Iban Berunding pasal Jesus Jako Pemuka Bup ti mit tu bisi jako ari Bup Kudus pasal Jesus Kristus. Kami arap ka kita deka macha samoa pasal pengidup enggau ajar Jesus ti ditulis ulih anembiak iya ti terubah - iya nya Matthew, Mark, Luke enggau John. Kita tau mega macha iya ba surat bukai dalam Berita Manah. Jesus- siko orang ti tebilang Nadai bisi siko orang udah ngiring pengidup mensia ba dunya tu baka Jesus. Iya di-ada di menoa Israel maya perintah Rome bekuasa ba menoa nya dulu kelia. Leboh maya nya Rajah Augustus men ukum ngagai samoa orang ti dipegai iya, ngasoh sida nganjong nama diri awak ka kena itong leboh ngitong tuboh. Nya alai genap iko sida bela nganjong nama diri ngagai nengeri sida empu. Josep angkat ari nengeri Nasaret di Galili, ngagai Betlehem, dalam menoa Judah, endor Rajah David ada. Josep mansang kia, laban iya datai ari peturun David. Iya mansang nganjong nama iya enggau nama Maria ti tunang iya. Nyadi Maria betuboh bisi, lalu leboh saduai di Betlehem, iya nyau chukop bulan endor beranak. Iya ngada ka anak lelaki ti tuai. . . Anak nya lalu digaga ka nama Jesus, iya nya nama ti udah dipadah ka melikat apin iya dikandong indai iya. Luke 2:1,3-7,21 Tiga puloh taun udah nya, Pilat ti Gabenor Rome, men iya ukum bunoh. Pilat nguji ngiga jalai dikena ngelepas ka Jesus. Tang orang Judah bejako meradak ka nyawa, ko sida. "Enti nuan ngelepas ka iya, reti nya nuan ukai pangan Rajah Besai! Barang orang ti ngumbai diri rajah, nya munsoh Rajah Besai!" Leboh Pilat ninga jako nya, iya mai Jesus pansut lalu dudok ba kerusi penudok hakim, ba endor ti dikumbai "Geladak Batu" ... Hari leboh nya nyau ka tengah hari, iya nya hari sebedau Gawai Paska. Ko Pilat bejako ngagai orang Judah, "Tu iya ti rajah kita!" Sida nyaut iya enggau inggar, ko sida, "Bunoh iya! Bunoh iya! Regang iya!" Ko Pilat nanya sida, "Kati kita ngasoh aku ngeregang rajah kita?" Disaut sida tuai imam, "Kami nadai rajah bukai, semina siko Rajah Besai aja!" Udah nya Pilat nyerah ka Jesus ngagai sida, awak ka lalu diregang. John 19:12-16 Jesus- pengidup iya nyelai ari enggi orang bukai Kuasa iya besai agi ari samoa kuasa ti bisi ba dunya Kuasa iya atas samoa utai Benong sida belayar, Jesus lalu tindok. Kabut besai datai mangka ka danau nya, lalu perau sida nyau tama ai. Samoa sida nyau ka bebadi kena laban penusah. Sida murid mansang ngagai Jesus lalu ngerak iya, ko sida, "Tuan! Tuan! Kitai nyau ka mati!" Jesus angkat lalu bejako ngerara kabut enggau gelumbang. Kemaya nya kabut badu, tasik lalu tedoh. Udah nya ko iya bejako enggau sida murid iya, "Kini ka pengarap kita?" Tang sida alit ati lalu takut, nya alai ko sida bejako enggau pangan diri, "Sapa orang tu? Iya ngerara kabut enggau gelumbang, lalu sida ngasi ka iya!" Luke 8: 23-25 Kuasa iya atas antu Orang mayoh alit bendar ati ninga utai ti di-ajar Jesus. Iya enda baka sida pengajar adat, tang iya ngajar ngena kuasa. Leboh nya bisi siko lelaki ti dirasok antu mansang ngagai rumah sembiang, lalu nyeraoh, ko iya, "Nama ti deka digaga nuan enggau kami, Jesus ari Nasaret? Kati nuan kitu deka ngerusak kami? Aku ngelala nuan: nuan tu seruan Allah Taala ti kudus!" Jesus merintah antu, "Anang inggar, pansut ari orang tu!" Antu nya ngusak orang nya, lalu iya nyeraoh sereta pansut ari orang nya. Orang mayoh bela alit ati, nya alai