ଲୁକ ଲେମେକେତା ଡିଅ ଗାତା
ନି ବଇ ଅଲାଗ୍ଡେ ମିନଗ୍ ଲେକେସେର, ନାଅଁର ଲୁକ । ସାବୁରିଞ୍ ମୁଣୁସକିତେ ଇସର ଡିଅ କୁଇକେ, ନି ଗାତାରେ ଲୁକ ଲେକେସେକେ । ଜିସୁ ନି ମୁଲକବ ସୁଣିଞ୍ଡ ଡେନ ଆଉ ସୁଣିଞ୍ଡ ସରଗବ ଅନ ଏରେ ସାବୁରିଞ୍ ନି ବଇରେ ଏପଡେଜ କଙ୍କଙ୍ ଇରିମା । ଜିସୁ ନି ମୁଲକଆତେ ଆସିଆନ୍ ଏରେବେଳା ଲୁକକିତେ ସୁଗାଇ ଡିଅ କୁକୁଇନମାନ୍ ଆଉ ଦୁକି ଗରିବ ଆଉ ରୁଗା ଲୁକକିତେ ସାଆଜ କିକିମମାନ୍ । ଜିସୁ ସଦାବେଳେ ଇସରତେ ପାତାନା କିକିମମାନ୍ ଆଉ ନିମୁଳ ଆତାମା ଜିସୁତେ ସାଆଜ କିକିମମାନ୍ । ନି ସାବୁରିଞ୍ ଗାତା ନି ବଇଆ ଲୁକ ଲେକେସେକେ ।
1 ତିଅପିଲ, ଆଞ୍ ଆମ୍ତେ ଆଦର କିବ୍କେ । ଆମ୍ତେ ଆଞ୍ ନି ଚିଟି ଲେକେକେ । ନିଞା ଜା ଜା ଇସେରାନା, ଏରେ ଗାତାରେକି ଲେକେତେ ସୁଗାଇ ଲୁକକି ଚେସ୍ଟା କିବ୍ସେରକି । 2 ଉନୁକୁଳତାସୁନ୍ ଏରେ ସାବୁରିଞ୍ କିତିକ ଲୁକକି ଜସେରକି ଆଉ ଡିଅ ଗାତା ଲୁକକିତେ ଗାତାଏସେରକି । ଏରେ ଲୁକରେକି ନିଞ୍ତେ ଜା ଜା ଗାତାସେରକି, ଏରେ ସାବୁରିଞ୍ କିତିକ ଲୁକକି ଲେକେସେରକି । 3 ଏରେ ସାବୁରିଞ୍ ଆଞ୍ ଡିଅର ଅଙ୍ସେକେ ଆଉ ପଡେସେକେ । ଏତେ ଏରେ ଗାତାରେ ଆମ୍ତେ ଆଞ୍ ଆଉତରମିଞ୍ତା ଡିଅର ଲେକେଅଜ ଡିଅ ମିନା । 4 ଆମ୍ ଜା ମଙ୍ସେକେ, ଏରେ ସାବୁରିଞ୍ ସୁତୁକୁରିଞ୍ ଆସିକେ ବୁଲି ଆମ୍ କଙ୍କଙ୍ତେ ଆଞ୍ ନି ଚିଟି ଲେକେକେ ।
ଜିକରିଅ ଆଉ ଏଲିସାବେତ
5 ଏରୁଦ ରାଜାରା ଅମଳରା ଜିଉଦା ଦେସଆତେ ଜିକରିଅ ନାଅଁର ମିନଗ୍ ନାଗମ୍ ଆସିଆନା । ଆର ଅବିୟଆ ଦଳଆ ନାଗମ୍ ଆସିଆନା । ଆରା କୁଟୁମର କିଲଙ୍ ନାଗମ୍ ଆରଣଆ ଗୁତୁର ଲୁକ ଆସିଆନା । ନାଅଁର ଏଲିସାବେତ । 6 ଆରକିଆ ବାନଗ୍ ଇସରଆ ସାବୁରିଞ୍ ଗାତା ମାନେନମାନ୍କିଆ ଆଉ ଆରାକିଆ କିଚି ବାଗି ଗାତା ଆରାସିଆନା । ଆରକିଆ ଇସରଆ ସାମୁରାତେ ନିମୁଳ ଆସିଆନ୍କିଆ । 7 ଏଲିସାବେତ ବାଞ୍ଜି ଆସିଆନା ଏତେ ଆରାକିଆ କନନ୍ କଞ୍ଚେଲାନ୍ ଆଇନମାନ୍କି । ଆରାକିଆ ବାନଳଙା ସୁଗାଇ ବଳ ବୟସ ଇସେରାନ୍ତେ । 8 ମିସିଆଁ ମନ୍ଦିର ଆଲୁଙ୍ତେ ଉଜା କିକିବ୍ତେ ଜିକରିଅଆ ଦଳରାକା ନାଗମ୍କା ପାଳି ଅଲଗାନା । ଏତେ ଜିକରିଅ ମନ୍ଦିର ଆଲୁଙ୍ତେ ଉଜା କିକିମମାନ୍ । । 9 ଏରେବେଳା ଇସରଆ ମନ୍ଦିର ଆଲୁଙ୍ତେ ଦୁପ ଡିଞ୍ଡିଞ୍ତେ ଲଟେରି କିବାନ୍କିଜ ମିନଗ୍ ନାଗମ୍ତେ ବାଚେନମାନ୍କି । ଏରେଦିନଆ ଜିକରିଅଆ ପାଳି ଅଲଗାନା । 10 ଜିକରିଅ ମନ୍ଦିର ଆଲୁଙାତେ ଦୁପ ଡିଞ୍ଡିଞମାନ୍ ବଳଆ ସୁଗାଇ ଲୁକକି ବାଏତେ ପାତାନା କିକିବ୍ମମାନ୍କି । 11 ଏରେବେଳା ପରବୁଆ ମିନଗ୍ କବରିଆ ଡେନଜ ଦୁପ ଡିଞ୍ଡିଞମାନ୍ ଜାଗାରାତେ ଡିଅ ଇତିତା ତଙନାନ୍ଜ ଆବ୍ଜଏରମାନ୍ । 12 ଜିକରିଅ ଜୟଜ କାତିଞେରାନ୍ଜ ବେତଙାନ୍ । 13 ଏଲେ କବରିଆରେ ଜିକରିଅତେ ଗାମ, "ମେବେତଙାନ୍ଡ । ଆମା ପାତାନା ଇସର ଅଙ୍ସେକେ । ଆମା କୁଟୁମମ୍ ଏଲିସାବେତ ମୁଇଣ୍ଟ କନନ୍ ମୁଆଙା । ଆମ୍ ଆରା ନାଅଁର 'ଜଅନ' ମିଡିଞେ । 14 ଆମା କନନମା ଲାଗି ଆମ୍ ସୁଗାଇ କୁସି ମିନା । ଆର ଜନମ ମିନା ବଳତେ ସୁଗାଇ ଲୁକକି କୁସି ମିନାକି । 15 ଇସରଆ ସାମୁରାତେ ଆର କୁବା ମିନା । ଆର କେଣିସି ମଦ ଦିନମିଞ୍ ସୁରୁକା ଆଉର୍କେ ଜେନା । ଆର ବୁଇରା ଇତିବ୍ଡାତେ ମାସିନା ବଳତେ ଆର ନିମୁଳ ଆତାମାରେ ମରେନା । 16 ଆର ସୁଗାଇ ଇସ୍ରାଏଲି ଲୁକକିତେ ପରବୁ ଇସରଆ ସାମୁରବ ମରେନେ । 17 ଉଆଳିରେ ଏଲିଅଆ ଆତାମା ଆଉ ବଳ କୁଇଆନ୍ଜ ପରବୁଆ ଆଗିଲାତା ମନା । ଅବାରକି ଆଉ କନନ୍ କଞ୍ଚେଲାନ୍ଡକି କଲେଜାନ୍କିଜ ଆମା କନନମ୍ ଆରକିତେ ଡିଅ ସାନ୍ତି ମରେନେ । ଆମାନେକିକି ଲୁକରେକିତେ ଡିଅ ବୁଦି ଡିମିଞେ । ପରବୁଆ ଆସରବ ଡେଙ୍ଗର୍ତେ ଲୁକକିତେ ଟିକ୍ ମାବ୍କିବେ ।" 18 ଜିକରିଅ କବରିଆତେ ଗାମ, "ଆଞା କନନିଞ୍ ମିନା ବୁଲି ଆଞ୍ ସୁଣିଞ୍ଡ ଜାଣି କଅଙେ? ଆଞ୍ ବୁଡା ଇଆନ୍ତେ ଆଉ ଆଞା କୁଟୁମଞ୍ ଜ କାଣ୍ଡାଏଅତେ ।" 19 କବରିଆରେ ଜିକରିଅତେ ଗାମ, "ଆଞା ନାଅଁଞ୍ଡେ ଗାବିରିଏଲ୍ । ଆଞ୍ ଇସରଆ ସାମୁରା ତଙନ୍ଚେରେ । ଆମ୍ତେ ଏରେ ଡିଅ ଗାତା ଗାତାଏତେ ଇସର ଆଞ୍ତେ କିନ୍ଚେକେ । 20 ଆମ୍ ଆଞା ଗାତା ବିସାସ ମା ମିକିବ ଏତେ ଆମ୍ କନ୍ଦା ମିନା । ଏଲେ ଆଞା ଗାତା ସାବୁରିଞ୍ ସୁତୁକୁରିଞ୍ ମିନା । ଏରେ ସାବୁରିଞ୍ ମିନା ଅଚତା ଆମ୍ ଗାତାଏ ମିରିମା ।" 21 ଏରେବେଳା ଲୁକକି ଜିକରିଅତେ ବାଏତେ ଜଗେସେରକି । "ବିତେ ମନ୍ଦିର ଆଲୁଙାତେ ସୁଗାଇ ରସ ରଏଆନ୍" ଗାମକିଜ ଲୁକକି କାବା ଇଆନ୍କି । 22 ଜିକରିଅ ବାଏବ ଆରିଆନ୍ଜ ଲୁକକିତେ କିଚି ଗାତାଏ ଆରିମାନା ଏତେ ଇତିବ ଟାରେଅଜ ଗାତାଅ । ଆରତେ ମନ୍ଦିର ଆଲୁଙ୍ତେ ବିରିକ ଆବ୍ଜରମ୍ସେରେ ଗାମକିଜ ଲୁକକି ବୁଜିଅକି । ଏରେ ଦିନତାସୁନ୍ ଜିକରିଅ କିଚି ଗାତା ଗାତାଏ ଆରିମାନା । 23 ମନ୍ଦିରଆ ସେବା କିକିବା ପାଳିର ଜେଳାଅଜ ଜିକରିଅ ଆରା ଇଞାରବ ଡୁଙ । 24 କିତି ଦିନକ ଅଚତା ଜିକରିଅଆ କୁଟୁମର ଏଲିସାବେତ କାଣ୍ଡିଞ । ପାଞ୍ଚ ମାସ ଜାକଜ୍ ଏଲିସାବେତ ଆଲୁଙ୍ତା ବାଏବ ଆରାରିଆନା ଆଉ କେଣିସିଆଡେ ଆଅନ । 25 ଏଲିସାବେତ ଗାମ, "ଲୁକକି ନିନ୍ଦା ଆକିବ୍ଡେମେକିକ ଗାମଜ ଇସର ଆଞ୍ତେ ଦୟା କିବଜ ଉଣିଞ୍ଡ କିବ୍ସେକିଞ୍ ।"
ମରିୟମତେ ଇସରଆ କବରିଆ ଗାତାଅ "ଜିସୁ ଜନମ ମିନା "
26 ଏଲିସାବେତ କାଣ୍ଡିଞଜ ଚଅ ମାସ ଇସେରାନା ଏରେବେଳା, ଇସର ଆରା କବରିଆର ଗାବିରିଏଲତେ ଗାଲିଲି ଅଞ୍ଚଳ ନାଜରିତ ଗଳଆ ମିନଗ୍ ସେଲାନ୍ଡାଏରାବ କିନ । 27 ଏରେ ସେଲାନ୍ଡାଏରା ନାଅଁର ମରିୟମ । ଦାଉଦ ରାଜାରା କୁଟୁମାଳିଆ ଜୁସେପଆ ତୁଲଙ୍ ମରିୟମଆ ବାଆଗର ଇତେ ଗାତା ତେଜ୍ଚେରାନ୍ତେ । 28 ଇସରଆ କବରିଆର ମରିୟମତେ ଗାମ, "ଇସର ଆମ୍ତେ ଡିଅ ଆବ୍କମ୍ଡର୍ଚେକମ୍ । ଇସର ଆମା ତୁଲଙ୍ ଆସିକେ ।" 29 ମରିୟମ ଇସରଆ କବରିଆରା ଗାତାର ଅଙଜ "ନି ଗାତାରେ ସୁଣିଞ୍ଡ ମିନା" ଗାମଜ ଚିନ୍ତା କିକିବ୍ତେ ଲାଗେଆନା । 30 କବରିଆରେ ଗାମ, "ଏ ମରିୟମ, ମେବେତଙାନ୍ଡ । ଇସର ଆମା ଲାଗି କୁସି ଇରେ । 31 ଜଏ, ଆମ୍ ମେକାଣ୍ଡିଞେ ଆଉ ମୁଇଣ୍ଟ କନନ୍ ଜନମ ମିକିବେ । ଆରା ନାଅଁର ଜିସୁ ମିଡିଞେ । 32 ଆର ସାବୁରିଞାତାକୁରି କୁବା ମିନା । ଆଉ ସାବୁରିଞାତା କୁବା ଇସରଆ କନନ୍ଡ ଗାମକିଜ ଆରା ନାଅଁର ଉରି ମିନା । ଇସର ଆରତେ ଆରା ଅବାର ଦାଉଦ ଡେଗାନା ରାଜା କିମିବେ । 33 ଆର ସୁବୁଦିନ ଲାଗି ଇସ୍ରାଏଲି ଲୁକକା ରାଜା ମିନା । ଆରା ରାଇଜର ଆଜେଳାଏକେ ଜେନା ।" 34 ମରିୟମ ଇସରଆ କବରିଆରତେ ଗାମ, "ଆଞ୍ ସେଲାନ୍ ଆସିକେ, ବା ଇ ଜେନା । ଆଞା ସୁଣିଞ୍ କନନ୍ ମିନା?" 35 ଇସରଆ କବରିଆରେ ଗାମ, "ନିମୁଳ ଆତାମା ଆମା ଆଲିଙ୍ତେ ଡେମେନା ଆଉ ଇସରଆ ବଳ ଆମ୍ତେ ଡାମାଣ୍ଡାନେ । ଏତେ ଜିଏ ଜନମ ମିନା ଆର ନିମୁଳ ମିନା । ସାବୁରିଞ୍ ଆରତେ "ଇସରଆ କନନ୍ଡ" ଗାମାମ୍କି । 36 ଆମା ନିଜ କୁଟୁମାଳି ଲୁକମ୍ ଏଲିସାବେତତେ ଜଏ । କାଣ୍ଡାଏ ବଳତେ କାଣ୍ଡିଞ୍ଚେକେ । ଳୁକକି ଆରତେ "ବାଞ୍ଜି" ଗାଙ୍ଗାମମାନ୍କି । ଏଲେ ଏକଳଙ୍ ଆର କାଣ୍ଡିଞଜ ଚଅ ମାସ ଇଆନ୍ତେ । 37 ଇସର ସାବୁରିଞ୍ କିକିବ୍ ରିମିମା ।" 38 ମରିୟମ୍ ଗାମ, "ଆଞ୍ ଇସରଆ ମିନଗ୍ ଚାକରାଣି ଆସିକେ । ଆମ୍ ଜିମିତି ମେଗାମ୍କେ ଆଞ୍ତେ ଏରେନୁଣିଞ୍ଡ ଇରେମେ ।" ତା ଅଚତା ଇସରଆ କବରିଆର ମରିୟମଆ ସାମୁରତା ଡୁଙ ।
ମରିୟମ ଏଲିସାବେତଆବ ଅନ
39 ଜିଉଦା ଅଞ୍ଚଳଆ ଉଳିରାକାତେ ମୁଇଣ୍ଟ ଗଳ ଆସିଆନା । ମରିୟମ ଆରିଆନ୍ଜ ଏରେ ଗଳବ ଅନ । 40 ଜିକରିଅଆ ଇଞାବ ଅନଜ ଏଲିସାବେତତେ ଜୁଆର କିବାନା । 41 ଏଲିସାବେତ ମରିୟମଆ ଗାତାର ଅଙଜ ଇତିବ୍ଡାତେ ଆସିଆନା ଉଆଳିରେ କିଜ । ଏରେବେଳା ନିମୁଳ ଆତାମା ଏଲିସାବେତଆ ଆଲୁଙ୍ବ ଡୁଇଆନା । 42 ଏଲିସାବେତ ଲିଲାଅଜ ଗାମ, "ସାବୁରିଞ୍ ଜୁଆଙ୍ଡାଏକା ବିତିରୁ ଆମ୍ତେ ଇସର ସୁଗାଇ ଡିଅ କିବ୍ସେକମ୍ । ଆମା ଉଆଳିମ୍ତେ ବି ଇସର ଡିଅ କିବ୍ସେକେ । 43 ଆଞ୍ ଦନିଅ । ଆଞା ପରବୁଆ ବୁଇର ଆଞ୍ତେ ଜଜଏ ଡେଞ୍ଚେରେ । ଆଞା ଲାଗି ନି ଡିଅ ଗଟଣାରେ ସୁଣିଞ୍ ଗଟେଅ? 44 ଆଞ୍ ଆମା ଜୁଆର ଗାତା ଅଙଜ ଆଞା ଇତିମିଞା ଉଆଳିଞ୍ଡେ କୁସି ଇଆନ୍ଜ କିଜ । 45 ପରବୁ ଆମ୍ତେ ଜା ଜା ଗାତାସେକମ୍ ଆମ୍ ଏରେ ସାବୁରିଞ୍ ମିନା ମେଗାମଜ ବିସାସ ମିକିବ୍ସେକେ । ଏତେ ଇସର ଆମ୍ତେ ଡିଅ କିବ୍କମ୍ ।"
ମରିୟମ "ଇସର କୁବା" ଗାମଜ ଇସରଆ ସାମୁରାତେ ଗିତଏଅ
46 ମରିୟମ ଗାମ "ଆଞ୍ ଗାମ୍କେ 'ପରବୁ କୁବା ଆସିକେ' । 47 ଇସର ଆଞ୍ତେ ମୁକୁଳାଏସେକେ ଏତେ ଆଞା ଆତାମାଞ୍ଡେ ସୁଗାଇ କୁସି ଇରେ । 48 ଆଞ୍ ଇସରଆ ମିନଗ୍ ସାନ ଚାକରାଣି ଇସେରେ । ଆଞ୍ତେ ଇସର ମନେ ଅବ୍ଳଗ । ଏତେ ଆଞ୍ତେ ସାବୁରିଞ୍ ଲୁକକି 'ଇସର ଆରତେ ଡିଅ କିବ୍ସେକେ' ଗାମାମେକି । 49 ଇସର ସୁଗାଇ ବଳୁଆ ଆସିକେ, ଆର ଆଞା ଲାଗି ଡିଅ କାବା କମ କିବ୍ସେକେ । ଆରା ନାଅଁର ନିମୁଳ ଆସିକେ । 50 ଜୁ ଲୁକକି ଇସରତେ ବେତଙ୍ଡେକି, ଆରକିତେ ଇସର ସଦାବେଳେ ଦୟା କିମିବେ । ଏରେ ଦୟାରେ ନାତି ପୁତି ଜାକଜ୍ ମାସିନା । 51 ଇସର ଆରା ବଳରବ କୁବା କମ କିବ୍ସେକେ । ଜୁ ଲୁକକି ଆରାକା ମନରାକାତେ ଗରବ କିବ୍ଡେକି, ଏରେ ଲୁକରେକିତେ ଇସର ଆଉବ ନିବ କିବ୍ସେକେ । 52 ଇସର ରାଜାକିତେ ଆରକି ଡକସେରାନ୍କି ଚଉକିତା ତୁଳିବ ଅରେନ ଆଉ ଗରିବ ଲୁକକିତେ ଆଦର କିବ୍ସେକେ । 53 ତିମିଲାଜ୍ତା ଲୁକକିତେ ଇସର ଡିଅ ଡିଅ ଗିନିସ ଉରୁର୍ତେ ଡିଞଜ ଇତିବ୍ ଆବ୍ବୁସାଅ । ଏଲେ ଦନି ଲୁକକିତେ ଅଡଙ୍ ଇତି କିନ । 54 ନିଞା ଅବାନିଞ୍ ଅବରାମ ଆଉ ଆରା କନନ୍ କଞ୍ଚେଲାନ୍ଡକିତେ ଇସର ଜିମିତି ଗାତାସେର ଏରେ ନୁଣିଞ୍ଡ ନିଞ୍ତେ ଦୟା କିବଜ ମନେ କିବ୍ସେକେ । 55 ଏତେ ଇସର ଇସ୍ରାଏଲ୍ ଲୁକକିତେ ଦୟା କିବ୍ସେକେ । ନିଞ୍ ଇସ୍ରାଏଲ୍ ଲୁକକି ଇସରଆ ଚାକରରକି ନାସିକେ ।" 56 ମରିୟମ ଏଲିସାବେତଆ ତୁଲଙ୍ ତିନି ମାସ ରଏଆନ୍ ଅଚତା ଆରା ନିଜ ଇଞାରବ ଡୁଙ ।
ଜଅନ ଜନମ ଇଆନା
57 ଏଲିସାବେତଆ ଉଆଳି ଇତେ ଦିନ ଉରିଆନ୍ଜ ଆରା ମୁଇଣ୍ଟ କନନ୍ ଇଆନା । 58 ଆରା ସାଇରା ଲୁକରେକି ଆଉ କୁଟୁମାଳି ଲୁକରକି ଅଙକିଜୁ ଇସର ଆରତେ ସୁଗାଇ ଦୟା କିବ୍ସେକେ । ଏତେ ଆରକି ଏଲିସାବେତଆ ତୁଲଙ୍ କୁସି ଇଆନ୍କି । 59 ଉଆଳି ଜନମ ଇଆନ୍ ସାତ ଦିନ ଅଚତା ଆଟ ଦିନତେ ଆରକି ଉଆଳିରେତେ ସୁନତ କିକିବ୍ତେ ଅନକି । ଅବାରା ନାଅଁର ଜିକରିଅ ଏତେ ଆରକି ଅବାରା ନାଅଁ ଅଳଙ୍ଗର ଡିଞ୍ଡିଞ୍ତେ ମନ କିକିବ୍ମମାନ୍କି । 60 ଏଲେ ଉଆଳିରା ବୁଇର ଗାମ, "ଜେନା, ଆରା ନାଅଁର ଜଅନ ମିନା ।" 61 ଲୁକକି ଏଲିସାବେତତେ ଗାମକି, "ଆପେଆ କୁଟୁମାଳିପେଆ କାଆରିଆ ଏରେନୁଣିଞ୍ଡ ନାଅଁ ଜତେ ।" 62 ଲୁକରେକି "ଉଆଳିରା ନାଅଁର ବିରି ନିଡିଞେ" ଗାମକିଜ ଜିକରିଅତେ ଇତି ଟାରେଅକିଜ ଜିଙକି । 63 ଜିକରିଅ ଲେକେତେ ମୁଇଣ୍ଟ ସିଲଟ ଗାରାନା ଆଉ ଏରାତେ ‘ଆରା ନାଅଁର ଜଅନ’ ଲେକେଅ । ଏରାତେ ଆସିଆନ୍କି ଲୁକକି ସାବୁରିଞ୍ କାବା ଇନିଞାନ୍କି । 64 ସାଙ୍ଗେ ସାଙ୍ଗେ ଜିକରିଅଆ ତମର୍ଡତା ଆଉ ଆଇଲାଙ୍ଡତା ଗାତା ଆରିଆନା ଆଉ ଇସରତେ ଦନିଅବାଦ ଡିଞ । 65 ସାଇଆ ସାବୁରିଞ୍ ଲୁକକି ବେତଙାନ୍କି ଆଉ ଜିଉଦା ଅଞ୍ଚଳଆ ଉଳି ଗଳରା ସାବୁରିଞ୍ ଲୁକକି ଆରାକା ଆରାକା କଗାତାଆନ୍କି । ନି ଗାତାରେ ଅଞ୍ଚଳ ବେଳାମିଞ୍ ମାଡେନିଞ । 66 ଏରେ ଅଞ୍ଚଳରା ଜେତେ ସାବୁରିଞ୍ ଲୁକକି ଅଙକି ଆରାକା ଆରାକା ମନରାକାତେ ବାବେଅକିଜ ଗାମକି, "ଏରେ ଉଆଳିରେ ବିରି ଇତେ ଅଣ୍ଡେ?" ଆରକି କଙକି ଜୁ ପରବୁ ଇସରଆ ବଳ ସକତି ଉଆଳିରା ସାମୁରା ଆସିକେ ।
ଜିକରିଅ ଇସରଆ ଗାତା ଗାତାଅ
67 ଜିକରିଅ ନିମୁଳ ଆତାମାରେ ଅରେଆନ୍ଜ ଇସରଆ ଗାତା ଗାତାଅ । 68 "ଇସ୍ରାଏଲ ଲୁକକା ପରବୁ ଇସର ଡିଅ । ଆର ଆରା ଲୁକରକିତେ ସାଆଜ କିବଜ ମୁକୁଳାଏତେ ଡେଞ୍ଚେରେ । 69 ନିଞ୍ତେ ମୁକୁଳାଏତେ ଇସରଆ ଚାକରର ଦାଉଦଆ କୁଟୁମାଳିତା ମିନଗ୍ ବଳୁଆ ଲୁକତେ କିନ୍ଚେକେ । 70 ସୁଗାଇ ବରସ ଆଗିଲାର ଇସର ଏରେ ସାବୁରିଞ୍ ଗାତା ଇସରଆ ଗାତା ଗାତାନମାନ୍କି ଲୁକକିତେ ଗାତାସେର । 71 ନିଞା ସୁତୁରୁ ଲୁକକାତା ଆଉ ବାଗି ବୁଜିକିକି ଲୁକକାତା ନିଞ୍ତେ ମୁମୁକୁଳାଏ । 72 ଇସର ନିଞା ଅବାନିଞ୍କିତେ ଦୟା ଆବ୍ଜଏ ଗାମଜ ଗାତାସେର ଆଉ ନିୟମ ସବ୍ସେରାନ୍ । ନି ଗାତାରେ ଇସର ମନେ ଅବ୍ଳଗ୍ସେକେ ଏତେ ନିଞ୍ତେ ମୁମୁକୁଳାଏ । 73 ଇସର ନିଞା ଅବାଞ୍ ଅବରାମଆ ସାମୁରାତେ ନିୟମ ସବାନ୍ଜ ଏରେ ଗାମ୍ସେର । 74 ଇସର ନିଞା ସୁତୁରୁ ଲୁକକାତା ନିଞ୍ତେ ମୁମୁକୁଳାଏ ଆଉ ନିଞ୍ ସୁତୁରୁ ଲୁକକିତେ ମା ନେବେତଙାନ୍ଜ ଇସରଆ ସେବା ନିକିମା । 75 ଏରାଲାଗି ନିଞ୍ ସୁବୁଦିନ ନିମୁଳ ନେରଏଆନ୍ଜ ଇସରଆ ସାମୁରାତେ ଟିକ୍ରେ ଇସରଆ ସେବା ନିକିମା ।" 76 ଜିକରିଅ ଆରା କନନ୍ଡତେ ଗାମ, " ‘ସାବୁରିଞାତା କୁବା ଇସରଆ ଗାତା ଗାତାନମାନ୍ ଲୁକ’ ବୁଲି ଆମ୍ତେ ସାବୁରିଞ୍ କମଙ୍କି । ପରବୁଆ ଗଟାଙ୍ ସାଜାଳେତେ ଆମ୍ ଆରା ଆଗିଲାବ ମନା । 77 ଇସରଆ ଲୁକକିତେ ଆମ୍ ମେଗାମେ, 'ଇସର ଆପେଆ ପାପ କେମା କିବଜ ଆପେତେ ମୁମୁକୁଳାଏ ।' 78 ଇସର ନିଞ୍ତେ ଦୟା କିବ୍କେ, ଏତେ ମୁଇଣ୍ଟ ନୁଆ ଦିନ ଡେଗାନ୍ ଇସରଆ ଆଲୁଅ ସରଗତା ନିଞା ଆସନିଞ୍ବ ଡେମେନା । 79 ଜୁ ଲୁକକି ଗଗଜ୍ତେ ବେତଙ୍ଡେକି ଆଉ ଇସରତେ ଆକଙକିଜ ଆନ୍ଦାରକରା ଆସିକିକି, ଇସର ଆରକିତେ ଆଲୁଅବ ଡେଙ୍ଗର୍ତେ ସାଆଜ କିମିବେ । ଇସରଆ ତୁଲଙ୍ ଆଉ ଲୁକକା ତୁଲଙ୍ ସାନ୍ତିରେ ରଏତେ ଇସର ନିଞ୍ତେ ସାଆଜ କିମିବେ ।" 80 ଉଆଳିରେ କୁବାଏତେ ଲାଗେଆନ୍ ଆଉ ଆରା ଆତାମାର ସୁଗାଇ ବଳ କୁକୁଇତେ ଲାଗେଆନ୍ ।ଇସ୍ରାଏଲି ଲୁକକିତେ ଇସରଆ ଡିଅ ଗାତା ଗାତାଏତେ ବଳ ସକତି କୁକୁଇ ଜାକଜ୍ ଜଅନ ଅଲେଗା ମୁଇଣ୍ଟ ଟାଙ୍ଗାରା ପାଦା ଜାଗାତେ ରଏସେରାନ୍ ।
ଜିସୁ ଜନମ ଇଆନା
1 ଜଅନ ଜନମ ଇଆନା ଏରେ ସମୟରା ରୁମିଅ କୁବା ରାଜା ଅଗସ୍ଟକାଇସର ଗାତାଅ "ରୁମିଅ ଦେସଆ ସାବୁରିଞ୍ ଲୁକକା ନାଅଁରକି ବଇଆତେ ଲେକେତେ ମିନା ।" 2 କୁରିଣିଅ ସୁରିଆ ଅଞ୍ଚଳଆତେ ଜାରି କିକିମମାନ୍ ଏରେବେଳା ନୁଣିଞ୍ଡ ନାଅଁ ଲେକେତେ ଉନୁକୁଳ ଇସେରାନା । 3 ଏତେ ସାବୁରିଞ୍ ଲୁକକି ନିଜ ନିଜଆ ନାଅଁ ଆବ୍ଲେକାଏତେ ଗଳବ ଅନକି । 4 ଜୁସେପ କିଲଙ୍ ନାଅଁ ଆବ୍ଲେକାଏତେ ଗାଲିଲି ଅଞ୍ଚଳଆ ନାଜରିତ ଗାଁଆତା ଜିଉଦା ଅଞ୍ଚଳଆ ବେତଲେମ ଗଳବ ଅନ । ଦାଉଦ ରାଜା ବେତଲେମ ଗଳଆତେ ଜନମ ଇସେରାନା । ଜୁସେପ ଦାଉଦଆ କୁଟୁମାଳିର ଆସିଆନା । ଏତେ ବେତଲେମ ଗଳବ ଅନ । 5 ମରିୟମଆ ତୁଲଙ୍ ବାଆଗର ଇତେ ଗାତା ତେଜ୍ଚେରାନ୍ ଏତେ ଜୁସେପ ନାଅଁ ଆବ୍ଲେକାଏତେ ମରିୟମତେ କିଲଙ୍ ଗଗ । ମରିୟମ ଏରେବେଳା କାଣ୍ଡିଞ୍ଞ୍ଚେର । 6 ଆରକିଆ ବେତଲେମତେ ଆସିଆନ୍କିଆ ଏରେବେଳା ଉଆଳି ଜନମ ଇତେ ଦିନ ଉରିଆନା । 7 ମରିୟମ ଆରା ଉନୁକୁଳ କନନ୍ ଉଆଗାନ୍ । ଆରକିତେ ରଏତେ କୁଟିଜ୍ ସରିକା ଜାଗା ଆମେଳେଆନା । ଏତେ କନନ୍ଡତେ କତେରେବ ଡାଣ୍ଡାନଜ ଗୁଆଳ କୁଣ୍ଡତେ ଆବ୍ଗୁଚଗ୍ସେର ।
ମେଣ୍ଡା ଜଗେନମାନ୍କି ଲୁକରେକିତେ ଇସରଆ କବରିଆକି ଆବ୍ଜରମାନ୍କି
8 ଏରେ ରାତିରା ଏରେ ଅଞ୍ଚଳଆତେ କିତିକ ଲୁକକି ବାଏତେ ମେଣ୍ଡା ଜଗେନମାନ୍କି । 9 ପରବୁଆ ମିନଗ୍ କବରିଆର ଆରାକା ଆସରକିବ ଡେନ ଆଉ ପରବୁଆତା ଆଲୁଅ ଆରାକା ବେଳାମିଞ୍ କାରାଅଜ ଆଲୁଅ ଇନିଞାନ୍ । ଆରକି ସାବୁରିଞ୍ ସୁଗାଇ ବେତଙାନ୍କି । 10 ଇସରଆ କବରିଆର ଆରକିତେ ଗାମ, "ଏବେତଙାନ୍ଡ । ଆପେତେ ଆଞ୍ ମୁଇଣ୍ଟ ଡିଅ ଗାତା ଗାତାଏ । ଏରେ ଅଙକିଜ ସାବୁରିଞ୍ ଲୁକକି କୁସି ମିନାକି । 11 ମିସିଞ୍ ଦାଉଦ ରାଜାରା ଗଳରା ଆପେତେ ଆଉ ସାବୁରିଞ୍ ଲୁକକିତେ ମୁକୁଳାଏତେ ମିନଗ୍ ଜନମ ଇସେରେ । ଆର ଇରେ କିରିସ୍ଟ ପରବୁ, ଇସର ଆରତେ ବାଚେସେକେ । 12 ଆପେ ଏଜଏ, କତେ ଡାମାଣ୍ଡାନ୍ତା ମୁଇଣ୍ଟ ଉଆଳି କନନ୍ ଗୁଆଳ କୁଣ୍ଡଆତେ ଗୁମୁଚଗ୍ସେନା । ଏରେ ଆପେଆ ଲାଗି ଚିନ୍ନ ମିନା ।" 13 ସାଙ୍ଗେ ସାଙ୍ଗେ ସରଗତା ସୁଗାଇର କବରିଆକି ଡେନକିଜ ଏରେ କବରିଆରା ତୁଲଙ୍ ଇସରତେ ଦନିଅବାଦ ଡିଞକିଜ ଗାମକି, 14 "ସାବୁରିଞାତା ଆଲିଙ୍ ସରଗଆ ଇସର କୁବା ଆସିକେ, ଆରା ଜୟ ଇରେମେ । ନି ମୁଲକରା ଜୁ ଲୁକକିତେ ଇସର ଡିଅ କୁଇକେ ଆରକି ସାନ୍ତିରେ ରଏରେମେକି ।" 15 ଇସରଆ କବରିଆରକି ଆରାକା ସାମୁରକିତା ଡୁଙକି । ଅଚତା ମେଣ୍ଡା ଜଗେନମାନ୍କି ଲୁକରେକି ଆରାକା ଆରାକା କଗାତାଆନ୍କି "ଉଆ, ନିଞ୍ ବେତଲେମ ଜାକଜ୍ ନନା ବିରି ପରବୁ ନିଞ୍ତେ ଜୁ ଗାତାରେ ଗାତାସେର ଏରେ ନେଜଏ ।" 16 ଆରକି ଗଳଙ୍ ଅନକିଜ ଜୟକିଜୁ ଏରାତେ ମରିୟମ ଆଉ ଜୁସେପତେ ଆଉ ଉଆଳିରେ ଗୁଆଳ କୁଣ୍ଡତେ ଗୁମୁଚଗ୍ତା ଜୟକି । 17 ଜୟକିଜ ଇସରଆ କବରିଆକି ଏରେ ଉଆଳିରା ବିସୟରେ ଜା ଜା ଗାତା ଗାତାସେରକି ଏରେ ଗାତାରେ ଆରକିଆତେ ଗାତାଅକି । 18 ଏରେ ଗାତାରେ ଅଙକିଜ ସାବୁରିଞ୍ କାବା ଇଆନ୍କି । 19 ଏଲେ ମରିୟମ ଏରେ ସାବୁରିଞ୍ ଗାତାରେ ମନରାତେ କଳେର ଉନାନ୍ଜ ଚିନ୍ତା କିକିବ୍ମମାନ୍ । 20 ଇସରଆ କବରିଆର ଜା ଜା ଗାତାସେର ଟିକ୍ ଏରେ ନୁଣିଞ୍ଡ ମେଣ୍ଡା ଜଗେନମାନ୍କି ଲୁକରେକି ଜୟକି । ଏତେ ଏରେମିନ୍ଦିଆତେ ଇସରତେ ଦନିଅବାଦ ଡିଞକିଜ ଇଞାବ ପେରେଅକି । 21 ସାତ ଦିନ ଅଚତା ଆଟ ଦିନତେ ଉଆଳିରେତେ ସୁନତ କିବକିଜ ଆରା ନାଅଁ "ଜିସୁ" ଡିଞକି । ଏରେ ନାଅଁର ବୁଇର ଆକାଣ୍ଡିଞ୍ଚେର ଆଗିଲାର ଇସରଆ କବରିଆର ଗାତାସେର ।
ଜିସୁତେ ମନ୍ଦିରବ ଗଗକିଆ
22 ମସା ଗାତାସେର ରିତିନିତି ନିୟମରେକି ଡେଗାନ୍ ମରିୟମତେ ନିମୁଳ ଇତେ ଦିନ ଆଉଚିଆନା । 23 ପରବୁଆ ନିୟମରେ ଏରେ କିଲଙ୍ ଲେକା ଇସେରେ ‘ଉନୁକୁଳ କନନ୍ଡକିତେ ପରବୁଆ ଲାଗି ଅଲଗା ଇକିବେ’ ଏତେ ଜୁସେପ ଆଉ ମରିୟମ ପରବୁଆ ଲାଗି ଅଲଗା କିକିବ୍ତେ ଜିସୁତେ କିଲଙ୍ ଜିରୁସାଲମବ ଗଗକିଆ । 24 ପରବୁଆ ବଇଆ ଲେକା ଇସେରେ ଏରେ ନୁଣିଞ୍ଡ ମରିୟମତେ ନିମୁଳ ଇତେ ଆରକିଆ ଆମ୍ବାଟ ପାରାକନନ୍ ନାଲେ ଆମ୍ବାଟ କୁକୁଡାଏ କନ୍ତେର୍ ବଳି ଡିଞ୍ଡିଞ୍ତେ ଗଗକିଆ । 25 ଜଏପେ, ଏରେବେଳା ଜିରୁସାଲମତେ ସିମିଅନ ବୁଲି ମିନଗ୍ ଲୁକ ଆସିଆନା । ଆର ଇସରତେ ଡିଅ କୁକୁଇନମାନ୍ ଆଉ ଇସରଆ ସାମୁରାତେ ନିମୁଳ ରଏନମାନ୍ । ଇସର ଇସ୍ରାଏଲ ଲୁକକିତେ ମୁମୁକୁଳାଏ ଜାକଜ୍ ଏରେ ଲୁକରେ ଜଗେଅଜ ରଏସେରାନ୍ । ଇସରଆ ନିମୁଳ ଆତାମା ଆରା ସାମୁରାତେ ଆସିଆନା । 26 ନିମୁଳ ଆତାମା ଆରତେ ଗାମ୍ସେର "ଇସର ମିନଗ୍ ଡିଅ ରାଜା କିରିସ୍ଟତେ କିମିନେ । ଆରତେ ଆମ୍ ମା ମେଜୟଜ ମା ମେଗଜ୍କେ ଜେନା ।" 27 ଜିଉଦି ଲୁକକା ନିତିନିୟମ ପାଳନ କିକିବ୍ତେ ଜୁସେପ ଆଉ ମରିୟମ ଜିସୁତେ ମନ୍ଦିର ଆଲୁଙ୍ବ ଗଗକିଆ । ଏରେବେଳା ନିମୁଳ ଆତାମା ଗାତାଅଜ ସିମିଅନ ଏରାତେ ଆଉଚିଆନା । 28 ଜିସୁତେ ତାତିଅଜ ସିମିଅନ ଇସରତେ ଦନିଅବାଦ ଡିଞଜ ଗାମ 29 "ପରବୁ, ଆମ୍ ଜିମିତି ମେଗାମ୍ସେର ଏରେନୁଣିଞ୍ଡ ଆମା ଚାକରମ୍ ଏକଳଙ୍ ଡିଅ ସାନ୍ତିରେ ଗଗଜ୍ ରିମିମା । 30-31 ସାବୁରିଞ୍ ଲୁକକିତେ ମୁକୁଳାଏତେ ଆମ୍ ଜିଏତେ ମିକିନ୍ଚେକେ, ଆରତେ ଆଞ୍ ନିଜ ଅମର୍ବ ଜସେକେ । 32 ନି ଉଆଳିରେ ଡାବୁଙ୍ ଜାତି ଲୁକକିତେ ଡିଅ ଆଲୁଅ ଗଟାଙ୍ ମାବ୍ଜଏ, ଆଉ ଇସ୍ରାଏଲି ଲୁକକିତେ ମୁଲକ ବେଳାମିଞ୍ ଲୁକକିତେ ଆର ଆଦର କିମିବେ ।" 33 ସିମିଅନ ଉଆଳିରେତେ ଜା ଜା ଗାତାଅ ଏରେ ଅଙକିଆଜ ବୁଇ ଅବାର କାବା ଇଆନ୍କିଆ । 34 ଅଚତା ସିମିଅନ ଆରକିଆତେ କମ୍ଡର୍ଚେନାପା ଗାମଜ, ଉଆଳିରା ବୁଇରତେ ଗାମ, "ନି ଉଆଳିରା ଜୁଗୁ କିତିକ ଇସ୍ରାଏଲି ଲୁକକି ବାଗି ମିନାକି ଆଉ କିତିକ ଇସ୍ରାଏଲି ଲୁକକି ରକିଆ କୁମୁଇନାକି । ନି ଉଆଳିରେତେ ସୁଗାଇ ଲୁକକି ବିରୁଦ କିମିବ୍କି । ଏରେ ଇସରଆ ମୁଇଣ୍ଟ ଚିନ୍ନ ମିନା । 35 ଏରେ ନୁଣିଞ୍ଡ ଇଆନ୍ଜ ସୁଗାଇ ଲୁକକା ମନ ଆଲୁଙା ମାସିନା ଗାତାରେ ମାବିରାଏ । ଏଲେ ଆମା ଜିବନମ୍ତେ କଣ୍ଟା ମାରେକିକି ଡେଡାନ୍ କସଟ ଲାମାଗେନା ।" 36 ମନ୍ଦିରତେ ମିନଗ୍ ରାଣ୍ଡରାଏ ଆସିଆନା । ନାଅଁର ଆନା । ଆର ଆସେରଆ କୁଟୁମାଳି ପିନୁଏଲଆ କଞ୍ଚେଲାନ୍ଡ ଆସିଆନା । ଆର ସୁଗାଇ କାଣ୍ଡାଏସେରତେ । ଆର ଇସରଆ ଗାତା ଗାତାନମାନ୍ । ଆର ବାଆ ଇଆନ୍ଜ ସାଉରା ତୁଲଙ୍ ସାତ ବରସ ଜାକଜ୍ ଆସିଆନା । ଅଚତା ସାଉର ଗଜ । ଏରେତାସୁନ୍ ଆନା ଚାରି କୁଳି ଚାରି ବରସ ରାଣ୍ଡରାଏ ଇଆନ୍ଜ ଆସିଆନା । 37 ଏରେ ରାଣ୍ଡରାଏରେ ମନ୍ଦିର ଆସାଡେଅଜ ଆଡୁଙ୍ଡୁଙମାନ୍ ଆଉ ଉପାସ ରଏଆନ୍ଜ ପାତାନା କିକିମମାନ୍ ଆଉ ଦିନ ରାତି ଇସରଆ ସେବା କିକିମମାନ୍ । 38 ରାଣ୍ଡରାଏ ଆନା ଏରେବେଳା ମନ୍ଦିରଆତେ ଉଆଳିରା ଆସରବ ଡେନଜ ଇସରତେ ଦନିଅବାଦ ଡିଞ । ଇସର ଜିରୁସାଲମତେ ମୁମୁକୁଳାଏ ବୁଲି ଜୁ ଲୁକକି ବିସାସ କିବକିଜ ଜଗେସେରକି, ଆନା ଆରାକା ସେରାତେ ଏରେ ଉଆଳିରା ଗାତାର ଗାତାଅ ।
ଜୁସେପ ଆଉ ମରିୟମ ଇଞାବ ପେରେଅକିଆ
39 ଜୁସେପ ଆଉ ମରିୟମକିଆ ମନ୍ଦିରଆତେ ପରବୁଆ ସାବୁରିଞ୍ ନିତିନିୟମରେକି ପାଳନ କିକିବ୍ ଉଟାଆନ୍କିଆଜ ନିଜ ଇଞାବ ଡୁଙକିଆ । ଆରାକିଆ ଇଞାରକିଆ ଗାଲିଲି ଅଞ୍ଚଳଆ ନାଜରିତ ଗଳଆତେ ଆସିଆନା । 40 ଉଆଳି ଜିସୁ ତିରିତିରି କୁବାଅଜ ବଳୁଆ ଆଉ ବୁଦିଆ ଇତେ ଲାଗେଆନ୍ । ଇସର ଆରତେ ଆବ୍କମ୍ଡର୍ଚେର ।
ଜିସୁତେ ଆଉତରମିଞ୍ତା ମନ୍ଦିରବ ଗଗକିଆ
41 ଜିସୁଆ ଅବାର ବୁଇରବ ବରସମିଞ୍ତେ ତରମିଞ୍ ନିସ୍ତାର ଅବ ମାନେତେ ଜିରୁସାଲମବ ଅଙ୍ଗର୍ନମାନ୍କିଆ । 42 ଜିସୁତେ ବାର ବରସ ଇସେରାନା ଏରେବେଳା ସୁବୁ ବରସ ଅଣ୍ଡେକି ଡେଗାନ୍ ନିସ୍ତାର ଅବ ମାନେତେ ଆରକି ତିନି ଲେଙ୍କନ୍ଡାଏ ଅନକି । 43 ଅବ ଜେଳାଅ ଅଚତା ଜିସୁଆ ଅବାର ବୁଇରକିଆ ନିଜ ଇଞାରବ ପେରେଅକିଆ । ଏରେବେଳା ଜିସୁ ଜିରୁସାଲମତେ ରଏଆନ୍ । ଏଲେ ଜିସୁଆ ଅବାର ବୁଇରକିଆ ଆକଙକିଆ । 44 ଡୁଙ୍ଡୁଙମାନ୍କି ଲୁକରାକା ବିଳାରାକା ଜିସୁ ଆସିକେ ଗାମକିଆଜ ବୁଇରକିଆ ଅବାରକିଆ ବାବେଅକିଆ । ଏତେ ଆରକିଆ ଦିନମିଞା ଗଟାଙ୍ ଡୁଙ୍ସେରକିଆତେ । ତା ଅଚତା ବୁଇରକିଆ ଅବାରକିଆ ନି ଲୁକରାକା ବିଳାରାକା ଆଉ ଜଳାରକା ତୁଲଙ୍ ଜିସୁ ମାସିନା ଗାମକିଆଜ ଡଗରାଅକିଆ । 45 ଏଲେ ଆରକିଆ ଜିସୁତେ ଆକୁୟକିଆ । ଆରକିଆ ଡଗରାଏସୁନ୍ ଡଗରାଏସୁନ୍ ଜିରୁସାଲମବ ବେଜ୍ପେରଅକିଆ । 46 ବୁଇରକିଆ ଅବାରକିଆ ଡଗରାଏସୁନ୍ ତିନି ଦିନ ଅଚତା ଜିସୁତେ କୁୟକିଆ । ଜିଉଦି ଲୁକକା ବିତିରୁ ଜିଏ ଆବ୍ସଜ୍କିକି, ଜିସୁ ଆରାକା ତୁଲଙ୍ ମନ୍ଦିରଆତେ ଆସିଆନ୍ । ଆରକି ଜା ଗାଙ୍ଗାମମାନ୍କି ଏରେ ଅଙମାନ୍ ଆଉ ଆରକିତେ ଗାତା ଜିଙ୍ଜିଙମାନ୍ । 47 ଜିସୁ ସୁଗାଇ ଗାତାରେକି କଙ୍ସେର ଆଉ ଡିଅର ଗାତାନମାନ୍ ଏତେ ସାବୁରିଞ୍ ଲୁକରେକି କାବା ଇନମାନ୍କି । 48 ଜିସୁତେ କୁୟକିଆଜ ବୁଇରକିଆ ଅବାରକିଆ କାବା ଇଆନ୍କିଆ ଆଉ ବୁଇର ଜିସୁତେ ଜିଙ "ଲାଣ୍ଡା, ଆମ୍ ବିତେ ନିଞ୍ବାତେ ନୁଣିଞ୍ଡ ମିକିବ? ଅବାମ୍ ଆଉ ଆଞ୍ ଆମ୍ତେ ଡଗରାଏ ଡଗରାଏ ଅଏରାଣ ବାଇଆନ୍ତେ ।" 49 ଜିସୁ ଆରକିଆତେ ଗାମ, " ଆପା ବିତେ ଆଞ୍ତେ ଆଡଗରାଏନମାନ୍? ଆଞା ଅବାଞା ଇଞାରାତେ ଆଞ୍ତେ ରରଏତେ ମିନା । ଏରେ ଆପା କଙ୍କଙ୍ ଜେନା ବିରି?" 50 ଏଲେ ଜିସୁ ଆରକିଆତେ ଜା ଗାତାଅ ଅବାରକିଆ ବୁଇରକିଆ କିଚି ବୁଜି ଆରିମାନ୍କିଆ । 51 ଜିସୁ ବୁଇରା ଅବାରାକିଆ ତୁଲଙ୍ ନାଜରିତ ଗଳବ ଇକୁଡିଆ ପେରେଅକି । ଆର ଅବାରା ବୁଇରା ସାବୁରିଞ୍ ଗାତାରେକି ମାନେଅଜ ରଏଆନ୍ । ଏଲେ ବୁଇର ଏରେ ସାବୁରିଞ୍ ଗାତା ମନେ ଉନଜ ଚିନ୍ତା କିକିମମାନ୍ । 52 ଇସର ଆଉ ଲୁକକି ଜିସୁତେ ଡିଅ କୁୟକି ଆଉ ଜିସୁ ସୁଗାଇ ବୁଦି ଗିଆନ କୁଇଆନ୍ଜ କୁବାଅ ।
ଜଅନ ବାଗି କାମ ସାଡେତେ ଲୁକକିତେ ଗାତାଅ
1 ତିବରିଅ କାଇସର ରୁମିଅ କୁବା ରାଜା ଇଆନ୍ ଅଚତା ପନ୍ଦର ବରସ ଡାଇଙମାନ୍ । ଏରେବେଳା ପନ୍ତିଅ ପିଲାତ ଜିଉଦା ଅଞ୍ଚଳ ଜାରି କିକିମମାନ୍ । ଏରୁଦ ରାଜା ଗାଲିଲି ଅଞ୍ଚଳ ଜାରି କିକିମମାନ୍ । ଆରା କାକାର ପିଲିପ୍ପ ଇତୁରିୟା ଅଞ୍ଚଳ ଆଉ ତ୍ରାକନିତି ଅଞ୍ଚଳ ଜାରି କିକିମମାନ୍ । ଲୁସାନିଆ ଆବିଲିନି ଅଞ୍ଚଳ ଜାରି କିକିମମାନ୍ । 2 ଏରେବେଳା ଆନାନ ଆଉ କୟାପା ଜିଉଦି ଲୁକକା ସାବୁରିଞାତା କୁବା ନାଗମ୍କିଆ ଆସିଆନ୍କିଆ । ଏରେ ସମୟରା ଟାଙ୍ଗାରା ଜାଗା ପାଦାତେ ଜିକରିଅଆ କନନ୍ଡ ଜଅନଆ ତୁଲଙ୍ ଇସର ଗାତା ଗାତାଏଆନ୍ । 3 ଇସର ଗାତା ଗାତାଅ ଏତେ ଜଅନ ଜର୍ଦନ ନଦି ଆକଲାଜ୍ ଜାଗାରେକିବ ଅନଜ ଗାମ, "ଇସର ପାପ କେମା ତିଞ୍ଡିଞ୍ତେ( କିମିବେ ଏତେ) ବାଗି କମ ସାଡେପେ ବିରି ଡୁବନ ଗନାପେ ।" 4 ଜିସାୟ ନାଅଁର ମିନଗ୍ ଲୁକ ଆଗିଲା ଇସରଆ ଗାତା ଗାତାଏନମାନ୍ । ଆରା ବଇଆ ଇନି ନୁଣିଞ୍ଡ ଲେକା ଇସେରେ । "ଟାଙ୍ଗାରା ଜାଗାରା ମିନଗ୍ କୁବାର ଲିଲାଅଜ ଗାମ୍କେ 'ପରବୁଆ ଦିରେ ସଳକ ଗଟାଙ୍ ସାଜାଡେପେ ।' 5 ସାବୁରିଞ୍ ଉଳି ତୁଳି ଡଡାରେକି ଲଟବ୍ ରଗେପେଜ ସମାଏପେ । ଉଳି ସମୁନ୍ଦାଏ ସାମାଏପେଜ ସଳକ ବନାଏତେ ମିନା । ବଙ୍କା ବଙ୍କି ଗଟାଙ୍ଡେକି ସଳକ ମିନା ଆଉ ଡଡା ଡିଡି ମିସେନା ଗଟାଙ୍ଡେକିତେ ସମାଏକେଜ ସଳକ ମିନା । 6 ସାବୁରିଞ୍ ଲୁକକି ଜମଏକି ଜୁ 'ଇସର ମୁକୁଳାଏସେକେ ।' " 7 ଲୁକକି ଜଅନଆ ଆସରବ ଡୁବନ ଗଗଗ୍ତେ ଡେନକି । ଏରେ ଲୁକରେକିତେ ଜଅନ ଗାମ, "ଏ ବିସବାବୁଙା କୁଟୁମାଳିକି, ଇସର ଦିନମିଞ୍ ଲୁକକିତେ ଦଣ୍ଡ ଡିମିଞେ । ଏରେ ଦଣ୍ଡରେତା ଆପେ ରକିଆ ଇକୁଇନା ବୁଲି ଆପେତେ ଆଡି ଗାମ? 8 ଆପେ ସାବୁରିଞ୍ ଡିଅ କମ ଇକିବାନ୍ଜ ଲୁକକି କମଙ୍କି ଜୁ 'ଏରେ ଲୁକରେକି ସୁତୁକୁରିଞ୍ ମନ ବଦଳାଏସେରେକି ।' ଅବରାମ ନିଞା ଅବାନିଞ୍ ଏତେ ଇସର ନିଞ୍ତେ ଦଣ୍ଡ ଆଡିଞ୍କେ ଜେନା ବୁଲି ଗରବ ଇକିବାନ୍ଜ ଏକଗାମାନ୍ଡ । ଆଞ୍ ଗାମ୍କେ, ଇସର ନି ଏଗେର୍ଡେକିତା ଅବରାମଆ କନନ୍ଡକିତେ ବନାଏ ରିମିମା । 9 ଜଏପେ, ଏକଳଙ୍ ବି ସାବୁରିଞ୍ ସୁମୁସିଞ୍ ମୁଳଆ ଗୁଟିଆ ଉନୁନ୍ ଇସେରେ । ଜେଣିସି ସୁମୁସିଞ୍ଡେ ଡିଅ ଆଲାକୁଅଜ ଏରେତେ ଡେଡେଜ୍ ଇଆନ୍ଜ ଲାଲାଜ୍ତେ ଲବ୍ତର୍ ମିନା ।" 10 ଲୁକକି ଜଅନତେ ଜିଙକି "ଏକଳଙ୍ ନିଞ୍ ବିରି ନିକିବେ?" 11 ଜଅନ ଗାମ, "ଜାର କତେ ଆମ୍ବାଟ ଆସିକେ, ଜାର ଜତେ ଆରତେ ମୁଇଣ୍ଟ ଡିଞ୍ଡେମେ । ଏରେ ନୁଣିଞ୍ଡ ଜାର ଉରୁର୍ତେ ଆସିକେ ଜାର ଜତେ ଆରତେ ଉରୁର୍ତେ ଡିଞ୍ଡେମେ ।" 12 କିତିକ ମାସୁଲି ଟୁଳାଏକିକି ଲୁକକି କିଲଙ୍ ଡୁବନ ଗଗଗ୍ତେ ଜଅନଆ ଆସରବ ଡେନକି । ଆଉ ଜଅନତେ ଜିଙକି "ଏ ଗୁରୁ ନିଞ୍ତେ ବିରି କିକିବ୍ତେ ମିନା?" 13 ଜଅନ ଆରକିତେ ଗାମ, "ଜେତିକି ମାସୁଲି ଟୁଳାଏତେ ଇରେ, ଏରେ ବୁଲୁଙ୍ ମାସୁଲି ଟୁଳାଏପେ । ଏରେତାକୁରି ସୁଗାଇ ଟାଙ୍କା ପଇସା ଇଟୁଳାଅର ।" 14 ସଇନିକକି କିଲଙ୍ ଜଅନତେ ଜିଙକି, "ଆଉ ନିଞ୍ମାନକି ବିରି ନିକିବେ?" ଜଅନ ଗାମ, "ଏବେବ୍ତଙଜ ଏସାଡାଏଆନ୍ଜ କାଆରିଆତା ଦନ ଏଅରେନାନ୍ଡ । ଡିଅ ଲୁକକିତେ ଦୁସ ଇଡିଞଜ ଏଅରେନାନ୍ଡ । ଆପେ ଜେତିକି ଦରମା ଇକୁଇରେ ଏରେ ବୁଲୁଙ୍ ଏଅରେନାନ୍ଜ କୁସିରେ ରଏନାପେ ।" 15 "କିରିସ୍ଟ ଗଳଙ୍ ଡେମେନା" ଗାମକିଜ ଲୁକକି ଜଗେଅକିଜ ରଏନମାନ୍କି । ଏତେ "ଜଅନ କିରିସ୍ଟ ମିନାରି ବିରି" ଗାମକିଜ ଲୁକକି ଆରାକା ଆରାକା ମନେ ମନେ ବାବେନମାନ୍କି । 16 ଏତେ ଜଅନ ସାବୁରିଞ୍ତେ ଗାମ, "ଆଞ୍ ଆପେତେ ଡାଗ୍ତେ ଡୁବନ ଡିଞ୍କେ । ଏଲେ ଆଞାତାକୁରି ସୁଗାଇ ବଳୁଆ ମିନଗ୍ ଡେଣ୍ଡେ । ଆଞ୍ ଆରା ଜୁତାର ସରିକା ଏପ୍ଟାଏ ମା ରିମ୍ଡେ ଜେନା । ଆର ଆପେତେ ଇସରଆ ନିମୁଳ ଆତାମା ଆଉ ଲାଲାଜ୍ତେ ଡୁବନ ଡିମିଞେ । 17 ଟାକାରାତେ ବୁଆ ଉଡାଏତେ ଆରା ଇତିରା ମୁଇଣ୍ଟ ଉତାନ୍ ଆସିକେ । ବୁଆରେତେ ଉଡାଅଜ ବୁଆରେ ଆଲୁଙ୍ବ ଗମଙାକି ଆଉ ଆଲଞାଙ୍ଡକିତେ ଚିଅଗକିଜ ଲାଲାଜ୍ ଲମବ୍ତର୍କି । ଏରେ ଲାଲାଜ୍ଡେ ଆଗଜ୍କେ ଜେନା ।" 18 ଏରେ ନୁଣିଞ୍ଡ ଜଅନ ଲୁକକିତେ ଡାବୁଙ୍ ଡାବୁଙ୍ ଗାତାଅଜ ଇସରଆ ଡିଅ ଗାତା ଗାତାଏନମାନ୍ । 19 ଏରୁଦ ରାଜା ଆରା କାକାରା କୁଟୁମର ଏରୁଦିଆତେ କାନିଆ ଉନ୍ଚେର । ଆଉ କିତିକ ବାଗି କାମ ଏରୁଦ ରାଜା କିକିମମାନ୍ । ଏତେ ଜଅନ ଏରୁଦ ରାଜାତେ ଲେଜ । 20 ଏରୁଦ ରାଜା ଆଉ ମୁଇଣ୍ଟ ବାଗି କାମ କିବ । ଜଅନତେ ବନ୍ଦି ଇଞାତେ ଆବ୍ତାଙ୍ତର ।
ଜଅନ ଜିସୁତେ ଡୁବନ ଡିଞ
21 ଲୁକକି ଡୁବନ ଗଗଙମାନ୍କି ଏରେବେଳା ଜଅନ ଜିସୁତେ କିଲଙ୍ ଡୁବନ ଡିଞ । ଜିସୁ ଡୁବନ ଗଗାନ୍ ଜ ସାଙ୍ଗେ ସାଙ୍ଗେ ପାତାନା କିକିମମାନ୍ ଏରେବେଳା ଆକାସ ପାଗାନା, 22 ଆଉ ନିମୁଳ ଆତାମା ପାରା କନ୍ତେରା ଡେଗାନ୍ ଜିସୁଆ ଇଣିରବ ଅଳେଆନ୍ । ଆକାସତା ମୁଇଣ୍ଟ ଗାତା ଅଙାନା "ଆମ୍ ଆଞା କନନିଞ୍ । ଆମ୍ତେ ଆଞ୍ ଡିଅ କୁଇକମ୍ । ଆମା ଲାଗି ଆଞ୍ କୁସି ଇରେ ।"
ଜିସୁଆ କୁଟୁମାଳି ଲୁକକି
23 ଜିସୁ ଲୁକକା ସାମୁରାକାତେ ଇସରଆ କମ ଉନୁକୁଳ କିବ ଏରେବେଳା ଆରତେ ତିରିସି ବରସ ମିସେନା । ଲୁକକି ବାବେଅକି ଜିସୁ ଜୁସେପଆ କନନ୍ଡ । ଜୁସେପ ଏଲିଆ କନନ୍ଡ । 24 ଏଲି ମତାତଆ କନନ୍ଡ, ମତାତ ଲେବିଆ କନନ୍ଡ, ଲେବି ମଲ୍କିଆ କନନ୍ଡ, ମଲ୍କି ଜନୟଆ କନନ୍ଡ, ଜନୟ ଜୁସେପଆ କନନ୍ଡ, 25 ଜୁସେପ ମତିତିଆ କନନ୍ଡ, ମତିତି ଆମସଆ କନନ୍ଡ, ଆମସ ନାଉମଆ କନନ୍ଡ, ନାଉମ ଏସ୍ଲିଆ କନନ୍ଡ, ଏସ୍ଲି ନଗୟଆ କନନ୍ଡ, 26 ନଗୟ ମହତଆ କନନ୍ଡ, ମହତ ମତିତିଆ କନନ୍ଡ, ମତିତି ସିମୟିଆ କନନ୍ଡ, ସିମୟି ଜୁସେକଆ କନନ୍ଡ, ଜୁସେକ ଜୁଦାଆ କନନ୍ଡ, 27 ଜୁଦା ଜଅନଆ କନନ୍ଡ, ଜଅନ ରେସାଆ କନନ୍ଡ, ରେସା ଜିରୁବାବେଲଆ କନନ୍ଡ, ଜିରୁବାବେଲ ସଅଲ୍ତିୟେଲଆ କନନ୍ଡ, ସଅଲ୍ତିୟେଲ ନେରିଆ କନନ୍ଡ, 28 ନେରି ମଲ୍କିଆ କନନ୍ଡ, ମଲ୍କି ଅଦିଆ କନନ୍ଡ, ଅଦି କସାମଆ କନନ୍ଡ, କସାମ ଏଲ୍ମଦାନଆ କନନ୍ଡ, ଏଲ୍ମଦାନ ଏରଆ କନନ୍ଡ, 29 ଏର ଜିଅସିଅଆ କନନ୍ଡ ଜିଅସିଅ ଏଲିଏଜରଆ କନନ୍ଡ, ଏଲିଏଜର ଜରିମଆ କନନ୍ଡ, ଜରିମ ମତାତଆ କନନ୍ଡ, ମତାତ ଲେବିଆ କନନ୍ଡ, 30 ଲେବି ସିମିଅନଆ କନନ୍ଡ, ସିମିଅନ ଜିଉଦାଆ କନନ୍ଡ, ଜିଉଦା ଜୁସେପଆ କନନ୍ଡ, ଜୁସେପ ଜନାମଆ କନନ୍ଡ, ଜନାମ ଏଲିଆକିମଆ କନନ୍ଡ, 31 ଏଲିଆକିମ ମଲାହଆ କନନ୍ଡ, ମଲାହ ମନାଆ କନନ୍ଡ, ମନା ମତତାଆ କନନ୍ଡ, ମତତା ନାତନଆ କନନ୍ଡ, ନାତନ ଦାଉଦଆ କନନ୍ଡ । 32 ଦାଉଦ ଜିସିୟଆ କନନ୍ଡ, ଜିସିୟ ଅବେଦଆ କନନ୍ଡ, ଅବେଦ ବୟଜଆ କନନ୍ଡ, ବୟଜ ସେଲହଆ କନନ୍ଡ, ସେଲହ ନହସନଆ କନନ୍ଡ, 33 ନହସନ ଅମିନାଦାବଆ କନନ୍ଡ, ଅମିନାଦାବ ଅଦ୍ମିନଆ କନନ୍ଡ, ଅଦ୍ମିନ ଅର୍ଣିଆ କନନ୍ଡ, ଅର୍ଣି ଏସ୍ରଣଆ କନନ୍ଡ, ଏସ୍ରଣ ପେରସଆ କନନ୍ଡ, ପେରସ ଜିଉଦାଆ କନନ୍ଡ, 34 ଜିଉଦା ଜାକୁବଆ କନନ୍ଡ, ଜାକୁକ ଇସାକଆ କନନ୍ଡ, ଇସାକ ଅବରାମଆ କନନ୍ଡ, ଅବରାମ ତେରହଆ କନନ୍ଡ, ତେରହ ନାହରଆ କନନ୍ଡ, 35 ନାହର ସରୁଗଆ କନନ୍ଡ, ସରୁଗ ରଗୁଆ କନନ୍ଡ, ରଗୁ ପେଲଗଆ କନନ୍ଡ, ପେଲଗ ଏବରଆ କନନ୍ଡ, ଏବର ସେଲହଆ କନନ୍ଡ, 36 ସେଲହ କେନାନଆ କନନ୍ଡ, କେନାନ ଅର୍ପକିଅଦଆ କନନ୍ଡ, ଅର୍ପକିଅଦ ସେମଆ କନନ୍ଡ, ସେମ ନହଆ କନନ୍ଡ, ନହ ଲେମକଆ କନନ୍ଡ, 37 ଲେମକ ମିତୁସେଲହଆ କନନ୍ଡ, ମିତୁସେଲହ ହନକଆ କନନ୍ଡ, ହନକ ଜେରଦଆ କନନ୍ଡ, ଜେରଦ ମହଲଲେଲଆ କନନ୍ଡ, ମହଲଲେଲ କେନାନଆ କନନ୍ଡ, 38 କେନାନ ଏନସଆ କନନ୍ଡ, ଏନସ ସେତଆ କନନ୍ଡ, ସେତ ଆଦମଆ କନନ୍ଡ, ଆଦମ ଇସରଆ କନନ୍ଡ ।
କୁବା କଏଲଙ୍ ସଏତାନ ଜିସୁତେ ପରିକା କିବ
