1 Jisua Krista chu Davida irchi a nia, Abrahama ata an irkai lam chu hiang hin a ni.
2 Abrahama’n Isaka a neia, Isaka’n Jakoba, Jakoba’n Juda le a urênghai a neia, 3 Juda’n Pereza le Zera (an nu chu Tamari a ni) a neia, Pereza’n Hezrona a neia; Hezrona’n Arama a neia. 4 Arama’n Aminadaba, Aminadaba’n Nasona, Nasona’n Salmona, 5 Salmona’n Rahabi ata Boaza a neia, Boaza’n Ruthi ata Obeda, Obeda’n Jesaia a neia.
6 Jesaia’n rêng Davida a nei.
Davida’n Uria dôngma ata Solomona a neia. 7 Solomona’n Rehoboama, Rehoboama’n Abija, Abija’n Asa. 8 Asa’n Jehosafata, Jehosafata’n Jehorama, Jehorama’n Uzia, 9 Uzia’n Jothama, Jothama’n Ahaza, Ahaza’n Hezekia. 10 Hezekia’n Manasea, Manasea’n Amosa, Amosa’n Josia. 11 Babulon-a sala intâng lai vêl khan Josia’n Jehoiakina le a urênghai a neia.
12 Babulon-a sala intâng hruai hnungin Jehoiakina’n Sealtiela a neia, Sealtiela’n Zerubabela a neia. 13 Zerubabela’n Abiuda, Abiuda’n Eliakima, Eliakima’n Azora. 14 Azora’n Zadoka, Zadoka’n Akima, Akima’n Eliuda. 15 Eliuda’n Eliazara, Eliazara’n Mathana, Mathana’n Jakoba. 16 Jakoba’n Josefa, Mari pasal kha a neia; Mari ata Jisua Krista an iti kha, a zuang suak tâka.
17 Khanchu, Abrahama le Davida kâra irlo sôm irlo minli an oma, Davida le Babulon-a sala intâng hruai kâra khom irlo sôm irlo minli an om a ni. Kha rengata irthokin Messia suak dênin irlo sômhleiminli a ni.
Jisua suak thu
18 Jisua Krista zuang suak lam chu hiang hin a ni, a nu Mari kha Josefa dôngma hual a nia, an omsuam mân Irtha Irthiangin nâi an vongtir ti inhriat a ni tâka.
19 A pasal hrang Josefa chu mi fel tak a nia, mualinphoitir nuam maka, inrûkin mâk a tuma. 20 Khannisianlân, kha thu kha ar ngaitua laiin, irngai ta, ar manga Rengpa itîr vântîrtôn a hmua, “Josefa, Davida nâipa, ni dôngma hual Mari kha a nei chitinrîm no ro, a nâi vong chu Irtha Irthiang ata kêng, a tia. 21 Nâipasal nei a ta, ar hming Jisua phua ni ti, Ama khan a mihai kha an sualhai ata a isaninhring hrang a ni,” a tia. 22 Rengpa’n Deipu bâia, 23 ‘Irngai ta, dôngmate irthiang khan nâi vong a ta, nâipasal nei a ta, A’rhming Imanuela,’ phua an ti. (kha kha “Ei kuanga Pathian a om,” tihna a ni.) tia a insîr kha a hong tung theina hrangin hihai murdi hi a hong iom a ni. 24 Josefa in kha a hong hara, Rengpa Vântirtôn thupêk angin a oma, Mari kha dôngma’n a nei tâka; 25 Khannisianlân nâipasal a nei mâka chu zâlpui suam ma, khan Josefa’n ar hminga JISUA tiin nâi irhminga khan a phua tâka.
1 Heroda inlal laia, Judai rama Bethlehem khuaa Jisua a zuang suakin, irngai ta, nisua tianga mi vârhai Jerusalema an zuanga 2 “Khôn mo Judahai rêng hranga nâi zuang suak kha? Nisua tianga a ârsi kin hmua, ama, chubai mûk hrangin kin ihong a ni,” an tia.
3 Kha thu kha rêng Heroda’n an hriatin chu a sân a char a dong tâka, Jerusalema mi murdihai khom an char a donga. 4 Khanchu, Ochai inlalhai le Dân irchutirtuhai murdi chu a koi bûmhaia, an kuang, “Kho hmuna mo Mesia a isuak hrang?” tiin ar donhaia.
5 Anni khan, “Judai ram Bethlehem khuaa suak hrang a ni,” an tia. Hiang hin Deipu’n a lei irziak kha:
6 “Nang, Bethlehem,
Judai rama om,
Judai ram khopui laia hin chîn ual hliak mak che,
Ni sûng ata optu a zuang isuak hrang a ni,
ki mi Israelhai hruaitu hrang chu iti hi,”
tiin an sâma.
7 Khanchu, Heroda’n mi vârhai kha inrûkin a koihaia, ârsi inlang lai zoro kha fel takin ar donhaia. 8 Bethlehem-a khan an fetirhaia, “Fe ta unglân, nâite thu kha fel takin irdon infel unglân; kei khomin ama kha chubai ki hong mûk sa theina hrangin, nin hmu tikin ni hong inhril nôk roi,” a tia.
9 Reng thu kha an inhriata, an fe tâka, nisua tianga a ârsi an ihmu ngêt kha nâite omna chung irdîna a tunga, a’rngam mâka chu an maton tiang a hruaihai maia. 10 Ârsi kha an hmu’n an râi a fân tak taka. 11 In sûng an va lûtin chu a nu Mari kôla nâite kha an hmua, khûksadelin chubai an mûka; an irchon kokhai an inhonga, thilpêk rângachak, bero, mura hai an pêka. 12 Heroda kuang kîr nôk loi hrangin an irmanga hril an ni sikin, an ram panin lam dang tiang an kîr nôk tâka.
Aigupta rama an rot thu
13 An kîr hnungin, irngai ta, Rengpa vântirtôn inkhat Josefa kuang irmangin an lâra, “Thoiin lân, nâite le a nu hruaiin lân, Aigupta rama rot ta ro; nang ki hril nôk mâka chu kha khan om mai ro, Heroda’n nâite hi thatpai tumin a izong hrang a ni,” a tia. 14 Khanchu, a thoia, nâite le a nu chu a hruaia, a zân zânin Aigupta rama an fe ta. 15 Heroda thi mân chu kha khan an om tâka. Rengpa deipu hmanga, “Ki Nâipa kha Aigupta ram ata ki koi suak,” tia a insîr kha a hong tung ta a ni.
Nâitehai ithata an om thu
16 Khan, mi vârhaiin an ihuang a nih ti Heroda’n an hriatin chu, a sân a ning an mur tâka, a zoro thu an irdona an ihril ang khan Bethlehem le a kôlvêl murdia nâipang kum hni hnuai tianga chu an thattirhai zita. 17 Deipu Jeremia’n:
18 “Rama khuaa khêk irhâi an inhriat,
lusûn le chap ngûi ngûi irhâi chu;
Rakili’n a nâihai a châa,
an om ta no sikin ar tha irngam thei ta maka,”
tia insîr kha a hong tung ta a ni.
Aigupta ram ata an hong kîr thu
19 Heroda a thi zoiin, Aigupta rama khan Josefa’n a’rmangin Rengpa Vântirtôn a hmua, 20 “Thoiin lân, nâite le a nu hruaiin lân Israel rama kîr ta ro; nâite that tumtuhai kha an thi zoi ta,” a tia. 21 Khanchu, a thoia nâite le a nu kha a hruaia Israel ram chu a pan tâka. 22 Khannisianlân, Arkelausa chu a pa Heroda irthûlin Judai rama an lal ti an hriatin chu khataka fe kha a chia, a’rmanga inhriattir a ini angin Galili ram tiang a fe tâka. 23 Khua inkhat, Nazaret an itia khan a va oma, “Ama kha, ‘Nazaret mi’ ti an tih,” tia deipuhai lei insîr kha a hong itung ta a ni.
1 Kha lai khan baptistu Johana kha Judai ram ramchâra thuhrilin a honga. 2 “Irlet roi, Irvân Ram anai tâk e!” a tia.
3 Ama hi kêng deipu Isaia’n,
“Ramchâra mi khêk irhâi khan,
‘Rengpa lamlian siam unglân,
A fena hrangin lam intûn siam roi,’ a ti,”
tia a insîr kha.
4 Johana khan saringsei mul songkolin an nghâka, savun kongkhit a khita, a bu chu khâihmimse le ram khuaihlutui a ni. 5 Kha zoro lai khan Jerusalem le Jordan tuidung vêl ram murdia omhai khan ama kha an pan sup supa. 6 An sualhai an inpuanga, Jordan dunga khan a lei baptis-haia. 7 Khan, Farisaihai le Sadukai tamtak hong a hmu’n an kuang, “Mirûl irchihaio, ningmur hong tung hrang rengata zôk hrangin tu mo baptisma chang hranga nangni inthor? 8 Nin sualhai ata nin irlet ngêt a nih ti inlang hrangin sin tho roi. 9 ‘Abrahama irchi kêng ei ni,’ tia ningmurna rengata zôk hrangin irtûng no roi. Nangni ki hril, Pathianin hi lunghai khom hi Abrahama irchi’n a siam thei! 10 Atûn ata thing bul tina hreipui sia chian a ni ta. I ang thing khom ra saloi chu phûra meia tuapai chian an ti. 11 Keima’n chu irlet entîrna hrangin tuiin nangni ki baptis ngaia; ki hnunga zuang hrangtu chu keima nêkin a roiinpui uala, a kekok chôi inruk khom ni ma ung. 12 Ama’n chu Irtha Irthiang leh meiin nangni baptis a ti; a hruizôla bu kha zâp infâia, panga thun hrangin a mira kha a chôi tâka, a’rsîhai kha chu that theiloi meia hâl irhmang a ti,” a tia.
Jisua Baptisma chang thu
13 Kha zoro lai khan Galili ram ata Johana kuang, Jordan dunga baptisma chang hrangin Jisua kha a hong fea. 14 Johana khan, “Nangin kêng ni baptis hrang ni nia, ki kuang teh ni honga?” ti’n a sêla. 15 Khannisianlân, Jisua’n, “Atûn hin a sa ti chian ro, hianga Pathianin a inuam murdi ei tho zit hrang a ni,” a tia. Khanchu, Johana’n a sa a ti tâka.
16 Jisua kha baptisma a chang zoiin chu tui ata kha a suak zôi zela; a ta hrangin irvân ar honga, Pathian Irtha kha vasu anga suakin a chunga chuang a hmua. 17 Irngai ta, irvân ata hnuk irhâiin, “Hi hi ki nâipa, lungthung tak chu a ni, a chunga ki lôm tak tak,” a tia.
1 Kha zoiin chu Jisua kha Diabola inthêm hrangin ramchâra Irtha’n a hruai zôi zel tâka. 2 Sûn sômminli le zân sômminli bu a nghei zoiin chu a phîng a hong châm tâka. 3 Khanchu, Setana kha a honga, a kuang, “Pathian Nâipa ni ni lele’n chu hi lung hi bai chang hrangin thu pe ro,” a tia. 4 Jisua’n a sâma, “Bai ringotin mihriam hi an ihring thei hrang ni mah. Pathian bâi ata thu tinrêng suakin kêng an ihring hrang a ni,” tia irziak ang khan, tiin a sâma.
5 Kha hnung chu Diabola khan Jisua kha, Jerusalem khopui irthianga a hruai lûta, tempil sîpa an ngîrtira, 6 a kuang, “Pathian Nâipa ni ni lele’n chu irchômtha ro,
‘Ni chungchânga teh Pathianin vântirtônhai thu pe a ta,
An kutin nang indom an ti,
khano’nchu ni ke leh lung irfûina ni ti,’
ti irziak a ni,”
a tia.
7 Jisua’n a kuang, “Rengpa ni Pathian fia no ro, ti irziak a ni sa kêng,” a tia.
8 Diabola khan tâng irsâng taka a hruai nôka, rammual ram murdihai le a roiinpuina an entira. 9 A kuang, “Khûksadelin chubai ni mûkin lân, hihai murdi hi nang pe ki ti,” a tia. 10 Jisua’n a kuang, “Setan, rot pat ro, ‘Rengpa ni Pathian chu chubai mûkin lân ama sin vai tho ro,’ ti irziak a ni,” a tia. 11 Khanchu, Diabola khan a rotsana, vântîrtônhai an zuanga a sin an tho pe ta.
Jisua’n Galili rama sintho a phut
12 Johana an chel ti an hriatin Jisua kha Galili rama a fe pat tâka. 13 Nazaret suaksanin Kapernaum khuaa a zu om ta, kha kha Zebulun le Naftali ram huala Galili dîl panga om a ni. 14 Deipu Isaia insîr kha a hong itung a ni ta:
15 “Zebulun le Naftali ram,
Tuipui panna lam,
Jordan râl,
Jentailhai omna Galili.
16 Inthim hnuaia toihai khan vâr roiinpuitak an hmua,
Thina ram inthim hnuaia toihai chunga a zuang vâr ta,”
tia a lei insîr kha a hong tung indikna hrangin, kha kha a hong iom a ni.
17 Kha tena khan Jisua’n, “Irlet roi, irvân Ram chu anai tâk e,” tiin a hril irphut tâka.
Jisua’n nga chel ngai mi minli a koina
18 Jisua chu Galili dîl muanga a chai laiin ulenâi inhni, Simon Petera an iti le Andria chu dîla lên vôrin a hmuhaia; nga chel ngai an ni. 19 An kuang, “Ni zui roi, khanchu mihriam cheltu’n nangni siam ki ti,” a tia. 20 An lênhai kha mâksanin, ama kha an zui zôi zel tâka. 21 Khatak ata a fe thiaia, ulenâi inhni, Zebedaia nâi Jakoba le Johana kha a hmuhaia, an pa Zebedaia leh irkuanga an lên an insui insaa, anni kha a koihaia. 22 Khanchu, irkuang le an pa kha an mâksana; Jisua kha an zui zôi ta.
Jisua’n ar chutir, thu an sîr, a indam thu
23 Jisua’n Galili ram murdi ar fanga, an Sinagokhaia irchutirin, Ram Thurchi Sa chu a hrila, Israelhai laia natna tinrêng le hrât nona tinrêng irveihai chu an damhai thiaia. 24 Khanchu, Suria ram murdia a thurchi an thang tâka; damloi murdihai, damloina le natna tinrêng tuanghai, ramilhli ichelhai, hrisangol le zenginthihai, a kuang an hong hruaia, a lei indamhaia. 25 Galili ram ata, Dekapoli khua ata, Jerusalem ata, Judai ram ata le Jordan râlhai ata mipui tamtakin ama an zui ta.
1 Jisua’n mipuihai kha a hmu’n chu tânga a kâia, a toia, a irchutirhai an hong irbukkhôma; 2 khanchu, thu an sîra, a’rchutirhaia.
Vânsatna diktak
3 “Irthaa inrianghai chu an vân a sa e,
irvân Ram an ta a ni sikin.
4 “Irtha’nvâihai chu an vân a sa e,
irtharngam la ni an ti.
5 “Thuhnuairôlhai chu an vân a sa e,
Pathian chonginkung kha an la hmu hrang sikin.
6 “Felna sika phîngchâma tuiinhrâlhai chu an vân a sa e,
an la ikhop hrang a ni.
7 “Lungkhamna nei mihai chu an vân a sa e,
lungkham an la ihlo hrang a ni.
8 “Milunga irthianghai chu an vân a sa e,
Pathian an la ihmu hrang a ni.
9 “Irngeina siamtuhai chu an vân a sa e,
Pathian nâihai ti an la ni hrang sikin.
10 “Felna sika dengtheina tuanghai chu an vân a sa e,
irvân Ram an ta a ni sikin.
11 “Keima sika mi’n nangni an hala, deng nangni an intheia, dikloi taka sual tinrêng thoa nangni an bê’n chu nin vân la sa ti. 12 Lôm unglân, raifân takin om roi, irvâna nin lômman a om intama; khaang dênin tiana deipuhai khom kha deng an intheihai kêng.
Michi le vâr
13 “Irnêng michi nin ni, khannisianlân michi hi dong ta ngân sianlân, itina inaltir nôk hrang ma ni? Pai suaka, sirpha chian ti no chu ia khom hmang inruk ni ta no ni.
14 “Rammual vâr nin ni, tâng sîpa kho om chu thup thei ni mah. 15 Mi’n meiser hâlin khamphulu hnuaia sia ngai mahai, a sianaa kêng an sia ngai; khanchu, in sûnga mi murdi a êl invâr ngai. 16 Khaang dênin nin vâr kha mi mit hmu’n vâr ri se; khanchu, nin thil tho sahai kha hmu an ta, nin Pa irvâna mi chôiindôm thei an ti.
Dan chungchânga irchutirna
17 “Dân thua mani, Deipuhai thua mani, insiat hranga zuang ni iam no roi, insiat hrang ni loiin irkiptir hranga zuang kêng ki ini. 18 Thudik nangni ki hril, irnêng le irvân hi a om sûng chu Dân thua om inchuk dap mani, kaipit mani a rêngin a tung irkip zit mâka chu inkhat lua hi boi no ni. 19 Khanchu, hi thupêk laia poimo loitak inkhat khom hi ngainêpa, khaanga mihai irchutir ka chu irvân Rama mi chîn tak ti an ti; aniachu, tukhom, zôma irchutir ka chu irvân Rama mi lian ti an ti. 20 Nin felna’n Dân irchutirtuhai le Farisai felna a khêl no’n chu irvân Rama lût viat no chin ni, ti nangni ki hril a ni.
Ningmur chungchânga irchutirna
21 “Tianlai mihai kuang, “Mi ni ithat hrang ni ma, mi that rêng rêng chu an chungthu rêl ni a ti,” ti thu nin inhriat. 22 Keima’n chu nangni ki hril, mâni urêng chunga ningmur chu a chungthu rêl ni a ti; a urêng “hmangnaboipa” ti chu Sanhedrin-ah rêl ni a ti; a urêng “invêtpa” ti lenvâng chu hremhmun meia fe inruk a nih ti nangni ki hril a ni. 23 Khanchu, ni thilpêk maichâma nin hlan hranga khan ni urêngin ni chunga lunghoi nona a nei ti nin hriat suakin chu, 24 maichâma ni thilpêk kha masanin lân, fe’n lân ni urêng kha irngeipui bakin lân, kha zoiin ni thilpêk kha inhlan roh.
25 “Ni irdoipui kha lampuia nin fe suam laiin irngeipui lat roh; khano’nchu, roirêltu nang incheltir a ta, roirêltu’n chu sipai kuang nang inhlan a ta, intângna ina nang khumna lik an ti. 26 Thudik nang hril ki ti, poisa inkhat khom ni pêk irkip mâka chu, kha hmun ata kha suak viat no chi ni.
Uirena chungchânga irchutirna
27 “ ‘Ni uire hrang ni mah,’ ti nin inhriat. 28 Keima’n chu hiang hin nangni ki hril, tukhom, nupang indit ena en ka chu, a lungrîla a iuire chian tâk a ni. 29 Ni mit chang tiangin nang an tûktirin chu kêlsuakin lân, pai rak roh; ni taksa pumpui hremhmuna pai nêkin chu taksa mit kiangkhat boi chu ni ta hrangin a sa ual. 30 Khan, ni kut chang tiangin nang an tûktirin chu, tanpaiin lân, pai rak roh; ni taksa pumpui hremhmuna pai nêkin chu, ni taksa kut kiangkhat boi chu ni ta hrangin a sa ual.
Irmâkna chungchânga irchutirna
31 “ ‘Tukhom dôngma mâk chu irmâkna lekha pe ri se,’ ti a ni sa. 32 Keima’n chu hiang hin nangni ki hril, uire sika ni loia dôngma mâk ka kai chu, a dôngma kha an iuiretir a ni, kha zoia nei nôk khom an iuire a ni.
Khomâksâm chungchânga irchutirna
33 “Tianlai mihai kuang, ‘Milakin khomâk irsâm no unglân, Rengpa kuang ni khomâksâm kha ni isua hrang a ni,’ ti nin inhriata. 34 Keima’n chu hiang hin nangni ki hril, khomâk rêng rêng irsâm no roi; irvân sâlin sâm no roi, kha kha Pathian rêngtoihmun a ni; 35 irnêng sâlin irsâm sa no roi, kha kha a ke irnghatna a ni; Jerusalem sâl khomin irsâm no roi, kha kha rêng roiinpui tak khopui a ni. 36 Ni lu sâlin ni isâm hrang ni ual ma, sam malkhat khom ni inngoiin, ni invom thei ni mah. 37 Ni thu’nsîr kha “A ni” nin iti chu a nih ni ri se, “Ni mah” nin iti chu, ni mah ni ri se, khaban kha chu sual ata suak a ni.
Phuba lâk chungchânga irchutirna
38 “ ‘Mit irthûla mit; ha irthûla ha,’ ti nin inhriat; 39 Keima’n chu hiang hin nangni ki hril; mi sual irdoipui no roi; ni biang chang tiang inbêntu kuang chu vei tiang khom do roh; 40 Tukhomin ni chunga thupoi siamin ni songkol lâk an tumin chu ni puan khom inlatir sa roh. 41 Khan, mêl khat nakhrâta nang hruaitu chu mêl hni zui roh. 42 Nang an nghi’n chu pe’n lân, ni kuanga pûk nuampu chu irheisan no roh.
Râlhai lungthung hrang thu
43 “‘Ni bômhai lung ni ithung hrang a ni, ni râl chu ni ikhôkmâk hrang a ni,’ ti nin inhriat. 44 Keiin chu nangni ki hril; ni râlhai kha lungthungin lân, deng nangni intheitirtu chu chongchai pe ro, 45 nin Pa irvâna mi nâihai nin ni theina hrangin; Ama’n chu mi sualhai le mi sahai chunga misa an suaktira, sin sa sinhai le sin saloi sinhai chunga khom rua an thotir ngai. 46 Lung nangni thungtuhai vai lung nin thungin, lômman imo nin ihmu hrang? Khâzana irfuangtuhai khomin khaang khan an tho ngai! 47 Khan, nin urênghai vai chubai nin imûk hin imo ni itho inhliak ual? Jentailhai khomin khaang khan an tho ngai! 48 Khanchu, nin Pa irvâna mi a sa irkip angin nangni khom nin isa irkip ngêt hrang a ni.
1 “Nin thil sa thohai kha mihriam makunga, an hmu hranga tho loi hrangin irdîn roi; khano’nchu nin Pa irvâna mi kuang lômman hmu no chin ni.
2 Khanchu, lungkham thilpêk nin pêkin, mi vârirlethaiin mi inpâk an hlo theina hrangin Sinagokhai le kholaidunghaia an itho ngai angin ni matona bekul tum no roh. Thudik nangni ki hril, an lômman chu an hmu zoi ta. 3 Nangma’n chu lungkham thilpêk ni pêkin ni kut chang tianga itho kha ni vei kutin inhre no ri se; 4 ni thilpêk chu inrûka a om theina hrangin; khanchu, ni Pa, inrûka nang hmu ngaitu khan nang pe a ti.
Chongchai chungchânga irchutirna
5 “Nin chongchai khomin mi vârirlethai angin tho no roi; mi’n an hmu theina hrangin Sinagok haia, kholaidung haia, ngîr puma chongchai an ngaipoimo ngai. Thudik nangni ki hril, an lômman chu an hmu zoi ta. 6 Nangni’n chu nin chongchai zoro’n, nin chontan sûngrîla lût unglân, in khâr unglân, nin Pa mita hmu theiloi kuanga khan chongchai roi. Khanchu, inrûka nangni hmu ngaitu khan nangni thuan a ti.
7 “Nin chongchaiin Jentailhai angin nôk mai mai no roi; an chongchai tam sikin inhriat hrangin an ibe a ni. 8 Anni angin om no roi, nin zong mân khom nin Pa khan nin innanghai chu an hriat zit kêng. 9 Khanchu, nangni chu hiang hin chongchai roi:
‘Kin Pa, irvâna mi,
Ni’rhming mahripin om ri se,
Ni Ram zuang tung ri se.
10 Ni nuamlam irvâna mi’n an isin angin,
irnênga mi’n sin ri se.
11 A vuan hin kin rukin bu ni pe roh.
12 Kin chunga tho insualtuhai kin ngaidam angin,
nang khomin kin tho insualnahai ni ngaidam roh.
13 Thêmnaa ni hruai inlût no’n lân,
mi sualhai ata ni saninhring roh,’ tiin.
14 “An tho’nsualnaa mihai nin ngaidamin chu, nin Pa irvâna mi khomin nangni ngaidam a ti. 15 Nin ngaidam no’n chu nin Pa’n nin tho’nsualnahai nangni ngaidam bîk no ni.
Bu nghei chungchânga irchutirna
16 “Bu nin nghei zoro khomin mi vârirlethai angin ngûi hmêl irput no roi; anni’n chu mi mit hmu’n bu nghei an inlangtir theina hrangin ngûi hmêl an irput ngai. Thudik nangni ki hril, an lômman chu an hmu zoi ta. 17 Nangni’n chu bu nin ngheiin, sahriak irthû unglân, nin hmâi phi roi. 18 Nin Pa, inrûka om kuang vai no chu mi mit hmua bu nghei inlang no chin ni; khanchu, nin Pa, inrûka nangni hmu ngaitu khan nangni thuan a ti.
Irnênga irchon buk
19 “Irnênga, irthî le ngarêkin a fâk siatnaa, inruhaiin an inrûk theinaa hin nin ta hrangin irchon bukkhôm no roi. 20 Irvâna, irthî le ngar-êkin a fâk insiat loinaa, inruhaiin an inrûk thei loinaa khan nin ta hrangin irchon bukkhôm ual roi. 21 Nin irchon omna kipa nin lungrîl khom a om ngai.
Takpum ta hranga vâr
22 “Mit hi takpum ta hrangin meiser ang a ni, khan nin mit a vârin chu nin takpumpui invâr a ti; 23 nin mit a vâr no’n chu nin pumpuiin chokhap a ti. Khanchu, nangnia vâr om kha an thimin chu, kha inthim kha iti hraia irkhêl hrang mani tâk!
Pathian le sum
24 “Tûte’n hruaitu inhni sin irkop thei no nihai, inkhat hnôlin, inkhat indit an ta; aninole inkhat irngaiinnat an ta, inkhat hmusit an ti. Pathian sin le sum sin irkop thei no chin ni.
25 “Khasikin nangni ki hril, nin hringna hrangin imo fâkin kin iin hrang tihai, takpum ta hrangin imo kin isil hrang tihai hi lunginkâng no roi. Fâk hrang nêkin hringna hi a poimo ual, silkai nêkin takpum khom a ipoimo ual loi ma ni? 26 Chunglêng vahai khi en u ta, bu tû mahaia, ât mahai, fasiara inlût ual mahai, khannisian, nin Pa irvâna mi’n an fâhaia; anni nêkin chu nin ihlu ual loi ma ni? 27 Nangnihai laia lunginkâng sikin tu mo mâni hringna insei viat thei? 28 Silkai thua ithoa mo lung nin inkâng? Rama tûktin pâr irsôn lamhai hi ngaitua u ta, sin tho mahaia, pat kai mahai, 29 Khannisianlân, nangni ki hril, rêng Solomona lua mina a roiinpui thei ang dôrin ar bela khan, hi tûktin pâr inkhat dôr lua hin irvo ni mah.
30 “Khanchu, ram sûl, a vuana hring, nangtûk zînga meia tua nôk zel hrang lua Pathianin khaang dôrin a’rvotirin te, O nangni iamna tômhaio, khahai nêkin chu nangni irvôtir no ni mo? 31 Khasikin imo fâkin, in kin ta, imo silin kin irbel hrang tiin lunginkâng no roi. 32 Jentailhaiin kha kha an ibuaipui ual tak a ni: nin Pa’n khahai murdi kha nangni khomin nin innang ngêt a nih ti an hriat. 33 A ram le a felna chu zong masa roi, khanchu, hihai murdi hi nangni pêk bêlsa a ti. 34 Khasikin, zînga hrang lunginkâng no roi, nangtûka hrang khom Pathianin nangni ngaitua a ti. Sûn khat dengthei hi sûn khat hrangin a iruk a ni.
1 “Mi sêl no roi, isêla nin om nona hrangin. 2 Nin isêl lam ang takin Pathianin nangni sêl a ta, mi chunga dân nin ihmang tak kha nin chunga khom hmang an ti. 3 Ithoa mo mâni mita thingtum om chu inhre loiin ni urêng mita minim hlekte om kha ni ihmu? 4 Itin mo ni mita thingtum om chianin ni urêng kuang, ‘Ni mita minim hlekte kha nang lei la pe rong,’ ni iti ngam dân? 5 Nang vârirlet! ni mita thingtum kha pai bakin lân, khanchu, ni urêng mita minim hlekte om kha fel takin hmu thei ni ti.
6 “Ui kuang chu thil irthiang pe no unglân, vok makunga khom nin lunghlu pai no roi; sirpol an ta, chîl insiat chit an ti.
Nghi, zong, intôk thu
7 “Nghi roi, pêk ni nin ti; zong unglân, hmu nin ti; intôk unglân, inhong pe ni nin ti. 8 A nghi murdi’n an hmu ngai, a zong murdi’n an hmu ngai; tukhom an tôk chu inhong pe ni a ti. 9 A ni le, nangnihai laia tu mani, a nâipa’n bai nghi sianlân, tu mo lung pe hrang? 10 Nga nghi sianlân, tu mo mirûl pe hrang? 11 Khanchu, nangni mi sualhai luan nin nâihai thil sa pêkna châng nin inhriatin te, nin Pa irvâna mi khan a nghituhai kha thil sa a ipêk intam ual hrang mo ni ma!
12 “Khanchu, thil i khom mi’n nin chunga an itho nin inuam hrang ang khan mi chunga khom tho ngai roi; kha kha Dân le Deipuhai thu a lei ini chian a ni.
Mikot irchêp
13 “Mikot irchêpa khan lût roi, irhmangna mikot chu a’rzata, a lam khom a hoia, kha lampuia fehai chu tamtak an ni. 14 Hringna mikot chu a chîna, a lampui khom ar chêpa, a hmutuhai khom tômte an ni.
Thing sa chu a ra a sa
15 “Deipu dolhai ata irdîn roi, khahai kha belra vun silin nin kuang an hong ngai; an sûng tiang chu inê ang an ni. 16 Anni chu an sinthoa inhria nin ti. Ilhling kunga grep an irhmal ngai ma ni? Ilhling kunga khom theipui an ilâk ngai ma ni? 17 Thing sa chu a ra a sa ngai, thing sia chu a ra sa thei ngai mah. 18 Thing sa chu a ra siat ngai maka, thing saloi chu ra sa insua thei ngai mah. 19 Thing tin ra saa raloi ka chu an phûra, meia an tua ngai. 20 Khanchu, deipu dolhai chu an sinthoa inhriat nin ti.
Nangni inhre ngai ma ung
21 “‘Rengpa, Rengpa,’ ni ti narânhai chu irvân Rama lût no nihaia, ka Pa irvâna mi nuamlam thotuhai kêng an ilût hrang. 22 Kha nikhuaa khan mi tamtakin, ‘Rengpa, Rengpa! Ni’rhmingin thu kin insîra, ni’rhmingin ramilhlihai kin inhnot suak ngai, ni’rhmingin sinirkhêlhai kin itho ngai loi ma ni?’ la ti an ti. 23 Kha zoiin chu, ‘Nangni thil sual thotuhaio, nangni inhre ngai ma ung, ki kuang ata rot pat roi,’ tiin la hrilhai ki ti.
In sintu inhni
24 “Khanchu, hi ki thu hi inhriata, zôm murdi chu mi vâr, lungpui chunga in sintu leh irkhek rua a ni. 25 Rua a hong thoa, tuihai a hong liana, phâivua a hong thoa, kha in kha a hong nam rak raka, khannisianlân, chim ma, lungpui chunga sin indet khak a ni sikin. 26 “Hi ki thu hi inhriata zôm loihai chu mi’nvêt, bâli chunga in sintu leh irkhek rua a ni. 27 Rua a hong thoa, tuihai a hong liana, phâivua hai a hong thoa, kha in kha a hong nam rak raka, a chim tâka, a inrîl rup zôi a ni,” a tia.
Jisua irchamneina
28 Jisua’n kha thu kha an sir zoiin chu mipuihaiin a thu irchutir kha a sân ar khêl an ti. 29 Dân irchutirtuhai ang ni loia ircham nei taka ar chutirhai sikin.
1 Tâng ata a zuang chum hnungin mipui tamtakin Jisua an zuia. 2 A kuang phâr a honga, kûnin chubai a hong mûka, “Rengpa, ni nuamin chu ni ni’rthiangtir thei,” a tia.
3 Jisua’n a hong inbana, a tôna, “Ki nuam e, hong irthiang ta ni ti,” a tia, a phâr kha a hong irthiang zôi zel ta. 4 Jisua’n a kuang, “Tûte kuang insîr no roh, aniachu Ochai kuang va fe’n lân, ni dam ngêt tih mihaiin an inhriat theina hrangin Mosia’n irbôlna thilinhlan hrang a inkung kha inhlan roh,” a tia.
Sipai irza hruaitu siahlo indam thu
5 Khan, Kapernaum khua a hong lûtin a kuang sipai irza hruaitu a honga, 6 “Rengpa, ki siahlo zenginthi, ina a zâl chiana, a sân a na,” a tia. 7 Jisua’n, “Hong ki ta indamtir ki ti,” a tia. 8 Sipai irza hruaitu khan a sâma, “Rengpa, ki in sûnga ni lûtna hrangin irhoi mah, chongbâi ngotin ti’nlân, ki siahlo chu dam a ti. 9 Kei khom mi thuhnuaia om ki nia, ki hnuaia sipaihai an om nôka, ‘fe roh’ ki ti le a fea, ‘hong roh’ ki ti le a honga; ki siahlo khomin ‘hi hih tho roh’ ki ti le a tho ngai,” a tia.
10 Jisua’n kha kha an hriatin a sân ar khêl a tia, a zuituhai kuang khan, “Thudik nangni ki hril, Israelhai laia hiang dôra iamna nei hi tûte la hmu ma ung. 11 Nangni ki hril, sak le thang ata mi tamtak hong an ta, irvân Rama khan Abrahama, Isaka, Jakoba hai leh hruaithe la otsap an ta; 12 Ram nâihai chu pên tiang inthima inhnot suak ni an ti; kha khan chap le irkamirtôk om a ti,” a tia. 13 Jisua’n, sipai irza hruaitu kuang khan, “Fe tan lân, ni iam angin ni chunga tung ri se,” a tia. khan, kha zoro ngeia khan nâipang kha a dam tâka.
Mi tamtak indam thu
14 Petera ina Jisua a lûtin a tarpinu inkhura zâl kha a hmua, 15 a kut a tôn pea, an khur kha a boi pe ta; a thoia, bu anh a tho pe tâka. 16 Khohloi a hong ni’n chu a kuang ramilhli ichel tamtak an hong hruaia, Jisua chongbâiin, ramilhlihai kha an hnot suaka, damloi hong murdihai khom kha an damtir sa a ni. 17 Deipu Isaia’n, “Ama’n chu ei hrât loinahai a lâka, ei natna a pêl ta,” tia insîr kha a hong tung indik theina hrangin kha kha a itho a ni.
Jisua zui tumhai
18 Mipui tamtak a kôla om Jisua’n a hmu’n chu Jordan râl tiang fe hrangin a irchutirhai kha thu a pêka.
19 Dân irchutirtu inkhat a honga, a kuang, “Irchutirtu ni fena kipa nang zui ki ti,” a tia. 20 Jisua’n a kuang “Sihalhaiin khur an neia, chunglêng vahai khomin riak hmun an nei; Mihriam Nâipa hi chu a lu irnghatna hrang lua nei ma,” a tia.
21 A irchutirhai laia mi dangin a kuang, “Rengpa, ka pa vai ni va irvûitir ro ba,” a tia. 22 Jisua’n chu a kuang, “Ni zui roh, mithi chu anni mithiin irvûi ri sehai,” a tia.
Jisua’n tui irsok a hal indâi
23 Khan, Jisua irkuanga a chuanga, a irchutirhai khan an zuia. 24 Irningloi rengin dîla khan phâivuapui a hong thoa, khanchu tuiirsokin irkuang kha ngîmpai hrang a hong tho tâka, khannisian, Jisua chu a in zêta. 25 A’rchutirhai kha Jisua kuang an fea, an va kaithoia, “Rengpa, nin zôk ro, kin ithi hrang kêng,” an tia. 26 Jisua’n an kuang, “Itho mo ang dôra nin ichi? Iti hraia iamna tôm mo nin ini!” a tia. Khanchu, a thoia, phâivua le tui irsok kha irngam hrangin thu a pêka, kha hnung chu a dâi dup zôi zel tâka. 27 Mihai khan a sân a’rkhêl an tia, “Hi mi hi i ang mi mo a ini? Phâivua le tui irsok ten khomin a thu an izôm hi te!” an tia.
Ramilhli ichel inhni indam
28 Dîl râl tiang Gadarin rama Jisua a hong tungin, ramilhli ichel mi inhni, thân ata hong suakhaiin an irtongpuia. Khahai kha ichi an om sikin, kha lampuia khan tûte irlôi ngam mahai. 29 Voi khat rengin khahai kha an khêka, “Pathian Nâipa, imo ni lo hrang ni iti? Zoro inkung tung mâna deng nin thei hranga ni izuang ma ni?” an tia. 30 Khatak ata nâi tenga om vok rual fâk zong an oma. 31 Khanchu, ramilhli khan, “Ni nin hnot hrangin chu vok rualhai sûnga son nin fetir roh,” tiin Jisua kha an ngêna. 32 Jisua’n, “Fe roi,” a ti pehaia, khanchu, an suaka, vokhai sûnga an va lût ta. Khan vok rual kha rôla an irtol thâka, dîla a ngîmhai zit tâka. 33 A enkoltuhai kha an intâna, kho sûnga an fea, thil omzia murdi, ramilhli ichelhai chunga thil tunghai kha an van sîra. 34 An kho pumin Jisua irhmupui hrangin an hong suaka, ama an hmu’n chu an ram suaksan hrangin an ngên tâka.
1 Jisua irkuanga a chuanga, varâl tiang a kâia, a omna khua Kapernaum chu a va tunga. 2 Irngai ta, zenginthi inkhat a zâlna le ileh a kuang an hong irzôna. Jisua’n an iamzia a hmu’n zenginthi kuang khan, “Ki nâi, irtharngam takin om roh, ni sualhai ngaidam a ni tâk e,” a tia. 3 Dan irchutirtu senkhathaiin, an lungrîlin, “Hi mi hin Pathian a ihril insiat kêng,” an tia. 4 Jisua’n an lungrîla an ingaituahai kha a lei inhriata, an kuang, “Ithoa mo khaanga thil saloi nin lungrîla nin ingaitua? 5 ‘Ni sualhai ngaidam a ni ta’ ti le ‘Thoiin lân fe ta roh’ ti hi, a kho hi moh ti a ol ual? 6 Mihriam Nâipa hin irnêng chunga hin sualhai ngaidam theina ircham a nei ti nin inhriat theina hrangin,” a tia. Khanchu, zenginthi kuang khan, “Thoiin lân, ni zâlhmun lan lân, ni ina fe ta ro,” a ti pea. 7 Kha hnung chu kha pa kha a thoia, a ina a fe tâka. 8 Mipuihai khan kha kha an hmu’n chu, an chia, mihriamhai kuang irchamneina pêktu Pathian kha an inpâk ta.
Jisua’n Mathaia a koina thu
9 Jisua’n kha hmun kha a mâka, a fe malamin khâzana irfuangna hmuna toi mi inkhat, a’rhming Mathaia kha Jisua’n a hmua, a kuang, “Ni hong zui roh,” a ti pea. Khanchu a thoia, a zui tâka. 10 Khan, Jisua kha Mathaia ina bu a nêk laiin, khâzana irfuangtu tamtak le mi sualhai an honga, Jisua le a irchutirhai khan bu an nêkpui sa. 11 Farisai senkhathaiin ama kha an hmu’n chu a irchutirhai kuang “Itho mo nin irchutirtu hin khâzana irfuangtuhai le mi sualhai laia bu a inêk sa?” an tia. 12 Jisua’n an chong kha a lei inhriata, an kuang, “Mi hrisêlhaiin daktor innang mahaia, mi irveisiahaiin kêng an innang ngai. 13 Pathian Thubu’n, ‘Irbôlna zong ma ung, lungkhamna kêng ki inuam’ a iti hi fe unglân, a omzia va irchu roi, mi felhai irlam hranga zuang ni ma unga, mi sualhai irlam hranga zuang kêng ki ini,” tiin a sâma.
Bu nghei chungchânga chong irdonna
14 Khan, Baptistu Johana irchutirhai, Jisua kuang an honga, “Itho mo keini le Farisaihai hin bu kin nghei mai ngaia, ni irchutirhaiin chu an inghei viat ngai loi?” an tia. 15 Jisua’n an kuang, “Irneinaa khual mihai kha moineitu an kuanga a om sûngin chardong hrangin nin itûng ma ni? Ni thei no ni! khannisianlân, an kuang ata moineitu an tuangpai pe zoro la tung a ta, kha tika chu bu la nghei an ti. 16 Tûte’n puan milui, puan thar hlekin pho ngai mahai, puan thar kha irtum a ta, puan kha inset ual a ti. 17 Tûte’n uain thar kha savun kok miluia thun ngai mahai, thun ngân sian, uain thar khan savun kokhai kha mût set a ta, a uain le a savun kokhai leh hmanghmunboi chang a ti. Khasikin uain thar kha savun kok thara an thuna, khanchu satakin a om ngai,” a tia.
Zaira nâinu le nupangnu Jisua puan tôn thu
18 Jisua’n kha thu kha an sîr laiin, Juda hruaitu inkhat a honga, a makunga khûksadelin a kuang, “Ki nâinu atûn lele khan a thia; Khannisianlân, hongin lân, a chunga ni kut irnghatin lân hong hring nôk a ti,” a tia. 19 Khanchu, Jisua a thoia, a zuia, a irchutirhai khomin an zui sa a ni.
20 Khan, nupang inkhat, kum sômhleihni thi suak, damloi chu Jisua kuanga a honga, a puan hmor a tôna. 21 A lungrîlin, “A puan hmor lua tônin lân dam zel ki ti,” atia. 22 Jisua chu a hong irheia, khanu kha a hmua, a kuang, “Ki nâinu, irtharngam takin om roh; ni iamna hi ni idampui a ni,” a tia. Khanchu, kha zoro taka khan a hong dam tâka.
23 Khanchu, Jisua kha hruaitu ina a lûta, theihle tumhai le mipui irse mur mur a va hmu’n chu, an kuang, 24 “Suak roi, nin rêngin! Nâipang hi thi mah, a in kêng,” a tia. Khanchu, anni khan an innuisana. 25 Khannisian, mipuihai an hnot suakhai zoiin chu nâipang omna khan a lûta, a kuta a chela, nâipang kha a hong thoi tâka. 26 Kha thurchi kha, kha ram pumpuia khan an thang ta.
Jisua’n mitcho inhni an dam thu
27 Khan, Jisua’n kha hmun kha a mâka, a lei fe’n chu mitcho inhni’n an zuia, “Davida Nâipa, lung nin kham ro!” tiin an khêka. 28 Jisua in sûnga a lûtin chu, mitchohai kha a kuang an honga, Jisua’n an kuang, “Nangni indam thei ki ti, ti nin iam mo?” tiin ar donhaia, “O kin iam, Rengpa!” tiin an sâma. 29 Khanchu, Jisua’n an mit a tôna, an kuang, “Nin iam lam ang takin nin chunga tung ri se,” a tia. 30 Kha hnung chu an mit a hong vâr pehai ta, Jisua’n ngar takin an kuang, “Hi thu hi tûte hril no roi,” tiin chong a bêhaia. 31 Khannisian, anni kha an fea, kha ram pumpuia khan Jisua thurchi kha thang an inthei tâka.
Jisua’n chong theiloi an dam thu
32 Khan, kha mihai kha an suak laiin, mi senkhatin ramilhli ichela chong theiloi inkhat Jisua kuang an hong hruaia. 33 Khannisian, ramilhli kha an hnotpai le chu, kha mihriam kha a hong chong thei tâka; mi tinin an irngai ar khêl tâka, “Israelhai laia hiang rêng rêng hi la hmu ngai mak me,” an tia. 34 Khannisian, Farisaihaiin chu, “Ramilhli rêngpa’n, ramilhlihai inhnot suak theina irtha a ipêk a ni hi,” an tia.
Jisua’n mipuihai lung an kham thu
35 Jisua’n kho lian le kho chînhai ar fanga. Sinagokhaia, a irchuhaia, Pathian Ram Thurchi Sa an sîra, damloi chi tinrêng le natna chi tinrênghai an damhaia.
36 Mipuihai kha a hmu’n chu enkoltu neiloi belrahai angin dengthei le inthekindara an om sikin, lung an khamhai tak taka. 37 Khasikin a irchutirhai kuang, “Bu ât hrang a itam tia le te, sinthotu an tôm, a tia. 38 Khasikin a bu ât hranga sintho hranghai tîr hrangin, bu Neitupa kuang khan nghi roi,” a tia.
1 Jisua’n a irchutir sômhleihnihai kha a koihaia, ramilhlihai inhnot suak theina le damloi chi tinrêng le natna chi tinrêng indam theina sinthotheina a pêkhaia.
2 Tirtôn sômhleihnihai irhming chu hihai hi an ni; a masa taka Simon (Petera an iti) le a sangpa Andria; Zebedaia nâipa Jakoba le a sangpa Johana; 3 Filipa le Bartholomaia; Thoma le khâzana irfuangtu Mathaia; Alfaia nâipa Jakoba le Thadaia; 4 Kanaan mi Simona le an cheltirtu Juda Iskariota hai an ni.
Sômhleihnihai tho hrang
5 Kha sômhleihnihai kha Jisua’n a tîr suakhaia, an kuang hiang hin chong a bê. “Jentailhai rama le Samari mihai khuaa chu fe no roi. 6 Israel nam belra irhmanghai kuang nin ife hrang a ni. 7 ‘Fe unglân, Irvân Ram chu anâi ta,’ ti thu van sîr roi! 8 Damloihai indam unglân, mithihai kaithoi unglân, phârhai irthiangtirhai unglân, ramilhlihai inhnot suak roi. Manboiin nin mana, manboi ngêtin pe roi. 9 Nin zêpa rângachak poisa mani, sum mani, sumsen mani, chôi no roi; 10 inzinna hrangin hmarsa mani, songkol irthuam mani, kekok irthuam mani, khianghrol irthuam mani chôi no roi. Sinthotu chu a innanghai kha pêk ni a ti.
11 “Kho liana mani, kho chîna mani nin lûtin nangni intung nuam hrang mi zong unglân, kha hmun kha nin mâk nôk mâka chu kha ina khan om mai roi. 12 In sûng nin lûtin chu ‘Irtharngamna nin chunga om ri se,’ ti roi. 13 Kha ina mihai khan nangni an lei lômin chu nin irtharngamna chubai kha an chunga tung ri se; khannisian, nangni an lei lôm no’n chu nin chubai chong kha la kîr nôk roi. 14 Khan, kho khua khom nangni an pom noa, nin chong an irngai no’n chu marak unglân, nin ke bop kha nûlpai roi. 15 Thudik nangni ki hril, Roirêl nikhuaa chu kha khuahai tuang hrang nêkin chu Sodom le Gomora khuahai tuang hrang chu a zâi om ual a ti.
Dengintheina hong tung hrang thu
16 “Irngai u ta! Inê kâra belra lût angin nangni ki itîr a ni. Mirûl anga vârin, vasu anga nunirnêmin om roi. 17 Aniachu irdîn roi, nangni chela, Sanhedrin-ah nangni intunga, an sinagokhaia nangni zêm an ti. 18 Keima sikin hruaituhai le rênghai makunga la ngîr nin ti, anni leh Jentailhai chu Thurchi Sa nin insîr pehai theina hrangin. 19 Nin chungthu ngaitua hranga nangni an hruai tikin nin ti hrang lei insâpin nin milung inbuai no roi; a zoro a hong tungin inhriattir nih nin ti. 20 Nin iti hranghai kha nangni iti ni no nia, nin Pa Irtha khan nangni ti pe ti.
21 “Urêng khomin that hrangin a urêngpa lan cheltir a ta, pa khomin a nâihai lan cheltir sa ta, nâihai khomin an nu le pahai doi an ta, that an ti. 22 Keima sikin mi tinin nangni la hnôl an ti. Khannisian tukhom a mong dêna tuang diar ka chu saninhringin om a ti. 23 Khua inkhat ata an nuam nuamin nangni an lo’n chu, kho danga rot pat roi. Thudik nangni ki hril, Mihriam Nâipa a zuang mân Israel ram kho murdia nin sintho zoi no chin ni.
24 “Irchulai chu ar chutirtu nêkin lian ual ma, suak khom a pu nêkin lian ual mah. 25 Khasikin irchulai kha ar chutirtu angin a hong iom le, suak khom a pu anga a hong iom kha a ruk. In chongpu lua Belzebula an ti’n te, a in sûng mihai len vâng chu ti nok ual an ti!
Tu mo chi rua
26 “Khasikin mihriamhai kha chi no roi. Tinrêng inlang loi hranga ithup om maka, inhriatloi hranga thup ite om sa no ni. 27 Inthima nangni ki ihril hi sûn khovâra insîr unglân, inrûka nin inhriat hi in chunga chuangin tânginsampui roi.
28 Taksa thata irtha that theiloihai chu chi no unglân, hremhmuna nin taksa le irtha that theitu Pathian kha chi ual roi. 29 Chongzong inhni poisa khatin nin irchôk thei, khannisian, an laia inkhat lua nin Pa thu ni no’n chu irnênga ta no ni. 30 Nangni chu nin samzâi ten lua tep zit a ini kêng. 31 Khasikin chi no roi, chongzong tamtak nêkin chu nin hlu ual kêng! a tia.
Krista thop le hnôl
32 “Tukhom mihai makunga ni thop ka chu kei khomin ka Pa irvâna om makunga thop ki ti. 33 Khannisianlân, tukhom vântâng inhriata ni hnôl chu ka Pa irvâna mi makunga hnôl ki ti.
Irngeina ni loiin, khandai inlêng hrang thu
34 “Rammuala hin irngeina inlêng hranga zuang ni sôn no roi. Irngeina inlêng hranga zuang ni ma unga, khandai inlêng hranga zuang kêng ki ini. 35 Nâipa’n a pa doi a ta, nâinu’n a nu, moiin a tarpi indoitir hranga zuang kêng ki ini. 36 Mi a râl hrang chu a in sûngkua mihai ngêt ni an ti. 37 Tukhom keima nêka a nu mani, a pa mani lungthung ual chu, ki irchutir rua ni mah. 38 Tukhom a kros irputa ni zui no chu ki irchutir rua ni mah. 39 Tukhom mâni hringna sûnghual an tumin chu inchân an ta, keima sika an hringna inchân chu hmu an ti.
Lômmanhai
40 “Tukhom nangni lôm chu, a ni lôm an ni; tukhom a ni lôm chu a ni tîrtu lôm an ni. 41 Tukhom Pathian tirtôn kha Pathian tirtôn a nina sika lei lôm chu Pathian tirtôn lômman hmu a ti. Tukhom mi fel chu mi fel a nina sika lôm chu mi fel lômman hmu a ti. 42 Tukhom ki irchutirhai laia a chîn tak khom ki irchutir a nina sika tui dâi khilât khat khom lei pêk chu nangni ki hril, lômman hmu ngêt a ti,” a tia.
1 Jisua’n irchutir sômhleihnihai kha irchutirna thuhai a pêkhai zoiin, khatak ata Galili ram khuahaia irchutir le thu hril hrangin a fe tâka.
2 Baptistu Johana’n Jisua sintho hai kha intângna in ata a lei inhriatin, a irchutir senkhat Jisua kuang a tîrhaia. 3 Jisua kuang, “Ni hril roh, Johana’n a zuang hrangtu a iti kha ni ini ma ni? A ninole, mi dang kin la itûng hrang ma ni!” an tia.
4 Jisua’n an kuang, “Fe nôk ta unglân, thil nin ihmu le nin inhriat hi Johana va hril roi! 5 Mitchohai an hmu thei ta, ke’nbâi hai an fe thei ta, phârhai an irthiang ta, kuarsêthai khom an inhriat thei ta, mithihai kaithoiin an om ta, inrianghai laia Thurchi Sa insîr a ni ta. 6 Tukhom ki chunga lunghlâna nei loihai chu an vân a sa,” a ti pea.
7 Johana irchutirhai kha an fe zoiin chu, Jisua’n mipuihai kuang khan, Johana thurchi an sîra: “Johana kuang ramchâra nin fe laia khan imo hmu hranga nin itûng kha? Phâivua’n lâiluang a isêm inhnîng kha ma ni? 8 A ninole, i en hrang taka nin ife ma ni? Mi, puan irnêm sil ma ni? Khaanga puan sil ngai mi chu rêng ina kêng an om ngai! 9 Ni hril roi, i en hranga nin ife ma ni? Deipu en hranga ma ni? O a ni, khannisian, deipu nêka lian ual tak nin ihmu kha. 10 Kha Johana kha kêng Pathian Thubu’n, ‘Irngai ta, ki tirtôn ni matona ki lei tîr, ama khan ni lampui lei siam a ti,’ a lei iti kha. 11 Thudik nangni ki hril, Baptistu Johana nêka lian ual tûte la’rsiang ngai mahai, khannisian irvân Rama mi chîn tak khom Johana nêkin chu a roiinpui ual. 12 Baptistu Johana’n thurchi an sîr lai ata a vuan sûn ten khom irvân Ramin tuangna irkhêl a tuang ngaia, mi kôkhelhaiin kha ram kha lâk an tum ngai. 13 Deipuhai murdi le Mosia Dân thu khan Johana zuang om dênin Ram thurchi an insîra; 14 nin iam nuamin chu, a zuang hrang thu inpuanga lei om Johana hi Elija a ni. 15 Irngai roi, mikuar nei murdi’n chu!
16 “Atûnlaia thoiintharhai hi i leh mo ki irkhek ta hrang? Nâipang bazar hmuna toihai ang kha an ni. Pâl khatin pâl khat danghai an lei khêk pehaia. 17 ‘Irneina theihle nangni kin tum pea, khannisian, lâm mak chêi! Lusûn hla kin sak khomin chap mak chêi!’ ti ang kha an ni.
18 “Johana chu a zuanga, bu a ngheia uain in maka, mi tinin, ‘Ramilhli ichel kêng,’ an tia. 19 Mihriam Nâipa chu a zuanga, a fâka, a ina, mi tinin, ‘Hi mi hi en u ta! Bu’n dupa, uain indupa, khâzana irfuangtuhai le mi sualhai rualpa so!’ an tia. Khannisian, Pathian vârna chu a dik ti a raa khan inlangin a iom a ni,” a tia.
A iamloi khuahai
20 Jisua’n sinirkhêl a thôna khuaa mihai khan an sual ata irlet mahaia, khasikin kha khuahai kha a ngoa. 21 “Korazin! ni chung a rik e! Bethsaida, ni chung a rik e! Nangnia sinirkhêl sinhai kha Tura le Sidon khuaa sin, ni ta sian chu bora puan silin irvut irpolin an sual ata irlet ta an ti. 22 Thudik nangni ki hril, Roirêl Nikhua chu nangni ituang nêkin chu Tura le Sidon mihai ituang chu a zâi om ual a ti. 23 Nangma Kapernaum khom irvân dênin inpâk ni ini hrang ma ni! mithi khua dênin ni zu fe hrang sôn mak che! Nangmaa sinirkhêl isinhai kha Sodom khuaa sin ni sianlân chu, a vuan ten hin la om mai a ti. 24 Nang ki hril, Roirêl Nikhuaa chu ni ituang nêkin chu Sodom khua ituang chu a zâi om ual a ti,” a ti.
Ki kuang hong unglân sôl irngam roi
25 Kha laia khan Jisua’n “Ka Pa, irvân le irnêng Rengpa! Mi vâr, mi thiamhai laia ni iip kha mi inmôlhai laia nin puang sikin, lômthu kin sîr a ni. 26 A ni, ka Pa, khaanga tho kha ni nuamlam tak a ni,” a tia. 27 Thil tinrêng ka Pa’n a ni pêk ta. Pa ti no’n chu tûte’n Nâipa inhre mahai. Nâipa bana chu tûte’n Pa khom inhre mahai, Nâipa’n a inpuangnahaia ti no’n chu.
28 “Nangni sinsôl le puakrik pêl murdihaio, ki kuang hong unglân, keima’n nangni irngamtir ki ti. 29 Ki ringkol irbun unglân, ki kuang irchu roi, thuhnuairôl tak le irngaiintôm tak ki ni sikin, Khanchu nin irtha ta hrangin irngamna hmu nin ti. 30 Ki ringkol chu a hoia, ki puak khom a izâng a ni,” a tia.
1 Kha zoro lai khan, Jisua chu Sabat nî’n bu bil hmunhaia a hroa; irchutirhai kha an phîng a châma, bu vûihai kha an khiaka an fâk tâka.
2 Farisaihaiin an hmu’n chu, Jisua kuang, “En ta, Sabat nî’n ni irchutirhaiin an itho hi ei Dân ikhap a ni,” an tia. 3 Jisua’n an kuang, “Davida le a mihaiin an phîngchâm laia an itho kha nin la itep ngai loi ma ni? 4 Davida kha Pathian ina a lûta ama le a mihaiin bai, an ifâk irthiangloi Pathian kuanga inhlan tâk, Ochaihai vaiin an ifâk ngai kha an ifâk a ni khate. 5 A ni le Sabat dân an inchâi ngaia, khan khoma thiamno chang ngai mahai ti Mosia Dân lekhabua nin la itep loi ma ni? 6 Nangni ki hril, hin tempil nêka roiinpui ual a om. 7 Pathian Thubu’n, ‘Irbôlna nuam ma ung, lungkhamna kêng ki inuam,’ a iti hi a omzia nin inhriat infel ni sianlân chu, mi sahai kha thiamno inchang no chin ni; 8 Mihriam Nâipa hi Sabat Rengpa a ni sikin,” a tia.
Jisua’n kut zenginthi an damna thu
9 Jisua’n kha hmun kha mâkin, Sinagoka a lûta. 10 Khataka khan mi inkhat kut zenginthi a lei oma. Khabana, mi senkhat Jisua’n a tho’nsual tia hnôl nuamhai an lei om saa, Jisua kuang, “Sabat nia mi indamtir hi ei Dânin a ikhap ma ni?” tiin an irdona. 11 Jisua’n an kuang, “Nin laia tu khôkin mani belra inkhat nei sian, Sabat nî’n khurpadopa tâk sianlân, tu mo la suak loi hrang? 12 Belra nêkin chu mihriam chu a hlu ual kêng! Khasikin Sabat nia thil sa tho hi a irthiang a ni,” a tia. 13 Khanchu, kut zenginthi kuanga khan, “Ni kut phar ro,” a tia. A hong inphara, a kut kiang khat tianga angin a dam ving ta.
14 Khanchu, Farisaihai kha an suaka, Jisua kha an that thei hrang lam ngaitua’n an chong tâka.
Pathian siahlo inthangna thu
15 A that hrang lam an zong ti Jisua’n an hriatin chu kha hmun ata kha a rota, mipuihaiin a hnung an zuia. Damloihai murdi an dama, 16 a thurchi tûte kuang insîr loi hrangin thu a pêka. 17 Pathianin deipu Isaia kuanga a insîr kha a hong tung theina hrangin.
18 “En ta, ki siahlo ki inthang,
Ki indit tak, Ki lungrîlin a ilôm tak tak hi;
A sûnga ki’rtha sia ki ta,
Khanchu, nam tin laia roirêlna thu inpuang a ti.
19 Sêl no nia, khêk ual no nia,
kholaia khom tûte’n ar hâi inhre ual no nihai.
20 Hrât loihai chunga zâidamna nei a ta,
Beiindonghai chunga khonzana nei a ta,
Dikna khan inhnêna a pêk mâka chu mong no ni.
21 Ama irhminga Jentailhaiin sabeina irnghat an ti,”
ti hi.
Jisua le Belzebula
22 Khan, mi senkhat Jisua kuang mitcho le ramilhli’n a chel sika chong theiloi an hong hruaia. Jisua’n khapa kha an dama, khanchu, a hong chong theia, a hong hmu thei ta. 23 Jisua sintho kha mipuihai murdi’n a’rkhêl an ti oka. “Hi mi hi Davida Nâipa kha mo ni ma?” an tia. 24 Ama kha Farisaihaiin an inhriatin chu, “Hi mi hin ramilhlihai an hnot suak theina chu an rêngpa Belzebula’n irnak a pêk sika a ni,” an tia.
25 Jisua’n an ingaituahai kha an hriata, an kuang, “Kho rama khom mâni le mâni irdoi chu an chiam ngai; kho khuaa khom, sûngkua khom, mâni le mâni irdoi ka chu inding suak no nihai. 26 Setana khom Setana an hnot suakin chu mâni irdoi ni a ta, a ram chu itin mo a ingîr suak thei hrang? 27 Khan, Kei Belzebula sika ramilhlihai inhnot suak ngai ki lei ni chu, nin nâihaiin tu sikin mo an inhnot suak ngai kha? khasikin, anni chu nangni ngaituatu hranghai ni an ti. 28 Aniachu, Pathian Irtha sika ramilhli inhnot suak ngai ki ni’n chu, nin kuang Pathian Ram kha nin kuang a zuang tung ta tihna a ni. 29 A ninole, mi’n mi hrât kha a khit masa bak no’n chu itin mo a ina lûtin a sum a ilâkpai pe thei hrang? A khit zoia vai kêng a in kha inram pe thei hrang. 30 Tukhom keima tianga kop loi chu a ni doi a ni, tukhom ni bûmpui no ka chu a ichênpai chit a ni.
31 “Khasikin nangni ki hril, mihai sualna murdi le Pathian an hril insiatna tinrêng chu ngaidam nih a ti. Irtha Irthiang hrilsiat chu ngaidam ni no ni. 32 Tukhom, Mihriam Nâipa hrilsiattu chu ngaidam ni a ta, Irtha Irthiang hrilsiat chu, atûn hring sûnga khom, zoro hong theng hranga khom ngaidam ni no ni.
Thing le a ra
33 “Ra sa nei thei hrangin chu thingkung sa nin nei a nang; thingkung saloi nin neiin chu ra saloi nei nin ni. Thingkung chu a ra rengata inhriat thei a ni. 34 Mirûl irchihaio, nangni’n sual nei chianin itin mo thu sa nin insîr thei hrang? milunga lêt raka sip hi kêng bâiin a insîr suak ngai. 35 Mi sa’n chu ar chon kok sa ata thil sahai a sapsua ngai. Mi saloiin chu ar chon kok ata thil saloi a sapsua ngai.
36 “Nangni ki hril, mihaiin chong chanlamboi an insîr murdihai kha, Roirêlna Nikhuaa chu la hril zit an ti. 37 Ni thu khan thiam nang inchang a ta, ni thu ngêtin thiamno nang inchangtir a ti,” a tia.
Irsinsiana thilirkhêl an izong thu
38 Kha lai khan Dân irchutirtuhai le Farisaihai laia mi senkhathaiin a kuang, “Irchutirtu, ni kuang ata irsinsiana thilirkhêl hmu kin nuam e,” an tia. 39 Jisua’n an kuang, “Atûnlai thoiinthar sual tâk le uire hmang ngaihai, irsinsiana thilirkhêl nin izong na! Khannisianlân, deipu Jona irsinsiana vai ti no chu irsinsiana thilirkhêl dang rêng nin kuang pêk ni no ni. 40 Jona chu sûn thum le zân thum ngapui sûnga a iom ang khan Mihriam Nâipa hi sûn thum le zân thum irnêng sûnga a iom hrang a ni. 41 Roirêlna Nikhuaa chu Ninevi khuaa mihai kha ngîr an ta, thiamno nangni inchang an ti; anni chu Jona thu insîr an inhriata, an sualhai ata an irlet tâk sikin; nangni ki hril, Jona nêka lian ual hin a om. 42 Roirêl Nia chu Seba rêngnu kha ngîr a ta, atûnlai mihai leh hin thoi a ta, thiamno inchangtir a ti; rêng Solomona vârna irngaitua hrang luan kôlkung ata a honga; irngai u ta, Solomona nêka roiinpui ual hin a iom kêng!
Ramilhli hong kîr thu
43 “Ramilhli chu kha mi sûng ata a suakin chu irngam hmun zongin tui boina hmunhaia a chaia, khannisian hmu ta maka. 44 Khanchu, ‘Ki isuaksan tâknaa khan kîr nôk chian ki ti,’ a tia; a va tungin chu rongrala phît infâi diamin a va hmua. 45 Khanchu, a fea, ama nêka sual ual ramilhli sari dang a hong hruaia; an lûta, kha khan omhmun an khuar tâka. Kha mihriam om lam kha, matona nêkin a siat ok tâka. Khaang dênin, atûnlai thoiinthar sual tâkhai chunga hin la om a ti,” a tia.
Jisua nu le a urênghai
46 Mipuihai kuang thu an sîr lai khan a nu le a urênghai kha ama chongpui tumin pên tiang an ngîra, 47 Mi inkhatin a kuang, “Ni nu le ni urênghaiin nang chongpui tumin pên tiang son nang an nghâk kêng,” a tia.
48 Jisua’n a kuang, “Tu mo ka nu? Tu mo ki urênghai?” a tia. 49 Khanchu, a irchutirhai tiang a kut a phara, “En u ta, ka nu le ki urênghai hi: 50 Tukhom ka Pa irvâna mi nuamlam thotuhai hi ki urênghai, ki farnuhai, ka nuhai an ni,” a tia.
1 Kha nî sûn ngêta Jisua kha in ata a suaka, dîl kôla a fea, khan a toia, ar chuhaia. 2 Mipui tamtak an hong irchunkhôma; khanchu, irkuanga a chuanga, a toia, mipui murdi kha chiaiphoia an ngîra. 3 Thu tamtak an kuang chongirkhekin an sîra; “Irngai u ta, fachî inthektu fa chi inthek hrangin a fea. 4 A hong in thekin chu senkhat lampuia a tâka, vahaiin an hong fâk zôi zela. 5 Senkhat lungpherpha chung, irnêng irphânnaa a tâka, irnêng ar sâ no sikin, a hong mông lata. 6 Khannisianlân, misa a hong irsâng uala, a thêma, irzung a lâk thei no sikin a châra. 7 Senkhat chu hloi ilhlingnei kâra a tâka, hloi kha a hong mông irsânga, a hong dîp irhmang ta. 8 Senkhat chu irnêng saa a tâka, senkhat chu irzain, senkhat chu sômrukin, senkhat chu sômthumin a hong ra tâka. 9 Irngaituana mikuar nei murdi’n chu irngai ri sehai,” a tia.
Chongirkhek thiltum
10 Khan, irchutirhai kha Jisua kuang an honga, “Mipuihai laia thu nin sîrin ithoa mo chongirkhekin ni insîr?” an tia.
11 Jisua’n an kuang, “Irvân Ram thurîl inhriat theina nin kuang pêk a ni a, mi danghai kuang chu pêk ni ma, 12 Tukhom a nei ka chu pe sa ni a ta, nei ok a ti; tukhom a nei loi chu a inei sun khom lapai pe ni a ti. 13 An kuang thu kin sîra chongirkhek ki ihmang nasan chu an ena an hmu nona hrang le an irngaia an inhriat thei loina hranga a ni. 14 Khasikin, deipu Isaia lei ihril kha an chunga a hong itung a ni hi:
‘Hi mihai hin irngai an ta chu a omzia inhre thei no nihai;
En en an ta chu hmu’nfel no nihai.
15 An milung a lei inmôl tâka,
An mikuar a lei sêt tâk,
An mit khom a lei zîng tâk sikin.
khano’nchu an mitin hmu an ta,
An mikuarin inhriat an ta,
An milungin inhre thei an ta,
Keima tiang hong irhei kîr an ta,
Ki lei indamhai itinin,
Pathianin a ti,’ iti kha.
16 “Nangni chu, nin vân a sa bâka na! Nin mitin a hmua, nin mikuarin a inhriat a ni. 17 Nangni ki hril, nin ihmu hi deipu tamtak le Pathian mi tamtakin a hmu an nuam tak taka, khannisianlân, hmu thei mahai, nin inhriat khom hi inhriat an nuam tak taka, khannisian, inhre thei mahai.
Jisua’n fachî inthektu chongirkhek a hrilfia
18 “Khasikin irngai unglân, fachî inthektu chongirkhek omzia hi irchu roi. 19 Tukhomin Pathian Ram thu chu irngaia an inhriat thiam no’n chu mi sual chu a honga, a milunga inthek sai chu ar chupui ngai. 20 Khan, fachî lungpherpha irnêng irphânnaa tâk chu, thu an hriat zoi le lôm taka pom zôi zelhai hi an ni. 21 Khannisian irzung inthûk a thâk no sikin om sôt ngai mah. Thu sika intakna mani, dengintheina mani a hong om le chu an tûk zôi zel ngai a ni. 22 Fachî ilhling kâra tâk kha thu inhre tâkhai an ni, Khannisian, hi rammual kanna le irchongnahai khan thu kha a dîpa, ra nei ngai mah. 23 Khan, fachî irnêng saa tâk chu thu kha an inhriata, ar ngai lam khom inhriathai hi an ni. An ra ngaia, senkhat irza’n, senkhat sômrukin, senkhat sômthumin an hong pung ngai,” a tia.
Farhli chongirkhek thu
24 Jisua’n chongirkhek dang an sîr nôka: “Irvân ram chu mi inkhat a loia chi sa inthektu leh irkhek a ni. 25 Zân khat chu mi an in zit hnungin, râl a honga, bu bil laia khan bu dol an theka, a rot nôka. 26 Khan, bu kha a hong mônga, a hong vûiin chu farhli khom a hong inlang sa tâka. 27 Loi neitu suakhai kha an honga, a kuang, ‘Ka pu, ni loia chi sa ni inthek kha, farhli so kho taka hong om ma ni?’ an tia. 28 Ama khan an kuang, ‘Kha kha chu râlhai lei inthek sa a ni so te,’ a tia. Suakhai khan a kuang, ‘Khano’nte, va rôl zoiin lân a sa mo ni ti?’ an tia. 29 Ama khan a sâma, ‘Ti ma ung,’ farhli nin rôlin chu bu tak kha inpot pal sa nin ti. 30 Bu ât dênin mông sap ri sehai; bu ât tika a âttuhai kuang, ‘Farhli chu rôl bak unglân, hâl hrangin intêl roi; bu tak chu fasiara inlût roi,’ ” a tia.
Ancham chi chongirkhek
31 Jisua’n chongirkhek dang, an sîr nôka: “Irvân Ram chu mi’n ancham chi a chôia, a loia a inthek ang hi a ni. 32 Kha kha chîmu murdi laia chîn tak ni khomsian, a hong irsôn tikin chu chîmu danghai nêka lian tak a hong ni ngai. Thingkung a hong nia, khanchu, chunglêng vahai an honga, a ôna irbu an kai ngai,” a tia.
Chol chongirkhek thu
33 Jisua’n chongirkhek dang an sîr nôka: “Irvân Ram chu nupang inkhatin chol a lâka; baiphit litar sômminli leh ar zêla, a thoi mâka chu khamphulua a irpoltir ang kha a ni,” a tia.
Jisua’n chongirkhek a ihmangna san
34 Khahai murdi kha Jisua’n mipuihai kuang chongirkhekin an sîra, chongirkhek ni no’n chu an kuang ite insîr ma. 35 Kha a ihmangna san chu deipu’n,
“An kuang thu kin sîrin chongirkhek hmang ki ta,
Kho’rsiang kho’rzir ata thil irthup kha insîr pe ki ti,”
tia a lei insîr kha a hong tung theina hranga a ni.
Farhli chongirkhek hrilfiana thu
36 Jisua’n mipuihai kha a mâksanhaia, in sûnga a lûtin chu a irchutirhai an honga, a kuang, “Loia bu chongirkhek kha imo a omzia nin hril ro,” an tia.
37 Jisua’n an kuang, “Fa chi sa inthektu kha Mihriam Nâipa a ni, 38 loi chu rammual hi a ni, chi sa chu Ram nâihai an nia, farhli chu sual nâihai an ni; 39 râl, farhli inthektu kha chu Diabola a ni. Bu ât zoro chu rammual hekna hrang a nia, bu âttuhai chu vântîrtônhai an ni. 40 Farhlihai chu irtika, meia an ihâl angin rammual hek tika chu a iom hrang a ni; 41 Mihriam Nâipa’n vântîrtônhai kha tîr a ta, a Ram ata mi, sual inthotir ngaihai le sualtho ngaihai kha bûm an ta, 42 mei thi thei ngai loia khan pai an ta, kha khan chap an ta, an irkamnôi an ti. 43 Khanchu, Pathian nâihai chu an Pa Rama misa angin vâr ta an ti. Irngai roi, mikuar nei murdi’n chu!
Irchon phûm inrûk chongirkhek
44 “Irvân Ram chu mi inkhatin loia irchon phûm inrûk a hmu suaka, a phûm nôka raifân takin a fea, a inei murdi a va zuara, kha loi kha a irchôk tâk ang kha a ni.
Lunghlu chongirkhek
45 “Irvân Ram chu mi inkhatin lunghlu satak a zonga, 46 Lunghlu satak kha a hmu’n chu, a fea, a inei murdi a va zuara, kha lunghlu kha a irchôk tâk ang kha a ni nôk.
Lên chongirkhek
47 “Irvân Ram chu nga chel ngai senkhatin an lên dîla an vôra, nga chi tinrêng an iman ang kha a ni nôk. 48 Lên chu a sip tenin chu muanga an kaisuaa, kha khan an toia; a sa murdi koka an thuna, a saloi ka chu an pai ngai. 49 Rammual mong tika chu khaang khan la om a ti, vântîrtônhai chu zuang suak an ta, mi felhai laia irthokin mi sualhai kha bûm an ta, 50 mei thi thei ngai loia khan pai an ta, kha khan chap an ta, an irkamnôi an ti,” a tia.
Thil milui le thar
51 Khan, Jisua’n, “Khahai murdi kha nin inhriat thei mo?” a tia. Anni khan, “Kin inhriat thei,” an tia. 52 Khan, Jisua’n an kuang, “Khasikin, Dân irchutirtu, vân Ram thu irchu tâk ka chu, in neipu’n, ar chon kok ata thil milui le thil thar kêlsuatu ang hi a ni,” a tia.
Nazaret-a Jisua hnôlin a om
53 Jisua’n kha chongirkhek kha an sîr zoiin chu khatak ata a fe tâka, 54 a omna khua tiang a kîr nôka, Sinagoka khan a’rchutirhaia; a thu’nsîr inhriat dôrin chu an irngai a’rkhêl tâka, “Hi mi hi vârna le sinirkhêl sin theinahai hi khô taka a ihmu ma ni? 55 Hi mi hi bakot sin ngaitu nâipa kha mo ni ma? Mari kha a nu mo ni ma? A urênghai khom Jakoba, Josefa, Simona le Juda hai kha ni mahai mo? 56 A farhai khom hitaka om mo ni mahai? Hihai murdi hi khôtaka irthoka a ihmu ma ni?” an tia. 57 Khanchu, ama kha an hnôl tâka; Jisua’n an kuang, “Deipu chu a khua le a in mihai laia ti no chu hmun tina an chôiirsâng ngai,” a ti pehaia. 58 An iam no sikin khataka khan chu sinirkhêl tho intam ok ma.
1 Kha zoroa khan Galili rama rêng Heroda’n Jisua thurchi a lei inhriata. 2 A siahlohai kuang, “Hi mi hi Baptistu Johana ngêt kha a ni, mithi lai ata a thoi nôk tâk kêng. Khasikin kêng hi sinirkhêl sin theina ircham hi a inei,” a tia.
3 Matona khan Heroda’n Johana a lei chela, a khitphiara, intângna ina a lei ikhum tâk a ni. Khaanga a ithô nasan chu a urêngpa Filipa dôngma Herodi sika a ni. 4 Baptistu Johana khan Heroda kuang, “Herodi leh nin irnei hi dik ma,” a lei ti pe sikin. 5 Heroda’n Johana kha that a tuma, khannisian, Juda mipuihai a chia, Johana kha deipu’n an bê sikin. 6 Khannisianlân, Heroda suak nî champha nikhuaa khan chu Herodi nâinu kha mipuihai laia a lâma. Heroda kha a lôm tak taka, 7 a kuang chong an kunga, “I khom ni ni inghi ka chu nang pe ki ti,” a tia. 8 Khanchu a nu iti pe lam ang takin, “Hi hmuna hin atûn Baptistu Johana lu chu khênga ni pe zôi zel ro!” tiin a nghia. 9 Reng kha a sân a char an dongtir tâka, khannisian a chonginkung sikin le a khual mihai sika khan pêk hrang thu an kung tâka. 10 khanchu, intângna ina khan Johana lu kha an tan ta. 11 A lu kha khêngin an hong chôia, nupangtenu kuang an pêka, ama khan a nu kuang a chôi ta. 12 Johana irchutirhai an honga, ruak kha an chôia, an phûma; khanchu, an fea, Jisua an insîr pe ta.
Jisua’n mi sâng ringa a vâina thu
13 Khan, Jisua’n Johana thurchi a len hriatin, khataka irthokin a suaka, irkuangin a bing dokin hmun fianriala a fea. Mipuihaiin an inhriattin chu an khuahai ata kea fein an zui tâka. 14 Jisua irkuang ata vakama a suakin chu mipuihai kha a hmu’n chu a sân lung an khamhaia, damloihai an damhaia. 15 Kha ni khohloia khan a irchutirhai an honga a kuang, “A sân an hnung ok tâka; hi hi hmun fianrial a ni; mipuihai hi infetirhai tan lân, kho sûnghaia fehai sian, an fâk hrang ircho ri sehai” an tia. 16 Jisua’n an kuang, “An ife nang mah; nangni’n fa hrang pehai roi,” a tia. 17 Anni khan a kuang, “Hitaka kin inei chu a rêngin bai ringa le nga inhni vai keng,” tiin an sâma. 18 Jisua’n, “Hin hong chôi roi,” a tia. 19 Mipuihai kha sûl chunga toi hrangin thu a pêkhaia; Khanchu, bai ringa le nga inhni kha a lâka, irvân tiang enin Pathian kuang lômthu an sîra. Bai kha a khoia, irchutirhai kuang a pêka, irchutirhai khan mipuihai kuang an sem pehai tâka. 20 Mi tinin an fâka an khop senga, an fâk ban chu khamphulu sômhleihni an la hrût insip a ni. 21 A fâkhai chu nupang le nâipang tep loiin pasal ulian ka khom mi sângringa vêl an ni.
Jisua tui chunga ar lôi
22 Khan, Jisua’n mipuihai kha an chîntir zoro laiin a irchutirhai irkuanga an chuangtirhaia, dîl râl tiang a lei infehaia. 23 Mipuihai an chîn zoiin chu a bingin tânga chongchai hrangin a fea: khohloi a hong ni’n chu, kha khan a bing vaiin a om tâka.
24 Kha zoroa khan irkuang kha dîla hla taka a om tâka. Phâivua’n a no tiang a sêmpai sikin, tui irsokin hi tiang so tiang a hnôka. 25 Khanchu, zînga kôlirsal hrang tônin, Jisua chu tui chunga irlôiin a irchutirhai kuang a honga. 26 Tui chunga a ihong an hmu’n chu an chia, “Mithi irtha kêng!” an tia; an chia, an khêk mur mura. 27 Jisua’n a lei chongpuihai zôi zela, “Lungirngam takin om roi, keima kêng ki ini, chi no roi,” a ti pehaia.
28 Khanchu, Petera’n, “Rengpa, nangma ni ni’n chu tui chunga ni kuanga hong ni phal roh,” a tia. 29 Jisua’n, “Hong roh!” tiin a sâma. Khanchu, Petera kha irkuang ata a suaka, Jisua tiang panin tui chunga ke’n a fe tâka. 30 Khannisianlân, phâivua tho kha a hmu’n chu a chia, tuia ngîm hrangin a om tâka, “Rengpa, ni saninzôk ro!” tiin a khêka. 31 Jisua’n a hei inbana, an tûk zôi tâka, a kuang, “Ni iamna a tôm bâka! Itho sika mo lung ni irhlatir?” a ti pea. 32 An ruaiin irkuang sûnga an lûta, phâivua khom a dâidup tâka. 33 Khanchu, irkuanga irchutir omhai khan, “Pathian Nâipa ni ni lele kêng,” tiin Jisua chubai an mûka.
Jisua’n Genesaret rama damloihai an damna thu
34 Dîl râl an kâiin chu Genesaret ram an hong tung tâka, 35 kha khan Jisua kha an lei inhriat zôi zela. Khasikin an kôlvêl ram murdia khan mi an tîra, damloihai murdi kha Jisua kuang an hong tuanga. 36 Damloihai khan a puan hmor vai lua tôn hrangin an ngêna; a tôn murdi chu an dam thiaia.
1 Khanchu, Jerusalem ata Farisaihai le Dân irchutirtuhai kha Jisua kuang an honga. 2 “Ithoa mo ni irchutirhaiin pi pu thumâk hi an izôm ngailoi? Fâk an zong khomin tho dân angin kut irsûk ngai mahaia!” an tia. 3 Jisua’n an kuang, “Ithoa mo Pathian thupêk zôm loiin nin binga thumâk nin izui hi? 4 Pathianin, ‘Ni nu le ni Pa chôiindôm roh, mâni nu mani, pa mani insîrinsiat chu a ithi ngêt hrang a ni,’ a tia. 5 Khannisian, nangni’n chu, ‘Tukhom a nu mani, a pa mani, sanna hrang thil a neia, nikhomsian, ‘Hi thil hi Pathian ta tak kêng,’ a ti’n chu, 6 a nu le a pa mahrip a itho hrang ni mah,’ nin ti ngaia. Khasikin, nin pi le pu thumâkhai nin zôm theina hrangin Pathian thupêk chu ite’n nin ibe ngai loi a ni. 7 Nangni vârirlethaio, Isaia’n nin chungchâng a lei insîr kha a dik kêng!
8 ‘Hi mihai hin an bâiin an nin pâka,
Khannisian, an lungrîlin chu an ni hla.
9 An irchutirna chu mihriam thupêk an irchutir sikin,
an ni biakna hi a korong a ni,
Pathianin a ti,’
tia a lei irziak kha,” tiin a sâma.
Mihriam porinchetirtu
10 Khan, Jisua’n mipuihai kha a kuang a koihaia, an kuang, “Irngai unglân, inhre thiam roi! 11 Bâia lûtin mi porinchetir ngai maka, bâi ata suakin kêng mi a iporinchetir ngai,” a tia.
12 Khanchu, a irchutirhai an honga, a kuang, “Ni chong khan Farisaihai milung a sân hoi mah, ti nin hriat mo?” an tia. 13 Jisua’n, “Thing murdi ka Pa irvâna mi iphun ni no chu phâipaiin om an ti. 14 An chungchânga nin milung inbuai no roi! Anni kha mitchohai hruaitu mitcho an nia; mitcho khan mitcho dên a hruaiin chu an ruaiin khurpadopa tâk an ti,” tiin a sâma.
15 Petera’n a kuang, “Kha chong omzia kha ni hrilfiah pe ro,” a tia. 16 Jisua’n an kuang, “Nangni khom atûn ten ang dôra lan môl mo nin la ini? 17 Bâia lût ka chu phîng sûnga a lûta, kha hnung chu a isuakpai ngai ti nin inhriat loi ma ni? 18 Bâia suakhai ka chu milung ata hong suak a nia, kha khan mihriam a porinchetir ngai a ni. 19 Milung ata nin ngaituana sual hai, mi thatna hai, uirena hai, irditna hai, inrûkna hai, milaka irsêlna hai, Pathian hril siatna hai a ihong suak ngai a ni. 20 Kha kha mihriam porinchetirtu chu a ni; kut irsûk loia bu nêk hi chu mi porinchetir ngai ma,” a tia.
Suro Foiniki nupangnu iamna
21 Jisua’n kha hmun kha mâkin Tura le Sidon kho hual vêla a fea. 22 Kha rama om Kanaan nupangnu inkhat a kuang a honga, “Davida Nâipa! lung nin kham ro! ki nâinu ramilhli’n a chela, dengthei takin a iom kêng,” tiin a khêka. 23 Khannisianlân, Jisua’n chu bâi khat luan sâm mah. A irchutirhai a kuang an honga, “Hi mi hi infetir ta roh! khêk diaiin ei hnung a ni zui,” tiin an ngêna. 24 Khanchu, Jisua’n, “Israel belra irhmanghai laia vai kêng tîr ki ini,” tiin a sâma. 25 Khannisianlân, nupangnu kha a honga, “Rengpa, ni changpui roh,” tia kûnin chubai a mûka. 26 Jisua’n, “Nâihai bai lapaia, uihai laia pêk chu dik mah,” tiin a sâma. 27 Nupangnu khan a kuang; “Rengpa, a ni chu a ni, khannisian, uihai khomin an pu maichâm ata bai irnôi tâk chu an fâk ngai khate,” tiin a sâma. 28 Khasikin Jisua’n a kuang, “Nupangnu a sân ni iam, ni inuamlam ang takin ni chunga tung ri se” a ti pea. Khanchu, a nâinu kha, kha zoro lai taka khan a hong dam tâka.
Jisua’n mi tamtak an damtirna thu
29 Khan, Jisua chu khatak ata a fea, Galili dîl kôla a fea, tânga a kâia, a toi tâka. 30 Mipui tamtak a kuang an honga, ke’nbâi hai, mitcho hai, suakinsual hai, chong theiloi hai le mi dang tamtak Jisua kuang an hong hruaihaia; a lei indamhai thiaia. 31 Mipuihai khan chong theiloihai kha hong chongin, kholrabaichahai kha hong damin, kea fe’n, mitcho hai mit hong vâr tâk kha an hmu’n a sân a’rkhêl an tia; khanchu, Israel Pathian kha an inpâk ta.
Jisua’n mi sâng minli a vâina thu
32 Khan, Jisua’n a irchutirhai a koia, an kuang, “Mipuihai hi sûn thum ki kuang an om tâka, atûn hin ite fa hrang an nei no sikin, a sân lung kin khamhai tak taka, bu ngheiin inkîrtirhai nuam ma ung, khano’nchu lam laia châmsôl irveina an ti,” a tia. 33 Irchutirhai khan a kuang, “Hiang dôra mipui infâ inkhop hrangin, hi ramchâra hin khôn mo bai ei ihmu hrang?” an tia. 34 Jisua’n, “Idôr mo bai nin inei?” tiin a’rdonhaia. Anni khan, “Bai sari le nga tômte,” an tia. 35 Khanchu, Jisua’n mipuihai kha irnênga toi hrangin thu a pêkhaia. 36 Khan, bai sari le nga kha a lâka, Pathian kuang lômthu an sîra, a khoia, irchutirhai kuang a pêka; irchutirhai khan mipuihai kuang an pêk tâka. 37 An rêngin an fâka, an khop seng tâka. Khanchu, irchutirhai khan an ifak mihliaa a’rnôi kha khamphulu sari an la hrût insipa. 38 A fâkhai chu nupang le nâipang tep loiin pasal ulian inzen mi sâng minli an ni. 39 Kha hnung chu Jisua’n mipuihai kha an chîntirhai zoiin chu irkuanga a chuanga, Magadan rama a fe ta.
1 Khan, Farisaihai le Sadukaihai senkhat Jisua kuang an honga, ama fiana hrangin irvân ata irsinsiana sinirkhêl inentir hrangin an ngêna. 2 Khannisian, Jisua’n an kuang, “Khohloi a hong ni’n chu ‘Khua a ihoi hrang kêng nin tia, kôl a sen,’ nin ti ngai. 3 Zînga chu ‘Rua a itho hrang ni a ti, kôl a sen, khua ar ui’ nin ti ngai; Irvân enin rammual hoi hrang le hoi no hrang nin inhriat theia, khannisian, zoro irsinsianahai hi chu a omzia inhre thei mak chêi. 4 Atûnlaia thoiinthar mi sual tak le uire hmanghai! irsinsiana sinirkhêl nin ni izong na? Jona sinirkhêl ti no chu nin kuang irsinsiana sinirkhêl dang pêk ni no ni,” tiin a sâma, khanchu, a mâksanhai tâka.
Farisaihai le Sadukaihai chol
5 Irchutirhai kha dîl râl tiang an kâiin chu bai an hong chôi irnghila. 6 Jisua’n an kuang, “Farisaihai le Sadukaihai chol ata ir-enkol unglân, irdîn roi,” a tia. 7 Khan, anni khan, “Bai hong chôi mak me,” tiin an bingin an insîr irhlôma. 8 Jisua’n an insîrhai chu an hriata, an kuang, “Nin bai chôi no thua itho mo nin binga nin irngaitua? Nin iamna a tôm bâka! 9 Nin la inhriat thei loi ma ni? Mi sâng ringahai ta hrang bai ringa ki ikhoi kha nin irnghil ma ni ta? An fâk ban khamphulu iza mo an ihrût insip kha? 10 Mi sâng minli ta hrang bai sari rêk khate? An fâk ban khamphulu iza mo an ihrût insip kha? 11 Nin kuang bai thurchi insîr ma ung, ti itho mo nin inhriat loi? Farisaihai le Sadukaihai chol ata irdîn roi!” a tia. 12 Kha hnung chu irchutirhai khan bai chol ata irdîn hrang ni loiin, Farisaihai le Sadukaihai irchutirna ata irdîn hranga a ihril a nih ti an inhriat ta.
Petera’n Jisua nina an puang
13 Khan, Jisua kha Kaisari Filipi kho hualsûng a hong tungin, a irchutirhai kuang, “Mihaiin Mihriam Nâipa hi tu mo a ni an ti?” tiin a’rdonhaia. 14 Anni khan, “Senkhatin chu Baptistu Johana a ni, mi dangin Elija a ni, senkhat nôkin chu Jeremia a ni no le deipu tu khôk mani a ni, nang an ti,” tiin an sâma. 15 Ama khan an kuang, “Nangni’n te, tu mo a ni nin ni ti?” ti’n a’rdonhaia. 16 Simon Petera’n a kuang, “Mesia Pathian hring Nâipa kha ni ni,” tiin a sâma. 17 Jisua’n a kuang, “Simon Barjona, taksa le thisenin nang a inhriattir ni maka, ka Pa irvâna mi’n nang a inhriatir a ni. 18 Khasikin nang Petera; lungpui ni ni tih nang ki hril, hi lungpui chunga hin ki koiindang inding ki ta, thina khomin inhnê no ni. 19 Irvân Ram châbihai nang pe ki ta; irnênga ni ikhit chu irvâna khom khit nih a ti, irnênga ni isût chu irvâna khom isût ni a ti,” a ti pea. 20 Khanchu, Mesia a nih ti tûte hril loi hrangin irchutirhai kha thu a pêkhai ta.
Jisua’n a tuang hrang le a thi hrang thu an sîrna
21 Kha zoi ata chu Jisua’n a irchutirhai kuang fel takin thu an sîra, “Jerusalema a fe hrang thu hai, upa hai, Ochai inlalhai le Dân irchutirhai kuta a tuang hrang thu hai, thatpaia a om hrang thu hai le sûn thum nia kaithoia a om hrang thu hai kha,” a irchutirhai a hril irphut tâka. 22 Petera’n ama kha a bingin a hruaia, a kuang, “Pathianin a khap, Rengpa! kha thil kha ni chunga tung viat no ni,” tiin a ngoa. 23 Khan, Jisua kha a’rheia, Petera kuang “Setan, rot roh; a ni khâltu ni ni; Pathian nuamlam ngaitua loiin mihriam nuamlamin ni ingaitua a ni hi,” a tia.
24 Khanchu Jisua’n a irchutirhai kuang, “Tukhomin ni zui a nuamin chu mâni intak ngaitua loiin a kros irputin ni zui ri se. 25 Tukhomin mâni hringna sûnghual tumtu’n chu inchân an ta, tukhom keima sika a hringna inchân murdi’n chu hmu an ti. 26 Mi’n rammual hi a pumin nei sianlân, a hringna inchân sianlân, a ta hrangin imo a’rfêna? A ninole, mi’n a hringna irthûlin imo a ipêk hrang? 27 Mihriam Nâipa hi vântirtônhai le a Pa roiinpuina le, a izuang hrang a nia; kha tika chu mi tin an sintho ang zêlin thuan seng a ti. 28 Thudik nangni hril ki ti, hitaka ngîr senkhathai hi, Mihriam Nâipa, inlal taka a zuang an hmu mâka chu thina irtem loi hrang an om,” a tia.
1 Khan, sûn ruk hnunga chu Jisua’n Petera, Jakoba le Johana hai an bingin a hruaihaia, tâng irsâng taka a fe puihaia. 2 An mit hmua Jisua hmêl a hong danglama, a hmâi misa angin a hong vâra, a puan silhai khom irtêk rakin a vâra. 3 Khanchu, irchutir inthumhai khan Mosia le Elija’n Jisua an chongpui lai an hmua. 4 Khan, Petera’n Jisua kuang, “Rengpa, hitaka om hi ei ta hrangin a sa! Ni nuamin chu, kairêng inthum sin ki ta; ni ta hrangin inkhat, Mosia hrangin inkhat, Elija hrangin inkhat,” a tia.
5 A la chonglai takin, sûm vâr takin anni chu a’rhlîkhuhaia, sûm ata hnuk irhaiin, “Hi hi ki Nâipa, lungthungtak, ki ilôm tak tak chu a ni; ama thu irngai roi,” a tia. 6 Irchutirhai khan kha kha an inhriatin an inboka, an chi tak taka, 7 Jisua a honga, a hong tônhai tâka, “Thoi roi chi no roi!” a ti pehaia. 8 Khanchu an hong tanga, Jisua ti no chu mi dang hmu ta mahai.
9 Khanchu tâng ata an zuang chumin chu Jisua’n an kuang, “Mihriam Nâipa thina ata a thoinôk mâka chu nin thil hmu hi tûte hril viat no roi,” tiin thu a pêkhaia. 10 Khan, irchutirhaiin Jisua kuang, “Itho mo Dân irchutirtuhaiin Elija a izuang bak hrang a ni, an iti?” tiin an irdona. 11 Jisua’n, “Elija chu zuang bak hrang pial a ni, itinrêng ama’n lei siam infel zit a ti. 12 Khannisian, nangni ki hril, Elija chu a izuang pial tâk kêng; mihaiin lei inhre mahaia, an nuam nuam an lei lo kha. Khaang dênin Mihriam nâipa khom hin an kut a ituang hrang a ni,” a tia. 13 Khanchu, irchutirhaiin, Baptistu Johana thurchi an kuang a insîr a nih ti an hong inhriat tâka.
Jisua’n nâipang hrisangol irvei indamna thu
14 Mipuihai kuang an hong kîr nôkin chu mi inkhat Jisua kuang a honga; a makunga khûksadelin, 15 “Rengpa, ki nâipa hi lunginkham ro! Hrisangol irvei a nia, a tuang hrai tâka, voi iza tuia le meia an rîl tâka. 16 Ni irchutirhai kuang ki hong hruaia, indam thei mahai,” a tia. 17 Khan, Jisua’n, “Iti hraia iamna boi mo nin ini tâk! Idôr ten mo nin kuang omin nangni ki ingaitua thei hrang? Nâipangtepa kha ki kuang hong hruai roi!” a tia. 18 Jisua’n ramilhli kha thu a pêka, nâipangtepa sûng ata kha a suaka, kha zoro taka khan a hong dam ta. 19 Khanchu, irchutirhai kha Jisua kuang an honga, “Itho mo keini’n kin inhnot suak thei loi?” tiin mi inhriat loiin an irdon zâia. 20 Jisua’n an kuang, “Nin iamna tôm sika a ni. Thudik nangni ki hril, iamna ancham ru dôr nin neiin chu hi tâng hi, ‘Hitak ata, so son irson roh ti nin ta,’ irson a ti. Tho thei loi zel nei no chin ni,” a tia. 21 Khannisianlân, hianga hi chu chongchaina le bu ngheina ti no chu itin te’n inhnotsuak thei ni mah,” tiin a sâma.
Jisua’n a thi hrang thu an sîr nôkna
22 Irchutirhai kha an rêngin Galili rama an hong hnungin, Jisua’n an kuang, “Mihriam Nâipa hi mihriamhai kuta ichelin om a ta, 23 that an ta, khannisian, sûn thum niin chu kaithoiin om a ti,” a tia. Irchutirhai chu a sân an bêi a dong tâka.
Biak ina khâzana chôi thu
24 Jisua le a irchutirhai Kapernaumah an hong tungin, Tempil khâzana irfuangtuhai, Petera kuang an honga, “Nangni irchutirtu hin Tempil khâzana a chôi ngai mo?” tiin an irdona. 25 Petera’n, “A chôi ngai” tiin a sâma. Petera kha ina a va lûtin, Jisua’n a lei chongpui baka, “Simon, imo ni’rngai lam? Hi rammuala rênghai kuang hin tuhai mo khâzana chôi ngai? A ram mihai mo, ram dang mihai mo?” a tia. 26 Petera’n, “Ram dang mihai,” tiin a sâma. Jisua’n, “Khano’nchu a ram mihai chu an ichôi nang mah. 27 Khannisianlân, hi mihai lunghoi loia an iom hi nuam ma ung, khasikin dîla fe’n lân, irkuai chôiin lân, nga ni iman masa tak bâia khan ei ruaia Tempil khâzana ei ichôi ruk bak sum hmu ni ti. Kha kha hong chôiin lân, ei chôi tum kha an kuang va pe roh,” a tia.
1 Kha lai khan irchutirhai Jisua kuang an honga, “Irvân Rama tu mo roiinpui tak hrang?” an tia. 2 Khanchu Jisua’n nâipangte hi a koia, an makunga an ngîrtira, 3 “Thudik nangni ki hril, nin irleta, nâipangtehai angin nin om no’n chu, irvân Rama lût viat no chin ni. 4 Irvân Rama roiinpui tak hrang chu irngaiintôma, hi nâipangte anga omtu hi ni a ti. 5 Tukhom ki’rhming sika hianga nâipangte lôm ka chu keima ni lôm an ni.
Tûkna inomtirtu thêmna
6 “Tukhom, hi a ni iamhai laia nâipangte inkhat khom hi an tûktirin chu, a hroka bu nôina lung lianpa irhlitirin tuikhanglian inthûk taka inthâkhai sianlân a ta hrangin sa ual a ti. 7 Tûknahai sikin rammual chung an tak vang na! Tûknahai chu om mai a ti, khan tûknahai inomtirtu chung chu an tak vang na! 8 “Ni kutin mani, ni ke’n mani, nang an tûktirin chu tanpaiin lân, pai chian roh! kut kiang hni mani, ke kiang hni mani neia kumtuang hremhmuna nang pai nêkin chu kut boi, ke boia hringnaa lût ni ta hrangin a sa ual. 9 Ni mit khomin nang an tûktirin chu kêlsuakin lân, pai rak roh! Mit kiang hni neia hremhmun meidîla nang pai nêkin chu, mit kiang khat vai neia hringnaa lût ni ta hrangin a sa ual.
Belra irhmang chongirkhek thu
10 “Hi mi chîntehai laia inkhat lua hi hmusit loi hrangin irdîn roi, irvâna vântîrtônhaiin ka Pa irvâna mi, hmêl an hmu mai ngai ti nangni ki hril a ni. 11 Mihriam Nâipa hi a’rhmanghai zonga saninhring hrang piala zuang a ni.
12 “Mi inkhatin belra irzakhat a neia an laia inkhat irhmang sian, itin mo tho le nin irhoitir? Sômkuak kuakhai kha mâkin, fe a ta, ar hmangtu kha a va izong loi hrang ma ni? 13 Nangni ki hril, a va hmu’n chu sômkuak kuak ar hmang loihai nêkin inkhat chunga khan lôm ual a ti. 14 Khaang dênin, hi mi chîntehai laia inkhat irhmang khom hi nin Pa irvâna mi nuam mah.
Urêng thil tho’nsual thu
15 “Ni urêngin ni chunga thil sual tho sianlân, fe’n lân, nin inhni vai inhriata irchu roh. Ni chong ar ngaiin chu ni innghip ni a ti. 16 Khannisianlân, ni chong ar ngai no’n chu mi dang inkhat mani, inhni mani hruai sa’n lân, khanchu nin thu murdi chu inhretu inhni mani, inthum mani bâia indet ni thei a ti. 17 Khan, khahai chong khom ar ngai no’n chu thil tinrêng koiindanghai kuang intung roh. A hnungkhôn taka chu koiindang chong khom ar ngai nuam no’n chu, kha mi kha chu Jentail angin mani, khâzana irfuangtu angin mani bê roh.
Khap le phal
18 “Thudik nangni ki hril, irnêng chunga i khom nin ikhap ka chu irvâna ikhap ni a ta, irnêng chunga i khom ni iphal ka chu irvâna phal ni a ti. 19 Thudik nangni ki hril; irnêng chunga hin nin laia mi inhni inruala i thua khom an chongchaiin chu ka Pa irvâna mi’n tho pe a ti. 20 Mi inhni mani inthum mani ki’rhminga an irchunkhôm rikipin an kuang om ngai ki ti,” a tia.
Siahlo ngaidam nuam loi chongirkhek
21 Khanchu, Jisua kuang Petera a honga, “Rengpa, ki urêngin voi iza mo ki chunga thil tho’nsual sianlân ki ingaidam hrang? Voisari ten mo a ini hrang?,” a tia. 22 Jisua’n a kuang, “Voi sari ten, ti ma unga, voi sari hmun sômsari ten,” ki iti a ni.
23 Khasika khan irvân Ram chu, Inlaltak tu mo khat a siahlohai kuang sum chungchâng infel tumtu leh irkhek a ni. 24 A hong infelin chu, mi inkhat, talent sîngkhat intâng, a kuang an hong hruaia; 25 Thuanna a nei no sikin a pu khan ama leh a dôngma, a nâihai le a inei murdi zuara thuan hrang thu a pêka. 26 Khanchu, siahlo khan khûksadelin chubai a mûka, ‘Ki chunga irngai nin hoiin lân, a rêngin nang thuan zit ki ti,’ a tia. 27 Khanchu, kha siahlo kha a pu khan a sân lung an kham tak taka, an suaa, a intâng kha a ngaidam tâka.
28 Khannisianlân, kha siahlo kha a fe suaka, a siahlo chanpui inkhat a sum, a duli irza intângtu kha a va hmua, a chela, a bohroka a chela, ‘Ni intâng kha ni pe roh,’ a tia. 29 Kha a siahlo chanpui khan inbokin, ‘Ki chunga irngai nin hoiin lân, nang thuan ki ti!’ tiin a ngêna. 30 Khannisianlân, nuam maka, a lâkai a thuan mâka chu intângna ina a khum tâka, 31 Khan, siahlo danghaiin a sintho lam kha an hmu’n a sân poi an tia, Inlaltak kuang khan an fea, thil tinrêng an van sîr pe ta. 32 Khanchu, Inlaltak khan siahlo kha a koia, a kuang, ‘Siahlo pualoi! ni ni ngên sikin ni lâkai murdi nang ki ngaidam a ni. 33 Lung nang kin kham angin, nang khomin ni siahlo chanpui lung ni inkham hrang mo ni ma? a ti pea. 34 Inlaltak kha a sân a ning an mur sika kha siahlo kha a lâkai a thuan zoi mâka intângna ina a khum tâka,’ a tia.
35 Khan, Jisua’n, “Mi tinin nin urênghai nin lungrîl takin nin ngaidam no’n chu ka Pa irvâna mi’n khaang dên khan nin chunga tho sa a ti,” a tia.
1 Jisua’n kha thu kha an sîr zoiin chu Galili ram ata a suaka, Jordan râla Judai rama a fe tâka. 2 Mipui tamtakin an zuia, kha hmuna khan mi tamtak a lei indamhaia.
3 Farisai senkhathai a kuang an honga, ama fiana hrangin, “I ang khomin mi’n a dôngma a imâk hi a’rthiang mo?” an tia. 4 Khan ama’n, “A phut ata hi thu hi tep ngai mak chêi mo? a phut ata siamtu khan nupang le pasal a siama, 5 ‘Khasika khan pasalin a nu le a pa masan a ta, a dôngma thop a ti, khanchu an inhni khan taksa pumkhat hong ni ta an ti,’ a iti a ni. 6 Khasikin mi inhni ni ta mahaia, pumkhat an hong ni ta. Pathianin a izom tâk chu mihriamin a isen viat hrang ni mah,” tiin a sâma.
7 Farisaihai khan a kuang, “Khante, ithoa mo Mosia’n irmâkna lekha pêkin mâk thei thu a ipêk?” an tia. 8 Jisua’n an kuang, “Mosia’n nin dôngmahai mâk nangni a iphalna chu nin milung ngar sika a ni, Khannisian, a phuta chu khaang khan ni mah. 9 Keima’n chu nangni ki hril, tukhom uire sika ni loia a dôngma mâka, mi dang neitu chu a uire a ni,” a tia.
10 Irchutirhai khan a kuang, “Khaang khan ompui sangram chungchânga pasal ngîrhmun a niin chu, irnei hi sa mah,” an tia. 11 Jisua’n an kuang, “Hi irchutirna hi mi tin hrang ni maka, Pathianin a ipêkhai chunga vai hmang ni a ti. 12 Pasalin dôngma a inei loi nasan chu tamtak a om; senkhat chu nei loi hrang piala suak an ni; senkhat chu khaang hranga mihriamin an isiam khom an om; senkhat chu irvân Ram sikin an inei loi a ni. Tukhom hi irchutirna a pom thei murdi’n chu zôm ri se,” tiin a sâma.
Jisua’n nâipangtehai sat a vur thu
13 Khan, Jisua’n an chunga a kut a’rnghat thei hrang le a chongchai pe theina hrangin mi senkhatin nâipangtehai a kuang an hong hruaia, khannisian, irchutirhaiin an lei ngoa. 14 Jisua’n an kuang, “Nâipangtehai ki kuang inhongtirhai unglân, khap no roi, irvân Ram chu hiang mihai ta a ni sikin,” a tia. 15 Khan, an chunga a kut a’rnghata, khatak ata a fe tâka.
Ruatharte irchongpa thu
16 Khan, mi inkhat Jisua kuang a honga, “Irchutirtu, kumtuang hringna ki nei theina hrangin i sin sa mo ki itho hrang?” tiin a’rdona. 17 Jisua’n, “Itho mo sin sa ni ni irdon? A sa chu inkhat vai kêng a iom. I khom nisian, hringnaa lût ni nuamin chu thupêkhai zôm roh,” tiin a sâma. 18 Ama khan, “I thupêkhai mo?” tiin a’rdona: Jisua’n, “Mi that no roh; uire no roh, milakin mi hnôl no roh; 19 ni nu le ni pa chôiindôm roh; khabana, nangma lung ni irthung angin ni bômhai lungthung roh, tihai hi,” tiin a sâma. 20 Ruathartepa khan, “Kha thupêkhai kha chu ki zôm zit ta, imo ki la irsam?” a tia. 21 Jisua’n a kuang, “Satirkipa om ni nuamin chu fe’n lân, ni inei murdi zuarin lân, kha sum kha inrianghai kuang pe roh, khanchu, irvâna irchon nei ni ti; kha hnung chu, hongin lân, ni hong zui roh,” a tia. 22 Ruathartepa khan kha chong kha an hriatin chu chardong takin a rot ta, mi irchongtak a ni sikin.
23 Khan, Jisua’n, a irchutirhai kuang, “Thudik nangni ki hril; mi irchonghai hrangin chu irvân Rama lût a intak ok hrang a ni. 24 Nangni ki hril nok: Irchong Pathian Rama lût nêkin chu saringsei simphuai mikuara lût ol ual a ti,” a tia. 25 Kha chong kha irchutirhaiin an inhriatin chu a sân an irngai a’rkhêl oka, “Khano’nte, tu mo saninhring ni thei hrang?” tiin an irdona. 26 Jisua’n anni kha en ngitin an kuang, “Ama kha mihriam hrangin chu thei ni maka, Pathian hrangin chu thei a ni,” tiin a sâma.
27 Khanchu, Petera’n a kuang, “En ta, keini’n itinrêng mâkin nang kin zuia, imo kin ihmu hrang?” a tia. 28 Jisua’n an kuang, “Thudik nangni ki hril: Zoro thara chu, Mihriam Nâipa a rêngtoihmun roiinpui taka a toi tika, nangni a ni zuituhai khom hi Israel nam sômhleihni chunga roirêlin rêngtoihmun sômhleihnia la toi nin ti. 29 Tukhom ki’rhming sika in mani, urêng mani; farnuhai mani, pa mani, nu mani, nâihai mani, ramhai mani mâksan chu a bâk irzain hmu an ti; kumtuang hringna la dong sa an ti.
30 “Khannisian, atûna a masa taka omhai chu a hnungkhôn tak la ni an ta, a hnungkhôn taka omhai khom a masa tak la ni an ti,” a tia.
1 Irvân Ram chu mi inkhat a Grep irhuana sin hrang mi zonga zînga suak ang kha a ni. 2 Ama khan sinthotuhai kha a sûna a duli pe hrangin a’rfelpuihaia, khanchu, a grep irhuana sin hrangin a tîrhai tâka. 3 Khan, zîng dâr kuak vêlin bazar hmuna a fe nôka, mi dang lei ngîr mai maihai a hmua; 4 an kuang, ‘Nangni khom grep irhuana va fe roi ba; a’rhoi ang dôr nangni pe ki ti,’ a tia. 5 Khanchu an fe tâka, khan, sûn dâr sômhleihni le khohloi dâr thum tena khom a suaka, khaang dênin a tho nôka. 6 Khohloi dâr ringa’n a suak nôka, mi dang ite sin loia ngîrhai a va hmuhaia, an kuang, ‘Itho sika mo sûn sôta hi hin nin ingîr pa pai?’ a tia. 7 Anni khan a kuang, ‘Tûte’n irhlo hrangin an ni koi no sikin,’ ti’n an sâma. Khan ama’n an kuang, ‘Nangni khom fe unglân, grep irhuana va sin roi,’ a ti pehaia.
8 Khohloi a hong nî’n chu, grep irhuan neitu khan a sum vongtu kuang, ‘Sinthohai kha koi unglân, inhnung tak ata phutin a maton takhai dênin an hlo pe roi,’ a tia. 9 Khohloi dâr ringa vêla sin kophai kha an hongin chu a duli chit an dong senga. 10 Khanchu, a maton taka sin kophai kha an hongin chu hmu ual hrangin an irtûnga; khannisian, anni khom a duli dên pêk an nia. 11 An hlo an hong dongin chu in neitupa chunga an chiar tâka. 12 ‘Hi a hnungkhôn takhai hin dârkâr khat vai an sina, keini chu misa luma sûn misa tâk dênin kin sina, khan khomin, keini idong dôr ngêt anni khom ni pêkhaia!’ an tia.
13 A chongpu khan an laia inkhat kuang, ‘Irngai ta, mala, nang huang ma ung. I khom nisian, a sûna a duli hlo hranga ei irti mo ni ma? 14 Atûn ni hlo lan lân, ni ina fe roh. Nangma nang ki ipêk dôr kêng hi a hnungkhôn taka sin koppu khom hi ki ipêk nuam a ni. 15 Ki sum khate, ki nuamlam ang taka hmang hrangin ircham ki inei mo ni ma? A ninole, ki tikhoi sikin ni ihnarsa ma ni?’ a ti pea. 16 Khanchu, Jisua’n, “A hnungkhônhai chu a masa tak la ni an ta, a masa takhai chu a hnungkhôn tak la ni an ti,” a tia.
Jisua’n a thi hrang thu an sîr voi thumna
17 Khan, Jisua Jerusalem-a a hong fe laiin irchutir sômhleihnihai kha an bingin a hruaihaia, lampuia khan inrûkin an kuang, 18 “Irngai u ta, Jerusalema ei ife hrang a nia, kha khan Mihriam Nâipa hi Ochai inlalhai le Dân irchutirtuhai kuta ichelin om a ti. Thi hrangin rêlinchuk an ti. 19 Jentailhai kuta pe an ta, anni khan nuiza siamna’n hmang an ta, zêm an ta, krosa hembe’n ti; khannisianlân, sûn thum tena chu kaithoiin om a ti,” a tia.
Nu inkhat ngênna
20 Khanchu, Zebedaia dôngma kha a nâipasal inhni hong hruaiin Jisua kuang a honga, khûksadelin chubai a mûka, thil imo khat a zonga. 21 Jisua’n a kuang, “Imo ni izong?” a tia. Ama khan, “Hi ki nâipasalhai ruai hi ni Rama, ni chang tiang inkhat, ni vei tiang inkhat, an toi theina hrangin thu pehai ro ba,” a tia. 22 Jisua’n a sâma, “Nin thil zong hi nin inhriat loi kêng, ki khilât in hrang nin iin thei hrang ma ni?” a tia. Anni khan, “Thei kin ti,” an tia. 23 Jisua’n an kuang, “Ki khilât chu in ngei nin ti; khannisianlân, tu mo ki chang tiang le ki vei tianga toi hrang chu keima ircham ni mah, ka Pa’n a inkung pehai ta hrang a ni,” a tia.
24 Irchutir sômhai khan kha kha an inhriatin chu ulenâi inhnihai chunga khan a sân an ning an mur tâka. 25 Khasikin Jisua’n an rêngin a koi bukhaia, an kuang, “Jentailhai chunga roirêltuhai kha an inlal tak tak ngaia, an mi lianhai khomin an chunga ircham an nei tak tak ngai ti nin inhriat. 26 Khannisianlân, nangni laia chu khaang khan a ini hrang ni mah. Nin laia tukhomin mi lian a ni nuamin chu nin sinthotua a iom hrang a ni. 27 Nin laia inlal tak ni nuam khom, nin siahloa a iom hrang a ni. 28 Mihriam Nâipa khom hi sintho pe hrangin zuang maka, sintho hrang le mi tamtak irtan hranga a hringna pe hranga a izuang a ni,” a tia.
Mitcho inhni indam
29 Jisua le a irchutirhai Jeriko khua ata an suak laiin, mipui tamtakin an zuia. 30 Mitcho inhni lampui kôla toihaiin Jisua a fe ti an inhriatin chu, “Davida Nâipa! lung nin kham roh!” tiin an khêka. 31 Mipuihai khan dâihrek hrangin an ngohaia. Khannisianlân, anni khan “Davida Nâipa! lung nin kham roh!” tiin an khêk ual uala. 32 Jisua a ngîra, kha mitchohai kha a koihaia, “Imo nangni tho pe hranga nin inuam?” tiin ar donhaia. 33 Anni khan a kuang, “Rengpa mit vârna kin nuam,” an tia. 34 Jisua khan lung an khamhai tak taka, an mit a tôna, khanchu, an hmu thei zôia, ama kha an zui tâka.
1 Khan, Jisua le a irchutirhai Jerusalem an tung tôn, Oliv tâng Bethfage khuaa an hong tunga. Kha khan Jisua’n a irchutirhai laia mi inhni a tîrhaia, 2 an kuang, “Nin matona khuaa son fe unglân, sakuartung, a kôla a tê leh irthung hmu zôi nin ti. Sût unglân ki kuang hong kai roi. 3 Tukhomin nin kuang i khom lei tihai sian, ‘Rengpa’n a innang kêng,’ ti unglân; khanchu, nangni inhongtir zôi a ti,” a tia. 4 Deipu hmanga a insîr kha a hong tung theina hrangin khahai kha a hong iom a ni.
5 “Zion nâinu kha hril roh,
En ta, ni rêng chu ni kuang a hong e,
Sakuartung te chung ngeia,” ti thu hi.
6 Khanchu, irchutirhai kha an va fea, Jisua’n thu a ipêkhai ang takin an thoa. 7 Sakuartung le a tê kha an hong kaia, an chunga an puanhai an dâpa, Jisua kha a chuang ta. 8 Mipui laia a tam ualin chu lampuia an puanhai an dâpa, senkhatin sôlhna an sâta, lampuia khan an dâp thiai saa. 9 Mipui Jisua maton tianga fehai le a hnung tianga zuihai khan,
“Davida Nâipa kuang, Hosana!
Rengpa irhminga hong chu inpâkin om ri se.
An chung taka khin Hosana!”
tiin an khêka.
10 Jisua kha Jerusalema a lûtin chu, a kho pumpuiin, “Hi mi hi tu ma ni?” tiin an châng soia. 11 Mipuihai khan, “Hi mi hi deipu Jisua, Galili rama Nazaret khuaa mi a ni,” an tia.
Tempil irthiangtir
12 Jisua kha Tempila a va lûta, kha khan thil zuartuhai le irchôkpuhai kha an hnot suakhai zita. Sum thûltuhai maichâm le phervali zuartuhai toihmunhai khom a nam inrîl pehaia, 13 an kuang, “Pathian Thubua, Pathianin, ‘Ki in chu chongchaina in ti an ti,’ ti irziak a ni. Khannisian, nangni’n chu nakhrâtsonghai khura kêng nin isiam a ni hi,” a tia.
14 Tempila khan mitchohai le ke’nbâihai a kuang an honga, a lei indamhaia. 15 Ochai inlalhai le Dân irchutirtuhaiin sinirkhêl a isinhai le Tempila, ‘Davida Nâipa kuang Hosana,’ tia nâipang khêkhai kha an hmu’n chu a sân an ning an mura, “Hihai thu’nsîr hi nin hriat mo?” an tia.
16 Jisua’n an kuang, “Kin hriat e,
‘Nâitesenhai le irhnu nêk laihai bâia khan,
inpâkna a famirkip’ ti hi nin itep ngai loi mo?”
a tia.
17 Anni kha a rotsanhaia, khopui ata a suaka, Bethani-a a fea, kha khan a riak tâka.
Jisua’n theipui kung khua a sâlna
18 Khan, zînga khopui tiang a pan nôk laiin Jisua phîng a hong châm tâka. 19 Lam sîra theipui kung a hmua, a va pana, khannisianlân, a hnâ ti no chu ite hmu maka. Khasikin Jisua’n theipui kung kha, “Kumkhua’n ra ngai ta no ro!” a ti pea, voikhat rengin theipui kung kha a hong thêm ta. 20 Irchutirhaiin ama kha an hmua, an irngai ar khêl ok tâka, “Itina mo theipui kung hi a ithêm zôi tâk?” tiin an irdona. 21 Jisua’n an kuang, “Thudik nangni ki hril, lunghlâna nei viat loiin iamna nin neiin chu hi theipui kung chunga ki itho ang hin tho thei nin ti. Kha vai kha ni loiin hi tâng kuang khom, ‘Irthonin lân, tuikhangliana zu irpai roh’ ti unglân zu irpai a ti. 22 Nin iamin chu chongchaia nin inghi murdi chu hmu nin ti”, tiin a sâma.
Jisua irchamneina an irdonna thu
23 Tempila a lûta, ar chuhai laiin Ochai inlalhai le vântâng upahai kha a kuang an hong kâia, “I irchamneina’n mo hi sinhai hi ni itho? Tu’n mo ircham nang a ipêk?” an tia. 24 Jisua’n a sâma, “Kei khomin nangni irdon ki ti, kha kha nin ni don theiin chu, kei khomin tu irchamin mo ki itho nangni hril ki ti. 25 Johana baptisma kha kho rengata irchamneina mani, Pathian ata mo, mihriam a ta?” a tia. An bingin an irsêla, “Imo ei iti hrang tâk? ‘Pathian ata ei ti le, itho mo Johana kha nin iiam loi?’ ni ti a ta. 26 Mihriam ata ei ti lakin mipuihai hi ichi an oma, Johana kha Deipu’n an bê sikin,” an tia. 27 Khasikin Jisua kuang, “Inhre ma ung,” tiin an sâma. Jisua’n an kuang, “Kei khomin tu irchamin mo hihai hi ki isin, nangni hril bîk no ning,” a tia.
Nâipa inhni chongirkhek
28 Atûn hin nangni’n itin mo nin irngai? “Tiana khan mi inkhatin nâi inhni a neia. A nâi ulian kuang a va fea, a kuang ‘Ki nâi a vuan chu grep irhuana fe’n lân, va sin ro,’ a tia. 29 Ama khan, ‘Nuam ma ung!’ a tia, Khannisianlân, inhnunga chu a ngaituana a thûla, a fe nôk ta. 30 Khanchu inkhatpu kuang khom a fea, khaang dênin a va ti nôka. Ama khan, ‘O ka pa, fe ki ti,’ a tia, khannisianlân, fe maka. 31 Kha nâi inhnihai khan a tu khan mo an pa nuamlam an sin uala?” a tia.
Anni khan a kuang, “A ulian ualpu khan,” tiin an sâma.
Jisua’n an kuang, “Nangni ki hril: khâzana irfuangtuhai le notizuarhaiin Pathian Ram lût nangni an ikhêl tâk kêng. 32 Baptistu Johana khan lampui dik nin izui hrang nangni irhmu a zuanga, lei iam mak chêia; khâzana irfuangtuhai le notizuarhaiin chu an lei iam a ni. Nangni chu nin hmu hnung khomin nin ngaituana thûlin ama iam mak chêi,” a tia.
Grep irhuan chongirkhek
33 Jisua’n an kuang, “Chongirkhek dang irngai nôk roi: voi khat chu mi tu mani ram chongpu a oma, kha mi khan grep irhuan a thoa, dâiin ar kula, grep sôrna hrang khur a choia, a nghâkna hrangin in irsâng a sina. Khanchu, grep kha a nghâk hranghai kuta bângin, ram danga an zin ta. 34 Grep ra irhmal zoro a hong tungin chu, a nghâktuhai kuang khan dongtum va la hrangin a suakhai a tîra. 35 Irhuan nghâkhai khan an suakhai kha an lei chela, inkhat an zêma, inkhat an thata, inkhat lungin an dênga. 36 Khan, suak danghai matona nêka tam ualin a tîr nôka; matonahai ang dênin an lei tho nôka. 37 A hnungkhôn taka chu, ‘Ki nâipa hi chu lei ngîk ngêt an ti,’ tiin a nâipa a tîr tâka. 38 Khannisianlân, irhuan nghâkhai khan a nâipa kha an lei hmu’n chu ‘Hi mi hi a chongpu nâipa a ni; Tho that ei ta, ar chon hi lei lua pe rei!’ an tia. 39 Khanchu, an chela, grep irhuan pên tiang an kêlsuaa, an that ta. 40 Khan, grep irhuan chongpupa a hong tikin, kha irhuan nghâkhai kha imo lohai ni?” tiin Jisua’n a’rdonhaia.
41 Anni khan a kuang, “Kha mi suakhai kha that a ta, grep irhuan kha a nghâkpu dang, a ra irhmal zoroa, a zoro taka a dongtum a pe ngai hrangtu kuang pe a ti,” an tia.
42 Jisua’n an kuang, Pathian lekha thu’n,
‘In sintuhaiin lung an ipai,
hmang hmunboia an ibe kha,
A kila lung poimo tak a hong chang ta.
Ama kha Rengpa itho a ni;
Ei mit hmua hin a irkhêl a ni!’
a iti hi nin itep ngai loi ma ni?
43 Khasikin nangni ki hril, “Pathian Ram hi nin kuang ata lapai ni a ta, ra insua hrang namhai kuang ipêk ni a ti. 44 Tukhom kha lung chunga tûk ka chu irnôi an ta, a idel len vâng chu irnôi indi chit an ti,” a tia. 45 Ochai inlalhai le Farisaihaiin Jisua chongirkhek insîrhai kha an inhriatin, anni chungthu a insîr a nih ti an inhriat tâka. 46 Khasikin ama chel an tuma, khannisianlân, mipuihai kha an chia, mipuihaiin Jisua kha deipu an bê sikin.
1 Mipuihai kuang chongirkhekin Jisua’n thu an sîr nôka, 2 “Irvân Ram chu rêng inkhat a nâipa ta hranga irneina hruaithe leh khan irkhek thei a ni. 3 Hruaithe hranga a ifialhai kha koi buk hrangin a siahlohai a tîra, khannisian hong nuam mahaia. 4 Khan, siahlo danghai a tîr nôka, ‘Ki ifialhai kuang khan, irngai u ta, hruai chu ki’rsiam diam tâka, ki sehrât chalhai le sa ki ivâihai ki thata, itinrêng irsiam diam a ni tâka, hruaithe fâk hrangin hong ta roi ti roi,’ a tia. 5 Khannisianlân, lei ngaisak mahaia, an sintum chit an sina, inkhat chu loia a fea, inkhat chu dukana a fea, 6 mi danghaiin siahlohai kha an chela, an zêma, an thata. 7 Reng kha a sân a ning an mura, khasikin a sipaihai a tîra, kha mi thathai kha an thata, an khua khom an hâl pehai tâka. 8 Khanchu a siahlohai a koia, an kuang ‘Irneina hruai kha siam zoi a ni ta, khannisianlân, ki mi fialhai kha fâkrua ni mahai. 9 Atûn chu lamliana fe unglân, mi nin ihmu murdi hruaithe fa hrangin hong koihai roi,’ a tia. 10 Khanchu siahlohai kha lamliana an fea, mi an ihmu murdi, mi sa le mi sia, an hong koi bûmhaia, irneina in kha mipuiin an sip ta.
11 “Khan, rêng kha khual mihai en hrangin a va lûta, irneina puan sil loi mi inkhat a va hmua. 12 Reng khan a kuang, ‘Mala, irneina puan sil loiin itina mo hin ni ihong lût lam?’ tiin ar dona. Khannisianlân, kha mi kha a dâihreka. 13 Khanchu, rêng khan, a siahlo kuang, ‘A kut le a ke khit unglân, pên tiang inthima pai suak roi. Kha khan chap le irkamnôi om a ti,’ ” a tia. 14 Khan, Jisua’n, “Fialhai chu tamtak an nia, khannisianlân, inthanghai chu tômte an ni,” a tia.
Kaisara kuanga khâzana chôi
15 Khan, Farisaihai kha an suaka, Jisua kha a thu’nsîr rengata an chel theina hrangin an van sîr irhlôma, 16 Khan, an irchutir senkhathai le Heroda pâla mi senkhathai a kuang an tîra, kha mihai khan, “Irchutirtu, thutak nin sîr ngai ti kin inhriat tukhom uksak ual ngai mak chea, tukhom theibîk loiin mihriam ta hranga Pathian lungdo thutak kha nir chutir ngai. 17 Khante, itin mo nir ngai, ni hril ta? Kaisara kuanga khâzana chôi mo a’rthiang, irthiang ma mo?” an tia.
18 Khannisianlân, Jisua’n an lunginchong kha an hriat chiana, an kuang “Vârirlethai! Itho mo ki chong nin ôktir nin itum? 19 Khâzana chôi hranga sum kha nin entir u ta,” a tia. Khanchu, sum kha a kuang an hong chôia, 20 anni kha ar donhaia, “Tu illim le tu irhming mo a chuang?” a tia. 21 Anni khan, “Kaisara,” tiin an sâma.
Khanchu, Jisua’n an kuang, “Kaisara ta chu Kaisara pe unglân, Pathian ta chu Pathian pe roi,” a ti pehaia. 22 Kha thu kha an inhriatin chu ar khêl an ti tak taka, an mâka, an rot pat ta.
Thoinôkna thu an irdonna
23 Kha nî sûn ngeia khan, thoinôkna om mah ti pâl Sadukai senkhathai Jisua kuang an honga. 24 A kuang, “Irchutirtu, Mosia’n, ‘Mi nâi nei loiin a dôngma thisan sianlân, a sangpa khan meithâi kha lua nôkin a upa ta hrangin irchi a inei pe hrang a ni,’ a tia. 25 Khan, kin laia urêng sari an lei oma; a ulian takin dôngma a neia, irchi nei loiin a thia, khasikin a dôngma kha a sangpa kuang a mâk tâka. 26 A sangpa a inhnina chunga khom, khaang dênin a oma, inthumna chunga khom, a sarina dênin, an lua senga. 27 A hnungkhôn taka chu nupangnu khom a thi sa tâka. 28 Khan, thoinôk tika teh tu dôngma tak mo a ini hrang tâk? An rêng lakin an lua senga,” an tia. 29 Jisua’n an kuang, “Nin irngai insual bâka! Asan chu Pathian thu le Pathian irtha nin inhriat no sika a ni. 30 Mithihai an thoinôk tika chu irvâna vântîrtônhai angin om ta an ti, dôngma pasal irnei ta no nihai. 31 Khan, mithihai thoinôk thuhai Pathianin nangni a insîr pe kha nin la itep ngai loi ma ni? 32 ‘Keima Abrahama Pathian, Isaka Pathian Jakoba Pathian,’ ki ni a tia, Pathian chu ihringhai Pathian kêng a ini; mithihai Pathian ni ma,” tiin a sâma. 33 Mipuihaiin an inhriatin a irchutirna kha ar khêl an ti tak taka.
Thupêk roiinpui tak
34 Jisua’n Sadukaihai kha a sêl indonghai ti Farisaihaiin an inhriatin chu, an irhmukhôma, 35 an laia mi inkhat, Dân irchutirtu khan ama fiana hrangin, 36 “Irchutirtu, dâna hin i thupêk tak hi mo a roiinpui tak?” tiin a’rdona.
37 Jisua’n a kuang, “ ‘Rengpa ni Pathian chu ni lungrîl murdi’n, nir tha murdi’n, ni lunginchongna murdi’n lungthung roh!’ ti hi, 38 Hi hi thupêk roiinpui le poimo tak a ni. 39 Thupêk poimo inhnina a irangpui chu ‘Nangma lung ni irthung angin ni bômhai lungthung ro, ti hi,’ tiin a sâma. 40 Mosia Dân pumpui le deipuhai irchutirna murdi khom hi thupêk inhni hin a ihuap zit a ni,” a tia.
Mesia chungchânga irdon infelna
41 Farisai senkhathai an irchun laiin Jisua’n an kuang, 42 “Mesia hi itin mo nin irngai? Tu nâipa ma ni?” tiin ar donhaia. Anni khan, “Davida nâipa a ni,” tiin an sâma. 43 Jisua’n an kuang, “Khan, itho mo Davida kha Irtha’n Rengpa tia a ikoi?
44 Rengpa khan ki Rengpa kuang,
‘Ki chang tiang toi roh,
ni râlhai ki ke hnuaia ki sia zoi mâka chu,’
a iti a ni.
45 “Davida’n, ‘Rengpa,’ tiin a koiin teh, itin mo Mesia kha Davida nâipa a ini thei hrang?” a tia. 46 Khanchu, tûte’n Jisua kha sâm thei mahaia, kha nia irthokin chu tûte’n ite irdon ngam ta mahai.
Jisua’n Dân irchutirtuhai le Farisaihai kuang ata irdîn hranga a hrilna
1 Khan, Jisua’n mipui le a irchutirhai kuang thu an sîra, 2 “Dan irchutirtuhai le Farisaihai hi Mosia Dânhai hrilfia hranga phal an ni. 3 Khasikin tho hranga nangni an ibe murdi chu nin zômin, nin izui hrang a ni; Khannisian, an om dân chu zui no roi, an insîrhai hi an hmang ngai no sikin. 4 Puakrik pêl intak takhai an siama, mihai chunga an bâng ngaia, khan kha mihai sanna hrangin an kutpârhai lua hmang nuam ngai mahai. 5 An sintho murdi kha mihai hmu hrangin kêng an itho ngai; an bân khit le michal khitnaa Pathian chong irziakhai hi en u ta, an inhrol vang na! An songkol irfual irvonahai khom hi en u ta, an sei vang na! 6 Hruaithena hmuna toina satakhai, Sinagoka toina langsârhai, dukana chubai irmûk hai, 7 mihaiin ‘Rabbi’ an itihai an irngaisâng ngai.
8 “Nangni chu ‘Rabbi’ tia koi ni viat no chin ni; urêng khat inzen nin nia, irchutirtu inkhat vai nin nei sikin. 9 Irnêng chunga hin tûte ‘Ka pa,’ ti no roi, pa inkhat vai irvâna nin nei sikin. 10 ‘Hruaitu,’ ti khomin irkoi no roi. Mesia vai hin nin hruaitu a ni sikin. 11 Nin laia a roiinpui tak chu nin sinthopu a ini hrang a ni. 12 Tukhom irngaiinhlu ka chu irhniam an ta, irngaiintôm ka chu chôiindôm ni an ti.
An vârirletna Jisua’n a dem
13 “Nangni Dân irchutirtu le Farisai vârirlethaio, nin chung a rik! vân Ram lampui kha mihai nin khâr pehai ngaia; nangni lak lût mak chêia, a lût hranghai khom an ilût lak phal mak chêi. 14 Nangni Dân irchutirtu le Farisai vârirlethai, nin chung a rik! Meithâi sum nin fâka, mi huangna’n sôt tak tak nin chongchai ngai, khasika khan nin dûk tong lûminna ual a ti. 15 Nangni Dân irchutirtuhai le Farisaihaio, nin chung a rik e! mi inkhat irlet hrangin tuikhanglian le ram phêk pumpui nin irfang ngaia, khan, a hong irletin chu kha mi kha nangni nêka a bâk inhni’n hrem hmuna fe hrangin nin siam ngai, 16 ‘Nangni hruaitu mitcho, tukhom Tempil sâlin mi’n khomâksâm sianlân, ite ni mah, Tempil rângachak sâla khomâksâm chu a isua hrang a ni,’ tituhaio, nin chung a rik e! 17 Nangni, mi invêt mitchohaio, i hi mo a roiinpui ual, rângachak mo rângachak irthiang infâitu Tempil kha mo? 18 Mi’n maichâm sâlin khomâksâm sianlân, ite ni mah, khataka thilpêk sâla khomâksâm chu a isua hrang a ni nin ti saa. 19 Nangni mitchohaio, i hi mo a roiinpui ual, thilpêk mo thilpêk infâitu maichâm kha mo? 20 Khasikin, maichâm sâla khomâksâm chu maichâm le a chunga om murdi sâla khomâksâm a ni. 21 Tempil sâla khomâksâm chu Tempil le a luatu sâla khomâksâm a ni. 22 Irvân sâla khomâksâm chu Pathian toihmun le a chunga toi sâla khomâksâm a ni.
23 “Nangni Dân irchutirtuhai le Farisai vârirlethaio, nin chung a rik! A zoro taka vâng ngai, podina hai, lêngmiser hai, kumhoi hai sôma inkhat nin pêk ngaia, Dân thua poimo ual, dikna hai, lungkhamna hai; iamomna hai nin ngainêp ngai, khannisian, khahai kha kêng nin itho rua tak chu a ni, a danghai khi ma ual loiin. 24 Hruaitu mitchohaio! Nin tui ina thoivâi irthît infâia, saringsei chu nin invol ngai.
25 “Nangni Dân irchutirtuhai le Farisai vârirlethai! nin chung a rik: Nin khilât le khêng pên tiang nin infâia; a sûng tiang chu hlêprûkna le insumloina’n a sip a ni. 26 Farisai mitchohai! khilât sûng tiang chu infâi bak unglân, a pên tiang khom fâi sa a ti.
27 “Nangni Dân irchutirtuhai le Farisai vârirlethai! Thân lung nâl invâra, pên tianga sataka inlang, khannisian a sûng tiang chu mithi ruhai le ruak porinchena tinrênga sip ang kha nin ni. 28 Khaangin mi tin mithmua pên tiang chu a sa angin nin inlanga, khannisian, nin sûng tiang chu vârirletna le sualnaa sip nin ni.
Jisua’n hrem an ini hrang thu an sîr
29 “Nangni Dân irchutirtuhai le Farisai vârirlethai! nin chung a rik e! Deipuhai thân nin sina, mi felhai inhriatmaina lunghai nin irvo ngaia; 30 ei irchibulhai om laia khan lei om tâk khom inlân, Deipuhai thisen an insuakna khan chu kop no ih, nin ti ngai. 31 Khasikin deipuhai lei thattuhai irchia mi nin nih ti nin inlang chak a ni, 32 Fe unglân, nin irchibulhaiin an lei iphut kha irzoitir roi. 33 Nangni mirûlhai le mirûl irchihaio! Hremhmun fe hranga rêlinchukna irthokin itin mo zôk thei hrangin nin irtûng? 34 Khasikin nangni ki hril, nin kuang deipuhai, mi vârhai, Dân irchutirhai hong tîr ki ti; senkhat that nin ta, hembe nin ti; senkhat Sinagoka zêm nin ti, kho tina inhnot irzûl thiai nin ti. 35 Khanchu, Abela, mi fel tak thisen nin insua ata, hmun irthiang le maichâm kâra Barakia nâipa Zakaria thisen nin insua dên khan, irnêng chunga mi fel thisen suak murdi moh chu nangnihai chunga chum a ti. 36 Thudik nangni ki hril, khahai murdi kha atûnlai mihai chunga a itung hrang a ni.
Jisua’n Jerusalem lung a thungzia
37 “O Jerusalem, Jerusalem! Deipuhai thattu, Pathianin ni kuanga itîra omhai lei dêng thattu! Ârpuinu’n a têhai a mitha hnuaia a iop khôm angin ni nâihai voi iza mo op khôm ki tuma, nuam mak che? 38 Irngai u ta, nin Tempil kha marakin, a korongin om ta a ti. 39 Nangni ki hril, Rengpa irhminga hong chu Pathianin satvur ri se, nin ti mâka chu atûna irthokin ni hmu ta no chin ni,” a tia.
1 Khan, Jisua a suaka, Tempil ata a fe laiin, Tempil inen hrangin ar chutirhai a kuang an honga. 2 Ama khan an kuang en roi, “Thudik nangni ki hril, hitaka lung inkhat khom hi a hmuna om no ni; an rêngin paiin om zit an ti,” a tia.
Buaina le dengintheitirna
3 Khan, Jisua’n oliv tânga a toi laiin, a irchutirhaiin a bingin an hong irhmupuia, “Nin hril ta, hihai hi itika mo a itung hrang? Ni zuang nôkna hrang le rammual mongna hrang irsinsiana sinirkhêl kha i imo a iom hrang?” tiin an irdona.
4 Jisua’n an kuanga, “Tukhomin nangni an huang nona hrangin, irdîn roi. 5 Mi tamtakin, ‘Mesia kha ki nih,’ tiin keima irhming songin hong an ta, mi tamtak huang an ti. 6 Nin kôla irdoina thuthang lan hriat nin ta, khannisianlân, nin milung inbuai no roi. Kha thilhai kha chu a hong itung ngêt hrang a ni, khannisianlân, a mongna chu la ni no ni. 7 Nam le nam irdoi an ta, ram le ram irdoi an ti. Hmun tina châm tâk a ta, hnîngnu inhnîng a ti. 8 Khahai kha nâiha sê ar phut ta tihna a ni.
9 “Khanchu, deng nangni inthei hrang le nangni that hrangin nangni lan cheltir an ti. Keima sikin nam tinin nangni khôkmâk an ti. 10 Kha tika chu mi tamtakin an iamna masan an ta, irchel irhlômtir an ta, irkhôkmâk irhlômtir an ti. 11 Khanchu, deipu dol tamtak la hong suak an ta, mi tamtak la huang an ti. 12 Khan, sual a la pung hrang sikin mi tamtak lungthungna la dâi a ti. 13 Khannisianlân, tukhom a mong dêna tuang diar ka chu saninhringin om a ti. 14 Khan, hi Ram Thurchi Sa hi nam tin inhriatna hrangin rammual pumpuia ihrilin la om a ta, khanchu, a mongna hong tung a ti.
Intakna ichiom tak
15 “Khanchu, intakna ichiom porinche tak, deipu Davida lei insîr kha hmu nin ta, hmun irthianga khan ngîr hmu nin ti,” (khan a tep murdi’n chu a omzia inhre ri se). 16 Khanchu, “Judai rama omhai kha tânga rot ri sehai. 17 Mi, a in chunga om khom in sûnga a neinun la suak hrangin chum no ri se. 18 Mi, loia om khom a puan la hrangin kîr no ri se. 19 Kha nî khan chu inrâihai le nâite pom laihai chung chu a rik vang na! 20 Nin rot hrang zoro kha phalbia mani, Sabat nia mani, a hong tung nona hrangin Pathian kuang chongchai roi. 21 Kha zoro dengthei inthang om hrang kha chu rammual irsiang ata atûn ten hin la om ngai mah, om khom om nôk ta no ni. 22 Khannisianlân, Pathianin kha sûnhai kha an bong ta ni no len vâng sian chu tûte hringin suak no nihai. A mi inthanghai sikin Pathianin kha sûnhai kha inbong a ti.
23 “Khanchu, tukhomin nin kuang, en u ta, Krista chu, ‘Hi hi mani, so so mani,’ an ti khomin taksôn no roi, 24 Krista dolhai le deipu dolhai an la isuak hrang a ni, khahai khan thei len vânghai sian chu inthanghai lua an huang theina hrangin irsinsiana le thilirkhêl inthang tho an ti. 25 Irngai roi! A zoro a hong tung mân nangni ki lei ihril a ni, 26 Tukhomin nin kuang, ‘En ta, ramchâra a om,’ an ti khomin fe suak no roi, ‘A chontan sûnga a om’ an ti khomin taksôn no roi. 27 Mihriam Nâipa zuang nôk hrang chu kôlirtêka, sak tiang ata thang tiang ten irtêk ang kha a ni hrang sikin.
28 “Khoa khom saruak omna rikipa raikosohai omkhôm an ti,” a tia.
Mihriam Nâipa zuang hrang thu
29 “Khan, kha dengthei zorohai kha ar zoi le chu misa inthim a ta, tha vâr ta no ni, irvân ata ârsihai tâk a ta, irvân sinthotheinahai kha inhnîng a ti. 30 Kha zoro tika chu irnênga nam tinrêngin chapin an rôp irchûm an ta, Mihriam Nâipa hi sinthotheina le roiinpuina irkhêl tak le irvân sûm laia a zuang hmu an ti. 31 Bekul inring tak tum ni a ta, khanchu, a vân vântîrtônhai kha rammual kil minlia tîr suakhai a ta, kôlkung rengata kiang tianga kôlkung dênin a mi inthanghai chu bukkhômhai an ti.
Theipui kung ata irchu hrang
32 “Khanchu, theipui kung om lam ata hi irchu hrang nin nei; a ôn a hong irnoia, a hna a hong incherin chu kholum a hong nâi tah ti nin inhriat ngai. 33 Khaang dênin, nangni khomin khahai murdi nin hmu tika chu ama kha a zuang nâi tâka, mikot bula a om tah ti inhre roi. 34 Thudik nangni ki hril, khahai murdi kha a tung mâka chu atûn laia mihai hi boi no nihai. 35 Irnêng le irvân boi a ta, ki thu chu boi no ni.
Tukhomin a nikhua le a zoro an inhriat loi thu
36 “Khannisianlân, kha nikhua le a zoro kha chu Pa ti no chu tûte’n inhre mahai, irvâna vântîrtônhai khomin, Nâipa khomin inhre mahai. 37 Mihriam Nâipa zuang nôkna chu Nova dam laia ang khan ni a ti. 38 Tuilian mân, Nova irkuanga a lût ni dênin an fâkin an nêka, dôngma pasal an irnei ngai, 39 tui a hong liana, an rêngin an irhmang zit mâka chu imo a hong itung ite inhre mahai; Mihriam Nâipa zuang nôkna chu, khaang tak khan nih a ti; 40 Kha tika chu mi inhni loia sin an ta, inkhat ihruaiin om a ta, inkhat imâkin om a ti. 41 Nupang inhni’n bu suk an ta, inkhat chu ihruai ni a ta, inkhat chu masan ni a ti.
42 “Khanchu, irtûng chianin om roi, itik nia mo nin Rengpa a izuang hrang inhre mak chêi. 43 Khannisianlân, hi hi nin inhriat, inru hong hrang in neitu’n inhre sianlân, lei irtûng a ta, a in inmok no ni. 44 Khasikin, nangni khom irtûng chianin om roi, nin sabei no lai takin Mihriam Nâipa a zuang hrang sikin.
Siahlo iamom le iamomloi
45 “Siahlo iamom vâr tak, a pu’n a in sûng charêla, siahlo danghai zoro tina an fâk sem pe hranga hruaitua a isiam kha tu mo ni ni? 46 An pu a honga, khaanga sin thoa siahlo a hong ihmu kha a vân a sa. 47 Thudik nangni ki hril, a neinun murdi chunga a pu khan a zêk hrangin phun a ti. 48 Khannisianlân, siahlo saloi a niin chu, a milungin ka pu chu hong lat no nih ti a ta, 49 a siahlo chanpuihai kha lei zêm a ta, zu’nruihai laia fâkin in a ti. 50 Khanchu, kha siahlo pu kha a tûng no lai tak le an hriat no zoro lai takin hong pe a ti. 51 A pu khan inhnot suakpai a ta, vârirlethai idong anga kha indong a ti. Kha khan chap le irkamnôina om a ti.
1 “Kha zoi hnung chu irvân Ram chu dôngmate sômhai, an meiserhai chôia, moineitu don hranga fehai leh irkhek ni ta a ti. 2 An laia ringa an intoa, ringa an vâra. 3 An tohai khan an meiserhai an chôia, a tui chôi sa mahai, 4 A vârhai khan chu an meiserhai an chôia, a bûra khan a tui an chôi saa. 5 Moineitu kha a zuang inhnung sikin an lei inmusua, an lei in tâka.
6 “Zânlai taka chu ‘Moineitu a zuang ta! A don hrangin hong suak ta roi!’ tiin khêk irhai a zuang om tâka; 7 Khanchu, dôngmate sômhai kha an thoia, an meiserhai an irfûktir tâka. 8 Khan, an tohai khan a vârhai kuang khan, ‘Nin meisertui kha ni sem roi, kin meiserhai an ithi zoi hrang tâk kêng,’ an tia. 9 A vârhai khan ‘Nangni pe thei no ni ung, keini le nangni hrangin chu ruk no ni. A zuarpuhai kuang fe unglân, var cho roi,’ tiin an sâma. 10 Khanchu, dôngmate intohai kha meisertui ircho hrangin an fea. Khante, an fe kârin moineitu kha a zuang ta. Dôngmate ringa ar siamhai chu ama leh irbiakna hruaithe fa hrangin an lûta, in an khâr ta.
11 “Inhnunga chu dôngmate danghai khom an hong tung tâka, ‘Ka pu, ka pu, mikot nin hong roh,’ an tia. 12 Ama’n Thudik nangni ki hril, nangni inhre ma ung,” tiin a sâma. 13 Khasikin, irsiam diamin om roi, a nikhua le a zoro kha nin inhriat no sikin.
Siahlo inthumhai kuanga talent pêk chongirkhek
14 “Kha tika chu irvân Ram chu mi inkhat an zin hrang tôna, siahlohai a koia, sum inkoltir leh irkhek ni ta a ti. 15 Siahlo inkhat chu talent ringa a pêka, inkhat kuang inhni, inkhat dang kuang talent inkhat, an iruk ang dôr chit, pêk an nia, khanchu, a fe tâka. 16 Talent ringa dongtu kha a va inpung zôi zela, talent ringa dang a hlo suaka, 17 khaang dênin talent inhni dongtu khom khan talent inhni dang an pung nôka. 18 Talent inkhat dongtu chu irnêng a va choia, a pu sum kha a phûm tâka.
19 “Zoro sôt ian hnunga chu kha siahlohai pu kha a honga, an sum enkol chungchâng an felpuihaia. 20 Talent ringa dongpu kha a honga, talent ringa dang a hong chôia, ‘Ka pu, nangin talent ringa ni nin dontira, en ta, talent ringa dang ki hlo suak,’ a tia. 21 A pu khan a kuang, ‘Siahlo sa le iamom, ni tho’n sa! tômte chunga iam ni oma tamtak chunga nang inomtir ki ti; ni pu lômna dong sa roh!’ a tia.
22 “Talent inhni dongpu kha a honga, ‘Ka pu, nangin talent inhni ni nin koltira, en ta, talent inhni dang ki hlo suak,’ a tia. 23 A pu khan a kuang ‘Siahlo sa le iamom, ni tho’n sa, tômte chunga iam ni oma, tamtak chunga nang inomtir ki ti, ni pu lômna dong sa roh!’ a tia.
24 “Talent inkhat dongtu khom kha a hong, ‘Ka pu, ni ni ti kher kher ti kin hriata, ni itû loina khom ni bûm ngaia, chi ni inthek loina khom a ra ni ât ngai a ni. 25 Khasikin, nang ki chia, ni talent kha irnênga ki phûma, en ta, ni ta dên kha ni ihmu nôk a ni,’ a tia. 26 A pu khan a sâma, a kuang, ‘Nangma siahlo sual le thaboipa, ki itû loina khom ki âta, ki inthek loinaa khom a ra ki bûm ngai ti nin hriat mo? 27 Khante, itho mo ki sum kha sum inpungtuhai lei pe ro ba, ki hong kîrin a pung le ile ki ihmu hrang pial te! 28 Khanchu a talent hi a kuanga irthokin la unglân, talent sôm neitu kha pe roi. 29 A neitu ka chu pe belsa an ta, nei intam ok a ti; a nei loi chu a inei sun khom lâkpai pe rip ni a ti. 30 Khanchu, siahlo hmang hmunboi hi pên tiang inthima pai suak roi; kha khan chap le irkamnôi om a ti,’ a tia.
Roirêlna hnungkhôn
31 “Khan, Mihriam Nâipa chu vântîrtôn murdi leh roiinpui taka a zuang tikin chu, a rêngtoihmun roiinpui taka toi a ta, 32 a makunga khan nam tin inkhôm an ta, khanchu, belra nghâktu’n kêl le belra a isen angin pâlhniin sen a ti. 33 Mi felhai chu a chang tiang sia a ta, a danghai kha a vei tiang sia a ti.
34 “Kha tika chu inlaltak rêng khan a chang tianga mihai kuang, ‘Hong roi, ka pa satvurhaio, hong unglân, rammual siam irphut ata nin ta hranga ram sinsiam kha chang roi. 35 Ki phîng a châmin nangni’n fâk hrang nin ni pêka, ki tui an hrâlin nangni’n in hrang nin ni pêka; mikhual ki niin, nin ina nin ni intungtira; silkai ki’rsamin puan nin ni insiltira; 36 Ki dam no’n nin ni donsuia, intângna ina ki omin, nin ni pan ngai,’ la ti a ti.
37 “Khanchu, mi felhai khan, ‘Rengpa, itika khan mo phîngchâmin nang kin hmua bu nang kin ipêk! tuiinhrâlin ni oma, tui nang kin ipêk? 38 Itika khan mo mikhualin nang kin hmua, nang kin intungtir? silkai irsamin ni oma puan nang kin insiltir? 39 Itika khan mo dam loiin mani, intângnna ina mani nang kin hmua nang kin ipan?’ tiin la sâm an ti. 40 Inlaltak khan, ‘Thudik nangni ki hril, hi ki urêng chîntehai laia inkhat chunga nin itho hi, ki chunga nin itho a ni,’ tiin la sâm a ti.
41 “Kha zoia chu, a vei tianga mihai kuang khom khan, ‘Khosâl tonghaio, kumkhuaa mei, diabola le a siahlohai ta hranga lei siama khan ni rotsan roi. 42 Ki phîng a châmin nangni’n fâk hrang ni pe mak chêia, ki tui an hrâlin in hrang ni pe mak chêia; 43 Mikhual ki niin nin tungtir mak chêia; silkai ki’rsamin puan nin siltir mak chêia, ki damloi lai le intângna ina ki om laiin ni donsui mak chêia,’ la ti a ti. 44 Anni khom khan, ‘Rengpa, itika khan mo phîngchâmin mani, tuiinhrâlin mani, mikhualin mani, silkai irsamin mani, damloiin mani, intângna ina mani nang kin hmua nang kin idonsui loi?’ tiin la sâm an ti. 45 Ama khan, ‘Thudik nangni ki hril, hi mi chîntehai laia inkhat chunga nin itho loi chu ki chunga tho loi nin ni,’ tiin la sâm a ti.
46 “Kha mihai kha, kumtuang hremnaa fe an ta, mi felhai chu kumtuang hringnaa fe an ti,” a tia.
1 Jisua’n kha thu murdi kha an sîr zoiin chu a irchutirhai kuang, 2 “Sûn hni hnunga Ferkân kût a hong iom hrang a nih ti nin inhriat, Mihriam Nâipa hi hembe hrangin ipêk ni a ti,” a tia.
3 Khanchu, Ochai inlaltak Kaiafa ina irhmukhômna an neia, 4 inrûkin chela, that hrang lam an ngaituaa. 5 Khannisianlân, “Kût sûngin chu ni no ri se, khano’nchu vântâng laia buaina suak likna ti,” an tia.
Bethani-a Jisua sahriak polin a om
6 Khan, Jisua chu Bethani-a phâr Simona ina a oma. 7 Jisua bu a nêk laiin, nupang inkhat alabastar bûrin sahriak mirimhoi man tamtak hong chôiin, a luah a buak pea. 8 Irchutirhaiin an hmu’n chu an ning an mura, “I hranga a inchêk mo? 9 Hi mirimhoi hi man tamtaka zuarin, inrianghai kuang pe thei kêng a ini,” an tia. 10 Jisua’n an itihai kha an hriata; an kuang, “Itho mo hi nupangnu hi nin inbuai? Keima hrangin sin sa le enhoi tak a itho a ni. 11 Inrianghai chu nin laia om mai an nia, khannisianlân, kei chu nin kuang om mai no ning. 12 Hi sahriak, mirimhoi hi ki takpuma a ibuak hi, ni phûm hranga a ni sinsiam diam kêng a ini. 13 Thudik nangni ki hril, rammual pumpuia Thurchi Sa hi an hrilna kipa hi nu sintho khom hi, ama inhriatmaina hrangin insîr sa ngai an ti,” a tia.
Juda’n Jisua incheltir a tum
14 Kha zoi hnungin chu sômhleihnihai laia inkhat, Juda Iskariota an iti kha, Ochai inlalhai kuang a fea, 15 “Ama kha nangni incheltir ki ti, imo nin ni ipêk hrang?” a tia. Sum sômthum an tepa, an pêk tâka. 16 Khataka irthokin chu Juda khan Jisua chu an kuta a bâng theina hrang lam kha a zong mai tâka.
Jisua le a irchutirhai Ferkân kût an fâk
17 Bai chol koploi kût sûn masa taka khan irchutirhai kha Jisua kuang an honga, “Kho hmuna mo Ferkân kût khalâi ni otna hrang sinsiam inlân ni inuam?” an tia. 18 Ama khan, “Khopuia tu mo khat kuang va fe unglân, a kuang, ‘Irchutirtu khan ki zoro anâi tâka, ki irchutirhai leh Ferkân kût ni ina hmang kin ti duah, a ti’ va ti roi,” a tia. 19 Khanchu, Jisua’n thu a ipêk ang dên khan irchutirhai khan an thoa; Ferkân kût khalai kha an sinsiam tâka.
20 Khohloia chu irchutir sômhleihnihai le khalai kha an ot suama. 21 Khalai an irhîl lai takin Jisua’n an kuang, “Nangni ki hril, nin laia mi inkhat hin nin cheltir a ti,” a ti pehaia. 22 Khanchu, irchutirhai kha a sân an kamanga, a kuang, “Rengpa kei mo ki ini?” an ti senga. 23 Jisua’n an kuang, “Khalai ni otpuipu ngêt hin nin cheltir a ti. 24 Mihriam Nâipa hi a thurchi an irziak ang takin a ife hrang a ni; khannisianlân, Mihriam Nâipa incheltir hrangtu chung chu a rik; kha mihriam kha chu irsiang no sian, a ta hrangin sa ual a ti,” a tia.
25 An cheltirpu hrang Juda khan a sâma, “Rabbi, kei mo ki ini?” a tia. Ama khan, “Ni ti khate,” a tia.
Rengpa zânbu
26 Khan, an fâk laiin Jisua’n bai a lâka, lômthu an sîr zoiin a khoia, a irchutirhai kuang a pêka, an kuang, “La unglân, fa roi, hi hi ki taksa a ni,” a tia. 27 Kha hnung chu, khilât a lâka, Pathian kuang lômthu an sîr zoiin chu an kuang a pêka, an kuang, “In roi, nin rêngin; 28 hi hi ki thisen mi tamtak sual ngaidamna hranga suak hrang, Pathian thuthung indetpu kha a ni. 29 Nangni ki hril, ka pa Rama nangni leh uain thar ki in nî a tung mâka chu hi uain hi in nôk ta no ning,” a tia. 30 Kha zoiin chu hla inkhat an saka, an sak zoiin chu Oliv tâng tiang an fe ta.
Jisua’n, Petera’n a iphil hrang thu a lei insîr
31 Khanchu, Jisua’n an kuang, “A vuan zân ngêt hin nin rêngin laizâm tho nin ta, ni masan zit nin ti, ‘Belrapu chu zêm ki ta, belrahai chu indarh zit an ti,’ ti irziak a ni kha. 32 Khannisianlân, kaithoia ki om hnungin Galili rama hong masa ki ta,” a tia. 33 Petera khan, “An rêngin nang an irheisan zit khomin keima’n chu nang irheisan viat no ning,” tiin a sâma. 34 Jisua’n a kuang, “Thudik nang ki hril, âr a khuang mân a vuan zân hin voi thum ni phil ni ti,” a tia. 35 Petera’n a kuang, “Ni kuang thi a chuk khomin nang phil viat no ning,” a tia. Khaang dênin irchutir murdi khan an ti chita.
Gethsemani irhuana Jisua chongchaina
36 Kha zoia chu, Jisua chu annihai leh hmun inkhat Gethsemani an itia khan an fea, a irchutirhai kuang khan, “So son ki va chongchai sûngin hi hin lei toi roi,” a tia. 37 Petera le Zebedaia nâihai inhni kha a hruaia, irtha’nvâiin a kamang tak taka. 38 An kuang, “Ki’rtha an vâi tak tak, thipui hrang ang dôr a ni. Hi hin om unglân, ni lei hrungpui sa roi,” a tia. 39 Maton tiang a va fe viata, irnênga inbokin a chongchaia, “O ka Pa, thei a niin chu, hi khilât hin ni lôi hrâm sian, khannisianlân, keima ircham ni loiin nangma ircham cham ni ri se,” a tia.
40 Kha hnung chu a hong kîr nôka, irchutir inthumhai kha a inin a hong hmuhaia, Petera kuang, “Itin mo nangni inthum hi te dârkâr khat lua nin ni ihrungpui viat thei loi? 41 Inthêmnaa nin lût nona hrangin irtûng chianin chongchai roi, Irtha’n chu a nuama, taksa’n a iphari loi a ni,” a tia. 42 A va fe nôka, a chongchaia, “Ka Pa, hi tuangna khilât hi ki in noa, khâipai thei a ni no’n chu, nangma ircham ni ri se,” a tia. 43 A hong nôkin chu a irchutirhai kha a in ngêtin a hong hmuhaia; a sân an inmu a suak sikin. 44 A mâkhai nôka, a voi thumna’n a iti ngai dên kha ti nôkin a chongchai nôka. 45 Kha zoia chu a irchutirhai kuang a honga, an kuang, “Atûn ten inmusu’n nin la irngam chian mo? Irngai u ta, a zoro chu a hong tung ta. Mihriam Nâipa hi mi sualhai kuta an incheltir hrang a ni ta. 46 Thoi unglân fe ta ei ti, en u ta, a nin chel hrangtu hi a hong nâi ta,” a tia.
Jisua an chel
47 A la chong lai takin irchutir sômhleihnihai laia Juda kha a hong tunga, ama pâla khan Ochai inlalhai le Dân irchutirtuhai le vântâng ulian itîr tamtakhai, khandai le hêmvuak chôiin an hong tung tâka. 48 An cheltir hrangtu khan irsinsiana hrang a lei hril diam tâka; “A biang ki itum tak kha ama ni a ti; chel zôi roi!” tiin. 49 Juda kha Jisua kuang a theng thaia, a kuang, “Irchutirtu, ni chunga irtharngamna om ri se,” tiin a biang a tuma. 50 Jisua’n a kuang, “Mala, ni itho hrang chu tho lat roh,” a tia. Khanchu, an honga, Jisua chu an chel tâka. 51 Jisua kuanga omhai laia inkhatin a khandai a phôia, Ochai inlaltak siahlo mikuar kha a sât thâkpai pea. 52 Jisua’n a kuang, “Ni khandai kha a siana hmuna se nôk ta roh. Khandai inlekhai chu khandai ngêta thi an ti. 53 Vântîrtôn sângruk le hmun sômhleihni nêka tam ni zuang tîr pe zôi hrangin ka Pa ki ingên thei loi mo nin ni isôn ma ni? 54 Khannisian, ngên ta inlân Pathian lekha thu kha itin mo a hong itung thei hrang?” a tia. 55 Khanchu, Jisua’n mipuihai kuang khan, “Khandai le hêmvuak chôiin inru chel hrang anga ni chel hrangin nin ihong mo? Tempila a nitin mi ki’rchutir ngaia, ni chel mak chêia. 56 Khannisianlân, deipu lekha thuhai kha a hong tung theina hrangin hihai murdi hi a hong iom a ni,” a tia. Khannisianlân, a irchutirhaiin ama kha an mâksana, an rot zit tâka.
Jisua roirêltuhai makunga a ngîrna thu
57 A cheltuhai khan Jisua kha Ochai inlaltak Kaiafa ina Dân irchutirtuhai le upahai lei irbuk khômnaa khan an hruaia. 58 Petera khan hla vit ata Ochai inlaltak in tual dênin a zuia. In tual sûnga a lûta, an roirêl mongna ten hmu tumin siahlohai laia a toi saa. 59 Ochai inlalhai le Dân irchutirtuhai le Sanhedrin mi murdihai khan Jisua an that theina hrangin milakin hnôlna an zong, an zonga. 60 Khannisianlân, hmu mahai, mi tamtak hongin a chungthua milak hril khomhai sian a hnungkhôn taka mi inhni an honga, 61 “Hi mi hi Tempil insiata, ‘Sûn thum sûngin sin zoi nôk thei ki ti,’ a ti,” an tia. 62 Khanchu, Ochai inlaltak kha a ngîr suaka, a kuang, “Hihai nang isêlna hi ni isâm thei loi mo? Nang an isêlna hi itin mo?” a tia. 63 Jisua kha a dâihreka, Ochai inlaltak khan, “Pathian hring irhmingin nang ki ti; Krista, Pathian Nâipa chu ni ni lele mo ni hril roh,” a tia. 64 Jisua’n a kuang, “Ni ni ti mai tâk khate. Khannisianlân nangni ki hril: nakana chu, atûn ata Mihriam Nâipa hi Itinrêngthothei chang tianga toia, irvân sûm chunga zuang la hmu nin ti,” a tia.
65 Khanchu, Ochai inlaltak khan a puansilhai an pot thêra, “Pathian a hril insiat tah ti inhriatpuitu dang nang ta mah, Pathian a hril insiatzia chu nin inhriat ta! 66 Itin mo nin insâp?” a tia. Anni khan, “Thi hrangin a ruk,” an tia. 67 Khanchu, a hmâia an inchila, an zêma; senkhatin, 68 “Nin hril roh. Krista! tu mo nang a zêm!” tiin an inbêna.
Petera’n Jisua a phil thu
69 Khan, Petera kha irhuan sûng, kholaia a toia, khan dôngmate inkhat a kuang a honga, “Nang khom Jisua Galili rama mi kuang ni om ngai,” a ti pea. 70 Khannisianlân, an rênga makunga a phila. “I thurchi mo ni insîr inhre ma ung,” tiin a sâma, 71 irhuan dâi mikot pên tiang a va suaka, dôngmate dangin a lei hmu nôka, khataka omhai kuanga khan, “Hi mi hi Nazaret Jisua kuanga om ngai kha a ni duah,” a tia. 72 “Kha mihriam kha inhre ma ung,” tiin Petera khan khomâk irsâmin a phil nôka. 73 Chomkhat hnunga chu khataka ngîrhai khan Petera kha, “Nang khom hi an laia mi ngêt ni nih ti ni chong lama hin kin inhriat thei,” an hong tia. 74 Ama khan, khosâl irhuamin khomâk ar sâma, “Kha mihriam kha inhre ma ung,” a tia. 75 Âr a khuang zôi tâka, “Âr a khuang mân nangin voi thum ni phil ni ti,” tia Jisua’n a iti kha Petera khan an hriat suaka, khanchu a suaka a chap ngûi ngûi tâka.
1 Zîng tiang inmân taka Ochai inlalhai le vântâng upa murdihai khan Jisua that hrang dân an rêla. 2 An khita, an tuanga, Pilata, Rom Ramoptu kuang an pêk tâka.
Juda thi thu
3 An cheltirtu Juda khan Jisua kha thiamno an changtir ti an hriat le ar sîra, sum sôm thum kha Ochai inlalhai le upahai a pêk khîrhai nôka. 4 “Mi fel thi hrangin kin cheltir kha ki lei tho insual a ni,” a tia. Anni khan, “Kha kha kin ta hrangin imo a poina om? Nangin ni nuam nuamin lo roh,” an lei ti pea. 5 Khanchu, sum kha Tempila a pai inlûta, a fea, a va irkhâi that tâka. 6 Ochai inlalhai khan sum kha an lâka, “Hi hi Tempil suma sia chu irthiang mah, thisen man kêng a ni,” an tia. 7 Khanchu an chonga, mikhual phûmna hrangin bêl suktu hmun an lâk tâk. 8 Khasika khan, kha hmun kha, atûn ten “Thisen Hmun,” an ti mai tâka. 9 Khanchu deipu Jeremia’n,
“Israel nâi tuhaiin mo,
sum sômthum an tepa,
a man kha an lâka,
10 Rengpa’n thu a ipêk ang khan,
Bêl suktu hmun man hrangin sum kha an hmang ta,”
a iti kha a hong idik tâk a ni.
Pilata’n Jisua chongirdon a pêk thu
11 Jisua kha Rom ramoptu makunga a ngîra, ramoptu khan, “Judahai rêng mo ni ni?” tiin ar dona. Jisua’n, “Ki ni,” tiin a sâma. 12 Khannisianlân, Ochai inlalhai le upahaiin an isêlna thua chu ite khomin sâm mah. 13 Khasikin Pilata’n a kuang, “Nang an isêlna thua hin ni inhriat loi ma ni?” a tia. 14 Khannisianlân, Jisua’n bâikhat khomin sâm maka, Ramoptu chu a sân ar ngai a’rkhêl tâka.
Jisua that hranga thupêk
15 Khan, Rom Ramoptu khan Ferkân kût zoro rikipin mi intâng inkhat mipuihaiin an iti tak an sua pehai ngaia. 16 Kha laia khan mi intâng irhming Barabba an iti kha a oma. 17 Khasikin mipui an hong irbûmin Pilata’n an kuang, “A tu hi mo nangni insua pe inlân nin inuam? Barabba hi mo, Jisua, Mesia an iti pu hi mo?” tiin ar donhaia. 18 Juda irchamneipuhai khan Jisua kha an hnarsa sika a kuta an hong ipêk a nih ti fel takin an hriata.
19 Khan Pilata kha roirêl hmuna a toi laiin, a dôngma’n, “Kha mi fel chunga khan ite tho no roh, zânin ki’rmangin ama sikin ki ituang ok kêng,” tiin he a bêa. 20 Ochai inlalhai le upahaiin Barabba kha insuaa, Jisua that hranga Pilata ngên hrangin mipuihai an inthêmhaia. 21 Khannisianlân, Pilata’n mipuihai kuang, “Hi mi inhnihai laia hin tu hi mo nangni insua pe inlân nin inuam?” tiin ar donhaia. Anni khan, “Barabba,” tiin an sâma. 22 Pilata’n an kuang, “Khan Jisua, Mesia an iti hi imo ki ilo hrang tâk?” tiin ar donhaia. Anni khan, “Krosa hembe roh,” an tia. 23 Khannisianlân, Pilata’n an kuang, “Imo a itho insual,” tiin ar donhaia. Khanchu, anni khan, “Krosa hembe roh,” tiin an hrât do dôrin an khêka.