ko sida bejako enggau pangan diri, "Nama utai tu? Kati tu ajar ti baru? Orang tu bisi kuasa bejako enggau antu, lalu sida ngasi ka jako iya!" Mark 1:22-27 Kuasa iya atas penyakit Mentua Simon ti indu kena sakit chelap angat, sereta Jesus datai ba endor nya, iya lalu ditusoi ka pasal utai nya. Jesus mansang ngagai iya, megai jari iya, lalu ngangkat ka iya. Iya gerai, lalu angkat mela sida. Leboh hari nyau lemai, sida mai orang ti sakit enggau orang ti dirasok antu ngagai Jesus. Samoa orang mayoh di nengeri nya begelumu ba moa rumah. Jesus nyuman ka mayoh orang ti kena laban mayoh rnacham penyakit, lalu muai mayoh antu ari sida. Mark 1: 30-34 Jesus- pemati enggau pengangkat iya ti nyelai Ko jako ditulis Paul ti anembiak Jesus: Aku men utai ti udah disambut aku ngagai kita, iya ti pemadu besai guna: iya nya Kristus mati kategal penyalah kitai, baka ti udah ditulis dalam Bup Kudus; iya udah dikubor lalu iya udah di-angkat idup baru tiga hari udah lepas nya, naka ti udah ditulis dalam Bup Kudus. 1 Korint 15: 3,4 Pemati iya Leboh sida datai ba endor ti dikumbai "Keruntok Pala", sida lalu ngeregang Jesus di endor nya, lalu saduai dua iko ti ngereja penyalah, siko ari kanan iya lalu siko muak ari kiba iya. Luke 23: 33 Ko jako ditulis Paul: Kristus endang nadai bepenyalah, tang kategal kitai Allah Taala ngasoh iya besaum penyalah kitai, awak ka leboh kitai besaum enggau iya kitai tau bempu pengelurus Allah Taala. 2 Korint 5: 21 Ko jako ditulis Peter ti anembiak Jesus: Kristus empu mai penyalah kitai dalam tuboh iya ngagai kayu regang, ngambi ka kitai mati ka penyalah, lalu idup ka pengelurus. Ulih abi telih iya kita udah suman. 1 Peter 2: 24 Pengangkat iya ari pemati Kitai tau arap ka samoa utai ti disebut Jesus nya amat, laban iya udah angkat ari mati. Tumu pagi Hari Minggu, sida ti indu lalu mansang ngagai kubor nya, mai macham rempah ti udah disedia ka sida. Sida meda batu udah dibaring ka ari penama ngagai kubor nya, nya alai sida tama ka dalam; tang sida lalu nadai tetemu ka tuboh Tuhan Jesus. Sida bediri dia lalu irau ati ka utai nya. Kemaya nya dua iko lelaki ti ngena gari bekilat, bediri ngimbai sida. Laban ti balat takut, dia sida lalu nyunkor ka diri ka tanah, leboh lelaki nya bejako enggau sida. Ko saduai nya bejako enggau sida, "Nama kebuah kita ngiga iya ti idup ba endor orang ti udah mati? Iya nadai ditu; iya udah di-angkat. Kingat ka jako iya enggau kita di Galili: 'Anak Mensia enda tau enda diserah ka ngagai orang ti jai, awak ka iya diregang, lalu di-angkat ka idup baru ba hari ti ketiga!' " Udah nya baru sida ti indu ingat ka jako iya. Luke 24:1-8 Jesus Kristus dipadah enggau kuasa ti besai iya endang amat Anak Allah Taala, ulih iya di-angkat ka ari mati pulai idup baru. Rome 1:4 Jesus- ambu iya ti nyelai Iya Tuhan ti Petara amat Ko Jesus: "Barang sapa ti udah meda aku, udah meda Apai. Nama kebuah nuan nyebut, 'Asoh kami meda Apai'? Kati nuan enda arap ka aku bisi dalam Apai lalu Apai dalam aku? Jako ti udah disebut aku ngagai kita, ukai datai ari aku. Apai ti dalam aku ngereja pengawa iya empu. Arap ka jako aku, ti madah ka aku dalam Apai, lalu Apai dalam aku. Enti enda pia, arap ka pengawa ti digaga aku." John 14: 9-11 "Apai enggau aku endang siko aja." John 10:-30 Imam Besai agi nanya iya, "Kati nuan amat Kristus, Anak Allah