1 ଜିସୁ ନିମୁଳ ଆତାମାରେ ଅରେଆନ୍ଜ ଜର୍ଦନ ନଦିତା ପେରେଅ । ଏରେବେଳା ନିମୁଳ ଆତାମା ଜିସୁତେ ଟାଙ୍ଗାରା ଜାଗାବ ଗଗ । 2 ଜିସୁ ଏରାତେ ଚାଳିସି ଦିନ ଚାଳିସି ରାତି ରଏଆନ୍ । ଏରାତେ କୁବା କଏଲଙ୍ ସଏତାନ ଜିସୁତେ ପରିକା କିବ । ଏରାତେ ଜିସୁ ଜେତେ ଦିନ ରଏସେରାନ୍ କିଚି ଉରୁର୍ ଜେନା । ଚାଳିସି ଦିନ ଜେଳାଏ ଅଚତା ଜିସୁତେ ସୁଗାଇ ତିଲାଜାନ୍ । 3 କୁବା କଏଲଙ୍ ସଏତାନ ଜିସୁତେ ଗାମ, "ଆମ୍ ଜଦି ଇସରଆ କନନ୍ଡ ଏଲେ ଆମ୍ ଏଗେର୍ଡେତେ 'ଅଳାଗ୍ ଇନା' ଗାମେ ।" 4 ଜିସୁ କୁବା କଏଲଙ୍ ସଏତାନତେ ଗାମ, "ଇସରଆ ବଇଆ ଲେକା ଇସେରେ 'ମୁଣୁସ ଉଡେଇ ଅଳାଗ୍ବ ଆବଞ୍ଚେକେ ଜେନା ।' " 5 ଆଉ କୁବା କଏଲଙ୍ ସଏତାନ ଜିସୁତେ ମୁଇଣ୍ଟ ଜାଲିଙ୍ ଜାଗାବ ଗଗଜ ମୁଲକରା ସାବୁରିଞ୍ ରାଇଜରେ ଏକାତରମିଞ୍ ଜିସୁତେ ଆବ୍ଜୟ । 6 କୁବା କଏଲଙ୍ ସଏତାନ ଜିସୁତେ ଗାମ, "ନି ସାବୁରିଞ୍ ରାଇଜଆ ଅକ୍କ ଆଉ ଦନସମ୍ପତି ଆଞ୍ ଆମ୍ତେ ଡିଞମ୍ । ନି ସାବୁରିଞ୍ ଆଞ୍ତେ ଡିଞ୍ଡିଞ୍ ଇସେରେ । ଆଞ୍ ଜିଏତେ ମନ କିଇବେ ଆରତେ ଡିଞ୍ଡିଞ୍ ରିମା । 7 ଆମ୍ ଜଦି ଆଞ୍ତେ ଉଜା ମିକିବାନ୍ଜ ମୁଳୁଗିନା ତା ଏଲେ ନି ମୁଲକରା ସାବୁରିଞ୍ ଆମା ମିନା ।" 8 ଜିସୁ କୁବା କଏଲଙ୍ ସଏତାନତେ ଗାମ, "ଇସରଆ ବଇଆ ଲେକା ଇସେରେ 'ଆପେ ପରବୁ ଇସରତେ ଉଜା ଇକିମା ଆଉ ଉଡେଇ ଇସରତେ ସେବା ଇକିମା । ଆଉ କାରିଆ ସେବା ଇକିବର ।' " 9 କୁବା କଏଲଙ୍ ସଏତାନ ଜିସୁତେ ଜିରୁସାଲମ ଗଳବ ଗଗଜ ମନ୍ଦିରରା ସାବୁରିଞ୍ତା ଜାଲିଙ୍ ଜାଗାରାତେ ଆବ୍ତଙନଜ ଗାମ, "ଜଦି ଆମ୍ ଇସରଆ କନନ୍ଡ ନିତାସୁନ୍ ଆମ୍ ତୁଳିବ ଡେଗେ । 10 ଇସରଆ ବଇଆ ଲେକା ଇସେରେ 'ଆମ୍ତେ ରକିଆ କିକିବ୍ତେ ଇସର ଆରା କବରିଆକିତେ ଗାମାତାଏ ।' 11 ଆଉ ‘କାଳେ ଆମା ଇଜିଙମ୍ଡେ ଏଗେର୍ତେ ବାମାଜେ ଏରାଜୁଗୁ ଇସରଆ କବରିଆକି ଆମ୍ତେ ଇତିରକିବ ଲୁମୁବ୍ସବେକି ।’" 12 ଏଲେ ଜିସୁ ଗାମ, "ଇସରଆ ବଇଆ ନି ନୁଣିଞ୍ଡ କିଲଙ୍ ଲେକା ଇସେରେ ‘ଆମା ପରବୁ ଇସରତେ ପରିକା ମିକିବର ।’" 13 ସାବୁରିଞ୍ ପରିକା କିକିବ୍ ଉଟାଅଜ ସଏତାନ କିତି ଦିନକ ଜିସୁତେ ସାଡେଅଜ ଡୁଙ ।
ଗାଲିଲି ଅଞ୍ଚଳଆତେ ଜିସୁଆ କମ
14 ନିମୁଳ ଆତାମା ବଳ ସକତି ଡିଞଜ ଜିସୁ ଗାଲିଲି ଅଞ୍ଚଳବ ପେରେଅ । ଅଞ୍ଚଳ ବେଳାମିଞ୍ ଜିସୁଆ ଗାତାର ମାଡେଅ । 15 ଜିସୁ ଜିଉଦି ଲୁକକା ମଜାଙ୍ ଇଞାତେ ଆବ୍ସଜ୍ତେ ଲାଗେଆନା ଆଉ ସାବୁରିଞ୍ ଲୁକକି ଜିସୁତେ ଡିଅ ଗାଙ୍ଗାମମାନ୍କି ।
ନାଜରିତ ଗଳଆ ଲୁକକି ଜିସୁତେ ଡିଅ ଆକୁୟକି
16 ଜିସୁ ନାଜରିତ ଗଳବ ପେରେଅ । ଏରାତେ ଜିସୁ କୁବାସେର । ଆରା ରିତି ଡେଗାନା, ଜିରାଏରେକି ବାରରାତେ ମଜାଙ୍ ଇଞା ଆଲୁଙ୍ବ ଡୁଇଆନା । ଇସରଆ ବଇ ଅଲାଗ୍ ପଡେତେ ତଙନାନ୍ । 17 ଇସରଆ ଗାତା ଗାତାନମାନ୍ ଲୁକ ଜିସାୟଆ ବଇ ଅଲାଗ୍ଡେ ଜିସୁତେ ପଡେତେ ଡିଞକି । ଜିସୁ ବଇ ଅଲାଗ୍ ମେଲାଅଜ ନି ଲେକାରେ କୁୟଜ ପଡେଅ, 18 "ପରବୁଆ ନିମୁଳ ଆତାମା ଆଞା ଆଲିଙା ଆସିକେ । ଦୁକି ଗରିବ ଲୁକକା ସାମୁରାକାତେ ଡିଅ ଗାତା ଗାତାଏତେ ଆଞ୍ତେ ଇସର ବାଚେସେକେ । ବନ୍ଦି ଲୁକକିତେ 'ଆପେତେ ପିପିଜ୍ ଇସେରେ' ବୁଲି ଗାଙ୍ଗାମ୍ତେ, ଅନ୍ଦ ଲୁକକିତେ 'ଆପେ ଏକଳଙ୍ ଜଜଏ ଇରିମା' ବୁଲି ଗାଙ୍ଗାମ୍ତେ ଆଉ ଜୁ ଲୁକକି ଦୁକ କସଟ କୁଇରେକି, ଏରେ ଲୁକକିତେ ମୁକୁଳାଏତେ ଇସର ଆଞ୍ତେ କିନ୍ଚେକେ । 19 ଆଉ ପରବୁ ନି ସମୟରତେ ଆରା ଲୁକରକିତେ ଦୟା କିବଜ ରକିଆ କିମିବେ, ଏରେ ଗାତାରେ ଜ ଆଞ୍ ଗାଆତାଏ ।" 20 ତା ଅଚତା ଇସରଆ ବଇ ଅଲାଗ୍ଡେ ବନ୍ଦ କିବଜ ସେବା କିକିମମାନ୍ ଲୁକରେତେ ପେରାଅଜ ଜିସୁ ଡକଆନା । ମଜାଙ୍ ଇଞାତେ ଜେତେ ଲୁକକି ଆସିଆନ୍କି ସାବୁରିଞ୍ ଜିସୁତେ ଲଙ୍ସେରକି । 21 ଜିସୁ ଗାତାଏତେ ଲାଗେଆନା "ଆପେ ଜା ମିସିଞ୍ ଏଅଙ୍ସେକେ ଏରେ ଏକଳଙ୍ ସୁତୁକୁରିଞ୍ ଇସେରେ ।" 22 ସାବୁରିଞ୍ ଜିସୁତେ ଡିଅ ଗାମକି ଆଉ "ଜିସୁ ଏରେନୁଣିଞ୍ଡ ଡିଅର ଗାତାଏକେ" ଗାମକିଜ କାବା ଇଆନ୍କି ଆଉ ଗାମକି, "ନି ଜୁସେପଆ କନନ୍ଡ ଜେନାରି?" 23 ଜିସୁ ଗାମ, "ଆଞ୍ କଙ୍କେ ଜୁ ଆପେ ଆଞ୍ତେ ନି ଉରୁଣା ଗାତାରେ ଏଗାତାଏ 'ଡାକତର ନିଜତେ ଡିଅ କିବ୍ଡେମେ । ନି ଗାତାରା ଅରତର ଇରେ, ଆମ୍ କପର୍ନାଉମ ଗଳଆତେ ଜା ଜା ମିକିବ୍ସେର ବୁଲି ନିଞ୍ ନଙ୍ସେକେ, ଏରେ ସାବୁରିଞ୍ ଆମା ନିଜ ଅବାମା ଗାଅଁରାତେ କିଲଙ୍ କିବେ ।' 24 ଏଲେ ଆଞ୍ ଗାମ୍କେ, ଇସରଆ ଗାତା ଗାତାନମାନ୍ ଲୁକକିତେ ନିଜ ଗାଆଁ ଲୁକକି ଡିଅ ଆକୁଇକିକି । 25 ଆଞ୍ ସୁତୁକୁରିଞ୍ ଗାମ୍କେ, ଏଲିଅ ବଞ୍ଚେସେର ଏରେବେଳା ତିନି ବରସ ଚଅ ମାସ ଆକାସତା ଗିମା ଆଗୁର ଆଉ ଉରୁର୍ତେ କିଚି ଆମେଳେନମାନ୍ । ଏରେବେଳା ଇସ୍ରାଏଲି ଦେସଆତେ ସୁଗାଇ ରାଣ୍ଡରାଏକି ଆସିଆନ୍କି । 26 ଏଲେ ଇସର ଏଲିଅତେ ଆରାକା ଆସରକିବ ଆକିନଜ, ସିଦନ ଗଳ ଆକଆ ସାରିପତ ଗାଆଁବ ମିନଗ୍ ଡାବୁଙ୍ ଜାତି ରାଣ୍ଡରାଏଆ ଆସରବ କିନ । 27 ଏରେ ନୁଣିଞ୍ଡ ଇଲିସାୟ ଇସରଆ ଗାତା ଗାତାନମାନ୍ ଏରେବେଳା ଇସ୍ରାଏଲ୍ ଦେସତେ ସୁଗାଇ କେଳେଞ୍ତାଙ୍ ରୁଗା ଲୁକକି ଆସିଆନ୍କି । ଏଲେ ଆରାକା ବିତିରୁ ମିନଗ୍ ବୁଲୁଙ୍ ଡିଅ ଆଇସେରାନ୍କି । ସୁରିଆ ଅଞ୍ଚଳଆ ନାମାନ ନାଅଁର ମିନଗ୍ ଡାବୁଙ୍ ଜାତି ଲୁକରେତେ ଡିଅ କିକିବ୍ ଇସେରାନା ।" 28 ମଜାଙ୍ ଇଞାତେ ଜେତିକି ଲୁକକି ଆସିଆନ୍କି ସାବୁରିଞ୍ ଏରେ ଅଙକିଜ ଚଳେଆନ୍କି । 29 ଏତେ ଏରେ ଲୁକରେକି ତଙନାନ୍କିଜ ଜିସୁତେ ଗଳ ବାଏବ ବଳେ ବଳେ ଗଗକି । ଏରେ ଉଳି ଆଲିଙାତେ ଆରାକା ଗଳ ଆସିଆନା । ଜିସୁତେ ଏରେ ଉଳି ଆଲିଙ୍ତା ତୁଳିବ ତମ୍ତମ୍ତେ ଗଗକି । 30 ଏଲେ ଏରାତେ ରୁଣ୍ଡସେରାନ୍କି ଲୁକରାକାତା ଜିସୁ ସୁଣିଞ୍କ ଡାଇଙ୍ସୁନ୍ ଡୁଙଜୁ ଆରକି ଆକଙକି ।
କଏଲଙ୍ ସବ୍ସେର ଲୁକତେ ଜିସୁ ଡିଅ କିବ
31 ଜିସୁ ଗାଲିଲି ଅଞ୍ଚଳଆ କପର୍ନାଉମ ଗଳବ ଡେନ । ଜିରାଏରେକି ବାରତେ ମଜାଙ୍ ଇଞାତେ ଲୁକକିତେ ଆବ୍ସଜ୍ତେ ଲାଗେଆନା । 32 ଜିସୁ ସୁଗାଇ ଅକ୍କରେବ ଗାତା ଗାତାନମାନ୍ । ଏତେ ଲୁକକି ଜିସୁଆ ଗାତାର ଅଙକିଜ କାବା ଇଆନ୍କି । 33 ଏରେବେଳଆ ମଜାଙ୍ ଇଞାତେ ମିନଗ୍ ଲୁକତେ କଏଲଙ୍ ସବ୍ସେର । ଆର ଲିଲାଏ ଲିଲାଏତା ଗାମ 34 "ଏ ନାଜରିତ ଗଳଆ ଜିସୁ, ନିଞା ତୁଲଙ୍ ଆମା ବିରି ଆସିକେ? ଆମ୍ ବିରି ନିଞ୍ତେ ବାଗି କିକିବ୍ତେ ମେଡେଣ୍ଡେ? ଆମ୍ ଆଡି ଏରେ ଆଞ୍ କଙ୍କେ । ଆମ୍ତେ ଇସର କିନ୍ଚେକେ ଆଉ ଇସରଆ ନିମୁଳ ଲୁକ ମାସିକେ ।" 35 ଜିସୁ କଏଲଙ୍ତେ ଦମକାଅଜ ଗାମ, "କଳେର ରଏନା ନି ଲୁକରେତା ଆରିନା ଡାଏ ।" କଏଲଙ୍ଡେ ଲୁକରେତେ ସାମୁରିଞା ସାମୁରାତେ ଉବ୍ଗୁରଜ ଲୁକରେତେ କିଚି ଆକିବଜ ଆରିଆନ୍ଜ ଡୁଙ । 36 ସାବୁରିଞ୍ ଲୁକକି କାବା ଇଆନକିଜ ଆରାକା ଆରାକା କଗାତାଆନ୍କି "ନି ବିରି ଗାତା? ଅକ୍କ ଆଉ ବଳ ଡିଞଜ ଆର କଏଲଙ୍କିତେ ଗାମ୍କେ ଆଉ କଏଲଙ୍କି ଆରିଆନ୍କିଜ ଡୁଙ୍କିକି ।" 37 ଆଉ ଏରେ ଅଞ୍ଚଳଆ ଜିସୁଆ ଗାତାର ବେଳାମିଞ୍ ଉରି ଇଆନା ।
ଜିସୁ ସୁଗାଇ ଲୁକକିତେ ଡିଅ କିବ
38 ତା ଅଚତା ଜିସୁ ଜିଉଦି ଲୁକକା ମଜାଙ୍ ଇଞାତା ତଙନାନ୍ଜ ସିମନଆ ଇଞାରବ ଅନ । ସିମନଆ ମାମିର ସୁଗାଇ ଜରନମାନା । ଲୁକକି ଜିସୁତେ ସିମନଆ ମାମିରତେ ଡିଅ କିକିବ୍ତେ ଗାତାଅକି । 39 ଜିସୁ ସିମନଆ ମାମିରା ଆସରତେ ତଙନାନ୍ଜ ଜରତେ ଦମକାଅ । ସାଙ୍ଗେ ସାଙ୍ଗେ ସିମନଆ ମାମିରା ଜର ସାଡେଅ ଆଉ ଆର ତଙନାନ୍ଜ ଆରାକା ସେବା କିବ । 40 ବେଳ ବୁଡିଆନ୍ ଅଚତା ଲୁକକି ଜିସୁଆ ଆସରବ ବାରବୁନି ରୁଗା ଲୁକକିତେ ଅରେନକି । ସାବୁରିଞା ବକବ୍ ଆଲିଙାତେ ଜିସୁ ଇତିର ଉନଜ ଡିଅ କିବ । 41 ସୁଗାଇ ଲୁକକାତା କଏଲଙ୍କି ଆରିଆନ୍କିଜ ଲିଲାଏ ଲିଲାଏତା ଗାମକି, "ଆମ୍ ଇସରଆ କନନ୍ଡ ।" ଜିସୁ ‘କିରିସ୍ଟ’ ଆସିକେ ବୁଲି ଏରେ କଏଲଙ୍ଡେକି କଙ୍ସେରକି । ଏତେ ଜିସୁ କଏଲଙ୍କିତେ ଦମକାଅଜ ଗାତାଏତେ ଆଡିଞ । 42 ମେସାର୍ତେ ମେସାର୍ତେ ଜିସୁ ଆରିଆନ୍ଜ ମୁଇଣ୍ଟ ନିଚାଙ୍କା ଜାଗାବ ଅନ । ଲୁକକି ଆରତେ ଡଗରାଏତେ ଲାଗେଆନ୍କି । ଜିସୁତେ କୁୟକିଜ "ନିତା ମିଡୁଙର" ଗାମକିଜ ରକାଏନମାନ୍କି । 43 ଏଲେ ଜିସୁ ଗାମ, "ଡାବୁଙ୍ ଡାବୁଙ୍ ଗଳରାକାତେ ଆଞ୍ତେ ଇସରଆ ରାଇଜରା ଡିଅ ଗାତାରେ ଗାତାଏତେ ମିନା । ଏତେ ଇସର ଆଞ୍ତେ କିନ୍ଚେକେ ।" 44 ଜିସୁ ଜିଉଦା ଅଞ୍ଚଳଆ ଡାବୁଙ୍ ଡାବୁଙ୍ ମଜାଙ୍ ଇଞାରାକାତେ ଆବ୍ସଜ୍ତେ ଲାଗେନମାନ୍ ।
ଜିସୁଆ ଉନୁକୁଳ ଚାଲାରକି
1 ଦିନମିଞ୍ ଜିସୁ ଗିନେସରତ କୁବା ବନ୍ଦ ଆକଲାଜ୍ତେ ତଙନ୍ଚେରାନ୍ ଆଉ ଇସରଆ ଗାତା ଅଙ୍ତେ ଜିସୁଆ ବେଳାମିଞ୍ କୁସୁକୁରିଞ୍ ଲୁକକି ପପକ୍ ପାପାଗ୍ଡମାନ୍କି । 2 ଜିସୁ କୁବା ବନ୍ଦ ଏକେଚାଜ୍ତେ ଆମ୍ବାଟ ଡଙ୍ଗା ଜୟ । କାରଙ୍ ସସମମାନ୍କି ଲୁକକି ଡଙ୍ଗାତା ଅଳେଆନ୍କିଜ ଜାଲ ଗୁଜ୍ଦାଙମାନ୍କି । 3 ଏରାତେ ଆସିଆନା ମୁଇଣ୍ଟ ଡଙ୍ଗାତେ ଜିସୁ ଡକଆନା । ଏରେ ଡଙ୍ଗାରେ ସିମନଆ ଆସିଆନା । ଜିସୁ ସିମନତେ ଗାମ, "ଡଙ୍ଗା କୁଟିଜ୍ ଲାଙ୍କାବ ଟେଲେ ।" ଡଙ୍ଗାତେ ଡକଆନ୍ଜ ଲୁକକିତେ ଆବ୍ସଜ୍ତେ ଲାଗେଆନା । 4 ଗାତା ଜେଳାଅଜ ଜିସୁ ସିମନତେ ଗାମ, " କୁଟିଜ୍ ଜିଲୁଙ୍ ଡାଗ୍ବ ଅନାପେ ବିରି କାରଙ୍ ସସବ୍ତେ ଆପେଆ ଜାଲ ତମାପେ ।" 5 ଆଉ ସିମନ ଗାମ, "ଏ ଗୁରୁ, ନିଞ୍ମାନକି ରାତିମିଞ୍ କାରଙ୍ ସସବ୍ତେ ଅଏରାଣ ନିଆନ୍ଜ କିଚି ମା ନିକୁଇଆନ୍ । ଏଲେ ଆମ୍ ମେଗାମ୍କେ ଏତେ ଆଞ୍ ଜାଲ ତମ୍କେ ।" 6 ଆରକି ଜାଲ ତମାନ୍କିଜ କାରଙ୍ ସୁଗାଇ ସବାନ୍କି ଆଉ ଆରାକା ଜାଲ ରାଜ୍ଡେ ଆରାଜ୍ଡେ ଇଆନା । 7 ଡାବୁଙ୍ ଡଙ୍ଗାରା ଲୁକରେକିତେ ସାକାଏତେ ଟାରେଅକିଜ ଡାକେଅକି । ଏତେ ଆରକି ଅନକିଜ ଅମ୍ବାଟ ଡଙ୍ଗାତେ କାରଙ୍ ଉନକିଜ ଅରେଆନା ଆଉ ଡଙ୍ଗାରେକିଆ ବୁଡିରେ ଆବୁଡିରେ ଇଆନା । 8 ଏରେ ଜୟଜ ସିମନପିତର ଜିସୁଆ ପାଦ ତୁଳିତେ ଗୁରାନ୍ଜ ଗାମ, "ଏ ପରବୁ, ଆଞା ସାମୁଞ୍ତା ଡୁଙେ ଡାଏ । ଆଞ୍ ମିନଗ୍ ପାପି ମୁଣୁସ ।" 9 କୁସୁକୁରି କାରଙ୍ ସବାନ୍କିଜ ପିତର ଆଉ ଆରା ତୁଲଙ୍ ଆସିଆନ୍କି ଲୁକରେକି କାବା ଇନିଞାନ୍କି । 10 ଜେବଦିଆ ଆମ୍ବାଟ କନନ୍ଡକିଆ ଜାକୁବ ଆଉ ଜଅନ କିଲଙ୍ ସିମନଆ ତୁଲଙ୍ ଜାଲ ପକାଏନମାନ୍କିଆ । ଆରକିଆ କିଲଙ୍ ଏରେନୁଣିଞ୍ଡ କାବା ଇଆନ୍କିଆ । ଜିସୁ ସିମନତେ ଗାମ, "ଆମ୍ ମେବେତଙାନ୍ଡ । ମିସିଞ୍ତାସୁନ୍ ଆମ୍ ଜିମିତି କାରଙ୍ ମେସସମମାନ୍, ଏରେ ନୁଣିଞ୍ଡ ଆଞା ଆସଞ୍ବ ଲୁକକିତେ ମରେନେ ।" 11 ଆରକି ଡଙ୍ଗାରେକିଆ ଡାଗ୍ କାନ୍ତବ ଅରେନକିଜ ସାବୁରିଞ୍ ଗିନିସ ପତରରେକି ସାଡେଅକିଜ ଜିସୁଆ ଅଚ ଅଚର ଅନକି ।
ଜିସୁ କେଳେଞ୍ତାଙ୍ ଲୁକତେ ଡିଅ କିବ
12 ଜିସୁ ମୁଇଣ୍ଟ ଗଳଆତେ ଆସିଆନ୍ । ଏରେବେଳା ଏରାତେ ମିନଗ୍ ଲୁକ ଆସିଆନା । ଆରା ଇଣିରା ବେଳାମିଞ୍ କେଳେଞ୍ ଇନିଞ୍ଚେରାନ୍ । ଏରେ ଲୁକରେ ଜିସୁତେ ଜୟଜ ଆରା ପାଦତୁଳିତେ ଗୁରାନ୍ଜ ଗାମ, "ଏ ପରବୁ, ଆମ୍ ମନ ମିକିବଜ ଆଞ୍ତେ ଡିଅ କିକିବ୍ ମିରିମା । ଆଉ ଲୁକକି ଆଞ୍ତେ 'ସାପା ମିସେରେ' ଗାମାମ୍କି " 13 ଏତେ ଜିସୁ କେଳେଞ୍ତାଙ୍ ଲୁକରା ଇଣିରତେ ଜିବଜ ଗାମ, "ଆଞ୍ ମନ କିବ୍କେ ଆମ୍ ଡିଅ ଇନା ।" ସାଙ୍ଗେ ସାଙ୍ଗେ କେଳେଞ୍ତାଙ୍ ଲୁକରେ ଡିଅ ଇଆନା । 14 ଜିସୁ ଗାମ, "କିଏତେ ମେଗାତାଅର । ଏଲେ ଅନା ନାଗମା ସାମୁରାତେ ଆବ୍ଜଏରମା । ମସା ଜୁ ଜୁ ବଳି ଗାତାଏସେକେ ଏରେ ସମୁନ୍ଦାଏ ବଳିରେ ମିକିବେ । ଏରେ ମିକିବଜ ଲୁକକି କମଙ୍କି ଜୁ ଆମ୍ ସାପା ମିସେରେ ।" 15 ଏଲେ ଜିସୁଆ ଗାତାର ବେଳାମିଞ୍ ଉରି ଇନିଞାନା ଆଉ ସୁଗାଇ ଲୁକକି ଜିସୁଆ ଗାତାର ଅଙ୍ତେ ଆଉ ନିଜ ନିଜଆ ରୁଗରକି ଡିଅ ଇତେ ଜିସୁଆ ଆସରବ ଡେନକି । 16 ଏଲେ ଜିସୁ ବେଳେ ବେଳେ ନିଚାଙ୍କା ଜାଗାବ ଅନଜ ପାତାନା କିକିମମାନ୍ ।
ଜିସୁ ମିନଗ୍ ଡାଜିଙ୍ ଆରିମମାନ୍ ବାତୁଆ ଲୁକତେ ଡିଅ କିବ
17 ଦିନମିଞ୍ ଜିସୁ ଆବ୍ସଞମାନ୍ । ଏରେବେଳା ଗାଲିଲି ଅଞ୍ଚଳଆ ସାବୁରିଞ୍ ଗାଅଁତା ଆଉ ଜିଉଦା ଅଞ୍ଚଳତା ଆଉ ଜିରୁସାଲମତା ଡେଞ୍ଚେରକି ପାରୁସି ଲୁକକି ଆଉ ଇସରଆ ଗାତା ଆବ୍ସଞମାନ୍ ଲୁକକି ଏରାତେ ଡକସେରାନ୍କି । ଲୁକକିତେ ଡିଅ କିକିବ୍ତେ ପରବୁ ଜିସୁତେ ବଳସକତି ଡିଞ୍ଡିଞମାନ୍ । 18 ଏରେବେଳା ମିନଗ୍ ଲୁକତେ କଟ ମେସା ତିନ୍ତାରାକିଜ କିତିକ ଲୁକକି ଗଗ୍ସେରକି । ଆରତେ ଆଲୁଙ୍ବ ଜିସୁଆ ସାମୁରବ ଗଗଗ୍ତେ ମନ କିକିବ୍ମମାନ୍କି । 19 ଲୁକକି ସୁଗାଇ ଏତେ ଜିସୁଆ ଆସରବ ଗଗଗ୍ତେ ଗଟାଙ୍ ଆକୁୟକି ,ଏତେ ଇଞା ଆଲିଙ୍ବ ଡାଜାନ୍କିଜ ଜିସୁ ଜୁଆତେ ତଙନ୍ଚେରାନା, ଏରେ ସିଦାରେ କାମାଣାଅକି ଆଉ ଡାଜିଙ୍ ଆରିମମାନ୍ ଲୁକରେତେ ଦାଉଳା ତରକିଜ ଆଟିଆ ମେସା ତୁଳିବ ଅବ୍ଳେଅକି । 20 ଜିସୁ ଲୁକରାକା ବିସାସ ଜୟଜ ଗାମ, "ଜଳା, ଆମା ପାପ ସାବୁରିଞ୍ କେମା କିକିବ୍ ଇଆନା ।" 21 ପାରୁସି ଲୁକକି ଆଉ ଅର୍ଦାନକି ଆରାକା ଆରାକା ରେଙ୍ଗେ ଚେଙ୍ଗେ ଇଆନ୍କିଜ କଗାତାନ୍କି "ଏରେ ଲୁକରେ ଇସରଆ ନିନ୍ଦା କିବଜ ଗାତାଏକେ । ଆର ଆଡି? ଇସର ଆଇଆନ୍ଜ ଆଡି ପାପ କେମା କିକିବ୍ ରିମିମା?" 22 ଏଲେ ଜିସୁ ଆରାକା ମନ ଗାତାରକି କଙଜ ଆରକିତେ ଗାମ, "ଆପେ ବିତେ ନୁଣିଞ୍ଡ ମନେ ମନେ ଏଗାତାରେ? 23 ଇନି ଲୁକରେତେ ବିରି ଗାମଜ ସଅଜ ମିନା? 'ଆମା ପାପ ସାବୁରିଞ୍ କେମା କିକିବ୍ ଇଆନା' ଏରେ ନୁଣିଞ୍ ଗାତାଏ ବା 'ଆମ୍ ତଙନାଜ ଡୁଙେ ଡାଏ' ବୁଲି ଗାତାଏ । 24 ଏଲେ ମୁଲକଆ ଲୁକକା ପାପ କେମା କିକିବ୍ତେ ମୁଣୁସ କନନ୍ଡା ଅକ୍କ ଆସିକେ । ଇନି ଜିମିତି ଆପେ ଏକଳଙ୍ କଙ୍କଙ୍ ଇରମା ।" ଏରେ ନୁଣିଞ୍ ଜିସୁ ଗାମ ବିରି ଅଚତା ଡାଜିଙ୍ ଆରିମମାନ୍ ବାତୁଆ ଲୁକରେତେ ଗାମ, "ଅଙେ, ଆଞ୍ ଆମ୍ତେ ଗାମ୍କମ୍ ବୁଳୁନା ଆମା କଟମ୍ଡେ ସମା ବିରି ଇଞାବ ଡୁଙେ ଡାଏ ।" 25 ସାବୁରିଞ୍ ଲୁକକି ଜଜଏନମାନ୍କି, ଲୁକରେ ସାଙ୍ଗେ ସାଙ୍ଗେ ବୁଳୁରାନ୍ ଆଉ ଜୁ କଟରାତେ ଗୁଚଗ୍ସେରାନା ଏରେ କଟରେ ସବାନ୍ଜ ଇସରତେ ଦନିଅବାଦ ଡିଞଜ ଇଞାବ ଡୁଙ । 26 ସାବୁରିଞ୍ ଲୁକକି କାବା ଇଆନ୍କି ଆଉ ବେତଙାନ୍କିଜ ଗାମକି, "ଇସର ଡିଅ ଆସିକେ । ମିସିଞ୍ ନିଞ୍ କାବା କମ ନେଜସେକେ ।"
ଲେବି ନାଅଁର ମିନଗ୍ ଲୁକ ଜିସୁଆ ଚାଲାର ଇଆନା
27 ତା ଅଚତା ଜିସୁ ଏରେତା ଡୁଙ । ଏରେ ବେଳା ମୁଇଣ୍ଟ ଲୁକତେ ଜୟ, ନାଅଁର ଲେବି । ଲେବି ମାସୁଲି ଡିଞ୍ଡିଞ୍ଞମାନ୍କି ଏରେ ଜାଗାରାତେ ଡକସେରାନ୍ । ଆର ମାସୁଲି ଟୁଳାଏନମାନ୍ ଲୁକ ଆସିଆନା । ଜିସୁ ଲେବିତେ ଗାମ, "ଆଞା ଅଚ ଅଚ ଡେନା, ଉଆ ।" 28 ଲେବି ସାବୁରିଞ୍ ଗିନିସ ପତର ସାଡେଅଜ ତଙନାନ୍ଜ ସୁବୁ ଦିନ ଲାଗି ଜିସୁଆ ଅଚ ଅଚର ଅନ । 29 ଲେବି ଇଞାରାତେ ଜିସୁଆ ଲାଗି ମୁଇଣ୍ଟ କୁବା ବାତୁଲି କିବ । ମାସୁଲି ଟୁଳାଏକିକି ଲୁକକି ଆଉ ଡାବୁଙ୍ ଲୁକକି ସୁଗାଇ ଆରାକା ତୁଲଙ୍ ଉରୁର୍ତେ ଡକଆନ୍କି । 30 ପାରୁସି ଲୁକକି ଆଉ ଅର୍ଦାନକି ଜିସୁଆ ଚାଲାରକା ବିରୁଦରେ ଗାତା ଗାତାଅକିଜ ଗାମକି, "ଆପେ ବିତେ ମାସୁଲି ଟୁଳାଏକିକି ଲୁକକା ତୁଲଙ୍ ଆଉ ପାପି ଲୁକକା ତୁଲଙ୍ ଇଉର୍କେ?" 31 ଜିସୁ ଆରକିତେ ଗାମ, "ଡିଅ ଲୁକକିତେ ଡାକତର ଦରକାର ଜେନା । ଏଲେ ରୁଗା ଲୁକକିତେ ଡାକତର ଦରକାର । 32 ଆଞ୍ ଡିଅ ଲୁକକିତେ 'ମନ ବଦଳାଏନାପେ' ଗାଙ୍ଗାମ୍ତେ ଡେଙ୍ଗର୍ ଜେନା । ଏଲେ ପାପି ବାଗି ଲୁକକିତେ 'ମନ ବଦଳାଏନାପେ' ଗାଙ୍ଗାମ୍ତେ ଡେନ୍ଚେରେ ।"
ଲୁକକି ଜିସୁତେ ଜିଙକି "ଆମା ଚାଲାମ୍ଡେକି ବିତେ ଉପାସ ଆରଏରେକି?"
33 ଲୁକକି ଜିସୁତେ ଗାମକି, "ଜଅନଆ ଚାଲାରକି ଆଉ ପାରୁସି ଲୁକକି ଉପାସ ପାତାନା କିବ୍ଡେକି । ଏଲେ ଆମା ଚାଲାମ୍ଡେକି ବିତେ ଉରୁର୍ତେ ଜିମ୍ଜିମ୍ତେ ଲାଗେରେକି?" 34 ଏତେ ଜିସୁ ଲୁକକିତେ ଗାମ, "ବରକୁଳିଆକା ତୁଲଙ୍ ବର ଆସି ଜାକଜ୍ ବରକୁଳିଆକିତେ 'ଉପାସ ରଏନାପେ' ଗାଙ୍ଗାମ୍ ଇରିମାରି? 35 ଏଲେ ବେଳ ଡେମେନା, ଜେତେବେଳେ ଆରାକାତା ବରତେ ଗଗଗ୍ ମିନା । ଏରେବଳତେ ଆରକି ଉପାସ ରମଏନାକି ।" 36 ଜିସୁ ଆରକିତେ ଆଗଆ ଡେଗାନ୍ ଗାତାଅ । "କେଇ ନୁଆ କତେରେ ରାଜଜ ଉରୁଣା କତେରେବ ସିଲାଏ ଜେନା । ଏରେ ନୁଣିଞ୍ଡ ଇସିଲାଅଜ ନୁଆ କତେରେ ସେସେଜ୍ତେ ମିନା ଆଉ ଉରୁଣା କତେରେ ନୁଆ କତେବ ଆମେସେରେ ବି ଜେନା । 37 କେଇ ନୁଆ ଅଙ୍ଗୁର ରସରା ମଦ ଉରୁଣା ଚାଲ ଆଟିକାତେ ଆଉଣ୍ଡେ ଜେନା । ଉରୁଣା ଚାଲ ଆଟିକାତେ ଉନଜ ଅଙ୍ଗୁର ରସରା ମଦରେ କଡା ଇଆନ୍ଜ ଏରେ ଚାଲ ଆଟିକାରେତେ କାମାପ୍ଟି । ଅଙ୍ଗୁର ରସରା ମଦରେ ଆଉ ଆଟିକାରେ ବାଗି ମିନା । 38 ଏଲେ ନୁଆ ଅଙ୍ଗୁର ରସ ନୁଆ ଚାଲ ଆଟିକାତେ ଉନୁନ୍ତେ ମିନା । 39 ଲୁକକି ଉରୁଣା ଅଙ୍ଗୁର ରସରା ମଦ ଉରକିଜ ନୁଆ ଅଙ୍ଗୁର ରସରା ମଦ ଉରୁର୍ତେ ମନ ଆକିବ୍କିକି । ଆରକି ଗାମାମ୍କି 'ଉରୁଣା ଅଙ୍ଗୁର ରସରା ମଦରେର ଡିଅ ।' "
ଜୁ ବାରତେ ଜିରାଏରେକି, ଏରେ ବାରରା ଜିସୁ ଗାତାଅ
1 ମିସିଆଁ ଜୁ ବାରତେ ଜିରାଏରେକି, ଏରେ ବାରତେ ଜିସୁ ଆଉ ଆରା ଚାଲାରକି ମୁଇଣ୍ଟ ବିଲ ମୁଜି ଗଟାଙ୍ତା ଅଙ୍ଗର୍ନମାନ୍କି । ଚାଲାରକି ଡାଇଙ୍ ଡାଇଙ୍ ବୁଆ ସିସାରକି କେକେଜାନ୍କି । ଆଉ ବୁଆରେକିତେ ଇତିରକିବ ମସଟେଆନ୍କିଜ କକବ୍ମମାନ୍କି । 2 ଏରେ ଜୟକିଜ ପାରୁସି ଲୁକକି ଜିସୁତେ ଗାମକି, "ଜିରାଏରେକି ବାରତେ ଜା କିକିବ୍ ଆଇତାନ୍ ଜେନା, ଏରେ ଆମା ଚାଲାମ୍ଡେକି ବିତେ କିବ୍କିକି?" 3 ଜିସୁ ଆରକିତେ ଗାମ, "ଦାଉଦ ଆଉ ଆରା ତୁଲଙ୍ ଆସିଆନ୍କି ଲୁକକିତେ ତିଲାଜାନ୍କି, ଏରେ ବେଳା ଆରକି ବିରି କିବ୍ସେରକି? ଏରେ ବିରି ଆପେ ଇସରଆ ନିମୁଳ ବଇ ଅଲାଗ୍ଡେ ପଡେ ଜେନା? 4 ଦାଉଦ ଇସରଆ ପାତାନା ଇଞାରତେ ଡୁଇରାନ୍ ଆଉ ଉଜା ଅଳାଗ୍ଡେ ଜିମ ଆଉ ଏରେ ଲୁକରେକିତେ ବି ଡିଞ । ଉଜା ଅଳାଗ୍ଡେ ଉଡାଇ ନାଗମ୍କି ଜିମ୍ଜିମମାନ୍କି ଆଉ କେଇ ଆଜିମ୍କିକି ଜେନା ।" (ଏଲେ ଦାଉଦ ଜିମ ଏରେ ବେଳା କେଇ ଆରତେ ବାଗି ମା ଗାତାଅକି ।) 5 ତା ଅଚତା ଜିସୁ ଏରେ ଲୁକରେକିତେ ଗାମ, "ମୁଣୁସ କନନ୍ ଜିରାଏରେକି ବାରଆ ଜ ମାଲିକ ଆସିକେ ।"
ଜିରାଏରେକି ବାରତେ ଜିସୁ ମିନଗ୍ତେ ଡିଅ କିବ
6 ଆଉ ମୁଇଣ୍ଟ ଜିରାଏରେକି ବାରତେ ଜିସୁ ଜିଉଦି ଲୁକକା ମଜାଙ୍ ଇଞାବ ଡୁଇରାନ୍ଜ ଆବ୍ସଜ୍ତେ ଲାଗେଆନା । ଏରାତେ ମୁଇଣ୍ଟ ଲୁକ ଆସିଆନା, ଆରା ଡିଅ ଇତିରତା କସର୍ଚେର । 7 ପାରୁସି ଲୁକକି ଆଉ ଅର୍ଦାନକି ଜିସୁତେ ଦୁସ ସସବ୍ତେ ଡଗରାଏନମାନ୍କି । "ଜିସୁ ଜିରାଏରେକି ବାରତେ ଡିଅ କିମିବେ ନାରି?" ଗାମକିଜ ଜିସୁତେ ଲଙ୍ସେରକି । 8 ଏଲେ ଜିସୁ ଆରାକା ମନ ଗାତା କଙଜ ଜୁ ଲୁକରା ଡିଅ ଇତିର କସର୍ଚେର ଏରେ ଲୁକରେତେ ଗାମ, "ଉଆ ସାବୁରିଞ୍ ଲୁକକା ମୁଜିତେ ତଙନା ।" ଲୁକରେ ଆସିଆନ୍ଜ ମୁଜିଆତେ ତଙନାନ୍ । 9 ଜିସୁ ପାରୁସି ଲୁକକିତେ ଆଉ ଅର୍ଦାନକିତେ ଗାମ, "ଆଞ୍ ଆପେତେ ଜିଙ୍କେ । ଜିରାଏରେକି ବାରତେ ଇସରଆ ନିୟମ ଦିରେ ବିରି କିକିବ୍ ମିନା? ଡିଅ କିକିବ୍ ମିନାରି ବାଗି କିକିବ୍ ମିନା? ମିନଗା ଜିବନର ବଞ୍ଚାଏ ମିନାରି ଅବ୍ଗଜ୍ ମିନା?" 10 ଜିସୁ ବେଳାମିଞ୍ ସାବୁରିଞ୍ତେ ଲଙଜ ଲୁକରେତେ ଗାମ, "ଆମା ଇତିମ୍ଡେ ସଳକ କିମା ।" ଏତେ ଲୁକରେ ଏରେ ନୁଣିଞ୍ଡ କିବ । ଏରେତାସୁନ୍ ଆରା ଇତିର ଡିଅ ଇଆନା । 11 ଏଲେ ଜୟକିଜ ଅର୍ଦାନକି ଆଉ ପାରୁସି ଲୁକକି ଚଳେଆନ୍କି । "ଜିସୁତେ ବିରି କିକିବ୍ ମିନା" ଗାମକିଜ ଆରାକା ଆରାକା କଗାତାଆନ୍କି ।
ଜିସୁ ବାର ଜଣ ଚାଲାରକିତେ ବାଚେଅଜ ଇସରଆ ଗାତା ଗାତାଏତେ କିନ
12 ଏରେ ସମୟରା ମିସିଆଁ ଜିସୁ ପାତାନା କିକିବ୍ତେ ମୁଇଣ୍ଟ ଉଳି ଆଲିଙ୍ବ ଅନ । ରାତିମିଞ୍ ପାତାନା କିବ୍ତା କିବ୍ତା କମେସାର । 13 ତା ଆର ଦିନ ସେକାଳତେ ଜିସୁ ଆରା ଚାଲାରକିତେ ଡାକେଅଜ ବାର ଜଣ ଚାଲାରକିତେ ବାଚେଅ । ଜିସୁ ଆରକିତେ ‘ଜିସୁ କିନ୍ଚେକେ ଚାଲାରକି’ ନାଅଁ ଡିଞ । 14 ଆରକି ଇରେକି: ସିମନ (ଜିଏତେ ଜିସୁ "ପିତର" ନାଅଁ ଡିଞ), ଆରା ବକର ଆନ୍ଦିରିଅ, ଜାକୁବ, ଜଅନ, ପିଲିପ, ବାର୍ତଲମି, 15 ମାତିଉ, ତମା, ଅଲପିଆ କନନ୍ଡ ଜାକୁବ, ସିମନ (ନି ଲୁକରେ ଇସ୍ରାଏଲ ଦେସତେ ଡିଅ ବୁଜିନମାନ୍ ଆଉ ରମିଅ ଲୁକକା ବିରୁଦରେ ତଙନମାନ୍), 16 ଜାକୁବଆ କନନ୍ଡ ଜିଉଦା ଆଉ କାରିଅତ ଦେସତା ଡେଞ୍ଚେର ଜିଉଦା (ଏରେ ଲୁକରେ ଅଚତା ଜିସୁତେ ବଣ୍ଡେଅଜ ସତୁରୁକା ଇତିରାକାତେ ଅସବ) ।
ଜିସୁ ସୁଗାଇ ଲୁକକିତେ ଆବ୍ସଜ
17 ଜିସୁ ଆରାକା ତୁଲଙ୍ ଉଳିତା ତୁଳିବ ଅଳେଆନ୍ଜ ସମାନ ପାଦାଜାଗାବ ଡେନଜ ତଙନାନ୍ । ଏରେ ଜାଗାରାତେ ଜିସୁଆ କୁସୁକୁରି ଚାଲାରକି ଆସିଆନ୍କି । ଆଉ ଜିରୁସାଲମ ଗଳତା, ଜିଉଦା ଅଞ୍ଚଳତା ଆଉ ସୁର ଆଉ ସିଦନ ଅଞ୍ଚଳଆ ସମୁନ୍ଦର ଆକ ଜାଗାରେକିତା ସୁଗାଇ ଲୁକକି ଡେନକିଜ ଏରାତେ ଟୁଳସେରାନ୍କି । 18 ଆରକି ଜିସୁଆ ଗାତାର ଅଙ୍ତେ ଆଉ ରୁଗତା ଡିଅ ଇତେ ଏରେବ ଡେନ୍ଚେରକି । କଏଲଙ୍ ସବ୍ସେର ସୁଗାଇ ଲୁକରେକି ଡିଅ ଇଆନ୍କି । 19 ଜିସୁଆ ସାମୁରାତା ବଳସକତି ଆରିନମାନା ଏତେ ଲୁକକି ଜିସୁତେ ଜିଜିବ୍ତେ ମନ କିକିବ୍ମମାନ୍କି । ସାବୁରିଞ୍ ରୁଗା ଲୁକକିତେ ଜିସୁ ଡିଅ କିକିମମାନ୍ । 20 ଜିସୁ ଆରା ଚାଲାରକିତେ ଲଙଜ ଗାମ, "ଆପେ ଜୁ ଏକଳଙ୍ ଗରିବ ଏଆସିକେ, ଇସରଆ ରାଇଜରେ ଗରିବ ଲୁକକା ଲାଗି ଆସିକେ, ଏତେ ଆପେ ଦନିଅ । 21 ଆପେ ଜୁ ଏକଳଙ୍ ତିଲାଜ୍ ଏଆସିକେ, ଦିନମିଞ୍ ଆପେ ଇତିବ୍ ବୁସୁର୍ଜାକଜ୍ ଇଉରେ,ଏତେ ଆପେ ଦନିଅ । ଆପେ ଜୁ ଏକଳଙ୍ ଏଜେକେ, ଦିନମିଞ୍ ଆପେ ଏଲାରାଏ, ଏତେ ଆପେ ଦନିଅ । 22 ଆପେ ମୁଣୁସ କନନ୍ତେ (ଜିସୁତେ) ବିସାସ ଇକିବ୍କେ । ଏତେ ଲୁକକି ଜଦି ଆପେତେ ବାଗି ବୁଜିଅକିଜ ଆମେସାଏକିକି ଜେନା ଆଉ ନିନ୍ଦା ଡିମିଞେକି ଆଉ ଆପେଆ ବିସୟରେ ବାଗି ଗାତା ଗାମାତାଏକି, ତା ଏଲେ ଆପେ ଦନିଅ । 23 ଆପେଆ ଲାଗି ସରଗଆ ସୁଗାଇ ପୁରସ୍କାର ଆସିକେ । ଏତେ ଏରେରା ଲାଗି ଆପେ କୁସିରେ କିଜେପେ । ଏରେ ଲୁକରାକା ଅବାରକି ଜ ଇସରଆ ଗାତା ଗାତାନମାନ୍କି ଲୁକକିତେ, ଏରେନୁଣିଞ୍ଡ ନିନ୍ଦା କିକିବ୍ମମାନ୍କି । 24 "ଏଲେ ଦନି ଲୁକକି, ଆପେ ଏକଳଙ୍ ଡିଅକୁସିରେ ଏରଏରେ । ଅଚତା ଆପେଆ ସୁଗାଇ କସଟ ଡେମେନା । 25 ଆପେ ଏକଳଙ୍ ଇତିବ୍ ବୁସୁ ଜାକଜ୍ ଇଉର୍କେ । ଏଲେ ଅଚତା ଆପେଆ ସୁଗାଇ କସଟ ଡେମେନା ଆଉ ଆପେ ତିଲାଜ୍ ଏରଏନା । ଆପେ ଜୁ ଏକଳଙ୍ ଏଲାରାକେ । ଏଲେ ଅଚତା ଆପେଆ ସୁଗାଇ କସଟ ଡେମେନା । ଆପେ ଏରେବଳତେ ଏଜେଗେ । 26 ଆପେ ଜୁ ଲୁକକିତେ ନି ଲୁକରେକି 'ଡିଅ' ବୁଲି ଏଗାମ୍କେ, ଅଚତା ଆରାକା ସୁଗାଇ କସଟ ଡେମେନା । ଆଗିଲା କିତିକ ଲୁକକି 'ଆଞ୍ ଇସରଆ ଗାତା ଗାତାକେ' ଗାମକିଜ ଲୁକକିତେ ବଣ୍ଡାଏନମାନ୍କି । ଏରେ ଲୁକରେକିଜ ନି ଲୁକରାକା ଅବାରକି 'ଡିଅ' ବୁଲି ଗାଙ୍ଗାମମାନ୍କି ।"
ସୁତୁରୁକିତେ ଡିଅ କୁୟେପେ
27 ଜିଏ ଆଞା ଗାତାଞ୍ଡେ ଅଙ୍କେ, ଆରକିତେ ଆଞ୍ ଗାମ୍କେ । ଆପେ ସୁତୁରୁକିତେ ଡିଅ କୁୟେପେ । ଜୁ ଲୁକକି ଆପେତେ ବାଗି ବୁଜିକିକି, ଆରକିତେ ଡିଅ ବୁଜିପେ । 28 ଜୁ ଲୁକକି ଆପେତେ ସମ୍ପେକିକି, ଆରକିତେ ଆପେ କମ୍ଡର୍ଚେନାପେ ଗାମେପେ । ଜୁ ଲୁକକି ଆପେତେ ନିନ୍ଦା ଡିଞ୍କିକି, ଆରାକା ଲାଗି ପାତାନା କିବେପେ । 29 ମିନଗ୍ ଲୁକ ଆପେତେ ମସାଙ୍ ଗାଲତେ ଚାପଡ ମାରେଅଜ, ଆରତେ ଆଉ ମସାଙ୍ତା ଗାଲପେରେ କିଲଙ୍ ଆବ୍ଜଏପେ । ଜୁ ଲୁକ ଆପେଆ ଚାଦର ଗଗ୍ଡେ, ଆରତେ ଆପେ ଉଙ୍ଗିପେରେ କିଲଙ୍ ଗଗଗ୍ତେ ଡିଞେପେ । 30 ଜିଏ ଆପେତେ ଗାର୍ଡେ, ଆରତେ ଡିଞେପେ । ଜଦି ମିନଗ୍ ଆପେଆ ଗିନିସ ଗଗ୍ଡେ, ଆରତେ " ଆଞା ଗିନିସଞ୍ଡେ ଆନେ" ଏଗାମର । 31 ଲୁକକି ଜିମିତି ଆପେତେ ଡିଅ କିମିବେକି ବୁଲି ଆପେ ମନ ଇକିବ୍କେ, ଏରେ ନୁଣିଞ୍ଡ ଆରକିତେ କିଲଙ୍ ଡିଅ କିବେପେ । 32 ଆପେତେ ଜୁ ଲୁକକି ଡିଅ କୁଇକିକି, ଆପେ ଉଡେଇ ଆରକିତେ ଡିଅ ଇକୁଇଅଜ ଆପେ ବିରି ପୁରସ୍କାର ଇକୁଇନା ? ପାପି ଲୁକକି କିଲଙ୍ ଏରେ ନୁଣିଞ୍ଡ କିବ୍କିକି । 33 ଆପେତେ ଜୁ ଲୁକକି ଡିଅ ଉପକାର କିବ୍କିକି, ଆପେ ଉଡେଇ ଆରକିତେ ଡିଅ ଉପକାର ଇକିବଜ ଆପେ ବିରି ପୁରସ୍କାର ଇକୁଇନା? ପାପି ଲୁକକି କିଲଙ୍ ଏରେ ନୁଣିଞ୍ଡ କିବ୍କିକି । 34 ଜୁ ଲୁକକାତା କୁକୁଇତେ ଆସା ଆସିକେ, ଆରକିତେ ରୁଣ ଟାଙ୍କା ଇଡିଞଜ ଆପେ ବିରି ପୁରସ୍କାର ଇକୁଇନା? ପାପି ଲୁକକି କିଲଙ ଏରେ ନୁଣିଞ୍ଡ "ନିକୁଇନାକ" ଗାମକିଜ ରୁଣ ଡିଞ୍ଡେକି । 35 ଏଲେ ଆପେ ବିରି ଇକିମା ଏରେ ଆଞ୍ ଗାତାଏ । ଆପେଆ ସୁତୁରୁ ଲୁକକିତେ ଡିଅ କୁଇଏପେ । ଲୁକକିତେ ଉପକାର କିବେପେ । ଆପେ ରୁଣ ଇଡିଞଜ ଏରେ ଟାଙ୍କାରେ ‘ନିକୁଇନା’ ବୁଲି ଆସା ଇକିବର । ଏରେ ନୁଣିଞ୍ଡ ଇକିବଜ ଆପେ ସୁଗାଇ ପୁରସ୍କାର ଇକୁଇନା । ଆଉ ଆପେ ସାବୁରିଞାତା କୁବା ଇସରଆ କନନ୍ଡକି ଇନା । ଜୁ ଲୁକକି ବାଗି କମ କିବ୍କେକି ଆଉ ଇସରତେ ଦନିଅବାଦ ଆଡିଞ୍କିକି ଏରେ ଲୁକକିତେ କିଲଙ୍ ଇସର ଦୟା କିବ୍କେ । 36 ଆପେଆ ଅବାପେ ଇସର ଜିମିତି ଦୟାଳୁ ଆସିକେ, ଆପେ କିଲଙ୍ ଏରେ ନୁଣିଞ୍ଡ ଦୟାଳୁ ଇନାପେ ।
କାରିଆ ବିଚାର ଇକିବର
37 "ଆପେ କାରିଆ ବିଚାର ଇକିବର । ତା ଏଲେ ଆପେତେ ଇସର ବିଚାର ଆକିବ୍କେ ଜେନା । ଲୁକକା ଦୁସ ଏସବର । ତା ଏଲେ ଆପେତେ ଦୁସି ବୁଲି ଇସର ଆଗାମ୍କେ ଜେନା । ଲୁକକିତେ ଆପେ କେମା ଇକିବେ । ତା ଏଲେ ଆପେତେ ଇସର କେମା କିମିବେ । 38 ଦାନ ଡିଞେପେ । ତା ଏଲେ ଆପେତେ କିଲଙ୍ ଦାନ ଡିଞ୍ଡିଞ୍ ମିନା । ବାଟିତେ ଜିମିତି ଦବ୍ଲାଏ ଦବ୍ଲାଏତା ଅରେଆନ୍ଜ ଅଳଗ୍ଡେ । ଏରେ ନୁଣିଞ୍ଡ ଆପେତେ ଡିଞ୍ଡିଞ୍ ମିନା । ଆପେ ଲୁକକିତେ ଜୁ ବାଟିରାତେ ଇଡିଞ୍କେ, ଏରେ ବାଟିରାତେ କିଲଙ୍ ଆପେତେ ଡିଞ୍ଡିଞ୍ ମିନା ।" 39 ଜିସୁ ଆରକିତେ ମୁଇଣ୍ଟ ଆଗଆ ଅଳଙ୍ଗର ଗାତାଅ । "ଅନ୍ଦ ବିରି ଅନ୍ଦତେ ଗଟାଙ୍ କାଡାଏ ରିମିମା? ଆରକିଆ ବିରି ବାନଣଙ୍ ଗଟାଙ୍ତା ଡଡାବ ଆଗୁର୍ଡିକିଆ ଜେନା ବିରି? 40 ମିନଗ୍ ଚାଲା ଗୁରୁଆତା କୁବା ଆଇରେ ଜେନା । ଏଲେ ଚାଲାରେ ସାବୁରିଞ୍ ଗାତା ପଡେ ଉଟାଅଜ ଆରା ଗୁରୁଆ ଡେଗାନ୍ ଗୁରୁ ମିନା । 41 ଆମା କାକାମା ଅମର୍ଡାତେ କାଟିକିଲାଗ୍ ଗୁଣ୍ଡ ଅଲଗାନ୍ଜ ତୁଲଗ୍ସେରେ । ଏରେ ଗୁଣ୍ଡରେତେ ବିତେ ଆମ୍ ମେଜକେ? ଆମା ନିଜଆ ଅମର୍ନମା କାଟିକିଲାଗ୍ ଅଳଗ୍ସେରେ । ଏରେ ବିତେ ମା ମେଜରେ? 42 ଆମ୍ ଆମା ଅମର୍ନମା ଅଳଗ୍ସେରେ କାଟିକିଲାଗ୍ଡେ ନିଜେ ଜଜ ମା ମିରିମ୍ଡେ । ତା ଏଲେ ଆମ୍ ସୁଣିଞ୍ଡ କାକାମ୍ତେ ଗାଙ୍ଗାମ୍ ମିରିମା 'କା ଉଆ, ଆମା ଅମନମା ଅଳଗ୍ସେରେ କାଟିକିଲାଗ୍ ଗୁଣ୍ଡରେ ଆବିରାଏକେ ।' ଏ କୁପୁଟିଆ ବାଗି ଲୁକ, ଆଗିଲା ଆମା ନିଜଆ ଅମନମା ଅଳଗ୍ସେରେ କାଟିକିଲାଗ୍ ଗୁଣ୍ଡିରେ ଆବିରାଏନାତା । ଏଲେ ଆମ୍ ଡିଅର ଜଜଏ ମିରିମା । ଆଉ ଅଚତା କାକାମା ଅମର୍ଡା ଅଳଗ୍ସେରେ କାଟିକିଲାଗ୍ ଗୁଣ୍ଡିରେ ମାବିରାଏ ।"
ସୁମୁସିଞା ଲାକୁ
43 "ମୁଇଣ୍ଟ ଡିଅ ସୁମୁସିଞାତେ ଆସଙ୍ଡ ଲାକୁ ଆଲାକୁକେ ଜେନା । ଆଉ ମୁଇଣ୍ଟ ଆସଙ୍ ସୁମୁସିଞ୍ଡେତା ସୁଆଦ ଲାକୁ ଆଲାକୁକେ ଜେନା । 44 ଜୁଳାଗ୍ ସୁମୁସିଞ୍ତା ଲୁକକି ଡୁମ୍ବୁରି ଲାକୁ ଆକୁଇରେକି ଜେନା । ଜୁଳାଗ୍ ସୁମୁସିଞ୍ତା ଅଙ୍ଗୁର ଲାକୁର ଜ ଆକୁଇରେକି ଜେନା । ଲାକୁତା ସାବୁରିଞ୍ ସୁମସିଙ୍ତେ ତାମାନ୍ ଇରେ । 45 ଏରେ ନୁଣିଞ୍ଡ ମିନଗ୍ ଡିଅ ଲୁକରା ମନ ଆଲୁଙା ଡିଅ ଗାତା ସାବୁରିଞ୍ ଉନ୍ଚେରେ । ଏତେ ଆର ଡିଅ ଗାତା ଗାତାଏକେ । ଏଲେ ମିନଗ୍ ବାଗି ଲୁକରା ମନ ଆଲୁଙା ବାଗି ଗାତା ସାବୁରିଞ୍ ଆସିକେ । ଏତେ ଆର ବାଗି ଗାତା ଗାତାଏକେ । ମିନଗ୍ ଲୁକରା ମନ ଆଲୁଙା ଜା ଆସିକେ ଆର ଏରେ ଗାତାଏକେ ।
ମୁରୁକ ଲୁକ ଆଉ ବୁଦିଆ ଲୁକରାକିଆ ଆଗ
46 "ଆପେ ବିତେ ଆଞ୍ତେ ପରବୁ ପରବୁ ବୁଲି ଏଡାକେକିଞ୍? ଏଲେ ଆଞା ଗାତାଞ୍ଡେ ମା ଏପାଳେରେ । 47 ଜୁ ଲୁକ ଆଞା ସାମୁଞ୍ବ ଡେନଜ ଆଞା ଗାତାଞ୍ଡେ ଅଙଜ ପାଳେରେ ଆର ଆଡିଆ ଡେଗାନ୍ ବୁଲି ଆଞ୍ ଆପେତେ ଗାଆମେ । 48 ମିନଗ୍ ଲୁକ ଜିଲୁଙ୍ଡ ଡଡା ଲାଏଅଜ ମୁଇଣ୍ଟ କୁବା ଏଗେର୍ ଆଲିଙା ମୁଳଦୁଆ (ମୁଳକୁଣ୍ଟ) କିବ । ଗିମା ଗୁର ନଦି ବଡେଆନା ବାଦାସ ଇଆନ୍ ବିରି ଡାଗ୍ଡେ ଇଞାରାତେ ପେଟେରମାନ୍ ଏଲେ ଇଞାରେତେ ଦବଲାଏ ଆରିମାନା । ଇଞାରେ ଡିଅର ବନାଏ ଇସେରେ ଏତେ ଏରେ ଲୁକରା ଇଞାର କିଚି ଆଇଆନା । ଆଞା ଗାତାଞ୍ଡେ ଜିଏ ପାଳେରେ ଆର ଏରେ ଲୁକରା ଡେଗାନ୍ ଆସିକେ । 49 ଆଉ ମିନଗ୍ତା ଲୁକ ମୁଳଦୁଆ (ମୁଳକୁଣ୍ଟ) ଆକିବାନ୍ଜ ଲକା ଆଲିଙ୍ତେ ଇଞା ବନାଏଆନ୍ । ନଦି ଡେନଜ ଆରା ଇଞାରେ ଦୟ ଆଉ ସାବୁରିଞ୍ ବାଗି ଇଆନା । ଆଞା ଗାତାଞ୍ଡେ ଜୁ ଲୁକ ଅଙଜ ଆପାଳେରେ ଆର ନି ଲୁକରା ଡେଗାନ୍ ଆସିକେ ।"
ଜିସୁ ମିନଗ୍ ରୁମିଅ କୁବା ସଇନିକଆ ଚାକରରତେ ଡିଅ କିବ
1 ଜିସୁ ଲୁକକିତେ ନି ସାବୁରିଞ୍ ଗାତା ଗାତାଏ ଉଟାଅଜ କପର୍ନାଉମ ଗଳବ ଅନ । 2 ଏରାତେ ସଏ ସଇନିକକା କୁବା ସଇନିକ ମିନଗ୍ ରୁମିଅ ଲୁକ ଆସିଆନା । ଆରା ମିନଗ୍ ଚାକରରତେ ରୁଗ ଇଆନ୍ଜ ଗମଜ୍ତା ଅଳଙ୍ଗର ଇସେରାନା । କୁବା ସଇନିକରେ ଚାକରରେତେ ସୁଗାଇ ଡିଅ କୁକୁଇନମାନ୍ । 3 ଜିସୁଆ ଗାତାର ଅଙଜ କୁବା ସଇନିକରେ ଗାମ, "ଆଞା ଚାକରଞ୍ତେ ଡିଅ କିକିବ୍ତେ ଜିସୁତେ ଆଞା ଇଞାଞ୍ବ ଏଡାକେଜ ଏଅରେନେ" ଗାମଜ ଜିସୁଆ ଆସରବ କିତିକ ଜିଉଦି କୁବା ଲୁକକିତେ କିନ । 4-5 ଏରେ କୁବା ଲୁକରେକି ଜିସୁଆ ସାମୁରବ ଅନକି ବିରି ଜିସୁତେ ଗୁଆରି ଗାରାନ୍କିଜ ଗାମକି, "ଏରେ କୁବା ସଇନିକରେ ଡିଅ ଲୁକ । ଆର ନିଞା ଜାତି ଲୁକକିତେ ଡିଅ କୁଇକେ ଆଉ ନିଞା ଲାଗି ମୁଇଣ୍ଟ ମଜାଙ୍ ଇଞା ବନାଏସେକେ । ଏତେ ଆମ୍ ମନଜ ଆରତେ ସାଆଜ ମିକିବେ ।" 6 ଏତେ ଜିସୁ ଆରାକା ତୁଲଙ୍ ଅନ । ଜିସୁ ଇଞାବ ଆଉଚିତେ କୁଟିଜ୍ତା ଆସିଆନା, ଏରେବେଳା କୁବା ସଇନିକରେ ଜଳାରକିତେ ଜିସୁଆ ଆସରବ ନି ଗାତା ଗାଙ୍ଗାମ୍ତେ କିନ, "ପରବୁ ଆଉ କସଟ ମିକିବର । ଆଞ୍ ସାନ ଲୁକ ଏତେ ଆମ୍ ଆଞା ଇଞାଞ୍ବ ମେଡେନର । 7-8 ଏତେ ଆଞ୍ କିଲଙ୍ ଆମା ଆସମ୍ବ ମା ଅନ । ସଏ ସଇନିକକା ଆଲିଙ୍ତା ଆଞା ଅକ୍କ ଆସିକେ । ମିନଗ୍ତେ ଆଞ୍ "ଡାଏ" ଗାମଜ ଆର ଅଣ୍ଡେ ଆଉ "ଉଆ" ଗାମଜ ଆର ଡେଣ୍ଡେ । ଏତେ ଆଞ୍ କଙ୍କେ ଜୁ ଆମ୍ ପଦମିଞ୍ ଗାତା ଅକ୍କରେ ମେଗାତାଅଜ ଆଞା ଚାକରଞ୍ଡେ ଡିଅ ମିନା । ।" 9 ଜିସୁ ଏରେ ସାବୁରିଞ୍ ଗାତା ଅଙଜ କାବା ଇଆନା ଆଉ ଅଚଲିତା ଡେଙ୍ଗର୍ନମାନ୍ ଲୁକକିତେ ଲଙଜ ଗାମ, "ଆଞ୍ ଆପେତେ ଗାମ୍କେ । ଇସରାଏଲ୍ ଲୁକକା ବିତିରୁ ବି ନୁଣିଞ୍ଡ ବିସାସି ମା ଜଏସେର ।" 10 ଜିସୁତେ ଜୁ ଲୁକକି ଡାକେତେ ଅନ୍ଚେରକି ଆରକି ଇଞାବ ଅନକିଜ ଜୟକିଜୁ କୁବା ସଇନିକରା ଚାକରର ଡିଅ ଇସେରେତେ ।
ମିନଗ୍ ରାଣ୍ଡରାଏରା କନନ୍ଡ ଗଜ୍ଚେର । ଜିସୁ କନନ୍ଡତେ ବଞ୍ଚାଅ
11 ତା ଅଚତା ଜିସୁ ନାଇନ ଗଳବ ଅନ । ଜିସୁଆ ତୁଲଙ୍ ଚାଲାରକି ଆଉ ସୁଗାଇ ଲୁକକି ଅଙ୍ଗର୍ନମାନ୍କି । 12 ଗଳ ଆଉଚି ଆକଲାଜ୍ ଇସେରାନ୍କି ଏରେବେଳା ଲୁକକି ମିନଗ୍ ଗମଜ୍ତା ମୁଣୁସତେ ତିନ୍ତାରକିଜ ବାଏବ ଅରେନମାନ୍କି । ଆରା ବୁଇର ରାଣ୍ଡରାଏ ଇସେରାନା ଆଉ ରାଣ୍ଡରାଏରା ମୁଇଣ୍ଟ ବୁଲି କନନ୍ଡ ଆସିଆନା । ଆଉ ଗଳରା କୁସୁକୁରି ଲୁକକି ରାଣ୍ଡରାଏରା ତୁଲଙ୍ ଆସିଆନ୍କି । 13 ରାଣ୍ଡରାଏତେ ଜୟଜ ପରବୁଆ ମନରାତେ ସୁଗାଇ ଦୟା ଲାଗେଆନା ଆଉ ରାଣ୍ଡରାଏରେତେ ଜିସୁ ଗାମ, "ମେଜେଗର ।" 14 ଜିସୁ ଅନଜ ତିନ୍ତାରକିଜ ଗଗମମାନ୍କି କାଟଗୁଳିତେ ଜିବ ଏରେବେଳା ତିନ୍ତାଚେରକି ଲୁକରେକି ତଙନାନ୍କି । ଜିସୁ ଗମଜ୍ତା ଲୁକରେତେ ଗାମ, "କଙ୍ଗେର୍, ଆଞ୍ ଆମ୍ତେ ଗାମ୍କମ୍, ତଙନା ।" 15 ସାଙ୍ଗେ ସାଙ୍ଗେ ଗଜ୍ଚେର କଙ୍ଗେର୍ଡେ ତଙନାନ୍ଜ ଡକଆନା । ଆଉ ଗାତାତେ ଲାଗେଆନା । ଜିସୁ ମୁଣୁସ କନନ୍ଡେତେ ଆରା ବୁଇରା ଇତିରବ ଗତାଅ। 16 ଏରେ ଜୟକିଜ ସାବୁରିଞ୍ ଲୁକକି ସୁଗାଇ କାବା ଇନିଞାନ୍କି ଆଉ ଇସରତେ ଦନିଅବାଦ ଡିଞକିଜ ଗାମକି, "ନିଞା ବିତିରୁ ଇସରଆ ଗାତା ଗାତାଏକେ ମିନଗ୍ କୁବା ଲୁକ ଆସିକେ । ଆଉ ଇସର ଆରା ଲୁକକା ଆସରକିବ ଡେଞ୍ଚେରେ ।" 17 ଜିଉଦା ଅଞ୍ଚଳ ଆଉ ବେଳାମିଞ୍ ସାବୁରିଞ୍ ଜାଗାରାକାତେ ନି ଗାତାରେ ଉରି ଇଆନା ।
ଡୁବନ ଡିଞ୍କେ ଜଅନ ଜିସୁତେ ମୁଇଣ୍ଟ ଗାତା ଜିଙ
