The New Testament of our Lord and Saviour Jesus Christ

Mahte 1

1:1 Da ndai gaw Abraham a kasha hte Dawi a kasha, Yesu Hkristu a ahtik labau gawn ai Chyum laika rai nga ai. 2 Abraham gaw Isak hpe shaprat wu ai; Isak, Yaku hpe shaprat wu ai; Yaku gaw Yuda hte shi a kahpu kanau ni hpe shaprat wu ai; 3 Yuda gaw, Htama hta, Hparet yan Zerak hpe shaprat wu ai; Hparet gaw Hesrum hpe shaprat wu ai; Hesrum, Aram hpe shaprat wu ai; 4 Aram, Aminada hpe shaprat wu ai; Aminada, Nasun hpe shaprat wu ai; Nasun, Salmun hpe shaprat wu ai; 5 Salmun, Rahab hta, Bua hpe shaprat wu ai; Bua, Ruhta hta, Obed hpe shaprat wu ai; Obed gaw Yese hpe shaprat wu ai; 6 Yese gaw Dawi hkawhkam hpe shaprat wu ai; Dawi gaw Uria a madu jan ngu na hta, Shawlumon hpe shaprat wu ai; 7 Shawlumon gaw Rehoboam hpe shaprat wu ai; Rehoboam gaw Abia hpe shaprat wu ai; Abia gaw Asap hpe shaprat wu ai; Asap gaw Yosahpat hpe shaprat wu ai; 8 Yosahpat, Yoram hpe shaprat wu ai; Yoram, Uzia hpe shaprat wu ai; Uzia, Yohtam hpe shaprat wu ai; 9 Yohtam gaw Ahat hpe shaprat wu ai; Ahat gaw Hezekia hpe shaprat wu ai; 10 Hezekia, Manase hpe shaprat wu ai; Manase, Amon hpe shaprat wu ai; Amon, Yosia hpe shaprat wu ai; 11 Yosia gaw Babelon ginwang de bawng wa dung na aprat e, Yehkonia hte shi a kahpu kanau ni hpe shaprat wu ai; 12 Babelon hta bawng wa dung nga ai hpang e, Yehkonia gaw Salahtila hpe shaprat wu ai, Salahtila, Zerubabela hpe shaprat wu ai; 13 Zerubabela, Abiu hpe shaprat wu ai; Abiu gaw Eliakim hpe shaprat wu ai; Eliakim, Azura hpe shaprat wu ai; 14 Azura, Zaduk hpe shaprat wu ai; Zaduk, Ahkim hpe shaprat wu ai; Ahkim, Eliu hpe shaprat wu ai; 15 Eliu, Eliaza hpe shaprat wu ai; Eliaza, Mahtan hpe shaprat wu ai; Mahtan, Yaku hpe shaprat wu ai; 16 Yaku gaw Mari a madu wa Yosep hpe shaprat wu ai; Mari mahtang gaw, Hkristu ngu ai Yesu hpe shangai wu ai; 17 Shingrai, Abraham a aprat kaw nna Dawi a aprat du hkra, ahtik labau shi mali; bai, Dawi kaw nna Babelon hta bawngdung nga ai aprat du hkra, ahtik labau shi mali; bai, Babelon hta bawngdung nga ai kaw nna, Hkristu a aprat du hkra, ahtik labau shi mali li rai nga ma ai. 18 Ya, Yesu Hkristu a shangai wa ai lam ning rai nga ai: Shi a kanu Mari gaw, Yosep e mahtan da nga sai rai nna, shan shada da garai n kanawn yang, shi gaw dai Chyoi pra ai Wenyi a majaw na-um nasin rai wa sai. 19 Shi a madu wa Yosep chyawm gaw, dingman nga ai rai nna, shi hpe n shabrawng mayu wu ai majaw, shi e lagyim dat kau na maw nga ai. 20 Ndai lam ni hpe naw myit aru nga yang, yu u, Madu a lamu kasa langai mi yupmang hta shi hpe hkum madun dan nna, Dawi a kasha Yosep e, na a madu jan Mari hpe la na myit hkum ru et; shi a na-um nasin gaw, dai chyoi pra ai Wenyi kaw na rai nga ai: 21 Shi gaw shadang sha shangai na ru ai rai nna, nang shi a amying hpe, Yesu ngu nna shamying lu na rai nga ai: kaning rai nme law, shi a amyu hpe tinang a yubak mara kaw na hkyehkrang la na shi rai nga ai, ngu wu ai. 22 De a lam yawng hte, dai Madu gaw myihtoi hta tsun ai ga dik wa u ga majaw byin wa sai. 23 Shi gaw, Yu u, dai hkawnsek gaw na-um nasin rai wa na rai nna, shadang sha shangai na ra ai, Shi a amying, Emanuela shamying ya na maru ai, nga ai: de a ga lachyum, Karai Kasang anhte hte rau rai nga ai, nga ai re ai. 24 Yosep gaw, yup pyaw kaw na rawt wa nhtawm, dai Madu a kasa shi hpe hkangda wu ai hte maren, galaw wu ai rai nna, shi a madu jan hpe la wu ai: 25 raitimung, shadang sha hpe garai n shangai lu yang, shi hte n hkrum ai sha nga nga ai: dai shadang sha hpe, shi Yesu ngu nna shamying wu ai.

Mahte 2

2:1 Ya, Herod hkawhkam a lakhtak e, Yuda mung na Betlehem mare hta Yesu shangai wa ngut jang, yu mu, hpaji rawng ai masha sinpraw mung na Yerusalem de sa du ma ai rai nna, 2 Shangai wa sai Yuda hkawhkam wa gaw, kanang rai nga a ta? shi a shagan hpe sinpraw mung hta e anhte mu lu sagaw ai rai nna, shi hpe nawku na sa du ra ga ai, nga nna san ma ai. 3 Herod hkawhkam dai ga hpe na jang, shi hte Yerusalem na yawng hte hte rau myit kahpra nga ma ai rai nna, 4 dai amyu a hkinjawng agyi ni hte laika ka ai sara ni nlang hte hpe jahpawng da nhtawm, Hkristu hpe kanang shangai dat na maru ta, nga nna shanhte hpe jasan mu ai. 5 Shanhte gaw, Yuda mung na Betlehem mare hta e shangai wa na ra ai: kaning rai nme law, myihtoi a lata hte ning nga nna ka da nga ai, 6 Yuda mung na, nang Betlehem e, Yuda agyi ni hta, kaji htum nga ndai n rai; Nye a amyu Israela hpe woi rem nga na Du gaw, Nang kaw nna pru wa na ra ai, nga ai, ngu nna shi hpe tsun dan mu ai. 7 Shaloi Herod gaw, hpaji rawng ai ni hpe lagyim shaga la nna, dai shagan danpru ai ladaw hpe shanhte kaw azin ayang san achyin la nhtawm, 8 Betlehem de shanhte hpe shangun dat yang, Nanhte sa nna, dai ma kaji a lam azin ayang hkan tam ai hte, shi hpe mu hkrup lu jang, ngai mung shi hpe sa nawku lu n ga, ngai hpe wa shana ya mi, ngu nna tsun dat mu ai. 9 Dai hkawhkam a ga na la ngut jang, shanhte pru mat wa ma ai rai nna, yu mu, sinpraw mung e mada mu ai shagan gaw, ma kaji nga ai shara a ntsa e ang ang di rai kap mat hkra, shanhte a shawng e asa wa nga ai. 10 Dai shagan hpe mu mu ai shaloi, shanhte nachying kabu gara nga ma ai. 11 Dai nta hta e shang bang wa ma yang, dai ma kaji hte shi a kanu Mari hpe, shanhte mu mu ai rai nna, lahput hput di let shi hpe nawku mu ai: tinang a sut sumpu hpaw nhtawm, shi hpe aja, lawban hte mura ngu ai kumhpa hpe sak mu ai. 12 Herod hpang hku bai n hprang wa mu ga, yupmang hta shanhte hpe madun dan mu ai majaw, shanhte gaw tinang a mung de, lam kaga hku wa mat ma ai. 13 Ya shanhte wa mat ai hpang, yu mu, dai Madu a lamu kasa langai mi yupmang hta Yosep kaw danpru nna, Rawt u, dai ma kaji hte shi a kanu hpe woi la nna, Egutu mung de hprawng sa u: ngai nang hpe bai shaga ai ladaw du hkra, dai yang e anga nga su; kaning rai nme law, dai ma kaji hpe sat kau na, Herod tam magang ra ai, ngu wu ai. 14 Shaloi shi rawt nna, dai ma kaji hte shi a kanu hpe, shana ladaw e woi la nna, Egutu mung de htawt wa ai hte, Herod nsa hkyet ai ladaw du hkra, dai yang e anga nga ai. 15 Dai gaw, Ngai sha hpe Egutu mung na ngai shaga la se ai, nga nna myihtoi a n-gup hte dai Madu tsun ai ga gaw, dik wa u ga she byin wa ai. 16 Hpaji rawng ai ni Herod hpe hkalem kau ma ai, shi chye nga ai shaloi, shi ja ja masin pawt bu ai hte, hpaji rawng ai ni shi hpe madun dan ai aten sawn la nna, shi shangun dat nhtawm, Betlehem hte de a ginwang hkan e rawng nga ai, ni ning kaw nna lawu grit re ai lasha ma kaji nlang hte hpe, sat kau mu ai. 17 Dai shaloi jang, Rama shara hta e ngoi ai nsen, Hkrapngu hkrapngoi, ja ja sharung shayawt ai, na lu sai; 18 Rahkela, shi a kasha ni hpe hkrap nga ai rai nna, Shanhte n nga ma ai majaw, Shalan shabran n rai lu sai, nga nna myihtoi Yeremia n-gup hte tsun ai ga dik wa sai. 19 Ya Herod nsa hkyet mat ai hpang, yu mu, dai madu a lamu kasa langai mi, Egutu mung hta e, yupmang hte Yosep kaw danpru nna, 20 Rawt u, dai ma kaji hte shi a kanu hpe woi la nna, Israela a mung de wa su; dai ma kaji a asak hpe tam ai ni si mat masai, nga ai. 21 Shaloi shi rawt nna dai ma kaji hte shi a kanu hpe woi la nhtawm, Israela a mung de bai wa ai. 22 Raitimung, Arkela-u, shi a kawa Herod a malai, Yuda mung hta e hkawhkam tai nga ai shi na wu ai shaloi, dai de e shang wa na shi hkrit nga ai: dai hta kaga, yupmang hte shi hpe bai madun dan wu ai majaw, Galile mung de shi bai htawt nna, Nazaret ngu ai mare hta anga nga ai. 23 Dai rai nna, Nazare wa shi hpe ngu na maru ai, nga nna myihtoi ni tsun ai ga gaw dik wa sai.

Mahte 3

3:1 Dai ladaw a laman e baptisma sara Yawhan paw pru nna, 2 Sumsing lamu a mungdan du magang ra ai majaw, myit malai lu mu, nga nna Yuda nam mali hkan e tara hkaw nga ai. 3 Dai wa gaw, Nam mali kata e jahtau ai nsen gaw, Dai madu a lam lajang da mu, Shi a lam masun ni hpe shading mu! nga nna myihtoi Esaia lakap nna tsun ai wa nan rai nga ai. 4 Dai Yawhan chyawm gaw, gawla-u mun hte da ai nba bu hpun nna, shi nshang e shanhpyi shingkyit kyit nga ai: shi a shahpa mung, dinggam-yaw hte nam na lagat jahku rai nga lu ai. 5 Dai shaloi e Yerusalem na ni, Yuda mung ting na ni hte, Yawdan hka ginwang shara magup hkan na ni, shi hpang de pru sa wa ma ai rai nna, 6 tinang a yubak hpe shapraw dan let shi a lata hte Yawdan hka hta e baptisma hkam la ma ai. 7 Ya Hparishe hte Saduke masha law law wa baptisma hkam la na nga sa ma ai hpe shi mu mu yang, shanhte hpe shi tsun mu ai gaw, Pu htum amyu ni e, du magang ra ai yubak ari hta na hprawng wa lu myit ga, nanhte hpe kadai shadum da myit ta? 8 Dai majaw myit malai hte ging dan ai asi si mu! 9 Abraham gaw anhte a wa rai nga mali ai, nga nna tinang a kraw hta e hkum nawn nga myit! nanhte hpe ngai tsun made ga, Karai Kasang gaw ndai nlung ni hta na Abraham a matu kasha hpan shapraw da lu ai. 10 Ya e pyi dai nwa gaw, hpun pawt nhpang hkan e tawn da nga ai; dai rai nna, asi kaja nsi ai hpun nga manga hpe, kran daw kau nna wan hta kabai bang kau nga ai. 11 Ngai gaw, myit malai lu myit ga, hka hta nanhte hpe baptisma jaw made ai, raitimung, nye a hpang e du sa ai wa mahtang gaw, ngai hta n-gun grau ja ai rai nna, shi a kyepdin gun na pyi ngai n ging n dan nngai: dai wa gaw chyoi pra ai Wenyi hta mung, wan hta mung nanhte hpe baptisma jaw na myit dai: 12 shi a lata hta dai hkuwawn shi lang nga ai rai nna, shi a mam chyarang hpe shi yit jasan nhtawm, shi a mam hpe gaw dum hta shinggyin bang da nna, mam nsan hpe gaw, n sat lu ai wan hte nat kau na ru ai, ngu mu ai. 13 Dai aten e Yesu gaw, Yawhan a lata hte baptisma hkam la na nga, Galile mung kaw nna, Yawdan hka makau e nga ai Yawhan hpang de, du sa wa ai. 14 Shi chyawm gaw, Ngai mahtang she nang kaw nna baptisma hkam la na ra nga nngai, nang mahtang ngai kaw du sa rin ni? ngu nna shi hpe hkap ndang let tsun dan wu ai. 15 Shaloi Yesu gaw, Ya dai shabyin ya e; dingman ai lam shagu hpe shadik lu mu ga, an a matu sut nga mali ai, ngu nna shi hpe htan wu ai: shaloi, shi hpe dai lam shabyin ya wu ai. 16 Ya Yesu gaw baptisma hkam la ngut jang, dai hka hta na byawn hprang rai lung wa nna, yu u, lamu gaw hpaw malang wa nhtawm, Karai Kasang a Wenyi gaw, hkrudu zawn yu hkrat wa nna, shi a ntsa e dung nga ai hpe shi mu lu ai: 17 dai hta n-ga, Ndai wa gaw ngai sharawng awng nga ai, ngai tsawra ai Kasha rai nga li ai, nga nna lamu de na nsen ngoi pru wa ai.

Mahte 4

4:1 Dai shaloi e, Nat e gunglau hkrum u ga, dai Wenyi gaw Yesu hpe nam mali de woi bang wa nu ai. 2 Ya shani mali shi ya, shana mali shi na tup, shi lusha gam ai hpang kawsi wu ai. 3 Shaloi, dai gunglau ai wa shi kaw du nna, Nang Karai Kasang a Kasha rai n yang gaw, ndai nlung ni hpe muk tai mu ga, tsun u! ngu wu ai. 4 Shi mahtang htan nna, Masha gaw, muk hte sha hkrung nga lu na n rai; Karai Kasang a n-gup hta na pru ai mungga nlang hte hte hkrung nga lu na ra ai, nga nna ka da nga ai, ngu wu ai. 5 Shaloi Nat gaw dai chyoi pra ai mare de, shi hpe woi wa nna, nawku Htingnu a nchyun e shadun da nhtawm, 6 Nang Karai Kasang a Kasha rai n yang gaw, na hkum nan le de jahkrat dat u: kaning rai nme law, Nlung hta, na a lagaw n ahtu u ga, Na a matu shi a lamu kasa ni hpe shi hkangda nna, Shanhte a lata hta, nang hpe pawn la na mara ai, nga nna ka da nga ai, ngu nna shi hpe tsun wu ai. 7 Bai, Yesu gaw, Dai Madu, na a Karai Kasang hpe nang chyam yu lu na n rai, nga nna mung ka da nga ai, ngu wu ai. 8 Bai, Nat gaw, nachying tsaw ai bum ntsa de shi hpe woi lung wa da nna, mungkan ga na mungdan nlang hte hte dai ni a arawng sadang hpe, shi hpe madun dan nhtawm, 9 Nang dingnyawm nna ngai hpe nawku n yang gaw, ndai yawng mayawng hte hpe ngai nang hpe jaw na de ai, shi hpe ngu wu ai. 10 Dai rai nna Yesu gaw, Satan e, pru mat wa u; dai Madu, na a Karai Kasang hpe nang nawku lu na rai nna, shi hpe hkrai daw lu na re ai, nga nna she ka da nga ai shi hpe ngu wu ai. 11 Shaloi jang dai Nat gaw shi kaw na pru mat wa nna, lamu kasa ni shi hpe sa galaw daw mu ai. 12 Ya Yawhan ap kau ai hkrum nga ai hpe shi na wu yang, shi Galile mung de htawt sa wa ai: 13 bai. Nazaret mare na htawt mat wa a yang, Zebulon hte Naphtali a mung ginwang hkan na nawng makau e nga ai Kaperna-um mare de shi du nna anga nga ai. 14 Dai gaw, Zebulon hte Naphtali a mung, 15 Nawng makau e, Yawdan hka wora hkran na, Amyu kaga ni a Galile ga e; Nsin kata e dung nga ai amyu gaw, 16 Nhtoi kaba mu lu ma ai rai nna, Si ai mung hte de a shingnip kata hta dung nga ai ni kaw, Nhtoi dawng pru wa sai, nga nna myihtoi Esaia tsun ai ga dik wa u ga majaw byin nga ai. 17 Dai aten kaw nna Yesu gaw, Sumsing lamu a mungdan du magang ra ai rai nna, myit malai lu mu, nga nna hkaw nga ai hte tsun hpang nga ai. 18 Ya, Galile nawng makau e garet hkawm wa yang, shan nau rai nga ai Petru ngu ai Simun hte, shi a kanau Andre yan gaw, shan a sumgawn nawng hta e kabai bang nga ai hpe, shi mu hkrup mu ai: kaning rai nme law, shan lahkawng nga hkan ai masha rai nga ma ai: 19 Shaloi shi gaw, Ngai kaw hkan marit; masha hpe hkan hkwi na masha, ngai nan hpe shatai na made ai, ngu nna shan hpe tsun mu ai. 20 Shaloi jang, shan gaw dai sumgawn ni hpe kau da nna shi kaw hkan nang ma ai. 21 Bai, dai kaw na hkawm wa yang, kaga shan nau, Zebedi a kasha Yaku hte shi a kanau Yawhan yan gaw, shan a kawa Zebedi hte rau li hta nga nga nna, shanhte a sumgawn kapa nga ma ai hpe, shi mu hkrup mu ai rai nna, shan hpe shaga la mu ai. 22 Shaloi jang, shan gaw dai li hte shan a kawa hpe rap di kau da nna, shi kaw hkan nang ma ai. 23 Bai, shi gaw Galile mung ting hta kawan hkawm let, shanhte a tara jawng ni hta shi sharin shaga nga nna, dai mungdan a kabu gara shiga hpe hkaw dan ai hte, mung masha ni a machyi makaw amyu myu hte ana ahkya amyu myu hpe shamai shatsai ya wu ai. 24 Dai majaw, shi a kajai gumhkawng ai shiga gaw, Suri mung ting hta e pri rai wa sai rai nna, shanhte gaw, hkum n pyaw ai, machyi makaw amyu myu hte kawa machyi hkrum ai ni hte, nat kap ai, mamu mu ai hte lagaw lata katsing si ai ni hpe shi hpang de woi sa mu ai rai nna, shi shanhte hpe shamai shatsai ya wu ai. 25 Shingrai, Galile mung hte Dekapoli mung, Yerusalem mare hte Yuda mung hte Yawdan hka wora hkran na masha wunawng wuwa kaba shi kaw hkan nang ma ai.

Mahte 5

5:1 Ya, dai wunawng wuwa ni hpe mu hkrup jang, dai bum de shi lung wa sai: shi dung nga yang, shi a sape ni shi kaw du ma ai rai nna, 2 shi a n-gup hpaw ya ai hte, shanhte hpe sharin shaga let tsun mu ai gaw: 3 Wenyi hta matsan mayan rai nga ai ni gaw, a lu ma ai; kaning rai nme law, sumsing lamu a mungdan, shanhte a mungdan rai nga malu ai. 4 Yawnhkyen hkrum ai ni gaw, a lu ma ai; kaning rai nme law, shanhte shalan shabran ai hkrum na mara ai. 5 Myit sumnung ai ni gaw, a lu ma ai; kaning rai nme law, shanhte mungkan ga hpe madu lu na mara ai. 6 Dinghpring ai hpe kawsi hpang kara nga ai ni gaw, a lu ma ai; kaning rai nme law, shanhte hkru kat wa lu na mara ai. 7 Matsan chye dum ai ni gaw, a lu ma ai; kaning rai nme law, shanhte matsan dum la ai hkrum na mara ai. 8 Myit sanseng ai ni gaw a lu ma ai; kaning rai nme law, shanhte gaw Karai Kasang hpe mu lu na maru ai. 9 Shangwi shapyaw chye ai ni gaw, a lu ma ai; kaning rai nme law, shanhte hpe, Karai Kasang a kasha ni, ngu nna shamying na maru ai. 10 Dingman ai lam majaw, zingri zingrat hkrum ai ni gaw, a lu ma ai; kaning rai nme law, sumsing lamu a mungdan, shanhte a mungdan rai nga malu ai. 11 Nye a lam majaw, masha ni gaw nanhte hpe asawng asang di nna zingri zingrat nga ma ai hte, masu ai hku hkan let mara amyu myu shagun da myit dai shaloi e, nanhte a lu myit dai: 12 kabu nna pyaw pyaw rai nga mu; kaning rai nme law, sumsing lamu hta e nanhte a shabrai kaba nga malit dai: nanhte a shawng na myihtoi ni hpe mung shanhte dai hte maren zingri zingrat di kau manu ai. 13 Nanhte gaw dinghta ga a ajum rai nga myit dai; dai ajum mahtang hkawng mat yang gaw, hpa hta jashum la lu na rai ta? shinggan de kabai kau nna, masha e kabye kau na hta kaga, hpa asung mi n shang lu ai. 14 Nanhte gaw mungkan ga a nhtoi rai nga myit dai. Bum ntsa e de ai mare hpe shinggang lu na n rai; 15 pyengdin hpe shatu nhtawm, mung npu e tawn da ai gaw, kadai n galaw yu ai; pyengdin shadun hta tawn da nna, dai gaw, nta e nga nga ai ni nlang hte hpe jahtoi ya mu ai. 16 Dai rai nna, masha ni gaw nanhte a kaja ai bungli mu lu nna, sumsing lamu e nga ai nanhte a Kawa hpe shagrau sha-a lu mu ga, shanhte a man e nanhte a nhtoi hpe htoi tu shangun da mu law. 17 Dai jep ai tara hte myihtoi ni a ga hpe raw dat kau na, nga nna ngai sa du ai gaw, hkum nawn nga myit; raw dat kau na matu n rai, dai hpe shadik na she, ngai sa du ring ngai. 18 Nanhte hpe ngai teng teng tsun made ga, lamu hte aga garai n lai wa yang, dai hpe garai n shabyin byin gaw, dai jep ai tara kaw nna, ga kanu langai mi hte madin langai mi pyi, lai wa lu na n rai. 19 Dai rai nna, kadai mung, dai kaji htum ai ga matsun langai ngai hpe tawt lai nna, masha ni hpe ning rai sharin shaga nga a yang gaw, sumsing lamu a mungdan hta kaji htum ai wa ngu na maru ai: ga dai hpe hkan galaw nna, sharin achyin ya ai wa chyawm gaw, sumsing lamu a mungdan hta, kaba ai wa ngu na maru ai. 20 Kaning rai nme law, nanhte hpe ngai tsun made ai gaw, Nanhte a dinghpring ai lam, laika ka ai sara ni hte Hparishe ni a dinghpring ai hta n grau malit yang gaw, sumsing lamu a mungdan hta nanhte gaja wa n shang lu na myit dai. 21 Masha hpe nang sat lu na ndai n rai; sat kau ai wa gaw, jeyang ai de ging dan nga ai, nga nna moi shawng na ni hpe tsun dan ai ga gaw, nanhte na yu manu ai. 22 Ngai mahtang nanhte hpe tsun made ai gaw, tinang a kahpu kanau wa hpe masin pawt ai wa kadai raitimung jeyang ai hte ging dan nga ai: tinang a kahpu kanau wa hpe, Raka, nga ai wa gaw, dai salang hpawng a dawdan ai hte ging dan nga ai: bai, Mana ndai, nga ai wa gaw, ngarai a wan hte ging dan nga ai. 23 Dai rai nna dai hkungri de, na a kumhpa hpe nang la sayang, na a nhpu nnau nang hpe mara shagun ai shara lama ma nga nga ai hpe, dai shaloi jang nang dum lu wu yang gaw, 24 hkungri a man e na a kumhpa hpe tawn da nhtawm, na nhpu nnau hte myit jahkrum la na shawng sa nna, dai hpang e na a kumhpa hpe wa mara da u. 25 Nang hpe hka galaw ai wa hte rau, lam e naw sa wa yang, shi hte myit alawan jahkrum u; shing n rai, dai hka galaw ai wa gaw, tara agyi a lata hta nang hpe ap kau na ra ai; tara agyi gaw mang galang kaw nang hpe ap kau na ndai rai nna, htawng hta jahkrat kau ai nang hkrum na rin dai: 26 nang hpe ngai teng teng tsun de ai gaw, peksan prai hkra nang garai n wa wa gaw, dai kaw nna nang pru lu na ndai n rai. 27 Masha num nang shaw lu na ndai n rai, nga nna, tsun da ai gaw, nanhte na yu manu ai. 28 Ngai mahtang nanhte hpe tsun made ai gaw, myit madu hte numsha hpe yu yu nna ra ai wa gaw, shi a myit hta, dai numsha hte, num shaw ai amu galaw nu ai. 29 Dai rai nna, hkra maga na myi nang hpe shut shangun n yang gaw, dai hpe malawk kabai kau u; na a hkum ting hpe Ngarai mung hta jahkrat kau ai hkrum na hte, na a hkum daw langai mi hten na gaw, grau kaja nga ai. 30 Na a hkra lata mung nang hpe shut shangun n yang gaw, dai hpe kahtam dut kabai kau u; na a hkum ting Ngarai mung de shang wa na hte, na a hkum daw langai mi hten na gaw, grau kaja nga ai. 31 Na a madu jan hpe jahka mayu n yang gaw, shi hpe dat dat na laika jaw u ga, nga ai ga mung nga sai. 32 Ngai mahtang nanhte hpe tsun made ai gaw, la shaw ai majaw sha n rai yang gaw, tinang a num hpe jahka ai wa gaw, shi hpe la shaw shangun nu ai; (dai jahka kau ai num hpe hkungran ai wa mung, num shaw ai amu galaw nu ai.) 33 Bai Masu let nang n dagam lu na ndai rai nna, na a dagam ai ga gaw dai Madu kaw nang shadik lu na wu ai, nga nna moi shawng na ni hpe tsun dan ai ga gaw, nanhte na yu manu ai. 34 Ngai mahtang nanhte hpe tsun made ai gaw, nanhte hpa mung dagam dala rai lu na myit dai n rai: lamu hpe dagam lu na myit dai n rai; dai gaw Karai Kasang a tingnyang rai nga lu ai: 35 aga hta mung n rai; dai gaw shi a lagaw mara ai shara rai nga lu ai: Yerusalem hpe mung n rai; dai gaw hkawhkam kaba adung nga ai mare rai nga ai. 36 Na a baw hta mung dagam lu na ndai n rai: nang gaw kara singgawng langai mi hpe pyi, hpraw u ga chyang u ga n galaw lu ndai. 37 Na a ga gaw, Rai sa nga yang, rai u ga, N rai, nga yang, n rai u ga; dai hta lai ai ga nlang hte gaw n kaja ai wa hte seng nga ai. 38 Myi a matu myi, wa a matu wa bai htang lu na, nga nna tsun dan ai ga gaw nanhte na yu manu ai. 39 Ngai mahtang nanhte hpe tsun made ai gaw, N hkru ai wa hpe hpa mung hkum tai mu; na a hkra shabyi bye ai wa hpe, maga mi naw ja ya u. 40 Nang hpe tara dara nna na a lawng hkoi la kau mayu ai wa hpe, na a palawng hpe mung hkum ndang u; 41 nang hpe dip nna mai langai mi sa shangun ai wa hte rau, mai lahkawng naw hkan sa u. 42 Nang kaw hpyi ai wa hpe jaw u; nang kaw nna hkoi shap mayu ai wa hpe hkum gangkau u; 43 Na a baw sang wa hpe nang tsawra lu nna, na hpyen wa hpe ndawng n yawt lu na ndai, nga nna tsun dan ai ga gaw, nanhte na yu manu ai. 44 Ngai mahtang nanhte hpe tsun made ai gaw, nanhte a hpyen ni hpe tsawra mu: nanhte hpe zingri zingrat ai ni a matu mara akyu hpyi mu: 45 shingrai yang gaw, sumsing lamu hta nga ai nanhte a Kawa a kashu kasha ni gaw, nanhte tai na marin dai; kaning rai nme law, n kaja ai ni hte kaja ai ni a ntsa e, shi a jan hpe shi pru shangun nga ai rai nna, dinghpring ai ni hte n ding n hpring ai ni a ntsa e, marang jahtu ya mu ai. 46 Nanhte hpe tsawra ai ni hpe sha tsawra myit yang gaw, nanhte hpa shabrai lu la na myit ta? kang hta ai ni mung, dai hte maren galaw ma ai, n rai ni? 47 Nanhte a nhpu nnau ni hpe sha hkrum shaga myit yang gaw, hpa grau shara nga na myit ta? tara maigan ni mung, dai hte maren galaw ma ai, n rai ni? 48 Dai majaw, sumsing lamu na nanhte a Kawa gaw kup nga ai hte maren, nanhte mung kup kup rai nga mu.

Mahte 6

6:1 Masha ni mada mu lu mu ga, shanhte a man e sha, nanhte a daw ya ai amu hpe nanhte n galaw myit ga, sadi nga mu: shing n rai yang gaw, sumsing lamu hta nga ai nanhte a Kawa kaw na, nanhte shabrai n lu na mu ai. 2 Nang alu jaw n-yang gaw, masha ni a shakawn ai ga lu la lu u ga, tara jawng ni hta, lam hkan e mung, sawt ai masha ni galaw ai zawn, na a man e pahtau hkum dum shangun u: nanhte hpe ngai teng teng tsun made ai gaw, shanhte gaw, tinang a shabrai lu la manu ai. 3 Nang mahtang, alu jaw n-yang gaw, na a hkra lata galaw ai amu hpe na a pai lata n chye lu u ga; 4 shingrai, na a alu jaw ai amu n dan n leng ai hta rai nga lu na rai nna, n dan n leng ai shara hpe mu lu ai, na a Nwa gaw, nang hpe bai htang na rin dai. 5 Nanhte akyu hpyi nga myit yang gaw, sawt ai masha ni zawn hkum rai myit: kaning rai nme law, masha ni shanhte hpe mu lu mu ga, tara jawng ni hta, mare lam nshe ni hta tsap nga nna akyu hpyi nga na shanhte tsaw nga ma ai: nanhte hpe ngai teng teng tsun made ai gaw, shanhte tinang a shabrai lu la manu ai. 6 Nang mahtang akyu hpyi nga n yang gaw, na a kata gawk de shang nna, chyinghka hpe la da nhtawm, n dan n leng ai shara e, na a Nwa hpe hpyi u: n dan n leng ai shara hpe mu lu ai, na a Nwa gaw, nang hpe bai htang na rin dai. 7 Nanhte akyu hpyi nga myit yang, tara maigan na ni zawn, ga bai kahtap htap hkum rai nga myit: kaning rai nme law, ga galu galang tsun nga ma ai majaw, shanhte hpe madat mara la ya na ra ai, nga nna shanhte myit nawn ma ai. 8 Nanhte garai n hpyi lu yang pyi, nanhte ra ai hku hpe, nanhte a Kawa (Karai Kasang ) chye ya nga ai majaw, shanhte hte hkum bung nga myit. 9 Dai rai nna, nanhte gaw ning ngu akyu hpyi mu, Sumsing lamu na anhte a Wa e, Na a amying nsang chyoi pra nga lit ga; 10 Na a mungdan du wa ruga; Lamu tang hta, na a myit dik nga ai hte maren, ga ntsa e mung, dik lit ga law; 11 Anhte hta ra ai lusha, dai ni anhte hpe jaw mi; 12 Masha ni anhte hpe shut ai mara, anhte raw kau ya ai zawn, anhte a mara hpe mung raw kau ya mi; 13 Agung alau nga ai de, anhte hpe n sa shangun ai sha, N kaja ai lam hta na, shaw la mi law. 14 Kaning rai nme law, masha ni a shut hpyit ai hpe nanhte raw kau ya myit yang gaw, nanhte a lamu na Kawa gaw, nanhte a shut hpyit ai hpe mung, raw kau ya na myit dai; 15 Masha ni a shut hpyit ai hpe nanhte n raw kau ya myit yang gaw, nanhte a Kawa mung, nanhte a shut hpyit ai hpe, n raw kau ya na myit dai. 16 Bai, nanhte lusha gam nga myit yang, sawt ai masha ni zawn, nanhte a myiman hpe hkum kabyi myit; masha ni a man e shanhte a lusha gam ai dan lu u ga, shanhte gaw tinang a myiman hpe jasum ma ai: nanhte hpe ngai teng teng tsun made ai gaw, shanhte tinang a shabrai lu la manu ai. 17 Nang mahtang lusha gam nga n yang gaw, na a baw hpe naman chya nna, na a myiman hpe myit kau u; 18 Shingrai, masha a man e n rai, n dan n leng ai shara hta nga ai na a Nwa a man e sha, na a lusha gam ai dan nga na ra ai rai nna, n dan n leng ai shara hpe mu ai, na a Nwa gaw, nang hpe bai htang na rin dai. 19 Manut hte nhkan e sha jahten nna, lagu lagut ni tawk htu nna lagu la lu ai, dinghta ga a ntsa e, nanhte a sutgan hpe hkum mahkawng da mu. 20 Manut hte nhkan n sha jahten lu nna, lagu lagut ni mung n tawk htu lu ai hte n lagu la lu ai, suming lamu hta e, nanhte a matu sutgan hpe mahkawng da mu: 21 kaning rai nme law, na a sutgan nga ai kaw, na a myit masin mung nga na lit dai. 22 Dai myi gaw, hkum a pyengdin rai nga lu ai; na a myi asan sha rai nga yang gaw, na a hkum ting a htoi nga ai; 23 na a myi n kaja nga yang gaw, na a hkum ting a sin nga ai: nang hta rawng ai nhtoi gaw, nsin tai mat yang gaw, dai nsin gaw gade htat nga a hka! 24 Kadai rai ting mung, madu lahkawng kaw chyang lu na n rai; shi langai mi hpe ndawng nna kaga hpe tsawra na wu ai; shing n rai langai mi hpe kasawt nna, kaga hpe n kaw n law di na wu ai; nanhte Karai Kasang hpe mung, mungkan a sutgan hpe mung, rau chyang lu na myit dai n rai. 25 Dai rai nna ngai nanhte hpe tsun made ai gaw, hpa lusha na hpa lu lu na asak a matu, kaning rai lu hpun na nanhte a hkum a matu, hkum tsang nga myit; dai asak gaw ashat hta, hkum hkrang gaw hpun palawng hta grau nga ma ai, n rai ni? 26 Ntsa malen na u ni hpe mada yu mu; shanhte n gat n dan ma ai, sutdek hta mung n mahkawng da ma ai: raitimung, sumsing lamu na nanhte a Kawa gaw, shanhte hpe lusha jaw da nga ai: nanhte gaw shanhte hta grau nga myit dai n rai ni? 27 Nanhte hta kadai raitimung, myit tsang ai hte, tinang a aprat galu u ga, dawng mi daram jat la lu na myit ni? 28 Bai, hpun palawng a matu nanhte hpa rai myit tsang nga myit ta? Prang na hkalaw pan ni, kaning rai kaba wa ma ai hpe, myit dum nga mu: dai ni gaw, makan mung n galaw, ari mung n ri ma ai: 29 raitimung, ngai nanhte hpe tsun made ai gaw, Shawlumon pyi shi a hpung kaba mahkra hta, dai nampan langai mi zawn, bu hpun lu ai n rai. 30 Ai n kam ai baw e, dai ni nga nna hpawt de wan nmang hta kabai bang kau ai nam na tsingdu hpe pyi, Karai Kasang shing re jahpun da ai rai jang gaw, dai hta grau nna nanhte hpe jahpun na myit dai, n rai ni? 31 Dai re ai majaw nanhte gaw myit ru myit tsang let, Anhte hpa sha na, hpa lu na, hpa bu hpun na i? nga nna hkum tsun nga myit; 32 kaning rai nme law, tara maigan ni dai nlang hte hpe tam nga ma ai: dai yawng mayawng hte hpe nanhte ra nga myit dai gaw, sumsing lamu na nanhte a Kawa gaw chye nga ai. 33 Nanhte chyawm gaw, shi a mungdan hte shi a dinghpring ai lam hpe shawng tam nga mu; shaloi dai nlang nanhte hpe kahtap jaw na marin dai. 34 Dai rai nna, hpawt ni na matu myit hkum tsang myit; hpawt ni gaw shi a matu ru tsang na ra ai.Dai ni na ru tsang ai gaw, dai ni na matu ram nga ai.

Mahte 7

7:1 Nanhte jeyang ai n hkrum myit ga, hkum jeyang myit. 2 Kaning rai nme law, nanhte jeyang ai hku hkan nna, nanhte jeyang ai hkrum na marin dai; nanhte hteng ya ai dang hte, nanhte hpe hteng ya na marin dai. 3 Tinang a myi hta rawng ai hpuntawng hpe n myit yu ai mi, na a nhpu nnau a myi hta rawng ai nbun hpe, nang hpa rai yu nga n ta? 4 Yu u, na a myi hta hpuntawng rawng nga nlen, Naw hkring u, na a myi hta na nbun hpe ngai lai kau ya de ga, na nhpu nnau hpe nang kaning rai tsun lu n ta? 5 Sawt ai wa e, na a myi hta na hpuntawng hpe shawng lai kau u; dai hpang, na a nhpu nnau a myi na nbun hpe lai kau ya na, nang asan sha mu lu na rin dai. 6 Chyoi pra ai arai hpe gwi ni hpe hkum jaw mu; nanhte a hkachyi ni hpe wa ni man e hkum kabai tawn mu: shing n rai jang, dai ni tinang a lagaw hte dai hpe kabye kau nna, nanhte hpe nhtang kawa na marin dai. 7 Hpyi mu, shaloi nanhte lu la na myit dai; tam mu, shaloi nanhte mu lu na myit dai; akawk mu, shaloi nanhte a matu hpaw na ra ai. 8 Kaning rai nme law, hpyi ai wa kadai mung lu la ai; tam ai wa mung mu la ai, akawk nga ai wa hpe mung, hpaw ya wu ai. 9 Nanhte hta na kadai raitimung, shi a kasha gaw muk hpyi yang, nlung jaw na wu ni? 10 nga hpyi yang, lapu jaw na wu ni? 11 Dai rai nna, nanhte pyi nhkru nga myit dai mi, tinang a kasha ni hpe kaja ai kumhpa chye jaw myit yang gaw, dai hta grau n-ga, sumsing lamu na nanhte a Kawa gaw, shi hpe hpyi ai ni hpe kaja ai kumhpa jaw na n rai hka! 12 Masha ni nanhte hpe hkan galaw na, nanhte tsaw matsaw hte maren, nanhte mung dai hku shanhte hpe hkan galaw mu: dai gaw, jep ai tara hte myihtoi ni a ga kanu rai nga ai. 13 Dai gyip ai chyinghka hku shang wa mu: kaning rai nme law, hten bya ai de hkrang ai lam gaw, dam lada rai maden nga ai rai nna, dai hta shang mat wa ai ni law la ma ai. 14 Asak hkrung ai de hkrang ai chyinghka chyawm gaw, gyip nga ai hte de a lam gyeng nga ai rai nna, dai hpe mu tam ai ni n law ma ai. 15 Kraw lawang hta e amya sha na cyahkyawn myit rawng nna, sagu hpyi bu hpun let nanhte kaw sa du ai myihtoi masu ni hpe koi gam mu. 16 Shanhte a asi hte shanhte hpe chye lu na rai mu ai. Ju hpun hta na tsabyi si, salau hpun hta na maihpang si di la lu a ni? 17 Dai rai nna kaja ai hpun shagu gaw ja ai asi si nga ai; hpundaw wa ai hpun chyawm gaw, n ja ai asi si nga ai: 18 kaja ai hpun gaw n ja ai asi si lu ai n rai, hpundaw wa ai hpun mung, ja ai asi si lu ai n rai. 19 Ja ai asi n si ai hpun yawng mayawng hte gaw, kran daw kau nna wan hta kabai bang kau ai hkrum ma ai. 20 Dai rai nna, shanhte a asi hte, shanhte a akyang hpe chye na mu ai. 21 Ngai hpe, Madu e, Madu e, nga ai hte yawng mayawng gaw, sumsing lamu na mungdan hta shang lu na ma ai n rai: sumsing lamu hta nga ai, nye Wa a myit hkan ai wa sha, shang lu na ra ai. 22 Dai shani e, Madu e, Madu e, na a amying hte anhte myihtoi htoi saga ai hte, na a amying hte nat hkyawt kau nna, na a amying hte magam amu law law shachyen saga ai, n rai ni? nga nna law law wa ngai hpe tsun na mara ai. 23 Dai shaloi e, Ngai nanhte hpe galoi mung n chye made ai; n tara ai amu galaw ai ni e, ngai kaw na pru mat wa mu, ngu nna ngai shanhte hpe tsun na mawe ai. 24 Ndai nye a ga na nna, hkan galaw ai wa kadai mung, tinang a nta hpe lunghkrung ntsa e gap da ai hpaji rawng ai wa hte bung nga ai. 25 Dai marang htu nna, hka tung wa ai hte nbung bung wa nna, dai nta hpe ahtu timung, lunghkrung ntsa e gaw da nga ai majaw, n kadawng lu ai. 26 Ndai nye a ga na nna, n hkan galaw ai wa kadai mung, tinang a nta hpe zaibru jang e gap da ai masha angawk hte bung nga ai. 27 Dai marang htu nna, hka tung wa ai hte nbung bung wa nna, dai nta hpe wa ahtu wu ai rai nna dai gaw kadawng daw mat ai: de a kadawng daw mat ai gaw nyawp rap rai nga ai, ngu nna hkaw dan mu ai. 28 Ya, Yesu gaw dai ga hpe hkaw tsun ngut jang, shi sharin shaga ai lam hpe shawa masha ni mau mat nga ma ai; 29 kaning rai nme law, shanhte a laika ka ai sara ni zawn n rai, ahkang aya lu ai wa zawn, shi shanhte hpe sharin shaga ya mu ai.

Mahte 8

8:1 Ya, dai bum de nna yu hkrat wa yang, masha wunawng wuwa kaba shi kaw hkan nang ma ai. 2 Shaloi, yu mu, manggang kap ai masha langai mi sa du nna shi hpe nawku let, Madu e, nang hkraw n yang gaw, ngai hpe shapra ya lu na rai nga ndai, ngu wu ai. 3 Shi chyawm gaw lata ladawn nna, shi hpe ahtawk let, Ngai hkraw nga nngai, san pra wa nu, ngu wu ai: dai shaloi jang, shi a manggang san pra mat lu ai. 4 Shaloi Yesu gaw, Dai lam kadai hpe mung hkum tsun dan et; pru wa nhtawm na hkum hkinjawng wa hpe madun dan u; shanhte a matu sakse tai u ga, Mawshe tawn da ai kumhpa jaw da nu, shi hpe ngu dat wu ai. 5 Ya, Kaperna-um mare de shang bang wa yang hpyen latsa up ai bu langai mi shi kaw sa du nna, 6 Madu e, nye a ma katsing si ai ana hte nye a nta e a taw nga nna, aja awa aju machyi nga ai, ngu nna shi hpe hpyi nem wu ai. 7 Shi gaw, Shi hpe shamai ya na, ngai sa du na nngai, ngu wu ai. 8 Shaloi dai hpyenbu wa gaw, Madu e, nye a nta magaw npu e nang sa shang na gaw, ngai n ging n dan nngai: na ga hkaw mi sha tsun dat rit, shaloi nye ma mai na ra ai. 9 Kaning rai nme law, ngai mung du lawu na masha rai nga nngai, nye a lawu de mung hpyen masha nga ma ai rai nna, marai mi hpe, Sa u, ngu yang, shi sa wa ai; kaga wa hpe, wa rit ngu yang, shi wa ai; nye a mayam wa hpe mung, Ndai galaw u, ngu yang, shi galaw nga ai, ngu nna htan wu ai. 10 Dai ga Yesu na yang shi mau nna shi kaw hkan nang ai ni hpe tsun mu ai gaw, Nanhte hpe ngai teng teng tsun made ga,Israela amyu hta pyi, dai hte wa kamsham ai gaw ngai n mu hkrup nngai; 11 Bai ngai nanhte hpe tsun made ai gaw, sinpraw sinna maga de na, masha law law wa du wa na ma ai rai nna, sumsing lamu a mungdan hta e, Abraham, Isak, Yaku hte hte rau jawm dung lu na mara ai. 12 Dai mungdan a kashu kasha ni chyawm gaw, shinggan de na nsin hta shaden bang kau ai hkrum na mara ai: dai yang e, hkrapngu hkrapngoi ai hte wa urin udik rai nga na mara ai, ngu mu ai. 13 Yesu gaw, dai hpyenbu hpe mung, Nang wa nit: Nang kamsham ai hte maren nang hta byin u ga, ngu dat wu ai. Dai ahkying hta nan, dai ma gaw mai mat lu ai. 14 Bai, Yesu gaw Petru a nta hta shang yang, shi a kani hkali bu taw nga ai hpe mu hkrup wu ai. 15 Shi a lata hpe ahtawk ya wu yang, dai hkali kawp mat nna, shi rawt nhtawm, shi hpe galaw daw wu ai. 16 Ya, shana de du yang, shanhte gaw nat kap ai masha law law hpe shi hpang de woi sa wa mu ai rai nna, ga hte sha dai nat ni hpe shi shaden kau mu ai; machyi makaw hkrum ai ni nlang hte hpe mung, shamai ya mu ai. 17 Dai gaw, Shi hkum nan, anhte a ana ahkya hpe la kau ya nna, anhte a nji nmu hte hpe gun la kau nu ai, nga nna, myihtoi Esaia tsun ai ga dik wa u ga, rai nga ai. 18 Ya, Yesu gaw shi hpe shinggrup nga ai masha wunawng wuwa hpe mu mu yang, nawng wora hkran de rap sa wa na shi hkangda nga ai. 19 Shaloi laika ka ai sara langai mi sa du nna, Sara e, nang sa ai shara shagu de, ngai nang kaw hkan nang na nngai, ngu wu ai. 20 Yesu gaw, Chyahkyawn ni nhkun lu ma ai, ntsa malen pyen ai u ni mung u yup lu ma ai; dai Masha Kasha chyawm gaw baw tawn na shara pyi n lu nga ai, shi hpe ngu wu ai. 21 Sape ni hta na langai mi mung, Madu e, nye wa hpe wa makoi na ahkang shawng jaw e, ngu nna shi hpe tsun wu ai. 22 Yesu gaw, Ngai kaw hkan nang rit; masha chyasi ni gaw, tinang a chyasi ni hpe makoi mu ga, ngu wu ai. 23 Li de shang wa ngut jang shi a sape ni shi kaw hkan nang ma ai. 24 Shaloi, yu mu, dai nawng e laru kaba ru wa nna, hka leng ni dai li hpe ka-up wa mu ai; shi chyawm gaw yup pyaw nga ai. 25 Dai rai nna shi hpe sa jasu let shanhte gaw, Madu e, hkye la mi, anhte htum mat wa nga ga ai, ngu mu ai. 26 Shi gaw,Ai n kam ai ni e, hpa rai hkrit nga myit ta? ngu nna shanhte hpe tsun mu ai.Shaloi shi rawt nna, nbung hte nawng hpe daru kau wu ai: shingrai nachying atsin sim rai nga ai. 27 Masha ni chyawm gaw, mau mahka nga nna, Ndai wa gaw kaning re ai wa rai nga a ta? nbung hte nawng pyi, shi hpe madat mara nga ma hka? nga shajang ma ai. 28 Ya, wora hkran Gadare ginwang hkan e sa du jang, lupwa e sa nga ai nat kap ai masha lahkawng, shi hpe sa tau ma ai: shan gaw nachying n hkru la nga ma ai majaw, dai lam hta e kadai mung n lai hkawm lu ma ai. 29 Shan gaw, Karai Kasang a Kasha e, an nang hte hpa seng nga ga ta? aten garai n du yang, an hpe zingri na nang sa du rin ni? ngu nna jahtau mu ai. 30 Ya shanhte hte tsawmra mi tsan kaw e, wa wunawng kaba kanaw sha nga ma ai. 31 Dai rai nna, nat ni shi hpe hpyi nem nna, Nang anhte hpe hkyawt kau mi yang gaw, dai wa wunawng hta anhte hpe shang lu shangun mi, ngu mu ai. 32 Shi gaw, Sa wa mu, shanhte hpe ngu mu ai. Pru mat wa ma yang, shanhte dai wa ni hta shang wa ma ai rai nna, dai wa wunawng nlang hte n-gam mahka kaw nna nawng de rut gat bang wa ai hte, hka hta e marit si mat ma ai. 33 Wa rem ai ni chyawm gaw hprawng wa ma ai hte, dai mare de shang nna, byin mabyin hte hte, nat kap ai yan a lam hpe tsun dan mu ai. 34 Dai majaw, mare ting Yesu hpe tau la na pru sa wa ma ai rai nna, shi hte hkrum jang, shanhte a ginwang na pru mat wa u ga, shi hpe hpyi mu ai.

Mahte 9

9:1 Bai li de shi shang nna, rap wa ai hte tinang a mare de du wa ai. 2 Shaloi, Yu mu, panep hta taw nga ai katsing si ai masha langai mi hpe, shanhte shi hpang de hpai sa mu ai.Yasu gaw shanhte a kamsham ai myit mu jang, Sha e, ngwi pyaw nga n ga; na a yubak dat kau ya sade ai, ngu nna katsing si ai wa hpe tsun wu ai. 3 Dai rai nna laika ka ai sara ni nkau mi, Ndai wa shatan nhkan ga ga nga ai, nga nna tinang a kraw kata e tsun ma ai. 4 Yesu gaw shanhte a myit mang ai hpe chye ya jang, Nanhte a kraw hta e, hpa majaw n kaja ai myit nga myit ta? 5 Na a yubak dat kau ya sade ai; shing n rai, Rawt hkawm wa u, ning ngu tsun ai ga yan hta, gara mahtang grau tsun loi a ta? 6 Raitimung, dai Masha Kasha gaw ga ntsa e, yubak dat kau ya ai ahkang aya lu ai gaw, nanhte chye myit ga,_ shaloi dai katsing si ai wa hpe, Rawt u, na a hpun panep hpai la nna, na a nta de wa u, ngu wu ai. 7 Shaloi shi rawt nna shi a nta de wa mat ai. 8 Dai hpe mu ai shawa masha ni, hkrit kamyin nga ma ai rai nna, shinggyim masha ni hpe ning re ai ahkang jaw ai Karai Kasang hpe sharawng awng nga ma ai. 9 Yesu gaw dai shara kaw na sat sa wa yang, kang hta ai sum e dung nga ai Mahte ngu ai wa hpe shi mu hkrup nna, Ngai kaw hkan nang rit, shi hpe ngu wu ai: shaloi shi rawt nna shi kaw hkan nang nga ai. 10 Dai hpang dai wa a nta e dung nga a yang, yu mu, kang hta ai ni hte yubak kap ai masha law law wa, Yesu hte shi a sape ni hte rau sa dung nga ma ai. 11 Hparishe ni dai mu ma yang shanhte gaw, Kang hta ai ni hte yubak kap ai ni hte rau, hpa rai nanhte a sara gaw shat pawng sha a ta? nga nna shi a sape ni hpe san mu ai. 12 Shi gaw dai na jang, N-gun ja ai ni tsi sara n ra ma ai; machyi ai ni sha ra ma ai. 13 Dai rai nna, Hkungga jaw ai lam n rai, matsan dum ai lam she ngai tsaw nga nngai, nga ai ga hpe chye lu mu ga, sa sharin la mu: Kaning rai nme law, dinghpring ai ni hpe shaga na n rai, yubak kap ai ni hpe shaga na she ngai sa du nngai, ngu mu ai. 14 Shaloi Yawhan a sape ni shi kaw sa du nna, Anhte hte Hparishe ni lusha bai gam gam rai ga ai mi, na a sape ni hpa majaw lusha n gam nga ma hka? ngu mu ai. 15 Yesu gaw, La nnan wa gaw, hkungran ai gawk hte seng ai ma ni hte rau naw nga yang, shanhte yawnhkyen hkrum na ma hka? Raitimung? la nnan wa hpe shanhte kaw na jahka mat wa na nhtoi du na ra ai; dai shaloi shanhte lusha gam na mara ai. 16 Palawng nsa hpe garai n htun ai sumpan achyen hte kadai mung n kapa ga ai; shing di yang, dai achyen gaw palawng dingsa hpe gang nna, de a je ai hku gaw grau kaba wa ai. 17 Tsabyi nnan hpe mung shanhpyi ndum nsa hta, kadai mung n bang da ga ai: shing di yang, ndum ni kapaw wa ai hte tsabyi yun mat nna, ndum ni hten mat ma ai: tsabyi nnan hpe ndum nnan hta bang da ma ai rai nna, dai lahkawng yan a kaja nga ai. 18 Ndai ga shanhte hpe naw tsun nga yang, yu mu, agyi langai mi shi kaw sa du nna, shi hpe nawku let, Nye a shayi sha nsa hkyet wa sai raitim, nang sa nna shi ntsa e lata mara ya yang gaw, shi hkrung wa na ra ai, ngu wu ai. 19 Shaloi Yesu rawt nna, shi a sape ni hte rau dai wa kaw hkan nang ma ai. 20 Shaloi, yu mu, shi lahkawng ning sai htaw machyi ai numsha langai mi shi hpang de sit sa wa nna, shi a palawng a banbyau ahtawk wu ai; 21 kaning rai nme law, Shi a palawng hpe sha ngai ahtawk lu yang gaw, ngai mai wa lu na ring ngai, myit nna shi a kraw e nga ai. 22 Yesu mahtang kayin nna shi hpe mu wu yang, Shayi sha e, ngwi pyaw n ga; na a kamsham ai gaw nang hpe shamai ya nit dai, ngu wu ai. Dai ahkying kaw nna, dai numsha mai mat nga ai. 23 Ya, Yesu gaw dai agyi a nta de sa du nna, sumpyi dum ai ni hte sharung shayawt nga ai wunawng hpe mu mu yang, 24 Yen dat mi, dai numsha ma gaw si nga ai n rai, yup pyaw nga ai, ngu wu ai.Shanhte mahtang shi hpe asawng asang di kau mu ai. 25 Dai hpawng nga ai ni hpe shapraw kau ai hpang, shi shang nna, ma a lata hpe jum wu ai; shaloi dai numsha ma rawt wa ai. 26 Dai rai nna, shi a kajai gumhkawng ai ga dai mung ting hta pri rai wa ai. 27 Yesu gaw dai shara kaw nna sat sa wa yang, myi kyaw ai masha lahkawng shi kaw hkan nang let, Dawi a kasha e, an hpe matsan dum la mi, nga nna jahtau ma ai. 28 Dai nta de shang yang, dai myi kyaw ai yan shi kaw sa du nna, Yesu gaw, Ndai ngai galaw lu nngai hpe, nan kam nga myit ni? ngu nna shan hpe san mu ai. Shan mahtang, Rai sa, Madu e, ngu mu ai. 29 Dai rai nna shan a myi hpe shi ahtawk nna, Nan kamsham nga ai hte maren, byin wa malit ga, ngu mu ai. 30 Shaloi shan a myi hpaw wa malu ai.Yesu chyawm gaw, Kadai mung, ndai hpe n chye lu mu ga, sadi nga mu, ngu nna shan hpe aja awa ginhtim da mu ai. 31 Raitimung, shan gaw pru wa nna, shi a kajai gara ai lam hpe dai mung ting hta e shabrawng dat mu ai. 32 Dai yan pru mat wa jang, yu mu, n chye shaga ai nat kap ai masha hpe shi kaw woi shashawn mu ai. 33 Dai nat hpe shaden kau ai hpang, n chye shaga ai wa gaw shaga lu ai. Dai rai nna, shawa masha ni a mau nga nna, Israela amyu hta ndai zawn re ai, galoi mung n mu yu ga ga ai, nga ma ai. 34 Hparishe ni mahtang gaw, Nat ni a agyi hte sha, shi nat ni hpe shaden kau lu nu ai, nga ma ai. 35 Dai hpang Yesu gaw, mare kahtawng shagu hkan e kawan hkawm nna, shahte a tara jawng ni hta e sharin shaga ya ai hte sumsing lamu mungdan a kabu gara shiga hpe hkaw dan let, ana ahkya amyu myu hte machyi makaw amyu myu hpe shamai shatsai ya mu ai. 36 Dai shawa hpawng ni hpe mu jang, shi shanhte hpe matsan dum da mu ai:kaning rai nme law, shanhte gaw, sagu rem ai wa n nga ai majaw, ru tsang hkrum ai hte bra mat wa ai sagu hte bung nga ma ai. 37 Dai rai nna, shi a sape ni hpe shi tsun mu ai gaw, Nmut shang shara law law nga ai, amu galaw na ni mahtang n law ma ai: 38 dai majaw, dai mam Madu gaw shi a nmut hta amu galaw na masha shang shangun dat ya mu ga, hpyi nga mu, ngu wu ai.

Mahte 10

10:1 Shaloi shi a sape shi lahkawng hte hpe shi shaga la nna, n seng ai ji nat ni hpe shaden kau lu mu ga hte, ana ahkya amyu myu, machyi makaw amyu myu hpe shamai shatsai lu na ahkang, shanhte hpe jaw mu ai. 2 Ya dai kasa shi lahkawng a amying, ndai rai nga malu ai: shawng na wa Petru ngu ai Simun hte shi a kanau Andre; Zebedi a kasha Yaku hte shi a kanau Yawhan; 3 Hpilip hte Barhtolume; Htawma hte kang hta ai wa Mahte; Alhpe a kasha Yaku hte Htade; 4 Kanan masha Simun hte shi hpe ap kau ai Yuda Iskarut hte rai ma ai. 5 Dai shi lahkawng hte hpe Yesu shangun dat nna, shanhte hpe tsun mu ai gaw, Tara maigan ni a lam hta e hkum sa myit; Samari masha ni a mare hta e mung hkum shang myit: 6 Israela amyu hta na dam mat wa ai sagu ni kaw she shawng sa wa mu. 7 Pru hkawm wa yang, Sumsing lamu na mungdan gaw ni wa magang ra ai, ngu nna hkaw tsun dan mu. 8 Machyi makaw hkrum ai ni hpe shamai ya mu; si mat ai ni hpe sharawt dat mu; manggang kap ai ni hpe jaseng ya mu, nat ni hpe shaden kau mu; jahpu n ya ai sha nanhte lu la mu ai rai nna, jahpu n hpyi ai she jaw ya mu. 9 Nanhte a shingkyit hta e, aja, gumhpraw, dingsen, hkum gun da mu; 10 hkrun lam na matu mung htingpa hte palawng lahkawng, kyepdin hte dawhkrawng, hkum gun myit: kaning rai nme law, amu galaw ai wa gaw shi a shahpa lu la ging nga ai. 11 Gara mare, gara kahtawng hta e raitimung, nanhte shang myit yang, dai yang na ging dan nga ai wa hpe tam la mu: nanhte pru wa ai du hkra, dai shara hta e anga nga mu. 12 Nta hta shang myit yang gaw, dai ni hpe shachyen ya mu: 13 dai nta hta ging dan nga a yang gaw, nanhte a shaman ai ga shi ntsa e du u ga; ging dan ai wa n rai yang gaw, nanhte a shaman ai ga nanhte hpang de bai nhtang wa u ga. 14 Nanhte hpe n hkap hkalum la nna, nanhte a ga hpe n madat ya yang gaw, dai nta kaw na, shing n rai, dai mare kaw na pru wa nhtawm, nanhte a lagaw hta a kap ai nhpu hpe ahpu kau mu. 15 Nanhte hpe ngai teng teng tsun made ai gaw, tara dara ai nhtoi hta e, Sodom hte Gomora mung gaw, dai mare hta yubak nhkyi na ra ai. 16 Yu mu, chyahkyawn ni a ka-ang de sagu hpe zawn, ngai nanhte hpe shangun dat made ai: dai rai nna nanhte gaw; lapu zawn hpaji rawng nna, hkrudu zawn myit shingdi nga mu. 17 Raitimung, masha ni hpe sadi nga mu: kaning rai nme law, shanhte gaw salang hpawng ni a lata hta nanhte hpe ap kau na mara ai rai nna, shanhte a tara jawng ni hta e nanhte hpe anu kayat na marin dai. 18 Shanhte a man e mung, tara maigan amyu ni a man e mung, sakse tai na matu nanhte gaw nye a majaw, du ni hte hkawhkam ni a man de, dun bang ai, hkrum na marin dai. 19 Nanhte hpe ap kau myit dai shaloi, kaning ngu nna, hpa hku tsun lu na hpe, myit hkum tsang myit: dai ahkying hta, hpa tsun mai na gaw, nanhte hpe shadum na marin dai: 20 kaning rai nme law, ga tsun nga ai ni nanhte n rai, nanhte a Kawa a Wenyi gaw nanhte hta ga tsun nga ai. 21 Kahpu gaw kanau wa hpe, kawa gaw kasha hpe nsa dan hkra ap kau na ra ai; kasha ni mung gumlau maga de rawt nna, kanu yan kawa hpe sat shangun na maru ai. 22 Nye a amying majaw masha nlang hte gaw nanhte hpe ndawng n wawm na myit dai: raitimung, htum hkra shakut sharang ai wa gaw, hkyehkrang la ai hkrum na ra ai. 23 Mare langai mi hta nanhte hpe zingri zingrat myit yang gaw, kaga de hprawng sa mu: nanhte hpe ngai teng teng tsun made ai gaw,Israela a mare ni hpe garai n htum lu yang, dai Masha Kasha gaw du na ra ai. 24 Sape gaw sara hta, grau ai n rai; mayam mung shi a madu hta grau ai n rai. 25 Sape gaw shi a sara zawn, mayam gaw shi a madu zawn rai nga yang gaw, ram nga ai: shanhte gaw nta madu wa hpe Bezebula ngu mu yang gaw, shi a nta na ni hpe, shing grau ngu na mu ai, n rai hka! 26 Dai re ai majaw shanhte hpe hkum hkrit mu: kaning rai nme law, magap da nna, n pru n dan lu na arai gaw n nga ai; makoi da nna n chye na lu na arai mung n nga ai. 27 Ngai nanhte hpe nsin kata e tsun dan ai lam hpe, nhtoi hta e tsun dan mu: nanhte na hta e na la ai lam hpe, nta ntsa nna hkaw dan mu. 28 Hkum tsawp hpe sha sat kau nna, myit masin hpe n sat kau lu ai ni hpe hkum hkrit mu:myit masin hte hpawn hkum tsawp hpe ngarai mung hta e jahten kau lu ai wa hpe grau nna hkrit nga mu. 29 U tsa lahkawng hpe peksan langai mi hte dut kau lu ai, n rai ni? nanhte a Kawa a myit hte n rai yang gaw, dai ni hta na langai mi pyi ga de n hkrat ma ai. 30 Nanhte a baw na kara singgawng mahkra hpe mung, hti da nu ai. 31 Dai re ai majaw, hkum hkrit myit: u tsa law law hta nanhte grau nna hpu nga myit dai. 32 Kadai raitimung, masha ni a man e ngai hpe yin la ai wa hpe, Sumsing lamu e nga ai, nye Wa a man e dai wa hpe ngai yin la na we ai. 33 masha ni a man e ngai hpe nyet kau ai wa hpe chyawm gaw, sumsing lamu e nga ai, nye Wa a man e, dai wa hpe ngai nyet kau na we ai. 34 Ga ntsa de ngwi pyaw na lam shangun dat na ngai sa ring ngai, hkum myit nga myit: ngwi pyaw na lam shangun dat na ngai sa nngai n rai, nhtu hpe shangun dat na she ngai sa ring ngai. 35 Kaning rai nme law, masha langai ngai gaw shi a kawa hte, shayi sha gaw shi a kanu hte, kanam gaw shi a kamoi hte bra mat shangun na, ngai sa ring ngai rai nna, 36 tinang hpe ndawng n yawt na ni gaw, tinang a nta na ni tai wa na mara ai. 37 Kadai mung, ngai hpe tsawra ai hta, kanu kawa hpe grau nna tsawra ai wa gaw, ngai hte n ging n dan nga ai: ngai hpe tsawra ai hta, shayi shadang sha hpe grau nna tsawra ai wa mung, ngai hte n ging n dan nga ai. 38 Tinang a wudang hpai let, nye a hpang e n hkan ai wa gaw, ngai hte n ging n dan nga ai. 39 Tinang a asak hpe lahpawt ai wa gaw, asak sum na ra ai: nye a jaw e, tinang asak jasum ai wa chyawm gaw, asak mu la na ru ai. 40 Nanhte hpe hkap hkalum la ai wa gaw, ngai hpe mung hkap hkalum la ai; ngai hpe hkap hkalum la ai wa mung, ngai hpe shangun dat ai wa hpe hkap hkalum la ai rai nga ai. 41 Myihtoi a myiman hpe tau nna myihtoi hpe hkap hkalum la ai wa gaw, myihtoi a shabrai lu la na ru ai; dinghpring ai wa a myiman hpe tau nna, dinghpring ai wa hpe hkap hkalum la ai wa gaw, dinghpring ai wa a shabrai lu la na ru ai. 42 Masha langai ngai gaw, sape a myiman hpe tau nna, ndai ma kaji langai ngai hpe, ntsin katsi htinggap mi sha jaw wu yang, dai wa gaw shi a shabrai n lu la na nu ai n rai, nga nna ngai nanhte hpe teng teng tsun nngai, ngu mu ai.

Mahte 11

11:1 Ya, Yesu gaw shi a sape shi lahkawng hte hpe hkangda ngut yang, shanhte a mare ni hta sharin shaga nna, tara hkaw hkawm wa na matu, shi dai shara kaw na pru sa wa ai. 2 Hkristu e galaw dat ai amu bungli a lam Yawhan gaw htawng hta e na wu yang shi a sape hta na shi shangun dat nna, 3 Nang gaw dai du sa na ra ai wa rai nga n ni? shing n rai, kaga hpe anhte naw myit mada lu na rai nga a ni? ngu nna shi hpe san dat wu ai. 4 Yesu htan let shanhte hpe tsun mu ai gaw, Na mana mu mamu hte maren, Yawhan hpe wa tsun dan mu: 5 myi kyaw ai ni myi mu lu ma ai, lagaw hten ai ni hkawm sa lu ma ai, manggang kap ai ni san pra wa lu ma ai, na lahpang ai ni na lu ma ai, si mat ai ni sharawt la ai hkrum ma ai hte, matsan mayan ni a matu kabu gara shiga hkaw dan nga ai: 6 ngai hta myit kataw ai lam n mu ai wa kadai mung, a lu nga ai, ngu mu ai. 7 Ya shanhte wa mat ai hpang, Yesu gaw Yawhan a lam hpe lakap nna shawa masha ni hpe tsun hpang mu ai gaw, Dai nam de, hpa hpe hpu yu na, nanhte sa myit ta? nbung e kanga ai maiaw hpe rai ni? 8 shing n rai, hpa yu na sa myit ta? mani ai hpun palawng bu hpun ai wa hpe, rai ni? Yu mu, mani ai hpun palawng bu hpun ai ni gaw, hkawhkam a htingnu ni hta nga ma ai. 9 Dai hpe n rai taw, hpa majaw sa pru myit ta? myihtoi hpe sa yu na rai ni? Rai nga ai; nanhte hpe ngai tsun made ai gaw, myihtoi hta grau kaba ai wa mung rai nga ai. 10 Yu u, na a man e, na a lam lajang magang na, Nye a kasa hpe na a shawng de ngai shangun dat we ai, nga nna ka da ai ga gaw shi a lam rai nga lu ai. 11 Nanhte hpe ngai teng teng tsun made ai gaw, Numsha kaw shangai ai ni hta, Baptisma Sara Yawhan hta grau kaba ai marai langai mi muk n paw pru ai: raitimung, sumsing lamu a mungdan hta kaji ai wa gaw, shi hta grau kaba nga ai. 12 Baptisma Sara Yawhan a ladaw langa kaw nna ya du hkra, sumsing lamu a mungdan gaw anin katut hkrum nga ai rai nna, share lu ai ni mahtang, dai hpe shanyen la lu ma ai. 13 Kaning rai nme law, myihtoi ni nlang hte hte dai jep ai tara gaw, Yawhan a aprat du hkra sharin shaga nga ai: 14 nanhte madat la mayu myit yang gaw, ndai wa gaw, du magang ra ai Elia rai nga ai. 15 Na tu ai wa gaw, na la u ga. 16 Dai majaw, ndai amyu hpe, ngai hpa hte shadawn dan na mawe ta? Shanhte gaw, 17 Nanhte a matu anhte sumpyi dum ga timung, nanhte n ka myit dai: Anhte sharung shayawt timung, nanhte n yawn myit dai, nga nna, gat hkan e dung let, shada da gintan hkat ai ma ni hte bung nga ma ai. 18 Kaning rai nme law, Yawhan sa du nna n lu n sha ai sha nga yang, shanhte gaw, Shi nat kap ai wa rai nga ai, nga ma ai: 19 Dai Masha Kasha du sa nna, lu nga sha nga ai raitimung, Ndai sha marim ai wa, tsabyi lu shalai ai hte, kang hta ai ni, yubak kap ai ni a jinghku hpe yu mu, nga nna bai tsun ma ai.Hpaji byeng-ya chyawm gaw, shi a amu bungli hta awlaw ai hkrum nga ai, ngu mu ai. 20 Dai shaloi e Yesu gaw ga sharawt nna, shi a magam bungli malaw maga dan sai mare ni hpe, myit malai n lu ma ai majaw, ning ngu daru kau mu ai: 21 O, Kurazin e, nang dingnye lu ndai! O, Betsaida e, nang dingnye lu ndai! Kaning rai nme law, nan hta dan ai magam bungli ni hpe, Turu hte Sidun mare yan hta dan yu taw gaw, dai yan gaw moi moi e nan lachyit nba hte dap hta e, myit malai lu boi na masai. 22 Dai majaw, nan hpe ngai tsun nngai gaw, dai tara dara ai nhtoi hta e, Turu hte Sidun mare yan gaw, nan hta naw chyamai na mara ai. 23 Nang mung, Kaperna-um e, lamu du hkra sharawt ai, nang hkrum na n ni? katsan ga du hkra jahkrat kau ai nang hkrum na rin dai.Kaning rai nme law, nang hta dan ai magam bungli ni hpe, Sodom hta e shabyin taw gaw, dai mare gaw dai ni du hkra agrin nga na re ai. 24 Dai majaw nanhte hpe ngai tsun made ai gaw, tara dara ai nhtoi hta e, Sodom mung gaw, nang hta naw chyamai na ra ai, nga ai. 25 Dai aten hte hta Yesu gaw ga hpaw nna, Sumsing lamu hte ginding aga a Madu, Wa e; hpaji byeng-ya rawng ai ni hte myit kunghpan ai ni kaw na ndai lam nang makoi magap da nhtawm, ma kaji ni hpe madun dan ndai majaw, ngai nang hpe shakawn kungdawn nngai: 26 rai sa, Wa e, nang tsaw ai hku, ndai rai nga lit dai. 27 Nye Wa gaw arai yawng mayawng ngai hpe ap ya ni ai;Wa hta kaga, dai kasha hpe kadai mung n chye lu ai: dai Kasha hte, dai Kasha jahtoi ya mayu ai masha hta kaga, Wa hpe mung, kadai n chye lu ai. 28 Hki ba la nna lit li gun ai ni yawng hte e, ngai kaw wa marit; ngai nanhte hpe ban sa shangun na made ai. 29 Ngai gaw myitsumnung ai hte myit gyip nga nngai rai nna nye a kandang hpe hpai mu, nye a lam sharin la mu: dai rai yang nanhte a myit masin ban sa ai hkrum na malit dai: 30 kaning rai nme law, nye a kandang hpai loi ai hte, nye a lit mung tsang nga li ai, ngu mu ai.

Mahte 12

12:1 Dai aten hte hta Yesu gaw laban nhtoi e, hkaibang yi hku ga hkawm wa ai, shi a sape ni mahtang kawsi hkrum ma ai rai nna, mam nsi di la nhtawm, sha ma ai. 2 Hparishe ni dai mu jang, shanhte gaw, Yu u, laban nhtoi e n mai galaw ai amu, na a sape ni galaw ma ai, ngu nna shi hpe tsun mu ai. 3 Shi shanhte hpe, Dawi hte shi kaw hkan nang ai ni hte rau kawsi hkrum ma yang, shi gaw Karai Kasang a nta de shang nna, 4 shi mung, shi hte rau nga ai ni mung, n mai sha ai, hkinjawng ni chyu sha mai sha ai madun da ai muk ni hpe la sha nu ai lam hpe pyi, nanhte n hti yu myit ni? 5 Bai, laban nhtoi e dai Htingnu hta nga ai hkinjawng ni, laban nhtoi hpe wu kau mu timung, mara n nga ai gaw, dai tara laika hta nanhte n hti yu myit ni? 6 Nanhte hpe ngai tsun made ai gaw, Dai Htingnu hta grau kaba ai mahtang gaw, nang e rai nga ai. 7 Hkungga jaw ai lam n rai, matsan dum ai lam hpe sha ngai tsaw nngai, nga ai ga hpe nanhte chye mu taw gaw, mara n kap ai ni hpe, nanhte mara shagun na myit dai n rai: 8 kaning rai nme law, dai Masha Kasha gaw, laban nhtoi a Madu rai nga ai, ngu mu ai. 9 Bai, dai shara kaw nna shi sat sa wa nhtawm, shanhte a tara jawng hta shang ai: 10 ya yu mu, lata katsing si ai masha langai mi nga ai rai nna, shanhte gaw shi hpe, mara shagun lu u ga, Laban nhtoi hta e mai shamai ya a ni? ngu nna, shi hpe san mu ai. 11 Dai majaw shi shanhte hpe, Nanhte hta sagu langai mi lu ai masha lawm nna, dai gaw laban nhtoi e nhkun hta hkrat yang, dai hpe n dun shaw la ai wa langai ngai nga na myit ni? 12 Masha gaw sagu hta gade grau hpu a hka! Dai rai nna, laban nhtoi hta amu kaja galaw na sut nga ai, ngu mu ai. 13 Shaloi shi gaw dai wa hpe, Na a lata ladawn u, ngu wu ai.Dai majaw shi ladawn nna, dai gaw maga mi na zawn majing rai mat lu ai. 14 Hparishe ni chyawm gaw pru wa nna, shi hpe kaning di jahten kau lu na lam bawng nga ma ai. 15 Yesu dai hpe chye jang, kaga de htawt mat wa ai.Masha law law mung, shi kaw hkan nang ma ai rai nna, shanhte nlang hte hpe shamai shatsai di nhtawm, 16 shi a lam n shabrawng dat mu ga, shanhte hpe ginhtim dat mu ai. 17 Dai byin wa ai lam gaw, Ngai lata la ai, nye a shangun ma hpe, Ngai myit sharawng awng ai nja nhpra wa hpe, yu mu. 18 Nye Wenyi shi a ntsa e ngai bang da ya nna, Shi masha amyu ni hpe dawdan ai lam tsun dan na mu ai. 19 Shi gaw n gasat, n jahtau na rai nna, Shi a nsen hpe lam hkan e n na lu na mu ai. 20 Tara dara ai lam nlaw wa ai du hkra, Bye dip kau ai maiaw hpe shi n shadaw na hte Nhkut hku ai wan shat hpe, n sat kau na wu ai. 21 Shi a amying hta masha amyu ni myit mada na mara ai, nga nna, myihtoi Esaia tsun ai ga dik wa na matu byin wa sai. 22 Dai shaloi jang, myi kyaw ai hte n chye shaga ai nat kap ai wa langai mi hpe, shi kaw woi bang mu ai: shi gaw dai wa hpe shamai ya nu ai rai nna, n chye shaga ai wa gaw shaga lu ai hte myi mu lu nu ai. 23 Dai majaw shawa masha ni mau mahka nna, Ndai wa gaw Dawi a kasha rai nga a hka? nga nna tsun shajang ma ai. 24 Hparishe ni mahtang dai hpe na jang, Nat ni a du Bezebula hte n rai yang gaw, ndai wa nat ni hpe shaden kau lu na n rai, nga ma ai. 25 Shanhte a myit mang ai hku chye ya mu ai majaw, shi shanhte hpe tsun mu ai gaw, Dinghku brun ai mungdan shagu gaw hten bya mat na ra ai: gara mare, gara nta raitimung, dinghku bra mat wa yang, hking nga lu na n rai. 26 Satan gaw Satan hpe shaden kau ai rai yang gaw, shi gaw tinang hte hka bra wa nga ai: dai rai taw gaw, shi a mungdan kaning rai nme hking lu na lu ta? 27 Ngai chyawm gaw Bezebula hte sha nat ni hpe shaden kau mawe ai rai yang gaw, nanhte a kasha ni kadai wa hte shaden kau nga ma ta? Dai majaw shanhte gaw nanhte hpe tara dara ai agyi ni tai na mara ai. 28 Karai Kasang a wenyi hte nat ni hpe ngai shaden kau mawe ai rai yang gaw, Karai Kasang a mungdan nanhte kaw du sai rai nga ai. 29 N-gun ja ai wa hpe shawng n gyit kau yang gaw, shi a arai kashun la na, n-gun ja ai wa a nta nhku de kadai shang lu na rai ta? gyit da yang she shi a nta hpe hpya lu na rai nga ai. 30 Ngai hpang maga de n nga ai wa gaw, nye a gumlau maga de rai nga ai: ngai hte kahkyin gumdin n re ai wa gaw, ayai aya rai nga ai. 31 Dai majaw ngai nanhte hpe tsun made ga, yubak hte shatan nhkan ga amyu myu hpe, masha kaw na raw dat kau lu na lam hku nga ai; raitimung, Wenyi hpe shatan nhkan ga, raw dat kau lu na lam n nga ai. 32 Dai Masha Kasha hpe ga hte shut hpyit ai wa kadai hpe mung, mara raw dat kau ya na lam hku nga ai; chyoi pra ai Wenyi hpe ga hte shut hpyit ai wa chyawm gaw, ndai aprat hta rai timung, hpang na aprat hta raitimung, raw dat kau ya ai hkrum lu na n rai. 33 Dai hpun kaja nga ai hte, de a asi mung kaja nga ai, ngu mu: shing n rai, dai hpun n kaja nga ai hte, de a asi n kaja nga ai, ngu mu: kaning rai nme law, hpun hpe gaw tinang a asi hte chye ginhka lu ai. 34 Pu htum amyu ni e, nanhte n hkru nga myit dai mi, kaja ai ga kaning rai tsun lu na myit ta? kaning rai nme law, kraw hta hpring chyat nga ai kaw na, n-gup de tsun nga ai. 35 Kaja ai wa gaw tinang a kaja ai sutdek hta na kaja ai arai shapraw wu ai; n kaja ai wa mahtang gaw, n kaja ai sutdek hta na n kaja ai arai shapraw wu ai. 36 Nanhte hpe ngai tsun made ga, masha ni tsun nga ai, tinang a kaman lila ga yawng hte a majaw, tara dara ai nhtoi hta e, jahpan dan na hkrum na mara ai. 37 Kaning rai nme law, na a ga majaw nang awlaw ai hkrum na ndai: shing n rai, na a ga majaw, dawdan ai hkrum na rin dai, ngu mu ai. 38 Dai shaloi laika ka ai sara ni hte Hparishe ni nkau mi shi hpe htan nna, Sara e, nang dan ai lamik kumla langai mi, anhte mu mayu ga ai, ngu mu ai. 39 Shi htan let shanhte hpe tsun mu ai gaw, N hkru ai hte shut hpyit ai amyu gaw, lamik kumla tam ma ai; myihtoi Yona a lamik kumla hta kaga, hpa lamik kumla mung, shanhte hpe n dan na nme ai. 40 Yona gaw shani masum ya hte shana masum na du hkra, dai nga kaba a kan kata e rawng nga ai hte maren, dai Masha Kasha mung, shani masum ya hte shana masum na du hkra, ga sung ai kata e rawng nga na ra ai. 41 Tara dara ai nhtoi hta, Ninewe masha ni gaw, ndai prat na amyu hte rau rawt wa nna, shanhte hpe dawdan na maru ai: kaning rai nme law, Yona hkaw tsun ai ga a majaw shanhte myit malai lu ma ai: yu mu, ndai yang e, Yona hta grau kaba ai wa nga nga ai. 42 Tara dara ai nhtoi hta, dingda mung na hkawhkam jan gaw, ndai prat na amyu hte rau rawt wa nna, shanhte hpe dawdan na ra ai: kaning rai nme law, shi gaw Shawlumon a hpaji madat na, ga jahtum de na sa du ai: yu mu ndai yang e, Shawlumon hta grau kaba ai wa nga nga ai. 43 Dai n seng ai nat chyawm gaw, masha hta na pru nhtawm, hkraw hkun ai shara hkan e hkawm sa wa nna, sim sa na shara tam wu timung, n mu nu ai. 44 Shaloi shi gaw, Ngai pru kau da se ai nta de, ngai bai nhtang wa na nngai, nga ai: bai du wa yu yang, dai nta gaw asan awan di nna, ye kau ai hte shatsawm da ai hpe, mu nu ai. 45 Shaloi shi nhtang sa nna, shi hta grau n hkru ai nat sanit hpe shaga wa nhtawm, shanhte shang nna dai yang e a rawng nga ma ai; dai rai nna, dai masha a hpang de na asam gaw, shawng de na hta, grau ru wa lu ai: dai hte maren ndai n hkru ai amyu hta byin wa na ra ai, ngu mu ai. 46 Shawa masha ni hpe ga naw tsun nga yang, shi a kanu hte kanau ni gaw, shi hte ga tsun na nga nna shinggan e tsap nga ma ai. 47 Dai rai nna marai langai mi gaw, Yu u, na nnu hte nnau ni, nang hte ga tsun na, shinggan e tsap nga ma ai, ngu wu ai. 48 Htan let shi hte ga tsun ai wa hpe shi tsun wu ai gaw, Ngai nu hte ngai nau ni gaw, kadai ni rai nga ma ta? ngu wu ai. 49 Bai, shi a sape ni hpang de shi a lata ladawn nna, 50 Ngai nu hte ngai nau ni hpe yu mu: sumsing lamu hta nga ai nye Wa a myit hku hkan galaw ai ni kadai mung, ngai nau, ngai jan, ngai nu, rai nga ma ai, ngu nna tsun mu ai.

Mahte 13

13:1 Dai shani jang, Yesu gaw dai nta na pru nhtawm, nawng makau e sa dung nga ai. 2 Masha wunawng wuwa shi hpang de zuphpawng sa wa ma ai majaw, li langai mi hta shi shang dung nga ai rai nna, shawa masha ni mahkra gaw hkingau hta e tsap nga ma ai. 3 Shaloi, lam law law wa ga shadawn hku hte shi shanhte hpe tsun mu ai gaw, Nli gat ai wa gaw nli gat na pru sa wa ai. 4 Gat dat wu yang nkau mi gaw lam makau e hkrat nna, u ni dai hpe sa hta sha kau mu ai. 5 Nkau mi gaw, ga n law ai lung rawk hta e hkrat wa nna, ga n htat ai majaw, ya jang tu pru timung, 6 jan pru katen jang krau mat wa ai rai nna, ru n jung lu ai majaw hkraw mat wa ai. 7 Nkau mi gaw ju hpun nhpang e hkrat nna, ju hpun ni tu kaba wa ai hte, dai hpe lim kau mu ai. 8 Nkau mi gaw ga kaja hta hkrat wa nna, asi si wa ai: nkau mi dang latsa, nkau mi kru shi, nkau mi sumshi si mayat wa ai: 9 na tu ai wa gaw na la u ga, ngu mu ai. 10 Shaloi shi a sape ni sit wa nna, Ndai ni hpe hpa rai ga shadawn hte tsun dan mu ta? ngu nna shi hpe san mu ai. 11 Shi htan nna, Sumsing lamu a mungdan a sung htum ai lam ni hpe chye na shara, nanhte a matu hku nga malit dai; wora ni a matu chye na shara n hku malu ai. 12 Kaning rai nme law, lu ai wa kadai hpe mung naw jat jaw na rai nna, shi law wa na ra ai; n lu ai wa kaw na pyi shi lu ai hpe naw shaw la na ra ai. 13 Dai rai nna, shanhte mu lamu n mu ai hte, na lana n na la nna, n chye na ma ai majaw, ga shadawn hku ngai shanhte hpe tsun dan mawe ai. 14 Shingrai, Esaia tsun ai myihtoi ga gaw shanhte hta dik ang wa sai. Shi gaw, Nanhte na lana n chye na la na mu ai, Yu layu e n mu na mu ai, 15 Kaning rai nme law, ndai amyu gaw, Tinang myi hte n mu lu na hte Na hte n na lu nna, Myit hte n chye na lu mu ga she, Shanhte myit n kayin lu nna, Ngai shanhte hpe n shamai mai lu hkra Shanhte a myit mak nga nna, Shanhte a na lahpang nga ai hte, Shanhte a myi pat nga malu ai, nga ai. 16 Nanhte a myi mu lu ai hte, nanhte a na, na lu nga malit dai majaw, a nga myit dai. 17 Nanhte hpe ngai teng teng tsun made ga, nanhte mu lu ai arai ni hpe myihtoi hte dinghpring ai masha law law wa, mu mayu timung, n mu ma ai; nanhte na lu ai lam ni hpe mung, na mayu timung, n na lu ma ai. 18 Dai rai nna dai nli gat ai ga shadawn hpe madat la mu. 19 Kadai mung, dai mungdan lam hpe na ninglen n chye la yang gaw, dai n hkru ai wa sa du nna, shi a myit hta gat ai nli hpe shaw la kau wu ai: dai gaw lam makau e gat ai nli hpe rai nga ai. 20 Lung rawk hta gat ai nli a lam gaw, dai ga hpe na nna, shaloi jang kabu gara ai myit hte hta la wu timung, 21 kraw hta e ru n jung ai majaw, ladaw mi sha nga nga nhtawm, dai mungga a majaw ru tsang ai hte zingri zingrat hkrum jang, shaloi e myit kataw re ai wa hpe rai nga ai. 22 Ju hpun hta gat ai nli a lam gaw, dai ga hpe na la timung, ndai prat na myit tsang ai hte hkalem kau ai sutgan gaw, dai mungga hpe lim kau nna, asi n si lu ai wa hpe rai nga ai. 23 Ga kaja hta gat ai nli a lam chyawm gaw, dai ga hpe na la nna hta la nu ai hte, gaja wa teng teng asi si nna, nkau mi dang latsa, nkau mi kru shi, nkau mi sumshi jat wa ai wa hpe, rai nga ai, ngu wu ai. 24 Ga shadawn kaga mung, shi shanhte hpe kahtap tsun mu ai gaw, Sumsing lamu a mungdan, hkauna hta nli kaja gat ai wa hte bung nga ai. 25 Masha ni yup pyaw nga yang, gumlau ai wa gaw sa nna, dai mam hta e tsing tum gat bang, nhtawm pru mat wa ai. 26 Ya dai mam maku tu wa nna asi si jang, tsing mungdan pru wa ai. 27 Shaloi nta madu a mayam ni sa du nna, Madu e, na a hkauna hta e nli kaja ai nang gat nu ai n rai ni? rai taw gaw, hpa rai nme tsing tu a ta? ngu mu ai. 28 Shi gaw, Gumlau wa dai hpe galaw nu ai, ngu nna shanhte hpe tsun mu ai. Dai rai nna shanhte gaw, Anhte dai hpe magang kau na, nang hkraw nga n ni? shi hpe ngu mu ai. 29 Shi mahtang, N rai, nanhte tsing hpe baw kau yang gaw, mam hte nawng n baw lawm u ga, dai anga nga u ga. 30 Dai lahkawng yan nmut ta du hkra, rau tu kaba wa mu ga: nmut ta du jang, tsing hpe shawng dan mahkawng nna, nhtan nhtawm wan hta nat kau mu; dai mam hpe chyawm gaw, nye a dum hta e mahkawng da mu, ngu nna mam dan ai ni hpe ngai tsun na mawe ai, ngu mu ai. 31 Ga shadawn kaga mung, shi shanhte hpe kahtap tsun mu ai gaw, Sumsing lamu a mungdan gaw, masha la nna shi a yi hta hkai ai chyinghkrang tum hte bung nga ai. 32 Dai gaw tum abaw shagu hta kaji htum ai tum rai nga timung, kaba wa jang, shatmai lap ni hta grau kaba wa lu ai rai nna, hpun tai nga ai hte ntsa malen na u ni mung, de a lakung lakying ni hta sa dung nga ma ai, ngu mu ai. 33 Ga shadawn kaga mung, shi shanhte hpe tsun mu ai gaw, Sumsing lamu a mungdan gaw, numsha e la nna, muk shadung dang masum hta bang dat wu yang, mahkra hte hpe shawawm dat lu ai matsi hte bung nga ai, ngu mu ai. 34 Shingrai lam shagu Yesu gaw ga shadawn hku hte, shawa masha ni hpe tsun dan mu ai: kaning rai nme law, 35 Nye a n-gup, ga shadawn hte ngai hpaw nna, Ginding aga nnan lat kaw nna, makoi da ai ga hpe ngai htai dan na nngai, nga nna myihtoi tsun ai ga dik wa u ga, ga shadawn hte n rai yang gaw, shi shanhte hpe hpa mung n tsun dan yu ai. 36 Dai hpang shawa masha ni hte shi hka wa nna, dai nta hta e shang mat wa ai.Shaloi shi a sape ni shi kaw sit sa wa nna, Hkauna hta e tu ai tsing a ga shadawn lam, anhte hpe htai dan mi, ngu mu ai. 37 Shi htan nna, Nli kaja gat ai wa gaw, dai Masha Kasha rai nga ai; hkauna gaw, mungkan ga, rai nga ai; 38 Kaja ai nli gaw, dai mungdan a kashu kasha ni rai nga ma ai; tsing gaw, dai n hkru ai wa a kashu kasha ni rai nga ma ai; 39 dai hpe gat ai gumlau wa gaw, Nat rai nga ai; nmut ta gaw, lamu ga htum na aten rai nga ai; mam dan ai ni gaw, lamu kasa ni rai nga ma ai. 40 Dai tsing hpe gumdin la nna wan nat kau ai zawn, lamu ga htum na aten hta e mung, byin na ra ai. 41 Dai masha kasha gaw shi a lamu kasa ni hpe shangun dat na rai nna, shanhte gaw shi a mungdan hta na, myit kataw shangun ai baw hte tara hte n bung ai amu galaw ai ni nlang hte hpe, lata shaw la nhtawm, wanhtung hta kabai bang da na maru ai: 42 dai yang e hkrapngu hkrapngoi ai hte wa udik ai gaw, rai nga ai. 43 Dai shaloi e dinghpring ai ni gaw shanhte a Kawa a mungdan hta e, ajan zawn htoi kabrim na mara ai; na tu ai wa gaw na la u ga. 44 Sumsing lamu a mungdan gaw, ga dachyawk hta e makoi da nna, masha mu hkrup lu ai hte, bai makoi da ai sutgan hte bung nga ai: kabu gara ai myit hte shi wa nhtawm e, shi lu malu hte hpe dut kau nna, ga dachyawk dai hpe mari la wu ai. 45 Bai, sumsing lamu a mungdan gaw, kaja reng ai hkachyi hpe tam nga ai hpaga wa hte bung nga ai: 46 manu kaba ai hkachyi langai mi hpe mu hkrup jang, shi nhtang wa nhtawm e, shi lu malu hte hpe dut kau nna, ga dachyawk dai hpe mari la wu ai. 47 Bai, sumsing lamu a mungdan gaw, nawng hta e kabai bang nna, nga amyu myu hpe magawn la ai sumgawn hte bung nga ai. 48 Dai hpring chyat nga yang, shanhte gaw hkarang de karawt la mu ai rai nna, dung nga let, kaja ai baw hpe mung hta e bang da nna, n kaja ai baw hpe, kabai kau mu ai: 49 Dai hte maren lamu ga htum na aten hta e byin na ra ai: Lamu kasa ni pru sa nna, dinghpring ai ni a kata na, n hkru ai ni hpe lata karan da na mu ai rai nna, 50 wanhtung hta kabai bang kau na maru ai: dai yang e hkrapngu hkrapngoi ai hte wa udik ai gaw rai nga ai. 51 Ndai lam mahkra hte hpe, nanhte chye na da mu ni? ngu nna san mu yang, shanhte gaw, Chye na nga ga ai, ngu mu ai. 52 Bai shi gaw, Dai rai nna sumsing lamu mungdan a matu sape tai sai laika ka ai sara kadai mung, nta madu rai nga ai hte, tinang a sutdek hta na, nnan baw mung dingsa baw mung shapraw ai wa hte bung nga ai, ngu nna shanhte hpe tsun mu ai. 53 Ya, Yesu gaw dai ga shadawn ni hpe tsun ngut jang, dai shara kaw na shi pru mat wa ai. 54 Shi a buga de sa du wa yang shanhte a tara jawng ni hta shanhte hpe sharin shaga ya nga ai; dai rai nna, shanhte gaw myit a mau nga ai hte, Ndai wa gaw, ning re ai hpaji byeng-ya hte daru magam atsam gaw, kanang na lu la wu hka? 55 shi gaw lasama wa a kasha re ai, n rai ni? shi a kanu Mari mying ai hte, shi a kanau ni Yaku, Yosep, Simun hte Yuda rai nga ma ai, n rai ni? 56 shi a kajan ni yawng mung, anhte hte rau nga nga ma ai, n rai ni? dai rai taw gaw, ndai wa gaw, ndai nlang hte kanang na lu la wu hka? nga nna shi a lam myit kataw wa ma ai. 57 Yesu mahtang Myihtoi gaw tinang a buga hte nta hta n rai jang she, arawng lu nga ai, ngu nna shanhte hpe tsun mu ai. 58 Shanhte kamsham ai myit n rawng nga ma ai majaw, dai shara e magam amu law law wa shi n galaw nu ai.

Mahte 14

14:1 Dai aten hta e Herod munggyi Yesu a kajai gumhkawng shiga hpe na lu nna, 2 Ndai wa gaw Baptisma Sara Yawhan rai nga ai: shi gaw si ai ni kaw na rawt wa sai rai nna ning re ai magam amu hpe shachyen ya nga ai, nga nna shi a ali ama ni hpe tsun mu ai. 3 Herod mahtang, shi kanau Hpilip a madu jan Herodia majaw, Yawhan hpe rim gyit la nna, htawng hta e bang da nu ai. 4 Kaning rai nme law, Yawhan gaw, Dai num hpe nang n mai madu na ndai, ngu wu ai rai nna, 5 shi hpe sat kau mayu nu ai raitimung, mung masha ni Yawhan hpe myihtoi zawn nawn da mu ai majaw, shanhte hpe hkrit da mu ai. 6 Ya Herod a shangai nhtoi du jang, Herodia shayi sha dai poi ka-ang e pru ka ai hte Herod hpe myit shapyaw ya wu ai; 7 dai rai nna, hpyi mahpyi hte shi hpe jaw na, ngu nna dagam ai hte ga ndat da wu ai. 8 Dai numsha a kanu shi hpe shatsam wu ai majaw, Ndai ban hta e, baptisma sara Yawhan a baw bang ya e, ngu wu ai. 9 Dai hkawhkam chyawm gaw, yawn la timung, dagam ai ga hte shi hte rau dung sha ai ni a majaw, jaw sa na, ngu dat wu ai: 10 shaloi shi shangun nna, htawng hta e Yawhan a du hpe htau dut wu ai. 11 Shi a baw hpe mung ban hta la pru nna, dai mahkawn hpe ap ya nu ai: shi chyawm gaw, shi a kanu hpang de la wa wu ai. 12 Shi a sape ni mahtang dai moi mang hpe sa hta nna, lup kau nhtawm, Yesu hpe sa tsun dan mu ai. 13 Yesu gaw, dai ga na jang, li jawn let dai yang kaw nna pru mat wa nhtawm, shingran katsi ai shara de lagyim sa mat wa ai: shawa masha ni dai na mu yang, shanhte gaw mare shagu hkan na shi hpang de hkarang hku e hkan nang ma ai. 14 Pru wa yang, masha wunawng wuwa kaba hpe shi mu hkrup nna, shanhte hpe matsan dum ai hte shanhte a machyi makaw hkrum ai ni hpe shamai shatsai ya mu ai. 15 Ya shana de du yang, sape ni shi kaw sit sa wa nna, Ndai shara nam mali rai nga ai hte, ahkying mung lai wa sai: shawa masha ni kahtawng hkan e shahpa sa mari la mu ga, shanhte hpe shabawn dat mu, ngu mu ai. 16 Yesu mahtang, shanhte hpe shabawn shara n nga ai; nanhte nan shanhte hpe sha na jaw mu, ngu nna sape ni hpe tsun wu ai: 17 Shanhte chyawm gaw, Anhte gaw muk manga hte nga lahkawng sha, lu ga ai, ngu mu ai. 18 Shi gaw, Dai hpe ngai hpang de la wa marit, ngu wu ai. 19 Shawa masha ni tsingdu hta hkrawn taw nga mu ga shi hkangda wu ai; shaloi dai muk manga hte nga lahkawng hpe shi la nna, lamu de mada yu let dai hpe shaman ya wu ai hte ahkyep alep nna, muk dai sape ni hpe jaw dat wu ai; sape ni mung shawa masha ni hpe gam jaw mu ai. 20 Shaloi shanhte yawng sha nna hkru kat nga ma ai; ngam ai adaw ahkyep ni lahkawn la yang, mung shi lahkawng hpring dem naw rai nga ai. 21 Dai sha ai ni chyawm gaw, numsha hte ma kaji hpe n hti lawm yang, lasha hkrai hkying manga daram rai nga ma ai. 22 Shaloi jang, Yesu gaw, shawa masha ni hpe garai n shabawn dat yang, sape ni hpe li shajawn nna, shi shawng e wora hkran de rap mat wa shangun mu ai. 23 Shawa masha ni hpe shabawn dat kau nhtawm, akyu hpyi na matu, bum ntsa de shi hkrai lung wa ai: nrim rim rai jang, shi chyu sha dai yang e hti nga ai. 24 Dai li chyawm gaw, stadia law law wa hkarang hte gang wa sai rai nna, dai nbung n sun nga ai majaw, hka leng ni dai hpe kayat shadang mu ai, 25 Ya shana na ahkying ladaw mali hta e, shi gaw nawng ntsa e hkawm let, shanhte hpang de hkan sa nang ai. 26 Dai nawng ntsa e shi hkawm wa ai hpe, sape ni mu mu yang, shanhte kajawng nna, Dai gaw minla rai nga ai, nga nna hkrit gari ai hte marawn ma ai. 27 Shaloi jang Yesu gaw, Myit apyaw sha nga mu; ngai she rai nngai; hkum hkrit nga myit, ngu nna shanhte hpe tsun mu ai. 28 Petru mahtang htan nna, Madu e, nang rai n yang gaw, hka ntsa hku nang kaw sa du lu na, ngai hpe shaga la e, ngu wu ai: 29 shi gaw, Sa rit, ngu wu ai. Dai rai nna Petru gaw li hta na yu hkrat nna, hka ntsa e hkawm let, Yesu hpang de sa wa ai. 30 Raitimung, nbung hpe mu jang shi hkrit nga ai;dai rai nna hka hta lup bang wa jang, shi gaw, Madu e, ngai hpe sai la e, ngu nna jahtau wu ai. 31 Shaloi jang Yesu gaw shi a lata ladawn nna, shi hpe dun la let, Ai n kam ai wa e, hpa majaw nang kam shut nga n ta? ngu nna shi hpe tsun wu ai. 32 Shan gaw dai li hta shang mat jang, dai nbung num mat wa ai: 33 dai li kata e nga ai ni mahtang shi hpe nawku nna, Nang gaw Karai Kasang a Kasha gaja wa teng teng rai nga ndai, ngu mu ai. 34 Ya wora hkran de rap kawt jang, shanhte Genesaret mare de du ma ai. 35 Dai shara e nga ai masha ni shi hpe chye jang, dai mung grupyin a shara magup hkan na machyi makaw hkrum ai ni hpe, shi kaw woi sa bang shangun mu ai rai nna, 36 shi a palawng banbyau hpe sha ahtawk na ahkang hpyi nem mu ai: ahtawk ai ni kadai mung mai mat wa ma ai.

Mahte 15

15:1 Dai shaloi e, Yerusalem mare de na Hparishe ni hte laika ka ai sara ni, Yesu kaw sa du nna, 2 Na a sape ni gaw hpa majaw ji wa ni a ahtung alai tawt kau nga ma ta? shanhte gaw lata n kashin ai nan, muk sha ma ai, ngu mu ai. 3 Shi shanhte hpe htan nna tsun mu ai gaw, Taw, nanhte wa gaw, hpa majaw nanhte a ahtung alai hte, Karai Kasang a ga matsun hpe tawt kau nga myit ta? 4 Kaning rai nme law, Na nwa hte nnu hpe hkungga lara di u; bai Tinang a kanu kawa hpe n hkru ai ga tsun ai wa gaw, teng teng si u ga, nga nna Karai Kasang tsun nga timung, 5 nanhte mahtang gaw, Tinang a kanu kawa hpe, Nang nye a lata na lu la mai ai arai gaw, Karai Kasang a matu kumhpa rai mat sai, nga nna tsun na gaw mai nga ai, ngu kau mu ai: 6 shing nga nna, tinang a kawa hpe n hkungga nga ai; Karai Kasang a ga matsun hpe mung, nanhte a ahtung alai hte nanhte sai kau mu ai. 7 Sawt ai ni e, Ndai amyu gaw, tinang a nten hte ngai hpe hkungga lara rai ma timung, Tinang a myit gaw, ngai hte tsan gang malu ai. 8 Masha ga matsun hku sha sharin shaga nga ma ai majaw, Shanhte kaman lila ngai hpe nawku da mi ai, 9 nga nna, nanhte a lam Esaia tsun ai myihtoi ga ang nga malit dai. 10 Shaloi shawa masha ni hpe shi shaga la nna tsun mu ai gaw, Madat mara nna chye na la mu: 11 n-gup de shang wa ai arai gaw, masha hpe awu asin di kau lu ai n rai; n-gup hta na pru wa ai mahtang gaw, masha hpe awu asin di kau nga ai, ngu wu ai. 12 Shaloi sape ni sit sa nna, Ya tsun ai ga ndai Hparishe ni na jang, shanhte myit na machyi ma ai hpe nang chye nga n ni? ngu nna shi hpe tsun mu ai. 13 Shi htan nna, Sumsing lamu hta nga ai nye Wa n hkai da ai hpun yawng hte gaw, ru hte nawng baw kau ai hkrum na ra ai. 14 Shanhte gaw nga nga mu ga: myi kyaw ninglen lam madun ai ni rai nga ma ai: myi kyaw ai wa gaw, myi kyaw wa hpe lam madun a taw gaw, shan lahkawng gaw nhkun kata de hkrat na mara ai, ngu mu ai. 15 Shaloi Petru gaw, Ndai ga shadawn anhte hpe htai dan mi, ngu nna htan wu ai. 16 Yesu gaw, Ya du hkra nanhte mung, myit n kung nga myit ni? 17 N-gup de shang ai arai yawng hte gaw, kan kata e du nhtawm, hkum tsan ai shara de kabai kau ai hkrum nga ai hpe, nanhte n dum lu mu ni? 18 N-gup hta na pru wa ai mahtang gaw, myit masin hta na byin pru ai rai nna, dai hte gaw masha hpe awu asin di kau wu ai. 19 Kaning rai nme law, myit masin hta na n hkru ai myit mang ai, masha sat na, num shaw na, num shut hpyit na, lagu na, n teng n man ai sakse hkam na hte shatan nhkan ai lam hte gaw byin pru wa ai. 20 Dai hte gaw masha hpe awu asin di kau ai lam rai nga ai; lata n kashin ai hte muk sha na mahtang gaw, masha hpe awu asin di kau wu ai n rai, ngu wu ai. 21 Ya Yesu gaw dai yang na pru wa nna, Turu hte Sidun a mung ginwang hkan e sa du ai. 22 Shaloi, Yu mu, Hkanan amyu numsha langai mi, dai mung a ga jarit de na pru sa nna, Dawi a Kasha, Madu e, ngai hpe matsan dum e law; nye a shayi sha nat e zingri ai grai hkrum nga ai, nga nna jahtau let tsun wu ai. 23 Shi chyawm gaw ga hkaw mi pyi n htan wu ai. Shi a sape ni mung sit sa nna, Shi hpe shabawn kau u; anhte a hpang e shi hkan jahtau nga ai, ngu nna shadut mu ai. 24 Shi htan nna, Israela nta na dam mat wa ai sagu ni a matu sha, ngai hpe shangun dat nngai, nga ai. 25 Dai numsha mahtang gaw, sit sa wa nna, shi hpe nawku let, Madu e, ngai hpe karum e law, ngu wu ai. 26 Shi gaw, kasha ni a shahpa hpe la nhtawm, gwi ni hpe jaw kau na gaw, n sut nga ai, ngu nna htan wu ai; 27 Dai numsha mahtang, Rai nga ai, Madu e; gwi ni gaw tinang a madu a sha ku hta na hkrat ai ayun ayaw hpe sha mai nga ai, nga ai. 28 Dai rai nna Yesu gaw, Numsha e; na a kamsham ai gaw kaba nga lit dai; nang tsaw nga ai hku byin wa lit ga, ngu nna, shi hpe htan wu ai. Dai ahkying kaw nna, shi a shayi sha mai mat lu ai. 29 Bai Yesu gaw dai shara kaw na sat sa wa nna, Galile nawng makau de sa du ai: dai bum ntsa de shi lung wa nna, dai yang e dung nga ai. 30 Shaloi masha wunawng wuwa kaba shi kaw sa du ma ai hte, lagaw hten ai, lata hten ai, myi kyaw ai, n chye shaga ai hte ana amyu myu kap ai masha law law wa hpe, shanhte lahku sa ma ai rai nna, shi a lagaw nhpang e shayu tawn da mu ai: shi shanhte hpe shamai shatsai di mu ai. 31 Dai rai nna, n chye shaga ai ni shaga lu ma ai, lagaw hten ai ni hkawm sa lu ma ai hte, myi kyaw ai ni myi mu lu ma ai hpe, shawa masha ni mu mu yang, shanhte mau mahka nga ma ai rai nna, Israela Karai Kasang hpe shakawn kungdawn mu ai. 32 Shaloi Yesu shi a sape ni hpe shaga la nna, Ndai masha hpung ni hpe ngai matsan dum nga nngai: ya masum ya tup shanhte ngai hte rau nga nga masai rai nna, shahpa hpa mung n nga ma sa lu ai: lam hkan e hki ba htum ai n hkrum mu ga, kawsi nga ma yang ngai shanhte hpe n shabawn dat mayu nngai, ngu mu ai. 33 Sape ni mahtang, Masha nde wa nan hkru kat lu hkra muk ningsan wa, ndai nam mali hta e, kanang na lu la na ga ta? ngu nna shi hpe tsun mu ai. 34 Yesu gaw, Nanhte kaw muk gade wa nga nga a ta? ngu nna shanhte hpe san mu ai. Shanhte gaw, Muk tawng sanit hte nga kaji loi mi sha nga nga ai, ngu mu ai. 35 Shaloi shawa masha ni hpe ga hta dung nga na, shi hkangda nhtawm, dai muk sanit hte nga ni hpe la nna, 36 shakawn ngut jang ahkyep alep di ai hte sape ni hpe jaw mu ai; sape ni mahtang shawa masha ni hpe gam jaw mu ai. 37 Shingrai shanhte yawng sha nna hkru kat nga ma ai hte ngam ai adaw ahkyep ni hpe lahkawn la yang, mung sanit hpring dem rai nga ai. 38 Dai sha ai ni gaw, numsha hte ma kaji hpe n hti lawm yang, lasha hkrai hkying mali rai nga ma ai. 39 Dai shawa masha ni hpe shi shabawn dat nhtawm, li hta shang nna, Magadan ginwang hkan e sa du ai.

Mahte 16

16:1 Shaloi Hparishe ni hte Saduke ni sa du nna, shi hpe chyam dinglik yu let, lamu de na lamik kumla madun dan mi ga, hpyi ma ai. 2 Shi gaw, Shana de e, lamu hkyeng yang gaw, Lamu san na ra ai, nga nna nanhte tsun ga myit dai: 3 bai, jahpawt e rai jang gaw, lamu hkyeng ai hte n san nga ai majaw, Laru marang wa na ra ai, nanhte nga ga myit dai. Shingrai, lamu a man hpe nanhte chye ginhka lu mu ai raitimung ndai prat na kumla ni hpe, n chye ginhka myit dai. 4 N hkru ai hte shut hpyit ai amyu gaw, lamik kumla tam nga ai; raitimung, Yona a lamik kumla hta kaga, hpa lamik kumla mung, shanhte hpe n dan na nme ai, ngu nna tsun mu yang, shi shanhte hpe kau da nna, pru mat wa ai. 5 Bai sape ni gaw wora hkran de rap du yang, muk la gun na hpe malap kau ma ai. 6 Shaloi Yesu gaw, Hparishe ni hte Saduke ni a matsi hpe matsing da nna koi kau mu, ngu nna shanhte hpe tsun wu ai. 7 Shanhte mahtang, Anhte muk n gun nga ga hka, nga nna shada da tsun wa ma ai. 8 Yesu dai hpe hten wu yang, Ai n kam ai ni e, nanhte muk n gun ai hpe tau nna, hpa majaw shada da tsun wa myit ta? 9 Masha hkying manga, dai muk manga hpe sha lu nna, nanhte mung gade naw lahkawn la mu ai hte, 10 masha hkying mali, dai muk sanit hpe sha la lu nna, nanhte mung gade naw lahkawn la lu ai hpe, nanhte n sawn yu ai hte, n dum da mu ai? 11 Muk a lam ngai nanhte hpe n tsun nngai gaw, nanhte hpa rai n dum nga myit ta? Hparishe ni hte Saduke ni a matsi hpe koi kau mu, ngu nna she ngai tsun made ai, ngu wu ai. 12 Dai rai nna, muk hta na matsi hpe n rai, Hparishe ni hte Saduke ni a sharin shaga ai lam koi kau na she, shi tsun nga ai hpe, shanhte chye na mu ai. 13 Ya, Yesu gaw Kesare-Hpilip mare a ginwang hkan e du wa yang, Dai Masha Kasha rai nga ai hpe, masha ni kadai wa rai nga ai, nga nga ma ta? ngu nna shi a sape ni hpe san mu ai. 14 Shanhte gaw, Nkau mi, Baptisma Sara Yawhan; kaga ni gaw, Elia; bai kaga ni gaw, Yeremia, shing n rai myihtoi langai ngai re ai, nga ma ai, ngu mu ai. 15 Bai shi gaw, Nanhte mahtang ngai hpe kadai wa rai nga ai, nga nga myit ta? ngu wu ai. 16 Simun Petru gaw htan nna, Nang gaw Hkristu ngu ai ahkrung nga ai Karai Kasang a Kasha rai nga ndai, ngu wu ai. 17 Dai rai nna Yesu gaw, Bara-Yona Simun e, nang a lu ndai: ashan hte asai gaw, nang hpe dai madun dan ai n rai; sumsing lamu e nga ai nye a Wa gaw dai hpe madun dan da ndai. 18 Bai, nang hpe ngai tsun de ga, Nang Petru rai nga ndai hte, ndai lunghkrung ntsa e nye a Hpung hpe ngai de da na we ai rai nna. Katsan ga na chyinghka ni, dai hpe dang kau lu na n rai. 19 Sumsing lamu na mungdan a sumsaw ni ngai nang hpe ap ya na de ai rai nna, ding hta ga hta nang gyit da mada gaw, sumsing lamu hta mung gyit da ai hkrum na ra ai; dinghta ga hta nang raw maraw gaw, sumsing lamu hta mung, raw kau ai hkrum na ra ai, ngu nna shi hpe htan wu ai. 20 Bai, Hkristu shi rai nga ai gaw, kadai hpe mung n tsun dan mu ga, sape ni hpe ginhtim da mu ai. 21 Dai aten kaw nna Yesu Hkristu gaw, Yerusalem mare sa lu na hte agyi salang ni, hkinjawng agyi ni hte laika ka ai sara ni a lata hta e nni nkri law law wa hkrum nna, sat kau na hpe hkam la nhtawm, masum ya nhtoi hta e, bai sharawt la lu na lam, shi a sape ni hpe madun dan hpang wu ai. 22 Dai rai nna Petru gaw, shi hpe shaga la nna, Madu e, dai nang hta n byin u ga; dai gaw nang hpe galoi n hkra lu na rai, ngu nna shi hpe jet kau wu ai. 23 Shi mahtang kayin nhtawm Petru hpe, Satan e, nye hpang de sit mat wa u; Karai Kasang hte seng ai lam n rai, masha hte seng ai lam hpe sha nang myit nga ndai majaw, nye a matu myit kataw shara nang rai nga ndai, ngu nna tsun wu ai. 24 Bai, Yesu gaw shi a sape ni hpe, Ngai hpang de sa wa mayu ai wa kadai raitimung, tinang a hkum hpe nyet kau lu na rai nna, shi a wudang hpai let, ngai kaw hkan nang ruga. 25 Tinang a asak hpe hkye la mayu ai wa kadai mung, dai sum mat na lu ai; nye a jaw e tinang a asak sum ai wa chyawm gaw, dai hpe mu lu na ru ai. 26 Bai, masha gaw nga yawng nga pra kawm dawm amyat lu la ninglen, tinang asak sum mat yang gaw, shi a matu hpa akyu nga lu ta? masha gaw, hpa gawng malai hkungga hte wa tinang a asak hpe shaw la lu na a ta? 27 Kaning rai nme law, dai Masha Kasha gaw Kawa a hpung shingkang hte shi a lamu kasa ni hte nawng, du na ra ai; dai shaloi e, tinang galaw ai hte maren langai hte langai hpe bai htang na ra ai. 28 Ngai nang hpe teng teng tsun made ga, nang e tsap nga ai ni nkau mi, dai Masha Kasha gaw shi a mungdan hta du wa ai hpe, garai n mu mu gaw, si ai n hkrum na ma ai, ngu mu ai.

Mahte 17

17:1 Ya kru ya lai jang, Yesu gaw, Petru, Yaku hte shi a kanau Yawhan hte hpe shaga la nhtawm, tsaw ai bum ntsa de kaga lak shanhte hpe woi lung mu ai. 2 Shaloi shanhte a man e shi ahpraw asam galai wa ai hte, shi a myiman gaw, jan zawn htoi kabrim nna, shi a hpun palawng nhtoi zawn hpraw tu wa lu ai: 3 dai hta n-ga Mawshe yan Elia mung, shi hte ga tsun let, shanhte a man e danpru ma ai. 4 Shingrai Petru gaw, Madu e, ndai yang e anhte nga na mai nga ai: nang hkraw n yang gaw, nang e sum masum, na a matu langai mi, Mawshe a matu langai mi, Elia a matu langai mi, ngai gap na nngai, ngu nna Yesu hpe tsun wu ai. 5 Dai ga shi naw tsun nga yang, yu mu, htoi tu ai sumwi gaw shanhte hpe ka-up mu ai hte dai sumwi hta na nsen pru nna, Ndai wa gaw ngai sharawng awng ai, ngai tsawra ai ngai Sha rai nga ai: shi a ga madat mara mu, nga ai. 6 Sape ni dai hpe na jang, shanhte myiman dagup nna, nachying hkrit gari nga ma ai. 7 Shaloi Yesu wa nna shanhte hpe ahtawk let, Rawt mu, hkum hkrit nga myit, ngu wu ai. 8 Shanhte dawng yu mu yang, Yesu hta kaga, kadai hpe mung n mu manu ai. 9 Ya dai bum na shanhte yu hkrat wa ma yang, Yesu gaw, Dai Masha Kasha si ai ni kaw na sharawt la ai garai n hkrum hkrum gaw, ndai shingran hpe, kadai wa hpe mung hkum tsun dan myit, ngu nna shanhte hpe hkang dat mu ai. 10 Shaloi shi a sape ni, Dai rai taw gaw, Elia shawng sa du na ra ai, nga nna laika ka ai sara ni hpa majaw tsun nga ma ta? ngu nna shi hpe san mu ai. 11 Shi htan nna, Elia gaw sa du ra ai rai nna, yawng mayawng hte hpe shagrin da lu nu ai: 12 raitimung, ngai nanhte hpe tsun made ai gaw, Elia du boi sai rai nna, shanhte shi hpe n chye mu ai majaw, tinang a myit hte maren di kau manu ai; dai Masha Kasha mung, shanhte a lata hte dai hte maren nni nkri hkrum na ra ai, ngu wu ai. 13 Dai majaw Baptisma Sara Yawhan hpe lakap nna, shi tsun nga ai gaw, sape ni chye na mu ai. 14 Ya shawa masha ni hpang de wa du ma yang, masha langai mi shi kaw sit sa nna, lahput hput di let, Madu e, ngai sha hpe matsan dum ya e; shi mamu mu ai rai nna, atsu atsam grai hkrum nga ai: 15 law law lang wa wan hta mung, law law lang wa hka hta mung, shi kataw bang bang re ai: 16 na a sape ni hpang de ngai shi hpe woi wa lu timung, shanhte n shamai lu mu ai, ngu mu ai. 17 Yesu htan nna Makam masham n rawng ai hte nhtan shai ai amyu e, ngai nanhte hte rau gaten du hkra nga nga lu na rai ta? gaten du hkra, nanhte hpe sharang nga lu na rai ta? ngai hpang de shi hpe woi sa marit, ngu wu ai. 18 Shaloi Yesu shi hpe daru kau wu ai rai nna, dai nat gaw shi kaw na pru mat wa ai; dai ahkying kaw nna dai ma gaw mai mat lu ai. 19 Dai hpang sape ni hkrai sha Yesu hpang de sit sa wa nna, Anhte gaw dai nat hpe hpa majaw n shaden kau lu gaw ta? ngu mu ai. 20 Shi gaw, Nanhte ai n kam myit dai majaw, n di lu mu ai; nanhte hpe ngai teng teng tsun made ai gaw; Kamsham ai myit chyinghkrang tum daram nanhte rawng nga myit yang gaw, ndai bum hpe, Wora de htawt sit mat u, ngu nna nanhte tsun mu yang, dai htawt sit mat na ra ai: nanhte n di lu na amu hpa mung n nga na re ai, ngu nna shanhte hpe tsun mu ai. 22 Ya, Galile mung hta shanhte wa zup ma yang, Yesu gaw, Dai Masha Kasha hpe masha ni a lata hta ap kau ai hkrum na aten ni magang wa ra ai: 23 shanhte shi hpe sat kau na maru ai rai nna, masum ya nhtoi hta e sharawt la ai shi hkrum na ra ai, ngu nna shanhte hpe tsun wu ai; dai rai nna, shanhte nachying myit yawn nga ma ai. 24 Bai, shanhte Kaperna-um de wa du ma yang, nawku Htingnu na alu lahkawn ai ni gaw Petru kaw sa du nna, Nanhte a sara gaw dai shekela chyen mi n bang ga a ni? ngu mu ai. 25 Shi gaw, Bang ga ai, ngu wu ai. Ya Petru nta hta shang wa yang, Yesu shi hpe hkap tsun nna, Simun e, nang kaning rai myit da wu ta? ga ntsa hkawhkam ni, kang hte hkansi kadai kaw na hta ma ta? tinang kashu kasha ni kaw na hta ma ni? shing n rai, yu maya ni kaw na hta ma ni? ngu wu ai. 26 Shi gaw, Yu maya ni kaw na hta ma ai, ngu wu yang, Yesu gaw, Dai rai taw gaw, kashu kasha ni lawt lu ma ai: 27 raitimung, anhte a majaw shanhte myit n kataw mu ga, nawng de sa nna, nga myek jahkrat bang u; shawng lu ai nga hpe shaw la nhtawm, n-gup mahka yang, shekela pa mi nang mu na ru ai: dai hpe la nna, ngai hte na a matu shanhte hpe ya u, ngu nna shi hpe tsun wu ai.

Mahte 18

18:1 Dai ahkying hta e sape ni gaw Yesu hpang de sa du nna, Sumsing lamu a mungdan hta kadai wa mahtang grau kaba nga a ta? ngu nna san mu ai. 2 Dai rai nna shi gaw ma kaji langai mi hpe shaga la ai hte, shanhte a ka-ang e shatsap tawn nhtawm, 3 Nanhte hpe ngai teng teng tsun made ai gaw, nanhte myit n kayin nna, ma kaji zawn n tai myit yang gaw, sumsing lamu a mungdan hta, nanhte n shang lu na myit dai. 4 Ndai ma kaji zawn, tinang a myit shanem ai wa kadai raitimung, sumsing lamu a mungdan hta, grau kaba ai wa tai na ra ai. 5 Ndai ma kaji zawn re ai wa langai mi hpe, nye a amying hte hkap la ai wa kadai mung, ngai hpe hkap la nga ai. 6 Ngai hpe kamsham nga ai, ndai ma kaji ni hta na langai mi hpe, myit kataw shangun ai wa kadai mung, shi a du hta htumrin lung kaba noi nna, nawng na sung htum ai shara de jahkrat kau na gaw, ging nga ai. 7 Myit kataw shara nga nga ai majaw, mungkan ga na ni dingnye lu ma ai: myit kataw shara n nga hkra gaw, n rai lu ai; raitimung, myit kataw shara shabyin dat ai wa gaw, dingnye lu ai. 8 Na a lata, shing n rai, na a lagaw nang hpe myit kataw shangun n yang gaw, dai hpe kahtam dut kabai kau u: lagaw lata hkum hkum re ai hte, htani htana wan hta jahkrat kau ai hkrum na hta, hkum daw hten ai hte asak hkrung ai de shang na gaw, grau mai nga ai. 9 Na a myi nang hpe myit kataw shagun n yang gaw, dai hpe malawk kabai kau u: myi lahkawng maga hkum ai hte, ngarai mung na wan hta jahkrat kau ai hkrum na hta, myi maga sha nga ai hte asak hkrung ai de shang na gaw, grau mai nga ai. 10 Dai ma kaji langai mi hpe pyi nanhte n gawn n sawn n di kau myit ga, sadi nga mu: nanhte hpe ngai tsun made ga, Sumsing lamu kata e, shanhte a lamu kasa ni gaw, sumsing lamu na nye Wa a myiman hpe, galoi mung a mada nga ma ai. 12 Nanhte kaning ngu myit da mu ta? masha langai ngai sagu latsa lu nna, dai hta na langai mi dam mat yang, dai jahku shi jahku hpe bum lang hkan e shi tawn da nhtawm, dam mat ai hpe sa tam ga ai, n rai ni? 13 Dai hpe mu hkrup jang, n dam ai sagu jahku shi jahku a matu kabu gara ai hta, dai langai sha a matu grau nna kabu gara nga ai, ngai teng teng nanhte hpe tsun made ai. 14 Dai hte maren, ndai ma kaji langai mi hpe pyi jahten kau ai hkrum na gaw, sumsing lamu hta nga ai nye Wa gaw, n hkraw nga ai. 15 Na nhpu nnau wa nang hpe shut hpyit kau yang gaw, shi hpang de sa nhtawm, nan lahkawng hkrai chyaw rai da nna, shi a mara hpe madun u: na a ga hpe madat la a yang gaw, na nhpu nnau wa hpe nang mawai la lu nu ai. 16 Na a ga hpe n madat la yang gaw, marai langai lahkawng hpe naw shaga la nna, hpa hku hpa lam raitimung, sakse lahkawng masum a n-gup ga hte dawdan ya mu. 17 Shanhte a ga n madat hkraw a yang gaw, dai Hpung hpe sa shana ya mu: dai Hpung hpe mung n madat hkraw a yang gaw, tara maigan wa hte kang hta ai wa zawn, na a man e shi rai u ga. 18 Ngai nanhte hpe teng teng tsun made ai gaw, Dinghta ga hta nanhte gyit da mada gaw, sumsing lamu hta mung, gyit da ai hkrum na mara ai: dinghta ga hta nanhte raw maraw gaw, sumsing lamu hta mung, raw kau ai hkrum na mara ai. 19 Bai, nanhte hpe ngai tsun made ga, Nanhte hta na marai lahkawng, dinghta ga hta e myit hkrum da ai hte hpa lam hpe mung hpyi mu yang gaw, sumsing lamu e nga ai nye Wa gaw, shan a matu dai hpe shatup ya na mu ai. 20 Kaning rai nme law, marai lahkawng masum, nye a mying hpe gang nna zuphpawng nga ma yang gaw, dai yang shanhte a ka-ang e ngai mung lawm nga nngai, ngu mu ai. 21 Shaloi Petru shi kaw sit sa nna, Madu e, nye hpunau wa ngai hpe bai shut shut rai yang gaw, ngai gade lang shi a mara raw kau nga lu na rai ta? sanit lang du hkra rai ni? ngu wu ai. 22 Yesu gaw, Sanit lang du hkra sha n rai; sanit shi e htam sanit lang du hkra, mai rai nga ai, ngai nang hpe tsun de ai, ngu wu ai. 23 Dai rai nna sumsing lamu a mungdan gaw, shi a mayan ni hpe, ga jahpan la mayu ai hkawhkam wa langai mi hte bung nga ai. 24 Ga jahpan la nga a yang, gumhpraw mun mi hka kap ai masha langai mi hpe, shi kaw woi sa mu ai. 25 Hka wa na, shi hpa mung n lu ai majaw, shi hkum, shi a madu jan, shi a kasha ni mung, shi lu malu yawng hte hpe mung, dut kau nna hka wa u ga, nga nna shi a madu hkangda nga ai. 26 Dai majaw mayam wa gaw, lahput hput di da nna shi hpe nawku let, Ngai hpe matsan naw dum e law, ngai mahkra nang hpe wa na de ai, ngu wu ai. 27 Dai rai nna, mayam a madu gaw shi hpe matsan dum nna, dat dat wu ai hte, shi a hka raw kau ya wu ai. 28 Shaloi dai mayam wa pru nna shi kaw peksan latsa sha hka kap ai mayam manang langai mi hpe hkrum jang, shi hpe dun la ai hte shi du hpe gra chyit di nna, Nye hka ya wa e, ngu wu ai. 29 Dai majaw mayam manang wa gaw lahput hput di da nna, Ngai hpe matsan naw dum e law, ngai nang hpe wa na de ai, ngu nna hpyi nem wu ai. 30 Shi mahtang n hkraw wu ai rai nna, hka wa kau ai aten du hkra, htawng hta e shi hpe jahkrat da wu ai. 31 Ya, shi a mayam manang ni dai hpe mu hkrup mu yang, shanhte nachying myit yu machyi ya mu ai rai nna, dai byin mabyin hte shanhte a madu hpe wa shana da mu ai. 32 Shaloi jang shi a madu gaw shi hpe shaga la nna, N hkru ai mayam e, nang ngai hpe hpyi nem ndai majaw, nang hta kap ai hka yawng, ngai raw kau ya sade ai: 33 ngai nang hpe matsan dum de ai hte maren, na a mayam manang hpe mung, nang matsan mai dum ndai, n rai ni? ngu wu ai. 34 Shi a madu mung masin pawt nna, shi hka wa kau ai aten du hkra, mang galang ni a lata hta shi hpe ap kau wu ai. 35 Shingrai nanhte hta na kadai wa raitimung, tinang a hpunau wa mara hpe myit masin yawng hte n raw kau ya myit yang gaw, sumsing lamu na nye Wa mung, nanhte hpe tai na marin dai, ngu wu ai.

Mahte 19

19:1 Ya, ndai ga hpe Yesu tsun shangut ai hpang, shi Galile mung na pru wa nhtawm, Yawdan hka wora hkran na Yuda mung a ga jarit de sa du ai. 2 Masha wunawng wuwa kaba shi kaw hkan nang ma ai rai nna, shi dai yang e shanhte hpe shamai shatsai ya mu ai. 3 Shaloi Hparishe ni shi kaw sa du nna, shi hpe chyam dinglik yu let, Hpa mara hpe mung hkan nna, tinang a madu jan hpe shabawn kau na, mai nga a ta? ngu yu mu ai. 4 Shi gaw, Shawng nnan e hpan da ai wa gaw, lasha yan numsha hpe hpan da mu ai rai nna, 5 De a majaw lasha gaw shi a kanu yan kawa hpe kau da nhtawm, madu jan hte kanawn nna, shan lahkawng gaw hkumshan langai sha tai lu na mara ai, nga nna shi tsun ai ga hpe nanhte n hti yu myit ni? 6 Dai majaw shan gaw, lahkawng rai nga ma ai n rai, hkumshan langai sha rai nga ma ai. Dai rai nna, Karai Kasang matut da nu ai hpe, masha gaw n jahka kau u ga, ngu nna htan wu ai. 7 Bai shanhte gaw, Dai rai taw, jahka ai laika jaw nna, shi hpe shabawn kau lu na, nga nna, hpa majaw Mawshe hkangda nga a hka? ngu mu ai. 8 Shi gaw, nanhte a myit ja nga malit dai majaw, tinang a madu jan hpe shabawn kau na ahkang, Mawshe jaw myit dai; raitimung, shawng npawt kaw nna shing n nga ai. 9 Nanhte hpe ngai tsun made ga, Hpye ai lam hta kaga, tinang a madu jan hpe shabawn kau nhtawm, num kaga hpe hkungran la ai wa kadai mung, num shaw ai wa tai nga ai, ngu nna shanhte hpe tsun wu ai. 10 Dai rai nna sape ni gaw, tinang a madu jan hte madu wa a lam dai hku rai nga yang gaw n hkungran yang mahtang grau mai nga ai, ngu mu ai. 11 Shaloi shi shanhte hpe tsun mu ai gaw, Masha mahkra dai ga hpe hkam nga lu ma ai. n rai; hkam nga lu na chyeju lu la ai ni sha, hkam nga lu ma ai. 12 Kaning rai nme law, masha nkau mi gaw kanu a hkritung nna la chyasi tai nga ma ai; la chyasi nkau mi gaw, masha a lata hte la chyasi tai mat ma ai; la chyasi nkau mi gaw, sumsing lamu a mungdan majaw tinang a hkum hpe chyasi kau mu ai: dai ga hpe hkam lu ai wa, hkam nga u ga, ngu mu ai. 13 Shaloi, ma kaji ni a ntsa e lata mara da nna, akyu hpyi ya mu ga, shi hpang de shanhte hpe woi sa mu ai: sape ni mahtang shanhte hpe hkap daru kau mu ai. 14 Yesu chyawm gaw, Ma ni hpe ngai hpang de sa na ahkang jaw nna shanhte hpe hkum ban shadang myit; kaning rai nme law, sumsing lamu a mungdan gaw dai zawn re ai ni a mungdan rai nga ai, ngu mu ai. 15 Shaloi shanhte a ntsa e shi lata mara da nhtawm, dai shara na pru mat wa ai. 16 De a hpang e, yu mu, marai langai mi shi kaw sa du nna, Sara e, n htum nwai asak lu la hkra, kaja ai hpa baw ngai mai galaw na rai ta? ngu yu wu ai. 17 Shi gaw, Kaja ai ngu mai ai lam, nang hpa rai ngai hpe san yu n ta? Kaja ai wa langai mi nga nga ai: nang nan asak hkrung ai de shang mayu n yang gaw, jep ai tara hpe hkan nang nga u, ngu nna shi hpe tsun wu ai. 18 Dai wa gaw, Gara tara hpe mahtang rai ta? ngu wu ai. Yesu gaw, Masha hkum sat, masha num hkum shaw, hkum lagu, n teng n man ai sakse hkum hkam; 19 nnu yan nwa hpe hkungga lara di u; na a htingbu wa hpe na a hkum hte maren tsawra nga u, ngu wu ai. 20 Dai shabrang wa gaw, Dai yawng mayawng hte hpe ngai hkan shatup se ai: hpa mahtang ngai naw ra nga n ta? ngu nna shi hpe tsun wu ai. 21 Shaloi Yesu gaw, Nang dinghpring mayu nga n yang gaw, wa su, na a arai ni hpe dut kau nna, matsan mayan ni hpe karan jaw u; shingrai jang, sumsing lamu ntsa e nang sutgan lu na rin dai: ngai kaw mung sa hkan nang rit, ngu nna shi hpe tsun wu ai. 22 Dai shabrang wa gaw dai ga na jang, myit yawn la let byawn hprang rai mat wa ai: kaning rai nme law, shi arai law law lu su ai wa rai nga ai. 23 Dai rai nna Yesu gaw shi a sape ni hpe, Ngai nanhte hpe teng teng tsun made ga, sut su ai wa gaw, sumsing lamu a mungdan hta nachying wa shang yak nga ai. 24 Bai, ngai nanhte hpe tsun made ga, Sutgan lu ai wa gaw Karai Kasang a mungdan hta shang loi ai hta, gawla-u gaw samyit na hku gale na grau loi nga ai, ngu nna tsun wu ai. 25 Sape ni dai ga na ma yang, nachying myit mau mat ai hte Dai rai taw gaw, kadai wa mi hkyehkrang la ai kaw du lu na a ta? nga ma ai. 26 Yesu mahtang shanhte hpe mada yu nna, Dai amu hpe masha gaw dang di lu ai n rai; Karai Kasang mahtang gaw, yawng mayawng dang di lu ai, ngu mu ai. 27 Shaloi Petru htan nna, Yu u, anhte gaw arai yawng mayawng hpe kau da nna, nang kaw hkan nang saga ai; dai rai nna anhte hpa lu la na rai nga ga ta? ngu wu ai. 28 Yesu gaw, Nanhte hpe ngai teng teng tsun made ga, dai Masha Kasha gaw shi a arawng sadang a tingnyang hta e dung nga yang, bai shagai wa ai aten hta e ngai kaw hkan nang nga ai ni, nanhte mung, tingnyang shi lahkawng hta dung lawm na marin dai rai nna, Israela a amyu shi lahkawng hpe tara dara lu na maru ai. 29 Nye amying a matu mara, nta, kahpu kanau, kajan, kanu kawa, kashu kasha hte yi hkauna hte hpe kau da ai wa kadai raitimung, htam law law wa lu la nna, htani htana asak a sali wunli hkam la na ru ai. 30 Raitimung shawng na ni law law wa hpang hkrat na mara ai; hpang hkrat ai ni mahtang shawng na mara ai.

Mahte 20

20:1 Kaning rai nme law sumsing lamu a mungdan gaw, tsabyi sun hta amu galaw ai masha saw bang na, jahpawt jau jau e pru sa wa ai nta madu hte bung nga ai. 2 Dai wa gaw, lani mi hta gumhpraw lap mi jaw sa na, ngu nna amu galaw ai ni hte bawng jahkut nhtawm, tsabyi sun de shanhte hpe shangun dat mu ai. 3 Bai ahkying masum hta daram shi pru sa nna, gat hkan e kaman tsap nga ai masha kaga hpe mu hkrup yang, shi gaw, 4 Nanhte mung dai sun de sa wa ma su; ging ram ai hte maren ngai nanhte hpe jaw na made ai, ngu nna shanhte hpe tsun mu ai. Shaloi shanhte sa wa ma ai. 5 Bai ahkying kru hte ahkying jahku hta e daram, shi pru sa nna dai hte maren di mu ai. 6 Ya ahkying shi langai hta daram, bai pru sa yang, tsap nga ai masha kaga hpe shi mu hkrup nna, Nanhte hpa rai nme, nang e shani tup kaman sha tsap nga myit ta? ngu nna shanhte hpe san mu ai. 7 Shanhte gaw, Kadai mung anhte hpe n saw mi ai, ngu mu ai. Shi gaw, Nanhte mung dai sun de sa wa ma su, ngu mu ai. 8 Ya shana de rai jang, dai sun madu gaw, Amu galaw ai ni hpe shaga la nhtawm, hpang jahtum shang ai ni kaw nna, shawng nnan shang ai ni gu hkra shabrai jaw u, ngu nna shi a hpareng wa hpe tsun da wu ai. 9 Shaloi ahkying shi langai e shang ai ni sa nna, gumhpraw lap lap gu hkra lu la ma ai. 10 Shawng shang ai ni du yang, shanhte grau nna lu la na ga ai, nga nna myit ma timung, shanhte mung gumhpraw lap lap sha lu la shajang ma ai. 11 Shingrai lu la ma ai hpang shanhte gaw, 12 Hpang jahtum shang ai ndai ni gaw hkying mi sha chyang ma timung, dai ni tup lit gunhpai ai hte anhte jan ja hkrum sha ai ni hte maren, nang shanhte hpe di mu ai, ngu nna nta madu hpe angun aput mu ai. 13 Shi mahtang shanhte hta na langai mi hpe, Jinghku wa e, ngai nang hpe maw sha de ai n rai: gumhpraw lap mi jaw na ngu nna, nang ngai hte bawng hkut nit dai, n rai ni? 14 Nang hte seng ai hpe la wa su: hpang shang ai wa hpe nang hte maren jaw na ngai ra nngai. 15 Nye arai hpe ngai di mayu ai hte maren, n mai di a ni? Ngai mai kaja nga nngai majaw, na a myi akrawn nga lit ni? ngu nna htan wu ai. 16 Dai hte maren, hpang hkrat ai ni, shawng na mara ai; shawng nga ai ni mahtang, hpang hkrat na mara ai, ngu wu ai. 17 Bai, Yesu gaw Yerusalem de lung wa magang nga yang, dai sape shi lahkawng hte hpe hkrai sha shi shaga la nna, lam hkan e shanhte hpe tsun mu ai gaw, 18 Yu mu, Anhte Yerusalem mare de lung wa nga ga ai: dai Masha Kasha gaw hkinjawng agyi ni hte laika ka ai sara ni a lata hta ap kau ai hkrum na ra ai rai nna, shanhte shi hpe si na lam dawdan na hte, 19 asawng asang, anu kayat ai hte wudang hta jen da hkrum na matu, maigan amyu ni a lata de ap kau na mara ai; masum ya nhtoi hta e, bai sharawt la ai hkrum na ra ai, ngu mu ai. 20 Dai shaloi e, Zebedi a kasha yan a kanu gaw, shi kasha yan hte rau, shi kaw sit sa nna nawku let shi hpe lama ma hpyi wu ai. 21 Shi gaw, Nang hpa mi ra nga n ta? ngu wu ai. Dai num gaw, Ndai ngai sha yan gaw, na a mungdan hta e na hkra maga de langai mi, pai maga de langai mi, dung nga lu na ahkang jaw u, ngu wu ai. 22 Yesu gaw, Nanhte hpa hpyi nga ai hpe, nanhte n chye myit dai; ngai lu magang nga ai gawm hpe, nanhte lu lu na rai nga myit ni? ngu nna htan wu ai. Shanhte gaw, Anhte rai lu na ga ai, ngu mu ai. 23 Bai shi gaw, Nye a gawm hpe nanhte gaja wa lu na rai nga myit dai; raitimung, nye a hkra maga pai maga de dung nga lu na, ngai ahkang n jaw lu nngai: dai gaw, nye a Wa lajang da ya ai ni a matu mara sha rai nga ai, ngu nna shanhte hpe tsun wu ai. 24 Ya, dai ga hpe kaga sape shi na mu yang, shanhte dai shan nau hpe myit yu kahtet mu ai. 25 Yesu mahtang shanhte hpe shaga la nna, Maigan amyu ni a du ni gaw, shanhte a ntsa e reng nga ma ai hte daru magan re ai ni gaw shanhte a ntsa e ahkang lu ma ai hpe, nanhte chye nga myit dai. 26 Nanhte hta chyawm gaw, shingrai na nrai: nanhte hta grau mayu ai wa kadai raitimung, nanhte a ali ama tai u ga: 27 nanhte hta baw tai mayu ai wa kadai raitimung, nanhte a mayam tai u ga: 28 kaning rai nme law, dai Masha Kasha wa pyi, shangun ma hpe yam sha na nga du sa ai n rai; shangun ma a amu hpe galaw daw ya na hte, masha law law a matu mara, shi a asak hpe gawng malai jahpu shatai ya na nga nna du sa ai, ngu mu ai. 29 Ya Yerihko mare na shanhte pru wa ma yang, masha wunawng wuwa kaba shi kaw hkan nang ma ai. 30 Shaloi, yu mu, myi kyaw ai masha lahkawng, dai lam makau e dung nga ma ai rai nna, Yesu lai sa wa ai hpe na ma yang, shan gaw, Dawi a Kasha, Madu e, an hpe matsan dum la mi law, ngu nna jahtau mu ai. 31 Shawa masha ni gaw, shan atsin sha nga mat mu ga, jet kau mu ai. Shan mahtang, Dawi a Kasha, Madu e, an hpe matsan dum la mi law, ngu nna grau jahtau mu ai. 32 Shaloi Yesu tsap da nna shan hpe shaga la ai hte, Ngai nan a matu hpa di ya na, nan ra nga myit ta? ngu wu ai. 33 Shan gaw, Madu e, an a myi hpaw wa ma li ga, ngu mu ai. 34 Shaloi Yesu shan hpe matsan dum nna, shan a myi hpe ahtawk ya mu ai; shaloi jang, shan myi mu wa nna, shi kaw hkan nang ma ai.

Mahte 21

21:1 Ya, shanhte gaw Yerusalem de ni wa nna, Tsanlun bum hta htawng ai Bethpage kahtawng de du ma yang Yesu gaw sape lahkawng shangun dat nna, 2 Nan a shawng de na kahtawng de shang ma su; shaloi e dun tawn da ai lawze kanu hte de a kasha hpe nan mu na myit dai: dai yan hpe raw nhtawm, ngai hpang de dun wa marit. 3 Masha langai ngai nan hpe lama ma tsun a yang gaw, nan mahtang, Dai Madu ndai yan hpe ra ai da, ngu nna htan mu; shaloi jang, dai yan hpe dat dat na ra ai, ngu nna shan hpe tsun dat mu ai. 4 Dai lam chyawm gaw, myihtoi wa a ga dik wa u ga majaw byin wa ai. 5 Shi gaw, Ziun shayi sha hpe ning ngu mu: Yu u, na a Hkawhkam wa gaw, Sumnung ai myit rawng nna, lawze a ntsa e, Rai sa, lawze kanu a kasha ntsa e jawn let, nang kaw du ra ai, nga ai. 6 Dai sape yan mahtang sa nhtawm, Yesu shan hpe hkang dat mu ai hte maren galaw ma ai rai nna, dai lawze kanu hte kasha hpe dun wa ma ai; 7 dai yan a ntsa e shanhte hpun nba mara nna, de a ntsa e shi jawn wu ai. 8 Dai masha wunawng na malaw maga na ni, tinang a hpun nba ni hpe dai lam hta e nep ma ai; kaga hte gaw, hpun na lakung lakying kran la nna, dai lam hkan e nep ma ai. 9 Shi a shawng e sa wa ai hte, hpang de hkan nang ai masha wunawng ni gaw jahtau ma ai rai nna, Dawi a Kasha kaw, Hawsanna, rai wa u ga; Madu a amying ningsang hte du sa ai wa gaw, a nga ai law! Tsaw Htum ai shara e, Hawsanna, rai wa u ga, nga ma ai. 10 Ya, Yerusalem hta shang bang wa yang, mare ting kabring kabrawng rai wa nna, Ndai wa gaw, kadai rai nga a ta? nga ma ai. 11 Shawa masha ni mahtang, Ndai wa gaw, Galile mung Nazaret mare na, Yesu ngu ai myihtoi wa rai nga ai, nga shajang ma ai. 12 Dai hpang Yesu gaw nawku Htingnu de shang nna, dai Htingnu kata e rai dut rai mari ai ni hpe shaden kau mu ai rai nna, gumhpraw byan ya ai ni a ku ni hte, hkrudu dut ai ni a punghkum ni hpe, kanawng kadawng kau ya nhtawm, 13 Nye a nta hpe akyu hpyi ai nta ngu na mu ai, nga nna ka da nga timung, nanhte gaw dai hpe damya lungpu shatai myit dai, ngu nna shanhte hpe tsun mu ai. 14 Myi kyaw ai ni hte lagaw hten ai ni gaw, dai Htingnu kata de shi kaw du ma ai rai nna, shi shanhte hpe shamai shatsai wu ai. 15 Hkinjawng agyi ni hte laika ka ai sara ni chyawm gaw, shi galaw ai mauhpa amu hte, Dawi a Kasha kaw, Hawsanna rai wa u ga, nga nna Htingnu kata hta jahtau ai ma ni hpe mu mu yang, shanhte myit yu kahtet ma ai rai nna, Ndai ni tsun ai ga hpe nang na da nu ni? ngu nna shi hpe san mu ai. 16 Yesu gaw, Ngai na nga nngai, ma chyangai hte chyu chyu ai ni a n-gup hta mahkawn mangoi ai ga hpe nang shangut da nu ai, nga nna rawng ai ga hpe, nanhte galoi n hti yu myit ni? ngu nna shanhte hpe tsun mu ai. 17 Shaloi shi shanhte hpe kau da nna, dai mare na pru wa nhtawm, Behtani kahtawng de sa du ai hte dai yang e shana shalai kau wu ai. 18 Ya, hpang jahpawt e, dai mare de bai wa yang, shi kawsi nga ai. 19 Shaloi lam makau e tu ai maihpang hpun langai mi mu wu yang, dai de shi sa nna, dai hta e alap sha mu wu ai majaw, shi gaw, Ya kaw nna prat dingsa e, nang hta asi n si n ga, ngu nna tsun ai: maihpang hpun gaw dai ahkring sha e hkraw kyip mat wa ai. 20 Sape ni mahtang dai hpe mu jang, mau mat ma ai rai nna, Dai maihpang hpun gaw kaning rai nme, ahkring sha hkraw kyip mat wa a hka? ngu mu ai. 21 Yesu gaw, Nanhte hpe ngai teng teng tsun made ga, Nanhte kamsham ai myit rawng nna, kam shut ai hpa mung n lawm yang gaw, ndai maihpang hpun hta byin wa ai hta n-ga, nanhte galaw lu na hte, ndai bum hpe, Nang baw mat nna, nawng hta e htawt bang mat u, ngu nna nanhte tsun mu yang gaw, dai byin na ra ai. 22 Dai hta kaga, kamsham ai myit hte nanhte hpyi mahpyi mahkra hpe, nanhte lu la lu na maru ai, ngu nna shanhte hpe htan wu ai. 23 Bai, shi gaw nawku Htingnu hta wa shang nna, sharin shaga nga a yang, hkinjawng agyi ni hte mung masha ni a agyi salang ni shi kaw sit sa nna, Nang gaw hpa ahkang hte, ndai hte hpe galaw nga n ta? ndai ahkang nang hpe kadai jaw a ta? ngu mu ai. 24 Yesu gaw, Ngai mung, ga langai mi nanhte hpe san yu made ga; de a lam nanhte htan myit yang gaw, hpa ahkang hte ndai hte hpe ngai galaw nga nngai gaw, nanhte hpe tsun dan na made ai: 25 Yawhan a baptisma lam gaw gade nna rai a ta? lamu de na, rai ni? shing n rai, masha hta na rai ni? ngu nna shanhte hpe htan wu ai. Shanhte mahtang shada da bawng nna, Lamu de na re ai, anhte ngu gaw yang, Dai rai yang nanhte hpa rai shi hpe n kam myit ta? nga nna shi anhte hpe htan na ra ai: 26 bai, Masha hta na re ai, ngu yang, mung masha ni hpe anhte hkrit shara nga ga ai; kaning rai nme law, Yawhan myihtoi rai nga ai hpe, nlang hte gaw kam nga ma ai, nga shajang ma ai. 27 Dai rai nna shanhte Yesu hpe, Anhte n chye gaw ai, ngu nna htan mu ai. Shi mung, Ndai amu ni hpe hpa ahkang hte galaw nngai gaw, ngai mung nanhte hpe n tsun dan na nngai, ngu nna shanhte hpe tsun wu ai. 28 Raitimung, nanhte kaning ngu myit da myit ta? Masha langai mi shadang sha lahkawng lu ai: kasha alat hpang de shi sa nna. Sha e, dai ni tsabyi sun de bungli sa galaw su, ngu wu yang, 29 shi gaw, Sa na nngai, Madu e, nga ai raitimung, n sa mat ai. 30 Bai, kasha shadoi kaw shi sa nna, dai hte maren tsun wu ai. Shi mahtang, Ngai n sa na nngai, nga ai raitimung, myit malai bai lu nna sa ai. 31 Dai yan hta na kadai wa mahtang kawa a myit hkan shatsup lu a ta? ngu nna san wu ai. Shanhte gaw, Kasha shadoi mahtang rai nga ai, ngu mu ai.Yesu gaw, Ngai nanhte hpe teng teng tsun made ai gaw, Kang hta ai ni hte shawa num ni, nanhte a shawng e, Karai Kasang a mungdan hta shang shang rai ma ai. 32 Kaning rai nme law, Yawhan gaw dinghpring ai lam hpe hkan let, nanhte kaw du sai raitimung, nanhte shi hpe n kam mu ai; kang hta ai ni hte shawa num ni chyawm gaw, shi hpe kamsham ma ai: nanhte mahtang dai hpe mu myit timung, shi hpe kamsham na matu, myit malai bai lu na myit dai n rai. 33 Ga shadawn kaga hpe naw madat la mu; Nta madu langai mi tsabyi sun hkai sharam da nna, de a grupyin e nhpan kum da ai hte, dai hta e tsabyi htung htu da nna, langchyi gap da nhtawm, sun galaw ai masha hpe shap ya nna, kaga mung de sa nga mat ai. 34 Ya, asi ngai ai aten du jang, shi a asi sa la mu ga, sun galaw ai ni hpang de, shi a mayam ni hpe shangun dat mu ai. 35 Sun galaw ai ni mahtang shi a mayam ni hpe rim la nna, langai mi hpe anu kayat, langai mi hpe sat kau wu ai hte, langai mi hpe nlung kabai wu ai. 36 Bai, shawng na hta grau law hkra mayam kaga hpe shi shangun dat mu timung, shanhte gaw shawng na hte maren dai ni hpe di da mu ai. 37 Dai hpang shi gaw, Ngai sha hpe mahtang shanhte hkungga na ma ai, nga nna shi a kasha hpe shanhte hpang de shangun dat wu ai. 38 Sun galaw ai ni mahtang dai kasha hpe hkap mu jang, Ndai wa gaw, sali wunli dagraw na wa rai nga ai; sa marit, shi hpe sat kau ga, shi a sali wunli anhte la kau ya gaw, nga nna shada da dup la ma ai: 39 shingrai shanhte shi hpe rim la nna, sun shinggan de shapraw nhtawm, sat kau mu ai. 40 Dai rai nna, sun madu wa bai du wa yang, ndai sun galaw ai ni hpe, kaning di na wu ta? ngu nna san wu ai. 41 Shanhte gaw, Shi dai nkru ai ni hpe, n hkru ai hku jahten kau na mu ai rai nna, aten ram jang shi hpe asi jaw lu ai masha kaga hpe, dai sun htawt shap ya na ru ai, ngu nna shi hpe htan mu ai. 42 Yesu shanhte hpe tsun mu ai gaw, Wahpang gaw ai ni lata kau ai nlung gaw, Ningjut jahtum na nlung tai wa sai: Dai gaw, Madu a majaw byin wa sai rai nna, Anhte a man e mauhpa amu rai nga ai, nga ai ga hpe, dai laika hta nanhte lang mi pyi n hti yu myit ni? 43 Dai rai nna, ngai nanhte hpe tsun made ga, Karai Kasang a mungdan gaw, nanhte kaw na shaw la kau nna, de a asi shapraw lu na amyu hpe jaw kau na ru ai. 44 Dai nlung hta hkrat ai wa gaw, daw hten na ra ai; gade a ntsa e mung dai nlung hkrat bun yang gaw dai wa ayun ayaw mani mat na ra ai, ngu wu ai. 45 Hkinjawng agyi ni hte Hparishe ni chyawm gaw, shi a ga shadawn ni hpe na mu yang, shi shanhte a lam tsun nga ai gaw, shanhte chye na mu ai. 46 Shi hpe rim la na shanhte tam ma timung, shawa masha ni hpe hkrit da mu ai: kaning rai nme law, shi myihtoi rai nga ai hpe mung masha ni kam da mu ai.

Mahte 22

22:1 Bai, Yesu ga shadawn gawng nna, shanhte hpe kahtap tsun mu ai gaw, 2 Sumsing lamu a mungdan gaw, kasha a matu hkungran ai poi shachyip ai hkawhkam hte bung nga ai: 3 dai poi de shaga da sai ni hpe bai shaga la na, nga nna shi a mayam ni hpe shangun dat timung, shanhte n sa hkraw ma ai. 4 Bai mayam kaga hpe shi shangun dat nna, Yu mu, nye a poi gaw jin jin rai sai; nye a usu ni hte kawn da ai yamnga ni hpe sat kau ngut sai; yawng mayawng jin jin rai sai: hkungran ai poi de sa marit, ngu nna shaga da sai ni hpe sa tsun mu, ngu dat wu ai. 5 Shanhte gaw dai ga hpe hpa n na nawn mu ai rai nna, langai ngai gaw tinang a hkauna de, kaga gaw tinang a rai dut ai de sa mat wa ma ai. 6 Naw nga ai ni mahtang gaw, shi a mayam ni hpe rim la nna, aroi arip di nhtawm, sat kau mu ai 7 Hkawhkam wa chyawm gaw masin pawt bu nga ai rai nna, shi a luksuk ni hpe shangun dat nhtawm, masha sat ai ni hpe jahten kau mu ai hte shanhte a mare hpe nat kau ya wu ai. 8 Dai hpang shi a mayam ni hpe, Nye a hkungran ai poi jin jin rai sai, raitimung, shaga da ai ni ging dan nga ma ai n rai: 9 dai majaw lam mashe shagu hkan e pru sa nna, mu hkrup ai ni kadai hpe mung, dai hkungran ai poi de sa shaga la ma su, ngu nna tsun wu ai. 10 Dai rai nna, dai mayam ni gaw nmaw lam de pru sa nna, mu hkrup ai yawng hte hpe, n kaja ai ni raitimung, kaja ai ni raitimung, jahpawng tawn la mu ai rai nna, dai poi hta dung nga ai ni hpring chyat rai nga ai. 11 Ya, hkawhkam wa gaw dung nga ai ni hpe kawan yu na, shang wa yang, hkungran ai hpun palawng n bu hpun ai la langai mi hpe, shi mu hkrup wu ai. 12 Dai rai nna shi gaw, Jinghku wa e, hkungran ai hpun palawng n bu hpun ai mi, nang kaning rai nang e shang lu n ta? ngu wu ai: shi chyawm gaw atsin sha rai nga ai. 13 Shaloi dai hkawhkam wa gaw shi a ali ama ni hpe, Shi a lagaw lata hpe gyit hkang nna, shinggan de na nsin de jahkrat bang kau mu, ngu wu ai: dai yang e hkrapngu hkrapngoi ai hte wa udik ai rai nga ai. 14 Kaning rai nme law, shaga la hkrum ai ni law nga ma timung, lata la hkrum ai ni mahtang n law ma ai, ngu wu ai. 15 Dai hpang Hparishe ni pru nna, shi tsun ai ga hta gin di mara shagun lu na lam, bawng da ma ai. 16 Shaloi shanhte gaw, tinang a sape ni hte Herodi ngu ai ni hpe shi hpang de shangun dat mu ai rai nna, Sara e, nang tengman nga ndai hte, Karai Kasang a lam hpe teng teng sharin shaga nga ndai rai nna, masha a myiman hpe n tau yu ai sha, kadai hpe mung nang n agam nga ndai gaw, anhte chye nga ga ai: 17 dai rai nna, nang myit ai hku anhte hpe tsun dan mi: Kehta hkawhkam hpe hkansi mai bang nga a ni? n mai bang a ni? ngu mu ai. 18 Yesu mahtang shanhte a n hkru ai myit hpe hten ya da mu ai rai nna, Sawt ai ni e, nanhte hpa rai ngai hpe chyam yu nga myit ta? dai hkansi dingsen ngai hpe dan yu mi, ngu mu ai. 19 Shaloi shanhte gumhpraw lap mi, shi kaw la pru ma ai. 20 Dai rai nna shi gaw, Gade a sumla hte masat laika kap nga a ta? ngu nna san mu yang, shanhte gaw, 21 Kehta a sumla hte masat rai nga ai, ngu mu ai. Shaloi shi gaw, Dai rai yang gaw, Kehta hte seng ai hpe gaw, Kehta hpe ya mu; Karai Kasang hte seng ai hpe mung, Karai Kasang hpe ya mu, ngu nna shanhte hpe tsun mu ai. 22 Dai ga na la jang, shanhte mau mat ma ai rai nna, shi kaw na pru nhtawm wa mat ma ai. 23 Ya, bai hkrung rawt wa na lam n nga ai, nga nna tsun ai Saduke ni dai shani e shi hpang de sit sa wa nna, 24 Sara e, masha langai ngai kasha garai n kap ai si mat timung shi a kanau gaw karat hpe kahkyin la lu na rai nna, kahpu a matu htinggaw shachyaw u ga, nga nna Mawshe htet da mi ai. 25 Ning re ai yan nau ni marai sanit anhte hte rau nga nga ma ai: shawng na wa gaw hkungran nna si mat sai; matu mara shi n kap nga ai rai nna, kanau wa gaw gaida hpe hta wu ai: 26 dai hte maren, hpang na wa mung, masum ngu na wa mung dai sanit du hkra shi hpe hta da mu ai. 27 Mahkra a hpang jahtum e dai numsha mung si mat wa ai. 28 Dai rai nna bai hkrung rawt ai hta, dai marai sanit hta na, gade a madu jan mahtang shi rai na ra ta? kaning rai nme law, mahkra shi hpe hta manu ai, ngu nna san mu ai. 29 Yesu htan let shanhte hpe tsun mu ai gaw, Dai Chyum laika hte Karai Kasang a nsam hpe nanhte n chye da mu ai majaw, nanhte lam dam mat manit dai: 30 kaning rai nme law, bai hkrung rawt ai hta e, shanhte gaw, num la num ya ai n rai na ma ai: shanhte gaw sumsing lamu hta e, lamu kasa ni zawn rai nga ma ai. 31 Dai hta kaga, Ngai gaw Abraham a Karai Kasang, Isak a Karai Kasang, Yaku a Karai Kasang rai nga nngai, nga nna si ai ni kaw na bai rawt wa ai lam, Karai Kasang nanhte hpe tsun dan ai ga gaw, nanhte n hti yu myit ni? 32 Karai Kasang chyawm gaw, si nga ai ni a Karai kasang rai nga ai n rai, ahkrung nga ai ni a Karai Kasang she rai nga ai, nga ai. 33 Shawa masha ni dai ga na ma yang, shi a sharin shaga ai lam majaw, mau mat ma ai. 34 Ya, Yesu gaw Saduke ni jasim kau mu ai hpe Hparishe ni na ma yang shanhte mung lang lata sha zuphpawng ma ai rai nna, 35 shanhte hta na tara sara langai mi shi hpe chyam yu nna, 36 Sara e, dai jep ai tara hta na grau kaba nga ai nga nna hkangda ai ga gaw, gara mahtang rai nga a ta? ngu nna san wu ai. 37 Yesu gaw, Dai Madu, na a Karai Kasang hpe, na a myit kraw lawang mahkra hte, na a myit masin mahkra hte, na a myit mang mahkra hte nang tsawra lu na ndai, 38 nga nna hkangda ai ga gaw, grau kaba ai hte shawng na ga mung, rai nga ai. 39 Hpang na ga mung dai hte bung nga nna, Na a htingbu wa hpe, na a hkum hte maren nang tsawra lu na ndai, nga nna rawng nga ai. 40 Ndai hkangda ai ga lahkawng yan gaw, dai jep ai tara mahkra hte, myihtoi ni a ga madung rai nga ai, ngu wu ai. 41 Ya Hparishe ni zuphpawng nga ma yang Yesu shanhte hpe, 42 Nanhte gaw Hkristu a lam kaning ngu myit nga myit ta? shi gaw gade a Kasha rai nga a ta?ngu nna san wu ai. 43 Shanhte gaw, Dawi a Kasha rai nga ai, ngu mu ai. Bai, shi gaw, Dai rai yang gaw, Dawi mahtang wenyi hta e shi hpe Madu nga nna, kaning rai nga lu a ta? 44 Kaning rai nme law, shi gaw, Dai Madu nye a Madu hpe tsun wu ai gaw: Na a gumlau ni hpe, na a lagaw npu e ngai tawn da ai du hkra, Nye a hkra maga de naw adung nga u, nga nna tsun nga ai. 45 Shing nga Dawi gaw shi hpe Madu nga ai rai yang gaw, shi a kasha kaning rai nme rai na rai nga a ta? ngu nna shanhte hpe tsun wu ai. 46 Kadai wa mung, ga hkaw mi pyi shi hpe n htan lu mu ai hte, dai shani kaw nna htawmhpang de kadai wa mung shi hpe hpa ga pyi n san wam mu ai.

Mahte 23

23:1 Dai shaloi Yesu shawa masha ni hte shi a sape ni hpe tsun wu ai gaw, 2 Laika ka ai sara ni hte Hparishe ni gaw Mawshe a tingnyang hta e dung nga ma ai. 3 Dai re ai majaw shanhte a tsun matsun hpe hkan galaw nna shatup nga mu; raitimung, shanhte a arawn alai hte maren hkum galaw nga myit: kaning rai nme law, shanhte tsun da nhtawm e, tinang dai n hkan galaw ma ai. 4 Li la ai lit hpe shanhte baw la nna, masha ni a lahpa hta e mara da ya nhtawm e shanhte gaw tinang a layung hte sha pyi, dai hpe n shamawt mayu ma ai. 5 Shanhte galaw ai amu bungli mahkra hpe, masha ni mu lu mu ga, galaw ma ai: tinang a lakhpoi ni hpe shanhte kaba wa di mu ai hte, tinang a banbyau ni hpe mung myin jahkram mu ai rai nna, 6 poi hkan na grau reng ai dung shara ni hte, tara jawng ni hta grau reng ai tingnyang ni, gat hkan e hkungga lara shachyen ai hte, 7 masha ni, Rabai e, ngu nna shamying na hpe, shanhte sharawng la ma ai. 8 Nanhte mahtang gaw, Rabai, ngu nna shamying na hpe hkum ra myit: nanhte a Sara gaw langai sha rai nga ai rai nna, nanhte yawng kahpu kanau ni rai nga myit dai. 9 Nanhte gaw, ga ntsa e kadai hpe mung, Wa e, hkum nga myit: nanhte a Nwa gaw sumsing lamu na Wa hkrai rai nga ai. 10 Bai, Agyi wa nga nna shamying na hpe hkum ra myit: nanhte a Agyi wa gaw Hkristu ngu ai wa sha rai nga ai. 11 Nanhte hta na grau mayu ai wa gaw, nanhte a ali ama tai u ga. 12 Kadai raitimung tinang hkum hpe shagrau ai wa gaw, grit mat wa na ra ai: tinang hkum hpe shagrit ai wa chyawm gaw, grau wa lu na ra ai. 14 Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw masha ni a man e, sumsing lamu a mungdan lam hpe pat da mu ai: nanhte nan n shang myit dai hte, shang wa ai ni, shang na pyi, n hkraw myit dai. 15 Hpyi hpun ai laika ka ai sara ni hte Hparishe ni e, nanhte dingnye lu myit dai: sape langai mi shatai la na, nga nna nanhte gaw namukdara hte hkarang lam grup grup kahkrang hkawm myit dai raitimung, shi hpe shatai la ngut yang, nanhte hta htam lahkawng grau hkra, ngarai mung na kasha tai shangun mu ai. 16 Lam madun ai myi kyaw ni e, nanhte dingnye lu myit dai: Kadai raitimung, nawku Htingnu hpe dagam yang hpa n re ai, nga myit timung, dai Htingnu a aja hpe dagam ai wa gaw hka kap na rai nga ai, nga nna nanhte tsun nga myit dai. 17 Mana ai hte myi kyaw ai ni e, dai aja hpe shachyoi shapra ai Htingnu hte dai aja yan gaw, gara mahtang grau kaba nga a ta? 18 Bai lam mi gaw, Kadai raitimung, dai hkungri hpe dagam yang, hpa n re ai, nga myit timung, hkungri ntsa na kumhpa hpe dagam ai wa gaw, hka kap na rai nga ai, nga nna nanhte tsun nga myit dai. 19 Myi kyaw ai ni e, dai kumhpa hpe shachyoi shapra ai hkungri hte dai kumhpa gaw, gara mahtang grau kaba nga a ta? 20 Dai re ai majaw, dai hkungri hpe dagam ai wa gaw, dai hte de a ntsa na yawng hte hpe dagam nu ai rai nga ai. 21 Dai Htingnu hpe dagam ai wa mung, dai hte dai hta e shanu nga ai wa hpe mung dagam nu ai, rai nga ai. 22 Sumsing lamu hpe dagam ai wa mung, Karai Kasang a tingnyang hte dai hta e dung nga ai wa hpe dagam nu ai, rai nga ai. 23 Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw shingtawn pan, pansoi, hpakkyi tum re ai ni hta na, htamshi hta htammi lahkawn la ninglen, dai jep ai tara hta lawm ai grau akyu rawng ai, dinghpring ai, matsan dum chye ai hte kamsham ai lam hte hpe nanhte lai kau da myit dai: shawng de na hpe mung galaw lu nna, hpang de na hpe mung n lai kau taw gaw, mai nga ai. 24 Lam madun ai myi kyaw ai ni e, nanhte machyi hpe sai kau nhtawm e, gawla-u hpe bai mayu kau myit dai. 25 Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw dai gawm hte ngawt hpe shinggan maga de jaseng mu ai mung, kata maga de kashun kashe hte n tara ai hte hpring chyat rai nga ai. 26 Myi kyaw ai Hparishe e, dai gawm hte n-gawt a shinggan maga de seng wa lu n ga, de a kata maga de shawng e jaseng u. 27 Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw ahpraw chya ai lup ni hte bung nga myit dai: dai ni gaw shinggan de tsawm dam timung, kata de gaw, mang a nra hte nseng ai baw amyu myu hte hpring chyat rai nga ai. 28 Dai hte maren nanhte gaw, shinggan de e masha ni a man e dingman ai ni zawn rai nga myit timung, kata de gaw sawt ai hte tara lai ai amu hkrai hpring chyat nga myit dai. 29 Hpyi hpun ai laika ka ai sara ni hte, Hparishe ni e, nanhte dingnye lu myit dai; nanhte gaw myihtoi ni a lup ni hpe gaw da mu ai hte dinghpring ai ni a lup jarawp ni hpe mawn ya nhtawm, 30 Anhte gaw ji woi ni a lakhtak e pra ga taw gaw, myihtoi ni a asai hpe shapraw na, shanhte hta lawm na ga ai n rai, nga nna nanhte tsun myit dai. 31 Shing nga timung myihtoi ni hpe sat kau ai ni a kashu kasha ni nanhte rai nga myit dai gaw, nanhte nan sakse hkam nga myit dai. 32 Dai rai nna nanhte mung nji nwa ni a hpunda hpe dep hkra di mu law. 33 Lapu ni e pu htum a amyu e, Ngarai mung a ari hta na, nanhte kaning rai lawt lu na myit ta? 34 Dai rai nna, yu mu, myihtoi ni, hpaji rawng ai ni hte, laika ka ai sara ni hpe, ngai nanhte hpang de shangun dat mawe ai rai nna, shanhte hta na nkau mi hpe nanhte sat kau nna wudang hta jen da na hte, nkau mi hpe nanhte a tara jawng ni hta anu kayat di nna, mare mi hte mare mi de zingri zingrat di na maru ai: 35 Shingrai, dinghpring ai wa Abela a asai kaw nna, dai nawku Htingnu hte tawn hkungri a lapran e nanhte sat kau ai. Barahkia kasha Zakari a asai du hkra, ga ntsa e ru kau ai, dinghpring ai asai yawng mayawng gaw, nanhte a ntsa e galu na ra ai. 36 Ngai nanhte hpe teng teng tsun made ai gaw, ndai lam nlang hte gaw, ndai amyu a ntsa e du na ra ai. 37 Yerusalem e, Yerusalem e, myihtoi ni hpe sat kau kau rai nna, nang hpang de shangun dat ai ni hpe nlung hte a kabai sat sat re ai mare e!- u kanu gaw, u hkai ni hpe singkaw npu e jahpawng da ai zawn, na a nshu nsha ni hpe ngai gade lang jahpawng da mayu timung nanhte n hkraw nga myit dai. 38 Yu mu, nanhte a nta gaw a katsi katsang kram nga ai. Kaning rai nme law nga yang, ngai nanhte hpe tsun made ga, Dai Madu a amying hte du sa ai wa gaw a nga ai law, nga nna nanhte nan n tsun tsun gaw, ya kaw nna nanhte ngai hpe n mu lu na manit dai, ngu mu ai.

Mahte 24

24:1 Ya, Yesu gaw dai nawku Htingnu kaw na pru nhtawm hkawm sa wa let, dai nawku Htingnu na nta ni, shi hpe madun dan na, shi a sape ni sit sa ma ai. 2 Shi mahtang shanhte hpe, Ndai yawng hpe nanhte mada mu ai, n rai ni? Ngai nanhte hpe teng teng tsun made ga, Dai hpe e n run n hpya ai sha nlung langai mi a ntsa e langai mi muk n mara hkra rai mat na ra ai, ngu nna shanhte hpe tsun wu ai. 3 Shloi, Tsanlun bum ntsa e dung nga yang, shi a sape ni hkrai shi kaw sit sa nna, Dai hte gaw galoi ai me byin wa na ra ta? nang bai du na hte mungkan ga a htum wa na kumla gaw, hpa kumla rai na ra ta? anhte hpe tsun dan mi, ngu mu ai. 4 Yesu gaw, Kadai mung, nanhte hpe n hkalem lu myit ga, sadi nga mu. 5 Kaning rai nme law, masha law law wa nye a amying hte paw pru nna, Ngai gaw Hkristu rai nga nngai, nga nna law law hpe lam shadam kau na maru ai. 6 Hpyen gasat ai hte majan law wa na shiga nanhte na lu na maru ai; raitimung, nanhte myit n ru myit ga, sadi dung nga mu: kaning rai nme law, dai re ai ni gaw, byin lu na ra ai raitimung, dai jahtum ai gaw garai n rai nga ai. 7 Bai, amyu mi hte amyu mi, mung mi hte mung mi shada da gumlau hkat na mara ai: hku hku ai hte nnang nawn, shara kaga kaga hta e byin wa na ra ai: 8 dai yawng chyawm gaw, kyindut ngu ai a npawt nhpang rai nga ai. 9 Dai ban e, shanhte gaw ru tsang ai de nanhte hpe ap ya nna, sat kau na marin dai; nye amying a majaw amyu baw shagu nanhte hpe ndawng n wawm na myit dai. 10 Dai shaloi e, masha law law myit kataw wa nna, shada da ap kau ai hte, shada da ndawng n wawm na mara ai. 11 Masu ai myihtoi law law mung paw pru nna, law law hpe lam shadam na mu ai. 12 Tara tawt lai ai amu law wa na majaw, masha law law a tsawra ai myit kawp mat na ra ai: 13 raitimung, jahtum du hkra shakut sharang ai wa gaw, hkyehkrang la ai hkrum na ra ai. 14 Dai mungdan a kabu gara shiga gaw, masha amyu baw shagu a matu mara sakse tai lu u ga, mungkan ting hta e hkaw dan lu na rai nga ai; dai hpang e dai jahtum ai gaw du na ra ai. 15 Dai rai nna, myihtoi Daniela tsun dan ai jahten shabya ai a matsat shabat gaw, dai chyoi pra ai shara e jung nga ai hpe nanhte mu myit yang gaw, laika hti nga ai wa gaw, myit yu nga u ga; 16 dai shaloi e Yuda mung hta e nga ai ni gaw, bum lang de hprawng mu ga; 17 nta ntsa e nga ai wa gaw shi a nta na arai hpe shang la na, hkum yu wa u ga; 18 hkauna pa e nga ai wa mung, shi a hpun nba wa la na, hkum nhtang wa u ga. 19 Dai nhtoi hte hta na-um nasin re ai ni hte chyu chyu ai ma chyangai lu ai ni gaw, nachying yak na mara ai. 20 Dai rai nna, nanhte a hprawng na gaw, kashung ta hte laban nhtoi hta e n byin wa u ga, akyu hpyi nga mu: 21 kaning rai nme law, mungkan ga nnan lat kaw nna ya du hkra n byin yu ai hte hpang de mung n byin lu na ru tsang kaba gaw, dai shaloi e byin pru na ra ai. 22 Dai nhtoi ni hpe n shagying kau yang gaw, gade a hkumshan mung n lawt lu na ra ai; raitimung, lata la ai ni a matu mara, dai nhtoi ni gaw gying wa na ra ai. 23 Dai shaloi e masha langai ngai, Yu mu, nang e, shing n rai, ndai yang e Hkristu nga nga ai, nga nna nanhte hpe tsun myit yang gaw, nanhte hkum kam myit. 24 Kaning rai nme law, masu ai Hkristu hte raitimung, masu ai myihtoi hte raitimung paw pru nna, lata la sai ni hpe pyi shadam lu yang, shadam kau lu hkra lamik kumla hte mauhpa amu kaba madun dan na ra ai. 25 Yu mu, ngai nanhte hpe tsun hkap da ni ai. 26 Dai rai nna shanhte gaw, Yu mu, nam mali hkan e shi rai nga ai, nga nna tsun ma timung, nanhte hkum sa pru myit; bai gawk kata hkan e shi rai nga ai, nga ma timung, hkum kam myit. 27 Kaning rai nme law, myihprap gaw sinpraw maga de gala nna, sinna maga du hkra htoi pru ai hte maren, dai Masha Kasha a bai du ai gaw rai na ra ai. 28 Mang taw ai shara hkan e, lang da ni mung hpawng nga na mara ai. 29 Bai, dai nhtoi ni a ru tsang ai hpang jang jan gaw nip mat wa nna, shata mung n htoi mat na ra ai; shagan ni mung, lamu de na di hkrat mat nna, sumsing lamu a atsam ni gaw gari wa na mara ai. 30 Dai shaloi e Masha Kasha a kumla gaw, sumsing lamu hta e danpru na ra ai; shaloi jang ga ntsa na amyu baw shagu ni sharung shayawt let dai Masha Kasha gaw daru magam hte hpung shingkang kaba hte nawng lamu a sumwi hta du sa ai hpe, mu lu na mara ai. 31 Shi a lamu kasa ni hpe, pahtau kaba hte shi shangun dat nna, shanhte gaw nbung mali maga na, lamu htum ai de nna lamu htum ai du hkra, shi a lata la sai ni hpe jahpawng la na maru ai. 32 Shingrai dai maihpang hpun a ga shadawn hpe matsing da mu: de a lakung lakying ni majawm wa nna, lap prut wa ai shaloi, nlum ta ni wa ra ai hpe nanhte chye nga myit dai. 33 Dai hte maren nanhte gaw, dai byin wa ai lam yawng hte hpe mu myit dai shaloi, Shi gaw chyinghka lam makau de ni wa ra ai hpe, nanhte chye na nga mu. 34 Nanhte hpe ngai teng teng tsun made ai gaw, Ya pra nga ai ndai amyu masha ni garai n lai mat ma yang, dai lam yawng mayawng hte byin mat na ra ai. 35 Sumsing lamu hte ginding aga lai mat wa timung, nye a ga gaw n lai mat na li ai. 36 Raitimung, dai shani hte ahkying hpe chyawm gaw kadai mung n chye lu ai: lamu kasa ni hte Kasha pyi, dai hpe n chye lu ai; Wa hkrai sha dai hpe chye lu ai. 37 Bai, Noa a ban e rai nga ai hte maren, Masha Kasha a bai sa du ai hta e rai wa na ra ai. 38 Kaning rai nme law, dai sha-u garai n-ing yang na masha ni gaw Noa shanghpaw li kata de shang wa ai nhtoi du hkra, lu lu sha sha, num la num ya rai nga ma ai rai nna, dai sha-u ing wa ai hte nlang hte hpe magawn mat wa ai du hkra, 39 shanhte n dum shami nga nga ma ai hte maren, dai Masha Kasha a bai sa du ai hta mung, rai wa na ra ai. 40 Dai shaloi e marai lahkawng hkauna pa hta e rau nga ma ai rai nna, langai mi gaw woi la ai hkrum ai hte langai mi gaw hti nga mat lu na ra ai: 41 numsha lahkawng htumrin hta rau rin nga ma ai rai nna, langai mi gaw woi la ai hkrum nna, langai mi gaw, hti nga mat lu na ra ai. 42 Dai rai nna, nanhte a Madu gaw gara shani e du wa na hpe nanhte n chye myit dai majaw, a maja nga mu. 43 Raitimung nta madu gaw, lagut sa na ahkying ladaw hpe chye lu taw gaw, shi a nta hpe n tawk waw u ga, shi a maja nga na ra ai nanhte dum mu. 44 Dai rai nna nanhte mung chyip chyip rai nga mu: kaning rai nme law, nanhte n dum n mi re ai ahkying hta e, dai Masha Kasha du wa na ra ai. 45 Dai hta kaga, dai Madu gaw shi a nta masha ni a ntsa e san tawn da nna aten du jang shanhte hpe lusha karan jaw lu na, sadi ai hte myitsu ai mayam gaw kadai wa rai nga a ta? 46 Shi a madu bai du yu yang, shingrai a galaw nga hkrup ai mayam gaw, a nga ai. 47 Nanhte hpe ngai teng teng tsun made ga, Dai madu gaw shi a arai mahkra a ntsa e shi hpe san tawn da na wu ai. 48 Dai n shawp ai mayam chyawm gaw, Nye a Madu gaw wa na naw na la nga ai, nga nna shi a kraw kata e a tsun nga ai hte, 49 shi a manang mayam ni hpe anu ajin di nhtawm chyaru nang ai ni hte rau lu rau sha, rai nga yang, 50 dai mayam a madu gaw, shi n yu n mada ai nhtoi hte, n na n chye ai ahkying hta e, bai du wa na ra ai rai nna, 51 shi hpe katawng daw kau nhtawm, shi a daw hpe hpyi hpun ai ni hte rau tawn da na ru ai: dai yang e hkrapngu hkrapngoi ai hte wa udik ai rai na ra ai.