Taala ti Beberekat?" Disaut Jesus, "Aku tu meh iya! Samoa kita deka meda Anak Mensia dudok muak ari kanan iya ti Pemadu Bekuasa, lalu datai di atas remang." Mark 14: 61, 62 Iya meruan belama Ko Jesus: "Enggau bendar aku madah ka kita, apin Abraham ada, aku endang udah bisi." John 8: 58 "Apai, beri aku mulia di moa nuan diatu, mulia ti udah diberi nuan ngagai aku apin dunya nyadi kelia." John 17: 5 "Aku udah nurun ari serega deka ngereja pengawa nitih ka peneka iya ti ngasoh aku, ukai nitih ka peneka aku empu." John 6: 38 Iya ti bekuasa Ko Jesus: "Aku udah diberi samoa kuasa, di serega enggau di dunya." Matthew 28:18 Iya ngemuas ka "Aku tu roti pengidup. Iya ti datai ngagai aku enda nemu lapar; iya ti arap ka aku enda nemu aus." John 6: 35 Iya meri penampak dalam pemetang kitai "Aku tu penerang dunya. Barang sapa ti nitih ka aku deka bisi penerang ti ngasoh idup, lalu enda agi bejalai dalam pemetang." John 8:12 Iya deka ngibun "Aku tu pengibun domba ti badas. Pengibun domba ti badas meri nyawa diri kena ngidup ka domba. Nadai orang deka ngambi nyawa aku ari aku. Tang aku meri nyawa diri enggau peneka ati aku empu. Aku bisi kuasa meri nyawa diri, lalu aku mega bisi kuasa ngambi iya pulai baru. Nya utai ti udah di-asoh Apai aku kereja aku." John 10: 11,18 Iya besemaya deka meri pengelikun "Aku tu pintu. Barang sapa ti tama ka dalam nengah aku deka bulih selamat. . . Nyadi penchuri datai laban deka enchuri, munoh sereta ngerusak utai. Aku datai awak ka sida tau bulih pengidup, pengidup ti penoh belipat-lipat. .. Aku meri sida pengidup ti meruan lalu sida enda tau mati; lalu nadai siko orang ulih ngerampas sida ari aku. Utai ti udah diberi Apai aku ngagai aku besai ari samoa utai, lalu nadai siko orang ulih ngerampas sida ari jari Apai aku." John 10:9,10, 28,29 Iya besemaya deka meri pengidup udah pemati "Aku tu ti pengangkat enggau pengidup. Barang sapa ti arap ka aku deka idup, taja iya mati; lalu barang sapa ti idup lalu arap ka aku - enda tau mati." John 11: 25, 26 Iya jalai ngagai Allah Taala ke Apai "Aku tu meh jalai, pemendar enggau pengidup; nadai siko orang ulih datai ngagai Apai enti enda ulih aku." John 14: 6 Iya ngampun penyalah Sekeda orang mai siko orang ti bajong ngagai iya. Orang nya enda ulih dudok semina gali garing- garing. Jesus meda sida amat bisi pengarap, lalu ko iya bejako enggau orang ti bajong nya, "Anak, lantang nuan! Penyalah nuan udah di-ampun." Udah nya ko sekeda pengajar adat bejako enggau pangan diri: "Orang tu bejako ngelaban Allah Taala!" Jesus nemu utai ti dalam ati sida, nya alai ko iya, "Nama kebuah kita beperagam ka utai ti jai baka nya? Kati mudah agi nyebut, 'Penyalah nuan udah di-ampun,' tauka 'Angkat lalu bejalai?' Aku deka nentu ngagai kita, Anak Mensia bisi kuasa ngampun penyalah di dunya tu." Nya alai iya bejako enggau orang ti sakit bajong nya, "Angkat, sikap perengka penindok nuan, lalu pulai ka rumah!" Orang nya lalu angkat sereta pulai ka rumah. Leboh orang mayoh meda utai nya, sida takut, lalu muji Allah Taala ti udah meri kuasa ti baka nya ngagai mensia. Matthew 9: 2-8 Iya nemu utai ti deka nyadi Ko Jesus, ti ngumbai diri Anak Mensia: "Tanda Anak Mensia deka pegari di langit; udah nya mensia di dunya tu deka nyabak, lalu sida deka meda Anak Mensia datai dalam remang, ngena kuasa enggau mulia