24 Pilata’n i ang khomin ite ar fêna om no nia, buaina vai kêng a isuakna hrang ti an hriatin chu tui a lâka, mipuihai makunga a kut a’rsûka, an kuang, “Hi mihriam, thina hin ite mophurna nei ma ung! Ama hi nin nuam nuamin lo ta roi,” a tia. 25 Mipui murdi’n, “Hi mi thisen mophurna chu keini le kin nâihai chunga tung ri se,” tiin an sâma. 26 Khanchu, Pilata’n Barabba kha an sua pehai tâka, Jisua kha sipaihai an zêmtir zoiin, Krosa hembe hrangin an kuta a pêkhai tâka.
Sipaihaiin Jisua an soisak
27 Khanchu, Pilata sipaihai khan Jisua chu Ramoptu omna praitoriana an hruaia, an pâla mi murdi a kôlvêla an irbuka. 28 A puanhai an hlîk pea, puan senduk an insiltira. 29 Khanchu, ilhling lukhum an phana, an inkhumtira, a kut chang tiang khianghrol an inchôitira; a makunga khûksadelin, “Judahai Reng, hring sôt roh!” tiin an innuisana. 30 An inchila, a khianghrol kha an suta, a lu-a an zêma. 31 Khan, nuiza siamna’n an hmang zoiin chu puan senduk kha an lâk nôka, ama puan ngêt kha an insiltir nôk ta. Khanchu, Krosa hembe hrangin, an hruai ta.
Jisua hembea a om thu
32 Khan, an fe laiin Kurini kho mi inkhat ar hming Simona an hmua; Sipaihaiin Jisua Kros irput hrangin an dândea. 33 Golgotha, “Luru hmun,” an iti kha an va tunga. 34 Khan Jisua chu uain, thil khâ leh irpol an pêka, khan, a’rtem zoiin chu in nuam ta maka. 35 Khan, Krosa an hembea, khanchu, tasânin a puansilhai an irsema. 36 Kha hnung chu, an toia, an nghâk tâka. 37 A lu chunga an sêlna irziak, “Hi mi hi Jisua, Judahai Reng a ni,” tiin an inkhopa.
38 Khan, ama pâlin inru inhni an hembe saa, a chang tiang inkhat, a vei tiang inkhat.
39 Khan, ar lôi murdi’n an lu inthikin Jisua an êroa. 40 “Tempil insiat ni ta, sûn thum niin inding nôk ni ti na! Pathian Nâipa ni ni’n chu, ni bingin zôk roh! kros rêla irthokin zuang chum ta roh!” an tia. 41 Khaang dênin Ochai inlalhai le Dân irchutirhai le upahai khomin ama an êroa: 42 “Mi danghai lak an zôk ngaia, ama chu zôk thei maka! Israelhai rêng mo ni ma? Atûn hin kros rêla irthokin zuang chum sian chu iam ei ti! 43 Pathian a iama, Pathian Nâipa’n a’rbêa; Tho lei en rei, Pathianin an zôk nuam mo?” an tia. 44 Hrâtlâksong ama pâla an ihembehai khom khan khaang dênin an êroa.
Jisua thina thu
45 Khan, sûn dâr sômhleihni ata khohloi dâr thum ten chu rammual a zîng khak tâka. 46 Chohnung dâr thumin chu Jisua kha hnuk irhai inring takin a khêka, “Eli, Eli, lema sabakthani?” a tia. Kha kha “Ki Pathian, Ki pathian itho mo ni ni imâksan?” tihna a ni. 47 Kha hmuna ngîr senkhathaiin ama kha an inhriatin, “Elija a ikoi kêng,” an tia. 48 Khanchu, an laia mi inkhat an tân zôia, sponj a lâka, uain thûra an chiea, khianghrolin a târa, Jisua kha in intir a tuma. 49 Khan, mi danghaiin, “Dâihrek roi, a san hrangin Elija mo a zuang lei en rei,” an tia. 50 Jisua kha hnuk irhai inring takin a khêk nôka, a hrang a chat tâka.
51 Khanchu, tempil sûnga puanzâr kha a chung ata a mong dênin a têr thai ta. Kha hnung chu irnêng an hnînga, lungpuihai an koia, 52 thânhai an hong irhonga, Pathian mi tamtak a thi tâkhai, taksa kha kaithoiin an oma, 53 Thânhai kha an mâka, Jisua, thina irthoka thoinôk hnungin khopui irthianga an lûta, kha khan mi tamtak kuang an inlâr ta. 54 Sipai sâp le a kuanga sipai om Jisua thîrhai khan hnîngnupui inhnîng le thil omzia kha an hmu’n chu, “Hi mi hi Pathian Nâipa a ni lele hi te!” an tia. 55 Kha hmuna khan nupang tamtak, Galili rama irthoka Jisua hnung zuia, a ichangpui ngaihai khan hla vit ata an thîra, 56 Khahai kha Mari Magdala hai, Mari, Jakoba le Josia nu Mari hai an kop saa, Zebedaia dôngma khom a kop sa a ni.
Jisua an phûm thu
57 Khan, khohloi a hong ni’n chu, irchongpa Arimathaia kho mi, ar hming Josefa a hong tunga; ama khom kha Jisua irchutir a ni saa. 58 Kha mi kha Pilata kuang a va fea, Jisua ruak chu a va nghia. 59 Pilata khan a phala. Khanchu, Jisua ruak kha Josefa khan, puan irnêm fâi takin a tuama, 60 ama thân, lunga inver zoi phinga khan an zâl ta. Khanchu, thân bâi kha lung lian takin a sîng zoiin chu a fe tâka. 61 Mari Magdala le Mari dang kha thân tiang nghain an toia.
Thân nghâkhai
62 A tûk zîng, Sabat ni sûna Ochai inlalhai le Farisaihai kha Pilata kuang an honga, 63 a kuang, “Ka pu, kha milakpa khan a hring laiin sûn thum hnungin chu thoinôk ki ti,” a iti kin inhriat. 64 Khasikin thân kha sûn thum sûng chu sataka nghâk hrangin thu pe ro, khano’nchu a irchutirhai kha hong an ta mipui laia, ‘Thina irthokin a thoinôk tâk,’ tina an ti. khano’nchu hi thêmna hnungkhôn hi matona nêkin a isiat ual hrang kêng,” an tia. 65 Pilata’n an kuang, “Sipai nin inei mo ni ma, fe unglân nin thei la lamin inhrungtirhai roi ba,” a ti pehaia. 66 Khanchu, an fe a, thân lung kha irsinsiana siain, a nghâk hranghai kha an innghâktirhai tâka.
1 Sabat nî a hong heka, Pathian ni zînga khua a vâr hrang tônin, Magdala mi Mari le Mari danghai khan thân en hrangin an fea. 2 Voikhat rengin hnîngnu a hong inhnînga, irvân ata Rengpa Vântîrtôn a zuanga, a khârna lung kha an hlumpaia, a chunga a toia. 3 A hmêl kha kôlirtêk angin a oma, a silkai khom ivur ang a ni. 4 Sipai a nghâkhai khan an chi hrai tâk sikin an inthinga, mithi angin an om ta. 5 Vântîrtôn khan nupanghai kuang, “Nangni chu chi no roi, Jisua an ihêmbetu kha nin izong a nih ti kin hriat. 6 Hin om ta mah, a iti ang khan a thoinôk ta. Hin hong unglân, a zâlna hi hong en roi. 7 Atûn inrang takin fe unglân, a irchutirhai kuang, ‘Thina irthokin a thoinôk ta, Galili rama nin matona a lei fe, kha khan hmu nin ti!’ tiin hrilhai roi. Nangni ki ihril hi inhre mai roi,” a tia.
8 Khanchu, ichi le raifânna sipin, thâna irthokin an fe lata, irchutirhai va hril hrangin an intân ta. 9 Voikhat rengin Jisua’n anni kha a’rtongpuihaia, an kuang, “Nin chunga irtharngamna om ri se,” a tia. Khan, a kuang an honga, a kezapha an intûka, chubai an mûka; 10 Jisua’n an kuang, “Chi no roi; fe unglân Galili rama fe hrangin ki urênghai van hril roi, kha khan ni hmu an ti,” a tia.
Thân nghâkhai thu’nsîr
11 Nupanghai kha an fe laiin thân nghâk sipai senkhathai kha khopuia an kîr nôka, thil om lam murdi kha Ochai inlalhai an va hrila. 12 Ochai inlalhai kha upahai leh an irhmukhôma, sum tamtak an pêkhaia, 13 an kuang, “Zâna kin in kârin a irchutirhai an honga, a ruak kha an hong inrûk kêng, tiin insîr roi. 14 Ramoptu khan kha thurchi kha a lei inhriat le khom thiam nin chang tih insîrpui kin ta, ite nin milung nin inbuaina hrang om ma,” an tia. 15 Sipaihai khan sum kha an lâka, hê an ibehai lam ang takin an tho ta. Khasikin atûn ten kha thurchi kha Judahai laia an la ihril inlum mai ngai a ni.
Jisua, a irchutirhai kuang a inlârna thu
16 Khan, irchutir sômhleikhathai kha Galili rama tâng inkhata Jisua’n fe roi a iti pehaina khan an fea. 17 Ama an hmu’n chu chubai an mûka, senkhatin iamzoi nohai khomsian, 18 Jisua’n a hong panhaia, anni kha a chongpuihaia, “Irnêng le irvâna irchamneina murdi ki kuang pêk a ni ta. 19 Khanchu, hmun tina mihai kuang fe unglân, ki irchutirhaiin siam unglân, Pa le Nâipa le Irtha Irthiang irhmingin baptis-hai unglân, 20 Thu nangni ki ipêk murdi hi zôm hrangin irchutirhai roi. Khanchu, keima kumkhua’n, rammual mong dênin, nin kuang om mai ki ti,” a tia.
1 Pathian Nâipa; Jisua Krista Thurchi Sa irphutna chu;
2 Deipu Isaia Lekhabua;
“Irngai ta ki tirtôn ni matona ki tîr ta.
Ama khan ni lampui siam a ti.
3 Ramchâra mi khêk irhai khan,
‘Rengpa lamlian siam unglân,
A fêna hrangin lam intûn siam roi,’ a ti,”
tia irziak ang khan.
4 Khasikin, Baptistu Johana khan sual ngaidamna hrangin irletna baptisma chang hrang thu ramchâra a hong hrila. 5 Judai ram kil tina mi le Jerusalem khuaa mi murdi khan ama an pana, an sualhai an irphuanga, Jordan dunga khan a lei baptis-hai tâka.
6 Johana kha saringsei mul puanin ar bela, savun kha kongkhitin a khita, khaihmimse le ram khuaihlutui bu’n a ngama. 7 Khan, mipuihai laia, “Ki hnunga zuang hrangpu chu keima nêka roiinpui ual ok a nia, kei chu kûna a kekok hrui sût inruk lua khom ni ma ung. 8 Keima’n tuiin nangni ki baptisa, ama’n chu Irtha Irthiangin nangni baptis a ti,” tiin a hrila.
Jisua baptisma a changna le thêmna a tongna
9 Kha zoro lai khan Jisua kha Galili rama Nazaret khua ata a honga, Jordan dunga khan Johana’n a lei baptis tâka. 10 Tui ata a hong suak le chu irvân ar honga, Irtha, vasu anga ama chunga zuang chum a hmua, 11 Irvân ata kha hnuk irhai kha a zuang suaka. “Nang, ki Nâipa, ki lungthung tak ni ni; ni chunga ki lôm tak tak,” a zuang tia.
12 Irtha khan ama kha ramchâra a tîr zel tâka. 13 Kha khan sûn sômminli Setana inthêmin a oma; ram sahai laia a om sa tâka, Pathian vântîrtônhaiin an zuang changpui ngai.
Jisua’n nga cheltuhai minli a koina
14 Khan, Johana kha an chel zoiin chu Pathian Thurchi Sa hrilin Jisua kha Galili rama a honga; 15 “Zoro a hong tung ta; Pathian Ram khom anai ta; irlet unglân, Thurchi Sa hi iam ta roi,” a ti thiaia. 16 Galili dîl pang a hro lai khan Simona le a sangpa Andria kha dîla lên vôrin a va hmuhaia, nga chel ngai an nia. 17 Khan Jisua’n an kuang “Ni zui roi, khanchu mihriam cheltu’n nangni siam ki ti,” a tia. 18 An lênhai an mâksana, ama an zui ta.
19 A va fe nôk viata, Zebedaia nâi Johana hai ulenâi kha a hmua, irkuanga lên an phoa, 20 Jisua’n, anni khom kha a koihai zôia, an pa Zebedaia le an sinthotuhai irkuanga an mâkhaia, Jisua kha an zui tâka.
Ramilhli ichel indam
21 Khan, Kapernaum khua an lûta, Sabat nikhua khan Sinagoka ar chuhai zôia. 22 Mi a irchutir dân inhriat murdihai khan ar khêl an ti oka. Dân irchupuhai ang ni loia, thuneina nei taka anni kha ar chuhai sikin.
23 An Sinagoka khan ramilhli ichel mi inkhat a lei oma, a hong khêk suaka. 24 “Nazaret Jisua kin chungchânga irrol ni itum ma ni? Nin buai zoi hrangin ni ihong ma ni? Tu mo ni ini nang kin hriat, Pathian mi Irthiang kha ni ni,” a tia. 25 Jisua’n a hala, “Dâihrekin lân, a sûng ata hong suak roh,” a tia. 26 Khan ramilhli khan deng an theitir bita, inring taka khêkin a sûng ata kha a hong suak tâka. 27 An rêngin a’rkhêl an ti tak taka, “Hi hi imo a ini ngai tâk? irchuna thar a ni hi te; ramilhlihai khom irchamnei takin thu a pêka, an izôm hi,” an irti irhlôma. 28 Galili le ram dang kil tina a thurchi kha an thang zôi zel tâka.
Mi tamtak indamna
29 Khan, Jisua kha Sinagok ata irthokin Jakoba le Johana hai leh an suaka, Simona le Andria hai ina an lûta. 30 Simona tarpi kha inkhurin a lei zâl raka, a thurchi an va hril lata. 31 Ama kha a va pana, a kut a chela, a kaithoi tâka, an khur kha a boi zôia, fâk le nêk a siam pehai ta. 32 Kha khohloi, misa tâk hnung chu, damloi murdi le ramilhli ichelhai a kuang an hong hruaia. 33 An kho pumin inkhâr kôla khan an hong om sup tâka. 34 Jisua’n natna tinrênga dam no tamtak an dama, ram khohri ichel tamtak an hnot suaka. Ram khohrihai khan ama an inhriat sikin an chong phal mah.
Jisua’n Galili rama thu an sîr
35 Khan zînga khua a la vâr mân a thoia a suaka, hmun fianriala, a va chongchaia. 36 Simona le a rualhai khan an zonga; 37 an va hmu’n chu, “Mi’n nang an zong sup sup,” tiin an hrila. 38 Khan, ama’n “Hmun danga, kho irnai bômhaia fe ei ti, khahaia khom thu ki la insîr thiai hrang a ni; khatak kha ki izuangna bi a ni!” a tia. 39 Khanchu, Galili ram murdia an Sinagoka lûtin thu an sîr thiaia, ramilhlihai khom an hnot suaka.
Phâr indam
40 A kuang phâr a honga, a makunga khûksadela, chubai mûkin indam a ngêna, “Ni nuamin chu ni ni’rthiangtir thei,” a tia. 41 Jisua’n a saterengin lung an khama, a hong inbana a tôna, “Ki nuam e, hong irthiang ta ni ti,” a tia. 42 A phâr kha a hong dam zôi zela, a hong irthiang tâka. 43 Ngar takin thu a pêka, an fetir zôi ta. 44 A kuang, “Hi thu hi tûte kuang insîr viat no ro. Khannisian, ochai kuang thengthaiin lân, var en roh, kha hnung chu mi tinin ni’rthiang nôk tâk ti an inhriat infelna hrangin. Mosia’n irbôlna inhlan hranga a iti kha inhlan roh,” a ti pea. 45 Khannisian a fe suaka, kha thu kha an sîr tâka, a puang indarh ual uala, khanchu, an insîr inlum hrai sikin, Jisua chu thangphuangin khua khom lût ta maka, hmun fianriala a om ta, hmun tin ata mi’n an hong pan ngaia.
1 Khan, sûn iza tena mani chu Kapernaum a hong lût nôka, ina a om tih thu an thang tâka. 2 Khanchu, pên tiang khom mikot kôl sip khakin mi tamtak an lei pungkhôma, an kuang thu a hrila. 3 Zenginthi inkhat, mi minliin an hong irzôna, a kuang an hong panpuia. 4 Mipui sika khan nâi thei mahaia, a omna irdîna a zâlna pumin an zun thâka, 5 Jisua’n an iamzia a hmu’n chu zenginthî kuang khan “Ki nâipa, ni sualhai ngaidam a ni ta,” a tia.
6 Dân irchutirtu senkhat toi sahai khan an lungrîlin an ngaituaa, 7 “Hi mi hin itho sika mo hianga a iti; Pathian a ihril insiat a ni hi te; Pathian ni no’n chu, tu mo sualhai ngaidam thei?” tiin. 8 Khaang khan an ngaitua tih Jisua’n an hriat zôia, an kuang, “Itho sikin mo lungrîla khaang kha nin ingaitua? 9 Zenginthi kuang khan, ‘Ni sualhai ngaidam a ni tah ti le thoiin lân, ni zâlna kha lan lân, ke’n fe roh,’ ti hi, a kho hi mo a ol ual? 10 Rammuala hin Mihriam Nâipa hin sual ngaidam theina a nei ti nin inhriat theina hrangin nangni ki hong inhriattir a ni,” a tia; zenginthi kuang khan, 11 “Thoiin lân ni zâlna kha lan lân, ni in tiang kîr roh, nang ki hril,” a tia. 12 Khanchu, a thoia, a zâlna kha a lâka, an rênga mit hmua a suak zôi tâka; an rêngin ar khêl an ti tak taka, “Hiang hi ei la ihmu ngai viat loi kêng,” tiin Pathian an inpâk tâka.
Jisua’n Levia koi thu
13 Khan, dîl tiang khan a fe nôka, mipuiin an hong pan sup supa, ama’n a lei irchuhaia. 14 Khan, a fe malamin, Alfaia nâipa Levia kha khâzana irfuangna hmuna toi a hmua, “Ni zui roh,” a tia. Ama khan a thoia a zui tâka. 15 Khan Jisua chu Levia ina khalâi a ota, irchutirhai kha khâzana irfuangtuhai le mi sual tamtakin Jisua le irchutirhai an hong otpuia. Khan ama zuipuhai chu tamtak an nia. 16 Farisaihai laia Dân irchutirtuhai khan khâzana irfuangpuhai le mi sualhai khalâi otpui an hmu’n chu a irchutirhai kuang, “Itho sika mo khâzana irfuangpuhai le mi sualhai laia a iot sa?” an tia. 17 Jisua’n kha kha an hriatin an kuang, “Mi hrisêlhaiin daktor innang ngai mahaia, mi irveisiahai kêngin an innang ngai a ni. Mi felhai donsui hranga zuang ni ma unga, mi sualhai donsui hranga zuang kêng ki ini,” a tia.
Bu nghei chungchâng thua irdonna
18 Johana irchutirhai le Farisaihai bu nghei ni khan mi tuhai manni an honga, a kuang, “Itho sika mo Johana irchutirhai le Farisai irchutirhaiin bu an ngheia, ni irchutirhaiin chu an inghei loi?” an hong tia.
19 Jisua’n an kuang, “Irneinaa mikhualhai kha bu nghei an ti, nin itûng ma ni? Ni thei no ni! Moineipu an kuang a om sûng kârka chu bu nghei no nihai. 20 Khannisian, Moineipu kha an kuang ata hruai zoro la om a ta, kha tika chu la nghei an ti.
21 “Tukhomin puan milui phoa, puan thar irhlek leh pho ngai mahai, pho ta sianlân, a thar khan puan milui kha kai set a ta, chet nôk ual ual a ti. 22 Tûte’n Uain thar khom savun kok miluia thun ngai mahai, thun ta sianlân, uain thar khan savun kok kha mût set a ta, uain le savun kokhai kha hmanghmunboi chang zit a ti. Khasikin, uain thar chu savun kok thara thun an ti,” tiin a sâma.
Sabat chungchânga irdonna
23 Jisua chu Sabat niin bubil hmunhai a hroa, a irchutirhai khan fe malamin bu vûihai kha an kai dûka. 24 Farisaihai khan a kuang, “En ta, itho sika mo Sabat dân iphal loi an itho?” an tia. 25 Jisua’n a kuang, “Davida’n, a rualhai le phîngchâma fâk hrang an nei loi laia a thil tho kha nin itep loi mo? 26 Abiathara Ochai inlaltak a ni laia Pathian ina a lûta, Ochaihai vai fâk thei bai kha a fâka, a rualhai khom a ipêk sa thu kha?” a tia.
27 Jisua ngêtin, “Sabat hi mihriam ta hranga siam a nia, mihriam hi Sabat ta hranga siam ni mah. 28 Khasikin, Mihriam Nâipa hi Sabat chung tena khom hin Rêng a ni,” a tia.
1 Khan, Sinagoka a lûta, kha khan mi inkhat kut zenginthi a lei oma. 2 Ama an hnôl theina hrangin sabat nia an damtir le indamtir loi an enirchika. 3 Khan, Jisua’n kut zenginthi kuang khan, “A laia hin hong suak roh,” a tia. 4 Khan, Jisua’n mipuihai kuang, “Ei dânin Sabat niin imo tho hrangin a ni iphal? Sabat nia insatir mo a’rthiang, insiat mo? mi hringna san mo a’rthiang, that mo?” tiin a’rdonhaia; khannisianlân an dâihreka. 5 An milung ngarzia an hriatin poi a ti tak taka, ningmur takin a enhai hnungin kha pa kuang khan, “Ni kut inphar roh,” a tia. A hong phar suaka, a kut kha a hong dam pe tâka. 6 Khanchu, Farisaihai kha an suaka, Jisua an that theina hrang dân ngaitua’n Heroda pâla mihai leh khan an chong zôi tâka.
Jisua’n dîl panga mipui an dam thu
7 Jisua kha a irchutirhai leh dîl pang tiang an fe thal tâka, Galili ram ata mipui tamtakin an zuia. Khan a sintho roiinpuizia an inhriatin Judai ram le 8 Jerusalem hai ata, Idumai ram le, Jordan râl hai ata, Tura le Sidon hual hai ata kha mipui tamtakin ama an hong pan saa. 9 Mipuiin an hong hneng hrai loina hrangin irkuang lei ngaitua hrangin a irchutirhai kha chong a bêhaia. 10 Mi tamtak an damtir tâk sikin natna nei murdi’n ama tôn tumin an ûm mur mur tâka. 11 Ramilhli ichelhai khomin ama kha an hmu rikipin a makunga an hong inboka, “Nang Pathian Nâipa ni ni,” tiin an khêk ngaia. 12 Khanchu a thurchi kha tûte inhrilhai loi hrangin a khaphai ngita.
Jisua’n sômhleihnihai an thang thu
13 Khan, Jisua kha tânga a fea, a mi hranga a indit ualhai kha a koihaia, khan anni kha a kuang an honga. 14 A kuanga om theina hrangin le thuhril hranga a tîr suak theina hrangin. 15 Ramilhlihai chunga ircham an nei theina hrangin sômhleihni an thanghaia. 16 Khahai kha Simona, (Jisua’n Petera tia a iphua tâk kha). 17 Zebedaia nâi Jakoba le a sangpa Johana (kha mihai kha “Boanergea” a tihaia, kha omzia chu “Khonri Nâihai,” tihna a ni). 18 Andria, Filipa, Bartholomaia, Mathaia, Thoma, Alfaia nâi Jakoba, Thadaia Kanaan mi Simona, 19 a cheltu Juda Iskariota hai an ni.
Jisua le Belzebula
20 Khan, Jisua kha in tiang a va kîra, mipui an lei hong irbukkhôm nôka, Jisua le a irchutirhai khan bu anh fâk irman mahaia. 21 A in sûng mihaiin an inhriatin chu ama hruai hrangin an irthoka, mipuihaiin, “An vêt tâk kêng!” an ti pehai sikin. 22 Dân irchutirtuhai Jerusalem rengata zuanghai khan, “Belzebula ikop a ni hi te. Ramilhli rêng sikin kêng ramilhlihai a inhnot suak ngai,” an tia. 23 Jisua’n a koihaia, chongirkhekin an kuang, “Setana’n Setana ngêt itin mo a inhnot suak thei hrang? 24 Ram khom, mâni le mâni an irdoiin te, kha ram kha ngîr thei no ni. 25 In sûngkua khom anni le anni an irdoiin te kha in sûng kha ngîr suak thei no nihai. 26 Khaang khan, Setan khom ama le ama irdoi ta sianlân chu, ngîr suak thei no ni, irhmang a ti. 27 Mi hrât chu an khitphiar bak no’n chu, a in lûtin ar chon lapai pe thei ngai mahai, an khitphiar zoiin kêng a in kha an inram thei hrang. 28 A dik takin nangni ki hril, mi an sualna murdi le an hril insiatna murdia khom ngaidam ni a ti. 29 Khannisianlân, Irtha Irthiang hrilsiat chu itiklai khom ngaidam ni ta no nihai, kumtuanga sualna an itho a ni,” a tia. 30 Kha kha Jisua’n, “Ramilhli ikop a ni,” an ti sika khan kha kha a insîr a ni.
Jisua nu le a urênghai
31 Jisua nu le a urênghai kha an hong tunga, pên tiang an ngîra, mi an hong inkoitira. 32 A kôlvêla mipui toihai khan a kuang, “En ta, pên tiang son, ni nu le ni urênghaiin nang an zong,” an tia. 33 Ama khan a sâma, “Ka nu le ki urênghai kha tuhai mo an ini?” a tia. 34 A kôla toihai kha a hong en vêla, “Hei en u ta, Ka nu le ki urênghai hi. 35 Tukhom Pathian nuamlam thotuhai kha kêng, ki urênghai, ki farnuhai, ka nuhai an ni,” a tia.
1 Khan, dîl kôla khan a’rchutirhai nôk tâka; mipui tamtak an hong irbuk nôk tâka, irkuanga khan a chuanga, a toia; mipuihai kha dîl kôl muanga khan an oma. 2 Chongirkhekin thu tamtak ar chutirhaia, ar chuhai lai khan an kuang, 3 “Irngai u ta, voikhat chu mi inkhat hi fachî inthek hrangin a fea; 4 a hong inthekin chu senkhat lampuia a tâka, vahaiin an hong fâkpai ta. 5 Senkhat lungpherpha chung irnêng irphânna hmuna a tâka, irnêng irsa maka, a hong mông lata. 6 Khan misa a hong irsâng ualin chu, a em inchâra irzung a thâk thei no sikin, a ram nôk chit ta. 7 Senkhat ilhling laia a tâka, ilhling kha a hong irsôna, a dîp irhmanga, ra thei ta mah. 8 Senkhat chu irnêng sana hmuna a tâka, a hong môngin a hong irsôna, a ra tâka; a bâk sômthum, a bâk sômruk, a bâk irzakhatin a hong inpungtir ta,” a tia. 9 Jisua’n, “Tukhom inhriatna hranga mikuar nei murdi’n chu inhre ri sehai,” a tia.
Chongirkhek a ihmang nasan
10 A binga a om hnungin chu sômhleihnihai le a danghai khan chongirkhek thu kha an irdon infela. 11 Jisua’n chu an kuang, “Pathian Ram thurîl kha nin kuang pêk a nia; mi danghai ta hrangin chu chongirkhek vaiin insîr a ni.
12 ‘En enin hmu infel no nihaia,
Irngai irngaiin ar fêna lam chang inhre no nihai,
khano’nchu, hong irhei an ta,
ngaidam nina an ti;
ti ang kha a ni theina hrangin,’”
a tia.
Chongirkhek hrilfiana
13 Khan, Jisua ngêtin an kuang, “Hi chongirkhek hi nin inhriat infel thei loi ma ni? Khaang khan a ni’n te, itin mo chongirkhek danghai ngân khom kha nin inhriat thei hrang? 14 Fachî inthektu khan Pathian Thu a inthek a ni. 15 Lam kôla tâkhai kha hiang hi an ni; thu kha an inhriatin Setana a hong lata; an fachî inthek kha a lâkpai pehai zôi ngaia. 16 Khaang dênin, lungpherpha hmuna inthekhai kha hiang hi an ni, thu kha an inhriat zoi le raifân takin an pom zôi zela; 17 Khannisianlân, annia khan irzung tha maka, zoro sôtnote vai a diara, kha hnungin chu thu sika intakna mani, dengtheina mani, a hong om le chu an rîl zôi zel ngai a ni. 18 Hloiilhlingnei kâra inthekhai chu hihai hi an ni: Thu chu an inhriata, 19 khannisian, rammual intakna hai, irchon irzukna hai, irzukna dang danghai, a hong lûta, thu kha a hong dîp irhmanga, a ira ta ngai loi a ni. 20 Irnêng saa inthekhai chu, thu kha inhriata, an poma, a bâk sômthum, a bâk sômruk le a bâk irzakhata rahai hi an ni,” a tia.
Meiser irkhu
21 Jisua ngêtin an kuang, “Meiser chu a sianaa sia loia khamphulu hnuaia mani, zâlhmun hnuaia mani sia hrangin an hong inchok ngai ma ni? 22 Inpuang loi hranga thup ite om maka, inlang loi hranga thuppai khom ite om sa mah. 23 Irngaina mikuar nei murdi’n chu irngai ri se!” a tia.
24 Khan an kuang, “Nin thu irngai kha irdîn dêkin irngai roi, mi nin irkhîna ngêt khan, nangni irkhîna’n hmang an ti, nangni bôk ual viat an ti. 25 Tukhom a nei ka chu bôk sa an ta, a nei loi chu a ineisun khom lapai pe an ti,” a tia.
Chimu chongirkhek thu
26 Jisua’n an kuang, “Pathian Ram chu hiang hin a ni, mi’n loia chîmu an theka. 27 Zâna a zâla, sûna a thoia, chimu kha itika hong mônga, hong irsôn mani tih a inhriat loi ang hi a ni. 28 Irnêngin a kung kha a’rsôntira, ra an neitir ngai, a maton taka a kung a hong suaka, kha hnung a vûia, a hnungkhôn taka a’rmalpum kha a hong suaka. 29 Bu kha a hong hmin tâkin chu kôite lâkin bu ât a hong iphut ang hi a ni,” a tia.
Ancham ru chongirkhek
30 Jisua’n an kuang, “Pathian Ram chu i leh mo ei irkhî hrang tâk, i chongirkhek hmangin mo ei insîr infel hrang? 31 Hiang hi a ni, mi’n ancham ru rammuala, chimu tinrênghai laia a chîn tak a lâka, irnênga a tua. 32 Khannisian sôtnote hnunga a hong mônga, chimu tinrênghai laia a lian tak a hong ni ta; ôn lian tak tak a hong neia, chunglêng vahai khomin an irbûk irbei thei ngai ang hi a ni,” a tia. 33 Khaang chongirkhek tamtak hmang khan an inhriat thiam hrang dôrin thu kha an kuang an sîr ngai. 34 Chongirkhek no’n chu an kuang thu insîr ngai ma, a irchutirhai kuang chu itinrêng a hrilfiah ngai a ni.
Jisua’n phâivopui a hal indâi
35 Kha nî dêna khan khohloi a hong ni’n chu, Jisua’n irchutirhai kuang “Dîl râl tiang son lei kâi rei,” a tia. 36 Kha hnung chu mipuihai kha an mâka, Jisua lei toina irkuanga khan irchutirhai kha an lûta, ama khom an hruaia. Irkuang dang khom an om sa. 37 Irningloiin, phâivopui hrât tak a hong thoa, tui irsok kha irkuanga a lûta, a sip vâng vâng tâka. 38 Jisua chu lukham khamin irkuang irmei tiang khan a lei ina. An kai thoia, “Irchutirtu kin irhmang hrang hi poi ni iti loi ma ni?” an tia.
39 Khanchu a hong thoia, phâivua kha a hala, dîl kuanga khan, “Dâihrekin lân, om chian chian roh,” a tia. Phâivua kha a hong monga, a dâidup ta. 40 Ama khan an kuang, “Ithoa mo ang dôra nin ichi? iamna zel nin la inei loi ma ni?” a tia. 41 Khanchu an chi tak taka, “Hi mi hi tu mo a ini hi, phâivua le dîl khomin a thu an izôm hi?” an irtia.
1 Jisua le a irchutirhai chu Galili dîl râl, Gerasin ram an hong tunga. 2 Khan, Jisua kha irkuang ata a suak le chu ramilhli ichel, thâna irthoka hong suak mi inkhatin a tonga. 3 Kha mi kha thânhaia a om ngaia, tukhomin thîrhrui khomin khit thei ngai mahai. 4 Thîrhruia khitin thîrkolhai inbuntir ngai khomsian, thîrhruihai kha an pot sata, thîrkolhai kha a khiak chit ngai; a hrât hrai sikin tûte’n sep inhne thei mahai. 5 A sûn a zânin thâna le tânga a khêka, lunghai leh khom ar ât ngai.
6 Hlatak ata Jisua kha a hmu’n chu a maton tiang panin an tâna, kûnin chubai a mûka. 7 Inring takin a khêka, “Jisua, Inchungtaka Pathian Nâipa, imo ni lo hrang ni iti? Deng nin thei loi hrangin Pathian irhmingin nang ki ngên,” a tia. 8 (Hi a itih nasan chu Jisua’n a kuang, “Nang ramilhli, hi pa sûng ata hi hong suak roh,” a lei ti tâk sika a ni). 9 “Imo ni’rhming?” tiin a’rdona. Ama khan, “Ki’rhming chu Nuaia a ni, kin tamtak tak a ni,” a tia. 10 Khabana, kha ram ata kha inhnot suakhai loi hrangin Jisua a ngên ngita.
11 Khan, kha hmun kôla tâng panga fâk zong, vok tamtak an oma. 12 Ramilhlihai khan Jisua kuang, “Vok sûnga nin lûttir roh,” tiin an ngêna. 13 Jisua’n a phal pehai ta. Khanchu, ramilhli kha an suaka, vokhai sûnga an lûta, vok rualhai kha sânghni vêl an nia, khoisabaka an intâna, dîla khan an tâk that ta.
14 Vok vâituhai kha chi pumin an intâna, kho sûng le a kôlvêla mihai kha an va hrila. Khanchu, thil omzia eninfel hrangin mipui an fe ta. 15 Jisua kuang an hong tungin chu ramilhli ichel, Nuaia icheltu kha, puan sila lungrîl pangai irputa lei toi an va hmua; an chi tak taka. 16 Kha a hmutuhai khan ramilhli ichelpa chunga thil tunghai le vok thurchihai kha an lei hril saa. 17 Kha mihai khan Jisua kha an ram ata suak hrangin an ngêna. 18 Jisua irkuanga a chuang tôn chu ramilhli ichelpa khan Jisua kuang, “Ni kuang hong ki ti,” tiin a ngêna. 19 Khannisian, Jisua’n phal mah, phal nêkin a kuang, “Ni in mihai kuang fe’n lân, Rengpa’n ni chunga sin nang a itho pezia le lung nang a inkhamzia kha va hril roh,” a ti pea. 20 Khapa kha a fea, Dekapoli khuahaia khan thil a itho pezia kha tâng an sampui tâka, mi murdi’n ar khêl an ti tak tak.
Jaira nâinu kaithoi le nupang thi suak indam
21 Khan, Jisua kha irkuangin varâl a kâi nôkin chu, dîl panga mipui tamtak a kuang an hong irbûma. 22 Sinagok hruaitu laia inkhat, ar hming Jaira kha a honga, Jisua a hmu’n chu a ke bula khûksadelin chubai a mûka, 23 “Ki nâi nâipangte a sân a naa, a hong hara, a hong dam theina hrangin a chunga ni kut ni’rnghat pe roh,” tiin a ngên ngita. 24 Khanchu, a fepui tâka, mipui tamtakin ama kha an zui saa, ihneng rengin an hnenga.
25 Nupang inkhat, kum sômhleihni thi suaka damloi a oma. 26 Daktor tamtakin an en chit tâka, a sum nei murdi leh ar enkol tâka, khannisian, irzâng ual nêkin inrikin an rik pe ual uala. 27 Jisua thurchi a hong inhriatin chu a hnung tianga mipui kâra khan a honga, 28 a lungrîlin, “A puan vai khom tôn inlân dam zôi ki ti,” a tia.
29 Khanchu, a puan a tôna a thi suak kha voikhat rengin a hong chat pit ta, a natna kha indam a ni tah ti ar hriat zôi ta. 30 Jisua khom khan ama ata sinthotheina a suak tih ar hriat zôia, mipui tiang ar hei vêla, “Tu mo ki puan tôn kha?” a tia.
31 A irchutirhaiin, a kuang, “Mipuiin ihneng renga nang an ihneng hi ni hmua, itina mo, tu mo ni tôn? ni iti hi?” an tia. 32 Khan, Jisua’n chu a tôntu hmu nuamin a hei thîr vêla. 33 Khanchu, a chunga thil zuang tung tâk kha ar hriatin, nupangnu kha ichi le inthing pumin a honga, khûksadelin chubai a mûka, itinrêng dik takin a hril tâka. 34 Jisua’n a kuang, “Ki nâinu, ni iamna hi ni idampui a ni, irtharngam takin fe tan lân, ni natna ata kha hong dam suak ta ni ti,” a tia.
35 Jisua kha a la chong lai takin, Jaira in ata mi honghai khan, “Ni nâinu a thi ta. Itho sikin mo irchutirpu hi lan sôltir hranga?” an hong tia. 36 Jisua’n an thu’nsîr kha a len hriat saa, Sinagok hruaitupa, Jaira kuang khan, “Chi no roh, iam mai roh,” a tia. 37 Petera, Jakoba le a sangpa Johana hai tih no chu mi dang tukhomin an izui phal ta mah. 38 Khan, Jaira in an va tungin chu, lei irse mer mur le lei chap ngei ngûia lei hong khêk lel lul a va hmua. 39 A lût malamin an kuang “Ithoa mo nin ibuai nin ichap mer mur? Nâipang kha thi mah, a iin kêng,” a tia.
40 Anni khan an innuisana, khanchu, an rêngin an hnot suakhaia, nâipangtenu nu le pa le ama zuituhai kha a hruaia, nâipangtenu zâlna hmuna khan an lûta. 41 Khan, nâipang kut kha a chela, a kuang, “Talitha, Kum,” a tia, (kha kha tôinu, thoi ro!) tihna a ni. 42 Nâipangtenu kha a hong thoia ar lôi thei zôia, ama kha kum sômhleihni mi a ni. A sân ar khêl an ti tak taka. 43 Jisua’n an kuang, tûte kuanga insîr loi hrangin hê a bêhaia a khapa, “Fâk rua pe roi,” a ti saa.
1 Jisua’n kha hmun kha a suaksana, a omna ngai khua tiang a fe nôka, a irchutirhai khomin an zui maia. 2 Sabat ni a hong nia, Sinagoka khan mi a hong irchutir phut tâka; mi tamtak an oma, a thu an inhriatin chu ar khêl an ti tak taka, “Hi hi kho tak ata a inhriat ma ni? A kuang vârna khom ipêka a iom hi? Itin mo sinirkhêl a itho thei hi te? 3 Mari nâipa mistiri, a urênghai khom Jakoba, Josefa, Juda le Simona hai hi ni mahai mo? A farhai khom ei kuanga om mo ni mahai?” an tia. Kha hnung chu ama kha an hnôl ta.
4 Jisua khan an kuang, “Deipu chu a khua le a urênghai laia ti no chu hmun tina chôiindômin a om ngai,” a tia. 5 Khan, damloi tômte chunga kut a’rnghata a indam ti no chu khataka khan sinirkhêl reng tho thei mah. 6 An iam no sika khan ar khêl a ti ok a ni.
Jisua’n irchutir sômhleihnihai a tîr suakna
7 Khan, mi irchu thiaiin khuahai a’rfang vêla. Sômhleihnihai kha a koia, inhni hnia irkopin a tîr suakhaia, ramilhlihai chunga irchamneina a pêkhaia, 8 an kuang, “Nin inzinnaa khianghrol ti no chu bai mani, hmarsa mani, nin zêpa sum mani chôi no roi. 9 Kekok chu bun unglân, khannisian, songkol inhni irthuam chu chôi no roi,” tiin chong a bêhaia. 10 Hiang hin a ti sa, “Nangni an inhamin chu nin suaksan mâka chu nin va itungna in ngeia khan om mai roi. 11 Kho khua khomin nangni lôm loia, nin thu an irngai no’n chu, marak unglân, nin kea vâiphin kha hui tha roi. Kha kha an ta hrangin irningna ni a ti,” a tia.
12 Khanchu, an fe suaka, mipuihai irletna hrangin thu an insîra. 13 Ramilhli tamtak an inhnot suaka, damno tamtak sahriak an pola an dam ta.
Baptistu Johana thi thu
14 Jisua irhming kha a sân an thang tâk sikin, rêng Heroda khan a len hriat sa tâka. “Baptistu Johana kha mithi lai ata a hong thoi nôk tâka, hi sinthotheina irtha hi a inei,” an tia. 15 A danghaiin chu, “Elija a ni,” an tia. Mi danghai nôkin chu, “Tiana deipuhai anga deipu inkhat a ni,” an tia. 16 Heroda’n chu a len hriatin, “Johana, a lu ki itanpai kha, a hong thoi nôk ta a ni khate,” a tia.
17 Heroda ngeiin Johana kha an cheltira, khitphiarin intângna ina a lei ikhum a ni. Heroda’n hianga a ithôna chu a sangpa Filipa dôngma ni khom sian, ama’n dôngma’n a inei nôk, Herodi sika a ni. 18 Johana’n Heroda kuang, “Ni sangpa dôngma ni inei hi dik mah,” tiin a lei hril mai ngaia.
19 Khasikin Herodi’n Johana kha a hmumâk tâka, that a tuma, nikhomsian, Heroda sikin that thei mah. 20 Heroda’n Johana kha mi dik le mi’rthiang a nih ti an hriat sikin a chia, a inzôk ngai a ni. Johana thu’nsîr an hriat rikipin a sân a buai ngai khomin, a thu’nsîr irngai a nuam ngai a ni.
21 Heroda khan a mi roiinpui hai, sipai hruaitu lian hai, Galili rama mi lianhai a koia, a suak champha hruai an thea, kha nî khan chu Herodi’n zoro’nchum a hmu ta. 22 Herodi nâinu kha a hong lûta, a lâma, Heroda le khual mihai an lômtir oka, khasikin rêng khan nâipangtenu kuang, “Imo ni inuam? Ni inuam tak ni zong roh, nang pe ki ti,” a tia. 23 Chonginkung tamtak neiin a kuang, “I khom ni ni inghi ka chu ki ram chimrip khom nang pe ki ti,” tiin chong ar khâm saa.
24 Khanchu, nâipangtenu kha a suaka, a nu kuang, “Imo ki izong hrang?” tiin a nu kha a var dona. A nu khan, “Baptistu Johana lu,” tiin a lei sâma. 25 Inrang takin rêng kuang a kîr lata, “Khênga Baptistu Johana lu ni pe zôi roh,” a tia.
26 Reng khan poi a ti tak taka, khannisian, a khual mihai makunga a chonginkungna sika khan irkhâl thei maka. 27 Reng khan a nghâktu sipai inkhat a tîr zôia; intângna ina khan Johana lu kha a tana, 28 Kha hnung chu khêngin a hong chôia, nâipangtenu kuang a pêka, khan a nu a va pêk ta. 29 Kha kha a irchutirhaiin an inhriatin chu an va fea, a ruak kha an tuama, thâna an phûm ta.
Mi sângringa vâi thu
30 Tirtônhai kha Jisua kuang an hong kîr nôka, an sintho murdi le an irchuhai murdi Jisua an hrila. 31 Mipui a fe hong an tam hrai sikin Jisua le a irchutirhai kha bu anh khom fâk irman mahai. Khasikin ama khan an kuang, “Tho ei bingin ei om theina hrangin fe ei ta, lei irngam ta rei,” a tia. 32 Khanchu, fianrial panin irkuanga an fe ta.
33 Nikhomsian, an isuak chu mi tamtakin an hmua, tuhai mo an nih ti khom an lei inhriathai zôi zela, kho tina irthokin an intâna, Jisua le a irchutirhai kha an lei khâla. 34 Jisua kha irkuang ata a chumin chu mipui tamtak a hmua, enkolpu nei loi belra ang an ni sikin lung an khamhai tak taka, sathnem irngai takin ar chutirhai tâka.
35 Khante khohloi a hong ni tâka, a irchutirhai kha Jisua kuang an honga, a kuang, “Hi hi hmun fianrial a nia, a sân an hnung ok tâka, 36 ei kôlvêl loia mani, khuaa mani infetirhaiin lân, an fâk hrang imo khat ircho ri sehai,” an tia. 37 Jisua’n an kuang, “Nangni’n fâk rua imo khat pehai roi,” tiin a sâma. Khan, anni’n a kuang, “Bai a duli irzahni man va’rchôkin fâk rua kin ipêk hrang ma ni?” tiin an irdona. 38 Khasikin Jisua’n an kuang, “Bai iza mo nin inei? fe unglân, va en u ta,” a tia. Khanchu, an inei zât an inhriat le chu, “Bai ringa le nga inhni,” tiin an hrila.
39 Kha hnung chu, Jisua’n mipuihai kha, a pâl pâlin irsena, hloisûl chunga intoihai hrangin irchutirhai chong a bêhaia. 40 Khaang khan mipuihai kha a thâr thârin irzakhatin, sômringa’n an intoitirhai tâka. 41 Kha zoiin chu Jisua’n bai ringa le nga inhni kha a lâka, Pathian kuang lômthu a hrila. Kha hnung chu bai kha a khoia, mipuihai sem pehai hrangin a irchutirhai kuta a pêk ta. Nga khom kha an rênga laia a sem pehai sa tâka. 42 Mi tinin an fâka an khop senga. 43 Bai le nga an fâk mihlia kha khamphulu sômhleihni an la hrût insipa. 44 A ivâihai kha pasal ulian ringot khom sângringa an ni.
Jisua tui chunga fena thu
45 Khan, mipuihai an chîntir laiin varâl tianga Bethsaida khuaa a matona lei fe hrangin ama ngêtin a irchutirhai irkuanga an chuangtirhaia. 46 Mipuihai kha an thahai zoiin chu chongchai hrangin tânga a fe tâka. 47 Khohloi a hong ni’n chu, irkuang kha dîl laia a om tâka, ama kha a bingin muanga a oma. 48 Phâivua’n a ni nona tiang a nam tâk sika khan lunginzîng taka irkuang an ivailâi chu a hmua; kôlirsal tônin dîl chunga khan anni tiang a honga, pialhai a tuma. 49 Khan, anni khan dîl chunga a ife an hmu’n chu mithi irtha an sôna, an khêk mur mura. 50 Ama an hmua an rêngin irtha tâk rakin an oma. Voikhat rengin Jisua’n an kuang, “Lungirngam takin om roi! Keima kêng ki ni, chi no roi,” a ti pehaia. 51 Khanchu, an kuang irkuanga khan a chuang saa, phâivua kha a’rngam ta. Irchutirhai chu an irngai ar khêl tak taka, 52 an milung ngar sika sângringa a ivâina thu omzia diktak kha an inhriat thei no sikin.
Jisua’n Genesaret rama damloihai an dam
53 Khan, varâl an kâiin chu Genesaret ram an tunga, khatak khan an irkuang an khita. 54 Irkuang ata an chum le chu Jisua a nih ti mihaiin an inhriat zôi ta. 55 Kha ram pumpuia mihai an hong intân sup supa, a omna an inhriatna rikipa, a kuang damloihai an puantha pumin an hong irzôna. 56 Kho hmuna khom khuaa mani, khopuia mani, loia mani, Jisua fena rikipa chu bazara khom damloihai an hong tuanga, a puan hmor lua tôn thei hranga phalna an zonga; khaang khan a tôn murdi chu an dam thiai a ni.
1 Khan, Jerusalem rengata hong Farisaihai le Dan irchutirtuhai Jisua kuang an hong irbuka. 2 Khahai khan Jisua irchutirhai senkhatin kut sôp loia fâk an izong an lei hmu tâka.
3 (Farisaihai le Judahaiin chu an pi le pu thumâk zômin an kut fâi takin an sôp no’n chu fâk zong ngai mahai. 4 Khan bazar ata an kîr nôk khomin tui an irsil bak no zelin chu fâk zong ngai mahai. Pi le pu thumâk dang tamtak intûk ngit khom an om sa. Khahai kha khilât, bêlhai, sumsen bêlhai le zâlhmunhai sôpfâi hrang tituhai an ni.)
5 Khasikin, Farisaihai le Dân irchutirtuhai khan, “I sika mo ni irchutirhaiin pi le pu thumâk zôm loiin kut sôp loia fâk an izong ngai hi?” tiin an irdona.
6 Jisua’n an kuang, “Isaia’n nin chungthu a lei ihril kha a dik: vârirlet nin ni,
‘Hi mihai hin an bâiin an ni chôiindôma,
Khannisianlân, an lungrîlin chu an ni hla vit.
7 An irchutirnaa mihriam thupêkhai an irchutir sikin.
An ni biakna hi a korong a ni,’
ti irziak ang khan.
8 “Pathian thupêkhai chu nin hnôla, mihriam thumâkhai nin ipom a ni hi,” a tia. 9 Khan, ama ngêtin an kuang, “Nin thumâk nin zôm theina hrangin Pathian thupêkhai nin ihnôl hi chu lungvâr chu nin nei hi te. 10 Mosia’n, ‘Ni nu le pa mahrip tho roh, tukhomin a nu mani, a pa mani, hrilinsiattu chu thi ngêt ri se,’ tiin thu a lei pêka. 11 Nangni rêkin chu hiang hin nin ti ngai, ‘Mi’n a nu mani, a pa mani, kuang, ni ni hmangna hrang hi ‘Korban’ a ni ta,’ a ti’n chu, (Hi hi Hebrai chongin Pathian kuanga pêk tihna a ni) 12 a nu mani, a pa mani ta hrangin ite sin phal ta mak chêi; 13 hianga thumâk nin irchu thiai sikin Pathian Thu nin irhmangtir ngai a ni. Hianga sin nin itho ngai, a dang khom tamtak a la om sa,” a tia.
Mihriam porinchetirtu
14 Khan mipuihai kha a koi bukhai nôka, an kuang, “Nin rêngin ki thu hi irngai unglân, hi hi inhrenfel roi; 15 Pên tiang rengata mihriam sûnga lût ama porinchetir thei ite om mah, mihriam sûng rengata suak ngaituana hin kêng mihriam a porinchetir ngai. 16 Tukhom inhriatna hranga mikuar nei murdi’n chu irngai ri sehai,” a tia.
17 Khan mipuihai chu in sûnga a lûtsanhai hnungin, a irchutirhaiin chongirkhek thu kha an irdon infela. 18 Khan, Jisua’n an kuang, “Nangni khom hi dôr hi nin la inhriat thei loi mo? Hi hi inhre mak chêi mo? I khom pên tiang rengata mihriam sûnga lût hin ama porinchetir thei mah; 19 a milung sûnga lût loiin a phînga a lûta, a suakpai sikin, ti hi nin inhriat no ma ni?” a tia. (Kha kha Jisua’n fâk hrang tinrêng a’rthiang a tihna a ni.) 20 Khan, ama ngêtin, “Mihriam sûng rengata hong suak khan kêng mihriam a porinchetir ngai. 21 Mihriam lungrîl sûng rengata kêng ngaituana sual a hong suak, kha ngaituana sual khan kêng irditna, inruna, irthatna, 22 uirena, irzukna, sual tinrêng tho nuamna, irhuangna, hurna, hnarsana, nuisona, lârirpâkna le invêtna hai hi an tungtir ngai. 23 Kha sualhai murdi kha sûng tiang rengata a hong suaka, mihriam chu a porinchetir ngai a ni,” a tia.
Suro Foiniki nupangnu iamna
24 Khanchu, a thoia, Jisua’n Galili ram a mâksana, Tura le Sidon hualsûnga a fe tâka. In inkhata a lûta, tûte inhriat nuam maka, khannisianlân, irthup thei mah. 25 Khanchu, nupang inkhat, a nâinu ramilhli ichel pe a oma, kha nu khan a thurchi an hriata, a ke bula a van boka, 26 Kha nupangnu kha Grik mi a nia, irzirna tiang chu Suro Foiniki a ni. Khanu khan, a nâinu sûnga ramilhli inhnot suak hrangin Jisua a ngêna. 27 Khannisianlân, Jisua’n a kuang, “Nâihai khop bak ri sehai, nâihai bai lâkpai pea, uihai kuanga pêk chu dik mah,” a tia.
28 Nupangnu khan a kuang, “Rengpa ni chu a ni, khannisianlân, maichâm hnuaia uihai khomin nâipanghai bai irnôi chu an fâk ngai khate,” tiin a dona. 29 Khan, Jisua’n a kuang, “Kha ni chongbâi sika khan fe nôk tan lân, ni nâinu kha ramilhli khan a suaksan ta,” a ti pea. 30 Khan a ina a fe tâka, a nâinu kha ramilhli’n a suaksan zoia zâlhmuna zâlin a va hmua.
Kuarsêt chong theiloi indam
31 Khan, Tura ram rengata a suak nôka Sidon khuaa lûtin Dekapoli ram hro’n Galili dîl kha a tung tâka. 32 Khan, mi inkhat kuarsêt, chong khom theiloi hi a kuang an hong hruaia, kha pa chunga a kut irnghat hrangin Jisua kha an ngêna. 33 Khaang khan, kha pa kha, Jisua’n mipui lai ata a bingin a hruaia, a kutpârhaiin a mikuar sûng an khîk pea, an chila a milei khom an them pe sa. 34 Kha hnung chu Jisua’n irvân tiang tangin a phûk an sum huta, a kuang “Efatha,” a tia. (Kha kha Grikin, “Lei irhong roh,” tihna a ni).
35 Khanchu, a mikuarhai a hong irhonga, a milei irkhitna khom a hong irsûta, fel takin a chong thei ta. 36 Khan, Jisua’n mipuihai kuang, tûte hril viat loi hrangin thu a pêka, khannisianlân, a khap lia an inpuang li lia tâka. 37 An hriat murdi’n ar khêl an ti tak taka, “A isin tinrêng hi ar khêl a ni! kuarsêthai khom an vâr pehaia, chong theiloihai khom a inchongtir thei hi!” an tia.
1 Kha zoro lai khan mipui tamtak an hong irbûm nôka, ite fa hrang an nei no sikin, Jisua’n a irchutirhai kha a koihaia, an kuang, 2 “Mipuihai hi ki kuang sûn thum bang an om tâka, ite fa hrang an nei ta no sikin lungkham an om bâka. 3 Phîngchâma in tiang kin fetirhai lakin lam laia châmsôl irveina an ta, senkhat len vâng chu an hongna a sân a hla pehai sikin,” a tia.
4 A irchutirhaiin “Tu mo hi ramchâra hin hiang dôra mipuihai infâna hrang bai hmu thei hrang?” tiin an sâma. 5 Jisua’n, “Bai idôr mo nin inei?” tiin ar donhaia. “Sari,” tiin an sâma. 6 Khanchu, mipuihai kha irnênga toi hrangin thu a pêka, kha hnung chu bai sari chu a lâka lômthu a hril zoiin, a khoia; mipuihai laia sem hrangin a irchutirhai kuang a pêka, an sem tâka. 7 Nga tômte an nei saa kha khom kha satvurna a hril zoiin an semtirhaia. 8 Mi tinin an khop dôr dôrin an fâka, an fâk mihlia a’rnôi chu khamphulu sari an hrût insipa. 9 An rêngin sângminli vêl an ni; kha hnung chu Jisua’n mipui kha an chîntirhai tâka. 10 Jisua chu a irchutirhai leh irkuanga an chuang zôi zela, Dalmanutha ram tiang an fe ta.
Farisaihaiin irsinsiana an zong
11 Khan Farisaihai kha Jisua kuang an honga ama an chel theina hrangin an irsêlpuia. Pathianin ama a inham le inhamloi ti inhriat theina hrangin irvân ata irsinsiana irhmuhai hrangin an ngêna. 12 Khan, Jisua kha a milungin ar hniaka, “Itho sikin mo atûnlaia mihaiin irsinsiana an izong? A dik takin nangni ki hril, atûnlaia mihai kuang irsinsiana rêng rêng pêk ni no ni,” a tia. 13 Khan, anni kha mâksanin, irkuang chunga chuang nôkin varâl tiang panin a fe tâka.
Farisaihai chol le Heroda chol
14 A irchutirhaiin bai chôi hrang an irnghila, irkuanga khan bai tang khat vai ti no chu bai dang rêng rêng nei mahai. 15 Khan, Jisua’n an kuang, “Farisaihai chol le Heroda chol ata irhrung unglân, irdîn roi,” a ti ngita. 16 Anni’n chu, “Bai ei nei viat no sikin hi hi a iti kêng,” tiin an irti irhlôma. 17 Jisua’n an chong kha a len hriatin chu an kuang, “Itho sikin mo bai nin inei loi thu ngot nin ibuaipui? Atûn ten nin la inhriat thei loi ma ni? A’rngailam khom nin la inhriat loi ma ni? Nin milung a ingar hrai ma ni? 18 Mit nei chakin ithoa mo mit boi anga nin iom? Mikuar nei chakin ithoa mo mikuar boi anga nin iom? Nin inhriat ta loi ma ni? 19 Mipui sângringa, bai ringa ki khoi lai khan an ifâk mihlia a’rnôi kha khamphulu iza mo nin ihrût insip kha?” tiin a’rdonhaia. Anni’n “Sômhleihni,” tiin an sâma. 20 Khan, “Sângminli, bai sari ki khoi laia khan a’rnôi kha khamphulu i za mo nin ihrût insip kha?” a tia. Khan anni’n, “Khamphulu sari,” tiin an sâma. 21 Khanchu Jisua’n an kuang, “Atûn ten khom a’rngaina lam nin la inhriat loi mo?” a tia.
Jisua’n Betsaida khuaa mitcho an dam
22 Khan, Betsaida khua an hong tungin chu, mipui senkhatin Jisua kuang mitcho inkhat an hruaia, khapa kha tôn hrangin an ngêna. 23 Khan Jisua’n mitcho kut kha chelin kho pên tiang a fepuia; a mit an chil pe zoiin chu a chunga kut a’rnghata, a kuang, “Ni hmu thei ta mo?” tiin ar dona.
24 Khan a’rhei vêla, “O mihriam ki hmua, thingkung fe dêtdût angin ki hmu,” a tia. 25 Khan Jisua’n khapa mita khan a kut a’rnghat nôka. Kha zoroa khan kha mitchopa khan a en ngita, a mit a hong vâr nôka, itinrêng fel takin a hmu thei ta. 26 Khan Jisua’n, “Kho sûnga lût ta no roh,” tiin a in tiang an fetir ta.
Petera’n Jisua kha Krista a ni ti a phuangna
27 Khan, Jisua le a irchutirhai kha an fe suaka, Filipa Kaisari ram khuahai kha an irfanga; khan an fe pumin a irchutirhai kuang, “Mihaiin keima hi tu mo ki ni, an ni ti ngai?” tiin ar donhaia. 28 Khan anni’n chu, “Baptistu Johana,” nang an tia; senkhatin chu, “Deipu Elija, senkhatin tiana deipuhai laia inkhat khôk nih a ti, nang an ti ngai” tiin an sâma.
29 Khan Jisua’n an kuang, “Khante, nangni’n te tu mo nin ni ti?” tiin ar donhaia, Petera’n a kuang, “Krista” tiin a sâma. 30 Kha hnung chu a thurchi kha tûte hril viat loi hrangin a khaphai khaka.
Jisua’n a ituang hrang thu le a ithi hrang thu a lei insîr
31 Khan, a irchutirhai kuang, “Mihriam Nâipa’n intakna tamtak a ituang ngêt hrang thu hai, upahai, Ochai inlalhai le Dân irchutirtuhaiin an ihnôl hrang thu hai, an ithat ngêt hrang thu hai, sûn thum hnunga a ithoinôk ngêt hrang thu hai,” ar chutir irphut tâka. 32 Kha thu kha fel takin an sîr pehaia. Khanchu, Petera’n ama kha a bingin a hruaia a hala. 33 Khannisian, Jisua kha a’rheia, a irchutirhai tiang a ena, “Setan, ki hnunga fe roh. Ni ingaituana hi Pathian ata ni loiin, mihriam ata kêng a ini!” tiin Petera kha a hala.
34 Khan, Jisua’n mipuihai le a irchutirhai kha a koihaia; an kuang, “Tukhom a ni zui nuam ka chu mâni irnghilin, a Kros irputin ni zui ri se. 35 Tukhom mâni hringna inzôk nuam ka chu inchân a ta, khan tukhom keima leh Thurchi Sa sika a hringna inchân ka chu inzôk a ti. 36 Mi’n rammual hi a pumin nei sianlân, a hringna inchân ta sian, a ta hrangin imo a’rfêna? 37 Mi’n a hringna hmu nôk hranga a pêk hrang ite a nei no sikin. 38 Tukhom atûnlaia mihai, uire hmang le sual takhai laia keima le ki thu inzakpui chu, Mihriam Nâipa hi vântîrtôn irthianghai le a Pa roiinpuina leh a zuang tika chu lan zakpui a ti,” a tia.
1 Khan, ama ngêtin a irchutirhai kuang, “A dik takin nangni ki hril, nangni hitaka ngîr senkhathai hi chu Pathian Ram kha a sinthotheina leh a zuang tung an hmu mâka chu thi no nihai,” a tia.
Hmêl danglamna
2 Khan, sûn ruk zoia chu Jisua’n, Petera, Jakoba le Johana hai, tâng irsâng taka a fe puihai tâka, an makunga a hmêl omzia kha a hong danglam tâka. 3 Khanchu, a silkaihai khom rammuala puan irsûkpuhaiin an isôp inchek thei bana chekin a hong irtêk tâka. 4 Khan Elija le Mosia kha an zuang inlâra, Jisua’n a chongpuihaiin an hmua. 5 Khanchu, Petera’n Jisua kuang, “Irchutirtu, hitaka om hi ei ta hrangin a sa! Kairêng sin ki ta, nangma hrang inkhat, Mosia hrang inkhat, Elija hrang inkhat,” a tia. 6 An chi hrai tâk sikin, ti hrang khom a inhriat ta loi a ni.
7 Khan, sûm zuang zîngin, a’rhlîhaia; sûm ata kha hnuk irhai a zuang suaka, “Ama hi ki Nâipa lungthung tak a ni, a chong irngai roi,” a tia. 8 Khanchu, inrang takin an en vêla, Jisua ti no chu tukhom hmu ta mahai.
9 Tâng rengata an zuang chum laiin Jisua’n an kuang, “Mihriam Nâipa mithi lai ata a thoinôk mâka chu nin thil hmuhai kha tûte kuang hril no roi,” tiin a hrilhaia. 10 Khanchu, kha a thupêk kha an zôma, nikhomsian, “Mithi lai ata thoinôkna thu a hril kha i tihna ma ni ta?” tiin an irdon irhlôma. 11 Khan anni’n chu Jisua kuang, “Itho sika mo Dân irchutirtuhaiin Elija kha zuang bak a ti an iti ngai?” tiin an irdona. 12 Khan Jisua’n an kuang, “Thil tinrêng siam infel hrangin Elija kha a izuang masa ngêt hrang a ni, khannisianlân, itho sika mo Pathian Thubu’n Mihriam Nâipa dengtheina tamtak tuangin mi ihnôlin la om a ti, a iti? 13 Khan, nangni ki hril: Elija chu a zuang tâka, a thurchi an lei irziak ang tâk khan ama chu an nuam ang takin an lei lo tâk,” a tia.
Jisua’n ramilhli ichel an damna
14 Khan a irchutir danghai kuang an zu tungin chu, an kôla mipui tamtakhai le Dân irchutirtuhaiin an lei irsêlpuihai lai tak an zu hmua. 15 Khan mipui murdi’n Jisua kha an hmu’n chu, ar khêl an ti oka, ama tiang an van tâna chubai an va mûka. 16 Jisua’n a irchutirhai kuang, “Annihai leh khan itho mo nin irsêl?” tiin ar donhaia. 17 Mipui laia mi inkhatin a kuang, “Irchutirtu, ki nâipa ramilhli ichel chong theiloi nin dam pe hrangin ki hong ihruai a ni. 18 A puang pe zoro’n chu an rîltir rak ngai, a chilhuan an suaka, a ha a riala, an ngar khak ngai. Inhnotpai pe hrangin ni irchutirhai ki ngêna, khannisianlân thei mahai,” tiin a hrila.
19 Jisua’n an kuang, “Idôra iamna boi mihriam mo nin ini tâk? Idôr ten mo nin kuanga omin nangni ki irngaitua thei hrang? Nâipang kha ki kuang hong hruai roi,” a tia. 20 Khanchu, a kuang an hong hruaia, ramilhli khan Jisua a hmu’n chu nâipangtepa kha a sân deng an theitira; hnuaia a chinginrîla, a chilhuan suakin a hong inhlum a va inhluma. 21 Khan Jisua’n a pa kha ar dona, “Hianga a om phutna hi itiklai ata ma ni?” a tia. “Nâipangte a ni lai ata kêng,” tiin a sâma. 22 Ramilhli’n voi iza meia le tuia namthâkin that hrang a tuma, khasikin, nangin ni thei paiin chu lung nin khamin lân, ni san roh, tiin a ngêna.
23 Jisua’n a kuang, “Ni theiin chu, mo ni iti! A iamhai ta hrangin chu itinrêng hi tho thei a ni, ti hi ni inhriat loi ma ni?” a tia. 24 Khanchu nâipangte pa kha khêkin, “Ki iam, ki iam thei ualna hrangin ni san roh,” a tia.
25 Khan, Jisua’n mipui hong intân irbukkhôm kha a hmu’n, ramilhli kha a hala, a kuang, “Nang ramilhli chongtheiloi le kuarsêt, thu nang ki pêk nâipangtepa sûng rengata kha hong suakin lân, lût nôk ta no roh,” a tia. 26 Khan a khêk suaka, deng an theitir bit hnungin a hong suak tâka, nâipangtepa kha thi ang dôrin a oma, mi tamtakin chu, “A thi tâk kêng,” an tia. 27 Khannisianlân, Jisua’n a kuta a chela, a kaithoia, khanchu a hong thoi tâka. 28 Khan Jisua ina a va lûtin, chu a irchutirhaiin a kuang, “I sika mo keini’n te kin inhnot suak thei loi?” tiin inrûkin an irdona. 29 Jisua’n, “Hiang hi chu chongchaina le bu ngheina ti no’n chu, insuak thei ni mah,” a tia.
Jisua’n a thi hrang le a thoinôk hrang thu a hrilna
30 Jisua le a irchutirhai kha Galili hro’n an fe suaka, a omna kha tûte inhriat nuam maka. 31 A irchutirhai kha a hrila, an kuang, “Mihriam Nâipa hi mihriamhai kuta incheltirin om a ta, that an ti; khan an that hnung sûn thum tena thoi nôk a ti,” a tia. 32 Khannisianlân a thu insîrhai kha a omzia inhre thei mahai, ar don lak ngam mahai.
Tu mo roiinpui tak hrang
33 Khan, Kapernaum an hong tunga, in sûnga an lût tena chu, Jisua’n a irchutirhai kuang, “Lampuia khan i thu mo nin insîr irhlôm kha?” tiin a’rdonhaia. 34 Lampuia khan tu mo ei laia hin a lian tak hrang, ti thu an insîr irhlôm sikin an dâihreka. 35 Khanchu Jisua kha a toia, a irchutir sômhleihnihai kha a koia, an kuang, “Tukhom a maton tak ni nuam chu, a hnungkhôn taka an iom hrang a ni, mi tin sinthotua om bak a ti,” a tia. 36 Khan, Jisua’n nâipangte a kaia, an laia an ngîrtira, inkua pumin an kuang, 37 “Tukhom ki’rhming sika hianga nâipangte inkhat khom lôm ka chu keima ni lôm ni an ti; tukhom keima ni lôm chu, a ni tîrpu lôm khom an ni sa,” a tia.
A ni doiloipu chu eini tianga kop a ni
38 Johana’n a kuang, “Irchutirtu, mi inkhat nir hminga ramilhli inhnot suak kin hmua, kin chanpui a ni no sikin kin hong khap,” a tia. 39 Jisua’n, “Khap ta no roi, tukhom ki’rhminga sinirkhêl thoa, a ni hril insiat thei om mahai. 40 Tukhom a ni doi loitu chu ei tianga kop a ni. 41 Tukhom Krista mi nin ni sika, tui khilât khat in hranga nangni pêkpuhai ka chu, a diktakin nangni ki hril, kha mi khan a lômman hmu ngêt a ti.
Sual hranga inthêmna
42 “Tukhom, hi a ni iampu chîntehai laia inkhat khom intûktir ka chu, an ringa bu nôina lung liantak inhlitirin tuikhangliana inthahai sian, a ta hrangin sa ual a ti. 43 Khan, ni kutin nang an tûktirin chu, tan zôi ro! kut kianghni neia hremhmuna fe nêkin chu kut bûia hringnaa fe ni ta hrangin a sa ual. 44 Kha hmuna khan chu irnge thi ta ngai maka, mei khom ram ngai ma. 45 Khan ni ke’n nang an tûktirin chu tanpai zôi roh, ke kianghni neia hremhmuna pai nêkin chu, ke bûia hringnaa lût ni ta hrangin a sa ual. 46 Kha hmuna khan chu irnge thi thei ngai maka, mei khom thi ta ngai mah. 47 Khan, ni mit inkhatin nang an tûktirin chu kêlsuak roh! Mit kiangkhat neia Pathian Rama lût, ni ta hrangin a sa ual: mit kianghni neia hremhmuna pai nêkin chu, 48 Kha hmuna khan chu an irnge thi ta ngai maka, mei khom ram ngai ma.
49 “Irbôlna michi al leh an irthâr ngai angin mi tinrêng meiin irthâr la nih an ti. 50 Michi hi a sa; khannisianlân, a dong hnungin te i leh mo nin in-al nôk hrang? Nangni ngeia michi nei unglân, irngei irhlôm roi,” a tia.
1 Khan, Jisua’n kha hmun kha a mâka, Judai ram panin Jordan râla a kâia, mipuihai kha a kuang an hong irbuka, a irchutirhai ngai ang dênin ar chuhaia. 2 Khan Farisai senkhat a kuang an honga, ama fiana hrangin, “Mi’n a dôngma a imâk hi, dânin a phal mo?” tiin an irdona. 3 Jisua’n an kuang, “Mosia’n itin mo dân nangni a pêk?” tiin ar donhaia. 4 Anni’n chu, “Mosia’n chu irmâkna lekha irziakin a iphal ngai a ni,” tiin an sâma.
5 Jisua’n an kuang, “Nin milung a ngar sikin kêng, kha dân kha nangni a irziak pe mo sôn mak chêi. 6 Khannisianlân, rammual irsiang ata Pathian thubu’n a iti angin, ‘Pathianin pasal le nupang a siam a ni’. 7 Khasikin pasalin a nu le a pa masan a ta, a dôngma thop a ti. 8 Khanchu, an ruaiin taksa pumkhat hong ni ta an ta, inhni ni ta no nihaia; taksa pumkhat hong ni ta an ti. 9 Pathianin a irzom tâk chu mihriamin sen ta no ri se,” a tia.
10 Khan in sûng an lût tena chu a irchutirhaiin kha thu kha an irdon nôka. 11 Ama khan an kuang, “Tukhom a dôngma mâka mi dang nei chu, a dôngma a iuiresan a ni; 12 Khaang dênin nupang khomin a pasal a mâka, mi dang nei chu a pasal a iuiresan a ni,” a tia.
Jisua’n nâipangtehai sat a vur thu
13 Mi senkhatin a kuang nâipangtehai an hong hruaia, an chunga kut irnghat hrangin, irchutirhai khan an lei halhaia. 14 Khannisianlân, Jisua’n kha kha a hmu’n chu a ning an mura, a irchutirhai kuang, “Nâipangtehai kha ki kuang inhongtirhai unglân, khaphai no roi, Pathian Ram chu hiang mihai ta kêng a ini. 15 A dik takin nangni ki hril, tukhom nâipangte’n Pathian Ram a ilôm anga lôm loi chu a sûnga lût thei viat no ni,” a tia. 16 Khanchu, nâipangtehai kha an kuahaia, an chunga kut irnghatin sat a vurhai ta.
Ruatharte irchong kumtuang hringna zong thu
17 Khan, Jisua kha fe nôk hrangin a hei irphêt le chu, mi inkhat a kuang a hong intâna, khûksadelin, “Irchutirtu sa, kumtuanga hringna ki nei theina hrangin imo ki itho hrang?” tiin ar dona. 18 Jisua’n a kuang, “Itho sika mo sa ni ni iti? Pathian ti no chu tûte sa om mahai. 19 Thupêkhai kha chu nin hriat khate: ‘Mi that no roh; uire no roh; inru no roh; milakin bâto tho no roh; mi huang no roh; ni nu le pa mahrip tho roh,’ tihai hi,” a tia. 20 Khan khapa khan a kuang, “Irchutirtu, kha thupêk murdihai kha chu nâipangte ki ni lai ata ki izôm ngai kêng,” a tia. 21 Jisua’n khapa kha en ngitin, lungthungna tak neiin a kuang, “Lamkhat ni la’rsam, fe’n lân ni inei murdi zuarin lân, kha sum kha inrianghai pe’n lân, khanchu, irvâna irchon nei ni ti; kha hnung chu hongin lân, ni hong zui roh,” a ti pea. 22 Khapa khan kha chongbâi kha an hriatin chu, a hmâi a môk rupa, milung inzîng takin a rota, sum tamtak nei mi a ni sikin. 23 Khan, Jisua kha a hong irhei vêla, a irchutirhai kuang, “Irchonghai hrangin chu Pathian Rama lût hi, idôra intak mo a ini tâk!” a tia.
24 Khan, a irchutirhaiin a thuhril kha ar khêl an ti oka, khannisianlân, Jisua’n a sâmhai nôka, an kuang, “Nâihaio, Pathian Rama lût hi chu an tak kêng: 25 Mi’rchong Pathian Rama lût nêkin chu, saringsei simphuai mikuara lût hi ol ual a ti,” a tia. 26 Khan, anni’n chu ar khêl an ti tak taka, “Khante, tu mo inzôkin om thei hrang?” tiin an sâma. 27 Jisua’n anni kha a ena, “Kha kha mihriam hrangin tho thei zât ni maka, Pathian hrangin chu tho thei loi om ma, Pathian hrangin chu itinrêng tho thei a ni,” a tia.
28 Petera’n a kuang “Irngai ta, thil tinrêng mâksanin nang kin zui tâk a ni,” tiin a hrila. 29 Jisua’n, “A dik takin nangni ki hril, tukhom keima sik le Thurchi Sa sika in mani, urênghai mani, farnuhai mani, nu mani, pa mani, nâihai mani, ramhai mani, mâksan ka chu, 30 hi dam sûng renga hin in mani, urênghai mani, farhai mani, nu mani, pa mani, nâihai mani, ramhai mani, a bâk irza’n hmu an ta, dengintheina le, zoro la hong hranga kumtuang hringna hmu sa a ti. 31 Khannisianlân, mi tamtak a masa taka omhai kha inhnung taka la om an ta, inhnung taka omhai chu maton taka la om an ti,” a tia.
Jisua’n a thi hrang thu an sîr voithumna
32 Khan, Jisua le a irchutirhai kha Jerusalem hong fe hrangin lampuia an oma, Jisua chu maton an saa. A irchutirhaiin ar khêl an ti oka, a zuipu murdi’n chu an chia. Khan a irchutirhai kha an bingin a hruaihai nôka, a chunga thil la hong tung hranghai an sîr pehai nôka, an kuang, 33 “Irngai u ta, Jerusalema ei hong ife nôk hrang a ni hi; Mihriam Nâipa hi Ochai inlalhai le Dân irchutirtuhai kuta incheltirin om a ti. Thi hrangin rêlinchuk an ta, kha hnung chu Jentailhai kuta pêk an ti. 34 Anni khan nuiza siamna’n hmang an ta, inchil sa an ta, zêm an ta, that an ti, khannisianlân, sûn thum zoia thoi nôk a ti,” a tia.
Jakoba le Johana thil ngên
35 Khan, Zebedaia nâihai Jakoba le Johana’n Jisua an hong nâia, a kuang, “Irchutirtu, ni kuanga kin nghihai hi, ni ni itho pe kin nuam,” an tia. 36 Khan, Jisua’n an kuang, “Nin ta hrangin imo nangni tho pe inlân nin inuam?” a tia. 37 Anni khan a kuang, “Ni roiinpuina Rama ni rêngtoihmun chang tiang inkhat vei tiang inkhat nin toitir hrangin kin nuam,” tiin an sâma. 38 Jisua’n an kuang, “Nin izong hi nin inhriatloi kêng. Dengtheina khilât ki iin hrang hi nin iin thei hrang ma ni?” a tia. 39 Khan, anni’n chu, “Kin thei,” tiin an sâma. Jisua’n an kuang, “Ki khilât in hrang chu in thei nin ta, ki baptisma chang hrang khom chang thei nin ti. 40 Khannisianlân, ki chang tiang mani ki vei tiang mani a toi hrangin chu keima inthang hrang ni maka, kha hmunhai kha chu Pathianin a inkung pehai ta hrangin kêng a ini,” a ti pehaia.
41 Kha thu kha a irchutir sômkhathaiin an lei inhriatin, Jakoba le Johana chunga khan an ning an mura. 42 Khasikin, Jisua’n an rêngin a koihaia, an kuang, “Jentailhai chunga roirêltua an iphunhai chu an chunga an inlal tak tak ngaia, an hruaituhai khom an chunga ircham an nei tak tak ngai tih khom nin inhriat a ni. 43 Khannisianlân, nangni laia chu khaang kha ni no ni, tukhom nin laia mi lian chang a nuamin chu, nin sinthotua a iom bak ngêt hrang a ni. 44 Khabana, nin laia tukhomin maton tak ni a nuamin chu mi murdi suaka a iom bak ngêt hrang a ni. 45 Mihriam Nâipa lua hi mi’n a sin an itho pe hranga zuang ni maka, mi sintho pe hrang le mi tamtak irtanna hranga a hringna pe hrangin kêng a izuang a ni,” a tia.
Mitcho Bartimaia indam thu
46 Khan, Jeriko an hong tunga, Jeriko rengata Jisua le a irchutirhai le mipui tamtak le a suak laiin kutdo mitcho, Timaia nâipa Bartimaia kha lampui kôla a lei toia. 47 Nazaret Jisua a nih ti an hriatin chu a khêka, “Jisua Davida nâipa! Lung nin kham roh,” a tia. 48 Mi tamtakin dâihrek hrangin an hala, khannisianlân, ama khan, “Davida nâipa, lung nin kham roh!” tiin a khêk nôk ual uala. 49 Jisua a ngîra, “Hong koi u ta”, a tia. Khan mitchopa kha an hong koia, a kuang, “Lungirngam takin omin lân, thoi roh, nang a koi,” an ti pea. 50 Khan, a puan a pai raka, ar chôma, Jisua kuang a fe ta. 51 Jisua’n a kuang, “Ni chunga imo nang tho pe inlân ni inuam?” ti’n a’rdona. Khan mitchopa khan a kuang, “Irchutirtu, hmu thei ki nuam,” tiin a sâma. 52 Jisua’n a kuang, “Fe ta roh, ni iamna hi ni idampui a ni,” a ti pea. Khanchu, a hmu thei zôi tâka, lampuia khan Jisua a zui tâka.
1 Khan Jerusalem khua an tung tônin, Bethfage le Bethani kho kôl Oliv tâng an hong tungin, a irchutirhai laia mi inhni a tîra, 2 an kuang, “Nin maton khuaa son fe unglân, nin tungin chu sakuartungte irkhit, tûte la chuang ngai loina va hmu nin ti. Kha kha sût unglân, hin hong kai roi. 3 Khan, tukhomin, ‘Kha kha ithoa mo nin ikai?’ tiin nangni an irdonin chu, ‘Rengpa’n a izong kêng, hong inthaktir nôk zôi a ti,’ ti roi,” a tia. 4 Khanchu an fe tâka, sakuartung te, mikot kôla irthung, pên tiang mikot kôla ngîr kha, an va hmua, an sût tâka.
5 Khataka ngîrhaiin, “Ithoa mo sakuartung te kha nin isût?” an ti pehaia. 6 Jisua’n a ihril pehai lam ang takin an sâma, khanchu an ife an phal tâka. 7 Sakuartungte kha Jisua kuang an hong kaia, a chunga an puanhai an dâp zoiin chu, Jisua kha a chuang tâka. 8 Mi tamtakin lampuia an puanhai an dâpa, mi dangin loia sôlhna sâtin an dâp saa. 9 Khanchu a mân tianga fehai le a hnunga zuipuhai khan,
“Hosana! Rengpa irhminga zuang chu inpâkin om ri se;
10 Ram zuang tung hrang ei pa Davida ram chu inpâkin om ri se;
Anchungtaka khin Hosana,”
tiin an khêka.
11 Khan, Jerusalem a tungin chu Tempila a lûta, thil tinrêng a en vêla. Khannisianlân khohloi a lei ni tâk sikin a irchutir sômhleihnihai leh Bethani-a an fe tâka.
Jisua’n theipui kung khua a sâlna
12 Zîng nôka chu Bethani rengata an hong kîr nôkin, Jisua kha a phîng a châm pea. 13 Khan, theipui kung hna nei hla vit ata a hei hmua, “A ra mo ki hmu ro rôi,” tiin a va pana; khanisianlân, a va tungin chu a hna ti no chu ite va hmu maka; a ra zoro a ni no sikin. 14 Jisua’n theipui kung kuanga khan, “Atûn ata chu tûte’n ni ra fa ta no ri sehai,” a ti pea. A irchutirhai khomin kha chong kha an inhriat.
Jisua’n Tempil a’rthiangtir thu
15 Khan, Jerusalem an tungin chu Jisua Tempila a va lûta, Tempila neinun zuartuhai le irchôkpuhai kha a’rzûlpaihaia. Sum thûltuhai maichâm le phervali zuartuhai toihmun khom a nam inrîlpai pehaia. 16 Khan, tukhomin Pathian Tempila neinun an ichôi khom phal ta mah. 17 Khanchu, an kuang, “ ‘Ki in chu nam tin ta hranga chongchaina in ti an tih,’ ti irziak a ini loi ma ni? Nangni rêkin chu inruhai chêng inbualna’n nin isiam hi,” tiin a’rchuhaia. 18 Khan Ochai inlalhai le Dân irchutirtuhaiin kha kha an inhriatin, an that theina hrang lampui an zonga. Ama kha a sân an chia, asan chu mipuihai khan ar chutirna kha ar khêl an ti zap sikin. 19 Khan, khohloi rikipin Jisua le a irchutirhai kha khopui ata an fe suak ngai.
Theipui kung ata irchu hrang
20 A tûk zînga chu lampui kha an hong hro’n theipui kung kha a’rzung dêna thêmin an hmu tâka. 21 Khanchu, Petera’n a hong inhriat suak nôka, a kuang, “Irchutirtu, en ta, theipui kung khua ni isâl kha a thêm ving ta,” a tia. 22 Jisua’n a kuang, “Pathian iam roi. 23 A diktakin nangni ki hril, tukhom hi Oliv tâng hi irsonin lân, so tuikhangliana zu irpai roh, ti sianlân, lungrîla lunghla viat loiin a ihril kha tung ngêt a ti, iamtuhai ka chu an ihril ang takin hmu an ti. 24 Khasikin nangni ki ti, itinrêng chongchaia nin inghi ka chu hmu sai angin irbe unglân, khanchu, hmu nin ti. 25 Khan, chongchai hranga nin ngîr rikipa, tu chunga khom nuarna nin nei khomin ngaidam roi, nin pa irvâna mi khomin nin inchâinahai nangni a ngaidam theina hrangin. 26 Khannisianlân, nin ngaidam no’n chu nin pa irvâna mi khomin nangni ngaidam ual no ni,” tiin a hril pehaia.
Jisua Irchamneina an irdonna thu
27 Khan, Jerusalem an tung nôka, Tempila a lêng laiin Ochai inlalhai, Dân irchutirtuhai le upahai kha Jisua kuang an honga, 28 “Tu irchamin mo hihai hi ni itho? Hi thilhai hi tho hrangin tu’n mo ircham nang a ipêk?” tiin an irdona. 29 Jisua’n, “Kei khomin chongbâi khat nangni irdon ki ta, ni don unglân, khanchu, tu irchamin mo hi thilhai hi ki itho nangni hril ki ti. 30 Johana’n baptisma a itho theina ircham kha, Pathian ata mo, mihriam ata mo? ni sâm roi,” a tia. 31 Khanchu, an bingin an irsêla, “Imo ei iti hrang tâk? ‘Pathian rengata’ ei ti lakin te, itho sika mo a chong nin iiam loi? ni ti a ta. 32 ‘Mihriam rengata’ mo ti ih?” an tia. Khannisianlân, mipuihai kha an chia, asan chu, mi murdi’n Johana kha deipu’n an lei pom sikin. 33 Khasikin, “Inhre ma ung,” tiin Jisua kha an sâma. Khan Jisua’n, “Kei khomin tu irchamin mo hi thilhai hi ki itho, nangni hril ual no ning,” tiin a sâmhaia.
1 Khan, Jisua’n chongirkhekin an kuang thu an sîra, “Voikhat chu mi inkhatin Grep irhuan a siama, dâiin ar kula, grep sômna hrang khur a choia, in irsâng a sina. Khanchu, loi enkol ngaihai kuang a chuan irhlo hrangin a pêka, ram danga an zin tâka. 2 Khan, grep irhmal zoro a hong ni’n chu, a dongtum la hrangin a enkolhai kuang a suak inkhat a tîra. 3 A enkolhaiin a suak kha an lei chela, an vîka, kut rongin an infetir tâka. 4 Khan, ama khan suak dang a tîr nôka; kha khom kha a lu an lei vîk phopa mualphoi an lei sak bita. 5 Ama khan suak dang a tîr nôka; kha pa kha chu an lei that ta. Suak tamtak khom senkhat an lei vîkhaia senkhat an lei thathai. 6 Inkhat a nâi lungthungtak a la neia; ‘Ki nâipa hi chu mahrip lei tho ngêt an ti,’ tiin a nâipa kha a hnungkhôn taka a tîr tâka. 7 Khannisianlân, irhuan enkoltuhai khan, ‘Hi pa hi irchon lua hrangtu chu a ni, tho that ei ti, ar chon lua hrang hi ei lua theina hrangin,’ an irtia. 8 Khaang khan a nâipa kha an chela, an thata, a ruak khom grep irhuan pên tiang an pai tâka. 9 “Khan, irhuan chongpu khan imo a ilo hrang tâk?” tiin Jisua’n ar dona. Hong a ta, kha mihai kha thathai a ta, grep irhuan kha enkoltu dang pe paihai a ti. 10 Hi Pathian thu hi nin itep loi ma ni?
‘In sinhaiin lung an ipai,
hmanghmunboia an ibe kha.
A kila lung kâmom tak a hong ni ta.
11 Kha kha Rengpa itho a nia,
ei mit hmua ar khêl tak chu a ni!’
ti hi,” a tia.
12 Kha chongirkhek kha Juda hruaituhai demin a insîr tih inhriatin Jisua kha chel an tuma, khannisianlân, mipui an chia, ama kha an mâka, an rot ta.
Khâzana chôi chungchânga
13 Khan, a thu’nsîra irthokin chel hrangin Farisai senkhathai le Heroda pâla mi senkhat a kuang an tîra. 14 A kuang an hong tungin chu, “Irchutirtu, mi dik tak ni nia, tukhom ngaisak bîk nei mak che ti kin inhriata, tukhom hnôl ual loiin thei dôrin Pathian thu mi nir chuhai ngaia, khan, Kaisara kuanga khâzana chôi hi mo a’rthiang, irthiang ma mo? kin ipêk hrang mo, kin ipêk loi hrang mo?” an tia. 15 Khannisian, Jisua’n an vârirletzia kha an hriat chiana, an kuang, “Itho mo nin ni ifia? Aduli pum inkhat hong chôi u ta, lei en rong,” a tia. 16 Khanchu, an hong chôi pea, ama khan an kuang, “Tu irlim le tu irhming mo a chuang?” tiin ar donhaia. Anni khan, “Kaisara,” tiin an sâma. 17 Khanchu, Jisua’n an kuang, “Kaisara ta chu Kaisara pe unglân, Pathian ta chu Pathian pe roi ba,” a ti pehaia. Kha hnung chu Jisua chunga khan a sân an irngai ar khêl tak taka.
Thoinôkna thu irdonna
18 Khan, thoinôkna om ma ti ngai Sadukaihai Jisua kuang an honga. 19 “Irchutirtu, Mosia’n hi dân hi kin ta hrangin a’rziaka; tukhomin nâi nei loiin a dôngma thisan sianlân, a sangpa khan kha meithâi kha a inei ngêt hrang a ni, nâi an neia a thitu upa nâihaia ibe an nina hrangin. 20 Voikhat chu urêng sari an oma; a ulian takin dôngma a neia, irchi nei loiin a thia. 21 Kha hnung an hnina khomin a nei nôka, irchi nei loi ngêtin a thia. An thumna khomin khaang dênin a neia. 22 A hnuai nôkahai khomin khaang dên khan an hong nia; urêng sarihai khan kha nupang kha an lua senga, tukhomin nâi neipui loiin an thi zita. A hnungkhôn taka nupangnu khom kha a thi sa ta. 23 Thoinôk tikin teh tu dôngma tak mo a ini hrang tâk? Kha sarihai khan an rêngin an lua senga,” an tia.
24 Jisua’n an kuang, “Nin irngai insual bâka na! Imo asan nin inhriat mo? Asan chu, Pathian thu le irtha nin inhriat no sika a ni. 25 Mithihai an thoi nôk tika chu irvâna vântîrtônhai angin om ta an ta, dôngma pasal irnei ta no nihai. 26 Khan, mithihai kaithoia an om hrang thurchi chu, Mosia lekhabua chînribuk thurchia khan Pathianin, ‘Keima Abrahama Pathian, Isaka Pathian, Jakoba Pathian ki ni,’ tia a ichongpui lam kha nin la itep ngai loi ma ni? 27 Ama chu a hringhai Pathian kêng a ini, mithihai Pathian ni mah. Nin irngai insual ok!” tiin a sâma.
Thupêk roiinpui tak
28 Dân irchutirtu inkhatin an chong an hriata, Jisua’n Sadukaihai kha sâmna satak a pêk ti an hriatin chu a honga, Jisua kuang, “Thupêkhai laia i hi mo a kâmnang tak?” tiin ar dona. 29 Jisua’n a kuang, “A kâmnang tak chu hi hi a ni, ‘Israelhai, irngai roi! Rengpa ei Pathian vai hi Pathian a ni. 30 Rengpa ni Pathian chu ni lungrîl murdi’n, nir tha murdi’n, ni ngaituana murdi’n, ni hrâtna murdi’n lung ni ithung hrang a ni’ ti hi. 31 A voi hnina kâmnang chu hi hi a ni, ‘Nangma lung ni irthung ang dênin ni bômhai lungthung roh’ ti hi. Hi inhnihai nêka thupêk nang ual reng om mah,” tiin a sâma.
32 Dân irchutirtu khan Jisua kuang, “A ni khate, irchutirpu! Ni iti angin Rengpa vai hi Pathian a nia, ama bana chu Pathian dang zel om mahai. 33 Khasikin Pathian chu mihriamin a lungrîl murdi’n, a lunginchongna murdi’n, a hrâtna murdi’n lung a ithung ngêt hrang a ni, Khabana ama lung a irthung ang khan a bômhai khom lung a ithung hrang a ni. Pathian kuang pumhâl irbôl le irbôlna danghai nêkin khom, kha thupêk inhnihai zôm kha a nang ual,” a tia. 34 Khan, vâr takin a sâm ti Jisua’n an hriatin a kuang, “Pathian Ram chu hla mak che,” a ti pea. Kha zoiin chu tûte’n chong rêng rêng irdon ngam ta mahai.
Mesia thu an irdonna
35 Khan, Jisua’n Tempila ar chuhai laiin an kuang, “Itin mo Dân irchutirtuhaiin Mesia kha Davida irchia mi a ni an iti thei?
36 Davida ngeiin Irtha Irthiangin,
‘Rengpa khan ki Rengpa kuang,
ki chang tiang toi mai roh,
Ni râlhai ni kezapha hnuaia ki sia mâka chu,’
a ti a ni.
37 Davida ngei khan ama kha ‘Rengpa.’ a iti kêng, khasikin itin mo Mesia hi Davida irchia mi a ini thei hrang?” a tia. Mipui tamtakin Jisua thu’nsîr kha lôm takin an irngaia.
Jisua’n Dân irchutirtuhai ata irdîn hranga hrilna
38 A’rchutirhai pumin an kuang, “Dân irchutirtuhai ata irdîn roi, anni chu songkol irfual innghâka chai an nuam ngaia, bazar haia, chubai irmûk an irngaiirsânga. 39 Sinagok haia, toihmun satak hai, hruaithena hmuna hmun satak takhai an irngên ngai. 40 Meithâihai sum an fâka, mi huangna hrangin sôt tak tak an chongchai ngai. Khasika khan an dûk tuang na ual ok a ti,” a ti pehaia.
Meithâi nu tholôm
41 Khan, Jisua Tempila tholôm bôm kôla a toia, tholôm bôma mipuihaiin tholôm an thâklai kha a lei thîr chiana. Irchong tamtakin sum tamtak an thâk rui ruia. 42 Khan, meithâi inriangte a honga, damali inhni a thâka, kha kha poisa khat dôr a ni. 43 Kha hnung chu Jisua’n a irchutirhai a koi bûma an kuang, “Nangni ki hril, tholôm bôma tholôm thâk murdihai nêkin hi meithâi inriangtenu hin a thâk intam ual tak. 44 Mi danghaiin chu an inei mihlia, an ihmang zoi loi an thâka, ama’n chu a ineisun, a irdonsuina hranga kha a ithâk zit a ni,” a tia.
1 Khan, Jisua Tempila irthokin a suak laiin a irchutirhai laia inkhatin a kuang, “Irchutirtu en ta! A lunghai hi a lianin, a in sinhai hi a sa bâka!” a tia. 2 Jisua’n a kuang, “Hi in lianhai hi ni hmu mo? Hi lunghai hi inchim ni a ta inkhat lua khom a omna hmuna hin mâksan ni no ni,” a tia.
Buaina le dengintheina
3 Tempil irdîn, Oliv tânga Jisua a toi laiin Petera, Jakoba, Johana le Andria hai khan inrûkin thu an irdona; 4 “Kha kha itika mo a hong iom hrang, khahai murdi hong tung hranga khan irsinsiana thilirkhêl i imo, a hong om hrang? Nin hril ta,” an tia. 5 Jisua’n an kuang, “Tûte’n nangni an huang nona hrangin irdîn roi. 6 Mi tamtakin, ‘Krista ki ni,’ tiin ki’rhming sâmin hong an ta, mi tamtakhai huang an ti. 7 Khan nâi tenga irdoi irhu mani, hla viata irdoi thurchi mani, nin inhriat tika khom buai no roi, khahai kha chu a hong iom ngêt hrang a ni, khannisian zoro hnungkhôn chu la ni no ni. 8 Nam le nam la’rdoi an ta; ram le ram la’rdoi an ti. Hmun tina hnîngnu lan hnîng a ta, châm la tâk a ti. Kha kha nâihase irphut ang kha ni a ti.
9 “Nangni chu irdîn roi; ichel la ni nin ta, roirêltuhai kuang hruaiin la om nin ti. Sinagoka zêm phiar ni nin ta, anni Thurchi Sa nin insîr pe theina hrangin ki’rhming sikin roirêltuhai le rênghai makunga la ngîr nin ti. 10 Zoro hnungkhôn a hong tung mân Thurchi Sa hi mi murdi kuang insîrin a iom bak ngêt hrang a ni.
11 “Ichelin nin oma, roirêl hmuna hruaiin nin om tikin, nin iti hrang lei insâpin nin milung lei inbuai no roi; a zoro taka nin inhriat tak kha ti roi; nin iti kha nangni chong ni no nia, Irtha Irthiang chong ni a ti. 12 Urêng khomin that hrangin a sangpa lan cheltir an ta, pa khomin a nâihai lan cheltir sa a ta, nâihai khomin an nu le pahai doi an ta, that an ti. 13 Keima sikin mi tinin nangni la hnôl an ti. Khannisianlân, tukhom a mong dêna tuang diarhai ka chu saninhringin om an ti.
Intakna ichiom tak
14 “Intakna ichiom tak kha a ngîr nona hranga a ngîr la hmu nin ti, (a teppu dôrin a omzia inhre ri se) kha tika chu Judai rama omhai kha tânga laizâm tho ri sehai. 15 In chunga om khomin chumin a in sûnga neinun zu la no ri sehai. 16 Loia om khomin a puan la hrangin in sûnga kîr no ri se. 17 Nupang nâi vonghai le nâite pom laihai hrangin chu, kha nikhua hai kha nikho ichiom tak ni a ti. 18 Khahai kha phalbia a tung nona hrangin chongchai roi. 19 Kha nikhuahaia intakna kha chu Pathianin rammual a siam phut ata a vuan tena rammualin a lei inhriat ngai murdi nêka irkhêl ual tak chu a ni hrang sikin. Khaanga kha chu itiklai khom om nôk viat ta no ni. 20 Rengpa’n kha nikhuahai kha inbong no sian mihriam tûte dam suak no nihai; a mi inthanghai sikin a inbong a ni.
21 “Kha zoro tika chu, tukhomin nin kuang, ‘En u ta, Krista chu hi hi te,’ mani, ‘En u ta, so so mani,’ an ti khomin taksôn no roi. 22 Krista dol le deipu dol an la suak hrang sikin, Pathian mi irthianghai ten khom an theiin chu an huang theina hrangin sin irkhêlhai le thilirkhêlhai khom tho an ti. 23 Nangni chu irdîn roi! A zoro a tung mân itinrêng nangni ki lei hril diam ta a ni.
Mihriam Nâipa zuang hrang thu
24 “Kha intakna zoro a theng zoi hnunga nikhuahaia khan chu misa hong inthim a ta, tha khom vâr ta no ni. 25 Irvân ata ârsihai tâk a ta, irvân sinthotheinahai khom inhnîngtir ni a ti. 26 Kha zoi tikin chu Mihriam Nâipa hi a sinthotheina irkhêl tak le roiinpui takin sûm laia zuang ta a ti. 27 Kha tikin chu kôlkung ata kiang tianga kôlkung dêna rammual kil minli sûng ata Pathian mi inthanghai bûm hrangin vântîrtônhai tîr suak a ti.
Theipui kunga irchu hrang
28 “Khanchu, theipui kung om lam ata irchu roi, a ôn a hong irnoia, a hna a hong incherin chu kholum anâi tah ti nin inhriat ngai. 29 Khaang dênin nangni khomin ama kha a hong tung nin hmu tikin chu ama kha a hong nâi tâka, mikot renga a om tah ti inhre roi. 30 Khan, khahai murdi kha a tung mâka chu atûnlai mihai hi la boi irman no nihai, ti inhre mai roi. 31 Irnêng le irvân boi a ta, ki chong chu boi no ni.
A zoro le nikhua tûte’n inhre mahai
32 “Khannisianlân, kha nikhua le a zoro chu Pa ti no chu tûte’n inhre mahai, irvâna vântîrtônhai khomin, Nâipa khomin. 33 Irdîn unglân, irtûng chianin om roi, kha zoro kha nin inhriat no sikin. 34 Mi, ram danga an zin hrangin a suakhai kuang an sintum chit mophurtira, mikot nghâktu khom irtûng chiana om hrangin hril baka fe pat tâk ang hi a ni. 35 Khasikin irtûng chianin om roi, in chongpu hong hrang zoro kha khohloia mani, zâna mani, âr khuanga mani, zînga mani, a ini hrang nin inhriat no sikin. 36 Kha ni’n chu voikhat rengin hong tung lik a ta, a inin nangni a hmu itinin. 37 Nin laia ki iti hi mi tin tin kuang ki iti a ni, irtûng chianin om roi!” a tia.
1 Khan, sûn hni zoia Ferkân kût le bai chol kop loi kût om hrang a nia; Ochai inlalhai le Dân irchutirtuhai khan Jisua dâihreka chela, that hrangin lampui an zong maia. 2 “Kût sûng chu ni no ri se, mipui laia buaina suakna ti,” an tia.
Bethani-a Jisua sahriak ipolin a om
3 Bethani-a phâr Simona ina Jisua a oma, bu a nêk laiin nupang inkhatin nard Sahriak mirimhoi man hlutak alabastar bûrin a hong chôia, a bûr kha an khoia Jisua lua a buaka. 4 Khataka mi senkhathai chu an ning an mura, “I hrang mo hi sahriak mirimhoi hi a inchêk? 5 A duli irzathum nêka tama zuarin a sum kha inrianghai pe thei kêng a ni hi te!” an tia, kha hnung chu a chunga an chiar chuka. 6 Khannisian, Jisua’n an kuang, “Ite ti no roi, ithoa mo nin inbuai? Ki chunga a itho hi thil sa le enhoi tak a itho a ni. 7 Inrianghai chu nin kuanga om mai an nia, nin nuam te tena nin san thei. Kei chu nin kuang om mai hrang ni ma ung. 8 A thei lam dôra a itho a ni; ki takpum hi phûm hranga mirimhoi a lei ibuak irh a ni. 9 Thudik nangni hril ki ti, rammual pumpuia Thurchi Sa hi an hrilna rikipa, hi nu sintho khom hi ama inhriat maina hrangin insîr an ti,” a tia.
Juda’n Jisua incheltir a tum
10 Khan, irchutir sômhleihnihai laia Juda Iskariota khan Jisua an cheltir tumin Ochai inlalhai kuang a va fea. 11 Kha kha an lei inhriatin a sân an lôma, poisa pêk an inkung tâka. Khanchu, incheltir hrang lam zoro’nchum a zong tâka.
Jisua’n a irchutirhai Ferkân kût hruaithe a fâkpuihai
12 Bai chol pol loi kût sûn maton tak Ferkân kûta hrang belrate an that ngai nia khan irchutirhaiin a kuang, “Ferkân khalâi hi khôn mo nang irfûk pe inlân ni inuam?” tiin Jisua an irdona. 13 Khanchu, irchutirhai laia mi inhni a tîra, “Khopuia va fe ta unglân, pa inkhat bêla tui chôiin nangni irtongpui a ti. Ama kha zui unglân, 14 a lûtna taka in chongpu kuang khan, ‘Irchutirtu’n kho hin mo ki irchutirhai leh Ferkân Kût khalâi kin ifâkna hrang chontan kha?’ a ti, va ti roi. 15 Khanchu, ama ngeiin chontan chuanchung irzat tak, neinun om sai, rêlinfel diam nangni irhmu a ta, khataka khan ei ta hrangin va’rfûk roi,” a tia.
16 Khan irchutirhai kha an suaka, khopuia khan an fea, Jisua’n a ihril lam ang takin an va hmua, Ferkân Kût khalâi kha an irfûktir ta. 17 Khohloi tiang a hong ni’n chu Jisua kha irchutir sômhleihnihai leh an fe ta. 18 Khan, khalâi an irhîl lai takin, Jisua’n “A dik takin nangni ki hril; nin laia mi inkhat, ki kuanga khalâi otpu lele hin nin cheltir a ti” a ti pehaia. 19 Khanchu, irchutirhai milung dûk a tonga, an bi bingin “Keima ma ni?” tiin an irdon irhlôma. 20 Jisua’n an kuang, “Sômhleihnihai laia inkhat, khênga ni otpuipu tak hi a ni. 21 Pathian Thubu’n Mihriam Nâipa hi thi a ti, a lei iti ang takin a ithi hrang a ni; Khannisian, Mihriam Nâipa incheltir hrangtu chung chu a rik e! kha mihriam kha a irzir loi chian ni sian a ta hrangin sa ual a ti!,” a tia.
Rengpa Zânbu
22 An fâk lai takin Jisua’n bai a lâka, lômthu an sîr zoiin chu a khoia an kuang a pêka, “Fa roi, hi hi ki takpum a ni,” a tia. 23 Kha hnung chu khilât a lâka, Pathian kuang lômthu an sîr zoiin chu an kuang a pêka; an rêngin an in chit ta. 24 Khanchu, Jisua’n an kuang, “Hi hi ki thisen mi tamtak ta hranga suak, Pathian Thuthung Thar namindetna a ni. 25 Nangni ki hril; Pathian Rama uain thar ki in nî a tung mâka chu hi uain hi in nôk ta no ning,” a tia. 26 Kha zoiin chu hla inkhat an saka, an sak zoiin chu Oliv tânga an fe ta.
Jisua’n, Petera iphil hrang thu a lei insîr
27 Khan, Jisua’n a kuang, “Nin rêngin laizâm tho nin ta, ni la ma zit nin ti, Pathian Thubu’n, ‘Pathianin belrapu kha that a ta, belrahai kha irthekindarh chit an ti,’ a ti sikin. 28 Khannisianlân, ki thoinôk hnungin Galili rama nin matona lei fe ki ti,” a tia. 29 Petera’n a kuang, “A danghaiin nang mâk zithai khomsian, keima, chu nangma viat no ning,” tiin a sâma. 30 Jisua’n Petera kuang, “Nang ki hril; a vuan zân voihni âr a khuang mân nangin voithum ni phil ni ti,” a ti pea. 31 Petera’n chong na ualin a sâma a kuang, “Ni thina thi sa hrang khom ni inlân nang phil viat no ning,” a tia, irchutir danghai khomin khaang dênin an ti seng sa.
Gethsemani irhuana Jisua a chongchai
32 Khan, Gethsemani an iti hmun kha an hong tunga, Jisua’n a irchutirhai kuang, “Ki chongchai sûngin chu hin lei toi roi,” a ti pehaia. 33 Petera, Jakoba le Johana hai kha a hruaia; a saterengin irthanvâiin a milung dûk a tong tâka. 34 Khanchu, an kuang, “A sân ki milung dûk a tong hraia thi hrang ang dôrin kêng ki iom. Hin toi unglân, le’rtûng chian roi,” a tia. 35 Maton tiang a va fe viata, irnênga khûksadelin, thei a ni’n chu, kha tuangna zoro kha irlêk hrangin a chongchaia. 36 “Abba! Ka pa! Nangma ta hrangin itinrêng thothei a ni, hi tuangna khilât hi ki kuanga irthokin ni khâipai pe roh, Khannisianlân, Keima ircham ni loiin nangma ircham ni ri se,” a tia.
37 Kha hnung chu a hong kîr nôka, irchutir inthumhai kha a inin a hmuhaia, khanchu, Petera kuang, “Simon, ni iin kêng na? Dârkâr khat lua irtûng chianin ni iom thei loi na? 38 Inthêmnaa nin lût nona hrangin irtûng chianin chongchai roi, Irtha’n chu a nuama, taksa’n a iphâri loi a ni,” a tia. 39 Khan, voikhat a va fe nôka, a iti ang dênin a va chongchai nôka. 40 Kha hnung chu a irchutirhai tiang a hong kîr nôka, an in ngîrin a hmuhai nôka; an in a mu hrai sikin a sâm hrang lam khom inhre mahai. 41 Khan, a hong kîr voi thumna’n chu an kuang, “Atûn chu, irngam unglân in ta roi. A ruk ta! A zoro a hong tung ta! en u ta, Mihriam Nâipa hi mi sualhai kuta an ichel hrang tâk a ni. 42 Thoi unglân, fe ta ei ti, en u ta, nin chel hrangtu hi a hong nâi ta,” a tia.
Jisua an ichel thu
43 Khaanga a la chonglai takin irchutir sômhleihnihai laia Juda kha a hong tung zôia. Ama le Ochai inlalhai le Dân irchutirtuhai le upahai itîr mipui, khandai le hêmvuak chôiin an hong tung saa. 44 An chel hrangtu khan, “A biang ki itum tak kha nin izongtu ni a ti. Chel unglân, sataka enkolin hruai roi,” tiin a lei hrilhai diam tâk a ni.
45 Khan, Juda kha a hong tung le chu Jisua kha a va pan pata, “Irchutirtu,” tiin a biang a tuma. 46 Kha hnung chu Jisua an chela, an intûk khak tâka. 47 Khan, khataka ngîrhai laia mi inkhatin a khandai a kai doka, Ochai inlaltak suak, mikuar a sât thâk paia. 48 Kha hnung chu Jisua’n anni kha a chongpuihaia an kuang, “Khandai le hêmvuak chôiin hrâtlaksong chel hrang ang dêna ni chel nin ihong na? 49 Tempil haia a nitin irchutirin nin kuang ki om ngaia, ni chel ual mak chêia, khannisian, Pathian thu a hong tung indikna hranga a ni hi,” a tia. 50 Kha kha ar zoiin chu irchutirhai khan ama kha an mâk raka, an intân pat ta. 51 Khan, ruatharte inkhat, puan irphân sila irvo’n Jisua a zuia. Ama kha chel an tuma. 52 Khannisianlân a puan marakin, a rongin an tân pat ta.
Jisua roirêltuhai makunga a ngîr
53 Jisua kha Ochai inlaltak ina an tuanga, Ochai inlalhai, upahai le Dân irchutirtuhai an hong irbuk sa zôia. 54 Petera’n hla vit ata a zuia, Ochai inlaltak kholâi dênin a fea. Khataka khan mi chel ngaihai leh mei uatin a toia. 55 Ochai inlalhai le Sanhedrin murdi khan Jisua an that theina hrang bi an zonga, khannisian hmu mahai. 56 Mi tamtakin milak an intuma, khannisianlân, an intumna bi irhmu mah. 57 Mi senkhat an ngîra milak an intuma. 58 “Hi pa hin, ‘Hi tempil kuta sin hi insiat ki ta, sûn thumin a dang kuta sinloi inding nôk ki ti,’ a ti kin inhriat,” an tia. 59 Kha khoma khan an intumna bi irhmun thei ual mah. 60 Khanchu, Ochai inlaltak kha an matona a va ngîra, Jisua kuang, “Nang an intumna thua hin ite ni isâm loi hrang mo?” tiin ar dona. 61 Jisua kha a dâihreka, i ang khomin sâm mah, Ochai inlaltak khan a kuang, “Inpâk inruk Pathian Nâipa Mesia chu ni ni mo?” tiin ar don nôka. 62 Jisua’n a kuang, “Ki ni, Mihriam Nâipa hi sinthotheitu chang tianga toiin, irvâna sûm kâra zuang la hmu nin ti,” tiin a sâma. 63 Kha hnung chu Ochai inlaltak khan a puansilhai ar ekthêra, “Inhriatpuitu dang ite nang ta ma? 64 Pathian a ihrilinsiatzia hi nin inhriat tâka, itin mo nin irngaidân?” a tia. An rêngin ama kha that inruk a ni an ti chita. 65 An laia senkhatin an inchila, a hmâi an tuam pea, an zêma. A kuang, “Ti ro! tu mo nang zêm!” an tia, khabana a chelpuhai khomin hruai pumin an inbên thiaia.
Petera’n Jisua a phil thu
66 Khan, Petera kha hnuai tiang a in irhual sûnga a la om laiin Ochai inlaltak siahlo laia dôngmate inkhat a honga. 67 Petera mei lei uat kha a hmu le chu a en infela, a kuang, “Nang khom hi, hi Nazaret Jisua kuanga om ngai kha ni ni khate,” a ti pea. 68 Petera’n, “Ni thu’nsîr omzia inhre viat ma ung, a’rngaina lam chang khom inhre ma ung,” tiin a phila, kha zoiin chu dâi pên tiang a va suaka, âr khom a khuang zôi ta. 69 Khan, dôngmatenu khan a en maia, a kôla ngîrhai kuang khan, “Hi pa khom hi an laia mi inkhat a ni sa,” a ti nôka. 70 Khannisian, Petera’n a phil nôka, chomkhat a hong ni nôk tena chu, a kôla ngîrhai khan Petera kuang, “Galili rama mi ni ni sa sikin, nang khom an laia mi ni ni ngêt,” an tia. 71 Khannisianlân Petera’n an kuang, “Thudik hrilin khomâk ki irsâm a ni! A dik no’n chu Pathianin deng nin theitir ri se! kha mihriam nin iti kha inhre viat ngai ma ung!” a tia. 72 Kha zoiin chu âr voihni a khuang nôk tâka, khanchu Jisua’n Petera kuang, “Âr voihni a khuang mân nangin voithum ni phil ni ti,” a iti pe chong kha a hong irhriat suak nôka, kha chong kha a ngaitua’n a chap tâka.
1 Khan, zîng a hong ni’n chu, Ochai inlalhai chu, upahai, Dân irchutirtuhai le roirêltuhai murdi leh an irhmua, an chonga. Jisua kha an khita, an hruaia, Pilata kuta an bâng ta. 2 Pilata’n a kuang, “Judahai rêng mo ni ni?” tiin ar dona. “Ni nih, ni ni ti khate,” tiin a sâma. 3 Ochai inlalhai khan lam iza’n Jisua kha an hnôla, 4 Khasikin, Pilata’n Jisua ar don nôka, “Ni ni sâm loi hrang mo? irngai ta, pualoi nang an intumna san hi,” a tia. 5 Jisua’n a i ang khomin a sâm no sikin, Pilata irngai ar khêl ok.
Jisua thi hranga roi an rêlna
6 Khan, Pilata’n Ferkân Kût zoro rikipin intângna ina om inkhat mipuihaiin an inuam tak an sua pehai ngai. 7 Kha zoroa khan mi inkhat ar hming Barabba kha, mi pualoihai leh mi an that sika intângna ina om a ni. 8 Khan, mipuihai an hong fea, an ta hranga a itho pehai ngai anga tho hrangin an ngêna. 9 Khanchu, Pilata’n, an kuang, “Judahai rêng hi nangni insua pe inlân nin nuam mo?” a tia. 10 Ochai inlalhai khan an hnarsa sika Jisua kha a kuang an hong hruai a nih ti an hriat infela. 11 Ochai inlalhai khan mipuihai chu Barabba insua pehai hrangin an inphûthaia. 12 Khanchu, Pilata’n an kuang, “Khante, Judahai rêng nin ititu hi, imo ki ilo hrang tâk?” tiin ar donhai nôka. 13 Anni khan, “Krosa hembe ro!” tiin an khêk nôka. 14 Pilata’n an kuang, “Ithoa mo? Imo a itho insual?” tiin ar donhaia. Khannisianlân, anni khan, “Krosa hembe roh!” tiin an khêk inring uala. 15 Khanchu, mipuihai milung inhoi a nuam sikin, Barabba kha an sua pehaia. Khan, Jisua kha sipaihai an zêmtirhai zoiin chu Krosa hembe hrangin a pêk tâka.
Sipaihaiin Jisua an soisak
16 Khan, sipaihaiin Jisua kha Ramoptu in Praitoriana an hruai inlûta, an chanpuihai murdi an koi buka. 17 Khanchu, songkol irfual senduk an innghâktira, ilhling lukhum an phana, an inkhumtir ta a ni. 18 Kha hnung chu chubai an mûka, “Juda hai Rêng, hring sôt roh,” an tia. 19 A lua khianghrolin an vîka, an inchila, khûksadelin chubai an mûka. 20 Khan, an phengsan zoiin chu songkol irfual senduk kha an hlîk pea, ama songkol dên kha an innghâktir nôka. Kha zoiin chu Krosa hembe hrangin an hruai suak ta.
Jisua Hembea a om thu
21 Khan, lampuia mi inkhat ar hming Simona an irtongpuia, kha mi kha ram rengata khopui hong pan a nia, sipaihaiin Jisua Kros irput hrangin an dândea (Simona kha Kurini mi, Alexander le Rufa pa a ni). 22 Khanchu, Jisua kha Golgotha an iti hmuna an hruai ta, kha kha “Luru hmun,” tihna a ni. 23 Kha hmuna khan Jisua kha Uain, Mura leh irpol an pêka, Khannisian, in nuam mah. 24 Kha zoiin chu Krosa an hembea, a puansilhai kha an irsema, an dong hrang chit inhriatna hrangin tâ an sâna. 25 Jisua an hembe zoro kha zîng dâr kuak vêl a ni. 26 Khan, an hnôlna kha lekha’n an irziaka, “Juda hai Rêng,” tiin a lu chunga an târa. 27 Khan, Jisua le hrâtlaksong, mi inhni an hembe sa, a chang tiang inkhat, a vei tiang inkhat. 28 Khaang khan, Pathian thubu’n “Ama khom mi sualhai laia tep sain a om ta,” a iti kha a hong tung ta.
29 Khan, mi ar lôi murdi’n an lu inthikin Jisua kha an êroa, “O hoi! Tempil set ni ta, sûn thum ni’n ni inding nôk hrang na! 30 Kros ata zuang chumin lân, irzôk ta ro ba,” an tia. 31 Khaang dênin Ochai inlalhai le Dân irchutirtuhai khomin Jisua kha an êroa, “Mi danghai lak an zôktira, ama chu zôk thei maka! 32 Tho atûn Mesia, Israelhai rêng hi, Kros ata a zuang chum lei en hi rei; Khanchu ama ei iamna hrangin,” an tia.
Ama le an hembe mi inhnihai khomin Jisua an êro sa.
Jisua thina thu
33 Khan, sûn dâr sômhleihnia irthokin khohloi dâr thum ten chu rammual an thim khaka. 34 Dâr thumin chu Jisua kha inring takin a khêka, “Eli, Eli, lema sabakthani?” a tia. (Kha kha “Ki Pathian, ki Pathian, itho mo ni ni imâksan?” tihna a ni.)
35 Kha hmuna ngîr mi senkhatin ama kha an inhriatin, “Irngai u ta, Elija a ikoi kêng,” an tia. 36 Khanchu, an laia mi inkhat an tâna, sponj, uain thûr inchia’n, khianghrolin a târa, a hong in ina, “La nghâk roi, Jisua kha insum hrangin Elija a zuang pe mo lei en rei,” an tia. 37 Jisua kha inring takin a khêka, a hrang a chat ta. 38 Khanchu, Tempila puanzâr kha a chung tiang ata a hnuai dênin a têr thai tâka. 39 Sipai hruaitu kros matona ngîrtu khan Jisua hrang chat kha a hmu’n chu, “Hi pa hi Pathian Nâipa ngêt a ni hi te,” a tia. 40 Nupanghai khomin hlatak ata an thîr sa maia, kha laia khan Magdala mi Mari, Jakoba nâipang ualnu, Mari, Josefa nu, Salomi hai an kop sa a ni. 41 Hi mihai hi Galili rama a om laia ama zuia a sintho ngaihai an ni; ama pâla Jerusalem fe sa nupang dang khom tamtak an om.
Jisua an phûm thu
42 Juda hai irtûng nî a nia, (Kha kha Sabat hranga an irsinsiam nî a ni.) 43 Josefa, Arimathai khuaa om, roirêlpu laia kop sa, mi mahripom tak, Pathian Ram sabei mi a ni sa, khohloi tiang a hong ni’n chu, a honga ngam takin Pilata a va lût khuma, Jisua ruak a nghia. 44 Pilata’n Jisua thi tâk thu kha an hriatin chu a sân ar ngai ar khêl oka. Sipai irza hruaitu kha a koia, Jisua thina kha a isôt mani ta, a tia. 45 Sipai irza hruaitu ata an hriat zoiin chu a ruak kha Josefa a pêk tâka. 46 Khanchu, Josefa’n puan irnêm a lâka, a ruak kha an suma, puan irnêm leh a tuama, thân, lung invera an zâltira, thân bâi kha lungin a sîng tâka. 47 Khan, Mari Magdala mi le Josefa nu Mari hai khom khan an inzâlna kha an en chiana.
1 Sabat nî a hong hekin Magdala mi Mari, Jakoba nu Mari, Salomi hai khan, Jisua ruak pol hrangin sahriak mirimhoi an irchôka. 2 Pathianni zînga misa suak hnungin thâna an va fea. 3 Lampuia an fe laiin, “Thân bâia lung kha tu mo nir hlumpai pe hrang tâk?” an irti lai takin. 4 Lung lian tak a nia, an hong tanga lung kha irhlum saiin an hmu tâka. 5 Thân sûnga an lûta, ruatharte inkhat puan chek sil chang tianga toi an hmua, an chi tâka. 6 Khanchu, ama khan an kuang, “Lunginzîng no roi, Nazaret Jisua, an ihembe kha, nin izong ni a ta, hin om ta mah, a thoi nôk ta; en u ta, an inzâlna hi. 7 Atûn chu fe unglân, a irchutirhai le Petera kuang khan, nangni a ihril tâk ang khan Galili-a fe masa a ta, kha khan hmu nin ti, tiin va hril roi,” a tia. 8 Khanchu, thân ata kha an suaka, beidong le chi pumin an intân pat ta. An chi hrai sikin tûte kuang insîr mahai.
Magdala mi Mari kuang Jisua an lâr
9 Khan, Pathianni zînga a thoinôka khan, Magdala mi Mari a phîng sûnga irthokin ramilhli sari a inhnot suakpai penu kuang a masa takin an lâra. 10 Mari khan Jisua chanpuihai a va hrila. Irngaiinsia le chapin an lei oma; 11 Mari’n, “Jisua a hring nôka, hmu khom ki hmu lele,” a ti pehaia; an inhriat khomin taksôn mahai.
Irchutir inhni kuang Jisua an lâr
12 Kha hnungin, Jisua kha hmêl danglam irputin mi inhni an ram tiang an fe laiin an kuang an lâr nôka. 13 Khan, an hong kîra irchutir danghai an hong inhrila, khannisian tak lei sôn mahai.
Irchutir sômhleikhathai kuang an lâr
14 A hnungkhôn taka chu irchutir sômhleikhathai bu an nêk lai takin an kuang an lâr nôka. A thoinôk hnunga a hmuhai chong taksôn loiin an milung an inngar sik le iamna reng an nei no sikin, a halirchuhaia. 15 Jisua’n an kuang, “Rammual pumpuia fe unglân, thil siam murdihai kuang Thurchi Sa hi insîr roi. 16 Tukhom a iama, baptisma chang chu saninhringin om an ta. A iam loihai chu thiamno changin om an ti. 17 A iamhai chu sinirkhêl sintheina irtha ipêk ni an ta; ki’rhmingin ramilhli inhnot suak an ta, chong tharin chong an ti. 18 Mirûlhai an kutin chel an ta, thina tûr i ang khom in an ta, ite ti no ni; damloihai chunga an kut irnghat an ta, dam thiai an ti,” a tia.
Jisua irvâna a kâi thu
19 An kuang thu an sîr zoiin chu, Rengpa Jisua kha irvâna ihruaiin a om tâka, Pathian chang tiang a hong toi tâka. 20 Irchutirhai khom kha an fe suaka, hmun tina thu an insîr tâka, Rengpa khomin a thophaia, an thu’nsîr kha a dik tiin le an sinirkhêl tho khom an det pehai thiaia. Amen.
1 Ei laia thil zuang tung, a phut ata a hmuhai le a sinthohaiin, 2 an ni ihril ang khan, mi tamtakin irziak an tum tâka. 3 Khasikin Theofil mahripom tak, a bul ata tinrêng infel zita suiin, a dônte’n ni ta hrangin irziak inlân ki iti a ni. 4 Tiana thurchi nang an lei irchuhai kha a dik tak a ni tih nin hriat theina hrangin.
Baptistu Johana suak hrang thu lei hrilna
5 Judai ram rêng Heroda ni laiin, Abija pâla mi ochai Zakaria a oma, a dôngma chu Arona irchia mi Elizabeti a ni. 6 An ruaiin Pathian mit hmua fel takin an oma, sêlna boiin Rengpa dân le a thu zômin an om ngaia. 7 Khannisianlân, Elizabeti a ching sikin nâi nei maka, an ruaiin an tar ok tâka.
8 Khan, sûn khat chu Zakaria kha Tempila Ochai sin a thoa. 9 Dân angin Tempila lûtin Rengpa maichâma mirimhoi a hâla. 10 Mirimhoi a hâl laiin mipuihai an rêngin pên tiang an lei chongchaia. 11 Mirimhoi hâlna chang tianga ngîrin Rengpa itîr vântîrtôn inkhat a kuang a zuang inlâra. 12 Zakaria’n a hmu’n chu an lâi raka a sân a chia, 13 Khannisianlân, vântîrtônin chu, “Zakaria, chi no roh, ni chongchaina kha inhriat a ni, ni dôngma Elizabeti’n nâipasal nang nei pe a ti, ar hming Johana phua ni ti. 14 A suakin chu nangma le mi tamtak lungrîl lômin raifân a ti. 15 Rengpa mithmuin mi lian ni a ta, uain le zu rêng rêng khom in no ni. A nu phîng sûng ata Irtha Irthiangin sip a ti; 16 Israel irchihai laia mi tamtak Rengpa an Pathian tiang hong hruai nôkhai a ti. 17 Pahai chu an nâihai irngaisaktir hrangin, mi pualoihai chu mi felhai lungrîl irput ang irput hrangin, Rengpa ta hranga a mihai hranga lei sinsiam hrangin Elija irtha dong le a sinthotheina neiin, Rengpa makunga khan a izuang masa hrang a ni,” a tia.
18 Vântîrtôn kuang Zakaria khan, “Kha kha itin mo ki inhriat thei hrang? Keima lak tar ki nia, ki dôngma lak a sân ar chang ok tâka,” a tia. 19 Vântîrtôn khan, “Kei hi Pathian makunga ngîr ngai Gabriela ki ni, nang chongpui hrang le kha thu raifânom tak kha hril hranga itîr ki ni. 20 Irngai roh, a zoro taka hong tung ngêt hrang thil ki insîrhai hi tak ni sôn no sikin, a zuang tung tak tak mâka chu dâihrek ni ta, chong thei no chi ni,” a tia.
21 Mipuihaiin pên tiang an lei nghâka, Tempil sûnga a om sôt sikin a sân ar khêl an tia. 22 A hong suak tikin chu a chong thei ta no sikin Tempila inlârna a ihmu a nih ti an inhriata, an kuang kut veivâkin a hrilhaia, chong thei viat ta maka. 23 A sintho zoro a hong chuk tika chu in sûng tiang a kîr tâka.
24 Kha zoiin chu a dôngma Elizabeti khan nâi a vong tâka, tha ringa tual suak ta maka, 25 “Mi laia ki’rhming siat tâk insa nôkna hrangin Rengpa’n lung a nin khama, hiang hin a ni itho pe ta,” a ni.
Jisua suak hrang thu
26 Elizabeti nâi vong, a tha rukna’n chu Pathianin vântîrtôn Grabiela chu Galili ram Nazaret khuaa a tîra. 27 Reng Davida irchia mi Josefa dôngma hual dôngmate Mari kuang thu zuang chôiin, 28 Mari kuang a lûta, chubai, inditbîknu! “Rengpa ni kuang a om, sat nang a vur ok,” a tia.
29 Kha thu kha an hriatin chu imo a omzia tâk, tiin a sân a char a dong tâka.
30 Vântîrtôn khan, “Mari, chi no roh, Pathian ngaisakna ni dong kêng. 31 Inrâi ni ta, nâipasal nei ni ta, ar hming Jisua phua ni ti. 32 Mi lian ni a ta, an chung taka Pathian nâi tih an ti. Rengpa Pathianin a irchibul Davida angin Rengin siam a ti. 33 Jakoba irchihai chunga Rengin om a ta, an laia a ramin mong nî nei no ni,” a tia. 34 Khan, Mari’n vântîrtôn kuang, “Pasal lua la nei loiin te, itin mo a ini thei hrang?” a tia.
35 Vântîrtôn khan a sâma, “Irtha Irthiang kha ni chunga zuang om a ta, Anchungtaka sinthotheina khan nang irhli khu a ti; khasikin nâi zuang suak hrang chu mi irthiang, Pathian Nâipa tih an ti. 36 Khan, irngai ta, ni zuarpuinu, a ching an iti ngai, Elizabeti khomin a tar hnungin nâipasal a vong ta, hi tha hi a tha rukna a ni ta. 37 Pathian hrangin chu tho theiloi ite zel om ma,” a tia. 38 Mari khan, “Irngai ta, Rengpa suaknu ki ni, nir cham angin ki chunga tung ri se,” a tia, vântîrtôn khan a rotsan tâka.
Mari’n Elizabeti a hrôna thu
39 Kha lai khan Mari kha a thoia, thingtâng, Judahai khua inkhata a fe tâka. 40 Zakaria ina khan a hong tunga, Elizabeti kha chubai a mûka. 41 Elizabeti’n Mari chubai mûk an hriat le chu, a phînga nâite a chânga, Elizabeti kha Irtha Irthiangin a sip tâka, 42 Khanchu, inring takin a khêka, “Nang chu nupang laia mi vânnei tak ni ni, ni nâi vong khom mi vânnei a ni. 43 Itin lama mo ki Rengpa nu, ni ni hong ihro tâk? 44 Irngai ta, ni chubai mûkna irhâi kin hriat le chu ki sûnga nâite khom a raifân sikin a ichâng a ni. 45 Ni kuanga Rengpa’n thu a insîr kha a tung ngêt hrang tih ni iam sikin ni vânnei e,” a tia.
Mari inpâkna hla
46 Khanchu Mari’n, “Ki lungrîlin Rengpa a chôiindôma,
47 Ki’rtha khom a ni saninhringtu Pathian chunga a raiinfân tak tak,
48 A suaknu irngaiintômzia a zuang ngaisaka,
Irngai ro,
atûn ata chu thangthar thiaihai khomin vânnei ni tih an ti.
49 Sinthothei Pathian khom ki chunga sin lian tak a thoa,
ar hming khom a irthiang a ni.
50 A chipuihai chu thoiinthar dênin lung an kham thiai ngai.
51 A bânin a hrâtzia an langtira,
Mi lârirpâkhai chu an ngaituana an thekindarh tâka.
52 An toi hmuna rêng toihai kha a hnûk thâka,
Nam irngaiintômhai kha a chôiirsâng tâka.
53 Phîngchâmhai chu thil tui tinrêngin a vâia,
Irchonghai chu kut rongin an fetira.
54 Ei irchibulhai kuanga a inkung ang khan.
A siahlo Israelhai san hrangin a zuang tâka.
55 Abrahama le a irchihai kumkhua’n lung an khamzia inhriat maina hrangin,”
a tia.
56 Mari chu Elizabeti kuang tha thum a oma, khanchu, a in tiang a fe nôk tâka.
Baptistu Johana suak thu
57 Elizabeti nâi nei zoro a hong chukin chu, nâipasal a neia, 58 A bômhai le a urênghaiin, Rengpa’n a sân lung an kham ti an inhriatin chu, a sân an lômpui tâka. 59 Khan, a sûn riat nia chu, nâitesen sertan hrangin an honga, a pa irhming dên Zakaria phua an tuma. 60 Khannisianlân, a nu khan, “Ni mak e, a’rhming chu Johana kêng phua hrang,” a tia. 61 Annihai khan, “Hianga irhming hi nin urênghai laia khom la om ngai mah,” an tia. 62 A pa kha imo a’rhming phua a nuam ti kut veivâkin an irdona.
63 Zakaria’n, irziakna hrang lekha phêk a zonga, a’rhming chu Johana a nih tiin a’rziaka, a sân an irngai ar khêl tâka. 64 Voi khat rengin Zakaria kha a hong chong thei tâka, Pathian an pâk zôi ta. 65 An kôlvêla om murdi’n an chia, kha thurchi kha Judai ram thingtâng hmun tina an thang tâka. 66 An hriatpu dôrin, “Hi nâite hi itin takin mo a la hong iom hrang na! Rengpa Irtha laka a chunga a oma,” an tia.
Zakaria hla
67 Johana pa Zakaria kha Irtha Irthiangin a sipa, hiang hin a tia;
68 “Rengpa, Israelhai Pathian chu inpâkin om ri se,
A mihai san hrangin a zuanga,
an zôkhai tâka.
69 A siahlo Davida irchi ata ei ta hrangin saninhringtu roiinpui tak an ding ta.
70 Tianlai deipu irthianghai bâia a insîr tâk angin.
71 Ei râlhai le a ni khôkmâktuhai ata,
nin zôktu hrang chu,
72 Ei irchibulhai lung an khamzia an langtira,
A thuthung irthiang an hriat mai a ni.
73 Ei pu Abrahama kuang thu an kung khaka,
74 Ei râlhai ata a ni sana,
chi loia a sin ei tho theina hrang thu kha.
75 Ei hring sûngin a mit hmua,
Irthiang le fel taka ei om theina hrangin.
76 “A ni, ki nâi,
nang hi Anchungtak Pathian deipu nang la ti an ti.
A lampuihai sinsiam hrangin Rengpa maton tiang lei fe ni ti.
77 An sualhai ngaidamin,
a mihai kuanga saninhring thu inhriattir hrangin.
78 Ei Pathian chu inrenna le lungkhamnaa sip a nia,
Khasikin, chung tiang ata saninhringna misa vâr chu ei chunga insuaktir a ta,
79 irvân ata vârin,
inthim le thina dâihlim hnuaia omhai êl invâr a ta,
Irtharngamna lama kal nin chôitir a ti,”
a tia.
80 Khan, nâite kha taksa le irtha tianga ar sôn tîr tîra, Israel mipuihai laia an lâr mâka chu, ramchâra a om maia.
1 Kha laia khan, rêng Kaisara Augasta’n Rom sorkâr ram op murdia irhming irziak hrangin thu a pêka. 2 Hi irteppui masa tak hi Suria rama Kurinia, Ramoptu a ni laia a ni. 3 Mi tinin mâni khua chita irhming irziak hrangin an fea. 4-5 Josefa khom Davida in sûngkua le a’rchia mi a ni sikin, a dôngma hual Mari inrâi chum te tem leh khan Galili ram Nazaret ata Judai rama, Davida suakna Bethlehem khuaa irhming irziak hrangin an fea. 6 Khan Bethlehem-a an om laiin nâi nei zoro’n a hong de tâka. 7 Nâi lutîr pasal a neia, puanin a tuama, khualbûka an inleng ta no sikin sa bu pêkna khênga an inzâl ta.
Beralpuhai le vântîrtônhai
8 Kha rama belrapuhaiin belra an ena, zâna an riak nghaa. 9 Rengpa itîr vântîrtôn an makunga a zuang inlâra, Rengpa roiinpuina khan an kôl kha a êl invâr phuta, an chi tak taka. 10 Vântîrtôn khan an kuang, “Chi no unglân, irngai roi, mi tin ta hranga Thurchi Sa râifânom tak tak nangni ki zuang intung pe kêng. 11 A vuan hin nin ta hrangin Davida khuaa saninhringtu a suak ta, Reng Krista chu, 12 Khan, hi hi nin ta hranga irsinsiana hrang chu a ni; nâitesen, puana tuam, sa bu pêkna khênga zâl hmu nin ti,” a tia. 13 Voikhat rengin vântîrtôn kôla khan irvân mipuihai an zuang om mur tâka, Pathian an inpâka.
14 “Anchungtaka khin Pathian roiinpui takin om sianlân,
Irnênga a lômhai kuang irngeina lêng ri se,” an tia.
15 Khan, vân vântîrtônhaiin an rotsan le chu belrapuhai khan, “Thoi, Bethlehem-a fe ei ti, Rengpa’n thu a ni ihril, zuang tung kha lei va en rei,” an tia. 16 Khanchu inrang takin an fea, Mari le Josefa, sa bu pêkna khênga nâitesen zâl kha an va hmua. 17 An hmu’n chu nâitesen thurchi vântîrtôn insîr kha an hrila. 18 An hriatpu dôrin belrapuhai thu’nsîr kha ar khêl an ti tak taka; 19 Mari khan kha thuhai kha a lungrîla ngaitua’n a vong chiana. 20 Vântîrtôn ihrilhai ang dênin itinrêng an hmu le an inhriat sika khan, belrapuhai khan Pathian chôiindôm le inpâk pumin an kîr nôk tâka.
Jisua irhming an phua
21 Khan, a sertan hrang nikhua sûn riat a hong chukin chu, sula a om mân daia angin a lei iphua tâk irhming Jisua ti kha an phua tâka.
Nâitesen Jisua Tempila an hruai
22 Mosia dân anga an irthiang nî a hong chukin chu Josefa le Mari’n an nâite Pathian kuang inhlan hrangin Jerusalema an fepuia. 23 Rengpa dân thua, “Nâi lutîr pasal ka chu Rengpa dongtum hrang a ni,” ti a nia. 24 Khan, Rengpa Dân angin vasu inhni mani, phervali mani, irbôlna’n an inhlan hrang a ni.
25 Jerusalema khan mi inkhat, ar hming Simeona a oma. Ama kha mi fel le sakhua mi tak a nia, Israelhai irtharngamtir hrangtu kha a thîr maia; a chunga Irtha Irthiang a om. 26 Rengpa chonginkung Mesia a hmu mâka chu thi no ni tih a inkung a ni. 27 Irtha hruaiin Simeona Tempila a fea, Dân anga a chunga tho hrangin a nu le pa’n nâite Jisua kha, Tempila an hongpuia. 28 Simeona’n nâite a poma, Pathian kuang lômthu an sîra.
29 “Rengpa, atûn ni thu ang ngêtin,
ni suak hi irtharngam takin ni infetir hrang a ni tâka.
30 Ni saninhringna chu ki mit ngeiin ki hmu tâka.
31 Mi tin hmu hranga ni isiam kha.
32 Jentailhai kuang ni vâr inlangtir hrang le ni mi Israelhai roiinpuina hrang chu,”
a tia.
33 A nu le pa khan nâitesen chungchâng a insîr kha ar khêl an ti oka. 34 Simeona khan anni kha sat a vura, a nu Mari kuang, “Irngai roh, Israel laia mi tamtak siata tûk hrang le inngîr suakna hrangin, hi nâite hi inkung a ni, Pathian irsinsiana, mi tamtakin an isêl sup sup hrang ni a ti. 35 Nang khom khandai isun angin ni milung la na a ti, mi tamtak lungrîl sûng inlang la nih a ti,” a tia.
36 Deipu inkhat, ar hming Anna, Fanuela nâinu, Asera nam, a sân a tar tâk a oma. A pasal leh kum sari an irsen hnungin, 37 Kum sômriatminli a meithâi tâka. Ama khan Tempil rotsan loiin bu a nghei hena, sûn zân chongchaiin Pathian a biak ngai. 38 Kha lai khan ama kha a fea, Pathian kuang lômthu an sîra, Jerusalem sansuakna sabeituhai kuang nâitesen thurchi kha an sîr tâka.
Nazaret khuaa an kîr
39 Rengpa dân angin thil an tho zoi zit hnunga khan Galili rama, an khua Nazaret-a khan an kîr nôk tâka. 40 Nâitesen khom kha a’rsôn maia, a vâr tîr tîra, Pathian lungkhamna a chunga a om maia.
Nâipang Jisua Tempila
41 A nu le pahai kha kum tin Jerusalema Ferkân kût hmang hrangin an fe ngaia, 42 Ama kha kum sômhleihni a niin, dân angin kût hmang hrangin an hong fepuia. 43 Kût ar zoiin chu, an kîr tâka, nâipang Jisua chu a nu le pa inhre loiin Jerusalema a la riaka. 44 A rualhai laia fe ni a ti; tiin sûn khat an fe hnungin, an urênghai le an rualhai kuang an zonga. 45 Khan khom hmu mahaia, zong pumin Jerusalem tiang an hong kîr nôk tâka.
46 A sûn thum ni’n chu Tempila, irchutirtuhai kuang lei toiin an hong hmu tâka; an thu a lei irngai le lei irdonhaiin an va hmu tâka. 47 A vâr le a sâm theizia an inhriatin a sân ar khêl an tia. 48 A nu le pa khomin an hong hmu’n chu a sân ar khêl an tia, a nu khan, “Bonga, itho mo hianga ni ni ilo? Ni pa leh irthatâk vîkin nang kin izong mai tâk kêng,” a tia. 49 “Itho mo nin ni izong? Ka pa ina ki om ti nin inhriat loi ma ni?” a tia. 50 Khannisianlân, a sâm dân kha a’rngaina lam chang inhre mahai. 51 Khanchu, an kuang Nazaret-a fea, an thu zômin a oma, thil omzia hai murdi a nu’n a lungrîla a vong chiana.
52 Khan, Jisua kha taksa tiang le vârna tiang a hong irsôn tîr tîra, Pathian le mihriam inrenna le kanna a dong tîr tîr tâka.
1 Kaisara Tiberi-a an lal kum sômhleiringa kuma chu, Pontia Pilata chu Judai rama Ramoptu a nia, Heroda chu Galili rama rêng a nia, a sangpa Filipa kha Iturea le Trakonitis rama rêng a ni. Lusania chu Abilene rama rêng a ni. 2 Anna le Kaiafa hai kha Ochai inlaltak an nia; kha zoro lai khan ramchâra Zakaria nâipa Johana kuang Pathian thu a zuang tunga. 3 Khanchu, Johana’n Jordan vadung pang ram tin ar fanga, “Nin sualhai ata irlet unglân, baptisma chang roi; khanchu, Pathianin nangni ngaidam a ti,” tiin thu an sîra.
4 Deipu lekhabua irziak angin;
“Ramchâra mi hnuk irhai khan,
‘Rengpa lampui siam unglân,
a fena hrangin lamintûn siam roi!
5 Irhôr tin insip ni a ta, mual le tâng tin irhniamtir ni a ti.
Lampui kôihai intûntir ni a ta,
Lampui inrualloihai kha inrualtir ni a ti.
6 Khanchu Pathian saninhringna kha mi tinin hmu an ti,’ ”
ti irziak ang khan.
7 Khan, Johana kuang baptisma chang hrangin mipui an honga, an kuang, “Mirûl irchihaio, Pathian ningmur zuang tung hrang ata zôk hrangin tu mo nangni hril? 8 Nin sual nin irlet tak tak tih nin nunchana inlangtir roi. Abrahama kha ei irchibul a ni khate, lei ti chin ni; nangni ki hril, Pathianin hi lunghai khom Abrahama irchi a inchang thei kêng. 9 Thing tin a’rzung dêna phûr hrangin hreipui an sia ta. Thing tin ra saloia ra chu, irkita meia pai ni an ti,” a tia.
10 Khan, mipuihaiin an irdona, “Imo kin itho hrang tâk?” an tia. 11 An kuang, “Songkol irthuam neihai chu a nei loihai sem unglân, fâkrua neihai khomin a neiloihai sem roi,” a tia. 12 Khâzana irfuangtuhai khom baptisma chang hrangin an honga, a kuang, “Irchutirtu imo kin itho hrang?” an tia. 13 “Dân bituk bana chu irfuang no roi,” a tia. 14 Sipaihai khom an honga, a kuang, “Keini te imo kin itho hrang?” an tia. Ama khan, “Nakhrâtin mo minlakin mo tûte thil la pe no unglân, nin hloa nin milung inchuk roi,” a ti pehaia.
15 Mipuihaiin chu a sân sabei takin, Johana kha Krista kêng ni a ti, tia an ngaitua laiin, 16 Johana’n, “keima’n chu tuiin nangni ki baptisa, keima nêka roiinpui ual zuang hrang a nia, keima chu a kekok hrui sût inruk khom ni ma ung; Ama’n chu Irtha Irthiang le meiin nangni baptis a ti. 17 An sêpna hrangin mira a chôia, insêp a ta, butak chu a panga thun a ta, a’rsî kha mei thi ngailoia hâlirvôm a ti,” a tia. 18 An om dân irlet hrangin, Johana’n mipuihai kuang lam tamtakin Thurchi Sa a hril ngaia.
19 Reng Heroda khom kha, a urêngpa dôngma Herodi a nei sikin le thilsual dang a itho murdi thua a halirchua. 20 Khanchu, Heroda’n Johana kha intângna ina a khum tâka.
Jisua baptisma a chang thu
21 Khan, mi murdi baptisma an chang zoiin, Jisua khom baptisma a changa, a chongchai laiin irvân ar honga. 22 Irtha Irthiang chu taksa irputin a chunga vasu angin a zuang chuma, irvân ata hnuk irhai a zuang suaka, “Ki Nâi lungthung tak ni ni; ni chunga ki lôm tak tak,” a zuang tia.
Jisua irchibulhai
23 Jisua sintho a phuta khan ama kha kum sôminthum a nia. Mi irngai lamin chu Josefa nâipa a ni. Kha pa kha chu Helia nâipa a nia; 24 ama chu Matthata nâipa a ni; ama chu Levia nâipa a ni; ama chu Melkia nâipa a ni; ama chu Jannaia nâipa a ni; ama chu Josefa nâipa a ni; 25 ama chu Mattathia nâipa a nia, ama chu Amosa nâipa a nia, ama chu Nahuma nâipa a nia, ama chu Eslia nâipa a nia, ama chu Naggaia nâipa a nia; 26 ama chu Maatha nâipa a nia, ama chu Mattathia nâipa a nia; ama chu Simeia nâipa a ni; ama chu Joseka nâipa a ni; ama chu Joda nâipa a ni; 27 ama chu Joana nâipa a ni; ama chu Resa nâipa a ni; ama chu Zerubabela nâipa a nia, ama chu Sealtiela nâipa a ni; ama chu Neria nâipa a ni; 28 ama chu Melkia nâipa a ni; ama chu Addia nâipa a ni; ama chu Kosama nâipa a ni; ama chu Elmadama nâipa a ni; ama chu Era nâipa a ni; 29 ama chu Josua nâipa a ni; ama chu Eliazara nâipa a ni; ama chu Jorima nâipa a ni; ama chu Matthata nâipa a ni; ama chu Levia nâipa a ni; 30 ama chu Simeona nâipa a ni; ama chu Juda nâipa a ni; ama chu Josefa nâipa a ni; ama chu Jonama nâipa a ni; ama chu Eliakima nâipa a ni; 31 ama chu Melea nâipa a ni; ama chu Menna nâipa a ni; ama chu Mattatha nâipa a ni; ama chu Nathana nâipa a ni; ama chu Davida nâipa a ni; 32 ama chu Jesaia nâipa a ni; ama chu Obeda nâipa a ni; ama chu Boaza nâipa a ni; ama chu Salmona nâipa a ni; ama chu Nasona nâipa a ni; 33 ama chu Aminadaba nâipa a ni; ama chu Admina nâipa a ni; ama chu Arnia nâipa a ni; ama chu Hezrona nâipa a ni; ama chu Pereza nâipa a ni; ama chu Juda nâipa a ni; 34 ama chu Jakoba nâipa a ni; ama chu Isaka nâipa a ni; ama chu Abrahama nâipa a ni, ama chu Tera nâipa a ni, ama chu Nahora nâipa a ni; 35 ama chu Seruga nâipa a ni; ama chu Hragaia nâipa a ni, ama chu Falega nâipa a ni, ama chu Ebera nâipa a ni, ama chu Sela nâipa a ni, 36 ama chu Kainana nâipa a ni, ama chu Arpaksada nâipa a ni, ama chu Sema nâipa a ni, ama chu Nova nâipa a ni, ama chu Lameka nâipa a ni, 37 ama chu Methusela nâipa a ni, ama chu Enoka nâipa a ni, ama chu Jereda nâipa a ni, ama chu Mahalalela nâipa a ni, ama chu Kenana nâipa a ni, 38 ama chu Enosa nâipa a ni, ama chu Setha nâipa a ni, ama chu Adama nâipa a ni, ama chu Pathian Nâipa a ni.
1 Jisua kha Irtha Irthiangin a sipa, Jordan dung ata a kîr nôka, Diabola inthêmin ramchâra a fe tâka. 2 Khan Diabola’n sûn sômminli an thêma. Kha sûnga khan ite a fâk no sikin inhnunga chu a phîng a châm tâka.
3 Diabola’n a kuang, “Pathian Nâi ni ni’n chu, hi lung hi bai inchangtir ro,” a tia. 4 Jisua’n chu, “Bai ringotin chu mihriam hi an ihring hrang ni ma tih irziak a ni,” a tia. 5 Khanchu, Diabola’n a hong hruaia, mitkhap kâr vakin rammual pumpui an entira. 6 A kuang, “Hi chunga irchamneinahai le roiinpuinahai hi nang pe ki ti; ki kuang ipêk an ni ta, ki inuampu tak kuang ki pêk thei. 7 Chubai ni mûkin lân, a rêngin nang pe ki ti,” a tia. 8 Jisua’n, “Rengpa ni Pathian chu chubai mûkin lân, Ama sin vai tho ro, tih irziak a ni,” tiin a sâma.
9 Khanchu, Diabola’n Jerusalema a hruaia, Tempil sîp irzuma a siaa, “Pathian Nâipa ni ni’n chu irchôm tha roh. 10 ‘Pathianin a vân vântîrtônhai nang indom hrangin zuang tîr a ti,’ ti irziak a ni. 11 An kutin nang indom an ta, ni ke khomin lung irfûi no chi ni,” a ti pea. 12 Jisua’n chu “Rengpa ni Pathian fia no roh,” ti irziak a ni, tiin a sâm nôka.
13 An thêmna hrang dôra an thêm zoiin chu, Diabola’n zoro’nchum danga hrangin a rotsan tâka.
Jisua’n Galili rama sintho a phut
14 Khan, Jisua kha Irtha Irthiang sinthotheina neiin Galili rama a kîr nôka, kha ram sûnga khan a thurchi an thang tâka. 15 An Sinagokhaia, mi ar chutir ngaia, mihai inpâkin a oma.
Nazaret Jisua ihnôlin a om
16 A seilianna Nazaret khuaa a fea, Sabat ni’n chu a tho ngai lam angin Sinagoka a fea, Pathian Thubu tep hrangin a ngîra. 17 Deipu Isaia lekhabu an pêka, lekha irzuat kha a phara, hi irziak omna hi a tepa.
18 “Inrianghai kuang Thurchi Sa insîr hrangin a nin thang sikin,
Rengpa Irtha ki chunga a oma,
mi intânghai kuang zôkna thu inpuang hrangin a ni itîr a ni.
Mitchohai, mit vâr nôkna hrang le mi ihnuaisiahai zôkna hrangin.
19 Rengpa’n a mihai an zôkna hrang zoro a hong intung tâk tih inpuang sa hrangin,”
ti hi.
20 Khanchu, Jisua’n lekha kha an zuata, a dôntu a pêka, a toia, Sinagoka mi murdi’n an en chuta. 21 Khan, an kuang, “Hi Pathian lekha thu hi a vuan hin nin mikuar inhriata a zuang tung ta,” tiin a hong insîr tâka. 22 A chongbâi suak, lungkham thu insîrin, an lungrîl a tôna, ar khêl an tia, “Hi mi hi Josefa nâipa ni ma mo?” an tia.
23 Khan, an kuang, “Nangni’n hi chongirkhek thu hi, Daktor, ni bingin indam irhlôm roh. ‘Kapernaum-ah ni sinthohai, kin lei inhriathai khom hi ni khua tiang khom hin sin ro,’ ni la ti ngêt nin ti,” a tia. 24 Jisua’n, “Deipu chu mâni khuaa tûte’n lôm ngai mahai,” a ti pea. 25 “Irngai u ta, hi hi a dik a ni, Elija zoro laiin Israel rama meithâi tamtak an oma, kum thum le tha ruk rua tho loiin a oma, a ram pumpui sûnga châmpui a tâka. 26 Israel rama meithâi inkhat Sidon rama Zarefat kho mi kuang bana chu Elija kha tûte kuang itîr ni ma. 27 Deipu Elisa zoro lai khomin Israel rama phâr tamtak an oma, khannisianlân, tûte dam loiin, Suria rama mi Naamana vai indamin a om,” a tia.
28 Sinagoka mipuihai khan, a chong kha an inhriatin chu a sân an ning an mur. 29 An thoia, an khua ata an kaisuaka, khan an khua omna tânga rôla namthâk hrangin an hruaia. 30 Khannisianlân, mipui lai ata rel patin a rot tâka.
Ramilhli ichel indam
31 Khanchu, Jisua Galili rama Kapernaum khuaa a fea. Sabat ni’n mihai ar chuhaia. 32 Irchamnei takin ar chuhai sikin a sân an irngai ar khêl tâka.
33 Sinagoka khan ramilhli irtha ichel a oma, inring takin a khêka. 34 “O, Nazaret Jisua, imo ni lo hrang ni ni iti? Ni’rhmangtir hranga ni ihong ma ni? Nang kin hriat Pathian mi irthiang ni ni,” a tia. 35 Jisua’n, “Dâihrekin lân a sûng ata hong suak roh,” a tia. Ramilhli khan irnênga an rîltir raka, innatir loiin a sûng ata a suak tâka. 36 Khanchu, an rêngin ar khêl an tia. “Itina irchamnei ma ni? Irchamnei le sinthotheina neia ramilhli suak roi a tia, an isuak hi,” an irtia. 37 Khanchu, kha rama khan hmun tina Jisua irhming an thang tâka.
Jisua’n mipui tamtak an damna thu
38 Khan, Jisua Sinagok ata a suaka, Simona ina a fea, Simona tarpi a sân inkhur inrikin a oma, a ta hrangin Jisua a ngên pea. 39 A kôla a va ngîra, an khur kha a hala, khanchu, a hong boi zôia, a thoia an sin a tho pehai tâka.
40 Khanchu, misa a tâk hnungin, natna chi tinrênga damloihai a kuang an hong hruaia, an chung chita a kut pharin an damhai zita. 41 Khan, “Pathian Nâipa ni ni,” tia khêkin ramilhlihai khom mihai sûng ata an suak tâka. Krista a ni tih an inhriat sikin. Jisua’n ramilhlihai kha chong hrang phalhai ma.
Sinagoka Jisua thu’nsîr
42 Khan, khua a vâr le chu khua ata fianriala a fea, mipuihaiin an zonga, an hmu’n chu, masanhai loia an kuang la om hrangin an ngêna. 43 Khannisianlân, Jisua’n an kuang, “Pathian Ram Thurchi Sa kho tina insîr hrang piala tîr kêng ki ni,” a ti pehaia. 44 Khanchu, Galili rama Sinagokhaia thu an sîr tâka.
1 Sûn khat chu, Jisua Genesaret dîl kôla a ngîra, mipuihaiin Pathian thu irngai hrangin an hong pan mur mura; 2 dîl kôla irkuang inhni om kha a hmua, nga cheltuhaiin an lên sôphai an imâk kha a hmua. 3 Simona irkuanga khan a chuanga, muang ata irthîn viat hrangin a ngêna, khanchu, irkuanga a toia, mipui ar chuhaia.
4 Thu an sîr zoiin chu Simona kuang, “Tui inthûkna tiang irkuang infetirin lân, nga man hrangin nin lênhai vôr roi,” a tia. 5 Khan, Simon khan, “Rengpa, zân sôt kin vôra, ite man ma ung, khannisianlân, nangma irchamin lênhai vôr nôk kin ti,” a tia. 6 An zu vôrin chu nga tamtak an mana, an lênhai khom a chet vâng vânga. 7 Khanchu, irkuang danga an chanpui omhai kha hong sanhai hrangin an zâphaia. An honga irkuang inhni ngîm vâng vângin an thun insip zita.
8 Khan, Simon Petera’n thil omzia a hmu’n chu, Jisua kuang khûksadelin, “Rengpa, ni masan roh, mi sual kêng ki ni,” a tia. 9 Ama le a rualhaiin an nga chel a tam hrai sikin a sân ar khêl an tia. 10 Simona pâla Zebedaia nâihai Jakoba le Johana khomin ar khêl an ti ok sa a ni. Khan, Jisua’n Simona kuang, “Chi no ro, atûn ata chu mihriam chel ta ni ti,” a ti pea. 11 An irkuanghai muanga an hong kaisuaa, thil tinrêng mâk zitin Jisua an zui tâka.
Jisua’n phâr an damna
12 Nikho khat chu, Jisua kha khua inkhata a om laiin, a taksa pumpuia inphâr khan Jisua kha a hmua, khûksadelin damna a zonga, “Rengpa ni nuamin chu ni ni’rthiangtir thei,” a tia. 13 Jisua’n a hong inbana, “Ki nuam e, hong irthiang ta roh,” a tia. Voikhat rengin a phâr kha a hong boi zit ta. 14 Khan, Jisua’n a kuang, “Tûte inhril no roh, aniachu, Ochai kuang van entirin lân, mi tinin ni dam tâk ti an inhriat theina hrangin, Mosia dân angin irbôlna inhlan roh,” a ti pea. 15 Khannisianlân, Jisua thurchi kha an thang ual uala, a thu’nsîr irngai hrang le an natnahai indam hrangin mipuihai a kuang an hong irbûma. 16 Khan fianriala a fea a chongchaia.
Jisua’n zenginthi an damna thu
17 Sûn khat chu Jisua’n mi ar chutira, a kôla Farisaihai le Dân irchutirtuhai an toia, Galili le Judai ram kho tin ata le Jerusalem ata hong an nia. Mi indam theina hrangin Rengpa Irtha Jisua chunga a oma. 18 Zenginthi a zâlna pumin an hong irzôna, in sûnga Jisua makunga se hrang an tuma. 19 Khannisianlân, mipui tam sikin lût thei mahaia, in chung tiang an luipuia, in chung ata an lâi taka, Jisua makunga a zâlna pumin an zu inthâka. 20 Khan, Jisua’n an iamzia a hmu’n chu, a kuang, “Mala, ni sualhai ngaidam a ni ta kêng,” a tia.
21 Khan, Dân irchutirtuhai le Farisaihai khan, “Hiang taka Pathian hrilsiat hi tu mo a ini! Pathian vai kêng sual ngaidam thei,” tiin an insîr irhlôma. 22 Jisua’n an ngaituana an hriata, “Itho mo khaanga thil nin ingaitua? 23 ‘Ni sualhai ngaidam a ni ta’ ti le thoiin lân ke’n fe ta roh, ti hi kho hi mo a ol ual? 24 Mihriam Nâipa hin rammuala sualhai ngaidam theina a nei tih nangni inlangtir pe ki ti,” a ti pehaia. 25 Voikhat rengin an mit hmua a thoi zoka, a zâlna puantha a lâka, Pathian inpâk pumin a ina a fe ta. 26 An rêngin irngai irkhêlin an chia, “A vuan chu hiang taka thil irkhêl ei ihmu hi,” tiin Pathian an inpâk tâka.
Jisua’n Levia a koina
27 Kha hnung chu, Jisua a fe suaka, khâzana irfuangna hmuna toi, khâzana irfuangtu inkhat, a’rhming Levia kha Jisua’n a hmua, Jisua’n a kuang, “Ni zui roh,” a ti pea. 28 Khanchu, thil tinrêng mâkin a zui tâka.
29 Khan, Levia khan Jisua hrangin a ina hruai an thea, khâzana irfuangtu tamtak le mipuihai a fiala. 30 Khan, Farisai senkhathai le Dân irchutirtu senkhathaiin Jisua irchutirhai kha an sêla, “Itho mo khâzana irfuangtuhai, mi sualhai leh nin fâkin nin iin suam,” an tia. 31 Jisua’n an kuang, “Mi hrisêlhaiin daktor innang ngai mahaia, mi irveisiahai kêngin an innang ngai. 32 Mi felhai irlam hranga zuang ni ma unga, mi sualhai an irlet theina hranga zuang kêng ki ini,” a tia.
Bu nghei chungchânga irdonna
33 Mi senkhatin Jisua kuang, “Johana irchutirhaiin bu ngheiin an chongchai ngaia, Farisai irchutirhai khomin khaang dênin an tho ngaia, khannisianlân, ni irchutirhaiin chu nghei ngai mahaia?” an tia. 34 Jisua’n an kuang, “Irneinaa an rualhai kha moineipu an kuang a om kâr ka chu bu nin inngheitir theihai hrang ma ni? Ni thei no ni! 35 Khannisianlân, an kuang ata moineitu an hruaipai nikhua la tung a ta, kha tika chu la nghei an ti,” a tia.
36 Jisua’n an kuang chongirkhek dang an sîra, “Tûte’n puan thar inpot thêrin puan milui phô ngai mahai, phô ta ngân sian, a thar khan kaiset a ta, a thar hlek lâkin a milui kha irfûk no ni. 37 Tûte’n uain thar savun kok miluia thun ngai mahai, thun ngân ta sianlân, uain khan savun kokhai kha mût khoi a ta, irpai a ta, savun kokhai khom insiat a ti. 38 Khasikin, uain thar chu, savun kok thara thun an ti. 39 Tûte’n uain milui in hnungin uain thar in nuam ngai mah, uain milui a sa ual sikin,” a tia.
1 Sabat ni voikhat chu bubil hmunhai a hroa; a irchutirhaiin bu vûi an khiaka, an kuta inmuai infâiin an bâra. 2 Farisai senkhathaiin, “Itho mo ei Dânin Sabat nia tholoi hrang a iti te nin itho?” tiin an irdona. 3 Jisua’n an kuang, “Davida le a mihaiin an phîngchâm laia an itho kha nin itep ngailoi ma ni? 4 Pathian ina a lûta, Ochaihai bana chu tûte fâk hrang dân ni loi bai irthiang kha a lâka, a fâka. a rualhai khom a ipêk thu kha?” a tia. 5 An kuang, “Mihriam Nâipa hi Sabat nikhua Rengpa a ni,” a ti pehaia.
Kut zenginthi indam thu
6 Khan, Sabat nikhua danga chu Jisua Sinagoka a lûta, ar chuhaia. Khataka khan mi inkhat kut chang tianga zenginthi a oma. 7 Dân irchutirtuhai le Farisaihai khan demna an hmu theina hrangin Sabat nia indam hrang le indam loi hrang an enirchika. 8 Jisua’n an milung inchong an hriatin, damloi kuang, “Thoiin lân, a laia hin ngîr suak ta,” a tia. Khanchu a thoia, a ngîr suak tâka. 9 Jisua’n an kuang, “Sabat nia insa mo a’rthiang, insiat mo, mi saninhring mo, a’rthiang thatpai mo? nangni ki’rdon,” a ti pehaia. 10 Khanchu an rêng khan a enhaia, zenginthi kuang khan, “Ni kut phar ro,” a tia. A hong phara, a kut kha a hong dam tâka. 11 Khanchu, a sân an ning an mur tâka, Jisua kha itina lo hrang mani tiin an irdon irhlôm tâka.
Irchutir sômhleihnihai a inthangna thu
12 Kha zoroa khan Jisua chongchai hrangin tânga a fea, zân khovârin Pathian kuang a chongchaia. 13 Khua a hong vârin chu a irchutirhai kha a koihaia, an lai ata sômhleihni an thanga, an irhminga Tirtôn a phuahaia. 14 Simona Petera le a sang Andria, Jakoba le Johana, Filipa le Bartholomaia, 15 Mathaia le Thoma, Alfaia nâipa Jakoba le Simon Zelota, 16 Jakoba nâipa Juda le an cheltirtu Juda Iskariota hai an ni.
Jisua’n ar chutirna le an damna thu
17 Khan, Jisua le a irchutirhai tâng ata an zuang chum hnungin, a irchutir tamtakhai leh hmun inchama an ngîra, kha hmuna khan mipui tamtak Judahai ram tina irthoka, Jerusalema irthoka, tuikhanglian vapanga khua Tura le Sidon mihai an oma. 18 A thu’nsîr irngai hrang le natnahai indam hranga hong an ni. Ramilhli ichelhai khom an hong dam tâka. 19 A kuang ata sinthotheina a suak sikin mipui murdi’n ama tôn hrang an tuma, an rêngin an dam pak tâka.
Raifânna le chardongna
20 Jisua’n a thîr vêla, a irchutirhai kha a ena, thu an sîra,
“Nangni inrianghaio,
nin vân a sa e,
Pathian Ram nin ta a ni sikin!
21 Nangni atûna phîngchâmhaio,
nin vân a sa,
Nin la khop hrang sikin!
Nangni atûna chaphaio,
nin vân a sa,
nin lan nui hrang sikin.
22 “Mihriam Nâipa sika, mihaiin nangni an khôkmâka, nangni an hnôla, nangni an êroa, irhming siat raka nangni an hnôlin chu, nin vân la sa ti. 23 Kha zoi tika chu raiinfân unglân, lômin irchôm roi, irngai u ta, irvâna nin lômman a om hrang sikin! Nin chunga an itho angin an irchibulhai khomin Deipuhai chunga an itho ngai a ni.
24 “Nangni irchonghaio,
nin chung a rik e,
inhoina murdi nin hmang zoi tâk sikin!
25 Nangni atûna khophaio,
nin chung a rik e,
nin phîng a la châm hrang sikin!
Nangni atûna innuihaio,
nin chung a rik e,
beidongin nin la ichap hrang sikin!
26 “Mi tinin nangni an inpâk tika chu lungkham nin la iom hrang kêng; khaang dênin an irchibulhaiin deipu dolhai an inpâk ngai.
Râlhai lungthung hrang
27 “Ki thu irngaipuhaio, hiang hin nangni ki hril, nin râlhai kha lungthung unglân, nangni khôkmâktuhai chunga khan an satna hrang tho pehai roi. 28 Khua nangni sâltuhai chu satvurhai roi, deng nangni intheitirtuhai chu chongchai pehai roi.
29 “Mi’n ni hmâi kiangkhat inbêntu kuang kiangkhat tiang khom do pe roh. Khan ni puan lâktu kuang chu ni songkol lâk khom inlatir roh. 30 Nang a zongtu murdi chu pe’n lân, ni sum nang lâk petu chu zong nôk ta no roh. 31 Nin chunga mihaiin, nin nuamlam an itho ang dênin mi chunga khom tho roi.
32 Nangni lungthungtuhai vai lung nin thungin itin mo satvur nin idong hrang? Imo mi sualhai nêka nin danglam bîkna? Mi sualhai khomin anni lungthungtuhai chu lung an thung ngai kêng. 33 Nin chunga sin sa thohai chunga vai sin sa nin itho hin, imo mi sualhai leh nin danglam bîkna? itin mo satvur nin idong hrang? Mi sualhai khomin khaang khan an tho ngai kêng. 34 Hmu nôk hranga, nin isabeihai kuang vai, nin inpûktirin te, imo satvur nin idong hrang? Mi sualhai khomin a bi hmu nôk hrangin chu mi sualhai an inpûktir ngai. 35 Ni ma! Ni râlhai lungthungin lân, an satna hrang sin ro. Ite sabei loiin inpûktir roh. Khanchu, lômman tamtak hmu nin ta, Anchungtaka Pathian nâihai nin ini hrang a ni; Ama’n chu lômna châng inhre loihai le mi sualhai khom lung an kham zit ngai. 36 Nin pa khomin mi lung a inkham angin nangni khomin mi lung inkham ngai roi.
Mi dang sêl chungchâng
37 “Mi sêl no roi, Pathian khomin nangni sêl no ni, mi dem no unglân, Pathianin nangni dem no ni, mi ngaidam unglân, Pathianin nangni ngaidam a ti. 38 Pe unglân, khanchu, Pathianin nangni pe a ti. Tikhoi pêkin namirdên ngitin, nok inhnîngin, lêt rakin nin dong thei dôr nin kuta nangni pe a ti. Mi nin irte pêna ngai dêna khan Pathianin nangni irte pe a ti,” a tia. 39 Jisua’n hi chongirkhek hi an sîra, “Mitcho’n mitcho dên hruai thei mah, a hruaiin chu an ruaiin khurpadopa tâk an ti. 40 A’rchutirtu nêkin a’rchupu lian ual ma, khan, a’rchutu khom a zoi tika chu a’rchutirtu pha ta ti. 41 Itin lama mo, mâni mita thingtum om chu inhre loiin ni urêng mita minim om chu ni ihmu? 42 Mâni mita thingtum om chu ngaipoimo loiin, ‘Ni urêng kuang ni mita minim nang lei kêl pe rong ni iti thei hrang?’ Mi vârirlet! Ni mita thingtum kêl bakin lân, khanchu, ni urêng mita minimte kha hmu’nfel thei ni ti.