Mahte 25

25:1 Dai shaloi e sumsing lamu a mungdan gaw, tinang a pyengding lang nna, la nnan hpe hkap bawp la na pru sa wa ai mahkawn shi hte bung na ra ai. 2 Shanhte hta na manga gaw myit n su ma ai; manga mahtang gaw, myitsu nga ma ai. 3 Kaning rai nme law, myit n su ai ni shanhte a pyengdin lang ma yang tinang a matu sau n lang ma ai: 4 myitsu ai ni mahtang, tinang a hpengdin hte rau, tau ni hta, sau mung lang nga ma ai. 5 Ya la nnan gaw naw la nga ai majaw, shanhte nlang yup shamawi rai nna yup pyaw nga ma ai. 6 Yuptung hpawa e chyawm gaw, Yu mu, la nnan wa du ra ai! shi hpe hkap bawp la na pru mu, nga nna garu nga ai. 7 Shaloi jang dai mahkawn ni nlang rawt nna, tinang a pyengdin hpe lajang ma ai. 8 Myit n su ai ni mahtang, Anhte a pyengdin si mat wa ai majaw, nanhte a sau hta na karan jaw mi, ngu nna myitsu ai ni hpe hpyi mu ai. 9 Myit su ai ni mahtang htan nna, Anhte hte nanhte a matu n law dam nhten: dut ai ni kaw sa nna, nanhte a matu mari la na grau mai ai, ngu mu ai 10 Shanhte mari la na sa wa ai laman e, la nnan sa du wa ai hte, chyip chyip rai nga ai ni gaw, hkungran ai poi de shi hte rau shang lu ma ai rai nna, dai chyinghka la nga la ai. 11 Dai hpang mahkawn kaga ni mung du nna, Madu e, Madu e, anhte hpe hpaw la mi, ngu nna hpyi mu ai. 12 Shi mahtang htan nna, Nanhte hpe ngai teng teng tsun made ga, ngai nanhte hpe n chye made ai, ngu wu ai. 13 Dai rai na, dai shani raitimung, dai ahkying raitimung, nanhte n chye myit dai majaw, a maja nga mu. 14 Ga shadawn gaw, lang mi na masha langai mi bu hkawm na maw ai rai nna, mayam ni hpe shaga la nhtawm, shi a arai ni shanhte hpe ap ya da mu ai: 15 Langai mi hpe gumhpraw joi manga, langai mi hpe lahkawng, langai mi hpe joi mi di nna, langai hte langai hpe tinang a atsam hte maren ap ya da nhtawm e, hkawm sa mat wa ai. 16 Shaloi jang gumhpraw joi manga lu la ai wa gaw pru sa na, dai hte hpaga ga wu yang, kaga gumhpraw joi manga myat la nu ai. 17 Lahkawng lu la ai wa mung dai hte maren ga nna, lahkawng myat la nu ai. 18 Joi mi arang ai wa mahtang pru sa nhtawm, nhkun htu nna, shi a madu a gumhpraw hpe lup da wu ai. 19 Ya tawng marang na wa jang, dai mayam ni a madu bai wa nna, shanhte hpe ga jahpan la mu ai. 20 Gumhpraw joi manga arang ai wa gaw, kaga joi manga lang let, sa du nna, Madu e gumhpraw joi manga nang ngai hpe arang shapraw ya da ndai; yu u, kaga joi manga ngai myat la lu nngai, ngu wu ai. 21 Dai rai nna shi a madu, Ara, kaja ai hte sadi dung ai mayam e: arai loi sha hta nang kangka rai nit dai; arai law law a ntsa e ngai nang hpe san tawn da na de ai: na madu a kabu gara ai hta shang lawm u, ngu nna shi hpe tsun wu ai. 22 Gumhpraw joi lahkawng lu ai wa mung sa du nna, Madu e, joi lahkawng nang ngai hpe ap da ndai; yu u, kaga joi lahkawng ngai myat la lu nngai, ngu wu ai. 23 Dai rai nna shi a madu gaw, Ara, kaja ai hte sadi dung ai mayam e: arai loi sha hta nang kangka rai nit dai: arai law law a ntsa e ngai nang hpe san tawn da na de ai: na a madu a kabu gara ai hta nang shang lawm u, ngu nna shi hpe tsun wu ai. 24 Joi mi arang ai wa chyawm gaw sa du nna, Madu e, maji la ai wa nang rai nga ndai hte, nang n gat ai shara na nang dan la nna, nang n ayai ai shara na nang magawn la ndai hpe ngai chye nga nngai: 25 dai rai nna hkrit ai hte ngai sa nna, na a gumhpraw hpe ga hta e lup da se ai: yu u, na a arai naw nga nga lit dai, ngu wu ai. 26 Shi a madu gaw, N hkru ai hte lagawn ai mayam e: n gat ai shara na ngai dan la ai hte, n ayai ai shara na ngai magawn la ai hpe nang chye nga ndai: 27 dai majaw nye a gumhpraw hpe boi ai shara hta nang tawn da lu na rai ndai; ngai bai wa yang she, nye a arang hte atu hpe bai la lu na we ai. 28 Dai rai nna shi a gumhpraw joi hpe la kau nna, joi shi lu ai wa hpe jaw mu: 29 lu ai wa kadai hpe mung, naw jaw nna shi law htam wa na ra ai: nlu ai wa kaw na chyawm gaw, shi lu malu hpe pyi naw shaw la na ru ai. 30 Dai n hkaw ai mayam hpe gaw shinggan na nsin sin ai de shaden kau mu: dai shara e hkrapngu hkrapngoi ai hte wa udik ai rai na ra ai, ngu nna jeyang nu ai. 31 Dai Masha Kasha gaw shi a hpung shingkang danhkung let, lamu kasa ni nlang hte rau sa du ai shaloi, shi a hpung shingkang a tingnyang ntsa e shi dung nna, 32 amyu baw shagu hpe shi a man e jahpawng tawn da nhtawm, sagu rem wa gaw sagu ni hte bainam ni hpe karan ginhka da ai zawn, shanhte hpe karan ginhka da nna, 33 sagu ni hpe hkra maga de bainam ni hpe pai maga de tawn da na maru ai. 34 Shaloi e dai Hkawhkam wa gaw shi a hkra maga de nga ai ni hpe, Nye a Wa kaw na shaman ya lu la ai ni e, sa marit; ginding aga nnan lat kaw nna nanhte a matu lajang tawn da ai mungdan ngu ai sali wunli hpe hkam la mu: 35 kaning rai nme law, ngai kawsi jang nanhte ngai hpe sha na jaw myit dai: ngai hpang gara jang, nanhte ngai hpe lu na jaw myit dai: ngai manam tai hkawm yang, nanhte ngai hpe daw myit dai: 36 singgu krin rai jang, nanhte ngai hpe jahpun myit dai: machyi hkrum jang, nanhte ngai hpe yu lajang myit dai; htawng rawng nga yang, nanhte ngai hpe kawan yu myit dai, ngu na mu ai. 37 Shaloi dinghpring ai ni gaw, Madu e, nang kawsi ai hpe anhte galoi mu nna galaw jaw ga ta? hpang gara ai hpe anhte galoi mu nna, lu na jaw ga ta? 38 Nang manam tai hkawm ai hpe anhte galoi mu nna, daw ga ta? singgu krin rai nga ai hpe anhte galoi mu nna, jahpun ga ta? 39 Nang machyi hkrum ai hte htawng rawng nga ai hpe, anhte galoi mu nna, nang hpe kawan yu ga ta? ngu nna shi hpe htan na ma ai. 40 Dai rai nna hkawhkam wa gaw, Nanhte hpe ngai teng teng tsun made ga, Ndai ngai nau ni hta na kaji htum ai wa hpe nanhte galaw ai gaw, nanhte ngai hpe galaw manit dai, rai nga ai, ngu nna shanhte hpe htan na mu ai. 41 Bai, pai maga de nga ai ni hpe, Dagam dala hkrum ai ni e, ngai hte hka wa nna nat gumlau hte shi a salung sala ni a matu lajang da ai n htum n mat ai wan de shang wa mu: 42 kaning rai nme law, ngai kawsi yang, nanhte ngai hpe sha na n jaw myit dai; hpang gara yang, nanhte ngai hpe lu na n jaw myit dai: 43 ngai manam tai hkawm yang, nanhte ngai hpe n daw myit dai; singgu krin rai jang, nanhte ngai hpe n jahpun myit dai: machyi hkrum ai hte htawng rawng nga yang, nanhte ngai hpe n yu lajang myit dai, ngu na mu ai. 44 Shaloi shanhte mung, Madu e, nang kawsi ai, hpang gara ai, manam tai hkawm ai, singgu krin re ai, machyi hkrum ai hte htawng e nga ai hpe, anhte galoi mu nna, nang hpe n galaw daw ga ta? ngu nna htan na mu ai. 45 Dai rai nna, Ngai nanhte hpe teng teng tsun made ga, Ndai ni hta na kaji htum ai wa hpe nanhte n galaw myit dai majaw, ngai hpe n galaw myit dai rai nga ai, ngu nna shanhte hpe htan na mu ai. 46 Shaloi shanhte gaw n htum n wai ari de shang wa na mara ai; dinghpring ai ni mahtang n htum n wai asak de shang lu na mara ai, ngu wu ai.

Mahte 26

26:1 Ya Yesu dai ga yawng mayawng hte hpe tsun ngut jang, shi a sape ni hpe shi kahtap tsun wu ai gaw. 2 Ni ni lai jang dai Shalai wa ai poi du na ra ai, nanhte chye nga myit dai rai nna, Masha Kasha hpe wudang hta e jen da na matu, ap kau ai hkrum na ra ai, ngu wu ai. 3 Dai shaloi e hkinjawng agyi ni hte mung masha ni a salang ni gaw, Kayapa ngu ai hkinjawng agyi a nta npan e zuphpawng ma ai rai nna, 4 Yesu hpe hkalem rim la lu na hte sat kau lu na lam, bawng nga ma ai: 5 raitimung, Mung masha ni n kabrawng wa mu ga, poi a laman e n rai u ga, nga nna shanhte hkan da ma ai. 6 Ya Yesu gaw Behtani kahtawng na, manggang kap ai Simun a nta e rai nga ai shaloi, 7 nachying hpu ai mura rawng ai lunghpraw gawm lang ai numsha langai mi, shi shat sha na hkrawn taw nga yang, shi hpang de sa nna shi a baw hta e ru bun wu ai. 8 Sape ni dai hpe mu jang, myit yu kahtet wa nna, Ndai hpe hpa rai nme lahpawt lama di kau wu ta? 9 Dai hpe manu kaba hte dut la nna, matsan mayan ni hpe karan jaw lu na wu ai, nga ma ai. 10 Yesu mahtang dai chye nna, Dai numsha hpe nanhte hpa rai nme shatsang nga myit ta? Shi gaw, ngai hta kaja ai hku galaw nu ai: 11 matsan mayang ni nanhte hte rau tut tut anga nga ma timung, ngai chyawm gaw nanhte hte tut tut nga nga lu na n rai. 12 Ndai mura hpe nye a hkum hta shi ru bun ai gaw, ngai hpe lup makoi na matu lajang da ai rai nga ai. 13 Nanhte hpe ngai teng teng tsun made ai gaw, Ndai kabu gara shiga hpe mungkan ga ting shara shagu hkan e hkaw dan nga yang, ndai numsha a masat dingsat tai na matu, shi galaw ai amu ngu nna hkai dan na maru ai, ngu nna shanhte hpe tsun mu ai. 14 Dai shaloi, sape shi lahkawng hta lawm ai, Yuda Iskarut ngu ai wa langai mi, hkinjawng agyi ni kaw pru sa nna, 15 Ngai nanhte a lata hta e shi hpe ap ya jang, ngai hpe gade jaw na myit ta? ngu wu ai. Dai rai nna shanhte gaw gumhpraw lap sumshi, shi e shen ya mu ai. 16 Dai kaw nna shi hpe ap ya na mai ang ai ginwan shi tam nga ai. 17 Ya dai Azuma poi nnan shani e, sape ni gaw Yesu hpang de sit sa nna, Dai Shalai wa ai poi hpe sha na, gara shara hta e na a matu shachyip na, nang tsaw nga n ta? ngu mu ai. 18 Shi gaw, Dai mare hta na masha langai mi kaw sa nna, Sara tsun dat mi ai gaw, Nye a ahkying ni wa sai: na a nta e nye a sape ni hte rau, dai Shalai wa ai poi hpe ngai sha na nngai, ngu nna shi hpe tsun mu, ngu dat wu ai. 19 Shaloi sape ni gaw, Yesu hkang dat mu ai hte maren galaw nna, dai Shalai wa ai poi hpe shachyip da mu ai. 20 Ya nrim rim rai jang, dai sape shi lahkawng hte rau shi hkrawn taw nga ai rai nna, 21 shanhte shat sha nga ma yang shi gaw, Ngai nanhte hpe teng teng tsun made ga, Nanhte hta na langai mi ngai hpe ap kau na ring ngai, ngu wu ai. 22 Shanhte mahtang nachying myit yawn nna, langai hte langai, Madu e, ngai rai na n ni? nga nna shi hpe tsun mu ai. 23 Shi gaw htan let, Dai hka wan hta ngai hte rau lata manaw ai wa gaw, ngai hpe ap kau na ring ngai: 24 ka da nga ai hte maren, dai Masha Kasha gaw sa wa na ra ai; raitimung, dai Masha Kasha hpe ap kau ai wa gaw dingnye lu na ra ai! dai masha n shangai taw gaw, shi a matu grau kaja nga ai, ngu wu ai. 25 Shiloi shi hpe ap kau na Yuda mung htan nna, Rabai e, ngai rai nga n ni? ngu nna san yang, Yesu gaw, Nang tsun ai hte maren rai nga ai, ngu nna shi hpe tsun wu ai. 26 Ya shanhte shat sha nga ma yang, Yesu gaw muk la shaman ya nna ahkyep alep di nhtawm, sape ni hpe jaw let, La sha mu; dai gaw nye a hkum rai nga li ai, ngu wu ai. 27 Bai, gawm hpe mung shi la nna, shakawn kungdawn ngut jang shanhte hpe, Nanhte yawng dai hta na lu mu; 28 dai gaw, yubak hpe raw dat kau myit ga, law law a matu ru kau ya ai, dai ga shaka hte seng ai, nye a asai rai nga li ai: 29 nanhte hpe ngai tsun made ai gaw, Nye Wa a mungdan hta e, nanhte hte rau tsabyi nnan hpe ngai lu lu na nhtoi du hkra, ndai tsabyi ru a asi hta na ngai bai lu lu na n rai, ngu nna shanhte hpe gam jaw mu ai. 30 Dai hpang mahkawn mangoi ngut jang, shanhte gaw Tsanlun bum de pru sa wa ma ai. 31 Shaloi e Yesu shanhte hpe tsun mu ai gaw, Ndai shana e, nanhte nlang nye a lam myit kataw na marin dai; kaning rai nme law, Dai sagu rem ai wa hpe ngai anu sat nna, sagu hpung na sagu ni gaw, bra mat na mara ai, nga nna ka da nga ai: 32 raitimung, ngai bai hkrung sharawt ai hkrum ai hpang e, Galile mung de, nanhte a shawng e ngai sa wa magang na nngai, ngu mu ai. 33 Shaloi Petru htan nna, Nlang hte gaw na a lam myit kataw mat ma timung, ngai chyawm gaw galoi kataw lu na n rai, ngu nna shi hpe tsun wu ai. 34 Yesu mahtang, Nang hpe ngai teng teng tsun de ga, dai na u garai n goi yang, nang ngai hpe masum lang nyet kau na rin dai, ngu nna shi hpe tsun wu ai. 35 Petru gaw, Nang hte rau ngai si timung, nang hpe n nyet kau lu na nngai, ngu nna shi hpe htan wu ai.Sape ni nlang dai hte maren tsun nang ma ai. 36 Dai hpang Yesu gaw shanhte hte rau, Getsemane ngu ai shara de du ai rai nna, sape ni hpe, Ngai akyu hpyi na wora de sa nga yang, nang e naw dung nga ma la, ngu wu ai. 37 Shaloi Petru hte Zebedi a kasha yan hpe shi shaga woi nhtawm, yawnhkyen hkrum nna, myit ru myit tsang grai rai nga ai. 38 Dai rai nna, shi shanhte hpe, Nye a myit masin si hkra yawnhkyen kaba hkrum nga li ai: ngai hte rau a maja nga na nang e naw nga nga mu, ngu mu ai. 39 Shaloi dai yang na shi loi mi lai sa nhtawm, ga de myiman gum dagup let akyu hpyi nna, Wa e, ndai gawm hpe ngai kaw na shalai kau lu yang gaw, shalai kau ya e; raitimung, nye a myit n rai, na a myit she rai u ga, ngu nna tsun wu ai. 40 Bai, sape ni kaw shi nhtang wa nna, shanhte yup pyaw nga ma ai hpe mu mu ai; dai rai nna shi Petru hpe,Ataw, hkying mi sha muk ngai hte rau n maja nga lu myit ni? 41 agung alau ai kaw n du myit ga, maja nga ai hte akyu hpyi nga mu: wenyi gaw let nga ai, hkumshan mahtang n-gun kya nga ai, ngu mu ai. 42 Lang mi bai bat nna, Wa e ngai dai hpe n lu ai sha, ngai kaw na n shalai kau lu yang gaw, na a myit dik lit ga law, ngu nna akyu hpyi nga ai. 43 Bai nhtang wa yang shanhte a myi yup shamawi ai majaw, shanhte yup pyaw nga ma ai hpe wa mu mu ai. 44 Bai shi shanhte hpe kau da nhtawm, shawng na ga hte maren masum lang ningdaw hpyi wu ai. 45 Dai hpang sape ni kaw shi bai nhtang wa nna, Nanhte gaw naw yup pyaw nga nna asan apan rai nga myit hka! yu mu, dai ahkying ni wa magang nga ai rai nna, dai Masha Kasha gaw yubak kap ai ni a lata hta e, ap kau ai hkrum na ra ai. 46 Rawt mu, anhte sa wa saga: yu mu, ngai hpe ap kau na wa gaw ni wa ra ai, ngu nna shanhte hpe tsun mu ai. 47 Shi ga naw tsun nga yang, yu mu, sape shi lahkawng hta lawm ai Yuda gaw sa wa nna, hkinjawng agyi ni hte, mung masha ni a salang ni kaw na pru ai, nhtu hte dawhkrawng lang ai shawa hpawng kaba, shi gaw hkan nang nga ma ai. 48 Shi hpe ap kau na wa chyawm gaw, Ngai pup ai wa gaw, dai wa rai nga ai: shi hpe rim la mu, ngu nna shanhte hpe kumla jaw da manu ai: 49 Shaloi shi Yesu kaw hkre rai sa nna, Rabai e, a nga n ga, ngu nna shi hpe pup wu ai. 50 Yesu mahtang, Jinghku wa e, nang sa ang ai amu hpe di u, ngu nna hkap tsun wu ai. Shaloi shanhte gaw Yesu hpe lata hte gang rim la mu ai. 51 Dai rai nna, Yesu hte rau nga ai ni hta na marai langai mi shi a nhtu shaw nhtawm, hkinjawng agyi a mayam hpe kahtam nna, shi a na di mat lu ai. 52 Shaloi Yesu gaw, Na a nhtu hpe de a shara e bang da u; nhtu hpe shaw ai ni yawng mayawng hte gaw, nhtu hte hten bya hkrum na mara ai: 53 nye Wa hpe hpyi na ahkang ngai lu nna, shi gaw ya e pyi lamu kasa dap shi lahkawng n-ga, ngai hpang de shangun lu na, nang n nawn nga n ni? 54 Shingrai yang, ndai lam byin wa lu na ra ai, nga nna laika tsun ai ga gaw, kaning rai dik wa lu na a ta? ngu nna shi hpe tsun wu ai. 55 Dai ahkying hta e, Yesu gaw shawa masha ni hpe, Damya hpe rim la ai zawn, ngai hpe rim la na, nanhte nhtu dawhkrawng hte rai pru sa wa marin ni? Sharin shaga nga let nawku Htingnu hta e, ngai shani shagu dung nga timung, nanhte ngai hpe n rim la manit dai: 56 ndai lam yawng hte chyawm gaw, myihtoi ni a laika ni dik wa mu ga majaw byin wa sai, ngu mu ai. Shaloi jang, sape ni nlang shi hpe kau da nna hprawng mat wa ma ai. 57 Yesu hpe rim la ai ni gaw, laika ka ai sara ni hte salang ni zuphpawng nga ai shara e, hkinjawng agyi Kayapa hpang de, shi hpe woi shang mu ai. 58 Petru chyawm gaw, hkinjawng agyi a wing du hkra shi a hpang e tsan tsan e hkan nang nna, dai hta e shang nhtawm, dai amu htum na hpe yu yu na, ali ama ni hte rau dung nga ai. 59 Shaloi hkinjawng agyi ni hte, salang hpawng ting gaw, Yesu hpe sat kau lu hkra, shi a lam masu ai sakse tam nga nna, masu ai sakse hkam na ni law law wa dawng pru ma timung, shanhte mara n mu mu ai. 60 Hpang jahtum e marai lahkawng pru sa nna, 61 Ndai wa gaw, Karai Kasang a nawku Htingnu hpe ngai run kau nna, masum ya na laman e dai hpe bai de lu na we ai, nga nna shi tsun sai, ngu mu ai. 62 Shaloi hkinjawng agyi wa gan rawt nna, Nang hkaw mi muk n htan nga n ni? shanhte na a lam kaning re ai sakse hkam lu nga ma hka? ngu nna shi hpe tsun wu ai. 63 Yesu mahtang atsin sha nga nga ai. Bai, hkinjawng agyi wa gaw, Karai Kasang a Kasha, ngu ai Hkristu gaw, nang rai nga ndai kun, anhte hpe tsun dan n ga, ngu nna ahkrung nga ai Karai Kasang hta ngai nang hpe dagam da de ai, ngu nna shi hpe tsun wu ai. 64 Yesu gaw, Nang tsun ai hte maren rai nga ai: dai hta n-ga ngai nanhte hpe tsun made ga, Dai Masha Kasha gaw, Daru Magam a hkra maga e dung nga nna lamu na sumwi ni hta sa du ai hpe nanhte mu na marin dai, ngu nna shi hpe tsun wu ai. 65 Shaloi hkinjawng agyi wa gaw, shi a hpun palawng gang je kau nna, Shi gaw shatan nhkan ga tsun nu ai anhte hpa sakse mi naw ra nga ga ta? yu mu, nanhte nan dai shatan nhkan ga hpe na manu ai: 66 nanhte hpa nawn da mu ta? ngu mu ai. Shanhte htan let, Shi gaw si ging ai wa rai nga ai, nga ma ai. 67 Shaloi shanhte gaw shi a myiman hpe mayen mahtaw bun ai hte shi hpe htwi mu ai: 68 nkau mi shi hpe kahpret nna, Hkristu e nang hpe bye ai kadai rai nga a ta? myihtoi ga hte tsun dan mi, nga ma ai. 69 Petru chyawm gaw dai wing kata de dung nga ai: shaloi nchyang numsha langai mi shi kaw sa nna, Nang mung Galile masha Yesu hte rau nga ga ndai, ngu wu ai. 70 Shi mahtang mahkra a man e nyet kau nna, Nang tsun ai ga ngai n chye nngai, ngu wu ai. 71 Bai nta jan de pru wa yang, num kaga shi hpe mu nna, dai yang na ni hpe, Ndai wa mung Nazaret na Yesu hte rau rai nga ai, ngu mu ai. 72 Bai, matsa mawa let, shi nyet kau nna, Dai wa hpe ngai n chye nngai, ngu wu ai. 73 Dai hpang gade n na yang, dai yang e tsap nga ai ni gaw sit sa wa nna, Gaja wa nang mung, shanhte hta lawm nga ndai: na a ga mung nang hpe shadan da ndai, ngu nna Petru hpe tsun mu ai. 74 Dai rai nna, shi dagam nna matsa mawa ga hte, Dai wa hpe ngai n chye nngai, ngu mu ai: shaloi jang, u goi sai. 75 Dai rai nna, Petru gaw, U garai n goi yang, nang ngai hpe masum lang nyet kau na rin dai, nga nna Yesu tsun ai ga hpe dum dat wu ai: shaloi shi gaw shinggan de pru nna ja ja hkrap nga ai.

Mahte 27

27:1 Jahpawt du jang, hkinjawng agyi ni hte, mung masha ni a salang ni nlang hte gaw, Yesu hpe sat kau na lam bawng hkut nga masai: 2 dai rai nna, shanhte shi hpe gyit nhtawm, Pilat munggyi hpang de sa ap kau mu ai. 3 Ya shi hpe ap kau ai Yuda gaw, Yesu dawdan hkrum ai hpe mu chye jang shi myit malai lu nna, gumhpraw lap sumshi hpe hkinjawng agyi ni hte salang ni hpang de bai la sa nna, Ngai dingman ai asai hpe ap kau we ai majaw, yubak kap ni ai, ngu mu ai. 4 Shanhte gaw, Dai anhte hte hpa seng nga a ta? nang hkrum yu u ngu mu ai. 5 Shaloi dai gumhpraw hpe, nawku Htingnu hta e shi kabai tawn da nna, pru mat wa nhtawm, shi dai nan dau si mat ai. 6 Hkinjawng agyi ni chyawm gaw, dai gumhpraw hpe la nna, Dai gaw asai jahpu rai nga ai majaw, alu sutdek hta e bang tawn da na htung n nga ai, nga ma ai. 7 Shanhte bawng hkut la nhtawm, di bu sama a ga dachyawk hpe, dai hte mari la nna, tsasam masha ni a matu lupwa shatai mu ai. 8 Dai majaw ya du hkra Sai ga dachyawk, ngu nna dai ga hpe tsun shalai da mu ai. 9 Shaloi nna, Dai Madu ngai hpe hkangda ai hte maren, Israela kashu kasha ni nkau mi, manu tawng sai wa ai jahpu ngu na gumhpraw lap sumshi hpe shanhte sawn la nna, 10 di bu sama a ga dachyawk a matu ya kau mu ai, nga nna myihtoi Yeremia tsun ai ga dik ang wa sai. 11 Ya, Yesu gaw dai munggyi a man e tsap nga ai: munggyi mung, Nang Yuda ni a hkawhkam rai nga n ni? ngu nna shi hpe san wu ai: Yesu gaw, Nang tsun ai hte maren rai nga nngai, ngu wu ai. 12 Raitimung, hkinjawng agyi ni hte salang ni shi hpe mara shagun yang, shi hpa mung n htan wu ai. 13 Shaloi Pilat gaw, Shanhte gade wa na a lam sakse hkam ma ai hpe nang n na n ni? ngu nna shi hpe tsun wu ni. 14 Shi mahtang ga hkaw mi muk n htan wu ai: dai rai nna, munggyi gaw ja ja wa a mau nga ai. 15 Dai poi hta e, shawa masha ni ra ai hku hkan nna, bawngdung ai masha langai ngai hpe shanhte a matu dat ya na, munggyi a ahtung rai ga ai. 16 Dai shaloi e Baraba ngu ai, kajai gumhkawng ai bawngdung ai wa langai mi nga nga ai. 17 Dai rai nna shanhte zuphpawng nga ma yang, Pilat gaw, Nanhte a matu dat ya na, kadai mahtang hpe tsaw myit ta? Baraba hpe rai myit ni? shing n rai, Hkristu ngu ai Yesu hpe rai myit ni? ngu nna shanhte hpe san mu ai: 18 Kaning rai nme law, manawn masham majaw, shanhte shi hpe ap kau mu ai hpe, shi chye nga ai. 19 Ya, dai tara tingnyang hta e shi naw dung nga yang, shi a madu jan shi kaw shangun nna, Dai dinghpring ai wa hpe hpa mung hkum di u; dai ni pyi, yupmang hta e shi a majaw, ngai nni nkri law law wa hkrum nngai, ngu nna htet dat wu ai. 20 Hkinjawng agyi ni hte salang ni chyawm gaw, Baraba hpe hpyi nna, Yesu hpe sat kau na, ngu nna shawa masha ni hpe shadut mu ai. 21 Shaloi munggyi gaw shanhte hpe htan nna, Ndai yan hta na, nanhte a matu dat ya na, gara mahtang hpe nanhte tsaw myit ta? ngu mu ai. Shanhte gaw, Baraba hpe tsaw ga ai, ngu nna htan mu ai. 22 Bai Pilat gaw, Dai rai yang gaw, Hkristu ngu ai Yesu hpe ngai kaning di na we ta? ngu nna shanhte hpe tsun mu ai. Shanhte nlang, Wudang hta jen da u ga, ngu mu ai. 23 Bai shi gaw, Shingrai taw gaw, shi n hkru ai, hpa wa galaw hkrup sata? ngu mu ai. Shanhte chyawm gaw, Wudang hta jen da u ga, nga nna grau jahtau bu ma ai. 24 Pilat mahtang gaw, hpa hku mung n dang lu ai hte kabrawng kabrang byin wa ai hpe mu mu yang, ntsin la nna, shawa masha ni a man e lata hpe kashin let, Ndai wa a asai hta na ngai lawt nga n ga: nanhte nan myit yu nga mu, ngu wu ai. 25 Dai rai nna dai masha nlang hte gaw, Shi a asai anhte a ntsa e mung, anhte a shu sha ni a ntsa e mung mara nga mali ga, nga nna htan ma ai. 26 Shaloi jang, shi Baraba hpe shanhte e dat ya mu ai: Yesu hpe mahtang shi kayat nna, wudang hta jen da ai hkrum u ga, ap kau dat wu ai. 27 Shaloi, dai munggyi a hpyen ma ni gaw, Yesu hpe htingnu nhku de woi wa nna, dai hpyendap na nlang hte hpe, shi a man e jahpawng tawn mu ai. 28 Shanhte shi a hpun palawng raw kau nna, ahkyeng nsan ai nba lawai ya mu ai: 29 Ju kagup mung shanhte hkri la nhtawm, shi a baw hta shagup ya mu ai rai nna, shi a hkra lata e kumba yan mi jum shangun nna, shi a man e lahput hput di let, shi hpe asawng nna, Yuda ni a hkawhkam e, nang a lu nit ga law! ngu mu ai; 30 bai, shi hpe mayen mahtaw bun nhtawm, dai kumba yan hpe shanhte la nna, shi a baw hpe kayat ya mu ai. 31 Shi hpe asawng asang di ngut jang, dai nba hpe shanhte raw kau nna, shi a hpun palawng hpe jahpun nhtawm, wudang hta e jen da na, shapraw sa wa mu ai. 32 Shanhte pru sa wa ma yang, Simun mying ai Kureni masha langai mi hpe shanhte mu hkrup nna, Yesu a wudang hpai ya u ga, shi hpe shadip mu ai. 33 Ya, Golgohta ngu ai, Pungkum mying ai shara de du jang, hka ai tsi hte hpaw ai tsabyi jahku lu u ga, shanhte shi hpe jaw mu timung, 34 dai hpe chyim yu nhtawm, shi n kam lu wu ai. 35 Shi hpe wudang hta e jen da ngut jang, shanhte hpaida da ai hte shi a hpun palawng hpe jawm karan la mu ai: 36 dai yang e mung shanhte dung nga nna shi hpe sin da mu ai. 37 Shi a baw ntsa e Ndai wa gaw, Yuda ni a khawhkam, Yesu rai nga ai, ngu nna shi a mara madun ai laika hpe shanhte ka shakap da mu ai. 38 Shaloi e, shi hte rau damya lahkawng hpe, hkra maga de langai mi, pai maga de langai mi, wudang hta e jen da mu ai. 39 Lam e lai sa wa ai ni mung, shi hpe shatan nhkan di nna, tinang a baw hpe kanga let, 40 Naw ku Htingnu hpe run kau nna, masum ya na laman e bai de lu na nga ai wa e, na a hkum hpe nan hkye la u: nang Karai Kasang a Kasha rai n yang gaw, wudang hta na yu hkrat wa u, ngu mu ai. 41 Hkinjawng agyi ni, laika ka ai sara ni hte salang ni mung, dai hte maren shi hpe asawng asang di nna, 42 Masha kaga hpe shi hkye la ga ai: tinang hkum hpe nan n hkye la lu a hka. Shi gaw Israela hkawhkam rai nga ai; ya wudang hta na yu wa u ga, shaloi anhte shi hpe kamsham na ga ai. 43 Shi gaw Karai Kasang hta hpa nga ai; shi hta awng nga yang gaw, ya shi hpe mawai la u ga: kaning rai nme law, Ngai gaw Karai Kasang a Kasha rai nga nngai, shi nga ai, nga ma ai. 44 Shi hte rau wudang hta jen da hkrum ai damya yan mung dai hte maren shi hpe aroi arip di mu ai. 45 Ya, ahkying kru kaw nna, ahkying jahku du hkra, mung ting hta e nsin chyip rai mat ai. 46 Ahkying jahku e daram Yesu gaw nsen kaba hte, Elo-i, Elo-i lema sabakhtani? nga nna jahtau wu ai: dai gaw, Nye a Karai Wa e, nye a Karai Wa e, hpa rai nang ngai hpe kau da nga n ta? nga ai, rai lu ai. 47 Dai makau e tsap nga ai ni nkau mi dai hpe na mu yang, shi Elia hpe shaga nga ai, nga ma ai. 48 Shaloi jang shanhte hta na marai langai mi gat sa nna, hka kamu la nhtawm, ntsin hkri jahpring nna, dai hpe kumba yan hta shakap nhtawm, shi hpe hkyen jaw wu ai. 49 Kaga ni mahtang, Nga nga nu ga; Elia shi hpe sa hkye la na ru ai kun, anhte yu yu ga, ngu mu ai. ( Bai, kaga wa langai mi, ri hte shi a garep e galun ya wu ai rai nna, ntsin hte asai pru wa ai. ) 50 Bai Yesu gaw nsen kaba wa hte jahtau let, shi a wenyi jahti mat lu ai. 51 Shaloi, yu mu, nawku Htingnu na nba grang ntsa de nna hkren, ka-ang brang ga mat ai; ginding aga mung ashun awam wa nna, lunghkrung ni ga mat wa ma ai; 52 lup ni mung hpaw mahka wa nna, dai hta e yup nga ai chyoi pra ai ni a hkum tsawp law law wa rawt wa nna, 53 shi bai hkrung rawt wa ai hpang lup ni hta na pru wa shajang nhtawm, dai chyoi pra ai mare de shang wa nna, masha law law hte hpe tinang nang a hkum shadan dan mu ai. 54 Ya hpyen latsa up ai bu hte shi hte rau Yesu hpe sin nga ai ni, dai nnang nawn hte byin mabyin ni hpe mu mu yang shanhte hkrit kahpra nna, Gaja wa, ndai wa gaw Karai Kasang a Kasha nan rai nga ai, nga ma ai. 55 Galile mung na Yesu kaw hkan nang wa ai hte shi hpe galaw daw ai numsha law law mung, dai shara e nga ma ai rai nna, tsan tsan yang nna a yu nga ma ai: 56 dai hte hta Magdala Mari, Yaku hte Yosep a kanu Mari, Zebedi a kasha yan nu ni, nang nga ma ai. 57 Ya, shana du yang, Aramahti a mare na, Yosep mying ai sut su ai wa langai mi sa du ai; shi hkum nan Yesu a sape rai nga ai. 58 Dai wa gaw Pilat hpang de shang nna, Yesu a hkum tsawp hpe hpyi wu ai, Shaloi dai hpe ya dat na ahkang jaw da wu ai. 59 Dai rai nna, dai hkum tsawp hpe Yosep la nhtawm, lachyit sumpan hte kayawp ahkyen nna, 60 nlung hta krawk ai, shi a lup nnan hta e bang tawn da wu ai: nlung kaba mung, dai lup a mahka e shi galau pat da nna, wa mat ai. 61 Dai yang e Magdala Mari yan kaga Mari nga nga nna, dai lup tawtap e dung nga ma ai. 62 Dai shachyip ai nhtoi lai ai hpang shani e, hkinjawng agyi ni hte Hparishe ni Pilat hpang de sa zuphpawng nna, 63 Madu e, ndai hkalem ai wa gaw naw hkrung nga yang, Masum ya nhtoi hta e, ngai bai hkrung rawt wa na nngai, nga nna shi tsun ai hpe anhte dum sagaw ai. 64 Dai majaw shi a sape ni shi hpe sa lagu la nhtawm, Si mat ai ni kaw na bai hkrung rawt wa sai, nga nna shawa masha ni hpe n tsun lu hkra, masum ya nhtoi ting dai lup hpe sin nga mu ga, hkangda u: shing n rai, shawng na shut ai lam hta, hpang na mahtang gaw grau yak wa na ra ai, ngu mu ai. 65 Pilat mahtang, Nanhte sin langa lu myit dai; sa wa masit: nanhte rai lu ai hte maren, malawm magawm di mu, ngu nna shanhte hpe tsun dat mu ai. 66 Dai rai nna shanhte sa wa nna dai nlung hpe dazik dawk ai hte lup hpe malawm magawm di mu ai rai nna, sin langa ni mung shanhte hte rau rai nga ma ai.

Mahte 28

28:1 Ya dai laban nhtoi lai magang wa nna, bat mi a shawng shani nhtoi hprim hpram rai wa jang, Magdala Mari hte kaga Mari yan gaw, dai lup hpe yu yu na kawan sa ma ai. 2 Shaloi, yu mu, nnang nawn kaba nawn wa ai: kaning rai nme law, dai Madu a lamu kasa langai mi, lamu de na yu hkrat wa nna dai nlung hpe sa galau kau nhtawm, dai hta e dung nga ai. 3 Shi a ahpraw asam myihprap zawn rai nga nna, shi a hpun palawng hkyen zawn hpraw nga lu ai. 4 Shi hpe hkrit kajawng ai majaw, sin ai ni gari kawa rai nna, si ai masha zawn htan mat ma ai. 5 Dai lamu kasa mahtang, numsha yan hpe tsun mu ai gaw, Nan hkum hkrit myit; wudang hta jen da sai Yesu hpe, nan tam nga myit dai hpe ngai chye nga nngai: 6 shi nang e nga ai n rai; shi tsun dan sai hte maren bai hkrung rawt wa sai: sa marit; shi taw nga sai shara hpe sa yu maru. 7 Bai, alawan pru wa nhtawm, Si ai ni kaw na shi bai hkrung rawt wa sai, ngu nna shi a sape ni hpe tsun dan mu: yu mu, nanhte a shawng e, Galile mung de shi sa wa na ra ai; dai yang e nanhte shi hte hkrum na marin dai: yu mu, ngai nan hpe tsun dan made ai, ngu mu ai. 8 Shaloi shan gaw hkrit kahpra ai hte kabu gara ai myit kaba hte dai lup de na alawan wa nhtawm, shi a sape ni hpe shana ya na, gat wa ma ai. 9 Shaloi, yu mu, Yesu shan hpe tau la nna, Ngwi pyaw nga myit ga, ngu mu ai: shan gaw shi a lagaw hpe sa ginshum let shi hpe nawku ma ai. 10 Bai Yesu gaw, Hkum hkrit myit; Galile mung de wa jahkrum mu ga, nye a hpunau ni hpe sa tsun dan mu; dai yang e, ngai hte hkrum na mara ai, ngu mu ai. 11 Ya shan sa wa nga ma yang, yu mu, sin langa ni hta na nkau mi, mare de shang nna, dai byin mahbyin nlang hte hpe hkinjawng agyi ni hpe shana ya mu ai. 12 Shaloi shanhte salang ni hte zuphpawng nna bawng hkut ngut yang, shanhte gaw hpyen ma ni hpe gumhpraw law law wa jaw nhtawm, 13 Shana aten e, anhte yup nga yang, shi a sape ni shi hpe sa lagu la kau mu ai, nanhte ngu mu. 14 Munggyi gaw dai lam hpe na la dam yang, nanhte ru tsang n hkrum myit ga, anhte shi hpe shalen na gaw ai, ngu dat mu ai. 15 Shingrai shanhte dai gumhpraw hpe la nna, sharin dat ai hte maren di da mu ai: dai rai nna, ga dai gaw, Yuda masha ni hta, dai ni du hkra kajai gara pri rai wa sai. 16 Dai sape shi langai chyawm gaw, Yesu shanhte hpe hkangda ai Galile mung na bum de, lung mat wa ma ai. 17 Shi hpe mu mu yang, shanhte nawku ma ai; nkau mi mahtang kam shut nga ma ai. 18 Shingrai Yesu shanhte hpang de sit sa wa nna, Sumsing lamu hta e mung, ginding aga hta e mung, uphkang na ahkang nlang hte, ngai hpe ap ya ni ai. 19 Dai majaw nanhte pru sa nna, masha amyu baw shagu hpe sape shatai let, Kawa a, Kasha a, chyoi pra ai Wenyi a amying nsang hta, shanhte hpe baptisma jaw nhtawm, 20 ngai nanhte hpe hkangda mada yawng hte hpe hkan shadik lu mu ga, shanhte hpe sharin shaga ya mu: dai hta kaga, yu mu, lamu ga aprat htum hkra, ngai nanhte hte rau dinggrin anga nga na nngai law, ngu nna shanhte hpe matsun dat mu ai.

Marku 1

1:1 Karai Kasang a Kasha, Yesu Hkristu a kabu gara shiga a npawt nhpang re ai lam. 2 Yu mu, na a man e na a lam lajang magang na, Nye a kasa hpe ngai shangun dat we ai; 3 Nam mali kata e jahtau ai nsen gaw: Dai madu a lam lajang da mu, Shi a lam masun ni hpe shading mu, nga nna, 4 myihtoi Esaia laika hta ka da nga ai hte maren, yubak raw dat kau na matu, myit malai baptisma hkaw dan ai hte, nam mali hkan e baptisma jaw ai Yawhan gaw, paw pru ra ai. 5 Dai rai nna, Yuda mung ting na ni hte, Yerusalem hkan na nlang hte gaw, shi hpang de pru sa wa nna, tinang a yubak hpe shapraw dan let, shi a lata hte Yawdan hka hta e baptisma hkam la ma ai. 6 Yawhan chyawm gaw, gawla-u mun hte da ai hpun palawng hpe bu hpun nna, shi nshang e shanhpyi shingkyit kyit nga ai: dinggam-yaw hte nam na lagat jahku hpe shi lusha nga ai. 7 Shaloi shi gaw, Ngai hta n-gun grau rawng ai wa gaw, nye a hpang e du na ra ai: shi a kyepdin sumri hpe ngai gum raw na pyi ging nga nngai n rai. 8 Ngai gaw nanhte hpe hka hta baptisma jaw masade ai, raitimung, dai wa gaw, nanhte hpe chyoi pra ai Wenyi hta baptisma jaw na marin dai, ngu nna hkaw dan mu ai. 9 Dai nhtoi hte hta e Yesu gaw, Galile mung, Nazaret mare de na sa du nna Yawhan a lata hte Yawdan hka hta e baptisma hkam la wu ai. 10 Shaloi jang, dai hka hta na shi pru lung wa yang sumsing lamu gaw ga malang wa ai hte, dai Wenyi gaw hkrudu zawn, shi a ntsa e yu wa ai hpe, shi mu wu ai rai nna, 11 Nang gaw nye tsawra ai Kasha rai nga ndai; nang hta ngai sharawng awng nngai law, nga ai nsen gaw lamu de na ngoi pru ai. 12 Shaloi jang, dai Wenyi gaw nam mali hkan e shi hpe shadut wu ai. 13 Satan a gunglau ai hkrum let, dai nam mali hkan e, nhtoi mali shi ya tup shi nga nga ai; matse labye ni hte rau shi rai nga ai rai nna, lamu kasa ni shi hpe galaw daw mu ai. 14 Yawhan gaw ap kau hkrum ai hpang, Yesu gaw Galile mung de sa du nna, 15 Dai aten ladaw dik wa ai hte, Karai Kasang a mungdan gaw ni wa magang ra ai: myit malai lu nna, dai kabu gara shiga hpe kamsham nga mu, ngu nna Karai Kasang a kabu gara shiga hpe hkaw dan mu ai. 16 Galile nawng makau e garet hkawm nga yang, Simun hte Andre yan nau gaw nawng hta e sumgawn kabai bang nga ai hpe, shi mu hkrup wu ai: kaning rai nme law, shan gaw nga hkan ai masha rai nga ma ai. 17 Shaloi Yesu gaw, Ngai kaw hkan marit; masha hpe hkan hkwi na masha, ngai nan hpe shatai na made ai, ngu nna shan hpe tsun mu ai. 18 Shaloi jang, shan gaw dai sumgawn ni hpe kau da nna, shi kaw hkan nang ma ai. 19 Bai, loi mi hkawm sa wa yang, Zebedi a kasha Yaku hte shi a kanau Yawhan yan hpe shi mu hkrup mu ai; shan gaw dai li hta e, tinang a sumgawn ni hpe kapa nna nga nga ma la ai. 20 Shaloi jang, shi shan hpe shaga mu ai: dai rai nna shan gaw, shan a kawa Zebedi hpe, nchyang ni hte rau, dai li hta e jahti da nna shi kaw hkan nang ma ai. 21 Dai hpang shanhte Kaperna-um mare de shang ma ai. Shaloi jang laban nhtoi e shi shanhte a tara jawng hta shang nna sharin shaga nga ai. 22 Shi sharin shaga ai lam hpe shanhte mau mat nga ma ai: kaning rai nme law, laika ka ai sara ni zawn n rai, daru magam ahkang lu ai wa zawn shi shanhte hpe sharin shaga ya mu ai. 23 Shaloi jang, shanhte a tara jawng hta e, n san n seng nat kap ai masha langai mi lawm nga ai: 24 shi jahtau nna, Nazare wa Yesu e, anhte nang hte hpa seng ga ta? anhte hpe jahten na nang sa du n ni? nang kadai re ai ngai chye nga nngai; Karai Kasang a chyoi pra ai wa nang rai nga ndai, ngu wu ai. 25 Shaloi Yesu gaw, Atsin sha nga u, shi kaw na pru wa u, ngu nna shi hpe daru kau wu ai. 26 Dai rai nna, dai n seng ai nat gaw shi hpe bu kashan shangun nna nsen kaba hte jahtau let shi kaw na pru mat wa ai. 27 Nlang hte gaw mau mahka nga nna, Ndai gaw, hpa rai nga a ta? ningnan sharin shaga ai lam rai i? daru magam ahkang hte n seng ai nat ni hpe pyi shi htet da nna, shanhte madat mara nga ma ai, nga nna shada da tsun hkat ma ai. 28 Shaloi jang Galile mung ting na shara shagu hkan e, shi a lam kajai gara gumhkawng pri rai wa sai. 29 Shaloi jang, dai tara jawng hta na pru wa nhtawm, shanhte gaw Yaku yan Yawhan hte rau, Simun yan Andre a nta de shang wa ma ai. 30 Ya Simun a kani hkali bu nna kaleng taw nga ai: shaloi jang shanhte gaw shi a lam shi hpe tsun dan mu ai. 31 Shaloi shi sit wa nna, shi a lata jum let shi hpe sharawt wu ai. Dai hkali mung kawp mat nna, shi shanhte hpe galaw daw mu ai. 32 Ya, jan shang nna shana ahkying du jang, shanhte machyi makaw hkrum ai ni hte nat kap ai ni nga manga hte hpe, shi hpang de sa hpai tawn mu ai: 33 dai rai nna, mare ting, dai chyinghka lam makau e sa zuphpawng nga ma ai. 34 Shingrai ana ahkya amyu myu hte machyi ai masha law law hpe shi shamai shatsai ya nna, nat law law hpe mung, shaden kau mu ai; shi gaw Hkristu rai nga ai hpe, nat ni chye nga ma ai majaw, shi shanhte hpe ga tsun na ahkang n jaw mu ai. 35 Jahpawt manap jau jau e, nhtoi garai n htoi yang, shi rawt pru nna, nam na machyi shim ai shara de sa wa nhtawm, dai yang e akyu hpyi nga ai. 36 Shaloi Simun hte shi hte rau nga ai ni shi hpe hkan tam nga ma ai: 37 shanhte shi hpe hkrum nna, Nlang hte gaw nang hpe tam nga ma ai, ngu nna shi hpe tsun mu ai. 38 Shi gaw, Grupyin hkan na mare kahtawng ni hta e ngai hkaw dan lu n ga, shara kaga de anhte sa wa saga; dai lam majaw ngai sa du nngai, ngu nna shanhte hpe tsun mu ai. 39 Shaloi, Galile mung ting na shanhte a tara jawng ni hta e, shi sa hkaw dan nna, nat ni hpe shaden kau mu ai. 40 Manggang kap ai masha langai mi mung shi hpang de sa ai rai nna, lahput hput di let, Nang hkraw n yang gaw, ngai hpe shapra ya lu na rai nga ndai, ngu nna hpyi nem wu ai. 41 Shi gaw matsan dum ai hte shi a lata ladawn let shi hpe ahtawk nna, Ngai hkraw nga nngai, san pra wa nu, ngu wu ai. 42 Shaloi jang, dai manggang shi kaw na pru mat nna, shi san pra mat ai. 43 Shaloi shi gaw, De a lam, kadai hpe mung, ga hkaw mi pyi nang n tsun n ga, sadi nga u: pru wa nna, hkinjawng wa hpe na a hkum madun dan nhtawm, shanhte a matu sakse tai u ga, nang san pra ai a matu, Mawshe tawn da ai hte maren, hkungga wa nawng ya u, 44 ngu nna dai wa hpe ginhtim da nhtawm tin tin shabawn dat wu ai. 45 Shi mahtang pru wa nna, dai hpe aja awa hkai dan ai hte dai lam hpe kajai gumhkawng dat wu ai: shingrai Yesu gaw, mare kata de leng leng n shang lu ai rai nna, nam mali hkan e anga nga ai: shara magup hkan na ni mung, shi hpang de sa du ma ai.

Marku 2

2:1 Ya tawng marang mi na ai hpang Kaperna-um de bai shang yang, dai nta hta e shi rai nga ai hpe, na gara shajang ma ai. 2 Dai rai nna, masha lan lak zuphpawng nga ma ai rai nna, chyinghka lam makau e pyi, shanhte a matu shang shara n nga hkra, rai nga ma ai: shi shanhte hpe dai mungga tsun dan mu ai. 3 Shaloi hkum katsing si ai masha langai mi hpe, marai mali hpai nna shi hpang de tawn da mu ai. 4 Masha wunawng chyat nga ma ai majaw, dai wa hpe shi hpang de n shashawn lu jang shi rawng nga ai nta magap hpe shanhte kayen kau mu ai rai nna, dai hpe tawk waw nhtawm, katsing si ai wa hpe yup rai hte nawng shayawn dat mu ai. 5 Yesu gaw shanhte a kamsham ai myit mu jang, Sha e, na a yubak dat kau ya sade ai, ngu nna katsing si ai wa hpe tsun wu ai. 6 Dai yang e laika ka ai sara ni nkau mi dung nga nna, Ndai wa gaw, hpa rai ning nga tsun a ta? Shatan nhkan ga shi tsun nga ai: 7 Karai Kasang sha n rai yang yubak dat kau ya lu ai gaw kadai wa rai nga a ta? nga nna tinang a kraw kata e myit aru yu nga ma ai. 8 Shanhte gaw tinang a kraw kata e shingrai myit aru yu nga ma ai hpe, Yesu gaw shi a wenyi hta chye chyang nga ai majaw, Nanhte hpa rai kraw kata e ndai hte wa myit aru nga myit ta? 9 Dai katsing si ai wa hpe, Na a yubak dat kau ya sade ai; shing n rai, Rawt u, na a yupku hpe la nna hkawn wa na, ning ngu tsun ai ga yan hta gara mahtang grau tsun loi a ta? 10 Raitimung, Masha kasha gaw, ga ntsa e, yubak dat kau ya ai ahkang aya lu ai gaw, nanhte chye nga myit ga, 11 dai hkum katsing si ai wa hpe, Nang hpe ngai tsun de ga, Rawt u, na a yup rai hpe la nna, na a nta de wa nu, ngu nna tsun wu ai. 12 Shaloi jang shi rawt nna, shi a yup rai hpe lang let, mahkra a man e pru wa ai; dai majaw nlang hte gaw mau mahka nga ma ai rai nna, Karai Kasang hpe shakawn kungkawn let, Anhte galoi mung, dai zawn re ai n mu yu ga ai, nga ma ai. 13 Bai, dai nawng makau de shi pru sa wa ai; shawa hpawng ni nlang hte gaw, shi hpang de sa du ma ai rai nna, shi shanhte hpe sharin shaga yu mu ai. 14 Garet hkawm wa let, Alhpe a kasha Lewi, kang hta ai sum e dung nga ai hpe, shi mu hkrup wu ai rai nna, dai wa hpe, Ngai kaw hkan rit, ngu wu ai. Shaloi shi rawt nna, shi kaw hkan nang nga ai. 15 Dai hpang shi a nta de shat sha na shi dung nga ai rai nna, kang hta ai ni hte yubak kap ai masha law law wa, Yesu hte shi a sape ni rau dung nga ma ai: kaning rai nme law, law law wa rai nga ma ai rai nna shanhte shi kaw hkan nang ma ai. 16 Shingrai, yubak kap ai ni hte, kang hta ai ni rau shi shat sha nga ai hpe, Hparishe ni a laika ka ai sara ni mu mu yang shanhte gaw, Kang hta ai ni hte yubak kap ai ni rau, shi lusha nga a hka? ngu nna, shi a sape ni hpe tsun mu ai. 17 Yesu dai hpe na wu yang, N-gun ja ai ni tsi sara n ra ma ai, machyi ai ni sha ra ma ai; dinghpring ai ni hpe shaga na n rai, yubak kap ai ni hpe shaga na she ngai sa du nngai, ngu nna shanhte hpe tsun mu ai. 18 Ya, Yawhan a sape ni hte Hparishe ni lusha gam ga ma ai: dai rai nna shanhte shi kaw sa du nna, Yawhan a sape ni hte Hparishe ni a sape ni, lusha gam ga ma ai mi, na a sape ni mahtang hpa rai lusha n gam nga ma ta? ngu mu ai. 19 Yesu gaw, La nnan wa gaw hkungran ai gawk hte seng ai ma ni hte naw nga nga yang, shanhte lusha gam lu ma ni? la nnan wa, shanhte hte rau naw nga ai laman e, shanhte lusha gam lu ma ai n rai. 20 Raitimung la nnan wa hpe shanhte kaw na jahka mat wa na nhtoi du na ra ai; dai nhtoi hta e shanhte lusha gam na mara ai. 21 Palawng nsa hpe, garai n htun ai sumpan chyen hte kadai mung n kapa ga ai: shing di yang, dai achyen gaw dai hpe sha ai hte, dai nnan gaw dingsa hpe gang je kau nna, de a je mat ai gaw grau kaba wa ai. 22 Tsabyi nnan hpe mung, shanhpyi ndum dingsa hta, kadai mung n bang da ga ai: shing di yang, tsabyi gaw ndum ni hpe kapaw je kau nna, dai tsabyi hte ndum ni sum mat ma ai. ( Tsabyi nnan gaw, ndum nnan hta bang ga ma ai.) 23 Dai hpang laban nhtoi hta e, Yesu gaw hkaibang yi hku ga hkawm wa ai rai nna, shi a sape ni lai wa let, mam nsi hpe di ma ai. 24 Dai rai nna Hparishe ni gaw, Yu u, n mai galaw ai amu, shanhte hpa rai laban nhtoi hta e galaw nga ma ta? ngu nna shi hpe tsun mu ai. 25 Shaloi shi gaw, Dawi hte shi hte rau nga ai ni kadawn nna, kawsi hkrum nga ma yang, 26 hkinjawng agyi Abiahta a lakhtak e, Karai Kasang a nta de shang nna, hkinjawng ni sha n rai yang gaw, kadai mung n mai sha ai madun da ai muk hpe sha nna, shi hte rau nga ai ni hpe mung, jaw mu ai amu a lam, nanhte kalang mi muk n hti yu myit ni? ngu nna shanhte hpe tsun mu ai. 27 Bai shi gaw, Laban nhtoi gaw masha a matu tai wa sai, masha chyawm gaw laban nhtoi a matu tai wa lu ai n rai: 28 dai rai nna, Masha Kasha gaw, laban nhtoi a Madu mung rai nga ai, ngu nna shanhte hpe tsun mu ai.

Marku 3

3:1 Shaloi, tara jawng hta e shi bai shang ai rai nna, dai yang e, lata katsing si ai masha langai mi nga ai. 2 Laban nhtoi hta e, dai wa hpe shamai ya na kun? nga nna, Yesu hpe mara shagun na, shanhte gyam yu nga ma ai. 3 Shaloi shi gaw dai lata katsing si ai wa hpe, Ka-ang e rawt tsap u, ngu nna tsun wu ai. 4 Bai, shi shanhte hpe, Laban nhtoi hta e, kaja ai amu galaw na, n kaja ai amu galaw na, masha asak hpe hkye la na, shing n rai sat kau na, gara mahtang mai galaw na a kun? ngu mu ai. 5 Shanhte chyawm gaw, atsin sha rai nga ma ai. Shingrai shanhte a myit ja ai majaw, shi myit yawn nna, masin pawt let shanhte hpe grupyin yu nhtawm, Na a lata ladawn u, ngu nna dai wa hpe tsun wu ai. Shi mung ladawn nna, shi a lata mai mat lu ai. 6 Dai rai nna, Hparishe ni pru nhtawm, shi hpe kaning di sat kau lu na, nga nna Herodi ngu ai ni hte, shaloi jang, bawng nga ma ai. 7 Ya Yesu gaw, shi a sape ni hte rau dai nawng de htawt mat wa ma ai: Galile mung na, masha wunawng wuwa hkan nang nga ma ai; 8 dai hta n-ga Yuda mung hteYerusalem mare na, Idumia mung hte, Yawdan hka wora hkran na ni hte, Turu hte Sidun ginwang hkan na masha wunawng wuwa, shi galaw dat ai amu a lam hte hpe, na ma ai rai nna, shi hpang de sa du ma ai. 9 Shawa masha ni shi hpe n htu hkra mu ga, li kaji langai mi shi a matu san tawn da na, shi a sape ni hpe tsun da mu ai: 10 kaning rai nme law, masha law law hpe shi shamai ya mu ai majaw, ana ahkya hkrum ai ni nlang hte, shi hpe ahtawk lu hkra, nga nna shi kaw anin shang wa ma ai. 11 N seng ai nat ni mung shi hpe mu jang, shi a man e dagup nna, Nang gaw Karai Kasang a Kasha rai nga ndai, nga nna jahtau ma ai. 12 Shi hpe n shadan dan mu ga, nga nna shi shanhte hpe aja awa daru kau mu ai. 13 Bai, dai bum de shi lung wa nhtawm, shi ra ai ni kadai hpe mung shaga la mu ai rai nna, shanhte shi hpang de sa du ma ai. 14 Dai rai nna, shi hte rau nga nga na hte ga hkaw dan na matu shangun dat nna, nat ni hpe shaden kau lu na ahkang lu la mu ga, 15 marai shi lahkawng hpe shi san da nhtawm shanhte hpe kasa ni, ngu nna shamying da mu ai. 16 Dai marai shi lahkawng hpe shi san da nna, Simun hpe, Petru ngu nna mying hkawt shamying wu ai; 17 bai, Zebedi a kasha Yaku hte, Yaku a kanau Yawhan shan nau hpe, Buanerga, ngu nna mying hkawt shamying mu ai; dai gaw, mu ngoi ai kasha yan ngu ai rai nga ai: 18 bai, Andre, Hpilip, Barhtolume, Mahte, Htawma, Alhpe a kasha Yaku, Htade, Kanani masha Simun hte, 19 shi hpe ap kau na Yuda Iskarut hte rai ma ai. 20 Dai hpang, shi nta hta e shang wa ai rai nna, shanhte shat pyi n sha lu hkra, shawa masha ni bai zuphpawng nga ma ai. 21 Shi a nta masha ni dai hpe na mu yang, Shi myit n gring nga ai, ngu nna shi hpe rim la na pru sa wa ma ai. 22 Dai hta n-ga, Yesusalem na yu wa ai laika ka ai sara ni mung, Shi gaw Bezebula rawng ai wa rai nga ai; nat ni a agyi wa hte shi nat ni hpe shaden kau mu ai, nga nna tsun ma ai. 23 Shingrai shi shanhte hpe shaga la nna, ga shadawn hku hte tsun mu ai gaw, Satan gaw, Satan hpe kaning rai shaden kau lu na a ta? 24 Mungdan langai mi dinghku brun mat wa yang, dai mungdan gaw grin nga lu na n rai; 25 nta langai mi mung, dinghku brun mat wa yang, dai nta gaw grin nga lu na n rai. 26 Dai hte maren, Satan gaw tinang hpang maga rawt nna, tinang hte hka wa yang, shi n hking nga lu ai sha, htum mat na ra ai. 27 Dai hta kaga n-gun ja ai wa hpe garai n gyit yang, shi a nta hta shang nna, shi a arai hpe hpya la na, kadai mung n galaw lu ai; shi hpe gyit ngut jang she, shi a nta hpe hpya la na ru ai. 28 Ngai nanhte hpe teng teng tsun made ga, Shinggyim masha ni a yubak yawng hte hte, shanhte a shatan nhkan ai ga amyu myu hpe, raw dat kau na ahkang lu ma ai: 29 raitimung, dai chyoi pra ai Wenyi hpe shatan nhkan ai masha kadai raitimung, htani htana e raw dat kau ai n hkrum lu na ma ai: dai masha gaw htani htana yubak akap nga ai wa rai nga ai, ngu mu ai. 30 Dai nga ai gaw, Shi n seng ai nat rawng nga ai, nga nna shanhte tsun ai ga a majaw, tsun mu ai. 31 Dai laman e, shi a kanu hte kanau ni gaw, shinggan e tsap nna, shi hpe shaga u ga, shangun dat ma ai. 32 Dai shaloi e shawa masha ni shi a grupyin e dung nga ma ai rai nna, shanhte gaw, Yu u, na nnu hte nnau ni, shinggan de nna nang hpe tam nga ma ai, ngu nna shi hpe tsun mu ai. 33 Htan let shi shanhte hpe tsun mu ai gaw, Ngai nu hte ngai nau ni gaw, kadai ni mahtang rai nga ma ta? ngu mu ai. 34 Bai, shi a grupyin e dung nga ai ni hpe kayin yu let, shi gaw, Ngai nu hte ngai nau ni hpe, yu mu. 35 Karai Kasang a myit hkan nga ai ni, kadai raitimung, ngai nau, ngai jan, ngai nu, rai nga ma ai, ngu mu ai.

Marku 4

4:1 Bai, dai nawng makau e shi sharin shaga rai nga ai. Shawa masha law law wa, shi hpang de sa hpawng ma ai majaw, nawng na li hta e shi shang nna dung nga ai: shawa masha ni nlang hte gaw, nawng makau hkarang ntsa e, nga nga ma ai. 2 Shaloi ga shadawn hku law law hte, shi shanhte hpe sharin shaga mu ai rai nna, shi a sharin shaga ai lam hta, Madat mara mu: 3 yu mu, nli gat ai wa gaw, nli gat na pru sa wa ai. 4 Gat dat wu yang, nkau mi gaw lam makau e hkrat nna, u ni dai hpe sa hta sha ma ai. 5 Kaga gaw, ga n law ai lung rawk ntsa e hkrat wa nna, ga n htat ai majaw ya sha tu pru timung, 6 jan pru katen jang, krau mat wa nna, ru n jung lu ai majaw nyip si mat ma ai. 7 Kaga gaw, ju hpun ni hta hkrat ai; ju hpun ni mung kaba wa nna, dai hpe lim kau mu ai majaw, asi n si lu ai. 8 Bai, kaga gaw ga kaja hta hkrat ai; dai gaw asi si let, kaba wa ai hte grawng wa ai rai nna, dang sumshi, kru shi, latsa rai, mayat wa ai. 9 Bai shi gaw, Na la na, na tu ai wa gaw, na lu u ga, ngu nna shanhte hpe tsun mu ai. 10 Dai hpang shi hkrai sha rai nga yang, shi hte rau nga ai ni hte sape shi lahkawng gaw, dai ga shadawn a lam shi hpe san mu ai. 11 Dai rai nna, shi gaw, Karai Kasang a mungdan a sung htum ai lam hpe, nanhte hpe shadan dan ai ahkang rai nga ai: 12 shinggan de nga ai ni chyawm gaw, Myit n kayin lu nna, raw dat kau ai n hkrum mu ga, Shanhte mu lamu n yu lu na hte, Na lana n chye na lu mu ga, hpa lam mung ga shadawn hku hte sha, shanhte hpe shapraw dan na nme ai, ngu nna shanhte hpe tsun mu ai. 13 Bai shi gaw, Ndai ga shadawn hpe nanhte n chye na lu mu ni? dai rai yang, ga shadawn yawng hte hpe kaning rai chye lu na myit hka? 14 Nli gat ai wa gaw, dai mungga hpe gat nga ai. 15 Lam makau e mungga hpe gat da nna, taw nga ai hte chyawm gaw, dai mungga hpe na la ai shaloi jang, Satan gaw sa du nna, shanhte hta gat da ai mungga hpe shaw la kau ai ni hpe, ang nga ai. 16 Dai hte maren, dai lung rawk hta gat da ai hte gaw, dai mungga hpe na la ai, shaloi jang, kabu gara ai myit hte hta la ai ni rai ma ai: 17 raitimung, shanhte hta ru n jung nga ai rai nna, tawng marang mi sha nga nga ma ai: dai hpang, dai mungga a majaw ru tsang ai hte zingri zingrat hkrum ai shaloi jang, shanhte myit kataw wa ma ai. 18 Bai, ju hpun hta e, kaga mung gat nga ai; dai ni gaw, dai mungga hpe na la timung, 19 ndai mungkan a myit tsang ai, sutgan a hkalem ai hte myit marin ai lam kaga ga shang wa nna, dai mungga hpe lim kau ai majaw, asi n si lu ai ni, rai nga ma ai. 20 Bai, ga kaja hta e gat nga ai ni chyawm gaw, dai mungga hpe na la ai hte dai hpe hkam la nna, asi si let, dang sumshi, kru shi, latsa dang, mayat wa ai ni rai nga ma ai, ngu nna shanhte hpe tsun mu ai. 21 Bai shi shanhte hpe tsun mu ai gaw, Pyengdin hpe, mung npu e, shing n rai, yupku npu e shadun na, la sa ga ma ni? pyengdin shadun hta e shadun na she, la sa ga ma ai, n rai ni? 22 kaning rai nme law, n dan n pru lu hkra makoi da ai arai n nga ai; dai hta kaga, makoi magap da ai arai mung, n dan n leng wa lu na, n nga ai. 23 Na la na, na tu ai wa kadai mung, na la mu ga, ngu mu ai. 24 Bai shi shanhte hpe tsun mu ai gaw, Nanhte hpa na la myit dai gaw, sadi nga mu: nanhte hteng ya ai dang hte nanhte hpe bai hteng ya na marin dai: rai sa, nanhte myat wa na marin dai. 25 Kaning rai nme law, lu ai wa kadai hpe mung, naw jat jaw na ra ai; n lu ai wa kadai hpe mung, shi lu ai rai hpe pyi, shi kaw na naw shaw la ya na ra ai, ngu mu ai. 26 Bai shi gaw, Dai rai nna, Karai Kasang a mungdan gaw, aga nsta e nli gat bang ai masha zawn, rai nga ai; 27 gat ngut jang, shani shana shi yup wa, rawt wa nga ai rai nna, shi n chye ai lam hta nli gaw prut wa nna, tu kaba wa nga ai. 28 Aga gaw shi hkrai asi si wa ai hte, shawng e maku, hpang e htingkyang, dai hpang htingkyang hta e mam nsi hkum wa shangun ai. 29 Mam myin jang nmut ta du ai majaw, shi shaloi jang, dai nhkyau hpe shangun dat wu ai, ngu mu ai. 30 Bai shi gaw, Karai Kasang a mungdan hpe, hpa hte shabung lu na gaw ta? hpa ga shadawn hku hte shadawn na gaw ta? 31 Dai gaw chyinghkrang tum zawn rai nga ai; ga ntsa e gat dat jang ga ntsa na tum amyu mahkra hta kaji htum dam timung, 32 gat dat ai hpang, tu wa nna, shatmai lap amyu mahkra hta grau kaba wa ai hte, lakung lakying kung dam wa nna, ntsa malen u ni de a shingnip hta e shingbyi nga lu ma ai, ngu mu ai. 33 Shingrai ga shadawn hku law law hte, shanhte matsing lu ai hte maren, shi shanhte hpe dai mungga lam tsun dan mu ai. 34 Ga shadawn hte n rai yang gaw, shi shanhte hpe hpa mung n tsun dan yu ai. Raitimung, shanhte hkrai rai nga ma yang, ga nlang shi a sape ni hpe shapraw shadan dan mu ai. 35 Dai shani a shana du jang, shi gaw, Anhte wora hkran de rap wa saga, ngu nna shanhte hpe tsun mu ai. 36 Dai rai nna, shawa masha ni hpe kau da nhtawm, shi kaman nga ai hte maren, shanhte gaw shi hpe li hta e shashawn la mu ai; li kaga mung shi hte rau naw lawm ma ai. 37 Shaloi, nbung laru kaba ru wa nna, hka leng ni li hta kaput bang wa ai majaw, dai li gaw hpring magang wa ai. 38 Shi chyawm gaw, li mai de punghkum ntsa e, yup pyaw nga ai: shaloi shanhte shi hpe jasu nna, Sara e, anhte mat mat na hpe, nang hpa n nawn nga n ni? ngu nna shi hpe tsun mu ai. 39 Dai majaw shi rawt nna, nbung hpe daru wu ai hte, dai nawng hpe, Atsin sim rai nga u, ngu wu ai. Dai nbung mung num mat wa nna, a katsi sha rai mat wa ai. 40 Shaloi shi gaw, Nanhte hpa majaw hkrit nga myit ta? nanhte kamsham ai myit garai n rawng nga myit ni? ngu nna shanhte hpe tsun mu ai. 41 Shanhte mahtang hkrit kaba hte hkrit nga nna, Ndai wa gaw kadai wa re ai i? dai nbung hte nawng pyi shi a ga madat nga ma hka? nga nna shada da tsun shajang ma ai.

Marku 5

5:1 Ya dai nawng wora hkran na, Gerase mung de shanhte du ma ai. 2 Shi gaw li de na pru wa ai shaloi jang, n seng ai nat kap ai masha langai mi lupwa kaw na pru nna, shi hpe sa tau wu ai. 3 Dai wa a nga shara gaw, lup ni hta e rai lu ai rai nna, kadai mung, hpri sumri hte pyi shi hpe n gyit da lu mu ai; 4 kaning rai nme law, hkang hkyihkyang hte hpri sumri hte law law lang shi hpe gyit da mu timung, hpri sumri hpe shi gang dut kau ai hte, hkang hkyihkyang ni hpe agrawp malan kau wu ai rai nna, kadai mung shi hpe shani la lu na n-gun n rawng ma ai. 5 Shani shana tut e dai lup ni hte bum hkan e shi nga nga nna, jahtau marawn let shi hkum hpe nlung hte arin aran di wu ai. 6 Yesu hpe tsan tsan kaw nna mu mada wu yang, shi gat sa nna shi hpe nawku ai hte, Tsaw Htum ai Karai Kasang a Kasha Yesu e, ngai nang hte hpa daw nga ga ta? 7 Nang ngai hpe n zingri n ga, Karai Kasang hta, ngai nang hpe dagam de ai, ngu nna nsen kaba hte jahtau wu ai. 8 Kaning rai nme law, shi gaw, N seng ai nat, nang e, dai wa kaw na pru mat wa u, ngu nna shi hpe jet da boi sai. 9 Bai Yesu gaw, Na amying hpa rai lit ta? ngu nna shi hpe san wu yang, shi gaw, Anhte law wa rai nga ga ai majaw, nye a amying Legio rai nga li ai, ngu nna shi hpe htan wu ai. 10 Dai hta kaga, dai mung hkan na shanhte hpe n shabawn kau mu ga, shi Yesu hpe grai hpyi nem wu ai. 11 Ya, dai bum lanem hkan e, wa nawng kaba kanaw sha nga ma ai. 12 Dai rai nna, nat ni gaw, Anhte dai wa ni hta shang lu u ga, shangun dat mi, ngu nna shi hpe hpyi nem mu ai. 13 Shaloi shi shanhte hpe ahkang jaw dat mu ai. N seng ai nat ni chyawm gaw, pru wa nhtawm wa ni hta shang ma ai rai nna, wa nawng gaw dai n-gam mahka kaw na nawng de rut gat bang wa nna, nawng hta e marit si mat ma ai: dai wa ni gaw hkying lahkawng daram rai nga ma ai. 14 Wa rem ai ni chyawm gaw, hprawng gat wa nna, dai mare hte nta htinghkrai hkan e, dai lam tsun dan ma ai. Shaloi, dai byin ai amu hpe yu yu na, shanhte pru sa wa ma ai. 15 Shanhte Yesu kaw du ma yang, Legio lawm ai nat kap ai wa gaw, hpun palawng bu hpun nna, shawoi na myit hte dung nga ai hpe, shanhte mu mu ai rai nna, hkrit kahpra mat ma ai. 16 Dai lam mu chye ai ni mung, dai nat kap ai masha hte wa ni hta kaning rai byin ai hpe, shanhte hpe hkap hkai dan mu ai. 17 Dai rai nna, shanhte a buga na pru wa na lam shi hpe jawm hpyi nem mu ai. 18 Dai li hta wa shang yang, shi hte rau nga nga na, nat kap ai wa gaw shi hpe hpyi nem wu ai. 19 Shi mahtang ahkang n jaw ai sha, Na nta na ni hte na a manang ni hpang de bai wa nna, dai Madu nang hpe gade wa karum nna, matsan dum nga ai hpe, wa tsun dan su, ngu nna shi hpe tsun dat wu ai. 20 Dai majaw shi pru wa nna, Yesu shi hpe gade wa karum sai gaw Dekapoli mung ginwang hkan e, hkaw dan mu ai rai nna, nlang hte nan mau mahka nga ma ai. 21 Ya, Yesu gaw li hta wora hkran de bai rap wa yang, masha wunawng kaba shi kaw sa hpawng ma ai; dai nawng makau e shi nga nga ai. 22 Shaloi, tara jawng agyi ni hta na, Ya-iru mying ai masha langai mi sa du nna shi hpe mu hkrup yang, shi a lagaw nhpang e dingnyawm nna, 23 Nye a shayi sha kaji nsa hti wa magang sai: shi bran wa nna, naw ahkrung nga u ga, shi a ntsa e lata mara ya na, sa wa rit, ngu nna akroi anoi shi hpe hpyi nem wu ai. 24 Dai rai nna, shi hte rau sa wa ai. Masha wunawng kaba mung, shi kaw hkan gumbawm nna, shanhte gaw shi hpe kanawng matep hkra mu ai. 25 Shi lahkawng ning tup sai htaw machyi ai numsha langai mi mung lawm nga ai: 26 shi gaw tsi sara law law a lata hta nni nkri law law wa hkrum ai hte, shi lu malu mahkra hpe ginlut kau wu timung, mai mat lu hkra n rai, grau nna yak wa lu ai; 27 shi gaw Yesu a lam na wu yang, dai shawa hpawng a shingnawm hta sa du nna, shi a hpun palawng hpe ahtawk wu ai. 28 Kaning rai nme law, shi gaw, Shi a hpun palawng hpe sha pyi ngai ahtawk lu taw, ngai mai wa lu na ring ngai, nga ai. 29 Shaloi jang, shi a sai nhpang hkyet mat wa nna, shi a atsu atsam mai mat ai hpe, shi hkum dai dum chye wu ai. 30 Yesu gaw, shi hta na atsam pru wa ai hpe, shi a myit hta shaloi jang chye dum wu ai majaw, dai shawa hpawng de kayin wa let, Nye a hpun palawng hpe kadai ahtawk nga nit ta? ngu nna san mu ai. 31 Dai rai nna shi a sape ni, Shawa masha ni nang hpe kanawng matep hkra nga ai hpe, nang mu nit htawm e, Ngai hpe kadai ahtawk mi ta? naw nga n hka i? ngu nna shi hpe htan mu ai. 32 Shi mahtang, dai amu galaw ai num hpe mada yu na, kayin yu nga ai. 33 Dai numsha chyawm gaw, shi hta byin ai amu hpe chye chyang ai majaw, hkrit gari let sit sa nna, shi a man e dingnyawm nhtawm, shi a lam yawng mayawng hte hpe teng ai hku sha tsun dan wu ai. 34 Shi mahtang, Shayi sha e, na a kamsham ai gaw nang hpe shamai ya nit dai: ngwi pyaw ai hte wa u: na a atsu atsam mai wa nu ga, ngu nna shi hpe tsun dat wu ai. 35 Shi naw tsun nga yang, tara jawng agyi a nta na ni sa du nna, Na a shayi sha si mat sai; dai sara hpe hpa rai naw shatsang nga n ta? ngu mu ai. 36 Yesu mahtang dai sa tsun ai ga hpe hpa n nawn nna, Hkum hkrit et; kamsham ai myit sha rawng u, ngu nna tara jawng agyi wa hpe tsun dan wu ai. 37 Shaloi, Petru, Yaku hte Yaku a kanau Yawhan hta kaga, shi kaw hkan nang na ahkang kadai hpe mung n jaw mu ai. 38 Ya, dai tara agyi a nta de du ma yang, kaming kamawng re ai, hkrapngu hkrapngoi ai hte sharung shayawt kaba hpe shi mada mu wu ai: 39 nhku de shang wa yang, Nanhte hpa rai kaming kamawng re ai hte hkrapngu hkrapngoi rai nga myit ta? ma gaw si ai n rai, yup pyaw nga ai, nga nna shanhte hpe tsun mu ai. 40 Shanhte chyawm gaw shi hpe asawng asang ngu kau mu ai. Shi mahtang nlang hte hpe shaden kau ngut jang, dai ma a kanu yan kawa hte shi hte rau nga ai ni hpe, shaga la nna, dai ma a taw nga ai shara de shang wa ai: 41 shaloi dai ma a lata hpe shi jum da nna, Talihta Kumi, ngu wu ai; de a ga lachyum gaw, Mahkawn e, rawt u, ngai ngu de ai, nga ai rai lu ai. 42 Shaloi jang, dai mahkawn gaw rawt nna, hkawm wa ai: shi a aprat gaw shi lahkawng ning rai nga ai. Shingrai shanhte nachying mau mahka mat ma ai. 43 Dai amu a lam hpe kadai mung n chye mu ga, shi shanhte hpe grai di ginhtim da mu ai: dai hta kaga, ma hpe sha hpa jaw na, shi htet da mu ai.

Marku 6

6:1 Shaloi dai yang na shi pru mat wa ai rai nna, shi a buga de du wa ai: shi a sape ni mung shi kaw ahkan nang nga ma ai. 2 laban nhtoi du yang, tara jawng hta e, shi sharin shaga hpang nga ai. Ga na lu ai ni law law wa, myit na kahpra nga ma ai rai nna, Ndai wa gaw, ndai hte hpe kanang na lu la wu hka? Dai wa lu la ai hpaji byengya gaw hpa baw rai nga a ta? Shi a lata hta byin ai, ndai magam amu gaw, hpa wa rai nga a ta? 3 Shi gaw, dai lasama wa rai nga ai, n rai ni? Mari a kasha shi rai nga ai hte, Yaku, Yosep, Yuda, Simun hte a kahpu mung, shi rai nga ai, n rai ni? Shi a kajan ni mung, anhte hte rau, nang e nga nga ma ai, n rai ni? nga wa ma ai rai nna, shi a lam myit kataw wa ma ai. 4 Yesu mahtang, Myihtoi gaw, tinang a buga hta tinang a mayu dama ni hte, tinang a nta hta n rai jang she, arawng lu nga ai, ngu nna shanhte hpe tsun mu ai. 5 Nji nmu hkrum ai nkau mi a ntsa e lata mara nna shamai ya na hta kaga, dai yang e hpa magam amu hpe mung, shi n galaw lu ai. 6 Shanhte a n kam n sham ai myit majaw, shi amau nga ai. Dai hpang, grupyin hkan na kahtawng ni hta e, shi kawan hkawm nna, sharin shaga nga ai. 7 Shaloi dai sape shi lahkawng hte hpe shi shaga la nhtawm, marai lahkawng yep yep di nna, shangun dat mu ai hte, n seng ai nat ni hpe dang kau lu na ahkang, jaw dat mu ai rai nna; 8 dawhkrawng hta kaga, hkrun lam a matu, muk mung, htingpa mung, shingkyit hta dingsen mung, n gun n lang ai sha, kyepdin din nna, 9 palawng lahkawng hpe mung n hpun ai sha, sa wa mu, ngu nna shanhte hpe shadum dat mu ai. 10 Dai hta n-ga, Gara nta hta raitimung, nanhte shang myit yang, dai yang na pru wa ai nhtoi du hkra, dai kaw anga nga mu. 11 Gara shara hta e raitimung, nanhte hpe n hkap la nna, nanhte hpe n madat mara nga ma yang gaw, dai yang na pru wa let, shanhte hpang maga de sakse tai u ga, nanhte a lagaw lahpan hta kap ai ga nhpu hpe, ahpu sharun kau da mu, ngu nna shanhte hpe tsun dat mu ai. 12 Shaloi shanhte pru wa nna, masha ni myit malai lu na lam, hkaw dan mu ai: 13 nat law law hte hpe shanhte shaden kau mu ai hte, nji nmu hkrum ai ni law law hpe naman chya ya nna shamai shatsai ya dat mu ai. 14 Shaloi Herod hkawhkam gaw dai lam hpe na wu ai: kaning rai nme law, Yesu a amying danhkung wa lu ai rai nna, masha ni gaw, baptisma jaw ai Yawhan gaw si ai ni kaw na bai hkrung rawt wa sai; dai majaw, dai magam amu hte gaw, dai wa hta e pra pra rai pru nga ai; 15 kaga ni mahtang, Shi gaw, Elia rai nga ai; bai kaga hte gaw, Moi na myihtoi langai mi zawn, myihtoi bai pru ra ai, nga shajang ma ai. 16 Herod mahtang, dai na wu yang, Ngai baw htau kau se ai Yawhan gaw bai hkrung rawt wa sai, nga ai. 17 Ya Herod shi hkum nan, shi a kanau Hpilip a madu jan Herodia hpe hkungran la ai majaw, shangun dat nna Yawhan hpe rim la nhtawm, htawng hta e hkangda wu ai. 18 Kaning rai nme law, Yawhan gaw, Na nnau a madu jan hpe la na, n mai nga ai, ngu nna Herod hpe daru kau wu ai. 19 Herodia mung shi hpe myit machyi nga nna, shi hpe sat kau mayu wu timung, shi n rai lu ai: 20 kaning rai nme law, Yawhan gaw dingman ai hte chyoi pra ai wa rai nga ai hpe, Herod chye wu ai majaw, shi hpe hkrit kamyin ai hte makawp maga nga ai: shi a ga na la wu yang, shi myit grai ung ang rai nga timung, shi a ga na la na grai ra nga ai. 21 Ya, Herod a shangai ai nhtoi du nna, shi gaw shi a hkringmang ni, hpyen du ni hte Galile mung na agyi ni hpe shana shat galaw daw nga yang: 22 mai ang ai nhtoi du ai majaw, Herodia a shayi sha shang nhtawm ka nga ai: dai lam hpe, Herod hte shi hte rau dung ai ni gaw ra mu ai. Dai rai nna, dai hkawhkam gaw, Nang tsaw matsaw ngai kaw hpyi rit ngai jaw na de ai, ngu nna dai mahkawn hpe tsun wu ai. 23 Dai hta n-ga, Nang ngai hpe hpyi mahpyi, nye a mungdan ka-ang hkup du hkra, ngai nang hpe jaw na de ai, ngu nna shi hpe dagam wu ai. 24 Shaloi shi pru wa nna shi a kanu hpe, Ngai hpa hpyi na ma? ngu nna san wu yang, shi gaw, baptisma jaw ai Yawhan a baw hpe hpyi u, ngu wu ai. 25 Shaloi jang dai hkawhkam hpang de shi tin tin shang nna, Baptisma Sara Yawhan a baw hpe, ban hta e nang ngai hpe ya jang jaw na, ngai ra nga nngai, ngu nna hpyi wu ai. 26 Dai hkawhkam chyawm gaw ja ja myit yawn nga timung, dai dagam kau ai ga hte, rau dung rau hpawng nga ai ni a majaw, shi hpe ndang kau mayu ai n rai. 27 Shaloi jang, hkawhkam gaw, mang galang langai mi hpe shangun dat nna, Yawhan a baw hpe sa la na, hkang dat wu ai. 28 Shaloi shi sa wa nna, htawng hta e Yawhan a baw hpe daw nhtawm, dai baw hpe ban e la wa nna, dai mahkawn hpe ya dat wu ai: dai mahkawn mung kanu e ap ya wu ai. 29 Shi a sape ni dai na mu yang, shanhte sa du nna, shi a moi mang hpe la wa nhtawm, lup hta e tawn da mu ai. 30 Dai hpang, kasa ni gaw Yesu kaw wa zup nna, shanhte galaw sai lam nlang hte hte, sharin shaga ya ai lam yawng shi hpe shana dan mu ai. 31 Dai rai nna shi gaw, Nam mali kata na machyi shim ai shara de, nanhte hkrai nan sa nna, loi mi ban sa la mu, ngu nna shanhte hpe tsun mu ai. Kaning rai nme law, sa sa wa wa rai nga ai ni gaw law la ma ai rai nna, shanhte gaw shat sha na aten pyi n mu da mu ai. 32 Dai rai nna, shanhte gaw li hte sa nhtawm nam mali na machyi shim ai shara de sa wa ma ai. 33 Raitimung, masha ni gaw shanhte pru sa wa ma ai hpe mu mada nna, law law wa shanhte hpe chye mu ai hte, mare shagu hkan na hkarang lam hku e gat sa wa nna, shanhte a shawng e du ma ai. 34 Shingrai shi pru nna masha wunawng kaba mu mada ai hte shanhte gaw rem ai wa n nang ai sagu hpung hte bung nga ma ai majaw, shi shanhte hpe matsan dum nna, law law wa sharin shaga ya mu ai. 35 Ya, jan du wa sayang, shi a sape ni shi kaw sa du nna, Ndai yang nam mali rai nga ai hte jan du wa magang sai: 36 dai rai nna masha ni gaw grupyin kahtawng hte htinghkrai ni hta, lusha hpa hpa sa mari la mu ga, shanhte hpe shabawn dat mu, ngu mu ai. 37 Shi gaw, Nanhte nan shanhte hpe sha na jaw mu, ngu nna htan mu ai. Shanhte gaw, Anhte sa wa nna, gumhpraw lap ni tsa hte muk mari jaw na rai kun? ngu nna shi hpe san mu ai. 38 Shi mahtang shanhte hpe, Nanhte muk gade lu nga myit ta? sa yu mu, ngu mu ai. Shanhte chye jang, Muk manga hte nga lahkawng sha rai nga ai, ngu mu ai. 39 Dai rai nna yawng hte gaw, hpung mi hte hpung mi, dai tsingdu yang e hkrawn taw nga mu ga, shi htet da mu ai. 40 Shanhte mung latsa tsa hte manga shi shi di nna, lam mi hte lam mi, dung nga ma ai. 41 Shaloi dai muk manga hte nga lahkawng hpe shi la nna, lamu de mada yu let shaman ya nhtawm, dai muk hpe ahkyep alep nna, masha ni a man e hkan tawn mu ga, sape ni hpe jaw da mu ai; dai nga lahkawng hpe mung, masha gu hkra hpe karan jaw mu ai. 42 Shanhte nlang sha nna hkru kat ma ai. 43 Dai hta kaga, ngam ai ahkyep ahkap hpe shanhte lahkawn la yang, mung shi lahkawng hpring dem rai nga ai: nga mung naw ngam nga ai. 44 Muk sha ai ni chyawm gaw, lasha hkying manga ting rai nga ma ai. 45 Shaloi jang, shawa masha ni hpe naw shabawn lawn nga yang, sape ni li hta shang nna, shi a shawng e nawng wora hkran Betsaida mare de rap sa wa mu ga, shi shanhte hpe reng dat mu ai. 46 Shanhte hpe shabawn dat ngut jang, shi akyu hpyi na matu, dai bum de lung wa sai. 47 Shana du yang, dai li gaw nawng ka-ang e rai nga nna, shi hkrai sha hkarang de hti nga ai. 48 Nbung hkap htu nga ai majaw, dai li hpe grai shap kyin nga ma ai hpe, shi mu mu yang, dai shana na ahkying ladaw mali daram hta e, nawng ntsa e hkawm let, shi shanhte kaw sa du ai rai nna, shanhte kaw lai wa mayu sam nga ai. 49 Shanhte chyawm gaw, shi nawng ntsa e hkawm nga ai hpe, mu mu yang, dai gaw minla rai nga ai, myit nawn nna jahtau marawn ma ai: 50 kaning rai nme law, nlang hte gaw shi hpe mu mada nna myit kahpra nga ma ai. Shaloi jang, shi shanhte hte shaga hkat nna, Ngwi pyaw myit ga: ngai she rai nngai; hkum hkrit myit, ngu nna shanhte hpe tsun mu ai. 51 Shaloi dai li de, shi shanhte kaw shang nna, dai nbung gaw num mat wa ai. Shanhte mahtang nachying mau katu nga ma ai: 52 kaning rai nme law, dai muk sha ai lam shanhte n chye na ma ai hte, shanhte a myit ja mat malu ai. 53 Ya, wora hkran de rap tawng ngut yang, Genesaret ngu ai danam de shanhte du ma ai rai nna, sek nga ma ai. 54 Dai li hta na shanhte yu wa ma ai shaloi jang, masha ni shi hpe chye mu ai hte, 55 dai ginwang ting gat kahkrang nna, machyi makaw hkrum ai ni hpe, hpun panep hte nawng, shi nga ai shara de, hpai sa du mu ai. 56 Dai hta kaga, gara kahtawng hta e raitimung, mare hta e raitimung, htinghkrai shara hta e raitimung, shi shang wa yang, dai yang na htingwang hta e, ana ahkya hkrum ai ni hpe shanhte tawn da mu ai rai nna, shi a hpun palawng banbyau hpe sha pyi ahtawk na ahkang hpyi nem mu ai: shi hpe ahtawk lu ai ni yawng hte nan, mai mat wa ma ai.

Marku 7

7:1 Dai shaloi e, Hparishe ni hte, Yerusalem na lung wa ai laika ka ai sara ni nkau mi gaw, shi kaw sa zup ma ai rai nna, 2 shi a sape nkau mi, lata n shin kau ai, awu asin ngu ai hte shat sha nga ma ai hpe, mu hkrup da mu ai. 3 Kaning rai nme law, Hparishe ni hte Yuda ni mahkra gaw, ji wa ni a ga madat hpe hkan nga ma ai rai nna, lata hpe atsawm sha n shin kau yang gaw, shat n sha yu ma ai: 4 gat de na bai wa timung, hkum garai n shin yang, shanhte n sha yu ma ai: dai hta n-ga; gawm ni, ka-mai ni, magri wan ni hpe kashin kau ai hta kaga, shanhte hkan ai ahtung ahking law law wa, naw rai nga malu ai. 5 Dai rai nna Hparishe ni hte laika ka ai sara ni gaw, Na a sape ni, hpa rai ji wa a ga madat hpe n hkan ai wa, awu asin re ai lata hte nan, shat sha nga ma ta? ngu nna shi hpe san mu ai. 6 Shi gaw, Sawt ai ni e, laika hta ka da nga ai hte maren, Ndai amyu gaw tinang a nten hte ngai hpe hkungga lara ma timung, Shanhte a myit masin ngai hte tsan gang malu ai: 7 Masha ga matsun hpe sha, htawn sharin shaga nga ma ai majaw, Shanhte ngai hpe kaman lila nawku nga ma ai, nga nna, nanhte a lam Esaia, myihtoi ga ka da ai gaw, gaja wa teng sa lu ai. 8 Nanhte gaw Karai Kasang a hkangda ai ga hpe kau da nhtawm, masha a ga madat hpe sha hkan nga myit dai, ngu mu ai. 9 Bai, shi shanhte hpe, Gaja wa nanhte a ga madat hpe hkan nga na nga nna. Karai Kasang a hkangda ai ga hpe nanhte shingkan kau mu ai. 10 Kaning rai nme law, Na nnu nwa hpe hkungga lara di u; bai, Kanu kawa hpe n kaja ai ga tsun ai wa gaw, teng teng si u ga, nga nna Mawshe tsun nga timung, nanhte gaw, 11 tinang a kanu kawa hpe, Nye a lata na nang lu la mai ai arai gaw, Korban ngu ai, Karai Kasang a matu alu kumhpa rai nga ai, nga nna tsun ai wa kadai raitimung, 12 tinang a kanu kawa hpe karum na, nanhte hkum nga myit dai; 13 dai rai nna, nanhte ap tawn da ai ga madat hte, Karai Kasang a mungga hpe nanhte sai kau da mu ai; shingrai lam law law wa nanhte galaw nga myit dai, ngu nna shanhte hpe tsun mu ai. 14 Shawa masha ni hpe shi bai shaga la nna shanhte hpe tsun mu ai gaw, Nanhte nlang ngai hpe madat mara nna, chye na la mu: 15 masha a shinggan e nga nna, shi kata de shang wa ai hpa raitimung, shi hpe awu asin di kau lu ai n rai; masha a kraw kata de nna pru wa ai mahtang gaw, masha hpe awu asin di kau wu ai, ngu mu ai. 17 Dai hpang, shawa masha ni hte hka wa nna, nta de bai shang yang, shi a sape ni, dai ga shadawn a lam shi hpe san mu ai. 18 Dai rai nna, shi shanhte hpe, Dai hpe sha mung nanhte n chye na la myit ni? Shinggan de nna masha kata de shang wa ai hpa raitimung, masha hpe awu asin di kau lu ai n rai, nanhte n dum lu myit ni? 19 kaning rai nme law, dai gaw, shi a myit masin kata de shang wa ai n rai, shi a kan kata de sha shang wa ai hte hkum tsan ai shara de bai pru wa ai: dai lam lusha yawng mayawng hpe jasan jaseng di wu ai. 20 Bai lam mi gaw, Masha hta na pru wa ai gaw, masha hpe awu asin di kau wu ai: 21 kaning rai nme law, masha a myit kata de nna, n kaja ai myit mang ai, num shut hpyit na, lagu na, masha sat na, num shaw na, lawhpa ai, n hkru n hkra ai 22 hkalem ai, ngang ai, manawn masham ai, shatan nhkan ai, gumrawng ai hte angawk angak re ai myit, pru wa ai: 23 dai n hkru ai lam nlang hte gaw kata de nna pru wa ai rai nna, masha hpe awu asin di kau wu ai, ngu mu ai. 24 Shaloi dai yang na shi rawt wa nna, Turu hte Sidun lamu ga jarit hkan e du hkra pru sa wa ai. Nta hta e shi shang nna, dai hpe kadai mung n chye lu u ga, shi ra nga timung, koi lu ai n rai. 25 Kaning rai nme law, n seng ai nat kap ai shayi sha kaji lu ai numsha gaw, shi a lam shaloi jang, na wu ai rai nna, sa du nhtawm, shi a lagaw nhpang e dingnyawm nna, shi a shayi sha kaw na dai nat hpe shaden kau ya u ga, shi hpe hpyi nem wu ai: 26 dai numsha chyawm gaw Heleni amyu na Suru-Hpiniki numsha rai nga ai. 27 Dai rai nna Yesu gaw, Ma ni hpe shat hkru hkra shawng jaw n ga: ma ni a shat la nna, gwi ni hpe jaw kau na n mai nga ai, ngu nna shi hpe tsun wu ai. 28 Dai numsha mahtang, Rai sa, Madu e, sha ku npu na gwi ni mung, ma ni a shat ahkyep ahkap hpe sha ga ma ai, ngu nna shi hpe htan wu ai. 29 Bai, Yesu gaw, Dai tsun ai ga a gawp e sa wa su: nat gaw, na a shayi sha kaw na pru wa sai, ngu nna shi hpe tsun wu ai. 30 Dai majaw shi nta de bai wa ai rai nna, dai ma gaw yupku ntsa e kaleng taw nga ai hte, nat gaw shi kaw na pru mat ai hpe, mu wu ai. 31 Bai, Turu a ga jarit kaw nna pru wa yang, Sidun hpe lai ga wa nna, Dekapoli ginwang ka-ang hku ga sa wa nhtawm, Galile nawng de sa du ai. 32 Shaloi na lahpang nna ma-a ai masha langai mi hpe, shanhte shi hpang de woi wa mu ai rai nna, shi a ntsa e lata mara ya na, hpyi nem wu ai. 33 Shingrai shawa masha hpawng na, shim ai shara de shi hpe shapraw la nhtawm, dai wa a na lashing hku shi a layung achyaw bang ai hte, mayen mahtaw nhtawm, shi a shinglet hpe mung ahtawk ya wu ai rai nna, 34 lamu de mada yu let, shi madai nna, dai wa hpe, Ethpahta, ngu wu ai: dai gaw, Hpaw wa u, nga ai, rai lu ai. 35 Dai rai nna, shi a na san mat wa ai hte, shi a shinglet lakang hpyan mat wa nna, ga leng leng tsun lu ai. 36 Dai lam kadai hpe mung n tsun dan mu ga, shi shanhte hpe ginhtim da mu timung, shanhte hpe je ginhtim je shanang hkai dan shajang mu ai. 37 Shanhte mung nachying wa mau mahka mat ma ai rai nna, Shi yawng mayawng hte hpe mai kaja ai hku galaw lu ai: na lahpang ai ni hpe na lu shangun nna, n chye shaga ai ni hpe ga tsun shangun lu ai, nga ma ai.

Marku 8

8:1 Ya, dai nhtoi hte hta e, masha wunawng kaba bai hpawng nga ma ai rai nna, shanhte shahpa hpa n lu ma ai shaloi, shi sape ni hpe shaga la nna, 2 Shawa masha ni ya masum ya tup ngai hte rau nga nga nna, hpa shahpa mung n lu ma ai majaw, ngai shanhte hpe matsan dum la nngai: 3 Kawsi nga yang, tinang nang a nta de shanhte hpe shabawn dat yang gaw, shanhte hkrun lam hkan e ba galawp wa na ma ai: shanhte hta na nkau mi mung tsan ai de nna sa du ma ai, ngu nna shanhte hpe tsun mu ai. 4 Sape ni shi hpe htan nna, Ndai nam mali hta e, shanhte hpe muk jahkru shakat lu hkra, kanang na wa lu la lu na rai ta? ngu mu ai. 5 Shi mahtang, Nanhte muk gade lu nga myit ta? ngu nna san mu yang, shanhte gaw, Sanit sha rai sai, ngu mu ai. 6 Dai rai nna shawa masha ni ga hta dung nga na shi hkangda mu ai: shaloi dai muk sanit hpe shi la nna, shakawn ngut jang, dai hpe ahkyep alep nhtawm, shanhte a man e hkambum da mu ga, shi a sape ni hpe jaw da mu ai: shanhte mung, shawa masha ni a man e, hkambum da mu ai. 7 Nga kaji loi mi sha mung shanhte lu nga ma ai rai nna, dai hte hpe shaman ya nhtawm, dai hpe mung hkambum da mu ga, hkangda mu ai. 8 Shaloi shanhte sha nna hkru kat lu nga ma ai; ngam ai adaw ahkyep hpe ka sanit tup shanhte lahkawn la mu ai. 9 Marai hkying mali daram rai nga ma ai; dai hpang shi shanhte hpe shabawn dat mu ai. 10 Shaloi jang shi a sape ni hte rau li kata de shi shang nna, Dalamanuhta a ginwang de e sa du ai. 11 Dai shaloi Hparishe ni pru sa nna, shi hte ndang kalang hkat ma ai hte, shi hpe chyam yu let lamu ntsa na lamik kumla hpe, shi kaw hpyi mu ai. 12 Shingrai shi a wenyi hta shi grai madai nna, Ndai amyu gaw hpa majaw lamik kumla hpe hpyi nga ma hka? ngai nanhte hpe teng teng tsun made ga Ndai amyu hpe lamik kumla hpa mung, shapraw dan na mawe ai n rai, ngu mu ai. 13 Shaloi shi shanhte hpe kau da nna, li hta e bai shang nhtawm, wora hkran de rap mat wa ai. 14 Shanhte mahtang muk gun na malap kau mu ai, dai li hta e muk tawng langai sha nan, ngam nga malu ai. 15 Shaloi shi shanhte hpe, Hparishe ni a matsi hte Herod a matsi hpe koi kau lu myit ga, sadi nga mu, ngu nna shanhte hpe ginhtim da mu ai. 16 Dai rai nna, shanhte gaw, Anhte muk n gun nga ga hka, nga nna shada da tsun hkat ma ai. 17 Yesu dai hpe chye wu yang, Nanhte muk n gun ai lam, hpa rai tsun hkat nga myit ta? ya du hkra nanhte n htai la lu nna, n chye na nga myit ni? nanhte a myit masin a ja nga malit ni? 18 myi tu timung, nanhte n mu nga myit ni? na tu timung n na nga myit ni? 19 Dai muk manga sha, masha hkying manga hpe ngai ahkyep alep jaw ai hpang, nanhte lahkawn la ai adaw ahkyep, mung gade hpring dem re ai hpe nanhte n dum kau manu ni? ngu mu ai. Shanhte gaw, Mung shi lahkawng re ai, ngu mu ai. 20 Dai muk sanit hpe mung, masha hkying mali hpe karan jaw yang, nanhte lahkawn la ai adaw ahkyep ka gade hpring dem rai nga a ta? ngu nna bai san mu yang, shanhte gaw, Ka sanit re ai, ngu nna shi hpe tsun mu ai. 21 Bai shi shanhte hpe, Ya du hkra wa nanhte n chye na nga myit ni? ngu nna tsun mu ai. 22 Shaloi shanhte gaw Betsaida de du ma ai. Ya, myi kyaw ai masha langai mi hpe shanhte shi hpang de woi wa mu ai rai nna, shi hpe ahtawk na hpyi da mu ai. 23 Shi gaw dai myi kyaw ai wa hpe lata hte dun nna, kahtawng shinggan de shapraw nhtawm, shi a myi hpe mayen madit nna, shi a ntsa e lata mara da let, Nang lama ma mu da nu ni? ngu nna shi hpe san wu ai. 24 Shi gaw dawng yu nna, Masha hpe ngai mu nngai; hpun zawn shanhte hkawm ma ai ngai mu mase ai, ngu wu ai. 25 Bai shi a myi ntsa e, lata mara da yang, dai wa gaw mada mu lu nna, myi majing rai mat ai hte, arai yawng mayawng hpe asan sha mu lu nu ai. 26 Shaloi shi a nta de shi hpe dat dat wu ai rai nna, Dai kahtawng hta e pyi nang hkum shang et, ngu dat wu ai. 27 Dai hpang Yesu hte shi a sape ni gaw Kesarea Hpilipi mare a kahtawng ni hta e lai hkawm wa ma ai rai nna, hkrun lam hkan rai nga yang, shi a sape ni hpe, Masha ni, ngai hpe kadai wa re ai, nga nga ma ta? ngu nna san mu ai. 28 Shanhte gaw, Baptisma Sara Yawhan re ai; kaga hte gaw, Elia re ai; bai, kaga hte gaw, Myihtoi ni hta na langai mi rai nga ai, nga ma ai, ngu nna shi hpe tsun dan mu ai. 29 Bai, shi shanhte hpe, Nanhte mahtang ngai hpe kadai wa re ai, nga nga myit ta? ngu nna san mu ai. Petru htan let, Nang, Hkristu rai nga ndai, ngu nna shi hpe tsun wu ai. 30 Dai rai nna, shi a lam kadai hpe mung n tsun dan u ga, shi shanhte hpe ginhtim da mu ai. 31 Dai shaloi e, Dai Masha Kasha gaw nni nkri law law wa hkrum nna, agyi salang ni, hkinjawng agyi ni hte laika ka ai sara ni e nyet kau ai hkrum na hte, sat kau ai hkrum nhtawm, masum ya nhtoi hpang e bai hkrung rawt wa lu na lam, shi shanhte hpe sharin achyin hpang mu ai. 32 Dai ga hpe shi dan dan leng leng tsun dan mu ai. Dai rai nna Petru gaw shi hpe shaga la nna, daru kau wu ai. 33 Shi mahtang kayin wa ai hte, shi a sape ni hpe mada yu let Petru hpe, Satan e nye hpang de sit mat wa u; Karai Kasang hte seng ai lam n rai, masha hte seng ai lam hpe sha nang myit nga ndai, ngu nna daru kau wu ai. 34 Bai shawa masha ni hte shi a sape ni hpe shi shaga la nna shanhte hpe tsun mu ai gaw, Ngai hpang de hkan sa mayu ai wa kadai raitimung, tinang hkum hpe ndang kau nna, shi a wudang hpai let, ngai kaw hkan nang ruga. 35 Tinang asak hpe hkye la mayu ai wa kadai mung, asak sum na ra ai: nye a matu hte, dai kabu gara shiga majaw, asak sum ai wa chyawm gaw, dai hpe hkye la lu na wu ai. 36 Bai, masha gaw ndai mungkan ting hpe madu lu da nna, tinang a asak sum mat a yang gaw, shi a matu hpa akyu nga lu ta? 37 masha gaw hpa gawng malai hkungga hte wa, tinang a asak hpe raw la lu na a ta? 38 Kaning rai nme law, ndai shut hpyit ai hte yubak kap ai amyu hta e, ngai hte ngai tsun ai mungga hpe kaya nga ai wa kadai mung, dai Masha Kasha gaw shi a Kawa a hpung shingkang hte chyoi pra ai lamu kasa ni hte nawng du sa wa yang, dai wa hpe kaya kau na ru ai.

Marku 9

9:1 Nanhte hpe ngai teng teng tsun made ai gaw, Nang e tsap nga ai ni nkau mi, Karai Kasang a mungdan gaw hpung dagu hte du ra ai hpe, garai n mu mu gaw, si ai n hkrum na ma ai, ngu mu ai. 2 Ya, de a hpang kru ya lai yang, Yesu gaw, Petru, Yaku, Yawhan hte hpe shaga la nhtawm, tsaw ai bum de, shanhte hpe hkrai woi lung wa mu ai. Shaloi, shanhte a man e shi a ahpraw asam galai wa ai hte, 3 shi a hpun palawng gaw kabrim kabram wa nna, nachying hpraw tu wa lu ai: ga ntsa na tsi chyaw ai wa kadai mung, dai hte wa hpraw jahtap lu ai n rai. 4 Mawshe yan Elia mung shanhte kaw danpru ma ai: shan gaw Yesu hte ga tsun ma ai. 5 Shaloi Petru Yesu hpe, Rabai e, ndai yang e nga na, anhte a matu mai nga ai: nang e sum masum, na a matu langai mi, Mawshe a matu langai mi, Elia a matu langai mi, anhte gap ga, ngu nna tsun wu ai. 6 Shanhte hkrit kahpra nga ma ai majaw, shi hpa tsun na hpe, n chye wu ai. 7 Dai shaloi sumwi du hkrat nna, shanhte hpe ka-up nhtawm, dai sumwi hta na nsen pru nna, Ndai wa gaw, ngai tsawra ai, ngai Sha rai nga ai: shi a ga madat mara mu, nga ai. 8 Ya akajawng sha kayin yu yang, Yesu hta kaga, shanhte kadai hpe mung n mu manu ai. 9 Ya dai bum de na yu hkrat wa ma yang, dai Masha Kasha gaw si ai ni kaw na garai n rawt rawt gaw, shanhte mu ai hpe, kadai wa hpe mung n hkai dan mu ga, shi shanhte hpe ginhtim da mu ai. 10 Shanhte mahtang dai ga hpe matsing la nna, Si ai ni kaw na bai rawt wa na, nga ai gaw, hpa nga ai rai lu hka? nga nna shada da san bu ma ai. 11 Shaloi shanhte gaw, Elia shawng du sa na ra ai, nga nna laika ka ai sara ni hpa majaw tsun nga ma ta? ngu nna shi hpe san mu ai. 12 Shi gaw, Gaja wa, Elia shawng du ra ai rai nna, yawng mayawng hte hpe shagrin da lu nu ai: dai hta kaga, dai Masha Kasha mung, nni nkri law law wa hkam nga nna, gangkau ai hpe hkrum na wu ai, nga nna hpa rai ka da nga a ta? 13 Nanhte hpe ngai tsun made ga, Elia gaw du boi sai rai nna, shi a lam ka da nga ai hte maren, shanhte gaw tinang a myit ra ai hku shi hpe di kau manu ai, ngu mu ai. 14 Bai, sape ni kaw du wa ma yang, shanhte a grupyin e masha wunawng kaba nga nga ma ai rai nna, laika ka ai sara ni shanhte hte ndang kalang hkat nga ma ai hpe, wa mu mu ai. 15 Shawa masha ni shi hpe mu hkrup jang, mau mahka mat ma ai rai nna, shi hpang de sa gat shakram mu ai. 16 Shaloi shi gaw, Nanhte gaw hpa lam shanhte hte san hkat nga myit ta? ngu nna shanhte hpe san mu yang, 17 Shawa masha ni hta na marai langai mi shi hpe htan nna, Sara e, ngai sha nang hpang de ngai woi wa ring ngai; n chye shaga ai nat rawng nga ai: 18 kanang mung shi hpe jashung yang, dai nat gaw shi hpe gumpye kau wu ai rai nna, shi hkumbawp lawu ai hte wa udik urin nna hkum akyip akap rai mat nga ai: shi hpe shaden kau ya mi ga, na a sape ni hpe ngai tsun dan nme ai raitimung, shanhte n rai lu ma ai, ngu wu ai. 19 Dai rai nna Yesu gaw, Makam masham n rawng ai amyu e, gaten du hkra ngai nanhte hte rau nga nga lu na rai ta? gaten du hkra nanhte hpe sharang nga lu na rai ta? shi hpe ngai hpang de woi sa marit, ngu nna htan mu ai. 20 Shaloi shanhte gaw dai ma hpe woi sa mu ai. Shi hpe mu hkrup ai shaloi jang, dai nat gaw shi hpe htan kashan shangun nna, shi ga de kadawng wa ai hte, hkumbawp lawu let gumkan galu nga ai. 21 Dai rai nna, Yesu gaw, Shingrai shi hta byin ai gaw, gade na wa sata? ngu nna kawa hpe san wu yang, shi gaw, Naw kaji kaw nna rai sai: 22 shi hpe jahten lu hkra nga nna, wan hta e raitimung, hka hta e raitimung, law law lang wa shi hpe kabai bang bang di wu ai: raitimung, nang rai lu n yang gaw, an hpe matsan dum nna karum ya mi, ngu wu ai. 23 Yesu gaw, Nang rai lu n-yang gaw!- Kamsham ai myit rawng ai wa gaw hpa mung rai lu na ra ai, ngu nna shi hpe tsun wu ai. 24 Shaloi jang, dai ma a kawa gaw, Ngai kamsham nga nngai, nye a n kam n sham ai myit naw matsan dum ya e, nga nna jahtau tsun ai. 25 Dai shawa masha ni gat let zuphpawng wa ma ai hpe Yesu mu wu yang, dai n seng ai nat hpe, N chye shaga nna na lahpang ai nat e, ngai nang hpe htet da de ga, shi hta na pru mat wa u; htawmhpang e galoi mung bai hkum shang nit, ngu nna daru kau wu ai. 26 Shaloi, shabam wa ai hte shi hpe bu kashan dat nhtawm, shi pru mat wa ai: dai ma mung si ai zawn rai mat ai hte, masha law law wa, Shi si mat sai, nga shajang ma ai. 27 Yesu mahtang shi a lata hpe dun let, shi hpe sharawt wu ai rai nna, shi rawt wa sai. 28 Nta nhku de bai shang wa yang, shi a sape ni lagyim san nna, Anhte dai nat hpe hpa majaw n shaden kau lu gaw ta? ngu mu ai. 29 Shi gaw, Ndai amyu hpe gaw, akyu hpyi ai hte sha n rai yang gaw, n shapraw lu na re ai, ngu nna shanhte hpe tsun mu ai. 30 Dai yang na pru wa ma yang, shanhte gaw Galile mung hku ga sa wa ma ai rai nna, dai hpe kadai mung n chye lu u ga, shi ra nga ai. 31 Kaning rai nme law, Dai Masha Kasha gaw masha ni a lata hta e ap kau ai hkrum nna, shanhte shi hpe sat kau na maru ai hte, sat kau ai hkrum ngut jang, masum ya nhtoi hpang e, shi bai hkrung rawt wa na ra ai, ngu nna shi a sape ni hpe sharin achyin ya nna, tsun dan mu ai. 32 Shanhte mahtang dai ga hpe n chye na mu timung, shi hpe jasan na n wam nga ma ai. 33 Dai hpang shanhte gaw Kaperna-um de du sa ma ai. Nta nhku de rawng nga yang shi shanhte hpe, Nanhte lam hkan e, hpa lam tsun hkat nga myit ta? ngu nna san mu ai. 34 Shanhte mahtang atsin sha nga ma ai: kaning rai nme law, Gara mahtang grau kaba nga ga ai kun? nga nna, lam hkan e shanhte shada da tsun hkat masai. 35 Shaloi shi dung nna, sape shi lahkawng hte hpe shaga la nhtawm, shanhte hpe, Grau mayu ai wa kadai raitimung, nlang a hpang na wa hte, nlang a ali ama tai u ga, ngu nna tsun mu ai. 36 Bai, ma kaji langai mi hpe shi shaga la nna, shanhte a ka-ang e shatsap tawn wu ai; shi hpe pawn la let shanhte hpe, 37 Ma kaji ni hta na, ndai zawn re ai ma langai mi hpe, nye a amying majaw hkap la ai wa kadai mung, ngai hpe hkap la nga ai: ngai hpe hkap la ai wa mung, ngai hpe hkap la ai n rai, ngai hpe shangun dat ai wa hpe she hkap la ai rai nga ai. 38 Dai shaloi e Yawhan gaw, Sara e, anhte kaw n hkan nang ai marai langai mi na a amying hte nat shaden kau ai hpe anhte mu hkrup sagaw ai raitimung, anhte gaw n hkan nang ai majaw, shi hpe hkum kau gaw ai, ngu nna shi hpe tsun wu ai. 39 Yesu mahtang, Shi hpe hkum hkum myit: nye a amying hte magam amu galaw ai wa gaw, nye a lam hpe n kaja ai ga alawan tsun lu na, kadai mung n nga ai: 40 anhte a gumlau maga e n nga ai wa gaw, anhte a hpang maga nga ai wa rai nga ai. 41 Nanhte hpe ngai teng teng tsun made ai gaw, Hkristu a amying hte nanhte seng nga myit dai, nga nna ntsin htinggap mi nanhte hpe jaw ai wa kadai mung, shi a shabrai hpe gaja wa gawm kaw lu na wu ai n rai, 42 Lam mi gaw, Ndai kamsham nga ai ma kaji ni hta na langai mi hpe, myit kataw shangun ai wa kadai raitimung, shi a du hta htumrin kaba noi nna, nawng hta kabai bang kau na gaw, shi a matu grau nna mai nga ai. 43 Na a lata nang hpe myit kataw shagun a yang gaw, dai hpe kahtam dut kau u: lata lahkawng hkum nga ai hte ngarai mung na n si n krip ai wan hta shang na hta, lata hten ai hte asak hkrung ai de shang na gaw, grau mai nga ai. 45 Na a lagaw nang hpe myit kataw shangun a yang gaw, dai hpe kahtam dut kau u: lagaw lahkawng hkum nga ai hte, ngarai mung de jahkrat kau ai hkrum na hta, lagaw hten ai hte asak hkrung ai de shang na gaw, grau mai nga ai. 47 Na a myi nang hpe kataw shangun a yang gaw, dai hpe malawk kau u: myi lahkawng maga hkum ai hte, shanhte a matu byet n si nna, wan mung n si n krip hkraw ai, 48 ngarai mung de jahkrat kau ai hkrum ai hta, myi maga sha nga ai hte, Karai Kasang a mungdan de nang shang na gaw, grau mai nga ai. 49 Kaning rai nme law, kadai wa raitimung, wan ngu ai jum hte shashum la ai hkrum lu na ra ai: 50 Jum gaw kaja nga ai: raitimung, jum hkawng mat yang gaw, hpa hte jashum la lu na myit ta? Nanhte hta jum sharawng da mu: nanhte shada da ahkau achyap rai nga mu, ngu mu ai.

Marku 10

10:1 Dai kaw na shi rawt pru nna, Yuda mung ga jarit hte Yawdan hka wora hkran de du sa ai rai nna, masha wunawng wuwa shi hpang de bai sa hpawng ma ai majaw, shi htung nga ai hte maren, shanhte hpe bai sharin shaga ya mu ai. 2 Shaloi Hparishe ni sa du nna, shi hpe dinglik yu let, Masha gaw tinang a madu jan hpe shabawn kau na, mai nga a ni? ngu nna shi hpe san mu ai. 3 Shi gaw Mawshe nanhte hpe kaning nga hkangda a ta? ngu nna htan mu ai. 4 Shanhte gaw, Jahka ai laika ka da nna, shi hpe shabawn kau na, Mawshe ahkang jaw da sai, ngu mu ai. 5 Yesu gaw, Nanhte a myit ja nga malit dai majaw, ndai hkangda ai ga, shi nanhte a matu ka da nu ai. 6 Raitimung, lamu ga nnan lat kaw nna, lasha hte numsha yan hpe shi hpan da mu ai. 7 De a majaw lasha gaw kanu kawa hpe kau da nna, 8 shan lahkawng gaw hkumshan langai sha tai lu na mara ai. 9 Shingrai shan gaw, lahkawng rai nga ma ai n rai, hkumshan langai sha rai nga ma ai. Dai rai nna, Karai Kasang matut da nu ai hpe, masha gaw n jahka kau u ga, ngu mu ai. 10 Nta nhku de nga nga ma yang, sape ni ndai lam shi hpe bai san mu ai. 11 Shaloi shi gaw, Tinang a madu jan hpe shabawn kau nhtawm, num kaga hpe hkungran ai wa kadai mung, shi a madu jan hpe shut ai wa tai nga ai: 12 numsha mung shi a madu wa hpe shabawn kau nna, la kaga hpe hkungran a yang gaw, la shaw ai amu galaw ai rai nga ai, ngu mu ai. 13 Ma kaji ni hpe ahtawk ya mi ga, nga nna shi hpang de woi sa ma ai: sape ni mahtang shanhte hpe daru kau mu ai. 14 Yesu dai hpe mu yang, myit yu pawt nga ai rai nna, Ma ni hpe ngai hpang de sa shangun maru; shanhte hpe hkum gang shadang myit; kaning rai nme law, Karai Kasang a mungdan gaw, dai zawn re ai ni a mungdan rai nga ai. 15 Nanhte hpe ngai teng teng tsun made ga, Kadai raitimung Karai Kasang a mungdan hpe ma kaji zawn n hkap la ai wa gaw, dai hta e gaja wa n shang lu na ra ai, ngu nna shanhte hpe tsun mu ai. 16 Shaloi shi shanhte hpe pawn la nna, shanhte a ntsa e lata mara da let, shaman ya mu ai. 17 Bai, lam e sa wa nga yang, marai langai mi shi kaw gat du nna, shi a man e lahput hput di let, Mai kaja ai Sara e, n htum n wai asak sali wunli lu la hkra, ngai hpa mi galaw na rai ta? ngu nna shi hpe san wu ai. 18 Yesu gaw, Ngai hpe mai kaja ai hpa rai nga n ta? Karai Kasang hta kaga mai kaja ai kadai mung n nga ai. 19 Jep ai tara hta, Masha hkum sat, masha num hkum shaw, hkum lagu, n teng n man ai sakse hkum hkam, maw sha map sha hkum rai et, nnu yan nwa hpe hkungga lara di u, nga ai ga hpe nang chye nga ndai, ngu nna shi hpe tsun wu ai. 20 Dai wa gaw, Sara e, dai yawng mayawng hte hpe, brang ram kaw nna, ngai hkan se ai, ngu nna Yesu hpe tsun wu ai. 21 Yesu shi hpe azi yu let, shi hpe tsawra wu ai rai nna, Lam langai mi nang naw ra nga ndai: nang wa su, lu malu hte hpe dut kau nna matsan mayan ni hpe karan jaw u; shingrai jang she sumsing lamu ntsa e nang sutgan lu na rin dai; ngai kaw mung sa hkan nang rit, ngu nna shi hpe tsun wu ai. 22 Shi mahtang dai ga majaw, myiman sum mat nna, myit yawn la ai hte hprang rai mat wa ai: kaning rai nme law, shi arai law law lu ai wa rai nga ai. 23 Shingrai Yesu gaw praw rai yu nna, shi a sape ni hpe, Sut su ai ni gaw, Karai Kasang a mungdan hta, nachying wa shang yak la ahka gaw! ngu nna tsun mu ai. 24 Sape ni mahtang shi a ga majaw, mau mahka nga ma ai. Dai rai nna Yesu gaw, Ngai sha ni e, Karai Kasang a mungdan hta shang na gaw, nachying yak la ahka gaw. 25 Lu su ai wa gaw, Karai Kasang a mungdan de shang loi ai hta, gawla-u gaw samyit na hku gale na grau loi nga ai, ngu nna shanhte hpe bai htan wu ai. 26 Shanhte mahtang ladu lai nna mau mat let, Dai rai yang gaw, kadai wa mi hkyehkrang la ai kaw du lu na a ta? ngu nna shi hpe tsun mu ai. 27 Yesu mahtang shanhte hpe mada yu nna, Dai amu gaw masha n dang di lu timung, Karai Kasang gaw, n dang di lu ai n nga ai; kaning rai nme law, Karai Kasang gaw yawng mayawng hpe dang di lu ai. 28 Shaloi, Petru gaw, Anhte arai yawng hpe kau da nna, nang kaw hkan nang saga ai, ngu nna shi hpe tsun htang wu ai. 29 Yesu gaw, Nanhte hpe ngai teng teng tsun made ga, Nye a matu mara hte, dai kabu gara shiga a matu mara, nta, kahpu kanau, kajan, kanu kawa, kashu kasha hte yi hkauna hte hpe kau da ai wa kadai raitimung, 30 zingri zingrat hkrum ai hte hpawn, ndai aprat hta e nta, kahpu kanau, kajan, kanu, kashu kasha hte yi hkauna hte hpe htam latsa dang, n lu la na wa, n nga ai: htawmhpang prat e gaw n htum n wai asak lu la na ra ai. 31 Raitimung, shawng nga ai ni law law wa, hpang hkrat na mara ai; hpang hkrat ai ni mahtang gaw, shawng na mara ai, ngu mu ai. 32 Shaloi, Yerusalem de lung wa na, shanhte lam e rai masai rai nna, Yesu gaw shanhte a shawng e sa wa nga ai: shanhte mahtang mau mat ma ai: hkan nang nga ai ni mung, hkrit kahpra nga ma ai. Dai shaloi, sape shi lahkawng hte hpe, shi bai shaga la nhtawm, shi hta byin magang ra ai amu a lam, shanhte hpe tsun mu ai gaw, 33 Yu mu, anhte Yerusalem mara de lung wa nga ga ai; dai Masha Kasha gaw hkinjawng agyi ni hte laika ka ai sara ni a lata hta, ap kau ai hkrum na ra ai: shanhte shi hpe si na lam dawdan nna, maigan amyu a lata de ap kau na maru ai: 34 shanhte gaw shi hpe asawng asang di nna, mayen mahtaw bun ai hte, shi hpe anu kayat nhtawm, sat kau na maru ai: masum ya nhtoi hpang e shi bai hkrung rawt wa na ra ai, ngu mu ai. 35 Dai shaloi Zebedi a kasha Yaku yan Yawhan gaw shi hpang de sit sa nna, Sara e, an hpyi mahpyi hpe nang an hpe jaw na gaw, an ra nga ga ai, ngu nna shi hpe tsun mu ai. 36 Shi gaw, Ngai nan a matu galaw na, hpa ra nga myit ta? ngu nna shan hpe tsun mu ai. 37 Shan gaw, Na a hpung shingkang hta e, na a hkra maga de langai mi, pai maga de langai mi, dung nga lu na ahkang an hpe jaw mi, ngu nna shi hpe tsun mu ai. 38 Yesu mahtang, Nan hpa hpyi nga ai hpe, nan n chye myit dai. Ngai lu nga ai gawm hpe, nan lu lu na rai nga myit ni? ngai hkam la na baptisma hpe mung, nan hkam la lu na rai nga myit ni? ngu nna shan hpe tsun mu ai. 39 Shan gaw, An rai lu na ga ai, ngu mu ai. Bai Yesu gaw, Ngai lu nga ai gawm hpe, nan mung lu na rai nga myit dai; ngai hkam la na baptisma hpe mung, nan hkam la na rai nga myit dai: 40 raitimung, nye a hkra maga pai maga de dung nga lu na, ngai ahkang n jaw lu nngai; dai gaw, lajang da ya ai ni a matu mara sha, rai nga ai, ngu nna shan hpe tsun mu ai. 41 Ya, kaga sape shi, dai ga hpe na mu yang, shanhte Yaku yan Yawhan hpe myit na kahtet mu ai. 42 Dai majaw Yesu shanhte hpe shaga la nna, Maigan amyu ni hta up na ahkang lu la ai ni gaw, shanhte a ntsa e reng nga ma ai hte, daru magam re ai ni gaw, shanhte a ntsa e hkang nga ma ai hpe, nanhte chye nga myit dai. 43 Nanhte hta chyawm gaw, shingrai nga ai n rai: nanhte hta grau mayu ai wa kadai raitimung, nanhte a ali ama tai u ga: 44 nanhte hta baw tai mayu ai wa kadai raitimung, nlang a mayam tai u ga: 45 kaning rai nme law, dai Masha Kasha wa pyi, shangun ma hpe yam sha na, nga nna du sa ai n rai; shangun ma a amu hpe galaw daw ya na hte, masha law law a matu mara, shi asak hpe gawng malai jahpu shatai ya na, nga nna du sa ai, ngu nna tsun mu ai. 46 Shaloi shanhte gaw Yerihko mare de du ma ai. Bai Yesu gaw, shi a sape ni hte, masha wunawng wuwa kaba hte rau, Yerihko de na pru wa ma yang, Teme a kasha Bara Teme mying ai, myi kyaw nna hpyi sha ai wa langai mi, dai lam makau e dung nga ai. 47 Nazaret wa Yesu nga nga ai hpe, shi na wu yang, Dawi a Kasha Yesu e, ngai hpe matsan dum la e law, ngu nna hpyi jahtau wu ai. 48 Masha law law wa, shi atsin sha nga mat u ga, shi hpe jet kau mu ai. Shi mahtang, Dawi a Kasha e, ngai hpe matsan dum la e law, ngu nna grau jahtau shaja wu ai. 49 Yesu gaw, tsap let, Shi hpe shaga wa marit, nga ai. Dai rai nna shanhte gaw, dai myi kyaw ai wa hpe shaga ai hte, Ngwi pyaw n ga; rawt u, shi nang hpe shaga nga ai, ngu mu ai. 50 Shi gaw shi a hpun nba raw kau da ai hte, gan rawt nna Yesu hpang de sit sa wa ai. 51 Shaloi Yesu shi hpe ga tsun nna, Ngai nang hpe hpa di ya na, nang ra n ta? ngu wu ai. Myi kyaw ai wa gaw, Rabunai e, nye myi mu li ga law, ngu nna shi hpe tsun wu ai. 52 Yesu gaw, Hkawm wa su; na a kamsham ai gaw nang hpe shamai ya nit dai, ngu nna shi hpe tsun wu ai. Dai wa gaw shaloi jang myi mu lu nna, hkrun lam e shi kaw hkan nang nga ai.

Marku 11

11:1 Ya shanhte gaw, Yerusalem hte, Tsanlun bum na Bethpage yan Behtani kahtawng hkan e ni wa ma yang, shi sape lahkawng shangun dat nna, tsun mu ai gaw, 2 Nan a shawng de na kahtawng de sa ma su: dai hta e shang wa ai shaloi jang, kadai mung garai n jawn yu ai lawze kasha dun nga ai hpe, nan mu na mu ai; dai hpe raw nhtawm dun wa marit. 3 Masha langai ngai, Nan hpa majaw shingrai galaw myit ta? nga nna san myit yang, nan gaw, Dai Madu ndai hpe ra ai da, ngu nna htan mu: shaloi jang, shi dai hpe nang de ya dat na ra ai, ngu mu ai. 4 Shan gaw sa wa nna, kahtawng lam chyinghka shinggan e lawze kasha dun nga ai hpe, mu mu ai rai nna, dai hpe raw dun wa mu ai. 5 Dai yang e tsap nga ai ni nkau mi gaw, Nan hpa majaw dai lawze kasha hpe raw dun mu ta? ngu nna shan hpe san mu yang, 6 Yesu shan hpe tsun dat mu ai hte maren, tsun dan mu ai: dai rai nna shanhte gaw shan hpe dat dat mu ai. 7 Shaloi shan gaw dai lawze kasha hpe Yesu hpang de dun wa mu ai rai nna, de a ntsa e shanhte a hpun nba mara nhtawm, shi dai hta jawn nga ai. 8 Masha law law wa, tinang a hpun nba ni hpe lam hta e nep ya ma ai: kaga hte gaw, nam na hpun lakung lakying kran la nna, dai lam e hkan nep ma ai. 9 Shawng e sa wa ai ni hte hpang e hkan nang ai ni gaw, Hawsanna: Madu a mying ningsang hte du sa ai wa gaw, a nga ai law; 10 Anhte a wa Dawi a du ra ai mungdan gaw, a nga ai law; Tsaw htum ai shara e, Hawsanna, rai wa u ga, nga nna jahtau garu ma ai. 11 Shaloi Yesusalem na nawku Htingnu kata de shi shang nna, arai yawng mayawng hpe shagu yu ngut jang, jan du wa ai majaw, shi pru nna, sape shi lahkawng hte hte rau, Behtani kahtawng de rai mat wa ai. 12 Hpang jahpawt e Behtani kahtawng na pru wa ma yang, shi kawsi hkrum nga ai. 13 Shaloi tsan tsan kaw na, alap lap ai maihpang hpun langai mi shi mu hkrup nna, dai hta e si langai ngai lu la lu na, shi myit nna sit sa wa ai. Dai de du wa yang, maihpang si si na aten n re ai majaw, alap sha shi mu wu ai rai nna, 14 Prat dingsa e, nang hta na kadai mung asi n lusha mu ga, ngu nna dai hpe tsun wu ai. Shi a sape ni mung dai hpe na nga ma ai. 15 Shaloi shanhte gaw Yerusalem de du ma ai. Dai nawku Htingnu hta e mung, shi shang ai rai nna, dai Htingnu hta rai dut ai ni hte mari ai ni hpe shaden kau ai hte, gumhpraw byan ai ni a ku ni hte hkrudu dut ai ni a punghkum ni hpe kanawng kadang kau ya mu ai. 16 Dai Htingnu kata de hka wan langai mi pyi shashawn na, shi n hkraw nga ai. 17 Shi shanhte hpe sharin shaga nna, Nye a nta gaw amyu baw shagu a matu akyu hpyi ai nta ngu na mu ai, nga nna ka da nga ai, n rai ni? nanhte chyawm gaw, dai hpe damya lungpu di kau manu ai, ngu nna tsun mu ai. 18 Hkinjawng agyi ni hte laika ka ai sara ni, dai na ma yang, shi hpe sat kau na lam tam ma ai: kaning rai nme law, mung masha ni nlang shi a sharin shaga ai lam hpe mau mahka nga ma ai majaw, shanhte gaw shi hpe hkrit da mu ai. 19 Shana shagu e, dai mare shinggan de shi pru hkawm wa ai. 20 Dai hpang lahpawt mi hta e hkawm lai wa ma yang, dai maihpang hpun gaw ru hte nawng hkraw mat nga ai hpe, shanhte mu mu ai. 21 Dai rai nna, Petru shadum let, Rabai e, yu u, nang dagam kau ai maihpang hpun gaw hkraw mat sahka! ngu nna shi hpe tsun wu ai. 22 Yesu htan let, Karai Kasang hpe kamsham nga mu: 23 nanhte hpe ngai teng teng tsun made ai gaw, kadai raitimung, ndai bum hpe, Nang baw mat nna nawng hta htawt bang mat u, nga nna kam shut ai myit n rawng ai sha, tinang tsun ai hte maren byin na ra ai, kamsham nga ai rai yang gaw dai lam byin na ra ai. 24 Dai majaw ngai nanhte hpe tsun made ai gaw, Nanhte hpyi mahpyi hte ra mara lu la na ra ai, ngu nna kamsham nga mu: shingrai jang, nanhte lu la na myit dai. 25 Ahkyu hpyi let tsap nga ai shaloi, masha langai ngai nang hpe lama ma shut a yang gaw, sumsing lamu na nanhte a Nwa gaw, nanhte a mara hpe raw kau ya lu u ga, shi a mara hpe mung, raw kau ya mu. 27 Dai hpang shanhte gaw Yerusalem de bai shang ma ai. Ya nawku Htingnu kata e htinglet hkawm nga yang, hkinjawng agyi ni, laika ka ai sara ni hte agyi salang ni, shi hpang de sa du ma ai rai nna, 28 Nang gaw hpa ahkang hte ndai amu ni hpe galaw nga n ta? Ndai hte hpe galaw lu na, ndai ahkang gaw, nang hpe kadai wa jaw n ta? ngu nna tsun mu ai. 29 Yesu gaw, Ngai mung, ga langai mi nanhte hpe san yu made ga; ngai hpe htan ya ma la, shaloi hpa ahkang hte ndai hte hpe ngai galaw nga nngai gaw, ngai nanhte hpe tsun dan na made ai: 30 Yawhan a baptisma lam gaw, lamu de na rai ni? shing n rai, masha hta na rai ni? ngai hpe htan yu mi, ngu nna shanhte hpe tsun mu ai. 31 Shanhte mahtang shada da bawng nna, Lamu de na re ai, anhte ngu gaw yang, Dai rai yang nanhte hpa rai shi hpe nkam myit ta? nga nna, shi htan na ra ai: 32 bai, Masha hta na rai kun? anhte ngu gaw yang, mung masha ni hpe shanhte hkrit nga ma ai; kaning rai nme law, Yawhan myihtoi rai nga ai hpe, nlang hte gaw, gaja wa kam nga ma ai. 33 Dai rai nna, shanhte Yesu hpe htan let, Anhte n chye gaw ai, ngu nna tsun mu ai. Shaloi, Yesu gaw, Ndai amu ni hpa ahkang hte ngai galaw nngai gaw, ngai mung nanhte hpe n tsun dan na nngai, ngu nna shanhte hpe tsun mu ai.

Marku 12

12:1 Dai shaloi ga shadawn hte hte shi shanhte hpe tsun hpang mu ai gaw, Masha langai mi tsabyi sun hkai sharam da nna, grupyin e nhpan kum da ai hte tsabyi htung htu da nna, langchyi gap da nhtawm, sun galaw ai masha hpe boi ya da nna, kaga mung de sa nga mat ai. 2 Ya aten du jang, sun galaw ai ni a lata na, dai sun na asi nkau mi lu la u ga, sun galaw ai ni hpang de, mayam langai mi hpe shangun dat wu ai. 3 Shanhte mahtang, shi hpe rim la nna, anu kayat nhtawm, kaman dat dat mu ai. 4 Bai, mayam kaga hpe, shi shanhte hpang de shangun dat wu ai: dai wa a baw hpe shanhte shahpye ya nna, shi hpe kaya kahpa jahkrum mu ai. 5 Bai, kaga hpe shangun dat wu yang, shanhte dai wa hpe sat kau mu ai: kaga marai law law hpe shi shangun dat timung, shanhte nkau mi hpe anu kayat di nna, nkau mi hpe sat kau mu ai. 6 Shi tsawra ai kasha langai mi naw nga ai: shi hpe mung hpang jahtum e, shanhte hpang de shangun dat wu ai rai nna, Shanhte gaw ngai sha hpe mahtang hkrit hkungga na ma ai, nga nna myit da ai. 7 Sun galaw ai ni mahtang, Ndai wa gaw, sali wunli dagraw na wa rai nga ai; sa marit, shi hpe sat kau gaw; shaloi shi a sali wunli, anhte lu la na gaw ai, nga nna shada bawng la ma ai. 8 Dai rai nna, shanhte shi hpe rim la nna, sat kau nhtawm, sun shinggan de kabai kau mu ai. 9 Dai majaw, tsabyi sun madu gaw, kaning di na mu ta? Shi sa du nna, sun galaw ai ni hpe sat kau nhtawm, dai sun masha kaga hpe, htawt shap ya na ru ai. 10 Dai hta n-ga, Wahpang gaw ai ni, lata kau ai nlung gaw, Ningjut jahtum na nlung tai wa sai: 11 Dai gaw, dai Madu a majaw byin wa ai rai nna, Anhte a man e mauhpa amu rai nga ai, nga ai laika hpe pyi, nanhte n hti yu myit ni? ngu mu ai. 12 Dai majaw shanhte gaw shi hpe rim la na tam ma timung, shawa masha ni hpe hkrit da mu ai: kaning rai nme law, ndai ga shadawn hpe, shanhte a lam shi tsun nga ai gaw, shanhte chye na mu ai. Shaloi shanhte shi hpe kau da nna, pru mat wa ma ai. 13 Dai hpang, shi a ga hta shi hpe hkap wang lu u ga, shanhte gaw, Hparishe ni hte Herodi ngu ai ni nkau mi, shi hpang de shangun dat mu ai. 14 Shaloi shanhte du nna, Sara e, nang tengman nga ndai hte, kadai hpe mung n agam nga ndai gaw anhte chye ga ai; masha a myiman hpe nang n tau yu ai sha, Karai Kasang a lam hpe tengman ai hku sharin shaga nga ndai. Kehta hkawhkam hpe hkansi mai bang ga ni? 15 anhte bang na rai kun? n bang na rai kun? ngu nna shi hpe san mu ai. Shi mahtang shanhte a myit sawt ai lam chye nna, Nanhte hpa rai ngai hpe chyam yu nga myit ta? Ngai yu yu we ga, dai gumphraw lap mi ngai kaw la wa marit, ngu nna shanhte hpe tsun mu ai. 16 Dai rai nna, shanhte la wa mu ai. Shaloi shi gaw, Gade a sumla hte masat laika kap nga a ta? ngu nna san mu yang, shanhte gaw, Kehta a sumla hte masat rai nga ai, ngu nna shi hpe htan mu ai. 17 Dai rai nna Yesu gaw, Kehta hte seng ai hpe gaw, Kehta hpe ya mu; Karai Kasang hte seng ai hpe mung Karai Kasang hpe ya mu, ngu nna shanhte hpe tsun mu ai. Shanhte mahtang, shi a lam grai mau mat nga ma ai. 18 Dai hpang, Bai hkrung rawt wa na lam n nga ai, nga nna a tsun nga ai Saduke ni shi hpang de sit sa wa nna, san let tsun mu ai gaw, 19 Sara e, masha langai ngai a kahpu wa, kasha garai n kap ai si mat nna gaida nga yang, shi a kanau gaw dai gaida hpe hta la lu na rai nna, kahpu a matu mara shachyaw u ga, nga nna Mawshe anhte hpe ka da ya ma ni ai. 20 Ning re ai yan nau ni marai sanit rai nga ma ai. Shawng na wa gaw num la nna, matu mara n kap ai, si mat sai. 21 Hpang na wa, dai num hpe hta nna, matu mara n kap yang, si mat sai: masum ngu na wa dai hte maren rai mat ai: 22 shingrai dai shan nau ni sanit, matu mara n kra ma ai. Nlang hte a hpang jahtum e, dai numsha mung, si mat wa ai. 23 Ya, dai bai hkrung rawt ai hta, dai ni hta na gade a madu jan shi rai na ra ta? Kaning rai nme law, marai sanit a madu jan shi tai yu sai, ngu mu ai. 24 Yesu gaw, Dai Chyum Laika hte, Karai Kasang a atsam hpe, nanhte n chye mu ai majaw, nanhte lam dam nga myit dai, n rai ni? 25 Si ai ni bai hkrung rawt wa jang, num la num ya n rai na ma ai: shanhte gaw sumsing lamu hta e, lamu kasa ni zawn, rai nga ma ai. 26 Dai hta kaga, si mat ai ni a bai hkrung rawt wa na lam, Karai Kasang gaw dai singwum makau e, Mawshe hpe, Ngai gaw Abraham a Karai Kasang, Isak a Karai Kasang, Yaku a Karai Kasang rai nga nngai, nga ai ga hpe, nanhte Mawshe a laika hta n hti yu myit ni? 27 Karai Kasang chyawm gaw, si nga ai ni a Karai Kasang n rai, ahkrung nga ai ni a Karai Kasang she rai nga ai: nanhte grai lam dam mat manit dai, ngu mu ai. 28 Dai shaloi, laika ka ai sara langai mi sa du nna, shanhte a ndang kalang hkat ai lam na wu ai hte, Yesu shanhte hpe hkap htan ai ga manu nga ai hpe, chye wu ai majaw, Hkangda ai ga mahkra hta e, gara mahtang grau kaba nga a ta? ngu nna shi hpe san wu ai. 29 Yesu gaw, Israela amyu e, madat mara la mu; Anhte a Madu Karai Kasang gaw Madu langai sha rai nga ai: 30 Dai Madu, na a Karai Kasang hpe, na a myit kraw lawang mahkra hte, na a myit masin mahkra hte, na a myit mang mahkra hte, na a n-gun lagaw mahkra hte, nang tsawra lu na ndai, nga ai ga gaw, grau kaba ai ga rai nga ai. 31 Hpang na ga mahtang gaw, Na a htingbu wa hpe, na a hkum hte maren nang tsawra lu na ndai, rai nga ai. Ndai ga lahkawng hta, grau kaba ai hkangda ai ga n nga ai, ngu nna htan wu ai. 32 Dai laika ka ai sara gaw, Ara, rai sa, Sara e; Karai Kasang gaw langai sha rai nga ai hte, shi hta shaje kadai n nga ai, nang tsun ai ga teng nga lit dai: 33 dai hta kaga, myit kraw lawang mahkra hte, myit hpaji mahkra hte, n-gun lagaw mahkra hte shi hpe tsawra lu na rai nna, tinang a htingbu wa hpe tinang a hkum hte maren tsawra lu na gaw, wan nat hkungga hte hkungga amyu mahkra hta grau kaba ai rai nga ai, ngu nna shi hpe tsun wu ai. 34 Dai wa gaw, kunghpan myit hte htan nga ai hpe, Yesu chye wu yang, Nang gaw Karai Kasang a mungdan hte tsan nga ndai n rai, ngu nna shi hpe htan wu ai. Dai hpang kadai mung, shi hpe hpa pyi n san wam mu ai. 35 Ya Yesu nawku Htingnu nhku de sharin shaga nga yang, kahtap tsun mu ai gaw, Hkristu gaw, Dawi a kasha rai nga ai, nga nna laika ka ai sara ni, kaning rai tsun lu nga ma ta? 36 Dawi shi hkum dai, Chyoi pra ai Wenyi hta, Dai Madu nye a madu hpe tsun wu ai gaw: Na a gumlau ni hpe, na a lagaw npu e ngai tawn da ai du hkra, Nye a hkra maga de naw adung nga u, nga nna tsun nga ai. 37 Dawi shi dai Hkristu hpe Madu ngu wu ai: dai rai yang gaw, shi a kasha kaning rai nme rai na rai nga a ta? ngu mu ai. Shawa masha ni chyawm gaw, kabu gara ai hte shi hpe na ra ya mu ai. 38 Bai sharin shaga nga let, shi tsun mu ai gaw, Laika ka ai sara ni hpe sadi nga mu: shanhte palawng galu bu hpun let hkawm sa mayu nna gat hkan shachyen ai mung, 39 tara jawng ni hta e grau ai tingnyang ni hpe mung, poi hkan e grau ai dung shara ni hpe mung, ra nga ma ai: 40 gaida gaina ni a nta ni hpe, shanhte hpya lu hpya sha nna, hpyi hpun ai hte galu galang akyu hpyi ma ai. Dai ni gaw dawdan kau ai grau nna hkrum na mara ai, ngu mu ai. 41 Dai hpang, dai alu sumpu tawtap e shi dung nga nna, shawa masha ni dai alu sumpu hta e dingsen bang ma ai hpe, yu nga ai. Sut su ai ni law law wa, law law sa bang ma ai. 42 Shaloi, matsan mayan re ai gaida jan langai mi sa nna, peksan langai mi ging ai, magri dingsen lahkawng bang nu ai. 43 De a majaw, shi a sape ni hpe shi shaga la nna, Nanhte hpe ngai teng teng tsun made ga, ndai matsan mayan re ai gaida jan gaw, alu sumpu hta e bang da ai ni mahkra hta, grau nna bang dat nu ai. 44 Kaning rai nme law, shanhte nlang, tinang a n taw n tsang lu ai hta na jan ai hpe bang da ma ai; shi chyawm gaw shi a matsan mayan re ai hta na lu malu mahkra hpe, rai sa, shi a nsa bau na arai yawng hpe, bang kau nu ai, ngu mu ai.

Marku 13

13:1 Ya, dai nawku Htingnu na pru wa yang, Yesu a sape langai mi, Sara e, yu u: grai re ai nlung hte hte, grai re ai wahpang ni rai nga a hka! ngu nna shi hpe tsun wu ai. 2 Yesu gaw, Ndai kaba ai wahpang ni hpe nang mada nu ni? nang e, n run n hpya ai sha, nlung langai mi a ntsa e langai mi muk n mara hkra, rai mat na ra ai, ngu nna shi hpe tsun wu ai. 3 Shaloi dai Tsanlun bum ntsa e, nawku Htingnu tawtap e, dung nga yang, Petru, Yaku, Yawhan hte Andre gaw, 4 Dai hte gaw galoi ai me rai na ra ta? ndai yawng mayawng hte dik wa magang yang, hpa kumla danpru na ra ta? anhte hpe tsundan mi, ngu nna shi hpe lagyim san mu ai. 5 Yesu gaw, Nanhte hta na kadai raitimung, hkalem kau ai n hkrum myit ga, sadi nga mu. 6 Masha law law wa nye a amying hte paw pru nna, Ngai gaw dai wa rai nga nngai, nga nna law law hpe lam shadam kau na maru ai. 7 Hpyen gasat ai hte, majan baw wa na shiga, nanhte na myit yang, myit hkum ru myit: dai lam ni gaw byin lu na ra ai, raitimung, dai jahtum ai gaw garai n rai nga ai. 8 Bai amyu mi hte amyu mi, mung mi hte mung mi shada da gumlau hkat na mara ai: shara kaga kaga hta e nnang nawn nawn wa na ra ai; hku mung hku wa na ra ai: dai chyawm gaw kyindut ngu ai a npawt nhpang rai nga ai. 9 Nanhte mahtang, tinang hkum lala sadi nga mu: shanhte gaw, salang hpawng ni kaw, nanhte hpe ap kau na mara ai; tara jawng ni hta e nanhte anu kayat ai hkrum na marin dai; du ni hte hkawhkam ni kaw, sakse tai wa na matu, shanhte a man e nanhte tsap lu na myit dai. 10 Dai kabu gara shiga hpe, masha amyu baw shagu hpe, shawng hkaw dan lu na, rai nga ai. 11 Nanhte hpe tara agyi ni hpang de woi sa nna ap kau myit jang gaw, kaning ngu nna ga tsun na, myit hkum ru myit: dai ahkying hta e, nanhte hpe tsun shangun ai hte maren tsun dan mu: nanhte ga tsun nga ai ni n rai, dai chyoi pra ai Wenyi mahtang tsun nga ai. 12 Dai shaloi e kahpu gaw kanau hpe kanau gaw kahpu hpe, kawa gaw kasha hpe si ai de ap bang kau na mara ai: kasha ni mung kanu kawa ni hpe gumlau rawt nna, sat kau shangun na mu ai. 13 Nye a amying majaw masha nlang hte a ndawng n yawt ai nanhte hkrum na marin dai; jahtum du hkra shakut sharang ai wa chyawm gaw, hkyehkrang la ai hkrum na ra ai. 14 Dai jahten shabya ai matsat shabat gaw, n da ang ai shara e tawn da ai hpe nanhte mu myit yang gaw, laika hti nga ai wa gaw myit yu nga u ga; dai shaloi e, Yuda mung hta e nga ai ni gaw, bum lang de hprawng mu ga; 15 nta ntsa e nga ai wa gaw, shi a nta na arai lama ma hpe shang la na, hkum yu wa nu ga; 16 hkauna pa e nga ai wa mung, shi a hpun nba wa la na, hkum nhtang wa nu ga. 17 Dai nhtoi hte hta na-um nasin re ai ni hte, ma chyu naw chyu ai ni gaw, nachying yak na mara ai; 18 Dai rai nna, dai gaw kashung ta e n byin wa u ga, akyu hpyi nga mu. 19 Kaning rai nme law, Karai Kasang hpan tawn da ai, ginding aga nnan lat kaw nna ya du hkra n byin yu ai hte, hpang de mung n byin lu na, ru tsang ai gaw, dai nhtoi hte hta e byin pru na ra ai. 20 Dai nhtoi ni hpe, dai Madu n shagying kau yang gaw, gade a hkumshan mung, n lawt lu na ra ai; raitimung, shi lata la nu ai lata la ai ni a matu mara, dai nhtoi ni hpe shagying da nu ai. 21 Dai shaloi e masha langai ngai, Yu mu, nang e, yu mu wonang Hkristu nga nga ai, nga nna nanhte hpe tsun myit yang gaw, nanhte hkum kam myit. 22 Kaning rai nme law, masu ai Hkristu hte raitimung, masu ai myihtoi hte raitimung, paw pru nna, lata la ai ni hpe shadam lu yang, shadam lu hkra, lamik kumla hte mauhpa amu shachyen na mara ai. 23 Nanhte mahtang sadi nga mu: ngai nanhte hpe ndai nlang tsun hkap da ni ai. 24 Bai, ru tsang ai hpang na nhtoi hte hta e, jan gaw sin mat wa nna, shata mung nip mat na ra ai; 25 shagan ni mung lamu de na di hkrat mat nna, sumsing lamu hta e nga ai nsam ni gaw gari wa na mara ai. 26 Dai shaloi e Masha Kasha gaw daru magam hte hpung shingkang kaba hte nawng sumwi ni hta e du sa ai hpe, shanhte mu na mara ai. 27 Dai shaloi e, lamu kasa ni hpe shi shangun dat nna, nbung mali maga na, aga htum ai de nna lamu htum ai kaw du hkra, shi a lata la ai ni hpe jahpawng la na maru ai. 28 Dai hta kaga, maihpang hpun hpe yu nna, de a ga shadawn hpe matsing da mu: de a lakung lakying ni majawm wa nna lap prut wa jang, nlum ta ni wa ra ai hpe nanhte chye nga myit dai. 29 Dai hte maren, dai lam ni byin hpang wa ai hpe, nanhte mu myit dai shaloi, Shi gaw chyinghka lam makau e ni wa ra ai hpe, chye na nga mu. 30 Nanhte hpe ngai teng teng tsun made ga, Ya pra nga ai ndai amyu masha ni garai n lai mat ma yang, dai lam yawng mayawng hte byin mat na ra ai. 31 Sumsing lamu hte ginding aga lai mat wa timung, nye a ga gaw n lai mat na li ai. 32 Raitimung, dai shani hte ahkying hpe dai Wa hta kaga, kadai mung n chye lu ai: lamu na kasa ni hte dai Kasha pyi dai hpe n chye lu ma ai. 33 Dai ahkying hpe nanhte n chye nga myit dai majaw, sadi, maja nga mu. 34 Dai lam, masha langai mi tsan tsan mung de sa nga mat na, shi a nta hpe kau da yang, shi a mayam ni hpe ahkang jaw mu ai hte langai hte langai hpe bungli karan ngut jang, chyinghka sin ai wa hpe mung maja nga u ga, nga nna hkangda ai lam hte bung nga ai: 35 kaning rai nme law, dai nta madu gaw, nrim e, yuptung e, u-goi hpawa e, jahpawt manap e, bai du wa na ra ai hpe nanhte n chye da mu ai majaw, a maja nga mu: 36 shing n rai, shi a kajawng sha wa du nna, nanhte n dum shami yup nga ai hpe, wa mu na ra ai. 37 Nanhte hpe ngai tsun made ai hte maren, yawng hte hpe ngai tsun mawe ga, A maja nga mu, ngu nna shanhte hpe tsun mu ai.

Marku 14

14:1 Dai hpang ni ni lai jang, Shalai wa ai poi hte Azuma poi du ra ai. Shaloi, hkinjawng agyi ni hte laika ka ai sara ni shi hpe kaning di hkalem ai hte rim la nna sat kau lu na lam tam nga ma ai: 2 raitimung shanhte gaw, Mung masha ni n kabrawng wa mu ga, poi a laman e n rai u ga, nga nna tsun ma ai. 3 Ya Yesu gaw Behtani kahtawng na manggang kap ai Simun a nta e hkrawn taw nga yang, numsha langai mi nachying hpu ai mura nardu jet rawng ai lunghpraw gawm lang shang nna, dai lunghpraw gawm gang daw nhtawm, shi a baw hta e ru bun ya wu ai. 4 Dai rai nna nkau mi gaw, myit yu kahtet nga ma ai hte, Ndai mura hpe hpa rai nme lahpawt lama di kau wu ta? 5 Dai gaw lap masum tsa jan hte dut la nhtawm, matsan mayan ni hpe karan jaw lu na rai nga ai, nga nna shada da tsun hkat ma ai: shanhte mung dai numsha hpe daru kau mu ai. 6 Dai rai nna Yesu gaw, Dai numsha anga nga u ga; nanhte hpa rai nme shi hpe shatsang nga myit ta? Shi gaw ngai hta kaja ai amu galaw nu ai. 7 Matsan mayan ni nanhte hte rau tut tut nga nga ma ai hte, nanhte ra ai hte maren shanhte hpe galoi mung chyeju galaw lu timung, ngai gaw nanhte hte rau tut tut nga lu na n rai. 8 Shi gaw rai lu ai hte maren galaw nu ai; lup makoi na matu, shi nye a hkum hpe hkap chya ya ni ai. 9 Nanhte hpe ngai teng teng tsun made ai gaw, Dai kabu gara shiga hpe mungkan ga ting shara shagu hkan e hkaw dan nga yang, shi a masat dingsat tai na matu, shi galaw ai amu ngu nna hkai dan na maru ai, ngu mu ai. 10 Shaloi, sape shi lahkawng hta lawm ai Yuda Iskarut gaw, Yesu hpe kinjawng agyi ni a lata de ap ya na, shanhte hpang de pru sa wa ai. 11 Dai hpe na yang, shanhte kabu gara nga ma ai rai nna, shi hpe gumhpraw jaw na, hkam la ma ai. Dai rai nna, shi hpe kaning di ap ya lu na, mai ang ai ginwan tam nga ai. 12 Ya, dai shalai wa ai hkungga hpe sat mu ai, Azuma poi a nnan shani e, Yesu a sape ni gaw, Dai Sahlai wa ai poi nang sha lu n ga, gara shara hta e na a matu sa shachyip na, nang tsaw nga n ta? ngu nna shi hpe san mu ai. 13 Shaloi shi a sape lahkawng shi shangun dat nna, Dai mare de sa ma su; ntsin di bu hpai ai wa gaw nan hte hkrum na ra ai: shi kaw hkan nang nna, 14 shi kanang shang timung, nta madu hpe, Nye a sape ni hte rau dai Shalai wa ai poi hpe ngai sha lu na, nye a manam gawk kanang nga a ta? nga nna Sara gaw san shangun dat mi ai, ngu mu: 15 shaloi, jahting shachyip da ai ntsa gawk kaba shi nan hpe madun na ra ai: dai yang e anhte a matu shachyip da ma la, ngu nna tsun dat mu ai. 16 Dai sape yan pru sa wa nna, mare de shang wa ma yang, shi tsun da mu ai hte maren, mu ma ai rai nna, dai Shalai wa ai poi shachyip da ma ai. 17 Ya nrim rim rai yang, dai sape shi lahkawng hte rau shi sa du ai. 18 Shanhte shat sha dung nga ma yang, Yesu gaw, Ngai nanhte hpe teng teng tsun made ga, ngai hte rau sha nga ai, nanhte hta na marai langai mi, ngai hpe ap kau na ring ngai, ngu mu ai. 19 Shanhte mahtang myit na yawn nna, langai hte langai, Ngai rai na n ni? ngu nna shi hpe tsun mu ai. 20 Bai shi gaw, Dai shi lahkawng hta lawm ai, hka wan hta ngai hte rau lata manaw ai wa rai nga ai. 21 Ka da nga ai hte maren Masha Kasha gaw sa wa na ra ai: raitimung, dai Masha Kasha hpe ap kau ai wa hta dingnye nga na ra ai; dai masha n shangai taw gaw, shi a matu grau kaja nga ai, ngu nna shanhte hpe tsun mu ai. 22 Shanhte shat sha nga ma yang, shi muk la nna, shaman ya nhtawm, ahkyep alep nna, shanhte hpe jaw let, La mu, dai gaw nye a hkum rai nga li ai, ngu mu ai. 23 Bai, gawm hpe mung shi la nna, shakawn kungdawn ngut jang, shanhte hpe jaw nna, shanhte nlang dai hta na lu ma ai. 24 Shahte hpe shi tsun mu ai gaw, Dai gaw, masha law law a matu ru kau ya ai, dai ga shaka hte seng ai, nye a asai rai nga li ai. 25 Nanhte hpe ngai teng teng tsun made ga, Karai Kasang a mungdan hta e tsabyi nnan hpe ngai lu lu na nhtoi du hkra, ndai tsabyi ru a asi hta na, ngai kalang mi muk bai lu lu na n rai, ngu mu ai. 26 Dai hpang mahkawn mangoi ngut jang, shanhte gaw Tsanlun bum de pru sa wa ma ai. 27 Shaloi e, Yesu shanhte hpe tsun mu ai gaw, Nanhte nlang myit kataw na marin dai; kaning rai nme law, Sagu rem wa hpe ngai anu sat nna, sagu ni bra mat na mara ai, nga nna ka da nga ai: 28 raitimung, ngai bai sharawt hkrum ai hpang e, Galile mung e ngai nanhte a shawng e, sa wa magang na nngai, ngu mu ai. 29 Shaloi Petru gaw, Nlang hte pyi myit kataw mat ma timung, ngai n lawm na nngai, ngu nna shi hpe tsun wu ai. 30 Yesu mahtang, Nang hpe ngai teng teng tsun de ga, Dai na pyi, u lahkawng lang garai n goi yang, nang ngai hpe masum lang nyet kau na rin dai, ngu wu ai. 31 Petru chyawm gaw, Nang hte rau ngai si timung ngai nang hpe n nyet kau na nngai, ngu nna aja awa tsun wu ai. Shanhte nlang dai hte maren tsun nang ma ai. 32 Getsemane mying ai shara de shanhte du ma ai rai nna, shi gaw, Ngai akyu hpyi nga yang nanhte nang e naw dung nga ma la, ngu nna shi a sape ni hpe tsun mu ai. 33 Shaloi, Petru, Yaku, Yawhan hte hpe shi hte rau shaga woi nhtawm, shi myit mak wa ai hte, myit ru myit tsang grai hkrum nga ai rai nna, 34 Nye a myit masin si hkra yawnhkyen kaba hkrum nga li ai: nang e nga nga nna, a maja nga ma la, ngu nna tsun mu ai. 35 Shaloi, dai yang na shi loi mi lai sa nna, ga de gum dagup let, dai ahkying ladaw shi hta shalai lu taw gaw shalai kau na, nga nna, 36 Aba, Wa e, yawng mayawng hpe nang shabyin lu ndai; ndai gawm hpe ngai kaw na shalai kau ya e; raitimung, nye a myit n rai, na a myit she rai u ga, ngu nna hpyi wu ai. 37 Ya, shi bai wa yang, shanhte yup pyaw nga ma ai hpe mu mu ai rai nna, Petru hpe, Simun e, nang yup pyaw nga n ni? ahkying mi sha pyi maja na n sharang lu n ni? 38 Agung alau ai kaw n du myit ga, maja, akyu hpyi nga mu: wenyi gaw let nga ai, hkumshan mahtang n-gun n ja nga ai, ngu nna tsun wu ai. 39 Bai, shi lai sa nna, shawng na ga hpe kahtap hpyi wu ai. 40 Bai, nhtang wa yang, shanhte a myi yup shamawi ai majaw, shanhte naw a yup pyaw nga ma ai hpe shi mu mu ai rai nna, shi hpe kaning ngu htan na, shanhte n chye ma ai. 41 Masum lang bat nhtang wa yang, Nanhte gaw naw yup pyaw nna, asan apan rai nga myit hka: ram sai; ahkying aten du sai; yu mu, dai Masha Kasha gaw, yubak kap ai ni a lata hta e ap kau ai hkrum na ra ai. 42 Rawt mu; sa wa saga: yu mu, ngai hpe ap kau na wa gaw ni sa wa ra ai, ngu nna shanhte hpe tsun mu ai. 43 Shi ga naw tsun nga yang pyi, sape shi lahkawng hta lawm ai Yuda hte, hkinjawng agyi ni, laika ka ai sara ni hte agyi salang ni kaw na, nhtu hte dawhkrawng lang ai shawa hpawng, shi hte rau sa du ma ai. 44 Shi hpe ap kau na wa chyawm gaw, Ngai pup ai wa gaw, dai wa rai nga ai: shi hpe rim la nna sadi hte woi wa mu, ngu nna, shanhte hpe kumla htet da manu ai. 45 Dai rai nna du ai shaloi jang, shi Yesu kaw hkre rai sa nna, Rabai e, ngu nna shi hpe pup wu ai. 46 Shaloi shanhte gaw shi hpe lata hte gang nna, rim la mu ai. 47 Raitimung, makau e tsap nga ai ni hta na langai mi, nhtu shaw nhtawm, hkinjawng agyi a mayam hpe kahtam nna shi a na di mat lu ai. 48 Yesu mahtang, Nanhte gaw, damya hpe rim la na zawn, ngai hpe rim la na, nhtu dawhkrawng hte rai nna pru sa marin ni? 49 Sharin shaga nga let, nawku Htingnu hta e ngai shani shagu nanhte hte rau nga timung, nanhte ngai hpe n rim la manit dai. Ndai chyawm gaw, laika ni dik wa mu ga majaw, byin wa sai, ngu nna shanhte hpe tsun wu ai. 50 Shaloi, nlang hte gaw shi hpe kau da nna, hprawng mat wa ma ai. 51 Shabrang langai mi, lachyit nba sha lawai ai hte shi kaw hkan nang ai rai nna, dai ni shi hpe rim la mu ai: 52 shi chyawm gaw dai nba hpe malu kau da nhtawm, singgu krin hprawng mat wa ai. 53 Shaloi shanhte gaw, Yesu hpe hkinjawng agyi wa hpang de, woi wa mu ai rai nna, hkinjawng agyi ni, agyi salang ni hte laika ka ai sara ni nlang, shi kaw hpawng sa wa ma ai. 54 Petru chyawm gaw, hkinjawng agyi a wing kata du hkra, tsan tsan e shi kaw hkan nang nna, ali ama ni hte rau dung let, wan kra lawm nga ai. 55 Shaloi dai hkinjawng agyi ni hte, salang hpawng ting gaw, Yesu hpe sat kau lu hkra, sakse tam nga ma timung, n mu mu ai: 56 kaning rai nme law, marai law law wa shi a lam masu ai sakse hkam ma timung, shanhte a sakse ga n hkrum malu ai. 57 Shaloi nkau mi rawt pru nna, shi a lam masu ai sakse hkam let, 58 Ndai wa gaw, Lata hte galaw ai ndai nawku Htingnu hpe ngai run kau nna, masum ya laman e, lata hte n re ai sha, kaga hpe bai de lu na we ai, nga nna shi tsun ai ga hpe anhte na sagaw ai, ngu mu ai. 59 Raitimung shanhte a sakse ga gaw, garai n hkrum nga ai. 60 Shaloi hkinjawng agyi wa gaw ka-ang e gan rawt nna, Nang hkaw mi muk n htan nga n ni? shanhte na a lam kaning rai sakse hkam nga ma hka? ngu nna Yesu hpe san wu ai. 61 Shi mahtang atsin sha nga nna, hkaw mi muk n htan wu ai. Bai, hkinjawng agyi wa gaw, A lu ai Wa a Kasha, ngu ai Hkristu gaw, nang rai nga n ni? ngu nna shi hpe san wu ai. 62 Yesu gaw, Ngai rai nga nngai; dai hta kaga, Masha Kasha gaw hpung dagu a hkra maga e dung nga nna, lamu na sumwi ni hte sa du ai hpe, nanhte mu na marin dai, ngu wu ai. 63 Dai rai nna, hkinjawng agyi wa gaw shi a hpun palawng hpe gang je let, Anhte hpa sakse mi naw ra nga ga ta? 64 Dai shatan nhkan ga hpe nanhte na manit dai: nanhte hpa nawn da mu ta? ngu mu ai. Shi si ging ai wa rai nga ai, nga nna shanhte nlang dawdan mu ai. 65 Dai hta kaga nkau mi gaw, shi hpe mayen mahtaw bun ai hte, shi a myiman hpe magap kau ya nhtawm, shi hpe htwi nna, Myihtoi ga tsun u, ngu nna shi hpe tsun wu ai: ali ama ni mung lata hte shi hpe bye kahpret mu ai. 66 Petru chyawm gaw dai wing kata de nga ai shaloi, hkinjawng agyi a nchyang numsha langai mi sa du nna, 67 Petru wan kra nga ai hpe mu wu yang, shi hpe mada yu nna, Nang mung Yesu ngu ai Nazaret masha hte rau nga ga ndai, ngu wu ai. 68 Shi mahtang nyet kau ai hte, Nang tsun ai ga hpe ngai n chye n dum se ai, ngu wu ai: dai hpang, nta jan de shi pru sa mat wa ai. 69 Dai nchyang numsha shi hpe bai mu jang, grupyin tsap nga ai ni hpe, Ndai wa mung shanhte hta lawm nga ai, nga ai. 70 Shi mahtang, bai nyet kau wu ai. Dai hpang gade n na jang, grupyin tsap nga ai ni gaw, Gaja wa, nang shanhte hta lawm nga ndai; Galile masha mung nang rai nga ndai, ngu nna Petru hpe tsun mu ai. 71 Dai rai nna, shi gaw matsa mawa ga hte, Nanhte tsun ai wa hpe ngai n chye nngai, ngu nna dagam mu ai. 72 Shaloi jang, dai u lahkawng lang bat goi nga ai. Dai rai nna Petru gaw, U lahkawng lang garai n goi yang, nang ngai hpe masum lang nyet kau na rin dai, ngu nna Yesu shi hpe tsun ai ga gaw dum nga ai hte, dai hpe myit dum let, hkrap nga ai.

Marku 15

15:1 Dai jahpawt manap e pyi, hkinjawng agyi ni, agyi salang ni, laika ka ai sara ni hte dai salang hpawng ting gaw bawng hkut masai rai nna, Yesu hpe gyit nhtawm, shi hpe dun wa nna, Pilat kaw ap ya mu ai. 2 Shaloi, Pilat gaw, Nang Yuda masha ni a hkawhkam rai nga n ni? ngu nna shi hpe san wu ai. Shi gaw, Nang tsun ai hte maren rai nga nngai, ngu nna htan wu ai. 3 Hkinjawng agyi ni mahtang, mara law law wa shi hpe shagun mu ai. 4 Dai rai nna Pilat gaw, Nang hpa muk n htan nga n ni? shanhte nang hpe mara shagun ai lam, gade wa law nga ai hpe yu yu u, ngu nna san wu ai. 5 Yesu chyawm gaw, ga hkaw mi muk, hpa n htan wu ai rai nna, Pilat gaw amau nga ai. 6 Dai poi a laman e, shanhte hpyi nga ai hte maren, bawngdung ai masha langai ngai hpe shi shanhte a matu dat dat ga nga ai. 7 Dai shaloi e, gumlau kabrawng ai hte masha hpe sat kau ai gumlau ni hte rau gyit lawm ai, Baraba ngu ai wa langai mi, nang nga ai. 8 Shaloi shawa masha ni lung wa nna, htung hte maren shanhte hpe galaw na hpyi ma ai. 9 Pilat mahtang, Yuda ni a hkawhkam hpe dat dat na nanhte ra nga myit ni? ngu nna shanhte hpe htan mu ai. 10 kaning rai nme law, manawn masham majaw, hkinjawng agyi ni shi hpe ap kau mu ai hpe, shi chye nga ai. 11 Hkinjawng agyi ni chyawm gaw, shanhte a matu Baraba hpe dat dat u ga, nga nna shawa masha ni hpe myit sharawt da mu ai. 12 Pilat mahtang shanhte hpe bai htan nna, Dai rai taw gaw, Yuda ni a hkawhkam, nanhte ngu ai wa hpe ngai kaning di na rai ta? ngu wu ai. 13 Shanhte gaw, Wudang hta jen da u, nga nna bai jahtau ma ai. 14 Pilat gaw, Shi n hkru ai hpa wa galaw hkrup sata? ngu nna san mu ai. Shanhte mahtang, Wudang hta shi hpe jen da u, nga nna grau jahtau bu ma ai. 15 Pilat gaw shawa masha ni hpe myit shapyaw ya mayu ai hte, shanhte a matu Baraba hpe dat ya nna, Yesu hpe anu kayat nhtawm, jen da ai hkrum u ga, ap kau dat mu ai. 16 Shaloi hpyen ma ni gaw Pretori Htingnu wing kata de, Yesu hpe woi wa nna, dai hpyendap ting hpe shaga tawn mu ai. 17 Shanhte gaw hkyeng ai hpun nba shi hpe jahpun nna, ju kagup hkri nhtawm, shi hpe shagup mu ai hte, 18 Yuda ni a hkawhkam e, nang a lu nit ga law! ngu nna shi hpe shakram mu ai. 19 Bai, shanhte gaw kumba yan hte shi a baw hpe kayat nna, shi hpe mayen mahtaw bun mu ai hte, lahput hput di let shi hpe nawku mu ai. 20 Shi hpe asawng asang di ngut jang, dai hkyeng ai hpun nba hpe shanhte raw kau nna, shi a hpun palawng hpe jahpun mu ai. Shaloi, wudang hta shi hpe jen da na, shanhte shapraw sa wa mu ai rai nna, 21 shi a wudang hpe hpai ya u ga, nam kahtawng na wa nna, lai hkawm sa wa ai Alesandru yan Ruhpu a kawa, Simun ngu ai Kureni mung masha langai mi hpe, shadip mu ai. 22 Ya, Golgohta ngu ai shara de shanhte shi hpe shapraw mu ai; Golgohta a ga lachyum gaw, Pungkum shara ngu ai rai nga lu ai. 23 Shaloi shanhte gaw mura hte kayau ai tsabyi jahku hpe shi hpe jaw mu timung, shi n kam lu nu ai. 24 Ya shanhte wudang hta e shi hpe jen da nna, shi a hpun palawng hpe karan tawn mu ai hte, langai hte langai la ang na matu hpaida da mu ai. 25 Wudang hta e shi hpe jen da ai gaw, ahkying masum rai nga ai. 26 Dai hta kaga, Yuda ni a Hkawhkam, ngu nna shi a mara hpe madun ai laika ka shakap tawn mu ai. 27 Shi hte rau damya lahkawng hpe mung, shi a hkra maga de langai mi, pai maga de langai mi, shanhte jen da mu ai. 29 Lam e lai sa wa ai ni mung shi hpe shatan nhkan nna, tinang abaw hpe kanga let, Aha! nawku Htingnu hpe run kau nna, masum ya na laman e bai de lu ai wa e, 30 na a hkum hpe nan hkye la nna, wudang hta na yu hkrat wa u, ngu mu ai. 31 Hkinjawng agyi ni mung, laika ka ai sara ni hte, dai hte maren asawng asang di let, Masha kaga hpe shi hkye la ga ai; tinang hkum dai pyi n hkye la lu a hka! 32 anhte mu nna shi hpe kamsham lu u ga, Israela Hkawhkam, Hkristu gaw, dai wudang hta na ya yu hkrat wa u ga, nga nna shada da tsun ma ai. Shi hte rau wudang hta jen da ai yan mung, shi hpe aroi arip ngu mu ai. 33 Ya ahkying kru du yang, dai kaw nna ahkying jahku du hkra, mung ting hta e nsin chyip rai mat ai. 34 Ahkying jahku hta e, Yesu gaw nsen kaba hte, Elo-i, Elo-i, lama sabakhtani? ngu nna jahtau wu ai; de a ga lachyum gaw, Nye a Karai Wa e, Nye a Karai Wa e, hpa majaw nang ngai hpe kau da nga n ta? nga ai, rai lu ai. 35 Dai makau e tsap nga ai ni nkau mi, dai hpe na mu yang, Yu mu, shi Elia hpe shaga nga ai, nga ma ai. 36 Shaloi marai langai mi gat sa nna, hka kamu ntsin hkri hte jahpring nna, kumba nren hta shakap nhtawm, shi hpe gawn jaw wu ai rai nna, Nga nga u ga, Elia shi hpe sa shayu kau na kun, anhte yu yu gaw, ngu mu ai. 37 Yesu mahtang nsen kaba hte jahtau let, nsa hkyet mat lu ai. 38 Shaloi nawku Htingnu na nba grang, ntsa nna ga hkren, ka-ang brang rai ga mat ai. 39 Yesu gaw shingrai nsa hkyet mat ai hpe, shi man e tsap nga ai hpyen latsa up ai bu mu wu yang, Gaja wa, ndai wa gaw Karai Kasang a Kasha nan rai nga ai, nga ai. 40 Tsan tsan kaw nna, a yu nga ai numsha ni mung, nga ma ai: shanhte hta na, Galile mung e shi naw nga yang, shi kaw hkan nang nna, shi hpe galaw daw ai Magadala Mari, Yaku kaji yan Yose a kanu Mari hte, Salome hte lawm ma ai: 41 Yerusalem mare de shi hte rau lung wa ai numsha kaga law law mung, yu lawm ma ai. 42 Ya nrim rim rai nna dai laban nhtoi a shawng shani ngu ai, shachyip da ai nhtoi rai nga ai majaw, arawng lu nna rung aya lu ai hte, Karai Kasang a mungdan hpe myit mada nga ai, Aramahti a mare na Yosep gaw sa du nna, 43 Pilat hpang de shang wam ai hte Yesu a hkum tsawp hpe hpyi wu ai. 44 Shi ya e sha si mat ai hpe Pilat mau nna, hpyen latsa up ai bu hpe shaga la nhtawm, shi si ai gaw myi wa rai sai kun, san wu ai. 45 Hpyenbu shi hpe shana wu ai majaw, dai moi mang gaw, Yosep hpe ap ya mu ai. 46 Shi gaw lachyit sumpan mari la nna dai moi mang hpe shayu nhtawm, sumpan hta e kayawp ahkyen nna, nlung hta krawk da ai lup hta e bang tawn da wu ai: dai lup a mahka e, shi nlung galau pat da wu ai. 47 Magadala Mari yan Yose a kanu Mari gaw, dai tawn da ai shara hpe mu ma ai.