ti besai. Terumpit ti besai deka disepu, lalu iya deka ngasoh bala melikat iya mansang ngagai empat bengkah sukut dunya, lalu sida deka ngempuru ka orang ti dipilih iya an sukut dunya sapiak ngagai sukut sapiak ... Langit enggau dunya deka lenyau, tang jako aku enda nemu lenyau." Matthew 24: 30, 31, 35 Jesus- pengasai orang ti udah betemu enggau iya Maya tu mayoh penemu pasal Jesus Kristus, tang manah agi enti kitai ninga ari orang ti udah betemu enggau iya. Pengasai bala mayoh Leboh Jesus tembu nyebut utai nya, orang tekenyit ninga ajar iya. Iya ukai baka pengajar adat tang iya ngajar ngena kuasa. Matthew 7: 28, 29 Ko orang Samaria madah ngagai indu nya, "Kami arap diatu, ukai kategal jako nuan, tang laban kami empu udah ninga iya, lalu kami nemu iya tu endang orang ti nyadi ka Penebus dunya." John 4: 42 Pengasai Peter - siko ari pangan ti semak enggau Jesus Jesus mansang ngagai menoa semak nengeri Siseria Pilipi, endor iya nanya sida murid iya, ko iya, "Sapa Anak Mensia, ko penemu orang mayoh?" Ko sida nyaut iya, "Sekeda ngumbai iya John Pemaptisa. Sekeda ngumbai Elijah, lalu sekeda ngumbai Jeremiah tauka siko ari sida nabi." "Kati dalam penemu kita?" ko iya nanya sida. "Sapa aku tu ko kita?" Ko Simun Peter nyaut, "Nuan tu Kristus, Anak Allah Taala ti idup." Matthew 16:13-16 Pengasai pengajar adat Imam Besai bejako enggau Jesus, "Dalam nama Allah Taala ti idup, aku ngasoh nuan bejako enggau sumpah: padah ka kami, sekali ka nuan Kristus, Anak Allah Taala?" Disaut Jesus, "Au, nuan empu udah madah" ... Ninga nya Imam Besai nyarik ka gari diri, lalu bejako, "Busong! Nadai kitai agi beguna ka saksi! Diatu kita udah ninga jako jai ti dipansut ka iya! Nama runding kita?" Disaut sida, "Iya amat salah, lalu enda tau enda dibunoh." Udah nya sida ngeludah moa iya sereta malu iya; lalu ko sida ti nampar iya bejako enggau iya, "Padah ngagai kami, Kristus! Sapa ti malu nuan!" Matthew 26: 63-68 Pengasai Pilat - hakim Jesus ari bansa Rome Udah nya Pilat bejako ngagai sida tuai imam enggau orang mayoh, "Aku nadai nemu kebuah orang tu patut di-ukum." Luke 23:4 Pengasai pemesai soldadu ti ngeregang Jesus Leboh pemesai soldadu enggau bala soldadu ti enggau iya ngemata ka Jesus, meda tanah berenyang enggau samoa utai ti nyadi rambau nya, sida balat takut lalu ko sida, "Iya tu tentu amat Anak Allah Taala!" Matthew 27:54 Udah pemati enggau pengangkat Jesus, raban Kristian mansang enggau jampat. Nadai bisi pengakang ati ba orang Kristian dulu suba pasal pemesai kuasa Jesus - baka jako ari Bup Kudus dibaroh tu: Allah Taala bejako ngena Jesus Dulu kelia Allah Taala suah bendar bejako ngagai sida aki ini kitai, lalu ngena mayoh macham jalai ulih sida nabi, tang udah lepas nya iya bejako ngagai kitai beseruan ka Anak iya. Ulih iya Allah Taala ngaga dunya, iya ti udah dipilih Allah Taala bempu samoa utai ba pengujong dunya. Iya mandang ka penampak mulia Allah Taala; iya sabaka sakali enggau Allah Taala, lalu iya megai samoa dunya ngena jako iya ti pemadu bekuasa. Udah iya bulih ampun ka penyalah mensia, iya dudok di serega, muak ari kanan Allah Taala, ti Pemadu Bekuasa. Hebrew 1:1-3 Jesus Kristus nya Tuhan Jesus Kristus selalu ngasai ka diri endang Allah Taala, tang iya enda enggau pejal ngumbai diri sabaka enggau Allah Taala. Tang, ari peneka ati iya empu, iya