18 ଜଅନଆ ଚାଲାରକି ଜିସୁଆ ଗାତାର ଜଅନତେ ଆବଙକି । ଏତେ ଜଅନ ଆରା ବାନଗ୍ ଚାଲାରକିଆତେ ଡାକେଅ । 19 "ଜାର ଡେଙ୍ଗର୍ତେ ଆସିଆନା, ଆମ୍ ବିରି ଏରେ ଲୁକ? ନା ଆଡିତେ ନେଜଗେ ବିରି?" ଏରେ ଗାତାରେ ଜିସୁତେ ଜିଙ୍ଜିଙ୍ତେ ଚାଲାରକିଆତେ କିନ । 20 ଜିସୁଆ ଆସରବ ଡେନକିଆଜ ଜିଙକିଆ "ଡୁବନ ଡିଞ୍କେ ଜଅନ ନିଞ୍ବାତେ ଆମା ଆସମ୍ବ ଗାତା ଆବ୍ଗଗ୍ସେକେ । ଜାର ଡେଙ୍ଗର୍ତେ ଆସିଆନା, ଆମ୍ ବିରି ଏରେ ଲୁକ? ନା ଆଡିତେ ନେଜଗେ ବିରି ନେରଏନା?" 21 ଏରେବେଳା ଜିସୁ ସୁଗାଇ ରୁଗି ଲୁକକିତେ ଡିଅ କିବ୍କିମମାନ୍, କଏଲଙ୍ ସବ୍ସେର ଲୁକରେକିତା କଏଲଙ୍ ଆବ୍ସାଡାଏନମାନ୍ ଆଉ ଅନ୍ଦ ଲୁକକିତେ ଡିଅ କିବଜ ଆବ୍ଜନମାନ୍ । 22 ଜିସୁ ଆରକିଆତେ ଗାମ, "ଆପା ଜା ଜା ଆଜଏସେକେ ଆଉ ଆଅଙ୍ସେକେ ଏରେ ସାବୁରିଞ୍ ଜଅନତେ ଆବଙ୍ପା । ଅନ୍ଦ ଲୁକକି ଜଜଏ ରିମ୍ଡେକି, ଡାଜିଙ୍ ଆରିମ୍ଡେକି ଲୁକକି ଡାଇଙ୍ ରିମ୍ଡେକି, କେଳେଙ୍ତାଙ୍ କୁଷ୍ଟ ଲୁକକି ଡିଅ ଇରେକି, କାଲା ଲୁକକି ଅଙ୍କିକି, ଗମଜ୍ତା ଲୁକକିତେ ବଞ୍ଚାଏ ଇରେ ଆଉ ଗରିବ ଲୁକକା ସାମୁରାକାତେ ଇସରଆ ଡିଅ ଗାତା ଆବଙ୍ ଇରେ । 23 ଜୁ ଲୁକକି ମନ ଆଉବ ନିବ ଆକିବାନ୍କିଜ ଆଉ ମୁଇଣ୍ଟ ମନରେ ଆଞ୍ତେ ବିସାସ କିମିବ୍କିମମାକି ଏରେ ଲୁକରେକି ଦନିଅ ।" 24 ଜଅନଆ ଚାଲାରକିଆ ଡୁଙକିଆ ଅଚତା ଜିସୁ ଲୁକକିତେ ଜଅନଆ ଗାତାର ଗାତାଏତେ ଲାଗେଆନା । ଜିସୁ ଗାମ, "ଆପେ ବିରି ଜଜଏତେ ଟାଙ୍ଗାରା ଜାଗାବ ଏଅନ୍ଚେର? ପବନ ଗାସରେତେ ଦବଲାଏକେ, ଆପେ ବିରି ଏରେ ଜଜଏତେ ଏଅନ୍ଚେର? ନା ଜେନା । 25 ତା ଏଲେ ଆପେ ବିରି ଜଜଏତେ ଏଅନ୍ଚେର? ଜୁ ଲୁକ ଡିଅ କତେ ଆଣ୍ଡିଚେରେ, ଆରତେ ଜଜଏତେ ଏଅନ୍ଚେର?ନା ଜେନା । ରାଜା ଇଞାରତେ ରଏରେକି ଲୁକରେକି ଡିଅ ଡିଅ କତେ ଆଣ୍ଡିଜ୍ଡେକି ଆଉ ଅଇସିରେ ଜିବନ କାଟେରେକି । 26 ତାଏଲେ ଆପେ ବିରି ଏଜୟ? ଇସରଆ ଗାତା ଗାତାଏକେ ମିନଗ୍ ଲୁକତେ? ଅଏ, ଆଞ୍ ଆପେତେ ସୁତୁକୁରିଞ୍ ଗାମ୍କେ, ଜଅନ ଇସରଆ ଗାତା ଗାତାଏକେ ଲୁକକାତାକୁରି ସୁଗାଇ କୁବା ଆସିକେ । 27 ଇସରଆ ବଇ ଅଲାଗା ଲେକା ଆସିକେ 'ଇସର ଆରା କନନ୍ଡତେ ଗାମ: "ଆଞ୍ ଆମା ଆଗିଲାର ଆଞା କବରିଆଞ୍ତେ କିନେ । ଆର ଆମା ଲାଗି ଆଗିଲାର ଗଟାଙ୍ ବମନାଏ ।" 'ନି ଗାତାରେ ଜଅନଆ ଗାତା ବିସୟରେ ଲେକା ଇସେରେ । 28 ଆଞ୍ ଆପେତେ ଗାମ୍କେ, ନି ମୁଲକଆ ଜୁଆଙ୍ଡାଏତା ଜନମ ଇସେରିକି ସାବୁରିଞାତାକୁରି ଜଅନ କୁବା ଆସିକେ । ଜଅନତା କେଇ କୁବା ଜେନା । ଏଲେ ଇସରଆ ରାଇଜତେ ଜିଏ ସାବୁରିଞାତାକୁରି ସାନ ଆସିକେ, ଆର ଜଅନତାକୁରି କୁବା ଆସିକେ ।" 29 ଜିସୁଆ ଗାତାର ଅଙ୍ତେ ଟୁଳସେରାନ୍କି ଲୁକକି ଆଉ ମାସୁଲି ଟୁଳାଏକିକି ଲୁକକି ନି ଗାତାରେ ଅଙକିଜ ଇସରଆ ସାବୁରିଞ୍ ଗାତାରେକି ସୁତୁକୁରିଞ୍ ଟିକ୍ ଡିଅ ଆସିକେ ବୁଲି ଗାମକି । ଏରେ ଲୁକରେକି ଆଗିଲାର ଜଅନଆତା ଡୁବନ ଗଗ୍ସେରାନ୍କି, ଏତେ ନି ନୁଣିଞ୍ଡ ଗାମକି । 30 ଏଲେ ପାରୁସିକି ଆଉ ଉକିଲ ଲୁକକି ଜଅନଆତା ଡୁବନ ଆଗଗାନ୍କି । ଏରେ ନୁଣିଞ୍ଡ ଇସର ଆରାକା ଜିବନ ଲାଗି ଜା ମନ କିବ୍ସେର, ଏରେ ସାବୁରିଞ୍ ଆରକି ମାନା କିବକି । 31 ଜିସୁ ଆଉତରମିଞ୍ତା ଗାତାଅ "ନି ଜୁଗଆ ଲୁକକି ଆଡିଆ ଡେଗାନ୍ ଆସିକିକି? ଆରକି ସୁଣିଞ୍ ଲୁକକି? 32 ଆରକି ନି ନୁଣିଞ୍ଡ ଆସିକିକି । ଆଟ ବଜାରତେ ଉଆଳିକି ଡକଆନ୍କିଜ ଆରାକା ଆରକା କଡାକେଆନ୍କି 'ନିଞ୍ ଆପେଆ ସାମୁପେତେ ବଇଁସି ନେପେର, ଏଲେ ଆପେ ମା ଇକିଜ । ନିଞ୍ ଦୁକରେ ନେଜେଗ ଏଲେ ଆପେ ମା ଏଜେଗ ।' 33 ଡୁବନ ଡିଞ୍କେ ଜଅନ ଡେନଜ ଅଳାଗ୍ ଆଜିମ ଆଉ ଅଙ୍ଗୁର ରସ କିଲଙ୍ ଆଉର । ଏଲେ ଆପେ ଏଗାମ 'ଆରତେ କଏଲଙ୍ ସବ୍ସେକେ ।' 34 ଏଲେ ମୁଣୁସ କନନ୍ଡେ ଡେନଜ ଡାବୁଙ୍ ଲୁକକା ଡେଗାନ୍ ଜିମ୍କେ ଆଉ ଉର୍କେ ଆଉ ଆପେ ଏଗାମ୍କେ 'ଜଏପେ ନି ମିନଗ୍ କାଙ୍ଗାଳିଆ ଆଉ ମଦୁଆ । ମାସୁଲି ଟୁଳାଏକିକି ଲୁକକି ଆଉ ଡାବୁଙ୍ ପାପି ଲୁକକି ନି ଲୁକରା ଜଳାରକି ଆସିକିକି ।' 35 ଜୁ ଲୁକକି ଇସରଆ ବୁଦିଗିଆନ କୁଇସେରେକି, ଏରେ ଲୁକକା ଜିବନ ନେଜୟଜ ନେକଙ୍କେ ଜୁ ଏରେ ବୁଦି ଜିଆନରେ ସୁତୁକୁରିଞ୍ ଆସିକେ ।"
ମିନଗ୍ ପାରୁସି ଲୁକରା ଇଞା ଆଲୁଙ୍ବ ଜିସୁ ଉରୁର୍ତେ ଅନ
36 ମିନଗ୍ ପାରୁସି ଲୁକ ଜିସୁତେ ଉରୁର୍ତେ ଇଞାରବ ଡାକେଅ । ନି ଲୁକରା ନାଅଁର ସିମନ ଆସିଆନା । ଜିସୁ ଆରା ଇଞାରବ ଅନଜ ଉରୁର୍ତେ ଡକଆନ୍ । 37 ଏରେ ଗଳରାତେ ମିନଗ୍ ବାଗି ଜୁଆଙ୍ଡାଏ ଆସିଆନା । ଏରେ ପାରୁସିଆ ଇଞାରାତେ ଜିସୁ ଉରୁର୍ତେ ଡକସେରାନା ।ଏରେବେଳା ନି ଜୁଆଙ୍ଡାଏରେ କଙଜ ମୁଇଣ୍ଟ ସିସିତେ ସୁଗାଇ ଦାମି ଅତର ଅଜନ୍ ସବଜ ଏରେ ଇଞାରେବ ଅନ । 38 ଜିସୁଆ ଅଚଲିରତା ପାଦ ଆକଲାଜ୍ଡା ତଙନାନ୍ । ଅଚତା ଆର ଆଣ୍ଟିମାନ୍ଜ ଜେକ୍ତା ଜେକ୍ତା ଜିସୁଆ ପାଦର ଅମର୍ଡାଗ୍ଡବ ଅଡାଗଜ ଆରା ବକବ୍ଡା ଜୁଣ୍ଟାରବ ଉଚିତେ ଲାଗେଆନା । ଜିସୁଆ ପାଦର ମୁମୁଜାନ୍ ଆଉ ସୁଗାଇ ଦାମିକିଆ ଅତର ଅଜନ୍ଡେ ଜିସୁଆ ପାଦରା ରଗଜ କାକାର୍ତେ ଲାଗେଆନା । 39 ଜୁ ପାରୁସି ଜିସୁତେ ତଣ ଉରୁର୍ତେ ଡାକେସେର, ଆର ଜୁଆଙ୍ଡାଏରେତେ ଜୟଜ ମନେ ମନେ ଗାଙ୍ଗାମ୍ତେ ଲାଗେଆନା "ଜିସୁ ଜଦି ଇସରଆ ଗାତା ଗାତାଏକେ ଲୁକ ଇସେତାନା, ତା ଏଲେ ନି ଜୁଆଙ୍ଡାଏରେ ସୁଣିଞ୍ଡ ? ନି ଜୁଆଙ୍ଡାଏରେ ପାପି ବୁଲି ଜିସୁ କଙ୍କଙ୍ ରିମ୍ସେତାନ୍।" 40 ଜିସୁ ଆରା ମନଗାତା କଙଜ ସିମନତେ ଗାମ, "ଏ ସିମନ, ଆମ୍ତେ ଆଞ୍ ବିରିକ ଗାଙ୍ଗାମ୍ତେ ଆସିକେ ।" ସିମନ ଗାମ, "ଏ ଗୁରୁ, ଗାମେ ।" 41 ଜିସୁ ଗାମ, "ମୁଇଣ୍ଟ ମାଲିକଆତା ବାନଗ୍ ଲୁକକିଆ ରୁଣ ଗଗ୍ସେରାନ୍କିଆ । ମିନଗ୍ ୫୦୦ ରୁପା ଟାଙ୍କା ଆଉ ମିନଗ୍ ୫୦ ରୁପା ଟାଙ୍କା ରୁଣ କିବାନ୍କିଆଜ ଗଗ୍ସେରାନ୍କିଆ । 42 ରୁଣ ଗଗ୍ସେରାନ୍କିଆ ଏରେ ବାନଗ୍ ଲୁକରେକିଆ ପେରାଏତେ କିଚି ଆରାସିଆନା । ଏତେ ମାଲିକରେ ରୁଣ ଚାଡ କିବ । ତା ଏଲେ ଆରାକିଆ ବିତିରୁ ମାଲିକରେତେ ଆଡି ସୁଗାଇ ଡିଅ କୁମୁଇନା?" 43 ସିମନ ଗାମ, "ଆଞା ମନଞ୍ଡେ ବାବେକେଜୁ ଜାର ସୁଗାଇ ରୁଣ ଚାଡ ଇଆନା, ଆର ମାଲିକରେତେ ସୁଗାଇ ଡିଅ କୁମୁଇନା ।" ଜିସୁ ଗାମ, "ଆମ୍ ଟିକ୍ ମେଗାମ୍କେ ।" 44 ଏରେ ଜୁଆଙ୍ଡାଏରାବ ଲଙଜ ଜିସୁ ସିମନତେ ଗାମ, "ଆମ୍ ନି ଜୁଆଙ୍ଡାଏରେତେ ମେଜସେକେ । ଆଞ୍ ଆମା ଇଞାମ୍ବ ଡେନଜ ପାଦ ଗୁଇଦାଗ୍ଜିଙ୍ତେ ଲୁଟାମିଞ୍ ସରିକା ଡାଗ୍ ମା ମିଡିଞ । ଏଲେ ଜୁଆଙ୍ଡାଏରେ ଅମର୍ଡାଗ୍ଡବ ଗୁଇଦାଗ୍ଜିଙଜ ବକବ୍ଡା ଜୁଣ୍ଟାରବ ଉଚିଅ । 45 ଆମ୍ ଆଞ୍ତେ ମା ମିମୁମୁଜଞ୍ ଏଲେ ଆଞ୍ ଆଲୁଙ୍ବ ଡେନ ଏରେତାସୁନ୍ ପାଦିଞ୍ଡେତେ ମୁମୁଜ୍ତେ ଆର ବନ୍ଦ ଆକିବ୍କେ । 46 ଆମ୍ ଆଞା ବକବିଞା ଜୁଣ୍ଟାଞ୍ତେ କୁଟିଜ୍ ସୁରୁକା ଅଜନ୍ ମା ମେକାର ଏଲେ ଏରେ ଜୁଆଙ୍ଡାଏରେ ଅତର ଅଜନ୍ ଆଞା ପାଦଞ୍ଡେତେ କାର । 47 ଏତେ ଆଞ୍ ଆପେତେ ଗାମ୍କେ, ନାନ୍ଡା ସୁଗାଇ ପାପ କେମା କିକିବ୍ ଇସେରେତେ, ଏତେ ଏରେ ଜୁଆଙ୍ଡାଏରେ ସୁଗାଇ ଡିଅ କୁୟ । ଏଲେ ଜିଏତେ ଅଳପ କେମା ଡିଞ୍ଡିଞ୍ ଇରେ, ଆର କୁଟିଜ୍ ଡିଅ କୁଇକେ ।" 48 ଜିସୁ ଏରେ ଜୁଆଙ୍ଡାଏରେତେ ଗାମ, "ଆମା ପାପ ସାବୁରିଞ୍ କେମା ଇସେରେତେ ।" 49 ଆରା ତୁଲଙ୍ ଡକସେରାନ୍କି ଲୁକକି ଆରାକା ଆରାକା କଗାମାନ୍କି "ଇନି ଆଡି? ଆର ପାପ କେମା କିବ୍କେ ।" 50 ଏଲେ ଜିସୁ ଜୁଆଙ୍ଡାଏରେତେ ଗାମ, "ଆମା ବିସାସମ୍ଡେ ଆମ୍ତେ ମୁକୁଳାଏସେକମ୍ । ଡିଅ ସାନ୍ତିରେ ଇଞାବ ଡୁଙେ ଡାଏ ।"
କିତିକ ଜୁଆଙ୍ଡାଏରେକି ଜିସୁତେ ସାଆଜ କିବକି
1 ତା ଅଚତା ଜିସୁ ନି ଗଳ ଆଉ ଗଳ ଆଉ ଗାଆଁ ଗାଆଁ ବୁଲିଅଜ ଇସରଆ ରାଇଜଆ ଗାତା ଗାତାଏତେ ଲାଗେଆନା । ଆରା ତୁଲଙ୍ ବାର ଜଣ ଚାଲାରକି ଆସିଆନ୍କି । 2 କିତିକ ରୁଗା ଜୁଆଙ୍ଡାଏରେକିତେ ଜିସୁ ଡିଅ କିବ୍ସେର ଆଉ କିତିକ କଏଲଙ୍ ସବ୍ସେର ଜୁଆଙ୍ଡାଏରେକିତେ ଜ ଜିସୁ ଡିଅ କିବ୍ସେର । ଏରେନୁଣିଞ୍ଡ କିତିକ ଜୁଆଙ୍ଡାଏରେକି ଜିସୁଆ ତୁଲଙ୍ ଆସିଆନ୍କି । ଆରାକା ବିତିରୁ ମଗ୍ଦଲିନି ମରିୟମ ନାଅଁର ମିନଗ୍ ଆସିଆନା । ଆର ମଗ୍ଦଲିନି ଗଳତା ଡେନ୍ଚେର । ଜିସୁ ଆରାତା ଇଣିରତା ସାତଗଟା କଏଲଙ୍କିତେ ସାଡାଏସେର । 3 ଜୁଆନା, ନାନ୍ଡା ସାଉର ଏରୁଦ ରାଜାରା ମିନଗ୍ କୁବା ବାବୁ ଆସିଆନା, ନାଅଁର କୁଜା । ସୁସାନା, ଆଉ ଡାବୁଙ୍ ଜୁଆଙ୍ଡାଏରେକି ଜ ଜିସୁଆ ତୁଲଙ୍ ଆସିଆନ୍କି । ଏରେ ଜୁଆଙ୍ଡାଏରେକି ନିଜ ନିଜଆ ଜା ଜା ଆସିଆନା, ଏରେ ଡିଞକିଜ ଜିସୁତେ ଆଉ ଚାଲାରକିତେ ଜତନ ଆଉ ସେବା କିକିବ୍ମମାନ୍କି ।ବିଅନ ବିବିର୍ଆ ମୁଇଣ୍ଟ ଆଗ 4 ମିସିଆଁ ଜିସୁଆ ସାମୁରାତେ ସାବୁରିଞ୍ ଗଳତା ଆଉ ଗାଅଁତା ଲୁକକି ଡେନକିଜ ଟୁଳସେରାନ୍କି । ଜିସୁ ଆରକିତେ ମୁଇଣ୍ଟ ଆଗ ଗାତାଅ । 5 "ମିନଗ୍ ଲୁକ ବିଅନ ବିବିର୍ତେ ବିଲବ ଆରିଆନା । ଏରେବେଳା କିତିକ ବିଅନ ଗଟାଙାତେ ଅଲଗାନା । ଅଙ୍ଗର୍ନମାନ୍କି ଲୁକକି ପପଗ୍ ପାପାଗକି ଆଉ ଆକାସତା କନ୍ତେର୍କି ଡେନକିଜ ଏରେ ବିଅନରେ କବକି । 6 ଆଉ କିତିକ ବିଅନରେ ଏଗେର୍ ଚାର ଲଟବା ଅଲଗାନା । ଏଲେ ଜେତେବେଳା ଲେରାବ, କୁବାଏତେ ଡାଗ୍ ଆରାସିଆନା ଏତେ କସର । 7 ଆଉ ଅମ୍ବାର୍ ବିଅନ ଜୁଳାଗ୍ ସୁମୁସିଞା ଅଲଗାନା । ଜୁଳାଗ୍ ସୁମୁସିଞ୍ଡେକି କୁବାଅକିଜ ବିଅନଆ ଆଲିଙ୍ତା ମାଡେଅ । 8 ଆଉ କିତିକ ବିଅନରେ ଡିଅ ଲଟବା ଅଲଗାନା । ଏରେ ବିଅନରେ ଲେରାବଜ କୁବାଅ ଆଉ ବାଟିମିଞ୍ତେ ସଏ ବାଟି ଲାକୁଅ ।" ଆଗରେ ଜେଳାଅ ଅଚତା ଜିସୁ ଲିଲାଅଜ ଗାମ, "ଜାର ଅଙ୍ତେ ଲୁତୁର୍ ଆସିକେ, ଆର ଅଙ୍ଡେମେ ।" 9 "ନି ଆଗରା ଅରତର ବିରି?" ଗାମକିଜ ଜିସୁଆ ଚାଲାରକି ଜିସୁତେ ଜିଙକି । 10 ଜିସୁ ଗାମ, "ଇସରଆ ରାଇଜରା ଗାତାରେ ଆଞ୍ ଆଗିଲା ଆପେତେ ଆମାଗାତାଏସେର । ଏଲେ ଏକଳଙ୍ ଆପେତେ ଗାଆତାଏ, ଆଉ ଆପେ ବୁଜି ଇରିମା । ଡାବୁଙ୍ ଲୁକକିତେ ଆଗଆ ଅଳଙ୍ଗର ଗାଙ୍ଗାମ୍ ମିନା । ତା ଏଲେ ଆରକି ଲଙ୍ସେରକି ଏଲେ ଜଜଏ ଆରିମାନ୍କି, ଆରକି ଅଙ୍ସେରକି ଏଲେ ବୁଜି ଆରିମାନ୍କି ।" 11 ଜିସୁ ଆଗରା ଅରତରେ ବୁଜାଅଜ ଗାମ, "ବିଅନ ଇରେ ଇସରଆ ଗାତା । 12 କିତିକ ଲୁକକି ଇସରଆ ଗାତା ଅଙ୍କିକି । ଏଲେ ସାଙ୍ଗେ ସାଙ୍ଗେ କୁବା କଏଲଙ୍ ସଏତାନ ଡେନଜ ଇସରଆ ଗାତା ଗଗ୍ଡେ । ଏତେ ନି ଲୁକରେକି ବିସାସ କିକିବ୍ ଆରିମ୍ଡେକି ଆଉ ରକିଆ ଆକୁଇରେକି । ନି ଲୁକରେକି ଗଟାଙ୍ ଲଟବା ଅଳଗ୍ସେରେ ବିଅନଆ ଡେଗାନ୍ ଆସିକିକି । 13 କିତିକ ଲୁକକି ଇସରଆ ଗାତା ଅଙକିଜ ଡିଅ ବୁଜିକିକି ଆଉ ଡିଅର ଗାମ୍କିକି । ଏରେ ଲୁକରେକି ଏଗେର୍ ଚାର ଲଟବା ଡେଗାନ୍ ଆସିକିକି । ଚେର ଆମାଡେଅ ସୁମୁସିଞ୍ ଡେଗାନା ଆରକି ଅଳପ ଦିନ ଜାକଜ୍ ବିସାସରେ ରଏରେକି । ଦୁକ କସଟ ବାଦା ଡେନଜ ବିସାସ ସାଡେକିକି । 14 ବିଅନ ଅଳଗ୍ସେରାନ୍ ଜୁଳାଗ୍ ଜାଗାରାକା ଡେଗାନ୍ କିତିକ ଲୁକକି ଇସରଆ ଗାତା ଅଙ୍କିକି । ମୁଲକଆ ଦନ, ଟାଙ୍କା ପଇସା, ସୁକ ବାରୁବୁନିତେ ଲୁବ କିବ୍ଡେକି ଆଉ ସୁଗାଇ ଚିନ୍ତା କିବ୍ଡେକି । ଏତେ ଇସରଆ କିଚି କିକିବ୍ ଆରିମ୍ଡେକି । 15 ଡିଅ ଲଟବା ବିଅନରେ ଅଳଗ୍ସେରାନ୍ ଡେଗାନ୍ ଲୁକକି ଇସରଆ ଗାତା ଅଙ୍କିକି, ସରଳ ଆଉ ଡିଅ ମନରାକାତେ ଗାତା ଉନ୍କିକି, ଜିବନ ସାମ୍ବାଳେଅକିଜ ସୁଗାଇ ଲାକୁକେ ଡେଗାନ୍ ସୁବୁଦିନ ଲାଗି ଇସରଆ ଡିଅ କମ କିବକିଜ ରଏରେକି ।"
ଡିବିରିରା ଆଗ
16 ଜିସୁ ଆଉ ବେଜ୍ଗାତାଅ "ଡିବିରି ଲାଗାଅଜ ବାଟି ତୁଳିତା ଆଉ କଟ ତୁଳିତା ଉନୁନ୍ ଆଇରେ ଜେନା । ଡିବିରି ଲାଗାଆନ୍କିଜ ଡିବିରି ଉନୁନ୍ ଜାଗାତେ ଉନୁନ୍ ଇରେ । ତା ଏଲେ ଇଞା ଆଲୁଙ୍ବ ଅଙ୍ଗର୍ଡା ବଳତେ ଲୁକକି ଆଲ ଜଜଏ ରିମ୍ଡେକି । 17 ଏରେ ନୁଣିଞ୍ଡ ଜା ସାବୁରିଞ୍ ସମବାର୍ତା ଆସିକେ, ଏରେ ସାବୁରିଞ୍ ଲୁକକି ଜଜଏ ରିମିମାକି । ଜା ସାବୁରିଞ୍ ଲରାନ୍ଜ ଆସିକେ ଏରେ ସାବୁରିଞ୍ ଜ ଲୁକକି ଜମଏକି । 18 ଏତେ ସୁଣିଞ୍ଡ ଆପେ ଏଅଙ୍କେ, ଏରେମିନ୍ଦିରେତେ ଡିଅର ମନ ଡିଞେପେ ବିରି ଅଙେପେ । ଜାର ଆସିକେ ଆରତେ ସୁଗାଇ ଡିଞ୍ଡିଞ୍ ମିନା ଆଉ ଜାର ଜତେ ଆରାତା ଜା ଆସିକେ ସାବୁରିଞ୍ ଗଗଗ୍ ମିନା ।"
ଜିସୁଆ ବୁଇର ଆଉ ବକରକି
19 ଜିସୁଆ ବୁଇର ଆଉ ବକରକି ଜିସୁଆ ସାମୁରବ ଡେନକି । ସୁଗାଇ ଲୁକକି ଟୁଳସେରାନ୍କି ଏତେ ଜିସୁଆ ସାମୁରବ ଅଙ୍ଗର୍ ଆରିମମାନ୍କି । 20 ଆଡିକ ମିନଗ୍ ଜିସୁତେ ଗାତାଅ "ଆମା ବୁଇନମ୍ ଆଉ ବକମ୍କି ଆମ୍ତେ ଜଜଏତେ ମନ କିବକିଜ ବାଏଆ ତଙନ୍ଚେରେକି ।" 21 ଜିସୁ ଲୁକକିତେ ଗାମ, "ଜୁ ଲୁକକି ଇସରଆ ଗାତା ଅଙ୍କିକି ଆଉ ପାଳେରେକି, ଆରକି ଆଞା ବୁଞ୍ ଆଉ ବକଞ୍କି ଆସିକିକି ।"
ଜିସୁ ବାଦାସତେ ବନ୍ଦ କିବ
22 ଦିନମିଞ୍ ଜିସୁ ଆଉ ଚାଲରକି ମୁଇଣ୍ଟ ଡଙ୍ଗାତେ ଡାଜାନ୍କିଜ ଡକଆନ୍କି । ଜିସୁ ଚାଲାରକିତେ ଗାମ, "କୁ, କୁବା ବନ୍ଦ ଆଉପାରିତା ନନା ।" ଏତେ ଚାଲାରକି ଅଙ୍ଗର୍ତେ ଆରିଆନ୍କି । 23 ଆରକି ଡଙ୍ଗାତେ ଅଙ୍ଗର୍ନମାନ୍କି ଏରେବେଳା ଜିସୁ ଗୁଚଗାନ୍ଜ ଲେବେର୍ନମାନ୍ । ଏରେବେଳା କୁବା ବନ୍ଦ ମୁଜିଆତେ ସୁଗାଇ କୟୟଜ ବାଦାସ ଇଆନା । ଆରାକା ଡଙ୍ଗାରାତେ ଡାଗ୍ ଅରେଆନ୍ଜ ବୁଡିତେ ଲାଗେଆନା । 24 ଜିସୁଆ ଚାଲାରକି ଜିସୁଆ ଆସରବ ଡେନକିଜ ଜିସୁତେ ବୁବ୍ଳୁରକି "ଏ ଗୁରୁ, ଏ ଗୁରୁ, ନିଞ୍ ନିବୁଡିଆନ୍ତେ ।" ଜିସୁ ବୁଳୁରାନ୍ଜ ବାଦାସତେ ଆଉ କୟତେ ଦମକାଅଜ ଗାମ, "ତିରି ଇନା" ଆଉ ବାଦାସରେ ସାଙ୍ଗେ ସାଙ୍ଗେ ବନ୍ଦ ଇଆନା ଆଉ କୟରେବି ତିରି ଇଆନା । 25 ତା ଅଚତା ଜିସୁ ଚାଲାରକିତେ ଗାମ, "ଆପେଆ ବିସାସ ମାଣ୍ଡା?" ଏଲେ ଚାଲାରକି କାବା ଇଆନ୍କିଜ ବେତଙାନ୍କି ଆଉ ଆରାକା ଆରାକା କଗାତାଆନ୍କି "ନି ଆଡି ଜୁ ଆର ପବନତେ ଆଉ ଡାଗ୍ତେ କିଲଙ୍ ଗାତାଏକେ ଆଉ ଆରକି ନାନ୍ଡା ଗାତାର ମାନେକିକି ।"
କଏଲଙ୍ ସବ୍ସେର ମିନଗ୍ ଲୁକତେ ଜିସୁ ଡିଅ କିବ
26 ତା ଅଚତା ଜିସୁ ଆଉ ଚାଲାରକି ଗାଲିଲି କୁବା ବନ୍ଦ ଆଉପାରିବ ଗରାସିଅ ଅଞ୍ଚଳଆ ଆଉଚିଆନ୍କି । 27 ଜିସୁ ଡଙ୍ଗାତା ଅଳେଆନ୍ ଏରେବେଳା ଏରେ ଗଳରା ମିନଗ୍ ଲୁକ ଡେନଜ ଜିସୁତେ ରୁବାଙ । ଆରତେ କଏଲଙ୍ ସବ୍ସେର । ନି ଲୁକରେ ସୁଗାଇ ମାସ ଇଆନ୍ଜ କତେ ଆରାଣ୍ଡିଜାନ୍ଜ ଇଞାରାତେ ଆରଏନମାନ୍ । ମିସାଣି ପାଦା ଜାଗାରା ଲାତାରାକାତେ ରଏନମାନ୍ । 28 ଲୁକରେ ଜିସୁତେ ଜୟଜ ଲିଲାଅ ଆଉ ଜିସୁଆ ପାଦ ତୁଳିତେ ଗୁରାନ୍ ବିରି ଜୁରୁ ଲିଲାଅଜ ଗାମ, "ଏ ସାବୁରିଞାତା କୁବା ଇସରଆ କନନ୍ଡ ଜିସୁ, ଆଞା ତୁଲଙ୍ ଆମା ବିରି କମ ଆସିକେ? ଆଞ୍ ଆମ୍ତେ ଗୁଆରି ଗାରାନ୍ଜ ଗାମ୍କେ ଆଞ୍ତେ କସଟ ମିଡିଞର ।" 29 ଜିସୁ ଏରେ ବେଳାର ଏରେ କଏଲଙ୍ଡେତେ ଗାମ୍ସେର "ଏ କଏଲଙ୍, ନି ଲୁକରାତା ଆରିନା ବିରି ଡୁଙେ ଡାଏ ।" ଏତେ ଲୁକରେ ଏରେ ନୁଣିଞ୍ଡ ଗାମ । ସୁଗାଇ ତର କଏଲଙ୍ ଆରତେ ମଳେ ମାଳାଅ । ଆରତେ ଇଜିଙ୍ଡ ଇତିର ସିଙ୍କୁଳିବ ତରକିଜ ବି ଆର ସିଙ୍କୁଳିରତେ ଅବ୍ତେଞମାନ୍ ଆଉ କଏଲଙ୍ଡେ ଆରତେ ନିଚାଙ୍କା ଜାଗାବ ଗଗଙମାନ୍ । 30 ଜିସୁ ଆରତେ ଜିଙ "ଆମା ନାଅଁମ୍ଡେ ବିରି?" ଲୁକରେ ଗାମ, "ନିଞ୍ ନିରେ ସୁଗାଇ ଏତେ ନାଅଁଞ୍ଡେ 'ସୁଗାଇ' ।" 31 କଏଲଙ୍କି ଜିସୁତେ ଗୁଆରି ଗାରାନ୍କିଜ ଗାଙ୍ଗାମ୍ତେ ଲାଗେଆନ୍କି "ନିଞ୍ତେ ପାତାଳବ ମିକିନର" 32 ଏରେବେଳା ଏକେଚାଜ୍ ଉଳିଆତେ ସୁଗାଇ ବୁତାଏକି ସରେନମାନ୍କି । କଏଲଙ୍କି ଜିସୁତେ ଗୁଆରି ଗାରାନ୍କିଜ ଗାମକି, "ନିଞ୍ତେ ଏରେ ବୁତାଏରାକାବ ଡୁଡୁଇତେ କିନେ ।" ଜିସୁ "ଅଏ" ଗାମ । 33 କଏଲଙ୍ଡେକି ଏରେ ମୁଣୁସରେତା ଆରିଆନ୍କିଜ ବୁତାଏରେକା ଆଲୁଙାତେ ଡୁଇରାନ୍କି । ଏରେ ସାବୁରିଞ୍ ବୁତାଏରେକି ସୁଗାଇ ଜୁରୁ ଉଳିତାସୁନ୍ ତୁଳିବ ଦବଳେସୁନ୍ ଡୁଙକିଜ କୁବା ବନ୍ଦଆ ଡାଗ୍ତେ ବୁଡିନିଞାନ୍କି । 34 ସରାଏନମାନ୍କି ଲୁକରେକି ଏରେ ଜୟକିଜ ଡୁଙ୍ଡୁଙକି ବିରି ଗଳରାକା ଆଉ ଗାଅଁରାକା ଏରେ ଗାତାରେ ଗାତାଅକି । 35 ଏରେ ଜଜଏତେ ଲୁକକି ଆରିଆନ୍କିଜ ଡେନକି ଆଉ ଜିସୁଆ ଆସରବ ଅନକି । ଜୁ ଲୁକରାତା କଏଲଙ୍ଡେକି ଆରିଆନ୍କିଜ ଡୁଙ୍ସେରକି, ଏରେ ଲୁକରେ କତେ ଆଣ୍ଡିଜାନ୍ଜ ଡିଅ ମନରେ ଜିସୁଆ ଆସରାତେ ଡକସେରାନା । ଏରେ ଲୁକକି ଜୟକିଜ ବେତଙାନ୍କି । 36 ଜୁ ଲୁକକି ଜସେରକି ଆରକିତେ କଏଲଙ୍ ସବ୍ସେର ଲୁକରେ ସୁଣିଞ୍ଡ ଡିଅ ଇଆନା ଏରେ ଗାତାରେ ଗାତାଅକି । 37 ଗରାସିଅ ଅଞ୍ଚଳଆ ଲୁକକି ସାବୁରିଞ୍ ବେତଙିଞାନ୍କି । ଏତେ ଜିସୁତେ "ନି ଜାଗାତା ଡୁଙେ" ଗାମକି । ଜିସୁ ପେରେତେ ଡଙ୍ଗାତେ ଡକଆନ୍ । 38 ଏରେବେଳା ଜୁ ଲୁକରାତା କଏଲଙ୍କି ଆରିସେରାନ୍କି, ଏରେ ଲୁକରେ ଜିସୁତେ "ଆଞ୍ ଆମା ତୁଲଙ୍ ଅନା" ଗାମଜ ଗୁଆରି ଗାରାନା । ଏଲେ ଲୁକରେତେ ଜିସୁ ଗାମ, "ଇଞାବ ଡୁଙେଡାଏ । 39 ଇସର ଆମା ଲାଗି ଜା ଜା କିବ୍ସେକମ୍ ନି ଗାତାରେ ଲୁକକିତେ ମେଗାତାନିଞେ ।" ଲୁକରେ ଇଞାବ ଡୁଙ ଆଉ ଜିସୁ ଆରା ଲାଗି ଜା ଜା କିବ୍ସେର, ଏରେ ଗାତାରେ ଗଳଆ ସାବୁରିଞ୍ ଲୁକକିତେ ଗାତାତେ ଲାଗେଆନା ।
ଜାଇରସଆ କଞ୍ଚେଲାନ୍ଡ ଗଜ୍ଚେର, ଜିସୁ ଆରତେ ବଞ୍ଚାଅ । ଆଉ ମିନଗ୍ତା ଜୁଆଙ୍ଡାଏତେ କିଲଙ୍ ଜିସୁ ଡିଅ କିବ
40 ଜିସୁ ଗାଲିଲି ଅଞ୍ଚଳବ ପେରେଅ ଏରେବେଳା ଲୁକକି ଆରତେ ଜଗେସେରକି । ଏତେ ଲୁକକି କୁସିରେ ଜିସୁତେ ଡାକେଅକି । 41 ଏରାତେ ଜିଉଦି ଲୁକକା ମଜାଙ୍ ଇଞାରା ମିନଗ୍ କୁବା ଲୁକ ଆସିଆନା । ନାଅଁର ଜାଇରସ । ଜାଇରସ ଜିସୁତେ ଜୟଜ ଜିସୁଆ ଆସରବ ଡେନଜ ଜିସୁଆ ଇଜିଙ୍ଡାତେ ସବଜ ଗୁଆରି ଗାରାନ୍ଜ ଗାମ, "ଆଞା ଇଞାଞ୍ବ ଉଆ ।" 42 ଜାଇରସଆ ମୁଇଣ୍ଟ ବୁଲି କଞ୍ଚେଲାନ୍ଡ ଆସିଆନା । ଆରତେ ବାର ବରସ ଇସେରାନ୍ । ଆର ଗମଜ୍ତା ଡେଗାନା ଇସେରାନା । ଜିସୁ ଜାଇରସଆ ଇଞାରବ ଅଙ୍ଗର୍ନମାନ୍ ଏରେବେଳା ଲୁକକି ଜିସୁତେ ପପଗ୍ ପାପାଗକି । 43 ଏରେବେଳା ମିନଗ୍ ଜୁଆଙ୍ଡାଏ ଆସିଆନା । ବାର ବରସ ଇଆନ୍ଜ ଆରା ମାସିକିଆ ବନ୍ଦ ଆଇନମାନ୍ । ଜୁଆଙ୍ଡାଏରେ ଇଣିରା ଦିରେ ଆରା ସାବୁରିଞ୍ ଟାଙ୍କା ପଇସା ଉଟାଅ । ଏଲେ କେଣିସି ଡାକ୍ତରକି ଡିଅ କିକିବ୍ ମାରିମାନ୍କି । 44 ଜୁଆଙ୍ଡାଏରେ ଅଚଲିତା ଅନଜ ଜିସୁଆ କତେର ଜିବ ଆଉ ସାଙ୍ଗେ ସାଙ୍ଗେ ଜୁଆଙ୍ଡାଏରା ମାସିକିଆ ବନ୍ଦ ଇଆନା । 45 ଏତେ ଜିସୁ ଗାମ, "ଆଡି ଆଞ୍ତେ ଜିବ?" ଏଲେ ସାବୁରିଞ୍ "ଜେନା" ଗାମକି । ପିତର ଗାମ, "ଏ ଗୁରୁ, ସାବୁରିଞ୍ ଲୁକକି ପପଗ୍ ପାପାଗ୍ଡମ୍ଡେକି ।" 46 ଏଲେ ଜିସୁ ଗାମ, "ଆଡିକ ମିନଗ୍ ଆଞ୍ତେ ଜିବ ଆଉ ଆଞାତା ବଳଞ୍ଡେ ଆରିଆନା ବୁଲି ଆଞ୍ ଜାଣି କଙ ।" 47 ଜୁଆଙ୍ଡାଏ ଜାଣି କଙ ଜୁ ନିଜେ ଲଲର୍ ଆରିମାନା । ଏତେ ଆର ତରତରାଏସୁନ୍ ଡେନଜ ଜିସୁତେ ଉଳୁଗିଆନ୍ । ଜୁଆଙ୍ଡାଏରେ ବିତେ ଜିସୁତେ ଜିବ ଆଉ ସୁଣିଞ୍ଡ ସାଙ୍ଗେ ସାଙ୍ଗେ ଡିଅ ଇଆନା, ଏରେ ଗାତାରେ ଲୁକକା ସାମୁରାକାତେ ଗାତାଅ । 48 ଜିସୁ ଗାମ, "ଲାଣ୍ଡି, ଆମ୍ ଆଞ୍ତେ ବିସାସ ମିକିବ ଏତେ ଆମ୍ ଡିଅ ମିଆନା । ସାନ୍ତିରେ ଡୁଙେ ଡାଏ" 49 ଜିସୁ ଇନି ନୁଣିଞ୍ଡ ଗାତାରେ ଗାଙ୍ଗାମମାନା ଏରେବେଳା ଜାଇରସଆ ଇଞାରତା କିତିକ ଲୁକକି ଡେନକିଜ ଗାମକି, "ଆମା କଞ୍ଚେଲାନମ୍ ଗଜତେ । ଗୁରୁତେ ବିତେ ଅଏରାଣ ମିକିବ୍କେ?" 50 ଏଲେ ଜିସୁ ଏରେ ଅଙଜ ଆରତେ ଗାମ, "ମେବେତଙାନ୍ଜ ଦୁକ ମିକିବାନ୍ଡ, ଆଞ୍ତେ ବିସାସ କିବେ ଆଉ କଞ୍ଚେଲାନମ୍ଡେ ବମଞ୍ଚେ ।" 51 ଜିସୁ ଇଞାବ ଡେନଜ ପିତର, ଜଅନ, ଜାକୁବ ଆଉ କଞ୍ଚେଲାଣ୍ଡା ବୁଇର ଅବାରକିଆ ତୁଲଙ୍ ଇଞା ଆଲୁଙ୍ବ ଅନକି । ଆଉ ସାବୁରିଞ୍ତେ ଆଲୁଙ୍ବ ଆପିଜ । 52 ଜେତେ ଲୁକକି ଏରାତେ ଆସିଆନ୍କି, ସାବୁରିଞ୍ ବୁକୁରାକାତେ ପେଟେରମାନ୍କିଜ ଜେଜେଙମାନ୍କି । ଏତେ ଜିସୁ ଗାମ, "ବିତେ ଏଜେକେ? କଞ୍ଚେଲାନ୍ଡେ ଗଗଜ୍ ଜେନା, ଲେବେର୍କେ ।" 53 କଞ୍ଚେଲାନ୍ଡେ ଗଜ୍ଚେକେତେ ଗାମକିଜ ଲୁକକି କଙ୍ସେରକି । ଏତେ ଜିସୁତେ ଆବ୍ଗିଆନକିଜ ଲାରାଅକି । 54 ଏଲେ ଜିସୁ କଞ୍ଚେଲାନ୍ଡା ଇତିର ସବଜ ଡାକେଅ "ଲାଣ୍ଡି, ବୁଳୁନା ।" 55 କଞ୍ଚେଲାନ୍ଡା ଆତାମାର ପେରେଅଜ ଡେନ ଆଉ ସାଙ୍ଗେ ସାଙ୍ଗେ ବୁଳୁରାନା । ଜିସୁ ଗାମ, "ମୁଣୁସ କଞ୍ଚେଲାନ୍ଡେତେ ଉରୁର୍ତେ ଡିଞେପେ ।" 56 ଏରେ ଜୟକିଆଜ କଞ୍ଚେଲାନ୍ଡା ବୁଇର ଅବାରକିଆ କାବା ଇଆନ୍କିଆ । ଏଲେ "ନି ସାବୁରିଞ୍ ଗାତାରେ କିଏତେ ଆଗାତାଅର" ଗାମଜ ଜିସୁ ବୁଇର ଅବାରକିଆତେ ଗାତାଅ ।
ଜିସୁ ବାର ଜଣ ଚାଲାରକିତେ ଇସରଆ ଗାତା ଗାତାଏତେ କିନ
1 ମିସିଆଁ ଜିସୁ ଆରା ବାରଜଣ ଚାଲାରକିତେ ସାମୁରବ ଡାକେଅଜ ଇକୁଡିଆ କିବ । କଏଲଙ୍ ସାଡାଏତେ ଆରକିତେ ଅକ୍କ ଡିଞ ଆଉ ରୁଗା ଲୁକକିତେ ଡିଅ କିକିବ୍ତେ ବଳ ସକତି ଡିଞ । 2 ଆରକିତେ କିନଜ ଗାମ, "ଇସରଆ ରାଇଜଆ ଗାତା ଗାତାଏପେ ଆଉ ରୁଗା ଲୁକକିତେ ଡିଅ କିବେପେ । 3 ଆପେ ଏଅନା ବଳତେ ବାଡି ଆଉ କିଣିସି ଗୁଣ୍ଡିରାଗ୍ ଗାଞ୍ଜିଆ ଏଗଗାଣ୍ଡ । ତଅଣ ଅଳାଗ୍, ଟାଙ୍କା ପଇସା କିଚି ଏଗଗାଣ୍ଡ । କତେ ଉଙ୍ଗି ଅଳମ୍ବାଟ ଏଗଗାଣ୍ଡ । 4 ଆପେ ଜୁ ଇଞାବ ଏଅନା ଏରେ ଗାଆଁରେତା ଡୁଡୁଙ୍ ଜାକଜ୍ ଏରେ ଇଞାରାତେ ଏରଏନା । 5 ଏଲେ ଜୁ ଜାଗାତେ ଲୁକକି ଆପେତେ ଡିଅ ଆକୁଇକିକି, ତା ଏଲେ ଏରେ ଜାଗାରେତା ଇଡୁଙେ ବଳତେ ଆପେଆ ଇଜିଙ୍ପେଆ ଦୁଳି ଜାଳେପେ ବିରି ଡୁଙେପେ । ଏରେ ଜୟକିଜ ଗାଅଁ ଲୁକକି କମଙେକିଜୁ 'ନିଞ୍ ଇସରଆ ଗାତା ମାନେ ଜେନା ଏତେ ଇସର ନିଞ୍ତେ ଦଣ୍ଡ ଡିମିଞେ ।' " 6 ଏତେ ଚାଲାରକି ଡୁଙକିଜ ଗାଆଁ ଗାଆଁ ଅନକିଜ ଇସରଆ ରାଇଜଆ ଡିଅ ଗାତା ଗାତାଏତେ ଲାଗେଆନ୍କି ଆଉ ରୁଗି ଲୁକକିତେ ଡିଅ କିବକି ।
ଏରୁଦ ରାଜା "ଜିସୁ ଆଡି" ଗାମଜ ବାଳେରମାନା
7 ଏରୁଦ ରାଜା ଏରେ ସାବୁରିଞ୍ ଗାତାରେ ଅଙଜ ବାଳେରମାନା । କିତିକ ଲୁକକି ଗାଙ୍ଗାମମାନ୍କି "ଡୁବନ ଡିଞ୍ଡିଞମାନ୍ ଜଅନ ଗଜ୍ଚେର ଆଉ ଏରେତା ବେଜ୍ବଞ୍ଚେସେକେ" । 8 ଆଉ କିତିକ ଲୁକକି ଗାଙ୍ଗାମମାନ୍କି "ଏଲିଅ ଆବ୍ଜରମ୍ସେରାନ୍" ଆଉ କିତିକ ଗାଙ୍ଗାମମାନ୍କି "ଅନଗା ଆଗିଲା ଇସରଆ ଗାତା ଗାତାନମାନ୍ ମିନଗ୍ ଲୁକ ଗଜ୍ଚେର ଆର ବେଜ୍ବଞ୍ଚେସେକେ ।" 9 ଏରେ ସାବୁରିଞ୍ ଅଙଜ ଏରୁଦ ରାଜା ବାଳେରମାନ୍ଜ ଗାମ, "ଜଅନଆ ବକବ୍ଡତେ ଆଞ୍ ଆବ୍ଡେଜ୍ଚେର । ଏଲେ ଜାରଆ ଗାତାରେ ନୁଣିଞ୍ଡ ନଅଙ୍କେ, ଏରେ ଆଡି?" ଏରୁଦ ରାଜା ଜିସୁତେ ଜଜଏତେ ମନ କିବ ।
ଜିସୁ ପାଞ୍ଚ ଅଜାର ଲୁକକିତେ ଉରୁର୍ତେ ଡିଞ
10 ଅଚତା ଜିସୁ କିନ୍ଚେକେ ବାର ଜଣ ଚାଲାରକି ଡେନକିଜ ଜା ଜା କିବ୍ସେରକି ଜିସୁତେ ଗାତାନିଞକି । ଜିସୁ ଆରକିତେ ଆରା ସାଙ୍ଗେରେ ଗଗଜ ବେତ୍ସାଇଦା ବୁଲି ମୁଇଣ୍ଟ ଗଳବ ଅନକି । ଆଉ କିଏତେ ଆଗଗ । 11 ଏଲେ ଲୁକକି ଏରେ କଙକିଜ ଜିସୁଆ ଅଚ ଅଚର ଅନକି । ଜିସୁ ଲୁକକିତେ ଡାକେଅଜ ଇସରଆ ରାଇଜରା ଗାତା ଗାତାଏତେ ଲାଗେଆନା ଆଉ ରୁଗି ଲୁକକିତେ ଡିଅ କିକିବ୍ମମାନ୍ । 12 ବେଳ ବୁଡିତେ ଅଙ୍ଗର୍ନମାନ୍ ଏରେବେଳା ଜିସୁଆ ଚାଲାରକି ଜିସୁଆ ଆସରବ ଡେନକିଜ ଗାମକି, "ନି ମୁଇଣ୍ଟ ନିଚାଙ୍କା ଜାଗା । ଏତେ ନି ଲୁକରେକିତେ ପିଜେଡୁ । ଆରକି ଏକେଚାଜ୍ ଗାଆଁ ଆଉ ତାସି ଇଞାରାକାବ ଅନକିଜ ନିଜଆ ଦିରେ ଉରୁର୍ତେ ସଙ୍ଡେମେକି ଆଉ ରଏତେ ଇଞା ଡଗରାଏରେମ୍କି ।" 13 ଏଲେ ଜିସୁ ଚାଲାରକିତେ ଗାମ, "ଆପେ ଲୁକରେକିତେ ଉରୁର୍ତେ ଡିଞେପେ ।" ଚାଲାରକି ଜିସୁତେ ଗାମକି, "ନିଞା ସାମୁନିଞା ପାଞ୍ଚଗଟା ଅଳାଗ୍ ଆଉ ଆମ୍ବାଟ କାରଙ୍ ତାକୁରି ସୁଗାଇ ଜତେ । ଏଲେ ନିଞ୍ ନନଜ ନି ସାବୁରିଞ୍ ଲୁକକିତେ ଉରୁର୍ତେ ନେସଙେଜ ନରେନ୍ ବିରି?" 14 ଏରାତେ ପାଞ୍ଚ ଅଜାର କାମୁଲଗ୍ ଲୁକକି ଆସିଆନାକି । ଜିସୁ ନିଜଆ ଚାଲାରକିତେ ଗାମ, "ମୁଇଣ୍ଟ ଦଳତେ ପଚାସ ଜଣ କିରି ଆବ୍ଡକଏପେ ।" 15 ଏତେ ଜିସୁଆ ଚାଲାରକି ଏରେ ନୁଣିଞ୍ଡ ସାବୁରିଞ୍ ଲୁକକିତେ ଆବ୍ଡକଅକି । 16 ଆଉ ଜିସୁ ପାଞ୍ଚ ଗଟା ଅଳାଗ୍ ଆଉ ଅମ୍ବାଟ କାରଙ୍ ସବ ବିରି ସରଗ ଆଲିଙ୍ବ ଲଙଜ ଇସରତେ ଦନିଅବାଦ ଡିଞ । ତା ଅଚତା ଅଳାଗ୍ କାରଙ୍ଡେକିତେ ଗବ୍ଳଅଜ ଲୁକକିତେ ତାତାଜ୍ତେ ଜିସୁ ନିଜଆ ଚାଲାରକିତେ ଗାତାଅ । 17 ଏରାତେ ଆସିଆନ୍କି ଲୁକକି ସାବୁରିଞ୍ ଉରକିଜ ସାନ୍ତି ଇଆନ୍କି । ଆରକି ଉରକି ଜିମକିଜ ବଳେସେର ଅଳାଗ୍ଡେ ଟୁଳାଅକିଜୁ ବାର ଟେକା (ଟଙ୍କାଏ) ଇଆନା ।
ପିତର ଜିସୁତେ ଗାମ, "ଆମ୍ କିରିସ୍ଟ, ଲୁକକିତେ ମୁକୁଳାଏତେ ଇସର କିନ୍ଚେକେ ଲୁକ"
18 ଦିନମିଞ୍ ଜିସୁ ମିନଗ୍ ପାତାନା କିକିବ୍ମମାନା । ଏରେବେଳା ଚାଲାରକି ଜିସୁଆ ତୁଲଙ୍ ଆସିଆନ୍କି । ଜିସୁ ଚାଲାରକିତେ ଜିଙ "ଆଞ୍ ଆଡି ବୁଲି ଲୁକକି ବିରି ଗାମ୍କେକି?" 19 ଚାଲାରକି ଗାମକି, "ଆଡି ଗାମ୍କେ ଆମ୍ ଡୁବନ ଡିଞ୍ଚେର ଜଅନ । ଅଦକ ଗାମ୍କିକି ଏଲିଅ ଆଉ ଅଦକ ଗାମ୍କିକି ଅନଗା ଆଗିଲା ଇସରଆ ଗାତା ଗାତାଏକିକି ଲୁକକା ବିତିରୁ ମିନଗ୍ ଗଗଜାତା ବେବଞ୍ଚେଅଜ ଡେଞ୍ଚେରେ ।" 20 ଜିସୁ ଜିଙ "ଆଞ୍ ଆଡି ଏରେ ଗାତାରେ ଆପେ ବିରି ଏଗାମ୍କେ?" ପିତର ଗାମ, "ଆମ୍ କିରିସ୍ଟ, ଲୁକକିତେ ମୁକୁଳାଏତେ ଇସର କିନ୍ଚେକେ ଲୁକ ।" 21 ଜିସୁ ଚାଲାରକିତେ "ଆଞା ଗାତାଞ୍ଡେ କେଇତେ ଏଗାତାଅର" ଗାମଜ ଟାଣର ଗାତାଅ ।
ଜିସୁ ଆରା ଦୁକ କସଟର ଆଉ ଗଗଜ୍ଡା ଗାତାର ଗାତାଅ
22 ଜିସୁ ଆରା ଚାଲାରକିତେ ଆବ୍ସଜଜ ଗାତାଏତେ ଲାଗେଆନା "ମୁଣୁସ କନନ୍ତେ ସୁଗାଇ ଦୁକ କସଟ ସଏତେ ମିନା । ଆଉ ନୁଣିଞ୍ଡ ନେତାକି, କୁବା ନାଗମ୍କି ଆଉ ଅର୍ଦାନକି ଆରତେ ଚିମିଚିକାର୍କି ଆଉ ମବ୍ଗଜେକି । ଏଲେ ତିନି ଦିନ ଅଚତା ଆର ବରନଜ ମେଜ୍ବଞ୍ଚେ । (ଜିସୁ ନିଜତେ ‘ମୁଣୁସକନନ୍’ ଗାମ୍ଡମାନ୍) 23 ଅଚତା ଜିସୁ ସାବୁରିଞ୍ତେ ଗାମ, "କେଇ ଜଦି ଆଞା ଅଚ ଅଚ ଅଙ୍ଗର୍ତେ ମନ କିବ୍କେ, ନିଜତେ ଆବ୍ଚିଅଗ୍ଡେମେ ଆଉ ସୁବୁଦିନ ଆରା ନିଜଆ ଚକି କୁଣ୍ଟ ସବାନ୍ଜ ଆଞା ଅଚ ଅଚ ଡେଣ୍ଡେମେ ।" 24 ଏଲେ ଜିଏ ନିଜ ଜିବନର ରକିଆ କିକିବ୍ତେ ମନ କିବ୍ଡେ, ଆର ମାରେନା । ଏଲେ ଜିଏ ଆଞା ଲାଗି ନିଜ ଜିବନ ମାରାଏନା ଆର ରକିଆ କୁମୁଇନା । 25 ମିନଗ୍ ଲୁକ ଜଦି ଟାଙ୍କୁଣିଞ୍ଞ୍ ମୁଲକ କୁଇଆନ୍ଜ ଆର ଆଜେଳାଏକେ ଜିବନ ଆକୁଇରେ ଜେନା । ତା ଏଲେ ଆରା ବିରି ଡିଅ ମିନା? 26 ଜିଏ କେଇ ଆଞ୍ତେ ଆଉ ଆଞା ଗାତା ଗାତାଏତେ ଗିଆନ୍ଡେ, ତାଏଲେ ଜେତେ ବଳତେ ମୁଣୁସ କନନ୍ଡେ ଇସରଆ କବରିଆକା ତୁଲଙ୍ ଅବାରା ଡେଗାନ୍ ଟାଲାଟାଜାନ୍ଜ ଡେମେନା, ଏରେବଳତେ ଏରେ ଲୁକରା ଗାତା ଗାତାଏତେ ମୁନୁସ କନନ୍ଡେ ଗିମିଆନା ।" (ଜିସୁ ନିଜତେ ‘ମୁଣୁସକନନ୍’ ଗାମ୍ଡମାନ୍) 27 ଜିସୁ ଆଉତରମିଞ୍ତା ଆରକିତେ ଗାମ, "ଆଞ୍ ଆପେତେ ସୁତୁକୁରିଞ୍ ଗାତାଏକେ । ଇସରଆ ରାଇଜର ଜଜଏ ଜାକଜ୍ ଆଞା ସାମୁଇଞା ତଙନ୍ଚେରେକି କିତିକ ଲୁକକି ଆଗଜ୍କିକି ଜେନା । "
ଜିସୁଆ ଇଣିର ବଦଳାଅ
28 ଏରେ ସାବୁରିଞ୍ ଗାତା ଗାତାଅ ଆଟ ଦିନ ଆଉରିସେରାନ୍ ଏରେବେଳା ଜିସୁ ପାତାନା କିକିବ୍ତେ ଉଳି ଆଲିଙ୍ବ ଅନ । ଆରା ତୁଲଙ୍ ପିତର, ଜାକୁବ ଆଉ ଜଅନତେ ଗଗ । 29 ପାତାନା କିକିବ୍ଡା ବଳଆ ଜିସୁଆ ମୁଅଁର ବଦଳେଆନ୍ ଆଉ ଆରା କତେର ଆଣ୍ଡାରାର ଇଆନ୍ଜ ସୁଗାଇ କାରାଅ । 30 ଏରେବେଳା ସାଙ୍ଗେ ସାଙ୍ଗେ ମସା ଆଉ ଏଲିଅ ଆବ୍ଜରମାନ୍କିଆ ଆଉ ଆରାକିଆ ତୁଲଙ୍ ଜିସୁ ଗାତାଆନ୍ । 31 ଆରକିଆ ସରଗଆ ଲୁକକା ଡେଗାନ୍ କାରାଅକିଆଜ ଆସିଆନ୍କିଆ । ଆରକି ଜିସୁଆ ଗଗଜା ଗାତାର ଗାତାନମାନ୍କି । ଜିସୁ ଗଳଙ୍ ଜିରୁସାଲମ ଗଳତେ ଗଗଜ୍ତେ ଆଚିଆନ୍ତେ । 32 ଏରେବେଳା ପିତର ଆଉ ଜଳାରକି ଲେବେର୍ନମାନ୍କି । ଏଲେ ଆରକି ବୁଳୁରାନ୍କିଜ ଜୟକିଜୁ ଜିସୁ ଟାଲାଟାଜାନ୍ଜ ତଙନ୍ଚେରାନ୍ । ଜିସୁଆ ତୁଲଙ୍ ବାନଗ୍ ଲୁକକିଆତେ ଜ ଜୟକି । 33 ମସା ଆଉ ଏଲିଅ ପେରେନମାନ୍କିଆ ଏରେବେଳା ପିତର ଗାମ, "ଏ ଗୁରୁ, ନିଞ୍ ନେନ୍ ଜାଗାରା ନାସିକେ । ନିଞ୍ତେ ଡିଅ ଲାଗେରେ । ନିଞ୍ ଏଗଟା ଲାଗର୍ ଇଞା ନେବନାଏ । ଆମା ଦିରେ ମୁଇଣ୍ଟ, ମସା ଦିରେ ମୁଇଣ୍ଟ ଏଲିଅଆ ଦିରେ ମୁଇଣ୍ଟ ।" ପିତର ବିରି ଗାମ୍କେ ଏରେ ଆକଙ୍ସେର । 34 ପିତର ଗାଙ୍ଗାମମାନ୍ ଏରେବେଳା ପାଳିମିଞ୍ ବାଦଳ ଡେନଜ ଆରକିତେ ଡାଣ୍ଡାନ ଆଉ ବାଦଳ ଆଲୁଙ୍ବ ଅଙ୍ଗର୍ଡା ବଳଆ ଚାଲାରକି ସୁଗାଇ ବେତଙାନ୍କି । 35 ଏରେ ବାଦଳତା ମୁଇଣ୍ଟ ଗାତା ଅଙାନା "ନି ଆଞା କନନିଞ୍, ଆରତେ ଆଞ୍ ବାଚେସେକେ । ଆରା ଗାତାର ଅଙେପେ ।" 36 ଏରେ ଗାତା ଅଙାନ୍ ଅଚତା ଚାଲାରକି ଜୟକିଜୁ ଆରାକା ତୁଲଙ୍ ଉଡେଇ ଜିସୁ ଆସିକେ, ଆଉ କେଇ ଜତେ । ଚାଲାରକି କଳେର ରଏଆନ୍କି ଆଉ ଆରକି ଜା ସାବୁରିଞ୍ ଜଏସେରକି, ଏରେବେଳା ସୁଗାଇ ଦିନ ଜାକଜ୍ କିଏତେ ଆଗାତାଅକି ।
ମିନଗ୍ ଉଆଳିତେ କଏଲଙ୍ ସବ୍ସେର ଜିସୁ ଆରତେ ଡିଅ କିବ
37 ତା ଆର ଦିନ ଜିସୁ ଆଉ ଚାଲାରକି ଉଳି ଆଲିଙ୍ତା ଅଳେଆନ୍କିଜ ଡେନକି । ଏରାତେ କୁସୁକୁରିଞ୍ ଲୁକକି ଜିସୁତେ ଜଜଏତେ ଡେନକି । 38 ଆଉ ଜଏପେ, ଲୁକକା ବିତିରୁ ମିନଗ୍ ଲୁକ ଲିଲାଅଜ ଗାମ । "ଏ ଗୁରୁ ଆଞ୍ ଆମତେ ଗୁଆରି ଗାର୍ଡେ ଆଞା କନନିଞ୍ତେ ଦୟା କିବେଜ ଡେନା,ଉଆ । ଜଏ ଏରେ ଆଞା ମୁଇଣ୍ଟ ବୁଲି କନନିଞ୍ । 39 ଉଆଳିରେତେ ମୁଇଣ୍ଟ କଏଲଙ୍ ତରତରମିଞ୍ ସବ୍କେ । ଏରେ ବଳତେ ଉଆଳିରେ ସାଙ୍ଗେ ସାଙ୍ଗେ କେରେକେଞ୍ଡେ ଏରେ ନୁଣିଞ୍ଡ ମଳେ ମାଳାଅଜ ଆରା ତମର୍ଡତା ପମ୍ପଲ ଆରିରେ । ଉଆଳିରେତେ ଉବ୍ଗୁରଜ ଉଆଲିରା ଇଣିର କେଳେଞ୍ କାଳାଞ୍ଡେ । ଉଆଳିରେତେ ସୁଗାଇର କସଟ ଡିଞ୍ଡିଞ୍ ଜାକଜ୍ କଏଲଙ୍ଡେ ଉଆଳିରାତା ଆସାଡେକେ । 40 କଏଲଙ୍ ଆବ୍ସାଡାଏତେ ଆଞ୍ ଆମା ଚାଲାମ୍ଡେକିତେ ଗୁଆରି ଗାର୍ଚେରାନା । ଏଲେ ଆରକି କଏଲଙ୍ ସାଡାଏ ଆରିମାନ୍କି ।" 41 ଜିସୁ ଲୁକକିତେ ଗାମ, "ଏ ଅଳପ ବିସାସିକି, ଆଞ୍ ଆଉ କିତି ଦିନ ସଏଅଜ ଆପେଆ ତୁଲଙ୍ ରଏନା," ତା ଅଚତା ଏରେ ଲୁକରେତେ ଗାମ, "ଆମା କନନମ୍ତେ ଆଞା ଆସଞ୍ବ ଅରେନେ ।" 42 ଉଆଳିରେ ଡେଙ୍ଗର୍ ଡେଙ୍ଗର୍ତେ କଏଲଙ୍ଡେ ଉଆଳିରେତେ ତୁଳିତେ ଉବ୍ଗୁରଜ ସୁଗାଇ ମଳେ ମାଳାଅ । ଏଲେ ଜିସୁ କଏଲଙ୍ଡେତେ ଦମକାଅଜ ଉଆଳିରେତେ ଡିଅ କିବ । ଆଉ ଉଆଳିରେତେ ଅବାରା ଆସରାତେ ଡିଞ । 43 ଏତେ ସାବୁରିଞ୍ ଲୁକକି ଇସରଆ ଡିଅ କମ ଜୟକିଜ କାବା ଇନିଞାନ୍କି । ଜେତେବଳଆ ସାବୁରିଞ୍ କାବା ଇନମାନ୍କି ଏରେବେଳା ଜିସୁ ଚାଲାରକିତେ ଗାମ 44 "ଆଞ୍ ଆପେତେ ନି ଜା ସାବୁରିଞ୍ ଗାମ୍ସେକେ ଏରେ ଏବାଣାଆନ୍ଡ । ମୁଣୁସ କନନ୍ ମୁଣୁସକା ଇତିରାତେ ଅସବ୍ତେ ଅଣ୍ଡେତେ ।" (ଜିସୁ ନିଜତେ ‘ମୁଣୁସକନନ୍’ ଗାମ୍ଡମାନ୍) 45 ଏଲେ ଚାଲାରକି ଏରେ ଗାତାରେ ବିରି ଗାମକିଜ ଜାଣି ଆକଙକି । ଆରକି ଜିମିତି ଜାଣି ଆକଙ୍କେକିଜେନା ଏତେ ଏରେ ଗାତାରା ଅରତରେ ଚାଲାରାକାତା ଅଲର୍ଚେରାନା । ଚାଲାରକି ଏରେ ଗାତାରେକି ଜିଜିଙ୍ତେ ଜିସୁତେ ବେତଙମାନ୍କି।
ଆଡି ସାବୁରିଞାତା କୁବା
46 "ନିଞା ବିତିରୁ ଆଡି କୁବା?" ଗାମକିଜ ଚାଲାରକି ଆରାକା ଆରାକା ରେଙ୍ଗେ ଚେଙ୍ଗେ ଇଆନ୍କି । 47 ଏଲେ ଆରାକା ମନ ଗାତାରେ ଜିସୁ ଜାଣି କଙ । ଅଚତା ଜିସୁ ମୁଇଣ୍ଟ ସାନ ଉଆଳିତେ ଅରେନଜ ଆସରାତେ ଆବ୍ତଙନଜ ଚାଲାରକିତେ ଗାମ, 48 "ଆଞା ନାଅଁରେ ଜିଏ ନି ସାନ ଉଆଳିରେତେ ଡିଅ ବୁଜିକେ ଆର ଆଞ୍ତେ ଡିଅ ବୁଜିକେ । ଆଞା ଅବାଞ୍ ଆଞ୍ତେ କିନ୍ଚେକେ ଆଉ ଜିଏ ଆଞ୍ତେ ଡିଅ ବୁଜିକେ ଆର ଆଞା ଅବାଞ୍ତେ କିଲଙ୍ ଡିଅ ବୁଜିକେ । ଆଉ ଜିଏ ସାବୁରିଞ୍ତା ନିରଳ ରଏରେ ଆର ଇରେ ସାବୁରିଞାତା କୁବା ।"
ଜିଏ ନିଞା ବିରୁଦରେ ଜେନା ଆର ନିଞା ସାମୁନିଞା
49 ଜଅନ ଜିସୁତେ ଗାମ, "ଏ ଗୁରୁ ମିନଗ୍ ଲୁକ ଆମା ନାଅଁରେ କଏଲଙ୍ ସବ୍ସେର ଲୁକକିତେ ଡିଅ କିବ ଏରେ ନିଞ୍ ନେଜୟ । ଏଲେ ଆର ନିଞା ଦଳରା ଲୁକ ଜେନା ଏତେ ନିଞ୍ ଆରତେ ମାନା ନିକିବ ।" 50 ଏଲେ ଜିସୁ ଚାଲାରକିତେ ଗାମ, "ଆରତେ ମାନା ଇକିବର । ଜିଏ ଆପେଆ ବିରୁଦରେ ଜେନା ଆର ଆପେଆ ତୁଲଙ୍ ଆସିକେ ।"
ସମିରଣି ଗାଅଁଆ ଲୁକକି ଜିସୁତେ ଆମାନେଅକି
51 ଜିସୁ ମୁଲକ ସାଡେଅଜ ସରଗବ ଅଙ୍ଗର୍ତେ ଦିନ ଆଉଚିନମାନା ଏରେ ବେଳା ଜିସୁ ଜିରୁସାଲମ୍ ଅଙ୍ଗର୍ତେ ସୁଗାଇ ମନ କିବ । 52 ଜିସୁ ଜିରୁସାଲମ ମନା ଆଗରୁ ଆଗିଲା କିତି ଜଣକ ଚାଲାରକିତେ କିନ । ଜିସୁଆ ଲାଗି ଜା ଜା ଗିନିସରେକି ଦରକାର ଆସିଆନା ଏରେ ଚାଲାରକି ଜୁଗାଳେତେ ଆଗିଲାର ମୁଇଣ୍ଟ ସମିରଣି ଗାଅଁବ ଅନକି । 53 ଏଲେ ଜିସୁ ଜିରୁସାଲମ ଅଙ୍ଗର୍ତେ ମନ କିବ୍ସେକେ । ଏରେ କଙକିଜ ଲୁକକି ଜିସୁତେ ଏରେ ଗାଅଁତେ ରରଏତେ ଆଡିଞକି । 54 ଏରେ ଜୟକିଆଜ ଜାକୁବ ଆଉ ଜଅନ ବାନଣଙ୍ ଚାଲାରକିଆ ଗାମକିଆ "ଏଲିଅ ଜିମିତି କିବ୍ସେର ଏରେ ନୁଉଣିଙ୍ଡ ଆକାସ ଆଲିଙ୍ତା ଲାଲାଜ୍ତେ ନେଡାକେଜ ଆରକିତେ ନେଲବ୍ତର୍ ବିରି?" 55 ଏରେ ବେଳା ଜିସୁ କିନବ୍ଡବ ବୁଲିଆନ୍ଜ ଚାଲାରକିତେ ଲେଜ ବିରି ଗାମ, "ଆପେଆ ସୁଣିଞ୍ଡ ଆତାମାପେରେ ଏରେ ଆପେ ମା ଏକଙ୍କେ । ମୁଣୁସ କନନ୍ ମୁଣୁସତେ ଅବ୍ଗଜ୍ତେ ଡେଙ୍ଗର୍ ଜେନା । ଏଲେ ରକିଆ କିକିବ୍ତେ ଡେନ୍ଚେରେ ।" 56 ତା ଅଚତା ଜିସୁ ଆଉ ଚାଲାରକି ଆଉ ମୁଇଣ୍ଟତା ଗାଅଁବ ଅନକି ।