Marku 16

16:1 Ya, laban nhtoi lai mat jang, Magadala Mari yan Yaku a kanu Mari hte Salome gaw, dai moi mang hpe chya ya na matu, manam pyaw ai sau mari ma ai. 2 Dai nhtoi bat mi a shawng shani jahpawt jau jau e, jan pru jang, shanhte gaw dai lup de sa wa ma ai. 3 Shaloi shanhte gaw, Dai lup mahka de na, anhte a matu dai nlung hpe kadai galau kau ya na a ta? nga nna shada da tsun hkat ma ai. 4 Yudat yang, dai nlung galau mat nga ai hpe shanhte mu ma ai: dai gaw nachying kaba nga ai. 5 Dai lup kata de shang yang, hpraw tu ai nba lawai ai hte, hkra maga e dung nga ai shabrang langai mi hpe, shanhte mu ma ai rai nna, mak mat ma ai. 6 Shi mahtang, Nanhte hkum mak mat myit: wudang hta e jen da sai Nazaret wa Yesu hpe nanhte tam nga myit dai: shi rawt wa sai; shi nang e n nga sai; shi hpe bang tawn da ai shara hpe yu yu mu! 7 Raitimung, Nanhte a shawng e, Galile mung de shi sa wa na ra ai da, ngu nna shi a sape ni hte Petru hpe wa tsun dan mu; shi tsun dan ai hte maren, dai yang e nanhte shi hte hkrum na marin dai, ngu nna shanhte hpe tsun dan mu ai. 8 Shaloi shanhte pru wa nna, dai lup de na hprawng mat ma ai: kaning rai nme law, hkrit gari ai hte mau mak mat ai shanhte hkrum masai: hkrit nga ma ai majaw, shanhte kadai hpe mung hpa muk n tsun ma ai. 9 Ya, dai nhtoi bat mi a shawng shani jau jau e, shi hkrung rawt mat wa ai hpang, nat sanit shaden kau ya ai Magdala Mari hpe, shi hkum shawng shadan dan wu ai. 10 Shi pru nna, sharung shayawt, hkrapngu hkrapngoi rai nga ma ai, Yesu kaw hkan nang yu ai ni hpe, shana ya mu ai. 11 Shi gaw ahkrung nga ai hte, shi hkum nan shi mu la sai hpe, shanhte na ma ai shaloi, n kam n sham ma ai. 12 Dai hte a hpang, shanhte hta na nam kahtawng de hkawm sa wa ai marai lahkawng hpe, shi ahpraw asam kaga di nna, shan hpe shadan dan mu ai. 13 Shan gaw bai wa nna kaga ni hpe shana ya mu ai: shanhte mung n na kam ma ai. 14 Dai hpang, sape shi langai ni hkrai, shat sha nga ma yang, shi shanhte hpe shi hkum shadan dan wu ai. shi si ai kaw na bai hkrung rawt wa ai, mu lu ai ni a ga hpe nan, n kam ma ai majaw, shanhte a n kam n sham ai hte, myit ja nga ai hpe daru kau wu ai. 15 Bai shi shanhte hpe, Nanhte mungkan ting chyam hkra hkawm sa wa nna, shinggyim masha amyu baw shagu hpe, dai kabu gara shiga hpe hkaw dan mu. 16 Kamsham nna baptisma hkam la ai wa gaw, hkyehkrang la ai hkrum na ra ai. n kam n sham ai wa chyawm gaw, dawdan ai hkrum na ra ai. 17 Kamsham ai ni madun dan lu na lamik kumla gaw, da ndai ni rai nga ai: Shanhte nye a amying hte nat ni hpe shaden kau lu na mara ai; ga amyu kaga ga mung, tsun dan lu na mara ai; 18 tinang a lata hte lapu hpe magra jum lu ma ai hte, si ai baw gung hpe lu ma timung, hpa mung n hkrum na ma ai; machyi makaw hkrum ai ni a ntsa e shanhte lata mara ya nna, dai ni bran wa na mara ai, ngu nna matsun dat mu ai. 19 Shingrai, dai Madu Yesu gaw, shanhte hpe ga tsun da ai hpang, sumsing lamu de shalun la ai hkrum nna, Karai Kasang a hkra maga de dung nga ai. 20 Shanhte mung hkawm sa nna, shara shagu hkan e hkaw dan mu ai: dai Madu shanhte hte shingdep nna, shabyin lu ai lamik kumla ni hte dai mungga hpe shagrin ya mu ai.

Luka 1

1:1 Shawng nnan kaw nna, tinang lala mu ai ni hte, mungga gunhpai nga ai ni gaw, 2 anhte kaw e byin ngut sai lam ni hpe, anhte e hkai dan madan hte maren, maumawi ka hpajang da ai masha law law wa nga ma ai majaw: 3 ngai mung yawng mayawng hpe npawt ndung hkren azin ayang tam san la ngut jang, 4 nang sharin la sai ga a dinggrin nga litdai hpe, nang chye lu n ga, na a matu matut manoi ka da na, ngai myit lu nngai, arawng lu htum ai Htawhpilu e. 5 Yuda mung up ai Herod hkawhkam a lakhtak e, Abia hpung hta nang ai, Zakari mying ai hkinjawng langai mi nga ai; shi a madu jan gaw Arun amyu shayi sha ni hta na rai lu ai; shi a amying gaw Elisabet ngu ai, rai nga ai. 6 Dai yan gaw, Madu a jep ai tara hte hkangda mada yawng hpe htep lahti hkannang ma ai rai nna, Karai Kasang a man e dinghpring ai yan rai nga ma ai. 7 Shan gaw kasha n lu ma ai; kaning rai nme law, Elisabet gaw maudung dung nga ai hte, shan lahkawng aprat kaba masai. 8 Ya shi gaw, shi a hpung hte rau abat wa jaw nna, Karai Kasang man e hkinjawng amu gun nga yang, 9 dai Madu a nta nhku e manam pyaw ai baw shang nat na, hkinjawng htung hte maren, hpaida hte lata la ai hta ang wu ai. 10 Dai manam pyaw nat ai ahkying hta shawa masha ni nlang hte gaw, shinggan e akyu hpyi let nga nga ma ai. 11 Shaloi dai Madu a lamu kasa gaw, manam pyaw nat ai hkungri a hkra maga de, shi hpe tsap shadan dan wu ai. 12 Zakari gaw dai mu jang kajawng nna hkrit kahpra mat nga ai. 13 Dai lamu kasa chyawm gaw, Zakari e, hkum hkrit et; nang hpyi ai ga madat ya nitdai rai nna, na madu jan Elisabet gaw na a matu shadang sha shangai na ra ai; shi a amying Yawhan ngu nna, nang shamying ya na ru ai; 14 Na a matu kabu gara ai hte ngwi pyaw shara tai na ra ai; shi shangai wa ai a majaw masha lanlak mung, kabu gara wa na mara ai. 15 Kaning rai nme law, shi gaw dai Madu a man e galu kaba wa na ra ai; tsabyi hte chyaru shi lu na n rai; kanu a hkritung nna pyi, chyoi pra ai Wenyi hte hpring na ra ai. 16 Israela kashu kasha ni law law hpe, shanhte a Madu Karai Kasang hpang de shi kayin wa shangun na maru ai. 17 Kawa ni a myit masin hpe kasha ni hpang de, je hpre ai ni hpe dinghpring ai ni a hpaji ningli lam de kayin wa shangun na hte, dai Madu a matu mazing da ai amyu hpe lajang shachyip da na, Elia a wenyi hte atsam rawng let, shi a shawng numshawn e sa wa na ra ai, ngu nna shi hpe tsun wu ai. 18 Shaloi Zakari gaw, Dai gaw ngai kaning di chye lu na we ta? ngai gaw dingla ni ai, nye madu jan mung aprat kaba sali ai, ngu nna lamu kasa hpe htan wu ai. 19 Dai lamu kasa, Ngai gaw Karai Kasang a man e tsap nga ai Gabriela rai nga nngai; nang hpe tsun dan wu nga nna, ndai kabu gara shiga tsun shana ya na, ngai hpe shangun dat ni ai. 20 Yu u, dai ahkying du yang dik wa na ra ai nye a ga hpe, nang n kam ndai majaw, dai amu byin ai nhtoi du hkra, ga n tsun lu ai ma-a nga na rin dai, ngu nna shi hpe htan tsun wu ai. 21 Shawa masha ni gaw Zakari hpe a la nga nna, nawku Htingnu nhku e na na rawng nga mat ai hpe, mau ma ai. 22 Shi pru wa yang shanhte hpe ga n tsun lu ai rai nna, dai nawku Htingnu nhku e shingran mu nu ai hpe, shanhte dum ya ma ai: shi gaw shanhte hpe a dingsi dan nga nna, ma-a let nga nga ai. 23 Ya, shi dawjau ai amu a nhtoi gu jang, shi a nta de bai wa ai. 24 Dai hpang shi a madu jan Elisabet gaw na-um nasin hkum rai wa nna, Masha ni a man e ngai hkrum ai shatan nhkan hpe, 25 mada mara nna yeng seng kau ya ai nhtoi hta, dai Madu gaw ngai hpe ning di ni ai, nga nna shata manga tup up rawng nga ai. 26 Ya, shata kru hta, lamu kasa Gabriela hpe Karai Kasang kaw nna, Galile mung na Nazaret ngu ai mare e nga ai, 27 Dawi amyu hta na Yosep ngu ai wa mahtan da ai mahkawn hpang de shangun dat wu ai: dai mahkawn a amying chyawm gaw Mari ngu ai, rai nga ai. 28 Dai lamu kasa gaw Mari kaw du jang, Chyeju nga lit ga, nang a lu ndai, dai Madu gaw nang hte rau nga nga ai law, ngu wu ai. 29 Mari gaw dai ga majaw masin kahpra nna, ndai shachyen ai ga gaw, kaning nga ai ga rai na ra i? nga nna myit aru yu nga ai. 30 Shaloi dai lamu kasa gaw, Mari e, hkum hkrit et; nang Karai Kasang a man e myiman pa nitdai: 31 yu u, nang na-um nasin rai wa nna shadang sha shangai na rin dai; shi a amying Yesu ngu nna, nang shamying ya na ru ai. 32 Dai wa gaw galu kaba na ra ai rai nna, Tsawhtum ai wa a Kasha ngu ai hkamla na ru ai; Madu Karai Kasang mung, shi kawa Dawi a tingnyang, shi hpe jaw na wu ai rai nna, 33 shi gaw Yaku a nta ntsa e, htani htana e a up nga na ra ai: shi a mungdan mung htum ngu ai nga na n rai, ngu nna shi hpe tsun wu ai. 34 Shaloi Mari gaw, Dai gaw kaning rai byin na a ta? ngai la n chye nngai, ngu nna, lamu kasa hpe tsun wu ai. 35 Dai lamu kasa gaw, Chyoi pra ai Wenyi na ntsa de du nna, Tsawhtum ai wa a atsam nang hpe shingnip ka-up na ra ai; dai re ai majaw shangai na ra ai wa gaw, Chyoi pra ai wa, Karai Kasang a Kasha ngu ai hkamla na ra ai. 36 Dai hta kaga, yu u, na a amyu jan Elisabet mung, gumgai rai sayang shadang sha na-um nasin hkum rai nga nna, maudung ngu ai num hta ya shata kru rai wa sai: 37 kaning rai nme law, Karai Kasang kaw na hpa mungga muk, atsam kata rai na ra ai n rai, ngu nna shi hpe htan wu ai. 38 Shaloi Mari gaw, Yu u, Madu a mayam jan ngai rai nga nngai; na a ga hte maren ngai hta rai wa u ga, ngu wu ai. Shaloi dai lamu kasa gaw shi kaw na wa mat ai. 39 Dai nhtoi hte hta e Mari gaw, Yuda mung na bum ga e nga ai mare langai mi de alawan rawt sa nna, 40 Zakari a nta de shang nhtawm, Elisabet hpe hkrum shaga wu ai. 41 Mari hkrum shaga ai ga Elisabet na la jang, shi a hkritung na ma gaw gumlawt nga ai: 42 Elisabet mung chyoi pra ai Wenyi hte hpring nna nsen kaba hte jahtau let, Numsha ni hta nang a lu ndai; na a hkritung na ma mung a lu lit dai law. 43 Nye Madu a kanu ngai kaw sa du ai gaw, hpa chyeju jaw e rai ra ai i? 44 Yu u, na a hkrum shaga ai ga ningsen nye na hta shang jang, nye hkritung na ma gaw kabu gara ai hte gumlawt li ai. 45 Kamsham ai numsha gaw a lu ai; kaning rai nme law, dai Madu kaw nna shi hpe tsun ai ga gaw dik wa na ra ai, nga ai. 46 Shaloi Mari gaw, Nye myit masin dai Madu hpe shagrau li ai; 47 Nye wenyi mung ngai hpe hkyela ai Madu Karai Kasang hta kabu gara li ai. 48 Shi a mayam jan a myit gyip ai hpe shi mada yu nu ai; Yu u, ya kaw nna shu mashi shu masha prat dingsa, ngai hpe a lu ai, ngu na ma ni ai. 49 Atsam rawng ai wa gaw, ngai hpe galu kaba ai galaw ni ai; Shi a amying nsang chyoi pra lu ai: 50 Shi hpe hkrit kamyin ai ni a ntsa e, shu mashi shu masha du hkra, Shi a matsan dum ai myit anga nga ai. 51 Shi a lahpum hte atsam pra di nu ai; Tinang kraw e maw ai hku hta gumrawng nga ai ni hpe, shi shabra kau nu ai. 52 Du magam ni hpe tingnyang na jahkrat kau nna, myit gyip ai ni hpe shagrau ya nu ai. 53 Kawsi hkrum ai ni hpe kaja ai hte jahkru shakat nna, sut su ai ni hpe kaman dat dat nu ai. 54 Anhte a ji wa ni hpe tsun da sai hte maren, Abraham hte shi a kashu kasha ni hpe, 55 Prat dingsa matsan dum ai lam dum nga na matu, Shi a shangun ma Israela hpe lanu lahku nu ai, nga nna tsun ai. 56 Mari chyawm gaw Elisabet hte rau shata masum dang nga nhtawm, nta de bai wa mat ai. 57 Shaloi Elisabet gaw shangai nhtoi gu nna, shadang sha shangai wu ai. 58 Dai Madu gaw shi a chyeju chyalai shajan shi hpe madun wu ai gaw, htingbu ni hte mayu dama ni na ma ai rai nna, shi hte rau kabu gara ma ai. 59 Ya matsat ya nhtoi hta e dai ma hpe matu gadoi jaw na lam shanhte sa ma ai rai nna, shi kawa a amying hte maren, Zakari, ngu nna shamying ya mayu ma ai. 60 Kanu mahtang, N rai, Yawhan ngu na re ai, ngu nna htan wu ai. 61 Shanhte gaw, Na a baw sang hta shing nga mying ai langai mi muk n nga ai, ngu nna shi hpe tsun mu ai. 62 Shaloi, dai ma hpe kaning ngu shamying mayu ai kun? nga nna kawa hpe dingsi san mu ai. 63 Shi gaw gamgu pa hpyi la nna, Shi a amying Yawhan rai lu ai, ngu nna ka dan wu ai. Shanhte nlang mau ma ai. 64 Dai ahkring mi hta shi gaw n-gup hpaw ai hte shinglet yan nna, Karai Kasang hpe shakawn kungdawn let ga tsun nga ai. 65 Dai re ai majaw, shanhte a makau grupyin hkan na ni nlang hte a ntsa e hkrithpa tai wa ai rai nna, dai ga mahkra gaw, Yuda bum ga ting hta e kajai gumhkawng wa ai. 66 Na mana ni yawng hte mung, tinang a kraw kata e dai hpe matsing da nna, Ndai ma gaw, kaning re ai wa rai na ra ai i? nga ma ai: kaning rai nme law, dai Madu a lata gaw shi hte rau nga nga ai. 67 Shaloi shi a kawa Zakari chyoi pra ai Wenyi hte hpring wa nna, myihtoi ga hku tsun wu ai gaw, 68 Dai Madu, Israela Karai Kasang gaw, a nga u ga law; Shi a amyu hpe kawan yu sa nna, hkrang la ai lam waw ya nu ai. 69 Chyaloi nhkoi nna shi a chyoi pra ai myihtoi ni a n-gup hte tsun da ai hte maren, Gumlau ni hte ndawng ai ni yawng a lata na hkyehkrang la ai lam hpaw na hte, 70 Anhte a ji wa ni hpe matsan dum ai lam madun na matu mung; Gumlau ni a lata na mawai la ai hkam ngut jang, 71 Hkrit ai myit n rawng ai sha, anhte a prat dingnawng, Chyoi pra ai, dinghpring ai hte, shi a man e dawjau lu hkra, 72 Anhte a ji wa Abraham hpe dagam da ai, dagam ga ngu ai, 73 Shi a chyoi pra ai ga shaka hpe dum na matu mung, 74 Shi a shangun ma Dawi a nta hta, anhte a matu, 75 Hkyehkrang la ai nrung shatut ya ma ni ai. 76 Ma e, nang mung, Tsawhtum ai Wa a myihtoi ngu ai hkamla na rin dai: Anhte a Karai Kasang a matsan dum ai chyeju majaw, 77 Anhte a ntsa e Matsaw ntsa na nhtoi htoi la wa nna, Yubak mara raw dat kau na lam hte, 78 Shi a amyu hpe hkyehkrang la ai lam chye lu shangun na matu mung, Nsin, hte si ai shingnip kata e dung nga ai ni hpe htoi ya nna, 79 Anhte a lagaw hpe ngwi ai lam de woi wa na matu mung, Dai Madu a lam lajang na, shi a shawng e nang sa wa na rai nga ndai, nga ai. 80 Dai ma mung kaba wa nna, wenyi atsam hta ja wa let, Israela masha ni kaw danpru ai nhtoi du hkra, nam mali hkan e nga nga ai.

Luka 2

2:1 Dai nhtoi hte hta e, mungkan ting hpe jahpan la na, Kehta hkawhkam Agustu kaw nna mungga pru ai. 2 Dai jahpan la ai gaw, Suri mung hta Kureni munggyi tai nga yang, shawng la ai jahpan rai nga ai. 3 Shaloi masha mahkra gaw amying shalawm na matu, langai hte langai tinang mare de wa ma ai. 4 Yosep mung, Dawi a kashu kasha hte aru arat rai nga ai majaw, Galile mung na Nazaret mare kaw nna, Yuda mung na Betlehem ngu ai Dawi a mare de, 5 shi mahtan da ai num Mari hte rau amying shalawm na matu lung wa ai: Mari chyawm gaw na-um nasin hkum rai nga ai. 6 Dai yang e naw nga yang, shangai nhtoi gu nna, 7 shi gaw shadang sha alat shangai wa sai: nbat hte kayawp nhtawm, ushat wakang hta kaleng tawn da wu ai; kaning rai nme law, manam jarawp hta shanhte a matu nga shara n nga malu ai. 8 Ya dai ginwang e sagu rem ai masha, urawng udat hkan e nga ma ai rai nna, shanhte a sagu hpung hpe shana na ahkying ladaw ni hta sin nga ma ai. 9 Shaloi dai Madu a lamu kasa gaw shanhte a makau e sa tsap nga nna, dai Madu a hpung shingkang gaw shanhte a grupyin e htoi kabrim wa ai: dai rai nna shanhte gaw hkrit kaba hte hkrit mat ma ai. 10 Dai majaw lamu kasa gaw, Hkum hkrit myit; yu mu, masha nlang a matu nachying kabu gara mai ai shiga, ngai nanhte kaw gun sa ring ngai; 11 dai ni na nhtoi hta Hkyehkrang la ai wa Hkristu ngu ai Madu gaw, Dawi a mare e nanhte a matu shangai wa sai: 12 nanhte a matu kumla ndai rai na ra ai: ma chyangai langai mi nbat hte kayawp nna ushat wakang hta kaleng taw nga ai gaw, nanhte mu na marin dai, ngu nna shanhte hpe tsun mu ai 13 Ya, dai lamu kasa hte rau, lamu na wunawng wuwa ga daga, akajawng sha danpru nna, Karai Kasang hpe shakawn kungdawn let, 14 Matsaw lahta tang e Karai Kasang gaw hpung shingkang rawng nga u ga; Ga ntsa e mung, shi sharawng awng ai masha ni hta, ngwi pyaw ai gaw anga nga nu ga law, nga ma ai. 15 Lamu kasa ni sagu rem ai ni kaw nna lamu de wa mat jang, shanhte gaw, Betlehem mare du hkra nan anhte sa nna, byin wa sai hte, dai Madu anhte hpe shadan dan ai lam hpu yu saga, nga nna shada da tsun ma ai. 16 Shingrai shanhte lau lau sa nna, Mari yan Yosep hpe mung, ushat wakang hta kaleng taw nga ai ma chyangai hpe mung, mu ma ai. 17 Dai mu ma ai shaloi, dai ma a lam shanhte e tsun dan ai ga hpe, shanhte tsun kajai dat ma ai. 18 Na mana ni mung, sagu rem ai ni shanhte hpe tsun dan ai ga majaw mau ma ai. 19 Mari chyawm gaw dai ga yawng mayawng hpe matsing gun la nna, shi kraw kata e a ru yu nga ai. 20 Sagu rem ai ni mung, shanhte hpe tsun dan manu ai hte maren, na la, mu la ai lam mahkra a majaw, Karai Kasang hpe shagrau sha-a nna, shakawn kungdawn let bai wa ma ai. 21 Dai ma hpe matu gadoi lam jaw na, matsat ya nhtoi du jang, hkritung hkriwang e shi garai n rawng yang, lamu kasa shamying da ai amying hte maren, shi hpe Yesu ngu nna shamying mu ai. 22 Mawshe a tara hte maren shanhte a jasan jaseng ai nhtoi gu jang, Shadang sha alat shagu dai Madu a matu chyoi pra ai ngu lu na, nga nna, 23 dai Madu a tara hta ka da nga ai hte maren, dai ma hpe Madu kaw sa ap ya na matu mung, dai Madu a tara hta tsun da ai hte maren, 24 Hkrudu lahkawng, shing n rai, u ra kasha lahkawng, hkungga nawng ya na matu mung, shan gaw dai ma hpe Yerusalem mare de woi sa mu ai. 25 Ya, yu mu, Simun mying ai masha langai mi Yerusalem mare e nga ai: dai wa gaw dinghpring ai hte tara hkungga nna, Israela hpe shalan shabran na lam myit mada nga ai wa rai nga ai; dai chyoi pra ai Wenyi mung shi a ntsa e nga nga ai. 26 Shi gaw, dai Madu a Hkristu hpe garai n mu yang, si na n rai, nga nna chyoi pra ai Wenyi hte madun dan ai lu la wu ai. 27 Dai wa gaw nawku Htingnu kata de Wenyi hte du sa ai; kanu yan kawa gaw ma Yesu hpe tara htung hte maren di ya na woi sa mu ai shaloi. 28 Simun gaw shi a lata hte dai ma hpe pawn la nna Karai Kasang hpe shakawn sha-a let, 29 N-gawn Madu e, na ga hte maren, na a mayam wa hpe ngwi hyaw ai hte ya wa shangun dat nit ga law: 30 Masha amyu myu ni a man e lajang da nna, 31 Maigan amyu ni hpe jahtoi dan na nhtoi hte, 32 Na amyu Israela a hpung shingkang matu rai nga ai, Na a hkyehkrang la ai lam hpe, nye a myi hte chyaw ngai mu lu se ai, nga nna tsun ai. 33 Kanu yan kawa gaw shi a lam tsun ai ga majaw, mau nga ma ai. 34 Simun gaw shanhte hpe shaman ya nna, kanu Mari hpe, Yu u, ndai ma gaw, Israela masha ni hta, law law a matu kataw shara hte, law law a matu rawt wa na lam mung, ndang kalang rai hkat na kumla matu mung, san da ai wa rai nga ai. 35 dai hta n-ga, masha law law ni a kraw lawang na myit mamyit ni dan pra wa na matu, na a myit masin hta nan nhtu htinggrang na ra ai, ngu nna tsun wu ai. 36 Dai hta kaga, Ashe amyu re ai Hpanuela shayi sha, Anna ngu ai num myihtoi langai mi nga ai; shi gaw asak grai kaba la sai; mahkawn prat kaw nna sanit ning du hkra madu wa hte nga nhtawm, matsat shi mali ning tup gaida nga ai: 37 dai num gaw nawku Htingnu kaw na n pru ai sha, lusha gam nna akyu hpyi ai hte shani shana dawjau let anga nga ai. 38 Shi mung dai ahkying e nan sit sa nna, Karai Kasang hpe shakawn kungdawn let, Yerusalem hpe hkyehkrang la na lam myit mada ai ni nlang hte hpe, dai ma a lam tsun dan mu ai. 39 Shan gaw dai Madu a tara hte maren, lam magup shatup da ngut jang, Galile mung na, tinang nga ai Nazaret mare de bai wa ma ai. 40 Dai ma gaw kaba wa ai hte n-gun lapyin ja wa nna, hpaji byeng-ya hte hpring nga ai; Karai Kasang a chyeju mung, shi a ntsa e anga nga ai. 41 Shi a kanu yan kawa gaw, Shalai wa ai poi ten du jang, shaning shagu Yerusalem mare de sa ma ai. 42 Dai ma gaw shi lahkawng ning du jang, dai poi a htung hte maren shanhte lung wa ma ai; 43 dai nhtoi hte shalai ngut nna bai wa ma yang, dai ma Yesu gaw Yerusalem e hti nga mat ai; kanu yan kawa chyawm gaw dai n chye ma ai. 44 Rau wa manang hpung hta lawm nga a dawng, nga nna myit kau ma ai majaw, shan gaw lani sat wa nna, mayu dama ni hte chye chyap ai ni kaw shi hpe hkan tam ma ai; 45 dai ma hpe n mu jang, shan gaw shi hpe hkan tam let, Yerusalem mare de nhtang sa wa ma ai. 46 Ya masum ya na wa sayang she, dai nawku Htingnu kata, sara ni a ka-ang e, shanhte a ga madat la nna, shanhte hpe jasan let dung nga ai hpe, shan sa mu mu ai. 47 Shi a ga na mana ni gaw, shi a myit kung ai hpe mung, shi htan ai ga a majaw mung, mau nga ma ai. 48 Shi hpe mu jang shan mau mat ma ai rai nna, shi a kanu gaw, Sha e, hpa rai an e ning di mi ta? yu u, nwa hte an myitru myittsang ai hte nang hpe hkan tam nga ga ai, ngu nna shi hpe tsun wu ai. 49 Shi gaw, Hpa rai ngai hpe tam myit ta? Nye Wa hte seng ai lam hta ngai nga lu mai ai, nan n chye myit ni? ngu nna shan hpe htan wu ai. 50 Raitimung, shi shan hpe tsun ai ga gaw, shan n chye na ma ai. 51 Shi chyawm gaw shan hte rau yu wa nna, Nazaret mare de du wa ai: shan a npu e mung shi taw nga ai: shi a kanu gaw dai ga mahkra hpe shi kraw hta matsing da wu ai. 52 Yesu gaw hpaji byeng-ya kunghpan wa ai hte, gawng shing-yan kaba wa nna, Karai Kasang a man e mung, masha a man e mung, myiman pa wa nga ai.

Luka 3

3:1 Kehta hkawhkam Tiberu gaw hkaw dung ai shi manga ning hta, Yuda mung e Puntu Pilat gaw munggyi aya hta, Galile mung e Herod gaw du aya hta, Ituri hte Trakuni ginwang hta e shi a kanau Hpilip gaw du aya hta, Abili mung e Lusanu gaw du aya hta, 2 Anna yan Kayapa gaw hkinjawng agyi aya hta rai shajang ma ai shaloi, Karai Kasang a mungga gaw Zakari a kasha Yawhan kaw, nam mali e rai nga yang du nna, 3 shi gaw Yawdan hka ginwang shara magup hkan e du hkawm let, yubak raw dat kau na matu myit malai baptisma lam hkaw tsun nga ai: 4 dai gaw, Nam mali kata e jahtau ai nsen gaw: Dai Madu a lam lajang da mu, Shi a lam masun ni hpe shading mu: 5 Hkaraw hkamwam shagu kaput lu na rai nga ai, Bum hte kawng shagu hpe daw kau lu na rai nga ai; Magaw ai lam ni hpe shading lu na rai nga ai, Machyawk marawk re ai lam ni hpe shara lu na rai nga ai: 6 Shaloi ahkrang ashan yawng gaw, Karai Kasang a hkyehkrang la ai lam mu lu na mara ai, nga nna myihtoi Esaia laika hta ka da ai ga hte maren rai wa sai. 7 Dai majaw, Yawhan a lata hte baptisma hkamla na, pru sa ai shawa masha ni hpe shi tsun mu ai gaw: Pu htum amyu ni e, du magang ra ai yubak ari hta na hprawng wa lu myit ga, nanhte hpe kadai shadum da myit ta? 8 Dai majaw myit malai hte ging dan ai asi si mu! Abraham gaw anhte a wa rai nga mali ai, nga nna tinang kraw e hkum tsun myit; kaning rai nme law, nanhte hpe ngai tsun made ga, Karai Kasang gaw ndai nlung ni hta na Abraham a matu kasha hpan shapraw dat lu ai. 9 Ya e pyi dai nwa gaw hpun pawt nhpang hkan e tawn da nga ai; dai rai nna asi kaja n si ai hpun nga manga hpe kran daw kau nna wan hta kabai bang kau nga ai, ngu mu ai. 10 Shaloi shawa masha ni, Dai rai taw gaw, anhte kaning rai na rai ta? nga nna shi hpe san ma ai. 11 Shi shanhte hpe htan mu ai gaw, Palawng lahkawng lu ai wa gaw n lu ai wa hpe karan u ga, shat lusha lu ai wa mung dai hte maren jaw u ga, ngu mu ai. 12 Kang hta ai ni mung baptisma hkamla na sa nna, Sara e, anhte kaning rai na rai ta? nga nna shi hpe san ma ai. 13 Shi gaw, Nanhte hta la na shadang tawn ai made hta grau nna hkum adip la myit, ngu nna shanhte hpe tsun mu ai. 14 Hpyen masha ni mung, Anhte wa gaw kaning rai na rai ta? nga nna shi hpe san ma ai. Shi gaw, Kadai hpe mung adip arip hkum rai myit: jahkrit shama sha ai mung hkum rai myit; nanhte a shabrai hte ram dum nga mu, ngu nna shanhte hpe tsun mu ai. 15 Masha ni chyawm gaw myit mada nga ma ai rai nna, Yawhan gaw Hkristu wa mi hkoi rai nga ai kun? nga nna yawng mayawng gaw tinang a kraw kata e shi a lam myitsumru shajang nga ma yang; 16 Yawhan gaw, Ngai gaw nanhte hpe hka hte baptisma jaw made ai; raitimung, ngai hta atsam grau rawng ai wa gaw sa wa ra ai; shi a kyepdin sumri raw na pyi ngai n ging nngai: shi gaw chyoi pra ai Wenyi hta mung, wan hta mung, nanhte hpe baptisma jaw na ra ai: 17 shi a lata hta shi hkuwawn lang nna, shi a mam chyarang hpe yit jasan kau nhtawm, mam gu hpe shi dum hta shinggyin bang da nna, nsan hpe gaw n sat lu ai wan hte nat kau na ra ai, ngu nna mahkra hpe htan mu ai. 18 Shingrai shi gaw shadum shahprang ai ga kaga law law hte mung, dai masha ni hpe kabu gara shiga hkaw tsun wu ai: 19 raitimung Herod du gaw, shi kanau a madu jan Herodia lam hte, shi nan galaw ai n shawp ai amu kaga mahkra a gawp e daru sharin hkrum wu ai majaw, 20 dai mara yawng a ntsa e bai kahtap nna, Yawhan hpe htawng hta sharen da wu ai. 21 Masha nlang baptisma hkamla ma ai shaloi, Yesu mung baptisma hkam nhtawm, akyu hpyi nga yang, lamu hpaw wa nna, 22 dai chyoi pra ai Wenyi gaw hkrang dan dan shi a ntsa e hkrudu zawn yu hkrat wa nna, Nang gaw nye tsawra ai Kasha rai nga ndai; nang hta ngai sharawng awng nngai law, nga nna lamu de na nsen du pru wa ai. 23 Yesu gaw amu galaw hpang ai shaloi sumshi ning daram rai wa sai; shi gaw masha myit yu ai hte maren, Yosep a kasha rai nga ai: Yosep gaw Heli a kasha; Heli gaw Mahtat a kasha; 24 Mahtat gaw Lewi a kasha; Lewi gaw Melhki a kasha; Melhki gaw Yanna a kasha; Yanna gaw Yosep a kasha; 25 Yosep gaw Matahtia a kasha; Matahtia gaw Amu a kasha: Amu gaw Na-um a kasha; Na-um gaw Esali a kasha; Esali gaw Nagai a kasha 26 Nagai gaw Ma-at a kasha; Ma-at gaw Matahtia a kasha: Matahtia gaw Semai a kasha; Semai gaw Yosek a kasha; Yosek gaw Yoda a kasha; 27 Yoda gaw Yawhan a kasha; Yawhan gaw Resa a kasha; Resa gaw Zerubabela a kasha; Zerubabela gaw Salahtila a kasha; Salahtila gaw Neri a kasha; 28 Neri gaw Melhki a kasha; Melhki gaw Adi a kasha; Adi gaw Kusam a kasha; Kusam gaw Elamadam a kasha; Elamadam gaw Era a kasha; 29 Era gaw Yesu a kasha; Yesu gaw Elieza a kasha; Elieza gaw Yawrim a kasha; Yawrim gaw Mahtat a kasha; Mahtat gaw Lewi a kasha; 30 Lewi gaw Simun a kasha; Simun gaw Yuda a kasha; Yuda gaw Yosep a kasha; Yosep gaw, Yawnam a kasha; Yawnam gaw Eliakim a kasha; 31 Eliakim gaw Melia a kasha; Melia gaw Mena a kasha; Mena gaw Matahta a kasha; Matahta gaw Nahtam a kasha; Nahtam gaw Dawi a kasha; 32 Dawi gaw Yese a kasha; Yese gaw Obed a kasha; Obed gaw Bua a kasha; Bua gaw Sala a kasha; Sala gaw Nasun a kasha; 33 Nasun gaw Admin a kasha; Admin gaw Arni a kasha; Arni gaw Hesrun a kasha; Hesrun gaw Hparet a kasha; Hparet gaw Yuda a kasha; 34 Yuda gaw Yaku a kasha; Yaku gaw Isak a kasha; Isak gaw Abraham a kasha; Abraham gaw Htara a kasha; Htara gaw Nahura a kasha; 35 Nahura gaw Seruk a kasha; Seruk gaw Ragu a kasha; Ragu gaw Hpelek a kasha; Hpelek gaw Ebera a kasha; Ebera gaw Sala a kasha; 36 Sala gaw Kainam a kasha; Kainam gaw Arhpaza a kasha; Arhpaza gaw Shem a kasha; Shem gaw Noa a kasha; Noa gaw Lamek a kasha; 37 Lamek gaw Mehtusala a kasha; Mehtusala gaw Enuk a kasha; Enuk gaw Yaret a kasha; Yaret gaw Mahelela a kasha; Mahelela gaw Kainan a kasha; 38 Kainan gaw Enu a kasha; Enu gaw Shet a kasha; Shet gaw Adam a kasha; Adam gaw Karai Kasang a kasha rai nga ai.

Luka 4

4:1 Dai hpang Yesu gaw, chyoi pra ai Wenyi hte hpring let, Yawdan hka nna bai wa yang, dai Wenyi e nam mali de 2 nhtoi mali shi ya tup woi hkawm wu ai rai nna, Nat e gunglau ai hkrum wu ai. Dai nhtoi hte laman e shi hpa mung n sha ai rai nna dai hte ya lai jang kawsi wu ai. 3 Dai rai nna Nat gaw, Nang karai Kasang a Kasha rai n yang gaw, ndai nlung hpe muk tai u ga, tsun u, ngu nna shi hpe tsun wu ai. 4 Yesu gaw, Masha gaw muk hte sha hkrung nga lu na n rai, nga nna ka da nga ai, ngu nna htan wu ai. 5 Bai Nat gaw, shi hpe woi lung wa nna, mungkan ga na mungdan nlang hpe myi grip mi hta sha madun dan nna, 6 Ndai ahkang aya mahkra hpe, dai ni a hpung shingkang hte nawng, ngai nang hpe jaw na de ai; dai gaw ngai hpe ap ya ni ai rai nna, ngai jaw mayu ai wa kadai hpe mung jaw lu nngai: 7 dai re ai majaw, nye man e nang nawku n yang gaw, ndai yawng mayawng na a tai na ra ai, ngu nna shi hpe tsun wu ai. 8 Shaloi Yesu gaw, Dai Madu na a Karai Kasang hpe nang nawku lu na rai nna, shi hpe hkrai dawjau lu na ndai, nga nna ka da nga ai, ngu nna shi hpe htan wu ai. 9 Bai Nat gaw Yerusalem mare de shi hpe woi sa wa nna, dai nawku Htingnu a nchyun e shadun tawn nhtawm, Nang Karai Kasang a Kasha rai n yang gaw, na a hkum hpe nang nna le de jahkrat dat u; 10 kaning rai nme law, Nang hpe bausin na, na a matu shi a lamu kasa ni hpe shi hkangda na nu ai. 11 bai, Nlung hta, na a lagaw n ahtu u ga, Shanhte a lata hta nang hpe pawn la na mara ai, nga nna ka da nga ai, ngu wu ai. 12 Yesu gaw, Dai Madu na a Karai Kasang hpe nang chyam yu lu na n rai, nga nna rawng nga ai, ngu nna htan wu ai. 13 Nat gaw agung alau lam mahkra shatup ngut jang, shi kaw na tawng marang mi pru nga nga ai. 14 Yesu chyawm gaw Wenyi a atsam hte Galile mung de bai wa ai. Dai ginwang shara magup hkan e shi a lam kajai gumhkawng mat wa ai. 15 Shanhte a tara jawng ni hta shi sharin shaga ya nna, nlang hte gaw shi hpe shagrau sha-a ma ai. 16 Shaloi, shi nga kaba wa ai Nazaret mare de du wa ai; shi a htung hte maren laban nhtoi e dai tara jawng hta shi shang wa ai rai nna, laika hti na rawt wu ai. 17 Shaloi myihtoi Esaia a laika shi hpe jaw wu ai rai nna, dai laika hpaw yang, ning nga ka da ai shara mu hkrup wu ai; 18 Madu a Wenyi nye a ntsa e nga nga ai: Matsan mayan ni hpe kabu gara shiga hkaw tsun na matu, shi ngai hpe naman chya ni ai: Bawngdung ai ni hpe shalawt lu na lam, Myikyaw ai ni hpe myi bai mu na lam, hkaw tsun na matu mung, Zingri zingrat hkrum ai ni hpe dat dat shangun na hte, 19 Madu a sharawng awng ai shaning hkaw tsun dan na matu mung, shi ngai hpe shangun dat ni ai, nga ai. 20 Dai laika katsu nna, tara jawng sin ai wa hpe bai ya kau nhtawm, shi dung nga ai: tara jawng na ni nlang hte gaw shi hpe azi yu nga ma ai. 21 Shi gaw, Ndai ka da ai ga gaw dai ni nan nanhte a na hta dik mat sai, ngu nna shanhte hpe ga tsun hpaw wu ai. 22 Nlang hte gaw shi a lam sakse hkam ya ai hte, shi a n-gup hta na pru ai chyeju ga majaw mau nga nna, Ndai wa gaw Yosep a kasha n rai nga a ni? nga nna tsun shajang ma ai. 23 Dai rai nna shi gaw, Nanhte gaja wa teng teng, Tsi sara e, tinang hkum dai shamai la u; anhte na ai hte maren, Kaperna-um mare e shabyin ai amu zawn, nang na a buga e mung galaw dan u, nga nna ga shadawn ndai hte ngai hpe tsun na marin dai. 24 Bai shi gaw, Nanhte hpe ngai teng teng tsun made ga, Kadai myihtoi mung tinang buga e arawng n lu ga ai. 25 Bai nanhte hpe ngai gaja wa tsun made ga, Elia a aprat e, masum ning e shata kru tup jan gri nna, dai mung ting hkan e nachying hku hku hpang gara rai wa yang, Israela a amyu hta gaida law law nga ma ai: 26 raitimung, shanhte hta na langai mi kaw muk Elia hpe n shangun dat wu ai; Sidun mung Zarephta mare na gaida jan langai mi kaw she shangun dat wu ai. 27 Myihtoi Elisha a aprat e mung,Israela a amyu hta manggang kap ai masha law law wa nga ma ai, raitimung, shanhte hta na langai mi muk sanpra wa lu ai n rai; Suri masha Naman ngu ai wa chyu sha sanpra wa lu ai, ngu mu ai. 28 Dai tara jawng na ni nlang hte gaw dai lam na jang, ja ja masin pawt bu ai hte, 29 gan rawt nna, mare shinggan de shi hpe shapraw nhtawm, shanhte a mare de ai bum pungding na hkin-gau mahka kaw nna, shi hpe kanawng jahkrat kau na woi sa wa mu ai. 30 Shi chyawm gaw shanhte a ka-ang hku ga pru nna sa mat wa ai. 31 Shaloi Galile mung na Kaperna-um ngu ai mare langai mi de shi sa du ai. Laban nhtoi ni hta mung shi shanhte hpe sharin shaga mu ai; 32 shi sharin shaga ai lam hpe shanhte mau mat nga ma ai: kaning rai nme law, shi a ga gaw daru magam ahkang ga rai lu ai. 33 Shaloi dai tara jawng hta, n san n seng ai nat shung ai masha langai mi nga ai: dai wa gaw nsen kaba hte jahtau nna, 34 A! Nazaret wa Yesu e, anhte nang hte hpa seng ga ta? anhte hpe jahten na nang sa du n ni? nang kadai re ai ngai chye nga nngai, Karai Kasang a chyoi pra ai wa nang rai nga ndai, nga ai. 35 Shaloi Yesu gaw, Atsin sha nga u, shi kaw na pru wa u, ngu nna shi hpe daru kau wu ai. Dai rai nna Nat gaw dai wa hpe ka-ang e kadawng kau tawn da nhtawm, hkala nba n di ai sha, shi kaw na pru mat wa ai. 36 Dai majaw nlang hte gaw mau mahka nga ma ai rai nna, Ndai ga gaw kaning re ai ga re ai i? daru magam ahkang hte mung, n-gun atsam hte mung, n san n seng ai nat ni hpe shi htet da nna shanhte pru mat wa ma ai, nga nna shada da tsun hkat ma ai. 37 Shaloi, dai ginwang grupyin shara shagu hkan e, shi a lam kajai gara gumhkawng pri rai wa sai. 38 Dai tara jawng na shi rawt wa nna, Simun a nta de shang wa ai. Simun a kani gaw hkali ja ja bu nga ai rai nna, shanhte shi a matu shi hpe hkap hpyi ma ai. 39 Dai numsha a makau e tsap nga let, dai hkali hpe shi daru kau wu ai rai nna, shi a hkali kawp mat wa ai: shaloi jang shi rawt nna, shanhte hpe galaw daw mu ai. 40 Jan shang wa jang, machyi makaw re ai hte ana ahkya amyu myu kap ai masha lu ai ni nlang hte gaw, dai ni hpe shi hpang de woi sa mu ai; shi gaw langai hte langai a ntsa e lata mara ai hte shanhte hpe shamai ya mu ai. 41 Nat ni mung, Nang gaw Karai Kasang a Kasha rai nga ndai, nga nna jahtau let masha law law kaw na pru mat wa ma ai: shi Hkristu rai nga ai hpe shanhte chye ma ai majaw, ga n tsun lu hkra, shanhte hpe jet kau mu ai. 42 Nhtoi htoi jang shi pru wa nna, nam na machyi shim ai shara de sa du ai.Shawa masha ni chyawm gaw shi hpe hkan tam nna, shi kaw du jang, shanhte kaw na n wa mat u ga, nga nna hkan hkum mayu ma ai. 43 Shi gaw, Karai Kasang mungdan a kabu gara shiga hpe, mare kaga ni hta mung ngai hkaw tsun lu na nngai; dai matu ngai hpe shangun dat ni ai, ngu nna shanhte hpe tsun mu ai. 44 Shaloi, Galile mung na tara jawng ni hta, shi hkaw dan nga ai.

Luka 5

5:1 Kalang mi na, shawa masha ni gaw Karai Kasang a mungga madat na nga, shi kaw katut bang wa ma yang, Genesaret nawng makau e shi tsap nga ai rai nna, 2 nawng hkin-gau e li lahkawng sek nga ai hpe mu wu ai: nga hkan ai ni chyawm gaw li hta na pru nna, sumgawn kashin nga ma ai. 3 Simun a li hta shang nhtawm, hkin-gau hte loi mi jahka na shi hpe hpyi wu ai rai nna, dai li hta dung let, dai kaw nna shawa masha ni hpe sharin shaga mu ai. 4 Ga tsun htum jang, Hka sung ai shara de naw sit nna, nga ja na matu nanhte a sumgawn ni hpe jahkrat mu, ngu nna Simun hpe tsun wu ai. 5 Simun gaw, Madu e, mana tup anhte shakut ga timung, hpa mung n lu gaw ai, raitimung na a ga majaw, ngai sumgawn jahkrat na we ai, ngu nna htan wu ai. 6 Shingrai jahkrat jang, shanhte gaw nga wunawng kaba magawn hkrup lu ma ai; shanhte a sumgawn ni mung je wa malu ai rai nna, 7 li kaga hta nga ai manang ni hpe sa karum la na, dingsi shaga mu ai. Shanhte mung sa ma ai rai nna, dai li lahkawng yan lupwa magang hkra, bang jahpring mu ai. 8 Simun Petru gaw dai mu jang, Yesu a lahput nhpang e dingnyawm nna, Madu e, ngai kaw na wa mat u; ngai gaw yubak kap ai masha rai nga nngai, ngu wu ai. 9 kaning rai nme law, shingrai nga magawn la lu ai majaw, shi mung, shi kaw hkannang ai ni nlang hte mung, mau mahka mat ma ai; 10 Simun a manang Zebedi a kasha Yaku yan Yawhan mung dai zawn mau mat ma ai. Shaloi Yesu gaw, Simun hpe, Hkum hkrit et; ya kaw nna nang masha hpe hkan hkwi na rin dai, ngu wu ai. 11 Li yan hpe danam e sek tawn da nhtawm, shanhte gaw arai mahkra kau da nna, shi kaw hkannang ma ai. 12 Lang mi na mare langai mi hta shi nga nga yang, yu mu, hkum ting manggang kap ai masha langai mi nga ai: dai wa gaw Yesu hpe mu jang, dingnyawm dagup nna, Madu e, nang hkraw n yang gaw, ngai hpe shapra ya lu na rai nga ndai, ngu nna hpyinem wu ai. 13 Yesu gaw lata ladawn nna shi hpe ahtawk let, Ngai hkraw nga nngai, sanpra wa nu, ngu wu ai. Shaloi jang dai manggang shi kaw na pru mat wa ai. 14 Dai lam kadai hpe mung n tsun dan ai sha, Nang pru wa nna hkingjawng wa hpe na hkum madun dan nhtawm, shanhte a matu sakse tai u ga, nang sanpra ai a matu Mawshe tawn da ai hte maren, hkungga wa nawng ya u, ngu nna shi hpe ginhtim dat wu ai. 15 Raitimung, shi lam a shiga gaw grau nna kajai gumhkawng pri rai wa ai hte, shawa masha wunawng wuwa gaw, ga madat na matu mung, Shanhte a machyi makaw mai na matu mung, sa hpawng ma ai. 16 shi chyawm gaw nam mali de lagyim sa mat nna akyu hpyi nga ai. 17 Lani mi hta shi sharin shaga nga yang, Galile mung, Yuda mung, kahtawng shagu hkan na hte, Yerusalem mare de na Hparishe hte tara sara ni sa du dung nga ma ai: machyi shamai na matu mung dai Madu a atsam gaw shi a ntsa e nga nga ai. 18 Shaloi, yu mu, masha ni gaw hkum katsing si ai wa langai mi hpe panep hta hpai sa nna, dai wa hpe shi a man e shawn tawn lu hkra shashawn lu na lam tam ma ai. 19 Masha wunawng chyat nga ai majaw, dai wa hpe gara hku n shashawn lu mu jang, dai nta ntsa de shanhte lung nna, galup ai wut waw kau nhtawn, dai wa hpe panep hte nawng, shawa hpawng ka-ang Yesu a man e, yawn jahkrat dat mu ai. 20 Shanhte a kamsham ai myit mu jang, shi gaw, Masha wa e, na a yubak dat kau ya sade ai, ngu wu ai. 21 Shaloi laika ka ai sara ni hte Hparishe ni gaw, Ning nga shatan nhkan tsun ai wa gaw, kadai wa rai ta? Karai Kasang sha n rai yang yubak dat kau ya lu ai gaw kadai wa rai nga a ta? nga nna myit aru yu nga ma ai. 22 Shanhte a myit aru yu ai hpe Yesu chye wu ai majaw, Nanhte hpa rai kraw kata e myit aru yu nga myit ta? 23 Na yubak dat kau ya sade ai, ngu ai hte, Rawt hkawm wa u, ngu ai ga yan hta, gara mahtang grau tsun loi a ta? 24 Raitimung, Masha Kasha gaw ga ntsa e yubak dat kau ya ai ahkang aya lu ai gaw nanhte chye nga myit ga, dai hkum katsing si ai wa hpe, Nang hpe ngai tsun de ga, Rawt u, na a yupku la nna, nta de wa nu, ngu nna shanhte hpe htan wu ai. 25 Shaloi jang shanhte a man e shi rawt nna, shi a yupra hpai la nhtawm, Karai Kasang hpe shakawn kungdawn let, shi a nta de wa mat ai. 26 Nlang hte gaw grai wa mau mahka nga ma ai rai nna, Karai Kasang hpe shakawn kungdawn nga ma ai; nachying hkrit la ai hte mung, Dai ni anhte mauhpa amu mu saga ai, nga nna tsun ma ai. 27 Dai hpang shi pru sa wa nna, Lewi ngu ai kanghta ai wa langai mi, kang sum hta dung nga ai hpe mu wu ai rai nna, dai wa hpe, Ngai kaw hkan rit, ngu wu ai. 28 Shi gaw arai yawng mayawng kau da nhtawm, rawt nna shi kaw hkannang nga ai. 29 Shaloi Lewi gaw shi a nta e Yesu a matu poi kaba galaw nna, kanghta ai ni hte masha kaga law law wa, shanhte hte rau sha dung nga ma ai. 30 Dai rai nna Hparishe ni hte shanhte a laika ka ai sara ni gaw, shi a sape ni a lam wu wu di di nga nna, Nanhte hpa rai kanghta ai ni hte yubak kap ai ni rau lusha nga myit ta? nga nna tsun ma ai. 31 Yesu gaw, Hkam kaja ai ni tsi sara n ra ma ai, machyi ai ni sha ra ma ai: 32 dinghpring ai ni hpe myit malai lu hkra shaga na, ngai sa du ai n rai, yubak kap ai ni hpe shaga na she, sa du nngai, ngu nna shanhte hpe htan mu ai. 33 Bai shanhte gaw, Yawhan a sape ni lusha gam gam rai ma ai hte akyu hpyi let nga ma ai: Hparishe ni a sape ni mung shingrai nga ma ai: na a sape ni mahtang gaw a lu a sha nga ma ai, ngu nna shi hpe tsun mu ai. 34 Yesu gaw, La nnan wa gaw hkungran ai gawk hte seng ai ma ni hte rau naw nga yang, nanhte shanhte hpe lusha gam shangun lu myit ni? 35 Raitimung, la nnan wa hpe shanhte kaw na jahka la ya ai nhtoi du na ra ai rai nna, dai nhtoi hte hta shanhte lusha gam na mara ai, ngu nna shanhte hpe tsun mu ai. 36 Ga shadawn hte mung shi shanhte hpe tsun mu ai gaw, Palawng nnan hta na achyen gang je la nna, palawng dingsa hta kadai n kapa ga ai; shing di yang, palawng nnan hpe gang je kau nna palawng dingsa mung nnan hta na achyen hte n pre na ra ai. 37 Tsabyi nnan hpe mung shanhpyi ndum dingsa hta kadai n bang ga ma ai; shing di yang, tsabyi nnan gaw ndum ni hpe kapaw je kau nna, tsabyi mung yun mat ai hte ndum ni mung hten mat wa ai. 38 Tsabyi nnan hpe shanhpyi ndum nnan hta bang na rai nga ai. 39 Tsabyi ningsa lu sai wa gaw nnan n ra nu ai; ningsa she kaja nga ai, nga nna tsun ai ngu mu ai.

Luka 6

6:1 Laban nhtoi langai mi hta hkaibang yi hku ga hkawm wa yang, shi a sape ni gaw mam nsi di la nna, lata hte manai kayup baw sha ma ai. 2 Dai rai nna, Hparishe nkau mi gaw, Laban nhtoi e n mai di ai lam, hpa rai nanhte galaw myit ta? nga ma ai. 3 Yesu shanhte hpe, Dawi gaw, shi kaw hkannang ai ni hte rau, kawsi hkrum ma yang, 4 Karai Kasang a nta de shang nna, hkinjawng ni hta kaga, kadai n mai sha ai madun da ai muk ni hpe la sha nna, shi kaw hkannang ai ni hpe mung jaw sha wu ai lam hpe pyi, nanhte n hti yu myit ni? ngu nna htan mu ai. 5 Bai shi gaw, Masha Kasha gaw laban nhtoi a Madu rai nga ai, ngu nna shanhte hpe tsun mu ai. 6 Laban nhtoi kaga hta mung tara jawng hta shi shang nna sharin shaga nga ai: dai yang e hkra lata katsing si ai masha langai mi nga ai. 7 Dai rai nna, laika ka ai sara ni hte Hparishe ni gaw, shi hta mara shagun lu hkra, Laban nhtoi hta shamai ya na ra ai kun? nga nna shi hpe gyam yu ma ai: 8 Shi chyawm gaw shanhte a myit hpe chye ya wu ai rai nna, lata katsing si ai wa hpe, Rawt nna ka-ang e tsap u, ngu wu ai: dai wa mung rawt nna tsap nga ai. 9 Shaloi Yesu gaw, Ngai nanhte hpe san yu made ga, Laban nhtoi hta e kaja ai amu galaw na, n kaja ai amu galaw na; masha asak hkyela na, shing n rai jahten na, gara mahtang mai galaw na a kun? ngu nna shanhte hpe tsun mu ai. 10 Shanhte mahkra hpe grupyin yu nna, dai wa hpe, Na a lata ladawn u, ngu wu ai; shi mung ladawn nna shi a lata gaw mai mat lu ai. 11 Shanhte chyawm gaw myi di lahpang pawt bu nna, Yesu hpe kaning di na rai nga a ta? nga nna shada da tsun ginrawn ma ai. 12 Dai nhtoi hte hta mung shi gaw akyu hpyi na nga, dai bum de pru sa wa nna, shana tup Karai Kasang hpe akyu hpyi let nga nga ai. 13 Nhtoi htoi jang shi a sape ni hpe shi shaga la nna, shanhte hta na marai shi lahkawng hpe lata la nhtawm, shanhte hpe kasa ni ngu nna shamying da mu ai: 14 dai ni gaw, Petru ngu nna shi e shamying ai Simun hte shi a kanau Andre; Yaku yan Yawhan; Hpilip yan Barhtolume; 15 Mahte yan Htawma; Alhpe a kasha Yaku yan Zelutu ngu ai Simun; 16 Yaku a kasha Yuda hte, ap kau na wa tai ai Yuda Iskarut hte rai ma ai. 17 Shanhte hte rau yu wa nna layang e tsap nga yang, shi a sape hpung kaba mung, Yuda mung ting hte Yerusalem mare na mung, nammukdara makau na Turu hte Sidun kaw na mung, masha wunawng wuwa kaba gaw shi a ga madat la na hte tinang a machyi makaw shamai la na matu, rau hpawng nga ma ai: 18 n seng ai nat ni a sharu shatsang hkrum ai ni mung mai mat ma ai. 19 Shawa masha ni nlang shi hpe ahtawk na tam ma ai: kaning rai nme law, shi hkum na atsam pru nna mahkra hpe shamai nga ai. 20 Shaloi shi a sape ni hpe shi mada yu nna tsun mu ai gaw: Nanhte matsan mayan ni a lu myit dai: kaning rai nme law, Karai Kasang a mungdan gaw, nanhte a mungdan rai nga malit dai. 21 Ya kawsi nga ai ni, nanhte a lu myit dai: kaning rai nme law, nanhte hkru kat lu na marin dai. Ya hkrap nga ai ni, nanhte a lu myit dai: kaning rai nme law, nanhte mani na marin dai. 22 Masha ni gaw nanhte hpe ndawng n yawt ai hte, dai Masha Kasha a majaw shadaw jahka di kau nna, asawng asang di ai hte nanhte a mying hpe n hpru n mai ai arai hpe zawn shaden kau ai hkrum myit yang, nanhte a lu myit dai. 23 Dai nhtoi hta e kabu gumlawt nga mu; kaning rai nme law, yu mu, nanhte a shabrai gaw sumsing lamu hta e kaba nga malit dai: shanhte a kaji kawa ni mung dai zawn myihtoi ni hpe di yu manu ai. 24 Raitimung, sut su ai ni nanhte dingnye lu myit dai: kaning rai nme law, nanhte gaw tinang a shalan shabran ai lu la manit dai. 25 Ya hkru kat nga ai ni nanhte dingnye lu myit dai: kaning rai nme law, nanhte gaw kawsi ai hkrum na marin dai. Ya mani nga ai ni nanhte dingnye lu myit dai: kaning rai nme law, nanhte gaw sharung shayawt ai hte hkrapngu hkrapngoi ai hkrum na marin dai. 26 Masha yawng mayawng nanhte hpe kaja ai ngu myit yang, nanhte dingnye lu myit dai: kaning rai nme law, shanhte a kaji kawa ni mung dai zawn myihtoi masu ni hpe ngu yu manu ai. 27 Dai hta kaga, madat la ai ni nanhte hpe ngai tsun made ga, Nanhte a hpyen ni hpe tsawra mu; nanhte hpe ndawng n yawt ai ni e kaja ai hku galaw mu; 28 nanhte e dagam ai ni hpe shaman ya mu; nanhte hpe aroi arip di ai ni a matu akyu hpyi mu. 29 Na a shabyi maga mi bye ai wa hpe, maga mi naw ja ya u; na a palawng galu la kau ya ai wa hpe, na a lawnghkoi mung hkum ndang u. 30 Nang kaw hpyi ai wa kadai hpe mung jaw u; na a arung arai la kau ya ai wa kaw bai hkum hpyi nit. 31 Masha ni nanhte hpe hkan galaw na, nanhte tsaw myit dai hte maren, nanhte mung dai zawn shanhte hpe hkan galaw mu. 32 Nanhte e tsawra ai ni hpe sha tsawra myit yang gaw, nanhte a matu hpa akyu nga a ta? yubak kap ai ni mung tinang e tsawra ai ni hpe gaw tsawra ma ai. 33 Nanhte e kaja ai hku galaw ai ni hpe sha, kaja ai hku galaw htang myit yang gaw, nanhte a matu hpa akyu nga a ta? yubak kap ai ni mung dai zawn galaw ma ai. 34 Bai htang lu na zawn nawn ai ni hpe sha hkoi shap ya myit yang gaw, nanhte a matu hpa akyu nga a ta? Yubak kap ai ni pyi, hkoi ya ai made bai lu la hkra yubak kap ai ni hpe hkoi shap ya ma ai. 35 Dai rai nna nanhte gaw, nanhte a hpyen ni hpe tsawra mu; shanhte hpe kaja ai hku galaw mu; myit hpa mung n ru ai sha hkoi shap ya mu; shingrai jang, nanhte a shabrai kaba wa na hte, Tsawhtum ai wa a kasha ni mung nanhte tai na marin dai: kaning rai nme law, shi gaw chyeju malap kau ai ni hte, n hkru n hkra re ai ni hpe malawm magawm di mu ai. 36 Nanhte a Kawa matsan dum chye ai hte maren, nanhte mung matsan chye dum mu. 37 N jeyang ai nga mu; shingrai jang, nanhte jeyang ai n hkrum na myit dai: n dawdan ai nga mu; shingrai jang, nanhte dawdan ai n hkrum na myit dai: mara dat kau mu; shingrai jang, nanhte dat kau ai hkrum na myit dai. 38 Jaw mu, shingrai jang, nanhte hpe jaw na marin dai: hpring kabrat hkra anin garin, man ai dang hte nanhte a lahpyen e shanhte jaw na mara ai: kaning rai nme law, nanhte hteng ya ai dang hte, nanhte hpe bai hteng ya na marin dai. 39 Dai hta kaga, ga shadawn mung shi shanhte hpe tsun mu ai gaw, Myikyaw ai wa gaw myikyaw ai wa hpe lam woi madun lu a ni? shan lahkawng nhkun hta hkrat na ma ai, n rai ni? 40 Sape gaw sara hta grau ai n rai: hkum hkra sharin la sai wa kadai mung, tinang a sara zawn rai na ra ai. 41 Tinang myi hta rawng ai hpuntawng hpe n myit yu ai mi, na a nhpu nnau a myi hta rawng ai nbun hpe, hpa rai yu nga n ta? 42 Tinang myi hta rawng ai hpuntawng hpe pyi, n mu ai wa mi, Hpunau wa e, na myi hta rawng ai nbun hpe ngai naw lai kau ya de ga, nga nna nhpu nnau wa hpe kaning rai tsun lu n ta? Sawt ai wa e, na a myi hta na hpuntawng hpe shawng lai kau u; dai hpang, na nhpu nnau wa a myi hta rawng ai nbun hpe lai kau ya na, nang asan sha mu na rin dai. 43 Kaning rai nme law, n kaja ai asi si ai hpun kaja gaw, kanang mung n nga ai; kaja ai asi si ai hpundaw mung, kanang n nga ai; dai rai nna hpun shagu hpe tinang a asi hta chye ginhka lu nga ai. 44 Kaning rai nme law, ju hpun hta na maihpang si kadai n di la yu ai; ju singwum hta na mung tsabyi si kadai n di la yu ai. 45 Kaja ai wa gaw, tinang kraw lawang a kaja ai sutdek hta na, kaja ai rai shapraw dan ai; n kaja ai wa mung n kaja ai sutdek hta na, n kaja ai rai shapraw dan ai: kaning rai nme law, kraw hta hpring chyat nga ai kaw na, shi a n-gup de tsun pru nga ai. 46 Ngai tsun ai hte maren n hkan galaw myit dai mi, hpa rai nanhte ngai hpe, Madu e, Madu e, nga myit ta? 47 Ngai hpang de sa nhtawm, nye ga madat la nna hkan galaw ai wa kadai mung, kaning re ai wa hte bung ai gaw ngai nanhte hpe madun made ga: 48 dai wa gaw, wa hpang gaw yang, sung sung htu nna lung hkrung ntsa e npawt gaw ai wa hte bung nga ai: hka rawt hka tung wa yang, hka hpungla ni dai nta hpe ahtu adawt raitimung, ngang ngang kang kang gaw da sai majaw, dai hpe n shamawt lu ai. 49 Ga na la nna n hkan galaw ai wa chyawm gaw, npawt n gaw ai sha, gaman hta wahpang gaw ai wa hte bung nga ai: hka hpungla ni dai nta hpe ahtu adawt nna, shaloi jang kadawng daw mat ai; dai nta a hten run ai gaw kaba la nga ai.

Luka 7

7:1 Shi gaw shawa masha ni hpe shi a ga mahkra tsun htum jang, Kaperna-um mare de shang wa ai. 2 Dai shaloi hpyenbu langai mi a tsawra ai shangun ma gaw machyi nna, si wa magang nga lu ai. 3 Yesu a lam na jang, shi Yuda agyi salang ni hpe shangun dat nna, shi a shangun ma hpe sa shamai ya na, Yesu hpe hpyi dat wu ai. 4 Dai ni gaw Yesu kaw du ma yang, Nang shi hpe ndai lam galaw ya na, ging dan ai wa shi rai nga ai; 5 anhte a amyu hpe shi tsawra ai hte, anhte a matu tara jawng mung shi hkum nan gap ya ma ni ai, nga nna akroi anoi shi hpe hpyi ma ai. 6 Dai rai nna Yesu gaw shanhte hte rau sa wa ai. Shi dai nta hte gade n tsan kaw du jang, hpyenbu wa gaw shi a jinghku ni hpe shangun dat nna, Madu e, na hkum hpe hkum shatsang et; nye nta a magaw npu e nang sa shang na gaw, ngai n ging n dan nngai: 7 dai majaw ngai mung nang kaw sa na ging dan nngai, ngu nna n myit nngai: raitimung, na ga hkaw mi tsun dat rit, shaloi nye ma mai na ra ai. 8 Kaning rai nme law, ngai mung du a lawu e dang da ai masha rai nngai: nye a lawu de mung hpyen masha nga ma ai rai nna, langai wa hpe, Sa u, ngu yang, shi sa wa ai; kaga wa hpe, Wa rit, ngu yang, shi wa ai: nye mayam wa hpe mung, Ndai galaw u, ngu yang, shi galaw nga ai, ngu nna tsun shangun dat wu ai. 9 Yesu gaw dai ga na jang, dai wa a lam hpe mau nna, shi kaw hkannang ai shawa masha ni hpe kayin yu let, Nanhte hpe ngai tsun made ga, Israela amyu hta pyi, ndai hte wa kamsham ai gaw ngai n mu hkrup nngai, ngu mu ai. 10 Shangun dat ai ni nta de bai du wa ma yang, dai machyi ai shangun ma gaw a kaja sha rai nga la ai hpe, wa mu ma ai. 11 Dai hpang gade n na yang, Na-in ngu ai mare de shi sa wa ai rai nna, shi a sape ni hte shawa hpung kaba mung, shi hte rau hkan sa ma ai. 12 Dai mare chyinghka de du magang yang, yu mu, si mat sai masha langai mi a moi mang hpe hpai kau sa wa nga ma ai; si ai wa gaw kanu a kasha shingtai rai nga ai; kanu mung gaida rai nga ai; mare masha law law mung dai num hte rau hkan sa nang ma ai. 13 Madu gaw dai numsha hpe mu jang, shi hpe matsan yu dum nna, Hkum hkrap et, shi hpe ngu wu ai. 14 Ani sha shi sit sa nna dai da-u hpe ahtawk wu ai; hpai ai ni mung tsap ya nga ma ai: shaloi shi gaw, Shabrang e, ngai nang hpe tsun de ai, rawt u, ngu wu ai. 15 Si ai wa mung rawt dung nna ga tsun nga ai. dai Madu gaw shi hpe kanu e ap ya wu ai. 16 Masha nlang hte mung hkrit mau mat shajang ma ai rai nna, Karai Kasang hpe shagrau sha-a let, Myihtoi kaba anhte kaw paw pru ra ai, nga nna mung, Karai Kasang gaw shi a amyu hpe kawan katsan yu nga ai, nga nna mung, tsun gara wa ma ai. 17 Dai rai nna shi lam a shiga gaw, Yuda mung ting hte grupyin shara shagu hkan e kajai gumhkawng mat wa ai. 18 Shaloi Yawhan a sape ni gaw dai lam yawng mayawng Yawhan hpe wa tsun dan mu ai. 19 Dai rai nna Yawhan gaw shi a sape lahkawng shaga la nhtawm, dai Madu hpang de shangun dat nna, Nang gaw dai du sa na ra ai wa rai nga n ni? shing n rai, kaga hpe anhte naw myit mada lu na rai nga a ni? ngu nna san dat wu ai. 20 Dai yan gaw Yesu kaw du jang, Nang gaw dai du sa na wa rai nga n ni? shing n rai, kaga hpe anhte naw myit mada lu na rai nga a ni? nga nna Baptisma Sara Yawhan gaw, nang hpang de an hpe san shangun dat mi ai, ngu mu ai. 21 Dai ahkying e nan shi gaw masha law law hpe machyi makaw, ana ahkya hte n hkru ai nat hta na shamai kau ya mu ai: myikyaw ai masha law law hpe mung, myi bai mu ai chyeju jaw mu ai. 22 Shaloi htan let shi shan hpe, Na mana mu mamu hte maren Yawhan hpe wa tsun dan mu: myikyaw ai ni myi mu lu ma ai, lagaw hten ai ni hkawm sa lu ma ai, manggang kap ai ni sanpra wa lu ma ai, na lahpang ai ni na lu ma ai, si mat ai ni sharawt la ai hkrum ma ai, matsan mayan ni a matu kabu gara shiga hkaw dan nga ai: 23 ngai hta myit kataw ai lam n mu ai wa kadai mung a lu nga ai, ngu nna tsun mu ai. 24 Yawhan a kasa yan wa mat ai hpang, shi Yawhan a lam hpe lakap nna shawa masha ni hpe tsun hpang mu ai gaw, Dai nam de hpa hpe hpu yu na nanhte sa myit ta? nbung e kanga ai mai-aw hpe rai ni? 25 Shing n rai, hpa yu na sa myit ta? mani ai hpun palawng buhpun ai wa hpe rai ni? yu mu, tsawm htap ai hpun palawng buhpun nna nhpaw n-ya rai nga lu ai ni gaw, hkawhkam a htingnu ni hta nga ma ai. 26 Dai hpe n rai taw, hpa yu na sa myit ta? myihtoi hpe rai ni? Rai nga ai; ngai nanhte hpe tsun made ai gaw, myihtoi hta grau kaba ai wa shi rai nga ai. 27 Yu u, na a man e na a lam lajang magang na, Nye a kasa hpe na a shawng de ngai shangun dat we ai, nga nna ka da ai ga gaw shi a lam rai nga lu ai. 28 Nanhte hpe ngai tsun made ga, Numsha kaw na shangai ai ni hta, Yawhan hta grau kaba ai langai mi muk n nga ai: raitimung Karai Kasang a mungdan hta kaji ai wa gaw shi hta grau kaba nga ai. 29 Mung masha ni nlang hte hte kanghta ai ni gaw, Yawhan a ga na la jang, shi jaw ai baptisma sa hkamla ma ai hta, Karai Kasang a dingman ai lam shagrau ma ai. 30 Hparishe ni hte tara sara ni chyawm gaw, Shi jaw ai baptisma n hkamla ma ai hta, Karai Kasang a maw mawn ai hku hpe, tinang a matu ran kau ma ai. 31 Dai re ai majaw, ndai amyu masha ni hpe ngai hpa hte shadawn na mawe ta? shanhte hpa hte bung ma ta? 32 Shanhte gaw, Nanhte a matu anhte sumpyi dum ga timung, nanhte n ka myit dai, Anhte sharung shayawt timung, nanhte n hkrap myit dai, nga nna gat hkan e dung let, shada da gintan hkat ai ma ni hte bung ma ai. 33 Kaning rai nme law, Baptisma Sara Yawhan sa du nna, muk n sha tsabyi n lu ai nga yang mung, Shi nat kap ai wa rai nga ai, nanhte nga myit dai. 34 Dai Masha Kasha sa du nna, lu nga sha nga rai nga yang mung, Ndai sha marim ai wa hte tsabyi lu shalai ai wa, kanghta ai ni hte yubak kap ai ni a jinghku wa hpe, yu mu, bai nga myit dai. 35 Hpaji byeng-ya chyawm gaw, shi a kasha nlang hte hta awlaw ai lu la nu ai. 36 Hparishe langai mi gaw, shi kaw shat sha na Yesu hpe shaga wu ai. Dai rai nna, dai Hparishe a nta de shi shang nhtawm, sha na dung nga ai. 37 Shaloi, yu mu, dai mare na yubak kap ai numsha langai mi nga ai rai nna, Yesu gaw dai Hparishe a nta e dung nga ai hpe shi chye wu yang mura lunghpraw gawm la sa nhtawm, 38 shingdu maga Yesu a lagaw nhpang e hkrap tsap nga let shi a lagaw hpe myi prwi hte madit ya wu ai rai nna, shi a kara hte katsut kau ya wu ai: shi a lagaw hpe mung shi pup nna, mura hte chya ya wu ai. 39 Yesu hpe shaga ai Hparishe wa dai mu jang, Ndai wa dai myihtoi rai yang gaw, shi hpe hkra ai numsha gaw, kadai hte kaning re ai numsha re ai mung, yubak kap ai jan rai nga ai mung, shi chye na wu ai, nga nna shi a kraw e myit nga ai. 40 Yesu gaw htan let, Simun e, ngai nang hpe tsun shara lama mi nga ai, ngu wu ai. Simun gaw, Sara e, tsun e, ngu wu ai. 41 Shaloi Yesu gaw, Gumhpraw hkoi ya ai wa langai mi kaw, hka kap ai masha lahkawng nga ai: langai wa mi hta lap manga tsa, langai wa mi hta manga shi kap ai. 42 Dai yan gaw hka wa na n lu ma ai majaw, hka madu gaw shan lahkawng hpe shalawt dat mu ai. Shingre ai majaw, dai yan hta kadai wa mahtang shi hpe grau tsaw na ma ta? ngu wu ai. 43 Simun gaw, Grau law shalawt kau ya ai wa rai na re ai, ngai nawn nngai, ngu nna htan wu ai. Yesu gaw, Nang hparan ai hku rai nga ai, ngu wu ai. 44 Shaloi dai numsha hpang de shi kayin nna, Simun hpe, Ndai numsha hpe nang mu da wu ni? Ngai na a nta de shang tim' lagaw shin na ntsin nang n jaw ndai: shi chyawm gaw myi prwi hte nye a lagaw madit ya nna, shi a kara hte katsut kau ya ni ai. 45 Nang ngai hpe n pup ndai: shi chyawm gaw, ngai nhku de shang kaw nna, nye a lagaw hpe pup n sim nga ai. 46 Nye baw hpe namman n chya ya ndai: shi chyawm gaw nye a lagaw hpe, mura chya ya ni ai. 47 Dai lam a majaw ngai nang hpe tsun de ga, Dai numsha gaw law wa tsawra ai majaw, shi a law la ai yubak raw dat kau ya ai lu la nu ai: loi mi sha raw dat hkrum ai wa chyawm gaw loi mi sha tsawra nga ai, ngu nna tsun wu ai. 48 Dai numsha hpe mung, Na a yubak raw dat kau ya sade ai, ngu nna tsun wu ai. 49 Rau dung nga ai ni gaw, Yubak nan raw dat kau ya lu ai, ndai wa gaw, kadai wa rai ta? nga nna myit shajang ma ai. 50 Shi gaw, Na a kamsham ai gaw nang hpe hkyela nitdai; a pyaw sha wa nu, ngu nna dai numsha hpe tsun dat wu ai.

Luka 8

8:1 Dai hpang gade n na yang, shi gaw Karai Kasang a mungdan lam hkaw dan ai hte, kabu gara shiga tsun shana ya let, mare mi kaw nna mare mi, kahtawng mi kaw nna kahtawng mi de, du hkawm sa wa ai: sape shi lahkawng hte mung shi hte rau rai nga ma ai; 2 n hkru ai nat hte machyi makaw hta na shamai la ai numsha nkau mi mung, nat sanit pru mat ai Magdala ngu ai Mari, 3 Herod a kunhting wa Kuhta a madu jan Yawhana, Susanna hte kaga law law wa, tinang a lu su ai hte shanhte hpe galaw daw let, hkannang ma ai. 4 Shawa hpawng kaba zuphpawng wa nna, mare shagu na ni shi kaw sa du ma yang, ga shadawn hte shi tsun wu ai gaw, 5 Nli gat ai wa gaw shi a nli gat na pru sa wa ai; gat dat wu yang, nkau mi gaw lam makau e hkrat nna, masha e kabye kau ai hte, ntsa malen na u ni hta sha kau ma ai. 6 Nkau mi gaw nlung ntsa e hkrat nna, tu pru wa yang, ga n madi nga ai majaw, nyip si mat ma ai. 7 Nkau mi gaw ju hpun ka-ang e hkrat nna, ju hpun ni dai hte rau tu kaba wa ai hte, dai hpe lim kau mu ai. 8 Nkau mi gaw ga kaja hta hkrat ai rai nna, tu kaba wa jang, htam latsa si mayat wa ai, ngu wu ai: shi shing nga tsun ai ninglen, Na la na, na tu ai wa gaw, na la u ga, nga nna jahtau wu ai. 9 Shaloi shi a sape ni, ga shadawn ndai gaw hpa nga ai re ai kun? nga nna shi hpe san mu ai. 10 Shi gaw, Karai Kasang a mungdan a sunghtum ai lam ni hpe chye na na ahkang nanhte a matu hku nga malit dai: masha gale ni chyawm gaw, yu layu e n mu mu ga, na lana n chye na mu ga, ga shadawn hku hte tsun nme ai. 11 Ya na ga shadawn gaw ndai hku rai nga ai: Nli gaw Karai Kasang a mungga rai nga ai. 12 Lam makau e nga ai ni gaw, dai mungga na la ai hpang, kamsham ai hte hkyela ai kaw n du lu mu ga, dai mungga hpe shanhte a kraw lawang na Nat e sa shaw la kau ya hkrum ai ni rai ma ai. 13 Nlung hta nga ai ni gaw, dai mungga hpe na jang, kabu gara ai myit hte hta la ai raitimung, ru n jung ma ai majaw, tawng marang mi sha kamsham nhtawm, gunglau hkrum ai nhtoi hta e bai htak mat wa ai ni rai ma ai. 14 Ju hpun hta hkrat ai nli gaw, mungga na la nna, tinang lam hkan nga yang, ndai prat a myitru myittsang ai, sut lu sut su ai, pyaw daw tam ai lam ni hta lim mat nna, ja kat ai asi n si ai ni rai ma ai. 15 Ga kaja hta hkrat ai nli chyawm gaw, dai mungga hpe kangka rai nna kaja ai myit hte madat la ngut jang, lashum lanoi rai nna hkam sharang ai myit hte asi si ai ni rai ma ai. 16 Pyengdin shatu nhtawm, di hte ka-up da ai mung, yupku npu e tawn da ai mung, kadai n rai ga ai: shang sa ai ni de a htoi san ai mu lu hkra, pyengdin shadun hta shadun da ga ma ai: 17 kaning rai nme law, n dan n pru lu na makoi da ai arai hpa mung n nga ai; makoi magap da ai arai hpa mung, n chye lu na hte n dan n leng wa lu na, n nga ai. 18 Dai re ai majaw, nanhte kaning rai na la myit dai hpe sadi nga mu: kaning rai nme law, lu ai wa kadai hpe mung, naw jat jaw na ra ai; n lu ai wa kaw na chyawm gaw, shi lu dum ai hpe pyi, naw shaw la ya na ra ai, ngu wu ai. 19 Dai shaloi shi a kanu hte kanau ni shi kaw du sa ma ai rai nna, shawa hpawng chyat nga ai majaw, shi hpang de n sit shang lu ma ai. 20 Shaloi shi hpe, Na nnu hte nnau ni nang hpe hkrum mayu nna, shinggan e tsap nga ma ai, ngu nna tsun ya mu ai. 21 Shi gaw shanhte hpe, Karai Kasang a mungga madat la nna hkan galaw ai ni gaw, ngai nu, ngai nau ni rai nga ma ai, ngu nna htan mu ai. 22 Dai tawng na lani mi hta, shi gaw shi a sape ni hte rau li de shang nna, Anhte nawng wora hkran de rap sa wa saga, ngu nna shanhte hpe tsun mu ai: shaloi shanhte rap sa wa ma ai. 23 Shingrai rap sa wa nga yang, shi gaw yup mu nga ai. Shaloi dai nawng hta nbung laru ru hkrat wa nna, li hta hka hpring wa ai majaw, shanhte lup si magang wa nga ma ai. 24 Dai rai nna shanhte sit sa nna, Madu e, madu e, anhte mat mat wa nga ga ai, ngu nna shi hpe jasu mu ai. Shaloi shi rawt nna, nbung hte hkaleng ni hpe daru kau wu ai: dai ni mung sim mat wa nna, atsin sim rai nga ai. 25 Dai rai nna shi gaw, Nanhte a kamsham ai gaw kanang rai malit ta? ngu nna shanhte hpe tsun mu ai. Shanhte chyawm gaw hkrit gari ai hte mau mahka mat nna, Ndai wa gaw kadai wa re ai i? nbung hte hka hpe pyi, shi mungga dat nna, dai ni madat nga ma hka? nga nna shada da tsun shajang ma ai. 26 Shaloi shanhte gaw Galile mung hte tawtap re ai, Gerase mung de sa du ma ai. 27 Shi hkarang de pru lung wa yang, dai mare na nat kap ai wa langai mi shi hpe sa tau wu ai: dai wa gaw aten na na wa hpun palawng n buhpun ai hte, nta e mung n nga ai sha, lupwa hkan e nga nga ai. 28 Dai wa gaw Yesu hpe mu jang, jahtau nna shi a man e dingnyawm dagup let, Tsawhtum ai Karai Kasang a Kasha Yesu e, ngai nang hte hpa daw nga ga ta? nang ngai hpe n zingri n ga, ngai nang hpe hpyi nga nngai, ngu nna nsen kaba hte tsun wu ai. 29 Kaning rai nme law, dai wa kaw na pru wa na, dai n seng ai nat hpe shi daru da nu ai. Dai nat gaw dai wa hta law law lang shung ai majaw, shi hpe sharen da ai hte, hpri sumri hte hkanghkyi hkyang e gyithkang shadang raitimung, dai sumri ni hpe gang dut kau nhtawm, nat gaw dai wa hpe nam mali de shapoi la la a rai nga ai. 30 Shaloi Yesu gaw, Na amying hpa rai lit ta? ngu nna shi hpe san wu ai. Shi gaw Legio rai li ai, ngu wu ai: kaning rai nme law, nat law law wa shi hta shang nga masai. 31 Nat ni mung, shanhte hpe sunghtum ai shara de n gawt kau na, shi hpe hpyinem ma ai. 32 Ya dai yang e wa nawng kaba mi bum ntsa e kanaw sha let nga nga ma ai: dai wa ni hta shang lu na ahkang, shanhte hpyinem ma ai: shaloi shi shanhte hpe ahkang jaw dat mu ai. 33 Dai rai nna nat ni gaw dai masha kaw na pru nna, wa ni hta shang ma ai: shaloi dai wa nawng gaw dai n-gam mahka kaw na nawng de rut gat bang wa nna, marit si mat ma ai. 34 Wa rem ai ni gaw shingrai byin ai mu jang, hprawng gat wa nna, mare hte nta htinghkrai hkan e dai lam tsun dan ma ai. 35 Shanhte mung dai byin ai lam yu yu na pru sa wa ma ai: shanhte Yesu kaw du ma yang, nat ni pru mat wa ai wa gaw hpun palawng buhpun nna, shawoi na myit hte Yesu a lagaw nhpang e dung nga ai hpe, mu ma ai rai nna hkrit kahpra mat ma ai. 36 Dai lam mu chye ai ni mung, nat kap ai wa hpe kaning di shamai ai gaw, dai ni hpe hkap tsun dan mu ai. 37 Shaloi Gerase mung a ginwang hkan na masha nlang hte gaw, hkrit kaba hte hkrit mat ma ai majaw, shi shanhte kaw na pru mat wa na, shi hpe jawm hpyi ma ai: shi chyawm gaw li de shang nna bai wa mat ai. 38 Nat pru mat ai wa gaw, shi hte rau nga nga na, shi hpe hpyinem wu ai: raitimung, shi gaw, 39 Na nta de she wa nna, Karai Kasang nang hpe gade wa karum nitdai gaw, wa tsun dan su, ngu nna shi hpe shabawn dat wu ai: shaloi shi pru wa nna, Yesu shi hpe gade wa karum sai gaw, dai mare ting hkan e hkaw tsun dan nga ai. 40 Yesu bai wa yang, nlang hte gaw shi hpe a la nga ma ai majaw, shi hpe ja mara hkapla ma ai. 41 Shaloi, yu mu, Ya-iru mying ai tara jawng agyi wa langai mi sa du ai: dai wa gaw Yesu a lagaw nhpang e hput di nna, shi a nta de sa na, shi hpe hpyi shaja nga ai: 42 kaning rai nme law, shi lahkawng ning du sai shi a shayi sha shingtai gaw si wa magang nga lu ai: Yesu hkan sa wa nga yang, shawa masha ni gaw shi hpe ahtu hkra shajang ma ai. 43 Dai shaloi, shi lahkawng ning tup sai htaw machyi nna, gade ai muk n shamai ya lu ai numsha langai mi gaw, 44 shi hpang de sit sa nna, shi a palawng banbyau ahtawk wu ai: shaloi jang shi a sai htaw ai ana gaw sim mat lu ai. 45 Shaloi Yesu gaw, Ngai hpe ahtawk ai kadai rai ta? ngu wu ai. Nlang hte gaw ndang nga ma yang Petru gaw, Madu e, shawa masha ni nang hpe ahtu hkra ai hte, kanawng matep hkra rai nga ma ai, ngu wu ai. 46 Yesu gaw, Marai langai ngai, ngai hpe ahtawk sai: ngai hta na atsam pru wa sai hpe ngai hkan chye dat nngai, nga ai. 47 Dai numsha gaw makoi magap n rai lu ai chye wu jang, gari kawa rai sa nna, shi a man e dingnyawm dagup let, hpa rai shi hpe ahtawk ai mung, dai shaloi jang shi mai mat ai mung, masha mahkra a man e tsun dan wu ai. 48 Shi mahtang, Shayi sha e, na a kamsham ai gaw nang hpe shamai ya nitdai; ngwi pyaw ai hte wa u, ngu nna shi hpe tsun dat wu ai. 49 Shi naw tsun nga yang, Tara jawng agyi a nta de na marai langai mi sa nna, Na a shayi sha si mat salit dai; dai sara hpe hkum shatsang nu, nga nna sa tsun ai. 50 Yesu dai ga na jang, Hkum hkrit et; kamsham ai myit sha rawng u, shaloi shi mai na ra ai, ngu nna shi hpe htan wu ai. 51 Nta de du ma yang, Petru, Yawhan, Yaku hte, dai numsha ma a kanu yan kawa hta kaga, shi hte rau nhku de kadai hpe mung n shang shangun wu ai. 52 Nlang hte gaw dai ma a majaw hkrapngu hkrapngoi nga nna sharung shayawt nga ma ai. Shi chyawm gaw, Hkum hkrap myit, shi si ai n rai, yup pyaw nga ai, ngu mu ai. 53 Ma gaw si mat sai shanhte chye ma ai majaw, shi hpe asawng asang ngu kau mu ai. 54 Shi chyawm gaw dai ma a lata jum da nna, Ma e, rawt u, ngu nna shaga wu ai. 55 Dai rai nna, shi a wenyi bai wa nna, shaloi jang shi rawt wa ai; shi hpe lusha jaw na shi tsun da wu ai. 56 Dai ma a kanu yan kawa chyawm gaw mau mahka mat ma ai: raitimung, dai byin ai lam kadai hpe mung n tsun dan u ga, shi shan hpe ginhtim da mu ai.

Luka 9

9:1 Dai hpang, shi gaw dai sape shi lahkawng hte hpe shaga la nhtawm, nat nlang hpe dang lu na mung, machyi makaw shamai ya na mung, shanhte hpe atsam hte ahkang jaw nna, 2 Karai Kasang a mungdan lam hkaw tsun na hte, shamai shatsai ya na matu shangun dat mu ai. 3 Shi shanhte hpe, Hkrun lam na matu dawhkrawng, htingpa, muk, gumhpraw re ai hpa mung hkum gun hkum lang myit; palawng lahkawng mung hkum gun myit. 4 Gara nta hta mung nanhte shang myit yang, dai kaw nga nga nna, dai kaw nna bai pru wa mu. 5 Nanhte hpe n hkapla ai ni hpe gaw, shanhte a mare na pru wa yang, shanhte a man e sakse tai na matu, nanhte a lagaw hta kap ai nhpu hpe ahpu sharun kau da mu, ngu nna tsun dat mu ai. 6 Shingrai shanhte pru sa wa nna, kahtawng shagu hkan e dai kabu gara shiga hkaw dan let, shara magup hkan e shamai shatsai ya hkawm ma ai. 7 Shingrai byin ai lam yawng hpe Herod munggyi na la nna, myit ung ang nga ai: kaning rai nme law, nkau mi gaw, Yawhan si ai kaw na bai hkrung rawt wa sai; 8 nkau mi gaw, Elia paw pru ra ai; bai kaga ni mung, Shawng na myihtoi langai ngai bai rawt sai, nga nna tsun shajang ma ai. 9 Herod mahtang gaw, Yawhan hpe ngai baw htau kau se ai; raitimung, ndai hte wa ngai na ai gaw, kadai wa rai ta? nga nna, Yesu hpe mu yu na tam nga ai. 10 Shaloi kasa ni bai wa ma yang, shanhte galaw ai amu a lam shi hpe hkai dan ma ai. Shi chyawm gaw shanhte hpe woi la nna, Betsaida ngu ai mare de lagyim sa mat wa ai. 11 Shawa masha ni mung dai hkan chye jang, shi hpang de hkan sa ma ai rai nna, shanhte hpe hkaw dan nna, machyi mai mayu ai ni hpe shamai ya mu ai. 12 Ya jan du wa magang nga ai: dai rai nna sape shi lahkawng gaw sit sa nhtawm, Dai shawa masha ni hpe grupyin hkan na kahtawng ni hte htinghkrai hkan e wa yup nna lusha tam sha mu ga, shabawn dat u: anhte gaw ya nam e she rai nga ga ai, ngu nna shi hpe tsun mu ai. 13 Shi gaw, Nanhte nan shanhte hpe sha na jaw mu, ngu nna, shanhte hpe tsun mu ai. Shanhte gaw, Ndai masha nlang sha na lusha anhte n sa mari yang gaw, anhte kaw muk manga hte nga lahkawng hta kaga hpa mung n nga ai, ngu mu ai: kaning rai nme law, lasha hkrai hkying manga daram rai nga ai. 14 Shaloi shi gaw, Ndai ni hpe hpung mi hta manga shi shi daram di nna, hpawng dung nga shangun mu, ngu nna shi a sape ni hpe tsun mu ai. 15 Shanhte mung shing di nna, nlang hte hpe dung nga shangun mu ai. 16 Shaloi shi gaw dai muk manga hte nga lahkawng hpe la nna, lamu de mada yu let dai hpe shaman nhtawm, ahkyep alep di nna, shawa masha ni hpe hkan tawn jaw na matu shi a sape ni hpe jaw da wu ai. 17 Shaloi dai ni sha nna nlang hkru kat masai: shanhte a angaw angam adaw ahkyep hkan hta lahkawn la yang, mung shi lahkawng hpring dem naw rai nga ai. 18 Lang mi na shi hkrai akyu hpyi nga a yang, sape ni mung shi hte rau nga ma ai: shaloi shi shanhte hpe, Shawa masha ni ngai hpe kadai re ai nga nga ma ta? ngu nna san yu ma ai. 19 Shanhte gaw, Baptisma Sara Yawhan, nkau mi gaw, Elia, nkau mi gaw, shawng na myihtoi langai ngai bai hkrung rawt ai, rai nga ai, nga shajang ma ai, ngu nna htan mu ai. 20 Bai, Shi gaw, nanhte mahtang ngai hpe kadai wa re ai nga myit ta? ngu nna shanhte hpe tsun mu ai. Shaloi Petru gaw, Karai Kasang a Hkristu wa nang rai nga ndai, ngu nna htan wu ai. 21 Dai lam kadai hpe mung n shana mu ga, shi shanhte hpe tsun ginhtim da mu ai. 22 kaning rai nme law, Dai Masha Kasha gaw nni nkri law law wa hkrum nna, agyi salang ni, hkinjawng agyi ni, laika ka ai sara ni e nyet kau ai hkrum na hte sat kau ai hkrum nhtawm, masum ya nhtoi hta sharawt la ai hkrum na rai nga ai, nga ai. 23 Bai nlang hte hpe shi tsun mu ai gaw, Nye a hpang hkan sa mayu ai wa kadai mung, tinang hkum hpe ndang kau nna, shani shagu tinang wudang hpai let, ngai kaw hkannang ruga. 24 Tinang a asak hkyela mayu ai wa kadai mung asak sum na ra ai; nye a jaw e tinang a asak sum ai wa chyawm gaw, asak hkyela lu na wu ai. 25 Masha gaw, ndai mungkan ting hpe madu lu da nna, tinang dai hten byak sum mat yang gaw, shi a matu hpa akyu nga lu ta? 26 kaning rai nme law, ngai hte ndai nye a ga hpe kaya ai wa kadai hpe mung, dai Masha Kasha gaw tinang a hpung shingkang hte mung, Kawa a hpung shingkang hte mung, chyoi pra ai lamu kasa ni a hpung shingkang hte mung du sa yang, dai wa hpe kaya kau na ru ai. 27 Nanhte hpe ngai gaja wa teng teng tsun made ga, Nang e tsap nga ai ni hta na nkau mi, Karai Kasang a mungdan garai n mu mu gaw, si ai n hkrum na ma ai, ngu mu ai. 28 Dai ga tsun ai hpang matsat ya dang rai jang, shi gaw, Petru, Yawhan, Yaku hte hpe woi nna, akyu hpyi na nga, dai bum de lung wa ai. 29 Akyu hpyi nga yang shi a myiman gaw ahpraw asam lai nna, shi a hpun palawng mung hpraw tu ai hte kabrim kabram rai wa lu ai. 30 Shaloi, yu mu, Mawshe yan Elia ngu ai masha lahkawng, hpung shingkang hte danpru nna, 31 Yerusalem mare e shatup na ra ai kawt pru wa na lam, shi hte ga tsun nga ma ai. 32 Petru hte shi hte rau nga ai yan gaw yup shamawi nga ma ai. raitimung, dumhprang mat ma jang, shi a hpung shingkang hte shi hte rau tsap nga ai yan hpe shanhte mu ma ai. 33 Dai yan gaw shi kaw na wa magang ma yang, Petru gaw, Madu e, ndai yang e nga na anhte a matu mai nga ai; nang e sum masum, na a matu langai mi, Mawshe a matu langai mi, Elia a matu langai mi anhte gap ga, nga nna hpa tsun ai matu mung n chye ai, Yesu hpe tsun wu ai. 34 Shing nga nga yang, sumwi du nna shanhte hpe ka-up wa nga ai: dai sumwi kata de lawm shang wa ma yang shanhte gaw hkrit nga ma ai. 35 Dai sumwi hta nna mung nsen ngoi pru wa ai gaw, Ndai wa gaw, ngai Sha, ngai lata la ai wa rai nga ai: shi a ga madat mara mu, nga ai. 36 Dai nsen ngoi pru ai shaloi Yesu shi hkrai nga ai hpe, shanhte mu ma ai: sape ni mung atsin sha nga nna, shanhte mu ai lam ni hpe, dai nhtoi hte hta kadai e mung n tsun dan ma ai. 37 Hpang shani shanhte gaw dai bum de na yu wa ma yang, shawa hpawng kaba shi hpe sa bawp la ma ai. 38 Shaloi, yu mu, dai shawa hpawng hta nang ai marai langai mi jahtau nna, Sara e, ngai sha hpe yu ya na, ngai nang hpe hpyi nngai; shi gaw ngai sha shingtai sha rai li ai: 39 yu u, shi hta nat shung nna, shi akajawng sha shabam wa ai hte, hkumbawp pru hkra shi hpe bu kashan shangun nna, machyi la hkra shatsang ngut jang she nachying yak la ai hte shi kaw na pru mat wa wa re ai. 40 Dai nat shaden kau ya mi, ngu nna na a sape ni hpe ngai hpyi nme timung, shanhte n di lu ma ai, ngu wu ai. 41 Dai rai nna Yesu gaw, Makam masham n rawng ai hte nhtan shai ai amyu e, ngai nanhte hte rau gaten du hkra nga nna, sharang ya lu na rai nga a ta? na nsha hpe nang de woi sa rit, ngu nna htan wu ai. 42 Dai ma sa wa nga yang pyi, nat gaw shi hpe kadawng tawn nna htan kashan shangun nga ai: Yesu chyawm gaw dai n seng ai nat hpe daru kau nna, dai ma hpe shamai ya nhtawm kawa e ap ya wu ai. 43 Nga manga hte mung Karai Kasang a daru magam nsam majaw mau mahka nga ma ai. Shingrai shi galaw ai amu mahkra a majaw, nlang hte gaw mau nga ma yang, shi gaw, 44 Dai Masha Kasha gaw masha ni a lata de ap kau ai hkrum na ra ai, ga ndai hpe nanhte a na hta madat gun da mu, ngu nna sape ni hpe tsun mu ai. 45 Shanhte gaw dai ga hpe n chye na ma ai; n chye na mu ga mung, dai hpe shanhte a matu makoi magap da wu ai: de a ga lachyum mung, shanhte n wam san ma ai. 46 Dai shaloi, shanhte hta kadai mahtang grau kaba nga ga ai kun? nga nna shada da tsun hkat pru ma ai. 47 Yesu chyawm gaw shanhte a kraw lawang na myit mang ai hpe chye ya wu ai majaw, ma langai mi hpe shaga la nna, shi a makau e shatsap da nhtawm, 48 Ndai ma hpe nye a amying majaw, hkapla ai wa kadai mung, ngai hpe hkapla ai rai nga ai; ngai hpe hkapla ai wa mung, ngai hpe shangun dat ai wa hpe hkapla ai rai nga ai: dai rai nna, nanhte mahkra hta grau kaji ai wa gaw kaba grau ai wa rai nga ai. 49 Shaloi Yawhan htan nna, Madu e, na amying hte nat shaden kau ai marai langai mi hpe anhte mu hkrup ga ai; anhte kaw n hkannang ai majaw, anhte shi hpe hkum kau gaw ai, ngu wu ai. 50 Yesu gaw, Hkum hkum myit; nanhte a gumlau maga n nga ai wa gaw, nanhte hpang maga nga ai wa rai nga ai, ngu nna shi hpe tsun wu ai. 51 Ya shi hpe shalun la na nhtoi du wa magang yang, Yerusalem mare de sa na shi myit dingren di da wu ai rai nna, shi a shawng de kasa shangun dat wu ai. 52 Dai ni gaw pru sa wa nna, shi a matu lajang da magang na, Samari masha ni a kahtawng langai mi de shang ma ai. 53 Shi a myiman Yerusalem mare de yawng na sam sam ai majaw, dai ni gaw shi hpe n hkapla ma ai. 54 Sape Yaku yan Yawhan gaw dai mu jang, Madu e, shanhte hpe jahkru kau na, an gaw lamu de na wan shaga na, nang hkraw nga n ni? ngu mu ai. 55 Shi chyawm gaw kayin nna, shan hpe daru kau mu ai. 56 Dai rai nna shanhte kahtawng kaga de sa mat wa ma ai. 57 Shanhte lam e sa wa nga ma yang, masha langai mi gaw, Nang sa ai shara shagu de, ngai nang kaw hkan sa na nngai, ngu wu ai. 58 Yesu gaw, Chyahkyawn ni nhkun lu ma ai, ntsa malen pyen ai u ni mung, u yup lu ma ai; dai Masha Kasha chyawm gaw baw tawn na shara pyi n lu nga ai, ngu nna shi hpe tsun wu ai. 59 Bai kaga wa hpe, Ngai kaw hkan rit, ngu wu ai. Dai wa gaw, Nye wa hpe wa makoi na ahkang naw jaw e, ngu wu ai. 60 Yesu gaw, Masha chyasi ni gaw tinang a chyasi ni hpe makoi mu ga: nang gaw Karai Kasang a mungdan lam sa hkaw dan su, ngu nna shi hpe tsun wu ai. 61 Bai masha kaga langai wa mung, Madu e, ngai nang kaw hkannang na nngai; raitimung, nye nta na ni hpe wa shakram na ahkang naw jaw e, ngu wu ai. 62 Yesu gaw, Na htai jum nna hpang de kayin yu ai wa kadai mung, Karai Kasang a mungdan hte n ging n dan nga ai, ngu nna shi hpe tsun wu ai.

Luka 10

10:1 Dai hpang, dai Madu gaw sape kaga sanit shi san la nna, shi hkum dai sa magang ai mare hte shara shagu de, marai lahkawng yep di nna, shi a shawng e shangun dat wu ai. 2 Shi shanhte hpe, Nmut shang na shara law law nga ai; amu galaw ai ni mahtang n law ma ai: dai majaw mam Madu gaw shi a nmut amu hta, amu galaw na masha shashawn u ga, a hpyi nga mu. 3 Nanhte sa wa manu; yu mu, chyahkyawn ni a ka-ang de sagu kasha hpe zawn, ngai nanhte hpe shangun dat made ai. 4 Gumhpraw jan, htingpa hte kyepdin re ai ni hkum gun myit; lam e naw rai nga yang, kadai hte mung hkum shachyen myit. 5 Gara nta hta mung nanhte shang myit yang, Ndai nta ngwi pyaw nga u ga, ngu nna shawng tsun mu. 6 Dai nta hta ngwi pyaw ai a kasha nga ai rai yang gaw, nanhte a shangwi shapyaw ai dai wa a ntsa e nga nga na ra ai: n nga ai rai yang gaw, dai gaw nanhte hpang de bai nhtang wa na ra ai. 7 Dai nta hta e nga nga nna, shanhte tawn jaw ai hte maren lusha mu: kaning rai nme law, amu galaw ai wa gaw shabrai hkamla ging nga ai: nta mi kaw nna nta mi de hkum htawt nga hkawm myit. 8 Gara mare hta mung nanhte shang nna, shanhte nanhte hpe hkapla ma yang gaw, nanhte a man e baw tawn ai hte maren lusha mu: 9 dai yang na machyi ai ni hpe shamai ya nna, Karai Kasang a mungdan gaw nanhte hte ani sha du ra ai, ngu nna shanhte hpe tsun dan mu. 10 Gara mare hta raitimung nanhte shang yang, shanhte n hkapla ma yang gaw, dai mare a lam de pru nhtawm, 11 Anhte a lagaw hta kap ai nanhte a mare na ga nhpu pyi, nanhte hpe deng na maga de anhte katsut kau da ga ai: raitimung, Karai Kasang a mungdan gaw ani sha du ra ai hpe, chye nga mu, ngu nna tsun da mu. 12 Nanhte hpe ngai tsun made ga, dai nhtoi e Sodom gaw dai mare hta naw chyamai na ra ai. 13 O, Kurazin e, nang dingnye lu ndai! O, Betsaida e, nang dingnye lu ndai! nan hta dan ai magam bungli ni hpe Turu hte Sidun mare yan hta dan yu taw gaw, dai yan gaw moi moi e me lachyit nba hpun nna dap e kangu nga ai hte, myit malai lu boi na masai. 14 Dai rai nna, tara dawdan ai nhtoi hta Turu hte Sidun mare yan gaw nan hta naw chyamai na mara ai. 15 Nang mung, Kaperna-um e, lamu du hkra sharawt ai, nang hkrum na n ni? katsan ga du hkra jahkrat kau ai nang hkrum na rin dai. 16 Nanhte a ga madat ai wa gaw, nye a ga madat ai mung, rai nga ai. nanhte hpe gangkau ai wa gaw, ngai hpe mung gangkau ai, rai nga ai: ngai hpe gangkau ai wa gaw, ngai hpe shangun dat ai wa hpe mung, gangkau ai rai nga ai, ngu nna tsun dat mu ai. 17 Dai sape sanit shi chyawm gaw kabu gara ai myit hte bai wa nna, Madu e, na a amying hte nat ni pyi anhte a ga madat ma ai, ngu mu ai. 18 Shing nga jang shi gaw, Satan gaw lamu de nna myihprap zawn hkrat wa ai hpe, ngai mu se ai. 19 Yu mu, lapu hte n-gawgawk ni hpe kabye lu na hte, gumlau a atsam nlang hpe dang lu na ahkang, ngai nanhte hpe jaw made ai rai nna, hpa e mung nanhte hpe hkala lu na myit dai n rai. 20 Raitimung, nat ni nanhte a ga madat ma ai majaw, hkum kabu myit; nanhte a amying sumsing lamu hta ka da nga ai majaw she, kabu nga mu, ngu nna shanhte hpe tsun mu ai. 21 Dai ahkying hta Yesu gaw chyoi pra ai Wenyi hta kabu nna, Sumsing lamu hte ginding aga a Madu, Wa e: hpaji byengya rawng ai ni hte myit kunghpan ai ni kaw na, ndai lam ni hpe nang makoi magap da nhtawm, ma kaji ni hpe madun dan ndai majaw, ngai nang hpe shakawn kungdawn nngai: rai sa, Wa e, dai gaw nang tsaw ai hku rai nga lit dai. 22 Nye wa gaw arai yawng mayawng ngai hpe ap ya ni ai: Kasha kadai re ai gaw, Wa hta kaga kadai mung n chye ai; Wa kadai re ai mung, Kasha wa hte dai Kasha e jahtoi ya mayu ai wa hta kaga, kadai mung n chye nga ai. 23 Sape ni hpang de kayin yu let mung, shi lagyim tsun mu ai gaw Nanhte mu lu ai lam ni hpe, mu lu ai myi ni gaw, a nga malit dai. 24 Kaning rai nme law, ngai nanhte hpe tsun made ga, nanhte mu lu ai lam ni hpe myihtoi hte hkawhkam law law wa mu mayu ma timung, n mu lu ma ai; nanhte na lu ai lam ni hpe na mayu ma timung, n na lu ma ai, ngu mu ai. 25 Shaloi, yu mu, tara sara langai mi rawt nna, Sara e, n htum n wai asak lu la hkra ngai kaning rai na rai ta? ngu nna shi hpe san dinglik chyam yu wu ai. 26 Yesu gaw, Tara laika hta kaning nga ka da a ta? nang kaning nga hti n ta? ngu nna shi hpe tsun wu ai. 27 Dai wa gaw, Dai Madu, na a Karai Kasang hpe, na a kraw lawang mahkra hte, na a myit masin mahkra hte, na a n-gun lagaw mahkra hte, na a myit mang mahkra hte, nang tsawra lu na ndai; na a htingbu wa hpe mung na a hkum hte maren tsawra lu na ndai, nga ai, ngu nna htan wu ai. 28 Yesu gaw, Nang htan ai ga teng nga lit dai; shingrai u, shaloi nang asak hkrung na rin dai, ngu nna shi hpe tsun wu ai. 29 Raitimung dai wa gaw shi a dinghpring ai shapraw dan mayu nna, Nye htingbu wa gaw kadai wa rai na a ta? ngu nna Yesu hpe tsun wu ai. 30 Yesu gaw, Masha langai mi Yerusalem mare nna Yerihko mare de yu wa yang, damya hkrum wu ai: dai ni gaw shi a hpun palawng raw kau nna, nhtum nni di kayat nhtawm, ganoi noi si sayang she, kau da nna wa mat ma ai. 31 Shaloi hkinjawng langai mi dai lam hku hprang hkrup nna, dai wa hpe mu jang, koi kau da wu ai. 32 Dai hte maren Lewi masha langai mi mung, dai yang du nna, dai wa hpe mu jang, koi kau da wu ai. 33 Samari masha langai mi mung dai lam sa wa yang, dai wa kaw du nna, shi hpe mu jang, matsan yu dum ai hte sit sa nna, 34 shi a nma ni hta naman hte tsabyi ru bun nhtawm, ahkyen kayawp wu ai: shi a lawze hta mung dai wa hpe shajawn nhtawm, manam nta langai mi de lakawn wa nna, lajang ya wu ai. 35 Hpang shani e shi gumhpraw lap lahkawng shaw nna, dai manam nta madu wa hpe ya let tsun wu ai gaw, Ndai wa hpe yu lajang ya e; shi a majaw nang jan ma ai made gaw, ngai bai wa jang she, nang hpe wa wa na de ai, ngu da wu ai. 36 Dai masha masum hta damya hkrum ai wa hte htingbu daw ai wa gaw, kadai mahtang re ai, ngu nna nang myit n ta? ngu nna htan wu ai. 37 Dai tara sara gaw, Dai wa hpe matsan dum ai wa re ai, ngu wu ai. Yesu gaw, Nang mung dai zawn wa galaw u, ngu nna shi hpe tsun dat wu ai. 38 Ya shanhte sa wa nga ma yang, kahtawng langai mi de shi shang wu ai: Marhta ngu ai numsha langai mi mung, shi a nta hta shi hpe hkapla wu ai. 39 Dai numsha gaw Mari ngu ai kanau langai mi lu ai: shi gaw dai Madu a lagaw nhpang e dung nga let, shi a ga madat nga ai. 40 Marhta chyawm gaw galaw jaw ai amu law law a majaw myit kyin dum nga ai: dai rai nna shi sit sa nhtawm, Madu e, ngai nau gaw galaw jaw ai amu hta ngai hpe hkrai sha rap di da ai hpe, nang hpa n nawn ya n ni? ngai hpe karum na, shi hpe tsun dat ya e, ngu wu ai. 41 Shaloi dai Madu gaw, Marhta, Marhta, nang gaw amu lam law law a majaw myit ru nna tsang nga ndai: 42 raitimung, ra grau ai lam gaw langai sha she rai nga ai: Mari gaw kaja ai kumhtaw lata la nu ai rai nna, dai hpe shi kaw na shaw la kau ya lu na n rai, ngu nna shi hpe htan wu ai.

Luka 11

11:1 Lang mi na shi gaw shara mi hta akyu hpyi nga ai rai nna, shi hpyi ngut jang, shi a sape langai mi gaw, Madu e, Yawhan gaw shi a sape ni hpe akyu hpyi na sharin ya ai zawn, anhte hpe mung sharin ya mi, ngu nna shi hpe tsun mu ai. 2 Shaloi shi gaw, Nanhte akyu hpyi yang ning ngu mu: Wa e, Na a mying ningsang chyoi pra nga lit ga; Na a mungdan du wa ruga. 3 Anhte ra ai lusha gaw, shani shagu anhte hpe jaw mi. 4 Anhte hpe shut ai ni yawng mayawng a mara, anhte raw kau ya ga ai majaw, anhte a yubak hpe mung raw kau ya mi. Agung alau nga ai de mung anhte hpe hkum sa shangun mi, ngu mu, ngu nna shanhte hpe tsun mu ai. 5 Bai shi shanhte hpe, Nanhte hta na langai mi jinghku lu ai rai nna, yuptung hpawa e shi kaw sa nhtawm, Jinghku wa e, muk tawng masum ngai hpe gan hkoi ya e; 6 nye a jinghku wa hkrun lam de na ngai kaw du ra ai rai nna, shi hpe jaw sha na hpa mung n lu nngai, ngu wu yang, 7 nhku de na wa gaw, Ngai hpe hkum shatsang et; chyinghka mung la kau se ai, ngai sha ni mung ngai hte rau yupku hta rai mat masai: nang hpe jaw na ngai n rawt lu ni ai, ngu nna hkap htan na wu ni? 8 Ngai nanhte hpe tsun made ga, jinghku re ai nga nna n rawt jaw hkraw raitimung, shi akroi anoi hpyi nga ai majaw, dai wa hpe ra mara rawt jaw na wu ai. 9 Bai, nanhte hpe ngai tsun made ai gaw, Hpyi mu, shaloi nanhte lu la na myit dai; tam mu, shaloi nanhte mu na myit dai; akawk mu, shaloi nanhte a matu hpaw ya na ra ai. 10 Kaning rai nme law, hpyi ai wa kadai mung lu la ai; tam ai wa mung mu la ai, akawk ai wa hpe mung hpaw ya na ra ai. 11 Nanhte hta kadai kawa mung, kasha gaw muk hpyi yang, nlung jaw na wu ni? nga hpyi yang, nga a malai lapu jaw na wu ni? 12 u di hpyi yang, n-gawgawk jaw na wu ni? 13 Dai rai nna, nanhte n hkru nga myit dai ni pyi, tinang a kasha ni hpe kaja ai kumhpa chye jaw myit yang gaw, dai hta grau nna sumsing lamu na Kawa gaw, shi e hpyi ai ni hpe dai chyoi pra ai Wenyi jaw na n rai hka! ngu nna tsun mu ai. 14 Lang mi na shi gaw n chye shaga ai nat hpe shapraw kau wu ai: nat pru mat wa ai hpang, n chye shaga ai wa gaw shaga nga ai. Shawa masha ni gaw mau mat nga ma ai. 15 Raitimung, shanhte hta na nkau mi gaw, Nat agyi wa Bezebula hte she, shi nat ni hpe shaden kau lu ai, nga ma ai. 16 Nkau mi mung shi hpe chyam dinglik yu let, lamu de na lamik kumla hpyi ma ai. 17 Shi chyawm gaw shanhte a myit mang chye ya wu ai majaw, shanhte hpe, Dinghku brun ai mungdan shagu gaw, hten mat ga ai rai nna, nta mi hte nta mi hpe kamyet daw agrawp mat ga ai. 18 Ngai gaw Bezebula hte nat ni hpe shaden kau nga ai, nga nna nanhte tsun myit dai hte maren, Satan mung tinang hte hka bra mat sai rai yang gaw, shi a mungdan kaning rai grin nga lu na lu ta? 19 Ngai Bezebula hte nat ni hpe shaden kau mawe ai rai yang gaw, nanhte a kasha ni kadai wa hte shaden kau nga ma ta? dai majaw, shanhte gaw nanhte hpe tara dara ai agyi ni tai na mara ai. 20 Karai Kasang a layung hte ngai nat ni hpe shaden kau mawe ai rai yang chyawm gaw, Karai Kasang a mungdan nanhte kaw du sai rai nga ai. 21 N-gun ja ai wa gaw ri nhtu lang nna, shi a nta nbang npan sin nga yang, shi a arai ni gaw ashim sha rai nga lu ai: 22 shi hta n-gun grau ja ai wa sa nna, dai wa hpe gasat dang kau ngut jang she, shi kam ai ri nhtu hpe magawn la kau ya nhtawm, shi a arai ni hpe karan kachyan di la kau ya wu ai. 23 Ngai hpang maga de n nga ai wa gaw, gumlau maga de rai nga ai: ngai hte kahkyin gumdin n re ai wa gaw, ayai aya rai nga ai. 24 Dai n seng ai nat gaw masha hta na pru nhtawm, hkraw hkun ai shara hkan e hkawm sa wa nna, sim sa na shara tam nga ai; n mu wu jang, Ngai pru kau da se ai nta de ngai bai nhtang wa na nngai, nga ai. 25 Bai du wa yu yang, dai nta gaw asan awan, ye kau nna mawn da nga la ai hpe, wa mu wu ai. 26 Shaloi shi nhtang sa nna, shi hta grau n hkru ai nat sanit shaga wa nhtawm, shanhte shang nna, dai yang e anga nga ma ai: dai rai nna, dai masha a hpang de na asam gaw shawng de na hta grau ru wa lu ai, ngu nna tsun mu ai. 27 Shing nga tsun nga yang, dai shawa hpawng kata na numsha langai mi gaw shi a nsen shaja nna, Nang hpe gun ai hkritung hkriwang hte, nang chyu ai madoi chyuhpang gaw, a nga lit dai, ngu nna shi hpe tsun wu ai. 28 Yesu gaw, Rai sa, Karai Kasang a mungga madat la nna, hkannang ai ni gaw a lu ma ai, nga ai. 29 Shawa masha ni gumbawm wa ma ai shaloi, shi tsun hpang wu ai gaw, Ndai prat na ni gaw n hkru ai amyu rai nga ai: shanhte lamik kumla tam nga ma ai; raitimung, Yona a lamik kumla hta kaga, hpa lamik kumla mung shanhte hpe n dan na nme ai. 30 Yona gaw Ninewe masha ni a man e lamik kumla tai wa ai zawn, dai Masha Kasha mung, ndai amyu a man e, lamik kumla tai na ra ai. 31 Dai tara dara ai nhtoi hta, dingda mung na hkawhkam jan gaw, ndai prat na amyu hte rau rawt wa nna, shanhte hpe dawdan na ra ai: kaning rai nme law, shi gaw Shawlumon a hpaji madat na, ga jahtum de na sa du ai: yu mu, ndai yang e Shawlumon hta grau kaba ai wa nga nga ai. 32 Tara dara ai nhtoi hta Ninewe masha ni gaw, ndai prat na amyu hte rau rawt wa nna, shanhte hpe dawdan na mara ai; kaning rai nme law, Yona hkaw tsun ai ga majaw, shanhte myit malai lu ma ai: yu mu, ndai yang e Yona hta grau kaba ai wa nga nga ai. 33 Pyengdin shatu nhtawm, makoi shinggang gawk e mung, mung hte dagup nna mung, kadai n tawn da ga ai: shang sa ai ni de a htoi san ai mu lu hkra, pyengdin shadun hta shadun da ga ma ai. 34 Na myi gaw hkum hkrang a pyengdin rai nga lit dai; na a myi asan sha rai nga yang, na a hkum ting ahtoi nga ai: n kaja nga lit yang gaw, na a hkum mung sin chyip rai nga ai. 35 Dai re ai majaw, nang hta rawng ai ahtoi gaw, sin mat ai n sin mat ai, a yu nga u. 36 Na a hkum hkrang hta shara mi muk n sin ai, hkum ting htoi nga ai rai yang gaw, pyengdin htoi tu kabrim ai hte nang hpe jahtoi ya ai zawn, na a hkum hkrang ting htoi na ra ai, ngu wu ai. 37 Shing nga tsun nga yang, Hparishe langai mi, shi kaw shani shat sha na, shi hpe shaga wu ai: shaloi shi shang nna, shat sha na dung nga ai. 38 Shat garai n sha yang, hka n shin ai hpe, dai Hparishe wa mu nna mau nga ai. 39 Dai rai nna Madu gaw, Nanhte Hparishe ni gaw, gawm hte ban hpe shinggan maga de sha shapra ga myit dai; nanhte a kata maga de wa gaw, kashun kashe re ai hte, n hkru n shawp ai hpring chyat nga malit dai. 40 Masha angawk ni e, shinggan maga galaw ai wa gaw, kata maga de mung galaw ai, n rai ni? 41 Raitimung, kata de rawng ai arai hpe alu jaw mu; shaloi, yu mu, nanhte a matu nlang sanpra nga na rai malit dai. 42 Hparishe ni e, nanhte dingnye lu myit dai! kaning rai nme law, shingtawn pan, shinglim pan ni hte shat mai lap amyu myu hta na, htamshi hta htammi nanhte lahkawn sha myit htawm me, dingman ai hku tara dara na hte, Karai Kasang a tsawra ai lam hpe gaw, lai kau da myit dai: shawng na mung galaw nna, hpang na hpe mung n tawt kau myit taw gaw, mai na malit dai. 43 Hparishe ni e, nanhte dingnye lu myit dai! tara jawng ni hta grau reng ai dung shara ni hpe mung, gat hkan e hkungga shachyen ai ga hpe mung, nanhte sharawng la myit dai. 44 Nanhte dingnye lu myit dai! nanhte gaw masha ni n chye ai hte, de a ntsa e hkawm sa lu hkra prai mat sai lup ni hte bung myit dai, ngu nna shi hpe tsun wu ai. 45 Shaloi tara sara langai mi htan nna, Sara e, nang shing nga ai gaw, anhte hpe mung roi lawm nga ndai, ngu nna shi hpe tsun wu ai. 46 Dai nga jang Yesu gaw, Nanhte tara sara ni mung dingnye lu myit dai! nanhte gaw masha ni hpe gun yak ai lit shagun nhtawm, tinang ni gaw dai lit ni hpe layung mi hte pyi n jahkra yu myit dai. 47 Nanhte dingnye lu myit dai! Nanhte a nji nwa ni sat kau ai myihtoi ni a lup ni hpe nanhte galaw lajang myit dai: 48 dai rai nna nanhte a nji nwa ni a amu hta sakse tai ai ni hte, myit hkrum ai ni nanhte rai nga myit dai: kaning rai nme law, shanhte gaw myihtoi ni hpe sat kau nna, shanhte a lup ni hpe nanhte galaw lajang myit dai. 49 Dai re ai majaw, Karai Kasang a hpaji byeng-ya tsun ai gaw, Myihtoi hte kasa hpe ngai shanhte hpang de shangun dat na we ai rai nna, dai ni hta na nkau mi hpe shanhte sat kau ai hte di nna, zingri zingrat na maru ai: 50 shingrai, Abela asai kaw nna, tawn hkungri hte nawku nta lapran e sat kau hkrum ai Zakari a asai du hkra, ginding aga lat kaw nna ru kau hkrum ai myihtoi nlang a bunglat gaw, ndai aprat na amyu hpe shagun lu na rai nga ai, nga ai; 51 rai sa, ngai nanhte hpe tsun made ga, dai bunglat gaw ndai aprat na amyu hpe shagun lu na rai nga ai. 52 Tara sara ni e, nanhte dingnye lu myit dai! hpaji sumsaw gaw nanhte kyem da myit htawm, tinang dai mung n shang, shang mayu ai ni hpe mung, nanhte hkum shadang da myit dai, ngu wu ai. 53 Dai yang na pru wa yang, laika ka ai sara ni hte Hparishe ni gaw, shi hte ja ja ndang kalang nga nna, shi a n-gup na ga langai ngai hte shi hpe mara shagun lu hkra 54 gyam yu nga let, lam law law hte shi hpe tsun shadut ma ai.

Luka 12

12:1 Dai shaloi masha hkying mun wa zuphpawng nga nna, shada da kabye hkra rai nga ma yang, shi a sape ni hpe shi shawng tsun hpang mu ai gaw, Sawt ai myit ngu ai, Hparishe ni a matsi hpe koi kau mu. 2 N pru n dan lu hkra magap da ai arai gaw n nga ai; n chye n chyang lu hkra makoi magap da ai arai mung, n nga ai. 3 Dai re ai majaw, nsin e nanhte tsun matsun hpe, nhtoi e na shajang na mara ai; kata gawk hkan e na hta tsun matsun hpe, nta ntsa nna tsun gara shajang na mara ai. 4 Nye a jinghku ni e, nanhte hpe ngai tsun made ga, Hkum tsawp hpe sha sat kau lu nna, kaning mung bai n di lu ai ni hpe, hkum hkrit myit. 5 Kadai hpe sha hkrit mai ai gaw, ngai nanhte hpe sadum made ga; Hkum tsawp hpe sat kau ngut jang, ngarai kata de jahkrat kau na ahkang lu ai wa hpe chyawm gaw, hkrit nga mu: rai sa, ngai nanhte hpe tsun made ai gaw, Dai wa hpe hkrit nga mu. 6 U tsa manga hpe peksan lap lahkawng hte dut kau lu ai, n rai ni? dai u tsa langai mi hpe mung Karai Kasang malap kau wu ai n rai. 7 Nanhte a baw na kara singgawng mahkra hpe pyi, hti da nu ai. Hkum hkrit myit: u tsa law law hta nanhte grau nna hpu nga myit dai. 8 Kadai raitimung masha ni a man e ngai hpe yin la yang gaw, dai Masha Kasha mung, Karai Kasang a lamu kasa ni a man e, dai wa hpe yin la na wu ai: 9 masha ni a man e ngai hpe nyet kau ai wa chyawm gaw, Karai Kasang a lamu kasa ni a man e nyet kau ai hkrum na wu ai. 10 Dai Masha Kasha hpe ga hte shut kau ai wa kadai hpe mung, mara raw dat kau ya na lam hku nga ai: dai chyoi pra ai Wenyi hpe shatan ai wa a matu chyawm gaw, mara raw ya na lam n nga lu ai. 11 masha ni gaw nanhte hpe tara jawng ni de mung, agyi salang ni hte ahkang aya lu ai ni a man de mung, dun wa myit jang gaw, hpa hte kaning ngu htan na mung, gara hku tsun na mung, hkumtsang myit: 12 dai ahkying hta nan hpa tsun mai na gaw, chyoi pra ai Wenyi nanhte hpe sharin ya na marin dai, ngu mu ai. 13 Shaloi shawa hpawng kata de na marai langai mi gaw, Sara e, ngai hpu wa hpe ngai hte sali wunli karan na lam tsun ya e, ngu nna shi hpe tsun wu ai. 14 Dai rai nna Yesu gaw, Masha wa e, nan a ntsa e tara agyi hte hparan wa tai na, ngai hpe kadai san da a ta? ngu nna shi hpe htan wu ai. 15 Shanhte hpe mung shi bai tsun mu ai gaw, Nammak lawhpa lam yawng hta na myit hpe shim shadang nna koi gam mu: kaning rai nme law, sutgan law htam wa ai hta, masha asak rawng ai n rai, ngu mu ai. 16 Ga shadawn mung, Sahti langai mi a yi hkauna gaw nsi naisi hkai nmai grai ja lu ai. 17 Dai rai nna dai wa gaw shi a myit hta, Ngai hpa wa galaw yu na i? nye a nsi naisi shinggyin da na shara ngai n lu nngai: 18 bai shi gaw, Ngai ning rai galaw na we ai: nye a dum nsa ni hpe ngai run kau nna grau kaba ai galaw na we ai: dai ni hta nye a nsi naisi hte sutrai nlang hpe ngai shinggyin da nhtawm, 19 nye a myit masin hpe ning ngu na we ai, Myit masin e, law law ning a matu arai kaja law law nang shinggyin da nitdai: asan apan rai nga nu, lu nu, sha nu, pyaw pyaw rai nga nu, ngu na we ai, nga ai. 20 Shaloi Karai Kasang gaw dai wa hpe, Masha angawk e, dai na jang na a myit masin hpe dawm la kau ya na ra ai: dai rai nna, nang mahkawng shachyip da ai arai ni gaw, gade a matu tai na ra ta? ngu wu ai. 21 Tinang a matu sutgan mahkawng da nhtawm, Karai Kasang hta n lu n su ai wa gaw, shingre ai wa rai nga ai, ngu nna shanhte hpe tsun mu ai. 22 Bai shi a sape ni hpe, Dai re ai majaw ngai nanhte hpe tsun made ga, Hpa lu hpa sha na, nga nna asak a matu, hpa bu hpa hpun na, nga nna hkumhkrang a matu hkumtsang nga myit: 23 asak gaw lusha hta, hkumhkrang gaw hpun palawng hta, grau nga ai. 24 U hka ni n gat n hkai, n dan n shu ma ai hpe, myit yu mu: dai ni gaw mam dum hte sutdek n lu ma ai: raitimung Karai Kasang gaw dai ni hpe shahpa jaw da nga mu ai: nanhte gaw u ni hta gade grau hpu myit ta? 25 Nanhte hta kadai wa mi myit tsang ai hte, tinang a aprat hpe dawng mi jat la lu myit ni? 26 Dai rai nna, kaji htum ai lam hpe pyi, nanhte n di lu myit dai rai yang gaw, gale lam a majaw hpa rai myit tsang nga myit ta? 27 Hkalaw pan ni kaning rai kaba wa ma ai hpe, myit yu mu: dai ni gaw makan n galaw, ari n ri ma ai: raitimung, nanhte hpe ngai tsun made ai gaw, Shawlumon pyi shi a hpung kaba mahkra hta, dai nampan langai mi zawn buhpun lu ai n rai. 28 Ai n kam ai baw e, dai ni nga nna hpawt de wan mang hta kabai bang kau ai nam na tsingdu hpe, Karai Kasang shingre ai jahpun da ai rai yang gaw, dai hta n-ga nanhte hpe jahpun na myit dai, n rai ni? 29 Nanhte gaw, hpa lu hpa sha na, nga nna hkum tam myit: myit ung ang ai mung hkum rawng myit: 30 kaning rai nme law, mungkan amyu ni dai lam nlang hpe tam nga ma ai: dai lam nanhte hta ra nga ai gaw, nanhte a Kawa chye ya nga ai. 31 Nanhte chyawm gaw shi a mungdan hpe tam nga mu, shaloi dai lam nlang nanhte hpe kahtap jaw na marin dai, 32 Sagu hpung kaji e, hkum hkrit et; dai mungdan nanhte hpe jaw na, nanhte a Kawa myit sharawng nga ai. 33 Nanhte lu ai arai dut kau nna alu jaw mu; tinang a matu dingsa n chye ai gumhpraw jan galaw nna, lagut mung n du, manut e mung n sha lu ai, sumsing lamu e n htum n ma chye ai sutgan, kyem da mu. 34 Kaning rai nme law, nanhte a sutgan nga ai kaw, nanhte a myit masin mung nga na malit dai. 35 Nanhte gaw nshang e shingkyit kyit nna, pyengdin shatu let, 36 tinang a madu hkungran poi de na bai wa nna, chyinghka wa akawk yang, shi hpe shaloi jang hpaw la lu hkra ala nga ai ni zawn, nanhte mung rai nga mu. 37 Dai madu du wa yang, maja nga ma la ai mayam ni gaw, a lu ma ai: ngai nanhte hpe teng teng tsun made ga, dai madu gaw shi hkum dai shingkyit kyit nna, shanhte hpe lusha shangun na shadun tawn nhtawm, shi nan shanhte hpe sa galaw jaw na mu ai. 38 Yuptung hpawa e raitimung, u goi mahka de raitimung, shingrai maja nga ma ai hpe, wa mu yang gaw, dai mayam ni a lu ma ai. 39 Da ndai dum chye mu: gara ahkying aten hta lagut sa na hpe, nta madu wa chye wu taw gaw, shi a maja nga nna, shi a nta hpe tawk waw lu hkra, kau da na wu ai n rai. 40 Dai rai nna nanhte mung chyip chyip rai nga mu: kaning rai nme law, nanhte n dum n mi re ai ahkying hta e, dai Masha Kasha du sa na ra ai, ngu nna tsun mu ai. 41 Shaloi Petru gaw, Madu e, ndai ga shadawn gaw anhte hpe sha, shing n rai, yawng hpe tsun ai, rai n ni? ngu nna san wu ai. 42 Dai rai nna Madu gaw, Nta madu shi a kun dinghku ntsa e san tawn da nna, aten du jang lusha karan jaw lu na kangka re ai hte myitsu ai kunhting wa, kadai rai nga a ta? 43 Shi a madu bai wa mu yang, shingrai galaw nga hkrup ai mayam gaw, a nga ai. 44 Nanhte hpe ngai teng teng tsun made ai gaw, Dai madu gaw shi a arai mahkra a ntsa e, dai wa hpe san tawn da na wu ai. 45 Shing n rai, dai mayam gaw, Nye a Madu du wa na naw na la nga ai, nga nna shi a kraw kata e myit nga let, mayam la, mayam num manang ni hpe anu ajin di ai hte, lu nga, sha nga nna chyaru nang nga ai rai yang gaw, 46 dai mayam n mada n hten ai nhtoi hte, n dum n chye ai ahkying hta, shi a madu du wa nna, dai wa hpe nhtum nni adup kau nhtawm, shi a kumhtaw dawm la ya nna, sadi sahka n rawng ai ni hte rau tawn kau na ru ai. 47 Tinang madu a myit chye da ninglen, madu a myit hku n hkan, chyip chyip rai n hkyen nga ai mayam kadai raitimung, anu ajin di ai, law hkrum na ra ai. 48 n chye nna anu ging ai amu galaw kau ai mayam chyawm gaw, loi mi sha anu ai hkrum na ra ai. Law wa hkamla ai wa kaw na, law wa hpyi na ra ai; law wa ap ya shajang ai wa kaw na mung, grau nna bai hpyi na mara ai. 49 Ga ntsa de wan jahkrat na, ngai du sa ring ngai; dai wan ya jang chyi kap sai rai taw gaw, ngai hpa ndawt shara nga na a ta? 50 Raitimung, ngai hkam na baptisma langai mi naw nga ai; dai garai n hkam hkam gaw, ngai nachying kyin la nga nngai. 51 Ga ntsa de ngwi pyaw shangun na, ngai du sa ai zawn nawn myit ni? ngai nanhte hpe tsun made ga, Dai hku n rai, shabra na she, du ring ngai. 52 Kaing rai nme law, ya kaw nna nta langai sha hta na masha manga hte gaw, masum hte lahkawng ran, lahkawng hte masum ran, rai nna shada hka bra na mara ai. 53 Kawa gaw shadang sha hte, shadang sha gaw kawa hte; kanu gaw shayi sha hte, shayi sha gaw kanu hte; kamoi gaw kanam hte, kanam gaw kamoi hte shada hka bra na mara ai, ngu mu ai. 54 Shawa masha ni hpe mung shi tsun mu ai gaw, Nanhte gaw sinna maga de sumwi dung ai mu yang, shaloi jang, Marang htu na ra ai, nga nga rai myit dai: dai hte maren mung, byin byin rai nga ai. 55 Dingda nbung wa yang, Jan ja na ra ai, nga ga myit dai; dai hte maren mung byin ga nga ai. 56 Sawt ai masha ni e, lamu hte ga a man hpe gaw nanhte chye ginhka lu myit dai: dai re ai mi, ndai prat a kumla hpe, hpa rai n chye ginhka lu myit ta? 57 Dai hte maren nanhte dai dai hpa rai dingman ai hku n chye dawdan myit ta? 58 Kaning rai nme law, nang hpe hka jun ai wa hte rau, du kaw sa wa ai shaloi, lam e naw rai nga yang, shi hte mai lu hkra shaja u: dai n rai yang, hka madu gaw tara agyi wa kaw nang hpe sa bang kau nna, tara agyi wa gaw manggalang kaw nang hpe ap kau na ra ai rai nna, dai manggalang gaw nang hpe htawng hta bang kau na hpe tsang ra ai. 59 Nang hpe ngai tsun de ga, peksan lap mi muk n ngam hkra, garai n wa ma ma gaw, dai kaw nna nang pru wa lu na ndai n rai, ngu wu ai.

Luka 13

13:1 Dai tawng hte hta, dai yang e nga ai ni nkau mi, Pilat munggyi gaw Galile masha nkau mi a asai hpe, shanhte nawng ai hkungga hte kayau kau ai lam, shi hpe tsun dan mu ai. 2 Shi shanhte hpe, Dai Galile masha ni shingre ai hkrum ma ai majaw, Galile masha yawng hta yubak grau law ma ai, ngu nna nanhte myit da mu ni? 3 Dai n rai, ngai nanhte hpe tsun made ga; nanhte mung myit malai n lu myit yang gaw, nanhte nlang dai hte maren htenbya mat na marin dai. 4 Dai hta kaga, Siloam kahtawng na langchyi daw hkrat nna, kamyet si ai masha shi matsat gaw, Yerusalem mare na ni yawng hta mara grau law ma ai, ngu nna nanhte myit da mu ni? 5 Dai n rai, ngai nanhte hpe tsun made ga; nanhte mung myit malai n lu myit yang gaw, nanhte nlang dai lam hte htenbya mat na marin dai, ngu mu ai. 6 Ndai ga shadawn mung shi tsun wu ai gaw, Masha langai mi shi a tsabyi sun hta hkai da ai maihpang hpun langai mi tu lu ai rai nna, dai hta na asi sa tam yang, n mu wu ai. 7 Dai rai nna shi gaw, Yu u, ngai masum ning tup dai maihpang hpun hta na asi sa tam timung n mu we ai; dai hpe kran kau u: hpa rai ga lahpawt tu nga na a ta? ngu nna tsabyi sun lajang ai wa hpe tsun wu ai. 8 Dai wa gaw, Madu e, dai ning sha gaw naw tu nga yu u ga, de a nhpang grup e ngai htu kapun nna hpun apawm na we ai: 9 dai hpang asi si yang gaw, tu nga u ga: asi n si yang gaw, nang kran kau na rai nga ai, ngu nna madu hpe htan wu ai. 10 Laban nhtoi hta e tara jawng langai mi hta shi sharin shaga nga ai. 11 Shaloi, Yu mu, shi matsat ning tup machyi jahkrum nat kap ai numsha langai mi nga ai: shi gaw marung htingkung mat nna, shi hkum hpe loi mi muk n malan lu nu ai. 12 Yesu dai numsha hpe mu jang, shi hpang de shaga la nna, Numsha e, na machyi ai hta na nang lawt lu nitdai, nga nna 13 shi a ntsa e lata mung mara ya wu ai: shaloi jang shi a malang jan rai lu nna, Karai Kasang hpe shakawn kungdawn nga ai. 14 Shingrai Yesu gaw laban nhtoi e shamai ya ai majaw, tara jawng agyi wa gaw masin kahtet nna shawa masha ni hpe, Amu bungli galaw mai ai nhtoi kru ya nga ai; dai nhtoi ni hta shamai la na sa mu: laban nhtoi hta gaw hkum sa myit, ngu nna tsun mu ai. 15 Shaloi dai Madu shi hpe, Sawt ai masha ni e, nanhte langai hte langai laban nhtoi e tinang a yamnga lawze hpe ntsin shayaw na ulawng na raw dat ga myit dai, n rai ni? 16 Dai rai yang gaw, ndai Abraham a shayi sha hpe mung, shi matsat ning tup, Satan e gyithkang da ai sumri hta na, laban nhtoi e mai raw dat ai, n rai ni? ngu nna htan wu ai. 17 Shing ngu tsun jang, shi hte nhtan shai ai ni nlang hte gaw kaya mat shajang ma ai: shawa masha ni yawng hte chyawm gaw, shi galaw ai hpung shingkang amu mahkra a majaw, kabu gara shajang nga ma ai. 18 Dai re ai majaw shi gaw, Karai Kasang a mungdan gaw hpa hte bung a ta? ngai hpa hte shadawn na rai ta? 19 Dai gaw, masha langai mi shi a sun hta gat dat ai chyinghkrang tum hte bung nga ai: dai tum gaw tu kaba wa ai hte, hpun tai hkra rai nna, ntsa malen u ni de a lakung lakying ni hta dung nga lu ma ai, ngu wu ai. 20 Bai shi gaw, Karai Kasang a mungdan hpe, ngai hpa hte shadawn na rai ta? 21 Dai gaw, numsha e la nna, muk shadung dang masum hta bang nhtawm, mahkra hte hpe shawawm dat lu ai matsi hte bung nga ai, ngu wu ai. 22 Bai shi gaw, mare kahtawng langai hte langai de shang sa wa nna, sharin shaga let, Yerusalem de lai sa wa ai. 23 Shaloi masha langai mi gaw, Madu e, hkyehkrang la ai kaw du ai ni n law ma ni? ngu wu ai. 24 Yesu gaw, Gyip ai chyinghka hku shang lu na, shaja mu: ngai nanhte hpe tsun made ga, masha law law wa shang na tam ma ai raitimung, n shang lu ai nga na mara ai. 25 Nta madu wa chyinghka rawt la kau sayang, nanhte shinggan e tsap nga nna chyinghka akawk let, Madu e, anhte e hpaw la mi, nga nna hpyi myit yang, dai wa gaw, Nanhte kanang na rai myit dai gaw, ngai n chye made ai, nga nna htan myit jang, 26 shaloi nanhte gaw, Anhte na a man e lusha saga ai; anhte a lam hkan e mung nang sharin shaga ya yu nitdai, nga na marin dai: 27 nta madu wa chyawm gaw, Nanhte kanang na rai myit dai gaw ngai gaja wa n chye ngu nga nngai; n teng n man ai hku hkan galaw ai ni nlang hte e, ngai kaw na pru wa mu, ngu nna htan kau na myit dai. 28 Abraham, Isak, Yaku hte myihtoi ni nlang, Karai Kasang a mungdan e nga nga ai hpe nanhte mu lu nna, nanhte hkum dai gaw shinggan de shapraw kau hkrum myit dai shaloi, dai yang e hkrapngu hkrapngoi ai hte wa urin udik ai, rai na ra ai. 29 Dai shaloi, sinpraw sinna, dingdung dingda maga de na masha ni sa nna, Karai Kasang a mungdan hta ningngai nga na mara ai. 30 Shaloi, yu mu, hpang hkrat ai ni a nkau mi gaw, shawng na mara ai; shawng ai ni nkau mi mung, hpang hkrat na mara ai, ngu nna shanhte hpe tsun mu ai. 31 Dai ahkying hta nan Hparishe nkau mi, Nang na pru mat wa u: Herod nang hpe sat na maw nga ai, ngu nna shi hpe sa tsun mu ai. Shaloi shi gaw, 32 Dai chyahkyawn hpe ning ngu wa tsun mu, Yu u, dai ni hte hpawt ni nhtoi hta mung, ngai nat shaden kau nna machyi makaw shamai ya na rai nga nngai; masum ya nhtoi du jang she nye amu ngut na, rai nga ai: 33 raitimung, dai ni, hpawt ni hte hpawt din ni ngai naw sa wa ra nga nngai: kaning rai nme law, Yerusalem mare hta kaga, myihtoi si mai ai shara n nga lu ai. 34 Yerusalem e, Yerusalem e, myihtoi ni hpe sat kau kau rai nna, nang hpang de shangun dat ai ni hpe nlung hte kabai sat sat re ai mare e! u kanu gaw u hkai ni hpe singkaw npu e jahpawng da ai zawn, na nshu nsha ni hpe ngai gade lang jahpawng da mayu timung, nanhte n hkraw myit dai. 35 Yu mu, nanhte a nta gaw a katsi katsang kram nga ai. Nanhte hpe ngai tsun made ai gaw, nanhte nan, Madu a amying ningsang hte du sa ai wa gaw, a nga ai law, n nga nga gaw, nanhte ngai hpe n mu lu na manit dai, ngu nna shanhte hpe tsun mu ai.

Luka 14

14:1 Shaloi shi gaw laban nhtoi langai mi hta, Hparishe agyi langai mi a nta e shat sha na nga, shang nga nga yang, shanhte gaw shi hpe la mada yu nga ma ai. 2 Shaloi, yu mu, namling ling ai masha langai mi, shi a man e nga nga ai. 3 Dai rai nna Yesu gaw, Laban nhtoi hta machyi shamai mai a ni? n mai a ni? ngu nna tara sara ni hte Hparishe ni hpe san mu ai. 4 Shanhte gaw atsin sha nga ma ai. Shaloi dai wa hpe shi jum la nhtawm, shamai ya nna, dat dat wu ai. 5 Shi shanhte hpe mung, Nanhte hta tinang a kasha, shing n rai, yamnga, laban nhtoi shani e hkahtung hta hkrat bang yang, shaloi jang n dun shaw la ai nga na, kadai wa rai myit ta? ngu nna tsun mu ai. 6 Shanhte chyawm gaw dai ga hpe hpa n htan lu ma ai. 7 Shaga da ai ni gaw reng grau ai dung shara ni lata la ai hpe mu wu yang, shi shanhte hpe ga shadawn hku tsun mu ai gaw, 8 Masha langai ngai nang hpe num hkungran poi de shaga yang, reng grau ai shara hta hkum dung et: nang hta grau arawng lu ai wa hpe mung shi shaga ra nhten; 9 nan lahkawng hpe shaga ai wa sa nna, Ndai wa hpe shara yen ya u, nga nna nang hpe tsun kau yang, nang gaw kaya ai hte nhting htang de htawt lu na ndai. 10 Dai rai nna, masha nang hpe shaga yang, nhting htang e sa dung u: shaloi nang hpe shaga ai wa sa nna, Jinghku wa e, naw sit lung u, nga nna nang hpe tsun yang, nang hte rau dung nga ai ni nlang hte a man e, nang arawng lu na rin dai. 11 Kaning rai nme law, tinang hkum shagrau ai wa kadai mung, grit mat ai hkrum na ra ai: tinang hkum shagrit ai wa chyawm gaw, shagrau ai hkrum na ra ai, ngu wu ai. 12 Shi hpe shaga ai wa hpe mung shi tsun wu ai gaw, Jahpawt shat, shing n rai, shana shat nang galaw daw ai rai yang, na a jinhku jing-yu ni, nhpu nnau ni, mayu dama ni hte sut lu ai htingbu ni hpe hkum shaga et: shing n rai jang she, shanhte mung nang hpe bai shaga daw nna, chyeju htang lu na mara ai. 13 Nang poi galaw daw n yang gaw, matsan mayan ni, jahten labye ni, lagaw hten ai ni hte myikyaw ai ni hpe shaga la u: 14 shingrai jang gaw, nang a lu na ndai: shanhte nang hpe chyeju htang lu na ma ai n rai: dai re ai majaw, tengman ai ni a bai hkrung rawt wa ai hta, de a akyu chyeju nang hkamla na rin dai, ngu wu ai. 15 Shi hte rau sha dung nga ai masha langai mi dai ga na jang, Karai Kasang a mungdan hta shat sha lu na wa gaw a lu ai, ngu nna shi hpe tsun wu ai. 16 Yesu gaw dai wa hpe, Masha langai mi shana shat daw na poi kaba lawn wu ai rai nna, masha law law hpe shaga da wu ai: 17 shat daw hkying du jang, shaga da sai ni hpe; Sa marit, lusha yawng jin masai; ngu nna shi a mayam hpe shaga shangun dat wu ai. 18 Shaloi dai ni nlang hte gaw, myit langai sha hte tinang hpe dat kau na hku hpyi ma ai. Langai mi gaw, Ngai hkauna lung mi mari da se ai rai nna, dai sa yu ra nngai majaw, ngai hpe naw dat e, ngu nna shi hpe tsun wu ai. 19 Langai wa mi gaw, Ngai wutang gap manga mari ni ai rai nna, dai shagun chyam yu ra nngai majaw, ngai hpe naw dat e, ngu wu ai. 20 Langai wa mi mung, Ngai num la ni ai rai nna, n sa lu nngai, ngu wu ai. 21 Shaloi dai mayam bai wa nna shi a Madu hpe dai lam mahkra tsun dan wu ai. Dai ga na jang nta madu wa gaw masin pawt la ai hte shi a mayam hpe, Mare na nmaw lam ni hte htingwan lam ni de alawan sa nna, matsan mayan ni, jahten labye ni, myikyaw ai ni hte lagaw hten ai ni hpe shaga woi wa rit, ngu nna shangun dat wu ai. 22 Dai hpang mayam wa gaw, Madu e, na a ga hte maren galaw ngut se ai; raitimung, dung shara naw man nga ai, ngu wu ai. 23 Shing nga jang madu gaw, Lam nmaw ni hte sun nhpan hkan pru sa nna, nye a nta hpring wa u ga, shanhte hpe adip akrip woi bang rit: 24 ngai nanhte hpe tsun made ai gaw, Shawng e shaga da ai ni langai mi muk, nye a shana shat chyim lu na n rai, ngu nna mayam hpe tsun dat wu ai, ngu wu ai. 25 Dai shaloi shawa hpung kaba shi hte rau sa wa nga ai rai nna, dai ni hpe kayin yu let, 26 Ngai kaw sa du ai wa kadai mung, tinang a kanu kawa, madu jan kasha ni hte, kahpu kanau kajan ni hpe mung, dai hta n-ga tinang a asak hpe mung, ndawng n rai yang gaw, dai wa gaw nye a sape n tai lu ai. 27 Kadai mung tinang a wudang hpai let nye hpang n hkan ai wa gaw, nye a sape n tai lu ai. 28 Kaning rai nme law, nanhte hta na masha langai mi, wahpang langchyi gaw mayu yang, dai ngut ram hkra shi lu ai gumhpraw law na n law na, hkrat ang ai jahpu hpe dung nna, shawng n sawn yu na masha nga a ni? 29 Shing n rai yang, npawt nhpang jung ngut nhtawm, ngut hkra n di lu yang gaw, 30 Ndai wa gaw npawt gaw hpang nhtawm ngut hkra n di lu nu ai, nga nna mu ai ni yawng e jaw na mara ai. 31 Lam mi gaw, hkawhkam langai mi kaga hkawhkam hpe gasat na maw yang, masha mun lahkawng hte sa ai wa hpe, mun mi hte hkap manga lu na, n manga lu na, dung nna shawng n bawng yu ai, nga na a ni? 32 Shing n rai yang, dai kaga hkawhkam wa tsan tsan e naw rai nga yang, kasa shangun dat nna, htinglu htinglai na lam hpyinem na ra ai. 33 Dai hte maren, nanhte hta tinang a arai nga manga hpe n kau da ai wa gaw, nye a sape n tai lu ai. 34 Jum gaw kaja nga ai; raitimung, jum shum ai hkawng mat yang gaw, hpa hte jashum la lu na rai ta? 35 Dai gaw ga a matu mung, namhpun di na matu mung, akyu n rawng ai rai nna, shinggan de kabai kau ga ma ai. Na la na, na tu ai wa gaw, na la u ga.

Luka 15

15:1 Ya, kanghta ai ni hte yubak kap ai ni nlang hte gaw, shi a ga madat na nga, shi hpang de sa ma ai. 2 Dai rai nna Hparishe ni mung, laika ka ai sara ni mung, Ndai wa gaw yubak kap ai ni hpe hkapla nna, shanhte hte rau lusha nga ai, nga nna aput angun nga ma ai. 3 Shaloi dai ni hpe ndai ga shadawn shi tsun mu ai gaw, 4 Nanhte hta, sagu latsa lu nna langai mi mat yang, dai jahku shi jahku hte hpe nam e naw tawn da nhtawm, mat ai sagu hpe mu la hkra n hkan tam ai, kadai wa nga na rai ta? 5 Dai hpe mu la jang mung, kabu gara ai myit hte lahpa hta mara hpai nna, 6 shi a nta de du wa jang, jinghku jing-yu ni hte htingbu htingbyen ni hpe shaga nna, Ngai hte rau kabu gara nga ga: nye a mat ai sagu hpe ngai bai mu la se ai, nga na ra ai. 7 Nanhte hpe ngai tsun made ga, Dai hte maren, myit malai lu shara n nga dum ai, dinghpring ai masha jahku shi jahku a majaw kabu gara ai hta, myit malai lu dum ai yubak kap ai masha langai mi a majaw, sumsing lamu kata e grau nna kabu gara shara rai na ra ai. 8 Bai lam mi gaw, numsha langai ngai gumhpraw lap shi lu ai hta na, lap mi mat yang, pyengdin shatu nhtawm, nta ye seng nna mu la hkra achyoi sha n tam yu ai, nga na a ni? 9 Dai hpe mu la jang mung, jinghku jing-yu ni hte htingbu hting-byen ni hpe shi shaga nna, Ngai hte rau kabu gara nga ga; mat ai gumhpraw ngai bai mu la se ai, nga na ra ai. 10 Nanhte hpe ngai tsun made ga, Dai hte maren, yubak kap ai masha langai mi, myit malai lu ai majaw, Karai Kasang a lamu kasa ni a man e, kabu gara shara rai nga ai, ngu mu ai. 11 Bai shi gaw, Masha langai mi shadang sha lahkawng lu ai. 12 Dai yan hta kasha kaji mahtang gaw, kawa hpe, Wa e, ngai la ang ai sali kumhtaw gaw, ngai hpe karan ya e, ngu nna hpyi wu yang, kawa mung shan hpe sali wunli karan ya wu ai. 13 Dai hpang nhtoi gade ya n na yang, kasha kaji gaw arai mahkra shinggyin la nhtawm, tsan ai mung de sa wa nna, dai shara e pyaw daw kadaw hkawm nga ai hte, shi a sutrai ginlut shamat kau wu ai. 14 Shingrai lu malu shamat kau ma jang, dai mung e hku wa kaba hku wa ai rai nna, shi matsan chyaren hkrum magang nga ai. 15 Shaloi dai mung na masha langai mi kaw shi sa shingbyi nga ai: dai wa mung shi a prang ga de, shi hpe wa rem shangun dat wu ai. 16 Shaloi shi gaw, wa ni sha ai shapre kawp hte pyi, shi a kan jahkru mayu timung, gade ai mung n jaw sha mu ai. 17 Shingrai shi myit dum yang, Nye wa a shabrai sha ai ni gade wa n taw n tsang muk sha lu nga ma hka! ngai wa gaw ndai yang e kawsi kyet ai hte htenbya magang wa nga nngai: 18 ngai rawt nna nye wa kaw wa nhtawm, Wa e, sumsing lamu a man e mung, na a man e mung, ngai shut ni ai: 19 ya kaw nna na nsha ngu na, ngai n ging n dan nngai: na shabrai sha ai masha langai mi zawn ngai hpe tawn da e law, ngu na we ai, nga ai. 20 Shingrai shi rawt wa nna, kawa kaw du wa ai. Shi tsan tsan naw rai nga yang, kawa gaw shi hpe hkap mu ai hte matsan yu dum nna, gat sa nhtawm, kasha a du hta noi ginshum let, shi hpe a pup wu ai. 21 Shaloi kasha gaw, Wa e, sumsing lamu a man e mung, na a man e mung, ngai shut ni ai: ya kaw nna na nsha ngu na ngai n ging n dan nngai: ( na a shabrai sha ai masha langai mi zawn, ngai hpe tawn da e law ) ngu nna kawa hpe tsun nem wu ai. 22 Kawa chyawm gaw shi a mayam ni hpe, Reng htum ai hpun palawng alawan la sa nna, shi hpe jahpun ya maru; shi a lata hta lachyawp chyawp ya maru; lagaw hta kyepdin din ya maru; 23 kawn tawn ai dumsu kasha mung la sat mu: shingrai anhte kabu gara ai hte lusha nga ga: 24 hpa majaw nga yang, ndai ngai sha gaw si mat sai, ya bai hkrung sali ai; mat mat sai mung, ya bai mu la se ai, ngu mu ai. 25 Shingrai shanhte pyaw pyaw rai nga ma ai. Kasha kaba wa chyawm gaw yi e nga nga ai; dai de na wa nna nta du magang yang, chying bau dum ai hte ka manau ai nsen na wu ai; 26 dai rai nna, ma langai mi hpe shaga la nhtawm, dai kaning re ai rai nga ai, san yu wu yang, 27 dai ma gaw, Na nnau bai wa ra ai rai nna, nwa mung shi hpe a hkam a kaja sha hkapla lu wu ai majaw, kawn tawn ai dumsu kasha sat nu ai, ngu nna shi hpe tsun dan wu ai. 28 Dai na jang shi masin pawt nna, nhku de n shang wa hkraw ai. Shaloi shi a kawa pru sa nna, shi hpe sa nem wu ai. 29 Dai kasha chyawm gaw, Yu u, nde nlaw ning tup na a nchyang amu ngai galaw nna, nang tawn da ai hku ngai galoi mung n lai nngai: raitimung, nye jinghku ni hte pyaw pyaw rai nga na, nang lang mi muk bainam kasha langai mi pyi, ngai hpe n jaw yu ndai: 30 shawa num ni hte kanawn nna, na a sutrai ginlut shamat kau ai ndai na nsha wa bai wa jang chyawm gaw, kawn tawn ai dumsu kasha, shi a matu nang sat nit hka, ngu nna shi a kawa hpe htan wu ai. 31 Kawa gaw, Ngai sha e, nang gaw ngai hte rau tut tut anga nga ndai; nye a sutrai nga manga gaw, na a hkrai rai nga ai. 32 Raitimung, pyaw pyaw rai kabu gara mai nga ai; hpa majaw nga yang, ndai na nnau gaw si mat sai, ya bai hkrung ra ai: mat mat sai mung, ya bai mu la saga ai, ngu nna shi hpe nem wu ai, ngu mu ai.

Luka 16

16:1 Sape ni hpe mung shi tsun mu ai gaw, Sahti langai mi kaw kunhting wa langai mi nga ai; dai kunhting wa gaw madu a arai jai shamat kau ai rai nna, madu a man e mara sa shagun da mu ai. 2 Shaloi sahti wa gaw shi hpe shaga la nna, Ngai na ai, na a lam gaw kaning re ai rai ta? na a kunhting aya a jahpan laika dan yu e; ya kaw nna kunhting amu nang galaw lu na nitdai n rai, ngu wu ai. 3 Dai rai nna kunhting wa gaw, Ngai kaning rai na i? nye madu ngai hpe kunhting aya na jahkrat kau ni ai: ga htu ga chye na mung, ngai n di lu nngai; hpyi lu hpyi sha na mung, ngai kaya nngai: 4 ngai hpe kunhting aya na jahkrat kau yang, masha ni ngai hpe tinang a nta hta hkapla ra hkra, ngai kaning di na gaw, ya ngai chye se ai, nga nna shi a kraw hta myit la lu jang, 5 shi a madu a hka kap ai ni langai hte langai hpe shaga la nna, langai wa hpe, Nye a madu a hka nang kaw gade kap a ta? ngu nna san wu yang, dai wa gaw, Namman joi latsa kap nga nngai: ngu wu ai. 6 Shaloi kunhting wa gaw, Na a jahpan laika la nna, alawan dung let manga shi ngu nna ka da u, ngu wu ai. 7 bai kaga wa hpe, Nang kaw mung gade kap a ta? ngu nna san wu yang, dai wa gaw, Hkaulan mam dang latsa kap nngai, ngu wu ai. Kunhting wa gaw, Na a jahpan laika la nna, matsat shi ngu nna ka da u, ngu wu ai. 8 Dai n tara ai kunhting wa hpaji hte chye galaw ai majaw, madu gaw shi hpe shakawn wu ai: kaning rai nme law, ndai mungkan ga a kashu kasha ni gaw, tinang a amyu hta e, ahtoi a kashu kasha ni hta grau nna hpaji rawng ma ai. 9 Dai rai nna ngai nanhte hpe tsun made ga, n tara ai sutgan hte tinang a matu jinghku hku mu: shaloi she dai htum mat jang, shanhte gaw dinggrin anga nga ai nta hta, nanhte hpe hkapla na marin dai. 10 Amu kaji hta kangka re ai wa gaw, amu kaba hta mung kangka rai na ra ai: amu kaji hta n ding n man ai wa gaw, amu kaba hta mung n ding n man ga ai. 11 N tara ai sutgan hta pyi nanhte kangka n rai lu myit yang gaw, dai dingman ai sutgan hpe, nanhte hpe kadai mi kam ap ya na myit ta? 12 Masha wa a sutrai hta nanhte kangka n rai lu myit yang gaw, nanhte madu ang ai sutrai hpe, nanhte e kadai mi ap ya na rai ta? 13 Kadai shangun ma raitimung, madu lahkawng a amu gunhpai lu ai n rai: langai wa hpe shi ndawng nna, langai wa hpe tsawra na wu ai: shing n rai, langai wa hta machyu nna, langai wa hpe n kaw n law di na wu ai: nanhte gaw Karai Kasang a magam hta mung, mungkan a sutgan hta mung, rau n gun n hpai lu na myit dai, ngu mu ai. 14 Dai ga mahkra hpe, gumhpraw marin ai Hparishe ni na ma ai rai nna, shi hpe asawng asang ngu mu ai. 15 Dai rai nna Yesu gaw, Nanhte gaw masha ni a man e tinang hkum hpe dingman chye shadan ai ni rai myit dai; raitimung, Karai Kasang gaw nanhte a kraw lawng hpe chye ya nga ai: kaning rai nme law, masha e shagrau ai gaw Karai Kasang a man e matsat shabat rai nga ai. 16 Jep ai tara hte myihtoi ni a ga gaw, Yawhan du ai du hkra rai nga ai: dai kaw nna gaw Karai Kasang a mungdan a kabu gara shiga hkaw tsun nga ai rai nna, nlang hte gaw dai hta anin katut shang wa ma ai. 17 Jep ai tara hta na madin langai mi hten loi ai hta, lamu hte aga hten lai na grau loi nga ai. 18 Tinang a madu jan hpe jahka kau nna, num kaga la ai wa kadai mung, numshaw ai rai nga ai: madu wa jahka kau ai num hpe la ai wa mung, numshaw ai rai nga ai. 19 Lang mi na sahti langai mi gaw, hkyeng ai nba hte mani ai hpun palawng buhpun sumli nna, shani shanang pyaw pyaw ningngai nga ai. 20 Hkum ting kahpraw hpye ai Lazaru ngu ai hpyi sha ai wa langai mi hpe mung, 21 dai sahti wa sha ku hta na hkrat ai adaw ahkyep hta sha mayu nna, shi a chyinghka makau e sa tawn da mu ai: gwi ni mung shi a nma sa mata ya ma ai. 22 Shaloi dai hpyi sha ai wa si mat nna, lamu kasa ni gaw shi hpe Abraham a lahpyen hta woi bang da mu ai: sahti wa mung si wa nna, makoi mayang di dat mu ai. 23 Katsan ga e nachying nni nkri hkrum let shi mada yu nna, Abraham hpe mung, shi a lahpyen hta rawng ai Lazaru hpe mung, mu wu ai. 24 Shaloi shi gaw, Wa Abraham e, ngai hpe matsan dum le e; ngai gaw ndai wan grung ai hta nji nmu hkrum nga nngai majaw, Lazaru gaw shi a lata ndung hte ntsin kapruk sa nna, nye a shinglet madit katsi ya li ga, ngai hpang de shangun dat ru law, ngu nna hpyi jahtau wu ai. 25 Shaloi Abraham gaw, Sha e, nang gaw naw hkrung nga ai hte yang, na a ngamu ngamai lu la nitdai mung, Lazaru gaw dai hte yang tsin-yam tsindam hkrum nga ai mung, dum nga u; ya chyawm gaw shi nang e bran nga sai, nang mahtang gaw nji nmu hkrum nga nitdai. 26 Dai hta kaga, ndai yang nna nanhte hpang de rap sa mayu ai ni, n rap lu mu ga mung, dai yang nna anhte hpang de kadai n rap wa lu mu ga mung, anhte hte nanhte a lapran e sung la ai krung sinwa din nga ai, ngu nna htan wu ai. 27 Bai sahti wa gaw, Wa e, dai rai taw gaw, ngai nang hpe hpyi de ga, Ngai nau manga naw nga ma ai majaw, shanhte mung ndai nni nkri hkrum ai shara de n du mu ga, 28 shanhte hpe wa shadum shahprang na, Lazaru hpe nye wa nta de shangun dat ya e law, ngu nna hpyi wu ai. 29 Abraham gaw, Shanhte kaw Mawshe hte myihtoi ni nga ma ai: dai ni a ga madat mu ga, ngu wu ai. 30 Sahti wa gaw, N rai, Wa Abraham e; si ai ni hta na langai mi shanhte kaw bai wa yang gaw, shanhte myit malai lu na ma ai, ngu wu ai. 31 Abraham gaw, Mawshe hte myihtoi ni a ga shanhte n madat ma yang gaw, si ai ni hta na langai mi bai hkrung rawt wa raitimung, madat kam na ma ai n rai, ngu nna shi hpe htan wu ai, ngu nna shanhte hpe tsun mu ai.

Luka 17

17:1 Dai hta kaga shi gaw shi a sape ni hpe, Myit kataw shara n pru hkra gaw nnga lu ai: raitimung, myit kataw shara shapraw dat ai wa gaw, dingnye lu ai. 2 Dai wa gaw, ndai ma kaji langai mi hpe myit kataw shangun ai hte, shi a du hta htumrin lung noi nna, nammukdara hta jahkrat kau ai hkrum yang gaw, shi a matu grau mai nga ai. 3 Nanhte gaw tinang hkum dai sadi mu: na nhpu nnau wa shut hpyit yang, shi hpe daru sharin u: myit malai bai lu yang gaw, shi a mara dat ya u: 4 lani jan sha nang hpe sanit lang shut nhtawm, Ngai myit malai lu ni ai, nga nna sanit lang nang hpe bai kayin nem yang gaw, shi a mara dat kau ya u, ngu nna tsun mu ai. 5 Shaloi kasa ni gaw, Anhte a kamsham ai myit shalaw ya mi, ngu nna Madu hpe hpyi mu ai. 6 Shing nga jang Madu gaw, nanhte hta kamsham ai myit chyinghkrang tum daram rawng myit yang gaw, ndai labri hpun hpe, Hpun e, aru hte nawng baw nna nammukdara e sa tu nga u law, ngu yang, nanhte a ga madat na ra ai. 7 Hkauna galau ai, shing n rai sagu bainam rem ai mayam nga ai rai nna, dai mayam gaw hkauna pa de na du wa yang, dai wa hpe, Alawan wa dung nna shat sha ru, nga nna tsun na, nanhte hta kadai rai ta? 8 Dai mayam hpe mahtang, Ngai sha na shana shat hpajang u; ngai lusha ngut hkra nshang shingkyit kyit nna, ngai hpe galaw jaw e; dai ngut jang she nang lusha lu na ndai, ngu na wu ai, n rai ni? 9 Tsun matsun galaw ai a majaw, dai mayam hpe chyeju htang ai ga tsun ga myit ni? 10 Dai hte maren nanhte mung tsun matsun yawng hpe hkan shatup ngut jang she, Anhte gaw akyu n rawng ai mayam ni rai nga ga ai; galaw ra ai hpunda hte sha anhte shatup saga ai, ngu mu, ngu wu ai. 11 Ya Yerusalem mare de sa wa nga yang, shi gaw Samari mung hte Galile mung lapran hku ga sa wa ai. 12 Kahtawng langai mi de shang yang, manggang kap ai masha marai shi Yesu hpe hkap tau nna, 13 tsan tsan e tsap nga let, Madu, Yesu e, anhte hpe matsan dum la mi law, nga nna jahtau ma ai. 14 Yesu shanhte hpe mu jang, Nanhte a hkum hkinjawng ni kaw wa madun dan mu, ngu dat mu ai rai nna, shanhte wa nga yang pyi, sanpra mat ma ai. 15 Shanhte hta na marai langai mi gaw, tinang hkum sanpra mat sai mu chye jang, bai nhtang sa nna nsen kaba hte Karai Kasang hpe shagrau sha-a ai hte, 16 Yesu a lagaw nhpang e dingyawm dagup nna, shi a chyeju hpe shakawn ya wu ai: dai wa gaw Samari masha rai nga ai. 17 Dai rai nna Yesu gaw, Marai shi sanpra mat masai, n rai ni? marai jahku gaw kanang rai wa ma sata? 18 Ndai tsasam masha hta kaga, Karai Kasang hpe shagrau sha-a na, bai nhtang sa ai langai mi muk n nga a ni? nga nna san nhtawm, 19 dai wa hpe, Rawt wa nu; na a kamsham ai gaw nang hpe hkyela nitdai, ngu nna shi hpe tsun dat wu ai. 20 Karai Kasang a mungdan galoi du na lam, Hparishe ni san ma yang, shi gaw, Karai Kasang a mungdan du ai gaw myi hte yu nga nna, mu na n rai; 21 dai hte maren, Yu mu, nang e nga nga ai, wonang nga nga ai, nga nna mung tsun lu na ma ai, n rai: kaning rai nme law, Karai Kasang a mungdan gaw, nanhte a kata e rai nga ai, ngu nna shanhte hpe htan mu ai. 22 Sape ni hpe mung shi tsun mu ai gaw, Masha Kasha a nhtoi lani mi hpe nanhte hkrum kadup mayu na shani pru na ra ai, raitimung hkrum kadup lu na myit dai n rai: 23 dai nhtoi e masha ni gaw, Yu mu, wonang nga nga ai, Yu mu, nang e nga nga ai, nga nna nanhte hpe tsun ma timung, hkum pru, hkum hkan myit: 24 kaning rai nme law, lamu maga mi de na kalam ai myihprap gaw, lamu maga mi de du hkra htoi ala wa ai zawn, Masha Kasha gaw shi a nhtoi hta rai na ra ai. 25 Raitimung, dai garai n byin yang, shi gaw nni nkri law law hte, ndai aprat na ni a ndang kau ai, naw hkrum na rai nga ai. 26 Noa a ban e byin ai zawn, Masha Kasha a nhtoi hta mung byin na ra ai. 27 Noa gaw dai shanghpaw li kata de shang nna, sha-u ing wa let nlang hte hpe yeng seng kau ai nhtoi du hkra, masha ni gaw lu let sha let num la num ya rai let, nga nga ma ai. 28 Lawt a ban hta e mung dai hte maren rai nga ai: masha ni gaw lu let sha let, mari let dut let, gat hkai let, dum nta gap let nga nga ma ai: 29 raitimung, Lawt gaw Sodom mare na pru wa ai nhtoi hta, lamu na wan hte kan marang htu nna, nlang hte hpe yeng seng kau mu ai: 30 dai Masha Kasha a danpru ai nhtoi hta mung, dai hte maren rai na ra ai. 31 Dai nhtoi hta e, nta magaw e nga ai wa gaw, tinang a arai nta nhku e nga ai rai yang gaw, dai rai la na hkum yu wa nu ga: hkauna pa e nga ai wa mung, dai hte maren nta de hkum nhtang wa nu ga. 32 Lawt a madu jan hpe dum nga mu. 33 Tinang a asak jahkrung da na tam ai wa kadai mung, asak sum na ra ai; asak sum ai wa chyawm gaw, asak jahkrung la na wu ai. 34 Nanhte hpe ngai tsun made ga, Dai shana hta e yupra langai mi hta, lasha lahkawng rau nga na ma ai; langai mi gaw woi la ai hkrum nna, langai mi gaw hti nga mat na ra ai. 35 Numsha lahkawng htumrin hta rau rin nga na ma ai; langai mi gaw woi la ai hkrum nna, langai mi gaw hti nga mat na ra ai, ngu mu ai. 37 Shaloi sape ni gaw, Madu e, kanang e byin na ra ta? ngu nna shi hpe htan mu yang, shi gaw, Mang taw ai kaw, lang da ni mung hpawng nga na mara ai, ngu nna shanhte hpe tsun mu ai.

Luka 18

18:1 Tutnawng e akyu a hpyi nga mu ga hte myit n hten malu ga, shi shanhte hpe ga shadawn tsun mu ai gaw, 2 Mare langai mi hta, Karai Kasang hpe mung n hkrit masha hpe mung n agam ai tara agyi langai mi nga ai. 3 Dai mare hta gaida jan langai mi mung nga ai; shi gaw dai tara agyi wa kaw sa nna, Ngai hte amu rawng ai wa hpe mara hte maren tai ya e, nga nna a tsun nga ai. 4 Raitimung, tawng marang wa mi na hkra, shi n jeyang ya hkraw ai: dai hpang shi gaw, Ngai Karai Kasang hpe n hkrit, masha hpe mung ngai n agam nngai, raitimung, 5 gaida jan ndai ngai hpe a shatsang nga ai majaw, shi hpang maga ngai tara dara ya na nngai; dai n rai yang shi ya sa sa rai nna, ngai hpe myit jahtum na ra ai, nga nna shi a kraw hta myit la wu ai, ngu mu ai. 6 Dai rai nna dai Madu gaw, N ding n man ai tara agyi wa tsun ai ga hpe myit la mu: 7 Karai Kasang gaw matsan dum lama nga ai rai nna, shi hpe shani shana hpyi jahtau nga ai, shi a lata la ai ni a hpang maga de, tara n dara ya ai, nga na wu ni? 8 Nanhte hpe ngai tsun made ga, Shanhte hpang maga alawan tara dara ya na wu ai. Raitimung, Masha Kasha du sa ai nhtoi hta, ndai mungkan ga ntsa e makam masham nga nga ai gaw, mu lu na a kun? ngu mu ai. 9 Tinang hkum hpe dingman dum nna, masha kaga hpe hpa n nawn ai ni nkau mi hpe, ndai ga shadawn mung shi tsun mu ai gaw, 10 Masha lahkawng akyu hpyi na nga, nawku Htingnu de lung wa ma ai; langai mi gaw Hparishe, langai mi gaw kanghta ai wa, rai ma ai. 11 Hparishe wa gaw tsap nna, Karai Kasang e, ngai gaw hpya lu hpya sha ai, n ding n man ai, num shut numshaw re ai masha gale ni hte n bung nngai hta n-ga, ndai kanghta ai wa zawn pyi n rai nngai majaw, ngai nang hpe shakawn nngai: 12 bat mi na nhtoi hta lahkawng lang ngai lusha gam nga nngai; ngai lu la mala hta na htamshi hta htammi alu jaw nngai, nga nna shi hkrai kaga rai hpyi wu ai. 13 Kang hta ai wa chyawm gaw, tsawmra naw tsan kaw tsap nna, lamu de pyi n wam mada ai; shi a sinda adup let, Karai Kasang e, ndai yubak kap ai wa ngai hpe matsan dum la e law, ngu nna hpyi wu ai. 14 Nanhte hpe ngai tsun made ga, kanghta ai wa gaw Hparishe wa hta dinghpring ai grau lu la nna, nta de bai yu wa nu ai: kaning rai nme law, tinang hkum shagrau ai wa kadai mung grit mat ai hkrum na ra ai; tinang hkum shagrit ai wa chyawm gaw, shagrau ai hkrum na ra ai, ngu mu ai. 15 Ma kaji ni hpe mung ahtawk ya mi ga, nga nna shi hpang de woi sa ma ai: sape ni gaw dai mu jang hkap daru kau mu ai. 16 Raitimung Yesu gaw ma kaji ni hpe shaga let, Ma ni hpe ngai hpang de sa shangun maru; shanhte hpe hkum gang shadang myit: kaning rai nme law, Karai Kasang a mungdan gaw, dai zawn re ai ni a mungdan rai nga ai. 17 Nanhte hpe ngai teng teng tsun made ga, Kadai raitimung, Karai Kasang a mungdan hpe, ma kaji zawn n hkapla ai wa gaw, dai hta e gaja wa n shang lu na ra ai, ngu mu ai. 18 Aya lu ai masha langai mi mung shi hpe, Mai kaja ai sara e, n htum n wai asak a sali wunli lu la hkra ngai hpa mi galaw na rai ta? ngu nna shi hpe san wu ai. 19 Yesu gaw, Ngai hpe, mai kaja ai, hpa rai nga n ta? Karai Kasang hta kaga, mai kaja ai gaw kadai mung n nga ai. 20 Jep ai tara hta, Masha num hkum shaw, masha hkum sat, hkum lagu, nteng n man ai sakse hkum hkam, nnu yan nwa hpe hkungga lara di u, nga ai ga hpe nang chye nga n dai, ngu nna shi hpe htan wu ai. 21 Dai wa gaw, Dai yawng mayawng hpe brang ram kaw nna ngai hkan se ai, ngu wu ai. 22 Yesu gaw dai ga na jang, Lam langai mi nang naw ra nga ndai: nang lu malu dut kau nna matsan mayan ni hpe karan jaw u; shingrai jang she, sumsing lamu ntsa e nang sutgan lu na rin dai: ngai kaw mung sa hkannang rit, ngu nna shi hpe tsun wu ai. 23 Dai wa gaw dai ga na jang, nachying myit yawn mat ai: kaning rai nme law, shi gaw grai lu su ai wa rai nga ai. 24 Yesu gaw dai wa shingre ai mu jang, Sut su ai ni gaw Karai Kasang a mungdan hta nachying shang yak la ahka gaw! 25 Lu su ai wa Karai Kasang a mungdan de shang loi ai hta, gawla-u gaw samyit na hku gale na grau loi nga ai, ngu wu ai. 26 Ga na ai ni gaw, Dai rai yang gaw, kadai wa mi hkyehkrang la ai kaw du lu na a ta?nga ma ai. 27 Shaloi shi gaw, Masha n dang di lu ai lam ni hpe, Karai Kasang gaw dangdi lu nga ai, ngu nna tsun dan mu ai. 28 Shaloi Petru gaw, Yu u, anhte gaw lu malu kau da nna, nang kaw hkannang nga ga ai, ngu wu ai. 29 Dai rai nna Yesu gaw, Nanhte hpe ngai teng teng tsun made ga, Karai Kasang a mungdan majaw, tinang nta, madu jan, kahpu kanau, kanu kawa, kashu kasha, kau da ai wa kadai mung, 30 ndai prat hta htam law law wa n lu la ai, n nga na hta kaga, htawmhpang prat e mung, n htum n wai asak n lu la ai gaw, n nga na re ai, ngu nna shanhte hpe tsun mu ai. 31 Shaloi shi gaw sape shi lahkawng hte hpe shaga la nna, Yu mu, Anhte Yerusalem mare de lung wa nga ga ai; myihtoi ni a lata hte ka da mada gaw, Masha Kasha hta dik wa na ra ai. 32 Kaning rai nme law, maigan amyu ni a lata de ap kau na, asawng asang di ai, aroi arip re ai, mayen mahtaw bun ai, shi hkrum na ra ai: 33 shi hpe anu kayat nhtawm, sat kau na maru ai: masum ya nhtoi hta e shi bai hkrung rawt na ra ai, ngu nna shanhte hpe tsun mu ai. 34 Dai lam langai mi hpe mung shanhte n chye na ma ai: dai ga gaw shanhte a man e makoi magap nga ai rai nna, tsun dan ai lam ni hpe n dum n hten mu ai. 35 Ya shi gaw Yerihko mare de du magang yang, myikyaw ai masha langai mi gaw lam makau e hpyi sha let dung nga ai rai nna, 36 masha wunawng wuwa lai sa wa ai hpe na jang, dai kaning re ai rai nga ai hpe, san yu wu ai. 37 Shaloi hkannang ai ni gaw, Nazaret mare na Yesu lai sa wa nga ai, ngu nna shi hpe tsun dan mu ai. 38 Dai na jang shi gaw, Dawi a kasha Yesu e, ngai hpe matsan dum la e law, ngu nna hpyi jahtau wu ai. 39 Shawng e sa wa nga ai ni gaw, atsin sha nga na dai wa hpe jet kau mu ai. Shi mahtang, Dawi a kasha e, ngai hpe matsan dum la e law, nga nna grau jahtau shaja wu ai. 40 Dai rai nna Yesu gaw tsap da nna, dai wa hpe shi hpang de woi sa na, tsun wu ai. Myikyaw ai wa shi makau du jang, Yesu gaw, 41 Ngai nang e hpa di ya na, nang ra n ta? ngu nna shi hpe san wu yang, dai wa gaw, Madu e, nye myi mu li ga law, ngu wu ai. 42 Shaloi Yesu gaw, Na myi mu lit ga; na a kamsham ai gaw nang hpe shamai ya nitdai, ngu nna shi hpe tsun wu ai. 43 Dai wa gaw shaloi jang myi mu lu nna, Karai Kasang hpe shagrau sha-a let shi kaw hkannang wu ai: hkannang ai ni nlang hte gaw dai lam hpe mu jang, Karai Kasang hpe shakawn kungdawn nga ma ai.