Thing sa le thing saloi ra
43 “Thing sa chu a ra siat ngai mah, thing sia lak a ra sa ngai mah. 44 Thing tin an ra chita ei inhriat thei a ni; ilhling rânga theipui irhmal ngai mahai, hloiilhlingnei kunga khom grep irhmal ngai mak chêi. 45 Mi sain chu a milung irchon kok sa ata thil sahai a phor suak ngai, mi sual chu a milung irchon kok saloi ata thil saloihai a phor suak ngai, milunga lêt raka sip hi kêng bâiin nin insîr suak ngai.
Mi inhni in sin thu
46 “Itho mo ki thu zôm loia Rengpa, Rengpa, nin ni iti? 47 Tukhom ki kuang honga ki thu zôm chu i ang mi mani nangni hril ki ti. 48 Kha mi kha chu a in sin kha lungpui chunga inthûk vita lungphûm ang kha a ni. Tui lianin a suka, inhnîng maka, det ngita sin a ni sikin. 49 Khan, tukhom ki hnuk irhai inhriata, ki thu zôm no chu, lungphûm loia pil chunga in sin, tui lianin a suk a suka, a chim zôi zela, a isiat irnôi chit ang kha a ni,” a tia.
LUKA 6
Sabat chungchânga irdonna
1 Sabat ni voikhat chu bubil hmunhai a hroa; a irchutirhaiin bu vûi an khiaka, an kuta inmuai infâiin an bâra. 2 Farisai senkhathaiin, “Itho mo ei Dânin Sabat nia tholoi hrang a iti te nin itho?” tiin an irdona. 3 Jisua’n an kuang, “Davida le a mihaiin an phîngchâm laia an itho kha nin itep ngailoi ma ni? 4 Pathian ina a lûta, Ochaihai bana chu tûte fâk hrang dân ni loi bai irthiang kha a lâka, a fâka. a rualhai khom a ipêk thu kha?” a tia. 5 An kuang, “Mihriam Nâipa hi Sabat nikhua Rengpa a ni,” a ti pehaia.
Kut zenginthi indam thu
6 Khan, Sabat nikhua danga chu Jisua Sinagoka a lûta, ar chuhaia. Khataka khan mi inkhat kut chang tianga zenginthi a oma. 7 Dân irchutirtuhai le Farisaihai khan demna an hmu theina hrangin Sabat nia indam hrang le indam loi hrang an enirchika. 8 Jisua’n an milung inchong an hriatin, damloi kuang, “Thoiin lân, a laia hin ngîr suak ta,” a tia. Khanchu a thoia, a ngîr suak tâka. 9 Jisua’n an kuang, “Sabat nia insa mo a’rthiang, insiat mo, mi saninhring mo, a’rthiang thatpai mo? nangni ki’rdon,” a ti pehaia. 10 Khanchu an rêng khan a enhaia, zenginthi kuang khan, “Ni kut phar ro,” a tia. A hong phara, a kut kha a hong dam tâka. 11 Khanchu, a sân an ning an mur tâka, Jisua kha itina lo hrang mani tiin an irdon irhlôm tâka.
Irchutir sômhleihnihai a inthangna thu
12 Kha zoroa khan Jisua chongchai hrangin tânga a fea, zân khovârin Pathian kuang a chongchaia. 13 Khua a hong vârin chu a irchutirhai kha a koihaia, an lai ata sômhleihni an thanga, an irhminga Tirtôn a phuahaia. 14 Simona Petera le a sang Andria, Jakoba le Johana, Filipa le Bartholomaia, 15 Mathaia le Thoma, Alfaia nâipa Jakoba le Simon Zelota, 16 Jakoba nâipa Juda le an cheltirtu Juda Iskariota hai an ni.
Jisua’n ar chutirna le an damna thu
17 Khan, Jisua le a irchutirhai tâng ata an zuang chum hnungin, a irchutir tamtakhai leh hmun inchama an ngîra, kha hmuna khan mipui tamtak Judahai ram tina irthoka, Jerusalema irthoka, tuikhanglian vapanga khua Tura le Sidon mihai an oma. 18 A thu’nsîr irngai hrang le natnahai indam hranga hong an ni. Ramilhli ichelhai khom an hong dam tâka. 19 A kuang ata sinthotheina a suak sikin mipui murdi’n ama tôn hrang an tuma, an rêngin an dam pak tâka.
Raifânna le chardongna
20 Jisua’n a thîr vêla, a irchutirhai kha a ena, thu an sîra,
“Nangni inrianghaio,
nin vân a sa e,
Pathian Ram nin ta a ni sikin!
21 Nangni atûna phîngchâmhaio,
nin vân a sa,
Nin la khop hrang sikin!
Nangni atûna chaphaio,
nin vân a sa,
nin lan nui hrang sikin.
22 “Mihriam Nâipa sika, mihaiin nangni an khôkmâka, nangni an hnôla, nangni an êroa, irhming siat raka nangni an hnôlin chu, nin vân la sa ti. 23 Kha zoi tika chu raiinfân unglân, lômin irchôm roi, irngai u ta, irvâna nin lômman a om hrang sikin! Nin chunga an itho angin an irchibulhai khomin Deipuhai chunga an itho ngai a ni.
24 “Nangni irchonghaio,
nin chung a rik e,
inhoina murdi nin hmang zoi tâk sikin!
25 Nangni atûna khophaio,
nin chung a rik e,
nin phîng a la châm hrang sikin!
Nangni atûna innuihaio,
nin chung a rik e,
beidongin nin la ichap hrang sikin!
26 “Mi tinin nangni an inpâk tika chu lungkham nin la iom hrang kêng; khaang dênin an irchibulhaiin deipu dolhai an inpâk ngai.
Râlhai lungthung hrang
27 “Ki thu irngaipuhaio, hiang hin nangni ki hril, nin râlhai kha lungthung unglân, nangni khôkmâktuhai chunga khan an satna hrang tho pehai roi. 28 Khua nangni sâltuhai chu satvurhai roi, deng nangni intheitirtuhai chu chongchai pehai roi.
29 “Mi’n ni hmâi kiangkhat inbêntu kuang kiangkhat tiang khom do pe roh. Khan ni puan lâktu kuang chu ni songkol lâk khom inlatir roh. 30 Nang a zongtu murdi chu pe’n lân, ni sum nang lâk petu chu zong nôk ta no roh. 31 Nin chunga mihaiin, nin nuamlam an itho ang dênin mi chunga khom tho roi.
32 Nangni lungthungtuhai vai lung nin thungin itin mo satvur nin idong hrang? Imo mi sualhai nêka nin danglam bîkna? Mi sualhai khomin anni lungthungtuhai chu lung an thung ngai kêng. 33 Nin chunga sin sa thohai chunga vai sin sa nin itho hin, imo mi sualhai leh nin danglam bîkna? itin mo satvur nin idong hrang? Mi sualhai khomin khaang khan an tho ngai kêng. 34 Hmu nôk hranga, nin isabeihai kuang vai, nin inpûktirin te, imo satvur nin idong hrang? Mi sualhai khomin a bi hmu nôk hrangin chu mi sualhai an inpûktir ngai. 35 Ni ma! Ni râlhai lungthungin lân, an satna hrang sin ro. Ite sabei loiin inpûktir roh. Khanchu, lômman tamtak hmu nin ta, Anchungtaka Pathian nâihai nin ini hrang a ni; Ama’n chu lômna châng inhre loihai le mi sualhai khom lung an kham zit ngai. 36 Nin pa khomin mi lung a inkham angin nangni khomin mi lung inkham ngai roi.
Mi dang sêl chungchâng
37 “Mi sêl no roi, Pathian khomin nangni sêl no ni, mi dem no unglân, Pathianin nangni dem no ni, mi ngaidam unglân, Pathianin nangni ngaidam a ti. 38 Pe unglân, khanchu, Pathianin nangni pe a ti. Tikhoi pêkin namirdên ngitin, nok inhnîngin, lêt rakin nin dong thei dôr nin kuta nangni pe a ti. Mi nin irte pêna ngai dêna khan Pathianin nangni irte pe a ti,” a tia. 39 Jisua’n hi chongirkhek hi an sîra, “Mitcho’n mitcho dên hruai thei mah, a hruaiin chu an ruaiin khurpadopa tâk an ti. 40 A’rchutirtu nêkin a’rchupu lian ual ma, khan, a’rchutu khom a zoi tika chu a’rchutirtu pha ta ti. 41 Itin lama mo, mâni mita thingtum om chu inhre loiin ni urêng mita minim om chu ni ihmu? 42 Mâni mita thingtum om chu ngaipoimo loiin, ‘Ni urêng kuang ni mita minim nang lei kêl pe rong ni iti thei hrang?’ Mi vârirlet! Ni mita thingtum kêl bakin lân, khanchu, ni urêng mita minimte kha hmu’nfel thei ni ti.
Thing sa le thing saloi ra
43 “Thing sa chu a ra siat ngai mah, thing sia lak a ra sa ngai mah. 44 Thing tin an ra chita ei inhriat thei a ni; ilhling rânga theipui irhmal ngai mahai, hloiilhlingnei kunga khom grep irhmal ngai mak chêi. 45 Mi sain chu a milung irchon kok sa ata thil sahai a phor suak ngai, mi sual chu a milung irchon kok saloi ata thil saloihai a phor suak ngai, milunga lêt raka sip hi kêng bâiin nin insîr suak ngai.
Mi inhni in sin thu
46 “Itho mo ki thu zôm loia Rengpa, Rengpa, nin ni iti? 47 Tukhom ki kuang honga ki thu zôm chu i ang mi mani nangni hril ki ti. 48 Kha mi kha chu a in sin kha lungpui chunga inthûk vita lungphûm ang kha a ni. Tui lianin a suka, inhnîng maka, det ngita sin a ni sikin. 49 Khan, tukhom ki hnuk irhai inhriata, ki thu zôm no chu, lungphûm loia pil chunga in sin, tui lianin a suk a suka, a chim zôi zela, a isiat irnôi chit ang kha a ni,” a tia.
1 Khan, Jisua’n mihai kuang thu an sîr zoiin chu Kapernaum khuaa a fea. 2 Rom sipai irza hruaitu suak lung a ithung tak dam maka, a thi vâng vânga. 3 Khan, Jisua thurchi an hriatin chu a suakna kha indam pe ngêt hranga ngên hrangin Juda upahai a tîra. 4 Jisua kuang an honga, “Hi mi hi changpui inruk a ni. 5 Ei mihai hi lung a thunga, Sinagok khom a ni sin pe a ni,” an tia.
6 Khanchu, Jisua kha an pâla a fe sa tâka. In a va tung hrang tôn chu, sipai irza hruaitu chu a rualhai a tîra, “Rengpa intak pu pumin hong no ro, ki in sûng ni lûtna zât ni mak e, 7 Khabana keima khom ni kuanga hong hrang khom inruk ni ma ung. 8 Kei khom keima nêka lianhai thu hnuaia om ki nia, ki thu hnuaia sipaihai an oma, inkhat kuang, ‘Fe roh,’ ki tiin a fea, ‘Hong roh,’ ki tiin a honga, ki suak kuang, ‘Hi hi sin roh,’ ki tiin a sin ngai,” a tia. 9 Khan, Jisua’n kha kha an hriatin kha pa kha a sân a’rkhêl a tia, a’rhei têi tuaia, a zuituhai kuang, “Nangni ki hril, hiang dôra iamna irkhêl hi Israelhai laia tukhom la hmu ma ung,” a tia. 10 A mi tîrhai kha ina an va kîr nôkin chu, suak kha a damin an va hmu ta.
Jisua’n meithâi nâipa a kaithoi
11 Chomkhat hnunga chu Jisua kha Nain khuaa a fea, a irchutirhai le mipuihaiin an zuia. 12 Khan, khua dâi mikot an tungin chu, mithi an hong irzôna, meithâinu nâi neisun a ni. An khuaa mi tamtak an hong saa. 13 Khan, Rengpa’n a hmu’n chu, kha nu kha lung an kham tak taka, “Chap ta no roh,” a tia. 14 A va nâia, irlâng kha a chela, a’rzôntuhai khom kha an ngîr tâka, “Ruatharte, thoi roh, nang ki ti,” a tia. 15 Mithi kha a thoi zôi zela, a chonga, a nu kuang a pêk tâka.
16 Mi murdi’n an chia, Pathian an inpâka, “Ei laia Deipu roiinpui tak a zuang iom tâk a ni,” an tia; Pathianin a mihai a zuang ihro tâk a ni, an ti saa. 17 Kha thu kha Judai ram murdia le a kôlvêla Judai ram tina an thang suak tâka.
Baptistu Johana mi tîrhai
18 Johana irchutirhaiin Jisua thurchi Johana an hrila. 19 Khanchu, mi inhni Rengpa kuang a tîra, “A zuang hrang Mesia kha mo ni ini, mi dang kin la itûng hrang mo?” tia irdon hrangin. 20 Khan, Jisua kuang an honga, “Baptistu Johana’n a zuang hranga kha ni ini mo, mi dang mo kin la itûng hrang? a ti,” tiin an irdona. 21 Kha lai taka khan, Jisua’n mi tamtak damloihai, an natna hai, ramilhli ichelhai an damhaia, mitchohai mit an vâr pehaia. 22 Khan, Johana irchutirhai kuang, “Fe nôk ta unglân, Johana kuang nin ihmu le nin inhriathai va hril roi, mitchohai an hmu thei ta, kholrahai ke’n an fe thei ta, phârhai an irthianga, kuarsêt hai khom an mikuar a vâra, mithihai kaithoi an ni tâka, inrianghai kuang Thurchi Sa hril a ni ta. 23 Khan, tukhom ki chunga milung irlakna nei loi chu an vân a sa,” a tia.
24 Johana mi tîrhai an kîr hnungin, Jisua’n mipui kuang Johana chungchâng thu an sîra. “I enhoi en hrangin mo ramchâra nin izuang? lailuang phâivua’n a isêm inhnîng mo? 25 I en hrangin mo nin ife suak? puan irnêm sila irvo mo? puan irnêm sil le mi neihai chu rêng ina kêng an iom. 26 I tak en hrangin mo nin ife? Deipu en hrangin mo? A ni khate; nangni ki hril, ama chu deipu nêka roiinpui ual a ni. Hi mi hi a ni hi te.
27 Johana’n hi Pathian Thubua,
‘Irngai ta, ki tirtôn ni matona ki tîr,
Ama khan ni matona ni lam siam a ti,’
tia a thurchi an irziak kha. 28 Nangni ki hril, nupang inei laia Johana nêka roiinpui ual om mahai; aniachu, Pathian Rama mi chîn tak khom ama nêkin chu a roiinpui ual,” a tia.
29 Vântânghai le khâzana irfuangtuhai khan Johana thu an inhriatin Pathian sintho dik tak kha pomin a kuang baptisma an chang oka; 30 Farisai le Dân irchutirtuhai chu baptisma kha chang nuam mahai, anni ta hranga Pathian irfûktir kha nuam mahai.
31 Jisua’n, “Atûnlai mihai hi i leh mo ki irkhi hrang tâk? I ang mo an ini. 32 Nâipanghai bazar hmuna toia, senkhatin irneina theihle nangni kin tum pea, lâm mak chêia, lusûn hla kin sak khomin chap mak chêia, tia irsamirhlôm ang kha an ni. 33 Baptistu Johana a zuanga, bu ne maka, uain khom in maka, ramilhli nâi kêng nin tia. 34 Mihriam Nâipa a zuanga, a fâkin a ina, rôlruakpa, khâzana irfuangtuhai le mi sualhai rualpa nin tia. 35 Khannisianlân, a pomtuhai ta hrangin chu, Pathian vârna hi a dik a ni tih inlangna a ni,” a tia.
Farisai Simona ina Jisua thu
36 Farisai inkhatin Jisua bu nêk a koia, Jisua a fea, bu ne hrangin a toia. 37 Kha khua khan nupang sual a oma, Jisua Farisai ina bu a nêk tih an hriatin chu alabastar bûrin sahriak mirimhoi a hong chôia. 38 Jisua hnung tiang a ke bula a ngîra, a chapa, a mit irthîn a kehai a zunga, a samin a huia, a ke kha a tuma, a sahriak mirimhoi kha a pol tâka. 39 Farisai khan a hmu’n chu a milungin, “Hi mi hi deipu dik a ni’n te, a tôntunu, nupang sualzia hi inhria a ti,” a tia.
40 Jisua’n a kuang, “Simon, nang hril hrang ki nei,” a tia. Simona’n “Ti ro ba, irchutirtu,” a tia. 41 Jisua’n, “Mi inhni’n lâkai pe ngaitu kuang sum an tângtira, inkhatin irza ringa, inkhatin sômringa, 42 An tuam thei no sikin, a ngaidamhaia, a tu khan mo lungthung ual ni?” a tia. 43 Simona’n a sâma, “Ki iam lamin chu a ingaidam tam ualtu khan,” a tia. Jisua’n, “Ni indik,” a ti pea. 44 Khanchu, nupangnu tiang irheiin, Simona kuang, “Hi nupangnu hi ni hmu mo? Ni ina ki honga, ki ke sôpna hrang tui ni pe mak chea, ama hin chu a mit irthi’n ki ke an duia, a samin a huia. 45 Nangin ni tum mak chea, ama hin chu a hong lût phut ata ki ke tum hi mong mah. 46 Nangin ki lua sahriak ni pol mak chea, ama hin chu ki ke sahriak mirimhoi a ipol a ni. 47 Khasikin, nangni ki hril, hi nupangnu hin lungthungna lian tak an langtirnaa hin, a sualna murdi ngaidam a ni tâk tih an lang infel a ni. Khasikin, tukhom ngaidamna tôm ual dongpu’n chu lung a ithungna ar nêp ual ngai,” a tia.
48 Nupang kuang khan, “Ni sualna ngaidam a ni ta,” a tia. 49 A khalai otpuituhaiin chu, “Tu mo a ini tâk kha, sualhai khom ngaidam thei tâk,” an irtia. 50 Khan, nupang kuang khan, “Ni iamna hin nang a isaninhring a ni, irtharngam takin fe ta ro,” a tia.
1 Chomkhat hnunga chu Jisua’n Galili ram kho lian le kho chîna Pathian Ram Thurchi Sa insîrin a fea. Irchutir sômhleihnihai khom an zui ngai. 2 Nupang senkhat, ramilhli ichel indam le an natnahai ata damhai khom an kop sa; Magdala kho mi Mari a sûnga ramilhli sari a irzûlpai pehai, 3 Heroda sum enkoltu Chuza dôngma Joani hai, Susani hai, mi dang nupang tamtakhaiin an zui saa. Hi mihai hin an sumin Jisua le a irchutirhai an changpui ngaia.
Fachî inthektu chongirkhek
4 Kho tina irthokin mipuihai Jisua kuang an hong irbûma, Jisua’n hi chongirkhek thu hi an sîra. 5 “Mi inkhatin bu inrît hrangin a loia a fea, khaanga fachî a hong inthek khan senkhat lampuia a tâka, an lei sirphaa, vahaiin an hong fâk zôi tâka. 6 Senkhat lungpherpha pil chunga a tâka, a hong mông lata, khannisian, pil kha a’rzil no sikin a hong châr zôia. 7 Senkhat hloiilhlingnei kâra a tâka, hloi khan ar sôn dela, a dîp irhmang ta. 8 Senkhat irnêng saa a tâka, a hong irsôn liana, a bâk irza’n a vûi tâka,” a tia. Kha thu kha an sîra, “Irngaina mikuar nei murdi’n chu irngai ri sehai,” tiin a tia.
Chongirkhek thil tum
9 A irchutirhai khan kha chongirkhek thu kha i tihna mo, tiin an irdona. 10 Ama khan, “Pathian Ram thurîl chu nangni inhriat hranga tho a nia, mi danghai ta hrang chu thu intak a ni; hmu chian khomhai sian hmu’n fel mahaia, inhre mai khomhai sian an inhriat thei nona hrangin.
Fachî inthektu chongirkhek omzia
11 “Chongirkhek omzia chu hi hi a ni: Fachî chu Pathian thu hi a ni. 12 Lampuia tâk kha chu an iam noa saninhring an ni nona hrangin Diabola a honga, an milunga thu kha a lâkpai pehai ngai. 13 Lungpherpha chunga tâk kha, an inhriat zôi le thu kha lôm taka pom tâkhai hi an ni; khannisianlân, irzung la maka; zoro sôtnote chu an iam tâka, inthêmna an tong viat le chu an tûk nôk zôi ngai a ni. 14 Hloiilhlingnei laia tâkhai chu thu kha an inhriata, a hong irsôna, khannisian dam sûng hringnun inhoinahai le irchongnahai khan a hong dîpa, ra puihling a insuak ngai loi a ni. 15 Irnêng saa tâk kha hihai hi an ni; thu kha inhriata lungrîl dik le saa, sataka vonga, bei zâma ra suak tâkhai hi an ni.
Meiser hâla irkhu
16 “Tukhomin an meiser hâl kha belin irkhu ngai mahai, zâlhmun hnuaia khom sia ngai mahai, a lût murdi’n a vâr an hmu theina hrangin a sianaa an sia ngai. 17 Ite phuang nôk loi hranga thup om mah, inhriat loi hrang le inlang loi hrangin ite ithup om ual mah, 18 Khanchu, nin thu dong dâna irdîn roi, a nei ka chu pe bel sa an ta, a nei loi chu a neia a inhriat sun khom lapai pe an ti.” a tia.
Jisua nu le a urênghai
19 A nu le a urênghai khom a kuang an honga, khannisianlân, mipui sikin nâi thei mahai. 20 “Ni nu le ni urênghaiin nang hmu tumin pên tiang son nang an nghâk,” tiin an hrila. 21 Ama’n a sâmhaia, “Pathian thu inhriata zômhai hi ka nu le ki urênghai an ni,” a tia.
Phâivopui a hal inmong
22 Sûn khat chu a irchutirhai leh irkuanga an chuanga, an kuang, “Dîl râl tiang son kâi ei ti,” a tia, an suak tâka. 23 Khaanga an fe lai khan, Jisua kha a lei ina. Voikhat rengin dîla khan phâivopui a hong thoa, an irkuang tuiin a sip vâng vâng tâka, a sân phûkinthingin an om tâka. 24 Irchutirhai kha Jisua kuang fein, an va kaithoia, “Irchutirtu, Irchutirtu; kin ithi zoi hrang tâk kêng,” an tia. Khanchu, Jisua kha a thoia, phâivopui le tui irsok kha a hala: a hong monga, a boi rup tâka. 25 Irchutirtu khan an kuang, “Kho mo nin iamna?” a tia. An chia, ar khêl an ti tak taka, “Hi mi hi tu mo a ini? phâivua le tui ten khom thu a pêka, an i-zôm hi.” an irti irhlôma.
Jisua’n ramilhli ichel an damna thu
26 Khan, Jisua le a irchutirhai kha Galili dîl râl, Gerasin mihai rama khan an va kâia. 27 Jisua varâl a kâi le chu mi inkhat, ramilhli ichel a tonga, kha mi kha zoro sôt taka silkai boiin, in sûnga khom om loiin thâna a om ngai. 28 Jisua a hmu’n chu a khêka, a makunga khûksadelin, inring takin, Jisua Pathian Anchungtaka Nâipa, Imo ni lo hrang ni iti? Deng nin theitir no roh, tiin a ngêna. 29 Jisua’n irtha porinche kha a sûng ata suak hrangin, thu a pêk sika hianga a iti a ni. Voi iza an chela, lung ina an khum ngaia, a kut a ke thîrhruiin an khita an pôisata, ramilhli khan ramchâr tiang a hruai ngai a ni. 30 Jisua’n, “Imo nir hming?” a tia. Ama khan, “Ki’rhming chu Nuaia,” a tia. A sûnga ramilhli lût kha a sân an tam sika, a ni. 31 Khurmongboia pai thâk loi hrangin Jisua kha an ngêna.
32 Khan, kha tânga khan vok rual fâk zongin an oma, ramilhlihaiin vokhai sûnga lût hrangin Jisua an ngêna, a phal pehaia. 33 Kha pa sûng ata an suaka, vokhai sûnga an lût tâka. Rôl fora khan an intâna, dîla an intân lûta, tui inhakin an thi ta.
34 A enkoltuhai khan thil hong tung kha an hmu’n chu an intâna, kho sûng mihai le a kôlvêla mihai kha an inhrilhaia. 35 Khanchu, i thil mo a hong itung ta tih en hrangin mihai kha an suaka, Jisua kuang an hong tungin chu, ramilhli isuaksan tâk pa kha puan sila, lungrîl pangai irputin Jisua ke bula toi an hong hmu’n chu, a sân an chi tâka. 36 Khan, a hmupu dôrin a dam lam dân kha mihai kuang an va hrila. 37 Gerasin rama mihai khan an chi sikin Jisua kha an kuang ata rot hrangin an ngêna, khanchu, Jisua irkuanga a chuanga a mâk tâka.
38 Ramilhli sûng ata suak, hong damtu khan, Jisua kuang, “Nang zui ki ti,” a tia. 39 Khannisianlân, Jisua’n, “Ni ina fe’n lân, ni chunga Pathian sinthozia hi van sîr roh,” a ti pea. Khanchu, a fea, khopui sûng pumpuia a chunga Jisua sinthozia kha an sîr tâka.
Jaira nâinu le nupang thi suak indam
40 Khan, Jisua hong kîr kha mipuihai khan lei lômin an lei nghâka. 41 Irngai ta, mi inkhat, ar hming Jaira, Sinagok hruaitu kha a honga, Jisua ke bula an bok hrupa, a ina fe hrangin a ngêna. 42 A nâinu neisun, kum sômhleihni mi, a thi vâng vâng sikin. Khan, Jisua a fe’n chu mipuihaiin an uap tur tura.
43 Nupang inkhat, kum sômhleihni thi suak tâk, a sum nei murdi khom daktora a sêng zoi tâka, tûte’n an indam theiloi kha a hnunga a honga, a puan hmor kha a hong tôna, 44 Irningloiin a thi suak kha a boi zôi zela. 45 Jisua’n, “Tu mo a ni tôn kha?” a tia. “Kei chu ni ma ung,” an ti chita, khan Petera’n, “Hruaitupa mipuiin hiang dôra ihneng renga nang an ihneng hi te,” a ti pea. 46 Khannisianlân Jisua’n, “Tukhôkin mani a ni tôn, keima ata sinthotheina a suak ti kin hriat,” a tia. 47 Khan, nupangnu khan irthup thei zât ni ta mah ti an hriatin, inthing pumin a honga, a makunga an boka, a itônna san le irningloia a idam tâk thu mi murdi makunga a hril tâka. 48 Khanchu Jisua’n a kuang, “Ki nâinu, ni iamna hi ni idampui a ni, irtharngam takin fe ta roh,” a tia.
49 A la chong lai takin Jaira in ata mi inkhat a honga, “Ni nâinu a thi ta, Irchutirtu hi dengintheitir ta no roh,” a hong tia. 50 Jisua’n an hriatin, Jaira kuang, “Chi no roh, iam maiin lân, dam nôk a ti,” a tia. 51 In kha a va tungin chu, Petera, Johana, Jakoba hai le nupangtenu pa vai ti no chu tûte lût hrang phal maka. 52 Khataka om murdi’n nâite lei sûnin an chapa. Jisua’n, “Chap no roi, a thi ni mah, a in kêng,” a tia. 53 A thi ngêt a nih ti an inhriat sikin an innuisana. 54 Jisua’n a kut a chela, “Ki nâinu thoi roh,” a tia. 55 A’rtha kha a zuang kîr nôka, a thoi zôia; “Fâk rua pe roi,” a tia. 56 A nu le pa khan ar khêl an ti tak taka, khannisianlân, thil om lam kha mi dang hril a khap khaka.
1 Jisua’n irchutir sômhleihnihai kha a koi bûmhaia, an kuang, ramilhli inhnot suak theina le natnahai indam theina sinthotheina le irchamneina a pêka. 2 Khanchu, Pathian Ram thu’nsîr hrang le damloi indam hrangin a tîr suakhai tâka.
3 An kuang khan, “Inzinna hrangin khianghrol, hmarsa, bai, sum, songkol a’rthuamin chôi no roi, a ti pehaia. 4 Nangni an lei lômna in taka khan om chian roi, kha khua kha nin mâk nôk mâka chu. 5 Nangni an lei ingaisak loina khua chu, nin suaksan hrang tika an dikloizia inhriatirna hrangin nin kezaphaa vâiphin kha nûlpai roi,” a ti pehaia.
6 Khanchu, an suak tâka, kho tin an irfanga, hmun tina Thurchi Sa hrilin mihai an indam thiaia.
Heroda char a dong
7 Khan, Galili-a rêng Heroda’n, thil omzia an hriatin a buai tâka. Senkhatin, “Johana kha mithi lai ata a ithoi nôk tâk kêng,” an tia. 8 Senkhatin, “Elija a zuang inlâr nôk ta kêng,” an tia; senkhatin, “Tianlaia deipu tu mo khat a zuang ithoi nôk ta kêng,” an ti sika khan, a’rngaina lam chang inhre maka. 9 Heroda khan, “Johana kha a lu ki itanpai tâk kha! A thurchi hiang dôra irkhêl ki inhriat hi tu mo a ini tâk?” a tia. Jisua kha hmu a tum tâka.
Mi sângringa a vâina thu
10 Khan, tirtônhai an hong kîr nôkin chu an sinthohai Jisua kuang an hrila. Khan, a kuang a hruaihaia, Bethsaida khuaa an bingin a fe puihaia. 11 Mipuiin an inhriatin chu an zuia, a lei lômhaia, Pathian Ram thu a hrila, indam innang ka chu an damhaia.
12 Khan, khohloi a hong ni’n chu, irchutir sômhleihnihai an honga, a kuang, “Mipuihai hi infetirhai ta roh, kho sûnga le a kôl vêlhaia hin bu le riak hmun an hmu theina hrangin, ei omna lak hi hmun ramchâra om kêng ei ini,” an tia. 13 Khan Jisua’n an kuang, “Nangni’n fâkrua pehai roi,” a ti pehaia. Anni’n “Bai ringa le nga inhni vai kêng kin inei. 14 Hiang dôra mipui sângringa fâk hrang, kin va irchôk hrang ma ni?” tiin an sâma. Khan a irchutirhai kuang, “Mipuihai hi a buk bukin sômringa chitin intoitirhai roi,” a tia.
15 Khanchu, irchutirhaiin a chong bê angin an intoihai tâka. 16 Khan, Jisua’n bai ringa le nga inhni kha a lâka, irvân enin Pathian kuang lômthu an sîra, a khoia, khanchu mipuihai kuang sem hrangin a irchutirhai a pêk tâka. 17 Khanchu, an rêngin an khop do dôrin an fâk hnungin, an fâk ban, khamphulu sômhleihni irchutirhaiin an la hrût insip a ni.
Petera’n Jisua nina a phuang
18 Voikhat chu Jisua’n a bingin a chongchaia, a irchutirhai an honga, an kuang, “Mipuihaiin tu mo a ni, an ni ti ngai?” tiin ar donhaia. 19 Senkhatin, “Baptistu Johana, senkhatin Elija, senkhatin tiana deipu tu khôk mani, a izuang nôk nang an ti ngai,” tiin an sâma. 20 Khante, “Nangni’n teh tu mo nin ni ti?” tiin ar donhaia, Petera’n, “Pathian Mesia ni ni,” tiin a sâma.
Jisua’n a tuang hrang le a thi hrang thu an sîr
21 Khan, Jisua’n hi thu hi tûte kuang insîr loi hrangin thu a pêka. 22 An kuang, “Mihriam Nâipa hi upahai, Ochai inlalhai, Dân irchutirtuhaiin, hnôl an ta, dengintheitir an ta, that an ti, khan, sûn thum hnunga chu hringin thoi nôk a ti,” a tia.
23 Khan, an rênga kuang, “Tukhomin ni zui a nuamin chu, mâni intakna uksak loiin, a nitin a kros irputin ni zui ri se. 24 Tukhom mâni hringna inzôk nuam chu inchân a ta, Tukhom keima sika a hringna inchân murdi’n zôk an ti. 25 Mi’n rammual hi a pumin nei sianlân, ama khan siatpuiin irhmangpui sian, a ta hrangin imo ar fêna? 26 Ki thu le keima nin zakpui ka chu Mihriam Nâipa khomin a roiinpuina le, Pa le vântîrtôn irthianghai roiinpuina le, a zuang tika anni kha lan zakpui a ti. 27 Dik takin nangni ki hril, hitaka ngîr senkhathai hi Pathian Ram an hmu mâka chu thiloi hrang an om,” a tia.
Jisua hmêl danglamna
28 Kha thu an sîr zoi ata sûn riat vêl anga chu, Petera, Johana, Jakoba hai hruaiin chongchai hrangin tânga an fea. 29 Khaanga a chongchai laiin a hmêl inlang dân kha a hong danglam tâka, a puanhai kha a vâr irtêk tâka. 30 Irningloiin mi inhni an zuanga, an chongpuia. Mosia le Elija an ni. 31 Irvân roiinpuina’n an zuang inlâra, Pathian tumna sua hranga, Jerusalema a thi hrang chungchâng thu Jisua leh an insîr a ni.
32 Petera le a rualhai chu an lei ina, an hong harin chu Jisua roiinpuina le a kuanga mi inhni ngîr an hmua. 33 Mihai khan Jisua an mâksan tôn chu, Petera’n a kuang, “Irchutirtu, hitaka om hi ei ta hrangin a sa, kairêng inthum sin ki ta, nangma ta hrang inkhat, Mosia ta hrang inkhat, Elija ta hrang inkhat,” a tia, (kha thu kha imo a iti khom a inhriat infel loi a ni.) 34 A la chong lai takin sûmin a zuang irhlihaia, sûmin a zuang irhlihaiin chu irchutirhai kha an chia. 35 Sûm ata kha hnuk irhai a zuang suaka, “Ama hi ki Nâipa, ki inthang chu a ni; Ama thu hi irngai roi,” tiin. 36 Hnuk irhai a zuang suak zoiin chu Jisua vai an hmua. Irchutirhai khan an thil hmuhai tûte hril loiin an ip chiana.
Jisua’n ramilhli ichel nâipang a indamna
37 Zîng nôka tâng ata Jisua le a irchutir inthumhai an zuangin chu mipui tamtakin Jisua kha an lei nghâka. 38 Mipui laia pa inkhat chu a khêk suaka, “Irchutirtu, ki nâipa inkhat neisun kha hong en hrangin nang ki ngên a ni; 39 ramilhli’n a chela, a khêk raka, an rîla, a bâia a khasuai zung chupin a soisaka, thi hrang ang dôrin a rotsan ngai. 40 Ni irchutirhai hi inhnot suak hranga ki ngên lakin tho thei mahai,” a tia. 41 Jisua’n “Iamna nei loi, mi pualoihaio, idôr ten mo nin kuang ki omin nangni ki ingaitua hrang? Ni nâipa kha hin hong hruai roh,” a tia. 42 Khan, nâipang kha a hongin chu, ramilhli khan irnênga an zuan raka, an rîl ta. Jisua’n ramilhli kha thu a pêka, nâipang kha an damtira, a pa kuang a pêk ta. 43 Pathian sintho roiinpuizia chu ar khêl an ti tak taka.
Jisua’n a thina hrang thu a lei insîr nôkna
Jisua’n sintho mihaiin ar khêl an la ti laiin, a irchutirhai kuang, 44 “Nangni ki ihril hrang hi irnghil no roi, Mihriam Nâipa hi mihriamhai kuta ipêk nih a ti,” a tia. 45 Khan, irchutirhai lakin a omzia inhre thei mahaia. An inhriat thei nona hranga thu irthup a nia, ama lak an chi sikin irdon ngam mahai.
Tu mo roiinpui tak?
46 Khan, irchutirhai khan tu mo ei laia a roiinpui tak hrang, tiin an irsêla. 47 Jisua’n an milung inchong an hriata, nâipangte a kaia, an kôla an ngîrtira. 48 An kuang, “Tukhom hi nâipangte hi ki’rhming sika lôm chu, keima ni lôm a ni; keima ni lôm chu, a ni tîrtu lôm an ni. Nin laia a chîn tak hi a roiinpui tak a ni,” a tia.
Nangni doi loi ka chu nin tianga kop an ni
49 Khan, Johana khan ama kha a chongpuia, “Irchutirtu, mi inkhatin ni’rhmingin ramilhli an hnotsuak kin hmua, keini angin nang a zui no sikin khap kin lei itum kêng,” a tia. 50 Jisua’n a kuang, “Khap no roi, nangni doi loi ka chu nin tianga kop a ni,” a tia.
Samari khua mihaiin Jisua an hnôl
51 Jisua, irvân a kâi hrang nî a hong nâiin chu, Jerusalema fe ngêt hrangin milung an chonga. 52 A maton tiang thanginthei hrangin mi a tîra, a ta hranga tinrêng lei irfûktir hrangin Samari khua inkhata an lûta. 53 Khan Jerusalema fe a nih ti an inhriat sikin lei lôm mahaia. 54 Khan, irchutir Jakoba le Johana’n an inhriatin chu a kuang, “Rengpa, hihai kâng zit hranga hin Elija angin irvân ata mei koi thâk hrangin ni nuam mo?” an tia. 55 Khan, Jisua’n anni tiang irheiin a halhaia. 56 Khanchu, kho danga an fe tâka.
Jisua zui tumhai
57 Khan, lampuia an fe laiin, mi inkhatin Jisua kuang, “Ni fena tina nang zui ki ti,” a tia. 58 Jisua’n a kuang, “Sihalhaiin khur an neia, vahaiin irbu an neia; khannisianlân, Mihriam Nâipa chu a lu irnghatna hrang lua nei mah,” a ti pea. 59 Khanchu, mi dang kuang, “Ni zui roh,” a ti pea. Khan, kha mi khan “Rengpa, fe ki ta, ka pa va irvûi bak ki ti,” a tia. 60 Jisua’n a kuang, “Mithi’n anni mithi kha irvûi ri sehai; nang chu Pathian Ram thu hi va hril indarh ual roh,” a tia. 61 Mi dangin a kuang, “Rengpa, nang zui ki ti, khan, ki in mihai chonghoiin ni van thâtir bak roh,” a tia. 62 Jisua’n a kuang, “Tukhom âl kainaa kut irnghata, hnung tianga en chu Pathian Rama mi ni inruk ni mah,” a ti pea.
1 Kha zoiin chu, Rengpa’n mi dang sômsari inhni an thanga, a bo bopin an fena hrang kho tina le hmun tina a tîr suakhaia. 2 An kuang, “Bu ât hrang a tama sintho mi lak an tôm. Khasikin, a bu ât hranga mi tîr hrangin bu Neitupa kuang ngên roi,” a tia.
3 Irngai u ta, ine laia belrate lût angin nangni ki itîr a ni. 4 Sum kok, hmarsa, kekok hai chôi no roi; lampuia khom tûte chubai no roi. 5 In nin lûtna kipa, “Hi ina hin irtharngamna om ri se,” ti bak roi. 6 Irtharngamna irngaiinna mi an omin chu, nin irtharngamna thu kha a chunga om mai a ta, khan an om no’n chu nin irtharngamna thu kha nin chunga hong kîr nôk a ti. 7 Nin tungna ina vai om unglân, in tin rôl têt tuat no roi, nangni an ipêk ka fâkin in roi, sinthotu chu a hlo hmu rua a ni.
8 Khua nin lûta, nangni an lômin chu, nangni an ipêk ka chu fa roi. 9 Kha khuahai khan damloi indam unglân, an kuang, “Pathian Ram nin kuang a zuang tung ta,” ti roi. 10 Nin lûtna khuaa nangni an lôm no’n chu tuala fe unglân, 11 Nin khuaa vâiphin kin kea kop ten lua khom nin chunga kin hui nôk zit, khan khomin, Pathian Ram chu nin kuang a zuang tung ta, nin iti hrang a ni. 12 Nangni ki hril, Pathian Roirêl nia chu, kha khua tuang hrang nêkin chu Sodom khua tuang hrang chu a zâi om ual a ti.
Irlet nuamloi khuahai
13 Korazin! Ni chung a rik e! Bethsaida khom ni chung a rik e! Nangnia sinirkhêl thohai kha Tura le Sidon khuaa tho ni sianlân chu, bora silin irvut irnôtin an sual ata irlet ta an ti. 14 Roirêl nîa chu nin ituang hrang nêkin chu Tura le Sidon tuang hrang chu a zâi om ual a ti. 15 Nangma Kapernaum khom, irvân dênin inpâk ni ini hrang ma ni? Hremhmuna kêng paithâk ni ini hrang.
16 Jisua’n a irchutirhai kuang, “Tukhom nin thu irngai chu, ki thu irngai a ni. Tukhom nangni hnôl chu a ni hnôl a ni, tukhom ni hnôl chu a ni tîrtu hnôl a ni,” a tia.
Sômsari inhnihai hong kîr nôk thu
17 Khan, sômsari inhnihai kha raifân takin an hong kîra, “Rengpa, nir hmingin ramilhlihai tenin kin thu an zôm,” an tia. 18 Jisua’n a sâma, “Setana irvân ata michêk anga zuang tâk ki hmu,” a tia. 19 An kuang, “Irngai u ta, mirûl, âinuvêt hai, râlpa hrâtna murdi hai sirbe theina ircham nangni ki pêk a ni, ite’n nangni inna viat no ni. 20 Aniachu, irthahai nin irchamin an om sika hin lôm no roi, irvâna nin irhming irziak a ni sikin lôm ual roi,” a tia.
Jisua lômna
21 Kha laia khan Jisua kha Irtha Irthiangin raifânin a sipa, “Ka pa, irnêng irvân Rengpa, mi thiamhai laia ni thup khaka, mi’nmôlhai kuang nin puang ngai sikin lômthu kin sir; A ni, ka pa, khaang kha ni lungdo le ni nuamlam tak a ni. 22 Ka Pa’n itinrêng a nin koltir ta, Nâipa hi tu mo a ini, Pa ti bana chu tukhomin inhre mahai; Pa khom tu mo a ini, Nâipa le Nâipa’n a inpuang nuamhai laia ti no chu, tukhomin inhre mahai,” a tia.
23 Khan, Jisua’n irchutirhai tiang a’rheia, inrûkin, “Hihai nin ihmu hi nin râlvân a sa. 24 Deipuhai, rênghai tamtakin nin ihmuhai ang hi hmu an nuama chu hmu mahai, nin inhriathai hi inhriat an nuama chu inhre mahai,” a ti pehaia.
Samari mi sa chongirkhek thu
25 Dân irchutirtu inkhat Jisua kuang a honga, a kuang, “Irchutirtu, kumtuang hringna ki nei theina hrangin imo ki itho hrang?” a tia. 26 Jisua’n a sâma, “Dân bua mo a chuang? A itak mo nin itep ngai?” a tia. 27 Ama khan, “ ‘Rengpa ni Pathian chu ni milung murdi’n, ni hringna murdi’n, ni hrâtna murdi’n, ni lungrîl murdi’n lung ni ithung hrang a ni; nangma lung ni irthung angin ni bômhai khom lung ni ithung hrang a ni ti hi,’ ” a tia. 28 Jisua khan, “Ni sâm indik e, khaang khan tho’n lân, hring ni ti,” a tia.
29 Khannisianlân, Dân irchutirtu khan thiam chang nuamin, Jisua kuang, “Tu mo ki bômhai?” a tia.
30 Jisua’n kha thu kha a sâma, “Mi inkhat, Jerusalem ata Jeriko khuaa fe hrang kha, lam chimripa hrâtlâksonghaiin an lei zêma, a puan a diar an khekpai pea, an zêm bita, thi vâng vângin an rotsana. 31 Kha lama khan Ochai inkhat a zu fea, a hong hmu’n chu a lôi pata. 32 Khaang dênin Levia irchi mi inkhat khomin kha hmun kha a hong tunga, ama kha a hong hmu’n chu a lôi sa tâka. 33 Samari mi inkhat inzin fe khan, kha hmun kha a hong tunga, ama kha a hong hmu’n chu lung an kham tak taka, 34 a va pana, a pophai kha sahriak le uain polin a tuam pe tâka; ama sakuartung chunga ngei khan an chuangtira, khualbûka a fepuia, a enkol tâka. 35 Zîng nôka chu a duli inhni a kêlsuaa, khualbûk enkoltu kha a pêka, lei enkolin lân, hi nêka hin ni thâmin chu ki zuang kîr nôk tika nang thuan ki ti,” a tia.
36 “Khan, kha mi inthumhai laia a tu tak kha mo hrâtlaksonghai tongtu bômhai ni iam?” a tia. 37 Ama khan a kuang, “Lunginkhamtu kha,” a tia. Jisua’n, “Nang khom khaang tak khan va tho ro,” a tia.
Jisua’n Marthi le Mari a panna
38 Khan, Jisua le a irchutirhai an inzin malamin, khua inkhata an lûta, nupang a’rhming Marthi’n a ina an tungtirhaia. 39 Zuarpui inkhat a neia, a’rhming chu Mari a ni, ama kha Rengpa ke bula toiin a thu’nsîr a’rngaia. 40 Marthi chu sin zongin a buai zapa, a honga, “Rengpa, ki zuarpuinu’n ki bing doka sin hranga a ni imâk hi, ni ingaisak loi ma ni? Ni hong san sian sa no ni mo?” a tia. 41 Rengpa khan a sâma, “Marthi, Marthi, thil tamtak ni ngaituaa ni ibuai kêng. 42 Inkhat vai kêng a inang, Mari’n thil dik an thanga, ni isutpai hrang ni mah,” a tia.
1 Voikhat chu hmun inkhata a chongchaia. A hong mongin chu a irchutirhai laia inkhatin a kuang, “Rengpa, Johana’n a irchutirhai chongchai dân a irchutir angin keini khom nir chutir roh,” an tia. 2 An kuang, “Nin chongchaiin hiang hin ti roi:
‘Kin pa, Ni’rhming mahrip om ri se,
Ni Ram zuang tung ri se.
3 A ni tin kin rukin bu ni pe roh.
4 Keini khomin kin chunga tho’nsual murdi kin ngaidam ngai angin,
Nang khomin kin sualhai ni ngaidam roh,
Thêmnaa ni hruai lût no roh,’ ti hi,”
a tia.
5 Jisua’n a irchutirhai kuang, “Nin laia mi inkhatin rual nei sianlân, zânlaia a kuang va fe’n, ‘Mala, bai tiam nin pûktir ta’: 6 Ki rual inzinin a ni hro lika, ite infatir hrang lak nei ma unga,” va ti sianlân; 7 in sûnga a rualpa’n, ‘Ni hong inbuai ta no roh, mikot kin kal zit ta, ki nâihai leh kin izâl tâk kêng, thoiin nang inhong pe thei no ning,’ ti sianlân; 8 Nangni ki hril, a rual a ni sikin thoiin va pe no khom sian, a zong ngot ngot sikin thoiin a nuam dôr pe a ti.
9 “Khanchu, nangni ki hril, nghi unglân, pêk ni nin ti; zong unglân hmu nin ti, into unglân inhong pe ni nin ti. 10 A nghi murdi chu pêk ni an ta, a zong murdi’n hmu an ta, an tôk murdi chu mikot inhong pe ni an ti. 11 Nangni laia pahai hin, nin nâipahaiin nga nangni nghi sianlân, nga irthûla tu mo mirûl pe hrang? 12 Ârtui irthûlin khom tu’n mo âinuvêt pe hrang? 13 Khasikin, nangni mi sualhai luan nin nâihai thil sa pêkna châng nin inhriatin te nin pa irvâna mi khan a nghituhai kha Irtha Irthiang a ipêk hrang mo ni mah!” a tia.
Jisua le Belzebula
14 Khan, Jisua’n ramilhli chong theiloi inkhat an hnot suaka, a suak le chu chong theiloi kha a hong chong tâka. Mipui khan ar khêl an tia. 15 Khan, mi senkhatin chu, “Ramilhli rêng Belzebula a ni sikin, ramilhlihai a inhnot suak thei a ni,” an tia. 16 Senkhatin ama fiana hrangin irvân ata irsinsiana sinirkhêl inentir an inphûta. 17 Jisua’n an milung inchong an hriata, an kuang, “Kho ram khom irsena, mâni le mâni irdoi ka chu ram chit an ti, in sûngkua khom mâni le mâni irdoi ka chu irhmang an ti. 18 Setana khom mâni le mâni an irdoiin te, itin mo a ram kha a inding thei hrang? Belzebula sikin ramilhlihai inhnot suak nin ni ibe, a ti pehaia. 19 Keiin Belzebula sikin inhnot suak ni inlân, nin mihai khan tu sikin mo ramilhli an lei inhnot suak ngai? Khanchu, anni kêng thiamno nangni inchangtir ual hrang. 20 Khan, Pathian irchama ramilhlihai ki inhnot suak ngai a niin chu, Pathian Ram nin kuang a zuang itung tak tak a ni.
21 Mi hrâtin hriamhrei irkipin a hrung kâr ka chu, neinun murdi kha zômin a om ngai. 22 Aniachu, ama nêka hrât ualin a hong beia, a hong inhne’n chu, a isong râlthuam kha sutpai a ta, a neinun khom lapai pe a ta, a nu nuamin sempai a ti. 23 Tukhom, ki tianga kop loi ka chu a ni doi a ni, tukhom ni bûmpui no ka chu a inthek indarh a ni.
Ramilhli kîr nôk thu
24 “Ramilhli kha, mi sûng ata a suakin chu, irngam hmun zongin tui om loina hmunhaia a’rvâk a’rvâka; khannisian a hmu no sikin, ‘Ki in, ki isuaksan tâknaa khan, kîr nôk chian ki ti,’ a tia. 25 A hong kîr nôkin chu, phît fâia infel diamin a hmua. 26 Khanchu, a fea, ama nêka sual ramilhli dang sari a hong hruai lûta, kha khan omhmun an khuar tâka; kha mihriam om dân kha chu matona nêkin a hong siat ual ta a ni,” a tia.
Vânsatna tak tak
27 Jisua’n kha thu kha an sîr laiin mipui laia nupangnu a khêka, a kuang, “Nupang nang vongtunu le nang donsuinu chu a vân a sa e,” a tia. 28 Jisua’n a sâma, “Pathian thu inhriata zômhai chu an vân a sa ual,” a ti pea.
Irsinsiana an inphût
29 Khan, mipui an hong pungkhôm mura, Jisua’n, “Atûnlaia mihai hi a sân an sual; irsinsiana sinirkhêl an zonga, Jona irsinsiana ti no chu irsinsiana sinirkhêl zel inentir ni no nihai. 30 Ninevi kho mihai hranga deipu Jona irsinsiana a ini ang khan, atûnlaia mihai hrangin chu Mihriam Nâipa hi irsinsiana ni a ti. 31 Roirêl Nia chu sim tianga rêngnu Seba la ngîr a ta, atûnlaia mihai thiamno inchang a ti. Reng Solomona vâr irngai hrang pialin ram hla tak ata a hong sikin. Nangni ki hril Solomona nêka lian ual hin a om.
32 “Roirêl Nia chu Ninevi mihai khom hong ngîr an ta, thiamno nangni inchang an ti. Jona thuhril sikin an sualna ata an irleta; irngai roi, nangni ki hril, Jona nêka roiinpui ual hin a om,” a tia.
Takpum meiser
33 Tûte’n meiser inchokin, hmun irthupa se ngai mahaia, khamphulu khom irkhu ngai mahai, a siana hmuna kêng an sia ngai, mi a lût murdi’n a vâr an hmu theina hrangin.
34 Ni mit hi ni takpum ta hrangin meiser ang a ni; ni mit a dikin chu ni takpumpui kha invâr zit a ti; a dik no’n chu ni pumpui inthim khak a ti. 35 Irdîn roh, nangmaa vâr om kha inthim ni lik ni. 36 Khanchu, meiser, nangni a i-êl invâr hlang ngai ang khan, nin takpum ôn inthimna boi zitin, nin pumpuiin vâr hlang a ti.
Jisua’n Farisaihai le Dân irchutirtuhai a dem
37 Khan, Jisua’n an sîr lai khan Farisai inkhatin bu nêk a koia; a fea, bu nêk hrangin a toia. 38 Farisai khan, kut irsu loia, Jisua’n khalai a i-ot kha a hmu’n chu ar ngai ar khêl oka. 39 Khan, Rengpa’n a kuang, “Nangni Farisaihai, khilât le khêng a pên tiang nin infâia, khan, nin sûng tiang chu huatirhamna le sualna’n a sip a ni. 40 Nin invêt bâka! pên tiang siamtu, Pathianin a sûng tiang khom a isiam mo ni ma? 41 Ni khilât le khêng sûnga thil om kha mi’nrianghai pe unglân chu nin ta hrangin itinrêng a irthiang mai hrang a ni.
42 “Nangni, Farisaihai nangni lan tak pe a ti na! lêngmiser, podina le chîmu tinrênghai sôma inkhat Pathian nin pêk ngai, khannisianlân, dikna le Pathian lungthungna chu nin irngaiinnêp ngai; khahai kha kêng nin itho ngêt ngêt hrang chu, a danghai khom khi mâk ual loiin. 43 Nangni Farisaihaio, nangni lan tak pe ti, Sinagoka toina satakhai le dukanhaia chubai mûk nin irngaiinhlu ngaia. 44 Nangni lan tak pe ti, mi’n thân ti inhre loia a chunga mi an ifena ngai ang hi nin ni e,” a tia.
45 Dân irchutirtuhai laia inkhat khan, “Irchutirtu, hi thu ni insîr hin keini khom ni ni dem sa a ni,” tiin a sâma. 46 Jisua’n, “Dân irchutirtuhaio, nangni khom nangni an tak pe; mi chunga pêl intak, puakrik nin bânga, a pêlpui hrangin chu nin kuthmor luan tôn nuam mak chêi. 47 Nangni an tak pe vang na! Nin irchibulhai ithat deipuhai thân nin siam insata. 48 Nin irchibulhaiin deipuhai an lei that kha, nin inhampui inlangna’n, nangni’n an thânhai nin siaminsata. 49 Khasikin, Pathian vârna’n, ‘Deipuhai le tirtônhai tîr ki ta, senkhathai that an ta, senkhathai dengintheitir an ti,’ a tia. 50 Khasikin, rammual irsiang ata deipuhai an lei that sikin, atûnlaia mihai hi denginthei ni an ti. 51 Abela an that ata Zakaria dênin, ama len vâng chu maichâm le hmun irthiang kâra that a ni. Nangni ki ti, khahai sik piala khan atûnlaia mihai chunga phuba lâk ni an ti. 52 Dân irchutirtuhai khom nangni an tak pe vang na! vârna châbi nin chôipaia, nangni lak lût no chin ni, a lût nuamhai tena nin khâl ngai”, a tia.
53 Khan Jisua’n kha hmun kha a mâkin chu, Dân irchutirtuhai le Farisaihaiin an sêla, thil tamtak an irdona. 54 A sâm insual a nei le an chel theina hrangin an enirchika.
1 Mipui sâng tamtak irsirpol bet but ang dôr an pungkhôma, Jisua’n a maton taka, a irchutirhai kuang, “Farisaihai chol vârirletna ata irdîn roi. 2 Ite thupsua thei ni mah, an lang nôk zel ngai, ite inhriat loi hranga ip om mah, inhriat suak a ni nôk ngai. 3 Zân inthima nin itihai kha sûn khovâra lan puang an ta, chontan sûnga inrûka nin iti kha in chunga chuangin tâng lan sampui an ti, a ti pehaia.
Tu mo chi rua
4 “Ki rualhaio, nangni ki hril, takpum thata, kha zoia ite tho thei ta loi chu chi no roi. 5 Tu mo chi rua, nangni hril ki ti; takpum thata, thi zoi hnunga hremhmuna pai theina thuneitu, Pathian vai kha chi roi; a ni, nangni hril nôk ki ti, Ama vai kha chi roi. 6 Chongzong ringa poisa hni’n an izuar ngai mo ni ma? Pathianin chu an laia inkhat te lua irhmâi ngai ma. Nin samzâihai ten khom a itep zit kêng. 7 Chi no roi, chongzong tamtak nêkin nin hlu ual.
Mihai makunga Krista thop
8 “Nangni ki hril, mihai makunga ni thop ka chu Pathian vântîrtônhai makunga Mihriam Nâipa hin thop a ti. 9 Khannisianlân, mihai makunga ni hnôl ka chu Mihriam Nâipa khomin Pathian vântîrtônhai makunga hnôl a ti. 10 Tukhom Mihriam Nâipa sêl chu ngaidam nih a ta; khannisianlân, Irtha Irthiang sêl ka chu ngaidam ni no ni.
11 “Khan, nin roirêl hrangin, Sinagoka mani, Ramoptu makunga mani, roirêltuhai makunga mani, nangni an hruai tikin, itin mo ki isâm hrang, imo ki iti hrang, tiin milung inkâng no roi. 12 Nin iti hrang chu a zoro taka Irtha Irthiangin nangni hril a ti,” a tia.
Irchong invêt chongirkhek
13 Mipui laia mi inkhatin Jisua kuang, “Irchutirtu, ka upa kuang kin pa irchon mâk ni sem sa hrangin ti pe roh,” a tia. 14 Jisua’n a sâma, “Mihriam, nangni ta hrangin tu mo roirêltua le irchon sempua ni siam?” a tia. 15 Khan an kuang, “Irdîn unglân, irzukna tinrêng ata irdîn roi, mihriam hringna bi hi irchon lâmkhîl sika ni mah,” a ti pehaia.
16 Khan, hi chongirkhek hi an sîra, “Mi irchong tak inkhat hi a loia a sân an lâpa. 17 Khanchu, ar ngaituaa, ‘Itin mo ki itho hrang tâk? ki bu le bâl siana hrang nei zoi ta ma unga,’ a tia. 18 ‘Hiang hin tho ki ti; ki fasiar set ki ta, a nêka lian ual sin ki ta, kha khan ki bu le bâl, ki neinun murdi sia ki ti,’ a tia. 19 Khanchu, ki’rtha kuang, “Irtha, kum tamtak hrangin sum tamtak ni buk ta; irngamin lân, fa’n lân, inin lân lungthi takin om ro, irti ki ti,” a tia. 20 Khan, Pathianin a kuang, ‘Mi’nvêt, a vuan zân zel hin ni hringna a iboi hrang tâk kêng, hi thil ni isuahai hi tu ta hrang mo a ini tâk?’ a ti pea. 21 Khan, Jisua’n, “Pathian tiang irchon buk loia, mâni ta hrang vaia irchon buk chu khaang khan nih an ti,” a tia.
Pathian iam roh
22 Jisua’n a irchutirhai kuang, “Khasikin, nangni ki hril nin takpum fâk nêk hrang, nin sil le kai hrang lunginkâng no roi. 23 Fâk nêk hrang nêkin hringna a hlu ual, silkai hrang nêkin takpum a hlu ual. 24 Vaâkhai hi en u ta, bu khom tû mahai; khannisianlân, Pathianin an fahai ngai; nangni chu vahai nêkin chu nin ihlu ual kêng. 25 Nangni laia lunginkâng sikin tu mo mâni hringna inseitir ual thei? 26 Hi dôr lua nin itho thei loi khate, imo a da dang len vâng khate nin lunginkânga? 27 Tûktin pârhai hi en u ta, sin khom zong mahai, puan khom không mahai, khan, nangni ki hril, kha dôra irchong Solomona khom khan hi pârhai hi pha mah. 28 Khanchu, ram hloisûl, a vuana hring, nangtûka meia tuah nôk hrang lua Pathianin khaang dôra a’rvôtirin te, o nangni iamna tômhaio, khahai nêkin nangni irvôtir no ni mo! 29 Khasikin, nin fâk nin nêk hrang thua lunginkâng no roi. 30 Hi hi rammual mi murdi’n an ibuaipui tak ngai a ni; nangni khomin nin innang ngai ti, nin Pa’n an hriat; 31 Ama Ram kha zong bak unglân, khanchu, hihai khom hi nangni a ipek belsa hrang a ni. 32 Pôl tômtehaio, chi no roi, Ram nangni pêk hi nin pa nuamlam tak a ni.
Irvâna irchon
33 “Nin inei murdi zuar unglân, inrianghai pe roi, irvâna inru fe loinaa, irthî ifâk thei loinaa khan, sum kok phâi thei loihai, sum hek theiloihai irsiam roi. 34 Nin irchon omna kipa nin lungrîl khom a om ngai.
Siahlo irtûng chian
35 “Irthok sai diamin, meiser bel sai leh irsiam mai roi. 36 Siahlo, an pu irnei hruaithe ata zuang hrang lei nghâk chianhai angin. A zuanga mikot a hong intôk le, inhong zôi hrangin. 37 Siahlo, an pu zuanga irtûng chiana om a ihmuhai chu, mi vânnei an ni. Nangni ki hril, ama kha irsiam a ta, khalâi dohai a ta, an bu nêk donhai a ti.
38 “Zân chimripa, âr khuanchunga mo, a zuanga irtûng chiana om a ihmuhai chu mi vânnei an ni. 39 Hi hi nin inhriat, inru hong hrang inneitu’n inhre sianlân chu hrung a ta, a in inset no ni. 40 Khasikin, nangni khom irtûng chianin om roi, nin tûng no lai takin Mihriam Nâipa zuang a ti,” a tia.
Siahlo iamom le iamomloi
41 Petera’n, “Rengpa, hi chongirkhek hi keini vai mo ni ni ihril mi murdi mo?” a tia. 42 Rengpa’n, “An pu’n a siahlohai hruaitua le an bu sem tika sem ngaitu hrangin sum enkoltu iamom tak le vâr tak a inkung hrang kha tu mo a ini hrang? 43 A pu a honga, khaanga lei tho siahlo a ihmu chu mi vânnei a ni. 44 A dik takin nang ki hril, a inei chunga hruaitua hong siam a ti. 45 Khannisian siahlo khan, ‘Ka pu hong kîr lat no ni,’ tiin nupang pasal zêm sianlân, lei fâk lei nêkin len rui sianlân, 46 Kha siahlo pu kha ar tûng no kârin, a iam no nikhuaa a pu zuang a ta, tukkhoi a ta, mi iamloihai dongtum indong a ti. 47 Siahlo, an pu nuamlam inhre chiana tho loi le irtûng loi chu a sate’n zêm ni an ti. 48 Aniachu, inhre loi sika hremna dôr thil tho chu nêp uala zêm nih an ti. Tukhom tamtak indongtira omhai chu tamtak ingên ni an ti.
Jisua sika irsenna
49 “Irnêng hâl hranga zuang ki ni, atûn khom kâng zôi ta sian ki ti! 50 Baptisma ki ichang hrang a om, kha kha ki tho mâka chu ki ning ar hal vang na! 51 Irnênga irngei inlêng hranga zuang ni ma ung, irsenna inlêng hranga zuang kêng ki ini. 52 Atûna irthokin in sûng khata mi ringa irsen an ta, inthumin, inhni doi an ta, inhniin inthumhai doi an ti. 53 Pa’n a nâipa doi a ta, nâipa’n a pa; nu’n a nâinu doi a ta, nâinu’n a nu; a tarpiin a moinu doi a ti, moinu’n a tarpi doi a ti,” a tia.
A zoro inhriat thiam
54 Jisua’n mipuihai kuang khan, “Misa tâk tiang sûm a hong zîngin chu rua a itho hrang kêng nin tia, a tho khom a tho ngai. 55 Khan sim tiang phâivua a hong tho nin inhriatin chu, a ilum hrang kêng nin tia, lum khom a lum ngai. 56 Vârirlethaio! Irnêng irvân nin ena, kho om hrang lam nin inhriata, khannisianlân, atûnlai zoro om lam hi itho mo nin inhriat theiloi?” a tia.
Ni irdoipui leh irngei ro
57 “A dik le dikloi kha ithoa mo nangni khomin nin itheithâk mai loi? 58 Thuneitu makunga ni irdoipui leh nin inlang hrangin, fe pumin ama leh irngeina lam zong roh; khano’nchu, roirêltu makunga nang hruai inlût a ta, Roirêltu’n pulis kuang nang inhlan a ta, pulis khan intângna ina nang khum a ti. 59 Nang ki hril, poisa khatte khom ni thâk irkip mâka chu, khatak ata kha suak viat no chi ni,” a tia.
1 Kha laitaka khan tuhai mani an oma, Galili rama mi, Pathian kuang thil an inhlan laia Pilata’n a ithathai thurchi Jisua kuang an hril.
2 Jisua’n a sâma, “Khaanga thata an iom kha Galili rama mi danghai nêkin an sual ual nin isôn ma ni? 3 Sual bîk mahai, nangni ki hril, nangni khom nin irlet no’n chu khaang dênin irhmang nin ti. 4 Khano’nte, Siloam in irsâng chimin sômhleiriat a idel thathai kha. Jerusalema mi danghai nêkin an isual bîk nin isôn ma ni? 5 Sual bîk mahai, nangni ki hril, nangni khom nin irlet no’n chu khaang dênin irhmang nin ti,” a tia.
Theipui raloi chongirkhek
6 Jisua’n hi chongirkhek thu hi an sîr saa; “Mi senkhatin grep irhuana theipui kung a phuna. A ra a zonga hmu maka. 7 Khanchu irhuan enkoltu kuang, ‘En roh, kum thum hi theipui kunga hin a ra ki zonga, inkhat lua hmu ma ung. Hmun vai kêng a iluana, phûrpai roh,’ a tia. 8 Khan, irhuan enkoltu’n, ‘Ka pu, kumin chu la om hi ri se, a’rhîlin tuk ki ta, nimnok vur ki ta, 9 nakum a ra’n te sa a ta, a ra no le phûrpai ni ti,’ ” a tia.
Sabat nia nupang damloi indam
10 Voikhat chu Sabat ni’n Sinagok inkhata Jisua’n ar chutirhaia. 11 Nupang inkhat, kum sômhleiriat ramilhli ichel a oma, a kûn chiana, ngîr khom ngîr intûn thei maka. 12 Jisua’n a hmu’n chu a koia, “Nupangnu, ni natna ata ni zôk ta,” a ti pea. 13 A chunga a kut a’rnghata, a ngîr intûn thei zôi zela, Pathian an pâk tâka.
14 Jisua’n Sabat ni’n mi an damtir sikin Sinagok hruaitu kha a sân a ning an mura, sinthôna hrang sûn ruk a oma, kha sûng khan hong unglân indam irhlôm roi ba, Sabat nî lele’n te! tiin mipuihai a hrila. 15 Rengpa khan a kuang, “Nangni vârirlethaio, Sabat ni khoma mâni sehrât chal mani, sakuartung mani sûta, a thungna hmun ata tui in hranga hruai suak loia om mo nin om? 16 Hi nu khom hi Abrahama nâinu a nia. Setana’n kum sômhleiriat dên a khit phiar tâka, kha a khitna kha Sabat ni khom ni sian sût pe hrang mo ni ma?” a tia.
17 Kha thu kha a hong insîrin chu, a râlhai kha a sân an inzaka, mipui chu a sintho roiinpui takhai sikin an lôma.
Ancham chi chongirkhek
18 Khanchu Jisua khan, “Pathian Ram chu i ang mo a ini? I leh mo ki irkhek hrang? 19 Ancham chi mal khat, mi’n a lâka, ar huana a inthek ang hi a ni; a hong mônga, thing a hong changa, chunglêng vahaiin a ôna an riak ngai,” a tia.
Chol chongirkhek
20 Jisua’n ar don nôka, “Pathian Ram chu i leh mo ki hong irkhek nôk hrang? 21 Nupangnu’n chol a lâka, baiphit litar sômminli leh a’rzêl zita, a thoi mâka khamphulua a irpol ang kha a ni,” a tia.
Mikot irchêp
22 Jisua’n irchutir malamin Jerusalem a pana, kho lian le kho chînhai ar fang thiaia.
23 Tu’n mani, a kuang, “Saninhringhai chu tômte vai mo an ini hrang?” a tia. 24 Jisua’n a kuang, “Mikot irchêpa khan lût tum hrâm roi; nangni ki hril, mi tamtakin lût tum an ta thei no nihai. 25 In neitupa a thoia mikot a kal tâkin chu, nangni’n pên tiang ngîrin, ‘Ka pu, mikot nin hong roh,’ tiin van tôk khom unglân ama khan, ‘Kho tianga mi mo nin ini nangni inhre ma ung,’ tiin nangni lei sâm a ti. 26 Khanchu nangni’n, ‘Hmunkhatin fâkin ei in suam ngai khate, ki kholaihaia nir chutir ngai khate,’ la ti nin ti. 27 Khannisian, ama khan, ‘Nangni ki hril, kho tianga mi mo nin ini, nangni inhre ngai ma ung; ki kuang ata rot roi, mi pualoihai!’ nangni ti nôk a ti. 28 Hnôlin nin om tikin chu chapin, irkamnôi nin ta; Abrahama hai, Isaka hai, Jakoba hai le deipu murdihai kha, Pathian Rama omin hmu nin ti. 29 Khan, sak le thang, sim le hmâr ata mi hong an ta, Pathian Ram hruaithe hong ot an ti. 30 Irngai u ta, a hnungkhôn takhai khom a maton tak la ni an ta, a maton takhai khom a hnungkhôn tak la ni an ti,” a tia.
Jisua’n Jerusalem lung a thungzia
31 Kha laitaka khan Farisai senkhat an honga, a kuang, “Suakin lân, hitak ata rot roh, Heroda’n nang that a itum kêng,” an hong tia. 32 Jisua’n an kuang, “Kha sihal kha hiang hin hril roi, Irngai roh, a vuan le nangtûk hin ramilhlihai inhnot suak ki ta, damloihai khom indam ki ta, sûn thumin ki sin zoi ki ti. 33 I khom nisian, a vuan, nangtûk le a zîng nôk dênin tho mai ki ti; Jerusalem pên tiang deipu thi ngai mah,” a tia.
34 “O Jerusalem, Jerusalem, deipuhai thattu, ni kuanga tîrhai lunga lei dêng thattu! Ârpuinu’n a tehai a mitha hnuaia a iop khôm angin ni nâihai voi iza op khôm ki tuma, nin inuam loi kha? 35 Khasikin, ‘Rengpa irhminga hong chu Pathianin satvur ri se,’ nin ti mâka chu nin Sinagok hi ram a ta, ni hmu nôk ta no chin ni,” a tia.
1 Voikhat chu khâzana irfuangtuhai le mi sual tamtakin a thu irngai hrangin an hong pana. 2 Farisaihai le Dân irchutirtuhai khan, “Hi pa hin mi sualhai a’rpâlpuia, bu khom a nêkpuihai ngai,” tiin an chiara.
3 Jisua’n an kuang, hi chongirkhek thu hi an sîra, 4 “Nangni laia tu’n mo khatin belra irzakhat nei sianlân an laia inkhat irhmang ta sianlân, rama sômkuak kuakhai kha mâkin, ar hmang kha a hmu nôk mâka chu tu mo zong loi hrang? 5 A hmu nôkin chu raifân takin a dâra irput a ta, 6 in sûng a va tungin chu a rualhai le a kôlahai koi buk a ta, ‘Ki belra irhmang kha ki hmu nôk ta, tho ni lômpui roi,’ ti a ti. 7 Nangni kin hril, khaang dênin mi fel sômkuak kuak irlet nuam loihai nêkin chu, mi sual inkhat irlet chunga hin irvâna mi an lôm ual ngai.
Duli irhmang chongirkhek thu
8 “Khan, nupang tukhom, duli sôm neiin inkhat irhmang ta sian, meiser hâla in phîtin, a hmu nôk mâka chu tu mo sataka zong loi hrang? 9 A hmu nôkin chu a rualhai le a kôlahai koi buk a ta, ‘Ki duli irhmang kha ki hmu nôk tâk e, tho ni lômpui roi,’ ti a ti. 10 Nangni ki hril, khaang dênin Pathian vântirtônhai laia khan mi sual inkhat irlet chunga lômna a lûminna ual ngai,” a tia.
Nâipa irhmang
11 Jisua’n an sîr zom zêla, “Mi inkhatin nâipasal inhni a neia; 12 a nâipang ual khan a pa kuang, ‘Ka pa, ki’rchon dongtum hrang chu ni pe roh,’ a tia. Khanchu, a sum kha an kuang a semhai tâka. 13 Khan, nikhua sôtnotea chu, a nâi nâipang ual khan a dongtum murdi kha a lâkkhôm zita, ram dang hlataka a fe tâka; kha sum kha nuamningin a hmang inhek zoi tâka. 14 A sum nei a hmang inhek zit hnungin chu kha rama khan châmpui a tâka, fâk hrang ar sam tâka. 15 Khanchu, kha rama om mi inkhat ar hnêl tâka, ama khan a loi tianga vokhai enkol hrangin a tîra. 16 Khan, vokhai bu fâk ngai itinrênga hôk fa hrangin a’rzuka, khannisian tûte’n fa rua pe mahai.
17 “Khan, a hong inhriat suak tena chu, ka pa ina irhlo mihai bu nêk zoiloi a itam tia le te, keima lak hi hin phîngchâmin ki ithi chian hrang ma ni! 18 Thoi lik ki ta, ka pa kuang fe ta ki ta, a kuang, ‘Ka pa, Pathian chunga le ni chunga ki itho’nsual ta a ni. 19 Ni nâipaa irti inruk ni ta ma ung, irhlo ngai inkhat angin ni hmang roh, ti ki ta,’ a tia.
20 “Khanchu a thoia, a pa kuang a fe tâka. Hla taka a la om laiin a pa khan a lei hmua, lung an kham tak taka, a van tâna, a poma, a tum pôt pôta. 21 A nâipa khan, ‘Ka pa, irvâna Pathian chunga le ni chunga thil ki tho’nsual a ni, ni nâipaa irti inruk ni ta ma ung,’ a tia. 22 A pa khan a siahlohai kuang, ‘Songkol satak kha hong la lat unglân, innghâktir roi, kutsabi inbuntir unglân, kekok khom inbuntir roi. 23 Sehrâtchal tuai mar tak kha hong kai unglân, that roi, raifân takin hruai inthe ei ti. 24 Hi ki nâipa hi a thia, a hong ihring nôk ta a ni; a’rhmanga, ei ihmu nôk ta a ni hi,’ a tia. Khanchu raifân takin hruaithe an phut tâka.
25 “A nâipa ulian ual kha loia fe a hong kîrin chu, in a tung tôn chu thil tum irhai le lâm irhai kha an hriat tâka. 26 Siahlo inkhat a koia, ‘Khu khu, imo a ini tâk?’ tiin ar dona. 27 Ama khan, ‘Ni sangpa a hong kîra, dam taka a hmu nôk sikin ni pa’n sehrâtchal mar a ithat kêng,’ a tia. 28 Khanchu, a ning an mura, in sûng lût nuam ta maka. A pa kha a va suaka, a hong inthêma. 29 A pa kha a sâma, ‘Irngai roh, kumkhua’n ni ta hrangin suak sinin ki sina, ni thupêk lak pom loiin om ma unga, khan khomin ki rualhai leh lômna hrang kêlte lua ni pe ngai mak chea. 30 Khannisianlân, hi ni nâipa notizuarhai kuanga ni sum hmang inchêktu hi a hong kîra, sehrâtchal mar tak ni lei that pe sa nôka,’ a tia.
31 “Khan, a pa khan a sâma, ‘Ki nâipa, ki kuanga om mai ni nia, ki inei murdi hi ni ta zit kêng. 32 Hi ni sangpa thi tâk hi, a ihong hring nôk ta a ni, ar hmang tâk kha ei ihmu nôk ta a ni hi te,’ raifân taka om hrang kêng ei ini,” a tia.
1 Khan, a irchutirhai kuang khan, “Mi irchong inkhatin sum enkoltu a neia, kha mi khan a sum a hmang inchêk mai mai a ni ti’n a kuang an va dema. 2 Khanchu ama kha a koia, ‘Ni chungchâng thu ki inhriat hi itin lama mo? Ni sum enkol irziakna bu kha hong chôi roh sum enkoltua kop thei no chi ni,’ a ti pea. 3 Kha sum enkoltu khan a lungrîlin, ‘Ka pu’n sum enkoltu ki nina a ni inmâktir hrang ni a ti, itin mo tho ta ning? Irnêng tuk lak hrât ma unga, kut do lak kin zaka, a tia. 4 Sum enkoltu a nin mâktir tika mihaiin an ina an ni inomtir theina hrang lam kin hriat ta,’ a tia. 5 Khanchu, a pu lâkai intângtuhai kha inkhat khatin a koihaia, a maton tak kuang khan, ‘Ka pu kuang i dôr mo ni intâng?’ a tia. Ama khan ‘Sahriak tîn irzakhat,’ a tia. 6 Ama khan, ‘Ni’rziakna lekha hi lan lân, toiin lân, sômringa ti irziak roh,’ a tia. 7 Mi dang kuang, ‘Nang te i dôr mo ni intâng kha?’ a tia. Ama khan, ‘Bu tîn sângkhat,’ a tia. Ama khan, ‘Ni irziakna lekha hi lan lân, tîn sômriat ti irziak roh,’ a tia. 8 A pu khan sum enkoltu sual vâr thiamzia kha an pâk tâka, vâr nâihai nêkin atûnlai mihai hi rammual thila chu an vâr ual a ni,” a tia.
9 Jisua’n, “Nangni ki hril, rammual irchonin rual siam unglân; irchon a hek tika kumtuang rama lôm lût ni thei nin ti. 10 Tômte chunga iamom chu tamtak chunga khom iam a om ngai. 11 Rammual irchon chunga lua nin iamom no’n te tu mo irchon tak tak kha nangni inkoltir ngam hrang? 12 Mi dang ta chunga lua iamom loiin teh nin ta hrang ngei khom tu mo nangni pêk hrang? 13 Siahlo tukhomin hruaitu inhni sin tho irkop thei ni no ni, inkhat hnôl ni a ta, inkhat pom ni a ta, a ninole inkhat kha irngaiinnat a ta, inkhat hmusit a ti. Pathian Sin le sum sin tho irkop thei no chin ni,” a tia.
Jisua thu’nsîr senkhat dang
14 Farisai, sum irngai inhluttuhaiin kha thu kha an inhriatin, Jisua kha an innuisana. 15 Jisua’n an kuang, “Mi mit hmu’n mi fel anga inlang mai mai nin ni; khannisian, Pathianin nin lung sûng an hriata. Mihriamhai irngaisâng hi Pathian mit hmu’n intirom a ni. 16 Baptistu Johana a hong mâka chu, Mosia Dân le deipuhai lekhabu thuhai kha hmang hrang a nia; kha rengata chu Pathian Ram Thurchi Sa hril a nia, mi tinin lût tumin an inbo sup sup a ni. 17 Khannisianlân, Dân thu inkhat chînte boi nêkin chu irnêng le irvân boi hi ol ual a ti.
18 “Dôngma mâka, mi dang nei ka chu an iuire a ni, mi dôngma mâk tâk nei khom an iuire a ni.
Irchongpa le Lazara
19 “Mi irchongpa inkhat a oma, puan man tamhai silin a nitin a hoihôka lêngin a om ngai. 20 A mikot kôla khan mi inriang tak inkhat, ar hming Lazara, pân ituam zuak, an zâltir ngaia; 21 Irchongpa maichâm ata a ifâk irnôi tâkhai kha fâk hrang arzuka, uihai lakin a pân an hong inliak ngaia. 22 Mi inriang kha a thia, Abrahama kôla toi hrangin vântîrtônhaiin an fepui tâka. Mi irchongpa khom a thia, an phûma. 23 Mithi khuaa intak tak a tuanga; a hong tanga; hla taka om Lazara, Abrahama kôla toi a hong hmua. 24 Khan, a hong sâma, ‘Ka pa Abrahama, lung nin khamin lân, Lazara kha a kut pâr hmor tuia inchie sianlân, ki milei indâi hrangin zuang tîr ro ba, hi mei choka hin a sân ki na tak tak kêng,’ a tia.
25 “Abrahama’n chu, ‘Ki nâipa, nangin ni dam laiin thil sa inzen ni donga, khaang dênin Lazara’n thil saloi inzen a idong kha inhre mai ro ba; atûn chu ama chu irtharngam takin hi hin a om ta, nang chu natna tuangin ni iom tâk a ni. 26 Khabana, hitak ata nangni kuanga fe tumhai mo, kha tiang ata keini tianga hong tumhai mo, an kâi thei nona hrangin irnêng chat inthûk tak ei kâra a iom kêng,’ a tia.
27 “Irchongpa khan, ‘A ninole, ka pa Lazara kha ka pa ina infetir hrangin nang ki ngên. 28 Irzirpui pasal ringa ki neia, hi na tuangna hmuna hin hongna an ti, sathnem irngai takin hrilhai ri se,’ a tia. 29 Abrahama khan, ‘Ni urênghai hril hrang te, Mosia le deipuhai an nei khate, khahai thu kha irngai ri sehai,’ a tia. 30 Ama khan, ‘Ka pa Abrahama, ni make, mithi laia mi ngêt an kuang fe sianlân irlet an ti,’ a tia. 31 Ama khan, ‘Mosia le deipuhai thu an zôm no’n chu mithi laia mi thoinôk thu khom zôm ual no nihai,’ ” a ti pea.
1 Khan, Jisua’n a irchutirhai kuang, “Tûknahai hi om no thei ni mah, khannisianlân, an omtirtu chung chu a rik e, 2 Hi mi chîntehai laia inkhat khom hi an tûktir nêkin chu bu nôina lung lianpa a ringa inhlitira, tuikhangliana inthâk ni sian a ta hrangin sa ual a ti.
3 “Irdîn roi, ni urêngin ni chunga thil a tho’nsualin chu hril roh, a’rletin chu ngaidam roh. 4 Sûn khata ni chunga voisari thil a tho’nsualin voisari ‘Ki’rlet e,’ tia nangma tiang a hong irheiin chu ni ingaidam hrang a ni,” a tia.
Iamna
5 Tirtônhaiiin Rengpa kuang khan, “Kin iamna nin det pe roh,” an tia, 6 Rengpa khan, “Ancham ru malkhat dôr iamna nei unglân chu, hi thingtheimu kung kuanga hin ‘Irphôiin lân, tuikhangliana irson roh,’ ti nin ta, nin thu zôm a ti,” tiin a sâma.
Siahlo sintum
7 Nangni laia tukhomin mâni siahlo nei sian, irnêng tuka fe mo, kêlbelra ena fe mo a hong kîr le, “Hongin lân, bu hong ot zôi roh,” tu mo lei ti hrang? 8 Khasikin, ki bu nêk hrang siam ro, irsiamin lân, ki nêk zoi mâka chu ni don ro; kha zoi tika nêk ni ti, a iti loi hrang mo ni ma? 9 Nin thu anga a tho sikin nin siahlo chu lômthu nin hril ngai mo? 10 Khaang dênin nangni khom thupêk murdi nin tho zoi zit hnung khomin, “Siahlo takirtâi loi ei ni, ei itho tum kêng ei itho a ni, ti roi,” a tia.
Phâr sômkhat a indam thu
11 Khan, Jisua Jerusalem a pan pumin Samari le Galili ramria a fea. 12 Khua inkhata a lûtin chu, phâr sômkhat an honga; hla vita an ngîra; 13 an khêka, “Jisua, Hruaitupa, lung nin kham ro,” an tia. 14 Anni kha a hong hmuhaiin chu, “Fe ta unglân ochaihai van entir roi,” a tia. Khaanga an fe lai khan an hong irthiang tâka. 15 An laia inkhat khan a dam tâk ti ar hriat zoi le chu, irhai inring taka Pathian inpâk pumin a hong kîr nôk tâka. 16 Jisua ke bula khan a van boka, lômthu an sîr tâka. Kha mi kha Samari mi a ni. 17 Jisua khan a lei chongpuia, “Mi sômkhat kha nin irthiang infâi zit mo ni ma? Kuakhai kha khôn mo an om tâk? 18 Ithoa mo, hi ram dang mi vai hin, Pathian inpâk hrangin a hong ikîr nôk?” a tia. 19 Khanchu, a kuang, “Thoiin lân, fe roh, ni iamna hi ni dampuina a ni,” a tia.
Pathian Ram zuang tung
20 Farisaihaiin Pathian Ram zuang tung hrang zoro an irdonin chu, Jisua’n an kuang, “Pathian Ram zuang tung chu mita hmu zât ni mah. 21 Tûte’n, ‘En ro, hi hin kêng a om,’ ‘So son kêng a om,’ ti no nihai. Irngai u ta, Pathian Ram chu nin laia hin a iom chian a ni,” a tia.
22 A irchutirhai kuang khan, “Mihriam Nâipa hring lai sûnhai hi sûn khatte lua nin ihmu nuam nî la hong om a ti, khannisianlân, hmu no chin ni. 23 Nin kuang, ‘En u ta, so so mani, hi hi mani,’ la ti an ti; en hrangin fe suak no unglân, zuihai sa no roi. 24 Irvâna kôlirtêkin kôlkung ata kôlkung dênin a ivâr ngai ang kha a ni, Mihriam Nâipa zuang Ni chu la nih a ti. 25 Khannisian, atûnlai mihai hin la hnôl an ta, thil tamtak a ituang masa hrang a ni.
26 “Nova zoro laia thil om dân ang khan Mihriam Nâipa zuang hrang nia khom a la iom hrang a ni. 27 Nova irkuanga a lût ni dên khan mihai khan an fâkin an ina, dôngma pasal an irneia; tui a hong liana, an rênga a hong ithat irhmanghai tâk kha.
28 Khaang dênin Lota dam laiin thil a iom kha; an fâkin an ina, an irchôka, an zuara, thil an phuna, in an sina; 29 Khannisianlân, Sodom khua ata Lota a suak ni khan irvân ata mei le kât a thoa, an rêngin a thathai zita. 30 Mihriam Nâipa a zuang tika chu khaang dên khan a ini hrang a ni. 31 Kha tika chu in chunga mi an omin chu in sûnga a neinun la hrangin chum no ri se. 32 Loia om chu kîr ta no ri se. Lota dôngma inhre mai roi. 33 Tukhom mâni hringna inzôk nuam ka kaiin chu inchân a ta, tukhom mâni hringna inchân ka kaiin chu inzôk a ti.
34 “Nangni ki hril, kha ni zâna khan mi inhni zâlhmun khata zâl an ta, inkhat chu ihruai ni a ta, inkhat chu mâksan ni a ti. 35 Nupang inhni’n bu suk an ta, inkhat chu ihruai ni a ta, inkhat chu mâksan ni a ti. 36 Mi inhni loia fe khom inkhat ihruai ni a ta, inkhat mâksan ni a ti,” a tia.
37 Irchutirhai khan, “Rengpa, khôn mo?” an tia. Jisua’n, “Sa ruak omna kipa raikosohai khom omkhôm an ti,” a tia.
1 Khan, beidong loia chongchai mai mai hrang a nizia chongirkhekin Jisua’n a hrila. 2 Khua inkhata hin roirêltu a oma; Pathian khom chi maka, mihriam khom uksak mah. 3 Kha khuaa khan meithâi inkhat a oma, kha meithâinu khan, “Ki irdoipui leh kin thubuai ni set infel pe roh,” tiin roirêlpu kuang a hong fe mai ngaia. 4 Ama khan i dôr ten mani chu lei nuam maka, nakan tena chu a lungrîlin, “Pathian chi loiin mihriam uksak no khom inlân, 5 hi meithâi hin a sân a nin buaia, infel pe ki ti; khano’nchu, la hong mai a ta, ni lan buai irzêltir ngêt a ti,” a tia.
6 Rengpa khan an sîr maia, “Roirêltu felloi thu’nsîr chu inhre roi. 7 Pathianin a mi inthang, sûn zâna ama insamtuhai thu kha Pathianin a iset infel pe lat loi hrang ma ni? A ir-ial hrang ma ni? 8 Nangni ki hril, zuang set infel pe lat a ti. Khannisian, Mihriam Nâipa hin a zuang tika rammuala iamna nei zuang hmu ni mo?” a tia.
Farisai le khâzana irfuangtuhai chongchai
9 Mânia ki fel irtia, mi danghai hmusit ngaihai kuang Jisua’n chongirkhek thu an sîra. 10 “Mi inhni Tempila chongchai hrangin an fea; inkhat chu Farisai a nia, inkhat chu khâzana irfuangtu a ni. 11 Farisai kha a ngîra, hiang hin a chongchaia, ‘O Pathian, kei chu mi dang anga mi huang ngai, iamomloi le uire mi khom ki ni no sikin le hi khâzana irfuangtu ang khom hi ki ni no sikin, lômthu nang ki hril. 12 Hapta tin bu ki nghei ngaia, ki inei murdi sôma inkhat ki pêk ngai,’ a tia.
13 “Khâzana irfuangtu chu inhnung tiang a ngîra, irvân tiang khom tang ngam maka, ‘O Pathian, keima mi sual hi lung nin kham roh,’ tiin a rôp ar chûm tâka.
14 “Jisua’n nangni ki hril, a masapu nêkin hi pa hi thiam changin a in tiang a kîr tâka. Tukhom irngaiinhlu murdi’n irhniam an ta, irngaiintôm murdi’n chôiindôm ni an ti,” a tia.
Jisua’n nâipang sat a vurna
15 Mi senkhat an nâitehai Jisua kuanga, an chunga kut irnghat hrangin an hruaihaia, irchutirhai khan an lei hnôlhaia. 16 Khannisianlân, Jisua’n anni kha a koihaia, “Nâipangtehai kha ki kuang inhongtirhai unglân, hnôlhai no roi; Pathian Ram chu hianga nâipangtehai ta kêng a ni. 17 Thudik nangni ki hril, Pathian Ram chu nâipangte anga lôm loi ka chu tûte a sûnga lût viat no nihai,” a tia.
Hruaitu irchong
18 Khan, hruaitu inkhatin a kuang, “Irchutirtu sa, kumtuang hringna ki dong theina hrangin imo ki itho hrang?” tiin ar dona. 19 Jisua’n, “Itho sika mo sa ni ni iti? Tûte sa om mahai, Pathian vai no chu. 20 Thupêkhai kha nin hriat khate uire no roh, mi that no roh, inru no roh, milakin mi hnôl no roh, ni nu le ni pa chôiindôm roh,” a tia. 21 Ama khan, “Khahai murdi chu ki thoibop ata ki zôm ngai,” a tia.
22 Kha kha an hriatin Jisua’n a kuang, “Lam inkhat ni la’rsam; ni inei murdi zuarin lân, inrianghai sem roh, khanchu, irvâna irchon nei ni ti; khan, hongin lân, ni zui roh,” a tia. 23 Kha thu kha a hong inhriatin chu a sân a char a dong tâka irchongpa a ni sikin.
24 Jisua’n ama kha a hmu’n, “Irchonghai ta hrangin Pathian Rama lût an tak vang na! 25 Pathian Rama mi’rchong lût nêkin chu simphuai mikuara saringsei lût a ol ual,” a tia. 26 A lei irngaituhai khan, “Khano’nte, tu mo saninhring ni thei hranga?” an tia. 27 Ama khan, “Mihriam itho theiloi hi Pathianin chu a tho thei zit kêng,” a tia.
28 Petera khan, “Irngai ta, kin in le loi mâksanin nang kin zui tâka,” a hong tia.
29 Jisua’n, “Thudik nangni ki hril, tukhom Pathian Ram sikin a in mani, dôngma mani, urênghai mani, nu le pa mani, nâihai mani mâksan tâk ka kai chu, 30 a nêka tam ual, atûna hring sûng le zoro la hong tung hranga kumtuang hringna le ileh hmu ngêt a ti,” a tia.
A thi hrang thu Jisua’n a insîr voithumna
31 Sômhleihnihai kha an bingin a hruaihaia, an kuang, “Irngai u ta, Jerusalema ei ife hrang a ni; Mihriam Nâipa chungchâng thu deipuhai hmanga irziak murdi kha tung irkip a ti. 32 Jentailhai kuta pe an ta; anni khan len nuisan an ta, inzakom takin soisak an ta; inchil an ta. 33 Zêm an ta, that an ta; sûn thum ni’n thoinôk a ti,” a tia.
34 Khannisianlân, a irchutirhai khan kha thu kha a’rngaina lam chang inhre mahai, anni ta hrangin kha thu kha irthup a ni sikin, imo a ihril khom inhre mahai.
Jeriko kho kôla mitcho a indamna
35 Khan, Jisua chu Jeriko khua a tung tônin mitcho inkhat hi lampui sîra kut do’n a lei toia. 36 “Mipui fe irhai kha imo a ini tâk,” tiin a’rdonhaia. 37 “Nazaret Jisua a hong a ni,” an ti pea. 38 Khanchu, “Jisua, Davida Nâipa, lung nin kham roh,” tiin a khêk tâka. 39 Fe masahai khan an ngoa, dâihrek hrangin an ti khomin a matona nêka inringin, “Davida Nâipa, lung nin kham ro,” tiin a khêk nôk ual uala.
40 Jisua kha a ngîra, a kuang hong hruai hrangin a tia. 41 A kôl a hong tungin chu, “Imo nang tho pe inlân ni inuam?” a tia. Ama khan, “Rengpa, hmu thei ki nuam,” a tia. 42 Khanchu Jisua’n, “Hong hmu thei ta roh, ni iamna hi ni idampui a ni,” a tia. 43 Irningloiin a hong hmu thei tâka. Mi murdi’n kha kha an hmu’n chu Pathian an inpâka.
1 Khan Jisua’n sûn palin Jeriko lût hrang a nia. 2 Kha khan mi inkhat, a’rhming Zakaia a oma; khâzana irfuangtuhai hruaitu a nia, mi irchong tak a ni. 3 Jisua kha tu mo a inih ti hmu a tuma, mipui sika khan hmu thei maka, mi dung bong a ni sikin. 4 Khanchu a fena hrang lampuia an tâna, theipui kunga en hrangin a luia. 5 Jisua’n kha hmun kha a tungin chu a tanga, “Zakai, zuang chum lat roh, a vuan hin ni ina ki itung hrang kêng,” a tia. 6 A zuang chum lat lata, raifân takin an tungtir tâka. 7 Kha kha an hmu’n chu an rêngin, “Mi sual kuang tung hrangin a lût tâk so,” tiin an chiara.
8 Zakai kha a ngîra, Rengpa kuang khan, “Irngai ta, Rengpa, ki sum chimrip mi’nrianghai pe ki ta; tu chunga khom dikloi taka ki lei ilâkpai pe a omin chu a bâk minli’n tuam nôk ki ti,” a tia. 9 Jisua’n a kuang, “A vuan hin hi ina hin saninhringna a zuang tung ta, ama khom Abrahama nâipa a ni. 10 Mi irhmanghai zonga saninhring hrangin Mihriam Nâipa hi a izuang a ni,” a tia.
Rângachak sum chongirkhek thu
11 Kha thu kha an irngai lai khan Jerusalem khom a hong nâi tâk sikin le Pathian Ram kha zuang tung zel hrangin an iam sikin, hi chongirkhek thu hi Jisua’n an sîr tâka. 12 Hiang hin an sîra, “Mi lian inkhat, an lal theina hrang thu lâka hong kîr nôk hrangin kho lam hlataka fe a tuma. 13 A suak sômkhat a koihaia, rângachak sum inkhat a pêkhai senga, an kuang, ki om no kârin len pung roi,” a tia. 14 Khan, kha khuaa mihai khan an hnôla, “Hi pa hi rêng hrangin nuam ma ung” ti hrangin palai an tîr zui sa zôia.
15 “Inlalna thu kha a lâka, a hong kîr nôkin chu, sum a ipêkhai kha, an inpung zât inhriatna hrangin an koitira. 16 A hong masa tak khan, ‘Ka pu, ni rângachak sum kha sômin a pung,’ a tia. 17 Ama khan, ‘Suak sa, ni tho’n sa e, tômte chunga ni iam oma, kho sôm chunga hruaitu’n om roh,’ a tia. 18 Inhnina hongpu khom khan, ‘Ka pu, ni rângachak sum kha ringa’n a pung,’ a tia. 19 Ama’n chu, ‘Nang khom, kho ringa chunga hruaitu’n om roh,’ a tia.
20 “A dang khom a honga, ‘Ka pu, en ta, ni rângachak sum kha, irthân huina puanin ki lei infûn chiana. 21 Mi ngar tak ni ni sikin nang ki chia; ni isia loi khom ni lâk ngaia, ni itû loi khom ni ât ngaia,’ a tia.
22 “Ama khan, ‘Suak sual, ni chongbâi suak rengata thiam nang inchang ma ung. Mi ngar tak ki nia, ki isia loi khom ki lâk ngaia, ki itû loi khom ki ât ngai nin hriat mo? 23 Khano’nte, ki sum kha ithoa mo sum bepârhai kuang ni isia loi? ki hong kîrin a pung le ileh ki la isîng hrang kêng a ini,’ a tia. 24 Khan, a kôla ngîrhai kuang, ‘A rângachak sum kha lapai pe unglân, sôm neitu kha pe roi,’ a tia. 25 Anni khan, ‘Ka pu, ama’n chu sôm a nei khate!’ an tia. 26 Ama’n an kuang, ‘Nangni ki hril, tukhom a neipu ka kai chu, pêk belsa ni a ta, a nei loi chu a inei sunte khom lâkpai pe rip ni a ti,’ a tia. 27 Khan, hi ki râlhai inlal hranga ni inuam loituhai hi, hong hruai unglân, ki makunga that roi,” a tia.
Jisua’n roiinpui takin Jerusalem a lût
28 Kha thu kha an sîr zoiin chu Jerusalem panin maton an sa tâka. 29 Oliv tâng an itia om Bethfage le Bethani khua a tung tônin irchutirhai laia inhni a tîrhaia. 30 “Ei maton khuaa son va fe unglân, nin va lûtin sakuartungte irthung, tûte la chuang ngai loina va hmu nin ta; sût unglân, hong kai roi. 31 Tu mo khatin, ‘Ithoa mo nin isût?’ nangni an ti khomin, Rengpa’n a innang kêng, tiin sam roi,” a tia. 32 Khanchu a itîrhai kha an fe tâka, an kuang a ihrilhai ang dênin an va hmua. 33 Sakuartung kha an sût lai takin a neipuhai khan, “Sakuartung kha ithoa mo nin isût?” an tia. 34 Anni khan, “Rengpa’n a innang kêng,” an tia. 35 Jisua kuang an hong kaia, sakuartung chunga khan an puanhai an dâpa, a chunga Jisua kha an inchuangtir tâka. 36 A fe tâka, lampuia khan an puanhai an dâp thiaia. 37 Jerusalem tung tôn, Oliv tâng khêl tôna khan irchutir murdihai khan sinirkhêl an ihmu murdihai sikin an lôma, hnuk irhai inring takin an khêka, Pathian an inpâk tâka.
38 “Rengpa irhminga hong chu,
inpâkin om ri se,
Irvâna irngei lêng sianlân,
Anchungtaka khin roiinpuina om ri se,”
an tia.
39 Mipui laia Farisai senkhathaiin chu a kuang, “Irchutirtu, ni irchutirhai hi khaphai roh,” an tia. 40 Ama khan a sâmhaia, “Nangni ki hril, hihai hi an dâihrekin chu hi lunghai lua hin an ikhêk suak hrang a ni,” a tia.
Jisua’n Jerusalem a châ
41 Khan, a hong nâi uala khopui a hong hmu’n chu a chap tâka. 42 “O nang lua’n a vuan ten hin irtharngamna lampui hi inhre tan lân chu! khannisianlân, atûn chu ni hmu loi hrangin ar thup ta. 43 Ni râlhaiin nir hîlin kul siam an ta, nang irhualin kil tin ata nang an bei zoro la hong tung a ti: 44 ni sûnga om ni nâihai ten luan nang pai rak an ti; ni sûnga lung irchon rêng rêng hôi no nihai, Pathianin nang a zuang kan lai kha nin hriat no sikin, kha kha ni chunga hong tung a ti,” tiin.
Jisua Tempila a lût
45 Khan, Jisua chu Tempila khan a va lûta, neinun zuartuhai kha an hnot suakhaia, 46 an kuang, “Ki in chu chongchaina in ni a ti, ti irziak a ni, nangni’n chu nakhrâtsonghai khura kêng nin siam ual tâk,” a tia.
47 A nitin Tempila khan ar chutir ngaia, Ochai inlalhai le Dân irchutirpuhai khan, vântâng hruaituhai le, ama kha that irhmang an tuma. 48 Khannisianlân, mipuihaiin a thu irngai an hnông thei no sikin, a tho lam dân an inhriat theiloi a ni.
1 Sûn khat chu Jisua’n Tempila mihai Thurchi Sa hrilin ar chutir laiin, Ochai inlalhai, Dân irchutirtuhai le upahai a kuang an honga. 2 “I irchamneina’n mo hi thil hi ni itho? Tu’n mo thu nang a ipêk nin hril roh,” an hong tia. 3 Jisua’n a sâma, “Kei khomin chongbâi khat nangni irdon ki ti; 4 Johana baptisma kha irvâna om ircham mo a ini, mihriam ircham mo? ni hril roi,” a tia. 5 An irsêl irhlôma, “Pathian ircham ei ti le, ‘Ithoa mo a thu nin izôm loi’ ni ti a ta; 6 Mihriam ircham ei ti lakin mipui hin an rêngin lungin ni dêng an ta, Johana kha deipu ni ngêtin an pom sikin,” an tia. 7 Khanchu, “Kho tianga irchamin mo, hi thil hi a itho inhre ual ma ung,” an tia. 8 Jisua khom khan, “Kei khomin tu irchamin mo hi thil hi ki itho nangni hril ual no ning,” a tia.
Grep irhuan chongirkhek
9 Vântâng mipui kuang Jisua’n hi chongirkhek thu hi a hril tâka, “Mi inkhatin grep irhuan a siama, irhuan enkoltuhai kuang a chuan a’rhlotirhaia, ram danga zoro sôttak a zu irhmanga. 10 A’rhmal zoro’n chu a dongtum la hrangin suak inkhat irhuan enkoltuhai kuang a tîra, Khannisianlân, irhuan enkoltuhai khan an lei zêma, kut rongin an inkîrtira. 11 Suak dang a tîr nôka, kha khom kha an lei zêma, inzakom takin an soisaka, kut rong dênin an inkîrtîr nôk tâka. 12 A voithumnaa a itîr len vâng chu thisen an lei insuaa, irhuan ata an pai suaka.
13 “Grep irhuan neitupa khan, ‘Itin mo ki itho hrang tâk? ki nâipa inditom tak hi tîr ta ki ta; ama hi chu lei inza an ti duah,’ a tia. 14 Irhuan enkoltuhai khan an lei hmu’n chu, ‘Hi mi hi irhuan luatu hrang chu a ni, tho that ei ta, eini’n ar chon kha ei dongna hrangin,’ an irtia. 15 Grep irhuan ata kha an pai suaka, an that tâka.
Khanchu, Jisua’n, “Grep irhuan neitupa khan itin mo lohai ta ni?” a tia. 16 “Hong a ta, irhuan enkoltuhai kha that irhmanghai a ta, irhuan kha mi danghai pe a ti,” a tia. Kha thu kha an inhriatin chu, ‘Kha tenpa bâk kha chu tho tet no ni,’ an tia.
17 Khannisianlân, an nihai kha Jisua’n a ena,
“Imo a omzia?
‘In sinpuhaiin lung an inuam loi kha,
kha ngêt kha a kila lung poimo tak a hong ni ta,’
ti irziak hi i tihna ma ni?
18 “Tukhom kha lung chunga tûk murdi chu koi irnôi an ta, a idel len vâng chu irnôi indi chit a ti” a tia.
Khâzana chôi thua irdonna
19 Kha lai khan Dân irchutirtuhai le Ochai inlalhai khan, kha chongirkhek thu kha anni demin a insîr ti an inhriat sikin, chel zôi zel an nuama, aniachu vântâng an chihaia.
20 Khanchu, zoro’nchum an irdîp chaka. Ramoptu roirêlna le ar chamneinaa an tung theina hrangin a chong insuala chel hrangin enirchiktu senkhat mi dik anga inlang, an tîra. 21 Kha mihai khan, “Irchutirtu ni thu’nsîr le ni thu irchutir hi a dik ti kin inhriat; tukhom inza bîk nei ual loiin Pathian thu dik tak nir chutir ngai. 22 Kaisara kuang khâzana kin ichôi hrang mo, chôi loi hrang mo? nin hril roh,” tiin an irdona. 23 Khannisianlân, butdi an itho a nih ti an hriata, an kuang, 24 “A duli ni hong inentir u ta, tu dûr le tu irhming mo a chuang?” a tia. Anni khan, “Kaisara,” an tia. 25 Ama khan, “Khano’nte, Kaisara ta chu Kaisara pe unglân, Pathian ta chu Pathian pe roi ba,” a tia. 26 Khanchu vântâng makunga a thu’nsîra chel an itum kha hlo an sam tâka; a isâmna kha a sân ar khêl an tia, an dâihrek ta.
Thoinôkna thua irdonna
27 Sadukaihaiin thoinôkna om mak an tia; an laia senkhat Jisua kuang an honga. 28 “Irchutirtu Mosia’n, Tukhom dôngma neia nâi nei loiin thi sianlân, a urêngpa ta hrangin irchi a inei hrang a nih ti a’rziaka. 29 Khan, urêng pasal sari an oma, a ulian tak khan dôngma a neia, nâi nei loiin a thia; 30 a inhnina khan a lua nôka, 31 Inthumna khomin; a lua nôka, khaangin sarihai khan an lua senga, nâi nei loiin an thi zita. 32 Kha hnung chu nupang khom kha a thi sa tâka, 33 Khanchu thoinôkna khan kha nu kha tu dôngma tak mo a ini hrang tâk? Urêng sarihai khan dôngma’n an nei senga,” tiin an irdona.
34 Rengpa’n an kuang, “Hi rammual mihai hi dôngma pasal an irnei ngaia, 35 rammual la hong om hranga thoinôknaa chang hranga inkunghai rêk chu dôngma pasal irnei ta no nihai. 36 Thi khom thi nôk thei ta no nihai, vântîrtônhai angin om an ti. Thina ata an thoi nôk tâk sikin Pathian nâihai ni ta an ti. 37 Mithi kaithoi thu kha Mosia khomin an langtir khate; chînribuk mei chok thua khan Rengpa kha, ‘Abrahama Pathian, Isaka Pathian, Jakoba Pathian’ tia a insîr kha. 38 Ama chu mithihai Pathian ni maka, mi hringhai Pathian a ni ual. Ama ta hrangin chu an ihring zit a ni,” a tia.
39 Dân irchutirpu senkhatin, “Irchutirtu, a sân nin sîr indik,” an lei ti saa. 40 Kha hnung chu, thu dang irdon ngam ta mahai.
Mesia chungchâng irdon infelna
41 Jisua’n an kuang, “Krista kha Davida nâipa, itin lama ti mo an ini? 42 Inpâkna hla bua Davida ngeiin.
43 ‘Rengpa khan ki Rengpa kuang ki chang tiang hong toi roh,
Ni râlhai ni ke irnghatnaa ki sia mâka chu,’
a tia. 44 Davida’n ama kha, ‘Rengpa’ a tiin teh, itin mo Mesia kha Davida nâipa a ini thei hrang?” a tia.
Dan irchutirtuhai ata irdîn hrang
45 Vântâng mipui inhriatin Jisua’n a irchutirhai kuang khan, 46 “Dân irchutirtuhai ata irdîn roi. Anni khan songkol irfual innghâka chai vêl an uara, bazar hmuna chubai irmûk an irngaisânga, Sinagoka toina langsâr tak le hruaithena hmuna toina satakhai an irngên ngai. 47 Hi mihai hin meithâi sum fa pe zoia, mi hmu hrangin vai, sôt tak tak chongchai ngaihai hin hremna tuang ual an ti,” a tia.
1 Tholôm bôma mi irchonghai tholôm thâk kha Jisua’n a thîr maia, 2 meithâi inriang tak inkhatin poisa hni a hong ithâk a hmua. 3 Khanchu, “Thudik nangni ki hril, hi meithâi inriang tak hin mi danghai nêkin a thâk intam ual a ni. 4 Mi danghaiin chu an inei lêta om kha kêng an ithâk ngai, ama hin chu a ineisun a ir-enkolna hranga kha kêng a hong ithâk a ni hi,” a tia.
Tempil siat hrang thu
5 Khan, irchutir senkhathaiin Tempil, lung satakhai leh an irvôtir le Pathian kuanga an thilpêkhai an insîr laiin, Jisua’n, 6 “Hi nin thil hmuhai, lung irchuan rêng rêng hi inchim loia hitaka hin om no ni; khaang zoro kha la tung a ti,” a tia.
Buaina le dengtheina
7 Anni’n, “Irchutirtu, kha kha itika mo a hong iom hrang?” tiin an irdona. 8 Ama’n, “Hruai pai nin ni nona hrangin irdîn roi; ki’rhming songin, ‘keima hi ki ni, a zoro tung hrang a ni ta,’ tiin mi tamtak hong suak an ti, an hnung zui no roi. 9 Irdoi irhai le tehel sika buaina irhai nin inhriatin chi ual no roi, khahai kha tung masa hrang rêng a ni, zoro mongna chu la ni no ni,” a tia.
10 Khan, an kuang, “Nam dang le nam dang irdoi an ta, ram dang le ram dang irdoi sa an ti. 11 Hnîngnupui tho a ta, hmun dang danga châm tâk a ta, hrihai pung a ta, irvân ata ichiomhai le siatna irkhêl tak tak hong om a ti. 12 Khannisianlân, kha thilhai kha a hong tung mân nangni chel an ta, Sinagokhaia hruaiin, intângna ina nangni khum an ti, deng nangni an inthei hrang a ni. Ki’rhming sikin rênghai le roirêltuhai makunga nangni hruai an ti. 13 Kha kha nin ta hrangin Thurchi Sa hril inchumna zoro la nih a ti. 14 Lei inhre diam roi, itin mo irphilin kin lei isâm hrang, tiin lunginkâng no roi. 15 Nin irdoipuihai murdi’n nangni an sêl thei nona hrangin vârna le mi sâm theina nangni pêk ki ti. 16 Nin nu le nin pahai, nin urênghai, nin sûngsuakhai le nin rualhai dên khomin nangni incheltir an ta, senkhat vâng chu nangni thatpai an ti. 17 Ki’rhming sikin mi tinin nangni hnôl an ti. 18 Khannisianlân, nin samzâi malkhat khom irhmang no ni. 19 Diar ngitin ngîr unglân, khanchu zôk nin ti.
Jisua’n Jerusalem siat hrang thu a lei hrilna
20 “Khan, sipaihaiin Jerusalem an irhual nin hmu tika chu a siat hrang anai tah ti inhre roi. 21 Kha zoro tika chu Judai rama omhai chu tâng ramhaia intânhai sian; khopui sûnga omhai khan suaksan ri sehai, rama omhai chu a sûnga lût no ri sehai. 22 Pathian thubua irziak a hong tung indik theina hrangin, kha nikhuaa chu ‘Phuba lâk nihai,’ ni a ti. 23 Kha ni’n chu, inrâihai le nâite pom laihai kha a sân intak a ti. Hi rammuala hin a sâna intak tung a ta, hi irchihai chunga hin ningmur a hong tung hrang sikin. 24 Khandaiin thi an ta, nam tin kuang suaka hruai indarin om an ta, khan, Jentailhai zoro a mong mâka chu Jerusalem hi Jentailhai isirbe ni a ti.
Mihriam Nâipa zuang hrang thu
25 “Khan, misa haia, tha haia, ârsi haia khin irsinsiana irkhêl tak tak hong om a ta; irnênga khom tuikhanglian irsôn le irhai an inhriatin nam tin thôna lam inhre loiin kamang an ta; 26 Irvân sinthotheinahai kha inhnîngtir ni a ta, rammuala thil ichiom hong tung hrang an ngaitua’n ichia irthatâkin chinginrîl an ti. 27 Kha zoro tika chu Mihriam Nâipa hi sinthotheina le roiinpuina irkhêl tak leh sûm laia zuang hmu an ti. 28 Kha thil kha a zuang tung tikin chu chung tiang enin tang unglân, nin zôkna hrang kha a zuang nâi sikin,” a tia.
Theipui kung ata irchu hrang
29 Jisua’n an kuang chongirkhek thu an sîr saa, “Theipui kung le thing danghai khom hi en u ta, 30 A hong incher irnoi nin hmu’n, kholum a hong irphut ta, ti nin inhriat ngai. 31 Khaang takin nangni khomin, khahai murdi zuang tung nin hmu tikin chu, Pathian Ram chu a zuang nâi tah ti inhre mai ngai roi. 32 Thudik nangni ki hril, khahai thil murdi kha a zuang tung mâka chu atûnlaia mihai hi boi irman no nihai. 33 Irnêng le irvân boi a ta, ki thu chu boi viat no ni.
Irtûng chian hranga inthorna
34 “Khanchu, nuam le ninga omhai, zu’nrui hai, a nitin om dân ngaituana hai, nin lungrîla a sip nona hrangin irdîn roi. 35 Chânga in-ôk angin nangni tongna ti. Irnêng pumpui chunga a zuang itung hrang a ni. 36 Kha thil zuang tung hranghai tuang suaka, Mihriam Nâipa makunga nin ngîr theina hrangin itiklai khomin irngaitua’n chongchai roi,” a tia.
37 Jisua’n sûna chu Tempila ar chutirhaia, khohloi tiang chu a suaka, Oliv tâng an itia khan a riak ngai. 38 Mi murdi khom a thu irngai hrangin zînga Tempila an hong ngai.
1 Khan, bai chol koploi Kût, Ferkân Kût an iti kha a hong nâi tâka. 2 Ochai inlalhai le Dân irchutirtuhai khan vântâng mipui an chihai sikin inrûka that hrang lam an ngaituaa.
Juda’n Jisua incheltir a tum
3 Sômhleihnihai laia kop sa, Juda, Iskariota an itihtu sûnga Setan a lûta. 4 Khanchu, a va fea, Ochai inlalhai le ulian hruaituhaiin an ichel hrang lam a van sîrpuihaia. 5 Anni khan a sân an lei lôma, sum pêk hrang an inkung ta. 6 Ama khom khan sa a tia, mipui om loi laia incheltirna zoro’nchum a zong tâka.
Ferkân kût bu sinsiam
7 Bai chol kop loi Kût ni, Ferkân Kûta belrate an that nî chu a hong tunga. 8 Khanchu, Petera le Johana kha a tîra, “Ferkân Kût khalâi bu ei inêk hrang va sinsiam roi,” a tia. 9 Anni khan “Khôn mo va sinsiam inlân ni inuam?” an tia. 10 Ama khan, “Irngai u ta, khopuia nin va lûtin pa inkhat bêla tui chôiin nangni irtongpui a ti; a lûtna ina zui lût roi. 11 Khan, in neipupa kuang, ‘Irchutirtu’n ki irchutirhai leh Ferkân Kût khalâi kin nêkna hrang chontan kha kho hin mo a ti,’ ti roi. 12 Ama khan chontan chuanchung irzat tak; itinrêng omsai, nangni inkhîk irhmu a ti. Kha khan sinsiam roi,” a tia. 13 Khanchu an fea, an kuang a insîr lam ang tak khan an va hmua, Ferkân Kût khalâi bu kha an sinsiam tâka.
Rengpa zânbu
14 Khan, a fâk zoro’n chu ama le a irchutirhai khan khalâi kha an ot tâka. 15 An kuang, “Ki tuang mân hi Ferkân Kût khalâi bu hi nangni otpui ki nuam tak tak a ni. 16 Nangni ki hril, Pathian Rama a tak tak a tung mâka chu hi khalâi bunêk hi fa ta no ning,” a tia. 17 Khanchu, khilât a lâka, Pathian kuang lômthu an sîr zoiin, an kuang, “Hi hi la unglân, irsem roi. 18 Nangni ki hril, atûn ata Pathian Ram a zuang tung mâka chu, hi uain tui hi in nôk ta no ning,” a tia. 19 Khan, bai a lâka, Pathian kuang lômthu an sîr zoiin a khoia, an kuang a pêkhaia, “Hi hi ki taksa a ni, nin ta hranga pêk a ni; nin ni inhriat maina hrangin hi ang hin tho ngai roi,” a tia. 20 Zân bu nêk zoia chu khaang dênin khilât a lâka, “Hi khilât hi ki thisena thuthung thar, nin ta hranga suak chu a ni. 21 Khannisianlân, irngai u ta, a nin cheltir hrangtu chu hi maichâma hin a ot chian a ni. 22 Mihriam Nâipa hi Pathian inkung angin a ife hrang a ni, aniachu, an cheltirtu hrang mihriam chung chu a rik e,” a tia. 23 Anni khan an laia khaanga tho hrang kha tu tak mo a ini hrang tâk, tiin an indon irhlôma.
Tu mo roiinpui tak hrang
24 Khan irchutirhai laia tu mo roiinpui tak ni ni, ti thu irsêlna a hong suaka. 25 Ama khan an kuang, “Jentailhai rênghai chu inlal an irti tak taka, an chunga irchamneituhai lakin, ‘Hruaitu sa,’ ti irhming an irphuaa. 26 Khannisianlân, nangni laia chu khaang khan ni mah. Nin laia roiinpui tak chu a chîn tak angin om sianlân, hruaitu tak kha sinthopu angin om ual ri se. 27 Tu mo roiinpui ual, khalâi ottu mo a sinthotu mo? khalâi ottu kha mo ni no ni? Khannisianlân, keima’n chu sinthotu angin ki iom kêng.
28 “Intakna ki tong sûngin nangni’n nin ni ompuia. 29 Ka pa’n ram a ni inkung pe ang dênin kei khomin ram nangni kin kung pe; 30 khanchu, ki rama chu ki maichâma fâkin, in nin ta, rêngtoihmuna toiin Israel nam sômhleihnihai chunga roirêl pe nin ti.
Petera’n phil hrang thu Jisua’n a lei insîr
31 “Simon, Simon, irngai ta! Setana’n butak le bu irsi sensâi hrang, bu’n sêp anga nangni fiaa, a sa le a sia nangni theithâk hrangin, Setana’n phalna a hmu tâk. 32 Khannisianlân, ni iamna a boi nona hrangin nang ki chongchai pe. Khan, ni hong irhei nôk tika chu ni urênghai indet ro,” a tia. 33 Ama khan, “Rengpa, ni kuang chu intângna ina lût hrang le thi hrang khomin fe sa mai ki’rphal,” a tia. 34 Ama khan, “Peter, nang ki hril, ‘Ama kha inhre ma ung’ tia voithum ni ni phil mâka chu a vuan zân âr khuang no ni,” a tia.
Sum choli, hmarsahai, le khandaihai chôi thu
35 Jisua’n an kuang, “Sum choli, hmarsatehai, kekokhai chôi loia nangni ki tîra khan, thil irsam nin nei moh?” a tia. Anni khan, “Nei viat ma ung,” an tia. 36 Ama khan, “Atûn chu sum choli neipu’n chu chôi sianlân, hmarsate khom chôi ri se; khandai nei loi chu a puan zuar sianlân, irchôk ri se. 37 Nangni ki hril, ‘Ama chu mi sual laia an tep sa ta,’ ti Pathian Lekha thu chu ki chunga tung ngêt hrang a ni. Ki chungthu an irziak kha tung irkip hrang a ni ta” a tia. 38 Anni khan, “Rengpa, en ta, hin khandai inhni a om e,” an tia. Ama khan, “A ruk ta,” a tia.
Oliv tânga chongchai
39 Khan, ama kha a suaka, a tik danga angin Oliv tânga khan a fea, a irchutirhai khom khan an zui saa. 40 A hmun a va tungin chu an kuang, “Thêmnaa nin lût nona hrangin chongchai roi,” a tia. 41 Lung dêng phâk ten vêla, a bingin a va fea, khûksadelin a chongchaia. 42 “Ka pa, sa ni ti’n chu, hi khilât hi ni lapai pe roh, khannisianlân, keima ircham ni loiin nangma ircham ni ual ri se,” a tia. 43 Irvân ata vântîrtôn inkhat inhartir hrangin a kuang a zuang inlâra. 44 A zâm a’rzal tak taka, a’rthân kha thisen zung lian tak angin a zunga.
45 A chongchai zoiin chu irchutirhai kuang a honga, an beidong inmusu kha a hong hmua, an kuang, “Ithoa mo nin inmusu? 46 Thoi unglân, thêmnaa nin lût nona hrangin chongchai roi,” a tia.
Jisua chel thu
47 Khan, a la chong lai takin mipui an hong tunga, sômhleihnihai laia kop Juda an iti khan mah a hong hruaia, tum hrangin Jisua a hong pana. 48 Khannisianlân, Jisua’n a kuang, “Juda, Mihriam Nâipa hi i tumin mo, ni incheltir hrang?” a tia. 49 A kôla mihai khan thil hong tung hrang kha an hmu’n, “Rengpa, khandai irlek kin ti duah?” an tia. 50 An laia inkhatin chu Ochai inlal tak siahlo mikuar chang tianga a sât thâkpai pea. 51 Jisua’n a sâma, “A ruk ta,” a tia. A mikuar kha a tôn pea, an damtir ta.
52 Ochai inlalhai, Tempil hruaituhai le upa honghai kuang khan, Jisua’n, “Khandai le hêmvuak chôiin hrâtlâksong chel hrang ang dênin nin hong ipût mo? 53 A nitin, Tempila nin laia ki om ngai lai khan ni chel mak chêia; khannisianlân, inthim irchamneina’n roi a rêl lai hin nin sintho zoro a ni,” a tia.
Petera’n Jisua a phil
54 Jisua an chel tâka, Ochai inlaltak ina an hruai lût ta; Petera khan hla vit ata a zuia. 55 Khan kholaia mei an thoa, an toi irbuka, Petera khom kha an laia khan a toi saa. 56 Mei vâra a toi laiin siahlo dôngmate inkhatin a hong hmua, a en vong vonga, “Hi pa khom hi a kuanga om sa a ni hi te,” a tia. 57 Ama’n, “Nupang, ama chu inhre ma ung,” a tia, a phila. 58 Kha hnungin mi dangin a hong hmu nôka, “Nang khom hi, an laia mi ni ni hi te,” a tia. Petera’n, “Mihriam, kei chu ni viat ma ung,” a tia. 59 Dârkâr khat vêl hnunga chu mi dangin, “Hi pa khom hi a kuanga kop sa kha a ni ngêt hi te, Galili mi a ni hi,” a ti ngita. 60 Petera khan, “Mihriam, ni thu’nsîr kha inhre viat ma ung,” a tia. A chong mai lai takin âr a khuang zôia. 61 Rengpa chu a hong irheia, Petera kha a ena. Petera khan, ‘A vuan zân âr a khuang mân nangin voi thum ni phil ni ti,’ Rengpa’n a kuanga a lei iti kha an hriat suaka. 62 Pên tiang a suaka, a chap irhniak bop bop tâka.
Jisua nuiza siamna’n an hmang, an inbên
63 Jisua cheltuhai khan nuiza siamna’n an hmanga, an inbêna, 64 A mit an tuama, “Tu mo nang an bên, ti ro?” an tia. 65 Chong saloi tak takin an ngoa.
Sanhedrin makunga Jisua a ngîr
66 Khan, khua a vârin chu vântâng upahai, Ochai inlalhai le Dân irchutirpuhai kha an irbuka; an Sanhedrin-ah khan Jisua kha an hong hruaia. 67 A kuang, “Krista ni ni lele’n chu nin hril roh,” an tia. Ama khan, “Nangni hril khom inlân, iam ual no chin nia, 68 Chong nangni irdon khom inlân ni sâm ual no chin ni. 69 Khannisianlân, atûn ata chu Mihriam Nâipa hi Pathian sinthotheina chang tiang toi ta a ti,” a tia. 70 Khan an rêngin, “Nang hi Pathian Nâipa ni ini mo?” an tia. Ama’n, “Ni nih, nin ni ti khate,” a tia. 71 Anni’n, “Inhriatpuitu dang tu mo ei la innang hrang? Eini ngeiin a chongbâi suak ata ei inhriat tâk hi te,” an tia.
1 An rêngin an thoia, Pilata kuang Jisua chu an hruai tâka. 2 “Hi mi hin ei mipuihai tehel zong hrangin an thorhaia, Kaisara kuang khâzana chôi a khapa, ama hi Rêng, Krista chu, ar ti, ti khom kin inhriat suak a ni,” tiin an hnôla. 3 Pilata’n a kuang, “Judahai rêng mo ni ni?” a tia. Khan, Jisua’n, “Ni ni, ni ni ti khate,” tiin a sâma. 4 Pilata’n Ochai inlalhai le mipuihai kuang khan, “Hi mi hi thiamno inchang hranga hin ite a bi hmu ma ung,” a tia. 5 Khannisianlân, anni khan, “Tehel zong mi inthorin, Judai ram kho tina mi ar chutir ngai ti kin inhriat, Galili rama a phuta, hin khom a hong itung tâk a ni,” tiin an bei nôk uala.
Heroda makunga Jisua a ngîr
6 Pilata’n, kha kha a hong inhriatin chu, Galili mi a ni le ni loi ar dona. 7 Heroda biala mi a nih ti an hriatin chu, Heroda kuang a tîr tâka; ama khom Jerusalema a lei om lai tak a ni. 8 Heroda’n Jisua thurchi a lei inhriata, Jisua hmu hrang a nuamna, a sân a lei sôt tâk sikin, Jisua a hmu’n chu a lôm oka; a sinirkhêl imo khat hmu khom a sabei sa. 9 Thu tamtak ar dona, khannisianlân, i ang khomin sâm mah. 10 Ochai inlalhai le Dân irchutirtuhai khom an ngîr saa, an sêla. 11 Khan, Heroda khom khan, a sipaihai leh Jisua kha an hmusit tak taka, nuiza siamna’n an hmanga, puan roiinpui tak an siltira, Pilata kuang a tîr nôk tâka. 12 Pilata le Heroda kha lei irngei ngai mahaia; kha nikhua taka khan chu an irngei ta.
Jisua thi hranga a roi an rêlna
13 Pilata khan Ochai inlalhai le Dân irchutirtuhai le vântâng mipuihai kha a koi buka, an kuang, 14 “Hi mi hi mihai tehel zong hrangin an thorhai, nin hong tia, nin makung ngeia ki’rtipuia, nin ihnôlna thua thilpoi ite a itho hmu ma ung. 15 Heroda khomin hmu ual mah, ki kuang a hong itîr nôk ta a ni. Irngai roi thina hrang ang dôr ite tho’nsual nei ual mah. 16 Khanchu, vîk ki ta, insua nôk ki ti,” a tia. 17 Ferkân kût hruaithe rikipin Pilata’n mi intâng inkhat an ta hrangin an sua pehai ngai a ni.
18 Khannisianlân, an rêngin khêk irrualin, “Hi mi hi chu thatin lân, Barabba kha nin sua pe roh,” an tia. 19 Kha mi kha khopuia tehelna sik le mi that sika intângna ina intâng a ni. 20 Pilata khan Jisua kha insua a nuama, an kuang thu an sîr nôka; 21 Khannisian, “Krosa hembe roh, krosa hembe roh,” tiin an khêk mur mur tâka. 22 Khan, Pilata’n a voi thumnaa, an kuang, “Itho mo? Imo a tho’nsual? Thina hrang rak ten ite a itho’nsual hmu ma ung; vîk ki ta insua ki ti,” a tia. 23 Anni khan inring takin an khêka, Krosa hembe hrangin an ngên ngota, an irhai khan an hnêpai tâka.
24 Pilata’n an ingên angin an kung tâka. 25 Tehelna le mi that sika intângna ina mi intâng an ingên kha an suaa, Jisua kha an nuam nuama lo hrangin a pêkhai tâka.
Jisua hembêna
26 Khanchu, sipaihaiin Jisua an hruaia, an fe laiin, Simona Kurini kho mi, thingtâng rengata khopui hong pan an tonga, an chela; Kros an irputtira, Jisua hnunga an infetira.
27 Khan, vântâng mipui tamtak le milung naa chap bop bop nupanghaiin an zui sup supa. 28 Jisua kha anni tiang a’rheia, “Jerusalem nuhaio, ni châ no roi, nangni le nin nâihai ta hrangin chap ual roi. 29 Nupang ching hai, nâivong ngai loihai, nâi don ngai loihai chu an vân a sa e! an ti zoro la hong tung a ti. 30 Kha zoro tika chu mihaiin tâng kuang, ‘Ni del roh,’ ti an ta, mual kuang, ‘Ni’rkhu roh,’ la ti an ti. 31 Thing hring lua hiang hin an lo’n te, thing châr len vâng te itin takin mo an ilo hrang?” a tia.
32 Khan, that sa hrangin mi dang, mi sual inhni, a pâlin an hruai saa. 33 Luru an ti hmun chu an va tunga; khatak khan krosa an hembe tâka; mi sualhai khom kha a chang tiang inkhat, a vei tiang inkhat, an hembe saa. 34 Jisua’n, “Ka Pa, annihai hi ngaidam roh, an sintho hi inhre mahai” a tia. A silkaihai kha tasânin an irsema. 35 Vântâng mipuihai khan ngîrin an thîra. Hruaituhai khom khan, “Mi dang lua an damhai ngaia, Pathian mi’nkung, Krista chu, a ni lele’n teh a bing khomin irdam ri se ba,” tiin an êroa. 36 Sipai hruaituhai khom khan an innuisana, a kuang an fea, zu thûr an pêka, 37 “Judahai rêng ni ni tak takin chu, ni bingin irdam ro ba,” an tia. 38 A chunga khan, “Hi mi hi Judahai rêng a ni,” ti irziak an târa.
39 An hembe sa mi sual inkhatpu khan a chiar khuma, “Krista kha ni ini loi ma ni? Irdamin lân, keini khom nin dam sa ro ba,” a tia. 40 Khannisianlân, inkhatpu khan a lei khapa, a halirchua, “Pathian ten lua ni ichi loi mani, irang maia nang an ihrem hi? 41 Eini ruai hi chu hrem inruk rêng ei ni, ei sinthôna man ei ihmu a ni hi; Ama hin chu ite tho’nsual nei mah,” a tia. 42 Khanchu, “Jisua, ni Ram ni tung tika nin hre mai roh,” a tia. 43 Jisua’n a kuang, “Thudik tak nang ki hril, ki kuang a vuan hin Paradisa om sa ni ti,” a tia.
Jisua thi thu
44 Khan, sûn dâr sômhleihni vêl ata khohloi dâr thum dênin rammual an thim khaka; 45 misa a hong inthim tâka, tempil sûnga puanzâr kha a laia a têr thai tâka. 46 Jisua kha inring takin a khêka, “Ka Pa, ki’rtha ni kuta nang kin koltir,” a tia. Kha kha a ti zoiin chu a hrang a chat tâka.
47 Sipai irza hruaitu khan thil zuang tung kha a hmu’n chu, Pathian an pâka, “Hi mi hi mi dik ngêt a ni,” a tia. 48 Kha thîr hranga mipui hong irbukhai khan thil omzia kha an hmu’n, beidongin an rôp irchu chûmin an kîr nôk tâka. 49 A hmêl inhriathai chu hla vita an ngîr chiana, Galili ram ata ama zuipu nupanghai leh khan, kha thil kha an thîr suama.
Jisua an phûm
50-51 Khan, Judai rama Arimathai khuaa mi, ar hming Josefa a oma. Ama chu mi fel tak, mi mahripom tak, le Pathian Ram zuang tung hrang lei nghâk mi a nia. Roirêlpuhai laia mi ni sa khomsian, an roirêlna le an sintho kha sa tipuihai maka. 52 Kha mi kha Pilata kuang a fea, Jisua ruak a va nghia. 53 Khan, Jisua ruak kha a kai thâka, puan irnêmin a tuama, tûte an la inzâl ngai loina lung inver thâna an zâltir tâka. 54 Kha nikhua kha Judahai irtûng nî a nia, khannisian Judahai Sabat ni ar phut vâng vâng ta. 55 Galili ram ata hong zuitu nupanghai khom khan an zui sa thiai thiaia, thân le a ruak an inzâl lam kha an hmua. 56 Khan, an kîra, mirimhoihai le sahriak mirimhoihai an irfûka. Khan, Dân thupêk angin Sabat nî chu an irngama.
1 Khan, Pathianni thingchangvârroa mirimhoi an irfûkhai kha chôiin thâna khan an va fea. 2 Thân mikot ata lung kha irhlumpaiin, an va hmua, 3 an hong lûtin chu Rengpa Jisua ruak kha hmu ta mahai.
4 Khaanga chamai raka an om lai khan, mi inhni puan chek silin an kôla an zuang ngîra. 5 An chia, irnênga inbokin an kûn khaka; kha mihai khan an kuang, “Itho sika mo mithi laia mi hring nin izong? 6 Hi hin om ta ma? Kaithoi a ni ta Galili rama a om laia nin kuanga a ihril kha inhre mai roi, 7 ‘Mihriam Nâipa hi mi sualhai kuta incheltir ni a ta, Krosa hembe an ta, sûn thum ni’n a ithoi nôk hrang a ni,’ a ti ngai khate,” an tia.
8 Khan, nupanghai khan a thu’nsîr kha an inhriat suak nôk tâka. 9 Thân ata kha an kîra, thil omzia chu sômhleikhathai le mi danghai kuang, kha thu kha an hril ta. 10 Kha thu, tirtônhai hong hrilpuhai chu, Magdala mi Mari, Joani, Jakoba nu Mari hai le an laia fe sa nupang senkhathai an ni. 11 Khannisianlân, kha thu kha thu dikin le’rngai mahaia, lei iam mahai. 12 Petera chu a thoia, thâna khan a van tâna, a kûna a zu vêngin chu, puan irnêm sil omhai vai kha a hmuhaia, khanchu, thil om dân kha ar khêl ti pumin in tiang a kîr nôk tâka.
Emmau kho pan rual lefahai
13 Irngai ta, kha ni taka khan an laia mi inhni kha khua inkhat Emmau an itia khan fe hrangin an suaka, kha khua kha Jerusalem ata kilometar sômhleikhat vêla hla a ni. 14 Thil hong tung murdi kha an insîr suama. 15 Khaanga an insîr suam lai khan Jisua ngei khan a hong nâihaia, an fe suam tâka; 16 khannisianlân, a hmêl an inhriat thei nona hrangin an mit an vâitir pehaia. 17 An kuang, “Fe puma nin insîr kha i thu mo?” a tia. Khanchu, ngûi takin an ngîr tâka.
18 A’rhming Kleopa khan a sâma, “Nangma vai hi ni ni ti, Jerusalem hroa atûnlai thurchi inhre loi chu!” a tia. 19 Ama khan, “I thurchi mo?” a tia. Anni khan, “Nazaret Jisua thurchi; Pathian le mi murdi mit hmua a thua le a sinthoa deipu sinthothei tak thurchi kha, 20 Ama kha Ochai inlalhai le ei roirêltuhaiin that hrangin an pêka, Krosa an hembe thu kha. 21 Keini lakin Israelhai irtantu hrang a ni tih kin lei tûnga. Kha vai kha ni ma, a vuan hin a sûn thumna a ni tâk. 22 Kin pâla nupang senkhathai khan a vuan zîng khan thâna an va fea, chardong an nin lâktira. 23 A ruak hmu loiin an hong kîr nôka, vân vântîrtôn inlâr kin hmua, khahai khan, ‘A hring nôk ta,’ an ti tiin an hong tia.
24 Kin iompui laia senkhat khom thâna an va fea, nupanghai insîr ang tak khan an va hmua, khannisian ama chu va hmu ta mahai, an tia.
25 Jisua khan an kuang, “Mi’ntohaio, deipuhai thu’nsîr tinrêng iamna tianga beng sêthaio! 26 Krista’n kha thil kha tuangin a roiinpuinaa a lût hrang mo ni ma?” a tia. 27 Khanchu, Mosia ata irphutin deipu murdi thu suiin Pathian Lekha thua, a thurchi irziakna hmun tina a hrilfiah pehaia.
28 An ifena hrang khua an tung tônin, ama chu fe mai hrang angin an langa. 29 Chong bâiin an chela, “Kin kuang riak sa ta roh, an hnung ok tâk, misa khom tâk hrang a ni ta, a inthim hrang tâk kêng,” an tia. Khanchu an kuang riak hrangin a lût tâka. 30 Zân bu an hong ot suama, bai a lâka, sat a vura, a khoia an kuang a pêka. 31 An mit kha a hong vâra, a hmêl an inhriat tâka; ama khom an mit hmua ar hmang pat ta. 32 Anni’n, “Lampuia a ni chongpui laia Pathian Lekha thuhai a ni hril lai khan, ei milung a hong vâr ual mo ni ma?” an irtia. 33 Khanchu, an thoia, Jerusalema an kîr nôka, sômhleikhathai le an rualhai omkhôm kha an hong hmua. 34 “Rengpa chu a hong thoi nôk ngêt a ni, Simona kuang khom a inlâr kêng,” an lei tia. 35 Anni khom khan lampuia thil hong tung le bai a khoia ama an inhriat tâk dânhai kha an insîra.
Irchutirhai kuanga Jisua inlârna thu
36 Kha thu kha an insîr laiin Jisua ngei kha an laia a hong ngîra, an kuang, “Nin chunga irtharngamna om ri se,” a tia. 37 A’rkhêl an tia an chi tak taka, irtha an ihmu an sôna. 38 Ama khan, “Ithoa mo khaang dôra nin ichi? Itina mo nin irngaitua inbuai tâk? 39 Ki kuthai, ki kezaphahai hi en u ta, keima ngei kha ki ni hi te. Ni tôn unglân, en roi; nin ni ihmu ang hin irtha’n taksa le ru nei mak e,” a tia. 40 An sîr zoiin a kuthai a kezaphahai an entirhaia. 41 An lôm hraia chu, la iam ual mahaia, ar khêl an ti lai takin an kuang, “Hin imo fâkrua nin inei?” a tia. 42 Nga, rô inhmin bong khat an pêka, 43 A lâka, an makunga khan a fâk tâka. 44 Jisua’n an kuang, “Nin laia ki om lai khan hi thuhai lele hi nangni ki hril ngai khate. Mosia Dân bua, Deipu lekhabua, inpâkna hlabuhaia ki Thurchi an lei irziak, hong tung indik ngêt hranga nangni ki lei inhrilhai kha a ni,” a tia. 45 Khanchu, Pathian lekha thu inhre thiam thei hrangin an lungrîl an vâr pehaia. 46 An kuang, “Krista khan tuang ngêt a ta, sûn thum ni’n mithi lai ata thoi nôk a ti, 47 Ama irhmingin irletna le sual ngaidamna thu Jerusalem ata nam tin laia insîr la ni a ti. 48 Hi thilhai hi an hriattuhai nin ni. 49 Irngai u ta, Pa chonginkung chu nin chunga zuang tîr ki ti. Chung tiang ata sinthotheina nin chunga a chum mâka chu, khopuia hin lei om mai roi,” a tia.
Irvâna Jisua lâk a ni
50 Khan, Bethani dâi dênin a hruai suakhaia, a bân an phara, anni kha sat a vurhaia. 51 Khaanga sat a vur lai khan a’rsenpuihaia, ama chu irvâna hruai kâiin a om tâka. 52 Khan, ama chu chubai an mûka, raifân takin Jerusalema an kîr nôk tâka, 53 khan Tempila khan Pathian kuang lômthu insîrin an zoro murdi an hmang ngai.
1 A phut taka Thu a om, Thu kha Pathian kuang a oma, Thu kha Pathian a ni. 2 Ama kha a phut rengata Pathian kuang a om. 3 Ama hmanga itinrêng siam a nia; thil siam rêng rêng ama isiam loi ite om mah. 4 Amaa hringna a oma, kha hringna kha mihriamhai vârna a ni. 5 Vâr kha inthima a zuang vâra, inthimin kha kha inhre mah.
6 Pathianin mi inkhat a zuang tîra, ar hming chu Johana a ni. 7 Ama kha vâr thu inhriattir hranga zuang a ni, mi murdi’n a thu inhriattir kha an iamna hrangin. 8 Ama kha chu vâr ni ma, vâr thu kha inhriattir hranga zuang a ni ual.
9 Kha vâr kha vâr dik tak, rammuala zuanga mi tin zuang invârtu chu a ni. 10 Rammuala a oma, ama hmanga rammual kha siam a nia, rammualin ama kha len hre ma. 11 Ama ram ngeia a zuanga, aniachu ama mihaiin lei lôm mahai. 12 Mi senkhatin chu an lei lôma, ama iamtu murdihai chu an kuang Pathian nâihai ni theina hrang a pêka. 13 Kha mihai kha thisena irzir ni mahai, pasal nuamlama irzir khom ni mahai, Pathian ata irzir an ni.
14 Khan, Thu chu mihriam a zuang changa, ei laia a zuang om tâka. A roiinpuizia ei hmu, Pa nâi khât neisun roiinpuina chu, lungkham le thu takin a sip.
15 Johana’n a thurchi a hrila, “Ki hnunga zuang hrang chu ‘keima nêkin a roiinpui ual’ ki iti kha, hi mi hi a ni, ki om mâna om tâk a nia,” tiin a khêka. 16 A lungkhamna irkip ei dong seng, lungkham chunga hril thei ban lungkham nôkna. 17 Dân kha Mosia hmanga pêk a nia, lungkhamna le thutak chu Jisua Krista zâra zuang tung a ni. 18 Tukhomin Pathian hmu ngai mahai; Pa Nâipa nei sun, a rôpsuama om khan, a thurchi an hriattir ta a ni.
Baptistu Johana thu inhriattir
19 Jerusalem khuaa Judahaiin, “Tu mo ni ini?” tia irdon hrangin Ochaihai le Levia irchihai an tîrhai lai khan, Johana’n hi thu hi a hong inhriattir a ni. 20 Khan Johana’n ip loiin, “Kei chu Krista chu ni ma ung,” tiin fel takin an puang ta. 21 Khante, “Tu mo ni ini? Elija mo ni ini?” tiin an irdona. Ama’n a sâm nôka, “Ni ma ung,” a tia; “Deipu kha mo ni ini?” an tia. “Ni ma ung,” tiin a sâm nôka. 22 Anni’n, “A ni tîrtuhai kin sâm theina hrangin tu mo ni ini, nin hril ta, ni thurchi imo insîr hrang ni inei?” an tia. 23 Johana’n, deipu Isaia chong hmangin a sâm:
“Keima hi ramchâra ‘Rengpa lampui siam roi tia khêktu kha ki ni,’ ”
a tia.
24 Kha palai, Farisaihai hong itîrhai khan Johana an irdon nôka. 25 Anni’n, “Krista mani, Elija mani, deipu mani lua ni ni no’n teh, ithoa mo mi ni ibaptis ngai?” tiin an irdon nôka. 26 Johana’n, a sâma, “Keiin chu tuiin ki baptisa, khannisian nin laia mi inkhat, nin inhriat loi a ingîr a ni. 27 Ama kha ki hnunga a honga, a kekok hrui sût inruk lua ni ma ung,” a tia.
28 Khahai kha Bethani khua, Jordan vadung râl, Johana a baptisna ngai hmun an iti a ni.
Pathian Belrate chu
29 A tûka chu Johana’n Jisua khan ama a hong ipan kha a hmua; “En u ta, Pathian Belrate, rammual sual pêl hrangtu so,” a tia. 30 So mi so a ni, “Ki hnunga hong hrangtu chu, keima nêka roiinpui ual, ki om mâna om tâk, ki ititu chu. 31 Ama kha inhre ma unga; khannisianlân, Israelhaiin ama an inhriat theina hrangin kei hi tuia baptis-in ki ihong a ni,” a tia.
32 Hi hi Johana’n thu an hriattir dân chu a ni, “Irtha kha vasu angin irvân ata a zuang suaka, a chunga chuang ki hmua. 33 Khan khomin, keima’n chu lan hre ma ung, nikhomsian, tuia mi baptis hranga ni tîrtu, Pathian khan Irtha kha irvân rengata zuang chumin vasu anga zuangin, tukhôk chunga chum mani hmu ni ti, kha kha Irtha Irthianga mi ni ibaptis hrangpu kha a ni, ti a ni lei inhril tâka,” a tia. 34 Johana’n, “Kha kha ki hmu tâka, hi mi hi Pathian Nâipa a nih ti nangni kin hriattir a ni,” tiin.
Irchutir masa takhai
35 A tûk nôka chu Johana kha a irchutirhai inhni leh an ngîra. 36 Jisua chai vêl kha an thîra, “En u ta, Pathian Belrate so,” a tia. 37 A irchutir inhnihaiin a insîr kha an inhriatin chu Jisua kha an zui tâka. 38 Jisua kha a hong irheia, ama an hong izui kha a hmua, an kuang, “Imo nin izong?” a tia. Anni’n, “Rabbi, (Kha kha irchutirtu tihna a ni) khôn mo ni iom?” an tia. 39 “Hong unglân hmu nin ti” a tia. Khanchu a kuang an fe tâka, a omna kha an va hmua, kha nia khan a kuang an om tâka. Khohloi dâr minli vêl a ni.
40 Johana thu’nsîr inhriata Jisua zuitu inhnihai laia inkhat kha Andria, Simon Petera urêng a nia. 41 Ama khan a masa taka a urêng Simona a va hmua, “Mesia, (Kha kha Krista tihna a ni) kin hmu ta,” a va tia. 42 Khan, Jisua kuang a hong hruaia. Jisua’n ama a lei ena, “Johana nâipa, Simona ni ni, Kifa nang ti ta an ti”. (Kifa chu Petera ti le hmunkhat, a omzia chu lungpui tihna a ni.)
Jisua’n Filipa le Nathanaela a koi thu
43 A tûka chu Jisua’n Galili rama fe a tuma, Filipa a hmua, a kuang, “Ni zui roh,” a tia. 44 (Filipa kha Andria le Petera omna khua, Bethsaida khuaa mi a ni.) 45 Filipa’n Nathanaela chu a hmua, a kuang “A thurchi Dân lekhabua Mosia’n a’rziak, deipuhai khomin an irziak kha ama kin hmu ta, Nazaret Jisua, Josefa nâipa kha,” a tia. 46 Nathanaela’n, “Nazaret khuaa thil sa a isuak thei ma ni?” a tia. Filipa’n, “Hongin lân en roh,” a tia.
47 Jisua’n Nathanaela hong a hmu’n chu a thurchi a lei insîra, “En u ta, Israel mi dik tak, mi huang tumna rêng rêng nei loi so,” a tia. 48 Nathanaela’n, “Itin mo ni ni inhriat,” a tia. Jisua’n, “Filipa’n nang a koi mâna theipui kung bula ni om lai khan nang ki ihmu tâk kêng,” a tia. 49 Nathanaela’n, “Rabbi, Pathian Nâipa ni ni. Israelhai rêng inlaltak ni ni kêng,” tiin a sâma. 50 Jisua’n, “Theipui kung bula nang ki hmu kêng ni kuang ki ti sikin ni ni iam mo? Hi nêka thil roiinpui ual hi la hmu ni ti,” a tia. 51 Khan, a kuang, “Thudik tak nang kin hril, irvân irhonga vântirtônhai Mihriam Nâipa chunga a chum le a kâi la hmu nin ti,” a tia.
1 Sûn thum nî’n chu Galili ram Kana khuaa irneina a oma, kha khan Jisua nu a om saa. 2 Jisua le irchutirhai khom irneinaa khan an fiala. 3 Uain ruk ta mahaia, Jisua nu khan a kuang, “Uain an irsam tâk kêng,” a tia. 4 Jisua’n a sâma, “Nupang ithoa mo ni hong irrol? ki zoro a la itung loi kêng,” a tia. 5 A nu khan sinthotuhai kuang, “Nin kuang nangni a ihril lam ang takin tho zôi zel roi,” a tia. 6 Judahai irsûkinfâi dân angin, lung tuibêl kiruk oma, litar irzakhat keng theina chit a ni, kha lung tuibêlhai kha an doa. 7 Jisua’n an kuang, “Tui bêlhai hin tui sung roi,” a tia. A rêngin an sung insiphaia. 8 Khanchu an kuang, “Thâl unglân, hruaithea hruaitu kuang fepui roi,” a tia. Khanchu an fepui tâka.
9 Khaang khan tui kha an hong chôia, uain a hong chang tâka, hruaithea hruaitu khan tui uain chang kha a’rtema, uain kha kho taka mani inhre maka; (khannisianlân tui thâltuhai khan chu an inhriata,) moineitu kha a koia, 10 a kuang, “Mi tinin uain sa an sem masaa, tamtak an in zoiin a saloi ual an sem ngaia, nang chu atûn ten uain sa ni la inei hi te,” a tia. 11 Jisua’n hi sinirkhêl a itho phutna hi Galili rama Kana khuaa a thoa, a roiinpuizia an langtira, a irchutirhai khan ama an iam tâka.
12 Kha zoi hnunga chu, Jisua kha a nu le a urênghai le a irchutirhai le Kapernaum khuaa an zu fea, kha khan nikhua tômte vai an châm.
Tempil irthiangtir
13 Judahai Ferkân Kût zoro a hong tung vâng vâng tâka, Jisua kha Jerusalema a hong fea. 14 Tempila khan sehrât, belra, phervalihai an izuar kha a hmuhaia, sum thûltuhai an maichâm kôla toi a hmu saa. 15 Zêmna hruihrual ang hi a siama, an bêlrahai, sehrâthai, sa dang murdi leh khan an hnot suakhai zita; sum thûltuhai maichâmhai kha a naminrîla, an poisahai kha an thekpai pehaia. 16 Khanchu phervali zuartuhai kuang khan, “Hi hi la suak roi, Ka Pa in hi bazar hmunin siam no roi,” a tia. 17 A irchutirhai khan, “Ni in hranga ki sathnem irngaina khan mi fa zoi a ti,” tih Pathian lekha thu kha an inhriat suak nôk tâka. 18 Judahai khan an hong irkôka, “Hi thilthotheina ni nei ti entîrna hrangin i irsinsiana sinirkhêl mo ni ni inentir hrang?” an tia. 19 Jisua’n, “Hi Tempil hi set unglân, sûn thum sûngin indingtir nôk ki ti,” a tia.
20 Judahai khan, “Sûn thum sûngin ni indingtir nôk hrang mo? Hi Tempil sinna hranga hin kum sômminli kiruk a inang kêng,” an tia.
21 Khannisianlân, Jisua’n tempil a iti hi ama takpum a ni. 22 Khasikin thina irthokin a thoinôkin chu, a irchutirhaiin hi thu hi a lei insîr zoi tâk ti an inhriat suaka, Pathian Lekha Thu le Jisua thu insîr tâkhai kha an iam tâka.
Jisua’n mihriam nitnazia an hriat
23 Ferkân Kût Jerusalema a om laia Jisua’n irsinsiana sinirkhêl a ithohai kha an hmua, mi tamtakin ama kha an iam tâka. 24 Khannisianlân, Jisua’n anni kha iamhai maka, mi murdi an hriat infelhai tak tak sikin. 25 Mi thurchi tûte’n inhril ngai mahai, an milung sûnga om murdi kha a inhriat zit a ni.
1 Mi inkhat ar hming Nikodema a oma, Judahai hruaitu, Farisai pâla mi a ni. 2 Zân khat chu Jisua kuang a honga, a kuang, “Rabbi, Pathian itîr irchutirtu ni nih ti kin hriat, Pathian an chunga a om no’n chu tukhomin ni irsinsiana sinirkhêl tho ang hi tho thei no nihai,” a tia. 3 Jisua’n a sâma, “Thudik tak nang ki hril, mi tukhom a suakinthar no’n chu Pathian Ram hmu thei no ni,” a tia. 4 Nikodema khan, “Mi a tar hnungin itin mo a isuakinthar nôk thei hrang? A nu sûnga lûtin lak suak nôk thei ta no nia?” a tia.
5 Jisua’n, “Thudik nang hril ki ti, mi tukhom tuia le irthaa an suak no’n chu Pathian Rama lût thei no ni. 6 Taksaa irzir ka chu taksa mi a nia, irthaa irzir ka chu irthaa mi a ni. 7 Ni isuak nôk hrang kêng ki iti hi ar khêl ti no roh. 8 Phâivua khoa khom a nuam nuamna a tho ngai; ar hâi nin hriat, khannisianlân, kho tianga hong mani tih le kho tiang mo a ife nôk hrang ti chu inhre mak che. Tukhom Irthaa suak ka chu khaang kha a ni,” a tia. 9 Nikodema’n, “Kha kha itin mo a ini thei hrang?” a tia. 10 Jisua’n a kuang, “Israelhai irchutirtu ni nia, kha kha ni inhriat loi mo? 11 Thudik nang hril ki ti, kin inhriat kha kin insîra, kin ihmu kha kin inhriattir ngai, tûte’n kin thu inhriattir pom nuam mak chêi. 12 Rammual thil ki insîr lua iam mak chêia, irvân thil len vâng te nangni hril inlân itin mo nin iiam thei hrang? 13 Tukhom irvâna kâi ngai maka, Mihriam Nâipa, irvân ata zuang chumtu vai ti no chu,” a tia.
14 Mosia’n ramchâra mirûl a inkhâi ang khan Mihriam Nâipa hi inkhâiin a iom hrang a ni. 15 Tukhom a iam murdi chu ama sika kumtuang hringna an nei theina hrangin. 16 Pathianin rammual lung a thung tak taka, khanchu, a Nâipa khât neisun a pêka, ama iam tâk ka chu irhmang loia kumtuang hringna an neina hrangin. 17 Pathian khan rammual thiamloi inchang hrangin a Nâipa rammuala tîr maka, ama sika rammual saninhringa an om theina hrangin a itîr kêng a ni.
18 Tukhom Pathian Nâipa iam ka chu atûn ata thiamloiin om mahaia, tukhom Nâipa iamloi chu atûn ata thiamloiin an iom tâk a ni. Pathian Nâipa khât kha an iam no sikin. 19 Thiamno an chang dân kha hiang hin a ni; vâr kha rammuala a zuanga, khannisianlân, mihaiin vâr nêkin chu inthim kha an nuam ual, thil sual an tho sikin. 20 Thil sual tho murdi’n vâr an khôkmâk ngaia, vâra hong mahai, an sinthohai an lang nona hrangin. 21 Sin dik thohai murdi’n vâra an hong ngai, an sinthohai kha Pathian thu zôma tho an nih ti an langna hrangin.
Jisua le Baptistu Johana
22 Kha zoi hnunga chu Jisua le a irchutirhai kha Judai rama an fea. Kha khan Jisua an kuang a om maia, a baptis-hai ngaia. 23 Johana khomin Salem kôla Ainon hmuna a baptis thiaia. Kha hmuna khan tui a tam sikin, mipuihai a kuang an fea, a lei baptis-hai ngaia. 24 Kha zoro lai khan Johana kha intângna ina la khum mahai.
25 Johana irchutir senkhathai le Juda inkhat irsûkinfâi thua an lei irsêl tâka. 26 Khanchu, Johana kuang an fea, “Irchutirtu, Jordan râl nisua tianga ni kuanga om, thurchi ni insîr ngai kha ni lan hriat mo? Khapa khan mi a baptisa, mipuiin an pan sup sup ngai,” an tia. 27 Johana’n a sâma, “Pathianin a pêk no’n chu tukhomin ite dong thei mahai. 28 ‘Kei chu Krista ni ma unga, a mân tianga fe hranga tîr ki ni’ ki iti kha nangni ngei ki thu inhretuhai nin ni. 29 Moi pasal chu moineitu kha a ni, moi neitu rual, a thu hong uksak maitu khan moineitu irhai an hriatin a lôm ngai, khaang khan kei khom ki lôm ar kip tâk a ni. 30 Ama chu roiinpui tîr tîr hrang a nia. Kei chu chîn tîr tîr hrang ki ni,” a tia.
Irvân ata zuang chum
31 Chung tiang ata zuang chumtu kha chu mi tin tin nêka an chung tak a ni; irnênga suak chu irnênga mi a nia, irnêng thil an sîr ngai; irvân ata zuang chu mi murdi nêka inchung tak a ni. 32 Thil a ihmu le a inhriathai kha an sîra, khannisianlân, tukhomin a thu inhriattir kha pom mahai. 33 Tukhom a thu inhriattir pom chu mi dik a nih ti pom indet a ni. 34 Pathian itîr khan Pathian thu an sîr ngai, Pathianin ama Irtha irkip a pêk sikin. 35 Pa’n Nâipa lung a thunga, a kuta itinrêng a sia ta. 36 Tukhom Nâipa iam chu kumtuang hringna an nei ta; Nâipa thu zôm loi chu hringna nei no nihaia, an chunga Pathian ningmur kha a om mai a tia.
1 Johana nêkin Jisua’n irchutir tam ual a siam le a baptis-hai nôk tih Farisaihaiin an inhriat tih Jisua’n an hriatin chu, 2 (A dik takin, Jisua’n chu tûte baptis maka, a irchutirhaiin mi an ibaptis ngai a ni.) 3 Khanchu Judai ram a suaksana, Galili rama a kîr nôk tâka. 4 Samari ram kha hro hrang a nanga.
5 Samari khua inkhat, Sukar an iti kha a va tunga, kha kha Jakoba’n a nâipa Josefa ram a ipêk kôla om a ni. 6 Jakoba tuikuang khom khatak khan a oma. Sûn lai tak a hong ni’n Jisua kha a sân a sôl sikin tuikuang kôla khan a toi chota. 7 Samari nupang inkhat tui chôi hrangin a honga. Jisua khan, “In hrang ni pe roh,” a lei ti pea. 8 A irchutirhai kha fâk rua ircho hrangin khuaa an fe tâk a ni. 9 Nupang khan, “Nang Juda mi ni nia, keima Samari nupang ki nia, ithoa mo in hrang ni ni inghi?” a tia. (Judahaiin Samari mihai kha itea irhmang irhlômpui ngai mahai).
10 Jisua’n a sâma, “Pathian thilpêk le ni kuang, ‘In hrang ni pe roh,’ tihtu hi inhre’n lân chu, a kuang ni inghi lem hrang a ni, ama’n chu tui hring nang a ipêk hrang a ni,” a tia. 11 Nupangnu khan, “Ka pu, kaisuana hrang ite lak nei mak chea, tuikuang a inthûk tia le te, kho taka mo tui hring ni inei? 12 Kin pu Jakoba nêkin ni iroiinpui ual ma ni? Ama khan hi tuikuang hi a ni pêka, ama le a nâihai le a sâ vâihai khomin hitaka hin an in ngai,” a tia. 13 Jisua’n, “Tukhom hi tui in murdi chu an tui lan hrâl nôk a ta; 14 Tukhom an kuanga ki ipêk hrang tui in ka chu an tui inhrâl nôk ta no ni. An kuang ki ipêk hrang chu an phîng sûnga tuihnâr hong chang a ta, kumtuang dênin kang ta no ni,” a tia.
15 Nupang khan, “Ka pu kha tui kha ni pe ro, ki tui an hrâl ta nona hrangin le hi ten tena tui chôi ki zuang ta nona hrangin,” a tia. 16 Jisua’n, “Ni pasal va koiin lân, hong kîr nôk ro,” a tia. 17 Nupangnu’n, “Pasal mo ki neia,” tiin a sâma. Jisua’n, pasal nei ma ung ni iti hi, ni ti indik; 18 pasal ringa ni nei tâka, atûna ni inei khom hi ni pasal tak ni ual maka, “Ni iti kha a dik,” a tia. 19 Nupang khan, “Ka pu, deipu ni nih ti kin hriat ta. 20 Kin irchibulhaiin chu hi tânga hin Pathian an biak ngaia, nangni’n chu, ‘Mihaiin Jerusalema ngêt Pathian an ibiak hrang a ni’ nin ti ngaia,” a tia.
21 Jisua’n, “Nupangnu, ni iam roh, hi tânga kher no khom, Jerusalema kher no khom Pa chubai nin mûkna hrang zoro tung a ti. 22 Nangni Samarihaiin chu nin inhriat loi chubai nin mûka, keini Judahaiin chu kin inhriat kêng chubai kin imûk ngai; saninhringna chu Judahai kuang ata hong suak a nia. 23 Khannisianlân, a zoro la tung a ti, atûn khom a tung thiai ta, Pathian chubai mûktu tak takhaiin irtha le thutakin Pa chubai mûk an ti, khaang mi kha Pa’n ama chubai mûktu hrangin a izong a ni. 24 Pathian chu Irtha a nia, ama chubai mûktuhaiin Irtha le thu takin chubai an imûk hrang a ni,” a tia. 25 Nupangnu’n, “Mesia, Krista an iti kha, zuang hrang a nih ti kin hriat. A zuang tika chu itinrêng ni la hril a ti,” a tia. 26 Jisua’n a sâma, “Keima, nang a chongpuitu hi Ama kha ki ni,” a tia.
27 Kha lai taka khan irchutirhai kha an hong tung nôka, nupangnu a ichongpui kha an hong hmu’n chu, a sân ar khêl an tia. Khannisianlân, tukhomin, “Imo ni izong? Ithoa mo nupangnu kha ni ichongpui?” khom ti mahai. 28 Nupangnu’n a tuibêl a mâksana, kho sûng tiang a kîr nôka, kho sûnga mihai kuang khan, 29 “Mi inkhat ki itho tinrêng ni hril zit theitu a oma, hong unglân en u ta, Krista mo ni thei ni?” a tia. 30 Khanchu, kho sûng ata kha an suaka, Jisua kuang an fea. 31 Kha kâra khan irchutirhaiin “Irchutirtu, fa roh,” tiin an ngêna. 32 Ama khan, “Nin inhriatloi bu nêk hrang ki nei,” a tia. 33 Irchutirhaiin, “Tu mo khatin bu an hong ipêk ma ni?” tiin an irti irhlôma.
34 Jisua’n an kuang, “A ni tîrtu nuamlam sin le a sintho zoi hi ki bu a ni. 35 Nangni’n bu âtna hrangin ‘Tha minli a la om,’ nin iti ngai mo ni ma? Thîr unglân, loihai hi en u ta, buhai chu ât thei zôi zel hrangin a hmin ta tih nangni ki hril. 36 Bu âttu chu a hlo a hmu ngaia, kumtuang hringna dêna om hrangin a ra a bûm ngai, a phuntu le a âttu an lôm irrual theina hrangin. 37 ‘Mi inkhatin a tûa, mi dangin a ât ngai,’ ti hi a dik a ni. 38 Nin sin sôl loina ra ât hrangin nangni ki itîr hi, mi dangin an sina, an isinna ra kha nin i-ât a ni,” a tia.
39 Nupangin, “Ki sintho tinrêng a ni hril thei zit,” a ti sika khan, kha khuaa Samari mi tamtakin Jisua an iam tâka. 40 Samari mihai kha Jisua kuang an hong tungin chu, an kuang la châm hrangin an ngêna, kha khuaa khan sûn hni a châm tâka. 41 A thu an inhriatin chu mi dang tamtak khomin an iam tâka. 42 Khan, nupang kuang khan, “Atûn chu ni thu’nsîr sika iam ni ta ma unga, kei ni ngêtin a thu’nsîr kin inhriata, hi mi hi rammual saninhringtu a ni ngêt ti kin inhriat ta,” an tia.
Jisua’n milian nâipa an damtir
43 Sûn hni hnunga chu khatak ata Galili rama a fe tâka. 44 Jisua ngêtin, “Deipu kha ama ram tiang chôiirsângin om ngai mah,” a lei ti ngaia. 45 Galili ram a va tungin chu, Galili mihai khan a sân an lei lôma; Jerusalema Ferkân Kûta an fe laia a sintho tinrêng an hmu sikin.
46 Jisua Galili rama Kana khuaa tui uain an changtirna kha a va tung nôka. Khan, Kapernaum-ah sorkâr mi liantak inkhat nâipa damloi a oma. 47 Khapa khan Jisua, Judai ram ata Galili rama a hong tih an hriatin chu a kuang a hong fea, a nâipa thi vâng vâng indam hrangin Kapernaum-ah fe hrangin a fiala. 48 Jisua’n a kuang, “Thilirkhêl le sinirkhêl tho nin hmu no’n chu iam viat no chin ni,” a tia. 49 Khapa khan, “Ka pu, ki nâipa kha a thi mân hong hrâm roh,” a tia. 50 Jisua’n, “Fe ta roh; ni nâipa kha a dam ta,” a tia. Ama khan Jisua thu’nsîr kha a iama, a fe tâka. 51 A kîr nôk laiin, a siahlohaiin an lei dona, “Ni nâipa kha a dam tâk,” an lei tia. 52 A nâipa lei dam zoro kha ar donhaia. Anni khan, “Mizân sûn dârkhata khan an khur a boi pe ta,” an tia. 53 Khanchu, a pa khan Jisua’n a kuanga, “Ni nâipa a dam tâk,” a ti lai tak kha a nih ti an hriat tâka. Kha hnung chu, ama le a in mihai, an rêngin an iam zit tâka. 54 Kha kha Jisua Judai ram ata Galili rama a fe hnunga sinirkhêl a itho voihnina a ni.
1 Kha zoi hnung chu Judahai kût inkhat a oma, Jisua khom Jerusalema a hong fe saa. 2 Jerusalema khan Belra mikot kôla dîl inkhat, Hebrai chonga Bethzatha an iti kha a oma; khataka khan bokrop ringa a oma, 3 Kha khan damloi tamtak, mitchohai, ke’nbâihai, zenginthihai an oma. 4 Rengpa itîr vântîrtônin tui a zun chânga. Tui a châng zoi le dîla irchôm masa tak kha i ang natna khom ni sian, an dam ngai sikin tui châng nghâkin an iom a ni. 5 Mi inkhat, kum sômthum kiriat damloi khom a oma. 6 Jisua’n khataka a zâl kha a hmua, zoro sôt tak damloiin a om tah ti an hriata, a kuang, “Dam mo ni nuam?” a tia. 7 Damno khan, “Ka pu, tui a châng zoi leh dîla ni siatu hrang tukhom nei ma unga, lût ki tum sûngin mi dangin an ni khêl ngai a ni,” a tia. 8 Jisua’n, “Thoiin lân, ni puantha lan lân ke’n fe ta roh,” a tia. 9 Kha pa kha irningloiin a hong dam zôi zela; a puantha kha a lâka, ke’n a fe tâka. kha nikhua kha Sabat nî a ni.
10 Judahaiin a damtu kuanga khan, “Sabat nî a ini kêng; ei Dânin ni puantha ni ichôi irthiang mah,” an ti pea. 11 Ama khan a sâma, “A nin damtirpu khan, ‘Ni puantha lan lân, ke’n fe ta roh,’ a ni ti khate,” a tia. 12 Anni’n, “Ni puantha lan lân, ke’n fe roh, titu kha tu ma ni?” an tia. 13 A hong damtu khan tu mo a ini lak inhre maka, kha khan mipui tamtak an oma, Jisua laka chu a fe pat tâka.
14 Kha zoi hnunga chu Jisua’n Tempila a hmua, a kuang, “Hi, ni hong idam tâk hi; sual nôk ta no roh, khano’nchu, ni chunga thil saloi ual hong tungna ti,” a tia. 15 Kha pa khan ama indamtirtu kha Jisua a nih ti Judahai kha a va hril tâka. 16 Khasika khan Judahaiin Jisua kha deng an intheitir irphut tâka, Sabat ni’n mi an damtir ti sikin. 17 Jisua’n an kuang, “Atûn ten Ka Pa’n sin a tho maia, kei khomin ama angin ki isin a ni,” a tia. 18 Khasika khan Judahaiin ama kha that an tum nôk uala, Sabat nî a insiat vai ni loiin, Pathian kha “Ka Pa a ni,” a tia Pathian angin ar bê sikin.