ତିନି ଜଣ ଲୁକକି ଜିସୁଆ ଚାଲା ଇତେ ମନ କିବକି
57 ଜିସୁ ଆଉ ଚାଲାରକି ଅଙ୍ଗର୍ନମାନ୍କି ଏରେବେଳା ମିନଗ୍ ଲୁକ ଜିସୁତେ ଗାମ, "ଆମ୍ ଜୁ ଜାଗାରେବ ମନା ଆଞ୍ ଆମା ଅଚ ଅଚମ୍ଡେ ଅନା ।" 58 ଜିସୁ ଲୁକରେତେ ଗାମ, "କାକାଙ୍ ସିଆଳଆ ଗାତର୍ ଆସିକେ । ଆକାସଆ କନ୍ତେର୍କା ବାସାରକି ଆସିକେ । ଏଲେ ମୁଣୁସ କନନ୍ନା ଲେବେର୍ତେ ସରିକା ଜାଗା ଜତେ ।" 59 ପୁଣି ଜିସୁ ଆଉ ମିନଗ୍ତେ ଗାମ, "ଆଞା ଅଚ ଅଚ ଉଆ ।" ଏଲେ ଏରେ ଲୁକରେ ଗାମ, "ଆଗିଆଁ, ଆଞ୍ ଆଗିଲା ଅନଜ ଆଞା ଅବାଞ୍ତେ ଗମଜ୍ତା ମାଳାରେ ତିନ୍କେ ବିରି ଡେଣ୍ଡେତା । ଆଞ୍ ଆମ୍ତେ ଗୁଆରି ଗାର୍ଡେ ଆଞ୍ତେ ପିଞିଞ୍ଡୁ, ଆଞ୍ ପେରେଅଜ ଆମା ଅଚ ଅଚମ୍ଡେ ଅନା ।" 60 ଏଲେ ଏରେ ଲୁକରତେ ଜିସୁ ଗାମ, "ଗମଜ୍ତା ଲୁକକି ଗମଜ୍ତା ଲୁକକା ମାଳା ତିନ୍ଡେମେକି । ଏଲେ ଆମ୍ ଅନା ବିରି ଇସରଆ ରାଇଜରା ଗାତାର ଗାତାଏ ।" 61 ଆଉ ମିନଗ୍ତା ଲୁକ ଡେନଜ ଗାମ, "ଆଞ୍ ଆମା ଅଚଅଚମ୍ଡେ ଅନା । ଏଲେ ଆଞା ଇଞାନିଞା ଲୁକକି ଆସିକିକି । ଆରକିତେ ଗାତାରମାନ୍ଜ ଡେଣ୍ଡେ ।" 62 ଏଲେ ଏରେ ଲୁକରେତେ ଜିସୁ ଗାମ, "ଜିଏ ସିନିଆ ମୁଟିରାତେ ଇତିର ଉନଜ ଅଚଲିବ ଲଙ୍କେ ଆର ଇସରଆ ରାଇଜଆ ଲାଗି ଡିଅ ଜେନା ।"
ଜିସୁ ତିନିକୁଳି ବାରଜଣତେ ଚାଲା ଇତେ ବାଚେଅ
1 ତା ଅଚତା ପରବୁ ଆଉ ତିନିକୁଳି ବାରଜଣତେ ବାଚେଅ । ଆଉ ଜୁ ଜୁ ଗଳ ଗାଆଁ ଜାଗାରେକିବ ଜିସୁତେ ଅଙ୍ଗର୍ତେ ଇସେତାନ୍ ଏରେ ଜାଗାରେବ ବାନଣଗ୍ ଲେକା କିନ । 2 ଜିସୁ ଏରେ ଲୁକରେକିତେ ଗାମ, "ବୁଆ ଗାଗାର୍ତେ ସୁଗାଇ ଆସିକେ । ଏଲେ କମ କିକିବ୍ତେ ଲୁକକି ଅଳପ ଆସିକିକି । ବୁଆରା ମାଲିକରା ଆସରାତେ ପାତାନା କିମାପେ 'ଆମା ବୁଆ ଗାଗାର୍ତେ ସୁଗାଇ ଲୁକକିତେ ମିକିନେ ।' 3 ଆପେମାନକି ଅନାପେ ଡାଏ, ଆପେତେ ଉଣ୍ଡାଳିଆକା ବିତିରୁ ମେଣ୍ଡାକନନ୍କା ଡେଗାନ୍ କିନ୍କେ । 4 ବେଗ୍, ଗୁଣ୍ଡିରା ଆଉ ଜୁତା ଏଗଗାନ୍ଡ । ଗଟାଙ୍ତେ କିଏତେ ଜୁଆର ଇକିବର । 5 ଆପେ ଜୁ କିଣିସି ଇଞାତେ ଇଡୁଇନା ଉନୁକୁଳ ଏଗାମେ 'ନି ଇଞାରେତେ ଡିଅ ସାନ୍ତି ଇରେମେ ।' 6 ଏରେ ଇଞାରା ଲୁକରେ ସାନ୍ତିରେ ମାସିନା ତା ଏଲେ ଇସର ଆରତେ ସାନ୍ତି ଡିମିଞେ । ଏଲେ ଇଞାରା ଲୁକରେ ସାନ୍ତିରେ ରଏତେ ମନ ଆକିବଜ ଇସର ଆରତେ ସାନ୍ତି ଆଡିଞ୍କେ ଜେନା । 7 ଆପେ ଜୁ ଇଞାବ ଇଡୁଇନା ଏରେ ଇଞାରାତେ ଏରଏନା । କମ କିମିବ୍ସେନା ଲୁକରା ମୁଲ କୁକୁଇତେ ଅକ୍କ ଆସିକେ । ଏତେ ଆରକି ଜା ଡିମିଞେକି ଏରେ ଇଉରେ ଇଜିମେ । 8 ଜୁ କିଣିସି ଗଳବ ଆପେ ଏଅନଜ ଆଉ ଲୁକକି ଆପେତେ ଡାମାକେକି, ଏରାତେ ଜା ଜା ଉରୁର୍ତେ କିମିବ୍ସେରେକି ଆପେ ଏରେ ଇଉରେ ଇଜିମେ । 9 ଏରେ ଜାଗାରା ରୁଗା ରୁଗି ଲୁକକିତେ ଡିଅ କିବେପେ ଆଉ ଆରକିତେ ଗାମେପେ 'ଇସରଆ ରାଇଜର ଆପେଆ ଆସପେବ ଆଉଚିଆନ୍ତେ ।' 10 ଏଲେ ଜୁ କିଣିସି ଗଳବ ଆପେ ଏଆଉଚିଆନ୍ଜ ଆପେତେ ଲୁକକି ଡିଅ ଆବୁଜିକେକି ଜେନା, ଆପେ ବାଏ ଗଟାଙ୍ବ ଆରିନାପେ ବିରି ଗାମେପେ 11 'ଆପେଆ ଗଳଆ ଜୁ ଦୁଳି ନିଞା ପାଦନିଞା ଲାଗେସେରେ, ଆପେଆ ବିରୁଦରେ ନି ଦୁଳିରେ ନେଜାଳେକେ । ଏଲେ ବି ଇସରଆ ରାଇଜର ଆଉଚିଆନ୍ତେ ଏରେ ଆପେ କଙେପେ ।' 12 ଆଞ୍ ଆପେତେ ଗାମ୍କେ ଜୁ, ବିଚାର ମିନା ବଳତେ ଏରେ ଗଳରା ଲୁକରାକା ଦସା ତାକୁରି ସଦମଆ ଲୁକରାକା ଦସା ସୁଗାଇ ଡିଅ ମିନା । " 13 ଜିସୁ ଆଉତରମିଞ୍ତା ଗାମ, "କୋରାଜିନ୍ ଆଉ ବେତ୍ସାଇଦା ଗଳଆ ଲୁକକି, ଆପେଆ ଗଳରେକିଆତେ ଆଞ୍ ଜୁ କାବା କମ ଆବ୍ଜସେକେ ଏରେ କମରେକି ଜଦି ସୁର ଆଉ ସିଦନ ଗଳରାକିଆତେ କିବ୍ସେତାନ୍ ତା ଏଲେ ଏରେ ଗଳଆ ଲୁକରେକି ବସତା ଆଣ୍ଡିଜାନ୍କିଜ ଆକବ୍ତେ ଡକଆନ୍କିଜ ନିଜ ନିଜଆ ମନରକି ବଦଳାଏସେତାନ୍କି ଆଉ ପାପ କମ ସାଡେସେତାନ୍କି । 14 ଏଲେ ବିଚାର ଦିନତେ ସୁର ଆଉ ସିଦନ ଗଳଆ ଲୁକକା ଦସା ତାକୁରି ଆପେଆ ଦସା ସୁଗାଇ ବାଗି ମିନା । 15 ଏ କପର୍ନାଉମ, ଆମ୍ ବିରି ଜେତିକି ଆକାସ ଆଲିଙ୍ ଏରେ ବୁଲୁଙ୍ ଜାକଜ୍ ମନା? ଜେନା, ପାତାଳ ଜେତିକି ତୁଳି ଏରେ ବୁଲୁଙ୍ ତୁଳି ଜାକଜ୍ ମନା ।" 16 ଜିସୁ ଆଉତରମିଞ୍ତା ଚାଲାରକିତେ ଗାମ, "ଜିଏ ଆପେଆ ଗାତା ଅଙ୍କେ ଆର ଆଞା ଗାତା ଅଙ୍କେ । ଆଉ ଜିଏ ଆପେଆ ଗାତାପେରେ ବାଗି ବୁଜିକେ, ଆର ଆଞ୍ତେ ବାଗି ବୁଜିକେ, ଆଉ ଜିଏ ଆଞ୍ତେ ବାଗି ବୁଜିକେ, ଆର ଆଞା ସରଗଆ ଅବାଞ୍ତେ କିଲଙ୍ ବାଗି ବୁଜିକେ ।"
ତିନିକୁଳି ବାରଜଣ ଚାଲାରକି କମ ଉଟାଅକିଜ ପେରେଅକି
17 ତା ଅଚତା ଏରେ ତିନିକୁଳି ବାରଜଣ ଚାଲାରକି ପେରେଅକି ବିରି ସୁଗାଇ କୁସିରେ ଗାମକି, "ପରବୁ କଏଲଙ୍କିତେ ଜେତେବଳଆ ଆମା ନାଅଁମ୍ଡେ ନେଗାମ ଏରେବେଳା କଏଲଙ୍କି ନିଞା ଗାତାନିଞ୍ଡେ ମାନେଅକି ।" 18 ଜିସୁ ଚାଲାରକିତେ ଗାମ, "ମବ୍ଲେର୍କେ ଡେଗାନ୍ ଆକାସ ଆଲିଙ୍ତା କୁବା କଏଲଙ୍ ସଏତାନ ତୁଳିବ ଅଳଗ୍ଡେ ଏରେ ଆଞ୍ ଜୟ । 19 ଜଏପେ, ଆଞ୍ ଆପେତେ ବାବୁଙ୍ ଆଉ କାଳାର୍ ତୁତୁକାର୍ ଆଲିଙ୍ତା ଡାଇଙ୍ତେ ଅକ୍କ ଡିଞ୍ଚେକେ । ସୁତୁରଆ (କୁବା କଏଲଙ୍ ସଏତାନଆ) ବଳ ଅରାଏତେ ଆଞ୍ ଆପେତେ ଅକ୍କ ଡିଞ୍ଚେକେ । ଆଉ କିଣିସି କିଚି ଗାତା ସରିକା ଆପେତେ ବାଗି କିକିବ୍ ଆରିମ୍ଡେ ଜେନା । 20 ଏଲେ କଏଲଙ୍କି ଆପେଆ ଗାତା ମାନେକେ ଏଗାମଜ କୁସି ଇଆନ୍ଡ । ଆପେଆ ନାଅଁ ସରଗଆ ଲେକା ଇସେରେ ବୁଲି କୁସ ଇନାପେ ।" 21 ଏରେ ବଳଆ ନିମୁଳ ଆତାମା ଜିସୁତେ ସୁଗାଇ କୁସି କିବ ଆଉ ଜିସୁ ଗାମ, "ବାଆ, ସରଗ ଆଉ ନି ମୁଲକଆ ମାଲିକ ଆମ୍ । ଗିଆନ ବୁଦିଆ ଲୁକକାତା ନି ସାବୁରିଞ୍ ଗାତାରେ କଳେର ମୁନଜ ଏଣ୍ଟେଜ୍ ଉଆଳିକା ଡେଗାନ୍ ମୁରୁକ ଲୁକକା ସାମୁରାକାତେ ମେଗାତାଅ । ଏତେ ଆମ୍ତେ ଦନିଅବାଦ ଡିଞ୍କମ୍ । ଅଏ, ବାଆ ଏରେ ଆମ୍ ଜିମିତି ମନ ମିକିବ ଏରେ ନୁଣିଞ୍ଡ ଇଆନା ।" 22 ଜିସୁ ଲୁକରେକିତେ ଗାମ, "ଆଞା ଅବାଞ୍ ଆଞ୍ତେ ସାବୁରିଞ୍ ଗିନିସ ଡିଞ୍ଚେକେ । କନନ୍ଡ ଆଡି ଏରେ ଅବାଞ୍ ତାକୁରି କେଇ ଆଙ୍କକେକି । ଆଉ ଅବାଞ୍ ଆଡି ଏରେ କନନ୍ଡା ତାକୁରି କେଇ ଆଙ୍କକେକି । ଆଞା ଅବାଞା ଗାତାର ଜିଏତେ ଆଞ୍ ଗାତାଏତେ ମନ କିବ୍କେ ଆର କିଲଙ୍ ଆଞା ଅବାଞ୍ତେ କମଙେ ।" 23 ଜିସୁ ଚାଲାରାକା ସାମୁରାକାତେ ବେଳାମିଞ୍ ବୁଲିଆନ୍ଜ ଉଡାଇ ଚାଲାରକିତେ ଗାମ, "ଆଞ୍ ଜୁ ସାବୁରିଞ୍ କିବ୍କେ, ଏରେ ସାବୁରିଞ୍ ଆପେ ଏଜଏକେ ଏତେ ଆପେ ଦନିଅ । 24 ଏଲେ ଆଞ୍ ଆପେତେ ଗାମ୍କେ ଆପେ ଜା ଏଜଏସେକେ, ଏରେ ସାବୁରିଞ୍ ଇସରଆ ଗାତା ଗାତାନମାନ୍କି ଲୁକକି ଆଉ ରାଜାକି ଜଜଏତେ ମନ କିକିବ୍ମମାନ୍କି ଏଲେ ଜଜଏ ଆରିମାନ୍କି । ଆଉ ଆପେ ଜା ଜା ଏଅଙ୍କେ ଏରେ ସାବୁରିଞ୍ ଅଙ୍ତେ ମନ କିକିବ୍ମମାନ୍କି ଏଲେ ଆଅଙକି ।"
ସମିରଣ ଗଳଆ ମିନଗ୍ ଡିଅ ଲୁକରା ଆଗ
25 ମିନଗ୍ ଉକିଲ ଡେନଜ ଜିସୁତେ ପରିକା କିବଜ ଗାମ, "ଏ ଗୁରୁ ଆଜେଳାଏକେ ଜିବନ କୁକୁଇତେ ଆଞ୍ତେ ବିରି କିକିବ୍ତେ ମିନା?" 26 ଜିସୁ ଆରତେ ଗାମ, "ଇସରଆ ବଇରେ ବିରି ଲେକା ଇସେରେ? ଆମ୍ ଏରେ ସୁଣିଞ୍ଡ ମେବୁଜିକେ?" 27 ଲୁକରେ ଗାମ, "ଆପେ ନିଜଆ ମନପେରେ, ସାବୁରିଞ୍ ଆତାମାପେରେ ଆଉ ସାବୁରିଞ୍ ବଳ ସକତିପେରେ ଡିଞେପେ ବିରି ପରବୁ ଇସରତେ ଡିଅ କୁଇଏପେ । ଆପେ ନିଜତେ ଜିମିତି ଡିଅ ଇକୁଇରେ, ଏରେ ନୁଣିଞ୍ଡ ଆପେଆ ସାଇ ପଡିସା ଲୁକକିତେ କିଲଙ୍ ଡିଅ କୁଇଏପେ । ଇସରଆ ବଇରେ ଏରେ ସାବୁରିଞ୍ ଲେକା ଇସେରେ ।" 28 ଏତେ ଜିସୁ ଗାମ, "ଆମ୍ ଟିକ୍ ମେଗାମ୍କେ । ଏରେ ନୁଣିଞ୍ଡ ମିକିମା, ତା ଏଲେ ଆମ୍ ଆଜେଳାଏକେ ଜିବନ ମିକୁଇନା ।" 29 ଏଲେ ଲୁକରେ ନିଜତେ ଡିଅ ଆବ୍ଜରମ୍ତେ ମନ କିବ । ଏତେ ଜିସୁତେ ଜିଙ "ଆଡି ଆଞା ସାଇ ପଡିସା ଲୁକକି?" 30 ଜିସୁ ମୁଇଣ୍ଟ ଆଗ ଗାତାଅଜ ଗାମ, "ମିନଗ୍ ଲୁକ ଜିରୁସାଲମତା ଜିରିଅ ଗଳବ ଅଙ୍ଗର୍ନମାନ୍ ଏରେବେଳା ଡାକୁକା ସାମୁରାକାତେ ଆବଡେରମାନା । ଡାକୁକି ଲୁକରା କତେରକି ସାଡାଏଆନ୍କିଜ ଆବୁଜକି ବିରି ଗମଜ୍ତା ଅଳଙ୍ଗର କିବକିଜ ଗଟାଙ୍ତେ ଅୟରକିଜ ଡୁଙକି । 31 ରସମିଞ୍ ଇଆନ୍ ଅଚତା ଜିଉଦି ଲୁକକା ମିନଗ୍ ନାଗମ୍ ଏରେ ଗାଟାଙ୍ତା ଇଆନ୍ଜ ଡେନ । ଲୁକରେତେ ଜୟଜ ନାଗମ୍ଡେ ଗଟାଙ୍ଡେ ସାଗାନ୍ଜ ଡୁଙ । 32 ଏରେ ନୁଣିଞ୍ଡ ମିନଗ୍ ଲେବି ଲୁକ କିଲଙ୍ ଏରାତେ ଆଉଚିଆନା । ଲୁକରେତେ ଜୟଜ ଆର କିଲଙ୍ ଗଟାଙ୍ ସାଗାନ୍ଜ ଡୁଙ । 33 ଏଲେ ମିନଗ୍ ସମିରଣି (ସାନ ଜାତି) ଲୁକରେ ଡେନଜ ଲୁକରା ସାମୁରା ଆଉଚିଆନା । ଲୁକରେତେ ଜୟଜ ଦୟା ଲାଗେଆନା । 34 ଆରା ସାମୁରବ ଅନଜ ଲୁକରା କେଳେଞ୍ଡାତେ ଅସ ଅଜନ୍ କାର ଆଉ ଅଙ୍ଗୁର ରସ ରଗଜ ପଟି ତର । ଲୁକରେତେ ନିଜଆ ଗଦରାତେ ଡବ୍କଅଜ ମୁଇଣ୍ଟ ଇଞାବ ଗଗଜ ଲୁକରା ଜତନ କିବ । 35 ତା ଆରଦିନ ସମିରଣି ଲୁକରେ ଅମ୍ବାଟ ରୁପା ଟାଙ୍କା ଆବିରାଅଜ ଇଞାରା ଲୁକରେତେ ଡିଞଜ ଗାମ 'ନି ଲୁକରା ଜତନ ମେଗନା । ଆଉ ଜା ସୁଗାଇ କରଚ ମିନା ଏରେ ଆଞ୍ ପେରେଅଜ ଆମା ଅଦିକା ଟାଙ୍କାମ୍ଡେ ଡିଞମ୍ ।' " 36 ଆଗରେ ଗାତାଅଜ ଜିସୁ ଜିଙ "ନି ତିନି ଜଣକା ବିତିରୁ ଆଡି ଡାକୁକା ସାମୁରାକାତେ ଅଳଗ୍ସେରାନା ଲୁକରା ସାଇ ପଡିସା ବୁଲି ଏଗାମ୍କେ?" 37 ଉକିଲ ଗାମ, "ଜୁ ଲୁକରେ ଡାକୁକା ସାମୁରାକାତେ ଅଳଗ୍ସେରାନା ଏରେ ଲୁକରେତେ ଜିଏ ଦୟା କିବ ଆର ।" ଜିସୁ ଲୁକରେତେ ଗାମ, "ଡାଏ ଆମ୍ କିଲଙ୍ ଏରେ ନୁଣିଞ୍ଡ ମିକିବେ ।"
ମାରାତା ଆଉ ମରିୟମ
38 ଆରକି ଅଙ୍ଗର୍ନମାନ୍କି ବଳଆ ଜିସୁ ମୁଇଣ୍ଟ ଗାଅଁବ ଡୁଇଆନା । ମାରାତା ନାଅଁର ମିନଗ୍ ସେଲାନ୍ ଆରା ଇଞାରବ ଉରୁର୍ତେ ଡାକେଅ । 39 ମାରାତାରା ମିନଗ୍ ବକରାଏର ଆସିଆନା । ନାଅଁର ମରିୟମ । ମରିୟମ ଜିସୁଆ ପାଦ ସାମୁରାତେ ଡକଆନ୍ଜ ଜିସୁଆ ଗାତାର ଅଙମାନ୍ । 40 ଏଲେ ମାରାତା ଇଞା କମରେତେ ସୁଗାଇ ଚିନ୍ତା କିକିବ୍ମମାନା । ମାରାତା ଜିସୁଆ ଆସରବ ଡେନଜ ଗାମ, "ଏ ଗୁରୁ ଆଞା ବକରାଞ୍ ଆଞ୍ତେ ମିନଗ୍ କମତେ କିବଞ୍ । ଏରେ ଆମା ବିରି ଚିନ୍ତା ଜେନା? ଆଞ୍ତେ କୁଟିଞ୍ କମତେ ସାକାଏରେମେ ଗାତାଏ ।" 41 ଏଲେ ପରବୁ ଗାମ, "ମାରାତା, ମାରାତା, ଆମ୍ ସୁଗାଇ ଗାତାତେ ଚିନ୍ତା ମିକିବ୍ଡେ ଆଉ ମେବାଳେରମ୍ଡେ । 42 ଏଲେ ମୁଇଣ୍ଟ ଗାତାରେ ଦରକାର ଆସିକେ । ଏରେ ଗାତାରେ ମରିୟମ ନିଜଆ ଲାଗି ଡିଅ ପସନ୍ଦ କିବାନ୍ଜ ବାଚେସେରେ । ଏରେ ଆରାତା କେଇ ସାଡାଏଆନ୍କିଜ ଆଗଗ୍ଡେକି ଜେନା ।"
ଜିସୁ ଚାଲାରକିତେ ପାତାନା କିକିବ୍ତେ ଆବ୍ସଜ
1 ଦିନମିଞ୍ ଜିସୁ ମୁଇଣ୍ଟ ଜାଗାତେ ପାତାନା କିକିବ୍ମମାନ୍ । ଜିସୁ ପାତାନା କିକିବ୍ଡ ଉଟାଏଆନ୍ଜ ଜିସୁଆ ଚାଲାରାକା ବିତିରୁ ମିନଗ୍ ଜିସୁତେ ଗାମ, "ଏ ପରବୁ, ଜଅନ ଜିମିତି ନିଜଆ ଚାଲାରକିତେ ପାତାନା କିକିବ୍ତେ ଆବ୍ସଜ୍ଚେର ଏରେ ନୁଣିଞ୍ଡ ଆମ୍ କିଲଙ୍ ନିଞ୍ତେ ପାତାନା କିକିବ୍ତେ ଆବ୍ସଜେ ।" 2 ଏତେ ଜିସୁ ଚାଲାରକିତେ ଗାମ, "ଜେତେବଳତେ ଆପେ ପାତାନା ଇକିମା, ଏରେ ବଳତେ ଏଗାମେ 'ବାଆ, ଆମା ନାଅଁମ୍ଡେ ନିମୁଳ ବୁଲି ମାନେରେମ୍କି । ଆମା ରାଇଜମ୍ଡେ ଡେଣ୍ଡେମେ । 3 ସବୁ ଦିନ ଲାଗି ଆମ୍ ନିଞ୍ତେ ତଣ ଉରୁର୍ତେ ଆନେ । 4 ଜୁ ଲୁକକି ନିଞା ଲାଗି ବାଗି କିବ୍ସେକିକି, ଆରକିତେ ନିଞ୍ କେମା ନିକିବ୍ସେକେ । ଏରେ ନୁଣିଞ୍ଡ ନିଞା ସାବୁରିଞ୍ ପାପ କେମା କିବେ । ପରିକାତେ ଅଳଗ୍ତେ ନିଞ୍ତେ ମିଡିଞର ।' " 5 ଆଉ ଜିସୁ ଚାଲାରକିତେ ଗାମ, "ମନେ କିବେପେ ଆପେଆ ମିନଗ୍ ବନ୍ଦୁ ଆସିକେ । ଆପେ ଆରା ଆସରବ ଏଅନଜ ମୁଜିରାତିତେ ଏଗାମେ, 'ଏ ବନ୍ଦୁ ଆଞା ମିନଗ୍ ବନ୍ଦୁ ମୁଇଣ୍ଟ ଗଳତା କୁଣିଆ ଡେନଜ ଆଉଚିଆନା । 6 ଆରତେ ଉରୁର୍ତେ ଡିଡିଞ୍ତେ ଆଞା କିଚି ଜଅତେ । ଏତେ ଆଞ୍ତେ ଏଗଟା ଅଳାଗ୍ପେରେ ଉଦାର ଆନେ' । 7 ବନ୍ଦୁରେ ଆଲୁଙ୍ତା ଏରେ ନୁଣିଞ୍ଡ ଗାମାମେ "ଅଏରାଣ ମିକିବର । ଦୁଆରଆ ସେଡାଗ୍ଡେ କରାନ୍ତେ ଆଉ ଆଞା ଉଆଳିଞ୍କି ସାମୁଞା ଲେବେର୍କେକି । ଆଞ୍ ବୁଳୁରାନ୍ଜ ଆମ୍ତେ ଡିଡିଞ୍ ମା ରିମ୍ଡେ ଜେନା ।" 8 ଆଞ୍ ଆପେତେ ଗାମ୍କେ ଏରେ ଲୁକରେ ଆପେଆ ବନ୍ଦୁ ବୁଲି ବୁଳୁରାନ୍ଜ ଡିମିଞେ ବୁଲି ଆପେ ଏବାବେଅର । ଏଲେ ବି ଆପେ ଗଣତେ ଗଣତେ ଏଗାରାନ୍ଜ ଲୁକରେ ବୁଳୁରାନ୍ଜ ଆପେଆ ଜେତିକି ଦରକାର ଆସିକେ ଆର ଡିମିଞେ । 9 ଆଞ୍ ଆପେତେ ସୁତୁକୁରିଞ୍ ଗାମ୍କେ, ଇସରଆ ସାମୁରାତେ ଏଗାର୍ଗାନମା ଆପେତେ କିଲଙ୍ ଡିଡିଞ୍ ମିନା । ଏଡଗରାଏନମା ଆପେ ଇକୁଇନା । ଦୁଆରଆ ସେଡାଗ୍ତେ ଏପେଟେନମା ଏଲେ ଆପେଆ ଲାଗି କାକାଜ୍ ମିନା । 10 ଜୁ ଲୁକକି ଇସରଆ ସାମୁରାତେ ଗାର୍ଡେକି ଏରେ ସାବୁରିଞ୍ତେ ଡିଞ୍ଡିଞ୍ ମିନା । ଜୁ ଲୁକକି ଡଗରାଏରେକି ଆରକି କୁଇରେକି । ଜୁ ଲୁକକି ଦୁଆରତେ ପେଟେକେକି ଏରେ ସାବୁରିଞା ଲାଗି ସେଡାଗ୍ଡେ ଇଗ୍ ମିନା । 11 ଆଉ ଆପେଆ ବିତିରୁ ଆଡି ଏରେ ନୁଣିଞ୍ଡ ଅବାର ଇସେରେ ଜିଏ ଆରା କନନ୍ଡ କାରଙ୍ ଗାରାନ୍ଜ ଉଆଲିରେତେ କାରଙା ବଦଳର ବାବୁଙ୍ ଡିଞ୍କେ? 12 ସୁସୁତେର୍ ଗାରାନ୍ଜ ଆରତେ କଳାର୍ ତୁତୁକାର୍ ଡିଞ୍କେ? 13 ଆପେ ବାଗି ଇଆନ୍ ସରିକା ନିଜ ନିଜଆ କନନ୍ପେତେ ଡିଅ ଡିଅ ଦାନ ଡିଞ୍ଡିଞ୍ ଏକଙେ । ତା ଏଲେ ନିଞା ସରଗଆ ବା ଇସର ଆରା ସାମୁରାତେ ଗାର୍ଡେକି ଲୁକକିତେ କିତି ସୁଗାଇ ନିମୁଳ ଆତାମା ଡିମିଞେ ।"
କିତିକ ଲୁକକି ଗାମକି, "କୁବା କଏଲଙ୍ ସଏତାନ ବଳ ଡିଞଜ ଜିସୁ କଏଲଙ୍କିତେ ଆବ୍ସାଡାଏକେ"
14 ଦିନମିଞ୍ ଜିସୁ ମିନଗ୍ ଲୁକରେତେ ମୁଇଣ୍ଟ କଏଲଙ୍ ଆବ୍ସାଡାଅଜ ଡିଅ କିବ । ଏରେ କଏଲଙ୍ଡେ ସବ୍ସେର ଏତେ ଲୁକରେ ଗାତା ଆରିମମାନ୍ । କଏଲଙ୍ଡେ ଆରିଆନା ଅଚତା ଲୁକରେ ଗାତାଅ । ଏତେ ଲୁକକି ସାବୁରିଞ୍ କାବା ଇଆନ୍କି । 15 ଏଲେ ଆରାକା ବିତିରୁ ଅଦକ ଅଦକ ଗାମକି, "ଜିସୁତେ କଏଲଙ୍କା ରାଜା ବାଲ୍ଜିବୁଲ ବଳ ଡିଞଜ ଜିସୁ କଏଲଙ୍କିତେ ଆବ୍ସାଡାଏକେ ।" 16 ଡାବୁଙ୍ ଲୁକକି ଜିସୁତେ ପରିକା କିକିବ୍ତେ ଗାମକି, "ଆକାସ ଆଲିଙ୍ତା ମୁଇଣ୍ଟ କାବା କମ (ଚିନ) ଆବ୍ଜଏ ।" 17 ଏଲେ ଜିସୁ ଆରାକା ମନ ଗାତାରକି ଜାଣି ଙ୍କଙଜ ଆରକିତେ ଗାମ, "ଜିଣିସି ରାଇଜରେ ନିଜଆ ବିରୁଦରେ କଲେଜ୍ କଗାମ୍ଡେକି, ତା ଏଲେ ଏରେ ରାଇଜରେ ଆରଏରେ ଜେନା । ମୁଇଣ୍ଟ ଇଞା ଲୁକକି କଲେଜାନ୍କିଜ ଇଞାରେ ବାମାଟୁଙା । 18 ଏରେ ନୁଣିଞ୍ଡ କୁବା କଏଲଙ୍ ସଏତାନ କଏଲଙ୍କା ବିରୁଦରେ ତଙନାନ୍ଜ ଆରା ରାଇଜର ସୁଣିଞ୍ଡ ରମଏନା? ଆଞ୍ ବାଲ୍ଜିବୁଲଆ ବଳରବ କଏଲଙ୍କିତେ ସାଡାଏକେ ବୁଲି ଆପେ ତ ଏଗାମ୍କେ । 19 ଆଉ ଆଞ୍ ଜଦି ବାଲ୍ଜିବୁଲଆ ବଳରବ କଏଲଙ୍କିତେ ସାଡାଏକେ, ଏଲେ ଆପେଆ ଚାଲାପେରେ ଆଡିଆ ବଳବ କଏଲଙ୍କିତେ ସାଡାଏକିକି? ଏତେ ଆରକି ଗାମାମେକି ଜୁ ଆପେଆ ଗାତାପେରେ ଟିକ୍ ଜେନା । 20 ଏଲେ ଆଞ୍ ଜଦି ଇସରଆ ବଳ ସକତିରେ କଏଲଙ୍କିତେ ସାଡାଏକେ, ତା ଏଲେ ଇସରଆ ରାଇଜର ଆପେଆ ସାମୁପେବ ଆଉଚିଆନ୍ତେ । 21 "ମିନଗ୍ କୁବା ବଳୁଆ ଲୁକ କଣ୍ଡା, ଟେଙ୍ଗା ସବାନ୍ଜ ଆରା ନିଜ ଇଞାର ଜଗେଅଜ ଆରା ଦନ ସମ୍ପତିର ଆଉ ଇଞାରେ ରମଏନା । 22 ଲୁକରେ ଆରା କଣ୍ଡା ଆଉ ଟେଙ୍ଗାରକିତେ ବିସାସ କିବ୍କିମମାନ୍ । ଏଲେ ଜେତେବଳତେ ଏରେ କୁବା ବଳୁଆ ଲୁକରାତା ଆଉ ମିନଗ୍ତା ବଳୁଆ ଲୁକରା ତୁଲଙ୍ କୁରିମାନ୍ଜ ଜେମେତେ, ଆଉ ଏରେ ଲୁକରା କଣ୍ଡା ଟେଙ୍ଗାରକିତେ ସୁଗାଇ ବଳୁଆ ଲୁକରେ ସାଡାଏଆନ୍ଜ ଗମଙା । ଆଉ ଆରା ସାବୁରିଞ୍ ଦନ ସମ୍ପତିରକି କିଲଙ୍ ଗଗାନ୍ଜ ତାମାତାଜେ । 23 "ଜୁ ଲୁକ ଆଞା ତୁଲଙ୍ ଜେନା, ଆର ଆଞା ବିରୁଦରେ ଆସିକେ । ଜୁ ଲୁକ ଆଞା ତୁଲଙ୍ ଲୁକକିତେ ଇସରଆ ସାମୁରବ ବିସାସ କିକିବ୍ତେ ଆଟୁଳାଏକେ, ଆର ଲୁକରେକିତେ ଆଉବ ନିବ କିବ୍କେ ।
ବାଗି ଆତାମା ମିନଗାତା ଆରିଆନ୍ଜ ପେରେ ରିମିମା
24 "ଜେତେ ବଳତେ ମିନଗ୍ ଲୁକଆତା କଏଲଙ୍ଡେ ଆରିରେ, ଏରେ ବଳତେ କଏଲଙ୍ଡେ ଜିରାଏତେ ଜାଗା ଡଗରାଏତେ ଲମାଗେନା । ଡାଗ୍ ଆରାସିଆନା କସର ଜାଗା ବୁଲିଅଜ ଜିରାଏତେ ଜାଗା ଆକୁଇଆନ୍ଜ ଗାମାମେ 'ଆଞ୍ ଜୁ ଲୁକଆତା ଡେନ୍ଚେର ଏରେ ଇଞାବ ବେଜ୍ପେରେ ।' 25 ଏଲେ କଏଲଙ୍ଡେ ବେଜ୍ପେରେଅଜ ଜମଏ ଜୁ ରଏସେରାନ୍ ଜାଗାରେ ଡିଅ ସାପାସୁତୁରା ଆସିକେ । 26 ଏରେବଳତେ କଏଲଙ୍ଡେ ବେଜ୍ପେରେଅଜ ଆରାତାକୁରି ସୁଗାଇ ବାଗି ସାତଗଟା କଏଲଙ୍କିତେ ସାଙ୍ଗେର ଡାକେଅଜ ମରେନେ । କଏଲଙ୍ଡେକି ଏରେ ଲୁକରା ଆଲୁଙ୍ବ ଡୁଇଆନ୍କିଜ ଏରାତେ ରମଏନାକି ଆଉ ଏରେ ଲୁକରା ଉନୁକୁଳ ଦସାତାକୁରି ଅଚ ଦସା ସୁଗାଇ ବାଗି ମିନା ।"
ଆଡି ସୁତୁକୁରିଞ୍ ଦନିଅ ଆସିକେ?
27 ଜିସୁ ନି ସାବୁରିଞ୍ ଗାତାଅ ଏରେବେଳା ଏରାତେ ଆସିଆନ୍କି ଲୁକକା ବିତିରୁ ମିନଗ୍ ଜୁଆଙ୍ଣ୍ଡାଏ ତଙନାନ୍ ବିରି ଲିଲାଅଜ ଜିସୁତେ ଗାମ, " ଆମା ବୁଇନମ୍ ଦନିଅ ଜିଏ ଆମ୍ତେ ଜନମ ଡିଞ୍ଚେକମ୍ ଆଉ ଦୁଦ ଆମ୍ବୁଅମ୍ଜ ଆବ୍କୁବାସେକମ୍ ।" 28 ଜିସୁ ଗାମ, "ଏଲେ ଜୁ ଲୁକକି ଇସରଆ ଗାତା ଅଙ୍କେକି ଆଉ ମାନେଅକିଜ ପାଳନ କିବ୍ଡେକି, ଏରେ ଲୁକରେକି ସୁଗାଇ ଦନିଅ ଇରେକି ।"
କାବା ଚିନ ଜଜଏତେ ଲୁକକି ଡଗରାଆନ୍କି ଏତେ ଜିସୁ ଲୁକକିତେ ବୁଜାଅ
29 ଲୁକକି ସାବୁରିଞ୍ ଦଳ ଦଳ ଇଆନ୍କିଜ ଜିସୁଆ ସାମୁରାତେ ଇକୁଡିଆ ଇସେରାନ୍କି ଏରେବେଳା ଜିସୁ ଗାଙ୍ଗାମ୍ତେ ଲାଗେଆନା "ନି ମିସିଞ୍ଡା ଜୁଗରା ଲୁକକି କିତିକ ବାଗି ଆସିକେକି । ନିଇକି ମୁଇଣ୍ଟ ଚିନ ଡଗରାଏରେକି । ଏଲେ ଜୁନସଆ ଚିନର ନି ଲୁକରେକିତେ ଡିଞ୍ଡିଞ୍ ମିନା ଆଉ କିଣିସି ଚିନ ନି ଲୁକରେକିତେ ଡିଡିଞ୍ ଆଇରେ ଜେନା । 30 ଜୁନସ ଜିମିତି ନିନିବିରା ଲୁକକିତେ ଚିନ ଡେଗାନା ଇସେରାନା, ମୁଣୁସ କନନ୍ କିଲଙ୍ ଏରେ ନୁଣିଞ୍ଡ ନି ମିସିଞ୍ଡା ଜୁଗରା ଲୁକକିତେ କିଲଙ ଚିନ ମିନା । 31 ଦକିଣ ଦେସରା ରାଣିରେ ସଲୁମନଆ ଡିଅ ଗିଆନ ଗାତାର ଅଙ୍ତେ ସୁଗାଇ ଲାଙ୍କାତା ଡେଞ୍ଚେର । ଆଉ ଜଏପେ, ସଲୁମନଆ ତାକୁରି କୁବା ଲୁକ ନାନ୍ ଆସିକେ । ଏତେ ଇସର ଲୁକକିତେ ବିଚାର କିକିବ୍ଡା ବଳତେ ଦକିଣ ଦେସଆ ରାଣି ତଙନାନ୍ଜ ନି ଜୁଗରା ଲୁକକା ଦୁସ ସମବେ । 32 ନିନିବିରା ଲୁକକି ଜୁନସଆ ଗାତାରତେ ମନ ବଦଳାଏସେରାନ୍କି । ଜଏପେ, ଜୁନସଆତାକୁରି କୁବା ଲୁକ ନାନ୍ ଆସିକେ । ଏତେ ଇସର ଲୁକକିତେ ବିଚାର କିମିବେ ଏରେ ବଳତେ ନିନିବିରା ଲୁକକି ତଙନାନ୍କିଜ ନି ଜୁଗରା ଲୁକରେକା ଦୁସ ସମବେକି ।
ନି ମୁଲକଆତେ ଡିବିରି ଆଲ ଡେଡାନ୍ ରଏନାପେ
33 "ଡିବିରି ଆଲ ଲାଗାଅକିଜ ଆଜରେ ଜେନା ଜାଗାତେ ଆଉ ବାଟି କୁଳିବକିଜ ଆଉଣ୍ଡେକି ଜେନା । ଏଲେ ଲୁକକି ଜିମିତି ଆଲୁଙ୍ବ ଡୁଇଆନ୍କିଜ ଡିବିରି ଆଲରେବ ଜଜଏ ରିମିମାକି, ଏତେ ଡିବିରି ଉନୁନ୍ ଜାଗାତେ ଉନୁନ୍ ଇରେ । 34 ଆପେଆ ଅମର୍ ଆପେଆ ଇଣିପେଆ ଡିବିରି ଆସିକେ । ଜେତେବଳତେ ଆପେଆ ଅମର୍ପେରେ ଡିଅ ଆସିକେ, ଏରେବଳତେ ଆପେଆ ସାବୁରିଞ୍ ଇଣିପେରେ ଡିବିରି ଆଲ ଇରେ । ଏଲେ ଜେତେବଳତେ ଆପେଆ ଅମର୍ପେରେ ବାଗି ଆସିକେ, ଏରେବଳତେ ଆପେଆ ଇଣିପେରେ କିଲଙ୍ ଏନ୍ଦାରକର୍ଡ ମିନା । 35 ଏତେ ସାବଦାନରେ ରଏନାପେ ଆପେଆ ମନ ଆତାମାରା ଆଲ ଜିମିତି ଏନ୍ଦାରକର୍ ଆଇରେ ଜେନା । 36 ଜଦି ଆପେଆ ସାବୁରିଞ୍ ଇଣିପେରେ ଡିବିରି ଆଲ ଡେଗାନ୍ ମିନା ଆଉ କୁଟିଜ୍ ସରିକା ଏନ୍ଦାରକର୍ ଆରାସିକେ ଜେନା, ତା ଏଲେ ଆପେଆ ଆସପେଆ ଡିବିରି ଆଲ ଜିମିତି ଲାଗେଆନ୍ଜ କାରାଏକେ ଏରେ ନୁଣିଞ୍ଡ ଆପେ ସୁତୁକୁରିଞ୍ ଆଲୁଅରେ ଏଆସିନା ।"
ପାରୁସି ଲୁକକିତେ ଜିସୁ ଗାମ, "ଆପେ ଦୁସି"
37 ଜିସୁ ଗାତା ଆବ୍ସଜ ଅଚତା ମିନଗ୍ ପାରୁସି ଲୁକ ଜିସୁତେ ଇଞାରବ ଉରୁର୍ତେ ଡାକେଅ । ଆଉ ଜିସୁ ଆଲୁଙ୍ବ ଡୁଇଆନ୍ଜ ଉରୁର୍ତେ ଡକଆନା । 38 ଏଲେ ଆଉର୍ଚେର ଏରେବେଳା ଜିସୁ ଜିଉଦି ଲୁକକା ନିତିନିୟମ ଡେଗାନ୍ ଆପାଳେଆନ୍ଜ ଉନୁକୁଳ ଇତିର ଆଗୁଜ୍ତିସେରାନ୍ । ଏରେ ଜୟଜ ପାରୁସି ଲୁକରେ କାବା ଇଆନା । 39 ଏତେ ପରବୁ ପାରୁସି ଲୁକରେତେ ଗାମ, "ଏ ପାରୁସି ଲୁକକି, ଆପେଆ ଟାଟିଆକନନା ଆଉ ତାଳାଇପେରେକି ବାଏତା ସାପା ଇକିବାନ୍ଜ ଇଗୁଗୁଜ୍ଚେରେ । ଏଲେ ଆପେଆ ଆଲୁଙା ମନପେରେ ବାଗି ଇଂସା ଆଉ ଲୁବ ଅରେସେରେ । 40 ଏ ମୁର୍କ ଲୁକକି, ବାଏଆ ଜା ଜା ଆସିକିକି ଏରେ ସାବୁରିଞ୍ ଇସର ବନାଏସେକେ । ଏରେ ଇସରରେ ଆଲୁଙା ଜା ସାବୁରିଞ୍ ଆସିକିକି, ଏରେ କିଲଙ୍ ବନାଏସେକେ । ନି ଗାତାରେ ଆପେ କଙ୍କଙ୍ ଜେନା ବିରି? 41 ଏଲେ ଆପେଆ ଆଲୁଙା ଜା ଜା ଆସିକେ, ଏରେ ଲୁକକା ଆସରାକାତେ ଦାନ ଡିଞେପେ, ଆଉ ଜଏପେ ଆପେ ଡିଅ ସାପା ଇନା । 42 "ଏ ପାରୁସି ଲୁକକି ଆପେଆ ସୁଗାଇ ବାଗି ଦସା ମିନା । ଆପେ ସାବୁରିଞ୍ ଗିନିସଆ ଦସ ବାଗରୁ ମୁଇଞ୍ ବାଗ ଇସରତେ ଦାନ ଇଡିଞ୍କେ । ପୁଦୁନା ସାଗ ଆଉ ବାକାଳିଆ ସାଗରେ ଏକାମଜ ଦସ ବାଗତା ମୁଇଞ୍ ବାଗ ଇସରତେ ଇଡିଞ୍କେ । ଏଲେ ଡାବୁଙ ଲୁକକିତେ ଦୟା ନିଆୟ ମା ଇକିବ୍କେ ଆଉ ଇସରତେ ଡିଅ ମା ଇକୁଇକେ । ଆପେ ଦସ ବାଗତା ମୁଇଞ୍ ବାଗ ଇସରତେ ଡିଞେପେ ଏଲେ ଇସରତେ ଦାନ ଡିଞ୍ଡିଞ୍ଡା ବଳତେ ଆପେ ଲୁକକିତେ ଦୟା ନିଆୟ ଇକିବେ । 43 ଏ ପାରୁସି ଲୁକକି, ଆପେଆ ବାଗି ଦସା ମିନା । ଆପେ ମଜାଙ୍ ଇଞାରାତେ ଡିଅ ଡିଅ ଜାଗାତେ ଡକତେ ଡିଅ ଇକୁଇକେ । ଆଉ ଆଟ ବଜାରତେ ଡାବୁଙ୍ ଲୁକକି ଉଳୁଗିଆନ୍କିଜ ଡିଅ ଇକୁଇକେ । 44 ଆପେଆ ବାଗି ଦସା ମିନା । ଲୁକକିତେ ତିନ୍ ତିନ୍ ଜାଗାରାତେ ଲୁକକି କଙ୍କଙ୍ତେ ମୁଇଣ୍ଟ ଏଗେର ଉନ୍କିକି । ଏଲେ କିତିକ ଜାଗାରାତେ ଏରେ ନୁଣିଞ୍ଡ ଏଗେର୍ ଆଉନ୍କିକି । ଆପେ ଏରେନୁଣିଞ୍ ଏଆସିକେ । ଲୁକକି ଆକଙକିଜ ତା ଆଲିଙା ଡାଇଙ୍କିକି ।" 45 ଏଲେ ମିନଗ୍ ଉକିଲ ଲୁକ ଜିସୁତେ ଗାମ, "ଏ ଗୁରୁ ନି ଗାତା ମେଗାତାଅ ଜୁଗୁ ଆମ୍ ନିଞ୍ତେ କିଲଙ୍ ଅପମାନ ମିକିବ୍କେ ।" 46 ଜିସୁ ଗାମ, "ଏ ଉକିଲ ଲୁକକି, ଆପେ ଲୁକକିତେ ସୁଗାଇ ବାର ତିନ୍ତାର୍ତେ ଇଡିଞଜ ସୁଗାଇ କସଟ ଇଡିଞ୍କେ । ଏଲେ ଏରେ ବାର ତିନ୍ତାର୍ତେ ଆପେ ଆପେଆ ମୁଇଣ୍ଟ ଆଙ୍ଗୁଳିପେରେ ସରିକା ମା ଏଲାଗାଅଜ ସାଆଜ ମା ଇକିବ୍କେ, ଏତେ ଆପେଆ ବାଗି ମିନା । 47 ଆପେଆ ବାଗି ଦସା ମିନା । ଆପେ ଇସରଆ ଡିଅ ଗାତା ଗାତାନମାନ୍କି ଲୁକରାକା ଦିରେ ଡିଅ ସମାଦି ଏବନାଏନମ୍ଡେ । ଏରେ ଲୁକରେକିତେ ଆପେଆ ଅବାପେରେକି ଅବ୍ଗଜ୍ଚେରକି 48 ଏତେ ଆପେ କିଲଙ୍ ଅବାପେଆ ନି କମରେକି ଡିଅ ବୁଲି ଏଗାମ୍କେ । ଅବାପେରେ ଇସରଆ ଗାତା ଗାତାନମାନ୍ ଲୁକକିତେ ଅବ୍ଗଜ୍ଚେରକି ଆଉ ଆପେ ଆରାକା ଲାଗି ସମାଦି ଏବନାଏକେ । 49 ଏରେ ଗାତାରେ ଇସର ନିଜ ବୁଦି ଗିଆନରେବ ଗାତାଅ 'ଆଞ୍ ଲୁକକା ସମୁରାକାବ ଆଞା ଗାତା ଗାତାଏତେ ଲୁକକିତେ ଆଉ ଚାଲାରକିତେ କିନେ । ଆରାକା ବିତିରୁ କିତି ଜଣତେକ ଆରକି ମବ୍ଗଜେକି ଆଉ କିତି ଜଣତେକ ଦୁକ କସଟ ଡିମିଞେକି ।' 50 ନି ମୁଲକଆ ଉନୁକୁଳତାସୁନ୍ ସୁଗାଇ ଇସରଆ ଗାତା ଗାତାଏନମାନ୍କି ଲୁକକିତେ ଅବ୍ଗଜ୍ଚେକେ । ନି ସାବୁରିଞ୍ ଲୁକକା ଇଞାମ୍ଡା ଜୁଗୁ ଇସର ନି ଜୁଗରା ଲୁକକିତେ ଦଣ୍ଡ ଡିମିଞେ । 51 ଉନୁକୁଳ ଏବଲତେ ଆରା କାକାର ଅବ୍ଗଜ୍ଚେର । ତା ଅଚତା ଇସରଆ ଗାତା ଗାତାନମାନ୍ ସୁଗାଇ ଲୁକକିତେ ଲୁକକି ଅବ୍ଗଜ୍ଚେରକି । ଅଚତା ମନ୍ଦିର ଆଉ ବଳି ଡିଞ୍କିକି ଜାଗା ମୁଜିଆତେ ଜିକରିଅତେ ଅବ୍ଗଜ୍ଚେରକି । ଅଏ, ଆଞ୍ ଆପେତେ ଗାମ୍କେ, ନି ସାବୁରିଞ୍ ଲୁକକା ଇଞାମ୍ଡା ଜୁଗୁ ଇସର ନି ଜୁଗରା ଲୁକକିତେ ଦଣ୍ଡ ଡିମିଞେ । 52 ଉକିଲ ଲୁକକି, ଆପେଆ ବାଗି ମିନା । ଆପେ ଇସରଆ ବୁଦି ଗିଆନରା ଇଞାରେତେ ବନ୍ଦ ଇକିବଜ କୁଞ୍ଚିଆତ ଏମାରେସେକେ । ଆପେ ନିଜେ ଇସରଆ ଗିଆନ ମା ଏସଜ । ଏଲେ ଜୁ ଲୁକକି ଇସରଆ ଗିଆନ ସସଜ୍ତେ ମନ କିବ୍ଡେକି, ଆପେ ଆରକିତେ ସସଜ୍ତେ ଆମାଡିଞ ।" 53 ଜିସୁ ଏରେ ଜାଗାରେତା ଡୁଙ୍ଡୁଙମାନ୍ ଏରେବେଳା ଉକିଲ ଲୁକକି ଆଉ ପାରୁସି ଲୁକକି ଜିସୁତେ ଇଂସା କିକିବ୍ତେ ଲାଗେଆନ୍କି ଆଉ ସାବୁରିଞ୍ ଡାବୁଙ୍ ଡାବୁଙ୍ ଗାତାରେକି ଜିଜିଙ୍ତେ ଲାଗେଆନ୍କି । 54 ଏରେ ଲୁକରେକି ଜିସୁତେ ଜା ଏଲେ ବାଗି ଦୁସ ଗାତା ନେସବେ ଗାମକିଜ ମନ କିକିବ୍ମମାନ୍କି ।
ବାଗି ଗାତାତା ଲାଙ୍କାବ ରଏନାପେ
1 ଅଜାର ଅଜାର ଲୁକକି ଇକୁଡିଆ ଇଆନ୍କିଜ ଆରାକା ଆରାକା ପପଗ୍ ପାପାଗ୍ଡମାନ୍କି ଏରେ ବେଳା ଜିସୁ ନିଜଆ ଚାଲାରକିତେ ଗାଙ୍ଗାମ୍ତେ ଲାଗେଆନା "ପାରୁସି ଲୁକକାତା ସାମ୍ବାଳେନାପେ । ଆରକି କମିର ଡେଗାନା ଆସିକିକି । ଆରକି ମୁଇଣ୍ଟ ଗାତା ଗାତାଏକି ଆଉ ମୁଞ୍ଟତା କମ କମରେକି । 2 ଜା ସାବୁରିଞ୍ ସବାର୍ ଆସିକେ ଏରେ ସାବୁରିଞ୍ ଜମଏନା । ଆଉ ଜା ଜଣା ଆଇରେ ଜେନା ଏରେ ସାବୁରିଞ୍ ଜାଣି ମଳଙା । 3 ଆପେ ଜା ଜା ଅନ୍ଦାରକରା ଏଗାତାସେରେ, ଏରେ ଗାତାରେ ମେସାର୍ତେ ମଙେକି । ଆପେ ଇଞା ଆଲୁଙାତେ ଜା ଜା କଳେର ଲୁତୁର୍ତେ ଏଗାତାସେରେ, ଏରେ ଗାତାରେ ଇଞା ଆଲିଙାତେ ସାବୁରିଞ୍ତେ ମଙା ବଳିଆ ଗାତା ମିନା । 4 "ଆଞା ଜଳାଞ୍କି, ଆଞ୍ ଆପେତେ ଗାମ୍କେ ,ଜୁ ଲୁକକି ଇଣିରିକିତେ ଅବ୍ଗଜ୍କିକି, ତା ଅଚତା କିଚି କିକିବ୍ ଆରିମ୍ଡେକି ଜେନା । ଏତେ ଆରକିତେ ଏବେତଙାନ୍ଡ । 5 ଏଲେ ଆଡିତେ ଏବେତଙା, ଏରେ ଆଞ୍ ଆପେତେ ଆବଙେ । ଇଣିରତେ ଅବ୍ଗଜଜ ନରକତେ ଅବ୍ଳଗ୍ତେ ଇସରଆ ଅକ୍କ ଆସିକେ, ଆଞ୍ ଆପେତେ ଗାମ୍କେ ଆରତେ ବେତଙାପେ । 6 "କିଆନ୍ତେର୍ କନ୍ତେର୍କି ଅଳପ ଟାଙ୍କାବ ଆରାବ୍ସଙ୍ଡେକି ଜେନା ବିରି? ଏଲେ ବି ଇସର ମୁଇଣ୍ଟ ସରିକା କିଆନ୍ତେର୍ କନ୍ତେର୍ତେ ଆବାଣାରେ ଜେନା । 7 ଆପେଆ ବକବ୍ପେଆ ସାବୁରିଞ୍ ଜୁଣ୍ଟାପେରେ ଗଣେସେକେତେ । ଏବେତଙାନ୍ଡ, ଆପେ କିଆନ୍ତେର୍ କନ୍ତେର୍କାତାକୁରି ସୁଗାଇ ଦାମି ଏଆସିକେ । 8 "ଆଞ୍ ଆପେତେ ଗାମ୍କେ, ଜିଏ ଲୁକକା ସାମୁରାତେ ଆଞା ଗାତା ଗାତାଏକେ, ମୁଣୁସ କନନ୍ କିଲଙ୍ ଇସରଆ କବରିଆରାକା ସାମୁରାକାତେ ଆରାକା ଗାତାରେ ଗାମାତାଏ । 9 ଏଲେ ଜୁ ଲୁକରେକି ଲୁକକା ସାମୁରାକାତେ ଆଞା ଗାତାଞ୍ଡେ ଆଗାତାଏକେ ଜେନା, ମୁଣୁସ କନନ୍ କିଲଙ୍ ଇସରଆ କବରିଆରାକା ସାମୁରାତେ ଆରକିତେ 'ଆଞ୍ କଙ୍କଙ୍ ଜେନା' ଗାମାମେ । 10 ଜିଏ ମୁଣୁସ କନନା ବିରୁଦରେ ଗାତା ଗାମାତାଏ ଆରତେ କେମା ଡିଞ୍ଡିଞ୍ ମିନା । ଏଲେ ଜିଏ ନିମୁଳ ଆତାମା ବିରୁଦରେ ନିନ୍ଦା ଗାତା ଗାମାତାଏ ଆରତେ କେମା ଡିଞ୍ଡିଞ୍ ଆଇରେ ଜେନା । 11 "ଜେତେବଳତେ ଲୁକକି ଆପେତେ ମଜାଙ୍ ଇଞାବ ଆଉ ଜାରି କିବ୍କେ ଲୁକରା ଆସରବ ସବକିଜ ଡିଗାର୍ଚୁନ୍ ଗମଗେକି । ଏରେବଳତେ ଆପେ 'ନିଞା ନିଜ ଗାତାନିଞ୍ଡେ ସୁଣିଞ୍ଡ ନେଗାତାଏ ଆଉ ବିରି ନେଗାତାଏ' ଏଗାମଜ ଚିନ୍ତା ଇକିବ୍ବାନ୍ଡ । 12 ଏଲେ ବିରି ଗାଙ୍ଗାମ୍ତେ ମିନା, ଏରେବଳତେ ଆପେତେ ନିମୁଳ ଆତାମା ଗାମାତାଏ ।"
ମିନଗ୍ ଦନି ଲୁକରା ଆଗ
13 ଲୁକକା ବିତିରୁ ମିନଗ୍ ଲୁକ ଜିସୁତେ ଗାମ, "ଏ ଗୁରୁ ଆଞା କାକାଞ୍ତେ ଆଞା ତୁଲଙ୍ ଅବାଞା ଦନ ସମ୍ପତିର ବିଲ ବାକାଳି ବାଗ କିକିବ୍ତେ କାକାଞ୍ତେ ତାତାଜ୍ତେ ଆମ୍ ଗାତାଏ ।" 14 ଏଲେ ଜିସୁ ଲୁକରେତେ ଗାମ, "ଆପା ଅବାପାରା ଦନ ସମ୍ପତି ବିଲ ବାକାଳିରେ ତାତାଜ୍ତେ ଆଡି ଆଞ୍ତେ ଅକ୍କ ଡିଞ ?" 15 ଆଉ ଜିସୁ ଲୁକକିତେ ଗାମ, "ସାବଦାନରେ ରଏନାପେ । ସାବୁରିଞ୍ ଗିନିସରେକିତେ ଲୁବ ଇକିବର । ମିନଗ୍ ଲୁକ ସୁଗାଇ ଦନ ସମ୍ପତି ବିଲ ବାକାଳି କୁଇଆନ୍ଜ ବି ଆରା ଜିବନର ଡିଅ ମାସିନା ବୁଲି ଗାଙ୍ଗାମ୍ ଆଇରେ ଜେନା ।" 16 ଜିସୁ ଲୁକକିତେ ନି ଆଗରେ ଗାତାଅଜ ଗାମ, "ମିନଗ୍ ଦନି ଲୁକରା ବିଲରା ସୁଗାଇ ଡିଅ ବୁଆ ଇଆନା । 17 ଏତେ ଦନି ଲୁକରେ ମନେ ମନେ ବାବେଅଜ ଗାମ ' ବୁଲୁଙ୍ ବୁଆ ବିରି କିମା । ଆଞା ତାସରେକି ଇକୁଡିଆ ଟୁଉଳାନ୍ଜ ଉନୁନ୍ତେ ଜାଗା ଜତେ ।' 18 ତା ଅଚତା ଦନି ଲୁକରେ ଗାମ 'ଏରେ ନୁଣିଞ୍ଡ କିମାଜୁ ଆଞା ଉନୁକୁଳ ଇଞାଞ୍ଡେ ରାଜେ ବିରି କୁବାର ବନାଏନା ବିରି ଆଞା ଦନ ସମ୍ପତିରେକି ଉନା । 19 ତା ଅଚତା ଆଞା ନିଜ ମନଞ୍ତେ ଗାମେ "ଏ ମନ ସୁଗାଇ ବରସ ଲାଗି ଆମା ସୁଗାଇ ବୁଆ ଦନ ସମ୍ପତି ଇକୁଡିଆ ଟୁଳାଅଜ ଉନ୍ଚେକେ । ଏତେ ଏ ମନ ଜିରାଏନା ଆଉ ଉରେ ଜିମେ ବିରି ଅଇସିରେ ରଏନା ।" ' 20 ଏଲେ ଇସର ଦନି ଲୁକରେତେ ଗାମ 'ଏ ମୁରୁକ, ମିସିଞ୍ ରାତିଆତେ ଆମା ଜିବନମ୍ଡେ ଆମାତା ଗଗଗ୍ମିନା । ତା ଏଲେ ଆମା ସାବୁରିଞ୍ ଗିନିସ ବିଲ ବାକାଳି ଦନ ସମ୍ପତିମ୍ଡେ ଆଡିଆ ମିନା?' 21 ଜୁ ଲୁକ ନିଜଆ ଲାଗି ବିଲ ବାକାଳି ଦନ ସମ୍ପତି ଇକୁଡିଆ ଟୁଳାଆନ୍ଜ ଉଣ୍ଡେ, ଏରେ ଲୁକରେ ଇସରଆ ଲାଗି ଦନି ଆଇରେ ଜେନା, ଆରା ଲାଗି ଏରେ ନୁଣିଞ୍ଡ ମିନା ।"
ଇସରଆ ସାମୁରାତେ ବିସାସ କିମାପେ ଆଉ ଚିନ୍ତା ଇକିବର
22 ଜିସୁ ନିଜଆ ଚାଲାରକିତେ ଗାମ, "ନିଜ ଜିବନଞାତେ ବିରି ନୁରେ ନିଜିମେ ଏବାବେଅଜ ଚିନ୍ତା ଇକିବାନ୍ଡ । ଆଉ ଇଣିନିଞା ଲାଗି ବିରି ନାଡିଞା ଏଗାମଜ ଚିନ୍ତା ଇକିବାନ୍ଡ । 23 ଉରୁର୍ ଜିମ୍ଜିମ୍ତା କରି ସୁଗାଇ କୁବା ଇରେ ଜିବନନିଞ୍ଡେ । ଆଉ କତେତା କୁବା ଇରେ ଇଣିନିଞ୍ଡେ । 24 ଗୁଆଁଗ୍କିତେ ଜଏପେ, ଆରକି ଆବିର୍ଡେକି ଜେନା କି ଆଗାର୍ଡେକି ଜେନା । ଆରାକା ଗୁଲା ଇଞା ଆଉ ବୁଆ ଉନୁନ୍ତେ ଜାଗା ଜତେ । ଏଲେ ଇସର ଗୁଆଁଗ୍ଡେକିତେ ଉରୁର୍ତେ ଡିଞ୍କେ । ଆପେ କନ୍ତେର୍କାତା ସୁଗାଇ ଦାମି ଏଆସିକେ । 25 ଆପେଆ ବିତିରୁ ଆଡି ଚିନ୍ତା କିବ୍ତା କିବ୍ତା ଆଉ କୁଟିଜ୍ତା ଅଦିକା ଆୟସ ବଡାଏ ରିମିମା? 26 ଆପେ ଜଦି ନି ନୁଣିଞ୍ଡ ସାନ କମ ମା ଇକିବ୍ଡେ, ତା ଏଲେ ଡାବୁଙ୍ କୁବା କାବା ଗାତାରେକି ଏବାବେଅଜ ବିତେ ଚିନ୍ତା ଇକିବ୍ଡେ? 27 "ବଣଆ ଆସିକିକି ରାସିଙ୍ଡେକି ସୁଣିଞ୍ଡ ଏରାଗ୍କିକି, ଜଏପେ । ଆରକି ଆକମରେକି ଜେନା କି କତେ ଆବନାଏରେକି ଜେନା । ଏଲେ ବି ଆଞ୍ ଆପେତେ ଗାମ୍କେ, ସାବୁରିଞାତା କୁବା ଦନି ଆଉ ବୁଦିଆ ରାଜା ସଲୁମନ୍ କିଲଙ୍ ଏରେ ରାସିଙ୍ଡାକା ଡେଗାନ୍ ଡିଅର କତେ ଆରାଣ୍ଡିଜ୍ଚେରାନ୍ । 28 ପାଦାରା ଗାସରେ ମିସିଞ୍ ଆସିକେ, ତେରା କସରଜ ଲାଲାଜ୍ତେ ଲବ୍ତର୍କିକି । ଏରେ ଗାସରେକିତେ କିଲଙ୍ ଇସର ସାଜାଏକେ, ତା ଏଲେ ଇସର ଆପେତେ କତେ ଆଣ୍ଡିଜ୍ତେ ଡିମିଞେ । ଆପେ ଇସରତେ କମ୍ ବିସାସ ଇକିବ୍ଡେ । 29 ଏତେ ସଦାବଳେ ବିରି ନୁରେ ନିଜିମେ ଏରା ଲାଗି ଚିନ୍ତା କିକିବ୍ତେ ଏଲାଗେଆନ୍ଡ । 30 ନି ମୁଲକରା ଜୁ ଲୁକକି ଇସରତେ କଙ୍କଙ୍ ଜେନା ଏରେ ଲୁକରେକି ଏରେ ସାବୁରିଞ୍ ଗିନିସରେକି ଡଗରାଏତେ ଲାଗେରେକି ଏଲେ ଆପେଆ ଉରୁର୍ତେ ଜିଜିମ୍ତେ ଦରକାର ଆସିକେ ବୁଲି ଆପେଆ ଅବାପେ ଇସର କଙ୍କେ । 31 ଆପେ ଇସରଆ ରାଇଜର ଡଗରାଏନାପେ ତା ଏଲେ ଆପେତେ ଏରେ ସାବୁରିଞ୍ ଗିନିସରେକି ଇସର ଡିମିଞେପେ ।
ଦନ ସମ୍ପତି ଲୁବ ଇକିବାନ୍ଡ
32 "ଏ ଆଞା ଚାଲାଞ୍କି ଆପେ ଅଳପ ଲୁକ ଏଆସିକେ ବୁଲି ଏବେତଙାନ୍ଡ । ଆପେତେ ଏରେ ସରଗ ରାଇଜ ଡିଡିଞ୍ତେ ଆପେଆ ଅବାପେ ଇସର ମନ କିବ୍ସେକେ । 33 ଆପେଆ ଜା ଜା ଆସିକେ ଏରେ ସାବୁରିଞ୍ ଦନ ସମ୍ପତି ଆବ୍ସଙାପେ ବିରି ଜାରଆ ଜତେ ଆରତେ ଦାନ ଡିଞେପେ । ଏରେ ନୁଣିଞ୍ଡ ଇକିବିବାନ୍ଜ ଆପେ ସରଗଆତେ ଦନ ସମ୍ପତି ଇଟୁଳାଏନା । ଏରେ ଦନ ସମ୍ପତିରେ ସୁବୁଦିନ ଲାଗି ରମଏନା ଆଉ କେଇ ସାଡାଏଆନ୍କିଜ ଗଗଗ୍ ଆରିମ୍ଡେକି ଜେନା ଆଉ ଆତୁବ୍ଡିର୍କେକି ଜେନା । 34 ଆପେଆ ଜୁଉଆ ଦନ ସମ୍ପତି ଆସିକେ, ଏରା ଆପେଆ ମନ ଆସିକେ ।
ଜାଗେନାପେ ବିରି ରଏନାପେ