Luka 19

19:1 Shaloi Yesu gaw, Yerihko mare de shang nna ga sa wa nga ai. 2 Ya Zake mying ai kanghta agyi langai mi nga ai; dai wa gaw sut su ai wa rai nga ai; 3 Yesu gaw kadai wa re ai, shi mu mayu nna tam wu timung, masha wunawng chyat nga ai hte, shi gaw hkum nem ai masha rai nga ai majaw, n mu lu wu ai. 4 Dai rai nna shi hpe mu lu hkra, shi shawng de gat sa nhtawm, Yesu lai sa wa na ra ai lam makau na lakum hpun hta lung dung nga ai. 5 Dai de du yang Yesu gaw dap mada yu nna, Zake e, alawan yu wa rit; dai ni ngai na a nta e rai na nngai, ngu nna shi hpe tsun wu ai. 6 Shaloi shi alawan yu wa nna, kabu gara ai hte Yesu hpe hkap hkalum la wu ai. 7 Nga manga ni gaw dai mu jang, shi gaw yubak kap ai wa langai mi kaw shang manam sai, nga nna aput angun nga ma ai. 8 Zake chyawm gaw rawttsap nna, Madu e, nye a sutrai ka-ang hkup ngai matsan mayan ni hpe karan jaw we ai: langai ngai hpe mawp sha kau ai rai yang gaw, htam mali ngai bai wa na we ai, ngu nna Madu hpe tsun wu ai. 9 Shaloi Yesu gaw, Dai ni ndai nta hta hkyehkrang la ai lam pru sai: kaning rai nme law, shi mung Abraham a kasha rai nga ai. 10 Masha Kasha gaw mat mat ai ni hpe, hkan tam nna hkyehkrang la na du sa ai rai nga ai, ngu nna Zake hpe tsun wu ai. 11 Dai lam ni hpe shanhte madat nga ma yang, Yesu gaw Yerusalem mare de du na ni sai majaw mung, Karai Kasang a mungdan gaw alawan danpru magang ra ai, nga nna myit shajang nga ma ai majaw mung, shi ga shadawn hte bai tsun bungjat wu ai gaw, 12 Arawng lu ai masha langai mi gaw, mungdan lu la nna dai hpang bai wa na nga, tsan ai mung de sa na maw nga ai. 13 Shaloi shi gaw shi a mayam marai shi shaga la nhtawm, gumhpraw joi shi hpra shanhte hpe ap ya da nna, ngai bai wa ai du hkra ndai hte hpaga ga mu, ngu nna shanhte hpe hkangda mu ai. 14 Shi a mung masha ni chyawm gaw, shi hpe ndawng da mu ai rai nna, Ndai wa anhte a ntsa e up nga na, anhte n ra ga ai, ngu nna shi a hpang e kasa hkan shangun dat mu ai. 15 Dai wa gaw mungdan lu la nna bai du wa yang, gumhpraw ap ya da sai mayam ni, hpaga ga nna amyat gade kap masai chye lu hkra, shanhte hpe shaga na, tsun dat wu ai. 16 Dai rai nna shawng na wa gaw sa du jang, Madu e, na a gumhpraw joi mi hta, joi shi kap sai, ngu nna tsun wu ai. 17 Shaloi Madu gaw, Ara, kaja ai mayam e, nang gaw amu kaji hta kangka rai nitdai majaw, mare shi a ntsa e uphkang nu, ngu nna shi hpe tsun wu ai. 18 Hpang na wa mung sa nna, Madu e, na a gumhpraw joi mi hpe, joi manga shapraw se ai, ngu wu ai. 19 Madu gaw dai wa hpe mung, Nang mare manga a ntsa e uphkang nu, ngu wu ai. 20 Bai langai wa mi gaw sa nna, Madu e, yu u, na a gumhpraw ndai rai nga ai, hpajet hte ngai makai da nngai: 21 kahti kari re ai wa nang rai nga ndai majaw, ngai nang hpe hkrit nngai: n tawn n da ai arai nang magawn la nna, n gat n hkai ai kaw na, nang dan la ga ndai, ngu wu ai. 22 Shaloi madu gaw, N hkaw n shawp ai mayam e, na a n-gup na ga hku hkan nna ngai nang hpe jeyang na de ai: ngai gaw kahti kari re ai wa rai nga nngai hte, n tawn n da ai arai ngai magawn la nna, n gat n hkai ai kaw na dan la ga nngai, nang chye ndai rai yang gaw, 23 nye a gumhpraw hpe ngai bai wa yang arang hte atu lu la hkra, gumhpraw boi ai shara e hpa rai n bang da n ta? ngu nna shi hpe tsun wu ai. 24 Makau e tsap nga ai ni hpe mung, Dai gumhpraw joi mi shi kaw na dawm la nna, joi shi lu ai wa hpe jaw jat mu, ngu wu ai. 25 Dai ni gaw, Madu e, shi gaw joi shi lu sai, ngu mu ai. 26 Ngai nanhte hpe tsun made ga. Lu ai wa kadai hpe mung, naw jat jaw na rai nga ai; n lu n lawm ai wa kaw na chyawm gaw, shi lu ai made hpe pyi naw la kau ya na rai nga ai. 27 Dai hta kaga, shanhte a ntsa e ngai hpe up shangun na n ra ai, nye a gumlau ni hpe, nang de dun wa nna, nye a man e sat kau maru, ngu nna hkang dat mu ai, ngu wu ai. 28 Dai lam ni hpe tsun ngut jang, shi gaw shawng de sa wa let, Yerusalem mare de lung wa ai. 29 Ya, Tsanlun ngu ai bum na Bethpage kahtawng hte Behtani kahtawng de du magang jang, shi sape lahkawng shangun dat nna, 30 Nan a shawng na kahtawng de sa ma su; dai de shang jang, gade e lang mi muk garai n jawn yu ai lawze kasha dun nga ai hpe, nan mu na mu ai: dai hpe raw nhtawm dun wa marit: 31 masha langai ngai, Dai hpa di raw myit ta? nga nna nan hpe san dam yang, Madu ndai hpe ra ai da, ngu nna htan mu, ngu matsun dat mu ai. 32 Shangun dat ai yan gaw sa du nna, shi tsun dat ai hte maren sa mu ma ai. 33 Dai lawze kasha hpe raw nga yang, madu ni gaw, Dai lawze kasha hpe hpa di raw mu ta? ngu nna shan hpe san mu ai. 34 Shan gaw, Madu ndai hpe ra ai da, ngu mu ai. 35 Shaloi shan gaw dai lawze kasha hpe Yesu hpang de dun wa nna, shanhte a hpun nba mara nhtawm, Yesu hpe shajawn mu ai. 36 Shingrai shi jawn sa wa nga yang, shanhte gaw tinang ni a hpun nba ni hpe lam e hkan nep ya ma ai. 37 Ya mare du wa magang yang na Tsanlun bum kadawng yu ai kaw du yang, sape hpung masha nlang hte gaw, shanhte mu yu sai magam atsam amu yawng a majaw, kabu gara let nsen kaba hte Karai Kasang hpe shakawn kungdawn tsun ma ai gaw, 38 Madu a amying ningsang hte Du sa ai Hkawhkam wa gaw, a nga ai law; Sumsing lamu e ngwi pyaw ai hte, Tsawhtum ai shara e hpung shingkang rawng u ga law, nga ma ai. 39 Dai rai nna, dai hpung kata na Hparishe ni nkau mi gaw, Sara e, na a sape ni hpe daru kau u, ngu nna shi hpe tsun ma ai. 40 Shaloi Yesu gaw, Nanhte hpe ngai tsun made ga, Ndai ni atsin sha nga ma yang gaw, nlung ni jahtau na rai nga ai, ngu nna htan wu ai. 41 Ya dai de ni wa nna mare hpe mu wu yang, de a matu shi hkrap nna, 42 Mare nang e, ngwi pyaw ai lam hpe dai ni na nhtoi e nang chye lu wu taw gaw law! ya chyawm gaw dai lam ni hpe na a man e makoi da nga ai. 43 Kaning rai nme law, nang hpang de kawan katsan yu sa ai aten ahkying hpe nang n dum n chye ndai majaw, nang hpe hpyen ai ni gaw na a grupyin e gaduk dap jung nna wang da let, nang hpe maga shagu pat shadang nhtawm, 44 nang hpe mung, na a kashu kasha ni hpe mung, ga hte azat kayau kau ai nhtoi gaw, nang kaw pru na ra ai rai nna, nang hta nlung langai mi a ntsa e nlung langai mi pyi n ngam mara lu ai rai na ra ai, ngu wu ai. 45 Ya shi gaw nawku Htingnu de shang nna, rai dut ai ni hpe, Nye a nta akyu hpyi ai nta rai na ra ai, nga nna ka da nga timung, 46 nanhte gaw ndai hpe damya lungpu shatai myit dai, ngu nna shanhte hpe shaden kau mu ai. 47 Shi gaw shani shanang nawku Htingnu e sharin shaga let nga nga ai. Hkinjawng kaba ni, laika ka ai sara ni hte, mung a agyi salang ni mahtang gaw, shi hpe sat kau lu na lam tam ma ai: 48 raitimung, shawa masha ni nlang hte gaw, shi a sharin shaga ai ga hta madat noi nga nga ma ai majaw, kaning di na lam mung, n mu mu ai.

Luka 20

20:1 Dai nawku Htingnu hta, mung masha ni hpe sharin shaga nga ai hte kabu gara shiga hkaw tsun nga ai nhtoi langai mi hta, hkinjawng agyi ni, laika ka ai sara ni hte agyi salang ni gaw, shi kaw sit sa nna, 2 Nang gaw hpa ahkang hte ndai amu ni hpe galaw nga n ta? ndai ahkang nang hpe kadai wa jaw a ta? anhte hpe tsun dan mi, nga nna shi hpe tsun ma ai. 3 Shaloi shi gaw, Ngai mung nanhte hpe lama mi san made ga, nanhte htan ya ma la: 4 Yawhan a baptisma lam gaw, lamu de na rai ni? shing n rai, masha hta na rai ni? ngu nna shanhte hpe san mu ai. 5 Shanhte gaw myit yu nna, Lamu de na re ai, anhte ngu yang mung, Dai rai yang gaw, hpa rai shi hpe n kam myit ta? nga nna shi tsun na ra ai: 6 Masha hta na re ai, ngu yang mung, Yawhan gaw myihtoi re ai, nga nna mung masha ni nlang myit kam nga ma ai majaw, anhte hpe nlung hte kabai sat na ma ai, nga nna jawm myit la nhtawm, 7 Kanang na re ai gaw anhte n chye ga ai, ngu nna htan mu ai. 8 Shaloi Yesu gaw, Ndai amu ni hpa ahkang hte ngai galaw nngai gaw, ngai mung nanhte hpe n tsun dan na nngai, ngu nna shanhte hpe tsun mu ai. 9 Dai shaloi e mung masha ni hpe ndai ga shadawn hte shi tsun wu ai gaw, Masha langai mi tsabyi sun hkai sharam da nna, sun galaw ai masha hpe boi ya da nhtawm, kaga mung de na na wa sa nga mat ai. 10 Aten du jang, sun na asi hta na shi hpe jaw maru ga, nga nna sun galaw ai ni hpang de mayam langai mi shangun dat wu ai: sun galaw ai ni gaw dai wa hpe anu kayat nna, kaman dat dat mu ai. 11 Bai, mayam kaga hpe shi shanhte hpang de shangun dat wu ai: dai wa hpe mung shanhte anu kayat nna kaya kahpa di zingri nhtawm, kaman dat dat mu ai. 12 Bai masum lang ngu na hta, mayam langai mi bai shangun dat wu ai: dai wa hpe mung aje ahpye di nhtawm, shapraw kau mu ai. 13 Shaloi tsabyi sun madu wa gaw, Ngai kaning di na i? tsawra ai, ngai sha hpe, ngai shangun dat yu na we ai: shi e gaw shanhte hkrit hkungga na ma ai nhten, nga nna tsun ai. 14 Sun galaw ai ni gaw dai kasha wa hpe mu jang, Ndai wa gaw sali wunli dagraw na wa rai nga ai; dai sali wunli anhte lu la ya hkra, shi hpe sat kau gaw, nga nna shada da bawng la nhtawm, sun shinggan de shi hpe shapraw nna, sat kau mu ai. 15 Dai majaw tsabyi sun madu gaw shanhte hpe kaning di na wu ta? 16 Shi sa du nna, dai sun galaw ai ni hpe sat kau nhtawm, dai sun masha kaga hpe htawt shap ya na ru ai, ngu mu ai. Dai ga na ai ni gaw, Shing n rai u ga, nga ma ai. 17 Shaloi shi gaw shanhte hpe mada yu let, Dai rai yang gaw, Wahpang gaw ai ni lata kau ai nlung gaw, Ningjut jahtum na nlung tai wa sai, nga nna ka da ai ga gaw, hpa nga ai rai ta? 18 Dai nlung hta hkrat ai wa kadai mung, daw hten na ra ai; gade a ntsa e raitimung, dai nlung hkrat bun yang gaw, dai wa gaw ayun ayaw mani mat na ra ai, ngu nna tsun wu ai. 19 Dai ga shadawn hpe laika ka ai sara ni hte hkinjawng agyi ni hpe sha-ang nna tsun ai gaw shanhte chye ma ai majaw, dai ahkying hta pyi shi hpe rim la na maw ma ai, raitimung, mung masha ni hpe hkrit nna nga mat ma ai. 20 Dai rai nna shanhte gaw shi hpe gyam yu ai hte, mung up du hte ahkang aya lu ai munggyi wa kaw, shi hpe ap kau lu na matu, shi a ga hta mara shagun na lam mu hkra, dingman hpyi hpun ai kin-yu masha shangun dat ma ai. 21 Dai ni gaw, Sara e, nang gaw ding dingman man tsun sharin ndai hte, masha a myiman hpe n tau yu ai sha, Karai Kasang a lam hpe tengman ai hku sharin shaga ndai gaw, anhte chye ga ai: 22 anhte gaw Kehta hkawhkam hpe hkansi mai bang ga ni? n mai bang a ni? ngu nna shi hpe san yu mu ai. 23 Raitimung, shi gaw dai ni a myit magaw ai hpe chye ya wu ai rai nna, shanhte hpe, 24 Gumhpraw lap mi ngai hpe madun yu mi; gade a sumla hte masat laika kap nga a ta? ngu nna htan mu yang, shanhte gaw, Kehta a sumla hte masat rai nga ai, ngu mu ai. 25 Shaloi shi gaw, Dai rai yang gaw, Kehta hte seng ai hpe gaw, Kehta hpe ya mu: Karai Kasang hte seng ai hpe mung, Karai Kasang hpe ya mu, ngu nna shanhte hpe tsun mu ai. 26 Shanhte gaw, mung masha ni a man e shi a ga hta mara n mu ma ai hte, shi htan ai ga a majaw mau nna, atsin sha nga ma ai. 27 Dai shaloi, Bai hkrung rawt wa na lam n nga ai, nga nna ndang ga ai Saduke ni nkau mi gaw shi kaw sa du nna, 28 Sara e, num lu ai kahpu wa, kashu kasha n kap ai si mat yang gaw, kahpu a gaida hpe kanau wa hta nna, kahpu a matu mara shachyaw u ga, nga nna Mawshe gaw anhte hpe ka da ya ma ni ai. 29 Ning re ai yan nau ni marai sanit rai nga ma ai: shawng na wa gaw num la nna, matu mara n kap ai, si mat wa ai; 30 hpang na wa mung, masum ngu na wa mung, dai kahpu a gaida hpe hta ma ai: 31 dai zawn marai sanit du hkra matu mara n kap ai hkrai, si mat wa ma ai: 32 hpang jahtum e num dai mung si mat wa ai. 33 Dai rai nna, dai bai hkrung rawt ai hta, dai numsha gaw dai ni hta na, gade a madu jan mahtang tai na ra ta? kaning rai nme law, marai sanit a madu jan shi tai yu sai, ngu nna shi hpe san yu mu ai. 34 Shaloi, Yesu gaw, Ndai dinghta masha ni gaw, htinggaw rawn ai hte, num la num ya rai ma ai: 35 wora katsan prat hte si ai kaw na bai hkrung rawt wa ai de du ging ai ni chyawm gaw, htinggaw rawn ai hte num la num ya ngu ai n nga ma ai: 36 dai ni gaw sihkrung sihtan ngu ai htawmhpang e n hkrum lu masai rai nna, lamu kasa ni zawn rai wa ai hte, bai hkrung rawt ai a kashu kasha ni rai ma ai majaw, Karai Kasang a kasha ni rai nga ma ai. 37 Mawshe pyi dai Madu hpe, Abraham a Karai Kasang, Isak a Karai Kasang, Yaku a Karai Kasang nga nna tsun ai ga hte, si ai ni bai hkrung rawt ai lam dai singwum hte seng nna ka da ai hta, madun da nga ai. 38 Karai Kasang chyawm gaw si nga ai ni a Karai Kasang n rai, hkrung nga ai ni a Karai Kasang she rai nga ai: yawng mayawng hte gaw, shi a man e hkrung nga ma ai, ngu nna shanhte hpe htan mu ai. 39 Shaloi laika ka ai sara ni nkau mi gaw, Sara e, nang gaw rai la ai hku tsun nitdai, nga nna htan ma ai. 40 Kaning rai nme law, dai ni gaw shi hpe hpa lam mung bai n san wam manu ai. 41 Shaloi shi gaw shanhte hpe, Hkristu gaw Dawi a kasha re ai, nga nna shanhte kaning rai tsun lu nga ma ta? 42 Kaning rai nme law, Dawi shi nan, Dai Madu nye a madu hpe tsun wu ai gaw, 43 Na a gumlau ni hpe, na a lagaw nhpang e, lagaw kabye lahkum ngai shatai kau ai du hkra, Nye a hkra maga de naw dung nga u, nga ai, nga nna Shakawn Kungdawn Laika hta tsun nga ai, 44 Dai rai nna Dawi gaw, Hkristu hpe, Madu ngu wu ai rai yang gaw, shi a kasha kaning rai nme rai na rai nga a ta? ngu nna tsun mu ai. 45 Masha nlang hte na hkra sape ni hpe shi tsun mu ai gaw, 46 Laika ka ai sara ni hpe sadi nga mu: shanhte palawng galu buhpun let hkawm sa mayu nna, gat hkan shachyen ai hte, tara jawng hkan na reng grau ai tingnyang ni, poi hkan na reng grau ai dung shara ni hta dung na sharawng ai hta n-ga, 47 gaida gaina ni a nta ni hpe hpya lu hpya sha nna, hpyi hpun ai hte galu galang akyu hpyi ma ai: dai ni gaw dawdan kau ai grau nna hkrum na mara ai, ngu wu ai.

Luka 21

21:1 Dai shaloi shi dap mada yu nna, alu sumpu hta alu bang shajang nga ma ai lu su ai ni hpe mu wu ai. 2 Magri dingsen lap lahkawng sha bang ai matsan mayan re ai gaida jan langai mi hpe mung shi mu wu ai rai nna, 3 Nanhte hpe ngai teng teng tsun made ga, ndai matsan mayan re ai gaida jan gaw, shanhte yawng hta grau law bang nu ai: 4 kaning rai nme law, dai ni nlang hte gaw tinang a n taw n tsang lu ai hta na jan ai hpe, alu hta bang dat ma ai: shi chyawm gaw, shi a matsan mayan re ai hta na asak bau na hte yawng bang dat nu ai, ngu wu ai. 5 Dai nawku Htingnu gaw reng hkik ai nlung hte mung, alu ni hte mung, kumhpa mawn sumli da ai rai nga ai, nga nna nkau mi tsun ma yang, shi gaw, 6 Ndai nanhte mu nga ai arai ni gaw, n run n hpya kau ai, nlung langai mi a ntsa e langai mi n mara nga lu na nhtoi du na ra ai, ngu mu ai. 7 Shing nga jang shanhte gaw, Sara e, dai rai yang gaw, dai galoi ai me rai na ra ta? dai byin na ni wa magang jang, hpa kumla danpru na ra ta? ngu nna shi hpe san mu ai. 8 Shaloi shi gaw, Nanhte hkalem kau ai n hkrum myit ga, sadi nga mu: kaning rai nme law, masha law law wa nye a amying hte paw pru nna, Ngai gaw dai wa rai nga nngai, ahkying mung du ra ai, nga nna tsun na mara ai: shanhte a hpang hkum hkannang myit. 9 Hpyen gasat ai hte gumlau rawt ai lam na yang, hkum hkrit hkum kang myit: dai lam ni gaw shawng byin lu na rai nga ai: raitimung, jahtum ai gaw, dai shaloi jang, rai na n rai, ngu mu ai. 10 Bai shi shanhte hpe tsun mu ai gaw, Amyu mi hte amyu mi, mung mi hte mung mi shada da gumlau hkat na mara ai; 11 nnang nawn kaba wa ai mung, shara kaga kaga hta e ana zinli wa ai hte hku hku wa ai mung, byin na ra ai: sumsing lamu de na hkrithpa hte lamik kumla kaba mungdan pru na ra ai. 12 Raitimung, dai lam yawng garai n byin yang, masha ni gaw nanhte hpe rim la nna, zingri zingrat di nhtawm, tara jawng ni hte htawng ni hta ap kau na myit dai hte, nye a amying majaw hkawhkam ni hte du ni kaw sa bang kau ai hkrum na marin dai. 13 Shingre ai hte, nanhte a matu, sakse hkam lu na lam, pru na ra ai. 14 Dai re ai majaw, kaning ngu nna hkap tsun htan na, nga nna shawng e myit n htang da na hpe, kraw e shatawng da mu: 15 kaning rai nme law, nanhte a gumlau maga na ni nlang, n hkap htang lu hkra, ngai nanhte hpe n-gup ga hte hpaji jaw na made ai. 16 Raitimung, nanhte gaw kanu kawa ni kahpu kanau ni, mayu dama ni hte jinghku jing-yu ni e pyi, ap kau ai hkrum na marin dai: shanhte gaw nanhte hta na nkau mi hpe mung, sat kau shangun na mara ai: 17 nye a amying majaw masha nlang hte a ndawng n yawt ai, nanhte hkrum na marin dai. 18 Raitimung, nanhte a kara singgawng langai mi pyi, hten lu na n rai. 19 Nanhte gaw hkam sharang ai hte asak wenyi jahkrung la lu na marin dai. 20 Yerusalem mare hpe hpyen luksuk ni hte wang kawan da ai hpe, nanhte mu myit yang chyawm gaw, dai mare htenbya na, ni wa ra ai gaw, dum chye mu. 21 Dai shaloi e, Yuda mung hta e nga ai ni gaw, bum lang de hprawng pru mu ga; mare kata e nga ai ni gaw, pru wa mu ga; mare ginwang hkan e nga ai ni mung, mare kata de hkum shang mu ga: 22 kaning rai nme law, ka da mada yawng shadik na matu, dai nhtoi ni gaw, matai htang na nhtoi ni rai na ra ai. 23 Dai nhtoi hte hta na-um nasin re ai ni hte ma chyu naw chyu ai ni gaw nachying yak na mara ai; kaning rai nme law, ndai mung a ntsa e kyindut kaba, ndai amyu a ntsa e pawt bu ai ari, du na ra ai. 24 Shanhte gaw ri nhtu e sat kau hkrum ai hte, amyu shagu ni e rim woi mat wa ai hkrum na mara ai: maigan amyu ni a nhtoi dik wa ai du hkra, Yerusalem gaw maigan amyu ni e kabye dip da ai hkrum na ra ai. 25 Dai shaloi e jan, shata, shagan ni hta lamik kumla danpru na ra ai, nammukdara hte hkaleng ni a wu kadu ai nsen majaw, ga ntsa e, mung masha amyu ni myitmau ai hte rutsang hkrum na mara ai: 26 masha ni gaw mungkan ga e byin wa na ra ai amu ni a lam hpe myittau nna hkrit wa ai majaw, htan mat na mara ai: kaning rai nme law, sumsing lamu a atsam ni gaw gari wa na mara ai. 27 Dai shaloi e Masha Kasha gaw, daru magam hte hpung shingkang kaba hte nawng sumwi hta du sa ai hpe, shanhte mu na mara ai. 28 Dai lam ni byin hpang wa jang, baw sharawt mada yu mu: kaning rai nme law, nanhte a hkrang shaw la ai lam du na ni wa ra ai. 29 Shi shanhte hpe ga shadawn hte naw tsun mu ai gaw, Maihpang hpun hte, hpun yawng hpe yu mu: 30 lap hkalung prut wa ai mu yang, nlum ta ni wa ra ai, nga nna nanhte dai mu chye myit dai. 31 Dai hte maren, dai lam ni byin hpang wa ai hpe nanhte mu myit yang, Karai Kasang a mungdan du ra ai hpe, chye na nga mu. 32 Nanhte hpe ngai teng teng tsun made ai gaw, Ya pra nga ai ndai amyu masha ni garai n lai mat ma yang, dai lam yawng mayawng hte byin mat na ra ai. 33 Sumsing lamu hte ginding aga lai mat wa timung, nye a ga gaw n lai mat na li ai. 34 Raitimung, lu lai sha lai ai, chyaru nang ai, dinghta ga myitru myittsang ai hte nanhte a myit masin li nga nna, dai nhtoi gaw mahkam htim ai zawn, nanhte a ntsa e akajawng sha n du pru u ga, sadi nga mu: 35 kaning rai nme law, dai nhtoi gaw ga ntsa ting e nga nga ai ni nlang hte a ntsa e, shingrai du na ra ai. 36 Dai rai nna, dai byin wa na ra ai lam ni yawng hta na nanhte lawt lu nna, Masha Kasha a man e tsap lu ging ai ni tai lu myit ga, akyu hpyi let, ahkying aten shagu hta a maja nga mu, ngu mu ai. 37 Shingrai shi gaw shani shanang nawku Htingnu e sharin shaga nga nna, shana shagu Tsanlum ngu ai bum de pru sa nna, sa nga nga re ai. 38 Masha nlang hte mung shi a sharin shaga ai ga madat na nga, nawku Htingnu de shi kaw jahpawt jau jau e du ga ma ai.

Luka 22

22:1 Ya Shalai wa ai poi ngu ai, Azuma poi du na ni wa sai. 2 Shaloi hkinjawng agyi ni hte laika ka ai sara ni gaw, shi hpe kaning di sat kau lu na lam, tam nga ma ai: kaning rai nme law, shanhte mung masha ni hpe hkrit da mu ai. 3 Dai shaloi e, sape shi lahkawng hta lawm ai, Iskarut ngu ai Yuda hta, Satan shang wu ai rai nna, 4 dai wa gaw pru wa nhtawm, hkinjawng kaba ni hte hpyendu ni kaw, shi hpe kaning di ap kau ya na lam, shanhte hte sa bawng wu ai. 5 Dai majaw shanhte kabu nna, Yuda hpe gumhpraw jaw na, nga nna myit hkrum ma ai. 6 Shi mung hkamla nna, masha hpawng e n rai jang, Yesu hpe ap kau lu na mai ang ai ginwan tam nga ai. 7 Ya dai Shalai wa ai hkungga sat lu ai Azuma nhtoi du ra ai. 8 Shaloi shi gaw Petru yan Yawhan hpe, Anhte sha na matu Shalai wa ai poi sa shachyip magang mu, ngu nna shangun dat mu ai. 9 Dai yan gaw, Kanang e shachyip da shangun mayu n ta? ngu nna shi hpe san mu ai. 10 Shaloi shi gaw, Yu mu, mare de shang sa wa myit yang, ntsin di bu hpai ai wa hte nan hkrum na marin dai: dai wa kaw hkannang wa nna, shi shang ai nta hta hkan shang nhtawm, 11 nta madu hpe, Ngai nye a sape ni hte Shalai wa ai poi sha lu na manam gawk kanang rai ta? nga nna Sara gaw nang kaw san shangun dat mi ai, ngu nna tsun mu. 12 Shaloi jahting tawn ai ntsa gawk kaba nan hpe madun na ra ai: dai yang e shachyip da ma la, ngu nna tsun dat mu ai. 13 Dai sape yan pru sa wa nna, shi tsun dat ai hte maren mu ma ai rai nna, Shalai wa ai poi shachyip da ma ai. 14 Ya aten du jang shi dung nna, kasa ni mung shi hte rau rai nga ma ai. 15 Shaloi shi gaw, Ngai nni nkri garai n hkrum yang, nanhte hte rau ndai Shalai wa ai poi sha na, ngai grai ra da we ai: 16 kaning rai nme law, ngai nanhte hpe tsun made ga, Ndai poi a lam Karai Kasang a mungdan hta garai n dik dik gaw, ngai dai hpe n sha na ni ai, ngu nna shanhte hpe tsun mu ai. 17 Shaloi shi gaw gawm la nna, shakawn ngut jang, Ndai la nna nanhte shada karan lu mu: 18 ngai nanhte hpe tsun made ga, Karai Kasang a mungdan garai n du dingsa sagaw, ya kaw nna tsabyi ru a asi hta na, ngai n lu na ni ai, ngu mu ai. 19 Shaloi shi muk la nna shakawn ngut jang, dai hpe ahkyep alep nhtawm, shanhte hpe jaw let, Ndai gaw nanhte a matu ya kau ai, nye a hkum rai nga li ai: ngai hpe adum nga na matu, ndai galaw mu, ngu mu ai. 20 Dai hte maren shana shat sha ngut jang, dai gawm hpe mung shi la nhtawm, Ndai gawm gaw nanhte a matu ru kau ai, nye a asai hta gaw da ai, ga shaka ningnan rai nga ai. 21 Raitimung, yu mu, ngai hpe sa ap kau na wa a lata gaw, ndai sha ku hta ngai hte rau rai nga ai: 22 Masha Kasha gaw, san da ai hte maren sa wa na gaw, rai nga ai: raitimung, shi hpe ap kau ai wa hta dingnye nga na ra ai, ngu mu ai. 23 Shing nga jang sape ni gaw, shanhte hta na kadai wa ndai lam galaw na ra ai kun, nga nna shada da san hkat ma ai. 24 Dai hta kaga, shanhte hta na kadai wa mahtang grau kaba nga ai kun, nga nna shanhte shada da tsun shajang pru ma ai. 25 Dai rai nna Yesu gaw, Maigan amyu hkawhkam ni gaw, maigan amyu ni a ntsa e uphkang lu ma ai rai nna, dai ni a ntsa e daru magam lu ai ni hpe, Chyeju madu ni, nga nna hkungga shaga ma ai. 26 Nanhte chyawm gaw shingrai na n rai: nanhte hta, grau kaba ai wa gaw, aprat kaji ai wa zawn rai u ga; uphkang ai wa mung, shangun ma zawn rai u ga. 27 Kaning rai nme law, kadai mahtang grau kaba a ta? sha dung nga ai wa kun? shing n rai, galaw jaw ai wa kun? sha dung nga ai wa, n rai ni? Raitimung ngai gaw, nanhte hta na galaw jaw ai wa zawn rai nga nngai. 28 Nanhte chyawm gaw, ngai gunglau hkrum shatsang ai hta, ngai hte rau nga nan nga ai ni, rai nga myit dai. 29 Dai re ai majaw, nye wa gaw ngai hpe mungdan ap ya ai zawn, ngai mung nanhte hpe mungdan ap ya nna, 30 nye a mungdan e, nye a sha ku hta, nanhte lusha lu na marin dai: nanhte mung tingnyang hta dung nna, Israela amyu shi lahkawng hte hpe tara dara lu na marin dai. 31 Simun, Simun e, yu u, hkaulan mam hpe hking ai zawn, nanhte hpe hking lu n ga nga, Satan gaw ahkang hpyi nga ai: 32 raitimung na a kamsham ai myit n hten lit ga, ngu nna na a matu ngai akyu hpyi da ni ai; nang bai kayin dum yang, na nhpu nnau ni hpe shangang shakang ya u, ngu wu ai. 33 Shaloi Simun gaw, Madu e, nang hte rau ngai gaw htawng de raitimung, si hkam ai de raitimung, hkan shang nang na myit tawng nga nngai, ngu nna htan wu yang. 34 Yesu gaw, Petru e, ngai nang hpe tsun de ga, Dai ni pyi, u garai n goi yang, nang ngai e n chye nngai, nga nna masum lang nyet kau na rin dai, ngu wu ai. 35 Dai hta kaga shi shanhte hpe tsun mu ai gaw, Gumhpraw jan, htingpa, kyepdin n gun n lang ai sha, ngai nanhte hpe shangun dat ai shaloi, nanhte hta lama ma ra malit ni? ngu nna san mu yang, shanhte gaw, Hpa mung n ra ga ai, ngu mu ai. 36 Shaloi shi shanhte hpe, Ya chyawm gaw gumhpraw jan lu ai wa gaw, la gun u ga; htingpa lu ai wa mung, la hpye u ga; nhtu n lu ai wa gaw, hpun palawng dut nna mari u ga: 37 kaning rai nme law, ngai nanhte hpe tsun made ga, ngai hte seng maseng gaw ngut mat na rai ra ai majaw, Dai wa gaw tawt lai ai ni hta hti lawm mat nga ai, nga nna ka da ai ga gaw, ngai hta dik lu na rai nga ai, ngu nna tsun mu ai. 38 Dai rai nna shanhte gaw, Madu e, yu u, nang e nhtu lahkawng nga nga ai, ngu nna tsun dan mu yang, shi gaw, Dai hte ram sai, ngu nna shanhte hpe tsun mu ai. 39 Ya shi gaw pru nna, shawoi sa ga ai hte maren Tsanlun bum de sa wa nga ai. 40 Dai shara de du jang, shi gaw, Nanhte gunglau ai de n lawm mat myit ga, akyu hpyi nga mu, nga nna shanhte hpe tsun da mu ai; 41 sape ni nga ai kaw nna lung din kabai hkap daram hka sa wa nhtawm, lahput hput di let, 42 Wa e, nang ra n yang gaw, ndai gawm hpe ngai kaw na shalai kau ya e; raitimung ngai ra ai hku n rai, nang ra ai hku she rai u ga, ngu nna hpyi wu ai. 43 ( Dai shaloi lamu de na lamu kasa langai mi danpru nna, shi hpe sa shalan ya wu ai. 44 Myit masin nachying nni nkri hkrum ai majaw, shi grau nna akyu hpyi shaja wu ai: shi a salat mung, sai tum sai pa zawn ga de hkrat lu ai.) 45 Shingrai akyu hpyi ai kaw na rawt nna, sape ni kaw wa yu yang, shanhte gaw myit yawn ai hte yup nga ma ai hpe, wa mu wu ai rai nna, Hpa rai yup nga myit ta? 46 rawt mu, gunglau ai de n lawm myit ga akyu hpyi nga mu, ngu nna shanhte hpe tsun mu ai. 47 Shing nga naw tsun nga yang, yu mu, masha wunawng hte sape shi lahkawng hta lawm ai Yuda gaw, dai ni a shawng e sa wa nna, Yesu hpe pup na sit wa ai. 48 Dai rai nna Yesu gaw, Yuda e, nang gaw Masha Kasha hpe pup ai hte ap kau n ni? ngu nna shi hpe tsun wu ai. 49 Shaloi shi hte rau nga ai ni gaw, byin wa na ra ai amu hpe tau chye mu yang, Madu e, anhte nhtu hte kahtam na rai ni? ngu nna, 50 shanhte hta na marai langai mi gaw, hkinjawng agyi a mayam hpe kahtam wu ai rai nna, dai wa a hkra maga ana di mat lu ai. 51 Yesu chyawm gaw, Shanhte ra ai mi rai mu ga, nga nna htan tsun ngut jang, dai mayam a na hpe ahtawk nna shamai ya wu ai. 52 Bai Yesu gaw shi hpang de du sa ai hkinjawng agyi ni, nawku Htingnu sin ai hpyendu ni hte agyi salang ni hpe, Nanhte gaw damya hpe rim la na zawn, nhtu dawhkrawng hte rai nna pru sa marin ni? 53 Naw ku Htingnu e shani shagu nanhte hte rau nga nga yang, ngai hpe rim la na nanhte n htim yu manit dai; raitimung, ndai ahkying gaw nanhte a ahkying rai nga ai hte, nsin a ahkang hpung ja ai mung rai nga ai, ngu mu ai. 54 Shaloi shanhte gaw shi hpe rim woi wa nhtawm, hkinjawng agyi a nta de woi bang mu ai: Petru mung tsan tsan kaw nna hkannang nga ai. 55 Ya masha ni nta wing ka-ang e wan wut nna hpawng dung nga ma yang, Petru mung shanhte a ka-ang e dung lawm nga ai. 56 Shingrai wan a ahtoi hta dung nga ai hpe, nchyang numsha langai mi e mu wu yang, shi hpe azi yu nna, Ndai wa mung shi hte rau rai nga ai, ngu wu ai. 57 Shaloi Petru gaw, Num nang e, dai wa hpe ngai n chye nngai, ngu nna nyet kau wu ai. 58 Dai hpang loi hkring rai jang langai wa mi mung shi hpe mu nna, Nang mung shanhte hta lawm nga ndai, ngu wu yang, Petru gaw, La nang e, ngai n rai nngai, ngu wu ai. 59 Hkying mi daram bai na jang, langai wa mi mung, Gaja wa teng teng, ndai wa mung shi hte rau nga nga ai; Galile masha mung shi rai nga ai, nga nna atik anang tsun wu ai: 60 Petru gaw, La nang e, nang tsun ai lam ngai n chye nngai, ngu wu ai. Shing nga naw tsun nga yang, u goi shayan ra ai. 61 Shaloi Madu gaw kayin nna, Petru hpe mada yu wu ai. Dai rai nna Petru gaw, Dai ni pyi, u garai n goi yang, nang ngai hpe masum lang nyet kau na rin dai, nga nna Madu shi hpe tsun ai ga dum dat wu ai: 62 shaloi shi gaw shinggan de pru nna ja ja hkrap nga ai. 63 Yesu hpe jum sin ai ni mung shi hpe asawng asang di nna, anu kayat mu ai: 64 shi a myiman magap kau ya nhtawm, Myihtoi htoi yu u; nang hpe htwi ai gaw, kadai wa rai ta? ngu nna san mu ai. 65 Shanhte lam kaga law law hte mung, shi hpe shatan nhkan nga let tsun ma ai. 66 Nhtoi htoi yang, mung masha ni a salang hpung rai nga ai, hkinjawg agyi ni hte laika ka ai sara ni, zuphpawng ma ai rai nna, dai ni a salang hpawng de shi hpe woi wa nhtawm, 67 Nang Hkristu rai nga n yang gaw, anhte hpe tsun dan mi, ngu mu ai. Yesu gaw, Ngai tsun timung, nanhte kam na myit dai n rai: 68 ngai san timung, nanhte htan na myit dai n rai. 69 Raitimung Masha Kasha gaw, ya kaw nna Karai Kasang a hpung dagu a hkra maga de dung nga lu na ra ai, ngu nna shanhte hpe tsun mu ai. 70 Shaloi shanhte nlang, Dai rai yang gaw, nang Karai Kasang a kasha rai nga n hka i? ngu nna san mu ai; shi gaw, Ngai re ai, nga nna nanhte nan tsun nga myit dai, ngu nna shanhte hpe htan mu ai. 71 Shaloi shanhte gaw, Anhte hpa sakse mi naw ra nga ga ta? shi a n-gup na nan anhte dai na lu saga ai, nga ma ai.

Luka 23

23:1 Dai shaloi hpawng nga ai ni nlang hte gaw rawt nna, shi hpe Pilat hpang de woi bang nhtawm. 2 Ndai wa gaw anhte a amyu hpe lam woi shadam ai hte, Kehta hkawhkam hpang de hkansi bang na lam hkum da nna, shi hkum dai Hkristu ngu ai hkawhkam rai nga ai, nga nna tsun nga ai hpe, anhte mu ga ai, ngu nna shi hpe mara jun mu ai. 3 Shaloi Pilat gaw Yesu hpe, Nang Yuda masha ni a hkawhkam rai nga n ni? ngu nna san wu ai; shi gaw, Nang tsun ai hte maren rai nga nngai, ngu nna shi hpe htan wu ai. 4 Pilat chyawm gaw, Ndai wa hta hpa mara mung ngai n mu we ai, ngu nna hkinjawng agyi ni hte shawa masha ni hpe tsun mu ai. 5 Dai ni mahtang, Ndai wa gaw Yuda mung ting hte, Galile mung kaw nna ya nang du hkra, sharin shaga nga ai hte, mung masha ni hpe woi kabrawng wu ai, nga nna grau tsun anin shadut ma ai. 6 Pilat gaw dai na jang, shi Galile masha re ai, n re ai, san la nhtawm, 7 Herod up ai mung na masha re ai shi chye yu yang, Herod shi dai mung, Yerusalem mare e dai ten e nga nga ai rai nna, Yesu hpe shi hpang de sa bang shangun wu ai. 8 Herod gaw Yesu hpe mu jang grai kabu nga ai: kaning rai nme law, shi a lam na yu nu ai rai nna, shi galaw dan ai lamik kumla langai ngai mu lu na, nga nna myit mada nga ai majaw, shi hpe mu mayu ai na la salu ai. 9 Dai rai nna shi gaw Yesu hpe lam magup san yu wu ai, raitimung Yesu gaw, ga hkaw mi muk n htan ya wu ai. 10 Hkinjawng agyi ni hte laika ka ai sara ni chyawm gaw rawttsap nna, shi hpe mara grai grai jun da mu ai. 11 Herod mung shi a hpyen masha ni hte shi hpe aroi arip di nna, jahpoi asawng nhtawm, reng ai hpun palawng jahpun nna, Pilat hpang de bai nhtang sa shangun mu ai. 12 Dai shani jang Herod yan Pilat gaw shada bai hkau ma ai: shawng de chyawm gaw shada myitkraw n ngawn hkat ma ai. 13 Shaloi Pilat gaw hkinjawng agyi ni, du ni hte mung masha ni hpe shaga jahpawng nhtawm, Mung masha ni hpe lam woi shadam ai wa re ai nga nna, ndai wa hpe nanhte ngai kaw sa bang manit dai: 14 ya, yu mu, nanhte a man e ngai shi hpe san yu we yang, nanhte shagun ai mara lam hpa mung ndai wa hta ngai n mu we ai: 15 dai hta n-ga Herod mung hpa mung n mu wu ai: shi gaw ndai wa hpe anhte hpang de bai sa dat shangun ra ai: dai rai nna, yu mu, ndai wa gaw hpa si ging ai amu mung n galaw wu ai; 16 dai majaw ngai shi hpe anu sharim nna dat dat na we ai, ngu nna shanhte hpe tsun mu ai. 18 Shing nga jang shanhte nlang hte gaw, Dai wa hpe la kau u, Baraba hpe chyawm gaw dat ya mi, nga nna jawm jahtau ma ai: 19 Baraba gaw, mare e gumlau ai hte masha sat ai amu a majaw htawng hkrat ai wa rai nga ai. 20 Pilat gaw Yesu hpe dat dat mayu wu ai rai nna, shanhte hpe bai shaga tsun mu ai: 21 raitimung shanhte gaw, Dai wa hpe wudang hta jen da u, jen da u, nga nna jahtau nga ma ai. 22 Dai rai nna Pilat gaw masum lang ngu na hta, bai tsun wu ai gaw, Ndai wa n hkru ai amu hpa galaw hkrup sata? shi hta si ging ai mara hpa mung ngai n mu we ai: dai majaw ngai shi hpe anu sharim nna dat dat na we ai, ngu nna shanhte hpe tsun mu ai. 23 Shanhte mahtang nsen kaba hte jahtau nna, Yesu hpe wudang hta jen da lu na lam atik anang hpyi shaja ma ai: shing nga jahtau ai hte mung shanhte dang la ma ai. 24 Dai majaw Pilat gaw, shanhte hpyi ai hte maren rai u ga, nga nna dawdan ya mu ai. 25 Shing nga shi gaw shanhte hpyi ai hte maren, gumlau ai hte masha sat ai amu a majaw, htawng hkrat ai wa hpe dat ya nna, Yesu hpe gaw shanhte ra ai hku ap kau ya dat wu ai. 26 Yesu hpe shapraw sa wa nga ma yang, nam kahtawng de na wa ai Simun ngu ai Kureni mung masha langai mi hpe shanhte rim la nhtawm, wudang jahpai nna, Yesu a hpang e hkan sa shangun mu ai. 27 Masha wunawng wuwa kaba hte, shi a lam hkrapngu hkrapngoi, sharung shayawt nga ai numsha ni mung, shi a hpang e hkannang ma ai. 28 Yesu gaw shanhte hpang de kayin nna, Yerusalem shayi sha ni e, nye a majaw hkum hkrap myit: nanhte hkum dai hte, nanhte a nshu nsha ni a matu hkrap nga mu: 29 kaning rai nme law, Maudung num, na-um nasin n rai yu ai hkum hte, n chyu yu ai madoi chyuhpang gaw a nga ai, nga nna tsun na nhtoi gaw du wa ra ai. 30 Dai nhtoi e, bum ni hpe, Anhte a ntsa e daw kamyet mi, nga nna mung, kawng ni hpe, Anhte a ntsa e ka-up mi, nga nna mung, shanhte shaga shajang na mara ai: 31 shanhte hpun katsing hta ning di ma yang gaw, hpun chyahkraw hta kaning wa di na mara ta? ngu mu ai. 32 Dai shaloi damya lahkawng hpe mung, sat kau na nga, shi hte rau woi shapraw sa wa mu ai. 33 Ya Pungkum ngu ai shara de du jang, shanhte gaw shi hpe mung, damya yan hpe mung, shi a hkra maga de langai mi, pai maga de langai mi di nna, wudang hta jen da mu ai. 34 Shaloi Yesu gaw, Wa e, shanhte a mara dat kau ya mu: shanhte galaw ai lam hpe shanhte n chye nga ma ai, nga ai. Shanhte gaw shi a hpun palawng ni hpe mung, hpaida da nna karan la ma ai. 35 Mung masha ni gaw mada yu let tsap nga ma ai. Du aya lu ai ni mung shi hpe asawng asang nga nna, Masha kaga hpe shi hkyela ga ai; ndai wa gaw Karai Kasang a Hkristu ngu ai, Karai Kasang lata la ai wa rai yang gaw, shi hkum dai shi hkyela u ga, nga ma ai. 36 Hpyen masha ni mung sit sa nna, ntsin hkri ladawn jaw nhtawm, 37 Nang Yuda ni a hkawhkam rai n yang gaw, na hkum dai nang hkyela u, nga nna shi hpe roi ma ai. 38 Shi a ntsa e mung N dai wa gaw Yuda ni a hkawhkam rai nga ai, nga ai laika shakap da nga ai. 39 Wudang hta noi nga ai damya langai mi mung, Nang gaw Hkristu n rai n ni? na hkum dai hte an hpe mung hkyela mi, ngu nna shi hpe roi wu ai. 40 Langai wa mi chyawm gaw, Nang mung dawdan ai ndai hte wa hkrum da ninglen, Karai Kasang hpe pyi n hkrit n ni? 41 An gaw tinang a mara majaw hkrum ging ai hte maren dawdan ai hkrum ga ai: ndai wa chyawm gaw n sun n ang ai lam hpa mung galaw wu ai n rai, nga nna dai wa hpe daru let htan wu ai. 42 Shing nga nhtawm, shi gaw, Yesu e, nang na a mungdan hta du wa yang, ngai e dum rit law, ngu nna hpyi wu ai. 43 Shaloi Yesu gaw, Ngai nang hpe teng teng tsun de ga, Dai ni jang nang ngai hte rau Hparadisu e nga na rai nga ai, ngu nna shi hpe htan wu ai. 44 Ya gaw ahkying kru daram rai nga ai rai nna, jan a ahtoi nip mat ai majaw, hkying jahku du hkra mung ting nsin chyip rai mat ai; 45 nawku Htingnu na nba grang mung, ka-ang brang rai ga mat ai. 46 Shaloi Yesu gaw, Wa e, nye a Wenyi na a lata hta ngai ap ya de ai, nga nna nsen kaba hte jahtau wu ai: shing nga tsun ngut jang, shi nsa hti mat ai. 47 Shingrai byin ai lam ni hpe hpyen latsa up ai bu wa mu wu yang, Gaja wa teng teng ndai wa gaw dingman ai wa rai nga ai, nga nna Karai Kasang hpe shagrau sha-a wu ai. 48 Dai lam yu na nga, sa hpawng ai masha nlang hte mung, shingrai byin ai lam ni hpe mu mu yang, sinda a dup let bai wa ma ai. 49 Shi hpe chye machye ni hte, Galile mung nna shi kaw hkannang ai num ni gaw, tsan tsan e tsap nna, dai lam ni hpe mada yu let, nga nga ma ai. 50 Shaloi, yu mu, Yuda mung hta Aramahti ngu ai mare na, Yosep mying ai rung aya lu ai wa langai mi nga ai: dai wa gaw mai kaja ai hte dinghpring ai wa mung, Karai Kasang a mungdan hpe myit mada ai wa mung, rai nga nna, 51 rung aya lu ai gale ni a bawng ai hku hte galaw ai lam hta myit n hkrum lawm ai, rai nga ai: 52 shi gaw Pilat kaw shang nna Yesu a hkum tsawp hpyi wu ai. 53 Dai hpe shayu nna, lachit sumpan hte ahkyen kayawp nhtawm, kadai hpe mung garai n bang yu ai, nlung hta krawk da ai lup hta, bang tawn da wu ai. 54 Ya Shachyip da ai nhtoi rai nga ai rai nna, laban nhtoi du magang ra ai. 55 Galile mung nna shi hte rau pru sa ai numsha ni mung, hpang e hkannang nna, dai lup hpe mung, shi a hkum tsawp hpe kaning di tawn da ai mung, mu da ma ai. 56 Shaloi shanhte wa nna, manam pyaw ai baw hte mura sau lajang da ma ai. Laban nhtoi e gaw, tara nga ai hte maren shanhte laban nga ma ai.

Luka 24

24:1 Raitimung, hpang na nhtoi bat shawng shani na nhtoi mahka de, shanhte gaw lajang da ai manam pyaw ai baw la gun nna, lup de sa wa ma ai. 2 Sa du ma yang, lup mahka na nlung galau mat nga ai hpe, shanhte mu ma ai rai nna, 3 shang yu yang, dai Madu Yesu a moi mang hpe n mu mu ai. 4 Shingre ai majaw shanhte mau ung ang nga ma yang, yu mu, tu kabrim ai hpun palawng buhpun ai masha lahkawng shanhte a makau e tsap nga ma ai. 5 Dai numsha ni hkrit kajawng nna ga de myiman dagup nga ma yang, dai yan gaw, Hkrung ai wa hpe si ai ni kaw, hpa rai tam myit ta? 6 Shi nang e n nga ai, hkrung rawt wa sai: Galile mung e naw nga yang, 7 Masha Kasha gaw yubak kap ai ni a lata de ap kau ai hkrum nna, wudang hta jen da ai hkam ngut jang, masum ya nhtoi hta hkrung rawt wa na ra ai lam, nanhte e tsun da ai ga hpe myit dum mu, ngu nna shanhte hpe tsun mu ai. 8 Shaloi shanhte gaw Yesu a ga hpe dum nna, 9 lup de na bai wa nhtawm, sape shi langai hte hte kaga ni nlang hte hpe, dai lam yawng mayawng wa tsun dan mu ai. 10 Dai lam wa tsun dan ai ni gaw, Magdala Mari, Yoana, Yaku a kanu Mari hte rai ma ai; shanhte hte rau nga ai numsha kaga ni mung, kasa ni hpe dai lam tsun dan mu ai. 11 Kasa ni chyawm gaw shanhte a ga hpe kaman ga zawn nawn nna n kam ya ma ai. 12 ( Raitimung, Petru gaw rawt nna, lup de gat sa wa nhtawm, gum yu wu yang sumpan taw nga ai sha mu wu ai rai nna, shingrai byin ai lam hpe mau let, shi a nta de bai wa ai. ) 13 Dai hta kaga, yu mu, dai shani e nan shanhte hta na marai lahkawng, Yerusalem mare nna, mai sanit daram tsan ai Ema-u kahtawng de sa wa ma ai rai nna, 14 dai byin mabyin ni a lam shada tsun chyai nga ma ai. 15 Shingrai tsun chyai nna shada san hkat let sa wa nga ma yang, Yesu gaw shi hkum dai sit sa nna, shan hte rau sa wa ai. 16 Raitimung, shi hpe n chye mu ga, shan a myi hpe myi le le ya mu ai. 17 Shaloi shi gaw, Nan hkawm sa wa let, shada da tsun chyai ai lam gaw, hpa lam rai ta? ngu nna san mu yang, shan gaw myiman sum let, hkring tsap nga ma ai. 18 Shaloi dai yan hta na Hkleopa ngu ai wa gaw, Nang gaw Yerusalem mare e sa manam nga da nhtawm, ya hte dai mare e byin ai lam ni hpe, nang hkrai sha n chye n ni? ngu nna htan wu ai. 19 Dai rai nna shi gaw, Hpa lam rai ta? ngu nna bai san wu yang, shan gaw, Nazaret mare na Yesu a lam rai nga ai: dai wa gaw Karai Kasang a man e mung, masha nlang hte a man e mung, lata atsam hte n-gup hpaji a nsam rawng ai myihtoi wa rai nga ai: 20 raitimung hkinjawng agyi ni hte anhte a du salang ni gaw, dai wa hpe sat kau na lam dawdan na ap kau nhtawm, wudang hta jen da kau manu ai. 21 Anhte chyawm gaw, dai wa gaw Israela amyu hpe hkrang shaw la na wa re ai, ngu nna myit mada ga ai: raitimung, shingrai nna dai lam ni byin ai pyi gaw, dai ni masum ya du sai. 22 Dai hta kaga, lup de jau jau e sa yu ai, anhte hpung hta na numsha nkau mi mung, anhte hpe wa shamau mi ai: 23 shi a moi mang hpe n mu jang, shanhte bai wa nna, dai Madu hkrung nga ai, nga nna tsun dan ai lamu kasa danpru ai shingran mu ai lam, wa tsun shana mi ai. 24 Anhte hte rau nga ai ni nkau mi mung, lup de sa yu nna, numsha ni tsun ai hte maren mu mu ai: dai wa hpe chyawm gaw shanhte n mu ma ai da, ngu nna shi hpe tsun dan mu ai. 25 Shaloi shi gaw, Myihtoi ni htawn tsun ai ga mahkra hpe kamsham lu na, hpaji n rawng ai hte myit ja ai ni e! 26 Hkristu gaw shingre ai nni nkri hkam nna, shi a hpung shingkang hta shang ningngai na re ai, n rai ni? ngu nna shan hpe tsun mu ai. 27 Shing nga tsun sharawt nhtawm, Mawshe ka da ai kaw nna, myihtoi ni yawng ka da ai Chyum laika ni hta na, shi hta ang ai ga yawng a ga lachyum, shan hpe tsun hpaw dan mu ai. 28 Ya, dai yan sa wa ai kahtawng de du magang yang, shi gaw lai nna sa wa na zawn rai nga ai. 29 Dai rai nna shan gaw, An hte rau shang nga ga: jan du sai, nsin mung sin wa ra ai, ngu nna shi hpe akroi anoi saw mu ai: dai majaw shan hte rau nga na shi shang wa ai. 30 Dai shaloi shan hte rau shat sha na dung nga yang, shi muk la nna shaman nhtawm, ahkyep alep ngut jang shan hpe jaw mu ai. 31 Shaloi shan a myi hpaw nna Yesu re ai chye ma ai: shi chyawm gaw shan kaw na mat mat wa ai. 32 Dai rai nna shan gaw, Lam e anhte ga tsun nna, Chyum laika ni a ga lachyum tsun hpaw dan mi ai shaloi, an a myit masin gadau gadap nga mali ai, n rai ni? nga nna shada da tsun ma ai. 33 Shan gaw dai ahkying hta nan rawt nna, Yerusalem mare de bai wa nhtawm, zuphpawng nga ma ai sape shi langai hte hte, shanhte hte rau nga ai ni gaw, 34 Dai Madu teng teng hkrung rawt wa sai; Simun hpe mung shi hkum shadan dan nu ai, nga nna tsun nga ma la ai hpe, wa mu mu ai. 35 Shaloi shan gaw, lam e rai nga yang byin ai lam ni mung, muk ahkyep jaw ai hta shi re ai chye lu ai mung, tsun dan mu ai. 36 Shanhte dai lam jawm tsun nga ma yang, shi hkum nan shanhte a ka-ang e tsap nga nna, Nanhte ngwi pyaw nga myit ga, ngu nna shanhte hpe tsun mu ai. 37 Shanhte chyawm gaw kajawng ai hte hkrit gari mat ma ai rai nna, minla mu ga ai, nga nna myit nga ma ai. 38 Dai rai nna shi gaw, Nanhte hpa rai myit ung ang nga myit ta? hpa majaw nanhte kraw hta le le waw waw myit nga myit ta? 39 Ngai nan rai nga nngai, nye lata hte lagaw hpe yu yu mu: ngai hpe masawp yu mi; minla ngu ai gaw, ngai hpe nanhte mu ai zawn, ashan hte nrut nra rawng ai n rai, 40 nga nna shanhte hpe tsun nhtawm, shi a lagaw lata ni shanhte hpe madun dan mu ai. 41 Shanhte gaw kabu ai hte garai n kam lu ai, naw mau nga ma yang, shi gaw, Nanhte nang e shahpa lama ma lu da mu ni? ngu nna shanhte hpe san mu ai. 42 Shaloi nga kakang daw mi shanhte shi hpe jaw mu ai. 43 Shi gaw dai la nna, shanhte a man e sha dan nga ai. 44 Shaloi shi gaw, Mawshe a tara hta mung, myihtoi ni a laika hta mung, Shakawn Kungdawn laika ni hta mung, ngai hpe sha-ang nna ka da mada yawng gaw dik lu na ra ai, ngu nna nanhte hte rau naw nga yang, ngai nanhte hpe tsun ni ai, nye a ga gaw, ndai rai nga ai, ngu nna shanhte hpe tsun mu ai. 45 Shaloi Chyum laika ga ni hpe chye na lu na matu, shi shanhte a myit hpaw ya nna, 46 Hkristu gaw nni nkri hkam nna, masum ya du ai nhtoi e si ai ni kaw na hkrung rawt wa na ra ai lam mung, 47 Yerusalem mare kaw nna, masha amyu baw shagu hpe yubak raw dat kau ya lu ai myit malai lu na lam hpe, shi a amying nsang hte hkaw tsun lu na mung, ning nga nna ka da nga ai. 48 Nanhte gaw ndai lam ni a sakse ni rai nga myit dai. 49 Yu mu, nye Wa a ga ndat nanhte a ntsa e ngai shangun dat na ring ngai: nanhte chyawm gaw, matsaw ning tsang de na n-gun atsam dagraw la lu ai nhtoi du hkra, ndai mare e naw la nga ma la, ngu nna shanhte hpe tsun dat mu ai. 50 Dai hpang shi gaw shanhte hpe Behtani kahtawng hte tawtap du hkra woi sa wa nhtawm, shi a lata sharawt nna, shanhte hpe shaman ya mu ai. 51 Shingrai shanhte hpe shaman ya nga yang, shi shanhte kaw na hka mat wa nna sumsing lamu de woi shalun la ai hkrum wu ai. 52 Shanhte chyawm gaw shi hpe nawku nna, nachying kabu gara let Yerusalem mare de bai wa nhtawm, 53 Karai Kasang hpe shakawn kungdawn let, nawku Htingnu e tutnawng e anga nga ma ai.

Yawhan 1

1:1 Shawng ningpawt e Mungga nga ai; dai Mungga gaw Karai Kasang hte rau rai nga ai rai nna, dai Mungga nan Karai Kasang rai nga ai. 2 Dai Mungga gaw shawng ningpawt e Karai Kasang hte rau rai nga ai. 3 Arai yawng mayawng gaw shi a marang e tai nga ai; nga manga hta shi n lawm ai tai wa ai gaw, langai mi muk n nga ai. 4 Shi hta asak daju rai nga ai; dai asak gaw masha ni a nhtoi rai nga ai. 5 Dai nhtoi gaw nsin hta htoi nga ai rai nna, nsin mahtang gaw dai hpe n chye hkap la wu ai. 6 Karai Kasang e shangun dat ai, Yawhan mying ai wa langai mi, du sa ai: 7 dai wa gaw, dai nhtoi a lam sakse hkam ya nna, yawng mayawng shi a jaw e kamsham mu ga nga, sakse sa tai na matu, du sa ai. 8 Dai wa gaw dai nhtoi n rai; dai nhtoi a lam sakse hkam ya na she, du sa ai. 9 Mungkan ga de sa nga let, masha nlang hte hpe jahtoi ya ai nhtoi majing chyawm gaw, nga nga sai. 10 Shi gaw mungkan ga e nga nga ai hte, mungkan ga mung shi a marang e nan tai wa sai: raitimung mungkan ga gaw shi hpe n chye wu ai. 11 Shi gaw shi a mung ga de du sa ra ai raitimung, shi a baw sang ni gaw shi hpe n hkap la ma ai. 12 Shi a amying ningsang hpe kamsham ai ni ngu ai, shi e hkap la mala ni hpe, Karai Kasang a kashu kasha tai lu na ahkang shi jaw mu ai: 13 dai ni gaw, asai hte shaprat ai ni n rai, hkumshan a myit hte mung n rai, masha a myit maw ai hku hte mung n rai, Karai Kasang e shaprat ai ni she rai ma ai. 14 Dai Mungga gaw masha a hkumshan dagraw la nna, chyeju hte tengman ai hpring let, anhte hta nga nga yu sai rai nna, Kawa hta na Kasha shingtai a hpung shingkang zawn, anhte shi a hpung shingkang hpe, mu lu sagaw ai. 15 Shi a lam Yawhan sakse hkam ya nna jahtau tsun wu ai gaw, Nye a hpang e du sa ai wa gaw, nye a shawng na wa rai nga ai majaw, nye a shawng e rai nga sai, ngu nna ngai tsun ai wa gaw, ndai wa rai nga ai, nga ai. 16 Kaning rai nme law, anhte mahkra gaw, shi a hkum tsup ai hta na, chyeju htap mi hta htap mi, lu la saga ai. 17 Jep ai tara gaw Mawshe a lata hte jaw da ai, rai nga ai. chyeju hte tengman ai lam gaw, Yesu Hkristu a marang e tai wa ai, rai nga ai. 18 Karai Kasang hpe gade ai muk galoi mung n mu yu ai; Kawa a lahpyen e rawng nga ai Kasha shingtai gaw, Karai Wa a hkum shadan dan nu ai. 19 Yuda masha ni gaw Yerusalem mare na, hkinjawng hte Lewi masha ni hpe Yawhan hpang de shangun dat nna, Nang gaw kadai rai nga n ta? ngu nna san shangun mu yang, shi hkam ai sakse lam gaw, da ndai rai nga ai: 20 shi gaw, Ngai Hkristu n rai nngai, nga nna n ip n nyet ai sha, yin la wu ai. 21 Shaloi shanhte gaw, Dai rai yang gaw, nang Elia rai n ni? ngu nna san mu yang, shi gaw, N rai nngai, ngu wu ai: Dai myihtoi rai n ni? ngu nna bai san mu yang, N rai nngai, ngu nna bai htan wu ai. 22 Dai rai nna shanhte gaw, Anhte hpe shangun dat ai ni e wa tsun dan na ga lu n ga, Nang gaw kadai rai nga n ta? Na a hkum hpe nang kaning ngu n ta? ngu nna shi hpe bai san mu yang, Yawhan gaw, 23 Ngai gaw, myihtoi Esaia htawn tsun ai hte maren, Dai Madu a lam shading mu, nga nna nam e jahtau ai wa a nsen rai nga nngai, ngu mu ai. 24 Dai shangun kasa ni chyawm gaw, Hparishe ni kaw na rai ma ai. 25 Bai shanhte gaw, Nang gaw, Hkristu mung n rai, Elia mung n rai, dai myihtoi wa mung n rai n yang gaw, nang hpa rai baptisma jaw n ta? ngu nna shi hpe san mu yang, 26 Yawhan gaw, Ngai gaw hka hta baptisma jaw nngai; nanhte a ka-ang e, nanhte n chye ai wa langai mi tsap nga ai: 27 dai wa gaw nye a hpang e du sa ai wa rai nga ai; shi a kyepdin sumri pyi ngai n raw ging nngai, ngu nna shanhte hpe htan mu ai. 28 Ndai lam ni gaw, Yawhan baptisma jaw let nga nga ai, Yawdan hka wora hkran na Behtani kahtawng e byin ai, rai nga ai. 29 Hpang shani e Yawhan gaw, shi hpang de Yesu sa wa ai hpe, hkap mu wu yang, Mungkan ga a yubak gun la kau ya ai, Karai Kasang a Sagu Kasha hpe yu yu mu! 30 Ngai hta shawng nga ai wa langai mi, nye a hpang e du na ra ai; shi gaw nye a shawng e rai nga sai, ngu nna ngai tsun ai wa gaw, ndai wa rai nga ai. 31 Ngai gaw, shi kadai re ai mung n chye nngai; raitimung, shi gaw Israela masha ni a man e danpru na matu, hka hta baptisma jaw let, ngai du sa nngai, nga ai. 32 Dai hta kaga Yawhan gaw, Wenyi gaw sumsing lamu de nna hkrudu zawn yu hkrat wa ai hpe, ngai mu se ai: dai wenyi mung shi a ntsa e nga nga ai. 33 Ngai gaw, shi kadai re ai mung n chye nngai: raitimung, ngai hpe hka hta baptisma jaw shangun dat ai wa, ngai hpe tsun nngai gaw, Kadai wa a ntsa e, dai Wenyi yu hkrat wa nna nga nga ai hpe, nang mu ai rai yang, dai wa gaw chyoi pra ai Wenyi hta baptisma jaw ai wa rai nga ai, nga ai. 34 Dai hte maren ngai mu se ai rai nna, ndai wa gaw Karai Kasang a Kasha re ai, ngai sakse hkam we ai, nga nna sakse hkam ya wu ai. 35 Bai hpang shani e, Yawhan hte shi a sape lahkawng rau tsap nga ma ai rai nna, 36 Yesu lai sa wa nga yang, Yawhan gaw shi hpe mada yu nna, Karai Kasang a Sagu Kasha hpe yu yu mu! ngu mu ai. 37 Dai sape yan gaw shi tsun ai ga na nna, Yesu kaw hkan sa ma ai. 38 Yesu gaw kayin yu nna, dai yan hkan sa ai hpe mu wu yang, Nan hpa tam myit ta? ngu nna hkap san mu ai. Shan gaw, Rabai e, nang kanang nga n ta? ngu nna shi hpe nhtang san mu ai: ( Rabai ngu ai ga lachyum gaw, Sara nga ai, rai nga ai.) 39 Yesu gaw, Sa marit, shaloi nan mu na marin dai, ngu nna shan hpe tsun wu ai. Dai re ai majaw, shan hkan sa nna, shi nga ai shara kanang re ai mung mu ma jang, dai shani tup shi hte rau nga nga ma ai: dai ahkying gaw ahkying shi daram rai nga ai. 40 Yawhan tsun ai ga na nna, shi kaw hkan sa ai yan hta na langai mi gaw, Simun Petru a kanau Andre rai nga ai. 41 Dai wa gaw shi a kahpu Simun hpe shawng mu nna, An gaw Meshia hpe mu saga ai, ngu nna shi hpe tsun dan wu ai: ( Meshia ngu ai ga lachyum gaw, Hkristu nga ai, rai nga ai.) 42 Shaloi shi gaw Yesu hpang de shi hpe woi wa wu ai. Yesu gaw shi hpe hkap yu nna, Nang gaw Yawhan a kasha Simun rai nga ndai: nang Kehpa ngu ai mying lu na rin dai, ngu wu ai: ( Kehpa ngu ai ga lachyum gaw, Petru nga ai, rai nga ai.) 43 Hpang shani e shi gaw Galile mung de rai wa mayu nga ai. Shaloi Yesu gaw Hpilip hpe mu wu ai rai nna, shi hpe, Ngai kaw hkan nang rit, ngu wu ai. 44 Hpilip gaw Andre yan Petru nga ai Betsaida mare na rai nga ai. 45 Hpilip gaw Nahtanela hpe mu nna, Mawshe gaw tara laika ni hta, myihtoi ni mung myihtoi laika ni hta, sha-ang nna ka da ai, Yosep a kasha, Nazaret mare na Yesu hpe anhte mu sagaw ai, ngu nna shi hpe tsun dan wu ai. 46 Nahtanela gaw, Nazaret mare na arai kaja lama mi pru lu a ni? ngu nna htan wu ai. 47 Hpilip gaw, She, sa yu rit, ngu wu ai. Shaloi Yesu gaw, Nahtanela shi hpang de sa wa ai hpe mu wu yang, shi hpe sha-ang nna, Sawt ai myit n rawng ai, Israela masha majing hpe yu yu mu, ngu wu ai. 48 Nahtanela gaw, Nang ngai hpe kanang nna chye n ta? ngu nna shi hpe san wu ai. Yesu gaw, Hpilip e nang hpe garai n shaga kaw nna, dai maihpang hpun npu e nang naw nga yang, ngai nang hpe mu de ai, ngu nna shi hpe htan wu ai. 49 Nahtanela gaw, Rabai e, nang gaw Karai Kasang a Kasha rai nga ndai; Israela masha ni a hkawhkam nang rai nga ndai, ngu nna shi hpe htan wu ai. 50 Shaloi Yesu gaw, Ngai nang hpe maihpang hpun npu e mu de ai, ngu ai majaw, nang kam n ni? dai hta grau kaba ai amu nang mu na rin dai. 51 Bai Yesu gaw, Ndai nanhte hpe teng teng tsun made ga, Sumsing lamu hpaw malang wa nna, Karai Kasang a lamu kasa ni gaw, Masha Kasha a ntsa e lung wa yu wa rai nga ai hpe, nanhte mu na marin dai, ngu nna shi hpe htan tsun wu ai.

Yawhan 2

2:1 Dai hpang masum ya du ai shani e, Galile mung na Hkana kahtawng e, num hkungran ai poi rai nga ai rai nna, Yesu a kanu gaw dai poi hta lawm nga ai: 2 Yesu hpe mung, Shi a sape ni hte nawng, dai poi de shaga mu ai. 3 Tsabyi ma mat jang Yesu a kanu gaw, Shanhte tsabyi n lu masai, ngu nna shi hpe tsun wu ai. 4 Shaloi Yesu gaw, Numsha e, ngai nang hte hpa seng a ta? nye a ahkying garai n du li ai, ngu nna shi hpe htan wu ai. 5 Raitimung shi a kanu gaw, Shi nanhte hpe tsun matsun galaw mu, ngu nna shangun ma ni hpe tsun da mu ai. 6 Ya dai yang e, Yuda masha ni a jasan jaseng ai htung hte maren, dang lahkawng masum daram ram shang ai, nlung yam kru shadun tawn ai nga malu ai. 7 Yesu gaw, Ndai yam ni hta ntsin ja bang jahpring mu, ngu nna shangun ma ni hpe tsun mu ai: dai rai nna shanhte gaw, yam nten dem rai hkra hkra ja bang ma ai. 8 Bai Yesu gaw, Ya kamai la nna poi up wa hpe wa jaw mu, ngu nna shanhte hpe tsun wu yang, shanhte wa jaw ma ai. 9 Poi up wa gaw ntsin na byin ai tsabyi hpe chyim yu nhtawm, dai kanang na lu la ai gaw, ntsin ja ai ma ni chye ma timung, poi up wa gaw n chye wu ai majaw, la nnan wa hpe shaga la nna, 10 Masha ni kadai mung tsabyi kaja shawng jaw ga ma ai; dai lu law ma jang she, n jet ai baw jaw ma ai: nang gaw tsabyi kaja hpe ya du hkra kyem da ndai, ngu wu ai. 11 Shingrai Yesu gaw shi dan ai lamik kumla ni hta, shawng dan hpang ai gaw, Galile mung na Hkana kahtawng e dan nna, shi a hpung shingkang dan shapraw wu ai: shi a sape ni mung, shi hpe kamsham ma ai. 12 Dai hpang shi gaw, kanu, kanau ni hte shi a sape ni hte nawng, Kaperna-um mare de yu wa nna, dai yang e mung, gade ya wa n hkring nga ma ai. 13 Ya Yuda masha ni a Shalai wa poi du wa ra ai rai nna, Yesu gaw Yerusalem mare de lung wa sai. 14 Shaloi nawku Htingnu e sagu, dumsu, hkrudu dut ai ni hte, gumhpraw byan sha ai ni dung nga ma ai hpe, shi mu wu ai rai nna, 15 shingri hte galaw ai lasik la nhtawm, shanhte mahkra hpe mung, sagu dumsu ni hpe mung, dai nta na shachyut nna, gumhpraw byan sha ai ni a gumhpraw ni hpe ru kau ya ai hte, shanhte a ku ni hpe kanawng kadawng kau ya mu ai: 16 hkrudu dut ai ni hpe mung, Ndai rai ni la wa mu; nye Wa a nta hpe hpaga nta hkum shatai mu, ngu nna tsun mu ai. 17 Dai shaloi, Na nta hta manoi ai nja nhpra myit gaw, ngai e sha kau na ra ai, nga nna ka da ai ga hpe, sape ni dum ma ai. 18 Shing re ai majaw Yuda masha ni gaw, Nang ning rai galaw ai gaw, anhte hpe hpa lamik kumla madun dan n ta? ngu nna shi hpe tsun mu ai. 19 Yesu gaw, Ndai htingnu hpya kau mu; masum ya laman e ngai dai hpe sharawt na we ai, ngu nna shanhte hpe htan mu ai. 20 Shing nga ai majaw, Yuda masha ni gaw, Ndai nawku Htingnu hpe mali shi kru ning tup galaw ai re ai, nang chyawm gaw masum ya laman e sharawt lu na wu ni? ngu mu ai. 21 Raitimung, Yesu tsun ai gaw, shi a hkum hkrang ngu ai htingnu hpe, sha-ang nna nga ai, rai nga ai. 22 Dai re ai majaw si ai ni kaw na hkrung sharawt la ai hkrum wu ai shaloi, sape ni gaw shi shing nga tsun ai ga hpe dum ma ai rai nna, Chyum laika hpe mung, Yesu tsun da ai ga hpe mung, kamsham ma ai. 23 Dai Shalai wa poi nhtoi ni a laman e Yerusalem mare hta shi naw nga nga yang, masha law law wa, shi dan ai lamik kumla mu lu ma ai majaw, shi a mying ningsang hpe kamsham ma ai. 24 Yesu chyawm gaw, masha yawng mayawng a lam chye da wu ai majaw mung, masha kraw kata e kaning nga ai myit rawng nga ai hpe, shi nan chye nga ai rai nna, 25 masha wa a lam hpe gade ai muk sakse sa hkam ya na, n ra ai majaw mung, shi hkum nan shanhte hta myit n krem da wu ai.

Yawhan 3

3:1 Raitimung, Yuda masha ni hta salang rai nga ai Nikodi mying ai Hparishe langai mi nga ai: 2 dai wa gaw shana e Yesu kaw sa nna, Rabai e, nang gaw Karai Kasang kaw nna du sa ai sara rai nga ndai hpe, anhte chye ga ai: nang dan ai lamik kumla ni gaw, Karai Kasang n lawm yang gaw, kadai mung n galaw lu ai, ngu nna shi hpe tsun wu ai. 3 Yesu gaw, Ngai nang hpe gaja wa teng teng tsun de ga, Ntsa de nna n shangai ai masha gaw, Karai Kasang a mungdan mu lu na n rai, ngu nna shi hpe htan wu ai. 4 Bai Nikodi gaw, Masha gaw aprat kaba sayang, kaning rai bai shangai lu na a ta? kanu a hkritung de bai shang nna shangai lu na a ni? ngu nna san wu yang, 5 Yesu gaw, Ngai nang hpe gaja wa teng teng tsun de ga, Hka hte Wenyi e n shangai ai masha gaw, Karai Kasang a mungdan hta shang lu na n rai; 6 hkumshan hte shangai ai gaw, hkumshan rai nga ai; Wenyi hte shangai ai chyawm gaw, wenyi rai nga ai. 7 Ntsa de nna shangai lu na myit dai, ngu nna ngai tsun ai hpe hkum mau et. 8 Nbung gaw bung wa mayu ai de bung wa nna, de a wu ai nsen hpe nang na dat wu timung, kanang na bung wa nna, gade rai wa ai gaw, nang n chye dat ndai; dai hte maren, Wenyi e shangai ai masha shagu mung shingrai nga ai, ngu nna htan wu ai. 9 Shaloi Nikodi gaw, Dai gaw kaning rai byin lu na a ta? ngu nna shi hpe bai san wu yang, 10 Yesu gaw Nang gaw Israela masha ni hta sara wa mi ting rai da nhtawm, ndai lam nang n chye n ni? 11 Ngai nang hpe gaja wa teng teng tsun de ga, Anhte gaw tinang chye ai lam tsun ga ai, mu yu saga ai hte maren sakse hkam ga ai; raitimung anhte a sakse ga hpe, nanhte n hkap la myit dai. 12 Dinghta ga hte seng ai lam sha ngai tsun yang pyi, nanhte n kam lu myit yang gaw, sumsing lamu hte seng ai lam wa, ngai tsun made yang gaw, kaning rai kam lu na myit ta? 13 Sumsing lamu de na yu hkrat wa ai hte, sumsing lamu e nga nga yu ai Masha Kasha hta kaga, kadai mung sumsing lamu de lung wa yu ai n rai. 14 Mawshe gaw nam mali e lapu hpe sharawt da ai zawn, 15 Masha Kasha hta kamsham ai ni nlang hte gaw, htani htana asak lu la hkra, Masha Kasha mung sharawt da ai hkrum na ra ai. 16 Kaning rai nme law, Karai Kasang a Kasha hpe kamsham ai ni nlang hte gaw, hten bya n hkrum ai sha, htani htana asak lu la mu ga nga, Karai Kasang gaw shi a Kasha shingtai hpe jaw kau ai kaw du hkra, mungkan ga hpe tsawra wu ai. 17 Mungkan ga hpe tara dara u ga nga nna, Karai Kasang gaw dai Kasha hpe mungkan ga de shangun dat wu ai n rai; mungkan ga gaw shi a marang e hkyehkrang la ai hkrum lu na she, shangun dat wu ai. 18 Shi hpe kamsham ai wa gaw tara dara ai n hkrum lu ai; n kam n sham ai wa chyawm gaw, Karai Kasang a Kasha shingtai a mying ningsang hpe n kam n sham ai majaw, ya e pyi tara dara ai hkrum nga ai. 19 Tara dara ngu ai mung, Nhtoi gaw mungkan ga de shang sai, raitimung, masha ni a arawn alai n shawp nga ma ai majaw, shanhte gaw nhtoi hta nsin hpe grau tsaw ma ai, dai gaw tara dara hkrum ai lam nan rai nga ai. 20 Kaning rai nme law, n shawp n kap ai amu galaw ai wa gaw, nhtoi hpe ndawng n wawm nga ai rai nna, tinang galaw ai amu majaw, daru sharin kau ai n hkrum n ga nga, nhtoi de n sit sa wa ai. 21 Tengman ai lam hkan galaw ai wa chyawm gaw, tinang galaw ai amu Karai Kasang hta shachyen nga ai gaw, danpru u ga nga, dai nhtoi de sit sa wa ai, ngu nna shi hpe htan wu ai. 22 Dai hpang e Yesu gaw shi a sape ni hte nawng, Yuda mung hkan e du hkawm ma ai rai nna, dai yang e shanhte hte rau hkring nga nna baptisma jaw wu ai. 23 Yawhan mung, Salim makau na Enun ngu ai shara e, hka law nga ai majaw, dai yang e baptisma jaw let nga nga ai rai nna, mung masha ni gaw dai de baptisma sa hkam ma ai. 24 Kaning rai nme law, Yawhan gaw htawng hta jahkrat kau ai, garai n hkrum wu ai. 25 Dai re ai majaw, Yawhan a sape ni gaw, dai jasan jaseng ai lam a nhkan e, Yuda masha langai mi hte ndang kalang hkat ma ai. 26 Dai rai nna shanhte gaw Yawhan hpang de wa nhtawm, Rabai e, Yawdan hka wora hkran e nang hte rau nga nga nna, nang sakse hkam ya ai wa gaw, yu u, shi mung baptisma jaw nga ai rai nna, yawng mayawng shi hpang de du sa ma ai, ngu nna shi hpe tsun dan mu ai. 27 Shaloi Yawhan gaw, Sumsing lamu de na jaw ai sha n rai yang gaw, masha gaw hpa mung n lu la lu ai. 28 Ngai gaw Hkristu n rai nngai, shi a shawng e shangun dat ai wa she rai nngai, ngu nna ngai tsun ni ai gaw, nanhte nan nye a sakse ni rai nga myit dai. 29 Num nnan lu ai wa gaw, la nnan rai nga ai; la nnan a makau e tsap nga nna, shi a ga na la ai jinghku wa gaw, la nnan a nsen majaw ja ja kabu nga ai: shing re ai kabu gara lam gaw, ngai hta dik wa sali ai. 30 Shi gaw jat wa na ra ai, ngai chyawm gaw yawm wa na rai nga nngai. 31 Ntsa de nna du sa ai wa gaw, yawng a ntsa na rai nga ai: dinghta ga na rai nga ai wa gaw, dinghta ga hte seng nga ai rai nna, dinghta ga a lam sha chye tsun nga ai: sumsing lamu de nna du sa ai wa chyawm gaw, yawng a ntsa na rai nga ai. 32 Mu mamu na mana a lam shi sakse hkam nga ai; shi hkam ai sakse hpe gade ai muk n hkap la ya mu ai. 33 Shi a sakse lam hpe hkap la ai wa chyawm gaw, Karai Kasang gaw tengman nga ai, nga nna dazik shakap ai wa rai nga ai. 34 Karai Kasang e shangun dat ai wa gaw, Karai Kasang a mungga tsun nga ai: kaning rai nme law, Karai Kasang gaw shadawn sharam nna sha, Wenyi jaw wu ai n rai. 35 Kawa gaw Kasha wa hpe tsawra wu ai rai nna, yawng mayawng shi a lata hta ap ya nu ai. 36 Kasha wa hpe kamsham ai wa gaw, htani htana asak lu la wu ai: Kasha wa a ga hpe n madat ai wa chyawm gaw, asak hkrung lam mu na wu ai n rai: Karai Kasang a sindawng kahtet ai gaw, dai wa a ntsa e anga nga ai, ngu nna htan mu ai.

Yawhan 4

4:1 Yesu gaw shi hkum nan baptisma n jaw timung, shi a sape ni jaw ma ai rai nna, 2 Yesu gaw Yawhan hta grau nna sape shatai ai hte baptisma jaw nga ai gaw, Hparishe ni na masai hpe, dai Madu chye wu jang, 3 Yuda mung na shi pru nhtawm, Galile mung de bai wa ai. 4 Shaloi shi Samari mung ka-ang hku ga wa lu na rai nga ai. 5 Dai majaw shi gaw, Yaku e shi a kasha Yosep hpe jaw ai ga dachyawk makau na, Suhka ngu ai Samari mung na mare langai mi de du wa ai: dai yang e Yaku a hka htung nga nga ai. 6 Yesu gaw lam hkawm ba ai majaw, dai hka htung makau e dung nga ai: dai aten gaw hkying kru daram rai nga ai. 7 Shaloi Samari numsha langai mi hka ja na pru sa ai: Yesu gaw, Ngai hpe ntsin jaw lu e, ngu nna shi hpe hpyi wu ai: 8 shi a sape ni chyawm gaw shahpa mari na matu, mare de sa mat ma ai. 9 Dai rai nna Samari numsha gaw, Nang Yuda masha rai da nhtawm me, ngai Samari numsha hpe, hpa rai ntsin hpyi n ta? ngu nna shi hpe tsun wu ai: kaning rai nme nga yang, Yuda masha ni gaw Samari masha ni hte n kanawn ga ma ai. 10 Shaloi Yesu gaw, Karai Kasang a kumhpa hte, Ngai hpe ntsin jaw lu e, nga nna nang kaw hpyi ai wa hpe, nang chye wu taw gaw, nang shi kaw hpyi nna, shi gaw nang hpe hkrung ai ntsin jaw na nit dai, ngu nna shi hpe htan wu ai. 11 Dai numsha mung, Madu e, nang ntsin ja na rai hpa mung n lu ndai, hka htung mung sung nga ai; dai re ai majaw dai hkrung ai ntsin gaw, nang kanang na lu n ta? 12 Anhte a wa Yaku gaw ndai hka htung anhte hpe jaw da ma ni ai rai nna, shi hkum nan hte shi a kashu kasha ni, shi a yamnga ni, ndai hta na lu masai: nang gaw shi hta grau kaba n ni? ngu nna shi hpe tsun wu ai. 13 Shaloi Yesu gaw, Ntsin ndai lu ai wa kadai mung, hpang bai gara na ra ai; ngai jaw ai ntsin lu ai wa chyawm gaw, galoi mung hpang gara na n rai: 14 dai ngai jaw ai ntsin gaw, dai wa hta htani htana asak a matu lwi pru ai hka hpawk tai na ra ai, ngu nna shi hpe htan wu ai. 15 Shaloi dai numsha gaw, Madu e, ngai hpang mung n gara, nang de mung hka n sa ja ra n ga, ntsin dai jaw e, ngu nna shi hpe hpyi wu ai. 16 Yesu gaw, Na madu wa hpe naw wa shaga la nna, nang de sa rit, ngu wu ai. 17 Dai numsha gaw, Ngai la n lu nngai, ngu nna htan wu ai. Yesu gaw, Ngai la n lu nngai, nga nna nang tsun ai ga gaw, rai nga lit dai: 18 kaning rai nme law, nang la manga lu yu nit dai; ya na la gaw, na a madu wa n rai lit dai; ndai lam hta nang teng ai ga tsun nit dai, ngu nna shi hpe tsun wu ai. 19 Shaloi dai numsha gaw, Madu e, nang myihtoi rai nga ndai ngai dum se ai: 20 anhte a ji wa ni gaw ndai bum e nawku ga ma ai; nanhte chyawm gaw, nawku mai ai shara, Yerusalem mare e sha rai nga ai, nga nna tsun ga myit dai, ngu wu ai. 21 Yesu gaw, Numsha e, nye ga hpe kam u: ndai bum e mung n rai, Yerusalem mare e mung n re ai, Wa hpe nawku na aten gaw du na ra ai. 22 Nanhte gaw tinang n chye ai hpe nawku myit dai; anhte chyawm gaw tinang chye ai hpe nawku ga ai: kaning rai nme law, hkyehkrang la ai lam gaw, Yuda amyu hta na rai nga ai. 23 Raitimung, tengman ai hku nawku ai ni gaw, wenyi hta mung, tengman ai hta mung, Wa hpe nawku na aten gaw, du wa ra ai rai nna, ya e pyi rai nga ai: Wa gaw shingrai nawku ai ni hpe tam nga ai. 24 Karai Kasang gaw Wenyi rai nga ai: shi hpe nawku ai ni gaw, wenyi hta mung, tengman ai hta mung, nawku lu na rai nga ai, ngu nna shi hpe tsun wu ai. 25 Dai numsha mung, Hkristu ngu ai Meshia du na ra ai gaw, ngai chye nngai; dai wa du jang gaw, shi anhte hpe lam magup tsun madun na ra ai, ngu wu ai. 26 Shaloi Yesu gaw, Nang hte ga tsun nga ai, ngai gaw, dai wa nan rai nngai, ngu nna shi hpe tsun wu ai. 27 Dai shaloi shi a sape ni du wa nna, shi numsha hte shaga nga ai hpe, wa mau ma ai; raitimung, Nang hpa ra n ta? ngu na mung, Shi hte hpa rai shaga nga n ta? ngu na mung, gade ai muk n san wam mu ai. 28 Dai rai nna dai numsha gaw, shi a ntsin dibu tawn kau da nna, mare de bai wa nhtawm, mare masha ni hpe, 29 Ngai galaw ai lam yawng, ngai hpe bai tsun dan ya ai wa hpe sa yu maru: dai wa gaw Hkristu rai na kun? ngu nna wa tsun mu ai. 30 Shanhte mung mare de na pru sa nna, shi kaw sa du ma ai. 31 Dai laman e sape ni gaw, Rabai e, shat sha u, ngu nna shi hpe agaw mu ai. 32 Shi gaw, Nanhte n chye ai shahpa ngai lu da we ai, ngu nna shanhte hpe htan mu ai. 33 Dai majaw, sape ni gaw, Masha langai ngai shi e shat sa jaw masai kun? nga nna shada san tsun ma ai. 34 Dai rai nna Yesu gaw, Ngai e shangun dat ai wa a myit hku hkan galaw na hte, shi a magam bungli shangut lu na gaw, nye a shahpa rai nga li ai. 35 Nanhte gaw, Ya shata mali naw ra ai, dai lai jang she mam dan ten du na re ai, nga myit dai n rai myit ni? Yu mu, ngai nanhte hpe tsun made ga, yi hkauna ni hta dan na mam, ya e pyi myin htoi nga ai hpe, sharawt mada yu mu: 36 gat ai wa hte dan ai wa rau kabu lu na she, dan ai wa mung shabrai lu la nna, htani htana asak a matu nsi nai si shu la lu ai. 37 Kaning rai nme law, langai mi gaw gat, langai mi gaw dan re ai, nga ai ga gaw, ndai yang e gaja teng nga ai. 38 Nanhte n-gun n dat ai kaw na dan la nu, ngai nanhte hpe shangun dat made ai: masha kaga ni makan bungli galaw masai rai nna, nanhte gaw shanhte a makan bungli hta shang la nga myit dai, ngu nna shanhte hpe tsun mu ai. 39 Dai numsha e, Ngai galaw ai lam yawng shi ngai hpe bai tsun dan ya ai, nga nna sakse hkam ai ga majaw, dai mare na Samari masha law law wa, Yesu hpe kamsham ma ai. 40 Dai rai nna, Samari masha ni shi hpang de du ma yang, shanhte hte anga nga na hpyi ma ai majaw, dai yang e ni ni hkring nga ai. 41 Shi a ga majaw mung kamsham ai ni grau law wa ma ai: 42 dai ni gaw dai numsha hpe, Ya gaw, na a ga majaw sha anhte kamsham ai n rai saga ai: anhte nan na la lu nna, ndai wa gaw mungkan ga a Hkyehkrang la ai Madu teng teng rai nga ai chye saga ai, ngu mu ai. 43 Ni ni lai jang shi gaw dai yang na pru nna, Galile mung de rai mat wa ai: 44 kaning rai nme law, myihtoi gaw tinang mung e arawng n lu ga ai, nga nna Yesu gaw shi hkum dai sakse hkam nga ai. 45 Dai rai nna, Galile mung de du jang, Galile masha ni gaw poi nhtoi rai yang na, Yerusalem mare e shi galaw dan ai amu mahkra hpe mu ma ai majaw, shi hpe hkap la ma ai: kaning rai nme nga yang, shanhte mung dai poi de sa ma ai. 46 Dai majaw shi gaw, ntsin hpe tsabyi shatai ai shara, Galile mung na Hkana kahtawng de bai sa du ai. Shaloi e Keperna-um mare na du langai mi a shadang sha gaw machyi nga lu ai. 47 Yesu gaw Yuda mung na Galile mung de du wa ai hpe, dai du wa na wu yang, shi Yesu hpang de sa nna, shi a kasha hpe yu wa shamai ya na hpyi wu ai: shi gaw si wa magang nga ai. 48 Dai re ai majaw Yesu gaw, Nanhte lamik kumla hte mauhpa amu n mu myit yang gaw, nanhte hpa mung n kam n sham myit dai, ngu nna shi hpe tsun wu ai. 49 Dai du wa chyawm gaw, Madu e, ngai sha garai n si yang yu wa ga law, ngu nna hpyi wu yang, 50 Yesu gaw, Wa nu, na nsha gaw bran salit dai, ngu nna shi hpe tsun dat wu ai. Dai du wa gaw, Yesu tsun ai ga hpe kam let wa mat ai. 51 Shingrai shi wa nga yang, shi a mayam ni shi hpe sa tau nna, kasha bran sai lam, tsun dan mu ai. 52 Dai majaw machyi bran ai aten ahkying san wu yang, shanhte gaw, Mani ahkying sanit e hkum kahtet ai gaw kawp mat sai, ngu nna htan mu ai. 53 Dai rai nna dai ahkying gaw, Na nsha bran salit dai, nga nna Yesu shi hpe tsun ai ahkying nan rai nga ai hpe, kawa chye wu ai rai nna, shi hkum nan hte shi a nta masha nlang hte gaw, kamsham mat ma ai. 54 Ndai lamik kumla gaw Yesu Yuda mung nna, Galile mung de du wa ai, lahkawng lang bat yang na lamik kumla rai nga ai.

Yawhan 5

5:1 Dai hpang Yuda masha ni a poi langai mi nga ai rai nna, Yesu gaw Yerusalem mare de lung wa ai. 2 Ya Yerusalem mare hta dai sagu chyinghka makau e, jarawp manga gap da ai hte, Hebre ga hku Behtesda ngu ai hka lawng langai mi nga ai. 3 Dai jarawp ni hta, machyi makaw re ai, myi kyaw ai, lagaw hten ai, hkum katsing si ai masha law law taw nga ma ai. 5 Dai yang e sumshi matsat ning tup machyi ai masha langai mi mung lawm nga ai. 6 Yesu gaw dai wa kaleng taw nga ai hpe mu nna, shingrai machyi nga ai na la sai, chye wu ai majaw, dai wa hpe, Nang mai mayu n ni? ngu nna san wu ai. 7 Dai machyi ai wa gaw, Madu e, hka shamu jang hka lawng de ngai hpe woi shang na masha n lu nngai; ngai shang sa wa nga yang, masha kaga langai ngai nye a shawng e shang mat mat re ai, ngu nna shi hpe htan wu ai. 8 Shaloi Yesu gaw, Rawt u, na a hpun panep la hpai nna hkawm wa su, ngu nna dai wa hpe tsun wu ai. 9 Dai wa gaw shaloi jang mai mat ai rai nna, shi a hpun panep hpai let hkawm mat wa ai. 10 Dai shani gaw laban nhtoi rai nga ai. Dai re ai majaw Yuda masha ni gaw, dai machyi mai ai wa hpe, Dai ni laban nhtoi rai nga ai rai nna, nang hpun panep n mai hpai ndai, ngu mu ai. 11 Shaloi dai wa gaw, Ngai e shamai ya ai wa e, Na a hpun panep la hpai nna hkawm wa u, ngu nngai, ngu nna shanhte hpe htan wu ai. 12 Shanhte gaw, Nang hpe, Hpun Panep la hpai nna hkawm wa u, nga ai wa gaw, kadai wa rai ta? ngu nna san mu ai. 13 Raitimung, machyi mai ai wa gaw, kadai re ai mung n chye dat wu ai: kaning rai nme law, dai yang e masha hpawng nga ai majaw, Yesu gaw mayun pru mat wa sai. 14 Dai hpang Yesu gaw nawku Htingnu e dai wa hpe mu hkrup nna, Yu u, nang ya hkam kaja nit dai: shawng na hta grau ai tsinyam n hkrum n ga, yubak hkum bai galaw et, ngu nna shi hpe tsun wu ai. 15 Dai wa gaw pru wa nna, shi hpe shamai ya ai wa gaw Yesu rai nga ai hpe, Yuda masha ni e tsun dan wu ai. 16 Laban nhtoi e shing re ai amu galaw ai majaw, Yuda masha ni gaw Yesu hpe zingri shatsang mu ai. 17 Shaloi Yesu gaw, Nye Wa gaw ya du hkra pyi amu a galaw nga ai rai nna, ngai mung galaw nngai, ngu nna shanhte hpe htan mu ai. 18 Dai rai nna, laban nhtoi jahprai ai hta n-ga, Karai Kasang hpe nan shi a Kawa nga nna, shi hkum dai hpe Karai Kasang hte shabung wu ai majaw, Yuda masha ni gaw shi hpe sat kau lu na lam, grau nna tam ma ai. 19 Dai re ai majaw Yesu gaw, Ngai nanhte hpe gaja wa teng teng tsun made ga, Kasha gaw tinang a myit hte hpa mung n galaw lu ai; Kawa galaw ai lam mu mamu hpe sha hkan galaw lu ai: Kawa galaw ai lam shagu, Kasha mung hkan galaw lu na rai nga ai. 20 Kawa gaw Kasha hpe tsawra wu ai rai nna, shi hkum dai galaw ai lam yawng mayawng Kasha wa hpe madun wu ai: nanhte mau mahka hkra, ya na hta grau kaba ai lam ni hpe mung, Kasha wa hpe madun na ru ai. 21 Kaning rai nme law, Kawa gaw si ai ni hpe sharawt nna jahkrung ya ai hte maren, Kasha wa mung shi ra mara ni hpe jahkrung ya wu ai. 22 Dai hta kaga, Kawa hpe hkungga ai hte maren, masha yawng Kasha wa hpe hkungga mu ga nga, Kawa gaw kadai hpe mung tara n dara ai sha, tara dara ai ahkang mahkra Kasha wa hpe ap ya nu ai. 23 Kasha wa hpe n hkungga ai wa gaw, shi e shangun dat ai Kawa hpe mung n hkungga ai rai nga ai. 24 Nanhte hpe ngai gaja wa teng teng tsun made ga, Nye a ga madat nna ngai e shangun dat ai wa hpe kamsham ai wa gaw, htani htana asak lu la wu ai rai nna, tara dawdan ai kaw n du ai sha, si nga ai kaw nna hkrung nga ai de, kawt lai wa sai. 25 Ngai nanhte hpe gaja wa teng teng tsun made ga, Si nga ai ni gaw, Karai Kasang a Kasha a nsen na lu na ahkying du wa ra ai rai nna, ya e pyi rai nga ai: na la ai ni mung hkrung nga na mara ai. 26 Kaning rai nme nga yang, Kawa gaw shi hkum dai hta asak rawng nga ai hte maren, Kasha wa hpe mung, shi hkum dai hta asak rawng lu na lam jaw nu ai rai nna, 27 shi gaw Masha Kasha rai nga ai majaw, tara dara na ahkang mung shi e ap ya nu ai. 28 Dai lam hpe hkum mau myit: kaning rai nme law, lup ni hta rawng nga ai ni nlang hte gaw shi a nsen na nna, pru lu na ahkying du na ra ai: 29 kaja ai lam hkan galaw ai ni gaw, asak hkrung ai a bai rawt ai de, n shawp ai lam hkan galaw ai ni gaw, tara dawdan hkrum ai a bai rawt ai de, pru lu na mara ai. 30 Ngai gaw nye a myit hte hpa amu mung n galaw lu nngai: ngai gaw na ai hte maren sha jeyang nngai; nye a jeyang ai hku mung dingman li ai: kaning rai nme law, ngai gaw nye myit hku hkan na n tam nngai, ngai e shangun dat ai wa a myit hku hkan na she tam nngai. 31 Ngai dai nye a lam sakse hkam la nngai rai yang gaw, ngai hkam ai sakse teng na li ai n rai. 32 Nye a lam sakse hkam ai wa gaw, kaga mi she nga ai:dai wa nye a lam hkam ya ai sakse gaw, tengman ai sakse rai nga ai hpe, ngai chye nga nngai. 33 Nanhte gaw Yawhan hpang de kasa shangun dat myit dai rai nna, shi gaw tengman ai lam maga de sakse hkam ya nu ai. 34 Ngai lu ai sakse chyawm gaw masha kaw na n rai: raitimung, nanhte hkyehkrang la ai kaw du myit ga, ngu nna ndai lam ngai tsun nngai. 35 Yawhan gaw tu grung ai hte htoi nga ai pyengdin rai nga ai rai nna, nanhte gaw shi a ahtoi hta e, tawng marang mi kabu nga mayu myit dai. 36 Raitimung, ngai lu ai sakse gaw Yawhan hkam ya ai sakse hta grau kaba li ai: kaning rai nme nga yang, Wa gaw, ngai gunhpai shangut na matu ngai hpe ap ya nna, ya ngai gunhpai nga ai amu ni e pyi, ngai hpe Wa e shangun dat ai lam sakse hkam ya nga ai. 37 Ngai hpe shangun dat ai nye Wa mung nye a lam sakse hkam ya ni ai. Nanhte gaw shi a nsen galoi mung n na yu myit dai: shi a gawng shing-yan hpe mung n mu yu myit dai: 38 dai hta kaga shi a mungga mung nanhte hta n rawng lu ai: kaning rai nme law, shi shangun dat ai wa hpe, nanhte n kam n sham myit dai. 39 Chyum laika ni hta nna nanhte htani htana asak lu la na re ai, nga nna myit myit dai majaw, dai laika ni hta nanhte hkan sawk yu yu rai myit dai: dai laika ni nan nye a lam sakse hkam nga ai: 40 dai re ai mi, asak hkrung ai lu la na matu nanhte gaw ngai hpang de n sa mayu myit dai. 41 Masha jaw ai arawng sadang gaw ngai n hkam la nngai: 42 raitimung, Karai Kasang a tsawra ai myit nanhte hta n rawng nga ai gaw, ngai chye nngai. 43 Ngai gaw nye Wa a amying hte du sa nngai raitimung, nanhte ngai hpe n hkap la myit dai; kaga wa mi tinang a amying hte du sa ai rai taw gaw, dai wa hpe nanhte hkap la na rai nga myit dai. 44 Shada da jaw ai arawng sadang hkam la nna, langai sha rai nga ai Karai Kasang e jaw ai arawng sadang hpe n tam ai ni, nanhte wa mi, kaning rai kamsham lu na myit ta? 45 Wa a man e ngai nanhte hpe mara shagun na hkum nawn myit; nanhte hpe mara shagun na wa gaw langai mi she nga ai; dai wa gaw, nanhte shamyet shanat nga ai Mawshe nan rai nga ai. 46 Mawshe hpe nanhte kam myit dai rai yang gaw, ngai hpe mung kam na manit dai: kaning rai nme law, Mawshe gaw nye a lam ka da nu ai. 47 Shi ka da ai laika ni hpe, nanhte n kam myit yang gaw, nye a ga hpe kaning rai kam lu na myit ta? ngu nna shanhte hpe tsun mu ai.

Yawhan 6

6:1 Dai hpang Yesu gaw, Tiberi ngu ai Galile nawng wora hkran de rap sa wa ai. 2 Machyi makaw hkrum ai ni hta, shi galaw dan ai lamik kumla ni hpe mu ma ai majaw, masha wunawng kaba shi kaw hkan nang ma ai. 3 Shaloi Yesu gaw dai bum de lung wa nna, shi a sape ni hte rau dung nga ai. 4 Ya, Shalai wa ai poi ngu ai, Yuda masha ni a poi, du na ni wa sai. 5 Dai re ai majaw Yesu mada yu nna, masha wunawng kaba shi kaw sa wa ai hpe mu wu yang, shi gaw Hpilip hpe, Ndai ni sha na muk anhte kanang sa mari na i? ngu nna san wu ai. 6 Shing nga san ai gaw, Hpilip hpe chyam yu na nga nna rai nga ai: kaning rai nme law, kaning di na gaw, shi dai chye da nu ai. 7 Hpilip gaw, Gumhpraw ni tsa a matu mari timung, masha hkum shagu, kachyi mi hpra sha na pyi law na n rai, ngu nna htan wu ai. 8 Shaloi, shi a sape ni hta na Simum Petru a kanau Andre gaw, 9 Muk-yaw muk tawng manga hte, nga lahkawng lu ai lasha ma langai mi nang e nga nga ai; raitimung, nde wa law ai masha ni a matu gaw kanang dang law na rai ta? ngu nna tsun dan wu ai. 10 Yesu gaw, Masha ni hpe dung nga shangun mu, ngu mu ai. Dai yang e tsingdu mung htat nga ai. Shingrai lasha hkying manga daram dung nga ma ai. 11 Shaloi Yesu gaw dai muk tawng ni hpe la nna, shakawn ya nhtawm, dung nga ai ni hpe karan jaw wu ai; dai hte maren nga hpe mung shanhte ra ai made, karan jaw mu ai. 12 Shanhte sha hkru ma jang, shi gaw, Hpa mung n mat u ga, ngam ai ahkyep alep ni hpe hkan hta la mu, ngu nna shi a sape ni hpe tsun mu ai. 13 Dai hte maren shanhte hkan hta la nna, dai muk-yaw muk tawng manga hta na, sha ai ni a ngam ai ahkyep alep, mung shi lahkawng hpring tup lu la ma ai. 14 Dai re ai majaw, shi madun ai lamik kumla hpe, shawa masha ni mu ma yang, shanhte gaw, Gaja wa teng teng ndai wa gaw mungkan ga de du sa ra ai myihtoi rai nga ai, nga ma ai. 15 Dai masha ni gaw shi hpe adip la nna, hkawhkam shatai na maw ma ai hpe, Yesu chye wu ai majaw, shi hkrai sha dai bum de bai mayun lung mat wa ai. 16 Shana de du jang shi a sape ni gaw nawng de yu wa nna, 17 li jawn nhtawm, nawng wora hkran na Kaperna-um mare de rap sa wa ma ai. Ya nsin sin nna, Yesu mung shanhte kaw garai n du wa ai: 18 nbung laru mung ru wa ai rai nna, nawng e hka leng ni hta nga ai. 19 Dai re ai majaw mai masum mali daram shap sa wa sayang, Yesu gaw hka ntsa e hkawm let, li makau du hkra du sa wa ai hpe, shanhte hkap mu nna, hkrit kajawng nga ma ai. 20 Shi chyawm gaw, Ngai she rai nngai, hkum hkrit myit, ngu wu ai. 21 Dai majaw shanhte gaw shi hpe li hta hkap shalun la mayu ma ai rai nna, dai li mung shanhte du na ra ai danam de, shaloi jang du wa ai. 22 Hpang shani e nawng wora hkran e tsap nga ma ta ai shawa masha ni gaw, li langai sha hta kaga shaje li n nga ai hpe mu ma ai hte, Yesu gaw dai li hta shi a sape ni hte rau n shang nang ai, sape ni hkrai shang ma ai hpe, dum ma ai: 23 ( raitimung, dai Madu shakawn ai hpang, shanhte muk sha ai shara a makau de, Tiberi mare na li ni du ma ai ): 24 dai re ai majaw dai kaw Yesu mung, shi a sape ni mung, n nga masai hpe, shawa masha ni chye mu yang, shanhte mung dai li ni hta jawn nna, Yesu hpe tam let Kaperna-um mare de hkan du nang ma ai. 25 Shingrai dai nawng wora hkran e shi hpe mu mu yang, shanhte gaw, Rabai e, nang nang de galoi du nit ta? ngu nna san mu ai. 26 Yesu gaw, Ngai nanhte hpe gaja wa teng teng tsun made ga, Lamik kumla mu myit dai majaw, nanhte ngai hpe tam ai n rai myit dai; muk lusha nna hkru kat ai majaw sha, tam ai rai nga myit dai. 27 Hten bya chye ai lusha a matu hkum shaja myit; Masha Kasha nanhte hpe jaw lu ai htani htana asak a matu, agrin nga ai lusha lu la na she shaja mu: kaning rai nme law, dai wa gaw, Kawa Karai Kasang a dazik kap ai wa rai nga ai, ngu nna htan mu ai. 28 Dai majaw shanhte gaw, Anhte Karai Kasang a amu gunhpai na gaw, kaning di na rai ta? ngu nna shi hpe san mu yang, 29 Yesu gaw, Karai Kasang a amu ngu ai gaw, shi shangun dat ai wa hpe kamsham ai lam, ngu ai rai nga ai, ngu nna shanhte hpe htan wu ai. 30 Dai re ai majaw shanhte gaw, Anhte mu lu nna nang hpe kam na gaw, nang hpa lamik kumla madun nga n ta? nang hpa magam gun nga n ta? 31 Shi gaw shanhte sha na matu, sumsing lamu de nna muk jaw mu ai, nga nna ka da nga ai hte maren, anhte a ji wa ni gaw nam mali hkan e manna muk lusha ma ai, ngu nna shi hpe tsun mu ai. 32 Shaloi Yesu gaw, Ngai nanhte hpe gaja wa teng teng tsun made ga, Nanhte hpe sumsing lamu de na muk jaw ai gaw Mawshe n rai; nye Wa she sumsing lamu de na dai tengman ai muk nanhte hpe jaw myit dai: 33 kaning rai nme law, Karai Kasang a muk ngu ai gaw, sumsing lamu na yu wa nna, mungkan ga hpe asak jaw ai hpe ngu ai, rai nga ai, ngu nna shanhte hpe tsun mu ai. 34 Dai rai nna shanhte gaw, Madu e, muk dai anhte hpe galoi mung a jaw nga mi, ngu mu ai. 35 Yesu gaw, Asak muk gaw ngai rai nga nngai, ngai hpang de sa ai wa gaw kawsi hkrum na n rai, ngai hpe kamsham ai wa mung, galoi mung hpang kara hkrum na n rai. 36 Raitimung, nanhte gaw ngai hpe mu da ninglen n kam myit dai, ngu nna ngai nanhte hpe tsun masade ai. 37 Wa e ngai hpe ap ya ai yawng mayawng hte gaw, ngai hpang de du na mara ai; ngai hpang de du sa ai wa hpe mung, gaja wa ngai n kanawng kau na nngai. 38 Kaning rai nme law, sumsing lamu nna ngai yu sa ai gaw, nye a myit hkan na ngu, yu sa nngai n rai, ngai hpe shangun dat ai wa a myit hkan na she, yu sa ai rai nngai. 39 Ngai hpe shangun dat ai wa a myit mung, ngai e ap ya ai yawng mayawng hte hta na, langai mi muk ngai n shayet ai sha, hpang jahtum na nhtoi hta sharawt la na, nga nna myit ai rai nga ai. 40 Hpa rai nga yang, Kasha wa hpe mu nna, kamsham ai wa kadai mung htani htana asak lu la na gaw, nye Wa a myit ra ai hku rai nga ai: ngai mung hpang jahtum na nhtoi hta, dai wa hpe sharawt na we ai, ngu nna shanhte hpe tsun mu ai. 41 Dai rai nna Yesu shi nan, Sumsing lamu de na yu wa ai muk ngai rai nga nngai, nga ai majaw, Yuda masha ni shi a lam aput angun let, 42 Ndai wa gaw Yosep a kasha Yesu n rai ni? shi a kanu kawa hpe anhte chye gaw ai n rai ni? Dai re ai mi, Ngai gaw sumsing lamu de na yu wa nngai, nga nna kaning rai tsun lu a ta? nga ma ai. 43 Shaloi Yesu gaw, Nanhte shada da hkum tsun angun myit: 44 ngai hpe shangun dat ai nye Wa e lau la ai wa n rai yang gaw, kadai mung ngai hpang de du sa lu na n rai; du sa ai wa hpe mung, hpang jahtum na nhtoi hta ngai sharawt la na we ai. 45 Masha yawng mayawng gaw Karai Kasang a sharin achyin ai lu la ai ni rai na mara ai, nga nna myihtoi laika ni hta ka da ai hte maren, nye Wa kaw na madat la nna, sharin achyin la ai ni yawng hte gaw, ngai hpang de du sa ma ai. 46 Shinggyim masha langai mi e me Wa hpe mu yu ai n rai; Karai Kasang kaw nna du sa ai wa chyu sha, Wa hpe mu yu nu ai. 47 Nanhte hpe ngai gaja wa teng teng tsun made ga, Kamsham ai wa gaw htani htana asak lu la lu ai. 48 Ngai gaw asak muk rai nga nngai. 49 Nanhte a nji nwoi ni gaw nam mali hkan e manna muk sha nna, si wa masai. 50 Ya na muk gaw, masha wa sha nna n si u ga nga, sumsing lamu de na yu wa ai muk rai nga ai. 51 Ngai gaw sumsing lamu de na du yu wa ai, hkrung ai muk rai nga nngai: muk ndai sha ai wa kadai mung, htani htana ahkrung nga na ra ai: mungkan ga a asak hkrung nga na matu, ngai jaw ai muk chyawm gaw, nye a shan rai nga li ai, ngu nna shanhte hpe htan mu ai. 52 Dai re ai majaw Yuda masha ni, Ndai wa gaw, kaning di nna anhte hpe shi a ashan jaw sha lu na a ta? nga nna shada da tsun hkat ma ai. 53 Dai rai nna Yesu gaw, Ngai nanhte hpe gaja wa teng teng tsun made ga, Masha Kasha a ashan nanhte n sha, shi a asai hpe mung n lu myit yang gaw, nanhte hta asak n rawng lu ai. 54 Nye a ashan sha nna, nye a asai lu ai wa gaw, htani htana asak lu la nu ai: dai wa hpe mung, hpang jahtum na nhtoi hta ngai sharawt la na we ai: 55 kaning rai nme law, nye a ashan gaw tengman ai shahpa rai li ai; nye a asai mung, tengman ai luhpa rai li ai. 56 Nye a ashan sha nna, nye a asai lu ai wa gaw, ngai hta rawng nga ai; dai wa hta mung ngai rawng nga nngai. 57 A hkrung nga ai nye Wa gaw, ngai hpe shangun dat ai rai nna, ngai gaw Wa a majaw hkrung nga nngai hte maren, ngai hpe sha ai wa mung, nye a majaw hkrung nga na ra ai. 58 Da ndai gaw sumsing lamu de nna du yu wa ai muk rai nga ai: nji nwa ni sha nna si wa ai muk zawn n rai: ndai muk sha ai wa gaw, htani htana ahkrung nga na ra ai, ngu nna shanhte hpe tsun mu ai. 59 Ndai gaw, Kaperna-um mare na tara jawng hta, shi sharin shaga nga yang, tsun ai ga rai lu ai. 60 Dai re ai majaw shi a sape ni law law wa dai ga na jang, Ga ndai gaw yak la ai ga rai nga ai, kadai wa madat lu na i? nga ma ai. 61 Shing nga nna shi a sape ni tsun ngun nga ma ai hpe, Yesu shi a myit hta chye wu ai majaw, shi shanhte hpe, Ga ndai gaw nanhte hpe myit hten shangun wa sa ni? 62 Dai Masha Kasha, myi nga ai shara de bai lung wa ai hpe nanhte mu myit yang gaw, kaning nga na myit ta? 63 Asak jahkrung ai gaw Wenyi rai nga ai; hkumshan gaw hpa lam mung n la ai: ngai nanhte hpe tsun ai mungga gaw, Wenyi rai nga ai, asak mung rai nga ai. 64 Raitimung nanhte hta na nkau mi gaw n kam n sham myit dai, ngu mu ai. Kaning rai nme law, Yesu gaw, n kam n sham ai ni kadai rai ma ai mung, shi hpe ap kau na wa kadai re ai mung, shawng nna chye da nga ai. 65 Dai rai nna shi gaw, Dai lam majaw she, nye Wa a ahkang hte n rai yang gaw, kadai mung ngai hpang de ndu n sa lu ai, ngu nna ngai nanhte hpe tsun masade ai, ngu mu ai. 66 Dai nga ai majaw shi a sape ni law law wa nhtang mat wa nna, shi kaw bai n hkan nang masai. 67 Dai rai nna Yesu gaw sape shi lahkawng hte hpe, Nanhte mung wa mat mayu myit ni? ngu nna san mu ai. 68 Shaloi Simun Petru gaw, Anhte kadai hpang de wa na rai nga a ta? nang gaw htani htana asak hte seng ai mungga lu ndai: 69 nang gaw Karai Kasang a Chyoi pra ai wa rai nga ndai hpe, anhte kamsham saga ai rai nna, chye nga ga ai, ngu nna shi hpe htan wu ai. 70 Bai Yesu gaw, Nanhte shi lahkawng hpe ngai lata la masade ai, n rai ni? raitimung, nanhte hta na langai mi gaw nat matse rai nga ai, ngu nna shanhte hpe htan mu ai. 71 Shing nga ai gaw, Simun Iskarut a kasha Yuda hpe sha-ang nna tsun ai rai nga ai: kaning rai nme law, dai wa gaw shi hpe ap kau na wa rai nga ai hte, sape shi lahkawng hta mung lawm nga ai.

Yawhan 7

7:1 Dai hpang Yesu gaw Galile mung hkan e jawt hkawm nga ai: Yuda masha ni shi hpe sat kau na tam ma ai majaw, Yuda mung e n hkawm mayu wu ai. 2 Dai shaloi e Yuda masha ni a Sum poi, ngu ai poi, du ra ai rai nna, shi a kanau ni gaw, 3 Nang galaw ai amu a lam ni hpe na a sape ni mung mu lu mu ga, ndai mung na pru nna, Yuda mung de sa wa su: 4 kajai gumhkawng na hpe ra ai wa gaw, makoi magap rai nna hpa mung n galaw ga ai. Nang ndai amu lam galaw ndai rai yang gaw, mungkan ga e na a hkum shadan dan u, ngu nna shi hpe tsun mu ai. 5 Kaning rai nme law, shi a kanau ni pyi shi hpe n kam n sham ma ai. 6 Dai re ai majaw Yesu gaw shanhte hpe, Nye a ahkying garai n du li ai; nanhte a ahkying chyawm gaw, tutnawng a rai nga ai. 7 Mungkan ga gaw nanhte hpe ndawng n wawm rai lu ai n rai; ngai hpe ndawng n wawm nga ai: kaning rai nme law, de a arawn alai n shawp ai hpe, ngai sakse hkam nngai majaw rai nga ai. 8 Dai poi de nanhte lung wa mu: ngai chyawm gaw ndai poi hta garai n lung na nngai: kaning rai nme law, nye a ahkying garai n du li ai, 9 nga nna shanhte hpe tsun dat nhtawm, shi gaw Galile mung e naw hti nga ai. 10 Raitimung, kanau ni dai poi de lung mat wa ai hpang, shi mung, dan dan n re ai sha, mayun nna sa ai zawn, lung wa wu ai. 11 Dai majaw Yuda masha ni gaw dai poi hta shi hpe tam nna, Dai wa kanang rai nga a ta? nga ma ai. 12 Shawa masha ni hta mung shi a lam wu wu di di law nga ai hte, nkau mi gaw, Shi gaw masha kaja rai nga ai, nga ma ai; bai nkau mi gaw, N rai, mung masha ni hpe woi shadam ai wa rai nga ai, nga shajang ma ai. 13 Raitimung, Yuda masha ni hpe hkrit ai majaw, kadai mung shi a lam leng leng n tsun ma ai. 14 Ya dai poi nhtoi a ka-ang hkup rai wa jang, Yesu gaw nawku Htingnu de lung nna sharin shaga nga ai. 15 Dai re ai majaw Yuda masha ni gaw mau ai hte, Ndai wa gaw n sharin yu ai mi, laika kaning rai chye lu ai ga i? nga ma ai. 16 Dai majaw Yesu gaw, Ngai sharin shaga ai ga gaw nye a ga n rai, ngai hpe shangun dat ai wa a ga rai nga ai: 17 Dai wa a myit hkan mayu ai wa rai yang gaw, sharin shaga ai ga ndai, Karai Kasang kaw na re ai, shing n rai, nye a myit hte tsun nga ai ga re ai, chye ginhka lu na wu ai. 18 Tinang a myit hte tsun ai wa gaw, tinang a arawng sadang tam ai rai nga ai: tinang hpe shangun dat ai wa a arawng sadang tam ai wa chyawm gaw, tengman nga ai rai nna, shi hta n ding n man ai n rawng lu ai. 19 Mawshe gaw nanhte hpe jep ai tara jaw da sai, n rai ni? raitimung, nanhte hta na kadai mung, dai tara n hkan myit dai. Ngai hpe sat kau na hpa rai tam myit ta? ngu nna shanhte hpe htan mu ai. 20 Shaloi hpawng nga ai masha ni gaw, Nang hta nat rawng nga ai: nang hpe sat kau na kadai tam a ta? ngu nna htan mu ai. 21 Yesu gaw, Ngai amu langai mi galaw se ai rai nna, nanhte yawng mau manit dai. 22 Matu gadoi ai lam gaw Mawshe kaw nna n rai, ji wa ni kaw nna she, Mawshe nanhte hpe dai tara jaw da myit dai rai nna, laban nhtoi hta pyi nanhte masha hpe matu gadoi ai lam jaw myit dai: 23 shingrai Mawshe a tara n hten lu hkra, masha wa laban nhtoi e matu gadoi hkam la lu ai re ai mi, laban nhtoi hta masha hkum ting hpe shamai ya ai majaw, nanhte ngai hpe pawt bu nga myit ni? 24 Myiman tau nna hkum jeyang myit, dingman ai hku she jeyang mu, ngu nna shanhte hpe htan mu ai. 25 Dai re ai majaw Yerusalem mare na masha nkau mi gaw, Sat kau na tam ai gaw, ndai wa hpe n rai ni? 26 Yu mu, shi dan dan leng leng hkaw tsun nga nna, shi hpe mung hpa n ngu mu hka: ndai wa nan Hkristu rai nga ai gaw, du ni gaja wa chye manu ai kun? 27 Raitimung, ndai wa kanang na re ai gaw, anhte chye ga ai; Hkristu du sa yang chyawm gaw, kanang na danpru na gaw, kadai chye ai n rai, nga ma ai. 28 Dai re ai majaw Yesu gaw nawku Htingnu e sharin shaga nga yang, Nanhte ngai hpe chye nga myit dai; ngai kanang na re ai mung chye myit dai: ngai gaw nye a myit hte du sa nngai n rai; raitimung ngai hpe shangun dat ai, nanhte n chye ai wa gaw, tengman nga ai. 29 Dai wa gaw ngai hpe shangun dat nngai rai nna, shi kaw na ngai du sa nngai majaw, ngai shi hpe chye we ai, ngu nna jahtau wu ai. 30 Dai rai nna shanhte gaw shi hpe rim la na maw ma ai; raitimung, shi a ahkying garai n du lu ai majaw, gade ai muk shi hpe n rim lu mu ai. 31 Hpawng nga ai masha ni hta chyawm gaw, shi hpe kamsham ai ni law law wa rai nga ma ai rai nna, Hkristu du sa yang ri, ndai wa galaw ai hta, grau ai lamik kumla dan lu na a ni? nga nna tsun shajang ma ai. 32 Hpawng nga ai masha ni gaw, shi a majaw shing nga tsun wu ma ai hpe, Hparishe ni na ma yang, hkinjawng agyi ni hte Hparishe ni gaw, shi hpe rim la na matu, hpyen du ni hpe shangun dat ma ai. 33 Dai re ai majaw Yesu gaw, Ngai nanhte hte rau tawng marang mi sha naw nga nna, ngai hpe shangun dat ai wa hpang de wa mat na nngai: 34 shaloi nanhte ngai hpe tam timung, mu na myit dai n rai: ngai nga ai shara de mung nanhte n du lu na myit dai, ngu mu ai. 35 Dai majaw Yuda masha ni gaw, Anhte n mu tam lu hkra, ndai wa gaw gade sa wa na ra ai i? Heleni masha ni hta bra nga ai ni hpang de sa nna, Heleni masha ni hpe sharin shaga na wu ai kun? 36 Nanhte ngai hpe tam timung n mu na myit dai; ngai nga ai shara de mung nanhte n du lu na myit dai, nga ai ga gaw hpa nga ai ga rai lu ai i? nga nna shada da tsun ma ai. 37 Shaloi dai poi a jahtum nhtoi ngu ai nhtoi kaba hta Yesu gaw tsap da nna, Hpang kara ai wa nga yang gaw, ngai hpang de sa lu rit. 38 Ngai hpe kamsham ai wa gaw, Chyum laika hta tsun ai hte maren, dai wa a kraw lawang hta na asak hkrung ai ntsin a hka nu lwi pru nga na ra ai, ngu nna jahtau tsun wu ai. 39 Shing nga ai gaw, shi hpe kamsham ai ni lu la na Wenyi hpe, sha-ang nna tsun ai rai nga ai: kaning rai nme law, Yesu gaw shi a hpung shingkang garai n danhkung ai majaw, Wenyi garai n jaw wu ai. 40 Shing nga ai ga na ma yang, hpawng nga ai ni hta na nkau mi gaw, Ndai wa gaw gaja wa dai myihtoi rai nga ai: 41 nkau mi mung, Ndai wa gaw Hkristu nan rai nga ai, nga ma ai. Raitimung, nkau mi gaw, Ataw! Hkristu wa mi Galile mung na pru na a ni? 42 Hkristu gaw Dawi a lakung hta na prat wa nna, Dawi a shara ngu ai Betlehem kahtawng na she, paw pru na re ai, nga nna Chyum laika hta rawng ai, n rai ni? nga hkat ma ai. 43 Dai rai nna hpawng nga ai masha ni hta, shi a majaw bra wa shara rawng wa malu ai. 44 Shanhte hta na nkau mi gaw shi hpe rim la mayu ma timung, kadai wa mung shi hpe n rim lu mu ai. 45 Dai re ai majaw hpyenbu ni, hkinjawng agyi ni hte Hparishe ni hpang de bai du wa ma yang, dai ni gaw, Dai wa hpe hpa rai n woi wa myit ta? ngu nna hkap san mu yang, hpyenbu ni gaw, 46 Wora wa zawn nga nna sharin shaga ai kadai mung n nga yu ai, ngu nna htan mu ai. 47 Shaloi Hparishe ni gaw, Nanhte hpe wa mung lau kau lu manit ni? 48 Du agyi ni hta na mung, Hparishe ni hta na mung, dai wa hpe kamsham ai kadai nga a ta? 49 Tara n chye ai, ndai shawa hpawng chyawm gaw, dagam dala hkrum sha ai ni rai nga ma ai, ngu nna shanhte hpe htan mu ai. 50 Shanhte hta lawm ai, shawng de Yesu kaw sa ai wa Nikodi chyawm gaw, 51 Anhte a tara gaw masha hpe, shi hkum nan e n san yu ai mi, shi galaw ai lam garai n chye yang, dawdan ga a ni? ngu nna shanhte hpe san mu ai. 52 Shanhte gaw, Nang mung Galile masha rai nga n ni? Galile mung de na kadai myihtoi mung n paw pru yu ai, nang she gawn yu u, ngu nna shi hpe htan mu ai. 53 ( Shaloi shanhte langai hte langai tinang a nta de wa mat ma ai:)

Yawhan 8

8:1 Yesu chyawm gaw Tsanlun bum de pru mat wa ai. 2 Bai jahpawt jau jau e nawku Htingnu de shi sa wa ai rai nna, masha nlang hte shi kaw sa ma ai; shi dung let shanhte hpe sharin shaga nga ai. 3 Shaloi laika ka ai sara ni hte Hparishe ni gaw, shut hpyit nga ai masha num langai mi hpe dun sa nna, ka-ang e shatsap tawn da nhtawm, 4 Sara e, ndai numsha hpe shut hpyit nga yang, mu hkrup sagaw ai: 5 ndai zawn re ai numsha hpe, nlung hte kabai sat kau lu na re ai, nga nna Mawshe gaw jep ai tara hta anhte hpe matsun jaw da ma ni ai: ya nang gaw kaning ngu na wu ta? ngu nna shi hpe san mu ai. 6 Shing nga san ai gaw, shi hta mara shagun na lam mu lu hkra, shi hpe chyam dinglik yu ai rai nga ai. Yesu chyawm gaw ga de gum nna, ga hta layung hte ka nna nga nga ai. 7 Shanhte shing nga bai kahtap san san rai ma ai majaw, shi rawt mada yu nna, Nanhte hta na mara n lu ai wa, shi hpe shawng nlung hte kabai mu, ngu nna shanhte hpe tsun mu ai. 8 Shing nga ngut jang shi bai gum nna, ga hta ka nga ai. 9 Shanhte dai ga na jang, agyi salang ni shawng pru wa kaw nna, langai hte langai pru mat wa ma ai: shingrai Yesu hkrai sha hti nga ai hte, dai numsha mung myi na shara e anga nga ai. 10 Shaloi Yesu bai rawt mada yu nna, Numsha e, ya shanhte kanang rai wa ma sata? nang hpe gade ai muk n jeyang a ni? ngu nna shi hpe san wu yang, 11 numsha gaw, Madu e, gade ai muk n jeyang nngai, ngu nna htan wu ai. Shaloi Yesu gaw, Ngai mung nang hpe n jeyang na nngai: wa nu; ya kaw nna yubak hkum galaw nit, ngu nna tsun dat wu ai.) 12 Dai re ai majaw Yesu shanhte hpe bai tsun mu ai gaw, Ngai gaw mungkan ga a nhtoi rai nga nngai: nye a hpang hkan nang ai wa gaw, nsin hta n hkawm n sa lu na rai nna, asak a nhtoi lu la na ra ai, ngu mu ai. 13 Dai rai nna Hparishe ni gaw, Nang dai na a lam sakse hkam ndai rai nna, na a sakse gaw n teng nga lit dai, ngu nna shi hpe tsun mu ai. 14 Shaloi Yesu gaw, Ngai dai nye a lam sakse hkam yang pyi, nye a sakse teng nga li ai: ngai kanang na pru sa nna, gade rai wa na mung, ngai chye nngai: nanhte chyawm gaw, ngai kanang na pru sa nna, gade rai wa na mung n chye myit dai. 15 Nanhte gaw hkumshan lam hku sha dawdan myit dai; ngai gaw kadai hpe mung n dawdan nngai. 16 Gaja wa dawdan nngai rai yang mung, ngai dawdan ai hku tengman li ai: kaning rai nme law, ngai gaw langai sha rai nga nngai n rai; ngai mung, ngai hpe shangun dat ai, nye Wa mung, rai nga ga ai. 17 Rai sa, sakse lahkawng a ga gaw tengman nga ai, nga nna nanhte a tara hta ka da nga ai. 18 Ngai gaw tinang dai sakse hkam ya ai wa rai nga nngai: ngai hpe shangun dat ai, nye a Wa mung, nye a lam sakse hkam ya ai wa rai nga ai, ngu nna shanhte hpe htan mu ai. 19 Dai rai nna shanhte gaw, Na Nwa gaw kanang nga lit ta? ngu nna shi hpe san mu ai. Yesu gaw, Nanhte ngai hpe mung, nye Wa hpe mung, n chye myit dai: ngai hpe chye myit taw gaw, nye Wa hpe mung, chye na manit dai, ngu nna bai htan mu ai. 20 Ga ndai gaw nawku Htingnu e sharin shaga nga yang, alu gawk e tsun ai ga rai nga ai: shi a ahkying garai n du lu ai majaw, shi hpe gade ai muk n rim lu mu ai. 21 Dai re ai majaw shi shanhte hpe bai tsun mu ai gaw, Ngai wa mat na nngai, shaloi nanhte ngai hpe tam na marin dai; tinang a yubak hta mung, nanhte si na myit dai: ngai wa ai shara de mung, nanhte n du lu na myit dai, ngu mu ai. 22 Dai majaw Yuda masha ni gaw, Ngai wa ai shara de nanhte n du lu na myit dai. nga nna shi tsun ai gaw, shi hkum dai sat na wu ai kun? nga ma ai. 23 Shaloi shi gaw, Nanhte lawu tsang na rai nga myit dai; ngai chyawm gaw lahta tang na rai nga nngai: nanhte gaw ndai mungkan ga na rai myit dai; ngai chyawm gaw ndai mungkan ga na n rai nngai. 24 Dai majaw, nanhte gaw tinang a yubak hta si na marin dai, ngu nna ngai nanhte hpe tsun ni ai: kaning rai nme law, ngai dai wa rai nga nngai hpe, nanhte n kam myit yang gaw, nanhte tinang a yubak hta si na myit dai, ngu mu ai. 25 Dai nga ai majaw shanhte gaw, Nang kadai rai nga n ta? ngu nna shi hpe san mu ai. Yesu gaw, Shawng shawng de nna ngai nanhte hpe a tsun nga nngai hte maren, ngai wa rai nga nngai. 26 Ngai hta nanhte a lam tsun hparan shara hte jeyang shara law law nga ai: raitimung, ngai hpe shangun dat ai wa gaw, tengman nga ai rai nna, shi kaw na ngai na la mala hpe mungkan ga hpe ngai tsun dan we ai, ngu mu ai. 27 Kawa a lam shaang nna shi shanhte hpe tsun nga ai gaw, shanhte n chye na ma ai. 28 Dai majaw Yesu gaw, Dai Masha Kasha hpe nanhte sharawt da ai shaloi she, ngai gaw dai wa rai nga nngai mung, ngai gaw nye myit hte hpa mung n galaw ai sha, nye Wa ngai hpe sharin nngai hte maren, dai ga ngai tsun nga nngai mung, nanhte chye na marin dai. 29 Ngai hpe shangun dat ai wa gaw ngai hte rau anga nga ai; ngai hkrai sha nga u ga, nga nna shi ngai hpe n jahti kau nngai: kaning rai nme law, shi sharawng awng ai amu hpe, ngai tutnawng e a galaw nga nngai, ngu mu ai. 30 Dai ga tsun nga yang, masha law law wa shi hpe kamsham ma ai. 31 Dai re ai majaw Yesu gaw shi hpe kamsham ai Yuda masha ni hpe, Nanhte nye a ga hta agrin nga myit yang gaw, nye a sape teng teng nanhte rai nga myit dai: 32 tengman ai lam mung nanhte chye lu na marin dai rai nna, dai tengman ai gaw, nanhte hpe shalawt dat na ra ai, ngu nna tsun mu ai. 33 Shaloi shanhte gaw, Anhte Abraham a amyu rai ga ai rai nna, kadai kaw lang mi muk n yam yu ga ai: dai she rai yang, Shalawt dat na myit dai, nga nna nang kaning rai tsun lu n ta? ngu nna san mu ai. 34 Yesu gaw, Ngai nanhte hpe gaja wa teng teng tsun made ga, Yubak galaw ai wa kadai mung, yubak a mayam rai nga ai. 35 Mayam ngu ai gaw, nta e tutnawng anga nga lu ai n rai: kasha chyawm gaw tutnawng anga nga lu ai. 36 Dai re ai majaw Kasha wa e nanhte hpe shalawt dat myit yang gaw, nanhte gaja wa teng teng lawt lu na myit dai. 37 Nanhte Abraham a amyu rai myit dai gaw, ngai chye nga nngai: raitimung, nye a ga nanhte hta n rawng nga malit dai majaw, ngai hpe sat kau na nanhte tam nga myit dai. 38 Ngai gaw nye Wa kaw na mu la ai hte maren, tsun nga nngai: nanhte mung nanhte a kawa kaw na, na la ai hte maren, galaw nga myit dai, ngu nna shanhte hpe htan mu ai. 39 Shaloi shanhte mung, Abraham gaw anhte a Wa rai nga mali ai, ngu nna shi hpe htan mu ai. Yesu gaw, Nanhte Abraham a kasha rai myit yang gaw, Abraham a lailen hku nanhte hkan galaw na myit dai. 40 Ya gaw, nanhte hpe Karai Kasang kaw na, na la ai tengman ai lam tsun dan ai wa, ngu ai ngai hpe, nanhte sat kau na tam myit dai: Abraham gaw dai zawn re ai n rai. 41 Nanhte gaw nanhte a kawa a lailen hku hkan galaw myit dai, ngu nna tsun mu ai. Shanhte gaw, Anhte n-gyi amyu n rai ga ai. Karai Kasang ngu ai anhte a Wa langai sha rai mali ai, ngu nna, shi hpe tsun mu ai. 42 Shaloi Yesu gaw, Karai Kasang nanhte a Kawa rai malit yang gaw, nanhte ngai hpe tsawra na myit dai: kaning rai nme law, ngai gaw Karai Kasang kaw na pru nna du sa nngai, nye a myit hte ngai du sa nngai n rai, shi gaw ngai hpe shangun dat nngai. 43 Ngai tsun ai lam nanhte hpa rai n chye na myit ta? Nye a ga n madat la lu ai majaw, rai nga myit dai. 44 Nanhte gaw, nanhte a kawa ngu ai, gumlau Nat hta na prat wa ai ni rai nga myit dai rai nna, nanhte a kawa a kayut ai hku mung, hkan mayu myit dai: shi gaw shawng npawt kaw nna, masha sat ai wa rai nga ai rai nna, shi hta tengman ai lam n rawng lu ai majaw, tengman ai lam hta n nga lu ai: shi masu magaw ga tsun yang, shi a myit hta na hte maren tsun nga ai: shi gaw masu ai wa rai nga ai hte, masu magaw ai a kawa mung, rai nga ai. 45 Ngai tengman ai lam tsun nngai majaw, nanhte n kam n sham myit dai. 46 Ngai hta ra rawng ai gaw, nanhte hta na kadai madun lu na myit ta? tengman ai lam she ngai tsun ai rai yang gaw, hpa rai nanhte n kam myit ta? 47 Karai Kasang hte seng ai wa gaw, Karai Kasang a ga madat nga ai; nanhte gaw Karai Kasang hte n seng ai majaw, n madat myit dai, ngu nna shanhte hpe tsun mu ai. 48 Shaloi Yuda masha ni gaw, Nang Samari masha rai ndai, nat shang ai wa mung rai ndai, ngu nna anhte tsun ai ga gaw, jaw la nga ai n rai ni? ngu nna shi hpe bai htan mu ai. 49 Yesu gaw, Ngai nat shang ai wa n rai nngai: nye Wa hpe she ngai hkungga nngai, nanhte chyawm gaw ngai e jahpoi myit dai. 50 Raitimung ngai gaw nye a arawng sadang n tam nngai; tam ya ai wa hte jeyang ya ai wa langai mi rai nga ai. 51 Nanhte hpe ngai gaja wa teng teng tsun made ga, Nye ga hku hkan ai wa gaw galoi mung n si na ra ai, ngu nna bai htan mu ai. 52 Bai Yuda masha ni gaw, Nang nat shang ai wa rai nga ai gaw, ya anhte chye saga ai: Abraham hte myihtoi ni pyi si mat wa masai; nang wa chyawm gaw, Nye ga hku hkan ai wa gaw, galoi mung n si na ra ai, nga nna tsun lu ndai. 53 Nang wa mi, si mat wa sai, anhte a Wa Abraham hta grau kaba nga n ni? myihtoi ni mung si mat wa masai; nang gaw kadai wa tai nga n ta? ngu na shi hpe tsun mu ai. 54 Yesu gaw, Nye hkum hpe ngai shagrau nngai rai yang gaw, nye a arawng hpa n tai li ai; ngai e shagrau ai wa gaw, nye Wa rai nga ai: dai wa hpe nanhte a Karai Kasang re ai, nga nna nanhte tsun myit dai; 55 raitimung nanhte shi hpe n chye myit dai, ngai chyawm gaw chye nga nngai. N chye nngai, ngu yang gaw, nanhte zawn masu ai wa ngai rai na ra ai: ngai chyawm gaw shi hpe chye nga nngai rai nna, shi a ga hpe mung hkan nga nngai. 56 Nanhte a kawa Abraham gaw nye a nhtoi mu lu na hpe, sharawng awng nga ai rai nna, mu lu ai hte kabu gara nga ai, ngu nna htan mu ai. 57 Dai re ai majaw Yuda masha ni gaw, Nang gaw asak manga shi ning pyi garai n du ai mi, Abraham hpe mu yu nu ni? ngu nna shi hpe tsun mu ai. 58 Shaloi Yesu gaw, Nanhte hpe ngai gaja wa teng teng tsun made ga, Abraham garai n nga yang nna ngai nga ni ai, ngu nna shanhte hpe tsun mu ai. 59 Dai rai nna shanhte gaw shi hpe kabai na nga nna, lungdin hta ma ai: Yesu chyawm gaw makoi mat nna, nawku Htingnu na pru mat wa ai.

Yawhan 9

9:1 Ya shi lai sa wa nga yang, hkritung nna myi kyaw ai wa langai mi hpe mu wu ai. 2 Shaloi shi a sape ni gaw, Rabai e, ndai wa myi n mu ai shangai wa ai gaw, yubak galaw ai kadai wa rai ta? ndai wa rai ni? kanu yan kawa rai ni? ngu nna san mu ai. 3 Yesu gaw, Ndai wa yubak galaw ai n rai, kanu yan kawa mung n rai; shi hta Karai Kasang a magam amu danhkung na matu, rai nga ai. 4 Ngai hpe shangun dat ai wa a magam amu hpe, shani nhtoi naw rai nga yang, anhte gunhpai lu na rai nga ai: kadai muk amu n gun n hpai lu ai shana ahkying du na ra ai. 5 Ngai gaw mungkan ga e naw nga ai hte yang, mungkan ga a nhtoi ngai rai nga nngai, ngu nna htan mu ai. 6 Shing nga tsun ngut jang, shi gaw ga hta mayen prat bang nna, hkumpup galaw la nhtawm, dai wa a myi hta chya ya nna, 7 Silum hka lawng de sa kashin su, ngu nna shi hpe tsun dat wu ai: dai hte maren shi sa kashin nna, myi mu ai hte bai wa ai: ( Silum ngu ai gaw, shangun dat ngu ai, rai nga ai.) 8 Dai rai nna htingbu ni hte, shawng de shi hpyi sha ai wa re ai mu ga ai ni gaw, Ndai wa gaw, dung nga nna hpyi sha ai wa n rai ni? nga ma ai. 9 Nkau mi gaw, Dai wa nan re ai, nga ma ai. Bai nkau mi gaw, Dai wa n rai, dai wa hte gaw bung ai, nga ma ai. Dai wa chyawm gaw, Ngai nan dai wa rai nngai, ngu nna tsun wu ai. 10 Shaloi dai ni gaw, Rai taw, na a myi kaning rai mu lu lit ta? ngu nna shi hpe san mu ai. 11 Shi gaw, Yesu ngu ai wa hkumpup galaw la nna, nye a myi hta chya ya nhtawm, Silum hka lawng de sa kashin u, nga ai hte maren ngai sa kashin we yang, myi mu lu li ai, ngu nna htan mu ai. 12 Shaloi shanhte gaw, Dai wa kanang nga nga a ta? ngu nna bai san mu yang, Shi gaw, Ngai n chye nngai, ngu nna bai htan wu ai. 13 Shanhte gaw, shawng de myi n mu ai wa hpe Hparishe ni hpang de woi sa mu ai: 14 Yesu hkumpup galaw la nna, dai wa a myi hpaw ya ai shani gaw, laban nhtoi rai nga ai. 15 Bai Hparishe ni mung, dai wa hpe, shi a myi kaning rai mu lu ai lam san mu yang, dai wa gaw, Nye a myi hta shi hkumpup bang ya nna, ngai kashin kau dat we yang mu wa li ai, ngu nna shanhte hpe htan mu ai. 16 Shaloi Hparishe ni nkau mi gaw, Dai wa gaw laban nhtoi n gawn ai majaw, Karai Kasang kaw na du sa ai wa n rai, nga ma ai: bai nkau mi gaw, Yubak lu ai masha gaw, ning re ai lamik kumla kaning rai galaw lu na a ta? nga ma ai. Shing nga nna shada da bra mat ma ai. 17 Dai rai nna shanhte gaw myi n mu ai wa hpe, Na a myi hpaw ya ai majaw, shi a lam nang kaning ngu da wu ta? ngu nna bai san mu yang, shi gaw, Dai wa gaw myihtoi rai nga ai, ngu nna bai htan mu ai. 18 Yuda masha ni gaw myi mu ai wa a kanu yan kawa hpe shaga nna, Ndai wa gaw hkritung nna myi kyaw ai, nga ai, nan a kasha rai malit ni? dai rai yang, ya kaning rai mu lu lu ta? 19 nga nna shan hpe garai n san yang, dai wa shawng de myi n mu ai, ya she mu ai hpe, n kam ma ai. 20 Dai wa a kanu yan kawa mung, Ndai gaw an a kasha rai nga ai, hkritung nna myi n mu ai mung rai nga ai, an chye nga ga ai: 21 raitimung, ya kaning rai mu lu ai, an n chye gaw ai, gade ai shi a myi hpaw ya ai mung, n chye ga ai: shi hpe san yu mu: shi asak mung kaba sai, shi a lam gaw shi tsun na ra ai, ngu nna htan mu ai. 22 Shi a kanu yan kawa gaw Yuda masha ni hpe hkrit ma ai majaw, shing ngu tsun mu ai: kaning rai nme nga yang, Yesu gaw Hkristu re ai, nga nna yin la ai wa kadai hpe raitimung, tara jawng na shapraw kau na, nga nna Yuda masha ni ya nna pyi bawng hkut da masai. 23 Dai majaw dai wa a kanu yan kawa gaw, Shi asak kaba sai, shi hpe san yu mu, ngu mu ai. 24 Dai re ai majaw shanhte gaw dai myi n mu ai wa hpe lang mi bai shaga nna, Karai Kasang hpe shagrau u; dai wa gaw yubak kap ai wa rai nga ai anhte chye ga ai, ngu nna shi hpe tsun mu ai. 25 Shaloi dai wa gaw, Shi yubak kap ai wa re ai n re ai, ngai n chye nngai: ngai shawng de myi n mu ai, ya chyawm gaw mu lu ni ai, dai lam langai sha ngai chye nngai, ngu nna shanhte hpe htan mu ai. 26 Bai shanhte gaw, Shi nang hpe kaning di a ta? na myi kaning di jahpaw ya a ta? ngu nna san mu ai. 27 Dai wa gaw, Ya sha mung ngai nanhte hpe tsun ni ai, nanhte she n na myit dai; hpa rai bai na mayu myit ta? nanhte mung shi a sape tai mayu myit ni? ngu nna shanhte hpe bai htan wu ai. 28 Shaloi shanhte gaw shi hpe jahpoi asawng let, Nang chyawm shi a sape rai nga ndai, anhte gaw Mawshe a sape ni rai nga ga ai: 29 Karai Kasang gaw Mawshe hpe mungga jaw ai anhte chye ga ai; dai wa kanang na re ai gaw, anhte n chye ga ai, ngu mu ai. 30 Shaloi dai wa gaw, Nye a myi shi hpaw ya lu nga timung, shi kanang na re ai hpe nanhte n chye ai gaw, mauhpa lam rai nga ai. 31 Yubak kap ai ni a ga Karai Kasang n madat nga ai gaw, anhte chye ga ai: Karai Kasang hpe nawku hkungga nna, shi a myit hkan ai wa rai yang gaw, dai wa a ga madat ya nga ai. 32 Hkritung nna myi kyaw ai wa a myi hpe, gade ai hpaw ya lu ai nga ai mung, lamu ga lat kaw nna galoi mung n na yu ai. 33 Dai wa Karai Kasang kaw na n rai yang gaw, hpa mung galaw lu na n rai, ngu nna shanhte hpe htan mu ai. 34 Shaloi shanhte gaw, Nang wa mi hkum ting yubak hta na shangai wa da nhtawm me, anhte hpe sharin nga n ni? ngu nna jawm htan nhtawm, dai wa hpe kanawng shapraw kau mu ai. 35 Dai wa hpe shapraw kau ai lam Yesu na wu ai rai nna, shi hpe mu tam jang, Masha Kasha hpe nang kamsham nga n ni? ngu nna san wu ai. 36 Dai wa gaw, Madu e ngai kamsham lu na, Masha Kasha gaw kadai wa rai ta? ngu nna htan wu yang, 37 Yesu gaw, Dai wa hpe nang mu yu nit dai hta n ga, ya nang hte shaga ai wa gaw, dai wa nan rai nga ai, ngu nna shi hpe tsun wu ai. 38 Shaloi dai wa gaw, Madu e, ngai kamsham nga nngai, nga nna shi hpe nawku wu ai. 39 Bai Yesu gaw, Myi n mu ai ni myi mu lu na matu mung, mu nga ai ni n mu lu na matu mung, mungkan ga a tara dara ai lam tai na ngai sa du nngai, ngu wu ai. 40 Shi kaw nga ai Hparishe ni dai ga na ma yang, Rai taw, anhte mung myi n mu ga ni? ngu nna shi hpe san mu ai. 41 Yesu gaw, Nanhte myi n mu myit taw gaw, yubak n nga na myit dai: ya gaw, Anhte myi mu ga ai, nga nga myit dai: de a majaw nanhte hta yubak mara nga ai.

Yawhan 10

10:1 Ngai nanhte hpe gaja wa teng teng tsun made ai gaw, Sagu lawng de chyinhka lam hku n shang ai, kaga nna shingtawt shang ai wa gaw, lagut, damya rai nga ai. 2 Chyinghka lam hku shang ai wa chyawm gaw, sagu ni hpe rem ai wa rai nga ai. 3 Chyinghka sin ai wa mung, dai wa hpe gaw hpaw ya ga ai; sagu ni mung shi a nsen madat ma ai rai nna, shi gaw tinang a sagu ni hpe amying hte shaga nna, shinggan de woi shapraw praw di wu ai. 4 Shi a sagu nlang hte hpe woi shapraw nhtawm, sagu ni a shawng e sa wa wu ai rai nna, sagu ni mung shi a nsen hpe chye chyap ma ai majaw, shi kaw hkan nang ma ai. 5 Tsasam wa a nsen hpe gaw, sagu ni n chye n chyap ma ai majaw, tsasam wa kaw n hkan hkraw ai she, hprawng mat wa ma ai, ngu nna, shanhte hpe tsun mu ai. 6 Yesu gaw dai ga shadawn shanhte hpe tsun mu ai; raitimung shi hpa lam tsun ai gaw, shanhte n chye na ma ai. 7 Dai re ai majaw Yesu shanhte hpe bai tsun mu ai gaw, Ngai nanhte hpe gaja wa teng teng tsun dan made ga, Ngai gaw sagu ni shang ai chyinghka hku rai nga nngai. 8 Nye a shawng e pru ai ni nlang hte gaw, lagut damya rai nga ma ai: sagu ni mung shanhte a ga hpe n madat ya ma ai. 9 Ngai gaw chyinghka hku rai nga nngai: ngai hta shang ai wa gaw, hkyehkrang la hkrum na wu ai rai nna, shang wa pru wa rai lu ai hte, udat shara mu na wu ai. 10 Lagut gaw, lagu na, sat na, hpya sha na nga nna she sa ga ai: ngai chyawm gaw, sagu ni asak hkrung lu na hte nhpaw n-ya lu la mu ga, ngu nna, sa ring ngai. 11 Ngai gaw sagu rem wa kaja rai nngai: sagu rem wa kaja gaw, sagu ni a matu tinang a asak nawng ya kau lu ai. 12 Sagu ni hpe madu ai wa n re ai, nchyang she rai yang chyawm gaw, chyahkyawn sa wa ai mu jang, sagu ni hpe kau da nna hprawng mat wa ga ai; chyahkyawn mung sagu ni hpe amya sha nna shabra kau nga ai: 13 dai wa gaw nchyang sha rai nga ai majaw, sagu ni a matu n tsang ai hprawng mat wa ai. 14 Ngai gaw sagu rem wa kaja rai nngai: nye Wa gaw ngai hpe chye ai rai nna, ngai mung Wa hpe chye nngai zawn, 15 nye a sagu ni hpe ngai chye nngai, nye a sagu ni mung ngai hpe chye ma ai: sagu ni a matu mung, nye a asak ngai nawng ya kau nngai: 16 Ndai ulawng hte n seng ai sagu kaga mung ngai naw lu nngai: dai sagu ni hpe mung ngai woi wa lu na rai nna, dai ni mung nye a nsen madat na mara ai; shaloi sagu hpung langai sha, sagu rem wa langai sha, rai na ra ai. 17 Ngai gaw nye a asak hpe bai lu la n ga, ngu nna asak nawng ya kau nngai majaw, nye Wa ngai hpe tsawra nngai. 18 Nye asak hpe gade ai kashun la ya lu ai n rai: nye a myit hte ngai nawng ya kau nngai: nawng ya kau na ahkang hte bai lu la na ahkang ngai lu nngai: dai ahkang gaw nye Wa kaw na ngai lu la ni ai, ngu mu ai. 19 Shaloi dai ga a majaw, Yuda masha ni hta hka bra na lam bai pru wa malu ai. 20 Shanhte hta na law law gaw, shi nat shung nna mana nga ai: shi a ga hpe hpa rai madat nga myit ta? nga ma ai. 21 Nkau mi gaw, Shi a ga gaw nat shung ai wa a ga n rai: nat gaw myi n mu ai wa a myi hpe hpaw ya lu a ni? nga ma ai. 22 Ya Yerusalem mare e Engeni poi rai nga ai: 23 nshung ta mung rai nga ai; Yesu gaw nawku Htingnu na Shawlumon a jarawp e htinglet hkawm nga ai. 24 Dai shaloi Yuda masha ni gaw shi hpe grup rai nna, Nang galoi du hkra anhte hpe kam shut shangun nga na n ta? Nang Hkristu rai n yang gaw anhte hpe leng leng tsun dan mi, ngu mu ai. 25 Yesu gaw, Ngai tsun ni ai, nanhte mahtang n kam myit dai; nye Wa a mying hte ngai galaw ai amu ni gaw, nye a lam sakse hkam ya nga ai. 26 Raitimung, nanhte gaw nye a sagu n rai myit dai majaw n kam myit dai. 27 Nye a sagu ni gaw, nye a nsen madat ma ai rai nna, ngai shanhte hpe chye nngai, shanhte mung nye a hpang hkan nang ma ai: 28 ngai shanhte hpe n htum n wai asak jaw da we ai rai nna, shanhte galoi mung hten bya ai hkrum na n rai; nye a lata na shanhte hpe gade ai kashun la ya lu na n rai. 29 Shanhte hpe nye a lata hta ap ya ai, nye Wa gaw, yawng hta grau kaba nga ai rai nna, kadai mung Wa a lata na shanhte hpe kashun la ya lu na n rai. 30 Ngai hte nye Wa gaw langai sha rai nga ai, ngu nna shanhte hpe htan mu ai. 31 Shaloi Yuda masha ni gaw, shi hpe kabai na nga, nlung bai hta ma ai. 32 Yesu gaw, Nye Wa kaw na amu kaja law law wa ngai nanhte hpe madun masade ai: dai amu ni hta na gara mahtang a majaw, ngai hpe nlung hte kabai na myit ta? ngu nna san wu ai. 33 Yuda masha ni gaw, Kaja ai amu a majaw nang hpe kabai na n rai, shatan ai ga tsun ndai hte, nang dai masha rai da nna, Karai Kasang hpyi hpun ndai majaw kabai na ga ai, ngu nna htan mu ai. 34 Shaloi Yesu gaw, Nanhte Karai daw ni rai nga myit dai, ngu nna ngai tsun made ai, nga nna nanhte a tara laika hta ka da nga ai n rai malit ni? 35 Chyum laika hta na ga hpe n kau mai ai rai nna, Karai Kasang a mungga dep la lu ai ni hpe, Karai daw ni ngu lu ai rai yang gaw, 36 nye Wa e shachyoi shapra nna, ndai mungkan ga de shangun dat ai wa, Ngai Karai Kasang a Kasha rai nngai, nga nna tsun ai a majaw, dai wa hpe, Nang shatan nhkan ga tsun ndai, mai ngu a ni? 37 Ngai nye Wa a amu n galaw nngai rai yang gaw, ngai e hkum kam myit. 38 Dai ngai galaw nngai rai yang gaw, ngai e n kam timung, ngai hta nye Wa nga nga ai mung, nye Wa hta ngai nga nga ai mung, nanhte mu chye nna chye na lu myit ga, dai amu ni hpe kamsham mu, ngu nna shanhte hpe htan mu ai. 39 Shaloi shi hpe rim la na shanhte bai tam ma ai: shi chyawm gaw shanhte a lata na pru mat wa ai. 40 Yawhan baptisma jaw hpang ai shara, Yawdan hka wora hkran de, shi bai rap nna dai yang e sa nga nga ai. 41 Masha law law wa shi kaw du sa nna, Yawhan gaw gaja wa hpa lamik kumla madun ai n rai: ndai wa a lam Yawhan tsun matsun chyawm gaw tengman nga ai, nga ma ai. 42 Dai yang e mung masha law law wa shi hpe kamsham ma ai.

Yawhan 11

11:1 Dai shaloi Mari hte kana Marhta nga ai Behtani kahtawng na, Lazaru ngu ai wa langai mi, machyi nga ai. 2 Dai Mari gaw Madu hpe mura chya nna, lagaw hpe shi a kara hte katsut kau ai numsha rai nga ai: dai machyi nga ai Lazaru gaw, shi a kayung rai nga ai. 3 Dai re ai majaw dai yan nau gaw shi hpang de masha shangun dat nna, Madu e, yu u, nang tsawra ai wa gaw machyi nga ai, ngu nna tsun dan mu ai. 4 Yesu gaw dai ga na jang, Dai machyi gaw si machyi n rai: de a majaw Karai Kasang a Kasha hpung shingkang danpru u ga nga nna, Karai Kasang a hpung shingkang matu byin ai rai nga ai, ngu nna tsun dat wu ai. 5 Yesu chyawm gaw Marhta hpe mung, shi a kanau hte Lazaru hpe mung tsawra wu ai. 6 Dai majaw shi machyi nga ai lam na jang, Yesu gaw shi nga ai shara e ni ni naw hkring nga ai. 7 Dai hpang shi gaw, Anhte Yuda mung de bai sa saga, ngu nna sape ni hpe tsun wu ai. 8 Shaloi sape ni gaw, Rabai e, Yuda masha ni ya pyi nang hpe nlung hte kabai sat na tam nga ma yang me, dai de naw bai sa na n ni? ngu mu ai. 9 Yesu gaw, Lani mi hta ahkying shi lahkawng re ai, n rai ni? Shani chyingtung e hkawm sa ai wa gaw, ndai mungkan ga a nhtoi hpe mu lu ai rai nna, ahtu kataw n rai ga ai: 10 shana nsin e hkawm sa ai wa chyawm gaw, shi hta nhtoi n rawng ai majaw, ahtu kataw ga ai, ngu mu ai. 11 Shing nga nhtawm, Anhte a jinghku wa Lazaru yup nga ai: raitimung, shi hpe jasu na ngai sa na nngai, ngu nna shanhte hpe bai tsun mu ai. 12 Dai re ai majaw sape ni gaw, Madu e, shi yup nga ai she rai yang gaw, bran wa na ra ai, ngu nna htan mu ai. 13 Yesu gaw Lazaru si sai lam tsun wu timung, shanhte gaw majoi na yup ai hpe tsun ai rai daw, nga nna myit ma ai. 14 Dai majaw Yesu gaw, Lazaru si sai: 15 nanhte kamsham lu na matu, dai yang e ngai n nga hkrup ai majaw, nanhte a lam ngai kabu nngai: raitimung shi hpang de sa wa saga, ngu nna leng leng tsun dan mu ai. 16 Dai rai nna Didumu ngu ai Htawma gaw, Shi hte rau si nang na, anhte mung hkan nang saga, ngu nna sape manang ni hpe tsun mu ai. 17 Shingrai Yesu du yang, Lazaru gaw lup hta rawng ai mali ya rai sai hpe, mu wu ai. 18 Behtani kahtawng gaw Yerusalem mare hte mai lahkawng daram sha gang nga ai rai nna, 19 Marhta yan Mari a kayung wa a majaw, shan hpe shalan shabran na nga, Yuda masha law law wa sa ma ai. 20 Yesu du ra ai hpe Marhta na jang, shi hpe sa tau la na nga sa wa ai: Mari chyawm gaw nta e naw dung nga ai. 21 Shaloi Marhta gaw, Madu e, nang nang e nga ndai rai taw gaw, ngai yung n si na re ai. 22 Ya raitimung Karai Kasang kaw nang hpyi mahpyi hte gaw, Karai Kasang nang hpe jaw na ndai ngai chye nngai, ngu nna Yesu hpe hkap tsun wu ai. 23 Shaloi Yesu gaw, Ning yung wa gaw bai rawt na ra ai, ngu wu ai. 24 Marhta gaw, Hpang jahtum na bai hkrung rawt ai nhtoi hta, shi mung bai rawt na ra ai gaw, ngai chye nngai, ngu wu ai. 25 Bai Yesu gaw, Ngai gaw bai hkrung rawt ai lam hte asak hkrung ai lam rai nga nngai: 26 ngai hpe kamsham ai wa gaw, si mat timung ahkrung nga na ra ai: asak hkrung nna ngai hpe kamsham ai wa kadai mung, si ai galoi mung n hkrum na ra ai. Ga ndai hpe nang kam n ni? ngu nna shi hpe tsun wu ai. 27 Shaloi Marhta gaw, Rai sa, Madu e, nang gaw ndai mungkan ga de du sa sai, Hkristu ngu ai Karai Kasang a Kasha rai nga ndai hpe, ngai kam nga nngai, ngu nna shi hpe htan wu ai. 28 Shing nga nhtawm shi a kanau Mari hpe wa lagyim shaga nna, Sara nang de nga nga nna, nang hpe shaga nga ai, ngu wu ai. 29 Mari gaw dai ga na jang alawan rawt una Yesu hpang de sa wa ai. 30 Yesu chyawm gaw kahtawng de garai n shang ai sha, Marhta sa tau ai shara e naw rai nga ai. 31 Dai majaw shalan shabran ga tsun chyai let, Mari hte rau nta e nga nga ai Yuda masha ni gaw, Mari alawan rawt nna pru wa ai hpe mu ma yang, lup de sa hkrap na rai sam ai nga, myit nna shi kaw hkan nang ma ai. 32 Mari gaw Yesu nga ai shara de du nna shi hpe mu jang, shi a lagaw nhpang e dingnyawm dagup let, Madu e, nang nang e nga ndai rai taw gaw, ngai yung n si na re ai, ngu wu ai. 33 Mari gaw hkrapngu hkrapngoi rai nga ai hpe mung, shi kaw hkan nang ai Yuda masha ni hkrapngu hkrapngoi ma ai hpe mung, Yesu mu wu yang, shi a wenyi hta shi yawn madai ai hte, myit law ai rai nna, 34 Shi hpe kanang lup da mu ta? ngu nna san wu ai. Shan gaw, Madu e, sa yu rit, ngu nna htan mu ai. 35 Yesu mung myi prwi pru nga ai. 36 Dai majaw Yuda masha ni gaw, Yu mu, shi gaw dai wa hpe grai wa tsawra nga a hka! nga ma ai. 37 Bai nkau mi gaw, Myi n mu ai wa hpe myi hpaw ya lu ai, ndai wa gaw, Lazaru hpe mung n si u ga nga, n di lu na a ni? nga ma ai. 38 Dai majaw Yesu gaw shi kraw kata e bai yawn madai ai hte lup de sa du ai: dai lup gaw lungpu hku rai nga ai rai nna, lung tawng hte pat da nga ai. 39 Yesu gaw, Nlung dai hpe galau kau mu, ngu mu ai. Shaloi si ai wa a kajan Marhta gaw, Madu e, ya gaw manam na sai; shi si ai mali ya rai sai, ngu nna tsun wu ai. 40 Yesu gaw, Nang kam n yang gaw, Karai Kasang a hpung shingkang nang mu lu na rin dai, ngu nna ngai tsun sade ai, n rai ni? ngu nna shi hpe tsun wu ai. 41 Dai rai nna nlung dai hpe shanhte galau kau mu ai. Shaloi Yesu gaw lamu de mada yu nna, Wa e, nang nye a ga madat ya ndai majaw, ngai nang hpe shakawn nngai law. 42 Nang galoi mung nye a ga a madat ya nga ndai gaw, ngai chye nngai; raitimung, nang ngai hpe shangun dat ndai gaw, ndai grupyin nga ai masha ni kamsham lu mu ga, shanhte a matu ngai ning nga tsun nngai, nga ai. 43 Shing nga tsun ngut jang shi gaw, Lazaru e, pru wa rit law, nga nna nsen kaba hte jahtau dat wu ai. 44 Shaloi si mat sai wa gaw, shi a lagaw lata hta sumpan yan ahkyen nna, myiman e mung hpajet kayawp ai hte pru wa ai, Yesu gaw, Shi hpe raw nna dat dat mu, ngu nna shanhte hpe tsun mu ai. 45 Dai re ai majaw Mari kaw sa hpu ai Yuda masha law law wa, Yesu galaw ai amu hpe mu jang shi e kamsham ma ai. 46 Nkau mi chyawm gaw, Hparishe ni hpang de wa nna, Yesu galaw ai lam wa tsun dan mu ai. 47 Dai rai nna hkingjawng agyi ni hte Hparishe ni gaw, du salang ni hpe shaga jahpawng nhtawm, Anhte kaning re ai rai nga ga ta? dai wa gaw lamik kumla law law madun dan nga ai. 48 Shi hpe ning di a dat da nga ga yang gaw, masha yawng mayawng shi hpe kamsham ma na mara ai rai nna, Roma masha ni mung sa nna, anhte a mungdan hte anhte a amyu hpe kashun la kau na mara ai, nga ma ai. 49 Raitimung, shanhte hta na, dai shaning e hkinjawng agyi aya lu ai, Kayapa ngu ai wa langai mi gaw, Nanhte hpa mung n chye myit dai: 50 amyu ting hten bya n hkrum hkra, ndai amyu a matu masha langai mi si hkam yang gaw, nanhte a matu grau mai nga ai hpe, nanhte n myit yu myit hka, ngu nna tsun wu ai. 51 Ga dai gaw shi a myit hte shi tsun ai n rai: dai shaning e hkinjawng agyi rai nga ai majaw, Yesu gaw amyu masha ni a matu si hkam lu na re ai, nga nna mung, 52 dai amyu a matu sha n rai, shara shagu hkan e bra nga ai, Karai Kasang a kashu kasha ni hpe langai sha di nna, shinggyin jahpawng da na matu si hkam lu na re ai, nga nna mung, myihtoi ga hte tsun ai rai nga ai. 53 Dai shani kaw nna shi hpe sat kau na lam shanhte bawng nga ma ai. 54 Dai majaw Yesu gaw Yuda masha ni kaw, dan dan bai n hkawm ai sha, dai yang na pru nhtawm, nam de ni ai ginwang na Ehprim ngu ai mare de sa wa nna, shi a sape ni hte rau dai yang e nga nga ai. 55 Ya Yuda masha ni a Shalai wa poi du magang ra ai rai nna, masha law law wa tinang a hkum jasan jaseng na matu, poi garai n du yang, kahtawng ginwang hkan na Yerusalem mare de lung wa ma ai. 56 Dai majaw shanhte gaw Yesu hpe tam nna, nawku Htingnu e jawm tsap let, Nanhte kaning rai myit nga myit ta? Shi gaw ndai poi de n sa na myit a ni? nga nna shada da san ma ai. 57 Dai shaloi e hkinjawng agyi ni hte Hparishe ni gaw, shi hpe rim la lu hkra, kadai raitimung shi nga ai shara chye yang gaw, madun lu na re ai, nga nna hkangda masai.

Yawhan 12

12:1 Dai re ai majaw Yesu gaw, si ai kaw na sharawt la ai Lazaru nga ai Behtani kahtawng de, Shalai wa poi du na kru ya naw ra yang, sa du ai. 2 Shaloi shanhhte gaw shi hpe shana shat hkap daw mu ai rai nna, Marhta gaw shat lusha jau nga ai: Lazaru gaw shi hte dung nga nna lusha ai hta lawm ai wa langai mi, rai nga ai. 3 Shaloi Mari gaw hpu la ai mura nardu sau ajet hkan masum daram la nna, Yesu a lagaw hta chya ya nhtawm, shi a kara hte katsut kau wu ai: dai sau a manam pyaw ai gaw, nhku ting hpring chyat rai nga ai. 4 Raitimung, Yuda Iskarut ngu ai, shi hpe ap kau na ra ai, shi a sape langai mi gaw, 5 Dai mura sau hpe gumhpraw lap masum tsa hte dut nna, matsan mayan ni hpe hpa di n karan jaw wu ta? ngu wu ai. 6 Shi shing nga ai gaw, matsan mayan ni a matu myit ya nna tsun ai n rai: shi gaw gumhpraw jan jum ai wa rai nga ai rai nna, bang da ai gumhpraw hta na sen di sha ai lagut rai nga ai majaw, tsun ai sha rai nga ai. 7 Dai majaw Yesu gaw, Rai nu ga, ngai hpe lajang lup ai shani du hkra, shi dai hpe kyem da u ga: 8 matsan mayan ni gaw nanhte hte rau tut anga nga ai, ngai chyawm gaw nanhte hte tut tut anga nga na n rai, ngu wu ai. 9 Yesu dai yang nga nga ai gaw, Yuda masha ni hta shawa masha law law wa chye ma ai rai nna, shanhte gaw Yesu a majaw sha mung n rai, si ai kaw na shi sharawt la ai Lazaru hpe mung mu yu na nga, du sa shajang ma ai. 10 Dai majaw hkingjawng agyi ni gaw Lazaru hpe mung sat kau na, nga nna bawng nga ma ai: 11 kaning rai nme law, shi a lam majaw Yuda masha law law wa pru sa wa nna, Yesu hpe kamsham ma ai. 12 Dai hpang shani e Yesu gaw Yerusalem mare de sa wa ra ai hpe, dai poi de du sa ai shawa masha law law ni na jang, 13 shanhte gaw namhtan hpun lakung ni daw lang nna shi hpe sa tau la let, Hawsanna: Dai Madu a amying hte du sa ai wa ngu ai, Israela a hkawhkam gaw, a nga u ga law, nga nna garu ma ai. 14 Shaloi Yesu gaw lawze kasha mu nna jawn wu ai: dai gaw, 15 Ziun shayi sha e, hkum hkrit et; Yu u, na a hkawhkam gaw Lawze kasha jawn nna du sa ra ai, nga nna ka da ai hte maren rai nga ai. 16 Dai lam ni hpe shawng e gaw shi a sape ni n chye ma ai: raitimung, Yesu gaw hpung shingkang lu la ai hpang e she, shi hpe sha-ang nna shing nga ka da ai mung, dai hku raw shanhte shi hpe di mu ai mung, dum chye ma ai. 17 Dai lam byin ai gaw, Lazaru hpe lup kata na shaga nna, si ai kaw na sharawt la ai shaloi e, shi hte rau nga ai shawa masha ni e sakse hkam ya ai rai nga ai. 18 Dai lam majaw mung, shawa masha ni shi hpe sa tau ai rai nga ai: kaning rai nme law, shi dai lamik kumla madun dan ai gaw, shanhte na masai. 19 Dai re ai majaw Hparishe ni gaw, Nanhte kaning mung n di lu manit dai gaw, yu mu; gaja wa mungkan ting shi kaw hkan mat wa masai, nga nna shada da tsun shajang ma ai. 20 Dai poi a laman e nawku na nga, lung wa ai ni hta Heleni masha nkau mi lawm ma ai. 21 Dai ni gaw Galile mung na Betsaida mare masha Hpilip kaw sa nna, Hkau e, anhte gaw Yesu hpe hkrum mayu ga ai, ngu nna tsun mu ai. 22 Shaloi Hpilip gaw Andre hpe sa tsun nna, Andre yan Hpilip gaw Yesu hpe sa tsun dan mu ai. 23 Dai rai nna Yesu gaw, Masha Kasha a hpung shingkang danhkung na ahkying du wa ra ai: 24 Nanhte hpe ngai gaja wa teng teng tsun made ai gaw, Mam nhkyep gaw ga hta hkrat nna, n hten mat yang gaw, langai sha a rai nga ai: hten mat yang she, asi law law si wa ai. 25 Tinang a asak lahpawt ai wa gaw asak sum na ra ai: ndai mungkan ga e tinang asak hpe ndawng ai wa chyawm gaw, htani htana na asak lu la hkra, tinang a asak hpe makawp ai tai na ra ai. 26 Nye a amu gunhpai ai wa rai yang gaw, nye a hpang hkan nang ruga: ngai nga ai shara e, nye a shangun ma mung nga na ra ai; nye a amu gunhpai ai wa rai yang gaw, nye Wa dai wa hpe shagrau na ra ai. 27 Ya ngai myit ru nga nngai: ngai kaning ngu tsun na i? Wa e, ndai ahkying hta na ngai hpe hkyehkrang la e: ning ngu yang mung ndai lam a majaw she, ndai ahkying de ngai du wa ni ai: 28 Wa e, na a mying ningsang hpe sha shagrau u law, nga nna shan hpe tsun wu ai. Shaloi sumsing lamu de na ga nsen gaw, Ngai shagrau se ai, bai naw shagrau na we ai, nga nna, ngoi pru wa ai. 29 Dai yang e tsap hpawng nga nna, dai lam na ai ni gaw, Mu ngoi nga ai, nga ma ai: nkau mi mung, Lamu kasa shi hpe sa tsun ai rai nga ai, nga ma ai. 30 Yesu gaw, Nsen ndai gaw nye a matu ngoi pru ai n rai, nanhte a matu mara rai nga ai. 31 Ndai mungkan ga gaw, ya jeyang ai hkrum nga ai, ndai mungkan Du wa gaw, ya shinggan de shaden kau ai, hkrum na rai wa sai. 32 Ngai chyawm gaw ga nna sharawt tawn da ai hkrum jang, ngai masha yawng hpe, ngai hpang de gang la na we ai, ngu nna htan mu ai. 33 Shing nga ai gaw, shi si hkam na kumla madun nna, tsun ai rai nga ai. 34 Dai nga ai majaw shawa masha ni gaw, Hkristu gaw htani htana agrin nga na re ai, nga nna she tara laika hta rawng ai anhte na yu ga ai: dai re ai mi, nang gaw, Masha Kasha sharawt da ai hkrum lu na ra ai, nga ai gaw, hpa nga ai rai lit ta? Masha Kasha dai gaw, kadai wa mi rai ta? ngu nna shi hpe htan mu ai. 35 Dai rai nna Yesu gaw, Dai nhtoi gaw nanhte hta loi hkring mi sha naw nga na sai: dai nsin gaw nanhte hpe n lep myit ga, nanhte hta nhtoi naw nga yang hkawm sa mu: nsin e hkawm sa ai wa gaw tinang gade sa wa ai mung, n chye wu ai. 36 Nanhte hta nhtoi naw nga nga yang, nhtoi a kashu kasha ni tai lu myit ga, nhtoi hpe kamsham nga mu, ngu nna shanhte hpe tsun mu ai. Yesu gaw ndai ga tsun ngut jang pru nna, shanhte kaw na makoi mat nga ai. 37 Lamik kumla ndai hte wa shanhte a man e shi madun dan mu timung, 38 Madu e, anhte tsun ai shiga hpe kadai kam ya a ta? Dai Madu a lata mung kadai kaw dan yu a ta? nga nna myihtoi Esaia tsun ai ga dik wa kam ma ai. 39 Bai Esaia tsun ai hta, na re ai majaw, shanhte gaw shi hpe n Shanhte myi e n mu, myit masin hte n chye na nna, Ngai shanhte hpe n shamai mai gaw, Myit n kayin lu mu ga, 40 Shanhte a myi hpe shi magap ya nna, Shanhte a myit masin hpe mung, shaja ya wu ai, nga ai ga majaw, shanhte n kam n sham lu ma ai. 41 Esaia gaw shi a hpung shingkang mu lu ai rai nna, shi a lam shing nga tsun ai rai nga ai. 42 Raitimung, du ni hta pyi law law wa shi hpe kamsham shajang ma ai: dai raitimung, Tara jawng na shapraw kau na hpe tsang nna, Hparishe ni a jaw e n yin hkraw ma ai: 43 kaning rai nme law, Karai Kasang kaw na arawng sadang lu la na hta, masha kaw na arawng sadang lu la na hpe, grau ra ma ai. 44 Bai Yesu jahtau nna tsun ai gaw, Ngai hpe kamsham ai wa gaw, ngai hpe kamsham ai n rai; ngai e shangun dat ai wa hpe kamsham ai rai nga ai. 45 Ngai hpe mada mu ai wa gaw, ngai e shangun dat ai wa hpe mada mu ai rai nga ai. 46 Ngai hpe kamsham ai yawng hte gaw, nsin hta n rawng nga mu ga, ngu nna nhtoi tai let, ngai mungkan ga de du sa ring ngai. 47 Nye a ga na la nhtawm, n hkan nang ai wa kadai hpe mung ngai jeyang na n rai: kaning rai nme law, mungkan ga hpe jeyang na ngu nna, ngai du sa nngai n rai, mungkan ga hpe hkye la na she sa nngai. 48 Ngai hpe n hkap la ai hte nye a ga n hta la ai wa hpe, jeyang na madu kaga mi nga ai: ngai tsun ai mungga e nan, hpang jahtum na nhtoi hta, dai wa hpe jeyang na ru ai. 49 Ngai chyawm gaw nye myit hte tsun ai n rai; ngai kaning ngu sharin shaga na gaw, ngai hpe shangun dat ai, nye Wa e matsun jaw dat ni ai. 50 Shi a ga matsun gaw htani htana na asak rai nga ai, ngai chye nga nngai: dai re ai majaw, ngai tsun matsun gaw, nye Wa e hkang dat ai hte maren she, ngai tsun nngai law, ngu wu ai.