Jisua irchamneina
19 Jisua’n a sâmhaia, “Thudik tak nangni ki ihril hi, Nâipa’n ama thu’n ite tho thei mah; Pa sintho a ihmu ti no chu; Pa sintho ang kha Nâipa khomin a itho ngai a ni. 20 Pa’n Nâipa lung a thunga, a sintho tinrêng an entira. Hi nêka thil roiinpui ual hi lan entir a ti, ar khêl nin tihna hrangin. 21 Pa’n mithihai a kaithoia, a inhring ang dênin Nâipa khomin a inuam murdi chu an hringtir ngai. 22 Pa’n tu chungthu khom rêl pe ngai mah, Nâipa kuang roirêlna kha a inhlan zit a ni, 23 mi murdi’n Pa an imahrip angin Nâipa khom mahrip an ti. Tukhom Nâipa mahrip loi chu ama tîrtu Pa khom an imahrip loi a ni.
24 “Thudik nangni ki hril, tukhom ki thu inhriata, a ni tîrtu iam chu kumtuang hringna a nei ta, thiamno changin om ta no nia, thina ata hringnaa a ilût tâk a ni. 25 Thudik nangni ki hril, a zoro tung a ti, atûn khom a tung thiai ta; kha tika chu mithihaiin Pathian Nâipa hnukirhai inhriat an ta, an hriathai kha hring an ti. 26 Pa chu hringna hnâr a ini angin Nâipa khom kha hringna hnâr nina a ipêk a ni. 27 Mihriam Nâipa a ni sikin roirêl theina a ipêk sa a ni.
28 “Kha kha ar khêl ti no roi, thâna mithi murdi’n a hnukirhai an inhriat zoro la tung a ti, 29 Khan, thân ata hong suak an ta, sin sa thotuhai chu hringna neiin hong thoi nôk an ta, sual thotuhai chu thiamloi chang hrangin thoi nôk an ti.
Jisua inhriatpuituhai
30 “Ki bingin ite tho thei ma ung; Pathianin a ni ihril ang takin roi ki rêla, ki roirêl khom a dik, keima nuamlam tho tum loiin a ni tîrtu nuamlam vai tho ki tum ual sikin. 31 Mâni thurchi inhriattir ni inlân, ki thu inhriattir kha dikloi a ni. 32 Khannisianlân, mi dang ki thu inhriattirtu a om, ki thu a inhriattir kha a dik ti khom kin hriat. 33 Johana kuang mi nin tîra, ama’n thutak a lei inhriattir a ni. 34 Thu ki inhriattir hi mihriama irthoka ni maka; khannisianlân, saninhringa nin om theina hrangin hi thu hi ki ihril a ni. 35 Johana chu meiser chok tak le vâr tak ang a nia, a vâra raifân taka hong om chot khom nin nuama. 36 Khannisianlân, Johana thu inhriatpuina nêka inhriatpuitu poimo ual ki nei, Pa’n sintho hranga a ni ipêkhai, atûna ki ithohai hin Pa’n keima a ni tîr ngei a nih ti an hriattir. 37 Pa ni tîrtu ngei khom khan ki thu an hriat ta a ni. Nangni’n itiklai khom a hnukirhai inhre ngai mak chêi, a hmêl khom hmu ngai mak chêi. 38 A thu khom nin milunga vong chian mak chêia, a itîrtu hi nin iam no sikin. 39 Pathian Lekha Thu ngûk takin nin irchu ngai, a sûnga kumtuang hringna a om ti nin iam sikin. Kha Pathian Thubuhai khan ki thu inhriattirtu chu an ni. 40 Khannisianlân, hringna nei hrangin ki kuang hong nuam mak chêia.
41 “Mihriam inpâk zong ma ung. 42 Nangni kin hriat, nin milunga Pathian lungthungna zel nei mak chêi. 43 Ka Pa irchamin ki zuanga, khannisianlân ni lei lôm mak chêi; mâni irchamin tu mo khat zuang sianlân lei lôm nin ti. 44 Pathian rengata inpâkna dong tum loiin irpâkirhlôm nin nuama, itin mo nin iiam thei hrang? 45 Ka Pa kuang nangni hnôl ki ti sôn no roi. Nangni a hnôltu hrang chu Mosia a ni, nin iiam kha. 46 Mosia kha nin lei iam ni sian chu kei khom ni iam nin ta, ki thurchi kêng a irziak. 47 A thu irziak kha nin iam zel no’n chu ki thu’nsîr hi itin mo nin iiam thei hrang?” a tia.
1 Kha zoi hnung chu Jisua kha Galili dîl, (Tiberi dîl an iti) râla a kâi tâka. 2 Damloihai chunga sinirkhêl a ithohai an hmu sikin mipui tamtakin an zuia. 3 Jisua chu tânga a kâia, a irchutirhai leh an toia. 4 Judahai Ferkân Kût kha anai tâka.
5 Jisua kha a hong irheia, mipui tamtakin ama an hong pan kha a hmua, Filipa kuang, “Hihai fâk khop hrang bai khôn mo ei irchôk hrang?” a tia. 6 (Kha kha Filipa fiana hranga a ihril a ni; a itho hrang kha chu a binga a lei inhriat chian a ni.) 7 Filipa’n a sâma, “Mi tinin tômte tea an dong chit hrang khom a duli irzahni man baiin khom ruk no nihai,” a tia. 8 A irchutirhai laia inkhat, Andria, Simon Petera urêngpa khan, 9 “Hitaka hin pasalte inkhat barli bai ringa le nga inhni nei a om; khannisianlân, hiang dôra mipui hrangin chu ite ni no ni?” a tia. 10 Jisua’n, “Mipuihai hi intoitir roi,” a tia. Kha hmuna khan hloisûl tamtak a oma. Mipuihai kha an toia, sângringa an ni. 11 Jisua’n bai kha a lâka, Pathian kuang lômthu an sîra, khataka toihai kha a semhaia; khaang dênin nga khom an ruk dôrin a semhaia. 12 An khopin chu a irchutirhai kuang, “Ite inchêk loi hrangin, a zôk kha se sabak roi,” a tia. 13 Khanchu an lâk khôma, barli bai tang ringa fâktuhai kuanga sem ban kha khamphulu sômhleihni an hrût insipa. 14 Mipuihaiin sinirkhêl a itho kha an hmu’n chu, “Hi mi hi deipu, rammuala zuang hrangtu kha a ni ngêt kêng!” an tia. 15 Khan Jisua’n nakhrâta chelin rênga siam an tum tih an hriatin; tânga a bingin a fe nôk tâka.
Tui chunga a fe
16 Khohloi a hong ni’n chu a irchutirhai kha dîla an zu fea, 17 Irkuanga an chuanga, Kapernaum tiang panin dîl kha irkân hrang an nia. Zân a hong inthim tâka, Jisua lak an kuang la hong tung maka. 18 Phâivua a sân a tho sikin tui a hong irsôna. 19 Kilometar ringa mani, kiruk mani vêl irkuang an vai zoia chu, Jisua’n tui chunga a fea irkuang a hong nâi kha an hmu’n chu; an chia. 20 Khannisianlân, ama khan an kuang, “Keima kêng ki ini, chi no roi,” a tia. 21 Kha hnung chu irkuanga khan an inchuangtira, irkuang khan an ipanna muang kha a tung zôi zel tâka.
Mipuihaiin Jisua an zong
22 A tûka, dîl râla mipui la omhai khan irkuang inkhat vai no chu irkuang dang om mah ti an hmua, Jisua kha a irchutirhai kuang irkuanga chuang sa maka, a irchutirhai kha an bing vaiin an fe tih an hriata. 23 Rengpa’n lômthu an sîr zoia bai an fâkna kôla Tiberi khua ata irkuang dang honghai kha an hong tung tâka. 24 Mipuihaiin Jisua le a irchutirhai chu, kha hmuna khan om ta mahai tih an hmu’n chu, irkuanghaia khan an chuanga Jisua zongin Kapernaum-ah an fe tâka.
Jisua, hringna bai
25 Mipuihaiin Jisua kha dîl râl dang tiang an va hmu’n chu, “Irchutirtu, itik kâra hi hin ni hong itung mo?” an tia. 26 Jisua’n a sâmhaia, “Thudik tak nangni ki hril, sinirkhêl nin hmu sika ni zong ni mak chêia, bai nin fâk khop sika ni zong nin ni hi te. 27 Bai a hek nôk thei irzûlin irvâk irvâk no unglân, kumtuang dêna om mai hrang hringna bu, Mihriam Nâipa’n nangni a ipêk hrang kha zong ual roi, Pathian, Pa khan ama a’rsinsia tâk sikin,” a tia.
28 Khanchu anni’n, “Pathian sin kin tho theina hrangin imo kin itho hrang?” an tia. 29 Jisua’n, “Pathian sin nin itho hrang chu hi hi a ni, a mi tîr hi iam roi,” a tia. 30 Anni khan, “Kin hmua kin iam theina hrangin i sinirkhêl mo ni itho hrang? Imo ni itho hrang? 31 Kin irchibulhaiin ramchâra mana kha an fâka, Pathian lekha thu’n irvân ata anni kha fâk rua a pêk a iti ang khan,” an tia.
32 Jisua’n, “Thudik tak nangni ki hril, irvân ata bai Mosia’n nangni pe maka; Ka Pa’n kêng irvân ata bai diktak kha, nangni a ipêk a ni. 33 Pathian bai pêk kha irvân ata zuang chuma rammual kuanga hringna pêkpu hi a ni,” a ti a. 34 Anni’n, “Rengpa, kha bai kha ni pe mai roh,” an tia.
35 Jisua’n, “Kei hi hringna bai chu ki ni; ki kuanga hong ka chu an phîngchâm no ni, tukhom a ni iam chu an tuiinhrâl ta no ni. 36 Nangni’n nin ni hmu hnung khomin ni la iam mak chêi tih nangni ki hril. 37 Pa’n ki kuanga a ni ipêk murdi chu ki kuang hong an ta, ki kuanga hong tâk ka chu inhnot suak no ning. Tukhom Pa hmu ngai mahai, Pa kuang ata zuang suak ni loi chu. 38 Mâni nuamlam tho hrang ni loiin a ni tîrtu nuamlam tho hrangin irvân ata zuang chum ki ni. 39 A ni tîrtu chu hi hi a ni; ama’n a ni ipêk murdi tukhom irhmangtir loia zoro hnungkhôna chu la kaithoihai nôk ki ti, iti hi. 40 Ka Pa nuamlam chu hi hi a ni; Nâipa hmua ama iam murdi’n kumtuang hringna an neia, anni kha zoro hnungkhôna chu kaithoihai ki ti,” a tia. 41 “Irvân ata bai zuang chum kha ki ni” a ti sikin, Judahai kha a chunga an chiar tâka. 42 “Hi pa hi Josefa nâipa, Jisua, a ini loi ma ni? A nu le pa khom ei inhriat khate. Itin mo ‘Irvân ata zuang chum ki ni,’ a iti tâk hi?” an tia.
43 Jisua’n a sâmhaia, “Chiar ta no roi. 44 Pa, a ni tîrtu’n a hong hruai no’n chu tukhom ki kuang hong thei no nihai; keima’n zoro hnungkhôna chu kaithoi ki ti. 45 Deipuhaiin, ‘Mi murdi Pathianin irchutir a ti,’ tiin an irziak. Mi tin, Pa thu inhriata, a kuang ata irchu chu ki kuang an hong ngai. 46 Tûte’n Pa an hmu tâk ki iti ni mah; Pa kuang ata zuangpu vaiin kêng Pa chu a ihmu. 47 Thudik tak nangni ki hril, tukhom a iamtu chu kumtuang hringna a nei ta. 48 Keima hi hringna bai ki ni. 49 Nin irchibulhaiin ramchâra mana an fâka, khannisian an thia. 50 Irvân ata bai zuang chum hi chu a fâk murdi’n thi no nihai. 51 Keima hi irvân ata bai hring zuang chum kha ki ni. Hi bai hi tukhomin an fâkin chu kumkhua’n hring mai an ti. Bai ki ipêk hrang chu ki taksa hi a ni, rammual hringna hranga ki ipêk kha a ni,” a tia.
52 Khanchu, Judahai kha a sate’n an irsêl tâka. “Itin mo hi pa hin a taksa fa hrangin a ni ipêk thei hrang?” an tia.
53 Jisua’n, “Thudik tak nangni ki hril; Mihriam Nâipa taksa nin fâk noa, a thisen nin in no’n chu nin bingin hringna nei mak chêi. 54 Tukhom ki taksa fâka, ki thisen intu chu kumtuang hringna a nei ta, keiin zoro hnungkhôna ama kha kaithoi ki ti. 55 Ki taksa hi bu tak a nia, ki thisen hi in rua tak a ni. 56 Tukhom ki taksa fâka, ki thisen in chu keimaa a om maia, kei khom amaa ki iom a ni. 57 Pa, hring khan a ni tîra, Pa sika khan kei khom ki hringa, khaang dênin tukhom a ni fâk chu keima sikin hring an ti. 58 Hi hi irvân ata bai zuang chum chu a ni, nin irchibulhaiin bai an fâka, an ithi nôk ang kha ni mah. Hi bai fâktu hi chu kumtuangin hring mai a ti,” a tia.
59 Hi thu hi Jisua’n Kapernaum Sinagoka ar chutir laiin a insîr a ni.
Kumtuang hringna thu
60 A irchutirhai laia tamtakin an inhriatin chu “Hi hi thu ngar tak a ni, tu’n mo an inhriat thei hrang?” an tia.
61 Kha thua khan a irchutirhai an chiar tih Jisua’n a lungrîlin an hriata, an kuang, “Hi thu hin nin milung a ini loi mo? 62 Mihriam Nâipa hi tiana a omna ngai tiang a kîr nin hmu tikin, itin mo nin itho hrang? 63 Hringna pêktu chu Irtha a ni; taksa kha kâmnang ma. Nin kuanga thu ki insîrhai hi Irtha le hringna a ni. 64 Kha tena khom khan senkhatin la iam nuam mak chêi,” a tia. Jisua’n a phut ata tuhai mo iam nuamloi hrang le tu mo ama incheltirtu hrang an hriat chian tâka. 65 Khasikin kêng nin kuang, “Pa’n fe theina nangni a pêk no’n chu tûte ki kuang hong thei mahai, ki iti kha,” a tia.
66 Kha tika chu a zuituhai laia tamtakin an mâksana, a kuang fe ta mahai. 67 Jisua’n sômhleihnihai kuang khan, “Nangni khom fe sa nin inuam ma ni?” a tia. 68 Simon Petera’n a sâma, “Rengpa, tu kuang mo kin ife hrang? kumtuang hringna thu ni nei khate, 69 Pathian mi irthiang kha ni nih ti kin iama, inhriat khom kin inhriat,” a tia. 70 Jisua’n a sâmhaia, “Nangni sômhleihnihai hi keima inthang mo ni mak chêi? Khan khoma nin laia inkhat chu Diabola a ni!” a tia. 71 Simon Iskariota nâipa Juda thu kha a insîr a ni, sômhleihnihai laia mi a ni nâkin ama incheltirtu hrang a ni.
1 Kha zoi chu Jisua’n Galili ram ar fanga, Judahaiin that an tum sikin Judai ram irfang nuam maka.
2 Judahai kairêng kût kha anai tâka. 3 Jisua urênghaiin chu a kuang, “Hi hmun hi suaksanin lân, Judai rama fe ro, ni irchutirhaiin ni sintho hi an hmu theina hrangin. 4 Tukhomin irhming inthang nuam sikin inrûkin sintho ngai mahai. Hi sin hi ni tho lele’n chu rammual hmua hin inlang ro,” an tia. 5 A urênghai khom khan iam mahaia.
6 Jisua’n an kuang, “Ki zoro la tung ma, nangni zoro chu itiklai khomin a tung mai. 7 Rammualin nangni khôkmâk thei maka, kei chu a ni khôkmâk, an sin thohai sa mah ti kin hriattir ngai sikin. 8 Kûta hong fe roi. Kei chu atûn chu la hong fe no ning; ki zoro a la tung no sikin,” a tia.
9 Khaang khan an sîra, Galili rama a la om maia.
Jisua kairêng kûta
10 A urênghaiin kût hmang hranga an kâi zoi hnung chu ama khom inrûkin a hong fe saa. 11 Judahaiin kût hmuna khan ama kha an zonga, “Khôn mo a iom?” an tia. 12 Mipui khan a chungchâng an insîr sup supa. Senkhatin, “Mihriam sa a ni,” an tia, senkhatin, “Ni mah, mipui a hruai insual kêng,” an tia. 13 Judahai an chi sikin, thangphuangin chu tukhomin a chungchâng insîr mahai.
14 Kût an hmang lai takin Jisua kha tempila a kâia, ar chutirhaia. 15 Judahai khan, “Hi mi hi irchu loiin itin mo lekha a ithei?” an tia, a sân ar khêl an tia.
16 Jisua’n anni kha a sâmhaia, “Ki thu irchutir hi keima irchutirna ni maka, a ni tîrtu irchutirna a ni. 17 Tukhom Pathian nuamlam tho nuam chu, ki thu irchutir hi Pathian kuang ata mo, keima iphuachôp moh ti inhria an ti. 18 Tukhom mâni iphuachôpa thu insîrtu chu mâni roiinpuina a izong a ni. Khannisian a tîrtu roiinpuina zongtu chu iam a oma, amaa dik loina rêng rêng om mah. 19 Mosia’n Dân kha nangni a ipêk loi ma ni? khannisianlân, nin laia tukhomin Dân chu zôm mak chêi. Ithoa mo ni that nin itum?” a tia.
20 Mipui khan an sâma, “Ramilhli ichel ni ni hi te; tu mo nang that nang tum?” an tia. 21 Jisua’n anni kha a sâma, “Thil inkhat ki thoa, nin rêngin ar khêl nin ti. 22 Mosia’n sertan thu nangni a pêk sikin (Mosia insuaktir ni mah, nin irchibulhai insuaktir kêng). Khasikin, Sabat nî khomin ser nin tan ngai. 23 Mosia Dân porinchetir loina hrangin Sabat nî khoma ser nin tan ngaiin te, ithoa mo Sabat ni’n mi kin damtir sikin, ki chunga nin ning nin inmurtir bîk? 24 Pên tianga inlang dân ngot enin ngaitua no unglân, a ni dân dik takin ngaitua ual roi,” a tia.
Hi mi hi Krista ma ni?
25 Jerusalema mi senkhathaiin chu, “Hi mi hi that an itum kha ni ma mo? 26 En u ta, thangphuangin thu an sîra, tukhomin sêl mahai. Kûthai hin ama hi Krista chu ni ngeiin an inhriat ta tihna mo a ini hrang? 27 Hi pa hi kho tianga mi mo a ini lak ei inhriata; Krista chu a zuang tika chu kho taka mi mo a ini tukhomin inhre no nihai,” an tia.
28 Jisua’n khaanga Tempila ar chutir lai khan hnukirhai inring takin, “Keima nin nin hriata, kho taka mi mo ki ini khom nin inhriat. Khannisianlân, mâni thua zuang ni ma ung. A ni tîrpu chu mi diktak a ni, ama chu inhre mak chêi. 29 keima’n chu kin hriat, a ni tîra, a kuang ata zuang ki ni sikin,” a tia. 30 Khanchu chel an tuma, khannisianlân, a zoro a la hong tung no sikin tûte’n tôn thei mahai. 31 Mipui laia tamtakin an iama, “Krista a zuang tika hi pa itho nêka tam ual sinirkhêl a zuang itho hrang ma ni?” an tia.
Jisua chel hrangin enkoltuhai tîr an ni
32 Farisaihaiin chu a chungchâng mipuiin inrûka an insîr sup sup kha an inhriata, Ochai inlalhai le Farisaihai khan Jisua chel hrangin enkoltuhai an tîr tâka. 33 Khanchu, Jisua’n, “Zoro sôtnote nin kuanga la om ki ta, kha zoiin a ni tîrtu kuang fe ki ti. 34 Nangni’n ni zong nin ta, ni hmu no chin ni, ki omna hranga fe thei no chin ni,” a tia.
35 Juda thuneituhai khan, “Khôn mo a fea, ei ihmu ta loi hrang? Ei mihai Grik khopuia fea, Grikhai irchutir a itum ma ni? 36 Nangni’n ni zong nin ta ni hmu no chin ni, ki fena hranga khom hong thei no chin ni, a itihai hi i tihna ma ni?” tiin an irti irhlôma.
Tui hring dunghai
37 Kût hnungkhôn taka, nikhua roiinpui taka khan Jisua a ngîra, hnukirhai inring takin a khêka, “Tukhom tuiinhrâl ka chu ki kuang hong sianlân, in ri se. 38 Pathian lekha thu’n a insîr angin, tukhom keima ni iam chu a milung ata tui hring dunghai zuang suak a ti” a tia.
39 Kha kha Irtha, ama iamtuhaiin an la idong hrang kha a insîrna a ni; Jisua kha roiinpuia a la om no sikin Irtha kha pêk a la ini loi a ni.
Mipui laia irsenna
40 Mipui laia senkhatin kha thuhai kha an inhriatin chu, “Hi pa hi deipu chu a ni ngêt,” an tia. 41 Mi dangin, “Krista chu a ni,” an tia. Senkhatin chu, “Krista chu Galili ram ata a izuang hrang mo? 42 ‘Krista chu Davida irchi, Davida omna Bethlehem khuaa zuang suak hrang a ni’ Pathian lekha thu’n a iti mo ni ma?” an tia. 43 Khanchu, ama sikin mipui laia irsenna a hong om ta. 44 An laia senkhatin ama chel an tuma, khannisianlân, tûte’n tôn mahai.
Juda hruaituhai iam loina
45 Enkoltu sipai chu Ochai inlalhai le Farisaihai kuang khan an kîr nôka, anni khan, “Ithoa mo nin hong ihruai loi?” an tia. 46 Enkolpu sipaihai khan an sâma, “Hi pa thu’nsîr ang hin tûte’n thu lan sîr ngai mahai,” an tia. 47 Farisaihai khan an sâma, “Nangni khom nangni a lei ihuang ma ni? 48 Hruaituhai le Farisaihai laia inkhat luan ama iam mahai ti nin inhriat loi mo? 49 Hi mipui, Mosia Dân inhre loihai hi Pathianin khua a isâlhai kêng,” an tia.
50 Farisaihai laia, mi inkhat Nikodema, matona Jisua leh irhmu hranga fepu kha a om saa. Ama khan an kuang, 51 “Ei dânin chu mi tukhom a chongbâi suak ei inhriat mân le a sintho ei hmu suak mân chu thiamno inchangtir thei mak me,” a tia. 52 Anni’n an sâma, “Nang khom Galili mi ni ini loi mo? Pathian lekha thu ngûk takin tepin lân, Galili ram ata deipu suak ngai mahai tih inhria ni ti,” an tia. 53 Khan, mi tin mâni in senga an fe tâka.
1 Khanchu, mi tin mâni in chita an fe tâka, khannisian Jisua chu Oliv tânga a fe tâka. 2 A tûk zînga chu Tempila a lût nôka. Mipui murdi a kuang an honga; a toia, annihai kha ar chutirhai tâka. 3 Dân irchutirtuhai le Farisaihai khan, nupangnu a uire lai taka chel an hong hruaia, a laia an inngîrtira.
4 Jisua kuang, “Irchutirtu, hi nupangnu hi a uire lai taka kin ichel a nia, 5 Ei Dân, Mosia ni ipêka chu hiang nupangnu hi lunga dêng that hrang tih a nia. Nangin teh itin mo ni ti?” an tia. 6 Kha kha ama fiana hrangin an iti a ni, demna an hmu theina hrangin. Jisua kha a kûna, a kut chalin irnênga a’rziaka.
7 Khaanga ngîr pumin an irdon kher kher sikin, a thoia, an kuang, “Nin laia sual neiloi takin lungin dêng masa ri se,” a tia. 8 Khanchu a kûn nôka, a kutin irnênga a’rziak nôk tâka. 9 Kha kha an inhriatin chu inkhat khatin ulian taka irphutin an suak zit tâka, nupangnu a omna ngaia om leh vai khan an om tâka. 10 Jisua kha a hong tanga, a kuang, “Nupangnu, khôn mo an om zoi tâk? Thiamno nang inchangtir tûte om mahai mo?” a tia. 11 Ama khan, “Rengpa, om mahai,” a tia. Jisua’n a kuang, “Keima khomin thiamno nang inchangtir no ning; fe’n lân, atûn ata chu sual nôk ta no roh,” a tia.
Jisua rammual vâr
12 Jisua’n Farisaihai kuang thu an sîr nôka, “Keima hi rammual êl invârpu ki ni. Tukhom a ni zuitu chu inthima lêng viat no nihaia, hringna vâr nei ual an ti,” a tia. 13 Farisaihaiin a kuang, “Mâni thurchi kêng ni insîr, ni thu insîr hi dik mah,” an tia. 14 Jisua’n, “Mâni thu inhriattir ki ni khomin ki thu inhriattir chu a dik a ni, ki zuang suakna le ki fena hrang kin hriata, nangni’n chu ki zuang suakna le ki fena hrang inhre mak chêi. 15 Nangni’n chu taksa dânin nin ni hrilsiat ngaia, keima’n chu tûte hrilsiat ngai ma ung. 16 Ki lei hrilsiat khom lei ni sianlân, ki hrilsiatna chu dik a ti; ki bing vaia om ni ma unga, Pa ni tîrtu ki kuang a om sikin. 17 Nin Dân lekhabua khom, ‘Hriatpuitu mi inhni chong chu a dik,’ ti irziak a ni. 18 Kei hi mâni thu inhriattirtu ki nia, Pa ni tîrpu chu ki thu nin hriatpui sa a ni,” a tia. 19 Anni’n chu, “Kho hi mo ni Pa,” an tia. Jisua’n, “Nangni’n nin hre mak chêi, Ka Pa khom inhre mak chêi. Keima nin hre unglân chu Ka Pa khom inhria nin ti,” a tia. 20 Kha thu kha Tempil tholôm bôm siana hmuna ar chutir laia a insîr a ni. Tukhomin chel mahai, a zoro a la tung no sikin.
Ki fena hranga fe thei mak chêi
21 Jisua’n an kuang, “Hin om ta no ning, nangni’n ni zong nin ti, khannisianlân nin sualnaa khan thi nin ti. Ki fena hranga hong thei no chin ni,” a ti nôka. 22 Judahaiin, “A irthat hrang ma ni? Ki fena hranga khan hong thei no chin ni a iti hi?” an tia. 23 Jisua’n an kuang, “Nangni chu hnuai tiang ata hong suak nin ni; kei chu chung tianga zuang suak ki ni; hi rammual ata hong suak nin nia; Kei chu hi rammual ata hong suak ni ma ung. 24 Khasika khan kêng, ‘Nin sualnaa khan thi ni nin ti’ nangni ki iti,” a tia. 25 Anni’n, “Tu mo ni ini?” an tia. Jisua’n, “A phut ata nin kuang ki insîr tâk mo ni ma? 26 Nin chungchânga insîr hrang le rêl hrang tamtak ki nei; i khom nisian, a ni tîrtu chu mi diktak a ni, a kuang ata ki inhriat vai rammual kuang kin sîr ngai,” a tia. 27 An kuang Pa thu a insîr a nih ti inhre mahai.
28 Jisua’n an kuang, “Mihriam Nâipa hi nin inkhâi tika keima ki ni tih le, keima irchamin i khom tho ma ung Pa’n a ni ihril ang vai kin sîr ngai tih lan hria nin ti. 29 A ni tîrpu chu ki kuang a oma, ki bing vaia om hrangin ni rotsan ngai ma, a nuamlam vai ki tho ngai sikin,” a tia. 30 Kha thu kha an sîr laiin mi tamtakin ama kha an iam tâka.
Thutakin nangni’n zalêntir a ti
31 Jisua’n ama iamtu Judahai kuang khan, “Ki thutaka nin om maiin chu ki irchutir tak takhai ni nin ti; 32 Thutak inhria nin ta, thutak khan nangni inzalêntir a ti,” a tia. 33 Anni’n an sâma, “Abrahama irchihai ei nia, tu suaka khom om ngai ma ung, nangni inzalêntir a ti, itina ni iti ma ni?” an tia.
34 Jisua’n a sâmhaia, “Thudik tak nangni ki hril, thilsual tho murdi chu suak an ni. 35 Suak chu kumkhua’n in sûngkua mi ni mai mah, nâipa chu kumkhua’n a om mai. 36 Khasikin, Nâipa’n nangni an zalêntirin chu zalên tak tak ta nin ti. 37 Abrahama irchihai nin nih ti kin hriat, khannisianlân, ni that nin tuma, ki thu hin nangnia hmun a nei no sikin. 38 Keima’n Pa kuanga ki ihmu kin sîra, nangni khom nin Pa kuang ata nin inhriat kha nin insîr ngai,” a tia.
Nin pa Diabola
39 Anni’n, “Kin pa chu Abrahama a ni,” tiin an sâma. Jisua’n, “Abrahama nâihai nin ni’n chu, Abrahama itho ang kha tho nin ti. 40 Atûna ni that nin itum hi, thutak Pa kuang ata ki inhriat, nangni hriltu hi Abrahama’n khaang khan tho ngai ma. 41 Nin pa itho ang nin itho hi,” a tia. Anni’n chu, “Zâi nâi ni ma unga, Pa inkhat kin nei, Pathian chu,” an tia.
42 Jisua’n an kuang, “Pathian kha nin Pa a ni lele’n chu, lung ni thung nin ti, Pathian kuang ata zuang ki ni. Keima irchama zuang ni ma unga, a ni tîrtu irchama zuang kêng ki ini. 43 Ki thu’nsîr hi itina mo nin inhriat thei loi? Ki thu nin dong indik no sika a ni. 44 Nin pa Diabola ata suak nin nia, nin pa lungdo sin nin inuam a ni. Ama kha a phut ata mi that ngai a ni, thu dik tiang khom chang ngai ma, dikna zel a nei no sikin. Milak a tho’n ama insua a ni ngai. Milak pa a ni sikin; milakhai tinrêng pa khom a ni sa. 45 Keima’n thutak kin sîr sikin nin ni iiamloi a ni. 46 Nin laia tu mo sualna insîr thei? Thutak kin sîra, ithoa mo nin ni iiam loi? 47 Pathian ata suak khan Pathian thu a’rngaitua ngaia; nangni’n chu ki thu irngaitua mak chêi, Pathian ata suak nin ni no sikin,” a tia.
Jisua le Abrahama
48 Judahai khan an sâma, “Samari mi ni nia, ramilhli ichel a ni kin iti kha, kin iti indik mo ni ma?” an tia. 49 Jisua’n, “Ramilhli ichel ni ma unga, Ka pa ki ichôiindôm kêng, nangni lakin ki thang nin insiaa. 50 Keima roiinpuina hrang zong ni ma ung, a zongtu le a ngaituatu chu inkhat a om. 51 Thudik nangni ki hril, tukhom ki thu zômpu chu thi viat no ni,” a tia. 52 Judahaiin a kuang, “Atûn chu ramilhli ichel ni nih ti kin inhriat infel ta; Abrahama a thi tâka, deipuhai khom an thi tâka, nang lakin, ‘Tukhom ki thu zôm chu kumkhua’n thina irtem no ni,’ ni tia. 53 Kin irchibul Abrahama nêkin ni iroiinpui ual ma ni? Ama khom a thi tâka, deipuhai khom an thi tâka, a tukhôkin mo ni irbe?” an tia.
54 Jisua’n, “Mâni irchôiindôm inlân, ki satna kha ite ni no ni. Kin Pathian nin iti Ka Pa chu, a ni chôiindômtu chu a ni. 55 Ama chu inhre mak chêi, keima’n chu kin hriat; Ama kha inhre ma ung ki ti’n chu, nangni ang dêna milak ni ki ti; khannisianlân, ama kin hriata a thu khom ki zôm ngai. 56 Nin Pa Abrahama’n ki izuang a hmu hranga khan a râi a fân oka, khaang khan a hmu ngeia, a lôm tak tak,” a tia. 57 Judahai khan a kuang, “Kum sômringa lua la ni mak che dua, Abrahama ni hmu moa?” an tia. 58 Jisua’n an kuang, “Thudik kêng nangni ki ihril. Abrahama suak mân khom ki om,” tiin a sâma.
59 Khan ama dêngna hrang lung an lâka, khannisian Jisua kha ar bîka, Tempil ata a suak tâka.
1 Khan, Jisua chu a fe malamin mi inkhat mitcho saia suak a hmua. 2 A irchutirhai khan, “Rabbi, mitcho saia a isuak hi tu’n mo thil a tho’n sual, hi mi hin mo a nu le a pa’n mo?” an tia.
3 Jisua’n a sâma, “Hi pa hin tho’nsual mah, a nu le pa khomin tho’nsual ual mahai, amaa Pathian sintho an lang theina hranga a ni. 4 Sûn a ni lai hin a ni tîrtu sin hi ei itho hrang a ni. Zân ni hrang a ni ta tûte’n sin thei ta no nihai. 5 Rammuala ki om sûng hin rammual vâr ki ni,” a tia. 6 Kha kha an sîr zoiin irnêng an chila, kha khan pilpok a siama, a mita a pola, 7 “Siloam dîla va’rsu roh,” a tia. Siloam chu “Tîr” tihna a ni. Khanchu a va fea, a va’rsûka, mit vârin a hong kîr nôk tâka.
8 A tualbômhai le matona a kutdo lei hmu ngaihai khan, “Hi pa hi kutdoa toi ngai kha mo ni ma?” an tia. 9 Senkhatin, “A ni khate,” an tia. Mi dangin, “Ni mah, ar angpui kêng,” an tia. Kha pa khan, “Kha mi kha ki ni,” a tia. 10 Anni’n, “Itin mo ni mit a ivâr tâk lam?” an tia. 11 Ama khan, “Mi inkhat, Jisua an iti khan pilpok a siama, ki mita a pola, ‘Siloam dîla fe’n lân, va’rsûk roh,’ a ni tia. Khanchu, ki va’rsûka, ki hong ihmu thei zel tâk a ni,” a tia. 12 Anni khan, “Khôn mo a iom?” an tia. “Inhre ma ung,” tiin a sâmhaia.
Farisaihaiin mitcho a hong idam dân an irdonna
13 Khanchu, mitcho lei ni ngai kha Farisaihai kuang an hruaia, 14 Jisua’n pilpok a siama, a mit a invârtir pe nî kha Sabat nikhua a nia. 15 Farisaihai khan a hong ihmu thei tâk lam kha an irdon nôka. Ama khan, “Ki mita pilpok a pola, ki’rsûka ki ihmu thei tâk a ni,” a tia. 16 Farisaihai laia mi senkhatin, “Hi pa hi Pathian ata zuang suak ni ma, Sabat a ser no sikin,” an tia. Senkhatin chu, “Mi sualin itin mo hiang sinirkhêl a itho thei hrang?” an tia. An laia irsenna a hong om tâka. 17 Mitcho kuang khan, “Ama kha i ang mi’n mo ni ibe, ni mit nang an vârtir pea?” an tia. Ama khan, “Deipu a ni,” a tia.
18 Khannisian, Juda ulianhai khan kha mi kha mitcho saia suak a nia, atûn chu mit vârna a hmu a nih ti iam thei mahai sikin, a nu le pahai an koia, an kuang, 19 “Hi pa hi nin nâipa, mitcho saia suak nin iti kha ma ni? Itina a hong ihmu thei tâk mo?” tiin an irdonhaia. 20 A nu le pa khan an sâma, “Hi pa hi kin nâipa a nia, mitcho saia suak a ni. 21 Itina a ihong hmu thei tâk mani chu inhre ma ung, a mit invârtir petu khom inhre ma ung; irdon roi, puihling a ni tâka, a chungchâng thu insîr ri se,” an tia.
22 A nu le pahai khan Judahai an chi sika khaanga an iti a ni; Judahaiin chu, “Ama kha Krista a nih,” ti a pom murdi chu Sinagok ata inhnot suak hrangin an le’rsiam diam tâka. 23 Khasikin kêng a nu le pa’n, “Puihling a ni khate, ama irdon roi,” an itihna a ni.
24 Khan, mitcho lei ni ngaitu kha a voi hnina an koi nôka, a kuang, “Pathian makunga thudik hril hrangin inkungna nei ro! Nang indampu kha mi sual a nih ti kin inhriat,” an tia. 25 Ama khan a sâmhaia, “Mi sual a ni le ni loi inhre ma ung, thil inkhat kin hriat, mitcho ki lei ni ngaia, atûn chu ki hmu thei ta,” a tia. 26 Anni khan, “Itin mo nang a ti? Ni mit itin mo a invârtir?” an tia. 27 Ama khan, “Nangni ki hril tâka, irngai nuam mak chêi; ithoa mo nin inhriat nuam nôk tâk? Nangni khom a irchutirhai nin ini nuam mo?” a tia. 28 Anni khan an ngo tâka, “Nang hi, kha pa irchutir kha ni nia, keini chu Mosia irchutirhai kin ini kêng. 29 Pathianin Mosia a chongpui tih kin inhriat, hi mi hi chu kho taka mi mani inhre viat ma ung,” an tia.
30 Kha pa khan a sâma, “Khatak kha ar khêlna chu, kho taka mi mani inhre mak chêia, ki mit a invârtir hi! 31 Pathianin mi sual chong irngai nuam mah ti ei inhriat; khannisianlân, Pathian ngaisaka, a nuamlam thotuhai chong chu ar ngaitua ngai. 32 Rammual irsiang ata mitcho saia suak mit invârtir ngai tukhomin inhre mahai. 33 Hi pa hi Pathian ata zuang suak a ni no’nte ite tho thei no ni,” a tia.
34 Anni khan an sâm nôka, “Sual pumpuia suak mo ni mak che, ni’rchutir ni itum?” an tia. Khanchu an inhnot suak tâka.
Irtha tianga mitcho
35 An inhnot suak tih Jisua’n a lei inhriatin, a va zong suaka, a kuang, “Mihriam Nâipa hi ni iam mo?” tiin ar dona. 36 Kha pa khan a sâma, “Ka pu, tu mo a ini ni hril roh, ki iam theina hrangin,” a tia. 37 Jisua’n, “Ni hmu chian tâka, nang a chongpui maipu hi a ni hi te,” a tia. 38 “Rengpa, ki iam” tiin khûksadelin chubai a mûk tâka.
39 Jisua’n, “Roirêl hrangin hi rammuala zuang ki ni, mitchohaiin an hong hmu theia, mit vârhaiin mitcho an hong ni theina hrangin,” a tia. 40 A kôla Farisai omhai khan kha kha an inhriatin a kuang, “Keini khom mitcho mo kin ini?” an tia. 41 Jisua’n an kuang, “Mitcho nin ni’n chu, sual nei no chin ni; khannisian, ‘Kin hmu thei hi te’ nin ti sikin, nin sual kha a iom chian a ni,” a tia.
1 Jisua’n, “Thudik tak nangni ki hril, tukhom belra mikota lût loia, hmun dang tianga luia lût chu inru ngai le hrâtlâksong a ni. 2 Mikota lût chu belrapu a ni. 3 Inkhâr enkoltu’n ama kha mikot an hong pe ngaia, belrahai khomin ar hâi an inhriat, a belrahai kha an irhming sengin a koia a hruai suak ngai. 4 A ta murdi an suaktir zoiin chu an maton a hruaia, belrahai khan ama an zui ngai, a hnukirhai an inhriat sikin. 5 Mi dang chu zui no nihaia, intânsan an ti, mi danghai hnukirhai chu an inhriat no sikin,” a tia.
6 Kha chongirkhek thu kha Jisua’n an kuang an sîra, khannisianlân, a thu’nsîr omzia kha inhre mahai.
Jisua belra enkoltu sa
7 Khanchu, Jisua’n an kuang thu an sîr nôka, “Thudik tak nangni ki hril, keima hi belrahai ta hrangin mikot ki ni. 8 Ki matona hong murdi chu inru ngai le nakhrâtsonghai an ni; khannisian belrahai khomin an thu irngaitua mahai. 9 Keima hi mikot chu ki ni. Tukhom keimaa lût chu inzôkin om a ta, lûtin suak a ta, fâk hrang hmu sa ti. 10 Inru chu inru hrang le mi that hrang le insiat hrang vaiin kêng a ihong ngai, kei chu hringna nin neina hranga, tamtak nin neina hranga zuang ki ni.
11 Kei hi belra enkoltu sa ki ni; belra enkoltu sa’n a belrahai hrangin a hringna a pêk ngai. 12 Irhlo mi, belrapu tak ni loia, belra neipu ni no chu inê hong a hmu’n chu belrahai an tânsan ngai, inê khan belrahai kha a sea, an thekindarh chit ngai. 13 Irhlo mi a nia, belrahai a uksak no sikin a intânsan pat ngai a ni. 14 Kei chu belra enkoltu sa ki ni, ki ta chu kin hriat, ki ta khomin an nin hriat. 15 Pa’n a nin hriata kei khomin Pa ki inhriat ang hin; belrahai ta hrangin ki hringna ki pêk. 16 Hi belra kula mi ni loi hi belra dang ki nei; anni khom ki la hong ihruaihai hrang a ni, ki hnukirhai khom inhria an ti, khanchu pâl khatin om an ta, a enkoltu inkhat leh.
17 “Hi sika hin Pa’n lung a ni ithung a ni, la nôk hranga ki hringna ki pêk hrang sikin. 18 Tukhomin ki hringna hi ni lâk pe thei no ni. Keima irchamin ki ipêk hrang a ni. A pêk thei ki ni; la nôk thei khom ki ni. Hi thupêk tho hrang hin Ka Pa’n a ni ibe a ni,” a tia. 19 Kha thu sika khan Judahai laia irsêlna a hong om nôka. 20 An laia mi tamtakin, “Ramilhli ichel an vêt kêng! ithoa mo a chong nin irngai?” an tia. 21 Senkhatin, “Ramilhli ichelin chu hiang hin chong thei no ni! Itin mo ramilhli’n mitcho mit a invârtir pe thei hrang?” an tia.
Judahaiin Jisua an hnôl
22 Khan, phalbi zoro a nia, Jerusalema irpumpêkna kût an hmang lai a ni. 23 Jisua chu Tempila Solomona bokropa a hong irlôi a va’rlôia. 24 Judahai a kôla an hong pungkhôma, a kuang, “I dôr ten mo milung ôkincha’n ni ni isia hrang? Krista ni ni’n chu, fel takin nin hril roh,” an tia.
25 Jisua’n a sâma, “Nangni ki hril tâk khate, iam mak chêia, Ka Pa irhminga sin ki ithohai hin ki thurchi nangni a inhriattir a ni. 26 Khannisianlân, iam mak chêi, ki belra laia mi nin ni no sikin. 27 Ki belrahaiin ki hnukirhai an inhriata, kei khomin anni kha kin hriat ngaia, an ni zui ngai; 28 an kuang kumtuang hringna ki pêka, kumkhua’n thi no nihai, tukhomin ki kut ata ni lapai pe no nihai. 29 Anni ni pêktu Ka Pa chu itinrêng nêka roiinpui ual a ni; Ka Pa kuta om chu tûte’n sutpai thei mahai. 30 Keima le Pa chu pumkhat kin ni,” a tia.
31 Judahaiin chu ama dêngna hrang lung an hrût nôka. 32 Jisua’n an kuang, “Pa’n sin hranga a ni ipêk, sin sa tamtak nin mit hmua ki sina, ki sinthohai laia a i tak sika mo lunga ni dêng nin itum?” a tia. 33 Judahaiin an sâma, “Sin sa ni sin sika lungin nang dêng hrang ni ma unga, Pathian ni hrilinsiat le nang mihriam mai mai Pathiana nir bê sikin a ni,” an tia.
34 Jisua’n a sâma, “Nin Dân lekhabua, ‘Pathianhai nin nih,’ ti irziak mo ni ma?. 35 Ei inhriat angin ei Pathian Thubu’n a iti ka chu kumkhua’n a idik ngai a ni, Pathianin a chong a intungnahai khom kha pathianhai a iti a ni. 36 Keima len vâng chu Pa’n a nin thanga, rammuala a ni izuang tîr a ni. Itin mo Pathian Nâipa ki ni, ki ti sika hin Pathian ni hril insiat, nin ni iti? 37 Ka Pa’n sin hranga a ni inuam ki sin no’n chu ni iam no roi; 38 Khannisianlân, ki isin a ni’n chu, keima nin ni iam no khomin, ki sinthohai lua hi iam roi ba; Pa chu keimaa a om ti le kei khom Paa ki om tih nin inhriat infel theina hrangin,” a tia.
39 Kha hnung chu Jisua kha chel an tum nôka, khannisian an kut ata a suak tâka. 40 Jordan râla, Johana’n matona mi a baptisna ngai hmun tiang khan a fea, kha hmuna khan a om mai tâka. 41 Mi tamtak a kuang an honga, “Johana’n sinirkhêl ite tho mah, khannisianlân, Johana’n hi pa chungchâng thu a insîr murdi chu a hong idik kêng,” an tia. 42 Khanchu mi tamtakin ama an iam tâka.
1 Mi inkhat ar hming Lazara, Bethani khuaa om kha dam maka. Bethani khua kha Mari le a zuarpuinu Marthi omna khua a ni. 2 (Hi Mari hi Rengpa sahriak mirimhoi poltu, a ke sahriak innôta, a sam leh a ke hui penu kha a ni, a dam no Lazara hi a nuchapa a ni.) 3 Khanchu, a farnuhaiin, “Rengpa, ni lungthung kha dam ma,” tiin mi an van hriltira.
4 Jisua’n a len hriatin chu, “Hi natna hi thina hrang ni maka, Pathian roiinpuina hranga a ni. Hi sika hin Pathian Nâipa hi roiinpuiin a iom hrang a ni,” a tia. 5 Jisua’n Marthi le a zuarpuinu le Lazara kha lung a thunga, 6 Khannisianlân, dam mah ti an hriat hnungin a omna khuaa khan sûn hni a la oma. 7 Kha zoi hnung chu a irchutirhai kuang, “Judai rama fe nôk ta ei ti,” a tia. 8 A irchutirhaiin “Irchutirtu, Judahaiin lunga nang dêng an tum chak kha; khan khomin fe nôk ni itum mo?” an tia.
9 Jisua’n a sâma, “Sûna dârkar sômhleihni a iom loi ma ni? Khasikin mi tukhom sûn khovâra a lêngin chu a ke sir châi ngai ma, hi rammual vâr hi a hmu sikin. 10 Zâna a lêngin chu a ke sir a châi ngai, amaa khan vâr a om no sikin,” a tia.
11 Kha thu kha an sîr zoiin an kuang, “Ei rualpa Lazara kha a ina, khannisian ama kaithoi hrangin ki ife hrang a ni,” a tia. 12 A irchutirhai khan a kuang, “Rengpa, a in a ni’n te, hong dam nôk ta ti,” an tia. 13 Jisua’n a thi thu a insîrna a ni, khannisianlân anni’n chu a’rngam sûnga a in thu a insîr an sôna. 14 Khasikin, Jisua’n fel takin an sîra, “Lazara a thi tâk, 15 khannisian nangni sikin khataka ki iom no chu ki lôm, nin iam theina hrangin; i khom nisian, a kuang va fe ei ti,” a tia. 16 Thoma, (Phîra) an iti chu a irchutir chanpuihai kuang, “Tho Irchutirtu kuanga ei rêngin fe ei ta, a thinaa va thi sa hrangin fe ei ti,” a tia.
Jisua thoinôkna le hringna
17 Jisua a hong tungin chu Lazara kha sûn minli thâna a lei om ta tih an hriata. 18 Bethani kha Jerusalem kôla om a ni, kilometar thum dôra hla a ni. 19 Judahai laia tamtak, an nuchapa thi chungchâng thua Marthi le Mari lungngam saka toipui hrangin an honga. 20 Marthi chu Jisua tung hrang a nih ti an hriatin chu a va dona, Mari’n chu in a lei nghâka. 21 Marthi’n Jisua kuang, “Rengpa, hitaka ni iom ni sian chu, ki nuchapa thi no ni! 22 Atûn khom Pathian kuang ni izong murdi Pathianin nang pe a ti, ti kin hriat,” a tia. 23 Jisua’n, “Ni nuchapa thoi nôk a ti,” a tia. 24 Marthi’n, “Zoro hnungkhôna chu thoinôkna nia chu thoinôk a ti, ti chu kin hriat,” a tia.
25 Jisua’n, “Kei hi thoinôkna le hringna ki ni, tukhom a ni iam ka chu thi khom sianlân, hring mai a ti; 26 tukhom hring maia ni iam chu, kumkhua’n thi no ni; kha kha ni iam mo?” a tia. 27 Ama khan a kuang, “Ki iam, Rengpa, Krista, Pathian Nâipa rammuala zuang hrangpu kha ni nih ti ki iam,” a tia.
Jisua a chap
28 Kha kha an sîr zoiin a fea, a zuarpuinu Mari chu inrûkin a va koia, “Irchutirtu hi hin a om, nang a koi,” a tia. 29 Khan, kha thu kha an hriat zoi le chu a thoi lika, a kuang a fe tâka. 30 Jisua kha kho sûnga la lût loiin, Marthi’n a va donna hmuna khan a la om maia. 31 Judahai, in sûnga lungngam saka toihai khan, Mari thoi lika, a suak kha an hmu’n, thâna chap hranga a ife mani an tia, an zuia. 32 Mari’n Jisua omna a va tunga, a va hmu’n chu a ke bula an boka, “Rengpa hi hin omin lân chu, ki nuchapa thi no ni,” a tia.
33 Jisua’n Mari chap le a hong zuitu Judahai chap kha a hmu’n, a sân a’rpei a tema, a’rhniaka, 34 “Khôn mo nin inzâl,” a tia. Anni khan, “Rengpa, hongin lân, en roh,” an tia. 35 Jisua a chap ta.
36 Judahai khan “En u ta, Lazara hi lung a thung bâka!” an tia. 37 An laia senkhatin chu, “Mitchopa kha mit vârna a ipêk mo ni ma? Lazara khom hi thi loiin a isia thei loi ma ni?” an lei tia.
Lazara kaithoia a om thu
38 Jisua kha irhniak pumin thân kha a tung tâka. Thân kha pûk a nia, lung leh khâr a ni. 39 Jisua’n, “Lung hi khâipai roi,” a tia. A thitu farnu Marthi’n a kuang, “Rengpa, atûn hin chu a mirim se ta ti, a thina sûn minli a ni ta,” a tia. 40 Jisua’n a kuang, “Ni iamin chu Pathian roiinpuizia hmu ni ti, nang ti ma ung mo?” a tia. 41 Khanchu lung kha an khâipai tâka, Jisua kha a tanga, “Ka Pa, ki thu nir ngaitua sikin lômthu kin sîr. 42 Ki thu nir ngaitua ngai ti khom kin hriat; khannisianlân, hitaka mi pungkhômhai sika hin hi thu hi ki insîr a ni, nangin keima ni ni tîr ti an iam theina hrangin,” a tia. 43 Kha kha an sîr zoiin chu hnukirhai inring takin a khêka, “Lazar, hong suak roh,” a tia. 44 Mithi kha a kut a ke thân puana tuam pumin a hong suaka, a hmâi khom irhuina puana tuam a nia. Jisua’n an kuang, “Sût unglân, infetir roi,” a tia.
Jisua that hrang lam an ngaitua
45 Mari ina hong Judahai laia tamtakin Jisua sintho kha an hmua, an iam tâka. 46 Senkhat chu Farisaihai kuang an fea, Jisua sinthohai kha an va hrila. 47 Khanchu, Ochai inlalhai le Farisaihai khan Sanhedrin-ah an koia, “Hi pa hin sinirkhêl tamtak a thoa, itin mo ei itho ta hrang? 48 Hiang hin ei insua rak maiin chu mi murdi’n iamna an ta, Rom mihai hong an ta, ei hmun irthiang le ei nam ni hong insiat pai pêna an ti,” an tia.
49 An laia inkhat, ar hming Kaiafa, kha kuma Ochai inlaltak khan, an kuang, “Inhre mak chêi; 50 Mipui irthûla mi inkhat a thia, nam pumpui irhmang chit loi chu nin ta hrangin a sa ual ti nin inhriat loi a ni,” a tia. 51 Kha kha ama lungrîl puak suaka a insîr ni mah; kha kuma khan Ochai inlaltak a nia, an nam irthûla Jisua thi hrang a lei insîr a ni. 52 An nam irthûl vai khom ni loiin Pathian nâi rammuala indarhai pâl khata a hruaikhôm nôkna hrang khom a insîr a ni. 53 Khatak ata chu ama that lam an ngaitua tâka. 54 Khasikin Jisua kha inlangin Judahai laia lêng ta maka, kha rengata chu ramchâr kôla khua inkhat ar hming Efraima an itia khan a fea, kha khan a irchutirhai leh an om tâka.
55 Judahai Ferkân Kût a hong nâi tâka, thingtâng ata mi tamtak chu Ferkân Kût mân irthâr hrangin Jerusalema an fea. 56 Jisua kha an zonga, Tempila an irbûm laiin an chonga, “Itin mo nin ngaitua? Kûtnaa hong no ni mo?” an irti irhlôma. 57 Ochai inlalhai le Farisaihaiin ama an chel theina hrangin tukhomin a omna an inhriatin chu irchamneituhai an inhriattir hrang a nih ti thu an pêka.
1 Ferkân Kût hrang sûn ruk a la omin, Jisua’n mithi lai ata a ikaithoi Lazara omna Bethani khua kha a hong tunga. 2 Khatak khan a ta hrangin zânbu an sinsiama, Marthi’n khalâi othai kha a donhaia, Lazara khom khalâi othai laia chang sa a ni. 3 Khan, Mari’n, litar chimrip vêl, Spiknard hriak mirimhoi tak le man hlutak a hong chôia, Jisua ke an nôta, a samin a ke a hui pea; khanchu, kha hriak mirim khan in pumpui kha a sip zit tâka.
4 A irchutirhai laia inkhat Juda Iskariota ama incheltir hrangtu khan, 5 “Ithoa mo hi sahriak mirimhoi hi a duli irzathuma zuarin inrianghai pêk a ini loi?” a tia. 6 Inrianghai a ngaisak sika kha chong kha a iti ni mah, inru a nia, sum kok a dôna, a sûnga om kha a lâk ngai sika a ni. 7 Jisua’n, “Ite ti no roi, phûmin ki om nia hrangin hrê ri se. 8 Inrianghai chu nin kuang om mai hrang an ni, kei chu nin kuang om mai no ning,” a tia.
Lazara that an tum thu
9 Juda mi tamtakin Bethani khuaa Jisua a om ti an inhriat tâka, Jisua vai hmu nuama hong ni mahaia, mithi lai ata a ikaithoi Lazara khom hmu an inuam sa a ni. 10 Ochai inlalhai khan Lazara khom kha that an tum tâka, 11 ama sika Juda tamtakhaiin an rotsanhaia, Jisua an iam tâk sikin.
Jisua roiinpui taka Jerusalem a lûtna thu
12 A tûk zînga chu Ferkân Kûta hong mi tamtakin chu Jisua kha Jerusalema hong lût hrang a nih ti an inhriatin, 13 tûm ônhai an chôia, a nghâk hrangin an suaka.
“Hosana!
Rengpa irhminga hong chu inpâkin om ri se!
Israel rêng chu inpâkin om ri se!”
tiin an khêk mur mura.
14 Jisua’n sakuartung a hmua,
a chunga a chuanga,
15 “Chi no ro, Zion nâinu,
En ta, ni Rêng chu a hong e,
sakuartung te chunga chuangin,”
ti irziak ang khan.
16 Kha kha a irchutirhaiin a phuta khan chu inhre thei mahaia, khannisianlân, Jisua chôiindôma a om zoi tena chu, a chungchâng, khaanga irziak a ni, a chunga kha thil kha lei itho a ni an inhriat thei ta. 17 Lazara, thân ata a koi suaka, mithi lai ata a kaithoi laia a kuanga mipui omhai khan kha thu kha an inhriatirhai thiai tâka. 18 Sinirkhêl a tho tih an inhriat sikin, mipuihaiin ama an va inghâk a ni. 19 Farisaihai khan, “Ite nin ilo thei loi a ni hi te, en u ta, rammualin ama an izui tâk hi,” an irtia.
Grik mi senkhatin Jisua an zong
20 Kût hmang laia Pathian biak hranga hong fehai laia Grik tuhai manni an oma. 21 Khahai kha Galili rama Bethsaida kho mi Filipa kuang an fea, “Ka pu, Jisua hmu kin nuam,” tiin an ngêna. 22 Filipa khan Andria a hong hrila, Andria le Filipa khan Jisua an va hrila.
23 Jisua’n a sâma, “Mihriam Nâipa chôiindôma a om zoro a hong tung ta. 24 Thudik nangni ki hril; bu’rmal irnênga a tâka a thi no’n chu, ar mal dênin a om chiana, a thiin chu ra tamtak an sua ngai. 25 Tukhom mâni hringna inpâm murdi’n chu inchân a ta; tukhom hi rammuala hin a hringna an pâm no’n chu kumtuang hringna nei mai a ti. 26 Tukhom ki sintho nuam murdi’n chu ni zui ngêt ri se, ki sin thotu chu ki omnaa a om sa theina hrangin. Tukhomin ki sin tho chu ka Pa’n chôiindôm a ti,” a tia.
Mihriam Nâipa inkhâiin a om hrang thu
27 “Atûn hin ki lungrîl a na tak taka, imo ki iti hrang tâk? ‘Ka Pa, hi zoro ata hi ni saninhring roh’ ki iti hrang ma ni? Ti no ning, hi dûk tuang hrang piala zuang kêng ki ini,” a tia. 28 “Ka Pa, nir hming chôiindôm roh,” a tia. Khanchu, irvân ata hnukirhai a zuang suaka, “Ki chôiindôm ta, la chôiindôm nôk mai ki ti,” a tia.
29 Khataka mipui ngîr sahai khan hnukirhai kha an inhriatin, “Khonri kêng,” an tia; senkhatin “Vântîrtônin a ichongpui,” an tia. 30 Jisua’n a sâma, “Kha hnukirhai kha ki ta hranga zuang suak ni mah, nin ta hranga a ni ual. 31 Atûn hin rammual chungchâng ngaitua lai a ni, atûn hin rammual roirêltu hi pai suak ni a ti. 32 Keima irnêng ata inkhâia ki omin chu, mi murdi keima tiang kaihruaihai zit ki ti,” a tia. 33 Kha thu kha i ang taka a ithi hrang mani tih inhriatirna hrangin a insîr a ni. 34 Mipuiin chu an sâma, “Krista chu kumkhua’n om mai a ti, ti Dân lekhabu ata kin inhriat, nangin ‘Mihriam Nâipa inkhâiin om a ti,’ itina ni iti ma ni? Mihriam Nâipa kha tu mo a ini?” an tia.
35 Jisua’n an kuang, “Vâr hi sôtnote nin laia la om a ti. Vâr nin nei sûng hin chai roi, inthimin nangni a de nona hrangin, tukhom inthima lêng chu a fena inhre ngai ma. 36 Vâr nin nei sûng hin vâr hi iam roi, vâr nâihai nin ni theina hrangin,” a tia. Kha thu kha Jisua’n an sîr zoiin, a fe pat tâka, an hmu nona hrangin ar bîka.
Judahai iamnozia
37 Khaanga sinirkhêl tamtak kha an mit hmua tho khom sianlân iam mahai.
38 Deipu Isaia’n:
“Rengpa, kin thu’nsîr tu’n mo iam?
Rengpa sinthotheina kha tu kuang mo an lang?”
a iti kha a hong tung theina hrangin. 39 Hi sika hin an iiam thei loi a ni,
Isaia khan:
40 “Pathianin an mit an chotir pehaia,
An milung an ngartir sa,
An mitin an hmu nona hrang le an milungin an inhriat thei nona hrangin.
Khanchu, hong kîr nôk an ta,
Anni kha ki lei indamhai itinin,”
a iti ang khan. 41 Isaia’n kha thu kha a roiinpuizia a hmu sikin a thurchi a insîr a ni.
42 Khan khomin hruaituhai laia mi tamtakin Jisua kha an iam tâka; khannisian, Farisaihai sikin insîr inlang ngam mahai, khano’nchu, Sinagok ata inhnot suak an ini hrang a ni. 43 Pathian roiinpuina nêkin mihriam kuanga roiinpuina an inuam ual a ni.
Jisua thu, roirêlna
44 Jisua a khêk suaka, “Tukhom ni iam chu keima ni iam ni mahaia, a ni tîrtu iam an ni. 45 Tukhom a ni hmu chu a ni tîrtu hmu a ni. 46 Rammuala hin vâr angin ki izuang a ni, tukhom a ni iam murdi’n chu inthima an om nona hrangin. 47 Tukhomin ki thu inhriatin zôm no sianlân, ama kha keiin thiamno inchangtir ma ung; rammual thiamno inchangtir hranga zuang ni ma ung, rammual saninhring hranga zuang ki ni. 48 Tukhom ni hnôla ki thu pom nuam loi chu a chungthu rêl pe hrang inkhat a nei. Ki thu’nsîr ngei kha, zoro hnungkhôna chu a chungthu rêl petu la ni a ti. 49 Keima phuachôpin insîr ma unga, Pa, a ni tîrpu ngei khan, ki insîr hrang le ki iti hrang kha ircham a ni ipêk a ni. 50 A thupêk chu kumtuang hringna a nih ti kin hriat. Khasikin, Pa’n hril hranga a ni iti ang takin ki ihril a ni,” a tia.
1 Ferkân Kût hrang a hong ni tâka, Jisua’n hi rammual suaksana Pa kuang a fe zoro a tung ta ti an hriata; Ama mi, rammuala om a lungthunghai chu a mong dênin lung a thunga. 2 Khan, zânbu an nêk laiin, Diabola khan Simon nâipa Juda Iskariota kha Jisua incheltir hrangin ngaituana a lei inneitir tâka. 3 Jisua’n, Pa’n itinrêng a kuta a sia tih le Pathian ata zuang suak a nih ti le, Pathian kuang fe nôk hrang a ni an hriata. 4 Khasikin, zânbu khalâi ot lai kha a thoia, a songkol irfual a kheka, irhuina puan a lâka, a boma. 5 Khan tâbora tui a sunga, irchutirhai ke a’rsûk tâka, irhuina puan khan a hui thiaia.
6 Simon Petera kha a hong phâkin chu, Petera’n, “Rengpa nangma’n ki ke ni irsûk hrang mo?” a tia. 7 Jisua’n a sâma, “Ki sintho hi atûn hin inhre mak che, khannisianlân, nakana lan hria ni ti,” a tia. 8 Petera’n a kuang, “Ki ke irsu viat no chi ni,” a tia. Jisua’n a sâma, “Ni ke ki’rsûk no’n chu ki irchutir ni thei no chi ni,” a tia. 9 Simon Petera khan a kuang, “Rengpa, khano’nchu, ki ke vai irsu loiin, ki kut le ki lu khom,” a tia. 10 Jisua’n a kuang, “Tui irsil tâk chu a ke vai no chu irsûk nang mah, a pumin a fâi kêng. Nangni chu nin fâi, nin rêngin chu ni mah,” a tia. 11 Ama incheltirtu hrang kha an hriata, khasikin, “Nin rêngin chu fâi mak chêi,” a iti a ni.
12 An ke a’rsûk zoiin chu, a songkol sia kha an nghâka, a toi nôk tâka, an kuang, “Nin chunga ki sintho hi a omzia nin inhriat mo? 13 Nangni’n, Irchutirtu le Rengpa nin ni ti ngai, nin ti indik, ki ni ngeia. 14 Kei Rengpa le irchutirtu luan nin ke ki’rsûkin te, nangni khomin nin ke nin irsûk irhlôm hrang a ni. 15 Nin chunga ki itho anga nangni khomin nin thôna hrangin, nangni ki irhmutir a ni. 16 Thudik tak nangni kin hril, suak chu a pu nêkin roiinpui ma, tirtôn khom a tîrtu nêkin roiinpui ual mah. 17 Kha kha nin inhriata, nin zômin chu lôm nin ti. 18 Nin rênga thu insîr ma ung; ki inthanghai chu keima’n kin hriat, khannisian:
‘Ki bai fâktu’n a kuttum a nir hmua,’
ti Pathian lekha thu kha a zuang tung theina hrangin.
19 “Kha kha a zuang tung mân atûn hin nangni ki lei inhril a ni; a zuang tung tika, Ama kha ki ni ngei nin iam theina hrangin. 20 Thudik nangni ki hril, ki mi tîr lei lôm chu keima ni lôm a ni, keima ni lômtu chu a ni tîrtu lôm a ni,” a tia.
Incheltira a om hrang thu Jisua’n a lei insîr
21 Jisua’n kha thu kha an sîr zoiin a sân a milung dûk a tonga. “Thudik tak nang ki hril, nin laia mi inkhatin nin cheltir a ti,” a tia. 22 Tu tak mo a iti inhre loiin irchutirhai kha an ir-enchuk tâka.
23 A irchutirhai laia inkhat, Jisua’n lung a ithung kha, Jisua kôla a toia. 24 A tu tak mo a iti irdon hrangin kut veivâkin Simon Petera’n ama kha a chongpuia. 25 Khan kha mi khan Jisua a va nâiin, “Rengpa a tu tak hi mo?” a tia. 26 Jisua’n a sâma, “Bai hlek kin chia ki ipêktu tak chu a ni,” a tia. Khan bai hlek kha an chia, a lâk suaka, Iskariota Simona nâipa Juda kha a pêka. 27 Juda’n bai hlek kha a lâk zoiin chu, a sûnga Setana a lût tâka. Jisua’n a kuang “Ni itho hrang kha tho lat ta roh,” a tia. 28 Khataka toihai laia tukhomin kha kha i sika a kuanga a insîr mo inhre mahai. 29 Irchutir senkhathaiin chu Juda sum hmarsa a dôn sikin, Jisua’n, kût hranga thil ei innanghai var cho roh; a iti mani, a ninole, inrianghai i i pehai roh, a iti pe mani an sôna.
30 Juda khan bai hlek kha a lâka, a suak zôi zel tâka; kha zoro kha, zân a ni.
Thupêk thar
31 Khan, Juda kha a suak zoiin chu Jisua’n, “Atûn chu Mihriam Nâipa chôiindômin a om ta, Amaa Pathian khom chôiindômin a om ta. 32 Amaa Pathian chôiindôma a om khan, Pathianin ama khom a makunga chôiindôm a ta, chôiindôm zôi zel a ti. 33 Nâihaio, sôtnote nin kuang ki la oma, nangni’n ni zong nin ta, ki fena hranga hong thei no chin ni, Judahai kuang ni ihril ang khan atûn nangni kuang khom ki hril a ni.
34 “Thupêk thar nangni ki pêk; lungirthung irhlôm roi; keiin lung nangni ki ithung ang hin nangni khom lungirthung roi. 35 Lung nin irthung irhlômin chu mi murdihaiin ki irchutirhai nin ni ti, khataka khan inhria an ti,” a tia.
Jisua’n, Petera iphil hrang thu a lei insîr
36 Simon Petera’n a kuang, “Rengpa, khôn mo ni ife hrang?” a tia. Jisua’n a sâma, “Atûn chu ki fena hranga ni zui thei no chin ni, nakana ni la zui nin ti,” a tia. 37 Petera’n, “Rengpa, itho sikin mo atûn hin nang ki izui thei loi hrang? Nangma hrangin chu thi khom ki’rhuam kêng,” a tia. 38 Jisua’n a sâma, “Ki hrangin thi nir huam mo? Thudik tak nang ki hril, nangin voithum ni ni phil mâka chu âr khuang no ni,” a tia.
1 Jisua’n, “Nin milung dûk intong no ri se, Pathian nin iam kei khom ni iam sa roi. 2 Ka Pa ina omna tamtak a oma, om no sianlân chu, nin ta hranga hmun siama ki fe hrang thu nangni ki ihril hrang ma ni? 3 Nin ta hranga hmun siamin ki fe’n chu zuang kîr nôk ki ta, ki kuang nangni hruai ki ti, ki omnaa nin om sa theina hrangin. 4 Ki fena hrang lam khom nin inhriat,” a tia.
5 Thoma’n a kuang, “Rengpa, ni fena hrang inhre ma ung, itin mo a lam kin inhriat thei hrang?” a tia.
6 Jisua’n a sâma, “Keima hi lampui le thutak le hringna ki ni, keimaa fe no chu tukhom Pa kuang tung ngai mahai. 7 Keima hi nin hre unglân chu ka Pa khom inhria nin ta, atûn chu ama nin inhriat tâk, ama nin hmu sa tâk,” a tia. 8 Filipa’n a kuang, “Rengpa, Pa kha nir hmutirin lân, kin ta hrangin sa ti,” a tia.
9 Jisua’n, “Filipa, hi dôr hi nin kuang ki om tâka chu, nin ni la inhriat loi ma ni? Keima ni hmu chu Pa hmu a ni. Itina mo ‘Pa chu nir hmutir roh’ ni iti? 10 Keima Paa ki om le Pa keimaa a om ti nin iiam loi ma ni? Nin kuanga thu ki insîrhai hi keima phuachôpin ki insîr ni mah. Pa keimaa a om maiin chu, a sin a itho a ni ual. 11 Keima Paa ki oma, Pa keimaa a om ki iti hi iam roi; a ninole, ki sintho sika lua hin ni iam roi. 12 Thudik tak nangni ki hril, tukhom ni iam chu thil ki itho ang hi tho sa ti; hi nêka roiinpui ual khom hi la tho a ti, Pa kuang ki fe hrang sikin. 13 Ki’rhmingin i khom nin izong ka chu tho thiai ki ti; Pa kha Nâipa sika chôiindôm a ni theina hrangin. 14 Nangni’n ki’rhmingin i khom nin izong ka chu tho thiai ki ti.
Irtha Irthiang inkung kha
15 “Nangni’n lung nin ni thungin chu, ki thupêkhai zôm nin ti. 16 Khan, keima’n Pa zong ki ta, Irtharngamtu dang nangni pe a ti, kumkhuaa nin kuanga om hrangin. 17 Irtha dik tak chu, rammualin nei thei maka, ama an hmu thei no sik le ama an inhriat no sikin. Nangni’n chu ama nin inhriat, nin kuang a om maia, nangnia a om mai sikin. 18 Fara’n nangni masan no ning, nin kuang zuang nôk ki ti. 19 Zoro sôtnote hnunga rammualin ni hmu ta no nihai, nangni’n chu ni hmu nin ti, keima ki hring sikin nangni khom la hring nin ti. 20 Kha tika chu keima Paa ki oma, nangni keimaa nin om le, keima nangnia ki om ti lan hria nin ti. 21 Tukhom ki thupêkhai poma zômpu chu lung ni thungpu a ni, lung ni thungpu chu ka Pa’n lungthung a ta, kei khomin lungthung ki ti, a kuang inlâr sa ki ti,” a tia.
22 Juda, (Iskariota ni loi) khan a kuang, “Rengpa, kin kuang inlâr ni ta, rammual kuang nin lâr loi hrang mo?” a tia.
23 Jisua’n a sâma, “Mi’n lung an ni thungin chu ki thu khom zôm a ta, ka Pa’n ama kha lungthung a ta, a kuang zuang kin ta, a kuang om mai kin ti. 24 Lung ni thung loitu chu ki thu zôm maka, thu nin inhriat hi keima thu ni maka, Pa a ni tîrtu thu a ni ual. 25 Nin kuang ki la om sûng hin nangni ki ihril a ni; 26 Irtharngamtu, Irtha Irthiang, ki’rhminga Pa’n a zuang itîr hrang khan itinrêng nangni irchutir a ti, nin kuang ki insîr murdi nangni inhriat suaktir nôk a ti.
27 Irtharngamna nangni ki mâk pe, keima irtharngamna kêng nangni ki ipêk; rammualin a ipêk ang ni loiin nangni ki ipêk a ni. Nin milung dûk tong no ri se, chi khom chi no ri se.
28 “Nangni masan hrang ki nia, nin kuang zuang kîr nôk ki ti,” ki iti kha nin inhriat ta. Lung nin ni thungin chu Pa kuanga ki ife hrang hi lôm nin ti; Pa kha keima nêkin a roiinpui ual sikin. 29 Kha kha a zuang tung tika nin iam theina hrangin, atûn a zuang tung mân nangni ki ihril a ni. 30 Zoro sôt ualin chu nin kuang thu insîr intam ta no ning, hi rammual roirêlpu hi a hong hrang sikin, ama’n ki chunga irchamnei mah, 31 khannisian, keiin Pa lung ki thung le, Pa’n thu a ni ipêk angin ki tho ngai tih rammualin an hriatna hrang a ni. Thoi unglân, hitak ata hi suak ta ei ti.
1 “Kei hi Grep râng diktak ki ni, ka Pa ar huan enkoltu a ni. 2 Ki irzompui ôn raloi murdi chu a pai ngaia, a ra murdi chu a’rthial infâi ngaia, a ra tam ualna hrangin. 3 Nin kuanga ki thu’nsîr murdi sika khan nin irthiang ving ta. 4 Keimaa om mai unglân, kei khom nangnia om mai ki ti. Ôn kha grep rânga a om mai no’n chu a ira thei loi ang dênin, nangni khom keimaa nin om mai no’n chu ra thei no chin ni.
5 “Kei hi grep râng ki ni, nangni a ônhai nin ni. Tukhom keimaa a om maia, kei khom amaa ki om maina chu tamtakin a ra ngai; keima boiin ite tho thei mak chêi. 6 Tukhom keimaa om loi chu ôn anga pai suakin an om ngai, ôn ipai kha a châra, an irkhôma, meia an paia, a kâng irhmang ngai. 7 Keimaa nin om maia, ki thu nangnia a om maiin chu nin inuam murdi zong unglân, hmu thiai nin ti. 8 Tamtak nin ra hin, ka Pa chu chôiindômin a om ngaia, khanchu ki irchutirhai ni nin ti. 9 Pa’n lung a ni thung sikin kei khomin lung nangni ki ithung a ni; ki lungthungin om roi. 10 Ki thupêkhai nin zômin chu, ki lungthungin om mai nin ti, keiin ka Pa thupêkhai ki zôma, a lungthunga ki iom ang hin.
11 “Ki lômna hi nangnia a om mai theina hrang le nin lômna ar kip theina hrangin hi thu hi nin kuang ki insîr a ni. 12 Hi hi ki thupêk chu a ni; lung nangni ki ithung ang takin nangni khom lung irthung irhlôm roi. 13 Mi’n a rual hranga a hringna a ipêk bana lungthungna inthûk ual tûte’n nei mahai. 14 Thu nangni ki ipêk hi nin zômin chu ki rualhai nih nin ti. 15 Suak nangni ti ta no ninga; suakin chu a pu sintho inhre maka; rualhai nangni ti ta ki ti; ka Pa kuang ata thil ki inhriat murdi nangni kin hriatir tâk sikin. 16 Nangni’n nin thang mak chêi, keima’n nangni kin thang, va ra hrang le nin raa om mai hrangin nangni kin kung a ni; ki’rhminga Pa kuanga nin izong murdi nangni a pêk theina hrangin. 17 Khasikin hi thu hi nangni ki ipêk a ni, lung irthung irhlôm roi.
Rammualin a hmumâkna
18 “Rammualin nangni a hmumâkin chu, keima a ni lei hmumâk ta ti inhre mai roi. 19 Rammuala mi ni unglân chu, rammualin ama ta angin lung nangni a ithung hrang a ni. Khannisianlân, rammual ata nangni ki inthang suak nin nia, rammual mi nin ni ta no sikin rammualin nangni a ihnôl a ni. 20 Suak a pu nêkin roiinpui mah ti thu nin kuang ki insîr kha inhre mai roi. Anni’n deng an ni inthei ang khan nangni khom deng nangni lan theitir an ti; ki thu an zômin chu nin thu khom zôm an ti. 21 Khannisianlân, hi thil murdi hi ki’rhming sika nin chunga tho an ti, a ni tîrtu an inhriat no sikin. 22 Keima zuangin an kuang thu insîr no inlân chu sual nei no nihaia, atûn chu an sual hnônna hrang nei ta mahai. 23 Tukhom ni hnôl chu ka Pa khom an ihnôl a ni. 24 Mi dang tûte la tho ngai loi thilhai an laia tho no inlân chu sual nei no nihai; atûn chu ki sinthohai an hmua, kei le Pa chu an ni ihnôl tâk a ni. 25 I khom nisianlân, an Dân lekhabua, ‘Anni’n a bi om loiin an ni hnôl’ ti irziak kha a hong tungna hranga an itho a ni.
26 “Irtharngamtu, Pa kuang ata nin kuang ki zuang itîr hrang kha, Pa rengata suak Irtha diktak kha a zuang tung tika ama’n ki thurchi nangni inhriattir a ti. 27 Nangni khom ki thu inhrepuhai nin ni, a phut ata ki kuang nin om sikin.
1 “Nin iamna nin mâk nona hrangin hi hi nangni ki insîr pe a ni. 2 Sinagok haia nangni kêlsua an ta; nangni that tumtuhaiin Pathian sin an itho anga an bê zoro la hong tung a ti. 3 Khaang thil kha mipuiin nin chunga la tho an ti, Pa le kei an nin hriat no sikin. 4 A zoro a zuang tung tika nangni ki lei hril tâk tih nin inhriat maina hrangin, hi thu hi nin kuang ki insîr a ni.
Irtha Irthiang sintho
“Hi thu hi a phut ata nangni ki la ihril loi a ni, nin kuang ki la om sikin. 5 Atûn chu a ni tîrtu kuang fe hrang ki nia, khan khomin nin laia tukhomin ki fena hrang nirdon mak chêi. 6 Hi thu hi nin kuang kin sîr sikin nin milung kha chardongna’n a sip tâka.
7 “Khannisianlân, thudik tak nangni ki hril, ki ife hi nin ta hrangin a sa ual, ki fe no’n chu Irtharngamtu kha nin kuang zuang no nia, ki fe’n chu nin kuang zuang tîr ki ti. 8 Ama kha a zuang tungin chu, sualna tiang mani, dikna thua mani, roirêlna thua mani, an lei irngai insual tih rammual inhriatir a ti. 9 Sualna lama thiamno chang an ti, keima an ni iam no sikin; 10 Thudika khom thiamno an ichang a ni, Pa kuang ki fe hrang sik le nin ni hmu ta no hrang sikin; 11 roirêlna lama khom thiamno an ichang a ni, hi rammual roirêltu khom thiamno changin a om tâk sikin.
12 “Nin kuang thu insîr hrang tamtak ki la nei, khannisian, atûn chu nangni hrangin inhriat lantak hrai a ti. 13 Irtha dik tak a zuang tung tika chu thutak murdia nangni hruai inlût a ti. Ama phuachôpin thu insîr no ni; thu a idong kha insîr a ta, thil la hong tung hrang khom nangni hril a ti. 14 Ama’n kei ni chôiindôm a ta, ki chong tihai kha lâkin nangni a hril hrang sikin. 15 Pa’n thil a inei murdi ki ta a ni; khasika khan kêng, ‘Irtha’n ki taa om lâkin, nangni hril a ti,’ ki iti a ni.
Chardongna le lômna
16 “Sôtnotea nangni’n ni hmu ta no chin nia, sôtnotea ni hmu nôk nin ti,” a tia.
17 A irchutirhai senkhatin, “Ei kuanga thu’nsîr kha imo a itihna? Sôtnotea ni hmu ta no chin nia, sôtnotea dên ni hmu nôk nin ti, a iti hi, ‘Pa kuang ki fe hrang sikin’ a iti hi? an irtia. 18 Khanchu, ‘Sôtnote’ a iti hi imo a itihna? Imo a insîr tum inhre mak me,” an tia.
19 Jisua’n thu an irdon nuam tih an hriata, an kuang, “Sôtnotea ni hmu ta no chin ni, sôtnotea dên ni hmu nôk nin ti, ki iti kha nin irdon irhlôm mo? 20 Thudik tak nangni ki hril, nangni’n nin mit irthi tâkin chap nin ta, khannisianlân, nin chardong kha lômna la chang a ti. 21 Nupangin nâihâ a tuang laiin chu a sân a char a dong ngaia, a zoro a tung tâk sikin; khannisianlân, nâi a neiin chu a chardong kha inhre ta mah, rammuala mihriam zuang suak kha a lôm sikin. 22 Khaang khan nangni khom atûn hin nin char a donga, khannisianlân, nangni hmu nôk ki ti, nin lungrîl lôm a ti, nin lômna kha tûte’n nangni lâkpai pe no nihai. 23 Kha nikhuaa khan nangni’n ite nir don ta no chin ni. Thudik tak nangni ki hril, Pa kuang i khom nin zongin chu ki’rhmingin nangni pe a ti. 24 Atûn ten ki’rhmingin ite la zong mak chêi; zong roi, khanchu hmu nin ti, nin lôm ar kip theina hrangin” a tia.
Rammual inhnêtu
25 “Kha kha chongirkhekin nin kuang kin sîr ngai a nia; nin kuang chongirkhekin insîr ta loiin fel taka Pa thu nangni ki hril zoro la hong tung a ti. 26 Kha nikhua khan chu nangni’n ki’rhmingin zong nin ta; keima’n nin ta hrangin Pa kuang zong ki ti, ki itihna ni mah. 27 Pa ngei khan lung nangni a thunga, nangni’n kei lung nin ni thunga, Pa rengata zuang ki nih ti nin iam sikin. 28 Pa kuang ata ki zuang suaka, rammuala zuang ki ni, rammual suaksan nôk ki ti, Pa kuang ki ife nôk hrang a ni,” a tia.
29 A irchutirhai khan, “Atûn chu fel takin thu nin sîr tâka, chongirkhekin insîr ta mak che. 30 Nangma’n itinrêng nin hriat, tûte’n nang an irdon khom nang ta mah, atûn chu kin inhriat ta. Hi sika hin Pathian kuang ata zuang ni nih ti kin iam tâk,” an tia.
31 Jisua’n a sâma, “Atûn chu nin iam ta mo? 32 Irngai roi, mâni in chita irthekindarin ki bingin nin ni mâk zoro la tung a ti, a tung thiai ta; khannisian, ki bingin om ma ung, Pa kha ki kuang a om. 33 Keimaa irtharngamna nin hmûna hrangin nin kuang hi thu hi ki insîr a ni; rammuala hin intak nin tuang ngai; khannisian hâi takin om roi! Keiin rammual kin hnê ta,” a tia.
1 Kha thu kha Jisua’n an sîra, irvân tiang a tanga, “Ka Pa, a zoro a tung ta; ni Nâipa chôiiindôm roh, Nâipa khomin nang a chôiindômna hrangin; 2 Mi murdi chunga irchamneina a kuang ni pêk tâk sikin, Ama khomin ni ipêk murdihai kuang kumtuang hringna a pêk theina hrangin. 3 Hi hi kumtuang hringna chu a ni, nang Pathian tak vai le ni itîr Jisua Krista inhriat hi. 4 Thil tho hrang ni ni ipêk kha ki tho zoia irnênga hin nang ki chôiindôm ta. 5 Ka Pa! rammual om mâna ni kuanga roiinpuina ki inei kha, atûn nangma makunga ngei ni chôiindôm roh.
6 “Rammual ata mi ni ipêkhai kuang nir hming kin langtir ta; ni ta an nia; anni kha ni ni pêka; ni thu khom an zôm ta. 7 Atûn chu thil ni ni ipêk murdi nangmaa suak a nih ti an inhriat ta. 8 Nangin thu ni ni ipêkhai kha an kuang ki pêka, an hong poma; ni kuang ata zuang ki ni ngêt ti an inhriat tâka; nangin keima ni ni tîr ti khom an iam ta.
9 “Keiin an ta hranga ki ingên pe hi, rammual ta hranga ngên pe ni ma ung, nangin ni ni ipêkhai ta hrang a ni, ni ta an ni sikin. 10 Ki ta murdi chu ni ta a ni, ni ta khom ki ta a ni, annia chôiindômin ki om ta. 11 Kei rammuala om ta no ning, anni hi chu rammuala la om an ta; kei chu ni kuang hong kîr hrang ki ni ta. Ka Pa Irthiang! nangin ni ni ipêkhai hi nir hmingin hrunghai roh, Keima le nangma pumkhat ei ini angin, anni khom pumkhat an ni theina hrangin.
12 “An kuang ki om sûng chu nangin keima ni ni ipêkhai hi nir hmingin ki hrung ngai; anni kha ki donsuia, an laia inkhat lua irhmang loia, irhmang nâipa ti no chu, Lekha thu a hong tung irkipna hrangin. 13 Atûn ni kuang hong kîr hrang ki ni ta, hi thil hi rammuala ki insîr a ni; ki lômna annia an nei irkipna hrangin. 14 Ni thu an kuang ki pêk tâka, rammualin anni kha an hmu mâkhaia, keima rammuala mi ki ini loi ang dênin rammuala mi an ni no sikin.
15 “Anni chu rammual ata la suak hrangin nang ngên ma ung, mi sual ata hrung hrangin nang ki ngên a ni. 16 Rammuala mi ni mahai, keima rammuala mi ki ini loi ang hin. 17 Anni chu thutakin irthiangtir roh, ni thu chu thutak a ni. 18 Rammuala ni ni itîr ang hin anni khom rammuala ki itîr a ni. 19 Anni sikin ki irthiang infâi a ni, anni khom thutaka an irthiang theina hrangin.
20 “Hihai ta hrang vai ngên pe ni ma ung, an thu insîr sika keima ni la iam hranghai ta hrang khoma ngên sa ki ni. 21 An rêngin inpumkhat an ni theina hrangin nang ki ngên a ni. Ka Pa nang keimaa ni oma, kei nangmaa ki iom ang hin, anni khom einia an omna hrangin, nangin kei ni ni tîr ti rammualin an iam theina hrangin. 22 Nangin roiinpuina ni ni ipêk kha kei khomin ki pêkhai ta, pumkhat an ni theina hrangin pumkhat ei ni ang dênin. 23 Keima annia, nang keimaa omin, an inpumkhat tak takna hrangin; khanchu ni ni itîr a nih ti rammualin inhriat an ta, lung ni ni thung angin anni khom lung ni thung tih rammualin inhriat an ti. 24 Ka Pa, nangin mi, ni ni ipêkhai hi ki kuanga om hrangin ki nuam, nangin lung ni ni thung sika rammual irsiang mâna ni ipêk ki roiinpuina kha an hmûna hrangin; 25 Ka Pa Fel tak! Rammualin nang inhre mahaia, keiin chu nang kin hriat; hihai khom hin nangin kei ni ni tîr ti an inhriat. 26 An kuang ni’rhming kin hriattira, inhriattir mai ki ti; nangin kei lung ni ni thungna ngei kha annia a oma, keima annia ki om theina hrangin,” a tia.
1 Jisua’n kha thu kha an sîr zoiin, a irchutirhai leh an suaka, Kidron dung an irkâna, khataka khan irhuan a oma, a sûnga khan a irchutirhai leh an lûta. 2 An cheltirtu Juda khom, kha hmun kha an hriata, kha khan Jisua leh a irchutirhai an irhmukhôm ngai sikin. 3 Khan, Juda khan sipai pâlkhat le Ochai inlalhai le Farisaihai itîr Tempil enkoltuhai, kha khan a hong hruaihaia; meiser hai, chokser hai, hriamhrei hai an hong chôia.
4 Jisua’n a chunga thil hong tung hrang murdi kha an hriat zita, a va suaka an kuang, “Tu mo nin izong?” a tia. 5 “Nazaret Jisua,” tiin an lei sâma, Jisua’n, “Kei hi ki ni,” a tia. An cheltirtu Juda khom kha an laia a ngîra. 6 Khanchu, “Keima hi ki ni,” an kuang a ti zoi le, hnung tiang an irtôla, irnênga an inrîla. 7 “Tu mo nin izong?” tiin anni kha ar donhai nôka, “Nazaret Jisua,” an tia. 8 Jisua’n, “Keima hi ki nih ti nangni ki hril ta khate, keima nin ni izong a ni’n chu, a danghai hi infetirhai roi,” a tia. 9 A thu’nsîr, “O Pa, Nangin kei ni ni ipêkhai kha, inkhat lua irhmangtir ma ung,” a iti kha a hong tung theina hrangin.
10 Simon Petera chu a khandai vong a phôia, Ochai inlaltak suak mikuar chang tianga a sât thâk pea. Kha suak irhming kha Malka a ni. 11 Jisua’n Petera kuang khan, “Khandai kha a koka thun roh, Pa’n a ni ipêk tuangna khilât hi ki i-in loi hrang ma ni?” a tia.
Jisua Anna makunga a ngîr
12 Khan, sipai pâl le an hruaitu le Judahai Tempil enkoltu, irchun khômhai khan Jisua kha an chela, an khita, 13 Anna kuang an hruai masaa, Kaiafa tarpupa a ni sikin. Kaiafa chu, kha kuma khan Ochai inlaltak a ni. 14 Kaiafa khan, “Mipui thi irthûla mi inkhat thi a sa ual,” tia Judahai tipuitu chu a ni.
Petera’n Jisua a phil
15 Simon Petera le irchutir dang inkhatin Jisua kha an zuia, kha irchutir kha Ochai inlaltak hmêlhriat a ni, Ochai inlaltak tual laia khan Jisua a lûtpui saa. 16 Petera chu mikot pên tiang a ngîra; irchutir dang Ochai inlaltak hmêlhriat kha a va suaka, mikot enkoltu dôngmate kha a chongpuia, Petera kha a hruai inlûta. 17 Mikot enkoltu dôngmate khan Petera kuang, “Nang khom, hi pa irchutirhai laia mi ni ini loi ma ni?” a tia. Ama khan, “Ni ma ung,” a tia. 18 Siahlohai le enkoltu sipaihai khan an ngîra, a dâi hrai sikin meiholin mei an thoa, an uata; Petera khom ngîr pumin an laia mei lum kha a va uat saa.
Ochai inlaltakin Jisua chong ar don
19 Ochai inlaltak khan Jisua kha a irchutirhai thurchi le a thu irchutir chungchâng ar dona. 20 Jisua’n a sâma, “Thangphuangin mi tin kuang thu kin sîr ngai; Juda murdi fe irchunna Sinagok haia, Tempil haia, ki’rchutir mai ngaia, inrûkin ite insîr ngai ma ung. 21 Ithoa mo ni ni irdon? Ki thu’nsîr irngaituhai kuang imo ki insîr ngai irdonhai ro ba, imo ki insîr an inhriat,” a tia. 22 Kha kha an sîr zoiin chu enkoltu sipai ngîrhai laia inkhat khan Jisua hmâia an bêna, “Ithoa mo Ochai inlaltak kha, khaanga ni isâm?” a tia. 23 Jisua’n a sâma, “Ki ti insualna a om duaiin chu, imo ki ti insual, hi mihai hi inhril roh. Khannisian, ki tho indikna a omin chu, nin hril ro, khannisian ki tho’n dik a omin te ithoa mo ni ni inbên?” a tia. 24 Khanchu, Anna khan khit pumin Ochai inlaltak Kaiafa kuang a tîr tâka.
Petera’n Jisua a phil nôkna
25 Simon Petera khan ngîrin mei lum a la uata, “Nang khom hi irchutirhai laia mi ni mak che mo?” an tia. Khan Petera’n a phila, “Ni ma ung,” a tia. 26 Ochai inlaltak siahlohai laia inkhat, Petera’n a mikuar a isât thâk pe urêng khan, “Irhuana khan a kuang nang ki ihmu mo ni ma?” a tia. 27 Petera khan a phil nôka; khanchu âr a khuang zôi zel tâka.
Jisua Pilata makunga
28 Zîng taka Jisua chu Kaiafa in ata Ramoptu in Praitoriana an hong hruaia. Juda irchamneituhai chu, dân ang taka irthianga Ferkân Kût fâk an nuam sikin Ramoptu in Praitoriana lût mahai.
29 Khanchu, Pilata chu an kuang a va suaka, “Hi mi hi imo a tho’nsuala nin ibe,” a tia. 30 Anni khan, “Hi mi hin thilsual tho no sian chu ni kuang hong hruai no ni ung,” an tia. 31 Pilata’n, “Nangni’n hruai unglân, nin dân angin a chungthu rêl pe roi,” a tia. Khan, Judahaiin a kuang, “Keini’n chu mi that theina dân nei ma ung,” an tia. 32 A thi hrang thu Jisua’n a lei insîr a hong tung theina hrangin khahai kha a hong iom a ni.
33 Khanchu, Pilata chu Praitoriana a lût nôka, Jisua kha a koia, a kuang, “Judahai rêng mo ni nih?” a tia. 34 Jisua’n a sâma, “Kha kha nangma milung suaka ni iti mo, mi dangin ki chungchâng nang an ihril mo?” a tia. 35 Pilata’n a sâma, “Kei hi Juda mi mo ki ini? Ni chipuihai le Ochai inlalhaiin ki kuang nang an hong ihruai a ni hi; imo ni iti?” a tia.
36 Jisua’n a sâma, “Ki rêng Ram hi chu rammuala om ni ma, ki Ram chu hi rammuala om ni sianlân, Judahai kuta incheltira ki om nona hrangin ki hnung zuihaiin doihai an ta, ki rêng Ram chu hitaka hin ni mah,” a tia. 37 Pilata’n, “Khante, rêng mo ni ini?” a tia. Jisua’n a sâma, “Nangma’n rêng ni ni ti khate; kei chu thutak inhriattir hi ki isuakna san le rammuala ki izuangna san chu a ni; tukhom thutaka omhai chu ki’rhâi an irngai ngai,” a tia. 38 Pilata’n a kuang “Thutak chu imo a ini?” a tia.
Jisua thi hrangin an inkung
Kha kha an sîr zoiin chu Judahai kuang a va suak nôka, an kuang, “A chunga thiamno inchang hrangin ite a bi hmu ma unga. 39 Khannisian, nin dân angin Ferkân Kût zoro’n intângna ina om mi inkhat kin sua ngaia. Judahai rêng hi nangni insua pe inlân nin nuam mo?” a tia. 40 Khannisianlân, inring takin an khêka, “Hi pa hi chu ni no ri se, Barabba kha ni ri se,” an tia. (Barabba kha hrâtlâksong ngai mi a ni.)
1 Khan, Pilata’n Jisua a hruaia, a vîka. 2 Sipaihaiin ilhling lukhum an siama, an inkhumtira, khanchu, songkol irfual senduk an innghâktir sa, 3 “Chubai, Judahai rêng!” an tia; an inbêna. 4 Pilata chu pên tiang a va suak nôka, an kuang, “En u ta, a chunga ite a sualna hmu ma ung tih nin inhriatna hrangin nin kuang ki hong ihruai suak hi,” a tia. 5 Khanchu, ilhling lukhum khumpumin songkol irfual senduk innghâkin Jisua kha a hong suaka. Pilata’n an kuang, “En u ta, hi mihriam hi,” a tia.
6 Ochai inlalhai le a nghâkhaiin an hmu’n chu, “Krosa hembe roh, Krosa hembe roh,” tiin an khêka. Pilata’n an kuang, “Nangni’n hruai unglân, Krosa hembe roi, keiin chu ite a chunga a sualna hmu ma ung,” a tia. 7 Judahaiin an sâma, “Dân kin neia, kha dân ang khan a ithi hrang a ni, Pathian Nâipa ar ti sikin,” an tia. 8 Pilata’n kha thu kha an hriatin chu a chi nôk uala. 9 Praitoriana a lût nôka, Jisua kuang, “Kho tianga mi mo ni ini?” a tia. Khannisianlân, Jisua’n sâm ma. 10 Pilata’n a kuang, “Ni ni isâm loi hrang mo? Nang insua thei ki ni, Krosa nang hembe thei ki ni, ti hi ni inhriat loi ma ni?” a tia. 11 Jisua’n a sâma, “Chung tiang ata pêk ni ni no’n chu, ki chunga irchamneina rêng nei no chi ni, khasikin, ni kuanga ni pêktu khan sual a pêl intam ual a ni,” a tia. 12 Khasikin Pilata’n ama insua hrang lam a zong tâka, khannisianlân, Judahai an khêka, “Hi pa hi nin sua’n chu Kaisara rual ni no chi ni,” an tia.
13 Pilata’n kha thu kha an hriatin chu Jisua kha a hruai suaka, “Lungirchuan” Hebrai chonga chu Gabbatha an iti roirêlna toihmuna khan a toia. 14 Ferkân Kût irtûng ni a nia, sûn lai tak a ni. Judahai kuang khan, “En u ta, nin rêng hi,” a tia. 15 Khahai kha an khêka, “Inboipai roh, inboipai roh, Krosa hembe roh,” an tia. Pilata’n, “Nin rêng hi Krosa ki ihembe hrang mo?” a tia. Ochai inlalhaiin an sâma, “Kaisara ni no chu rêng dang nei ma ung,” an tia.
16 Khanchu Pilata’n Jisua kha Krosa hembe hrangin a pêkhai tâka.
Jisua hembe thu
Khanchu, Jisua kha an hruai tâka, 17 Khan a kros kha irputin “Luru hmun” Hebrai chonga Golgotha an iti hmun dênin a fe tâka. 18 Khatak khan krosa an hembea, mi dang inhni, a sîr le a sîra an hembe saa, a laia Jisua. 19 Pilata’n inhriatirna a’rziaka, “Nazaret Jisua, Judahai rêng,” tiin kros rêla a târa. 20 Inhriatirna kha Juda tamtakin an tepa, Jisua an hembêna hmun kha khopui kôl a ni sikin Hebrai, Rom, Grik chongin irziak a ni. 21 Juda Ochai inlalhai khan Pilata kuang, “Judahai rêng tiin irziak no roh, Judahai rêng ki ni a ti, tiin irziak roh,” an tia. 22 Pilata’n a sâma, “Ki irziak chu ki’rziak zoi ta,” a tia. 23 Sipaihaiin Jisua krosa an hembe zoiin chu a silkaihai an lâk pea, sipai minliin an irsema, an sika phêk kha khatin an dong. A songkol irfual an lâk saa, kha kha insui loi songkol a nia, a ring ata a pumpuia phan a ni. 24 Anni khan, “Hi hi chu ir-ekthêr no roi, tu ta hrang tak mani inhriatna hrangin tasân ei ti,” an tia.
“Ki silkaihai an irsema,
Ki songkol hrangin tâ an sâna,”
ti irziak kha a hong tung indik hranga a ni. Sipaihai khan kha kha an tho tâk a ni.
25 Jisua Kros kôla khan, a nu le a nu zuarpuinu Mari, Klopa dôngma le Magdala mi Mari hai an ngîra. 26 Jisua’n a nu le a kôla ngîr irchutir lung a ithungtu kha a hmu’n chu a nu kuang, “Ka nu, en ta, ni nâipa kha,” a tia. 27 Irchutir kuanga khom khan “En ta, ni nu kha,” a tia. Kha zoro ata chu a irchutir kha ama ina om hrangin kha nu kha a hruai tâka.
Jisua thi thu
28 Kha zoi hnung chu Jisua’n itinrêng a tung irkip ta ti an hriata; Pathian lekha thu a tung theina hrangin, “Ki tui an hrâl e,” a tia. 29 Khataka khan bêl, uain thûra sip, a oma; khanchu sponj, uain thûra an inchie kha, husop khianghrolin an târa, a hmûra an hong intungtira. 30 Jisua’n uain thûr kha a lei in zoiin chu, “A’rzoi ta,” a tia; khanchu a lu a kûna, a hrang a chat ta.
Jisua kânga an sun
31 Judahai irtûng ni a nia, ruakhai kha Sabat nia Krosa a om mai nona hrangin, kha Sabat kha nikho roiinpui a nia, Judahai khan mi hembehai ke inkhiakhaia, an ruakhai insum hrangin Pilata kuang an ngêna. 32 Khanchu, sipaihai an honga, Jisua pâla hembehai, a matonpu le a dang kehai an khiak pehaia. 33 Jisua kha an va pana, a thi tah ti an inhriata, khannisian a ke chu khiak pe mahai. 34 Sipai laia inkhat khan a kânga ufeiin a suna, thisen le tui a zuang luang suak tâka.
35 Mit ngeia hmutu insîr a ni, nangni khomin nin iamna hrangin. A thu inhriatir hi a dika, thu dik an sîr ti inhretu inkhat a om. 36 Pathian lekha thu’n “A ru inkhat lua inkhiak ni no ni,” ti a hong indikna hrangin ama kha a hong iom a ni. 37 Pathian lekha thu dangin, “An isunna kha la en an ti,” a ti saa.
Jisua phûma a om thu
38 Kha zoi hnung chu Arimathai khuaa om Josefa, Jisua irchutir, Judahai a chi sika irthuptu khan, Pilata kuang Jisua ruak la hrangin a ngêna. Pilata’n a lei phal pea. Khanchu, a ruak kha a va lâka.
39 Nikodema, zâna a kuanga hongtu kha mura le aloe irpolsai, her sômthum dôr chôiin a honga. 40 An inhni khan Jisua ruak kha an lâka, Judahai irphûm dân angin thil mirimhoihai leh khan puan irnêm silin an tuama. 41 Ama an hembêna hmuna khan irhuan a oma; irhuana khan thân thar, tûte lan zâlna ngai loi a oma. 42 Judahai irtûng ni a ni sikin le thân kha an kôl renga om a nia, Jisua kha an phûm ta.
1 Pathian ni zîng taka, thingchangvârroa chu Magdala mi Mari kha thâna khan a va fea, lung kha thân ata lâkpaiin a hmua. 2 Khanchu Simon Petera le irchutir dang Jisua’n lung a ithungtu kuang khan a van tâna, an kuang, “Thân ata Rengpa kha an lâk suaka, khôn mo an isia inhre ma ung,” a tia.
3 Khanchu, Petera le irchutir dang kha thân tiang panin an suak tâka. 4 An ruaiin an intân suama; irchutir dang kha Petera nêkin an tân hrât uala, thân kha a tung masa a ni. 5 Kûnin a vênga, puan irnêm sil omhai kha a hmua, a sûnga chu lût mah. 6 Simon Petera khom a hnunga a hong tung tâka, thân sûnga khan a lûta, puan irnêm sil omhai kha a hmua, 7 a lu khitna puan khom kha, puan irnêm sil kôla om loiin irzuata a binga omin a hmua. 8 Irchutir dang, thân tung masa khom kha a lût sa tâka, a hmua, a iam ta. 9 Mithi lai ata thoi nôk hrang a nih ti Pathian lekha thu kha lan hre thiam mahaia. 10 Khanchu, irchutirhai kha an in tiang an kîr nôk tâka.
Magdala mi Mari kuanga Jisua inlârna thu
11 Khan, Mari kha thân pên tiang chap puma ngîrin a kûna, thân sûng kha a vênga. 12 Vântîrtôn inhni, puan cheka irvo’n, Jisua an inzâlna lu thun tiang inkhat, ke thuan tiang inkhat toiin a hmuhaia. 13 Anni khan a kuang, “Nupang, ithoa mo ni ichap?” an tia. Ama khan an kuang, “Ki Rengpa an lâkpaia, an isiana inhre ma ung,” a tia. 14 Kha kha an sîr zoiin chu a hong irheia, Jisua ngîr kha a hmua, Jisua a nih ti inhre mah. 15 Jisua’n a kuang, “Nupang, ithoa mo ni ichap? Tu mo ni izong?” a tia. Ama khan irhuan enkoltu mani a sôna, a kuang, “Ka Pu, ama kha ni ilâkpai a ni’n chu, ni isiana nin hril ro ba; khanchu la ki ti,” a tia.
16 Jisua’n a kuang, “Mari,” a tia. Ama khan ama tiang a hong irheia, Hebrai chongin, “Rabboni,” a tia, (Kha kha “Irchutirtu” tihna a ni.) 17 Jisua’n a kuang, “Ni tôn no roh, Pa kuang khom la hong fe ma ung; khannisianlân, ki urênghai kuang va fe’n lân, an kuang, ‘Ka Pa, nin Pa, Ki Pathian, nin Pathian kuang kâi hrang ki ni’ a ti, ti roh,” a tia. 18 Mari, Magdala mi kha a fe tâka, irchutirhai kuang, “Rengpa kha ki hmu ta,” a va tia, a kuanga thu a insîr pe kha a hrilhaia.
Irchutirhai kuang Jisua an lârna thu
19 Pathianni khohloi a nia, Judahai an chi sikin irchutirhai omna mikothai kha an khâr tâka, Jisua a honga, an laia a hong ngîra, an kuang, “Nin chunga irtharngamna om ri se,” a tia. 20 Kha kha an sîr zoiin chu a kut le a kâng an entirhaia, Rengpa kha an hmu’n chu irchutirhai kha a sân an lôm tâka. 21 An kuang, “Nin chunga irtharngamna om ri se,” a ti nôka. “Pa’n keima a ni itîr ang dênin kei khomin nangni ki tîr a ni,” a tia. 22 Kha kha an sîr zoiin chu, “Irtha Irthiang nei roi, tiin an chunga a phûk a mût khumhaia. 23 Tu sual khom nin ingaidamhai ka chu ngaidam ni an ta, nin ingaidam loi chu ngaidam ni no nihai,” a tia.
Thoma kuanga Jisua inlârna
24 Sômhleihnihai laia inkhat, Thoma, (Phîra) an iti kha, Jisua hong laiin an laia om maka. 25 Irchutir danghai khan a kuang, “Rengpa kha kin hmu ta kêng,” an tia. Ama khan, “A kuta thîr hembêna sabê ki hmua, thîr hembêna sabêhaia ki kut leh ki tôna, a kâng kin them mâka chu iam no ning,” a tia.
26 Sûn riat hnunga a irchutirhai kha in sûnga an om irchun nôka, Thoma khom an laia a om saa, Mikothai kha an kala, khannisianlân Jisua a honga, an laia a hong ngîra, “Nin chunga irtharngamna om ri se,” a tia. 27 Khan, Thoma kuang khan, “Ni kut pârin hong inthemin lân, ki kuthai en ro; ni kutin hong inbanin lân, ki kâng hi tôn roh; iam loiin om no’n lân iam zôi zel roh,” a tia. 28 Thoma’n a sâma, “Ki Rengpa le ki Pathian,” a tia. 29 Jisua’n a kuang, “Ni ni hmu sika iam mo ni inih? Hmu loia iamhai chu an râlvân a sa,” a tia.
Hi lekhabu irziakna san
30 Jisua’n irchutirhai makunga khan sinirkhêl dang tamtak a thoa, kha kha hi lekhabua irziak ni mah. 31 Jisua kha Krista Pathian Nâipa a nih ti nin iam theina hrang le nin iam sika khan ama irhminga hringna nin nei theina hranga hihai hi irziak a ni.
1 Kha zoi hnung chu Jisua kha Tiberi dîla a irchutirhai kuang an lâr nôka, hiang hin an lâr a ni. 2 Simon Petera, Thoma (Phîra an iti,) Galili rama Kana khuaa om. Nathanaela, Zebedaia nâipahai inhni, a irchutir inhni danghai an om irchuna. 3 Simon Petera khan an kuang, “Nga chel fe hrang ki ni,” a tia. Anni khan, “Keini khom ni kuang zuang sa kin ti,” an tia. An fe suaka, irkuanga an chuang tâka; khannisian kha zâna khan chu ite man mahai. 4 Khua a hong vârin chu Jisua kha ivadung kôla chiaiphoia a ngîra; khannisianlân, irchutirhai khan Jisua a nih ti inhre mahai. 5 Jisua’n an kuang, “Nâihaio, ite nin iman loi mo?” a tia. Anni khan, “Man viat ma ung,” tiin an sâma.
6 Jisua’n an kuang, “Irkuang sîr chang tianga khan lên vôr unglân, man nin ti,” a tia. Khanchu an vôra, nga kha a tam ta hrai sikin kaisua thei ta mahai. 7 Irchutir, Jisua’n lung a ithung khan Petera kuang, “Rengpa a ni so te,” a tia. Simon Petera’n Rengpa a nih ti an hriatin chu puan a sila, (puan boia om a ni sikin) dîla khan ar chôm thâk tâka. 8 Irchutir danghai khan irkuang chîn le, lêna nga sip kaisua pumin an hong pana. Muang ata hla maka, metar irzakhat vêla om an ni.
9 Muanga an va suakin chu, meihola mei tho, a chunga nga le bai om kha an hmua. 10 Khan, Jisua’n, “Atûn hin nin nga man kha hong chôi u ta,” a tia. 11 Khanchu, Simon Petera kha irkuanga a va chuanga, lên kha nga lian tak tak sipin muanga a kai suaka, a rêngin irzakhat sômringa inthum a ni. Khaang dôr kha om khom sianlân, lên kha chet mah. 12 Jisua’n an kuanga, “Hong unglân fa ta roi,” a tia. Irchutirhai laia tukhomin, “Tu mo ni ini?” ti’n irdon ngam mahai. Rengpa a nih ti an inhriat infel sikin. 13 Jisua kha a fea, bai a lâka, an kuang a pêkhaia, nga khom khaang dênin a pêkhaia. 14 Kha kha Jisua mithi lai ata a thoinôk hnunga an lâr voithumna a ni.
Ki belrahai infa ro
15 Khan, an fâk zoiin chu Jisua’n Simon Petera kuang, “Simon, Johana nâipa, hihai nêkin nangin lung mo ni ni thung ual?” a tia. Ama khan, “O Rengpa, lung nang ki thung ti nin hriat,” a tia. Jisua’n a kuang, “Ki belra tehai infa roh,” a tia. 16 A voihninaa khom Jisua’n a kuang, “Simon, Johana nâipa, nangin lung mo ni ni thung?” a ti nôka. Ama khan, “O Rengpa, lung nang ki thung ti nin hriat,” a ti nôka. Jisua’n, “Ki belrahai enkol roh,” a tia. 17 A voithumna khan a kuang, “Simon, Johana nâipa, nangin lung ni ni thung mo?” a tia. Jisua’n a voithumna’n, “Nangin lung ni ni thung mo?” a ti pe nôk sikin, Petera irngai a siat tâka. “Rengpa itinrêng nin hriat, lung nang ki thung ti nin hriat,” a tia. Jisua’n a kuang, “Ki belrahai infa roh.
18 “Thudik tak nang ki hril, ni nâiinpang laiin nir siama, ni kong ni khita, ni nuamna tiang tiang ni chai ngaia, ni ulian tika chu ni kut phar ni ta, mi dangin ni kong nang khit pe an ta, ni nuam loina ti tiang nang hruai an ti,” a tia. 19 (Kha thu kha Jisua’n an sîr pena chu, Petera thi lam hrang le Pathian a la ichôiindôm hrang a nih ti irhmutir hrangin kha thu kha a insîr a ni.) Kha kha an sîr zoiin chu Jisua’n a kuang, “Ni zui roh,” a tia.
Jisua le irchutir dang
20 Khan, Petera kha a hong irheia, irchutir, Jisua’n lung a ithung, zânbu fâk laia Jisua tiang va kûna, “Rengpa, tu mo nang a chel hrang?” tia irdontu kha a hnunga a hmua. 21 Ama kha Petera’n a hmu’n chu Jisua kuang, “Rengpa, hi pa hin imo a itho hrang?” a tia. 22 Jisua’n a kuang, “Ki zuang nôk mâka hring mai hrangin nuam khom inlân, imo ni ilo hrang? Ni zui zôi zel roh,” a tia. 23 Khan, kha irchutir kha thi loi hrang angin urênghai laia thu an thang tâka. Khannisianlân, Jisua’n thi no nih ti a kuang a insîr ni mah. “Ki zuang nôk mâka hring mai hrangin nuam khomin lân, imo ni ilo hrang?” a itihna kêng a ni.
24 Kha irchutir kha hi thu inhretu le irziaktu hi a nia, a thu inhriatir hi a dik a nih ti ei inhriat. 25 Thil dang tamtak Jisua’n a itho a la oma, khahai kha irziak suak zit hrang ang ni sian, lekhabu irziak hrang chu rammuala khom hin inlengin iam ma ung.
1 Theofil, ki lekha masaa khan Jisua sintho irphut thu ata irvâna ilâka a om dêna a sintho le a thu irchutir murdi ki’rziak tâka; 2 a tîrtôn inthanghai kha Irtha Irthiang hmangin chong a bêhaia, irvân tiang ihruaiin a om nî tena thu kha; 3 a thi zoiin a hring nôk tih inhriatna hrangin irhmâi loiin voi tamtak an kuang an lâra, sûn sômminli sûng kha Pathian Ram thu insîrin an lâr ngai. 4 An laia a om laiin “Jerusalem khua suaksan no roi Pa inkung nangni ki ihril kha lei nghâk roi, a tia. 5 Johana khan tuiin nangni a baptis ngaia, khannisianlân nangni chu sûn sôtnotea Irtha Irthianga baptis ni nin ti” tiin a hrila.
Jisua irvân a kâina thu
6 Khan, tîrtônhai kha Jisua leh an irbukkhômin chu, “Rengpa, atûn hin mo Israelhai ram ni inding nôk hrang?” tiin an irdona. 7 Jisua’n an kuang, “Pa’n a zoro le nikhua, ama ircham chama om hranga a isia chu nangni lei inhriat zât ni mah. 8 Khannisianlân, Irtha Irthiang nin chunga a zuang tung tika sinthotheina la nei nin ti; khanchu, Jerusalema, Judai le Samari ram pumpuihaia kôlkung dênin ki thu inhretuhai nin ini hrang a ni,” a tia.
9 Khan, kha thu kha an sîr zoiin chu an en chian laiin irvâna hruai a nia, sûmin an ihmu phâk loia a lâk irhmang tâka. 10 Khaanga irvâna a kâi an thîr mai laiin mi inhni puan chek sil an kuang an zuang ngîra. 11 Kha mihai khan, “Galili mihaio, ithoa mo irvân tiang enin nin ingîr mai? Hi Jisua nin kuang ata irvâna lâkpai hi irvâna a ikâi nin hmu ang takin zuang nôk a ti” an tia.
Juda thûltu inthang thu
12 Khanchu, tîrtônhai kha oliv tânga irthokin Jerusalema an kîr nôk tâka, kha tâng kha Jerusalem ata kilometar khat vêl a ni. 13 Khua an lûtin chu an tungna chontan chunginta an kâia; khahai kha Petera, Johana, Jakoba, Andria, Filipa, Thoma, Bartholomaia, Mathaia, Alfaia nâipa Jakoba, Zelota pâla om Simona le Jakoba nâipa Juda hai an ni. 14 An rêng khan nupanghai le Jisua nu Mari le Jisua urênghai le lungrual takin an chongchai ngai.
15 Sûn tômte hnunga chu, iamtuhai irbukkhômna an neia, an rêngin irzakhat sômhni vêl an ni, khahai laia khan Petera chu a ngîra, an kuang, 16 “Urênghaio, Irtha Irthiangin Jisua cheltuhai hruaitu Juda thu Davida bâia a lei insîr, Pathian Lekha thu kha, a hong itung hrang pial a ni. 17 Ama kha ei laia a kop sa ngaia, ei sinthônaa hin khom dongtum nei hranga inthang sa a ni,” a tia. 18 Ama khan a thilsual thôna manin hmun inkhat a lâka, a tâk thata, a phîng chetin a rîl murdi a suak zita. 19 Kha thu kha Jerusalema om murdi’n an inhriata, kha hmun kha anni chongin “Akeldama” an tia, kha kha “Thisen hmun” tihna a ni.
20 Inpâkna hla bua hiang hin irziak a ni.
‘A in le loi kha ram sianlân,
A sûnga tûte om no ri se,’
ti le ‘A hruaitu nina kha mi dangin chang ri se,’
ti hi.
21 Khanchu, ei Rengpa Jisua leh ei om laia ei laia kop sa ngai, 22 “Baptistu Johana zoro ata irvâna a ni kâisan ni dêna kop ngai, mi inkhat, a thoinôkna nin hriatpuitu hrangin ei inthang suak hrang a ni” a tia. 23 Khanchu, mi inhni, Josefa, Barsaba an iti, (Justa khom an iti sa ngai) le Mathia an inkunga. 24 Kha hnung chu an chongchaia, “Rengpa, nang mihriam murdi lungrîl inhretu, hihai hi a tu khôk hi mo ni inthang nin hriattir roh. 25 Juda’n ama hmuna a fe theina hranga hi tîrtôn sin a imâk rak hmun thûl hrangin,” an tia. 26 An inhnia chunga khan tâ an sâna, an tasân chu Mathia chunga a chuma, Mathia kha tîrtôn sômhleihnihai laia khan tep sa a ni ta.
1 Pentikos nî a hong tungin chu an rêngin hmun khata an omkhôm zita. 2 Khanchu, voikhat rengin irvân ata phâivopui anga irhâi a zuang tung thuta, an toina in kha irhâi khan a zuang sip zita. 3 Milei anga om meidôn irsem indarin an hmua, an chunga a chuang chita. 4 An rêngin Irtha Irthiangin an sip zita, Irtha’n a inchongtirhai angin chong dangin an chong tâka.
5 Irvân hnuaia nam chi tinrêng laia om, Pathian ngaisak Judahai kha Jerusalema an châma. 6 Kha irhâi kha an inhriattin chu mi tamtak an hong irchuna, an thu’nsîr kha mi tinin mâni chong ang chitin an inhriat sikin an milung sûnga an lei buaia. 7 Irkhêl an ti tak taka, “En u ta, hi thu’nsîr murdihai hi Galili mi mo ni mahai? 8 Itina mo ei rêngin mâni chong ang chitin ei inhriat seng thei ma ni? 9 Senkhat Parthai mi, Medai mi, Elimatai mihai ei nia; senkhat Mesopotamia rama om, Judai rama om, Kapadokia ram, Ponto le Asia ram, 10 Frugia le Pamfulia ram, Aigupta le Libia rama Kurini khua kôlvêla omhai ei nia; senkhat Rom khua ata hong, 11 Judahai le Juda saphun hai ei nia; senkhat Kret chômbung mi le Arab rama mi ei nia; khannisianlân, Pathian sintho roiinpuihai an insîr hi, mâni chong ang chita ei inhriat hi” an tia. 12 An rêngin a’rngaina lam chang inhre loiin ar khêl an tia, “Hi hi imo a ini ta ngai!” an tia.
13 Senkhatin chu, an innuisanhaia, “Uain thar an inrui kêng!” an tia.
Pentikos nia Petera thu’nsîr
14 Sômhleikhathai laia Petera kha a ngîra, mipui laia khan inring takin thu an sîra, “Nangni Judai rama mihai le Jerusalema om murdihaio, ki thu’nsîr hi irngai roi. 15 Hihai hi nin iiam angin inrui mahai, zîng dâr kuak vai kêng a la ini. 16 Hi thil hi deipu Joela’n a lei insîr kha a ni:
17 Pathianin, ‘Sûn hnungkhôna chu hi hi la tho ki ti:
Mi murdi chunga Irtha la buak ki ta,
Nin nâipahai le nin nâinuhaiin ki thu lan sîr an ta,
Nin ruathartehaiin inlârna la hmu an ta,
Nin tarhaiin irmangin phan an ti.
18 Kha nikhuahaia khan chu ki sinthotuhai,
Nupang pasal chunga Irtha buak ki ta,
ki thu insîr an ti.
19 Chung tiang irvâna sin irkhêlhai,
Hnuai tiang irnênga thilirkhêlhai inhmutir ki ti.
Thisen, mei, meikhuhai om a ti;
20 Misa inthim a ta,
tha thisen chang a ti;
Rengpa nikhua roiinpui le poimo tak zuang tung mân.
21 Khanchu Rengpa irhming irlam murdi’n chu Saninhringin om an ti,” a ti,’
iti kha.
22 Nangni Israel mihaio, irngaitua u ta; nin inhriat chit angin Pathianin Nazaret Jisua hmangin thil roiinpui tak takhai, thilirkhêl hai sinirkhêl hai nin laia ngêt tiin. A mi inkung a nizia a sân an lang infeltir a ni kha te. 23 Ama kha Pathian lei itum lei irêl angin nin kuang pêk a nia. Nangni’n nam dang mihai hmangin krosa nin hembea, nin ithat kha.
24 Khannisianlân, Ama kha chu thina ichel sua thei a ni no sikin Pathianin thina ata inzôkin, a kaithoi ta, 25 Davida khomin a chungchâng hianga a lei insîr kha:
‘Ki makunga Rengpa ki hmu mai ngaia,
ki kuang a oma,
Ite’n nin hnîng thei mah.
26 Khasikin ki lungrîl a lôma,
ki chong khom lômna’n a sipa,
ki taksa khomin a sabei ngit a ni.
27 Ki’rtha mithi khuaa mâksan no chi nia,
Ni mi irthiang ruak hmon phal no chi ni,
28 Hringna lam ni nir hmua,
Ni hmêl hmu’n lômin sip ta ki ti,’
a tia.
29 Urênghaio, irchibul Davida thu kha hâi takin nangni ki hril, ama kha a thi tâka, an phûma, a thân khom atûn ten ei kôla a la om mai. 30 Ama kha deipu a nia, ar chihai laia tu mo khat a rêngtoihmun lua hrangin Pathianin a kuang chong an kung ngit ti an hriata. 31 Khan Davida khan Pathianin sûnmatona imo a itho hrang ti kha a hmua, khasikin Mesia thoinôk hrang thu kha a insîr a nia,
‘Mithi khuaa mâksan ni maka;
a ruak khom hmon no nia,’
ti thu a insir a ni. 32 A ni, kha Jisua kha Pathianin a kaithoi nôk tâka, kha thu kha ei rêngin an hriatuhai ei ni. 33 Pathian chang tiang chôiindôm a ni tâka, Pa kuang ata Irtha Irthiang inkung kha a donga, nin ihmu le nin inhriat hi a thilpêk a zuang ibuak chu a ni hi. 34 Davida irvâna fe mak e, ama ngeiin
‘Rengpa khan ki Rengpa kuang ki chang tiang lei toi mai roh.
35 Ni râlhai ni ke irnghatnaa,
hong sia ki ti,’
a itihna kêng. 36 “Khanchu, Jisua nin ihêmbe kha, Pathianin Rengpaa le Kristaa a siam ngei ti Israel mi tinin inhre ngêt ri sehai” a tia.
37 Khanchu, kha thu kha an inhriatin chu an lungrîl a sân a tôna, Petera le tîrtôn danghai kuang khan, “Urênghaio, imo kin itho hrang tâk?” an tia.
38 Petera’n, “Irlet unglân nin sualhai ngaidam a nina hrangin Jisua Krista irhmingin baptisma chang chit roi; khanchu, hi thilpêk, Irtha Irthiang hi, dong nin ti. 39 A inkung hi nangni le nin nâihai le ram hla taka mi murdihai hrang le Rengpa ei Pathianin a kuanga a ikoihai hrangin a ni,” a tia. 40 Thu dang tamtakin a hrilfiaa, “Atûn lai mi sualhai ata hi irdîn roi” tiin a ngênhaia. 41 A thu zômhai murdi’n baptisma an changa; kha nî khan mi sângthum vêlin an thop sahai tâka.
42 tîrtônhai thu irchutirin irpôlkhôm le bai khoia chongchaiin sathnem irngai takin an oma.
Iamtuhai om dân
43 tîrtônhai khan sinirkhêl le thilirkhêl tamtak an tho sikin mi tinin an chihai tâka. 44 A iamhai murdi chu irpôlkhôm maiin an neinun tinrêng irkopin, 45 an irchonhai an neinunhai murdi an zuara, an intak lam ang chitin an rênga kuang an sem ngaia. 46 A nitin milung hmunkhatin tempila an inkhôm ngaia, an in tiang khom raifân tak le milung chuk takin khalâi an ot suam ngai. 47 Pathian an inpâka, mi murdi lôm lamin an oma. Khan, Rengpa’n a saninhringhai ka chu a nitin an kuang an thoptirhai maia.
1 Chohnung dâr thum chongchai zoro anga khan Petera le Johana kha tempila an hong fea. 2 Pa inkhat, a suak lai ata ke’nbâi hi an hong irzôna, Tempila fehai kuang kut lei do hrangin mikot “Enhoi” an iti kôla a nitin an sia ngaia. 3 Kha pa khan Petera le Johana tempila lût hrang kha a hmuhaia, kut a lei doa. 4 Khan Petera le Johana khan an en chiana, Petera khan a kuang, “Ni hong en ta,” a tia. 5 Khanchu ama khan imo khat dong hrang anga sabeiin a ena, 6 Khannisianlân Petera’n, “Sum le rângachak ite nei ma ung, nikhomsian, ki ineisun nang pe ki ti. Nazaret Jisua Krista irhmingin ke’n fe ta roh,” a tia. 7 A kut chang tiang a chela, a kaithoia, voikhat rengin a ke le a ke ârtui ruhai kha a hong hrât zôi zel tâka. 8 Khanchu kha pa kha irchôm zokin a ngîra, ke’n a fe tâka, kea fe’n, irchôma Pathian inpâk pumin Tempila khan a lût sa tâka. 9 Mipui murdi’n kea a ife le Pathian a inpâk kha an hmu’n chu, 10 Tempil mikot Enhoi kôla kutdo toi ngai kha a nih ti an inhriata, a chunga thil tung kha ar khêl an ti tak taka, a’rngaina lam chang inhre mahai.
Tempila Petera thu’nsîr
11 Khan, kutdo khan Petera le Johana kha a la chel mai laiin mipuihai kha Solomona bokrop an itia khan an lei intân irbuka ar khêl an ti tak taka. 12 Khan, Petera’n mipuihai kuang, “Nangni Israel mihaio, ithoa mo hi hi ar khêl nin iti? Pathian kin ngaisak bîk sika kin sinthotheinaa hi pa hi infetir angin ithoa mo nin ni en mai? 13 Abrahama, Isaka le Jakoba Pathian, ei irchibulhai Pathian khan a tîrtôn Jisua kha a ichôiindôm tâk a ni. Ama kha nin incheltira, Pilata’n insua a tum khomin nin sêl ngot kha a ni. 14 Mi Irthiang le Fel tak kha nin hnôla, mi thatpa kha insua pe hrangin nin ngêna. 15 Hringna pêktu kha nin thata, khannisianlân, Pathianin ama kha mithi lai ata a kaithoi tâka, kha thu’nhretuhai kha kin ni. 16 Jisua irhminga sinthotheina le ar hming iamna khan nin ihmu le nin inhriat ngai pa hi an damtir tâka; ama iamna sikin a ni, hi pa hi, nin rênga nin ihmu angin a idam tâk a ni.
17 Khannisianlân, atûn hin urênghaio, nangni le nin hruaituhai khomin Jisua chunga nin sintho kha nin inhriat tak tak loi a nih ti ki inhriat a ni. 18 Pathianin a deipu murdihai hmanga Krista khan a ituang hrang a nih ti a lei insîr kha a zuang itung a ni ta. 19 Khasikin nin sualhai irlet unglân, Pathian tiang hong kîr nôk roi. 20 Khanchu Rengpa kuang ata hartharna zoro hong tung a ta, nin ta hranga Mesia a inkung Jisua kha, zuang tîr a ti. 21 Aniachu, itinrêng siamthar zoro a tung mâka chu irvânin ama kha lan sua no ni; kha siamtharna thu kha Pathianin a deipu irthianghai bâia tianlai ata a insîr tâk kha.
22 Mosia khom khan, “Rengpa nin Pathianin keima anga nin urênghai laia mi, deipu inkhat nangni inding pe a ti, i khom nin kuanga a insîr murdi chu nin la izôm hrang a ni. 23 Kha deipu thu irngai loi murdi chu ‘Pathian mihai lai ata inhnotsuakin that irhmang hrang a ni’ a iti kha. 24 Samuela le a hnunga deipu murdihaiin atûnlai thurchi hi an lei insîr sa ngai a ni.
25 “Deipuhai le nin irchibulhai kuanga thuthung a ipêk khom kha nin idong sa tâk a ni. Pathianin Abra-hama kuang, “Ni’rchihai sikin rammuala mi murdi satvur ki ti,” a lei iti ang khan. 26 Pathianin a nâi kha an thanga, nin sualhai irheisantir zit hrang le sat nangni vur hrangin nin kuang a zuang itîr masa a ni hi,” a tia.
1 Mi inkhat, a’rhming Anania a oma, a dôngma chu Sapfiri a ni. Anania’n ram a zuara, 2 a man kha a dôngma inhriatpuiin anni ta hrangin an khâia, a chimrip vai hong chôiin tîrtônhai kuang an hong inhlana. 3 Khannisianlân Petera’n, “Anani, Irtha Irthiang huangin ram man a chimrip thup hrangin ithoa mo Setana’n ni milunga ircham ni inneitir? 4 Ni zuar mâna khom khan ni ta a nia, ni zuar hnunga khom a man chu nir cham tak mo ni ma? Ithoa mo, hianga thil tho hrangin milung nin inchong? Mihriam huang ni itum ni maka, Pathian kêng huang ni itum,” a tia.
5 Anania’n kha thu kha an hriatin chu an rîl zôi zel tâka, a thi ta. An hriat murdi’n a sân an chi tâka. 6 Ruathartehai kha hongin, an tuama, irzôn suakin, an phûm ta.
7 Dârkâr thum zoia chu a dôngma khom thil omzia inhre loiin a hong lûta. 8 Petera’n a kuang, “Nin hril roh, ram kha hiang dôr vaiin mo nin izuar?” a tia. Sapfiri khan, “O! kha dôr khan” a tia. 9 Petera’n, “Ithoa mo Rengpa Irtha fia tumin nin inthurual? Irngai ta, ni pasal phûmtuhai khom mikot kôl an hong tung nôk tâk so, nang khom nang irzôn suak an ti,” a tia.
10 Khanchu irningloiin a ke kôla khan an rîla, a thi zôi zel tâka, ruathartehai kha an hong lûta, ama kha a thiin an hong hmua, an irzôn suaka, a pasal kôla an phûm sa tâka. 11 Koiindang mi murdihai le kha thu inhriat murdi’n chu a sân an chi tâka.
Tîrtônhaiin thilirkhêl le sinirkhêl tamtak an tho
12 Tîrtônhai chu mipui laia thilirkhêl le sinirkhêl tamtak an tho thiaia. An rêngin lungrual takin bokropa an inkhôm ngaia. 13 An kuanga khan tûte mi dang kop ngam mahaia chu, a sân an irngaisânghai tak tak a ni. 14 Rengpa iamtuhai chu, nupang, pasal, an kuanga kopin an pung thiai mai. 15 Khanchu dam loihai khom kholâihaia an irzôn suaka, zâlhmun haia, puanthâ haia an inzâltirhaia. Petera hong inlôi va inlôi khan ar hlîmin senkhat lua ar hli theina hrangin an iti a ni. 16 Jerusalem kôlvêl ata khomin mi an honga, dam loihai, ramilhli ichelhai an hruaia, khahai murdi khom kha an hong dam thiai tâka.
Tîrtônhai deng an intheitirhai
17 Khan, Ochai inlaltak le a changpui murdihaiin; Sadukai pâla mihai kha, an hong irthoka; tîrtônhai kha an hnarsa hai tak taka, dengintheitirhai an nuam tâka. 18 Khaang khan, tîrtônhai kha an chelhaia, vântâng intângna ina an khumhai tâka. 19 Khannisianlân, zâna Rengpa itîr vântîrtôn inkhatin intângna in mikot kha a hong inhonga, a hruai suakhaia, an kuang, 20 “Fe ta unglân, Tempila va ngîr unglân, mipuihai kuang hi hringna thu le a omzia murdi hi van sîr ta roi,” a tia. 21 Kha thu kha an inhriatin chu an fe tâka, zînga chu Tempila an lûta, mi an irchutirhai ta.
Ochai inlaltak le a chanpuihai khan Israel upahai Sanhedrin-ah mi murdi an koi bukhaia, tîrtônhai kha va hruai hrangin intângna ina mi an tîra. 22 An mi tîrhai kha an va fea, khannisian, intângna ina khan va hmu mahai, an hong kîr nôka, 23 “Intângna in kha sataka irkhârin kin hmua, khannisianlân kin hong inhonga, a sûnga tûte hmu ma ung,” tiin an hong insîra. 24 Tempil hruaitu le Ochai inlalhaiin an inhriatin chu, “Itina mani ta ngai?” tiin a sân an buai tâka. 25 Kha zoro lai khan mi inkhat a honga, an kuang, “Irngai u ta, intângna ina mi nin ikhumhai khan tempila mi an irchutirhai,” a hong tia. 26 Khanchu, tempil hruaitu kha a chanpuihai leh an honga tîrtônhai kha nakhrât song loiin an hong hruaihaia, nakhrât an songin chu mipuiin lungin dênghai an tih ti an chi sikin.
27 An hong hruai intunghaiin chu Sanhedrin-ah khan an inngîrtirhaia, Ochai inlaltak khan an kuang, 28 “Hi Jisua irhminga thu insîr viat ta loi hrangin thu nangni kin pêka; irngai u ta, nin thu irchutir Jerusalem pumpui nin insip zit tâk hi te; hi mi thina hi keini chunga nin ni intum a ni hi te,” tiin a sâmhaia.
29 Petera le tîrtônhai khan “Mihriam thu nêkin Pathian thu kin izôm hrang a ni. 30 Ei irchibulhai Pathian khan, krosa hembea nin ithat tâk Jisua kha, a kaithoi nôk tâka. 31 Israelhai sual irlettira ngaidam an ni theina hrangin. Ama ngei kha Pathianin rêng le saninhringtu ni hrangin a chang tiang a chôiindôm ta. 32 A thu zômtuhai kuang Pathian ipêk Irtha Irthiang le keini hi kha thu’nhretuhai kha kin ni,” tiin an sâma.
33 Kha an thu kha an inhriatin chu a sân an ning an mur tâka, tîrtônhai kha thatpai an tum tâka. 34 Khannisianlân, Farisai inkhat; ar hming Gamaliela, Dân irchutirtu, mi murdi irngaisâng tak kha Sanhedrin-ah khan a ngîra, tîrtônhai kha insuahai viat hrangin enkoltuhai kha a hrila. 35 Roirêltuhai kuang khan, “Israel mihaio, hi mihai chunga nin sintho tuma khan irdîn roi. 36 Kha mân khan Theuda kha, mi roiinpui tak nia irbe’n a honga, mi irza minli vêlin an zuia. Ama kha an thata, ama zuituhai murdi kha an indarh zita, ite ni ta mahai. 37 Kha zoi hnung chu, irteppui lai khan Galili rama om Juda kha a hong nôka, ama khomin mipui a sân an hnêhaia. Khannisianlân, ama khom an thata, ama zuitu murdi khom an indarh nôk zit sa ta. 38 Khasikin, atûn hin nangni ki ti, hi mihai hi tônhai no roi, inomtirhai chian roi. Hi an sintho tum le an sinthohai hi mihriam tho suakna vai a ni’n chu mong nôk zôi a ti. 39 Khannisian Pathiana irthoka suak a ni’n chu that theihai no chin ni; Pathian doi hong nina nin ti,” a tia.
40 Khanchu, a thu kha an zôma, tîrtônhai kha an koia, an khaphaia, Jisua irhminga thu’nsîr viat ta loi hrangin thu an pêkhaia, an insuahai tâka. 41 Khanchu Jisua irhming sika mualphoi tuang hranga inruk an ni sikin, lôm takin Sanhedrin ata an suak ta. 42 A nitin, Tempila le in tiang “Jisua kha Mesia a ni,” iti insîr le irchutir mong ual mahai.
1 Kha zoroa khan irchutirhai an pung mai lai khan, a nitin an thil sema khan an meithâihai an uksak ngai no sikin Grik chong hmang ngai Judahai kha Hebrai chong hmang Judahai chunga an chiara. 2 Sômhleihnihai khan irchutir danghai murdi kha an koi buk zita, “Pathian thuhril mâksana a nitin sumpuan zêka ei changin chu dik no ni. 3 Khanchu, urênghaio, nin laia mi irhming sa, Irtha Irthianga sip, mi pasal sari inthang unglân, an kuang hi sin hi inhlan kin ti. 4 Keini chu chongchai le thu’nsîrin om kin ti,” an tia.
5 Kha thu khan mipui murdi an lômtirhaia; khanchu, Stefana, iamtu det tak le Irtha Irthianga sip le Filipa, Prokora, Nikanora, Timona, Parmena, Nikola, Juda saphun, Antiokei khuaa mihai an inthanghaia. 6 Kha mihai kha tîrtônhai makunga an inngîrtirhaia, tîrtônhai khan an lu chunga kut irnghatin an chongchaia. 7 Khanchu, Pathian thu chu an darh zêl tâka, Jerusalema irchutir a sân an hong punga, Ochaihai laia mi tamtak khomin Iamna kha an pom sa tâka.
Stefana chel thu
8 Stefana chu Pathian lungkhamna le sinthotheina’n a sipa, mi laia sinirkhêl le thilirkhêl roiinpui tak a tho ngaia. 9 Khannisianlân, Kurini khua le Alexandria khua ata Juda senkhat, “Mi’ntâng suak pâl,” Sinagok an itia kop sa ngaihai le Kilikia ram le Asia rama Judahai an hong irpâla, Stefana kha an hong irsêlpuia. 10 A vârna le an sîrtirtu Irtha kha, sêl inhnê thei mahai.
11 Khanchu, “Mosia leh Pathian a hril insiat kin inhriat” ti hrangin mi an inphûta. 12 Mipuihai, upahai le Dân irchutirtuhai kha an inthorhaia, Stefana kha an beia, an chela, Sanhedrin roirêltuhai kuang an hruai zôi tâka. 13 Inhriatpuitu milak an siama, khahai khan, “Hi pa hin ei Tempil irthiang le ei Dân hi a hrilinsiat ngai. 14 Nazaret Jisua’n ei tempil hi insiat a ta, Mosia Dân ni pêkhai hi indanglamtir zit a ti, a iti kin inhriat a ni,” an tia. 15 Roirêl buala om murdi’n Stefana kha an en chuta, a hmêl kha vântîrtôn hmêl angin an hmua.
1 Ochai inlaltak khan, “Hi thu hi a dik mo?” a tia.
2 Khan, Stefana’n, “Ki urênghai le ka pahaio, irngaitua roi. Ei irchibul Abrahama kha Haran khuaa a om mân, Mesopotamia rama a om lai khan, Roiinpuina Pathian kha a kuang an lâra, 3 ‘Ni ram le ni sûngsuakhai hi masanhaiin lân, ram nang ki la inhmutirna hrang tiang fe roh,’ a zuang tia. 4 Khanchu, Kaldai ram ata a suaka, Harana om hmun a siama. A pa thi zoiin chu khataka irthokin atûn nin omna rama hin Pathianin nangni a irthontir a ni. 5 Pathianin ram lua hrang ite ke sirna hmun khom pe maka; khannisian, Abrahama kha nâi nei loi a ni khomin, ama le ar chihai kuang hi ram hi pêk an kung tâka. 6 Pathianin hiang hin a ti, ‘Ni’rchihai chu mi rama mikhual la ni an ti, kum irza minli mi suaka omin denginthei ni an ti. 7 Khannisian suaka siamtu hrang nam chu keima ngeiin la ngaitua ki ta, kha zoi hnunga suak an ta, hi hmuna hin ki sin la tho an ti,’ a tia. 8 Khanchu, Pathianin Abrahama kuang sertan thu a thung tâka, khanchu Abrahama’n Isaka a neia, sûn riat nia a ser a tan pea. Isaka’n Jakoba a neia, Jakoba’n nâipasal, sômhleihnihai kha a neia.
9 “Khan, irchibulhaiin Josefa kha an hnarsaa, Aigupta ram tiang an zuara; khannisianlân Pathianin a kuang a om, 10 intak a ituang murdi ata kha a sansuak zêl a ni. Aigupta rama rêng Faroa mit hmua mi vâr tak le inditom tak an nitira; Faroa khan Aigupta ram le a sûngkuahai chunga hruaitua a siam tâka. 11 Khan, Aigupta le Kanaan ram pumpuia châm a hong tâka, a sân intak an tuanga; ei irchibulhai khan fâk hrang nei ta mahai. 12 Jakoba’n Aigupta rama bu a om tih an hriatin chu, ei irchibulhai kha a tîr suakhaia, kha kha an fe phutna masa tak a ni. 13 An voihni fenaa khan Josefa’n a urênghai kuang hmêl inhriatna a siama, Faroa khomin Josefa in sûng mihai kha an hriathai tâka. 14 Khanchu, Josefa khan a pa Jakoba le a urênghai murdi an koitirhaia, an rêngin sômsari ringa an ni. 15 Jakoba hai kha Aigupta rama an fea, kha rama khan ama le ei irchibulhai kha an thi tâka. 16 An ruak kha Sekem kho dênin an hong irzôna, Abrahama’n Sekem khuaa Harmora nâihai kuanga suma a ilâk thâna khan an phûm tâka.
17 Abrahama kuang Pathian chonginkung kha a tung hrang zoro anai tika chu ei mihai kha Aigupta-a khan a sân an punga, an tam tâka. 18 Aigupta rama khan rêng dang, Josefa inhre loi, a hong inlal tâka. 19 Kha pa khan ei irchibulhai kha fing irfia takin a beihaia, ei irchibulhai deng an theitira, an nâitesenhai thi hrangin an paitirhai ngaia. 20 Kha zoro lai khan Mosia a zuang suaka, nâitesen inditom tak a nia, an ina tha thum an ompuia. 21 An in ata an pai suak zoiin chu Faroa nâinu’n a lâka, a nâi hrangin a don tâka. 22 Mosia kha Aigupta rama vârna murdi ar chutira, khanchu, thu insîr thei tak le sinthothei tak a hong ni tâka. 23 Mosia kha kum sômminli a ni kum khan, a urêng Israel nâihai kha hro a nangin an hriat tâka. 24 A va hro’n chu an laia inkhat kha Aigupta mi’n deng a hong intheitir lai kha a hmua, a sana, dengtheina tuangtu phuba kha a lâka, Aigupta mi kha a that tâka. 25 Mosia khan ama kutin Pathianin anni saninzôk a ti, ti a urênghaiin an inhriat mani a tia; khannisianlân, inhre ta mahai.
26 A tûka chu mi inhni irsual lai a hong hmua, selhai tumin, ‘Irngai u ta, urêngkhat kêng nin ini, ithoa mo nin irsual?’ tiin irngei a tuma. 27 A pualoi masa pu khan Mosia kha a nampaia, ‘Kin chunga hruaitu le roirêltua tu’n mo nang siam? 28 Mizâna Aigupta mi ni ithatpai ang khan ni thatpai ni itum ma ni?’ a tia. 29 Kha thu sika khan Mosia kha a rota, Midian rama a va om tâka, kha khan nâipasal inhni a nei tâka.
30 “Khan, kum sômminli a hong ni zoiin Sinai tânga ramchâra chînribuka meichok kâra vân vântîrtôn a kuang an lâra. 31 Mosia’n a thil hmu kha ar khêl a ti tak taka; fia tumin a va nâia, Rengpa hnuk irhâiin, 32 ‘Kei hi ni puhai Pathian, Abrahama, Isaka, Jakoba hai Pathian kha ki ni’ a lei tia. Khanchu Mosia kha a chia, fia ngam ta maka. 33 Rengpa khan a kuang, ‘Ni kekok kha khek roh, ni ngîrna kha hmun irthiang a ni. 34 Aigupta rama ki mihai deng an intheizia ki hmu maia, an khêk irhâi khom kin hriata, anni hruai suak hrangin ki zuang ichum ta a ni. Hong ta, Aigupta rama nang tîr ki ti,’ a tia.
35 “Kha Mosia ‘hruaitu le roirêltua tu mo nang siam’ tia an isêl kha chînribuka vântîrtôn an laia inlârtu khan a changpuia, Pathianin ama ngei kha hruaitu le sansuaktu ni hrangin a itîr a ni. 36 Ama khan anni kha a hruai suaka, Aigupta rama, Tuipui Sena, ramchâra kum sômminli sûng dênin sinirkhêl le thilirkhêlhai tho’n Aigupta ram ata mipuihai a hruai suak tâka. 37 Kha Mosia kha Israel nâihai kuang, ‘Pathianin keima angin nin urênghai laia om deipu nangni la siam pe a ti’ titu kha a ni. 38 Ama kha a ni ramchâra pungkhôm laia, Sinai tânga ama chongpuitu vântîrtôn laia khom oma, eini ni pe hranga Pathian thu hring latu kha a ni. 39 Khannisianlân, ei irchibulhai khan a thu zôm nuam mahaia, an sêla, Aigupta ram tianga kîr nôk an nuama. 40 Arona kuang, ‘Kin mahruaitu hrangin pathianhai ni siam pe roh, Mosia, Aigupta ram ata ni hruai suaktu lak a thurchi reng inhre ta ma ung’ an tia. 41 Kha hnung chu, khahai khan sehrât irlim an sina, a’rlim kha satakin an biaka, an kut suaka khan an lôm tâka. 42 “Khanchu, Pathianin anni kha ar heisanhaia, irvâna ârsihai an biak theina hrangin a rotsanhaia, deipu lekhabua:
‘Israel in sûng mihaio,
kum sômminli sûngin ramchâra khan irbôlna sa thatin nin inhlan ma ni?
43 Moleka puan in le nin pathian Refana ârsi millimhai kha chubai nin mûka,
khasikin Babulon khêl tiang nangni intângtir ki ti,’
ti irziak ang khan.
44 Ei puhaiin chu ramchâra khan Pathian omna puan in an neia, Mosia kuang Pathianin siam hrang lam a hril laia, a dûr an entir ang taka siam a ni. 45 Kha ngêt kha ei irchibul irchihai khomin an nei maia, Pathianin ei puhai makunga Jentailhai an hnot suaka, Josua hai Kanaan ram an lûta khan an lûtpuia, Davida zoro dên khan a om tâka. 46 Davida khan Pathian changpuina a donga, Jakoba Pathian ta hrangin in sin phalna a ngên tâka. 47 Khannisianlân, Solomona’n in kha a sin pe tâka. 48 Aniachu, Anchungtaka kuta sin inhaia om ngai mah, deipu’n:
49 Rengpa’n, ‘Irvân ki toihmun a nia,
Irnêng hi ki ke irnghatna a ni.
In i ang mo nin ni isin pe hranga,
ki’rngamna hmun te khôn mo?
50 Hi thil murdi hi ki kuta ki isiam a ini loi ma ni?’ a ti:
tia a insîr ang khan.
51 “Mi pualoihai, sertanloi mi ang, milung le beng ngarhaio; Irtha Irthiang nin doi maia, nin puhai ang dênin nangni khomin nin tho ngaia. 52 Nin puhaiin deipuhai laia tu mo deng an inthei loi? Mi fel Tak, hong hranga thu lei hriltuhai kha an thathaia, atûn nangnihai hi, kha Mi fel tak incheltirtu le thatpuhai kha nin ni. 53 Nangni hi Pathian Dân, Vântîrtônhai zuang inchoi hmu chaka, zôm loihai nin ni,” a tia.
Stefana lunga dêng
54 Kha thu kha an inhriattin a sân an ninginmurin Stefana chunga an irkam an nôia. 55 Khannisianlân, Stefana chu Irtha Irthiangin a sipa, irvân tiang a thîr chiana, Pathian roiinpuina le Pathian chang tianga Jisua ngîr a hmua. 56 “Irngai u ta, irvân irhong ki hmua, Pathian chang tiang Mihriam Nâipa ngîr khom ki hmu,” a tia.
57 Khanchu, inring takin an khêka, an mikuar an hîpa, Stefana kha an hong bei tâka, 58 khua ata kha an nam suaka, lungin an dêng tâka. Thu’nhretuhai khan an puanhai kha ruatharte inkhat ar hming Saula an iti ke bula khan an siaa. 59 Stefana’n “Rengpa Jisua, ki’rtha la roh,” tia Rengpa a koi laia lungin an dêng sup supa. 60 Khûksadelin, inring takin “Rengpa, hi an sintho insual hi inhre pehai mai no roh,” a tia. Kha thu kha an sîr zoiin chu a hrang a chat tâka. Saula khomin an ithat kha a pompuihaia.
1 Ochai inlaltak khan, “Hi thu hi a dik mo?” a tia.
2 Khan, Stefana’n, “Ki urênghai le ka pahaio, irngaitua roi. Ei irchibul Abrahama kha Haran khuaa a om mân, Mesopotamia rama a om lai khan, Roiinpuina Pathian kha a kuang an lâra, 3 ‘Ni ram le ni sûngsuakhai hi masanhaiin lân, ram nang ki la inhmutirna hrang tiang fe roh,’ a zuang tia. 4 Khanchu, Kaldai ram ata a suaka, Harana om hmun a siama. A pa thi zoiin chu khataka irthokin atûn nin omna rama hin Pathianin nangni a irthontir a ni. 5 Pathianin ram lua hrang ite ke sirna hmun khom pe maka; khannisian, Abrahama kha nâi nei loi a ni khomin, ama le ar chihai kuang hi ram hi pêk an kung tâka. 6 Pathianin hiang hin a ti, ‘Ni’rchihai chu mi rama mikhual la ni an ti, kum irza minli mi suaka omin denginthei ni an ti. 7 Khannisian suaka siamtu hrang nam chu keima ngeiin la ngaitua ki ta, kha zoi hnunga suak an ta, hi hmuna hin ki sin la tho an ti,’ a tia. 8 Khanchu, Pathianin Abrahama kuang sertan thu a thung tâka, khanchu Abrahama’n Isaka a neia, sûn riat nia a ser a tan pea. Isaka’n Jakoba a neia, Jakoba’n nâipasal, sômhleihnihai kha a neia.
9 “Khan, irchibulhaiin Josefa kha an hnarsaa, Aigupta ram tiang an zuara; khannisianlân Pathianin a kuang a om, 10 intak a ituang murdi ata kha a sansuak zêl a ni. Aigupta rama rêng Faroa mit hmua mi vâr tak le inditom tak an nitira; Faroa khan Aigupta ram le a sûngkuahai chunga hruaitua a siam tâka. 11 Khan, Aigupta le Kanaan ram pumpuia châm a hong tâka, a sân intak an tuanga; ei irchibulhai khan fâk hrang nei ta mahai. 12 Jakoba’n Aigupta rama bu a om tih an hriatin chu, ei irchibulhai kha a tîr suakhaia, kha kha an fe phutna masa tak a ni. 13 An voihni fenaa khan Josefa’n a urênghai kuang hmêl inhriatna a siama, Faroa khomin Josefa in sûng mihai kha an hriathai tâka. 14 Khanchu, Josefa khan a pa Jakoba le a urênghai murdi an koitirhaia, an rêngin sômsari ringa an ni. 15 Jakoba hai kha Aigupta rama an fea, kha rama khan ama le ei irchibulhai kha an thi tâka. 16 An ruak kha Sekem kho dênin an hong irzôna, Abrahama’n Sekem khuaa Harmora nâihai kuanga suma a ilâk thâna khan an phûm tâka.
17 Abrahama kuang Pathian chonginkung kha a tung hrang zoro anai tika chu ei mihai kha Aigupta-a khan a sân an punga, an tam tâka. 18 Aigupta rama khan rêng dang, Josefa inhre loi, a hong inlal tâka. 19 Kha pa khan ei irchibulhai kha fing irfia takin a beihaia, ei irchibulhai deng an theitira, an nâitesenhai thi hrangin an paitirhai ngaia. 20 Kha zoro lai khan Mosia a zuang suaka, nâitesen inditom tak a nia, an ina tha thum an ompuia. 21 An in ata an pai suak zoiin chu Faroa nâinu’n a lâka, a nâi hrangin a don tâka. 22 Mosia kha Aigupta rama vârna murdi ar chutira, khanchu, thu insîr thei tak le sinthothei tak a hong ni tâka. 23 Mosia kha kum sômminli a ni kum khan, a urêng Israel nâihai kha hro a nangin an hriat tâka. 24 A va hro’n chu an laia inkhat kha Aigupta mi’n deng a hong intheitir lai kha a hmua, a sana, dengtheina tuangtu phuba kha a lâka, Aigupta mi kha a that tâka. 25 Mosia khan ama kutin Pathianin anni saninzôk a ti, ti a urênghaiin an inhriat mani a tia; khannisianlân, inhre ta mahai.
26 A tûka chu mi inhni irsual lai a hong hmua, selhai tumin, ‘Irngai u ta, urêngkhat kêng nin ini, ithoa mo nin irsual?’ tiin irngei a tuma. 27 A pualoi masa pu khan Mosia kha a nampaia, ‘Kin chunga hruaitu le roirêltua tu’n mo nang siam? 28 Mizâna Aigupta mi ni ithatpai ang khan ni thatpai ni itum ma ni?’ a tia. 29 Kha thu sika khan Mosia kha a rota, Midian rama a va om tâka, kha khan nâipasal inhni a nei tâka.
30 “Khan, kum sômminli a hong ni zoiin Sinai tânga ramchâra chînribuka meichok kâra vân vântîrtôn a kuang an lâra. 31 Mosia’n a thil hmu kha ar khêl a ti tak taka; fia tumin a va nâia, Rengpa hnuk irhâiin, 32 ‘Kei hi ni puhai Pathian, Abrahama, Isaka, Jakoba hai Pathian kha ki ni’ a lei tia. Khanchu Mosia kha a chia, fia ngam ta maka. 33 Rengpa khan a kuang, ‘Ni kekok kha khek roh, ni ngîrna kha hmun irthiang a ni. 34 Aigupta rama ki mihai deng an intheizia ki hmu maia, an khêk irhâi khom kin hriata, anni hruai suak hrangin ki zuang ichum ta a ni. Hong ta, Aigupta rama nang tîr ki ti,’ a tia.
35 “Kha Mosia ‘hruaitu le roirêltua tu mo nang siam’ tia an isêl kha chînribuka vântîrtôn an laia inlârtu khan a changpuia, Pathianin ama ngei kha hruaitu le sansuaktu ni hrangin a itîr a ni. 36 Ama khan anni kha a hruai suaka, Aigupta rama, Tuipui Sena, ramchâra kum sômminli sûng dênin sinirkhêl le thilirkhêlhai tho’n Aigupta ram ata mipuihai a hruai suak tâka. 37 Kha Mosia kha Israel nâihai kuang, ‘Pathianin keima angin nin urênghai laia om deipu nangni la siam pe a ti’ titu kha a ni. 38 Ama kha a ni ramchâra pungkhôm laia, Sinai tânga ama chongpuitu vântîrtôn laia khom oma, eini ni pe hranga Pathian thu hring latu kha a ni. 39 Khannisianlân, ei irchibulhai khan a thu zôm nuam mahaia, an sêla, Aigupta ram tianga kîr nôk an nuama. 40 Arona kuang, ‘Kin mahruaitu hrangin pathianhai ni siam pe roh, Mosia, Aigupta ram ata ni hruai suaktu lak a thurchi reng inhre ta ma ung’ an tia. 41 Kha hnung chu, khahai khan sehrât irlim an sina, a’rlim kha satakin an biaka, an kut suaka khan an lôm tâka. 42 “Khanchu, Pathianin anni kha ar heisanhaia, irvâna ârsihai an biak theina hrangin a rotsanhaia, deipu lekhabua:
‘Israel in sûng mihaio,
kum sômminli sûngin ramchâra khan irbôlna sa thatin nin inhlan ma ni?
43 Moleka puan in le nin pathian Refana ârsi millimhai kha chubai nin mûka,
khasikin Babulon khêl tiang nangni intângtir ki ti,’
ti irziak ang khan.
44 Ei puhaiin chu ramchâra khan Pathian omna puan in an neia, Mosia kuang Pathianin siam hrang lam a hril laia, a dûr an entir ang taka siam a ni. 45 Kha ngêt kha ei irchibul irchihai khomin an nei maia, Pathianin ei puhai makunga Jentailhai an hnot suaka, Josua hai Kanaan ram an lûta khan an lûtpuia, Davida zoro dên khan a om tâka. 46 Davida khan Pathian changpuina a donga, Jakoba Pathian ta hrangin in sin phalna a ngên tâka. 47 Khannisianlân, Solomona’n in kha a sin pe tâka. 48 Aniachu, Anchungtaka kuta sin inhaia om ngai mah, deipu’n:
49 Rengpa’n, ‘Irvân ki toihmun a nia,
Irnêng hi ki ke irnghatna a ni.
In i ang mo nin ni isin pe hranga,
ki’rngamna hmun te khôn mo?
50 Hi thil murdi hi ki kuta ki isiam a ini loi ma ni?’ a ti:
tia a insîr ang khan.
51 “Mi pualoihai, sertanloi mi ang, milung le beng ngarhaio; Irtha Irthiang nin doi maia, nin puhai ang dênin nangni khomin nin tho ngaia. 52 Nin puhaiin deipuhai laia tu mo deng an inthei loi? Mi fel Tak, hong hranga thu lei hriltuhai kha an thathaia, atûn nangnihai hi, kha Mi fel tak incheltirtu le thatpuhai kha nin ni. 53 Nangni hi Pathian Dân, Vântîrtônhai zuang inchoi hmu chaka, zôm loihai nin ni,” a tia.
Stefana lunga dêng
54 Kha thu kha an inhriattin a sân an ninginmurin Stefana chunga an irkam an nôia. 55 Khannisianlân, Stefana chu Irtha Irthiangin a sipa, irvân tiang a thîr chiana, Pathian roiinpuina le Pathian chang tianga Jisua ngîr a hmua. 56 “Irngai u ta, irvân irhong ki hmua, Pathian chang tiang Mihriam Nâipa ngîr khom ki hmu,” a tia.
57 Khanchu, inring takin an khêka, an mikuar an hîpa, Stefana kha an hong bei tâka, 58 khua ata kha an nam suaka, lungin an dêng tâka. Thu’nhretuhai khan an puanhai kha ruatharte inkhat ar hming Saula an iti ke bula khan an siaa. 59 Stefana’n “Rengpa Jisua, ki’rtha la roh,” tia Rengpa a koi laia lungin an dêng sup supa. 60 Khûksadelin, inring takin “Rengpa, hi an sintho insual hi inhre pehai mai no roh,” a tia. Kha thu kha an sîr zoiin chu a hrang a chat tâka. Saula khomin an ithat kha a pompuihaia.
1 Saula khom khan Stefana thi kha a sa a ti saa. Kha nikhua ata khan Jerusalem-a Koiindang kha deng an theitirhai tâka. Khanchu, tîrtônhai vai no chu Juda le Samari ram kho tina an indarh zit tâka. 2 Pathian ngaisak senkhathaiin Stefana kha an phûma, a sân an châ tâka. 3 Saula chu Koiindang inboipai tumin in tina a lûta, nupang pasal a kaisuakhaia, intângna ina a khumhai ta.
Samari rama Thurchi Sa hril thu
4 Khan, iamtu kho tina irthekhai kha hmun tina an fea, Thurchi Sa an hril thiaia. 5 Filipa chu Samari khopuia a chuma, an kuang Krista Thu a hrila. 6 Mipuihaiin Filipa thu’nsîr an inhriata, a sintho irkhêl thohai an hmu’n chu a thu’nsîrhai kha a sân an irngaia. 7 Ramilhli kha inring taka khêkin mi tamtak sûng ata an hong suaka, zenginthî le ke’nbâi tamtak khom an damtirhaia. 8 Kha khuaa mihai kha a sân an lôm tak taka. 9 Kha khuaa khan mi inkhat, Simona an iti, dôi thei a oma. Mi roiinpui tak niin ar bêa, Samari mihai khan a dôi kha ar khêl an ti tak taka. 10 Mi murdi’n, a lian a chînin a thu kha a sân an irngai. “Hi pa hi Pathian sinthotheina ‘Roiinpui’ an iti kha a ni,” an tia. 11 A mitphil thu kha zoro sôt tak a’rkhêl an lei ti tâk sikin a thu kha an irngai ngaia. 12 Khannisian Pathian Ram Thurchi Sa le Jisua Krista irhminga Filipa’n a ihril kha an iam tâkin chu nupang pasalin baptisma an hong chang tâka. 13 Simona khomin a iam tâka, baptisma a changa, Filipa kha a kop khak ta, thilirkhêl le sinirkhêl roiinpui tak a ithohai kha a hmua, ar khêl a ti tak taka.
14 Jerusalem-a tîrtôn omhai khan Samari kho mihaiin Pathian thu an pom tah ti an inhriatin chu an kuang Petera le Johana an tîra. 15 Anni chu an zu fea, Irtha Irthiang an dong theina hrangin an chongchai pehaia. 16 An laia tukhomin Irtha Irthiang kha la dong mahaia; Rengpa Jisua irhmingin baptisma an ichang vai a la ni. 17 Khanchu, Petera le Johana’n an lu chunga kut an irnghata, Irtha Irthiang an dong tâka. 18 tîrtônhaiin an chunga kut an irnghatin Irtha Irthiang pêk anni ti Simona khan a hmu’n chu, 19 “Hianga sinthotheina hi ni pe roi, tu chunga khom kut ki’rnghatin Irtha Irthiang an dong sa theina hrangin,” tiin an kuang poisa pêk a tuma.
20 Khannisianlân, Petera’n a kuang, “Pathian thil manboi pêk hi suma irchôk ni tum sikin, ni sum leh ni pumpuiin irhmang ni ti. 21 Ni lungrîl irput lam Pathian mit hmua dik maka, hi thila hin kopna le dongtum nei mak che. 22 Aniachu, ni sual hi irletin lân, Rengpa kuang chongchaiin lân, ni ngaituana sual hi nang ngaidam no ni mo. 23 Irzukna lungrîl siat tak ni’rputa, sualin nang a khit khak ti nang kin hriat,” a tia. 24 Simona’n, “Ni thil insîrhai chu ite ki chunga a zuang tung nona hrangin nangin Rengpa kuang ni ngên pe roi,” a tia.
25 Khanchu, Rengpa thu kha an inhriattira an insîr hnung chu Petera le Johana kha Jerusalem tiang an kîr nôk tâka. An kîr pum khan Samari rama kho tamtaka Thurchi Sa an hrila.
Filipa le thainuzel
26 Rengpa itîr vântîrtônin Filipa kha a chongpuia, “Thoiin lân, Jerusalem ata Gaza khua zu sun sim tiang ramchâr thengthai tiang khun fe roh,” a tia. 27 Khanchu, a thoia, a fe tâka. Khan, Ethiopia rama mi inkhat, an rêngnu Kandaki hnuaia thainuzel inlaltak tak, a sum murdi enkoltu, Jerusalema Pathian biak hrangin a hong fea; 28 a kîr nôk tiang chu tâlia toi pumin deipu Isaia lekhabu a tepa.
29 Irtha’n Filipa kuang, “Tâli so va panin lân, va nâi roh,” a tia. 30 Khanchu, Filipa kha a van tâna, deipu Isaia lekhabu, thainuzel itep kha, ar ngaia, “Ni itep kha a omzia mo nin hriat?” a tia. 31 Ama khan, “Tûte’n ni hrilfiah pe loiin itin mo ki inhriat thei hrang?” a tia. Filipa kha a kôla a toia chuang sa hrangin a fiala. 32 Pathian lekha thu irchâng a itep lai kha hi hi a ni:
“Belra that hrang angin ama kha an hruaia,
Belrate a mul eppu makunga a idâihrek angin ama kha a bâi âng mah,
33 Mualinphoitir a nia,
dik loi taka rêl pe a ni,
A’rchihai thurchi tu’n mo lan sîr hrang?
Rammual ata a hringna an lâk pe tâka,”
ti hi. 34 Khan, thainuzel khan Filipa kuang “Deipu hin tu thu mo a insîr, ama thu mo, mi dang thu mo? Ni hril ta,” a tia. 35 Filipa khan Lekha thu ata insîr phut chu Jisua thurchi a hril tâka. 36 Khaanga lampuia an fe lai khan tui omna an tunga, thainuzel khan, “En ta, hi hin tui a om, baptisma ki ichang hrang hi, imo ni khâl?” a tia. 37 Filipa khan, “Ni milung murdi’n ni iamin chu baptisma chang thei ni ti,” a tia. Ama khan, ‘Ki iam,’ Jisua Krista chu Pathian Nâipa a ni ki iam,” a tia.
38 Khanchu, tâli kha an ngîrtira, Filipa le thainuzel kha an inhni’n tuia khan an chuma; Filipa khan a baptis tâka. 39 Tui ata an hong suakin chu, Rengpa irtha’n Filipa chu a lâkpai tâka. Thainuzel khan hmu ta maka; khannisianlân, raifân takin a fe tâka. 40 Filipa kha Azota khuaa an hmua, Kaisari khua a tung mâka chu kho tina a fe tâka, Thurchi Sa a hril thiaia.
1 Saula chu Rengpa irchutirhai kha that hrangin a lan sîhai thiaia. Ochai inlal tak kuang a fea, 2 Rengpa Lampuia zui mihai, nupang pasal, a ihmu murdi chela Jerusalama, a hong hruai theina hrangin Damaska khuaa Sinagok hruaituhai pêk hrang lekha Ochai inlal tak a va ngêna.
3 Damaska pana a fe laiin, a tung vâng tâka, voikhat rengin irvân ata ar hîlin a zuang vâr pe phuta, 4 irnênga a sakor ata a tâk tâka; “Saula, Saula, ithoa mo deng ni ni inthei?” ti hnuk irhâiin a zuang tia. 5 Ama khan, “Rengpa, tu mo ni ini?” a tia. Hnukirhâi khan, “Jisua, deng ni intheitirtu kha ki ni; 6 thoiin lân, kho sûnga lûtin lân, ni tho hrang nang lei hril an ti,” a tia.
7 A ifepuihai kha chamai rakin an ngîra, hnukirhâi kha an inhriata chu tûte hmu mahai. 8 Saula chu a hong thoia, a hong menga, ite hmu thei ta maka; khanchu, a kuta an kaia Damaska-a khan an hruai lûta. 9 Sûn thum rammual hmu loiin a oma, ite fâkin in mah.
10 Damaska-a khan irchutir inkhat, Anania a oma. Rengpa chu a kuang an lâra, “Anani” a tia. Ama khan, “Rengpa, hi hin ki om,” a tia. 11 Rengpa khan, “Thoiin lân, lamlian ‘intûn’ an itia khan fe’n lân, Juda ina Tarsa khuaa om Saula zong suak roh. Ama kha a chongchai lai tak a ni, 12 inlârna’n mi inkhat, Anania a hong lûta, a mit invâr pe nôk hrangin a chunga kut irnghatin a hmua,” a tia.
13 Anania’n, “Rengpa, kha pa khan Jerusalema ni mi irthianghai a sate’n deng an theitir ti mi tamtakin an hrila. 14 Hi hin khom nir hming irlam murdi chel theina hrangin Ochai inlalhai kuang ata irchamneina a hmua hong kêng a ini,” a tia.
15 Rengpa khan, “Fe chian roh, hi pa hi Jentailhai, rênghai le Israelhai kuang ki’rhming pe lûttu hranga ki mi inkung kêng a ini. 16 Ki’rhming sikin intak i anga irkhêl mo a la ituang hrang, ama lan hretir ki ti,” a tia.
17 Khanchu, Anania chu a chuma, ina khan a va lûta, a chunga kut irnghatin, “Urêng Saula, ni mit a vâr nôk theina hrang le Irtha Irthianga ni sip theina hrangin, ni hongna lampuia ni kuanga inlâr Rengpa Jisua khan ni kuang a ni hong itîr a ni,” a tia. 18 Khanchu, irningloi rengin a mit ata hlip anga om a tâk zôia, a mit a hong vâr nôk tâka. Khanchu, a thoia, baptisma a chang ta. 19 Bu anh a fâka, a hong har nôk tâka. Damaska-a khan irchutirhai kuang idôr sûn ten mani a châma.
Saula’n Damaska-a thu a hril
20 Sinagokhaia khan Jisua Pathian Nâipa a nih ti a hril irphut zôi tâka. 21 A thu’nsîr inhriat murdi’n a sân ar khêl an tia. “Hi mi hi Jerusalema Jisua Irhming irlamtuhai dengintheitirtu kha ni ma mo? Ochai inlalhai kuang hruai hrangin hi Irhming irlamtuhai chel tumin hi hin khom a izuang mo ni ma?” an tia. 22 Saula thu insîra khan mi an hne tîr tîra, Jisua chu Mesia a nih ti fel takin a hrilfiah ngai sikin Damaska-a Judahai kha a sêl indonghaia, an buaitirhai chit ta.