35 "ଆପେ କମ କିକିବ୍ତେ ଅଣ୍ଟାପେତେ ଗାମୁଚା ତନାପେଜ ଜାଗେସେନାପେ । ଆଉ ଡିବିରି ଆଲ ଲାଗେରେମେ । 36 ସାଉଆର କାନିଆ କୁଳତା ତଣ ଉରୁର୍ତା ପେରେଅଜ କୁନ୍ତୁଳି ବାଏତା ତଙନାନ୍ଜ ସେଡାଗ୍ଡେତେ ପେଟେଅଜ ସାଙ୍ଗେ ସାଙ୍ଗେ ସେଡାଗ୍ ଇଗ୍ତେ ଚାକରରକି ଆଲୁଙ୍ତା ତଙନ୍ଡେକି ଆଉ ସାଙ୍ଗେ ସାଙ୍ଗେ ଦୁଆରଆ ସେଡାଗ୍ଡେ ଇଗ୍କିକି । ଆପେ କିଲଙ୍ ଏରେ ଚାକରକା ଡେଗାନ୍ ଏଆସିନା । 37 ସାଉଆର ଡେନଜ ଜୁ ଚାକରକି ଜାଗେଆନ୍କିଜ ରମଏସେନାକି, ଆରକିତେ ଜୟଜ ଡିଅ ଗାମାମ୍ । ଆଞ୍ ଆପେତେ ସୁତୁକୁରିଞ୍ ଗାମ୍କେ, ମାଲିକରେ ନିଜଆ ଗାମୁଚାର ଅଣ୍ଟାତେ ତରାନ୍ଜ ଚାକର ଲୁକକିତେ ତଣ ଉରୁର୍ତେ ଡବ୍କଅଜ ତଣ ଉରୁର୍ତେ ଡିମିଞେ । 38 ଆଉ ସାଉଆର ସିରିଗୁଳି ରାତିଆ ବା ସେକାଳ ପୁଜୁରୁ ଡେନଜ ଚାକରକି ଜାଗେସେରାନ୍କି ଏରେ ଜୟଜ, ଏରେ ଚାକରରେକି ଦନିଅ ମିନାକି । 39 ଏଲେ ଏରେ କଙ୍ସେରେପେ, କିତିବଳତେ ଚୁର ଡେମେନା, ଏରେ ଇଞାରା ମାଲିକରେ ଜଦି କଙ୍ତାନା ତା ଏଲେ ମାଲିକରେ ଚୁରରେତେ ଇଞାରବ ଡୁଡୁଇତେ ଆଡିଞ୍ଚେତାନ୍ ଜେନା । 40 ମୁଣୁସ କନନ୍ କିତି ବଳତେ ଡେମେନା ଆପେ ଜାଣି ମା ଏକଙ୍କେ ଜେନା । ଏତେ ଆପେ କିଲଙ୍ ଜାଗେନାପେ ବିରି ରଏନାପେ ।" 41 ପିତର ଗାମ, "ଏ ପରବୁ ଆମ୍ ଉଡାଇ ନିଞ୍ତେରି ଆଉ ସାବୁରିଞ୍ତେ ନି ଆଗରେ ମେଗାତାକେ?" 42 ପରବୁ ଗାମ, "ତା ଏଲେ ଡିଅ ବୁଦିଆ ଚାକର ଆଡି ? ଜିଏତେ ବିସାସ କିକିବ୍ ରିମିମା(ସାବୁରିଞ୍ ଗାତାରେକି ଡିଅର କିକିବ୍ ରିମିମା)? ମାଲିକଆ ଇଞାର ଚଳାଏତେ ଆଉ ଟିକ୍ ବଳତେ ଚାଲାରକିତେ ତଣ ଉରୁର୍ତେ ଡିଡିଞ୍ତେ ଆଡିତେ ସାଉଆର ଦାଇତ ଡିମିଞେ? 43 ସାଉଆର ଡେନଜ ନିଜଆ ଜୁ ଚାକରରତେ, ଏରେ ନୁଣିଞ୍ଡ ଡିଅ କମ କିମିବ୍କିମମା ଏରେ ଜମଏ, ଏରେ ଚାକରରେ ଦନିଅ । 44 ଆଞ୍ ଆପେତେ ସୁତୁକୁରିଞ୍ ଗାମ୍କେ, ଏରେ ଇଞାରା ମାଲିକରେ ଆରା ସାବୁରିଞ୍ ଦନ ସମ୍ପତିରେକି ଆଉ ଗିନିସରେକି ଜଗେତେ ଦାଇତ ଏରେ ଚାକରରେତେ ଡିମିଞେ । 45 ଜଦି ଏରେ ଚାକରରେ ଆଞା ମାଲିକରେ ଡେଙ୍ଗର୍ତେ ଡେରି ଆସିକେ ଗାମଜ ଡାବୁଙ୍ ଚାକର ଚାକରାଣିକିତେ ମାବୁଜେ ଆଉ ସୁଗାଇ ତଣ ଉରୁର୍ତେ ଲାମାଗେନା ଆଉ ମଦ ଉରଜ ମାତାଲ ମିସେନମା, 46 ତାଏଲେ ଜୁ ଦିନତେ ଏରେ ଚାକରରେ ଜାଗେଆନ୍ଜ ଆରଏସେରେନା, ଜେତେବଳତେ ଏରେ ଚାକରରେ ଆକଙ୍ସେକେ ଜେନା, ଏରେ ନୁଣିଞ୍ ଦିନତେ ଚାକରରା ମାଲିକରେ ଡେନଜ ମାଉଚିନା । ମାଲିକରେ ଚାକରରେତେ ସୁଗାଇ ଦଣ୍ଡ ଡିମିଞେ ବିରି ଜୁ ଲୁକକି ଅବିସାସ କିବକିଜ ଆମାନେକିକି ଆରାକାବ , ଏରେ ଚାକରରେତେ ଆରାକାବ ଡିମିନେ । 47 "ଜୁ ଚାକରରେ ନିଜଆ ମାଲିକରା ମନର ଜାଣି କଙଜ ବି ଆରା ମାଲିକରା କମର ଆକିବ୍କେ, ଏରେ ଚାକରରେ ସୁଗାଇ ଦଣ୍ଡ କୁମୁଇନା । 48 ଏଲେ ଜୁ ଚାକରରେ ମାଲିକରା ମନର କିଚି ଜାଣି ଆଙ୍କକେ, ଡିଅ କମ ଆକିବ୍କେ ତା ଏଲେ ଆର ସୁଗାଇ ଦଣ୍ଡ ଆକୁଇରେ ଜେନା । ଏଲେ ଜୁ ଲୁକରେକି କଙସେକେକି ଆରକିତେ ସୁଗାଇ ଦଣ୍ଡ ଡିଡିଞ୍ ମିନା । ଜୁ ଲୁକରେତେ ସୁଗାଇ ଡିଞ୍ଡିଞ୍ ଇସେରେ ଆରାତା ସୁଗାଇ କୁକୁଇତେ ଆସା ଆସିକେ । ଜୁ ଲୁକରେତେ ସୁଗାଇ ଦାଇତ ଡିଞ୍ଡିଞ୍ ଇସେରେ ଆରତେ ସୁଗାଇ ଜିଙ୍ଜିଙ୍ ମିନା ।
ଜିସୁଆ ଲାଗି ଲୁକକି ତାମାତାଜ୍ଡମାକି
49 "ଆଞ୍ ନି ମୁଲକତେ ଲାଲାଜ୍ ଲାଗାଏତେ ଡେନ୍ଚେରେ ଆଉ ଆଞ୍ ଚାଁଏକେ ଜୁ ଗଳଙ୍ ଲାଲାଜ୍ ଲାଗେରେମେ । 50 ଏଲେ ଆଞ୍ତେ ମୁଇଣ୍ଟ ଡୁବନରେ ଗଗ୍ତେ ମିନା । ଆଉ ଏରେ ଡୁବନ ଜେଳାଏ ଜାକଜ୍ ଆଞ୍ ଚାନିଆ ଇରେ । 51 ଆଞ୍ ନି ମୁଲକରେତେ ସାନ୍ତି ଡିଡିଞ୍ତେ ଡେନ୍ଚେରେ ବୁଲି ଆପେ ମନେ ଇକିବ୍କେ । ଏଲେ ଆଞ୍ ଆପେତେ ଗାମ୍କେ ଜେନା, ଦଳ ଦଳ କିକିବ୍ତେ ଡେନ୍ଚେରେ । 52 ମିସିଞ୍ତାସୁନ୍ ମୁଇଣ୍ଟ ଇଞାତେ ପାଞ୍ଚ ଜଣ ଆସିଆନ୍କିଜ ପାଞ୍ଚ ଜଣକା ବିତିରୁ ବାନଗ୍ ବିରୁଦରେ ତିନି ଜଣ ଆଉ ତିନି ଜଣଆ ବିରୁଦରେ ବାନଗ୍ ତମଙ୍ନାକିଆ । 53 କନନ୍ଡା ବିରୁଦରେ ଅବାର ଆଉ ଅବାରା ବିରୁଦରେ କନନ୍ଡ ତମଙନା । କଞ୍ଚେଲାଣ୍ଡା ବିରୁଦରେ ବୁଇର ଆଉ ବୁଇରା ବିରୁଦରେ କଞ୍ଚେଲାଣ୍ଡ ତମଙନା । ବୁଇରାଏରା ବିରୁଦର ମାମିର ଆଉ ମାମିରା ବିରୁଦର ବୁଇରାଏର ଏରେ ନୁଣିଞ୍ଡ ବିରୁଦ କିବକିଜ ତମଙନାକି ।"
ନି ଜୁଗରା ସମୟରେତେ ବୁଜିପେ
54 ଅଚତା ଜିସୁ ସାବୁରିଞ୍ ଲୁକକିତେ ଗାମ, "ପଶ୍ଚିମତା ମୁଇଣ୍ଟ ଗିମା ଡେଣ୍ଡେ ଏଗାମଜ ଏଜୟଜ ସାଙ୍ଗେ ସାଙ୍ଗେ ଆପେ ଏଗାମ୍କେ 'ଗିମା ଡେଣ୍ଡେ' ଆଉ ଏରେ ନୁଣିଞ୍ଡ ଇରେ । 55 ଆଉ ଦକିଣତା ବଏକେ ଏରେ ଏଜୟଜ ଆପେ ଏଗାମ୍କେ 'ସୁଗାଇ କାରା ମିନା' ଆଉ ଏରେ ଇରେ । 56 ଏ କପଟି ଲୁକକି, ଆପେ ନି ମୁଲକଆ ଆଉ ଆକାସଆ ଗିମା, କାରା ସାବୁରିଞ୍ ଆଲିଙ୍ବ ଏଲଙଜ ଜାଣି ଏକଙ୍କେ । ଏଲେ ନି ଜୁଗରା ଏକଳଙ୍ ସମୟରେ ସୁଣିଞ୍ଣ୍ଡ ବୁଜି ମା ଇରିମ୍ଡେ ?
ଆପେଆ ବିରୁଦ ଲୁକ ଆସିଆନ୍ଜ ମିଳା ମିସା ଇନାପେ
57 "ଆପେ ମାଣ୍ଡି କମରେ କିବ୍କେଜ ଡିଅ ମିନା ଆଉ ମାଣ୍ଡି କମରେ କିବ୍କେଜ ବାଗି ଆଇରେ ଜେନା ଏରେ ବିତେ ନିଜେ ବିଚାର ମା ଇକିବ୍ଡେ ? 58 ଆପେଆ ଦୁସ ସସବ୍ତେ ମିନଗ୍ ଆପେତେ ବିଚାର କିବ୍କେ ଲୁକଆ ଆସରବ ଗଗଗ୍ଡାବଳତେ ଗଟାଙ୍ତେ ଆରା ତୁଲଙ୍ ମିଳା ମିସା ଇତେ ଚେସ୍ଟା କିବେପେ । ମିଳା ମିସା ଆଇଆନ୍ଜ ଆର ଆପେତେ ବିଚାର କିବ୍କେ ଲୁକରା ଆସରବ ଡିଗାର୍ଚୁନ୍ ଗମଗେ । ଆଉ ବିଚାର କିବ୍କେ ଲୁକରେ ଆପେତେ ମିନଗ୍ କୁବା ବାବୁ ଲୁକରା ଆସରାତେ ମବ୍ସବେ ଆଉ ଏରେ ଲୁକରେ ଆପେତେ ସବଜ ତାମାଙ୍ତରେ ବିରି ବନ୍ଦି ଇଞାତେ ମୁନେ । 59 ଆଞ୍ ଆପେତେ ଗାମ୍କେ ତା ଅଚତା ଜୁରିମନା ଟାଙ୍କା ସାବୁରିଞ୍ ମା ଇଡିଞଜ ଏରେ ବନ୍ଦି ଇଞାତା ଆରି ମା ଇରିମ୍ଡେ ଜେନା ।"
ବାଗି କମ ସାଡେପେ ବିରି ମନ ବଦଳାଏନାପେ
1 ଏରେ ବେଳା କିତିକ ଲୁକକି ଜିସୁଆ ସାମୁରାତେ ଆସିଆନ୍କି । ଗାଲିଲି ଅଞ୍ଚଳଆ ଜା ଇସେରାନା ଏରେ ସାବୁରିଞ୍ ଜିସୁତେ ଗାତାଅକି । କିତିକ ଲୁକକି ବଳି ଡିଞ୍ଡିଞମାନ୍କି ଏରେ ସମୟରା ଏରାତେ ଜାରି କିକିବ୍ମମାନ୍ ରୁମିଅ ଲୁକ ପିଲାତ ଏରେ ଲୁକକିତେ ଡେଜକି ଆଉ ମୁଣୁସକା ଇଞାମ୍ଡେକି ବଳି ଡିଞକି ଜନ୍ତୁରାକା ଇଞାମ୍ ଇକୁଡିଆ ମେସାଅକି । ଏରେ ଗାତାର ଗାତାଅକି । 2 ଜିସୁ ଆରକିତେ ଗାମ, "ଡାବୁଙ୍ ଗାଲିଲି ଲୁକକାତାକୁରି ନି ଲୁକରେକି ସୁଗାଇ ବାଗି ବୁଲି ଆପେ ଏବାବେକେ ବିରି? 3 ଆଞ୍ ଆପେତେ ଗାମ୍କେ, ଜେନା ଏରେ ଲୁକରେକି ସୁଗାଇ ବାଗି ଲୁକକି ଆରାସିଆନ୍କି । ଏଲେ ବାଗି କମତା ଆପେ ମନ ମା ଏବଦଳାଏଆନ୍ଜ ଆପେମାନକି ସାବୁରିଞ୍ ଏରେ ନୁଣିଞ୍ଡ ଏଗଜେ । 4 ଜିରୁସାଲମ ଗଳଆ ସିଲୁଆ ଜାଗାରାତେ ମୁଇଣ୍ଟ ଜାଲିଙ୍ଡ ଇଞାରେ ଦସକେଆନ୍ଜ ଅଟର ଜଣ ଲୁକରେକି ଗଜକି । ଆରାକା ଗାତାରକି ବାବେପେ । ଜିରୁସାଲମତେ ରଏନମାନ୍କି ସାବୁରିଞ୍ ଡାବୁଙ୍ ଲୁକକାତାକୁରି ଆରକି ସୁଗାଇ ବାଗି ଲୁକକି ଆସିଆନ୍କି ବୁଲି ଆପେ ଏବାବେକେ ବିରି? 5 ଆଞ୍ ଆପେତେ ଗାମ୍କେ, ଜେନା, ଏରେ ଲୁକରେକି ସୁଗାଇ ବାଗି ଲୁକକି ଆରାସିଆନ୍କି । ଏଲେ ବାଗି କମତା ମନ ମା ଏବଦଳାଏଆନ୍ଜ ଆପେ ସାବୁରିଞ୍ ଏରେ ନୁଣିଞ୍ଡ ଏଗଜେ ।"
ଡୁମ୍ବୁରି ସୁମୁସିଞା ଆଗ
6 ତା ଅଚତା ଜିସୁ ଲୁକକିତେ ମୁଇଣ୍ଟ ଡୁମ୍ବୁରି ସୁମୁସିଞା ଆଗ ଗାତାଅ । "ମିନଗା ବାକାଳିତେ ମୁଇଣ୍ଟ ଡୁମ୍ବୁରି ସୁମୁସିଞ୍ ଆସିଆନା । ଲୁକରେ ଡୁମ୍ବୁରି ସୁମୁସିଞ୍ ଆସରବ ଅନଜ ଲାକୁର ଡଗରାଏଆନା ଏଲେ ସୁମୁସିଞ୍ତା କିଚି ଲାକୁର ଆକୁଇଆନା । 7 ଏତେ ବାକାଳିରା ଦାଇତ ଗଗନମାନ୍ ମୁଲିଆ ଲୁକରେତେ ଗାମ 'ନି ତିନି ବରସ ଇଆନାଜ ଆଞ୍ ଜଗେସୁନ୍ ଡେନ । ଏଲେ ଡୁମ୍ବୁରି ସୁମୁସିଞା ଲାକୁର ଡଗରାଏଆନ୍ଜୁ ମା କୁଇଆନା । ଏତେ ନି ସୁମୁସିଞ୍ଡେତେ ଡେଞେପେ ବିରି ଚିଅଗେପେ ନି ସୁମୁସିଞ୍ଡେ ବିତେ ବେଳାମିଞ୍ ଲଟବ୍ ଜାଗାତେ ମାମାଡେସେକେ?' 8 ଏଲେ ମୁଲିଆରେ ଗାମ 'ସାଉଆର, ନି ସୁମୁସିଞ୍ଡେତେ ନି ବରସ କିଲଙ୍ ପିଜେ ଡୁଉ । ଆଞ୍ ବେଳାମିଞ୍ ଲାଅଜ ଇତାଙ୍ ସାର କିବେ । 9 ଆଉ ନି ସୁମୁସିଞ୍ଡେ ମାନ୍ତା ଲାମାକୁଇଏ ତ ଡିଅ । ନା ଏଲେ ମେଡେଜେ ବିରି ମିଚିଅଗେ ।' "
ଜିସୁ ମିନଗ୍ ଜୁଆଙ୍ଡାଏତେ ଡିଅ କିବ
10 ଦିନମିଞ୍ ଜିସୁ ଜିଉଦି ଲୁକକା ଜିରାଏରେକି ବାରତେ ମୁଇଣ୍ଟ ପାତାନା ଇଞାତେ ଲୁକକିତେ ଆବ୍ସଞମାନା । 11 ଏରାତେ ମିନଗ୍ ଜୁଆଙ୍ଡାଏତେ କଏଲଙ୍ ସବ୍ସେର ଏତେ ଆର ଅଟର ବରସ ଇଆନ୍ଜ କୁଜି ଇଆନ୍ଜ ରଏସେରାନା । ଆର ସୁଗାଇ ଚେସେଟା କିବାନ୍ ଏଲେ ସଳକ ତଙନ୍ ଆରିମମାନା । 12 ଜିସୁ କୁଜି ଜୁଆଙ୍ଡାଏରେତେ ଜୟଜ ଆସରବ ଡାକେଅଜ ଗାମ, "ଏ ଜୁଆଙ୍ଡାଏ, ଆମା ଜା ରୁଗମ୍ଡେ ଆସିକେ ଏରେ ରୁଗରେତା ଆମ୍ ଡିଅ ମିସେରେ ।" 13 ଜିସୁ ଜୁଆଙ୍ଡାଏତେ ଜିବ ଏରେ ବେଳା ସାଙ୍ଗେ ସାଙ୍ଗେ କୁଜି ଜୁଆଙ୍ଡାଏରେ ସଳକଆନ୍ଜ ଇସରତେ ଦନିଅବାଦ ଡିଞ୍ଡିଞ୍ତେ ଲାଗେଆନା । 14 ଜିରାଏରେକି ବାରତେ ଜିସୁ ଜୁଆଙ୍ଡାଏରେତେ ଡିଅ କିବ ଏତେ ମଜାଙ୍ ଇଞାରା କୁବା ଲୁକ ଚଳେଆନ୍ଜ ଗାମ, "କମ କିକିବ୍ତେ ଚଅ ଦିନ ଆସିକେ । ଏତେ ଆପେ ଡିଅ ଇତେ ଏରେ ଦିନରାକାତେ ଡେନାପେ ଜିରାଏରେକି ବାରତେ ଡିଅ ଇତେ ଏଡେନର ।" 15 ଏଲେ ପରବୁ ଆରକିତେ ଗାମ, "ଏ ବମଣ୍ଡାଏତା ଲୁକକି, ଆପେଆ ବିତିରୁ କେଇ ମିନଗ୍ ବୁଲୁଙ୍ ଜିରାଏରେକି ବାରତେ ଗୁଆଳତା ଅଳେଞ୍, ଗଦ, ମେରମ୍ ଏକାଜଜ ଡାଗ୍ ଆବୁର୍ତେ ମା ଏଗଗ୍କେ ବିରି? 16 ଏକଳଙ୍ ନି ଜୁ ଜୁଆଙ୍ଡାଏରେତେ ଆଞ୍ ଡିଅ କିବ । ଆର ଇରେ ଅବରାମଆ କୁଟୁମାଳି ନିଞା ମିନଗ୍ ଜିଉଦି ବକରାଏନିଞ୍ । ଅଟର ବରସ ଜାକଜ୍ କୁବା କଏଲଙ୍ ସଏତାନ ଆରତେ ତରଜ ଉନ୍ଚେର ଏତେ କୁଜି ଇଆନ୍ଜଆ ଆସିଆନା । ଜିରାଏରେକି ବାରତେ ଆରତେ ଡିଅ କିକିବ୍ତେ ଜେନା ବିରି ?" 17 ଏରେ ଗାତାଅ ଏରେବେଳା ଜିସୁଆ ସୁତୁରୁରକି ସାବୁରିଞ୍ ଗିଆନାନ୍କି । ଏଲେ ଜିସୁଆ ସାବୁରିଞ୍ କାବା କମରେକି ଜୟକିଜ ଲୁକକି କୁସି ଇତେ ଲାଗେଆନ୍କି ।
ଇସରଆ ରାଇଜର ସୁରୁସୁ ଅଜାଙ୍ ଆଉ କମିର ଡେଗାନ୍ ଆସିକେ
18 ଅଚତା ଜିସୁ ଲୁକକିତେ ଜିଙ "ଇସରଆ ରାଇଜର ସୁଣିଞ୍ ଡେଗାନ୍? ଇସରଆ ରାଇଜରେତେ ଆଞ୍ ବିରିଆ ତୁଲଙ୍ ମେସାଏ ବିରି ଗାମେ । 19 ମିନଗ୍ ଲୁକ ଆରା ବାକାଳିରାତେ ସୁରୁସୁ ଅଜାଙ୍ଡେ ବିର । ସୁରୁସୁ ଅଜାଙ୍ଡେ ଲେରାବ ବିରି କୁବା ସୁମୁସିଞ୍ ଇଆନା । ଏରେ ସୁରୁସୁ ସୁମୁସିଞ୍ ଡାଳରାତେ କନ୍ତେର୍କି ଡକରେକି ଆଉ ବାସା ବନାଏରେକି । ଏରେ ନିଣିଙ୍ଡ ମୁଇଣ୍ଟ ସୁରୁସୁ ଅଜାଙା ଡେଗାନ୍ ଆସିକେ ଇସରଆ ରାଇଜର ।" 20 ଆଉ ତରମିଞ୍ତା ଜିସୁ ଗାମ, "ଇସରଆ ରାଇଜରେତେ ଆଞ୍ ବିରିଆ ତୁଲଙ୍ ମେସାଏ ବିରି ଗାମେ? 21 ଇସରଆ ରାଇଜରେ କୁଟିଜ୍ କମିର (ମଲିକା) ଡେଗାନ୍ ଆସିକେ । ମିନଗ୍ ଜୁଆଙ୍ଣ୍ଡାଏ ଅଦା ବସତା ମଇଦା ଅଟା କୁଟିଜ୍ କମିର (ମଳିକା) ଗଗଜ ମେସାଅଜ ତୁଡାନ । ଅଚତା ଅଟାରେ ସାବୁରିଞ୍ ଉଲାନିଞ ।"
ସରଗ ରାଇଜବ ଅଙ୍ଗର୍ତେ ଗଟାଙ୍ ସୁରୁ ଆସିକେ
22 ଜିସୁ ନି ଗଳ ଆଉ ଗଳ, ନି ଗାଅଁ ଆଉ ଗାଅଁ ବୁଲି ବୁଲିତା ଇସରଆ ଡିଅ ଗାତା ଆବ୍ସଜ୍ତେ ଲାଗେଆନା ବିରି ଜିରୁସାଲାମ ଗଳବ ଅନ । 23 ମିନଗ୍ ଲୁକ ଜିସୁତେ ଗାମ, "ପରବୁ, ଉଡେଇ ଅଳପ ଳୁକକି ମୁକଳେ ରିମିମାକି ବିରି?" ଏତେ ଜିସୁ ଲୁକରେକିତେ ଗାମ 24 "ସରଗ ରାଇଜବ ଡୁଡୁଇର୍ତେ ଏଣ୍ଟେଜ୍ଡ ସେଡାଗ୍ ଆସିକେ । ଏତେ ଆପେ ଏଣ୍ଟେଜ୍ଡ ସେଡାଗ୍ବ ଡୁଡୁର୍ତେତେ ସୁଗାଇ ଚେସେଟା କିମାପେ । ଆପେତେ ଆଞ୍ ଗାମ୍କେ, ଆଲୁଙ୍ବ ଅଙ୍ଗର୍ତେ ସୁଗାଇ ଲୁକକି ଚେସେଟା କିମିବ୍କି, ଏଲେ ଅଲୁଙ୍ବ ଡୁଇର୍ ଆରିମ୍ଡେକି ଜେନା । 25 ଇଞାରା ମାଲିକ ଆରା ସେଡାଗ୍ଡ କରାନ୍ଜ ଆପେ ବାଏତା ଏତଙ୍ନାନ୍ଜ 'ଏ ପରବୁ ଏ ପରବୁ ନିଞା ଲାଗି ସେଡାଗ୍ଡେ ବାଏତା ଏପ୍ଟାଏ' ଏଗାମଜ ସେଡାଗ୍ଡେତେ ପେଟେତେ ଏଲାଗେନା, ଏରେ ବଳତେ ମାଲିକରେ ଆପେତେ ଗାମାମେ 'ଆପେ ମାଣ୍ଡିତା ଏଡେନ୍ଚେରେ, ଆଞ୍ ଏରେ କଙ୍କଙ୍ ଜେନା ଆଉ ଆପେତେ କିଲଙ୍ ଚିନି ଜେନା' ଗାମାମେ । 26 ଏରେ ବଳତେ ଆପେ ଗାଙ୍ଗାମ୍ତେ ଏଲାଗେନା 'ନିଞ୍ ଆମା ତୁଲଙ୍ ନୁଉର ନିଜିମ ଆଉ ନିଞା ନିଜଆ ଦାଣ୍ଡନିଞ୍ଡାକାତେ ଆମ୍ ମାବ୍ସଜ୍ଚେର ।' 27 ଆଉ ମାଲିକରେ ଆପେତେ ଗାମାମେ 'ଆପେ ମାଣ୍ଡିତା ଏଡେନ୍ଚେର ଏରେ ଆଞ୍ କଙ୍କଙ୍ ଜେନା । ଏ ସାବୁରିଞ୍ ବାଗି ଲୁକକି, ଆଞା ଆସଞ୍ତା ଲାଙ୍କାବ ଡୁଙେପେ ।' 28 ଜେତେବଳଆ ଅବରାମ, ଇସାକ, ଜାକୁବ ଆଉ ସାବୁରିଞ୍ ଇସରଆ ଗାତା ଗାତାନମାନ୍କି ଲୁକକି ଇସରଆ ରାଇଜରାତେ ମାସିନାକି, ଏରେ ଆପେ ଏଜଏ । ଆପେ ନିଜେ ବାଏତେ ଏଆସିନା । ଏରେ ବଳତେ ଏରାତେ ଏଜେଗେ ଆଉ ଦାନ୍ତପେରେ ଏକେଡାବ୍ଡମା । 29 ଏଲେ ପୁରୁବ, ପଶ୍ଚିମ, ଉତର,ଦକିଣତା, ଏରେ ସାବୁରିଞ୍ ବେଳାମିଞ୍ ଲୁକକି ଡେନକିଜ ଇସରଆ ରାଇଜରାତେ ବାତୁଲି ଉରୁର୍ ଜିଜିମ୍ତେ ଡମକନାକି । 30 ଆଉ ଜଏପେ ଜୁ ଲୁକକି ଅଚସେରେକି ଆରାକା ବିତିରୁ କିତିକ ଲୁକକି ଆଗିଲାବ ସେମେଙାକି । ଆଉ ଜୁ ଲୁକକି ଆଗିଲା ଇସେରାନ୍କି ଆରାକାତା କିତିକ ଲୁକକି ଅଚଲିବ ମଚନାକି ।"
ଜିସୁ ଜିରୁସାଲମ ଗଳଆ ଲାଗି ଦୁକ କିବାନ୍
31 ଏରେ ବେଳା କିତିକ ପାରୁସି ଲୁକକି ଜିସୁଆ ଆସରବ ଡେନକି । ଆଉ ଆରକି ଗାମକି, "ଆମ୍ ନି ଜାଗାରେତା ଡୁଙେ ଡାଏ । ଏରୁଦ ରାଜା ଆମ୍ତେ ଡେଡେଜ୍ତେ ମନ କିବ୍କେ ।" 32 ଏଲେ ଜିସୁ ଆରକିତେ ଗାମ, "ଆପେ ଅନାପେ ବିରି ଏରେ କାଙ୍କାଙ୍ ସିଆଳତେ ଗାତାଏପେ, 'ଜଏପେ ଆଞ୍ ମିସିଞ୍ ଆଉ ତେରା କିଲଙ୍ କଏଲଙ୍ ସବ୍ସେରକି ଲୁକକିତେ ଆଉ ରୁଗା ଲୁକକିତେ ଡିଅ କିବେ । ଆଉ ତା ଅଚତା ଆଞ୍ ତିନି ଦିନଆତେ ଆଞା କମ ଉଟାଏନା । 33 ଜାଆ ଇରେମେ ସରିକା ମିସିଞ୍ ତେରା ଆଉ ମଏଆଙ୍ ଆଞ୍ତେ ଅଙ୍ଗର୍ତେ ମିନା । ଜିରୁସାଲାମ୍ ଗଳ ଆଉତା ଇସରଆ ଗାତା ଗାତାକେ ଲୁକକିତେ ଡେଡେଜ୍ ଆରିମ୍ଡେକି ଜେନା, ଜିରୁସାଲମତେ ମବ୍ଗଜ୍କି । 34 "ଏ ଜିରୁସାଲାମ୍ ଏ ଜିରୁସାଲାମ୍ । ଆମ୍ ଇସରଆ ଗାତା ଗାତାଏକେ ଲୁକତେ ମେଡେଜ୍କେ । ଜୁ ଲୁକକିତେ ଇସର ଆମା ଆସମ୍ବ କିନ୍ଚେର ଆମ୍ ଆରକିତେ ଏଗେର୍ ମେତମଜ ମବ୍ଗଜ୍କେ । ଆଞ୍ ଆମା ଲୁକମ୍କିତେ ସାକାଏତେ ମନ କିବ୍ସେର । ମୁଇଣ୍ଟ ସେଙ୍କଏ ଆରା କନନ୍ଡକିତେ ଇକୁଡିଆ କିବାନ୍ଜ ଡେଣା ତୁଳିତେ ଉନ୍କେ ଡେଗାନ୍ ଆଞ୍ ଆମା ଲୁକକିତେ ଇକୁଡିଆ କିକିବ୍ତେ ମନ କିବ୍ସେର । ଏଲେ ଆମ୍ ଆଞ୍ତେ ଏରେ କିକିବ୍ତେ ମା ମିଡିଞ । 35 ଜଏପେ, ଆମା ଇଞା ସାବୁରିଞ୍ ଲୁକକି ସାଡେଅକିଜ ଡୁମୁଙେକି । ଆଞ୍ ଆମ୍ତେ ଗାମ୍କେ, 'ପରବୁଆ ନାଅଁରେ ଜିଏ ଡେଣ୍ଡେ ଆର ଦନିଅ' ବୁଲି ଆମ୍ ଗାଙ୍ଗାମ୍ ଜାକଜ୍ ଆଞ୍ତେ ସୁତୁକୁରିଞ୍ ଜଜଏ ମା ମିରିମ୍ଡେ ଜେନା ।"
ଜିରାଏରେକି ବାରତେ ମିନଗ୍ ରୁଗା ଲୁକତେ ଜିସୁ ଡିଅ କିବ
1 ଦିନମିଞ୍ ଜିସୁ ଜିରାଏରେକି ବାରଆ ପାରୁସି ଲୁକକା ମିନଗ୍ କୁବା ଲୁକରା ଇଞାରବ ଉରୁର୍ତେ ଅନ । ତଣ ଉରୁର୍ନମାନ୍ ଏରେବେଳା ଜିସୁତେ ଲକିଅ କିବକିଜ ଲଙ୍ସେରକି । 2 ଏରାତେ ମିନଗ୍ ଲୁକରା ଇଜିଙ୍ ଇତିରକି ପୁଲିଆନ୍ଜ ଆସିଆନା । 3 ଏତେ ଜିସୁ ପାରୁସି ଲୁକକିତେ ଆଉ ଉକିଲକିତେ ଜିଙ "ଜିରାଏରେକି ବାରତେ ରୁଗା ଲୁକକିତେ ଡିଅ କିକିବ୍ତେ ଡିଅରି ବାଗିଜ୍ ଡି?" ଏଲେ ଲୁକରେକି କଳେ କାଳାର ରଏଆନ୍କି । 4 ଏରେ ଇଜିଙ୍ ଇତିର ପୁଲିସେରାନ୍ ଲୁକରେତେ ଜିସୁ ଜିବଜ ଡିଅ କିବ ଆଉ ଲୁକରେତେ "ଡୁଙେ ଡାଏ" ଗାମ । 5 ପାରୁସି ଲୁକକିତେ ଆଉ ଉକିଲକିତେ ଗାମ, "ଆପେମାନକା ବିତିରୁ ଜିରାଏରେକି ବାରତେ ଜଦି ଜାରଆ କନନ୍ପେରେ ନଏଲେ ବଳଦପେରେ କୁଅତେ ଲାମାଉନା ତା ଏଲେ ଆପେ ଜିରାଏବାର ଦିନତେ ସାଙ୍ଗେ ସାଙ୍ଗେ ଆରତେ ମା ଏଆବିରାଏକେ ଜେନା ବିରି?" 6 ଆଉ ପାରୁସି କୁବା କୁବା ଲୁକକି ଜିସୁତେ କିଣିସି ଗାତା ଗାତାଏ ଆରିମାନ୍କି ।
ନିରଳା ଇତେ ଜିସୁ ଗାମ
7 ଲୁକକି ଡିଅ ଡିଅ ଜାଗାତେ ଡକତେ ବାଚେଆନ୍କି ଏରେ ଜିସୁ ଜୟଜ ଲୁକକିତେ ଏରେ ଆଗରେ ଗାତାଅ । 8 "ଜଦି ମିନଗା ବାଆଗରତେ ଗୁଆ ଡିଞଜ ଆରା ବାଆଗରରାତେ ତଣ ଉରୁର୍ତେ ଏଅନଜ ଆଗିଲାତା ଡିଅ ଡିଅ ଜାଗାତେ ଉରୁର୍ତେ ଏଡକଆନ୍ଡ । କାଳେ ଆପେଆତା କୁବା କୁବା ଲୁକକିତେ ଡାମାକେସେନା । 9 ଆପେ ଆଗିଲା ସାବୁରିଞାତା ଡିଅ ଜାଗାତେ ଏଡକଆନ୍ଜ ଆପେତେ ବାଆଗରଆତେ ଗୁଆ ଡିମିଞ୍ଚେରେ ଲୁକରେ ଡେନଜ ଗାମାମେ 'ଆମ୍ ତଙନା ଡୁ ନି ଲୁକରେ ଡକରେମେ' ଗାମଜ ଆପେ ଏତଙନାନ୍ଜ ଅଚଲି ଜାଗାବ ଏଡେନଜ ଆପେତେ ଗିମିଆନେପେ । 10 ଏଲେ ମିନଗ୍ ଲୁକ ଆପେତେ ବାଆଗରତେ ଗୁଆ ଡିଞଜ ଆପେ ତଣ ଉରୁର୍ତେ ଏଅନଜ ମୁଇଣ୍ଟ ଅଚଲି ଜାଗାତେ ଏଡକନା ତା ଏଲେ ଆପେତେ ଗୁଆ ଡିମିଞ୍ଚେରେ ଲୁକରେ ଡେନଜ ଗାମାମେ 'ଏ ଜଳା, ଆମ୍ ନି ଅଚଲିତେ ମା ମେଡକଆନ୍ଜ ଆଗିଲାବ ଡିଅ ଜାଗାତେ ଡକନା' ଗାମାମେ । ଏରେ ବଳତେ ଆମା ତୁଲଙ୍ ମନ୍ଚେନାକି ଲୁକକି ଆମ୍ତେ ଆଦର କିମିମମ୍କି । 11 ଜୁ ଲୁକ କୁବା ଆବ୍ଗାମ୍ଡମ୍ଡେ ଆରତେ ସାନର କିକିବ୍ ମିନା ଜୁ ଲୁକ ନିରଳା ଇଆନ୍ଜ ସାନ ଆବ୍ଗାମ୍ଡମ୍ଡେ ଆରତେ କୁବା କିକିବ୍ ମିନା ।" 12 ଗୁଆ ଡିମିଞ୍ଚେରେ ଲୁକକିତେ ଜିସୁ ଗାମ, "ଆମ୍ କେଇତେ ମେସାର୍ତେ ଆଉ ରାତିତେ ବାତୁଲି ଉରୁର୍ତେ ମେଡାକେଅଜ ଆମା କାକାମ୍କିତେ ବକମ୍କିତେ ଜଳାମ୍କିତେ ଆଉ ନିଜଆ କୁଟୁମାଳିକିତେ ଆଉ ସାଇମା ଦନି ଲୁକକିତେ ମେଡାକେଅର । ମେଡାକେଅଜ କାଳେ ଆମ୍ତେ କିଲଙ୍ ବାତୁଲି ଉରୁର୍ତେ ଡାମାକେକି ଏରେବଳତେ ଆମ୍ ଜା ମିଡିଞ ଏରେ ମିକୁଇନା । 13 ଏଲେ ବାତୁଲି ଉରୁର୍ତେ ମିଡିଞେ ବଳତେ ଗରିବ ଲୁକକିତେ ଆଉ କନ୍ଦା, କାଲା, ଚୁଟା, କୁଜା, କଣା, ଅନ୍ଦ, ଆଳବଗ୍କିତେ, ତଣ ଉରୁର୍ତେ ଗୁଆ ମିଡିଞେ । 14 ଏରେ ନୁଣିଞ୍ଡ ଉରୁର୍ତେ ଗୁଆ ମିଡିଞଜ ଆମ୍ ଦନିଅ ମିନା । ଆପେତେ ଡିଞ୍ଡିଞ୍ତେ ଆରାକା କିଚି ଜତେ । ମିସିଆଁ ଡିଅ ଲୁକକି ଗଗଜାତା ବମଞ୍ଚେକି ଏରେବଳତେ ଇସର ଆପେତେ ଡିଅ ପୁରସ୍କାର ଡିମିଞେ ।"
ବାତୁଲି ଉରୁର୍ଡା ଆଗ
15 ଏରେ ଅଙକିଜ ଜିସୁଆ ତୁଲଙ୍ ବାତୁଲିଆତେ ଉରୁର୍ତେ ଡକସେରାନ୍କି ଲୁକକା ବିତିରୁ ମିନଗ୍ ଲୁକ ଜିସୁତେ ଗାମ, "ଜୁ ଲୁକ ଇସରଆ ରାଇଜରାତେ ବାତୁଲି ତଣ ଉରୁର୍ତେ ଡମକସେନା ଆର ଇରେ ଦନିଅ ।" 16 ଏଲେ ଜିସୁ ଏରେ ଲୁକରେତେ ଗାମ, "ମିନଗ୍ ଲୁକ ଦିନମିଞ୍ କୁବା ବାତୁଲି ଉରୁର୍ ଡିଞ୍ଡିଞ୍ତେ ମନ କିବଜ କୁସୁକୁରି ଲୁକକିତେ ଡାକେଅ । 17 ବାତୁଲି ଉରୁର୍ ସମୟ ଇଆନ୍ , ଏରେ ବାତୁଲିଆତେ ଉରୁର୍ତେ ଡାକେସେର ମାଲିକରେ ଲୁକକା ଆସରକିବ ନିଜଆ ଚାକରରତେ କିନଜ ଗାମ 'ଅପେମାନକି ଡେନାପେ ଉଆ, ସାବୁରିଞ୍ ତଣ ଉରୁର୍ ଗିନିସ ଇସେରେତେ ।' 18 ଏଲେ ଲୁକକି ଅଙ୍ଗର୍ତେ ମନ ଆକିବକିଜ ମିନଗ୍ ପରେ ମିନଗ୍ ଗାଙ୍ଗାମ୍ତେ ଲାଗେଆନ୍କି । ଉନୁକୁଳ ମିନଗ୍ ଚାକରର ଗାମ 'ଆଞ୍ ମୁଇଣ୍ଟ ବିଲ ସଙ୍ସେରେ । ଆଞ୍ତେ ବିଲ ଜାଗାରେ ଜଜଏତେ ମିନା । ଆଞ୍ ଅଙ୍ଗର୍ ମା ରିମ୍ଡେ ଜେନା, ଆଞ୍ତେ କେମା କିମିଞ୍ ।' 19 ଆଉ ମିନଗ୍ତା ଗାମ, 'ଆଞ୍ ପାଞ୍ଚ ଅଳ ବଳଦ ସଙ୍ସେରେ ଆଉ ଆରକିତେ ପରିକା ଆବ୍କିବ୍ତେ ଅଣ୍ଡେ । ଆଞ୍ ଅଙ୍ଗର୍ ମା ରିମ୍ଡେ ଜେନା, ଆଞ୍ତେ କେମା କିମିଞ୍ ।' 20 ଆଉ ମିନଗ୍ତା ଗାମ, 'ଆଞ୍ ନୁଆ କାନିଆ ଉନ୍ଚେକେ, ଏତେ ଆଞ୍ ଅଙ୍ଗର୍ ମା ରିମ୍ଡେ ଜେନା ।' 21 ଆଉ ଚାକରର ଡେନଜ ମାଲିକରତେ ଏରେ ସାବୁରିଞ୍ ଗାତାନିଞ୍ । ଏତେ ଇଞାରା ମାଲିକରେ ଚଳେଆନ୍ଜ ଚାକରରତେ ଗାମ 'ଗଳଙ୍ ଅନା ଡାଏ, ଗଳଆ ସାଇ ଆଉ ଗୁଳି କୁନ୍ଦିଆ ଜାଗାରେବ ଅନା ବିରି ଗରିବ ଲୁକକିତେ ଆଉ ଅନ୍ଦ, କୁଜା ଆଉ ଡାଇଙ୍ ଆରିମ୍ଡେକି ଲୁକକିତେ କିଲଙ୍ ଡାକେ ବିରି ଅରେନେ ।' 22 ତା ଅଚତା ମାଲିକରା ଚାକରର ପେରେଅ ବିରି ଡେନଜ ଗାମ 'ଏ ପରବୁ ଆମ୍ ମେଗାତାସେର ଡେଗାନ୍ ଆଞ୍ ସାବୁରିଞ୍ କିବ୍ସେକେ । ଏଲେବି କୁସୁକୁରିତା ଜାଗା ଆସିକେ ।' 23 ଏତେ ମାଲିକରେ ଚାକରରତେ ଗାମ, 'ଗାଅଁ ଆଉ ଗଟାଙ୍ କାନ୍ତବ ଅନା ବିରି ଆଞା ଇଞାଞ୍ଡେ ଜିମିତି ମରେନାକି ଏରାଦିରେ ଲୁକକିତେ ଡେଙ୍ଗର୍ତେ ଗାତାଏ । 24 ଆଞ୍ ଆପେତେ ଗାମ୍କେ, ବାତୁଲି ତଣ ଉରୁର୍ତେ ଉନୁକୁଳ ଗୁଆ ଡିଞ୍ଚେର ଲୁକକା ବିତିରୁ କେଇ ମିନଗ୍ ବୁଲୁଙ୍ ଆଞା ବାତୁଲି ତଣ ଉରୁର୍ ଆରିମ୍ଡେକି ଜେନା ।' "
ଆଗବ ଅଚବ ବେଚାରନାପେଜ କମ କିମାପେ
25 କୁସୁକୁରି ଲୁକକି ଜିସୁଆ ତୁଲଙ୍ ଗଟାଙ୍ ଡାଇଙମାନ୍କି, ଆଉ ଜିସୁ କିନବ୍ଡବ ବୁଲିଆନ୍ଜ ଲୁକକିତେ ଗାମ 26 "କେଇ ଜଦି ଆଞା ଆସଞ୍ବ ଡେନଜ, ବୁଇରତେ, ଅବାରତେ, କୁଟୁମରତେ, କନନ୍ଡକିତେ,କଞ୍ଚେଲାନ୍ଡକିତେ, କାକାରକିତେ, ବକରକିତେ, ଆଜିରକିତେ,ବକରାଏରକିତେ ଆଉ ନିଜତେ କିଲଙ୍ ଆଞାତାକୁରି ଡିଅ କୁୟଜ ଆର ଆଞା ଚାଲାଞ୍ଡେ ଇ ଆରିମ୍ଡେ ଜେନା । 27 କେଇ ଜଦି ଆଞା ଲାଗି ଗଗଜ୍ତେ ରାଜି ଆଇଆନ୍ଜ ନିଜଆ ଚକି କୁଣ୍ଟର ଆତିନ୍ତାରାନ୍ଜ ଆଞା ଅଚ ଅଚଞ୍ଡେ ଆଡେଣ୍ଡେ ଜେନା, ଆର ଆଞା ଚାଲାଞ୍ଡେ ଇ ଆରିମ୍ଡେ ଜେନା । 28 "ଆପେଆ ବିତିରୁ ମିନଗ୍ ଚାତ ଇଞା ବନାଏତେ ମନ କିବଜ, ଉନୁକୁଳ ଡକଆନ୍ଜ ଏରେ ଇଞାରେ ବନାଏତେ କିତି ଟାଙ୍କା ପଇସାରେ ଲାମାଗେନା ବୁଲି ଇସାବ କିବ୍ଡେ । ଇସାବ କିବଜ ଆରା ସାମୁରା ପଇସା ଆସିକେ ନାରି ଜଜଏ ରିମିମା । 29 ଏଲେ ଇସାବ ଆକିବଜ ଗାତର୍ ଲାଅଜ ମୁଳକୁଣ୍ଟ ଟାଙ୍କରଜ ଲୁକରା ଇଞାର ଉଟିଆ କିକିବ୍ ଆରିମାନ୍ଜ ଲୁକକି ଏରେ ଇଞାରେ ଜୟକିଜ ଲାମାରାଏକି ବିରି ଗାମାମେକି 30 'ଏରେ ଲୁକରେ ଇଞା ବନାଏତେ ଉନୁକୁଳ କିବ ଏଲେ ଇଞାରେ ଉଟିଆ କିକିବ୍ ଆରିମାନ୍ ।' 31 "ମିନଗ୍ ରାଜା ଆଉ ମିନଗ୍ତା ରାଜା ତୁଲଙ୍ ଜୁଦ କିକିବ୍ତେ ଅଙ୍ଗର୍ଡା ବଳତେ ଉନୁକୁଳ ମନ୍ତିରିକା ତୁଲଙ୍ ଡକଆନ୍ଜ ଚିନ୍ତା କିବ୍ଡେକି ‘ଏରେ ଡାବୁଙ୍ ରାଜାରା କୁଡିଏ ଅଜାର ସଇନିକକା ତୁଲଙ୍ ନିଞା ଦସ ଅଜାର ସଇନିକକିତେ ଗଗଜ ଜୁଦ କିକିବ୍ତେ ମୁଆମୁଇ ଇତେ ରିମିମାରି ନାରି ।’ 32 ଜଦି ଆରିମ୍ଡେକି ଜେନା, ତା ଏଲେ ଡାବୁଙ୍ ରାଜା ଲାଙ୍କାତେ ମାସିନା ଏରେବଳତେ ମିନଗ୍ କବରିଆରତେ କିନଜ ସାନ୍ତି କିମିବେ। 33 ଏରେ ନୁଣିଞ୍ଡ ଆପେ ନିଜଆ ଦନ ସମ୍ପତି ଟାଙ୍କା ପଇସା ସାବୁରିଞ୍ ଗିନିସରେକି ସାଡେ ମା ଇରିମାନ୍ଜ ଆଞା ଚାଲାଞ୍ଡେ ଇ ମା ଇରିମ୍ଡେ ଜେନା । 34 "ବିଲୁଙ୍ଡେ ଡିଅ । ଏଲେ ବିଲୁଙ୍ ସେକାବ୍ ଇଆନ୍ଜ ଆପେ ବିଲୁଙ୍ଡେତେ ବିରିବ ସୁଆଦ ଇକିବେ? 35 ବିଲୁଙ୍ ସେକାବ୍ ଇଆନ୍ଜ କତ କି ସାର କିଲଙ୍ ଆଇରେ ଜେନା, ଏତେ ବାଏତେ ଚିଅଗ୍କେକି । ଜାର ଅଙ୍ତେ ଲୁତୁରୁ ଆସିକେ, ଆର ଅଙ୍ଡେମେ ।"
ଅଜେସେରାନା ମେଣ୍ଡାରା ଆଗ
1 ଦିନମିଞ୍ ମାସୁଲି ଟୁଳାଏକେକି ଲୁକକି ଆଉ ଡାବୁଙ୍ ପାପି ଲୁକକି ସାବୁରିଞ୍ ଜିସୁଆ ଗାତା ଅଙ୍ତେ ଜିସୁଆ ଆସରବ ଡେଙ୍ଗର୍ନମାନ୍କି । 2 ଏଲେ ପାରୁସିକି ଆଉ ଅର୍ଦାନକି ଗାଣାଜର୍କିଜ ଗାମକି, "ନି ଲୁକରେ ପାପି ଲୁକକିତେ ଡିଅ ବୁଜିକେ ଆଉ ଆରାକା ତୁଲଙ୍ ଉର୍କେ ।" 3 ଏତେ ଜିସୁ ପାରୁସି ଲୁକକିତେ ନି ଆଗରେ ଗାତାଅ । 4 "ଆପେ ମନେ କିବେପେ । ଆପେଆ ବିତିରୁ ମିନଗା ପାଞ୍ଚ କୁଳି ମେଣ୍ଡା ଆସିକେ । ମେଣ୍ଡାରାକା ବିତିରୁ ମୁଇଣ୍ଟ ଅଜେଆନ୍ଜ, ଏଲେ ଏରେ ଲୁକରେ ଚାରି କୁଳି ଉଣିସି ଗଟା ମେଣ୍ଡାରକିତେ ପାଦା ଜାଗାତେ ସାଡେଅଜ ଏରେ ମୁଇଣ୍ଟ ଅଜେସେରାନା ମେଣ୍ଡାରେତେ କୁକୁଇ ଜାକଜ୍ ଡମଗରାଏ । 5 କୁୟଜ ଲୁକରେ ମେଣ୍ଡାରେତେ ସୁଗାଇ କୁସିରେ ତାରମ୍ଡାତେ ତିନ୍ତାରଜ ଇଞାବ ମରେନେ । 6 ଜଳାରକିତେ ଆଉ ସାଇପଳିସା ଲୁକକିତେ ଡାକେଅଜ ଇକୁଡିଆ କିବଜ ଆରକିତେ ଗାମାମେ 'ଆଞା ତୁଲଙ୍ କୁସି ବାସି କିମାପେ, ଆଞା ଅଜେସେରାନା ମେଣ୍ଡାରେ କୁଇଆନା ।' 7 ଏରେ ନୁଣିଞ୍ଡ ଆଞ୍ ଆପେତେ ଗାମ୍କେ, କିତିକ ଡିଅ ଲୁକରେକିତେ ଇସରଆ ସାମୁରାତେ ମନ ବଦଳାଏତେ ଦରକାର ଜେନା । ଏରେ ନୁଣିଞ୍ଡ ଚାରିକୁଳି ଉଣିସି ଜଣ ଡିଅ ଲୁକକାତାକୁରି ମିନଗ୍ ପାପି ବାଗି ଲୁକ ମନ ବଦଳାଏଆନ୍ଜ ଆରା ଲାଗି ସରଗତେ ସୁଗାଇ କୁସି ମିନା ।
ଅଜେସେରାନା ରୁପା ଟାଙ୍କାରା ଆଗ
8 "ମିନଗ୍ ଜୁଆଙ୍ଡାଏରା ଦସ ଗଟା ରୁପା ଟାଙ୍କା ଆସିଆନା, ଆଉ ଏରେ ଦସଗଟାରେତା ମୁଇଣ୍ଟ ରୁପା ଟାଙ୍କା ଅଜେଆନା, ଏତେ ଏରେ ଜୁଆଙ୍ଡାଏରେ ଡିବିରି ଆଲ କିବଜ ଇଞା ଆଲୁଙା ଜାଳେନିଞଜ ଜଜଗ ବିରି ଟାଙ୍କାରେ କୁକୁଇ ଜାକଜ୍ ଡିଅର ଡଗରାଏଆନା । 9 ଏରେ ଟାଙ୍କାରେ କୁଇଆନ୍ଜ ଜୁଆଙ୍ଡାଏରେ ନିଜଆ ଜଳାରକିତେ ଆଉ ସାଇ ପଳିସା କୁଟୁମାଳିରକିତେ ଡାକେଅ ବିରି ଇକୁଡିଆ କିବଜ ଗାମାମେ, 'ଆଞା ତୁଲଙ୍ କୁସି ବାସି ଇନାପେ, ଜୁ ଟାଙ୍କାରେ ଆଞା ଅଜାଏସେର, ଏରେ କୁଇଆନ୍ ।' 10 ଆଞ୍ ଆପେତେ ଗାମ୍କେ, ମିନଗ୍ ପାପି ମନ ବଦଳାଆନ୍ଜ, ଏରେ ମିନଗ୍ ପାପିଆ ଲାଗି ଇସରଆ କବରିଆରକି ସୁଗାଇ କୁସି ମିନାକି ।"
ଅଜେସେରାନ୍ କନନ୍ଡା ଆଗ
11 ଜିସୁ ଅଦକତା ଗାମ, "ମିନଗ୍ ଲୁକଆ ଅମ୍ବାଟ କନନ୍ଡକିଆ ଆସିଆନ୍କିଆ । 12 ସାନ କନନ୍ଡ ଅବାରତେ ଗାମ, 'ବାଆ ଦନ ସମ୍ପତି, ବିଲ, ବାକାଳିରେକି ତାତାଜେ ବିରି ଆଞା ବାଗଞ୍ଡେ ଆନେ ।' ଏତେ ଅବାର ଅମ୍ବାଟ କନନ୍ଡକିଆତେ ଦନ ସମ୍ପତି, ବିଲ, ବାକାଳିରେକି ତାତାଜ । 13 "କିତି ଦିନ ଅଚତା ସାନ କନନ୍ଡ ସାବୁରିଞ୍ ଦନ ଇକୁଡିଆ କିବାନ୍ଜ ସୁଗାଇ ଲାଙ୍କା ଦେସବ ଡୁଙ । ଏରାତେ ବାଗି କମ କିବଜ ରଏଆନ୍ ଆଉ ନିଜଆ ସାବୁରିଞ୍ ଟାଙ୍କା ପଇସାରକି କରଚ କିବଜ ଉଡାଏନିଞ । 14 ଏଲେ ସାବୁରିଞ୍ ଟାଙ୍କା ପଇସାରେ କରଚ କିବାନ୍ଜ ଉଡାଅ । ଅଚତା ରଏସେରାନା ଦେସରାତେ ମରଗ ଅଲଗାନା, ଏତେ ଆରା ଅବାବ ଇଆନା । 15 ଏତେ ଆର ଅନଜ ଏରେ ଦେସଆ ମିନଗ୍ ଲୁକଆ ଆସରାତେ କମଆନା । ମାଲିକରେ ବୁତାଏ ସରାଏତେ ନିଜଆ ବିଲ ଜାଗାରବ କିନ । 16 ଏରେ ବୁତାଏକି ଜୁ ଜୁ ଗିନିସରେକି ଜିମ୍ଜିମ୍ମମାନ୍କି, ଏରେ ଲୁକରେ ନିଜଆ ଇତିବ୍ ଆବ୍ବୁସୁତେ ଜିମ୍ଜିମ୍ତେ ମନ କିକିବ୍ମମାନା, ଏଲେ କେଇ ମିନଗ୍ ସରିକା ଆରତେ କିଚି ଉରୁର୍ତେ ଆଡିଞ୍ଡିଞମାନ୍କି । 17 "ତା ଅଚତା ଏରେ ଲୁକରେ ଜାଣିଙ୍କଙଜ ଗାମ, 'ଆଞା ଅବାଞା ମୁଲିଆରକି ଉରକି ଜିମକିଜ ବଳେକେ, ଏଲେ ଆଞ୍ ନାନ୍ ତିଲାଞ୍ ଗଜ୍କେ । 18 ଆଞ୍ ତଙନା ବିରି ଆଞା ଅବାଞା ଆସରବ ଅନା, ଆଉ ଅବାଞ୍ତେ ଗାମେ, "ବାଆ, ଇସରଆ ବିରୁଦରେ, ଆଉ ଆମା, ବିରୁଦରେ ପାପ କିବ୍ସେରେ । 19 ଆମା କନନ୍ମ ବୁଲି ଡାକେତେ ଆଞ୍ ଡିଅ ଜେନା, ଆଞ୍ତେ ଆମା ମିନଗ୍ ଚାକର ଡେଗାନ୍ ମୁନିଞ୍" ଗାଆମେ ।' 20 "ଏତେ ଲୁକରେ ଏରେତା ତଙନାନ୍ଜ ନିଜଆ ଅବାରାବ ଅନ । ସାନ କନନ୍ଡ ଲାଙ୍କାତେ ଆସିଆନ୍ ବଳଆ ଅବାର ସାନ କନନ୍ଡତେ ଜୟଜ, ଦୟା ଲାଗେଆନା, ଆଉ ଦବଡେସୁନ୍ ଅନଜ ସାନ କନନ୍ଡତେ କୁଣ୍ଡୁଗଜ ମୁମୁଞାନା । 21 ସାନ କନନ୍ଡ ଅବାରତେ ଗାମ, 'ବାଆ ଇସରଆ ବିରୁଦରେ ଆଉ ଆମା ବିରୁଦରେ ଆଞ୍ ପାପ କିବ୍ସେରେ, ଆମ୍ ଆଞ୍ତେ କନନ୍ ବୁଲି ମେଡାକେଅର, ଆଞ୍ ଡିଅ ଜେନା ।' 22 ଏଲେ ଅବାର ଚାକରକିତେ ଡାକେଅଜ ଗାମ, 'ସାବୁରିଞାତା ଡିଅ କତେ ଗଳଙ୍ ଅରେନ୍ପେ ବିରି ନି ସାନ କନନ୍ନିଞ୍ତେ ଆବାଣଣ୍ଡିଜେପେ, ନିନାନ୍ ଇତିରାତେ ମୁଦି ଆବ୍ସୁପେ ଆଉ ଇଜିଙ୍ଡା ପାଦରାତେ ଜୁତା ଉକୁର୍ପେ । 23 ସାବୁରିଞ୍ଞାତା ମୁଟାଏସେରେ କତାଙ୍ କନନ୍ଡେ ଅରେନ୍ପେ ବିରି ଅବ୍ଗଜେପେ, ଉଆ ନିଞ୍ମାନକି କୁବା ବାତୁଲି ନିକିମା ବିରି କୁସି ବାସି ନିନା । 24 ନି ଆଞା ସାନ କନନ୍ନିଞ୍ଡେ ଗଜ୍ଚେର, ଆଉତରମିଞ୍ତା ବେଜ୍ବଚେଅ, ଅଜେସେରାନା ଆଉ ମେଳେଆନା ।' ଏତେ ଆରକି ବାତୁଲି କିବାନ୍କିଜ କୁସି ଇଆନ୍କି । 25 "ଏରେବେଳା ଆରା କୁବା କନନ୍ଡ ବିଲଆତେ ଆସିଆନା । କୁବା କନନ୍ଡ ଜେତେବେଳା ଡେନଜ ଇଞା ଆଉଚି ଆକଲାଜ୍ ଇସେରାନା, ଏରେବେଳା ବାଇଦ ଆଉ ଗିତ ନାଟ ସବଦ ଅଙ । 26 ଚାକରରାକା ବିତିରୁ ମିନଗତେ ନିଜଆ ଆସରବ ଡାକେଅଜ, 'ଏରେ ସାବୁରିଞ୍ ବିରି ଇରେ' ଗାମଜ ଜିଜିଙ୍ତେ ଲାଗେଆନା । 27 ଚାକରରେ କୁବା କନନ୍ଡତେ ଗାମ 'ଆମା ବକମ୍ ଲାଙ୍କାବ ଡୁଙ୍ସେର ଆର ପେରେଅଜ ଡେନ୍ଚେରେ । ଆମା ଅବାମ୍ ଆରତେ ଡିଅ ଇଣିର ଜଜଏତେ କୁୟ ଏତେ ସାବୁରିଞାତା କୁବା ମୁଟାଏସେରାନ୍ କତାଙ୍ କନନ୍ ଗେସେକେ ବିରି ବାତୁଲି କିବ୍ସେକେ ।' 28 ଏତେ କୁବା କନନ୍ଡ ଚଳେଆନ୍ଜ ଇଞା ଆଲୁଙ୍ବ ଅଙ୍ଗର୍ତେ ଆମଙ୍ଗେଅ । ଏତେ ଆରା ଅବାର ଆଲୁଙ୍ତା ବାଏବ ଡେନଜ କୁବା କନନ୍ଡତେ ବୁଜାଏତେ ଲାଗେଆନା । 29 ଏଲେ କୁବା କନନ୍ଡ ଅବାରତେ ଗାମ 'କିତି ସୁଗାଇ ବରସ ଇଆନ୍ଜ ଆଞ୍ ଆମା ଚାକରମ୍ଡେ ଡେଗାନ୍ କମ କିବ୍କେ ଆଉ ଦିନମିଞ୍ ସରିକା ଆମା ଗାତାମ୍ଡେ ଇଳିବ୍ ଜେନା । ଏଲେ ଆଞା ନିଜଆ ଜଳାରାକା ତୁଲଙ୍ କୁବା ବାତୁଲି କିକିବ୍ତେ ଆମ୍ ଆଞ୍ତେ ଦିନମିଞ୍ ସରିକା ମେରମ୍ କନନ୍ ଡିଡିଞ୍ ଜେନା । 30 ଏଲେ ନି ଜୁ ଆମା ସାନ କନନମ୍, ଚାଣ୍ଡାଳକା ତୁଲଙ୍ ଆମା ଦନ ସମ୍ପତି ଆବ୍ସଙାନ୍ଜ ଉଡାଏସେକେ । ଜେତେ ବଳଆ ଆର ଇଞାବ ଡେନ, ଆମ୍ ସାନ କନନ୍ମା ଲାଗି ସାବୁରିଞାତା କୁବା ମୁଟାସେରାନ୍ କତାଙ୍ କନନ୍ ମାବ୍ଗେଅଜ କୁବା ବାତୁଲି ମିକିବଜ ମିଡିଞ ।' 31 ଅବାର ଗାମ 'ଲାଣ୍ଡା, ଆମ୍ ତ ସୁବୁଦିନ ଆଞା ତୁଲଙ୍ ମାସିକେ, ଜା ସୁବୁ ଆଞା ଏରେ ସମୁନ୍ଦାଏ ଆମା ଆସିକେ । 32 ଏଲେ ଆମା ବକମ୍ ଗଜ୍ଚେର ଆଉତରମିଞ୍ତା ବେଜ୍ବଞ୍ଚେଅ, ଅଜେସେରାନା ଆଉ ମେଳେଆନା । ଏରାଦିରେ ନିଞ୍ କୁସି ନିକିବାନ୍ ।' "
ବୁଦିଆ ଚାକରଆ ଆଗ
1 ଜିସୁ ଚାଲାରକିତେ ଗାମ, "ମିନଗ୍ ଦନି ଲୁକ ଆସିଆନା, ଦନି ଲୁକରେ ମିନଗ୍ତେ ଚାକରଆ ଡେଗାନ୍ ଦନ ସମ୍ପତି ସାମ୍ବାଳେତେ ଉନ୍ଚେରାନ୍ । ଚାକରରେ ଦନ ସମ୍ପତିରେକି କରଚ କିବ୍ଡେ ଗାମଜ ମାଲିକରେ ଅଙ । 2 ଏତେ ଚାକରରେତେ ଡାକେଅଜ ଗାମ 'ଆଞ୍ ଆମା ଗାତାମ୍ଡେ ନି ଗାତାରେ ଅଙ୍ସେକେ ଜୁ ଆମ୍ ସୁଗାଇ କରଚ ମିକିବ୍କେ । ଆମ୍ ଦନ ସମ୍ପତିରିକି ଇସାବ ମିକିକିବ୍ମମାନ୍ ଏରେ ଆଞ୍ତେ ଇସାବ ଡିଞିଞ୍ ଆନେ । ଆମ୍ ଦନ ସମ୍ପତିରେକି ସାମ୍ବାଳେତେ ମା ମେରଏରେ ଜେନା ।' 3 ଏତେ ଏରେ ଚାକରରେ ମନେ ମନେ ଗାମ୍ଡମାନା 'ବିରି କିମା । ଆଞା ସାଉକାରଞ୍ ତ ଦନ ସମ୍ପତିରେକି ସାମ୍ବାଳେତେ ଆଞ୍ତେ ଆଉନ୍କେ ଜେନା । ଲଟବ୍ ଲାଲାଏତେ ଆଞା ବଳ ଜତେ, ବିକ ଗାଗାର୍ତେ ଆଞ୍ତେ ଗିଆନ୍କେ । 4 ଆଞ୍ତେ ନି କମରେତା ସାଡାଅଜ, ଲୁକକି ଜିମିତି ଆଞ୍ତେ ଡିଅ କୁୟକିଜ ଇଞାରକିବ ଉରୁର୍ତେ ଡାମାକେକି, ଏତେ ଆଞ୍ତେ ବିରି କିକିବ୍ତେ ମିନା, ଏରେ ଆଞ୍ ବୁଜିଅତେ ।' 5 ଏତେ ଚାକରରେ ମାଲିକଆତା ରୁଣ ଗଗ୍ସେରାନାକି ଲୁକକିତେ ମିନଗ୍ତେ ମିନଗ୍ତେ ଡାକେଅ । ଉନୁକୁଳ ଗଗ୍ସେରାନ୍ ଲୁକରେତେ ଜିଙ 'ଆଞା ସାଉକାରଞାତା ଆମ୍ ବିରି ମେଗଗ୍ସେରେ?' ଏରେ ଲୁକରେ ଗାମ, 'ପାଞ୍ଚ କୁଳି ଟିଣ ଅଜନ୍ ଗଗ୍ସେରେ ।' 6 ଚାକରରେ ଗାମ, 'ଆମା ଇସାବ କାଗଜମ୍ଡେ ଗଙା, ଡକନା ବିରି ଦୁଇ କୁଳି ଦସ ଟିଣ ଲେକେନା ।' 7 ତା ଅଚତା ଆଉ ମିନଗ୍ତା ଲୁକତେ ଜିଙ, 'ଆଞା ସାଉକାରଞାତା ଆମ୍ ବିରି ମେଗଗ୍ସେରେ?', ଲୁକରେ ଗାମ, 'ପାଞ୍ଚ କୁଳି ଗହମ ବସତା ।' ଚାକରରେ ଲୁକରେତେ ଗାମ, 'ଆମା ଇସାବ କାଗଜ ଗଙା, ଚାରି କୁଳି ବସତା ବୁଲି ଲେକେନା' ଗାମ । 8 ଏରେ ଅବିସାସି ଚାକରରେ, ବୁଦି କିବାନ୍ ଏତେ ଆରା ସାଉକାରର ଗାମ 'ଆଞା ଚାକରଞ୍ ବୁଦିଆ କମ କିବ୍ସେକେ ।' ନି ମୁଲକରା ବାଗି ଲୁକରେକି ଆରାକା ଜୁଗରେ ଇସରଆ ସୁତୁକୁରିଞ୍ ଗାତା କଙ୍ସେକିକି ଲୁକରାକାତାକୁରି ସୁଗାଇ ବୁଦି କିବ୍ଡେକି । 9 "ଆଞ୍ ସୁତୁକୁରିଞ୍ ଆପେତେ ଗାମ୍କେ, ନି ମୁଲକରା ଆପେଆ ଦନ ସମ୍ପତିରେ ଡାବୁଙ୍ ଲୁକକିତେ ଡିଞେପେଜ ସାଆଜ କିବେପେ । ତା ଏଲେ ଏରେ ଲୁକରେକି ଆପେଆ ଜଳାପେରେ ମିନାକି । ଆପେଆ ସାବୁରିଞ୍ ଦନ ଜେଳାଅଜ ଆପେତେ ମୁଇଣ୍ଟ ଇଞାବ ରରଏତେ ଡାମାକେକି । ଏରେ ଇଞାରେ ସୁବୁଦିନ ଲାଗି ରମଏନା । 10 ଜିଏ ଅଳପ କୁଟିଜ୍ ଗାତାତେ ମିନଗ୍ତେ ବିସାସ କିକିବ୍ ଇରିମାନ୍ଜ ଆରତେ ସୁଗାଇ ଗାତାତେ କିଲଙ୍ ବିସାସ କିକିବ୍ ଇରିମ୍ଡେ । କୁଟିଜ୍ ଗାତାତେ ମିନଗ୍ତେ ବିସାସ କିକିବ୍ ଆମାରିମାନ୍ଜ, ଆରତେ ସୁଗାଇ ଗାତାତେ କିଲଙ୍ ବିସାସ କିକିବ୍ ଆମାରିମ୍ଡେ ଜେନା । 11 ଏଲେ ଆପେତେ ନି ମୁଲକରା ଦନ ସମ୍ପତି ସାମ୍ବାଳେତେ ବିସାସ କିକିବ୍ ଆମାରିମାନ୍ଜ, ଆଡି ଆପେତେ ବିସାସ କିବଜ ସୁତୁକୁରିଞ୍ ଦନ ସମ୍ପତି ଡିମିଞେ? 12 ଆପେ ଜଦି ପରଆ ଦନ ସମ୍ପତି ସାମ୍ବାଳେତେ ବିସାସ କିକିବ୍ ଆମାରିମାନ୍ଜ, ଆଡି ଆପେତେ ନିଜଆ ଲାଗି ଦନ ସମ୍ପତି ଡିମିଞେପେ?