Yawhan 13

13:1 Ya dai Shalai wa poi garai n du yang, Yesu gaw ndai mungkan ga nna, shi a Kawa hpang de htawt wa na ahkying du wa sai, chye wu ai rai nna, mungkan ga e nga ai shi a masha ni hpe tsawra nga ai re ai hte maren, jahtum nhtoi du hkra shanhte hpe tsawra mu ai. 2 Shana shat sha nga yang, gumlau Nat gaw Simun a kasha Yuda Iskarut a kraw kata e shi hpe ap kau na, hpaji daw bang ya boi nu ai rai nna, 3 Yesu gaw Kawa e shi a lata de nga yawng nga pra ap ya nu ai mung, Karai Kasang kaw na shi pru sa nna, Karai Kasang hpang de bai wa na rai nga ai mung, chye wu ai majaw, 4 shat sha nga ai kaw na shi rawt nna, shi a palawng kaba raw kau nhtawm, hpajet langai mi la nna nshang e kyit wu ai. 5 Dai hpang angdung hta ntsin bang la nna, sape ni a lagaw hpe kashin ya nhtawm, shi kyit ai hpajet hte katsut kau ya ya di mu ai. 6 Shingrai Simun Petru kaw du yang, dai wa gaw, Madu e, nang wa mi ting, nye a lagaw kashin na n ni? hkap ngu wu ai. 7 Yesu gaw, Ngai galaw ai lam nang ya n chye timung, hpang de she chye na rin dai, ngu nna shi hpe htan wu ai. 8 Petru gaw, Nye a lagaw hpe nang galoi mung n kashin lu na ndai, bai ngu wu ai. Bai Yesu gaw, ngai nang hpe n kashin lu yang gaw nang ngai hte n seng ndai, ngu nna shi hpe tsun wu ai. 9 Shaloi Simun Petru gaw, Madu e, nye lagaw sha n rai, lata hte abaw mung kashin ya rit bai ngu wu ai. 10 Yesu gaw, Hka shin ngut sai wa gaw, lagaw hta kaga, hpa kashin shara n nga sai: dai wa a hkum ting gaw sanseng nga sai; nanhte mung sanseng nga myit dai, raitimung, nanhte yawng wa n rai, ngu wu ai. 11 Kaning rai nme law, shi hpe ap kau na wa kadai re ai gaw, shi chye da wu ai: dai re ai majaw, Nanhte yawng wa sanseng myit dai n rai, ngu nna tsun wu ai. 12 Shingrai shanhte a lagaw kashin ya ngut nna, shi a palawng kaba la hpun nhtawm, bai dung nga let shi gaw, Ya nanhte hpe ngai galaw ai lam, nanhte chye da mu ni? 13 Nanhte ngai hpe, Sara nga nna mung, Madu nga nna mung, hkungga myit dai: dai hte maren ngai rai nga nngai majaw, nanhte a ga mung rai la sai. 14 Dai rai nna, Madu mung, Sara mung rai da ninglen, ngai pyi nanhte a lagaw kashin nngai rai yang gaw, nanhte mung, nanhte shada a lagaw mai kashin myit dai. 15 Nanhte hpe ngai galaw ai zawn, nanhte mung hkan galaw myit ga, ngu nna ngai nanhte a matu kasi kamang tawn da ni ai. 16 Ngai nanhte hpe gaja wa teng teng tsun made ga, Mayam wa gaw madu hta grau ai n rai, kasa mung shangun dat ai wa hta grau ai n rai. 17 Ndai lam ni hpe nanhte chye nna, dai hpe hkan shatup myit yang gaw, nanhte a lu myit dai. 18 Nanhte yawng hpe sha-ang nna ngai tsun nngai n rai: ngai lata la ai ni hpe gaw, ndai chye da we ai: raitimung, Nye a shat sha ai wa gaw, shi a lahtin hte ngai hpe shingdit nngai, nga nna ka da ai ga shadik na a majaw rai nga ai. 19 Dai lam byin pru ai shaloi, ngai dai wa rai nga nngai gaw, nanhte kamsham myit ga, ngu nna garai n byin yang na tau tsun magang da made ai. 20 Ngai nanhte hpe gaja wa teng teng tsun made ai gaw, Ngai shangun dat ai wa e hkap la ai wa gaw, ngai hpe hkap la ai, rai nga ai: ngai e hkap la ai wa mung, ngai hpe shangun dat ai wa e hkap la ai, rai nga ai, ngu nna shanhte hpe tsun wu ai. 21 Yesu gaw shing nga tsun ngut jang, shi a myit hta yawn la ai hte, Ngai nanhte hpe gaja wa teng teng tsun nngai gaw, Nanhte hta na marai langai mi, ngai hpe ap kau na myit dai, ngu nna sakse hkam nga ai. 22 Dai rai nna sape ni gaw, kadai hpe sha-ang nna tsun ai mung n chye mu ai majaw, myit ung ang ai hte shada da mada hkat ma ai. 23 Shaloi Yesu tsawra ai sape langai mi gaw, sha ku makau e, Yesu a lahpyen hta hkrawn taw nga ai rai nna, 24 Simun Petru gaw, Shi kadai hpe sha-ang nna tsun nga a ta, anhte hpe tsun dan mi, ngu nna dai sape hpe dingsi tsun wu ai. 25 Shaloi dai sape gaw, Yesu a lahpyen de kayin shamyet nna, Madu e, kadai mahtang rai ta? ngu nna san wu ai. 26 Dai re ai majaw Yesu gaw, Ngai muk n-gup mi tsing nna jaw ai wa rai na re ai, nga nhtawm, dai muk n-gup mi tsing la nna, Simun Iskarut a kasha Yuda hpe jaw wu ai. 27 Dai wa dai muk n-gup mi la sha ngut jang, Satan gaw shi hta shang nu ai. Dai re ai majaw, Yesu gaw, Nang galaw ra ai amu lau lau galaw u, ngu nna shi hpe tsun wu ai. 28 Hpa majaw shi e shing nga tsun ai gaw, sha ku makau e dung nga ai ni hta, kadai mung n chye ma ai. 29 Kaning rai nme law, Yuda gaw gumhpraw jan jum ai wa rai nga ai majaw, Yesu gaw shi hpe, Poi na matu anhte lang ra ai sa mari u, nga sam ai, nga nna mung, shing n rai, Matsan mayan ni hpe lama ma sa jaw u, nga sam ai, nga nna mung, shanhte hta nkau mi myit ma ai. 30 Yuda gaw dai muk n-gup mi la sha nhtawm, shaloi jang pru mat wa ai: dai shaloi gaw shana nsin rai nga ai. 31 Dai wa pru mat wa ai hpang Yesu gaw, Masha Kasha gaw, ya hpung shingkang danhkung nga ai rai nna, Karai Kasang mung Masha Kasha a hkum hta hpung shingkang danhkung nga ai. 32 Karai Kasang gaw shi hkum nan Masha Kasha a hpung shingkang shapraw ya na wu ai: rai sa, gade n na yang shi hpe hpung shingkang shapraw ya na ra ai. 33 Ngai sha ni e, ngai nanhte hte hkring mi naw nga na nngai. Nanhte ngai hpe tam na marin dai: Ngai wa ai shara de mung nanhte n du lu na myit dai, ngu nna Yuda masha ni hpe ngai tsun ai hte maren, nanhte hpe mung ngai tsun dan made ai. 34 Nanhte shada da tsawra nga mu, ngu nna tara ningnan ngai nanhte hpe jaw da made ai: ngai nanhte hpe tsawra made ai zawn, nanhte mung shada da tsawra nga na rai myit dai. 35 Shingrai nanhte shada tsawra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na mara ai, ngu mu ai. 36 Simun Petru gaw, Madu e, nang gade sa mat wa na n ta? ngu nna Yesu hpe san wu ai. Yesu gaw, Ngai sa wa ai shara de, nang ya n hkan lu na ndai, hpang de she hkan nang lu na rin dai, ngu nna htan wu ai. 37 Bai Petru gaw, Madu e, ngai nang hte rau hpa rai ya n hkan lu na rai ta? Na a majaw nye a asak ngai nawng kau ya na we ai, ngu wu ai. 38 Bai Yesu gaw, Nang wa nye a majaw, na asak nawng kau na wu ni? Nang hpe ngai gaja wa teng teng tsun de ga, U garai n goi yang, nang ngai hpe masum lang nyet kau na rin dai, ngu nna shi hpe htan wu ai.

Yawhan 14

14:1 Nanhte myit hkum ru myit: Karai Kasang hpe kam mu, ngai hpe mung kam mi. 2 Nye wa a nta e nga shara law law nga ai; dai n nga yang gaw, N nga, ngu nna ngai n tsun ai, nga na n rai: kaning rai nme law, nanhte a matu nga shara lajang na she, ngai wa na nngai. 3 Shingrai ngai wa nna, nanhte a matu nga shara lajang da nhtawm, ngai nga nga ai shara e nanhte mung nga lu hkra, ngai bai sa nna, nanhte hpe ngai hpang de woi la na made ai. 4 Ngai sa wa ai shara de du ai lam nanhte chye nga myit dai, ngu mu ai. 5 Shaloi Htawma gaw, Madu e, nang gade sa wa na pyi, anhte n chye ga ai mi, lam kaning rai chye ga ta? ngu nna shi hpe tsun wu ai. 6 Yesu gaw, Lam gaw ngai rai nga nngai, tengman ai hte asak mung, ngai rai nga nngai: ngai hta nna n rai yang gaw, kadai mung nye Wa kaw n du wa lu ai. 7 Nanhte ngai hpe chye manit dai rai yang gaw, nye Wa hpe mung chye na manit dai: ya kaw nna nanhte shi hpe chye manit dai, mu mung mu manit dai, ngu nna shi hpe tsun wu ai. 8 Hpilip mung, Madu e, Wa hpe anhte e madun mi, shaloi anhte myit dik na ga ai, ngu wu ai. 9 Yesu gaw, Hpilip e, ngai nanhte hte nde nlaw na hkra nga nga sa timung, nang ngai hpe n chye n ni? Ngai hpe mu yu ai wa gaw, Wa hpe mu yu nu ai: dai re ai mi, Wa hpe anhte e madun mi, nga nna hpa rai tsun n ta? 10 Ngai gaw Wa hta nga nngai mung, Wa gaw ngai hta nga nga ai mung, nang n kam n ni? ngai nanhte hpe tsun ai ga gaw nye a myit hte ngai tsun ai n rai: ngai hta rawng ai nye a Wa gaw, shi a amu galaw nga ai. 11 Ngai gaw Wa hta nga nngai mung, Wa gaw ngai hta nga nga ai mung, kamsham nga mi: dai n rai yang gaw, dai amu ni hpe tau yu nna pyi, kamsham nga mi. 12 Nanhte hpe ngai gaja wa teng teng tsun made ai gaw, Ngai hpe kamsham ai wa gaw, ngai galaw ai amu lu galaw na ra ai; dai hta grau kaba ai amu mung, lu galaw na ra ai: kaning rai nme law, ngai gaw Wa hpang de wa na nngai. 13 Shingrai, Wa gaw Kasha a marang e hpung shingkang lu la hkra, nye a amying gang nna, nanhte hpyi mahpyi, ngai madat ya na nngai. 14 Nanhte nye a amying gang nna, ngai kaw lama ma hpyi myit yang, hpyi ai hte maren ngai madat ya na nngai. 15 Nanhte ngai hpe tsawra myit dai rai yang gaw, nye a ga matsun hkan shatup na myit dai. 16 Ngai mung Wa kaw hpyi nna, Wa mung, nanhte hte prat tup rau nga na matu, tengman ai hte seng ai Wenyi ngu ai Shalan Shabran ai wa kaga, nanhte kaw shangun dat ya na ra ai. 17 mungkan ga gaw dai Wenyi hpe n mu n chye ma ai majaw, n hkap la lu ma ai: nanhte chyawm gaw dai Wenyi hpe chye nga myit dai; kaning rai nme law, shi gaw nanhte hte rau rai nga ai, nanhte hta mung rawng nga na ra ai. 18 Nanhte hpe jahkrai zawn ngai kau da na n rai: nanhte hpang de ngai bai sa na ring ngai. 19 Loi hkring mi rai jang, mungkan ga gaw ngai hpe n mu dat na nu ai: nanhte chyawm gaw naw mu lu na marin dai: kaning rai nme law ngai ahkrung nga nngai majaw, nanhte mung ahkrung nga na marin dai. 20 Ngai gaw nye Wa hta nga nga nngai mung, nanhte ngai hta nga nga myit dai mung, ngai nanhte hta nga nga nngai mung, dai shani e nanhte chye lu na marin dai. 21 Nye a ga matsun lu la nna hkan shatup ai wa gaw, ngai hpe tsawra ai wa rai nga ai: ngai e tsawra ai wa hpe, nye Wa mung tsawra na wu ai: ngai mung dai wa hpe tsawra ai hte, ngai hkum nan shi e shadan dan na we ai, ngu nna shi hpe tsun wu ai. 22 Yuda Iskarut n re ai, kaga Yuda gaw, Madu e, na a hkum anhte hpe shadan dan nhtawm, mungkan ga hpe n shadan dan na gaw, hpa majaw rai na a ta? ngu nna san wu ai. 23 Yesu gaw, Ngai e tsawra ai wa rai yang gaw, nye ga matsun hkan shatup na ra ai: nye Wa mung dai wa hpe tsawra na wu ai rai nna, an lahkawng gaw dai wa kaw sa nna shi hte rau hpawng de nga na ga ai. 24 Ngai e n tsaw n ra ai wa gaw, nye a ga n hkan shatup lu ai, dai hta kaga, nanhte na la lu ai mungga gaw, nye a ga n rai li ai, ngai hpe shangun dat ai, nye Wa a mungga rai nga lu ai. 25 Ngai nanhte hte rau naw nga nga yang, ga ndai ngai nanhte hpe tsun da masade ai. 26 Nye Wa e nye a amying hte shangun dat na ra ai, Shalan Shabran ai wa ngu ai, Chyoi pra ai Wenyi gaw, nanhte hpe lam magup sharin ya nna, ngai nanhte hpe tsun da ai ga yawng mayawng, nanhte hpe shadum shahprang ya na ra ai. 27 Ngwi pyaw ai gaw ngai nanhte hta da ya masade ai; nye a ngwi pyaw ai nanhte hpe ngai jaw made ai: mungkan ga na ni jaw ai zawn, ngai nanhte hpe jaw made ai n rai. Nanhte myit hkum ru myit, hkrit mung hkum hkrit myit. 28 Ngai wa nna, nanhte kaw bai sa na ring ngai, ngu nna ngai nanhte hpe tsun ai gaw, nanhte na manit dai: nanhte ngai hpe tsawra myit dai rai yang gaw, Wa hpang de ngai wa ai majaw, nanhte kabu na rai myit dai; kaning rai nme law, Wa gaw ngai hta grau kaba nga ai. 29 Dai amu byin pru wa ai shaloi, nanhte kamsham lu myit ga, ngu nna garai n byin pru yang, ngai nanhte hpe tsun da made ai. 30 Ya kaw nna ngai nanhte hte ga law law n tsun lu na ni ai: kaning rai nme law, mungkan ga a Du wa gaw, du magang ra ai: dai wa chyawm gaw nye a ntsa e hpa ahkang mung n lu na wu ai: 31 raitimung, ngai nye a Wa hpe tsawra nga nngai gaw, mungkan ga chye lu na hte, nye Wa e ngai hpe matsun jaw dat ai hte maren she, ngai galaw nga nngai. Rawt mu, dai yang nna sa wa saga.

Yawhan 15

15:1 Ngai gaw tengman ai tsabyi ru rai nga nngai, nye Wa gaw tsabyi sun madu rai nga ai. 2 Ngai hta asi n si ai lakung shagu hpe gaw, shi krum kau wu ai: asi si ai lakung shagu hpe chyawm gaw, asi grau si u ga nga, tsan kau ya wu ai. 3 Nanhte chyawm gaw, ngai nanhte hpe tsun dan ai mungga majaw, ya e pyi asan apra rai manit dai. Ngai hta noi nga mu, ngai mung nanhte hta noi nga na nngai. 4 Tsabyi lakung gaw tsabyi ru madung hta n jung n noi yang gaw, shi chyu sha asi n si lu ai zawn, nanhte mung ngai hta n jung n noi myit yang gaw, asi n si lu na myit dai. 5 Ngai gaw tsabyi ru madung rai nga nngai, nanhte gaw lakung lakying ni rai nga myit dai: ngai hta noi nga nna, ngai mung dai wa hta noi nga ai rai yang gaw, dai wa gaw asi law law si wa lu ai: kaning rai nme law, ngai hte hka jang, nanhte hpa mung n galaw lu myit dai. 6 Ngai hta n jung n noi ai wa gaw, lakung lakying hpe zawn kabai kau ai hkrum nna hkraw mat wa ai hte, masha ni e magawn la nhtawm, wan hta kabai bang nna, hkru krawp mat ai kaw du wa ai. 7 Nanhte ngai hta noi nga nna, nye ga mung nanhte hta noi nga ai rai yang gaw, nanhte hpa hpyi mayu yang hpyi mu, hpyi ai hte maren nanhte e madat ya na ra ai. 8 Nanhte asi law law si wa ai a majaw, nye Wa a hpung shingkang danhkung wa nna, nanhte mung, nye a sape ni teng na myit dai. 9 Wa gaw ngai hpe tsawra ai zawn, ngai mung nanhte hpe tsawra made ai: nye a tsawra ai hta maju jung nga mu. 10 Ngai gaw nye Wa a ga matsun hkan shatup nna, shi a tsawra ai hta maju jung nga nngai zawn, nanhte mung nye a ga matsun hkan shatup myit yang gaw, nye a tsawra ai hta maju jung na myit dai. 11 Nye a kabu gara ai myit nanhte hta rawng nga na hte, nanhte a kabu gara ai gaw hpring tup wa na matu, ga ndai ngai nanhte hpe tsun da made ai. 12 Ngai nanhte hpe tsawra made ai zawn, nanhte shada da tsawra nga mu, dai gaw nye a ga matsun rai li ai. 13 Jinghku wa a matu tinang a asak nawng kau hkra tsawra ai myit hta, grau kaba ai tsawra ai myit gaw kadai hta mung n rawng nga ai. 14 Nanhte nye a ga matsun hkan shatup myit yang gaw nanhte nye a jinghku ni rai nga myit dai. 15 Ya kaw nna ngai nanhte hpe mayam n ngu na ni ai; kaning rai nme law, mayam gaw madu galaw ai amu hpe n chye wu ai: nanhte hpe jinghku she ngai ngu na made ai; nye Wa kaw na ngai na la ai hte yawng, ngai nanhte hpe chye shangun masade ai. 16 Nanhte ngai hpe lata la myit dai n rai, ngai she nanhte hpe lata la made ai rai nna, nanhte gaw pru sa nna, asi si na hte, nanhte a asi grin nga u ga, ngu nna mung, nye a amying hte Wa kaw nanhte hpyi mahpyi lu la mu ga, ngu nna mung, ngai nanhte hpe san da masade ai. 17 Nanhte shada da tsawra nga myit ga, ngu nna she, ngai nanhte hpe ndai ga matsun ni jaw da made ai. 18 Mungkan masha ni nanhte hpe ndawng n yawt myit yang, nanhte hpe garai n rai yang, ngai hpe shawng ndawng ma ai gaw, chye nga mu. 19 Nanhte mungkan ga hte seng ai ni rai myit yang gaw, mungkan ga gaw tinang hte seng ai ni hpe tsawra nga masai: nanhte chyawm gaw mungkan ga hte seng ai ni n rai myit dai hte, ndai mungkan ga na ngai nanhte hpe lata la made ai majaw, mungkan ga gaw nanhte hpe ndawng n yawt ai rai nga ai. 20 Mayam gaw madu hta grau kaba ai n rai, ngu nna ngai nanhte e tsun ai ga hpe dum nga mu: ngai hpe pyi zingri zingrat ma ai rai yang gaw, nanhte hpe mung zingri zingrat na mara ai: nye a ga madat mara ma ai rai yang gaw nanhte a ga hpe mung madat mara ya na mara ai. 21 Raitimung shanhte gaw nye amying a majaw, dai lam yawng nanhte hpe di na mara ai: kaning rai nme law, ngai e shangun dat ai wa hpe shanhte n chye ma ai. 22 Ngai shanhte hpe n sa tsun ai rai taw gaw, shanhte hta mara n nga na re ai: ya chyawm gaw shanhte a mara lawt na lam, ndang shara n nga ma sa lu ai. 23 Ngai hpe ndawng ai wa gaw, nye Wa hpe mung ndawng ai, rai nga ai. 24 Masha kaga n di lu ai amu, ngai shanhte hta n di nngai rai taw gaw, shanhte hta mara n nga na re ai: ya chyawm gaw shanhte ngai hte nye Wa hpe mu da ninglen, an lahkawng hpe ndawng n yawt rai masai. 25 Raitimung dai gaw, Mara n nga nga timung, shanhte ngai hpe ndawng n yawt ma ai, nga nna shanhte a tara laika hta ka da ai ga dik wa na matu, rai nga ai. 26 Nye Wa kaw nna, nanhte hpang de ngai shangun dat ya na ring ngai, Shalan Shabran ai wa ngu ai, Wa kaw nna pru sa ai tengman ai a Wenyi du jang, shi gaw nye a lam sakse hkam ya na ra ai. 27 Nanhte mung, shawng nnan kaw nna ngai hte rau nga manit dai majaw, sakse hkam nga myit dai.

Yawhan 16

16:1 Nanhte myit kataw shara n nga malit ga, ngu nna she, ndai lam ngai nanhte hpe tsun da made ai. 2 Shanhte gaw tara jawng ni hta nna, nanhte hpe shapraw kau na mara ai: gaja wa nan, nanhte hpe sat kau lu ai wa kadai mung, Karai Kasang a magam hpe gunhpai nngai, nga nna myit la ai aten du wa ra ai. 3 Shanhte gaw nye Wa hpe mung, ngai hpe mung n chye ma ai majaw, shing di na mara ai. 4 Raitimung, shanhte a nhtoi du ai shaloi, ngai nanhte hpe ning ngu tsun hkap da sai gaw, nanhte dum lu myit ga, ngu nna ga ndai ngai nanhte hpe tsun nngai: shawng de gaw ngai nanhte hte rau naw nga nngai majaw, ngai nanhte hpe ning ngu n tsun yu nngai. 5 Ya chyawm gaw, ngai hpe shangun dat ai wa hpang de ngai wa na ni ai: nanhte hta na mung, Nang gade wa na n ta? nga nna ngai hpe kadai n san yu myit dai. 6 Raitimung, ndai lam ni ngai nanhte hpe tsun made ai majaw, nanhte a myit masin hta yawnhkyen ai hpring mat ma salit dai. 7 Ning nga timung, tengman ai lam she ngai nanhte hpe tsun nngai: ngai wa ai gaw nanhte a akyu matu rai nga ai: kaning rai nme law, ngai n wa yang gaw, dai Shalan Shabran ai wa nanhte kaw du sa na n rai: ngai wa jang chyawm gaw, ngai shi hpe nanhte hpang de shangun dat na we ai. 8 Dai wa du jang shi gaw mungkan ga hpe, yubak mara lu ai lam mung, dinghpring lu ai lam mung, tara jeyang na lam mung, dawdan da na wu ai: 9 yubak mara lu ai lam dawdan da na gaw, shanhte ngai hpe n kam n sham ma ai majaw, rai na rai nga ai: 10 dinghpring lu ai lam dawdan da na gaw, ngai gaw nye Wa hpang de wa mat nna, htawmhpang de nanhte ngai hpe n mu lu na majaw, rai na rai nga ai; 11 tara jeyang ai lam dawdan da na gaw, ndai mungkan ga a Du wa tara jeyang hkrum sai majaw, rai na rai nga ai. 12 Ngai nanhte hpe tsun da na lam law law naw nga ai raitimung, nanhte ya garai n hkam la lu myit dai. 13 Raitimung, dai tengman ai Wenyi du sa jang, shi gaw tengman ai lam yawng mayawng nanhte hpe madun na ra ai: dai wa gaw shi a myit hte tsun na ra ai n rai; na la lu ai hte made tsun dan na ra ai: htawmhpang de byin na ra ai lam mung, shi nanhte hpe tsun dan na ra ai. 14 Dai wa gaw, ngai lu ai hta na shaw la nna, nanhte hpe tsun shana ya na rai nga ai majaw, nye a hpung shingkang shapraw ya na ra ai. 15 Nye Wa lu malu gaw ngai lu ai rai nga ai: dai majaw, ngai lu ai hta na shi shaw la nna, nanhte hpe tsun shana ya na ra ai, ngu nna ngai tsun ni ai. 16 Hkring mi rai jang, nanhte ngai hpe n mu na myit dai; hkring mi bai rai jang, bai mu lu na myit dai, ngu mu ai. 17 Shing nga ai majaw shi a sape ni nkau mi gaw, Hkring mi rai jang, nanhte ngai hpe n mu na myit dai; hkring mi bai rai jang, bai mu lu na myit dai, nga nna mung, Wa hpang de ngai wa na nngai, nga nna mung, shi anhte hpe tsun mi ai ga gaw, hpa nga ai ga re ai i? nga nna shada da san shajang ma ai: 18 bai shanhte gaw, Hkring mi rai jang, nga nna tsun ai mung, hpa nga ai ga re ai i? Shi tsun ai ga hpe anhte n chye na ga ai, nga ma ai. 19 Shanhte shi e san mayu nga ma ai hpe, Yesu chye da wu ai majaw, shi gaw, Hkring mi rai jang, nanhte ngai hpe n mu na myit dai, hkring mi bai rai jang bai mu na myit dai, ngu nna ngai tsun ai ga hpe, nanhte shada jawm san hkat da mu ni? 20 Ngai nanhte hpe gaja wa teng teng tsun made ga, Nanhte gaw hkrapngu hkrapngoi ai hte, sharung shayawt ai hkrum na marin dai; mungkan masha ni chyawm gaw kabu gara lu na mara ai; nanhte gaw yawnhkyen ai hkrum na marin dai, raitimung, nanhte a yawnhkyen ai gaw kabu gara ai bai tai na ra ai. 21 Numsha gaw kasha shangai na rai yang, shi a shangai nhtoi gu sai majaw, yawnhkyen nga ai, raitimung, kasha shangai ngut jang, ndai dinghta ga e masha langai mi shaprat tawn nu ai majaw, kabu gara nga ai rai nna, shawng na ru tsang ai hpe bai n dum wu ai. 22 Dai hte maren nanhte ya yawnhkyen nga myit dai: raitimung, nanhte hte ngai bai hkrum lu nna, nanhte a myit masin kabu gara na ra ai: dai nanhte a kabu gara ai hpe kadai kashun la ya lu na n rai. 23 Dai nhtoi hta nanhte ngai hpe hpa mung n san ra na myit dai: ngai nanhte hpe gaja wa teng teng tsun made ga, Wa kaw na lama ma hpyi myit yang, nye amying a marang e shi nanhte hpe jaw na ra ai. 24 Ya du hkra nye a amying hta gang nna, nanhte hpa mung n hpyi yu myit dai: nanhte a kabu gara ai hpring tup wa hkra, lu la na matu, hpyi nga mu. 25 Ndai lam ni hpe ga shadawn hku hte ngai nanhte hpe tsun dan masade ai; ga shadawn hku hte n re ai sha, Wa a lam nanhte hpe dan dan leng leng tsun dan na ahkying gaw, du na ra ai. 26 Dai nhtoi e, nanhte nye a amying hpe gang nna hpyi na marin dai; nanhte a matu mara nye Wa kaw ngai hpyi na, n ngu nngai: 27 kaning rai nme law, nanhte ngai hpe tsawra myit dai rai nna, ngai gaw Wa kaw na pru sa nngai hpe, nanhte kamsham myit dai majaw, Wa gaw shi hkum nan nanhte hpe tsawra nga ai. 28 Ngai gaw Wa kaw na pru sa nna, mungkan ga de du sa ni ai; bai mungkan ga hpe ngai kau da nna, Wa hpang de wa na nngai, ngu mu ai. 29 Shaloi shi a sape ni gaw, Yu u, ya gaw ga shadawn hku hte n re ai, dan dan leng leng nang tsun nit dai: 30 yawng mayawng hpe nang chye nga ndai mung, gade ai nang hpe hpa n san ra ai mung, ya anhte chye saga ai: dai re ai majaw nang Karai Kasang kaw na du sa ndai gaw, anhte kam saga ai, ngu nna tsun mu ai. 31 Yesu bai htan wu ai gaw, Nanhte ya kam manit ni? 32 Yu mu, nanhte bra mat nna, ngai hkrai hpe sha kau da nhtawm, langai hte langai tinang a shara de wa mat na ahkying gaw du wa ra ai rai nna, ya pyi du ra ai: raitimung ngai gaw, ngai hkrai nga nngai n rai, Wa gaw ngai hte rau rai nga ai. 33 Nanhte ngai hta ngwi pyaw ai lu la myit ga, ngu nna, ndai ga ngai nanhte hpe tsun ni ai: nanhte gaw mungkan ga e nni nkri hkrum sha myit dai: raitimung, dakring dakan rai nga mu; ngai gaw mungkan ga hpe dang kau da ni ai, ngu mu ai.

Yawhan 17

17:1 Dai lam ni Yesu tsun nga ninglen, lamu de mada yu nna, Wa e, nye ahkying du sali ai: ngai nsha wa a lata de nang ap ya ai yawng mayawng hpe shi htani htana asak jaw nga u ga, hkrung mahkrung a ntsa e up ai ahkang aya nang shi hpe jaw nit dai hte maren, 2 ngai nsha wa e na a hpung shingkang shapraw ya lu n ga, nsha wa a hpung shingkang hpe mung, shapraw ya e law. 3 Htani htana asak ngu ai chyawm gaw, langai sha rai nga ai hte tengman re ai nang Karai Kasang hpe mung, nang shangun dat ai wa Yesu Hkristu hpe mung, shanhte chye chyang lu ai hpe, ngu ai, rai nga ai. 4 Ngai gunhpai na matu, nang ngai e ap ya ai amu hpe, ngai gunhpai ngut se ai rai nna, ga ntsa e na a hpung shingkang shapraw da ya se ai. 5 Wa e, ginding aga garai n lat kaw nna, nang hte rau ngai lu nga ai hpung shingkang ngu ai, nang hkum hte nan, ya mung ngai hta danhkung shangun e law. 6 Mungkan ga na nang ngai e ap ya ai masha ni hpe, na a amying ningsang ngai shadan ya se ai; shanhte gaw na a ni rai ma ai rai nna, nang shanhte hpe ngai e jaw nit dai; shanhte mung na a mungga hkan shatup masai. 7 Nang ngai hpe jaw majaw yawng, nang kaw na rai nga ai gaw, ya shanhte chye masai: 8 kaning rai nme law nang ngai e jaw dat ai mungga hpe, ngai shanhte hpe jaw mawe ai rai nna, shanhte mung dai hpe hkap la masai majaw, nang kaw na ngai pru sa nngai gaw, shanhte gaja wa teng teng chye ma ai hte, nang ngai hpe shangun dat ndai mung, kamsham ma ai. 9 Shanhte a matu mara ngai hpyi nngai: mungkan masha ni a matu mara hpyi nngai n rai; nang ngai hpe jaw ai ni a matu she hpyi nngai; kaning rai nme law, shanhte gaw, na a ni rai nga ma ai: 10 dai hta kaga, ngai lu malu gaw na a rai nga ai; nang lu malu mung, nye a rai nga ai rai nna, nye a hpung shingkang shanhte hta danhkung li ai. 11 Ya kaw nna ngai gaw mungkan ga e n nga nngai, ndai ni chyawm gaw, mungkan ga e nga nga na rai ma ai: ngai gaw nang hpang de wa na rai nga nngai. Chyoi pra ai Wa e, an gaw langai sha rai nga ga ai zawn, ndai ni mung rai nga mu ga, nang ngai e jaw ai ni hpe, na a mying ning sang hta shagrin shangang da u. 12 Ngai shanhte hte rau nga nga ai hte yang, nang ngai e jaw ai ni hpe, na a amying ningsang hta ngai shagrin shangang da nna, shanhte hpe makawp maga mase ai: shanhte hta na hten bya ai a kasha hta kaga gaw, langai mi muk n hten n bya ma ai. dai wa a hten bya ai chyawm gaw, Chyum laika hta rawng ai ga dik wa na matu rai nga ai. 13 Ya gaw nang hpang de ngai wa na rai nna, nye a kabu gara ai gaw shanhte hkum hta nan hpring tup wa malu ga, ngu nna mungkan ga e, ga ndai ngai tsun da nga nngai. 14 Na a mungga ngai shanhte hpe jaw da mase ai: ngai gaw mungkan ga na n rai nngai hte maren, ndai ni mung mungkan ga na n rai ma ai majaw, mungkan masha ni shanhte hpe ndawng nga ma ai. 15 Ndai ni hpe mungkan ga na htawt la na, ngai hpyi nngai n rai, n shawp n kap ai hta na shanhte hpe makawp maga na she, ngai hpyi nngai. 16 Ngai gaw mungkan ga na n rai nngai hte maren, ndai ni mung mungkan ga na n rai ma ai. 17 Na a tengman ai lam hta, shanhte hpe shachyoi shapra ya mu; na a mungga gaw, tengman ai lam rai nga lit dai. 18 Nang ngai hpe mungkan ga de shangun dat ndai zawn, ngai mung shanhte hpe mungkan ga de shangun dat da mawe ai. 19 Shanhte hkum nan, tengman ai lam hta chyoi pra nga mu ga, ngu nna ngai gaw shanhte a matu mara, nye hkum dai shachyoi shapra tawn se ai. 20 Ndai ni a matu sha ngai hpyi nngai n rai; shanhte tsun dan ai ga a majaw, ngai hpe kamsham ai ni a matu mung, ngai hpyi nga nngai: 21 nang ngai hpe shangun dat ndai gaw, mungkan ga na ni kamsham lu mu ga, dai ni nlang hte gaw langai sha tai nna, Wa e, nang ngai hta nga nga nna, ngai mung nang hta nga nga nngai zawn, dai ni nlang hte gaw, an hta nga nga na matu, ngai hpyi nga nngai. 22 An gaw langai sha rai nga ga ai zawn, ngai gaw shanhte hta nga nga nna, nang mung ngai hta nga nga ai a marang e, shanhte langai sha tai wa nna, langai sha hta hkum tsup wa lu na matu mung, 23 nang ngai hpe shangun dat ndai hte nang ngai hpe tsawra ndai zawn, shanhte hpe mung tsawra nga ndai gaw, mungkan masha ni chye lu na matu mung, nang ngai e jaw ai hpung shingkang hpe, ngai shanhte hpe jaw da mase ai. 24 Wa e, gingding aga garai n lat kaw nna, nang ngai hpe tsawra nga ndai majaw, nang ngai e jaw ai hpung shingkang hpe, ngai hpe jaw da ai ni mung mada mu lu mu ga, ngai nga ai shara e shanhte ngai hte rau nga nga lu na hpe, ngai ra nga nngai. 25 Dinghpring ai Wa e, mungkan ga na ni nang hpe n chye ma timung, ngai chye nga nngai: nang ngai hpe shangun dat ndai gaw, ndai ni mung chye nga ma ai: 26 nang ngai e tsawra ai n-gaw nwai myit gaw, shanhte hta anga nga u ga mung, ngai shanhte hta anga nga na matu mung, na a mying ningsang hpe ngai shanhte e shachye shachyang mase ai rai nna, a shachye shachyang nga na nngai law, nga ai.

Yawhan 18

18:1 Yesu gaw dai ga tsun ngut jang, shi a sape ni hte rau pru wa nna, Kedron hkaraw wora hkran de rap sa ma ai: dai yang e sun nga nga ai rai nna, shi gaw sape ni hte dai de shang wa ma ai. 2 Yesu gaw shi a sape ni hte law law lang dai de a sa ga nga ai majaw, shi hpe ap kau na wa Yuda mung, dai shara hpe chye da wu ai. 3 Dai rai nna Yuda gaw, hpyen langa ni hte, Hkinjawng agyi ni hte Hparishe ni kaw na, hpyenbu ni hpe lu la jang, pyengdin, shanan, ri nhtu hte rai nna, dai de sa wa ma ai. 4 Yesu gaw, shi hta byin wa ra ai lam yawng hpe chye wu ai majaw sit sa nna, Nanhte kadai hpe tam myit ta? ngu nna shanhte hpe san mu ai. 5 Shanhte gaw, Nazaret na Yesu hpe tam ga ai, nga nna shi hpe htan ma ai. Yesu gaw, Ngai nan rai nga nngai, ngu nna shanhte hpe tsun mu ai. Shi hpe ap kau na wa Yuda mung dai ni hte rau tsap nga ai. 6 Dai rai nna shi gaw, Ngai nan rai nga nngai, ngu wu yang, dai ni gaw hpang de kanut wa nna, ga hta kadawng taw mat ma ai. 7 Bai shi gaw, Kadai hpe tam myit ta? ngu nna shanhte hpe bai san mu yang, shanhte gaw, Nazaret na Yesu hpe tam ga ai, nga nna bai htan ma ai. 8 Yesu gaw, Ngai nan rai nga nngai, ngu nna nanhte hpe ngai tsun masade ai: ngai hpe tam ai rai myit yang gaw, ndai ni gaw wa manu ga, ngu nna htan wu ai: 9 dai gaw, Nang ngai e jaw ai ni hta na, langai mi hpe muk ngai n shayet kau nngai, nga nna shawng de shi tsun ai ga dik wa na matu, rai nga ai. 10 Simun Petru gaw nhtu hpye nga ai rai nna, dai hpe shaw nhtawm, hkinjawng agyi wa a mayam hpe kahtam nna, dai wa a hkra maga na ana di mat lu ai: dai mayam a amying gaw Malhku ngu ai rai lu ai. 11 Dai re ai majaw Yesu gaw, Na a nhtu dai hpe n-ga hta shawn bang kau u: nye Wa ngai e jaw ai gawm hpe ngai n lu na rai ni? ngu nna Petru hpe tsun wu ai. 12 Shaloi hpyen ma ni, hpyenbu wa hte, Yuda masha ni a agyi ni gaw, Yesu hpe rim la nna gyit ngut jang, Anna hpang de shawng woi wa mu ai: 13 kaning rai nme law, shi gaw dai shaning e hkinjawng agyi tai ai, Kayapa a katsa wa rai nga ai. 14 Dai Kayapa gaw, Amyu masha ni a matu masha langai mi si yang grau mai ai, nga nna Yuda ni hpe hpaji daw ya ai wa rai nga ai. 15 Shaloi Simun Petru hte kaga sape langai mi gaw, Yesu kaw hkan nang ma ai. Dai kaga sape wa gaw, hkinjawng agyi hte chye chyap ai rai nna, hkinjawng agyi wa a nta npan de, Yesu hte rau hkan shang nang ai: 16 Petru chyawm gaw shinggan maga chyinghka lam makau e hti tsap nga ai. Dai majaw hkinjawng agyi wa hte chye chyap ai sape kaga gaw pru nna, chyinghka sin ai num hpe tsun nhtawm, Petru hpe shashawn la wu ai. 17 Shaloi chyinghka sin ai num gaw, Nang mung dai wa a sape ni hta na langai mi rai n ni? ngu nna Petru hpe san wu ai. Shi gaw, N rai nngai, ngu nna htan wu ai. 18 Dai shaloi kashung ai majaw, mayam ni hte agyi ni gaw, nra hte wan wut nna, wan kra let tsap nga ma ai: Petru mung dai ni hte rau tsap nna, wan kra nang nga ai. 19 Shaloi hkinjawng agyi wa gaw Yesu hpe, shi a sape ni a lam hte shi sharin shaga ai lam, san wu ai. 20 Yesu gaw, Ga ntsa e ngai dan dan leng leng hkaw tsun ni ai: Yuda masha nlang zuphpawng ai Tara jawng ni hta mung, nawku Htingnu hta mung ngai tut tut sharin shaga ni ai: makoi magap nna ngai hpa mung n hkaw n tsun nngai. 21 Nang ngai e hpa rai san n ta? Ngai kaning ngu hkaw tsun nngai gaw, na la ai ni hpe san yu u; ngai tsun ai ga hpe shanhte chye ma ai, ngu nna htan wu ai. 22 Shing ngu wu yang makau e tsap nga ai agyi langai mi gaw Yesu hpe kahpret nna, Hkinjawng agyi wa mi ting hpe, nang shing nga htan lu n ni? ngu wu ai. 23 Yesu gaw, Ngai tsun ai ga n kaja yang gaw, n kaja ai ngu nna sakse hkam u; ga kaja she ngai tsun ai rai yang me, nang hpa rai ngai hpe kahpret n ta? ngu nna htan wu ai. 24 Dai rai nna Anna gaw, gyit da nga ai ta, shi hpe hkinjawng agyi Kayapa hpang de sa bang shangun dat wu ai. 25 Simun Petru chyawm gaw wan kra let tsap nga ai. Shaloi shanhte gaw, Nang mung shi a sape ni hta na rai n ni? ngu nna shi hpe san mu ai. Shi gaw, N rai nngai, ngu nna nyet kau wu ai. 26 Petru e kahtam nna, na di ai wa hte hpunau daw ai, hkinjawng agyi a mayam langai mi mung, Nang sun e dai wa hte rau nga ndai hpe, ngai mu nngai, n rai ni? ngu wu ai. 27 Dai majaw Petru bai nyet kau wu ai: dai shaloi jang u goi ra ai. 28 Bai shanhte gaw Yesu hpe, Kayapa kaw nna Pretori Htingnu de sa bang mu ai: dai ten gaw jahpawt manap jau e rai nga ai: shanhte gaw awu asin re ai n hkrum ai sha, dai Shalai wa poi sha lu na matu, tinang dai Htingnu nhku de n shang ma ai. 29 Dai re ai majaw Pilat gaw shanhte nga ai de pru nna, Ndai wa hta nanhte hpa mara shagun mu ta? ngu nna san wu ai. 30 Shaloi shanhte gaw Ndai wa n kaja ai amu galaw ai wa n rai yang gaw, anhte nang kaw sa bang na ga ai n rai, ngu nna htan mu ai. 31 Dai re ai majaw Pilat gaw, Nanhte dai shi hpe la nna nanhte a tara hte maren jeyang mu, ngu nna shanhte hpe htan wu ai. Yuda masha ni, Anhte gaw kadai hpe sat na ahkang mung n lu ga ai, ngu nna bai htan mu ai. 32 Shanhte shing nga ai gaw, Yesu shi kaning re ai lam hte si hkam lu na, nga nna kumla jaw let, tsun da ai ga dik wa na matu, rai nga ai. 33 Dai majaw Pilat gaw Htingnu kata de bai shang nna, Yesu hpe shaga la nhtawm, Nang Yuda masha ni a hkawhkam rai nga n ni? ngu nna shi hpe san wu ai. 34 Yesu gaw, Dai gaw na a myit hte nang san n ni? shing n rai, masha kaga e nye a lam nang hpe tsun dan ma ni? ngu nna htan wu ai. 35 Pilat gaw, Ngai Yuda masha rai nga a ni? Na a amyu masha ni hte hkinjawng agyi ni gaw, nang hpe ngai kaw sa ap nga ma ai; nang hpa galaw shut nit ta? ngu nna htan wu ai. 36 Yesu gaw, Nye a mungdan gaw ndai mungkan ga na n rai li ai; nye a mungdan ndai mungkan ga na re ai rai yang gaw, ngai Yuda masha ni a lata de n shang hkra, nye a ali ama ni gasat na masai: ya chyawm gaw nye a mungdan ndai yang na n rai li ai, ngu nna htan wu ai. 37 Dai re ai majaw Pilat gaw, Rai taw, nang hkawhkam teng nga n ni? ngu nna san wu ai. Yesu gaw, Nang tsun ai hte maren ngai Hkawhkam teng nga nngai: dai ngu nna tengman ai a maga de sakse hkam na matu, ngai shangai jinghkai wa ni ai hte, mungkan ga de du sa ring ngai: tengman ai hte seng ai ni nlang hte gaw, nye a ga nsen madat ma ai, ngu nna htan wu ai. 38 Pilat gaw, Tengman ngu ai gaw hpa rai ta? ngu nna shi hpe tsun wu ai. Shing nga nhtawm Yuda masha ni kaw shi bai pru nna, Ndai wa hta hpa mara mung ngai n mu nngai. 39 Raitimung, Shalai wa poi e masha langai mi ngai nanhte hpe dat ya ga ai htung, nanhte hta nga ai hte maren, Yuda masha ni a Hkawhkam wa hpe nanhte e dat ya na, nanhte ra myit ni? ngu nna san wu ai. 40 Shaloi shanhte gaw, Dai wa hpe n rai, Baraba hpe dat ya mi, nga nna bai jahtau tsun ma ai: Baraba chyawm gaw damya rai nga ai.

Yawhan 19

19:1 Dai re ai majaw Pilat gaw Yesu hpe gang la nna kayat wu ai. 2 Hpyen masha ni mung ju hpun hte kagup hkri la nhtawm, shi a baw hta shagup ya nna, palawng ahkyeng mung shi hpe jahpun mu ai: 3 shing di nhtawm, shi hpang de shanhte sit sa nna, Yuda ni a Hkawhkam e, nang a lu nit ga law, nga nna tsun let shi hpe kahpret ma ai. 4 Shaloi Pilat gaw shinggan de bai pru nna, shanhte hpe, Yu mu, ndai wa hta hpa mara mung ngai n mu nngai gaw, nanhte chye lu myit ga, ngu nna ngai shi hpe nanhte hpang de shapraw dan made ai, ngu wu ai. 5 Yesu mung, ju kagup gup ai hte palawng ahkyeng hpun let pru wa ai. Shaloi Pilat gaw, Ndai masha wa hpe yu mu! ngu nna shanhte hpe tsun mu ai. 6 Dai majaw hkinjawng agyi ni hte du agyi ni gaw shi hpe mu jang, Wudang hta jen da u, jen da u, nga nna jahtau ma ai. Shaloi Pilat gaw, Nanhte nan shi hpe la nna jen da mu; ngai gaw shi hta hpa mara mung n mu nngai, ngu nna shanhte hpe tsun mu ai. 7 Shaloi Yuda masha ni gaw, Anhte mung tara lu ga ai; ndai wa gaw shi hkum hpe Karai Kasang a Kasha hpyi hpun ai a majaw, dai tara hte maren si ging nga ai, ngu nna shi hpe htan mu ai. 8 Pilat gaw dai ga na ai majaw grau hkrit nga ai rai nna, 9 Htingnu nhku de bai shang nhtawm, Yesu hpe, Nang kanang na rai n ta? ngu nna san wu ai. Yesu chyawm gaw ga hkaw mi muk n htan wu ai. 10 Dai majaw Pilat gaw, Nang ngai hte ga n tsun hkraw n ni? Ngai nang hpe dat dat lu ai ahkang hte, wudang hta jen da lu ai ahkang lu nngai, nang n chye n ni? ngu nna shi hpe tsun wu ai. 11 Yesu gaw, Nang hpe ntsa de nna, ahkang jaw da sai n rai taw gaw, nye a ntsa e hpa ahkang mung, nang n lu na ndai: dai majaw ngai hpe nang kaw sa ap ya ai wa gaw, yubak grau kaba lu ai, ngu nna, shi hpe htan wu ai. 12 Shing nga ai majaw Pilat gaw Yesu hpe dat dat na lam tam nga ai: Yuda masha ni mahtang, Nang dai wa hpe dat dat n yang gaw, nang Kehta hkawhkam a jinghku n rai nit dai: tinang dai tinang hkum hpe hkawhkam shatai la ai wa gaw, Kehta hkawhkam hte nhtan shai ai wa rai nga ai, nga nna jahtau ma ai. 13 Pilat gaw dai ga na jang, Yesu hpe woi shapraw nhtawm, Hebre ga hte Gabahta ngu ai Nlung nep ai shara e tara tingnyang hta dung nga ai. 14 Ya, Shalai wa poi a matu shachyip ai nhtoi rai nga ai hte, hkying kru daram mung rai sai. Shaloi Pilat gaw Yuda masha ni hpe, Nanhte a hkawhkam wa hpe yu yu mu, ngu mu ai. 15 Dai re ai majaw shanhte gaw, La kau u, la kau u, wudang hta jen da kau u! nga nna jahtau ma ai. Bai Pilat gaw, Nanhte a Hkawhkam wa hpe wudang hta ngai jen da na rai ni? ngu nna shanhte hpe san wu ai. Shaloi hkinjawng agyi ni gaw, Kehta hkawhkam hta kaga, anhte hkawhkam n lu ga ai, ngu nna htan mu ai. 16 Dai re ai majaw Yesu hpe wudang hta jen da kau mu ga nga, shanhte a lata de ap ya kau wu ai. 17 Dai rai nna shanhte gaw Yesu hpe woi dun wa mu ai: Yesu gaw shi a wudang shi dai hpai nna, Pungkum ngu ai shara de pru sa wa ai; dai shara hpe Hebre ga hte Golgohta nga ma ai: 18 shanhte gaw dai yang e shi hpe wudang hta jen da ma ai; shi hte rau marai lahkawng hpe mung, maga mi de langai ngai di jen da mu ai rai nna, Yesu gaw dai yan a lapran e rai nga ai. 19 Pilat mung masat dingsat laika ka la nna wudang hta shakap da wu ai. Dai ka ai gaw, Yuda ni a Hkawhkam Nazaret wa Yesu, nga ai rai lu ai. 20 Yesu hpe jen da ai shara gaw mare hte mung ni nga ai hte, dai laika hpe Hebre ga, Latin ga, Heleni ga hte ka da nga ai majaw, Yuda masha law law wa dai masat dingsat laika hpe hti ma ai. 21 Shing nga ka da ai majaw, Yuda masha ni a hkinjawng agyi ni gaw, Pilat hpe, Yuda ni a Hkawhkam nga nna hkum ka, Ngai gaw Yuda masha ni a Hkawhkam rai nngai, nga nna shi tsun ai, ngu nna she ka u, ngu nna sa tsun mu ai. 22 Pilat gaw, Ngai ka ai hku ngai ka da se ai, ngu nna htan mu ai. 23 Hpyen masha ni gaw Yesu hpe jen da ngut jang, shi a hpun palawng hpe la nna, mali brang di ga karan nhtawm, hpyen masha langai mi e daw daw la mu ai: dai kata palawng hpe mung shing di na maw mu ai: raitimung, kata palawng gaw shakung n rawng ai, lawng du nna htum hkra da ai rai nga ai. 24 Dai majaw shanhte gaw, Palawng ndai hpe anhte n gang je ai sha, kadai mahtang la ang na gaw hpaida da ga, nga nna shada da tsun ma ai; dai gaw, Shanhte nye a hpun nba hpe shada karan la nna, Nye a kata palawng hpe mung hpaida da ma ai, nga nna laika hta rawng ai ga dik wa na matu rai nga ai. 25 Dai majaw hpyen masha ni shingrai galaw ma ai. Ya Yesu a wudang makau e shi a kanu hte, kanu a nau na Klopa a madu jan Mari hte, Magdala Mari hte tsap nga ma ai. 26 Dai majaw Yesu gaw kanu hte shi tsawra ai sape, makau e tsap nga ma ai hpe, mu wu yang, kanu hpe, Numsha e, ning sha hpe yu u, ngu wu ai. 27 Dai sape hpe mung, Ning nu hpe yu u, ngu wu ai. Dai shani kaw nna dai sape gaw, Yesu a kanu hpe shi a nta e woi tawn da wu ai. 28 Dai hpang Yesu gaw amu mahkra ngut sai hpe chye wu jang, Ngai hpang kara nngai, nga nna laika shadik na matu tsun wu ai. 29 Dai yang e ntsin hkri hte hpring nga ai di bu langai mi dung nga ai: dai majaw shanhte gaw hka kamu hta ntsin hkri jahpring la nhtawm, maiaw ndung hta shakap nna, shi a n-gup hta gawn ya mu ai. 30 Yesu gaw dai ntsin hkri hkap lu ngut jang, Ngut ma sali ai, nga nhtawm, baw nga di nna, nsa jahti kau wu ai. 31 Dai shani gaw shachyip ai nhtoi rai nga ai hte, hpang shani mung Laban nhtoi kaba rai nga ai majaw, laban nhtoi e wudang hta mang n noi nga u ga, Yuda masha ni gaw dai ni a lagaw kayat daw nna, dai mang ni hpe htawm kau na, Pilat kaw ahkang hpyi ma ai. 32 Dai majaw hpyen masha ni sa nna, shi hte rau jen da ai yan a lagaw hpe kayat daw ya mu ai: 33 Yesu kaw du yang, shi si mat boi sai hpe shanhte mu ma ai majaw, shi a lagaw hpe gaw n daw ya mu ai: 34 raitimung hpyen masha langai mi gaw, shi a garep hpe ri hte galun waw ya wu ai rai nna, shaloi jang sai hte ntsin pru wa ai. 35 Dai lam mu ai wa gaw sakse hkam wu ai rai nna, shi a sakse gaw tengman lu ai: nanhte mung kamsham lu myit ga, tengman ai ga shi tsun nga ai gaw, shi dai chye nga ai. 36 Kaning rai nme law, dai lam byin ai gaw, Shi a nra langai mi muk daw na n rai, nga ai laika ga dik wa na matu rai nga ai. 37 Bai laika langai mi hta, shanhte galun waw ai wa hpe shanhte mu lu na maru ai, nga ai. 38 Dai hpang, Yuda masha ni hpe hkrit ai majaw, mayun de nna Yesu a sape tai nga ai, Aramahti mare na Yosep ngu ai wa gaw, Yesu a hkum tsawp hpe shayu la na, Pilat kaw ahkang hpyi wu ai; Pilat mung ahkang jaw dat wu ai: dai re ai majaw shi sa nna dai hkum tsawp shayu la wu ai. 39 Shawng de shana e shi kaw sa chyai ai, Nikodi mung sa ai rai nna, mura hte achyaw kayau ai manam pyaw ai baw, joi sumshi dang la sa ai. 40 Shaloi shan gaw Yesu a hkum tsawp hpe la nhtawm, Yuda masha ni a makoi mayang ai hking hte maren, manam pyaw ai baw hte sumpan e kayawp ahkyen mu ai. 41 Shi hpe jen da kau ai shara e sun langai mi nga ai: dai sun e masha langai mi hpe muk garai n makoi yu ai lup ningnan langai mi nga ai. 42 Yuda masha ni a shachyip ai nhtoi rai nga ai hte, lup dai mung ni nga ai majaw, shan gaw Yesu hpe dai yang e tawn da mu ai.

Yawhan 20

20:1 Hpang na nhtoi bat shawng shani, nhtoi garai n htoi yang, Magdala Mari gaw jau jau e lup de sa wa ai rai nna, lup chyinghka la ai nlung sit mat nga ai hpe, mu wu ai. 2 Dai majaw shi gaw Simun Petru yan Yesu tsawra ai sape hpang de gat wa nhtawm, Dai Madu hpe lup de na shanhte la mat wa nna, kanang tawn da mu ai mung, anhte n chye ga ai, ngu nna shan hpe tsun mu ai. 3 Dai majaw Petru yan kaga sape gaw, pru nna lup de sa wa ma ai. 4 Shan rau gat sa wa ma yang, dai kaga sape gaw Petru hpe gat lai kau da nna, lup de shawng sa du ai: 5 shaloi shi gum yu wu yang, sumpan gin-yan taw nga ai sha mu wu ai: raitimung, shi gaw kata de n shang ai. 6 Simun Petru chyawm gaw shi a hpang e hkan gat nang nna, dai de du jang, kata de shang yu wu ai: 7 sumpan gin-yan taw nga ai mung, baw na hpajet gaw sumpan hte rau n re ai, kaga ga rai nna katsu taw nga ai mung, shi mu wu ai. 8 Dai majaw lup de shawng du ai, dai kaga sape mung hkan shang wa nna, mu lu ai hte kamsham wu ai. 9 Kaning rai nme law, Yesu gaw si ai ni kaw na bai hkrung rawt na ra ai, nga nna rawng ai Chyum laika hpe, shan garai n chye ma ai. 10 Shaloi dai sape yan gaw nta de bai wa ma ai. 11 Mari chyawm gaw, dai lup shinggan e hkrap let tsap nga ai: shingrai hkrap let shi gum nna, lup kata de yu yu di wu ai; 12 shaloi hpraw tu ai hpun palawng bu hpun ai lamu kasa lahkawng gaw, Yesu a moi mang tawn ai shara a baw ngu na de langai mi, lagaw ngu na de langai mi, dung nga ai hpe mu wu ai. 13 Dai yang gaw, Numsha e, hpa rai hkrap nga n ta? ngu nna san mu ai: shi gaw, Nye Madu hpe la mat wa nna, kanang tawn da ma ai mung, n chye nngai majaw rai nngai, ngu nna shan hpe htan mu ai. 14 Shing nga nhtawm, shingdu de shi kayin wa ai rai nna, Yesu tsap nga ai hpe mu wu ai; raitimung, dai wa Yesu rai nga ai gaw, shi n chye wu ai. 15 Yesu mung, Numsha e, hpa rai hkrap nga n ta? nang kadai hpe tam n ta? ngu nna shi hpe san wu ai: shi chyawm gaw dai wa hpe sun sin ai wa rai daw ai nga, myit nna, Tsa e, nang shi hpe hpai la kau ndai rai yang gaw, kanang tawn da ai, ngai hpe tsun dan e, ngai la wa na nngai, ngu nna shi hpe tsun wu ai. 16 Shaloi Yesu gaw, Mari e, ngu nna shaga wu ai. Shi mung kayin let, Raboni, ngu nna Hebre ga hte htan wu ai: dai gaw, Sara nga ai, rai nga ai. 17 Bai Yesu gaw, Ngai e hkum hkra et; kaning rai nme law, ngai Wa hpang de ngai garai n lung wa nngai: raitimung, ngai nau ni hpang de wa nna, Ngai gaw nye a Wa hte nanhte a Kawa, nye a Karai Kasang hte nanhte a Karai Kasang hpang de lung wa sa na da, ngu nna shanhte hpe wa tsun dan su, ngu nna shi hpe tsun dat wu ai. 18 Shaloi Magdala Mari gaw wa nna, Dai Madu hpe ngai mu lu se ai, nga nna mung, shi ngai hpe shing nga htet dat ai, nga nna mung, tsun dan wu ai. 19 Dai re ai majaw, dai nhtoi bat shawng shani na nsin rim e, Yuda masha ni hpe hkrit ma ai majaw, sape ni nga ai nta e chyinghka ni la kau ma sayang, Yesu sa du nna shanhte hpe a ka-ang e tsap let, Nanhte ngai pyaw nga myit ga, ngu nna shanhte hpe tsun wu ai. 20 Shing nga ngut jang, shi shanhte hpe shi a lata hte garep madun wu ai. Sape ni mung dai Madu hpe mu lu yang, kabu gara nga ma ai. 21 Bai Yesu gaw, Nanhte ngwi pyaw nga myit ga; nye Wa ngai hpe shangun dat nngai hte maren, ngai mung nanhte hpe shangun dat made ai, ngu nna shanhte hpe tsun mu ai. 22 Shing nga nhtawm, sape ni a ntsa e shi kawut nna, Chyoi pra ai Wenyi hkap la mu: 23 gade a yubak mara hpe raitimung, nanhte raw dat myit yang gaw, raw mat na ra ai; gade a yubak mara hpe raitimung, nanhte shagun da myit yang gaw, mara nga na ra ai, ngu nna shanhte hpe tsun wu ai. 24 Shingrai Yesu sa du ai shaloi, sape shi lahkawng hta lawm ai Didumu ngu ai Htawma gaw, shanhte hte rau n nga ang ai. 25 Dai rai nna kaga sape ni shi hpe, Anhte gaw Madu hpe mu lu saga ai, ngu nna tsun dan mu ai. Shaloi Htawma gaw, Shi a lata hta hpri hkang ngai n mu, dai hpri hkang hta nye a layung hte nan ngai n shawn yu, shi a garep hta nye a lata n manaw yu lu yang gaw, ngai n kam nngai, ngu nna shanhte hpe tsun wu ai. 26 Dai hpang matsat ya rai jang, sape ni gaw nhku e bai rawng nga ma ai rai nna, Htawma mung shanhte hte rau rai nga ai. Chyinghka la da nga yang, Yesu sa du nna shanhte a ka-ang e tsap let, Nanhte ngwi pyaw nga myit ga law, ngu wu ai. 27 Shaloi shi gaw Htawma hpe, Na a layung nang de ladawn nna, nye a lata hpe yu u; na a lata ladawn nna, nye a garep hpe mung manaw yu u; n kam hkum rai et, kamsham nga u, ngu wu ai. 28 Dai rai nna Htawma gaw, Nye a Madu, nye a Karai Kasang rai nga ndai, ngu nna shi hpe htan wu ai. 29 Yesu gaw, Nang gaw ngai e mu lu ai majaw sha kam n ni? n mu timung, kamsham ai ni gaw a lu ma ai, ngu nna shi hpe tsun wu ai. 30 Laika ndai hta n ka da ai lamik kumla kaga law law mung, Yesu gaw shi a sape ni a man e galaw dan nu ai: 31 raitimung, Yesu gaw, Karai Kasang a Kasha ngu ai, Hkristu rai nga ai hpe, nanhte kamsham lu nna, shi mying ningsang a marang e asak hkrung ai lu la myit ga, nga nna ndai hte wa ka tawn nga ai.

Yawhan 21

21:1 Dai hpang Yesu gaw Tiberi nawng makau e, sape ni hpe shi hkum bai madun dan mu ai; dai shaloi na madun dan ai lam gaw, ning rai nga ai: 2 Simun Petru hte Didumu ngu ai Htawma, Galile mung Hkana kahtawng na Nahtanela, Zebedi a kasha yan, kaga sape lahkawng, dai hte rau nga ma ai. 3 Shaloi Simun Petru gaw, Ngai nga sa hkan ni ga, ngu nna shanhte hpe tsun wu ai. Shanhte gaw, Anhte mung hkan sa na ga ai, nga ma ai. Shaloi shanhte pru sa nna li hta shang ma ai: dai shana shanhte gaw langai mi muk n lu ma ai. 4 Nhtoi htoi wa yang, Yesu gaw nawng hkin-gau ntsa e tsap nga ai: raitimung sape ni gaw, Yesu re ai, n chye mu ai. 5 Dai majaw Yesu gaw shanhte hpe, Ngai sha ni e, nanhte shahpa lama ma lu myit ni? ngu nna san wu ai; shanhte gaw, N lu ga ai, ngu nna shi hpe htan mu ai. 6 Shaloi shi gaw, Dai li a hkra maga de sumgawn jahkrat mu, shaloi lu na myit dai, ngu nna shanhte hpe tsun mu ai. Dai hte maren shanhte jahkrat nna, nga law law wa magawn la lu ai majaw, sumgawn pyi n gang lu mu ai. 7 Dai rai nna Yesu a tsawra ai sape gaw, Madu she rai nga ai, ngu nna Petru hpe tsun wu ai. Madu re ai nga ai hpe Simun Petru na jang, shi sing-gu krin rai nga ai majaw, ntsa palawng hta labu nna, nawng de gan shang wa ai. 8 Kaga sape ni chyawm gaw, hkin-gau hte manga shi lam sha gang nga ai majaw, nga hte hpring chyat re ai sumgawn karawt let, li kaji hte du wa ma ai. 9 Shanhte gaw hkarang ntsa de du wa ma yang, nra wan mang hta, nga kakang da ai hte, muk tawn da ai hpe, mu mu ai. 10 Shaloi Yesu gaw, Ya nanhte lu la ai nga hta na la wa marit, ngu wu ai. 11 Dai majaw Simun Petru lung nna, nga kaba latsa e manga shi masum ting rawng ai sumgawn hpe hkarang ntsa de karawt shalun wu ai: dai hte wa law timung, sumgawn gaw n je lu ai. 12 Shaloi Yesu gaw, wa marit, jahpawt shat wa sha maru, ngu nna shanhte hpe tsun mu ai. Shi Madu rai nga ai hpe sape ni chye ma ai majaw, shanhte hta na kadai mung, Nang kadai rai n ta? ngu nna n san wam mu ai. 13 Yesu gaw dai muk la nna sape ni hpe sa jaw mu ai; nga hpe mung dai hte maren sa jaw mu ai. 14 Yesu shi si ai ni kaw na bai hkrung rawt ai hpang, sape ni hpe shi a hkum madun dan ai hta na, ndai gaw masum lang na rai nga ai. 15 Ya shanhte jahpawt shat sha ngut jang, Yesu gaw Simun Petru hpe, Yawhan a kasha Simun e, ndai ni tsawra ai hta, nang ngai hpe grau tsawra n ni? ngu nna san wu ai. Shi gaw, Rai sa, Madu e, ngai nang hpe tsawra nga nngai gaw, nang chye nga ndai, ngu nna htan wu ai. Shaloi Yesu gaw, Nye a sagu kasha ni hpe bau nga u, ngu nna shi hpe tsun wu ai. 16 Bai lahkawng lang, Yawhan a kasha Simun e, nang ngai hpe tsawra nga n ni? ngu nna shi hpe san wu ai. Shi gaw, Rai sa, Madu e, ngai nang hpe tsawra nga nngai gaw, nang chye nga ndai, ngu nna bai htan wu ai. Yesu gaw, Nye a sagu ni hpe rem nga u, ngu wu ai. 17 Bai masum lang, Yawhan a kasha Simun e, nang ngai hpe tsawra nga n ni? ngu nna san wu ai. Masum lang du hkra, Nang ngai hpe tsawra nga n ni? nga nna shi hpe san wu ai majaw Petru myit yawn nna, Madu e, nang gaw yawng mayawng hpe chye nga ndai; ngai nang hpe tsawra nga nngai gaw, nang chye nga ndai, ngu nna, htan wu ai. Yesu gaw, Nye a sagu ni hpe bau nga u. 18 Nang hpe ngai gaja wa teng teng tsun de ga, Nang shabrang nga ai hte yang, na a hkum hpe nang dai shingkyit kyit nna, sa mayu ai shara shagu de sa lu ndai: raitimung, nang dingla jang chyawm gaw, na a lata yan hpe nang lalam nna, masha kaga gaw nang hpe kyit ya nhtawm, nang n ra ai shara de woi sa wa na rin dai, ngu nna shi hpe tsun wu ai. 19 Shing nga tsun ai gaw, Petru gaw kaning re ai si lam hte Karai Kasang a hpung shingkang shapraw lu na hpe, tau nna tsun ai rai nga ai. Ga dai tsun ngut jang, Yesu gaw Petru hpe, Ngai kaw hkan nang rit, ngu wu ai. 20 Shaloi Petru kayin yu wu yang, Yesu tsawra ai sape ngu ai, shawng de shana shat sha nga ai shaloi, Yesu a sinda hta shamyet nna, Madu e, nang hpe ap kau na wa gaw kadai mahtang rai ta? nga nna san ai sape hkan nang nga ai hpe, mu wu ai. 21 Petru gaw dai wa hpe mu jang Yesu hpe, Madu e, rai taw, ndai wa gaw kaning rai na ra ta? ngu nna san wu ai. 22 Yesu gaw, Ngai du sa ai nhtoi du hkra, ngai shi hpe nga nga shangun mayu nngai, dai nang hte hpa seng a ta? nang gaw nye hpang hkan nang rit, ngu nna htan wu ai. 23 Ga dai majaw, dai sape gaw si na n rai, nga nna hpunau ni hta tsun shajang ma ai: raitimung, dai sape hpe n si na re ai, nga nna Yesu tsun ai n rai; Ngai du sa ai nhtoi du hkra, ngai shi hpe nga nga shangun mayu nngai, dai nang hte hpa seng a ta? nga nna tsun ai sha, rai nga ai. 24 Dai sape wa gaw ndai lam ni hpe sakse hkam nna, ndai lam ni ka da ai wa rai nga ai: shi a sakse tengman nga ai gaw, anhte chye ga ai. 25 Yesu galaw ai amu kaga law law wa naw nga ai; dai amu ni a lam shagu hpe hkan ka da yang, dai ka da ai laika ni gaw mungkan ga hta pyi a shang na re ai, ngu nna ngai myit nngai law.

Kasa 1

1:1 Yesu gaw, shi a lata la ai kasa ni hpe, chyoi pra ai Wenyi hte ga matsun hkangda ngut nna, ntsa de shalun la hkrum ai nhtoi du hkra, 2 galaw dan ai hte, sharin shaga wa ai yawng mayawng a lam, shawng na laika hta ngai hpajang da se ai, Htawhpilu e: 3 shi gaw nni nkri hkrum ai hpang, shi hkum chyahkrung hpe, kam ging ai sakse law law hte shanhte hpe madun dan nna, Karai Kasang a mungdan lam hkai dan let, nhtoi mali shi ya laman e, shanhte kaw shi hkum sa pru dan dan di mu ai. 4 Shingrai rau hpawng nga yang, shi shanhte hpe, Yerusalem kaw na n pru ai sha, nanhte ngai kaw na na la ai, Wa a ga ndat hpe a la nga mu, nga nna hkangda nga ai: 5 ga ndat dai gaw, Yawhan gaw hka hte baptisma jaw ai; nanhte chyawm gaw nhtoi gade n na yang, Chyoi pra ai Wenyi hta baptisma hkam la lu na marin dai, nga ai, rai nga ai. 6 Dai rai nna, naw hpawng nga ma yang shanhte gaw, Madu e, dai Mungdan Israela masha ni hpe, ndai aten e bai de ya na rai sa ni? ngu nna shi hpe san mu ai. 7 Shi gaw, Wa gaw shi a hpung dagu hte, hkang tawn ai aten hte ahkying ladaw hpe, nanhte chye shara n nga ai: 8 raitimung, Chyoi pra ai Wenyi nanhte a ntsa e du jang, nanhte n-gun atsam lu la na marin dai rai nna, nanhte gaw Yerusalem mare hte Yuda mung ting, Samari mung hte lamu ga htum hkra, nye a sakse ni tai na marin dai, ngu nna shanhte hpe tsun mu ai. 9 Ndai tsun nga yang, shanhte yu nga ninglen shi hpe ntsa de shalun la ai rai nna, sumwi gaw shanhte a man na shi hpe magap la mat wa ai. 10 Shi lung mat wa nna, shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng, shanhte a makau e tsap pru nna, 11 Galile masha ni e, hpa rai lamu de naw dawng yu nga myit ta? Nanhte a man na sumsing lamu de shalun la ai wa, dai Yesu gaw, nanhte mu nga yang sumsing lamu de wa ai zawn, dai hku bai du na ra ai, ngu nna tsun mu ai. 12 Shaloi shanhte gaw, Yerusalem mare hte laban nhtoi sa ram sha gang ai Tsanlun bum kaw nna, Yerusalem de bai wa ma ai. 13 Du wa ma yang shanhte nga nga re ai ntsa gawk de lung wa ma ai: dai ni gaw, Petru, Yawhan, Yaku, Andre, Hpilip hte Htawma, Barhtolume hte Mahte, Alhpe a kasha Yaku, Zelutu ngu ai Simun, Yaku a kasha Yuda hte rai ma ai. 14 Shanhe nlang hte gaw, numsha ni hte Yesu a kanu Mari hte mung, shi a kanau ni hte mung, myit langai sha hte akyu hpyi shaja let nga nga ma ai. 15 Dai nhtoi hte yang, masha latsa e hkun daram rai hpawng nga ai kahpu kanau ni a ka-ang e Petru rawt tsap nna, 16 Hpunau ni e, Yesu hpe rim la ai ni e woi shawng ai wa Yuda hpe lakap nna, moi Dawi a n-gup hta Choi pra ai Wenyi tsun da ai laika gaw dik wa lu na rai sai. 17 Kaning rai nme law, dai wa gaw anhte hta hti lawm nna, ndai sara aya hta shi hte seng ai kumhtaw lu la nu ai. 18 ( Dai wa gaw n ding n man ai hku na shabrai hte ga dachyawk langai mi lu la nna, nhtang chyaw di hkrat si ai hte kan ga nna, shi a pu nlang ayai mat sa lu ai. 19 Dai lam hpe Yerusalem na ni nlang chye wa masai; dai rai nna, ga dachyawk dai hpe shanhte a ga hku, Akela dama ngu nna shamying mu ai; dai gaw, Sai ga, ngu ai, rai nga ai. ) 20 Dai lam gaw Shakawn Kungdawn laika hta, Shi a htingra katsi katsang rai mat u ga, Dai hta kadai mung n nga mu ga, ngu nna mung; bai, Shi a aya hpe masha kaga lu la u ga, nga nna mung, rawng nga ai. 21 Dai re ai majaw, Yawhan baptisma nnan jaw ai kaw nna, anhte kaw na shalun la ai du hkra, Madu Yesu anhte hte, 22 rau hkawm rau sa ai nhtoi hte ting, anhte hte kanawn nga ai wa langai mi gaw, anhte hte rau, shi a bai rawt wa ai lam, sakse wa tai na ra ai, ngu wu ai. 23 Shaloi shanhte gaw Yustu mying hkawt mying ai, Barsaba ngu ai Yosep yan Mahtia hpe san da mu ai. 24 Shingrai shanhte akyu hpyi ma ai gaw, Yawng mayawng a myit masin chye chyang ai Madu e, Yuda gaw shi hte seng ai shara de wa mat na nga, 25 kau da ai shi a sara aya hte kasa ahkang hpe, kadai lu la na gaw, ndai yan hta gara mahtang hpe nang lata la ai madun ya mi, nga nna hpyi ma ai. 26 Shaloi shanhte hpaida hte lata nna, dai hpaida gaw Mahtia hta ang wa ai: dai kaw nna shi gaw dai kasa shi langai hta shang lawm wa ai.

Kasa 2

2:1 Ya Pentekoti shani du jang, shanhte nlang shara sha hta rau hpawng nga ma ai. 2 Shaloi lamu de nna nbung laru kaba wa ai zawn, akajawng sha kadu pru nna, shanhte rawng nga ai nta ting hpring chyat rai wa ai. 3 Bra karan ai wan shinglet zawn re ai mung, shanhte kaw danpru nna, langai hte langai a ntsa e jung nga ai. 4 Shanhte nlang hte mung, Chyoi pra ai Wenyi hpring shajang nna, Wenyi e shadut mu ai hte maren, ga amyu kaga ga hku shaga wa ma ai. 5 Dai shaloi e sumsing lamu a npu e nga ai masha amyu shagu hta na, tara hkungga ai Yuda masha, Yerusalem mare e nga nga ma ai. 6 Dai kadu ai nsen na ma yang, masha wunawng hpawng sa nna, langai hte langai tinang nang a buga ga hku chye na la ma ai majaw, shanhte mak mat ai rai nna, 7 mau mahka let, Yu mu, Ya shaga nga ai ndai ni yawng Galile masha hkrai n rai ma ni? 8 Dai rai yang gaw, anhte langai hte langai tinang nang a buga ga hku na la lu ai gaw, kaning re ai i? 9 Parhti, Medi, Elam mung na ni hte Mesopotamia mung e nga nga ai ni, Yuda hte Kapadokia mung, Pontu hte Asi, 10 Hprugi hte Pamhpuli, Egutu hte Kureni ginwang hkan e nga ai Lebu mung na ni, Roma nna wa nga ai ni, ngu ai, Yuda masha hte proselutu, 11 Kreti hte Arabi mung na ni, anhte gaw, Karai Kasang a mauhpa amu magam lam shanhte hkai dan ai ga hpe, tinang a buga ga hku na la lu nga ga hka, nga nna myit kahpra rai tsun ma ai. 12 Yawng mayawng hte mung mau mahka let, Ning nga ai gaw hpa wa i? nga nna shada da ung ang san hkat ma ai. 13 Raitimung nkau mi gaw, Shanhte tsabyi nnan hkru nga ma ai, nga nna tsun jahpoi ma ai. 14 Shaloi Petru gaw sape shi langai ni hte rau rawt nna, nsen shaja let dai masha ni hpe tsun wu ai gaw, Yuda mung na ni hte Yerusalem e nga nga ai ni nlang hte e, ndai lam nanhte chye na myit ga; nye a ga hpe mung madat la mu. 15 Nanhte zawn nawn ai hku n rai; ndai ni tsabyi n nang ma ai: kaning rai nme law, ya e shani ahkying masum sha naw rai nga ai: 16 ndai lam chyawm gaw, myihtoi Yoela tsun da ai lam rai nga ai. Shi tsun ai gaw, 17 Karai Kasang ning nga ai:Hpang jahtum na nhtoi ni hta, Nye a Wenyi, ashan yawng a ntsa e ngai ru jaw nna, Nanhte a shayi shadang sha ni myihtoi htoi na mara ai. Nanhte a brang ram ni shingran mu nna, Nanhte a dingla ni yupmang mu na mara ai. 18 Rai sa, dai nhtoi hte yang, nye a nchyang la ni hte, Nye a nchyang jan ni a ntsa e, Nye a Wenyi ngai ru jaw nna, shanhte myihtoi htoi na mara ai. 19 Ntsa de sumsing lamu e mauhpa amu, Lawu na ga ntsa e, lamik kumla ngu ai, Asai, awan, nhkut salu hte hpe, ngai madun na nngai. 20 Galu kaba re ai hte danhkung ai shani ngu ai, Dai madu a nhtoi, garai n du yang, Ajan hpe ningsin hte, Shata hpe asai hte, galai kau na ra ai. 21 Dai shaloi e, shi Madu a mying ningsang hpe gang shaga ai masha kadai mung, Hkyehkrang la ai kaw du na mara ai, nga ai. 22 Israela masha ni e, ga ndai madat la mu: Nanhte chye nga myit dai hte maren, Karai Kasang gaw Nazaret wa ngu ai Yesu a lata hte magam ningsam, mauhpa amu, lamik kumla re ai ni nanhte a man e madun dan let, Karai Kasang e nanhte kaw awlaw shadan ya ai hkrum wu ai: 23 ndai wa gaw, Karai Kasang shatawng ngut tawn sai hpaji hte, tau chye tau chyang ai lam hku ap kau hkrum wu yang, nanhte gaw, n tara ai masha a lata hte, shi hpe wudang hta jen sat kau myit dai: 24 raitimung, si hkrung si htan a nni, nkri hpe Karai Kasang raw kau ya nna, shi hpe jahkrung sharawt nu ai. Kaning rai nme law, dai nni nkri gaw shi hpe hkang shadang lu ai n rai. 25 Dai wa hpe lakap nna Dawi tsun ai gaw, Dai Madu hpe nye a myiman chyaw ngai tut tut mu lu nga nngai; Ngai n shamu n shamawt u ga nga, Shi nye a hkra maga e nga nga ai. 26 Dai re ai majaw nye a myit masin kabu nga ai hte, nye a shinglet awng nga li ai; Nye a hkumshan mung myit mada ai kaw rai na ra ai; 27 Kaning rai nme law, nang nye a myit masin hpe katsan ga e kau da ya na n rai; Na a chyoi pra ai wa hten byak hkrum na, nang hkraw na n rai. 28 Asak hkrung ai lam nang ngai hpe madun nit dai; Na a myiman hte nang ngai hpe kabu gara ai hte jahpring ya na rin dai, nga ai. 29 Hpunau ni e, anhte wa daju Dawi gaw, nsa hkyet mat ai mung, lup kau ai hkrum ai mung, shi a lup gaw dai ni du hkra anhte hte rau nga nga ai gaw, ngai nanhte hpe tsun wam nga nngai. 30 Dai wa gaw myihtoi rai nga ai rai nna, shi a amyu matu hta na langai wa mi, shi a tingnyang hta dung nga lu na, nga nna, shi hpe Karai Kasang dagam shaka da ai hpe chye wu ai majaw, 31 Hkristu a bai hkrung rawt wa na lam shi chye tau tawn ai rai nna, shi hpe katsan ga e n kau da na hte, shi a hkumshan hten byak n hkrum na lam, tsun da wu ai. 32 Dai Yesu hpe Karai Kasang jahkrung sharawt la wu ai; anhte yawng mung, dai lam a sakse ni rai nga ga ai. 33 Shingrai, Karai Kasang a hkra lata hte shagrau tawn nu ai rai nna, Chyoi pra ai Wenyi a lam, Kawa kaw na ga ndat lu la wu ai majaw, ya nanhte mu lu, na lu ai lam, shi ru jaw dat ru ai. 34 Kaning rai nme law, Dawi gaw sumsing lamu de lung wa sai n rai: shi nan she ning nga ai, Shi Madu nye a Madu hpe tsun wu ai gaw, 35 Na a gumlau ni hpe, na a lagaw nhpang e, Lagaw kabye lahkum, ngai shatai kau ai du hkra, Nye a hkra maga de naw dung nga u, nga ai. 36 Dai re ai majaw, nanhte wudang hta jen da sat kau ai, dai Yesu hpe, Karai Kasang gaw Madu hte Hkristu shatai nu ai gaw, Israela amyu ting gaja wa chye nga myit ga law, ngu nna tsun wu ai. 37 Dai na ma yang, shanhte myit hta hkra malu ai rai nna, shanhte gaw, Hpunau ni e, anhte kaning rai na rai ta? nga nna Petru hte kaga kasa ni hpe tsun ma ai. 38 Petru gaw, Myit malai lu nna, nanhte a yubak raw dat kau ya u ga, nanhte hkum shagu Yesu Hkristu a mying ningsang hta baptisma hkam la mu; shaloi chyoi pra ai Wenyi ngu ai kumhpa gaw, nanhte lu la na marin dai. 39 Kaning rai nme law, ga ndat dai gaw, shi Madu anhte a Karai Kasang shaga la na ni mahkra hte ngu ai, nanhte hte nanhte a nshu nsha ni hte mung, sumtsan ga e nga ai ni nlang hte mung, seng nga ai, ngu nna shanhte hpe tsun dan mu ai. 40 Ga kaga law law hte mung shi sakse hkam nna, Ndai myit magaw ai amyu hta na lawt pru myit ga law, ngu nna shanhte hpe shadum shahprang wu ai. 41 Ga dai hta la ai ni gaw baptisma hkam la shajang nna, dai shani e masha hkying masum dang jat bang wa ma ai. 42 Dai ni gaw kasa ni a sharin shaga ai lam, rau kanawn hpawng ai lam, muk ahkyep karan ai lam hte akyu hpyi ai lam hta, htep lahti hkan nga ma ai. 43 Masha nlang hte mung hkrit kang shajang ma ai: kasa ni a lata hta mung, mauhpa amu hte lamik kumla law law wa shapraw dan mu ai. 44 Kamsham ai ni nlang hte gaw, shara mi hta rau hpawng nna, arai yawng mayawng hpe jawm lang ma ai; 45 tinang a sut rai ni hpe mung, shanhte dut kau nna, kadai wa hpe mung n nga ai, ra ai shagu hpe karan jaw mu ai. 46 Shani shagu myit langai sha hte nawku Htingnu hta shanhte htep lahti machyu nga nna, tinang a nta e muk ahkyep karan nga yang, 47 Karai Kasang hpe shakawn kungdawn let, kabu gara ai hte myit tsup rai lusha shahpa sha ma ai; masha mahkra a man e mung myiman pa lu ma ai. Dai Madu mung, hkyehkrang la hkrum ai ni hpe, shani shagu shanhte hta jat wa shangun ya mu ai.

Kasa 3

3:1 Ya Petru yan Yawhan gaw, ahkying jahku na akyu hpyi ai ladaw hta, nawku Htingnu de lung wa ma ai. 2 Shaloi e, kanu a hkritung nna lagaw hten ai masha langai mi hpe hpai sa nna, Htingnu de shang wa ai ni kaw na hpyi sha u ga nga, Tsawm pra mying ai Htingnu chyinghka makau e shani shanang sa tawn da da di mu ai. 3 Petru yan Yawhan dai Htingnu de shang wa nga ma ai hpe, shi mu nna hkap hpyi nga ai. 4 Petru yan Yawhan chyawm gaw shi hpe jawm azi yu nna, An hpe mada yu mi, ngu wu ai. 5 Shan kaw lama ma lu la na myit mada let, shan hpe galaw yu nga ai. 6 Petru chyawm gaw, Aja, gumhpraw gaw ngai n lu nngai, raitimung, ngai lu ai nang hpe jaw de ga: Nazaret wa Yesu Hkristu a amying ningsang hte rawt hkawm wa u, nga nna tsun let, 7 shi a hkra lata jum nna dun sharawt wu ai: shaloi jang, shi a lagaw hkarutum ni n-gun rawng wa lu ai. 8 Alawan rawt tsap let shi hkawm sa wa yu nhtawm, hkawm sa let, gumlawt let, Karai Kasang hpe shakawn nna, shan hte rau Htingnu de shang wa ai. 9 Shi hkawm sa wa nga ai hte Karai Kasang hpe shakawn kungdawn nga ai gaw, masha yawng mu lu ma ai: 10 dai wa gaw nawku Htingnu a Tsawm pra chyinghka makau e dung nna, hpyi sha ai wa rai nga ai hpe shanhte matsing da mu ai rai nna, shi hta byin wa ai lam majaw, mau mahka nna myit yu kahpra nga ma ai. 11 Dai wa gaw Petru yan Yawhan kaw kanan nang nga yang, shawa masha ni gaw mau mahka let, Shawlumon ngu ai jarawp de, shanhte kaw gat ru bang wa ma ai. 12 Petru dai mu jang, shawa masha ni hpe, Israela masha ni e, ndai wa a lam hpe hpa rai mau myit ta? an lala a myit tsup ai hte ndai wa hpe hkawm sa lu shangun ai zawn rai nna, an hpe hpa rai azi yu nga myit ta? 13 Abraham, Isak hte Yaku a Karai Kasang ngu ai, anhte a ji wa ni a Karai Kasang gaw, shi a Shangun ma Yesu hpe hpung shingkang shapraw ya nu ai: nanhte chyawm gaw shi hpe ap kau myit dai rai nna, Pilat du wa, shi hpe dat kau na myit da sayang, nanhte mahtang shi a man e dai wa hpe ndang kau myit dai. 14 Dai chyoi pra ai hte dinghpring ai wa hpe nanhte ndang kau nna, masha sat ai wa hpe mahtang hpyi la nhtawm, 15 asak Madu hpe sat kau myit dai; Karai Kasang chyawm gaw, chyasi ni hta na shi hpe jahkrung sharawt la nu ai: anhte mung dai lam a sakse ni rai nga ga ai. 16 Shi a amying ningsang hpe kamsham ai a marang e, shi a amying nan, ndai nanhte mu chye ai wa hpe n-gun shaja nu ai; rai sa, shi kaw na makam masham gaw, ndai wa hpe, nanhte yawng a man e, hkum hkum shamai tawn nu ai. 17 Ya raitimung, hpunau ni e, nanhte hte nanhte a du gyi ni dai lam hpe n chye nna galaw kau ai rai nga ai gaw, ngai chye nga nngai. 18 Dai gaw, Karai Wa a Hkristu nni nkri hkrum na re ai, nga nna myihtoi ni yawng a n-gup hte tau tsun shangun ai Karai Kasang shi nan, ning re ai lam hte shadik nu ai. 19 Dai re ai majaw, dai Madu kaw na ngwi pyaw ai aten ladaw du ruga hte, 20 Yesu ngu ai, nanhte a matu san da ya ai Hkristu hpe, shi shangun dat ya ruga, nanhte a yubak raw mat na matu, myit malai lu nna kayin wa marit; 21 moi chyaloi nhkoi nna nga nga ai, shi a chyoi pra ai myihtoi ni a n-gup hta, Karai Kasang tsun da sai lam hte maren, nga yawng danghta hpe nnan bai gram ai prat du hkra, sumsing lamu gaw dai wa hpe hkap la da nga na, rai nga ai. 22 Mawshe nan tsun da ai mung, Dai Madu Karai Kasang gaw, ngai zawn re ai myihtoi, nanhte a nhpu nnau ni hta na, nanhte a matu paw pru shangun ya na ra ai: dai wa tsun matsun nanhte madat mara lu na rai myit dai. 23 Kadai wa dai myihtoi a ga hpe n madat yang, dai wa gaw tinang amyu hta na sumri dan kau ya ai hkrum lu na rai nga ai, nga ai. 24 Rai sa, Samuela kaw nna, shi a hpang e hkan paw pru nna htawn tsun tsun re ai myihtoi yawng hte gaw, nhtoi ndai hpe lakap nna mung tau tsun wa masai. 25 Nanhte mung dai myihtoi ni a kashu kasha ni rai nga myit dai hte, Karai Kasang Abraham hpe, Na amyu matu a marang e ga ntsa amyu mahkra gumring gumrat chyeju hkam la shajang na mara ai, nga nna nanhte a nji nwa ni hte tawn da ai ga shaka a kashu kasha ni mung, rai nga myit dai. 26 Nanhte hta hkum shagu hpe tinang a shut hpyit ai lam hta na kayin wa lu shangun na hte, nanhte hpe shaman ya n ga nga, Karai Kasang gaw shi a Shangun ma hpe paw pru shangun ai hta, nanhte hpang de shawng shangun dat ya sai, ngu nna tsun mu ai.

Kasa 4

4:1 Shingrai, shan gaw shawa masha ni hpe shaga nga yang, hkinjawng agyi ni, nawku Htingnu sin ai agyi wa hte Saduke ni katu pru nna 2 shawa masha ni hpe sharin shaga nga let, Yesu a marang e si mat sai ni bai hkrung rawt wa na lam tsun ma ai majaw, shanhte grai myit ru da mu ai rai nna, 3 kasa yan hpe rim la nhtawm, ya shana rai wa sai majaw, jahpawt du hkra htawng hta bang da mu ai. 4 Raitimung, mungga na la ai ni law law wa, kamsham ma ai rai nna, kamsham ai lasha yawng hkying manga daram rai nga ma ai. 5 Hpang jahpawt e, shanhte a du agyi ni, salang ni hte laika ka ai sara ni, Yerusalem mare hta hpawng nga ma ai: 6 hkinjawng agyi Anna hte nawng, Kayapa, Yawhan, Alesandru hte hte, hkinjawng agyi a amyu ni kadai mung, dai yang lawm nga ma ai. 7 Shaloi kasa yan hpe shanhte a ka-ang e shadun da nna, Taw, nan gaw, hpa atsam, gade a amying hte ndai amu galaw myit ta? ngu nna san mu ai. 8 Shaloi Petru, Chyoi pra ai Wenyi hpring nga ai rai nna, shanhte hpe tsun mu ai gaw, Mung masha ni a du agyi salang ni e, 9 ndai chyahten labye wa hpe madun ai chyeju lam a majaw, dai wa hpe kaning di shamai ai nga nna, dai ni an deng ai hkrum na rai yang gaw, 10 nanhte nlang hte Israela amyu yawng hpe chye la shangun made ga: nanhte wudang hta jen da sat kau nna, Karai Kasang chyasi ni kaw na jahkrung sharawt la ai, Nazaret wa Yesu Hkristu a amying ningsang hta, ndai wa nanhte a man e amai atsai tsap nga ai. 11 Dai Yesu gaw, nanhte nta gaw ai ni lata kau ai nlung rai nga timung, ningjut jahtum na nlung bai rai wa sai. 12 Shi hta shaje hkye krang la ai lam n nga sai; anhte hkyehkrang la kaw du lu na matu, sumsing lamu a npu, shinggyim masha ni hta jaw ya ai amying ningsang shaje, kanang mung n nga sai, ngu nna htan wu ai. 13 Shanhte chyawm gaw, Petru yan Yawhan a nden ja ai myit mu nna, shan gaw laika n chye ai, yu maya masha rai nga ma ai hpe chye ma ai majaw, mau nga ma ai; raitimung, shawng de Yesu hte rau shan nga yu ai gaw, shanhte dum ma ai: 14 dai hta kaga, mai tsai ai wa mung, shan hte rau tsap nga ai hpe, shanhte mu ma ai rai nna, ndang shara hpa mi n mu mu ai. 15 Raitimung, shan hpe dai salang hpawng na shapraw tawn nhtawm, shanhte shada bawng ma ai gaw, 16 Ndai yan hpe kaning di na rai nga ga ta? shan a lata hte danhkung ai lamik kumla langai mi byin wa sai gaw, Yerusalem e nga ai ni nlang a man e dan dan pra pra rai wa sai rai nna, anhte mung ndang shara n mu sagaw ai. 17 Raitimung, dai lam, mung masha ni hta grau nna n gara wa u ga, ya kaw nna amying dai gang nna kadai hpe mung, n tsun dan na hku, shan hpe daru jet kau gaw, nga ma ai. 18 Shingrai shan hpe shaga nhtawm, Yesu a amying gang nna hpa mung n tsun, n sharin lu na hku, hkangda ma ai. 19 Petru yan Yawhan chyawm gaw, Karai Kasang a ga madat na hta, nanhte a ga mahtang madat yang, Karai Kasang a man e mai n mai gaw, nanhte she dawdan yu mu. 20 An chyawm gaw, mu la, na la sai lam ni hpe n tsun ai, n nga lu ga ai, ngu nna shanhte hpe bai htan mu ai. 21 Shaloi shanhte gaw, mung masha ni hpe tau yu let, shan hpe ari jaw na lam n mu mu ai majaw, shan hpe bai daru nna dat dat mu ai; kaning rai nme law, dai byin ai amu majaw, masha nlang Karai Kasang hpe shagrau sha-a ma ai. 22 Dai hta n-ga, dai lamik kumla byin ai shamai hkrum ai wa gaw, asak mali shi ning jan sai, rai nga ai. 23 Shingrai raw dat hkrum jang, shan gaw tinang a hpung manang ni hpang de wa nna, hkinjawng agyi ni hte salang ni, shan hpe ahkrim ai ga mahkra tsun dan mu ai. 24 Dai na jang shanhte gaw myit langai sha hte Karai Kasang hpang de tinang a nsen shaja nna, Sumsing lamu hte ginding aga, nammukdara hte dai hte hta nga manga hpan tawn da ai Madu e; 25 Nang na a mayam, anhte a wa Dawi a n-gup hta, chyoi pra ai Wenyi hte tsun da ndai gaw; Maigan amyu ni hpa majaw n-yun bu nna, Masha amyu ni hpa majaw lila maw nga ma hka? 26 Dai Madu hte shi a Hkristu hpe tai na, Ga ntsa hkawhkam ni rawt nna, Du salang ni rau hpawng nga ma ai, nga ai. 27 Gaja wa teng teng, na a lata, na a myit hpaji hte tau hpang da ai hku, byin wa lu hkra, nang namman chya ai, na a chyoi pra ai wa Shangun ma Yesu hpe tai na nga, 28 ndai mare hta e Herod yan Pontu Pilat, maigan amyu ni hte Israela amyu masha ni du hkra jawm hpawng nga ma ai. 29 Ya yang Madu e, shanhte a daru ahkrim ai ga hpe dum ya mi; machyi makaw mai tsai hkra, na a lata ladawn nna, na a chyoi pra ai Shangun ma Yesu a amying hte lamik kumla, mauhpa amu byin nga ai hta, 30 na a mayam ni, na a mungga hpe nden ja ai myit hte tsun dan nga lu hkra, karum ya mi law, nga nna hpyi ma ai. 31 Shingrai akyu hpyi ngut jang, shanhte hpawng nga ai shara gaw gari ashun wa nna, nlang hte hta chyoi pra ai Wenyi hpring wa ai hte, Karai Kasang a mungga hpe nden ja ai myit hte tsun dan wa ma ai. 32 Dai kamsham ai shawa hpung ting gaw myit mang langai sha rai nga ma ai: kadai mung tinang lu ai arai hpe nye a, n nga ai sha, yawng mayawng hpe jawm lang ma ai. 33 Kasa ni mung, dai Madu Yesu a bai hkrung rawt ai lam hpe atsam kaba hte sakse hkam ma ai rai nna, shanhte mahkra ntsa e chyeju kaba nga malu ai. 34 Shanhte hta kadawn ai masha langai mi muk n nga ma ai; kaning rai nme law, ga dachyawk lu ai ni, nta lu ai ni kadai mung, dai dut nna, lu la ai gumhpraw hpe, 35 kasa ni a lagaw nhpang e sa tawn da ma ai; dai rai nna, kadawn ai wa kadai hpe mung rap shara nna, karan jaw karan ya mu ai. 36 Dai shaloi, Barnaba ngu nna, kasa ni e mying hkawt shamying ai, Kupru mung na Lewi masha Yosep mung, shi lu ai ga dachyawk dut nna, lu la ai gumhpraw hpe kasa ni a lagaw nhpang e sa tawn da wu ai: 37 Barnaba ngu ai ga lachyum gaw shalan shabran ai a kasha ngu ai, rai nga ai.

Kasa 5

5:1 Raitimung, Anani mying ai la wa hte madu jan Sahpira gaw, shan lu ai ga dachyawk dut nna, 2 shan la myit hkrum ai hte, dai jahpu kau mi ip da nhtawm, kau mi sha kasa ni a lagaw nhpang e sa tawn da wu ai. 3 Dai rai nna Petru gaw, Anani e, chyoi pra ai Wenyi hpe masu kau na hte, ga jahpu hta na kau mi ip da na gaw, hpa majaw Satan na a myit jahpring ya lu a ta? 4 ga dai nga nga yang, na a arai nga ai n rai ni? dut kau ai hpang na mung, na a arai naw nga ai n rai ni? nang hpa rai dai hku maw n ta? masha hpe masu ai n rai, Karai Kasang hpe masu kau nu ai, ngu wu ai. 5 Dai ga na jang Anani gaw kadawng si mat ai: dai na ai ni yawng mayawng mung nachying hkrit kahpra mat ma ai. 6 Shaloi shabrang ni rawt nna, shi a mang hpe ahkyen kayawp nhtawm, sa hpai lup kau ma ai. 7 Dai hpang, ahkying masum daram na jang, madu jan mung, shingrai byin ai lam hpe n chye nna, shang wa ai. 8 Bai Petru gaw, Ga dachyawk dut ai, ndai hte sha re a ni? ngai e tsun dan e, ngu wu yang, shi mung, Rai sa, ndai hte hte sha dut ai re ai, ngu wu ai. 9 Shaloi Petru gaw, Dai Madu a Wenyi hpe chyam yu na, nan hpa majaw ndai hku myit hkrum myit ta? Yu u, na a madu wa hpe lup kau ai ni a lagaw, dai chyinghka e du ra ai; nang hpe mung hpai kau na mara ai, ngu wu ai. 10 Shaloi jang shi mung kasa wa a lagaw nhpang e kadawng si mat ai: shabrang ni mung shang wa yu yang, dai numsha si taw nga ai hpe mu nna hpai sa wa nhtawm, madu wa makau e lup kau mu ai. 11 Dai rai nna, Hpung ting hte, dai lam na mana ni yawng, naching hkrit kahpra mat wa ma ai. 12 Ya kasa ni a lata hta lamik kumla hte mauhpa amu law law wa, mung masha ni a man e byin dan nga ai; dai ni nlang myit langai sha hte, Shawlumon mying ai jarawp hta nga nga ma ai. 13 Masha gale kadai mung shanhte hte n kanawn wam ma ai: mung masha ni chyawm gaw, shanhte hpe sha-a ma ai rai nna 14 kamsham ai numsha lasha hpung kaba, dai Madu kaw jat bang wa ma ai: 15 dai rai nna, Petru lai sa wa yang, langai ngai a ntsa e shi a shingnip sha pyi hkra u ga, nga nna machyi makaw hkrum ai ni hpe, mare lam makau de hpai shapraw nhtawm yupku ni hte panep ni hta, tawn da shajang ma ai. 16 Dai hta kaga, Yerusalem grupyin ginwang hkan na mare ni kaw nna mung, masha law law wa machyi ai ni hte nat shang zingri hkrum ai ni hpe woi nna, du sa shajang ma ai; dai ni mung nlang hte shamai shatsai ai hkrum ma ai. 17 Raitimung, hkinjawng agyi wa hte, shi a manang ni, Saduke ngu ai hpung masha nlang hte gaw, manawn ai myit hkrai chyat rai nga malu ai rai nna, rawt nhtawm 18 kasa ni hpe rim la nna, mare na htawng hta rawng da mu ai. 19 Raitimung, dai shana e Madu a lamu kasa gaw, htawng chyinghka ni hpaw kau ya nna, shanhte hpe shapraw dat let, 20 Nanhte pru wa mu, nawku Htingnu e wa tsap nna, ndai asak hkrung ai lam hte seng ai ga yawng mayawng, shawa masha ni hpe tsun dan mu, ngu dat wu ai. 21 Ga dai na jang, jahpawt manap hpawa e dai Htingnu de shanhte shang wa nna sharin shaga nga ma ai. Hkinjawng agyi wa hte shi a manang ni mung sa du nna, tara agyi ni hte Israela kashu kasha ni a salang nlang hte hpe shaga jahpawng tawn nhtawm, kasa ni hpe shapraw la na htawng de masha shangun dat mu ai. 22 Ali ama ni chyawm gaw, htawng e kasa ni hpe n mu jang, bai wa nna, 23 Htawng mung chyip chyip la nga ai, sin langa ni mung chyinghka shinggan e sin nga ma la ai; dai wa mi hpaw yu yang me, kata e kadai mung n nga nga la ai, ngu nna wa tsun dan mu ai. 24 Naw ku Htingnu agyi wa hte hkingjawng agyi ni dai ga na jang, ndai lam hpa byin ai rai wa sai kun, nga nna grai myit ru ma ai. 25 Shaloi langai wa mi shang sa nna, Yu mu, nanhte htawng e rawng da ai ni gaw, nawku Htingnu e tsap nna masha ni hpe sharin shaga nga ma ai, ngu nna shanhte hpe tsun dan mu ai. 26 Dai rai nna hpyenbu wa gaw ali ama ni hte sa nna, kasa ni hpe sa woi la mu ai; raitimung, aja awa n di wam mu ai; kaning rai nme law, shawa masha ni nlung hte kabai wa na hpe, hkrit da mu ai. 27 Shing di shanhte hpe woi la nna, salang hpawng a man e tawn da ngut jang, hkinjawng agyi wa gaw, 28 Nanhte hpe, amying dai hte hpa mung hkum tsun, ngu nna anhte aja awa hkangda saga ai; ya yu mu, Yerusalem mare ting nanhte a sharin shaga lam pri di manit dai rai nna, dai wa a asai anhte a ntsa e mara ya na maw nga myit dai, ngu nna shanhte hpe tsun wu ai. 29 Shaloi Petru hte kasa ni htan mu ai gaw, Masha ga madat na hta, Karai Kasang a ga mahtang grau madat na ga ai. 30 Anhte a ji wa ni a Karai Kasang gaw, nanhte wudang hta jen da sat kau ai Yesu hpe, jahkrung sharawt dat nu ai. 31 Israela amyu hpe myit malai lam hte mara raw ya ai lam hpaw ya na matu, Daru Magam hte Hkyehkrang la ai Madu shatai na nga, Karai Kasang gaw dai wa hpe, shi a hkra lata hte shagrau tawn nu ai. 32 Anhte mung ndai lam ni a sakse ni rai nga ga ai; shi a mungga madat mara ai ni hpe Karai Kasang jaw ya ai chyoi pra ai Wenyi mung, dai hte a sakse rai nga ai, ngu mu ai. 33 Dai ga na jang, shanhte a myit masin hta mala la hkra malu ai majaw, kasa ni hpe sat kau na pyi myit lu ma ai. 34 Raitimung, mung masha ni mahkra man e arawng lu ai tara sara Gamale ngu ai Hparishe langai mi, dai salang bawng hta rawt nna, kasa ni hpe hkring mi shapraw tawn shangun nhtawm, 35 tsun wu ai gaw, Israela masha ni e, ndai ni hpe kaning di na gaw atsawm sha naw myit yu mu. 36 Kaning rai nme law, moi shawng de Htuda ngu ai wa, shi hkum hpe reng ai wa rai nngai, nga nna paw pru yang, marai mali tsa daram shi kaw hkan nang yu sai; shi hkum nan sat kau ai hkrum nna, shi a ga madat ai ni nlang kamawng mat ma masai. 37 Dai hpang, jahpan hti la ai aten hte yang, Galile masha Yuda paw pru nna, mung masha ni hpe shi hpang de lau la mu ai; shi mung hten byak hkrum nna, shi a ga madat ai ni nlang, bra mat wa masai. 38 Ya mung, ndai ni hpe hpa mi hkum gawn myit, ra mi rai mu ga; hpaji ndai hte, lam ndai raitimung, masha kaw na rai yang gaw, byak mat na ra ai: 39 Karai kasang kaw na rai yang chyawm gaw, nanhte hpya lu na n rai; Karai Kasang hpe daw ai tai na mahtang tsang ra ai, ngai tsun da made ga, ngu mu ai. 40 Ga dai hpe shanhte myit htuk dum ma ai rai nna, kasa ni hpe shaga la nhtawm, kayat nna, Yesu a mying hte n sharin n shaga lu na lam hkangda ngut jang, dat dat ma ai. 41 Shanhte chyawm gaw, Amying ningsang de a majaw she, kaya hkrum na gaw, ging nga ga ai, nga nna myit la ai majaw, kabu gara ai myit hte dai salang hpawng na pru wa ma ai. 42 Dai raitimung, shanhte shani shagu nawku Htingnu hta mung, nta hkan e mung, Yesu gaw Hkristu rai nga ai, nga nna a hkaw a tsun nga ma ai.

Kasa 6

6:1 Ya, sape ni law htam wa ai nhtoi hte yang, Heleni ngu ai ni hta na gaida jan ni hpe, shani shagu na galaw lu galaw sha ai amu hta shadawng tawn ai nhkan e, dai Heleni ni gaw Hebre masha ni hpe, aput angun nga ma ai. 2 Shaloi dai kasa shi lahkawng hte gaw sape hpung ting hpe shaga la nna, Anhte wa Karai Kasang a mungga hpe kau da rap rai nna, sha ku amu hpajang nga na gaw, n htuk ga ai. 3 Dai majaw, hpunau ni e, nanhte hta na sari rawng nna, Chyoi pra ai Wenyi hte hpaji byeng-ya hta myit kup ai masha marai sanit lata tawn mu; dai ni hpe ndai amu madu shangun na matu, anhte san da nme ga. 4 Anhte chyawm gaw, akyu hpyi ai amu hte mungga hkai dan ai amu hta, htep lahti shatsup nga na ga ai, ngu nna tsun mu ai. 5 Ga dai hpe hpung ting na ra ma ai rai nna, makam masham tsup ai hte, Chyoi pra ai Wenyi hpring ai Stehpan ngu ai wa hte, Hpilip, Prokoru, Nekanora, Timun, Parmena hte Antioki mare na Proselutu hpung na Nikola hte hpe lata la nna, 6 kasa ni a man e shadun tawn da mu ai; shanhte akyu hpyi ngut jang, shanhte hpe lata mara jaw da mu ai. 7 Karai kasang a mungga mung, galu kaba wa ai rai nna, Yerusalem mare hta sape ni nachying law htam wa ai hte, hkinjawng ni ga daga mung, dai makam masham lam madat mara nga ma ai. 8 Ya Stehpan gaw chyeju hte n-gun atsam hpring nga ai rai nna, mung masha ni a man e mauhpa amu hte lamik kumla kaba madun dan mu ai. 9 Shaloi, Shanglawt ngu ai ni a tara jawng hte seng ai ni hte, Kureni, Alesandru, Kiliki hte Asi ngu ai tara jawng hte seng ai ni nkau mi rawt nna, Stehpan hte ndang kalang hkat ma ai. 10 Raitimung, shi tsun wa ai hpaji ga hte Wenyi hpe shanhte n dang lu ma ai. 11 Shaloi shanhte gaw, Ndai wa Mawshe hte Karai Kasang hpe shatan ai ga tsun nga ai gaw, anhte na saga ai, nga nna tsun na masu ai sakse tam tawn ma ai. 12 Shingrai shanhte gaw mung masha ni hte, agyi salang ni, laika ka ai sara ni hpe masin sharawt ya nna, shi hpe sa rim la nhtawm, salang hpawng a man e woi tawn mu ai: 13 sakse masu ni hpe mung shashawn dat mu ai rai nna, shanhte gaw, Dai wa, ndai chyoi pra ai shara hte jep ai tara hpe jahpoi ai ga n sim n sa a tsun nga ai: 14 Nazaret na Yesu ngu ai wa gaw, shara ndai hpe hpya kau nna, anhte hpe Mawshe jaw da ai tara a htunghking hpe galai kau na rai nga ai, nga nna shi nan tsun ai ga anhte na saga ai, ngu nna tsun mu ai. 15 Shaloi dai hpawng shingra e dung nga ai ni nlang, shi hpe jawm azi yu mu yang, shi a myiman lamu kasa myiman zawn rai nga lu ai gaw, shanhte mu ma ai.

Kasa 7

7:1 Shaloi hkinjawng agyi wa, Dai hku rai nga n ni? ngu nna san wu yang, 2 Stehpan tsun mu ai gaw, Hpunau ni hte wa ni e, madat mara yu mu: anhte a aji daju Abraham, Haran e garai n wa shingbyi, Mesopotami mung e naw rai nga yang, hpung shingkang rawng ai Karai Kasang gaw shi kaw danpru nna, 3 Na a mung, na amyu kaw na pru nhtawm, ngai madun na ra de ai mung de sa wa su, ngu nna, shi hpe tsun dan wu ai. 4 Shaloi Hkaldea mung na shi pru nna, Haran mung e wa shingbyi nga ai; dai hpang, shi a kawa si mat jang, dai kaw nna ya nanhte nga nga ai ndai mung de, Karai Kasang shi hpe woi htawt wa wu ai: 5 dai mung e, sali wunli ngu na, lagaw hkang daram pyi shi e n jaw wu ai; raitimung, shi hta kashu kasha myiman garai n mu kaw nna, lamu ga ndai, shi hpe mung, htawmhpang na shi a kashu kasha ni hpe mung, jaw na nga ga ndat tawn da wu ai. 6 Dai hta kaga, Karai Kasang ndai lam hpe tsun ai gaw, shi a amyu matu ni masha tsasam a mung hta sa shingbyi nga nna, dai mung masha ni e yam sha na hte, mali tsa ning zingri zingrat hkrum na mara ai: 7 shanhte e yam sha ai amyu hpe mung, ngai jeyang na mawe ai; shaloi shanhte pru wa nna, ndai yang e ngai hpe jaw jau lu na mara ai, nga nna Karai Kasang tsun sai. 8 Matu gadoi jaw na lam hte seng ai ga shaka hpe mung shi e jaw dat wu ai; shaloi Isak hpe shaprat wu ai rai nna, matsat ya nhtoi hta matu gadoi ai lam jaw wu ai: Isak gaw Yaku hpe shaprat nna, Yaku gaw aji daju ni shi lahkawng hpe shaprat wu ai. 9 Dai aji daju ni gaw Yosep hpe manawn nna, Egutu mung de dut kau dat mu ai. 10 Raitimung, Karai Kasang shi hte rau nga nga ai rai nna, tsinyam tsindam yawng na shi hpe shaw la ai hte, Egutu hkawhkam Hpara-u a man e chyeju hte hpaji byeng-ya jaw wu ai majaw, dai hkawhkam gaw Egutu mung ting hte hpawn, shi a htingnu madu shangun wu ai. 11 Dai hte yang Egutu mung hte Hkanan mung ting hta hku wa kaba wa nna, kyindut kaba du ra ai; anhte a aji daju ni mung lusha htum mat malu ai. 12 Ya Egutu mung e mam nga nga ai lam Yaku na wu yang, shawng na lang hta, anhte a aji daju ni hpe shangun dat wu ai. 13 Bai hpang na lang hta, Yosep gaw shi a kahpu kanau ni hpe shi a lam tsun hpaw dan wu ai rai nna, Hpara-u mung Yosep a baw sang lam chye ya wu ai. 14 Dai shaloi Yosep gaw kawa Yaku hte hpawn, nta masha yawng ngu ai, marai sanit shi manga hte hpe, shi hpang de woi la wu ai. 15 Yaku mung Egutu mung de du yu wa nna, shi hkum hte anhte a aji daju ni yawng si mat wa masai; 16 shanhte hpe Shehkem de la wa nna, Shehkem e nga ai Hamora a kashu kasha ni kaw na, Abraham gumhpraw manu hte mari da ai lup hta wa lup ma ai. Ya Karai Kasang Abraham hpe jaw da ai ga ndat hte seng ai aten du wa magang yang, 18 Egutu mung ntsa e Yosep hpe n chye ai hkawhkam paw pru ai prat du hkra, anhte a amyu masha ni Egutu mung e kaba wa nna law htam wa ma ai. 19 Dai hkawhkam wa gaw, anhte a baw sang ni hpe hpaji hte manai nna, ma chyangai ni hpe n jahkrung da lu hkra kabai kau na lam hte, ji wa ni hpe zingri zingrat mu ai. 20 Dai hte yang Mawshe shangai ai rai nna, shi gaw Karai Kasang a man e ahpraw tsawm nga ai; shata masum kawa nta e bau maka nna, 21 kabai kau ai hkrum jang, Hpara-u a shayi sha shi e shaw la nhtawm, shi a kasha shatai nna shapan da wu ai. 22 Mawshe mung Egutu hpaji yawng mayawng sharin la nna, mungga marai hte lata marai grai rawng ai wa rai nga ai. 23 Ya shi asak mali shi ning du magang yang, shi a kahpu kanau Israela kashu kasha ni hpang de kawan katsan yu na, myit pru nna sa wa ai. 24 Shaloi, zingri hkrum nga la ai wa langai mi hpe mu jang, dai wa hpe maga nna, zingri ai wa, Egutu masha hpe, matai htang let sat kau wu ai: 25 shi a lata hte kahpu kanau ni hpe, Karai Kasang hkyehkrang la ai lam hpaw ya nga ai gaw, shanhte chye na ma dawng, nga nna myit wu ting mung, shanhte chyawm gaw n chye ma ai. 26 Hpang shani e shada gasat nga ai gaw sa ang hkrup nna, shan hpe je mayu ai majaw, Hkau yan e, hpunau shada she rai yang me, hpa rai shada zingri hkat nga myit ta? ngu nna nem wu yang; 27 htingbu wa hpe zingri ai wa mahtang, Anhte a ntsa e du hte tara agyi tai na, nang hpe kadai san da a ta? 28 Mani e Egutu masha hpe sat kau ai zawn, ngai hpe mung sat kau mayu nga n ni? nga nna htan let shi hpe nawng kau wu ai. 29 Ga de a majaw Mawshe hprawng nna, Midian mung e sa manam nga let, dai yang e shadang sha lahkawng shaprat wu ai. 30 Dai kaw mali shi ning lai jang, Sina bum na nam mali e wan grung nga ai singwum hta, lamu kasa shi kaw danpru ai. 31 Mawshe gaw dai mu jang, dai shingran majaw shi mau nna, dai hpe yu yu na nga sit sa wa yang, dai Madu a nsen ngoi pru ai gaw, 32 Ngai gaw, na nji nwa ni a Karai Kasang, Abraham, Isak, Yuku a Karai Kasang rai nga nngai, nga ai. Mawshe chyawm gaw hkrit gari nna, n mada wam wu ai. 33 Bai, dai Madu gaw, Na a kyepdin raw kau u; nang tsap ai shara chyoi pra ai ga rai nga ai. 34 Egutu mung na nye amyu a ru tsang ai hpe ngai gaja wa mu se ai; shanhte a madai ai nsen ngai na ni ai; shanhte hpe hkye la na ngai yu wa ring ngai; ya sa rit, ngai nang hpe Egutu mung de shangun dat de ga, nga nna shi hpe tsun wu ai. 35 Dai rai nna, Nang hpe du hte tara agyi tai na, kadai san da a ta? nga nna shanhte ndang kau ai, dai Mawshe hpe, Karai Kasang gaw singwum e danpru ai lamu kasa a lata hte, du hte hkyehkrang la ai wa shatai nna shangun dat nu ai. 36 Dai wa nan, Egutu mung e mung, Nawng hkyeng hta mung, nam mali hkan e mung, mali shi ning tup mauhpa hte lamik kumla amu madun let, shi a amyu masha ni hpe woi wa mu ai. 37 Dai Mawshe nan, Nan hpu nan nau ni hta na, nanhte a matu ngai zawn re ai myihtoi langai mi Karai Kasang paw pru shangun ya na ra ai, nga nna Israela kashu kasha ni hpe tsun da ai wa mung, rai nga ai. 38 Nam mali e rai nga yang na shawa hpung hta, Sina bum e shi hte ga tsun ai lamu kasa hte, anhte a ji wa ni rau rai nga ai wa gaw, shi nan rai nga ai; anhte hpe ap ya na asak hkrung ai mungga hkap la ai wa mung, shi rai nga ai: 39 anhte a ji wa ni chyawm gaw shi a ga n madat mayu nna, shi hpe ndang kau let, Egutu mung hpe bai marit ai hte, 40 Arun hpe, Anhte a shawng e sa wa na Hpara galaw ya mi; Egutu mung na anhte hpe shaw woi wa ai, ndai Mawshe hta hpa byin sai gaw anhte n chye saga ai, nga nna tsun ma ai. 41 Dai nhtoi hte hta shanhte dumsu kasha sumla galaw nna, dai sumla hpe hkungga jaw let, tinang a lata hte galaw ai amu hta kabu gara nga ma ai. 42 Dai rai nna, myihtoi laika hta tsun ai gaw, Israela amyu e; mali shi ning tup nam mali e lang ai hkungga hte kumhpa gaw, Ngai hpe jaw jau ai rai ni? 43 Nanhte nawku na matu galaw la ai sumla ngu ai, Molak sumla a sum hte, Rehpan Hpara a shagan hpe she, hpai hkawm myit dai: Dai majaw Babelon tawt hkra ngai nanhte hpe woi mat wa na made ai, nga nna rawng ai; dai hte maren Karai kasang gaw shanhte kaw na myiman kayin kau nna, sumsing lamu na zaw nawng zaw wa hpe nawku shangun na ap kau wu ai. 44 Nang mu ai kasi hte maren hkan galaw u, nga nna Mawshe hpe hkang dat ai hku galaw ai sakse sum hpe, dai nam mali e anhte a ji wa ni lu la ma ai rai nna; 45 Karai Kasang gaw ji wa ni a man na shachyut kau ya ai masha amyu ni a ninghtawn hta shanhte shang sha wa ai shaloi, dai prat na ji wa ni Yawshu hte rau dai hpe la shawn wa ma ai rai nna, Dawi a aprat du hkra rai nga ai: 46 Dawi chyawm gaw Karai Kasang a man e myiman pa ai rai nna, Yaku a Karai Kasang a matu nga shara tam na ahkang hpyi wu timung, 47 Shawlumon e she shi a matu nta gap wu ai. 48 Raitimung Tsaw Htum ai wa gaw masha a lata hte sha gap ai nta hta rawng ai n rai; dai lam myihtoi wa htawn tsun ai gaw, 49 Sumsing lamu gaw nye a tingnyang, Ginding aga gaw nye a lagaw kabye lahkum rai nga ai: Kaning re ai nta nye a matu gap na myit ta? Ngai ban sa na shara kaning re ai shara rai na a ta? 50 Dai yawng hpe nye a lata hte hkrai galaw tawn ai n rai ni? Nga nna dai Madu tsun ai, nga ai. 51 Du ja nna, masin hte ana hpe matu n gadoi ai ni e, nanhte galoi mung chyoi pra ai Wenyi hpe hkap daw myit dai; nanhte a nji nwa ni galaw ai zawn, nanhte mung a galaw nga myit dai. 52 Nanhte a nji nwa ni n zingri yu ai myihtoi, kadai wa nga a ta? Dai Dingman ai wa paw pru na lam htawn tsun ai ni hpe, shanhte sat kau ma ai; ya nanhte mung dai wa hpe ap kau ai ni, sat kau ai ni, rai nga myit dai; 53 lamu kasa a lata hte hpajang ai tara nanhte lu la myit timung, dai hpe hkan shatsup myit dai n rai, ngu nna tsun mu ai. 54 Dai lam na lu jang shanhte a masin mala la achyaw malu ai majaw, Stehpan hpe wa udik let yu da mu ai. 55 Shi chyawm gaw chyoi pra ai Wenyi hpring nna, lamu de azi yu wu yang, Karai Kasang a hpung shingkang hte Karai Kasang a hkra maga de Yesu tsap nga ai hpe, mu wu ai rai nna, 56 Yu u, sumsing lamu hpaw malang nga ai hte, Karai Kasang a hkra maga de Masha Kasha tsap nga ai gaw, ngai mu se ai, nga ai. 57 Shaloi shanhte gaw aja awa jahtau let, tinang a na pat kau nhtawm, lang lata rau shi hpang de htim nna, 58 mare shinggan de shapraw nhtawm, nlung hte jawm kabai mu ai: sakse ni mung, Shawlu mying ai shabrang wa a lagaw nhpang e, tinang a hpun palawng raw tawn ma ai. 59 Shingrai kabai nga ma yang Stehpan gaw akyu hpyi let, Madu Yesu e, nye a wenyi hkap la ya e, nga ai. 60 Bai, hput di let, Madu e ndai mara shanhte hpe hkum shagun ya et, nga nna nsen kaba hte jahtau wu ai: dai tsun ngut jang shi yup mat wa ai.

Kasa 8

8:1 Shawlu mung shi hpe sat kau ai amu hta awlaw lawm nga ai. Dai shani e Yerusalem mare na Hpung gaw zingri zingrat kaba hkrum wa ai rai nna, kasa ni hta kaga, gale nlang hte gaw, Yuda mung, Samari mung, shara magup hkan e bra mat wa ma ai. 2 Raitimung, tara hkungga ai masha Stehpan hpe makoi mayang nna, shi a majaw hkrapngu hkrapngoi kaba di mu ai. 3 Shawlu chyawm gaw, nta shagu shang nna, numsha lasha hpe ahkyik karawt la nhtawm, htawng hta sharen da ai hte, dai Hpung hpe hpya sharun da mu ai. 4 Bra hkawm mat wa ai ni chyawm gaw, mungga hkaw dan let htawt hkawm nga ma ai. 5 Shaloi Hpilip gaw Samari mare de sa wa nna, Hkristu a lam hkaw tsun dan wu ai. 6 Shi tsun dan ai lam na ai hte, shi madun ai lamik kumla mu ma yang, masha wunawng wuwa myit langai sha hte shi a ga madat mara nga ma ai. 7 Kaning rai nme law, nat shung ai ni law law hta na, n seng ai nat ni jahtau marawn let pru mat shajang ma ai; hkum katsing si ai ni hte lagaw hten ai ni law law mung, mai mat shajang ma ai. 8 Dai rai nna, dai mare hta kabu gara lam kaba rai nga ai. 9 Raitimung, Simun mying ai wa langai mi, shawng e dai mare hta lakle amu dan nna, shi hkum hpe, Ngai gaw kang ai wa rai nngai, nga nna Samari masha ni hpe shamau mu ai: 10 masha kaji kaba yawng mung, Ndai wa gaw, Galu kaba ngu ai, Karai Kasang a atsam rai nga ai, nga nna shi a ga madat ma ai. 11 Dai wa gaw, na na wa shi a lakle amu hte shanhte hpe shamau mu ai majaw, shi hpe kam ya ai rai ma ai. 12 Raitimung, Karai Kasang a mungdan hte Yesu Hkristu a amying ningsang hte seng ai kabu gara shiga lam, Hpilip hkaw dan ai hpe, kamsham ma yang, numsha lasha baptisma hkam la shajang ma ai. 13 Simun shi mung kamsham nna, baptisma hkam la ngut jang, Hpilip kaw hkan nang nga ai: lamik kumla hte mauhpa amu kaba ni shi mu jang, mau mahka mat nga ai. 14 Samari masha ni, Karai Kasang a mungga hta la ma ai hpe, Yerusalem e nga ai kasa ni na ma yang, shanhte gaw Petru yan Yawhan hpe shangun dat mu ai: 15 shan mung du jang, dai masha ni chyoi pra ai Wenyi lu la na matu akyu hpyi ya mu ai: 16 kaning rai nme law, shanhte hta na gade a ntsa e mung, chyoi pra ai Wenyi garai n yu wa ai; Madu Yesu a amying hta baptisma a hkam ai sha, naw rai nga ma ai. 17 Dai rai nna kasa yan shanhte a ntsa e lata mara ya jang, shanhte dai chyoi pra ai Wenyi hkam la lu ma ai. 18 Kasa yan a lata mara ai hte Wenyi hkam la lu ai hpe Simun mu jang, shi gumhpraw sa sak nna, 19 Gade a ntsa e raitimung ngai lata mara jang, dai wa chyoi pra ai Wenyi lu la na matu, dai baw ahkang ngai e mung jaw mi, ngu nna hpyi wu ai. 20 Petru chyawm gaw, Karai Kasang a kumhpa hpe gumhpraw hte lu la na re ai, nga nna myit ndai majaw, na a gumhpraw gaw nang hte rau hten bya mat u ga, 21 Na a myit Karai Kasang a man e n ding nga lit dai majaw, ndai lam hta nang hpa mung lawm lu ndai n rai. 22 Dai majaw, na n hkru ai lam hpe myit malai lu u; na a kraw hta myit mang kau ai lam hpe, mahkoi raw dat kau ya dam nhten, shi Madu kaw hpyi nem u. 23 Ladu nan ahkut nna n hkru ai hte, n ding n man ai hta ahkang achyang nga ndai gaw, ngai mu da de ai, ngu nna shi hpe tsun wu ai. 24 Shaloi Simun gaw, Nan tsun ai lam hpa mung ngai kaw n du u ga, nye a matu mara nan lala dai Madu kaw hpyi ya mi, ngu nna htan wu ai. 25 Shan chyawm gaw, dai Madu a mungga lam sakse hkam nna hkai dan ngut jang, Samari kahtawng law law hkan e dai kabu gara shiga hkaw dan let, Yerusalem mare de bai wa ma ai. 26 Ya, Madu a lamu kasa Hpilip hte tsun wu ai gaw, Rawt u; Yerusalem kaw nna Gaza de hprang ai lam pru hkra, dingda de tawk sa wa su, ngu wu ai; lam dai gaw nam mali lam rai nga ai. 27 Shaloi shi rawt nna sa wa ai; ya yu mu, Ehtiopi mung up ai hkawhkam jan Kandake a man e ahkang kaba lu nna, shi a sutgan yawng sin ai, unuk re ai, Ehtiopi masha langai mi, nawku na nga, Yerusalem de sa wa sai: 28 ya shi bai wa nna, shi a leng hta dung let, myihtoi Esaia laika hti nga ai. 29 Shaloi Wenyi gaw Hpilip hpe, Sa sit, dai leng de rau rai u, ngu wu ai. 30 Hpilip mung gat sa wa nna, myihtoi Esaia laika hti nga ai na wu yang, Nang hti ai lam hpe chye na da wu ni? ngu nna san wu ai. 31 Dai wa gaw, Htai ya ai mi n nga yang, ngai kaning rai chye na na rai ta? nga nna htan nhtawm, shi kaw rau lung dung na, Hpilip hpe saw wu ai. 32 Shi hti ai laika a ga gaw ndai rai nga ai, Sat na matu sagu hpe zawn, shi hpe dun sa wa nu ai; Sagu kasha gaw mun rep ai wa a man e atsin sha nga ai zawn, Shi mung n shaga ai sha nga ai. 33 Shagrit kau ai hkrum nga ai hta, shi dawdan ai kaw na lawt lu wu ai: Raitimung shi asak hpe ga ntsa na dawm kau ya wu ai majaw, Shi a baw sang ni a lam, kadai gawn dan lu na rai ta? nga ai. 34 Shaloi dai Unuk wa gaw Hpilip hpe, Rai taw, dai myihtoi wa gaw kadai hpe sha-ang nna tsun ai rai ta? shi hkum hpe tsun ai rai kun? shing n rai, kaga wa a lam tsun ai rai kun? ngu nna san wu ai. 35 Shaloi Hpilip ga tsun hpaw nna, dai laika hta ga sharawt nhtawm, Yesu hte seng ai kabu gara shiga, shi hpe hkai dan wu ai. 36 Shingrai sa wa ma yang, hka nga ai kaw du jang, dai Unuk wa gaw, Yu u, nang e hka nga nga ai; ngai baptisma hkam na, hpa hkum shara nga a ta? ngu wu ai. 37 ( Hpilip gaw, Na a myit mahkra hte nang kamsham nit yang gaw hkam la mai ai, ngu wu ai. Shi mung, Yesu Hkristu Karai Kasang a kasha rai nga ai gaw, ngai kamsham ni ai, ngu nna htan wu ai) 38 Shaloi shi a leng jahkring na tsun nhtawm, shan lahkawng hka de yu wa nna, Hpilip gaw Unuk wa hpe baptisma jaw wu ai. 39 Hka na lung wa ma yang, dai Madu a Wenyi Hpilip hpe woi mat wa nna, Unuk wa mung shi sa wa ai lam de kabu gara let bai wa wu ai rai nna, shi e bai n mu wu ai. 40 Hpilip chyawm gaw, Azutu mare e wa du ai rai nna, dai mung ga sa wa yang, Kesare mare du hkra mare shagu hkan e dai kabu gara shiga hkai dan wu ai.

Kasa 9

9:1 Shawlu chyawm gaw, Madu a sape ni hpe jahkrit shama ai hte sat kau na nga, masin naw rawt bu nga ai rai nna, hkinjawng agyi kaw sa nhtawm, 2 ndai lam hkan ai, numsha lasha mu mamu hpe rim la nna, Yerusalem de dun wa lu hkra, Damasku mare na tara jawng ni hpe, jaw dat na ahkang laika hpyi gun wu ai. 3 Ya sa wa yang, Damasku mare de shi ni magang wa sai rai nna, akajawng sha lamu de na nhtoi shi a grup e htoi tu pru wa ai: 4 shi mung, ga e kadawng taw mat ai hte, Shawlu, Shawlu, nang ngai hpe hpa rai zingri nga n ta? nga nna shi hpe tsun ai nsen na wu ai. 5 Shaloi shi gaw, Madu e, nang kadai rai nga n ta? ngu nna san wu yang, Madu gaw, Nang zingri zingrat ai Yesu rai nga nngai: 6 raitimung, rawt u, mare de shang wa u; nang galaw lu na lam nang hpe tsun dan shangun na we ai, nga nna htan wu ai. 7 Shi hte rau sa ai manang ni gaw, dai nsen na timung, kadai hpe mung n mu ma ai majaw, mau let tsap nga ma ai. 8 Shaloi Shawlu rawt nna, myi hpaw yu wu yang, hpa mung n mu lu ai rai nna, shi hpe lata e dun let, Damasku mare de woi shang wa mu ai. 9 Ya shi gaw masum ya tup myi n mu nna, n lu n sha ai nga nga ai. 10 Ya Damasku mare e Anani mying ai sape langai mi nga ai rai nna, Madu gaw shingran hta, Anani e, ngu wu ai. Shi mung, Madu e, nang nga nga nngai, ngu nna htan wu ai. 11 Dai Madu bai tsun wu ai gaw, Rawt u, Lam Ding ngu ai mare lam de sa nna, Yuda nta e, Tarshu masha Shawlu hpe sa tam su; yu u, shi akyu hpyi nga ai rai nna, 12 Anani mying ai wa shang sa nna, shi myi bai hpaw ya n ga nga, shi a ntsa e lata mara da ya ai hpe, shingran hta mu nu ai, ngu wu ai. 13 Anani chyawm gaw, Madu e, dai wa gaw Yerusalem e, na a chyoi pra ai ni hpe n hkru ai hku gade wa galaw ai gaw, ashi law law ngai na se ai; 14 ndai yang e mung, na a mying ningsang hpyi gang ai ni yawng mayawng hpe gyit dun la na nga, hkinjawng agyi ni kaw na ahkang lu la sai rai nga ai, ngu nna htan wu ai. 15 Madu mung, She sa su; dai wa gaw, maigan amyu ni hte hkawhkam ni a man e mung, Israela amyu masha ni a man e mung, nye a amying gunhpai na matu, nye a ngu nna san tawn da ai malai rai nga ai: 16 kaning rai nme law, nye mying majaw gade wa matsan tsin-yam hkrum na gaw, ngai shi hpe madun na we ai, ngu wu ai. 17 Shaloi Anani du sa nna, dai nta de shang nhtawm, Shawlu a ntsa e lata mara let, Hpunau Shawlu e, nang myi bai mu lu nna, chyoi pra ai Wenyi hpring lit ga nga, nang sa wa ai lam e, nang hpe shadan dan ai Madu Yesu gaw, ngai e shangun dat ni ai, ngu wu yang, 18 Shawlu a myi hta na asep zawn re ai alawan gaw hkrat mat nna, shi myi bai mu lu ai; shaloi shi rawt nna, baptisma hkam la wu ai: 19 lusha mung sha nna, n-gun awai la wu ai. 20 Yesu gaw Karai Kasang a kasha rai nga ai, nga nna shaloi jang tara jawng ni hta hkaw dan nga ai. 21 Shi a ga na ai ni nlang mau mahka let, Ndai wa gaw Yerusalem e amying ndai gang ai ni hpe sharun shabya ai wa rai nga ai, n rai ni? ya ndai de mung, dai baw ni hpe gyit la nna, hkinjawng agyi ni hpang de wa ap na maw ai hte sa du ra hka, nga nna tsun shajang ma ai. 22 Shawlu chyawm gaw n-gun ja wa nna, Yesu gaw Hkristu nan rai nga ai lam pra pra madun dan ai hte, Damasku e nga ai Yuda ni hpe shamak kau mu ai. 23 Ya nhtoi tsawmra wa na jang, Yuda masha ni shi hpe sat kau na bawng ma ai: raitimung, shanhte a maw ai lam hpe Shawlu chye wu ai. 24 Shi hpe sat kau lu hkra, shani shana mare chyinghka ni hta hkap nga ma ai. 25 Shi a sape ni chyawm gaw, shana e shi hpe woi la nna, ka hta mare bunghku kaw nna shayat dat mu ai. 26 Dai hpang Yerusalem de du wa jang, sape ni hte kanawn na maw wu ai; raitimung, shi sape rai sai hpe n kam ma ai majaw, nlang hte shi hpe hkrit da mu ai. 27 Barnaba chyawm gaw shi hpe kasa ni hpang de woi wa wu ai rai nna, Shawlu shi dai Madu hte lam e kaning rai hkrum nna, dai Madu e shi hpe tsun ai ga na lu ai mung, Damasku mare hta Yesu a mying gang nna nden ja ai myit hte hkaw dan ai lam mung, shanhte hpe hkai dan mu ai. 28 Shingrai Yerusalem mare e shi shanhte hte rau pru pru shang shang rai nga let, 29 Madu a mying ningsang gang nna, nden ja ai myit hte hkaw tsun nga ai; Heleni ngu ai ni hte mung shi ndang hkat nga ai rai nna, shanhte gaw shi hpe sat kau na maw ma ai. 30 Dai lam hpunau ni chye jang, shi hpe kesare de sa dat nna, Tarshu de shangun dat mu ai. 31 Dai hte yang, Yuda mung, Galile mung hte Samari mung shara magup hkan e nga ai Hpung gaw, shadaw shangang ai lu la nna, angwi apyaw rai nga ai; dai Madu hpe hkrit hkungga ai hte, Chyoi pra ai Wenyi a shalan shabran ai lam ni hta hkawm sa let, shanhte law htam wa ma ai. 32 Dai shaloi e Petru gaw shara magup hkan e kawan hkawm wa let, Luda mare e nga ai chyoi pra ai ni kaw mung sa du ai. 33 Dai yang e hkum katsing si nna, matsat ning tup yup shara na n rawt lu ai Ainea mying ai masha langai mi hpe mu hkrup wu ai. 34 Shaloi Petru gaw, Ainea e, Yesu Hkristu nang hpe shamai nit dai: rawt u, na hpun panep lajang u, ngu nna shi hpe tsun wu ai: shaloi jang shi rawt wa lu ai. 35 Luda hte Sharon e nga nga ai ni nlang hte mung shi hpe mu nna, Madu hpang de kayin bang wa ma ai. 36 Ya, Yopa mare hta Tabihta mying ai numsha sape langai mi nga ai; mying de a ga lachyum gaw Dorka ngu ai rai lu ai: dai numsha gaw kaja ai bungli hte alu jaw ya ai lam hta, myit tsup ai jan rai nga ai. 37 Dai hte yang shi machyi nna si mat sai; mang kashin nna, ntsa gawk e sharawn da ma ai. 38 Luda gaw Yopa mare hte ni nga ai rai nna, Petru dai yang nga ai lam sape ni na ma yang, shanhte marai lahkawng shangun dat nna, Anhte kaw sa na hkum hkring et, ngu nna hpyi dat mu ai. 39 Shaloi Petru rawt nna, dai yan hte rau hkan sa wa ai. Shi du jang ntsa gawk de woi shawn mu ai rai nna, gaida jan ni nlang hkrap let shi a makau e tsap nna, shanhte hte rau naw nga yang, Dorka chywi ai palawng ni, nba ni, madun let nga nga ma la ai. 40 Petru chyawm gaw nlang hte hpe shapraw kau ai; shingrai dai mang de kayin let, Tabihta e, rawt u, ngu wu ai. Shaloi dai jan myi hpaw nna, Petru hpe mu jang, rawt dung nga ai. 41 Petru mung lata ladawn nna gang sharawt nhtawm, chyoi pra ai ni hte gaida jan ni hpe shaga la nna, shi hpe chyahkrung ap ya wu ai. 42 Dai lam hpe Yopa ginwang ting na ma ai rai nna, law law wa, dai Madu hpe kamsham ma ai. 43 Shingrai Petru gaw, Simun ngu ai shanhpyi sama wa hte rau, nhtoi tsawmra na hkra, Yopa mare hta nga nga ai.

Kasa 10

10:1 Ya Kesare mare e, Itali ngu ai hpyendap hta, Korneli mying ai hpyen latsa up ai bu langai mi nga ai: 2 dai wa gaw tara hkungga myit rawng nna, shi a nta na ni nlang hte rau Karai Kasang hpe hkrit hkungga ai hte, masha ni hpe alu law law jaw let, Karai kasang hpe tut tut a hpyi nga ai. 3 Lani wa mi ahkying jahku daram e, Karai Kasang a lamu kasa shi kaw du nna, Korneli e, nga nna shi hpe shaga ai gaw, shingran hta leng leng mu wu ai. 4 Shi gaw dai wa hpe azi yu nna, Madu e, hpa lam rai ta? ngu nna hkrit let shi hpe san wu ai. Dai wa chyawm gaw, Na a akyu hpyi ai hte alu jaw ai lam, Karai Kasang a man e, masat dingsat matu hkrang salit dai. 5 Ya Yopa mare de shangun nna, Petru ngu ai Simun hpe shaga la su; 6 shi gaw shanhpyi sama Simun a nta e shingbyi nga ai; shi a nta gaw nammukdara makau e rai nga ai, ngu wu ai. 7 Shi hte ga tsun ai lamu kasa wa mat jang, shangun ma lahkawng hte, shi kaw tut hkan nga ai ni hta na, tara hkungga ai hpyen ma langai mi hpe shaga nna, 8 shanhte hpe yawng mayawng hkai dan nhtawm, Yopa mare de shangun dat mu ai. 9 Shanhte mung hpang shani e sa wa nna, Yopa makau du magang jang, Petru gaw ahkying kru daram e akyu hpyi na nga, nta ntsa de lung wa ai. 10 Shaloi shi kawsi nna shat sha mayu nga ai: raitimung, lusha naw shachyip nga yang, shi myit nawng mat wa nna, 11 sumsing lamu hpaw wa ai hte, hpajawng kaba zawn, jut mali de jum nna, ga de shayu dat ai arai hpe mu wu ai: 12 dai hta e, ga ntsa na lagaw mali tu ai baw dusat hte gumrawt hkawm ai baw amyu myu, ntsa malen na u amyu myu, rawng nga ai. 13 Nsen mung ngoi pru ai gaw, Petru e, rawt u, sat sha u, nga ai. 14 Petru chyawm gaw, N rai law, Madu e; n sha mai ai hte n san n seng ai rai hpe, ngai galoi mung n sha yu nngai, ngu nna htan wu ai. 15 Bai lang mi na nsen gaw, Karai Kasang jasan jaseng ai rai hpe, n sha mai ai hkum nga et, nga nna shi kaw bai ngoi pru ai. 16 Masum lang shing nga nhtawm, dai rai hpe sumsing lamu de, shaloi jang dawm la wu ai. 17 Ya Petru gaw, shi mu ai shingran hpa rai na ra ai i? nga nna myitsumru yu nga yang, yu mu, Korneli shangun dat ai ni gaw, Simun a nta tam san let, chyinghka makau e tsap nna, 18 Petru ngu ai Simun, nta dai hta nga ai n nga ai, jahtau san yu ma ai. 19 Petru mung, shingran de a lam myit naw sumru nga yang, Wenyi gaw, Yu u, masha lahkawng nang hpe tam nga ma ai: rawt u, yu wa sit; 20 shan hpe ngai shangun dat mawe ai majaw, myit hpa n ganung ai sha, shan hte rau sa wa su, ngu dat wu ai. 21 Shaloi Petru dai ni hpang de yu wa nna, Yu mu, nanhte tam ai wa ngai rai nga nngai: hpa lam rawng nna sa myit ta? ngu nna san mu ai. 22 Shanhte gaw, Dingman nna, Karai Kasang hpe hkrit hkungga ai hte, Yuda amyu ting a man e myiman pa ai, hpyen latsa up ai bu Korneli gaw, nang hpe shi a nta de shaga bang nna, nang tsun ai ga madat la na lam, chyoi pra ai lamu kasa na shadum dan ai lu la nu ai, ngu nna tsun dan mu ai. 23 Dai rai nna, shi shanhte hpe shaga shashawn nhtawm, manam daw mu ai. Ya hpang shani e shi rawt nna, shanhte hte rau sa wa ai; Yopa mare na kahpu kanau ni nkau mi mung hkan nang ma ai. 24 De a hpang shani Kesare mare de shang wa ai; Korneli chyawm gaw, shi a hpunau ni hte makyin jinghku ni hpe jahpawng tawn nna, shanhte hpe la nga ma ai. 25 Ya, Petru shang wa jang, Korneli gaw hkap tau let, shi a lagaw nhpang e dingnyawm nawku wu ai. 26 Petru chyawm gaw, Rawt u, ngai mung masha she rai nngai, nga nna tsun let shi hpe dun sharawt wu ai. 27 Shingrai shi hte shaga let shang wa yu yang, law law hpawng nga ma ai hpe, mu wu ai. Shaloi Petru gaw shanhte hpe, Yuda masha ngu ai wa gaw maigan amyu masha hte kanawn mazum, htinglup htingshang n rai mai ai, nanhte nan chye nga myit dai: 28 dai rai tim kadai wa hpe mung n ging n dan ai, n san n seng ai, n nga mai ai lam gaw, Karai Kasang ngai hpe madun ni ai. 29 Dai rai nga ai majaw, ngai e shaga yang, ngai n ningdang ai sha hkan nang ring ngai. Dai rai nna, hpa lam rawng ai majaw ngai hpe shaga myit ta? ngai san nga nngai, ngu nna tsun mu ai. 30 Shaloi Korneli gaw, Dai ni mali ya rai sai, akyu hpyi ai ahkying jahku hta, nye a nta e ngai akyu hpyi nga yang, yu u, tu kabrim ai hpun palawng bu hpun ai wa langai mi nye a man e tsap pru nna, 31 Korneli e, na a akyu hpyi ai ga madat mara nu ai; na alu jaw ai mung Karai Kasang matsing da nu ai. 32 Dai re ai majaw Yopa de shangun nna, Petru ngu ai Simun hpe shaga su; dai wa gaw, nammukdara makau e nga ai shanhpyi sama Simun a nta e shingbyi nga ai, nga nna tsun ai. 33 Dai majaw, shaloi jang ngai nang hpang de shangun dat ai rai nna, ya nang du ai gaw, mai kaja nga ai. Dai rai nna, shi Madu nang hpe hkangda mada madat la na, ya anhte nlang Karai Kasang a man e, rai nga ga ai, ngu nna tsun wu ai. 34 Shaloi Petru ga hpaw nna, Karai Kasang masha myiman n tau ai gaw, ya ngai gaja wa chye se ai: 35 amyu baw shagu hta shi hpe hkrit hkungga ai hte dingman ai amu galaw ai wa gaw, shi kaw myiman pa nga ai. 36 Nga yawng nga pra Madu rai nga ai Yesu Hkristu a marang e ngwi pyaw ai hte seng ai kabu gara shiga hkaw tsun dan u ga nga, Israela kashu kasha ni kaw shangun dat ai mungga ngu ai: 37 Yawhan baptisma tara hkaw ai hpang, Galile mung kaw nna Yuda mung ting kajai gara wa ai lam hpe, nanhte nan chye nga myit dai: 38 dai gaw Nazaret wa Yesu a lam rai nga ai; Karai Kasang gaw chyoi pra ai Wenyi hte mung, n-gun atsam hte mung, shi hpe chya ya wu ai; Karai Kasang shi hte rau rai nga ai majaw, mai kaja ai amu shi galaw nna, nat gumlau e zingri zingrat hkrum ai ni yawng mayawng hpe shamai ya let, kawan katsan hkawm nga ai. 39 Shingrai, Yuda masha ni a mung hta e mung, Yerusalem mare hta mung, shi galaw hkawm wa ai amu yawng mayawng a sakse ni, anhte rai nga ga ai: dai wa hpe nan shanhte hpun hta jen sat kau mu ai. 40 Karai Kasang chyawm gaw, masum ya nhtoi hta dai wa hpe sharawt dat wu ai rai nna, mung masha danghta man e n rai, sakse matu nga nna, shawng e Karai Kasang lata san da sai anhte ni a man e sha shadan dan mi ai: 41 si ai ni kaw na shi bai rawt ai hpang e, anhte gaw shi hte rau lusha lu ga ai. 42 Shi Madu nan mung, hkrung ai ni hte si sai ni a tara agyi tai na, Karai Kasang san da ai wa rai nga sai lam, mung masha ni hpe tsun dan let sakse hkam na matu shi anhte hpe hkangda ma ni ai. 43 Shi hpe kamsham masham ni nlang, shi mying ningsang a marang e, yubak raw dat kau ya ai hkrum na mara ai, nga nna tsun ai myihtoi mahkra mung shi a lam sakse rai nga ma ai, ngu mu ai. 44 Petru gaw dai lam naw tsun nga yang, dai ga na ai ni mahkra a ntsa e Chyoi pra ai Wenyi yu shang wa ai. 45 Chyoi pra ai Wenyi ngu ai kumhpa gaw, maigan amyu masha ntsa e ru jaw ai majaw, Petru hte rau hkan nang ai, matu gadoi lam hkan sai, kamsham ai ni, mau mahka nga ma ai: 46 kaning rai nme law, shanhte ga amyu myu tsun ai hte Karai Kasang hpe shagrau ma ai, na lu ma ai. 47 Dai rai nna Petru gaw, Anhte zawn Chyoi pra ai Wenyi hkam la ai ni hpe, baptisma n hkam shangun na nga, hka hpe kadai hkum lu a ta? ngu wu ai. 48 Shingrai, Yesu Hkristu a amying hta baptisma hkam na lam, shi shanhte hpe hkangda mu ai.Shaloi, nhtoi loi mi naw hkring nga na, shanhte shi hpe hpyi ma ai.

Kasa 11

11:1 Maigan amyu masha ni mung, Karai Kasang a mungga hta la ma ai, nga ai lam hpe kasa ni hte Yuda mung hkan na kahpu kanau ni na ma ai. 2 Raitimung, Petru gaw Yerusalem de lung wa jang matu gadoi lam hkan ai ni mahtang, 3 Nang gaw matu gadoi n hkam ai ni a n ta shang nna, shanhte hte rau lu rau sha ndai, nga nna hkap ndang hkat ma ai. 4 shaloi Petru ga sharawt nna, dai lam hpe npawt ndung hkren hkai dan nna shanhte hpe, 5 Ngai gaw Yopa mare hta akyu hpyi nga nngai; shaloi ngai myit nawng mat wa nna, hpajawng kaba zawn jut mali de jum let, sumsing lamu de na ngai hpang de jahkrat dat ai arai yu wa ai gaw, shingran hta ngai mu we ai: 6 dai hpe achyoi sha galaw yu yang, ga ntsa na lagaw mali tu ai baw dusat, matse labye, gumrawt hkawm ai baw hte, ntsa malen u ni rawng nga ai, ngai mu nna sumru yu nga nngai. 7 Dai sha n rai, nsen ngoi pru ai mung, Petru e, rawt u; sat sha u, nga ai, ngai na nngai. 8 Ngai chyawm gaw, N rai law, Madu e; n sha mai ai hte n san n seng ai baw, ngai galoi mung n sha ga nngai, ngu we ai. 9 Bai lang mi na nsen gaw, Karai Kasang jasan jaseng ai rai hpe n sha mai ai hkum nga et, nga nna lamu de na tsun pru ai. 10 shingrai masum lang byin nna, dai yawng hpe sumsing lamu de dawm la wu ai. 11 Shaloi jang, Kesare mare nna, ngai hpang de shangun dat ai masha masum, anhte nga ai nta ndaw e tsap nga ma ai. 12 Myit n ganung ai sha, shanhte kaw hkan sa na, Chyoi pra ai Wenyi ngai hpe tsun ni ai; ndai hpunau kru mung ngai hte rau sa nna, dai wa a nta de anhte shang saga ai. 13 Shaloi dai wa gaw, shi a nta e lamu kasa yu tsap ai hte, Yopa mare de masha shangun nna, Petru ngu ai Simun hpe shaga su; 14 nang hte na nta masha ni nlang hkyehkrang la kaw du lu myit ga, shi nang hpe ga tsun dan na ra ai, nga nna sa tsun ai lam, anhte hpe hkai dan mi ai. 15 Ya, ngai ga hpaw nna tsun nga yang, shawng de anhte a ntsa e Chyoi pra ai Wenyi yu hkrat ai zawn, shanhte hta mung yu hkrat wa malu ai. 16 Shaloi she, Yawhan gaw hka hte baptisma jaw wu ai; nanhte chyawm gaw, Chyoi pra ai Wenyi hta baptisma hkam la na marin dai, nga nna, shi Madu tsun ai ga hpe ngai dum we ai. 17 Dai re ai majaw, shi madu Yesu Hkristu hpe kamsham ai shani, anhte hpe jaw ai chyeju kumhpa hte maren she, Karai Kasang shanhte hpe jaw ai rai yang gaw, ngai hpa wa re ai ngu nna, Karai Kasang hpe shadang lu na rai ta? ngu nna tsun wu ai. 18 Dai lam na ma yang, shanhte myit pyaw nga nna, Aw, rai sa, Karai Kasang gaw maigan amyu ni hpe mung, asak hkrung ai hte seng ai myit malai lam jaw manu hka, nga nna Karai Kasang hpe shagrau sha-a ma ai. 19 Ya Stehpan kaw nna hpang ai zingri zingrat lam majaw bra mat wa ai ni gaw, Hpinisi, Kupru mung hte Antioki mare du hkra len hkawm wa nna, Yuda masha ni hpe hkrai sha, dai mungga hkaw dan ma ai. 20 Raitimung, shanhte hta na Kupru hte Kureni mung na ni nkau mi, Antioki de hkan du ma ai rai nna, Madu Yesu a kabu gara shiga, Heleni masha ni hpe mung tsun dan ma ai. 21 Dai Madu a lata shanhte hte rau nga nga ai rai nna, kamsham ai hpung daw wa kaba, Madu hpang de kayin bang wa ma ai. 22 Dai ni a lam, Yerusalem na Hpung a na hta kajai gumhkawng shang wa ai rai nna, shanhte gaw Barnaba hpe Antioki du hkra shangun dat mu ai. 23 Dai wa du nna, Karai Kasang a chyeju mu lu yang, kabu gara nga ai hte, shanhte dai Madu hta lashum shawt manoi manat nga na matu, nlang hte hpe shadum shahprang mu ai: 24 kaning rai nme law, dai wa gaw masha kaja rai nna, chyoi pra ai Wenyi hte mung, makam masham hte mung, hkum tsup ai wa rai nga ai: masha law law wa hpe dai Madu hpang de jat bang wa shangun mu ai. 25 Bai Barnaba gaw, Shawlu hpe sa tam na Tarshu de pru sa wa nna, shi hpe mu jang Antioki de woi wa wu ai. 26 Ya, shan gaw laning mi tup dai Hpung hte rau hpawng nga ma ai rai nna, masha law law hpe sharin shaga lu ma ai; sape ni mung, Hkristu ni, ngu ai amying hpe, Antioki mare hta shawng lu la ai rai nga ai. 27 Dai nhtoi hte hta myihtoi nkau mi Yerusalem kaw nna, Antioki de sa du ma ai. 28 Dai ni hta na Agabu ngu ai wa rawt nna, ga ntsa ting hta hku wa kaba wa na ra ai lam, Wenyi madun ai hte tsun dan mu ai; dai gaw hkawhkam Klawdi a aprat e byin wa sai. 29 Dai rai nna, sape ni gaw, Yuda mung na kahpu kanau ni hpang de langai hte langai rai lu ai made karum dat na nga, myit shatawng da ma ai: 30 dai hte maren shanhte galaw nna, Barnaba yan Shawlu a lata hta salang ni hpang de shagun dat ma ai.

Kasa 12

12:1 Dai aten hte yang, Herod hkawhkam gaw, Hpung masha nkau mi hpe zingri zingrat na dakan nga ai. 2 Shingrai, Yawhan a kahpu Yaku hpe htau kau wu ai. 3 Dai lam Yuda ni yu kabu ai mu jang, Petru hpe mung rim la shayan wu ai. Dai aten gaw Azuma poi rai nga ai. 4 Ya Shalai wa poi lai jang she, mung masha ni hpe shapraw ya na myit da wu ai majaw, shi hpe rim la ngut yang htawng hta bang da nhtawm, shi hpe sin nga na matu, hpyen hpung mali a lata de ap ya mu ai. 5 Shingrai Petru htawng hta rawng nga ai; Hpung masha ni chyawm gaw shi a matu mara Karai Kasang kaw akroi anoi akyu hpyi ma ai. 6 Herod gaw shi hpe shapraw la na a shawng shana e, Petru gaw hpri sumri lahkawng gyit nna, hpyen ma lahkawng lahpran e yup nga ai: sin langa ni mung, htawng chyinghka e sin nga ma ai. 7 Shaloi, yu u, Madu a kasa langai mi pru tsap nna, dai gawk hta nhtoi htoi nga ai: shi gaw Petru a garep gumhpuk ya nna, Alawan rawt u, ngu nna jasu wu ai; shaloi hpri sumri ni mung shi a lata na malaw mat lu ai. 8 Bai lamu kasa gaw, Shingkyit kyit nna, kyepdin din u, ngu wu ai. Shi mung galaw wu ai. Bai, Na nba lawai nna ngai kaw hkan rit, ngu wu ai. 9 Shaloi shi pru nna hkan nang nga ai; raitimung, lamu kasa shabyin ai amu dai hpe gaja wa re ai, shi n chye nna, shingran rai nga ai, ngu nna myit nga ai. 10 Ya shan gaw sin ai shara gap padu lahkawng lai nna, mare de pru ai hpri chyinghka du jang, chyinghka dai mung shi chyu hpaw mat wa ai rai nna, shan pru nhtawm, mare lam langai mi hta hkan sa wa nna, lamu kasa gaw, shaloi jang shi hte hka mat wa ai. 11 Ya Petru myit arai la lu jang, Madu gaw shi a lamu kasa shangun dat nna, Herod a lata hte Yuda masha ni myit mada ai lam yawng hta na ngai hpe shaw la sai gaw, ya ngai teng teng chye se ai, nga nna, 12 dai lam myit aru ngut jang, masha tsawmra wa hpawng nna, akyu hpyi nga ai shara, Marku mying hkawt mying ai, Yawhan a kanu Mari a nta de du wa ai. 13 Shingrai dai wing chyinghka wa akawk wu yang, Rode mying ai num kasha langai mi, madat yu na nga pru sa ai. 14 Shi gaw Petru a nsen re ai chye jang, kabu ai majaw chyinghka n hpaw ya ai sha, nhku de gat shang wa nna, Petru gaw chyinghka lam e tsap nga ai, ngu nna tsun dan wu ai. 15 Shanhte chyawm gaw, Nang mana ndai, shi e ngu mu ai. Shi mahtang, gaja wa rai nga ai, nga nna a tsun shanang nga ai. bai shanhte gaw, Shi a lamu kasa rai nga lu ai, nga ma ai. 16 Raitimung, Petru gaw a akawk nga ai rai nna, shanhte hpaw la mu yang, shi hpe mada yu nna, mau mahka nga ma ai. 17 Shi gaw, shanhte hpe tsin mu ga nga nna, lata dingsi nhtawm, shi hpe Madu e htawng hta na kaning rai shaw la ai lam shanhte hpe tsun dan nna, Ndai lam ni Yaku hte kahpu kanau ni hpe tsun shana dat mu, ngu mu ai. Shaloi shi pru nna, shara kaga de sa mat wa ai. 18 Ya nhtoi htoi yang hpyen masha ni gaw, Petru hta hpa byin ai n chye ma ai majaw, grai ruk rak bu ma ai. 19 Herod chyawm gaw Petru hpe tam nna nmu jang, sin langa ni hpe gawn yu nhtawm, shanhte hpe sat kau na lam dawdan nga ai. Dai hpang shi gaw Yuda mung nna Kesare mare de yu wa nna nga nga ai. 20 Dai hte yang hkawhkam wa gaw Turu hte Sidun masha ni hpe grai pawt bu da wu ai; dai rai nna, shanhte gaw myit langai sha hte shi hpang de sa nna, Blastu ngu ai, shi a kun hkringmang wa kaw sa hpa let, majan htinglu na lam sa hpyi ma ai: kaning rai nme law, shanhte a mung mahtang hkawhkam a mung na, lusha sha hpa lu la ma ai. 21 Shaloi, madat da ai shani hta e, Herod gaw hkawhkam hpun palawng sumli nna, tingnyang hta dung let, shanhte hpe ga dan dat mu ai. 22 Shaloi mung masha ni gaw, Ndai gaw shinggyim masha nsen n rai, Karai Wa a nsen she rai nga ai, nga nna jahtau ma ai. 23 Dai shaloi jang, Karai Kasang a hpung shingkang hpe n tau yu wu ai majaw, Madu a lamu kasa shi hpe ari jaw nna, byet e sha ai hte shi nsa hti mat ai. 24 Dai Madu a mungga chyawm gaw galu kaba wa nna, maden jat wa sai. 25 Barnaba yan Shawlu gaw, shan a galaw daw ai amu hpe ngut jang, Marku ngu ai Yawhan hpe shaga la nhtawm, Yerusalem mare na bai wa ma ai.

Kasa 13

13:1 Ya, Antioki mare na Hpung hta e, myihtoi ni, sara ni, nang nga ma ai: dai ni gaw, Barnaba, Nigera ngu ai Simun, Kureni masha Luki, Herod du wa kanawn kanau Manaen hte Shawlu hte rai nga ma ai. 2 Ya shanhte Madu hpe nawku let lusha gam nga yang, Chyoi pra ai Wenyi gaw, Barnaba yan Shawlu hpe, ngai shaga da ai amu gunhpai na matu, san da mu, nga ai. 3 Dai hte maren shanhte gaw lusha gam let, akyu hpyi nna, shan a ntsa e lata mara jaw ngut jang, shan hpe dat mu ai. 4 Shingrai, Chyoi pra ai Wenyi shan hpe shangun dat mu ai hte maren, shan gaw Seluki de yu wa nna, dai yang na li jawn nhtawm, Kupru de du ma ai. 5 Salami mare hta naw nga ai hte yang, Yuda ni a tara jawng ni hta, Karai Kasang a mungga hkai dan mu ai; Yawhan mung shan a nrum ntau rai nga ai. 6 Ya shanhte gaw dai tsunlawng ga sa wa nna Pahpu mare du ma yang, Bara-Yesu mying ai Yuda masha rai nga ai lakle sara hte masu ai myihtoi langai mi hpe, mu hkrup mu ai; 7 dai wa gaw, Sergi Pawlu ngu ai, myit kunghpan ai munggyi wa kaw nga ai wa re ai. Dai munggyi wa Karai Kasang a mungga madat la mayu nna, Barnaba yan Shawlu hpe shaga la mu ai. 8 Shaloi lakle sara ngu ai, lachyum hku shamying ai, Eluma gaw, dai munggyi wa a kamsham ai lam jahpyak kau ya mayu ai rai nna, shanhte hpe ndang shadang mu ai. 9 Shaloi Pawlu ngu ai Shawlu gaw, chyoi pra ai Wenyi hpring let, shi hpe azi da nna, 10 Myit magaw lam yawng hte gumle gumlau yawng hpring nga ai, nat a kasha, dingman ai lam shagu a hpyen wa e, Madu a dingman ai lam hpe hkap shadang na n sim nga n ni? 11 Ya, yu u, Madu a lata na ntsa e du nna, tawng marang mi jan n mu lu ai, myi kyaw nga na rin dai, ngu wu ai. Shaloi jang shi a myi shinggang mat nna, nsin chyip rai mat salu ai; shingrai, shi a lata dun ai masha tam let, kayin hkawm nga ai. 12 Dai lam hpe munggyi wa mu jang, Madu a sharin shaga ai lam hpe mau ai hte kamsham nga ai. 13 Dai hpang Pawlu hte shi a manang ni gaw, Pahpu kaw nna li jawn nhtawm, Pamhpuli mung na Perga mare de du ma ai: Yawhan chyawm gaw shanhte hte hka nna, Yerusalem mare de wa mat ai. 14 Bai, shanhte gaw Perga kaw nna rawt sa wa yang, Pesidi mung na Antioki mare de du ma ai: ya laban nhtoi e tara jawng hta shang dung nga ma ai. 15 Shaloi tara laika hte myihtoi laika hti ngut jang, jawng agyi ni gaw shanhte hpang de masha shangun nna, Hpunau ni e, shawa hpawng hpe shadum shahprang na ga lu myit yang gaw, shadum shahprang mu, ngu mu ai. 16 Shaloi Pawlu rawt nna lata dingsi let, Israela masha ni hte Karai kasng hpe hkrit hkungga ai ni e, madat mara la mu. 17 Ndai Israela amyu a Karai Kasang gaw, anhte a ji wa ni hpe lata la nu ai rai nna, Egutu mung e naw nga nga yang, dai amyu hpe shagrau nna, shada da ai lahpum ta hte shaw woi nu ai. 18 Bai, mali shi ning daram, nam mali hkan e shanhte a akyang hpe sharang ya nna, 19 Hkanan mung na masha amyu sanit hpe shaza kau nhtawm, mali tsa manga shi ning daram, dai ni a mungdan hta na sali shanhte hpe karan jaw mu ai: 20 dai hte a hpang e myihtoi Samuela aprat du hkra tara agyi ni tawn da ya mu ai. 21 Dai hpang shanhte hkawhakm hpyi nna, Karai Kasang gaw shanhte hpe, Ben-yamin amyu, Kisa a kasha Shawlu hpe mali shi ning laman e, shadun ya mu ai. 22 Dai wa hpe jahkrat kau nhtawm, Dawi hpe, shanhte a hkawhkam tai na sharawt ya wu ai: dai wa a lam shi nan sakse hkam ai gaw, Nye a myit hte tup ai Yese a kasha Dawi hpe ngai mu se ai; dai wa gaw, ngai ra ai hku yawng shadik ya na ra ai, nga ai. 23 Dai wa a amyu matu hta na, Karai Kasang gaw, ga ndat nga ai hte maren, Israela masha ni a matu, Hkyehkrang la ai madu Yesu hpe, paw pru shangun wu ai. 24 Dai wa garai n pru yang Yawhan mung, Israela amyu yawng hpe myit malai hte seng ai baptisma lam shawng hkaw dan manu ai. 25 Bai Yawhan gaw shi gun ai magam hpra wa na rai jang, Ngai hpe kadai re ai nawn nga myit ta? Ngai gaw dai wa n rai nngai; yu mu, nye a hpang e langai mi du na ra ai; dai wa a kyepdin raw na pyi ngai n ging nngai, nga ai. 26 Abraham a amyu kashu kasha ni hte, nanhte hta na Karai Kasang hpe hkrit hkungga ai, hpunau ni e, ndai hkyehkrang la ai lam a mungga gaw, anhte hpang de jaw dat ra ai. 27 Kaning rai nme law, Yerusalem na ni hte, shanhte a du gyi ni gaw, shi madu hpe mung, laban nhtoi shagu hti ai myihtoi ni a ga hpe mung, n chye na ai wa, shi hpe dawdan ai hte dai ga ni hpe shatup manu ai. 28 Shi hta si ging ai mara n mu timung, shi hpe sat kau na, Pilat kaw hpyi ma ai. 29 Shingrai, shi hpe lakap nna ka da mada shatup ma jang, shi hpe hpun hta na jahkrat la nna, lup hta bang da mu ai. 30 Karai Kasang chyawm gaw, chyasi ni kaw na shi hpe sharawt la wu ai: 31 Galile mung kaw nna Yerusalem mare de shi hte rau lung wa ai ni ngu ai, mung masha ni a man e ya shi a sakse tai nga ai ni, nhtoi tsawmra na hkra shi hpe mu lu masai. 32 Shingrai, Nang ngai sha rai nga ndai, dai ni ngai nang hpe shaprat sade ai, nga nna kanu lahkawng ngu na Shakawn Kungdawn ga hta ka da nga ai hte maren, 33 Karai Kasang Yesu hpe hkrung sharawt ya ai a marang e, ji wa ni hpe jaw da ai ga ndat hpe, anhte a kashu kasha ni hta shadik ya ai kabu gara shiga gaw, nanhte kaw gun sa saga ai. 34 Dai hta kaga, shi hten bya ai galoi n hkrum hkra, si ai ni kaw na hkrung sharawt la na lam, Karai Kasang tsun ai gaw, Dawi hta nna, chyoi pra ai hte grin nga ai chyeju, ngai nanhte hpe jaw na made ai, nga ai. 35 Kaning rai nme law, kaga Shakawn Kungdawn laika hta mung, Na a Chyoi pra ai wa hten bya hkrum na nang hkraw na n rai, nga nna shi tsun ai. 36 Ya Dawi gaw, shi a prat hte hta Karai Kasang a ra ai hku gunhpai ngut jang, yup mat nna, kaji kawa ni kaw tawn da ai hte, hten byak ai kaw du wa sai; 37 Karai Kasang hkrung sharawt la ai wa chyawm gaw, hten byak hkrum wu ai n rai. 38 Dai re ai majaw, hpunau ni e, dai wa a marang e, yubak raw dat kau lu na ahkang, nanhte hpe hkaw dan nga ai gaw, chye nga mu: 39 dai hta n-ga, Mawshe a tara hte dingman ai kaw n du lu ai, dai wa hpe kamsham ai ni nlang hte lam shagu hta dingman ai kaw du lu na rai nga ai. 40 Dai re ai majaw, Yu mu, jahpoi ai ni e, mau nna htum mat mu: Nanhte a nhtoi hta lam langai mi ngai shabyin na nngai; 41 Dai lam marai langai ngai nanhte hpe hkai dan timung, hpa n kam na marin dai, nga nna myihtoi ni tsun ai ga, nanhte hta n ang u ga, sadi nga mu, ngu nna hkaw tsun nga ai. 42 Ya shan pru wa yang, ndai ga hpang na laban nhtoi hta mung bai hkai dan na shanhte hpyi ma ai. 43 Tara jawng na bra mat wa jang, Yuda ni hte tara hkungga ai proselutu ni law law wa, Pawlu yan Barnaba kaw hkan nang ma ai rai nna, Karai Kasang a chyeju hta shanhte grin nga na matu, shanhte hpe shadum shahprang shaja mu ai. 44 Dai hpang na laban nhtoi hta, Karai Kasang a mungga na la na matu, mare ting ganoi mahkra, wa zuphpawng nga ma ai. 45 Yuda masha ni chyawm gaw dai shawa hpawng hpe mu jang, manawn ai myit hte hpring chyat nga ma ai rai nna, Pawlu tsun ai lam hpe ndang hkat ai hte aroi ara ngu da mu ai. 46 Pawlu yan Barnaba mung nden ja ai myit hte, Karai Kasang a mungga nanhte hpe shawng tsun dan na gaw, lam rai nga ai; raitimung, nanhte mahtang dai hpe gangkau nna, n htum n wai asak hte n ging ai gaw, tinang dai dawdan la myit dai majaw, yu mu, maigan amyu ni hpang de anhte myiman kayin na saga ai. 47 Kaning rai nme law, Lamu ga htum hkra hkyehkrang la ai lam tai wa hkra, Ngai nang hpe, maigan amyu ni a matu nhtoi shatai sade ai, nga nna shi Madu anhte hpe hkang dat mani ai, ngu nna tsun mu ai. 48 Maigan amyu ni dai na jang, kabu gara nga ai hte, Karai Kasang a mungga hpe shagrau sha-a ma ai: n htum n wai asak lu la na san da ai ni nlang hte mung, kamsham mat ma ai. 49 Karai Kasang a mungga gaw dai mung ting pri rai wa sai. 50 Yuda masha ni chyawm gaw, tara hkungga nna arawng lu ai num ni hte, dai mare na agyi ni hte shadut nna, Pawlu yan Barnaba hpe zingri zingrat di shangun ai hte, shanhte a lamu ga jarit na shaden kau mu ai. 51 Shan gaw tinang a lagaw na nhpu shanhte hpang maga ahpu kau da nna, Ikoni mare de du ma ai. 52 Sape ni chyawm gaw, kabu gara ai hte Chyoi pra ai Wenyi hpring nga ma ai.

Kasa 14

14:1 Ya Ikoni mare e rai nga yang, shanhte gaw Yuda masha ni a tara jawng hta rau shang nna, Yuda masha hte Heleni masha wunawng kaba kamsham mat hkra, ga tsun dan mu ai. 2 Raitimung, n madat hkraw ai Yuda masha ni gaw, maigan masha ni hpe myit shadut nna, hpunau ni hpe ndawng na hku gumlau mu ai. 3 Dai majaw shan mung tsawmra na hkra dai yang nga nna, Madu hta hpa let nden ja ai myit hte hkaw dan mu ai rai nna, shi Madu mung, shan a lata hta lamik kumla hte mauhpa amu shabyin ya let, shi a chyeju mungga a lam, sakse hkam ya nga ai. 4 Mare na ni chyawm gaw myit bra wa ma ai rai nna, nkau mi Yuda ni hpang de, nkau mi kasa ni hpang de, rai mat ma ai. 5 Ya maigan masha hta na ni mung, Yuda masha ni hte shanhte a agyi ni mung, shan hpe aroi arip di nna nlung hte kabai sat na nga htim ma ai hpe, 6 shan dum rau na, Lukaoni mung na mare, Lustra, Derbe hte dai yan a ginwang de hprawng mat wa ma ai: 7 dai hkan e mung dai kabu gara shiga hkaw dan mu ai. 8 Ya Lustra mare hta e, kanu a hkritung nna lagaw hten ai chyahten labye rai nna, galoi mung n hkawm yu ai wa langai mi, dung nga ai. 9 Shi mung Pawlu tsun ai ga madat nga ai; dai wa hpe Pawlu azi yu wu yang mai wa lu hkra kamsham ai myit rawng nga ai hpe shi chye ya nna, 10 Ai jan rawt tsap u, nga nna, nsen shaja tsun wu ai; shi mung, gumlawt rawt nna hkawm yu nga ai. 11 Shingrai, Pawlu galaw ai amu hpe shawa masha ni mu jang, shanhte gaw Lukaoni ga hte, Hpara ni, masha hkum hkrang dagraw nna, anhte hpang de yu hkrat wa mara ai, nga nna jahtau ma ai. 12 Dai rai nna shanhte gaw, Barnaba hpe Zeu, Pawlu ga ningbawng wa re ai majaw, shi hpe Herma, ngu nna shamying mu ai. 13 Dai mare shinggan e nga ai Zeu jawng na hkinjawng wa mung, mare chyinghka hkan e usu hte nampan shanghkawng ni la sa nna, shawa masha ni hte rau hkungga jaw na maw ma ai. 14 Raitimung, kasa Barnaba yan Pawlu gaw dai na jang tinang a hpun palawng gang je kau let, shawa hpawng ka-ang de gat shang nhtawm, 15 Hkau hte e, hpa rai dai galaw wa myit ta? An mung nanhte hte maren shinggyim masha yan sha rai ga ai; ndai kaman lila amu kau da nna, sumsing lamu hte ginding aga, nammukdara hte dai hta rawng ai nga manga hpe hpan tawn da ai, ahkrung nga ai Karai Kasang hpang de kayin wa myit ga, ngu nna she nanhte hpe kabu gara shiga hkaw dan ai rai nga ai. 16 Shi gaw, moi shawng na ni a ban e masha amyu baw shagu hpe, tinang ra ai hku hkan mu ga nga, dat tawn da mu ai; 17 raitimung, shi hkum a sakse kata ai n rai; mai kaja ai amu galaw let sumsing lamu na marang hte, nsi naisi shangai chye ai duhkra ladaw shi jaw da ai hte, nanhte hpe lusha hte mung kabu gara ai hte mung, jahkru shakat ya nga ai, ngu nna jahtau mu ai. 18 Shing nga tsun yang pyi, shawa masha ni shan hpe hkungga jaw na lam, n hkum dang na daram she rai wa ai. 19 Dai hpang, Antioki hte Ikoni mare hkan na Yuda masha ni sa du nna, shawa hpawng hpe woi awn nhtawm, Pawlu hpe nlung hte kabai nna, shi hpe si mat sai zawn nawn ai majaw, mare shinggan de karawt shapraw kau mu ai. 20 Raitimung, sape ni grup rai tsap nga yang, shi rawt nna mare de shang wa ai; hpang shani e shi Barnaba hte rau Derbe mare de sa wa ai. 21 Dai mare hta e kabu gara shiga hkaw dan nna, sape law law shatai nhtawm, shan gaw, Lustra, Ikoni, Antioki mare lam bai wa nna 22 sape ni a myit shangang ya let, dai makam masham lam hta agrin nga na matu shadum shahprang ai hte, Karai Kasang a mungdan de ru tsang ai law law hte shang wa na rai ga ai, ngu nna sharin da mu ai. 23 Hpung shagu hta, hpung up salang lata la nna, lusha gam let akyu hpyi ngut jang, shanhte kamsham nga ai Madu a lata hta, ap ya da mu ai. 24 Dai hpang shan gaw, Pesidi mung ga sa wa nna, Pamhpuli mung de du ma ai. 25 Dai yang Perga mare hta mungga tsun dan nhtawm, Atali de yu wa ma ai; 26 dai kaw nna li jawn nhtawm, ya shan gunhpai lai wa sai amu a matu, Karai Kasang a chyeju hta ap nna, shangun dat hkam la ai Antioki mare de bai du wa ma ai. 27 Shan du wa jang, Hpung masha ni hpe jahpawng tawn nna, Karai Kasang shan hta galaw ai lam yawng mayawng mung, maigan amyu ni hpe dai makam masham lam chyinghka hpaw ya wu ai mung, hkai dan mu ai. 28 Shingrai shan gaw, dai yang sape ni hte tsawmra wa na hkra, hkring nga ma ai.

Kasa 15

15:1 Ya Yuda mung na ni nkau mi sa du nna, hpunau ni hpe, Nanhte Mawshe a htung hte maren matu gadoi lam n hkan myit yang gaw, hkyehkrang la ai kaw n du lu na myit dai, ngu nna sa sharin mu ai. 2 De a majaw bra na lam pru nna, Pawlu yan Barnaba dai ni hte grai ndang kalang hkat ma yang, dai lam hpe jahkrup yu na matu, hpunau ni gaw, Pawlu yan Barnaba hte shanhte hta na nkau mi hpe, Yerusalem de nga ai kasa ni hte salang ni hpang de, shangun dat na san da ma ai. 3 shingrai Hpung masha ni shanhte hpe sa sa jang, shanhte gaw Hpinisi mung hte Samari mung ga sa wa let, maigan masha ni a myit malai ai lam hkai dan nna, hpunau ni yawng mayawng hpe grai kabu shangun mu ai. 4 Yerusalem mare de du jang, Hpung masha ni, kasa ni hte salang ni, shanhte hpe hkap hkalum la ma ai rai nna, Karai Kasang shanhte hta galaw dan ai lam magup shanhte hkai dan ma ai. 5 Shaloi Hparishe hpung hta na, kamsham ai ni nkau mi rawt nna, Shanhte hpe matu gadoi hking jaw na hte, Mawshe a tara hku hkan shangun na naw ra nga ai, nga nna tsun ma ai. 6 Ya kasa ni hte salang ni, ndai lam bawng yu na matu, zuphpawng nga ma ai. 7 Dai lam hta law law wa san htai lai nga ma yang, Petru rawt nna shanhte hpe, Hpunau ni e, maigan amyu ni nye a n-gup hta nna, dai kabu gara shiga na la ai hte kamsham u ga nga, shawng nnan e Karai Kasang ngai hpe, nanhte kaw na lata la ai gaw, nanhte chye nga myit dai. 8 Kraw lawang hpe chye ya lu ai Karai Kasang gaw, anhte hpe jaw mi ai hte maren, shanhte hpe mung, Chyoi pra ai Wenyi jaw ya nna, shanhte a hpang maga sakse hkam ya manu ai; 9 shingrai, kamsham ai hte shanhte a myit masin hpe kashin ya mu ai rai nna, anhte hte shanhte a lapran e, hpa hku mung ginhka mi ai n rai. 10 Dai rai yang, ji wa ni e mung n dang, anhte mung n hpai dang ai lit hpe, sape ni a lahpa hta shagun ga nga, hpa rai Karai Kasang hpe chyam yu nga myit ta? 11 Anhte mung shanhte zawn, Madu Yesu a chyeju hte sha hkyehkrang la ai kaw du na, anhte kamsham nga ga ai, ngu nna tsun mu ai. 12 Shaloi shawa hpung ting atsin sha nga nna, Barnaba yan Pawlu, shan a lata hte maigan amyu ni hta, Karai Kasang kaning re ai lamik kumla hte mauhpa amu shabyin ya ai lam ni hkai dan ai ga, madat nga ma ai. 13 Shan a ga htum jang Yaku mung, Hpunau ni e, nye ga madat ya yu mi: 14 Karai Kasang gaw maigan amyu ni hta na, shi a amying ningsang a matu, masha amyu mi hpe shaw la na nga, kaning rai shawng nna shanhte kaw kawan katsan sa yu sai lam, Simun tsun dan ma ni ai. 15 Dai lam gaw myihtoi ni a ga hte mung bung nga ai: dai gaw ning nga ka da nga ai, 16 Dai amu lam ni a hpang e ngai bai wa nna, Daw taw mat ai Dawi a nawku nta hpe bai gap na we ai; De a marawng marang ni ngai bai gaw nna, Dai hpe bai sharawt da na we ai: 17 Shaloi she, hti nga ai masha ni hte, Nye amying hta shamying la ai maigan amyu danghta, ngai Madu hpe tam lu na mara ai, nga nna, 18 Ndai lam hpe chyi nma kaw nna shachye shachyang ai Madu tsun nga ai, nga ai. 19 Dai re ai majaw, maigan masha ni hta na Karai Kasang hpang de kayin wa ai ni hpe, hpa mi n sharu ai sha, 20 Hpara sumla ni a n san n seng ai hte, ndaw liknga lam, du manat sat ai shan hte, asai re ai ni hpe koi gam na lam, shanhte hpe laika hte shana mai ai, ngu nna ngai myit da we ai. 21 Kaning rai nme law, Mawshe a tara gaw laban nhtoi shagu, tara jawng ni hta a hti dan nga ma ai majaw, moi prat kaw nna mare shagu, hta dai tara hkaw dan ai ni nga nga ma ai, ngu nna tsun mu ai. 22 Shaloi kasa ni hte salang ni gaw hpung masha nlang hte bawng nna, shanhte hta na masha lata la nhtawm, Pawlu yan Barnaba hte rau Antioki de shangun dat na lam myit hkrum ma ai: dai hte maren hpunau ni hta na, myitsu ai salang Barsaba ngu ai Yuda yan Sila hpe lata la nna, 23 shan a lata hta ka ya dat mu ai ga gaw, Anhte kasa ni, salang ni, hpunau ni gaw, Antioki mare hte Suri mung, Kiliki mung hkan e nga ai maigan amyu hpunau ni hpang de ngwi pyaw ga shana dat ga ai. 24 Anhte kaw na pru wa wa re ai nkau mi, anhte muk n hkang dat yang, nanhte hpe ga hte shatsang nna myit gale galau di ya ai hpe, anhte na lu saga ai majaw, 25 anhte nlang bawng yu nna, masha lata la nhtawm, anhte a Madu Yesu Hkristu a mying ningsang majaw tinang asak pyi n lahpawt ai, 26 anhte a tsawra ai Barnaba yan Pawlu hte rau, nanhte hpang de shangun dat na, myit hkrum ga ai. 27 Dai re ai majaw anhte gaw Yuda yan Sila hpe shangun dat gaw ai rai nna, shan a n-gup hte nan, laika hta rawng ai lam hte maren, tsun dan na mara ai. 28 Nanhte a matu gaw, Hpara sumla ni hpe nawng ai rai hte, asai, du manat sat ai shan hte, ndaw liknga lam koi gam lu na hta kaga, grau ai lit shaje nanhte hta shagun shara n nga ai, nga nna, Chyoi pra ai Wenyi hte anhte myit hkrum ga ai; 29 dai hte hpe nanhte koi gam nga yang, mai kaja na rai malit dai. Hkam kaja nga myit ga law, nga ai. 30 Shanhte hpe shangun dat mu yang, Antioki mare de du nna, hpung masha ni hpe jahpawng tawn nhtawm, dai shagun dat ai laika hpe ap ya mu ai. 31 Dai hpe hti ngut jang, dai shalan shabran ga majaw, shanhte kabu gara nga ma ai. 32 Yuda yan Sila gaw, myihtoi mung rai ma ai rai nna, mungga law law hte hpunau ni hpe shadum shahprang let shadaw shagang da mu ai. 33 Dai yang e tawng marang mi na hkra nga nga ai hpang, shanhte hpe shangun dat ai hpunau ni hpang de, ngwi pyaw ai hte bai shabawn dat mu ai. 34 Sila chyawm gaw shi myit shadang nna anga nga ai. 35 Pawlu yan Barnaba chyawm gaw, Antioki mare e naw hkring nga ma ai rai nna, manang law law hte, Madu a mungga sharin achyin ya nna, hkaw dan mu ai. 36 Dai hpang, nhtoi ram ram na wa jang, Pawlu gaw Barnaba hpe, Madu a mungga hkaw dan da sai mare shagu hkan na kahpu kanau ni kaning rai nga ma ai, bai sa kawan yu saga, ngu nna tsun wu ai. 37 Barnaba chyawm gaw Marku ngu ai Yawhan hpe shanan la mayu wu ai. 38 Pawlu mahtang, shi gaw Pamhpuli mung nna shan hpe kau da ai hte, shan hte rau amu gunhpai ai de n hkan hkraw ai wa re ai, nga nna n shalawm mayu wu ai. 39 Dai nhkan e shan ga lai nna, langai hte langai hka mat ma ai; Barnaba gaw Marku hpe woi nna, Kupru tsunlawng de li hte sa wa ai. 40 Pawlu chyawm gaw Sila hpe lata la nna, hpunau ni mung shi hpe Madu a chyeju hte ap dat ngut jang, pru sa wa ma ai. 41 Shingrai Pawlu gaw, Suri mung, Kiliki mung hku ga sa wa nna, Hpung masha ni hpe shadaw shangang mu ai.