Saula Judahai kuang ata a rel pat
23 Zoro sôt tak hnunga chu Saula that tumin Judahai an chong irhlôma. 24 Khannisianlân, ama’n an thiltum kha a lei inhriata. Khan that hrangin kul mikot tina khan a sûn a zânin ama an inruanga. 25 Khannisianlân, a irchutirhaiin ama kha an hruaia, zâna kulbang ir-ônga kokin an inthâka.
Saula Jerusalema a fe
26 Khan, Saula’n Jerusalem a hong tungin chu irchutirhai laia kop a tuma anni khan irchutir a ni sa tih iam thei mahaia, an rêngin a sân an chia. 27 Khannisianlân, Barnaba khan tîrtônhai kuang a fepuia; lampuia Rengpa a hmua, Rengpa’n ama a ichongpui lam thuhai, Damaska-a Jisua irhminga hâi takin thu a ihril thurchihai a hrilhaia.
28 Khanchu, Saula chu Jerusalema khan an laia a om sa tâka. Rengpa irhmingin hâi takin thu a hril ngai. 29 Grik chong hmang Judahai kuang thu an sîra, a sêlhaia, anni khan that an lei tum tâka. 30 Urênghaiin kha kha an inhriatin Kaisari khuaa an hruaia, Tarsa khuaa an infetir pat tâka.
31 Judai rama, Galili rama, Samari ram haia, a ram pumpuia koiindang mihai kha lungngam takin an oma, an det tîr tîra, Rengpa chi pumin an om saa, Irtha Irthianga irtharngamin an hong pung tîr tîra.
Ainia indam
32 Petera’n hmun tin ar fang laiin voikhat chu Luda khuaa mi irthianghai a zu hroa. 33 Kha khan mi inkhat, Ainia, zenginthî sika kum riat dên zâlhmuna zâl tâk a hmua. 34 Petera khan a kuang, “Aini, Jisua Krista’n nang an dam ta, thoiin lân, ni zâlna kha siam infel roh,” a tia. Khanchu, a thoi zôia. 35 Luda le Saron phâia om murdihaiin Aini kha an hmua, Rengpa tiang an hong irlet intam ta.
Dorki kaithoi
36 Khan, Jopa khuaa irchutir inkhat Tabiti a oma, a Grik irhming chu Dorki a ni, kha kha ‘Sazukilla’ tihna a ni. Thil sa tho le inrianghai changpuina’n a zoro a lei hmang ngai a ni. 37 Kha lai khan dam maka, a thi tâka. Tui an irsiltira, chontan chungintaa an inzâltira. 38 Luda chu Jopa kho kôla om a nia. Luda khuaa Petera a om ti irchutirhaiin an inhriatin chu, “Lungkham takin hong lat ri se,” tia ngên hrangin a kuang mi inhni an tîra.
39 Khanchu, Petera kha a thoia, an pâla khan a fe sa tâka. A va tungin chu chontan chungintaa an hruai kâia, meithâi murdi kha a kôla an ngîra, an chapa. Dorki’n a dam laia songkol le puan diar dang a isiamhai kha inentirin an chapa. 40 Petera khan an rêngin an suaktirhai zita, khûksadelin a chongchaia ruak tiang a’rheia, “Tabiti, thoi roh,” a tia. Khanchu, Tabiti kha a hong menga, Petera kha a hmua, a hong toi suak tâka. 41 Petera khan an bana, a kaithoia, mi irthianghai le meithâihai kha a koihaia, damin an kuang a hruai tâka.
42 Kha kha Jopa kho pumpuiin an inhriata, mi tam takin Rengpa an iam tâka. 43 Petera kha Jopa khuaa khan zoro sôt tak, savun siamtu Simona ina a châma.
1 Khan, Kaisari khuaa mi inkhat, Kornelia, Itali sipai pâl an itia sipai irza hruaitu a oma. 2 Ama kha Pathian ngaisak mi a nia, a in sûng mihai an rêngin Pathian chi mi an ni. Pathian kuang a chongchai mai ngaia. 3 Sûn khat chu chohnung dâr thuma, fel takin inlârna a hmua, Pathian itîr vântîrtôn inkhat a kuang a hong lûta, “Korneli” a hong tia. 4 Kornelia khan ama kha a en chiana, a chia, “Rengpa, i mani?” a tia. Vântîrtôn khan, “Ni chongchaina le ni thil pêkhai kha Pathianin an hriat chian a ni. 5 Atûn hin Jopa khuaa mi tîrin lân, mi inkhat, Simona, Petera an iti kha inkoitir roh. 6 Ama chu, tuipui kôla, savun siamtu Simona ina a tung,” a tia. 7 A chongpuitu vântîrtôn kha a fe zoi le, Kornelia khan a siahlohai laia mi inhni le sipai inkhat, Pathian irngaisak tak, a tîrtôn ngai bîk laia mi kha a koia. 8 Thil omzia murdi kha a hrila, Jopa khuaa khan a tîr tâka.
9 Khan, a tûk sûn laia, kha mihai khua an tung tôn chu Petera kha chongchai hrangin in chung zôla a luia. 10 A sân a phîng a châma, bu nêk a nuama, khannisian nêk hrang an siam lai takin inlârna a hmua. 11 Irvân irhongin i mani puan lianpa ang kha, a kil minlia thunga irvâna irthokin zuang tâkin a hmua. 12 Kha sûnga khan sa ke minli chi tinrênghai a lôn ngai chi tinrênghai le va chi tinrênghai an hmutira. 13 A kuang hnuk irhâiin, “Peter, thoi roh, thatin lân fa roh,” a tia.
14 Petera’n, “Ni mah, Rengpa, irthiang loi le porinche ite fa ngai ma ung,” a tia. 15 Hnuk irhâi voihnina’n, “Pathianin a’rthiang a iti chu nangma’n irthiang mah ti no roh,” a ti nôka. 16 Khaang khan, voithum a zuang tia. Kok kha irvân tiang lâkpai a ni nôk tâka.
17 Petera’n a thil hmu kha a’rngaina lam inhre loiin a om lai khan, Kornelia mi tîrhai kha Simona in kha irdon suakin a mikot kôla an lei ngîra; 18 “Hi hin Petera a tung mo?” tiin an irdona.
19 Petera’n a inlârna hmu kha a ngaitua laiin, Irtha khan a kuang, “Mi inthumin nang an zong. 20 Thoiin lân, chum roh, ite lunghla loiin zuihai roh; khahai kha ki hong itîrhai an ni,” a tia. 21 Khanchu, Petera kha a suaka, mihai kuang khan, “Nin izong kha ki ni, imo nin ihong nasan?” a tia.
22 Anni khan, “Pathian chi mi, Juda nam murdi’n an inpâk, sipai irza hruaitu fel tak Kornelia chu vântîrtôn irthiangin a chongpuia, ni thu’nsîr a’rngai theina hrangin, a ina nangma kha fial hrangin a hrila, keini hi a ni hong itîr a ni,” an tia. 23 Kha mihai kha a koi lûthaia, an riaktirhai tâka.
A tûka chu Petera chu a thoia, kha mihai kha a zuia, Jopa khuaa iamtu, tuhai mani khom an fe saa. 24 A tûk nôka chu Kaisari khuaa an tung tâka, Kornelia khan a urênghai le rual lungthunghai a koi bûmhaia, Petera hai chu an lei nghâk chiana.
25 Khan, Petera a lût hrang tôn takin Kornelia’n a lei dona, a ke bula khûksadelin chubai a mûka. 26 Petera khan ama kha a kaithoia, “Thoi roh, kei khom mihriam dên kêng ki ini,” a tia.
27 A kuang thu’nsîr pumin a lûta, mi tamtak irbûmhai kha a va hmua. 28 An kuang, “Judahai ta hrangin nam dang, pan hrang le irpôlpui hrangin Juda sakhua’n phal mah ti nangni rengin nin inhriat. Khannisianlân, tûte a’rthiangloi le fâiloi hranga ki bê nona hrangin Pathianin a ni irhmutir a ni. 29 Khasikin, a ni hong koi le chu sêl loiin ki ihong a ni. Imo ni ni hong ifialna san?” a tia.
30 Kornelia khan, a vuan hin a sûn minlina a ni ta, atûn ang zoro hi chohnung dâr thuma ki chongchai laiin; irngai ta, mi inkhat puan chek sil ki kuang a hong ngîra, 31 “Korneli! ni chongchaina le ni thilpêkhai Pathianin an hriat mai kêng. 32 Khanchu, Jopa khuaa mi tîrin lân, Simon Petera hong koi roh, ama kha tuikhanglian panga savun siam ngaitu Simona ina a tung,” a tia. 33 Khasikin, ni kuanga mi ki hong itîr zôi zel a ni; ni ihong hi a sa ok. Rengpa’n thu insîr hranga nang a ipêk inhre hrangin atûn hin Pathian mithmu’n kin rêngin kin iom a ni hi,” a tia.
Kornelia ina Petera thu’nsîr
34 Petera’n thu an sîra: “Pathianin mi tinrêng ir-ang natin a ni en tih kin hriat infel ta. 35 Nam tin laia tukhom ama inhriata, sin fel tak tho murdi chu a pom inruk mi a ni ngai. 36 Ama khan irtharngamna Thurchi Sa Jisua Krista, mi tinhai Rengpa bâia insîrin Israelhai an pêltir ti nin inhriat, Jisua chu mi murdi Reng a ni. 37 Johana’n baptisma thu a hril zoia Galili rama irphuta Judai ram pumpuia thil hong tung thu kha nin lei inhriat ta. 38 Nazaret Jisua chu Pathianin Irtha Irthiang le sinthotheina’n a vurzia kha nin inhriat. Pathian khan a ompui maia, sin sa thoa inzin vêlin Diabola soisak murdihai an damtir thiaia. 39 Judai ram le Jerusalema a sintho murdi inhretuhai kin ni, ama kha Krosa hembe’n an ithat a ni. 40 Khannisian, Pathianin sûn thum nia kaithoia hmu theiin an lârtira. 41 Mi tin hmua chu inlâr mah, Pathianin inhretu hranga a lei inkung keinihai vai hin kin hmu; a thoi nôk hnung khan kin fâkin kin in suam ngai a ni. 42 Kha kha tânginsampui hrang le Ama kha mi hring le mithi chunga Roirêltua Pathian inkung kha a nih ti mihai inhriattir hrangin thu a ni ipêk a ni. 43 Tukhom, Ama iam tâk chu ar hming sikin a sualhai ngaidamin om a ti, tiin deipu murdihai khomin a Thurchi an insîr ngai,” a tia.
Jentailhaiin Irtha Irthiang an dong
44 Petera’n kha thu kha an sîr laiin ar ngaitu murdihai chunga khan Irtha Irthiang a hong tung tâka. 45 Sertanhai laia iamtu Petera hong zuituhaiin chu, Irtha Irthiang thilpêk, Jentailhai kuang a ini kha ar khêl an ti tak taka. 46 Chong inhriat loiin a thu an insîr le Pathian an inpâk kha an inhriata. 47 Petera’n, “Hi mihai hi kin idong ang khan Irtha Irthiang an donga, tui hmangin baptisma an ichang kha tu’n mo khap hrang?” a tia. 48 Khanchu, Jisua Krista irhminga baptisma chang hrang thu a pêka. Kha zoia chu la châm ual hrangin an ngêna.
1 Judai ram tina tîrtônhai le urêng omhai khan Jentailhai khomin Pathian thu an iam sa ti an inhriat tâka. 2 Petera’n Jerusalem a tungin chu, sertanhaiin an lei sêla, a kuang, 3 “Sertan loihai a hroa, an kuang bu a nêk ngai,” an tia.
4 Khannisianlân, Petera’n chu a bula irthokin a rêngin thil hong tunghai kha an sîr pe tâka. 5 Jopa khuaa ki chongchai laiin, inlârna ki hmua. puan lian tak angin, a kil minlia khitin irvân ata zuang irtûlin ki hmua, ki kôl a ni hong nâia. 6 Kha khan ki en chiana, sa ke minli chi tinrênghai, a lôn ngai chi tinhai le va chi tinrênghai ki hmua. 7 Hnuk irhâiin ki kuang, “Peter, thatin lân fa roh,” a ni tia. 8 Khannisianlân, keima’n Rengpa, “Ni mak e!, a’rthiangloi le a fâiloi ite ki bâia lût ngai mah,” ki tia. 9 Irvân ata hnuk irhâi khan, ‘Pathianin a’rthiangtir tâk chu nangin porinche ti no roh,’ a ni zuang ti nôka. 10 Khaang dên khan voithum a zuang oma, a rêngin irvâna khâipai a ni nôk tâka. 11 Kha zoro lai khan mi inthum Kaisari ata ki kuang mi an hong itîrhai kha ki tungna in mikota an lei ngîr chian tâka.
12 Irtha khan lungirhlâna nei viat loiin anni kha zui hrangin a nin hrila. Hi urêng kiruk khom hin an ni zui saa, Kornelia ina khan kin va lûta. 13 Khanchu, ama khan ki kuang, a ina vântîrtôn a hmu thu chu a kuang, ‘Jopa khuaa mi tîrin lân, Simon Petera inkoitir roh, 14 ama khan thu nang hril a ta, a thu’nsîr sika khan nang le ni in sûng mi murdi saninhringin om nin ti’ a ti thuhai a ni lei hrila. 15 Thu chu ki hong insîr phuta, Irtha Irthiang chu, a phuta kin chunga a zuang itung ang dênin, an chunga a zuang tung ta. 16 Rengpa’n, ‘Johana’n tuiin a baptis ngaia, nangni chu Irtha Irthianga baptis ni nin ti’ a itihai kha kin hriat suak nôk ta. 17 Khaang khan, Rengpa Jisua Krista ei iam phut laia thilpêk a ni ipêk a ni ti, a ifel a ni. Khasikin, ‘Keima hi tu mo ki ni, Pathian ikhap tum hi!’ a tia.
18 Hi chong hi an inhriat le chu sêl ta mahaia, “Khaang khan a ni’n chu, Pathianin Jentailhai khom irleta, hring hranga zoro’nchum a ipêk a ni kha te,” tiin Pathian an inpâk ta.
Antiokei khua Koiindang
19 Khan, Stefana an that zoia dengintheina sika inthek indarhai, kha Foiniki rama, Kupra chômbung, Antiokei kho dênin an fe indara Judahai kuang vai no chu tu kuang khom thu hril mahai. 20 An laia senkhat chu Kupra chômbunga om le Kurini kho mihai an ni. Kha mihai khan Antiokei an tungin chu Grik mihai kuang khom thu an insîr. Rengpa Jisua Thurchi Sa an hril sa tâk. 21 Rengpa’n anni kha a changpuihaia, mi tam takin an iama, Rengpa tiang an irhei ta.
22 An thurchi kha Jerusalem khuaa Koiindanghaiin an lei inhriata. Anni khan Barnaba chu Antiokei-a an tîr ta. 23 A zu tungin chu Pathian lungkhamna sintho chu a hmua, a sân a lôma; Iamom taka Rengpa chel khak ta hrangin an rêngin an thorhaia. 24 Barnaba chu mi satak, Irtha Irthiang le iamnaa sip a ni. Khanchu mi tamtak Rengpa kuang hruai an ni tâka.
25 Khan, Barnaba chu Saula zong hrangin Tarsa tiang a fe nôk ta. 26 A hong hmu’n chu Antiokei-a a hong hruaia, kum khat ang dôr Koiindang mihai laia an kop saa, mi tamtak an irchutir ngai. Antiokei khuaa hin a ni irchutirhai chu ‘Kristian’ an itihna masa tak a ni.
27 Khâlâi khan Jerusalem ata deipu senkhat Antiokei-a an fea. 28 An laia inkhat Agaba chu a ngîra, rammual pumpuia châm irkhêl tak tung a ti, ti Irtha inhriattirin an puanga, kha châm kha Klaudia inlal laiin a tung ta. 29 Khanchu, irchutirhai khan an thei lam chitin, Judai rama iamtuhai laia changpuina thon an tuma. 30 Kha kha an tho ngeia, upahai laia pe hrangin Barnaba le Saula kuta an thon ta.
1 Khan, kha zoro lai khan rêng Heroda’n koiindang mihai laia mi senkhat deng an theitir irphuta. 2 Jakoba, Johana urêngpa chu, khandaiin a tuk thata. 3 Ama kha Judahai an lôm ok ti an hriatin, Petera khom chel a tum nôk thiaia, (Kha kha Bai chol koploi kût zoro a ni.) 4 Petera chu a chela, intângna ina a khuma, sipai pâl minli, minli lia irsanin an entirhaia. Ferkân kût zoia mipui matona hruai suak a itum a ni. 5 Petera chu intângna ina a om sûnga khan koiindang mihai sathnem irngai takin Pathian kuang an chongchai pea.
Intângna in ata Petera a suak
6 Heroda’n hruai suak tum hrang zân khan Petera kha sipai inhni kâra, a bâna thîr hrui inhni bunin a ina, a vêngtuhai khom mikot bula an oma, intângna in chu an nghâk chiana. 7 Irngai ta, Rengpa itîr vântîrtôn inkhat a hong ngîra, intângna in sûnga khan vâr a zuang inlang. Vântîrtôn khan Petera dâra an bên inhartira, “Thoi lat roh,” a tia. Thîrhrui khom kha a bân ata a tâk pe tâka. 8 Vântîrtôn khan, “Irsiamin lân, ni kekok bun roh,” a tia. Khaang khan a tia. Vântîrtôn khan, “Ni songkol innghâkin lân, ni zui roh,” a ti nôka. 9 Petera khan a zui suak ta. Vântîrtôn sintho chu a tak a nih ti inhre ma, a’rmanga a ihmu ma ni a sôna. 10 Khan, a enkoltu masa tak le inhnina an khêlin chu khopui a lûtna thîr mikot an va tunga, kha mikot kha a bingin ar hong tâka, an fe suaka. Khan, lamlian inkhat an khêlin chu irningloiin vântîrtôn khan Petera kha a mâksan tâka.
11 “Khan, Petera kha a hong har le chu, “Rengpa’n vântîrtôn a zuang tîra. Heroda kut ata le Judahai sabeina murdia irthokin a nin zôk ti a dik kin hriat ta,” a tia. 12 A milung an chong zoiin chu Johana Marka nu Mari ina khan a va fea, kha khan mi tamtak an om irchuna, an lei chongchaia.
13 Petera khan mikot kha an tôka, dôngmate inkhat, Rodi kha, mikot inhong hrangin a va fea. 14 Petera hnuk irhâi a nih ti an hriatin chu a lôm ta hraia, mikot kha inhong loiin an tân nôka, mikot kôla Petera a ngîr ti thu a va hrilhaia. 15 Anni khan, “Ni invêt ma ni ta,” an lei tia. Ama’n chu, “A dik ta tak kêng? a ti ngita. Anni khan, “Vântîrtôn ni a ti,” an tia. 16 Khannisianlân, Petera khan mikot kha an tôk nôk hena. Mikot an hong inhongin chu ama kha an hmu tâka, a sân ar khêl an ti. 17 Khanchu, dâihrek hrangin kutin a zâphaia; Pathianin intângna in ata a hruai suak lamhai kha a hrilhai tâka. Khan, “Hi thu hi Jakoba le iamtu danghai van hrilhai roi,” a tia. Kha hnung chu, a suaka ram danga a fe tâka.
18 Khua a hong vârin chu enkoltu sipaihai kha “Petera kha khôn mo a iom tâk?” tiin a saterengin an buai ta. 19 Heroda khan a zonga, hmu maka, a enkoltuhai kha a ngohaia, thathai hrangin thu a pêkhai ta. Khan, Heroda kha Judai rama irthokin Kaisari khuaa a zu fea, kha khan a om ta.
Heroda thi thu
20 Heroda chu Tura le Sidon mihai chunga a sân a ning an mura. Anni khan Blasta, rêng zâlhmun nghâkpu kha rualin an siam baka, inrualin rêng kuang an honga, an ramin rêng rama irthoka fâk nêk an ihmu ngai a ni sikin irngei hrangin an ngêna. 21 Chongpui hrang nia khan Heroda chu rêng songkol innghâkin rêng toihmuna a toia, an kuang thu an sîra. 22 Mi murdi’n, “Mihriam hnuk irhâi ni mah, Pathian hnuk irhâi kêng,” an tia, an khêka. 23 Ama khan Pathian kuang roiinpuina a pêk no sikin Rengpa vântîrtônin voikhat rengin a chela, rûlrukûtin a fâka, a thi ta. 24 Pathian thu chu an darh maia, iamtuhai an pung maia. 25 Barnaba le Saula’n an sintho an zoiin chu Johana, Marka an itipu kha hruaiin Jerusalem ata an kîr nôk ta.
1 Khan, Antiokei Koiindang mihai laia khan deipuhai le tîrtônhai an oma. Khahai kha Barnaba, Simeona (Nigera, an ti) Kurini mi Lukia, rêng Heroda’n urênga a inei Manaina, Saula hai an nia. 2 Bu an ngheia Rengpa an biak suam laiin Irtha Irthiangin, “Barnaba le Saula hi anni ki inkungna san tho hrangin ni’rsentir roi,” a tia. 3 Khanchu, bu an ngheia, an chongchaia, an chunga kut an irnghata, an tîr suak ta.
Tîrtônhaiin Kupra chômbunga thu an hril
4 Khanchu, Irtha Irthiang itîr suakin Selukai khuaa an chuma, khatak ata khan Kupra chômbunga irkuangin an fea. 5 Salamis khua an tungin chu Judahai Sinagokhaia Pathian thu an hrila. Johan Marka khom anni changpuitu hrangin an hruai sa.
6 Chômbung kha Pafos khua dênin an irfang suaka. Dôithei, deipu dol, Juda mi inkhat, Bar-Jisua an hmua. 7 Kha mi kha Ramoptu vâr tak Sergia Paula kuanga om a ni. Kha Ramoptu khan Barnaba le Saula kha chai hrangin a fiala, Pathian thu inhriat a nuama. 8 Eluma, dôithei (Kha kha Grik chonga a’rhming a ni.) khan Ramoptu kha iamna thu kha in-iam notir a tuma, anni kha a sêlhaia. 9 Saula, Paula an iti kha, Irtha Irthiangin a sipa, ama kha a en chiana, 10 “Diabola nâipa, satna tinrêng râlpa. Milak tinrêngin ni sipa, zoro tina Pathian thutak hi thu no inchang ni itum ngai a ni. 11 Irngai roh, atûn Rengpa kut hi ni ituang hrang a ni; ni mit cho a ta, sun khovâr hmu ta no chi ni,” a tia. Khanchu, sûm le inthimin ama kha a zui zôi zel tâka, a hruai hrang mi zongin a’rvâk a’rvâk thiai tâka. 12 Khan, Ramoptu khan thil hong om kha a hmua, Rengpa irchutirna thu kha a’rkhêl a ti oka, a iam tâka.
Pisidia rama Antiokei-a Barnaba le Paula thu’nsîr
13 Paula le a rualhai chu Pafos ata irkuangin an suaka, Pamfulia rama Perga khua an tunga, Johan Marka khan anni kha a’rheisanhaia, Jerusalema a kîr nôk tâka. 14 Perga ata kha Pisidia rama Antiokei khuaa an fe zêla. Sabat niin Sinagoka inkhômin an toi sa. 15 Dân bu le deipu Lekhabu tep zoi chu Sinagok hruaituhai khan mi an tîra, “Urênghaio, nin ni inthorna hrang thu imo nin neiin chu insîr roi,” an va tia. 16 Khanchu, Paula chu a ngîra, kutin a zâpa, an sîr tâka.
“Nangni Israel mihaio, irngai roi. 17 Hi Israel mihai Pathian hin ei irchibulhai kha a lei inthanga, an mikhualna Aigupta rama an om sûng khan nam roiinpui taka a siama; khatak ata kha a sinthotheina roiinpui tak hmangin a hruai suakhaia. 18 Kum sômminli ramchâra khan an sinthohai kha an en thei maia. 19 Kum irza minli sômringa sûnga khan Kanaan rama nam sari ar hmangtira, an ram khom a mihai a pêk ta. 20 “Kha hnunga khan roirêltuhai a pêk zela, deipu Samuela dênin, 21 Khan, kha hnunga khan rêng an nghia, khaang khan, Pathianin Saula, Kisa nâipa, Benjamina irchia mi kha kum sômminli sûnga an rêng hrangin a pêkhai ta.
22 Ama kha a hnôl hnunga khan an rêng hrangin Davida a siam ta. Kha chungchâng kha Pathianin hiang hin an sîr. “Davida, Jesaia nâipa, ki lungchuk mi ki hmu ta, ama khan sin hranga ki inuam murdi sin a ti,” a tia.
23 Pathianin a lei inkung tâk ang khan, kha irchihai laia irthoka khan Israel mihai Saninhringtu Jisua a zuang intung a ni. 24 Jisua’n a sin a phut mân khan, Israel mihai an sual an irleta baptisma an changna hrangin Johana’n thu an sîr pe ngai. 25 Khan, Johana’n a sintum a zoi hrang tôn khan mipuihai laia, ‘Tu mo a nih ti nin ni iam? Nin inghâktu kha keima hi ni ma ung. Khannisianlân, irngai u ta! Ki hnunga zuang a ti, kei chu a kekok khek hrang luan inruk ma ung,” a tia.
26 Urênghai, Abrahama irchihai le nangni Pathian chi mi dang murdihaio, kha saninhringna thu kha ei rênga kuang a zuang itung ta a ni. 27 Jerusalema omhai le an roirêltuhaiin ama kha inhre mahaia, Sabat ni rikipin an itep ngai deipuhai thu an inhriat thiam no sikin ama kha thiam no an inchangtira, deipuhai thu kha an tung irkiptir ta a ni. 28 Thina hrang dôr a chunga ite a bi an hmu no khomin, that hrangin Pilata kuang an ngêna. 29 A thurchi Pathian Thu bu’n a irziak murdi kha a tung zoiin Kros ata an kai suma, thâna an phûm ta. 30 Khannisianlân, Pathianin ama kha mithi lai ata a kaithoi nôk tâka. 31 Galili ram ata Jerusalema ama pâla hmunkhata lei lêng suam ngaihai kuang sûn tamtak sûng an lâr ngaia; kha mihai kha atûn hin Israel mihai kuang a thu inhretuhai an ni. 32 Keini hi chu Thurchi Sa kha hril hrangin kin izuang a ni. Pathianin irchibulhai kuang thu an kunga, 33 eini an irchihai kuanga Jisua kaithoia a hong intung tâk thu hi. Sam inhninaa,
‘Nang chu ki nâipa ni ni,
A vuan hin ki nâia ki nei ta a ni,’
tia irziak ang khan. 34 Ramna hmun thâna kîr nôk ta loi hrangin Pathianin ama kha thina irthokin a kaithoi hrangzia thu, hiang hin an sîr:
‘Satvurna irthiang le fel Davida kuanga ki inkung kha nang pe ki ti,’
tiin.
35 Khasikin, hla danga,
‘Ni mi irthiang chu thâna ram hrangin phal no chi ni,’
a ti sa.
36 Davida’n ama zoro ka chu Pathian nuamlam a sina, kha hnung chu a thia, ar chibulhai leh an phûma, a takpum kha thâna a ram tâk. 37 Pathianin thina irthoka a ikaithoitu kha chu ram mah.
38 Khanchu urênghaio; khasika sual ngaidamna thu nangni kin hong ihril a ni. Mosia Dâna thiam nin chang thei nona murdia khan, 39 Jisua iamtu murdi thiam inchangtir an ni ta. Kha kha Mosia Dânin mi thiam a inchangtir thei loi kha a ni. 40 Khasikin, irdîn roi, deipuhai lei iti kha nin chunga tung likna ti:
41 ‘Hmusittuhai,
en u ta! ar khêl ti unglân irhmang roi;
nin dam sûnga sin ki itho hi,
mi’n nangni hrilfiah pe khom sian iam viat no chin ni, iti kha,’
a tia.
42 Khan, Paula le Barnaba kha inkhôm in ata an suakin chu Sabat ni nôka kha thu kha hong insîr nôk hrangin mipuihai khan an fiala. 43 Inkhôm an chîn zoiin chu, Juda mi tamtak le Juda saphun Pathian ngaisak tam takin Paula le Barnaba kha an zuia, an inkhômnaa khan Pathian lungkhamnaa om mai hrangin an inthorhaia.
44 Sabat ni nôka chu Rengpa thu irngai hrangin a kho pumpui an hong inkhôma. 45 Khannisianlân, Judahaiin mipui an hmu’n chu a sân an hnarsahaia; Paula thu’nsîr kha an sêl irkaltira, an insîr insiata.
46 Paula le Barnaba khan hâi takin, “Pathian thu hi nangni kuang hril masa hrang rêng a ni; khannisianlân, nin hnôla, kumtuang hringna nei zel loia nin irngai hnung chu inhre roi, Jentailhai tiang irhei kin ti. 47 Khaanga tho hrangin Rengpa’n thu a ni ipêk a ni.
‘Jentailhai invâr hrangin nang kin kung,
kôlkil dêna mihai Saninhringna hrangin,’
ti irziak ang khan,”
an tia.
48 Khanchu, Jentailhai khan kha thu kha an inhriatin chu an lôma, Pathian thu an chôiindôm tâka, kumtuang hringna dong hranga inthang murdihai khan chu an iam tâka.
49 Rengpa thu kha ram pumpuia khan an darh ta. 50 Khannisianlân, Judahaiin kho sûnga ulianhai le Pathian ngaisak Jentail nupang mahripomhai an inthorhaia, Paula le Barnaba kha an beihaia, an ram ata an inhnot suakhai tâka. 51 An idemhai inlangna hrangin tîrtônhai khan an ke zapha ata vâiphin an hui thâka, Ikoniom khuaa an fe tâka. 52 Irchutirhai kha Irtha Irthiangin an sipa, a sân an lôm tâka.
1 Khaang dên khan Ikoniom-a khom Judahai Sinagoka tîrtônhai kha an inkhôma, an thu’nsîr sikin Juda le Grik tam takin an iama, 2 Iam nuamloi Judahai khan Jentailhai an inthorhaia, urênghai kha an khôkmâktirhaia. 3 Khannisian, tîrtônhai kha sôt zan an châma, Rengpa thu kha hâi takin an hril ngaia. A lungkhamna thu an hril ngai kha namindetna hrangin Rengpa’n anni hmangin thilirkhêl le sinirkhêl tamtak a thoa.
4 Kho sûnga mipuihai kha an irsena, senkhatin Judahai an thopa, senkhatin tîrtônhai an thopa. 5 Jentailhai le Judahai chu an roirêltuhai le, dengintheitirhai bita lunga dêng an tum ti, 6 tîrtônhaiin an inhriatin, Lukaoni rama Lustra khua, Derbe khuaa le a vêl ramhaia an rot tâka. 7 Khahai khoma khan Thurchi Sa an hril thiaia.
Lustra le Derbe
8 Khan, Lustra-ah khan mi inkhat, ke’nbâi, toi chiana om, a’rzir ata a ke’nbâi, ke’n kal la chôi ngai viat ngai loi mi a oma. 9 Kha pa khan Paula thu’nsîr kha a’rngaia, Paula’n a en chiana, damna hrangin iamna a nei ti an hriatin, 10 inring takin, “Ni ke’n ngîr suak roh,” a tia. Kha pa kha ar chôma, ke’n a fe thei ta.
11 Mipuihaiin Paula sintho kha an hmu’n, Lukaoni chongin inring takin, “pathianhai kha mihriam angin ei laia an hong isuak ta a ni hi,” an tia. 12 Barnaba kha ‘Zeusa’ an tia, Paula thu’nsîrtu tak a ni sikin, ‘Hermaa’ an tia. 13 An pathian Zeusa tempil kha mikot suaa a oma, kha khan Ochaiin sehrâtchal le pâr inthil hruihai dâi mikota khan an hong chôia; mipuihai leh khan tîrtônhai kuang irbôlna inhlan an tum tâka.
14 tîrtôn Barnaba le Paula’n kha kha an inhriatin chu, an puan an inpot thêra, mipui laia khan an irchôm lûta, an khêka, 15 “Hi hi i hrang mo nin itho? keini khom nangni ang mihriam mai mai kin ni. Hi chanlamboi thilhai hi mâkin, Pathian hring, irvân, irnêng, tuikhanglian le a sûnga om murdi siamtu tianga nin hong kop theina hranga Thurchi Sa nangni hong hril kêng kin ini. 16 Pathianin tiana chu mi tin mâni lampui chit hro a phal ngai a ni. 17 Khannisianlân, ama inhriattirna omin thil sa nangni tho pe’n an lang ngêt ngai. Irvân ata rua le chîmuhai a zoro taka nangni a pêk ngaia; fa hrang le nin lungrîla lômna nangni a pêk ngai,” an tia.
18 Kha thu kha insîrin mipuihai chu an kuang irbôlna inhlan loi hrangin an khap thei zâma. 19 Khannisianlân, Antiokei le Ikoniom ata Juda senkhat an honga, mipuihai kha an hong inhminhaia, Paula chu lungin an dênga, a thi tâk sônin kho sûng ata an kai suaka. 20 Khannisian, irchutirhai kha an hong ngîrin a thoia, kho sûnga a lût nôk tâka, khan, a tûka chu Barnaba le Derbe-a an fe tâka.
Suria ram Antiokei-a an kîr nôk thu
21 Kha khuaa khan Thurchi Sa an hrila, irchutir mi tamtak an siam hnungin Lustra-ah an kîra. Ikonioma, Antiokei-haia an fe maia. 22 “Intakna tamtak tuangin Pathian Rama ei ilût hrang a ni,” tiin iamtuhai lungrîl an indettira, iamna kha chel khak hrangin an inthorhaia. 23 Koiindang tina upahai an thangpui thiaia bu ngheiin an chongchaia, an iiam Rengpa kuang an inkoltir maia.
24 Pisidia ram chu an irfang suaka, Pamfulia an hong tung nôka. 25 Perga khuaa thu an hrila, Atalia khuaa an fea, 26 khataka irthokin chu irkuangin Antiokei an tung nôk tâka. Kha hmun kha hi zoroa an sintho an phut hrang laia Pathian lungkhamna kuta ibânga an omna hmun kha a ni.
27 An tungin chu koiindang mihai chu an koi bukhaia, Pathianin anni hmanga thil a itho murdi le Jentailhai ta hrang khom Jisua iamna lam ar hong thuhai an hrila. 28 Iamtuhai kuang khan zoro sôt tak an châm tâka.
1 Judai ram ata mi senkhat an hong chuma, “Mosia Dân anga ser nin tan kher no’n chu saninhring ni thei no chin ni,” tiin urênghai kha an hong irchutira. 2 Khanchu Paula le Barnaba hai le an irsêl mur mura, an irsunkhak sikin, Paula le Barnaba leh an laia mi senkhat, Jerusalema tîrtônhai le upahai kuang fea kha thu kha insîr hrangin an tia. 3 Khanchu, koiindang mihai chu an inthaa, Foiniki ram Samari ram an irfang suaka, khataka urêng omhai kuang, Jentailhaiin Pathian thu an iam tâk thu an insîr thiaia; kha an insîra irthoka khan iamtuhai an lômtir oka.
4 Jerusalema an hong tungin chu koiindang mihai, tîrtônhai le upahai chu an lei lôma; Pathianin anni hmanga thil a itho murdi an kuang an hrila. 5 Farisai pâla mi, iamtu senkhat an ngîr suaka, “Jentailhai chu an sertan hrang a nia, Mosia Dân khom zôm hrangin inphût ngit hrang a ni,” an tia.
6 Kha thu ngaitua hrang khan tîrtônhai le upahai kha an inkhôma. 7 Zoro sôt tak an ngaitua hnungin Petera a ngîra, an kuang, “Urênghaio, Jentailhaiin keima bâi ata Thurchi Sa an inhriata an iamna hrangin Pathianin tiana nin lai ata nin thang kha nin inhriat. 8 Lungrîl inhretu Pathian chu keini a ni ipêk ang dêna an kuanga Irtha Irthiang pêkin Jentailhai a inuam a ni an langtir kha. 9 Eini le anni thiarthâk loiin an iam sikin an sualhai a ngaidam tâka. 10 Khasikin, ei irchibulhai le eini ipêl zoi loi puak kha atûna hin iamtuhai chunga inkhop pe tumin i hrangin mo Pathian nin idoi? 11 Khaang khan ni ma! anni ang dênin eini khom Rengpa Jisua lungkhamna sika saninhring hrang ni’n ei irtûng,” a tia.
12 Khanchu, mipui murdi chu an dâihrek tâka, Barnaba le Paula chu anni hmanga Jentailhai laia thilirkhêl le sinirkhêl Pathianin a ithohai an insîr chu an irngaia. 13 An dâihrek zoi khan Jakoba’n an sîra, “Urênghaio, ki thu hi irngai roi. 14 Pathianin ama irhming irput hranga anni laia mi la suak hrangin Jentailhai a zuang hro irphut thu Simona’n an sîr tâka. 15 Kha thu le deipuhai thu hi a irtok thap a ni, Pathian thu’n,
16 ‘Kha irzoia khan kîr nôk ki ta,
Davida omna in chim kha inding nôk ki ti.
A siatna ualhai khom siam insa nôk ki ti.
17 Mi dang, Jentailhai murdi ki’rhming irputhai khan Rengpa an zongna hrangin,
kha kairênghai kha inding ki ti, tiin.
18 Rammual irsiang ata hi thu inhre ngaitu Rengpa khan a ti,’
a iti ang khan.
19 “Khasikin, ama hi ki ngaitua lam a ni, Jentail, Pathian tianga hong irlethai hi chu inbuai no inlân, 20 kha nêkin, lekha thonin millim biakna thil irthiang loi fâk mani, irdit mani, sa ise that le thisen fâk mani, mong hrangin ti pehai inlân ki iti a ni. 21 Mosia Dân chu tian ata Sabat ni rikipin Sinagoka an insîr ngai ta,” a tia.
Jentail Kristianhai laia lekha thon
22 Khanchu tîrtônhai, upahai le koiindang pumpuiin, an laia mi inthanga, Paula le Barnaba pâla Antiokei-a infetir an inchuka. An ulian ual inhni Juda, Barsaba an iti le Sila an inthanga. 23 Hiang hin an irziakin an inchôi:
“tîrtônhai le upahai le nin urênghai hin, Antiokei-a mihai, Suria rama mihai, le Kilikia rama Jentail urêng omhai kha chubai nangni kin mûk e. 24 Kin laia mi senkhat, thu zuang insîrin nangni kha an inbuaia, lungzîng nangni an siam ti kin inhriata; khannisian, an kuang ite thu pe ma ung. 25 Khasikin, kin irbûma, milung inrual takin mi inthanga nin laia hong tîr hrangin kin inchuk a ni. Kin rual indit tak Barnaba le Paula pâla kin hong itîr a ni. 26 Jisua Krista sin thônaa an hringna phalhai leh hin nin zuang tîr sa kin tia. 27 Khaang khan, Juda le Sila kin zu itîr a ni. Hihai hin kin irziak hai hmêl irhmu ngeiin nangni insîr pe an ti. 28 Irtha Irthiang le irrualin hi thu kâmom ok loi hi chu puakrik dang siam loi hrangin kin inrual. 29 Millim biakna hmê fa no roi, thisen le sa ise that hme fa no unglân, irdit masan sa unglân kin ti, hi thilhai ata nin irkiangin chu nin ta hrangin sa ti, Dam takin,” tiin an irziaka.
30 Khanchu an infetir tâka, Antiokei an tunga, mipui an koi buka, lekha thon kha an pêka. 31 An tep zoiin chu, fûina thu sika khan a sân an lôm tâka. 32 Juda le Sila chu deipu an ni saa, urênghai chu thu tam takin an inthora, an indeta. 33 Sôt tak an châm hnungin, anni tîrtuhai kuang irtharngam taka kîr nôk hrangin iamtuhai khan an inkîrtir tâka. 34 Khannisianlân, Sila chu om mai hrang a tuma. 35 Paula le Barnaba chu Antiokei-a khan an om chian tâka, mi dang tam takhai leh Rengpa thu an insîra, an irchutirhai ngaia.
Paula le Barnaba an irsen
36 Zoro sôt ian hnunga chu Paula’n Barnaba kuang, “Tho! fe nôk ei ta, kho tina Rengpa thu ei insîrna murdia ei urênghai pan ei ta, iamnaa an ngîr hmunhai lei irhmutir rei,” a tia.
37 Barnaba’n Johan Marka an laia tuang a nuama, 38 Khannisian, Paula’n chu nuam maka, asan chu, Pamfulia ram tena a kîra, an sin a zoipui no sika a ni. 39 A sân an irkhala, an irsen tâka; Barnaba’n Johan Marka a hruaia, irkuangin Kupra chômbung tiang an fe tâka, 40 Paula’n chu Sila an thanga, urênghaiin Rengpa Lungkhamnaa an koltir hnungin an zin suak sa tâka. 41 Suria ram le Kilikia ram chu an irfang suaka, Koiindang mihai kha an indettirhai thiaia.
1 Paula’n Derbe le Lustra khom a hro saa, kha khan Kristian inkhat a’rhming Timothea a oma. A nu chu Kristian Juda a nia, a pa chu Grik a ni. 2 Lustra le Ikonioma urênghai khan Timothea kha a sân an inpâk. 3 Paula’n ama kha hruai hrangin a nuama, kha kôlvêla Judahai khan Timothea pa kha Grik a nih ti an inhriat zita, a ser a tan pea.
4 Kho tin an irfang malamin, Jerusalema tîrtônhai le upahai thurêl kha an pêk thiai maia, zôm hrangin a hrilhai thiaia. 5 Khasikin, koiindanghai kha iamna an hrât uala a nitin an pung tîr tîr tâka.
Troas-ah Paula inlârna hmu
6 Irtha Irthiangin Asia rama thu’nsîr a khap sikin Frugia le Galatia ram an irfanga. 7 Musia ramri an tungin chu Bithunia rama fe an tuma, khannisian, Jisua Irtha khan phal maka. 8 Khasikin, Musia ram khêlin Troas-ah an fe tâka.
9 Khan, kha ni zâna khan Paula’n inlârna’n Makedonia rama mi inkhatin, “Makedonia rama hong kâiin lân, ni hong san roh!” tia ngênin a hmua. 10 Paula’n inlârna hi a hmu zoi le chu, Makedonia rama fe hrangin kin irsiam zel tâka, kha rama mihai laia Thurchi Sa insîr hrangin Pathianin a ni koi sikin.
Filipi khuaa Ludi irletna
11 Khanchu, Troas-ah irthokin irkuangin kin suaka, Samotraki khuaa kin theng thaia, a tûka Neapolis khuaa kin fea. 12 Khataka irthokin Filipi khuaa kin fea, kha khua kha Makedonia rama khua inkhat a nia, kha biala khan chu kho kâmom tak a ni. Rom mihai riakbuk a ni. Kha khuaa khan sûn tamtak kin châma. 13 Sabat niin khopui pên tianga ivadung panga, Judahai chongchaina ngai hmun ni hranga kin iiama khan kin fea; kha khan kin toia, nupang irbûmhai laia thu kin insîr. 14 Khahai laia mi ar hming Ludi Thuatira kho mi puan senduk zuar ngai, Pathian chi mi nupang inkhatin kin chong an hriata, khanchu, Paula thu’nsîr kha zôm hrangin Rengpa’n a lungrîl an vâr pea. 15 Ama le a in mihaiin baptisma an chang zoiin chu, “Rengpa iam tak takin nin ni bêin chu ki ina hong tung roi,” tiin a ni fial ngita, a nin tûk tâka.
Filipia khuaa Paula le Sila Intângna ina an khum
16 Khan, nikho khat chu chongchaina hmuna kin fe laiin suak dôngmate inkhat ramilhli ichel tasân thei hin a ni chongpuia, khanu khan tasân a theina sika khan a puhai sum tamtak a lei pêk ngaia. 17 Khanu khan Paula le keini a ni zuia, “Hi mi, saninhringna lampui nangni hrilhai hi, Anchungtak Pathian suakhai an ni hi,” tiin a khêk ngaia. 18 Khaang khan, sûn tamtak a tho tena chu Paula milung hoi ta maka, a’rheia, ramilhli kuang khan, “Jisua Krista irhmingin a sûnga irthoka suak hrangin thu nang ki pêk,” a tia. Mitkhap kârin a suak zôi tâka.
19 Khan, a puhai khan an sum hmûna ngai om ta mah ti an inhriat le chu Paula le Sila kha an chela, roirêltuhai kuang bazâr hmuna an kai inlûthaia. 20 Roirêltuhai kuang an intungin chu, “Hi mihai hi Juda an nia, kin kho sûnga buaina an siam ngai. 21 Keini Rom mihai izôm le irthiang loi dân dang an ihril a ni,” an tia.
22 Mipuihai kha Paula le Sila zêm hrangin an irsiam tâka. Kha hnung chu, roirêltuhai khan Paula le Sila puan an thêr pehaia, khianghrol leh zêm hrangin thu an pêka. 23 An zêm bithai hnungin intângna ina an khuma, a nghâktu kuang khan sataka khum khak hrangin thu an pêka. 24 Khaang khan, intângna in sûngrîl taka a khuma, an kea thing kol an inbuntira.
25 Zân laitaka chu Paula le Sila chu Pathian kuang an chongchaia, hla an saka, intângna ina mi danghaiin an irngaia. 26 Khanchu, irningloiin hnîngnupui a hong inhnînga, intângna in lungphûmhai ten khom ar nok zit tâka. 27 Khanchu, intângna in nghâktu kha a hara, mi’ntânghai kha an irot suak zit mani ta a tia, a khandai a phôia, irthatpai a tuma. 28 Khannisianlân, Paula khan inring takin a khêka, “Ite irlo no roh, kin rêngin hin kin la om zit hi te,” a tia. 29 Kha zoi le chu meiser a zonga, a’rchôm lûta, ichi le inthing pumin Paula le Sila makunga khan a van boka. 30 Ama kha pên tiang a hruai suaka, “Puhaio, saninhring ki ni theina hrangin imo ki itho hrang?” a tia.
31 Anni khan, “Rengpa Jisua iamin lân, khanchu saninhring nih ni ti, nangma le ni in sûng mihai le,” an tia. 32 Ama le a ina om murdihai kuang khan Rengpa thu an hril tâka. 33 Kha zân, kha dârkâr lelea khan Paula hai kha a hruaia, an izêmna pophai kha a’rsûk pehaia, an in sûng mi rêngin baptisma an chang zôia. 34 Paula le Sila kha a ina a hruaihaia, fa hrang a pêkhaia. Pathian an iam tâk sikin an in sûng pumin a sân an râi a fân tâka.
35 A tûk zîng chu roirêltuhaiin, “Kha mihai kha insua ta roh,” ti thupêk inchôitirin enkoltu hril hrangin pulis an tîra. 36 Intângna in enkoltu khan an thu kha Paula a hrila, “Roirêltuhai khan nangni insua hrangin mi a hong tîra, atûn hong suak unglân, irtharngam takin fe roi,” a tia. 37 Khannisianlân, Paula khan an kuang, “Rom mi kin nia, thiam no chang ni ma unga, vântâng hmuna an ni zêma, intângna ina an ni khuma. Atûn hin inrûkin nin sua an itum mo? Ni viat no ni, anni ngêt honghai sianlân, ni va hruai suak ri sehai,” a tia. 38 Pulishai khan kha thu kha roirêltuhai an va hrila. Rom mi an nih ti an inhriatin chu an chi tâka. 39 An va fea, thupha an chôia, an hruai suaka, an khua ata suak hrangin an ngên tâka. 40 Paula le Sila kha intângna in ata an suaka, Ludi ina an fea. Kha khan iamtuhai kha an hmua, irtharngamna an sakhai zoiin chu an mâkhai tâka.
1 Khan, Amfipoli le Apolonia an khêla. Thesalonika an tung tâka, khatak khan Judahai Sinagok a oma. 2 Paula chu a itho ngai lam angin an khôm saa; Sabat voithum Pathian Lekha thu ata sataka sûtpuiin, 3 Krista kha thina tuang hrang a nizia le mithi lai ata thoi nôk hrang ngêt a nizia hrilfiain an khîk irhmu ngaia. “Hi Jisua, a thurchi nangni kin ihril hi, Krista kha a ni,” a tia. 4 Khanchu an laia mi senkhatin an iama, Paula le Sila kha an zôm tâka; Pathian ngaisak Grik mi tamtak le mi lian nuhaiin an zui saa.
5 Judahaiin an hnarsa tak taka, kholâia mi sual om ma maihai kha an bûmhaia, a khopumin an inbuaia, tîrtônhai kha vântâng makunga hruai suak tumin Jasona in an hong rûna. 6 Khannisian, an hmu no tika chu, Jasona le iamtu senkhathai kha kho sûng hruaituhai kuang an hruaihaia, an khêka, “Hi mihai hin hmun tina buaina an siam ngai! Atûn hin ei khuaa an ihong a ni, 7 Jasona hin a ina a lei intung ngaia. Hihai hin, a’rhming Jisua, rêng dang a om tiin Kaisara dân an doi ngai,” an tia. 8 Kha chong kha an inhriatin chu mipuihai le kho sûng hruaituhai an buai tâka. 9 Kho sûng hruaituhaiin Jasona le a chanpuihai kha an irchôka, an insuahai tâka.
Paula le Sila Beroia khua
10 Khanchu iamtuhaiin kha ni zân ngeiin Paula le Sila kha Beroia khuaa an infetirhai zôia, khan an tungin chu Judai Sinagoka an lûta. 11 Khataka mihai kha chu Thesalonika mihai nêkin chu an lungrîl ar hong uala. Thu kha tui takin an irngaia, Paula thu’nsîr kha a dik le dikloi inhriatna hrangin a nitin Pathian Lekhabu an tep ngai. 12 Khahai laia mi tam takin an iam taa, Grik nupang mahripom tak le pa tamtak khom an iam tâka.
13 Khannisian, Thesalonika taka Judahai khan, Paula’n Beroia khuaa khom Pathian thu an sîr tih an inhriatin chu kha khan khom an va fea, mipuihai an inthora; an buai nôk tâka. 14 Khanchu, iamtuhaiin tuipui dêna irkuanga fe hrangin Paula kha an tîra, Sila le Timothea chu an la oma. 15 Paula zu thakhai khan Atheni dênin an zu thaka, Sila le Timothea kha irhnot taka a kuang fe hrangin Paula chong bê chôiin an kîr nôk tâka.
Atheni khuaa Paula thu’nsîr
16 Khan, Paula’n, Atheni-ah anni kha a lei nghâk laiin kha khua kha millim sip a nih ti a hmu’n a lungrîl a na pe oka. 17 Khanchu, Sinagoka Judahai le Jentailhai, Pathian biakhai kha a sêl ngai; bazâr hmuna khom khataka omhai ngân chu a nitin a sêl ngaia.
18 Khan, Epikuria mi senkhat le Stoik mi vâr senkhathai leh khom an irdoia. Senkhatin, “Hi hmûr thiampa hin imo insîr a itum?” an tia. Senkhat nôkin chu, “Ram dang Pathian thu a insîr hrang a ni hi te,” an tia. Hianga an itih nasan chu Paula’n Jisua thu le thoi nôk thu an sîr sika a ni. 19 Khanchu, Paula kha an koia, roirêlna Areopagia khan an hruaia; a kuang “Hi irchutirna thar ni insîr ngai hi an hriat kin nuam. 20 Ni insîr kin inhriathai hi lan hre ngai ma ung. Khasikin, itina mo a ini an hriat kin nuam,” an tia. 21 (Atheni kho sûng mi murdi le kho dang mi a zuang iomhai khomin an zoro nei murdi thil thar insîrna le irngainaa hmang an nuama.)
22 Khan, Paula kha roirêlna Areopagia maton taka a ngîra, “Nangni Atheni mihai, lam tinrênga sakho mi tak nin nih ti kin hriat. 23 Nin kho sûnga ki lêng malamin chubai nin mûk ngaihai ki ena, maichâm inkhat, “Inhriat loi Pathian ta hrang,” tia irziak ki hmua. Nin inhriat no chubai nin mûk mai ngai kha atûna nangni ki insîr pe hi a ni. 24 Pathian, rammual le a sûnga thil tinrêng siamtu chu, irnêng le irvân Rengpa a ni sikin kuta sin inhaia om ngai mah. 25 Mihriamin ei sem hrang thil ite khom irsam mah. Ama ngei kha tinrêng laia hringna hai, phûksâna hai le thil tinrêng pêktu a ni. 26 Rammual pumpuia om hrangin, mi inkhat ata zât tin a siama. An ta hrangin hun bihai a khit pehaia, an omna hranghai a khang pehaia. 27 Hi a ithô nasan chu ama an ena, an zonga an hmu lik theina hranga a ni. Khannisian, Pathian khan tûte ni hla ual mah.
28 Mi senkhatin an iti angin,
‘Ama sikin ei hring,
ei ichâng, ei iom a ni.’
Nin hla phuahai khomin an iti sa angin,
‘Eini khom a nâihai ei ni.’
ti hi. 29 Khanchu, Pathian irchihai ei ni’n chu, Pathian chu rângachak mani, sumin mani, lung mani, mihriam thiamthei le inkunga songhai ang mani hi niin ei ibe hrang ni mah. 30 Pathianin ama ei inhriat no laia khan chu inhre loi om a tho ngaia; khannisianlân, atûn chu ram tina mi murdi irlet hrangin chong a ipêk tâk a ni. 31 Nikhua a khita, kha nia khan a mi phuntu kha rammuala mi murdihai roi dik takin inrêltir a ti. Kha thu kha chu Pathianin ama kha thina irthoka kaithoiin mi murdi kuang an hriattir ta,” a tia.
32 Khan, thina irthoka thoi nôk thu an inhriat le chu senkhatin an innuisana; senkhat nôkin chu, “Hi thu hi ni kuang ata a la’rngai nôk kin nuam,” an tia. 33 Khanchu, Paula chu an lai ata a suak tâka. 34 Senkhat chu a kuang an thop ngita an iam tâka. Khahai laia senkhat chu, Areopagia roirêltu pâla mi Dionusia le nupang inkhat ar hming Damari le mi danghai leh an ni.
1 Kha zoi chu Paula’n Atheni a suaksana, Korinth khuaa a fe tâka. 2 Juda mi inkhat Akuila a hmua, ama kha Ponto rama suak a ni. Rom rêng Klaudia khan Juda murdi Rom khua ata an hnotsuak sikin a dôngma Priskili leh Itali ram ata hong tung phing an ni. An kuang a chaia, 3 a sintho ang sin an ni sikin a tungna haia, a sinpui sa ngaia; puan in sin ngai an ni. 4 Sabat ni rikipin Sinagoka thu an sîra; Judahai le Grikhai kha in-iamtirhai tumin a beihai ngaia.
5 Sila le Timothea Makedonia ram ata an hong tunga khan Paula chu thuhril sina ar pêk tâka; Jisua kha Krista a nih ti Judahai kuang a hrilfiah ngai. 6 Khannisianlân, Judahaiin an doia, an insîrinsiatin chu Paula’n a puan an thika, “Nin thi khomin nangni mophurna a ni ta, kei chu ki’rthiang ta. Atûn chu Jentailhai tiang irhei ta ki ti,” a tia. 7 Khatak ata a fe suaka, mi inkhat Tita Justa ina a lûta, ama kha Pathian ngaisak mi tak a nia; a in khom Sinagok kôla om a ni. 8 Sinagok hruaitu Krispa le a in sûng mihai murdi’n Rengpa an iama, Korinth khuaa mi tamtakhai khomin an inhriata, an iama, baptisma an chang tâka.
9 Zân khat chu Paula’n inlârna a hmua, Rengpa khan a kuang, “Chi no roh, dâihrek loiin thu insîr mai roh. 10 Keima ni kuang ki om sikin nang innatir hrangin tûte ni chunga kut tha no nihai, hi khuaa hin mi tamtak ki nei,” a tia. 11 Paula chu an kuang Pathian thu irchutirin kum khat le tha ruk a om tâka.
12 Khan, Gallioa, Akaia rama Ramoptu a chang laiin Judahai an inruala, Paula an chela, roirêlna hmuna an hruaia. 13 “Hi mi hin dân ni loia Pathian biak hrangin mi inthêm inhnê a tum ngai,” an tia.
14 Paula chong hrang a ti le, Gallioa khan Judahai laia, “Judahai, hi hi thil dik loi mani a ninole tho’nsual mani lua ni sian chu, irlêk loiin nangni ngaitua pe ki ti. 15 Khannisianlân, thuhai irhminghai le nin dân chungchânga nin buaina thu chian a niin chu, nangni’n ngaitua roi. Kei chu khaang thu kha chu irngaitua nuam ma ung,” a lei tia. 16 Roirêlna in ata kha an suaktir tâka. 17 Khannisian mi dang murdi chu Sinagok in hruaitu Sosthena chu an chel tâka, roirêlnaa khan an zêma. Kha khom kha Gallioa khan, kha an thil tho kha itea irngai mah,
Paula Antiokei-a a kîr nôkna
18 Paula chu nikho sôt tak a la châma, kha zoi hnunga chu urênghai kha satakin an thâhaia, Suria ram tiang panin irkuangin a fe suak tâka, a kuang Priskili le Akuila khom an fe sa. Paula’n chonginkung a lei nei sikin, Kenkriai khuaa a sam a lei ep baka. 19 Khanchu, Efesi an tunga kha khan Priskili le Akuila kha a mâkhaia; ama kha Sinagoka a lûta, Judahai kha thu a la’rtukpuihaia. 20 Khanchu, anni khan sôt taka om hrangin an ngêna, khannisian, nuam pehai maka. 21 Khan, an kuang, fe khomin lân, “Pathian lungdo a ni’n chu nin kuang la hong nôk ki ti,” tiin chonghoiin an thâhaia, Efesi-a irthokin irkuangin a fe tâka. 22 Kaisari a tungin chu Jerusalema a fea, Koiindang chubai a mûka; kha hnung chu Antiokei-a a fe tâka. 23 Kha khan sûn tamtak a om hnungin a fe nôka, iamtuhai indet thiaiin Galatia ram le Frugia ram a’rfang suak zit tâka.
Efesi le Korinth-ah Apolova thu’nsîr
24 Kha laia khan Juda inkhat a’rhming Apolova, Alexandria suak, Efesi-a a zuanga. Ama chu thu’nsîr thei tak a nia, Pathian Thuhai khom an hriat oka. 25 Ama kha Rengpa Lampui thu irchu tâk a nia, lungrîla sathnem irngai tak irveiin Jisua thu an sîr ngaia, dik takin a’rchutir ngaia. Khannisianlân, Johana baptisma thu vai kêng a la inhriat. 26 Sinagoka hâi takin thu’nsîr a phuta khan chu, Priskili le Akuila khan a thu’nsîr an inhriatin chu an ina an hruaia, a kuang Pathian Lampui thu dik ualin a hrilfiah pehaia. 27 Khan, ama kha Akaia rama fe a tum sikin Efesi-a iamtuhaiin an inthora, ama an lei lômna hrangin Akaia rama iamtuhai laia lekha an irziak pea. A tungin chu Pathian lungkhamna sika iamtu hong changhai ta hrangin changpuitu satak a chang ta. 28 Vântâng inhriata Judahai kha a sêl indonga, Pathian Lekha thu hmangin Jisua chu Mesia a nih ti an lang ngaia.
1 Apolova kha Korinth khuaa a la om laiin, Paula’n chu sak tiang ram hual vêl ar fanga, Efesi a tunga. Kha khan iamtuhai senkhat a hmua, 2 ama khan, “Nin iam phuta khan Irtha Irthiang nin dong mo?” a tia. Anni khan, “Irtha Irthiang a om tih lua inhre ma ung,” tiin an sâma. 3 Ama khan, khante, i baptisma mo nin ichang?” a tia. Anni khan, “Johana baptisma,” an tia. 4 Khanchu, Paula’n an kuang, Johana khan mihai kuang, ki hnunga zuang hrangtu Jisua nin la iiam hrang a ni tiin an sualna ata irlet tâkhai kha a ibaptis ngai a ni kha,” a tia. 5 Kha kha an inhriat le chu Rengpa Jisua irhmingin baptisma an chang tâka. 6 Khanchu, Paula’n an chunga a kut a’rnghata, Irtha Irthiang an dong zôi zel tâka, chong inhriat loihaiin an chonga, Pathian thu an insîr tâka. 7 An rêngin pasal sômhleihni vêl an ni.
8 Paula chu Sinagoka lût maiin tha thum chu Pathian Ram thurchi irtukpuiin, inthêm inhnê tumin hâi takin thu an sîr maia. 9 Khannisianlân, senkhat chu a sân an lei ngara, iam nuam mahaia, mipui makunga Rengpa Lampui thu kha an insîrinsiata. Khasikin, Paula’n anni kha mâkin, iamtuhai kha a hruaia, a nitin zîng dâr sômhleikhata irthokin khohloi dâr minli tena Turana irchûna ina khan thu an sîr irhlômpuihai ngaia. 10 Khaang khan kum hni a thoa, khasikin, Asia rama om murdi, Judahai le Grikhai khomin Rengpa thu an inhriat tâka.
Skeva nâihai thurchi
11 Khan, Pathianin Paula kuta thilirkhêl danglam tak an thoa. 12 Paula’n a lei ihmang ngai hmâihuina le a puan silhai kha dam loihai kuang an chôia, an natnahai a boi pehai ngaia, an sûnga ramilhli ten khom an suak ngai.
13 Khanchu, Judahai, ramilhli inhnot suak tuma irvâk ngaihai khomin Rengpa Jisua irhming an hmanga. Ramilhlihai kuang, “Paula’n a insîr ngai Jisua irhmingin a sûng ata suak hrangin thu nang ki pêk,” an tia. 14 Juda Ochai Inlaltak Skeva khan nâipasal sari khaanga tho ngai a neia. 15 Khannisianlân, ramilhli khan an kuang, “Jisua kin hriat, Paula khom kin hriat; nangni rêk hi chu tuhai mo nin ini?” a tia. 16 Khanchu, a sûnga ramilhli neitu khan a hong inboa, an hnê zit tâka, kha in ata kha pop iliam le an puan chet chitin an intân zit tâka.
17 Efesi-a om Judahai le Grikhai murdi’n kha thu kha an inhriatin an chi tak taka. Khanchu, Rengpa Jisua irhming an thang ual tâka. 18 Iamtu tamtak an honga, vântâng inhriata an tho’nsualhai an inpuanga. 19 Dôi hmang ngai tamtak khomin an lekhabuhai an hong irchuna, mi tin mit hmua an hal tâka, khan a man an insâpa, sîngringa (50,000) a niin an inhriat. 20 Khaang taka khan Rengpa thu an dara, an hnê thiai tâka.
21 Kha zoiin chu, Paula’n Makedonia ram le Akaia ram irfang zoi baka, Jerusalema fe a tuma. “Kha khan ki fe zoiin chu Rom khua khom hro sa ngêt ki ti,” a tia. 22 Khasikin, a changpui ngai mi inhni, Timothea le Erasta kha Makedonia rama a lei tîrhai baka, ama kha Asia rama a la oma.
23 Kha lai vêla khan Rengpa Lampui thu sikin buaina lian tak Efesi-a a oma. 24 Mi inkhat ar hming Demetria, sumin Artemis tempil in irlim siam ngai a oma, kha a sin khan a siam thiamhai laia inlâpna lian tak a pêk ngaia. 25 Khasikin, ama khan anni kha a koibûmhaia, an sintho anga thohai le; khanchu, an kuang, urênghai, hi sin hi ei irchongna a nih ti nin inhriat. 26 Khannisianlân, hi Paula sintho hi nangni khomin nin hmu, nin inhriat, Efesi khuaa vai khom ni loiin Asia ram pumpuia ti hrang dôrin hi mi hin, ‘kuta siam pathianhai hi pathian ni viat mahai,’ tiin mi tamtak an thêm inhnê zoi tâka. 27 Khasikin, ei sintho hi mi’n ngainêp an ti, ti vai ni loiin, Asia rama mi murdi le rammuala mi’n an ibiak ngai pathiannu Artemis roiinpui khom boi a ti, ti hi ichi a iom a ni,” a tia. 28 Kha chong kha mipuihaiin an inhriat le chu an ning an mur tâka, “Efesi khuaa Artemis hi a roiinpui ok,” tiin an khêka. 29 Khanchu, a kho pumpui an buai tâka; Gaia le Aristarka, Makedonia rama om, Paula hnungzuihai kha an chela, a pâlin enhoi siamna ina an intânpuihaia. 30 Paula’n mipui makunga va ngîr a tuma, khannisianlân, iamtuhaiin phal mahai. 31 Khan, Asia ram ulian senkhat Paula rualhai an oma, khahai khom khan Paula kha enhoi siamna ina van lang loi hrangin chong an inhriattira. 32 Khan, ar bûmhai an rêngin an buai tâka; mi tam takin an irbûmna bi khom inhre mahai. Khasikin, senkhat thu inkhat an khêkpuia, senkhat thu dang an khêkpuia.
33 Judahaiin chu Alexandara chu mân tiang an nampai sikin, mipui laia senkhat chu ama sika an tia. Alexandara chu dâihrek hrangin kutin an hong zâpa, mipui kuang chu a thiam thu insîr a tuma. 34 Khannisianlân, ama kha Juda a nih ti an hriat le chu, dârkâr hni ang dôr, “Efesi-a khuaa Artemis hi roiinpui tak a ni,” ti inzenin an khêk mur mura.
35 Khopui lekha irziaktu khan mipuihai an dâihrektir zoiin chu, “Efesi mihaio, Artemis roiinpui tak biak in le a’rlim irthiang irvân ata zuang tâk kha, enkoltu chu Efesi kho mihai hi nin nih ti tu mo om? 36 Hi thil hi sêl zoi loi a ni hnungin, nin idâihrek hrang a ni, ngaituah irzom loiin ite nin itho hrang ni mah. 37 Hi nin hong hruaihai hi tempil inmok ngai ni mahaia, ei pathian insîrinsiattu lak ni mahai. 38 Demetria le a sinthohai khomin tu chunga khom thu’ntak an neiin chu roirêltuhai ei neia, roirêlna in khom a’rhong mai, so son van tung ri se. 39 Khan, thu’ntak dang pial nin neiin chu inkhôm ngai dêna ngaitua ni a ti. 40 A vuana inkhôm sika hin buaina insuahai tiin ni sia an ti, ti hi ichiom a ni. Hi buaina hi a bi boi a ni sikin, tûte lakin a bi insîr thei no nia,” a tia.
41 Kha kha a ti zoiin chu mipuihai kha an chîntir tâka.
1 Buaina kha a boi hnungin Paula’n irchutirhai a koi buka, an thorhaia, chonghoiin an irsena, Makedonia rama fe hrangin a suak tâka. 2 Kha ram kha ar fang suaka, irchutirhai kha a sate’n an thorhai zoiin Grik ram a tung tâka. 3 Khatak khan tha thum a om hnungin Suria ram tiang fe hrangin, ar siama; khannisian, Judahaiin that an tum sikin Makedonia ram tiang kîr nôk a tum chian tâka. 4 Pura nâipa Sopatera, Beroia kho mihai, Thesalonika kho mi Aristarka le Sekunda hai, Derbe kho mi Gaia hai, Timothe hai, Asia rama Tukika hai leh Trofima haiin an zuia. 5 Khahai kha maton an lei insaa, Troas khuaa anni lei nghâka. 6 Keini khom bai chol koploi kût zoia Filipi khua ata irkuangin kin suaka, sûn ringa hnunga Troas kin tunga, kha khan sûn sari kin châma.
Paula Troas khua a hrôna hnungkhôn
7 Khan, Pathianni khohloi bai khoi hranga kin irbûmin, Paula’n a tûka fe a tum sikin zânlai dênin thu an sîr ngita. 8 In irchuan chunginta chontana kin inkhômnaa khan meiser tamtak a oma. 9 Khan, ar hming Eutuka, ruatharte inkhat tukvera a toia, a lei inmusua, Paula thu’nsîr kha a sôt ta hrai sika khan in irchuan inthumna ata a zuang tâka, an zu hrûtin chu a thi chian ta. 10 Khannisianlân, Paula a chuma, a zun boa, a zu poma, “Nin charindong no roi, a hrang la chat mah,” a tia. 11 Khanchu, Paula kha a kâi nôka, bai a khoia, an fâktir tâka, khovâr dênin a chongpui zoiin chu a fe tâka. 12 Ruatharte pa kha a hong dama in tiang an hruai tâka, an irtha a’rngam tak tak ta.
Troas ata Mileto-a an zinna
13 Khan, keini chu irkuangin Asso khua panin matona kin lei fe masaa, Paula chu kea hong a tum sikin Asso khuaa irkuanga lei inchuangtir kin tuma, kha kha ama lei inkung lam dân a ni. 14 Asso-a a ni hong phâka, kin inchuangtira; Mitulene khua kin tung tâka. 15 Khataka irthokin irkuang ngêtin kin fe nôka, a tûka Kia kin tung ta. A tûk nôka chu Samo chômbung kin lûta, a tûk nôka chu Mileto kin tung tâka. 16 Khan, Paula’n Asia rama om insôt a nuam no sikin Efesi chu sûn pal a itum pial a ni. Thei a ni photin chu Jerusalema Pentikos nî hmang a tuma, a irhnot a ni.
Efesi upahai laia Paula thu’nsîr
17 Mileto-a irthokin Paula’n Efesi khuaa mi a tîra, koiindang upahai an koitira. 18 A kuang an tungin chu an kuang, Asia ram ki lût ni masa taka nin kuanga ki om kâr ka ki om lam kha nin inhriat. 19 Judahaiin an nin ruang sika mit irthi tâk pum le zoro ngar ki chunga hong tunghai tuangin, irngaiintôm takin Rengpa sin ki tho ngai. 20 Nin ta hranga inlâp hrang ite thup loiin vântâng laia in sûnghaia nangni ki hril ngaia, nangni ki’rchutir ngai kha te. 21 Judahai le Grikhai kuang khom Pathian tiang an sualna irlet hrang le ei Rengpa Jisua iam hrangin ngûk takin thu ki hril ngai. 22 Khan, atûn Irtha Irthiang thu zômin Jerusalema ki ife hrang a ni, kha khan ki chunga imo a itung hrang inhre ma ung. 23 Khannisianlân, kho tina, “Intâng ina buaina’n a ni nghâk ti vai hi Irtha Irthiangin a nin hriattir, ki inhriat a ni. 24 Pathian lungkhamna Thurchi Sa insîr hrang sintum Rengpa Jisua Krista’n a ni ipêk zoina hrangin chu ki hringna khom hi ite’n bê ma ung.
25 “Khasikin, inhre roi, nin rêngin, Pathian Ram thurchi insîra ki’rvâkna ngaihaia hin atûna irthokin chu ni hmu ta no chin nih ti kin hriat. 26 Khabana, ar hmang nin om le khom kei chu ki ihul a nih ti a vuan hin nangni kin hriattir. 27 Pathian thil tum murdi a rêngin nin laia insîr indîn ma ung. 28 Khasikin, Pathian Koiindang, a Nâipa thina sika ama ta hranga a isiam chunga belrapu chang unglân, nangni le belra pâl Irtha Irthiangin nangni a ikoihai satna hrang zong roi. 29 Ki hnunga chu inê ichiomhai nin laia hong lût an ta, belra pâlhai kha hôi no nihai tih kin hriat. 30 Nin laia senkhat mi khomin iamtuhai anni tiang an hruai theina hrangin milak an hril zoro la tung a ti. 31 Khasikin, sûn zân mitrithi tâk puma kum thum dênin mi tin nangni ki irchutir kha inhre maiin irngai zit roi.
32 “Atûn hin Pathian enkolna le a lungkhamna thua nangni ki’rnghat; ama khan nangni a siam inlian theia, Pathianin a mihai ta hranga a inkung satvurna kha nangni a pêk thei. 33 Tu tu sum mani, rângachak mani, silkai mani khom irzuk ngai ma ung. 34 Ki kut hin keima le ki chanpuihai intakna murdi a tho suak ngai ti nangni rengin nin inhriat. 35 Lam tinrênga sintho irnaksongin le Rengpa Jisua’n, ‘Lâk nêkin pêk an lâp ual’ a iti kha inhre mai roi,” a tia.
36 Kha thu kha an sîr zoiin chu an rêngin khûksadel pumin, an chongchaia. 37 An rêngin an chap tâka, Paula kha an inkuaa, an tum tâka. 38 A hmêl an hmu nôk ta no hrang thu Paula’n a insîr pehai kha an milung irngaisiatna bi tak chu a ni. Kha irzoiin chu irkuang dênin an zu thak tâka.
1 Anni kha chong kin bê zoiin chu irkuangin kin suak tâka. Intûn thalin kin fea, Kos kin tunga, a tûka Rodi kin tung nôka, khataka irthokin Patara khuaa kin fe. 2 Kha khan irkuang inkhat Foiniki pan hrang kin hmua, kin chuanga kin fe nôk ta. 3 Kupra an langna hmun kin phâka, Kupra kha vei tiang mâkin Suria tiang kin pan. Tura chu neinun an insum sikin muanga kin chum. 4 Kha khan iamtuhai senkhat kin hmua, an kuang sûn sari kin châm. Anni khan Irtha Irthiang inhrilin Paula kha Jerusalema fe loi hrangin an khapa.
5 Kha zoia chu kin suaka, kin fe’n chu irchutirhai khan an rêngin, an dôngma, an nâihai le kotsua dênin an nin thaa, tuipui kôla khan khûksadelin kin chongchaia. 6 Chubai kin irmûka, irkuanga kin chuanga, in sûng tiang an kîr nôk tâka. 7 Tura ata kha irkuangin Tolemai khua kin tunga, urênghai chubai kin mûka, an kuang sûn khat kin châma.
8 A tûka kin suak nôka, Kaisari khua kin tunga, Thurchi Sa hriltu Filipa ina kin lûta; ama kha upa sarihai laia om kha a ni. A ina kin tung tâka. 9 Nâi dôngmate irthiang minli a neia, Pathian thu an hril ngai. 10 Nikhua sôt ian kin châma, kin châm sûngin Judai ram ata deipu inkhat Agaba a zuang chuma. 11 Kin kuang a zuanga, Paula kongkhit kha a lâka, a ke le a kut ar khita, “Jerusalem Judahaiin hiang hi kongkhit neitu hi khit an ti, Jentailhai kuta pe an ti, Irtha Irthiangin a ti,” a tia.
12 Kha thu kha kin inhriatin keini le kha khuaa mihai khan Paula kha Jerusalema fe loi hrangin kin ngên khaka. 13 Paula khan, “Imo nin itina, nin chap nin chapa, bei nin ni indongtira nin dôptir nin itum mo? Rengpa Jisua irhming sika khan Jerusalema khan khit vai mo ki’rhuama, thi khom ki irhuam kêng,” a tia. 14 Inthêm thei a ni no tena chu, ‘Rengpa ircham cham ni ri se,’ kin tia, kin chîn tâka.
15 Kha hnung chu kin irsiama, Jerusalema kin hong fe ta. 16 Kaisaria khuaa irchutir senkhathaiin an ni zuia, kin tungna hrang Nasona ina an ni hruaia; ama kha Kupra chômbunga irchutir masahai laia om a ni.
Paula’n Jakoba a hro
17 Jerusalem kin tungin chu urênghai raifân takin an ni lei lôm a ni. 18 A tûka chu Paula pâlin Jakoba kuang kin chaia, koiindang upa murdi khom an lei oma. 19 Paula’n khahai kha chubai a mûk zoiin a sin thôna hmanga Pathianin Jentailhai laia thil a itho kai chu chipchiar takin a hrila.
20 Urênghai khan kha thu kha an inhriatin Pathian an inpâka, Paula kuang khan, “Urêngpa, Judahai laia iamtu an tam tâkzia ni hmua, ei dân irngaiinnat zit an nia. 21 Nangin Jentailhai laia Juda om murdi kha Mosia dân masana, an nâihai sertan loi hrang le Judahai dân zômloi hrangin nir chutir ngai ti mi insîr an inhriat. 22 Itin mo a ini hrang tâk? Ni zuang tung ti an inhriat ngêt hrang a nia. 23 Khanchu, ni kuang kin thu insîr ang hin tho ro ba chonginkung nei lai pasal minli ei laia an om. 24 Kha mihai kha hruaiin lân, irthâr sa’n lân, an sam ep man tum pehai roh. Khanchu, mi murdi’n ni thurchi an inhriat hi milak a ni, nangma ngei khom dân ang takin ni la iom mai kêng a nih ti inhria an ti. 25 Jentailhai laia iamtuhai chungchâng thu chu, millim biakna thil fa loi hrang hai mani, sa thisen fa loi hrang hai mani, sa ise that hme fa loi hrang hai mani le irdit mâksan hranga ei thu rêlhai ei thon tâk kha te,” an tia.
26 Khanchu, a tûka Paula’n khan mihai kha a hruaia, anni leh khan ar thâr sa tâka. Khan, tempila a lûta, an irthâr zoi hrang ni le an irhmang irkipa irbôlna an hlan pehai zoro hrang ni ochai an hriattira.
Tempila Paula an chel
27 Sûn sari a hong phâk vângin Asia rama Judahaiin Paula chu tempila an hmua. Mipui an inphûthaia, Paula kha an chel tâka. 28 “Israel mihaio, ni changpui roi. Hi mi hi ei irchibulhai, ei dân hai le irkal lama ram tina mi murdi irchu ngaitu kha a ni, atûn khom khan tempila hin Grik mihai a lûtpuihaia, hi hmun irthiang hi a iporinchetir a ni,” an tia. 29 Efesi kho mi Trofima kha khopui ama leh an hmu masa tâk sikin, Paula’n ama kha tempila a hruai lût mani an iti a ni. 30 An kho pumin an buai zoi ta, mipui an hong intân sup supa. Paula kha an chela, tempil ata an hnûk suaka, mikothai an khâr zôia. 31 Ama kha that an tum laiin Jerusalem kho pumpui a buai ti sipai hruaitu inlal takin a len hriata. 32 Kha pa kha sipaihai le sipai irza hruaituhai hruaiin an laia an tâna. Mipui khan sipai hruaitu inlaltak le sipaihai kha an hmu le chu Paula an izêm kha an mong tâka.
33 Sipai hruaitu inlaltak khan a hong nâia, Paula kha a chela, thîrhrui inhni’n an khittira, tu mo a ini, imo a itho ar dona. 34 Mipui laia senkhat thu irrualin an khêka, senkhat thu dangin an khêka, buaina sikin a kho mo dik inhre thei maka; Kulpui sûnga an hruaitirhai tâka. 35 Anni khan kalbi dênin an hruaia, mipuihai an pût hrai sikin sipaihaiin Paula kha an irdona. 36 Mipuihai khan, “That roi” tia khêkin an zui sup supa.
Paula’n a thiamna thu an sîr
37 Khan, Paula’n Kulpuia an hruai lût hrang lai khan Paula’n sipai hruaitu inlaltak kuang, “Ni kuang thu bâi khat insîr thei ning mo?” a tia. Ama khan, “Grik chong ni ithei ma ni?
38 Khanchu, Aigupta mi inkhat kha mâna buaina insuaka mi that uar, sâng minlihai ramchâra hruai suaktu kha ni ini loi mo?” a tia. 39 Paula’n, “Juda, Kilikia rama Tarsa khuaa suak ki ni, kho poimo mi kêng ki ini. Ngaihoi takin mipui laia nin chongtir roh,” a tia. 40 Phal a hong ni le Paula kha kalbia khan a ngîra, mipui kha dâihrek hrangin kutin a zâphaia, an dâihrek tâka, Hebrai chongin thu an sîr tâka.
1 “Urênghai le pahaio, ki thiamna thu nin kuang ki insîr hi irngai roi,” a tia. 2 Hebrai chongin thu an sîr tih an inhriattin chu an dâi nôk uala.
3 Khan, Paula’n, “Juda mi, Kilikia rama Tarsa khuaa suak ki ni; khannisianlân, hi khuaa Gamaliela irchutirna hnuaia seilian ki ni. Ei irchibulhai dân kha ngar taka irchu ki nia, a vuan sûna nangni ang taka hin Pathian tianga irpe mi ki ni. 4 Hi Lampuia mihai hi thathai hrang dôrin deng kin theitir ngaia, nupang pasal ki chela, intângna ina kin khumtir ngai. 5 Ochai inlaltak le upa toihai khomin an nin hriatpui. An kuang ata Damaska urênghai pêk hrang lekha ki lâka, khataka omhai kha hrem hrangin khit puma Jerusalema hruai hrangin ki fe tâka.
Paula’n a suakinthar thu an sîr
6 “Khan, ki fea, Damaska ki tung hrangin sûn lai taka, irningloiin irvâna irthokin vâr a saterengin a ni zuang êl phuta. 7 Khanchu, hnuaia kin rîl raka, ‘Saula, Saula! ithoa mo deng ni ni intheitir?’ iti chong kin hriata. 8 Keiin, ‘Rengpa, tu mo ni ini?’ ki tia. Ama khan ‘Jisua, deng ni intheitirtu,’ a tia. 9 Khan vâr kha chu an hmua, ki ichongpuitu chong kha chu inhre mahai. 10 Khan keima’n, ‘Rengpa, imo ki isin hrang?’ ki tia. Rengpa’n ki kuang, ‘Thoiin lân, Damaska-a lût roh, kha khan Pathianin thil tinrêng ni isin hranga a lei inkung murdi ihrilin om ni ti,’ a tia. 11 Khan, a vâr hrai sika khan ki mit khom a zîng khaka, ki chanpuihai khan kêng Damaska-a khom an ni ihruai lût.
12 “Mi inkhat, Anania, dân ang taka Pathian bê mi, kha khuaa Juda murdihaiin an inpâk kha, 13 ki kuang a honga, ki kôla a ngîra, ki kuang, ‘Urêng Saula, ni mit hong vâr ri se,’ a ni tia. Khanchu ki hong hmu nôk thei tâka, ama ki hong ena. 14 Ama khan, ‘Ei irchibulhai Pathianin a nuamlam inhriata Mi feltak kha hmua, a hnuk irhâi ngêt inhre hrangin nang an thang ta. 15 Ni thil hmu le inhriat thua khan mi murdi kuang thu’nhretu ni ini hrang a ni. 16 Ir-ial loiin thoiin lân, ar hming sâmin baptisma changin lân, ni sualhai irsunfâi ta roh,’ a ni tia.
Paula Jentailhai kuang tîr a ni.
17 “Khan Jerusalema ki kîr nôka tempila ki chongchai laiin inlârna’n, 18 Rengpa ki hmua, ki kuang, ‘Irhnotin lân, Jerusalem mapai chian ro; ki thu ni insîr hrang hi an pom no hrang sikin,’ a ni tia.
19 “Keiin, ‘Rengpa, Sinagok tena lûtin nang a iamtuhai ki zêma, intângna ina kin khumtir ngai kha, anni ngeiin an inhriat. 20 Ni thu’nhretu Stefana thisen an insua lai khan, keima khom an laia ki ngîr saa, a sa ki itipuihai kêng, a thattuhai puan diar ki lei enkol,’ ki tia. 21 Ama khan ‘Fe roh, hla taka Jentailhai kuang nang ki itîr hrang a ni,’ a ni ti tâka,” a tia.
Paula sipai hruaitu inlaltak makunga
22 Kha ten kha an sîra, an irngai tena chu hnuk irhâi inring takin an khêka, “Inboipai roi! thatpai roi! hring inruk ni ma!” an tia. 23 An khêka, an puanhai an hlîka, vâiphin irvân tiang an vôra. 24 Sipai hruaitu inlaltak khan Paula chu kulpuia a hruai inlûttira, a chunga khaang dôra an ikhêksan kha a hmu suak theina hrangin hrui hruala zêmin indôp hrangin thu a pêka. 25 Zêm hranga savun hrui leh an khit zoiin, Paula’n a kôla ngîr sipai irza hruaitu kuang, “Rom mi, thiam no inchangtir khom la ni loia zêm mo a’rthiang,” a tia. 26 Sipai irza hruaitu khan inlaltak kuang a fea, “Itin mo ni itho hrang? Hi pa hi Rom mi a lei ini chian kêng,” a tia. 27 Sipai hruaitu inlaltak kha a honga, a kuang, “Rom mi mo ni ini? Ni hril ro” a tia. Paula’n “O, ki ni,” tiin a sâma. 28 Ama khan, “Keiin chu Rom mi nina nei hrangin sum tamtak ki ithâm kêng,” a tia, Paula’n chu, “Kei chu Rom mia suak pial ki ni,” a tia. 29 Khanchu soisak puma indôp hranghai khan Paula kha an chînsan zoi tâka, sipai hruaitu inlaltak khom khan Rom mi a lei ikhit chian tih a hong inhriatin a sân a chitinrîm tâka.
Paula Sanhedrin-ah a ngîr
30 A tûka chu Judahaiin Paula chunga thu imo an nei inhriat infel tumin sipai hruaitu inlaltak khan Paula kha a sûta, khanchu Paula kha a hruaia. Ochai inlalhai le Sanhedrin mihai irbuk hrangin thu a pêkhaia. Paula kha an makunga an ngîrtira.
1 Paula’n roirêltuhai kha a hong enin felhaia, “Urênghaio, a vuan sûn ten hin Pathian makunga ki om lama ki sia le sa inhriatnaa mani, thei nona ite nei ma ung,” a tia. 2 Ochai inlaltak Anania khan Paula kôla ngîrhai kuang, “A bâi kha inbên pe roi,” a tia. 3 Paula khan, “Nang, bang innôt invârpa, Pathianin nang inbênna ti, Dân anga mi ngaitua hrangin ni toia, dân no anga mi inbên hrang ni iti mo?” a tia. 4 A kôla ngîrhai khan, “Ochai inlaltak ni ingo mo?” an tia. 5 Paula’n, “Ochai inlaltak a nih ti ki inhriat loi a ni, ‘Nin nam roirêltu chunga thu saloi insîr no roh,’ ti irziak a ni,” a tia.
6 Paula’n senkhat Sadukaihai, senkhat Farisaihai an nih ti an hriata, Sanhedrin-ah khan a khêka, “Urênghaio, kei khom Farisai ki ni, Farisai nâipa khom ki ni. Mithi thoi nôkna a om tûngna thua a roirêlna makunga ki ingîr a ni,” a tia. 7 Kha kha an sîr zoiin chu Farisaihai le Sadukaihai kha an irsêla, Sanhedrin kha an irsen tâka. 8 Sadukaihai khan, “Thoinôkna zel om mah, vântîrtôn hai, irtha hai khom om mah,” an tia. Farisaihai chu kha kha an iama. 9 Khanchu buaina lian tak a suak tâka, Farisai tianga Dân irchutirtuhai senkhat an ngîra, an san khaka, “Hi pa chunga hin ite thil dik loi hmu ma ung, Irtha’n mani vântîrtônin mani an ichongpui ni a ti,” an tia. 10 An irsêl ta hrai sikin, sipai hruaitu inlaltak khan Paula kha an inpot chit itinin tiin, zu fea, an lai ata Paula la suaka, Kulpuia hruai hrangin sipaihai thu a pêkhaia.
11 Kha zân khan Rengpa kha Paula kôla a ngîra, “Hâi takin om roh; Jerusalema ki thu ni ihril ang takin Rom khuaa khom ni ihril hrang a ni,” a tia.
Judahaiin Paula an inruang
12 A tûk zînga chu Judahai chu Paula inruangin an irbuka, an that mâka chu ite fâka in loi hrangin khomâk an irsâma. 13 Khaanga inruangtuhai kha sômminli nêka tam an ni. 14 Ochai inlalhai le upahai kuang an fea, “Paula kin that mâka chu ite fa loi hrangin khomâk kin irsâm zit a ni. 15 Khasikin, atûn nangni le roirêltuhaiin a thu fel nôk uala ngaitua tum angin Paula kha nin kuang hruai insum hrangin sipai hruaitu inlaltak kuang hong hril roi; a zuang chum zoi mâna that hrangin kin irsiam diam tâk a ni,” an tia.
16 Khannisianlân, Paula farnu nâipa’n that tuma an lei inruang hrang thu kha a lei inhriata, a hong fea, kulpui sûnga a lûta, Paula a hril tâka. 17 Paula khan sipai irza hruaitu laia inkhat a koia, “Hi ruatharte hin sipai hruaitu inlaltak kuang hruai roh; a kuang, thu imo khat insîr hrang a nei,” a tia. 18 Khanchu, sipai hruaitu inlaltak kuanga khan a va hruaia, “Mi intâng, Paula khan a ni koia, hi ruatharte hi ni kuanga hong hruai hrangin a ni ngêna, ni kuang imo khat insîr hrang a inei ni a ti,” a tia. 19 Sipai hruaitu inlaltak khan a kuta a chela, a hruaia, inrûkin, “Imo ni hril hrang ni inei?” a tia.
20 Ama khan, “Paula thu fel nôk uala ngaitua hrang angin nangtûk Sanhedrin makunga hruai insum hrangin Judahaiin nang ngên hrangin an inrual. 21 Khannisianlân, an thu le’rngai no roh. An laia mi sômminli nêka tamin an inruang chian, khahai khan an that mâka chu, ite fâk nêk zong loi hrangin khomâk an irsâm. Atûn hin ni thu nghâkin irsiamsaiin an iom chian a ni,” a tia.
22 Sipai hruaitu inlaltak khan ruatharte pa kha an fetir tâka, “Hi thu hi ni nin hril ti, tûte kuang insîr no roh,” tiin a khapa. Khanchu ruathartepa kha an suaktir tâka.
Ramoptu Felika kuang Paula an fetir
23 Sipai hruaitu inlaltakin, sipai irza hruaitu inhni a koihaia, “Kaisaria a vuan zân dâr kuaka fe hrangin sipai irzahni le sakor chunga chuang mi sômsari le ufei chôi mi irzahni irfûk roi. 24 Khan, Paula chuangna hrang sakorte irfûk sa unglân, sataka Ramoptu Felika kuang nin intungtir hrang a ni,” a tia.
25 Hiang hin lekha a’rziaka, 26 “Klaudia Lusia’n Ramoptu inzaom tak Felika chubai a mûk e. 27 Hi pa hi Judahaiin an chela, an that hrang laiin sipaihai hruaiin ki zu fea, Rom mi a nih ti kin hriatin ki sansuaka. 28 Khan, thatpai an inuam nasan inhriat ki nuama, an Sanhedrin makunga ki zu fepuia. 29 An Dân i ia mani hnôl a nih ti ki hmua. Khannisianlân, an hnôlna thua khan thina hrang dôr mani intângna hrang dôr mani ite a itho inhre thei ma ung. 30 Judahaiin that tumin an inruang ti mi’n an ni hril le ni kuang ki hong itîr zôi zel a ni, a hnôltuhai khom a chunga thupoi an inei murdi ni kuang hril hrangin kin hriattir,” tiin.
31 Khanchu sipaihaiin thupêk angin a zân zânin Paula kha an hruaia, Antipatri khua an tunga. 32 A tûka chu sakor chunga mihai kha Paula hruai mai hrangin an fea, sipai danghai khan an kîrsana, kulpui tiang an kîr nôk tâka. 33 Anni khan Kaisari kha an tunga, Ramoptu kuang lekha an pêka, Paula khom an makunga an inngîrtira. 34 Ramoptu khan lekha kha a tep zoiin kho tianga mi mo a ini tiin ar dona, Kilikia rama mi a ni an hriat tâka. 35 “Nangma hnôltuhai an zuang tung tika ni chungchâng ngaitua ki ti,” a tia. Khan, Heroda Praitoriana siaa, enkol hrangin thu a pêka.
1 Sûn ringa zoia chu ochai inlaltak Anania le upa senkhathai kha ukhîl inkhat, Tertula hruaiin an hong tunga, Paula an sêlna thu kha Ramoptu makunga an sêl tâka. 2 Paula an koi suak zoi chu Tertula khan an sêlna thu a hong insîr tâka; “Felika mahripom tak, nangma zâra kin laia irngeina le irtharngamna sôt tak a lei om tâka, ni vârna sikin hi rama mihai ta hrangin thil saloi tak tak, 3 lam tinrênga hmun tina siaminsat a hong ini tâk hi, a sa kin tia, kin lôm tak tak a ni. 4 Ni zoro nang kin châi nona hrangin bongte’n hong ti ki ti, lungkham taka ni irngaitua pe hrangin nang ki ngên. 5 Hi pa hi mizêl tak, ram tina Juda murdi laia buaina insuaktu, Nazaret pâl hruaitu tak a nih ti kin inhriat. 6 Tempil khom porinchetir a tuma, kin ichel ta a ni. 7 Khannisian, sipai hruaitu inlaltak Lusia a honga, a ni’rchupuia a hnôltuhai chu ni makunga fe hrangin a ni ipêk a ni. 8 Nangma ngeiin irdonin lân, kin ihnôlna murdi hi inhre thei ni ti,” a tia. 9 Judahai khomin a hnôlna kha an lei thopa, khaang kha a ni an lei tia.
Felika makunga Paula’n a thiamna thu an sîr
10 Ramoptu khan thu insîr hranga a hong en le Paula khan, “Kum tamtak, hi chihai roirêltu ni lei ni tâk tih kin hriat sikin raifân taka ni makunga ki thiamna thu ki insîr hrang a ni,” a tia. 11 Jerusalema Pathian bê hranga ki hong ife kha sûn sômhleihni ban la ni no ni ti, nangma rengin inhre suak thei ni ti. 12 Tempila mani, Sinagoka mani, khopui kho hmuna khom mi ki sêla, buaina siam hranga mi ki inthor tûte’n inhre mahai. 13 Atûna an ni sêlna khom hi a bul a bâl ni kuang insîr hrang nei ual no nihai. 14 Thil inkhat nang hril ki ti, ‘Pâl dang’ an iti lam dân zuiin ei irchibulhai Pathian ki biak ngaia, Dân le deipuhai lekhabua irziak murdi ki iam sa. 15 Pathian ki iama, mi fel le felloihai thoi nôkna a om tih ki iam sa; kha kha anni ngeiin an iam sa. 16 Khasikin, itiklai khoma Pathian le mihriam makunga insîrinsiat hlo ma ung, sia le sa inhriatna irthiang nei ki tum ngit ngai a ni.
17 “Kum tamtak hnunga hin ki chipuihai kuanga thupêk chôiin, irbôlna inhlan hrangin Jerusalem-a ki hong fea. 18 Khaanga ki tho lai khan tempila an ni hmua, khannisian mipui pungkhômna om maka, buaina om ual mah. 19 Khannisian, Asia rama om Juda senkhat an oma, khahai khan ki chunga thupoi an neiin chu hi hin hongin, ni makunga an ni hnôla an intung hrang a ni. 20 A ninole, hitaka honghai hin Sanhedrin makunga ki ngîr lai khan imo ki itho’nsual an iti hrang a ni. 21 Hi thu bâi khat sika hin a ni no tâkin chu, an laia ngîrin, ‘Mithi thoi nôkna thua a vuan sûn hin nin makunga inpông khumin ki iom a ni hi te,” tiin a sâma.
22 Felika khan Lam thu kha an hriat infel ok sikin, An kuang, “Sipai hruaitu inlaltak Lusia a zuang tung tika nin thu la rêl rong,” tiin a lei sia chiana.
23 Paula kha zalên viata inomtirin, a rualhaiin a sin an itho pe khom khap loia enkol hrangin sipai irza hruaitu kha thu a pêka.
Felika le a dôngma Drusili makunga Paula a ngîr
24 Khan, sûn idôr ten mani hnunga Felika chu a hong nôka, a dôngma Drusili, Juda mi, hruaiin a honga, Paula kha an koitirhaia, Krista Jisua iamna thu a insîr kha a’rngaia. 25 Thiam inchangna thu hai, insumtheina thu hai, roirêlna la om hrang thu hai Paula’n an sîr lai khan Felika’n a sân ichi a om a tia, “Fe nôk tan lân, zoro’nchum ki nei nôk tika nang la hong inkoitir nôk rong,” a tia. 26 Sum a ipêk kha a sabei saa, khasikin Paula kha koia, a ichongpui mai ngai a ni.
27 Kum hni ar vêl hnungin chu Felika chu Porkia Festa’n a thûla. Felika khan Judahai inlômtir a nuama, Paula kha lung ina a mâksan tâka.
1 Festa’n, ram kha a op hnung sûn thum zoia, Kaisaria irthokin Jerusalema a hong fea. 2 Ochai inlalhai le Juda hruaituhaihai khan Festa kuang Paula chungchâng thu buai kha an lei hrila. 3 “Lungkham takin Jerusalema hong inhruaitir roh,” tiin an lei ngêna, lam laia lei irdîpa that an itum a ni. 4 Khannisian, Festa’n, “Paula kha Kaisari intângna ina a oma, kei khom fe lat hrang ki ni, 5 Sualna a neiin chu nin hruaituhaiin ni zui sianlân, sêl roi,” a tia.
6 An laia khan sûn riat mani sûn sôm vêl mani a châma, Kaisaria a kîr nôk tâka. A tûka chu roirêlna toihmuna a toia, Paula kha an hruaitirhaia. 7 A zuang tungin chu Jerusalem ata Juda zuang chumhai kha a kôla an ngîra, thu ngar tak takin an hnôla; khannisian, an hnôlnahai kha a bul diktak suisuak thei mahai. 8 Paula’n a thiamna thu an sîra, “Judahai dân porinchetir ma ung, tempil khom porinchetir ma ung, Kaisara khom hril insiat ma ung,” a tia.
9 Festa’n Judahai laia irhming sa a nuama, Paula kuang, “Jerusalema hong fea, hi nang an ngôna thuhai hi khitaka ki makunga rêl ni nuam mo?” a tia.
10 Paula’n chu, “Roirêlna toihmun Kaisara makunga, roirêl pea ki omna hrang ngeia ngîr ki ti. Judahai chunga ite tho’nsual ma ung, nang khomin ni inhriat angin. 11 Thil ki tho’nsuala, thina hrang dôr thil ki tho’n chu, thi hi sêl ma ung. Khannisianlân, hihai ni hnôlna hi a bul ite a om no’n chu, anni raifânna hrangin tûte’n an ni ipêk hrang ni mah. Ki chungchâng hi Kaisara kuanga intung ki ngên,” a tia.
12 Festa’n a roirêltuhai a chongpui zoiin chu, “Kaisara kuanga intung ni inuamna angin, Kaisara kuang fe ni ti,” a tia.
Reng Agripa le Berniki makunga Paula an hruai
13 Sûn idôr ten mani a hek hnungin chu, rêng Agripa le Berniki chu Kaisari khuaa Festa lôm hrangin an honga. 14 Sûn tamtak an châma, Festa’n Paula chungchâng thu chu rêng a hrila, “Felika khan mi intâng inkhat a mâksana, 15 Jerusalema ki hong fe’n Juda ochai inlalhai le an upahaiin a thu kha an ni hrila, thiam no inchangtir hrangin an ni ngêna. 16 keima’n chu an kuang, “Mi tûte, ama hnôltuhai le hmâi irsonga an irti mâka chu thiam no inchangtir zôi zel chu Rom sorkâr dân ni mah,” ki tia. 17 Hi hin an zuanga, ir-ial loiin a tûka roirêlna toihmuna ki toia, kha pa kha kin koitirhaia. 18 A hnôltuhai kha a kôla an ngîra, ki itûng lam angin ite thupoi insîr mahai. 19 Anni sakho thu le mi inkhat thi tâk Paula’n a hring nôk thu an sîr, Jisua chunga an lei ibuai chian a ni. 20 Keima’n kha thu kha ki’rngaitua thei ual khomin inhre ma unga, Jerusalema hong fea, an thu kha hong rêl a nuam le nuam no ki’rdona. 21 Khannisianlân, Paula’n kha kha sataka enkola an thu kha inlaltak kuanga intung a ngên uala. Khasikin Kaisara kuang ki tîr thei mâka chu enkol insa hrangin thu ki ipêk a ni,” a tia.
22 Agripa khan Festa kuang, “Kei khom kha pa thu’nsîr kha irngai ki inuam kêng,” a tia.
Festa’n, “Nangtûk la’rngai roh,” a tia.
23 A tûka chu Agripa le Berniki kha roiinpui takin an fea, thu’nsîrna in sûnga an lûta, sipai hruaitu lianhai le khuaa mi poimo ual ualhai khom an kop saa. Festa thupêkin Paula kha an hong hruai inlûta.
24 Festa’n, “Reng Agripa le hitaka kin laia om murdihaio, Juda mipui murdihaiin ‘Hring inruk ni mah,’ tiin an khêka, Jerusalema le a chungchâng thu ki kuang an insîr kha hi nin ihmu pa hi a ni. 25 Khannisianlân, keima’n chu thina hrang ang dôr ite a itho hmu ma ung, ama’n Inlaltak kuang intung a nuam sikin tîr ki itum ta a ni. 26 Aniachu ite irziak hrang inhre ma ung. Khasikin nin makunga ki hong ihruai suak a ni; rêng Agripa, ni kuanga hong hruai bîk ki ni, irâi a ni zoiin i imo irziak hrang kin hriat theina hrangin. 27 Ama an ihnôl fel taka irziak loia mi intâng Inlaltak kuanga tîr chu a dikin inhre ma ung,” a tia.
1 Agripa’n Paula kuang, “Ni thiamna thu nin sîr thei,” a tia. Kha zoi le Paula’n a kut a phara, a thiamna thu an sîr tâka.
2 “Reng Agrip, a vuan hin ni makunga Judahai ni hnôlna murdia ki thiamna thu kin sîr hrang sikin, a sân vânnei ki’rti ok. 3 Judahai om lam le an irsêlna ngai lamhai a sân nin hriat sikin vânnei ki’rti nôk ual a ni. Khasikin, sataka nir ngai pe hrangin nang ki ngên a ni. 4 Ki thoibop ata ki chipuihai laia le Jerusalema ki om lam chu a phut ata Judahai murdi’n an inhriat. 5 An insîr nuamin chu ei sakho pôl ingar tak Farisai laia om, tian ata ki inihai khom an inhriat. 6 Ei irchibulhai kuang Pathian thu’nkung kha a tung ki sabeina thua atûn hin roirêlna makunga ki ingîr a ni. 7 Kha thu’nkung kha hmu hrang sabeiin ei nam sômhleihnihaiin a sûn a zânin sathnem irngai takin sin an itho ngai a ni. O rêng Agrip, khaang sabeina sika khan Judahai hin an ni ihnôl a ni.
8 “Nangni’n itho sika mo Pathianin mithihai a ikaithoi nin iiam loi? 9 Keima ngei khomin Nazaret Jisua irhming doi lamin thil tamtak tho inlân ki lei ti ngaia. 10 Khaang khan Jerusalema ki ti ngaia, ochai inlalhai kuang ata ircham lâkin mi irthianghai laia mi tamtak intângna inhaia ki bukhaia, thathai an tum khomin a sa ki tipuihai ngai. 11 Sinagok tina Jisua hril insiatir tumin ki hremhai chian chiana, an chunga ki ning an mur hrai sikin, ram dang dênin deng kin theitirhai ngai.
Paula’n a suakinthar thu an sîr
12 Khaang tho hranga khan ochai inlalhai kuang ata thu dong le an thupêk chôiin Damaska ki pana. 13 Khanchu, rêng Agrip, lampuia kin fe laiin sûn laia irvân ata vâr, misa nêka vâr, ki hmua, kha khan keima le ki ifepuihai kha a ni zuang êla. 14 Irnênga ki’rtet raka, Hebrai chonga irhâiin, ‘Saula, Saula, ithoa mo deng ni ni intheitir? Sunna khianghrol irpal hi nangma vai kêng nang a inphop’ tiin chong kin hriata.
15 “Keima’n, ‘Rengpa, tu mo ni ini?’ ki tia. Rengpa’n, ‘Jisua, deng ni intheitirtu hi ki ni,’ a tia. 16 Thoiin lân, ni ke’n ngîr roh, ki sinthopua nang inkung hrangin ni kuanga ki zuang inlâr a ni. Ni ni ihmu thu le thil nang ki la inentir hrang hi mihai ni ihril hrang a ni. 17 Judahai le Jentailhai kuang nang tîr ki ta, anni ata nang ki isansuak hrang a ni. 18 Keima ni iam sika an sualhai ngaidam an nina hrangin mi irthianghai laia irchon dongtum an nei sa theina hrangin. An mit invâr hrangin, inthim ata vâr hong inkîrtir hrangin Setana thuhnuai ata Pathian tiang hong inkîrtirtu hrang ni ni,” a ni tia.
Paula’n a thurchi Judahai le Jentailhai a hril
19 “Khasikin, rêng Agrip, irvân ata inlârna ki ihmu kha chu sêl ma ung. 20 Khanchu, Damaska mihai kuanga insîr irphutin Jerusalema mihai kuang, Judai rama mi murdihai le Jentailhai kuang khom an sualna ata irleta Pathian tiang an irheia, an irlet tak tak a nih ti an langna hranga, sin an thôna hrangin thu ki ihril ngai a ni. 21 Khasika khan tempila ki om laiin Judahaiin an ni chela, ni that an itum a ni. 22 Khanisianlân, Pathianin a ni changpui sikin a vuan ten mi lian le mi chîn tetehai kuang thuhril hrangin ki la ingîr thei a ni. Deipuhai le Mosia’n thil hong tung hrang an insîr ban ite insîr ma ung. 23 Krista khan dûk tuang a ta, mithi lai ata thoi nôkna mahruaitu nih a ta, Judahai le Jentailhai kuang vâr irhmutir masa tak ni a ti, an ti thu kha,” a tia.
Paula’n reng Agripa iam hrangin a ngên
24 Khaanga a thiam thu an sîr laiin Festa kha inring takin a khêka, “Paula, ni invêt tâk kêng, ni tep intam ta hraia nang a invêttir a ni ta,” a tia.
25 Khannisianlân, Paula khan “Festa mahripom tak, invêt ma unga; thu dik tak le thu vâr tak ki insîr ual a ni. 26 Hi thil hi rêng khomin an hriat, a kuang khom hâi takin ki insîr a ni. Hi thil hi inrûka tho khom ni mah, a kuang ite ip om mah ti kin hriat infel sikin. 27 Reng Agrip, deipuhai thu ni iam mo? Ni iam tih kin hriat” a tia.
28 Agripa khan Paula kuang, “Sôtnote sûnga Kristiana ni siam ni itum mo?” a tia.
29 Paula’n, “Sôt sian, sôt no sian, nang vai ni loiin a vuana ki thu irngaituhai murdi khom hi keima anga om hrangin Pathian kuang ki ngên a ni, thîrkol hi chu bun sa loiin,” a tia.
30 Khanchu, rêng hai, Ramoptu hai Berniki hai le an itoipuihai murdi kha an thoi zita. 31 An bingin an fea, an chonga, “Hi pa hi thina hrang dôr mani, lung ina intângna hrang ang dôr mani ite tho ual ma hi te,” an tia. 32 Agripa khan Festa kuang, “Hi pa hin Kaisara kuanga tung ngên no sianlân chu suak zôi thei a ni,” a tia.
1 Khan, irkuangin Itali rama fe hrangin an ni ti zoi le, Paula le mi intâng dang senkhathai chu Augasta sipai pâl an iti pa sipai irza hruaitu Julia kuta an inhlan ta. 2 Adramuteno khuaa irkuang, tuikhanglian kôla Asia ram khuahai hro hrang khan kin chuanga, kin fe tâka. Makedonia rama Thesalonika kho mi Aristarka khom a om sa. 3 A tûka chu Sidon kin tunga, kha khan Julia khan Paula chunga a sa oka, irkaiinhar theina hrangin a rualhai kuang an lêngtira. 4 Khatak ata irkuangin kin fe nôka, phâivua’n a no tiang a ni nam sikin Kupra chômbung khorthi phâivua ir-upna tiang kin fea. 5 Kilikia ram le Pamfulia ram dep tuipui kin khêl zoiin Lukia rama Mura khua kin tunga. 6 Kha khan sipai irza hruaitu khan Alexandria khuaa irkuang, Itali rama fe hrang a hmua, kha irkuanga khan an nin chuangtira. 7 Nikho sôtzan kin fe zâm zâma, intak takin Knidos khua irdîn kin tung hrâma, a no tiang a ni nam sikin Kret chômbung irbîkna tiang kin fe irkuala. Kret chômbung hmor irzum Salmoni an iti kha kin hroa. 8 Intak takin ivapang zuiin hmun inkhat irkuang Irngamna ‘Hoi’ an iti kha kin tunga, kha kha Lasai kho pêna om a ni.
9 Nikho sôt ian kin châm hnungin Bu nghei zoro a khêl tâka, irkuanga fe mai a sân ichi a om tâk sikin anni kha Paula’n thu ar donhaia, 10 an kuang, “Puhaio, atûn hin ei fe mai hrangin chu siatna a sate’n ei itong hrang ti kin hriat; irkuang le a timmatua pêl vai ni loiin eini irkuanga chuanghai khom hong tung a tih ti kin hriat,” a tia. 11 Khannisianlân, sipai irza hruaitu chu Paula ircham nêkin irkuang chalaitu le irkuang neitu ircham kha a zôm uala. 12 Phalbia omna hrangin chu irkuang irngamna kha an chum rak no sikin, mi tam ual fe suaka, Foiniki khua a tung hrâma, khataka khan phalbi tuang kha an nuama. Foiniki khua hi Kret chômbunga irkuang irngamna inkhat a ni, sim nitâk tiang le hmâr nitâk tianga irheia om a ni.
Tuipuia phâivua
13 Sim khorthi a hong tho viat viata, an inuam ang tak an ihmu mani an irtia, thîrkuaikim kha an kaisuaka, Kret chômbung ivapang kha thei dôra nâiin kin zuia. 14 Khannisianlân, sôtnotea, muang ata a sân phâivua a zuang tho thuta kha phâivua kha Eurakuilo an ti. 15 Irkuang kha a hong sêm rak raka, phâivua tianga chalai inhne chi ni ta maka, a nuam nuama, ni tân hrangin kin om tâka, a ni tân, a ni tân tâka. 16 Chômbung chînte Klaudi an iti kôla phâivua ir-upna tiang irtôla, intak tak pumin irpûm irkuangin kin zôk thei hrâma. 17 Irkuang an kaisuaka, irkuang kha hruiin an khit khak tâka. Libia ivakama, tuichira ni tân phâk a ti, ti an chi sikin irkuang puanzâr kha an irhniamtira; khanchu, a ni tân a ni tân nôk tâka. 18 Phâivua le tuiirsôn khan a ni ngîm mai sikin a tûka chu irkuang timmatua pêl kha an pai irphut tâka. 19 Sûn thum ni’n chu anni kut ngêtin irkuang timmatua khom an pai suak nôk tâka.
20 Nikho sôt tak misa khom, ârsi khom inlang maka, phâivua lakin a saterengin a nin muai maia, hring hrang rêng rêngin irsabei ta ma ung. 21 Bu nêk loia nikho tamtak an om hnungin Paula kha an laia a ngîra, “Puhaio, ki thu kha zômin Kret chômbung ata khan suak no inlân chu hiang intakna le irhmangnahai hi ei itong loi hrang a ni. 22 Khannisianlân, atûn hin irtharngam taka om hrangin nangni ki ngên a ni. Nin laia tûte thi no chin ni, irkuang chu a isiat hrang a ni. 23 A ta ki nia, a sin ki tho ngai, Pathianin vântîrtôn inkhat zânin khan a zuang tîra, ki kuang a zuang ngîra, 24 ‘Paula, chi no roh, Kaisara makunga ni ingîr hrang a ni. Irngai ta, irkuanga ni inzinpui murdi kha nangma sikin Pathianin a inzôk hrang a ni,’ a ni zuang tia. 25 Khasikin, puhaio, irtharngam takin om roi. Pathian ki iama, a ni ihril ang kha tung ngêt a ti. 26 Chômbung khôn mo khata a ni itân suak hrang a ni,” a tia.
27 A zân sômhleiminli zâna chu phâivua’n Mediteranean tuipuia khan a ni tân zêla, zânlai tak vêla chu irkuang mihaiin i mual mani tung hrang angin an inhriata. 28 Khanchu, tui inthûk lam an irkhia, hlam sômhnia inthûk a lei nia; zoro sôtnote hnunga an irkhi nôka, hlam sômhlei ringaa inthûk a ni ta. 29 Lung khorok kâra a ni chôi itinin ti an chi sikin irkuang irmei tiang thîrkuaikim minli an inthâka, khovâr a sân an nghâkhmoa.
30 Irkuang chalaituhai khan irkuang lu tiang thîrkuaikim thâk hrang angin irpûm kha tuikhangliana an inthâka, irkuang kha rotsan an itum a ni. 31 Kha zoi le, Paula’n sipai irza hruaitu le sipaihai kuang khan, “Hihai hi irkuanga an om mai no’n chu zôk thei no chin ni,” a tia. 32 Khanchu, sipaihai khan irpûm hruihai kha an ât sata, an intânpaitir tâka.
33 Khovâr tônin Paula’n irkuanga om murdihai kha bu nêk hrangin a ngênhaia, “A vuan hin ite fa loia nin omna sûn sômhleiminli a hong ni ta. 34 Khasikin bu nêk hrangin nangni ki ngên a ni, nin hringna hrang a ni; nin laia tûte samzâi inkhat te khom irhmang no ni,” a tia. 35 Kha thu kha an sîr zoiin bai a lâka, an rênga makunga khan Pathian kuang lômthu an sîr zoiin a khoia, a fâk irphut tâka. 36 Khanchu, an rêngin irtharngam takin an fâk tâka. 37 Irkuanga om kha kin rêngin irzahni sômsari kiruk kin nia. 38 An fâk zoi zit hnungin chu irkuang inzângtir hrangin an bu pêlhai kha tuipuia an pai suak nôk tâka.
Irkuang siat thu
39 Khua a hong vârin chu, kho tianga ivakam mo an itung inhre mahai, khannisianlân, kho tianga li inkilkôia mani chiaiphoi an hmua, kha chunga khan a theiin chu irkuang kha muang inkâitir an tuma. 40 Thîrkuaikim hruihai kha an ât sata, tuipuia an mâksan tâka; kha chunga khan an kai inhêlna khitnahai kha an sûta, maton tianga puanzâr kha phâivua insêmtir lam hrangin an irsângtira, chiaiphoi kha an pan tâka. 41 Khannisianlân, tui hrât inhni irtongna hmuna kin lût lika, irkuang kha hnuai an insuktir tâka. Khanchu irkuang lu tiang an ôk khaka, inchâng thei loiin a om chiana, a pên tiang chu tuiirsôn sikin a koi irphut tâka.
42 Sipaihai chu intânghai kha that zit an tuma, tui irhliaia kâi, om an ta, intân zoi an ti, ti an chia. 43 Khannisianlân, sipai irza hruaitu khan Paula saninzôk a nuama, an thil tum kha a khapa; tui irhliai thei murdi’n tuipuia irchômthâka muanga lei kâi masa hrang le, 44 mi dang chu thingphêk chunga mani, kâi hrangin thu a pêk tâka. Khaang khan kin rêngin muanga satakin kin kâi zit tâka.
1 Kin kâi zoiin chu chômbung kha Malta a nih ti kin hriat tâka. 2 Kha chômbung mihai khan a sân lung an ni lei inkham tak taka. Rua a tho sik le a sân a dâi sikin mei an thoa, kin rêngin an ni lei lôma.
3 Paula’n thing têlkhat a’rfuanga, meia a tuaa, a lum sikin mirûl a suaka, a kut an chuka, a kut a kher pe khaka. 4 Khataka mihai khan a kuta mirûl kop chian kha an hmu’n chu, “Hi pa hi mi that ngêt a ni, tuikhanglian ata intân suak khom sianlân, dik taka Roirêltu’n a ihring hi a inuam ta loi a ni,” an tia. 5 Khannisianlân, ama khan mirûl kha meia a nok thâka, ite ti mah. 6 Anni khan a hong invûngin irningloia chinginrîlin a ithi zôi zel hrang mani an iama. Sôt ian an nghâka, ite ti mah ti an hmu’n chu an ngaidân ar thûla, “Pathian a ni hi te,” an ti nôk tâka.
7 Kha kôla khan kha chômbung rêng Poplia irhuan a oma. Ama khan a ni lei lôma, sûn thum dên lôm takin an nin tungtira. 8 Poplia pa kha inkhur le thisena in-êk irveiin a lei zâl chiana. Paula khan a ena, a lua kut irnghatin a chongchaia, a dam tâka. 9 Kha zoi hnung chu, kha chômbunga khan mi dang a na murdi an honga, an dam tâka. 10 Annihai khan a saterengin an ni chôiindôma, kin fe nôk hrang khomin kin innang murdi irkuanga an siaa.
Paula’n Rom khua a tung
11 Tha thum hnunga chu phalbi laia lei châm tâk irkuangin kin fe nôk tâka. Kha irkuang kha Dioskuri an tia, (Pathian inphîr khom an ti ngai) Alexandria khuaa irkuang a ni. 12 Surakus khua kin tunga, sûn thum kin châma. 13 Khatak ata kha irkuangin kin kîr nôka, Regium khua kin tunga. Sûn khat zoia sim khorthi a hong thoa. 14 Kha khan iamtuhai kin hmua, an kuang hapta khat châm hrangin an ni ngêna, khaang khan Rom khua kin tung ta a ni. 15 Rom khuaa iamtuhai khan kin thurchi an lei inhriat le chu, ‘Appia dukan’ le ‘khualbûk inthum’ dênin ni nghâk hrangin an honga. Paula’n kha mihai kha a hmu Pathian kuang lômthu an sîra, a sân ar tha a’rngam sa tâka.
16 Rom kin tungin chu a nghâktu sipai kuang a binga om an phal ta.
Paula’n Rom-ah thuhril
17 Sûn thum hnunga chu Paula’n khataka Juda hruaituhai kha a koi bukhaia, an hongin chu an kuang, “Urênghaio, ei mihai chunga mo ei irchibulhai Dân ata mo ite tho’nsual no khomin, Jerusalema an ni chela, Rom sorkâr kuta an nin hlana. 18 Rom mihaiin chong an nir don zoiin chu ki chunga ite tho’nsuala, thi theina hrang an hmu no sikin nin sua an nuam tâka. 19 Khannisianlân, ama kha Judahaiin an sêl sikin Kaisara kuang intung ngêt ki inang tâk a ni; ki mihai demna hrang nei chu ni ma ung. 20 Khasikin nangni hmu le nangni chongpui nuamin nangni ki ikoi buk a ni; Israelhaiin an isabei ngai, kha pa sika khan hi thîrhrui hi ki ibun a ni,” a tia.
21 Anni khan, “Judai ram ata ni thurchi insîrna lekha ite hmu ma ung, urênghai laia tûte’n ni thurchi a siat tiang mo, a sa tiang mo insîr hrangin hong ual mahai. 22 Hi pôl hi hmun tina insîrinsiat a ni tiin kin lei inhriat, nir ngai dân khom inhriat kin nuam,” an tia.
23 Khanchu, nikhua an khita, kha ni khan a omna ina mi tam takin an hong pana, zîng ata zân dênin Pathian ram thu an sîra, a hrilfiaa. Mosia Dan bu le deipuhai lekhabu ata Jisua chungchânga annihai kha in-iamtir tumin a hrilhaia.
24 Senkhatin a thu’nsîr kha an iama, senkhatin iam mahai. 25 An chong irhmun thei ta maka, Paula’n hi thu hi an sîr zoiin chu an fe suak tâka. A thu’nsîr kha hi hi a ni. “Irtha Irthiangin deipu Isaia bâia nin irchibulhai kuang a insîr kha a sân a dik.
26 ‘Hi chihai laia hin fe’n lân, van sîr roh,
Irngai, irngai nin ta,
a’rngaina lam chang inhre no chin ni.
Hmu chian chian nin ta,
hmu’nfel no chin ni.
27 Hi mihai milung hi a cho tâka,
An mikuar kha an sêttira,
An mit an insîng saa,
khan ni no sian an mitin hmu an ta,
An mikuarin inhria an ta,
An milung inhre sa ta,
hong irhei nôk an ta,
lei indamhai likna ki ti,’
a ti kha. 28 Pathian saninhringna kha Jentailhai kuang pêk a nih ti inhre roi; anni’n chu irngai irngai an ta,” a tia. 29 Hi thu hi an sîr zoiin chu an irsêl mur mura an rot zoi tâka.
30 Kum hni kâi rakin ama omna hranga man a ipêk ina khan a oma, a kuang a hong murdi a lei lômhai ngai. 31 Pathian Ram thu a hrila, Rengpa Jisua Krista thu, hâi takin mi ar chutirhaia, tûte’n khap mahai.
1 Paula, Jisua Krista suak, tirtôn hranga koi, Pathian Thurchi Sa hril hranga indangtu khan; 2 Kha Thurchi Sa kha, Pathianin a deipuhai hmangin a Lekha irthianga a lei inkung tâka; 3 A Nâipa, ei Rengpa Jisua Krista thu chu taksa tiang ei suiin chu Davida irchia suak a nia, 4 a irthiangna irtha tianga chu sinthotheina’n Pathian Nâipa a nizia an langtira; 5 kha sika khan Pathianin nam tin laia mihai iama tak insôntir hrangin tirtôn nina sintum an inhlan a ni: 6 Nangni khom khaanga Krista mihai ni hranga koi nin nia:
7 Pathianin a lungthung le ama mi irthiang ni hranga a ikoi Rom khuaa mihai chubai nangni ki mûk a ni. Pathian ei Pa le Rengpa Jisua Krista kuang ata lungkhamna le irngeina nin kuang om ri se.
Paula’n Rom hro a’rzukna thu
8 Nin iamna thu ram tina an thang sup sup sikin Jisua Krista zâra nangni sikin Pathian kuang lômthu ki insîr phot bak a ni. 9 Ki chongchainahai khan nangni kin hriat mai ngai a ni, a dik taka a Nâipa Thurchi Sa insîrin ki lungrîl murdi’n a sin ki tho ngai, Pathian kha nin hriatpuitu a ni. 10 A sa a iti rua a ni’n chu atûn hin lua nangni ki hong hro theina hrangin Pathian ki ngên mai a ni. 11 Nin det nôk ualna hrangin irtha tiang thilpêk nangni indongtir hrangin nangni hmu ki’rzuk tak tak a ni. 12 Ki iamna le nin iamna irfa irhlôm hi ki irzuk a ni, ei irchangpui irhlôm theina hrangin.
13 Urênghaio, nangni hong hro ki tum maia, khannisian, inchum loina a lei om nôk ngai ti nin inhriat ki inuam a ni. Jentail danghai laia ra ki hmu ngai angin nin laia khom ra hrang hmu ki isabei a ni. 14 Grik mi le Oze mihai, mi vâr le mi’nmôlhai kuang lâkai ki nei: 15 Khasikin kêng nangni Rom khuaa omhai kuang khom Thurchi Sa hril hi ki irzuk tak tak a ni.
Thurchi Sa sinthotheina
16 Thurchi Sa hi inzakpui ma ung, tukhom, a iam murdi saninhringna hranga Pathian sinthotheina a nia; Judahai hrangin a ni phota, Jentailhai hrang khom a ni nôka. 17 Hi hin iamna sika vai Pathianin mi thiam a inchangtir lam a hong inlang ta a ni, Pathian Thu bu’n, “Iamnaa mi fel chu hring a ti” ti irziak ang khan.
Mihriamhai sualna
18 Irvân ata Pathian ningmurna kha mihriamhai Pathian uksak loina, sualna le felloina murdi chunga a zuang inlang a ni; an sualna sikin thutak kha a khâl khaka, 19 Pathianin an hriattir tâk sikin, Pathian thurchi inhriat hrang mihai chu an lungrîla inhriattirin a lei om tâka. 20 A nina, mita hmu thei loi, a kumtuang sinthotheina le a Pathianzia kha rammual siam irphut ata a thil siamhai chu fel taka hmu theiin an langa. Irphilna hrang zel nei mahai. 21 Pathian chu inhriat chakin, Pathian angin chu chôiindôm mahaia, lômthu khom hril mahai; thil chanlamboi an ngaitua tâka; an lungrîl invêt chu an thim zoi ta. 22 Vâr an irti nâkin, a sân an invêt tâk a ni. 23 Thi theiloi Pathian roiinpuina chu thi thei mihriam hai, va hai, sa ke minli neihai le thilhring irlim ang dênin an inchangtira, chubai an mûka.
24 Khasikin, an milung irzuk lam thil porinchehai tho hrangin Pathianin ar heisanhaia, inzakpui hrang angin an iom tâk a ni. 25 Pathian thutak nêkin milak an inthanga, a siamtu biak nêkin a isiam kha biakin a sin an tho tâka. A siamtu chu kumtuanga inpâkin om ri se. Amen.
26 Khasika khan kêng Pathianin inzak taka an ihur kha phalin a irheisanhai tâk a ni; an nupanghai khomin an omlam dân kha paiin dân no angin an oma; 27 an pasalhai khom nupang hmang lam dân pangai mâksanin, hurin an irhnarsa irhlôma, pasal le pasal saloi takin an lênga. An taksa ngeia an sual ra kha an ihmu a ni.
28 Khanchu Pathian inhriatna dik kha an inthâ tâk sikin an ngaituana felloi tak anga om hrangin Pathianin a’rheisanhaia, an tho loi hrang hrang khom an tho tâk a ni. 29 Fel loina chi tinrêngin an hong sip tâka, sualna hai, huatirhamna hai, mi that hai, irngôna hai, irhuangna hai le irkhôkmâkna haiin an sip ta. 30 An irnuisoa, an irhrilsiata, Pathian an khôkmâka, an irlôi irhlôma, an irpâka, an irsonga, thil saloi thar an uar suak nôk maia; an nu le pa mahrip tho mahai, 31 tûte uksak mahaia, milung nei loi, chonginkung insiat, izirpui lungkhamna nei loi, inrenna nei loi an ni. 32 Khaang thil thotuhai chu Pathianin a inkung ang dêna thi inruk an nih ti an inhriat nâkin, nakhrâtin an tho maia, mi dang a thohai khom an la pompui sa ngai a ni.
1 Khasikin, o mihriam, mi hrilsiatpu tukhom ni inlân, irphilna rêng nei viat no chi ni; mi dang ni irêlna ngeia khan nangma theiloi ni ichang kêng; nangma a rêlpu rêng khomin khaanga sin kha ni tho sa ngai sikin. 2 Khaanga tho mihai kha chu Pathianin thiam no an changtirin chu, a itho indik a nih ti ei inhriat; 3 nangma’n ni itho anga thohai thiamno nin changtirin chu, Pathianin nangni a idemna kha lôi hrangin ni irtûng ma ni? 4 A ninole, nangni irlettir a nuam sikin Pathian chu khonzâna neiin nangni a nghâk ngai tih inhre loiin satna a nei intamzia le a tuangdiarzia le a entheizia chu a ingainêp ma ni? 5 Ni tukullian le ni milung ngar sikin Pathian ningmurna nikhua, dik taka Pathianin roi a rêlna nikhua tika mani hremna bukkhôm chian ni ni. 6 Pathianin chu mi tin an sintho ang takin a irêl hrang a ni. 7 Roiinpuina hai, chôiindômna hai le irhmang thei loinahai zonga thil sa tho mai maihai kumtuang hringna pe a ti; 8 Khannisianlân, mâni hrang vai sapirsia ngita, thutak hnôla, thil dikloi zôm ualhai chunga chu Pathian ningmurna le ninginthikna om a ti. 9 Thil sual tho murdihai hrangin intakna hai, chardongnahai om a ti Judahai hrangin om bak a ta, Jentailhai hrang khomin om a ti; 10 Khannisianlân, thil sa tho murdihai chu Pathian kuang ata roiinpuina hai, chôiindômna hai le irtharngamnahai dong an ti. Judahai dong phot an ta, Jentailhai khomin dong an ti.
11 Pathianin mi theibîk nei mah. 12 Dân pên tianga om, sualna tho murdi, dân pên tiang irhmang an ti; Dân sûnga om, thil sual tho murdi Dân hmanga an chungchâng rêl ni a ti. 13 Dân inhriat sika ni loiin a zôma zôm sika khan Pathian makunga thiam chang thei a ni. 14 Dân nei loi Jentailhai chu Dân thu tum chu an irsiangpui zia irfûk lam a ni sikin an thoa, dân chu an kuang ipêk ni no khomsian, dân nei ang an ni. 15 Dân thupêk chu an milunga a irziak a nih ti an omlam ata an lang, an sia le sa inhriatnaa khom an langa an lungrîlhai ar sêla, a kâra thiam an changa, a kâra thiamno an chang ngai. 16 Pathianin mi tinrêng ngaituana irthup Jisua Krista hmanga a rêl niin chu Thurchi Sa ki insîr anga hin rêl a ti.
Judahai le Dan
17 Khannisianlân, nang kha, Juda mi nir tia, Dana khan ni’rnghata, Pathian chu a sân ni songa: 18 Pathian nuamlam khom nin hriat. Dân nin hriat sikin a sia le sa khom nin hriat; 19 mitchohai hruaitu, inthima omhai in êltu, 20 Mi invêthai hruai invârtu, nâipang irchutirtu tak nia ni irbe ngai; inhriat hrang le thutak zong chu Dân thua hin a om zita nin hriat sikin. 21 Mi dang ki’rchutir nir tia, ithoa mo mâni a irchutir loi? Inru loi hrangin mi nir chutira, nangin ni inrûk mo? 22 Uire ni khapa, nangin ni iuire mo? irlim khôkmâktu, nangin millim biakna ina thilhai kha ni inrûk ngai mo? 23 Dân chu a sâna songin dân chu inchâiin Pathian thang ni insetir mo? 24 “Nangnihai sikin Pathian irhming chu Jentailhai laia hrilinsiat a ni,” ti irziak ang khan.
25 Dan zômin lân chu ni sertan khom kha a sân inlâp a ti; Dân nin châiin chu sertanloi ang chian ni ni. 26 Sertanloiin Dân a zômin chu sertan anga bê a ini loi hrang ma ni? 27 Nangni’n ser nin tana, Dân thu irziak nin neia, khannisian Dân thu chu inchâi nôka, Jentail, taksa sertan loihai chu Dân thu chu an zôm ngit nôka, thiamno nangni an inchangtir hrang a ni. 28 A chungphua ringota Juda mi ki nih ti chu Juda mi tak tak ni mah, taksa ringota sertan chu sertan tak tak ni nôk sa mah; 29 aniachu, sûngrîla Juda mi ni chu, Juda tak tak chu a nia, sertan tak tak khom kha milung tianga a nia, Lekha thu ringota ni loiin irtha tiang a ni ual. Khaang mi chu mihriamin chôiindôm nohai khomsian Pathianin chôiindôm a ti.
1 Khante, Juda mi nih a’rfê bîkna mo a om? Sertan khom imo a’rfêna?
2 Lam tinrênga a sân an lâp; An lâpna tak chu Pathian thuhai inkoltir an inina hi a ni. 3 Mi senkhathai iamom ta no sianlân, itin mo ni ta ni? Anni iamom loina khan Pathian iamomna chu a inboi hrang ma ni? 4 Nâi sai mak e! mi murdi milak thei ni zit khomsian, Pathian chu a idik ngêt hrang a ni:
“Nangin thu nin sîr zoro’n thiam ni changa,
Roirêl pea ni om tika nin hnê theina hrangin,”
tia irziak ang khan.
5 Ei dikloina khan Pathian felzia an langtir infel ualin te, itin mo ei irngai? Pathianin mi a hrem hin, mi felloi a ini ma ni? (Mihriam dân angin ki insîr a ni) 6 Nâi sâi mak! Pathianin itin mo rammual roi a irêl thei hrang? 7 A ninole, milak ki inina hin a roiinpuina hranga Pathian dikzia an langtir ual nôkin chu ithoa mo mi suala nin ni itep hrang? 8 Mi senkhatin “Thil sa a hong suak theina hrangin thil sual lei tho rei, a ti”, tia an ni hrilinsiat ang khan ei itho chian hrang ma ni? Kha mihai kha thiamno changrua pial an ni.
Tûte mi fel om mahai
9 Khante eini Judahai hi ei isa bîk ma ni? Nâi sâi mak e! Judahai le Grikhai chu sual suaka om zit ei nih ti kin insîr infel tâk kha te:
10 “Tûte mi fel rêng om mahai;
Inkhat lua om mahai;
11 Tûte inhre thiam rêng om mahai,
Tûte Pathian zong rêng om viat mahai.
12 A ni loina tiang an pêt zoi zit tâka;
Ite khom hmang inruk ta loiin an om zit tâka;
Tukhom thil sa tho reng om mahai;
Inkhatte lua om ta mahai.
13 An hrok chu thân inhong a nia,
An mileiin huangna thu an insîra,
An hmûr ata mirûl tûr a suaka,
14 An bâi chu khuasâlna le thu khâin a sipa.
15 An ke chu thisen insuana hrangin a pêt hrâta;
16 An lampuia chu irhmangna le dengtheina a oma.
17 Irtharngamna lam khom inhre mahai.
18 An mit hmua Pathian chitna zel om mah,”
ti irziak ang khan.
19 Dân thuhai chu Dân hnuaia omhai chunga hmang hrang a nih ti ei inhriat; tûte’n ite an insîr thei loina hrang le rammual hi Pathian roirêla a omna hrangin. 20 Dan zôm insa sikin tûte Pathian makunga thiam changpui om mahai; Dân sikin mi’n thil sual an tho ti an inhriat fia ngai a ni.
Iam sika thiamchangna
21 Atûn chu Dân hmang ngai loia mi thiam an changtir lam Pathian khan a zuang inlangtir ta: Dân le deipuhai thu khomin kha kha a insîr a ni. 22 Jisua Krista an iam sikin Pathianin mi thiam a inchangtir a ni, tukhom a iam murdihai chu, danglamna zel om mah. 23 Mi murdi’n thilsual an tho zita, Pathian roiinpuina kha an ichang thei ta loi a ni. 24 Khannisianlân, Jisua Krista irtanna zâra Pathian chu a lungkhamna sika vai mi manboiin thiam an changtir ta.
25 Pathianin ama kha a thisen tûng sika sual thupha chôina ni hrangin an kunga, mi thiam a inchangtir lam inlangtir hranga tho a ni. 26 Atûn laia a felzia entirna hrangin kêng, ama ngei kha mi fel a ni theina hrang le, Jisua iam murdi chu thiam inchangtirtu a ni theina hrangin.
27 Khante, song hrang mo ei neia? Nei mak meh! I sikin mo? Sintho sikin mo? Ni mak e, iamna sika kêng a ini. 28 Dân zôm sika ni loiin iamna sikin mi’n thiam an chang ei iti a ni. 29 Pathian chu Judahai ta bîk ma ni? Jentailhai ta khom a ni loi ma ni? Ni e, Jentailhai ta khom a ini kêng. 30 Pathian chu inkhat a nia, sertanhai chu an iamna sikin thiam inchangtir a ta, sertan loihai khom an iamna sika ngêt khan thiam inchangtir a ti. 31 Khano’nte, iamna ei insîr poimo sikin Dân chu ite ni loia ei isia ta tihna ma ni? Ni mak e. Dân chu ei ithop ual a ni.
1 Khano’nte, taksa tianga ei irchibul Abrahama thu kha itin mo ei insîr hrang tâk?
2 Abrahama khan sintho sika thiam a changin chu song hrang a inei a ni; aniachu, Pathian makunga song hrang nei viat mah. 3 Pathian lekha thu’n imo a insîr kha? “Abrahama khan Pathian a iama, kha a iamna khan thiam inchangtir a ni,” a tia. 4 Sinthotu hlo chu lungkham thilpêk ni mah, lâkai anga bê a ni ual. 5 Aniachu sintho loia, Pathian ngaisak loi, thiam inchangtirtu iam uala iamna kha, ama felnaa inkung a ni. 6 Sintho sika ni loia Pathianin thiam a inchangtirhai vânneizia Davida khom hiang hin an sîr:
7 “An itho’nchâinahai ngaidama oma,
An sualhai irkhupaia omhai chu.
Vân an nei bâk na!
8 Rengpa’n sual neia a ibe loi chu vân an nei e,”
tiin.
9 Kha satvurna kha sertanhai hrang vai mo sertan loihai hrang khom? “Abrahama’n a iamna sikin thiam a chang,” ei tia. 10 A sertan mâna thu mo a tan zoia thu? Itina irngai hrang ma ni? A sertan hnunga ni maka, a sertan mâna a ni ual. 11 A sertan mâna a iamna ngeiin Pathianin thiam an changtir tih entîr hrangin ser a itan kêng a ini. Khanchu sertan no khomsian iamna sika Pathianin thiam a inchangtirhai hrangin chu Abrahama chu an irtha tianga pa a ni. 12 Sertanhai pa khom a ni, sertan an ini vai sika ni loiin ei pa Abrahama’n ser a tan mâna a iam ang dêna iamna an nei sika a ni.
Iamna sika chonginkung hlenna thu
13 Dan zôm sika ni loiin iamnaa thiam inchangtir a ni sik uala, Pathian khan Abrahama kuang ama le ar chihai khan rammual hi an la ilua hrang a nih ti thu a inkung a ni. 14 Dan zôm hi irchon luatu nina ni sian, iamna hi a korong chian ni a ta, chonginkung khom ite ni ma tihna ni a ti.
15 Dânin chu ningmurna an suaktira, Dân om no sian inchâina khom a iom hrang ni mah. 16 Abrahama irchi murdihai hrangin, dân zômtuhai vai ni loiin, ama iam anga iamtuhai hrangin Pathian thilmanboi pêk a nizia inlang hrangin iamna sikin kêng Abrahama kuang thu a inkung a ni. 17 “Chi tamtak paa nang siam ki ti,” ti irziak ang khan, a iiam Pathian, mithihai inhring nôktu, thil om loihai inomtirtu a iiam Pathian mithmua khan; Abrahama chu ei renga pa a ni. 18 Sabei hrang a om no khomin a sabeiin a iam ngita, khanchu chi tamtak pa a hong ni ta, “Ni’rchihai chu khi irvâna ârsi tam ang dôr khi la ni an ti,” ti irziak ang khan. 19 Kum irzakhat ang dôra mi a ni tâka, a takpum ngaitua’n chu mithi ang dên a ni tâka, Sari khom kha nâi nei zât ni ta mah ti an hriat chian pumin a iamna kha chuai ual hliak mah, 20 iamna irsamin Pathian thu’nkung kha lunghla loia, a iamna kha a hrât tîr tîra, khanchu Pathianin a chôiindôm ual ta a ni. 21 Thu’nkung khan a inkung tak chu hlen thei ngêt a ti a iam ngita. 22 Khasikin a lôma, “A iamna sika thiam inchangtir a ni,” an iti a ni.
23 Khanchu, hi chongbâi, “Ama chu mi fela pom a ni,” iti hi, ama chungchâng insîr hrang ringota irziak ni mah. 24 Keinihai, ei Rengpa Jisua mithi lai ata kaithoitu iamtuhai, iamna sika thiamchang tâkhai hrang khoma irziak a ni. 25 Jisua chu thil sual ei ithohai sika ithatpai a nia, Pathian kuang thiam ei changna hranga kaithoi a ni sa.
1 Khasikin iamna sika thiam ei chang tâk sikin, ei Reng Jisua Krista zâra Pathian le irngeiin ei om ta. 2 Ama sika ngêt khan atûn hin ei iomna lungkhamna hnuaia hin, iamna’n ei lût tâka, Pathian roiinpuina sabeina sikin ei ilôm sa a ni.
3 Khabana ei intaknaa khom ei ilôm mai a ni; intakna’n dorôina a siama, 4 dorôina khom khan detna a siama, detna khan sabeina an suaktir ti ei inhriata. 5 Kha sabeina khan bei nin dongtir maka, Irtha Irthiang a ni ipêk hmangin ei lungrîla hin Pathianin a lungthungna kha a zuang ibuak tâk a ni. 6 Ite tho theiloi ei ni lai khan, a zoro taka Krista chu mi sualhai hrangin a zuang thi tâka. 7 Mi fel ta hranga thi chu tu hrang khomin a sân intak a ti, mi sa ta hrangin chu thi ngam khom an om rôi mo. 8 Aniachu Pathianin lung a ni ithungna an langna chu, mi sual ei ni lai ata Krista kha ei ta hrangin a zuang thi tâka! 9 A thisen sika khan Pathianin thiam a ni zuang inchangtir tâka; Pathian ninginmurna ata khom ama zâra ni sansuak ngei a ti. 10 Râl ei ni lai lua khan a Nâipa thina zâra Pathian leh ei irngei tâkin chu Pathian leh irngeina ei om hnunga vâng chu Krista hringna sikin saninhring ni ngêt ei ti! 11 Kha vai khom kha ni mah, atûna irngeina ni pêktu ei Rengpa Jisua Krista zâra Pathiana ei ilôm a ni.
Adama le Krista
12 Rammuala hin mi inkhat sikin sual a hong lûta, sual sika khan thina a hong om ta. Khanchu rammuala mihriam murdi hi thina khan ar fang suak ta a ni, mi murdi’n thil sual an tho sikin. 13 Dân a om mân khomin rammuala sual a om ta, khannisian Dân a om no sikin sual kha suala ibe ni mah. 14 Khannisianlân, Abrahama zoro ata Mosia zoro dênin mi murdi chunga Adama’n Pathian thupêk zôm loia thil sual a itho tâk anga sual loihai chunga khom thina khan ircham a neia. Adama chu la zuang hrangpu leh irkhek a ni.
15 Khannisianlân, Pathian thilmanboi pêk kha Adama sual leh khan irang no tak a ni. Mi inkhat sual sika khan mi tamtak an thia; Pathian lungkhamna le mi inkhat Jisua Krista sika khan a thilmanboi pêk chu mi tam takin an idong a ni. 16 Pathian thilpêk le mi inkhat sual chu irang no tak a ni, mi inkhat sual sikin thiamno changna a hong oma, aniachu, sual tamtak sikin lungkhama thiam changna a hong om ta. 17 Mi inkhat, mimal sualna sika rammuala hin thina’n roi a rêl a ni tâkin chu, mi inkhat ngêt Jisua Krista sikin, Pathian lungkhamna irkhêl tak le thilmanboi pêk thiam changna dongtuhai chu, hringna changin roiinpui takin roirêl ngêt an ti.
18 Khanchu, mi inkhat sual sikin mi murdi thiamno inchangtir an nia, khaang dênin mi inkhat fel sikin mi murdi thiam changin an ihring thei tâk a ni. 19 Mi inkhat thu zômloi sika khan mi tamtak mi sual an ni tâka, khaang dênin mi inkhat thu zômna sikin mi tamtak mi fel ni an ti.
20 Sual a pung nôk ual theina hrangin Dân a zuang oma; khannisianlân, sual a pung nôk ualin lungkhamna a pung nôk ual a ni. 21 Khanchu, sual chu thina’n roi a rêla; ei Reng Jisua Krista zâra kumtuang hringna ei nei theina hrangin Pathian lungkhamna khan thiam inchangtirna’n roi a irêl tâk a ni.
1 Imo ei insîr hrang tâk? Lungkhamna chu a pung theina hrangin ei isual nôk li lia hrang ma ni? 2 Nâi sâi mak e, Eini sual thisan tâkhai chu suala itin mo ei la iom mai thei hrang? 3 Krista Jisuaa baptisma chang murdihai chu a thinaa baptis-in ei om thiai tih nin inhriat mo ni ma? 4 Baptisma ei changin a kuang phûmin ei om saa, a thina kha ei irkoppui a ni; khaang dênin, Pa’n mithi lai ata roiinpui taka Krista chu a kaithoi ang khan, eini khom hringna tharin lêng ta ei ti. 5 A ithi anga ama leh irzoma ei thiin chu ama kha a ithoi nôk ang dênin ama leh irzomin eini khom kaithoiin om sa ei ti. 6 Sual suaka ei om ta loina hrangin sual irput takpum hi thatpai hrangin ei mihriam milui kha a kuang hembe’n a om tah ti ei inhriat a ni. 7 Tukhom thi tâk chu sual ata a irkiang tâk a ni. 8 Khan, Krista kuang ei thi sa tâkin chu a kuang hring sa ta ei tih ti ei iiam a ni. 9 Krista chu mithi lai ata kaithoiin a oma, thi nôk ta no ni tih ei inhriat, thina khan a chunga ircham nei ta mah. 10 A thina kha sualna tiang chu thi theng thaina a nia, a hringna chu Pathian kuang hring theng thaina a ni. 11 Khaang dênin nangni khom sualna tiang chu thi tâkin irbe unglân, Krista Jisuaa khan Pathian tiang chu a hringin irbe roi.
12 Khanchu, nin taksa irzukna nangni inzômtir hrangin nin takpum thi theia khan sual hi inlal no ri se. 13 Nin takpum ônhai khom thil saloi thôna hrangin inhmangtir ta no roi; mithi lai ata hring nôk angin Pathian kuang inhlan unglân, nin takpum ônhai khom kha ama kuang felna hriamhrei hrangin pe ual roi. 14 Sual khan nin chunga ircham nei ta no nia; Dân hnuaia om maka, lungkhamna thuhnuaia nin om ual tâk sikin.
Felna suak
15 Itin mo a ini hrang tâk? Dân thuhnuaia om loia lungkhamna thuhnuaia ei om tâk sikin, sual ei itho nôk mai hrang ma ni? Ni mak e. 16 Tu kuang khom a thu zôm hranga a suaka nin lûtin chu, thina hrang tena sual suak mani, felna hrang tena thu zômna suak mani khom ni sianlân, a thu nin izômpu suak chu nin nih ti nin inhriat loi ma ni? 17 Sual suak ni ni tâka, khannisian, nangni an inhlan nôk Thurchi Sa irchutirna thu nin idong kha milung taka nin zôm sikin, 18 sual suak ata chu insuak nin ni, felna suak nin hong ni ta. Khasikin Pathian kuang lômthu om ri se. 19 (Nin inhriat theina hrangin mihriam dânin thu ki insîr a ni.) Nin takpum hrât loizia inhriatin, mihriam takin thu ki insîr a ni, nin takpum ônhai chu matona porinche le inchâina suaka insiat hrangin nin ipêk ngai ang khan, atûn chu felna suaka irthianga hring hrangin pe ual ta roi. 20 Sual suak nin ni lai khan felna ata nin irkianga. 21 Atûna nin inzakpui tak, thil nin lei itho ngai kha, nin inlâppui mo? Kha khan a mong taka chu thina an tunga. 22 Atûn chu sual ata irkiang nin ni tâka, Pathian suaka nin lût tâk sikin kumtuang hringna chang hranga irthiangtir nin ni ta. 23 Sual man chu thina a nia; Pathian thilmanboi pêk chu ei Rengpa Krista Jisuaa khan kumtuang hringna a ni.
1 Urênghaio, dân nin inhriat intama, ki insîr hi irhmâi no chin ni; dânin chu mi a hring sûng vai an chunga ircham a inei mo ni ma? 2 Dôngma chu a pasal a hring sûng ten a pasala dân khan a khita; khannisian a pasal a thiin chu a pasal ata dânin a ikhitna kha isûtin a om ngai. 3 A pasal hring laiin mi dang a neiin chu a iuire a nia; a pasal thi hnunga chu dân khitna ata ar kianga, mi dang nei khomsian uire ni ta mah.
4 Khaang tak kha a ni, ki urênghaio: Krista takpum ônhai nin ni tâk sikin dân chu nin thisan tâka. Pathian ta hrangin ra ei insua theina hrangin atûn chu mi dang ta, mithi lai ata kaithoitu ta kha ei ni. 5 Taksaa ei om lai khan dân sika ei inuamlam sual hong suakhai chu ei takpum ônhai thina hrang dôra ra hrangin sin a hong tho ngai. 6 Atûn hin chu, a ni khit ngaitu kha ei thisan tâka, dân ata ei irkiang ta: Dân thu irziak milui anga ni loiin Irtha dân tharin sin ei itho ual a ni.
Dân le sualna
7 Imo ei insîr hrang tâk? Dân chu sual ma ni? Ni mak e. Aniachu dânin nin hriattir no sian sual hi inhre no ning, dân khan, “Irzuk no roh,” ti no sian, irzuk hi ki inhriat loi hrang pial a ni. 8 Hi thupêk hi zoro’nchuma hmangin sual khan keimaa hin irzukna chi tinrêng an suaktira. Dân om no sianlân chu sual hi thil thi chian a ni. 9 Tiana khan chu dân kop loiin ki om ngaia, khannisian thupêk chu a hong oma, sual kha a hong hara, 10 kei chu ki thi tâka. Hringna hranga thupêk chu ki hrangin thina a hong ni ta. 11 Sualin chu thupêk kha zoro’nchuma hmangin mi a huanga; a ni ithatpai tâk a ni. 12 Dân kha chu a’rthiang kêng, thupêk khom a’rthianga, a fela, a isa a ni.
13 A ninole, thil sa khan ei ta hrangin thina a hong intung kêng na? Intung mak e. Sual kêngin a ni: Sual a nizia inlang hrangin thil sa hmangin ki ta hrangin thina a hong intunga, thupêk sikin sual irkhêlzia chu a hong inlang fel tâk a ni.
Mihriama irmîl thei loi
14 Dân chu irtha tianga thil a nih ti ei inhriat; kei chu mihriam mai mai, sual suaka zuar tâk ki ni. 15 Ki châng lam dân hi inhre thei ma ung, ki itho nuam chu tho loiin ki inuam loi kêng ki itho hen a ni. 16 Ki itho nuam loi kha ki tho’n dân kha a sa ki itipui sa tihna a ni. 17 Khanchu keima hi chu a thotu tak kha ni ma ung, keimaa sual om hi a ni ual. 18 Keimaa mihriam hi chu thil sa ite om mah ti kin hriat; thil sa tho nuamna nei ngai khom inlân, tho thei ma ung. 19 Ki itho nuam thil sa kha tho loiin ki itho nuam loi thil sual chu ki tho ngaia. 20 Ki itho nuam loi lam kha ki tho’n chu a thotu tak kha keima hi ni ta ma ung tihna a ni; keimaa sual om hi a ni ual.
21 Hiang hi thil om lam a nih ti kin hriat suak ta: Thil sa ki tho nuam nâkin, thil sual ki tho nôk ngai. 22 Ki mihriam sûngrîlin chu Pathian Dân kha a lôma; 23 Khannisianlân, ki takpuma hin a thotu, dân danglam tak a om tih kin hriat, kha khan ki sûngrîlin sa a iti lam dân kha a doia, sualna dân ki takpuma hong tho ngai suaka khan a ni siam chian a ni.
24 Lunginkham om mi te ki nia na! Hi thina takpum ata tu’n mo ni sansuak ni? 25 Pathian vaiin kêng! ei Rengpa Jisua Krista zâra ei Pathian kuanga lômthu ki insîr a ni. Khanchu, ki milung sûngrîl taka chu Pathian Dân a zôma, ki takpum hin chu sualna sin a itho a ni.
1 Khasika khan atûn chu Krista Jisua omhai ta hrangin chu thiamno inchangtirna zel om ta mah. 2 Krista Jisuaa hringna Irtha dân khan sual le thina dân ata chu a nin suaktir tâka. 3 Taksa hrât loina sika dânin a itho thei viat loi kha Pathianin a zuang tho tâka; mihriam taksa sual ang irputin a Nâipa ngêt kha, sual irbôlna’n Pathianin a zuang tîra; taksaa sual om chu thiamno an changtir tâka; 4 taksa dâna om ta loi, irtha dâna om tâkhai, keinia hin dânin a inphût kha hlen suaka a om theina hrangin.
5 Taksa dâna omhaiin chu taksa tianga thilhai an nuama, irtha dâna omhaiin chu Irtha tianga thilhai an nuam ngai a ni. 6 Taksa tianga thil nuamhai chu thina a nia, Irtha tianga thil nuam chu hringna le irtharngamna a ni. 7 Taksa nuamlam chu Pathian a doia; Pathian Dân zôm maka, zôm khom zôm thei ual mah; 8 Khasikin taksa nuamlam anga omhai chu Pathian inlômtir thei mahai.
9 Pathian Irtha kha nin kuang a omin chu taksa mi ni ta mak chêia, Irtha mi nin ni ual ta a ni. Tukhom Krista Irtha nei loi chu ama mi ni mah. 10 Khan, Krista kha nangnia a omin chu nin takpum kha sual sika thi ni khomsian, thiam inchangtir nin ni tâk sikin nin irtha chu a ihring a ni. 11 Mithi lai ata Jisua kaithoi nôkpu irtha kha nangnia a omin chu, thina irthoka Krista Jisua kaithoi nôkpu khan nin takpum thi thei kha nangnia ama Irtha inomtirin nin takpum thi thei kha inhring a ti.
12 Khasika khan, urênghaio, lâkai ei nei, taksa dâna taksa taka hring hrang chu ni mah. 13 Taksa dâna nin omin chu nin ithi ngêt hrang a ni: aniachu, nin taksa irzuk lam thil sual thohai Irthaa nin thatpaiin chu hring nin ti. 14 Pathian Irtha hruaia om murdihai chu Pathian nâihai an ni. 15 Nin Irtha dong kha suak anga ichia nangni inomtir nôk hrang ni loiin nâia nangni siam hranga Irtha a ni ual; khasika khan, “Abba! ka Pa” tiin ei ikhêk suak ngai a ni. 16 Kha Irtha ngei khan einia irtha leh irkopin Pathian nâihai ei ni a nin hriattira. 17 Pathian nâihai ei niin chu ar chon luatuhai ei ni, Krista tuangna ei irkoppui ngêt hrang a ni.
Roiinpuina hong om hrang
18 Atûna tuangnahai hi nakana ei ta hranga roiinpuina inlang hrang leh khan irkhek inrukin bê ma ung. 19 Thil siam murdi’n chu Pathianin a nâihai a hong inlangtir zoro an nghâkhmo tak tak a ni. 20 Thil siamhai chu an mâni nuamlam sik ni loiin, Pathian nuamlam sikin chanlamboi ni hranga hnôl an ni tâk, aniachu, sabei hrang a la om; 21 thil siamhai chu siatna suak ata insuaka omin, Pathian nâihai zalênna roiinpui kha an irkoppui hrang a nih ti sabeina a ni. 22 Thil siam murdi chu atûn ten nâiha irvei inrûm angin an inrûm tih ei inhriat a ni. 23 Kha vai kha ni mah, eini Irtha ra masa dongtuhai ngei khom hi, a nâia a ni siam tika chu, nghâkhmo’n ei inrûm a ni. 24 Kha sabeina sika khan saninhring ei nia; aniachu hmu tâk sabeina kha sabeina ni mah. A ihmu chian tâk kha chu tu mo la sabei mai hrang? 25 Ei ihmu loi kha ei sabeiin chu ei inghâk zâm zâm ngai a ni.
26 Khasikin Irtha khom khan ei hrât loinaa a ni changpui ngai. I anga chongchai hrang moh ti inhre mak meh. Irtha’n chu inrûm insîr theiloiin a ni chongchai pe ual a ni. 27 Mi milung enfiatu Pathianin chu, Irtha insîr tum chu imo a nih ti an hriat; Irtha’n chu Pathian nuamlam ang takin a ni chongchai pea.
28 Pathian lungthungtu, ama inkung anga a ikoihai hrangin chu, an satna hrangin itinrêngin a tho pe ngai tih ei inhriat; 29 a lei inhriathai kha ama Nâipa ang taka om hrangin a lei inkunga; khanchu, a Nâipa chu urêng tamtak laia nâi lutîr tak a hong ini hrang a ni. 30 Khan a lei inkunghai kha a koia, a ikoihai kha chu thiam an changtira, thiam a inchangtirhai chu a roiinpuina an changtir sa a ni.
Krista Jisuaa Pathian lungthungna
31 Kha thua khan imo ei insîr hrang tâk? Pathian chu eini tiang a changin chu tu’n mo ni doi thei hrang? 32 Ama Nâipa ngei khom hôi loia ei rênga hranga pêktu khan itinrêng manboiin a ni ipêk sa loi hrang ma ni? 33 Pathian mi inthanghai chu tu’n mo hnôl ngam hrang? Pathian chu thiam inchangtirtu a nia. 34 Tu’n mo thiamno inchangtir hrang? Krista Jisua mo? Ama chu ei ta hrangin a ithi vai ni loiin a thoi nôka, Pa Pathian chang tiang omin ni chong petu kha chu ama dên kêng a ini.
35 Krista lungthungna ata chu tu’n mo ni sen thei hrang? Intakna’n mani, lungdûkna’n mani, dengintheina’n mani, châmin mani, korongboiin mani, khandaiin mani a ni isen thei hrang ma ni? 36 Pathian Thu bu’n,
“Nangma sikin sûn sôtin that zôi zel hmabâkin ki oma,
Belra that hrang anga sia ki ni,”
ti irziak ang khan. 37 Thei no ni! Khahai murdi ata khan a ni lungthungtu sikin roiinpui taka ngamtu ei ni.
38 Thina’n mani, hringna’n mani, vântîrtônin mani, inlalna’n mani, thil omsaiin mani, thil la om hrangin mani, sinthotheina’n mani, 39 irsângna’n mani, inthûkna’n mani, thil siam dang rêng rênghai khomin ei Rengpa Krista Jisuaa om Pathian lungthungna ata chu ni sen thei no ni, ti kin hriat infel a ni.
1 Kristaa khan thu dik tak ki insîr a ni; milak ma ung: Irtha Irthiang zâra ki sia le sa inhriatna khomin an hriat infel a ni. 2 Ki lungrîl intak lam irkhêlzia le ki chardongna a iboi thei loizia hi! 3 Ki urênghai, taksa tianga ki chipuihai irthûla hin khosâl tongin Krista kuang ata indang ni inlân, ki ti rak ngai a ni. 4 Israel mi an nia, nâi nina hai, roiinpuina hai, thuthung hai, dân hai, sin thôna sin hai, Pathian thu’nkung hai an changa; 5 irchibulhai kha an puhai an nia, taksa tianga suiin chu Krista ngei khom kha an irchi a ni; itinrêng chunga om Pathian chu kumtuanga inpâkin om ri se! Amen.
6 Pathian thu chu mâkana a ni ta tihna chu ni viat mah; Israel irchi murdi Israel mi ni zit mahai. 7 Abrahama irchi murdi khom a nâihai ni zit ual mahai. “Isaka hin nir chihai sui ni a ti,” Pathianin a iti ual kha. 8 Khanchu taksa tianga a nâihai chu Pathian nâihai ni ual hliak mahai, Pathian thu’nkung sika a nâihai chu Abrahama irchi dik taka bê an ni. 9 “Atûn zoro anga hin zuang a ta, Sari’n chu nâipasal nei a ti,” tia inkung a ni kha. 10 Kha vai kha ni maka, Rebeki khan nâipasal inkhat, ei irchibul Isaka ata inphîr a vonga, 11 nâite suak mân a sia mo a sa mo an ti thei mân khan Pathianin a nuamlam angin inkhat kha a inthang a nih ti an lang: 12 sintho sika ni loiin, a koitu nuamlamin Rebeki kuang, “A ulian ualin a nâipang ual sintho a ti,” Pathianin a ti kha. 13 Pathian Thu bu’n,
“Jakoba lung ki thunga,
Esaua chu ki khôkmâk,”
ti irziak a ni sa.
14 Khaang kha a niin chu imo ei insîr hrang tâk? Pathiana felloina a iom ma ni? Om mak e! 15 Ama khan, “Lung ki inkham murdi chu lung ki inkham ni a ta, za ki irngaiina murdi chunga za irngai ki ti,” tia Mosia kuanga a insîr kha. 16 Khasikin, mihriam nuam lama mâni sinthoa ni loiin, Pathian lungkhamnaa a irnghat ual a ni. 17 Pathian Lekha Thu’n Faroa kuang, “Hi mi sika ringot hin nang kin dingtir nôk a ni, nangmaa ki sinthotheina nang kin entir theina hrang le rammual pumpuia ki’rhming an thang theina hrangin,” a tia. 18 Khanchu Pathian khan a inuam murdi lung an kham ngaia, a inuam murdi khom an tukulliantir ngai a ni.
Pathian ningmurna le lungkhamna
19 Khaang khan a ni’n teh ithoa mo Pathianin mi a la idem hrang? A inuamlam kha tu mo khâl theia? nin iti a ni thei.
20 Khannisian, o mihriam, Pathian sêltu kha tu mo ni ini? Thil siam khan a siamtu kuang? “I hrang mo hiang hin ni ni isiam?” a iti hrang ma ni? 21 Bêlpil tang khat ata bêl inkhat hlu ual takin le bêl inkhat hlu loi taka hrangin bêl suktu’n chu pilbêl chunga khan ircham a inei mo ni ma? 22 Khaang khan Pathianin a tho ngai, a ninginmurna le a sinthotheina inlang nuam khomsian, a ninginmurna dongtu bêl irhmang zôi zâthai chu a tuang zâm zâma, 23 Khan, a lunginkhamna bêl, a roiinpuina dong hranga a isinsiam, einihai kuanga hin, a roiinpuina irkhêl tak a zuang inlangtir tâk a ni. 24 Judahai lai ata vai ni loiin Jentailhai lai ata a ikoi suakhai hi, khaang bêlhai kha ei ni. 25 Hosea lekhabua hiang hin a insîr kha,
“Ki mi ni ngai loihai kha ‘Ki mihai’ ti ki ta,
Lung ki ithung loinu kha ‘Lungthungnu’ ti ki ti.
26 ‘Ki mihai ni mak chêi,’
an itihna hmuna ngei khan Pathian ihring nâihai ibe’n om an ti,”
tia irziak ang khan.
27 Isaia khom khan Israel mihai thu khêkpuiin, “Israel mihai chu tuikhanglian chiai dôrin tam khomhai sianlân, a ihrem ban tômte vai saninhring ni an ti. 28 Rengpa khan irnêng chunga a roirêlna hrang kha a hlen lat hrang a ni,” a ti kha.
29 Isaia dênin,
“Rengpa Itinrêngthothei khan irchi ni lei hôi pe no sian chu,
Sodom angin ni ta a ta,
Gomora ang dênin ni ta ei ti,”
tia a lei insîr ang khan.
Israelhai le Thurchi Sa
30 Imo ei insîr hrang tâk? Jentail thiam chang tum ual loihai chu thiam inchangtir an hong ni ta, iamna sika thiam changna kha. 31 Dân zôma thiamchang tum Israelhai khan kêng dân angin chu thiam chang zoi ta mahai. 32 Itho sikin mo? Iamna’n zong loiin sinthoa hmu an tum sika a ni. Tûkna lunga khan an itûk tâk a ni.
33 Pathian Thu Bu khan,
“Irngai ta, Zion-a khan tûkna lung le khâlna lungpui ki siaa,
Tukhom ama iam murdi’n chu mualinphoi no ni,”
ti irziak ang khan.
1 Urênghaio, ki chipuihai kha saninhringin omhai sian tih hi ki inuamlam le Pathian kuanga ki ingên tak ngai a ni. 2 Pathian ta hranga sathnem ki’rngai irkhêlzia kin hriat, inhriat infel loiin sathnem an irngai a ni. 3 Pathianin mi thiam an changtir lam inhre thiam mahaia, an lampui an hro ngita, Pathianin thiam an changtir dân hnuaia irpelût nuam mahai. 4 Krista chu dân famirkiptirtu a ni, a iam murdihai thiam inchangtira an om theina hrangin.
Mi murdihai hranga saninhringna
5 Mosia’n chu dân zôm sika thiamchang chungchâng thu, hiang hin a’rziak: “Dân zômtu chu hring a ti,” tiin. 6 Iamna sika thiam changna thu rêk chu, “Tu mo irvâna lui hranga?” (ama kha chung tiang ata tu mo Krista zuang hruai hrang tihna a ni.) 7 “Tu mo irnêng rîla zu fe hranga? (ama kha thina ata tu mo Krista a hong ihruai hrang tihna a ni) mo nin lungrîlin ti no roi,” a tia. 8 Khante, imo a iti? “Thu khan nang a nâi, ni bâi le ni lungrîla a om,” a ti. Thu ti hi iamna thu ei insîr hi a ni. 9 “Ni bâiin Jisua kha Rengpa a ni tiin ni thopa, thina ata Pathianin a kaithoi ti ni lungrîla ni iamin chu saninhringin om ni ti,” tiin. 10 Lungrîla iam chu thiam inchangtir an nia, bâia thop chu saninhringin an om sa ngai. 11 Pathian Lekha thu’n, “Tukhomin a iam chu mualinphoi no nihai,” a iti a ni. 12 Juda mani, Grik mani ite danglamna om ual mah; Rengpa inkhat chu an rênga Rengpa a ni; ama irlamtu murdi hrangin itinrêng a nei intam a ni. 13 “Tukhom Rengpa irlamtu murdi chu saninhring ni an ti,” ti a ni.
14 An iiam loi chu itin mo an irlam hrang? An inhriat loi chu itin mo an iiam thei hrang? A hriltu om loiin teh itin mo an inhriat hrang? 15 Tîr an ni no’n chu tu’n mo hril hrang? “Thil sa thurchi hong hriltu ke chu a va sa vang na!” ti irziak ang khan. 16 Khannisianlân, Thurchi Sa chu an rêngin iam zit mahai. Isaia ngei khomin, “Rengpa, kin thu’nsîr hi tu’n mo a iam?” a tia. 17 Khanchu, thu chu inhriat sikin iam a nia, thu kha chu Jisua Krista thu kha a ni. 18 Khante, an mikuarin an inhriat ngailoi tak tak ma ni? Inhriat e:
“An irhâi chu ram tina an thanga,
An thu chu kôlkung dênin an thang suak ta,”
ti a ni.
19 Israel mihaiin an inhriat ngailoi ma ni?
“Irchia tep kâiloihai chu nang inhnarsatir ki ta,
Irchia vâr loihai sikin ning nang ni inmurtir ki ti,”
tiin Mosia khan an sîr masaa.
20 Isaia’n chu hâi nôk ualin:
“Ni zong loihaiin an ni hmua,
Ni’rlamloihai kuang ki inhriattira,” a tia.
21 Israelhai chungchâng thua chu,
“He lâkloi le tehelzong mihai ta hrangin sûn misa tâkin ki bân ki phar ngai,”
a tia.
1 Khante, Pathianin a mihai kha a ipai thâk mo ei iti hrang? Pai thâk mak e. Keima ngei khom Israel mi, Abrahama irchi, Benjamina nam ki ni. 2 Pathianin a phuta a inthang, a mihai kha pai thâk viat mah. Elija thurchi Pathian Lekha thua chuang kha nin inhriat loi ma ni? Ama khan Israelhai chungchâng Pathian kuang an tungtira:
3 “Rengpa, ni deipuhai an thata,
Ni maichâmhai an inchimtira,
Keima vai ki la oma,
Kei khom ni thatpai an itum a ni,”
tiin.
4 Khannisianlân, Pathianin itin mo a sâm kha? “Baala makunga khûksadel ngai loi mi sângsari keima hrangin ki la hôi mai a ni,” tiin a isâm a ni khate. 5 Atûn khom khaang dên khan Pathianin a lungkhamna sika a inthang suakhai tômte an la om. 6 A lungkhamna sika inthang suak an niin chu, a sintho sika ni thei mahai; khaang khan ni sian, lungkhamna kha lungkhamna ni thei no ni.
7 Itin mo a ini hrang tâk? Israelhai khan an izong kha hmu mahaia, Pathian inthang tômte vaiin an hmua, mi danghai rêng rêng chu an sêt zoi zit tâk a ni. 8 “Pathianin a vuan tena hin lungrîl inmusu irtha a pêka, mit hmu thei loi le beng inhre thei loi le ile,” ti irziak ang khan.
9 Khan, Davida khan,
“An hruaithe kha an ta hrangin châng le bil ni sianlân,
Tûkna le thuanna ni ri se;
10 An hmu thei loina hrangin an mit kha zîng sianlân,
puak rikin irkul mai ri se,”
a tia.