ଜିସୁ ଲୁକକିତେ ସୁଗାଇ ଗାତା ଆବ୍ସଜ
13 "ମିନଗ୍ ଚାକରରେ ବାନଗ୍ ସାଉଆରକିଆତେ ସେବା କିକିବ୍ ଆରିମ୍ଡେ ଜେନା, ସେବା କିବଜ, ବାନଗା ବିତିରୁ, ମିନଗ୍ତେ ବାଗି ବୁମୁଜି, ଆଉ ମିନଗ୍ତେ ଡିଅ କୁମୁଇଏ । ମିନଗା ଗାତାର ମାମାନେ ଆଉ ମିନଗା ଗାତାର ଆମାନେକେ ଜେନା । ଆପେ ଇସରତେ ଆଉ ଦନ ସମ୍ପତିତେ, ସେବା କିକିବ୍ ମା ଇରିମ୍ଡେ ଜେନା ।" 14 ପାରୁସି ଲୁକକି ଦନ ସମ୍ପତିତେ ସୁଗାଇ ଡିଅ କୁକୁଇନମାନ୍କି । ଏତେ ଏରେସାବୁରିଞ୍ ଗାତାରେ ଅଙକିଜ, ଜିସୁତେ ବାଗି ଗାତାଅକି । 15 ଏତେ ଜିସୁ ପାରୁସି ଲୁକକିତେ ଗାମ, "ଆପେ ମୁଣୁସକା ସାମୁରାକାତେ ନିଜ ନିଜତେ ଡିଅ ଏଆବ୍ଗାମ୍ଡମ୍ଡେ । ଏଲେ ଇସର ଆପେଆ ମନପେରେ କଙ୍ସେକେତେ । ଜା ମୁଣୁସକି 'ସୁଗାଇ ଡିଅ' ଗାମ୍କିକି ଏରେ ସାବୁରିଞ୍ ଇସରଆ ସାମୁରାତେ ସୁଗାଇ ବାଗି ଆସିକେ । 16 "ଜଅନ ଡେଙ୍ଗର୍ ଜାକଜ୍ ଆପେଆ ଆସପେଆ ମସାରା ନିୟମରେକି ଆଉ ଇସରଆ ଗାତା ଗାତାନମାନ୍କି ଲୁକରେକା ବଇରେକି ଆସିଆନ୍କି । ଏଲେ ଏକଳଙ୍ ଇସରଆ ରାଇଜରା ଡିଅ ଗାତା ଲୁକକିତେ ଗାତାଏ ଇରେ, ଆଉ ସାବୁରିଞ୍ ଲୁକକି ଇସରଆ ରାଇଜରବ ଅଙ୍ଗର୍ତେ ସୁଗାଇ ଚେସେଟା କିବ୍କିକି । 17 ଆକାସ ଆଉ ନି ମୁଲକ ବାଗି (ନସ୍ଟ)ମିନା । ଏଲେ ଇସରଆ ନିତି ନିୟମରା କୁଟିଜ୍ ଗାତା ସରିକା ବାଗି ଆଇରେ ଜେନା । 18 "ମିନଗ୍ ଲୁକ ନିଜଆ କୁଟୁମରତେ ସାଡେଅଜ ଡାବୁଙ୍ ଜୁଆଙ୍ଡାଏତେ କାନିଆ ଉନଜ ଆର ଚାଣ୍ଡାଳ କାମ କିବ୍ଡେ । ସାଉରାତା ଚାଡିରି ଇଆନ୍ଜ ଡୁମୁଙ୍ସେରେ ଜୁଆଙ୍ଡାଏରେତେ ଜିଏ କାନିଆ ମୁନେ, ଆର କିଲଙ୍ ଚାଣ୍ଡାଳ କାମ କିବ୍ଡେ ।
ଦନି ଲୁକ ଆଉ ଲାଜାରଆ ଆଗ
19 "ମିନଗ୍ ଦନି ଲୁକ ଆସିଆନା, ଏରେ ଦନି ଲୁକରେ ସୁଗାଇ ଦାମିକିଆ କତେ ଆଣ୍ଡିଞମାନା, ସୁବୁଦିନ ଡିଅ ଉରଜ ଜିମଜ ଅଇସିରେ ରଏନମାନା । 20 ଏଲେ ଏରେ ଦନି ଲୁକରା ଦୁଆର ମୁଅରା ସେଡାଗ୍ ଆକଲାଜ୍ ଲାଜାର ବୁଲି ମିନଗ୍ ଗରିବ ଲୁକ ଆସିଆନା, ଆରା ଇଣିରା ବେଳାମିଞ୍ କେଳେଞ୍ ଇନିଞ୍ଚେରାନ୍ । 21 ଲାଜାର ଏରେ ଦନି ଲୁକରେ ତଣ ଉର୍କେ ବଳତେ ଅଳଗ୍ଡେ ଆଏଣ୍ଟାରେ ଉରଜ ଇତିବ୍ ବୁସୁତେ ମନ କିକିବ୍ମମାନା ଆଉ ସେଲଗ୍ଡେକି କିଲଙ୍ ଡେନକିଜ ଲାଜାରଆ କେଳେଞ୍ଡତେ ଜାଞ୍ଜାନମାନ୍କି । 22 "କିତି ଦିନକ ଅଚତା ଏରେ ଲାଜାରରେ ଗଜ, ଆଉ ଇସରଆ କବରିଆରକି ଡେନକିଜ ଅବରାମଆ ସାମୁରବ ଗଗକି, ତା ଅଚତା ଏରେ ଦନି ଲୁକରେ କିଲଙ୍ ଗଜ, ଆଉ ଆରତେ ତିନକି । 23 ଏରେ ଦନି ଲୁକରେ ନରକ ଲାଲାଜ୍ କୁଣ୍ଡତେ, କଲବଲ ଇଆନ୍ଜ ଆଲିଙ୍ବ ଲଙ ଆଉ ଲାଙ୍କାତାସୁନ୍ ଅବରାମଆ ସାମୁରାତେ ଲାଜାରତେ ଜୟ । 24 ଏରେ ଦନି ଲୁକରେ ଡାକେଅଜ ଗାମ, 'ଏ ବାଆ ଅବରାମ, ଆଞ୍ତେ ଦୟା କିମିଞ୍ ବିରି ଲାଜାରତେ କିନେ । ଲାଜାର ଆରା ଆଙ୍ଗୁଳିର ଡାଗାତେ ବୁଡାଅଜ ଆଞା ଆଏଲାଙିଞ୍ତେ କୁଟିଜ୍ ଲାବ୍ଟାଗ୍ଡେମେ । ଆଞ୍ ନି ଲାଲାଜା କଲବଲ ଇରମ୍ଡେ ।' 25 ଏଲେ ଅବରାମ ଗାମ, 'ଲାଣ୍ଡାଳେ, ଆମ୍ ଜୁ ମେବଞ୍ଚେସେର ଏରେ ବଳଆ ଆମ୍ ଡିଅ ଡିଅ ଦନ ସମ୍ପତି ଗିନିସ ମିକୁଇସେରାନା ଆଉ ଲାଜାର ବାଗି ଗିନିସରେକି କୁଇସେରାନା, ଏରେ ମନେ ଅବ୍ଳଗେ । ଏକଳଙ୍ ଲାଜାର ନି ଜାଗାରା ଡିଅ ସୁକ କୁଇରେ, ଆଉ ଆମ୍ ନରକ ଲାଲାଜ୍ କୁଣ୍ଡଆ କଲ ବଲ ମିରେ । 26 ଆପେଆ ଆଉ ନିଞା ମୁଜିଆ ମୁଇଣ୍ଟ ଜିଲୁଙ୍ଡ ଡଡା ଆସିକେ । ନି ଜାଗାତା ଆପେଆ ଆସପେବ ଅଙ୍ଗର୍ତେ ମନ କିବକିଜ ବି କେଇ ଆପେଆ ଆସପେବ ଅଙ୍ଗର୍ ଆରିମ୍ଡେକି ଜେନା, ଆଉ ଏରେ ଜାଗାରେତା କେଇ ନି ଜାଗାରେବ ଡେଙ୍ଗର୍ ଆରିମ୍ଡେକି ଜେନା ।' 27 "ଏତେ ଦନି ଲୁକରେ ଗାମ, 'ଏ ବାଆ, ଏଲେ ଆଞ୍ ଆମ୍ତେ ଗୁଆରି ଗାର୍ଡେ, ଲାଜାରତେ ଆଞା ଅବାଞା ଇଞାରବ କିନେ । 28 ଆଞା ପାଞ୍ଚ ବାଇ ଆସିକିକି । ଲାଜାର ଅନଜ ନି ଜାଗାରା ସୁଗାଇ କସଟ ଆସିକେ ଗାମାମେ ଆଉ ଆରକି ନି ଜାଗାରେବ ଆଡେଣ୍ଡେମେକି ।' 29 ଆଉ ଅବରାମ ଗାମ, 'ଆରାକା ସାମୁରାକା ଇସରଆ ବଇ ଅଲାଗ୍ ଆସିକେ, ଆରକି ଏରେ ଗାତାରକି ଅଙ୍ଡେମେକି ।' 30 ଏତେ ଦନି ଲୁକରେ ଗାମ, 'ଏ ବାଆ ଅବରାମ, ଏରେ ସୁଗାଇ ଜେନା । ଏଲେ ମିନଗ୍ ଲୁକ ଗଜ ଅଚତା ନି ଜାଗାରାତା ଅନଜ ଆରକି ମନ ବମଦଳାଏନାକିଜ ବାଗି ଗାତା ସାମାଡେକି ।' 31 ଆଉ ଅବରାମ ଗାମ, 'ଜଦି ଆରକି ମସା ଆବ୍ସଜ୍ଚେର ଗାତାରେକି ଆମାନେକେକି ଆଉ ଇସରଆ ଗାତା ଗାତାଏକିକି ଲୁକକା ଗାତାରକି ଆଅଙ୍କେକି ଜେନା, ତା ଏଲେ ମିନଗ୍ ଲୁକ ଗଜଜ ବେଜ୍ବଞ୍ଚେଅଜ ସରିକା, ଏରେ ଲୁକରେକି ଆରା ଗାତାର ଆଅଙ୍କିକି ଜେନା । ' "
ପାପ ବାଗି କମ
1 ଜିସୁ ଚାଲାରକିତେ ଡାକେଅଜ ଗାମ, "ପାପ କିକିବ୍ତେ ସଦାବେଳେ ଲୁବ ଆସିକେ । ଏଲେ ଜିଏ ମିନଗ୍ତେ ପାପ କିକିବ୍ତେ ଲୁବ ଆବ୍କିବ୍କେ ଆରା ସୁଗାଇ ବାଗି ମିନା । 2 ଆଞା ସାନର ବିସାସିତେ ପାପ ଆବ୍କିବଜ ଇସର ସୁଗାଇ ଦଣ୍ଡ ଡିମିଞେ । ମିନଗ୍ ଲୁକରା କଙ୍କରାତେ ମୁଇଣ୍ଟ ଚକି ଏଗେର୍ ତରଜ ଆରତେ ସମୁନ୍ଦର ଡାଗ୍ତେ ଚିଅଗଜ ଏରେ ଦଣ୍ଡ କୁକୁଇତାକୁରି ସୁଗାଇ ଡିଅ ମିନା । 3 ଆପେ ନିଜେ ନିଜଆଲାଗି ଡିଅର ଜାଗେନାପେ ବିରି ରଏନାପେ । ଆପେଆ କାକାପେରେ ପାପ କିବଜ ଆରତେ ଏଗାମେ 'ଆମ୍ ପାପ ମିକିବ୍କେ' କାକାପେରେ ମନ ବଦଳାଆନ୍ଜ, ଆରତେ କେମା ଡିଞେପେ । 4 କାକାପେରେ ମୁଇଣ୍ଟ ଦିନତେ ସାତ ତର ଆପେଆ ବିରୁଦରେ ପାପ ବାଗି କମ କିବଜ, ସାତ ତର ଆପେଆ ସାମୁପେବ ଡେନଜ 'ଆଞ୍ ମନ ବଦଳାଏସେରେ, ଆଞ୍ତେ କେମା କିମିଞ୍' ବୁଲି ଗାମଜ ଆରତେ କେମା ଡିଞେପେ ।" 5 ଜିସୁଆ ବାରଜଣ ଚାଲାରକି ପରବୁ ଜିସୁତେ ଗାମକି, "ଆମ୍ତେ ସୁଗାଇ ବିସାସ କିକିବ୍ତେ ନିଞ୍ତେ ସାଆଜ କିବେ ।" 6 ପରବୁ ଗାମ, "ମୁଇଣ୍ଟ ସୁରୁସୁ ଅଜାଙ୍ଡା ଡେଗାନ୍ ଆପେଆ ବିସାସପେରେ ଆସିଆନ୍ଜ ନି ମଲ୍ବରି ସୁମୁସିଞ୍ଡେତେ 'ମୁଳରତାସୁନ୍ ଜାଗ୍ଡମାନ୍ଜ, ସମୁନ୍ଦର ଡାଗ୍ତେ ଡାଏ ଅରାଜ୍ଡମା' ଏଗାମଜ ଆର ମରାଜ୍ଡମା ।
ଇସରଆ ଡିଅ ଚାକର ଇନାପେ
7 "ମନେ କିବେପେ, ଆପେଆ ମିନଗ୍ ଚାକର ଆସିକେ । ଆର ବିଲଆ ସିଲୁଗ୍ ସିଅଜ ବା ମେଣ୍ଡା ସରାଅଜ ଡେନଜ ଆରତେ ଆପେ ବିରି ଏଗାମେ? 'ଉଆ ଡେନାଜ ଉରୁର୍ତେ ଡକନା' ଏଗାମେ ବିରି? 8 ଜେନା । ସାଉଆରେ ଚାକରରେତେ ଗାମାମେ 'ଆଞା ଉରୁର୍ତେ ଗଳାଏନିଞ୍, ଆଞ୍ ଉରୁର୍ ଜିମ୍ଜିମମା ବଳତେ ଆମ୍ ଆଞା ସେବା କିମିଞ୍, ଆଞ୍ ଉରୁର୍ ଉଟାଅଜ ଆମ୍ ମୁରେ ।' 9 ଚାକରରେ ସାଉଆରା ଗାତାର ମାନେଅଜ କମଆନା, ସାଉଆର ବିରି ଚାକରରତେ ଦନିଅବାଦ ଡିଞ୍କେ? ଜେନା । 10 ଏରେ ନୁଉଣିଣ୍ଡ ଆପେ କିଲଙ୍ ସାବୁରିଞ୍ ଗାତା ଏମାନେଅଜ ଡିଅ କମ ଇକିବଜ ଗାମେପେ 'ନିଞ୍ ଉଡେଇ ଚାକରକି, ଜା କିକିବ୍ତେ ମିନା, ଏରେ ନିଞ୍ ନିକିବ୍ସେକେତେ ।' "
ଦସ ଜଣ କେଳେତାଙ୍ ରୁଗା ଲୁକକିତେ ଜିସୁ ଡିଅ କିବ
11 ଜିସୁ ଜିରୁସାଲମ୍ ଅଙ୍ଗର୍ନମାନ୍ ଏରେ ବଳଆ ସମିରଣ ଆଉ ଗାଲିଲି ଅଞ୍ଚଳ ମୁଜିଆତେ ଆଉଚିଆନା । 12 ଜିସୁ ମୁଇଣ୍ଟ ଗାଅଁବ ଡେନ ।ଏରାତେ ଦସ ଜଣ କେଳେତାଙ୍ ରୁଗା ଲୁକକି ଜିସୁତେ ରୁବାଙକି ।କୁଟିଜ୍ ଲାଙ୍କାତେ ଆସିଆନ୍କି ଆଉ ଆରକି କୁଷ୍ଟ ରୁଗି ଇସେରାନ୍କି ଏତେ ଜିସୁଆ ଆସରବ ଡେଙ୍ଗର୍ ଆରିମାନକି । 13 କେଳେଞ୍ତାଙ୍ ରୁଗା ଲୁକରେକି ଲାଙ୍କାତାସୁନ୍ ତଙନାନ୍କିଜ ସୁଗାଇ ଜୁରୁ ଲିଲାଅକିଜ ଗାମକି, "ଏ ଜିସୁ, ଗୁରୁ, ନିଞ୍ତେ ଦୟା କିବେ ।" 14 ଏଲେ ଜିସୁ କେଳେଞ୍ତାଙ୍ ରୁଗା ଲୁକକିତେ ଜୟଜ ଗାମ, "ଆପେ ଅନାପେ ବିରି ନିଜେ ନିଜେ ନାଗମ୍କିତେ ଆବ୍ଜନାପେ" ଆଉ କେଳେତାଙ୍ ରୁଗା ଲୁକରେକି ଅଙ୍ଗର୍ ଅଙ୍ଗର୍ ଡିଅ ଇନିଞାନ୍କି । 15 ଏଲେ ଆରାକା ବିତିରୁ ମିନଗ୍ ଡିଅ ଇସେରେ ଗାମଜ, ସୁଗାଇ ଜୁରୁ ଲିଲାଅଜ ଇସରତେ ଦନିଅବାଦ ଡିଞ୍ତା ଡିଞ୍ତା ପେରେଅଜ, 16 ଜିସୁଆ ପାଦ ତୁଳିତେ ଉଳୁଗିଆନ୍ଜ ଜିସୁତେ ଦନିଅବାଦ ଡିଞ । ଆର ମିନଗ୍ ସମିରୁଣିଅ ଲୁକ ଆସିଆନା । 17 ଏତେ ଜିସୁ ଗାମ, “ଦସ ଜଣ କେଳେତାଙ୍ ରୁଗା ଲୁକରେକି ଡିଅ ଆଇସେରାନ୍କି ବିରି? 18 ଏଲେ ଆଉ ନ ଜଣତା ମାନ୍ଡିଆ? ଇସରତେ ଦନିଅବାଦ ଡିଞ୍ଡିଞ୍ତେ ଉଡେଇ ନି ଡାବୁଙ୍ ଜାତି ଲୁକରେ ପେରେଅଜ ଡେନ ।” 19 ଜିସୁ ଲୁକରେତେ ଗାମ, “ତଙନା ବିରି ଆମ୍ ଡୁଙେ, ଆମ୍ ବିସାସ ମିକିବ ଏତେ ଆମ୍ ଡିଅ ମିଆନ୍ ।”
ଇସରଆ ରାଇଜ
20 ଇସରଆ ରାଇଜର କିତିବଳତେ ଡେମେନା ? ଏରେ ଗାତାରେ ପାରୁସି ଲୁକକି ଜିସୁତେ ଜିଙକି ଏରେବେଳା ଜିସୁ ପାରୁସି ଲୁକକିତେ ଗାମ, "ଇସରଆ ରାଇଜର ଏରେନୁଣିଞ୍ ଡେମେନାଜୁ ଆପେ କେଇ ଜଜଏ ଆମାରିମ୍ଣ୍ଡେ ଜେନା । 21 କେଇ ଆଗାମ୍କିକି ଜେନାଜୁ 'ଇସରଆ ରାଇଜର ନାନ୍ ଆସିକେ' ବା 'ଇସରଆ ରାଇଜର ଆଉରା ଆସିକେ ।' ଏଲେ ଜଏପେ, ଇସରଆ ରାଇଜର ଆପେଆ ସାମୁପେଆ ଆସିକେ ।" 22 ଜିସୁ ଚାଲାରକିତେ ଗାମ, "ଏରେ ନୁଣିଞ୍ଡ ଦିନ ଡେମେନା, ଜେତେବଳତେ ଆପେ ମୁଣୁସ କନନ୍ତେ ଜଜଏତେ ମନ ଇକିମା, ଏଲେ ଜଜଏ ମା ଇରିମ୍ଡେ ଜେନା । 23 ଜଏପେ, ଲୁକକି ଆପେତେ ଗାମାମିକିଜୁ 'ମୁଣୁସ କନନ୍ ନାନ୍ ଆସିକେ' କି 'ମୁଣୁସ କନନ୍ ଆଉରା ଆସିକେ' ଗାମାମ୍କି । ଏଲେ ଆପେ ଆରାକା ତୁଲଙ୍ ଏଅନର ଆଉ ଆରାକା ଅଚ ଅଚର ଏଅନର । 24 ମବ୍ଲେର୍କେ ବଳତେ ଆକାସ ଆଲିଙା ମୁଇଁଟାଣତା ଆଉ ପାରିତା ଆଲ ଇରେ । ମୁଣୁସ କନନ୍ ଆରା ଦିନଆତେ ଏରେ ନୁଣିଞ୍ଡ ମିନା । 25 ଏଲେ ଉନୁକୁଳ ମୁଣୁସ କନନ୍ଡେତେ ସୁଗାଇ ଦୁକ କସଟ ସଏତେ ମିନା, ଆଉ, ନି ଜୁଗରା ଲୁକରେକି ମୁଣୁସ କନନ୍ଡେତେ ସାମାଡେକି । 26 ଆଗିଲା ନୁହଆ ବଳଆ ଜିମିତି ଇସେରାନା, ମୁଣୁସ କନନ୍ଡା କିଲଙ୍ ଏରେ ନୁଣିଞ୍ଡ ମିନା । 27 ଜାଆଜଆତେ ନୁହ ଆଲୁଙ୍ବ ଡୁଇଆନ୍ ଏରେ ଦିନ ଜାକଜ୍ ଲୁକକି ତଣ ଉରୁର୍ନମାନ୍କି ଜିମ୍ଜିମମାନ୍କି, କାନିଆ ଉନୁନ୍ନମାନ୍କି ଆଉ କାନିଆ ଡିଞ୍ଡିଞମାନ୍କି । ଏଲେ ଆକାସ ଆଲିଙ୍ତା ଗିମା ବାଦାସ ଡେନଜ ସାବୁରିଞ୍ତେ ଅବ୍ଗଞିଞ । 28 "ଲୁଟଆ ବଳଆ କିଲଙ୍ ଏରେ ନୁଣିଞ୍ଡ ଇସେରାନା । ଏରେ ଜୁଗରା ଲୁକରେକି ଉରୁର୍ନମାନ୍କି ଜିମ୍ଜିମମାନ୍କି, ସଙ୍ସଙମାନ୍କି ଆବ୍ସଙମାନ୍କି, ସୁମୁସିଞ୍ ଅରାଞମାନ୍କି ଆଉ ଇଞା କିଲଙ୍ ବନାଏନମାନ୍କି, 29 ଏଲେ ଲୁଟ ସଦମ ଗଳତା ଆରିଆନ୍ ଏରେ ଦିନଆତେ ଆକାସ ଆଲିଙ୍ତା ଲାଲାଜ୍ ଡେନଜ ସାବୁରିଞ୍ତେ ଅବ୍ଗଞିଞ । 30 ଜୁ ଦିନଆତେ ମୁଣୁସ କନନ୍ଡେତେ ସାବୁରିଞ୍ ଜମଏକି, ଏରେ ଦିନଆତେ କିଲଙ୍ ଏରେ ନୁଣିଞ୍ଡ ମିନା । 31 ଏରେ ବଳତେ ଜୁ ଲୁକ ଚାତ ଇଞା ଆଲିଙାତେ ମାସିନା, ଆରା ଇଞା ଆଲୁଙ୍ଡା ମାସିନା ନିଜଆ ଗିନିସ ପତରରେକିତେ ଗଗ୍ତେ ଚାତ ଆଲିଙ୍ତା ତୁଳିବ ଆଅଳେରେମେ । ଏରେ ନୁଣିଞ୍ଡ ଜୁ ଲୁକ ବିଲତେ ମାସିନା, ଏରେ ଲୁକରେ ଇଞାବ ଆପେରେମେ । 32 ଲୁଟଆ କୁଟୁମରା ଗାତାର ମନେ ଅବ୍ଳଗ୍ପେ । 33 ଜିଏ ନିଜଆ ଜିବନର ରକିଆ କିକିବ୍ତେ ଚେସ୍ଟା କିବ୍ଡେ, ଏରେ ଲୁକରେ ଜିବନର ମାରାଏନା, ଆଉ ଜୁ ଲୁକରେ ନିଜଆ ଜିବନର ମାରାଏନା, ଏରେ ଲୁକରେ ଜିବନର ରକିଆ କିମିମା । 34 ଆଞ୍ ଆପେତେ ଗାମ୍କେ, ଏରେ ରାତିରାତେ ବାନଗ୍ ମୁଇଣ୍ଟ ଆଟିଆତେ ଲେବେର୍ନମାନ୍କିଆଜ, ମିନଗ୍ତେ ଗଗଗ୍ ମିନା ଆଉ ମିନଗ୍ତେ ସାଡେ ମିନା । 35 ବାନଗ୍ ଜୁଆଙ୍ଡାଏକିଆ ଇକୁଡିଆ ଚକି ଏଗେର୍ତେ ରମଗଳେନମାକିଆ, ମିନଗ୍ତେ ଗଗଗ୍ ମିନା ଆଉ ଆଉ ମିନଗ୍ତେ ସାଡେ ମିନା । 36ବାନଗ୍ ଲୁକକିଆ ବିଲତେ ଇକୁଡିଆ କମ କିବ୍କିମମାନ୍କିଆଜ, ମିନଗ୍ତେ ଗଗଗ୍ ମିନା ଆଉ ମିନଗ୍ତେ ସାଡେ ମିନା । " 37 ଏତେ ଲୁକକି ଜିସୁତେ ଗାମକି, "ଏ ପରବୁ, ଏରେ ସାବୁରିଞ୍ ମାନ୍ତେ ମିନା?" ଜିସୁ ଲୁକକିତେ ଗାମ, "ଜୁଆତେ ଗମଜ୍ତା ମାଳା ଆସିକେ, ଏରାତେ ସାଗୁଣା କନ୍ତେର୍କି ଇକୁଡିଆ ଟୁଳରେକି ।"
ସାଦାବେଳେ ପାତାନା ଇକିମାଜ ଏରଏନା
1 ନିରାସା ମା ଇଆନ୍ଜ ସଦାବଳେ ପାତାନା ଇକିମାଜ ଏରଏନା, ନି ଗାତରେ ଜିସୁ ଚାଲାରକିତେ ମୁଇଣ୍ଟ ଆଗ ଗାତାଅଜ ଆବ୍ସଜ । 2 ଜିସୁ ଗାମ, "ମୁଇଣ୍ଟ ଗଳଆତେ ମିନଗ୍ ବିଚାର କିକିମମାନ୍ ଲୁକ ଆସିଆନା । ଏରେ ଲୁକରେ ଇସରତେ ଆବେତଙମାନ୍ ଆଉ ମୁଣୁସକିତେ ଆମନେନମାନା । 3 ଏରେ ଗଳରାତେ ମିନଗ୍ ରାଣ୍ଡରାଏ ଜୁଆଙ୍ଡାଏ ଆସିଆନା, ଏରେ ରାଣ୍ଡରାଏ ଜୁଆଙ୍ଡାଏରେ ଗଣତେ ଗଣତେ ବିଚାର କିକିମମାନ୍ ଲୁକରାବ ଅନଜ ଗାତାନମାନ୍, 'ଆଞ୍ତେ ମିନଗ୍ ବିରୁଦ ଇଂସା କିବ୍କେ । ଆରା ନିଆୟ ବିଚାର କିବେ ।' 4 ବିଚାର କିକିମମାନ୍ ଲୁକରେ କିତି ଦିନକ ଆଅଙ ଏଲେ ଅଚତା ମନେ ମନେ ଗାମ୍ଡମାନା, 'ଆଞ୍ ଇସରତେ ମା ବେତଙ୍ଡେ ଆଉ ମୁଣୁସତେ ମା ମାନେକେ, 5 ଏଲେ ନି ରାଣ୍ଡରାଏ ଜୁଆଙ୍ଡାଏରେ ଆଞ୍ତେ ସୁଗାଇ କସଟ ଅଏରାଣ ଡିଣ୍ଡିଞମ୍ଡେ, ଏତେ ଆଞ୍ ରାଣ୍ଡରାଏରା ଡିଅ ନିଆୟ ବିଚାର କିବେ, ନା ଏଲେ ରାଣ୍ଡରାଏ ଜୁଆଙ୍ଡାଏରେ ସଦାବଳେ ଡେନଜ ଆଞ୍ତେ ଅଏରାଣ କିମିବେ ।' " 6 ପରବୁ ଗାମ, "ନି ବିଚାର କିକିମମାନ୍ ଲୁକରେ ଡିଅ ନିଆୟ ଆକିବ୍କେ ଏଲେ ବି ଆର ବିରିକ ଗାମ୍କେ ଜୁ ଅଙେପେ । ଆର ଅଚତା ଏରେ ରାଣ୍ଡରାଏରା ଲାଗି ଡିଅ ନିଆୟ କିବ । 7 ତା ଏଲେ ଇସରତେ ଜୁ ଲୁକକି ଦିନ ରାତି ପାତାନା କିମିବ୍କିମମାକି, ଇସର ବିରି ଏରେ ଲୁକରିକିତେ ଡିଅ ନିଆୟ ଆକିବ୍କେ ଜେନା ବିରି? ଆର ଜିମିତି ଏଲେବି ଲୁକକିତେ ସାଆଜ କିମିବେ । କୁଟିଜ୍ ସୁଦାତେ ଡେରି ଆକିବ୍କେ ଜେନା । 8 ଆଞ୍ ଆପେତେ ସୁତୁକୁରିଞ୍ ଗାମ୍କେ, ଇସର ଗଳଙ୍ ଲୁକରେକିତେ ଡିଅ ନିଆୟ କିମିବେ । ଏଲେବି ମୁଣୁସ କନନ୍ ଡେନଜ ମୁଲକଆତେ ବିସାସିକିତେ ଜଜଏ ରିରିମା ବିରି?"
ନିଜତେ କୁବା ଏଗାମାଣ୍ଡ
9 କିତିକ ଲୁକକି ନିଜ ନିଜତେ ଡିଅ ଲୁକ ବୁଲି ଗାମ୍ଡମାନ୍କିଜ ଡାବୁଙ୍ ଲୁକକିତେ ବାଗି ବୁଲି ଗାମ୍କିକି । ଏରେ ଲୁକରେକିତେ ବୁଜାଏତେ ଜିସୁ ନି ଆଗରେ ଗାତାଅ, 10 "ବାନଗ୍ ଲୁକକିଆ ପାତାନା କିକିବ୍ତେ ମନ୍ଦିର ଆଲୁଙ୍ବ ଅନକିଆ, ମିନଗ୍ ପାରୁସି ଲୁକ ଆଉ ମିନଗ୍ତା ମାସୁଲି ଟୁଳାଏନମାନ୍ ଲୁକ । 11 ପାରୁସି ଲୁକରେ ମନ୍ଦିରତେ ତଙନାନ୍ଜ ନିଜଆ ଲାଗି ନି ନୁଣିଞ୍ଡ ପାତାନା କିବାନ୍, 'ଏ ଇସର, ଆଞ୍ ଆମ୍ତେ ଦନିଅବାଦ ଡିଞ୍କମ୍ ଜୁ, ଆଞ୍ ଡାବୁଙ୍ ସାବୁରିଞ୍ ଲୁକକା ଡେଗାନ୍ ଜେନା । ଆଞ୍ ଲୁକକାତା ସୁରମ୍ ଜେନା, ବାଗି କବ କିକିବ୍ ଜେନା, ଚାଣ୍ଡାଳ କାମ କିକିବ୍ ଜେନା ଆଉ ନି ମାସୁଲି ଟୁଳାଏକେ ଲୁକରା ଡେଗାନ୍ କିଲଙ ଜେନା । 12 ଆଞ୍ ସପ୍ତାମିଞ୍ତେ ଦୁଇ ତର ଉପାସ ମାନେଆନ୍ଜ ପାତାନା କିବ୍ଡେ, ଆଉ ଆଞ୍ ଜା ସାବୁରିଞ୍ କମଆନ୍ଜ ଅରେନ୍ଡେ ଏରେ ଦସ ବାଗରେତା ମୁଇ ବାଗ ଆମ୍ତେ ଡିଙ୍କମ୍ ।' 13 ଏଲେ ମାସୁଲି ଟୁଳାଏନମାନ୍ ଲୁକରେ ଲାଙ୍କାତାସୁନ୍ ତଙନାନଜ, ସରଗ ଆଲିଙ୍ବ ଲଲଙ୍ତେ ସରିକା ସାଆସ କିକିବ୍ ଆରିମାନା ଆଉ ନିଜଆ ଚାତିରାତେ ପେଟେରମାନ୍ଜ ପାତନା କିବାନ୍ 'ଏ ଇସର, ଆଞ୍ ପାପି ଆସିକେ ଆଞ୍ତେ ଦୟା କିମିଞ୍ ।' 14 ଆଞ୍ ଆପେତେ ଗାମ୍କେ, ନି ମାସୁଲି ଟୁଳାଏନମାନ୍ ଲୁକରେ ଇସରଆ ସାମୁରାତେ ଡିଅ ଲୁକ ଇଆନ୍ଜ ନିଜଆ ଇଞାବ ପେରେଅ, ଏଲେ ପାରୁସି ଲୁକରେ ଜେନା । ଜିଏ ନିଜତେ କୁବା ଆବ୍ଗାମ୍ଡମ୍ଡେ, ଏରେ ଲୁକରେକିତେ ଇସର ସାନ ଲୁକ କିମିବେ । ଜିଏ ନିଜତେ ସାନ ଆବ୍ଗାମ୍ଡମ୍ଡେ, ଏରେ ଲୁକରେକିତେ ଇସର କୁବା ଲୁକ କିମିବେ ।"
ଉଆଳିକା ଡେଗାନ୍ ଇସରତେ ବିସାସ ଇକିବଜ ଇସରଆ ରାଇଜବ ଏଅନା
15 ଜିସୁ ଉଆଳିକିତେ ଜିଜିବ୍ତେ ଲୁକକି ଉଆଳିକିତେ ଜିସୁଆ ଆସରବ ଅରେନ୍ତେ ଲାଗେଆନ୍କି । ଜିସୁଆ ଚାଲାରକି ଏରେ ଜୟକିଜ ଲୁକରେକିତେ ଗାମକି "ଗୁରୁତେ ଅଏରାଣ ଇକିବର" । 16 ଏଲେ ଜିସୁ ଚାଲାରକିତେ ଆସରବ ଡାକେଅଜ ଗାମ, "ଉଆଳିକିତେ ଆଞା ଆସଞ୍ବ ଡେଙ୍ଗର୍ତେ ପିଜେପେଡୁ ଆରକିତେ ମାନା ଇକିବର । ଇସରଆ ରାଇଜର ନୁଣିଞ୍ଡ ଉଆଳିକା ଡେଗାନ୍ ଲୁକକା ଲାଗି ଆସିକେ । 17 ଆଞ୍ ଆପେତେ ସୁତୁକୁରିଞ୍ ଗାମ୍କେ, ଜିଏ ଉଆଳିଆ ଡେଗାନ୍ ଇସରଆ ରାଇଜରା ଗାତାରେତେ ବିସାସ ଆକିବ୍କେ ଆର ମୁଳୁ ଇସରଆ ରାଇଜରବ ଡୁଡୁଇର୍ ଆରିମ୍ଡେ ଜେନା ।"
ଦନ ସମ୍ପତିତେ ଲୁବ ଇକିବର
18 ଜିଉଦି ଲୁକକା ମିନଗ୍ କୁବା ଲୁକରେ ଜିସୁତେ ଜିଙ, "ଏ ଗୁରୁ, ଆଜେଳାଏକେ ଜିବନ କୁକୁଇତେ ଆଞ୍ ବିରି କିମା?" 19 ଏତେ ଜିସୁ ଲୁକରେତେ ଗାମ, "ଆଞ୍ତେ ଡିଅ ଗୁରୁ ବୁଲି ବିତେ ମେଗାମ୍କେ? ଉଡେଇ ଇସର ମିନଗ୍ ଡିଅ ଆସିକେ । ଇସରଆତାକୁରି ଆଉ କେଇ ଡିଅ ଜେନା । 20 ଇସରଆ ଗାତାରେକି ଆମ୍ତ ମେକଙ୍କେ । ଚାଣ୍ଡାଳ କାମ ମିକିବର, ମୁଣୁସକିତେ ମେଡେଜର, ମିସୁରମାନ୍ଡ, ମିନଗ୍ ଲୁକଆ ବିରୁଦରେ ମେବଣ୍ଡେଅର, ଆମା ଅବାମ୍ ବୁଇନମ୍ତେ ଆଦର କିମା ।" 21 ଲୁକରେ ଗାମ, "ଏରେ ସାବୁରିଞ୍ ଆଞ୍ ଉଆଳିତାସୁନ୍ ପାଳେଆନ୍ଜ ଡେଣ୍ଡେ ।" 22 ଜିସୁ ଏରେ ଅଙଜ ଲୁକରେତେ ଗାମ, "ଆମା ଆଉ ମୁଇଣ୍ଟତା କମ କିକିବ୍ତେ ଆସିକେ । ଆମା ନିଜଆ ଦନ ସମ୍ପତିମ୍ଡେକି ଆବ୍ସଙାଜ ଦୁକି ଗରିବକିତେ ଦାନ ଡିଞେ, ତା ଏଲେ ଆମ୍ ସରଗଆ ଦନ ସମ୍ପତି ମିକୁଇନା; ତା ଅଚତା ଆମ୍ ଆଞା ଅଚ ଅଚ ଡେନା ଉଆ ।" 23 ଏରେ ଲୁକରେ କୁବା ଦନି ଲୁକ ଆସିଆନା ଏତେ ଏରେ ସାବୁରିଞ୍ ଗାତାରେ ଅଙଜ ସୁଗାଇ ଦୁକ କିବାନା । 24 ଜିସୁ ଏରେ ଦନି ଲୁକରେତେ ଜୟଜ ଗାମ, "ଜୁ ଲୁକକା ସୁଗାଇ ଦନ ସମ୍ପତି ଆସିକେ, ଆରକି ସୁଗାଇ କସଟରେ ଇସରଆ ରାଇଜରବ ଡୁମୁଇନାକି! 25 ଏଲେ ମିନଗ୍ ଦନି ଲୁକ ଇସରଆ ରାଇଜରବ ଅଙ୍ଗର୍ତାକୁରି ମୁଇଣ୍ଟ ଚୁଞ୍ଚି କାଣାତେ ମୁଇଣ୍ଟ ଉଟ ଆଲୁଙ୍ବ ଡୁଡୁଇର୍ତେ ସଅଜ ମିନା ।" 26 ଜୁ ଲୁକକି ନି ଗାତାରେ ଅଙକି ଆରକି ଗାମକି, "ଏଲେ ଆଡି ମୁକଳେ ରିମିମା?" 27 ଆଉ ଜିସୁ ଗାମ, "ଜା ମୁଣୁସ କିକିବ୍ ଆରିମ୍ଡେ ଜେନା, ଏରେ ଇସର କିକିବ୍ ରିମିମା ।" 28 ଏତେ ପିତର ଜିସୁତେ ଗାମ, "ନିଞ୍ ନିଜ ନିଜଆ ଦନ ସମ୍ପତି ଗିନିସରେକି ନେସାଡେଅଜ ଆମା ଅଚ ଅଚମ୍ଡେ ନଅଣ୍ଡେ ।" 29 ଜିସୁ ଚାଲାରକିତେ ଗାମ, "ଆଞ୍ ଆପେତେ ସୁତୁକୁରିଞ୍ ଗାମ୍କେ, ଜୁ ଲୁକ ଇସରଆ ରାଇଜରବ ଅଙ୍ଗର୍ତେ ଆରା କୁଟୁମରତେ, ଆଉ କାକାରକିତେ, ବକରକିତେ ଅବାରତେ ବୁଇରତେ, କନନ୍ କଞ୍ଚେଲାନ୍ଣ୍ଡକିତେ ସାଡେସେକେ, 30 ଆର ନିଇ ଜୁଗରାତେ ଏରେ ସାବୁରିଞ୍ ସୁଗାଇ କୁମୁଇନା, ଆଉ ଡେଣ୍ଡେ ଜୁଗରାତେ ଆର ଇସରଆ ତୁଲଙ୍ ଆଜେଳାଏକେ ଜିବନ କୁମୁଇନା ।"
ଜିସୁ ଗଜଜ ଆଉତରମିଞ୍ତା ବମରନେ
31 ତା ଅଚତା ଜିସୁ ବାର ଜଣ ଚାଲାରକିତେ ମୁଇଣ୍ଟ ଜାଗାବ ଡାକେଅଜ ଗାମ, "ଜଏପେ, ନିଞ୍ ଜିରୁସାଲାମ ଗଳବ ନଅଣ୍ଡେ, ଆଉ ଇସରଆ ଗାତା ଗାତାନମାନ୍କି ଲୁକକି ଆରାକା ଗାତା ବଇ ଅଲାଗା ମୁଣୁସ କନନା ବିସୟରେ ଜା ଲେକା ଇସେରେ, ଏରେ ସାବୁରିଞ୍ ସୁତୁକୁରିଞ୍ ମିନା । 32 ଜିଉଦି ଲୁକକି ଆରତେ ଡାବୁଙ୍ ଜାତି ଲୁକକା ସାମୁରାକାତେ ମସବେକି, ଆଉ ଲୁକକି ଆରତେ ଆବ୍ଗିଆନକିଜ, ମାବୁଜେକି ଆଉ ଇଣିରାତେ ବିମିଞ୍ତୁଙେକି, 33 ଚାବୁକୁବ ମାବୁଜେକି ବିରି ମବ୍ଗଜେକି, ଆଉ ତିନି ଦିନ ଅଚତା, ଗଗଜାତା ମେଜ୍ବଞ୍ଚେ ।" (ଜିସୁ ନିଜତେ ମୁଣୁସକନନ୍ ଗାମ୍ଡମାନ୍) 34 ଏଲେ ଜିସୁଆ ଚାଲାରକି ନି ସାବୁରିଞ୍ ଗାତାରେକି କିଚି ବୁଜି ଆରିମାନ୍କି; ନି ଗାତାରେ ଚାଲାରାକା ସାମୁରାକାତା କଳେର ରଏଆନା, ଆଉ ଜିସୁ ଜାଜା ଗାତାନମାନ୍, ଏରେ ସାବୁରିଞ୍ ଚାଲାରକି ଆବୁଜିନମାନ୍କି ।
ଜିସୁ ମିନଗ୍ ଅନ୍ଦ ଲୁକତେ ଡିଅ କିବ
35 ଜିସୁ ଆଉ ଚାଲାରକି ଜିରିହ ଗଳ ଆଉଚି ଆକଲାଜ୍ ଇଆନ୍କି ଏରେବେଳା, ମିନଗ୍ ଅନ୍ଦ ଲୁକ ଗଟାଙ୍ କାନ୍ତତେ ଡକଆନ୍ଜ ବିକ ଗାଗାର୍ନମାନ୍ । 36 ଏରେ ଗଟାଙ୍ତେ କୁସୁକୁରି ଲୁକକି ଅଙ୍ଗର୍ନମାନ୍କି ଏତେ ଅନ୍ଦ ଲୁକରେ ଡାଇଙମାନ୍କି ଏରେ ସବଦ ଅଙଜ ବିରି ଇସେରେ ଗାମଜ ଲୁକକିତେ ଜିଙ୍ଜିଙ୍ତେ ଲାଗେଆନା । 37 ଅଙ୍ଗର୍ନମାନ୍କି ଲୁକରେକି ଅନ୍ଦ ଲୁକରେତେ ଗାମକି, "ନାଜରିତ ଗଳଆ ଜିସୁ ନି ଗଟାଙ୍ତା ଇଆନ୍ଜ ଅଣ୍ଡେ ।" 38 ଏତେ ଅନ୍ଦ ଲୁକରେ ସୁଗାଇ ଜୁରୁ ଲିଲାଅଜ ଗାମ, "ଏ ଦାଉଦଆ କନନ୍ଣ୍ଡ ଜିସୁ , ଆଞ୍ତେ ଦୟା କିମିଞ୍ ।" 39 ଏଲେ ଆଗିଲା ଅଙ୍ଗନମାନ୍କି ଲୁକରେକି ଅନ୍ଦ ଲୁକରେତେ କଳେର ରଏନା ଗାମକିଜ ଦମକାଅକି, ଏଲେ ଅନ୍ଦ ଲୁକରେ ଉଦୁକିତା ସୁଗାଇ ଜୁରୁ ଲିଲାଅଜ ଗାଙ୍ଗାମ୍ତେ ଲାଗେଆନା, "ଏ ଦାଉଦଆ କନନ୍ଡ ଜିସୁ, ଆଞ୍ତେ ଦୟା କିମିଞ୍ ।" 40 ଏତେ ଜିସୁ ତଙନାନ୍ଜ ଲୁକରିକିତେ ଗାମ, "ଅନ୍ଦ ଲୁକରେତେ ସାମୁଇଞ୍ବ ଅରେନ୍ପେ ।" ଅନ୍ଦ ଲୁକରେ ଜିସୁଆ ଆସରା ଆଉଚିଆନା ବିରି ଜିସୁ ଅନ୍ଦ ଲୁକରେତେ ଜିଙ, 41 "ଆମ୍ ବିରି ମନ ମିକିବ୍କେ, ଆଞ୍ ଆମା ଲାଗି ବିରି କିଇମମ୍ ?" ଅନ୍ଦ ଲୁକରେ ଗାମ, "ଏ ପରବୁ, ଆଞ୍ ଜଜଏତେ ମନ କିବ୍କେ ।" 42 ଜିସୁ ଅନ୍ଦ ଲୁକରେତେ ଗାମ, "ଏକଳଙ୍ ଜଏ, ଆମ୍ ଆଞ୍ତେ ବିସାସ ମିକିବ ଏତେ ଆମ୍ ଡିଅ ମିଆନା ।" 43 ଏରେ ବେଳା ସାଙ୍ଗେ ସାଙ୍ଗେ ଅନ୍ଦ ଲୁକରେ ଜଜଏ ରିମାନ୍ ଆଉ ଇସରତେ ଦନିଅବାଦ ଡିଞ୍ତା ଡିଞ୍ତା ଜିସୁଆ ଅଚ ଅଚ ଡାଜିଙ୍ତେ ଲାଗେଆନା, ଆଉ ଲୁକକି ସାବୁରିଞ୍ ଜୟକିଜ ଇସରତେ ଦନିଅବାଦ ଡିଞକି ।
ଜକିୟ ଜିସୁତେ ବିସାସ କିବଜ ଡିଅ ଲୁକ ଇଆନା
1 ତା ଅଚତା ଜିସୁ ଜିରିହ ଗଳ ମୁଜି ଗଟାଙ୍ତା ଇଆନ୍ଜ ଅଙ୍ଗର୍ନମାନ୍ । 2 ଆଉ ଜଏପେ, ଜକିୟ ବୁଲି ମିନଗ୍ ଲୁକ ଆସିଆନା, ଆର ମାସୁଲି ଟୁଳାଏନମାନ୍କି ଲୁକକା ସାବୁରିଞ୍ତା କୁବା ଲୁକ ଆସିଆନା ଆଉ କୁବା ଦନି ଲୁକ ଆସିଆନା । 3 ଜିସୁ ଆଡି ଗାମଜ, ଏରେ ଜଜଏତେ ଜକିୟ ମନ କିକିବ୍ମମାନ୍ । ଜକିୟ ବାଙ୍ଗରା ଆସିଆନା ଆଉ କୁସୁକୁରି ଲୁକକି ଟୁଳସେରାନ୍କି ଏତେ ଜିସୁତେ ଜଜଏ ଆରିମାନା। 4 "ଜିସୁତେ ଜଏକ" ଗାମଜ ଜକିୟ ଆଗିଲାବ ଦବଳେସୁନ୍ ଅନଜ, ମୁଇଣ୍ଟ ଡୁବୁରି ସୁମୁସିଞ୍ତେ ଡାଜାନା । ଆର କଙଜୁ ଏରେ ଗଟାଙ୍ତା ଜିସୁ ଡେମେନା । 5 ଜିସୁ ଏରେ ଡୁବୁରି ସୁମୁସିଙ୍ ଜାଗାରେବ ଆଉଚିଆନ୍ଜ ଆଲିଙ୍ବ ଲଙ୍ଜ ଗାମ, "ଜକିୟ, ସୁମୁସୁଙ୍ତା ଗଳଙ୍ ଅଳେନା, ମିସିଞ୍ ଆଞ୍ତେ ଆମା ଇଞାମାତେ ରଏତେ ମିନା ।" 6 ଏତେ ଜକିୟ ଡୁମ୍ବୁରି ସୁମୁସିଞ୍ତା ମନ କୁସିରେ ଗଳଙ୍ ଅଳେଆନ୍ଜ ଜିସୁତେ ଇଞାବ ଗଗ । 7 ଏରେ ଜୟକିଜ ସାବୁରିଞ୍ ଲୁକକି ବାଗି ବୁଜିଅକିଜ ଗାମକି, "ଜିସୁ ମିନଗ୍ ପାପି ଲୁକରା ଇଞାରାତେ ରଏତେ ଅନତେ ।" 8 ଅଚତା ଜକିୟ ତଙନାନ୍ଜ ପରବୁତେ ଗାମ, "ଏ ପରବୁ, ଜଏ, ଆଞା ଦନ ସମ୍ପତିଞ୍ତା ଅଦା ଦୁକି ଗରିବ ଲୁକରେକିତେ ଡିଞ୍କେ ଆଉ ଜଦି ଆଡିଆତାକ ବଣ୍ଡେ ବାଣ୍ଡାଅଜ ମାସୁଲି ଅରେନ୍ଚେରେ, ତା ଏଲେ ଆଞ୍ ଏରେ ଚାରି ଗୁଣତା ପେରାଏକେ ।" 9 ଏତେ ଜିସୁ ଜକିୟତେ ଗାମ, "ମିସିଞ୍ ନି ଇଞାରାତେ ଆମ୍ ଆଉ ଆମା କୁଟୁମାଳି ଲୁକକିତେ ଇସର ମୁକୁଳାଏସେକେ । ନି ଜକିୟ କିଲଙ୍ ଅବରାମଆ ମିନଗ୍ କନନ୍ଣ୍ଡ ଆସିକେ । 10 ଜା ଅଜେସେରେ, ଏରେ ଡଗରାଅଜ ରକିଆ କିକିବ୍ତେ ମୁଣୁସ କନନ୍ ଡେନ୍ଚେରେ ।" (ଜିସୁ ନିଜତେ ‘ମୁଣୁସ କନନ୍’ ଗାମ୍ଡମାନ୍)
ଇସର ଜା ସାବୁରିଞ୍ ଡିଞ୍ଚେକେ ଏରେ ଗଙାପେଜ ଡିଅ କମ କିବେପେ
11 ଲୁକକି ନି ଗାତା ସାବୁରିଞ୍ ଅଙକି ଏରେ ବେଳା ଜିସୁ ଆଉ ମୁଇଣ୍ଟତା ଆଗ ଗାତାଅ । ଜିସୁ ଜିରୁସାଲାମ୍ ଗଳ ଆଉଚି ଆକଲାଜ୍ ଇସେରାନା ଆଉ ଇସରଆ ରାଇଜର ଗଳଙ୍ ଡେମେନା ବୁଲି ଲୁକକି ମନ କିକିବ୍ମମାନ୍କି ଏତେ ଜିସୁ ନି ଆଗରେ ଗାତାଅ । 12 ଜିସୁ ଗାମ, "ମିନଗ୍ ରାଜା ଇଞାରା ଲୁକ ମୁଇଣ୍ଟ ଲାଙ୍କା ଦେସବ ରାଜା ଇତେ ଅଙ୍ଗର୍ନମାନ୍, ତା ଅଚତା ରାଜା ଲୁକରେ ନିଜ ଇଞାରବ ପେରେତେ ମନ କିବ । 13 ରାଜା ଲୁକରେ ଦସ ଗଟା ରୁପା ଟାଙ୍କା ଅରେନଜ ନିଜଆ ଦସ ଜଣ ଚାକରକିତେ ଡାକେଅଜ ମୁଇଣ୍ଟ ମୁଇଣ୍ଟ ରୁପା ଟାଙ୍କା ଡିଞ୍ଡିଞଜ ଗାମ, 'ଆଞ୍ ଡେଙ୍ଗର୍ ଜାକଜ୍ ବେପାର କିମାପେ ।' 14 "ନିଜଆ ଦେସରା ଲୁକରେକି ରାଜାତେ ବାଗି ବୁଜିନମାନ୍କି । ଆଉ ଲୁକକି ରାଜାରା ଅଚଲିତା କବରିଆରକିତେ କିନଜ ଗାମକି, 'ନି ଲୁକରେ ନିଞା ଆଲିଙ୍ତା ଜାରି କିମିବେ, ନି ନିଞା ମନ ଜେନା ।' 15 ଏଲେ ବି ଏରେ ଲୁକରେ ରାଜା ଇଆନା । ତା ଅଚତା ରାଜାଲୁକରେ ଇଞାବ ପେରେଅ । ଜୁ ଚାକରରକିତେ ଟାଙ୍କା ଡିଞ୍ଚେର, ଆରକି ବେପାର କିବାନ୍କିଜ ଆଡି କିତି ସୁଗାଇ ଲାବ କିବ୍ସେରେ, ଏରେ କଙ୍କଙ୍ତେ ମନ କିବ । ଏତେ ଚାକରରକିତେ ଆସରବ ଡେଙ୍ଗର୍ତେ ଗାତାଅ । 16 "ଉନୁକୁଳ ଟାଙ୍କା ଡିଡିଞ୍ ଇସେରାନ୍ ଲୁକରେ ଡେନଜ ଗାମ, 'ଏ ପରବୁ ଆମା ଟାଙ୍କାମ୍ତା ଆଉ ଦସ ଗଟାତା ଲାବ କିବ୍ସେରେ ।' 17 ରାଜା ଲୁକରେ ଗାମ, 'ଆମ୍ ଡିଅ କମ ମିକିବ୍ସେକେ । ଡିଅ ଚାକର, କୁଟିଜ୍ ଗାତାତେ ଆମ୍ ଡିଅ କମ ମିକିବ୍ସେକେ ଏତେ ଦସ ଗଟା ଗଳ ଆଲିଙା ଆମ୍ ଜାରି ମିକିବେ ।' 18 ଆଉ ମିନଗ୍ତା ଲୁକରେ ଡେନଜ ଗାମ, 'ପରବୁ, ଆମା ଟାଙ୍କାମ୍ତା ଆଉ ପାଞ୍ଚ ଗଟାତା ଲାବ କିବ୍ସେରେ।' 19 ରାଜା ଏରେ ଚାକର ଲୁକରେତେ କିଲଙ୍ ଗାମ, 'ଆମ୍ କିଲଙ୍ ପାଞ୍ଚଗଟା ଗଳ ଆଲିଙା ଜାରି ମିକିବେ ।' 20 "ଆଉ ମିନଗ୍ତା ଚାକର ଡେନଜ ଗାମ, 'ପରବୁ, ଜଏ, ନି ଆମା ଟାଙ୍କାମ୍ଡେ, ଆଞ୍ ଇନି ଗାମାଚାଆତେ ଲୁଳିଆଅଜ ଉନ୍ଞ୍ଚେର । 21 ଆମ୍ ଲୁକକିତେ ଦୟା ମା ମିକିବ୍କେ । ଜା ମାମୁନ୍ଞ୍ଚେରେ ଏରେ ମେଗଗ୍ଡେ, ଆଉ ଜା ମା ମିବିର୍ଚେରେ ଏରେ ମେଗାରାନ୍ଜ ମେଗଗ୍ଡେ । ଏତେ ଆଞ୍ ଆମ୍ତେ ବେତଙାନ୍ଜ ଟାଙ୍କାମ୍ଡେ ଉନ୍ଚେକେ ।' 22 ରାଜା ଲୁକରେ ଚାକରରେତେ ଗାମ, 'ଏ ବାଗି ଚାକର, ଆମା ବାଗି ଗାତାମ୍ଡେବ ଆଞ୍ ବିଚାର କିବେ । ଆଞ୍ ଲୁକକିତେ ଦୟା ମା କିବ୍କେ, ଜା ମା ଉନ୍ଚେରେ ଏରେ ଆଞ୍ ଗଗ୍ଡେ, ଆଉ ଜା ମା ବିର୍ଚେରେ, ଏରେ ଗାର୍ଡେ, ଏରେ ବିରି ମେଙ୍କଙ୍ସେର? 23 ଜଦି ଆମ୍ ମେକଙ୍ସେର ତା ଏଲେ ଆଞା ଟାଙ୍କାଞ୍ଡେ ବେଆଙ୍କେଆତେ ବିତେ ମା ମୁନ? ଆଞ୍ ଡେନ୍ଚେରଜ ସୁଦ ମୁଳ କୁଇସେତାନ୍ ।' 24 "ଏରାତେ ତଙନ୍ଚେରାନ୍କି ଲୁକରେକିତେ ଗାମ, 'ନି ଟାଙ୍କାରେ ନି ଲୁକରାତା ଗଗେପେ ବିରି, ଜାଆରଆ ଦସ ଟାଙ୍କା ଆସିକେ, ଆରତେ ଡିଞେପେ ।' 25 ଏତେ ଲୁକକି ରାଜାତେ ଗାମକି, 'ପରବୁ, ଆରା ତ ଦସ ଟାଙ୍କା ଆସିକେ ।' 26 ରାଜାରେ ଗାମ 'ଆଞ୍ ଆପେତେ ଗାମ୍କେ , ଜାର ଆସିକେ, ଆରତେ ସୁଗାଇ ଡିଡିଞ୍ ମିନା; ଆଉ ଜାର ଜତେ, ଆରା ସାମୁରା ଜା ଆସିକେ, ଏରେ ଗଗଗ୍ ମିନା । 27 ଆଞା ଜୁ ନି ସୁତୁରୁକି ଆଞ୍ତେ ରାଜା କିକିବ୍ତେ ମନ ଆକିବ୍ସେରକି । ଆରକିତେ ଏଟାବ ଅରେନ୍ପେ ଆଉ ଆଞା ଆଗୁମୁଞ୍ତେ ଡେଜେପେ ।' "
ଜିସୁ ଗଦ କନନ୍ ଆଲିଙ୍ତା ଡକଆନ୍ଜ ରାଜା ଡେଗାନ୍ ଜିରୁସାଲମବ ଅନ
28 ଏରେ ସାବୁରିଞ୍ ଗାତା ଗାତାଏ ଉଟାଅଜ ଜିସୁ ଆଗିଲା ଆଗିଲା ଜିରୁସାଲାମ ଗଳବ ଅଙ୍ଗର୍ତେ ଲାଗେଆନା । 29 ଜେତେବଳତେ ଜିସୁ ଜିତଉଳି ଆଉଚି ଆକଲାଜ୍ ବେତେପାଗି ଗାଅଁ ଆଉ ବେତନିଆ ଗାଅଁ ଆକରା ଆଉଚିଆନା, ଏରେବଳତେ ଜିସୁ ବାନଗ୍ ଚାଲାରକିଆତେ ନି ଗାତାରେ ଗାତାଅଜ କିନ । 30 "ଆପା ଏକଳଙ୍ ଆଉପାରିତା ଅନାପାଡାଏ, ଏରେ ଗାଅଁତେ ଆଉଚିନା ବଳତେ ମୁଇଣ୍ଟ ଗଦ କନନ୍ତେ ତତର୍ ମିସେନା ଆଜଏ । ଏରେ ଗଦରା ଆଲିଙାତେ କେଇ ଦିନମିଞ୍ ସରିକା ଆଡକସେରେକି ଜେନା । ଏରେ ଗଦ କନନ୍ତେ କାଜେପା ବିରି ଅରେନ୍ପା ଡାଏ । 31 ଆଉ ଆପାତେ ଜିଏ 'ବିତେ ଗଦ କନନ୍ତେ ଆକାଜ୍କେ' ଗାମକିଜ ଜିମିଙେକି, 'ପରବୁଆ ଦରକାର ଆସିକେ' ଆଗାମେ" । 32 ଏତେ ଚାଲାରକିଆ ଅନକିଆଜ, ଜିସୁ ଜିମିତି ଗାତାସେର, ଏରେ ନୁଣିଞ୍ଡ ଗଦ କନନ୍ ଜୟକିଆ । 33 ଆରକି ଗଦ କନନ୍ଡେତେ କାଜକିଆ ଏରେବଳଆ, ଗଦ କନନ୍ଡା ମାଲିକର ଜିସୁଆ ଚାଲାରକିଆତେ ଜିଙ, "ବିତେ ଗଦ କନନ୍ଡେତେ ଆକାଜ୍କେ?" 34 ଜିସୁଆ ଚାଲାରକିଆ ଗାମକିଆ, "ପରବୁଆ ଦରକାର ଆସିକେ ।" 35 ଚାଲାରକିଆ ଗଦ କନନ୍ଡେତେ ଜିସୁଆ ସାମୁରବ ଅରେନକିଆଜ ଗଦ କନନ୍ଡା ଇଣି ଆଲିଙ୍ତା ନିଜ ନିଜଆ କତେରକି ବେନକିଆଜ ଜିସୁତେ ଗଦ କନନ୍ଡା ଇଣିରାତେ ଡବ୍କଅକିଆ । 36 ଜିସୁ ଅଙ୍ଗର୍ନମାନ୍ ବଳଆ ଲୁକରେକି ଗଟାଙ୍ତେ ନିଜ ନିଜଆ କତେରକି ବେନ୍ବେନକି । 37 ଜିସୁ ଜେତେବଳଆ ଜିତଉଳି ଅଦରାଣି ଆକଲାଜ୍ ଇଆନା, ଏରେବଳଆ ଜିସୁଆ ସାବୁରିଞ୍ ଚାଲରକି ସୁଗାଇ କୁସିରେ କୁସୁକୁରି ଲିଲାଅକିଜ ଇସରତେ ଦନିଅବାଦ ଡିଞକି । ଜିସୁଆ ସାବୁରିଞ୍ କାବା କମରେକି ଆରକି ଜସେରକି ଏତେ ଆରକି ଏରେ ନୁଣିଞ୍ଡ ଗାମକି, 38 "ପରବୁଆ ନାଅଁରେ ଜିଏ ଡେଣ୍ଡେ ଆର ଡିଅ, ଆରତେ ଇସର ଆବ୍କମ୍ଡର୍ଚେକେ । ସରଗଆ ସାନ୍ତି ଇରେମେ ଆଉ ସାବୁରିଞାତା ଆଲିଙା ସରଗଆ ଇସର କୁବା ଆସିକେ ।" 39 ଏଲେ ଲୁକକା ବିତିରୁ କିତିକ ପାରୁସି ଲୁକକି ଜିସୁତେ ଗାମକି, "ଏ ଗୁରୁ, ଆମା ଚାଲାମ୍ଡେକିତେ କଳେର ରରଏତେ ଗାମେ ।" 40 ଜିସୁ ଗାମ, "ଆଞ୍ ଆପେତେ ଗାମ୍କେ, ଇନିକି ଜଦି କଳେର ରମଏନାକି, ଏଗେର୍ଡେକି ଲିମିଲିଆଏକି ।"