ngelengka ka samoa nya, lalu ngaga diri nyadi baka anembiak. Iya nyadi baka mensia, lalu pegari baka pendiau mensia. Iya ngemaroh ka diri lalu diau ngasi datai ka mati - mati di atas regang. Kategal nya Allah Taala ngangkat ka iya ngagai endor ti pemadu tinggi, sereta meri ka iya nama ti besai agi ari nama bukai. Nya alai, kena ngemesai ka nama Jesus, samoa utai ti di serega, di tanah, enggau di baroh dunya deka besugang magang, lalu samoa deka nelah Jesus Kristus nya Tuhan, ngagai mulia Allah Taala ti Apai. Pilipi 2: 5-11 Pengasai nuan pasal Jesus Sekeda orang deka muru iya. Sekeda orang enggai nerima iya. Sekeda enda iboh ka iya. Sekeda mega enda deka ninga enggau ngasi ka utai ti di-asoh iya. Nya sabaka enggau diatu. Nuan enda tau enda milih nerima iya tauka nulak iya Ko Jesus: "Barang orang ti enda satanah enggau aku, tetap ngelaban aku." Luke 11: 23 Pending ka iya "Enggau bendar aku madah ka kita: barang sapa ti ninga ka jako aku lalu arap ka iya ti ngasoh aku, bisi pengidup ti meruan. Iya enda kena pechara, tang udah ngelimpas pemati ngagai pengidup. Enggau bendar aku madah ka kita: timpoh deka datai - tang udah datai - endor sida ti mati deka ninga munyi nyawa Anak Allah Taala, lalu sida ti ninga iya deka idup." John 5: 24, 25 Ngelala utai ti dipeguna nuan Enti kitai bejako ngumbai diri nadai penyalah, kitai ngelakar diri empu, lalu nadai pengamat ba kitai. Tang enti kitai ngaku penyalah diri ngagai Allah Taala, iya deka ngamat ka semaya iya lalu ngereja utai ti lurus: iya deka ngampun kitai ari penyalah lalu nuchi samoa kereja kitai ti salah. Enti kitai bejako ngumbai diri nadai penyalah, kitai ngaga Allah Taala bula, lalu jako iya nadai dalam kitai. 1 John 1:8-10 Pengelepas semina tau ulih ari Jesus siko aja; laban nadai siko orang dalam dunya tu, ti bisi nama ti udah diberi Allah Taala ngagai mensia, ti tau ngelepas ka kitai. Kereja Rasul 4:12 Berunding ka pasal utai ti patut dibuai nuan enti nitih ka iya Jesus ngasoh orang mayoh enggau sida murid iya datai ngagai iya, ko iya, "Barang sapa ti deka nitih ka aku, iya enda tau berat ka diri empu, tang ngesan regang iya lalu nitih ka aku. Laban barang sapa ti deka ngidup ka nyawa diri, ngelenyau ka nyawa iya; tang barang sapa ti muai nyawa diri kategal aku enggau kategal injil, deka ngidup ka nyawa iya. Kati orang bulih penguntong enti iya bempu samoa dunya, tang nyawa iya lenyau? Nama utai ti ulih diberi mensia kena nukar nyawa diri?" Mark 8: 34-37 Arap ka iya Barang sapa ti arap ka Anak Allah Taala bisi saksi tu dalam ati iya; tang barang sapa ti enda arap ka Allah Taala, udah ngasoh iya nyadi orang ti pemula, laban iya udah enda arap ka utai ti disebut Allah Taala pasal Anak iya. Nyadi tu saksi pasal utai nya: Allah Taala udah meri ka kitai pengidup ti meruan, lalu pengidup nya bepun dalam Anak iya. Barang sapa ngembuan Anak bisi pengidup nya; barang sapa ti nadai ngembuan Anak Allah Taala nadai pengidup nya. 1 John 5: 10-12 Iya ngangau ka nuan Ko Jesus: "Datai ngagai aku, samoa kita ti lelak ngema utai berat, lalu aku deka ngasoh kita lantang. Pegai pesan aku lalu simpan ba ati kita, lalu pelajar ka ari aku, laban aku lemi lalu enda besai ati; lalu kita deka bulih pengelantang. Pesan ti deka diberi aku ngagai kita mudah, lalu ma ti deka di-asoh aku bai kita lempong." Matthew 11:28-30