11 An tûk sikin an itûk theng thaina hrang mani, ti nôk inlân? Tûk theng thai mak! An tûk sikin Jentailhai kuang saninhringna a zuang tunga, Israelhai irzukna hranga a ni. 12 Khaang khan, an tûk luan rammual irchongna a nia, an hlosamna man Jentailhai irchonga a niin te, an hong kop irkip tena len vâng chu itin tak mo a ini hrang tâk!
Jentailhai Saninhringna
13 Nangni Jentailhai kuang thu ki insîr a ni. Keima hi Jentailhai hranga tirtôn ki ni sikin ki sinthôna sin hi ki inhlu a ni; 14 Ki chipuihai nangni kin hnarsatira, senkhat lua ki saninhring theina hrangin. 15 Anni pai thâkna lua rammual hi Pathian ruala siam nôkna a ni’n chu, anni lômlût nôkna chu thina ata hring nôkna ni no ni mo? 16 Bai tiam masa tak kha Pathian kuang inhlan irthiang a ni’n teh, a pumpuiin irthiangtir a ni. Khan, thing khom a’rzung a’rthiangin chu a ônhai khom a irthiang a ni. 17 Oliv thing ôn senkhat kha sât thâkin, nangni oliv dolhai kha oliv kunga khan zom nin nia; irzung sa kha nin thop sa tâka. 18 Ôn danghai ata kha irsor khom unglân a’rzung infâtu ni mak chêi, a’rzungin nangni a infa a ni.
19 Khan, nangma’n, “Ki izom hrang ônhai kha sât thâk kêng a ini,” ti ni ti. 20 Ni ti indik; an iam no sikin ikhiakpaiin an oma, nang chu ni iam sikin izom ni ni, lârirpâkpui no roh, chi ual roh. 21 Pathianin a ôn takhai kha a hôi no’n chu nang khom nang hôi ual no ni.
22 Pathian satzia le ichiomzia hi ngaitua ta; a tûkhai hrangin ichi a oma, a satnaa ni om maiin chu, nangma ta hrangin chu a isa a ni, ni om mai no’n chu nang khom sât thâk ni ni ti.
23 Khan, anni khom iamloia an om mai no’n chu izomin om nôk an ti, Pathianin anni kha a zom nôk thei a ni. 24 Nang oliv dol ata sât thâk lua, suak dân pangai ang loia oliv thing saa zom ni ni’n chu oliv dik tak ôn kha thing dika khan zom ol ual ok a ti!
Israelhai indingtir nôkna
25 Urênghaio, hi thu’rthup hi nin inhriat loi nuam ma ung; khano’nchu ki vâr dên lei irtina nin ti; Jentailhai an kop irkip mâka chu Israel mi senkhathai chunga hnangrakna la zuang tung bak a ti, ti hi. 26 Kha tika khan kêng Israel mi murdi saninhringna an iom hrang a ni.
“Zion ata Saninhringna kha a zuang isuak hrang a ni,
Jakoba kuang ata Pathian ngaisak loina inboi a ti,
27 Ama kha an kuanga ki thuthung hrang chu a ni.
An sualhai ki lâkpai tika chu,”
ti irziak ang khan.
28 Thurchi Sa an hnôl sikin Judahai chu Pathian râl an nia; nangni dongtum a saa; Khannisian, Pathianin an thang sikin irchibulhai zâra a rual lungthunghai an ni. 29 Pathianin mi, sat a ivur tâk le a inthang tâk chu sut nôk thei ni ta mah. 30 Tiana khan chu Pathian thu zôm no sikin a lungkhamna nin dong ta a ni. 31 Khaang dênin, atûn hin nangni’n lungkhamna nin dong sikin anni khomin lungkhamna an dong sa theina hrangin atûn hin an la iiam loi a ni. 32 An rênga chunga lungkhamna an langtir nuam sikin Pathianin mi murdi iamloinaa a ikhum zit ta a ni.
Pathian inpâk roi
33 Pathian irchongzia, a vârna le an hriatna kha an thûk bâka! A roirêl lam khom inhriat phâk loi zât, a lampuihai kha sui suak thei zât a ni no bâka! 34 Pathian Thu bu khan,
“Rengpa lungrîl chu tu mo an hriata,
Tu mo a roizêknaa chang tâk?
35 A thuan nôk hranga thilpêk,
Tu mo om ngai?”
ti hi. 36 Thil murdi hi ama ata zuang om, ama sika le ama hranga om a ni. A kuang kumtuang roiinpuina kha om ri se. Amen.
1 Khasikin urênghaio, Pathian lungkhamna sika hin irbôlna hring le irthiang le Pathian lôm inruk ni hrangin nin takpum kha inhlan hrangin nangni ki ngên a ni; khaang kha nin sintho hrang lam tak a ni. 2 Hi rammual om lam ang hin om no unglân, Pathian nuamlam, a sa le lôm inruk le satirkip kha nin inhriat infel theina hrangin, nin lungrîl a thara omin hong danglam ta roi.
3 Pathian ni ipêk lungkhamna sika hin nin laia tukhom irngaiinhlu hrai loi hrangin nangni ki ingên a ni. Pathianin mi tin kuang iamna a ipêk ang takin, mâni irphu tôk lungrîl irput roi. 4 Takpum inkhata ôn tamtak ei neia, ôn murdi’n tho tum an nei seng; 5 khaang dênin eini khom tamtak ni inlân khom Kristaa khan takpum ôn anga irzom irhlôm seng ei ni. 6 Lungkhamna a ni ipêk ang dênin thilmanboi pêk dang dang ei nei seng, thuhrilna tiang a ni’n chu, ei iam lam ang takin insîrin lân, 7 sinthôna tiang a ni’n chu, sathnem irngai takin sinin lân, irchutirna tiang a ni’n chu irchutirin lân; 8 mi irtharngamtir hrang a ni’n chu thei tôp insua’n lân; pêktu’n chu phal takin pe sianlân, roirêltu’n chu takirtâi takin rêl sianlân, changpui innanghai changpuitu’n chu raifân takin changpui ri se.
Kristian diktak irsinsianahai
9 Lungthungna chu vârillekna kop loiin ni ri se. Sual chu khôkmâk unglân, a sa kha pom khak roi. 10 Urêng angin ir-en irhlôm unglân, irchôiindôm irhlôm uar roi. 11 Irtha inboi viat loiin lungrîl irthor takin Rengpa sin kha tho roi. 12 Sabeina khan nangni inlômtir sianlân, dengintheina nin tuang khomin dorôi takin tuang unglân, itiklai khomin chongchai roi, 13 urêng irsamhai kha irchangpui irhlôm unglân, mikhual lôm uar roi.
14 Deng nangni intheituhai chu satvurhai unglân, khua sâlhai no roi. 15 Lômhai chu lômpuihai unglân, chaphai chu chappui roi. 16 Ngaitua hmunkhatin om seng unglân, irngaitua irsâng hrai no unglân, mi chînhai irrualpui roi, Vâr irti no roi. 17 Sual chu suala ngêt thuan no unglân, mi murdi irngaia a sa ngaitua roi. 18 Nangni chu mi murdi leh irngei tum roi. 19 Inditom takhaio, “Phuba la no unglân, Pathian ningmurna inkian ual roi; phuba rêng rêng keima lâk hrang a ni, keima’n thuan ki ti Rengpa’n a ti,” ti irziak a nia. 20 Khasikin ni râl a phîng a châmin chu fa hrang pe ro; a tui an hrâlin chu in hrang pe roh, khaang khan ni tho’n chu a sân a inzak hrang a ni. 21 Sual nang inhnêin om no’n lân, satna’n sual chu inhnê ual roh.
1 Mi tinin an chunga roirêltuhai thu an izôm hrang a ni. Pathian inkung ni loiin roirêltu om thei mahai; atûna roirêltuhai khom hi Pathian inkung kêng an ini. 2 Khanchu, roirêltu doi chu Pathian inkung a idoi a ni; a doitu chu ama chunga hremna intungtir a ti. 3 Roirêltu chu thil sa thopu hrangin chu ichiom ma, thil sual thotu hrangin chu ichi a iom a ni. Roirêltu chi loia om mo ni nuam? Thil sa tho’n lân, inpâk hlo ni ti. 4 Ni satna hranga Pathian sinthopu a ni. Thil sual ni tho’n chu chi ro, khandai kha an ichôi pai pai ni ma. Pathian sinthotuhai an nia, thil sual thotuhai chunga Pathian hremna irlektuhai an ni. 5 Khasikin, hremna chi ringot vai ni loiin ni sia le sa inhriatna sika khom an thu ni izôm hrang a ni. 6 Khaang khan a ni sikin khâzana khom nin chôi ngai; irchamneituhaiin an sin sataka an tho’n chu Pathian sin an itho a ni. 7 Pe hranga an inkunghai murdi kuang pe unglân, irnêng man a niin chu pe unglân, khâzana chôi hrang a ni le chôi unglân, chi hrang chu chi unglân, mahrip hrang chu mahrip roi.
Urêng irlungthungna
8 Lungirthung irhlômna ringot no chu tûte kuang intâng no roi; mâni mihriam chanpui lungthungtu chu dân zôm irkip tak a ni. 9 Dân thupêkhai, “Uire no ro, mi that no ro, inru no ro, irzuk no ro,” tihai le thupêk danghai rêng rêng hi “Nangma lung ni irthung ang hin ni bômhai lungthung ro,” tih hin a kaikhôm zit a ni. 10 Lungthungna’n mâni bômhai insiat ngai maka; khasikin lungthungna hi dân zôm irkipna a ni.
Krista zuang nôkna anai thu
11 Atûnlai thil omzia nin inhriat sikin le a inhai thoi zoro a ni tak tak tâk tih nin inhriat sikin, kha kha ki insîr a ni; atûn chu ei iam phut laia nêkin chu ei saninhringna chu anâi ual tâk a ni. 12 Zân hi a boi vâng vâng tâka, khua a ivâr hrang a ni ta; khasikin izînga sintho chu pai inlân, vâr irbelin irbel ta ei ti. 13 Sûna om angin satakin om ta ei ti, zu inbuai le zun ruia om loiin, hur le irdit songa om loiin. 14 Rengpa Jisua Kristaa khan irbel lem unglân, nin taksa irzukna puiinhling hrangin ite irsiam no roi.
1 Mi tinin an chunga roirêltuhai thu an izôm hrang a ni. Pathian inkung ni loiin roirêltu om thei mahai; atûna roirêltuhai khom hi Pathian inkung kêng an ini. 2 Khanchu, roirêltu doi chu Pathian inkung a idoi a ni; a doitu chu ama chunga hremna intungtir a ti. 3 Roirêltu chu thil sa thopu hrangin chu ichiom ma, thil sual thotu hrangin chu ichi a iom a ni. Roirêltu chi loia om mo ni nuam? Thil sa tho’n lân, inpâk hlo ni ti. 4 Ni satna hranga Pathian sinthopu a ni. Thil sual ni tho’n chu chi ro, khandai kha an ichôi pai pai ni ma. Pathian sinthotuhai an nia, thil sual thotuhai chunga Pathian hremna irlektuhai an ni. 5 Khasikin, hremna chi ringot vai ni loiin ni sia le sa inhriatna sika khom an thu ni izôm hrang a ni. 6 Khaang khan a ni sikin khâzana khom nin chôi ngai; irchamneituhaiin an sin sataka an tho’n chu Pathian sin an itho a ni. 7 Pe hranga an inkunghai murdi kuang pe unglân, irnêng man a niin chu pe unglân, khâzana chôi hrang a ni le chôi unglân, chi hrang chu chi unglân, mahrip hrang chu mahrip roi.
Urêng irlungthungna
8 Lungirthung irhlômna ringot no chu tûte kuang intâng no roi; mâni mihriam chanpui lungthungtu chu dân zôm irkip tak a ni. 9 Dân thupêkhai, “Uire no ro, mi that no ro, inru no ro, irzuk no ro,” tihai le thupêk danghai rêng rêng hi “Nangma lung ni irthung ang hin ni bômhai lungthung ro,” tih hin a kaikhôm zit a ni. 10 Lungthungna’n mâni bômhai insiat ngai maka; khasikin lungthungna hi dân zôm irkipna a ni.
Krista zuang nôkna anai thu
11 Atûnlai thil omzia nin inhriat sikin le a inhai thoi zoro a ni tak tak tâk tih nin inhriat sikin, kha kha ki insîr a ni; atûn chu ei iam phut laia nêkin chu ei saninhringna chu anâi ual tâk a ni. 12 Zân hi a boi vâng vâng tâka, khua a ivâr hrang a ni ta; khasikin izînga sintho chu pai inlân, vâr irbelin irbel ta ei ti. 13 Sûna om angin satakin om ta ei ti, zu inbuai le zun ruia om loiin, hur le irdit songa om loiin. 14 Rengpa Jisua Kristaa khan irbel lem unglân, nin taksa irzukna puiinhling hrangin ite irsiam no roi.
1 Iamnaa mi hrât loi chu, a lunghlânahai kha sêl loiin lôm roh. 2 Mi inkhatin thil itinrêng fa thei hrangin a iama, mi hrât no’n chu chîmu (an sûlhloihna) vai a fâk ngai. 3 Itinrêng fa thei mi khan a fâk loi mi kha hmusit no ri se; a fâk loitu khom khan a fâktu kha sêl no ri se; Pathianin ama kha chu a ilôm tâk kêng. 4 Mi dang siahlo sêltu chu tu mo ni ini? A ngîr indet mo, a tûk mo, a ngaituah hrang chu a pu ircham cham a ni. Ngîr indet ngêt a ti, Rengpa khan a ngîr indet suaktir thei a ni.
5 Khan, mi dangin sûn khat hi sûn dang nêkin a’rngaiinhlu bîka, mi dangin chu nikhua murdi hi irang chitin a bêa. Mi tinin mâni lungrîla inhriat infel ri se. 6 Sûn khat ser bîktu chu Rengpa chôiindômna hrangin a iser a ni; itinrêng fâktu chu, Pathian kuang lômthu insîr baka a ifâk a ni sikin, Rengpa a ichôiindôm a ni. A fâk loitu khom khan Pathian kuang lômthu an sîr sa dên sikin Rengpa chôiindômna hrangin a inghei a ni. 7 Tûte mâni hranga hring ni mak me, tûte mâni hranga thi ni ual mak me; 8 ei hring khomin Rengpa ta hrangin ei ihring a nia, ei thi khomin Rengpa ta hrang ei ithi a ni; khasikin ei hring khomin ei thi khomin Rengpa ta ei ni. 9 Khanchu mi hring le mithi Rengpa a ni theina hrangin Krista chu a thia a ihring nôk tâk a ni. 10 Itho sika mo nangin ni urêngpa ni isêl mai? Itho sika mo nang khomin ni urêngpa ni ihmusit mai? Pathian roirêlna toihmun makunga khan ei la ingîr seng hrang kêng a ni.
11 “A hringpu kha ki ni kêng,
Mi tinrêng ki makunga khûksadelin om an ti.
Irnêng murdi’n Pathian ki ini inpuang an ti, Rengpa’n a ti,”
ti irziak a ni. 12 Khanchu, ei rêngin Pathian makunga mâni thurchi insîr seng hrang ei ni.
Ni urêng intûktir no roh
13 Khanchu, irsêl irhlôm uar no roi, tukhomin mâni urêng tûkna hrang mani, lunghoiloina hrang mani, siam tum no roi.
14 Ama khât ringotin chu a’rthiang loi ite om mah ti Rengpa Jisuaa khan kin hriat infel a ni. Nikhomsianlân, thil senkhat a’rthiang loia irngaipu ta hrangin chu a irthiang loi a ni. 15 Ni thil fâk sikin ni urêng lungrîl a nain chu lungthungna lampui ni ihro ta loi a ni. A thi irthûl Krista’n a thi pe kha, ni thil fâkin inboi no roh. 16 Khasikin nin ta hranga satna kha insîr insiatin om no ri se. 17 Pathian Ram thu chu fâk le nêk lampang ni mah; Irtha Irthiang zâra thiam changna hai, irngeina hai lômna hai a ni ual. 18 Khaanga Krista sinthotu murdi chu Pathian nuamlam mi a nia, mihriam inpâk khom a hlo ngai. 19 Khanchu irngeina hrang le inlâptir irhlômna hrang thilhai kha ei irzûl ngêt hrang a ni. 20 Ni thil fâk sikin Pathian sintho insiat no roh. Thil itinrêng fâk hi a’rthiang, khannisian, mi dang tûkna thil chu fâk sa mah. 21 Ni urêng tûkna hrang a niin chu hme hai, uain hai le thil tinrêng nghei a sa. 22 Ni iam lam kha iam chian roh, Pathian leh nin kâr thu a ni. Mâni iam dân lama thiam loina nei loi chu a vânnei e. 23 Khannisian, tukhomin thiam irti loi puma fâk chu Pathianin thiamno a an chang chian tâk a ni; a iam lam ang ni mah ti a ni sikin. I khom, dika inhre loi puma tho chu sual a ni.
1 Eini iamnaa a hrâthai hin mâni lômna zong loiin hrât no ualhai an hrâtloinaa ei ichangpui hrang a ni. 2 Iamnaa ei phun indet theina hrangin mâni bômhai inlômin an ta hranga thil sa tho tum seng ei ti. 3 Krista khomin mâni lômna zong ual mah, “Nang êrôtuhai êrôna kha ki chunga a chum ta,” ti irziak ang khan a ituang tâk a ni. 4 Pathian Lekha thua lei irziak tâk rêng rêng chu nir chutir hranga irziak a ni, thu irziak ata dorôina le irtharngamna ei dong zâra sabeina ei nei theina hrangin. 5 Dorôina le irtharngamna Pathian kha Krista Jisua nuamlam angin lungrîl inkhat nang innei sianlân, 6 Khanchu, lungrîl inkhat inrualin ei Rengpa Jisua Krista Pa le Pathian kha zâi inrualin inpâk thei nin ti.
Judahai le Jentailhai hranga Thurchi Sa.
7 Pathian roiinpuina hrangin Krista khan nangni a ipom angin pom irhlôm seng roi. 8 Nangni ki hril, Pathian iam omzia infelna hrangin irchibulhai kuang a thu’nkung kha hlenin, Krista chu sertanhai sinthotua a lei oma. 9 Jentailhai khomin a lungkhamna sika Pathian chôiindôm theina hrangin. Pathian Thu bu’n,
“Khanchu Jentailhai laia nang inpâk ki ta,
Ni’rhming inpâkin zâi ki ti,”
ti irziak ang khan.
10 Hiang hin a ti sa a ni:
“Jentailhaio, mihai leh lôm roi,”
11 Hiang khom hi a ti:
“Jentail murdihaio, Rengpa chu inpâk roi,
Ama mihai murdi khomin inpâk ri sehai,”
12 Isaia khomin hiang hin a ti:
“Jesaia irzung hong irzâm ata,
Jentailhai rêng hrangin hong suak a ti.
Ama chunga Jentailhai khan an sabeina kha irnghat an ti,”
ti a ni. 13 Irtha Irthiang sinthotheina zâra sabeinaa nin sip theina hrangin sabeina hnâr Pathiana khan nin iam sikin lômna le irtharngamna tinrêngin nangni vur ri se.
Paula tirtôn a nina san
14 Ki urênghaio, nangnihai hi satnaa sip, vârna tinrêng neiin tam, irchutir irhlôm thei hrangin nangni ki iam ngita; 15 aniachu, thil senkhat nangni inhriattir nôk hrangin ki la hong irziaka. Jentailhai hranga sin hrangin Pathian khan Krista sinthôna sin a ni zuang inhlan phuta khan, hâi taka ki irziak a ni. 16 Jentailhai chu Irtha Irthianga Pathian kuang, lôm inruka irbôlna hranga, inhlan hrangin Thurchi Sa hril hi ki ochai sin a ni. 17 Krista Jisuaa khan Pathian sin ki tho hi a sân ki isong a ni. 18 Jentailhai in-iamtir hrangin Krista’n sintho le thuhrilin keima ni hmanga a sinthohai vai no chu i khom hril ngam no ninga; 19 Irsinsiana le sinirkhêlhai, Irtha Irthiang sinthotheinaa khan a ni hmang a ni, khasika khan Jerusalem khua le a kôlvêl rama irthokin Illurikon dênin, Krista Thurchi Sa chu hmun tina ki hril irkip tâka.
20 Mi dang lungphûm chunga sin inding ki ni loina hrangin Krista lan hriatloina hmun kipa Thurchi Sa inpuang hi ki nuamlam a ni.
21 “A thurchi an la ihril ngai loina mihai khan chu hmu an ta,
La’nhre ngailoihai khan inhria an ti,”
ti irziak ang khan hril ki itum ngai a ni.
Paula’n Rom hro a tum lam
22 Khasika khan kêng, nin kuanga hong ki irlêk chian ngai a ni. 23 Atûn hin chu hi ramhaia hin fena hrang nei ta ma unga, kum tam tak sûng nangni hong hro ki itum mai ngai ang khan. 24 Spain ram fe malamin hong hrangin ki’rsabeia, nangni irpôlkhômpui bakin, ki ife tumna tiang nin sua hrangin nangni ki sabei sa a ni. 25 Atûnlai taka hin chu mi irthianghai sintho hrangin Jerusalem khuaa la fe bak ki ti. 26 Makedonia le Akaia rama mihai khan irphal takin Jerusalem khuaa mi irthianghai laia inrianghai ta hrangin tholôm an thoa. 27 Irphal taka tho an ni, aniachu an ni ata lâkai an nei mai ngai a ni. Jentailhaiin an irtha tiang thila Judahai an irkoppuiin chu, rammual tianga thila khom Jentailhaiin Judahai sin an itho a inang a ni.
28 Khasikin, kha kha ki thoa, tholôm kha an kuang kin hlan infel tika nangni hong hro malamin Spain rama fe ki ti. 29 Khan, nin kuang ki hong tika chu Krista satvurna famirkip pumin hong ki ti, ti kin hriat. 30 Urênghaio, ei Rengpa Jisua Krista le Irtha Irthiang zâra lungirthungna’n Pathian kuang ni chongchaipui ngut ngut hrangin nangni ki ngên a ni. 31 Judai rama iam loihai ata ki zôk theina hrang le Jerusalem ta hranga changpuina thil ki ichôi hi, mi irthianghai lômlam tak a hong ni theina hrangin. 32 Pathian irfûktir lam anga, lungrîl raifân taka nin kuang ki honga, ei irkaiinhar irhlôm theina hrangin ni chongchai pe roi. 33 Irngeina Pathian chu nin rênga kuang om ri se. Amen.
1 Ei farnu Foibi, Kenriai Koiindanga sinthotu hi, a hmêl nangni inhriattirna nei ki nuam a ni. 2 Rengpa irhminga mi irthianghai ti irhoi anga lei lôm hrang le changpui nangna kipa lei changpui hrangin nangni ki nuam a ni. Ama khom hi mi tamtak lei changpui ngai a nia, keima ngei khom a ni changpui a ni.
3 Priskili le Akuila, Krista Jisuaa ki sinthopuihai kha chubai ni mûk pe roi; 4 khahai khan ki hringna inzôkna hrangin thi khom an irhuam a ni. Keima vai ni loiin Jentail koiindang murdi khom an chunga an ilôm a ni. 5 An ina Koiindang inkhômhai ngai kha chubai ki mûk a ni. Ki rual lungthung Epaineta, Asia rama Krista iam masatak kha chubai ni mûk pe roi.
6 Mari, nin ta hranga dengthei taka sinnu kha chubai ki mûk. 7 Andronika le Junia, ki chipui le ki intângpuihai kha, chubai ki mûk; anni chu tirtônhai laia irhming inthang tak an nia, ki’rthûla Krista iam masa an ni.
8 Ampliata, Rengpaa ki rual lungthung tak kha, chubai ki mûk.
9 Kristaa ki sinthopui Urbana le ki indit tak, Stakua kha chubai ki mûk.
10 Kristaa mi tak, Apelia kha chubai ki mûk. Aristobula in sûng mihai chubai ki mûk.
11 Ki chipui, Herodiona kha chubai ki mûk. Narkisa hai in sûnga mi Rengpaa omhai kha chubai ki mûk.
12 Trufaini le Trufosi, Rengpaa a satêna sinthohai kha, chubai ki mûk. Ki rual satak Persi, Rengpa hranga a satêna sintho ngai kha, chubai ki mûk.
13 Rengpa sinthoa mi langsâr tak Rufa le a nu, ka nu ni sa khom kha, chubai ki mûk.
14 Asunkrita hai, Flegona hai, Hermia hai, Patroba hai, Herma hai, an kuanga urêng omhai leh khan, chubai ki mûk.
15 Filologoa le Juli, Nirea le a farnu le Olumpa, an kuanga mi irthiang om murdi chubai ki mûkhai.
16 Tum irthiangin irchubai irhlôm unglân, Krista Koiindang hin chubai nangni kin mûk a ni.
Inthorna hnungkhôn
17 Urênghaio, irchutirna thu nin idongna lama nin laia irsenna le tûkna insuaktuhai ata irdîn unglân, anni kha irheisan hrangin nangni ki nuam a ni. 18 Khaang mihai khan ei Rengpa Krista sintho mahai, mâni phîngpui sintho chian an ni. An chong hmang thiam le chong hoiin mi’nmôlhai kha an huanghai ngai a ni. 19 Thurchi Saa nin detzia mi tin inhriat a nia, khasikin kei khom nin chunga ki ilôm a ni. Nikhomsianlân, thil sa tianga vâra, sualna tiang irkiang ki inuam a ni. 20 Irngeina Pathian khan Setana kha nin ke hnuaia nangni insirphatir a ti.
Ei Rengpa Jisua Krista lungkhamna kha nin kuang om ri se.
21 Ki sinthopui Timothea le ki chipui Lukia hai, Jasona hai, Sosipatera hai hin chubai nangni an mûk.
22 Keima, Tertia, hi lekha thon irziaktu hin, Rengpa irhmingin chubai nangni ki mûk a ni.
23 Ki tungna in pa, koiindang inkhôm dongtu Gaia hin, chubai nangni a mûk.
Kho sum enkoltu Erasta le a urêngpa Kuarta khomin chubai nangni an mûk.
24 Ei Rengpa Jisua Krista lungkhamna kha nin rênga kuang om ri se. Amen.
A mongna chongchai
25 Pathian chu chôiindôm ei ti; Ama’n chu Jisua Krista thu, Thurchi Sa ei ihril le tiana thurîl irthup lei inpuang tâk ang khan nin iamnaa det takin nangni an dettir thei a ni. 26 Atûn hin chu thu irthup ngai kha deipuhai Lekhaa a hong inlanga, tukhomin an iama an zôm theina hrangin kumtuang Pathian thupêk anga nam tin laia inhriattir a ni ta. 27 Pathian omsun, vâr tak, Jisua Krista sikin kumtuangin roiinpuina om ri se. Amen.
1 Paula, Krista Jisua tirtôn ni hranga Pathian nuamlam anga koi le ei urêngpa Sosthena khan,
2 Korinth khuaa Pathian Koiindang om, mi irthiang ni hranga koi, Krista Jisuaa irthiangtir le hmun tina ei Rengpa Jisua Krista, (anni le eini Rengpa) irhming irlam murdihai chubai kin mûkhai. 3 Pathian ei Pa le Rengpa Jisua Krista kuang ata lungkhamna le irngeina nin kuang om ri se.
Krista Satvurnahai
4 Pathianin Krista Jisuaa lungkhamna nangni a ipêk ang hin nin chungchânga ki Pathian kuang itiklai khomin lômthu kin sîr ngai a ni. 5 Amaa khan lam tinrêngin irchongtir ni nia, thua le inhriatna tinrênga nin irsôn maia, 6 Krista thu kha nangnia indet ngitin a oma; 7 ei Rengpa Jisua Krista inlârna nin inghâk angin satvurna tinrêng hmu loiin om mak chêi. 8 Ei Rengpa Jisua Krista Nikhuaa khan khom sêlna boia nin omna hrangin ama khan a mong dênin nangni indet a ti. 9 Pathian, a Nâipa Jisua Krista, ei Rengpa leh irpôlna nei hranga nangni koitu kha iiam a iom a ni:
Koiindanga irsenna
10 Urênghaio, ei Rengpa Jisua Krista irhmingin nangni ki ngên, nin laia irsenna om loiin thukhatin om unglân, lungrîl hmunkhat le ngaidân hmunkhat le tumna hmunkhata, fel taka irzom ngotin om roi. 11 Ki urênghaio, nin laia irngeiloina a om tih Kloii in sûng mihaiin an ni hril. 12 Hi hi a ni ki iti chu: Mi tinin, “Kei Paula pôl ki ni, kei Apolova pôl ki ni, kei Kifa pôl ki ni, kei Krista pôl ki ni,” nin irti chita.
13 Krista chu senin a iom ma ni? Nin ta hrangin Krosa hembe kha Paula ma ni? A ninole Paula irhmingin baptisma nin ichang ma ni? 14 Krispa le Gaia no chu tûte nin laia ki baptis no sikin Pathian kuang lômthu ki ihril a ni. 15 Khaang khan, tûte’n Paula irhmingin baptisma ki chang ti thei no chin ni. 16 (Stefana le a in sûng mihai kha chu ki baptis sa; mi dang ki baptis sa mo chu inhre ma ung).
17 Krista’n baptis hrangin ni tîr maka, Thurchi Sa insîra, kha Thurchi Sa kha mihriam vârna hmang loia insîr hrangin a ni tîr ual a ni; Krosa Krista thina kha chanlamboi a chang loina hrangin.
Krista, Pathian sinthotheina le vârna
18 Kros thu chu a’rhmang thiaihai ta hrangin chu invêtna a nia, eini saninhring thiaihai ta hrangin chu Pathian sinthotheina a ni. 19 Pathian Thu Bu’n,
“Mi vâr vârna chu inboi ki ta,
Mi thiam thiamna hnôl sa ki ti,”
ti irziak a ni. 20 Mi vâr kha khôn mo a iom? Mi thiam kha khôn mo a iom? Hi rammuala irsêl thiam kha khôn mo a iom? Pathianin rammual vârna hi invêtna a nih ti an lang ta. 21 Pathian vâr dân chu hi hi a ni, Rammualin vârna hmanga Pathian an inhriat theiloi hnungin, kin thuhril invêt hmanga iamtuhai saninhring hi: Kha kha Pathian nuamlam tak a ni. 22 Judahaiin chu irsinsiana thilirkhêl an inphûta, Grikhai lakin kha vârna ringot kha an zonga; 23 Keini’n chu Krista hembe thu kin ihril a ni, kha kha Judahai ta hrangin chu khâltu a nia, Jentailhai ta hrangin chu thil invêtom a ni. 24 Juda khom ni sian, Grik khom ni sian, koihai ta hrangin chu Krista kha Pathian vârna le sinthotheina a ni. 25 Pathian invêtna chu mihriam vârna nêkin a vâr uala. A hrât loina khom mihriam hrâtna nêkin a hrât ual a ni.
26 Urênghaio, nangni a ikoi lam hi irngaitua u ta, taksa tianga mi vâr tam takhai, mi hrât tam takhai, mi sa tam takhai ikoi an ni loizia hi. 27 Pathianin chu rammual mihai irngaia thil invêthai kha mi vârhai mualinphoina hrangin an thanga, rammuala thil hrât loihai kha thil hrâthai mualinphoina hrangin an thang saa. 28 Rammual thil môl le hmusitomhai, thil om loihai ten khom, Pathianin an thanga; thil om saihai pai thâkna hrangin Pathianin ite ni loia an irngai kha an thang tâk a ni. 29 Khasikin Pathian makunga khan tûte irsor thei om mahai. 30 Nangni chu, Krista Jisuaa khan nin om tâka; ama chu Pathian kuang ata, eini ta hrangin chu vârna hai, thiam inchangtirna hai, irthiangna hai le irtanna hai a lei ni tâka. 31 Khanchu an irziak angin, “Song hrang nuamhaiin Rengpa kha song ri sehai”.
1 Urênghaio, Pathian thutak irthup insîra nin laia ki hong laia khan thu roiinpui le vârna roiinpui leh hong ma ung. 2 Nin laia ki om khoma khan thil dang murdi irnghil zitin Jisua Krista hembea om thu vai kha inhriat ki tum ngai a ni. 3 Khaang khan nin laia ki hong laia khan inhriat loi le ichia inthing pumin ki oma. 4 Ki bâia irthoka irchûna thu suak le ki thu insîrhai khom kha mihriam vârnaa inthêmna thu ni maka, Pathian Irtha sinthotheinaa inhriatna thu a ni ual. 5 Khasikin nin iamna kha mihriam vârnaa irnghat maka, Pathian sinthotheinaa a irnghat a ni ual.
Pathian vârna
6 Khan khom, irthaa ulianhai kuang chu vârna thu kin sîr ngaia. Khannisian, hi rammual vârna thu chu ni maka, hi rammual roirêltu, an inlalna irhmang thiaihai vârna thu khom ni mah. 7 Pathian vârna thu irthup kha ki insîr ual ngai a ni, vârna thu irthup, ei roiinpuina hranga Pathianin rammual om mâna a lei inkung sai tâk kha. 8 Kha vârna kha hi rammual roirêltuhai rêng rêngin inhre mahai. Inhrehai sianlân chu, roiinpuina Rengpa kha hembe no nihai. 9 Pathian Thu’n,
“Pathianin ama lungthunghai ta hranga an irfûk angin chu,
Mita hmu ngailoi le mikuara inhre ngai loi.
Mihriam lungrîla lût ngai loi a ni,”
a iti angin. 10 Eini chu Pathianin a thutak irthup kha Irtha’n a nin hriat tâka. Irtha khan tinrêng a suisuak ngai Pathian thil tum inthûk tak khom. 11 Mihriam thil tum kha a sûnga om, ama irtha vai kêng an hriat ngai. Khaang dênin Pathian Irtha vaiin kêng Pathian thil tumhai an hriat thei.
12 Ei idong hi rammual irtha ni maka, Pathianin thil a ni ipêkhai tinrêng ei inhriat theina hrangin Pathian zu itîr Irtha kha ei idong ual a ni. 13 Khasikin mihriam vârna irchutirin insîr ngai ma unga, Irtha irchutirin kin insîr uala, irthaa thutak kha Irtha mihai kuang kin hrilfia ngai. 14 Tukhom Irtha nei loiin chu Pathian Irtha ata thil pêkhai kha dong thei ma. Kha mi khan chu kha thilhai kha inhre thei mah; ama ta hrangin chu invêtna kai a ni, a hlutzia kha irtha vaia inhre thei a ni sikin. 15 Tukhom Irtha nei ka kaiin chu thil tinrêng hlutzia an inhriat ngai, khannisian, ama chu tûte’n inhre thei ngai mahai. 16 Pathian thu’n,
“Tu’n mo Rengpa lungrîl inhriat?
Tu mo irchûna chong pe thei hrang?”
a iti ang khan. Khannisian, eini’n chu Krista lungrîl ei irput.
1 Urênghaio, irtha mihai kuanga ki insîr angin nin kuang thu insîr thei ma unga; taksa mi, Krista iamnaa nâitesenhai kuanga insîr angin ki insîr ngai a ni. 2 Nin la fâk thei no sikin bu hrum ni loiin irhnutuiin nangni kin fâa; atûn ten khom la fa thei mak chêi. 3 Taksa mi nin la ni sikin. Nin laia irhnarsâna le ir-êngna a om kâr ka chu taksa mi, mihriam taka la om nin ni tihna mo ni ma? 4 Nin laia, “Kei Paula pôl ki ni, kei Apolova pôl ki ni,” tihai nin la om sûng chu a sân nin la taksa mi tihna mo ni ma?
5 Khano’nte Apolova chu i mani? Paula khom imo a ini? Nin iam theina hranga sinthotu an ini kêng; kha khom kha Rengpa’n a ipêk ang dênin an isin a ni. 6 Keima’n ki phuna, Apolova’n tuiin an fâa, khannisianlân Pathianin a irsôntir a ni. 7 A’rsôntirtu Pathian vai no chu a phuntu le tuia infâtu kha ite ni mahai. 8 A phuntu le tuia infâtu chu sin hmunkhata sin an ni. An sin intam dâna zirin lômman hmu an ti. 9 Pathian ta hranga sin suam kin ni, nangni hi Pathian loimân nin ni. Pathian in sin nin ni sa. 10 Pathianin thilpêk a ni ipêk hmangin in sintu thiam tak angin keima’n lungphûm ki phûma, mi dangin in an isin a ni. Khannisianlân, mi tinin an sin hrang lam chita irdîn ri sehai. 11 Pathianin lungphûm a lei iphûm tâk Jisua Krista bana chu tûte’n lungphûm dang phûm thei no ni. 12 Kha lungphûm chunga khan senkhatin rângachak mani, sum mani, lung mantam mani hmangin in sin an ta; senkhatin thing mani, hloisûl mani, fapôl mani hmangin sin an ti. 13 Krista Nikhuaa khan meiin an lâr hrang sikin, mei ngei khan mi tin sintho kha fia ta a ta, a ini tak inlang a ti. 14 Lungphûm chunga sin kha a kâng no’n chu a sintu’n lômman hmu a ti. 15 Tu sintho khom a kângin chu inchân a ti. Khannisian, ama tak chu mei irkân ang dôrin saninhringin om a ti.
16 Pathian in nin nih ti le Pathian irtha nangnia a om tih nin inhriat loi ma ni? 17 Tukhomin Pathian in kha an siatin chu, Pathianin ama kha insiat a ti. Pathian in chu a’rthiang kêng, kha in kha nangnihai nin ni. 18 Tûte a bingin irhuang no ri se. Nin laia tukhomin hi rammual dâna vârin a’rbe’n chu, a vâr ta tak theina hrangin into chang phot bak ri se. 19 Hi rammualin vârna a iti hi Pathian mit hmua chu invêt a ni sikin, Pathian Thu’n, “Pathianin mi vârhai chu an vârillekna khan an inôk ngai,” a iti angin. 20 Pathian Thubu dangin, “Rengpa’n chu mi vârhai ngaituana kha a korong a nih ti an hriat,” a iti sa angin.
21 Khasikin tûte’n mihriamhai song no ri se. Thil tinrêng nin ta a ni. 22 Paula khom, Apolova khom, Petera khom, hi rammual khom, hringna khom, thina khom, thil om saihai le a la hong iom hranghai khom, a rêngin nin ta zit a ni. 23 Nangni khom, Krista ta nin nia, Krista khom Pathian ta a ni.
1 Keini hi Krista tirtôn le Pathian thutak irthup enkoltuhaiin ni bê roi. 2 Enkoltu hranga inkunghai chu an iiamom phot hrang a ni. 3 Nangni’n mo mi dangin mo nin ni fiana hi itea bê ma ung, keima lakin irfia ngai ma ung. 4 Itea irdemna hrang inhre ma ung, sêlna boi ki ni tihna lak ni mah, ni fiatu chu Rengpa a ni. 5 Khanchu Rengpa zuang nôk mâka chu a zoro loia tûte insîr insiat no roi. Rengpa zuang mâka chu, ama’n inthima thup irhmanghai chu ivâra hong inlang an ta, lungrîla tumna irthuphai khom inlang sa a ti. Khanchu, mi tinin mâni irphu tôka Pathian inpâk hlo seng an ti.
6 Urênghaio, hi thu, “Thu irziak chu khêl no roi,” iti chong omzia nin irchu theina hrangin keima le Apolova hi nin enton hrangin ki hong itârlang a ni; tûte’n inkhat songin mi dang enkhûm no roi. 7 Tu mo mi chunga ulian nangni siam? Nin idonghai kha Pathian nangni ipêk ni ma mo? Nin dongin teh ithoa mo dong no anga nin irsong? 8 Nin irsam tinrêng nin inei tâk ma ni? Kin om no khoma rêng nin ichang thei tâk ma ni? Reng chang thei tak tak unglân ki nuam vang na, keini khom nin rêng kin changna hrangin. 9 Pathianin keini tirtônhai hi thi hranga inkung ang dênin, irnêng le irvân vântîrtôn le mi murdi enhoi hrangin a hnungkhôn taka a ni isia mani ki ti ngai. 10 Keini chu Krista sikin mi’nvêt kin ni, nangni chu Krista zâra mi vâr nin ni. Keini chu hrât ma unga, nangni chu nin hrâta, keini chu mihaiin an ni hmusita, nangni chu nangni an ngaisâng a ni. 11 Atûn ten phîngchâm le tuiinhrâlin kin oma, silkai kin irsama, mi tôkhmol kin tuanga, kin invâi a ni. 12 A sân kuta sintho’n fâk kin zonga, mi’n khomâk an ni sâm le sat kin vurhaia, deng an nin theitir le diar takin kin tuanga, 13 mi’n an ni êro le dâiriamin kin sâm ngai. Hi rammuala sahrok leh danglam ual ma ung, atûn ten khom hin irnênga nokkok ang kin ni.
14 Hi thu ki irziak hi nangni inzakna hrang ki tia ni loiin, ki nâi lungthunghai angin nangni irchu ki nuam sika a ni. 15 Krista khan enkoltu sîngkhat (10,000) khom nei unglân, Pa chu inkhat vai nin inei a ni. Nin laia Thurchi Sa hong intungna Krista Jisua leh irzoma nin hringna khan nin Pa ki hong ini a ni. 16 Khasikin keimaa irthoka irchu hrangin nangni ki ngên. 17 Hi chungchânga hin, Timothea, Rengpaa ki nâi lungthung le iamom kha nin kuang ki hong tîr. Ama khan Krista leh irzoma hringna thara ki om dân ram tina koiindang tinhai ki’rchutir ngai lam ang khan nangni inhriatir nôk a ti.
18 Nin laia hong ta loi hrang ni sônin mi senkhat chu nin irsong a ni. 19 Khannisianlân, Rengpa’n sa a ti’n chu, nin laia hong lat ki ti, khanchu hi mi irsonghai thu chu ni loiin, an sinthotheina kha inhre thei ta ki ti. 20 Pathian Ram chu thu vaia irnghat mah, sinthotheinaa a irnghat ual a ni. 21 Imo nin inuam? Tôkhmol leh mo nin kuang ki ihong hrang, aninole lungthungna le thuhnuairôl lungrîl irputin?
1 Nin laia irditna saloi a om tih mi’n an hong insîr bak ngaia, khaang dôra irditna saloi kha chu Jentailhai laia lua om ngai mah. Mi inkhatin a puinghâksia a zâlpui ngai ti khom ki lei inhriat. 2 Khan khomin nin la irsong thei mai? Irsong nêkin, kha mi kha nin lai ata nin inhnot theina hrangin chardongin nin isip ual hrang a ni.
3 Nin laia taksa’n chang no khom inlân, irtha’n chu ki ichang a ni; nin laia om ang khan ei Rengpa Jisua irhmingin khaang taka thil ichiom thotu chunga khan roi ki rêl ta. 4 Nangni le keima irtha Rengpa Jisua sinthotheinaa irbûmin, 5 Kha mi kha ar tha Rengpa Nikhuaa khan saninhring a ni theina hrangin, a takpum chu irhmang hrangin Setana kuta nin ipêk hrang a ni.
6 Nin irpâk hi dik mah, chol tômte’n bai tang kha a pumpuiin a thoizit ngai ti nin inhriat mo ni ma? 7 Chol koploi bai nin ini ang dênin, bai tang thar zek nin ni theina hrangin chol milui kha zen infâi roi. Ei Ferkân kûtna hrang Krista ngêt kha inhlanin a om tâk sikin. 8 Khasikin, Ferkân kût ei ti, chol miluia kût tho loiin, nunsiat le sualna chola kût tho loiin, takna le dikna bai, chol kop loiin kût nei ei ti.
9 Ki lekha thona khan irdit hmanghai pôlloi hrangin nangni ki tia. 10 Rammual mi, irdit hmanghai, huatirham hai, inru hai le millim biakhai pôl viat no roi ki iti ni mah, khaang khan ni sianlân rammual nin imâk rak a inang hrang a ni. 11 Ki iti tak chu tukhom urêng irhming irputa irdit song mani, huatirham mani, millim biak mani, irngo song mani, zû’nrui mani, inru mani pôl no roi ti hi a ni. Khaanga mi leh khan chu fâk nêk khom hmunkhatin zong no roi. 12 Pên tianga mihai chu keima’n ki ngaitua hrang mo a oma? 13 Nangni’n sûng tianga mi nin ngaitua’n, pên tianga mihai chu Pathianin a ingaitua loi ma ni? Kha mi sual kha nangni laia irthokin inhnot suak roi.
1 Nin laia mi’n iamtu dang ata thubuai a neiin iamtuhai kuang tung loiin, itho sika mo iamloihai kuang a itung ngam? 2 Iamtuhaiin rammual roi la rêl an ti, ti nin inhriat mo ni ma? rammual roirêl petu hranghai nin ni’n chu, thil chînte lua ngaitua rukloi nin ini ma ni? 3 Atûn dam sûng thil chu ti loiin, vântîrtônhai chungchâng thu khom kin la irêl hrang tih nin inhriat loi ma ni? 4 Dam sûng thil rêl hrang ni neiin koiindanga ite irngeiloihai nin inrêltir hrang ma ni? 5 Inzak a om bâka! Urêng kâra thu irfûk thei mi vâr inkhat lua nin laia nin iom loi ma ni? 6 Urêngin a urêng leh an thubuai roirêlnaa intungin, sononghai a inrêl ngai hi! 7 Thubuai nin nei ngai sika hin chukloina tak nin neih ti chu a inlang a ni. Nin ta hrangin tho’nsuala om kha a isa mo ni ma? Nin ta hrangin tuang ual nih khom itho sika mo nin inuam loi? 8 Nangni rengin nin tho’nsual irhlôma. nin inrûk irhlôm ngai, nin urênghai ta tak leh khom?
9 Mi felloihaiin Pathian Ram lua no nihai ti nin inhriat loi ma ni? Ihuangin om no roi; irdit songhai, millim biakhai, uirehai, hurhai, mongkohurhai, 10 inrûhai, huatirhamhai, zu’nruihai, irkhal songhai, hleprûkhai hin Pathian Ram lua viat no nihai. 11 Nangni khom senkhat chu khaanga mi nin lei ni ngai. Khannisianlân, sualna ata infâiin Pathian kuanga inhlan nin ni tâka, ei Rengpa Jisua Krista le ei Pathian Irtha sikin Pathian kuang thiam nin chang ta.
Pathian roiinpuina hranga takpum hmang hrang thu
12 Thil tinrêng tho hi ki ta hrangin a’rthianga, khannisian, inlâp zit ual ma, ki ta hrangin irthiang khomnian, i suaka khom irphal ma ung. 13 Fâknêk chu phîng ta hrang a nia, phîng chu fâknêk ta hrang a ni; khannisian, Pathianin inboi seng seng a ti. Takpum hi irditna sanoa hmang hrang ni maka, Rengpa ta hrang a ni ual; Rengpa khom takpum ta hrang a ni. 14 Pathianin Rengpa chu thina irthokin a kaithoia, eini khom a sinthotheina’n ni kaithoi sa a ti. 15 Nin takpumhai kha Krista takpum ônhai a nih ti nin inhriat loi ma ni? Krista takpum ônhai kha la pêkin notizuar takpum ônhaiin ki isiam hrang ma ni? Nâisâi mak e! 16 Notizuar irzompui mi kha a notizuar leh takpum inkhat a nih ti nin inhriat no ma ni? Pathian Thubu’n fel takin, “An ruaiin takpum inkhat ni ta an ti,” a iti a ni. 17 Khannisianlân, Rengpa irzompui mi kha chu irtha pumkhat an ni. 18 Irdit hi mong ta roi. Mihriamin sualna dang a isin tinrêng chu a takpum pên tiang a ni; irdit song mi rêk kha chu ama takpum chunga a isual a ni. 19 Nin takpum kha nin sûnga om Pathian nangni ipêk Irtha Irthiang in a nih ti nin inhriat loi ma ni? Mâni ta ni ta mak chêia, 20 mana irchôk kêng nin ini tâk, khasikin nin takpum kha Pathian roiinpuina hrangin hmang roi.
1 Atûn, nin thu irziak chungchânghai kha ngaitua’n: Pasal ta hrangin dôngma nei loi a sa. 2 Khannisian, irditna tak a om ngai sikin pasalin dôngma bîk nei chit sianlân, nupang khomin pasal bîk nei chit ri sehai. 3 Pasalin a dôngma kuang a dongtum dôr chu pe sianlân, khaang dênin nupang khomin a pasal kuang a dongtum dôr chu pe ri se. 4 Nupangin ama takpum chunga khan ircham nei maka, a pasalin a nei ual, khaang dênin pasal khomin ama takpum chunga ircham nei maka, a dôngma’n a nei ual a ni. 5 Chongchai hranga nin irpêk theina hrang le nin irhmun nôk theina hrangin bongtea hrangin a sa nin ti seng seng no’n chu, nin irchamneina irchu irhlôm no roi; khano’nchu, nin irdîn zoi nona sikin Setana’n nangni an thêm itinin. 6 Hi thu hi thupêk angin insîr ma unga, phalna thu ringot angin ki insîr ual a ni. 7 A dik takin chu, nin rêngin keima ang hin om unglân ki inuam a ni. Khannisianlân, mi tinin an dongtum chit thilpêk Pathian kuang ata an idong chit a ni; inkhatin lam dang tiang, a dangin lam dang tiang. 8 Khan in nei loihai le meithâihai kuang chu hiang hin ki ti a ni: keima angin irthi phiaiin om tum mai unglân nin ta hrangin sa a ti. 9 Khannisian, irdîn theina nin nei no’n chu irnei roi, hur nêkin chu irnei a sa.
10 In nei tâkhai kuang khan thu ki pêk, keima thupêk chu ni loiin Rengpa thupêk: Nupangin a pasal sen no ri se; 11 an irsen tâk le khom pasal dang nei ta no ri se, khano’nchu, a pasal leh ngêt om nôk ri se; pasal khomin a dôngma ma no ri se.
12 Mi danghai kuang chu Rengpa’n ni loiin keima’n ki ti: Kristian pasalin sonong dôngma a neiin a dôngma khan a kuang om mai hrangin a milung a chuk rêng rêngin chu ma no ri se. 13 Khan, Kristian nupang khomin sonong pasal a neiin chu, a pasal khan a kuanga om mai hrangin a milung a chuk rêng rêngin chu ma no ri se. 14 Iamloi pasal chu a dôngma zâra irthiangtir a nia, iamloi nupang khom a pasal zâra irthiangtir a ni sa. Khaang khan ni sian, nin nâihai kha irthiang no nihai; khannisianlân, an irthiang a ni. 15 Aniachu, iamloi khan irsen a nuamin chu irsen chian ri sehai; khaang thil kha a tokin chu iamtu, nupang pasal, khit ni mahai; Pathian chu irngei hrangin nangni a ikoi a ni. 16 Kristian dôngma, ni pasal ni saninhring hrang le hrang loi, itin mo ni inhriat? Kristian pasal, ni dôngma ni saninhring hrang le hrang loi itin mo ni inhriat?
Pathian koi lam anga om hrang
17 Tukhom Rengpa’n a kuang thilpêk a ipêk lam tak le Pathianin a ikoi lam takin om ri se. Hi dân hi koiindang tina ki isiam a ni. 18 Sertan mi khan Pathian koina a pom tâkin chu, a sertan irsinsia kha pai a tum hrang ni mah; Sertanloi mi khomin Pathian koina a pom tâkin chu, ser a itan hrang ni mah. 19 Pathian thupêkhai zôm ti no zel chu sertan le tanloi ite ni mah. 20 Tukhom Pathianin a koi laia a iom lam ang tak khan om mai ri se. 21 Pathianin nang a ikoia khan suaka om mo ni ini? Ngaitua no roh; khannisian, zalênna zoro ni manin chu hmang ual ro? 22 Suak, Rengpa’n a ikoi chu Rengpa insua suak a nia, khaang dêna khan suak ni loi Krista’n a ikoi khom kha Krista suak a ni. 23 Pathianin mana nangni a irchôk tâk kêng; khasikin mihriamhai suak chang no roi. 24 Urênghai, tukhom Pathianin a koi laia a om lam ang khan Pathian leh irpôlin om mai ri se.
Lênglaihai le meithâihai chungchânga chong irdon
25 Atûn, lênglaihai chungchânga nin thu irziak kha irngaitua’n: Rengpa ata thupêk chu nei ma ung, khannisianlân, Rengpa lungkhamna sika iiam rua mi ki ni sikin ki’rngaidân insîr ki ti. 26 Atûnlai intakna ngaitua’n, mi a om lam ang taka a iom mai hi sa le ki’rhoitir. 27 Dôngma mo ni nei tâk? Zôkna zong no roh. Lênglai mo ni la ini? Dôngma zong no roh. 28 Khannisianlân dôngma ni nei leh khom tho’nsual mak che; dôngmate khomin pasal a neiin tho’nsual mah. Khannisianlân, in nin neiin chu rammuala dengthei nin ti; kha kha nangni inzôk ki inuam a ni.
29 Urênghai, ki iti nuam tak chu hi hi a ni: zoro hi a bong ta; atûna irthokin chu dôngma neihai kha nei no angin omhai sianlân, 30 chaphai kha chap loi angin omhai sianlân, lômhai chu lômloi angin omhai sianlân, ar chôkhai khan nei loi angin omhai sianlân; 31 hi rammual hmangtuhai chu hmang ta hrai loia an om theina hrangin zoro hi inbongin a iom a ni; hi rammual om dân hi a irhmang thiai a ni hi.
32 Lungdûk nei loi hrangin nangni ki nuam a ni. Ruatharte’n chu Rengpa inlôm a tum sikin Rengpa sin kha a ngaitua ngai. 33 Khannisianlân, dôngma nei sikin rammual thilhai a ngaituah ngaia; 34 Khasikin kailangka’n a iom ngai a ni. Dôngmate’n chu a takpum le ar tha inhlan rip a nuam sikin Rengpa sin kha a ngaitua ngai; khannisian, pasal a nei tâkin chu a pasal inlôm a nuam sikin rammual thilhai a ngaitua ngai. 35 Kha kha nangni changpui ki nuam sika ki iti a ni. Nin chunga dân ngar khang tum ma ung. Thil dik le malam panna thil sin hrang le Rengpa sinthônaa ite hôi viat loia irpêkhlet hrangin nangni ki inuam a ni.
36 Dôngmate le ruatharte irnei thu infel tâk, irnei nôk ta loi hrang tihai chungchâng thua chu: ruatharte kha a dôngmate tianga khan mahripa omin ar dîn thei noa an irnei a nang ti an hriattin chu irnei ri sehai, a inuam angin, tho’nsual mah. 37 Khannisianlân, a nang ti loia, kha dôngmate kha nei loi hrang a lungrîl det taka sinsiama, a nuamlam septheitu khan chu om hrang dân a lungrîla a ngaitua zoi ta, dôngmate kha a nei no sikin a tho’n sa. 38 Khasikin ruatharte, dôngma neitu khan a tho’n sa, khannisian a nei loitu khan a tho insa ual.
39 Nupang kha a pasal hring sûng chu a pasal ikhit a nia; khannisian, a pasal a thiin chu a inu nuam a nei thei, Kristian a ni ngânin chu. 40 Khannisianlân, a om ngaiin om sianlân, a raifân ual a ti. kha kha ki’rngaidân a ni, kei khom Pathian Irtha chu ki neiin ki irbe a ni.
1 Atûn, millim biakna thil chungchânga nin thu irziak ngaitua’n: Ei rêngin inhriatna ei nei an iti angin a idik a ni. Khannisian, khaanga inhriatna khan chu mi an irpâk ngaia, lungthungna rêkin chu mi a siam insa ngai. 2 Tukhomin idôr ten mani inhriatna nei tâkin ar tûngin chu, an hriat hrang lam angin a la inhriat loi a ni. 3 Khannisian, tukhomin Pathian lung a thungin chu kha mi kha Pathianin a inhriat a ni. 4 Khaang khan, millim biakna thil fâk chungchânga chu: rammuala millim rêng rêng hi ite an ini loizia le Pathian inkhat vai a om tih chu ei inhriat. 5 Irvâna mo, irnênga mo, Pathian irhming irput pathian le rêngpa, tamtak om khomsian, 6 Eini ta hrangin chu Pathian inkhat vai, Pa, thil itinrêng siamtu kha a oma, ama ta hrangin ei hringa, Rengpa khom inkhat vai, Jisua Krista a oma, ama sikin thil tinrêng siam a ni, eini khom ama sikin ei ihring a ni.
7 Khannisian, kha thutak kha mi tinin inhre mahai. Mi senkhat chu millim biak ngaiinzong an ni sikin, atûn tena hin millim ta ang taka bên an fâk rikipa an sia le sa inhriatna a’rzala, kha fâk khan a innim tâkin an irbe ngai a ni. 8 Khannisian, fâk hin Pathian leh ei irzomna chu ni siam insa pe thei loi a ni; fa no khom inlân ite inchân no ih, fa khom inlân ite hmu ual no ih. 9 Khannisianlân, nin zalênna sintho khan iamnaa hrât loihai kha suala an tûk loina hrangin irdîn roi. 10 Nangma inhriatna nei mi, sia le sa inhriatna hrât loi nei mi khan millim biakna ina ni fâk lai nang hmu sianlân, a sia le sa inhriatna khan millim biakna thil fâk an ngam hrang ni ma moh? 11 Khasikin kha mihriam hrât loi, ni urêng, Krista’n a’rthûlin a ithitu kha nin hriatna sikin a irhmang hrang a ni. 12 Khaang khan nin Kristian urênghai chunga tho’nsuala, an sia le sa inhriatna inphop pêkin Krista chunga nin tho’nsual ni a ti. 13 Khasikin fâkin ki urêng suala an tûktirin chu, sa fa viat ta no ning, ki urêngpa suala a tûk loina hrangin.
1 Zalên mo ni ma ung? Tirtôn mo ni ma ung? Ei Rengpa Jisua mo hmu ma ung? Nangni kha Rengpa ta hranga ki sintho ra ni mak chêi mo? 2 Mi danghaiin tirtônin ni bê no khomhai sian, nangni’n chu nin ni bê ngêt! Rengpa leh nin hringna a’rzom tâk sikin, ki tirtôn indangna chu nangni kha nin ni. 3 Mi’n an ni sêlin chu hiang hin ki sâm ngai: 4 Sin ki tho theina hranga fâknêk pêk hrangin ircham ki inei loi ma ni? 5 Tirtôn danghai le Rengpa urênghai le Petera hai anga khan kin zinnaa Kristian dôngma hruai hrangin ircham ki inei loi ma ni? 6 Khante, Barnaba le keima vai mo mânia irfâ hrang? 7 Tu sipai mo mânia irfaa râl doi ngai? Tu mo grep irhuan siama, a ra fa ngai loi? Tu mo kêl pâl vâia a dût in ngai loi?
8 Dân khomin kha dên kha a ti sikin, a nitina irkhîna hi ki iten loi a ni. 9 Mosia dân lekhabua khan, “Sechalpa kha bu a chîla ni hmang laiin a hmûr khit pe no roh,” ti ei tep. Pathianin sechal mo a ingaitua tak? 10 Eini hranga a insîr mo ni ma? A ni, eini hrang piala a irziak a ni. Âl kaitu le bu âttu khan dongtum tûngin sin an itho hrang a ni.
11 Nin laia irtha chi kin intheka, nin kuang ata taksa thilhai ât inlân irkhêl ni mo? 12 Mi danghai lua mina hi taksa thilhai hi, nin kuang ata tûng hrangin irchamneina an neiin teh, keini len vâng te irchamneina lian ual kin inei mo ni ma? Khannisianlân, kha irchamneina kha hmang ma ung. Krista Thurchi Sa chakal kin sak loina hrangin itinrêng kin ituang zâm zâm a ni. 13 Pathian biak ina sintho mihai khan biak ina irthokin an fâk hrang an hmu ngai tih le maichâma irbôlna inhlan ngaihai khomin maichâm le dongtum an nei ngai ti nin inhriat loi ma ni? 14 Khaang taka khan Rengpa’n Thurchi Sa kha Thurchi Sa insîrhai irfâna hrangin a inkung a ni.
15 Khannisianlân, keima’n chu khahai kha inkhat khom ki ihmang loi a ni; atûn khom hin ki chunga khaang khan nin thôna hranga ki irziak ni viat mah. Tukhomin ki isong hi chanlamboia an isiam nêkin chu thi zel inlân ki ta hrangin a sa ual. 16 Thurchi Sa kin sîr ringot sika irsong theina nei ma ung. Thurchi Sa hi insîr ngêt hranga dânde kêng ki ini. Thurchi Sa hi insîr no inlân chu, ki ta hrangin ichiom tak a ini hrang a ni. 17 Hi sin hi keima nuam inthangna sika ki isin ni sianlân chu thahlo tûng thei ki ti; khannisian, Pathianin hi sin a nin koltir sikin ki sintum piala bêin ki isin a ni. 18 Khante, thahlo imo ki ihmu hrang tâk? Thurchi Sa hrang sika ki sinthônaa ki’rchamneinahai hmang loia, thahlo boia ki sin hi Thurchi Sa ta hranga zoro sa a ni.
19 Tûte suak chu ni ma ung, khannisianlân, thei dôra mi ki lâklût theina hrangin mi murdi suak ki ichang a ni. 20 Judahai ki lâklût theina hrangin Judahai laia chu Juda angin ki om ngai. Dân hnuaia om no khom inlân, dân hnuaia omhai kuang chu anni ki lâklût theina hrangin dân hnuaia om angin ki om ngai. 21 Khaang dênin, Jentailhai ki lâklût theina hrangin Jentailhai laia chu Jentailhai angin, Juda dân pên tiang ki om ngai. Kha kha Pathian Dân zôm ma ung ki itihna ni mah; Krista Dân hnuaia ki iom a ni. 22 Hrât loi ki lâklût theina hrangin hrât loihai laia chu hrât loi angin ki om ngai. Itin tak mani, senkhathai lua ki saninhring theina hrangin mi murdi kuang thil tinrêng ki ni tâk. 23 Satvurna ki dong theina hrangin, khahai tinrêng kha Thurchi Sa sinin ki isin a ni.
24 Intânirsiathai chu an rêngin an intâna, khannisianlân, inkhat vaiin lômman a hmu ngai ti nin inhriat loi ma ni? Lômman chu nin hmu theina hrangin khaang takin intân roi. 25 Irsiatnaa changhaiin chu lam tinrênga an irdîn ngai. Anni chu rênglukhum siatthei hmu hrangin an irsiata, eini’n chu rênglukhum siat theiloi hmu hranga a ni. 26 Khasikin thiltum neiin ki intân ngai a ni. Phâivua irchûmtu ang khan chu irchûm ma ung. 27 Ki takpum denginthei nghekin ki sep ngaia, mi danghai irsiatnaa ki koibuk hnungin keima chukloia ki om loina hrangin.
1 Urênghaio, ei irchibulhai Mosia zuihai chunga thil tung kha nin inhriat mai hrangin ki nuam. An rêngin sûm thupna hnuaia an om chita, hoi riamin Tuipui sen râl an kâi. 2 Sûma le tuipuia khan Mosia zuihai ni theina hrangin an rêngin baptis-in an iom a ni. 3 An rêngin hmunkhatin irtha bu an fâka, 4 hmunkhatin irtha tui an ina, anni zuitu irtha lungpuia irthokin irtha tui an i-in a ni; kha lungpui kha Krista a ni. 5 Khan khomin an laia mi tam ual chunga chu Pathian milung hoi maka, ramchâra khan an ruak a irthek chit a ni.
6 Khahai kha eini ta hranga enirkhîna a ni, thil sa loi an irzuk angin ei irzuk loina hrang le, 7 an laia mi senkhat millim an ibiak angin ei biak loina hrangin. Pathian Thubu’n, “Mipuihai hruaithe fa hrangin an toia, khannisian, zu in le irdita hoihôkna an irlet nôk,” a iti angin. 8 An laia mi senkhat irdit saloi an uara sûn khat sûnga mi sînghni le sâng thum an ithi anga khan, eini chu irditna sa loi uar no ih. 9 An laia mi senkhat Rengpa an ifia ang khan fia no roi, mirûlin an chuk thathai ok kha. Rengpa chu fia no roi. 10 An laia senkhat Pathian ata an ichiar ang khan chiar no roi, inboipaitu’n an boipaihai kha.
11 Kha an thil tonghai kha mi dang halirchu a nia; eini zoro hnungkhôna omhai nir chutirtu hrangin irziak a ni sa. 12 Khanchu, tukhom ngîr indeta irhriat chu, a tûk loina hrangin irdîn ri se. 13 Fiana nin itong hen hi mi tong ban om ual mah. Pathian chu iam a oma, ni tuang thei bana irkhêl fiana nin chunga intungtir no ni, nin doi zoi theina hrangin fiana hong tung laiin lôitheina lampui nangni siam pe a ti.
14 Khasikin inditom takhaio, millim biak hi irheisan roi. 15 Mi vârhai kuanga insîr ang khan ki insîr a ni; ki thu’nsîr hi ngaitua u ta.
16 Satvur khilât chunga lômthu ei insîr hi Krista thisen irzompuina a ini loi ma ni? Bai ei ikhoi ngai khom hi Krista takpum irzompuina a ini loi ma ni? 17 Eini mi tamtakhai hi, bai tiam inkhata irthokin ei dong seng sikin. 18 Israel mihai kha en u ta, irbôlna sa fâkhai khan maichâma Pathian sin kha an irzompui ni ma mo? 19 Millim le a kuanga fâk inhlan kha thil kâmom a ni ki itihna ma ni? 20 Ni mak e! ki iti chu sonong maichâma irbôlna kha Pathian kuanga ni loiin ramilhlihai kuang an inhlan a ni ual. Ramilhlihai leh irzom hrangin chu nangni ki inuam viat loi a ni. 21 Rengpa khilât le ramilhli khilât irkop thei no chin ni; Rengpa maichâm le ramilhli maichâm fâk irkop thei no chin ni. 22 Rengpa chu ning ei inmurtir hrang ma ni? Ama nêkin ei ihrât ma ni?
23 Thil tinrêng tho a’rthianga, khannisian, thil tinrêng chu sa zit mah. Thil tinrêng tho a’rthianga, khannisian, thil tinrêng tho’n mi siam insa ual mah. 24 Tukhomin mâni satna hrang vai zong loiin mi dang satna hrang zong ual ri se. 25 Hmê dukana an izuar ka chu ite irdon viat loiin ni sia le sa inhriatna sikin fa zel roi. 26 Pathian Thubu’n, “Irnêng le a sûnga thil tinrênghai hi Rengpa ta a ni,” a ti sikin. 27 Sonong inkhatin nangni fialin fe ta unglân, nangni an ido ka chu irdon viat loiin nin sia le sa inhriatna sikin fa zel roi. 28 Khannisian, t’un mani, “Hi fâk hi millim kuanga inhlan a ni,” tiin nangni a hrilin chu, nangni hriltu sik le ama sia le sa inhriatna sikin fa no roi; 29 nangni sia le sa inhriatna ki iti ni mah, mi dang sia le sa inhriatna ki ti ual a ni. I hranga mi dang sia le sa inhriatna khan ki zalênna a isêl ma ni? 30 Ki fâk chunga Pathian kuang lômthu ki insîr tâk pial teh i hrang mo mi’n an ni la isêl ngai hi?
31 Khaang khan, nin isin murdi, nin ifâk le nin i-in murdi Pathian roiinpuina hrangin tho roi. 32 Judahai, Grikhai le Pathian Koiindanghai ta hranga buaina nin ni no hrang lam takin om roi. 33 Ki itho ang taka hin tho roi. Kei chu mâni ta hranga satna zong loiin saninhring an ni theina hranga mi murdi satna hrang zong ualin ki sinthôna tina mi murdi inlômtir ki itum ngai a ni.
1 Ki om dân irchutuhai ni roi, Krista om dân irchutu ki ini ang hin.
Inkhômnaa lukhum khum thu
2 Nin inhriat mai sikin le thumâk nangni ki insîr pe ang taka nin vong ngit sikin nangni kin pâk.
3 Khannisian, pasal lu chu Krista a ni, nupang lu chu pasal a ni; Krista lu chu Pathian a nih ti hi nin inhriat hrangin ki nuam. 4 Pasal, lukhum puma chongchai mani, thuhril mani chu an lu an imualinphoitir a ni. 5 Aniachu, nupang lukhum khum loia chongchai mani, thuhril mani, khom an lu an imualinphoitir a ni, khaang kha chu ep inkol le hmunkhat a ni. 6 Nupangin lukhum khum nuam loi chu ep chian ri se. Aniachu, nupang ta hrangin sam ep le voi hi inzak a omin chu lu khum ri se. 7 Pasal chu Pathian irangpui le roiinpuina inlangtirpu a ni sikin lukhum an ikhum hrang ni mah; nupang chu pasal roiinpuina inlangtirtu a ni. 8 Pasal hi nupang ata siam ni maka, nupang chu pasal ata siam a ni. 9 Pasal hi nupang ta hranga siam ni maka, nupang chu pasal ta hranga siam a ni. 10 Khasikin vân vântîrtônhai sika khan nupangin pasal irchamneina hnuaia om a nih ti irdangna hrangin lu an ikhum hrang a ni. 11 Khannisianlân, Rengpaa khan nupang hi pasal boiin chu om thei mahaia, pasal khom nupang boiin chu om thei mahai. 12 Nupang hi pasal ata siam a ni ang dênin pasal hi nupang ata suak a nia; khannisianlân, itinrêng hi Pathian ata suak zit a ni. 13 Irngaitua u ta, nupang lukhum khum loia Pathian kuang chongchai chu ar hoi mo? 14 Pasal sam insei chu ata hranga thil inzakom a nih ti nin lungrîl irzirpui khomin a inhriat mo ni ma? 15 Nupangin sam insei chu ama roiinpuina a nia, a sam kha ama irkhûna hranga pêk a ni. 16 I khom ni sianlân, hi hi nin hnôl a ni khomin, keini’n mani, Pathian Koiindanghaiin mani, khaang tiang khan dân nei mak meh.
Rengpa zânbu
17 Hi nangni ki hrilnahaia hin nangni inpâk ma ung, nin satna hrang ni loia nin siat ualna hrangin nin inkhôm ngai sikin. 18 A masa takin nin laia irsenna a om tih mi’n an ni hrila; dik le khom ki iam a ni. 19 (Mi dikhai kha an inlang theina hrangin nin laia irsenna a om hrang pial a ni.)
20 Nin irbûm zoroa nin ifâk ngai kha Rengpa zânbu ni mah. 21 Nin fâkin nin bu chit nin fâka, senkhat nin inrui laiin senkhat nin phîng a châm ngai sikin. 22 Fâk zongna hrang in nin inei loi ma ni? A ninole, Pathian koiindang enkhûmin intak mihai kha mualphoi nin isak ma ni? Hi chungchânga hin imo ti ri se, ti nin ni itûng? Nangni ki inpâk hrang ma ni? Nangni inpâk zât ni ma ung.
23 Thu nangni ki ihril non nôk hi Rengpa kuang ata kêng: Khaanga ichela a om ni zâna khan Rengpa Jisua’n bai a lâka, lômthu an sîr zoiin a khoia, 24 “Hi hi ki takpum a ni, nin ta hranga a ni, nin ni inhriatmaina hrangin tho hen roi,” a iti kha. 25 Khaang dênin, an fâk zoia, khilât khom a lâka, “Hi khilât hi ki thisena Thuthung Thar chu a ni, nin in rikipin nin ni inhriatmaina hrangin tho hen roi,” a iti kha.
26 Kha bai kha nin fâka, khilât khom nin in rikipin, a zuang nôk mâka chu, Rengpa thina kha nin inpuang ngai a ni. 27 Khasikin, tukhom chukloi puma Rengpa bai hi fâka, a khilât hi in ka kaiin Rengpa takpum le thisena thiamno chang an ti. 28 Khanchu, mi tin mâni irfia seng sianlân, khaangin bai kha fâkin khilât kha in ri se. 29 Bai fâktu le khilâta uain intu khan Rengpa takpum a nih ti an hriat no’n chu mâni chunga roirêlna tung hrangin a ifâkin a i-in a ni. 30 Hi pa sika hin nin laia tamtakin hrât loiin nin irzala mi tamtak chu nin inmusu a ni. 31 Mâni ir-en masa ngai inlân chu roirêl pe’n ei iom loi hrang a ni. 32 Roirêl pea ei om khomin rammual mihai leh thiamloi ei chang loina hrangin Rengpa’n a ni sep ngai a ni.
33 Khanchu urênghaio, Rengpa zânbu ot hranga nin inkhômin irnghâk ngai roi. 34 Nin inkhômin Pathian roirêlna hnuaia nin om loina hrangin tukhom a phîng a châmin chu a ina ne ri se. Thil dang chu ki hong tika hong infel ki ti.
1 Urênghaio, Irtha tianga thilpêk thu kha nin inhriat loi nuam ma ung. 2 Jentail mi nin ni lai khan millim chongtheiloi tiang nangni an hruai irhmang ngai ti nin inhriat. 3 Khasikin hi hi nangni kin hriattir: Pathian Irtha’n chu tukhomin, “Jisua kha vânnisalin om ri se,” ti thei mahaia, Irtha Irthianga no’n chu, Jisua kha Rengpa; ti thei sa mahai.
4 Khan, thilpêk chi dang dang a oma, Irtha inkhata om a ni. 5 Sinthôna chi dang dang a oma, Rengpa inkhat a ni; 6 sinthotheina khom chi dang dang a oma, Pathian inkhat kuanga om a ni, mi tin kuang sinthotheina pe ngaitu kha.
7 Inlâp seng hrangin mi tin kuang Irtha inhriattirna kha a zuang tung senga. 8 Irtha zâra mi senkhat kuang thuvâr insîr theina pêk a nia, mi dang kuang chu Irtha ngêta khan thu inhriat theina pêk a nia; 9 mi dang kuang chu Irthaa dên khan iamna pêk a nia, kha Irtha ngêt khan mi dang kuang indam theina pêk a nia, 10 mi dang kuang thuhril theina pêk a nia, mi dang kuang Irtha dik le dikloi inhriat theina pêk a nia, mi dang kuang chong inhriat loi chi dang dang pêk a ni, mi dang kuang chong inhriatloi hrilfiah theina pêk a ni. 11 Hihai murdi hi Irtha inkhata sintho zit a nia, a inuam ang takin mi tin kuang chi dang dang a ipêk a ni.
Takpum inkhat ôn dang dang
12 Takpum hi inkhat a nia, ôn tamtak a neia; takpum ônhai murdi kha tam ok khom sian takpum inkhat a ini angin; Krista khom khaang kha a ni. 13 Ei rêngin Juda mo ei ni, Grik mo ei ni, suak mo ei ni ni loi mo, taksa pumkhata om hrangin Irtha inkhata baptis ei nia, Irtha inkhat vai a ni inneitir chit a ni.
14 Takpum hi ôn khat vai ni loiin, ôn tamtak ei ni. 15 Ke hin “Kut ki ni no sikin takpuma kop ni ma ung,” ti ta sianlân, khasika khan takpuma kop loi ni ual mah. 16 Mikuar hin “Mit ki ni no sikin takpuma kop ma ung,” ti ta sianlân, khasika khan takpuma kop loi ni ual mah. 17 Takpumpui hi mit ni zit ta sian itin mo irhâi ei inhriat hrang? Mikuar ni zit ta sianlân, itin mo mirim ei inhriat hrang? 18 Pathianin ôn dang dang hi takpuma hin a nang a itihna hmun tina a isia a ni. 19 An rêngin ôn khat vai ni ta sianlân, takpuma a iom thei hrang ma ni? 20 Ôn dang dang tam ok khom sian, takpum chu inkhat a ni.
21 Khanchu mit hin kut kuang, “Nang innang ma ung,” ti thei mah; lu khomin ke kuang, “Nang innang ma ung,” ti thei ual mah. 22 Takpum ôn hrât loi ual anga inlanghai hi a poimo ual. 23 Ei takpum ôn hmusitom anga ei ibehai hi, kha ngêt kha ei ngaipoimoa, a sate’n ei irvôtir ngaia, a inlang saloihai kha ei irvô insatir ngai a ni. 24 Ei takpum ôn sa ualhai chu irvôtir mo a nanga. Pathianin taksa hi a siam irfûka, insitomhai kha a chôiindômtira. 25 Khasikin, takpuma hin irsenna om maka, a ôn dang danghai an irngaitua irhlôm theina hrangin a isia irfûktirhai a ni. 26 Ôn inkhatin a tuangin chu ôn dang dangin an tuang zit a ni, ôn inkhat chôiindôm a ni’n chu ôn dang murdi’n an lôm sa zit ngai a ni.
27 Nangnihai hi Krista takpum chu nin ni, a ônhai nin ni seng sa a ni.
28 Pathianin a Koiindanga hi mihai hi a siaa: inkhatnaa tirtônhai, an hninaa deipuhai, an thumnaa Irchûtirtuhai, thilirkhêl thohai, indam theina thilpêk hai, mi changpui nuamhai, roirêl thiamhai, chong inhriat loia thu’nsîr theina thilpêk donghai kha an ni. 29 An rêngin tirtôn an ni zit mo? An rêngin deipu mo an ni zita? An rêngin irchutirtu mo an nia? An rêngin thilirkhêl thothei mo an nia? 30 Indam theina thilpêk dong zit mahaia, chong inhriat loiin chong zit mahai, a hrilfia theina dong zit ual mahai. 31 Irtha thilpêk poimo ual dong a sân irzuk roi. Lam satak nangni inentir ki ti.
1 Mihriam chonghai le vân vântîrtôn chonghaiin thu insîr thei khom inlân, lungthungna ki nei no’n chu, dâr inring mai mai mani, têngrep inbên irhâi mai mai mani ni ki ti. ti. 2 Khabana, thu’nsîr theina neiin, thu’rthup murdi inhriattheina le inhriatna murdi nei khom inlân, lungthungna ki nei no’n chu ite ni no ning. 3 Inrianghai infâna hrangin ki nei murdi pe vingin, ki takpum tena khom kâng hrangin irpe khom inlân, lungthungna ki nei no’n chu ki ta hrangin ite ar fêna om no ni.
4 Lungthungna chu a tuang theia, khonzâna a neia; hnarsa ngai maka, lârirpâk maka, irsong ngai maka, 5 Lungthungna chu om insual ngai maka, mâni hranga sa zong ngai mah, a ninginmur nuam ngai maka; sual insâp ngai mah; 6 lungthungna’n chu felloina lôm ngai maka, thutak a lôm ngai. 7 Lungthungna’n chu a tuang zâm zâma, a iamna hai, a tuangnahai le a tuangtheina hai hlosam viat ngai mah.
8 Lungthungna chu itiklai khom boi no ni. Thu’nsîrna hi om khom sian inmongtir la ni a ti, chong inhriat loihai hi om khomsian la mong an ti; inhriatna hi om khomsian la boi a ti. 9 Irkip loiin, ei inhriata irkip loiin thu ei insîr ngai a ni; 10 ar kipa zuang tung tika chu ar kip loi hi boi ta a ti. 11 Ki nâiinpang lai khan nâipang chongin ki chonga, nâipang lungrîl ki’rputa, nâipang ngaitua lam angin thil ki ngaitua ngai; ki hong puihlingin chu nâipang tho lam kha ki mâk ta. 12 Atûn chu hlîmena inlang rêi ruai ang dênin ki’rhmua, nakana chu hmâi irtongin hmu ta ei ti. Atûn chu a chimrip vai ei inhriata, nakana chu Pathianin nin inhriat infel ang hin lan hriat infel ei ti.
13 Khanchu hi thil inthum iamna hai, sabeina hai le lungthungna hai hi om mai a ti, an laia a poimo tak chu lungthungna hi a ni.
Irtha thilpêk, chong inhriatloi le thuhril theina thilpêk
1 Khan, nin irzûl hrang tak chu lungthungna hi a ni. Irtha thilpêkhai irzuk roi, a bîkin, Pathian thu insîr theina thilpêk kha irzuk roi. 2 Chong inhriatloi thu’nsîrtu khan mihriam laia a insîr ni maka, Pathian kuanga a insîr a ni, tûte’n an inhriat loi sikin. Ama khan Irtha sinthotheina’n thutak irthup a insîr a ni. 3 Khannisian, Pathian thu’nsîrtu’n chu mihriam laia a insîr a nia, siaminsatna thuhai, inthorna thuhai le irtharngamna thuhai a pêk ngai. 4 Chong inhriatloi thu’nsîrtu khan chu ama vai a’rsiaminsata, khan, Pathian thunsîrtu khan chu koiindang pumpui a siaminsat ngai. 5 Nin rêngin chong inhriatloia thu’nsîr hrangin nangni ki nuam; khannisian, Pathian thu’nsîr theina thilpêk nei hrangin nangni ki nuam ual a ni. Chong inhriatloi chu Koiindang pumpuiin siaminsatna an hmûna hranga hrilfiatu a om nôk no ngânin chu, Pathian thu’nsîrtu kha chong inhriatloia thu’nsîrtu nêkin chu a ihlu ok a ni.
6 Khasikin urênghai, nin kuang hong ta inlân, chong inhriatloiin thu insîr inlân, nin ta hrangin imo a’rfêna ki iom hrang? Pathiana irthoka thuphuang thu mani, inhriatna thu mani, thu sa insîr hrang mani, irchûna thu mani ki hong chôi no zelin chu nin ta hrangin ar fêna ki iom loi hrang a ni. 7 Hringna neiloi, irhâihoi hmangruahai, theihle mani, perkhuang mani khom hi omze nei loia an tumin chu i hla mo an isak tu mo inhre thei hrang? 8 Bekul khom mumal neia an tum no’n teh tu mo râl doi hranga irsiam hrang? 9 Khaang dênin chong inhriatloia nin insîr kha inhre mai thei a ni no’n teh tu mo inhre thiam hrang? Chong pa pai nin ini hrang kêng. 10 Rammuala hin chong chi dang dang a sân a itam khom a ni thei, omze neiloi inkhat lua om mah. 11 A thu’nsîr omzia kin hriat no’n chu ama kha ki ta hrangin kha chong hmangpu kha ram dang mi ang ni a ta, kei khom a ta hrangin ram dang mi ni sa ki ti.
12 Khanchu irtha thilpêk dong irzuk mai unglân, Koiindang indingna hranga siam insatna hrang kha nin nei theina hrangin zong roi.
13 Khasikin chong inhriatloi neihai chu a hrilfiah theina hrangin chongchai ri se. 14 Chong inhriatloia ki chongchaiin chu ki’rtha kha a chongchai ngeia, ki ngaituana chu hmang ma ung. 15 Itin mo a ini hrang tâk? Irtha’n chongchai ki ta, ngaituana hmangin chongchai ki ta. Inpâkna hla khom irtha’n sak ki ta, ngaituana hmangin sak sa ki ti. 16 Pathian kuanga irtha vaiin lômthu nin sîrin te, inkhôma hong chang mi narânhai khan nin chong kha inhriat no nihaia, nin lômthu insîra khan itin mo “Amen” an iti thei hrang? 17 Ni lômthu insîr chongchaina kha a sân a sa khom a ni thei, khannisian mi dang inlâptir mah. 18 Nangni nêkin chong inhriatloi ki hmang intam ual sikin Pathian chunga a sân ki ilôm a ni. 19 Khannisian koiindang inkhômnaa khan mi dang irchutirna hrangin chong inhriatloia thu 10,000 (sîngkhat) insîr nêkin ngaituana hmanga thu bâi ringa lik insîr ki nuam ual.
20 Urênghaio, nâipang angin thil ngaitua no roi; sualna lama chu nâitesen ang ni unglân, ngaituanaa chu puihling takin om roi.
21 “Chong inhriatloi hmang mihai hmûrin hi mihai kuang hin thu insîr ki ta,
Khan khomin mihaiin nir ngaitua pe no nihai,”
Rengpa’n a ti, tiin Dân bua a irziak a ni. 22 Khanchu, chong inhriatloi hi iamloi mihai ta hrangin irsinsiana a nia, iamtuhai ta hrangin ni mah; khaang dênin Pathian thuhril hi iamtuhai ta hrangin irsinsiana a nia, iamloihai ta hrangin chu ni mah. 23 Koiindang pumpui inkhômnaa nin rêngin chong inhriatloiin thu insîr ta unglân, lan hre loihai mani iamloihai mani hong lût tahai sianlân, nin invêt mani nangni ti no nihai mo? 24 Nin rêngin thu lei insîr ta unglân, iamloi mani, inhreloi mani hong lûthai kha nin thu khan sun a ta, an sualzia inhriattir a ti. 25 An lungrîla thu’rthuphai kha inlangtir ni a ta, Pathian chubai mûkin inbok an ta, “Nin laia Pathian a om ngai a ni,” tiin irpuang ual an ti.
Koiindanga tho dân mumal
26 Urênghaio, inkhômnaa hla nei mani, thu inpuang hrang nei mani, chong inhriatloia chong nang mani, hrilfiana neihai nin omin chu, itina tho hrang mani? Koiindang siaminsat lam tianga tho hrang a ni. 27 Mi tukhomin chong inhriatloia thu nin insîrin, mi inhni inthum bana thu insîr no ri sehai, a dônte’n insîr sianlân, inkhatin hrilfia roi, 28 hrilfiatu an om no’n chu Koiindang inkhômnaa khan dâihrek sianlân, a bîkin mâni le Pathian kuang insîr ri se. 29 Thuhriltuhai khom mi inhni mani inthum mani vaiin hrilhai sianlân, mi dangin a sate’n lei irngai ri sehai.
30 A’rngaituhai laia thu inpuang hrang a omin chu an sîr masatu kha dâihrek ri se. 31 A dônte’n thuhril ngai unglân, khanchu mi tinin irchu hrang nei thei nin ti, mi tin irtharngamin om thei nin ti. 32 Thuhriltuhai thuhril theina irtha thilpêk khan, an thu hnuaia a iom hrang a ni; 33 Pathian chu buaina Pathian ni maka, irngeina Pathian kêng a ini. Koiindang tina mi irthianghai tholam angin.
34 Koiindang inkhômnaa nupanghai chu dâihrek ri sehai, thu an insîr phal ni mah. Dân bu’n a insîr angin thu an izôm ual hrang a ni. 35 Thil inhriat nuam an neiin chu in sûng tiang an pasalhai irdon ri sehai. Nupang ta hrangin chu Pathian Koiindang inkhômnaa thu’nsîr hi inzak a om.
36 Pathian thu hi nangni ata suak ma ni? khano’nte, nin kuang vai mo a zuang itung? 37 Tukhomin deipu mani, irtha mi mani, niin a’rbê’n chu, nin kuanga ki lekha hi Rengpa thupêk a nih ti lei inhre ri se. 38 Khannisian, tukhomin a ngaisak no’n chu ama khom ngaisak no roi.
39 Khanchu, ki urênghaio, thuhril hi a sân irzuk unglân, chong inhriatloia thu’nsîr khom khap no roi. 40 Aniachu, itinrêng fel tak le mumal nei taka tho hrang a ni.
1 Urênghaio, nin kuanga Thurchi Sa nangni ki lei inhril kha atûna hin nangni inhriattir nôk ki nuam; kha Thurchi Sa kha nin lei poma, kha chunga khan nin iamna a inding indet hrang a ni. 2 Thurchi Sa nangni ki ihril kha nin pom maiin chu saninhring ni nin ta, nin pom mai no’n chu nin iamna kha a korong ni a ti.
3 Hi hi ki thu dong poimo tak nangni ki ihril nôk chu a ni; Krista chu Pathian Lekha thu ang zêlin ei sualhai sikin a thia, 4 phûmin a oma, Pathian Lekha thu angin sûn thum nia kaithoi a ni; 5 Petera kuang an lâra, sômhleihnihai kuang khom an lâra. 6 Kha hnunga, voikhat urêng irzaringa nêka tamhai kuang an lâr nôka, kha laia a tam ual chu an la dama, senkhat chu an thi ta; 7 Jakoba kuang an lâr nôka, kha zoi hnunga chu tirtôn murdihai kuang an lâr nôka. 8 A mong taka chu, kei, a zoro loia suak kuanga khom an lâr nôk. 9 Kei chu, tirtôn laia a chîn tak ki ni, Pathian Koiindang deng kin theitir sikin tirtôna ibe zât khom ni ta ma ung. 10 Khannisianlân, Pathian lungkhamna sikin ki ini nih ki ni ta. A lungkhamna ni pêk hi a korong ni mak e, tirtôn danghai nêkin ki sin intam kêng, khannisianlân, keima isin ni mah, ki kuanga om Pathian lungkhamna isin a ni ual. 11 Khanchu, kei khomin, anni khomin khaang khan kin hril ngaia, nangni khomin kha ngei kha nin iam tâk.
Mithi thoinôkna
12 Krista chu mithi lai ata kaithoi a ni thu kin hrila, nin iam hnungin te, nin laia senkhatin ithoa mo mithi thoinôkna om mah nin iti thei? 13 Mithi thoinôkna a om no’n chu Krista khom kha kaithoi ni no ni. 14 Krista kha kaithoi a ni no’n chu kin thuhril hi milak ni a ti, milak iam nina nin ti. 15 Pathianin Krista chu mithi lai ata a thoi ti kin hrila, mithi thoinôkna a om no’n chu Krista khom kaithoi ni no ni, Pathian chungchâng thua milak kin insîr ni a ti. 16 Mithihai kaithoi an ni no’n chu Krista khom kha kaithoi ni bîk no ni. 17 Krista chu kaithoi a ni no’n chu nin iamna hi ite ni maka, nin sualnaa nin la iom mai ni a ti. 18 Khaang khan a ni’n chu, iamtu Kristaa intakhai khom kha an irhmang ta ni a ti. 19 Kristaa sabei kin nei hi atûn hring laia hrang vai ni no sian, mi murdi nêka lungkhamom tak ni ei ti.
20 Khannisian, Krista chu mithi lai ata kaithoi a ni ngêta, mithihai thoinôkna mahruaitu a ni. 21 Mihriam sikin thina a lei oma, mihriam sika ngêt thoinôkna khom a lei iom a ni. 22 Mi murdi Adama leh an irzomna sika an ithi ang khan mi murdi Krista leh an irzomna sikin kaithoiin om an ti. 23 Aniachu, mâni zoro senga kaithoi ni an ti; a masa taka Krista a nia, Krista tahai chu a zuang nôk tika kaithoiin om an ti. 24 Kha hnung chu zoro mong hong tung ta a ti; Krista’n roirêlnahai le irchamneinahai le sinthotheinahai kha inboi zit a ta, Ram kha Pa Pathian kuta bâng ta a ti. 25 Pathianin a râlhai an hnê zita, a ke bula a sia mâka chu Krista a inlal mai hrang a ni. 26 Râl hnungkhôn tak inhne hrang chu thina hi a ni. 27 Pathian Thubu’n, “Pathianin itinrêng a ke hnuaia a sia zit,” a tia. Khasikin “Itinrêng” ti chong hin Pathian, itinrêng Krista ke hnuaia setu chu huap mah ti a inlang a ni. 28 Khan, itinrêng Krista’n lalna hnuaia a sia tika chu Nâipa ngei khom Pathian itinrêng a hnuaia setu hnuaia om a ta, Pathian chu itinrênga tinrêng ni ta a ti.
29 Khaang khan a ni no’n te, mithi irthûla baptisma changhai kha itin mo an itho hrang? Mithihai chu kaithoiin an om no hrangin te, i hranga anni irthûla baptisma an ichang ngai mo? 30 Eini khom itho sikin mo dârkâr tina ichia ei iom ngai ma ni? 31 Urênghai, ei Rengpa Jisua Kristaa nangni ki songna kha sâmin, “A nitin thina ki tong ngai,” ki ti a ni. 32 Mihriam tho lam ringota Efesi-a sahrânghai irsualpui ki ni’n teh, ki ta hrangin, imo ar fêna om hranga? Mithi kaithoiin an om no hrangin chu senkhathai iti ngai ang khan “Tho fa ei ta, lei in rei, nangtûka ei thi zôi hrang sikin,” an ti ngai. 33 Hruai irhmangin om no roi, “Rual sualin nunchan sa an siat ngai,” ti a ni. 34 Fel takin har unglân, sual ta no roi. Nin laia mi senkhat chu Pathian inhriatna zel nin nei no sikin nin inzakna hranga hi hi ki iti a ni.
Thoinôk takpum
35 Itin mo mithihai kha kaithoi an ini hrang? I ang takpum mo an irput hrang? tiin nin irdon a ni thei.
36 Nangma mi’nto! Irnênga chi ni tû khomin a thi bak no’n chu mông ngai mah kha teh. 37 Khan, ni chi tu khom kha a takpum la om hrang chu tu mak chea, a’rmal vai ni tû ngaia, bu’rmal chi dang i khôk irmal mani a ni thei. 38 Khannisian, Pathianin a nuamlam takin takpum a pêk ngai, chitin an takpum seng kha. 39 Taksa murdi hi taksa chi inkhat ni mah; mihriam taksa a danga, sa taksa a danga, va taksa a danga, nga taksa a dang a ni. 40 Khabana, irvân takpum a oma, irnêng takpum khom a om; irvân takpum roiinpuina a dang a nia, irnêng takpum roiinpuina khom a dang a ni. 41 Misa roiinpuina a danga, tha roiinpuina a danga, ârsihai roiinpuina khom a dang a ni, ârsi le ârsi khom roiinpuinaa chu irang mah.
42 Mithi thoinôkna khom hi, khaang khan a ni. Hmon theia phûmin a oma, hmonthei loia kaithoiin om a ti; 43 Hmêl setak le hrât loi taka phûmin a oma, enhoi tak le hrât taka kaithoiin om a ti. 44 Mihriam takpuma phûmin a oma, irtha takpuma kaithoiin om a ti. Mihriam takpum a om sikin irtha takpum khom a iom hrang a ni. 45 Pathian Thubu’n, “Mihriam masa tak, Adama kha mihriama siam a ni,” a tia. Adama hnungkhôna kha chu hringna pêkpu Irtha a ni. 46 Irtha kha a zuang iom bak ni maka, taksa kha a zuang om baka, kha hnung irtha a zuang iom a ni. 47 Adama masa kha chu pila siam, irnênga irthoka hong a nia; Adama inhnina chu irvâna irthoka zuang a ni. 48 Irnênga siamhai chu irnênga Siamtu ang kha an nia, irvâna mihai chu irvâna Mi ang kha la nih ei ti. 49 Khan, irnênga siamtu ang kha ei ini angin, irvâna irthoka zuangpu angna khom la nei ei ti.
50 Urênghaio, “Taksa le thisenin Pathian Ram lua thei no nia, a hmon thei hin hmon theiloi kha lua thei ual no ni,” ti hi a ni. 51-52 Hi thutak irthup hi irngai roi. Ei rêngin chu thi zit no ih, khannisian, bekul hnungkhôn an ring tena chu voikhat rengin, mitkhapkâr vakin indanglamin om seng ei ti. Bekul an ring tikin chu mithihai khom thi nôk zit loi hrangin kaithoiin om an ta, eini khom indanglamin om seng ta ei ti. 53 A hmonthei hi hmon theiloia chang a ta; a thi thei khom hi thi theiloia a ichang hrang a ni. 54 Khasikin hi hmonthei hi hmon theiloia changin a oma, hi thi thei khom hi thi theiloia changin a om tikin chu “Inhnêna’n thina an lem zoi ta! 55 O thina nin hnêna kha khôn mo a iom tâk? O thina, ni tûr kha khôn mo a iom tâk?” ti thu irziak kha hong tung ta a ti.
56 Thina tûr chu sual a nia, sual sinthotheina chu Dân thu a ni. 57 Khannisian, ei Rengpa Jisua Krista zâra inhnêna ni pêktu Pathian kuang lômthu om ri se! 58 Khasikin urêng lungthunghai, det takin châng viat loiin om roi. Rengpa Sin nin itho rêng rêng chu a korong chang viat mah ti nin inhriat sikin, Rengpa Sin chu sathnem irngai takin sin mai roi.
1 Khan, Judai rama Pathian mihai ta hranga tholôm tho thu kha, Galatia rama Koiindanghai kuang thu ki pêk ang khan nangni khomin lei tho sa roi. 2 Pathianni rikipin nin sika nin sum hlo lam ang sengin lei bûm roi, ki hong tika tholôm irfuang a nang loina hrangin. 3 Khan, nin thilpêk chôia, Jerusalema fe hranga tukhom a sa nin iti tak lekhahai chôiin ki hong tika tîr ki ti. 4 Ki ife sâna hrang irhoi a ni len vângin chu keima ni zui an ti.
Paula’n inzin a tum thu
5 Makedonia ram ki’rfang a nang sikin, Makedonia ram irfang zoi bak ki ta nin kuang hong ki ti. 6 Nin kuang chu sôtzan chu om ki ti, phalbi sûng chu a ni thei, khoa khom ki fena taka nin ni intha theina hrangin. 7 Atûna fe malama nangni hmu chu nuam ma unga, Rengpa’n sa a ti’n chu nin kuang sôtzan cham ki’rtûng a ni. 8 Efesi khua hin pentikos nî tena chu om ki ti. 9 Hi khua hin a ni doi tamtak om khomhai sian, sin roiinpuitak le sin kâmnang tak ki sin theina hranga zoro’nchum tak a iom a ni
10 Timothea a hongin chu mâni in ang taka nin kuang a om theina hrangin lei lôm unglân, lunghnâng lei tho roi, keima anga Rengpa sin tho a ni sikin. 11 Tûte’n hnuaisia no ri sehai, irtharngam takin ki kuang a hong tung theina hrangin intha ual roi; urênghai leh hmunkhata hong hrangin ki lei itûng kêng.
12 Ei urêngpa Apolova thu kha chu, urêng danghai leh hmunkhatin nangni hong hro hrangin kin thor maia, khannisian, hi zoroa hong hrangin chu nuam viat mah, zoro’nchum a hmu leh chu hong a ti.
Thu khârna le chubai mûkna
13 Irtûng chianin om unglân, iamnaa ngîrindet unglân, hâi unglân, hrât takin om roi. 14 Nin sin murdi lungthungna’n sin roi. 15 Stefana le a in mihai thurchi kha nin inhriat, anni kha Akaia rama Kristian chang masa tak an nia, khabana, Pathian mihai sintho hranga irpêk an ni. 16 Khaanga mihai le an isinpuihai le an sin lei tho pe ngaihai irchamneina kha pomin, an thu zôm hrangin nangni ki ngên a ni.
17 Khan, Stefana hai, Fortunata hai, Akaika hai honga hin a sân an nin lôm a ni; anni hin nin omloi khom irdang loiin an ni siama, 18 nin lungrîl nangnia inhartir ang khan kei khom an nin hartira, hiang mihai hi irngaiinhlu roi.
19 Asia ram Koiindanghai hin chubai nangni an mûk. Akuila le Priskili le an ina Koiindang inkhômhai hin Rengpa irhmingin chubai nangni an mûk mur mur a ni. 20 Urêng murdihai khom hin chubai nangni an mûk; irtum irthiangin chubai irmûk irhlôm roi.
21 Hi hi, kei Paula’n, keima kut ngeia irziakin chubai nangni ki imûkna a ni. 22 Tukhom, Rengpa lungthung loi chu vânnisalin om ri se! Maranatha: Ei Rengpa a zuang e! 23 Rengpa Jisua lungkhamna kha nin kuang om ri se. 24 Krista Jisuaa lung nangni ki thungna hi nin rênga kuanga om ri se. Amen.
1 Paula, Pathian lungdoa Krista Jisua tirtôn le ei urêngpa Timothea khan, Korinth khuaa Pathian Koiindanghai le Akaia ram pumpuia Pathian mihai kuang khan: 2 Pathian ei Pa le ei Rengpa Jisua Krista’n lungkhamna le irngeina nangni pe ri se.
Paula’n Pathian kuanga lômthu an sîrna
3 Ei Rengpa Jisua Krista Pathian le Pa, khonzana sip, Pa, changpuina murdi luangsuakna Pathian kuanga lômthu insîr ei ti. 4 A kuanga irthok ata ei idong changpuina ngei kha hmangin buaina chi tinrêng nei mihai ei changpui theina hrangin ei buaina tinrênga Pathianin a ni changpui ngai. 5 Krista tuangna tam takhaia dongtum ei inei ang khan Krista zârin Pathian changpuina lian khoma dongtum ei inei a ni. 6 Kin tuangin chu, changpuina le saninhringna nin hmûna hrang a ni; changpuina kin omin chu, nangni khom changpuiin nin oma, tuangna kin ituang kha tuangtheina neia ituang hrangin hrâtna ipêkin nin iom a ni. 7 Khasikin nangnia kin tûngna kha inhnîng viat ngai mah; kin tuangnahaia dongtum nin inei ang khan kin changpuina donghai khoma hin dongtum nin nei sa ti kin hriat.
8 Urênghai, Asia rama buaina kin itong thurchi kha inhriat tharna nangni pêk kin nuam. Kin chunga puak isiahai kha a lian hrai sik le a rik hrai sika khan la hring hrang tûngna rêng nei ma ung. 9 Kin chunga thina roi an irêl tâkin kin hriat. Khannisianlân, kha kha chu nangnia irnghat loia Pathian, mithi kaithoi ngaitu kuang kin irnghat thei ualna hranga a lei ni. 10 Ama khan kha thina ichiom tak ata kha a ni saninhring tâka, ni la saninhring a ti; ni la saninhring nôk mai a ti, tiin kin tûngna amaa kin irnghata, 11 nangni khomin kin ta hranga chongchaia nin ni changpui ang khan. Khanchu, kin ta hranga chongchaina tam takhai kha sâmin Pathianin sat a ni vur ta, kin irthûlin mi tam takin a kuanga lômthu insîr an ti.
Paula tumna irthûlna
12 Hi rammuala kin hringnuna le a bîkin nangni leh kin irzomna khan lungkhamna sinthotheina sikin Pathian ipêk irthiangna le dikna an ni vong ti kin sia le sa inhriatna’n a ni hril sikin kin irsong a ni. 13-14 Nin itep thei le nin inhriat thei kai kêng nin kuang kin irziak. Atûn ni lan hre thei ving no khom unglân, ni lan hriat thei tak tak nin tih ti ki tûng, ei Rengpa Jisua Nikhuaa khan nangni kin song lam ang taka nin ni song theina hrangin.
15 Khahai murdi kha kin hriat infel, voi hni satvura nin om theina hrangin nangni hong hro bak ki tum. 16 Makedonia rama ki fe malamin nangni hong hroa, ki hong kîr nôk tiang khom nangni hong hro nôk ki tum a ni, Judai rama kin zinna hranga khan nin ni changpui theina hrangin. 17 Hi ki tumna sika hin tumna detloi mi ang khan ki inlang ma ni? Hi ki tumnahai hi mâni hranga sa tûng sika “A ni, a ni” le “Ni mak, ni mak”, inrual taka ti hranga tum mo ki ini ma ni? 18 Pathian thutak hril a ifel ang khan nin kuanga ki chonginkung khom kha “A ni” le “Ni mak” ni mah. 19 Pathian Nâipa, Jisua Krista, a thu Sila, Timothea le keima’n kin insîr kha, “A ni,” le “Ni mak,” a ni no sikin, Ama kha Pathian “A ni” ti a ni. 20 Pathian chonginkunghai murdi “A ni” a ni sikin. Khasika khan kêng Jisua Krista zârin Pathian roiinpuina hrangin “Amen” ei ti ngai.
21 Krista leh irzoma nangni le hringna nin hmutirtu kha Pathian a nia, a sintho hranga nin dangtu khom ama dên a ni, 22 ama khan ama ta ei nina irsinsia ei chunga a siaa, ei ta hranga thil a ibûmhai khapna’n ei lungrîla Irtha Irthiang a ni ipêk a ni.
23 Ki inhriatpuitu hrangin Pathian ki ikoi a ni, ama khan ki lungrîl an hriat. Nangni hoi hrang sika Korinth khua ki hong kâi ta loi a ni. 24 Nin iam ngêt hrang thu nangni insîr pe tum ma ung, iamnaa khan nin ngîr indet ti kin hriat sikin. Kha nêkin, nin raifânna hrangin nangni leh sin kin tho ual a ni.
1 Khasikin, irngaiinsiat nangni sak hrangin chu nin kuanga hong nôk ta no inlân ti ki lunginchong tâk a ni. 2 Irngaiinsiat nangni sak inlân, tu’n mo raifân ni sak hranga? Ngaisiat ki sakhai ti no chu tûte om mah. 3 Ki hong tika nin lômtir hranghaiin ki milung inna loina hrangin kha lekha kha nangni ki hong ithon a ni. Ki râi a fânin chu nangni khom nin râi a fân sa ngai tih kin hriat sikin. 4 Lungrîl inbuai le beiindong taka mit irthi tam tak tâkpuma ki irziak a ni; ki thil tum chu nin milung innatir loia, nin rênga lung nangni ki ithungzia hi nin inhriat theina hrangin a ni.
Thil tho’nsualtu ta hranga ngaidamna
5 Atûn hin tukhomin mi lungrîl an natirin chu, keima lungrîl innatir ni maka, nin rêngin nangni lungrîl nangni a inna vi viat pak a ni. (Hi ki iti nasan chu a chunga inngar hrai ki nuam no sika a ni). 6 Kha mi kha chu nin laia mi a tam ualin kha anga dûk nin itho kha a iruk a ni. 7 Khan khoma ngaidam unglân, lungrîl na’n a sip hrai nona hrangin inthor sa roi. 8 Khaanga, ama kha lung nin thung ta tak tih inhre hrangin nangni ki ngên. 9 Nin kuanga ki’rziak nasan chu fianahaia nin lei hong inngîr insa dân le nangni ki hrilna chong zoro tina zôm mai hrangin mo nin irsiam tih inhriat ki nuam sika a ni. 10 Mi tukhom nin ingaidam ka chu kei khomin ki ngaidam. Keima khomin ki ingaidam tâk chu, a dik takin i khom ngaidam hrang ki inei chu nangni sikin Krista makunga ki ingaidam ngai a ni. 11 Setana’n ei chunga zoro’nchum a hmu loina hrangin; a tumnahai ei inhriat chian sikin.
Troas khuaa Paula lungdûkna
12 Krista Thurchi Sa insîr hrangin Troas ki tungin chu, khataka sintho hrangin Rengpa’n lam a nin hong pe ki hmu. 13 Khannisianlân, ei urêngpa Tita ki hmu no sikin ki milung dûk a tong ok. Khasikin khataka mihai kha chongbâi hoiin kin thaa, Makedonia rama ki fe ta.
Krista zâra inhnêna
14 Khannisianlân, Pathian kuang lômthu om ri se! Krista inhnêna sika lampui hrôna khan mi intâng ang khan Pathianin Krista leh irzomin a ni hruai mai ngai sikin. Krista inhriatna thu kha hmun tina mirimhoi ang khan irthekindarh hrangin Pathianin a ni ihmang ngai a ni. 15 Keini chu Krista’n mirimhoi hâl Pathian kuang a inhlan, saninhring thiaihai le ar hmang thiaihai laia inthekindarh ang kha kin ni.
16 A’rhmang thiaihai ta hrangin chu thina hrang mirimsia a nia; saninhring thiaihai ta hrangin chu hringna hrang mirimhoi a ni. Khante, tu mo kha sin hranga a chuk hrang tâk? 17 Mi tamtak chu Pathian thu hi irvaina hmang an iom ang khan, keini chu hmang ma ung. Pathianin a ni tîrna sikin Krista zuituhai ang khan Pathian mit hmua dik takin kin ichong a ni.
1 Mâni irhril insa ei iphut nôk mani ta rêk? A ninole, mi danghai ang dênin irhril insana lekha ei ichôi mo, nin kuang ata kin ilâk mo a inang ta ma ni?
2 Nangni hi kin lekha, kin milung sûnga irziak, mi tin inhriat le tep kha nin ini kêng. 3 Nangni hi Krista lekha, keini a ni irziaktir, lekhatuia irziak ni loi, Pathian hring Irthaa irziak a ni, lungphêka irziak khom ni maka, taksa milung phêka irziak nin nih ti an lang infel a ni. 4 Krista zârin Pathian kuang iamna kin nei sikin kha kha kin iti a ni. 5 Keini ringotin chu chuk ma unga, keini itho anga insîr hrang ite om mah, kin ichukna chu Pathian ni ipêk a ni. 6 Ama khan Thuthung Thar sintho inrukin a ni siama, kha kha, Dân, horopa irziak ang kha ni maka; Thuthung Thar, Irthaa irziak kha a ni. Dân, horopa irziak khan, thina an tungtira, Irthaa chu hringna an tungtir a ni.
7 Mosia hmêl boi nôk zôi hrang lua Israel nâihaiin an ien mai thei loi dôrin a roiinpuia; lung horopa irziak, thina intungtu sin thôna lua, khaang taka roiinpui a ni’n chu, 8 Irtha sinthôna kha a iroiinpui ual hrang mo ni mah? 9 Thiamloina intung ngai dân lua mina a roiinpuiin te, saninhringna intung ngai sinthôna kha idôra roiinpui ual mo a ini hrang! 10 Roiinpuina vâr ual ok sika khan zoro thenga roiinpuina vâr kha chu om mah kin ti thei. 11 Kha zoro sôtloitea lua khan roiinpuina a omin te, kumtuanga hrang vânga kha teh idôra roiinpuina lian ual mo a iom hrang tâk!
12 Kha tûngna kha kin nei sikin kin ihâi a ni. 13 Keini chu Mosia ang khan ni ma ung, ama khan vâra chuai tîr tîr boidipna kha Israel mipuihaiin an hmu loina hrangin a hmâi kha irkhuna’n a’rkhûa. 14 A dik takin, an milung sûng kha ar khâr a ni, a vuan sûn ten khoma hin Thuthung Lui an tepin chu kha irkhûna ngêt khan an milung sûng ar khu ngai. 15 A vuan sûn ten khoma hin Mosia Dân an tep rikipin irkhûna khan an lung sûng a la’rkhu mai ngai.
16 Khannisianlân, Rengpa tiang an irnghat tika chu, kha irkhûna kha pai ni ta a ti. 17 Hi hmuna “Rengpa” ti hi chu Irtha a nia, khante, Rengpa Irtha omna tina chu zalênna a om ngai. 18 Keini chu kin rêngin hmâi irkhu loiin Rengpa roiinpuina chu kin inlangtira, roiinpui ata roiinpui ual ual hrangin, ama irangpuia om hrangin, irthiangtir mai ei ni, kha kha Rengpa ti a ni, ama kha Irtha a ni.
1 Pathianin a lungkhamna’n hi sin hi tho hrangin a ni pêka, khasikin kin zâmirzaltir ma ung. 2 Thil irthup le inzakpuiom sinhai kha kin mâka, milakin sin ma unga, Pathian thu huangna khomin hmang sa ma ung. Thutak vârna irkipin Pathian mithmua khan inlêngin mi tin sia le sa inhriatna mit tung kin tum ual ngai. 3 Kin Thurchi Sa insîr hi thupin a omin chu, ar hmang chianhaia irthokin ithupin a iom a ni. 4 Hi rammuala pathian saloi khan an milung inchong inthima a sia pehai sikin an iiam loi a ni. Krista, Pathian angna neitu roiinpuizia Thurchi sa vâr an chunga zuang inlang kha an hmu loina hrangin an mit a incho pehai a ni. 5 Keini thu insîr ma unga, Jisua Krista chu Rengpa a nih ti kin insîra, keini khom Jisua sikin nangni suakhai kin ni iti kin insîr ual ngai.
6 “Inthima irthokin vâr hong vâr suak a ti,” tihtu Pathian ngêt khan a ni, Krista hmêla Pathian roiinpuina vâr suak kin inhriatna hrangin kin lungrîl a ivâr tâk a ni.
7 Khannisianlân, keini, irtha tianga irchon neihai hi pil bêl ang kha kin ni, irtha lian kha kin ta ni loiin Pathian ta a nih ti an lang theina hrangin. 8 Inbuai maiin kin oma, khannisian, duai ma ung; a kâra chu lunginzîngin kin oma, khannisian, kin beidong viat ngai mah. 9 Râl tamtak an oma, khannisian, rual nei loiin om ngai ma ung; pop chitin om ngai khom inlân, irhmang ripin chu om ma ung. 10 Itiklai khomin kin takpum thi theia hin Krista thina kin irput mai ngai, a hringna khom kin takpuma hin an lang theina hrangin. 11 Kin hring kâr ka chu Krista sika thi hrangin kin irtûng mai ngai, a hringna khom kin takpum thi theia hin an lang theina hrangin. 12 Kha omzia chu keinia thina’n sin a thoa, nangnia hringna’n sin a itho a ni.
13 Pathian Thubu’n, “Kin iam sikin thu ki insîr a ni,” a iti ang khan, kha iamna irtha ngêta khan keini khomin thu kin insîr a ni, kin iam sikin. 14 Rengpa Jisua kaithoitu Pathian khan keini khom Jisua pâlin ni kaithoi a ta, nangni leh a makunga ni hruai a tih ti kin inhriat. 15 Hihai tinrêng hi nangni hrang sika a ni; Pathian lungkhamna’n mi tam ual a izo tîr tîr ang khan, khahai khan Pathian roiinpuina hrangin lômthu insîrna chongchai Pathian kuang inhlan ual ual an ti.
Iamnaa hring
16 Khasika khan kin zâmirzal viat ma ung. Kin taksa mihriam hi hong hmon tîr tîr khomsian, kin irtha mihriam chu a nitin siamintharin a iom mai a ni. 17 Sôtnote sûnga kin intakna tuang nêp taka hin kumtuang roiinpuina, tetûk inruk loi dôra irkhêl, a ni siam pe a ni. 18 Thil hmu theihai chu thîr mak mea, thil hmu theiloihai chu ei ithîr ual a ni. Thil hmutheihai chu boi nôk zôi a ta, thil hmu theiloihai chu kumtuangin om a ti.
1 Ei omna irnênga in hi siat khom sian, irvâna in, kuta sinloi, kumtuanga om mai hrang, Pathian kuanga in det chu ei neih ti ei inhriat. 2 Irvâna ei omna hrang ina khan, a nir khu hrang irzuk tak takin hi ina hin ei inrung tak tak ngai a ni; 3 Kha kha ei silin chu takpum boiin om no ih. 4 Hi irnêng ina ei om laia hin puak rikin ei inrung tak taka, silkai boia om ei nuam sika ni maka, silkai thua om ei nuam sika a ni, thi thei hi hringna inlem zoiin a om theina hrangin.
5 Khaang hranga khan a ni siam irfûktirtu chu Pathian a ni, irkhâmna Irtha ni pêktu kha. 6 Khasika khan takpum ei om sûng hin Rengpa kuang om mak meh ti inhriatin kumkhua’n ir-ial takin ei om ngai. 7 Ei hringna hi hmu theia fe loiin, iamna’n ei ife ual a ni. 8 Ir-ial takin ei om, ki iti, taksaa om loia Rengpa kuanga om ei nuam ual a ni.
9 Khasikin om inlân, om no inlân, ama nuamlam mi ni ei itum ngit ngai hrang a ni. 10 Mi tinin taksaa sinthohai, a sia mo, a sa mo, ei itho ang taka ei hmu theina hrangin Krista roirêlna toihmun makunga khan inlangin ei iom zit hrang a ni.
Krista zâra Pathian leh rual irchangna
11 Rengpa chi lam kin hriata, mi kin inthêm ngai a ni. Pathianin a nin hriat infel zit, nangni khomin nin lungrîlin nin hriat infel sa nin ti ki tûng. 12 Nin kuang kin sa lam kin insîr ni mah, om dân tiang ni loia kha a chungphua ringota irsong ngaihai kha nin sâm theina hrangin keini nin ni songna hrang bi nangni kin insîr pe ual a ni. 13 Kin into ta tak ma ni? Pathian hrang sika a ni. A ninole kin ivâr ma ni? Nangni hrang sika a ni. 14 Krista lungthungna’n a ni irêl a ni, mi tin ta hrangin mi inkhat a thia, kha omzia chu an rêngin a thina kha an irkoppui a nih ti atûn chu kin infel ta. 15 Khan, a hringhai khan anni ta hrangin hring ta loia, an ta hrang sika thia thoinôktu ta hrang vaia an iam theina hrang takin a ni, mi murdi ta hrangin a ithi kha. 16 Khasikin mihriam irkhî lamin tûte hril insiat ta no ni ung. Mihriam irkhî dânin Krista lei inhre ta khom unglân, tho ta ma ung. 17 Tukhom, Kristaa a omin chu, thilsiamthar a hong nia, thil miluihai chu a boia, irngai u ta, a hong thar ta.
18 Khahai tinrêng kha ei râl irchangna irthoka Krista zâra a rualhai ni siama, mi dang khom a rualhai a siam theina sin ni pêktu Pathian khan a isin a ni. 19 Kin thu’nsîr chu hi hi a ni, Pathianin Krista zârin mi tinrêng a rualhaiin a siam tâk. An sualhai kha insâp pe ta loiin, a rualhaia a siamzia thu kha keini hi a ni ipêk tâk a ni. 20 Khasikin Krista hranga palai kin ni. Pathianin nangni a ngênna kha keinia a ibâng a ni. Krista irthûlin nangni kin ngên: Pathianin râl nin nina irthokin a rualhaiin nangni siam ri se. 21 Krista khan sual nei mah, Khannisian, ama leh irzoma Pathian felna kha ei dong sa theina hrangin Pathianin ei sual a indong a ni.
1 Pathian lungkhamna nin idong kha chanlamboia nin hmang inhek loina hrangin keini a sinthopuihaiin nangni kin ngên. 2 Pathianin, “Nangni ki ngaitua zoro a hong tungin,
Nangni ki ngaituaa;
Nangni ki saninhring zoro a hong tungin,
Nangni ki changpui ngai,”
a ti. Irngai roi! Atûn hin zoro lômom tak a nia, atûn hin saninhringna ni chu a ni.
3 Kin sinthôna hin tûte’n an ni demna hmu nohai sian ki nuam a ni, khasikin tûte lampuia khom lam chaninvâitir tum ma ung. 4 Kha nêkin, kin sinthôna tinrênga buainahai, dengtheinahai le intaknahai diar taka tuangin, Pathian sinthotuhai kin nih ti kin inlang ual ngai. 5 Zêm bitin, intângna ina khumin le mipui zêmin kin oma; sinsôlin, inmu inhnâiin le bu ngheiin kin om ngai. 6 Kin irthiangna hai, inhriatna hai, tuangna hai le khonzana hai sikin Pathian sinthohai kin nih ti kin inlang ngai. Irtha Irthiang sikin, kin lungthungna dik sikin, 7 thutak kin insîrna sikin le Pathian irtha sikin. Mi doina hrang le keini ir-enkolna hrangin felna kha tukfamin kin nei ngai. 8 Chôiirsângin le mualphoi sakin kin om ngaia; irkôkinsia le inpâkin kin om ngai. Milakhaia bê kin nia, khan khomin thutak kin insîr ngai; 9 mi inhriatloi angin kin oma, khan khoma mi tinin an nin hriat; ithi ang dôra omin, khannisian, nin ni ihmu ang khan kin ihring a ni. Hremin kin tuang khomin, that chu ni ma ung; 10 Lungdûk irsak ni khom unglân, ki lôm mai; inriang kin ang, khannisian, mi tamtak kin irchong; ite neiloi kin ang, khan khoma thil tinrêng kin nei zit.
11 O Korinth rual lungthunghai! Nin kuang fel takin kin iti tâk a ni; kin lungrîl kin inhong irzattir tâk. 12 Keini chu kin lungrîl nangni tiang khâr ma unga, nangni chu nin lungrîl keini tiang nin ikhâr a ni. 13 Ki nâihai anga nangni bê’n atûna hin kin iti a ni; Nin ta hranga ngaituana kin nei lam takin nangni khom nei roi. Nin lungrîl inhong irzat roi.
Pathian hring Tempil kha nin ni
14 Iamno mihai inthurualpui no roi. Felna le sualna’n imo irhlopna an nei? Vâr le inthim khom ar kop thei moa? 15 Krista le Beliara khomin irnaina imo an nei? Iamtu le iamloi imo kopirkâina an nei? 16 Pathian tempil le millimhai khomin imo irzomna an inei? Eini chu Pathian hring tempil kêng ei ni.
Pathianin, “Ki mihai kuang in sin ki ta,
an kuang om ki ti;
Keima an Pathian ni ki ti,”
a iti ang khan.
17 Khasikin, “Anni laia irthokin hong suak unglân,
A bingin om roi,
Thil porinche rêng rêng tôn no roi,
Rengpa’n a ti.
Khanchu, nangni pom ki ti.
18 Keima nin Pathian ni ki ta,
nangni ki nâipahai le ki nâinuhai ni nin ti,
Rengpa Itinrêngthothei khan a ti,”
a iti a ni.
1 Ki rual lungthunghai, kha chonginkunghai murdi kha eini hrang a ni. Khasika khan, takpum le irtha porinche thei thil ata irkiang ei ta, Pathian mahrip tho pumin irthiangna irkiptir ei ti.
Koiindang mihai irletnaa Paula lômthu
2 Nin lungrîl hmun nin ken roi. Tûte chunga tho’nsual ma unga, tûte insiat ma unga, tûte chunga khom inlâpna zong ma ung. 3 Ama kha thiamno inchangna hranga ki iti ni mah; matona ki iti tâk ang khan, lung nin ni thung ok sikin hmunkhatin ei iom mai a ni, ei hring le khom ei thi le khom. 4 Nangni kin hriat infel oka, nangni ki song tak tak a ni. Kin buaina tinrêng khoma khan lungrîl hrâtna’n ki sip maia; râifânna’n ki isip lêt a ni. 5 Makedonia ki tung hnung khoma khan, irngamna zel nei ma ung. Hmun tina buaina a oma, mi leh irsualin kin oma, kin lungrîla chitna kin nei. 6 Khannisian, Pathian, lungrîl ngûi inthorinhar ngaitu khan Tita hongna sikin a nin thorinhartir. 7 A hongna ringot kha nin ilôm ni maka, ama nin lei inthor inharzia a ni hrilna khom kha a nia. Ama khan, ni hmu nin nuamzia hai, nin milung nin ni inlêngpuizia hai le ni thop hranga nin irsiamzia hai a ni hril sikin, atûna hin chu ki lôm ual ok tâk.
8 Ki lekha thon khan lungdûk nangni tho khom sian, irsîr ta ma ung, zoro sôt ok loi chu lungdûk nangni a tho ti kin hriata, ki irsîr a ni. 9 Khannisianlân, atûn chu ki râi a fân ok, lungdûk nangni ki tho sika ni loiin, nin lungdûkna khan nin lampui nangni an tung sikin a ni. Kha lungdûkna kha Pathianin a ihmang a ni, khasikin nin chunga tho’nsual ma ung. 10 Lungdûkna, Pathianin a ihmang khan lungrîl irthûlna nangni pêkin saninhringna nangni an tungtir sikin. Khannisianlân, mihriam ringot lungdûkna chu thina a tung ngai. 11 En u ta, nin lungdûknaa Pathian sintho hi, sathnem irngaina nangni an neizia hai, nin irthiangzia fia nin nuam dân hai, ninginthikna hai, irningna hai, ngaituana hai, irpêkna hai, tho’nsualna hai dengintheina hai hranga nin irsiam dân hai kha! kha thu rêng rênga khan nangni chu sêlna om mak chêi ti nin inlang a ni. 12 Khasikin nin kuang irziak inlân khom a sual thotu sika khan ki irziak ni maka, a sual tuangtu sika khan khom ki irziak ni maka, kin chunga nin sathnem irngaizia Pathian mit hmua nin kuanga inhriattira a om theina hrangin ki irziak ual a ni.
13 Khasika khan kêng inthorinharin kin iom. Inthorinhara kin iom vai ni loiin, Tita nin lei changpuina zâra a lômna sikin keini khom a ni inlôm tak tak a ni. 14 A kuanga nangni song ngai khom inlân, mualinphoi ma ung. Nin kuang thutak kin hril mai ngai, khaang khan, Tita kuanga nangni ki songna khan a dik iti a ifia a ni. 15 An irchûna thuhai zôm hranga nin rêngin nin irsiam zia hai, ichi le inthing puma ama nin lei lômzia hai kha an hriat mai sikin, nin ta hranga a lungthungna ar sôn ual ok ta. 16 Nangni ki’rnghat zit thei sikin ki lôm tak tak a ni.
1 Urênghaio, Makedonia rama Koiindanghai laia Pathian lungkhamna sintho kha nin inhriat hrangin kin inuam a ni. 2 Buaina an tonga khan fia tak takin an oma, khannisianlân, an raifânna a lian tak tak sikin inriang tak ni khomhai sian, tikhoina tak neiin pêkna an inei a ni. 3 An thei dôr chu, an thei dôr nêka tam khom, an ipêk a nih ti nangni kin hriatpui a ni. 4 An binga lungdo’n Judai rama Pathian mihai changpuina lama sintum nei sa hrangin an ni ingên a ni. 5 Kha kha kin itûng ban a ni! A masa takin Rengpa kuang an irpêk baka, kha hnung chu Rengpa lungdo’n ki kuang an irpêk nôk a ni. 6 Khasikin hi sin phutpu Tita kha, kin ngên, hi lungthungna sin sa bîk hi sunzom maia nangni zoipui hrangin. 7 Nin inei murdi iamna hai, thu’nsîr theina hai le inhriatna hai, ni changpui hranga nin irzukna hai le lung nin ni thungna haia khan nin irchong ok sikin hi lungthungna sin khoma hin tikhoi sa hrangin nangni kin nuam a ni.
8 Ite dân nangni khang pe ma ung. Khannisianlân, mi danghaiin ni changpui an irzukzia hai nangni hmu’n lung nin ni thungna hi a dik ta tak mani iti inhriattir ki tum a ni. 9 Ei Rengpa Jisua Krista lungkhamna nei intamzia chu nin inhriat; inriangna sikin nin hong irchong theina hrangin irchong ok khomsian, nangni sikin a lei inriang tâk a ni.
10 Mini kuma nin iphut kha atûn hin zoi unglân nin ta hrangin sa a ti, ti hi keima irngaidân a ni. Sin hranga a phut masa vai ni mak chêia, sin hranga an milung masa khom nin ni sa. 11 Khaang khan, kha chunga irnghat maiin nin sin kha zoi ta roi! Nin lei itum tâk ang khan zoi hrangin irzuk unglân, atûna nin nei lam ang tak khan tho roi. 12 Pe hrangin nin irzukin chu, nin inei loi chunga ni loiin, nin inei chunga nin thilpêk kha Pathianin inham a ti. 13-14 Nangni puak nangni inpêlin mi danghai inzôk tum ma ung; khannisianlân, hi zoroa hin nin nei intam sikin ar samhai nin ichangpui chu a sa ok a ni. Khanchu, nangni nin irsama anni an nei intam khomin nangni changpui an ti. Khaang khan irangna om a ti. 15 Pathian Thubu’n,
“A hrût intam khan nei intam ual maka, a
hrût intom khan nei intôm ual mah,”
a iti ang khan.
Tita le a chanpuihai
16 Nangni changpui hranga kin irzuk lam ang taka Tita khom irzukna inneitu Pathian chunga kin lôm tak tak. 17 Kin ngênna a inham vai ni loiin, ama lung suaka nangni changpui irzukna nin kuang a hong ichuk a ni. 18 Ama le a urêng, Thurchi Sa insîrna sin a ithôna sika Koiindang murdi’n an imahriptu kha kin zu tîr sa. 19 Khabana, ama hi, hi lungthungna sin Pathian roiinpuina hrang le nangni changpui kin nuamna inlangna hrang kin sinnaa ni zui hranga Koiindanghaiin an inthanga an iphun a ni. 20 Hi thilpêk tam kin sem dâna hin tûte’n an ni sêl loina hrangin kin irdîn a ni. 21 Kin thil tum chu Rengpa mithmu vaia ni loiin mihriam mit hmu khoma dikna sin hi a ni. 22 Khasikin anni leh khan kin urêng inkhat kin zu itîr a ni; voi iza kin fiaa, nangni changpui a’rzuk tak tak iti kin inhriat. Atûn vâng chu tak nangni a sôn tak taka, nangni changpui a’rzuk ual ual tâk. 23 Tita hi chu ki rualpa, nangni ki changpuina lama sin ni thopui ngaitu a nia; urêng dang a changpuihai hi chu Koiindanghai irthûla Krista kuanga roiinpuina intungtu an ni. 24 Khahai kuanga khan nin lungthungna inlang roi, nangni kin songna chungchâng thua hin kin idik ti Koiindanghai murdi’n an inhriat infel theina hrangin.
1 Judai rama Pathian mihai changpuina inpêl chungchâng thu kha chu nangni kuanga irziak nang ual mah. 2 Changpui nin peiziahai kin hriata. Makedonia rama mihai kuang khan “Akaia rama urênghaiin chu mini kum ata changpui hranga an irsiam tâk kêng,” tiin nangni ki song a ni. Nin irzukna khan an laia mi tamtak an thora. 3 Khannisian, kha thua khan nangni ki songna kha a korong a ni loina hrangin, urênghai hi ki hong itîr a ni, ki ihril lam ang taka nin lei irsiam theina hrangin. 4 Makedonia rama mihai ngânin kin pâla ni zuang zuiin, nin irsiam loi zuang hmu ta duaihai sian, nangni kin iiam lia le te, nangni vai ni loiin, keini hi mualinphoiin kin iom hrang kêng. 5 Khasikin, inrenna thilpêk nin lei intak kha nin lei irsiam diam theina hrangin, hi urênghai hi ki matona nangni lei zuang sir bak hrangin ngên an nang niin kin hriata. Khanchu, ki zuang tung tena chu lei irfûk diam ta nin ta, nin nei sika ni loiin, nin nuam sika nin ipêk a nih ti inlang a ti.
6 Inhre roi, hiang lama hin chîmu a tû intômin chu inlût intôm a ta, a tû intamin chu ât intam a ti. 7 Mi tinin inpâm pum le pêk loi theiloi anga irngaia pêk ni loiin, an lungsuak lam ang taka pêk ni ri se; lôm taka pêkpu kha kêng Pathianin a lôm ngai. 8 Pathian chu nin innang thil sa tinrêng nangni a pêk theia. Khabana nin innang nêka tam khom thil sa nin tho theina hrangin nangni a pêk belsa thei a ni. 9 Pathian Thu bu’n,
“A sem indara irsamhai a pêka,
A khonzâna chu kumkhua’n a pangai a ni,”
ti irziak ang khan. 10 Khan, an thektu kuang chîmu petu leh fa hrang bai pêktu Pathian khan chîmu nin innang murdi nangni pêkin nangni irsôntir a ti, nin tikhoi irthoka khan ra tamtak nangni insua pe a ti. 11 Nin tik nin inhoi mai theina hrangin Pathianin nangni irchongtir mai a ta, mi tam takin nin thilpêk keima irthoka an hmu sika khan Pathian kuang lômthu insîr an ti. 12 Hi nin sintho hin Pathian mihai irsamna vai irfûk pe maka, Pathian kuang lômthu insîrna lian tak nghi sain a lêt mai a ni. 13 Hi nin sintho’n fiana a intung sika khan mi tam takin Pathian kuang roiinpuina pe an ti. Krista Thurchi Sa nin inpuang ngaia iam nin om sik le anni ta hrang le mi tin ta hranga nin tikhoi sika khan. 14 Khasikin lungthungna inthûk tak neiin nangni chongchai pe an ti, Pathianin lungkhamna bîk nangni ar hmutir sika khan. 15 A thilmanboi pêk sika khan Pathian kuang lômthu insîr ei ti.
1 Keima, Paula, nin laia ki oma nin chunga irngaiintôm le dâiriama oma, nin kuanga ki om no le nin chunga lum raka om ngaitu an iti hin Krista thuhnuairôlna le nunhoina songin nangni ki ngên a ni. 2 Ni kuanga ki hong zoro hin rammual mihai lunginchong anga sin thoa ni’rngaituhai chunga ngar ngit hrang ki ni, nangni chunga chu ngar ngit hranga nin phût loi hrangin nangni ki ngên. 3 Rammuala om chu ei ni, khannisian rammual mihai lungrîl irput anga bei ni mak meh. 4 Kin râlhai doinaa kin ihmang râlthuamhai chu rammual râlthuam ni maka, Pathian râlthuam irnak nei a ni ual; ama kha kulpui det takhai siana’n kin hmang ngai. Irsêlna dik loihai kin inboia; 5 Pathian inhriatna dân hranga lârirpâkna lamchâina tinrênghai kha kin seta, ngaituana tinrêng suaka hruaiin Krista thu kin zôm ngai. 6 Iam nin om tak tak tih nin fia zoiin chu iamom loihai denginthei hrangin irsiam zel kin ti.
7 Thilhai hi a chungphuaa an inlang dân nin ien a ni. Kha khan tu mo khat Krista mia irbe a iom ma ni? A sa, a omin chu, a bingin a chungchâng ngaitua nôk ri se, ama a ini ang takin keini khom Krista ta kin ni sikin. 8 Nangni setna hrang ni loia nangni indingna hranga Rengpa’n irchamneina a ni ipêk hi song ual viat khom inlân, inzak ma ung. 9 Ki lekha thona nangni insi tum anga inlang chu ki inuam loi a ni. 10 Mi senkhatin, “Paula lekha thonhai hi a ngarin a naa, khannisian, ei kuang a omin chu a taksa a’rzala, a thuhai khom ite ni mah,” ti an ti. 11 Khaanga mihai khan, hmun danga kin oma kin lekha thonhai le nin kuanga kin oma kin sintho hrang kha a danglamna om mah, iti an inhriat ngêt hrang a ni.
12 A dik takin, mânia irpâka irsâng oka irbêhai laia khan chu irtepin anni leh irkhî ngam ma ung. An invêt bâka! Mâni le mâni an irkhîna hrang le an irrêlna hrangin anni na nâkin dân an siama. 13 Khannisianlân, keini chu, kin irsongna kha a ten om kêng; Pathianin sin a ni iten pe sûnga khan a ni ngêt ngai, khan, hi hin nin laia kin sin kha a huap sa. 14 Kha ten sûnga om nin ni sikin Krista Thurchi Sa chôia nin kuang kin zuang khoma kha ten ban chu fe ma ung. 15 Khasikin Pathianin a ni iten pe bial bana mi danghaiin an isin kha song ma ung. Kha nêkin, nin iamna hong irsôn a ta, Pathianin a ni iten pe sûnga zoro tin nin laia sinna lian ual ok tho thei kin ti, ti kin itûng ual a ni. 16 Khanchu, Thurchi Sa hi nin kuang bana ram danga khom insîr thei kin ta, hmun danga mi sin lei tho tâk kha song no ni ung. 17 Khannisianlân, Pathian Thu’n a iti angin, “Tukhomin a song nuam murdi’n chu Rengpa sintho kha song ri se,” ti a ni. 18 Mânia sa irtia irpâktu chu inpâk hlo no nia, Rengpa’n an pâkin kêng inpâkna a ihlo ngai.
1 Into viat anga ki om zoro lai khomin nin ni ituangpui hrangin ki nuam. Ngaihoi takin ni tuangpui roi! 2 Pathian hnarsâna angin kêng nang ki hnarsa; dôngmate irthiang ang nin nia, pasal ruathar inkhat, Krista ngei kha, nangni innei hranga ki lei inkung pehai nin ni. 3 Nin lung sûng kha hong siatin Kristaa nin irpêkna rikip le irthiang kha marak nin ti, ti ki ichi a ni, khaang khan Evi kha mirûl butdi milak khan inthêmin a iom a ni. 4 Tu mani nin kuang zuangin Jisua dang, a thu kin insîr ni loi a zuang insîra, lôm taka nin lei irngai thei sik le keinia nin ihmu Irtha le Thurchi Sa ni viat loi irtha dang le thurchi sa dang nin lei pom sikin. 5 Nin “tirtôn” lianhai nêka chîn ual hrangin chu irtûng ma ung! 6 Thu’nsîr chu ki thei rak no khom a ni thei, khannisian, inhriatnaa chu khaang khan ni viat mah; ama kha chu itiklai khomin tinrênga nangni kin infel pe tâk a ni.
7 Nin kuang Pathian Thurchi Sa ki zuang insîr laia khan ite thil nangni ngên ma ung; nangni chôiindômna hrangin keima ki irhniam a ni kha. Kha khan ki itho’nsual ma ni? 8 Nin laia sin ki tho zoro’n Koiindang danghaiin hlo an ni ipêk ngai a ni. Nangni changpuina hrangin, Koiindanghai sum kêng ki inhek pehai ngai. 9 Nin kuang ki om sûngin poisa ki’rsam laia khan tûte nangni inbuai ma ung; Makedonia rama irthoka urêng zuanghai khan ki irsam tinrêng an ni zuang ichôi pe a ni. Sûn hnung tianga ang khan sûnmatona khom nangni angin phurrik ni viat no ning! 10 Krista thutak keimaa om sika khan hi ki’rsongna hi Akaia ram pumpuia dâihrek no ni. 11 Lung nangni ki thung no sika hi hi ki iti ma ni? Lung nangni ki thung iti Pathianin an hriat!
12 Atûn hin sin tho mai ki ti, tirtôn danghai kha an irsong thei loina hrang le keini sintho lam ang takin sin an tho, an ti thei loina hrangin. 13 Kha mihai kha tirtôn dik ni mahai: tirtôn dolhai, an sinthoa milak thoa, Krista tirtôn dikhai anga inlang hranga irsiam an ni. 14 Kha kha a sa, irkhêl ual mah! Setana khom vâr vântîrtôn anga inlang hrangin ar siam kha te! 15 Khasikin a tirtônhai khomin felna tirtônhai anga inlang hranga an irsiam hi thilirkhêl ni mah. A hnungkhôna chu an sintho ang takin la hmu an ti.
Tîrtôn ninaa Paula tuangna
16 Ki ti nôk: tûte’n into’n ni bê no ri sehai. Khannisianlân, nin ni bê’n chu, a chînte lua ki’rsong theina hrangin into angin ni pom roi. 17 A dik takin, atûna ki iti hi chu Rengpa thu angin ti ma ung; hi irsongna thua hin chu into ang takin ki iti a ni. 18 Khannisianlân, mi tamtak mihriam nitna song an om sikin, kei khom song ki ti. 19 Nangni chu vâr tak tak, khasikin intohai lôm takin nin ituangpui a ni! 20 Nangni chu mi’n suakin nangni siamin, nangni fa khôt zoiin, nangni huangin, chânga nangni in-ôktirin, nangni enkhûm khom sian, nin hmâia nangni inbên khom sian, nin tuang zoi zit ngai.
21 Khahai tho hrangin chu kin chi hrai sikin a pom khom kin zak. Khannisianlân, tukhomin i ang lama khom an irsong ngamin chu, into angin ki ichong a ni, kei khom ki’rsong ngam. 22 Hebrai mi mo an ini? Kei khom ki ni. Israel mi mo an ini? Kei khom ki ni; Abrahama irchi mo an ini? Kei khom ki ni. 23 Krista sinthotuhai mo an ini? Into ang riaiin hong hrilin lân, anni hrangin chu tirtôn sa ual ki ni! Sintho intam uala irnak song ual ki ni, intângna ina kin tâng intam uala, zêm laka ki tuang intam ual taka, thi zôi zel theina khom ki tong intam tâk a ni. 24 Judahaiin voi sôminthum voi kuaka vîka tarâng ringa an ni zêm. 25 Voi thum Rom-haiin an ni zêma, voi khat lungin an ni dênga. Voi thum irkuang siatna ki tonga, voi khat chu zân khat le sûn khat tui chunga ki om. 26 Kin zinna voi tamtak ichiomna ki tong ngai, tuia ata, hrâtlâksonghai ata, ki Juda chanpuihai ata, Jentailhai ata, khopui sûng ata ramchâr ata, tuipui ata chitna ki tong chi chian ngai. 27 Sin intamin ki buaia, fâkrua ki’rsam mai ngaia, silkai boiin phalbi dâi ki tuang ngai. 28 Hihai bana khom hin Koiindang murdihai ki ngaituana, a nitin ni del chianin a om sa ngai. 29 Mi hrât loihai ki ituangpui ngailoi ma ni? Mi an tûkin ki irvei ngai loi ma ni?
30 Ki song ngêt hrangin chu ki hrât loizia inlang thilhai hi song ki ti. 31 Rengpa Jisua Pa le Pathianin milak ki itho loizia an hriat. Ama kha kumtuangin inpâkin om ri se.
32 Damaska khuaa khan rêng Areta hnuaia roirêltu khan ni chel tumin Damaska khua kha mi an nghâktira. 33 Khannisian, kokin kulpui bang ir-ônga an nin thâka, kha roirêltu ata ki izôk a ni.
1 Ki irsong hrang rêng rêng a ni, ite ar fêna a om no hrang khomin. Khannisianlân, atûn Pathianin inlârna a ni irhmu le thu phuang hrang a ni ipêkhai kha insîr ki ti. 2 Kum sômhleiminli matona khan Kristian mi inkhat, irvân irsâng taka khin zuang ilâkin a om ti kin hriat (ama kha a tak mani, inlârna a ihmu mani, inhre ma ung Pathian vaiin an hriat). 3-4 Ki ti nôk, kha mi kha Paradisa zuang lâkin a om ti kin hriat, (Ama khom kha a tak mani, inlârna a i hmu mani, inhre ma ung. Pathian vaiin an hriat). Khan, ama khan chonga insîr theiloi le mihriam insîr hranga phal ni loi thil a hong inhriata. 5 Khasikin kha mi kha song ki ti, khannisian, ki’rzalzia inlang thilhai ti no chu keima chu irsong no ning. 6 Irsong nuam khom inlân, into ni no ning, thu dik tak kin sîr hrang sikin. Khannisian, irsong no ning, tukhomin an ni hmu lam le keima ata thu an inhriat lam nêkin an ni’rngaiirsâng loina hrangin.
7 Thilirkhêl tamtak ki ihmuhai sika khan irpâkna’n ki sip loina hrangin, taksa a satêna dam loina tak pêkin ki iom a ni, kha kha ki’rpâk loina hranga Setana tirtôn anga sinthoa ni zêm ngai a ni. 8 Hi natna hi nir kiangtir pe hrangin Rengpa kuang voi thum ki nghi. 9 Khannisianlân, ama khan, “Ki lungkhamna hi kêng ni irhelpui tak, ni hrât loi zoro’n kêng ki sinthotheina a irkip ngai,” tiin a ni sâm. Khasikin ki chunga Krista sinthotheina ki chunga a om theina hrangin lôm takin ki hrât loinahai hi song ual ta ki ti. 10 Krista sikin chu hrât loinahai, hmusitnahai, hnuaisianahai, dengintheitirnahai le intaknahai khom ki milung a chuk. Ki hrât loi zoro rikipa ki hrât ngai sikin.
Paula’n Korinth mihai a ngaituana
11 Into angin ki iom a ni, nangni’n into hrangin nin ni inphût sikin. Nangni’n kêng nin ni inhamna inlang hrang nin ini. Ite ni no khom inlân, nin “tirtôn” lianhai nêkin chu i lama khom chîn ual no ning. 12 Tirtôn ki nih ti fiana sinirkhêl le thilirkhêl tamtak nin laia diarna ta tak neiin sin a ni ta. 13 Koiindang danghai nêka saloi uala enin itin mo nin iom? Poisa tianga nangni kin buai loina kha a ni no’nte. Ngaihoi takin kha fel zoi loina kha chu ni ngaidam roi!
14 Atûna hi nin kuang zuang hranga ki irsiam a voi thumna a ni tâka, khan, ite nangni sîng no ning. Ki izong chu nangni kha nin ni, nin poisa ni mah. Khannisianlân, nâihaiin an nu le pahai sem hrang an nei hrang ni maka, nu le pahaiin an nâihai sem hrang an inei ual hrang a ni. 15 Nangni changpuina hrangin ki inei murdi lôm takin hmang zoi ki ta, keima khom irhmang zoiin om ki ti. Lung nangni ki thung okna sika khan lung nin ni ithung bak loi hrang ma ni?
16 Puakrik nangni ki ichang pe loi kha chu inham nin ti. Khannisianlân, tu’n mani ama kha milaka sip, milakin nangni a in-ôk tâk kêng la ti a ti. 17 Itin mo? Nin laia ki zuang itîrhai hmangin nin chunga inlâpna mo ki zonga? 18 Tita kha zuang hrangin ki ngên, ama le Kristian urêng dang kha ki zuang itîr a ni. Tita’n kin chunga inlâpna a zong nin iti thei hrang ma ni? Ama le keima hi lunginchong irhmunin châng dân hmunkhatin châng ngai ma ung mo?
19 Nin kuang ki thiamna thu insîr mai nin ni sôn thei. Ni make! Krista einia chong ang khan Pathian makunga kin iti a ni, thil tinrêng kin isinhai hi rual lungthunghai, nangni changpuina hrang zit a ni. 20 Ki zuang tikin ki nuam lamin nangni ki hmu no itinin ti le nangni khomin nin nuam lamin nin ni hmu no itinin ti hi, ki ichi a ni. Khabana irngôna hai, irhnarsâna hai, ningmurna hai, ir-êngna hai, insirinsiatna hai, irnuisôna hai le lârirpâkna hai buaina hai nin laia ki hmu itinin ti ki ichi sa a ni. 21 Ki zuang nôk tika nin mithmua ki Pathianin ni mualinphoitir a ta, matona thil sual thohai, an thil porinche tho, irditna hai, hurna hai irlet ual loiin mi tamtak sikin chapna ki ti, tih hi ki ichi sa a ni.
1 Atûna nin kuanga ki izuang hrang hi a voi thumna hrang a ni. Pathian Thubu’n a iti ang khan, “Hnôlna kha inhriatpuitu inhni mani, inthum mani an om vaiin indet ni a ti,” ti a ni. 2 Zoro theng tâka sual sinhai le mi dang murdihai khom nangni hril ki inuam a ni. Nin laia ki zuang a voi hninaa khan ki ti tâka, atûn hin nin kuang ki om no sikin ti nôk ki ti: Ki zuang nôkin chu tûte dengintheitirna irthokin zôk no chin ni. 3 Krista, keimaa chong ngai fiana nin izong ngai kha a rêngin hmu nin ti. Ama kha nangni a ngaitua zoro’n irzal ngai maka; kha nêkin, nin laia a sinthotheina a inlang ual ngai a ni. 4 Ama kha hrât loina’n Krosa hembe’n om khom sianlân, Pathian sinthotheina’n a ihring mai a ni. Keini khom ama le irzomin kin ihrât loi a ni; Khannisian, nangni leh kin irmanna sikin a hringna khan Pathian sinthotheina dong sa kin ti.
5 Iamna khan nin om le om loi nin irhriat theina hrangin nin bingin irfia ngai unglân, nangni ngeiin irfia ngai roi. A ninole, nangnia Jisua Krista kha a om ti nangni ngeiin nin irhriat infel loi ma ni? Irhriatna nin la nei no’n chu a dol chian nin la ni. 6 Irfiana khan keini chu hlosam ma ung ti lan hria nin tih ki tûng. 7 Ite thil nin tho’nsual loina hrangin Pathian kuang kin nghi ngai, hlo kin chuk tih inlangna hranga ni loiin, hlosam khom inlân, nangni’n thil dik nin tho theina hranga a ni ual. 8 Thutak hrang sika ni no’n chu, a doi hrangin chu sin tho thei ma ung. 9 Kin irzal zoro khomin nin lei hrât ngai sikin kin ilôm a ni. Khasikin nin sa irkipna hrang khomin kin nghi sa ngai. 10 Khasika khan kêng hi hi nin kuang ki om loi zoro’n ki irziak; nangni setna hrang ni loia nangni indingna hranga Rengpa’n irchamneina a ni ipêk kha hmanga ki zuang tung tikin nangni ki’rkôk rak loina hrangin.
11 Atûn chu, ki urênghai, lôm takin om roi. Sat irkipna hrangin irnak song unglân; ki ngênna irngai unglân; lung inrualin om unglân, irtha irngam takin om roi. Khanchu, lungthungna le irngeina Pathian kha nin kuang om a ti. 12 Urêng irtumna’n chubai irmûk irhlôm roi. 13 Pathian mihai murdi’n chubai nangni an mûk. 14 Rengpa Jisua Krista lungkhamna, Pathian lungkhamna le Irtha Irthiang pôlna kha nin rênga chunga om ri se.
1 Kei Paula, tirtôn, mihriam itîr ni loi, mihriam inkung khom ni loi Jisua Krista le mithi lai ata ama kaithoitu Pa Pathian inkungtu hin, 2 Ki kuanga urêng om murdihai leh hin, Galatia rama koiindanghai chubai nangni kin mûk. 3 Pathian, ei Pa le Rengpa Jisua Krista kuang ata lungkhamna le irngeina nin kuang om ri se. 4 Pathian, ei Pa nuamlam zômin atûn zoro saloi ata ni sansuak hrang le ei sualhai ni’rsunfâi pe hrangin Krista kha a’rpêk tâka. 5 Pathian kuang khan roiinpuina kumtuangin om ri se. Amen.
Thurchi Sa dang om mak
6 Krista lungkhamnaa koitu kha rotsanin Thurchi Sa chi dang nin pom nôk thut hi, irkhêl ki ti. 7 Thurchi Sa chi dang om mah, nangni inbuaipuihai khan Krista Thurchi Sa indanglam an itum kêng. 8 Eini khom ni inlân, irvân ata zuang chum vântîrtônhai khom ni sianlân, ei ihril tak ni loi “Thurchi Sa” nangni an hrilin chu, khosâl tongin om ri sehai! 9 Nangni ki hril tâka, atûn khom nangni ki hril nôk. Nin ipom tak ni loi “Thurchi Sa” dang, nangni hong hril murdi chu khosâl tongin om ri se. 10 Khante! mihriam inlômtir mo ki itum Pathian inlômtir mo? Mihriam lôm lam insîr tumin ki ihong ma ni? Mihriam inlômtir tum ni inlân Krista suak ni no ning.
Paula tîrtôn a ni dân
11 Urênghaio, nangni ki hril, Thurchi Sa nangni ki ihril hi mihriam ata suak ni mah. 12 Tu kuanga dong khom ni ma ung, tukhomin nir chu ual mahai, Jisua Krista ngei khan ki kuang a inpuang a ni. 13 Juda sakhuaa ki’rpêk laia ki om lam kha nin inhriat; Pathian koiindanghai laia hong lûta deng kin theitirhaia, inram chithai ki itum ngai kha. 14 Ei sakhua biakna tianga irchibulhai thumâk vong chungchânga khom, ki rual tamtak Judahai ki khêl ngai. 15 Khannisianlân Pathian lungkhamna’n ka nu pum sûng ata a ni lei inkunga, a ni ikoi tâk a ni. 16 Jentailhai laia Thurchi Sa ki hril theina hrangin a Nâipa kha ki kuang an lâr lai khan, tûte ni san hrangin irdon ma ung. 17 Ki ni mân daiha tirtôn lei ni tâk Jerusalem mihai kuang fe ual ma ung. Arabia rama ki fe pat tâka; khan, Damaska kho tiang ki hong ikîr nôk lik tâk a ni. 18 Kum thum hnunga chu Jerusalema Kifa hmêl inhriat hrangin ki hong fea, a kuang sûn sômhleihni ki châma. 19 Khannisianlân, Rengpa urêng Jakoba ti no chu tirtôn danghai tûte hmu ma ung. 20 Nin kuanga ki thu irziak hi a dik a ni. Milak tho ma ung, Pathianin an hriat. 21 Kha zoiin chu Suria le Kilikia ramhaia ki fe nôk tâka.
22 Judai rama Kristian koiindanghai len vâng chu ki hmêl lan hre irman mahai, 23 “Tiana deng nin theitu khan inrampai a itum iamna thu a hril lik ta,” ti irhâi vai an inhriata; 24 Khaang khan, keima sikin Pathian an inpâk ta.
1 Kum sômhlei minli zoiin Barnaba leh Jerusalema kin hong fe nôka, Tita khom kin hruai sa. 2 Pathianin a ni tîr sika fe ki ni. Hruaitu lian ualhai vai an bingin ki’rhmupuihaia, Jentailhai kuang Thurchi Sa tâng ki insampui hi anni inhriata kin sîr pehai nôka; zoro lei thenga ki sinthôna mo, atûn laia mo, mâkana sôl ki ni loina hrangin. 3 Khannisianlân, ki mi hruai Tita khom kha Grik mi a ni nâkin, nakhrâtin ser intantir ual mahai. 4 Iamtu dol, Jisua Krista Zalênna ei nei enirchik hranga an laia lût inrukhaiiin chu suaka nin lûttir an tuma. 5 Aniachu, Thurchi Sa thudik kha nin ta hrangin an indang lamtir loina hrangin voikhat lua irtôl viat nuam ma ung.
6 Hruaitu poimo nia inlanghai, an ni tak tak le ni loi, ki ta hrangin danglam ual mah, Pathianin pên tiang inlang dân vai ngaisâng ma, hihai luan insîr hrang ite nei mahai. 7 Nei nêkin Petera kha sertanhai laia Thurchi Sa hrilna sin inkoltir a ini ang dênin sertanloihai kuang Thurchi Sa hrilna sin hi ki kuang inkoltir a nih ti an hmu. 8 Sertanhai hranga tirtôn ni hranga Petera ta hranga tho pêktu khan, Jentailhai ta hranga tirtôn ni hrangin kei khom a ni itho pe a ni. 9 Khanchu, Koiindang dingpuia an ibe tâkhai, Jakoba hai, Kifa hai le Johana hai khom khan, hi dongtum ki idong hi an hmum tho suam kin ni entîrna’n Barnaba leh irpôlna kut chang tiang a ni pêk tâka; keiin Jentailhai laia sin tho kin ta, anni’n sertanhai laia. 10 An laia inrianghai chu inhre mai hrangin a ni tia, khatak kha ki la itum chian a ni.
Antiokei khuaa Paula’n Petera ar kôk
11 Khan, Kifa kha Antiokei khuaa a hong lai khan dem omin an lang sikin, hmâi ir-enin ki’rkôka. 12 Jentailhai laia bu a nêk ngaia, khannisian Jakoba kuang ata mi senkhat Jentail ser intantir tumtuhai kha a chia, an hong tung tena chu a chia, a bingin a om tâka. 13 Juda danghai khom khan a tho dân an zuia, Barnaba khom an tho dân angin a om sa tâka. 14 An sintho dân kha Thurchi Sa thu leh irhme mah ti ki hmu’n, an rênga makunga Kifa kuang khan, “Nang Juda ni nia, Juda anga om loiin Jentailhai angin ni hong lênga, kha chunga khom khan ithoa mo Jentailhai kha Juda mi anga inomtir ni itum?” ki tia.
Judahai khom Jentailhai anga iam sika saninhring an ni
15 Eini chu Juda mi hrang piala suak ei nia, “Jentail mi sual” an iti ngai ang ni mak meh. 16 Aniachu, Jisua Krista iamna sika vai, Dân zôm sika ni loiin, mi’n Pathian makunga thiam a chang thei a nih ti kin inhriat; Dân zôm sika ni loia Krista iam sika Pathian makunga thiam ei chang theina hrangin keini ngei khom hin Kristaa khan iamna kin irnghat a ni. Tukhomin Dân zôm sikin Pathian makunga thiamchang zoi no nihai. 17 Krista iam sika Pathian makunga thiamchang tum, keinihai ngei khom hi, “Jentail mi sualhai” anga siatna irngai kin niin chu, Krista khan sual sin a lei tho tihna ma ni? Nâi sai mak. 18 Ki lei insiat tâk Dân ngêt kha inding thar nôk ki tumin chu, an siattu ki nih ti a ifel a ni. 19 Keima’n chu, Dân sikin, Dân ki thisan tâk a ni, Pathian tiang chu ki hring theina hrangin Krista kuang krosa hembe ki ni ta. 20 Keima hringna pangaia hring ni ta ma unga, keimaa hin Krista kha a hring tâk a ni. Atûna taksaa ki ihring hi, a ni lungthungtu ki ta hranga hringna pêktu, Pathian Nâipa iama hring ki ni. 21 Pathian lungkhamna hi hnôl no ning. Dân zôm sika Pathian makunga thiamchang thei a niin chu, Krista thina hi a korong chian ni a ti.
1 O Galatia rama mi’nvêthaio, tu’n mo nangni an dôi? Nin mit hmu ngeia Jisua Krista kha Krosa hembe a nih ti fel taka inlangtir a ni kha te!
2 Ni hril u ta, Irtha nin idong kha Dân nin zôm sika ma ni, Thurchi Sa nin inhriata nin iam tâk sika ma ni? 3 Khaang dôra invêt mo nin ini! Irtha song tâk hnunga taksa thila nin imong hrang ma ni? 4 Nin chunga thil tunghai kha ite a ini loi ma ni? Ni loia irhoi tak! 5 Phal taka Irtha nangni pêka, nin laia thilirkhêl tho ngaitu Pathian khan, Dân nin zôm sika mani, Thurchi Sa nin inhriat nin pom tâk sika tho ma ni? 6 Pathian Thubu’n a ti angin, “Abrahama’n chu Pathian a iama, thiamchanga pom kêng a ni ta,” ti a irziak ang khan. 7 Abrahama nâi dik takhai kha chu iamtuhai hi an nih ti inhre roi ba. 8 Khan, Lekha Thu khan Jentailhai khom iamna sikin Pathian khan thiam inchangtir hrang a nih ti a lei hmua; khanchu Abrahama kuang, “Nangmaa khan nam tin satvurin om an ti,” tiin Thurchi Sa kha a lei hril diam tâk a ni. 9 Khanchu, Abrahama’n a iiam anga iam murdi’n satvurna kha an idong tâk a ni.
10 Dân zôm irnghatnaa hmanghai chu khosâl tong chian an ni; “Dân lekha Thu a chuang murdi zôm loia tho zit loi chu khosâl tong an ni,” ti irziak a ni. 11 Dân zôm sikin Pathian makunga tûte thiamchang zoi om mahai ti a fel a ni. “Iamna sika thiamchang kha hring a ta,” ti a ni. 12 Dânin chu, “Thupêk zôm zittu chu hring a ta a ti maia, iamna insîr sa mah. 13 Thinga inkhâi chu khosâl tong a ni,” ti irziak ang khan. Krista khan ei ta hrangin khua isâlna kha pêlin Dân khosâlna ata a ni sansuak tâk. 14 Khanchu, Pathianin Abrahama sat a vurna kha Jentailhai kuang Kristaa khan a zuang tung tâka, eini hin Irtha pêk inkung kha iamna sikin ei lei dong tâk a ni.
Dân le chonginkung
15 Urênghaio, entîrna hrangin mihriam tho dân hong insîr ta inlân, mihaiin Thu an hong intung infel tâkin chu, mihriam thuthung chian a ni sikin, tûte’n khoi nôk ngai mah, bôk khom bôk ngai mahai. 16 Abrahama le ar chihai kôla vai a ni, Pathianin Thu a inkung kha: mi tamtak chungchâng insîr mah, “Irchihai” ti loiin mi inkhat hrilna angin, “Chi” a iti a ni; kha mi kha Krista hi a ni. 17 Ki insîr tum chu hi hi a ni. Kum irzaminli le kum sômthum zoia Dân lei om tâk khan Pathian Thuthung kha insiat ual mah, a thu’nkung khom kha indanglamtir ual mah. 18 Dân zôm sika irchon luatu ni thei sian, Pathian thu’nkung sika ni no nia; irchon luatu hrang a ipêk tâk a ni.
19 Khaang kha ni sian, Dân hi itho sikin mo pêk a ini? Tho’nsualna hi i ang tak mani ti, inlang hranga vântîrtônhai palaia hmangin pêk a ni; Abrahama kuang Nâi a inkung kha a hong inlang mâna hrang vai a ni. 20 Mi inkhat hrangin palai om nang maka, Pathian chu inkhat vai a ni.
Suakhai le Nâihai
21 Khaang kha ni sian, Pathian Thu’nkung hi Dân hin a irkal ma ni? Irkal mak e! A nin hring thei Dân pêk ni sianlân, kha Dân zôm sika khan Pathian makunga tukhom thiamchang thei ni a ti. 22 Khannisianlân, Pathian Lekha thu khan, “Itinrêng hi sual thuhnuaia a om ta,” a tia; khanchu Jisua Krista iam sika dong hrang thil inkung kha a iam murdi kuang pêk a ni. 23 Iamna thu a hong tung mâka chu Dânin mi a khitphiara; 24 Iamna sika thiam ei chang theina hrangin, Dân chu Krista tianga ni kaihruaitu a nia. 25 Khannisian atûn chu iamna thu kha a hong tung tâk sikin, Dân kaihruaitu hnuaia om ta mak me. 26 Khanchu Krista Jisua nin iamna sikin nin rêngin Pathian nâihai nin ni ta; 27 Kristaa baptisma chang murdi’n chu Kristaa khan nin irvô tâk a ni. 28 Juda le Jentail, suak le suakloi, pasal le nupang om ual ta mah, Jisua Krista leh irzomin nin rêngin pumkhat nin ni. 29 Khanchu, Krista mi nin ni tâkin chu Abrahama irchihai nin nia; Pathianin thilpêk a inkung kha nin ihmu hrang a ni.
1 Ki insîr tum tak kha hong insîr thiai inlân; Nâipa kha irchon murdi luatu hrang ni sian khom nâipang a la ni sûngin chu a neitu tak a ni khomin suak ang dêna ibe a ni. 2 A pa zoro’nkung a tung mâka chu enkoltuhai hnuaia a om ngai. 3 Eini khom khaang khan ei om, nâipang ei la ni lai khan rammual irchutirna dikloi hnuaia suak ei ni. 4 A zoro tak a hong tungin chu Pathianin a Nâipa kha a zuang tîra. 5 Ama kha, Dân hnuaia omhai nir tan hrang le nâipa ngîrhmuna nin ngîrtir hrangin nupang ata suakin Dân hnuaia a hong inseiliantir a ni. 6 Nâi nin nih ti a felna hrangin, Pathian khan a Nâipa Irtha kha ei milung sûnga a hong tîra, “Abba, Ka pa” tiin a khêk suak ngai. 7 Khanchu, suak ni ta mak chêia, nâi nin ni ual ta, nâi nin niin chu, Pathian zâra irchon luatuhai hrang nin ni.
Galatia mihai Paula’n ar vei
8 Tianlai khan Pathian lan hre ngai mak chêia, khasikin an irzir dân reng khoma Pathian ni ngai loihai suaka nin om ngai kha. 9 Atûn chu Pathian nin hong inhriat tâka, Pathianin nangni a hong inhriat tah ti hrang a ni. Itho sikin mo rammual irchutirna dikloi mai maia, ite ni theiloihai tiang nin irheia an suak ni nôk nin inuam tâk? 10 Misa hai, tha hai, zoro hai, kum hai ser bîk nin inei nôk tâk? 11 Nangni hrangin ki zoro chanlamboiin pai ki tih ti ichi a om a ni.
12 Urênghaio, keima anga om hrangin nangni ki ngên, nangni ang dênin kei khom ki oma, tukhomin ki siatna hrang tho ngai mak chêi. 13 Nin kuang Thurchi Sa ki hong hril masa khan ki damno sika a nih ti nin inhriat. 14 Ki taksa kha nin ta hrangin buaipui om tak ni khom sian, ni hmusit mak chêia, ni hnôl ual mak chêi; Pathian vân vântîrtôn ang dên le Jisua Krista ang dênin nin ni lôma. 15 Thei ni len vâng sian nin mithai kêlsuaka ni pêk nin irhuam tih kin hriat; vânnei nin irti lia le te itho mani ta? 16 Thudik tak kin sîr sikin nin râl mo ki ini mani ta? 17 Ni irdoipuihai hin a sa lama nangni hong ngaisak ni mahaia, nangni hruaipaia, nin irngaiinhluthai an nuam sika kêng. 18 Nin laia ki om lai khomin a sa tianga hong ngaisak an om photin chu raifân a om mai. 19 Nâihaio, Krista angna nin nei mâka chu nâi irveiin nangni ki irvei a ni. 20 Atûna hin nin kuanga ki iom ni sian ki’rzuk tak tak, nin tianga ki ngaituana khom indanglamtir ki ta; nangni ki ngaituana ki milung a buai ok tâk kêng a ni!
Hagari le Sari ennirkhîna
21 Dân hnuaia om nuamhaio, ni hril roi, Dân thu kha nin inhriat loi ma ni? 22 “Abrahama chu nâipa inhni a neia, inkhat kha suaknu nâi, inkhat kha a suak ni loinu nâi,” ti irziak a ni. 23 Suaknu nâi kha mihriam dân pangai anga nei a nia, a suak ni loinu nâi chu Pathian thu’nkung sika nâi a ni. 24 Hi hi chongirkhek a ni: kha nupang inhnihai kha thuthung inhni entîrna an ni, inkhat chu Sinai tâng ata hong suak kha a nia, kha kha Hagari a nia, a nâi neihai chu suak an ni. 25 Hagari kha Arabia rama Sinai tâng entîrna a ni, Jerusalem chu atûnlaia khua leh hmunkhat a ni, a sûnga omhai leh suak an ni. 26 Chung tiang Jerusalem chu suak ni mahai, kha kha eini nu hi a ni.
27 Pathian Thubu’n,
“Nang a ching tâk,
nâi nei ngai loi, lôm roh!
Nang nâiha irvei ngai loi,
raifân takin khêk suak roh!
Nupang pasal neinu nêkin chu nupang chardong om,
mi imâknu khan nâi a nei intam ual a ti,”
ti irziak ang khan. 28 Khanchu urênghaio, Isaka ang dêna Pathian thu’nkung nâihai nin ni. 29 Mihriam dân pangai anga nei khan Irtha sinthotheinaa nei chu deng a inthei ang dênin, atûn khom a ni mai. 30 Lekha thua itin mo a irziak kha? “Suaknu chu a nâipa leh khan inhnot suak roh; suaknu nâipa khan suak ni loinu nâipa irchon a iluapui hrang ni mah,” ti a ni kha. 31 Khanchu, urênghaio, suaknu nâihai ni mak mea, suak ni loinu nâihai ei ni.
1 Krista khan a nin zalêntir tâka, nin zalênnaa khan ngîr indet khak unglân, suak ringkola intâng nôk ta no roi.
2 Irngai u ta, keima Paula ngei hin nangni ki hril, ser nin tanin chu Krista kha inlâppui viat no chin ni. 3 Sertan murdi kuang hi hi ki insîr nuam chu a ni. Dânin a inphût murdi chu an itho lele hrang a ni. 4 Dân zôm sika thiamchang tumhaio, Krista leh nin irsen tâka; lungkhamna kha nin suaksan ta a ni. 5 Keini chu Irtha zâra iamna sika thiamchangna kha sabeiin kin inghâkhmo a ni. 6 Jisua Kristaa ei om photin chu sertan mo, tanloi mo danglam ual mah; lungthungnaa irbel iamna hi a poimo a ni.
7 Mâ nin isôn tia le te, a tu takin mo Thutak kha taksôn loi hrangin nangni hruai irhmang! 8 Hi hruai kôina hi a koitu Pathian ata suak ni mah. 9 Chol tômte khomin bai lian tak khom ar fang suak thei ti a ni. 10 Rengpa inkhata om suam ei ni sikin lungrîl dang la’rput mak chêi, keima’n chu ki iam ngit a ni; nangni inbuaitir chu, tukhom ni sian, hrem la tong a ti. 11 Urênghaio, keima’n sertan a nang tiin lei hril ngai inlân, itho mo deng an ni intheitir hrang? khaang khan nisian, kros thu kin ihril hin buaina siam no ni. 12 Nangni inbuai ka chu ser an itan vai ni loiin, kha khan tho li lia ri se; tan sabak ri se ki inuam a ni.
13 Urênghaio, nangni chu Zalênna nei hranga koi nin ni, nin Zalênna hi taksa ta hranga zoro inchuma hmang viat no roi; lung irthung irhlômin sin irtho irhlôm roi. 14 “Nangma lung ni irthung angin ni bômhai khom lungthung roh,” ti chongbâi khat hi nin zômin chu Dân murdi nin izôm zit ni a ti. 15 Ramsa ang dêna nin irsea, nin irfâk duaiin chu, nin irfâk zit loina hrangin irdîn roi.