Kasa 16

16:1 Derbe hte Lustra mare de mung shi du nna, yu u, dai yang e Timohti mying ai sape langai mi nga nga ai; kanu gaw kamsham ai Yuda num, kawa chyawm gaw, Heleni masha rai nga ai. 2 Dai sape gaw, Lustra hte Ikoni mare nga ai kahpu kanau ni hta, sari sadang lu ai wa rai nga ai. 3 Pawlu gaw dai wa hpe shanan la mayu ai rai nna, shi a kawa Heleni masha rai nga ai gaw, dai yang na Yuda masha ni nlang chye ma ai majaw, shanhte hpe tau nna, shi hpe matu gadoi hking jaw wu ai. 4 Shingrai, dai mare ni ga sa wa let, Yerusalem na kasa ni hte salang ni hkang dat ai ga matsun hpe, hkan nang mu ga nga, shanhte hpe ap jaw ma ai. 5 Hpung masha ni mung dai makam masham lam hta ngang wa nna, lani hte lani law htam wa ma ai. 6 Ya, Asi mung e mungga lam tsun dan na, chyoi pra ai Wenyi shanhte hpe hkum shadang mu ai majaw, shanhte Hprugi hte Galati mung de ga sa wa nna, 7 Musi mung du magang yang, Bihtuni mung de shang sa wa na maw ma ai; raitimung, Yesu a Wenyi shanhte hpe ahkang n jaw mu ai majaw, 8 Musi mung makau garet sa wa nna, Troa mare de du ma ai. 9 Dai yang, shana e Pawlu gaw shingran hta, Makedoni masha langai mi sa tsap nna, Makedoni mung de rap sa nna, anhte hpe karum la mi, nga nna shi hpe hpyi ai mu wu ai. 10 Shingran dai mu nna, Makedoni masha ni hpe kabu gara shiga hkaw dan na matu, Karai Kasang anhte hpe shaga ai rai sai, ngu nna myit la nhtawm, Makedoni mung de rap na matu anhte shaloi jang tam shajin ga ai. 11 Dai re ai majaw, anhte Troa mare nna, Samohtrake tsunlawng de ang ang li hta jawn sa wa nna, hpang shani e Neapoli mare de du ga ai; 12 dai kaw na bai lai yang, Makedoni mung e, Roma masha de ai, dai ginwang na mare daju, Hpilipi de, anhte du nna, dai yang tawng marang mi nga nga ga ai. 13 Laban nhtoi du jang, akyu hpyi ai shara nga na zawn nawn nna, mare chyinghka shinggan, hka kau de anhte pru sa nhtawm, dung nga let, dai de hpawng sa wa ai num ni hpe tsun dan ga ai. 14 Shaloi, Karai Kasang hpe nawku ai, Htuatira mare na, sumpan hkyeng dut ai num, Ludi ngu ai jan anhte a ga na la nna, Pawlu tsun dan ai lam hpe madat mara u ga nga, Madu gaw shi a myit hpaw ya wu ai. 15 Num dai hte shi a nta masha ni baptisma hkam la ngut jang, shi gaw, Dai Madu hta ngai kangka rai ni ai, nanhte myit hkut da sai rai yang gaw, nye nta e shang manam marit, nga nna anhte hpe akroi anoi hpyi ai hte nga shangun mi ai. 16 Dai hpang anhte dai akyu hpyi ai shara de sa wa nga yang, gumhpan hpan nna, madu ni hpe sut grai jasu ai nat shung ai mayam nunsha langai mi anhte hte hkrum hkrum re ai. 17 Numsha dai mi Pawlu hte anhte kaw hkan nang nang rai nhtawm, Ndai ni gaw law, nanhte hpe hkyehkrang la ai lam tsun dan ai, Tsaw Htum ai Karai Kasang a shangun ma ni rai nga ma ai law, nga nna jahtau htau re ai. 18 Law law ya wa shi shing re ai majaw, Pawlu grai myit n pyaw nna, kayin nhtawm, dai nat hpe, Yesu Hkristu a mying ningsang hte ngai nang hpe tsun de ai, shi kaw na pru mat u, ngu nna daru wu yang, dai ahkying hta nan shi pru mat wa ai. 19 Ya shi a madu ni gaw, ma-un shabrai lusha na lam myit mada shara n nga sai, chye jang, shanhte Pawlu yan Sila hpe rim la nna, gat de nga ai agyi salang ni hpang de karawt wa mu ai; 20 shingrai, mare up ai ni a man de shan hpe woi shashawn n htawm, Ndai Yuda masha yan, anhte a mare hpe nachying sharu shatsang ai hte, 21 anhte Roma masha ni n mai hta, n mai hkan ai htunghking hpe sa sharin nga ma ai, ngu nna tsun mu ai. 22 Dai rai nna shawa masha ni shan a maga mi de lang lata rawt ma ai; mare up ai ni mung, shan a hpun palawng hpe gang je kau ya nna, ri tawng hte kayat na lam, dawdan mu ai. 23 Shingrai, shan hpe law law lang kayat nhtawm, htawng hta rawng da mu ai rai nna, shan hpe ashim sha sin da na lam, htawng agyi wa hpe hkang dat mu ai; 24 htawng agyi wa mung, shing nga hkang dat ai ga majaw, shan hpe htawng na kata gawk hta shashawn nna, share hte sharen tawn mu ai. 25 Raitimung, yuptung hpawa e Pawlu yan Sila gaw akyu hpyi ai hte, Karai Kasang hpe mahkawn mangoi nga ma ai rai nna, bawngdung ai ni shan a ga madat nga ma ai. 26 Shaloi nnang nawn kaba akajawng sha nawn wa nna, htawng nta npawt ni awam wa ai hte, chyinghka mahkra ahkring sha hta hpaw malang mat shajang nna, yawng hte a hkang hkyihkyang ni malaw mat wa ai. 27 Htawng agyi wa mung, yup hprang nna, htawng chyinghka ni hpaw maden nga ai mu jang, bawng ni hprawng mat masai nga, myit la nna, shi a nhtu shaw nhtawm, shi dai dai galun si na hkyen nga ai. 28 Pawlu chyawm gaw, Nang dai, na hkum hpe hkum shaza et, anhte nlang ahkum sha rai nga ga ai law, ngu nna aja awa jahtau tsun wu ai. 29 Shaloi shi pyengdin hpyi lang nna, kata de gat bang wa nhtawm, hkrit gari let Pawlu yan Sila man e dingnyawm nga ai; 30 bai shan hpe woi pru nna, Madu yan e, ngai hkyehkrang la ai kaw du lu hkra, kaning rai na rai ta? ngu nna san mu ai. 31 Shaloi shan gaw, Madu Yesu hpe kamsham u; shaloi nang hte na nta masha ni nlang, hkyehkrang la ai kaw du na marin dai, nga nna tsun ai lata, 32 dai htawng agyi wa hte shi a nta masha nlang hte hpe Madu a mungga hkaw tsun dan mu ai. 33 Dai shana ahkying hta nan, shi shan hpe woi wa nhtawm, shan a nma kashin kau ya nna, shi hkum hte nta ting hpawn, shaloi jang baptisma hkam la ma ai. 34 Bai, shi a nta nhku de mung shi shan hpe woi shashawn la nna, lusha galaw daw let, Karai Kasang hpe kamsham lu sai majaw, shi hte nta ting hte hpawn, ja ja kabu gara nga ai. 35 Ya nhtoi htoi jang, mare agyi ni gaw, Dai yan hpe dat dat u, ngu nna mang galang ni hpe sa tsun shangun mu ai. 36 Shaloi htawng agyi wa, dai ga Pawlu hpe tsun dan let, Nan hpe dat dat na, mare agyi ni masha shangun mara ai majaw, ya angwi apyaw pru wa masit, ngu nna tsun nga ai. 37 Pawlu chyawm gaw, An Roma masha she rai nga ga ai hpe, garai n san dawdan yang, masha man e an hpe kayat nna, htawng hta jahkrat da myit htawm me, ya atsin sha lagyim dat dat na maw ma hka i? N rai law, shanhte hkum lala she sa shapraw la mi ga, ngu nna shanhte hpe htan dat mu ai. 38 Mang galang ni mare agyi ni hpe ga dai wa tsun dan wu yang, shan gaw Roma masha re ai na jang, hkrit nna, 39 shanhte hkum nan shan kaw sa nhtawm, sa nem shapraw la nna, dai mare na pru wa na lam hpyi nem ma ai. 40 Shaloi shan gaw dai htawng na pru wa nna, Ludi a nta de shang wa ma ai; shingrai hpunau ni hpe mu jang, shanhte hpe shalan shabran tawn da nhtawm, pru mat wa ma ai.

Kasa 17

17:1 Dai hpang shanhte gaw Amhpipoli hte Apoloni mare ga sa wa ma yang, Htesaloni mare de du ma ai;dai yang e Yuda masha ni a tara jawng rai nga ai. 2 Pawlu gaw shi a htung hte maren, shanhte kaw shang nna, Laban nhtoi masum ting, Chyum laika hku hkan nna shanhte hte tsun chyai let, 3 Hkristu gaw nni nkri hkrum lu na hte, si ai kaw na bai hkrung rawt wa na gaw, shi a lam rai nga ai, nga nna mung, Ngai nanhte hpe tsun dan ai Yesu gaw, dai Hkristu nan rai nga ai, nga nna mung, shanhte hpe jahprang mu ai. 4 Shanhte hta na nkau mi gaw kamsham nna, Pawlu yan Sila hte kanawn nga ma ai;dai ni hta, tara hkungga ai Heleni masha law law wa hte, arawng lu ai num ni ram ram mung, lawm ma ai. 5 Yuda masha ni chyawm gaw myit manawn nna, pagawn para re ai masha ni hta na n hkru ai masha nkau mi hpe saw la ntawm, masha jahpawng tawn nna, mare ting hpe kabrawng shangun mu ai; shingrai, Yasun a nta hpe adip nna, shawa masha ni hpang de shan hpe shapraw ya na hku, tam ma ai, 6 Shan hpe n mu jang, Yasun hte hpunau ni nkau mi hpe, shanhte mare du gyi ni hpang de karawt sa nna, Mungkan ting hpe galau kau hkawm ai ndai ni, nang de mung du mara ai hpe, Yasun shan hpe hkap la mu ai: 7 shanhte mahkra, Yesu ngu ai hkawhkam kaga langai mi naw nga ai, nga nna tsun ma ai majaw, Kehta tara hte nhtan shai ai, rai nga ma ai, nga nna jahtau tsun ma ai, 8 Mare masha ni hte mare agyi ni dai ga na ma yang, myit ru myit ra nga ma ai. 9 Raitimung, Yasun hte kaga ni kaw na pahkam hkam la nhtawm, shanhte hpe dat da mu ai. 10 Hpunau ni chyawm gaw dai shana jang, Pawlu yan Sila hpe Beria mare de shangun dat mu ai; dai de du yang, shan gaw Yuda ni a tara jawng hta shang bang wa ma ai. 11 Dai mare masha ni gaw Htesaloni masha ni hta myit grau su ma ai rai nna, dai mungga hta myit shawn loi ai hte, dai lam ni teng ai n teng ai chye lu hkra, Chyum laika hpe shani shagu a yu nga ma ai. 12 Dai rai nna, shanhte hta na law law wa kamsham shajang ma ai; arawng lu ai Heleni numsha, lasha ram raw mung, lawm ma ai. 13 Pawlu gaw Beria mare hta mung, Karai Kasang a mungga hkaw dan nga ai lam, Htesaloni mare na Yuda masha ni chye yang, dai de mung shanhte sa nna, mare masha ni hpe myit sharawt nna, kabrawng shangun mu ai. 14 Shaloi hpu nau ni gaw Pawlu hpe nammukdara makau sa du hkra, shaloi jang, sa kau dat mu ai;Sila yan Timohti chyawm gaw naw hti nga ma ai. 15 Raitimung, Pawlu hpe hkan sa ai ni gaw, Ahten mare du hkra shi hpe hkan sa kau da nna, Sila yan Timohti hpe alawan hkan nang na lam, htet dat ai ga gun let, bai wa ma ai. 16 Ya Pawlu, Ahten mare hta dai yan hpe la let hkring nga yang, dai mare ting Hpara sumla hkrai chyat rai nga ai mu nna, shi a wenyi kahtet bu nga ai. 17 Dai re ai majaw shi gaw, tara jawng hkan e Yuda masha ni hte tara hkungga ai ni hte mung, shani shagu gat hkan e hkrum mahkrum ni hte mung, tsun dan hkat nga ai. 18 Dai rai nna, Epikuri lam hte Sto-i lam hkan ai hpaji sara ni nkau mi, shi hte dang rang hkat ma ai rai nna, nkau mi gaw, Ndai bawlaw ai wa hpa tsun mayu nga ai kun? nga nna mung, nkau mi gaw, Hpara kaga ni a lam tsun dan ai wa rai sam ai, nga nna mung, tsun shajang ma ai: dai gaw, shi Yesu a lam hte bai hkrung rawt wa ai lam tsun dan ai majaw rai nga ai. 19 Shing nga tsun nhtawm, Pawlu hpe Aripagu ngu ai kawng de woi lung wa nna, Dai nang tsun ai sharin shaga lam ningnan, anhte mung chye yu mawe ga ? 20 Mau na zawn nga ai lam nkau mi, nang anhte hpe tsun dan ndai rai nna, dai lam hpa nga mayu ai gaw, anhte chye mayu ga ai, ngu nna tsun mu ai. 21 (Ya Ahten masha nlang hte hte dai yang na shingbyi manam ni gaw, amu ningnan lama ma a lam, hkai chyai ai hte madat mara let, nhtoi shalai nna nga nga ma ai.) 22 Shaloi Pawlu dai Aripagu ka-ang e tsap nna tsun mu ai gaw, Ahten masha ni e, lam shagu hta Hpara ni hpe nanhte ja ja hkrit hkungga myit dai gaw, ngai mu nngai. 23 Kaning rai nme law, ngai lai hkawm wa nna, nanhte jaw jau ai rai ni hpe mada yu yang, N chye gaw ai Karai Wa matu, nga nna ka tawn ai hkungri langai mi mung, ngai mu hkrup we ai: dai nanhte n chye let nawku ai wa a lam, ngai nanhte hpe hkai dan made ga, 24 Mungkan ga hte dai hta nga ai yawng mayawng hpe, hpan tawn da ai Karai Kasang gaw, sumsing lamu hte ginding aga a Madu rai nga ai rai nna, masha lata hte shachyaw ai nawku nta hta rawng nga ai n rai: 25 shi nan, yawng mayawng hpe hkrung ai asak, nsoi nsa hte arai hkum sumhpa jaw ya ai wa rai nga ai majaw, lama ma ra ai wa zawn masha lata hte dawjau ra ai n rai. 26 Shi gaw, shinggyim masha ni Karai Kasang hpe hkan tam masawp lamawm yu nna, mu yang me mu mu ga nga, dinghta ga e nga pra na matu, masha amyu danghta hpe daju langai hte sha hpan tawn da nna, 27 du hkra ladaw hte buga jarit madat da ya mu ai; shing nga tim shi anhte kadai hte mung tsan nga ai n rai: 28 kaning rai nme law, shi a jaw e anhte hkrung nga nna, shamu shamawt nga ai hte nga pra ga ai. Dai hte maren, nanhte hta na ningtam laka ni pyi, Anhte mung Shi a amyu matu ni rai nga ga ai, nga nna ka ma ai. 29 Shingrai, anhte Karai Kasang a amyu matu ni rai nga ga ai majaw, Karai Kasang ngu ai hpe, masha a hpaji lata hte tawk ka ai aja, gumhpraw, nlung sumla hte bung ai, ngu nna n mai myit la ga ai. 30 N na n chye nna lai mat sai prat hpe, Karai Kasang shatawt lai kau wu timung, ya gaw, shara magup hkan na masha nga yawng hpe, myit malai lu mu, nga nna hkang dat ra ai: 31 kaning rai nme law, shi e san da sai wa a lata hte mungkan ga hpe dingman ai hku dawdan na nhtoi gaw, shi tawn da nu ai: dai wa hpe si ai ni kaw na shi hkrung sharawt la ai hte, dai san da ai lam hta, masha yawng a man e kam ram ai sakse tawn da nu ai, ngu nna tsun nga ai. 32 Si sai ni bai hkrung rawt ai nga ai lam na jang, nkau mi gaw jahpoi asawng ma ai: nkau mi chyawm gaw, Ndai lam, na a ga anhte lang mi naw madat yu na ga ai, nga nna tsun ma ai. 33 Shingrai Pawlu mung shanhte kaw na pru mat wa ai. 34 Raitimung, masha nkau mi shi hte kanawn nna kamsham mat ma ai: dai ni hta na Aripagu kawng agyi Dionusi hte Damari mying ai num langai mi mung. dai hta kaga masha ni mung, lawm ma ai.

Kasa 18

18:1 Ya dai lam byin ai hpang Pawlu gaw, Ahten mare na pru nna, Korinhtu mare de du ai. 2 Dai yang, Pontu mung masha, Akula mying ai, Yuda la langai mi hte hkrum wu ai; dai wa gaw, Yuda masha nlang, Roma mare na pru wa lu na, nga nna, Hkawhkam Klawdi ga dat ai majaw, madu jan Priskila hte rau Itali mung na htawt wa ai, gade garai n na ai; ya shi gaw, dai yan kaw manam nga ai: 3 shanhte janghpang chywi sha ai hkrai rai nna, galaw sha bungli baw sha rai malu ai majaw, shi mung shan hte rau amu jawm galaw nna, nga nga ai. 4 Laban nhtoi shagu, tara jawng hta Yuda masha hpe mung, Heleni masha hpe mung, tsun hkat let awn da mu ai. 5 Ya Sila yan Timohti Makedoni mung nna hkan dep jang, Pawlu gaw mungga hkaw lam hkrai san rai nna, Yesu gaw Hkristu nan rai nga ai, nga nna Yuda masha ni hpe sakse hkam da wu ai. 6 Shanhte chyawm gaw hkap ndang ai hte aroi ara nga ma yang, shi palawng ahpu dan let, Nanhte a asai gaw nanhte a baw e mara nga nu ga; ngai chyawm gaw lawt ni ai: ya kaw nna gaw, maigan amyu ni hpang de ngai kayin mat wa na ni ai, ngu nna shanhte hpe tsun mu ai. 7 Dai yang na shi pru nhtawm, Karai Kasang hpe nawku ai Titu Yustu mying ai wa a nta de, shang bang wa ai; dai wa a nta gaw tara jawng hte htep rai nga ai. 8 Krispu mying ai tara jawng agyi wa mung, shi a nta masha nlang hte hte hpawn, Madu hpe kamsham ma ai: Korinhtu masha ni law law mung, na la nna kamsham ai hte baptisma hkam la ma ai. 9 Dai shaloi Madu gaw shana e shingran hta Pawlu hpe hkum hkrit et; she tsun u, atsin sha hkum nga et; 10 ngai nang hte rau rai nga nngai, nang hpe shoihpa jahkrum na kadai lata shadu lu na n rai; ndai mare hta nye a masha law law nga nga ai, ngu nna tsun wu ai. 11 Shingrai dai yang e Karai Kasang a mungga sharin achyin ya let, laning me shata kru anga nga ai. 12 Raitimung, Galio gaw Ahkaia mung e munggyi rai nga yang, Yuda masha ni lang lata sha Pawlu hpe gumlau rawt nna, shi hpe tara tingnyang de dun wa nhtawm, 13 Ndai wa jep ai tara hte nhtan shai ai hku, Karai Kasang hpe nawku na nga, masha ni hpe woi gunglau nga ai, ngu nna mara shagun mu ai. 14 Shaloi Pawlu htan na nga, n-gup ap sha naw rai yang, Galio mahtang, Yuda masha ni e, amu ndai, tara tawt lai ai amu, n hkru n hkra re ai amu rai yang gaw, ngai nanhte a matu sharang ya lu na nngai: 15 raitimung, aga sumtu lam, amying shingjawng lam hte, nanhte a tara lam sha tsun hkat ai rai yang gaw, nanhte dai nanhte yu la mu: dai zawn re ai amu a matu ngai tara agyi n tai mayu nngai, ngu nna Yuda masha ni hpe daru kau wu ai. 16 Shing nga shi shanhte hpe tara tingnyang na shaden kau mu ai. 17 Shaloi shanhte nlang tara jawng agyi wa Sosteni hpe rim la nna, tara tingnyang man e anu kau mu ai: Galio chyawm gaw, dai lam hpe hpa mung n nawn wu ai. 18 Dai hpang Pawlu gaw, dai yang nhtoi tsawmra wa na hkra naw nga nga nhtawm, hpunau ni hpe shakram da nna, li jawn let Suri mung de sa wa ai;Priskila yan Akula shan la mung, shi hte rau rai nga ma ai;shawng e ga shaka da ai ga nga lu ai majaw, Kenhkrea mare e baw doi wu ai. 19 Shaloi shanhte Ehpesu mare de du nna, shi shan hpe dai yang e jahka tawn da mu ai: shi chyawm gaw tara jawng de shang nna, Yuda ni hte tsun hkat nga ai. 20 Dai yang na ni shi hpe, shanhte kaw tawng marang mi naw nga nga na hpyi ma timung, shi mahtang n hkraw let, Ya du magang ra ai poi hta Yerusalem e ngai lawm ra nngai. 21 Karai Kasang hkraw yang gaw, ngai nanhte hpang de bai du na ring ngai, ngu nna shanhte hpe shakram da nhtawm, Ehpesu kaw na li hte pru mat wa ai. 22 Ya Kesare mare du-jang, shi lung wa nna, dai Hpung hpe wa jahkrum nhtawm, Antioki de bai yu wa ai. 23 Dai kaw tawng mi nga nhtawm, shi bai pru nna, Galati mung hte Hprugi mung ga sa wa let, sape ni nlang hpe shadaw shangang nga ai. 24 Dai hte yang, Apolo ngu ai, Alesandru mare na, zai byeng-ya rawng ai Yuda masha langai mi, Ehpesu mare de du ai: dai wa gaw, Chyum laika grai chye chyang ai wa rai nga ai. 25 Dai wa gaw, Madu a lam sharin la hkrup nna, nachying sharawng let, Yesu a lam atsawm sha sharin achyin ya nga ai; raitimung, shi gaw Yawhan a baptisma lam sha naw chye nga ai: 26 ya shi gaw tara jawng hta nden ja ai myit hte nnan hkaw hpang wa nga ai. Shaloi Priskila yan Akula gaw, shi hkaw tsun ai ga na jang, shi hpe shaga la nna, Karai Kasang a mungga lam azin ayang naw sharin shachyang ya mu ai. 27 Bai shi gaw, Ahkaia mung de rap sa mayu yang, hpunau ni mung, shi hpe galaw shadut nna, sape ni shi hpe hkap hkalum la na matu, shanhte hpang de laika jaw dat ya mu ai: shi du jang, chyeju majaw kamsham ai ni hpe, grai wa shadaw shangang mu ai: 28 kaning rai nme law, Yesu gaw Hkristu nan rai nga ai, nga nna Chyum laika hku madun let, Yuda ni hpe dan dan leng leng, aja awa tsun kapat kau nga ai.

Kasa 19

19:1 Ya Apolo korinhtu mare e nga nga yang, Pawlu gaw lahta mung hku ga sa wa nna, Ehpesu mare de du ai: dai yang shi sape nkau mi hpe hkrum ai rai nna, 2 shanhte hpe, Taw nanhte kamsham sai rai yang, Chyoi pra ai Wenyi lu la manit ni? ngu nna san mu ai: shanhte gaw Chyoi pra ai Wenyi nga ai pyi, anhte n na yu ga ai, nga nna htan mu ai. 3 Bai Pawlu gaw, Dai rai yang, hpa ngu ai baptisma nanhte hkam la myit ta? ngu nna san mu yang, shanhte gaw, Yawhan a baptisma hkam ga ai, ngu mu ai. 4 shaloi Pawlu, Yawhan gaw myit malai baptisma she jaw ai rai nna, shi a hpang e sa ai, Yesu ngu ai wa hpe mahtang, kamsham ra ai, ngu nna mung masha ni hpe tsun mu ai, ngu mu ai. 5 Shanhte dai ga na jang, Madu Yesu a amying hta baptisma hkam la ma ai. 6 Ya Pawlu shanhte a ntsa e lata mara jang, Chyoi pra ai Wenyi shanhte a ntsa e du nna, shanhte ga amyu kaga tsun nna myihtoi htoi ma ai. 7 Shanhte nlang, lasha marai shi lahkawng rai ma ai. 8 Dai hpang Pawlu gaw tara jawng de shang nna, shata masum tup nden ja ai hte Karai Kasang a mungdan lam tsun hkai hkat nga nna, woi awn da wu ai. 9 Raitimung, nkau mi gaw myit ja ma ai rai nna, n madat hkraw ai hta n-ga, shawa masha ni a man e ndai Lam hpe aroi asawng ya jang, shanhte kaw na shi pru nna, sape ni hpe kaga jahka la nhtawm, Turanu ngu ai wa a hpaji jawng hta, shani shanang sharin shaga hkat nga ai. 10 Shingrai ni ning laman hte hta sharin nga ai rai nna, Asi mung ting na ni nlang, Yuda masha da, Heleni mahsa da, Madu a mungga na la lu ma ai. 11 Karai Kasang mung, Pawlu a lata hte chyalai magam ningsam madun wu ai rai nna, 12 Pawlu lang ai hpajet re ai, shingkyit re ai, lama ma machyi ai ning hpang de la wa jang, dai ni mai mat wa ai hte, shung ai nat ni mung pru mat wa ma ai. 13 Dai shaloi e nat hkyawt let, len hkawm ai Yuda masha nkau mi mung, nat ni hpe, Pawlu hkaw tsun ai Yesu a amying hte ngai nanhte hpe shapraw made ai, nga nna nat shung ai ni a ntsa e Madu Yesu a amying nsang la gang ma ai. 14 Skewa ngu ai, Yuda hkinjawng agyi langai mi a shadang sha sanit hte mung shingrai galaw ma ai. 15 Shaloi dai n hkru ai nat shanhte hpe, Yesu hpe ngai chye nngai. Pawlu hpe mung ngai chye da we ai; nanhte mahtang kadai ni rai myit ta? nga nna htan nhtawm, 16 dai nat shung ai wa mung shan a ntsa de gumjawt lung nna, adep anut ai hte, dang kau mana mu ai; dai rai nna shanhte gaw ahpye a lam rai, dai nta na singgu krin hprawng htaw wa ma ai. 17 Dai lam hpe Ehpesu mare na Yuda masha, Heleni masha nlang chye ma yang, shanhte yawng hkrit mat shajang nna, Madu Yesu a amying gaw shagrau sha-a ai lu la nga ai. 18 Kamsham sai ni hta na law law mung sa nna, tinang galaw shut ai lam ni tawngban tsun dan ma ai. 19 Lakle mandan bau sha ga ai ni law law mung, shanhte a laika ni la sa nna, masha yawng a man e nat kau mu ai: dai ni a manu sawn yu yang, gumhpraw lap mun manga ging malu ai. 20 Shingrai, dai Madu a mungga gaw n-gun atsam hta galu kaba maden jat wa nga ai. 21 Ndai lam ni byin ai hpang e, Pawlu gaw, Makedoni mung hte Ahkaia mung ga sa wa ngut yang, Yerusalem de bai wa nhtawm, Dai hpang e Roma mare de mung ngai du yu na nngai, nga nna myit da nga ai. 22 Dai rai nna shi a ningrum ningtau tai ai Timohti yan Erastu hpe, Makedoni mung de shawng shangun dat nhtawm, shi hkum gaw Asi mung e tawng marang mi naw hkring nga ai. 23 Ya dai tawng hte yang dai lam majaw kabrawng kabrang grai wa byin wa ai. 24 Hpa rai nga yang, Demetri ngu ai janghkam wa langai mi, Artemi Hpara num a gumhpraw nta hkrang kaji shachyaw nna, amu galaw manang ni hpe sut woi jasu da mu ai; 25 dai wa gaw shi a janghkam manang ni hte, dai baw amu galaw sha ai kaga ni yawng hpe shaga jahpawng la nna, Manang ni e, ndai baw amu hte sha anhte ngamai nga ga ai gaw, nanhte nan chye nga myit dai. 26 Raitimung ya gaw, Ehpesu mare hta sha nrai sa, Asi mung ting ganoi rai hkra, ndai Pawlu ngu ai wa e, masha lata hte shachyaw ai baw Karai Kasang n re ai, nga nna masha law law hpe gunglau ai hte myit shayit kau ya manu ai, nanhte nan mu nga chye nga myit dai. 27 Dai rai nna, anhte a bungli hpoi mat na hpe tsang ra ai hta n-ga, galu kaba ai Hpara shayi Artemi a nawku htingnu gaw hpa n tai mat nna, Asi mung ting hte mungkan ting nawku ai Hpara shayi sha a hpung shingkang hpoi mat na mung, myit tsang shara rai nga ai, ngu nna tsun mu ai. 28 Dai ga na jang, shanhte masin pawt bu shajang nna, Ehpesu masha ni a Artemi she galu kaba ai law, nga nna marawn ma ai. 29 Shingrai dai mare ting hpe woi kabrawng ai hte, Pawlu a manang, Makedoni masha Geu yan Aristarku hpe rim dun la nna, shanhte a poi wang de lang lata sha htim bang wa ma ai. 30 Pawlu mung dai masha hpawng de shang mayu nga ai, rai tim sape ni shi hpe hkum shadang mu ai. 31 Shi a jinghku Asi poi up nkau mi mung, shi hpe poi wang de n shang u ga nga, masha shangun nna tsun dat mu ai. 32 Dai shawa hpawng chyawm gaw kashuk kashak rai nga ai rai nna, nkau mi baw kaga ga nga marawn bu ma ai; shanhte law malaw gaw tinang hpa majaw sa hpawng ai pyi, n chye ma ai. 33 Ya Yuda masha ni Alesandru hpe shadut mu ai rai nna, masha ni mung shi hpe dai shawa hpawng nna shalun dat mu ai. Alesandru mung shawa hpawng hpe ga tsun hparan kau we ga nga, lata dingsi nga ai. 34 Rai ri mung shi Yuda masha re ai chye jang, yawng hte ting, Ehpesu masha ni a Artemi she galu kaba ai law, nga nna lang lata hkying lahkawng daram na hkra marawn bu ma ai. 35 Ya, mare chyare wa dai shawa hpawng hpe jasim kau ngut jang, shi shanhte hpe, Ehpesu masha ni e, Ehpesu masha ni a mare ndai, galu kaba ai Artemi a nawku htingnu hte Zeu hpara kaw na hkrat ai sumla, bau sin ai mare rai nga ai hpe, nchye ai, kadai wa nga nga a ta? 36 Dai lam ndang shara n nga ai majaw, nanhte atsin sha nga mai ai hte, sadi n dung ai amu gaw n galaw mai myit dai. 37 Shanhte gaw nawku htingnu hpya ya ai ni mung n rai, anhte a Hpara shayi hpe jahpoi ya ai ni mung n re ai mi, nanhte ndai ni hpe dun wa myit hka. 38 Demetri hte shi a janghkam manang ni, marai langai ngai hte mungga lama ma rawng yang gaw, tara rung ni hpaw nga ai, mung du ni mung nga ma ai; shanhte shada da tara dara sa hkat na ma dawng. 39 Lam gale lama ma tsun mayu yang chyawm gaw, mung bawng zuphpawng hta hparan na rai nga ai. 40 Dai ni kabrawng ai amu ndai hta, matu nhpang n nga ai majaw, anhte hta mara shagun na, tsang shara rai nga ai: ning re ai hpawng a lam hpe, hpa majaw hpawng ai ngu nna mung, anhte tsun dan shara n lu ga ai, ngu nna tsun mu ai. 41 Shing ngu nna dai shawa hpawng hpe shabra kau wu ai.

Kasa 20

20:1 Ya dai kabring kabrawng lam sim mat ai hpang, Pawlu gaw sape ni hpe shaga la nna, shanhte hpe shadum shahprang ngut jang, shakram da nhtawm, Makedoni mung de sa wa na pru wa ai. 2 Makedoni ginwang hkan e ga sa wa nna, law law wa shadum shahprang da ngut jang, Heleni mung de wa du ai. 3 Dai yang shata masum nga nhtawm, Suri mung de li hte bai wa na hkyen yang, Yuda masha ni shi hpe gyam ma ai majaw, Makedoni mung hku nhtang wa na, myit da wu ai. 4 Shaloi shi kaw hkan nang ai ni gaw, Beri mare na Puru a kasha Sopata; Htesaloni mare na Aristarku yan Sekundu; Derbe mare na Geu hte Timohti; Asi mung na Tuhkiku yan Trohpimu hte rai ma ai. 5 Shanhte chyawm gaw shawng sa wa nna, Troa mare hta e anhte hpe sa la nga ma ai. 6 Anhte mung Azuma poi lai ai hpang, Hpilipi mare na li jawn nna, manga ya e Troa mare de shanhte kaw du jang, dai yang e nhtoi sanit ya hkring nga ga ai. 7 Ya nhtoi bat a langai ya ngu na shani e, muk ahkyep na matu anhte zuphpawng nga yang, Pawlu gaw hpang jahpawt pru na maw ai majaw, sape ni hpe sharin shaga let, yuptung tung hkra ga tsun galu nga ai. 8 Dai anhte hpawng nga ai ntsa gawk hta e, pyengdin law law tu nga ai. 9 Hkuwawt hku mahka e, Utuhku ngu ai shabrang langai mi yup nga dung nga ai; Pawlu ga naw tsun galu nga yang, dai wa yup malap mat wa ai hte, nata htap masum kaw na di hkrat nna, si mat sai hpe pawn sharawt da mu ai. 10 Shaloi Pawlu yu wa nhtawm, dai wa ntsa e shi hkum mara a hpum let, Hkum kashai myit, nsa naw rawng nga ai. ngu mu ai. 11 Bai shi lung wa nna, muk ahkyep ai hte sha nhtawm, nhtoi htoi ai du hkra shanhte hte tsun chyai ngut jang, shi pru wa ai. 12 Dai ma hpe mung, ahkrung nga ai hte shanhte woi wa nna, grai kabu gara nga ma ai. 13 Anhte mahtang li de shawng sa wa magang nna, Asu mare e she Pawlu hpe hkap shajawn la na myit nna jawn sa wa ga ai: kaning rai nme law, Pawlu shi gaw hkarang hku sa wa na myit nna, dai hku hkang dat mi ai. 14 Shingrai Asu mare e anhte hte hkrum jang, shi hpe shajawn la nhtawm, Mitulene mare de jawn sa wa ga ai. 15 Dai kaw nna bai rawt ai gaw, hpang shani e anhte Kiu tsunlawng makau hku lai wa nhtawm, dai hpang shani e Samu tsunlawng de wa hkring nna, lani mi bai rai jang, Melitu mare de du ga ai. 16 Kaning rai nme law Pawlu gaw, Pentekoti shani e Yerusalem mare de dep lu yang dep hkra nga tin da wu ai rai nna, Asi mung e nhtoi hkatum n shama mayu ai majaw, Ehpesu mare hpe lai kau da na, myit shatawng da wu ai. 17 Ya Pawlu gaw Melitu mare na Ehpesu mare de masha shangun nna, Hpung na salang ni hpe shaga mu ai. 18 Dai ni du jang, shi shanhte hpe tsun mu ai gaw, Asi mung hta ngai nnan shang ai shani kaw nna, ngai nanhte hte tutnawng e kaning rai nga nga nngai mung; 19 shi Madu a magam gunhpai ai hta nachying myit shanem nna, nep myi prwi hte, Yuda masha ni jahte tam ai a majaw ngai hta byin ai sharu shatsang hkam sha ai lam hpe mung; 20 nanhte a matu akyu rawng ai lam magup hpe n ginhtim da ai sha, shawa yawng a man e da, nta shagu hkan e da, 21 Yuda masha hte Heleni masha hpe, Karai Kasang a man na myit malai lam hte, anhte a Madu Yesu a makam masham lam sakse hkam let, ngai shaja nga nngai gaw, nanhte nan chye nga myit dai. 22 Ya, yu mu, nye wenyi hta ngai gyit hkang ai hkrum nna, ngai hpa hkrum hpa hkra na n chye ai wa mi, Yerusalem de sa wa lu na rai nga ai: 23 raitimung, gyit hkang ai hte zingri zingrat na gaw ngai hpe la nga ai, nga nna, mare shagu hta Chyoi pra ai Wenyi ngai e sakse hkam nga ai. 24 Ngai chyawm gaw, nye a gat shadu ra ai lam hpe mung, Karai Kasang a chyeju kabu gara shiga lam sakse hkam na matu, Madu Yesu kaw na ngai lu la ai magam hpe mung, ngut hkra gunhpai lu na rai yang, nye asak hpe pyi lahpawt nngai n rai. 25 Ya bai yu mu, ndai mungdan lam ngai hkaw hkawm yang na hkrum kanawn yu ai ni, nanhte nlang, nye a myiman htawmhpang de bai n mu lu na manit dai, ngai chye nga nngai. 26 Dai majaw masha yawng a asai hte ngai lawt ni ai gaw, ngai dai ni nanhte hpe sakse hkam da made ai. 27 Kaning rai nme law, Karai Kasang a ra ai hku hte tup, nanhte hpe hkaw dan na, ngai ginhtim yu nngai n rai. 28 Karai Kasang gaw shi a sai hte mari la ai Hpung hpe yu lahku na matu, Chyoi pra ai Wenyi nanhte hpe Hpung up ni shatai manit dai majaw, nanhte gaw, tinang hkum dai hte, sagu hpung ting hpe, sadi sahka hte yu nga mu law. 29 Ngai pru ai hpang, Hpung hpe matsan n dum ai, n hkru ai chyahkyawn, nanhte hta shang na ra ai, ngai chye nga nngai: 30 dai hta kaga, nanhte hta na mung, sape ni hpe lau la lu hkra, shut ai hku tsun ai masha paw pru na ra ai. 31 Dai re ai majaw, ngai nanhte mahkra hpe masum ning tup shani shana n sim n sa myi prwi hte shadum shahprang da ai hpe, dum nna a maja nga mu. 32 Ya gaw ngai nanhte hpe Karai Kasang kaw mung, shadaw shangang ya lu ai hte, shachyoi shapra lu la ai ni nlang hte rau, nanhte hpe Sali wunli jaw ya lu ai, shi a chyeju mungga hta mung, ap da masade ai. 33 Ngai gaw gade a aja gumhpraw hpun nba mung n marin yu nngai. 34 Lata ndai ni, ngai hkum hte ngai kaw hkan nang ai ni a ra ai lam magup galaw jaw ai lata rai li ai, nanhte nan chye nga myit dai. 35 Shingrai galaw shaja nna, gawngkya ai ni hpe shadaw mai ai lam mung, Hkam sha ai hta jaw ya ai mahtang grau a nga ai, nga nna Madu Yesu nan tsun ai ga dum ga, ngu nna mung, ngai lam shagu hta nanhte a ningli tai ni ai law, ngu nna tsun mu ai. 36 Shing nga tsun ngut jang, shi lahput hput di nna, shanhte mahkra hte rau akyu hpyi nga ai. 37 Shanhte nlang ja ja hkrap ai hte, Pawlu a du a hpum let shi e pup mu ai. 38 Hpang de shi a myiman bai n mu lu na nga ai ga majaw, shanhte grau yawn ma ai. Li du hkra mung shi hpe hkan sa dat ma ai.

Kasa 21

21:1 Ya anhte gaw shanhte hpe jahka kau da nna li jawn sa wa yang, Kusa tsunlawng de ang ang rai wa nna, hpang shani e Rodo tsunlawng de du ga ai; dai kaw nna Patara mare de du jang, 2 Hpinisi mung de rap wa ai li mu nna, dai hta jawn sa wa ga ai. 3 Ya Kupru tsunlawng mu mada jang, de a hkra maga hku lai mat wa nhtawm, Suri mung de anhte jawn sa wa nna, hpaga rai jahkrat na matu, Turu mare hta sek ga ai. 4 Dai yang na sape ni hpe tam mu nna, dai mare hta sanit ya hkring ga ai: dai sape ni mung Pawlu hpe, Yerusalem de n sa na lam, Wenyi hte tsun mu ai. 5 Sanit ya nhtoi lai jang, anhte bai pru wa ga ai; shanhte mung, madu jan kasha ni hte rau, mare shinggan du hkra hkan sa dat ma ai rai nna, hka kau e hput di let, akyu hpyi ga ai: shingrai shada da shakram ngut jang, 6 anhte li de shang nna, shanhte mung nta de bai wa ma ai. 7 Bai Turu mare na anhte a li jawn lam htum nga yang, anhte Toleme mare de du ga ai; dai yang na hpunau ni hte shachyen nna, shanhte hte rau lani mi rau nga ga ai. 8 Hpang shani e anhte bai pru nna, Kesare mare de du ga ai; shingrai sara sanit hta na, kabu gara shiga hkaw tsun ai wa Hpilip a nta e, anhte shang manam nga ga ai. 9 Dai wa gaw myihtoi htoi ai shayi hkawn jet mali lu ai. 10 Shi a nta e anhte tawng marang mi nga nga yang, Agabu ngu ai myihtoi langai mi, Yuda mung na sa du ai. 11 Dai wa anhte kaw shang nna Pawlu a shingkyit la nhtawm, shi dai dai shi a lagaw lata gyit nna, Chyoi pra ai Wenyi ning nga tsun nga ai, Ndai shingkyit madu hpe Yuda masha ni Yerusalem mare e ning di gyit nna, maigan amyu ni a lata de ap kau na mara ai da, nga nna tsun ai. 12 Ga dai na jang, anhte hte dai yang na ni gaw, Yerusalem de n sa na lam shi hpe hpyi hkum gaw ai. 13 Pawlu chyawm gaw, Nanhte hpa rai hkrapngu hkrapngoi nga nna, nye myit hpe gawng run shangun ya nga myit ta? gyit hkang ai sha n-ga, Madu Yesu a amying ningsang majaw, Yerusalem e sa si hkam na pyi ngai jin jin rai nga nngai, ngu nna htan shangap wu ai. 14 Shingrai n shabai lu gaw yang, Karai Kasang a myit rai nu ga, ngu nna anhte mung atsin sha nga ga ai. 15 Dai hpang anhte gaw arai shachyip la nna Yeru salem de lung wa ga ai. 16 Kesare na sape nkau mi mung, anhte hte rau sa ma ai rai nna, anhte hpe manam hkap na wa, Kupru masha, Manason ngu ai shawng shawng na sape langai mi kaw sa bang da mi ai. 17 Ya Yerusalem de du jang, hhpu nau ni anhte hhpe kabu gara ai myit hte hkap la mi ai. 18 Hpang shani e Pawlu anhte hte rau Yaku kaw shang nna, salang ni nlang mung hpawng nga ma la ai. 19 Shanhte hte shachyen ngut jang, shi gunhpai ai amu majaw, Karai Kasang maigan amyu ni hta shabyin wa ai amu lam langai hte langai hkai dan mu ai. 20 Dai na jang shanhte mung Karai Kasang hpe shagrau sha-a ma ai: bai shanhte gaw Pawlu hpe, Hpu wa e, Yuda masha hta na kamsham ai ni gade mun hkying law nga ma ai gaw, nang chye nga ndai; dai ni mahkra jep ai tara hta myit jung ai hkrai rai nga ma ai: 21 raitimung, maigan amyu ni hta jahkran nga ai Yuda masha yawng hpe, tinang a kashu kasha ni e matu gadoi n jaw ra ai hte, tara htunghking n hkan nga na, nga nna Mawshe a tara kabai kau na hku nang sharin achyin ya ai da, nga ai ga dai ni nlang na ma masai. 22 Ya kaning rai na rai ta? Nang du ai gaw shanhte gaja wa na lu na masai. 23 Dai rai nna anhte tsun ai hte maren hkan galaw u: anhte kaw ga shaka da ai marai mali nga ma ai. 24 Dai ni hpe shaga la nna, shanhte hte rau nang hkum jasan jaseng u; shanhte baw shangun lu hkra hkungga jahpu shapraw ya u: shaloi she na a lam shanhte na ai shi n teng nga ai hte, nang hkum nan jep ai tara htunghking hkan shatsup ai wa rai nga ai gaw, masha nlang chye na na mara ai. 25 Kamsham ai maigan masha ni a lam chyawm gaw, shanhte sumla hpe nawng ai rai hte, asai, du manat sat ai shan, ndaw liknga lam koi gam na, anhte dawdan let ga shangun sagaw ai, ngu nna tsun mu ai. 26 Dai re ai majaw Pawlu gaw dai la ni hpe shaga la nna, hpang shani e shanhte hte rau shi hkum jasan jaseng nhtawm, nawku Htingnu de shang nna, shanhte langai hte langai a matu hkungga jaw lu hkra, shanhte a jasan jaseng nhtoi gu sai lam sa tsun dan mu ai. 27 Ya dai nhtoi sanit gu magang yang, Asi mung na Yuda masha ni nawku Htingnu e Pawlu hpe mu jang, shawa masha ni hpe myit sharawt nna, shi e rim la let, Israela masha ni e, karum marit; 28 ndai wa gaw shara shagu hkan e yawng mayawng hpe anhte a amyu hte jep ai tara hpe mung, ndai shara hpe mung, nhtan shai ai hku sharin achyin ai wa re ai law; dai hta n-ga, nawku Htingnu hta Heleni masha shashawn nna, ndai chyoi pra ai shara hpe awu asin di kau nu ai law, nga nna jahtau ma ai. 29 Hpa majaw law nga yang, Trohpimu ngu ai Ehpesu masha langai mi hpe, mare e Pawlu hte rau shanhte mu manu ai rai nna, dai wa hpe nawku Htingnu de shashawn nu ai, nga nna myit ma ai. 30 Mare ting kabring kabrawng rai nna, shawa masha ni gat ginbawm bang wa ma ai; shanhte Pawlu hpe ahkyit karawt la nhtawm, Htingnu shinggan de shapraw la nna, chyinghka ni hpe alawan la da ma ai. 31 Shingrai Pawlu hpe sat kau na maw nga ma yang, Yerusalem mare ting kabrawng nga ai, nga nna hpyendap up ai bu kaba kaw ga hkawn pru ai. 32 Shaloi jang hpyen ma hte hpyenbu shaga la nna, shanhte hpang de gat bang wa ai: shanhte chyawm gaw hpyenbu kaba hte hpyen ma ni hpe mu jang, Pawlu hpe kayat ai, da kau mu ai. 33 Shaloi hpyenbu kaba sit sa nna, Pawlu hpe dun la nhtawm, hpri sumri lahkawng hte gyit na hkangda mu ai: shi kadai re ai, hpa shut ai mung, san yu wu ai. 34 Shawa masha ni chyawm gaw, nkau mi kaga ga nga nna jahtau bu ma ai hte, nau garu ai majaw, atsawm sha n chye lu wu yang, Pawlu hpe hpyen wing de shashawn na hkangda wu ai. 35 Lakang nhpang du jang, shawa masha ni nau anin ai majaw, hpyen ma ni shi e pawn lung wa mu ai. 36 kaning rai nme law, shawa masha ni mahtang, Sa sat kau mu, nga nna a hkan jahtau nang nga ma ai. 37 Ya hpyen wing de Pawlu hpe shashawn na ningtawn e, Pawlu gaw hpyenbu kaba wa hpe, Nang hpe ga hkaw mi tsun lu na a ni? ngu nna san wu yang, hpyenbu kaba gaw, Nang Heleni ga chye n ni? 38 Dai rai yang, shawng de lang mi gumlau rawt nna, nam mali hkan e damya hkying mali hpe woi ginrawn hkawm ai Egutu masha nang n rai n ni? ngu nna san wu ai. 39 Pawlu chyawm gaw, ngai Kiliki mung na, Tarshu mare Yuda masha rai nga nngai; ngai nga ai mare gaw kaji kashan sha n rai li ai: ndai masha ni hpe ga tsun lu na ahkang jaw e, ngu nna hpyi nem wu ai. 40 Shi hpe ahkang jaw jang, Pawlu gaw lakang baw e tsap let, lata dingsi nga ai: shanhe a katsi sha rai jang, Hebre ga hte shanhte hpe tsun wu ai gaw,

Kasa 22

22:1 Hpunau ni hte Wa ni e, nanhte a man e ngai mara raw ai ga, madat mara ya mi, ngu wu ai. 2 Hebre ga hte shanhte hpe tsun ai na jang, grau nna tsin nga ma ai: shaloi shi gaw, 3 Ngai gaw Kiliki mung, Tarshu mare e shangai ai Yuda masha rai nga nngai; raitimung, ndai mare hta Gamale a lagaw nhpang e ngai kaba wa nna, anhte a ji wa ni a ja la ai jep ai tara htunghking hte maren azin ayang sharin achyin la nna, dai ni na nanhte zawn, ngai mung, Karai Kasang hpang maga myit kaba ai hte, 4 numsha lasha hpe gyit hkang sharen nna, htawng hta bang kau let, ndai lam hpe sat kau ai du hkra, zingri zingrat yu ni ai. 5 Hkinjawng agyi wa hte salang hpung ting mung, nye a sakse ni rai nga ma ai; shanhte kaw na laika, hpunau ni a matu ngai lu la nna, Damasku mare e nga ai ni hpe mung, ari jahkrum na matu, Yerusalem de gyit dun wa n ga, ngu nna Damasku de ngai lung wa nngai. 6 Shingrai ngai sa wa nna, Damasku mare de du magang yang, jan pungding madi ai hpawa e, lamu de nna nhtoi kaba nye a grupyin e shajawng sha htoi tu pru ai. 7 Ga de ngai kadawng taw nna, shaga pru ai nsen mung, Shawlu, Shawlu, nang ngai hpe hpa rai zingri nga n ta? nga ai, nga na nngai. 8 Ngai mung, Madu e, nang kadai rai nga n ta? ngu nna htan we yang, Shi gaw, Nang zingri zingrat ai Nazaret na Yesu rai nga nngai, nga ai. 9 Ngai hte rau sa ai ni chyawm gaw, nhtoi mu ma timung, ngai e tsun ai wa a nsen n na ma ai. 10 Bai ngai gaw, Madu e, ngai hpa galaw na rai ta? ngu we ai. Shaloi Madu gaw, Rawt u, Damasku de sa wa su; na a matu san da ai lam nlang, dai yang e nang hpe tsun dan na ra ai, nga nna ngai e bai tsun ai. 11 Dai htoi kabrim ai shingkang a majaw ngai myi nmu mat yang, ngai kaw hkan nang ai ni nye a lata dun let, Damasku mare de ngai shang wa nngai. 12 Shingrai, jep ai tara hku tara hkungga nna, dai yang e nga ai Yuda masha ni mahkra man e myiman pa ai Anani ngu ai wa, 13 ngai kaw sa nna, nye a makau e tsap let, Ngai nau wa Shawlu e, na myi mu lit ga law, nga nna tsun ai. Shaloi jang ngai shi hpe mu mada lu nngai. 14 Bai shi gaw, Anhte a ji wa ni a Karai Kasang gaw, nang hpe shi a myit mang ai lam shachye u ga, nga nna mung, Dingman ai Madu hpe mu lu na hte shi a n-gup na mungga na la lu u ga, nga nna mung, nang hpe san da nit dai. 15 Kaning rai nme law, nang mu la, na la lu ai lam hpe, masha yawng a man e shi a matu sakse hkam ya ai wa, nang tai na rin dai. 16 Ya hpa rai ganung nga n ta? rawt u Shi a amying ningsang hpe gang shaga let baptisma hkam la nna, na yubak kashin kamun kau u, ngu nngai. 17 Dai hpang Yerusalem mare de ngai bai du wa nna, nawku Htingnu e akyu hpyi nga yang, ngai myit nawng mat wa ai hta, 18 Yerusalem na alawan pru wa u; nye a lam nang hkam na sakse ga, shanhte n hkap la na ma ai. nga nna shi Madu ngai hpe tsun ai, ngai mu nngai. 19 Shaloi ngai gaw, Madu e, nang hpe kamsham ai ni e ngai htawng e bang da ai hte tara jawng shagu hkan e anu kau ai gaw, shanhte nan chye nga ma ai: 20 na a sakse Stehpan a asai ru kau ma ai shaloi mung ngai nan makau e tsap nna, dai lam myit hkrum lawm let, shi hpe sat kau ai ni a hpun palawng hpe sin ya nngai, ngu we ai. 21 Shi chyawm gaw, Pru wa su; ngai nang hpe maigan masha ni nga ai sumtsan ga de shangun na de ai, nga nna tsun ai, ngu nna tsun mu ai. 22 Dai kaw du hkra shanhte shi a ga madat nhtawm, Dai zawn re ai wa hpe ga ntsa na tsan kau mu; shi hkrung nga nging nu ai, nga nna marawn ma ai. 23 Shing nga marawn let, tinang a hpun palawng raw kabai kau ai hte, ga nhpu kabai shamawng nga ma yang, 24 hpyenbu kaba wa gaw, Pawlu hpe hpyen wing de shashawn la nhtawm, shi a lam hpa majaw ning nga marawn bu ai, chye lu hkra, anu sharim nna san akrawk yu mu, ngu nna hkang dat mu ai. 25 Shanhpyi sumri hte shi hpe gang jen mu yang, Pawlu gaw makau e tsap nga ai hpyenbu wa hpe, Taw, Roma masha rai nga ai wa hpe, garai n jeyang ngut yang, nanhte kayat sharim mai a ni? ngu wu ai. 26 Hpyenbu wa dai na jang, hpyenbu kaba kaw wa nna, Nang hpa galaw maw nga n ta? dai wa gaw Roma masha rai nga ai, ngu nna shi hpe shana ya wu ai. 27 Hpyenbu kaba mung Pawlu hpang de sa nna, Nang Roma masha rai ndai da aw? ngai e tsun rit, ngu wu ai. Shi gaw, Rai nga nngai, ngu nna htan wu ai. 28 Bai hpyenbu kaba gaw, Ngai Roma masha tai lu na ahkang, manu kaba hte she lu la nngai, ngu nna htan wu yang, Pawlu gaw, Ngai chyawm gaw, Roma masha tai chyalu shangai ai wa rai nngai, ngu wu ai. 29 Shaloi jang, shi hpe san akrawk yu na nga ai ni, shi kaw na wa mat ma ai; hpyenbu kaba wa mung, Pawlu Roma masha re ai chye jang, shi hpe gyit shut wu ai majaw, hkrit kau wu ai. 30 Hpang jahpawt e, Yuda masha ni Pawlu hpe shagun ai mara hpa re ai, teng teng chye lu hkra, shi hpe raw dat nna, hkinjawng agyi ni hte salang bawng ting hpe shaga jahpawng tawn nhtawm, Pawlu hpe shanhte a ka-ang e shashawn ya wu ai.

Kasa 23

23:1 Shaloi Pawlu gaw dai salang bawng hpe azi yu da let, Hpunau ni e, dai ni du hkra Karai Kasang a man e, hkum tsup ai myit mang hte ngai hkan sa ni ai, ngu mu ai. 2 Dai rai nna, hkinjawng agyi Anani gaw, shi a n-gup bye ya mu nga nna makau e tsap nga ai ni hpe tsun mu ai. 3 Shaloi Pawlu gaw, Htun hpraw chya ai shakum e, Karai Kasang nang hpe mahtang bye na ndai: tara hku hte maren ngai hpe jeyang na she nang nang e dung nhtawm me, tara hte nhtan shai ai hku ngai hpe bye na hkang dat n ni? ngu wu ai. 4 Makau e tsap nga ai ni mung, Nang Karai Kasang a hkinjawng agyi wa hpe roi lu n ni? nga nna jet ma ai. 5 Pawlu gaw, Hpunau ni e, shi hkinjawng agyi re ai ngai n chye nna rai sai; na amyu ntsa e up ai wa hpe roi lu na n rai, nga nna ka da nga ai, nga nna bai yin wu ai. 6 Dai hpawng nga ai ni hta nkau mi Saduke, nkau mi Hparishe rai nga ma ai hpe Pawlu chye da wu ai majaw, dai salang bawng hpe, Hpunau ni e, ngai gaw Hparishe rai nga nngai; Hparishe kasha mung rai nga nngai; si ai ni bai hkrung rawt na myit mada ai lam majaw, ngai jeyang hkrum nga nngai, ngu nna jahtau dat wu ai. 7 Dai hku tsun dat yang, Hparishe ni hte Saduke ni shada da ndang hkat ma ai rai nna, shawa hpawng gaw myit shai shajang mat ma ai. 8 Kaning rai nme law, Saduke ni mahtang, hkrung rawt ngu ai n nga ai, lamu kasa hte wenyi mung n nga ai, nga nna tsun ma ai; Hparishe ni chyawm gaw dai lam lahkawng nga ai, kam ma ai. 9 Dai rai nna grai wa tsun garu bu nga ma ai; shaloi Hparishe hpung na laika ka ai sara ni nkau mi rawt nna, Ndai wa hta hpa mara mung anhte n mu ga ai; Wenyi, shing n rai, lamu kasa langai mi shi hte ga tsun ai rai yang, hpa re hka,--nga nna tsun hkat bu ma ai. 10 Shingrai nau wa dangrang hkat wa jang, shanhte Pawlu hpe ashep ashin di kau na, hpyenbu kaba tsang ai majaw, shanhte kaw yu wa nna, Pawlu hpe dai ni a ka-ang na kare la nhtawm, hpyen wing de shashawn la na, hpyen ma ni hpe hkang dat mu ai. 11 Dai shana Madu gaw shi a makau e tsap pru nna, Myit hkum ru et; nang nye a lam Yerusalem mare hta sakse hkam nit dai hte maren, Roma mare hta mung naw hkam lu na ndai, ngu nna tsun wu ai. 12 Ya nhtoi htoi yang Yuda masha ni jawm hpawng nna, Pawlu hpe garai n sat lu lu gaw, hpa mung n lu n sha na ga ai, nga nna tinang hkum dai dagam shaka ma ai. 13 Shing nga bawng ai ni marai mali shi jan rai nga ma ai. 14 Shanhte gaw hkinjawng ni hte salang ni hpang de sa nna, Pawlu hpe garai n sat lu lu gaw, hpa mung n chyim yu na, ngu nna anhte grai ngu dagam shaka tawn sagaw ai. 15 Dai re ai majaw, nanhte madu ni dai salang bawng hte rau, Pawlu a lam atsawm sha naw san yu mayu ai, ngu nna nanhte hpang de shi hpe shaga la na matu, hpyenbu kaba wa hpe hpyi dat mu; shaloi anhte gaw, shi garai n du yang lam lapran e shi hpe sat na jin jin rai nga na ga ai, ngu mu ai. 16 Shingrai, hkap lagyim la na lam hpe, Pawlu a kahkri wa na nna, hpyen wing de shang nhtawm Pawlu hpe sa tsun dan wu ai. 17 Pawlu mung, hpyenbu langai mi hpe shaga la nna, Ndai ma hpe hpyenbu kaba wa hpang de woi wa ya e: shi lama mi tsun mayu ai da, ngu dat wu ai. 18 Hpyenbu wa mung shi hpe woi sa wa nna, hpyenbu kaba wa kaw woi shang nhtawm, Ndai ma nang hpe tsun ai ga lama mi rawng ai majaw, shi e nang kaw woi sa na, bawngdung wa Pawlu ngai hpe shaga la nna hpyi dat nngai, ngu wu ai. 19 Shaloi hpyenbu kaba gaw shi a lata dun nna, shim ai shara de shi e woi bang nhtawm, Nang ngai hpe hpa tsun mayu n ta? ngu nna lagyim san yu wu ai. 20 Shaloi dai ma gaw, Pawlu hpe atsawm sha naw san yu na zawn di nna, salang bawng de hpawt ni e woi la na matu, nang kaw hpyi na, nga nna Yuda masha ni myit hkrum masai. 21 Dai rai nna shanhte ra ai hku hkum hkraw ya et; Pawlu hpe garai n sat lu lu gaw, hpa mung n lu n sha, nga nna tinang hkum dai dagam shaka ai marai mali shi jan, shi hpe hkap rim na makoi nga na ma ai; ya pyi, na a ahkang ala let, ndai amu galaw na shanhte jin jin rai nga masai, ngu wu ai. 22 Shaloi hpyenbu kaba gaw, dai ma hpe, Ndai lam nang ngai e sa tsun ndai, kadai hpe mung hkum tsun et, nga nna ginhtim ngut jang dat dat wu ai. 23 Bai shi gaw, hpyenbu lahkawng shaga la nna, Dai na ahkying masum hta Kesare mare de sa wa na, hpyen ma ni tsa, gumra jawn ai sanit shi, ri lang ai ni tsa hte hpe shajin tawn mu, ngu wu ai: 24 dai hta kaga, Pawlu hpe munggyi Hpilik hpang de ashim sha sa dat lu hkra, Pawlu jawn na gumra byau ya na mung hkang dat wu ai. 25 Laika mung ning ngu ka shagun dat wu ai: 26 Klawdi Lusi gaw, grau htum ai munggyi Hpilik hpe ngwi pyaw ga shana dat nngai. 27 Ndai wa hpe Yuda masha ni rim la nna, shi hpe sat na maw ma yang, hpyen masha ni hte ngai sa nna, shi Roma masha re ai chye we ai majaw, shanhte kaw na kare la we ai. 28 Shingrai, shi hpe shagun ai mara chye ya mayu we ai majaw, shanhte a salang bawng hta shashawn ya yu yang, 29 shanhte a tara hte seng ai lam sha mara shagun mu ai; si ging ai mara, sharen ging ai mara lama mi muk n nga lu ai, ngai chye we ai. 30 Ndai wa hpe sat kau na, hpaji daw ai lam ngai hpe shana ma ai majaw, shaloi jang ngai shi hpe nang hpang de sa kau dat nna, shi e mara shagun mayu ai ni mung, na a man e sa shagun hkat na hku, hkang dat mawe ai, nga ai. 31 Shingrai, hkang dat ai hte maren hpyen ma ni mung Pawlu hpe woi nna, Antipatri du hkra shana e sa sa dat mu ai. 32 Hpang jahpawt e, gumra hpyen ni hpe bai sa shadu shangun nhtawm, shanhte hpyen wing de bai wa ma ai: 33 gumra hpyen ni mung Kesare mare de du nna, munggyi wa hpe laika ya da nhtawm, Pawlu hpe mung shi a man e shashawn mu ai. 34 Shaloi laika dai hti ngut jang, Pawlu gara mung na re ai san yu nna, Kiliki mung na re ai chye jang, 35 Munggyi wa gaw, Nang hpe mara shagun ai ni du jang she, na amu ngai sagawn yu na nngai, nga nna tsun nhtawm, Pawlu hpe Herod a htingnu hta rawng da na, hkang dat wu ai.

Kasa 24

24:1 Dai hpang manga ya rai jang, hkinjawng agyi Anani gaw, salang ni nkau mi hte rau, Tertulu ngu ai bawmung wa langai mi hpe woi sa wa nna, shanhte gaw munggyi wa kaw Pawlu a lam sa tsun ma ai. Shaloi Pawlu hpe shaga tawn ya jang, Tertulu mara shagun ai ga tsun hpaw wu ai gaw, 2 Grau htum ai Hpilik e, anhte gaw na a marang e nachying nga ngwi nga pyaw nga ga ai hte, na a chye up chye hkang ai hta, ndai amyu a matu mung ding mung chying lam rai wa sai majaw, 3 anhte dai hpe lam magup hta shara shagu hkan e, chyeju dum ai myit hte hkam sha nga ga ai. 4 Raitimung, ngai nang hpe nau wa n shapu ai sha, ga gadun hte anhte tsun na lam hkaw mi, na myit galu kaba hte naw madat ya na, ngai hpyi nngai law. 5 Ndai wa gaw n hkru n hkra re ai hte, mungkan ting na Yuda masha ni nlang hpe gumlau sharawt nna, dai Nazaret hpung a agyi kaba rai nga ai gaw, anhte mu gaw ai: 6 dai hta kaga, shi gaw nawku Htingnu hpe awu asin di na mung maw nga ai: dai majaw anhte shi hpe rim la gaw ai: 8 shi hpe nang san yu jang, anhte shi e shagun ai mara lam yawng teng nga ai gaw, nang chye lu na ndai, ngu wu ai. 9 Yuda masha ni mung, dai hku re ai, nga nna jawm tsun lawm ma ai. 10 Munggyi wa lata dingsi nna, ga tsun na ahkang jaw wu yang, Pawlu gaw, Nang madu tsawmra ning na hkra ndai amyu a ntsa e tara agyi tai yu nit dai, ngai chye nngai majaw, nye a mara raw ai ga hpe kabu gara ai myit hte ngai tsun we ga: 11 Yerusalem de nawku na matu ngai lung wa ai, nhtoi shi lahkawng ya garai n jan ai gaw, nang chye ya lu ndai. 12 Naw ku Htingnu hte tara jawng hkan, mare kata hkan, kadai hte dangrang hkat ai mung, hpawng shingra hpe woi kabrawng ai mung, shanhte n mu ma ai. 13 Ya shanhte ngai e shagun ai mara lam ni hta, nang hpe sakse pyi n madun lu ma ai. 14 Raitimung, lam mi chyawm gaw nang hpe shapraw dan de ga; Jep ai tara lam shagu hte myihtoi ni a laika hta ka da ai hku yawng mayawng kamsham let, shanhte Hka bra Lam ngu nna shamying ai htung hku hkan nna, ngai ji wa ni a Karai Kasang hpe nawku nga nngai: 15 shanhte myit mada ai hte maren, ngai mung, dingman ai ni hte n ding n man ai ni a matu, bai hkrung rawt wa na lam nga ai, ngu nna Karai Kasang hta myit mada nga nngai. 16 Dai rai nna, Karai Kasang a man e mung, masha a man e mung, ra n rawng ai sha tutnawng myit mang san pra nga lu hkra, a shaja nga nngai. 17 Shingrai, tsawmra ning lai wa ai hpang, nye amyu masha ni kaw, majaw maya kumhpa hte shawang alu wa jaw na ngai wa nngai: 18 shaloi e, ngai kanang na shawa hpawng mi rau n nga ai, hpa kabrawng kabrang mung n rai ma ai; nawku Htingnu e nye hkum jasan jaseng nga ai hpe sha, ngai hpe mu ma ai; raitimung, Asi mung na Yuda masha nkau mi nga nga ai rai nna, 19 dai ni gaw, ngai hta mara lama ma shagun shara rawng yang gaw, nang kaw sa tsun mai ma ai. 20 Shing n rai, dai salang bawng a man e ngai tsap nga yang, Si ai ni a bai hkrung rawt wa ai lam a majaw, dai ni nanhte ngai hpe jeyang nga myit dai, 21 ngu nna, shanhte a ka-ang e ngai jahtau ai ga hta kaga, ngai hta hpa mara naw mu da mi yang gaw, ndai ni shanhte hkum nan tsun dan mu ga, ngu nna tsun wu ai. 22 Hpilik shi mahtang, dai tara lam grau chye da nhtawm, hpyenbu kaba Lusi du jang she, ngai nanhte a amu dawdan na nngai, ngu nna shanhte hpe jahkring kau mu ai. 23 Pawlu hpe mung majoi naw a sin tawn da nna, shi a jing-hku jing-yu ni kadai sa galaw jaw mayu yang, galaw jaw shangun mu, ngu nna hpyenbu wa hpe hkangda wu ai. 24 Dai hpang gade ya garai n na yang, Hpilik gaw, Yuda num Drusila ngu ai madu jan hte sa nna, Pawlu hpe shaga la nhtawm, Hkristu Yesu a makam masham lam tsun dan ai madat la wu ai. 25 Pawlu gaw dinghpring ai lam, tinang hkum hkang ai lam hte du magang ra ai tara dara ai lam shapraw dan wu yang, Hpilik kajawng nna, Ya naw wa su, ngai rau jang me nang hpe shaga na de ai, ngu wu ai. 26 Shi chyawm gaw, Pawlu gumhpraw jaw na ra ai nhten, nga myit nna, law law lang shi hpe shaga chyai wu ai. 27 Shingrai ni ning ladu hkrum jang, Hpilik a aya hta Porku Hpestu galai ai rai nna, Hpilik gaw Yuda masha ni a myiman shapa mayu ai majaw, Pawlu hpe sharen da let naw tawn da wu ai.

Kasa 25

25:1 Ya Hpestu dai mungdaw hta shang ai masum ya rai yang, Kesare mare kaw nna Yerusalem de lung wa ai. 2 Shaloi hkinjawng agyi ni hte Yuda masha ni a agyi salang ni, Pawlu a lam shi hpe sa tsun nna, 3 Pawlu hpe lam e hkap gyam sat kau lu hkra maw ai myit hte, shi hpe Yerusalem mare de sa dat ya na lam, chyeju hkap hpyi mu ai. 4 Raitimung Hpestu gaw, Pawlu hpe Kesare mare e she sharen tawn nga ai rai nna, gade n na yang shi mung dai de bai wa na rai nga ai majaw, 5 Nanhte hta na ahkang lu ai ni ngai hte rau yu wa nna, dai wa hta mara lama ma rawng yang gaw, sa shagun mu, ngu nna htan dat mu ai. 6 Shingrai shanhte kaw nhtoi matsat ya, shi ya daram hkring nga nhtawm, shi Kesare mare de bai yu wa nna, hpang shani e tara tingnyang hta dung let, Pawlu hpe shaga na hkang dat wu ai. 7 Shi du jang, Yerusalem na yu wa ai Yuda masha ni gaw Pawlu a grupyin e tsap nna, sakse n madun lu ai mara kaba law law wa shi a ntsa e shagun mu ai. 8 Pawlu chyawm gaw, Yuda masha ni a jep ai tara hpe mung, nawku Htingnu hpe mung, hkawhkam Kehta hpe mung, ngai hpa n shut n hpyit yu nngai, ngu nna mara raw ga tsun nga ai. 9 Raitimung Hpestu gaw, Yuda masha ni kaw myiman pa mayu nna, Pawlu hpe, Nang Yerusalem mare de lung wa nna, dai yang e nye a man e ndai amu lam dawdan hkam na, nang hkraw nga n ni? ngu nna shi hpe san wu ai. 10 Pawlu chyawm gaw, Hkawhkam Kehta a tara tingnyang man e ning ya tsap nga nngai; dawdan ai rai yang, nang e dawdan mi: nang madu atsawm sha chye nga ai hte maren, Yuda masha ni hpe ngai kachyi mi muk shut ai n rai. 11 Ngai shut hpyit tawt lai ai wa rai nna, si ging ai mara lama ma galaw kau ai rai yang gaw, si hkam na lam ngai ndang ai n rai: raitimung, ndai ni shagun ai mara langai mi muk n teng yang gaw, shanhte a lata de ngai hpe kadai wa ap kau lu na n rai. Hkawhkam Kehta kaw du na nngai, ngu nna htan wu ai. 12 Shaloi Hpestu gaw, salang bawng hte bawng ngut jang, Nang Kehta kaw du na nga nit dai: Kehta hpang de sa lu na re ai, ngu nna htan wu ai. 13 Dai hpang nhtoi gade n na yang, hkawhkam Agripa Yan Bernike hte Kesare mare de du nna Hpestu hpe sa shachyen ma ai. 14 Dai yang e tsawmra wa na hkra nga nga sayang, Hpestu dai hkawhkam hpe Pawlu a lam tsun dan wu ai gaw, Hpilik sharen da nga la ai bawng langai mi nga ai; 15 ngai Yerusalem de nga nga yang, hkinjawng agyi ni hte Yuda salang ni, dai wa a lam sa tsun nna, ngai shi a lam dawdan ya na hkap hpyi ma ai. 16 Ngai chyawm gaw, Mara shagun hkrum ai wa, mara shagun ai ni hte myiman chyaw tara hkat nna, mara raw ai ga garai n tsun lu yang, kadai hpe ap kau na lam mung, Roma masha ni a htung n nga ai, ngu nna shanhte hhpe tsun da mawe ai. 17 Dai rai nna shanhte nang e zuphpawng nga ma yang, ngai mung n hkring ai sha, hpang shani jang tara tingnyang e dung nna, dai wa hpe woi wa ya na hkang dat we ai. 18 Shaloi shanhte dai wa hpe mara tsun bun ma yang, ngai zawn nawn ai mara lama mi muk n shagun tawn mu ai; 19 shanhte a nawku htung lam hte, si mat sai, Yesu ngu ai wa langai mi a lam sha, shi hte dangrang hkat ma ai; dai Yesu gaw naw hkrung nga ai, nga nna Pawlu a tsun nga ai. 20 Dai lam hpe kaning di sagawn na n chye we ai majaw, Yerusalem mare e dai lam dawdan sa hkam na hkraw n hkraw ai, shi hpe san yu yang, 21 Pawlu mahtang, Hkawseng kaba kaw she du na nga hpyi ai majaw, Kehta kaw garai n sa dat lu ai laman e, shi hpe naw sin da na, ngai hkang dat we ai, ngu nna tsun dan wu ai. 22 Shaloi Agripa gaw Hpestu hpe, Ngai mung dai wa a ga na mayu nngai, ngu wu yang, Hpawt de na lu na re ai, ngu nna htan wu ai. 23 Hpang shani e Agripa yan Bernike gaw, amawn asam rai shingkang dat nna, hpyenbu kaba ni hte mare na agyi salang ni hte rau sa nna, rung gawk e shang du ma yang, Hpestu hkang dat jang, Pawlu hpe shashawn dat mu ai. 24 Shaloi Hpestu tsun wu ai gaw, Hkawhkam wa Agripa hte ya nang e hpawng nga ai ni nlang hte e, Yerusalem mare hte ndai mare na Yuda masha yawng, ngai kaw sa tsun nna, Dai wa hpe naw jahkrung da n mai sai, nga nna jahtau bu ai gaw, ya nanhte mu ai ndai wa hpe rai nga ai. 25 Raitimung, ndai wa hta sat ging ai mara hpa mung ngai n mu we ai: shi mahtang, Hkawseng kaw du na hpyi ai majaw, sa dat na ngai myit da se ai. 26 Sa dat nga yang mung, nye a Madu hpang de shi a lam azin ayang ka shana dat na mi, n rawng lu ai. Dai rai nna, dai wa hpe manaw yu ngut yang, ka dat lu na ga langai ngai ngai mu lu hkra, nanhte a man e mung, grau nna nang hkawhkam Agripa man e mung, ngai shi hpe shapraw dan de ai. 27 Kaning rai nme law, bawng langai mi sa dat yang, shi hpe shagun ai mara n madun dat ai gaw, n jaw ai, ngu nna ngai myit nngai, ngu mu ai.

Kasa 26

26:1 Shaloi Agripa gaw Pawlu hpe, Na a lam tsun na ahkang rai nga ai, ngu wu ai. Dai rai nna Pawlu lata ladawn let mara raw ai ga tsun wu ai gaw: 2 Hkawhkam Agripa e, Yuda masha ni a htunghking lam hte dangrang hkat ai lam magup hpe nang chye grau ai wa rai nga ndai majaw; 3 Yuda masha ni ngai hpe shagun ai mara lam shagu hpe, dai ni na a man e mara raw ga tsun lu ai gaw, ngai hta a nga sai, ngu nna myit nga nngai law: dai rai nna, myit galu kaba ai hte ngai e madat mara ya na, ngai hpyi nem nngai. 4 Shawng nnan, nye a brang ram prat kaw nna, nye a amyu hta mung, Yerusalem mare hta mung, ngai hkan nang ai arawn alai, Yuda masha ni nlang chye chyalu rai ma ai. 5 Moi nna nye a lam chye ma ai majaw, anhte a nawku htung na ja grau ai Hparishe ngu ai hpung hta ngai lawm nga nngai gaw, shanhte sakse hkam mayu yang, hkam lu ma ai. 6 Raitimung, ya, Karai Kasang gaw ji wa ni hpe jaw da ai ga ndat na myit mada lam majaw, dawdan ai hkam sha na, ngai nang e tsap nga nngai: 7 dai ga ndat chyeju hkam la lu hkra nga, anhte a amyu shi lahkawng ting, shani shana Karai Kasang hpe jaw jau let, shaja nga ma ai: dai myit mada lam majaw, Hkawhkam wa e, Yuda masha ni ngai e mara shagun ma ai. 8 Karai Kasang si ai ni hpe jahkrung dat ai nga ai gaw, kam shara nre ai, nga nna nanhte hpa rai myit la myit ta? 9 Ngai nan, Nazaret wa Yesu a amying hpe nhtan shai ai hku law law wa mai di na, ngu nna ngai teng teng myit nngai. 10 Gaja wa dai hku Yerusalem mare e galaw yu se ai, hkinjawng agyi ni kaw na ahkang lu la nna, chyoi pra ai ni hpe htawng e bang kau ai hte, shanhte hpe sat kau yang, ngai mung awlaw lawm ni ai. 11 Tara jawng magup hta mung shanhte hpe law law lang ari jahkrum let, Yesu hpe shatan shangun lu hkra shaja se ai: shanhte hpe nachying pawt ai nyun, bu nna, masha ga hkan na kahtawng mare du hkra pyi, hkan zingri mase ai. 12 Shingrai, hkinjawng agyi ni kaw na mungga ahkang la gun nna, Damasku mare de ngai sa wa yang, 13 Jan pungding madi ai aten e, Hkawhkam wa e, jan hta grau htoi tu ai nhtoi, dai lam e ngai hte nye a manang ni a grupyin, lamu de nna htoi tu pru ai, mu nngai. 14 Shaloi anhte nlang ga de kadawng taw mat shajang nga yang, Hebre ga hte ngai hpe, Shawlu, Shawlu nang ngai hpe hpa rai zingri nga n ta? masawn hpe htawng yang, na matu yak la ahka gaw, nga nna shaga ai nsen ngai na nngai. 15 Shaloi ngai gaw, Madu e, nang kadai rai nga n ta? ngu nna htan we yang, Madu gaw, Nang zingri zingrat ai Yesu rai nga nngai. 16 Raitimung, rawt u, jan rai tsap u: kaning rai nme law, nang ngai hpe mu mada lu sai lam hte, ngai nang hpe naw madun na ra de ai lam ni a matu, amu gunhpai masha hte sakse wa shatai na san da de ga, ngu nna ya nang kaw ngai danpru ring ngai: 17 shingrai maigan amyu ni, nsin kata nna nhtoi de, Satan a atsam kata nna Karai Kasang hpang de kayin wa lu nna, yubak raw dat kau ya ai chyeju lu la na hte, ngai hpe kamsham ai a marang e, shachyoi shapra hkam la ai ni hte rau Sali wunli dagraw lu hkra, 18 shanhte a myi jahpaw na matu, ngai nang hpe shanhte hpang de shangun dat de ai rai nna, na a amyu a lata na mung, maigan masha ni a lata na mung, hkyehkrang la na de ai, nga nna ngai hpe tsun nngai. 19 Dai rai nna, Hkawhkam Agripa e, lamu na shingran dai hpe n madat ai, ngai n nga lu nngai: 20 dai lam hpe nnan e Damasku masha ni kaw nna, Yerusalem hte Yuda mung ting hta mung, maigan amyu ni myit malai lu nna, myit malai hte ging dan ai arawn alai shachyen let, Karai Kasang hpang de kayin wa mu ga, ngu nna maigan amyu ni hta mung, ngai hkaw shana nga nngai. 21 Dai lam a majaw Yuda masha ni, nawku Htingnu e ngai hpe rim la nna, sat kau na maw mi ai. 22 Karai Kasang kaw na karum ai lu la ai majaw sha, dai ni du hkra nga nga let, kaji kaba yawng hpe sakse hkam ai hta, 23 Hkristu nni nkri hkrum lu na hte, si ai ni kaw na shawng hkrung rawt wa lu nna, shi a amyu hte maigan amyu ni hpe nhtoi lam madun dan lu na ra ai, nga nna byin wa na ra ai lam ni a matu, myihtoi ni hte Mawshe tsun ai lam hta kaga, ngai hpa mung n tsun jan nngai, ngu wu ai. 24 Shing nga mara raw ga tsun ai hpe, Hpestu gaw, Pawlu e, nang mana nit dai; hpaji hparat nau htang shalai nna mana mat nit dai, ngu nna aja awa jet wu ai. 25 Pawlu Chyawm gaw, Grau htum ai Hpestu e, ngai n mana nngai; tengman ai hte myit leng ai ga ngai tsun nngai. 26 Ndai lam hpe Hkawhkam wa nan chye da wu ai; shi a man e dingsa tsun ai mung, rai nga nngai: kaning rai nme law, ndai lam gaw njut nnaw e sha n byin re ai majaw, hkawhkam wa shi n chye ai mi n nga na re ai, ngu nna ngai kam nga nngai. 27 Hkawhkam Agripa e, myihtoi ni a ga hpe nang kam n ni? kam nga ndai gaw ngai chye nga nngai, ngu wu ai. 28 Shaloi Agripa gaw Pawlu hpe, Ga hkaw loi sha hte nang ngai hpe Hkristu a sape ganoi shatai lu da nngai, ngu wu ai. 29 Bai Pawlu gaw, Karai Kasang hkraw yang gaw, madu nang sha n rai, dai ni ngai tsun ai ga na mana ni nlang, ga hkaw loi sha hte raitimung, law law hte raitimung, ndai gyit hkang ai hpe n ngu ai sha, ngai zawn re ai hkrai rai na, ngai ra nga nngai, ngu wu ai. 30 Shaloi hkawhkam wa yan munggyi wa hte Bernike gaw, shanhte hte dung nga manang ni hte rau rawt ma ai. 31 Pru wa yang shanhte shada, Ndai wa gaw sat ging ai mara, sharen ging ai mara, lama mi muk galaw ai n rai, nga nna tsun shajang ma ai. 32 Agripa mung Hpestu hpe, Ndai wa shi mahtang Kehta kaw du na n hpyi taw gaw, raw dat mai sai, ngu nna tsun wu ai.

Kasa 27

27:1 Ya, anhte hpe Itali mung de li hte sharap sa wa na myit shatawng da ngut jang, shanhte Pawlu hte kaga bawng ni nkau mi hpe, Agustu hpyendap hte seng ai, Yuli ngu ai hpyenbu a lata hta ap dat mi ai. 2 Shaloi, Asi mung a nammukdara hkin-gau hkan na mare ni de garet shang hkawm wa ai, Adramuti na shanghpaw li hta anhte shang jawn ga ai: Htesaloni mare na Makedoni masha Aristarku mung anhte hte rau lawm nga ai. 3 Hpang shani e anhte Sidon mare hta sek ga ai; Yuli gaw Pawlu hpe matsan dum nna, shi a jinghku ni kaw sa jahkrum na hte galaw daw hkam sha na matu, ahkang jaw wu ai. 4 Dai kaw na pru jang, nbung n sun ai majaw, Kupru tsunlawng lahta hku garet nna, 5 Kiliki hte Pamhpuli mung na nawng makau hku rap tawng yang, Luki mung na Mura mare de du ga ai. 6 Dai shara e hpyenbu wa gaw, Itali mung de rap sa wa ai Alesandru mare na shanghpaw li mu hkrup nna, dai hta e anhte hpe shashawn mi ai. 7 Dai kaw nna nhtoi law law wa, yat yat sha sa wa nna, Kidu jut ang de yak let sha du lu jang, nbung n sun ai majaw, n shanang lu nna, Kreti tsunlawng hpe shinggun let, Salmone ginchyum ang hku sa wa nhtawm, 8 de a makau hku yak la ai hte garet hkawm wa yang, Lasea mare hte ni nga ai Daru Kaja ngu ai, li sek ai shara de du ga ai. 9 Ya nhtoi tsawmra wa na wa jang, lusha gam aten lai mat ai majaw, li hte hkawm sa hkrit ra ai ta du sai rai nna, 10 Pawlu gaw, Hkau ni e, ya hkawm yang, yak la nna ali hte arai ni sum na hta n-ga, anhte a asak pyi sum na zawn nawn da we ai, ngu nna shanhte hpe tsun shadum wu ai. 11 Hpyenbu wa mahtang, Pawlu a ga hta, Li hkang ai wa hte li madu a ga hpe, grau nna kam wu ai. 12 Daru dai mung nshung ta sek shatawt lu na n tai ai majaw, Hponik daru de du lu yang du hkra sa nna, dai yang nshung shatawt lu hkra du wa na lam, law malaw myit hkrum ma ai: dai shara gaw, Kreti tsunlawng na sinna dingdung hte sinna dingda de man yawng ai daru rai nga ai. 13 Dai rai nna, dingda nbung angwi sha bung wa jang, shanhte myit ai hte tup sai zawn nawn nna, hpri chyinghkyi dawm la nhtawm, Kreti tsunlawng makau hku garet sa wa ma ai. 14 Raitimung gade n na yang, sinpraw dingdung nbung laru gaw, dai tsunlawng de nna ru wa ai rai nna, 15 ali hpe adawt ai majaw n shadaw lu jang, anhte dat dat nna, nbung e woi ai de yawng nang ga ai. 16 Kawda ngu ai tsunlawng kaji a lawu hku garet wa nga yang, de a li kaji hpe grai shaja ai hte gang la lu nna, 17 li ntsa de gang sakap nhtawm, li kaba hpe ngang hkra, dai hpe matep nna sumri hte hkang mu ai; bai Surti ngu ai zaibru jang hta mara mat na hpe tsang ai majaw, de a sumpan ni hpe shanhte jahkrat kau nna, yawng nang ma ai. 18 Nbung laru nau nan ja la ai majaw, hpang shani e li hta na hpaga rai ni htawm jahkrat kau mu ai: 19 bai masum ya rai jang, dai li a arai ni hpe mung, tinang a lata hte htawm jahkrat kau mu ai. 20 Law law ya wa jan n mu, shagan ni mung n danpru ai hte, ja la ai laru sha aru nga ai majaw, anhte hta lawt lu na myit mada shara kachyi mi muk n nga masali ai. 21 Ya shanhte shat n sha ai, tsawmra ya na wa sai rai nna, Pawlu gaw shanhte a ka-ang e tsap let, Hkau hte e, nanhte nye a ga madat nna, Kreti tsunlawng na n pru myit taw gaw, ning re ai hten bya ga n du na re ai. 22 Ya raitimung, ngai tsun ai madat nna myit shalan mu; nanhte hta na kadai mung asak sum ga du na n rai; shanghpaw li sha asum na re ai. 23 Kaning rai nme nga yang, ngai hhpe uphkang nna, ngai dawjau ai Karai Kasang a lamu kasa langai mi, mana e nye a makau e sa tsap nna, 24 Pawlu e, hkum hkrit et; hkawhkam Kehta a man e nang tsap lu na rin dai; yu u, nang hte rau ndai li hta jawn ai ni nlang, Karai Kasang nang hpe ap ya nit dai, nga nna ngai e tsun sai. 25 Dai re ai majaw, Hkau hte e, hkum tsang myit; ngai hpe tsun dan ai hte maren rai na ra ai, ngu nna, ngai Karai Kasang hpe kam nga nngai. 26 Raitimung, tsunlawng langai ngai hta anhte mara na ga ai, ngu nna shanhte hpe shalan wu ai. 27 Ya nhtoi shi mali ya shana du nna, anhte Adri nawng hta yawng kayin nga yang, yuptung hpawa e, hkarang kawng langai ngai de ni wa sam nga ai, nga nna li ma ni myit ma ai. 28 Shingrai, hka shadawn yu yang, lalam hkun sung ai chye ma ai; loi hkring rai jang, bai shadawn yu yang, lalam shi manga sha sung sai mu ma ai. 29 Dai re ai majaw, nlung hkingau hta ahtu hkra na hpe tsang ai rai nna, shanhte li mai de na hpri chyinghkyi mali jahkrat nhtawm, nhtoi htoi hkra ala nga ma ai. 30 Li ma ni dai shanghpaw li kau da nna hprawng na maw ai myit hte, li baw na chyinghkyi jahkrat na zawn di nna, li kaji hpe hka de shayu nga ma yang, 31 Pawlu gaw hpyenbu hte hpyen ma ni hpe, Ndai ni li e n nga sayang me, nanhte lawt lu na mi n rai sai, ngu nna tsun mu ai. 32 Shaloi hpyen ma ni gaw li kaji dun ai sumri ni sa dan kau nna, li kaji dai hpe jahka kau ya mu ai. 33 Ya nhtoi htoi wa jang, Pawlu gaw, shanhte mahkra hpe shat sha na lam woi awn let, Nanhte lusha hpa mung n sha ai gaw, dai ni shi mali ya na wa manit dai: 34 dai re ai majaw, lusha lama ma sha mu; dai gaw nanhte a lawt na matu rai nga ai; nanhte hta gade a kara singgawng mi muk sum ga du na n rai, ngu nna shanhte hpe shalan wu ai. 35 Shing nga tsun ngut ai hte muk la nna, shanhte mahkra a man e Karai Kasang a chyeju hpe shakawn kungdawn let, shi woi hkyep nna, woi sha wu ai. 36 Shaloi she nlang hte mung myit pyaw nna, shat sha shajang ma ai. 37 Dai li hta rawng ai masha yawng gaw, ni tsa e sanit shi kru rai nga ga ai. 38 Hkru hkra sha ngut jang, hkaulan mam hpe hka de kabai bang kau nna, li hpe shatsang mu ai. 39 Nhtoi leng rai yang, shara dai hpe shanhte n chye timung, zaibru jang shingjut langai mi mu mada nna, dai de du hkra hkang lu n hkang lu chyam yu na, bawng ma ai. 40 Shaloi hpri chyinghkyi ni hpe shanhte raw nna nammukdara e kau da mu ai; li hkang ai lasham sumri hpe mung raw nna, li baw de na dawnghkawn sumpan sharawt nhtawm, dai zaibru jang de hkang wa ma ai. 41 Raitimung, zaini hkindawt langai mi kaw li wa chyat mat nna, li baw de n shamu lu ai hte, li mai de hka leng kayat ai majaw, agrawp mat wa ai. 42 Shaloi hpyen ma ni gaw, bawng ni hpungyawt rap wa nna lawt mat na hpe tsang ai majaw, shanhte hpe sat kau na bawng ma ai. 43 Hpyenbu wa chyawm gaw, Pawlu hpe hkye la mayu nna, shanhte a bawng ai lam hpe hkum kau nhtawm, hpungyawt chye ai ni kadai mung, hka de yu nna, hkarang de shawng kaw wa mu ga, nga nna mung; 44 kaga ni gaw, nkau mi hpunpyen hte, nkau mi shanghpaw li a arai kaga ni hta, noi nna rap wa mu ga mung, hkang dat mu ai. Shingrai shanhte nlang hkarang de kaw wa nna lawt lu ma ai.

Kasa 28

28:1 Shingrai anhte, kaw lawt lu jang she, tsunlawng dai Melite ngu ai tsunlawng rai nga ai hpe, anhte chye gaw ai. 2 Dai yang na karing karang masha ni anhte hpe grai wa matsan dum nna, marang a htu nga ai hte kashung ai majaw, wan wut nna, anhte nlang hte hpe hkap hkalum la mi ai. 3 Shaloi Pawlu gaw hpun dingshan magawn la nna, wan mang hta bang dat wu yang, pu htum langai mi wan kahtet ai na jang pru wa nna, shi a lata hta kawa noi nga ai. 4 Shingrai, Pawlu a lata pu htum noi goi lang nga ai hpe, dai karing karang masha ni mu ma yang, shanhte gaw, Gaja nan, ndai wa gaw masha sat ai wa teng sam ai; hka na lawt lu timung, shi hkrung nga na hpe, Shingra tara e n hkraw wu hka, nga nna shada tsun shajang ma ai. 5 Pawlu chyawm gaw lapu dai hpe wan mang de ari bang kau nna, hpa tsinyam mung n hkrum ai anga nga ai. 6 Shanhte gaw, shi hkum bum wa na ra ai, dai n rai, ahkring sha kadawng si na ra ai, nga nna myit nga ma ai, raitimung, na na wa la yu nga yang, shi hta hpa mung n byin ai mu jang, shanhte myit bai galai nna, ndai wa gaw Hpara langai mi she rai nga ai, nga nna bai tsun ma ai. 7 Ya, dai makau hkan e, Popli ngu ai tsunlawng agyi wa a ga dachyawk ni nga shajang nga ai: dai wa gaw anhte hpe hkap hkalum la nna, masum ya tup jainghku myit hte manam daw mi ai. 8 Dai shaloi e Popli a kawa gaw hkali hte daren machyi nna taw nga ai; Pawlu gaw dai wa kaw shang nna, akyu hpyi ai hte shi a lata mara ya nna, shi hpe shamai ya wu ai. 9 Shingrai byin ai majaw, tsunlawng na machyi ai ni kaga mung du ma ai rai nna, shamai shatsai lu la ma ai: 10 shanhte mung, anhte hpe hkungga lara ai lam law law galaw nna, dai yang na li jawn pru wa jang, anhte hta ra ai made li hta bang ya dat ma ai. 11 Shingrai, shata masum lai jang, dai tsunglawng e kashung ta shalai nna nga nga ai, Alesandru mare na, Hpara marun yan nau a sumla kap ai shanghpaw li hta anhte shang nna jawn pru wa ga ai. 12 Surakusa mare de du yang, anhte dai yang e masum ya hkring nga ga ai. 13 Dai kaw nna kawai jawn wa yang, anhte Regi mare de du ga ai: hpang shani e dingda nbung bung wa ai rai nna, ni ni shani hta Potioli mare de du ga ai; 14 dai yang e anhte hpunau ni hte hkrum nna, sanit ya tup hkring nga na shanhte hpyi ma ai rai nna, anhte hkring nga ga ai: dai hpang Roma mare du ga ai. 15 Dai mare na hpunau ni, anhte du na lam na nna, tau la na nga, Api gat hte Manam Jarawp masum du hkra sa ma ai; Pawlu shanhte hpe mu jang, Karai Kasang hpe shakawn kungdawn nna shalan shabran nga ai. 16 Ya anhte Roma mare de du bang jang, Pawlu gaw shi hpe sin ai hpyen ma hte rau kaga hkrai rai nga na, ahkang lu la wu ai. 17 Masum ya nhtoi lai ai hpang, Pawlu gaw dai yang na Yuda agyi salang ni hpe shaga la wu ai: shanhte du sa shajang ma yang, shi gaw shanhte hpe, Hpunau ni e, nye a amyu hpe mung, ji wa ni a htunghking hpe mung, nhtan shashai nna, ngai hpa mung n galaw yu nngai; raitimung Yerusalem mare kaw nna, Roma masha ni a lata de bawng di ap kau ai, ngai hkrum nngai: 18 Roma du ni chyawm gaw ngai hpe sagawn yu ngut jang, si ging ai mara ngai hta n mu ai majaw, ngai hpe raw dat mayu ma ai. 19 Dai hpe Yuda masha ni mahtang n hkraw ai majaw, ngai kaning n chye di nna, Kehta kaw du na hpyi we ai: dai raitimung, nye a amyu hpe mara shagun shara rawng ai majaw n rai. 20 Shingrai, Isaraela amyu a myit mada ai lam a nhkan e, ndai hpri hkang hkyihkyang hte sharen ai ngai hkrum nngai majaw, ngai kaw mahtang sa tsun chyai na, ngai nanhte hpe shaga dat nngai, ngu nna tsun mu ai. 21 Saloi shanhte gaw, Na a lam, Yuda mung na laika mung anhte n lu ga ai; hpunau ni kadai mung na a lam n kaja ai shi sa tsun ma ai n rai. 22 Ri timung, ndai hka bra Hpung gaw, shara shagu hkan e ndang kau hkrum ai lam rai nga ai hpe, anhte chye ga ai majaw, nang myit ai hku mung anhte na mayu ga ai, ngu nna htan mu ai. 23 Ya shanhte shi hte hkrum chyai na nhtoi madat da nhtawm, shi manam nga ai nta de masha law law wa sa hpawng nga ma ai: shaloi shi gaw, jahpawt kaw nna shana de du hkra, Mawshe a tara hte myihtoi ni a ga hta hkan nna, Karai Kasang a mungdan lam sakse hkam ai hte, Yesu a lam shanhte hpe shapraw shadan dan mu ai. 24 Shing nga tsun ai lam hpe nkau mi hta la ma ai; nkau mi chyawm gaw n kam n sham ma ai. 25 Shingrai shanhte shada myit n hkrum ma ai majaw, Pawlu gaw, shanhte hpe, Chyoi pra ai Wenyi myihtoi Esaia a n-gup hte nanhte a nji nwa ni hpe tsun ai ga gaw teng la malit dai: dai gaw, 26 Amyu dai hpe sa tsun dan su, Nanhte na lana n chye na na mu ai; Yu layu e, n mu na mu ai, ngu su. 27 Kaning rai nme law, tinang myi hte mu lu nna, Tinang a na hte na la lu let, Tinang a myit masin hta chye na lu ai hte Ngai hpang de kayin wa na hpe; Ngai shanhte hpe n shamai lu hkra, Dai amyu gaw myit mak nga nna, Shanhte a na lahpang nga ai hte, Shanhte a myi pat nga malu ai, nga ai, rai nga ai. 28 Dai re ai majaw, ndai Karai Kasang a hkyehkrang la ai lam, maigan amyu ni hpang de jaw dat nu ai rai nna, shanhte mahtang madat mara hta la na mara ai gaw, nanhte nan chye nga mu law, 29 ngu nna dai ga hkaw mi tsun jat dat ai hpang, shanhte pru wa ma ai. 30 Dai kaw nna Pawlu gaw ni ning tup shi shap rawng ai nta hta nga nga let, shi kaw sa masa ni hpe hkap la nna, 31 Karai Kasang a mungdan lam, hkaw dan ai hte, Madu Yesu Hkristu hte seng ai lam hpe nden ja ai myit hte sharin shaga nga nna, kadai mung shi hpe hkum shadang ai n rai.

Roma 1

1:1 Yesu Hkristu a mayam hte, kasa aya hta dang da nna, dai chyoi pra ai Chyum laika ni hta 2 Karai Kasang gaw moi moi shi a myihtoi ni e ndat da ai, shi a Kasha a lam ngu ai, Karai Kasang a kabu gara shiga a jaw e san da hkrum ai, ngai Pawlu gaw, 3 Karai Kasang a tsawra ai ni hte, chyoi pra ai masha tai mu ga shaga tawn da ai, Roma mare na yawng hte hpe, ga shana dat nngai. 4 Dai kasha gaw masha labau hku gawn yang, Dawi a aru arat rai nga ai; si mat ai ni kaw na bai hkrung rawt wa ai a majaw, Karai Kasang a Kasha nan shi rai nga ai gaw, chyoi pra rawng ai Wenyi hte aja awa shadan dan nga ai; anhte a Madu Yesu Hkristu nan shi rai nga ai rai nna, 5 shi mying ningsang a marang e, amyu baw shagu dai kamsham ai lam hpe madat mara mu ga she, shi kaw nna chyeju hte kasa aya hpe anhte hkamla lu sagaw ai: 6 Yesu Hkristu e shaga la ai ni rai nga myit dai majaw, nanhte mung dai ni hta lawm nga myit dai. 7 Anhte a Wa Karai Kasang hte, Madu Yesu Hkristu kaw na, chyeju hte ngwi pyaw ai gaw, nanhte hta e anga nga malit ga law. 8 Nanhte a kamsham ai gaw mungkan ting chyam hkra kajai gumhkawng wa sai majaw, Yesu Hkristu a jaw e, nanhte mahkra a matu mara, nye a Karai Kasang hpe, ngai shawng shakawn kungdawn nngai. 9 Kaning rai nme law, nye a akyu hpyi ai ga hta e ngai nanhte hpe n sim n sa adum nga nna, 10 Karai Kasang myit ai hku rai yang gaw, ya gade n na yang nanhte hpang de du lu na ahkang lu la n ga, tutnawng e ngai a hpyi nga nngai gaw, Kasha a kabu gara shiga hta, nye a wenyi hte ngai daw nga ai Karai Kasang gaw, nye a sakse rai nga ai. 11 Nanhte ngang hkang nga myit ga, wenyi kumhpa langai ngai nanhte hpe karan jaw lu n ga, nanhte hte hkrum na ngai katu nga nngai: 12 shing ngu made ai gaw, nanhte hte nye a kamsham ai lam a marang e, nanhte hte ngai, shangwi shapyaw ai hkamla lu n ga, ngu ai rai nga ai. 13 Dai hta kaga, hpunau ni e, maigan amyu kaga ni hta akyu hkamla lu nngai hte maren, nanhte hta na mung langai ngai lu la n ga, nanhte hpang de sa du na law law lang a myit lu nga nngai raitimung, ya du hkra hkum shadang ai hkrum nngai hpe, nanhte n chye nga na ngai n ra nngai. 14 Heleni amyu ni, karing karang amyu ni, hpaji rawng ai ni, hpaji n rawng ai ni hte, hka kap ai wa ngai rai nga nngai, 15 Dai rai nna, nanhte Roma ni hpe mung dai kabu gara shiga hkaw tsun dan na, ngai mahtang myit hkut da ni ai. 16 Kaning rai nme law, dai kabu gara shiga hta ngai kaya shara rawng ai n rai: dai gaw shawng nnan e Yuda ni, dai hpang e Heleni masha ni hta kamsham ai ni kadai hpe mung hkyehkrang la shangun lu ai Karai Kasang a atsam rai nga ai. 17 Dai hta kaga, Dinghpring ai wa gaw kamsham ai hte hkrung nga lu na ra ai, nga nna ka da nga ai hte maren, kamsham ai hte lu la nna kamsham ai de ang wa ai, Karai Kasang a dinghpring ai lam hpe, dai hta e shadan dan nga ai. 18 Kaning rai nme law, dai tengman ai lam hpe n ding n man ai hte dip shadang da ai masha ni a tara n hkungga ai hte n ding n man ai amu mahkra a ntsa e, Karai Kasang a masin pawt ai myit gaw, lamu de nna danpru nga ai: 19 kaning rai law nga yang, Karai Kasang gaw shanhte hpe madun dan manu ai majaw, Karai Kasang hpe chye chyang mai ai lam gaw, shanhte hta e dan leng wa sai. 20 Shabyin da ai arai ni hpe tau yu yang, ginding aga lat kaw nna shi a marai nsam ngu ai, htani htana atsam hte Karai Kasang shingyan gaw, leng leng a dan nga ai; dai rai nna, shanhte a mara raw na lam htum mat malu ai. 21 Shanhte Karai Kasang hpe chye chyang ninglen, Karai Kasang hpe shagrau sha-a ang ai hte maren, n shagrau n sha-a ma ai hte, shakawn kungdawn mung n rai ma ai; shanhte a myit mang ai lam gaw, kaman lila sha rai mat malu ai rai nna, shanhte a n gring ai myit gaw, sin mak mat malu ai. 22 Hpaji byeng-ya la rawng ai ni nsan nhtawm, shanhte angawk angak rai nga ma ai rai nna, 23 hten mat n chye ai Karai Kasang a arawng sadang hpe, hten mat chye ai masha a, awu a, lagaw mali tu ai ashu ashan a, gumrawt hkawm ai baw a sumla hkrang hte galai kau da mu ai. 24 Dai rai nna, tinang a hkum hkrang a arawng hpe shada da e shayuk kau hkra, tinang kraw lawang a kayut ai hku hkan let, awu asin re ai de rai mat wa mu ga, Karai Kasang gaw shanhte hpe nawng kau mu ai; 25 kaning rai nme law, Karai Kasang a tengman ai lam hpe masu matsa ai hte shanhte galai kau mu ai rai nna, Hpan wa Ningsang hpe shinggan kau nna, hpan tawn da sai arai ni hpe mahtang nawku nna dawjau ma ai: Hpan wa Ningsang chyawm gaw htani htana e a nga ai law. Amen. 26 Shingrai ma ai majaw, Karai Kasang gaw shanhte hpe kaya kahpa re ai ngang kayut ai de nawng kau mu ai: shanhte a numsha ni pyi, hking madung hpe kau da nna, dai hte nhtan shai ai hku galaw hkat ma ai; 27 dai hte maren lasha ni mung numsha hte kanawn ai hking madung hpe kau da nna, tinang a ngang kahtet ai hta shada da kayut katu tam let, lasha hte lasha masai marai re ai amu maw hkat nhtawm, shanhte a shut hpyit ai hte ging dan ai yubak shabrai hpe, tinang dai hkamla ma ai. 28 Bai, Karai Kasang hpe chye chyang na man ya e n gawn n sawn di mu ai majaw, n hpru n mai re ai amu galaw mu ga, Karai Kasang gaw shanhte hpe tuk shamak ai myit hta nawng kau mu ai rai nna, 29 shanhte gaw n ding n hpring ai amyu myu hte, n hkru n hkra ai, nammak lawhpa ai, n ju n yawt ai hte hpring ma ai; manawn masham ai, masha sak gyam ai, gasat gala ai, hkalem hkalam ai, kyang laban ai mung chyat rai nga malu ai: 30 kadum kahte ai ni, bawlaw ai ni, Karai Kasang hpe ndawng ai ni, mayang yu ai ni, gumrawng gumtawng ai ni, grang dakat ai ni, kajam galam shabyin ai ni, kanu kawa a ga n madat ai ni, 31 myit n gring ai ni, ga shaka lai ai ni, nja nhpra myit n rawng ai ni hte matsan dum n chye ai ni, shanhte rai nga ma ai: 32 shingrai galaw ai ni gaw si ging nga ma ai, nga nna Karai Kasang a matsun maroi ga nga nga sai hpe, shanhte chye ma timung, shanhte hkum nan dai hte hpe galaw ma ai hta n-ga, dai hku hkan galaw ai ni hpe mung, awlaw ma ai.

Roma 2

2:1 Dai rai nna, masha kaga hpe jeyang ai wa e, na a mara raw na lam htum mat salit dai; kaning rai nme law, nang hkum jeyang nga nhtawm me dai amu hpe nan galaw ndai majaw, masha kaga hpe jeyang ai shaloi jang, na hkum hpe mahtang nang dawdan kau da wu ai. 2 Shingrai galaw ai ni a ntsa e Karai Kasang a tara dara ai lam gaw, tengman ai lam hte maren rai nga ai, anhte chye nga ga ai. 3 Shingrai galaw ai ni hpe jeyang nga nhtawm, tinang nan hkan galaw ai wa e, Karai kasang a tara dara ai hta, lawt lu na re ai, nang nawn da wu ni? 4 Karai Kasang a chyeju gaw myit malai lu hkra nang hpe woi awn wa nitdai hpe n chye n dum let, shi a n taw n tsang ai chyeju mung, myit sharang ai hte myit galu kaba ai hpe mung, nang n kaw n law a di da wu ni? 5 Gaja wa, na a ja la ai hte malai n lu ai myit majaw, Karai Kasang a pawt bu ngu ai, dingman ai tara dara na danpru ai nhtoi e hkam na madawng hpe, nang mahkawng da ndai. 6 Karai Kasang gaw langai hte langai hpe, tinang a bungli hte maren nhtang jaw na ra ai: 7 kaja ai bungli galaw let, shakut sharang nna hpung shingkang ma, arawng sadang ma, n hten n mat ai ma, tam ai ni hpe, htani htana asak jaw na ra ai; 8 ndang kalang nga nna tengman ai ga hpe n madat ai wa mi, n ding n man ai madat mara ai ni hpe mahtang, pawt bu nna sindawng katawt ai hte arip na maru ai; 9 Yuda masha nan raitimung, Heleni masha raitimung, n hkru n hkra re ai bungli hpe shachyen ai shinggyim masha ni yawng a ntsa e, tsinyam tsindam hte sharung shayawt ai gaw, rai nga u ga; 10 bai, Yuda masha hpe nan raitimung, Heleni masha hpe raitimung, kaja ai bungli shachyen ai ni nlang hte hta hpung shingkang, arawng sadang hte ngwi pyaw ai gaw, rai nga u ga: 11 kaning rai nme law, Karai Kasang gaw masha a myiman lata nga ai n rai. 12 Dai jep ai tara hpe garai n chye ai yubak galaw ai ni kadai mung, jep ai tara hta htenbya hkrum na ma ai n rai; jep ai tara npu e yubak galaw ai ni mahtang gaw, jep ai tara hta tara dara ai hkrum na mara ai: 13 dai jep ai tara hpe na yu ai majaw sha Karai Kasang a man e dinghpring lu ai n rai; dai tara hkan galaw ai ni hpe mahtang gaw, dinghpring ai ngu na maru ai. 14 Kaning rai nme law, jep ai tara hpe n lu ai maigan amyu ni, dai tara a daju hpe chye chyalu hte galaw nga ma ai shaloi e, jep ai tara n lu timung, tinang dai tinang a matu tara tai wa masalu ai: 15 shanhte a myit nsam dai tara a lam hpe sakse hkam ya nna, shanhte a myit mang ai hku shada da mara shagun ai hte mara raw hkat ma ai majaw, dai jep ai tara a ningli shanhte a kraw lawang hta ka da nga sai hpe, madun dan ma ai: 16 shingrai, nye a kabu gara shiga hte maren, Karai Kasang gaw Yesu Hkristu a lata hte, masha ni a n dan n leng ai lam hte hpe tara dara na nhtoi hta e rai na ra ai. 17 Nang mahtang Yuda masha mying ai wa rai nga nna, dai jep ai tara hpe machyu nga ai hte, Karai Kasang a marang e gumrawng nga nna, 18 shi a shawang myit chye ya ai hte, dai tara a sharin achyin lu la ai majaw, lam kaga ga hpe chye ginhka nna, 19 myikyaw ai ni a lam woi ai wa, nsin e lup nga ai ni a nhtoi, 20 n gring ai ni a hpareng wa, ma kaji ni a sara ngai rai nga nngai myit la nna, dai jep ai tara hta e chye chyang ai hte tengman ai a kasi lu ai wa nang e, 21 masha kaga hpe sharin achyin ai wa mi, nang hkum hpe gaw n sharin achyin nga n ni? lagu lagut n mai, nga nna hkaw tsun nhtawm, nang nan lagu n ni? 22 masha numshaw na n mai, nga da nhtawm, tinang dai numshaw nga n hka? gawng ngu sumla hpe matsat ai wa e, nawku htingnu nang hpya la nga n ni? 23 dai jep ai tara a marang e gumrawng ninglen, tara hpe tawt lai ai hte, nang Karai Kasang hpe jahpoi n ni? 24 Kaning rai nme law, Karai Kasang a amying ningsang gaw, nanhte a majaw maigan amyu ni hta shatan nhkan hkrum nga ai, nga nna laika hta ka da ai hte maren rai nga ai. 25 Dai jep ai tara hpe hkan shatup yang gaw, matu gadoi hkam ai mahtang akyu nga ai; raitimung, tara hpe tawt lai ai wa nang rai nga n yang gaw, na a matu gadoi ai amu gaw, n gadoi ai bai tai nga ai. 26 Matu gadoi n hkam ai wa, jep ai tara a dinghpring ai lam hpe hkan shatup a yang gaw, shi a n gadoi ai hpe gadoi ai zawn nawn ya na wu ai n rai ni? 27 Hkumshan a gadoi n hkam timung, tara hpe hkan galaw ai wa gaw, laika hku hkan nna matu gadoi hkam ninglen, tara hpe tawt lai ai wa nang hpe, tara dara na rin dai. 28 Kaning rai nme law, shinggan maga sha Yuda re ai wa, Yuda masha majing n rai; hkumshan a matu gadoi ai mung gadoi ai majing n rai; 29 kraw kata e Yuda wa rai nga ai mahtang gaw, Yuda masha majing rai nga ai: dai gadoi ai mung, laika hku hte sha n rai, wenyi hta na kraw lawang e byin nga ai rai nna, de a shakawn kungdawn ai gaw shinggyim masha kaw na n rai, Karai Kasang kaw na sha pru nga ai.

Roma 3

3:1 Dai rai yang gaw, Yuda wa kaning rai grau nga a ta? matu gadoi hkam ai mung, hpa akyu nga a ta? 2 Lam shagu hta akyu grai nga ai. Shawng na mahtang, Karai Kasang a shingran ga shanhte hkamla lu ma ai. 3 Rai taw gaw? shanhte hta na nkau mi n kam n sham dam ma yang gaw, shanhte a n kam n sham ai gaw, Karai Kasang a sadi sahka hpe shabai lu na kun? 4 Shing n rai law: Na a ga hta nang dinghpring nga n ga hte, Tara dara na du yang, nang awng wa n ga, nga nna laika hta rawng nga ai hte maren, masha yawng masu matsa ai ni tai wa timung, Karai Kasang gaw tengman nga u ga. 5 Ya, anhte a n ding n hpring ai gaw, Karai Kasang a dinghpring ai hpe shapraw shadan dat a yang gaw, anhte kaning ngu tsun na rai ta? pawt bu ari jaw ai Karai Kasang gaw n ding n hpring na, n rai ni? ( shing nga ai gaw, masha a hku hkan nna sha tsun nngai; ) 6 shing n rai law; rai dam yang, Karai Kasang gaw mungkan ga hpe kaning rai tara dara lu na rai ta? 7 Bai, nye a masu matsa ga hte Karai Kasang a tengman ai lam grau nna arawng sadang jat wa a yang gaw, yubak kap ai wa zawn jeyang ai hpe, ngai hpa rai naw hkrum nga n ta? 8 Mai kaja ai pru u ga n kaja ai galaw ga, nga nna nkau mi anhte hpe shatan nhkan let deng ma ai hte maren, galaw mai na n rai ni? shing nga ai ni mahtang gaw dawdan ging ma ai. 9 Shaloi kaning kun? Anhte je jan nga ga ni? N rai law; kaning rai nme law, Yuda ni raitimung, Heleni ni raitimung, yawng yubak kap ai ni rai nga ma ai hpe, anhte shawng de kadeng dan saga ai. 10 Laika hta mung, Dinghpring ai wa n nga ai, langai mi pyi n nga ai. 11 Chye chyang ai wa n nga ai, Karai Kasang hpe tam ai wa mung n nga ai; 12 Yawng dam mat wa masai, Shanhte rau hpawn asung n shang ai ni tai mat ma ai. Kaja ai amu kadai mung n galaw ma ai, Gaja wa, langai mi muk n galaw nga ai. 13 Shanhte a mayu gaw hpaw nga ai lup rai nga malu ai; Shanhte a shinglet hkalem chye nga ai, Pu htum a tuk shanhte a nten npu e rawng nga ai; 14 Shanhte a n-gup matsa mawa hte kajet kaje hkrai hpring nga malu ai; 15 Asai shapraw na shanhte a lagaw larau nga ai hte, 16 Shanhte a lam gaw jahten shaza ai hte nni nkri rai nga ai rai nna, 17 Ngwi pyaw ai lam hpe shanhte n chye ma ai: 18 Karai Kasang hpe hkrit kamyin ai lam, shanhte a myiman e n rawng malu ai, nga nna ka da nga ai. 19 N-gup yawng mayawng hpe sha-ip kau lu nna, mungkan ting hte gaw Karai Kasang a man e mara rawng ai tai nga mu ga, jep ai tara hta tsun matsun hte, jep ai tara npu e nga ai ni hpe a tsun nga ai gaw, anhte chye nga ga ai: 20 kaning rai nme law, dai jep ai tara hte yubak lam hpe chye ginhka lu ai majaw, jep ai tara a magam bungli hku hte shi a man e kadai mung dinghpring ai kaw n du lu ma ai. 21 Ya chyawm gaw, dai jep ai tara n lawm timung, jep ai tara hte myihtoi ni a laika sakse hkam ya ai Karai Kasang a dinghpring lu ai lam langai mi danpru wa sai; 22 dai gaw Yesu Hkristu hta kamsham ai a majaw, kamsham ai ni nlang hte a matu mara Karai Kasang a dinghpring lu ai lam rai nga ai: lachyen lahka chyawm gaw hpa mung n nga lu ai. 23 Kaning rai nme law, yawng yubak galaw ma ai hte, Karai Kasang a arawng sadang hpe dumhprut kau nna, 24 jahpu n ya ai sha, shi a chyeju hte, Yesu Hkristu a htingrai htingra ya ai a gawp e, dinghpring ai gaw du lu na ma ai. 25 Karai Kasang gaw myit sharang nga nna moi shawng na yubak mara ni hpe shalai dat kau ai majaw, shi a dinghpring ai lam hpe shadan dan u ga; 26 rai sa, ndai prat e shi a dinghpring ai lam hpe shadan dan na hte, Yesu hta kamsham ai wa hpe dinghpring shangun let, shi hkum nan dinghpring nga u ga she, Yesu a asai hta kamsham na marang e, shi gawng malai hkungga tai na, Karai Kasang gaw shi hpe shapraw dat wu ai. 27 Dai rai yang gaw, gumrawng shara kanang nga a ta? Dai gaw ban shadang mat sai. Gara tara hte ban shadang mat a ta? magam bungli tara hte rai kun? n rai law, kamsham ai tara hte ban shadang mat sai. 28 Kaning rai nme law, tara a magam bungli n lawm ai sha, kamsham ai hte sha masha gaw dinghpring lu ai, anhte sawn nawn ga ai. 29 Dai n rai yang gaw, Karai Kasang gaw Yuda ni a Karai Kasang sha rai nga a ni? maigan ni a Karai Kasang mung shi rai nga ai, n rai ni? 30 Rai sa, matu gadoi hkam ai ni kamsham ai hte, matu gadoi n hkam ai ni kamsham ai a marang e, dinghpring shangun ai Karai Kasang gaw langai sha rai nga a yang gaw, maigan ni a Karai Kasang mung, shi rai nga ai. 31 Dai rai yang gaw, kamsham ai hte anhte dai jep ai tara hpe gum-yu shatai kau sagaw ni? shing n rai law; anhte dai tara hpe shangang shagrin ga ai.

Roma 4

4:1 Dai she rai yang gaw, anhte a wa daju Abraham gaw, gawng shing-yan a atsam hte hpa akyu mu la a ta? 2 Abraham gaw magam bungli hte dinghpring ai lu la a yang gaw, gumrawng gumtawng shara nga lu timung, Karai Kasang a man e n rai. 3 Dai Chyum Laika mahtang gaw kaning nga a ta? Abraham gaw Karai Kasang hpe kamsham nga ai rai nna, dai hpe dinghpring ai rai nga ai, shi a matu ngu ya wu ai, nga ai. 4 Magam bungli shachyen ai wa chyawm gaw, chyeju hku hte shabrai lu la ai n rai, hkam ging ai majaw sha lu la lu ai. 5 Magam bungli n shachyen ai sha, tara tawt lai ai ni hpe dinghpring lu shangun ai madu hpe kamsham nga ai wa gaw, shi a kamsham ai hpe gaw, dinghpring ai, ngu ya wu ai. 6 Dai hte maren, Karai Kasang gaw magam bungli hpe n tau yu ai sha, dinghpring ngu ya wu ai wa hpe, Dawi mung sha-a nga nna tsun ai gaw: 7 Tara shut hpyit ai hta na raw dat ai hte, Yubak hpe makoi kau ya ai hkrum ai ni gaw, a nga ma ai; 8 Madu e yubak n shagun ai wa gaw a nga ai, nga ai. 9 Shing nga sha-a ai gaw, matu gadoi hkam ai ni hpe sha, shing n rai, matu gadoi n hkam ai ni hpe mung, sha-a nga mu ni? Kaning rai nme law, kamsham ai gaw Abraham hta dinghpring ai ngu ya wu ai, nga nna anhte tsun ga ai. 10 Dai rai yang gaw, kaning rai ngu ya wu ta? Matu gadoi hkam ngut sayang, shing n rai, garai n hkam yang re ai, ngu ya nga wu ni? Matu gadoi hkamla ai hpang e n rai, garai n hkam yang she, rai nga sai. 11 Dai hta kaga, matu gadoi n hkamla ai sha, kamsham ai a majaw dinghpring ngu ya hkrum ai nlang hte a kawa mung; 12 matu gadoi hkam ai ni hta lawm ma ai rai nna, matu gadoi hkam ai hta n-ga, anhte a wa Abraham gaw matu gadoi garai n hkam kaw nna rawng nga sai makam masham a hkang hta e a hkannang nga ai ni a kawa mung shi tai nga u ga, matu gadoi garai n hkam kaw nna, dinghpring nga ai makam masham a dazik ngu ai, matu gadoi ai kumla gaw, shi hkamla nu ai. 13 Dai hta n-ga, mungkan ga a sali wunli tai na, nga nna Abraham hte shi a aru arat kaw pru ai ga ndat gaw, dai jep ai tara kaw na pru ai n rai, makam masham a dinghpring ai hte sha lu la lu ai. 14 Kaning rai nme law, jep ai tara hta lawm ai ni, sali wunli hkamla ai ni rai nga ma yang gaw, makam masham gaw kaman lila rai mat wa ai hte, ga ndat mung hpoi mat sai. 15 Jep ai tara gaw pawt sindawng ai shapraw wu ai; jep ai tara n nga yang gaw, yubak mara mung n nga na re ai. 16 Dai re ai majaw, sali wunli hpe chyeju hku hte sha lu la lu hkra, dai ga ndat gaw jep ai tara hta lawm ai ni hta sha n rai, yawng mayawng a kawa Abraham a kamsham ai hta lawm ai amyu mahkra hta e grin dik wa u ga she, kamsham ai hte sha rai wa ai: 17 Abraham hpe gaw, Amyu law law a kawa ngai nang hpe shatai sade ai, nga nna ka da nga ai hte maren si mat ai ni hpe jahkrung ya ai hte, garai n tai ai ni hpe ya e rai nga ai zawn ngu da ai rai nna, shi kamsham nga ai Karai Kasang a man e, anhte mahkra a kawa rai nga ai. 18 Na a nshu nsha ni dai hte maren tai na mara ai, nga nna tsun dan wu ai hte maren, myit mada shara n nga raitimung, amyu baw law law a kawa tai u ga, kamsham let, myit a mada nga ai. 19 Latsa ning du magang wa ai majaw, tinang hkum nan chyasi rai sai hte, Sara a pu jat mung chyasi zawn nawn wu ai raitimung, kamsham ai myit n yawm lu ai: 20 rai sa, Karai kasang a ga ndat hpe dum yang, shi kam shut ai hte ndi nda n re ai sha, kamsham ai hte dakan dakring rai wa let, 21 Karai Kasang hpe shakawn kungdawn nna, ga ndat da ai hte maren shi shabyin na ra ai hpe, myit a jung nga ai. 22 Dai re ai majaw, dai gaw shi a matu dinghpring ai, ngu ya wu ai. 23 Shi hpe shing ngu ya wa ai gaw, shi a matu sha ka da nga ai n rai: 24 anhte a Madu Yesu hpe si mat ai ni kaw na hkrung sharawt la ai wa hpe kamsham nna, ngu ya hkrum na ra ga ai, anhte a matu mung ka da nga ai: 25 dai Madu Yesu gaw, anhte a shut hpyit ai a matu ap kau ai hkrum nna, anhte dinghpring wa lu na matu, hkrung sharawt la ai hkrum nu ai.

Roma 5

5:1 Shingrai, kamsham ai hte dinghpring wa lu ga ai majaw, anhte a Madu Yesu Hkristu a marang e, anhte Karai Kasang hte mahku mara rai ga ai: 2 Yesu a gawp e mung, ya lu la sagaw ai chyeju hta e, anhte kamsham ai hte shang lu saga ai rai nna, Karai Kasang a hpung shingkang hpe myit mada nga let, kabu gumrawng nga ga ai. 3 Dai hta n-ga, tsin-yam tsindam hta e mung anhte kabu gumrawng ga ai; tsin-yam tsindam mahtang gaw shakut sharang ai, 4 shakut sharang ai gaw myit marai ai, myit marai ai gaw myit mada ai shabyin nga ai hpe, anhte chye ga ai: 5 dai myit mada ai chyawm gaw, kaya kahpa jahkrum mi ai n rai: kaning rai nme law anhte hpe jaw da sai Chyoi pra ai Wenyi e Karai Kasang a tsawra ai myit, anhte a kraw lawang hta e ru bang ya ma ni ai. 6 Anhte naw, gawngkya nga ga yang, ladaw da ai ahkying hta e, Hkristu gaw tara n hkungga ai ni a matu mara si hkam sai. 7 Gaja wa, dinghpring ai masha a matu mara si hkam na kadai n nga nhten; mai kaja ai masha matu mara chyawm gaw, si hkam gwi na pyi, langai ngai nga nhten. 8 Raitimung, anhte yubak kap ai ni naw rai nga ga yang, Hkristu gaw anhte a matu mara si hkam ai hta, Karai Kasang nan shi a tsawra ai hpe, anhte kaw e shadan dat ma ni ai. 9 Dai rai nna, shi a asai hta ya dinghpring lu saga ai majaw, anhte shi a gawp e Karai Kasang a pawt sindawng ai kaw na, hkyehkrang la ai grau nna hkrum na ga ai. 10 Kaning rai nme law, anhte hpyen ni naw rai nga ga yang, shi a Kasha a si hkam ai a majaw, anhte Karai Kasang hte htinglu htinglai ai hkrum lu saga ai rai yang gaw, htinglu htinglai hkamla ngut jang, shi a asak sumdam hta e, anhte hkyehkrang la ai grau nna hkrum na ga ai. 11 Bai, dai hta n-ga, anhte a Madu Yesu Hkristu a marang e, Karai Kasang hta mung anhte kabu gumrawng nga ga ai: shi a majaw dai htinglu htinglai ai chyeju gaw anhte ya hkamla lu sagaw ai. 12 Dai rai nna, masha langai mi a jaw e yubak gaw mungkan ga e shang wa nna, yubak a majaw sihkrung sihtan shang nang wa ai hte maren, yawng mayawng yubak kap nga ma ai, majaw, masha nlang kaw e sihkrung sihtan du bang wa sai. 13 Kaning rai nme law, dai jep ai tara da ai du hkra yubak gaw mungkan ga e nga nga sa timung, jep ai tara n nga ai laman e, yubak shagun ai, ngu ai, n nga ai. 14 Shing nga raitimung, Adam a tawt lai ai lam hte maren yubak n galaw ai ni a ntsa e pyi, Adam kaw nna Mawshe a aprat du hkra sihkrung sihtan uphkang nga sai: Adam chyawm gaw, du na ra ai wa a kumla rai nga ai. 15 Raitimung, tawt lai ai lam zawn, chyeju kumhpa lam rai nga ai n rai; kaning rai nme law, marai langai mi a shut hpyit ai jaw e ga daga si mat ma sayang gaw, Karai Kasang a chyeju hte, Yesu Hkristu ngu ai masha langai mi a chyeju hte jaw ai kumhpaw kumhpa gaw, lanlak a matu grau nna law htam wa na rai nga sai. 16 Bai, marai langai mi a yubak galaw ai lam zawn, dai kumhpaw kumhpa lam rai nga ai n rai; kaning rai nme law, dawdan shangun hkra, yubak langai mi a majaw tara dara na lam pru wa timung, dinghpring lu la hkra, tawt lai shajang ai law law a jaw e, dai chyeju kumhpa pru wa sai. 17 Dai hta kaga, marai langai mi tawt lai nna, dai langai mi a majaw sihkrung sihtan uphkang nga sayang gaw, n taw n tsang ai chyeju hte dinghpring ngu ai kumhpa hpe hkamla ai ni gaw, Yesu Hkristu ngu ai wa langai mi a majaw, asak hkrung ai hte grau nna uphkang nga na masai. 18 Dai rai nna, tawt lai ai langai mi a majaw, masha nlang hte gaw dawdan ai hkrum ma ai hte maren, dinghpring ai amu langai mi a majaw, masha nlang hte gaw dinghpring lu na asak sumdam lu la manu ai. 19 Kaning rai nme law, masha langai mi a n madat mara ai a majaw, ga daga hpe yubak kap ai ni ngu shatai mu ai hte maren, marai langai mi a madat mara ai lam majaw, lanlak hpe dinghpring ai ni ngu shatai na maru ai. 20 Shut hpyit ai amu law jat wa mu ga, jep ai tara gaw shang lawm wa sai: 21 raitimung, yubak gaw sihkrung sihtan hte uphkang nga ai hte maren, anhte a Madu Yesu Hkristu a marang e, htani htana asak lu la hkra, chyeju gaw dinghpring ai hte uphkang nga lu u ga, yubak law htam wa ai hte yang e, chyeju gaw grau nna law htam wa sai.

Roma 6

6:1 Dai rai yang gaw anhte kaning ngu tsun na ma? Chyeju law htam wa u ga, yubak hta e naw a hkan nga na kun? 2 Shing n rai u ga. Yubak kaw na si hka nga ai ni anhte gaw, dai hta e kaning rai naw pra nga lu na ga ta? 3 Dai hta kaga, Hkristu Yesu hta e baptisma hkam ai ni anhte nlang hte gaw, shi a si hkam ai hta baptisma hkam nga ga ai hpe, nanhte n chye nga myit ni? 4 Dai re ai majaw, Hkristu gaw Kawa a hpung shingkang hte si mat ai ni kaw na hkrung sharawt la ai hkrum wu ai hte maren, anhte mung asak sumdam ningnan hta e rawt hkawm wa lu hkra, dai baptisma hkam ai hta e, anhte si hkam nna shi hte rau lup makoi ai hkrum saga ai. 5 Kaning rai nme law, anhte a si hkam ai gaw shi a si hkam ai hte baw sha rai nga ai majaw, anhte nhpang sha tai nga ga yang gaw, bai hkrung rawt ai hta e mung, anhte shi hte nhpang rum na ga ai. 6 Si mat ai wa gaw yubak hta na lawt pru nga ai majaw, 7 yubak a mayam anhte naw n tai nga sa na, ngu nna yubak hkum gaw shaza kau ai hkrum u ga she, anhte a gawng shing-yan dingsa gaw shi hte rau wudang hta jen da hkam ai hpe, anhte chye nga ga ai. 8 Si mat ai ni kaw na hkrung sharawt la hkrum ai Hkristu gaw, galoi mung bai n si lu na hte, sihkrung sihtan gaw galoi mung shi hpe n madu lu na nu ai, anhte chye ga ai majaw, 9 Hkristu hte rau si hkam ga yang gaw, anhte shi hte rau mung hkrung nga lu na ga ai, ngu nna anhte kamsham nga ga ai. 10 Kaning rai nme law, shi a si hkam ai gaw, yubak a majaw kalang sha mi si hkam ai, rai nga ai; bai rawt hkrung ai chyawm gaw, Karai Kasang a man e ahkrung nga ai lam rai nga ai. 11 Dai hte maren nanhte mung, yubak hte si hka mat ai ni rai nga manit dai rai nna, Hkristu Yesu hta e Karai Kasang a man e ahkrung nga ai ni rai nga ga ai, ngu nna myit la mu. 12 Dai re ai majaw, yubak a kayut ai lam madat mara ai du hkra, nanhte a si chye ai hkum hkrang hta e yubak hpe hkum up shangun myit; 13 nanhte a daw shan ni hpe mung, n ding n hpring ai hpyen hking hpe zawn, yubak hpe hkum ap ya myit; si mat ai ni kaw na hkrung rawt lu ai ni zawn, Karai Kasang kaw tinang dai sak ya mu; nanhte a daw shan ni hpe mung, dinghpring ai hpyen hking shatai nna, Karai Kasang hpe sak ya mu. 14 Kaning rai nme law, nanhte gaw jep ai tara npu e n rai, chyeju npu e rai nga myit dai majaw, yubak gaw nanhte a ntsa e madu lu na n rai. 15 Dai rai yang gaw, kaning law? jep ai tara npu e n rai, chyeju npu e anhte rai nga ga ai majaw, yubak galaw na ga ni? Shing n rai u ga. 16 Langai ngai kaw madat mara na nga, tinang dai shang nna mayam tai wa myit yang gaw, sihkrung sihtan hkrum hkra yubak a ga raitimung, dinghpring ai lu la hkra madat mara ai lam raitimung, nanhte hkan madat nga myit yang gaw, de a mayam ni nanhte rai nga myit dai, n chye nga myit ni? 17 Nanhte chyawm gaw yubak a mayam ni tai yu manit dai raitimung, nanhte hkamla hkrum ai sharin shaga ai lam hpe, sharawng ai myit hte madat mara manit dai majaw, Karai Kasang kaw a nga u ga: 18 yubak kaw na shalawt dat ai hkrum nhtawm, dinghpring ai a mayam ni nanhte tai wa manit dai. 19 Nanhte gawng shingma kya nga myit dai majaw, masha a hku hkan nna sha ngai tsun nngai: kaning rai nme law, n tara ai bungli galaw u ga, nanhte a daw shan ni hpe awu asin re ai hte n tara ai a mayam ni tai na, nanhte ap kau manit dai hte maren, chyoi pra ai lu la hkra, dinghpring ai a mayam ni tai na, nanhte a daw shan ni hpe ya e ap ya mu. 20 Yubak a mayam ni nanhte rai nga manit dai shaloi e, dinghpring ai hta na nanhte daw hka nga myit dai. 21 Dai rai nna, dai aten e nanhte hpa akyu lu la nga myit ta? ya e nan kaya kahpa ai baw lu la nga myit dai: dai ni a chyahtum gaw si mat ai hkrai rai nga ai. 22 Ya chyawm gaw yubak kaw na shalawt dat ai hkrum nna, Karai Kasang a ali ama ni tai nga myit dai majaw, chyoi pra hkam na ngu ai akyu gaw, nanhte lu la myit dai: de a chyahtum madaw gaw htani htana asak rai nga ai. 23 Kaning rai nme law, yubak a shabrai gaw si mat ai rai nga ai; Karai Kasang a chyeju kumhpa chyawm gaw, anhte a Madu Hkristu Yesu hta e, htani htana asak rai nga ai.

Roma 7

7:1 Bai, hpunau ni e, masha naw hkrung nga ai aten e, jep ai tara gaw shi hpe madu nga ai, nanhte n chye nga myit ni? ( ning nga ai gaw, tara lam chye ai ni hpe ngai tsun nngai). 2 Kaning rai nme law, madu wa lu ai numsha gaw, madu wa naw hkrung nga ai hte yang, tara a majaw shi hte a lashum manoi nga ai: raitimung, madu wa si mat a yang gaw, madu wa a tara na lawt lu nga ai. 3 Dai re ai majaw, madu wa garai n si yang, la kaga kaw wa a yang gaw, la shaw ai num shi hpe ngu na rai nga ai; madu wa si mat sayang chyawm gaw, tara hta na shi lawt lu sai rai nna, la kaga kaw wa timung, la shaw ai num tai na n rai. 4 Dai hte maren, hpunau ni e, si mat ai ni kaw na hkrung sharawt la hkrum ai la kaga ngu ai wa kaw, nanhte wa lu nna, anhte Karai Kasang a matu asi si lu u ga, nanhte mung Hkristu a hkum hkrang hta e si mat ai hkrum nna, jep ai tara hte daw hka wa manit dai. 5 Kaning rai nme law, hkumshan a myit hta anhte naw rawng nga ga yang gaw, sihkrung sihtan a matu asi si u ga, jep ai tara a jaw e yubak a marin marit ai baw, anhte a daw shan ni hta e katu nga mali ai. 6 Ya chyawm gaw, si mat hkrum ai hte anhte hpe sharen da ai baw hta na daw hka wa yang, jep ai tara kaw na shalawt dat ai anhte hkrum saga ai: dai rai nna, ga matsun dingsa hku n hkan ai sha, Wenyi a myit ningnan hte anhte dawjau nga ga ai. 7 Dai rai yang gaw, anhte kaning ngu tsun na ma? Dai jep ai tara gaw yubak rai nga n ni? Shing n rai u ga. Raitimung, jep ai tara hte sha n rai yang gaw, yubak hpe ngai n chye nngai: kaning rai nme law, Myit hkum marin, nga nna jep ai tara n tsun taw gaw, gaja wa, myit marin ai hpe ngai n chye nngai. 8 Yubak chyawm gaw ginshan yaw nna, dai ga matsun hte myit marin ai baw sumhpa ngai hta e shapraw dat wu ai; kaning rai nme law, jep ai tara n nga yang gaw, yubak gaw chyasi rai nga ai. 9 Ngai chyawm gaw tara hta n nga ai wa, lang mi e pra nga nngai: raitimung dai ga matsun pru wa yang, yubak prawn wa ai, ngai mahtang si wa nngai; 10 dai rai nna, asak hte seng ai ga matsun gaw, si ai lam tai wa sai, ngai dum nngai: 11 kaning rai nme law, yubak gaw ginshan yaw nna, dai ga matsun hte ngai hpe hkalem kau nhtawm, dai hte ngai hpe sat kau ni ai. 12 Dai rai nna, jep ai tara gaw chyoi pra nga ai; dai ga matsun mung, chyoi pra, dinghpring ai hte mai kaja nga ai. 13 Dai rai yang gaw, mai kaja ai baw nye a matu si lam tai wa sani? Shing n rai u ga. Dai mai kaja ai baw ngai hta si mat ai shabyin let, yubak majing shadan dan nna, dai ga matsun hte yubak gaw nachying n hkru ai yubak tai u ga she, yubak mahtang nye a si lam tai wa sai. 14 Dai hta kaga, jep ai tara gaw wenyi tara rai nga ai anhte chye ga ai; ngai mahtang hkumshan myit sha rawng nna, yubak e mari ai mayam rai nga nngai. 15 Ngai shachyen ai bungli hpe ngai n chye nngai; ngai n galaw mayu ai lam galaw nga nngai; ngai ndawng n yawt ai bungli sha a galaw nga nngai. 16 Raitimung, n galaw mayu ai hpe ngai galaw yang gaw, jep ai tara gaw kaja nga ai, ngai dai hte myit hkrum nngai. 17 Dai rai nna, ya ngai nan dai hpe n galaw nngai, ngai hta rawng ai yubak she dai hpe galaw nga ai. 18 Kaning rai nme law, nye a kraw e, rai sa, nye a shinggyim hkumshan myit hta, kaja ai baw n rawng li ai, ngai chye nga nngai: galaw mayu ai myit ngai hta a rawng nga timung, mai kaja ai hku galaw na ngai n mu lu we ai. 19 Galaw mayu ai mai kaja ai hpe ngai n galaw ai wa, n galaw mayu ai n hkru n hkra dai hpe ngai galaw nga nngai. 20 Shingrai ngai n galaw mayu ai hpe ngai a galaw nga ai gaw, ngai nan dai hpe n galaw nngai, ngai hta rawng ai yubak she dai hpe galaw nga ai. 21 Dai re ai majaw, mai kaja galaw mayu ai ngai hkum lala, n hkru n hkra hte ginrun nga ai, ngu ai tara hpe ngai mu hkrup nngai. 22 Kaning rai nme law, nye kraw lawang myit hte Karai Kasang a tara hta e ngai kabu gara nga nngai; 23 raitimung, nye a daw shan ni hta e tara kaga gaw, nye myit mang hta rawng ai tara hte gasat hkat nga ai rai nna, nye daw shan ni hta e rawng ai yubak a tara hta e ngai hpe bawngdung shangun nngai, ngai mu ni ai. 24 Chyum sha hkrum ai ngai wa e, ndai si shangun ai hkum hkrang hta na, ngai hpe kadai wa mawai la na law e? 25 Anhte a Madu Yesu Hkristu a marang e, Karai Kasang hpe ngai sha-a nga nngai. Dai rai nna nye a myit mang hte ngai hkum nan Karai Kasang a tara hpe a daw nga nngai; hkumshan hte mahtang gaw yubak a tara hpe ngai a daw nga nngai.

Roma 8

8:1 Dai re ai majaw ya gaw, Hkristu Yesu hta e nga ai ni a matu mara, dawdan shara n nga ai. 2 Kaning rai nme law, Hkristu Yesu hta e jahkrung ya ai Wenyi a tara gaw, yubak a tara hta na raitimung, si mat ai tara hta na raitimung, ngai hpe shalawt dat ni ai. 3 Jep ai tara nan shinggyim hkumshan majaw n-gun kya nna n shabyin lu ai gaw, hkumshan kaw hkannang ai ni hta e n re ai sha, anhte Wenyi kaw hkannang ai ni mahtang hta e, dai jep ai tara a ga matsun dik wa lu hkra, 4 Karai Kasang gaw yubak a matu mara, yubak a hkum hkrang hte bung ai gawng shing-yan hte, shi hkum nan a Kasha hpe shangun dat ru ai rai nna, shinggyim hkumshan hta e yubak hpe dawdan wu ai. 5 Kaning rai nme law, shinggyim hkumshan myit hkan ai ni gaw, hkumshan hte seng ai arai ni hpe myit nga ma ai; Wenyi hkan ai ni mahtang gaw, Wenyi a lam myit nga ma ai. 6 Hkumshan myit gaw si mat ai lam rai nga ai; Wenyi a myit chyawm gaw, hkrung ai lam hte ngwi pyaw ai lam rai nga ai. 7 Dai hta kaga hkumshan myit gaw Karai Kasang a tara npu e n taw lu ai hte, dai hpe n madat lu ai majaw, Karai Kasang hpe ndawng n yawt ai myit sha rai nga ai; 8 hkumshan myit hkannang ai ni mung, Karai Kasang a myit awng shara n tai lu ma ai. 9 Nanhte hta e chyawm gaw Karai Kasang a Wenyi rawng nga myit yang gaw, nanhte hkumshan myit hta e n rai, Wenyi hta e nan rawng nga myit dai. Langai ngai gaw Hkristu a Wenyi n rawng yang dai wa shi hte n seng nga ai. 10 Hkristu gaw nanhte hta e nga nga a yang gaw, hkum hkrang gaw yubak a majaw si nga raitimung, wenyi mahtang dinghpring ai a majaw ahkrung nga ai. 11 Dai hta kaga, si mat ai ni kaw na Yesu hpe hkrung sharawt la ai wa a Wenyi gaw, nanhte hta e rawng nga a yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta e rawng nga ai shi a Wenyi a lata hte nanhte a si chye ai hkum hkrang ni hpe mung, jahkrung ya na marin dai. 12 Dai re ai majaw, hpunau ni e, hkumshan a myit hkannang na matu, hkumshan a hka kap ai ni anhte rai nga ga ai n rai; 13 kaning rai nme law, hkumshan hte seng ai asak sha hkrung nga myit yang gaw, nanhte si na rai nga myit dai; raitimung, Wenyi hte hkum hkrang a arawn alai ni hpe nanhte sat kau myit yang gaw, nanhte hkrung nga na marin dai. 14 Karai Kasang a Wenyi e woi lakawn la ai hkrum mahkrum ni gaw, Karai Kasang a kashu kasha ni rai nga ma ai. 15 Kaning rai nme law, bai hkrit kang na matu, mayam a wenyi hpe nanhte hkamla manit dai n rai; Aba, Wa e, nga nna jahtau chye ai, yin la ai kasha a wenyi hpe she, nanhte hkamla manit dai. 16 Dai Wenyi nan anhte a wenyi hte hkrum nna, anhte Karai Kasang a kashu kasha ni rai nga ga ai hpe, sakse hkam ya ma ai. 17 Kashu kasha rai nga ga yang gaw, sali wunli hkamla ai ni mung anhte rai nga ga ai; Hkristu hte rau hpung shingkang hkamla lu hkra, shi hte rau nni nkri hkrum nga ga yang gaw, Karai Kasang a sali wunli hkamla ai ni hte, Hkristu hte rum ai sali wunli hkamla ai ni, anhte rai nga ga ai. 18 Kaning rai nme law, ndai aprat na tsin-yam tsindam gaw, anhte kaw e shadan shapraw na ra ai hpung shingkang hte shadawn n ging nga ai, ngai myit nga nngai. 19 Nga yawng nga pra mung myit ndawt ai hte, Karai Kasnag a kashu kasha ni a paw pru na ra ai hpe ala nga ma ai. 20 Dai nga yawng nga pra chyawm gaw, hten run lam npu e shagrit kau ai hkrum raitimung, tinang ra ai hku n re ai sha, nga yawng nga pra nan lala sharen da ngu ai hten mat ai kaw na shalawt dat ai hkrum nna, 21 Karai Kasang a kashu kasha ni a pru lawt wa ngu ai hpung shingkang hta shang lu na, myit mada nga nna, dai hpe shagrit kau ai wa a majaw, shagrit kau ai hkam nga ai. 22 Dai hta kaga, nga yawng nga pra ting gaw ya du hkra rau madai nga nna, gadau gadap rai nga ma ai hpe, anhte chye ga ai. 23 Dai hta n-ga, Wenyi a chyeju nloi hpe hkamla sai ni anhte mung, anhte a kraw lawang hta e, anhte nan madai nga nna, anhte a hkum hkrang a htingrai htingrat ai lam ngu ai, kasha yin la na chyeju hpe, a la nga ga ai. 24 Kaning rai nme law, myit mada ai hte anhte hkyehkrang la ai hkamla saga ai; raitimung, mu lu ai arai hpe myit mada ai, ngu ai n rai nga ai; mu lu ai mahtang hpe kadai myit mada nga a ta? 25 N mu lu ai mahtang hpe myit a mada nga ga yang gaw, anhte dai hpe shakut sharang ai hte a la nga ga ai. 26 Dai hte maren, dai Wenyi mung anhte a gawng run gawng tsang ai hpe lanu lahku ya nga ai: kaning rai nme law, akyu hpyi mai ai hte maren anhte n chye hpyi nga ga timung, dai Wenyi nan n-gup n hkawn lu ai kraw madai ai hte, anhte a matu hpyi htinglu ya mi ai; 27 kraw lawang e sawk yu ai wa chyawm gaw, Wenyi a myit hpa rai nga ai gaw chye ya nga ai: kaning rai nme law, Karai Kasang ra ai hte maren, chyoi pra ai ni a matu mara shi hpyi htinglu ya nga ai. 28 Dai rai nna, shakyet tawn da ai hte maren, shaga la ai hkrum ai ni ngu ai, Karai Kasang hpe tsawra ai ni a matu mara, yawng mayawng mai kaja hkra jawm byin wa sai, anhte chye ga ai. 29 Kaning rai nme law, shi a Kasha gaw kahpu kanau lanlak hta e alat ningshawng tai u ga, shawng nna chye tawn da ai ni hpe, shi a Kasha a gawng shing-yan hte bung na matu, shi shanhte hpe shawng nna san tawn da mu ai: 30 shawng nna san tawn da sai ni hpe mung shi shaga la mu ai; shaga la manu ai ni hpe mung, shi dinghpring shangun mu ai; dinghpring shangun manu ai ni hpe mung, hpung shingkang lu shangun mu ai. 31 Dai rai yang gaw, ndai hte hta anhte hpa tsun na ga ta? Karai Kasang gaw anhte a maga e nga nga a yang gaw, anhte hpe hpyen ai maga de kadai wa mi nga lu na a ta? 32 Shi kasha lala hpe lahpawt lama n di ai sha, anhte mahkra a matu mara shi hpe ap ya ai wa gaw, shi hte nawng yawng mayawng anhte hpe jaw na, n rai ni? 33 Karai Kasang a lata la ai ni hpe kadai wa mi mara shagun lu na a ta? Karai Kasang gaw dinghpring shangun ai wa rai nga ai. 34 Dawdan lu ai wa gaw, kadai wa mi rai nga a ta? Si hkam nna, rai sa, si hkam ai hta n-ga, si mat ai ni kaw na hkrung sharawt la ai hkrum nhtawm, Karai Kasang a hkra lata e rai nga let, anhte a matu mara hpyi htinglu ya ai wa, Hkristu Yesu nan rai nga ai. 35 Hkristu a tsawra ai hta na anhte hpe kadai wa mi jahka kau lu na a ta? 36 Na a jaw e anhte shani shagu sat kau ai hkrum ga ai, Sat na san da ai sagu hpe zawn, anhte hpe nawn da mi ai, nga nna ka da nga ai hte maren, tsin-yam tsindam atsu atsam, zingri zingrat ai, hku hku hpang gara ai, singgu krin ai, shoihpa hkrithpa hte ri nhtu hkrum yang she, jahka kau lu na mi ni? 37 N rai law, anhte hpe tsawra nga ai wa a majaw, ndai yawng hte hpe anhte grau nna hkap dang kau lu ai ni rai ga ai. 38 Kaning rai nme law, si timung prawn timung, lamu kasa raitimung, tawa magam raitimung; ya e nga ai arai htawmhpang e du na arai hte, hpung atsam raitimung; 39 lahta tang na arai lawu tsang na arai hte, hpan da mada kaga hpa raitimung, anhte a Madu Hkristu Yesu hta e Karai Kasang a tsawra ai hta na, anhte hpe n jahka kau lu na mi ai, ngu nna ngai myit hkut nga nngai law.

Roma 9

9:1 Hkristu hta e tengman ai ga ngai tsun nngai, ngai n masu nngai; 2 nye kraw lawang e yawnhkyen kaba hte tutnawng na atsu atsam ngai hkam nga nngai gaw, Chyoi pra ai Wenyi hta e nye a myit nsam gaw, ngai hte sakse hkam ya ai. 3 Kaning rai nme law, nye a amyu baw re ai, nye a hpunau ni a matu mara, ngai hkum dai Hkristu hte hka nna dagam dala hkrum na hpe, hkam mayu hkra rai nga nngai: 4 shanhte gaw Israela masha rai nga ma ai; kasha yin la ai akyu mung, dai hpung shingkang mung, ga shaka ni mung, tara jaw ai shingran mung, dawjau ai lam mung, ga ndat ni hpe mung, shanhte lu ma ai: 5 ji wa ni gaw shanhte a ji wa ni rai nga ma ai rai nna, masha labau hku gawn yang, Hkristu gaw shanhte kaw na rai nga ai; shi gaw yawng mayawng a ntsa e htani htana e a nga ai Karai Kasang rai nga ai. Amen. 6 Raitimung, Karai Kasang a mungga gaw kaman be be zawn tai wa sai n rai. Kaning rai nme law, Israela amyu yawng hte wa, Israela masha majing n rai ma ai: 7 Abraham a aru arat re ai ni mung, yawng hte wa kashu kasha mai ngu na n rai. Isak hta mahtang, na a matu mara tai na ra ai, nga ai. 8 Da ndai gaw ning rai nga ai: shinggyim hkumshan e shangai ai kashu kasha ni gaw, Karai Kasang a kashu kasha ni majing n rai ma ai; ga ndat hte seng ai kashu kasha ni chyu sha, matu mara majing re ai nawn da mu ai. 9 Kaning rai nme law, Ladu hkrum jang ngai sa du nna Sara gaw shadang sha ba na ra ai, nga ai ga gaw, ga ndat rai nga ai. 10 Dai hta n-ga, Rebeka mung anhte a wa Isak hte na-um nasin rai wa sayang, 11 Karai Kasang shakyet da nhtawm, lata la ai lam gaw, magam bungli hte n re ai sha, shaga la ai wa a majaw she grin wa u ga, kasha yan garai n shangai ai rai nna, kaja ai hte n kaja ai hpa garai n galaw ti pyi, 12 Kaba ai wa matang kaji ai wa kaw mayam tai na ra ai, nga nna kanu hpe tsun dan wu ai. 13 Dai hte maren, Yaku hpe ngai tsawra nna, Esaw hpe ngai ndawng n yawt nngai, nga nna ka da nga ai. 14 Dai re ai majaw anhte kaning ngu tsun na ma? Karai Kasang kaw n ding n hpring nga ai rai ni? Shing n rai law. 15 Kaning rai nme law, Ngai chyeju galaw mayu ai wa hpe chyeju galaw na we ai; ngai matsan dum mayu ai wa hpe matsan dum na we ai, nga nna Mawshe hpe tsun dan nu ai. 16 Dai rai nna, lu la mayu ai wa a myit e rai lu ai n rai, gat shakut ai majaw mung rai lu ai n rai, dai gaw chyeju rawng ai Karai Kasang a myit majaw sha rai nga ai. 17 Kaning rai nme law, Chyum laika gaw, Nang hta nye a atsam madun dan lu nna, ga ntsa ting e nye a amying gumhkawng wa u ga she, ngai nang hpe sharawt dat de ai, nga nna Hpara-u hpe tsun nga ai. 18 Dai rai nna, kadai hpe mung, chyeju galaw mayu yang galaw nga ai, kadai hpe mung myit shaja mayu yang, shaja ya nga ai. 19 Dai re ai majaw, Shi hpa rai ra baw naw shagun nga ai kun? shi a shawang myit hpe kadai wa ban hkum lu a ta? nga nna ngai hpe htan mayu nhten. 20 Ataw, Karai Kasang hpe nhkap ai wa e, nang gaw kadai wa mi rai nga n ta? Galaw da sai arai gaw, Hpa majaw nang ngai hpe ning di galaw n ta? nga nna shachyaw da ai wa hpe tsun na a ni? 21 Di bu sama gaw kagam ga hpe madu lu nna, ga gumdin langai sha hta na, chyen mi hte reng ai di langai mi, bai chyen mi hte n reng ai di langai mi, galaw lu ai n rai ni? 22 Dai zawn Karai Kasang gaw, shi a pawt sindawng madun nna, shi a atsam hpe chye wa shangun mayu let, hten mat na matu hkyen da ai pawt ging ai di ni hpe galu kaba sumnung ai myit madun nna shakut sharang nga nga ai hte; 23 hpung shingkang a matu shawng e lajang da ai chyeju di ngu ai, Yuda ni hta sha n rai, maigan amyu ni hta na mung, 24 shaga la ai anhte hta e, shi a grau ai hpung shingkang hpe chye shangun mayu ai rai nga a yang gaw, hpa tsun shara nga a ta? 25 Dai hte maren Hosea laika hta mung shi ning nga tsun ai, Nye a amyu n re ai hpe, nye a amyu ngai ngu nna, N tsaw n ra ai shayi sha hpe, tsawra ai ngu na we ai; 26 Shingrai, Nanhte nye a amyu n rai nga myit dai, nga nna shanhte hpe tsun dan ai shara, dai yang e pyi, Hkrung nga ai Karai Kasang a kasha ni ngu na marin dai, nga ai. 27 Esaia mung Israela amyu a lam jahtau nna, Israela kashu kasha ni gaw nammukdara a zaibru zawn law ma timung, ngam nga ai kau chyen chyu sha hkyehkrang la ai hkrum na mara ai. 28 Kaning rai nme law, dai Madu gaw mungkan ting a ntsa e, shi a ga shadik na hte dai hpe shatup nna jahtum na ra ai, nga ai. 29 Dai hte maren, shawng e Esaia tsun da ai gaw, Dai Madu Zeba-ut anhte hpe matu mara n shangam taw gaw, Sodom zawn anhte tai nna, Gomora hte bung na ga ai, nga ai. 30 Dai re ai majaw anhte kaning ngu tsun na ma? Dinghpring ai lam n shachyut ai maigan amyu ni gaw, dinghpring ai hpe lep la ma ai; rai sa, kamsham ai hte lu la ai dinghpring ai hpe lep la ma ai: 31 tara hte seng ai dinghpring ai lam hpe shachyut ma ai Israela amyu mahtang gaw, dai tara hpe n dep lu ma ai. 32 Hpa majaw law nga yang, kamsham ai hte n re ai sha, magam bungli hte sha hkan shachyut ma ai majaw n dep lu ma ai. 33 Shingrai, Ahtu kataw na nlung hte, myit kataw shangun na lunghkrung hpe, Ziun hta e ngai tawn da se ai rai nna, Shi hpe kamsham ai wa gaw, kaya kahpa n hkrum na ra ai, nga nna ka da nga ai hte maren, dai ahtu kataw na nlung hta e shanhte ahtu kataw nga ma ai.

Roma 10

10:1 Hpunau ni e, shanhte gaw hkyehkrang la ai kaw du lu mu ga, shanhte a matu mara nye kraw lawang hta myit ndawt la nna, Karai Kasang hpe ngai akyu hpyi nga nngai. 2 Kaning rai nme law, Karai Kasang a lam shanhte grai myit maju jung nga ma ai hpe, ngai shanhte a lam sakse hkam ya nngai: raitimung, chye chyang ai nyan hte n re ai sha, 3 Karai Kasang a dinghpring ai lam hpe n chye n chyang ma ai rai nna, tinang a dinghpring ai lam hpe shagrin da na chyam yu ma ai majaw, shanhte Karai Kasang a dinghpring ai lam a npu e n taw ma ai. 4 Kaning rai nme law, dinghpring ai kaw du lu mu ga, Hkristu gaw kamsham ai ni mahkra a matu mara, jep ai tara a chyahtum rai nga ai. 5 Mawshe chyawm gaw, Tara hku hkan galaw ai wa gaw de a majaw asak hkrung nga lu na ra ai, nga nna jep ai tara hte seng ai dinghpring ai lam ka da nu ai. 6 Kamsham ai hte seng ai dinghpring ai lam mahtang gaw, Lamu de kadai lung wa lu na kun? Sunghtum ai shara de kadai yu wa lu na kun? nga nna na a kraw lawang e nang tsun lu na n rai, nga ai: 7 Shing nga ai gaw, Hkristu hpe yu wa shangun na, lamu de kadai lung wa lu na kun? bai, Hkristu hpe si mat ai ni kaw na sharawt la na, sunghtum ai shara de kadai yu wa lu na kun? nga ai rai nga ai. 8 Shaloi kaning rai tsun na law? Dai mungga gaw nang hte htep rai nga ai; dai gaw na a n-gup hte na a kraw lawang hta e rai nga ai:dai gaw, anhte hkaw tsun dan ai kamsham ai hte seng ai mungga rai nga ai: 9 shingrai, Yesu gaw Madu rai nga ai, nga nna na a n-gup ga hte tsun gara nna, Karai Kasang gaw si mat ai ni kaw na shi hpe hkrung sharawt la ai hpe, na a myit masin hta kamsham n yang gaw, nang hkyehkrang la ai hkrum na rin dai. 10 Kaning rai nme law, masha gaw dinghpring ai lu la hkra, myit masin hte kamsham nna, hkyehkrang la ai lu la hkra, n-gup hte tsun gara nga ai. 11 Dai Chyum Laika mung, Shi hpe kamsham ai ni yawng mayawng hte gaw kaya kahpa n hkrum na ra ai, nga ai. 12 Kaning rai nme law, Yuda ni hte Heleni masha ni hpe lachyen lahka n nga ai sha, dai Madu gaw yawng mayawng a ntsa na Madu langai sha rai nga ai rai nna, shi hpe shaga ai ni yawng mayawng hte hta chyeju hpring nga ai. 13 Shingrai dai Madu a amying nsang hpe shaga ai masha kadai mung, hkyehkrang la ai kaw du lu na ra ai. 14 Dai rai nna, garai n chye kam ai Madu hpe, kaning rai shaga lu na ma ta? garai n na yu ai wa hpe, kaning rai kamsham lu na ma ta? hkaw tsun dan ai wa n nga yang gaw, kaning rai na la lu na ma ta? 15 n shangun dat yang gaw, shanhte kaning rai hkaw tsun dan lu na ma ta? Dai hte maren, Mai kaja ai lam kabu gara shiga hkaw tsun dan ai ni a sat lagaw ni gaw, gade wa tsawm nga malu hka! nga nna ka da nga ai. 16 Raitimung, nlang hte wa dai kabu gara shiga hpe madat mara nga ma ai n rai. Kaning rai nme law, Esaia gaw, Madu e, anhte a shiga hpe kadai wa kamsham nga a ta? nga nna tsun ai. 17 Dai rai nna, kamsham ai gaw na la lu ai kaw nna, na la lu ai mahtang gaw Hkristu a mungga a majaw pru wa ai. 18 Raitimung, ngai tsun nngai gaw, Shanhte n na yu ma hka kun? Gaja wa teng teng, Mung shagu hkan e shanhte a nsen gaw, Mungkan ting hta shanhte a mungga pri rai wa sai, nga ai. 19 Bai, ngai tsun nngai gaw, Israela masha ni n chye ma hka kun? Mawshe gaw, Hpa n re ai amyu hte ngai nanhte hpe manawn shangun nna, N gring ai amyu e nanhte hpe pawt bu shangun na made ai, nga nna shawng nnan e tsun nga ai. 20 Dai hta kaga Esaia gaw, grai nden ja ai myit hte, Ngai hpe n tam ai ni gaw, ngai hpe mu ma ni ai, Nye a lam n san yu ai ni kaw, ngai danpru nngai, nga ai, nga nna tsun ai. 21 Israela masha ni a lam hpe mahtang shi bai tsun ai gaw, N madat n mara nna ndang kalang re ai amyu hpe, nye a lata shani tup ngai ladawn wak nga nngai, nga ai.

Roma 11

11:1 Dai rai nna, ngai tsun nngai gaw, Karai Kasang shi a amyu hpe kau da nu hka? Shing n rai law. Ngai mung Israela masha rai nga nna, Abraham a aru arat hte Benyamin a baw sang rai nga nngai. 2 Karai Kasang gaw shawng nna chye tawn da sai, shi a amyu hpe kau da nu ai n rai. Dai hta kaga, Elia gaw Karai Kasang a man e Israela masha ni hpe mara madi nna, 3 Madu e, na a myihtoi ni hpe shanhte sat kau manu ai; na a tawn hkungri ni hpe shanhte htu kadawng kau manu ai; ngai chyu sha ngam nga nna, shanhte nye a asak hpe mung tam ma ai, nga nna, shi a lam Chyum laika hta rawng nga ai ga hpe nanhte n chye nga myit ni? 4 Dai shingran ga chyawm gaw shi hpe kaning nga htan a ta? Bala a man e lahput garai n hput di ai lasha hkying sanit hte gaw, nye a matu ngai shangam da se ai, nga ai. 5 Dai hte maren, ndai aprat e mung, chyeju hte seng ai lata la ai lam a majaw, kau chyen mi naw ngam nga ai. 6 Dai gaw chyeju hte rai nga a yang gaw, magam bungli majaw n rai; bungli hte rai yang gaw, chyeju lam chyeju n rai nga ai. 7 Dai rai yang gaw, kaning law? Israela masha ni gaw, tinang tam ai lam hpe n dep ma ai; lata la hkrum ai ni mahtang gaw dep ma ai: 8 gale chyawm gaw, Ya du hkra pyi, hpam nga ai wenyi mung, n mu lu na myi hte n na lu na ana mung, Karai Kasang shanhte hpe jaw da manu ai, nga nna ka da nga ai hte maren, myit shanuk ya ai hkrum nu ai. 9 Dawi mung, Shanhte a sha ku tinang a matu dawnggawng hte mahkam, Myit kataw shara hte madawng hkrum na lam tai u ga; 10 Myi n mu lu hkra shanhte a myi sin mak malu ga, Shanhte a marung hpe tutnawng htingkung nga shangun nga u, nga ai. 11 Dai rai nna ngai tsun nngai gaw, Israela masha ni kazut taw nan hkra ahtu kataw hkrup ma sani? Shing n rai law, Shanhte hpe manawn shangun mu ga she, shanhte a ahtu kataw ai lam a jaw e, hkyehkrang la ai gaw maigan amyu ni kaw du wa sai. 12 Dai hta kaga shanhte a ahtu kataw ai gaw mungkan ga a sutgan, shanhe a sum mat ai gaw maigan amyu ni a sutgan tai wa a yang gaw, shanhte a hkum sumhpa gaw grau nna, akyu shabyin na n rai ni? 13 Dai rai nna nanhte maigan masha ni hpe ngai tsun made ai gaw: maigan amyu ni a kasa ngai rai nga nngai raitimung, nye a baw sang nkau mi hpe hkyehkrang la lu hkra, 14 shanhte hpe manawn shangun lu mawe yang gaw, nye a kasa aya hpe ngai shagrau sha-a nga nngai. 15 Kaning rai nme law, shanhte hpe kau da ai lam, mungdan ga a htinglu htinglai ya ai lam tai wa a yang gaw, shanhte hpe bai hkapla ai lam gaw, si mat ai kaw na hkrung wa ai hte bung nga na n rai ni? 16 Dai hta kaga, shawng nawng ai muk shadung gaw chyoi pra nga a yang gaw, de a muk tawng ting chyoi pra nga ai; ru pawt chyoi pra nga a yang gaw, lakung lakying ni mung chyoi pra nga na ma ai. 17 Raitimung, lakung lakying nkau mi gyi kau ai hkrum nna, tsanlun chyalam ngu ai nang mahtang gaw, dai ni hta shachyaw ai hkrum ndai hte, tsanlun ru a asau hta bawk jaw lawm ai wa tai n yang gaw, lakung lakying ni a ntsa e gumrawng gumtawng hkum rai et. 18 Gumrawng gumtawng nga n yang gaw, nang dai ru hpe gun ndai n rai, dai ru mahtang gaw nang hpe gun da ndai. 19 Raitimung, Ngai hpe shachyaw na, lakung lakying ni gyi kau ai hkrum ma ai, nga nna nang tsun mayu nhten. 20 Rai taw, rai u ga; shanhte gaw n kam n sham ai majaw gyi kau ai hkrum ma ai, nang mahtang gaw makam masham hte ngang hkang nga ndai. Myit hkum kaba et, hkrit kang nga u: 21 kaning rai nme law, Karai Kasang gaw lakung lakying majing hte hpe n lahpawt yang gaw, nang hpe mung lahpawt lama di na ndai n rai. 22 Dai re ai majaw, Karai Kasang a chyeju hte masin ja ai hpe myit yu mu. Kataw nga ai ni a ntsa e masin ja nga ai rai nna, Karai Kasang a chyeju hta e nang naw nga nga n yang gaw, shi a chyeju na ntsa e rai nga ai, dai n rai taw gaw, nang mung krum kau ai hkrum na rin dai. 23 Shanhte mahtang, tinang a n kam n sham ai hta n nawng mat malu yang gaw, bai shachyaw ai hkrum lu na mara ai: Karai Kasang gaw, shanhte hpe bai shachyaw na di lu nga ai. 24 Kaning rai nme law, tsanlun chyalam majing hta na nang hpe dan la nna, htung n nga timung, tsanlun kaja hta shachyaw n yang gaw, lakung lakying majing rai nga ai shanhte gaw, tinang a tsanlun hpun madung hta grau nna shachyaw ai hkrum na mara ai, n rai ni? 25 Dai rai nna, hpunau ni e, nanhte tinang a hpaji n machyu myit ga, ndai sunghtum ai lam hpe nanhte n chye nga na, ngai n ra nngai; dai gaw, maigan amyu ni garai n shang hkum ai du hkra, Israela masha nkau mi myit shanuk kau ai hkrum ma ai, nga ai: 26 shingrai Israela masha ni nlang hte gaw hkyehkrang la ai hkrum na ma ai: dai hte maren, Ziun kaw na Mawai la ai wa paw pru nhtawm, Tara n hkungga ai hpe Yaku hta na lat kau na ru ai; 27 Shanhte a yubak yeng seng kau ai shani e, Dai gaw shanhte hte nye a ga shaka rai nga ai, nga nna ka da nga ai. 28 Shaloi, dai kabu gara shiga a lam yu yang, nanhte a matu mara, shanhte hpyen ni tai wa masai; raitimung, lata la ai lam hpe yu yang, ji wa ni a gawp e, shanhte tsawra hkrum ai ni rai nga ma ai. 29 Karai Kasang a chyeju kumhpa ni hte shaga la ai lam chyawm gaw, myit dawm la shara n nga lu ai. 30 Kaning rai nme law, nanhte gaw shawng e Karai Kasang hpe n madat n mara myit timung, shanhte a n madat mara ai a majaw, ya e chyeju hkamla lu myit dai hte maren; 31 nanhte hkamla ai chyeju hte shanhte mung ya e chyeju hkamla lu mu ga, shanhte gaw ya e n madat n mara nga ma ai. 32 Karai Kasang chyawm gaw, nlang hte hpe chyeju madun dan lu hkra, nlang hte hpe n madat n mara ai hta ban hkum da mu ai. 33 Karai Kasang a n taw n tsang ai hpaji byeng-ya hte chye chyang ai myit gaw, gade wa sung nga a hka! kadai n sawk ya lu ai shi a jeyang ai hku, kadai n gawn ya lu ai shi a ningsang magam lam ni gaw, mau n ma rai nga ai. 34 Kaning rai nme law, dai Madu Du a myit hpe kadai dang chye a ta? shi hte bawng ai bawmung kadai wa rai nga a ta? 35 Chyeju htang ai hkrum lu hkra, kadai wa shi hpe shawng e sak ya sata? 36 Arai yawng mayawng hte gaw, shi kaw nna, shi a majaw, shi a matu mara pra nga ai. Shi kaw e htani htana hpung shingkang anga nga u ga law. Amen.

Roma 12

12:1 Dai re ai majaw, hpunau ni e, nanhte a hkum hkrang hpe, hkrung nga ai, chyoi pra ai hte, Karai Kasang kaw sharawng awng ai hkungga matu nawng ya na, Karai Kasang a chyeju hte ngai nanhte hpe shadut shahkat dat made ai: dai gaw nanhte a myit masin a dawjau ai lam rai nga ai. 2 Dai hta kaga, ndai dinghta ga a myit n hkan dagraw ai sha, Karai Kasang a mai kaja ai, sharawng awng ai hte hkum tsup re ai myit mang lam hpe nanhte chye ginhka lu myit ga, myit nnan lu la na hku arawn asam galai nga mu. 3 Dai rai nna, kadai mung tinang hkum hpe shadawn sharam ai hta nau wa n rai dum ai sha, Karai Kasang gaw langai hte langai hpe makam masham ren di nna karan jaw ai hte maren, mai myit ai lam chyu sha myit nga n ga, ngu nna ngai hpe jaw ai chyeju hte, nanhte kaw na langai hte langai hte hpe, ngai tsun dat nngai. 4 Kaning rai nme law, hkum hkrang langai sha hta nna, daw shan law law rai nga ai rai nna, daw shan ni yawng gaw asung langai sha hta n shang lu ai hte maren, 5 law law rai nga ga ai anhte mung, Hkristu hta hkum hkrang langai sha tai nna, langai hte langai shada da a daw shan ni rum nga ga ai. 6 Shingrai anhte hpe karan jaw ai chyeju majaw, langai hte langai gaw chyeju kumhpa kaga ga lu la ga ai hte maren, myihtoi htoi ga yang gaw, anhte a makam masham ang ai hte maren htoi ga; 7 hpungtau rai yang gaw, hpungtau bungli hpe gunhpai ga; sharin achyin re ai wa gaw, sharin achyin ai amu hpe, 8 shadum shahprang chye ai wa gaw, shadum shahprang ai amu hpe, shachyen u ga; alu jaw ai wa gaw n daw n hta jaw u ga; uphkang ai wa gaw, kasang kalang hte up nga u ga; matsan dum chye ai wa gaw, kabu gara ai myit hte galaw u ga. 9 Tsawra ai myit hta sawt ai n lawm u ga; n hkru n hkra ai hpe matsat nga mu, mai kaja ai hta manoi nga mu. 10 Hpunau hpe tsawra ai hta, shinggyim nau na myit shada da rawng nga mu; hkungga lara ai hta shada da shagrau hkat mu; 11 shakut sharang ai hta kadawn kanawn hkum rai myit; wenyi hta alet nga mu; dai Madu a bungli hpe a galaw nga mu; 12 myit mada let kabu gara nga mu; nni nkri hkrum yang, myit hkum kaji nga mu; akyu hpyi ai hta htep lahti tut rai nga mu; 13 chyoi pra ai ni a ra ai lam a matu mara gam jaw nga mu; manam daw ai lam hta sharau nga mu. 14 Nanhte e zingri zingrat ai ni hpe shaman ya mu; shaman ya mu, dagam dala hkum rai myit. 15 Kabu gara re ai ni hte rau kabu gara nga mu; hkrapngu hkrapngoi re ai ni hte rau hkrapngu hkrapngoi nga mu. 16 Langai hte langai shada da myit shara mu; arawng lam n tam ai sha, arawng n lu ai ni hte mazum hkau nga mu. Tinang hkum hpe hpaji rawng ai zawn, hkum nawn nga myit. 17 N kaja ai a majaw, n kaja ai hku kadai hpe mung hkum tai mu, Masha yawng mayawng a man e htaphtuk ai ningli madun na, myit yu nga mu. 18 Nanhte rai lu myit dai daram, masha nlang hte hte myit hkrum nna hkau chyap nga mu. 19 Tsawra ai ni e, tinang nan matai hkum htang mu; Karai Kasang a pawt sindawng na hpe ala nga mu: kaning rai nme law, dai Madu tsun ai gaw, Matai htang na ahkang ngai chyu lu nngai, ngai tai na we ai, nga nna ka da nga ai. 20 Dai hta n-ga, nang hpe hpyen ai wa kawsi nga a yang, shi hpe shat jaw u; hpang gara nga a yang, lu na jaw u: dai lam galaw n yang gaw, shi a baw ntsa e grung nga ai wan n-ga nang sumpum da na wu ai. 21 N hkru n hkra ai gaw nang hpe n dang kau u ga; mai kaja ai hte n hkru n hkra ai hpe dang kau u.

Roma 13

13:1 Shinggyim masha nlang hte gaw, daru magam ahkang aya lu ai ni a npu e ataw nga mu ga: kaning rai nme law, Karai Kasang kaw nna sha n rai yang gaw, ahkang aya n nga nga ai: nga nga ai ahkang aya hte mung, Karai Kasang e san da manu ai. 2 Dai re ai majaw, ahkang aya hpe lale ai wa gaw, Karai Kasang a tawn da ai aya hpe nhkap shadang nga ai; nhkap shadang nga ai ni chyawm gaw, tinang nan tara dara ai hkrum na mara ai. 3 Kaning rai nme law, du ni gaw kaja ai bungli a matu mara hkrithpa tai ma ai n rai; n kaja ai a matu mara hkrithpa rai ma ai. Ahkang aya lu ai wa hpe n hkrit mayu ai nga na myit ni? Mai kaja ai bungli galaw u, shingrai jang shi nang hpe shakawn kungdawn na rin dai: 4 kaning rai nme law, shi gaw na a akyu ara a matu mara, Karai Kasang a hkringmang rai nga ai. N hkru n hkra ai bungli nang galaw n yang gaw, hkrit kang nga u; kaning rai nme law, shi gaw dai nhtu hpe be lagya hpye wu ai n rai; n hkru n hkra ai bungli galaw ai wa hpe pawt sindawng hkra matai tai ai wa ngu ai, Karai Kasang hkringmang shi rai nga ai. 5 Dai rai nna, pawt sindawng na hpe tsang ai majaw sha n rai, tinang a myit masin e hkang ai majaw mung, ahkang aya npu e nanhte taw lu na marin dai. 6 Dai majaw mung, nanhte hkansi bang nga myit dai; kaning rai nme law, Karai Kasang a agyi salang ni shanhte rai nga ma ai rai nna, ndai amu hpe tutnawng e a gunhpai nga ma ai. 7 langai hte langai hte hpe mai ang ai hte maren jaw ya mu. hkansi mai hta ai wa hpe hkansi, kang mai hta ai wa hpe kang, bang mu; hkrit kamyin mai ai wa hpe hkrit kamyin nga mu, hkungga lara ram ai wa hpe, hkungga lara di mu. 8 Shada da tsawra ai hta kaga, kadai hte mung hpa hka hkum kap mu: masha kaga hpe tsawra ai wa gaw jep ai tara hpe shatup ngut nu ai. 9 Kaning rai nme law, Masha num hkum shaw, masha hpe hkum sat, hkum lagu, myit hkum marin, nga ai hte htet da ai ga kaga naw nga a yang gaw, dai hte gaw, Na a htingbu wa hpe na a hkum hte maren nang tsawra lu na ndai, nga ai ga langai sha hta gumhpawn lawm nga ai. 10 Tsawra ai gaw htingbu wa hpe n hkru n hkra galaw yu ai n rai: dai rai nna tsawra ai gaw, jep ai tara a shatup shadik ai lam rai nga ai. 11 Dai hta kaga, ndai aten hpe nanhte chye nga myit dai majaw, nanhte a yup hprang wa na ahkying, ya e pyi rai ra ai; kaning rai nme law, shawng nnan kamsham saga ai hta, dai hkyehkrang la ai gaw ya e nan anhte hte grau nna ni wa sai. 12 Shana ahkying lai magang wa nna, shani nhtoi du magang wa ra ai. Dai re ai majaw, nsin hte seng ai bungli hpe anhte raw sharun kau nna, nhtoi a hpyen hking hpe dagraw nga ga. 13 Tangpyaw shalai ai hte chyaru nang ai, shawa num gasawi ai hte ngang kayut ai, ga law ga la ai hte manawn masham ai hpe n hkan tam ai sha, shani chyingtung na shingdi ai zawn anhte a hkawm nga ga. 14 Dai hta n-ga, Madu Yesu Hkristu hpe buhpun dagraw nga mu: hkumshan a myit marin ai hku shadik na matu, hkum maw hkum hkyen nga myit.