ଜିସୁ ଜିରୁସାଲମ ଗଳ ଜୟଜ ଜେଗ
41 ଜିସୁ ଜେତେବଳଆ ଜିରୁସାଲମ ଗଳ ଆଉଚି ଆକଲାଜ୍ ଇସେରାନା, ଏରେବେଳା ଗଳରେତେ ଜୟଜ ଜିସୁ ଜେଗ 42 ଆଉ ଗାମ, "ଇସରଆ ତୁଲଙ୍ ସାନ୍ତିରେ ରରଏତେ ବିରି କିକିବ୍ତେ ମିନା, ଏରେ ଗାତାରେ ଆମ୍ ମେଙ୍କଙଜ ଡିଅ ଇତାନ୍ ! ଏଲେ ଏକଳଙ୍ ଏରେ ଗାତାରେକିତ ଆମା ସାମୁମା କଳେର ରଏଆନ୍ଜ ଆସିକେ । 43 ଏରେ ନୁଣିଞ୍ଡ ଦିନ ଡେମେନା, ଜେତେବଳତେ ଆମା ସୁତୁରୁ ଲୁକକି ଆମା ବେଳାମିଞ୍ ମିନିଞାକିଜ ପାଚିରି ବମନାଏକି ଆଉ ଆମ୍ତେ ଜାମାକେକି । 44 ଆମ୍ତେ ଆଉ ଆମା କନନ୍ କଞ୍ଚେଲାନମ୍ତେ ବାଗି କିମିବେକି, ଆଉ ଆମା ଇଞାମ୍ଡାକା ମୁଇଣ୍ଟ ଏଗେର୍ଡେ ଡାବୁଙ୍ ମୁଇଣ୍ଟତା ଏଗେର୍ ଆଲିଙ୍ତା ଆରଏରେ ଜେନା । ଆମ୍ତେ ମୁକୁଳାଏତେ ଆମା ଆସମ୍ବ ଇସର ଡେନ୍ଚେର, ଏରେ ଆମ୍ ମା ମେକଙ ଏତେ ଏରେ ନୁଣିଞ୍ଡ ଦିନ ଆମା ଆଲିଙ୍ତେ ଡେମେନା ।" 45 ଅଚତା ଜିସୁ ମନ୍ଦିର ଆଲୁଙ୍ବ ଡୁଇଆନ୍ଜ ଡାବୁଙ୍ ଡାବୁଙ୍ ଗିନିସରେକି ଆବ୍ସଙମାନ୍କି ଲୁକରେକିତେ ବାଏବ ଆବିରାଏନିଞ 46 ଆଉ ଆରକିତେ ଗାମ "ଇସରଆ ବଇ ଅଲାଗା ଲେକା ଇସେରେଜୁ, 'ଆଞା ଇଞା ପାତାନା ଇଞା ମିନା,' ଏଲେ ଆପେ ଏରେ ଇଞାରେତେ ଚୁର ଲୁକକିତେ ଲଲର୍ ଇଞା ଇକିବ୍ସେକେ ।" 47 ଜିସୁ ସବୁଦିନ ମନ୍ଦିର ଆଲୁଙ୍ତେ ଇସରଆ ଡିଅ ଗାତା ଆବ୍ସଞମାନ୍, ଏଲେ କୁବା ନାଗମ୍କି ଆଉ ଅର୍ଦାନ ଲୁକକି, ଆଉ ଜିଉଦି ଲୁକକା କୁବା ଲୁକକି ମେସେଆନ୍କିଜ ଜିସୁତେ ଅବ୍ଗଜ୍ତେ ମନ କିକିବ୍ମମାନ୍କି । 48 ସାବୁରିଞ୍ ଲୁକକି ମୁଇଣ୍ଟ ମନ ଡିଞକିଜ ଜିସୁ ଆବ୍ସଞମାନ୍ ଇସରଆ ଗାତାର ଅଙମାନ୍କି ଏତେ ଏରେ କୁବା ଲୁକରେକି ବିରି ନିକିବେ ଗାମକିଜ ଟିକ୍ କିକିବ୍ ଆରିମମାନ୍କି ।
ଜିସୁ ମାନ୍ତା ଅକ୍କ କୁଇଆନା, ଏରେ ଗାତାରେ ଜିଙକି
1 ଜିସୁ ଦିନମିଞ୍ ମନ୍ଦିରଆତେ ଲୁକକିତେ ଆବ୍ସଞମାନ୍ ଆଉ ଇସରଆ ଗାତା ଗାତାନମାନ୍, ଏରେବଳଆ କୁବା ନାଗମ୍କି, ଅର୍ଦାନ କି ଆଉ ଜିଉଦି ଲୁକକା କୁବା ଲୁକକି ଇକୁଡିଆ ଇଆନ୍କିଜ ଡେନକି ବିରି ଜିସୁତେ ଗାମକି, 2 “ଆମ୍ ମାଣ୍ଡି ଅକ୍କରେବ ନି ସାବୁରିଞ୍ କାବା କମ ମିକିବ୍କେ, ଆଉ ଜୁ ଲୁକରେ ଆମ୍ତେ ନି ଅକରେ ଡିଞମ୍, ଆର ଆଡି ନିଞ୍ତେ ଗାତାଏ ।” 3 ଏଲେ ଜିସୁ ଲୁକରେକିତେ ଗାମ, “ଆଞ୍ କିଲଙ୍ ଆପେତେ ମୁଇଣ୍ଟ ଗାତା ଜିଙେ, ଆଞ୍ତେ ଗାତାଏପେ, 4 ଜଅନତେ ଡୁବନ ଡିଞ୍ଡିଞ୍ତେ ଆଡି ଅକ୍କ ଡିଞ୍ଚେର - ଇସର ନା ମୁଣୁସ? 5 ଏତେ ଲୁକରେକି ଆରାକା ଆରାକା ରେଙ୍ଗେ ଚେଙ୍ଗେ ଇଆନ୍କିଜ ଗାମକି, "ଜଦି ‘ଇସର’ ନେଗାମେ, ତା ଏଲେ ଜିସୁ ଗାମାମେ, ‘ଆପେ ବିତେ ଆରତେ ବିସାସ ମା ଇକିବ?’ 6 ଜଅନ ମିନଗ୍ ଇସରଆ ଗାତା ଗାତାନମାନ୍ ଲୁକ ଆସିଆନା, ବୁଲି ଲୁକକା ସୁଗାଇ ବିସାସ ଆସିକେ । ଏତେ ଜଦି ‘ମୁଣୁସ’ ନେଗାମେ, ତା ଏଲେ ଲୁକକି ସାବୁରିଞ୍ ନିଞ୍ତେ ଏଗେର୍ ତମକିଜ ମବ୍ଗଜେକି ।" 7 ଏତେ “ଆଡି ଅକ୍କ ଡିଞ୍ଚେର, ନିଞ୍ କଙ୍କଙ୍ ଜେନା” ବୁଲି ଆରକକି ଗାମକି । 8 ଜିସୁ ଲୁକକିତେ ଗାମ, “ତା ଏଲେ ଆଞ୍ ମାଣ୍ଡି ଅକ୍କରେବ ନି ସାବୁରିଞ୍ କମ କିବ୍କେ, ଏରେ ଆଞ୍ କିଲଙ୍ ଆପେତେ ମା ଗାତାକେ ଜେନା ।”
ଇସର ଆରା କନନ୍ଡତେ କିନ ଏଲେ ଲୁକକି ଆରତେ ତାମାନ୍ ଆରିମାନ୍କି
9 ଜିସୁ ଲୁକକିତେ ନି ଆଗରେ ଗାତାଅ । "ମିନଗ୍ ଲୁକ ମୁଇଣ୍ଟ ଅଙ୍ଗୁର ତାସ କିବାନ୍ । ବିଲ ବନାଅଜ ଅଙ୍ଗୁର ଅରାଜାନ୍, ଏତାକୁରି ଆର ତାସି ଲୁକରେକିତେ ବାଗୁଆ ଡିଞ ବିରି ସୁଗାଇ ବରସ ଲାଗି ଆଉ ମୁଞ୍ତା ଦେସବ ଅନ । 10 ଲାକୁ କେକେଜ୍ତେ ସମୟ ଇଆନା । 'ତାସି ଲୁକରେକି ଅଙ୍ଗୁର ଲାକୁ ବାଗ ଡିମିଞେକି' ଗାମଜ ,ମାଲିକରେ ମିନଗ୍ ଚାକରତେ ଅଙ୍ଗୁର ତାସରେ ଆଦାୟ କିକିବ୍ତେ କିନ, ଆଉ ଅଙ୍ଗୁର ତାସି ଲୁକରେକି ସାଉଆର କିନ୍ଚେର ଚାକରରେତେ ଆବୁଜକିଜ ଅଡଙ୍ ଇତି ପେରାଅକି । 11 ମାଲିକରେ ଆଉ ମିନଗ୍ତା ଚାକରରତେ କିନ; ତାସି ଲୁକରେକି ଆରତେ କିଲଙ୍ ଆବୁଜକି ଆଉ ନିନ୍ଦା ଅପମାନ କିବକି ବିରି ଅଡଙ୍ ଇତି ପେରାଅକି । 12 ତା ଅଚତା ମାଲିକରେ ଆଉ ମିନଗ୍ତା ଚାକରରେତେ କିନ, ଏଲେ ଲୁକରେକି ଏରେ ଚାକରରେତେ କିଲଙ୍ ଆମାନେଅକିଜ ଆବୁଜକିଜ କୁଣ୍ଡିଆ କାବାରା କିବକିଜ ଅଙ୍ଗୁର ବିଲ ଆଉପାରିତ ଚିଅଗକି । 13 ଏତେ ଅଙ୍ଗୁର ବିଲରା ମାଲିକରେ ଗାମ, 'ଆଞ୍ ଏକଳଙ୍ ବିରି କିବେ? ଆଞା କନନ୍ନିଞ୍ତେ କିନେ, କାଳେ ଆରକି କନନ୍ନିଞ୍ତେ ଡିଅ ବୁମୁଜିକି ।' 14 ଏଲେ ତାସି ଲୁକରେକି ମାଲିକରା କନନ୍ଡତେ ଜୟକିଜ ଆରାକା ଆରାକା କଗାତାଆନ୍କି, 'ନି ତ ମାଲିକରା କନନ୍ଡ, ବିଲ ସାବୁରିଞ୍ ଆରା ମିନା । ଉଆ ନିଇତେ ନବ୍ଗଜେ, ଏତାକୁରି ଅଙ୍ଗୁର ବିଲରେ ନିଞା ମିନିଞା ।' 15 ଏତେ ତାସି ଲୁକରେକି ମାଲିକରା କନନ୍ଡତେ ଅଙ୍ଗୁର ବିଲ ଆଉତା ଗଗକିଜ ଅବ୍ଗଜକିଜ ଚିଅଗକି । ତା ଏଲେ, ଅଙ୍ଗୁର ବିଲରା ମାଲିକରେ ତାସି ଲୁକରେକିତେ ବିରି କିମିବେ? 16 ଅଙ୍ଗୁର ବିଲରା ମାଲିକରେ ଡେନଜ ଏରେ ତାସି ଲୁକରେକିତେ ମବ୍ଗଜେ, ଆଉ ଡାବୁଙ୍ ଲୁକକିତେ ଅଙ୍ଗୁର ବିଲରେ ଡିମିଞେ ।"ଏରେ ଗାତାରେ ଲୁକକି ଅଙ୍କିଜ ଗାମକି " ଏରେ ଉଣିଞ୍ଡ ଆଇରେମେ ।" 17 ଜିସୁ ଲୁକକାବ ସିଦା ସଳକ ଲଙଜ ଗାମ, "ତା ଏଲେ, ନି ଜୁ ଇସରଆ ବଇ ଅଲାଗା ଲେକା ଆସିକେ, ଏରେ ଗାତାରେ ବିରି, 'ଇଞା ବନାଏକେକି ଲୁକରେକି ଜୁ ଏଗେର୍ଡେତେ ଜେନା ଗାମ୍ସେରକି, ଏରେ ଏଗେର୍ଡା କୁଣରାତେ ସାବୁରିଞ୍ଞାତା ଡିଅ ଏଗେର୍ ଇଆନା ।' 18 ଜୁ କିଣିସି ଲୁକ ଏରେ ଏଗେର୍ଡାତେ ଗୁମୁନା ଆର ଗୁଣ୍ଡୁ ଗୁଣ୍ଡା ମିନା ,ଏଲେ ଏରେ ଏଗେର୍ଡେ ମିନଗା ଇଣି ଆଲିଙାତେ ଅଲଗାନ୍ଜ, ଏରେ ଲୁକରେ ଲାପାଟାଙ୍ଡ ମିନା ।"
ଜିସୁତେ ଦୁସ ସସବ୍ତେ ଜିଉଦି ଲୁକକି ଚେସ୍ଟା କିକିବ୍ମମାନ୍କି
19 ଜିସୁ ଏରେ ଆଗରେ ଅର୍ଦାନ ଲୁକକିତେ ଆଉ କୁବା ନାଗମ୍କିତେ ଅନମାନ କିବଜ ଗାତାସେର ବୁଲି ଆରକି ଜାଣି କଙକି । ଏତେ ଏରେ ଲୁକରେକି ଏରେବେଳା ସାଙ୍ଗେ ସାଙ୍ଗେ ଜିସୁତେ ସସବ୍ତେ ମନ କିକିବ୍ମମାନ୍କି, ଏଲେ ଲୁକକିତେ ବେତଙମାନ୍କି ଏତେ ଆରିମାନ୍କି ସସବ୍ । 20 ଏରାଲାଗି ଏରେ ଲୁକରେକି ଜିସୁତେ ଦୁସ ସବକିଜ ସାସନ କିବ୍କେ ଲୁକରା ସାମୁରାତେ ଅସବ୍ତେ ଉପାୟ ଲଲଙମାନ୍କି । ଜିସୁଆ ଦୁସ ସସବ୍ତେ ଲୁକକିତେ କିନକି, ଆଉ କଳେର ରଏଆନ୍କିଜ ନିଜ ନିଜତେ ଡିଅ ଆବ୍ଗାମ୍ଡମାନ୍କି । 21 ଦୁସ ସସବ୍ତେ ଜୁ ଲୁକକି ଅନ୍ଚେରକି ଏରେ ଲୁକରେକି ଡେନକିଜ ଜିସୁତେ ଜିଙକି, "ଏ ଗୁରୁ, ନିଞ୍ ନେକଙ୍କେ ଜୁ ଆମ୍ ଡିଅର ମେଗାତାଏକେ ଆଉ ଲୁକକିତେ ଡିଅର ମାବ୍ସଜ୍କେ । ଲୁକକିତେ କୁବା ସାନ ମା ମେବାଚେଅଜ ସୁତୁକୁରିଞ୍ ଇସରଆ ଡିଅ ଗାତା ମେଗାତାଅଜ ଲୁକକିତେ ଡିଅ ଗଟାଙ୍ ମାବ୍ଜକେ । 22 ଏତେ ଗାତାଏ, ରୁମିଅ ଲୁକକା କୁବା ରାଜା କାଇସରତେ ନିଞ୍ ମାସୁଲି ଡିଞ୍ଡିଞ୍ ଇରେ ଜୁ ଡିଅରି ବିରି? ନିଞ୍ ମାସୁଲି ନିଡିଞେରି ନାରି?" 23 ଏଲେ ଜିସୁ ଲୁକରାକା ମନ ଗାତାରକି ଜାଣିକଙଜ ଲୁକରେକିତେ ଗାମ, "ଆଞ୍ତେ ମୁଇଣ୍ଟ ଟାଙ୍କା ଆସଞ୍ବ ଅରେନ୍ପେ ବିରି ଆବ୍ଜଏନିଞ୍ପେ । 24 ଏରେ ଟାଙ୍କାରା ଆଡିଆ ଚାପା ଆଉ, ନାଅଁ ଆସିକେ?" ଲୁକରେକି ଗାମକି, "କାଇସରଆ ।" 25 ଜିସୁ ଏରେ ଲୁକରିକିତେ ଗାମ, "ଜା କାଇସରଆ ଆସିକେ, ଏରେ କାଇସରତେ ଡିଞେପେ, ଆଉ ଜା ଇସରଆ ଆସିକେ, ଏରେ ଇସରତେ ଡିଞେପେ ।" 26 ଏତେ ଆରକି ଲୁକକା ସାମୁରାକାତେ ଜିସୁଆ ଗାତାରତେ ଦୁସ ସସବ୍ ଆରିମାନ୍କି ଆଉ ଜିସୁଆ ଗାତାର ଅଙକିଜ କାବା ଇନିଞାନ୍କିଜ କଳେ କାଳାର ଜାଳାକାନ୍କିଜ ରଏଆନ୍କି ।
ଲୁକକି ଗଗଜାତା ବେବଞ୍ଚେଅକିଜ ସୁଣିଞ୍ଡ ମିନାକି
27 ଲୁକକି ଗଗଜାତା ବମଞ୍ଚେ ଗାମକିଜ ସାଦୁକି ଲୁକକି ବିସାସ ଆକିକିମମାନ୍କି । ଏରେ ସାଦୁକି ଲୁକରେକି ଜିସୁଆ ଆସରବ ଡେନକିଜ ଜିସୁତେ ଜିଙକି, 28 "ଏ ଗୁରୁ, ମସା ନିଞା ଲାଗି ଆରା ବଇ ଅଲାଗା ଲେକେସେକେ ଜୁ ମିନଗ୍ ଲୁକରା କାକାର କନନ୍ କଞ୍ଚେଲାନ୍ଡ ଆଇସେରାନ୍କିଜ ଗଜ, ତା ଏଲେ ଆରା ବକର ଆରା କୁଟୁମରତେ କାନିଆ ମୁନେ ବିରି ନିଜଆ କାକାରା ଲାଗି କୁଟୁମାଳିତେ ମାବ୍କୁବାଏ । 29 ଏଲେ ଜଏପେ, ମିନଗ୍ ଲୁକଆ ସାତ ଗଟା କନନ୍ଡକି ଆସିଆନ୍କି, ଉନୁକୁଳ କୁବା କନନ୍ଣ୍ଡ ମିନଗ୍ ଜୁଆଙ୍ଡାଏତେ କାନିଆ ଉନ । ଆରା କନନ୍ କଞ୍ଚେଲାନ୍ଡକି ଆଇସେରାନ୍କି ଗଜ । 30 ତା ଅଚତା ଆରା ପିଟିଆର କାକରା କୁଟୁମରତେ କାନିଆ ଉନ, ଏରେ ନୁଣିଞ୍ଡ ଆରା କିଲଙ୍ କନନ୍ କଞ୍ଚେଲାନ୍ଡକି ଆଇସେରାନ୍କି ଗଜ । 31 ଏରେ ନୁଣିଞ୍ଡ ଆରା ପିଟିଆର କିଲଙ୍ କୁଲିରତେ ଉନ, ଆର କିଲଙ୍ ଗଜ । ଏରେ ନୁଣିଞ୍ଡ ସାତ ବାଇଳଙ୍ ଏରେ ଜୁଆଙ୍ଡାଏରେତେ କାନିଆ ଉନକି ଆଉ କନନ୍ କଞ୍ଚେଲାନ୍ଡକି ଆଇଆନ୍କିଜ ଗଞିଞକି । 32 ତା ଅଚତା ଏରେ ଜୁଆଙ୍ଡାଏରେ କିଲଙ୍ ଗଜ । 33 ଏଲେ, ଗଗଜାତା ବେଏବଞ୍ଚେଅକିଜ, ଏରେ ସାତ ବାଇରାକା ବିତିରୁ ଜୁଆଙ୍ଡାଏରେ ଆଡିଆ କୁଟୁମର ମିନା? ସାତ ଜଣ ଜାକଜ୍ ତ ଏରେ ମୁଇଣ୍ଟ ଜୁଆଙ୍ଡାଏରେତେ କାନିଆ ଉନ୍ଞ୍ଚେରକି ।" 34 ଜିସୁ ଏରେ ଲୁକରେକିତେ ଗାମ, "ନି ମୁଲକଆତେ ଲୁକକି କାନିଆ ଉନ୍କିକି ଆଉ କାନିଆ ଡିଞ୍କିକି । 35 କିତିକ ଲୁକରେକିତେ ଇସର ବାଚେସେକେ ଆଉ ଏରେ ଲୁକରେକି ଗଗଜାତା ମେଜ୍ବଞ୍ଚେକି । ବଞ୍ଚେଅକିଜ ଆରକି କାନିଆ ଆଉନ୍କିକି ଆଉ ଆରତେ କାନିଆ ଆଡିଞ୍କିକି ଜେନା । 36 ଏରେ ଲୁକରେକି ଗଗଜାତା ବଞ୍ଚେସେକେକି ଏତେ ଆରକି ଇସରଆ କବରିଆରାକା ଡେଗାନ୍ ରମଏନାକି । ଆରକି ଆଉତରମିଞ୍ତା ଗଗଜ୍ ଆରିମ୍ଡେକି ଜେନା । 37 ଏଲେ ଗଗଜାତା ବେଜ୍ବଞ୍ଚେକେକି, ନି ଗାତାରେ ମସା କିଲଙ୍ ଗାତାସେକେ । ଡାଳ ବୁଦାରାକାତେ ଲାଲାଜ୍ ଲାଗେଆନା ଏରେବେଳେ ମସା ଇସରତେ ଗାତାଏସେର 'ଏ ପରବୁ, ଆମ୍ ଅବରାମଆ ଇସର, ଇସାକଆ ଇସର, ଆଉ ଜାକୁବଆ ଇସରଆ ମାସିକେ ।' 38 ସାବୁରିଞ୍ ଲୁକକି ଇସରଆ ସାମୁରାତେ ବଞ୍ଚେଅକିଜ ଆସିକିକି । ଏତେ ଇସର ଗମଜ୍ତା ଲୁକକା ଇସର ଜେନା,ଏଲେ ବମଞ୍ଚେତା ଲୁକକା ଇସର ଆସିକେ ।" 39 କିତି ଜଣକ ଅର୍ଦାନ ଲୁକକି ଗାମକି, "ଏ ଗୁରୁ, ଆମ୍ ଡିଅ ଗାତା ମେଗାତାଅ ।" 40 ଏରେ ଲୁକରେକି ଜିସୁତେ ଜିଙ୍ଜିଙ୍ତେ ସାଆସ କିକିବ୍ ଆରିମାନ୍କି ଏତେ ନୁଣିଞ୍ଡ ଗାତାଅକି । 41 ଜିସୁ ଏରେ ଅର୍ଦାନ ଲୁକରେକିତେ ଜିଙ, "କିରିସଟ ଦାଉଦଆ କନନ୍ଡ ଆସିକେ, ନି ଗାତାରେ ସୁଣିଙ୍ଡ ଲୁକକି ଗାମ୍କିକି? 42-43 ଦାଉଦଆ ଗିତ ବଇ ଅଲାଗା ଦାଉଦ ନିଜେ ଲେକେସେକେ, 'ପରବୁ ଆଞା ପରବୁତେ ଗାମ, "ଆମା ସୁତୁରୁକିତେ ଆମା ପାଦ ତୁଲିତା ଉନୁନ୍ ଜାକଜ୍ ଆମ୍ ଆଞା ଡିଅ ଇତିତା ଡକନା" ' 44 ଦାଉଦ ତ କିରିସ୍ଟତେ ପରବୁ ବୁଲି ଗାମ୍କେ, ତା ଏଲେ କିରିସ୍ଟ ସୁଣିଞ୍ଡ ଦାଉଦଆ କନନ୍ଡ ମିନା?" 45 ଅଚତା ସାବୁରିଞ୍ ଲୁକକି ଅଙମାନ୍କି ବଳଆ ଜିସୁ ଚାଲାରକିତେ ଗାମ, 46 "ଅର୍ଦାନ ଲୁକକାତା ଡିଅ ସାବଦାନରେ ରଏନାପେ! ଏରେ ଲୁକରେକି ଜିଲର୍ଡ କତେ ଆଣ୍ଡିଜାନ୍କିଜ ବୁଲିକିକି । ଆଟ ବଜାରତେ ସାବୁରିଞ୍ ଆରକିତେ ଜୁଆର କିବ୍ଡେକି, ଏରେ ଡିଅ କୁଇରେକି । ମଜାଙ୍ ଇଞାରାତେ ଆରକି ଡିଅ ଡିଅ ଜାଗାତେ ଡକତେ ଡିଅ କୁଇରେକି ଆଉ ଲୁକକି ବାତୁଲି କିବାନ୍କିଜ ଆଗିଲାତା ଜାଗାତେ ଡକତେ ଡିଅ କୁଇକିକି । 47 ଏରେ ଲୁକରେକି ରାଣ୍ଡରାଏକିତେ ବଣ୍ଡାଏଅକିଜ ଆରାକା ଇଞାରକିବ ଗଗ୍ଡେକି । ଲୁକକିତେ ଆବ୍ଜରମ୍ତେ ଜିଲର୍ଡ ପାତାନା କିବ୍ଡେକି । ନି ନୁଣିଞ୍ ଲୁକକି ସୁଗାଇ ଦଣ୍ଡ କୁମୁଇନାକି ।"
ମିନଗ୍ ଗରିବ ରାଣ୍ଡରାଏରେ ଇସରତେ ସାବୁରିଞ୍ ଡିଞ
1 ଜିସୁ ଜୟଜୁ ଇସରତେ ଦାନ ଡିଞ୍ଡିଞ୍ତେ ଜୁ ଜାଗା ଆସିଆନା, ଏରାତେ ଦନି ଲୁକକି ଇସରତେ ଦାନ ଡିଞ୍ଡିଞମାନ୍କି 2 ଆଉ ମିନଗ୍ ଗରିବ ରାଣ୍ଡରାଏରେ ଅମ୍ବାଟ ପଇସା ଡିଞ୍ଡିଞମାନ୍ । 3 ଏତେ ଜିସୁ ଗାମ, "ଆଞ୍ ଆପେତେ ସୁତୁକୁରିଞ୍ ଗାମ୍କେ, ନି ଗରିବ ରାଣ୍ଡରାଏରେ ସାବୁରିଞାତା ସୁଗାଇ ଦାନ ଡିଞ୍ଚେକେ । 4 ଇନି ଦନି ଲୁକରେକି ସାବୁରିଞ୍ ନିଜ ନିଜଆ ସୁଗାଇ ଦନ ଟାଙ୍କା ପଇସାରେତା ଅଳପ ଦାନ ଡିଞ୍ଡିଞକି, ଏଲେ ନି ଗରିବ ରାଣ୍ଡରାଏରେ ଆରା ଚଳେତେ ଜା ଅମ୍ବାଟ ପଇସା ଅସିଆନା, ଏରେ ସାବୁରିଞ୍ ଡିଞ ।"
ଜେମେଳାଏ ବଳତେ ବିରି ବିରି ମିନା ଏରେ ଜିସୁ ଗାତାଅ
5 ଜିସୁଆ କିତିକ ଚାଲାରକି ଗାମକି, "ଡିଅ ଡିଅ ଏଗେର୍ବ ମନ୍ଦିର ବନାଏଇସେରେ ଆଉ ଲୁକକା ଡିଅ ଦାନରକିବ ମନ୍ଦିରରେ ଡିଅର ସାଜାଏ ଇସେରେ ।" ଏଲେ ଜିସୁ ଗାମ, 6 "ଆପେ ନି ଜା ସାବୁରିଞ୍ ଏଜକେ, ଦିନ ଡେମେନା ଜେତେବଳତେ ମୁଇଣ୍ଟ ଏଗେର୍ ଆଲିଙ୍ତା ଆଉ ମୁଞ୍ଟତା ଏଗେର୍ଡେ ଆରଏରେ ଜେନା, ସାବୁରିଞ୍ ତୁଳିବ ମଳଙିଞା ।" 7 ଏତେ ଚାଲାରକି ଜିସୁତେ ଜିଙକି, "ଏ ଗୁରୁ, ନି ସାବୁରିଞ୍ କିତିବଳତେ ମିନା? ଆଉ, ଇନି ସାବୁରିଞ୍ ଇତେ ଅଣ୍ଡେ ବୁଲି ନିଞ୍ ସୁଣିଞ୍ଡ କଙ୍କଙ୍ ନିରିମା?" 8 ଜିସୁ ଗାମ, "ସାବଦାନ ଇନାପେଜ ରଏନାପେ, କେଇ ଜିମିତି ଆପେତେ ଆବଣ୍ଡାଏରେମେକି । ଏରେବଳତେ ସୁଗାଇ ଲୁକକି ,ଆଞା ନାଅଁଞ୍ଡେ ସମବେକି ବିରି ଗାମାମ୍କି 'ଆଞ୍ କିରିସ୍ଟ' ଆଉ 'ସମୟ ଡେନତେ' ଗାମକିଜ ଲୁକକିତେ ବମଣ୍ଡାଏକି । ଏରେ ଲୁକକା ଅଚଲିତା ଏଅନର । 9 ଆପେ ଜୁଦ ମିନମାକି ଆଉ କମଲେଞମାକି ଏରେ ଏଅଙେ । ଏରେ ଏଅଙେଜ ଏବେତଙାଣ୍ଡ । ନି ସାବୁରିଞ୍ ଉନୁକୁଳ ମିନା, ଏଲେ ମୁଲକ ଜେଳାଏତେ ଦିନ ଆଇସେରେନା ।" 10 ତା ଅଚତା ଜିସୁ ଚାଲାରକିତେ ଗାମ, "ଜାତି ବିରୁଦରେ ଜାତି ଲୁକକି ତମଙନାକି ଆଉ ରାଇଜ ବିରୁଦରେ ରାଇଜ ତମଙ୍ନାକି, 11 ଆଉ, ଲକା ସୁଗାଇ ଦମଲେନା ଆଉ ଅଲଗା ଅଲଗା ଜାଗାରାତେ ଲୁକକା ସୁଗାଇ ଡେଗେକେ ରୁଗ ମିନା ଆଉ ମରଗ ମିନା ବିରି ଲୁକକି ଉରୁର୍ତେ ଆକୁଇରିକି ଜେନା । ଏଲେ ଆକାସ ଆଲିଙ୍ବ ଜୟକିଜ ଲୁକକି ବେମେତଙାକି ଆଉ ଡାବୁଙ୍ ଡାବୁଙ୍ ଚିନ ଜମଏକି । 12 ଏଲେ ନି ସାବୁରିଞ୍ ମିନା ଆଗିଲାର ଲୁକକି ଆପେତେ ସମବେକିଜ ମଜାଙ୍ ଇଞାରକିବ ଗମଗେକି ଆଉ ବନ୍ଦି ଇଞାରାକାତେ ମୁନେକିଜ ଦଣ୍ଡ ଡିମିଞେକି । ଆପେ ଆଞ୍ତେ ବିସାସ ଇକିବ୍କେ ଏତେ ରାଜାକା ସାମୁରାକାବ ଆଉ ସାସନ କିବ୍କିକି ଲୁକକା ସାମୁରାକାବ ବିଚାର କିକିବ୍ତେ ଆପେତେ ଗମଗେକି । 13 ଏରେ ବଳତେ ଆପେ ଆଞା ଡିଅ ଗାତା ଗାତାଏ ଇରିମା । 14 ବିରି ନେଗାତାଏ ଏଗାମଜ ଚିନ୍ତା ଇକିବାନ୍ଡ, 15 ଏରେବଳତେ ଆଞ୍ ଆପେତେ ବୁଦିଗିଆନ ଡିଇଞେ । ଆଉ ଆପେତେ ବିରି ଗାତାଏତେ ମିନା ଏରେ କିଲଙ୍ ଆଞ୍ ଏରେବଳତେ ଗାତାଏ । ଆପେଆ ସୁତୁରୁ ଲୁକକି ଏରେ ଗାତାରେତେ ବିରୁଦ କିକିବ୍ ଆରିମ୍ଡେକି ଜେନା ଆଉ 'ଆପେ ବାଗି ଏଗାମ୍କେ' ବୁଲି ଗାତାଏ ଆରିମ୍ଡେକି ଜେନା । 16 ଆପେଆ ବୁଇପେଆ ଅବାପେଆ, କାକାପେଆ ନିଜଆ କୁଟୁମାଳିପେଆ, ଜଳାପେଆ ଆଉ ସାଇ ପଡିସା ଲୁକକି କିଲଙ୍ ମସବେକିଜ ସାସନ କିବ୍କିକି ଲୁକକା ଆସରାକାବ ଗମଗେକି । ଆପେଆ ବିତିରୁ କିତିକ ଲୁକକିତେ ଅବ୍ଗଜ୍ ବି ରିମିମାକି । 17 ଆଞ୍ତେ ବିସାସ ଇକିବ୍କେ ଏତେ ଆପେତେ ସାବୁରିଞ୍ ଲୁକକି ବାଗି ବୁମୁଜିକି । 18 ଏଲେ ଆପେଆ ବକବା ଜୁଣ୍ଟାପେରେ ମୁଇଣ୍ଟ ସରିକା ବାଗି ଆଇରେ ଜେନା । 19 ଦୁକ କସଟ ଏସୟଜ ଆପେ ଆଜେଳାଏକେ ଜିବନ ଇକୁଇନା । 20 "ଆପେତେ ଜେତେବଳତେ ଜିରୁସାଲାମ ଗଳଆ ବେଳାମିଞ୍ ସଇନିକକି ଜମଗେସେରେକି ଏରେ ଏଜଏ, ଏରେବଳତେ ଆପେ କଙ୍କଙ୍ ଇରିମା ଜୁ ଗଳରେ ଗଳଙ୍ ନସ୍ଟ ମିନା । 21 ଏରେବଳତେ ଜିଉଦା ଅଞ୍ଚଳଆ ଲୁକରେକି ସାବୁରିଞ୍ ଉଳି ଆଲିଙ୍ବ ଡୁଙ୍ଡେମେକି ଆଉ ଜୁ ଲୁକକି ଗଳ ମୁଜିଆ ଆସିକିକି, ଆରକି ଗଳ ମୁଜିତା ଡୁଙ୍ଡେମେକି, ଆଉ ଜୁ ଲୁକକି ଗାଅଁଆ ଆସିକିକି ଆରକି ଗଳ ମୁଜିବ ଆଡେଣ୍ଡେମେକି । 22 ଇସରଆ ଡିଅ ଗାତା ବଇଆ ଜା ସାବୁରିଞ୍ ଲେକା ଇସେରେ ଏରେ ସାବୁରିଞ୍ ଗମଟେ । ଏରେବଳତେ ଇସର ଜିରୁସାଲମ ଗଳଆ ଲୁକରକିତେ ଦଣ୍ଡ ଡିମିଞେ । 23 ଏରେବଳତେ ଜୁ ଜୁଆଙ୍ଡାଏରେକି କାମାଣ୍ଡିଞ୍ଞ୍ଚେରେକି ଆଉ କମମଣ୍ଡାଏସେନାକି,ଆରାକା କିତି ସୁଗାଇ ଦୁକ କସଟ ମିନା ! ଏରେବଳତେ ଗଳରେବ ସାବୁରିଞ୍ଞାତା କୁବା ଦୁକ କସଟ ଡେମେନା । ଏରେ ଦେସଆ ସାବୁରିଞ୍ ଲୁକକିତେ ଇସର ରାଗ କିମିମା । 24 କିତିକ ଲୁକକି କଣ୍ଡାବ ଗମଜେକି ଆଉ କିତିକ ଲୁକକିତେ ବନ୍ଦି କିବଜ ଡାବୁଙ୍ ଦେସବ ଗମଗେକି । ଡାବୁଙ୍ ଜାତି ଲୁକକି ଆଉରିଆନ୍କିଜ ଜିରୁସାଲାମ ଗଳଆ ଲୁକକିତେ ଜାରି କିମିବେକି । ଜାରି କିକିବ୍ତେ ଡାବୁଙ୍ ଲୁକରେକିତେ ଇସର ଜିତିକି ସମୟ ଡିଞ୍ଚେକେ, ଏରେବୁଲୁଙ୍ ଜାକଜ୍ ଜାରି କିମିବେକି । 25 ଏରେବଳତେ ବେଳ, ଲେରାଙ୍ ଆଉ କୁମୁଞ୍ଡାଗ୍ ଆକାସ ଆଲିଙ୍ତା କାବା ଚିନ ମାବ୍ଜଏ । ସମୁନ୍ଦର ଡାଗ୍ ସୁଗାଇ ଗମଜେରମାକି ଏତେ ନି ମୁଲକରା ସାବୁରିଞ୍ ଜାତି ଲୁକରେକି ବେମେତଙାକି ଆଉ 'ବିରି ନିକିମା ଆଉ ବିରି ଇରେ' ଗାମକିଜ ଆକଙ୍କେକି ଜେନା । 26 ଆଲିଙା ଜା ସାବୁରିଞ୍ ଆସିକେ ଏରେ ସାବୁରିଞ୍ ଦମଲେନା । ଏତେ ନି ମୁଲକରା ସାବୁରିଞ୍ ଲୁକକି ବେତଙାନ୍କିଜ ଜାଇଁ ମାମାରେନାକି । 27 ଏରେବଳତେ ମୁଣୁସ କନନ୍ ସୁଗାଇ ବଳ ସକତିବ ଟାଲାଟାଜାନ୍ଜ ଗିମା ବାଦଳତେ ଡେମେନା, ଏରେ ଲୁକକି ଜମଏକି । 28 ଆପେତେ ଗଳଙ୍ ଇସର ମୁମୁକୁଳାଏ । ଏତେ ନି ସାବୁରିଞ୍ ଗାତାରେ ଉନୁକୁଳ ଇଆନ୍ଜ ଆପେ ମା ଏବେତଙାନ୍ଜ ଆଲିଙ୍ବ ଲଙ୍ସେରେପେ ।"
ଜାଗେନାପେଜ ରଏନାପେ
29 ଜିସୁ ଲୁକକିତେ ମୁଇଣ୍ଟ ଆଗ ଗାତାଅ, "ମୁଇଣ୍ଟ ଡୁମ୍ବୁରି ସୁମୁସିଞ୍ ନା ଏଲେ ଆଉ ଡାବୁଙ୍ ସୁମୁସିଞ୍ଡେତେ ଜଏପେ । 30 ଜେତେବଳତେ ଏରେ ସୁମୁସିଞ୍ଡେକିତା କଅଣ ଅଲାଗ୍ ଇଆନ୍ଜ ଆଲେକେ, ଏରେବଳତେ ଆପେ କାରାଦିନ ଆଉଚିଆନ୍ତେ ଏଗାମଜ କଙ୍କଙ୍ ଇରିମା । 31 ଏରେ ନୁଣିଞ୍ଡ ଆପେ କିଲଙ୍ ଏରେ ସାବୁରିଞ୍ ଗମଟେତା ଏଜୟଜ ଇସରଆ ରାଇଜର ଆଉଚିଆନ୍ତେ ବୁଲି କଙ୍କଙ୍ ଇରିମା । 32 ଆଞ୍ ଆପେତେ ସୁତୁକୁରିଞ୍ ଗାମ୍କେ, ନି ସାବୁରିଞ୍ ଆଗଟେକେ ଜାକଜ୍, ଏକଳଙ୍ ବମରନେକି ଲୁକରେକି ଆଗଜ୍କିକି ଜେନା । 33 ଆକାସ ଆଉ ନି ମୁଲକ ସୁବୁଦିନ ଲାଗି ଆରଏରେ ଜେନା ଏଲେ ଆଞା ଗାତାରେ ସୁବୁଦିନ ଲାଗି ରମଏନା, ଦିନମିଞ୍ ସରିକା ନସ୍ଟ ଆଇରେ ଜେନା । 34 "ଆପେ ସୁଗାଇ ଇଉର ଇଜିମଜ ଆଉ ମଦ ଇଉରଜ ଏରଏଆରାନ୍ଡ । ନି ମୁଲକଆତେ ସୁଣିଞ୍ଡ ନେଚଳେ ଏଗାମଜ ଚିନ୍ତା ଇକିବର । ଏରେ ଦିନଆତେ ଚଟ୍କିରି ସାଙ୍ଗେ ସାଙ୍ଗେ ମୁଇଣ୍ଟ ପାସ ଡେଗାନ୍ ଡେମେନା ଏତେ ନିଜତେ ଏସାମ୍ବାଳେଆନ୍ଜ ଏରଏନା । 35 ନି ମୁଲକରା ସାବୁରିଞ୍ ଲୁକକିତେ ଏରେ ଦିନ ଡେମେନା । । 36 ଆପେ ସାମ୍ବାଳେନାପେଜ ରଏନାପେ । ଏରେ ସାବୁରିଞ୍ତା ମୁକଳତେ ଆଉ ମୁଣୁସ କନନା ସାମୁରାତେ ତଙନ୍ତେ ବଳ କୁକୁଇତେ ସଦାବେଳେ ପାତାନା କିମାପେ ।" 37 ଜିସୁ ସବୁଦିନ ମନ୍ଦିର ଆଲୁଙାତେ ଇସରଆ ଡିଅ ଗାତା ଗାତାଅଜ ଆବ୍ସଞମାନ୍, ଆଉ ସୁବୁଦିନ ରାତିକୁରୁ ବୁଳୁରାନ୍ଜ ଜିତ ଉଳିତେ ଅନଜ ରଏନମାନା । 38 ସୁଗାଇ ଲୁକକି ଜିସୁଆ ଗାତାର ଅଙ୍ତେ ସବୁଦିନ ବୁରୁ ସେକାଳତେ ବୁଳୁରାନ୍କିଜ ମନ୍ଦିରବ ଅଙ୍ଗର୍ନମାନ୍କି ।
ଇସ୍କାରିଅତ ଜିଉଦା ଜିସୁତେ ବଣ୍ଡାଏତେ ରାଜି ଇଆନା
1 ନିସ୍ତାର ଅବ ଆଉଚିନମାନ୍ । ଏରେ ଅବରେତେ ଅଳାଗ୍ତେ କମିର ଆମେସେତା ଅବ ଗାମ୍କିକି । 2 କୁବା ନାଗମ୍କି ଆଉ ଅର୍ଦାନ ଲୁକକି, ସୁଣିଞ୍ଡ ଜିସୁତେ ନବ୍ଗଜେ ଗାମକିଜ ମନ କିକିବ୍ମମାନ୍କି, ଏଲେ ଲୁକକିତେ ବେତଙମାନ୍କି, ଏତେ ଏରାଲାଗି ଉପାୟ ଜଜନମାନ୍କି । 3 ଏରେବେଳା ଜିସୁଆ ବାରଜଣ ଚାଲାରକା ବିତିରୁ ମିନଗା ନାଅଁର ଇସ୍କାରିଅତ ଜିଉଦା ଆସିଆନା । (ଆର କାରିଅତ ଗାଅଁତା ଡେଞ୍ଚେର ।) ଜିଉଦାରା ଆଲୁଙ୍ବ କୁବା କଏଲଙ୍ ସଏତାନ ଡୁଇଆନ୍ଜ ବାଗି କମ କିକିବ୍ତେ ମନର ଆବ୍ବୁଲାଅ । 4 ଜିଉଦା ଅନଜ କୁବା ନାଗମ୍କା ଆଉ ମନ୍ଦିରଆ ଜଗେକେକି କୁବା ଲୁକକା ତୁଲଙ୍ "ସୁଣିଞ୍ଡ ଆଞ୍ ଆପେଆ ସେରାତେ ଜିସୁତେ ଅସବେ" ଗାମଜ ଗାତା ବାରାତା ଇଆନ୍କି । 5 ଏରାଲାଗି କୁବା ନାଗମ୍କି ଆଉ ମନ୍ଦିରତେ ଜଗେନମାନ୍କି କୁବା ଲୁକକି କୁସି ଇଆନ୍କିଜ, ଜିଉଦାତେ ଟାଙ୍କା ଡିଞ୍ଡିଞ୍ତେ ଜବାବ ଅବ୍ତେଜାନ୍କି । 6 ଇସ୍କାରିଅତ ଜିଉଦା କୁସିରେ ମଙ୍ଗେଅଜ, ଲୁକକି ଆରାସିକିକି ଜେନା ବଳତେ ଜିସୁତେ ଆରାକା ଇତିରାକାତେ ଅସବେ ଗାମଜ ଗଟାଙ୍ ଡଗରାଏନମାନ୍ ।
ଜିସୁ ଆଉ ଚାଲାରକି ବାତୁଲି କିବାନ୍କି
7 ଅଚତା ଅଳାଗ୍ତେ କମିର ଆମେସେତା ଅବରା ଉନୁକୁଳ ଦିନ ଡେନ । ଏରେ ଦିନଆତେ ନିସ୍ତାର ଅବରା ମେଣ୍ଡା କନନ୍ତେ ବଳି ଡିଞ୍ଡିଞମାନ୍କି । 8 ଏରେ ଦିନଆତେ ଜିସୁ, ପିତରତେ ଆଉ ଜଅନତେ ଗାମ, "ନିସ୍ତାର ଅବ ବାତୁଲି ଉରୁର୍ ଜିମ୍ଜିମ୍ତେ ଆପେ ଅନାପେ ବିରି ନିଞା ଲାଗି ବାତୁଲି ଜୁଗାଏପେଜ ଉନ୍ଞ୍ଚେରେପେ ।" 9 ଏତେ ଚାଲାରକିଆ ଜିସୁତେ ଜିଙକିଆ, "ନିଞ୍ ମାଣ୍ଡି ଜାଗାରାତେ ନିସ୍ତାର ଅବ ନେମାନେନା ବୁଲି ଆମ୍ ମେଗାମ୍କେ?" 10 ଜିସୁ ଚାଲାରକିଆତେ ଗାମ, "ଜଏପା, ଆପା ଜିରୁସାଲମ ଗଳବ ଆଉଚିଆନ୍ଜ, କାଳାସାତେ ଡାଗ୍ ଗମଗଙମା ମିନଗ୍ ଲୁକରେତେ ଆପା ଆରୁବାଙେ । ଆରା ଅଚ ଅଚର ଆପା ଆଅନାଜ ଆର ଜୁ ଇଞାରେବ ଡୁମୁଇନା ଏରେ ଇଞାରା ମାଲିକରେତେ ଆଗାମେ, 11 'ଗୁରୁ ଆମ୍ତେ ଜିଙ୍କେ, "ଆଞ୍ ଆଞା ଚାଲାଞ୍କା ତୁଲଙ୍ ମାଣ୍ଡିଆତେ ନିସ୍ତାର ଅବରେ ନେମାନେନା, ଏରେ ବାକାରାରେ ମାଣ୍ଡିଆ?" ' 12 ଇଞାରା ମାଲିକରେ ଆପାତେ ଡିଅର ସମାଜାଳେତା ମାସିନା ମୁଇଣ୍ଟ ଆଲିଙ୍ ମାଲା କୁବା ବାକାରାରେ ମାବ୍ଜଏ, ଏରେ ଇଞାରାତେ ନିସ୍ତାର ଅବରା ବାତୁଲିରେ ଜୁଗାଏପା ।" 13 ଚାଲାରକିଆ ଅନକିଆଜ , ଜିସୁ ଜିମିତି ଗାତାସେର, ଏରେ ନୁଣିଞ୍ଡ ଜୟକିଆଜ ନିସ୍ତାର ଅବ ମାନେତେ ବାତୁଲି ଜୁଗାଅକିଆ । 14 ଉରୁର୍ତେ ସମୟ ଇଆନ୍ ଏରେବେଳା, ଜିସୁ ଆଉ ଆରା ତୁଲଙ୍ ବାରଜଣ ଚାଲାରକି, ନିସ୍ତାର ଅବ ବାତୁଲି ଉରୁର୍ ଜିମ୍ଜିମ୍ତେ ଇକୁଡିଆ ଡକଆନ୍କି । 15 ଜିସୁ ବାରଜଣ ଚାଲାରକିତେ ଗାମ, "ଆଞା ଦୁକ କସଟ ଆମାସଏସେକେ ଆଗିଲାର ଆଞ୍ ଆପେଆ ତୁଲଙ୍ ଇନି ନିସ୍ତାର ଅବରେ ମାନେତେ ସୁଗାଇ ମନ କିବ । 16 ଆଞ୍ ଆପେତେ ଗାମ୍କେ, ଇସରଆ ରାଇଜରତେ ଇନି ସାବୁରିଞ୍ ଗାତାରେ ଆଉରିଆନ୍ଜ ଆଞ୍ ନି ନିସ୍ତାର ଅବ ଦିନମିଜ୍ ସରିକା ମା ମାନେରେ ଜେନା ।" 17 ଜିସୁ ଟାଟିଆ ସବଜ ଇସରତେ ଦନିଅବାଦ ଡିଞଜ ଗାମ, "ଇନି ଗଙାପେ ବିରି ତାତାଞାପେ, 18 ଆଞ୍ ଆପେତେ ସୁତୁକୁରିଞ୍ ଗାମ୍କେ, ଇସରଆ ରାଇଜର ଡେଙ୍ଗର୍ ଜାକଜ୍ ଆଞ୍ ମିସିଞ୍ତାସୁନ୍ ଅଙ୍ଗୁର ଲାକୁତା ଆରିରେ ରସର ମା ଉରୁକେ ଜେନା ।" 19 ଜିସୁ ଅଳାଗ୍ ଗଗଜ ଇସରତେ ଦନିଅବାଦ ଡିଞଜ ଅଳାଗ୍ଡେ ଗବ୍ଳଅଜ ଚାଲାରକିତେ ଡିଞଜ ଗାମ, "ଇନି ଅଳାଗ୍ଡେ ଆପେତେ ଡିଞ୍କେପେ ,ନି ଆଞା ଇଣିଞ୍ଡେ । ଆଞ୍ତେ ମନେ ଅବ୍ଳଗ୍ତେ ନି ନୁଣିଞ୍ଡ କିମାପେ ।" 20 ଉରୁର୍ ଜିମ୍ଜିମ୍ ଅଚତା ଏରେ ନୁଣିଞ୍ଡ ଟାଟିଆରେ ଗଗଜ ଜିସୁ ଗାମ, "ନି ଅଙ୍ଗୁର ରସରେ ଆପେଆ ଲାଗି ରରଗ୍ ଇସେରେ, ଏରେ ଆଞା ଇଞାମିଞ୍ଡେ । ଆଞା ଇଞାମିଞ୍ଡେ ଡିଞଜ ମୁଣୁସ ଆଉ ଇସର ବିତିରେ ମୁଇଣ୍ଟ ନୁଆ ନିୟମ କିକିବ୍ ଇଆନା । 21 ଏଲେ ଜଏପେ, ଜୁ ଲୁକ ଆଞ୍ତେ ସୁତୁରୁଆ ଇତିରକାତେ ମସବେ, ଆର ନିଞା ତୁଲଙ୍ ନାନ୍ ଉର୍କେ । 22 ଇସର ଜିମିତି ମନ କିବ୍ସେକେ, ମୁଣୁସ କନନ୍ ଏରେ ନୁଣିଞ୍ଡ ସୁତୁକୁରିଞ୍ ଗମଜେ, ଏଲେ ମୁଣୁସ କନନ୍ତେ ଜୁ ଲୁକ ଅବଗଜ୍ତେ ସୁତୁରୁକା ଇତିରାକାତେ ମସବେ, ଆରା ଦସା ସୁଗାଇ ବାଗି ମିନା!" 23 ସାବୁରିଞ୍ ଚାଲାରକି "ଆଡି ଜିସୁତେ ମସବେ?" ଗାମକିଜ, ଆରାକା ଆରାକା କୁଜିଙାନ୍କି ।"
ଆଡି କୁବା ଗାମକିଜ ଜିସୁଆ ଚାଲାରକି ରେଙ୍ଗେଚେଙ୍ଗେ ଇଆନ୍କି
24 "ନିଞା ବିତିରୁ ଆଡି ସାବୁରିଞାତା କୁବା ?" ଗାମକିଜ ରେଙ୍ଗେ ଚେଙ୍ଗେ ଇଆନ୍କି । 25 ଏରାଲାଗି ଜିସୁ ଚାଲାରକିତେ ଗାମ, "ଡାବୁଙ୍ ଜାତି ଲୁକକା ରାଜାରକି ଆରାକା ଲୁକରକିତେ ସାସନ କିବ୍ଡେକି, ଆଉ ନି ରାଜା ଲୁକରେକି 'ଲୁକକା ଲାଗି ଡିଅ ଉପକାର କମ କିବ୍ଡେକି' ବୁଲି ଗାଙ୍ଗାମ୍ ଇସେରେ । 26 ଏଲେ ଆପେ ଏରେ ନୁଣିଞ୍ଡ ଇଆନ୍ଡ, ଆପେଆ ବିତିରୁ ଜିଏ ସାବୁରିଞାତା କୁବା, ଆର ସାବୁରିଞାତା ସାନ ଇରେମେ, ଆଉ ଜୁ ଲୁକ ନେତା ଆସିକେ, ଆର ଚାକର ଡେଗାନ୍ ଇରେମେ । 27 ଏଲେ ଆଡି ସାବୁରିଞାତା କୁବା? ଜିଏ ଉରୁର୍ତେ ଜିମ୍ଜିମ୍ତେ ଡକରେ, ନା, ଜିଏ ତାତାଜ୍କେ? ଜିଏ ଉରୁର୍ତେ ଜିମ୍ଜିମ୍ତେ ଡକରେ ଆର ବିରି ସାବୁରିଞାତା କୁବା ଜେନା ବିରି? ଏଲେ ଆଞ୍ ଆପେଆ ଆସପେଆ ମିନଗ୍ ଚାକର ଡେଗାନ୍ ଆସିକେ । 28 "ଆପେ ଆଞା ସାବୁରିଞ୍ ଦୁକ କସଟ ବଳତେ ଆଞା ତୁଲଙ୍ ଏରଏସେରାନ୍ । 29 ଏଲେ ଆଞା ଅବାଞ୍ ଜିମିତି ଆଞା ଲାଗି ମୁଇଣ୍ଟ ରାଇଜରା ଅକ୍କ ଡିଞ୍ଚେକେ, 30 ଏରେ ନୁଣିଞ୍ଡ ଆଞ୍ କିଲଙ୍ ଆପେତେ ଅକ୍କ ଡିଞ୍କେ । ଆପେ ଆଞା ରାଇଜଞ୍ତେ ଆଞା ତୁଲଙ୍ ଉରୁର୍ତେ ଜିମ୍ଜିମ୍ତେ ଏଡକନା ଆଉ ରାଜା ଚଉକିଆକିତେ କିଲଙ୍ ଏଡକଆନ୍ଜ ଇସିରାଏଲଆ ବାର ଗଟା ଗୁତୁରୁ ଲୁକକିତେ ବିଚାର ଇକିବେ ।
ପିତର "ଜିସୁତେ କଙ୍କଙ୍ ଜେନା" ଗାମାମେ, ଏରେ ଜିସୁ ଗାତାଅ
31 "ସିମନ, ସିମନ, ଜଏ, ଗଅମରେ ଗୁଙ୍କିକି ଡେଗାନ୍ ଆପେତେ କିଲଙ୍ ଗୁଙ୍ଗୁଙ୍ତେ କୁବା କଏଲଙ୍ ସଏତାନ ଅକ୍କ କୁଇସେରେ । 32 ଏଲେ ଆଞ୍ତେ ବିସାସ କିକିବ୍ତେ ଆମ୍ ବନ୍ଦ କିକିବ୍ ମା ମିରିମ୍ଡେ ଜେନା, ଏରାଲାଗି ଆଞ୍ ଆମା ଲାଗି ପାତାନା କିବ୍ସେକେ । ଆମ୍ ଆଞା ଆସଞ୍ବ ମେପେରେ ବଳତେ ଆଞା ନି ଚାଲାରକିତେ ସୁଗାଇ ବିସାସ କିକିବ୍ତେ ସାଅଜ ମିକିବେ ।" 33 ଏଲେ ପିତର ଗାମ, "ଏ ପରବୁ, ଆଞ୍ ଆମା ତୁଲଙ୍ ବନ୍ଦି ଇତେ ଆଉ ଗଗଜ୍ତେ କିଲଙ୍ ରାଜି ଆସିକେ ।" 34 ଏଲେ ଜିସୁ ଗାମ, "ଏ ପିତର, ଆଞ୍ ଆମ୍ତେ ସୁତୁକୁରିଞ୍ ଗାମ୍କେ, ମିସିଞ୍ 'ଜିସୁତେ କଙ୍କଙ୍ ଜେନା' ବୁଲି ଆମ୍ ତିନି ତର ମେଗାମେ, ଏରେ ଜାକଜ୍ ସେକଏ ଆସୁନ୍ଚେକେ ଜେନା ।"
ଅସୁବିଦା ଡେମେନା ଏତେ ଜାଗେନାପେଜ ରଏନାପେ
35 ଜିସୁ ଚାଲାରକିତେ ଗାମ, "ଜେତେବଳତେ ଆଞ୍ ଆପେତେ ବେଏକେ, ଗୁଣ୍ଟିଆଏ, ଆଉ ଜୁତା ଏଗଗାନ୍ଜ ଏଅନର ଗାମ୍ସେରଜ ଉଡାଇ ଅଡଙ୍ ଇତି କିନ୍ଚେର ଏରେବେଳା ଆପେଆ ଅବାବ ଇନମାନ୍ ବିରି?" ଚାଲାରକି ଗାମକି, "କିଚି ଅବାବ ଇଜେନା ।" 36 ଜିସୁ ଚାଲାରକିତେ ଗାମ, "ଏଲେ ଏକଳଙ୍ ଆଞ୍ ଗାମ୍କେ, ମିନଗା ଜଦି ପଇସା ଆସିଆନ୍ଜ ଆର ଏରେ ଗୁଣ୍ଟାଆନ୍ଜ ଗଗ୍ଡେମେ, ଏରେ ନୁଣିଞ୍ଡ ବେଏକେ କିଲଙ୍ ଗଗ୍ଡେମେ । ଜାର କଣ୍ଡା ଜତେ ଆର ନିଜଆ ଚାଦରର ଆବ୍ସଙାନ୍ଜ କଣ୍ଡା ସଙ୍ଡେମେ । 37 ଆଞ୍ ଆପେତେ ଗାମ୍କେ, 'ଆର ବାଗି ଲୁକକା ତୁଲଙ୍ ଗଣେରମାନ୍' ବୁଲି ଇସରଆ ବଇ ଅଲାଗା ଲେକା ଇସେରେ, ଏରେ ଆଞା ବିସୟରେ ଲେକା ଇସେରେ ଆଉ ଏରେ ଗାତାରେ ଟିକ୍ ଇତେ ଅଣ୍ଡେ । ଆଞା ବିସୟରେ ଜା ସାବୁରିଞ୍ ଗାତାରେ ଇସରଆ ବଇ ଅଲାଗା ଲେକା ଇସେରେ, ଏରେ ସାବୁରିଞ୍ ଟିକ୍ ମିନା ।" 38 ଜିସୁଆ ଚାଲାରକି ଗାମକି, "ପରବୁ ଜଏ, ଇନିନାନ୍ ଅମ୍ବାଟ କଣ୍ଡା ଆସିକେ" ଆଉ ଜିସୁ ଚାଲାରକିତେ ଗାମ, "ଏରେ ବୁଲୁଙ୍ ଆସିରୁମ୍ ।"
ଜିତ ଉଳିଆତେ ଜିସୁ ପାତାନା କିବାନ୍
39 ସୁବୁଦିନ ଅଳଙ୍ଗର ଜିସୁ ଆରିଆନ୍ଜ ଜିତ ଉଳିବ ଅନ, ଆଉ ଚାଲାରକି କିଲଙ୍ ଜିସୁଆ ଅଚ ଅଚର ଅନକି । 40 ଏରେ ଜିତ ଉଳିଆ ଅଉଚିଆନ୍କି ବଳଆ ଜିସୁ ଚାଲାରକିତେ ଗାମ, "ପରିକାତେ ଜିମିତି ମା ଏଅଳଗ୍ଡେ ଜେନା, ଏରାଲାଗି ଆପେ ପାତାନା କିମାପେ ।" 41 ଜିସୁ, ଚାଲାରକି ଆସିଆନକି ଏରେ ତାସୁନ୍ କୁଟିଜ୍ ଲାଙ୍କାବ ଅନଜ, ଆଣ୍ଟିମାନ୍ ବିରି ଇନି ନୁଣିଞ୍ଡ ପାତାନା କିକିବ୍ତେ ଲାଗେଆନା । 42 "ଏ ବାଆ, ଜଦି ଆମା ମନମ୍ଡେ ଆସିକେ, ଏଲେ ଇନି ଦୁକ କସଟରେ ଆଞା ସାମୁଞ୍ତା ଲାଙ୍କାବ କିବେ ।ଏଲେ ଆଞା ମନ ଜେନା, ଆମା ମନମ୍ଡେ ସାବୁରିଞ୍ ଇରେମେ ।" 43 ଏରେବେଳା ଆଲିଙ୍ ଆକାସତା ଇସରଆ ମିନଗ୍ କବରିଆ ଆବ୍ଜରମାନ୍ଜ ଜିସୁତେ ବଳ ସକତି ଡିଞ । 44 ଜିସୁ ଆଣ୍ଟିମାନ୍ଜ ସୁଗାଇ ଦୁକ କସଟ କିବାନ୍ଜ ଅଦକତା ସୁଗାଇର ପାତାନା କିକିବ୍ତେ ଲାଗେଆନା ଆଉ ଜିସୁଆ ଗିଳିଞ୍ଦାଗ୍ସଙ୍ ବଏଅ ଜୁ ଇଞାମ୍ ଲାଟାଗାନ୍ ଡେଗାନ୍ ଲକାତେ ଅଲଗାନାଜ ବଏଅ । 45 ଜିସୁ ପାତାନା କିକିବ୍ ଉଟାଆନ୍ଜ ତଙ୍ନାନ୍ ବିରି ଚାଲାରାକା ଆସରକିବ ଡେନ । ଚାଲାରକି ଦୁକରେ ଲେବେର୍ଚେକିକି, ଏରେ ଜୟ । 46 ଜିସୁ ଚାଲାରକିତେ ଗାମ, "ବିତେ ଏଲେବେର୍କେ? ପରିକାତେ ଜିମିତି ମା ଏଅଳଗ୍ଡେ ଜେନା, ଏତେ ବୁଳୁନାପେ ବିରି ପାତାନା କିମାପେ ।"