16 Ki insîr tum tak chu hi hi a ni: Irthaa om unglân, taksa irzukna chu zôm viat no chin ni. 17 Taksa nuamlam chu irtha lam tianga thil ar kal khaka, Irtha lakin taksa tiang thil chu ar kal khak saa, an irkal irhlôm khak sikin, nin itho nuam tak ite nin itho thei ngai loi a ni. 18 Irtha hruaia nin omin chu Dân hnuaia om mak chêi. 19 Taksa mihai sintho chu an lang infel a ni: irditna hai, porinchena hai, hurna hai, 20 millim biakna hai, dôi hai, irkhôkmâkna hai, irngôna hai, hnarsâna hai, milung saloi hai, dohasa hai, irthekindarna hai, irsenna hai, 21 irhnarsâna hai, zun rui uar hai, zu hmun buala inhoina hai le khaanga a dang dang thôna hai kha. Khaanga tho mihai khan Pathian Ram lua viat no nihai ti nangni ki hril tâk angin nangni hril nôk ki ti. 22 Irtha ra chu: lungthungna hai, raiinfânna hai, irngeina hai, tuangdiarna hai, khonzâna hai, satna hai, iamomna hai, 23 thuhnuairôlna hai insumtheina hai a ni. Khaang tianga Dân irkal om mah. 24 Jisua Kristaa omhai khan an taksa irzukna hai le nuamna hai khan an hembe ta a ni. 25 Irthaa hringna ei ni tâkin chu Irtha ni ihruai ang dênin om ei ti. 26 Lârirpâka, irsual irhlôm le irhnarsa’n ei iom hrang ni viat mah.
1 Urênghaio, mi tu mo khatin sual a tho lai takin tong ta unglân, nangni irtha mihaiin nin indik hrang a ni; khannisianlân, irngaiintôm takin ni tho hrang a ni. Nangni khom thêmnaa nin lût sa loina hrangin irdîn dêkin om roi. 2 Puakrik irsan irhlôm ngai unglân, khanchu Krista dân kha nin izôm ni a ti.
3 Mi ite ni loia mi lian tak nia irbe chu mâni a irhuang chian a ni. 4 Mi tinin mâni sintho enfiah seng bak ri se, kha hnung chu mi dang chunga ni loiin mâni chung ngeia song hrang nei a ti. 5 Mi tinin mâni hrang puak ei nei seng.
6 Kristian thu irchutirna dongpu khan thil sa murdi chu ama irchutirtu kuang a ipêk sa hrang a ni. 7 Ihuangin om no roi, Pathian chu hmusit zât ni mah. Mi’n a itû chu, a i-ât nôk ngêt hrang a ni. 8 Mâni taksa tianga tûtu chu taksaa siatna ât a ti. Irtha tianga tûtu chu Irthaa hringna ât a ti. 9 Thil sa tho hnông no idua, ei irtha ei inboi no’n chu a zoro taka ei la i-ât ngêt hrang a ni. 10 Khanchu zoro inchum ei inei ang lam takin mi tin kuang sin sa tho inlân, iamnaa ei in sûnghai chunga lenvâng chu tho uar ual ei ti.
Inthorna le chubai mûkna
11 En u ta, horop inhrol tak taka ki irziak hi keima irziak ngei a ni. 12 Taksa tianga, ser tan hranga nangni inphût ngaihai kha a chungphua tiang ringot inlanga, irpâk nuamhai kha an ni. Kha kha an tho ngai, nikhomsianlân, Krista Kros sika dengtheina an zôkna hranga paia an itho ngai a ni. 13 Sertanhai khom hin Dân kha zôm irkip bîk ngai mahai. Nin taksaa irsinsiana om kha an irsongpui theina hrangin, ser nangni intantir an itum a ni. 14 Kei chu ei Rengpa Jisua Krista Kros vaino chu song hrang dang rêng nei ma ung, kha krosa khan rammual hi ki ta hrangin hembe a nia, kei khom rammual ta hrangin hembe ki ni. 15 Mi’n ser an itan le tanloi ite poimo mah, Siamtharna hi a poimo tak chu a ni. 16 Hi thu zômtu murdi chunga irngeina le za’rngaina om ri se, Pathian Israelhai chunga khom.
17 Ki chong khârna’n: Atûn ata chu tukhomin nin buai ta no ri se, ki takpuma sâbe omhai hin Jisua Krista suak ki ni tih irsinsiana a inlang a ni.
18 Urênghaio, ei Rengpa Jisua Krista lungkhamna kha nin kuang om ri se. Amen.
1 Pathian nuam lama Krista Jisua Tirtôn Paula khan, mi irthiang Efesi khuaa om, Krista Jisua mi iamomhai chubai ki mûk.
2 Pathian ei Pa le Rengpa Jisua Krista kuang ata lungkhamna le inrenna nin kuang om ri se.
Kristaa irtha tianga satvurna
3 Ei Rengpa Jisua Krista Pa Pathian chu inpâk ei ti. Ama khan Krista zâra irvân hmunhaia khin irtha tiang satvurna tinrêngin sat a ni vura. 4 Irthiang le sêlnaboia a kuang ei om theina hrangin irnêng irsiang mân khan lung a ni thunga, Kristaa khan a nin thang ta. 5 Ama nuamlam le a tum lam ang taka Jisua Krista zâra a nâi ni hrangin a ni lei inkung sa ta. 6 A lungkhamna roiinpui tak sika a Nâipa lungthunga thilmanboi pêk sikin Pathian inpâk ei ti. 7 Krista thisenin irtan ei ni tâka, ei sualnahai ngaidam a ni tâk. Pathian lungkhamna chu an thûk tak taka. 8 Kha lungkhamna kha vârna le inhriattheina chuminbak takin a ni ivur tel a ni. 9 Pathianin a lungdo irthup Krista zâra zoi a itum kha zoiin a nin hriattir ta. 10 Kha a lungdo kha a zoro a chuk tika Pathianin thilsiam murdihai, irvân le irnênga omhai murdi intêl zita, Krista kha a lu taka siam hrang a ni. 11 Thil tinrêng hi Pathian lungdo le ti lam taka tho a ni; Khante, Pathianin a phuta a ti lam angin Kristaa a mihai ni hrangin a ni inthang tâk a ni. 12 Tho! eini Krista lei tûng masahai hin Pathian roiinpuina kha ei inlangtir hrang a ni. 13 Nin saninhringna Thurchi Sa, thutak kha nin inhriatna khan Pathian mihai nin hong ni ta. Krista nin iam sikin Pathianin Irtha Irthiang inkung kha nangni pêkin, Ama ta nin nih ti irsinsiana nin chunga a isia a ni. 14 Kha kha Pathian roiinpuizia inpâkna hranga ama ta ngei irtan suakna hranga ei irchon luana hranga khapna a ni.
Paula chongchaina
15 Khasikin kei khom, Rengpa Jisuaa nin iamna le Pathian mihai murdi lung nin thungzia kha kin hriat rengata chu, 16 ki chongchainahaia khom nangni inhre maiin nangni sikin Pathian kuang lômthu insîr mong ma ung. 17 Ei Rengpa Jisua Krista Pathianin roiinpuina Pa khan inhriatna lama vârna le inhriat infelna nin nei theina hrangin, Irtha kha nangni a pêkna hranga ngên maiin. 18 Ama vâr nin hmu theina hrangin nin lungrîlhai ar honga, nangni a koinaa tûngna om hai, a mihai hranga a inkung satvurna irkhêl tamzia hai leh. 19 Keini a iamhai laia sintho mai sinthotheina lianzia hai kha nin inhriat theina hrangin ki ingên a ni. Hi sinthotheina, einia sintho mai hi irtha lian, 20 Pathianin thina irthoka Krista a kaithoia, irvân Rama a chang tiang an toi laia a ihmang dên kha a ni. 21 Krista chu irvân roirêltuhai, irchamneituhai, sinthotheituhai le rênghai chung vita roirêlin hi rammual le rammual la hong om hranga irhming tinrêng laia irhming inchungtak a inei a ni. 22 Khan, Pathianin thil tinrêng Krista ke hnuaia a sia ta, ama chu thil tinrêng Rengpa hrangin Koiindanghai kuang a pêk ta. 23 Koiindang chu Krista takpum a ni, hmun tina thil tinrêng irkiptirtu irkipna kha.
1 Zoro lei theng tâka khan chu, nin thu zôm loina le nin sualnahai sikin irtha tiang nin ithi a ni. 2 Kha laia khan chu rammuala lampui sa loihai zuiin, boiruaka irtha sinthotheinahai roirêltu thu nin izôm a ni, atûna Pathian thu zôm loihai laia sintho mai irtha hi. 3 A dik takin eini khom ei rêngin anni angin ei iom a ni, ei taksa irzuknahai dungzuiin ei oma, ei takpum le ei lungrîlhai lungdo ei isin a ni. Eini khom mi danghai angin Pathian ningmurna nâi ei ni kha. 4 Khannisianlân, Pathian khonzana kha a itamin a milung ni thungna kha a ilian a ni, 5 ei thu zôm loina sika irtha tiang thi ei ni lai tak khomin, Krista leh a ni inhring tâk a ni. Pathian lungkhamnaa saninhring nin ni tâk. 6 Krista Jisua leh ei irzomna sika khan irvân Rama ama leh roirêl hrangin ama pâlin a ni kaithoi tâka. 7 Khahai murdi a thôna san chu zoro la hong hranghaia Krista Jisuaa lungthungna a inlanga a lungkhamna lian bîkzia kha an hmutir theina hranga a ni. 8 Lungkhamna sika iamnaa saninhring nin ni; nangni itho suak ni maka, Pathian thilpêk a ni. 9 Sintho sika ni mah, khano’nchu, mi’n songna an ti. 10 Thil sa tho hrangin Krista Jisuaa khan isiama omin ama kut suak ei hong nia; kha thil sa tho kha ei omna hrangin Pathianin a lei isiam irfûk a ni.
Kristaa pumkhata siam
11 Nangni, irzirnaa Jentail, taksa kuta sertanhaiin, “Sertanloi” nangni an iti ngai kha. 12 Kha lai khan Krista la nei mak chêia, Israel in sûngkua ata mi dang nin nia, Pathian thu’nkunga thuthung pên tianga mi nin ni saa, rammuala hin sabeina rêng neiloi le Pathian tak inhre loia nin iom kha inhre mai roi. 13 Khannisianlân, atûn chu Krista Jisuaa, nangni tiana hla taka omhai kha, Krista thisen sikin irnâitirin nin om ta.
14 Krista chu ei irngeina a ni. Ama khan Jentailhai le eini Judahai hi pumkhata a ni siama, ei irdanna ngai bang, irdoina kha, a taksa khan an inboitir a ni. 15 Dân thupêkhai le tho hrang omhai kha an mongtira, keini le nangni, amaa khan, mihriam thar, pumkhata a ni siama, irngeina a zuang intung tâka. 16 Krosa khan irdoina kha an boitira, Jentailhai le Judahai kha pumkhata hong omin Pathian leh ei irngei tâka. 17 Krista a zuanga khan hla uala om, nangni kuang irngeina Thurchi Sa a hrila, nâi uala om, keini kuang khom irngeina Thurchi Sa dên kha a hrila. 18 Krista zârin ei rêngin Judahai le Jentailhai, Irtha hmunkhatin Pa kuang ei itung suam thei tâk a ni.
19 Khanchu, atûn hin mikhual le mi châm mai ni ta mak chêia, mi irthianghai leh khan tualkhat le Pathian in sûngkua nin ni sa tâk. 20 Tirtônhai le deipuhai lungphûm chunga sia nin ni, kha lungphûm a kila lung poimo tak kha Krista Jisua hi a ni. 21 Kha in pumpui kha amaa khan siam sa a nia, Rengpa hrangin Tempil irthiang a hong ni ta a ni. 22 Nangni khom amaa khan Irthaa Pathian omna in hrangin mi danghai leh sia insa nin ni.
1 Hi sika hin nangni Jentailhai hranga Krista Jisua mi intâng, kei, Paula hin, nangni ki chongchai pe ngai a ni. 2 A lungkhamna sikin Pathianin nin ta hrangin hi sin hi tho hrangin a nin kung ti inhre ta nin ti. 3 Ki insîr viat tâk ang khan, Krista thu’rthup kha inlârnaa inhriattir ki ni. 4 Ki thu irziak nin tep intamin chu Krista thurîl kha kin hriat infelzia khom inhre thei nin ti. 5 A tirtôn le deipuhai kuang Irtha’n atûna a inhriattir ang hin, tianlai khan chu hi thurîl hi mihriamhai lan hretir ngai mah: 6 Thurchi Sa sikin Krista Jisuaa khan Jentailhai khom, Israelhai leh irchon lua suam hrang le pumkhata om hrang le sûngkhat, thu’nkung dong suam hrang an ni thu hi. 7 Pathian lungkhamna thilpêk a nin dongtir sika hin a sinthotheina hmangin kha Thurchi Sa sinthotua siam ki ni.
8 Keima hi mi irthiang murdihai laia chîn tak nêk khoma chîn ual ki ni, khan khomin Pathianin Jentailhai kuang Krista irchongna suisuak zoiloi Thurchi Sa insîr hrangin a lungkhamna’n a nin kunga. 9 Pathian itinrêng siamtu kuanga kumtuanga thu irthupa om, a lei irfûktir kha, mi murdihai kuang inlangtir hrangin a ni iphun a ni. 10 Pathian vârna nei intamzia hi, Koiindang sika hin, irvân rama vântîrtôn roirêltuhai le irchamneituhai kuang atûn inhriattir a ni ta. 11 Kumtuang ata lei irfûktir tâk ang ngei kha ei Rengpa Jisua Kristaa hlo a zuang inchuktir ta. 12 Kristaa khan, ama ei iam sikin, irnâi tak le ngam takin Pathian ei inâi thei ta a ni.
13 Khanchu, nin ta hranga ki ituangnahai sika, indôp loi hrangin nangni ki ngên, nin roiinpuina hrang a ni.
Krista lungthungna
14 Hi sika hin Pa makunga khûksadelin ki kûn ngai. 15 Pa, irvân le irnênga sûngkua tinrêngin an irhming diktak an hmûna kha. 16 A’rtha zâra nin sûng tianga hringnun inhriatna hrangin a roiinpuina irkhêl tak ata sinthotheina nangni pe sianlân, 17 iamna sikin Krista chu nin milunga châm sianlân, lungthungnaa irzung kaiin phûm indet nin ini hrang a ni. 18 Khanchu mi irthiang murdihai le a lungthungna irzatzia hai, seizia hai, irsângzia hai, inthûkzia hai, fel takin inhriat inrual thei nin ti. 19 Krista lungthungna, inhriat seng loi kha, inhria nin ta, Pathian famirkipna tinrênga insiptir hong ni nin ti.
20 Khanchu, einia sin ngai sinthotheina hmanga ei izong le ei ingaitua phâk bana irkhêl ngei khan, 21 itiklai khomin, Koiindanga le Krista kuang roiinpuina kumtuangin om ri se! Amen.
1 Khanchu, nangni a ikoina irphua om hrangin kei, Rengpa sika intâng hin, nangni ki ngên. 2 Lam tinrênga irngaiintôm le thuhnuairôl takin lungthungna le tuangdiarnahai nei mai ngai roi. 3 Irngei taka om suamin Irthaa pumkhatna hi vong khak roi. 4 Nangni a ikoina san sabeina hmunkhat nei hranga koi nin ini angin, Takpum inkhat le Irtha inkhat vai a om. 5 Rengpa inkhat, iamna hmunkhat, baptisma hmunkhat, 6 mi murdi Pa, Pathian inkhat vai a om. Ama chu itinrêng chunga a oma, itinrêng ar fang suaka, itinrênga a om sa a ni.
7 Khanchu, Krista lungkhamna thilmanboi pêk chu a ruk a iti ang takin a ni ipêk seng a ni. 8 Pathian Lekha thua khom:
“Chung tiang a kâia khan râl tamtak a imanhai kha suaka a hruaia,
Mihriamhai kuang khom thilpêk a sem,”
ti a ni kha. 9 Chung tianga kâi ti hi i tihna ma ni? Irnêng hmun irhnuai taka zuang chum masa tihna a ni. 10 Itinrêng a famirkip theina hrangin, zuang chumpu ngei kha irvân chung daiha a hong kâi nôk tâka kha a ni. 11 Khanchu, “Mihriamhai kuanga thilpêkpu” kha ama hi a ni: mi senkhat chu tirtôn hrangin, senkhat chu deipu hrangin, senkhat Thurchi Sa hriltu hrangin, senkhat pastor le irchutirtu hrangin a zuang inkunga.
12 Khaang khan, Krista takpum sin inngîrna hrangin Pathian mihai murdi Kristian sinthônaa sin an tho theina hrangin, kha kha a itho a ni. 13 Kha kha ei rênga iamna hmunkhat ei vonga, Pathian Nâipa inhriatna ei neia, mi puihling, Krista a ifamirkip dôra mi famirkip ei hong ni theina hrang a ni. 14 Khanchu, mihriam vârirlethaiin, an minlakna hmanga ihuanga omin, irchûna dikloi sika tuilian isok le phâivua’n hi tiang so tianga a isok le a isêm nâipang siat ang hi ni no roi. 15 Khanchu, lungthungnaa thudik insîrin itinrênga Krista tianga hong irsônlian thei ei ti, ama chu Lu a nia, Krista chu. 16 Takpumpui chu amaa a’rnghata, irthahrui le irnakin a khit hlûma, takpum om tin chu an itho ang tho chitin an irsôn inruala, lungthungna’n an irfa inlian ngai.
Om dân milui le om dân thar
17 Khanchu, hi hi kin sîr nuama, Rengpa irhmingin nangni ki hril; lungrîl mumal neiloi Jentailhai om lam angin om ta no roi. 18 An lungrîl a zîng zoia, inhriatna nei mahaia, an milung an incho tâk sikin Pathian hringna tak ata senin an om ta. 19 Inzakna lam khom inhre ta mahaia, sual porinchenaa an irpumpêka, huatirham takin thil porinche tinrêng an thoa. 20 Nangni chu Krista irchutu nin nia, khaanga om sa hrang ni mak chêi. 21 A thu nin zôma, thutak, Kristaa om kha, irchutir nin ni tâka. 22 Khasikin, nin taksa irzukna’n a insiat tâk, nin om dân masa, mihriam milui kha, mâksan roi. 23 Nin lungrîl le lunginchong kha inthar ni sianlân: 24 thutaka suak, felna le irthiangnaa Pathian anga siam, mihriam thar khan, irbel roi.
Om dân thara om hrang dân
25 Khanchu milak tho mâk unglân, Krista takpum ôn ei ni seng sikin mâni tualbômhai kuang thudik vai hril roi. 26 Ninginmur khom unglân, thil sual tho no roi, misa tâk de dênin ninginmur no roi. 27 Diabola kha zoro’nchum pe no roi. 28 Inrûk ngai khan inru ta no ri se, mi irsam kuang pêk hrang a nei theina hrangin mâni kut ngeia sin tho’n tam ual ri se. 29 Chong saloi rêng rêng hmang no roi, mi siaminsat thei vai, nin bâia suak ri se, khanchu a’rngaituhai hrangin lômom a ti. 30 Pathian Irtha Irthiang kha beiindongtir no roi, irtanna ni hrangin ama ta ngei nin nizia Pathianin nangni a isinsia a ni.
31 Irkhôkmâkna hai, ninginmurna hai, nuarna hai hrângna hai, insirinsiatna murdi hai nangni ata pai irhmang roi, sualna murdi hnung songsan roi. 32 Lungirkham irhlômin, ir-en irhlôm unglân, Pathianin Kristaa nangni a ingaidam angin irngaidam irhlôm roi.
1 Khanchu, Pathian nâi inditom takhai nin ni sikin, a om dân latuhai ni roi. 2 Krista’n lung a ni thunga, Pathian lôm lam thilpêk le thilinhlan mirimhoi ni hrangin ei ta hrangin a irpêk ang khan lungthungna nei seng roi.
3 Pathian mihai nin ni tâk sikin, nin laia: irditna hai, Porinchena hai, huatirhamna hai rêng rêng nin laia sâm khom sâm ni no ri se. 4 Bâi nghalhai, chonghoi loi le tufiam porinche insîr hai, nin ta hrangin sa mah, lômthu insîr uar ual roi. 5 Irdit uar hai, mi porinche hai, mi huatirham (Kha kha millim biak tihna a ni); kha mihai khan Krista le Pathian Rama khan dongtum nei viat mahai ti inhre fel roi.
6 A nêp ang tianga kha thil insîrtuhai khan nangni huang no ri sehai, kha thil sika khan Pathian ningmurna kha taksônloi mihai chunga a itung hrang a ni! 7 Khasikin, anni chu irkômpuihai viat no roi. 8 Tiana khan chu inthim nin nia, atûn chu Rengpaa vâr nin hong ni ta, ivâra omhai angin nin iom ngêt hrang a ni. 9 Vâr chu satna hai, felna hai, le thutak tinrêngin a ra suak ngai. 10 Rengpa lômlam chu i mani ti inhre fel tum ual roi. 11 Khan, inthim hnuaia omhai sintho inlâp loia khan kop viat no roi, a dikloizia inlangtir ual ngai roi. 12 Inrûka om thil tho ngaihai kha insîr khom inzak a om a ni. 13 Aniachu, thil tinrêng a thiamnozia inhriattira om hi vâr inlangtir a ni ngai, inlangtira om ka chu vâr a ni. 14 Khasikin Pathian thua khom:
“Nang inmusu, harin lân,
Mithi lai ata thoi roh,
Krista khan nang êl invâr a ti,”
ti a ni kha.
15 Khanchu nin om dâna a sân irdîn roi, mi’nvêthai anga om loiin mi vârhai angin om ual roi. 16 Zoro sano taka om ei ni sikin nin zoro kha hmang insa roi. 17 Khasikin, invêt takin om no unglân, Rengpa nuamlam i mani tih inhriat tum ual roi. 18 Uain inrui uar ta no roi, siatna bul a ni, Irtha sip ual roi. 19 Inpâkna hla hai, Pathian hla hai le irtha tianga hla hai leh khan irdon irhlôm ngai unglân, nin milung takin Rengpa inpâkna hla sakin inpâk roi. 20 Ei Rengpa Jisua Krista irhmingin itiklai khomin itinrênga Pa, Pathian kuang lômthu hril roi.
Ompui sangram om hrang dân
21 Krista chituhai nin ni sikin irpelût irhlôm roi. 22 Nuhai khomin Rengpa thu an izôm angin, mâni pasalhai thu an izôm hrang a ni. 23 Krista chu ama takpum Koiindang saninhringtu a nia, Koiindang lu a ini angin pasal chu dôngma lu a ni. 24 Krista kuang Koiindang a irpelût angin, dôngmahaiin an pasalhai thu, lam tinrênga zôm ri sehai.
25 Pahaio, Krista’n Koiindang lung a ithung ang hin nin dôngmahai lungthung roi. 26 Koiindang chu thu le tuia irsûkinfâia irthianginfai hrangin Krista chu ama a irpêka, 27 Koiindang roiinpui tak, chuai loi, innimna koploi le khaang thil porinche koploi, irthiang le chukloina dang rêng rêng om loi, ama ta hranga inding hrangin a irpêk a ni. 28 Pasalhai khan mâni takpum lung an ithung angin mâni dôngmahai lung an ithung hrang a ni. Mâni dôngma lungthungtu chu ama lung a irthung a ni. 29 Tukhomin mâni takpum khôkmâk ngai mahai, Krista’n Koiindang an fâa, a indot angin an indot ngai a ni; 30 eini khom a takpum ônhai ei ni. 31 Pathian Lekha thua, “Khasika khan pasalin a nu le a pa rotsan a ta, a dôngma chel a ta, khanchu an inhniin taksa pumkhat hong ni ta an ti,” ti a ni. 32 Hi hi thurîl inthûk tak a ni, keima’n chu Krista le Koiindang thu a insîrna niin kin hriat. 33 I khom nisian, nin laia tukhomin mâni lung a irthung angin mâni dôngma lungthung seng ri se, dôngma khomin a pasal chi lam dân inhre ri se.
1 Nâipanghaio, Rengpaa khan nin nu le nin pahai thu zôm roi, kha kha thil dik tak a ni. 2 “Ni nu le ni pa chôiindôm roh,” ti hi thupêk laia tep masa tak a ni. 3 “Ni ta hrangin sa a ta, irnênga hin dam insôt ni ti,” ti a ni kha.
4 Khan, nangni pahaio, nin nâihai ninginmurtir no unglân, Rengpa irchutirnaa le isepnaa khan enkol ual roi.
Suakhai le an puhai
5 Suakhaio, Krista thu nin izôm angin lungrîla a sate’n chi pum le inthing pumin taksaa nin puhai thu zôm roi. 6 Mihriam inlômtir tumtuhai ang dêna an hmu lai ringota sin loiin Krista suak ni irhoiin lungrîl takin Pathian nuamlam tho unglân, 7 mihriam sintho vai ni loia Rengpa sintho nin ini ual angin raifân takin sin ngai roi. 8 Suak khom suakloi khom, mi tinin an thil sa tho lômman Rengpa kuang ata an hmu seng hrang a nih ti nin inhriat a ni.
9 Khan, nangni hruaituhaio, khaang dênin an chunga tho roi. Nin suakhai le nin Hruaitu, theibîk neiloi kha, irvâna a om ti inhre maiin irngô irhal ma roi.
Sual doina hrangin Pathian râltukfam
10 A mong taka chu Rengpa le a hrâtna ata kha sinthotheina la mai ngai roi. 11 Diabola nangni inthêmna hrang nin lei khâl theina hrangin Pathian râltukfam irkipin irbel roi. 12 Mihriam râl doi mak meh, inlalna hai le irchamneina hai, hi rammual inthim chunga roirêltuhai le irvân hmuna irtha sual omhai ei idoi ual a ni hi. 13 Khasikin, Pathian râltukfam irkip khan irbel unglân, nikho saloi a tung tika râl kha khâl khak thei nin ti, nin khâl zoia khom ngîr mai thei nin ti.
14 Khanchu, det takin ngîr unglân, thutaka nin kong khitin, dikna kha rôpphoa innghâk roi. 15 Irngeina Thurchi Sa inpuang hranga irsiam diamna kha kekokin bun unglân, 16 mi sualpa thal chok theihai kha nin that mai theina hrangin iamna hi phô’n hmang roi. 17 Saninhringna kha lukhuma hmang unglân; Irtha khandai, Pathian thu kha, vong roi. 18 Chongchai mai unglân, Pathian chu nin innang rikipin zong unglân, Irtha hruai ang takin, itiklai khom chongchai roi. Nin chongchainaa khan mi irthiang murdi hrangin mongloiin zong roi. 19 Thurchi Sa irthup kha kin hriat theia, hâitaka inpuangsuak hranga ki ngîr tika, Pathianin thu a ni pêk theina hrangin keima ta hrang khomin ni chongchai pe sa ngai roi. 20 Atûn hin intângna ina om khom inlân, Thurchi Sa palai ki ni. Khasikin, Thurchi Sa insîrna lama khan ki hâi hrang dân taka ki hâi theina hrangin ni chongchai pe ngai roi.
Inthâna chubai
21 Rengpaa urêng inditom tak le sinthotu iamom tak Tukika hin ki thurchi nin inhriat theina hrangin itinrêng nangni hril a ti. 22 Ki thurchi nangni hril hrang le irtharngam nangni sak hrangin ama hi ki hong itîr a ni.
23 Pa, Pathian le Rengpa Jisua Krista kuang ata irngeina hai, lungthungna hai le iamna hai kha urênghai kuang om ri se. 24 Pathian lungkhamna kha lungthungna chuai theiloia ei Rengpa Jisua Krista lungthungtuhai kuang om ri se.
1 Paula le Timothea, Krista Jisua suakhaiin chu, Krista Jisua mi irthiang Filipi khuaa om murdi le Koiindang hruaituhai le sinthotuhai chubai kin mûk. 2 Pathian ei Pa le Rengpa Jisua Krista kuang ata lungkhamna le irngeina nin kuang om ri se.
Filipihai ta hranga Paula chongchaina
3 Nin thurchi ki’rngaitua rikipin ki Pathian kuang lômthu kin sîr ngaia, 4 i ang zoroa khom nin rênga ta hrangin ki chongchai rikipin raifân takin ki chongchai ngai a ni. 5 Nin inhriat phut ni ata atûn tena Thurchi Sa hrilna sin nin ni thopui ngai sikin. 6 Nangnia hi thil sa insuaktu khan Krista Nikhuaa puihling dênin a tho mai ki iam ngit a ni. 7 Nangni ki’rngai tak tak hena, Pathianin hi dongtum a ni ipêk Thurchi Sa ta hranga ki beina le indettirna sin ki thônahai le atûn intângna ina ki om laia ni changpuituhai nin ni sikin ki milunga nin om maia, nin rênga chunga khaang lungrîl irput irhoi khom ki ni. 8 Nin rêngin Krista Jisua lungrîl irputin nangni ki’rngai a nih ti Pathianin an hriat.
9 Nin lungthungna chu inhriatnahaia, thil hmu’n fel theina tinrênghaia irsôna a pung ual ual theina hrangin ki chongchai a ni. 10 Khanchu, thil sa ualhai kha inthang thei nin ta, Krista Nikhuaa khan irthiang le sêlnaboi lei ni nin ta, 11 Pathian roiinpuina’n le inpâkna’n Krista zâra felna ra khan nin lei isip hrang a ni.
Ki ta hrangin chu hring hi Krista a ni
12 Urênghaio, ki thil tuanghai hi Thurchi Sa indarna hrang a lei ni chian tih nin inhriat ki nuam a ni. 13 Ki thîrkol bunhai hi Krista sika a ni ti, Reng in enkoltuhai le mi dang murdihaiin an inhriat ta. 14 Urêng tam ualhai khomin ki thîrkol bun sikin Rengpa an iam uala, chi loiin Pathian thu khom an hril ngam ta. 15 Mi senkhat chu hnarsana le sêlna sikin Krista thu an hril sa ngaia, senkhat chu lungrîl satakin an hril ngai. 16 Thurchi Sa song hranga inkung ki ni, inhriatin lungthung sika hril an ni. 17 Mi senkhatin chu ki thîrkol bun chunga hin irngaisiatna ni bôk pe tumin, tho tak tak loiin, mâni satna hrang vai ngaitua’n Krista thu an ihril ngai a ni.
18 Poi make! A dolin mo, a takin mo i ang lama khom Krista thu ihril a ini hi raifân a om, raiinfân mai ki ti. 19 Nin ni chongchai pe sik le Jisua Krista Irtha changpuina sikin sansuak ki ni hrang tih kin hriat ta. 20 Ki inuam tak le ki isabei ngit kha ite mualinphoi loia, hâitaka i zoroa khom, hi zoro ngêta khom hin, damin mo ithiin mo, ki taksa Krista chôiindôm hi a ni. 21 Ki ta hrangin chu hring hi Krista a nia, thi khom inlâpna a ni. 22 Nikhomsian, ki la hringin chu sin kâmom la sin thei ok ki ti, a i tak mo inthang hrang inhre ma ung. 23 A lai lakloa omin, a’rngaina lamchang khom inhre loiin ki iom a ni. Hi hringnun hi mâkin, Krista kuanga om ta inlân ki’rzuk tak tak, kha kha a sa ual ok a ni. 24 Khannisian, nangni sika hin ki la ihring mai hi kâm a la iom ual a ni. 25 Nin rênga iamna irsôntir le nin raifânna inpung hranga ki dam mai hi a sa ual ti kin hriat ta. 26 Ki hong nôk tika chu keima sikin Krista lan pâk ual nin ti.
27 Mi danghai leh nin om dânhai kha Krista Thurchi Sa leh irhme bak ri se, ki hong mo hong no mo irtha hmunkhata ngîrindetin, lungrîl hmunkhat irputin Thurchi Sa iamna kha nin thop irrual ti inhriat thei ki ti. 28 Khanchu, doituhai chu i ang khomin chi loiin, hâitakin om unglân; khanchu, nangni inhnê no nihaia, inhnêhai nin ti, kha kha anni ta hrangin irhmangna a nih ti irsinsiana feltak ni a ti; asan chu inhnêna nangni petu kha Pathian a ni. 29 Krista sika ama nin iiam vai ni loiin, ama sika nin ituang sa hrang khomin phal nin ni. 30 Irdoina keimaa nin ihmu ngai, atûn khom a om tih nin inhriat kha nangni khomin nin itong sa tâk a ni hi.
1 Krista zâra irtharngamna nin nei tâka, a lungthungna khan nangni an lôma, Irtha pôlna nin chunga, irngaiinnatna le irlungkhamna nin nei ta. 2 Khasikin, lunginrual takin lungirthung irhlôma, inthuruala lungrîl hmunkhat irputin ki raifânna irkiptir roi. 3 Mâni hrang irzûl le irngaiinhlu taka ite tho loiin tukhomin irngaiintôm takin mi danghai sa ualin bê roi. 4 Mâni satna hrang vai zong loiin, mi danghai satna hrang khom zong roi. 5 Krista Jisua lungrîl ang hi nangni khomin irput mai roi.
6 Ama kha Pathian irangpui ni khomsianlân,
Pathian irangpuia om kha tum ngit hrangin irbe maka,
7 Mihriamhai anga zuang irzirin,
suak angin a’rsiama,
ama le ama a’rngaiintôm ual tâka.
8 Khanchu, mihriam anga zuang omin,
a’rngaiintôma,
thipui rakin thu a zôma,
krosa a thina ngei chu.
9 Khasikin Pathianin ama kha irsâng takin a sia tâka,
irhming murdihai laia irhming inchungtak a pêk tâka.
10 Khanchu, Jisua irnênga mihai,
irnêng hnuaia mihai a makunga khûksadel an ta.
11 Pa Pathian roiinpuina hrangin mi tinrêngin,
Jisua Krista kha Rengpa a ni tiin lan puang an ti.
Vâr anga rammual invâr hrang thu
12 Khanchu, ki indit takhaio, ki om laia ki thu nin izôm ang khan atûn ki om no khomin nin zôm nôk ual a inang a ni. Pathian chi le inthing pumin nin saninhringna irkiptir hrangin sin mai roi. 13 Ama nuamlam tho tum hrang le tho thei hranga nangnia sintu kha Pathian a ni. 14 Chiar loi le irsêl loiin itinrêng tho roi. 15 Atûnlai mi irkôkpoploi le pualoi laia hin Pathian nâi, sual neiloi, irthiangliai, sêlnaboi nin ni theina hrang le rammual invârtuhai nin ni theina hrangin. 16 Khanchu, môk intân ni loia, môk sinsôl ni ual loiin, Krista Nikhuaa chu song hrang nei thei ki ti.
17 Nin iamna sin thôna le irbôlnaa khan inhlana om hrang ni khom inlân lôm ki ti, nangni khom nangni lômpui sa ki ti. 18 Khaang dênin, nangni khom lôm unglân, ni lômpui sa roi.
Timothea le Epafrodita
19 Nin thurchi inhriata milung dam taka ki om theina hrangin Rengpa Jisua’n a sa a ti’n chu, nin kuang Timothea hong tîr lat thei ki ti, ti ki sabei a ni. 20 A dik taka keima anga nangni ngaitua chu ama vai hi a ni. 21 Mi danghaiin chu Jisua Krista ta hrang ngaitua loiin mâni ta hrangin an zong ngai. 22 Khannisianlân, ama hi chu a nangzia nin inhriat tâka, pa le nâi an sin suam angin Thurchi Sa sin kin tho suam ngai. 23 Khanchu, ki thurchi hrang kin hriat le ama hi hong tîr zôi thei ki ti, ti hi ki isabei a ni. 24 Rengpa’n sa a ti’n chu keima khom hong lat thei ki ti, ki iam. 25 Khan, ki urêngpa, ki sipai chanpui le ki tirtôn, ki innang inchuk hranga nin mi hong tîr Epafrodita hi, nin kuang hong tîr a nangin ki inhriat a ni. 26 Nin rêngin a sân nangni ar ngai tak taka, dam mah ti nin len hriat sikin a sân poi ki ti ok a ni. 27 Dam loiin a oma, thi vânga na chu a nia, khannisian Pathianin lung an khama, ama vai khom ni loiin kei khom lung a ni inkham ni a ti, beiindong ualna tong loiin a ni siam ta. 28 Khanchu, ama nin lei hmua nin lômna hrangin ama hi ki hong itîr lat a ni. 29 Ama hi Rengpa irhmingin raifân takin lei lôm unglân, hiang mi hi irngaiinhlu roi. 30 Nangnihaiin changpuina nin ni ipêk thei ban kha, ama’n ni pêk a tuma, a sân irnak song tak takin Krista sinthôna sika, a lei thipui vâng vâng a ni.
1 A mongna taka chu ki urênghaio, Rengpaa khan lôm roi. Thu pangai dên irziak nôk hi ki ta hrangin ihnông om ni mah, nin ta hrangin inlâp a ti. 2 Uihai ata, thil saloi thotuhai ata, sertan uarhai ata irdîn roi. 3 Eini Pathian Irtha zâra Pathian biak le Krista Jisua songa pên tiang thila irnghat loihai hi sertan dik tak ei ni ual a ni. 4 Nuam inlân chu kei khomin pên tianga thil chu ki isong thei kêng. Mi’n pên tiang thil song theia an inhriatin chu kei khom kin hre nôk ual a ni. 5 Sûn riat nia sertan, Israel irchia mi, Benjamina irchia mi, Hebrai nu le pa kâra suak ki ni, Dân zômna lama chu Farisai ki nia. 6 Sathnem irngaina tiang lak Koiindanghai dengintheitirtu ki ni. Dânin a inphût anga hlen suakna lama khom sêlnaboi ki ni. 7 Khannisianlân, kha thil kha, ki ta hranga inlâpna hrang ka chu, Krista sikin inchânna ki bê tâk a ni. 8 Kha vai kha ni mah, ki Rengpa Jisua Krista inhriat hi a sân a hlua, itinrêng hi inchânna ki bê tâka, Krista kha ki nei theina hrang le ama leh pumkhat kin ni theina hrangin, ama sikin itinrêng kin chân tâka. 9 Dân zôm sika ni loiin Krista iam sika thiamchang ki ni, iamna sika Pathian makunga thiamchangna chu. 10 Thil ki inuam tak chu hi hi a ni. Krista inhriathai, a thoinôkna sinthotheina dong hai, a ituang anga tuang hai, a thina irtemtuhai hi a ni. 11 Khanchu mithi thoinôknaa khan kaithoi ni ngêt ki ti.
Inkungna ten pana intân
12 Ki hmu tâk irti ni ma unga, ki’rkip tâk irti khom ni ual ma ung, “Krista ni man nasan hi ki man rôi mo,” tiin irzûlin ki irzûl mai a ni. 13 Urênghaio, hlochuk tâkin irbe ma unga, thil inkhat ki tho ngai, thil fe tâkhai kha irnghilin mân tiang thilhai kha ki thîr ual a ni. 14 Krista Jisua Pathian chung tianga koina lômman, hringna kha, hmu ngêt hrangin inkungna tiang ki pan ngut ngut a ni. 15 Khanchu, eini puihling tâkhai hin chu khaang lungrîl kha irput ei ti. Khan, senkhatin ngaidân dang nin nei duai khomin Pathianin nangni lan fâi pe a ti.
16 I khom nisianlân, ei iphâk ten chit hi indikin, khataka irthokin mân tiang fe mai ei ti. 17 Urênghai, ki omdân irchupuhai ni roi, enton hrang nin ni neia, kin om dân anga omhai chu en ual takhai roi. 18 An om dâna Krista kros râl tamtak an om ti nangni ki hril mai ngai kha, atûn khom chap pumin nangni ki ihril nôk a ni. 19 Khahai mongna hrang chu siatna a ni, fâk hrang hi Pathiana an bêa, an inzakpui hrang thilhai kha an song uala, rammual thil ringot an ingaitua a ni. 20 Eini chu irvân khua le tuihai ei nia, irvân ata a ni saninhringtu Rengpa Jisua Krista zuang hrang kha nghâkhmo takin ei ithîr a ni. 21 Itinrêng ar cham hnuaia sia theitu khan, ei taksa intem tak hi ama taksa roiinpui anga om hrangin a sinthotheina khan a ni indanglamtir hrang a ni.
1 Khasikin ki urêng inditom takhai le ki irngai tak takhai, ki raifânna le ni roiinpuitirtu hranghai ki indit takhaio, khaang khan Rengpaa ngîr indet roi.
2 Rengpaa khan milung hmunkhat irput hrangin Euodii le Suntuki kha ki ngênhai. 3 Nang khom, ki ringkol irbunpui iamom tak, kha nupanghai kha changpui hrangin nang ki ngên a ni; anni khan Klemena le Hringna Bua irhming chuang danghai le, Thurchi Sa hrilna sina ni sinpui intam ngai an ni.
4 Rengpaa khan lôm mai roi, ti nôk ki ti, lôm roi! 5 Nin tuangtheizia mi murdi inhriat ni ri se. Rengpa kha anai e. 6 Itea khom lunginzîng no roi, i thila khom chongchaiin nin innanghai Pathian kuang intung unglân, lômthu hril pumin ngên roi. 7 Khanchu, mihriam inhriat phâk loi, Pathian irtharngamna khan nin milung le nin lungrîlhai kha Krista Jisuaa khan nangni enkol pe a ti.
8 A mongna taka chu urênghaio, a dik le mahripom murdi, a fel le irthiang murdi, inditom le a thanginsat murdi, satna a oma inpâk ruk a om photin chu, khahai kha ngaitua roi. 9 Ki kuang nin thil irchu le donghai, nin thil inhriat le hmuhai kha tho ngai roi. Khanchu irtharngamna Pathian khan nangni ompui a ti.
Filipi mihai thilpêk sika Paula lômthu
10 Nin ni ngaituazia, hi kâra hin nin hong inlangtir nôk thei tâk sikin, Rengpaa khan ki lôm tak tak a ni. Khaang tho kha nin tum ngeia, zoro’nchum nin la ihmu loi ringot a ni. 11 Ki irsamna thu ki insîr ual chu ni ma ung; i ang khomin om inlân milungchuk taka om dân kin hriat tâk sikin. 12 Inriang taka om dân ki theia, irchong taka om dân ki thei tâka; itinrênga khop le phîngchâma om dân, irchong le inriang om dân thu’rthup ki’rchu ta. 13 A nin hrâttu sikin i khom tong hrangin hrâtna ki nei tâk a ni. 14 I khom ni sianlân, ki lunginzînghai nin ni inhriatpui ngai hi nin tho’n satak tak. 15 Khan, Thurchi Sa ki hril phut laia Makedonia ki suaksan hnung khan nangni Filipihai vai ni loi chu Koiindang dang inkhat luan sum hmang hrang ni ngaituapui om mahai ti nin inhriat. 16 Thesalonika khuaa ki om lai khomin ki’rsamna ni changpui hrangin voikhat vai ni loiin voihni reng thilpêk nin ni ithon kha. 17 Thilpêk zong ni ma ung, nin ta hranga irtha tianga ra hrang kha ki zong ual a ni. 18 Nin thilpêk murdi ki lei donga, ki nei intam ta. Epafrodita kuta nin thil hong thonhai kha ki lei hmua, ki’rhniang tâk e. Kha kha mirimhoi thilinhlan, pominruk, Pathian nuamlam a ni. 19 Ki Pathian khan Krista Jisuaa ar chongna roiinpui tak ata nin innang tinrêng nangni pe a ti. 20 Ei Pathian le ei Pa kha kumtuangin roiinpui ri se! Amen.
Chubai mûkna
21 Mi irthiang murdi Krista Jisua irhmingin chubai nangni ki mûk. Ki kuanga urêng omhai hin chubai nangni an mûk. 22 Mi irthiang murdi’n chubai nang an mûk, Kaisara ina omhai hin nangni an mûk ual tak a ni. 23 Rengpa Jisua Krista lungkhamna kha nin kuang om ri se.
1 Pathian nuamlam anga Krista Jisua Tirtôn Paula le ei urêngpa Timothea khan, 2 Kolosa khuaa mi irthiang om Kristaa urêng iamomhai kuanga khan, Pathian ei Pa kuang ata lungkhamna le irngeina nin kuang om ri se.
Kolosa Kristianhai sika Paula lômthu
3 Nin ta hrangin kin chongchai rikipin ei Rengpa Jisua Krista Pa, Pathian chu, lômthu kin insîr ngai. 4 Krista Jisua nin iiam tâk thu hai, mi irthiang murdi nin lungkham tâk thuhai kin lei inhriata. 5 Thurchi Sa thutak nin inhriat ata sabeina nin lei nei tâk sika a ni, kha sabeina kha nin ta hrangin irvâna sia insa a ni. 6 Nin kuang Thurchi Sa a hong tunga Pathian lungkhamna kha nin inhriat infel nî ata thil om dân ang khan rammual ram tina Thurchi Sa khan ra a suakin a indarh ta a ni. 7 Kin ta hranga Krista sinthotu iamom Epafra; kin suak chanpui inditom tak, Thurchi Sa hriltu khan, 8 Irtha zâra lungthungna nin nei thu hi a ni hril a ni.
9 Khasika khan irtha tiang vârna le inhriat thiamna tinrêng nuamlam nin inhriat irkip theina hrangin, nin thurchi kin inhriat ni ata chongchai le ngên pe mong ma ung. 10 Rengpa mi nin rukin, lam tinrênga inhriatnaa nin irsôn inlian theina hrangin kin ngên ngai a ni. 11 A sinthotheina roiinpui tak ata suak irzukna khan lam tinrênga sôina le tuangdiarna nei hrangin nangni inhrât a ti. 12 Khanchu mi irthianghai le a ram vâra irchon nei inruka siamtu Pathian kha raifân takin lômthu hril thei nin ti. 13 Ama khan inthim irchamneina ata a ni san suakin, a Nâipa lungthung taktu rama khan a ni hruai inlût ta a ni. 14 Nâipaa khan irtan suak ei nia, ei sualhai ngaidam a ni ta.
Krista mizia le a sintho
15 Krista kha hmu theiloi Pathian angpui, thil siam murdi mahruaitu a ni. 16 Amaa khan itinrêng, irvâna om hai, irnênga om hai, hmu thei hai, hmu theiloi hai siam a nia; rêngtoihmun hai roirêlna hai, inlalna hai, irchamneina hai, itinrêng hi ama sika siam a nia, ama ta hranga a ni sa. 17 Ama chu itinrêng om mâna, amaa khan itinrêng a irnghat sa a ni. 18 Ama kha Koiindang hi a takpum a ni sa; ama kha itinrêng bul a nia, itinrênga inchungtak a nina hrangin mithi laia thoinôkna mahruaitu a ni. 19 Amaa Pathian nina irkip a om hi Pa nuamlam a ni. 20 Krista sikin Ama leh a’rngeitir nôka, Krosa a Nâipa thisen khan irngeina a siama, Krista sika khan irnênga omhai, irvâna omhai kha Ama leh irngeina a siam ta.
21 Nangni khom tiana khan chu Pathian ata mikhual nin nia, thil sual nin irngaituaa nin tho ngai sikin râl nin ni. 22 Nikhomsianlân, atûn chu A Nâipa taksa thina sikin a rual hrangin nangni a siam tâka, a makunga irthiang le demnaboi le sêlnaboia nin om theina hrangin, Pathianin Ama leh nangni a irngeitir ta a ni. 23 Khanchu iamna khan om mai unglân, det taka ngîrin Thurchi Sa nin inhriat sika sabeina nin nei tâk kha irtôl irhmang no roi. Thurchi Sa kha irvân hnuaia thil siam murdi hril a ni ta, kei Paula hi kha sinthotua siam ki ni.
Koiindang ta hranga Paula sinthôna
24 Nangni sika ki tuangna hin atûn hin ki râi a ifân a ni. A takpum, Koiindang ta hranga Krista tuang bakhai kha ki takpumin ki isunzom mai a ni. 25 Pathian thu le a lei inkung kha nin kuang irkip taka inpuang hrangin Pathianin sin a ni pêka, Koiindang sinthotu’n kei hi a ni isiam a ni. 26 Mi murdi ata kumkhuaa a lei ithup ngai, thu’rthup kha, atûn a mi irthianghai kuang an langtir ta. 27 Kha mihai kuang khan Nam tin ta hranga thu’rthup roiinpui le hlu tak kha Pathianin inhriattir a nuam ngei a ni; kha thu’rthup kha, Krista nangnia om, roiinpuina sabeina san kha a ni. 28 Krista thu kha mi murdi laia kin hrila, Kristaa ei puihling chit theina hrangin vârna tinrêngin mi tin kin irchuin kin kaihruai ngai a ni. 29 Kha sintho hranga khan Krista hrâtna, keinia sin ngai kha hmangin kin beia, a sân irnak songin kin isin a ni.
1 Nangni le Laodikei khua mi le taksaa ki hmêl hmu loihai khomin idôr tena irnak songin mo nin ta hrangin ki isin ngai nin inhriat ki inuam a ni. 2 An milung irtha a’rngam theina hrangin lungthungnaa an irsuikhôma, lam tinrênga milunga inhriat felna a sipa, Pathian thu’rthup, Krista kha, an inhriat thei ki inuam a ni. 3 Kristaa khan vârna le inhriat thiamna irchon hlu murdi kha a’rphûma.
4 Tukhomin, thudik ni le irhoi taka inlang dik ual loia nangni an huang chian loina hrangin ki lei insîr a ni. 5 Taksa’n nin kuang om no khom inlân irtha’n nin laia ki oma, nin irvong infelzia le Krista iamnaa nin detzia ki hmu’n ki râi a ifân a ni.
Kristaa hringna irkip
6 Khanchu, Krista Jisua kha Rengpaa nin pom tâk sikin ama leh irzomin om mai roi. 7 Amaa khan irzung kaiin irzom unglân, irchuin nin om ang khan iamnaa khan ngîr indet unglân, lômthu insîr uar roi.
8 Irdîn roi, Kristaa suak ni loi, rammual irchutirna dikloi ramkhohri ata suak, rammual vârna an iti mihriam irchu nôk mai mai khan tu mo khatin nangni an huang itinin. 9 Krista takpuma khan Pathian famirkipna tinrêng kha a om. 10 Ama chu inlalna le irchamneina murdi lu a nia, amaa khan nangni khom famirkiptir nin ni.
11 Kristaa khan sertan nin ni tâk, mihriam kuta tan ni loiin, sual sinthotheina ata kêlsuana hrangin Kristaa sertan nin ni ta. 12 Baptismaa khan a kuang phûm sa nin nia, mithi lai ata ama kaithoitu Pathian sinthotheina iam sikin amaa khan kaithoi sa nin ni. 13 Nin porinchenahai le taksaa sertan loi nin ni sikin thi nin nia, khannisianlân, Krista leh nangni an hringtir tâka, ei porinchenahai murdi ngaidam a ni ta. 14 Thupêk kuta irziak, ni khâl ngaitu, zôm hrang hmabâk chu, a kâtpaia, Krosa khan hembe’n an boitir ta. 15 Kha Krosa khan Krista’n irtha roirêltuhai le irchamneinahai, sinthotheinahai ata suak paiin, khahai an hnêna kha mi tin hmu hrangin a siam ta.
16 Khanchu, fâk le nêk thua mani, in thua mani, nikho irthiang hmang thua mani, tha thar kût hmangna thua mani, Sabat ni thua mani, tukhomin ircham nangni nei pe no ri sehai. 17 Kha kha thil la om hrang irhlîm a ni, a tak chu Krista hi a ni. 18 Takpum irngainêp hrang, vântîrtônhai khom biak hrang tia inlârna danglam bîk hmua irbe, taksa lungrîl tak irputa, ite ni loia irpâkhai hi nin chunga ircham inneitirhai no roi. 19 A lu tak Krista chu chel ta mahaia, Amaa khan takpumpui hi irnak le irzung khitphiara infa a nia, Pathian nuamlam angin takpumpui kha a irsôn ngai a ni.
Kristaa hringna thar
20 Rammual irchutirna dikloihai kha Kristaa nin thisan tâkin te, itho sika mo rammual mihai angin hi thupêkhai 21 “Intôk no roh,” “irtem no roh,” “Tôn no roh,” itihai hi nin izôm mai? 22 Khaang thilhai kha mihriamhai isiam dân le irchutirnahai a nia, voikhat hmang zoi hnungin chu a irhmang nôk zit ngai kêng a ni. 23 Hi vântîrtôn biak tihai mani, takpum irngaiinêp tihai hi mani, sa zap le chu ar hoia, khannisian taksa irzuknahai inhnê hrangin chu ite ar fêna om mah.
1 Krista leh kaithoi nin ni tâka, khasikin Pathian chang tiang Krista toinaa om, chung tiang thilhai kha, zong ual roi. 2 Chung tiang thila nin lungrîl irnghat khak unglân, irnêng thila chu irnghat no roi. 3 Nin thi tâka, nin hringna kha Krista kuang Pathianin a vong insa a ni. 4 Nin hringna bul, Krista kha, a zuang inlang tena chu nangni khom a kuang roiinpui takin inlang sa nin ti.
Hringna milui le thar
5 Nin rammual om dân sual: irditna hai, porinchena hai, hurna hai, irzukna sual hai huatirhamna hai (kha kha millim biakna a ni,) hihai hi thatpai roi. 6 Kha thil sika khan iam loihai chunga Pathian ningmur a izuang chum hrang a ni. 7 Tiana khan nangni khom, khaang khan nin oma, nin nuamlam tak a ni. 8 Atûn chu ningmurna hai, milung inphuna hai, irhmumâkna hai, mâksan unglân, irhrilsiatna hai le chong porinche hai nin bâi ata suak no ri se. 9 Milak irhril irhlôm uar no roi, mihriam milui kha a sinthohai leh nin hlîk tâka. 10 Mihriam thar khan nin irbel tâk sikin; Pathian inhriat infel hrangin kha mihriam thar kha a siamtu anga om hranga siam thar mai a ni. 11 Kha hringna thar khan Grik le Juda, sertan le tanloi, Oze le Skuthia mi, suak le suakloi om thei mah, Krista vai hi itinrêng a nia, itinrênga a om.
12 Khanchu Pathian mi inthang, mi irthiang le inditom takhai ni le irhoiin lungrîl taka irrenna hai, khonzana hai, irngaiintômna hai, thuhnuairôlna hai, tuangdiarna hai khan irvô roi. 13 Tukhomin tu chunga khom thu’ntak nin neiin a tuang theiin, irngaidam irhlôm roi, Rengpa’n nangni a ingaidam ang khan tho roi. 14 Khahai murdi chunga khan lungthungna irbel unglân, kha kha itinrêng inrual taka khitkhop theitu a ni. 15 Krista irngeina khan nin milunga roirêl ri se, takpum inkhata om hranga koi nin ni. Lômna châng inhre roi. 16 Krista thu kha, a’rchongna murdi leh nangnia om ri se. Inpâkna hla hai, Pathian hla hai, Irtha tiang hla hai le vârna tinrêngin irchutir unglân, irthor irhlôm roi. Nin milung taka Pathian chôiindômin raifân takin inpâk roi. 17 Krista zâra Pathian kuanga lômthu hril pumin, nin itho murdi, thu’nsîra mani sinthoa mani Rengpa Jisua irhmingin tho zit roi.
Hringna thara Kristian in sûngkua om dân
18 Nuhaio, nin pasalhai thu zôm roi, kha kha Rengpa mihai tho rua a ni. 19 Pahaio, nin dôngmahai lungthung unglân, an chunga sual no roi. 20 Nâipanghaio, lam tinrênga nin nu le nin pahai thu zôm roi, kha kha Rengpa nuam lam a ni. 21 Pahai khom nin nâihai ninginmurtir no unglân, an beidongna ti. 22 Suakhaio, lam tinrênga nin puhai thu zôm unglân, mihriam inlômtir tumtuhai anga an hmu laia vai sin loiin, milung taka Rengpa chi pumin an hmu loia khom sin roi. 23 Nin itho murdi mihriam sintho ang ni loiin Rengpa sintho ang takin tho roi. 24 Irchon nin ilua hrang hi Rengpa ata lômman a nih ti inhre mai roi. Rengpa Krista sin nin itho a ni. 25 Thil dikloi thotuhai khan thil dikloi an itho man hmu an ti, Pathian chu tûte theibîk nei mah.
1 Hruaituhaio, nangni khomin irvâna Hruaitu nin nei tih inhriatin, nin suakhai chunga dik tak le satakin itinrêng tho roi.
Inthorna
2 Chongchai ngut ngut unglân, nin chongchainaa lômthu insîr pumin irngaitua roi. 3 Keini hrang khomin ni chongchai pe roi. A thu hrilna lampui Pathianin a nin hong pena hrangin, lung in ki intângna san Krista thurîl inpuang ki sunzom theina hrangin. 4 Ki insîr hrang lam ang taka kin sîr theina hrangin ni chongchai pe sa roi. 5 Iamloihai ata vâr takin om unglân, nin zoro kha hmang insa roi. 6 Itiklai khomin satak le chonghoi taka chong uar unglân, khanchu mi tin, i anga sâm hrang mo nin inhriat hrang a ni.
Inthâna chubai
7 Rengpaa ki chanpui sinthotu iamom tak, kin urêng inditom tak Tukika hin ki thurchi murdi nangni hril a ti. 8 Kin thurchi nin inhriata lungrîl raifân taka nin om theina hrangin ki hong itîr a ni. 9 Ama pâla hin nangni mi, urêng inditom tak Onesima, iamtu det tak hi ki hong tîr sa a ni. Hi thurchi hi nangni hril zit a ti.
10 Aristarka, intângna ina ki iompui hin chubai nangni a mûk. Marka, Barnaba tupa khom hin chubai nangni a mûk. (Ama hi nin kuang a hong zoro’n chu lei lôm hrangin nangni ki hril tâk kha.) 11 Josua, Justa an iti hin chubai nangni a mûk, Juda Kristianhai laia khan anni inthum vai hi Pathian Ram ta hranga a sinthotu an ni, ki’rtha a sân an irngamtir a ni.
12 Epafra, nangni mi, Krista Jisua suak hin chubai nangni a mûk. A chongchai rikipin det takin nin ngîra, nin hong puihlinga, Pathian nuamlam anga iamtu tak ni theina hrangin sathnem irngai takin nangni a ngên pe ngai a ni. 13 Nangnihai ta hrangin, Laodikei khuaa mihai le Hieropolis khuaa mihai ta hranga ama hi a sin intam tak tak ti khom kin hriat a ni.
14 Luka, daktor inditom tak le Dema hin chubai nangni an mûk.
15 Laodikei, khuaa urêng omhai le Numfii le a ina Koiindang inkhôm ngaihai kha chubai ni hong mûk pe sa roh. 16 Ki lekha hi nin laia nin tep zoia, Laodikei Koiindang inteptir sa roi, khaang dênin Laodikei Koiindang lekha hi lei tep sa roi. 17 Khan, Arkipa kuang khan, “Sinthôna, Rengpa kuang ata ni idong kha ni izoi ngêt hrang kêng, ti roi,” a tia. 18 Kei Paula’n hi hi keima kut ngeia irziakin chubai nangni ki imûkna a ni, ki thîrkol bunhai hi inhre mai roi. Pathian lungkhamna kha nin kuang om ri se.
1 Paula, Silvana le Timothea khan, Pa Pathian le Rengpa Jisua Kristaa Thesalonika koiindanghai laia: Lungkhamna le irngeina nin chunga om ri se.
Thesalonika mihai iamna le om lam
2 Nangnihai sikin Pathian kuang lômthu kin sîr ngai; kin chongchainahaia khom mong loiin nin irhming kin irlam ngai. 3 Iamna sika irnak nin isonghai, lungthungna sika nin sin intamzia haia, ei Rengpa Jisuaa sabeina nin sip indetziahai, ei Pa le Pathian makunga kin inhriat mai ngai a ni. 4 Urênghaio, Pathianin lung nangni a thunga, ama ta hranga inthang suak nin nih ti kin inhriat. 5 Nin kuang Thurchi Sa kin hong intung lai khan thu mai mai ni loiin sinthotheina le, Irtha Irthiang iam pumin kin hong insîr a ni; nin laia i angin mo nin ta hrangin kin iom khom nin inhriat. 6 Kin om lam le Rengpa om lam lâktuhai nin hong ni tâka, intakna tamtak tuang pumin Irtha Irthiang thu kha lâkin nin pom ta. 7 Khanchu, Makedonia le Akaia rama iamtu murdihai ta hrangin enton nin nia, 8 Rengpa thu atûn nangni ata Makedonia le Akaia rama vai indarh tâk hi ni loiin hmun tina Pathian nin iiam thu an thang tâka; khasikin keini’n ite kin insîr nang ta mah. 9 Nangni kin hro laia nin ni lôm lamhai, millim mâksana Pathian hring le dik taka sintho hranga Pathian tiang nin hong irhei tâk thu hai le 10 A Nâipa Jisua, mithi lai ata kaithoi, ningmurna zuang tung hrang ata ni sansuakpu kha, irvân ata zuang nghâka nin omhai an insîr sup sup a ni.
1 Urênghaio, nin kuang kin ihong kha a korong ni mah ti nangni khomin nin inhriat. 2 Nin inhriat angin Filipi khuaa khan inzakom taka soisak tuang khom inlân, irdoina tamtak kâra nin kuang Thurchi Sa hril hrangin ei Pathianin hâina a ni pêk a ni. 3 Kin thuhril hi thu dikloi mani, thu porinche mani, irhuangna thu mani ni maka. 4 Thurchi Sa inkoltir inruka Pathianin a ni inkung ang dênin, mihriam inlôm hrang ni loiin ei lungrîl fiatu Pathian inlôm hrangin thu kin ihril ngai a ni. 5 Itiklai khom mi inpâk pa pai ngai ma unga, huatirham irkhûna hrang thu insîr sa ngai ma ung tih nin inhriat, Pathian khomin an hriat. 6 Mi ni inpâk zong ngai ma unga, nangni’n mo mi dangin mo, mi ni inpâk khom irzûl ual ma ung. 7 Krista tirtôn kin ni sikin mihai ta hranga intak ni tuangpui ngai khomin lân, nu’n a nâihai a indot angin nangni kin indot a ni. 8 Khaang dôra nangni kin irngaiinnat hi, lung nangni kin thung sikin. Pathian Thurchi Sa vai ni loiin kin hringna ten khom nangni kin ipêk ngam a ni. 9 Urênghaio, kin sin sôlzia le intakzia kha nin inhriata, nin laia tukhom kin intaktir loina hrangin a sûn a zânin sin tho’n Thurchi Sa kin insîr ngai a ni, kha te! 10 Irthiang le fel le demom loi takin iamtuhai ata kin om ngai ti Pathian le nangni khom, nin hriatpuituhai nin ni. 11 Pa’n a nâihai chunga a itho angin nin rênga chunga kin tho ngai ti nin inhriat. 12 A ram le a roiinpuina chang sa hranga nangni koitu Pathian mi irphuaa om hranga ngênin, inthorin, nangni kin inhriatir ngai a ni.
13 Hi sika hin mong loiin Pathian kuang lômthu kin insîr ngai, kin thu hong insîr nin pom lai khan, mihriam thu anga pom loiin Pathian thu ngêt chu a nia, nangni iamtuhai chunga sintho ngai kha a ni. 14 Urênghaio, nangni khom Judai rama Pathian koiindanghai Krista Jisuaa omhai irchutirtu nin lei nia, anni’n Judahai ata an ituang angin nangni khomin nin mihai ata nin itûng kha. 15 Kha Judahai khan Rengpa Jisua le deipuhai an thata, keini khom an nin buaia Pathian inlômtir mahaia, mi dang khom irdoipui loi nei mahai. 16 Saninhringna an ni theina hranga thuhril khom an ni khapa, sual chungirchuan thoa, a hnungkhôn taka chu Pathian ningmurna an chunga a itung tâk a ni.
Paula’n Thesalonika hro nôk a’rzuk
17 Urênghaio, lungrîl tiang ni loiin taksa tiang zoro i ten sûng mani ei irsena, khasikin nin hmêl hmu nôk kin irzuka, hmu tumin a sân kinibei a ni. 18 Nangni hong pan kin tum ngaia, keima Paula ngêt hin voihni voithum ki tum tâka, khannisian setana’n a ni khâl ngai a ni. 19 Kin sabeina mani, ki raifânna mani, ei inhnêna chôiindômna rênglukhum isong hrang hi i ma ni? Ei Rengpa Jisua a zuang tika, a makunga chu nangni ngei hi nin ini loi hrang ma ni? 20 Nangni hi kin roiinpuina hrang le kin raifânna hrang chu nin ini kêng.
1 Nin thurchi inhre loia om kin thei ta no sikin keini vai hi Atheni khuaa la om inlân sa kin tia. 2 Khanchu, kin urêngpa Timothea, Krista Thurchi Sa hrila Pathian sin kin ithopui hi nin iamna indet hrang le, 3 hi dengintheinahai sika nin laia mi tukhom nin inhnîng loina hrangin nangni inthor hrangin kin hong itîr a ni. Nangni khomin hi hi nei ngêt hrang a nih ti nin inhriat kha. 4 Nin kuang kin om lai khan dengintheina ei ituang hrang tih nangni kin lei ihril a ni. Khaang ngêt khan a hong tung ta ti nin inhriat. 5 Iamnaa nin det mai le det mai loi inhre loia om kin thei ta no sikin, Timothea kha kin hong itîr a ni, inthêmtu’n inthêmpai hrangin kin sin sôlna chanlamboi a chang thei itinin tia kin hong itîr a ni. 6 Timothea chu nin kuang ata a hong kîr nôk tâka, thurchi raifânom tak, nin iiam indetziahai, lungthungna nin inei intamzia hai, keini’n nangni hmu kin irzuk tak tak angin nangni khomin nin irzuk thu hai, itiklai khomin nin ni inhriat mai a ni tihai nin ni hrila. 7 Khasika khan, urênghaio, nin iamna a det sikin kin lunginzîngna le kin intakna murdia irtharngam takin kin om thei ta a ni. 8 Rengpaa nin det mai sika hin atûn chu kin ta hrangin kin hringna hi ar fêna a om ta. 9 Nangni zâra Pathian makunga kin raifânna murdi sika hin a kuang lômthu hril thei inlân o! 10 Nin hmêl kin hmu theina hrang le iamna nin irsam kin thuan theina hrangin Pathian kuang, sûn le zân ngûk takin kin zong ngai a ni.
11 Ei Pa Pathian ngei le ei Rengpa Jisua khan nin kuang kin hongna hrang lam ni siam pe ri se. 12 Lung nangni kin ithung nêka irkhêlin lung nin irthung theina hrang le mi murdi lung nin thung theina hrangin, nin lungthungna kha Rengpa’n inpungtirin nangni inpuang pe ri se. 13 Khanchu ei Rengpa Jisua khan a mi’rthianghai murdi leh a zuang tika, Pathian ei Pa makunga khan irthiang le sêlna boia a om theina hrangin nin milung indet ri se.
1 A mong taka chu urênghaio, Pathian inlôm lama om dân kin kuang ata nin idong ang khan nin oma, khaanga om mai hrangin Rengpa Jisua irhmingin nangni kin ngên. 2 Rengpa Jisua irchamneina hmangin i thu mo nangni kin pêk nin inhriat. 3 Pathianin irthiangliai hrang le irdit mapai hrangin nangni a inuam a ni. 4 Mi tinin irthiang tak le mahripom takin mâni bêl vong thiam chit roi. 5 Pathian inhre loi Jentailhai angin taksa irzukna lût no roi. 6 Hi thila hin tukhomin a urêng a huangin a chunga thil saloi tho no ri se; khaanga thotuhai chunga khan Rengpa’n phuba la a tih ti nangni kin inhriattir tâk kha. 7 Pathianin chu porinche taka om hrang ni loiin irthiang taka om hrangin a ni ikoi a ni. 8 Khasikin, hi thu uksak loi chu mihriam a ipoisak loi ni maka, Irtha Irthiang nangni pêktu Pathian kha a ipoisak loi a ni ual.
9 Nin kuang chu urênghai irlungthungna thu irziak nang maka, Pathianin nangni ngei lung irthung irhlôm hrangin nangni a irchu a ni. 10 Khaang khan, Makedonia rama nin lei itho ngai tâk a ni. Khasikin, urênghaio, kha lungthungna kha nei nôk ual hrangin nangni ki ngên a ni. 11 Nangni ki lei inhril tâk ang khan, dâiriama omin, mâni sintum chit lunghnânga, mâni hnuk chu hlosuak tum seng ngai roi. 12 Khanchu, iamnotuhaiin mahrip nangni tho an ta, tûte chunga nin irnghat khom nang no nia, ite irsam no chin ni.
Rengpa zuang nôkna
13 Urênghaio, sabeina rêng neiloi mi danghai anga nin beidong loina hrangin, a thi tâkhai thurchi nin inhriat kin inuam a ni.
14 Jisua a thia, a thoi nôk ti ei iama, khaang dênin Jisua sika a thi tâkhai khom Pathianin ama leh hruai sa a ti. 15 Rengpa thu’n hi hi nangni kin ihril a ni: Rengpa zuang nôk tena a hring a dama la om maihai hin, a thi tâkhai kha khêlhai thei viat no ih, iti hi. 16 Rengpa ngei kha thupêk khêk irhai le, vântîrtôn roiinpui tak irhai le, Pathian bekul irhai le irvân ata zuang chum a ti, Kristaa thi tâkhai kha thoi masa an ti. 17 Kha zoi hnungin chu eini hring dama la om maihai hi boiruaka Rengpa nghâk hrangin anni leh irrualin sûm laia khin lâkin om ei ta, Rengpa kuang kumkhua’n om ta ei ti. 18 Khasikin, hi thuhai leh hin irtharngam lei irsak irhlôm roi.
1 Aniachu, urênghaio, a zoro le a nikhua thuhai irziak pe nang mak chêi. 2 Rengpa Nikhua chu zâna inru angin a itung hrang ti nangni ngeiin fel takin nin inhriat. 3 “Ningbeina le zôkna,” zoroa an ti lai takin nupang nâiha ise angin voikhat rengin an chunga irhmangna zuang tung a ta, lôi thei no nihai. 4 Urênghaio, nangni chu inthima om mak chêia, kha nikhua chu inru angin nangni de no ni. 5 Nin rêngin ivâra mi le sûna mi nin ni. Zâna mi le inthima mi ni mak me. 6 Khasikin mi danghai angin in no idua; har ei ta, irngaitua zui ei ti. 7 Mi’n zâna kêng an i-in ngai, zu khom zâna kêng an inrui ngai. 8 Eini chu sûna mi ei ni sika hin iamna le lungthungna rôppho kha innghâkin, saninhring sabeina kha lukhuma hmangin irtûng chianin om ei ti. 9 Pathian ningmurna tuang hrang ni loiin ei Rengpa Jisua Krista zâra saninhring ni hrangin a ni inkung ual a ni. 10 Ei dam khoma, ei thi khoma ama leh hmun khata ei om theina hrangin ei irthûlin a ithi a ni. 11 Khasikin, irtharngam irsak irhlôm roi, nin lei itho ngai angin.
Irchutirna hnungkhôn le chubai mûkna
12 Urênghaio, nin ta hrangin intak taka sintuhai le hriltuhai kha inhre mai hrangin nangni kin ngên. 13 Anni chu an sintho sika ngaisâng tak takin lungthung unglân, irngei siam siam roi. 14 Khan, urênghaio, nangni ki ngên, mi thaboihai kha ngo unglân, mi beidonghai kha irtharngam sakhai unglân, mi hrât loihai changpui unglân, mi tin chunga nin lungrîl insôt roi. 15 Tukhomin tu sual khom suala thuan loi hrangin irdîn unglân, itiklai khomin thil sa tho’rhlômin mi murdi chunga thil sa tho mai roi. 16 Lôm mai unglân, 17 mongloiin chongchai unglân, 18 itinrênga lômthu hril mai roi. Hi hi Krista Jisuaa khan Pathianin nin tho hranga a inuam chu a ni. 19 Irtha kha that no roi. 20 Thuhrilhai khom hmusit no roi. 21 Itinrêng fia ual unglân, a sa kha pom khak unglân, 22 a saloi kha masan roi.
23 Irngeina Pathian ngêt khan nin pumin irthiangtir sianlân, ei Rengpa Jisua Krista zuang nôk tika chu nin irtha le lungrîl le nin taksa a puma sêlna boiin inomtir ri se. 24 Nangni a koitu chu iam a oma, tho khom tho ngêt a ti. 25 Urênghaio, ni chongchai pe ngai roi. 26 Urêng murdi kha kut chelin chubai ni mûk pe seng roi.
27 Hi lekha hi urêng murdi inhriata tep hrangin Rengpa irhmingin nangni ki ngên. 28 Ei Rengpa Jisua Krista lungkhamna kha nin kuang om ri se.
1 Paula, Silvana le Timothea khan Thesalonika khuaa Pathian ei Pa le ei Rengpa Jisua Krista koiindanghai chubai ki mûk. 2 Pa Pathian le Rengpa Jisua Krista kuang ata lungkhamna le irngeina nin kuang om ri se.
Krista zuang tika roiinpuina
3 Urênghaio, nangni sikin Pathian kuang lômthu hril mai hrang kin nia, kha kha kin itho hrang pial a ni. Iamnaa chung nin tuar tak taka, nin rênga lung nin irthung irhlômna khom an thûk tîr tîr a ni. 4 Dengintheina le intak tinrêng dorôi takin nin tuanga, iamnaa nin detzia le nin dorôizia hai hi koiindanghai laia nangni kin song ngai a ni.
5 Pathian Ram sika tuang nin nia, khataka lût inruk nin ni theina hrangin. Pathian roirêl dikzia inlangna nin ni. 6 Pathian chu dik takin thil a tho ngaia, deng nangni intheitirtuhai chu intakna’n thuan a ti. 7 Rengpa Jisua kha irvân ata ama vântîrtôn sinthothei takhai le meichok laia a zuang inlang tika, nangni intak tuanghai hi hong irngamtir a ti, keini khom ni’rngamtir a ti. 8 Pathian inhre loihai le ei Rengpa Jisua Krista Thurchi Sa iam nuam loihai chunga phuba a lâk tika chu kha mihai khan hremna tuang an ti. 9 Kha mihai kha Rengpa makunga le a sinthotheina roiinpui taka irthokin kumkhua siatnaa khan pai ni an ti. 10 A mi’rthiang, ama iamtuhai kuang ata roiinpuina le chôiindômna dong hranga a zuang tika chu, kin thuhril nin lei iam sikin nangni chu kha iamtuhai laia khan kop sa nin ti. 11 Hi sika hin Pathianin nangni a ikoina irphua nin om theina hrang le sat nin nuamna murdi le iamna sika nin sinthohai kha, a hrâtnaa nangni ar kiptir theina hrangin, mong loiin nangni kin chongchai pe ngai. 12 Khanchu ei Pathian le Rengpa Jisua Krista lungkhamna zâra, ei Rengpa Jisua irhming kha nin laia chôiindôm ni a ta, nangni khom ama zâra chôiindôm ni nin ti.
1 Urênghaio, ei Rengpa Jisua Krista zuang nôkna le a kuang ei inkhômna hrang thua khan. 2 Irthaa insîr mani, thuhril mani, kin lekha sikin mani sirsana, “Rengpa nikhua kha a tung mai ta,” ti thu’nthang sika nin lungrîl inthinga inbuai loi hrangin nangni ki ngên. 3 Tukhomin i lampuia khom nangni hruai irhmang no ri se. Pathian ata tehelna chu a hong tunga, Dân insiatpa, Irhmang hrangpa kha, a hong inlang mâka chu kha Nikhua kha hong tung no ni. 4 Ama’n chu mihaiin Pathiana an inei, an ibiak murdihai kha doi a ta, anni nêka roiinpuiin irbe a ta, Pathian Tempil ngeia toiin Pathianin irbe a ti.
5 Nin kuang ki om lai khan, kha khan kha thu kha kin ihril ngai kha inhre mak chêi mo? 6 A zoro taka a hong tung theina hrangin atûn hin i’n mo nangni a ikhâlin nin inhriat? 7 Dân insiatna khan atûn khom inrûkin a la tho mai kêng; khannisianlân, a khâltu kha lâkpai a ni mâka chu hong inlang lik no ni. 8 Kha zoro tika chu Dân insiatpa kha hong inlang a ta, khannisian ama kha Rengpa Jisua’n hong that a ta, a zuang nôkna roiinpui taka khan zuang irhmangtir a ti. 9 Dân insiatpa kha setana hrâtnaa hong, sinthotheina tinrêngin sinirkhêl le thilirkhêl korong ni a ti. 10 Kha irhmang hranghai kha dikloi takin lam tinrênga huang ni a ta, anni saninhring thei hrang Thurchi Sa thutak kha an lôm no sikin. 11 Khasikin, milak an iam theina hrangin Pathianin an laia huangna hri an lêngtira. 12 Thutak iam loia fel loina lôm ualhai murdi’n thiamno an ichang zit hrang a ni.
Saninhring hranga inthang nin ni
13 Urêng, Rengpa indit takhaio, nangni sikin Pathian kuang lômthu hril mai hrang rêng ei ni; Irthaa irthiangtirin, thutak iam hrang le ra masa hrangin saninhring hrangin Pathianin nangni a inthang a ni. 14 Kha hranga khan ei Rengpa Jisua Krista roiinpuina changna hrangin ei Thurchi Sa hril hmangin nangni a ikoi a ni.
15 Khasikin urênghai, ngîr indet unglân thuhril le lekha thona thutak nangni kin irchutirhai kha intûk indet ngit roi. 16 Khanchu, ei Rengpa Jisua Krista, Pathian ei Pa, lung ni thungpu, a lungkhamna sika kumkhua’n irtharngamna le sabeina sa ni pêktu khan, 17 nin lungrîl irtharngamtir sianlân, thil sa tinrêng nin itho le nin insîra khan nangni inhrât mai ri se.
1 A mong taka chu, urênghaio, ni chongchai pe roi. Rengpa thu kha nin laia roiinpui tak le hrât taka a indarh ang khan an darh mai theina hrang le, 2 mi dikloi le mi sualhai ata ei zôk theina hrangin. Mi murdi’n la iam mahaia. 3 Rengpa chu iam a oma, ama khan nangni an hrâtin mi sualhaia irthokin nangni inzôk a ti. 4 Thu nangni kin ipêk angin nin zôma, nin izôm mai khom Rengpaa khan kin iam ngit a ni. 5 Rengpa khan nin milunghai kha Pathian lungthungna inhre nôk ual hrang le Krista anga tuangdiarna nei hrangin kaihruai ri se.
Thaboi loi hranga inthorna
6 Urênghaio, kin irchutirna thu zui nuamloia irthaboi taka om urênghai ata irkiang hrangin ei Rengpa Jisua Krista irhmingin thu nangni kin pêk a ni. 7 Kin isin lam takin nin isin hrang a nih ti nangni rengin nin inhriat infel. Nin laia kin om laia khan kin irtha inboi ngai ma ung. 8 Tu bu khom manboiin ne ngai ma ung, nin laia mi tûte deng kin intheitir loina hrangin sûn le zân sinin kin isôl a ni. 9 Kin thei no sika ni maka, nin entonna hranga tho kin ni ual ngai a ni. 10 Nin kuang kin om laia khan, “Sin tho nuamloi murdi’n chu fâk khom fa no ri se,” tiin nangni kin hril ngai kha te! 11 Nin laia senkhat an irthaboiin, chiar ti no chu ite tho loiin an om tih kin inhriat sikin kha kha kin iti a ni. 12 Khaang mihai kha sin tak taka mâni itho suaka irnghat hrangin Rengpa Jisua Krista irhminga thu pêkin kin inthorhai a ni.
13 Urênghaio, nangni’n chu sin sa sin hnông no roi. 14 Khan, tukhomin hi lekha thona kin thu nangni inpêl hi a zôm no’n chu an zak theina hrangin irsinsiahai unglân, irpôlpuihai viat no roi. 15 Aniachu, râl angin chu bêhai no unglân, urêng angin irchutirhai ual roi.
Chong hnungkhôn
16 Irngeina Rengpa ngei khan kumkhua’n lam tinrênga irngeina nangni pe sianlân, Rengpa kha nin rênga kuang om ri se.
17 Kei Paula’n keima kut ngeia chubai nangni ki imûkna a ni. Hianga ki irziak hi ki lekha thon murdi irsinsiana a ni. 18 Ei Rengpa Jisua Krista lungkhamna kha nin rênga kuang om ri se.
1 Keima Paula, a ni saninhringtu Pathian le ei isabei irnghatna Krista Jisua thupêk anga Krista Jisua tirtôn hin, 2 iamnaa ki nâi tak tak Timothe, chubai nang ki mûk. Pa Pathian le Krista Jisua ei Rengpa kuang ata lungkhamna, za’rngaina, irngeina hai ni kuang om ri se.
Irchutirna dikloi ata irdîn hrang
3 Makedonia rama ki fe hrang laia nang ki ingên ang khan Efesi khuaa om mai hrangin nang ki ngên nôk. Mi senkhat thurin dikloi irchutir ngaihai kha khaphai ngêt roh. 4 Khaanga thonthu le irchibulhai sui suina kha inmatir roh, irsêlna an intamtirna mai maia, iamna sika irhriat ngai, Pathian thil tum chu, mi inhriat infeltir ual mahai. 5 Milung irthiang, sia le sa inhriatna irthiang le iamna dik tak ata suak lungthungna kha a hong hring ual theina hrangin hi thu hi nang ki ipêk a ni. 6 Senkhatin chu kha kha an pêtsana, irsêlna inlâp loi tiang an lût ta. 7 Dân irchutirtu ang takin an irbea, an thu’nsîr omzia le ngam taka an thil insîr ngaihai kha inhre tak tak mahai.
8 Dân hi a hmangna hrang taka hmang a ni’n chu a sa ti ei inhriat. 9 Mi dikhai chunga irlek hrang ni mah ti inhre hrang a ni. Dân ngaisak loihai le tukullian hai, Pathian ngaisak loi le porinche hai nu le pa thattu hai le mi that hai, 10 irdit uarhai le mongkohur hai, mihriam inrûk uarhai le milak hai, milak thoa mâni thurchi dikloi taka insîrhai, thurin det insîr loi lama sintho murdihai hranga siam a ni ual. 11 Inpâk inruk Pathianin inpuang hranga a ni inkoltir Thurchi Sa roiinpui irkalna tianga irchutir uar hai chunga irlek hrang a ni.
Lungkhamna sika lômthu
12 A nin hrâttirtu, iam inruka ni bêa hi sin hranga nin kungtu Krista Jisua, ei Rengpa kuang lômthu ki insîr a ni; 13 matona khan an insîrinsiattu, dengintheitirtu le êrotu lei ni khom inlân, iamtu la ni ma unga; inhriat loia tho ngai ki ni sikin ki chunga za ar ngai tak taka. 14 Khan ei Rengpa lungkhamna tamtak khan Krista Jisuaa iamna le lungthungna’n a ni vur insip ual ta.
15 Krista Jisua kha mi sualhai saninhring hrangin rammuala a zuang tih hi a dikin pomrua tak a nia, anni laia kei hi a sual tak ki ni. 16 Hi pa sika hin lung a ni inkham a ni, Krista Jisua khan ki chunga a tuangdiarzia an langtir masaa, atûn ata khom ama iamtu murdi’n, kumtuang hringna nei thei an ti entîrna hrang a lei ni. 17 Inlaltak kumtuanga om, thi theiloi, mita hmu theiloi, Pathian tak vai kuanga khan chôiirsângna le roiinpuina kumtuangin om ri se. Amen.
18 Ki nâipa, Timothe, hi thupêk hi nang kin koltir; deipuhaiin ni chungchâng an lei insîr kha inhre maiin lân, kha thu kha hmangin irdoina sa kha beiin lân, 19 iamna le sia le sa inhriatna irthiang vong khak roh. Mi senkhathaiin an sia le sa inhriatna an hnôla, an iamna kha a koi siat zoi ta. 20 Khahai laia khan Humenaia le Alexandara khom an kopa, Pathian insîrinsiatna an mongna hrang le an irletna hrangin sep an nanga, Setana kuta ki pêk ta a ni.
1 Nang ki ibe nuam masa tak chu thil zongna hai, chongchaina hai, ngên pena hai, lômthu hrilna hai, mi murdi hrangin nei unglân, 2 Pathian ngaisak le mahripa omin irtharngam taka ei om suam theina hrangin inlaltak le irchamneitu murdihai hrangin zong pe sa roi. 3 Kha kha a ni saninhringtu Pathian hmuin a saa, a inuamlam a ni. 4 Ama khan mi murdi saninhringa om le thutak inhriat hrangin a inuam a ni. 5 Pathian inkhat vai a oma, Pathian le mihriam kâra palai inkhat vai a om sa, Ama kha mihriam Krista Jisua chu. 6 Mi murdi irtanna hrangin ama kha ar pêka, saninhringna thu chu a zoro a iti taka a zuang inpuang ta. 7 Keima hi, Jentailhai kuang chu iamna thu kha inpuang hrang le thutak irchutirtu le tirtôn hranga inkung ki ni; thutak ki insîr a ni, milak insîr ma ung.
8 Khanchu, nin inkhômna kipa pasalhaiin chu tho ta takin, ningmur le lunghla puma tho loiin kut irthiang pharin chongchai ri sehai. 9 Nupang khom a satak le ar hoi tôkin irvôhai sianlân, rêlirlek taka sam irvo mani, rângachaka irvo mani, lunghlu irthei irhli mani, puan man tam irbel mani uar no ri sehai. 10 Pathian ngaisak nupanghai tho irhoi, thil sa tho’n irbel ual ri sehai. 11 Nupanghaiin chu dâihrekin, thu ôi takin thil an irchu hrang a ni. 12 Nupangin mi an irchutir mani, pasal chunga ircham an inei mani phal ma ung, an idâihrek ngêt hrang a ni. 13 Adama kha siam masa a nia, kha hnunga kêng Evi kha siam a la ni sikin. 14 Khabana, ihuanga om kha Adama ni maka, nupang kha kêng ihuang le porinchetirtu chu a ni. 15 Nupanghai nâi nei zoro’n, Pathianin natna le dengintheina nangni an tongtira; khan khomnisian, iamna le lungthungna le, irthiangna neiin, lungrîl feltak leh an om photin chu saninhringin om an ti.
1 Tukhom Koiindang hruaitu sintho a nuamin chu sin sa a itho nuam a ni, ti hi a dik a ni. 2 Khanchu Koiindang hruaitu ni hrangin chu sêlna boi, dôngma inkhat nei, insumthei, lungrîl diktak, mi fel, mi lôm dân thei le irchutir thiam mi a ini hrang a ni. 3 Zu in ngailoi, mi vîk ngai loi, mi nunirnêm, irngei nuam mi le sum irngaiinnat loi mi a ini hrang a ni, 4 mahripom taka mâni in sûngkua om dân rêla, nâi le te enkol thiam mi a ini hrang a ni. 5 Mâni in sûngkua rêl fel thiam loiin itin mo Pathian Koiindang a ienkol thei hrang? 6 Iamthar mi ni no ri se, khano’nchu lârirpâk a ta, Diabola angin thiamno changna ti. 7 Pên tianga mihai ngaisâng a ini sa hrang a ni, khanchu irhming siatna hloin Diabola chânga a in-ôk loi hrang a ni.
Koiindang sinthotuhai
8 Khaang dênin Koiindang sinthotuhai khom omdân sa, lungrîl det, zû’n duloi, porinche taka sum hlêp nuam mi ni loi, 9 sia le sa inhriatna irthianga iamna thu chel indet khak mi an ini hrang a ni. 10 Enfia masa phot hrang an ni, an ruk dênin kêng sin an itho hrang a ni. 11 An nupanghai khom, khaang dênin mi mahripom, mi nuiso ngai loi, insumthei, lam tinrênga mi iamom an ini hrang a ni. 12 Sinthotuhai chu dôngma inkhat nei, nâi le te in sûngkua enkol thiam mi a ini hrang a ni. 13 Sintho insahai chu an dongtum hong sa tîr tîr a ta, Krista Jisua iamna lama khom hong hâi tîr tîr an ti.
Ei sakhua thu’rthup roiinpui
14 Hi lekha ki’rziak lai hin honga nang hmu lat ki’rsabei maia, 15 Khannisian, kin hnung taka Pathian sûngkua, Pathian hring Koiindang, thutak vongtuhai chu, i anga om hrang mani, nin hriat theina hrangin ki hong irziak a ni. 16 Tûte’n ei sakhua thu irthup roiinpuizia hi dik mah ti thei no ni:
Ama kha taksa irputin a zuang inlanga.
Irtha’n a dikzia an langtira,
Vântîrtônhai khomin an hmua.
Ama chu nam tin laia inpuang indarh a nia,
Rammual pumpuia mihaiin an iama,
Roiinpui taka lâkpai a ni ta.
1 Zoro hnungkhôna chu mihaiin iamna thu hi la’rheisan an ti, irtha dikloi la iam an ta, ramilhlihai irchutirna la zui an tih ti irtha fel takin an sîr. 2 Kha thu irchutirna inthek indartuhai kha sia le sa inhriatna cho, thîr irlinga eminchâr nei ang, milakthei an ni. 3 Mi senkhatin innei le thil senkhat fâk hi dik mah tiin mi an khapa. Khannisianlân, Thutak inhre tâk, iamtuhai chu lômthu insîr puma fâk hrangin Pathian isiam a nih ti an inhriat. 4 Pathian thilsiam murdihai hi a saa, ite pai hrang om ma; lômthu insîr puma fâk hrang a ni. 5 Pathian thu le chongchaina’n ar hlan irthiang zit ta.
Krista sinthotu sa
6 Hi kaihruainahai hi urênghai hrilin lân, Krista Jisua sinthotu sa ni ini hrang a ni; iamna thu le irchutirna sa ni zôm ngai ang khan irtha tianga nang irsôntir sa ri se. 7 Khannisianlân, Pathian mahrip loia, pitarhai thonthu dukdakloi mai mai irheisanin lân, Pathian ngaisakna tiang thila irsep roh. 8 Taksaa irsep hi an lâpa, irtha tianga irsepna len vâng chu lam tinrênga an lâpa, atûn hring sûng le nakan hringnun hrangin an lâp tak tak a ni. 9 Hi thu hi a dika, pom zôi zât a ni. 10 Pathian hring kha ei isabei irnghatna a ni tak tak a ni. Ama kha mi murdi ta hrangin saninhringtu a nia, iamtuhai ta hrangin a ni lele sa. 11 Hi thuhai le irchutirnahai hi urênghai pêkin lân, irchutir zui mai roh.
12 Ni nâiinpang sikin tûte’n nang manêp no ri sehai, thu’nsîrna lama, omlam dâna, lungthungna lama, irthiangna lama, iamtuhai entonrua ni roh. 13 Ki zuang mân chu vântâng laia Pathian thu tep hai, thuhril hai, irchutirna hai lei uar roh. 14 Upahaiin ni chunga kut irnghat laia deipuhai insîr anga irtha tiang thilpêk ni idonghai kha inthâ no roh. 15 Hmang zui maiin lân, tuina taka neiin lân, khanchu mi tinin ni masôn mai lam an ihmu hrang a ni. 16 Ni sintho le irchutirnaa a sân irdînin lân, hi hi tho maiin lân, nangma le ni thu irngaituhai ni isaninhring hrang a ni.
1 Upa ualhai chu ngo no’n lân, mâni pa anga enin a ngênin ngên roh; ruathartehai chu sangpa angin, 2 Pitarhai chu nu angin, dôngmatehai chu irthiang takin farnu angin enhai roh.
3 Mâni ringota om meithâihai chu inza’n lân; 4 khannisianlân, tu le nâi nei meithâihai khan in sûngkua tianga an sintum, Pathianin sûngkua mophurna a ipêk chu hlen suak irchu sianlân, anni infa inliantu kha infa nôk ri se, kha kha Pathian nuamlam a ni. 5 Infâtu neiloi, mâni ringota om meithâi chu, Pathian vai irhnêl hrang a neia, changpuina zongin a sûn a zân a chongchai ngai. 6 Meithâi rêlillek tak chu, a hring lai khomin mithi a ini chian a ni. 7 Hi irkaihruaina hi hrilin lân, sêlna boiin om ri se. 8 Khannisianlân, tukhomin mâni in tiang le khuahai, a bîkin mâni in sûng mihai a donsui no’n chu a iamna kha a hnôla, iamloi mi nêkin an sual ual a ni.
9-10 Kum sômruk la kâiloi chu meithâi laia irziak sa no roh; pasal inkhat vai nei, thil sa thôna lama inpâk ruk, nâi le te hong enkol inchuk tâk, mikhualhai lei intung ngai, mi irthianghai ke lei irsûk ngai, mi dengintheihai changpui nuam, thil sa thôna lama irpe mi a ini hrang a ni. 11 Meithâi la nâiinpang ualhai chu irziak no roh, an irzukna sikin Krista irheisana pasal nei an nuam nôk ngai, 12 an thu lei inkung tâk kha an porinchena sikin hrilsiat an hlo ngai. 13 Kha ni loi khom, mi ina an chainaa thaboi an irchua, thaboi vai khom ni loiin mi nuiso an uara, bâto an hrâta, an insîr loi hrang hrang an insîr ngai a ni. 14 Khasikin meithâi la nâiinpang ualhai chu pasal nei nôkhai sianlân, nâi neiin in sûngkua enkolhai sianlân, râlhaiin ni hrilsiatna hrang zel an inei loi hrang a ni. 15 Senkhat chu Setana zuiin an ipêt inchâi tâk a ni. 16 Iamtu nupangin, an in sûngkua meithâi ompui nei sianlân, a infa hrang a ni; Koiindang kha puakrik inpêl no ri se, meithâi an bing doka omhai khan an enkol theina hrangin.
17 Koiindang Upa, mi hruai thiam, thuhril le irchutirna tianga takirtâi bîkhai chu a bâk inhnia chôiindôm inruk an ni. 18 Lekha Thu’n, “Sehrâtpa’n bu a chîl laiin a hmûr khit no ri se; sinthotu chu a hlo hmu rua a ni,” a tia. 19 Koiindang upa an ihnôlna chu thun hretu inhni mani, inthum mani lua an om no’n chu, pom no roh. 20 Thil tho’nsualhai chu vântâng makunga halirchu roh, mi dang khomin an chi theina hrangin.
21 Hi thu hi ite theibîkna nei loiin, ni sin thôna tina tûte thop bîk nei loia, Pathian le Krista Jisua le vântîrtôn inthanghai mithmu’n zôm hrangin sathnem irngai takin nang kin hriattir. 22 Sinthotu hrang namindet irhnot no’n lân, mâni irvong irthiang roh. 23 Tui ringot in ta no’n lân, natna ni nei sikin, ni phîng hoina hrangin uain tômte te in viat sa ngai roh.
24 Mi senkhat sualna chu an lang pama, thiamno inchang thei zôi zel a ni; senkhat sualna chu sôt ian hnunga no’n chu inlang ngai mah. 25 Khaang dênin thil tho’n sa chu an lang pama, inlang no khom sian, thup mai thei chu ni mah.
1 Pathian irhming le ei irchutirna thu insîrinsiata, a om nona hrangin siahlohaiin an puhai kha itinrêng chunga chôiindôm inrukin bê ri sehai. 2 Suak, Kristian pu neihaiin chu iamnaa urêng an ini songin an puhai kha an ingainêp hrang ni mah, sa nôk ualin sin an itho pehai hrang a ni; an sinthotuhai le iamna le lungthungnaa in sûngkhat an ini kêng. Hi hi ni irchutirin ni inthorna hrang chu a ni.
3 Tukhom ei Rengpa Jisua Krista thu dik le sakhua irchutirna thu irkala irchutirna dang irchutir chu, 4 mi’nvêt, lârirpâk tak, ite inhre loi an ni; insîr hrang zong thei tak, irsêlna nuam, irhnarsa hai, irsualna hai, Pathian hrilsiatna hai, irsêl mongnaboi insuaktu an ni. 5 Lungrîl siat tâk, thudik man phâk ta loi, sakhua hi irchongna hranga hmang tumhai an ni. 6 A ni, Pathian ngaisakna hin mihriam ar chongtir ngai, a thil neia khan a milung a chukin chu. 7 Rammuala hin ite lûtpui mak mea, ite suakpui thei ual no ih. 8 Khasikin, fâk hrang le silkai hrang ei neiin chu ei milung inchuk ei ti. 9 Irchongna nuam mihai chu inthêmnaa an lûta, huatirhamna invêt, châng ichiom taka an in-ôka, an siatpuia, an irhmang ngai a ni. 10 Sum irngaiinnat hi sual tinrêng bul a ni, Sum nei intam an itumna tiang senkhat chu iamna hi an pêtsana, chardongna tamtakin an lungrîl an bingin an suninkhoi ngai a ni.
Mimal ta hranga inthorna
11 Nang, Pathian mi, kha thilhai kha nangma’n chu rotsan roh. Felna hai, Pathian ngaisakna hai, iamna hai, lungthungna hai thuhnuairôlna hai, tuangdiarna hai, nunhoina hai, nei tum khak roh. 12 Iamna hlu hi songin thei dôr insua roh; kumtuang hringna chu chel khakin lân, kha kha chang hranga koi ni ni, inhretu tamtak makunga iamna ni ipom thu ni inpuang kha.
13 Itinrêng hringna hnâr, Pathian le Krista Jisua, Pontia Pilata makunga chi viat loia, thudik thop ngittu makunga khan, 14 ei Rengpa Jisua Krista a zuang inlâr nôkna, Nikhua dêna thupêk kha iamom taka zôm hrangin tum roh. 15 An lârna kha chu a zoro taka Pathian inpâkrua le Roirêltu om sun, rênghai rêngtak le rênghai Reng khan intung a ni. 16 Ama vai hi thi theiloi, nâisâiloi zât, vâra om, tûte la ihmu loi le hmu thei ni sa loi kha a ni, a kuanga chôiindômna le sinthotheina kumtuangin om ri se. Amen.
17 Rammual mi irchonghai kha irsor loi hrangin hrilin lân, sum songloi ruaa irnghat tum loia itinrêng ei ihmang hranga ni pêktu Pathiana irnghat ual hrangin inthor roh. 18 Thil sa tho hrangin, thil sa thoa irchong hranghai phal taka mi danghai sem sa ngai hrangin inthor roh. 19 Khanchu, nakan tena irchon hlu tak an irsiam pe ni a ta, hringna tak tak an ichang hrang a ni.
20 O Timothe, ni chunga enkoltirna irnghat hi a sân vong irdîn roh. “Inhriatna dik,” tia an isong, dik ual loi, thu irkal, rammual mi tamtakin an irhnikpui ngai ata kha irkêm roh. 21 Kha kha senkhatin an izôm sa, iamna lam ata an iboi tâk a ni, Pathian lungkhamna kha nin rênga kuanga om ri se.
1 Paula, Krista Jisuaa hringna om inkungna thu insîrna tianga Pathian lungdoa Krista Jisua tirtôn khan 2 Ki nâi lungthung tak, Timothea kuanga: Pathian ei Pa le Krista Jisua ei Rengpa khan lungkhamna hai, irngeina hai ni kuang om ri se.
Thurchi Sa iamom
3 Sûn zâna ki chongchaina haia zoro tin nang kin hriat mai ngai sikin irchibulhai ata le sa inhriatna irthiang tak neia a sin ki tho ngai Pathian kuang lômthu kin sîr ngai. 4 Ni mitrithîhai khom kin hriat maia, raifân taka irhmu nôk a sân ki’rzuk. 5 Ni iamna detzia khom kin hriat mai ngai, ni pi Loisi inei le ni nu Euniki khomin a inei kha nang khomin ni nei a nih ti kin hriat. 6 Kha sika khom khan ni chunga kut ki’rnghat laia Pathian thilpêk ni idong kha sêm ir-al mai hrangin nang hril nôk ki inuam a ni. 7 Pathian Irtha ei idong hin nin dôptir maka, hrâtna hai, lungthungna hai, mâni irseptheina hai a ni ipêk a ni.
8 Ei Rengpa thu hi inpuang inzak no roh, ama sika lung in intâng khom hi nin zakpui ual no roh; Pathian hrâtna tûngin Thurchi Sa sika intak irhuam ual roh. 9 Ei sintho sika ni loiin ama tum dân a ni ual sikin lungkhamna’n a ni saninhringa, irthiang taka hring hrangin a ni ikoi a ni. Krista Jisuaa khan irnêng irsiang mân daiha a lungkhamna kha a ni pêk tâka. 10 Khannisian atûn hin, a ni saninhringtu Krista Jisua a zuanga khan, kha kha a hong inlang lik tâk a ni. Ama khan thina an hnê tâka, Thurchi Saa hin hringna le thi theiloina a hong inlang tâk a ni. 11 Kei hi kha Thurchi Sa inpuang hrangin Pathianin tirtôn le irchutirtu hranga inkung ki ni. 12 Khasika khan kêng atûn khom hianga ki ituang a ni; khannisian inzak ma ung; ki iiam chu kin hriat, ki inkoltir kha, kha Nikhua khan, a vong insa indik tih kin hriat.
13 Ki kuanga ta ni inhriat ngai irchutirna hrisêl kha a sân zômin lân, Krista Jisua iamnaa le lungthungnaa khan om ngit roh. 14 Ni chunga irnghat, thilpêk roiinpui tak kha, einia a om ngai, Irtha Irthiang hmangin a sân vong insa roh.
15 Asia rama om mi murdihaiin an ni mâk ti nin hriat, Fugela le Hermogena hai dênin, an nir heisan ta ti nin hriat. 16 Rengpa’n Onesifora in mihai kuanga lungkhamna pe ri se; anni khan voi iza an nin lômtira, lung ina ki intâng hi nin zakpui loiin. 17 Rom khuaa a zuang tung le a ni hong zong suak kher a ni. Efesi khuaa khom a sân a ni changpui intamzia nin hriat infela, 18 Rengpa khan kha Nikhuaa khan a lungkhamna kha indongtir ri se! Efesi khuaa ki ta hranga sin a ithozia khom nin hriat infel a ni.
1 Ki nâipa, nang chu Krista Jisua lungkhamna hin nang inhrât ri se. 2 Khan, hriatpuitu tamtakhai laia keima rengata irchutirna chong ni inhriathai kha, mi dang irchutir nôk thiai hrangin, mi iamomhai kuang inkoltir roh.
3 Krista Jisua sipai iamomtak angin intak ni tuangpui sa roh. 4 Sipai chu a hruaitu inlômtir hrangin hi rammual thil danga tomirzêl ngai mah. 5 Mi intân irsiat khom dân ang taka an tân no’n chu lômman hmu thei no ni. 6 Loimâna sin takirtâipu ngêt khan a ra a idong masa hrang a ni. 7 Ki insîr hi ngaitua sabakin lân, Rengpa’n lam tinrênga inhriat thiamna nang pe a ti.
8 Thurchi Sa ki hril ngai, Jisua Krista, Davida irchia mi, mithi lai ata thoi nôk tâk thu kha inhre mai roh. 9 Kha Thurchi Sa sika khan intak ki tuanga, mi sual ang dêna thîrhrui ikhit ki ni, Pathian thu chu khit zât ni ma. 10 Krista Jisuaa om, saninhringna kha, kumtuang roiinpuina le an dong theina hrangin irtanhai sikin, hihai murdi hi ki ituang a ni.
11 Hi thu hi a dik a ni:
“A thina ei kop sa’n chu,
A hringna kop sa ei ti.
12 Ei tuangin chu,
Ama leh roirêl sa ei ti.
Ei hnôlin chu, ni hnôl a ti.
13 Iamom no khom inlân,
Ama chu iam a om maia,
A bingin a’rphil thei no sikin,”
ti hi.
Sinthotu pomrua
14 Hi thu hi mihai inhriattirhai roh, Pathian irhmingin hrilin lân, thu irchua irsêlna ngai hi masan ri sehai, inlâpna om maka, a’rngaituhai an siatna mai mai a ni.
15 Nangin chu Pathian nuamlam mi, sinthotu, mâni sin inzakpui loi, thutak chu dik taka hmang theitu ni tum khak roh. 16 Rammual mihai thu dukdakloi kha irheisan roh, kha khan Pathian ngaisak loina tiang mi a hruai ngai. 17 Pân saloi angin an thu irchutir kha a zap ngai; an laia Humenaia le Fileta kha a bulpui an ni. 18 Thutak chu an pêtsana, “Thoinôkna chu a om chian ta” an tia, mi senkhat iamna khom an irhmangtir ngai. 19 Khannisian, Pathian lungphûm det tak kha chu inhnîng thei ma, ama khan hi chong hi irziak a om: “Rengpa’n ama tahai chu an hriat,” iti le “Tukhom Rengpa ta ki nih ti murdi’n chu sual hnung a isongsan ngêt hrang a ni,” ti hi.
20 In roiinpui taka bêlbûrhai khom rângachak le suma siam ni zit mahaia, pilsoia siamkhôm a ni, senkhat a hlu ual, senkhat hlu loi ual. 21 Hi thil saloi ki insîrhai ata irkêm mi hi chu hmangrua hlu, in Neitupa hrangin hmang zât, irsûkinfâi diam, sin sa tinrêng sinna hranga hmang zôi thei hranga irsiam chak ang hi lei ni a ti.
22 Thoibop irzukna hai chu irheisanin lân, milung irthiang taka Rengpa irlamtuhai le felna hai, iamna hai, lungthungna hai, irngeina hai irzûl roh. 23 Hi isêlna inlâploi le invêtom hi irheisan roh, irdoina an suaktirna mai mai a ni. 24 Rengpa siahlo chu irhal a iuar hrang ni ma, tukhom inrenthei, irchuthei, mi tuangdiarthei a ini hrang a ni. 25 Ama doituhai khom tuangdiarthei takin a suiôi hrang a ni, thutak inhre hrangin Pathianin an lungrîl a irlettir zôi thei. 26 Diabola chânga in-ôk, a nuamlam a inthotir ngaihai kha hong suakin la hong har suak an ti.
1 Sûn hnungkhôna chu zoro intak tak la tung a ti, ti inhre roh. 2 Mâni hrang satna zonghai, sum irngaiinnat hai, irsong hai, irpâkna hai, Pathian insîrinsiat hai, nu le pa thu zôm loihai, lômna neiloi hai, irthiang loi hai, 3 Irzirpui lungthungna nei loi hai, mi nunsia hai, mi hnôl ngai hai, irdîntheiloi hai, mi nunrông hai, mi that nuam hai, a sa nuam viat loi hai, 4 Vârirlet hai, milung hrât hai, irngaiinhlu hai Pathian lungthung nêkin mâni lômna vai lungthung ualhai la suak an ti. 5 A chungphua tiang chu sakho mi ang ni an ta, khannisianlân, a sûng tiang chu takna nei ual loihai la om an ti. Khaang mihai kha chu hnung songsanhai roh. 6 Khahai laia mihai kha kêng in sûnga lûta, sual puakrik nupang into ualhai suaka a man ngai. 7 Kha nupanghai kha irzukna tinrênga hruai irhmang, inhriat tum maia thutak inhre thei viat loihai an ni. 8 Jannia le Jambria’n Mosia an idoi anga khan, kha mihai khom khan thutak hi an doi ngai, lungrîl siat zoi tâka, iamna lama khom Pathian nuamloina lam mi an ni. 9 Khannisianlân, kha vai kha tho no ni, mi tinin an intozia an hmu hrang sikin. Kha tak kha, Jannia le Jambria chunga khom a itung a ni.
Timothea fûina
10 Nangma’n chu irchutirna hai, ki om dân hai, ki thil tum hai, ki iamna hai, ki tuangdiarna hai nin hriat. 11 Antiokei-a hai, Ikoniona hai le Lustra khua haia dengintheina le intakna tak tak ki chunga zuang tunghai dengintheina hai ki ituang irkhêlzia le khatak ata Rengpa’n a ni isansuak thu hai kha nin hriat. 12 Tukhomin Krista Jisua nunhoi tak anga om an tum photin chu denginthei ni ngêt an ti. 13 Mi sualhai le tho pa paihai chu an dongtum hong siat tîr tîr an ti, mi dang huang ngai khomsian anni ngei khom huang an ti.
14 Nang chu, nir chu tâk, ni pom indet tâk kha te, chel khak roh, tu mo nang irchu nin hriat. 15 Ni nâipangte ata Lekha irthiang kha nin hriat sa tâka, Jisua Krista iam sika saninhring ni hranga vârna nang a pêk thei ti nin hriat. 16 Lekha thu murdi hi Pathian phûkkhum a nia; ir-en indikna hranghaiin, irsiaminsatna hranghaiin, nun dân dik irchutirna hranghaiin an lâp tak tak a ni. 17 Khaanga hmangin kêng Pathian mi chu hmang inruk a hong nia, thil sa tinrêng thothei hranga irbel a hong ni ngai a ni.
1 Pathian le Krista Jisua, mithi le mi hring roirêltu hrang makunga a zuang nôkna le a ram inhriatin thu nang ki pêk. 2 Thu chu hril roh, zoro saa khom, zoro saloia khom, bei mai roh; tuangdiar taka irchutir pumin an dikloina irhmutirin lân, halirchu’n lân, inthor roh. 3 Irchutirna hrisêl irngai nuam sabak loiin an nuamlam vai irngaiin an mikuar lût lam anga irchutirtuhai vai an koibuk zoro la tung a ti. 4 Thudika an mikuar sungloia, thonthu mai mai irhnikpui an ti. 5 Nang chu itinrênga irsepin lân, tuang zâm zâm roh; Thurchi Sa hrilna sin hi sin maiin lân, ni sinthôna sin kha sua roh.
6 Kei chu inhlan hranga ti ki ni ta, rammual ata ki fe suak zoro a tung ta. 7 Intân irsiatna sa kha chu ki zoi tâka, ki’rhlanna hranga kin tân suaka, iamna kha ki ivong chian a ni; 8 atûn chu, thiamchangna, chôiindômna lukhum kha, dong hrang vai ki hmabâk a ni ta; kha kha roirêl dik, Rengpa khan, kha Nikhuaa khan ni pe a ta, keima vai ni loiin ama lungthunga, a zuang inlang nôk lei nghâkhai murdi kuang khom pe sa a ti.
Mimal thu
9 Ki kuang hong lat hrang hi lei tum zêl ta roh. 10 Dema khan atûnlai rammual a’rngaiinnat sikin Thesalonika khua tiang a ni rotsan ta, Kreskea khom Galatia rama a fe ta, Tita kha Dalmatia rama a fe sa. 11 Luka vaiin a ni ompui. Marka kha, sintho lama ni thoptu satak a ni, hong hruai roh. 12 Tukika chu Efesi khuaa ki tîr ta. 13 Ni hong tika chu Troas khuaa Karpa kuang ki songkol irfual hong mâk kha hong lan lân, ki lekhabu le, savun lekhahai len vâng kha chu hong chôi ngêt roh.
14 Alexander, dâr thîrsu kha ki chunga a sual tak tak ngai; a sintho ang takin Rengpa’n thuan a ti. 15 A kuang nang khom irdîn takin om ngai roh, ei thu’nsîr a idoi tak tak ngai kêng. 16 Ki thiamna thu kin sîr phut laia khan tûte’n ni changpui maka, anni imâk zit a ni; Pathianin mô chu inphurtir no ri se.
17 Khannisian, Thurchi Sa kha Jentailhai ta hranga kin sîr irkip theina hrangin Rengpa’n a ni ompuia, hrâtna a ni pêka, thi hrang tâk a ni ikêlsua nôk a ni.
18 Rengpa’n sualna tinrênga irthokin ni kêlsua a ta, a vân rama khin hoi takin ni hruai a ti. Roiinpuina kha a kuang kumtuangin om mai ri se! Amen.
Inthâna thu
19 Priskili le Akuila le Onesifora in sûng mihai kha chubai ni hong mûk pe roh. 20 Erasta kha Korinth-ah a la oma, Trofima chu a damno sikin Mileto-a ki mâk. 21 Phalbi mân hong tum ngêt roh. Eubula hai, Pudea hai Lina hai, Klaudi hai le urêng murdi’n chubai nang an mûk.
22 Rengpa kha nir tha kuang om ri se. Pathian lungkhamna kha nin rênga kuang om ri se.
1 Kei Paula hi, Pathian siahlo le Jisua Krista tirtôn, Pathian mi izenhai iamnaa kaihruai hrang le 2 sakho lam thudik, kumtuang hringna sabeina chu, inhriattir hranga inkung ki ni. 3 Milak tho ngailoi Pathian khan, kha kha irnêng irsiang mân daiha a lei inkung tâka, ama thu ang dênin sa a ti zoro taka a zuang inlangtir ta, a ni Saninhringtu Pathian thupêk anga, kha Thurchi Sa inpuangna sin kha inkoltir ki ni.
4 Tita, ki irkoppui iamnaa ki nâi tak tak kuanga ki irziak a ni: Pa Pathian le ni Saninhringtu Krista Jisua lungkhamna le irngeina nang pe ri se.
Kret chômbunga Tita sintho
5 Thil infel ban infel hrangin Kret chômbunga nang ki imâk a ni, thu nang ki ipêk ang khan kho tina upahai phun pehai roh. 6 Upahai chu demnaboi, dôngma inkhat nei an ini hrang a ni; an nâihai khom iamtu a hoihôkna tianga sêlnaboi le tukullian ni no ri sehai. 7 Koiindang hruaitu chu Pathian sûngkua enkoltu a nia, demnaboi ni ri se; mâni thu ringot nuam, milunginrem, zu’n rui mi, mi zêm song, porinche taka hlep nuam mi ni no ri se. 8 Mi lôm dân thiam, insumthei, mi’nthîk, mi irthiang, mâni irsep thei mi ni ri se. 9 Irchutirna dik takin mi an thor theina hrang le kha irchutirna sêltuhai kha thiamno an changtirhai theina hrangin irchutirna ang tak thurin iamom kha pom khak mi a ini sa hrang a ni.
10 Dân ni loi anga om, thuhril mai maihai le huangtuhai tamtak an oma, sertanhai laia mi an ni ual tak. 11 Khahai bâi kha hîp pehai hrang a ni; a sûngkua kuain mihai an inbuaihaia, sum hmu hrang sabeiin irchutir loi hrang hrang mi an irchutir ngaia. 12 Kret mi ngei, anni deipu inkhat khomin,
“Kret chômbunga mihai hi milak thei,
sahrâng pualoi, thaboi rôlruakhai an ni,”
a iti hi thudik tak a iti a ni. 13 Khasikin, iamna hrisêl an nei theina hrangin, na ianin irkôkhai roh. 14 Judahai thonthu mai mai le thutak irheisan tâkhai thu zôm ta no ri sehai.
15 Mi irthianghai ta hrangin chu itinrêng hi a’rthianga, mi porinchehai le iamna nei loihai ta hrangin chu ite hi irthiang om mah, an milung le an sia le sa inhriatna dênin a iporinche a ni. 16 Pathian inhriatin an irtia, porinchehai, thu zôm loihai, thil tinrêng thôna lama Pathian nuamloi lamhai an ni, (an sintho khan a philhai ngai.)
1 Nangma’n chu irchutirna hrisêl ni irchutir mai hrang a ni. 2 Putarhai chu insumthei, mahripom, irsepthei, iam dân dik, lungthungna nei mi le mi khonza thei ni hrangin inthorhai ro. 3 Khaang dênin pitarhai khan an om lama Pathian chi mi ni hrangin inthorin lân, mi nuiso uar, uain indu mi ni no ri se; thil sa irchutir uar sianlân, 4 nuvenghai chu an pasalhai le an nâihai lungthung mani, 5 insumthei mani, irthiang mani, in sûng omlam sa mani, khonzâna mani, pasal thu zôm hranga an irsep theina hrangin inthor ro. Khanchu, Pathian thu chu hrilsiata a om loina hrangin.
6 Khaang dênin pavenghai khom mâni irsep hrangin inthor roh. 7 Nangma len vâng chu thil sa tinrêng thôna lama entonrua takin omin lân, mahripom tak le a sate’n mi irchutirin lân, 8 chongbâi hoi, demna hrang om loi hmang ngai roh, a le tiang an inzakna hrangin.
9 Suakhai chu lam tinrênga an puhai kuang irpelût hrangin inthorhai roh; an nuamlamin omhai sianlân, an ithuanhai tur hrang ni mah. 10 An puhai neinun an inrûk hrang ni mah. Inrûk nêkin, Pathian ni Saninhringtu hi mihaiin an iam nuam theina hrangin itiklai khomin mi sa le iamom an nih ti an inlang ual hrang a ni. 11 Mi murdi saninhringa an om theina hrangin Pathian lungkhamna kha inlangtir a hong ni ta. 12 Atûnlai zoro hin Pathian uksak loina le rammual tiang thil masanin mâni irvong infela, dik taka omhai le Pathian uksakna nunhai a ni’rchutira. 13 Ei Pathian roiinpui taka a zuang inlangna nikho lômom ei isabei hi hlo’nchuk zoro ei inghâk a ni. 14 Ama ngei chu ei ta hrangin a’rpêka, tho’nsualna tinrêng ata a nir tan suaka, ama mi hrangin a ni’rthiangtira, thil sa tho nuamna a ni ipêk a ni.
15 Hi thuhai hi ni ihril hrang a ni, inthorin lân, irchamnei takin ngohai ro. Tûte’n nang ngainêp no ri sehai.
1 Roirêltuhai le irchamneihai kuang irpelûta an thu zôm hrangin le lam tinrênga sin sa tho hranga irzoi diama om hrangin inhretir nôk roh. 2 Tûte hrilsiat loia, irngeisîpa rual irchanga, mi tin chunga zâidam hrangin ti pe roh.
3 Tiana khan chu eini khom inmôltak, tukullian tak, hruai irhmanga om, irzukna le inhoina chi tinrêng suaka om ei nia, mi hnarsaa êsêlin ei oma; nunse tak, irkhôkmâk irhlôm uar mi ei ni ngai. 4 Aniachu, a ni saninhringtu Pathian khonzazia le a ni lungthungzia a hong inlanga khan, a ni saninhring ta. 5 Eini’n thil ei tho’n sa sika ni loiin, a lungkhamna sikin, a ni saninhring tâka, siamtharnaa irsûkinfâi le Irtha Irthianga siamthar ei ni tâk a ni. 6 A ni saninhringtu Jisua Krista zâra ei chunga hin ar tha kha a bun intam ok tâka, 7 khanchu lungkhamna sika thiam nin changtirin kumtuang hringna sabeina irchon luatuhai ei ni thei tâk a ni.
8 Hi thu hi a dik a ni. Pathian iam tâkhai chu thil sa tho nuamna lungrîl an irput zêl theina hrangin hi thu hi uar hrangin nang ki nuam a ni; kha kha a saa, tu hrang khomin a inlâp a ni. 9 Irsêlna kâmboi hai, irchibulhai sui sui hai, Dân thua irsêl irsêl hai masan roh; inlâpna nei maka, ar fêna om ual mah. 10 Irsen indarna insuaktu chu voikhat voihni ngo’n lân irngaitua zui no roh. 11 Khaang mi kha chu lungrîl kôi siat tâk an nih ti khom an inhriat chian a ni.
Inthâna chongbe
12 Artema mani, Tukika mani ni kuang ki hong tîr le chu Nikopoli khuaa ni hong pan lat roh, kha khan phalbi sûng chu om ki itum a ni. 13 Zena, dân inhre mi le Apolova chu, an inzinna lampuia ite an irsam loina hrangin ni thei ang tôkin changpuihai roh. 14 Ei mihai kha ra loia an om loina hrang le thil kâmom poimohai kha irsam loi hrangin sin tho nuam mai hrangin irchutirhai roh.
15 Ki kuanga om murdihaiin chubai nang an mûk a ni. Iamnaa ei rualhai kha chubai ki mûk. Nin rênga kuang Pathian lungkhamna om ri se.
1 Paula, Krista Jisua sika intângna ina intâng le ei urêngpa Timothea khan, kin sinthopui inditom tak Filemona hai, 2 kin farnu Afii hai, kin sipaipui Arkipa hai ni ina inkhôm ngai Koiindang mihai chubai kin mûk. 3 Ei Pa Pathian le Rengpa Jisua Krista kuang ata lungkhamna hai, irngeina hai nin kuang om ri se.
Filemona lungthungna le iamna
4 Ki urêngpa Filemona, ki chongchai rikipa nang kin hriat mai ngai, ki Pathian kuang khom lômthu ki hril ngai. 5 Ni iamna thu le Rengpa Jisua le mi irthianghai lung ni thungzia kin hriatin Pathian kuang lômthu kin sîr a ni. 6 Iamna sika irpôlkhômna ei inei takna hin Kristaa khan satvurna tinrêng ei idonghai inhriat thiamna an thûk ual ki sabei. 7 Urêngpa, ni lungthungna thu kin hriatin ki râi a fân tak taka, mi irthianghai lungrîl khom ni kaiinhar tâk sikin ki’rtha a’rngam ruam ta a ni.
Paula’n Onesima a ngên pena
8 Hi sik taka hin Kristaa urêng ei inina ni itho irhoi tho hrangin thu nang pe ngam khom inlân, 9 ni lungthungna inhriatin, keima Paula, atûn Krista Jisua sika intângna ina intâng hin, a ngênin nang ki ingên a ni. 10 Khaang khan, intângna ina intânga ki om laia Kristaa ki nâi Onesima ta hrangin keima irtha tianga pa hin ni kuang ki ingên a ni. 11 Matona khan ni ta hrangin hmanghmunboi ni khomsian, atûn chu ki ta hrangin a sân a nang tâka, ni ta hrang khomin nang ta ti. 12 Ki inuampuina lungrîl tak takin leh hi pa hi ni kuang ki hong tîr nôk a ni duah.
13 Thurchi Sa sika kin tâng sûng hin nangma irthûla ni changpui hrangin ompui mai ki nuam tak taka. 14 Khannisianlân a sa ni ti no’n chu ite tho tum ma ung; lungthungna chu nangma ata suak ngei ni sian tih ki nuam sikin, ama hi nang khappai pe ki inuam loi a ni. 15 Idôr ten sûng mani nang a irotsan hi kumkhuaa ni kuanga ngam patna irthûl ni a ti. 16 Atûn chu, suak ang ni ta loiin, suak nêka hlu tak, urêng inditom tak a ni ta, ki ta hrangin a satak taka, ni ta hrang khomin taksa tiang le Rengpaa sa nôk ual ngêt a ti.
17 Khasika khan, ni sinthopuiin ni ni bê tak takin chu keima ang dênin ama hi lei lôm roh. 18 Ni kuang ata sininchâi mani, a intâng mani a omin chu keima’n nang thuan hrangin lei insâp roh. 19 Kei, Paula hin keima kut ngêta irziakin nang thuan ki ti, ki iti hi. Nangma ngei ki kuanga ni intâng ti ual chu ni ma ung. 20 Khanchu, urêngpa, Rengpa sikin hi thil hi ni tho pe’n lân, Kristaa khan ki lungrîl nin lômtir roh. 21 Nang ki ingên hi hlo a chuk ngêt sabei ngitin ki irziak a ni, ki sabei nêka irkhêlin ni itho lele ki iam sa a ni. 22 Nin chongchaina hai kha sâmin nin kuang ki hong isuak ki sabei a ni, ki tungna hrang in ni lei ngaitua pe ro.
Inthâna chubai
23 Epafra, Krista Jisuaa, intângna ina ki intângpui hin chubai nang a mûk. 24 Ki sinthopui Marka hai, Aristarka hai Dema hai le Luka hai hin chubai nang an mûk. 25 Ei Rengpa Jisua Krista lungkhamna kha nin rênga kuang om ri se.
1 Tianlai khan Pathianin ei irchibulhai kuang a deipuhaia zoro tamtakin lam tinrênga thu a lei insîr ngaia. 2 Khannisianlân, sûn hnungkhônhai hin chu ei kuanga a Nâipa thu an sîr ta. Amaa khan Pathianin irnêng le irvân a siama, khabana ama kha sûn hnungkhônhaia chu thil tinrêng dong zit hrangin a iphun a ni. 3 Ama chu a Pathian roiinpuina vâr le, a tak angpui ngei le, ama sinthotheina thua itinrêng indingtu neiin, sualhai a’rthiangtir hnungin chung tianga Roiinpuitak chang tianga khin a hong toi ta.
Pathian Nâipa chu vântîrtônhai nêkin a roiinpui ual
4 Vântîrtônhai irhming nêka irhming roiinpui a nei tâka, khanchu anni nêkin a roiinpui ual a ni. 5 Pathianin hi chong hi vântîrtônhai kuang ti viat ngai mah,
“Nang chu ki Nâipa ni ni;
A vuan sûn hin ni Pa ki hong ni ta,” ti hi.
Khabana, Pathianin tu vântîrtôn thu khom insîrin,
“Keima a Pa ni ki ta,
Ama kha, ki Nâipa ni a ti,”
ti chong hi ti ngai mah. 6 Kha nêkin, Pathianin a Nâi lutîr kha rammuala a zuang tîr hrang laiin,
“Pathian vântîrtôn murdihaiin
Ama chubai an imûk ngêt hrang a ni,”
a iti ual a ni.
7 Vântîrtônhai chungchâng chu Pathian Thu’n hiang hin a ti,
“Pathianin vântîrtônhai chu phâivua’n a siam ngaia,
A sinthotuhai meichokin a siam ngai,”
a tia.
8 Nâipa chungchâng rêk chu Pathianin ama hi a iti a ni,
“O Pathian, nin lalna ram chu kumtuangin om mai a ti!
Ni mihai chunga felna’n roi ni rêl ngai.
9 Thudik nir ngai inhlua,
thudikloi ni hnôl ngai.
Khasikin Pathian,
ni Pathian khan nang inthangin ni hmêlhai nêkin chôiirsâng raifânna nang a ipêk ual ok tâk a ni hi,” ti le.
10 “Nang Rengpa’n a phuta irnêng ni siama,
irvân khom ni kut ngeia ni isiam a ni.
11 Khahai kha la boi an ta,
nang chu om mai ni ti;
Khahai kha silkai angin la milui an ti.
12 Puan angin inzuat ni ta,
Silkai angin thûl ni ti.
Nang chu a ngai dên nih ni ta,
Ni kumhai khom boi no ni,” tiin.
13 Pathianin vântîrtônhai laia tûte kuang hi chong hi ti ngai mah:
“Ni râlhai ni kezapha sianaa ki siam mâka chu,
Ki chang tiang hin toi roh,”
ti hi. 14 Khante, vântîrtônhai hi imo an ni? Vântîrtônhai chu irtha Pathian sinthohai an nia, saninhringna hmu hranghai changpui hranga tîr suakhai an ni.
1 Khasikin hruai irhmanga ei om nona hrangin thutak ei inhriathai kha ei intûk indet ngit hrang a ni. 2 Vântîrtônhaiin ei irchibulhai kuang thu an lei intung lua kha a dika, tukhom a zui loi le a zôm loi ka chu hremna an ihmu rua an hmu zel ngai a ni. 3 Hiang dôra saninhringna roiinpui vâng hi te uksak loiin tho inlân, itin mo ei irbîk thei hrang? Hi saninhringna hi a phuta Rengpa’n an puanga, kha hnung ama inhriathaiin a dik tih an ni ifia pe nôk a ni. 4 Pathian khomin sinirkhêl chi tinrêng le thilirkhêlhai sin le ama lungdoa Irtha Irthiang thilpêkhai semin khahai kha an hriatpui sa.
Saninhringna lama ei hruaitu
5 Pathianin vântîrtônhai kha rammual thar la hong om hrang ei insîr chunga roirêltu hrangin se mah. 6 Kha nêkin chu, kho hmuna mani, Pathian Thubua lei iti angin:
“Mihriam hi imo a nia,
O Pathian, ni inhriat mai ngai;
Mihriam nâipa khom hi imo a nia,
ni ikan ngai?
7 Ama chu vântîrtônhai nêka irhnuai ualin ni siama,
Roiinpuina le chôiindômna nin khumtira,
8 thil itinrêng chunga roirêlpu’n ni siam ta,”
ti’n irziak a lei ni. Pathianin mihriam hi, “Thil tinrêng chunga roirêlpu’n a siama,” a ti sikin lam tinrêng a huap zit ti a fela. Aniachu, atûn hin chu itinrêng thu hnuaia omin la hmu ual mak meh. 9 Khannisianlân, Jisua sôtnote hranga vântîrtônhai nêka irhnuai uala siam kha ei ihmu a ni, Pathian lungkhamna sika mi tin ta hranga thi hrangin. Thina a tuangna sika khan roiinpuina le chôiindômna inkhumin atûn hin ei ihmu tâk a ni. 10 Pathian, thil tinrêng siampu le indotpu ta hrangin chu, ama roiinpuina dong sa hranga nâi tamtak a hong hruaihai theina hrangin. Jisua khah dengintheina tuang sika famirkiptira siam hi a idik a ni. Jisua chu saninhringna tianga mihai hruaipu a ni sikin.
11 Irthiangtirtu le irthiangtirhai chu Pa hmun khata suak an ni. Khasikin, Jisua’n annihai kha urênghai ti inzak mah: 12 Pathian kuang,
“Ki urênghai kuang ni sinthohai insîr ki ta,
An inkhômnaa nang inpâk ki ti,”
a ti. 13 “Pathiana ki iamna irnghat ki ti,” a ti nôk, Pathianin, “Nâipang a ni ipêkhai leh hin kin om,” a ti nôk sa.
14 Jisua’n nâipang a ikoihai kha taksa le thisen nei an ni sikin, ama ngei khom anni anga zuang omin an mihriam nitna a zuang inthangpui sa a ni. Kha a zuang thô nasan tak chu thina chunga irchamneitu Diabola kha ar hmangtir theina hrang le, 15 thi chia dam sûnga suaka om murdihai kha a sansua theina hranga a ni. 16 A ichangpui ngai kha vântîrtônhai ni mah ti a fel. Pathian Thu’n, “Abrahama irchihai a changpui ngai,” a ti sikin. 17 Khasika khan Pathian sin a thôna khan mihriamhai Ochai Inlaltak, iamom le lungkhamnaa sip a hong nia, an sualhai ngaidam a ni theina hrangin lam tinrênga a urênghai angin a inang pial a ni. 18 Ama ngeiin thêmna tongin a lei tuang tâk sikin, atûn chu thêmna tonghai a changpui thei ta.
1 Ki Kristian urêng, Pathianin a ikoihai! Ei iamna lama ochai Inlaltak ni hranga Pathianin a itîr Jisua kha ngaitua roi. 2 Pathian in sûng mihai laia Mosia iam a iom ang khan, ama khom hi sin tho hranga an thangtu Pathian kuang iam a iom a ni. 3 In sintu khan a in nêkin chôiindômna a idong ual ngai ang khan, Jisua hi Mosia nêkin roiinpuina dong ual ok inruk a ni. 4 In tin hi tu mo khat isin mani chu a ni ngêta, thil tinrêng chu Pathian isiam a ni. 5 Pathian in sûng mihai laia tirtôn chu Mosia kha iamom tak a nia, Pathianin sûn matona a la iti hranghai kha a lei insîr a ni. 6 Krista rêk chu Pathian in sûng mihai chunga Nâipa’n iam a iom a ni. A in sûng mihai chu einihai hi ei ni, ei ihâina intûk indetin ei itûng hi ei irnghat ngit ngânin chu.
Pathian mihai ta hranga irngamna
7 Khasikin, Irtha Irthiangin,
“A vuan sûn Pathian hnukirhai nin inhriatin chu,
8 Nin irchibulhaiin ramchâra inthêmna nia,
Pathian an innuartir lai ang khan,
Nin lungrîl inngartir no roi;
9 Pathianin kha hmun khan nin irchibulhaiin,
An ni fia’n, an ni inthêma,
Kum sômminli sûnga ki sinthohai an hmu khomin.
10 Khasikin, kha irchihai chunga khan ki ning an mura,
‘An lungrîlin a hruai pêta,
Ki lampuihai khom inhre ta mahai,’ ki tia.
11 Ki ninginmurna sikin chonginkung ngar tak ki neia,
‘Ki’rngamna hrang rama khan lût viat no ni,’ ki tia,”
a iti ang khan. 12 Urênghai, Pathian hring kha hnungsong hrangin nin laia tûte’n iam loina lungrîl sual nin nei loina hrangin irdîn roi. 13 Khaang khan, nin laia tûte sual huangna sika milung ngar nin om loina hrangin Pathian Thubu’n, “A vuan sûn” ti a ni hmang pe sûng ka chu a ni tin irthor irhlôm mai roi. 14 Ei irnghat phutna kha a mong dênin ei intûk indet ngânin chu Krista leh Pathian satvur dong hranghai ei ni ta.
15 Ama hi Pathian Thubu’n a ti;
“A vuan sûn Pathian hê nin inhriatin chu,
Nin irchibulhaiin ama doia an irhel ang khan,
Nin milung inngar no roi,”
ti hi. 16 Tuhai mo Pathian hê inhriat hnunga tehel zong kha? Aigupta rama irthoka Mosia’n a ihruai suakhai kha an ni. 17 Tuhai chunga mo kum sômminli sûnga Pathian ning a inmur kha? Sual sina ramchâra thi tâkhai chunga khan a ni. 18 Tuhai mo Pathianin chonginkung ngar tak neiin, “Ki’rngamtirna hrang rama khan lût viat no nihai,” a iti kha? Tehel zonghai murdi kha an ni. 19 Khaang khan, an iamno sikin kha rama khan lût thei mahai tih ei ihmu a ni.
1 Atûn hin Pathianin kha irngamnaa nin lût hrangin chonginkung a ni ipêk a ni. Khasikin, nin laia tûte kha irngamnaa lût theiloi nin om loina hrangin irdîn ei ti. 2 An inhriat ang takin Thurchi Sa chu eini khomin ei inhriat. Thu chu an inhriat, khannisianlân, an thuin hriathai khan ite ar fêna hmu mahai; asan chu, thu an inhriat kha iamna’n an pom no sikin a ni. 3 Eini a iamhai chu, Pathianin a inkung irngamnaa khan ei ilût mai a ni.
“Ki ninginmurna sikin chonginkung ngar tak ki neia,
Ki’rngamna hrang rama khan lût viat no ni,”
a iti ang khan. A sinthohai kha irnêng le irvân irsiang phuta a izoi tâk ni khomsian, kha chong kha a la iti a ni. 4 Pathian Thubua, “Kho hmuna mani sûn sari ni’n chu Pathianin a sintho murdi ata a’rngam ta,” tiin. 5 Kha thu zôm dênin: “Ki’rngamtirna hrang rama khan lût viat no ni,” a ti nôk. 6 Thurchi Sa lei inhriat masahai khan an iam loina sikin, irngamna Rama lût ta no nihai, mi dang la lût hrangin phalna a la iom a ni. 7 Khaang khan, Pathianin “A vuan sûn” tiin nikhua dang an kung nôka, kum tamtak hnunga Davida hmangin matona a lei iti tâk,
“A vuan sûn Pathian hnukirhai nin inhriatin chu,
Nin milung inngar no roi,”
ti kha a ti nôka.
8 Josua’n mipuihai kha irngamna a lei ipêk thei ni sianlân chu, Pathianin inhnunga khan nikho dang thu insîr ta no ni. 9 Khasikin Pathian mihai ta hrangin chu sûn sari nia Pathianin a irngam ang khan irngamna kha a la iom mai a ni. 10 Tukhom kha irngamnaa lût chu Pathianin a sintho ata a irngam ang khan ama khom a sintho ata irngam a ti. 11 Tho, khasikin anni anga iam loina sika chuk loia om loiin irngamna khan ei lût theina hrangin a sân irnak song ei ti. 12 Pathian thu chu a hringa, sin a tho theia, i ang dôra khandai hriam ngaih tak nêk khomin a ngaih uala, hringna le irtha irbunnahai, ru’rbun le irtin hai dênin a sunkhoi chit theia, lungrîla ngaituana le tumnahai hi an hriat thei zôi zel ngai a ni. 13 Pathian hrangin chu ite thil irthup om mah, thilsiam tinrênghai khom a mithmu’n chu inlang pharin ar hong zit ngai a ni. Ama kuang ngei ei sik senga thurchi ei la insîr hrang a ni.
Jisua Ochai Reng roiinpui tak
14 Pathian omna irvâna fe tâk, Ochai Reng roiinpui tak Jisua, Pathian Nâipa kha ei nei sikin ei thurin hi intûk indet ngit ei ti. 15 Ochai Inlaltak ei hrât nonahai le inhre phâkpui theiloi mi nei mak mea, eini anga lam tinrênga thêmna tong tâk, khannisian, sual chu sual loi kêng ei ini.
16 Tho, khasikin za’rngaina le changpuina ei intak tika ei hmu theina hrangin Pathian lungkhamna rêngtoihmun kha hâi takin pan ei ti.
1 Ochai Inlaltak murdi’n chu, sualhai sika irbôlna le thilpêkhai inhlana mihriamhai irthûla Pathian sintho hranga mihriamhai laia irthoka phun an ni. 2 Khahai khom kha lam tamtak ata an hrât nona sikin, ite inhre loihai le an sualhai chunga khan an indîn thei ngai. 3 Khasikin mi danghai ta hrangin sual irbôlna an inhlan ang khan an mâni ta hrang khomin an inhlan ngêt hrang a ni. 4 Chôiindômna dong nuamin tûte Ochai inlaltak chang thei ngai mah. Arona anga Pathian ikoihai vai kêng ochai inlaltak a ichang thei ngai. 5 Khaang khan, Krista khomin ochai inlaltak ni sika chôiindômna kha ama ta hrangin la mah. Khannisianlân, Pathianin a kuang,
“Nangma ki Nâipa ni ni,
a vuan sûn hin ni Pa ki hong ni tâk,”
6 Hmun danga,
“Melkisedeka angin nangma Kumtuangin ochai ni ni ti,”
a ti sa.
7 A taksa irput lai sûnhaia khan Jisua’n thina irthoka ama saninhring theitu Pathian kuang a sâna inringa khêkin le ngênna hai a neia, irngaiintôma ar pêkna sikin irngai pe’n a om. 8 Pathian Nâipa tak ni khom sianlân, a tuangnahaia khan thu zôm a irchu a ni. 9 Irkiptir a hong ni tena chu a thu zômhai ta hranga saninhringna hnâr a hong ni ta. 10 Khaang khan, Pathianin Melkisedeka anga kumtuanga ochai inlaltak ni hrangin an kung ta.
Tûkna ata irdîn hrang
11 Hi thua hin insîr hrang tamtak ei nei, khannisianlân, an sîr infel an tak, nin inhriat thei no sikin. 12 A zoro ngaitua’n chu irchutirtu ni thei ta zit le nin irhoia, khannisianlân, Pathian thu bul rêt A, B, CH ata irchutir nin nang nôk tâk a ni. Bu’nhrum ni loiin irhnutui lan nang kêng nin ini. 13 Tukhom irhnutui lan nang chu, sia le sa lan hriat loi, nâite a ni. 14 Bu’nhrum chu ulianhai, an tho inzong sika a sa le a sia sen thei tâkhai hrang a ni.
1 Tho, khasikin Krista thu bul insîr ta loiin, maton tiang fe’n puihling lam pan ta ei ti. Sin chanlamboi thina intung ngai ata irleta Pathian iam hrang lam hai, 2 baptisma le kut irnghatna chungchânga irchutirna thu hai, thoinôkna thuhai le kumtuang roirêlna thuhai lungphûm chu phûm nôk ta no ih. 3 Maton tiang fe ta ei ti! Pathianin sa a tiin chu kha kha ei itho ngêt hrang a ni.
4 Khan, voikhat chu Pathian vâra om tâka, irvân thilpêk irtem tâka, Irtha Irthiang khom dong tâka, 5 Pathian thu satzia le zoro la hong hranga sinthotheina om hrang hai khom inhriat tâka, 6 an iamna mâk nôkhai chu irlet nôk hranga hong kîr nôk thei zât ni ta mah. Anni khan Pathian Nâipa kha hembe nôkin mualphoi an sak sikin. 7 Irnêng, a chunga rotui tâk ngai lei donga, a neitu ta hranga chîmu fâk rua insuak tâk chu Pathianin sat a vur ngai. 8 Khannisianlân, kha irnêng khan ilhling le hloi an suaktirin chu chanlamboi a nia; Pathian khomâksâm ichiomin a oma, inhnunga chu hâl irhmang a ni ngai.
9 Khannisianlân, rual lungthunghai, khaang khan ti khom inlân, nangni chu satvurna sa kin inhriat infel. 10 Pathian chu felloi ni mah. Ama ta hranga sin nin ithohai, lungthungna nin inlanghai, nin Kristian chanpuihai nin lei ichangpui le atûn ten khom nin la ichangpui maihai kha irnghil viat no ni. 11 Nin itûng a hong tung indik theina hrangin nin sika nin takirtâina chit insua mai hrangin kin inuam tak tak a ni. 12 Nin irtha inboi loiin iamna le tuangdiarna sika Pathian inkung hmuhai om dân kha irchu hrangin nangni kin inuam sa a ni.
Pathian chonginkung iamom
13 Pathianin Abrahama kuang chong an kung laia khan ama nêka roiinpui ual tûte an om no sikin, ama irhming sâmin khomâk ar sâma. 14 Pathianin Abrahama kuang, “Sat nang vur ki ta, irchi tamtak nang pe ki ti,” a tia. 15 Abrahama’n a tuangdiar sikin Pathian inkung kha a ihmu a ni.
16 Mihriamhaiin khomâk an irsâmin, anni nêka roiinpui ualhai irhming sâmin an irsâma, an irkhalna tinrêng khom an mong ngai. 17 Pathianin a inkung hmu hranghai kuang khan a thil tum indanglam viat no ni, ti infel pe ual nuamin a chonginkung kha khomâk irsâmin a indet a ni. 18 Khasikin Pathianin thil inhni a chonginkung danglam loi hrang le khomâksâm irkhêl loi hrang hmangin eini a kuanga zôkna hmuhai hin ei matona tûngna om hi intûk indet ngit hrangin a nin thor tak tak a ni. 19 Kha tûngna kha ei hringnun hrangin thîrkuaikim ang kha a ni. Det tak le iamom tak a nia, irvân biak in puanzâr sûnga hmun irthiang khoma khan a lûta. 20 Ama khan Jisua’n ei irthûlin ei matona a lei lût tâka, Melkisedeka angin kumtuang ochai inlaltak a lei ni ta.
1 Hi Melkisedeka hi Salem rêng le Pathian Inchungtak ochai a ni. Abrahama rêng minlihai inhnê zoia râl buala irthoka a hong tiang Melkisedeka hin a’rtongpuia, sat a ivur a ni. 2 Khanchu, Abrahama’n thil tinrêng sôma inkhat a pêk ta. (Melkisedeka irhming omzia masa chu “Felna Reng” a nia, khabana Salem rêng a ni sikin “Irngeina Reng” a ni sa.) 3 Melkisedeka pa mani, nu mani, ar chibulhai mani, irziak zel om maka; a suak ni le a thi ni khom irziak om sa ma. Pathian Nâipa angin ochaiin a iom mai a ni.
4 Irngai u ta, idôra roiinpui mo a ini; Ei irchibul Abrahama luan a râlhai thil tinrêng sôma inkhat a ipêk kha. 5 Levia irchihai laia ochai changhai kha, Israelhai kuanga irthoka sôma inkhat la hrangin Dânin thu a ipêk a ni; ama kha an ram mihai kuanga irthoka a ni, an ram mihai kha Abrahama irchi ngêt nihai khomsian an itho a ni. 6 Melkisedeka kha Levia irchi ni mah, khannisianlân, Abrahama kuanga irthokin sôma inkhat a lâka, Pathian chonginkung hmutu kha sat a ivur a ni. 7 Lunghlâna om viat loiin, satvurna dongtu nêkin a vurtu a roiinpui ual. 8 Ochaihai chungchânga chu a thi thei mihriamhaiin sôma inkhat an lâka, khannisian, Melkisedeka chungchânga chu, Pathian Thubu’n a hring mai a ititu’n sôma inkhat a ilâk a ni. 9 Khan, Abrahama’n sôma inkhat a pêka khan, Levia sôma inkhat la ngaitu khomin a pêk sa ti thei a ni. 10 Melkisedeka’n Abrahama a’rtongpui laia khan Levia kha la suak maka, ar chibul Abrahama takpum irzoma a la om mai sikin.
11 Israelhai kuanga khan Levihai ochai nina hnuaia Dân ipêk an ni. Khahai sintho kha a sa irkip a ni’n te, Arona anga ni loiin Melkisedeka anga ochai dang hong om ite a nangna om mah. 12 Ochai ninaa khan danglamna a hong omin chu dâna khom danglamna a hong om ngêt a inang a ni. 13 A thuhai insîra om ei Rengpa chu nam dang a nia, a nam laia mi tûte ochai chang ngai mah. 14 Ei Rengpa chu Juda nama irthoka zuang irzir a nih ti inhriat infel a ni, Mosia’n ochai chungchâng thu an sîr laia khan hi nam hi sâm mah.
Melkisedeka anga ochai dang
15 Ei thu’nsîr kha a hong fel ual ta; Melkisedeka anga ochai dang a hong om ta. 16 Ama kha mihriam dân balama siam ni loiin, mong ngailoi hringna sinthotheinaa ochaia siam a ni. 17 Pathian Thubu’n,
“Nang chu, Melkisedeka omdân anga kumtuangin Ochai ni ni ti,”
a iti ang khan. 18 Balam milui kha a hrât no sik le a hmangna boi sikin pai a ni ta. 19 Mosia Dân khan ite satirkipin a siam thei no sikin. Atûn chu tûngna sa ual pêkin ei om tâka, Pathian ei nâi thei ta. 20 Khabana, Pathian khomâk irsâmna khom a om sa ta. Mi danghai ochai chang laia khan chu, khaanga khomâk irsâmna kha om ngai mah.
21 Khannisianlân, Jisua chu Pathianin a kuang,
“Rengpa kha khomâk ar sâmna,
A milung inchong thûl ta no ni:
Nangma kumtuangin Ochai ni ni ti,”
tia khomâk irsâmin ochaiin a isiam a ni. 22 Khasikin kha danglamna khan Jisua chu thuthung sa ual inkungtu’n a isiam tâk a ni.
23 Danglamna dang a la om sa: mi danghai kha chu thina sikin an om mai thei ngai no sikin, ochaia siam kha tamtak an ni. 24 Khannisianlân, Jisua chu Kumkhontuangin a hring mai sikin a ochai sin kha tûte’n thûl mahai. 25 Khasikin amaa Pathian kuanga honghai chu atûn le itiklai khomin a saninhring thei, anni ta hranga Pathian kuang ngên pe hrangin kumtuangin an hring mai sikin.
26 Khaang khan, Jisua Ochai Inlaltak mi’rthiang, demnaboi, sualna neiloi, mi sualhai laia irthoka a binga om, irvânhai nêka inchung uala siam tâk chu ei ta hrangin a iruk bak a ni. 27 Ama kha ochai inlal danghai angin ni maka; ochai inlal danghai chu a nitin an sualna sikin irbôlna an inhlan baka, kha hnung kêng mihai hrang an la inhlan pe ngai. Khannisianlân, Jisua chu ama ta hrangin nang mah sikin, voikhatin ama ar hlan laia khan irbôlna inkhatin a irzoitir zit a ni. 28 Mosia Dân khan mihriam, irsamna neihai kha ochai inlaltakin a phun ngaia, khannisianlân, Pathian khomâk sâmna chonginkung, Dân hnunga zuang om khan chu Nâipa, kumtuanga irkip tak kha a iphun a ni.
1 Ei insîr laia a poimo tak chu ama hi a ni: Khaanga Ochai Inlaltak, irvâna Reng Roiinpuitak rêngtoihmun chang tianga hong toi ei inei a ni. 2 Mihriam isin ni loi, Rengpa isin biakbuk tak tak Hmun Irthiang taka Ochai Inlaltakin sin a itho a ni.
3 Ochai inlalhai ka chu thilpêk le irbôlna Pathian kuang inhlan hranga phun an nia, khasikin ei ochai Inlaltak khom hin inhlanrua mani chu a nei ngêt a inang a ni. 4 Irnênga om sianlân chu, ochai zel ni viat no ni; Juda Dân ti lama thilpêk inhlan ngai ochai an om sikin. 5 Anni sintho ngai kha chu irvân thilhai millim le irlim ka kêng a ini. Mosia’n biakbuk a sin hrang laia Pathianin a kuang, “Ni sin hrangzia chu tânga enirkhîna a’rlim ni ni ihmu ang zeka sin hrangin ngaitua roh,” tia hril angin.
6 Khannisianlân, atûn chu, anni nêka an chung ual ochai sin kha Jisua ipêk a ni ta, thuthung, Pathian le mihriam kâra a irfûk kha a isa ual ang khan, kha thuthung kha thil sa ual inkungnaa inding a ni tâk sikin.
7 Thuthung masa kha ite demna boi a ni’n chu, an hnina hong iom kha ite nangna om mah.
8 Khannisianlân, Pathianin a mihai fel loina a hmu sikin, hiang hin a ti.
“Nikhuahai kha a hong itung hrang tâk,
Israelhai le Judahai thuthung thar ki siam pe hrang nikhuahai kha.
9 An irchibulhai Aigupta ata hruai suak hranga an kuta kin tûk nia ki thuthung siam ang khan ni ta no ni.
ki thuthung siama khan iamom maka,
Khasikin anni kha ki uksak ta loi a ni,
Rengpa’n a ti.
10 Nikhua hong tung hranga Israelhai kuang thu ki ithung hrang chu hi hi a ni.
An milung sûnga ki dânhai sia ki ta,
An lungrîla irziak sa ki ti.
Keima an Pathian ni ki ta,
Annihai kha ki mihai ni an ti.
11 Khanchu, tûte’n,
Rengpa kha inhre ro,
tia mâni bômhai mani,
mâni ram mihai mani an irchutir nang ta no ni.
A chîn taka irthokin a lian tak dênin an nin hriat hrang tâk sikin.
12 An sualhai ngaidam ki ta,
an inchâinahai inhre mai ta no ning,
Rengpa’n a ti,”
tiin. 13 “Thuthung Thar,” a ti sikin a masa kha chu a inmiluitir tâk a ni; khaang khan, thil milui hmang sa taloi chu boi zit ta a ti.
1 Khan, thuthung masa khom khan chubai mûkna dânhai le mihriam siam chubai mûkna hmun a neia. 2 Biakbuk an siama, chontan masa kha meiser an siana hai, maichâma baihai Pathian kuanga inhlan tâkhai a oma, kha kha Hmun Irthiang an tia. 3 Puanzâr inhnina sûnga khan biakbuk Hmun Irthiang tak an iti chu a ni. 4 A sûnga khan mirimhoi hâlna hmun rângachak maichâm le rângachak inluan Thuthung Bôm a oma; kha Thuthung Bôm sûnga khan mana omna rângachak kola hai, Arona khianghrol hong incher hai le thupêk irziakna lungphêk inhnihai kha an oma. 5 Kha Bôm sûnga khan Pathian roiinpuina inlangin Cheruphai kha sual ngaidamna hmuna an mitha pharin an om sa. Khannisianlân, atûn chu kha thurchi kha a kip a kôiin insîr thei ni no ih.
6 Kha thilhai kha hiang hin an lei irfûktir a ni. Ochaihai kha a nitin Biakbuk chontan masaa khan an sintum sin hrangin an fe ngaia. 7 Khannisianlân, Biakbuk sûngrila khan chu Ochai Inlaltak vai a kuma voikhat thisen chôi ngêtin a lût ngai. Kha a thisen chôi kha ama hrang sik le mipuihaiin an inhriat loi kâra sual an isinhai hrang sika khan Pathian kuang an hong inhlan ngai. 8 Hi irfûktirna murdia irthoka hin Irtha Irthiangin ar chutira; “Biakbuk chontan masa kha a la om sûng ka chu, Hmun Irthiang Tak lampui kha la’rhong mah,” ti hi. 9 Kha kha atûnlaia entîrna a ni. A omzia chu thilpêkhai le irbôlhai Pathian kuang inhlan khan, a bêtu lungrîl famirkip thei mah, 10 fâk hrang, i-in hrang le irthârna balam tamtakhai thu vai a ni sikin. Khahai murdi kha pên tiang dân ringot an nia, Pathianin thupêk thar a pêk mâka hmang hrang a ni.
11 Khannisianlân, Krista chu thil sa, hitaka lei om pial tâkhai ochai Inlal takin a izuang a ni. Biakbuk, sin a thôna ngai kha a roiinpui uala, a famirkip ual; mihriam isin biakbuk ni mah, ama kha hi rammuala thilsiam laia mi ni mah tihna a ni. 12 Krista’n biakbuk chontan masa khêla Hmun Irthiang tak voikhatin a lût pat lai khan, irbôlna hrangin kêlhai le sehrâthai thisen chôi maka, ama thisen ngei chôiin ei ta hrangin kumtuang saninhringna a ni irhmu tâk a ni. 13 Kêlhai le sehrâtchalhai thisen le se’rla irvâm porinche chunga a inthek luan an taksa innimna infâi pêkin an irthiang theiin te, 14 Krista thisen len vângin te a ithei ual ok hrang kêng! kumtuang Irtha hruaina’n Pathian kuang ama irbôlna famirkip ar hlan tâk sikin, Pathian hring sin ei tho theina hrangin a thisenin thina ten intung sintho ngaihaia irthokin ei sia le sa inhriatna irthiang a ti.
15 Hi sika hin Krista hi thuthung thar irfûktirtu a ni, Pathianin a ikoihai khan kumtuang satvurna a inkung kha an hmu theina hrangin. Kha a ni theina chu thuthung masa a la om sûnga mihriamhai inchâina irthoka kêlsuaka, thina a lei om tâk sikin a ni.
16 Pi le pu thumâk chungchânga chu a mâktu kha a thi le thiloi ir-enfia a nang, 17 a mâktu a la dam sûng chu ite a hmangna la om loiin a thi hnungin kêng a hmangna a la om chak ngai a ni.
18 Khasikin thuthung masa khom kha thisen an hmang tena kêng hmang a la ichang. 19 A masa’n Mosia Dâna thupêk murdihai kha mipuihai kuang an puang baka. Kha hnung chu sehrâtchalhai le kêlhai thisen kha tui leh irpoltirin, husop ôn le samul sen hmangin Dân lekhabu le mipuihai murdi kha an theka, 20 an kuang, “Hitak hin Pathianin nin izôm hranga nangni a ipêk thuthung namindettu thisen kha a ni,” a tia. 21 Khabana, Biakbuk le biakna hmangruahai murdi khom kha thisen an thek sa. 22 A dik takin, Dân dungzuiin thil tinrêng hi thisenin an irthiang thei zit dên, sualhai ngaidamna vai kêng thisen suak loia a chang thei loi.
Sual chu Krista irbôlna’n an boi
23 Kha thilhai, irvâna a tak taka om millimhai kha, khaang khan irthiangtir an ini hrang a ni. Khannisianlân, irvâna thilhai kha chu irbôlna sa ual ok an innang a ni. 24 Krista chu mihriam isiam Hmun Irthiang, a tak millima khan lût mah, atûna Pathian makunga ei irthûla a ngîrna irvâna khin a ilût zôi a ni. 25 Juda Ochai Inlaltak khan sa thisen chôiin Hmun Irthiang Taka khan kum tin a fe ngaia. Khannisianlân, Krista chu nangnia inhlan hrangin voi tamtak lût mah. 26 Khaang khan ni no sianlân, irnêng irsiang phut ata voi tamtak a ituang hrang tâk a ni. Khannisianlân, atûn zoro mong hrang tôna hin ar bôlna sika sual an boi theina hrangin voikhatin a zuang inlang a ni. 27 Mi tin voikhat chu thi ngêt an ta, kha hnunga khan Pathian irêlin om an ti. 28 Khaang dênin Krista khom kha mi tamtakhai sual inboi hrangin voikhat irbôlna’n inhlan a ni tâka. Sualhai lapai hrang ni ta loiin ama lei nghâktuhai saninhringnaa hruai lût hrangin a izuang nôk hrang a ni.
1 Juda Dân chu thil tak ang zeka dûr irkip le entonna iamom ni maka, thil sa zuang irlang hrang irhlîm, a tak ni loi, a’rlim vai a ni. Kum tin irbôlna ngaingîr kha kumkhua’n an inhlan ngai a ni. Itin mo kha Dân khan khaanga irbôlnahai sika khan Pathian kuanga hong mihai kha famirkipin a isiam thei hrang? 2 Pathian biaka honghai kha an sualhai ata irthokin an irthiang tak tak ni sianlân chu, suala inhriatna kha nei ta no nihaia, irbôlna kha irngam ta an ti. 3 Kha nêkin hi irbôlna hin an sual tho, kum tin an hriat nontir ngai a ni. 4 Sechalhai le kêlhai thisenin sualhai kha inboi zât ni mah. 5 Khasikin, Krista’n rammuala a zuang hrang laiin Pathian kuang,
“Irbôlnahai le thilpêkhai nuam mak chea,
Keima ta hrangin takpum ni ni irfûk pe ual tâk.
6 Sa pum hâlirvôm irbôlnahai sual inboina hranga irbôlnahai kha lôm viat mak che.
7 Khanchu keima’n,
‘O Pathian, Dân lekhabua ki thurchi irziak ang khan,
Ni lungdo sin hrangin keima hin ki om’ ki tia,”
a tia. 8 A masa’n, “Irbôlnahai, thilpêkhai, pum hâlirvôma irbôlnahai le sual irbôlnahai kha Dân ang taka inhlan ni khom sianlân nuam mak chea, lôm khom lei lôm mak che,” ki tia. 9 Khanchu, “O Pathian, ni lungdo sin hrangin keima hin ki om,” a ti nôka. Khasikin Pathianin irbôlna miluihai kha an boi zita, khahai irthûla khan Krista irbôlna hi a isia tâk a ni. 10 Jisua Krista’n Pathian lungdo a sina, a takpum ngei voikhat ar hlan rip sika khan, ei rêngin sual ata ei irthiang tâk a ni.
11 Juda Ochai tinin a nitin an sintum sinin irbôlna ngai dên kha voi tamtak an inhlan ngaia, khannisianlân, kha irbôlnahai khan sualna inboi thei viat mah. 12 Krista’n chu kumtuanga hrangin sualhai ta hrangin irbôlna voikhat vai an hlana, kha hnung chu Pathian chang tiang a hong toi ta. 13 A râlhai Pathianin a ke zapha siana’n a siam pe mâka chu ama khan a inghâk mai a ni. 14 Irbôlna voikhat vaiin an sual ata irthiang tâkhai kha kumtuanga hrangin famirkipin a siam ta.
15 Irtha Irthiang khomin hiang hin a nin hriattir:
16 “Nikhua hong tung hranga an kuang,
Thu ki intung hrang chu hi hi a ni;
An milung sûnga ki dânhai sia ki ta,
An lungrîla irziak sa ki ti,”
a tia. 17 Kha hnung, “An sualhai le an inchâinahai inhre mai ta no ning,” a ti nôka. 18 Khasikin khaanga ngaidamna omna taka khan chu sual inboina hranga thilpêk nang ta mah.
Pathian nâi ei ti.
19 Khasikin urênghaio, Jisua thina sikin zalên takin Hmun Irthiang taka khan ei lût thei ta. 20 Ama khan puanzâr chu khêlin (kha kha a takpum tihna a ni) lam thar le lam hring a nin hong pe ta. 21 Pathian in sûng mihai chunga Ochai roiinpui tak ei inei a ni. 22 Khasikin lungrîl dik le iamna irkip neiin, sia le sa inhriatna dikloi ata ei lungrîlhai irthiangtirin le ei takpumhai tui irthianga infâiin Pathian nâi ei ti. 23 Ei thurin hi chel indet ngit ei ti, Pathian chu a chonginkunga iamom a ti, ti ei irnghat thei sikin. 24 Lungirthung le sin sa sina inthor irhlôm hrangin ngaitua seng ei ti. 25 Senkhatin inkhôm mâksan an iuar angin uar no inlân, irthor nôk ual ei ti; Rengpa Nikhua chu a hong nâi tah ti nin inhriat sikin irthor irhlôm nôk ual ual ei ti.
26 Thutak ei inhriat hnung khomin ei la sual maiin chu sualhai inboi hrangin irbôlna om ta no ni. 27 A om hrang chu ichi puma Roirêlna le mei inthang Pathian doihai kângirhmang hrang nghâkna vai tâk kêng. 28 Tukhom Mosia Dân zôm loi chu, ama doiin mi inhni mani inthum mani inhriatpuitu an omin chu, lungkhamna boi zitin that a ni ngai. 29 Pathian Nâipa hnuaisiaa, Pathian thuthung thisen ama irthiangna kha itea bê loia, lungkhamna Irtha êro mi kha idôra dûk rik ual mo tuang sian nin irhoitir? 30 “Phuba rêng rêng keima lâk hrang a ni, Keiin thuan ki ti,” ti le “Rengpa’n a mihai ngaitua a ti,” titu hi ei inhriata, 31 Pathian hring kuta tûk chu thil ichiom tak a ni.
32 Zoro thenga nin chunga thil omhai kha inhre mai roi. Pathian vârin nangni a êl hnungin kha laia khan dûk tamtak nin tuanga, khannisian, buaina khan nangni inhre mah. 33 Zoro khat chu mipui vântâng laia nangni êro’n deng nangni an intheia, zoro danga chu khaanga deng an lei intheihai leh hmunkhatin nin tuanga. 34 Mi’ntânghai tuangna kha nin tuangpuia, nin neinun murdi nangni an lâk pe lai khomin, kumtuanga sôi hrang thil sa ual nin la neih ti inhriatin, kha nin inchânna khom kha lôm takin nin ituang a ni.
35 Khanchu nin hâina kha irhmangtir no roi, lômman roiinpui tak a inei hrang a ni. 36 Pathian nuam lam nin sina, a inkung kha nin hmu theina hrangin diarna nin inang a ni.
37 Pathian Thubu’n,
“Sôtnote hnunga chu a zuang hrangtu kha zuang ta a ti;
Ir-ial ta no ni.
38 Khannisianlân, ki mi fel chu iamna’n hring a ti;
Hnung tiang a’rtôlin chu a chunga lôm viat no ning,”
a iti angin. 39 Eini chu hnung tiang irtôla a’rhmang hranghai ni mak mea, iamna neia saninhring ni hrang mi kêng ei ini.
1 Iamna nei ti chu thil ei isabei kha a dik ngêt infel le thil ei ihmu loihai kha a om ngêt inhriat infel hi a ni. 2 An iamna’n kêng zoro miluia mihai khan Pathian ipomna an lei idong ngai.
3 Iamna’n rammual hi Pathian thua siam a nih ti ei inhriat, khaang khan, thil hmu theihai hi thil hmu thei loihaia siam a ni.
4 Iamna’n Abela khan Kaina nêka irbôlna sa ual Pathian kuang an hlana. A iamna sikin a thilpêk kha ipomin a oma, mi fel a ni tiin Pathian pomna a idong a ni. Kha a iamna sika khan a thi hnung khomin thu a la insîr mai a ni.
5 Iamna’n Enoka kha thina irtem loi hrangin Pathianin chung tiang a hruaia, tûte’n hmu ta mahai. Pathian Thubu’n, “Enoka kha chung tiang hruaiin a om mâka khan Pathian an lômtir ngai,” a tia. 6 Iamna boiin chu tûte’n Pathian inlôm thei ngai mah. Iamna nei taka Pathian kuanga hong murdi’n chu ama chu a oma, ama zonghai kuang lômman a pêk ngai iti a iam ngêt hrang a ni.
7 Iamna’n Nova khan, sûn matona thil a la ihmu theiloi Pathianin a hril laia khan, Pathian thu zômin irkuang a sina, kha irkuanga khan ama le a in sûng mihai saninhringin an om. Khasika khan, rammual kha thiamno an changa, iamna sika felna Pathian kuanga om kha a idong a ni.
8 Iamna’n Abrahama khan, Pathianin ram pe hranga a inkung pea fe hrangin a koi laia khan Pathian thu zômin a fena hrang khom inhre loiin a suaka, 9 Iamna’n Pathianin ram a inkung pea khan khual mi angin a oma, Pathian chonginkung dong sa, Isaka le Jakoba angin puan inhaia a oma. 10 Abrahama’n khopui, lungphûm det nei, Pathian isiam le sin kha a nghâk mai a ni.
11 Iamna’n Abrahama kha a tar ok hnungin le Sari ngei khom a iching ni sian khom, Pathian chu a chonginkunga iam a om tiin a’rnghat ngit sikin pa a la ichang a ni. 12 Abrahama kha a thi ang dôra om tâk ni khomsian, kha mi inkhata irthokin irchi, irvâna ârsi za le tuipui kôla chiai tep zoiloi dôr an irzir a ni.
13 Iamna neiin kha mihai kha an ithi a ni. Pathianin a inkung pe kha dong phâk no khomsian, hla taka irthoka hmu’n an lei lôm tâka, irnênga hin khualmi le mi’nvâi an nih ti an lei inhriattir ta. 14 Khaanga tihai khan chu an ram an ithîr a nih ti an lang. 15 An ram hong mâk kha chu kan ta maka, kan sianlân chu kîr nôkna zoro’nchum nei ta an ti. 16 Kha nêkin, ram sa ual irvâna om kha kêng an irngai. Khasikin Pathianin an Pathian irti kha inzak maka, an ta hrangin khopui ten khom a lei siam pe tâk sikin.
17 Iamna’n Abrahama khan, fiaa a om lai khan a nâipa neisun Isaka kha, irbôlna’n a inhlan a ni. Pathian kuang ata chonginkung hmutu ni khom sianlân, a nâi irbôlna’n a la inhlan nuam a ni. 18 Pathianin a kuang, “Isaka irthoka hin ni chihai ki inkung kha nei ni ti,” a ti pea. 19 Pathianin Isaka kha thina irthok khomin a kaithoi thei tih Abrahama’n an hriata, Isaka kha thina irthokin a hmu nôk ti hrangin a om.
20 Iamna’n Isaka khan, sûn matona hrangin Jakoba le Esaua hai chunga satvurna chonga an kunga.
21 Iamna’n Jakoba khan, a thi hrang tônin Josefa nâihai kha sat a vur seng senga, kha hnung chu a khianghrol hmor tûngin Pathian chubai a mûk tâka.
22 Iamna’n Josefa khan, a thi hrangin Israel irchihai Aigupta ata an suak hrang thu an sîra, a ruhai an ihrê hrang dân khom chong a mâk pehai.
23 Iamna’n Mosia kha a suak laiin, nâite hmêl satak a ni sikin a nu le a pa’n rêng thupêk chi loiin tha thum an thupa.
24 Iamna’n Mosia khan, a hong lian tena chu Faroa nâinu nâipaa irbe mai kha nuam ta maka.
25 Sôtnote sûnga sual inhoina hmang nêkin chu Pathian mihai leh dengtheina tuang an thang ual ta.
26 Krista sika hmusitna tuang kha Aigupta rama irchon murdihai nêka irchon hlu ualin a bêa, sûn matona a lômman hmu hrang kha a thîr mai sikin.
27 Iamna’n rêng ningmur kha chi loiin Aigupta ram a mâka; hmu theiloi Pathian kha a hmu sikin a ikîr nuam ta loi a ni.
28 Iamna’n Ferkân kût an siama, thisen kha mikothaia inthek hrangin thu a pêka, vântîrtôn khan Israelhai nâi lutîr chu a that loina hrangin.
29 Iamna’n Israelhai khan muanga fe ang dôrin Tuipui Sen kha an irkâna; Aigupta mihaiin chu irkân an tuma, tuiin an lemhai zita.
30 Iamna’n Jeriko kulpui kha Israelhaiin sûn sari an vêl zoiin chu a chim ta.
31 Iamna’n Rahabi notizuar kha Pathian thu zôm loihai leh irhmang sa maka, Israel eninfeltuhai kha lunghoi tak le lôm takin a lei intunghai sikin.