Roma 14

14:1 Kamsham ai hta n-gun n ja ai wa hpe hkap hkalum la mu: raitimung, myit mang hparan ai lam hpe dinglik yu na matu, hkum rai myit. 2 Langai ngai gaw lusha amyu myu mai sha na kam nga ai, n-gun n ja ai wa mahtang gaw nam law nam lap sha nga ai. 3 Amyu myu sha ai wa gaw, n sha ai wa hpe hkum hkya u ga; n sha ai wa mung, sha ai wa hpe hkum jeyang u ga; kaning rai nme law, Karai Kasang gaw shi hpe hkap hkalum la sai. 4 Masha wa a shangun ma hpe jeyang ai wa e, nang gaw kaning san ai wa rai nga n ta? Tinang a madu a man e shi myiman pa na re ai, shing n rai, n pa na re ai; gaja wa shi pa na re ai; dai Madu gaw shi hpe shapa ya lu nga ai. 5 Marai langai ngai gaw nhtoi gale hta lani ni hpe shagrau wu ai; bai, langai ngai gaw, nhtoi shagu maren rai nga ai, myit da wu ai: langai hte langai gaw tinang myit shatawng shadik nga u ga. 6 Nhtoi hpe ginhka yu ai wa gaw, dai Madu a lam majaw ginhka yu nga ai: sha ai wa gaw, Karai Kasang hpe shakawn kungdawn nga ai majaw, dai Madu hpe dum let sha nga ai; n sha ai wa mung, dai Madu hpe dum let n sha nga ai rai nna, Karai Kasang hpe shakawn kungdawn nga ai. 7 Kaning rai nme law, anhte hta kadai raitimung, tinang hkum a matu mara sha hkrung nga ai n rai; kadai raitimung, tinang hkum a matu mara sha si wa ai n rai; 8 Hkrung nga yang gaw, dai Madu a lam anhte hkrung nga ga ai; si wa yang mung, dai madu a lam anhte si wa ga ai. Dai re ai majaw, hkrung timung si timung, dai Madu hte anhte seng nga ga ai. 9 Kaning rai nme law, si mat ai ni hte hkrung nga ai ni hpe madu nga lu hkra, Hkristu gaw si hkam nna bai hkrung rawt wa sai. 10 Nang chyawm gaw, hpa majaw na nhpu nnau wa hpe jeyang nga n ta? bai, na nhpu nnau wa hpe hpa majaw n gawn n sawn rai nga n ta? Anhte yawng mayawng hte gaw, Karai Kasang a tara tingyang a man e du tsap na ra ga ai. 11 Kaning rai nme law, Dai Madu gaw, Ngai ahkrung nga ai hte maren, nye a man e lahput shagu hput di nna, Shinglet shagu Karai Kasang kaw tawngban lu na re ai, nga ai, nga nna ka da nga ai. 12 Dai rai nna, anhte langai hte langai, tinang dai tinang lam a jahpan, Karai Kasang kaw dan na ra ga ai. 13 Dai re ai majaw, anhte shada da hpa n jeyang saga; kadai raitimung, tinang hpunau a matu ahtu kadawng shara hte myit kataw shara n tawn da na lam she, jeyang nga mu. 14 Hpa raitimung, tinang a npawt nhpang sa gawn yu yang, awu asin re ai mi n nga ai gaw, Madu Yesu hta e ngai chye nga nna myit dik nga nngai: raitimung, langai ngai gaw lama ma hpe awu asin re ai, nga nna myit nga a yang gaw, dai arai gaw shi a matu awu asin rai nga lu ai. 15 Kaning rai nme law, lusha shahpa majaw na a nhpu nnau a myit n pyaw nga a yang gaw, nang tsawra ai lam hta naw hkawm nga ndai n rai. Hkristu gaw shi a matu mara si hkam ya nu ai majaw, na a lusha shahpa e shi hpe hkum jahten et. 16 Shingrai nanhte a mai kaja ai bungli gaw, shatan nhkan hkum hkrum shangun u ga. 17 Kaning rai nme law, Karai Kasang a mungdan gaw, sha sha, lu lu rai na hku n re ai sha, Chyoi pra ai Wenyi e, dinghpring ai, ngwi pyaw ai hte kabu gara ai, rai nga ai. 18 Dai hku hkan nna Hkristu a bungli gunhpai ai wa gaw, Karai kasang a man e sharawng awng ai hkrum nna, masha a man e mung awlaw ai hkrum nga ai. 19 Dai re ai majaw, ngwi pyaw ai lam hte, shada da sharin hkang na lam hpe, anhte hkan shachyut nga ga. 20 Lusha shahpa nhkan e Karai Kasang a bungli hpe hkum sharun shabya kau et. Yawng mayawng hte gaw sanseng ai hkrai rai nga ai; raitimung kataw ai myit hte sha ai wa a matu, mara rai nga ai. 21 Shan sha na hte tsabyi lu na raitimung, na nhpu nnau hpe myit kataw shangun na lam hpa raitimung koi gam kau na gaw, mai kaja nga ai. 22 Nang hta rawng ai makam masham gaw, nang nan Karai Kasang a man e rawng nga n ga: ginhka lata ai lam hta tinang hkum dai jeyang shara n nga ai wa gaw, a nga ai. 23 Mahkoi myit rawng ai wa madaw sha a yang gaw, dawdan ai hkrum nga ai; kaning rai nme law, makam masham hte shi sha nga ai n rai: makam masham hte n seng ai hpa raitimung, yubak sha rai nga ai.

Roma 15

15:1 Dai rai nna anhte n-gun ja ai ni gaw, tinang pyaw ai lam n hkan ai sha, n-gun kya ai ni a magrau n grang ai hpe hkam sharang na, sut nga ai. 2 Anhte langai hte langai tinang a manang wa a ngamu ngamai na lam tau yu nna, shadaw shangang rai hkra shi hpe shapyaw nga ga. 3 Shingrai Hkristu mung shi hkum dai n shapyaw la ai sha, Nang hpe shatan ai ni a shatan nhkan ga, nye a ntsa e du ra ai, nga nna ka da nga ai hte maren, rai nga sai. 4 Kaning rai nme law, anhte shakut sharang nga lu nna, Chyum laika ni a shangwi shapyaw ai ga a majaw myit mada shara nga lu u ga, shawng e ka da ai lam shagu gaw, anhte hpe sharin achyin ya na matu, ka da nga sai. 5 Ya, anhte a Madu Yesu Hkristu a Kawa rai nga ai, Karai Kasang hpe, myit mang langai sha hte n-gup ga langai sha e shakawn kungdawn nga lu myit ga, 6 Hkristu Yesu a jaw e nanhte shada da myit mang ara sha rai nga lu u ga, shakut sharang ya ai hte shangwi shapyaw ya ai a Karai Kasang gaw, nanhte hpe awn nga u ga law. 7 Dai rai nna Karai Kasang a hpung shingkang a matu mara, Hkristu gaw anhte hpe hkap hkalum la mani ai hte maren, nanhte shada da hkap hkalum la mu. 8 Kaning rai nme law, ngai tsun nngai gaw, ji wa ni kaw jaw da ai ga ndat hpe shagrin lu na hte, maigan amyu ni mung chyeju majaw Karai Kasang hpe shakawn kungdawn lu mu ga, 9 Karai Kasang a tengman ai lam a matu mara, Hkristu gaw matu gadoi hkam ai ni a ali ama tai wa sai. Shingrai, Dai re ai majaw maigan amyu ni hta ngai nang hpe shakawn na nngai, Na amying nsang hpe mahkawn mangoi na nngai, nga nna ka da ai hte maren rai nga ai. 10 Bai shi gaw, Maigan amyu ni e, shi a amyu hte rau kabu gara nga mu, nga nna tsun ai. 11 Bai, Maigan amyu nlang hte e, dai Madu hpe shakawn mu; Amyu baw nlang hte gaw shi hpe kungdawn u ga, nga ai. 12 Bai Esaia gaw, Yese kaw nna kying ai ru npawt hte, Maigan amyu ni hpe up na paw pru ai wa rai na ra ai: Dai wa hpe maigan amyu ni myit mada na mara ai, nga ai. 13 Ya, Chyoi pra ai Wenyi a n-gun atsam hte myit mada ai lam hta nanhte gumring gumrat rai wa myit ga, myit mada npawt rai nga ai Karai Kasang gaw, kamsham ai lam hta e, chyeju hte ngwi pyaw ai amyu myu nanhte hpe jahpring shatsup ya myit ga law. 14 Nye a hpunau ni e, nanhte nan lala kaja htum ai hte hpring tsup nga nna, chye chyang ai amyu myu htak rai nga ai hte, nanhte shada da sharin jep lu myit dai hpe, nanhte a lam ngai hkum nan kam da made ai. 15 Raitimung, Chyoi pra ai Wenyi e shachyoi shapra ai a majaw, maigan amyu ni gaw sharawng awng ai hkungga tai lu mu ga, Karai Kasang a kabu gara shiga hta hkungga jaw let, maigan amyu ni a matu Hkristu Yesu a shangun ma ngai tai wa n ga; 16 Karai Kasang e ngai hpe jaw da ai chyeju majaw, nanhte hpe bai shadum jahprang na zawn, ngai nanhte hpe nden ja ai myit hte kau chyen ka dat made ai. 17 Dai re ai majaw, Karai Kasang hte seng ai lam hte hta, Hkristu Yesu hta e nye a gumrawng shara rai nga li ai. 18 Kaning rai nme law, maigan amyu ni madat mara lu hkra, Hkristu gaw ngai hta shabyin ai sumtu ga hte amu bungli mung, Chyoi pra ai Wenyi a atsam hte n-gun lagaw re ai lamik kumla hte mauhpa amu hta kaga, ngai hpa n tsun wam nngai. 19 Shingrai, dai ni hpe tau yu nna, Yerusalem kaw na Iluri mung ginwang grup hkra, Hkristu a kabu gara shiga ngai hkaw jahproi dan ni ai. 20 Raitimung, masha wa e gaw da ai npawt ntsa e n kahtap u ga, Hkristu a amying n na yu ai shara hkan e dai kabu gara shiga hkaw dan na, ngai nan myit makun nga nngai. 21 Dai hte maren, Shi a lam kajai gara ai garai n dep ai ni mu lu nna, Garai n na yu ai ni, chye na lu na mara ai, nga nna ka da nga ai. 22 Dai rai nna nanhte kaw du na lam hkum shadang kau ai, ngai law law lang hkrum nngai. 23 Ya chyawm gaw ndai shara hkan e ngai nga na lam n nga sai rai nna, Spani mung de ngai sa wa ai shaloi, nanhte kaw shang na, law law ning wa myit a katu nga nngai. 24 Kaning rai nme law, lai sa wa yang, nanhte hte hkrum mu nna, nanhte hte tawng marang mi kanawn mazum ngut jang she, dai mung de nanhte ngai hpe hkan shakram sa dat mi ga, ngai myit mada nga nngai. 25 Ya chyawm gaw, chyoi pra ai ni hpe galaw daw let, ngai Yerusalem de sa wa nga nngai. 26 Kaning rai nme law, Makedoni hte Ahkaia mung masha ni gaw, Yerusalem na chyoi pra ai ni hta na matsan mayan ai ni a matu, shawang kumhpa langai mi lahkawn na, myit madu nga masai. 27 Shanhte myit madu ma timung, dai gaw chyeju htang ai sha naw rai nga ai: kaning rai nme law, shanhte a wenyi wunli wun-gau hta maigan amyu ni jawm hpawm ma yang gaw, mungkan arai hte shanhte hpe galaw daw na, sut nga ai. 28 Dai re ai majaw, ndai amu hpe galaw ngut nna, ndai shawang si hpe shanhte a man e dazik dawk da ngut jang, nanhte hpang hku hprang rai, Spani mung de ngai lai sa wa na nngai. 29 Nanhte kaw du yang, Hkristu a gumring gumrat ai hte hpring chyat rai nna du na ring ngai, ngai chye nga nngai. 30 Ya, hpunau ni e, Yuda mung na nhtan shai ai ni kaw na ngai lawt lu nna, Yerusalem na ni a matu nye a shawang kumhpa hpajang na lam, chyoi pra ai ni a man e, sharawng awng ai hkrum lu na hte; 31 Karai Kasang a myit e, kabu gara ai hte nanhte kaw du lu nna, nanhte hte rau ban sa ai hkamla lu n ga, 32 Karai Kasang kaw nye a matu mara akyu hpyi let, nanhte gaw ngai hte rau shingjawng nga na, anhte a Madu Yesu Hkristu a marang e mung, Wenyi a tsawra ai a marang e mung ngai nanhte hpe shadut shahkat dat made ai. 33 Ya, ngwi pyaw ai a npawt Karai Kasang gaw, nanhte yawng mayawng hte rau anga nga u ga law. Amen

Roma 16

16:1 Kenhkrea hpung na hpungtau rai nga ai anhte a kajan Hpobe hpe ngai nanhte hpang de shashawn dat ya nngai: 2 chyoi pra ai ni a ging dan ai hku hkan nna, dai Madu hta e shi hpe hkap hkalum la nhtawm, hpa lam raitimung shi ra ai hte maren, shi hpe tawn nga mu; kaning rai nme law, shi hkum nan masha law law wa hpe mung, ngai hpe mung, tau ga sai. 3 Ngai hte rau Yesu Hkristu a amu shingtau ai Priska yan Akula hpe shakram ya mi; 4 shan gaw nye a asak a matu tinang du baw shatawng kau manu ai rai nna, ngai hkrai sha n rai, maigan na Hpung ni yawng hte mung, shan hpe shakawn ga ai: shan a nta e shanu ai Hpung hpe mung shakram ya mi. 5 Asi mung e Hkristu a matu shawng si ai asi rai nga ai, ngai tsawra ai Eponetu hpe shakram ya mi. 6 Nanhte a matu mara grai wa shakut sharang yu sai Mari hpe shakram ya mi. 7 Nye a baw sang re ai, ngai hte rau htawng rawng yu ai Androniku yan Yuni hpe shakram ya mi: dai yan gaw kasa ni hta e arawng lu ma ai rai nna, nye a shawng e Hkristu hta e de lu ma ai. 8 Dai Madu hta e ngai tsawra ai Ampliatu hpe shakram ya mi. 9 Anhte hte rau Hkristu a amu shingtau ai Orban hte, ngai tsawra ai Staku hpe shakram ya mi. 10 Hkristu hta e jet rai nga ai Apele hpe shakram ya mi. Aristobulu a nta na ni hpe shakram ya mi. 11 Nye a baw sang wa Herodion hpe shakram ya mi. Narkiso a nta na dai Madu hta de ai ni hpe shakram ya mi. 12 Dai Madu a bungli gunhpai ai Truhpena hte Truhpawsa hpe shakram ya mi. Dai Madu hta e grai wa shakut sharang ai, tsawra ai Persi hpe shakram ya mi. 13 Dai Madu hta e lata la ai Ruhpu hte, shi hte an a kanu hpe mung shakram ya mi. 14 Asunkritu, Hpelegu, Herme, Patroba, Herma hte, shanhte hte rau nga ai hpunau ni hpe shakram ya mi. 15 Hpilogu hte Yulia, Nerea hte shi a kajan hpe mung, Olumpa hte shanhte hte rau nga ai chyoi pra ai ni yawng hte hpe shakram ya mi. 16 Nanhte shada da chyoi pra ai pup hte shakram ya mi. Hkristu hta de ai Hpung ni yawng hte gaw, nanhte hpe shakram dat ma ai. 17 Bai, hpunau ni e, nanhte hkamla ai sharin shaga ai lam hpe nhtan shai let, shabra sharun ai hte myit kataw shara shabyin ai ni hpe joi yu nna, shanhte hpe koi gam nga myit ga, ngai nanhte hpe shadum dat made ai. 18 Kaning rai nme law, shingre ai ni gaw, anhte a Madu Hkristu hpe n dawjau ai wa, tinang kan a matu sha tsang ma ai rai nna, naw kaja nga ai ni a myit hpe ga sau ga pyaw hte hkalem kau ma ai. 19 Nanhte a madat mara ai myit chyawm gaw masha nlang kaw chyam wa sai: dai re ai majaw nanhte a matu ngai kabu gara nga nngai; raitimung, nanhte gaw mai kaja lam hta hpaji byeng-ya, n kaja lam hta sanseng ai myit rawng nga myit ga, ngai naw ra nga nngai. 20 Ngwi pyaw ai a npawt Karai Kasang gaw, gade n na yang, nanhte a lagaw npu e Satan hpe kabye arin na ra ai. Anhte a Madu Yesu a chyeju gaw nanhte hte rau anga nga u ga law, 21 Nye a shingdep shingtau wa Timohti hte, nye a baw sang rai nga ai Luki, Yasun hte Sosipata hte gaw nanhte hpe shakram dat ma ai. 22 Ndai laika ka ai wa, ngai Tertiu mung, dai Madu hta e nanhte hpe shakram dat nngai. 23 Ngai hpe mung, Hpung ting hpe mung, manam daw ai madu Geu gaw nanhte hpe shakram dat ai. Dai mare na gumhpraw dek up ai wa Erastu hte, hpunau Kuartu yan gaw nanhte hpe shakram ma ai. 25 Amyu baw shagu makam masham a madat mara ai lu la hkra, htani htana Karai Kasang a matsun maroi ga majaw, myihtoi laika ni a jaw e kajai gara pri rai nga ai, chyi nma hpri nhpra e kyem da nhtawm, 26 ya e shadan dat ai sung ai shingran ga hku hkan let, nye a kabu gara shiga hte, Yesu Hkristu a lam hkaw dan ai ga hte maren, nanhte hpe shadaw shangang ya lu ai, 27 langai sha ngu ai, hpaji rawng htum ai Karai Kasang kaw, Yesu Hkristu a marang e, htani htana e hpung shingkang anga nga u ga law. Amen.

1 Korinhtu 1

1:1 Karai Kasang myit ra ai hte maren, Yesu Hkristu a kasa aya hta dang da ai, ngai Pawlu hte hpunau Sosteni gaw, Hkristu Yesu hta e shachyoi shapra ai hkrum nna, chyoi pra ai ni ngu na shaga la i, 2 Korinhtu mare na Karai Kasang a Hpung hta lawm ai ni hte, shara shagu hkan na, shanhte a shara hta mung, an a shara hta mung, anhte a Madu Yesu Hkristu a amying ningsang hpe shaga nga ai ni yawng hte hpe, ga shana dat ga ai. 3 Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e anga nga malit ga law. 4 Hkristu a sakse ga gaw nanhte hta e jung nga ma salit dai rai nna, 5 lam yawng mayawng hta ang ai, n-gup atsam shagu hte, chye chyang ai lam shagu hta, nanhte shi hta hkum tsup nga manit dai majaw, 6 Hkristu Yesu hta e nanhte hpe jaw da ai, Karai Kasang a chyeju hpe tau yu let, nanhte a lam Karai Kasang hpe ngai tutnawng e shakawn kungdawn nga nngai: 7 shingrai, anhte a Madu Yesu Hkristu a paw pru na lam ala let nga nga yang, hpa chyeju kumhpa mung nanhte n kadawn nga myit dai; 8 anhte a Madu Yesu Hkristu a nhtoi e mung, mara shagun shara n nga hkra, shi nanhte hpe shangang shakang na marin dai. 9 Anhte a Madu ngu ai, Kasha Yesu Hkristu hte kanawn mazum lu mu ga, nanhte hpe shaga la ai Karai Kasang chyawm gaw, kangka re ai wa rai nga ai. 10 Hpunau ni e, nanhte nlang hte gaw ga langai sha tsun nga nna, nanhte hta e hka wa bra wa na lam n nga ai sha, myit mang langai sha hte mung sumtu langai sha hta e nanhte hkum tsup lu myit ga, anhte a Madu Yesu Hkristu a amying ningsang a marang e, ngai nanhte hpe shadut jahkat dat made ai. 11 Kaning rai nme law, ngai hpu ngai nau ni e, nanhte hta ga law ga la rai nga myit dai gaw, Hkloe a nta na ni, nanhte a lam ngai hpe sa shana ya mi ai. 12 Ning ngu nna ngai tsun made ai gaw, Ngai chyawm gaw Pawlu hte seng nngai, ngai mahtang Apolo hte seng nngai; ngai gaw Kehpa hte seng nngai, ngai gaw Hkristu hte seng nngai, nga nna nanhte langai hte langai tsun hkat shajang nga myit dai majaw, ngai tsun made ai, rai nga ai. 13 Hkristu gaw bra wa sahka? Pawlu gaw nanhte a matu wudang hta jen da hkam sa ni? Pawlu a amying hta nanhte baptisma hkam manit ni? 14 Nye a amying hta nanhte baptisma hkam la saga ai, nga nna kadai mung tsun shara n nga u ga, 15 Krispu yan Geu hta kaga, nanhte hta na kadai hpe mung ngai baptisma n jaw nngai majaw, ngai myit ai htep ngu ni ai. 16 Stehpan a nta masha ni hpe mung ngai baptisma jaw ni ai; dai hta kaga gaw kadai hpe naw jaw nngai kun, ngai n dum nngai. 17 Kaning rai nme law, baptisma jaw na matu n rai, dai kabu gara shiga tsun dan u ga she, Hkristu gaw ngai hpe shangun dat nngai: raitimung, Hkristu a wudang gaw kaman lila n rai u ga, n-gup hpaji hte tsun dan nngai n rai. 18 Kaning rai nme law, dai wudang a sumtu aga lachyum gaw sum mat hkrum ai ni a matu, angawk angak ga rai nga ai; raitimung, dai gaw hkyehkrang la hkrum ai anhte a matu mara, Karai Kasang a atsam rai nga ai. 19 Kaning rai nme law nga yang, Hpaji rawng ai ni a hpaji hpe ngai jahten na nngai, Nyan rawng ai ni a nyan hpe ngai shinggan kau na nngai, nga nna ka da nga ai. 20 Hpaji byeng-ya rawng ai wa kanang nga a ta? laika ka ai sara kanang nga a ta? ndai mungkan ga na bawmung wa kanang nga a ta? Mungkan ga a hpaji byeng-ya hpe, Karai Kasang shangawk shangak kau ya nu ai, n rai ni? 21 Kaning rai nme law, Karai Kasang hpaji daw ai hte maren, mungkan ga gaw tinang a hpaji byeng-ya hte Karai Kasang hpe n chye lu ai majaw, angawk angak ngu ai hkaw dan ai ga hte kamsham ai ni hpe hkyehkrang la na, Karai Kasang ra ai hku rai nga ai. 22 Yuda ni madaw gaw lamik kumla hpyi ma ai; Heleni ni mahtang gaw hpaji byeng-ya tam ma ai: 23 anhte chyawm gaw, Wudang hta jen da hkrum ai Hkristu a lam hkaw dan ga ai; dai wa Yuda ni a man e myit kataw shara, maigan amyu ni a man e angawk angak, rai nga ai: 24 raitimung, shaga la hkrum ai Yuda ni hte Heleni masha ni a matu mara, shi gaw Karai Kasang a atsam hte, Karai Kasang a hpaji byeng-ya ngu ai, Hkristu nan, rai nga ai. 25 Kaning rai nme law, Karai Kasang kaw na angawk angak ngu ai gaw, masha a hpaji byeng-ya hta grau nga ai: Karai Kasang a gawngkya ai gaw, masha a n-gun lagaw hta grau nga ai. 26 Dai hta kaga, hpunau ni e nanhte hpe shaga la ai lam aru yu mu; masha a arawn alai hte maren, hpaji byeng-ya rawng ai ni law law wa, ahkang aya lu ai ni law law wa, du amyu hta na law law wa, lawm ma ai n rai. 27 Nsoi nsa rawng marawng gaw Karai Kasang a man e gumrawng gumtawng shara n nga u ga, hpaji byeng-ya rawng ai ni hpe kaya kahpa jahkrum mu ga, mungkan ga a angawk angak re ai hpe Karai Kasang lata la wu ai; 28 n-gun lagaw rawng ai ni hpe kaya kahpa jahkrum mu ga, mungkan ga na n-gun n ja ai ni hpe Karai Kasang lata la wu ai; 29 rai la dum ai ni hpe jahten mu ga, mungkan ga a arawng n lu ai, hti n mai ai hte hpa n re ai ni hpe, Karai Kasang lata la wu ai. 30 Shi a jaw e Hkristu Yesu hta e nanhte rai la nga myit dai: shi gaw, anhte a matu mara, Karai Kasang kaw na, hpaji byeng-ya lam, dinghpring ai lam, shachyoi shapra ai lam hte htingrai htingrat ai lam, tai wa sai. 31 Dai re ai majaw, Gumrawng gumtawng re ai wa gaw, dai Madu hta gumrawng gumtawng nga u ga, nga nna ka da nga ai hte maren, rai na re ai.

1 Korinhtu 2

2:1 Ngai chyawm gaw, hpunau ni e, nanhte kaw sa du jang, Karai Kasang a sung htum ai ga nanhte hpe tsun dan ai shaloi, reng ai ningtam hte hpaji byeng-ya hte ngai sa du nngai n rai. 2 Kaning rai nme law, Yesu Hkristu hte shi a wudang jen da ai lam hta kaga, ngai nanhte a man e hpa mung n chye dum na, ngu nna ngai myit da se ai. 3 Bai, ngai gaw, gawngkya ai hte, hkrit kamyin nna hkrit gari ai law law hte, nanhte hte rau nga nga nngai rai nna, 4 nanhte a makam masham gaw, masha a hpaji byeng-ya hte n rai, 5 Karai Kasang a atsam hte sha grin nga lu u ga, nye a aga hte nye a hkaw dan ai gaw, shalen chye ai hpaji byeng-ya ningtam n nang ai sha, Wenyi hte atsam rawng ai sakse lam rai nga ai. 6 Raitimung, anhte gaw kup tsup ai ni hpe hpaji byeng-ya tsun dan ga ai: ndai mungkan ga na hpaji byeng-ya n rai; ndai mungkan ga na hten bya nga ma ai du ni a hpaji byeng-ya mung n re ai sha, 7 makoi magap da ai hte, ginding aga garai n lat kaw nna, anhte a hpung shingkang a matu mara Karai Kasang san tawn da ai, Karai Kasang a hpaji byeng-ya hpe, sung htum ai ga hte anhte tsun dan ga ai. 8 Ndai hpaji gaw, ndai mungkan ga na kadai du ni mung, n chye ma ai; chye taw gaw, hpung shingkang rawng ai Madu hpe shanhte wudang hta n jen da na ma ai. 9 Shingrai, ka da nga ai hte maren, Myi e n mu, na hte n na yu nna, Masha myit hta n hkawn pru ai lam, Karai Kasang gaw shi hpe tsawra ai ni a matu mara lajang da ai hpa raitimung, anhte tsun dan ga ai. 10 Karai Kasang chyawm gaw, Wenyi a lata hte ndai lam hte hpe anhte kaw shapraw shadan dan mi ai: kaning rai nme law, dai Wenyi gaw Karai Kasang a sung htum ai kaw du hkra, yawng mayawng hte hpe manaw yu nga ai. 11 Masha hta rawng ai wenyi sha n rai yang gaw, masha hte seng ai hte hpe kadai wa chye lu a ta? Dai hte maren, Karai Kasang a Wenyi sha n rai yang gaw, Karai Kasang hte seng ai hte hpe gade ai mung n chye lu nga ai. 12 Anhte chyawm gaw mungkan ga a wenyi hpe hkam la saga ai n rai; Karai Kasang e anhte hpe jaw da ai chyeju hpe anhte chye lu u ga, Karai Kasang kaw na Wenyi hpe anhte hkam la saga ai: 13 dai chyeju a lam, masha a hpaji ga sharin ai hku hte maren anhte tsun dan ga ai n rai; Wenyi sharin ai hku hte maren anhte tsun dan ga ai: Wenyi hte seng ai lam hte hpe, Wenyi hte seng ai ga hte anhte shapraw shadan ga ai. 14 Myi na ta naw re ai shinggyim masha gaw, Karai kasang a Wenyi hte seng ai lam hte hpe hkam la lu ai n rai, dai hte gaw shi a matu angawk angak rai nga ai rai nna, Wenyi myit e sha dai hte hpe jeyang lu ai re ai majaw, shi gaw dai hte hpe chye na lu ai n rai. 15 Wenyi rawng ai wa chyawm gaw yawng mayawng hte hpe jeyang lu nga ai; shi hpe mahtang gaw kadai raitimung jeyang ya lu ai n rai. 16 Kaning rai nme law, dai Madu hpe sharin achyin ya lu u ga, shi a amyit hpe kadai chye ga nga a ta? Anhte chyawm gaw Hkristu a amyit rawng nga ga ai.

1 Korinhtu 3

3:1 Ngai chyawm gaw, hpunau ni e, Wenyi myit rawng ai ni hpe zawn, nanhte hpe tsun dan lu made ai n rai; shinggyim ta naw re ai ni hte, Hkristu hta e ma chyangai hpe zawn, tsun dan yu masade ai. 2 Garai n rin lu myit dai majaw, shat shatmai n re ai sha, chyu hkrai sha, ngai nanhte hpe gawn jaw made ai. Ya e pyi nanhte garai n rin lu myit dai: 3 kaning rai nme law, nanhte shinggyim ta naw rai nga myit dai. Nanhte hta e manawn masham hte ga law ga la rai nga myit dai majaw, nanhte shinggyim ta naw rai nga myit dai hte, mungkan masha zawn, naw hkawm nga myit dai, n rai myit ni? 4 Langai ngai gaw, Ngai chyawm gaw, Pawlu hte seng nngai; bai kaga gaw, Ngai mahtang Apolo hte seng nngai, nga nna tsun shajang myit yang gaw, nanhte mungkan masha hkrai rai nga myit dai, n rai myit ni? 5 Apolo gaw kadai rai nga a ta? Pawlu mung kadai rai nga a ta? Shan gaw shangun ma rai nga nna, shan a jaw e nanhte kamsham ai kaw du lu myit dai: dai Madu e jaw da mu ai hte maren, shan langai hte langai shachyen lu ma ai. 6 Ngai gaw hkai da nngai, Apolo gaw ntsin jaw wu ai: Karai Kasang e she tu shangun nga ai. 7 Shingrai, hkai da ai wa gaw hpa n rai nga ai, ntsin jaw ai wa mung hpa n rai nga ai; tu shangun ai Karai Kasang chyu sha shabyin ya lu ai. 8 Dai hta kaga hkai da ai wa hte ntsin jaw ai wa gaw langai sha rai nga ma ai; raitimung, tinang a shakut sharang ai hte maren, langai hte langai gaw tinang a shabrai lu la na mara ai. 9 Anhte chyawm gaw Karai Kasang a shingdep shingtau ni rai nga ga ai: nanhte gaw Karai Kasang a yi hkauna hte, Karai Kasang a wahpang htingnu, rai nga myit dai. 10 Karai Kasang ngai hpe jaw da ai chyeju hte maren, hpaji rawng ai nta shachyaw ai wa zawn, ngai npawt nhpang gaw da se ai; kaga hte gaw dai hta e gaw kahtap mu ai. Kaning rai gaw kahtap na hpe langai hte langai yu yu nga mu ga. 11 kaning rai nme law, gaw tawn da sai, Yesu Hkristu ngu ai npawt nhpang hta kaga, kadai mung gaw da lu ai n rai. 12 Marai langai ngai dai npawt nhpang hta e, aja, gumhpraw, lungseng, hpun, nawnam hte yi hku hte hte gaw kahtap dam a yang gaw, langai hte langai a bungli gaw danpru wa na ra ai: 13 kaning rai nme law, dai nhtoi gaw dai hpe shadawng dat nna, wan e gaw dai hpe shadan dan na ru ai; langai hte langai a bungli kaning rai nga ai gaw, dai wan e chyam ginhka na ru ai. 14 Marai langai ngai a gaw kahtap ai bungli nan nawng rai nga lu yang gaw, dai wa gaw shabrai lu la na ru ai. 15 Langai ngai a bungli hkru mat a yang gaw, shi sum mat ai hkrum na ra ai; raitimung, wan hte lawt ai zawn, shi hkum sha hkyehkrang la ai hkrum na ra ai. 16 Nanhte gaw Karai kasang a nawku htingnu rai nga nna, Karai Kasang a Wenyi gaw nanhte hta e rawng nga malit dai hpe, nanhte n chye nga myit ni? 17 Marai langai ngai Karai Kasang a nawku htingnu hpe sharun shabya nga yang gaw, Karai Kasang dai wa hpe sharun shabya kau na ru ai; kaning rai nme law, Karai Kasang a nawku htingnu gaw chyoi pra nga ai; nanhte mung dai zawn rai nga myit dai. 18 Kadai raitimung tinang hkum hpe hkum hkalem nga myit ga. Marai langai ngai ndai mungkan ga e nanhte hta, Hpaji byeng-ya rawng nga nngai, nga nna grang a yang gaw, dai wa gaw hpaji byeng-ya lu la hkra, angawk angak tai wa u ga. 19 Kaning rai nme law, ndai mungkan ga na hpaji byeng-ya gaw, Karai Kasang a man e angawk angak rai nga ai. Dai rai nna, Hpaji rawng ai ni hpe shanhte a hpaji hte shi shakrip mu ai; 20 bai, Hpaji rawng ai ni a myit ai lam kaman lila rai nga ai gaw, dai Madu chye ya nga ai, nga nna ka da nga ai. 21 Dai re ai majaw, kadai raitimung masha hta e hkum gumrawng nga mu ga. Kaning rai nme law, yawng mayawng hte gaw nanhte a npu e rai nga ai: 22 Pawlu mung, Apolo mung, Kehpa mung, mungkan ga mung, hkrung mahkrung mung, si hkrung si htan mung, ya e nga ai hte htawmhpang e pra na ra ai mung, yawng mayawng hte gaw nanhte a npu e rai nga malit dai; 23 nanhte mahtang Hkristu a rai nga ai ni, rai nga myit dai; Hkristu chyawm gaw Karai Kasang a re ai wa rai nga ai.

1 Korinhtu 4

4:1 Shingrai an gaw Hkristu a hkringmang ni hte Karai Kasang a sung htum ai lam ni a kunhting yan an rai nga ga ai, an a lam masha ni myit nga mu ga. 2 Dai hta kaga, kunhting ni gaw kangka rai nga yang she, masha e ra ai hku rai nga ai. 3 Nanhte hte, masha e da ai nhtoi hta e, ngai hkum jeyang ai hkrum dam timung, dai gaw nye a matu amu kaji naw rai nga ai: nye a hkum hpe pyi ngai jeyang nngai n rai. 4 Kaning rai nme law, ngai hkum dai mara n lu dum nngai: raitimung, dai gaw nye a dinghpring ai lam n rai nga ai: ngai hpe jeyang ai wa gaw, dai Madu rai nga ai. 5 Dai re ai majaw, aten garai n du ai hte, nsin hta naw makoi magap da ai arai ni hpe hpaw shadawng dat nna, kraw lawang na myit mang ai hpe shapraw shadan dan na Madu du sa ai du hkra, hpa mung hkum jeyang nga myit; dai shaloi e Karai Kasang gaw langai hte langai hpe hkap shakawn na ra ai. 6 Hpunau ni e, ka da nga ai hte maren nanhte n lai lu na hte, langai wa hta myit kaba nna kaga wa hpe shinggan kau na n rai u ga, an a lam tau yu let nanhte sharin lu myit ga, ndai ga hte hpe ngai hte Apolo a lam, ngai nanhte a matu ga shadawn shatai nna sha-ang we ai. 7 Kaning rai nme law, kadai wa mi nang hpe ginhka shangun nga a ta? Hkam la ai sha n rai yang gaw, nang hpa lu nga a ta? Hkam la n yang gaw, n hkam la ai zawn, hpa majaw gumrawng nga n ta? 8 Ya hte sha nanhte hkru kat manit hka; ya hte sha nanhte sut su rau myit hka; anhte pyi n lawm ai sha nanhte up nga myit ni? gaja wa, anhte mung nanhte hte rau up nga lu u ga, nanhte up nga na ngai ra nga nngai. 9 Kaning rai nme law, sat na matu san da ai ni hpe zawn, Karai Kasang gaw kasa ni ngu ai anhte hpe hpang chyahtum e shadan dan ma ni ai, ngai myit nga nngai: anhte gaw mungkan ga hte, lamu kasa ni hte shinggyim masha ni a man e, ginsup poi dan ai ni tai wa saga ai. 10 Anhte gaw Hkristu a majaw angawk angak rai nga ga ai, nanhte mahtang Hkristu hta e myitsu nga myit dai; anhte gaw n-gun n ja ga ai, nanhte mahtang n-gun ja myit dai; nanhte hpung rawng myit dai, anhte mahtang arawng hpoi saga ai. 11 Ya ten du hkra anhte kawsi hpang gara, singgu krin, adup adep hkrum nna, nga shara garen nga ai hte, 12 anhte a lata hte shakut nna bungli galaw sha ga ai; arip aroi hkrum yang anhte shaman ga ai; zingri zingrat hkrum yang anhte shakut sharang ga ai; 13 shatan nhkan hkrum yang anhte ga ngwi ga pyaw tsun ga ai; ya du hkra, mungkan ga a mazuk mazak hte yawng mayawng na shanut shanaw zawn, anhte tai wa saga ai. 14 Nanhte hpe kaya jahkrum na, ndai lam ngai ka da nngai n rai; ngai tsawra ai sha ni hpe zawn ngai nanhte hpe shadum shahprang made ai. 15 Kaning rai nme law, Hkristu a lam sharin achyin ai sara mun mi dang nanhte lu myit timung, kawa law law wa n nga malit dai; dai kabu gara shiga jaw e, ngai nanhte hpe Hkristu Yesu hta e shaprat dat made ai. 16 Dai rai nna, nye a samnang ai ni tai nga mu, ngu nna ngai nanhte hpe shadut jahkat made ai. 17 De a majaw, dai Madu hta tsawra ai hte sadi sahka nga ai, ngai sha Timohti hpe nanhte hpang de ngai shangun dat we ai; shi gaw, shara magup hkan e Hpung ni yawng hte hpe ngai sharin shaga ya ai hte maren, Hkristu Yesu hta na nye a lam ni, nanhte hpe shadum shahprang na marin dai. 18 Ngai hkum nanhte hpang de n sa du na zawn nawn nna, nkau mi gaw gumlu gumlan rai wa masai. 19 Raitimung, dai Madu hkraw a yang gaw, ngai nanhte hpang de alawan sa du na ring ngai rai nna, gumlu gumlan re ai ni a n-gup ga hpe n rai, shanhte a n-gun atsam hpe sha ngai matsing na nngai: 20 kaning rai nme law, Karai Kasang a mungdan gaw n-gup ga hta rawng nga ai n rai, n-gun atsam hta rawng nga ai. 21 Nanhte gara hku ra nga myit ta? Ngai gaw shingna hte, shing n rai, tsawra nna sumnung ai wenyi hte, nanhte hpang de sa du na kun?

1 Korinhtu 5

5:1 Nanhte hta e hpye ai amu rai nga ai gaw, gaja wa pri kajai wa masai: maigan ni hta pyi n lawm ai hpye ai amu rai nga ai rai nna, marai langai mi gaw shi a kawa a num shaw nu ai, rai nga ai. 2 Nanhte madaw gumlu gumlan rai nga myit dai rai nna, shing re ai amu galaw ai wa hpe nanhte kaw na shaden kau ai hkrum u ga, yawn ai myit n madun ai sha nga nga myit ni? 3 Ngai chyawm gaw, hkum hkrang tsan gang timung, wenyi hte lawm nga ai rai nna, nanhte hte nye a wenyi ni, anhte a Madu Yesu a atsam hte zuphpawng nga yang, 4 dai Madu a nhtoi hta e, ndai wa a wenyi hkyehkrang la ai hkrum u ga, hkum hkrang hten bya na matu, 5 shing re ai wa Satan hpe ap ya na, ngu nna rau nga ai zawn, ndai amu galaw ai wa hpe anhte a Madu Yesu a mying ningsang hte, ya e pyi ngai jeyang ngut se ai. 6 Nanhte a gumrawng gumtawng ai gaw mai kaja nga ai n rai.Matsi loi mi gaw muk tawng ting hpe shawawm dat wu ai, nanhte n chye nga nga myit ni? 7 Nanhte matsi n rawng myit dai hte maren, muk tawng ningnan nanhte tai myit ga, dai dingsa matsi hpe htawk kau mu. Kaning rai nme law, Hkristu ngu ai anhte a Shalai wa hkungga gaw sat kau ai hkrum nu ai. 8 Dai rai nna, dingsa matsi hte n rai, n hkru n hkra ai hte hpye ai amu ngu ai matsi hte mung n re ai sha, matsi n rawng ai san pra nna tengman ai hte, anhte poi galaw sha ga. 9 Nanhte gaw hpye ai amu galaw ai ni hte n kanawn myit ga, shagun dat ai laika hta ngai nanhte hpe ka dat ni ai; 10 raitimung, ndai mungkan ga na hpye ai amu galaw ai ni hte, nammak lawhpa ai ni, dip lu dip sha ai ni hte gawngngu sumla nawku ai ni hte n kanawn lu na, ngai n myit nngai: dai lam rai yang gaw, nanhte mungkan ga na pru mat wa na sha rai nga ai. 11 Ya chyawm gaw, hpunau ngu ai wa gaw, hpye ai hte nammak lawhpa ai, gawngngu sumla nawku ai, shatan nhkan ai, chyaru ya shang ai hte dip lu dip sha ai wa rai nga a yang gaw, n kanawn lu ai hta n-ga, shing re ai wa hte n jawm lu n jawm sha lu na, ngu nna nanhte hpe ka dat nngai. 12 Kaning rai nme law, shinggan de nga ai ni hpe jeyang na, ngai hte hpa seng ga ta? Nanhte gaw kun de na ni hpe jeyang myit dai, n rai myit ni? 13 Shinggan de nga ai ni hpe Karai Kasang jeyang nga ai, n rai ni? Dai n hkru n hkra ai wa hpe nanhte kaw na shaden kau mu.

1 Korinhtu 6

6:1 Nanhte shada da amu rawng myit yang gaw, chyoi pra ai ni a man e n re ai sha, n ding n man ai ni man e tara dara hkam na, nanhte hta na langai ngai sa wam nga myit ni? 2 Chyoi pra ai ni gaw mungkan ga hpe tara dara na mara ai, nanhte n chye nga myit ni? Mungkan ga gaw nanhte e tara dara ai hkrum a yang gaw, kaji htum ai lam hte hpe tara dara na, nanhte n ging nga myit ni? 3 Anhte lamu kasa hpe tara dara na re ai, nanhte n chye nga myit ni? dai rai nna, dinghta lam hte hpe grau nna tara dara lu na, n rai myit ni? 4 Shingrai yang, dinghta lam hte hpe tara dara shara nga myit yang gaw, Hpung kata e arawng n lu ai ni hpe nanhte tara agyi aya hta dang da ga myit ni? 5 Nanhte kaya myit ga she ndai lam ngai tsun nngai. Hpunau shada a lapran e jeyang chye ai hpaji byeng-ya rawng ai masha langai mi pyi nanhte hta n nga a ni? 6 Hpunau wa gaw hpunau wa hte n kam n sham ai ni a man e pyi, shawk hkat nga a hka? 7 Shingrai, ya nanhte shada da shawk hkat ai amu rawng nga myit dai gaw, nanhte a shut ai lam majing rai nga malit dai. Hpa majaw sharu shatsang ai mahtang n hkam myit ta? Map lu map sha ai hpe hpa majaw n hkam myit ta? 8 Nanhte chyawm gaw, hpunau ni hpe pyi, sharu shatsang ai hte map lu map sha myit dai. 9 N ding n man ai ni gaw Karai Kasang a mungdan a sali wunli n hkam la lu na re ai, nanhte n chye nga myit ni? Lam hkum dam myit: hpye ai amu galaw ai ni mung, gawngngu sumla nawku ai ni mung, num shaw ai ni mung, ngang ai ni mung, la shada tam ai ni mung, 10 lagu lagut ni mung, nammak lawhpa ai ni mung, chyaru ya shang ai ni mung, shatan nhkan ai ni mung, dip lu dip sha ai ni mung, Karai Kasang a mungdan a sali wunli hpe hkam la lu n rai. 11 Nanhte nkau mi gaw shingrai chyalu ni rai nga myit dai: raitimung, nanhte gaw anhte a Madu Yesu Hkristu a mying ningsang hte, anhte a Karai Kasang a Wenyi e kashin kamun kau ai mung, shachyoi shapra ai mung, dinghpring ngu ai mung, hkam la manit dai. 12 Yawng mayawng galaw na ahkang ngai lu nngai; raitimung, yawng mayawng hte wa akyu byin ai n rai. Yawng mayawng galaw na ahkang ngai lu nngai; raitimung, hpa lam a jaw e mung, ngai mayam n tai mayu nngai. 13 Shahpa gaw kan a matu, kan gaw shahpa a matu rai nga ai; raitimung, Karai Kasang gaw dai yan hpe rau jahten na ru ai. Dai hkum hkrang chyawm gaw hpye ai amu a matu n re ai sha, dai Madu a matu rai nga ai; dai Madu mung hkum hkrang a matu rai nga ai: 14 Karai Kasang chyawm gaw shi a n-gun hte dai Madu hpe hkrung sharawt wu ai rai nna, anhte hpe mung hkrung sharawt na mi ai. 15 Nanhte a hkum hkrang ni Hkristu a daw shan ni rai nga ai hpe, nanhte n chye nga myit ni? Dai rai yang gaw, Hkristu a daw shan ni hpe ngai jahka kau nna shawa num a daw shan ni shatai na rai nga a ni? Shing n rai law. 16 Shawa num hte manoi ai wa gaw, shi hte hkum hkrang langai sha rai nga ai hpe, nanhte n chye nga myit ni? Kaning rai nme law, Shan lahkawng gaw hkumshan langai sha tai na mara ai, nga nna shi tsun da nga ai. 17 Dai Madu hta manoi ai wa chyawm gaw, Wenyi langai sha rai nga ma ai. 18 Hpye ai amu hpe zai nga mu: masha e galaw nga ai yubak nga manga gaw, tinang a hkum hkrang a shinggan e nga nga ai; hpye ai amu galaw ai wa mahtang gaw, shi a hkum hkrang hpe nan shut hpyit da wu ai. 19 Dai hta n-ga, nanhte a hkum hkrang gaw, Karai kasang kaw na nanhte lu la ai hte, nanhte hta e rawng nga ai Chyoi pra ai Wenyi a htingnu rai nga ai, nanhte n chye nga myit ni? Nanhte gaw tinang hkum hpe pyi up lu ai n rai; 20 nanhte jahpu manu daw nna mari da sai ni rai nga myit dai: dai re ai majaw, nanhte a hkum hkrang hte Karai Kasang hpe shagrau sha-a nga mu law.

1 Korinhtu 7

7:1 Ya, nanhte ka da ai lam hte gaw, lasha gaw numsha hte n hkrum yang gaw, mai nga ai; 2 raitimung, hpye ai amu koi na matu, la langai hte langai tinang a num lu u ga, num langai hte langai tinang a la lu u ga. 3 Madu wa gaw htung hte maren madu jan hte kanawn u ga, Madu jan mung dai hte maren madu wa hte rai u ga. 4 Madu jan gaw tinang hkum hpe n up lu ai sha, dai madu wa she up nga ai; dai hte maren, dai madu wa mung tinang hkum hpe n up lu ai sha, madu jan she up nga ai. 5 Nanhte myit hkrum nna, akyu hpyi shin shang aten ladaw da na matu sha n rai yang gaw, shada da hkum koi gam myit: nanhte n sharang lu ai a majaw, Satan e gunglau ai n hkrum myit ga, dai ladaw lai yang, rau bai nga mu. 6 Ning nga ngai tsun nngai gaw, jep ai tara da nngai n rai, ahkang jaw ai hku sha ngai tsun nngai. 7 Masha yawng mayawng ngai zawn rai na ngai ra nngai; raitimung, langai hte langai gaw Karai Kasang kaw na tinang a chyeju kumhpa lu la shajang ma ai; marai langai mi gaw amyu langai mi, kaga gaw amyu kaga lu la shajang ma ai. 8 Garai n hkungran ai ni hte gaida jan ni hpe ngai tsun nngai gaw, ngai zawn nga nga na shanhte a matu mai kaja nga ai. 9 Raitimung, n sharang lu yang gaw, hkungran mu ga: kaning rai nme law, katu kahtet ai hta hkungran ai gaw, grau kaja nga ai. 10 Hkungran sai ni hpe ngai tsun ai n re ai sha, dai Madu tsun ai gaw, madu jan gaw madu wa hte n hka u ga; 11 hka sayang gaw, shi num bai n wa u ga, shing n rai, myi na la wa hte bai hkau chyap u ga; madu wa mung, madu jan hpe n kau u ga. 12 Gale hte hpe, dai Madu n re ai sha, ngai tsun nngai gaw, hpunau langai ngai n kam n sham ai madu jan lu dam timung, dai numsha shi hte rau nga nga mayu a yang gaw, shi hpe n jahka kau u ga. 13 Numsha mung n kam n sham ai madu wa lu dam timung, shi hte rau nga nga mayu a yang gaw, dai la wa hpe n jahka kau u ga. 14 Kaning rai nme law, n kam n sham ai madu wa gaw, madu jan a jaw e shachyoi shapra ai hkrum nga ai; n kam n sham ai madu jan mung, dai hpunau wa a jaw e shachyoi shapra ai hkrum nga ai: dai n rai yang gaw, nanhte a kashu kasha ni n san n seng na ma ai; ya chyawm gaw shanhte chyoi pra nga ma ai. 15 Raitimung, dai n kam n sham ai wa gaw hka wa mayu yang, hka wa u ga: hpunau lasha hte numsha gaw shing re ai hta hkum da shara n nga nga ai rai nna, Karai Kasang gaw anhte hpe ngwi pyaw ai hte shaga da ma ni ai. 16 Dai hta kaga, numsha e, na a madu wa hpe hkyehkrang la lu na, nang kaning rai chye n ta? dai hte maren, lasha e, na a madu jan hpe hkyehkrang la lu na, nang kaning rai chye n ta? 17 Dai Madu gaw langai hte langai hpe karan jaw nna, Karai Kasang gaw langai hte langai hte hpe shaga da mu ai hte maren, shi naw hkawm nga u ga. Hpung shagu hta e ndai lam ngai hkangda nngai. 18 Matu gadoi hkam ai wa shaga da ai hkrum a yang gaw, matu gadoi hkam ai hpe shi n shinggan u ga. Matu gadoi n hkam ai wa shaga da ai hkrum a yang gaw, matu gadoi ai shi n hkam u ga. 19 Matu gadoi hkam ai gaw, hpa n rai nga ai; matu gadoi n hkam ai mung, hpa n rai nga ai: Karai Kasang a htet da ai lam hkan nang na chyu sha, akyu rai nga ai. 20 Langai hte langai gaw shaga da ai lam hta naw anga nga u ga. 21 Mayam rai nga ai wa shaga da ai hkrum n yang gaw, myit hkum tsang et; raitimung, lawt lu n yang gaw, dai lam grau nna tam u. 22 Kaning rai nme law, mayam rai nga yang, dai Madu e shaga la ai hkam ai wa gaw, dai Madu a shanglawt rai nga ai; dai hte maren shanglawt rai nga yang, shaga la ai hkam ai wa gaw, Hkristu a mayam rai nga ai. 23 Jahpu manu daw nna mari da sai ni nanhte rai nga myit dai: masha a mayam hkum tai myit. 24 Hpunau ni e, langai hte langai shaga da ai hkam ai hte maren, Karai Kasang a man e naw nga nga u ga law. 25 Ya, mahkawn ni a lam, dai Madu kaw na htet da ai ga ngai n lu nngai: raitimung, sadi sahka ai wa tai na she, dai Madu kaw na chyeju hkam la lu ai zawn, ngai jeyang ai lam shapraw nngai. 26 Dai rai nna, ya anhte hkrum ai kyindut ai a majaw, masha wa gaw nga nga ai hte maren mai nga nga na, ngai myit nga nngai. 27 Madu jan hte nang makyit sayang gaw, bai yan na lam hkum tam et; numsha hte lawt sayang gaw, num hkum tam et. 28 Raitimung, nang hkungran n yang gaw, yubak n rai nga lit dai; mahkawn mung hkungran a yang gaw, yubak n rai nga ai; shing re ai ni chyawm gaw, hkumshan hta e nni nkri hkrum na mara ai: ngai mahtang, nanhte hpe shalawt mayu made ai. 29 Bai, hpunau ni e, dai lam ngai tsun nngai gaw, ahkying ladaw gying mat wa sai; shingrai ya kaw nna gaw, num lu ai ni, n lu ai zawn, rai wa manu ga; 30 hkrapngu hkrapngoi ai ni, n hkrap ai zawn; kabu gara ai ni, n kabu ai zawn; hpaga ga ai ni, hpa n lu ai zawn; 31 ndai mungkan ga hpe sung ai ni gaw, grai wa n sung nga ai zawn, rai wa manu ga; kaning rai nme law, ndai mungkan ga a amawn asam gaw lai mat wa nga ai. 32 Nanhte gaw myit ru myit tsang n nga myit ga, ngai ra nga nngai. Num n la ai wa gaw, dai Madu hte kaning rai myit hkrum lu na nga nna, Madu a lam hte hpe a tsang nga ai: 33 num la ai wa chyawm gaw, madu jan hte kaning rai myit hkrum lu na, nga nna, mungkan ga a lam hte hpe tsang nga ai rai nna, myit kabra nga lu ai. 34 Num n wa ai numsha hte mahkawn gaw, tinang a hkum hte wenyi chyoi pra nga u ga, nga nna dai Madu a lam hte hpe a tsang nga ai: num wa ai num chyawm gaw, madu wa hte kaning rai myit hkrum lu na, nga nna mungkan ga a lam hte hpe a tsang nga ai. 35 Ning rai ngai tsun nngai gaw, nanhte a akyu byin na matu, nanhte hpe singgau hte hkam na zawn n re ai sha, htaphtuk ai hku shapraw nna, dingbai dingna n lawm ai sha, dai Madu hpe si si dawjau lu na she, ngai tsun nga nngai. 36 Raitimung, marai langai ngai a shayi sha ram prat lai wa a yang gaw, dai ma hpe n tsawm ai hku galaw ai, shi sawn nawn ya ai; galaw shara pru dam yang, galaw mayu ai hte maren galaw u ga; shi yubak galaw ai n rai: shan gaw hkungran mu ga. 37 Bai, kadai raitimung n ya hkraw ai myit rawng nga ai hte, galaw shara mung n nga ai sha, tinang a myit hpe hkan na ahkang lu nga ai rai nna, shi a shayi sha hpe naw tawn da na, nga nna tinang a kraw e myit hkut sayang gaw, kaja ai hku galaw nga ai. 38 Shingrai, shi a shayi sha hpe ya ai wa gaw, kaja ai hku galaw nga ai; n ya ai wa mung grau kaja ai hku galaw na re ai. 39 Madu jan gaw, madu wa garai n si dingsa, shi hte naw makyit nga ai: raitimung, madu wa nsa hkyet sayang gaw, tinang myit hte maren, Karai Wa hpe dum ai hte sha, kadai kaw wa mayu yang, wa lu na re ai. 40 Raitimung, nga nga lu yang shi grau pyaw na re ai; dai gaw ngai jeyang ai hku rai nga ai; ngai mung Karai Kasang a Wenyi rawng nga nngai gaw, ngai myit nngai law.

1 Korinhtu 8

8:1 Ya, sumla ni hpe nawng ai hkungga a lam, anhte yawng mayawng chye ginhka ai myit rawng nga ai gaw, anhte dum chye ga ai. Chye ginhka ai myit gaw grang chye ai, tsawra ai myit chyawm gaw, shadaw shangang chye ai. 2 Marai langai ngai, lama ma chye nngai, nga nna myit a yang gaw, chye mai ai lam pyi shi garai n chye wu ai: 3 langai ngai gaw, Karai Kasang hpe tsawra a yang gaw, Karai Kasang gaw shi hpe chye da wu ai. 4 Dai rai nna, sumla ni hpe nawng ai hkungga sha na lam gaw, sumla gaw ga ntsa e hpa n re ai sha rai nga ai hte, langai sha rai nga ai Karai Kasang hta kaga shaje n nga ai, anhte dum chye ga ai. 5 Kaning rai nme law, sumsing lamu hte ginding aga ntsa e, Hpara ngu ai ni nga shajang ma ai rai nna, Hpara law law hte madu law law rai nga ma ai, 6 raitimung, anhte a matu mara, Wa ngu ai, Karai Kasang langai sha rai nga ai rai nna, shi kaw nna yawng mayawng pru wa ai hte, shi a matu anhte rai nga ga ai; Yesu Hkristu ngu ai Madu mung langai sha rai nga ai rai nna, shi a marang e yawng mayawng rai nga ai hte, shi a majaw anhte rai nga ga ai. 7 Raitimung, dai chye ginhka ai myit masha yawng n lu ma ai: nkau mi gaw ya du hkra sumla hta man ai majaw, hkungga sha ma yang, dai gaw sumla hpe nawng ai, dum nna sha ma ai; shanhte a myit nsam mahtang n-gun n ja ai majaw, awu asin hkrum ma ai. 8 Raitimung, shahpa majaw Karai Kasang a man e anhte myiman pa na ga ai n rai: anhte n sha yang gaw, grit wa na ga ai n rai; sha yang mung, grau wa na ga ai n rai. 9 Shing wa nga timung, nanhte a ahkang gaw n-gun n ja ai ni a myit kataw shara n tai u ga, sadi nga mu. 10 Kaning rai nme law, nang gaw ginhka chye ai myit lu ninglen, sumla nta hta shat sha nga ai hpe, marai langai ngai mu a yang, dai wa a myit nsam n-gun n ja yang gaw, sumla hpe nawng ai hkungga sha gwi wa na, n rai ni? 11 Shingrai, na a chye ginhka ai a majaw, n-gun n ja ai wa gaw hten wa sai; dai hpunau wa a matu mara Hkristu gaw si hkam nu hka! 12 Dai di yang, hpunau ni hpe shut hpyit nna shanhte a n-gun n ja ai myit nsam hpe machyi shangun myit yang gaw, nanhte Hkristu hpe shut hpyit nga myit dai. 13 Dai rai nna, shahpa a majaw nye a hpunau myit kataw a yang gaw, nye a hpunau wa myit n kataw u ga, ngai prat dingsa e shan n sha na ni ai.

1 Korinhtu 9

9:1 Ngai gaw nye myit shadang lu nngai, n rai ni? Kasa mung ngai rai nga nngai, n rai ni? anhte a Madu Yesu hpe ngai mu yu ni ai, n rai ni? nanhte gaw, dai Madu hta e, nye a magan rai nga myit dai, n rai myit ni? 2 Masha kaga a kasa ngai n rai yang gaw, nanhte a ngai teng teng rai nga nngai; kaning rai nme law, nanhte gaw, dai Madu hta e, nye kasa aya a dazik rai nga myit dai. 3 Ngai hpe san dinglik yu ai ni hpe, ngai tsun htang ai ga gaw, da ndai rai nga ai. 4 Anhte gaw sha na lu na ahkang n lu ga ai kun? 5 Kasa kaga ni hte, Madu a kanau ni hte Kehpa zawn, kamsham ai madu jan woi hkawm na ahkang, anhte n lu ga ni? 6 Ngai hte Barnaba chyu sha lata bungli tawn da mayu yang, ahkang n lu ga ni? 7 Kadai wa mi tinang a jarit hte majan amu gun a ta? Sun galaw nna dai hta na n di sha ai, kadai wa rai ta? Yamnga rem nna, yamnga chyu n lu n sha ai, kadai wa rai ta? 8 Masha hku hkan nna sha, ndai lam ngai tsun nga n ni? jep ai tara mung ndai lam tsun nga ai, n rai ni? 9 Kaning rai nme law, Mam kabye ai nga a n-gup hpe ka dagraw ya lu na n rai, nga nna Mawshe a tara hta e ka da nga ai. Karai Kasang gaw usu ni hpe sha tsang nga ai kun? shing n rai, anhte a matu teng teng tsun nga ai kun? 10 Gaja wa, hkauna galau ai wa gaw, myit mada let galau mai lu ai rai nna, mam kabye ai wa mung, mam lu la na myit mada ai hte kabye lu u ga she, anhte a matu shing nga ka da nga ai. 11 Anhte gaw nanhte hta e wenyi nli gat nhtawm, nanhte a dinghta jarit hpe anhte dan ga yang gaw, chyeju kaba ngu lu na a ni? 12 Sara kaga ni gaw nanhte hta shing re ai ahkang lu ma yang gaw, anhte grau nna lu ang ga ai, n rai ni? Raitimung, dai ahkang hpe anhte n hkan ai sha, Hkristu a kabu gara shiga hpe n shadang u ga she, anhte lam shagu hta shakut sharang nga ga ai. 13 Naw ku nta na chyoi pra bungli shachyen ai ni gaw, nawku nta hte seng ai hte hpe sha lu ma ai hte, tawn hkungri hpajang ai ni gaw, tawn hkungri na daw chyen, sha lu ma ai hpe, nanhte n chye nga myit ni? 14 Dai hte maren, dai kabu gara shiga hkaw dan ai ni gaw, dai kabu gara shiga hta asak bau lu na, nga nna dai Madu hkangda nga sai. 15 Ngai chyawm gaw, ndai ahkang hpe loi mi mung n hkan nngai. Shingrai, ngai hpe dai zawn di mi ga mung, ngu nna ndai lam hte hpe ngai ka da nngai n rai; kaning rai nme law, marai langai ngai nye a gumrawng shara shayuk ai hta, ngai si wa na gaw, nye a matu grau mai nga ai. 16 Ndai kabu gara shiga hpe ngai hkaw dan nga yang, nye a matu gumrawng shara n nga ai; kaning rai nme law ngai n hkaw dan ai gaw n nga lu nngai; ngai n hkaw dan yang gaw, dingnye lu nngai. 17 Dai rai nna, dai amu hpe nye a myit hte ngai galaw nga n yang gaw, ngai shabrai lu nngai; raitimung, nye a myit hte n galaw nga n yang gaw, kunhting aya hta san da ai sha rai nga nngai. 18 Dai re ai majaw, nye a shabrai gaw hpa rai nga a ta, nga yang, dai kabu gara shiga hkaw dan ai shaloi, kabu gara shiga a ahkang nau wa ngai n hkan ai rai nna, jahpu n hpyi ai sha, dai kabu gara shiga hpe shagrin da na, rai nga li ai. 19 Ngai gaw shingrai gade a ahkang npu e n nga timung, malaw maga hpe lum la lu hkra, yawng mayawng a mayam ngai tai nga nngai. 20 Yuda ni hpe lum la lu hkra, Yuda ni hta e Yuda masha zawn, ngai tai nga nngai; ngai hkum tara npu e n nga timung, tara npu na ni hpe lum la lu hkra, tara npu na ni hta e tara npu e nga ai wa zawn, ngai tai nga nngai. 21 Ngai hkum Karai Kasang kaw tara kata ai wa n rai, Hkristu a tara npu e nga ai wa ngai rai nga nngai raitimung, tara kata ai ni hpe lum la lu hkra, tara kata ai ni hta e, tara kata ai wa zawn, ngai tai nga nngai. 22 N-gun n ja ai ni hpe lum la lu hkra, n-gun n ja ai ni hta e, n-gun n ja ai wa zawn, ngai tai nga nngai: nkau mi hpe lam langai ngai hte hkyehkrang la lu hkra, masha yawng mayawng hta lam yawng mayawng, ngai hkan shatsup nngai. 23 Dai kabu gara shiga a akyu hta ngai mung lawm lu u ga, dai kabu gara shiga a jaw e ngai yawng mayawng hte hpe hkan galaw nngai. 24 Gat shingjawng ai shara e yawng gat ma timung, marai langai wa sha dai kumhpa lu la nga ai, nanhte n chye nga myit ni? Shingrai nanhte lu la hkra gat shingjawng nga mu; 25 shingjawng poi hta hkying hkat ai ni gaw, lam shagu hta htang gam nga ma ai. Shanhte gaw hten byak chye ai janmau lu la hkra sharang ma ai; anhte chyawm gaw hten byak n chye ai janmau lu la hkra sharang ga ai. 26 Dai majaw tuk shamak re ai zawn, ngai gat nngai n rai; htwi hkat yang mung, nbung hpe ngai n htwi kau ai sha, 27 masha kaga hpe tara hkaw ngut ai hpang, ngai hkum nan sum kau ai n hkrum u ga, nye a hkum hpe ngai htwi kau nna, dai hpe shagrit da we ai.

1 Korinhtu 10

10:1 Hpunau ni e, anhte a ji wa ni yawng gaw, dai sumwi npu e nga ma ai hte, yawng gaw dai nawng hta ga rap wa ma ai rai nna, 2 yawng gaw dai sumwi hte nawng hta e Mawshe kaw baptisma hkam ma ai hte, 3 yawng gaw wenyi shahpa ra ra sha nna, 4 yawng gaw wenyi luhpa ra ra lu ma ai: kaning rai nme law, shanhte kaw hkan nang nga ai wenyi lunghkrung hta na, shanhte lu ma ai rai nna, dai lunghkrung gaw Hkristu rai nga ai; dai lam hte hpe nanhte n chye na ai nga na hpe, ngai n ra nngai. 5 Raitimung, shanhte hta na malaw maga hte hpe Karai Kasang gaw n sharawng awng da mu ai rai nna, shanhte dai nam mali hkan e run byak mat ai hkrum ma ai. 6 Shanhte gaw n kaja ai arai hpe myit marin nga ma ai zawn, anhte gaw n marin u ga she, dai lam hte gaw anhte matu shari tai wa masai. 7 Dai hta kaga, Masha ni gaw lusha let dung nna, ginsup na matu bai rawt ma ai, nga nna ka da nga ai hte maren, shanhte nkau mi sumla nawku ai ni tai ma ai zawn, nanhte hkum tai myit. 8 Shanhte nkau mi hpye ai amu galaw nna, lani mi hta sha mun lahkawng e hkying masum rum mat ma ai zawn, anhte gaw hpye ai amu n galaw ga. 9 Shanhte nkau mi dai Madu hpe chyawm dinglik nna, lapu ni e kawa sharum ai zawn, anhte gaw dai Madu hpe n chyam dinglik ga. 10 Shanhte nkau mi put ngun nna, jahten ai wa a lata e hten byak hkrum ma ai zawn, nanhte gaw put ngun hkum rai myit. 11 Dai lam hte gaw shari tai u ga, shanhte hta shabyin nga ai rai nna, hpang jahtum ai aprat dep lu ai ni anhte hpe shadum shahprang na matu, ka da nga ai. 12 Dai rai nna, marai langai ngai, Ngai gaw jan rai tsap nga nngai, nga nna myit a yang gaw, shi n kadawng ai, sadi nga u ga. 13 Masha n jan lu ai agung alau gaw nanhte hkrum hkra myit dai n rai; Karai Kasang mung sadi sahka nga ai rai nna, nanhte n jan lu ai agung alau hkrum na ahkang n jaw nga ai sha, nanhte jan lu myit ga, dai agung alau hte rau pru wa na hkat shi hkat da na ru ai. 14 Dai re ai majaw, ngai tsawra ai ni e, sumla nawku na lam hpe koi gam mu. 15 Hpaji rawng ai ni hpe zawn ngai tsun made ga; ngai tsun ai ga hpe maram masam yu mu. 16 Anhte shaman nga ai, a nga ai gawm gaw, Hkristu a asai hte kanawn mazum ai lam rai nga ai, n rai ni? anhte ahkyep alep nga ai muk gaw, Hkristu a hkum hkrang hte kanawn mazum ai lam rai nga ai, n rai ni? 17 Kaning rai nme law, anhte law law wa rai ga timung, muk tawng langai sha rai nga ai hte, anhte yawng dai muk tawng langai sha hta jawm sha ga ai majaw, anhte hkum hkrang langai sha rai nga ga ai. 18 Myi na htung ta rai nga ai Israela hpe yu yu mu: shagu hkungga sha ai ni gaw, dai tawn hkungri hte baw sha rai nga ma ai, n rai ni? 19 Ning nga ngai tsun ai gaw, hpa nga ai rai nga a ta? Sumla hpe nawng ai hkungga gaw lam la nga ai, sumla mung lam la nga ai, ngai tsun nga a ni? 20 Shing nga ngai n tsun ai sha, maigan ni jaw ai hkungga gaw, Karai Kasang hpe jaw ai n rai, nat ni hpe jaw nga ma ai, ngai tsun nngai: nanhte gaw nat ni hte kanawn mazum nga na, ngai n ra nngai. 21 Dai Madu a gawm hte nat ni a gawm hpawn, nanhte lu lu na myit dai n rai; dai Madu a sha ku hte nat ni a sha ku hta rau nanhte shang sha lu na myit dai n rai. 22 Dai Madu hpe anhte nhkap shapawt na gaw ni? anhte gaw shi hta n-gun grau nga ga ni? 23 Yawng mayawng galaw na ahkang nga ai; raitimung, yawng mayawng hte wa akyu byin ai n rai; yawng mayawng galaw na ahkang nga ai; raitimung, yawng mayawng hte wa shadaw shagrin lu ai n rai. 24 Kadai mung tinang akyu n re ai sha, kaga wa a akyu sha tam nga mu. 25 Gat hkan e dut ai guji guyang hte hpe sha mu, myit ung ang ai a jaw e hpa hkum san hkum gawn myit: 26 kaning rai nme law, lamu ga hte de a yawng mayawng hte gaw dai Madu a hkrai rai nga ai. 27 N kam n sham ai wa langai ngai, nanhte hpe shaga nna, nanhte sa mayu myit yang gaw, nanhte a man e baw jaw majaw hte hpe sha mu; myit ung ang ai a jaw e hpa hkum san hkum gawn myit. 28 Raitimung, marai langai ngai, Ndai gaw shagu hkungga shan rai nga ai, nga nna nanhte hpe tsun dan myit yang gaw, shadum shahprang ai wa hte myit ung ang ai a jaw e hkum sha myit. 29 Myit ung ang ai nga ai gaw, tinang myit hpe n rai, kaga wa a myit hpe lakap nna tsun nngai; kaning rai nme law, nye a ahkang aya hpe masha kaga wa a myit ungang hpa majaw jeyang lu na a ta? 30 Chyeju dum ai myit hte ngai sha n yang gaw, ngai shakawn kungdawn ai shahpa a lam, hpa majaw shatan nhkan ai ngai hkrum na rai ta? 31 Dai re ai majaw, nanhte sha timung, lu timung, hpa galaw timung, nga manga hta Karai Kasang a hpung shingkang tam let, galaw nga mu. 32 Masha yawng mayawng hkyehkrang la ai hkrum mu ga she, lam shagu hta nlang hte hpe ngai hkan shahkau nna, nye a akyu n re ai sha, 33 malaw maga a akyu tam nga nngai hte maren, nanhte gaw Yuda ni a matu mung, Heleni ni a matu mung, Karai Kasang a Hpung matu mung, ahtu kataw shara hkum tai nga myit.

1 Korinhtu 11

11:1 Ngai gaw Hkristu hta samnang ai zawn, nanhte mung nye a samnang ni tai nga mu. 2 Nanhte gaw lam shagu hta e ngai hpe adum nga nna, ngai nanhte hpe dai matsun maroi ga madat da ai hte maren, nanhte hkan sharau myit dai majaw, ngai nanhte hpe shakawn made ai. 3 Raitimung, lasha nlang hte a baw gaw, Hkristu rai nga ai, numsha a baw gaw lasha rai nga ai, Hkristu a baw chyawm gaw, Karai Kasang rai nga ai hpe nanhte chye myit ga, ngai ra nga nngai. 4 Kadai lasha mung akyu hpyi yang, shing n rai, myihtoi ga tsun nga ai shaloi e, baw magap nga a yang gaw, tinang baw a arawng jahpoi nga ai. 5 Kadai numsha mung, akyu hpyi yang, shing n rai myihtoi ga tsun nga ai shaloi e, baw n magap a yang gaw, tinang baw a arawng jahpoi nga ai; kaning rai nme law, dai lam gaw baw shangun ai hte langai sha nga ai. 6 Numsha gaw baw n magap na rai yang, kara mung doi kau u ga; raitimung, kara doi na, shing n rai, baw shangun na gaw, numsha a matu arawng jahpoi ai lam rai nga yang gaw shi baw magap u ga. 7 Lasha chyawm gaw, Karai Kasang a hkrang bung sumla hte hpung shingkang rai nga ai majaw, baw magap na n sut nga ai: numsha mahtang gaw, lasha a hpung shingkang rai nga ai. 8 Kaning rai nme law, lasha gaw numsha kaw na n rai, numsha mahtang lasha kaw na rai nga ai: 9 dai lasha mung, numsha a majaw hpan da wu ai n rai, numsha hpe mahtang, dai lasha a majaw hpan da wu ai. 10 Dai re ai majaw, lamu kasa ni hpe tau yu nna, numsha gaw baw ntsa e ahkang kumla nga ai gaw, sut nga ai. 11 Raitimung, dai Madu hta e, lasha n lawm yang gaw numsha hpa n rai nga ai; bai, numsha n lawm yang gaw lasha mung hpa n rai nga ai; 12 kaning rai nme law, numsha gaw lasha kaw na rai nga ai hte maren, lasha gaw numsha jaw e rai nga ai; dai hta n-ga yawng mayawng gaw Karai Kasang kaw nna rai nga ai. 13 Nanhte gaw tinang myit aru yu mu: numsha gaw baw n magap ai, Karai Kasang hpe akyu hpyi yang, sut nga ai kun? 14 Lasha gaw kara madat yang, shi a matu arawng hpoi ai lam rai nga ai gaw, hking madung hta nanhte hpe madun nga ai n rai ni? 15 Numsha mahtang gaw kara madat yang, shi a arawng rai nga ai; kaning rai nme law, kara gaw shi a pahpun tai na matu, jaw da nu ai. 16 Raitimung, marai langai ngai ndang kalang hkat mayu dam a yang gaw, anhte mung, Karai Kasang a Hpung ni mung, dai zawn re ai htung n nga ga ga ai. 17 Ya dai hku tsun timung, nanhte gaw akyu jat na matu zuphpawng myit dai n rai, akyu yawm na hku sha zuphpawng myit dai majaw, ngai nanhte hpe shakawn da made ai n rai. 18 Shawng na lam tsun yang, nanhte gaw dai Hpung hta e zuphpawng ai shaloi, nanhte hta e hka wa bra wa na lam rai nga ai, ngai na hkrup nngai rai nna, teng dam nhten ngai kam nngai. 19 Kaning rai nme law, nanhte hta e tengman ai ni danpru u ga, bra wa na lam pyi nanhte hta e byin lu na ra ai. 20 Dai re ai majaw, nanhte rau zuphpawng ai shaloi, dai Madu a shana shat sha na matu hpawng nga myit dai n rai: 21 kaning rai nme law, sha nga myit yang, langai hte langai gaw tinang a shana shat shawng la sha nna, langai ngai gaw kawsi nga ai, langai ngai gaw tsabyi nang myit dai. 22 Ataw, sha na lu na matu tinang a nta n lu myit ni? shing n rai, nanhte Karai Kasang a Hpung hpe n gawn n sawn di nna, n lu n su ai ni hpe kaya jahkrum myit ni? Nanhte hpe ngai kaning ngu tsun na i? ngai nanhte hpe shakawn lu na kun? Ndai lam hta ngai nanhte hpe shakawn da na made ai, n rai. 23 Kaning rai nme law, ngai nanhte hpe ap da made ai gaw, dai Madu kaw na ngai hkam la se ai: dai gaw, Madu Yesu gaw ap kau hkrum ai shana e muk la nna, 24 shakawn ngut jang, ahkyep alep nhtawm, Ndai gaw nanhte a matu mara nye a hkum rai nga li ai; ngai hpe adum nga na matu ndai galaw mu, ngu nna tsun mu ai. 25 Dai hte maren, shana shat sha ngut jang, dai gawm hpe mung shi la nhtawm, Ndai gawm gaw nye a asai hta gaw da ai ga shaka nnan rai nga ai; nanhte galoi mung lu yang, ngai hpe adum nga na matu ndai galaw mu, ngu nna tsun mu ai. 26 Kaning rai nme law, nanhte galoi mung ndai muk sha nna ndai gawm lu nga myit yang, dai Madu a si hkam ai lam, shi bai du ai du hkra, nanhte tsun shana ya myit dai. 27 Dai rai nna, kadai raitimung n ging n dan ai hte dai Madu a muk sha nna gawm lu a yang gaw, dai Madu a hkum hte asai hpe shut kau da wu ai. 28 Dai majaw kadai wa mung tinang hkum hpe san dinglik yu nhtawm, dai muk hta e sha u ga, dai gawm hta na mung lu u ga. 29 Kaning rai nme law, sha nna lu ai wa gaw, dai hkum hpe n gawn ginhka a yang gaw, tinang dai tara dara na hku lusha nga ai. 30 Dai re ai majaw nanhte hta law law wa n-gun n ja ai hte ana ahkya hkrum nna, tsawmra wa nsa hkyet mat manit dai. 31 Anhte gaw tinang dai hpe gawn dinglik ga yang gaw, tara dara ai n hkrum na ga ai. 32 Tara dara ai hkrum ga yang mung, mungkan masha ni hte rau dawdan ai n hkrum u ga she, dai Madu a lata hte anhte sharin achyin ai hkrum ga ai. 33 Dai rai nna, nye a hpunau ni e, lusha na matu nanhte zuphpawng nga myit yang gaw, shada da ala nga mu. 34 Nanhte a zuphpawng ai gaw tara dara hkrum na matu n rai u ga, masha langai ngai kawsi nga a yang gaw, nta e naw sha la u ga. Galoi rai tim ngai du yang she, naw ngam ai lam hte hpe ngai hkan shachyip na we ai.

1 Korinhtu 12

12:1 Hpunau ni e, dai wenyi kumhpa a lam nanhte n chye na ai nga na hpe, ngai n ra nngai. 2 Nanhte gaw maigan ni naw rai nga ai shaloi e, shalen la hkrum kadup ai hte maren, n chye shaga ai sumla ni hpang de nanhte woi la hkrum nga myit dai gaw, nanhte nan chye nga myit dai. 3 Dai rai nna, Karai Kasang a Wenyi hte tsun ai wa kadai raitimung, Yesu gaw ga sangam hkrum sha u ga, nga nna n tsun lu ai hte, Chyoi pra ai Wenyi e sha n rai yang gaw, Yesu gaw Madu rai nga ai, kadai mung n tsun lu ai gaw, ngai nanhte hpe shachye shachyang made ai. 4 Ya, chyeju kumhpa amyu myu nga timung, dai Wenyi gaw langai sha rai nga ai; 5 gunhpai na bungli lam amyu myu nga nna, dai Madu gaw langai sha rai nga ai; 6 magam atsam shapraw na lam amyu myu nga timung, yawng mayawng hta e arai yawng mayawng hpe shabyin ai Karai Kasang gaw langai sha rai nga ai. 7 Shingrai Chyeju akyu pru u ga she, langai hte langai hpe Wenyi a shapraw shadan ai lam jaw shajang manu ai. 8 Kaning rai nme law, langai mi hpe, dai Wenyi a jaw e, hpaji mungga; kaga wa hpe dai Wenyi a jaw e chye chyang ai mungga; 9 kaga wa hpe dai Wenyi a jaw e makam masham; kaga wa hpe, dai Wenyi langai sha a jaw e, machyi makaw shamai shatsai na chyeju; 10 kaga wa hpe lamik kumla galaw dan na ahkang; kaga wa hpe myihtoi htoi na ahkang; kaga wa hpe wenyi ni hpe chye ginhka na ahkang; kaga wa hpe ga amyu myu chye tsun na ahkang; kaga wa hpe ga amyu myu a ga lachyum shapraw dan na ahkang, jaw shajang mu ai: 11 dai lam yawng hte chyawm gaw, dai Wenyi langai sha e nan shabyin wu ai rai nna, shi myit ra ai hte maren, langai hte langai hte hpe karan kachyan shagu mu ai. 12 Dai hta kaga, dai hkum hkrang gaw langai sha rai nga nna, daw shan law law lu ai hte, dai hkum hkrang a daw shan ni yawng hte gaw law law rai nga timung, hkum hkrang langai sha tai nga ai hte maren, Hkristu mung dai zawn rai nga ai. 13 Kaning rai nme law anhte yawng mayawng, Yuda ni hte Heleni ni raitimung, mayam ni hte shanglawt ni raitimung, hkum hkrang langai sha tai na matu, Wenyi langai sha hta e baptisma hkam saga ai rai nna, nlang hte gaw Wenyi langai hta sha jawm dagrawng saga ai. 14 Dai hkum hkrang chyawm gaw, daw shan langai sha nga ai n rai, law law wa rai nga ai. 15 Dai lagaw mahtang gaw, Ngai lata n rai nngai majaw hkum hte n seng nngai, nga nna tsun a yang gaw, de a majaw hkum hte n seng ai, n rai. 16 Bai dai ana gaw, Ngai myi n rai nngai majaw hkum hte n seng nngai, nga nna tsun a yang gaw, de a majaw hkum hte seng ai, n rai. 17 Hkum ting gaw myi rai nga a yang gaw, na lu na lam kanang nga na a ta? na lu na lam hkrai rai nga a yang gaw, manam lu na lam kanang nga na a ta? 18 Ya chyawm gaw, Karai Kasang gaw shi ra ai hte maren, daw shan ni langai hte langai hte hpe dai hkum hkrang hta shachyaw tawn mu ai. 19 Bai, yawng mayawng daw shan langai sha rai nga a yang gaw, hkum hkrang gaw kanang nga na a ta? 20 Ya chyawm gaw daw shan law law nga timung, hkum hkrang langai sha rai nga ai. 21 Myi gaw, Nang lata hpe ngai n ra de ai, nga nna n tsun lu ai; abaw mung, Nan lagaw yan hpe ngai n ra made ai, nga nna n tsun lu ai. 22 Dai hta n-ga, hkum hkrang na n-gun grau n ja nsan ai daw shan ni gaw lawm ra nga ai: 23 hkum hkrang na arawng grau n lu nsan ai daw shan ni hpe anhte grau nna arawng jahpun ai hte, anhte a n htap ai daw chyen ni gaw, grau nna htap nga ai; 24 htap chyalu rai nga ai daw chyen ni mahtang gaw, dai lam n ra nga ai: dai hkum hkrang hta nru nra n byin ai sha, daw shan ni shada da myit tsang hkat nga mu ga she, 25 Karai Kasang gaw dai hkum hkrang hpe shabung shapre nna, arawng grit ai daw shan ni hpe grau nna arawng jaw mu ai. 26 Shingrai daw shan langai mi nji nmu hkrum yang, daw shan nlang hte gaw rau machyi dum ma ai; daw shan langai mi shagrau ai hkrum yang, daw shan nlang hte gaw rau kabu gara nga ma ai. 27 Ya nanhte gaw Hkristu a hkum hkrang rai nga ai hte, langai hte langai de a daw shan ni rai nga myit dai. 28 Karai Kasang chyawm gaw nkau mi hpe dai Hpung hta e, langai ngu na hta kasa ni, lahkawng ngu na hta myihtoi ni, masum ngu na hta sara ni, dai hpang e lamik kumla galaw ai ni, dai hpang e machyi makaw shamai shatsai na chyeju lu ai ni, shingdep shingtau ai ni, salang bawmung ni hte ga amyu myu chye tsun ai ni, san tawn da manu ai. 29 Yawng hte wa kasa rai nga ai kun? yawng hte wa myihtoi rai nga ai kun? yawng hte wa sara rai nga ai kun? yawng hte wa lamik kumla galaw lu ai kun? 30 yawng hte wa machyi makaw shamai shatsai na chyeju lu nga ai kun? yawng hte wa ga amyu myu chye tsun nga ai kun? yawng hte wa ga amyu myu a ga lachyum chye shapraw nga ai kun? 31 Nanhte gaw grau htum ai chyeju kumhpa ni hpe tsam mari marit nga mu. Dai hta n-ga grau htum ai lam langai mi ngai nanhte hpe naw madun na made ai.

1 Korinhtu 13

13:1 Ngai gaw masha a ga hte lamu kasa ni a ga amyu myu hpe chye tsun raitimung, tsawra ai myit n rawng yang gaw, mahku rawng ai sumseng hte, ngoi gara ai shupsheng sha ngai tai nga nngai. 2 Ngai myihtoi chye htoi ai hte, sung ai ga yawng mayawng, chye chyang ai lam amyu myu hkum nga ai hte, bum hpe jasit lu hkra re ai makam masham rawng timung, tsawra ai myit n rawng yang gaw, ngai hpa n rai nga nngai. 3 Nye a arai ni yawng hte hpe ngai gam kau nna, nye a hkum hpe pyi nat kau na matu ap kau raitimung, tsawra ai myit n rawng yang gaw; hpa akyu nga na n rai. 4 Tsawra ai myit gaw galu kaba nga ai, sumnung shingdi nga ai; tsawra ai myit gaw manawn masham n nga ai, grang ai ga n tsun ai, gumrawng gumtawng n rawng ai; 5 n se n sa n galaw ai, tinang a akyu n tam ai, sin pawt la htet n nga ai, mara n tam nga ai, 6 n ding n man ai hta n kabu ai sha, dai tengman ai hte rau kabu gara nga ai: 7 yawng mayawng hpe hkam mana nga ai, yawng mayawng hpe kamsham nga ai, yawng mayawng hpe myit mada nga ai hte yawng mayawng hpe shakut sharang nga ai. 8 Tsawra ai myit gaw galoi mung htak chye ai n rai: myihtoi chye htoi ai lam rai yang gaw, hkoi mat na ra ai: ga amyu myu chye tsun ai lam rai yang gaw, sim mat na ra ai; chye chyang ai lam rai yang gaw, hkoi mat na ra ai. 9 Kaning rai nme law, daw chyen sha mi anhte chye ga ai hte, daw chyen sha mi myihtoi htoi ga ai: 10 raitimung, dai hkum tsup re ai gaw du ngut jang, daw chyen re ai gaw hkoi mat na ra ai. 11 Ngai ma kaji naw rai nga yang, ma ga ngai ga ai hte ma myit naw rawng nna, ma a myit mang ai hku naw taw nngai; ya ngai salang wa jang she, ma kaji a lam ngai shinggan kau nngai. 12 Ya gaw gumwai hku rai nga ai jamna shingna sha anhte naw mu nga ga ai; raitimung, dai shaloi e myiman yawng let mu na ra ga ai: ya gaw daw chyen mi sha ngai chye nngai; dai shaloi e, Karai Kasang ngai hpe chye chyang ai zawn, ngai mung chye na ring ngai. 13 Ya chyawm gaw, makam masham, myit mada ai hte tsawra ai myit ngu ai lam masum rai nga ai, raitimung, dai hte hta grau kaba ai gaw tsawra ai myit rai nga ai.

1 Korinhtu 14

14:1 Tsawra ai myit hpe hkan tam mu; wenyi kumhpa ni hpe myit marit nga mu: myihtoi chye htoi lu na mahtang grau nna myit marit nga mu. 2 Kaning rai nme law, ga amyu myu chye tsun ai wa gaw, masha ni hpe n rai, Karai Kasang hpe sha, tsun ang nga ai; gade ai mung n chye na ai sha, wenyi hta e sung ai ga hpe shi a tsun nga ai. 3 Myihtoi htoi lu ai wa chyawm gaw masha ni hpe shadaw shangang ai ga, shadum shahprang ai ga, shangwi shapyaw ai ga tsun dan nga ai. 4 Ga amyu myu chye tsun ai wa gaw, shi hkum dai sha shadaw shangang lu ai; myihtoi chye htoi ai wa chyawm gaw, dai Hpung hpe shadaw shangang lu ai. 5 Nanhte nga manga ga amyu myu chye tsun na ngai ra nngai; nanhte myihtoi htoi lu na grau nna ngai ra nngai: kaning rai nme law, ga amyu myu chye tsun ai wa gaw, dai Hpung hpe shadaw shangang na ga lachyum n chye shapraw a yang gaw, myihtoi htoi lu ai wa gaw, shi hta grau kaba nga ai. 6 Ya chyawm gaw, hpunau ni e, ngai nanhte kaw sa du nna, ga amyu myu tsun timung, shingran ga, chye chyang ai ga, myihtoi ga hte sharin shaga ai ga, nanhte hpe n tsun dan made yang gaw, nanhte a matu hpa akyu nga na a ta? 7 Nsoi nsa n rawng ai baw ni mung mahku shapraw ma yang gaw, sumpyi raitimung, tingse raitimung, ngoi ai hku kaga ga n shapraw lu yang gaw, sumpyi dum ai hpa lam rai kun? tingse dum ai hpa lam rai kun? kadai chye ginhka lu na a ta? 8 Pahke mung n ginhka ai hku dum yang, hpyen rawt na matu kadai hkyen na a ta? 9 Dai hte maren nanhte ga amyu tsun ai hta, chye na loi ai ga n tsun nga myit yang gaw, tsun dan ai lam kaning rai chye ginhka lu na a ta? kaning rai nme law, nanhte a tsun ai gaw nbung sha rai nga malit dai. 10 Ga ntsa e ndai hte wa nsen amyu myu nga raitimung, nsen n shai ai gaw n nga ai. 11 Dai re ai majaw dai nsen a lachyum ngai n chye na yang gaw, ga tsun ai wa a man e zai ai masha zawn ngai tai nga nna, nye a man e mung, ga tsun ai wa gaw zai ai masha tai nga ai. 12 Dai hte maren nanhte gaw wenyi kumhpa ni hpe myit marit nga myit dai majaw, dai Hpung hpe shadaw shangang na lam, grau nna hkan tam nga mu. 13 Dai rai nna ga amyu myu tsun ai wa gaw, ga lachyum mung shapraw lu na matu akyu hpyi nga u ga. 14 Kaning rai nme law, ga amyu hte ngai akyu hpyi nga yang, nye a wenyi hte ngai akyu hpyi nga nngai, raitimung nye a myit akyu n lu la lu ai. 15 Shaloi kaning rai na rai ta? Nye a wenyi hte ngai akyu hpyi nna, nye a myit hte mung akyu hpyi na nngai; nye a wenyi hte ngai mahkawn mangoi nna, nye a myit hte mung mahkawn mangoi na nngai. 16 Shing n rai, wenyi hte sha nang shaman n yang gaw, karing karang re ai wa gaw na a ga n chye na ai majaw, nang chyeju dum ai ga tsun ai shaloi, shi gaw kaning rai, Amen, nga nna hkan sharau lu na a ta? 17 Nang chyeju dum ai ga kaja nga raitimung, masha kaga gaw shadaw shangang hkrum lu ai n rai. 18 Nanhte nlang hta ga amyu myu ngai grau nna chye tsun nngai majaw, Karai Kasang hpe ngai shakawn nngai: 19 raitimung, dai Hpung hta ga amyu mun mi tsun lu ai hta, Masha kaga hpe sharin achyin ya lu n ga, ga hkaw manga sha nye a myit hte grau nna tsun mayu nngai. 20 Hpunau ni e, myit mang ai lam hta ma kaji hkum tai myit; n hkru n hkra ai lam hta she ma kaji tai nga mu; myit mang ai lam hta chyawm gaw, myitsu ai ni tai nga mu. 21 Dai jep ai tara hta ka da nga ai gaw, Tsasam ga tsun ai ni a shinglet hte tsasam ni a nten e, ndai amyu hpe ngai tsun dan na, raitimung dai hte sha pyi shanhte ngai hpe n madat na ma ai, nga nna dai Madu tsun nga ai. 22 Shingrai, ga amyu myu gaw kamsham ai ni a matu mara n re ai sha, n kam n sham ai ni a matu mara, kumla rai nga ai; myihtoi chye htoi ai lam chyawm gaw, n kam n sham ai ni a matu mara n re ai sha, kamsham ai ni a matu mara, kumla rai nga ai. 23 Dai rai nna, dai Hpung ting zuphpawng nga nna, nlang hte gaw ga amyu myu hte tsun shajang nga ma yang, n chye na ai ni, shing n rai, n kam n sham ai ni, shang lawm ma yang gaw, nanhte mana bu myit dai, nga na ma ai, n rai ni? 24 Nlang hte wa myihtoi htoi yang chyawm gaw, n kam n sham ai wa, shing n rai n chye na ai wa langai ngai shang lawm yang gaw, nlang hte a shadum shahprang ai ga, nlang hte a jeyang ai ga, shi na la hkrup wu ai; 25 shi a kraw lawang na makoi magap ai lam mungdan pru mat na lu ai; shaloi shi a myiman dagup let, shi Karai Kasang hpe nawku nna, Gaja wa Karai Kasang gaw nanhte hte rau anga nga ai, nga nna kajai dat na ra ai. 26 Shaloi, hpunau ni e, kaning rai na rai ta? Nanhte zuphpawng nga myit yang, langai hte langai shakawn kungdawn ga, sharin achyin ga, shingran ga, ga amyu myu hte ga amyu a lachyum shapraw ai ga lu la shajang mai nga ai: lam shagu gaw shadaw shangang na matu byin nga u ga. 27 Ga amyu chye tsun ai wa lawm a yang gaw, marai lahkawng, shing n rai marai masum n lai ai sha, langai a hpang langai tsun nga nna, langai mi gaw ga lachyum shapraw u ga. 28 Ga htai ai wa n nga yang gaw, dai Hpung kata e shi atsin sha nga u ga: shi hkum dai hte Karai Kasang hpe, tsun nga u ga. 29 Myihtoi lahkawng, shing n rai masum tsun dan nga nna, masha shaje ni gaw maram masam nga mu ga. 30 Raitimung, rau dung nga ai wa kaga kaw shingran ga pru a yang gaw, shawng na wa atsin sha nga u ga. 31 Kaning rai nme law, yawng mayawng gaw sharin achyin ai lu la na hte, yawng mayawng gaw shadum shahprang ai lu la na she, nanhte nlang hte gaw langai a hpang langai myihtoi htoi lu na rai nga myit dai; 32 myihtoi ni a wenyi ni mung, myihtoi ni a npu e taw na ma ai; 33 Karai Kasang gaw kashuk kashak lam a Karai Kasang n re ai sha, ngwi pyaw lam a Karai Kasang she rai nga ai. Chyoi pra ai ni a Hpung ni yawng hta e rai nga ai hte maren, 34 numsha ni gaw Hpung ni hta e atsin sha nga nga mu ga: kaning rai nme law, shanhte gaw tsun shaga na ahkang n nga ma ai: dai jep ai tara tsun dan nga ai hte maren, shanhte gaw lawu grit rai nga mu ga. 35 Shanhte lama ma sharin la mayu ma yang gaw, nta e tinang a madu wa ni hpe jasan yu mu ga: kaning rai nme law, numsha gaw dai Hpung kata e tsun shaga na kaya kahpa rai nga ai. 36 Ataw, Karai Kasang a mungga gaw nanhte kaw nna pru ai rai kun? nanhte kaw sha du dep ai rai kun? 37 Marai langai ngai myihtoi, shing n rai Wenyi rawng ai wa rai nga nngai, nga nna myit la a yang gaw, ngai nanhte hpe ka ya ai lam gaw, dai madu a htet da ai ga rai nga ai, dum chye u ga. 38 Marai langai ngai n chye na a yang gaw, n chye na ai hku nga u ga. 39 Shingrai, nye a hpunau ni e, myihtoi chye htoi lu na myit marit nga mu; ga amyu myu hte tsun na mung hkum jet kau myit. 40 Lam shagu chyawm gaw, htaphtuk ai hte mai ang ai hku hte maren rai wa u ga.

1 Korinhtu 15

15:1 Bai hpunau ni e, ngai nanhte hpe tsun dan yu nna, nanhte mung hkam la ai hte, hkan nang yu manit dai kabu gara shiga a lam, ngai nanhte hpe naw shapraw shadan dan na made ai; 2 ngai nanhte hpe tsun dan yu ai mungga hpe nanhte a manat nga nna, kaman lila sha kamsham ai n rai myit yang gaw, de a jaw e mung nanhte hkyehkrang la ai hkrum myit dai. 3 Kaning rai nme law, ngai hkam la sai lam ngai nanhte hpe shawng na lak e ap ya masade ai; dai gaw, Chyum laika ni tsun ai hte maren, Hkristu gaw anhte a yubak a matu mara si hkam sai; 4 makoi mayang ai shi hkrum nhtawm, Chyum laika ni tsun ai hte maren, masum ya nhtoi hta e bai hkrung rawt wa sai rai nna, 5 Kehpa kaw paw pru dan wu ai; dai hpang e sape shi lahkawng kaw paw pru dan mu ai; 6 dai hpang lang lata sha hpunau manga tsa jan shi hpe mu dat mu ai: shanhte hta malaw maga ya du hkra nga shajang nga ma ai; nkau mi chyawm gaw yup pyaw mat masai; 7 dai hpang Yaku kaw, dai hpang kasa ni yawng hte kaw, shi paw pru dan mu ai; 8 hpang chyahtum e, ngai nhtoi n gu ai ma zawn re ai wa kaw mung, shi paw pru dan ni ai. 9 Kaning rai nme law, kasa ni hta kaji htum ai wa ngai rai nga nngai; Karai Kasang a Hpung hpe zingri zingrat nngai majaw, kasa ngu na pyi ngai n ging n dan nngai. 10 Raitimung, ngai rai nga nngai hte maren, Karai Kasang a chyeju majaw ngai rai nga nngai; ngai hkam la ai shi a chyeju gaw, ngai hta e kaman lila n rai nga ai sha, shanhte nlang hte hta ngai grau nna bungli gunhpai nngai; dai gaw ngai n rai, ngai hte rau anga nga ai karai kasang a chyeju sha rai nga ai. 11 Dai rai nna, ngai raitimung, shanhte raitimung, dai lam hkaw dan ga ai hte, nanhte mung dai lam kamsham manit dai. 12 Ya Hkristu gaw si mat ai ni kaw na bai hkrung rawt wa sai, hkaw dan nga ga yang, si mat ai ni a bai hkrung rawt wa ai lam n nga ai, nga nna nanhte hta na nkau mi kaning rai tsun lu nga myit ta? 13 Si mat ai ni a bai hkrung rawt wa ai lam n nga yang gaw, Hkristu mung bai hkrung rawt wa na n rai. 14 Hkristu gaw bai n hkrung rawt a yang gaw, anhte a hkaw dan ai ga kaman lila rai nga ai hte, nanhte a makam masham mung kaman lila sha rai nga ai; 15 dai hta kaga, Karai Kasang a lam hta masu ai sakse ni anhte tai wa na saga ai; kaning rai nme law, Karai Kasang gaw Hkristu hpe hkrung sharawt nu ai, nga nna shi a lam anhte sakse hkam saga ai; raitimung, si mat ai ni teng teng bai n hkrung rawt ma yang gaw, Karai Kasang shi hpe hkrung sharawt wu ai n rai. 16 Si mat ai ni bai n rawt ma yang gaw, Hkristu mung bai rawt wa na n rai. 17 Hkristu gaw bai n rawt a yang gaw, nanhte a makam masham kaman lila rai nga ai hte, nanhte a yubak hta e nanhte naw lup mat manit dai. 18 Dai hta kaga, Hristu hta e yup pyaw mat ai ni mung sum mat ai hkrum masai. 19 Anhte ndai aprat e sha Hkristu hta e myit mada shara lu ga yang gaw, shinggyim masha yawng hte hta grau nna matsan mayam hkrum ai ni, anhte rai nga ga ai. 20 Ya chyawm gaw, Hkristu si mat ai ni kaw na bai hkrung rawt wa sai rai nna, yup pyaw mat ai ni hta shawng si ai asi tai wa sai. 21 Kaning rai nme law, masha a jaw e si hkrung si htan byin wa ai zawn, masha a jaw e mung si mat ai ni matu bai hkrung rawt wa na lam tai wa sai. 22 Yawng mayawng gaw Adam hta e si mat wa ai hte maren, yawng mayawng gaw Hkristu hta e bai hkrung wa na mara ai. 23 Raitimung, langai hte langai tinang ang ai hku hte maren rai wa na ra ai: Hkristu gaw shawng si ai asi rai nga ai; dai hpang, Hkristu bai du ai ladaw e shi hte seng ai ni hkrung wa na mara ai; 24 dai hpang e chyahtum ladaw du na ra ai; dai shaloi e shi gaw Kawa Karai Kasang kaw dai mungdan hpe ap ya na ru ai rai nna, du aya yawng mayawng mung, up ai ahkang hte hpung dagu yawng mayawng hpe mung, shi yeng kau ngut nu ai: 25 kaning rai nme law, gumlau ni yawng hte hpe shi a lagaw npu e tawn da ai du hkra, shi up ai ahkang aya lu la na ru ai. 26 Hpang chyahtum na hpyen wa ngu ai, si hkrung si htan gaw, yeng kau ai hkrum na ra ai. 27 Kaning rai nme law, yawng mayawng hte hpe gaw shi a lagaw npu e tawn da nu ai, nga ai. Yawng mayawng hte hpe tawn da nu ai lam tsun yang, shi a npu na yawng mayawng hte hpe tawn da ai wa gaw n lawm nga ai. dan dan leng leng chye lu nga ai. 28 Yawng mayawng hte hpe shi a npu e tawn da ngut yang, shi a npu e yawng mayawng hte hpe tawn da ai wa a npu e mung, dai Kasha nan tawn da ai hkrum na ra ai rai nna, Karai Kasang gaw yawng mayawng hta e baw sumhpa tai na ra ai. 29 Dai hta kaga, si mat ai ni a matu mara baptisma hkam la ai ni gaw, kaning rai galaw nga ma ta? Si mat ai ni gaja wa bai n rawt ma yang gaw, shanhte a matu mara hpa majaw baptisma hkam la ma ta? 30 Anhte mung hpa majaw hkying shagu hta e hkrit shara e shang nga ga ta? 31 Ngai gaw, hpunau ni e, shani shagu si hkam nga nngai, ngu nna anhte a Madu Hkristu Yesu hta e nanhte a lam ngai lu ai gumrawng shara hpe tau yu nna tsun wam nga nngai. 32 Ngai gaw Ehpesu mare hta e masha ni zawn, matse labye hte gasat nngai raitimung, nye a matu hpa akyu nga a ta? Si mat ai ni bai n hkrung rawt wa na rai yang gaw, anhte sha ga, lu ga, hpawt ni she si na ga ai. 33 Nanhte lam hkum dam myit; N kaja ai kanawn manang ni, mai kaja ai arawn alai hpe jahten ma ai. 34 Dingman ai hku hkan na, dumhprang mu, yubak hkum galaw myit; nkau mi gaw Karai Kasang hpe n chye ma ai: nanhte kaya dum myit ga, ning nga ngai tsun nngai. 35 Raitimung, si mat ai ni gaw kaning rai bai rawt lu na ma ta? kaning re ai hkum hte paw pru na ma ta? nga nna langai ngai san na ra ai. 36 Angawk wa e, nang gat hkai ai nli mung n si mat yang gaw, tu hkrung wa ai n rai; 37 dai hta kaga, nang gat hkai ai gaw, tu na ra ai hkum hpe nang gat hkai ndai n rai; mam gu shing n rai kaga amyu nli sha nang gat hkai ndai rai nna, 38 Karai Kasang gaw jaw mayu ai hte maren, dai hpe hkum a jaw nga let, amyu kaga ga hpe tinang hte seng ai a hkum jaw shajang mu ai. 39 Hkumshan nga manga gaw amyu langai sha n re ai sha, masha a hkumshan kaga, yamnga shan kaga, u shan kaga, nga shan kaga, rai nga ai. 40 Sumsing lamu na hkum ni rai nga ai, ginding aga na hkum ni mung rai nga ma ai: sumsing lamu na hpung shingkang kaga, ginding aga na hpung shingkang kaga, rai nga ai. 41 Ajan a hpung shingkang kaga, shata a hpung shingkang kaga, shagan ni a hpung shingkang kaga, rai nga ai; kaning rai nme law, shagan langai ngai shagan gale hta hpung shingkang shai nga ai. 42 Si mat ai ni a bai hkrung rawt wa na lam mung, dai hte maren rai nga ai. Dai gaw hten mat chye ai hta gat hkai nga ai, n hten n mat chye ai hta bai hkrung rawt wa ai; 43 arawng n lu ai hta gat hkai nga ai, hpung shingkang hta bai hkrung rawt wa ai; magrau n grang ai hta gat hkai nga ai, n-gun atsam hta bai hkrung rawt wa ai; 44 dinghta hkum tsawp hte gat hkai nga ai, wenyi a hkum hte bai hkrung rawt wa ai. Dinghta hkum tsawp nga ai rai yang gaw, wenyi a hkum mung nga na rai nga ai. 45 Dai hte maren, shawng na masha Adam gaw asak hkrung ai shinggyim masha tai wa ai, nga nna ka da nga ai: hpang chyahtum na Adam, chyawm gaw, jahkrung ya ai wenyi rai nga ai. 46 Wenyi hte seng ai mahtang gaw shawng nga ai n rai, dinghta ga hte seng ai shawng nga nga ai; dai hpang wenyi hte seng ai bai nga ai. 47 Shawng na masha gaw dinghta ga na rai nga nna, dinghta ga hte seng nga ai: hpang na masha chyawm gaw, sumsing lamu na rai nga ai. 48 Dinghta masha rai nga ai hte maren, dinghta ga hte seng ai ni mung rai nga ma ai; sumsing lamu na masha rai nga ai hte maren, sumsing lamu hte seng ai ni mung, rai nga ma ai. 49 Dinghta ga a gawng shing-yan hpe anhte gun ga ai hte maren, sumsing lamu a gawng shing-yan hpe mung, anhte gun na ra ga ai. 50 Hpunau ni e, ning nga ngai tsun nngai gaw, hkumshan yan asai gaw Karai Kasang a mungdan a sali wunli n dagraw lu ai hte, hten mat chye ai gaw, n hten n mat chye ai sali wunli hta shang lu na n rai. 51 Yu mu, sung htum ai ga ngai nanhte hpe tsun dan made ga: anhte yawng yup pyaw mat na n rai; 52 raitimung, hpang chyahtum na pahtau ngoi wu ai shaloi e, akajawng sha, myi grip mi hta e, anhte yawng hte gaw lai mat na ra ga ai: dai pahtau gaja wa ngoi wu na ra ai rai nna, si mat ai ni gaw n hten n mat chye ai sha bai hkrung rawt wa na mara ai hte, anhte lai mat na ra ga ai. 53 Kaning rai nme law, ndai hten mat chye ai gaw, n hten n mat chye ai dagraw lu na ra ai; ndai si mat chye ai mung, n si n mat chye ai, dagraw lu na ra ai. 54 Ya ndai hten mat chye ai gaw, n hten n mat chye ai dagraw nga ai hte, ndai si mat chye ai mung, n si n mat chye ai gaw dagraw ngut yang she, Si hkrung si htan gaw padang e gamaw mayu kau ai hkrum nu ai, nga nna ka da nga ai hte maren, dik wa na ra ai. 55 Si hkrung si htan e, na a padang ninghkaw kanang nga nga a ta? Si hkrung si htan e, na a palen kanang nga nga a ta? 56 Si hkrung si htan a palen yubak rai nga ai; yubak a n-gun atsam gaw, dai jep ai tara rai nga ai. 57 Anhte a Madu Yesu Hkristu a jaw e anhte hpe padang jaw ai Karai Kasang chyawm gaw, a nga u ga law. 58 Dai re ai majaw ngai tsaw ngai ra ai hpunau e, nanhte gunhpai ai amu gaw dai Madu hta e kaman lila n rai nga ai dum chye nga let, ngang ngang kang kang, dakring dalang nga nga nna, dai Madu a bungli hta tutnawng e tsam mari shakut sharang nga nga mu law.

1 Korinhtu 16

16:1 Ya, chyoi pra ai ni a matu alu lahkawn ai lam, Galati hpung ni hpe ngai htet da ai hte maren, nanhte mung galaw mu. 2 Ngai sa du ai shaloi e lahkawn shara n nga nga la u ga, bat shagu na shawng shani hta e, langai hte langai ngamu ngamai ai hte maren, tinang a alu mahkawng da nga ma la. 3 Ngai du ai shaloi e, nanhte kadai dai hpe laika hte san da myit yang gaw, nanhte a chyeju kumhpa hpe Yerusalem de sa sa na, ngai shangun dat na mawe ai. 4 Ngai mung sa ang yang gaw, shanhte ngai hte rau sa na ga ai. 5 Makedoni mung hku ga sa wa nhtawm, ngai nanhte kaw sa du na ring ngai; kaning rai nme law, Makedoni mung hku ngai ga sa wa nngai rai nna, 6 ngai gade pru hkawm raitimung, nanhte ngai hpe hkan sa dat lu myit ga, ngai nanhte hte rau hkring nga lu nna, kashung ta pyi naw lai lu nhten. 7 Dai Madu hkraw a yang gaw ngai nanhte hte rau tawng marang mi nga lu na, ngai myit mada nga nngai majaw, ya hprang sa wa let gaw, nanhte hte rai n hkrum mayu nngai. 8 Dai Pentikoti poi du hkra, Ehpesu mare hta e ngai naw anga nga na nngai. 9 Kaning rai nme law, kaba la ai hte hpuwang rawng ai chyinghka gaw nye a matu hpaw malang nga ai rai nna, hpyen ni mung law law nga ma ai. 10 Timohti nanhte kaw du dam a yang gaw, shi n hkrit ai sha nanhte hte rau nga nga lu u ga, yu yu nga mu; kaning rai nme law, shi gaw ngai hte maren dai Madu a magam bungli hpe gunhpai nga ai. 11 Dai re ai majaw kadai mung shi hpe n gawn n sawn, n di u ga. Ngai hpang de shi bai wa lu u ga, shi hpe apyaw sha sa dat mu; hpunau ni hte nawng shi wa na ra ai hpe, ngai ala nga na nngai. 12 Ya, hpunau Apolo a lam, hpunau ni hte rau shi nanhte hpang de sa u ga, ngai aja awa sa shadut jahkat we ai: ya sa du na shi loi mi muk n ra ai, raitimung, mai ang ai gying du yang, shi sa na ra ai. 13 A maja nga mu, dai makam masham hta dakring dalang tsap nga mu, wa-ngan marai shapraw mu, n-gun lagaw shagrin nga mu. 14 Nanhte hta na yawng mayawng hte gaw, tsawra ai myit hte byin malit ga law. 15 Ngai nanhte hpe shadut jahkat made ai, hpunau ni e; Stehpan a nta masha ni gaw, Ahkaia mung na shawng si ai asi rai nga ai hte, chyoi pra ai ni hpe galaw daw na shanhte tinang dai myit hkut nga ma ai hpe, nanhte chye myit dai rai nna, 16 nanhte gaw shing re ai ni a npu e mung, shingdep shingtau ai ni hte, bungli gunhpai ai ni nlang hte a npu e mung, a taw nga mu. 17 Stehpan, Hportunatu hte Ahkaiku hte du ma ai majaw, ngai kabu gara nga nngai; nanhte n sharai lu ai hte hpe shanhte shatup ma rai rai nna, 18 ngai hte nanhte a wenyi hpe shangwi shapyaw ya mi ai. Dai rai nna shing re ai ni hpe dum sha-a nga mu. 19 Asi mung na Hpung ni gaw nanhte hpe shakram dat ma ai. Akula yan Priska hte shan a nta e shanu ai Hpung hte rau, nanhte hpe dai Madu hta grai wa shakram dat ma ai. 20 Hpunau ni yawng nanhte hpe shakram dat ma ai. Nanhte shada da chyoi pra ai pup hte shakram ya mi. 21 Ngai Pawlu gaw shakram ai ga hpe nye a lata hte ka dat nngai. 22 Marai langai ngai dai Madu hpe n tsaw n ra a yang gaw shi dagam dala hkrum u ga. Dai Madu du ruga. 23 Madu Yesu a chyeju gaw nanhte hte rau anga nga u ga. 24 Nye a tsawra ai myit gaw, Hkristu Yesu hta e nanhte yawng hte rau anga nga u ga law.

2 Korinhtu 1

1:1 Karai Kasang myit ra ai hte maren, Hkristu Yesu a kasa, ngai Pawlu hte, hpunau Timohti gaw, Korinhtu mare na Karai Kasang a Hpung hte Ahkaia mung ting na chyoi pra ai ni nlang hte hpe, ga shana dat ga ai. 2 Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e anga nga malit ga law. 3 Matsan dum chye ai Kawa hte, shangwi shapyaw na lam amyu myu a Karai Kasang, anhte a Madu Yesu Hkristu a Karai Kasang hte Kawa gaw, a nga u ga law. 4 Karai Kasang kaw na anhte hkum nan lu la sagaw ai shangwi shapyaw ai lam tau yu yang, dai shangwi shapyaw ai a marang e, tsin-yam tsindam amyu myu hkrum ai ni hpe shangwi shapyaw lu hkra, anhte a tsin-yam tsindam amyu myu hta shi anhte hpe shangwi shapyaw mi ai. 5 Shingrai, Hkristu a nni nkri anhte hta e law htam wa ai hte maren, Hkristu a jaw e mung, anhte a shangwi shapyaw na lam, law htam wa nga ai. 6 Dai rai nna, anhte tsin-yam tsindam hkrum yang, nanhte a shangwi shapyaw na lam hte hkyehkrang la na lam a majaw, hkrum ga ai: shangwi shapyaw ai hkrum yang, anhte nan hkam ai nni nkri amyu hta, shakut sharang ai shachyen chye ai nanhte a shangwi shapyaw na lam a majaw sha hkrum ga ai rai nna, nanhte a matu mara anhte a myit mada ai lam ngang ngang grin grin rai nga ai: 7 dai nni nkri hta nanhte lawm nga myit dai hte maren, dai shangwi shapyaw na lam hta mung lawm nang myit dai, anhte chye nga ga ai. 8 Kaning rai nme law, hpunau ni e, Asi mung e anhte hkrum sagaw ai tsin-yam tsindam a lam, nanhte n chye ai nga na, an n ra ga ai; anhte a asak lawt na n nawn lu hkra, anhte n dang lu ai nhtum nni li ai lit e anhte hpe dip kamyet ma ni ai: 9 dai hta n-ga, anhte gaw tinang dai n shamyet ai sha, si mat ai ni hpe hkrung sharawt ya ai Karai Kasang hpe sha shamyet shanat nga u ga, anhte nan tinang hkum hta si na dawdan gun saga ai. 10 Shi gaw ning san ai si lam hta na anhte hpe mawai la ma ni ai rai nna, naw mawai la na mi ai; shi anhte hpe naw mawai la na, anhte shi hpe myit mada nga ga ai rai nna, law law ni a myiman a marang e anhte lu la ai chyeju a majaw, 11 law law wa anhte a lam shakawn kungdawn lu mu ga, nanhte mung shingdep shingtau let anhte a matu mara akyu hpyi ya mi. 12 Kaning rai nme law, Karai Kasang a chyoi pra nna sanseng ai myit hte, dinghta hpaji n lawm ai sha, Karai Kasang a chyeju hte, mungkan ga e anhte htinglet nga nna, nanhte hte rau grau nna dai zawn rai nga ga ai hpe, anhte a myit masin a sakse hkam ai lam ngu ai gaw, anhte a gumrawng shara rai nga ai. 13 Nanhte hti yu nna chye lu manit dai lam hta kaga, anhte nanhte kaw ka dat ga ai n re ai sha, anhte a Madu Yesu Hkristu a nhtoi e nanhte gaw, 14 anhte a gumrawng shara tai wa ai hte maren, anhte mung nanhte a gumrawng shara tai wa na rai nna, anhte a lam nanhte kau chyen mi chye na nga ai zawn, hpang chyahtum du hkra chye nga na myit dai, ngu nna ngai myit mada nga nngai. 15 Ya, ning rai myit mu nga yang, nanhte gaw lahkawng lang na chyeju lu la myit ga she, nanhte hpang de shawng sa du nna, 16 nanhte a makau hku hprang let Makedoni mung de sa nhtawm, Makedoni kaw na nanhte hpang de bai wa nna, nanhte ngai hpe Yuda mung de hkan sa dat mi ga, ngai myit da nga nngai. 17 Ya, shingrai ngai myit da nga yang, ngai gaja wa nhting nhtang re ai myit madun nngai kun? Bai, nye a ga gaw, Rai sa, rai sa, nga ai gaw, N rai, n rai, tai wa u ga, ngu nna ngai myit da ai gaw, dinghta myit hku hkan nna myit da nngai kun? 18 Gaja wa, Karai Kasang teng nga ai hte maren, anhte a ga gaw nanhte kaw, Rai sa, n rai sa, ngu ai n rai. 19 Kaning rai nme law, ngai hte Silwanu yan Timohti gaw, nanhte hpe hkaw dan yu sai Karai Kasang a Kasha Hkristu Yesu gaw, Rai sa, n rai sa, ngu ai mi n nga ai sha, shi hta e, Rai sa, ngu ai sha tai wa ai. 20 Karai Kasang a ndat ga gade law nga raitimung, shi hta e, Rai sa, hkrai rai nga ai; dai rai nna, anhte a lata e Karai Kasang a hpung shingkang pru u ga, shi a jaw e, Amen, ngu ai mung rai nga ai. 21 Nanhte hte rau anhte hpe Hkristu hta e shagrin da nna, anhte hpe namman chya ya ai wa gaw, Karai Kasang hkrai rai nga ai: 22 shi gaw anhte hpe dazik shakap da nna, anhte a kraw lawang e Wenyi ngu ai masat dingsat jaw da ma ni ai. 23 Nanhte hpe matsam dum na majaw sha, ngai Korinhtu mare de rai n sa du ai gaw, nye a myit masin hta sakse tai na, Karai Kasang hpe ngai shaga nngai. 24 Ning nga tsun ai gaw, nanhte a kamsham ai hpe anhte madu nga ai n re ai sha, nanhte a kabu gara ai hta shingdep shingtau ai ni anhte rai nga ga ai; kaning rai nme law, kamsham ai hta nanhte grin grin tsap nga myit dai.

2 Korinhtu 2

2:1 Raitimung, ngai gaw myit yawn ai hte nanhte hpang de bai n sa na, ngu nna ngai nan myit da se ai. 2 Kaning rai nme law, ngai nanhte hpe shayawn made yang gaw, shingrai ngai shayawn ai wa hta kaga, ngai hpe kadai kabu shangun lu na kun? 3 Dai hta kaga, nye a kabu gara ai lam gaw, nanhte nlang hte a kabu gara ai lam rai nga ai, ngu nna nanhte nlang hte hpe ngai myit kam nngai majaw, ngai sa du ai shaloi e ngai hpe kabu gara mai shangun ai ni gaw myit yawn shara n shabyin u ga she, shawng na laika nan ngai ka dat made ai. 4 Kaning rai nme law, tsin-yam tsindam, myit ru myit yak law law hte, myi prwi law law pru let ngai nanhte hpe ka dat made ai; nanhte hpe myit yawn shangun na n re ai sha, ngai nanhte hpe nachying naw tsawra nga ai hpe nanhte chye lu myit ga, ngai ka dat made ai. 5 Bai, marai langai ngai yawn shangun ai teng a yang gaw, ( nau wa n daru mayu nngai ) ngai hpe n re ai sha, nanhte nlang hpe zawn shayawn nga ai. 6 Nanhte hta na malaw maga dai wa hpe shingrai daru sharin ai gaw, shi a matu ram nga ai rai nna, 7 nachying sung ai yawnhkyen ai hta n lup mat u ga, shi hpe mara dat nna bai shangwi shapyaw nga mu. 8 Dai rai nna tsawra ai gaw shi a matu bai shagrin u ga, ngai nanhte hpe shadum made ai. 9 Dai re ai majaw mung nanhte lam shagu hta madat mara nga ai kun chye lu n ga, ka dat ai laika hte ngai nanhte hpe chyam yu made ai. 10 Kadai wa a mara nanhte raw dat myit yang gaw, ngai mung raw dat nngai: kaning rai nme law, ngai lama ma raw dat ni yang gaw, Satan gaw anhte hpe n dang kau u ga, nanhte a majaw, Hkristu a man e, ngai raw dat nngai; 11 Satan a myit mang ai hku chyawm gaw anhte n chye ya gaw ai n rai. 12 Dai hta kaga, Hkristu a kabu gara shiga a lam, Troa mare de ngai sa du yang, dai Madu a marang e nye a matu chyinghka hpaw malang nga timung, 13 ngai nau Titu hte n hkrum lu ai majaw, nye a Wenyi hta ngai n ngwi n pyaw rai nga nngai rai nna, shanhte hpe shakram ngut jang, Makedoni mung de sa wa nngai. 14 Raitimung, anhte hpe Hkristu hta tutnawng e padang manau hta nlaw shangun nna, shi a chye chyang ai manam pyaw bat anhte a lata hte shara shagu hkan e shapraw shadan ai Karai Kasang gaw, a nga u ga law. 15 Kaning rai nme law, anhte gaw hkyehkrang la hkrum ai ni hta mung, sum mat hkrum ai ni hta mung, Karai Kasang a man e Hkristu hta ngwi pyaw bat rai nga ga ai: 16 sum mat hkrum ai ni hta si na matu si hkrung si htan bat, gale hta asak lu na matu asak kaw na bat, anhte rai nga ga ai. 17 Ndai bungli shachyen na kadai wa ging ram nga a ta? Kaning rai nme law, Karai Kasang a mungga hpe pau chye ai masha law law ni zawn anhte n rai nga ai sha, sanseng ai myit hte mung, Karai Kasang kaw nna mung, Karai Kasang a man e anhte Hkristu hta tsun nga ga ai.

2 Korinhtu 3

3:1 Anhte gaw tinang a hkum marai hpe bai dan hpang ga ai kun? dai hta n-ga, masha nkau mi zawn nanhte hpang de, shing n rai nanhte kaw na tinang marai dan ai laika anhte ra ga ai kun? 2 Anhte a kraw lawang e ka da nna, masha yawng mayawng chye chyang lu ai hte hti yu lu ai anhte a laika nan, nanhte rai nga myit dai: 3 tsi hte n re ai sha, hkrung nga ai Karai Kasang a Wenyi hte, bai, lung pa hta mung n re ai sha, hkumshan a kraw lawang e ka da nga ai, anhte a lata hte lajang da ai Hkristu a laika nan nanhte rai nga myit dai gaw, dan dan leng leng rai nga ai. 4 Ning rai myit kam ai gaw, anhte Hkristu a marang e Karai Kasang a man e lu ga ai. 5 Raitimung, anhte gaw tinang atsam machyu nna me, anhte nan hpa hpaji daw lu ga ai n rai; anhte a ging ram ai tsam gaw Karai Kasang kaw nna rai nga ai; 6 ningnan ga shaka sara tai na shi anhte hpe shaging sharam ma ni ai; dai ga shaka gaw, laika hkum hta na n re ai sha, Wenyi hta na rai nga ai: kaning rai nme law, laika hkum gaw sat kau chye ai, Wenyi chyawm gaw jahkrung ya lu ai. 7 Dai rai nna, hkoi mat chye ai Mawshe a myiman a hpung shingkang majaw, Israela masha ni shi a myiman hpe n azi yu lu hkra, laika hkum hte lung pa hta tawk ka da ai, si hkrung si htan daw ai aya gaw, hpung shingkang hte danpru nga ai rai yang gaw, 8 Wenyi hta na daw ai aya gaw, hpung shingkang hta grau nna tai na, n rai ni? 9 Kaning rai nme law, dawdan chye ai daw ai aya gaw hpung shingkang rawng ai rai yang gaw, dinghpring shangun ai daw ai aya gaw hpung shingkang hta grau nna law htam wa na ra ai. 10 Dai rai nna, chyahtum chyalai re ai hpung shingkang rawng ai aya a majaw, shawng na hpung shingkang rawng ai lam gaw, ning re ai hpung shingkang shapraw dan lu ai n rai. 11 Kaning rai nme law, hkoi mat chye ai aya gaw hpung shingkang rawng a yang gaw, agrin nga ai aya gaw grau nna hpung shingkang rawng na ra ai. 12 Ning re ai myit mada ai lam lu ga ai majaw, anhte grai wa nden ja ai myit madun ga ai rai nna. 13 hkoi mat chye ai aya jahtum hpe Israela masha ni n azi yu lu u ga, Mawshe gaw shi a myiman hpe man magap htinggrum ai zawn, anhte n galaw ga ai. 14 Shanhte a myit mang ai hku chyawm gaw shaja kau ai hkrum ma ai; kaning rai nme law, dai ni nan du hkra, dai ga shaka dingsa hti yang, myi na man magap gaw a htinggrum nga ai rai nna, dai gaw Hkristu e kun di kau nu ai hpe, shanhte kaw shapraw shadan manu ai n rai: 15 dai ni du hkra, galoi mung Mawshe a ga hti yang, man magap gaw shanhte a kraw lawang e a htinggrum nga malu ai. 16 Raitimung, dai Madu hpang de galoi kayin a yang gaw, dai man magap shaloi jang kun di kau ya na ru ai. 17 Dai Madu chyawm gaw dai Wenyi rai nga ai rai nna, dai Madu a Wenyi nga ai shara hkan e shanglawt mung rai nga ai. 18 Anhte nlang hte chyawm gaw myiman a man magap kun di kau nna, dai Madu a hpung shingkang hpe jamna hta mada yu let, dai Madu ngu ai Wenyi a marang e, hpung shingkang htap mi hte htap mi lu la ai hte, shing re ai hkrang bung sumla hte nan galai mat mat rai nga ga ai.

2 Korinhtu 4

4:1 Dai rai nna, chyeju lu la sagaw ai hte maren, ndai ahkang aya gunhpai lu ga ai majaw, anhte n hki n sang ga ai: 2 makoi magap re ai kaya kahpa hpe anhte rap di kau sagaw ai hte, hkalem hkalau ai mung n hkan nna, Karai Kasang a mungga hpe gale galau n di ai sha, dai tengman ai lam shapraw shadan let, Karai Kasang a man e, masha yawng mayawng a myit masin kaw, anhte hkum a tsam marai anhte dan nga ga ai. 3 Anhte a kabu gara shiga ndawng n dan nga a yang gaw, sum mat hkrum ai ni hta she ndawng n dan nga malu ai; 4 Karai Kasang a hkrang bung sumla ngu ai, Hkristu a hpung shingkang rawng ai kabu gara shiga a nhtoi gaw, n kam n sham ai ni hta n htoi tu u ga she, ndai mungkan ga na Hpara gaw, shanhte a myit mang ai hku shakyaw shamak kau ya manu ai. 5 Kaning rai nme law, anhte gaw tinang a lam hkaw dan ga ai n re ai sha, Madu Hkristu Yesu a lam hpe mung, anhte nan Yesu a jaw e nanhte a mayam ni rai nga ga ai lam hpe mung, hkaw dan nga ga ai. 6 Nsin hta na nhtoi htoi na ra ai, nga nna tsun ai Karai Kasang gaw, Hkristu a myiman kaw na Karai kasang a hpung shingkang a chye chyang ai nhtoi hpe shapraw ya lu u ga she, anhte a kraw lawang e jahtoi ya ma ni ai. 7 Raitimung, dai chyahtum chyalai re ai n-gun atsam gaw anhte kaw na n re ai sha, Karai Kasang kaw na pru nga u ga she, ndai sutgan gaw, ga di bu hta sha anhte rawng da gaw ai. 8 Anhte lam shagu hta tsin-yam tsindam hkrum ga ai raitimung, ginwan n lu ga ai n rai; myit ru myit tsang hkrum ga ai raitimung, myit htum ga ai n rai; 9 zungri zingrat hkrum ga ai raitimung, dam jahka kau ai hkrum ga ai n rai; ari gumpye kau ai hkrum ga ai raitimung, daw hten ai hkrum ga ai n rai. 10 Yesu a hkrung ai asak gaw anhte a hkum hkrang hta danpru lu u ga, Yesu a si wa ai lam hpe anhte hkum hkrang hta tutnawng e dagraw hkawm nga ga ai. 11 Kaning rai nme law, Yesu a asak hkrung ai gaw anhte a si chye ai hkumshan hta danpru lu n ga, anhte naw hkrung nga ai ni gaw, Yesu a jaw e tut tut si ai de ap kau ai hkrum nga ga ai. 12 Dai rai nna, anhte hta e si hkrung si htan, nanhte hta e chyawm gaw asak hkrung ai gaw, a shachyen nga ai. 13 Kamsham nngai majaw ngai tsun nga nngai, nga nna ka da nga ai hte maren, dai kamsham ai Wenyi nan anhte rawng nga ga ai majaw, anhte mung kamsham nga ga ai rai nna a tsun nga ga ai; 14 dai Madu Yesu hpe sharawt ya ai wa gaw, Yesu hte rau anhte hpe mung sharawt ya na rai nna, nanhte hte rau dingrawng shangun na mi ai hpe, anhte chye nga ga ai. 15 Kaning rai nme law, masha law law ni a gawp e chyeju gaw jat wa ai majaw, shakawn kungdawn ai ga gaw Karai Kasang a hpung shingkang matu mara law htam wa u ga, yawng mayawng gaw nanhte a matu mara rai nga ai. 16 Dai rai nna anhte n hki n sang ga ai sha, anhte a shinggan na wa hten bya hkrum raitimung, anhte a kata de na wa gaw, lani hte lani prat bai pra wa nga ai. 17 Kaning rai nme law, dandawng nga ai arai ni gaw ndai aprat na sha, n dan ndawng nga ai arai ni gaw htani htana na arai rai nga ai majaw, dandawng nga ai arai ni hpe anhte n tau yu ai sha, n dan ndawng ai arai ni hpe tau yu let, 18 ya e sha hkrum ai atsang sha rai nga ai tsin-yam tsindam gaw, nachying kaba li la ai htani htana hpung shingkang hpe anhte a matu mara a shachyen nga ai.

2 Korinhtu 5

5:1 Dinghta ga na nta ngu ai anhte a sum gaw run mat wa raitimung, lata hte n galaw ai nta, sumsing lamu e htani htana re ai Karai Kasang kaw na wahpang anhte lu nga ga ai gaw, anhte chye nga ga ai. 2 Kaning rai nme law, ndai sum hta anhte madai nga ga ai rai nna, sumsing lamu na anhte a hkum hkrang nta hpe, dagraw lu na ndawt nga ga ai; 3 gaja wa shingrai dagraw ngut jang, anhte hpe singgu krin mu hkrup na mi ai n rai. 4 Ndai sum hta e naw nga nga ai ni anhte gaw, lit hpe gunhpai let a madai nga ga ai rai nna, ndai sum hpe anhte kun di kau mayu ga ai n re ai sha, si mat chye ai gaw asak hkrung ai hta lup mayu kau ai hkrum u ga, hkum hkrang nta hpe dagraw na mahtang ra nga ga ai. 5 Dai chyeju nan lu la na anhte hpe shachyen ai wa gaw, Karai Kasang rai nga ai; shi gaw dai Wenyi a masat ding sat mung, anhte hpe jaw da ma ni ai. 6 Dai re ai majaw anhte galoi mung myit kaba nga ai hte ndai hkum hkrang hta naw shanu nga yang, dai Madu hte anhte tsan gang nga ga ai hpe, chye nga ga ai; 7 myi hte mu lu ai n re ai sha, makam masham a marang e anhte hkawm nga ga ai; 8 gaja wa anhte myit kaba nga ga ai rai nna, dai hkum hkrang hta n shanu ai sha, dai Madu kaw shanu lu u ga anhte grau nna ra nga ga ai. 9 Dai rai nna, shanu nga yang raitimung, garai n shanu nga yang raitimung, shi a man e sharawng awng ai ni tai u ga, anhte myit makun nga ga ai. 10 Kaning rai nme law, dai hkum hkrang hte kaja ai raitimung, n kaja ai raitimung, galaw saga ai hte maren, langai hte langai hkam la shajang mu ga, anhte nga manga Hkristu a tingnyang man e dawng pru na ra ga ai. 11 Dai rai nna, dai Madu a hkrit kang hpa hpe chye ga ai majaw, anhte masha ni hpe madun shadik nga ga ai; Karai Kasang a man e chyawm gaw, anhte dan dan leng leng rai nga ga ai; nanhte a myit masin a man e mung, anhte dan leng nga ga ai, ngai nawn nga nngai. 12 Anhte gaw nanhte a man e anhte hkum marai bai dan ga ai n re ai sha, myit masin hta n rai, myiman hta sha gumrawng ai ni hpe htan lu myit ga she, anhte a lam gumrawng na shara, nanhte hpe jaw nga ga ai. 13 Kaning rai nme law, anhte myit n gring nga ga ai rai yang gaw, Karai Kasang a matu mara n gring nga ga ai; gring nga ga ai rai yang gaw, nanhte a matu mara gring nga ga ai. 14 Dai hta n-ga, marai langai wa yawng mayawng a matu mara si hkam yang, yawng mayawng si hkam sai, nga nna myit da nga ga ai majaw, Hkristu a tsawra ai lam gaw anhte hpe woi awn nga mi ai: 15 asak hkrung ai ni mung, tinang myit hte n re ai sha, shanhte a matu mara si hkam nna, bai rawt wa ai wa a jaw e hkrung nga mu ga, yawng mayawng a matu mara shi si hkam sai. 16 Dai re ai majaw, ya kaw nna anhte kadai hpe mung hkumshan ahpraw hpe tau yu yang, n chye nga ga ai; Hkristu a hkumshan ahpraw hpe pyi anhte chye lu saga ai raitimung, ya kaw nna dai zawn hpa n chye ga ai. 17 Hkristu hta e marai langai ngai rai nga ai teng yang gaw, shi gaw ningnan hpan da ai wa rai nga ai; dingsa hte gaw lai mat wa sai, yu mu, dai hte gaw ningnan tai wa sai. 18 Dai lam yawng mayawng chyawm gaw Karai Kasang kaw nna rai nga ai; shi gaw anhte hpe Hkristu hta e shi hkum lala hte htinglu htinglai ya mi ai rai nna, dai htinglu htinglai ya ai ahkang aya gaw anhte hpe jaw da ma ni ai; 19 Karai Kasang gaw Hkristu hta nga let, mungkan ga hpe shi hkum lala hte htinglu htinglai ya nga ai; shanhte a mara gaw shi shanhte hpe n shagun ya mu ai rai nna, dai htinglu htinglai ya ai mungga gaw anhte hta e tawn da ya ma ni ai. 20 Dai re ai majaw Karai Kasang gaw anhte a lata e shadum shahprang nga ai zawn, Hkristu a lam htinglet ya ai kasa ni anhte rai nga ga ai; Karai Kasang hte htinglu htinglai mu, ngu nna Hkristu a jaw e anhte hpyi nem ga ai. 21 Shi hta e Karai Kasang a dinghpring ai ni anhte tai wa u ga, shi yubak n chye ai wa hpe, anhte a matu mara yubak shatai wu ai.

2 Korinhtu 6

6:1 Karai Kasang a chyeju hpe n gawn n sawn nanhte n hkam la myit ga, shingdep shingtau ai ni anhte mung, shadum shahprang dat ga ai. 2 Kaning rai nme law, Ang wa ai aten e ngai na a ga madat ya de ai, Hkyehkrang la ai nhtoi e ngai nang hpe karum de ai, nga nna shi tsun nga ai; yu mu, ya e pyi mai ang ai aten rai nga ai; yu mu, ya e pyi hkyehkrang la ai nhtoi rai nga ai. 3 Ndai daw ai aya gaw shatan nhkan n hkrum u ga, hpa lam hta mung ahtu kataw shara loi mi muk anhte n shatai ai sha, 4 shakut sharang ai law law hta, tsin-yam tsindam hta, kyindut ai hta, shagyeng ai hta, 5 anu kayat hkrum ai hta, htawng bang ai hta, kabrawng kabrang hkrum ai hta, bungli gunhpai ai hta, a maja nga ai hta, kawsi hpang gara ai hta, 6 san pra ai hta, chye chyang ai hta, myit galu kaba ai hta, mai kaja ai hta, Chyoi pra ai Wenyi hta, n sawt ai tsawra ai myit hta, 7 tengman ai mungga hta, Karai Kasang a n-gun atsam hta mung; dinghpring ngu ai hpyen hking gaw hkra maga pai maga e sumraw ai hte, 8 hpung shingkang hkrum ai raitimung, n kaw n law hkrum ai raitimung, shatan nhkan hkrum ai raitimung, shagrau ai hkrum ai raitimung: 9 hkalem sha ai ni zawn raitimung, tengman nga ga ai ni; gade ai n dum n chye ai ni zawn raitimung, kajai gumhkawng hkrum ai ni; si hkrung si htan hkrum ai ni raitimung, yu mu, anhte ahkrung nga ga ai; 10 adup achyin hkrum ai ni zawn raitimung, n si n mat ai ni; yawnhkyen hkrum ai ni zawn raitimung, tutnawng e a kabu nga ai ni; matsan mayan re ai ni zawn raitimung, masha law law hpe shalu jasu chye ai ni; hpa n lu ai ni zawn raitimung, yawng mayawng hpe madu nga ai ni rai nga ga ai rai nna, Karai Kasang a bungli daw ai sara ni rai nga ga ai gaw, lam shagu hta anhte hkum marai dan nga ga ai. 11 Korinhtu ni e, anhte a n-gup gaw nanhte a jaw e hpaw nga mali ai, anhte a myit gaw dam lada maden wa sai. 12 Anhte hta e nanhte chyat nga myit dai n rai; nanhte a kraw lawang gyip nga malit dai. 13 Dai zawn chyeju htang lu myit ga, nanhte a kraw lawang mung maden dat mu: tinang kasha ni hpe zawn ngai ning nga tsun nngai. 14 N kam n sham ai ni hte rau nhtan shai ai kandang hpe hkum jawm hpai mu: kaning rai nme law, dingman ai lam gaw, tara n hkungga ai lam hte hpa seng a ta? Nhtoi gaw nsin hte kaning rai kanawn lu a ta? 15 Hkristu gaw Beliala hte kaning rai hkau chyap lu ma ta? Kamsham ai wa gaw, n kam n sham ai wa hte hpa gumhtaw mi lu la na a ta? 16 Karai Kasang a nawku ai htingnu gaw, gawngngu sumla ni hte rau kaning rai kahtep lu na a ta? Kaning rai nme law, Ngai shanhte a kata de shanu nga nna ginrun nga na hte, Shanhte a Karai Kasang ngai tai na nngai rai nna, Shanhte gaw nye a amyu tai na mara ai, nga nna Karai Kasang tsun dan nga ai hte maren, ahkrung nga ai Karai Kasang a nawku ai htingnu gaw, anhte rai nga ga ai. 17 Dai rai nna, Shanhte a ka-ang na pru nhtawm, Kaga lak lak rai wa mu, nga nna dai Madu tsun nga ai. Awu asin re ai hpe hkum hkra mu, Shaloi ngai nanhte hpe hkap la na made ai. 18 Nanhte a Kawa ngai tai na nngai rai nna, Nanhte gaw nye a shadang sha ni hte shayi sha ni tai na marin dai, nga nna chyahtum chyalai n-gun rawng ai Madu gaw a tsun nga ai.

2 Korinhtu 7

7:1 Tsawra ai ni e, ndai ga sadi yawng hte gaw lu la gaw ai majaw, hkum hkrang hte wenyi hpe awu asin di kau ai matsat shabat hta na tinang hkum hpe jasan jaseng kau nhtawm, Karai Kasang hpe hkrit hkungga let shachyoi shapra ai lam shatup nga ga. 2 Anhte hpe hkap hkalum la mi: anhte kadai hpe mung n shut n hpyit yu ga ai; kadai hpe mung n shabyak ga ai; kadai hpe mung hkalem hkalau sha ga ai n rai. 3 Nanhte hpe jeyang na ngai ning nga tsun nngai n rai; kaning rai nme law, rau si rau prawn lu hkra, nanhte nan anhte a kraw lawang e anga nga myit dai gaw, ngai shawng e tsun yu ni ai. 4 Nanhte a man e nachying nden ja ai myit ngai rawng nga nngai; nanhte a matu mara ngai grai gumrawng nga nngai; ngwi pyaw ai hte ngai hpring chyat nga nngai; anhte a tsin-yam tsindam shagu hta ladu lai hkra kabu gara nga nga nngai. 5 Kaning rai nme law, Makedoni mung de du yang pyi anhte a hkumshan hta n ngwi n pyaw rai nga ai hte, lam shagu hta tsin-yam tsindam hkrum nga ga ai; shinggan maga de gasat gala, kata maga de hkrit kang ai pra nga ga ai. 6 Raitimung, myit gyip ai ni hpe shangwi shapyaw ai Karai Kasang gaw, Titu du sa ai hte e anhte hpe shangwi shapyaw mi ai. 7 Shi a du sa ai hte sha n rai, nanhte a marit ai myit, nanhte a madai sharung ai hte, nye a matu nanhte nja nhpra rai nga ai gaw, anhte hpe shana ya mi yang, nanhte kaw na shi lu la ai ngwi pyaw ai hte mung, anhte ngwi pyaw nga ga ai; shingrai ngai grau nna kabu nga nngai. 8 Dai rai nna, nye a shagun dat ai laika hte nanhte hpe myit shayawn yang, myit tsang shara n nga nngai: raitimung, dai laika gaw tawng marang mi nanhte hpe shayawn nga ai, ngai dum nna myit tsang nngai; 9 ya chyawm gaw ngai kabu nga nngai. Nanhte hpe myit shayawn ai majaw n rai, myit malai hkra shayawn made ai majaw, ngai kabu nga nngai; anhte a lata hte nanhte hpa sum mat ai mung n hkrum myit ga, Karai Kasang ra ai hte maren shayawn ai hkrum myit dai. 10 Kaning rai nme law, Karai Kasang ra ai yawnhkyen ai gaw, hkyehkrang la ai hkrum hkra, n tsang ra ai myit malai ai hpe shachyen nga ai; mungkan ga a yawnhkyen ai chyawm gaw, si mat ai hpe shachyen nga ai. 11 Bai, Karai Kasang ra ai hte shayawn hkrum ai lam hta nan, da hpran shakang na lam mung, mara nem na lam mung, masin rawt na lam mung, hkrit kang na lam mung, myit marit ai lam mung, nja nhpra ai lam hte mara htang na lam, gade wa shachyen jat wa ai gaw, yu yu mu: nanhte ndai amu hta mara n rawng nga myit dai gaw, lam shagu hta dan nga myit dai. 12 Dai rai nna, nanhte hpe ka dat made ai gaw, shut hpyit ai wa a nhkan e n rai, shut hpyit hkam ai wa a nhkan e mung n re ai sha, anhte a matu mara nanhte a da hpran ai myit Karai Kasang a man e nanhte hpe shadan dan myit ga, ngai ka dat nngai. 13 Dai lam hta e anhte shangwi shapyaw ai hkam ga ai. Anhte a shangwi shapyaw ai hkam lu ga ai hta n-ga, Titu a kabu gara ai lam majaw grau nna kabu gara nga ga ai; kaning rai nme law, nanhte nlang a majaw shi a wenyi kabu awng nga ai. 14 Nanhte a lam lama ma hta ngai shi hpe gumrawng nga nngai rai yang gaw, kaya kahpa ngai n hkrum nga nngai: anhte gaw lam shagu hta nanhte kaw tengman ai ga tsun saga ai hte maren, Titu a man e anhte a gumrawng ai mung tengman wa sai. 15 Nanhte nlang a madat mara ai myit hte, hkrit nna gari let shi hpe hkap hkalum la myit dai hpe adum nga ai majaw, shi nanhte hpe tsawra ai shawang amyit gaw, nachying galu kaba nga lu ai. 16 Nanhte hta ngai lam shagu hta myit kaba nga nngai majaw, kabu gara nga nngai law.

2 Korinhtu 8

8:1 Dai hta kaga, hpunau ni e, Makedoni mung na hpung ni hpe Karai Kasang jaw dat ai chyeju a lam, anhte nanhte hpe shana dat ga ai: 2 tsin-yam tsindam law law hta dinglik hkrum raitimung, shanhte a ladu lai ai kabu gara ai myit hte, shanhte a sung la ai matsan mayan ai hta, sutgan n daw n hta shapraw hkra law htam wa ma sa lu ai. 3 Kaning rai nme law, rai lu ai hte maren, rai sa, rai lu malu hta n-ga, shanhte hkrat nga ma ai hpe, ngai sakse hkam nngai; 4 chyoi pra ai ni hpe galaw daw na ngu ai chyeju hte lawm lu na ahkang shanhte gaw tinang myit lu ai hte anhte hpe akroi anoi hpyi nem mi ai: 5 anhte myit nawn ai hku n re ai sha, Karai Kasang a myit hkan yang, tinang hkum nan dai Madu hpe shawng jaw kau nna, anhte hpe mung jaw kau mi ai. 6 Dai rai nna, Titu gaw shawng galaw hpang ai hte maren, dai chyeju mung nanhte hta shatup u ga, anhte shi hpe shadut jahkat gaw ai. 7 Nanhte gaw kamsham ai hta, ga jahta ai hta, chye chyang ai hta, shakut sharang ai amyu myu hte, anhte a matu tsawra ai myit lam shagu hta law htam wa ai hte maren, ndai chyeju hta mung nanhte law htam wa myit ga, adum nga mu. 8 Ning nga tsun ai gaw htet da ai ga tsun nngai n re ai sha, kaga ni a shakut sharang ai hpe tau yu nna nanhte a tsawra ai myit majing hpe chyam yu na she, tsun nga nngai. 9 kaning rai nme law, anhte a Madu Yesu Hkristu gaw sut su nga ai raitimung, nanhte a matu mara matsan mayan hkrum nna, shi a matsan mayan ai hta nanhte sut su lu na rai nga ai chyeju hpe, nanhte chye nga myit dai. 10 Ndai lam hta nye a mung sumtu ngai madun nga nngai: kaning rai nme law, maning nna pyi galaw hpang ai hta n-ga, galaw mayu ai myit shawng madun ai ni, nanhte rai nga myit dai majaw, dai gaw nanhte a matu sut nga malit dai. 11 Dai rai nna dai bungli hpe ya shatup nga mu: galaw mayu ai myit rawng nga sai hte maren, nanhte rai lu ai daram, shangut na lam mung, dai zawn rai nga u ga. 12 Kaning rai nme law, galaw mayu ai myit rawng nga a yang gaw, n sharai lu ai hte n re ai sha, sharai lu ai hku sha sharawng awng nga ai. 13 Ndai amu hta e kaga ni hpe ngamu ngamai shangun nna, nanhte hpe sharu shayak na maw nga nngai n re ai sha, amu shabung shapre na she myit nga nngai: 14 nanhte a paw ai gaw shanhte a taw ai hta ya e shang lu nna, shanhte a paw ai gaw nanhte a taw ai hta bai shang lu na rai nna, shabung shapre ai hku rai wa u ga, ngai myit nga nngai. 15 Shingrai, Law wa hta la ai wa jan ai n rai, loi mi hta la ai wa mung naw ra nga ai n rai, nga nna ka da nga ai hte maren dik wa na ra ai. 16 Dai hta kaga, Titu a kraw lawang e, nanhte a matu mara dai zawn tsang ai myit nan jaw da ai Karai Kasang gaw, a nga u ga. 17 Ngai shadut jahkat ai ga shi hkam la ai hta n-ga, shi hkum nachying katu nga let, tinang myit tsu rai nna nanhte hpang de pru sa wa ai. 18 Dai kabu gara shiga nhkan e Hpung ni yawng hta shakawn hkrum ai hpunau wa hpe mung, anhte shi hte rau shangun dat ga ai; 19 dai hta n-ga, dai Madu a arawng sadang hte anhte a galaw mayu ai myit madun na matu, anhte a lata hte galaw daw ai, ndai chyeju hta anhte a kanawn manang tai wa u ga she, Hpung ni a lata la ai wa mung, shi rai nga ai: 20 anhte a lata hte galaw daw ai, ndai alu kaba lahkawn ai hta, kadai mung anhte hpe mara shagun shara n nga u ga, sadi nga ga ai; 21 kaning rai nme law, dai Madu a man e sha n rai, masha a man e mung htaphtuk ai ningli madun na, anhte myit yu nga ga ai. 22 Dai hta kaga, lam shagu hta law law lang chyam yu yang, shakut sharang chye nna nanhte hpe grai wa kamsham nga ai majaw, ya e grau nna shakut sharang nga ai hpunau wa hpe mung, dai yan hte rau anhte naw shangun dat ga ai. 23 Titu a lam chye mayu yang, shi gaw, nye a kanawn manang hte nanhte a matu shingdep shingtau ai wa rai nga ai; anhte a hpunau yan a lam chye mayu yang, shan gaw, Hpung ni a kasa yan hte Hkristu a arawng sadang mung rai nga ma ai. 24 Dai re ai majaw, nanhte a tsawra ai myit hte, nanhte a jaw e anhte a gumrawng nga ai sakse, Hpung ni a man e shanhte hpe shadan dan nga mu.

2 Korinhtu 9

9:1 Ya, chyoi pra ai ni a matu mara galaw daw ai amu a lam, ngai nanhte hpang de ka dat shara n nga nngai. 2 Kaning rai nme law nanhte a galaw mayu ai myit ngai chye nna, de a lam nanhte a jaw e gumrawng let, Ahkaia mung na ni maning kaw nna lajang jin nga masai, ngu nna Makedoni masha ni hpe tsun nngai: nanhte a sharawng ai myit mung, dai malaw maga hpe shadum sha-awn nga ai. 3 Raitimung, ndai lam hta nanhte a jaw e anhte gumrawng ai ga gaw kaman lila n tai u ga hte, ngai tsun nga sai hte maren nanhte a jin nga myit ga she, hpunau ni hpe ngai shangun dat nngai: 4 shing n rai, Makedoni masha nkau mi ngai hte rau sa nna nanhte n jin nga ma la ai hpe mu hkrup yang, nanhte kaya kahpa hkrum na ngai n tsun ai sha, anhte mung dai kamsham shara hta kaya kahpa hkrum na ra ga ai. 5 Dai re ai majaw, dai alu gaw kashun kashe la ai zawn n re ai sha, chyeju alu zawn jin magang nga u ga she, hpunau ni gaw nanhte hpang de sa magang nna, shawng na ndat da ai, nanhte a chyeju alu hpe shagum tawn myit ga, ngu nna shanhte hpe shadut jahkat na lam ngai dum nngai. 6 Raitimung, ngai tsun nngai gaw, loi sha mi gat ai wa gaw loi sha mi dan la na ra ai; myit sharawng awng let gat ai wa gaw, myit sharawng awng let dan la na ra ai. 7 Langai hte langai tinang a kraw lawang e myit da ai hte maren jaw u ga: lahpawt ai myit hte n rai, jaw shangun ai majaw sha mung n re ai sha, Karai Kasang gaw kabu gara ai myit hte jaw ya ai wa hpe tsawra nga ai. 8 Dai hta kaga, Shi gat nu ai, matsan mayan ni hpe gam jaw nu ai: Shi a dinghpring ai gaw htani htana anga nga ai, nga nna ka da nga ai hte maren, 9 lam shagu hta e nanhte tut tut marai hkum sumhpa rawng let, mai kaja ai magam bungli amyu myu hta law htam wa myit ga, Karai Kasang gaw nanhte hta e chyeju hkum sumhpa law htam shangun lu ai. 10 Nli gat ai wa hpe nli mung, sha na matu shahpa mung shapraw ya ai wa gaw, nanhte a gat na nli hpe shapraw nna shalaw jahtam na hte, nanhte a dinghpring ai a asi hpe law wa shangun na ru ai. 11 N daw n hta jaw lu hkra, lam shagu hta e nanhte sut su ai hkrum manit dai rai nna, dai gaw anhte a lata e, Karai Kasang hpe shakawn kungdawn na lam tai wa na ra ai. 12 Kaning rai nme law, ndai galaw daw ai bungli gaw, chyoi pra ai ni a ra nga ai hpe shatup nga ai hta n-ga, Karai Kasang a chyeju hpe mahkawn mangoi na lam mung law htam wa nga ai: 13 ndai galaw daw ai lam hte nanhte hpe chyam yu ngut jang, Hkristu a kabu gara shiga a lam hkan nang nna madat mara nga myit dai hte, n daw n hta re ai alu kumhpa, shanhte hpe mung, mahkra hpe mung, a jaw nga ai majaw, shanhte gaw Karai Kasang hpe shagrau sha-a nga ma ai: 14 shanhte mung nanhte hta nachying grau ai Karai Kasang a chyeju hpe tau yu ai majaw, nanhte a matu mara akyu hpyi nga yang, nanhte hte hkrum na hpe grai marit nga ma ai. 15 Tsun n dang lu ai Karai Kasang a kumhpaw kumhpa majaw, shi hta a nga u ga law.

2 Korinhtu 10

10:1 Nanhte a man e myit grit ai hte, tsan gang nga yang nanhte a lam nden ja ai myit madun ai, ngai Pawlu nan, Hkristu a sumnung ai hte myit gyip ai hpe tau yu nna, nanhte hpe shadut jahkat dat made ai: 2 anhte gaw hkumshan hking hte hkawm nga ga ai myit nna, anhte a lam nawn ya ai ni nkau mi hpe nachying nden ja ai myit madun na ngai maw nga nngai hte maren, nanhte hte rau nga yang, dai hte wa nden ja ai myit madun shara n nga u ga, ngai hpyi nem nngai. 3 Kaning rai nme law, hkumshan hta anhte hkawm nga ga ai raitimung, hkumshan hking hku hkan nna majan gasat nga ga ai n rai; 4 anhte a majan gasat na ri nhtu ni gaw hkumshan hte n seng ai sha, hpyendap ni hpe sharun shabya na matu, Karai Kasang a man e atsam n-gun rawng nga ai; 5 masha a myit mang ai hku hte, Karai Kasang a chye chyang ai lam hpe hkum da mayu ai tsaw matsaw hte hpe, anhte sharun shabya lu ai hte, Hkristu a ga madat mara na lam a npu e myit mang shagu hpe sharen da mu ai; 6 nanhte a madat mara ai lam gaw hkum tsup ngut jang, n madat n mara ai yawng hte hpe ari jaw na, anhte jin jin rai nga saga ai. 7 Nanhte gaw myiman sha yu matsing myit dai. Ngai gaw Hkristu hta e rai nga nngai, nga nna langai ngai myit da a yang gaw, shi nan Hkristu hta e rai nga ai hte maren, anhte mung rai nga ga ai, tinang hkum dai myit dum nga u ga. 8 Nanhte hpe sharun shabya na majaw n rai, nanhte hpe shadaw shalan na matu, dai Madu anhte hpe jaw da sai ahkang aya a lam ngai grai wa naw gumrawng nga timung, ngai hkrit kaya hkrum na nngai n rai; 9 dai hta kaga, nye a shagun dat ai laika ni hte nanhte hpe jahkrit na zawn, nawn shara n tai u ga. 10 Kaning rai nme law, shi a laika ni gaw li la ai hte atsam rawng ai laika rai lu ai raitimung, shi hkum nan rau nga nga yang, shi a hkum hpung n rawng nna, shi a tsun ai ga akyu n rawng lu ai, nga nna tsun ai ni nga ma ai. 11 Shing nga ai wa chyawm gaw, anhte tsan gang nga ga yang, laika ni hta rawng ai ga rai nga ai hte maren, rau nga yang mung anhte dai zawn bungli hta e rai na ga ai, adum nga u ga. 12 Kaning rai nme law, tinang a hkum hpe shagrau ai ni nkau mi hte hti lawm nna, anhte a hkum hpe shanhte hte shadawn yu na, anhte n gwi ga ai: shanhte gaw tinang a hkum hpe tinang dai shadawn nna, tinang a hkum hte tinang dai shabung nga ma ai majaw, myit n rawng nga ma ai. 13 Anhte chyawm gaw shalai nna gumrawng ga ai n re ai sha, nanhte kaw pyi du dep lu hkra rai u ga she, Karai Kasang gaw anhte hpe shadawn sharam da ai jarit hpe tau yu nna sha, gumrawng lu ga ai. 14 Nanhte kaw du dep na matu ntsa hku chyan ga ai n re ai sha, anhte Hkristu a kabu gara ai shiga hte nanhte kaw mung du dep saga ai. 15 Bai anhte gaw masha kaga wa a bungli hta shang nna, shalai gumrawng ga ai n re ai sha, nanhte a kamsham ai myit kaba wa yang she, anhte a shadawn sharam da ai jarit tau yu let, nanhte a jaw e anhte grau nna kaba wa na ga ai rai nna, 16 nanhte a ginwang shinggan e dai kabu gara ai shiga sa hkaw tsun lu nna, masha kaga wa shajin da ai yi ngam hta shang gumrawng ai hku n re ai sha, anhte myit mada nga ga ai. 17 Dai gumrawng ai wa chyawm gaw dai Madu hta gumrawng nga u ga. 18 Kaning rai nme law, tinang hkum hpe shagrau ai wa n rai, dai Madu shagrau ai wa chyu sha, ging dan ngu ai hkam la nga ai.

2 Korinhtu 11

11:1 Ngai angawk ai mara loi mi nanhte naw sharang ya mi ga, ngai ra nga nngai: gaja wa nanhte nye a lam sharang ya nga myit dai. 2 Kaning rai nme law, Karai Kasang a nja nhpra ai hte maren, ngai nanhte a lam nja nhpra rai nga nngai; nanhte hpe hkawnsek hpe zawn Hkristu kaw jaw ya nna, madu langai sha hte ngai nanhte hpe hkungran ya made ai. 3 Raitimung, lapu gaw shi a hkalem ai hte Ewa hpe lau kau wu ai zawn, Hkristu a sanseng ai hte chyoi pra ai lam hpe kau da hkra, nanhte a myit mang hten na hpe, ngai tsang nga nngai. 4 Kaning rai nme law, nanhte kaw sa du ai wa gaw, anhte n hkaw dan ai Yesu kaga a lam shi hkaw dan nna, nanhte n hkam la ai Wenyi kaga hpe nanhte hkam la myit dai hte, nanhte n hta la ai kabu gara shiga kaga hpe hta la myit yang gaw, shi a lam nanhte gaja wa sharang nga myit dai. 5 Ngai chyawm gaw kaba htum ai kasa ni a lawu e loi mi sha pyi n grit nga nngai, ngai nawn nga nngai. 6 Tsun ai ga hta zai ai zawn raitimung, chye chyang ai lam hta gaw dai zawn n re ai sha, nanhte a man e lam shagu hta, dai gaw yawng mayawng hta, dan dan leng leng pru wa sai. 7 Nanhte grau wa myit ga, ngai hkum hpe ngai shagrit nna, jahpu n hpyi ai sha Karai Kasang a kabu gara shiga nanhte hpe hkaw dan ai gaw, ngai hta mara kap nga ai kun? 8 Nanhte hpe galaw daw na, Hpung kaga ni kaw na ngai jarit hkam la ai gaw, shanhte hpe dip kashun sha nngai; nanhte hte rau nga nna lama ma ra ai shaloi, ngai kadai hpe mung n shatsang nngai: 9 Makedoni mung na du sa ai hpunau ni chyawm gaw ngai ra mara shapraw jaw ma ai rai nna, nanhte hpe hpa mung n shatsang ai sha ngai sadi nga ai hte naw a sadi nga na nngai. 10 Hkristu a tengman ai ga ngai hta rawng nga ai hte maren, ngai ning rai gumrawng shara nga ai hpe Ahkaia mung ginwang hkan e kadai mung hkum da lu na n rai. 11 Dai gaw hpa majaw rai kun? Nanhte hpe n tsaw n ra ai majaw rai kun? Karai Kasang gaw chye nga ai. 12 Mara tam mayu ai ni mara n mu u ga hte, shanhte a gumrawng ai hta anhte hte maren sha shanhte tai u ga she, ngai galaw yu ai lam hpe naw a galaw nga na nngai. 13 Kaning rai nme law, ning re ai ni gaw masu ai kasa ni hte, Hkristu a kasa ni a hpyi hpun nna hkalem ai bungli galaw ai ni rai nga ma ai. 14 Dai gaw mau na shara n nga ai; kaning rai nme law, Satan pyi nhtoi hta na lamu kasa a hpyi hpun chye nga ai; 15 dai rai nna shi a salung sala ni mung, dinghpring ai a ali ama ni a hpyi hpun nga ma ai hpe, amu kaba shadu na n rai: shanhte a jahtum na gaw, shanhte a bungli hte maren rai na ra ai. 16 Bai ngai tsun nngai gaw, kadai mung ngai hpe angawk angak hkum aleng nga u ga: aleng nga myit yang gaw, ngai loi mi naw gumrawng nga lu n ga, angawk angak re ai wa hpe zawn ngai hpe naw hkap hkalum la mi. 17 Ning nga nna gumrawng ai lam hta ngai sharawng nngai gaw, dai Madu ra ai hte maren ngai tsun nngai n re ai sha, angawk angak re ai ga zawn tsun nga nngai. 18 Masha law law wa hkumshan lam hta gumrawng nga ma ai majaw, ngai mung gumrawng na nngai. 19 Nanhte myitsu nga myit dai rai nna, angawk angak re ai ni hpe kabu gara ai hte sharang nga myit dai. 20 Kaning rai nme law, marai langai ngai nanhte hpe rim yam ai, kashun sha ai, rim la ai, tinang a hkum hpe shagrau ai hte nanhte hpe shabyi kahpret ya myit yang gaw, dai wa hpe nanhte sharang ya nga myit dai. 21 Anhte gaw n-gun kya ai ni zawn rai nga ga ai, ngu nna anhte a lam shatan let ngai tsun nngai; raitimung lam gale hta masha wa manoi nna nden ja nga a yang gaw, ngai mung dai lam hta nden ja lu nngai, ngu nna angawk angak re ai ga ngai tsun nngai. 22 Shanhte Hebre masha rai ma yang gaw, ngai mung rai nga nngai; shanhte Israela amyu rai ma yang gaw, ngai mung rai nga nngai; shanhte Abraham a aru arat rai ma yang gaw, ngai mung rai nga nngai. 23 Shanhte Hkristu a bungli gunhpai ai ni rai ma yang gaw, ngai mahtang grau nna rai nga nngai, ngu nna mana bu ai wa zawn ngai tsun nngai. Amu bungli grau nna ngai galaw nngai; htawng hkrat ai grau nna ngai hkrum nngai; ladu lai ai shingna ngai hkam ni ai; si hkrung si htan law law lang ngai hkrum nngai. 24 Yuda ni ngai hpe mali shi du na langai yawm yawm di nna, manga lang ndaw kayat ai shingna hkrum ni ai. 25 Masum lang hkawn hte adup ai mung ngai hkrum nngai; lang mi nlung hte kabai ai mung ngai hkrum nngai: masum lang li hten ai hta ngai lawm ni ai; lana mi hte lani mi tup nammukdara hta rawng nga nngai. 26 Law law lang ningwan hkawm nga nngai; hka e rap ai tsin-yam, damya hkrum ai tsin-yam, nye a amyu masha ni e di ai tsin-yam, maigan amyu ni e di ai tsin-yam, kahtawng mare hkan e hkrum ai tsin-yam, nam mali hkan e hkrum ai tsin-yam, nammukdara e hkrum ai tsin-yam, masu ai hpunau ni e di ai tsin-yam ngai a hkrum nga nngai; 27 amu bungli hte kyindut ai hta, law law lang yup n lusha ai hta, kawsi ai hte hpang gara ai hta, law law lang lusha gam ai hta, kashung ai hte shinggu krin re ai. tsin-yam, a hkrum nga nngai. 28 Dai shinggan de na kyindut ai hta kaga, Hpung ni yawng hte a lam myit ru myit tsang ai gaw, shani shagu ngai hpe a shadut shatsang nga ni ai. 29 Ngai gawng n kya yang, kadai gawngkya nga a ta? kadai kataw ai hkrum yang gaw, ngai myit n kahtet ai nga na kun? 30 Ngai gumrawng nga n yang gaw, nye a gawngkya ai lam ngai gumrawng nga nngai. 31 Ngai masu magaw ga n tsun nngai gaw, htani htana e a nga ai Madu Yesu a Kawa Karai Kasang gaw chye nga ai. 32 Damasku hta e ngai hpe rim la na hkawhkam Areta a munggyi gaw Damasku masha ni a mare hpe a sin da nga wu ai. 33 ngai chyawm gaw, mare bunghku na hkuwawt hku e, ka hta shayawn jahkrat dat mi ai rai nna, shi a lata na lawt lu nngai.

2 Korinhtu 12

12:1 N gumrawng nga ai gaw n nga lu nngai; raitimung dai gaw htaphtuk nga ai n rai: ya chyawm gaw, dai Madu kaw na myi le le ai hte shingran mu ai lam, ngai gaw tsun hpang na nngai. 2 Ya shi mali ning na wa sai, Hkristu hte seng ai wa langai mi hpe ngai chye nngai; dai wa gaw masum na sumsing lamu du hkra woi lung wa ai hkrum wu ai: shi gaw hkum hkrang lawm ai kun, ngai n chye nngai, n lawm ai kun, ngai n chye nngai, Karai Kasang sha chye nga ai. 3 Shing re ai wa hpe ngai chye nngai; shi gaw Paradisu de woi lung wa ai hkrum nna masha kadai mung tsun n ging ai kaba htum ai ga na wu ai: 4 shi gaw hkum hkrang lawm ai kun, n lawm ai kun, ngai n chye nngai, Karai Kasang sha chye nga ai. 5 Dai wa a lam ngai gumrawng na nngai: nye a gawngkya ai lam n rai yang gaw, nye hkum a lam ngai gumrawng na nngai n rai. 6 Ngai gumrawng mayu timung, angawk angak ngai tai na nngai n rai; kaning rai nme law, tengman ai ga ngai tsun na nngai: raitimung, ngai hkum hpe mu ai hte nye a n-gup ga na lu ai hta n-ga, nye a lam kadai mung hpa n nawn mu ga, gumrawng na lam da kau na nngai. 7 Ya dai chyahtum chyalai re ai shingran a majaw, ngai myit nau wa n kaba u ga, ngai hpe abyen na Satan a salung sala ngu ai, nye hkumshan hta ju ai aju ngai hkrum nga nngai; shingrai ngai nau wa myit n kaba nngai. 8 Ngai gaw dai hta na lawt lu u ga, dai Madu hpe masum lang akyu hpyi nga nngai. 9 Dai rai nna shi gaw, Nye a chyeju gaw na a matu ram nga ai; masha a gawngkya ai hta nye a n-gun atsam hkum tsup nga ai, nga nna ngai hpe tsun ni ai. Dai re ai majaw, Hkristu a n-gun atsam gaw nye a ntsa e a up nga u ga, nye a gawngkya ai hta grau nna ngai gumrawng na ra nga nngai. 10 Dai rai nna Hkristu a jaw e hkam ai gawngkya ai, hkala nba ai, kyindut ai, zingri zingrat ai hte nni nkri re ai hta ngai kabu nga nngai: kaning rai nme law, ngai gawngkya nga yang, n-gun atsam rawng nga nngai. 11 Ngai gaw angawk angak tai wa nngai; nanhte mahtang ngai hpe tai shangun ma ni ai: kaning rai nme nga yang, nanhte a shakawn kungdawn na hpe ngai hkam ang nga nngai. Ngai gaw hpa n re ai wa rai nga nngai raitimung, kaba htum ai kasa ni lawu e loi mi sha pyi n grit nga nngai. 12 Gaja wa, shakut sharang ai amyu myu hte, lamik kumla mauhpa amu hte hpung dagu ngu ai kasa kumla hte gaw, nanhte a ka-ang e dan wa sai. 13 Kaning rai nme law, ngai nanhte hpe n sharu shatsang ai lam n lawm yang me, nanhte Hpung kaga ni hte kaning rai lawu grit nga myit ta? shingrai ngai shut ai mara hpe dat kau ya mi. 14 Yu mu, ya masum lang ngu na hta nanhte kaw du na ngai jin jin rai ni ai rai nna, ngai nanhte hpe n sharu shatsang na nngai. Kaning rai nme law, nanhte a arung arai hpe ngai tam nngai n rai, nanhte hpe sha ngai tam nga nngai: kashu kasha ni gaw kanu kawa ni a matu sutgan mahkawng da na n ang ai sha, kanu kawa ni mahtang kashu kasha ni a matu mahkawng da na ang nga ai. 15 Ngai chyawm gaw nanhte a myit masin a matu sutgan jahkrat mayu ai hta n-ga, nye a hkum hpe pyi jahkrat na grau nna ra nga nngai. Nanhte hpe ning rai ladu lai hkra tsawra nga nngai majaw, ngai hpe ndawng n yawt na mai nga a ni? 16 Nanhte hpe ngai n sharu shatsang nga ai teng u ga; raitimung, ngai zai rawng nna hkalem ai hte nanhte hpe rim la nga ai, tsun nga myit yang gaw, 17 nanhte hpang de shangun ai masha langai ngai hte ngai nanhte a arung arai hpe sen di sha nga nngai kun? 18 Titu hpe ngai shadut jahkat nna, dai hpunau wa hpe shi hte rau shangun dat nngai. Titu gaw nanhte hpe sen di sha nga ai kun? Anhte gaw Wenyi langai sha hta hkawm nga ga ai, n rai kun? Lagaw hkang langai sha hta anhte hkawm nga ga ai, n rai ni? 19 Bai, anhte gaw nanhte a man e mara raw ai ga tsun nga ga ai, nanhte a nawn nga myit ni? Hkristu hta Karai Kasang a man e nan, anhte tsun nga ga ai. Raitimung, tsawra ai ni e, nanhte hpe shadaw shalan na matu, lam yawng mayawng hte gaw rai nga ai. 20 Kaning rai nme law, nanhte hpang de ngai du yang, ngai ra ai hte maren nanhte n rai nga nna, nanhte ra ai hte maren ngai mung n rai nga na nhten, ngu nna ngai tsang nga nngai: gasat gala, manawn masham, ndawng n yawt ai, bra wa na lam, bawlaw ai ga, kadum kahte ai ga, grang ai ga hte kabrawng kabrang rai nga na hpe mung, ngai tsang nga nngai: 21 nanhte hpang de ngai bai du ai shaloi, nye a Karai Kasang gaw nanhte a man e ngai hpe shagrit nhtawm, shawng e yubak galaw nna, tinang galaw ai n se ai lam hte, shut hpyit nna ngang ai amu a lam hta, myit n malai ai law law hte a majaw ngai myit yawn ai hkrum na nngai hpe mung, myit tsang nga nngai.

2 Korinhtu 13

13:1 Ya nanhte hpang de sa du ai gaw, masum lang na bat rai nga ai. Ga nga manga hte hpe, sakse lahkawng masum a n-gup ga hte shagrin nga na ra ai. 2 Ngai bai du yang gaw matsan n dum na nngai, ngu nna shawng e tsun ni ai hte maren, ya nanhte hte rau garai n nga raitimung, lahkawng lang na bat e rau nga ai hte maren, ya du hkra shut hpyit ai ni hte kaga yawng mayawng hte hpe, ngai tsun magang made ai; 3 ngai hta e ga tsun nga ai Hkristu a lam nanhte sakse tam myit dai majaw, ngai matsan n dum na made ai. Shi gaw nanhte hta e n-gun n kya ai sha, nanhte a kata e n-gun atsam dan nga ai: 4 kaning rai nme law, n-gun kya ai majaw wudang e jen da hkrum raitimung, Karai Kasang a n-gun atsam a gawp e shi ahkrung nga ai. Anhte mung Hkristu hte maren gawngkya nga ga timung, nanhte hta rawng ai Karai Kasang a n-gun atsam majaw, anhte shi hte rau ahkrung nga na ga ai. 5 Nanhte gaw dai makam masham hta de nga myit dai kun, tinang dai chyam yu mu; nanhte tinang hkum hpe dinglik yu mu: dinglik yu ai n hkam lu ai ni, nanhte n rai nga myit yang me, Yesu Hkristu nan nanhte a hkum hta e rawng nga ai hpe, nanhte n chye nga myit ni? 6 Anhte mahtang dinglik n hkam lu ai ni n rai nga ga ai hpe, nanhte chye lu myit ga, ngai myit mada nga nngai. 7 Dai hta kaga, anhte dinglik hkam lu ai lam dan wa u ga n re ai sha, anhte dinglik n hkam lu ai ni zawn rai na ga ai raitimung, nanhte gaw kaja ai lailen galaw lu myit ga hte, n kaja ai lai len n galaw myit ga, ngu nna Karai Kasang hpe anhte a hpyi nga ga ai. 8 Kaning rai nme law, tengman ai ga hte nhtan shai let anhte hpa mung n galaw lu ai sha, tengman ai ga a maga e nga yang she, galaw lu ga ai. 9 Dai rai nna, anhte gawngkya nga nna nanhte n-gun ja nga yang, anhte kabu gara nga ga ai: shingrai nanhte hkum tsup lu myit ga, dai lam mung anhte a hpyi nga ga ai. 10 Dai re ai majaw, nanhte hte rau nga ai shaloi sharun shabya na matu n rai, shadaw shalan na matu sha dai Madu ngai hpe jaw da ai ahkang aya hte maren, aja awa n di u ga she, ya e naw tsan gang nga yang, ning rai ngai ka dat nngai. 11 Dai hta kaga gaw, hpunau ni e, kabu gara nga mu; hkum hkum tsup tsup rai nga mu; shangwi shapyaw ai hkam la mu; myit mang langai sha rai nga mu; ngwi pyaw ai lam hkan nna, tsawra myit rawng ai hte ngwi pyaw shangun ai Karai Kasang gaw nanhte hte rau anga nga na ra ai. 12 Nanhte shada chyoi pra ai pup hte shakram ya mi. Chyoi pra ai ni yawng mayawng nanhte hpe shakram dat manit dai. 13 Madu Yesu Hkristu a akyu ara, Karai Kasang a tsawra n-gaw nwai ai hte, Chyoi pra ai Wenyi a kanawn mazum ai gaw, nanhte mahkra hte rau anga nga u ga law.

Galati 1

1:1 Masha kaw na n rai, masha a ahkang majaw mung n re ai sha, Yesu Hkristu hte si mat ai ni kaw na shi hpe sharawt la ai Kawa Karai Kasang a ahkang majaw kasa rai nga ai ngai Pawlu hte, 2 ngai hte rau nga ai hpunau ni nlang hte gaw, Galati mung na Hpung ni kaw ga shana dat ga ai. 3 Anhte a Wa Karai Kasang hte Madu Yesu Hkristu kaw na chyeju hte ngwi pyaw ai gaw, nanhte hta e anga nga malit ga law. 4 Dai Madu gaw, anhte a Kawa Karai Kasang a myit ra ai hte maren, ya e rai nga ai n hkru ai mungkan ga na anhte hpe mawai la u ga, anhte a yubak a matu mara shi hkum hpe nan ap kau ya wu ai. 5 Dai Kawa Karai Kasang kaw, htani htana prat dingsa e hpung shingkang anga nga u ga law. Amen. 6 Hkristu a chyeju hta nanhte hpe shaga la ai wa kaw na nde wa alawan hka wa nna, kabu gara shiga kaga hpang de hkan nang myit dai majaw, ngai amau nga nngai. 7 Dai kabu gara shiga kaga chyawm gaw, kabu gara shiga mai ngu na n re ai sha, Hkristu a kabu gara shiga hpe shabyak mayu nna, nanhte hpe sharu shatsang nga ai ni nkau mi rai nga ma ai. 8 Raitimung, anhte nanhte hpe hkaw tsun dan ai kabu gara shiga hta kaga, anhte mung, sumsing lamu na lamu kasa mung, nanhte hpe hkaw tsun dan a yang gaw, shi dagam dala hkrum u ga. 9 Nanhte hkam la manit dai kabu gara shiga hta kaga, marai langai ngai nanhte hpe hkaw tsun dan a yang gaw, shi dagam dala hkrum u ga, ngu nna shawng e anhte tsun ga ai hte maren, ya e ngai bai naw tsun nga nngai. 10 Kaning rai nme law, ning nga tsun ai gaw, masha myiman pa na ngai ra nga nngai kun? shing n rai, Karai Kasang a myiman pa na ngai ra nga nngai kun? Masha ra ai hku hkan nang na ngai tam nga nngai kun? Masha ra ai hku ngai naw hkan nang nga yang gaw, Hkristu a ali ama ngai rai na nngai n rai. 11 Dai hta kaga, hpunau ni e, ngai hkaw dan yu ai kabu gara shiga gaw, masha myit ai lam hte maren n rai nga ai gaw, ngai nanhte hpe shadum jahprang made ai. 12 Kaning rai nme law, masha kaw na ngai dai hpe hkam la nngai n rai; sharin achyin ya ai hte mung ngai n hkam la ai sha, Yesu Hkristu a shingran ga hte nan hkam la nngai. 13 Yuda htung hta naw nga ai shaloi e, nye a arawn alai a lam nanhte na yu manit dai; Karai Kasang a Hpung hpe nachying ladu lai hkra ngai zingri zingrat nga nna, dai hpe akrin atsai di kau mawe ai. 14 Nye a ji woi ni a matsun maroi ga a lam nachying nja nhpra rai nga nngai majaw, nye a amyu na rau ram manang ni law law hte, Yuda htung hta e ngai grau nna kaba wa nngai. 15 Raitimung, dai Kasha a kabu gara shiga hpe maigan amyu ni hpe hkaw tsun dan u ga, nye nu a hkritung nna pyi ngai hpe san tawn da ai Karai Kasang gaw, 16 shi a chyeju majaw ngai hpe shaga la nna shi Kasha a lam ngai hta shapraw dan na ra nga ai shaloi jang, ngai hkumshan yan asai hpe bawng yu nngai n rai. 17 Dai hta kaga nye a shawng e kasa tai ai ni hte sa hkrum na, ngai Yerusalem de n lung wa ai sha, Arabi mung de sa nhtawm, Damasku mare de bai wa nngai. 18 Dai hpang masum ning lai yang she Kehpa hte jahkrum na, ngai Yerusalem de lung wa nngai rai nna, shi manga ya tup shi hte rau anga nga nngai. 19 Dai Madu a kanau Yaku hta kaga, Kasa gale hpe ngai n mu nngai. 20 Nanhte hpe ngai ka dat ai hta, masu magaw ga n lawm nga ai ngu nna, yu mu, Karai Kasang a man e ngai tsun nga nngai. 21 Dai hpang e Suri hte Kiliki ginwang hkan e ngai sa du nngai. 22 Hkristu hta e nga ai, Yuda mung na Hpung ni chyawm gaw, nye a myiman hpe rai n chye n dum ma ai rai nna, 23 Shawng e anhte hpe zingri zingrat ai wa gaw, tinang nan shawng e akrin atsai di kau ai makam masham lam hpe, ya e hkaw tsun nga ai da, nga nna na la ai hte sha, 24 nye a lam Karai Kasang hpe shakawn kungdawn nga ma ai.