ଜିଉଦା ଜିସୁତେ ସୁତୁରୁକା ଇତିରାକାତେ ଅସବ
47 ଜିସୁ ଗାତାନମାନ୍ବଳଆ, ଜଏପେ, ସୁଗାଇ ଲୁକକି ଡେନକିଜ ଜିସୁଆ ଆସରା ଆଉଚିଆନ୍କି, ବାର ଜଣ ଚାଲାରାକା ବିତିରୁ ଜିଉଦା ନାଅଁର ମିନଗ୍ ଲୁକରାକା ଆଗିଲା ଆଗିଲା ଡେନଜ ଜିସୁତେ ମୁମୁଞ୍ତେ ଜିସୁଆ ଆସରବ ଡେନ । 48 ଜିସୁ ଜିଉଦାତେ ଗାମ, "ଏ ଜିଉଦା, ମିମୁମୁଞିଞା ବିରି ମୁଣୁସ କନନ୍ତେ ସୁତୁରୁକା ଇତିରାକାତେ ମସବେରି ?" 49 ବିରି ଇତେ ଅଣ୍ଡେ, ଏରେ ଜୟକିଜ ଜିସୁଆ ଜଳାରକି ଗାମକି, "ପରବୁ, ନିଞ୍ ବିରି କଣ୍ଡାବ ନାବୁଜେ ବିରି ?" 50 ଆଉ ଜିସୁଆ ମିନଗ୍ ଚାଲାର ସାବୁରିଞାତା କୁବା ନାଗମା ଚାକରରା ଡିଅ ଇତିରତା ଲୁତୁର୍ଡ ସେଜ । 51 ଜିସୁ ଗାମ, "ନିବୁଲୁଙ୍ ଆସିରେମେ" ଆଉ ନାଗମା ଚାକରରା ଲୁତୁର୍ଡତେ ଜିସୁ ଜିବଜ ଡିଅ କିବ । 52 ଜିସୁତେ ବନ୍ଦି କିକିବ୍ତେ ଡେନ୍ଚେରକି କୁବା ନଗମ୍କିତେ ଆଉ ମନ୍ଦିରଆତେ ଜଗେକେକି କୁବା କୁବା ଲୁକକିତେ ଆଉ ଜିଉଦି କୁବା ଲୁକକିତେ ଜିସୁ ଗାମ, "ଡକାଏତକିତେ ସବ୍କିକି ଡେଗାନ୍ କଣ୍ଡା, ଟେଙ୍ଗା ଆଉ ବାଡି ଏସବାନ୍ଜ ଆପେ ବିତେ ଏଡେନ୍ଚେରେ? 53 ଆଞ୍ ସବୁଦିନ ଆପେଆ ତୁଲଙ୍ ମନ୍ଦିରଆତେ ଆସିଆନ୍ବଳଆ ଆଞ୍ତେ ଆବୁଜ୍ତେ ସରିକା ଇତି ମା ଏଟେକେଅ । ଏଲେ ନି ଆପେଆ ସମୟ ଆଉଚିସେରେ ଆଉ ଏନ୍ଦାରକରଆ ବାଗି ପାପ କମରେକି ମିନା ।"
ପିତର "ଜିସୁତେ କଙ୍କଙ୍ ଜେନା" ଗାମ
54 ଅଚତା ଲୁକକି ଜିସୁତେ ସବକିଜ ସାବୁରିଞାତା କୁବା ନାଗମା ଇଞାରବ ଗଗକି । ପିତର କୁଟିଜ୍ ଲାଙ୍କାଲାଜ୍ ରଏଆନ୍ଜ ଅଚ ଅଚର ଅନ । 55 ଲୁକକି ଇଞାରା ମୁଜି ଦାଣ୍ଡତେ ଲାଲାଜ୍ ଗୁଜାନ୍କିଜ ଇକୁଡିଆ ଡକସେରାନ୍କି । ପିତର ଏରେ ଲୁକରାକା ତୁଲଙ୍ ଡକଆନ୍ଜ ଆସିଆନା । 56 ମିନଗ୍ ଚାକରାଣିର ପିତରତେ ଲାଲାଜ୍ଜା ଅସରାତେ ଡକସେରାନା ଜୟଜ ଏକା ଟିପରେ ଲଙ୍ସେର ଆଉ ଗାମ, "ନି ଲୁକରେ କିଲଙ୍ ଜିସୁଆ ତୁଲଙ୍ ଆସିଆନା ।" 57 ଏଲେ ପିତର ଆମଙ୍ଗେଅଜ ଗାମ, "ଏ ଜୁଆଙ୍ଡାଏ, ଆଞ୍ ଆରତେ କଙ୍କଙ୍ ଜେନା ।" 58 କୁଟିଜ୍ ରସମିଞ୍ ଅଚତା ଆଉମିନଗ୍ତା ପିତରତେ ଜୟଜ ଗାମ, "ଆମ୍ କିଲଙ୍ ଜିସୁଆ ତୁଲଙ୍ ମାସିଆନା ।" ପିତର ଗାମ, "ଜେନା, କାଆ, ଆଞ୍ ଜେନା ।" 59 ଗଣ୍ଟାମିଜ୍ ଅଚତା ଆଉ ମିନଗ୍ତା ସୁଗାଇ ଜୁରୁ ଟାଣ ଟାଣର ଗାଙ୍ଗାମ୍ତେ ଲାଗେଆନା, "ନି ଲୁକରେ କିଲଙ୍ ସୁତୁକୁରିଞ୍ ଜିସୁଆ ତୁଲଙ୍ ଆସିଆନା, ଇନି ତ ଗାଲିଲିଆ ଲୁକ ।" 60 ଆଉ ପିତର ଗାମ, "କାଆ, ଆମ୍ ବିରି ମେଗାମ୍କେ, ଏରେ ଆଞ୍ କଙ୍କଙ୍ ଜେନା ।" ପିତର ଗାତାତେ ଗାତାତେ ଏରେବେଳା ସାଙ୍ଗେ ସାଙ୍ଗେ ସେଙ୍କଏ ସୁନ । 61 ପରବୁ ବେଳାମିଞ୍ ବୁଲିଆନ୍ଜ ପିତରତେ ଲଙ ଆଉ ପରବୁ ଜା ଗାତାସେର ଏରେ ଗାତାରେ ପିତରଆ ମନେ ଅଲଗାନା । "ମିସିଞ୍ ସେଙ୍କଏ ଆସୁନ୍ଚେକେ ଜେନା ଆମ୍ ତିନିତର 'ଆଞ୍ ଜିସୁତେ କଙ୍କଙ୍ ଜେନା' ମେଗାମେ ।" ନି ଗାତାରେ ପରବୁ ପିତରତେ ଗାତାସେର । 62 ପିତର ବାଏବ ଅନଜ ସୁସାଇ ଦୁକ କିବାନ୍ଜ ଜେଗ । 63 ଜୁ ଲୁକକି ଜିସୁତେ ସବକିଜ ଉନ୍ଚେରକି, ଆରକି ଜିସୁତେ ଆବୁଜ୍ ଆବୁଜ୍ତା ଆବ୍ଗିଆନ୍ତେ ଲାଗେଆନ୍କି । 64 ଜିସୁଆ ଅମର୍ଡାତେ କତେ ତରକିଜ ଜିସୁତେ ଜିଙ୍ଜିଙ୍ତେ ଲାଗେଆନ୍କି, "ଆମ୍ ପରା ଇସରଆ ଗାତା ଗାତାଏକେ ଲୁକ, ଗାତାଏ , ଆଡି ଆମ୍ତେ ଆବୁଜମ୍?" 65 ଲୁକରେକି ଜିସୁଆ ବିରୁଦ ଆଉ ସୁଗାଇ ବାଗି ଗାତା ଗାତାଅକିଜ ଜିସୁତେ ନିନ୍ଦା ଅପମାନ କିକିବ୍ତେ ଲାଗେଆନ୍କି ।
ଜିସୁତେ କୁବା ମିଟିଙ୍ଗିବ ଗଗକି
66 ମେସାର୍ତେ ମେସାର୍ତେ ସେକାଳା ସାଙ୍ଗେ ସାଙ୍ଗେ ଜିଉଦି ଲୁକକା କୁବା ଲୁକକି, କୁବା ନାଗମ୍କି ଆଉ ଅର୍ଦାନ ଲୁକକି ଇକୁଡିଆ ଇଆନ୍କିଜ, ଆରକା କୁବା ମିଟିଙ୍ଗିବ ଜିସୁତେ ଗଗକିଜ ଗାମକି, "ଆମ୍ ଜଦି କିରିସିଟ ତା ଏଲେ ଆମ୍ ନିଞ୍ତେ ଗାତାଏ ।" 67 ଜିସୁ ଲୁକରେକିତେ ଗାମ, "ଆଞ୍ ଆପେତେ ଗାମଜ ବି ଆପେ ବିସାସ ମା ଇକିବ୍ଡେ ଜେନା । 68 ଆଞ୍ ଆପେତେ ଗାତା ଜିଙଜ ଆପେ ଉତର ଆମା ପେରାଏକେ ଜେନା । 69 ଏଲେ ଏକଳଙ୍ତାସୁନ୍ ମୁଣୁସ କନନ୍ ଇସରଆ ବଳ ସକତିରବ ଆରା ଡିଅ ଇତିରତା ଡମକନା ।" 70 ଏତେ ସାବୁରିଞ୍ ଲୁକକି ଜିଙକି, "ତା ଏଲେ ଆମ୍ ବିରି ଇସରଆ କନନ୍ଣ୍ଡ?" ଜିସୁ ଲୁକରେକିତେ ଗାମ, "ଆଞ୍ ଏରେ ବୁଲି ଅପେକି ତ ଏଗାମ୍କେ ।" 71 ଏତେ ଲୁକରେକି ଗାମକି, "ନିଞା ବିରି ପରମାଣ ଦରକାର ଆସିକେ? ନିଞ୍ ତ ନିଜେ ନିଜେ ଆରା ନିଜଆ ତମର୍ଡତା ନି ଗାତାରେ ନଅଙ । "
ପିଲାତ ସାମୁରାତେ ଜିସୁତେ ବିଚାର କିବକି
1 ଅଚତା ମିଟିଙ୍ଗିଆତେ ଜେତେ ସାବୁରିଞ୍ ଲୁକକି ଆସିଆନ୍କି, ତଙନାନ୍କିଜ ଜିସୁତେ ସବକିଜ ପିଲାତଆ ଆସରବ ଗଗକି । ପିଲାତ ମିନଗ୍ ରୁମିଅ ଲୁକ ଆସିଆନା ଆଉ ଜିଉଦି ଲୁକକିତେ ଜାରି କିକିମମାନ୍ । 2 ଲୁକରେକି ଜିସୁଆ ବିରୁଦରେ ବାଗି ଗାତା ଗାଙ୍ଗାମ୍ତେ ଲାଗେଆନ୍କି, "ନିଞ୍ ନେଜଏକେଜୁ, ନି ଲୁକରେ ନିଞା ଜାତି ଲୁକକିତେ ବାଗି ଗାତା ଆବ୍ସଜ୍କେ ଆଉ ରୁମିଅ କୁବା ରାଜା କାଇସରତେ ମାସୁଲି ଡିଞ୍ଡିଞ୍ତେ ମାନା କିବ୍କେ ଆଉ ନିଜତେ ନିଜେ ଜିଉଦିକା ଡିଅ ରାଜା କିରିସ୍ଟ ବୁଲି ଆବ୍ଗାମ୍ଡମ୍ଡେ । ଏତେ ନିଞ୍ ଆରତେ ନେସବ୍ସେକେ ।" 3 ଏରାଲାଗି ପିଲାତ ଜିସୁତେ ଜିଙ, "ଆମ୍ ବିରି ଜିଉଦି ଲୁକକା ରାଜାରକି?" ଜିସୁ ପିଲାତତେ ଗାମ, "ଆମ୍ତ ମେଗାମ୍କେ ।" 4 ଏରାଲାଗି ପିଲାତ କୁବା ନାଗମ୍କିତେ ଆଉ ଏରାତେ ଆସିଆନ୍କି ଲୁକରେକିତେ ଗାମ, "ଆଞ୍ ନି, ଲୁକରାତା କିଣିସି ଦୁସ ମା କୁୟ ।" 5 ଏଲେ ଏରାତେ ଆସିଆନ୍କି ଲୁକରେକି ସୁଗାଇ ଜୁରୁ ଲିଲାଅକିଜ ଗାଙ୍ଗାମ୍ତେ ଲାଗେଆନ୍କି, "ନି ଲୁକରେ ଜିଉଦା ଦେସଆ ସବୁଆଡେ ଲୁକକିତେ ଆବ୍ସଜଜ ଆବ୍କଲେଜ୍କେ । ଗାଲିଲିତାକୁରି ଉନୁକୁଳ କିବଜ ନି ଜାଗାରେ ଜାକଜ୍ ଲୁକକିତେ ଆବ୍ସଜ୍ସୁନ୍ ଡେନତେ ।"
ଜିସୁତେ ଏରୁଦ ରାଜାରା ଆସରବ କିନ
6 ପିଲାତ ଏରେ ଗାତାରେ ଅଙଜ ଜିଙ, "ନି ଲୁକରେ ଗାଲିଲିଆ ଲୁକ ବିରି?" 7 ପିଲାତ ଜେତେବଳଆ ଅଙ ଜୁ ଜିସୁ ଏରୁଦ ରାଜାରା ରାଇଜରା ଲୁକ ବୁଲି, ପିଲାତ ଜିସୁତେ ଏରୁଦ ରାଜା ଆସରବ କିନ । ଏରୁଦ ରାଜା କିଲଙ୍ ଏରେବଳଆ ଜିରୁସାଲାମତେ ଆସିଆନା । 8 ଏରୁଦ ରାଜା ଜିସୁଆ ଗାତାର ଅଙ୍ସେର ଆଉ ଜିସୁତେ ସୁଗାଇ ଦିନତାସୁନ୍ ଜଜଏତେ ମନ କିକିବ୍ ମମାନ୍ ଆଉ ଜିସୁଆତା କାବା କମ ଜଜଏତେ ଏରୁଦ ରାଜା ମନ କିକିବ୍ମମାନା । ଏତେ ଏରୁଦ ରାଜା ଜିସୁତେ ଜୟଜ ସୁଗାଇ କୁସି ଇଆନା । 9 ଏରୁଦ ରାଜା ଜିସୁତେ ସୁଗାଇ ଗାତା ଜିଙ୍ଜିଙ୍ତେ ଲାଗେଆନା ଏଲେ ଜିସୁ ଏରୁଦତେ କିଣିସି ଗାତା ଆଗାତାଅ । 10 କୁବା ନାଗମ୍କି ଆଉ ଅର୍ଦାନ ଲୁକକି ତଙନାନ୍କିଜ ଜିସୁଆ ବିରୁଦରେ ସୁଗାଇ ଜୁରୁ ଲିଲାଅକିଜ ବାଗି ଗାତା ଗାତାନମାନ୍କି । 11 ଏଲେ ଏରୁଦ ରାଜା ନିଜଆ ସଇନିକରକା ତୁଲଙ୍ ମେସେଆନ୍କିଜ, ଜିସୁତେ ସୁଗାଇ ଆବ୍ଗେଆନମାନ୍କି । ମାଲାମାଜ୍ଡ କତେ ଉଙ୍ଗି ଆବାଣ୍ଡିଜକିଜ ପିଲାତ ଆସରବ ଆଉ ତରମିଞ୍ତା ଗଗକି । 12 ଏରୁଦ ରାଜା ଆଉ ପିଲାତ ବାନଣଙ୍ ଆକମେସେଆନ୍କିଆଜ ସୁତୁରୁ ଇଆନ୍କିଆଜ ଆସିଆନ୍କିଆ । ଏଲେ ଏରେ ଦିନଆ ଆରକିଆ ବାନଳଙ୍ ଜଳା ଇଆନ୍କିଆ ।
ଜିସୁତେ ଅବ୍ଗଜ୍ତେ ଦଣ୍ଡ ଡିଞ
13 ଏତାକୁରି ପିଲାତ କୁବା ନାଗମ୍କିତେ, ଜିଉଦି ଲୁକକା କୁବାକୁବା ଲୁକକିତେ, ଆଉ ଏରାତେ ଆସିଆନ୍କି ସାବୁରିଞ୍ ଲୁକକିତେ ଡାକେଅଜ ଇକୁଡିଆ କିବଜ ଲୁକକିତେ ଗାମ, 14 "ନି ଲୁକରେ ସାବୁରିଞ୍ତେ ବାଗି ଗାତା ଆବ୍ସଜ୍କେ ବୁଲି ଏଗାମଜ ଆଞା ସାମୁଞ୍ବ ଏଅରେନ୍ଞ୍ଚେର । ଜୟପେ, ଆଞ୍ ଅପେଆ ସାମୁପେତେ ଜିସୁତେ ଗାତା ଜିଙଜ ଜିସୁଆ ବିରୁଦରେ ଆପେ ଏଗାତାଏକେ, ଏରେ ନୁଣିଞ୍ଡ କିଣିସି ବାଗି ଗାତା ମା କୁୟ । 15 ଏରୁଦ ରାଜା କିଲଙ୍ ବାଗି ଦୁସ ଗାତା ଜିସୁଆତା ଆକୁୟ, ଏଲେ ଜିସୁତେ ନିଞା ଆସନିଞ୍ବ ଆଉତରମିଞ୍ତା କିନ । ଜଏପେ, ଅବ୍ଗଜ୍ତେ ଦଣ୍ଡ ଡିଞ୍ଡିଞ୍ତେ ନି ଲୁକରେ କିଚି ବାଗି କମ କିକିବ୍ ଜେନା । 16 ଏତେ ନିଞ୍ ଜିସୁତେ ଚାବୁକୁବ ନାବୁଜେ ବିରି ନିପିଜେ" ଗାମ । 17 ସବୁ ବରସ ନିସ୍ତାର ଅବଆତେ ଜିଉଦି ଜାତି ଲୁକକା ମିନଗ୍ ବନ୍ଦି ଲୁକତେ ପିଲାତ ପିପିଜ୍ଞମାନା । 18 ଏଲେ ଲୁକରେକି ସାବୁରିଞ୍ ଇକୁଡିଆ ଇଆନ୍କିଜ ଜୁରୁ ଲିଲାଅକିଜ ଗାମକି, "ଜିସୁତେ ଅବ୍ଗଜ୍ପେ ଆଉ ନିଞା ଲାଗି ବାରବାତେ ମୁକୁଳାଏପେ ।" 19 ବାରବାତେ ଗଳରାତେ କଲେଜାନ୍ଜ ଦୁସି ଇସେରାନା, ଆଉ କିତି ଜଣକ ମୁଣୁସକିତେ ଡେଡେଜ୍ ଚେର ଏତେ ବାରବାତେ ବନ୍ଦି ଇଞାତେ ଉନୁନ୍ ଇସେରାନା । 20 ଏଲେ ପିଲାତ ଜିସୁତେ ମୁକୁଳାଏତେ ମନ କିବଜ ସାବୁରିଞ୍ ଲୁକକିତେ ଆଉତରମିଞ୍ତା ବୁଜାଏତେ ଲାଗେଆନା । 21 ଏଲେ ସାବୁରିଞ୍ ଲୁକକି ସୁଗାଇ ଜୁରୁର ଲିଲାଏ ଲିଲାଏତା ଗାମକି, "ଜିସୁତେ ଚକିକୁଣ୍ଟତେ ଅଡାଜେପେ ବିରି ଅବ୍ଗଜେପେ, ଚକି କୁଣ୍ଟତେ ଅଡାଜେପେ ବିରି ଅବ୍ଗଜେପେ" ଗାମକି । 22 ପିଲାତ ସାବୁରିଞ୍ ଲୁକକିତେ ତିନି ତର ବଳତେ ଆଉତରମିଞ୍ତା ବେଜ୍ଗାମ, "ବିତେ, ଜିସୁ ବିରି ଦୁସ କିବ୍ସେରେ? ଅବ୍ଗଜ୍ତେ ଦଣ୍ଡ ଡିଞ୍ଡିଞ୍ତେ ଆଞ୍ ଜିସୁଆତା କିଚି ଦୁସ ମାକୁଇଅ, ଏତେ ନିଞ୍ ଜିସୁତେ ଚାବୁକୁବ ନାବୁଜେ ବିରି ନିପିଜେ" ଗାମ । 23 ଏଲେ "ଜିସୁତେ ଚକି କୁଣ୍ଟତେ ଅଡାଜେପେ ବିରି ଅବ୍ଗଜ୍ପେ" ଗାମକିଜ ଲୁକକି ସୁଗାଇ ଜୁରୁ ଲିଲାଅକିଜ ଗାମକି । 24 ଲୁକକି ସୁଗାଇ ଜୁରୁ ଲିଲାଅକି ଏତେ ଆରାକା ଗାତାରକି ପିଲାତତେ ମାନତେ ଅଲଗାନା । 25 ଲୁକକି ବାରବାତେ ମୁକୁଳାଏତେ ମନ କିବକି । ଗଳରାତେ କଲେଜାନ୍ଜ ଦୁସି ଇସେରାନା, ଆଉ କିତି ଜଣକ ମୁଣୁସକିତେ ଡେଡେଜ୍ଚେର ଏତେ ବାରବାତେ ବନ୍ଦି ଇଞାତେ ଉନୁନ୍ ଇସେରାନା । ଏଲେବି ଲୁକରାକା ଗାତାରକି ପିଲାତ ମାନେଅଜ ବାରବାତେ ମୁକୁଳାଏଅ ଆଉ "ଜିସୁତେ ଜା କିକିବ୍ତେ ମନ ଇକିବ୍କେ, ଆପେ ଏରେ କିବେପେ" ଗାମଜ ଜିସୁତେ ଲୁକରାକା ସମୁରାକାତେ ସାଡେଅ ।
ଜିସୁତେ ଅବ୍ଗଜକି
26 ସଇନିକକି ଜିସୁତେ ଅବ୍ଗଜ୍ତେ ଗଗଗ୍ଡା ବଳଆ ମିନଗ୍ ଲୁକ ଏରେ ଗାଅଁ ସାଇତା ଇଆନ୍ଜ ଗଳବ ଡେଙ୍ଗର୍ନମାନା । ଆରା ନାଅଁର ସିମନ ଆସିଆନା । ସିମନ କୁରୁଣି ଗାଅଁଆ ମିନଗ୍ ଲୁକ ଆସିଆନା । ଏରେ ଲୁକରେତେ ଜିସୁଆ ଚକି କୁଣ୍ଟର ସଇନିକକି ତାରମ୍ଡାତେ ଆବ୍ତିନ୍ତାରକିଜ ଜିସୁଆ ଅଚ ଅଚର ବୁନୁଳାଏ ଗଗକି । 27 ଜୁଆଙ୍ଣ୍ଡାଏ କାମୁଲଙ୍ କୁସୁକୁରି ସୁଗାଇ ଲୁକକି ଜିସୁଆ ଅଚ ଅଚର ଡାଇଙମାନ୍କି, କୁସୁକୁରି ଜୁଆଙ୍ଡାଏକି ଜିସୁଆ ଲାଗି ଜେଗ୍ତା ଜେଗ୍ତା ଅଚ ଅଚର ଅଙ୍ନମାନ୍କି । ଆରକି ଜିସୁଆ ଲାଗି ସୁଗାଇ ଦୁକ କିକିବ୍ମମାନ୍କି । 28 ଏଲେ ଜିସୁ ବୁଲିଆନ୍ଜ କିନବ୍ଡବ ଲଙଜ ଗାମ, "ଏ ଜିରୁସାଲାମ ଗଳଆ ଜୁଆଙ୍ଡାଏକି, ଆଞା ଲାଗି ଏଜେଗର, ନିଜଆ ଲାଗି ଜେଗ୍ଡମାପେ, ଆଉ ନିଜ ନିଜଆ କନନ୍ କଞ୍ଚେଲାନ୍ପେଆ ଲାଗି ଜେଗେପେ । 29 ଜଏପେ, ଜୁ ଜୁଆଙ୍ଡାଏରାକା କନନ୍ କଞ୍ଚେଲାନ୍ ଆଇରେକି, ଆଉ ଜୁ ଜୁଆଙ୍ଡାଏରେକି ଦିନମିଞ୍ ସରିକା କାଣ୍ଡିଞ୍ ଜେନା, ଆଉ ଜୁ ଜୁଆଙ୍ଡାଏରେକି କନନ୍ କଞ୍ଚେଲାନ୍ଡକିତେ ଦୁଦ ଆରାମ୍ବୁଅକି, ଏରେ ଜୁଆଙ୍ଡାଏରେକିତେ ଲୁକକି ଦନିଅ ଆଉ ଡିଅ ବୁଲି ଗାମାମେକି, ଏରେନିଉଣିଣ୍ଡ ଦିନ ଡେଣ୍ଡେ । 30 ଏରେବଳତେ ଲୁକରେକି ଉଳିରେକିତେ ଗାମାମ୍କି 'ନିଞା ଆଲିଙ୍ନିଞାତେ ଅଳଙା ଉଆ' ଆଉ ଲୁକକି ଟଙ୍ଗ ଉଳିରେକିତେ 'ନିଞ୍ତେ ଡାଣ୍ଡାନେ' ଗାମାମେକି । 31 ସୁମୁସିଞ୍ଡେ ବରନ୍ଚେକେ ବଳତେ ନି ନୁଣିଞ୍ଡ କିବକିଜ ସୁମୁସିଞ୍ଡେ କସରଜ ବିରି ମାଇନା?" 32 ବାନଗ୍ ବାଗି ଲୁକକିଆତେ କିଲଙ୍ ଜିସୁଆ ତୁଲଙ୍ ଅବ୍ଗଜ୍ତେ ଗଗ୍ସେରକି । 33 କପାଳ ନାଅଁରା ଜାଗାରାତେ ଆଉଚିଆନ୍କିଜ ସଇନିକକି ଇତିରାତେ ଇଜିଙ୍ଡାତେ ଚକି କୁଣ୍ଟ ମେସାଅକିଜ ଜିସୁତେ କଣ୍ଟା ମାରେଅକି ଆଉ ଚକି କୁଣ୍ଟ ମେସା ଜିସୁତେ ଟାଙ୍କରକି । ବାନଗ୍ ଲୁକରେକିଆତେ କିଲଙ୍ ଜିସୁଆ ଡିଅ ଇତିରତା ମିନଗ୍ତେ ସାଗିତିରତା ମିନଗ୍ତେ ଏରେ ନୁଣିଞ୍ଡ ଚକି କୁଣ୍ଟତେ ଅଡାଜକି । 34 ଏରେବେଳା ଜିସୁ ଗାମ, "ବା, ନି ଲୁକରେକିଆତେ କେମା କିବେ, ନି ସାବୁରିଞ୍ ଲୁକରେକି ବିରି କିବ୍କିକି, ଏରେ ଆକଙ୍କେକି ।" ସଇନିକକି ଜିସୁଆ କତେର ଉଙ୍ଗିର ତାତାଜ୍ତେ ଲଟେରି କିବାନ୍କି । 35 ଲୁକକି ତଙନାନ୍କିଜ ଜଜଏନମାନ୍କି । ଜିଉଦି ଲୁକକା କୁବା ଲୁକକି ଜିସୁତେ ଆବ୍ଗେଆନ୍ତେ ଲାଗେଆନ୍କି, "ଜିସୁତ ଡାବୁଙ୍ ଲୁକକିତେ ରକିଆ କିବ୍କେ । ଜିସୁ ଜଦି ସୁତୁକୁରିଞ୍ ଇସରଆ ନିଜଆ ଲୁକ କିରିସ୍ଟ ତା ଏଲେ ନିଜତେ ରକିଆ କିବ୍ଡେମେ ।" 36 ସଇନିକକି କିଲଙ୍ ଜିସୁଆ ଏକେଚାଜ୍ବ ଡେନକିଜ ଆଜର୍ ଅଙ୍ଗୁର ରସ ଜାଚେଅକି ବିରି ଜିସୁତେ ଆବ୍ଗେନକିଜ ଗାମକି, 37 "ଆମ୍ ଜଦି ଜିଉଦି ଲୁକକା ରାଜା, ତା ଏଲେ ଆମ୍ ନିଜତେ ରକିଆ କିବ୍ଡମା ।" 38 ଆଉ ଜିସୁଆ ବକବ୍ ଆଲିଙ୍ତେ ଚକି କୁଣ୍ଟ ପାଟାରାତେ ନୁଣିଞ୍ଡ ଲେକା ଇସେରାନା, "ନି ଜିଉଦି ଲୁକକା ରାଜା ଆସିକେ ।" 39 ଜିସୁଆ ତୁଲଙ୍ ଚକି କୁଣ୍ଟତେ ଅଡାଜ୍ଚେରକି ମିନଗ୍ ବାଗି ଲୁକରେ ଜିସୁତେ ନିନ୍ଦା କିବଜ ଗାମ, "ଆମ୍ ବିରି କିରିସ୍ଟ ଜେନା ବିରି? ନିଜତେ ଆଉ ନିଞ୍ବାତେ ରକିଆ କିବେ ।" 40 ଏଲେ ଆଉ ମିନଗ୍ତା ବାଗି ଲୁକରେ ଦମକାଅଜ ଆରତେ ଗାମ, "ଆମ୍ ଏକା ସମାନ ଦଣ୍ଡ ମିକୁଇରେ, ଏଲେ ବି ଆମ୍ ବିରି ଇସରତେ ମା ମେବେତଙ୍ଡେ? 41 ନିଞ୍ବା ବାଗି କମ ବାକିବ୍ସେକେ, ଏତେ ନିଞ୍ବା ଟିକ୍ ଡିଅ ଦଣ୍ଡ ବାକୁଇରେ,ଏଲେ ନି ଲୁକରେ କିଚି ଦୁସ କିକିବ୍ ଜେନା ।" 42 ଆଉ ନି ଲୁକରେ ଜିସୁତେ ଗାମ, "ଏ ଜିସୁ, ଜେତେବଳତେ ଆମା ନିଜଆ ରାଇଜମାତେ ସାସନ ମିକିବେ, ଏରେବଳତେ ଆଞ୍ତେ ମନେ ମବ୍ଳଙିଞ୍ ।" 43 ଏରାଲାଗି ଜିସୁ ଏରେ ଲୁକରେତେ ଗାମ, "ଆଞ୍ ଆମ୍ତେ ସୁତୁକୁରିଞ୍ ଗାମ୍କେ, ମିସିଞ୍ ଆମ୍ ଆଞା ତୁଲଙ୍ ସରଗ ରାଇଜତେ ମାଉଚିନା ।"
ଜିସୁ ଗଜ
44 ଏରେବେଳା ଦିପର ବାରଟା ଇସେରାନା, ଆଉ ତିନି ଗଣ୍ଟା ଜାକଜ୍ ସାବୁରିଞ୍ ମୁଲକମିଞ୍ଡେ ଏନ୍ଦାରକର୍ ଇଆନ୍ଜ ରଏସେରାନ୍ । 45 ବେଳ ଆଜଜନମାନ୍ । ମନ୍ଦିରଆତେ ଉଜୁର୍ଚେରକି ପରଦା କତେରେ ମୁଜିତେ ଆଲିଙ୍ତାସୁନ୍ ତୁଳିଜାକଏ ରାଜାନା । 46 ଆଉ ଜିସୁ ଜୁରୁ ଲିଲାଅ ବିରି ଡାକେଅଜ ଗାମ, "ଏ ବା, ଆମା ଇତିମାତେ ଆଞ୍ ନିଜଆ ଆତାମାଞ୍ଡେ ଡିଞ୍କମ୍ ।" ନି ଗାମଜ ଜିସୁ ଗଜ । 47 କୁବା ସଇନିକ ନି ସାବୁରିଞ୍ ଗିନିସରେକି ଜୟଜ ଗାମ, "ଇସର ଡିଅ ଆସିକେ । ସୁତୁକୁରିଞ୍ ନି ଲୁକରେ ଡିଅ ଲୁକ ଆସିଆନା.ଆଉ ଦୁସି ଆରାସିଆନା ।" 48 ଜୁ କୁସୁକୁରି ଲୁକକି ଏରାତେ ଇକୁଡିଆ ଇଆନ୍କିଜ ଜଜନମାନ୍କି, ଏରେ ଲୁକରେକି ଏରେ ସାବୁରିଞ୍ ଗଟେସେର ଗିନିସରେକି ଜୟକିଜ, ନିଜଆ ଚାତିରାକାତେ ପେଟେରମାନ୍କିଜ ଇଞାରକିବ ଡୁଙ୍ଡୁଙକି । 49 ଏଲେ ଜିସୁଆ ନିଜଆ ଲୁକରକି ସାବୁରିଞ୍ ଆଉ ଗାଲିଲି ଅଞ୍ଚଳତା ଇକୁଡିଆ ଇଆନ୍କିଜ ଜିସୁଆ ଅଚ ଅଚର ଡେନ୍ଚେରକି ଜୁଆଙଣ୍ଡାଏରେକି ଲାଙ୍କାତାସୁନ୍ ତଙନାନ୍କିଜ ଏରେ ସାବୁରିଞ୍ ଜଜଏନମାନ୍କି ।
ଜିସୁତେ ତିନକି
50 ଏରାତେ ମିନଗ୍ ଜିଉଦି ଲୁକ ଆସିଆନା । ଆର ଆରାମାତିଆ ଗଳତା ଡେନ୍ଚେର ଆଉ ଆରା ନାଅଁର ଜୁସେପ ଆସିଆନା । ଜିଉଦି ଲୁକକା ସାବୁରିଞାତା କୁବା ମିଟିଙ୍ଗିରାକାତେ ମିନଗ୍ କୁବା ଲୁକ ଆସିଆନା । ଜୁସେପ ସୁଗାଇ ଡିଅ ଲୁକ ଆସିଆନା । 51 ଜୁସେପ ଇସରଆ ରାଇଜତେ ଜଗେସେର । ଡାବୁଙ୍ ଜିଉଦି କୁବା ଲୁକରେକି ଜିସୁତେ ଅବ୍ଗଜ୍ତେ ଗାଙ୍ଗାମମାନ୍କି ଏଲେ ଜୁସେପ ଜିସୁତେ ଅବ୍ଗଜ୍ତେ ରାଜି ଆଇନମାନ୍ । 52 ଜୁସେପ ଆବେତଙାନ୍ଜ ପିଲାତ ଆସରବ ଅନଜ ଜିସୁଆ ଇଣିର ଗାରାନା । ଏତେ ପିଲାତ ଜୁସେପତେ ଡାଏ ଗାମ । 53 ଜୁସେପ ଜିସୁଆ ଇଣିର ଚକି କୁଣ୍ଟତା ଅବଳେଅଜ ତୁଳିବ ଅରେନ ବିରି ମୁଇଣ୍ଟ ଦାମିକିଆ ସୁତା କତେ ଡାଣ୍ଡାନ । ଉଳି ଆଲିଙାତେ ଲାଲାଏ ଇସେରାନା ମୁଇଣ୍ଟ ଲାତାବ ଜିସୁଆ ଇଣିର ଗଗ । ଏରାତେ ଦିନମିଞ୍ ସରିକା କେଇତେ ମାଳା ତିନ୍ତିନ୍ ଆଇସେରାନା କି ଉନୁନ୍ ଆଇସେରାନା । ଏରେ ଜାଗାତେ ଜିସୁତେ ତିନ୍ତିନ୍ତେ ଉନ । 54 ଏରେବେଳା ସୁକୁରୁବାରଦିନ ଆସିଆନା । ଜିରାଏରେକି ଦିନ ବାରରେ ଆଉଚି ଆକଲାଜ୍ ଇନମାନା । ଏତେ ସୁକୁରୁବାରଦିନ ସାବୁରିଞ୍ କମ କିକିବ୍ ଉଟାଏତେ ଆସିଆନା । 55 ଗାଲିଲିତା ଜିସୁଆ ତୁଲଙ୍ ଡେନ୍ଚେରକି ଜୁଆଙଣ୍ଡାଏରେକି ଜୁସେପଆ ଅଚ ଅଚର ଅନକିଜ ଜିସୁଆ ଇଣିର ମାଣ୍ଡିଆତେ ଉନୁନ୍ ଇଆନା ଆଉ ସୁଣିଞ୍ଡ ଉନୁନ୍ ଇଆନା, ଏରେ ସାବୁରିଞ୍ ଜୁଆଙ୍ଡାଏରେକି ଜୟକି । 56 ଏରେ ଜୁଆଙ୍ଡାଏରେକି ଇଞାବ ପେରେଅକିଜ ଆଉ ବାସାନା ଅତର ଅଜନ୍ ସାଜାଳେଆନ୍କି । ଜିରାଏରେକି ବାରତେ ସାବୁରିଞ୍ ଜିଉଦି ଲୁକକିତେ ଜିରାଏତେ ମସା ଗାତାସେର ଏତେ ଜିରାଏରେକି ବାରତେ ଆରକି ଜିରାଏଆନ୍କି ।
ଜିସୁ ଗଗଜାତା ବେଜ୍ବଞ୍ଚେଅ
1 ଜିରାଏରେକି ବାର ପାଳେଆନ୍କି ବିରି ତା ଆର ଦିନ ରଇବାରତେ ଜୁଆଙ୍ଡାଏରେକି ଜିସୁଆ ତିମିନ୍ତା ଜାଗାରେବ ଅନକି । ଜୁ ଅତର ବାସାନା ଅଜନ୍ଡେ ଜୁଗାଳେଆନ୍କିଜ ଉନ୍ଚେରକି ଏରେ କିଲଙ୍ ଗଗାନ୍କି । 2 ଜିସୁଆ ମାଳାର ଉନୁନ୍ ଇସେରାରାନ୍ ଜାଗାରାତେ ମାଟା ଏଗେର୍ ଲାତା ମୁଅଁରାତେ ଡେଡେର୍ ଇସେରାନ୍ । ଜୁଆଙ୍ଡାଏରେକି ଜୟକିଜୁ ଏରେ ଏଗେର୍ଡେ ଅଲଗାବ ଡିଲିସେରେ । 3 ଏରେ ଜାଗାରା ଆଲୁଙ୍ବ ଅନକିଜ ଜୟକିଜୁ ପରବୁ ଜିସୁଆ ଇଣିର ଆକୁୟକି । 4 ଜୁଆଙ୍ଡାଏରେକି ଜୟକିଜ କାବା ଇନିଞାନ୍କିଜ ତଙନ୍ଚେରାନ୍କି ଏରେବେଳା ଜୟକିଜୁ ଟାଲାଟାଜ୍ଡ କତେ ଆମାଣ୍ଡିଜ୍ତା ବାନଗ୍ କାମ୍ବୁଲଗ୍କିଆ ଏରାତେ ତଙନ୍ଚେରାନ୍କିଆ । 5 ଜୁଆଙ୍ଡାଏରେକି ବେତଙାନ୍କିଜ ତୁଳିମୁଆ ଇଆନ୍କିଜ ତଙନାନ୍କି, ଏରେବେଳା ଲୁକରେକିଆ ଜୁଆଙ୍ଡାଏରେକିତେ ଗାମକିଆ, "ଗମଜ୍ତା ଲୁକକା ବିତିରୁ ଆପେ ବିତେ ବମଞ୍ଚେତା ଲୁକତେ ଏଡଗରାଏକେ? 6 ଆର ନାନ୍ ଜତେ, ଜିସୁ ଗଗଜାତା ବେଜ୍ବଞ୍ଚେସେକେତେ । ଜିସୁ ଗାଲିଲିଆତେ ଆସିଆନା ଏରେ ବେଳା ଆପେତେ ଜୁ ଗାତାରେ ଗାତାସେର ଏରେ ମନେ ଅବ୍ଳଗ୍ପେ । 7 'ମୁଣୁସ କନନ୍ ପାପି ଲୁକକା ଇତିରାକାତେ ଡିଞ୍ଡିଞ୍ ମିନା ଆଉ ଚକି କୁଣ୍ଟତେ ଗଗଜ୍ତେ ଅଣ୍ଡେ ଆଉ ତିନି ଦିନଆତେ ମେଜ୍ବଞ୍ଚେ ।' " 8 ଏରାଲାଗି ଜୁଆଙ୍ଡାଏରେକି ଜିସୁଆ ନି ଗାତାରେ ମନେ ଅବ୍ଳଗକି । 9 ଜିସୁତେ ତିନ୍ଚେରକି ଜାଗାରେତା ଜୁଆଙ୍ଡାଏରେକି ପେରେଅକିଜ ଜିସୁଆ ଏଗାର ଜଣ ଚାଲାରକିତେ ଆଉ ଡାବୁଙ୍ ସାବୁରିଞ୍ ବିସାସି ଲୁକକିତେ ନି ସାବୁରିଞ୍ ଗାତାରେ ଗାତାନିଞକି । 10 ନି ଜୁଆଙ୍ଡାଏରେକି ମଗ୍ଦଲିନି ମରିୟମ, ଜୁଆନା, ଜାକୁବଆ ବୁଇର ମରିୟମ, ଆଉ ଆରାକା ତୁଲଙ୍ ଆସିଆନ୍କି ଡାବୁଙ୍ ଜୁଆଙ୍ଡାଏ ଲୁକରେକି । ଇନିକି ଜିସୁଆ ଚାଲାରକିତେ ନି ସାବୁରିଞ୍ ଗାତାରେ ଆବଙିଞକି । 11 ଏଲେ ନି ସାବୁରିଞ୍ ଗାତାରେକି ଜିସୁଆ ଚାଲାରକିତେ ବେକାରିଆ ଗାତା ଡେଗାନ୍ ଲାଗେଆନା ଆଉ ଜୁଆଙ୍ଡାଏରାକା ଗାତାରକି ଜିସୁଆ ଚାଲାରକି ବିସାସ ଆକିବକି । 12 ଏଲେ ପିତର ତଙ୍ନାନ୍ଜ ଜିସୁତେ ତିନ୍ଚେରକି ଜାଗାରା ଆସରବ ଦବଳେସୁନ୍ ଅନ । ଅଣଗାନାଜ ଜୟଜୁ ଅଡଙ୍ କତେ ଲୁଳାଏରମାନ୍ଜ ଆସିଆନା । ଏରେ ସାବୁରିଞ୍ ଜୟଜ ପିତର କାବା ଇଆନ୍ଜ ବିରି ମିସେନା ବୁଲି ଚିନ୍ତା କିବାନ୍ଜ ନିଜଆ ଇଞାରବ ପେରେଅ ।
ଇମାଇଉ ଗାଆଁବ ଗଟାଙ୍ତେ ଜିସୁ ବାନଗ୍ ଚାଲାରକିଆତେ ଆବ୍ଜରମାନ୍
13 ଏରେ ଦିନଆ ଜିସୁଆ ବାନଗ୍ ଚାଲାରକି ଜିରୁସାଲାମଗଳତାକୁରି ଚାରି କୁସୁ ଗଟାଙ୍ ଲାଙ୍କା ଇମାଇଉ ଗାଅବ ଅଙ୍ଗର୍ନମାନ୍କିଆ । 14 ଜା ସାବୁରିଞ୍ ଇସେରାନା ଏରେମିନ୍ଦିରେ ଆରାକିଆ ଆରାକିଆ ବାନଣଙ୍ ଗାତା ବାରାତା ଇନମାନ୍କିଆ । 15 ଆରକିଆ ବାନଗ୍ ଗାତା ବାରାତା ଇନମାନ୍କିଆ ଏରେବଳଆ ଜିସୁ ନିଜେ ଆରାକିଆ ଅସରବ ଡେନଜ ଆରାକିଆ ସାଙ୍ଗେରେ ଡାଇଙ୍ତେ ଲାଗେଆନା । 16 ଆରାକିଆ ବାନଗା ଅମର୍ଡକିଆ ଏରେନୁଣିଞ୍ଡ ବନ୍ଦ ଇସେରାନ୍କିଆ ଜୁ, ଆରକିଆ ବାନଣଙ୍ ଜିସୁତେ ଜୟକିଆଜୁ ତାମାନ୍ ଆରିମାନ୍କିଆ । 17 ଜିସୁ ଆରକିଆତେ ଜିଙ, "ଆପା ଡାଇଗ୍ ଡାଇଗ୍ ଜୁ ସାବୁରିଞ୍ ଆଗାତାରେ, ଏରେ ସାବୁରିଞ୍ ବିରି?" ଏତେ ଆରକିଆ ବାନଣଙ୍ ମୁଅକିଆ କବ୍ସରାନ୍କିଆଜ କଳେର ତଙନାନ୍କିଆ । 18 ଆରାକିଆ ବିତିରୁ କେଲେୟପା ନାଅଁର ମିନଗ୍ ଜିସୁତେ ଗାମ, "ଜିରୁସାଲାମତା ଆମ୍ ବିରି ମିନଗ୍ ମେଡେନ୍ଚେର ଜିଏ ଏକଳଙ୍ ଜା ଜା ଇସେରାନା ଏରେ ମା ମେକଙ୍କେ?" 19 ଜିସୁ ଏରେ ବାନଗ୍ ଲୁକରେକିଆତେ ଜିଙ "ବିରି ବିରି ଇସେରାନା?" ଆରକିଆ ଜିସୁତେ ଗାମକିଆ, "ନାଜରିତିଅ ଜିସୁଆ ଗାତାର, ଜିସୁ ଇସରଆ ଗାତା ଗାତାଏକେ ଲୁକ ଆସିଆନା । ଇସର ଆଉ ସାବୁରିଞ୍ ଲୁକକା ଲାଗି ଡିଅ କମ କିବ୍ସେର ଆଉ ଡିଅ ଗାତା ଆବ୍ସଜ୍ଚେର । 20 ନିଞା ସାବୁରିଞାତା କୁବା ନାଗମ୍ ଆଉ କୁବା ଲୁକକି ଜିସୁତେ ଅବଗଜ୍ତେ ଦଣ୍ଡ ଡିଞ୍ଡିଞ୍ତେ ରୁମିଅ ଲୁକକା ଆସରକାବ ଡିଞକି । ଅଚତା ଜିସୁତେ ଚକି କୁଣ୍ଟତେ ଅବ୍ଗଜକି । 21 ଏରେ ଲୁକରେ ଇସିରାଏଲତେ ମୁମୁକୁଳାଏ ବୁଲି ନିଞ୍ ମନ ନିକିବ୍ସେରାନା, ଏଲେ ଏରେ ବୁଲୁଙ୍ ବଳଆ ନି ସାବୁରିଞ୍ ଗଟଣା ଗଟେନିଞ । ମିସିଞ୍ବ ତିନି ଦିନ ଇଆନ୍ତେ ପରବୁ ଜିସୁ ଗଜତେ । 22 ଅଦକତା କିତିକ ଜୁଆଙ୍ଡାଏ ଲୁକକି ନିଞ୍ବାତେ କାବା କମ ଗାତା ଗାତାଅକି । ଜୁ ଲାତାରାତେ ଜିସୁଆ ଇଣିର ଉନୁନ୍ ଇସେରାନା ଆରକି ମିସିଞ୍ ଆମେସାର୍ଚେର ଏରେ ଜାଗାରେବ ଅନ୍ଚେରକି । 23 ଆରକି ଏରାତେ ଜିସୁଆ ଇଣିର ଆକୁୟକି । ଆରକି ଏରାତେ ଇସରଆ ବାନଗ୍ କବରିଆକିଆତେ ଜୟକି । ଏରେ ଇସରଆ କବରିଆରକିଆ ଜା ଜା ଗାମକିଆ ଏରେ ଜୁଆଙ୍ଡାଏରେକି ପେରେଅକିଜ ନିଞ୍ତେ ଗାତାଅକି । ଜିସୁ ବେଜ୍ବଞ୍ଚେସେକେ ଏରେ ଗାତାରେ କବରିଆରେକିଆ ଗାତାଅକିଆ । 24 ନିଞା ତୁଲଙ୍ ଆସିଆନ୍କି କିତିକ ଆଡିଆଡିକ ଜିସୁତେ ତିନ୍ଚେରକି ଜାଗାରେବ ଅନ୍ଚେରକି । ଜୁଆଙ୍ଡାଏ ଲୁକରେକି ଜିମିତି ଗାତାସେରକି, ଏରେନୁଣିଞ୍ଡ ଜୟକି, ଏଲେ ଜିସୁତେ ଆଜୟକି ।" 25 ଏରାଲାଗି ଜିସୁ ଏରେ ବାନଗ୍ ଲୁକରେକିଆତେ ଗାମ, "ଏ ନିରିବୁଦିଆ ଲୁକକିଆ, ଇସରଆ ଗାତା ଗାତାନମାନ୍କି ଲୁକରେକି ଜା ସାବୁରିଞ୍ ଗାତାସେରକି ଏରେ ବିସାସ କିକିବ୍ତେ ବିରି ଆପେ ଏବାଣାରେ । 26 ଆରକି ଗାତାସେରକି ଜୁ, ସାବୁରିଞାତା କୁବା ଜାଗାବ ଅଙ୍ଗର୍ ଆଗିଲାର କିରିସ୍ଟତେ ଏରେ ସାବୁରିଞ୍ ଦୁକ କସଟ ସଏତେ ମିନା ।" 27 ଅଚତା ମସା ଆବ୍ସଜ୍ଚେର ଇସରଆ ବଇ ଅଲାଗ୍ରାକାତେ ଆଉ ସାବୁରିଞ୍ ଇସରଆ ଗାତା ଗାତାନମାନ୍କି ଲୁକକା ବଇରାକାତେ ଉନୁକୁଳ ତାକୁରି ଜିସୁଆ ନିଜ ଗାତାର ଜା ଜା ଲେକା ଇସେରାନା, ଏରେ ସାବୁରିଞ୍ ଲୁକରେକିଆତେ ବୁଜାଏନମାନ୍ । 28 ଆରକିଆ ବାନଗ୍ ଜୁ ଗାଅଁବ ଅଙ୍ଗର୍ନମାନ୍କିଆ, ଏରେ ଗାଅଁରେବ ଆଉଚି ଆକଲାଜ୍ ଇସେରାନ୍କି । ଆରକିଆ ଜୟକିଆଜୁ ଜିସୁ ଆଗିଲାବ ଅଙ୍ଗର୍ଡା ଡେଗାନ୍ ଇନମାନ୍ । 29 ଏତେ ଜିସୁତେ ଅଟକାଅକିଆଜ ଗାମକିଆ, "ନିଞ୍ବା ତୁଲଙ୍ ରଏନା ଉଆ, ବେଳ ବୁଡିଆନ୍ଜ ଏନ୍ଦାରକର ଇତେ ଅନତେ ।" ଏରାଲାଗି ଜିସୁ ଆରାକିଆ ତୁଲଙ୍ ରଏତେ ଇଞା ଆଲୁଙ୍ବ ଅନ । 30 ଜିସୁ ଆରାକିଆ ତୁଲଙ୍ ଉରୁର୍ତେ ଡକସେରାନା ଏରେବଳଆ ଜିସୁ ଅଳାଗ୍ଡେ ସବଜ ଇସରତେ ଦନିଅବାଦ ଡିଞ ଆଉ ଅଳାଗ୍ଡେ ଗବ୍ଳ ବିରି ଆରକିଆତେ ଡିଞ । 31 ଏରେତାସୁନ୍ ଆରାକିଆ ଅମର୍ଡକିଆ ମେଲାଏରମାନ୍କିଆଜ ଜିସୁତେ ଡିଅର ତାମାନକିଆ । ଜିସୁ ଆରାକିଆ ସାମୁରାକିଆତା ସାଙ୍ଗେ ସାଙ୍ଗେ ଉବା ଇଆନା । 32 ଆରକିଆ ବାନଗ୍ ଆରାକିଆ ଆରାକିଆ ଗାମକିଆ, "ଜେତେବେଳେ ଗଟାଙ୍ତେ ଜିସୁ ନିଞ୍ବା ତୁଲଙ୍ ଗାତା ବାରାତା କିକିବ୍ମମାନା ଆଉ ଇସରଆ ଡିଅ ଗାତା ବୁଜାଏନମାନା, ଏରେବେଳା ମନଞ୍ବାରେ ଲାଲାଜ୍ ଲାଗେରେ ଡେଗାନ୍ ଇନମାନା ।"
ଜିସୁ ଆଉତରମିଞ୍ତା ଚାଲାରକିତେ ଆବ୍ଜରମାନ୍
33 ଆରକିଆ ସାଙ୍ଗେ ସାଙ୍ଗେ ତଙନନ୍କିଆଜ ଜିରୁସାଲାମ୍ ଗଳବ ପେରେଅକିଆ । ଏରାତେ ଏଗାର ଜଣ ଜିସୁଆ ଚାଲାରକି ଆଉ ଡାବୁଙ୍ ଲୁକକି ଇକୁଡିଆ ଇସେରାନ୍କି, ଏରେ ସାବୁରିଞ୍ ଲୁକକିତେ ରୁବାଙକିଆ । 34 ଏରେ ସାବୁରିଞ୍ ଲୁକକି ଗାଙ୍ଗାମମାନ୍କି ଜୁ "ପରବୁ ଜିସୁ ସୁତୁକୁରିଞ୍ ଗଗଜାତା ବେଏବଞ୍ଚେସେକେ ଆଉ ସିମନତେ ଆବ୍ଜରମ୍ସେରାନ୍ ।" 35 ଗଟାଙ୍ତେ ଜା ସାବୁରିଞ୍ ଇସେରାନା ଆଉ ଅଳାଗ୍ ଗବ୍ଳଅ ଏରେବେଳା ସୁଣିଞ୍ଡ ଆରକିଆ ଜିସୁତେ ତାମାନକିଆ, ଏରେ ସାବୁରିଞ୍ ଗାତାରେ ଗାତାନିଞକିଆ । 36 ଏରେ ବାନଗ୍ ଚାଲାରକି ଏରେ ସାବୁରିଞ୍ ଗାତା ଗାତାନମାନ୍କିଆ ବଳଆ ଜିସୁ ନିଜେ ଆରାକା ଆସରାକାତେ ତଙନାନ୍ଜ ଗାମ, "ଆପେଆ ସାନ୍ତି ଇରେମେ ।" 37 ଜିସୁଆ ଚାଲାରକି ବେତଙାନ୍କିଜ ତରତରାଏଆନ୍କି । ମୁଇଣ୍ଟ ମିସାଣି ନେଜକେ ଗାମକିଜ ବାବେଅକି । 38 ଏରାଲାଗି ଜିସୁ ଆରକିତେ ଗାମ, "ବିତେ ଏବେତଙ୍ଡେ ଆଉ ଆପେଆ ମନପେରେ ବିଇତେ ଏଚକାଏରମ୍ଡେ? 39 ନି, ନିଜେ ଆଞ୍, ଆଞା ଇତି ଆଉ ପାଦଞ୍ଡେ ଜଏପେ, ଆଞ୍ତେ ଜିବେପେ ବିରି ଜଏପେ । ଆଞା ଆଏଳାଞ୍ଡେ ଆଉ ଆଡସର୍ନଞ୍ଡେ ଆସିକେ ଆପା ସାବୁରିଞ୍ ଏଜକେ । ମିସାଣିଆ ଏରେନୁଣିଞ୍ଡ ଇଣିର ଜତେ ।" 40 ଏରେ ନୁଣିଞ୍ଡ ଗାମଜ ଜିସୁ ଚାଲାରକିତେ ନିଜଆ ଇତିର ଆଉ ପାଦର ଆବ୍ଜନିଞ । 41 ଚାଲାରକି କୁସି ଇଆନ୍କିଜ କାବା ଇଆନ୍କି । ଏରେ ସାବୁରିଞ୍ ସୁତୁକୁରିଞ୍ ଇସେରେ ବୁଲି ବିସାସ କିକିବ୍ ଆରିମ୍ଡେକି । ଏରେବେଳା ଜିସୁ ଚାଲାରକିତେ ଜିଙ, "ଆପେଆ ସାମୁପେଆ ବିରି ବାରାକ ଉରୁର୍ତେ ନାନ୍ ଆସିକେରି ନାରି?" 42 ଚାଲାରକି ଜିସୁତେ ପାଳିମିଜ୍ ଗାମାଜ୍ତା କାରଙ୍ଡେ ଡିଞକି । 43 ଆଉ ଜିସୁ କାରଙ୍ଡେ ଗଗାନ୍ଜ ଚାଲାରାକାତା ସମୁରାକାତେ ଜିମ । 44 ଅଚତା ଜିସୁ ଚାଲାରକିତେ ଗାମ, "ଆଞ୍ ଆପେଆ ସାମୁପେଆତେ ଆସିଆନ୍ ବଳଆ ଗାତାରେକି ମନେ ଅବ୍ଳଗ୍ପେ । ଆଞ୍ ଆପେତେ ଗାତାସେରଜୁ 'ମସା ଆବ୍ସଜ୍ଚେର ଇସରଆ ବଇ ଅଲାଗ୍ରାକାତେ ଆଉ ସାବୁରିଞ୍ ଇସରଆ ଗାତା ଗାତାନମାନ୍କି ଲୁକକା ବଇରାକାତେ ଆଉ ଗିତ ବଇ ଅଲାଗା ଆଞା ଗାତାଞ୍ଡେ ଜା ସାବୁରିଞ୍ ଲେକା ଇସେରେ, ଏରେ ସାବୁରିଞ୍ ଗମଟେ ।' " 45 ଏରେବେଳା ଇସରଆ ଗାତାର ବୁଜି ରିମିମାକି ଏରାଲାଗି ଜିସୁ ଚାଲାରକିତେ ଜା ସାବୁରିଞ୍ ଲେକା ଇସେରାନ୍ ଏରେ ସାବୁରିଞ୍ ବୁଜାଏନିଞ । 46 ଜିସୁ ଚାଲାରକିତେ ଗାମ, "ନି ନୁଣିଞ୍ଡ ଇସରଆ ବଇ ଅଲାଗା ଲେକା ଇସେରେ ଜୁ କିରିସ୍ଟତେ ଅବ୍ଗଜ୍ ମିନା । ଏଲେ ଆର ତିନି ଦିନ ଅଚତା ଗଗଜାତା ମେଇବଞ୍ଚେ, ଏରେ ଗାତାରେ ଲେକା ଇସେରେ । 47 ଆପେ ସାବୁରିଞ୍ ଏରେ ଗଟଣା ଗଟେଅ ଏରେ ସାବୁରିଞ୍ ଏଜନିଞ । ଜିରୁସାଲାମତାକୁରି ଉନୁକୁଳ କିବେପେ ବିରି ସାବୁରିଞ୍ ଜାତି ଲୁକକା ସାମୁରାକାତେ ଏଗାମେ 'ପାପ ବାଗି କମ ଡାଡେପେ ବିରି ମନ ବଦଳାଏନାପେ ଆଉ ଜିସୁତେ ବିସାସ ଇକିବଜ ଇସର ପାପ କେମା କିମିବେ' ଏରେ ଗାତାରେ ଗାତାନିଞେପେ । 48 ଆପେମାନକି ନି ସାବୁରିଞ୍ ଗାତାରେ ଏଜସେକେ ଏରେ ସାବୁରିଞ୍ ମୁଲକମିଞ୍ଡେ ଏଗାତାନିଞେ । 49 ଜଏପେ, ଆଞା ଅବାଞ୍ ଜା ନିୟମ କିବାନ୍ଜ ଗାତାସେକେ, ଏରେ ଆଞ୍ ଆପେଆ ସାମୁବ ନିମୁଳ ଆତାମା କିନେ । ଏଲେ ଆପେ ସରଗତା ବଳ ସକତି କୁକୁଇ ଜାକଜ୍ ଆପେ ସୁତୁକୁରିଞ୍ ଜିରୁସାଲାମ୍ ଗଳତେ ଆସିନାପେ ।"ଜିସୁ ସରଗବ ପେରେଅ 50 ତା ଅଚତା ଜିସୁ ଚାଲାରକିତେ ଜିରୁସାଲମତାକୁରି ବେତନିଆ ଗାଅଁ ଆକଲାଜ୍ ଜାକଜ୍ ଗଗ । ଏରାତେ ନିଜଆ ଇତିର ଆଲିଙ୍ବ ଟେକେଅଜ ଆବ୍କମ୍ଡର । 51 ଚାଲାରକିତେ କମ୍ଡର୍ଚେନାପେ ଗାଙ୍ଗାମମାନ୍ ଏରେ ବେଳା ଜିସୁ ଆରକିତେ ସାଡେଅ ଆଉ ଜିସୁତେ ସରଗବ ଗଗଗ୍ ଇଆନା । 52 ଚାଲାରକି ଜିସୁତେ ଉଳୁଗିଆନ୍କିଜ ସୁଗାଇ କୁସି ଇଆନ୍କିଜ ଜିରୁସାଲାମ୍ ଗଳବ ପେରେଅକି । 53 ଆଉ ସବୁ ଦିନ ସୁଗାଇ ରସ ମନ୍ଦିରତେ ରଏଆନ୍କିଜ ଇସରତେ ଦନିଅବାଦ ଡିଞଡିଞମାନ୍କି ।