32 Ki la insîr mai hrang mo? Gideona, Baraka, Samsona, Jeptha, Davida, Samuela hai le deipuhai thurchi insîr hrang lakin zoro nei ma ung. 33 Iamna’n ram pumpui an doia, an inhnêa, thil dik an sina, Pathian chonginkung an donga, kâmkeibaknei bâihai an hîp pea, 34 mei inthanghai an thata, khandaia that an zôk a ni. Hrât no an lei nia, khannisianlân, iamna’n an hrâta, Israel buala khan mi hrât an nia, nam dang râl pâlhai kha an inhnê ngai. 35 Iamna sikin nupanghaiin an urêng mithihai thoinôkna an hmua. Mi dang thoinôkna sa ual an dong theina hrangin kêlsua nuam mah. 36 Senkhat chu nuiza siamna’n an hmanga, an zêma, senkhat nôk chu kolbun le intângna ina an khum. 37 Lunga dêngin an oma, bong hnia âtin an oma, khandaia thatin an oma, Belra vun le kêl vun silin an invâia; inriangin, intak takin le dengtheiin an oma. 38 Kha mihai ta hrangin chu rammual hi om hmun hoi loi tak a ni. Mi’nvâi angin ramchârhaia le tânghaia an irvâk an irvâka, pûkhaia le khurhaia an om ngaia.
39 Khahai khan an iamna sikin Pathian pomna an donga, khannisianlân, Pathian chonginkung chu dong mahai, 40 Pathianin ei ta hranga thil sa ual an kung sikin. Khahai kha eini leh ngêt kêng famirkipa siamin an iom hrang tih hi Pathian thil tum a ni.
1 Eini chu, a ni thîrhai mipui tamtak ihual vêlin ei om sika hin, ni khaphai le sual einia kop ngit hi pai ei ta, ei maton intân irsiatna oma hin irnak songin intân ei ti. 2 Jisua, ei iamna irphutna le mongna tiang kha en ngit ei ti. Ama khan a matona raifânna sika khan mualinphoina kha ngainêpin Krosa khan a tuanga, atûn chu Pathian rêngtoihmun chang tiang a hong toi ta. 3 Nin sôla nin irzal loina hrangin mi sualhai hnôlna irkhêltak tuangtu kha ngaitua roi. 4 Sual nin doinaa hin thi ngamin la pût mak chêi. 5 Pathianin nâihai anga nangni an thorna chong kha nin irnghil tâk ma ni?
“Ki nâi, Rengpa nang sepna kha ngaisakin lân,
Nang a ngo khomin irzal no roh.
6 Rengpa khan lung a ithunghai chu a sep ngaia,
Nâia a ipom ka chu a zêm ngai,”
ti hi. 7 Pa isep anga nin ituang hi tuang zâm zâm roi; Pathianin nâihai chunga tho dân angin sep loi nâi tu mo a om? 8 Nâi murdi’n an itong ngai sepna kha nin tong no’n chu, nâi tak ni loiin, zâi nâi kêng nin ini hrang a ni.
9 Ei taksa tianga pahai thua khom an ni sep, mahrip ei tho ngai. Ei irtha tianga Pa len vâng chu ei hringna hrangin ar cham chamin ei iom a nang a ni. 10 Ei taksa tianga pahaiin chu sôtnotea sa an ti lam ang takin an ni sep ngai, Pathianin chu a’rthiangna ei dong theina hranga ei satna hrangin kêng a ni isep ngai.
11 Sepna rêng rêng hi tuang laiin chu raifânomin inlang ngai maka, intak takin an lang ngai a ni. Khannisianlân, tuang zoi tika chu, khataka tuang suaka om tâkhaiin chu ra irtharngam om tak an suaktira, mi a siaminsa ngai.
Irchutirna le hrilna
12 Nin kut khamhai kha lâng unglân, nin irkhûk inthinghai kha inngîr roi. 13 Khan, ke’nbâi kha irlo’rphêt loia, indama a om ualna hrangin lam intûna fe roi.
14 Mi tin leh irngeia lêng tum unglân, irthiangna nei tum sa roi; kha irthiangna boiin tûte’n Rengpa hmu thei no ni. 15 Tûte Pathian lungkhamna ata kîr nôk loia, thingkung khâ hong inchera, a tûr sika buaina tamtak insua anga mi om loi hrangin en zit roi. 16 Khabana, tûte irdit song mi mani, Esaua anga rammual mi mani, om loi hrangin en zit roi; ama kha a nâi lutîr nina a ni. 17 Inhnunga khan a pa satvurna la dong khomsian, a sin lei tho kha a thûl thei ta no sikin, hnôlin a om tah ti nin inhriat.
18 Nin ngîrna inhre mai roi. Israelhai ang khan rammual Sinai Tânga ngîr mak chêi. Kha zoroa khan meichok hai, inthim hai, sûmbual hai, phâivopui hai, 19 bekul irhai hai, hnukirhai ichiomhai a oma. Mipuihaiin kha hnukirhai kha an inhriata, inhre nôk viat ta loi hrangin an ngêna. 20 “Sâ ten khomin tâng kha a tônin chu lunga dêng that hrang a ni,” ti thupêk kha an tuang thei no sika a ni. 21 An thil hmu kha ichi a om ok, Mosia lua khomin “Chiin kin thing tak tak,” a iti rak a ni.
22 Nangni chu Zion Tâng, Pathian hring khopui, vân Jerusalem le Vântîrtôn sâng tamtakhai omna nin ingîr a ni. 23 Nangni chu Pathian nâi lutîr irvâna an irhming chuang tâkhai râifâna an irbûmnaa nin ingîr a ni. Pathian, mi murdihai roirêltu kuang le mi felhai irtha famirkipa siam tâkhai kuang nin ingîr a ni. 24 Nangni chu Jisua, thuthung thar irfûktirtu kuang le thisen inthek, Abela thisen nêka thil sa ual inkungtu kuang nin ingîr a ni.
25 Thu’nsîrtu kha lei nuam loiin nin om loina hrangin irdîn roi. Irnênga thu lei insîrtu lua kha nuam maka, hremna zôk mah. Eini irvâna irthoka thu’nsîrtu hnung songhai len vâng chu hremna kha zôk thei viat no ih. 26 Kha laia khan a hnukirhai khan irnêng hi an hnînga, khan, atûn chu, “Voikhat chu irnêng vai ni loiin irvân khom lan hnîng ki ti,” tiin chong a inkung tâk a ni. 27 Khan, “Voikhat nôk” ti hin thil inhnîng thei loihai an om mai theina hrangin thil siamhai kha inhnîngin thon paiin om an ti, ti a inlang a ni. 28 Khasikin lôm ei ti, raifânin, a lôm hrang lamin mahrip le ichi pumin Pathian chubai mûk ei ti, 29 ei Pathian hi mi kâng irhmang ngai mei a ni sikin.
1 Kristian urênghai ang takin lung irthung irhlôm roi. 2 Nin ina mikhual intung inhre mai roi. Mi senkhatin khaanga tho an inhriat no kârin vântîrtôn an intung tâk kêng. 3 Lung ina omhai kha, nangni khom a intâng sa ang takin inhre mai roi. 4 Inneina hi mi murdi’n an inhlut hrang a ni, ompui sangram khomin an iamom irhlôm hrang a ni. Irdithai le uirehai chu Pathianin rêl a ti. 5 Sum irngaiinnat mi ni no unglân, nin thil nei lam anga khan milung inchuk roi. Pathianin, “Nang intha viat no ninga, mâk khom nang ma viat no ning,” a ti sikin.
6 Khasikin hâi takin,
“Rengpa ni changpuipu a ni,
chi no ning.
Mihriamin imo a ni ilo thei hrang?”
ti ei ti.
7 Pathian thu nangni lei insîr pe nin hruaitu masahai kha inhre mai roi. An lei hong om dân le an thi ziahai kha ngaitua unglân, an iam dân irchu roi.
8 Jisua Krista chu mizân, a vuan le kumkhua’n a pangai dên a ni. 9 Irchutirna chi dang dang le irkhêl tak tak hruai irhmangin om no unglân, Pathian lungkhamna irthoka lungrîl hrâtna hmu hi a sa, fâk thua dân zômin chu ni no ri se; kha dân zômhai khan ite irfêna hmu mahai. 10 Biakbuka ochai angin sin ei thoa, maichâma khan chu fa thei mak meh. 11 Nin inhriat angin, saruak, a thisen Juda ochai Inlalin Hmun Irthiang Taka irbôlna hranga a ilûtpui ngai kha riakbuk pên tiang an ihâl ngai a ni. 12 Jisua khomin ama thisen ngeia mihai an fâi theina hrangin khopui pên tiang a lei ituang a ni. 13 Tho, khasikin khopui pên tiang fe ei ta a mualinphoina lei irkoppui rei. 14 Irnênga hin chu khopui det nei mak mea, khopui la hong om hrang kha ei isabei a ni. 15 Khaang khan, Jisua zâra ei irbôlna’n Pathian kuang inpâkna inhlan mai ei ti; ama kha hmûrin irbôlna an inhlan, “Rengpa a ni,” tia an ithopna a ni. 16 Thil sa sin le irsan irhlôm hi irnghil no roi, khahai kha irbôlna, Pathian inlôm ngai an ni.
17 Nin hruaituhai thu zôm unglân, an thupêk murdi zui roi. Pathian kuang an sintho an lan sîr hrang sikin irngam loiin nangni an enkol ngai a ni. An thu nin zômin chu, raifân takin sin an ti, khano’nchu, intak pumin sin an ta, nin ta hrangin sa no ni.
18 Kin ta hrangin ni chongchai pe mai roi. Itiklai khomin thil fel sin ki nuam mai sikin sia le sa inhriatna irthiang tak kin nei ti kin inhriat infel. 19 Nin kuang Pathianin a ni tîr nôk zôi theina hranga chongchai hrangin nangni ki ngên tak tak a ni.
20-21 Khan, ei Rengpa Jisua, a thina sika kumtuang thuthung deta om, Belrapu Roiinpuitak, thina irthoka a kaithoitu irngeina Pathian khan a lungdo nin sin theina hrangin thil sa nin innang murdi nangni pe sianlân, Jisua Krista zâra einia hin, ama a lungdo sin ri se. Krista kuang roiinpuina kumtuangin om mai ri se! Amen.
Thukhârna le chongchaina
22 Urênghai, nin kuanga ki lekha thon hi a sei ok no sikin hi inthorna chong bêhai hi ngûk taka irngai hrangin nangni ki ngên. 23 Ei urêngpa Timothea intângna in ata insua a ni tâk ti nin inhriat ki nuam. A hong tung inrangin chu, nangni hmu hrangin ki hong tena hong hruai ki ti.
24 Nin hruaituhai murdi le Pathian mihai murdi kha chubai ni mûk pe roi. Itali rama urênghaiin chubai nangni an mûk.
25 Nin rênga kuang Pathian lungkhamna om ri se.
1 Pathian le Rengpa Jisua Krista suak Jakoba khan nam sômhleihni rammuala inthek indarhai kha chubai ki mûk.
Iamna le vârna
2 Ki urênghaio, fiana chi tinrêng nin tong tena thil raifân omin bê zit roi, 3 nin iamna fiaa a om hin tuangdiarna a siam ti nin inhriat. 4 Khaang khan, ite irsam loia nin famirkipa, puihlinga nangni a siam theina hrangin nin tuangdiarna khan hlosam viat loiin nangnia sintho ngêt ri se.
5 Nin laia tukhomin vârna ar samin chu mi murdi kuanga inhnar loia phal taka pe ngaitu Pathian kuang ngên ri se, pêk ni a ti. 6 Aniachu, iamna neiin, lungirhla viat loiin a ingên hrang a ni; lungirhlatu chu phâivua’n tuikhanglian a sêma a irsoktir ang hi a ni. 7-8 Khaang mi lungrîl bulbâl neiloi, a sintho murdia ite detloi mi khan Rengpa kuang ata ite hmu hrangin irtûng no ri se.
Inriangna le irchongna
9 Iamtu inriang mi kha Pathianin a chôiirsâng sikin lôm ri se. 10 Iamtu irchong khom irhniamtira a omin lôm sa ri se, hloisûl pâr angin ar chongna a la chuai hrang sikin. 11 Misa, a hong suakin a sân a hong luma, hloisûl kha a em inthêma, a pâr a tâka a enhoina a boi ngai. Khaang khan, irchong khom a sinthôna irhmangin om a ti.
Fiana le thêmna
12 Fiana tonga, ngîr indet khak mi chu a vân a sa, fiaa a om hnungin Rengpa’n ama lungthungtuhai pêk a inkung, chôiindômna lukhum, hringna kha, a ichang hrang a ni. 13 Tukhomin thêmna an tongin, “Hi thêmna hi Pathian ata kêng,” ti no ri se. Pathian chu sual hranga inthêm chi ni ma, ama khomin tûte inthêm ngai mah. 14 Mi tin hi mâni irzukna suala inthêm an ni zit uala, kha khan mi an hôpin a hruai irhmang ngai a ni. 15 Kha irzukna khan tê a hong vonga, sual a nei, kha sual kha a hong puihlingin chu thina an tungtir ngai a ni.
16 Ki urêng inditom takhaio, ihuangin om no roi. 17 Thilpêk sa le thilpêk irkip chu irvâna irthoka danglamna le irthûlna nei viat ngailoi Pathian, irvâna vâr Siamtu kuanga irthoka zuang chum ngai a ni. 18 A thil siamhai laia ra masa hrangin ama nuamlam ang takin thutaka a ni inei a ni.
Thu irngaina le zômna
19 Ki urêng inditom takhaio, hi hi inhre roi. Mi tinin ar ngai tiang uar sianlân, insîrna lam tiang irchu loiin, an milung inchuk ri sehai. 20 Mihriam ningmurna hin Pathian thiltum diktak kha hlo inchuk thei ngai mah. 21 Khasikin, intirom chi tinrêng le sual chi tinrêng pai irhmang unglân, nin milunga Pathian thu tû, nangni saninhring thei chu thuhnuairôl takin pom roi.
22 Sinthôna om loia thu irngai vai a ruk tiin mâni irhuang no roi. 23 Tukhom thu irngaitu nia, zôm ual loi chu, hlîmena mâni hmêl entu ang a ni. 24 Ngûk takin ar ena, a rot hnungin chu i ang hmêl irput mi mani a’rnghil nôk zel ngai. 25 Aniachu, tukhom dân famirkip, nin zalêntirtu kha ngaitua uala, khaanga om maia, irngaia irnghil nôk lattu ni loia, a zôma zômtu ngei chu, a sintho murdia hlochuk a ti. 26 Tukhom sakho mi tak nia irbea, a milei vêng inhnê ual loi chu mâni a irhuang a nia, a sakhua chu chanlamboi a ni. 27 Pathian mit hmua sakho biak dân irthiang le sual kop loi chu hi hi a ni: fara le meithâihai an intak laia donsui le rammual porinche kop loia irvong insa hi a ni.
1 Ki urênghaio, ei Rengpa roiinpui tak Jisua Krista iamtuhai khan theibîk nei no roi. 2 Nin Sinagoka, mi rângachak kut sabi buna songkol satak innghâk hong lût sianlân, mi inriang songkol siat innghâk hong lût sa sianlân; 3 songkol sa innghâk kha chu nin lei uksaka, “Nang chu toina sa hin toi ro,” nin tia, mi inriang kuang chu, “Nang chu so son ngîr ro,” mani, “Ki ke hnuaia hin toi ro,” mani nin ti’n chu, 4 theibîk nin neia, nin thîr dân lungrîl a sân a isual mo ni ma?
5 Ki urêng inditom takhaio, irngai u ta, rammual irngaia mi inrianghai hi iamnaa irchong hrang le ama lungthungtuhai kuang a ram inkung chang hrangin Pathianin a inthang loi ma ni? 6 Nangni’n chu mi inrianghai kha inza mak chêia. Mi irchonghai hi nangni hnuaisiatuhai le roirêlna ina nangni hnûklût ngaitu ni mahai mo? 7 Irhming satak nin irput kha insîrinsiattuhai ni mahai mo? 8 “Nangma lung ni irthung angin ni bômhai lung ni ithung hrang a ni,” ti Lekha Thua chuang Dân roiinpui tak hi, nin zômin chu nin tho’n sa; 9 theibîk nin neiin chu sual nin itho a ni, Dân insiattuhai, nin ni. 10 Tukhomin Dân zôm zit khomsian inkhat khom an siatin chu a rênga insiat a ni. 11 “Uire no roh,” titu’n chu, “Mi that no roh,” a ti nôka, Uire no khom sianlân, mi ni thatin chu Dân insiat ngêt ni ni. 12 Khanchu Dân, nin zalêntirtu hmanga rêl pe hrang ei nih ti inhriatin thu insîr unglân, thil tho’n sa roi. 13 Mi chunga za’rngaina nei loia thilthotu chu za’rngaina boiin a chunga roirêl pe ni a ti; khannisian, za’rngaina hin chu roirêlna an hnê ngai.
Iamna le sintho
14 Ki urênghaio, mi’n “Iamna ki nei,” ti sianlân, a sinthoa inlang no sianlân, imo an lâpna? Khaanga iamna khan nang saninhring thei ni mo? 15 Urêngpa mani farnu mani silkaiboi le phîngchâmin om sianlân, 16 nin laia tu’n mani, “Irtharngam takin fe tan lân, lum tak le khop takin om roh,” ti sianlân, a taksa ta hranga innang kha a pêk ual no’n chu imo an lâpna? 17 Khaang dênin sintho boia iamna vai hi chu omzia a inei loi a ni.
18 Mi tu khôkin mani, “Mi inkhatin iamna a neia, mi dangin sintho a nei,” ti a ti. Khannisian, keima sâmna chu, “Itin mo, mi’n sintho boiin iamna a inei thei lam nir hmu roi; keima’n chu sintho’n ki iamna nang irhmu ki ti,” ti hi a ni. 19 Pathian inkhat vai a om ti ni iam mo? Ni tho’n sa! ramkhohrihai khomin an iama, an inthing ngai kêng. 20 Mi’nvêtpa, iamna hi sintho kop loiin chu ite ni mah ti nin hriat nuam mo? 21 Ei irchibul Abrahama kha a nâipa Isaka, maichâma an hlan lai khan, a sintho sika thiam inchangtir mo ni ma? 22 A iamna le a sintho kha ar hlopa, a sintho khan a iamna kha ar kiptir ta ti nin hriat. 23 Pathian Lekha thua, “Abrahama’n Pathian a iama, a iam sika khan thiamchanga pom a ni ta,” ti kha a tunga, Pathian ruala ibe a ni ta. 24 Mi’n sintho sikin thiam an changa, iamna vaiin ni mah ti nin inhriat ta.
25 Khaanga khan Rahabi notizuar khom khan, mi tîrhai kha a lei lôma, lam danga an kîrtirhaia, a sintho sika khan thiam a ichang mo ni ma? 26 Khasikin, takpum hi irtha kop loiin chu a ithi angin sintho kop loiin chu iamna khom hi a ithi a ni.
1 Ki urênghaio, nin laia irchutirtu ni hi tum sup sup no roi, irchutirtuhai hi mi danghai nêka ngar uala roirêl pe ei la ini hrang ti nin inhriat. 2 Ei rêngin thil tamtak ei tho’nsual ngai. Tukhom a thu’nsîra tho’nsual ngailoi mi chu mi puihling a ni, khaang mi chu an takpumpui khom an sep thei ngai. 3 Ei thu inzômtir hrangin sakor bâia thîr takam ei inhmuamin chu, an takpumpui khom ei nuamna ang ei inher kôi thei ngai. 4 Irkuanghai khom lian okhai sian khom, phâivua’n a sêm inhnîng lai khomin a chalaitu’n a nuamna tiang ang a chalaina chînte khan an fetir thei a ni. 5 Khaang dênin milei khom hi takpum ôn chînte a ni nâkin, irsorthei tak a ni. Mei irsî chînte te’n ram inrôp tak tak khom a ikâng thei ngai dên hi ngaitua u ta. 6 Milei khom hi mei ang a nia, rammual siatnaa sip, ei takpuma kop, ei takpum om dân porinchetirtu a ni; ei hringnun pumpui hremhmun meia dengintheitirtu a ni. 7 Mihriamin, ramsa le vâ tinrêng hai, thilhring le tuia nga tinrênghai hi vâi inngam thei an nia, an vâi inngam ta ngai. 8 Khannisian, milei chu tûte’n vâi inngam thei viat ngai mah. Sual om chian thei loi, thina tûra sip a ni. 9 Kha leh khan ei Pa, Rengpa chu ei inpâka; ei mihriam chanpui, Pathian irangpuia siamhai khua ei sâl sa ngai a ni. 10 Bâi inkhat ata satvurna le khosâlna a suak ngai. Ki urênghaio, khaang khan chu a ini hrang ni mah. 11 Tuihnâr inkhat ata tui thum ual le tui khâ suak ngai mah. 12 Ki urênghaio, theipui kunga Oliv a ra ngai ma ni? Grep hruia khom theipui a ira thei ma ni? michikhur ata khozoi tui irthiang zuang suak thei ual mah.
Chung tiang ata vâr
13 Nin laia vârna le inhriat thiamna nei mo an om? Om dân sa le thil sa tho’n thiam tak le thuhnuairôl takin inlangtir ri se. 14 Nin milunga hnarsâna inthûk tak le mâni dohasana nin neiin chu thudik irkalnaa nin vârna irsorpuiin milak tho no roi. 15 Khaang vârna kha chung tianga zuang chum ni maka, rammual ata taksa irzukna le ramkhohri ata a ni ual. 16 Hnarsâna le mâni dohasana omnaa khan buaina le sualna chi tinrêng a om ngai. 17 Chung tiang ata vârna zuang suak chu a maton taka a’rthianga, kha zoiin irngei a nuama, a milung ar uaia, changpui a hoia, lungkhamna le ra saiin a sipa, theibîkna le vârirletna nei ngai mah. 18 Irngeina siamtuhaiin irngeina zonga chi an itû kha thil sain a ra ngai.
1 Nin laia irdoina le irsualnahai hi khôtak ata hong suak ma ni? Hoina nin nuama, nin milung sûnga irdoina intung ngaitu ata ni ma mo? 2 Nin irzuka, nei mak chêi, mi nin thatpuia; nin hnarsaa, nei thei mak chêi, nin irkhalin nin irdoia; Pathian nin ngên no sikin nin nuamlam nin ihmu ngai loi a ni. 3 Nin zong khomin nin zong dik no sikin hmu mak chêi, inhoina’n hmang nin tuma. 4 Iamna boihaio! Rammual rual irchangpui hi Pathian râl nina a nih ti nin inhriat no ma ni? Rammual rual ni hi a nuam murdi’n chu Pathian râla a irsiam a ni. 5 Lekha thu’n, “Einia Pathianin irtha a isia hin irzukna lian tak a nei,” a iti hi dik loi hrangin nin iiam ma ni? 6 Khasikin, Pathianin lungkhamna a ni ipêk hi a lian ual. Pathian Thubu’n,
“Pathianin lârirpâkhai a doia,
Irngaiintômhai chu lung an kham ngai,”
ti a ni. 7 Khasikin Pathian kuang irpelût unglân, Diabola chu doi roi, khanchu nangni rotsan a ti. 8 Pathian nâi roi, ama khomin nangni nâi a ti. Mi sualhaio, nin kuthai irsûkinfâi unglân, mi vârillekhaio, nin milung irthiangtir roi. 9 Lunginzîng unglân, beiindong unglân, chap roi; nin innuina kha beidonga chang sianlân, nin raifânna kha ngûina chang ri se. 10 Rengpa makunga irngaiintôm unglân, khanchu nangni chôiirsâng a ti.
Urêng hrilsiatloi hrang
11 Urênghaio, irhrilinsiat irhlôm no roi. Tukhom a urêng hrilsiat mani, dem mani chu Dân a hrilsiata, Dân a idem a ni; Dân ni demin chu, Dân zômtu ni mak chea, roirêltu ni ni. 12 Dân pêktu le roirêltu, Pathian inkhat vai a om. Ama vai kêng mi saninhring theia irhmangtir theitu chu a ni. Nang, tualbômhai dem ngaitu kha tu mo ni ini?
Irsor loi hranga hrilna
13 Irngai u ta, nangni, “A vuan mani, nangtûk mani, kho khuaa mo khat fe ei ta, kha hmuna khan kum khat sum bepâr va tho ei ta, sum tamtak van pung ei ti,” tituhaio. 14 Nangtûk hin itin mo nin hringna kha a iom hrang khom inhre mak chêi. Sûm, sôtnote a hong inlanga, a iboi nôk ang hi nin ni. 15 Khasikin, “Rengpa’n sa a ti chu dam ei ta, khahai kha tho ei ta,” nin iti hrang a ni. 16 Atûn hin chu lârirpâk takin nin irsora. Khaanga lârirpâk taka om kha sual a ni. 17 Khanchu, thil sa tho hrang inhriat chaka tholoi chu a ta hrangin sual a ni.
1 Nangni mi irchonghaio, irngai u ta, nin chunga intak zuang tung hrang sikin chap unglân, khêkhroi ta roi. 2 Nin irchongnahai a siat zoi tâka, nin puanhai khom irnge’n an fâk zoi ta. 3 Nin rângachak le sumhai khom a êkin a lei man zoi ta, a êk iman kha nin theiloizia inlangtirtu ni a ta, meiin thil a ikâng irhmang angin nin taksa kha fa zoi a ti. Sûn hnungkhôna chu irchon nin ibukkhôm a ni hi. 4 Irngai u ta, nin loia sinthotuhai hlo nin khit pehai kha an khêka, bu âttuhai khêk irhai kha Itinrêng Rengpa mikuar inhriata a tung ta. 5 Irnênga hin hoi tak le nuamningin nin oma, that hrang nikhuaa hrangin nin lei irvâi inmar chian nin ni. 6 Mi dik tak chu thiamno nin inchangtira, nin thata, ama’n chu nangni doi mah.
Diarna le chongchaina
7 Khanchu, urênghaio, Rengpa zuang mâka chu diar takin om roi. Loi neitu’n a loi ata ra inlût hrang a inghâk dân hi en roi; rua masa le rua hnungkhôn a nghâk mai mai ngai a ni. 8 Nangni khom diar takin om unglân, lungrîl det tak irput roi; Rengpa zuang nôkna hrang anai ta. 9 Urênghaio, thiamno changa nin om loina hrangin irdem irhlôm no roi. Irngai u ta, Roirêltu chu mikot kôla a om chian tâk a ni. 10 Urênghaio, Rengpa irhminga thu insîrtu, deipuhai dengintheina diar taka an tuang dân kha enton hrangin hmang roi.
11 Diar taka tuangtu kha vânsa ei irti a ni. Joba tuangdiarzia nin inhriata, Rengpa’n a hnungkhôna a pêk dânhai nin inhriat. Rengpa kha za’rngaina le lungkhamna’n a sipa. 12 Ki urênghaio, i khom nisian khomâk irsâm ngai no roi, irvân mani irnêng mani, thil dang sâmin mo khomâk sâm no roi, “A ni,” nin iti chu “A ni” ti chian unglân, “Ni ma,” nin iti chu “Ni ma” ni chian ri se; khanchu thiam loiin nin iom loi hrang a ni.
13 Nin laia vânduaina tong an om mo? Chongchai ri se. Râifân mo an om? Inpâkna hla sak ri se. 14 Nin laia damloi mo an om? Koiindang upa inkoitirin, anni’n Rengpa irhminga sahriak polin a ta hrangin chongchai ri se; 15 iam ngita chongchaina khan damloi kha indam a ta, Rengpa’n kaithoi a ti; thil a lei tho’nsual tâk khom ngaidam ni a ti. 16 Khanchu, nin sualhai thupha chôi irhlôm unglân chongchai irhlôm roi; khanchu indamin om nin ti. Sathnem irngai taka mi dik chongchaina khan thil roiinpuitak a tho thei a ni. 17 Elija kha eini anga mihriam ma mai kêng a ini, rua tho loi hrangin sathnem irngai takin a chongchaia, kum thum le tha ruk sûng irnêng chunga rua tho ta mah. 18 A chongchai nôka, irvân ata rua a zuang thoa, irnêng ata chîmuhai a hong inmông thartir nôk ta.
19 Ki urênghaio, nin laia tu mani thutak ata pêt irhmang sianlân, tu khôkin mani a hong koikhîr nôkin chu, 20 ama hi inhre roi: mi sual, a lampui irhmangna ata hruai kîr nôktu khan kha mi sual irtha kha thina ata irthokin a saninhringa, sual tamtak ata ngaidamna an tung pe tâk a ni.
1 Petera, Jisua Krista tirtôn khan, Pathian mi irthiang irthekindarhai Ponto ram hai, Galatia ram hai, Kapadokia ram hai, Asia ram hai le Bithunia rama om tâkhai chubai ki mûk. 2 Pa Pathian lei inhriat anga inthang, Jisua Krista thu iam hrang le a thina irsu’nfâi hranga Irtha irthiangtir nin nia, nin chunga lungkhamna le irngeina inpungin om ri se.
Sabeina hring
3 Ei Rengpa Jisua Krista Pathian le Pa chu inpâkin om ri se. Jisua Krista kha mithi lai ata kaithoiin sabeina hring nei hrangin a za’rngaina roiinpui tak khan a nin hring nôk tâka. 4 Khasikin, Pathianin a mihai hranga irchon tamtak a isia kha dong hrangin ei itûng a ni. Kha irchon siat thei loia, hmon thei loi le chuai thei ngai loi kha Pathianin nin ta hrangin irvâna a isia tâk a ni.
5 Ama nin iam sikin saninhringna sinsiam sai, zoro hnungkhôna inlang a ni dênin, Pathian sinthotheina khan nangni vong a ti. 6 Fiana tinrêng nin tonga, nin lunginzîng khomin raifân takin om roi. 7 Nin iamna fiana hrang a ni, rângachak siat thei lua meia fia a nia, kha nêka hlu ual, nin iamna chu, fia hrang pial kêng; khanchu Jisua Krista a zuang inlâr tika inpâkna hai, roiinpuina hai, chôiindômna hai, hlo nin ti. 8 Ama hmuloi khomin lung nin thunga, atûn ama nin hmu ual no khomin nin iama, raifânna irkhêl insîr thei loi le roiinpuina’n nin isip a ni; 9 nin iamna ra, nin irtha saninhringna kha, nin hmu thiai sikin.
10 Hi saninhringna chungchâng hi deipuhaiin ngûk taka zongin an suia, nin chunga Pathian thilpêk, lungkhamna zuang tung hrang chu, an lei insîr a ni. 11 Annia Krista irtha om chu, Krista tuangna le a hnunga chôiindôma a om hrang thu, a lei inhriattira, i zoroa mo zuang tunga, itina zuang tung hrang moh ti inhriat an tum ngai a ni. 12 Anni ta hrang ni loi, nangni ta hrangin sin an tho a nih ti inhriattir an ni. Irvân ata tîr, Irtha Irthiang changpuia nin kuanga thurchi Sa hriltuhai khan, kha kha nangni an hril tâk kha. Kha thil kha vântîrtônhaiin khom inhriat an irzuk a ni.
Om dân irthianga om hranga koina
13 Khasikin lungrîl irsiam diamin irtûng chian unglân, Jisua Krista a zuang inlang tika lungkhamna nangni a zuang chôi pe hrang kha tûng ngit roi. 14 Nâi thu zômhai angin om unglân, tianlai, nin inhriat loi laia nin irzuknahai ang khan om no roi. 15 Nangni a koitu a irthiang angin nangni khom nin om lam murdia lei irthiang roi. 16 Pathian Lekha Thu’n, “Keima ki’rthiang sikin, nangni khom nin irthiang hrang a ni,” a iti ang khan.
17 Theibîk nei loia mi tin an sintho ang taka ngaitua petu kha “Pa” tia nin koiin chu, hi rammuala nin om sûng hin ama chi pumin om roi. 18 Nin irchibulhai ata nin idong nôk, om dân hmang hmunboi tak ata kha thil siatthei sum le rângachaka irtan ni mak chêia, 19 belrate demna boi le porinche loi, Krista thisen hlua irtan nin nih ti nin inhriata. 20 Ama chu khorsiang kho’rzir mân daiha Pathian lei inkung a nia, atûn zoro hnungkhôna hin nin ta hrangin a len lang ta a ni. 21 Ama zâra mithi lai ata kaithoitu le roiinpuina pêktu Pathian kha, nin iam tâka, khanchu Pathian kha nin iamna le sabeina nin irnghatna tak a hong ni ta.
22 Atûn chu thutak nin zôm sikin nin lungrîl nin irthiangtira, urênghai lungirthung ta takin lung nin irthung tâka, nin lungrîl takin lung irthungirhlôm roi. 23 Chi siat thei ata ni loiin chi siat thei loi Pathian kumtuang thu hring ata suakinthar nin ni.
24 Pathian Thubu’n,
“Mi murdi hloisûl ang an ni,
An roiinpuinahai khom hloisûl pâr ang a ni,
Hloisûl chu a chuaia,
A pârhai chu a tâka.
25 Rengpa thu chu kumtuangin a om mai,”
ti a ni. Kha ngêt kha a ni Thurchi sa nangni an ihril kha.
1 Khanchu sual chi tinrêng masan unglân, huangna hai, vârirletna hai, hnarsâna hai, insîrinsiatna hai murdi masan roi; 2 nâitesen suakthar angin irtha tianga irhnutui irthiang ite polloi kha irzuk roi, kha irhnutui kha nin inin chu irsôn nin ta, hringna hmu nin ti. 3 Pathian Thubu’n, “Rengpa satna kha irtem ngân u ta,” ti irziak ang khan. 4 Rengpa kha pan roi, ama chu Lung hring, mihriamhai ihnôl, Pathian inthang, hlu tak kha a ni. 5 Khanchu nangni khom lung hring ang hong niin irtha tianga in hrang angin bukkhôm roi. Kha khan Jisua Krista zâra Pathian pom inruk, irtha tiang irbôlna inhlan hrang, ochai irthiang hong ni nin ti. 6 Pathian Lekha Thu’n,
“En ta, lung hlu tak ki inthang a kila lungphûm chu Zion-a ki sia ta,
Tukhom ama iam ka chu mualinphoi no nihai,”
a tia. 7 Nangni iamtuhai hrangin chu lung hlu tak a ni, iamloihaiin chu,
“In sintuhaiin lung an ipai kha,
Kha ngei kha a kila lung poimo tak a hong ni ta,” ti hi.
8 Pathian Thubu ngêtin,
“Lung, mi tûkna hrang le Lungpui mi khâlna hrang khom a ni,”
a iti ang khan. Thu kha an iamno sikin an itûk a ni, ama kha Pathian lei irêl dân khom a ni chian ta.
9 Nangni chu nam inthang, Rengpa ochai, nam irthiang, Pathian ta bîk, ama vâr irkhêl taka lût hranga inthim ata nangni koi suaktu Pathian sintho roiinpui inpuang hrang nin ni. 10 Matona khan Pathian mi la ni ngai mak chêia, atûn chu Pathian mihai nin hong ni tâk; matona khan Pathian za’rngaina lan hre ngai mak chêia, atûn chu a za’rngaina nin hong dong tâk kêng.
Pathian suakhai
11 Inditom takhaio, khual inzin, mi rama om nin ni sikin irtha doi ngai, taksa irzukna hai ata irkêm hrangin nangni ki ngên a ni. 12 Jentailhai lai ata satakin lêng unglân, thil sual thoa nangni an bê khomin nin sintho sahai anni ngêtin hmu an ta, Pathianin nangni a zuang hro tika ama chôiindôm thei an ti.
13 Rengpa sikin mihriam dâna irchamneituhai kuang irpelût roi; irchamneitu irsâng tak, inlaltak thu hai, 14 thil sual thotuhai hrema, thil sa thotuhai chôiindôm hranga a inkung ram optuhai thu zôm roi. 15 Ite inhre loihai thu’nsîr inmôl kha thil sa thoa nangni in-ôktir hrangin Pathianin a inuam a ni. 16 Zalênin om roi. Khannisianlân, nin zalênna kha sual thupna’n hmang loia, Pathian suakhai anga om hrangin nangni a inuam a ni. 17 Mi murdihai inza unglân, urênghai lungthung unglân, Pathian chi unglân, rêng inlaltak kha chôiindôm roi.
Krista tuangna enton hrang
18 Nangni siahlohaio, nin puhai thu zôm unglân, mi sa le mi nunhoihai vai ni loiin mi saloihai khom mahrip thohai roi. 19 Mi’n Pathian nuamlam nia a inhriat ngit sika a tuang kher loi hrang intak a tuangin chu Pathian nuamlam a ni. 20 Nin sual sika nin tuangin diar takin tuang khom unglân, nin ta hrangin irhming satna imo om? Khannisian, thil sa nin tho khomin kuttum nin tuangin chu Pathian nuamlam a ni. 21 Hianga om hrangin Pathian ikoi nin ni, Krista khom khan nin ta hrangin a tuanga, enton hranga a ke hnung nin zui theina hrangin nangni a imâk pe a ni. 22 Ama khan thil sual tho maka, a bâia huangna thu suak ual mah. 23 Mi ingo’n a om laiin ngo nôk ngai maka, dik taka roirêl ngaitu Pathian kuanga khan tûngna a inkoltir tâk a ni. 24 Sual thisana felna neia ei hring theina hrangin, Krista ngêtin a taksa’n Krosa khan ei sualhai a pêla, ama zêmna irdulhai khan indam nin ni ta. 25 Belra angin lamchan nin invâi tâka, atûn chu nin irtha Enkoltu le Hruaitu kuanga khan nin hong ikîr nôk tâk a ni.
1 Khaang dênin nangni nuhai khom, nin pasalhai thu zôm roi, khanchu an laia Pathian thu zômloi an om khomin thu’nsîr kher nang loiin nin nunchana khan inhnê a ti, 2 anni ngeiin chi puma nin om lam irthiang kha hmu an ti. 3 Pên tianga irvôna rêlirlek taka sam irvôtir hai, rângachak irthei irhli hai silkai sa irbela irvô insa tum loiin, 4 lungrîl ata mizia dik, lungrîla thuhnuairôl le nunhoi, irbelna siat theiloiin, irbel roi, kha kha Pathian mit hmu’n a ihlu tak tak a ni. 5 Khaanga khan tianlai nupang irthiang, Pathiana sabeina irnghathai kha, an pasalhai thu zômna hrangin an irvo a ni. 6 Sari khan Abrahama thu a zôma, “Ki Rengpa” tiin a ikoi ngai a ni. Atûn khom thil sa nin thoa, chitna rêng nin nei no’n chu Sari nâihai nin ni.
7 Nangni pahaio, khaang dênin ompui sangram nin ninaa nin dôngmahai indot roi, hrât loi ual an ni sikin Pathian lungkhamna thilpêk, hringna kha, nangni changpuitu an ni inhriatin inza thiamhai roi. Khanchu, nin chongchaina ite’n khâl no ni.
Felna sika tuang
8 A mong taka chu, nin rêngin lungrîl hmunkhat irput unglân, irkan irhlômin urêng angin lung irthung irhlôm unglân, lung irkham irhlômin thuhnuairôl takin om roi; 9 Sual kha sualin thuan no unglân, khuasâlna khom khuasâlna’n thuan loiin satvurhai roi; satvurna dong hrang kêngin Pathianin nangni a ikoi. 10 Pathian Lekha thu’n,
“Hringna lungthung nuam le,
Zoro sahai hmu nuamin chu,
Sual ata a milei vêng insa sianlân,
A hmûr khom huangna thu insîr loi hrangin vêng insa ri se.
11 Sual irheisanin thil sa tho ri se,
Irngeina zongin lungrîl pêk takin irzûl mai ri se.
12 Rengpa mit chu mi felhai chunga a chuma,
An chongchaina khom ar ngaitua ngai.
Khannisian thil saloi thotuhai chu a doihai ngai,”
a iti angin.
13 Thil sa thôna tiang irnak nin songin chu tu mo nin chunga thil saloi tho hrang? 14 Thil dik nin tho sika tuang nin niin chu vân sain irbe roi. Tukhom chi no unglân, lungindûk viat no roi. 15 Krista kha inza unglân, nin lungrîla rênga nei roi. Nangnia om nin isabei nasan chu nangni irdon murdi chu sâm hrangin irsiam diam roi. 16 Khannisianlân, thuhnuairôl le bengvâr takin, sia le sa inhriatna irthiang tak neiin tho roi, khanchu Kristaa nin om lam sa insîrinsiathai kha mualinphoiin om an ti. 17 Pathianin sa a tia tuang nin ni lele’n chu, thil sual tho sika tuang nêkin chu thil sa tho sika tuang kha a sa ual.
18 Krista khom ei sualhai sikin voikhat a thia, Pathian kuang nangni a hruai theina hrangin, mi fel chu mi felloihai ta hrangin a ithi a ni. Taksaa thatpai a nia, irtha tiang chu inhringin a om. 19 Ama khan intângna ina om, irthahai kuang thu a zu hrila. 20 Khahai kha Nova irkuang tuk sûnga Pathianin tuangdiar taka a nghâk laia, zôm nuamloihai irtha kha an ni. Irkuanga khan, mi tômte, kiriat vai, tuia saninhring an ni. 21 Kha irangpui, baptisma hin, Jisua Krista thoinôkna sikin atûn hin nangni a isaninhring ta a ni; baptisma chu taksaa porinche irsûkinfâina vai ni maka, sia le sa inhriatna irthiang taka Pathian kuanga thu inkungna hi a ni ual. 22 Jisua Krista chu irvâna fe’n Pathian chang tiang a oma, vântîrtônhai, irchamneinahai, sinthotheinahai a thuhnuaia an om ta.
1 Krista’n taksaa a tuang sikin nangni khom khaang lungrîl kha irput roi; tukhom taksaa tuang tâkin chu sual a mâksan ta. 2 Atûn rengata chu taksaa nin hring sûng chu mihriam irzuknahai irzûl ta loia Pathian nuamlama om theina hrangin. 3 Sûnhnung tiang khom Jentailhaiin an lei itho nuam ngai: hurna haia, taksa irzukna haia, zû induna haia, zu hmun raiinfânna haia, zu in irhlômna haia, millim biakna intirom tak haia nin thoa zoro nin lei hmang inhek ok tâk. 4 Atûn hin a hoihôkna angin nin om ta no sikin ar khêl an tia, nangni an hril insiat tâk a ni. 5 Khannisianlân, khahai khan, Pathian, mihring le mithihai ngaitua hranga irsiam sai kuang khan an thurchi chit anni’n lan sîr an ti. 6 Hi sika hin mithihai kuang khom Thurchi Sa hril a ni, mi danghai ang dêna an chungchâng rêl a nia, Pathian makunga irthaa an om theina hrangin.
Pathian thilpêk enkoltu sahai
7 Thil tinrêng mongna zoro chu anai tâka, nin chongchai theina hrangin lungrîl irfîm tak irputin irvong infel roi. 8 Thil dang nêkin milung takin lung irthung irhlôm hi uar roi, lungthungna’n sual tamtak ar khu ngai sikin. 9 Chiar loiin nin ina intung irhlôm ngai roi. 10 Pathian lungkhamna thilpêk tamtak enkoltu sahai angin Irtha tiang thilpêk nin idong murdi kha sin nin tho irhlômna hrangin hmang roi. 11 Tukhomin thu an sîrin chu Pathian thu ngêt insîr ri se, sinthotu khomin Pathianin irzukna a ipêk angin sin ri se; khanchu Jisua Krista sikin Pathian chu itinrênga inpâka a om theina hrangin, roiinpuina le sinthotheina chu kumtuangin ama ta a ni. Amen.
Kristian nina sika tuangna
12 Inditom takhaio, fiana irkhêl tak nin laia zuang tung hi thilirkhêl tak zuang tung tâk angin bê no roi. 13 Krista tuangna koppuituhai nin ni sikin lôm unglân, roiinpui taka a zuang inlang tena chu raifân le lômin nin la isip hrang a ni. 14 Krista irhminga hal nin ni’n chu nin vân a sa kêng, Irtha roiinpui tak, Pathian Irtha kha, nangnia a om tihna a ni. 15 Nin laia tukhomin, mi that sika mani, inru sika mani, thil sual tho sika mani, mi’nbuaitu a ni sikin mani, tuang no ri se. 16 Kristian nin ni sika tuang nin ni’n chu nin inzak hrang ni mah, Krista irhming nin irput sikin Pathian chôiindôm ual roi.
17 Roirêlna kha phut zoro a ni tâka, Pathian in sûng mihai ata phut ni a ti. Einia phut a ni’n chu Pathian Thurchi Sa thu iam loihai kha itin takin mo an iom hrang tâk! 18 Pathian lekha thu’n,
“Mi dikhai lua saninhring hrâm an ni’n te,
Pathian ngaisakloi mi sualhai kha,
itin takin mo an iom hrang tâk?”
a iti ang khan. 19 Khanchu Pathian lungdo anga tuanghai khan thil sa tho maiin an irtha kha Siamtu iamom tak kuang inkoltir ri sehai.
1 Nin laia koiindang upahai kha, keima an upa chanpui, Krista tuangnahai inhriatpuitu le roiinpuina zuang inlang hrang chang sa hranga sabeitu hin nangni ki inthor a ni. 2 Nin laia Pathian belrahai kha enkol insa roi, nakhrâtin ni loiin Pathian nuamlam anga irzuk taka tho’n, fâk sa hrang sabei sika ni loiin, sintho nuamna lungrîl irputin enkol roi. 3 Nin ihruaihai chunga inlal no unglân, belra pâlhai enton rua ni ual roi. 4 Khanchu, Belra Enkoltu Inlaltak a zuang inlang tena chôiindômna lukhum roiinpui chuai theiloi kha dong nin ti. 5 Khaang dênin nangni vânglaihai, ulian kuanga irpêklût roi. Sin nin irsanirhlôm theina hrangin thuhnuairôlna irbelin sin tho roi. Pathian Thubu’n,
“Pathianin lârirpâkhai a doia,
irngaiintômhai chu a lunginkham ngai,”
ti a nia.
6 Khasikin, a zoro taka chôiindôma nin om theina hrangin Pathian kut hrât tak hnuaia irsia hnuai unglân, 7 nin lungdûkna murdi ama chunga irnghat zit roi; nangni a ngaitua tak tak a ni.
8 Irngaitua unglân, irdîn roi! Nin râl Diabola kha, kâmkeibaknei inrûm ngai angin fâk hrang zongin a chai ngai. 9 Iamna hin ngîr indet khak unglân, ama kha doi roi. Rammual hmun danga nin urênghai khomin khaang dênin an tuang ti nin inhriata. 10 Sôtnote nin tuang zoiin, Kristaa a kumtuang roiinpuina chang hranga nangni koitu, lunginkhamna sip Pathian khan nangni zuang inngîrtir a ta, siaminsa irkipin, inhrâtin nangni indet a ti. 11 Ama kuang khan sinthotheina kumkhua’n om ri se. Amen.
Inthâna chubai
12 Urêngpa, mi iamom a nih ti nang kin hriat, Silvana kuta hin hi lekha bongte hi nangni ki hong thon a ni, hi hi Pathian lungkhamna kha a nih ti inhriattir hrang le, kha khan ngîr indet khak hranga nangni kin thorna a ni. 13 Babulon koiindang nangni ang dêna inthang hin chubai nangni an mûk; ki nâipa Marka khomin nangni a mûk sa. 14 Krista lungthungnaa kut irchelin chubai irmûk roi. Nangni Kristaa om murdihai kuang irngeina om ri se.
1 Jisua Krista suak le tirtôn Simon Petera khan, a ni saninhringtu Jisua Krista zâra le ei Pathian felna zâra iamna kin idong ang donghai chubai ki mûk. 2 Pathian le ei Rengpa Jisua nin inhriatnaa lungkhamna le irngeina nin chunga inpungin om ri se.
Pathian koina le inthangna
3 A roiinpuina le a satna dong hranga ni koipu ei inhriatna sika, sakhua diktak hringnuna ei om theina hrangin, thil ei innang murdi Pathian sinthotheina lianin a ni pêk ta. 4 Khanchu; thilpêk roiinpui tak le hlu tak a inkung chu, a ni pêk tâka, khasika khan rammual irzukna, a nin siatthei ata nin suaka, Pathian zia nin irkoppui thei tâk a ni. 5 Hi sika hin thei dôr insua nin iamnaa khan satna inkoptir unglân, nin satnaa khan inhriatna, 6 nin inhriatnaa khan mâni irsepna, mâni irsepnaa khan diarna, 7 nin diarna khan Pathian uksakna, Pathian uksaknaa khan urênghai inrenna, nin urênghai inrennaa khan lungthungna chu bôk sa roi. 8 Hi nitna hi nin innang a ni, kha kha chu nin neia, a pung maiin chu ei Rengpa Jisua Krista nin inhriatnaa takirtâi tak le poimo takin nangni siam a ti. 9 Kha thil nei loihai chu mitcho, hmu irzat loi, an tianlai sual irsûkinfâi pe an nih ti irnghil tâkhai an ni.
10 Khanchu, urênghaio, nangni a ikoina le nangni a inthang hi inlangtir hrangin theidôra takirtâina insua’n, det takin ngîr roi; khaanga ngîrhai chu itiklai khomin tûk siat no nihai. 11 Khanchu ei Rengpa le saninhringtu Jisua Krista kumtuang rama lôm takin nangni inlûttir a ti.
12 Khasikin thutak nin inhriata khan det takin om ta khom unglân, hi thu hi nangni inhriat nontir mai ki inuam a ni. 13 Khan, hi takpum ki’rput sûng hin chu hi thuhai nin inhriatna kha inhar thiai mai hrangin nangni ki nuam a ni. 14 Ei Rengpa Jisua Krista’n a ni ihril angin hi ki takpum hi ki isuaksan lat ta hrangin ki irhriat a ni. 15 Ki suaksan hnung khomin, itiklai khoma hi hi nin inhriat mai theina lam nangni siam pe hrangin thei dôrin irnak ki isong a ni.
Krista roiinpuina mit ngeia hmutuhai
16 Ei Rengpa Jisua Krista, sinthotheina le, a izuang nôkna thu nangni kin ihril lai khan thonthu phuachôp mai mai nangni hril ni ma ung, a roiinpuina chu mit ngeia hmutuhai kin ni. 17 Pa Pathian kuang ata chôiindômna le roiinpuina a dong lai khan, Roiinpuina Irsângtak kuang ata irhâi a zuang suaka, “Hi hi ki Nâipa lungthungtak a chunga ki lôm tak tak a ni,” a zuang tia. 18 Kha hnuk irhai, irvân ata zuang chum kha, keini khom tâng irthianga a kuang kin om lai khan kin inhriat a ni. 19 Deipuhai thu lei inpuang kha a dik ngêt tih keini khomin kin pom indet uala, nangni khomin, Vârpâr Ârsi a zuang inlang mân vâr angin, kha thu kha nin milunga invârtu hmang unglân sa a ti.
20 Pathian Lekha thua lei hrilna thuhai hi mâni ngaidân ringota hrilfia hrang ni mah ti inhre masa phot unglân. 21 Lei hrilna rêng rêng hi mihriam thua suak ni maka, Irtha Irthiang hruaiin Pathian kuang ata an insîr ngai a ni.
1 Mipuihai laia deipu dol an iom ngai ang khan nangni laia khom irchutirna dikloi la hong om a ti; mi insiat thei irchutirna dikloi inrûkin la hong lûtpui an ta; Inlaltak anni irtantu kha, hnôlin mâni siatna inrang takin intungtir an ti. 2 An omlam intirom tak chu mihaiin hong zui an ta, anni sika khan thutak lampui hi hrilinsiatna ni a ti. 3 Sum an hmu theina hrangin huatirham takin an thu phuachôp khan bepârna hrangin nangni an hmanga; khannisianlân, tiana an chunga roirêl sai tâk chu om chian chian no ni, anni irhmangtirtu hrang kha a ihar chian tâk a ni. 4 Vântîrtônhaiin thilsual an tho lai khan Pathianin hôihai ma, hremhmuna a paia, Roirêl Ni nghâk hrangin khura inthima khan an iom tâk a ni. 5 Tianlai rammual khom hôi ma, rammual sual tak chunga tui an lêttira khom khan, Nova, felna thu’npuangtu le mi dang sari vai an izôk a ni.
6 Sodom le Gomora khua khom a’rvuttir chita, Pathian uksak loihai a ihrem lam hrang entîrna hrangin a insiat chittir a ni khate. 7 Lota, mi fel, mi sualhai omlam a sâna poi ti ngaitu kha a sansuaka, 8 Kha mi satak kha an laia om sa ngai a nia, an thil tho’nsual a hmu le a inhriathai chu a sân a milung an natir ngaia. 9 Rengpa khan ama chituhai chu tuangna ata sansuak lam le roirêl Ni a zuang tung mâna khom mi sual hrem lam an hriat; 10 an takpum irzukna porinche anga omhai le Pathian irchamneina hmusittuhai len vâng chu hremna lam an hriat nôk ual. Hi irchutirtu dik loihai hi an invêtin an hâia, an lârirpâka, irvân mi roiinpuihai khom khi mahrip tho loiin an hrilinsiat ngai a ni. 11 Anni nêka hrât le sinthothei ual vântîrtônhai khomin, Rengpa makunga hi mi roiinpuihai chungchâng an insîrin chong siat hmang ngai mahai. 12 Khannisian, hihai hi ngaituana nei loi, ramsa, chela that zôi hranga zuang suakhai ang hi an ni, an inhriat thiamloi murdi an hrilsiata, ramsahai anga that ni an ti, 13 an sual man kha tuang an ti. Sûn sosôta a hoihôkna uar ngai an ni, nin laia mi intirom le mi porinche irphûm an nia, nin hruaithêna an hong kopa hin nangni an ihuang a ni. 14 An mitin uire hrang an en vêl maia, sual tho hnông thei mahai. An lungrîla huatirhamna lam a sân an inhriata, Pathian khosâl tong an ni. 15 Lampui dik an pêtsana, an irhmang ta. Beora nâipa Balaama lampui an zui ta. Ama khan chu thilsual tho an lâp takin ar hriata. 16 Khannisian, a tho’nsualnaa khan halirchu’n a om tâka, sakuartung chong theiloi chu mihriam angin a hong chonga, deipu invêtna chu inmongtir a ni ta.
17 Kha kha tuikuang tui om loi le sûm phâivua’n a isêmpai ang an ni; khahai ta hrangin chu Pathianin hmun inthim inthûk tak kha a sia pehai ta. 18 Thu chanlamboi uar tak taka hrilin, suala omhai laia irthoka intân suak lai takhai chu taksa irzuknaa intiromna an inthêm inhnêhai ngaia. 19 Anni sual suaka om chianin mi zalênna pe hrangin an inkung ngai, tu mihriam khom ama inhnêtu suaka chu a iom a ni. 20 Rengpa le Saninhringtu Jisua Krista an inhriat sikin rammual porinchenahai an intân suaksan hnungin kha dêna khan intân nôk an ta, inhnê nôkin an omin chu, a phuta nêkin inhnunga an dinghmun kha chu siat ual tak ni a ti. 21 Lampui fel inhriat hnunga thupêk irthiang an kuang inkoltir kha chu irheisan nêkin chu lampui fel inhre no sianlân a ta hrangin a isa ual hrang a ni. 22 An om lam ata hi, hi thuvâr dikzia hi an lang infel ok: “Ui chu a miluak a fâk nôka,” ti le “Vokpui dialdôka a irbual nôk ngai,” tihai hi.
1 Inditom takhaio, voihni lekha nangni ki hong ithon a ni ta. Nin inhriat sai tâk nangni ki hong inhriat nontir nôk; nangnia lungrîl irthiang kaiinhar hrangin voihni nangni ki hong ithon a ni. 2 Deipu irthianghai thu le Rengpa le Saninhringtu thupêk, nin tirtônhaiin tiana nangni an ihril kha, inhre mai roi. 3 Sûn hnungkhôna chu hmusitpuhai, mâni irzukna ang taka omhai hong suak an ti, ti inhre masa roi. Hmusit tak takin, 4 “Zuang nôk chonginkung kha itin mo a ni tâk? Ei irchibulhai an thi zoi tâka, thilsiam irphut ata itinrêng a ngai dênin a la iom mo ni ma?” la ti an ti. 5 Tianlaia khan Pathian thu’n, irvânhai khi siam a ini le irnêng chu tui ata siam suak a inihai, tui le tui kâra a isia hai, 6 tuilêt lai khan rammual milui chu, kha tui khan a ngîma, a insiathai kha a’rnghil om an thoa. 7 Pathian ngaisak loihai chungchâng rêl zoro le irhmangtir tika meia kâng irhmang hrangin atûn irnêng le irvân khom hi Pathian thu’n a ihôi a ni.
8 Inditom takhaio, hi hi irnghil no roi, Rengpa ta hrangin chu sûn khat hi kum sângkhat ang a nia, kum sângkhat khom hi sûn khat ang a ni. 9 Senkhat iam lam angin Rengpa hi a thu’nkung hlenna lama ir-ial ma; nin ta hrangin a ituang thei kêng; tûte irhmang nuam maka, mi murdi’n an sual an irleta, a kuang an ikîr a nuam ual a ni.
10 Rengpa Nikhua chu inru angin a zuang itung ngêt hrang a ni. Kha tika chu irhai inring tak le irvân khi kâng irhmang zit a ta; irnêng le a sûnga thil om murdi khom irhmang zit a ti. 11 Hihai hi khaanga siat zit hrang a ni’n chu nangnihai kha i ang mi mo nin ini hrang? 12 Pathian sûn tep nghâkhmo taka nin thîr mai lai hin mi irthiang, Pathian ta hranga irpêk mi nin ini hrang a ni. Kha tika chu irvân khi kâng irhmang a ta, a lum sikin ârsihai khom zôi zit an ti. 13 Khannisianlân, Pathian inkung, irnêng thar le irvân thar, a sûnga felna omna kha, ei inghâk a ni.
14 Khanchu inditom takhaio, hi thil nin nghâkhai hin Pathian makunga irthiang le sêlna boia om hrangin theidôr insua unglân, ama leh irngei roi. 15 Rengpa tuangdiarna hi saninhring nin ni theina zoro inchuma bê unglân, Pathianin vârna nangni a ipêk angin ei urêngpa inditom tak Paula khomin hi thu hi a irziak ngai a ni. 16 A thu irziak senkhathai chu a sân inhriat thiam an tak, ite irchu loi le mi det loihaiin Pathian Lekha thu dang an irngai kôi ang dênin an irngai kôia, mâni siatna an intung ngai. 17 Inditom takhaio, nangni’n chu nin inhriat tâka, irdîn roi; khano’nchu uksak nei loihaiin nangni hruai irhmang an ti; nin det insat laiin tûk likna chin ni.
18 Ei Rengpa le saninhringtu Jisua Krista inhriatna hai, lungkhamna hai irsônlian mai roi. A kuanga khan roiinpuina atûn ata kumtuang dênin om ri se. Amen.
1 A phut ata om, kin mikuara kin inhriat tâk, kin mita kin ihmu, ngûk taka kin ien, kuta kin itôn, hringna Thu kha kin irziak a ni. 2 Kha hringna kha a hong inlanga, kin ihmu tâk, kin inpuanga, Pa kuanga om kumtuang hringna kin kuang a zuang inlang kha, nangni kin inhril a ni. 3 Nangni’n nin ni pôl sa theina hrangin kin ihmu le kin inhriat kha nangni kin ihril a ni, kin irpôlna kha Pa le Nâipa Jisua Krista leh kin irpôlna a nia. 4 Kin lôm a’rkip theina hrangin hi thu hi kin irziak a ni.
Pathian chu Vâr a ni
5 A Nâipa ata thu kin inhriat nin kuanga kin inpuang chu hi hi a ni: Pathian chu vâr a nia, amaa inthim zel om mah. 6 Khasikin, inthima lêng maiin, ama leh ei irpôl ei tia, inthima ei omin chu milak ei thoa, thutak ei izôm loi a ni. 7 Ama vâra a om angin vâra ei iomna san chu ei irpôlkhôm hi a ni, A Nâipa Jisua thisenin ei sual murdi a ni’rsûkinfai tâk a ni.
8 Sual nei ma ung ei ti’n chu, mâni ei irhuanga, thutak kha einia a iom loi a ni. 9 Ei sualhai Pathian kuang ei irphuangin chu, ama kha iam a omin a dika, ei sualhai a ni ngaidamin, ei dikloina murdi a ni irsûkinfâi hrang a ni. 10 Thilsual tho ma ung ei ti’n chu, Ama kha milak ei inchangtira, a thu khom ei nia a iom loi a ni.
1 Nâihaio, thil sual nin tho loina hrangin hi thu hi nin kuang ki irziak a ni. Aniachu, tukhom hong sual ta sianlân, Pa kuanga nin sîrpuitu mi fel, Jisua Krista kha, ei nei. 2 Krista kha ei sual ngaidamna a ni, eini sual vai ni loiin rammuala mi murdi sual ngaidamna khom a ni.
3 Pathian thupêkhai ei zômin chu ama ei inhriat a nih ti a ifel a ni. 4 Ama kha kin inhriat tia a thupêkhai zôm ual loi chu milak a nia, amaa thutak a iom loi a ni. 5 Tukhomin a thu a zômin chu Pathian kha a sân lung a ithung a ni. Amaa ei om ngêt tih inhriat infelna hrang chu hi hi a ni: 6 Tukhom, Pathian leh irzomin ki om mai titu kha Jisua Kristaa om angin a iom sa hrang a ni, ti hi.
Thupêk thar
7 Inditom takhaio, nin kuang thupêk thar ki hong irziak ni mak e, thupêk milui, a phut ata nin inei kha ki irziak a ni. Thupêk milui kha, nin inhriat sai tâk kha a ni. 8 Khannisian atûna nin kuanga thupêk ki irziak hi a thar a ni, kha thutak kha Kristaa leh nangnia an lang; inthim kha a hong irkiang thiaia, vâr tak tak a hong vâr tâk sikin. 9 Vâra om irtia, a urêng khôkmâk chu atûn ten khom inthima a la iom mai a ni. 10 Tukhom mâni urêng lungthungtu chu vâra a om maia, amaa khan tûkna rêng om mah. 11 Tukhom mâni urêng khôkmâktu chu inthima a oma, inthima a’rvâk ngaia, inthimin a mit an zîng pe ngai sikin a fena khom a inhriat ngai loi a ni.
12 Nâihaio, Krista zâra nin sualhai ngaidam a ni tâk sikin nin kuang ki irziak a ni.
13 Pahaio, ama chu a phut ata om mai kha nin inhriat tâk sikin nin kuang ki irziak a ni. Vânglaihai, Setan kha nin inhnê tâk sikin nin kuang ki irziak a ni.
14 Nâihaio, Pa kha nin inhriat tâk sikin nin kuang ki irziak tâk a ni.
Pahaio, ama chu a phut ata om mai kha nin inhriat tâk sikin nin kuang ki irziak tâk a ni.
Ruathartehaio, nin hrâta, Pathian thu nangnia a om tâk sika Setan nin inhnê tâk sikin nin kuang ki irziak tâk a ni.
15 Rammual hi lungthung no unglân, rammuala thil omhai khom lungthung sa no roi, Tukhomin rammual hi lung a thungin chu, Pa lungthungna a inei loi a ni. 16 Rammuala thil om murdihai taksa irzukna hai, mit irzukna hai, mâni sum irsorpuinahai le dam sûng roiinpuinahai hi Pa kuang ata suak ni mak e, rammual ata suak kêng a ini ual. 17 Rammual hi a’rzuknahai pumin a hong iboi thiai a ni, khannisian, Pathian nuamlam thotu chu kumkhua’n om mai a ti.
Krista doitu
18 Nâihaio, zoro hnungkhôn a hong ni tâka, Krista râl la hong om a ti, ti nin inhriat ang khan, atûn hin Krista râlhai tamtak an hong suak ta; khasika khan zoro hnungkhôn kha a ni tah ti ei inhriat a ni. 19 Anni kha ei lai ata an suaka, ei mi le satak tak ni mahaia, nihai sian ei kuang an iom mai hrang a ni. Khannisian, an rêngin ei mi le sa ni zit mahai tih an inlang fiana hrangin an isuak tâk a ni.
20 Nangni chu, Mi Irthianga khan sahriak nangni a’rthutira, itinrêng nin inhriat a ni. 21 Thutak kha nin inhriat loi sika ki irziak ni maka, thutak nin inhriat sikin le thutak ata minlak rêng rêng suak ngai mah ti khom nin inhriat sika ki irziak a ni. 22 Jisua kha Krista a nih ti pomloitu nêka milak tu mo om? Kha pomloitu kha Krista râl a ni. Pa le Nâipa a ihnôl a ni. 23 Tukhom Nâipa pomloi chu Pa khom a ipom loi a ni; tukhom Nâipa pomtu chu Pa khom a ipom a ni.
24 Nangni’n chu a phut ata nin inhriat kha nangnia inomtir mai roi. A phut ata nin inhriat kha nangnia a om maiin chu nangni khom Pa le Nâipa khan nin iom mai hrang a ni. 25 Hi hi a ni a thu’nkung, Krista ngêtin ei kuang a inkung kumtuang hringna hi.
26 Nangni hruai irhmang tumtuhai chungchâng thu hi nin kuang ki irziak a ni. 27 Nangni chu, a sahriak nangni pol kha nangnia a om maia, tukhom irchu nang mak chêi. A sahriak nangni irpoltirna khan thil tinrêng nangni ar chutira, kha kha a dika, milak ni mah. Khanchu, nangni a irchutir ang khan Kristaa khan om mai roi.
Pathian Nâihai
28 Atûn hin, Nâihaio, a zuang inlâr tika hâi taka ei oma, a zuang Nikhuaa inzak loia ei om theina hrangin Kristaa khan om mai roi. 29 Ama kha mi diktak a ni ti nin inhriatin chu, dik taka thoptu ka chu a nâihai an nih ti inhre roi.
1 Irngai u ta, Pa lung ni thungna hi a lûminna bâka! Pathian nâihaia a ni ibe tâk hi; khaang kha ei hong ini kêng. Hi sika hin rammualin nin hre ma, ama kha an inhriat no sikin. 2 Inditom takhaio, atûn hin Pathian nâihai ei ni tâka, itin mo ei la iom hrang tih chu lan lang mah. Ama a zuang inlâr tika chu ama angin om ei tih iti ei inhriat, a nilam ang takin ama kha ei la hmu hrang sikin. 3 Tukhom, Kristaa sabeina nei murdi’n chu ama a irthiang angin a’rthianginfâi ngai.
4 Tukhom, thil sual tho chu dân a insiat a ni, sual chu dân insiatna a nia. 5 Ama kha sualhai lapai hrangin a hong inlanga, amaa khan sual om mah ti nin inhriat. 6 Tukhom Kristaa om mai chu thilsual tho mah; tukhom thil sual tho chu Krista hmu maka inhriat khom inhre mah. 7 Nâihaio, tukhomin nangni huang no ri sehai; Krista kha mi dik tak a ini angin thil dik thotu kha mi dik a ni. 8 Thil sual thotu chu Diabola ata suak a ni; a phut rengata Diabola khan thil sual a thoa. Pathian Nâipa a zuang inlangna san chu, Diabola sinthohai inboi hranga a ni. 9 Tukhom Pathian nâi chu sual ngai maka, Pathian nitna tak amaa a om maia; Pathian kha a pa a ni sikin a isual thei ta loi a ni. 10 Pathian nâihai le Diabola nâihai inlang infelna chu hi hi a ni: tukhom thil dik tholoi le a urêng lungthung loi chu Pathiana suak ni mah.
Lungirthung irhlômna
11 A phut ata thu nin inhriat kha: lung ei irthung irhlôm seng hrang a nih ti hi a ni. 12 Mi sual ata suak Kaina, a urêngpa Abela that anga khan chu om no iduah. Ithoa mo a ithat kha? Ama sinthohai a suala, a urêngpa sinthohai a fel sikin.
13 Urênghaio, rammualin nangni a khôkmâk khomin ar khêl ti no roi. 14 Eini chu urênghai lung ei thung sikin thina ata ei suaka, hringnaa ei lût ta tih ei inhriat: lungthungna nei loi chu thinaa a la iom mai a ni. 15 Tukhom, a urêng khôkmâk chu mi that a ni, tukhom mi that chu kumtuang hringna nei no nih ti nin inhriat. 16 Ama’n ei ta hrangin a hringna a ipêka hin, lungthungna kha ei inhriat ta. Eini khomin urênghai hrangin ei hringna hi ei ipêk hrang a ni. 17 Tu’n mani rammual irchon neiin a urêng irsam hmu sianlân, ama kha inren no sianlân, Pathian lungthungna kha itin mo a kuang a iom thei hrang? 18 Nâihaio, chongbâi le hmûr vaiin lungthung no ih, lungthungna diktak le sinthoa inlangin ni ual ri se.
Pathian makunga hâina
19 Khanchu, thutaka ei om tih inhria ei ta, a makunga khom ngam takin om thei ei ti. 20 Ei milung luan thiamno a nin changtirin te, Pathian kha ei milung nêkin a roiinpui uala, itinrêng an hriat zit a nih ti ei inhriata. 21 Inditom takhaio, ei lungrîlin thiamno a nin changtir no’n chu Pathian ei hnôl ngam ngai. 22 A thupêkhai ei zôma, a nuamlam ei tho sikin a kuang ei ngên murdi ei hmu thiai ngai a ni. 23 A thupêk chu hi hi a ni: A Nâipa Jisua Krista irhming ei iama, thu a ni ipêk anga lung ei irthungirhlôm hi. 24 Pathian thupêk zômtu chu Pathiana a om maia, Pathian khom a kuang a iom mai a ni. Khan, hi hi Pathian einia a om mai tih ei inhriatna a ni: Irtha a ni ipêk hi a ni.
1 Inditom takhaio, irtha narân hi iam no roi, irtha chu Pathian ata zuang suak a ni le ni loi fia bak ngai roi; deipu dol tamtak rammuala an hong suak tâk sikin. 2 Hi hi Pathian Irtha nin inhriat theina hrang chu a ni: Tukhom Jisua Krista chu taksa’n a zuang tih thoptu murdi chu Irtha a idong kha Pathiana suak a ni. 3 Jisua thoploihai irtha dong kha Pathian ata suak ni ma: kha kha Krista doitu hong hrang ti nin inhriat kha a ni, atûn khom rammuala a iom mai ta a ni.
4 Nâihaio, nangni chu Pathian ata suak nin nia, nangnia om Irtha kha rammuala om nêkin chu a roiinpui ual sikin deipu dolhai kha nin ngam tâk kêng. 5 Anni kha rammuala mi an nia; khasikin rammuala mi angin thu an insîra, rammualin an thu an irngaitua ngai a ni. 6 Eini chu Pathian ata suak ei ni; Pathian inhretuhai khan ei thu khom an irngai ngai; Pathian ata suak loi chu ei thu khom irngaitua mahai; khataka khan irtha diktak le dikloi ei inhriat thei a ni.
Pathian chu lungthungna a ni
7 Inditom takhaio, lung irthung irhlôm ei ti, lungthungna chu Pathian ata zuang suak a ni; tukhom lungthungna nei ka chu Pathian nâi a nia, Pathian an hriat sa ngai a ni. 8 Tukhom lungthungna nei loiin chu Pathian inhre mahai, Pathian chu lungthungna a nia. 9 Pathian lungthungna chu hi ang hin ei kuang a zuang inlang, ama zâra hringna ei nei theina hrangin Pathianin a Nâipa neisun rammuala a zuang tîra hin a ni. 10 Hi ngêt hi a ni lungthungna chu: Eini’n Pathian lung ei ithung ni loiin, Ama’n lung a ni thunga, ei sual thuphachôina hrangin a Nâipa a zuang tîr tâk a ni. 11 Inditom takhaio, Pathianin khaang dôrin lung a ni thungin te, eini khom lung ei irthungirhlôm seng hrang a ni. 12 Tukhomin Pathian hmu ngai mahaia chu, lung ei irthung irhlômin chu Pathian einia a om maia, a lungthungna khom einia irkiptirin a iom a ni.
13 A’rtha ni pêk hi Amaa ei oma, Ama khom einia a om tih ei inhriatna chu a ni. 14 Pa’n Nâipa kha rammual Saninhringtu hrangin a zuang tîr ti ei hmu tâka, mi dang khom ei inhriattir a ni. 15 Tukhom Jisua kha Pathian Nâipa a nih ti thoptu chu amaa khan Pathian a om maia, ama khom kha Pathiana a om mai a ni. 16 Pathianin lung a ni thungna chu eini ngêtin ei inhriata, ei iam ta a ni, Pathian chu lungthungna a nia, kha lungthungnaa om mai kha Pathiana a om maia, Pathian khom amaa a om mai a ni. 17 Roirêl nikhua kha chi viat loia ei om theina hrangin einia lungthungna chu irkiptir a ni ta; rammuala khom hin ama ang takin ei iom ta a ni.
18 Lungthungnaa hin chitna rêng om maka, lungthungna irkip khan chitna murdi an hnot irhmang ngai. Chitna hi hremna a ni sa, ichia om chu lungthungnaa a la irkip loi a ni. 19 Ama’n lung a ni thung masa sikin eini khomin lung ei ithung a ni. 20 Mi’n, “Pathian lung ki thung,” tiin a urêng khôkmâk sian, milak a ni; a urêng a ihmu mai lua lung a thung no’n te, Pathian a ihmu ngailoi kha itin mo lung a ithung thei hrang? 21 Krista’n thupêk a ni ipêk chu hi hi a ni: Tukhom Pathian lungthungtu khan a urêng khom lung a ithung sa hrang a ni, ti hi.
1 Tukhom Jisua hi Krista kha a nih ti iam murdi chu Pathian nâi an ni. Tukhom Pa lungthungtu khan nâi khom lung a ithung sa ngai a ni. 2 Pathian nâihai lung ei thung a ni ti ei inhriatna chu, Pathian lung ei thunga, a thupêkhai ei izôm hi a ni. 3 Pathian lung ei thungna chu hi hi a ni: a thupêkhai zôm hi; a thupêkhai chu eini ta hrangin ngar mah. 4 Pathian nei murdi’n chu rammual hi an hnê ngai: hi hi a ni rammual inhnêa ngamna chu, ei iamna hi. 5 Jisua hi Pathian Nâipa a nih ti iamtu vai no chu tu mo rammual hi inhnê thei hrang?
Nâipa chungchânga thu inhretu
6 Jisua Krista hi a ni, tui le thisena zuang kha, tuia vai ni loiin, tuia le irthaa a ni ual; Irtha kha an hriatpuitu a ni. Irtha kha thutak a ni. 7 Inhriatpuitu inthum an om: 8 Irtha, tui, le thisen kha, kha inthumhai kha an lunginrual a ni. 9 Mihriam inhriatpuina lua ei pomin te Pathian inhriatpuina kha a roiinpui ual a ni; Pathian inhriatpuina kha, A Nâipa thurchi an hriattir takna hi a ni. 10 Tukhom Pathian Nâipa iamtu’n chu amaa hin inhriatna hi a nei a ni: Pathian iamloitu chu Pathian kha milaka a inchangtir a ni, Pathianin a Nâipa thurchi an hriattir kha a iamno sikin. 11 Hi hi a thu inhriattir chu a ni, Pathian khan kumtuang hringna a ni pêka, kha hringna kha a Nâipaa hin a iom a ni. 12 Tukhom Nâipa nei murdi’n chu hringna kha an nei ta, Nâipa nei loiin chu hringna kha nei mahai.
Kumtuang hringna
13 Kumtuang hringna nin nei ti nin inhriat theina hrangin nangni Pathian Nâipa irhming iamtuhai kuang hi thu hi ki irziak a ni. 14 A nuamlam anga i khom ei ngênin chu a nir ngaitua ngai, kha kha a kuanga ei ngamna chu a ni. 15 Ei ngên zoro rikipin a nir ngaitua ngai ti ei inhriat sikin ei ingên ang kha a ni pêk ngai ti khom ei inhriat.
16 Tukhomin, a urêng, thina dôr ni loi sual tho’n hmu sianlân, ngên pe a ta, Pathianin hringna pe a ti. Hi hi thina dôra sual tho loihai hranga a ni. Khannisian, thina hrang dôr sual a oma, khaanghai ta hrangin ngên pe hrang ti ma ung. 17 Thil dikloi tho rêng rêng hi sual a ni zita, aniachu sual murdi hi thina hrang dôr sual ni mah.
18 Tukhom Pathian inei chu thil tho’nsual mah ti ei inhriata; Pathian Neitu khan a vong inhringa, mi sual khan a itôn theiloi a ni. 19 Rammual pumpui hi Mi sualpa thuhnuaia om sian khom Pathian ata suak ei nih ti ei inhriat. 20 Pathian Nâipa kha a zuanga, Pathian tak kha inhre thei hrangin inhriat theina a ni pêk ti ei inhriat sa; khanchu Pathian tak khan ei iom a nia, Nâipa Jisua Kristaa khan. Hi hi a ni Pathian dik tak kha, hi hi a ni kumtuang hringna chu. 21 Nâihaio, millim ata irkiang roi.
1 Upa’n chu Nupang sa, Pathian inthang le a nâihai, thutaka ki lungthunghai chubai ki mûk. Keima vai khom ni loiin thutak inhretu dang murdi khomin lung nang an thung; 2 thutak, ei nia om mai, kumkhua’n ei kuang a om hrang sikin. 3 Thutak le lungthungnaa khan Pa Pathian le Pa Nâipa Jisua Krista kuang ata lungkhamna hai, za’rngaina hai, irngeina hai kha ei kuang om a ti.
Thutak le lungthungna
4 Pa’n thu a ni ipêk anga ni nâi tuhai mani thutaka an om ki hmu sikin ki lôm tak tak a ni. 5 Nupang sa, thupêk thar ni loiin a phut ata ei idong kha nang hril hrangin ki irziak a ni: “Lungthung irhlôm seng ei ti,” ti nang ki ngên a ni. 6 A thupêk ang dêna ei iom hi lungthungna chu a ni; hi hi a thupêk, a phut ata nin inhriat tâk kha a ni, “Lungthungnaa nin om mai hrang a ni,” ti hi.
7 Mi huang ngaihai, Jisua Krista chu taksa irputin a zuang ti pomloihai, rammuala an hong suak tâka, khaang mihai kha huangtu le Krista doituhai an ni. 8 Khasikin nin itho suak tâkhai inchân loia lômman ar kipa nin hmu theina hrangin, mâni ir-enkol insa roi.
9 Tukhom Krista irchutirna thua om loia a khêlin chu Pathian nei mah. A irchutirna thua om mai chu Pa le Nâipa a inei irkop tâk a ni. 10 Kha irchutirna kha kop loia nin kuanga hong chu tukhom nin ina intungtir no unglân, chongbâi sa khomin lei chongpui no roi. 11 Chongbâi saa lei chongpuitu chu thil tho’nsuala khan a ikop sa a ni.
Inthâna chubai
12 Nin kuang thu tamtak insîr hrang nei khom inlân, lekha le lekhatuia irziak tum ma ung; ei lôm ar kip theina hrangin ni kuang honga, hmêl irhmua nang chongpui ki inuam ual a ni.
13 Ni zuarpuinu inthangnu nâihai khan chubai nang an mûk sa a ni.
1 Upa khan, a sâma ki lungthung Gaia, chubai nang ki mûk. 2 Rual inditom tak, itinrênga hlo ni chuk, irtha le taksa tiang ni dama, ni hrisêl theina hrangin nang ki chongchai pe ngai a ni. 3 Urênghai an honga, thutaka ni iamomzia le thutaka ni om indet khakzia an ni hong hrila, ki râi a fân tak tak a ni. 4 Ki nâihai thutaka an om tih kin hriata ki ilôm bana chu lômna dang rêng nei ma ung.
Gaia inpâkin a om
5 Rual inditom tak, hi urênghai hi mikhual ni khomhai sian an chunga ni lei satak taka, 6 Koiindanga khom ni satzia an insîr ngai. An inzinna lama anni hi Pathian nuamlam tiang ni lei changpui zêl theiin chu a sân sa ti. 7 Krista sinthoa an fenaa khan Jentailhai lai ata ite sanna la nuam mahai. 8 Khanchu, thutak hranga sin suam ei ni, ei inhriat theina hrangin keini hin hi mihai hi ei ichangpui hrang a ni.
9 Koiindanghai kuang khan lekha ki’rziak tâka, khannisianlân, Diotrefa, an laia hruaitu chang nuam ngaitu khan, ki thu uksak mah. 10 Khasikin ki hong zoro tena chu a om dân, thil irkhêl tak tak thoa mi a ibê thuhai nangni hril zit ki ti. Kha kha a ruk ti loiin ama ngêtin urênghai lôm nuam maka, a lôm nuamhai khom a khapa, Koiindang ata an hnot suakhai ngai a ni.
11 Urêng inditom tak, a saloi chu irchu no’n lân, a sa chu irchu ual roh. Thil sa thotu chu Pathiana suak a nia, sin saloi thotu chu Pathian la hmu ngai mah. 12 Demetria hi mi tinin an inpâka, thutak inpâk khom a ihlo a ni; keini khomin kin inpâka, kin inpâkna chu a dik a nih ti nin hriat.
Inthâna chubai
13 Ni kuang thu tamtak insîr hrang ki neia, khannisian, pe’n le lekha tuia irziakin nuam ma ung. 14 Sôtnote hnunga nang hmu lat ki sabeia, kha tena hmêl irhmu’n la chong ta rei.
15 Irtharngamna ni kuang om ri se. Ei rualhai hin chubai nang an mûk. Ei rualhai kha an irhming irlam sengin chubai ni mûk pe roh.
1 Jisua Krista suak le Jakoba urêng Juda khan, Pa Pathian lungkhamna le Jisua Krista ienkolnaa om, ikoihai chu chubai ki mûk.
2 Za’rngaina hai, irngeina hai, lungthungna hai nin chunga inpungin om ri se.
Irchutirna dikloi chungchâng
3 Inditom takhaio, saninhringna ei idong chungchâng hi nin kuang irziak ki nuam tak tak ngaia; Pathianin a mi irthianghai laia iamna thu voikhat nang an kol indettir tâk hi thop ngit hranga nangni inthor hrangin nin kuang lekha irziak a nang ti kin hriata. 4 Mi senkhat Pathian nei loihai, inrûkin ei laia hong lût an oma, kha mihai khan ei Pathian lungkhamna kha hurna an inchangtira, ei Hruaitu le ei Rengpa neisun Jisua Krista khom pom mahai. Kha mihai khan thiamno an chang hrang dân chu tianlai ata Pathian Thubu’n a lei inpuang sai diam tâk a ni.
5 Nin inhriat sai zit a ni khomin, nangni hong inhriattir nôk ki inuam a ni. Rengpa’n Aigupta ram ata Israel mihai a sansuaka, khannisian an laia iamloituhai kha a inboipaihai nôk a ni. 6 Vântîrtônhai khom an irchamneinahai pom nuam loia, an omna hmun mâksanhai kha, Roirêlna Nikhua roiinpui tika an chungthu rêl hrangin kumtuang thîrhruia khitin inthim hnuaia a isiahai tâk a ni. 7 Khaang dêna khan Sodom le Gomora khua hai kha, an kôlvêla khua hai leh hurna porinchea an irpumpêk zoi tâk sikin, mi tin le inhriattirna’n anni chu kumtuang meia hrem an ni tâk a ni.
8 Khaang dên khan, kha mihai khan inlârna an hmua, kha inlârna hmu sika khan an takpum an porinchetira, Pathian irchamneina an hnuaisiaa, chung tianga roiinpuihai khom an hrilinsiat ngai a ni. 9 Mikaila, vântîrtôn inchungtak khomin, Diabola le Mosia ruak chungchânga an irsêl lai khan, chong saloiin hal nuam mah, “Rengpa’n hal ri se,” a ti chian a ni. 10 Hi mihai hin an inhriat thiamloi murdi an insîrinsiat ngaia; ngaituana neiloi ram sahaiin an isuakpui inhriatna an izui ang dênin anni khom hin an izuinaa khan a insiattirhai a ni. 11 Lungkham an om bâk ngaia! Kaina lampui kha an zuia, sum irzûlin Balaama sualna tiang an intâna, Kora angin tehel an zong sikin, an irhmang sa ta! 12 Khahai kha lungthungna hruai nin inthê insiattu an ni, inzak loiin an ot sa. Mâni ringot an irngaituaa, sûm rotui pailoi, favâng thing ra loi, voihni thi tâk; a’rzung le ileh inkar zit tâk; a’rhmang zit tâk ang kha an ni. 13 Tuikhanglian ivôrpai, mâni mualirphoi irsak, ârsi chaninvâi, Pathianin kumtuang inthim irsa khak lei sia pehai ang kha an ni.
14 Adama irchi fe thiai a sarina, Enoka khan hihai chungchâng hi an lei hrila, “En u ta, Rengpa chu a mi irthiang sâng tamtak leh zuang a ti. 15 Pathian uksakloi mi murdihaiin Pathian chi loia an thil tho murdihai le ama doia thu ngar ta tak an insîr murdi chungchânga Pathian uksakloi mi sualhai thiamno inchangtir hrang le mi murdi chunga roirêl hrangin zuang a ti,” tiin.
16 Kha mihai khan chiar le mi hrilsiat vai an hrâta, anni irzukna sual vai an irzûla, bâi nghal songin irpâkin an irsora, inlâpna irzûlin mi huang an hrât tak tak a ni.
Irdîn hranga irchutirna
17 Inditom takhaio, nangni’n chu ei Rengpa Jisua Krista tîrtônhaiin thu an lei insîr kha inhre mai roi. 18 “Zoro hnungkhôna chu, nangni innuisantuhai, Pathian uksak loia mâni irzukna ang taka omhai la om an ti,” tia nangni a ihril kha. 19 Khahai kha irsenna insuaktuhai, taksa mi, Irtha mi ni loihai an ni. 20 Inditom takhaio, nangni’n chu iamna irthiang taka khan mâni irrual khak unglân; Irtha Irthianga chongchaiin, 21 Pathian lungthungna khan irvong insa unglân kumtuang hringna hrangin ei Rengpa Jisua Krista lungkhamna kha nghâk roi. 22 Lungirhlâna neihai kha lunginkham unglân, 23 mei ata senkhat sansuak innanghai kha kaisuahai lat roi; senkhat chu chi pumin lunginkham unglân, an taksaa porinche kop silkaihai kha intir roi.
Satvurna
24 Tûkloi hranga nang enkol thei chu, a roiinpuina makunga sêlna boi le raiinfân tak taka nangni inngîrtir theipu, 25 Pathian omsun, a ni saninhringtu kuang khan, ei Rengpa Jisua Krista zâra, roiinpuina hai, inlalna hai, sinthotheina hai, irchamneina hai zoro theng tâk murdihai ata atûn le kumtuang dênin om mai ri se. Amen.
1 Hi lekhabu hi Jisua Krista thuphuang, Pathianin a suakhai inhriat hranga a ipêk, thil hong tung zôi hrang thu kha a ni; kha thu kha vântîrtôn zuang tîrin a suak Johana kuang a zuang inhriattira, 2 khanchu, Johana’n a ihmu murdihai kha an sîra. Ama hi Pathian thu le Jisua Krista’n thutak a inpuang an sîrna a ni. 3 Hi lei hrilna bu teptu le ar ngaihai le a sûnga thu om zômhai chu an vân a sa! Hihai murdi tungna hrang zoro hi anai tâk sikin.
Koiindang sarihai chubai mûkna
4 Johana khan Asia rama Koiindang sarihai kuang:
Pathian, A om mai le, om tâka le, la om hranga kuanga irthok ata, A rêngtoihmun makunga irtha sari omhai kuanga irthok ata, 5 Jisua Krista, inhriatpuitu iamom tak, thina irthoka thoinôk masa tak le rammual rênghai chunga roirêltu kuanga irthok ata, lungkhamna le irngeina kha nin ta ni ri se. Lung a ni thunga, a thina sikin ei sualhai ata a ni’rtansuaka, 6 khua le tui le a Pathian le a Pa sintho hranga ochaihaia ni siamtu kuang, a ni, ama kuang ngei roiinpuina le irchamneina kumtuangin om mai ri se! Amen.
7 En roi, ama kha sûm laia khin a izuang hrang a ni! Mi tinin hmu an ti, ama suntuhai ngei khomin hmu an ti. Irnêng chunga mi murdi’n ama kha châ an ti. Khaang tak khan la ni a ti! Amen.
8 “Keima hi a maton tak le a hnungkhôn tak ki ni,” Rengpa Pathian om mai tâk le om tâka le la om mai hrang, Itinrêngthothei khan a ti.
Johana’n Krista inlârna a hmûna
9 Kei Johana, nin urêngpa le Jisua hnung zuinaa a Ram mihai chunga dengtheina hong tung diar taka tuangna lama nin chanpuipa ki ni, Pathian thu le Jisua’n thutak a inpuang thu kin puangna sikin Patmos chômbunga intângin ki oma. 10 Rengpa nia khan Irtha Irthiangin a ni pôla; khanchu ki hnunga irhai bekul anga inringin, 11 “Ni thil hmuhai hi irziakin lân, Koiindang sarihai: Efesi, Smurna, Pergamos, Thuatira, Sardis, Filadelfia le Laodikei hai kuang thon roh,” a iti kin hriat.
12 Tu mo ni chongpui tih inhriat nuamin ki hong irhêlin chu, rângachak meiser siana sari ki hmua; 13 Kha meiser siana laia khan mihriam ang, a kechum dên thaia songkolirfual innghâk, rângachak kongkhita khit ki hmua. 14 A sam chu belra mul le ivur angin a vâra, a mit chu meichok angin a oma; 15 a kezaphahai chu dâr irtêk, meipuia hâl irthiang tâk angin a oma, a hnuk irhai chu tuitâk irhai angin a ni. 16 A kut chang tiang ârsi sari a chôia; a bâia irthokin khandai bê hni nei ngaih tak a hong suaka, a hmêl chu misa hrât lai tak ang a ni.
17 Ama kha ki hmu le chu, a ke bula ithi ang dôrin kin rîla. Ama khan a kut chang tiang ki chunga irnghatin ki kuang, “Chi no roh! kei hi a maton tak le a hnungkhôn tak. 18 A hring kha ki ni! Thina chunga le mithi khua chunga khom ircham ki nei. 19 Khasikin ni thil hmuhai, atûna omhai le hi inhnunga la hong om hranghai hi irziak roh. 20 Ama hi ki kut chang tianga ârsi sari ni ihmuhai le rângachak meiser siana sarihai omzia irthup chu a ni: Ârsi sari chu Koiindang sarihai vântîrtôn an nia, meiser siana sari chu Koiindang sarihai an ni.
1 Efesi koiindanga vântîrtôn kuang hi ang hin irziak roh:
“Hi thu hi a kut chang tianga ârsi sari chôia, rângachak meiser siana sarihai laia ar lôi maitu khan hi thu hi a insîr a ni. 2 Ni sintho murdia ni sin irnak songzia hai le ni diarzia hai, mi sualhai nirngai theizia hai, ni tirtôn ni loia tirtôn dang irtihai kha ni fiaa, milak an nih ti nin hriat tâkzia hai kha kin hriat. 3 Ni diar tak taka, ki’rhming sikin ni tuanga ni sabei dong mah. 4 Khannisianlân, nang demna ki nei: atûn chu matona ang khan lung ni ni thung ta no sikin. 5 Idôr ten mo ni inrîl tâk ngaitua roh! Ni sualna ata irletin lân ni sintho masa kha tho nôk ta roh. Ni sualna ata nir let no’n chu zuang ki ta, ni meiser siana kha a hmun ata ki ithînpai hrang kêng. 6 Khannisianlân, hi hi ni satna chu a ni: Nikola pâlhai sintho kha ki hnôl lam ang takin ni hnôl sikin.
7 “Irtha’n koiindanghai kuanga thu a insîr hi mikuar nei murdi’n chu irngai roi! An hnêtu ka chu Pathian Irhuana hringna thing ra infatir ki ti,” tiin.
Smurna Koiindang kuanga lekhathon
8 “Smurna koiindanga vântîrtôn kuang hiang hin irziak roh: Hi thu hi a maton tak le a hnungkhôn tak, a thia hong hring nôk taktu khan a insîr a ni. 9 Ni dengtheizia le nin riangzia kin hriat, khannisianlân, nir chong, Juda tak ni loia, Setana pâla mi Juda irtihai nang insîrinsiatzia kha kin hriat! 10 Ni tuang hranghai hi ite chi no roh. Irngai ta! nin laia mi senkhat intângna ina khumin Setana’n nangni a ifia hrang a ni. Khante, sûn sôm dengthei nin ti. Thina dênin keimaa iamomin om roh, khanchu inhnêna lômmanin hringna rêng lukhum nang pe ki ti.
11 “Irtha’n koiindanghai kuang thu a insîr hi mikuar nei murdi’n chu irngai roi! An hnêtu ka chu thina inhnina khan ite nangni lo no ni, a ti,” tiin.
Pergamos koiindang kuanga lekhathon
12 Pergamos koiindang vântîrtôn kuang hiang hin irziak roh: “Hi thu hi khandai bê hni nei ngaihtak neitu khan a insîr a ni. 13 Ni omna hmun Setana toihmun omna kha kin hriat. Ki’rhming nin tûk ngita, ki inhriatpuitu iamom tak Antipas, Setana omnaa nin laia an that lai khoma khan ni iamna hi ma mak che. 14 Khannisianlân, nang demna ki nei viat: nin laia mi senkhatin Balaama thu irchutirna an pom sikin. Kha pa khan millim biakna thil an ifâkna hrangin le irditna porinche an songna hrangin Balaka kha Israel mihai suala hruai irhmang dân a irchutir a ni. 15 Khaang dênin Nikola mihai irchutirna thu pom senkhat ni ompui sa. 16 Khasikin ni sualna ata irlet roh! Ni’rlet no’n chu ni kuang zuang ki ta, ki bâia khandai khan anni kha ki zuang idoi hrang kêng.
17 “Irtha’n koiindanghai kuang thu a insîr hi mikuar nei murdi’n irngai roi! An hnêtu ka chu mana irthup kha pe ki ta, lung ngoi a chunga irhming thar irziak, a dongtu ti no’n chu tûte’n an inhriat ngai loi kha pe sa ki ti, a ti,” tiin.
Thuatira koiindang kuanga lekhathon
18 Thuatira Koiindanga vântîrtôn kuang hiang hin irziak roh: “Hi thu hi Pathian Nâipa, a mit meichok anga om, a kezaphahai dâr irtêk anga om khan a insîr a ni. 19 Ni sinthohai murdi kin hriat, lungthungna ni neizia hai, ni sinthozia hai le ni dorôizia hai kha. Atûna ni sinthohai hi chu matona nêkin a lûminna ual ti khom kin hriat. 20 Khannisianlân, nang demna ki nei a ni, nupang Jezebeli deipu irtinu kha nir ngai thei sikin. Ama khan ki suakhai kha irdit le millim biakna thil fâk irchutirin a hruai irhmang ngai. 21 A sualna ata a’rletna hrangin zoro ki pêka, khannisian, irlet nuam mah. 22 Khasikin natna zâlhmuna ki pai ta, a uire ngaihai khom kha an irlet no’n chu denginthei irkhêl taka pai sa ki ti. 23 A zui ngaihai khom kha that pe ki ta, khanchu keima hi lungrîl le ngaituana inhre ngaitu ki nih ti koiindanghai murdi’n inhria an ti. Nin rêngin nin sintho ang sengin nangni pe ki ti.
24 “Khannisianlân, nangni Thuatira kho mi, hi irchutirna saloi pom loia, ‘Setana thu irthup inthûk’ an iti irchu kakai chunga chu puakrik dang ite nangni bôk pe no ning ki iti a ni. 25 Nin inei sai kha chu ki zuang mâka chu intûk ngit roi. 26-28 An hnêtu kakai le a mong dêna ki nuamlam sintuhai chu, ka Pa kuanga irthoka ki hmu ang taka irchamneina kha pe ki ti; nam tin chunga thîr khianghrol leh roirêl a ta, pilbêl anga intôk khoi chit hrangin irchamneina pe sa ki ti. Sikhovâr khom pe sa ki ti.
29 “Irtha’n koiindanghai kuang thu a insîr hi mikuar nei murdi’n chu irngai roi, a ti,” tiin.
1 “Sardis koiindanga vântîrtôn kuang hiang hin irziak roh: Hi thu hi Pathian irtha sari le ârsi neitu khan a insîr a ni. Ni sinthohai murdi kin hriat; thi chianin, hring irhming ni irput a ni! 2 Harin lân, ni la inei a thi vâng vâng kha a thi hlet mân inhrât roh. Ni sintho rêng rêng hi ki Pathian mit tung mah ti kin hriat. 3 Khasikin irchutira ni om le ni inhriathai kha inhre maiin lân, zômin lân ni sualna ata irlet roh. Ni har no’n chu inru angin zuang ki ta, itika mo ni kuang ki izuang hrang inhre no chi ni. 4 Khannisianlân, Sardis-ah khan an puanhai innimloi, mi tômte nin om. Anni kha puan chek silin ki kuang om ngai an ti, khaanga tho inruk an ni ngai sikin. 5 An hnêtu ka chu khaang khan puan chekhai insiltir ni an ta, hringna lekhabua irthokin an irhming kha pai viat no ning. Ka Pa le vântîrtônhai makunga ki ta an ni tiin inpuang inlang ki ti.
6 “Irtha’n koiindanghai kuang thu a insîr hi mikuar nin neiin chu irngai roi, a ti,” tiin.
Filadelfia koiindang kuanga lekhathon
7 “Filadelfia koiindang vântîrtôn kuang hiang hin irziak roh: Hi thu hi mi irthiang tak le a dik tak, Davida châbi neitu, tûte ikhâr theiloi hrang inhong, tûte inhong theiloi hrang khârtu khan a insîr a ni. 8 Ni sintho murdi kin hriat: sinthotheina chînte ni nei, khan khomin ki thu ni poma, ki’rhming hnôl mak che ti kin hriat. Khasikin tûte khâr theiloi mikot kha ni makunga ki inhong a ni. 9 Irngai ta! Setana pâla mi senkhathai, Juda ni loia, milak tho Juda irtihai kha hong tîr ki ta, ni ke bula chubai nang hong inmûktir ki ti; khanchu khahai khan lung nang ki thung tih inhriat an ti. 10 Diarna thu nang ki pêk hi ni zôm sikin, irnêng chunga mihai fia hranga rammual pumpui chunga fiana zoro zuang tung hranga irthok khomin nang inzôk sa ki ti. 11 Ki izuang lat hrang tâk kêng, ni thil nei kha dôn chianin lân, khanchu inhnêna lômman ni idong tum kha nang irchupui no nihai. 12 An hnêtu kha chu ki Pathian biak ina chopuiin siam ki ta, kha hmuna khan om ta a ti. Khan, amaa khan ki Pathian irhming le, ki Pathian khopui Jerusalem thar, ki Pathian kuang ata irvâna irthoka zuang chum hrang irhming le ki’rhming thar irziak ki ti.
13 “Irtha’n koiindanghai kuang thu a insîr hi mikuar nei murdi’n chu irngai roi, a ti,” tiin.
Laodikei koiindang kuanga lekhathon
14 Laodikei koiindanga vântîrtôn kuang hiang hin irziak roh: “Hi thu hi Amen, inhriatpuitu diktak le iamom tak Pathian thilsiam bul khan a insîr a ni. 15 Ni sintho murdi kin hriat; a dâi khom ni mak che, a lum khom ni ual mak che. Ni idâi mani ni ilum mani ki nuam a ni! 16 Lum ual loi, dâi ual loiin, ni lum chêlchûl sikin ki bâi ata nang insâ pai ki ti. 17 Ki’rchong, sum ki nei, ite irsam ma ung ni tia, nang mi’rngaiinsia, inrenom, inriang, mitcho le korongboi ni nih ti ni inhriat loi a ni. 18 Khasikin nir chong theina hrangin rângachak meia irthiang tâk hai, ni korongboi ser an lang loina hranga ni sil hrang puan chek hai, ni hmu theina hranga mitna hloi hai ki kuang ircho hrangin nang ki ti. 19 Lung ki ithung ka chu ki hrila, ki zêm ngai, khasikin sathnem irngaiin lân, ni sualna ata irlet roh. 20 Irngai ta! mikota ngîrin ki intôk hi, tukhomin ki’rhâi an hriata; mikot an hongin chu, a ina lûtin a kuang bu nêk ki ta, ama khomin ki kuang nêk a ti. 21 An hnêtu ka chu rêngtoihmun kôla intoitir ki ti; kei khomin kin hnêa ka Pa rêngtoihmun kôla ki itoi ang hin. 22 Irtha’n koiindanghai kuang thu a insîr hi mikuar nei murdi’n chu irngai roi, a ti” tiin.
1 Kha irzoiin chu inlârna dang ki hmua, ki hong ena, irvâna mikot irhong ki hmu. Khanchu, bekul irhai ang hnukirhai kin hriat masaa ni chongpuitu khan, “Hi hin hongin lân, inhnunga thil hong om hranghai nang inhmutir ki ti,” a tia.
2 Khanchu, voikhat rengin Irtha’n ki om zôi zela, irvân toihmun a hong irsiama, kha toihmuna khan mi inkhat a hong toi saa. 3 Khan, a toitu kha Jasper le Karnelian lung hlu dôrin an langa, rêngtoihmun vêla khan sumrisâng emerald lung rông angin ar zâm sa. 4 Rêngtoihmun kôl vêla khan rêngtoihmun dang sômhni minli a om saa, kha rêngtoihmunhaia khan upa sômhniminli puan chek sila rângachak rêng lukhum khumin an toi. 5 Rengtoihmuna irthokin kôlirtêk, hnukirhai, khonri hai an hong suak dur dura. Rengtoihmun matona khan meiser sari a choka, khahai kha Pathian Irtha sarihai kha an ni. 6 Rengtoihmun matona ngîr khan Krustal lung anga vâr hlîmen tuikhanglian anga a om sa khan, rêngtoihmun irhîlin thilhring minli mân tiang le hnung tiang mita sip an oma. 7 Thilhring inkhatna chu kâmkeibaknei a anga, inhnina chu sehrâtchal a anga, an thumna chu mihriam hmêl a anga, a minlina chu irmupui vuang lai a anga. 8 Kha thilhring minlihai khan mitha kiruk an nei seng, kha an mithahai kha sûng tiang le pên tiang mita sip an ni. A sûn a zânin,
“Rengpa Pathian Itinrêngthothei,
A om tâka le A om maia le A la om hrangtu chu A’rthiang e,
a’rthiang e, a’rthiang e,
tia sakin mong ngai mahai,”
tiin.
9 Khan, thilhring minlihai khan rêngtoihmuna toi kumtuanga hring mai kuanga khan roiinpuina le chôiindômna hla an saka, lômthu an insîr rikipa, 10 Upa sômhni minlihai kha rêngtoihmuna toitu makunga khan inbokin kumtuanga hring maitu kha chubai an mûka. An rênglukhumhai kha rêngtoihmun matona siain,
11 “Kin Rengpa le Kin Pathian!
Roiinpuina le chôiindômna,
sinthotheina hai hmurua ni ni,
Nangma’n thil tinrêng ni siama,
Ni’rchama om le a hring an ni,”
an tia.
1 Khan, rêngtoihmuna toitu kut chang tianga khan lekhabu irzuat sûng tiang pên tianga irziak, irsinsiana sari neia irsinsia khak ki hmua. 2 Vântîrtôn hrâttak, hnukirhai inring takin, “Tu’n mo hi irsinsiana hi inhonga, lekhabu irzuat hi a phar thei hrang tâk?” tia tânginsam ki hmu sa. 3 Khannisianlân, irvâna, irnênga, irnêng hnuaia khom lekhabu irzuat kha an hong thei le a en theirua tûte om mahai. 4 Lekhabu irzuat kha an honga, a en theirua tûte an om no sikin ki chap ngûi ngûia. 5 Khanchu, upahai laia inkhatin ki kuang, “Chap no roh. Irngai ta! Juda nama mi Kâmkeibaknei, Davida bulpui khan, a’rsinsiana sari kha inhonga, lekhabu irzuat kha phar hrangin an hnê ta,” a tia.
6 Kha hnung chu, rêngtoihmun inlaina tak, thilhring minlihai le upahai irhîlin Belrate ngîr that tâk anga inlang, irki sari le mit sari nei ki hmua; kha mit sarihai kha chu Pathian irtha sari, irnêng chung pumpuia tîr suakhai kha an ni. 7 Belrate kha a fea, rêngtoihmuna toitu kut chang tianga lekhabu irzuat kha a va lâk tâka.
8 Lekhabu irzuat kha a lâk le chu, thilhring minli le upa sômhniminlihai kha, serânda le rângachak berbu mirimhoia sip chôi sengin, Belrate makunga khan an inboka; kha mirimhoi kha Pathian mihai chongchaina a ni.
9 “Nangma lekhabu irzuat kha lâka,
A’rsinsiana inhongrua ni ni;
Thatin ni oma,
ni thina sika khan chi tina mihai,
chong tina mihai, ram tina mihai,
Pathian ta hrangin ni thisenin nir chôk tâk.
10 Kin Pathian sintho hrangin khua le tuia le ochaihaiin ni siam tâka;
Khanchu, irnênga roirêl an ti,”
tiin hla thar an saka.
11 Ki hong en nôka, rêngtoihmun le thilhring minlihai le upahai kôla khan vântîrtôn tamtak hnukirhai kin hriata; an tam lam chu a sâng a sâng hmun sâng tamtak le a sîng a sîngin sîng tamtak an ni. 12 Khahai khan hnukirhai inring takin,
“Belrate that tâk hi,
Sinthotheina hai,
irchongna hai, vârna hai,
hrâtna hai, chôiindômna hai,
roiinpuina hai le inpâknahai hmurua a ni,”
an tia. 13 Khabana, irvân le irnêng chung le irnêng hnuai le tuikhangliana thilhring tinrênghai le rammual sûnga thilhring om murdihaiin,
“Rengtoihmuna toitu le Belrate kuanga khan,
Inpâkna hai, chôiindômna hai,
roiinpuina hai le sinthotheina hai,
kumtuangin om ri se,”
ti hla an isak kin hriat sa. 14 Thilhring minlihai khan “Amen!” an tia, upahai khan inbokin chubai an mûka.
1 Belrate khan irsinsiana sari laia inkhatna kha an hong lai ki hmua, thilhring minlihai laia inkhat khan hnukirhai khonri ang dôra inringin, “Hong roh!” a iti kin hriata. 2 Khanchu, ki hong ena, sakor ngoi ki hmua. A chunga chuangtu khan thal a chôia, a kuang rênglukhum an pêka; inhne pumin le inhne thiai mai hrangin a suak tâka.
3 Khan, Belrate khan irsinsiana an hnina an hong le chu, thilhring an hnina khan “Hong roh! a iti kin hriata. 4 Sakor dang a sen a hong suaka. A chunga chuangtu kuang khan mihriamhai an irthat irhlômna hrangin irnênga irsualna intung theina thu an pêka, a kuang khandai lian tak an pêk sa.
5 Khan, Belrate khan irsinsiana an thumna an hong le chu, thilhring an thumna khan, “Hong roh!” a iti kin hriata. Ki hong ena, sakor vom ki hmua. A chunga chuangtu khan thil varna bop khat a kutin a chôia. 6 Thilhring minlihai lai ata suak ni le irhoi hnukirhai kin hriata, “Fapui khamphulu khat sûn khat hlo, barli khamphulu thum sûn khat hlo, khannisian, oliv thing le grep irhuan chu insiat no roh,” a iti kin hriata.
7 Khanchu, Belrate khan irsinsiana a minli an hong le chu, thilhring a minlina khan, “Hong roh!” a iti kin hriata. 8 Ki hong ena, sakor dâng ki hmua. A chunga chuangtu irhming kha Thina a nia, mithi khua’na zui sa. Khandai hai, châm hai, hri hai, ram sahrâng hai hmanga that hrangin irnêng hi hmun minlia sena hmunkhat chunga irchamneina an pêka.
9 Khanchu, Belrate khan irsinsiana a ringana an hong le chu, Pathian thu an insîr sik le Pathian inhriatpuitu an nina tiang iam a om sika thata omhai irtha kha maichâm hnuaia ki hmua. 10 Anni khan hnukirhai inring takin, “Itinrêngthothei Rengpa, A’rthiang le A diktu! Idôr ten mo irnênga mihai chunga roirêl loiin kin thisen phuba la loiin ni iom hrang?” tiin an khêka. 11 Khan, an rêngin puan chek an pêk senga, an suak chanpuihai le an urênghai, anni thata an lei iom ang dêna om hranghai kha an irkip mâka chu la nghâk ual hrangin an hrila.
12 Belrate’n irsinsiana ki rukna an hong lai kha ki ena, Hnîngnupui a hong inhnînga, misa kha samul puan vom angin a hong duka, tha khom thisen ang dôrin a hong sen tâka. 13 Phâivopui theipui ra selhai a inthingpai zit ngai angin ârsihai kha irnênga an chil chûm chûm tâka. 14 Irvân chu lekhabu an inzuatpai angin, a boi tâka; tâng le chômbung tinrêng kha an omna hmun rengata ithînpaiin an om tâka. 15 Khanchu, irnênga rênghai, roirêltuhai, sipai uliantakhai, irchonghai, mi lianhai, mi tinhai, suakhai le suak ni loihai murdi kha pûkhaia le tânga lungpuihaia an irbîka. 16 Tânghai le lungpui kuang khan, “Ni delin lân, rêngtoihmuna toitu hmêla irthok le Belrate ningmurna ata ni thup roi! 17 An ningmurna nikhua ichiom tak kha a itung tâk kêng, tu mo ngîra doi thei hrang?” an tia.
1 Kha irzoiin chu, muanga le tuikhangliana le thingkunghai rêng rênga phâivua a tho ta loina hrangin phâivua chela irnêng kil minlia ngîr vântîrtôn minli ki hmua. 2 Vântîrtôn dang, Pathian hring irsinsiana chôi, nisua tianga hong suak ki hmu. Ama khan vântîrtôn minli Pathianin irnêng le tuikhanglian siat theina thu a ipêkhai kha hnukirhai inring takin an sâma. 3 Vântîrtôn khan an kuang, “Ei Pathian suakhai an michala irsinsiana ei sia mâka chu irnêng le tuikhanglian le thingkunghai kha lan siat no roi,” a tia.
4 An michala Pathian irsinsiana zonhai hrilin ki oma, nuaihni sîngminli le sângminli an ni. Khahai kha Israel nam sômhleihnihai an ni. 5 Juda nama sîngkhat sânghni, Reubena nama sîngkhat sânghni, Gada nama sîngkhat sânghni, 6 Asera nama sîngkhat sânghni, Naftalia nama sîngkhat sânghni, Manasea nama sîngkhat sânghni, 7 Simeona nama sîngkhat sânghni, Levia nama sîngkhat sânghni, Isakara nama sîngkhat sânghni, 8 Zebuluna nama sîngkhat sânghni, Josefa nama sîngkhat sânghni, Benjamina nama sîngkhat sânghni irsinsia tak tak an ni.
Mipui tam irkhêl
9 Kha irzoiin chu ki hong ena, mipui tam irkhêl tep zoiloi, zât tin, chi tin, nam tin le chong tina mihai puan chek sila tûm ônhai chôiin, rêngtoihmun le Belrate makunga ngîr ki hmua. 10 Khahai khan hnukirhai inring takin,
“Saninhringna hi ei Pathian,
rêngtoihmuna toitu le Belrate kuanga irthoka a ni,”
tiin an khêka. 11 Vântîrtônhai murdi kha rêngtoihmun le upahai le thilhring minlihai kôla khan an ngîra, rêngtoihmun makunga khan inbokin,
12 “Amen! Inpâkna hai,
roiinpuina hai,
vârna hai, lômthu insîrna hai,
chôiindômna hai,
Sinthotheina hai,
Kumkhontuangin ei Pathian ta a ni mai! Amen!”
tiin Pathian chubai a mûka.
13 Khan, upahai laia inkhatin ki kuang, “Hi puan chek silhai hi tuhai man ni, kho rengata hong mo an ini?” tiin a nir dona. 14 “Ka pu, inhre ma ung. Nangma’n nin hriat,” tiin ki sâma. Ama khan ki kuang, “Hihai hi dengintheina ichiom tak ata hong zôkhai kha an nia, an puanhai Belrate thisena irsunfaiin an inchek tâkhai a ni. 15 Khasikin, Pathian toihmun makunga ngîrin, sûn le zânin a biak ina sin an tho ngai, khan, rêngtoihmuna toitu khan a puan in an chunga zâr a ti. 16 An phîngchâm ta no nia, an tui khom inhrâl ta no ni. Misa’n emhai ta no nia, a sâna lum rêng rêng tuang ta no nihai. 17 Belrate, rêngtoihmun inlainaa om kha a enkoltu ni a ta, hringna tuikhanglianhaia tuang a ti. Khanchu, Pathianin an mit ata mitrithi tinrêng huipai ta a ti,” a tia.
1 Belrate khan irsinsia a sarina kha an hong le chu, dârkar chimrip vêl irvân an thim chita.
2 Khan, vântîrtôn sari Pathian makunga ngîr ngaihai kha ki hmua, an kuang bekul sari an pêka. 3 Vântîrtôn dang a honga, rângachak mirimhoi hâlna kok chôiin maichâm kôla a ngîra, Pathian mihai chongchaina le rêngtoihmun makunga rângachak maichâm chunga inhlan hrangin a kuang mirimhoi tamtak an pêka. 4 Mirimhoi khu kha Pathian mihai chongchaina le vântîrtôn kuta irthokin Pathian makunga a fe ta. 5 Khan, vântîrtôn khan mirimhoi hâlna kok kha a lâka, maichâma meiin an sipa, irnênga a paithâka, khanchu, hnukirhai, khonri hai, kôlirtêk hai, hnîngnu hai a hong om zôi ta.
Bekulhai
6 Khan, vântîrtôn sari bekul sari chôihai kha tum hrangin an irsiam ta. 7 Vântîrtôn inkhatna khan a bekul a hong tuma, irial le mei thisen leh irpol a hong oma; ama kha irnênga bunpaiin a om ta. Khanchu, irnêng hmun thuma sena hmunkhat chu a kânga, thingkunghai khom hmun thuma sena hmunkhat a kânga, hloisûl hringhai murdi khom a kâng sa ta.
8 Vântîrtôn an hnina khan a bekul a hong tuma, tâng lianpa meiin a ikâng lai ang tuikhangliana an paithâka. Khanchu, tuikhanglian hmun thuma sena hmunkhat chu thisen a chang tâka, 9 a sûnga thilhringhai khom hmun thuma sena hmunkhat chu an thia, irkuanghai khom hmun thuma sena hmun khat chu an siat sa tâka.
10 Vântîrtôn an thumna khan a bekul a hong tuma, ârsi lianpa, meiser anga chok, irvân ata zuang tâkin vadung hmun thuma sena hmunkhat le tuikhanglian kha a dela. 11 (Kha ârsi irhming kha “A khâ” a ni). Tui hmun thuma sena hmunkhat chu a hong khâ tâka, kha tui kha an ina, mi tamtak an thi ta, a kha tâk sikin.
12 Vântîrtôn a minlina khan a bekul a hong tuma, khanchu, misa hmun thuma sena hmunkhat, tha hmun thuma sena hmunkhat le ârsihai hmun thuma sena hmunkhat chu intôk siat a nia, khahai kha hmun thuma sena hmunkhat an thim theina hrangin. Khanchu, sûn hmun thuma sena hmunkhat chu vâr om ta maka, zân khom hmun thuma sena hmunkhat chu an thim khak tâka.
13 Khan, ki hong ena, irmupui vânlaizôla vuangin hnukirhai inring takin, “Vântîrtôn inthumhai bekul la tum hranga irhai hong om hrang sika khan irnênga omhai chung a rik e! a rik e! a rik e! a ti kin hriata.
1 Vântîrtôn ringana khan a bekul a hong tuma, khanchu, ârsi, irvân ata irnênga tâk ki hmua, a kuang khurmongboi châbi an pêka. 2 Ârsi khan khurmongboi kha a inhonga, khur ata kha meikhu, meipui thi theiloi khu khak angin a hong suaka, kha meikhu sika khan misa le irvân hai a hong inthim ta. 3 Meikhu ata khâihai irnênga an zuang tâka, âinuvêthaiin sinthotheina an inei ang takin an kuang sinthotheina an pêka. 4 Irnênga hloisûl hai, thilhring hai le thingkung hring hai rêng rêng chu sê viat loia, mihriam an michala Pathian irsinsiana nei loihai vai kha sê hrangin an hrila. 5 Khan, khâihai kha mihriamhai kha that hrangin chu pe maka, tha ringa sûng denginthei hrangin an pêk. Deng an theizia chu âinuvêtin mi a sêa, deng a intheitir ang hi a ni. 6 Kha sûnga khan chu thina zong an ta, hmu viat no nihai; thi irzuk an ta, khannisian, thina’n marakhai a ti.
7 Khahai kha sakor irdoina fe hranga irsiam chak an anga; an lua khan rângachak rênglukhum ang zek khuma, an hmâihai kha mihriam hmâi a anga. 8 An sam kha nupang sam angin a oma, an ha kha kâmkeibaknei ha angin a om. 9 Thîr rôppho ang hin rôppho an neia, an mithâ zâp irhai chu sakor tamtakin irdoina hmun pana sakor tâlihai an intânpui sup sup irhai ang kha a ni. 10 Âinuvêt angin irmei le sêna hrang an neia, tha ringa sûng mihriamhai innatir theina khom an irmeia khan a iom a ni. 11 Khur mongboia vântîrtôn kha rêng angin an chunga inlal takin an neia; Hebrai chonga a’rhming chu Abadona a nia, Grik chonga a’rhming chu Apoluona, a ni. (A omzia chu “An siattu,” tihna a ni).
12 Thilirkhêl masa chu a theng tâka, thilirkhêl dang inhni, hi zoia hin la om a ti.
13 Khan, vântîrtôn kirukna khan a bekul a hong tuma, khanchu, Pathian makunga rângachak maichâm irkia irthokin hnukirhai kin hriata. 14 Hnukirhai khan vântîrtôn kirukna kuang, “Eufrates tuidunga vântîrtôn minli ikhithai kha insua ro!” a tia. 15 Kha dârkâr le sûn le tha kum hranga irsiam tâk vântîrtôn minlihai kha, mihriamhai hmun thuma sena hmunkhat that hrangin an insuahai tâka. 16 Sipai sakor chunga chuanghai kha an tamzia chu kror hni an nih ti hrilin ki oma. 17 Inlârnaa khan sakorhai le a chunga chuanghai kha hiang hin ki hmu: rôppho mei anga sen huakin, lunghlu anga dum le kât anga eng an ni. Sakor luhai kha kâmkeibaknei lu ang hin a oma, an bâia irthokin mei hai, meikhu hai le kât hai a suaka. 18 Kha hremna inthumhai: mei, meikhu, le kât an bâia irthoka suak khan mihriam hmun thuma sena hmunkhat chu a that ta. 19 Sakorhai sinthotheina kha an bâia le an irmeia khan a oma; an irmeihai kha mirûl angin a oma, lu an nei saa, ama khan mi an innatir ngai a ni.
20 Mihriam, kha hremnaa that banhai khan an kut sinthohai ata irlet ual mahaia; ramilhli hai, rângachak millim hai, sum millim hai, dâr millim hai, lung millim hai, thing millim hai, ite hmu theiloi, inhretheiloi le fe theiloi hai biak kha ma mahai. 21 An mi that hai, dôi hmang hai, an irdit porinche hai, an inrûkhai ata khom irlet ual mahai.
1 Khan, vântîrtôn hrât tak dang irvân ata zuang chum ki hmua. Sûmin ar tuama, a lua sumrisâng ar zâma, a hmâi kha misa angin a oma, a kehai kha mei chopui angin a om. 2 A kuta khan lekhabu irzuat tê phar sai a chôia, a ke chang tiang tuikhanglian a sira, vei tiang muang a sira, 3 kâmkeibaknei inhrâm ang dôrin hnukirhai inring takin a khêka. A khêk zoiin chu khonri sarihai khan inring takin an dona. 4 Kha khonri sarihai khan an rôl an insua zoi le chu irziak ki tuma. Khannisianlân, “Khonri sarihai chong kha ip chian roh, irziak no roh,” tiin irvâna irthokin hnukirhai kin hriata.
5 Khan, vântîrtôn tuikhanglian le tânga ngîr ki ihmu khan a kut chang tiang irvân tiang a phara, 6 irvân hai, irnêng hai, tuikhanglian hai le a sûnga om tinrênghai siamtu Pathian, kumtuanga hring mai irhminga khomâk irsâmin, “Zoro om ta no ni, 7 khannisianlân, vântîrtôn a sarina khan a bekul a tum tena chu Pathianin a thu’rthup kha irkiptir ta a ti, a suak, deipuhai kuang a inpuang ang khan,” a tia.
8 Khanchu, irvân irthoka hnukirhai kin hriatin a ni chongpui tâka, “Tuikhanglian le tânga ngîr vântîrtôn kuang va fe’n lân, a kuta lekhabu irzuat phar sai so va la roh,” a tia. 9 Vântîrtôn kuang ki va fea, lekhabu irzuat tê kha ki nghia. Ama khan ki kuang, “La’nlân, fa roh: ni sûnga khâ a ta, ni bâia chu khuaihlutui ang dôrin thum a ti,” a tia.
10 Khanchu, vântîrtôn kuta irthokin lekhabu irzuat tê kha ki lâka, ki fâka; ki bâia chu khuaihlutui ang dôrin a thuma. Khannisianlân, kin vol zoiin chu ki sûnga chu a khâ zap ta. 11 Khan, ki kuang “Mi tamtakhai, nam tamtakhai; chong tamtakhai le rêng tamtakhai chungchâng thu ni la insîr nôk hrang kêng,” an tia.
1 Khanchu, khianghrol irkhîna khianghrol anga ipêkin ki oma, “Fe’n lân, Pathian biak in le maichâm kha irkhi’n lân, a sûnga Pathian biakhai kha tep sa roh. 2 Khannisianlân, Biak in pên tiang chu irkhî no roh, Jentailhai kuang pêk a ni tâk sikin. Anni khan khopui Irthiang kha tha sômminli le tha hni sirpha an ti. 3 Ki inhriatpuihai inhni bora puan silin tîr ki ta, sûn sângkhat irzahni sômruk sûnga khan Pathian thu insîr an ti,” a tia.
4 Kha inhriatpuitu inhnihai kha Oliv thing inhni le meiser siana inhni, irnêng Rengpa makunga ngîrhai kha an ni. 5 Anni kha tukhomin innatir an tumin chu an bâi ata mei a hong suaka, an râlhai kha a kâng irhmang ngai, khaang dênin tukhomin innatir an tumin chu ithatin om ngêt an ti. 6 Khahai khan Pathian thu an insîr sûng chu rua tholoi hranga irvân khâr theina irtha an neia, tui, thisen, inchang theina irtha an nei sa, khabana rammual hi an nuam dôr dengintheina tinrênga dengintheitir theina irtha an nei sa a ni.
7 Khan, an inhriatna thu an insîr zoiin chu khurmongboi ata sahrâng hong suak hrang khan doihai a ta, inhnêhai a ta, thathai a ti. 8 An ruak kha an Rengpa hembea a omna Jerusalem lamliana khan om a ti. Kha kho roiinpui kha irtha tiang thua chu Sodom le Aigupta ti a ni. 9 Nam tina mihai, chi tina mihai, chong tina mihai le zât tina mihai khan an ruak kha sûn thum le chomân en an ta, phûm phal no ni. 10 Kha inhnihai thi sika khan irnênga omhai lôm an ta, raifânin thilpêkhai irthon irhlôm an ti. Kha deipu inhnihai khan irnênga omhai deng an intheitir ok ngai sikin. 11 Khan, sûn thum le chomân hnunga chu Pathian kuang ata hringna phûk an sûnga a zuang lûta, an ke’n an ngîra; khanchu a hmuhai khan an chi ok ta. 12 Khan, deipu inhnihai khan irvâna irthokin hnukirhai inring takin, “Hin hong roi!” ti chong an inhriata. An râlhaiin an en chian kârin sûm laia irvâna an fe tâka. 13 Kha zoro taka khan hnîngnupui an hnînga; khua kha hmun sôma sena hmunkhat chu a chima, mi sâng sari an thi. A la hringhai khan an chi tâka, irvân Pathian an inpâk tâka.
14 Thilirkhêl inhnina chu a theng tâka, khannisianlân, thilirkhêl inthumna hong tung zôi a ti!
Bekul sarina
15 Khan, vântîrtôn sarina khan a bekul a hong tuma, “Rammual roirêlna chu ei Rengpa le Krista ta a hong ni tâk, ama’n kumtuangin roirêl a ti,” tiin irvâna hnukirhai inringtak takhai a hong oma.
16 Khanchu, upa sômhni minlihaiin an rêngtoihmuna Pathian makunga toihai khan inbokin,
17 “Rengpa Pathian Itinrêngthothei,
A om mai le A om tâka!
Ni sinthotheina roiinpuitak kha lâkin roi ni rêl tâk sikin ni kuang lômthu kin sir!
18 Jentailhai khan ningmurna an sip ta,
Ni ningmurna zoro khom a hong tung tâk sikin,
Mithihai roirêl pe zoro hai,
Ni suakhai, deipuhai,
ni mi irthianghai,
Mi lian mi chîn nir hming chituhai,
Lômman ni pêk zoro le irnêng insiattuhai kha insiat sa hrang zoro a tung ta!”
tiin Pathian chubai an mûka.
19 Khanchu, irvâna Pathian biak in kha ar honga, Thuthung Bôm a zuang inlanga. Kha hnung chu kôlirlek hai, hnukirhai, khonri hai, hnîngnu hai, irial inrik takhai a hong om ta.
1 Khanchu, thilirkhêl roiinpuitak irvâna an langa. Nupangnu misaa irvo, a ke hnuaia tha om, ârsi sômhleihnia siam rênglukhum khum hi a oma. 2 Kha nu khan nâi a vonga, nâiha sein a khêka.
3 Thilirkhêl dang irvâna an lang nôka. Dragon sen lianpa, lu sari le irki sôm nei, rênglukhum sari khum chit hi a oma. 4 A’rmeiin irvâna ârsi hmun thuma sena hmunkhat chu a zêma, irnênga a paithâk ta. Nupangnu nâi kha a zuang suak le chu a lei fâk theina hrangin nupangnu matona khan a ngîr ngita. 5 Khan, nâipasal, nam tin chunga thîr khianghrola roirêl hrang a neia, a nâi kha Pathian le a rêngtoihmun tiang tuang zôiin a oma. 6 Nupangnu kha chu ramchâra Pathianin hmun ar fûk pea, sûn sângkhat irzahni sômruk sûnga enkola a omna hrang tianga khan a rot ta.
7 Khanchu, irvâna irdoina a om ta. Mikaila le vântîrtônhaiin dragon kha an doia, dragon le a tirtônhai khomin an doi dêna; 8 khannisianlân, dragon kha inhnêpaiin a om tâka, ama le a tirtônhai kha irvâna om hrangin phal ni ta mahaia. 9 Khanchu, dragon lianpa, rûlpui tar, Diabola le Setana an iti, rammual pumpui inlemtu kha an paithâk ta. Irnênga an paithâka, ama vântîrtônhai khom an paithâk sa.
10 Kha hnung chu, irvâna hnukirhai inring takin, “Atûn chu ei Pathian saninhringna le a Reng ninaa a sinthotheina le a Krista irchamneina hai kha a zuang tung ta! Ei Pathian makunga ngîrin, a sûn a zâna ei urênghai hnôl ngaitu kha irvân ata an paithâk tâk sikin. 11 Belrate thisen le thutak an inpuang sika khan inhnêna an changa, an hringna khom thi ngam rakin an phal sa. 12 Khasikin, irvânhai le a sûnga omhai, lo ta roi! Khannisianlân, irnêng le tuikhanglian, nin chung a rik! Diabola khan zoro bongte vai a nei tâk ti an hriat, ningmur takin nin kuang a zuang tak tak sikin,” a iti kin hriat.
13 Dragon khan hnuaia paithâk a ni ar hriat le chu nâipasal nei nupangnu kha a’rzûl tâka. 14 Khanchu, nupangnu kha dragon tôn phâk bana, kum thum le a chimrip sûng enkola a omna hrang ramchâr tiang a vuang theina hrangin irmupui lianpa mitha kianghniin an pêka. 15 Nupangnu kha tuiin a tân theina hrangin a hnunga dragon khan tui, a bâia irthokin tuilian angin an phîsuaka. 16 Khannisianlân, irnêngin nupangnu kha a changpuia, a bâi a ânga, dragon tui inphît kha an lem tâka. 17 Dragon kha nupangnu chunga a ning an mur tak taka, nupangnu irchi la om Pathian thupêk zômhai le Jisua thutak inpuang pomhai kha doi hrangin a fe tâk. 18 Dragon kha tuikhanglian chiaiphoia khan a ngîr tâka.
1 Khan, sahrâng irki sôm le lu sari nei, tuikhanglian ata hong suak ki hmu. A’rkihaia khan rênglukhum a om senga, a luhaia khan Pathian hrilsiatna irhminghai a om sa. 2 Sahrâng ki ihmu kha keiârsi a anga, a kehai chu savom ke a anga, a bâi chu kâmkeibaknei bâi a ang. Dragonin sahrâng kuang khan a sintho theina le a rêngtoihmun le ar chamneina liantak kha a pêk. 3 Sahrâng lu inkhat kha thi theina dôra popin ki hmu, khannisianlân, kha sâbe kha a hong dam ta. Irnênga mi murdi’n ar khêl an tia, sahrâng kha an zui ta. 4 Sahrâng kuang ar chamneina a pêk sikin dragon kha mi tinin chubai an mûk. Sahrâng khom kha an mûk saa, “Sahrâng anga hi tu mo a om? Tu mo a doi thei hrang?” an tia.
5 Khan, sahrâng kha irpâk thei hrang le Pathian hrilsiat thei hrangin phal a ni, tha sômminli tha hni sûng ircham nei hrangin phal a ni sa. 6 Khanchu, Pathian le ar hming le a omna le irvâna omhai murdi hrilsiat an phut ta. 7 Pathian mihai doia inhne hrangin phal a ni, chi tin, nam tin, chong tin, le zât tin chunga irchamneina a kuang pêk a ni sa. 8 Irnêng le irvân siam mâna that tâk Belrate hringna bua irhming chuanghai ti no’n chu irnêng chunga om mi murdi’n chubai mûk an ti.
9 “Mikuar nin neiin chu irngai roi! 10 Tukhom sala om hranga a niin chu sala hruaiin om a ta, khandaia thi hrang a niin chu, khandaia thatin om a ti. Hitaka hin Pathian mihai chu ngîrindetna le iamom taka an om a nangzia an lang,” a tia.
11 Khan sahrâng dang irnêng ata hong suak ki hmua. Belrate irki angin irki inhni a neia, dragon angin a chonga. 12 Sahrâng masa irchamneina murdi kha sahrâng masa mit hmua a hmanga. Irnêng le a chunga mihriam om murdihai kha sahrâng masa thi theina dôra pop tâk, a dam nôk kha, chubai mûk hrangin an phût ta. 13 Sahrâng inhnina khan, mi tin mit hmua irvân ata irnênga mei zuang chôiin sinirkhêl liantak a sina. 14 Sahrâng masa mit hmua sinirkhêl sin hranga phalna a hmu sika khan irnênga mi murdihai a huanga; an kuang, sahrâng khandaia pop tâk la dam nôk chôiirsângna hrangin ama irlim siam hrangin thu a pêka. 15 Sahrâng masa irlim kha phûk hong neia, a chong theina hrang le chubai mûk loihai murdi a that theina hrangin sahrâng inhnina kuang khan phûk pêk theina irtha pêk a ni sa. 16 Khanchu, sahrâng khan mi murdi, a lian a chîn, ar chong an riang, suak le suakloi khom, an kut chang tiang mani, an michala mani, irsinsiana nei seng hrangin an phûta. 17 Sahrâng irhming mani, a’rhming nambar mani, indangna nei loihai ka chu, tûte’n ite irchôkin an zuar thei loina hrangin.
18 Ama hin vârna a nang. Inhriat theina neiin chu sahrâng nambar kha sût ri se, mihriam nambar a ni sikin. A nambar chu irzaruk sômruk kiruk a ni.
1 Khan ki hong ena, Belrate kha Zion Tânga, mi 144,000 (Nuaikhat sîngminli sângminli) an michala ar hming le a Pa irhming irziakhai leh ngîrin ki hmua. 2 Irvâna irthokin hnukirhai, tuitâk irhai le a sâna khonri inring angin kin hriat; Serânda âthaiin an Serânda an i-ât irhai angin kin hriat. 3 Rengtoihmun le thilhring minlihai le upahai makunga khan mi nuaikhat sîngminli le sângminli kha an ngîra, hla thar, anni vai irchu thei kha, an saka. Rammuala mi murdi laia kha mihai vai kha inhlan an ni. 4 Kha mihai kha nupang leh porincheloi, a’rthiangliai an ni. Belrate fena tina an zui ngai. Pathian le Belrate kuang inhlan masa tak ni hranga rammuala mi murdihai laia irthoka irtan an ni. 5 Milak hril viat ngai mahai; sêlnaboi an ni.
Vântîrtôn inthumhai
6 Khan, irnênga mi murdi zât tina mihai, chi tina mihai, chong tina mihai le nam tina mihai kuang tânginsam hrang Thurchi Sa nei vântîrtôn dang irvânlaizôla vuang ki hmua. 7 Ama khan hnukirhai inring takin, “Mihriamhai roirêl zoro a hong tung tâk sikin Pathian chu chi unglân, chôiindôm roi! Irvân, irnêng tuikhanglian le tuihnâr hai siamtu kha chubai mûk roi!” a tia.
8 Vântîrtôn inhnina khan vântîrtôn inkhatna kha a hong zuia, “Babulon kho roiinpui, a hurna uain hrât nam tin in-intir ngainu kha an rîl ta! an rîl ta!” a tia.
9 Khan, vântîrtôn inthumna khan vântîrtôn inkhatna le inhnina a hong zuia, hnukirhai inring takin, “Tukhom sahrâng le a’rlim chubai mûk le a michala mani, an kuta mani a’rsinsiana chuang murdi chu; 10 kha mi tak khan Pathian ningmurna uain, a ningmurna khilâta a isung insip kha in a ti. Vântîrtôn irthianghai leh Belrate makunga mei le kâta dengintheiin om a ti. 11 Kha mihai dengintheina meikhu kha Kumtuangin khu mai a ta, sahrâng le a’rlim chubai mûkhai le ar hming indangna neihai ta hrangin chu, a sûn a zânin zôkna om pe no ni,” a tia.
12 Hi hin Pathian mihai, a thupêk zôma Jisua ta hranga iamomhai chu tuangdiarna an inei a ni.
13 Khanchu, irvâna irthokin hnukirhaiin, “Hi hi irziak roh: Atûna irthokin Rengpaa thihai chu an vân a sa,” a iti kin hriat. Irtha khan, “A ni tak tak! An sinsôlna irthokin irngam ta an ti; an sinthôna ra khan a zui sikin,” tiin a sâma.
Irnêng bu ât zoro
14 Khan, ki hong ena, sûm chek hlang ki hmua. Kha sûm chunga khan mihriam ang taka om hi, rângachak rênglukhum khuma, kôite ngaihtak chôiin a toia. 15 Khan, vântîrtôn dang Pathian biak ina irthokin a hong suaka, sûm chunga toitu kuanga khan hnukirhai inring takin, “Ni kôite kha hmangin lân, bu kha ât roh; a ât zoro tâk kêng; irnêng buhai kha an hmin tâk sikin!” a tia. 16 Khanchu, sûm chunga toitu khan a kôite kha irnênga a vaia, irnêng buhai kha ât a ni ta.
17 Khan, vântîrtôn dang irvâna Pathian biak in ata a hong suak nôka, ama khom khan kôite ngaihtak a chôi sa.
18 Vântîrtôn dang, mei chunga ircham neitu, maichâma irthokin a hong suaka. Kôite ngaihtak chôitu kuang khan hnukirhai inring takin, “Ni kôite kha hmangin lân, irnênga grep ra khu zu ât roh, an hmin tâk sikin!” a tia. 19 Khaang khan, vântîrtôn khan a kôite kha irnênga a vaia, irnênga grep ra kha a âta, Pathian ningmurna grep sômna khurpuia khan a thun tâka. 20 Khanchu, khopui pên tianga grep sômna khura grep kha a sôma, kha khur ata kha thisen a hong suaka, kilometar irzathum seiin a luang suaka, metar inhni vêl an thûka.
1 Khanchu, irvâna thilirkhêl dang roiinpui tak le irkhêltak ki hmua. Vântîrtôn sariin hripui sari an chôia, kha kha dengintheina hnungkhôn takhai an ni; kha tena khan Pathian ningmurna a hek tâk sikin.
2 Khan, hlîmen mei leh irpol tuikhanglian nia irhoi taka inlang ki hmua. Sahrâng le a’rlim le a’rhming nambar inhnêtuhai kha ki hmu sa. Pathian perkhuang chôiin, hlîmen tuikhanglian muanga khan an ngîra. 3 Pathian suak Mosia hla le Belrate hla an saka,
“Rengpa Pathian Itinrêngthothei,
Ni sinthohai chu a roiinpuiin ar khêl tak tak!
Nangma chu nam tinhai laia Inlaltak,
Ni lampuihai chu a felin a dik tak tak!
4 Rengpa, tu mo nang chi loia,
a chôiindôm loi hrang?
Nangma vai ni’rthianga,
Ni sintho felhai kha mi tinin an hmu tâk sikin.
Nam tinrêngin chubai nang hong mûk an ti,”
tiin.
5 Kha zoiin chu ki hong ena, irvâna tempil irhong, a sûnga Pathian omna Biakbuk kha ki hong hmua. 6 Khanchu, kha tempil ata irthokin hremna sari chôi vântîrtôn sarihai kha tempil ata an zuang chuma; puan irnêm chek, vâr irtêk tak silin, rângachak hruiin an rôp an khita. 7 Kumtuanga hring mai Pathian ningmurnaa sip rângachak berbu sari kha thilhring minlihai laia inkhat khan vântîrtôn sarihai kha a pêka. 8 Tempil kha Pathian roiinpuina le sinthotheina khu khan a sip zita, vântîrtôn sarihai ichôi hremna sari kha a hek mâka chu tûte tempila khan lût thei mahai.
1 Tempil ata zuang suak irhai inringtak khan vântîrtôn sarihai kuang, “Fe unglân Pathian ningmurna berbu sarihai kha irnênga bunpai roi!” a iti kin hriata.
2 Vântîrtôn masa taktu kha a fea, a berbu kha irnênga a bunpaia; khanchu, sahrâng le a’rsinsiananeihai le a’rlim chubai mûktuhai chunga khan pân hri saloi natak a suak tâka.
3 Vântîrtôn inhnina khan a berbu kha tuikhangliana a bunpaia; khanchu thisen, mithi thisen angin a om zita, tuia thilhring murdi an thi zit ta.
4 Vântîrtôn inthumna khan a berbu kha tuidunghai le tuihnârhaia a bunpaia; thisen an chang zit tâk. 5 Vântîrtôn tuia irchamneitu khan, “Om mai le a om tâka, Nang mi Irthiang, roi ni rêl indik! 6 Mi irthianghai le deipuhai thisen insuatuhai kha thisen ni in intir lik tâk hi; an dongtum an ihmu kêng,” a iti kin hriat. 7 Maichâm ata kha, “A ni, Rengpa, Pathian itinrêngthothei, ni roirêlna kha a dikin a fel a ni,” irhai kin hriat sa.
8 Vântîrtôn minlina khan a berbu kha misaa a bunpaia; misa lum khan mihriamhai em inlông hrangin phal a ni. 9 Mihriamhai kha misa lum taka em inlôngin an om tâka, kha dengintheina chunga irchamneitu Pathian irhming kha khomâk an sâma, an sual ata irletin ama inpâk ual mahai.
10 Vântîrtôn ringana khan a berbu kha sahrâng rêngtoihmuna a bunpaia. A ram kha inthimin a bôm zit tâka, mihriamhai kha an natir hrai sikin an milei an sêa; 11 an na sik le an pân sika khan irvân Pathian khomâk an sâma, an sintho saloihai ata kha irlet ual mahai.
12 Vântîrtôn kirukna khan a berbu kha Eufrates tuipuia khan a bunpaia, a tui kha a kang chat tâka; nisua tiang ata rêng zuang hranghai ta hrangin lam a irhong tâk a ni. 13 Khan, Dragon bâi ata, sahrâng bâi ata, deipu dol bâi ata hong suak irtha porinche inthum, uichok anga om ki hmu sa. 14 Kha kha ramilhli irtha an ni, sinirkhêl khom an tho ngai. Pathian Itinrêngthothei nikho roiinpui irdoinaa hruai irchunkhôm hrangin irtha inthumhai kha rammual pumpuia rênghai murdi kuang an fea.
15 “Irngai u ta! Inru angin ki izuang kêng! Irsiama irvô zoi diama omhai chu an vân a sa, silkai boiin a mualinphoi no hrang sikin. 16 Khanchu, irthahai khan rênghai kha hmun inkhata, Hebrai chonga Armagedon an itia khan an koibûmhai tâka.
17 Vântîrtôn sarina khan chu a berbu kha boiruaka a bunpaia, tempila rêngtoihmun ata irhai inring tak a zuang suaka, “ar zoi tâk!” tiin. 18 Khan, kôl a’rtêka, irhai a zuang suaka, khonri, hnîngnu a hong inhnînga. Mihriam siam phut ata khaang dôra hnîngnu tho kha la om ngai mah. Khaanga hnîngnupui kha a natak a ni. 19 Kho roiinpui kha hmun thumin a hong koia, ram tina khopuihai a chim tâka. Babulon kho roiinpui kha Pathianin an hriat chiana, a ningmurna khilât kha an intir tâka. 20 Chômbung murdi a boia, tânghai khom ar hmang zit ta. 21 Irvân ata irial lian tak tak, her sômringa ang dôra rik, mihriam chunga a tâka. Irial hremna sika khan Pathian kha an hrilsiata, kha hremna kha a na ta hrai sikin.
1 Berbu sari chôi vântîrtôn sarihai laia inkhat kha a honga, a ni hong chongpuia. “Hong ta, tui tamtak chunga toi, notizuar irhming inthang tak chunga hremna om hrang kha nang irhmutir ki ti. 2 Irnênga rênghaiin an indit ngaia, irnênga omhai khom a hurna zu khan a vâi inruitir ngai,” a tia.
3 Vântîrtôn khan Irtha ramchâra a ni fepuia, Pathian hrilsiatnaa sip, lu sari nei le irki sômkhat nei, sahrâng seninlâr chunga chuang nupangnu ki hmua. 4 Nupangnu kha puan senduk le seninlârin a’rvoa, rângachak irthei hai, lung mantam hai, sailungvârhaiin a’rvoa. A kutin intirom le a hurna porinchena sip rângachak khilât a chôia. 5 A michala khan irhming, a omzia irthup, “Babulon kho roiinpui, irnênga notizuarhai le thil intiromhai nu,” iti irziak a oma. 6 Khan, kha nupang kha Pathian mihai thisen le Jisua mârtârhai thisen inruiin ki hmu. Ki hmu le chu a sân ki’rngai a’rkhêl tak taka
7 Vântîrtôn khan, “Ithoa mo ar khêl ni iti?” a tia. “Nupangnu le a chuangna sahrâng lu sari le irki sôm nei omzia irthup kha nang hril ki ti. 8 Sahrâng kha voikhat a lei om tâka, om nôk ta mah. Khannisianlân, khurmongboia irthokin hong suak a ta, irhmangnaa fe a ti. Irnênga mihriam omhai, irnêng le irvân siam mâna hringna lekhabua an irhming irziak loihai khan, sahrâng kha an hmu tena chu, a om tâk, om nôk ta loi, khannisianlân, a hong om nôk hrang tâk sikin, an irngai la’rkhêl tak tak a ti.
9 Hi hin vârna le inhriat theina a nang. Lu sarihai kha nupangnu toina tâng sarihai kha an ni. Reng sari khom an ni sa: 10 ringa chu an inrîl tâka, inkhat chu a lan lala, inkhat chu la hong inlal mah, hong inlal khomsian sôtnote kêng a inlal hrang. 11 Sahrâng lei om tâk kha, om nôk ta no khom kha rêng sarihai pâla kiriatna a nia, irhmangnaa fe thiai tâk a ni.
12 “Irki sôm ni ihmuhai kha rêng sôm a lan lal loihai an ni. Khannisianlân, sahrâng le rênghai angin dârkâr khat chu irchamneina ipêk la ni an ti. 13 Khante an thiltum inkhat a ni sikin an sinthotheina le an irchamneina sahrâng kuang pe an ti. 14 Khanchu, Belrate kha doi an ta, khannisianlân, Belrate kha rênghai Reng, inlalhai Inlaltak a ni sikin anni kha inhnê a ta, a inhnêna kha a ikoihai, a inthanghai le iamoma ama zuituhai khomin dong sa an ti,” a tia.
15 Kha vântîrtôn ngîr khan ki kuang, Notizuarnu toina tui tamtak ni ihmu kha mihai, mipuihai, Jentail hai, le chong dang dang hai an ni. 16 Irki sôm le sahrâng ni ihmu khan notizuarnu kha hnôl an ti. Thil a inei murdi lapai pe zit an ta, bomboiin marak an ti. A hme khom fa an ta, meiin hâlirvôm an ti. 17 Pathian thu le a thil tumhai a hong tung indik theina hrangin, rêng sômkhathai khan an irchamneina sahrâng kuang pe hrangin Pathianin lung irrualna an neia.
18 Khan, “Nupangnu ni ihmu kha kho roiinpui, irnênga rênghai chunga roirêltu kha a ni,” a tia.
1 Kha zoiin chu vântîrtôn dang irvân ata zuang chum ki hmua. Ama khan irchamneina lian tak a neia, a roiinpuina’n irnêng pumpui a êl invâra. 2 Ama khan hnukirhai inring takin, “Babulon kho roiinpui an rîl ta! an rîl ta! Ramilhlihai omna le irtha porinche hai, va porinche tinrêng chêng inbualna a hong ni ta. 3 A hurna uain hrât kha nam murdi’n irnênga rênghaiin ama kha an uirepui ngaia, a hoihôkna thil irchôk hraina sikin rammuala bepârhaiin an irchong sa ngai,” tiin a khêka.
4 Khanchu, irvâna irthokin hnukirhai dangin,
“Hong suak roi, ki mihai!
Kha nu kuang ata kha hong suak roi!
A sualnahaia nin ikop viat hrang ni mah!
A hremnahai hi nin tuang sa loina hrangin.
5 A sualna khan irvân a phâka,
Pathianin a thilsual tho kha a inhriat chian a ni.
6 Nin chunga a itho angin a chunga tho unglân,
A sinthohai murdi a bâk inhniin thuan unglân,
Zu nangni a irfûk pe hranga bâk hnia hrâtin a khilât insip pe roi.
7 Roiinpui a irti le a hoihôkhai ang takin hremna le beidongna’n thuan roi.
A lungrîlin, ‘Rengnu’n ki toia!
Meithâi ni ma ung.
Beidongna tong viat no ning!’
a iti kêng.
8 Khasika khan, sûn khat sûngin hremnahai,
natnathai, beidongna hai,
le châm hai hong tung zit a ti.
Meiin hâlirhmang ni a ti,
a roirêltu Rengpa Pathian kha a hrât sikin,”
a tia.
9 Irnênga rênghai a uirepui ngaihai le a nuamninga a iompui ngaihai khan, a kângna khu kha an hmu tikin chu beidongna’n la chap an ti. 10 A hremna kha tuang sa an chi sikin hla tak ata thîr an ta, “Babulon kho roiinpui le kho det, ni chung a rik! Ni chung a rik! Dârkâr khat sûngin te ni chunga roirêlna a itung tâk hi,” an tia.
11 Rammuala bepâr thohai khom khan beidongin an châa, tûte’n an neinun an irchôk ta no sikin. 12 A nei sunhai chu rângachak hai, sum hai, lunghlu mantam hai, sailungvâr hai, puan irnêm hai, puan senlâr le senduk hai, sotor hai, puan seninlâr hai, thing mirimhoi zât tinrêng hai, sâihaa siam thil tinrêng hai thing hlutak le dâr, thîr, sailungvâra siam thil tinrêng hai; 13 thingzungthum hai, mosola hai, bero hai, mura hai, mirimhoi hâl zât hai, uain le oliv hriak hai, baidi le bu hai, sehrât le belra, sakor le tâli, suak hai le mihriam hringna hai an ni. 14 Bepâr thohai khan a kuang, “Thil sa a nei ni irzukhai murdi kha an irhmang zit tâka, nir chongna le ni roiinpuina murdi khom an boi zoi tâk, hmu nôk ta no chi ni,” an tia.
15 Bepâr thohai, ama sika hong irchonghai khan a hremna kha an tuang sain teh ti chi sikin hlataka ngîr an ti, beidongin châ an ti, 16 “Kho roiinpui, puan irnêm le a senduk le a seninlâr sila, rângachak le lunghlu mantam le sailungvâra irvô ngai a chung a rik! A chung a rik e! 17 Dârkâr khat sûngin te kha a irchongna murdi kha a irhmang zit tâk hi,” ti an ti.
Irkuang hruaituhai le a chuanghai le a chalaituhai le tuia irhlo ngai murdihai khom khan hlataka ngîrin, 18 a ikângna meikhu kha an hmu’n chu, “Hi kho roiinpui anga hi chu la om viat ngai mah!” tiin an khêka. 19 An lua bâli an phula, beidongin an châa, “Kho roiinpui ar chongna sika tuikhanglian irkuang neihai khom lei irchong sa thei! A chung a rik! A chung a rik! Dârkâr khat sûngin te ar hmang zit lam tâk hi,” tiin an khêka.
20 O irvân le Pathian mihai, tirtônhai le deipuhai, a ramna sika hin lôm ta roi! Nin chunga a tho lam angin Pathianin a irêl tâk a ni hi!
21 Khanchu, vântîrtôn hrât tak hin bu nôina lung lianpa ang dôr lung a lâka, tuikhangliana an zuana, “Babulon kho roiinpui chu kha dôra na khan inzuan ni a ta, tûte’n hmu nôk ta no nihai. 22 Serânda irhai, mihriam hla sak irhai, theihle irhai le bekul irhai, ni sûnga inhre nôk ni viat ta no ni! Sin zongna lam rêng rênga sin thiam mi ni sûnga om nôk viat ta no nia, bunôina irhai khom ni sûnga inhre nôk ni ta no ni! 23 Meiser vâr khom ni sûnga hmu nôk ni ta no ni, pasal le moi irhai ni sûnga inhre nôk ni viat ta no ni. Ni bepârhai kha rammual pumpuia mi lianhai an nia, ni dôi milakin rammual pumpuia mihai huangin an iom a ni ta!” a tia.
24 A sûnga deipuhai le Pathian mihai le irnênga ithat murdihai thisen suakna a ni sikin Babulon kha ihrem a ni.
1 Kha zoiin chu irvâna mipui tamtakhai khêk irhai inring tak angin, “Haleluia! Saninhringna, roiinpuina, sinthotheina hai ei Pathian ta a ni! 2 A roirêlnahai khom a dikin a ifel a ni! Ama khan notizuar inthang, a uirena sika irnêng insiat ngainu le a suakhai thisen insua ngai kha thiamno inchangin Pathianin deng an theitir tâk sikin,” an iti kin hriat. 3 Khan, an khêk nôka, “Haleluia! Kho kângna meikhu kha kumtuangin chung tiang intor mai a ti,” an tia. 4 Khanchu, upa sômhni minlihai le thilhring minlihai khan inbokin, “Amen! Haleluia,” tiin Pathian, rêngtoihmuna toitu kha chubai an mûka.
Belrate irneina hruaithe
5 Khan, rêngtoihmuna irthokin hnukirhai a hong suaka, “Nangni suakhai murdi le ama mahrip thohai ngai, mi lian le mi chînhai, ei Pathian inpâk roi!” a tia. 6 Khanchu, mipui tamtak hnukirhai angin le tuitâk irhai angin le khonripui irhai angin, “Haleluia, Rengpa ei Pathian Itinrêngthothei khan roi a rêl ta! 7 Râifân le lôm takin a roiinpuina chôiindôm ei ti! Belrate dôngma nei zoro a ni ta, a moi khom ar siam zoi ta. 8 Puan irnêm, fâitak le irtêk tak a sil hrangin pêk a ni,” a iti kin hriat. (Puan irnêm kha Pathian mihai sintho sa a ni.)
9 Vântîrtôn khan ki kuang, “Belrate irneina hruaithea fialhai chu an vân a sa,” ti irziak roh, a tia. Ama dênin ki kuang, “Hihai hi Pathian thu dikhai a ni,” a ti saa.
10 Khanchu, chubai mûk hrangin a ke bula kin boka, khannisianlân, ama khan ki kuang, “Hiang hin chu tho no roh, kei khom nangma le ni urênghai le Jisua thutak inpuang pomhai suak chanpui kêng ki ni. Pathian chubai mûk roh!” a tia. Thutak Jisua inpuang kha thu’nsîr theina irtha a ni.
Sakor ngoi chunga chuangtu
11 Khan, irvân irhong ki hmua, sakor ngoi le a chunga chuang iamom le dik taka an iti ki hmu sa. Ama khan fel takin roi a rêla, a râl a doi ngai. 12 A mithai kha meichok angin a oma, rênglukhum tamtak a khuma. A chunga irziak irhming ama bana chu tûte’n a omzia an inhriat loi, a nei sa. 13 Songkol irfual, thisen kop chit an nghâka, a’rhming chu “Pathian Thu,” a ni. 14 Irvâna sipaihai khan puan irnêm chekhlang le fâi tak sila, sakor ngoihai chunga chuangin an zuia. 15 A bâia irthokin khandai ngaihtak a hong suaka, ama khan nam tin inhnê a ti. Thîr khianghrolin an chunga roirêl a ta, Pathian Itinrêngthothei ningmur inrikna grep sômna khura khan sirpha a ti. 16 A puan le a malpuia khan, “Renghai Reng le Hruaituhai Hruaitu,” tia irhming irziak a om.
17 Khan, misaa khin vântîrtôn ngîr ki hmua, vântîrtôn khan irvânlaizôla va vuang murdihai kuang hnukirhai inring takin a khêka, “Pathian hruaithe roiinpuitak irhîl hrangin hong irbûm roi! 18 Hong unglân, rênghai, sipai ulianhai, sipaihai, sakor le a chunga chuanghai hme, mi murdi suak le suak ni loi, a lian le a chînhai hme nin fâk theina hrangin!” a tia.
19 Khanchu, sahrâng le irnênga rênghai le an sipaihai kha sakor chunga chuang le a sipaihai doi hrangin an irbûm ki hmua. 20 Sahrâng kha an chela, deipu dol, a mit hmua sinirkhêlhai sin ngaipu kha an chel saa. (Kha sinirkhêlhai sika khan sahrâng irsinsiana neihai le a’rlim chubai mûkhai kha a ihuang ngai a ni). Sahrâng le deipu dol kha an ruaiin an hring pumin kâta kâng mei laia khan an paithâk tâka. 21 An sipaihai kha chu sakor chunga chuangtu bâia khandai suaka khan an sâta, va murdi’n an hmehai kha an fâka, an khop tâka.
1 Khan, vântîrtôn irvân ata zuang chuma khurmongboia châbi le thîrhrui lianpa a ichôi ki hmua. 2 Dragon, rûlpui tar Diabola le Setana kha a chela, kum sângkhat hrangin a khit ta. 3 Khurmongboia khan a pai thâka, a khura kum sângkhat a hek mâka chu nam tin a huang loina hrangin a kal khak tâka. Kha hnung chu zoro sôtnote hrangin insua nôk ni a ti.
4 Khan, rêngtoihmunhai ki hmua, a chunga mi an toia, kha a toihai kuang khan roirêl thei hrangin irchamneina pêkin an om. Khabana, Jisua inhriatpuitu an nina sik le Pathian thu an inpuangna sika an lu an itan pehai irtha kha ki hmu sa. Anni khan sahrâng le a’rlim chubai mûk mahaia, sahrâng irsinsiana kha an michala mo an kuta mo se mahai. Khahai kha an hong hringa, kum sângkhat sûnga hrangin Krista leh roirêlin an om ta. 5 (Mithi danghai kha chu kum sângkhat a hek mâka chu la hring mahaia.) Ama kha thoinôkna masa tak a ni. 6 Kha thoinôkna masa taka changhai kha chu an vân a sa’n an irthiang a ni. Khahai chunga khan chu thi hnina khan ircham rêng nei ta mah; Pathian le Krista Ochaihai ni an ta, ama leh kum sângkhat roirêl an ti.
Setana inhnêa a omna
7 Kum sângkhat a hek tikin chu, Setana kha an tângna ata insua ni a ta, 8 khanchu rammual pumpuia nam tin irthekindarhai, Gog le Magog huanga, irdoinaa hong hruai bûm hrangin fe suak a ti. An tam lam chu tuikhangliana chiaiphoi dôr an ni. 9 Irnêng pumpuia an dâp zitin an hong kâia, mi irthianghai kul le an khopui indet tak kha an irhuala, khannisian irvân ata mei a zuang chuma, anni kha a kâng irhmanghai tâka. 10 Khanchu, annihai huangtu Diabola kha, sahrâng le deipu dol omnaa, kâta kâng meidîla khan an paihaia, kha khan a sûn a zânin hremna tuangin kumkhua’n om ta an ti.
Roirêlna hnungkhôn tak
11 Khan, rêngtoihmun vâr lianpa le a chunga toitu kha ki hmua. A makung ata irnêng le irvân an rota an irhmang pat ta. 12 Khanchu, mithihai, a lian a chînin, rêngtoihmun makunga ngîr ki hmua. Lekhabuhai an phara, lekhabu dang hringna lekhabu khom kha ar phar saa. Khanchu, mithihai kha an sintho seng lekhabua chuang ang takin roirêl pêkin an om ta. 13 Khanchu, tuikhanglian khan a sûnga mithi omhai kha an suaktira, thina le mithi khua khan an sûnga mithi omhai an insua saa, an rêngin an sintho ang sengin roirêl pêkin an om tâka. 14 Kha hnung chu thina le mithi khua kha meidîla an pai thâk ta. (Meidîl kha thi inhnina a ni). 15 Tukhom hringna lekhabua ar hming chuang loi ka chu meidîla khan an pai thâk sa ta.
1 Khan, irvân thar le irnêng thar ki hmua; irvân masa le irnêng masa kha a boi tâka, tuikhanglian khom om ta mah. 2 Khabana, Khopui Irthiang, Jerusalem thar kha, moiin a pasal don hranga a irvô ngai ang khan irzoi diamin Pathian kuang irvân ata zuang chumin ki hmua. 3 Rengtoihmuna irthokin hnukirhai inringtakin, “Atûn chu Pathian in kha mihriamhai laia a zuang om ta! Ama chu an kuang om a ta, anni chu a mihai ni an ti. Pathian ngei kha an kuang om a ta, an Pathian ni a ti.
4 “An mit ata mitrithi murdi huipai pehai a ti. Thina om ta no nia, beidongna hai, chapna hai le natna hai khom om ta no ni; thil miluihai kha a boi zoi ta,”, a iti kin hriat.
5 Khanchu, rêngtoihmuna toitu khan, “Atûn chu thil tinrêng ki siam inthar ta!” a tia. Khabana, “Irziak roh, hi thuhai hi iam a omin an idik kêng,” a ti saa. 6 Khan, ki kuang, “A’rzoi tâk! keima a maton tak le a hnungkhôn tak, a bul le a mong ki ni. Tuiinhrâlhaiin chu hringna tuikuang ata manboiin pe ki ti. 7 An hnêtuhaiin chu hihai hi ki kuang ata dong an ti: Keima an Pathian ni ki ta, annihai kha ki nâihai ni an ti. 8 Khannisianlân, mi thâidôphai, iamloihai, irdit saloi thohai, mi thathai, felloihai, dôi hmanghai, millim biakhai, milakhai murdi omna hrang hmun chu mei le kâta kâng dîl kha a ni; kha kha thi inhnina chu a ni,” a tia.
Jerusalem thar
9 Khan, berbu sari hremna hnungkhôn tak sari chôitu, vântîrtôn sarihai laia inkhat kha ki kuang a honga, “Hongin lân, Moi, Belrate dôngma hrang nang irhmutir ki ti,” a ni tia. 10 Khanchu, ama khan Irtha’n tâng irsâng lianpa sîpa a ni fepuia, Jerusalem, Khopui Irthiang, Pathian kuang irvân ata zuang chum kha a nin entira. 11 Khopui khan Pathian roiinpuina a neia, lungmantam, Jasper lung angin, Krustal lung angin a vâra. 12 Kulpui irsângtak a neia, kha kulpui khan mikot sômhleihni a neia, mikothai nghâkin vântîrtôn sômhleihni an oma. Mikothaia khan Israel nam sômhleihnihai irhming a chuanga. 13 Kha mikothai kha nisua tiang inthum a oma, hmâr tiang inthum a oma, sim tiang inthum a oma, nitâk tiang inthum an iom a ni. 14 Kulpui khan lungphûm sômhleihni a neia, kha lungphûmhaia khan Belrate tirtôn sômhleihnihai irhming a chuanga.
15 Khan, vântîrtôn ni chongpuitu khan khopui le a mikothai le kulpui irkhîna hrangin rângachak irkhîna khianghrol a chôia. 16 Khopui kha a dung le a khang ar ang chaka. Vântîrtônin a irkhîna khianghrol khan a’rkhia: a dung kilometar sânghni irza minli a ni, a khang le a’rsânglam khom a dung dôr a ni. 17 Vântîrtôn khan irkhîna khianghrol a ichôi dên leh khan kulpui kha a’rkhî nôka, a’rsânglam kha mûk irzakhat sômminli minli a ni.
18 A kulpui kha Jasper lunga siam a nia, a khopui kha rângachak irthiang, hlîmen ang dôra irthianga siam a ni. 19 Kulpui lungphûmhai kha lunghlu mantam chi tinrênga irvô a ni. Lungphûm masatak chu Jasper a nia, inhnina chu safir a nia, inthumna chu agate lung a nia, a minlina chu emerald lung a nia, 20 a ringana chu sardonuk lung a nia, a kirukna chu karnelian lung a nia, a sarina chu kruso lung a nia, kiriatna chu berul lung a nia, kuakna chu topaz lung a nia, sômna chu krusopras lung a nia, sômhleikhatna chu tarkois lung a nia, sômhleihnina chu amethus lung a ni. 21 Mikot sômhleihnihai kha sailungvâr sômhleihni an nia, mikot tin kha sailungvâr inkhat senga siam a ni. Kha khopui tual kha chu rângachak irthiang hlîmen eninhlenthalthei anga hi a ni.
22 Khopui sûnga khan tempil hmu ma ung, Rengpa Pathian Itinrêngthothei le Belrate chu a tempil a ni sikin. 23 Khopui êl hrangin misa le tha nang ta mah, Rengpa roiinpuina khan a êla, Belrate kha a meiser a ni. 24 Khan a vâra khan nam tin om an ta; irnênga rênghaiin an roiinpuina chôiin lût an ti. 25 Khopuia mikothai kha sûn sôtin irhongin om mai a ta, itiklai khom khâr ni no ni, zân reng om ual ta no ni. 26 Khopui sûnga khan nam tin roiinpuina le chôiirsângna chôiin lût ni a ti. 27 Khannisianlân, thil porinche ite hong lût thei no nia, thil intirom thohai le milak insîr uarhai lût thei no nihai; Belrate hringna bua irhming chuanghai vai kha Khopuia khan lût thei an ti.
1 Khan, vântîrtôn khan hringna tui vadung krustal lung anga irtêk, Pathian le Belrate rêngtoihmun ata zuang luang kha a nin entira, 2 Khopui kholai inlaina taka a luanga. Khan, muang kiang tiang, kiang tianga hringna thing, thatin voikhat, a kuma voi sômhleihni ra a oma; kha thing hnahai kha nam tin damna a ni.
3 Khopuia khan Pathian khomâksâm rêng rêng om ta no ni. Pathian le Belrate rêngtoihmun kha om ta a ta, a suakhai khan chubai mûk an ti. 4 A hmêl hmu an ta, ar hming an michala chuang sa a ti. 5 Zân om ta no nia, meiser le misa khom nang ta no ni; Rengpa Pathian khan êl invâr ta a ta, kumtuang kumtuangin rênghai angin roirêl ta an ti.
Jisua zuang nôkna thu
6 Khan, vântîrtôn khan ki kuang, “Hi thuhai hi iam a omin a idik a ni. Deipuhai kuang ama Irtha pêktu Rengpa Pathian khan thil hong tung zôi hranghai kha a suakhai kuang en hrangin vântîrtôn a itîr a ni,” a tia. 7 Jisua’n, “Irngai roh! Ki izuang zôi zel hrang tâk kêng! Hi lekhabu lei hrilna pomhai ka chu an vân a sa,” a tia.
8 Kei Johana hi, hi thil murdihai hmupu le inhrepu ki ni. Kin hriata ki hmu zoi le chu kha thilhai nin entirtu vântîrtôn ke bula chubai mûk hrangin kin boka. 9 Khannisianlân, ama khan ki kuang, “Khaang khan chu tho no roh. Kei khom nangma le ni urêng deipuhai le hi lekhabu thu pom murdihai suak chanpui kêng ki ini, Pathian chubai mûk roh!” a tia.
10 Khanchu, ama khan ki kuang, “Hi lekhabu lei hrilna thuhai hi ip no roh, hihai murdi hong tungna hrang hi anai tâk sikin. 11 Tukhom mi felloi chu thil felloi sin mai a ta, tukhom mi porinche chu porinche om mai a ti; tukhom mi sa chu thil sa tho mai a ta, tukhom mi irthiang chu irthiangin om mai a ti,” a tia.
12 Jisua’n, “Irngai roh! Ki izuang zôi zel hrang tâk kêng! mi tin an sintho ang senga pêk hrangin ki lômman ki kuang a om. 13 Kei Alfa le Omega, a maton tak le a hnungkhôn tak, a Bul le a Mong ki ni,” a tia.
14 Hringna tuikuanga thei ra kha an fâk theina hrang le khopui kha an lût theina hranga an puan irsûk infâihai chu an vân a sa. 15 Khopui pên tiang chu uihai, dôi theihai, irdit saloihai, mi thathai, millim biakhai, chong le sinthoa milakhai kha om an ti.
16 “Kei, Jisua’n, hi thuhai hi Koiindanghai nin kuanga inpuang hrangin ki vântîrtôn ki zuang tîr a ni. Davida bulpui le a chi, sikhovâr vârtak ki ni,” a tia. 17 Khan, Irtha le moi khan, “Hong roh!” an tia. An hriat murdi’n, “Hong roh!” ti sa ngêt ri se. Tukhom a tuiinhrâl murdi chu hong roi; a nuam murdi’n hringna tui hi manboiin in ri se.
Thukhârna
18 Kei, Johana’n, tukhom hi lekhabu lei hrilna thu inhriat murdi’n chu ngar takin kin hriattir: Tukhomin hi thuhai hi a bôkin chu, hi lekhabua a ihril hremnahai hi a chunga Pathianin bôk pe a ti. 19 Khan, tukhomin hi hrilna lekhabua thu a paiin chu hi lekhabua a ihril a dongtum hringna thing kunga thei ra le Khopui Irthianghai kha Pathianin indoktir a ti.
20 Hi thu inhretuhai hin, “A ni tak tak! Ki izuang hrang tâk kêng!” a ti. Amen, zuang ta roh, Rengpa Jisua!
21 Rengpa Jisua lungkhamna kha mi tin kuang om ri se, Amen.