Galati 2

2:1 Dai hpang e shi mali ning lai yang she, Titu hpe mung shalawm let, ngai Barnaba hte rau Yerusalem de bai lung wa nngai. 2 Shingran ga hte maren ngai lung wa nngai rai nna, ngai galaw yu sai amu hte, ya e galaw nga ai amu gaw, kaman lila n rai dam nhten ngu nna, maigan amyu ni hpe ngai hkaw tsun dan ai kabu gara shiga hpe, shanhte a man e mung, arawng lu ai ni a man e kaga lak mung, hkai dan dat made ai. 3 Raitimung ngai hte rau rai nga ai Heleni masha Titu hpe pyi, matu gadoi hkam na n shangun mu ai. 4 Lagyim shashawn ai masu ai hpunau ni a majaw, dai lam ngai galaw nngai n rai; Hkristu Yesu hta e anhte lu la ai lawt wa ai lam hpe kinyu yu nna, anhte hpe mayam shayam na shanhte shang wa ma ai; 5 raitimung, dai kabu gara shiga a tengman ai lam nanhte hta agrin nga lu u ga, shanhte a lawu e ahkying langai mi pyi anhte taw nga ga ai n rai. 6 Arawng lu ai nsan ai ni chyawm gaw, kaning re ai ni rai ma ai kun, ngai hte n seng ga ai; Karai Kasang gaw masha a myiman n tau yu ga nga ai: dai arawng lu ai nsan ai ni gaw, ngai hpe hpa mi mung n sharin set ya mi ai hta n-ga, 7 matu gadoi hkam ai ni hpe dai kabu gara shiga hkaw dan na ahkang, Petru lu la ai hte maren, matu gadoi n hkam ai ni hpe hkaw dan na ahkang, ngai nan lu la ni ai gaw, shanhte mu ma ai. 8 Kaning rai nme law, matu gadoi hkam ai ni a matu mara Petru hpe kasa aya dang da ai wa gaw, maigan amyu ni a matu mara ngai hpe mung kasa aya dang da ni ai. 9 Shingrai ngai hpe jaw da ai chyeju mu ma ai shaloi, dawhpum ngu ging na nsan ai Yaku, Kehpa hte Yawhan hte gaw, shanhte nan matu gadoi ai ni hpang de sa na ma ai rai nna, anhte gaw maigan amyu ni hpang de sa u ga, kanawn manang ngu ai hkra lata gaw ngai hte Barnaba an hpe jaw mi ai. 10 Matsan mayan ni hpe anhte dum na shanhte ra ma ai hte, ngai nan dai lam hta grai shakut sharang mayu nga nngai. 11 Dai hpang e Kepha gaw Antioki mare de sa du ai shaloi, shi hta mara kap nga ai majaw, ngai shi hpe nan daru jet kau we ai. 12 Kaning rai nme law, manang nkau mi gaw Yaku kaw na garai n du ma yang, shi gaw maigan masha ni hte rau shat sha nga ai; dai ni du ma yang, matu gadoi hkam ai ni hpe hkrit kang ai majaw, shi nan maigan ni hte hka nna tsan gang mat wa ai. 13 Yuda gale ni mung shi hte rau dai hte maren hpyi hpun nga ma ai rai nna, Barnaba pyi shanhte a hpyi hpun ai hta lawm mat magang wa nga ai. 14 Ya shanhte gaw dai kabu gara shiga a tengman ai lam hte maren n hkawm nga ma ai gaw, ngai mu mawe ai shaloi, shanhte mahkra a man e Kehpa hpe ngai tsun we ai gaw, Nang gaw Yuda masha rai nga ninglen, Yuda masha zawn n rai, maigan masha ni zawn rai nga nhtawm e, maigan masha ni gaw Yuda ni a hking hkan na, nang kaning rai galaw shangun na n ta? 15 Anhte gaw Yuda amyu jet rai nga nna, maigan masha ni zawn yubak kap ai ni n rai nga ga timung, 16 masha gaw jep ai tara a magam amu hte n rai. Hkristu Yesu a makam masham hta sha dinghpring lu ai gaw, anhte chye nga ga ai majaw, jep ai tara a magam bungli hte n rai, Hkristu hta kamsham ai hte anhte dinghpring lu u ga, anhte pyi Hkristu Yesu hta e kamsham saga ai: kaning rai nme law, jep ai tara a magam bungli hte kadai mung dinghpring ai kaw n du lu ma ai. 17 Ya, Hkristu hta dinghpring ai lu la hkra anhte tam nga let, anhte hkum nan yubak kap ai ni rai nga ga ai, anhte mu hkrup saga yang gaw, Hkristu gaw yubak a ali ama tai nga ai kun? Shing n rai law. 18 Kaning rai nme law, shawng e ngai sharun shabya kau ai lam hpe, ngai bai shagrin nga yang gaw, ngai tawt lai ai masha tai na nngai. 19 Dai hta kaga, ngai gaw Karai Kasang hta e hkrung nga n ga, dai jep ai tara hte seng ai hta, jep ai tara a gawp e ngai si nga nngai. 20 Ngai gaw Hkristu hte rau wudang hta jen da ai hkrum nngai. Ngai hkum nan naw hkrung nga nngai n rai, Hkristu gaw ngai hta e ahkrung nga ai: ya e dai hkumshan hta ngai hkrung nga nngai gaw, ngai hpe tsawra nna, nye a matu mara shi hkum dai shi ap kau ai Karai Kasang a Kasha a makam masham hta sha ngai hkrung nga nngai. 21 Karai Kasang a chyeju hpe ngai gangkau nngai n rai: kaning rai nme law, dinghpring ai gaw jep ai tara hta lu la a yang gaw, Hkristu gaw kaman lila sha si hkam kau nu ai.

Galati 3

3:1 Angawk angak re ai Galati masha ni e, wudang hta jen da ai Yesu Hkristu hpe nanhte a myiman e dem shakap dan sai mi, nanhte hpe gade e hkalau kau myit ta? 2 Dai Wenyi hpe gaw jep ai tara a magam bungli hte nanhte lu la myit dai rai kun? shing n rai, dai makam masham a lam na la ai majaw rai kun? dai lam langai sha nanhte a n-gup na ngai chye la ma yu nngai. 3 Nanhte ndai hte wa angawk angak nga myit ni? Dai Wenyi hta hpa nna galaw hpang myit htawm e, hkumshan hta hpa nna ya shangut na myit ni? 4 Ning san ai nni nkri hpe nanhte kaman sha hkam kau manu ni? gaja wa, dai gaw kaman lila mahkoi rai nga ai kun. 5 Dai hta n-ga, nanhte hpe dai Wenyi shun di ya nna, nanhte a ka-ang e lamik kumla galaw ai wa gaw, jep ai tara a magam bungli hte, shing n rai, dai makam masham a lam na la ai majaw, shabyin lu ai rai kun? 6 Dai hte maren, Abraham gaw Karai Kasang hpe kamsham wu ai rai nna, dai hpe dinghpring ai rai nga ai, shi a matu ngu ya wu ai. 7 Dai re ai majaw, makam masham hte seng ai ni gaw Abraham a kashu kasha ni rai nga ma ai, chye nga mu. 8 Karai Kasang gaw makam masham hte sha maigan masha ni hpe dinghpring shangun na maru ai, nga ai Chyum laika gaw chye da hkrup sai majaw, Abraham hpe ning nga ai kabu gara shiga gaw, Amyu baw shagu gaw na a gawp e gumring gumrat hkrum na mara ai, nga nna shawng e tsun magang nu ai. 9 Dai rai nna, makam masham hte seng ai ni gaw, kamsham ai myit rawng ai Abraham hte rau gumring gumrat hkrum lu na mara ai. 10 Dai hta kaga, jep ai tara a magam bungli hta hpa ai ni kadai raitimung, dagam dala a npu e rai nga ma ai: kaning rai nme law, Tara laika hta ka da mada hte maren galaw na n shatup nga ai wa kadai raitimung, dagam dala hkrum na mara ai, nga nna ka da nga sai. 11 Dai hta n-ga, Dinghpring ai wa gaw kamsham ai hte hkrung nga lu na ra ai, nga nna ka da nga ai majaw, jep ai tara hte Karai Kasang a man e kadai mung dinghpring lu na n re ai gaw, dan dan leng leng rai nga ai. 12 Dai jep ai tara mahtang gaw, makam masham hte n seng ai rai nna, De a lam hte hpe hkan shatup ai wa gaw, dai hta e hkrung nga lu na ra ai, nga ai. 13 Hpun hta e jen da hkrum ai wa kadai raitimung dagam dala hkrum ai wa rai nga ai, nga nna ka da nga ai hte maren, Hkristu gaw anhte a matu mara dagam dala hkrum ai wa tai wa ai majaw jep ai tara a dagam dala kaw na anhte hpe hkrang shaw la mi ai: 14 shingrai Yesu Hkristu a marang e, Abraham a gumring gumrat chyeju gaw maigan masha ni hta byin wa lu na hte, anhte mung dai Wenyi a ga ndat hpe makam masham hte lu la na rai nga ga ai. 15 Hpunau ni e, masha myit ai hku hkan nna ngai tsun n ga: Masha e gaw da ngut sai ga nadat jahpan hpe pyi, kadai mung lai kau lu ai n rai, kadai mung dai hta set jat lu ai n rai. 16 Ya, dai ga ndat ni gaw Abraham hte shi a aru arat hpe tsun da nu ai. Aru arat ni nga ai gaw, law law wa hpe sha-ang ai zawn, shi tsun nga ai n rai: Na a aru arat ngu ai langai wa hpe sha shi tsun nga ai rai nna, dai gaw Hkristu rai nga ai. 17 Dai rai nna ngai tsun nngai gaw, Karai Kasang gaw da ngut sai ga shaka a hpang, mali tsa sumshi ning e du ai jep ai tara gaw, dai ga shaka hpe n shabai lu ai hte, dai ga ndat hpe mung lai kau lu ai, n rai. 18 Kaning rai nme law, dai sali wunli gaw jep ai tara hte seng a yang gaw, ga ndat hte seng nga ai n rai; Karai Kasang chyawm gaw, dai hpe ga ndat hte Abraham hpe jaw da nu ai. 19 Dai rai yang gaw, dai jep ai tara gaw hpa akyu nga a ta? dai ga ndat hta ang ai aru arat du ai du hkra, dai gaw shut hpyit nga ai a majaw set kahtap da nga ai: dai gaw htinglu ya ai wa a lata hte lamu kasa hta na san tawn da ai rai nga ai. 20 Htinglu ya ai wa mahtang gaw, langai sha hte n seng ai sha, Karai Kasang chyawm gaw langai sha rai nga ai. 21 Dai rai nna jep ai tara gaw Karai Kasang a ga ndat hte nhtan shai nga a ni? Shing n rai law; kaning rai nme law, hkrung ai asak jaw lu ai jep ai tara jaw da sai rai yang gaw, dinghpring ai gaw, gaja wa, jep ai tara hta e rai na ra ai. 22 Ya chyawm gaw, Yesu Hkristu hta e rai nga ai makam masham hte seng ai ga ndat gaw, kamsham ai ni hpe jaw ya lu mu ga, Chyum laika gaw yawng mayawng hte hpe yubak a npu e rawng da nu ai. 23 Dai makam masham garai n du yang, anhte jep ai tara a npu e sharen da ai hkrum ga ai rai nna, htawmhpang de paw pru na ra ai makam masham a matu mara, rawng da mi ai. 24 Dai rai nna, anhte gaw makam masham hte dinghpring wa u ga, anhte hpe Hkristu hpang de shangun dat na, jep ai tara gaw anhte a sharin ai sara tai wa sai. 25 Dai makam masham ya du sai majaw, sharin ai sara a npu e anhte naw rai nga ga ai n rai. 26 Kaning rai nme law, Hkristu Yesu hta e kamsham nga myit dai majaw, nanhte nlang hte gaw, Karai Kasang a kashu kasha ni rai nga myit dai. 27 Hkristu hta e baptisma hkam ai ni yawng hte gaw, Hkristu hpe bu hpun sumraw nga myit dai. 28 Nanhte yawng mayawng gaw Hkristu hta e langai sha rai nga myit dai majaw, Yuda wa ngu na mi n nga, Heleni wa ngu na mi n nga; mayam ngu na mung n nga, shanglawt ngu na mung n nga; lasha, numsha ngu na mi mung n nga lu ai. 29 Ya nanhte Hkristu hte seng nga myit yang gaw, nanhte Abraham a aru arat rai nga myit dai hte, dai ga ndat nga ai hte maren, sali wunli hkam la ai ni rai nga myit dai.

Galati 4

4:1 Bai ngai tsun nngai gaw, sali wunli hkam ang ai ma gaw, arai yawng mayawng a madu rai nga timung, ma naw rai nga a yang, mayam wa hte hpa n shai nga ai: 2 kawa madat da ai nhtoi du hkra, bau sin ai wa hte, nta up ai wa a npu e, shi naw rawng nga ai. 3 Dai hte maren, anhte ma naw rai nga ga yang, mungkan ga a hkang ai tara npu e anhte naw yamnga ga ai. 4 Raitimung, aten ladaw gu jang, dai jep ai tara npu e rai nga ai ni hpe hkrang shaw la nna, anhte kasha yin la ai chyeju hkam la lu u ga, 5 numsha hta shangai wa nna, jep ai tara npu e prat wa ai, shi a Kasha hpe nan, Karai Kasang gaw shangun dat wu ai. 6 Ya nanhte gaw kashu kasha rai nga myit dai majaw, Karai Kasang gaw, Aba Wa e, nga nna shaga chye nga ai, shi a Kasha a Wenyi hpe anhte a kraw lawang de shangun dat nu ai. 7 Dai rai nna nang gaw, mayam naw rai nga ndai n rai, kasha nan rai nga nit dai: kasha nan rai nga nit yang gaw, Karai Kasang a marang e sali wunli hkam la ai wa mung, nang rai nga ndai. 8 Raitimung, dai aten e nanhte Karai Kasang hpe n chye nga myit dai majaw, hking madung hku yu yang. Hpara n mai ngu ai ni a npu e, nanhte yamnga myit dai. 9 Ya chyawm nanhte gaw Karai Kasang hpe chye nga ai hta n-ga, Karai Kasang gaw nanhte hpe chye sayang me, n-gun kya ai hte matsan mayan re ai hkang ai tara hpang de, nanhte hpa rai bai nhtang nna, de a mayam bai tai mayu nga myit hka? 10 Nanhte gaw nhtoi, shata, aten ladaw hte shaning hte hpe matsing nga myit dai. 11 Ngai gaw nanhte kaw kaman lila sha shakut sharang kau nga nngai nhten, ngu nna nanhte a lam ngai myit tsang nga nngai. 12 Hpunau ni e, nanhte zawn ngai rai nga nngai majaw, nanhte mung ngai zawn rai nga mu, ngu nna ngai nanhte hpe hpyi nem made ai. 13 Nanhte ngai hpe hpa n shut n hpyit yu myit dai: dai hta n-ga, shawng nnan e dai kabu gara shiga nanhte hpe hkaw dan made yang, ngai hkum hkrang machyi makaw hkrum ai majaw hkring nna hkaw dan made ai gaw, nanhte chye nga myit dai; 14 Nye a hkumshan a majaw nanhte hta nkaw n law shara tai nga raitimung, nanhte ngai hpe matsat kau ai hte ban kau mi ai n re ai sha, Karai Kasang a lamu kasa hpe zawn, gaja wa, Yesu Hkristu hpe zawn, ngai hpe hkap hkalum la mi ai. 15 Dai rai yang gaw, nanhte tinang hkum sha-a ai gaw ya kanang rai nga malit ta? Kaning rai nme law, nanhte gaw tinang a myi malawk la nna, ngai hpe jaw lu taw gaw, jaw na pyi gwi myit dai hpe, ngai nanhte a lam sakse hkam nga nngai. 16 Ya chyawm ngai gaw nanhte hpe dai tengman ai lam tsun dan made ai majaw, nanhte a hpyen wa tai wa ni ai kun? 17 Shanhte gaw nanhte a lam tsang ma timung, mai kaja ai hku tsang ma ai n rai; nanhte gaw shanhte a lam tsang nga myit ga, shanhte gaw nanhte hpe hkum shadang mayu da myit dai. 18 Ngai nanhte hte rau nga nga yang sha, kaja ai lam hpe myit tsang mai na n rai; galoi raitimung kaja ai lam hpe myit tsang nga na, mai kaja nga ai. 19 Nye a ma kaji ni e, Hkristu a shing-yan nanhte hta hkum wa ai du hkra, shangai wa ai shinggyim machyi hpe ngai nanhte a matu naw hkam nga nngai. 20 Nanhte a lam ngai myit law la nga nngai majaw, ya nanhte hte rau nga nga lu nna, nye a nsen galai lu na hpe, ngai ra nga nngai. 21 Jep ai tara npu e nga mayu ai ni e, dai jep ai tara hpe nanhte n chye na nga myit ni? ngai hpe tsun dan mi. 22 Kaning rai nme law, ka da nga ai hte maren, Abraham gaw shadang sha lahkawng lu nga ai; langai mi gaw shingnan num a kasha rai nga ai, langai mi gaw numdung num a kasha rai nga ai. 23 Shingnan num a kasha gaw, masha a hkumshan hte shangai wa sai; numdung num a kasha chyawm gaw, ga ndat hte maren shangai wa sai. 24 Ya dai lam hte gaw ga shadawn rai nga ai; dai num lahkawng gaw dai ga shaka lahkawng hte bung nga ai: langai mi gaw Sina bum kaw na rai nga ai rai nna, mayam tai na matu kasha shangai dat wu ai, Hagara rai nga ai: 25 dai Hagara gaw, Arabi mung na Sina bum rai nga ai: shi gaw ya e de nga ai Yerusalem hte bung nga ai; kaning rai nme law, shi gaw shi a kashu kasha ni hte nawng, mayam rai nga ma ai. 26 Ntsa de rai nga ai Yerusalem chyawm gaw, numdung num rai nga ai rai nna, anhte a kanu mung rai nga mali ai. 27 Kaning rai nme law, Kasha n shangai ai maudung num e, kabu gara nga u; Shinggyim machyi n hkrum ai num e, garu nna kabu jahtau nga u: Gram nga ai num gaw, la lu ai num hta kashu kasha grau nna lu nga ai, nga nna ka da nga ai. 28 Anhte chyawm gaw, hpunau ni e, Isak hte maren ga ndat a kashu kasha ni rai nga ga ai. 29 Shawng nnan e dai hkumshan hte sha shangai ai wa gaw, dai Wenyi hte shangai ai wa hpe zingri zingrat wu ai hte maren, ya e mung byin nga ai. 30 Raitimung, Chyum laika gaw kaning nga tsun a ta? nga yang, Shingnan num hte shi a kasha hpe shapraw kau mu: kaning rai nme law, shingnan num a kasha gaw, numdung num a kasha hte rau sali wunli hpe jawm madu lu na n rai, nga nna tsun nga ai. 31 Dai rai nna, hpunau ni e, anhte gaw shingnan num a kasha ni n rai, numdung num a kasha ni rai nga ga ai.

Galati 5

5:1 Anhte shanglawt tai na matu, Hkristu gaw anhte hpe shalawt dat mi ai: dai re ai majaw agrin nga nna, dai mayam a kandang npu e bai hkum ahkang nga myit. 2 Yu mu, nanhte matu gadoi hkam myit yang gaw, Hkristu gaw nanhte a matu mara hpa akyu n nga ai, ngu nna ngai Pawlu nan nanhte hpe tsun dan made ai. 3 Dai hta n-ga, matu gadoi hkam ai wa gaw, jep ai tara nlang hte hpe shatup la na ra ai, ngu nna matu gadoi hkam ai masha yawng hte hpe, ngai sakse bai hkam nga nngai. 4 Jep ai tara hta dinghpring mayu ai ni, nanhte gaw Hkristu hte daw hka wa manit dai; nanhte chyeju hta na hkrat mat wa manit dai. 5 Anhte mahtang gaw, dinghpring ai lu la na myit mada ai lam hpe, dai Wenyi a jaw e kamsham ai hte a la nga ga ai. 6 Kaning rai nme law, Hkristu hta e matu gadoi hkam ai lam raitimung, matu gadoi n hkam ai lam raitimung, hpa akyu n nga ai rai nna, tsawra myit hte shachyen ai makam masham hkrai sha, akyu rawng nga ai. 7 Nanhte atsawm sha kagat yu manit dai: dai tengman ai lam hpe n madat myit ga, nanhte hpe kadai hkum shadang myit ta? 8 Ya nanhte myit jung ai lam gaw, nanhte hpe shaga la ai wa kaw na pru wa sai n rai. 9 Matsi loi mi gaw muk tawng ting hpe shawawm dat wu ai. 10 Nanhte myit kaga ga n rawng nga myit dai, ngu nna dai Madu hta nanhte a lam ngai myit da nga nngai: nanhte hpe sharu shatsang ai wa gaw, kadai raitimung, tinang mara a jeyang ai hkrum na ra ai. 11 Ya chyawm gaw, hpunau ni e, matu gadoi hkam ai lam ngai naw hkaw nga yang gaw, hpa majaw zingri zingrat ai naw hkrum nga nngai kun? shingrai hkaw tsun yang gaw, wudang a shatan nhkan shara hpe yeng kau nga sai. 12 Nanhte hpe myit shalaw ai ni gaw, tinang dai tinang a gadoi dut kau mu ga, ngai ra nga nngai. 13 Kaning rai nme law, hpunau ni e, shanglawt ahkang lu la myit ga, nanhte hpe shaga da manit dai: raitimung, shanglawt ahkang hpe hkumshan a ginshan hkum shatai mu; tsawra ai myit hte shada da yamnga mu. 14 Na a htingbu wa hpe tinang hkum hte maren tsawra nga u, nga ai ga langai sha hta, dai jep ai tara ting dik wa sai. 15 Shing n rai, nanhte shada da kawa nna sha hkat myit yang gaw, nanhte shada da n shamyit kau myit ga, sadi nga mu. 16 Da ndai ngai tsun nngai gaw, Wenyi hte hkawm nga mu; shaloi hkumshan a marin ai lam hpe nanhte shadik na myit dai n rai. 17 Kaning rai nme law, hkumshan gaw Wenyi hte nhtan shai nna marin nga ai; Wenyi mung hkumshan hte nhtan shai nna marin nga ai: nanhte galaw mayu ai n galaw lu myit ga, dai lahkawng gaw shada da nhtan shai hkat nga ma ai. 18 Dai Wenyi e nanhte hpe lakawn la myit yang gaw, nanhte dai jep ai tara a npu e rai nga myit dai n rai. 19 Hkumshan a bungli gaw dan dan leng leng rai nga ai rai nna, dai hte gaw: hpye ai amu, n san n seng ai amu, ngang ai amu, 20 gawng-ngu sumla naw ai lam, Mandan lakle amu, ndawng n yawt ai, ga law ga la ai, manawn masham ai, pawt sindawng ai, shai wa bra wa ai lam, daw hka wa ai lam, hpung karan wa ai lam, 21 nsu nnawn ai, chyaru nang ai, sawse lawklek ai hte bung ai lam rai nga ma ai; shingrai galaw ai ni gaw, Karai Kasang a mungdan a sali wunli hkam la lu na n rai, nga nna shawng e tsun dan ni ai hte maren, ya mung nanhte hpe tsun shadum nga nngai. 22 Wenyi a asi chyawm gaw tsawra ai kabu gara ai, ngwi pyaw ai, myit galu kaba ai, matsan dum ai, mai kaja ai, kangka ai, 23 myit nem ai hte tinang myit hpe hkang lu na rai nga ai: dai lam hte hpe hkum lu na tara mi n nga ai. 24 Hkristu Yesu hte seng ai ni chyawm gaw, tinang a hkumshan myit mung, myit kayut ai hte marin marit ai hte nawng, wudang hta jen da manu ai. 25 Anhte dai Wenyi hte hkrung nga ga yang gaw, dai Wenyi hte mung hkawm nga ga. 26 Anhte kaman lila grang nga nna, shada da jahte tam ai hte, shada da manawn masham ai, hkum rai nga ga.

Galati 6

6:1 Hpunau ni e, masha langai ngai n dum shami e yubak galaw hkrup a yang gaw, Wenyi rawng ai ni nanhte gaw, shing re ai wa hpe shingdi ai myit hte shadaw shalan rai nga mu: nang mung agung alau n hkrum u ga, tinang dai sadi nga u. 2 Nanhte shada da a lit hpe gunhpai shingtau nna, Hkristu a tara hpe shatup nga mu. 3 Hpa garai n re ai wa gaw, ngai mung langai ngai rai nga nngai, nga nna rai dum a yang gaw, tinang dai tinang hkum hpe hkalem kau wu ai. 4 Langai hte langai gaw tinang a bungli hpe dinglik yu u ga; shaloi shi gaw masha kaga hta n rai, tinang hta sha gumrawng shara rai na ra ai; 5 kaning rai nme law, langai hte langai gaw tinang a lit gunhpai shajang na rai nga ai. 6 Dai mungga hpe sharin achyin la ai wa gaw, sharin achyin ya ai wa hpe mai kaja ai yawng mayawng hte karan kachyan nga u ga. 7 Lam hkum dam myit; Karai Kasang hpe n sawn n sang di lu na n rai: masha gaw gat hkai ai hte maren, dan la na ra ai. 8 Tinang hkumshan hta gat hkai ai wa gaw, hkumshan hta na hten byak ai dan la na ra ai; Wenyi hta e gat hkai ai wa chyawm gaw, Wenyi hta na htani htana asak dan la na ra ai. 9 Kaja ai amu galaw na, anhte n hki n sang nga ga: kaning rai nme law, anhte myit n yaw ga yang gaw, aten ladaw du jang, anhte dan la na ra ga ai. 10 Dai re ai majaw, aten ladaw naw pra nga yang, anhte masha nlang hte hpe mai kaja ai amu galaw nga ga, raitimung, makam masham a dinghku na ni hpe, grau nna galaw nga ga. 11 Gade wa kaba ai laika hkum hte ngai nanhte hpe nye a lata hte ka da nngai gaw, yu yu mu. 12 Hkumshan a ahpraw nsam hpe tau yu ai ni kadai mung, Hkristu Yesu a wudang a majaw zingri zingrat ai n hkrum mu ga, nanhte hpe matu gadoi hkam na, adip arip di myit dai. 13 Kaning rai nme law, matu gadoi hkam ai ni nan, dai jep ai tara hpe shatup ma ai n rai; raitimung, nanhte a hkumshan hta gumrawng gumtawng lu hkra, nanhte matu gadoi hkam na hpe, shanhte ra ma ai. 14 Ngai chyawm gaw, anhte a Madu Yesu Hkristu a wudang hta kaga, gumrawng gumtawng shara n nga u ga: dai hta e mungkan ga gaw nye a matu jen sat kau ai hkrum nna, ngai mung mungkan ga a matu dai hta e jen sat kau ai hkrum ni ai. 15 Kaning rai nme law, matu gadoi hkam ai lam raitimung, matu gadoi n hkam ai lam raitimung, hpa akyu n nga ai: hpan da ai hkum ningnan chyu sha, akyu rai nga ai. 16 Ndai arawn alai hkan nang ai ni yawng mayawng a ntsa e mung, Karai Kasang a Israela amyu majing a ntsa e mung, ngwi pyaw ai hte matsan dum ai gaw, anga nga u ga law. 17 Ya kaw nna kadai mung ngai hpe hkum sharu shatsang manu ga: kaning rai nme law, Yesu a nma hkang nye a hkum shing-yan hta ngai gun hkawm nga nngai. 18 Hpunau ni e, anhte a Madu Yesu Hkristu a chyeju gaw, nanhte a Wenyi hte rau anga nga u ga law. Amen.

Ehpesu 1

1:1 Karai Kasang a myit ra ai a majaw, Hkristu Yesu a kasa rai nga ai, ngai Pawlu gaw, Ehpesu mare hta e nga ai chyoi pra ai ni hte, Hkristu Yesu hta kangka rai nga ai ni hpe, ga shana dat nngai. 2 Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e anga nga malit ga law. 3 Anhte a Madu Yesu Hkristu a Kawa rai nga ai Karai Kasang gaw, a nga u ga law: shi gaw sumsing lamu lahta tang hta e, Wenyi hte seng ai shaman ya ai lam amyu myu hte, Hkristu hta e anhte hpe shaman ya mi ai: 4 anhte gaw tsawra ai myit hte, shi a man e chyoi pra ai ni hte mara n rawng ai ni tai wa u ga, ginding aga garai n lat yang nna, shi anhte hpe Hkristu hta e lata la ma ni ai. 5 Tsawra htum ai Kasha a marang e, anhte hpe jaw dat mi ai hpung shingkang rawng ai chyeju a lam hpe shakawn kungdawn u ga, 6 shi a shawang myit sharawng awng nga ai hte maren, Yesu Hkristu a jaw e, kasha yin la na chyeju hkam la lu u ga, shi anhte hpe shawng nnan e san da ma ni ai. 7 Shi a n taw n tsang ai chyeju a majaw mung, tsawra htum ai Kasha a asai hta nan, htingrai htingrat na lam hte, yubak hpe raw dat kau na akyu, anhte lu la sagaw ai: 8 shi a shawang myit na sung htum ai lam anhte hpe shadan dan yang, 9 dai chyeju gaw hpaji byeng-ya hte kunghpan ai lam nlang hte hte, anhte hta e law htam wa sai: 10 dai sung htum ai lam chyawm gaw, shi a sharawng awng ai myit hku hkan nna, Hkristu hta e myit shatawng da sai hte maren, madat da ai aten ladaw du wa yang, sumsing lamu tang na arai hpe mung, ginding aga na arai hpe mung, nga manga hte hpe Hkristu hta e gumhpawn tawn da na ru ai lam, rai nga ai. 11 Rai sa, shi hta e gumhpawn da na ru ai: shingrai Hkristu hta e shawng myit mada nga ai ni anhte gaw, shi a hpung shingkang hpe shakawn kungdawn nga lu u ga, 12 shi a shawang myit bawng hkut ai lam hte maren, yawng mayawng shabyin da ai wa a myit shatawng da nna, anhte hpe shawng nnan e san da ma ni ai majaw, shi hta e mung anhte sali wunli tai wa saga ai. 13 Nanhte mung, nanhte hpe hkyehkrang la sai kabu gara shiga ngu ai tengman ai mungga hpe na yu nna, shi hta e kamsham ngut yang, ndat da ai Chyoi pra ai Wenyi hte dazik kap ai, hkrum manit dai: 14 Wenyi chyawm gaw, Karai Kasang a hpung shingkang shakawn kungdawn na lam a matu, shi mari da sai ni gaw htingrai htingrat ai chyeju lu la hkra, anhte a sali wunli a masat dingsat rai nga ai. 15 Dai re ai majaw, Madu Yesu hta e mung, chyoi pra ai ni yawng hte hta e mung, nanhte lu nga ai makam masham lam hpe ngai na yu nngai majaw, 16 ngai mung, nye a akyu hpyi ai hta nanhte hpe adum nga let, nanhte a lam shakawn kungdawn na, n sim n sa rai nga nngai. 17 Anhte a Madu Yesu Hkristu a Karai Kasang ngu ai, hpung shingkang a Kawa gaw, shi hkum nan hpe chye chyang lu mu ga, hpaji byengya hte shingran shapraw ai Wenyi nanhte hpe jaw ya u ga hte; 18 shi shaga la ai a jaw e myit mada shara gaw gade wa kaba nga ai mung; n taw n tsang ai hpung shingkang rawng ai shi a sali wunli gaw chyoi pra ai ni hta e gade wa kaba nga ai mung; kamsham nga ai anhte hta e shi a nachying galu kaba htum ai atsam gaw, gade wa galu kaba nga ai mung, 19 nanhte chye na lu myit ga, nanhte a kraw lawang na myi gaw htoi san wa malit ga, ngai hpyi nga nngai. Dai atsam chyawm gaw, shi a n-gun lagaw hte atsam shapraw wu ai hte maren, 20 Hkristu hpe si mat ai ni kaw na sharawt la yang, shi shapraw dat wu ai rai nna, 21 du magam, hkang ai ahkang, hpung dagu hte up ai aya lu ai ni nlang hte a ntsa e mung, ndai aprat hte htawmhpang na aprat e mying lu ai shingteng amying nlang hte a ntsa e mung, shi hpe shatsaw nna, sumsing lamu lahta tang hta, shi a hkra maga e dung nga shagun da wu ai. 22 Arai baw sumhpa hpe shi a lagaw npu e shi tawn da nu ai rai nna, yawng mayawng a baw tai na, dai Hpung kaw shi hpe jaw da wu ai: 23 dai Hpung gaw, yawng mayawng hpe jahpring shatsup lu ai wa a hkum tsup ngu ai Hkristu a hkum hkrang rai nga ai.

Ehpesu 2

2:1 Nanhte mung, nanhte a tawt lai ai bungli hte yubak a majaw chyasi rai nga ai shaloi e, 2 ndai mungkan a n-gawn shawa hte, nbung hta hkang ai du wa ngu ai, n madat mara ai kasha ni hta, ya e shachyen nga ai wenyi a lam hte maren, nanhte shawng e hkawm nga manit dai. 3 Anhte nlang hte mung shanhte hte rau shawng e kanawn nga nna, anhte a hkumshan a marin marit ai lam hkan let, hkumshan hte kraw lawang na myit mang ai hku hkan galaw ga yang, shanhte gale hte maren pawt sindawng ging ai kashu kasha ni majing rai nga ga ai. 4 Shingrai, tawt lai ai bungli a jaw e, anhte chyasi rai nga ga timung, nachying matsan dum chye ai Karai Kasang gaw, shi a tsawra ai myit kaba a marang e anhte hpe tsawra nna, 5 Hkristu hte hpawn jahkrung ma ni ai; chyeju hte sha nanhte hkyehkrang la ai hkrum manit dai; 6 Hkristu Yesu hta e anhte hpe chyeju jaw let, shi a nachying galu kaba htum ai chyeju hpe htawmhpang prat ni hta e madun dan nga u ga, 7 Hkristu Yesu hte hpawn, shi anhte hpe sharawt la nna, sumsing lamu lahta tang e dung shangun ma ni ai. 8 Kaning rai nme law, makam masham a marang e, chyeju hte sha, nanhte hkyehkrang la ai hkrum manit dai: dai gaw nanhte kaw na n rai, Karai Kasang a kumhpaw kumhpa sha rai nga ai: 9 kadai mung gumrawng shara n nga u ga, magam bungli kaw na mung rai nga ai n rai. 10 Kaning rai nme law, anhte shi a magam bungli rai nga ga ai; mai kaja ai bungli shachyen na, Hkristu Yesu hta e hpan da ai ni gaw, anhte rai nga ga ai: dai mai kaja ai bungli hta anhte hkawm nga u ga, Karai Kasang gaw dai ni hpe shawng nnan e lajang tawn da mu ai. 11 Dai rai nna, hkumshan hku yu yang, nanhte shawng e maigan ngu ai ni rai nga myit dai hpe, dum ngu mu;dai hkumshan hta e lata hte sha shabyin ai matu gadoi hkam ai ni gaw, Matu gadoi n hkam ai ni, nga nna nanhte hpe shamying nga ma ai; 12 dai aten e Hkristu hta nanhte n lawm myit dai; Israela masha ni a mungdan a shinggan e nanhte nga ai hte, dai ga shaka hte seng ai ga ndat ni hta tsasam ni rai nga myit dai rai nna, mungkan ga hta myit mada shara mung, Karai Kasang mung, n lu ai sha pra nga myit dai hpe, dum nga mu. 13 Ya chyawm gaw, shawng e tsan gang nga ai ni nanhte gaw, Hkristu a asai hte Hkristu Yesu hta e ni wa manit dai. 14 Kaning rai nme law, shi gaw anhte a ngwi pyaw ai lam rai nga ai; shi gaw, dai lahkawng rai nga ai hpe langai sha shatai let, lapran e din nga ai madin hpe sharun kau nu ai; 15 dai ndawng n yawt lam ngu ai matsun maroi ga hta rawng nga nna, htet da ai ga hte seng ai jep ai tara hpe, shi a hkumshan hta e shi htawm kau nu ai; shingrai, dai amyu lahkawng gaw shi hta e masha ningnan langai sha hpan tawn da u ga, shi gaw ngwi pyaw ai lam shatai wu ai: 16 shi a hkum hta dai wudang a marang e, dai ndawng n yawt lam hpe shaza kau let, dai amyu lahkawng hpe Karai Kasang a matu hkum hkrang langai sha tai mu ga, shan a lapran e htinglu htinglai ya mu ai. 17 Shingrai shi sa du nna, tsan gang nga ai nanhte hpe mung, ni nga ai ni hpe mung, ngwi pyaw ai lam a kabu gara shiga hkaw tsun dan mi ai. 18 Kaning rai nme law, an lahkawng gaw shi a marang e, Wenyi langai sha hte Kawa hpang de shang wa na lam lu la sagaw ai. 19 Dai re ai majaw, ya gaw nanhte tsasam hte malet nhprang manam n re ai sha, chyoi pra ai ni hte rau, mung masha hte Karai Kasang a nta na ni, nanhte rai nga myit dai: 20 kasa ni hte myihtoi ni, gaw da ai wahpang npawt hta nanhte de kahtap myit dai; Hkristu Yesu nan dai hta e grau htum ai njut nlung rai nga ai; 21 shi hta e wahpang langai hte langai, matut manoi htuk shachyaw sai rai nna, dai Madu hta e chyoi pra ai nawku htingnu de kaba wa sai: 22 Wenyi a jaw e Karai Kasang a rawng nga na wahpang tai myit ga, nanhte mung shi hta e jawm de nga myit dai.

Ehpesu 3

3:1 Ndai lam a majaw, nanhte maigan masha ni a matu mara, Hkristu Yesu a lam bawngdung ai wa, ngai Pawlu gaw; 2 shawng e nanhte hpe loi mi ka dat ni ai hte maren, dai sung htum ai lam, shingran ga hte ngai hpe shana dat nngai gaw, 3 Karai Kasang kaw na pru nna, nanhte a matu mara ngai hpe jaw da ai chyeju aya a lam, nanhte naw na yu taw gaw; 4 dai ka da ai ga hpe hti yu myit yang, Hkristu hte seng ai sung htum ai lam hta, nye a chye chyang ai nyan, nanhte dum jahkrup lu na myit dai: 5 dai lam chyawm gaw, dai kabu gara shiga a marang e, Hkristu Yesu hta e, maigan amyu ni gaw Yuda ni hte rau, ga ndat a sali wunli hkam la lu nna, shanhte hte rau hkum hkrang langai sha hte, ga ndat ni hpe jawm lu jawm la ai ni rai nga ma ai hpe, 6 ndai aprat e shi a chyoi pra ai kasa ni hte myihtoi ni kaw Wenyi e shadan dan ai hte maren, moi shawng na aprat ni hta e shinggyim masha ni kaw n shana ya mu ai, rai nga ai. 7 Karai Kasang a chyeju hte ngai hpe jaw da ai kumhpaw kumhpa a majaw, shi a atsam shachyen ai hte maren, dai kabu gara shiga a shangun ma ngai tai ni ai. 8 Rai sa, anhte a Madu Hkristu Yesu hta e shatawng da ai prat dingsa na bawng hkut ai hku hte maren, lamu lahta tang e nga ai du magam ni hte ahkang aya lu ai ni kaw, Karai Kasang a chyahtum chyalai re ai hpaji byeng-ya hpe, dai Hpung a lata hte, ya e shana dan u ga, 9 maigan amyu ni hpe Hkristu a nachying galu kaba htum ai sutgan a kabu gara shiga hkaw dan nna, 10 nga manga hte hpe hpan da sai Karai Kasang hta e moi chyaloi nhkoi kaw nna makoi magap da ai sung htum ai ga a aya a lam, hpa rai nga ai gaw, madun dan na, 11 chyoi pra ai ni yawng hta kaji htum ai wa rai nga ai, ngai hpe, dai chyeju jaw da ni ai. 12 Anhte a Madu Hkristu Yesu hte seng ai makam masham a marang e, nden ja ai myit hte n hkrit n kang let shang wa ai lam, anhte lu ga ai. 13 Dai re ai majaw, nanhte a matu mara ngai hkam ai tsin-yam tsindam hta nanhte myit n hten u ga, ngai hpyi nem nga nngai: dai tsin-yam gaw nanhte a arawng sadang rai nga malit dai. 14 Ndai lam a majaw, sumsing lamu hta mung, ginding aga ntsa e mung, kawa ngu shamying ai, 15 yawng hte a npawt daju Kawa a man e, ngai lahput hput di nga nngai; 16 shi a Wenyi a jaw e nanhte a kraw kata na masha hpe, atsam hte shadaw shalan nna, 17 Hkristu gaw nanhte a kraw lawang e makam masham hte shanu nga lu u ga, shi a n taw n tsang ai hpung shingkang hte maren, nanhte hpe chyeju gam jaw na hte, 18 tsawra ai hta ru jung nna, pawt gaw da let, de a nda de, dingdung de, tsaw de, sung de, kaning rai rai nga ai gaw, chyoi pra ai ni yawng hte rau atsawm sha myit shakup lu nna, 19 Karai Kasang a hkum tsup ai lam ting hte hkum tsup lu myit ga, chye chyang ai myit hte n dang chye ai Hkristu a tsawra ai lam hpe, nanhte chye na lu na, ngai hpyi nga nngai. 20 Ya, anhte hta e shachyen nga ai n-gun atsam hte maren, anhte hpyi mahpyi hte myit mang lu ai mahkra hta grau nna shabyin lu ai wa kaw, 21 dai Hpung hta e mung, Hkristu Yesu hta e mung, htani htana prat dingsa na shu mashi shu masha du hkra, hpung shingkang anga nga u ga law. Amen.

Ehpesu 4

4:1 Dai re ai majaw, nanhte hpe shaga la manit dai shaga la ai lam hta e, nanhte ging dan ai hte hkawm nga myit ga, dai Madu a jaw e bawngdung ai wa, ngai gaw, nanhte hpe shadut jahkat made ai. 2 Lam shagu hta myit nem ai hte lam shagu hta myit gyip nna, myit galu kaba ai hte, a hkawm nga mu: 3 Wenyi a myit hkrum ai lam hpe ngwi pyaw ai makyit sumri hte hkan shatup na, larau ladau rai nga mu. 4 Nanhte hpe shaga la ai lam hta, myit mada shara langai sha de, shaga la manit dai hte maren, hkum hkrang langai sha hte Wenyi langai sha rai nga ai: 5 Madu langai sha, makam masham langai sha, baptisma lam langai sha rai nga ai: 6 yawng mayawng a Kawa ngu ai Karai Kasang mung langai sha rai nga ai: shi gaw yawng mayawng a ntsa e rai nga nna, yawng mayawng hpe sharai ai hte, yawng mayawng a kata e rawng nga ai. 7 Dai hta kaga, Hkristu a kumhpaw kumhpa hpe sharam ya mi ai hte maren, anhte langai hte langai hte hpe dai chyeju ren di mi ai. 8 Dai re ai majaw, Shi gaw tsaw ai shara de lung wa yang, Bawngdung ai ni hpe rim la nna, Masha ni hpe kumhpa jaw mu ai, nga nna tsun ai. 9 Ning nga, lung wa ai ngu ai gaw, dinghta ga a lawu tsang de shi hkum nan yu hkrat wa ai hpe, tau yu nna, tsun ai, n rai ni? 10 Yawng mayawng hpe jahpring shatsup na matu, yu hkrat wa ai wa gaw, sumsing lamu nlang hte a ntsa de lai lung wa ai wa nan, rai nga ai. 11 Hkristu a hkum hpe shagrin jat wa u ga, gunhpai ang ai bungli a matu, chyoi pra ai ni hpe shakup shatsup na, 12 shi gaw nkau mi hpe kasa, nkau mi hpe myihtoi, nkau mi hpe kabu gara shiga hkaw hkawm ai ni, nkau mi hpe hpung up hte sara di nna, jaw da shajang mu ai. 13 anhte nga manga hte gaw, dai makam masham a myit hkrum na lam hte, Karai Kasang a Kasha a chye chyang ai hpunda hpe dep lu nna, hkum tsup re ai masha ngu ai, Hkristu hte shadawn ram ai gawng shing-yan a lanang hkap lu hkra, rai na rai nga ai: 14 shingrai anhte ma chyangai naw n rai nga na hte, masha a n hkru n hkra ai, maw da ai hkalem hkalau ai hpaji hte maren, nbung ngu ai sharin shga ai lam shagu gadau gadap ai hte nhting nhtang n hkrum ai sha, 15 tsawra ai myit hte tengman ai ga hpe tsun nga yang, Hkristu ngu ai baw hte lam shagu hta kaba rawt wa na ga ai: 16 shi kaw nna, dai hkum ting gaw, hkrihkraw lamyi ni yawng lanawn ya ai a marang e, matut manoi htuk nna shachyaw nga let, daw shan ni langai hte langai shachyen lu ai hte maren, tsawra ai hta de shatup hkra, tinang kung kaba wa ai lam, dai hkum hkrang gaw shabyin wu ai. 17 Dai rai nna, dai Madu a ahkang hte ndai lam ngai tsun nna sakse hkam nngai: maigan masha ni gaw tinang a kaman lila myit hte hkawm nga ma ai hte maren, nanhte gaw naw hkum hkawm nga myit: 18 shanhte a nyan sin mak nga nna, shanhte hta rawng ai n chye n chyang ai myit hte, shanhte a kraw lawang ja nga malu ai majaw, Karai Kasang hte seng ai asak a shinggan de, shanhte rai nga ma ai: 19 shanhte gaw hpa hkrit kaya ngu ai n dum ai majaw, nammak lawhpa ai hta n san n seng ai bungli amyu myu shachyen hkra, tinang a hkum hpe ngang kayut ai hta, nawng kau mu ai. 20 Nanhte mahtang Hkristu a lam hpe shingrai sharin la yu manit dai n rai: 21 nanhte shi a ga na yu nna, dai tengman ai ga Yesu hta e nga nga ai hte maren, shi hta e sharin achyin hkam myit taw gaw, 22 shawng na nanhte a arawn alai hte maren, marin marit nna hkalem hkalau ai hte hten mat wa ai gawng shing-yan dingsa hpe raw kau nhtawm; 23 nanhte a myit mang na wenyi hta ningnan wa tai nna, 24 tengman ai hte seng ai dinghpring ai hte chyoi pra re ai Karai Kasang hpan tawn da ai gawng shing-yan ningnan hpe dagraw lu myit ga, nanhte sharin achyin hkam la manit dai, rai nga ai. 25 Dai rai nna, masu matsa ga hpe kau da nhtawm, langai hte langai tinang a htingbu wa hpe tengman ai ga sha tsun nga mu: kaning rai nme law, anhte shada da a daw shan ni rai nga ga ai. 26 Myit kahtet timung, yubak hkum galaw myit: nanhte myit naw kahtet bu nga yang, jan hkum shadu myit: 27 nat hpe mung shang shara hkum yen mu. 28 Lagu ga ai wa gaw, bai hkum lagu u ga; kadawn nga ai ni hpe karan jaw lu hkra, tinang a lata hte mai kaja ai shachyen let, magam bungli galaw nga u ga. 29 N se ai ga hkaw mi mung nanhte a n-gup na hkum pru u ga; madat mara nga ai ni a matu akyu byin hkra, ra nga ai hte maren shadaw shalan na matu, mai kaja ai ga sha a tsun na mu. 30 Hkyehkrang la hkrum ai nhtoi du hkra, nanhte hpe dazik shakap ai Karai Kasang a Chyoi pra ai Wenyi hpe, myit hkum shayawn myit. 31 Myit gadun ai, sindawng katawt ai, masin pawt ai, ga law ga la ai, shatan nhkan ai amyu myu hte, n hkru n hkra ai yawng hte nawng, nanhte hte tsan gang nga u ga. 32 Nanhte shada da mai kaja ai, matsan dum ai myit madun hkat nna, Karai Kasang gaw Hkristu hta e nanhte a mara raw dat kau ya manit dai hte maren, nanhte mung shada da a mara raw dat kau nga mu.

Ehpesu 5

5:1 Shingrai, tsawra nga ai kashu kasha hte maren, Karai Kasang a samnang ai ni tai nga mu. 2 Hkristu gaw nanhte hpe tsawra ai hte, manam pyaw ai bat tai hkra, Karai Kasang kaw lahkan lahka hte shagu hkungga, shi hkum hpe di nna, nanhte a matu mara nawng kau ya ai hte maren, nanhte mung tsawra ai hta a hkawm nga mu. 3 Hpye ai amu, n san n seng ai yawng hte hte, nammak lawhpa ai hpe nanhte hta e ga hte pyi n shamying u ga; dai lam gaw chyoi pra ai ni a matu sut nga ai: 4 n sun n ang re ai ga kinsha, nlem ai ga, shatu shakra ai ga mung n tsun ai sha, shakawn kungdawn nga u ga. 5 Kaning rai nme law, hpye ai wa, n san n seng ai wa hte, gawngngu sumla nawku ai wa rai nga ai nammak lawhpa ai wa kadai raitimung, Hkristu yan Karai Kasang a mungdan hta sali wunli hpe n lu nga ai gaw, nanhte nan chye na myit dai. 6 Kadai raitimung, kaman lila ga hte nanhte hpe myit hkum shadam myit ga; kaning rai nme law, dai lam nhkan e Karai Kasang a pawt sindawng ai gaw, n madat mara ai ni a ntsa e du ra ai. 7 Dai re ai majaw shanhte hta hkum sharau nga myit; 8 kaning rai nme law, nanhte shawng e nsin mak rai nga myit timung, ya gaw dai Madu hta e, nhtoi rai nga myit dai. 9 Dai Madu a sharawng awng ai lam hpa rai nga ai gaw, dinglik yu nga let, nhtoi a kashu kasha ni zawn, a hkawm nga mu. 10 Kaning rai nme law, nhtoi a asi gaw mai kaja ai, dinghpring ai hte tengman ai hkrai hkrai rai nga ai. 11 Asi n lawm ai nsin a bungli ni hte nanhte n mazum ai sha n-ga, dai hte hpe kajet kau mu: 12 kaning rai nme law, shanhte mayun mayaw e galaw ai gaw, ga hte tsun na pyi kaya kahpa rai nga ai. 13 Yawng mayawng hte gaw kajet kau hkrum yang, nhtoi e shadawng dan nga ai; kaning rai nme law, shadawng da sai nga manga hte gaw, nhtoi rai nga ai. 14 Dai majaw, Yup pyaw ai wa e, rawt u, Si ai kaw na bai rawt wa nu; Shaloi Hkristu nang hpe jahtoi na ra ai, nga nna tsun ai. 15 Dai re ai majaw, nanhte kaning rai hkawm nga myit dai gaw, azin ayang yu nga mu: hpaji n rawng ai ni zawn n rai, hpaji rawng ai ni zawn hkawm nga mu: 16 ya na nhtoi ladaw ni gaw n shawp nga ai majaw, dai ahkying aten hpe lata mari la mu. 17 Dai rai nne, angawk angak re ai ni hkum tai myit; dai Madu a myit ra ai lam, hpa rai nga ai gaw, chye ginhka nga mu. 18 Chyaru hkum nang mu: dai hta e kabring kabrawng sha rai nga ai: Wenyi hte hpring tsup nga mu: 19 shakawn kungdawn ga, mahkawn mangoi ga, Wenyi hte seng ai laka ga hte shada da tsun nga let, nanhte a kraw lawang hta dai Madu hpe mahkawn mangoi nga nna, mahku shangwi nga mu: 20 anhte a Madu Yesu Hkristu a amying nsang gang nna, Kawa Karai Kasang hpe tutnawng e lam shagu a matu, a shakawn kungdawn nga mu: 21 Hkristu hpe hkrit kamyin ai hte nanhte shada da a npu e a taw nga mu. 22 Numsha ni e, dai Madu hpe daw nga ai zawn, tinang madu wa a hkang ai hku hkan nga mu: 23 kaning rai nme law, Hkristu gaw dai Hpung a baw rai nga ai zawn, dai madu wa mung madu jan a baw rai nga ai: Hkristu shi hkum nan dai hkum hkrang a Hkyehkrang la ai Madu rai nga ai. 24 Dai Hpung gaw Hkristu a npu e taw nga ai hte maren, madu jan ni mung lam shagu hta e madu wa ni hkang ai hku hkan nga u ga. 25 La ni e, Hkristu gaw dai Hpung hpe tsawra nna, shi hkum hpe nan de a matu ap kau ya wu ai hte maren, nanhte a madu jan ni hpe tsawra nga mu. 26 Dai Hpung hpe hka hte mungga e hka shin kau ai hte jasan jaseng kau nhtawm, dai hpe shachyoi shapra nna, agang chyalang hte kapum kapam re ai hpa mung n lawm ai sha, 27 chyoi pra ai hte mara n rawng ai hpung shingkang rawng ai Hpung hpe shi hkum nan a matu mara ap tawn da na, de a matu shi hkum nan hpe ap kau wu ai. 28 Dai hte maren, madu wa ni gaw tinang hkum hpe tsawra nga ai zawn, tinang a madu jan ni hpe tsawra nga na, sut nga ai. Tinang a madu jan hpe tsawra ai wa gaw, tinang hkum hpe nan tsawra nga ai. 29 Kaning rai nme law, kadai raitimung tinang hkum hpe ndawng n yawt ai gaw n nga ai hta n-ga, dai hkum hpe bau maka nna lanu lahku ya wu ai: 30 Hkristu gaw dai Hpung hpe dai hte maren galaw ya wu ai. rai nna, anhte gaw shi hkum hkrang a daw shan ni rai nga ga ai. 31 Dai lam majaw lasha gaw shi a kanu kawa hpe kau da nhtawm, shi a madu jan hte kanawn manoi nga na rai nna, shan lahkawng gaw hkumshan langai sha tai lu na mara ai. 32 Ndai lam gaw sung htum ai lam kaba rai nga ai: shing nga ai gaw Hkristu a lam hte dai Hpung a lam hpe ngai tsun nga nngai. 33 Raitimung, nanhte langai hte langai tinang hkum hpe tsawra ai hte maren tinang a madu jan hpe tsawra nga u ga: madu jan mung tinang a madu wa hpe hkrit hkungga nga u ga.

Ehpesu 6

6:1 Ma ni e, nanhte a kanu yan kawa hpe dai Madu hta madat mara nga mu: dai gaw ging dan ai lam rai nga ai. 2 Nang ngamu ngamai ai hkrum nna, na a nhtoi gaw dai mungdan hta galu kaba nga lit ga, na nnu yan nwa hpe hkungga lara di mu, 3 nga nna htet da ai ga gaw, ga ndat lawm ai, shawng na htet da ai ga rai nga ai. 4 Nanhte mung, nu wa ni e, nanhte a kasha ni hpe masin hkum shapawt myit: dai Madu a sharin achyin ai hte daru shadum ai lam hta, shanhte hpe bau maka nga mu. 5 Mayam ni e, Hkristu hpe madat mara ya ai zawn, hkrit gari nna myit mang langai sha hte, nanhte a mungkan madu ni hpe madat mara nga mu. 6 Myiman pa mayu ai hte masha a myit shapyaw na zawn n rai; Hkristu a mayam ni zawn, myit masin ting hte Karai Kasang a ra ai hku galaw nga mu: 7 masha a matu zawn n rai, dai madu a matu zawn sharawng awng ai myit hte, amu bungli galaw nga mu. 8 Mayam raitimung, shanglawt raitimung, mai kaja ai bungli hpa raitimung galaw a yang gaw, dai Madu gaw, langai hte langai hte hpe jaw htang na ru ai, chye nga mu. 9 Nanhte mung, madu ni e, shanhte hpe dai hte maren galaw nga nna, daru kajet ai lam hpe sharang kau mu: shanhte hte nanhte a Madu gaw sumsing lamu e adung nga ai rai nna, shi a man e myiman tau yu shara n nga ai gaw, adum nga mu. 10 Ya kaw nna dai Madu hte, shi a n-gun marai a atsam hta e, n-gun lapyin rawng nga mu. 11 Nat e maw ai hkalem hkalau ai lam hte hpe nanhte manga kau lu myit ga, Karai Kasang jaw da ai hpyen hking nlang hte hpe bu hpun dagraw nga mu. 12 Kaning rai nme law, anhte a gasat gala ai gaw, asai yan ashan hpe n re ai sha, du agyi ni hpe mung, ahkang aya lu ai ni hpe mung, ndai sin mak nga ai mungkan a hpung dagu rawng ai ni hpe mung, sumsing lamu lahta tang e nga ai. n hkru n hkra ai nat a luksuk ni hpe mung, gasat gala nga ga ai. 13 Dai re ai majaw, n hkru n hkra ai nhtoi hta nanhte ban hkum kau lu nna, lam shagu hte hpe shngut nhtawm, lahpran tsap nga lu myit ga, Karai Kasang a hpyen hking nlang hte hpe lang dagraw nga mu. 14 Dai rai nna, nanhte a nshang hpe tengman ai hte kyit nna, dinghpring ngu ai sinda magap hpe dagap nhtawm, 15 ngwi pyaw shabyin ai kabu gara shiga hkaw tsun na jin jin rai nga u ga, lagaw hta kyepdin din let, lahpran tsap nga mu. 16 Dai hta n-ga, n hkru n hkra ai wa a wan pala nlang hte hpe sat dang kau lu na, makam masham ngu ai n-gang hpe lang kahtap nga mu. 17 Hkyehkrang la ngu ai hpri gup chyawp hpe chyawp nna, Karai Kasang a mungga ngu ai Wenyi a ntawng nhtu hpe, a hpye nga mu. 18 Ahkying ladaw shagu hte hta e, akyu hpyi nna hpyi nem ai amyu myu hte, dai Wenyi hta hpyi nga nna, a maja nga let chyoi pra ai ni nlang hte a matu mara n-gun n yaw ai sha, tut tut akyu a hpyi nga mu. 19 Dai kabu gara shiga a jaw e, hkang hkyihkyang hte hkangda ai kasa ngai rai nga timung, dai kabu gara shiga a sung htum ai lam hpe nden ja ai myit hte shana ya lu nna, 20 ngai mai tsun ai hte maren n hkrit n kang ai sha tsun dan lu hkra, nye a n-gup hpaw ai shaloi, tsun dan lu na mung sumtu, ngai hpe jaw ya u ga, nye a matu mung akyu a hpyi nga mu. 21 Ngai hta byin ai hte, ngai kaning rai nga nga ai gaw, nanhte mung chye lu hkra, dai madu hta kangka re ai shingdep shangtau rai nga ai, tsawra ai hpunau Tuhkiku gaw, lam shagu nanhte hpe shana ya na marin dai: 22 nanhte gaw anhte a lam chye lu nna, nanhte a myit masin hpe shangwi shapyaw ai hkrum lu malit ga, ndai lam a majaw nan, ngai shi hpe nanhte hpang de shangun dat se ai. 23 Kawa Karai Kasang hte, Madu Yesu Hkristu kaw nna, ngwi pyaw ai hte makam masham hta lawm ai tsawra ai gaw, hpunau ni kaw anga nga u ga. 24 Anhte a Madu Yesu Hkristu hpe n sawt ai myit hte tsawra ai ni nlang hte hta, akyu ara rai nga u ga law.

Hpilipi 1

1:1 Hkristu a mayam rai nga ai Pawlu yan Timohti gaw, Hpilipi mare e nga nga ai, Hkristu Yesu hta e chyoi pra ai ni nlang hte hte, hpung up ni hte hpungtau ni hpe nawng, ga shana dat ga ai. 2 Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e anga nga malit ga law. 3 Shawng nnan a nhtoi kaw nna ya du hkra, dai kabu gara shiga hta nanhte a kanawn mazum ai lam majaw, 4 nanhte hpe dum shagu e nye a Karai Kasang hpe ngai shakawn kungdawn nna, 5 nye a akyu hpyi mahpyi hta, nanhte mahkra a matu mara galoi mung kabu gara ai myit hte akyu hpyi shachyen nga nngai. 6 Dai hta kaga, nanhte hta e mai kaja ai amu galaw hpang ai wa gaw, Yesu Hkristu a nhtoi du ai du hkra dai hpe shatsup shatup na ra ai, ngai myit mu nga nngai. 7 Nye a bawngdung ai hta raitimung, dai kabu gara shiga a lam awlaw nna shagrin da ai hta raitimung, nanhte nlang hte gaw ngai hte rau chyeju jawm hkam la ai ni rai nga myit dai majaw, nanhte mahkra a lam ngai ning rai myit nga na gaw, ging dan nga ai rai nna, nye a myit masin hta e ngai nanhte hpe sharawng nga nngai. 8 Kaning rai nme law, Hkristu Yesu a n-gaw nwai ai hta ngai nanhte nlang hte hpe gade wa nra la nga nngai gaw, Karai Kasang nye a sakse rai nga ai. 9 Dai hta kaga, nanhte lam kaga ga hpe chye ginhka lu nna, Hkristu a nhtoi hta sanseng ai hte mara n rawng lu ai sha, 10 Yesu Hkristu a marang e, Karai Kasang a hpung shingkang hte mahkawn mangoi ai lam a matu rai nga ai dinghpring ai a asi hte hpring chyat lu myit ga, 11 nanhte a tsawra ai myit gaw chye chyang ai hte myit leng ai yawng hta grau nna jat htam wa na matu ngai a hpyi nga nngai. 12 Bai, hpunau ni e, ngai hta byin ai lam hte gaw, dai kabu gara shiga naw grawng wa na matu byin wa ai rai nga ai, nanhte chye nga na ngai ra nga nngai. 13 Dai htingnu na sin langa ting hte kaga, mahkra ni a man e, Hkristu a jaw e ngai bawngdung ai lam, dan leng wa sai: 14 dai hta kaga, ngai bawngdung ai a marang e, dai Madu hta e hpunau ni malaw maga gaw, myit maku rawt wa ai hte, Karai Kasang a mungga hpe n hkrit n kang ai sha tsun dan na, grau nna gwi ma ai. 15 Gaja wa nkau mi gaw, manawn masham nna gasat gala ai hte Hkristu a lam hkaw dan nga ma ai; nkau mi gaw sharawng awng ai myit hte hkaw dan ma ai. 16 Ngai gaw dai kabu gara shiga hpe maga na matu, san da ai wa rai nga nngai hpe, shanhte chye nga ma ai rai nna, tsawra ai myit hte hkaw dan ma ai: 17 gale mahtang gaw, sanseng ai myit hte n re ai sha, nye a bawngdung ai lam hta tsin-yam tsindam naw jat ya na myit nga ma ai rai nna, zumbru zumbra re ai hte Hkristu a lam kajai gara nga ma ai. 18 Dai rai taw, kaning law? Sawt ai myit hte raitimung, tengman ai myit hte raitimung, lam shagu hta e Hkristu gaw kajai gara nga ai rai nna, dai hta e ngai kabu nga nngai. gaja wa, naw a kabu nga na nngai: 19 kaning rai nme law, nye a myit ndawt ai hte myit mada nga nngai hte maren, hpa lam hta mung ngai kaya kahpa n hkrum ai sha, shawoi na hte maren ya e pyi, hkrung timung, si timung, nden ja ai myit ting hte Hkristu gaw nye a hkum hkrang hta shagrau ai hkrum lu na hpe, 20 nanhte a akyu hpyi ai hte Yesu Hkristu a Wenyi a lanawn ya ai a marang e, ndai lam mung nye a hkyehkrang la ai lam tai na re ai, ngai chye nga nngai. 21 Kaning rai nme law, ngai asak hkrung ai gaw Hkristu nan rai nga ai, si wa yang mung amyat rai nga ai. 22 Raitimung, nye a hkum hkrang hta naw hkrung nga yang, nye bungli a asi si wa yang gaw, gara mahtang lata la na ngai n chye nngai. 23 Lam lahkawng a hpat wat e ngai rai nga nngai: lai nna Hkristu hte rau nga na, ngai ra nga nngai: dai gaw grau kaja nga ai; 24 raitimung, ndai hkum hkrang hta ngai naw nga nga na gaw nanhte a matu mara grau akyu rai nga ai. 25 Shingrai ngai myit mu nga nngai rai nna, nanhte hpang de ngai bai du lu na nngai majaw, nye a marang e nanhte a gumrawng shara Hkristu Yesu hta e grau nna jat wa lu u ga, 26 ngai naw anga nga nna, nanhte a makam masham jat wa ai hte kabu gara lam a jaw e, nanhte nlang hte rau nga nga na nngai, ngai chye nga nngai. 27 Dai hta n-ga, nanhte a arawn alai gaw Hkristu a kabu gara shiga a lam hte ging dan nga u ga: shingrai jang, ngai du nna nanhte hpe hkrum lu raitimung, naw tsan gang nga raitimung, Wenyi langai sha hte nanhte lahpran tsap nga nna, myit masin langai sha hte dai kabu gara shiga a makam masham a lam hkying hkat nga myit dai gaw, ngai nanhte a lam na lu na nngai: 28 dai hta kaga, nanhte gaw hpyen ni hpe hpa mung n hkrit n kang nga myit dai rai nna, dai gaw shanhte a matu hten byak wa na kumla rai wa timung, nanhte a matu mara gaw Karai Kasang kaw na hkyehkrang la na kumla rai wa sai; 29 kaning rai nme law, Hkristu hta e kamsham lu na chyeju sha n rai, shi a matu mara nni nkri hkrum na chyeju hpe mung, nanhte hkam la manit dai; 30 dai gaw moi shawng e ngai hta e mu lu nna, ya e pyi nye a lam na yu myit dai, ngai hkrum ai gasat gala ai lam hte langai sha rai nga ai.

Hpilipi 2

2:1 Dai re ai majaw, Hkristu hta e shadum shahprang na lam, tsawra ai myit hte shangwi shapyaw na lam, wenyi a kanawn mazum ai lam hte, n-gaw nwai nna matsan dum ai lam lama ma nga a yang gaw, 2 nanhte myit hkrum mang hkrum langai sha, tsawra ai myit langai sha, myit masin langai sha hte myit mang langai sha e hkan nang nga myit dai hta, nye a kabu gara lam hpe shadik shatup nga mu. 3 Ga law ga la ai, kaman lila grang ai hte hpa mung n galaw ai sha, myit nem nga let, langai hte langai tinang a hkum hta manang wa hpe shagrau sha-a nga mu. 4 Langai hte langai tinang hte seng ai sha n rai, masha gale hte seng ai hpe mung, myit yu nga mu ga. 5 Hkristu Yesu hta e rawng ai myit nan, nanhte hta e mung rawng nga myit ga: 6 shi gaw Karai Kasang a ahpraw nsam hta pra nga timung, Karai Kasang hte maren rai nga na shingjawng kashun ai hku n nawn ai sha, 7 tinang dai shagawm kau nna, mayam a ahpraw nsam dagraw let, shinggyim masha hte bung hkra tai wa sai: 8 shingrai, masha a gawng shing-yan lang let shi hkum hpe shi shagrit kau nna, si ai du hkra madat mara nga ai, gaja wa, wudang hta si ai du hkra madat mara nga ai. 9 Dai re ai majaw, sumsing lamu lahta tang na dinghta tsang na hte katsan ga na lahput yawng mayawng hte gaw, Yesu a mying nsang hte hput di nna, 10 Yesu Hkristu gaw Madu rai nga ai, nga nna shinglet yawng mayawng hte gaw, Kawa Karai Kasang a hpung shingkang a matu mara kajai gumhkawng nga mu ga, 11 Karai Kasang gaw shi hpe shagrau nna, amying shingteng yawng mayawng hta, grau ai amying nsang jaw da wu ai, rai nga ai. 12 Dai rai nna, ngai tsaw ngai ra ai ni e, nanhte galoi mung madat mara myit dai hte maren, ngai rau nga nga yang na zawn sha n re ai sha, naw tsan gang nga yang grau nna, nanhte a hkyehkrang la ai lam hpe hkrit gari ai hte shachyen shatsup nga mu: 13 kaning rai nme law, galaw mayu ai myit raitimung, galaw lu ai lam raitimung, Karai Kasang gaw shi a sharawng awng ai a marang e, nanhte hta shachyen da myit dai. 14 Hpa lam hpe mung, put ngun nna ndang kalang hkat ai hte, hkum galaw mu: 15 shingrai yang mara n rawng nna yubak n kap ai sha, ndai ja la nna myit magaw ai prat a ka-ang e agang chyalang n re ai Karai Kasang a kashu kasha ni nanhte tai wa ai hte, 16 asak hkrung ya ai mungga hpe lang nga let, shanhte a ka-ang e mungkan ga a nhtoi zawn nanhte htoi tu nga na myit dai: dai hta kaga, ngai mung kaman lila n gat shingjawng ai hte, kaman lila amu bungli n galaw nngai hpe tau yu yang, Hkristu a nhtoi hta kabu gumrawng shara ngai nga na nngai. 17 Dai hta n-ga nanhte a makam masham a hkungga hte dawjau ai a ntsa e, ngai hpe dumhpung zawn ru jaw ma timung, ngai kabu nga nna, nanhte mahkra hte rau a kabu nga nngai. 18 Dai hte maren nanhte mung kabu nga nna, ngai hte rau a kabu nga mu. 19 Nanhte a lam chye lu yang, ngai mung myit pyaw nga lu n ga, nanhte hpang de Timohti hpe alawan shangun dat na, dai Madu Yesu hta e ngai myit mada nga nngai. 20 Kaning rai nme law, ngai hte myit hkrum nna, shi zawn nanhte a lam hpe htep lahti tsang ai masha kaga, langai mi mung ngai n lu nngai. 21 Yawng hte gaw Hkristu Yesu hte seng ai hpe n re ai sha, tinang hte seng ai hpe sha tam nga ma ai. 22 Shi chyawm gaw, kasha gaw kawa hpe shadaw ai zawn, dai kabu gara shiga a lam hta ngai hte rau shakut sharang nga ai majaw, shi a kangka re ai hpe nanhte chye nga myit dai. 23 Dai rai nna ngai hta kaning rai na ra ai hpe ngai chye ai shaloi jang, dai wa hpe shangun dat na, ngai myit mada nga nngai. 24 Dai hta n-ga, gade wa n na yang, ngai hkum nan sa du na, ngu nna dai Madu hta e myit kam nga nngai. 25 Bai, nye a hpunau wa, shingdep shingtau wa hte hpyen manang wa ngu ai, nanhte a kasa hte ngai ra ai hku hpajang ai wa, Epahprodi hpe, nanhte hpang de shangun dat na mai nga ai, ngai myit ngut da we ai. 26 Kaning rai nme law, nanhte nlang hte hpe sa hkrum lu na, shi nachying myit ndawt nga ai hte, shi machyi ai hpe nanhte na yu hkrup myit dai majaw, shi grai wa myit ru myit tsang nga ai. 27 Gaja wa shi gaw ganoi noi si hkra machyi kau nu ai; raitimung, Karai Kasang gaw shi hpe matsan dum nga ai; shi hpe sha n rai, ngai gaw yawnhkyen ai htap mi hte htap mi n hkrum u ga, ngai hpe mung matsan dum nga ai. 28 Dai re ai majaw, nanhte shi hpe bai hkrum lu yang, nanhte kabu nga lu myit dai hte, nye a yawnhkyen ai mung yawm mat wa u ga, ngai shi hpe tin shapun shangun dat we ai. 29 Dai rai nna kabu gara myit ting hte shi hpe hkap hkalum la nna, shing re ai ni hpe hkungga lara di mu. 30 Kaning rai nme law, nanhte ngai hpe dawjau ai lam hta naw ngam nga ai hpe shatup shatsup lu na matu, shi a asak hpe pyi shi shanaw kau nna, dai Madu a magam bungli majaw, si ai ganoi noi hkrum nga ai.

Hpilipi 3

3:1 Dai hta kaga, nye a hpunau ni e, dai Madu hta kabu gara nga mu, Nanhte hpe lam langai sha bai ka dat dat rai na, nye a matu hki ba na lam n nga ai sha, nanhte a matu akyu byin nga ai. 2 Gwi ni hpe makran nga mu; n hkru n nkra ai bungli galaw ai ni hpe makran nga mu; matu gadoi hpyak ai ni hpe makran nga mu. 3 Anhte mahtang, Karai Kasang a Wenyi hte nawku nna, Hkristu Yesu hta gumrawng nga ai hte, hkumshan hta e n shamyet n shanat ai ni gaw, matu gadoi hkam ai ni majing rai nga ga ai: 4 ngai chyawm gaw hkumshan hta pyi shamyet shanat na lam lu ang na nngai. Masha kaga gaw dai hkumshan hta shamyet shanat na lam lu nngai, nga nna myit a yang gaw, ngai grau nna lu ang nngai. 5 Ngai gaw matsat ya nhtoi e matu gadoi hkam nngai; Israela amyu, Ben-yamin a aru arat hte, Hebre masha hta na Hebre majing, rai nga nngai: 6 Jep ai tara tau yu yang ngai Hparishe rai nga nngai: ngai shakut sharang ai lam tau yu yang, dai Hpung hpe zingri zingrat nngai; jep ai tara na dinghpring ai lam tau yu yang, ngai mara n kap nngai. 7 Raitimung nye a amyat ngu ai yawng hte gaw, Hkristu a jaw e sum mat ai lam rai nga ai, ngai nawn nga nngai. 8 Gaja wa nye a Madu Hkristu Yesu a chye chyang ai lam a chyahtum chyalai re ai a jaw e, yawng mayawng sum mat ai lam a rai nga ai, ngai nawn nga nngai. 9 Dai hta n-ga Hkristu hpe ngai lum la lu nna, shi hta grin nga lu na hte, jep ai tara na nye a dinghpring ai n rawng ai sha, Hkristu a makam masham a marang e kamsham ai hte lu la ai Karai Kasang a dinghpring ai rawng nga let, 10 si mat ai ni a bai rawt wa na lam hta ngai mung dep lu hkra, shi hte shi a bai rawt ai lam a atsam chye lu nna, shi a nni nkri hkrum ai hta kanawn lu na hte, shi a si hkam ai hpe hkan dagraw lu u ga, 11 yawng mayawng hte hpe ngai sum kau nna, shanut shanaw zawn nawn nga nngai. 12 Shingrai tsun yang, ngai ya e pyi lu la ni ai hte, ya e pyi hkum tsup rai nga ai hpe, ngai n tsun nngai; raitimung, dai akyu a lam a matu Hkristu Yesu ngai hpe hkap la ni ai hte maren, dai hpe ngai nan hkap la lu u ga, gat shachyut nngai. 13 Hpunau ni e, dai hpe ngai hkap la lu ni ai, ngai hkum dai n myit nngai: raitimung, lam langai sha ngai hkan nngai; 14 hpang maga na arai hte hpe malap kau nna, man ang ai arai ni hpe chyan la let, Hkristu Yesu hta e Karai Kasang a grau htum ai shaga la ai lam ngu ai kumhpa hpe lu la na, bandung shadaw du hkra ngai gat shachyut nngai. 15 Dai re ai majaw, hkum tsup nga ai ni anhte nlang hte gaw, dai lam myit nga ga; dai hta kaga, lam langai ngai hta nanhte shai nga myit yang gaw, Karai Kasang gaw dai hpe pyi nanhte hpe madun dan na marin dai: 16 raitimung, ya dep madep hte hte maren, dai arawn alai hta anhte hkawm nga ga. 17 Hpunau ni e, nanhte hpawm nna nye a samnang ai ni tai nga mu; anhte gaw nanhte a ningli tai ga ai hte maren, dai zawn hkan nang ai ni hpe yu matsing nga mu. 18 Kaning rai nme law, shawng e ngai nanhte hpe law law lang tsun dan nna, ya e pyi hkrap let nanhte hpe tsun dan nga nngai hte maren, Hkristu a wudang hpe ndawng n yawt ai ni law law wa brang hkawm nga ma ai. 19 Dai ni a chyahtum ai gaw, hten byak ai rai nga malu ai; dai ni a Karai Kasang gaw, tinang a kan rai nga ai hte, tinang a kaya kahpa hta shanhte a gumrawng shara rai nga ma ai; dinghta ga na arai hpe hkrai shanhte myit tsang nga ma ai. 20 Anhte a buga chyawm gaw, sumsing lamu hta e rai nga ai; dai yang na Madu Yesu Hkristu ngu ai Hkyehkrang la ai wa hpe, anhte a la nga ga ai. 21 Shi gaw arai yawng mayawng hpe tinang a npu e tawn da lu ai atsam shachyen nga ai hte maren, anhte a grit nga ai hkum hkrang hpe ningnan galai nna, shi a hpung shingkang rawng ai hkum hkrang hte bung hkra, shachyaw jahtap na ra ai.

Hpilipi 4

4:1 Dai rai nna, ngai tsawra ai hte sharawng awng nna, nye a kabu gara shara hte janmau rai nga ai, hpunau ni e, dai Madu hta shingrai lahpran tsap nga mu, ngai tsawra ai ni e. 2 Dai Madu hta e myit langai sha rai nga mu ga, Eodia hpe ngai shadut jahkat nngai, Suntuki hpe mung shadut jahkat nngai. 3 Nye a nrum ntau majing e, dai num yan hpe hkap tau la na, ngai nang hpe mung hpyi nngai; shan gaw Klemen hte, asak jahpan laika hta tinang a amying lawm ai nye a shingdep shingtau shaje ni hte, dai kabu gara shiga hta, ngai hte rau bungli galaw ma ai. 4 Dai Madu hta tutnawng e kabu gara nga mu; bai ngai tsun nngai, kabu gara nga mu. 5 Masha yawng mayawng nanhte a sumnung ai myit hpe chye wa mu ga. Dai Madu gaw ni magang wa ra ai. 6 Hpa lam hta mung myit hkum ru hkum tsang myit; lam shagu hta akyu hpyi nna tawngban ai hte shakawn kungdawn let, nanhte a hpyi mahpyi hpe Karai Kasang kaw shana nga mu. 7 Shaloi chye chyang ai nyan yawng hta grau lai ai Karai Kasang a ngwi pyaw ai gaw, nanhte a myit masin hte nanhte a myit mang ai hpe, Hkristu Yesu hta e bau sin na ra ai. 8 Dai hta kaga, hpunau ni e, hpa tengman ai lam raitimung, hpa htuk htap re ai lam raitimung, hpa dinghpring ai lam raitimung, hpa sanseng ai lam raitimung, hpa sharawng awng ai lam raitimung, hpa sha-a ram ai lam raitimung, arawng re ai lam lama ma, shakawn kungdawn re ai lam lama rai nga yang gaw, dai lam hte hpe myit ada yu nga mu. 9 Ngai kaw e, nanhte sharin la nna hkap la ai hte, na yu nna mu yu ai lam hte hpe, hkan galaw nga mu: shaloi ngwi pyaw ai a npawt Karai Kasang gaw, nanhte hte rau anga nga na ra ai. 10 Ya e mung nanhte nye a lam bai rawt tsang wa nga myit dai majaw, ngai dai Madu hta nachying kabu nga nngai; shawng e mung nanhte myit tsang myit dai raitimung, nanhte rai lu na n tai myit dai. 11 Shingrai ngai tsun nngai gaw, kadawn nga nngai majaw, ngai tsun nngai n rai: kaning rai nme law, ngai hkrum mahkrum hta myit dik nga u ga, ngai sharin la nngai. 12 Shagrit kau ai hpe ngai chye nngai, n taw n tsang ai hpe mung ngai chye nngai: lam shagu hte shara shagu hta hkru kat na hte kawsi hpang gara ai raitimung, n taw n tsang ai hte kadawn hkrum na hpe raitimung, ngai sharin hkrup nngai; 13 ngai hpe n-gun lagaw shaja ya ai wa a majaw, lam shagu hpe ngai hkam lu nngai. 14 Raitimung, ngai nni nkri hkrum ai hta ngai hte kanawn mazum ai gaw, nanhte mai kaja ai hku galaw ai rai nga myit dai. 15 Dai hta kaga, Hpilipi masha ni e, dai kabu gara shiga hkaw hpang nna, Makedoni mung na pru wa yang, dai galaw jaw ai hte hkam la ai lam hta, nanhte sha n rai yang gaw, Hpung kaga langai mi mung ngai hte kanawn mazum nga ai n re ai hpe, nanhte nan chye nga myit dai: 16 ngai Htesaloni mare e nga nga yang pyi, nanhte lang lahkawng lang ngai ra ai lam a matu, shagun jaw mi ai. 17 Shingrai ngai tsun nngai gaw, kumhpaw kumhpa hpe ngai tam nngai n rai, nanhte a akyu a matu mara, law htam wa na asi hpe sha ngai tam nga nngai. 18 Ya e ngai hpa mung hkum ai hta n-ga, jan hkra lu nga nngai: manam pyaw ai bat hte Karai Kasang a matu htuk htap nna sharawng awng ram ai hkungga ngu ai, nanhte shagun dat ai, Epahprodi a lata na ngai lu la ai kumhpa majaw, ngai hpring chyat nga nngai. 19 Nye a Karai Kasang chyawm gaw, shi sutgan su nga ai hte maren, Hkristu Yesu hta e hpung shingkang hte nanhte a ra mara hte hpe jahkum shatsup na marin dai. 20 Ya, anhte a Wa ngu ai Karai Kasang kaw, htani htana prat dingsa e, hpung shingkang anga nga u ga law. Amen. 21 Hkristu Yesu hta e nga ai chyoi pra ai ni nlang hte hpe shakram dat mu. Ngai hte rau nga ai hpunau ni gaw nanhte hpe shakram dat ma ai. 22 Chyoi pra ai ni nlang hte gaw nanhte hpe shakram dat ma ai: Kehta hkawhkam a htingnu na ni gaw grau nna shakram dat ma ai. 23 Madu Yesu Hkristu a chyeju gaw, nanhte a wenyi hte rau anga nga u ga law.

Kolose 1

1:1 Karai Kasang myit ra ai a majaw Hkristu Yesu a kasa rai nga ai, ngai Pawlu hte hpunau Timohti gaw, Kolose mare na chyoi pra ai ni hte Hkristu hta kangka re ai hpunau ni kaw, ga shana dat ga ai. 2 Anhte a Wa Karai Kasang kaw na, chyeju hte ngwi pyaw ai gaw, nanhte hta e anga nga malit ga law, 3 Sumsing lamu hta e nanhte a matu mara mahkawng da ai myit mada ai a marang e, Hkristu Yesu hta nanhte a makam masham hte, chyoi pra ai ni nlang hte gaw tsawra ai myit rawng nga myit dai hpe, anhte na yu saga ai majaw, 4 nanhte a matu tutnawng e akyu hpyi nga yang, anhte a madu Yesu Hkristu a Kawa Karai Kasang hpe, anhte shakawn kungdawn ga ai: 5 dai myit mada ai a lam nanhte kaw du dep ai tengman ai kabu gara shiga a majaw, nanhte shawng e na yu manit dai. 6 Dai kabu gara shiga gaw, mungkan ting chyam hkra du dep wa ai hte, nanhte na yu nna Karai Kasang a chyeju hpe teng teng chye chyang lu ai nhtoi kaw nna, nanhte hta asi si nna kaba wa lu ai hte maren, mungkan ting e mung, asi si nna kaba wa lu ai. 7 Dai gaw anhte a tsawra ai shingdep shingtau wa Epahpra kaw nna nanhte sharin la manit dai hte maren rai nga ai; shi gaw Hkristu hta e anhte a matu mara kangka re ai bungli gunhpai ai wa rai nga ai rai nna, 8 dai Wenyi hta e nanhte a tsawra ai myit gaw, shi anhte hpe mung shadan dan ma ni ai. 9 Dai re ai majaw, anhte mung na yu lu ai shani kaw nna, nanhte a matu mara akyu hpyi na, n sim n sa rai nga ai hte: Wenyi hte seng ai hpaji byeng-ya hte nyan amyu myu hta shi a myit mang ai a chye chyang ai lam hte nanhte hpring chyat lu nna, 10 Karai Kasang a chye chyang ai lam hta asi si nna, kaba wa let tsawm pra ai lam shagu hte kaja ai bungli shagu hta dai Madu a lam tau yu nna ging dan let hkawm nga myit ga mung, 11 shi a hpung shingkang re ai n-gun nga ai hte maren, shakut sharang nna kabu gara ai hte myit galu kaba hkum tsup hkra, n-gun lagaw amyu myu hte shaja ya ai hkrum myit ga mung, 12 nhtoi hta rawng nga ai chyoi pra ai ni a sali wunli a daw mi dagraw lu myit ga, nanhte hpe ging dan shangun ai Kawa kaw shakawn kungdawn na raitimung, anhte hpyi nem nga ga ai. 13 Dai Kawa gaw, nsin a ahkang aya kaw na anhte hpe mawai la nna, shi a tsawra ai Kasha a mungdan hta shashawn mi ai: 14 dai Kasha hte nan htingrai htingrat na lam hte yubak raw dat na akyu anhte lu la sagaw ai. 15 Shi gaw myi e n mu lu ai Karai Kasang a hkrang bung sumla rai nga ai hte, hpan da ai arai yawng mayawng hta alat rai nga ai. 16 Kaning rai nme law, sumsing lamu hte ginding aga hta yawng mayawng hte gaw, mu lu ai hte n mu lu ai hte hpe raitimung, hpa hkawhkam tingnyang, munggyi aya, du aya hte ahkang aya hte hpe raitimung, shi hta e hpan tawn da nga sai; arai yawng mayawng gaw, shi a jaw e mung, shi a matu mara mung, hpan tawn da nga sai. 17 Shi gaw yawng mayawng a shawng na rai nga ai hte, yawng mayawng gaw shi a majaw grin nga ai. 18 Dai Hpung ngu ai hkum hkrang a baw, shi rai nga ai. Shi nan lam shagu hta grau ai nhtung nhka tai wa u ga, shi gaw npawt nhpang hte si mat ai ni kaw na alat ningshawng rai nga ai. 19 Kaning rai nme law, shi hta e hkum dinghkum rawng nga u ga, Kawa gaw sharawng awng nga ai rai nna, 20 shi a wudang na hkaw ai asai hte mahku mara shatai let, shi a lata e yawng hte hpe shi hkum hte htinglu htinglai ya nga ai: rai sa, sumsing lamu e nga ai hte hpe raitimung, ginding aga e nga ai hte hpe raitimung, shi a lata hte htinglu htinglai ya nga ai. 21 Nanhte mung shawng e tsasam re ai hte, nanhte a n hkru n hkra ai bungli majaw, myit mang hte ndawng n yawt ai ni rai nga myit dai raitimung, sumsing lamu a npu e hpan da mada hte hpe hkaw tsun dan nna, nanhte na yu ai kabu gara shiga a myit mada ai hta n htak mat ai sha, 22 dai makam masham hta nga nga nna, de a npawt manat let da hpran nga myit yang gaw, chyoi pra nna agang chyalang n kap ai hte mara n rawng ai ni hpe, shi a man e shashawn myit ga, 23 shi a si hkam ai a marang e, shi a hkum hkrang na ashan hta e shi ya e nanhte hpe htinglu htinglai ya manit dai: dai kabu gara shiga a gunhpai ai wa ngai Pawlu nan tai wa ni ai. 24 Ya chyawm gaw nanhte a matu mara ngai hkrum ai tsinyam tsindam hta ngai kabu nga ai hte, dai Hpung ngu ai Hkristu a hkum hkrang a matu mara, shi a naw ngam nga ai nni nkri hpe nye a hkumshan hta e ngai jahkum shatsup nga nngai. 25 Moi chyaloi nhkoi prat mi hte prat mi makoi magap da ai sung htum ai lam ngu ai Karai Kasang a mungga hpe jahkum shatsup nga u ga. 26 Karai Kasang gaw nanhte a matu mara ngai hpe jaw da ai aya hte maren, dai Hpung a amu gunhpai ai wa, ngai tai nga nngai. 27 Dai sung htum ai lam chyawm gaw, shi a chyoi pra ai ni hpe ya e shadan dan nu ai; ndai sung htum ai lam a hpung shingkang ngu ai sutgan gaw, maigan masha ni hta hpa rai nga ai gaw, shanhte hpe shadan dan u ga, Karai Kasang gaw ra nga ai: dai gaw, Hkristu gaw nanhte hta e nga ai hpe, hpung shingkang myit mada ai lam ngu ai, rai nga ai. 28 Masha shagu hte hpe Hkristu a man e hkum tsup ai hte shashawn lu u ga, shi a lam anhte hkaw dan nna masha shagu hpe shadum jahprang ai hte, masha shagu hpe hpaji byeng-ya amyu myu hte sharin shaga nga ga ai. 29 Shingrai byin lu hkra, ngai hta tsam mari shachyen ai wa a bungli galaw ai hku hte maren, ngai mung bungli galaw ai hta shaja nga nngai.

Kolose 2

2:1 Kaning rai nme law, nanhte hte Ladoki masha ni a matu mung, nye a myiman n mu yu ai ni yawng a matu mung, Hkristu ngu ai Karai Kasang a sung htum ai lam shanhte chye chyang lu hkra, tsawra ai myit hte makyit mahkai nna zai byeng-ya ting ngu ai hkum tsup re ai sutgan hpe lu la let, 2 shanhte a kraw lawang shangwi shapyaw ai hkrum lu mu ga, ngai nde wa shaja nga nngai, nanhte chye nga na, ngai ra nga nngai: 3 Hkristu hta e chyawm gaw hpaji byeng-ya hte chye chyang ai lam ngu ai sutgan yawng mayawng kyem da nga ai. 4 Kadai wa raitimung, shalen hkalau ai ga hte nanhte hpe n hkalau u ga, ngai ning nga tsun nga nngai. 5 Kaning rai nme law, ngai hkum shing-yan hte tsan gang nga raitimung, nye a Wenyi e ngai nanhte hte rau nga nga nna, nanhte a arawn alai hte Hkristu hta nanhte a makam masham agrin nga ai hpe mu yu nna kabu nga nngai. 6 Dai re ai majaw, nanhte gaw Madu Hkristu Yesu hpe hkap hkalum la ai hte maren, shi hta e a hkawm nga mu: 7 shi hta e ru jung nna gaw da nga ai hte, nanhte sharin achyin la ai hte maren, nanhte a makam masham hta ngang ngang hkang hkang rai nga let, dai hta e shakawn kungdawn ai hte law htam wa mu. 8 Hkristu a hkang ai tara hte n bung ai, mungkan ga a hkang ai tara hte masha a matsun maroi ga hkan ai zai byeng-ya hte lila rai nga ai hkalem hkalau ga hte, kadai mung nanhte hpe n hkalau lu u ga, sadi nga mu: 9 kaning rai nme law, Hkristu a gawng shingma hta Karai Wa a marai hkum sumhpa a shanu nga ai. 10 Shi hta e mung nanhte hkum tsup nga myit dai; shi gaw du aya lu ai hte ahkang aya lu ai ni yawng mayawng a baw rai nga ai. 11 Hkristu a matu gadoi hkam ai ngu ai, hkum hkrang na ashan hpe sharun kau ai, lata hte n re ai matu gadoi hkam ai hte, nanhte shi hta e hkam manit dai: 12 baptisma hkam ai lam hta nanhte shi hte rau lupwa nna, si mat ai ni kaw na shi hpe hkrung sharawt la ai Karai Kasang a shachyen ai hta, kamsham ai a marang e shi hte rau sharawt la ai mung hkrum manit dai. 13 Nanhte gaw tara tawt lai nna, nanhte a hkumshan a matu gadoi n hkam ai hte chyasi ni rai nga myit timung, shi gaw nanhte hpe shi hte rau jahkrung ya manit dai. 14 Anhte a shut hpyit ai yawng mayawng hte hpe shi raw dat kau ya nna, anhte hte nhtan shai ai htet da ai ga rawng ai, anhte hpe jeyang ai lata jahpan hpe katsut kau ya nu ai; wudang hta e dai hpe dit shakap let shi dai hpe yeng seng kau nu ai. 15 Du aya hte ahkang aya lu ai hte hpe htawk jahkrat kau nhtawm, shi dai ni hpe leng leng mahtan tawn nna, dai wudang hta shanhte a ntsa e padang nlaw da mu ai. 16 Dai re ai majaw, shahpa, luhpa hte, poi shani, shata praw shani hte laban nhtoi a lam, kadai mung nanhte hpe n jeyang nga u ga: 17 dai hte gaw du na ra ai lam a shingna hkrai rai nga ai; dai hkum hkrang chyawm gaw, Hkristu a rai nga ai. 18 Myit shagyip ngu na lam tam nna, lamu kasa hpe nawku na htung hte, kadai mung nanhte hpe n hkalem sha u ga; shing re ai wa gaw tinang a man ai mu ai hpe sha machyu nga ai hte, tinang hkumshan a myit hta kaman lila grang wa ai rai nna, dai baw hpe n manat nga ai; 19 dai baw hta nna, hkum ting gaw hkrihkraw lamyi hte lasa ni hta lanawn ya ai hkrum nna shachyaw nga let, Karai Kasang a kaba wa shangun ai hte kaba wa nga ai. 20 Ya, Hkristu hte rau mungkan ga na hkang ai tara hta nna nanhte si mat teng nga myit yang gaw, masha a htet da ai ga hte sharin shaga ai ga hte maren, 21 Hkum jum, hkum chyim, hkum hkra myit, nga nna mungkan ga e naw pra nga ai zawn, hpa rai naw madat mara nga myit ta? 22 dai yawng hte gaw asung shang nna, hten mat na sha rai nga ai. 23 Shing nga ai ga gaw, tinang a myit jasat ai nawku ai htung hte, myit shagyip ngu ai hte, tinang hkum hpe shadip ai lam tau yu yang, hpaji byeng-ya zawn san nga timung, hkumshan a mak kayut ai hpe dang kau na matu, hpa akyu mi mung n rai nga malu ai.

Kolose 3

3:1 Dai rai nna, nanhte Hkristu hte rau bai rawt nga ai teng myit yang gaw, Hkristu gaw Karai Kasang a hkra maga e dung nga ai shara na ntsa arai ni hpe a tam nga mu. 2 Ga ntsa arai ni hpe myit hkum manoi myit; ntsa na arai ni hpe myit manoi nga mu. 3 Kaning rai nme law, nanhte si mat ai ni rai nga myit dai rai nna, nanhte a asak gaw Hkristu hte rau, Karai Kasang hta, kyem da nga ai. 4 Anhte a asak ngu ai Hkristu gaw danpru wa ai shaloi e, anhte mung shi hte rau hpung shingkang hta danpru na ra ga ai. 5 Dai re ai majaw, hpye ai amu, awu asin re ai amu, ngang kayut ai, n hkru n hkra re ai marin marit ai hte, gawng-ngu sumla nawku ai rai nga ai nammak lawhpa ngu ai, ga ntsa na nanhte a daw shan ni hpe sat kau mu: 6 dai hte a majaw Karai Kasang a pawt sindawng ai gaw du ra ai. 7 Dai hte hta nanhte shawng e naw hkrung nga ai shaloi e dai hta e nanhte hkawm nga myit dai. 8 Ya chyawm gaw ndai nlang hte hte, masin pawt ai, n-yun bu ai, n hkru n hkra ai, shatan nhkan ai hte ga kinsha hte hpe, nanhte a n-gup na yeng kau mu. 9 Shada da masu magaw ga hkum tsun myit: kaning rai nme law, dai gawng shing-yan dingsa hte tinang a arawn alai hpe, nanhte raw kau myit dai rai nna, 10 hpan tawn da ai wa a hkrang bung sumla hte maren rai nga ai chye chyang ai lam hta ningnan tai wa ai gawng shing-yan ningnan hpe nanhte dagraw nga myit dai: 11 dai gawng shing-yan ningnan hta, Heleni masha hte Yuda masha, matu gadoi hkam ai wa hte matu gadoi n hkam ai wa, karing karang masha, Skuti masha, mayam wa, shanglawt wa ngu ai mi n nga lu ai sha, Hkristu gaw yawng mayawng rai nga nna nlang hte hta a rai nga ai. 12 Dai re ai majaw, Karai Kasang a lata la ai ni hte, chyoi pra nna tsawra hkrum ai ni zawn, matsan dum ai, sumnung ai, mai kaja ai, myit nem ai, myit gyip ai hte myit galu kaba ai dagraw nga nna, 13 shada da hkam mana ai hte, mara langai ngai nga yang gaw, shada da raw dat kau hkat nga mu: dai Madu nanhte a mara hpe raw dat kau ya ai hte maren, nanhte mung galaw nga mu. 14 Dai nlang hte a ntsa e hkum tsup re ai makyit sumri ngu ai tsawra ai myit hpe kahtap hpun nga mu. 15 Nanhte a myit masin hta e mung, Hkristu a ngwi pyaw ai lam a up nga u ga: shingrai hkum hkrang langai sha hte nanhte hpe shaga la manit dai; dai hta n-ga chyeju adum nga mu. 16 Hkristu a mungga gaw hpaji byeng-ya amyu myu hte nanhte hta n taw n tsang ashanu nga u ga: shakawn kungdawn ga, mahkawn mangoi ga, Wenyi hte seng ai laka ga hte, chyeju hku hkan nna, nanhte shada da sharin shaga nna shadum shahprang nga let, nanhte a kraw lawang hta Karai Kasang hpe mahkawn mangoi nga mu. 17 Nanhte hpa lam galaw myit yang, mung sumtu hta raitimung, magan bungli hta raitimung, Madu Yesu a amying nsang hpe gang let, yawng mayawng hte hpe agalaw nga nna, shi a marang e Kawa Karai Kasang hpe shakawn kungdawn nga mu. 18 Numsha ni e, tinang madu wa a hkang ai hku hkan nga mu: dai gaw dai Madu a man e sut nga ai. 19 La ni e, madu jan ni hpe tsawra nga nna, shanhte hpe kajet kaje hkum rai nga myit. 20 Ma ni e, kanu kawa ni hpe lam shagu hta madat mara nga mu: dai gaw dai Madu a man e sharawng awng ai lam rai nga ai. 21 Kanu kawa ni e, nanhte a ma ni myit n kaji u ga, shanhte hpe hkum jahte nga mu. 22 Mayam ni e, nanhte a mungkan Madu ni hpe lam shagu hta madat mara nga mu: myiman pa mayu ai hte masha a myit shapyaw na zawn n re ai sha, myit mang langai sha hte dai Madu hpe hkrit kang nga let madat mara nga mu. 23 Dai madu a lata na, sali wunli ngu ai shabrai hpe nanhte nhtang hkam la na chye nga myit dai majaw, hpa galaw yang mung, masha a matu galaw ai zawn n rai, 24 dai Madu a matu zawn galaw nga nna, myit masin yawng hte a shaja nga mu: dai Madu Hkristu kaw nanhte yamnga myit dai. 25 N ding n man ai hku galaw ai wa gaw, tinang a n ding n man ai hpe nhtang hkam sha na ra ai rai nna, myiman tau yu ai lam n nga lu ai.

Kolose 4

4:1 Madu ni e, nanhte mung sumsing lamu e Madu lu nga myit dai hpe chye nga myit dai majaw, dingman ai hte ging ram ai hku mayam ni hpe marang nga mu. 2 Akyu hpyi ai hta shakut sharang rai nga mu, dai hta e a maja nga let shakawn kungdawn nga mu. 3 Hkristu a sung htum ai ga a majaw ngai gyit hkangda ai hkrum raitimung, dai sung htum ai ga tsun dan lu u ga, Karai Kasang gaw mungga a lam anhte a matu mara chyinghka hpaw malang nga na hte, 4 dai sung htum ai ga shadan dan na ngai mai tsun ai hte maren, ngai tsun dan lu hkra, anhte a matu mara mung akyu hpyi ya mi. 5 Shinggan de nga ai ni a man e hpaji byeng-ya hte hkawm nga nna, ahkying aten hpe lata mari la mu. 6 Langai hte langai hpe kaning rai htan lu na chye lu u ga, nanhte a ga hta galoi mung chyeju lawm nga nna, jum hte a shum nga u ga. 7 Dai Madu hta e tsawra ai hpunau wa hte kangka re ai shingdep shingtau hte kanawn mayam rai nga ai Tuhkiku gaw, ngai hte seng ai lam yawng mayawng nanhte hpe shana ya na marin dai: 8 nanhte gaw anhte a lam chye lu nna, nanhte a myit masin hpe shangwi shapyaw ai hkrum lu malit ga, ndai lam a majaw nan, ngai shi hpe nanhte hpang de shangun dat se ai. 9 Dai hta kaga, nanhte kaw na rai nga ai kangka re ai tsawra hpunau Onesimo hpe mung, ngai shi hte rau shangun dat se ai: shan gaw nang na byin mabyin hte hpe nanhte hpe shana ya na marin dai. 10 Nye a bawngdung manang Aristaku nanhte hpe shakram dat myit dai; Barnaba a kahkri Marku mung nanhte hpe shakram dat myit dai: shi a lam htet da ai ga hpe nanhte hkam la lu myit dai rai nna, shi nanhte kaw sa du yang gaw, shi hpe hkap hkalum la mu; 11 Yustu mying ai Yesu mung nanhte hpe shakram dat myit dai: shanhte gaw matu gadoi hkam ai ni hte seng ma ai rai nna, Karai Kasang a mungdan hta shanhte hkrai sha nye a shingdep shingtau ni rai ma ai hte, nye a matu mara ngwi pyaw ai lam tai wa ma ai. 12 Nanhte kaw na rai nga ai Hkristu Yesu a mayam Epahpra gaw nanhte hpe shakram dat myit dai: nanhte gaw Karai Kasang a myit mang ai hku nlang hte hta hkum tsup ai hte dinggrin nga let lahpran tsap nga lu myit ga, dai akyu hpyi ai hta shi nanhte a matu mara tutnawng e shingjawng hkat nga ai. 13 Kaning rai nme law, nanhte a matu mara mung, Ladoki hte Herapoli e nga ai ni a matu mara mung, shi shari sharat law law hkam nga ai gaw, shi a lam ngai sakse hkam nga nngai. 14 Tsawra ai tsi sara Luka yan Dema gaw nanhte hpe shakram dat myit dai. 15 Ladoki e nga ai hpunau ni hte, Numhpa hte shi a nta e shanu ai Hpung hpe shakram ya mi. 16 Ndai shagun dat ai laika hpe nanhte hti ngut jang, Ladoki a Hpung masha ni hpe hti shangun nna, Ladoki ni kaw shagun ai laika mung nanhte hti yu mu. 17 Arhkipo hpe mung, Dai Madu hta nang lu la ai daw ai amu hpe shatsup lu n ga, sadi nga u, ngu nna shi hpe tsun dan mu. 18 Ngai Pawlu nan nye a lata hte ndai shakram ai ga ka dat nngai. Nye a hkang hkyihkyang hpe dum nga mu. Chyeju gaw nanhte hte rau anga nga u ga law.

1 Htesaloni 1

1:1 Pawlu, Silwanu hte Timohti hte gaw, Kawa Karai Kasang hte Madu Yesu Hkristu hta rai nga ai, Htesaloni masha ni a Hpung hpe, ga shana dat ga ai. Chyeju hte ngwi pyaw ai gaw, nanhte hta e anga nga malit ga law. 2 Nanhte mahkra a matu mara anhte tutnawng e Karai Kasang hpe shakawn kungdawn nga nna, anhte a akyu hpyi ai ga hta, nanhte hpe adum nga ga ai: 3 anhte a Kawa Karai Kasang a man e, nanhte a makam masham a bungli mung, tsawra ai myit majaw magam shachyen ai mung, anhte a Madu Yesu Hkristu a myit mada ai lam a shakut sharang ai hpe mung, anhte n sim n sa adum nga ga ai. 4 Karai Kasang e tsawra nga ai, hpunau ni e, nanhte a shaga la ai lam hpe anhte chye nga ga ai: 5 kaning rai nme law, anhte a kabu gara shiga gaw, mung sumtu hte sha du ai n rai, n-gun atsam hte, Chyoi pra ai Wenyi hte, maju jung ai grai wa hte, nanhte kaw e du rai wa sai; nanhte hte rau nga yang, nanhte a matu mara anhte kaning rai nga ga ai gaw, nanhte nan chye nga myit dai. 6 Nni nkri law law hkrum timung, Chyoi pra ai Wenyi a kabu gara ai hte dai mungga hpe hkapla let, nanhte gaw anhte a samnang ai ni mung, dai Madu a samnang ai ni mung, tai nga manit dai rai nna, 7 Makedoni mung hte Ahkaia mung na kamsham ai ni nlang a kasi kamang tai wa manit dai. 8 Kaning rai nme law, nanhte kaw na dai Madu a mungga gaw, Makedoni mung hte Ahkaia mung e kajai gumhkawng wa ai sha n-ga, Karai Kasang kaw ang wa ai, nanhte a makam masham gaw, shara shagu hkan e chyam wa sai rai nna, anhte gaw hpa mi tsun, shara mung n nga ai. 9 Kaning rai nme law, nanhte hpang de anhte a shang wa ai lam kaning rai rai nga ai gaw, shanhte nan anhte a lam tsun kajai ma ai rai nna, nanhte gaw ahkrung nga nna tengman ai Karai Kasang hpe dawjau nga myit ga, gawngngu sumla ni hpe shinggan kau nhtawm, Karai Kasang hpang de kaning rai kayin wa myit dai hte, 10 sumsing lamu de na shi a Kasha hpe ala nga ai lam, tsun hkat nga ma ai: dai Kasha gaw si mat ai ni kaw na sharawt la nna, du na ra ai pawt sindawng ai hta na anhte hpe mawai la sai Yesu nan rai nga ai.

1 Htesaloni 2

2:1 Kaning rai nme law, hpunau ni e, nanhte hpang de anhte a shang wa ai lam be be kaman sha n rai nga ai gaw, nanhte nan chye nga myit dai. 2 Nanhte chye nga myit dai hte maren, Hpilipi mare hta shawng e nni nkri hte asawng asang hkrum ngut jang, zingri zingrat law law hkrum timung, anhte a Karai Kasang shatsam ai a jaw e, Karai Kasang a kabu gara shiga hpe nanhte kaw tsun dan na, anhte gwi ga ai. 3 Kaning rai nme law, anhte a shadum shahprang ai gaw, lam shadam ai hte, n san n seng ai hte, hkalem hklau ai hte n re ai sha, 4 dai kabu gara shiga lang ging ai ni ngu ai, Karai Kasang a ahkang hkam ga ai hte maren, masha hpe sharawng awng ai zawn n rai, anhte a kraw lawang hpe manaw yu ai Karai Kasang hpe sharawng awng na zawn, anhte tsun nga ga ai. 5 Kaning rai nme law, nanhte chye nga myit dai hte maren, anhte galoi mung a shapyaw ai ga hpe nsung ga ai hte, ka-up nga ai nammak lawhpa n rawng nga ai gaw, Karai Kasang nan sakse rai nga ai: 6 dai hta kaga, Hkristu a kasa ni rai nga ga ai majaw, nanhte hpe lit shagun mayu yang shagun lu ga ai raitimung, nanhte kaw na raitimung, masha gale kaw na raitimung, masha a hpung shingkang hpe anhte n tam saga ai. 7 Anhte gaw nanhte ka-ang e, sumnung nga ai hte, ma masut gaw tinang a ma hpe chyu jaw ai zawn, rai wa saga ai. 8 Shingrai nanhte hpe nja nhpra nga ga ai majaw, Karai Kasang a kabu gara shiga sha n rai, anhte a asak hpe pyi nanhte hpe jaw kau na, anhte myit dik nga ga ai; kaning rai nme law, anhte a tsawra ai ni nanhte tai wa manit dai. 9 Dai hta kaga, hpunau ni e, anhte a amu bungli hte atsu atsam hpe nanhte naw dum nga myit dai: nanhte hta langai mi hpe mung lit n shagun u ga, shani shana bungli galaw let, Karai Kasang a kabu gara shiga anhte nanhte hpe hkaw dan ga ai. 10 Kamsham nga ai ni nanhte a man e, anhte kaning rai chyoi pra ai hte dinghpring nna mara n kap ai rai nga ga ai hpe, nanhte mung, Karai Kasang mung, sakse rai nga myit dai. 11 Kaning rai nme law, shi a mungdan hte hpung shingkang kaw nanhte hpe shaga la ai Karai Kasang hte nanhte ging dan let a hkawm nga lu myit ga, 12 kawa gaw tinang a kasha ni hpe di ai hte maren, langai hte langai hte hpe anhte shadum shahprang nna, shangwi shapyaw ai hte sakse hkam ya ai hpe, nanhte nan chye nga myit dai. 13 Dai rai nna, anhte kaw nna na la ai Karai Kasang a mungga hpe nanhte hkamla myit dai shaloi e, masha a ga hpe zawn n rai, gaja wa teng teng rai nga ai hte maren, nanhte kamsham ai ni hta e a shachyen nga ai Karai Kasang a mungga hpe nanhte hta la manit dai majaw, anhte mung Karai Kasang hpe n sim n sa shakawn kungdawn a rai nga ga ai. 14 Kaning rai nme law, hpunau ni e, Yuda mung na Hkristu Yesu hta e rai nga ai Karai Kasang a Hpung ni a hkan sharau ai ni nanhte mung tai wa manit dai rai nna, Yuda mung na ni gaw tinang a amyu masha ni a lata la na nni nkri hkrum ma ai hte maren, nanhte mung nanhte a mung masha ni a lata la na hkrum myit dai: 15 Yuda ni chyawm gaw dai Madu Yesu hpe sat kau ai hte, myihtoi ni hpe mung, anhte hpe mung, zingri zingrat di mi ai rai nna, Karai Kasang a tsawra ai hku n tam ma ai hte, masha yawng mayawng hte nhtan shai nga ma ai: 16 maigan masha ni hkyehkrang la ai hkrum na matu hkaw tsun dan na, shanhte gaw anhte hpe ban hkum kau mi ai; shingrai shanhte gaw tinang a yubak hpe tutnawng e shalaw jahtam nga nna, dai pawt sindawng ai mung shanhte a ntsa e htum hkra dep nga sai. 17 Anhte mung, hpunau ni e, myit masin hte n rai, myiman hte sha tawng marang mi nanhte hte daw hka wa ga ai majaw, nanhte a myiman hpe bai mu lu na, nachying ndawt let anhte grau nna shakut sharang nga ga ai: 18 Dai re ai majaw, ngai Pawlu nan, nanhte hpang de du na lang lahkawng lang myit lawn ga ai raitimung, Satan gaw anhte hpe hkum shadang kau mi ai. 19 Kaning rai nme law, anhte a Madu Yesu a man e, shi a bai du ai hta, anhte a myit mada shara, kabu gara shara hte gumrawng na janmau gaw, hpa mi rai nga a ta? Nanhte nan dai rai nga myit dai, n rai myit ni? 20 Nanhte gaw anhte a hpung shingkang hte kabu gara shara rai nga myit dai.

1 Htesaloni 3

3:1 Dai rai nna, anhte naw n sharang nga lu ga ai majaw, Ahten mare hta e lik lik hti nga na, anhte myit hkut nga ga ai rai nna, 2 ndai tsin-yam tsindam a majaw kadai mung shamu shamawt n rai myit ga, nanhte hpe shadaw shalan nna, nanhte a makam masham hpe shangwi shapyaw na matu, 3 Hkristu a kabu gara shiga hta Karai Kasang a shangun ma rai nga ai anhte a hpunau Timohti hpe shangun dat gaw ai: tsin-yam tsindam hkrum na matu san da sai ni anhte rai nga ga ai, nanhte nan chye nga myit dai. 4 Kaning rai nme law, nanhte hte rau naw nga ai shaloi e, anhte tsin-yam tsindam hkrum na ga ai hpe, anhte nanhte hpe tsun dan magang ga ai rai nna, nanhte chye nga myit dai hte maren, shingrai mung byin wa sai. 5 Dai rai nna ngai naw n sharang nga lu nngai majaw, gunglau ai wa gaw nanhte hpe gunglau ai hte anhte a bungli kaman lila tai mat nhten, nga nna nanhte a makam masham hpe chye lu na, ngai shangun dat we ai. 6 Ya chyawm Timohti gaw nanhte kaw na anhte hpang de bai du wa nna, nanhte a makam masham hte tsawra ai mung, nanhte tutnawng e anhte hpe atsawm sha adum nga nna, anhte nanhte hpe hkrum mayu ga ai hte maren, nanhte mung anhte hpe hkrum mayu myit dai lam, anhte hpe kabu gara shiga wa shana ya mi ai shaloi e, 7 hpunau ni e, anhte a kyindut ai hte nni nkri yawng hta e, nanhte a makam masham majaw nanhte a lam e, anhte shangwi shapyaw ai hkrum ga ai. 8 Kaning rai nme law, nanhte ya e dai Madu hta lahpran tsap nga myit yang gaw, anhte ahkrung nga ga ai. 9 Dai hta kaga anhte a Karai Kasang man e nanhte a majaw anhte hkam lu ai kabu gara yawng hpe tau yu yang anhte nanhte a matu mara Karai Kasang hpe gaw, chyeju kaning rai htang lu na rai ta? 10 Nanhe a myiman mu lu nna, nanhte a makam masham hta naw ra nga ai hpe shatup shatsup lu u ga, anhte shani shana akyu grai hpyi nga ga ai. 11 Ya nanhte nga ai de anhte sa wa na lam hpe, anhte a Wa Karai Kasang hte anhte a Madu Yesu nan, hkyen lajang nga u ga. 12 Anhte a Madu Yesu gaw shi a chyoi pra ai ni yawng hte rau bai du wa ai shaloi e, anhte a Wa Karai Kasang a man e nanhte a myit masin hpe chyoi pra ai hta yubak n kap let, shangang jahkang ya u ga, 13 anhte nanhte hpe tsawra nga ga ai hte maren, nanhte a tsawra ai myit gaw shada da hte yawng mayawng a matu, kaba wa nna law htam wa lu hkra, dai Madu shabyin ya u ga.

1 Htesaloni 4

4:1 Bai lam mi gaw, hpunau ni e, nanhte gaw Karai Kasang a man e kaning rai hkawm lu nna shi ra ai hku shadik lu na, anhte kaw na nanhte hkamla ai hte nanhte hkawm yu myit dai hte maren, dai hta e grau nna law htam wa myit ga, Madu Yesu hta anhte nanhte hpe hpyinem nna shadut jahkat dat ga ai. 2 Madu Yesu a ahkaw ahkang hte e kaning re ai hkangda ai ga nanhte hpe ap ya saga ai gaw, nanhte nan chye nga myit dai. 3 Kaning rai nme law, nanhte gaw hpye ai amu hpe koi gam nna, Karai Kasang hpe n chye n chyang ai mai gan masha ni a ngang kayut ai hte n hkawm ai sha, 4 nanhte langai hte langai tinang a hkrang hpe chyoi pra ai hte arawng sadang hta hkang nga nna, 5 kadai hpe mung n tawt n lai ai hte, dai lam hta tinang a hpunau wa hpe n map n maw sha nga myit ga, dai gaw Karai Kasang a myit ra ai hku hte nanhte a shachyoi shapra na lam rai nga ai. 6 Anhte shawng e nanhte hpe tsun dan nna sakse hkam ya made ai hte maren, Karai Kasang gaw ndai lam yawng hte a matai dawp ai wa rai nga ai. 7 Kaning rai nme law, Karai Kasang gaw n san n seng ai hta nanhte hpe shaga la manit dai n rai, chyoi pra ai hta shaga la manit dai. 8 Dai rai nna, n kaw n law re ai wa kadai mung, masha hpe n rai, nanhte hta shi a Chyoi pra ai Wenyi jaw ya ai Karai Kasang hpe n kaw n law di da wu ai. 9 Ya, hpunau shada da tsawra ai lam, ngai nanhte hpe ka dat shara n nga ai. Kaning rai nme law, shada da tsawra nga na, Karai Kasang a sharin achyin ai ga nanhte nan hkamla manit dai rai nna, 10 Makedoni mung ting hta nga ai hpunau ni hpe shingrai galaw nga myit dai. Raitimung, hpunau ni e, nanhte dai hta e naw law htam wa nna, 11 sumnung shingdi ai hta myit makun nga let, shinggan de nga ai ni a man e ging ram ai hte hkawm nga lu nna, hpa mung n ra nga hkra, 12 nanhte hpe shawng e htet da ga ai hte maren, nanhte tinang hte ang ai amu gunhpai nna tinang a lata hte bungli galaw myit ga, anhte nanhte hpe naw shadut jahkat dat ga ai. 13 Dai hta kaga, hpunau ni e, myit mada ai lam n lu ai masha ni zawn nanhte yawnhkyen n hkrum myit ga, yup pyaw nga ai ni a lam nanhte n chye ai nga na, anhte n ra ga ai. 14 Kaning rai nme law, Yesu gaw si mat nna bai rawt wa ai hpe anhte kam nga ga yang gaw, Yesu hta yup pyaw ai ni hpe mung, Karai Kasang gaw shi hte rau woi wa na maru ai. 15 Ndai gaw dai Madu a mungga hte anhte nanhte hpe tsun dan ga ai: dai Madu bai du sa ai shaloi e, hkrung nga ai hte naw hti ngam nga ai ni anhte gaw, yup pyaw ai ni a numshawn de loi mi pyi shawng magang lu na ga ai n rai. 16 Dai Madu nan jahtau garu ai hte, lamu kasa agyi a nsen hte, Karai Kasang a pahtau dum ai hte sumsing lamu de na yu wa nna, Hkristu hta e si mat ai ni gaw shawng numshawn e rawt wa lu na mara ai; 17 dai hpang, dai Madu hpe Ka-ang ganghkau e hkrum na matu, hkrung nga ai hte naw hti ngam nga ai ni anhte gaw, shanhte hte rau sumwi ntsa de shalun la ai hkrum na ra ga ai rai nna, anhte gaw dai Madu hte rau tutnawng e anga nga na ra ga ai. 18 Dai re ai majaw, ndai ga hte nanhte shada da shangwi shapyaw hkat nga mu.

1 Htesaloni 5

5:1 Raitimung, hpunau ni e, aten hte ahkying ladaw a lam nanhte hpe ka dat shara n nga ai; 2 kaning rai nme law, shana na lagu lagut shang ai zawn, dai Madu a shani mung du na ra ai hpe, nanhte nan azin ayang chye nga myit dai. 3 Shanhte gaw, Ngwi pyaw ai hte asan apan rai nga ai, nga nna tsun ma yang gaw, na-um nasin re ai numsha gaw shing-gyim machyi hkrum ai zawn, shanhte a ntsa e hten byak wa ai gaw akajawng sha du na ra ai rai nna, shanhte kaning rai mung hprawng wa lu na ma ai n rai. 4 Nanhte chyawm gaw, hpunau ni e, dai shani gaw lagu lagut zawn nanhte hpe dep lu hkra, nanhte nsin hta e lup nga myit dai n rai: 5 kaning rai nme law, nanhte nlang hte gaw nhtoi a kashu kasha ni hte shani a kashu kasha ni mung rai nga myit dai. 6 Anhte gaw shana hte mung, nsin hte mung, n seng ga ai; dai re ai majaw masha gale zawn anhte n yup nga ai sha, a maja nga nna htauli htaula rai nga ga: 7 kaning rai nme law, yup nga ai ni gaw shana e yup nga ma ai, chyaru nang ai ni mung shana e nang nga ma ai. 8 Anhte chyawm gaw shani hte seng ga ai majaw, htauli htaula rai nga nna, makam masham hte tsawra ngu ai sinda magap hpe dagap nga ai hte, hkyehkrang la ai de myit mada ai lam ngu ai hpri gup chyawp hpe chyawp nga ga. 9 Kaning rai nme law, pawt sindawng na hpe hkam na matu Karai Kasang gaw anhte hpe n san da ai sha, anhte a Madu Yesu Hkristu a marang e hkyehkrang la na chyeju lu la u ga she, anhte hpe san da mi ai: 10 anhte hprang nga yang raitimung yup nga yang raitimung, shi hte rau hkrung nga n ga, shi anhte a matu mara si hkam sai. 11 dai re ai majaw, nanhte ya e pyi galaw nga myit dai hte maren, shada da shadum shahprang nna shadaw shalan nga mu. 12 dai hta kaga, hpunau ni e, nanhte hta bungli gunhpai nna, dai Madu hta nanhte a ntsa e up nga ai hte, nanhte hpe shadum shahprang nga ai ni hpe adum nga nna, 13 shanhte a amu bungli majaw, tsawra ai myit hte shanhte hpe grai wa hkungga lara nga na, anhte nanhte hpe hpyinem nga ga ai: nanhte mung shada da ngwi pyaw nga mu. 14 bai, hpunau ni e, kajam galam re ai ni hpe shadum shahprang nga mu, myit kaji nga ai ni hpe shalan shabran nga mu, gawngkya ai ni hpe shadaw shangang nga mu, masha yawng hte hpe galu kaba ai myit madun nga mu; 15 kadai hpe mung n kaja ai a jaw e n kaja ai hku bai n tai myit ga, sadi sahka nga mu; nanhte shada da hta mung, masha mahkra matu mara mung, tutnawng e mai kaja ai lam hpe hkan shachyut nga mu, ngu nna anhte nanhte hpe shadut jahkat made ai. 16 Tutnawng e kabu gara nga mu: 17 n sim n sa akyu hpyi nga mu; lam shagu hta shakawn kungdawn nga mu: 18 kaning rai nme law, dai gaw Hkristu Yesu hta e nanhte a lam Karai Kasang a myit ra ai hku rai nga ai. 19 Wenyi hpe hkum shanum myit; 20 myihtoi htoi ai lam hpe n kaw n law hkum di myit. 21 Lam yawng mayawng hpe chyam dinglik yu nga mu, mai kaja ai hpe mahkyu nga mu. 22 N kaja ai lam baw sumhpa hpe koi gam nga mu. 23 Ngwi pyaw ai a npawt Karai Kasang nan nanhte hpe hkum dinghkum shachyoi shapra myit ga; anhte a Madu Yesu Hkristu bai du sa ai shaloi e, nanhte a wenyi, myit masin hte hkum hkrang ting gaw, mara n kap hkra pau nga u ga. 24 Nanhte hpe shaga la ai wa gaw kangka nga ai rai nna, ndai lam hpe mung galaw na ru ai. 25 Hpunau ni e, anhte a matu mara mung akyu hpyi ya mi. 26 Hpunau ni yawng hte hpe, chyoi pra ai pup hte shakram ya mi. 27 Ndai shagun dat ai laika gaw hpunau ni yawng hte hpe hti dan shangun myit ga, ngai nanhte hpe dai Madu hta ga daka dat made ai. 28 Anhte a Madu Yesu Hkristu a chyeju gaw, nanhte hte rau anga nga u ga law.

2 Htesaloni 1

1:1 Pawlu, Silwanu hte Timohti hte gaw, anhte a Wa Karai Kasang hte Madu Yesu Hkristu hta rai nga ai Htesaloni masha ni a Hpung hpe, ga shana dat ga ai. 2 Kawa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e anga nga malit ga law. 3 Hpunau ni e, nanhte a makam masham gaw kaba la wa nna, nanhte langai hte langai a tsawra ai myit gaw shada da e law htam jat wa ai majaw, ging dan nga ai hte maren, nanhte mahkra a matu mara Karai Kasang hpe tutnawng e shakawn kungdawn nga na, anhte ra nga ga ai. 4 Dai rai nna nanhte hkam ai zingri zingrat hte nni nkri mahkra hta, nanhte a galu kaba ai myit hte makam masham ai a majaw, Karai Kasang a Hpung ni a man e anhte hkum nan lala, nanhte a jaw e gumrawng kabu nga ga ai. 5 Karai Kasang mungdan a matu mara nanhte nni nkri hkrum myit dai majaw, dai mungdan hta nanhte ging dan nga myit ga, dai lam gaw Karai Kasang a dingman ai jeyang ai lam a kumla tai nga ai. 6 Kaning rai nme law, dai Madu Yesu gaw sumsing lamu de nna, shi a n-gun rawng ai lamu kasa ni hte rau wan shinglet hte paw pru nna, 7 Karai Kasang hpe n chye n chyang ai ni hte, anhte a Madu Yesu Hkristu a kabu gara shiga n madat mara ni hpe matai dawp na shaloi e, 8 nanhte hta nni nkri jahkrum ai ni hpe, nni nkri bai nhtang jaw na hte, nni nkri hkrum nga ai ni nanhte gaw, anhte hte rau ban sa ai nhtang jaw na ra ai. Karai Kasang a dingman ai hku rai nga lu ai. 9 Yesu gaw shi a chyoi pra ai ni hta danhkung nga ai hte, nanhte gaw anhte a sakse ga hpe kamsham nga myit dai majaw, dai shani hta e kamsham nga ai ni mahkra hta shi mau mahka hkrum ai shaloi e, 10 n madat ai ni gaw dai Madu a myiman hte shi a atsam a hpung shingkang hte, hka wa na htani htana hten nan ai ari ahpri hkrum na mara ai. 11 Dai re ai majaw, anhte a Karai Kasang hte Madu Yesu Hkristu a chyeju marang e, anhte a Madu Yesu a mying nsang gaw nanhte hta e shagrau ai hkrum lu na hte, nanhte mung shi hta e shagrau ai hkrum lu hkra, 12 anhte a Karai Kasang a shaga la ai chyeju hpe nanhte hkam ging nga na hte, mai kaja ai marai myit yawng hte kamsham ai hte seng ai magam bungli shagu hpe, tsam mari re ai hte shatsup lu myit ga, anhte nanhte a matu mara tutnawng e akyu a hpyi nga ga ai.

2 Htesaloni 2

2:1 Hpunau ni e, dai Madu a shani gaw ni magang wa ra ai zawn, nanhte n nawn nna wenyi hte mung, ga sumtu hte mung, anhte a shagun dat ai laika zawn san ai hte mung, nanhte a kraw lawang alawan n shamu n shamawt ai hte, myit gadau gadap n rai myit ga, 2 anhte a Madu Yesu Hkristu a bai yu wa ai hte anhte shi hte rau zuphpawng nga na lam, anhte nanhte hpe shadum shahprang dat ga ai. 3 Kadai wa mung, nanhte hpe gara hku mung n hkalem kau myit ga. Kaning rai nme law, dai htak bra wa ai gaw shawng e n byin ai hte, n tara ai wa ngu ai hten byak wa ai a kasha garai n paw pru pru gaw, dai nhtoi du na n rai, 4 dai wa gaw Karai ngu mangu hte mung, nawku ai lam yawng mayawng hte mung, nhtan shai nga ai hte tinang dai shagrau la nna, Karai Kasang a nawku Htingnu hta dung nga let, shi hkum nan hpe Karai Kasang shatai da wu ai. 5 Nanhte hte rau naw nga ai shaloi e, ndai lam hte ngai nanhte hpe tsun dan masade ai hpe, nanhte n dum nga myit ni? 6 Dai wa gaw tinang a ahkying ladaw e danpru wa u ga, ya e ban hkum nga ai hpe nanhte chye nga myit dai. 7 Kaning rai nme law nga yang, n tara ai a sunghtum ai lam ya e pyi shachyen nga ai; raitimung, ban hkum ai wa naw nga nga nna, yeng kau ai hkrum ai du hkra, naw ban hkum nga na ra ai. 8 Yeng kau hkrum ai shaloi e dai n tara ai wa gaw danpru wa na ra ai: Madu Yesu chyawm gaw shi a n-gup na wenyi hte shi hpe sat kau nna, shi a yu wa ai a danhkung kama ai hte shaza kau na ru ai. 9 Dai n tara ai wa a du sa ai gaw, Satan a shachyen ai n-gun atsam, lamik kumla hte, masu ai mauhpa amyu myu hte, 10 hten byak ai hkrum na ni a matu mara n teng n man ai hkalem hkalau ai amyu shagu hte, rai na ra ai: shanhte hkyehkrang la ai hkrum na matu, dai tengman ai lam a tsawra ai hpe n hkamla ai a jaw e, shingrai hkrum ma ai. 11 Dai re ai majaw tengman ai lam hpe n kam n sham ai sha, n ding n man ai hta sharawng awng ai ni n lang hte gaw, dawdan ai hkrum mu ga, 12 masu matsa ga hpe kamsham lu hkra, Karai Kasang gaw shanhte a matu mara tsam mari re ai lam shadam ai hpe shangun dat wu ai. 13 Raitimung, dai Madu e tsawra nga ai hpunau ni e, nanhte a lam Karai Kasang hpe tutnawng e shakawn kungdawn na anhte ra nga ga ai: kaning rai nme law, Wenyi a shachyoi shapra na hte, tengman ai ga hpe kamsham na hta, hkyehkrang la ai hkrum na matu, Karai Kasang gaw shawng npawt kaw nna nanhte hpe lata la manit dai. 14 Anhte a Madu Yesu Hkristu a hpung shingkang hpe lu la lu myit ga, de a matu mung, anhte a kabu gara shiga hte, shi nanhte hpe shaga la manit dai. 15 Dai re ai majaw, hpunau ni e, anhte a sumtu ga hte raitimung, nanhte hkamla lu myit dai matsun maroi ga hta lahpran tsap nga nna, ting ting di nga mu. 16 Ya, anhte hpe tsawra nga nna, chyeju a jaw e anhte hpe htani htana shangwi shapyaw ai hte, mai kaja ai myit mada shara jaw ai, anhte a Wa Karai Kasang hte anhte a Madu Yesu Hkristu nan, 17 nanhte a kraw lawang hpe shangwi shapyaw nga nna, mai kaja ai amu bungli hte ga sumtu amyu myu hta, nanhte hpe shangang jahkang nga myit ga law.

2 Htesaloni 3

3:1 Bai, lam mi gaw, hpunau ni e, dai Madu a mungga gaw nanhte hta chyam wa nna hpung shingkang lawm nga ai hte maren, shara shagu hkan e chyam wa nna hpung shingkang lawm lu na hte, 2 myit n leng ai hte n hkru n hkra ai masha ni a lata na anhte mawai la ai hkrum lu u ga, anhte a matu mara akyu hpyi ya mi: kaning rai nme law, masha shagu wa makam masham rawng nga ai n rai. 3 Dai Madu chyawm gaw kangka rai nga ai rai nna, shi nanhte hpe shangang jahkang ya nna, n hkru n hkra ai hta na, bausin na marin dai. 4 Anhte htet da mada hte hpe nanhte galaw nga nna, naw a galaw nga na marin dai, ngu nna dai Madu hta e nanhte a lam anhte myit mu nga ga ai. 5 Dai hta kaga, Karai Kasang a tsawra ai hte Hkristu a shakut sharang ai hta, dai Madu nan, nanhte a myit masin hpe shalawn nga u ga. 6 Bai lam mi, hpunau ni e, anhte kaw nna hkamla ai matsun maroi ga hte maren n hkan hkawm ai sha, kajam galam re ai hpunau ni nlang hte kaw na daw hka wa myit ga, dai Madu Yesu Hkristu a mying nsang hte anhte nanhte hpe htet da ga ai. 7 Kaning rai nme law, anhte a len ningli kaning rai hkan sharau nga na, nanhte nan chye nga myit dai: anhte gaw nanhte a ka-ang e kajam galam myit madun ga ai n rai; 8 kadai wa a lusha mung anhte be be kaman n sha ai sha, nanhte hta langai mi hpe mung lit n shagun u ga, amu magan hte rutsang ai hta anhte shani shana bungli galaw nga ga ai. 9 Shingrai galaw ai gaw, ahkang n lu ga ai majaw n re ai sha, nanhte hkan sharau lu na len ningli tai malit ga she, anhte hkum nan nanhte a matu mara ningli tai saga ai. 10 Kaning rai nme law, nanhte hte rau naw nga nga yang, Amu bungli n galaw mayu ai wa gaw shat mung n sha u ga, ngu nna anhte nanhte hpe htet da ga ai. 11 Nanhte hta lawm nga ai nkau mi gaw, kajam galam nga ai rai nna, hpa amu n galaw ai sha, tinang hte n seng ai hta hkan sharau ai ni rai nga ma ai hpe, anhte na nga ga ai. 12 Shingrai nga ai ni gaw amu bungli angwi sha galaw nna, tinang a shat sha nga mu ga, ngu nna Madu Yesu Hkristu hta e anhte htet da ai hte shadut jahkat ga ai. 13 Nanhte mahtang, hpunau ni e, mai kaja ai amu galaw na, hkum hki hkum sang nga myit. 14 Ndai laika hta rawng ai anhte a ga hpe, marai langai ngai n madat mara nga a yang gaw, shingre ai wa hpe matsing nga mu; shi kaya dum u ga shi hte hkum kanawn nga myit. 15 Raitimung, hpyen wa zawn shi hpe hkum nawn mu; hpunau wa hpe zawn shi hpe shadum shahprang nga mu. 16 Ya, ngwi pyaw ai a npawt, dai Madu nan, nanhte hpe tutnawng e lam shagu hta ngwi pyaw ai, a jaw nga u ga. Dai Madu gaw nanhte nlang hte rau anga nga u ga law. 17 Ngai Pawlu nan nye a lata hte ka da ai shakram ai ga gaw, ngai ka shagun dat ai laika shagu hta, kumla rai nga li ai: ning rai ngai ka da nga nngai. 18 Anhte a Madu Yesu Hkristu a chyeju gaw, nanhte nlang hte rau anga nga u ga law.

1 Timohti 1

1:1 Anhte a Hkyehkrang la ai Madu Karai Kasang hte, anhte a myit mada shara rai nga ai Hkristu Yesu a htet da ai hte maren, Hkristu Yesu a kasa rai nga ai, ngai Pawlu gaw, dai makam masham hta nye a kasha majing rai nga ai Timohti hpe ga shana dat nngai. 2 Kawa Karai Kasang hte anhte a Madu Hkristu Yesu kaw na chyeju, matsan dum ai hte ngwi pyaw ai gaw, anga nga u ga law. 3 Sharin shaga ai lam kaga n sharin la lu mu ga mung, makam masham hta jung nga ai Karai Kasang a shadaw shalan ai lam n shabyin ai sha, 4 ga law ga la shapraw ai maumawi ga hte n htum hkraw ai ahtik labau gawn ai hku hpe n hkan shachyut mu ga she, nang gaw masha nkau mi hpe daru jet kau na matu, ngai Makedoni mung de sa wa ai shaloi e Ehpesu mare e naw anga nga na, nang hpe shadut jahkat sade ai hte maren, naw nga nga u. 5 Dai daru jet kau ai ga a chyahtum chyawm gaw, sanseng ai kraw lawang hte mai kaja nga ai myit nsam a tsawra ai hte, sawt ai n lawm ai makam masham nan, rai nga ai. 6 Dai lam hta na nkau mi gaw yit mat wa nna, kaman lila ga hpang de yawng mat wa ma ai; 7 shanhte gaw tara sara tai mayu ma timung, tinang nan hpa tsun nga ai hte, hpa lam hkap yau nga ai gaw, n chye na nga ma ai. 8 Marai langai ngai jep ai tara hpe sun ang ai hku sung nga a yang gaw, jep ai tara gaw mai kaja nga ai, anhte chye nga ga ai: 9 raitimung, dinghpring ai wa a matu mara jep ai tara tawn da nga ai n re ai sha, n tara ai ni, gumlau gumle re ai ni, tara n hkungga ai ni, yubak galaw ai ni, n chyoi n pra ai ni, ga n seng ai ni, kanu kawa hpe bye kau ai ni, masha sat ai ni; 10 hpye ai amu galaw ai ni, la shada tam ai ni, masha hpe lagu ai ni, masu magaw ga tsun ai ni, masu dagam ai ni hte sanseng ai sharin shaga ai ga hte nhtan shai ai lam kaga naw nga a yang gaw, de a matu mara jep ai tara tawn da nga ai: 11 dai gaw ngai hkam la ai a rawng ai Karai Kasang a hpung shingkang madun ai kabu gara shiga hte maren rai nga ai. 12 Ngai hpe kangka re ai wa nawn nna, dai aya hta ngai hpe dang da ai majaw, ngai hpe n-gun shaja ya ai, anhte a Madu Hkristu Yesu hpe nan, ngai shakawn kungdawn nngai. 13 Ngai chyawm gaw, shawng e shatan nhkan ai, zingri zingrat ai hte sheng mareng re ai wa rai nga nngai raitimung, n chye n chyang ai hte kamsham ai myit n rawng ai sha dai hpe galaw nngai majaw, matsan dum la ai ngai hkrum nngai: 14 Hkristu Yesu hte seng ai makam masham hte tsawra ai hte hpawn, anhte a Madu a chyeju gaw ladat hta lai hkra law htam wa sai. 15 Yubak kap ai ni hpe hkyehkrang la na matu mara, Hkristu Yesu gaw mungkan ga de du ra ai, nga ai ga gaw, kangka re ai hte gaja wa hkam la ging ai ga rai nga ai. 16 Dai yubak kap ai ni hta ngai mahtang yubak kaba htum ai wa rai nga nngai raitimung, Hkristu Yesu gaw shi a matsan dum ai yawng mayawng, ngai yubak kaba htum ai wa hpe madun dan lu nna, htani htana asak lu la hkra, hpang de shi hpe kamsham na mara ai ni a matu mara kumla tai na majaw, ngai hkum nan chyeju lu la ni ai. 17 Ya, htani htana re ai, n hten n mat chye ai, myi e n mu lu ai Hkawhkam ngu ai, Karai Kasang langai sha kaw, arawng sadang hte hpung shingkang gaw, htani htana prat dingsa e, anga nga u ga law. Amen. 18 Ngai sha, Timohti e, nang hta ang nna lakap nga ai myihtoi ga hta hpa nna, makam masham hte mai kaja ai myit nsam rawng nga let, dai kaja ai gasat gala hpe nang gasat nga lu u ga, tawn da sai myihtoi ga hte maren, ndai daru jet kau na ahkang ngai nang hpe ap ya de ai. 19 Dai lam hte hpe nkau mi shinggan kau nna, makam masham li hta na bunghkup mat masai. 20 Shanhte hta Humeni yan Alesandru lawm ma ai rai nna, shan gaw shatan nhkan ga koi gam nga na sharin la mu ga, ngai shan hpe Satan a lata de ap kau mase ai.

1 Timohti 2

2:1 Dai re ai majaw tara hkungga nna sun ang ai lam amyu myu hpe hkan galaw lu let, anhte ngwi pyaw ai hte sumnung shingdi ai hta hkrung nga lu hkra, shinggyim masha mahkra a matu mara mung, 2 hkawhkam ni hte ahkang aya lu ai ni mahkra a matu mara mung, hpyi nem ai, akyu hpyi ai, hpyi htinglu ya ai hte shakawn kungdawn nga u ga, shaje mahkra a shawng e, ngai shadut jahkat dat nngai. 3 Dai gaw anhte a hkyehkrang la ai Madu Karai Kasang a man e mai kaja ai hte sharawng awng ai lam rai nga ai: 4 masha yawng mayawng hkyehkrang la ai hkrum lu nna, tengman ai lam a chye chyang ai kaw du lu mu ga, shi ra nga ai. 5 Kaning rai nme law, Karai Kasang langai sha rai nga nna, Karai Kasang hte shinggyim masha lapran e, shinggyim masha rai nga ai Hkristu Yesu ngu ai htinglu ya ai wa langai sha mung rai nga ai. 6 Shi gaw yawng mayawng a matu mara shi hkum nan hpe gawng malai hkungga di nna ap kau nu ai: ahkying aten du jang she de a sakse pru na ra ai. 7 Dai sakse hkam ai hta, ngai gaw tara hkaw ai wa hte kasa rai nga nna, maigan amyu ni a kangka hte tengman ai sharin shaga ai wa ngai rai nga nngai: ning nga ngai tsun nngai gaw, tengman ai ga ngai tsun nga nngai, ngai n masu nngai law. 8 Dai re ai majaw, masin pawt ai n lawm nna, ndang kalang n re ai hte, lasha ni gaw chyoi pra ai lata sharawt let, shara shagu hkan e akyu hpyi nga na hpe, ngai ra nga nngai. 9 Numsha ni mung dai hte maren, kara hkri ai, aja arai, pale hte manu dan ai hpun palawng hte n mawn ai sha, sari nang ai hpun palawng hte tem si rai nna shatep nga let, 10 Karai Kasang hpe nawku ai numsha ni a mai ang ai hte maren, kaja ai magam bungli hte, tinang hkum hpe mawn sumli nga mu ga. 11 Numsha gaw hkang ai hku ting hkan nna, asim sha sharin la nga u ga. 12 Numsha gaw sharin shaga nga na hte, lasha hpe up nga na gaw, ngai n hkraw nngai; shi gaw asim sha nga nga u ga. 13 Kaning rai nme law, Adam hpe shawng e hpan da nna, dai hpang e she Ewa hpe hpan da nu ai. 14 Adam chyawm gaw hkalem hkalau ai n hkrum ai sha, dai numsha mahtang hkalem hkalau ai hkrum nna, tara tawt lai ai hta hkrat wa ai. 15 Raitimung, shatep ai hte makam masham, tsawra nna chyoi pra ai hku hkan nang nga yang gaw, dai kasha shangai na lam a marang e shi hkyehkrang la ai hkrum na ra ai.

1 Timohti 3

3:1 Hpung up aya sharawng ai wa gaw amu kaja tam nga ai, nga ai ga gaw, kangka re ai ga rai nga ai. 2 Dai re ai majaw Hpung up wa gaw, mara n kap ai wa, num langai sha lu ai wa, sadi sahka ai, myit gring ai, si si re ai, manam daw ai lam sharawng ai hte sharin shaga maka rawng ai wa, rai lu na rai; 3 chyaru len ai wa hte anu ajin re ai wa mung n re ai sha, sumnung ai, ga law ga la ai myit n rawng ai, aja gumhpraw n tsaw ai hte, 4 tinang nta hpe atsawm sha uphkang nga nna, tinang a kashu kasha ni hpe mai ang ai hku hte chye hkang ai wa mung, rai na rai. 5 Marai langai ngai tinang a nta hpe n chye hkang a yang gaw, Karai Kasang a Hpung hpe kaning rai lanu lahku lu na rai ta? 6 Gumrawng ai myit rawng nna, nat a jeyang ai hku hta n hkrat wa u ga, sape nnan wa hpe mung, hkum rai. 7 Shatan nhkan n hkrum nna, nat a dawnggawng hta n hkrup u ga, shinggan masha ni kaw na sakse kaja hkam ang ai wa mung, shi rai nga u ga. 8 Dai hte maren hpungtau ni mung, shatep shingdi re ai ni rai lu na rai: ga mashe n rawng ai, tsabyi n lu lai ai hte, n seng ai amyat n marin ai sha, 9 dai makam masham a sung htum ai lam hpe, sanseng ai myit nsam hta machyu nga ai ni, rai lu na rai. 10 Shanhte gaw shawng e chyam dinglik yu ai hkam nna, dai hpang e mara n rawng ma yang gaw, hpungtau amu galaw nga mu ga. 11 Dai hte maren numsha ni mung, shatep shingdi rai nna, nlem ai ni n re ai sha, sadi sahka hte lam shagu hta kangka re ai ni, rai lu na rai. 12 Hpungtau wa mung num langai sha lu nna, tinang a kashu kasha ni hte tinang a kun dinghku hpe atsawm sha hkang lu ai wa rai na ra ai. 13 Kaning rai nme law, hpungtau amu atsawm sha gunhpai ai ni gaw, tinang a matu arawng kaja hte, Hkristu Yesu a makam masham lam hta, nden ja ai myit kaba lu la ma ai. 14 Nang kaw gade n na yang du na, ngai myit mada nga nngai; raitimung ngai na na wa naw hkring nga yang, 15 Karai Kasang a nta e kaning rai arawn alai hkan mai na nang chye lu n ga, ndai lam ngai nang hpe ka dat nngai; dai nta chyawm gaw, hkrung nga ai Karai Kasang a Hpung rai nga nna, tengman ai a sumsai dawnu hte npawt hkridun mung rai nga ai. 16 Karai Kasang hpe nawku hkungga ai lam a sung htum ai gaw, kaba la ai lam rai nga ai, nga nna ndang shara n nga ai: Shi gaw hkumshan hta danpru wa sai, Wenyi hta e dinghpring ai hkrum nu ai; Lamu kasa ni gaw shi hpe mu lu manu ai; Maigan ni kaw shi a lam hkaw dan manu ai; Mungkan ga gaw shi hpe kamsham masai, Hpung shingkang hta shalun ai shi hkrum nu ai.

1 Timohti 4

4:1 Raitimung, htawmhpang prat e nkau mi gaw makam masham lam hta na htak wa nhtawm, masu magaw ga tsun ai hpyi hpun ai ni a marang e 2 hkalem hkalau chye ai wenyi ni hte nat a sharin shaga ai lam hpe madat mara na rai nna, shanhte a myit nsam hpri kahtet hte zawn gaba nga ai, nga nna, 3 Wenyi e dan dan leng leng tsun dan nga ai: shanhte gaw hkungran ai lam hpe mung, kamsham nga nna tengman ai ga hpe chye nga ai ni, shakawn kungdawn ga hte hkam la mai ai, Karai Kasang hpan tawn da ai ashan hpe mung, jep kau na mara ai. 4 Karai Kasang hpan tawn da ai ashu ashan nga manga chyawm gaw, mai kaja nga ai rai nna, 5 Karai Kasang a mungga hte akyu hpyi ai a gawp e shachyoi shapra nga ai majaw, dai hpe shakawn kungdawn ga hte hkam la a yang gaw, hpa raitimung gangkau mai ai n rai. 6 Ndai lam hte gaw nang hpunau ni hpe shadum shahprang nga n yang gaw, nang hkan nang nga ai makam masham a mungga hte mai kaja ai sharin shaga ai lam hta pan kaba wa ai majaw, Hkristu Yesu a amu gunhpai wa kaja, nang rai na ndai. 7 N san n seng ai hte gumgai maumawi ga hpe yeng kau u; tara hkungga ai hku hta na hkumshan hpe shakung jahpan nga u: 8 kaning rai nme law, hkum hkrang hpe jahpan ai lam gaw akyu loi sha mi nga ai raitimung, tara hkungga ai myit gaw lam shagu hta akyu nga ai rai nna, ndai aprat hte raitimung, htawmhpang na prat hte raitimung, seng ai ga ndat rawng nga ai. 9 Dai mungga gaw tengman ai hte gaja wa hkam la ging ai ga rai nga ai; 10 dai rai nna, shinggyim masha mahkra hte kamsham ai ni hpe grau nna hkyehkrang la ai Madu rai nga ai, ahkrung nga ai Karai Kasang gaw anhte a myit mada shara rai nga ai majaw, anhte amu bungli galaw nna a shaja nga ga ai. 11 Ndai lam hte hpe hkangda nna sharin shaga nga u. 12 Na a brang ram prat e, nang hpe kadai mung n shatan u ga: tsun ai ga hte mung, arawn alai hte mung, tsawra ai hte mung, kamsham nna chyoi pra ai hte mung, kamsham ai ni a matu mara, kasi kamang tai nga u. 13 Ngai sa du ai du hkra laika hti yu nna shadum shahprang ai hte sharin shaga ai hta, a shaja nga u. 14 Hpung salang ni a lata mara da let, myihtoi ga hte nang hpe jaw da nna, nang hta rawng ai maka hpe hkum hprai kau nga u. 15 Na a kunghpan wa ai nyan masha mahkra a man e dan leng wa u ga, ndai lam hte hpe hkan shachyut nna, dai hta sha a manoi nga u. 16 Na a hkum hpe mung, na a sharin shaga ai lam hpe mung, a sadi nga u; ndai lam hte hta e agrin nga u: shingrai galaw n yang gaw, na a hkum hpe mung, nang hpe madat mara ai ni hpe mung, nang hkyehkrang la lu na ra ai.

1 Timohti 5

5:1 Hpung salang wa hpe hkum daru kau u, kawa hpe zawn shi hpe shadum shahprang u; shabrang ni hpe kahpu kanau zawn, 2 hpawmi ni hpe kanu zawn, mahkawn ni hpe kajan zawn, sanseng ai myit ting hte shadum shahprang nga u. 3 Gaida jan majing rai nga ai gaida jan ni hpe, hkungga lara nga mu. 4 Gaida jan langai ngai kasha, shing n rai kashu lu a yang gaw, shanhte gaw tinang a nta na ni hpe tara hkungga ai myit shawng e madun nna, tinang a kanu kawa ni hpe chyeju nhtang jaw na, sharin nga mu ga: dai gaw Karai Kasang a man e sharawng awng ai lam rai nga ai. 5 Gaida jan majing ngu ai lik lik rai nga ai gaida jan gaw, Karai Kasang hpe myit mada nga nna, shani shana hpyi nem ai hte akyu hpyi ai hta, nan nan a rai nga ai. 6 Tangpyaw sha tam nga ai gaida jan chyawm gaw, naw hkrung nga ninglen chyasi rai nga ai. 7 Shanhte gaw mara n kap mu ga, ndai lam hte mung hkangda nga u. 8 Marai langai ngai tinang hte seng ai ni hpe n bau ai hta n-ga, tinang a nta na ni hpe n bau ai wa gaw, dai makam masham hpe nyet kau nna, n kam n sham ga ai wa hta grau nna n hkru nga ai. 9 Kru shi ning garai n du ai gaida jan gaw, gaida jahpan laika hta garai n lawm u ga; la langai sha lu yu ai jan; 10 kaja ai bungli galaw yu ai rai nna gumhkawng nga ai jan; kashu kasha hpe lanu lahku yu ai; manam daw yu ai, chyoi pra ai ni a lagaw hpe kashin yu ai, nni nkri hkrum ai ni hpe galaw bau ai hte, kaja ai amu bungli shagu hta azin ayang hkan galaw yu ai rai a yang gaw, gaida jahpan laika hta shang u ga. 11 Dai hta aprat kaji ai gaida jan ni hpe shinggan kau mu: shanhte gaw Hkristu a lam n hkam sharang lu ai shaloi e, hkungran mayu ma ai rai nna, 12 shawng na ga shaka hpe kau da ma ai majaw, jeyang ai hkrum nga masai. 13 Dai hta kaga, shanhte gaw nta mi hte nta mi len hkawm let lagawn chye ma ai; lagawn ai hta n-ga, nlem nga nna, n mai tsun ai ga tsun nga ma ai hte, tinang hte n seng ai amu hta hkan bawk lawm ma ai. 14 Dai rai nna, aprat garai n kaba ai gaida jan ni gaw hkunggran nna, kashu kasha shangai ai hte, kun dinghku hpe yu lajang let, nhtan shai ai ni a matu shatan nhkan ai lam n shapraw u ga, ngai ra nga nngai: 15 kaning rai nme law, ya e pyi nkau mi gaw lam dam ma ai rai nna, Satan kaw hkan nang ma ai. 16 Kamsham ai numsha langai ngai kaw gaida jan nga a yang gaw, shi nan shanhte hpe galaw daw nna, dai Hpung hpe hkum shatsang u ga: shingrai dai Hpung gaw gaida jan majing ni hpe galaw daw lu na mara ai. 17 Atsawm sha up nga ai Hpung salang ni hpe hkungga lara shagup na ging nga ai hta, dai mungga hte sharin shaga ai lam hta amu bungli gunhpai ai salang ni hpe, grau nna hkungga lara ging nga ai, dum nga mu. 18 Kaning rai nme law, Mam kabye ai nga a n-gup hpe ka dagraw ya lu na n rai; bai, Amu bungli galaw ai wa gaw, shi a shabrai hkam ging nga ai, nga nna Chyum Laika tsun nga ai. 19 Sakse lahkawng masum n nga a yang gaw, Hpung salang wa hpe mara shagun ai lam hta hkum madat lawm et. 20 Shaje ni gaw hkrit kang nga mu ga, mara lu ai ni hpe masha yawng a man e daru sharin kau mu. 21 Ndai lam hte hpe myiman n tau ai hte hpa lachyen lahka n re ai sha nang galaw nga n ga, Karai Kasang hte Hkristu Yesu a man e mung, lata la ai lamu kasa ni a man e mung, ngai nang hpe ga daka dat de ai. 22 Kadai wa a ntsa e mung lata alawan hkum mara ya u; masha kaga a yubak hta hkum bawk lawm nga u: tinang dai sanseng nga u. 23 Na a kan akyu byin lu na hte, jahkring jahkra sha machyi wa wa rai ndai majaw, ya kaw nna ntsin n lu ai sha, tsabyi jahku loi loi a lu nga u. 24 Masha nkau mi a yubak gaw dan leng nga ai rai nna, jeyang ai de shawng e sa wa chye ai; nkau mi a chyawm gaw shanhte a hpang e hkan nang nga ai. 25 Dai hte maren dan leng nga ai mai kaja ai amu bungli mung nga nga ai rai nna, shing n re ai mahtang hpe mung, makoi magap da lu ai n rai.

1 Timohti 6

6:1 Karai Kasang a mying nsang hte dai sharin shaga ai lam gaw shatan nhkan n hkrum u ga, kandang npu e nga ai mayam ni kadai raitimung, tinang a madu ni hpe lam shagu hta hkungga lara di mai ai myit nga nga mu ga. 2 Kamsham ai madu lu ai mayam ni gaw, maren hpunau rai nga ai, nga nna, shanhte hpe n gawn n sawn hkum di mu; dai ngamu ngamai hkam la ai ni gaw, kamsham ai ni hte tsawra ging ai ni rai nga ma ai majaw, grau nna shanhte a bungli gunhpai nga mu ga. 3 Marai langai ngai nhtan shai ai sharin shaga ai lam sharin ya nna, anhte a Madu Yesu Hkristu a hkam kaja ai mungga hte tara hkungga ai lam hte bung ai sharin shaga ai lam hpe n awlaw lawm a yang gaw, 4 shi gumrawng gumtawng nga ai hte, hpa mung n chye ai sha, ga sumtu hte sha seng ai ga sawk yu ai hte ndang kalang hkat ai lam sha tam nga ai; dai hta na manawn masham ai, zumbru zumbra ai, shatan nhkan ai, n kaja ai hku aleng ai hte, 5 n san n seng ai myit rawng nna, tengman ai ga yet mat ai hte, tara hkungga ai lam gaw hpaga amyat sha ai lam sha rai nga ai, nga nna myit nga ai masha a ga law ga la ai lam pru wa ai. 6 Gaja wa, tara hkungga ai gaw, myit dik ai hte nawng, amyat kaba rai nga ai: 7 kaning rai nme law, ndai mungkan ga de hpa n lawm ai sha, anhte shang wa ga ai rai nna, dai hta na pru wa yang mung, hpa n la wa lu ga ai: 8 dai rai nna, lusha hte hpun palawng lu nga ga yang gaw, anhte dai hte myit dik nga ga. 9 Kaning rai nme law, sut su mayu ai ni gaw, hten byak nna shaza kau ai hta, masha ni hpe marit si shangun kau ai gunglau ai hte dawnggawng hta, angawk angak re ai hte sheng mareng re ai myit marin ai lam amyu myu hta, lup mat ma ai. 10 Gumhpraw marin ai myit chyawm gaw, n hkru n hkra ai amyu myu a ru npawt rai nga ai; nkau mi gaw dai hpe hkan shachyut ma ai majaw, dai makam masham lam hpe yit kau nna, yawnhkyen ai amyu myu hte tinang hkum hpe galun dinggrang kau mu ai. 11 Nang chyawm gaw, Karai Kasang a masha wa e, ndai lam hte hpe koi gam nga u: dinghpring ai, tara hkungga ai, kamsham ai, tsawra ai, shakut sharang ai hte sumnung ai myit hpe hkan shachyut nga u. 12 Dai makam masham hte seng ai mai kaja ai gasat gala ai hpe a gasat nga u: htani htana na asak hpe magra noi nga u: dai hta e nang hpe shaga la nna, sakse law law ni a man e mai kaja ai sakse nang hkam ya nit dai. 13 Anhte a Madu Yesu Hkristu a paw pru ai du hkra, agang chyalang n re ai hte mara n kap ai sha, dai hkangda ai ga hpe nang hkan nang nga u ga, 14 arai yawng mayawng hpe asak jahkrung ya ai Karai Kasang a man e mung, Puntu Pilat a man e mai kaja ai sakse hkam ya ai Hkristu Yesu a man e mung, ngai nang hpe hkangda de ai: 15 ahkying aten ang wa yang, dai paw pru ai lam hpe, shi madun dan na ra ai. Shi gaw langai sha rai nga ai a rawng ai Daru Magam re ai du, hkawhkam ni a Hkawhkam, madu ni a Madu rai nga ai rai nna, 16 shi chyu sha htani htana asak a rawng nga ai hte, n dep lu ai nhtoi hta anga nga ai; masha gade ai mung shi hpe n mu yu ai hte, n mu lu nga ai: shi kaw htani htana arawng sadang hte hpung shingkang anga nga u ga law. Amen. 17 Ndai prat e sutgan lu ai ni gaw, gumrawng gumtawng n re ai hte, n grin ai sutgan hpe n shamyet nga ai sha, ngamu ngamai nga na matu, arai yawng mayawng anhte hpe n daw n hta jaw ai Karai Kasang hpe shamyet shanat nga na hte, 18 shanhte mai kaja ai galaw nga na, mai kaja ai bungli hta sut su let, karan kachyan jaw ai hte, jaw jahproi ai myit rawng nga nna, 19 asak majing ngu ai asak hpe magra noi lu mu ga, du magang ra ai aprat a matu mara mai kaja ai sutgan npawt tinang dai mahkawng da mu, ngu nna shanhte hpe a hkang nga mu. 20 O, Timohti e, nang hpe ap ya de ai aya hpe, a mahkyu nga u: n san n seng ai bawlaw ai ga hpe mung, chye chyang ai lam re ai ngu nna, shamying gawm ai nhtan shai ai lam hpe mung, koi kau nga u: 21 nkau mi gaw dai lam hpe hkan nang nga nna, dai makam masham lam hpe yit kau manu ai. Chyeju gaw nanhte hte rau anga nga u ga law.

2 Timohti 1

1:1 Hkristu Yesu hta e rawng ai asak jaw na lam a ga ndat hte maren, Karai Kasang a myit ra ai hku majaw, Hkristu Yesu a kasa rai nga ai, ngai Pawlu gaw, nye tsawra ai ngai sha Timohti hpe, ga shana dat nngai. 2 Kawa Karai Kasang hte anhte a Madu Hkristu Yesu kaw na, chyeju, matsan dum ai hte ngwi pyaw ai gaw, anga nga u ga law. 3 Nye a akyu hpyi ai ga hta nang hpe n sim n sa adum nga let, ji wa ni kaw nna sanseng ai myit hte ngai dawjau nga ai Karai Kasang hpe, ngai shakawn nga nngai; 4 na a myi prwi ngai dum nna, nye a kabu gara ai dik wa lu li ga, nang hte hkrum na, shani shana ngai myit ndawt nga nngai: 5 nang hta jung ai n sawt ai makam masham hpe mung ngai bai dum nga ai hte, dai gaw na nwoi dwi Lui hte, na nnu Uni yan hta shawng jung nga nna, nang hta e mung a jung nga ai hpe, ngai myit tawng nga nngai. 6 Dai re ai majaw, ngai lata mara jaw ai hte, nang hta rawng ai Karai Kasang a chyeju hpe naw wut shagrung ya na, ngai nang hpe shadum dat de ai. 7 Kaning rai nme law, Karai Kasang gaw hkrit chye ai myit anhte hpe n jaw mi ai; n-gun lagaw rawng ai myit, tsawra chye ai myit, si si nga chye ai myit she jaw mi ai. 8 Dai rai nna, anhte a Madu a sakse hkam ai lam hta mung, shi a bawngdung ai wa nye a lam hta mung, nang kaya ai myit n rawng ai sha, Karai Kasang a n-gun lagaw rawng ai hte maren, dai kabu gara shiga matu mara ru tsang ai rau hkrum nga ga: 9 Karai Kasang gaw anhte a arawn alai majaw n rai, shi hkum nan myit hpang da ai hte chyeju a majaw sha, anhte hpe hkyehkrang la nna, chyoi pra ai shaga la ai ga hte shaga da ma ni ai: 10 dai lam gaw moi chyaloi nhkoi kaw nna, Hkristu Yesu hta e anhte hpe jaw da ma ni ai raitimung, anhte a hkyehkrang la ai Madu Hkristu Yesu paw pru ai a majaw, ya e shadan shaleng dat nu ai; shi gaw si hkrung si htan hpe yeng kau da nna, dai kabu gara shiga hte asak hkrung ai lam mung, n hten n bya re ai lam mung, shadan dat nu ai: 11 dai kabu gara shiga hta, hkaw dan ai wa mung, kasa hte sara aya mung, ngai hpe dang da ni ai. 12 Dai rai nna, dai lam a majaw ndai hte ru tsang ai ngai hkrum timung, n hkrit n kaya nga nngai; kaning rai nme law, kadai wa hpe ngai kam manoi nga nngai gaw, ngai chye nga ai hte, ngai ap tawn da ai arai hpe, dai nhtoi du hkra, shi mahkyu da ya lu ai, ngu nna ngai myit mu nga nngai. 13 Ngai kaw na nang na la sai masan maseng mungga ningli hpe, Hkristu Yesu hte seng ai kamsham nna tsawra ai myit hte, gumnoi nga u. 14 Nang hpe ap ya da ai aya kaja hpe, anhte hta rawng nga ai Chyoi pra ai Wenyi hte, a mahkyu nga u. 15 Asi a mung na ni nlang hte ngai hpe kau da ma ni ai gaw, nang chye nga ndai; shanhte hta Hpugelu yan Heramoge lawm ma ai. 16 Dai Madu gaw Onesihpuru a nta masha ni hpe chyeju jaw u ga; kaning rai nme law, shi ngai hpe law law lang shalan shabran ni ai hta n-ga, nye a hkang hkyihkyang majaw n kaya ai sha, 17 Roma mare de sa du jang, ngai hpe alawan hkan tam jahkrum lu wu ai: 18 shi gaw dai shani e, Madu a man e matsan dum ai hkam la lu hkra dai Madu gaw shi hpe chyeju jaw u ga: Ehpesu mare e mung shi ngai hpe gade wa galaw daw sai gaw, nang atsawm sha chye nga ndai.

2 Timohti 2

2:1 Dai re ai majaw, ngai sha e, Hkristu Yesu hta e rawng ai chyeju hta, n-gun lapyin jat wa lit ga. 2 Sakse law law a man e ngai kaw na nang na la sai lam hte hpe, masha kaga hpe sharin achyin chye ai kangka re ai masha hte kaw htawt ap ya u. 3 Hkristu Yesu a hpyen ma kaja zawn, ru tsang jawm hkrum ga. 4 Hpyen amu gunhpai ai wa kadai mung, tinang hpe hpyen hpung hta shalawm la ai wa a myit htuk lu hkra, ndai aprat na arai ni hta tinang hkum hpe ahkang abai shangun ma ai n rai. 5 Shingjawng ai poi hta shang ai wa mung, tara hte maren n shingjawng yang gaw, nampan shanghkawng dagraw lu na n rai. 6 Sun hkauna magan shaja ai wa, nsi nai si shawng sha ai gaw, majoi rai nga ai. 7 Ngai tsun ai lam myit aru yu u; kaning rai nme law, dai Madu gaw lam shagu hta nang hpe chye chyang ai myit jaw na ra ai. 8 Ngai hkaw tsun ai kabu gara shiga hte maren, si mat ai ni kaw na bai hkrung rawt wa sai, Dawi a aru arat rai nga ai Yesu Hkristu hpe, adum nga u. 9 Dai kabu gara shiga a jaw e, n hkru ai wa zawn, bawngdung hkra ru tsang hkrum nngai, raitimung, Karai Kasang a mungga gaw sharen da hkrum lu ai n rai. 10 Dai re ai majaw, lata la hkrum ai ni mung, Hkristu Yesu hta na hkyehkrang la ai chyeju hte nawng, htani htana a hpung shingkang hpe hkam la lu mu ga, dai ni a matu mara hkrum mahkrum ngai hkam sharang nga nngai. 11 Da ndai gaw kangka re ai ga rai nga ai: Anhte shi hte rau si saga yang gaw, shi hte rau mung hkrung lu na ra ga ai; 12 anhte shakut sharang ga yang gaw, shi hte rau mung up lu na ra ga ai: shi hpe ndang kau yang gaw, shi mung anhte hpe ndang kau na mi ai: 13 anhte kangka n rai lu timung, shi gaw kangka rai nga ai; kaning rai nme law, shi gaw shi hkum dai ndang kau lu ai n rai. 14 Ndai lam ni shanhte hpe shadum shahprang nga u; hpa akyu n shabyin ai hta n-ga, na lu ai ni a myit hpe gale galau shangun ai ga hte gasat ningjet n nga mu ga, Karai Kasang a man e shanhte hpe hkangda u. 15 Nang chyawm gaw, kaya shara n rawng ai sha, dai tengman ai mungga hpe ding ding chye hpajang ai magam gunhpai wa zawn, Karai Kasang a man e myiman pa lu hkra, na hkum shadan dan na, a shaja nga u. 16 Kaman lila bawlaw ai ga hpe koi gam u; dai lam hkan ai ni gaw, n tara ai htung de grau nna shang nan wa ma ai rai nna, 17 shanhte a ga gaw manggang lahtawp zawn, sha ayai na ra ai: shanhte hta Humenu yan Hpilitu lawm ma ai: 18 shan gaw, bai hkrung rawt wa ai lam gaw byin ngut sai, nga nna, dai tengman ai lam hta na yit mat wa ma ai hte, nkau mi a kamsham ai lam hpe shabai kau ya ma ai. 19 Raitimung, Dai Madu gaw shi hte seng ai ni hpe chye ginhka ai, nga nna mung, Dai Madu a amying mying ai ni nlang hte gaw, n ding n hpring ai hpe koi gam mu ga, nga nna mung, dazik sakse kap nga ai Karai Kasang a ngang kang ai npawt nhpang gaw, agrin nga ai. 20 Dai hta n-ga, galu kaba ai nta hta, ja wan gumhpraw wan sha, nga ai n rai; hpun hte ga kagam wan mung lawm nga ai; nkau mi gaw arawng a matu, nkau mi gaw arawng a matu n rai. 21 Dai re ai majaw, dai ni hta na tinang hkum hpe jasan jaseng kau ai wa rai yang gaw, chyoi pra ai, madu lang ging ai hte, amu kaja shagu a matu hkyen da ai arawng lu ai wa rai na ra ai. 22 Dai rai nna, brang ram a myit kayut ai lam koi gam u: sanseng ai myit hte dai Madu hpe shaga gang ai ni hte rau, dinghpring ai, kamsham ai, tsawra ai hte ngwi pyaw ai hpe, hkan shachyut nga u. 23 Angawk angak hte tuk shamak re ai ndang kalang ga gaw, ga law ga la lam sha shapraw nga ai, chye da nga let, dai baw ga hpe koi gam u. 24 Dai Madu a shangun ma chyawm gaw, ga law ga la n mai nga ai sha, yawng mayawng a man e shingdi ai, sharin shaga chye ai hte myit galu kaba rawng nna, 25 nhtan shai ai ni hpe sumnung ai myit hte sharin achyin ya lu na, mai nga ai: shing di yang, tengman ai ga hpe chye chyang lu mu ga, Karai Kasang gaw shanhte hpe gaja wa myit malai lu na chyeju jaw nna, 26 nat a myit hku hkan na, shi a dawnggawng hta rim la hkrum ai ni, bai dumhprang wa dam ma nhten law.

2 Timohti 3

3:1 Dai hta kaga, hpang jahtum na nhtoi ni hta e, yak la ai aten du na ra ai, chye nga u, 2 kaning rai nme law, masha ni gaw, tinang hkum hpe tsawra ai ni, gumhpraw marin ai ni, grang dakat ai ni, gumrawng gumtawng re ai ni, shatan nhkan chye ai ni, kanu kawa ga n madat ai ni, chyeju n chye dum ai ni, n chyoi n pra ai ni, 3 nja nhpra myit n rawng ai ni, masin n si hkraw ai ni, nlem chye ai ni, marai n rawng ai ni, myit matse ai ni, kaja lam hpe ndawng ai ni, 4 mayun gumlau ai ni, sadi n dung ai ni, myit tsaw myit dap ai ni, Karai Kasang hpe tsawra ai hta tinang a pyaw daw lam hpe grau sharawng ai ni, rai na mara ai; 5 shanhte gaw tara hkungga ai htung hkan ma timung, dai hte seng ai hpung dagu hpe nyet kau ai ni rai nga ma ai: shing re ai ni hpe mung koi kau u. 6 Shanhte hta na nkau mi gaw, nta ni hta mayun de nna, yubak hta lup mat wa ai hte, ngang kayut ai lam amyu myu hta len mat nna, 7 tutnawng e sharin ai hkrum timung, tengman ai lam a chye chyang ai de galoi n du lu ai, myit n gring ai numsha ni hpe shang rim la ai ni, rai nga ma ai. 8 Yanne yan Yambre gaw Mawshe hpe hkum shadang nga ai zawn, dai ni mung dai tengman ai lam hpe hkum shadang ma ai: shanhte gaw myit hten tsam mat wa nna, kamsham lam hta maju n jung ai masha rai nga ma ai. 9 Raitimung, dai yan a lam dan leng pru wa ai zawn, ndai ni a ngawk ai lam mung, masha mahkra a man e dan leng wa na ra ai rai nna ya na made hta shanhte n lai lu na ma ai. 10 Nang mahtang gaw, nye a sharin shaga ai lam, nye a lai len, maw mawn ai hku, kamsham ai lam, myit galu kaba ai, tsawra ai, shakut sharang ai, 11 zingri zingrat hkrum ai hte nni nkri hkrum ai lam hta mung: Antioki, Ikoni, Lustra mare hkan e ngai hkrum mahkrum hta mung; zingri zingrat ai ngai gade wa hkrum ni ai hta mung, nang htep lahti hkan nang nit dai: shingrai hkrum timung, ngai hkrum ai yawng hta na dai Madu gaw ngai hpe shaw la ni ai. 12 Gaja wa, Hkristu Yesu hta tara hkungga ai lam hkan nang mayu ai ni nlang hte gaw, zingri zingrat ai hkrum lu na mara ai. 13 N hkru n hkra ai hte sawt ai masha ni chyawm gaw, hkalem sha nna, hkalem sha ai nhtang hkrum let, n hkru ai lam hta je je kaba wa na mara ai. 14 Nang chyawm gaw, kadai ni kaw na sharin achyin ya ai hkam la nit dai mung, Hkristu Yesu hta kamsham ai a marang e hkye krang la ai hkrum lu hkra, 15 nang hpe hpaji byeng-ya jaw lu ai chyoi pra ai Chyum laika ni hpe ma kaji prat kaw nna nang chye nga nit dai hpe mung, adum nga let, nang sharin la nna myit tawng da ai lam ni hta, agrin nga u. 16 Karai Kasang a masha wa gaw hkum tsup rai wa nna, mai kaja ai magam bungli shagu a matu mara, arai chyip makup lang lu u ga, 17 Karai Kasang e shung ya ai Chyum laika shagu gaw, sharin shaga ya ai, daru sharin chye ai, mye shading lu ai hte, dinghpring ai lam hta sharin achyin ya na matu, akyu rawng nga ai.

2 Timohti 4

4:1 Karai Kasang a man e mung, hkrung nga ai ni hte si ai ni hpe tara dara magang ra ai Hkristu Yesu a man e mung, shi a danpru na lam hte shi a mungdan a man e mung, ngai nang hpe shadut dat de ai gaw: 2 dai mungga hpe hkaw dan nga u; du hkra ladaw ang ai raitimung, n ang ai raitimung, a shaja nga u; myit galu kaba ai hte, sharin shaga ai hku yawng hkan let, daru jet nga u, yubak madun nga u, shadut jahkat nga u. 3 Kaning rai nme law, htawmhpang na prat e masha ni gaw, masan maseng ai sharin shaga ai lam hpe n madat hkam la lu ai hte, shanhte a ana kaya kaprep nna, tinang a myit kayut ai hku hte maren, tinang a matu mara sara shalaw la nhtawm, 4 dai tengman ai ga hpe na layawng kau let, maumawi ga hpang de yit mat wa na mara ai. 5 Nang chyawm gaw, lam shagu hta htauli htaula nga u; nni nkri hkam sharang nga u; kabu gara shiga hkaw dan ai sara a amu gunhpai nga u; na a sara aya a amu hpe hkum tsup hkra shatup u. 6 Kaning rai nme law, ya e pyi hkungga zawn nawng kau ai ngai hkrum nna, ngai pru lai mat wa na aten du magang ra ai. 7 Ngai gaw kaja ai gasat gala gasat ngut se ai: gat shingjawng ai lam htum hkra gat shadu se ai; dai makam masham hpe ngai a manoi nga ni ai: 8 ya kaw nna, dinghpring ai tara agyi ngu ai, dai Madu gaw, dai nhtoi hta e ngai hpe ap ya na, dinghpring ai hte seng ai ja janmau gaw, nye a matu mazing da nu ai: ngai hpe sha n rai, shi a danpru ai lam hpe sharawng awng ai ni nlang hte hpe mung, ap ya na ra ai. 9 Ngai hpang de alawan du na tin tin rai u: 10 kaning rai nme law, Dema gaw ndai mungkan ga hpe tsawra ai a majaw, ngai hpe kau da nna, Htesaloni mare de sa mat wa sai; Kareka gaw Galati mung de, Titu gaw Dalamati mung de, sa mat wa masai. 11 Luka chyu sha ngai hte rau anga nga ai. Marku hpe nang hte rau woi sa rit; nye a amu gunhpai na matu shi htuk nga ai: 12 Tuhkiku hpe chyawm gaw, Ehpesu mare de ngai shangun dat se ai. 13 Nang sa wa yang, Troa mare na Karku kaw ngai tawn da ai palawng galu mung, laika ni mung, grau nna shanhpyi laika ni hpe, la sa wa rit. 14 Janghkam wa Alesandru gaw ngai hpe n kaja ai law law wa galaw ni ai; shi a arawn alai hte maren dai Madu gaw shi hpe tai htang na ra ai; 15 nang mung shi hpe koi kau u: kaning rai nme law, anhte a ga hpe shi grai wa ndang kau yu ma ni ai. 16 Ngai hpe shawng na mara shawk yu ai lam hta, ngai hpang maga de kadai mung n lawm ai sha, yawng hte gaw ngai hpe jahka kau da ma ai: dai gaw shanhte a ntsa e mara n tai u ga. 17 Raitimung, nye a jaw e dai hkaw dan ai ga hpe dan dan hkaw shahproi lu nna, maigan amyu ni yawng na la lu hkra, dai Madu gaw ngai hpang maga de rau tsap nga nna, ngai hpe n-gun shaja ya ai hte, hkanghkyi a n-gup hta na mawai la ai ngai hkrum ni ai. 18 Dai madu gaw n hkru n hkra ai lam yawng hta na ngai hpe mawai la nna, shi a sumsing lamu mungdan hkap hkra, hkyehkrang la na ra ai: shi gaw htani htana prat dingsa hpung shingkang anga nga u ga law Amen. 19 Priska yan Akula hte Onesihpuru a nta masha ni hpe shakram ya mi. 20 Erastu gaw Korinhtu mare e hti nga ta sai; Trohpimu gaw machyi nna, Melitu mare e ngai tawn da se ai. 21 Nshung garai n shang yang du lu hkra, tin tin rai u. Ubulu, Puden, Linu, Klawdia hte hpunau ni yawng hte gaw, nang hpe shakram dat ma ai. 22 Dai Madu gaw na a Wenyi hte rau anga nga u ga. Chyeju gaw nanhte hte rau anga nga u ga law.

Titu 1

1:1 Karai Kasang a lata la ai ni a makam masham hte, tara hkungga lam hte seng ai, tengman ai ga a chye chyang ai hku hte maren, htani htana asak lu la na myit mada shara chye lu hkra, 2 Karai Kasang a mayam hte, Yesu Hkristu a kasa tai nga ai, ngai Pawlu gaw, makam masham lam rau sha hkan ga ai majaw, ngai Sha majing re ai, Titu hpe, ga shana dat nngai. 3 Dai htani htana asak lam, masu magaw n chye ai Karai Kasang gaw, moi chyaloi nhkoi kaw na ga ndat tawn da timung, shi madat da ai aten ladaw e sha, tara hkaw dan ai ga hte shapraw dan nna, 4 anhte a Hkyehkrang la ai Madu, Karai Kasang a hkangda ai ga hte maren, nye a lata de ap ya ni ai. Kawa Karai Kasang hte, anhte a Hkyehkrang la ai Madu Hkristu Yesu kaw na, chyeju hte ngwi pyaw ai gaw, anga nga u ga law. 5 Ngai nang hpe hkangda ai hte maren, naw ra ai lam ni hpe hkan yu hpajang na hte, mare shagu hta Hpung salang dang da na matu, ngai nang hpe Kreti tsunlawng e jahti da de ai; 6 mara n rawng ai wa, num langai sha lu ai wa, kabring kabrawng hte gumlau gumle re ai mara shagun shara n rawng ai, kamsham ai kashu kasha lu ai wa rai yang gaw, dang da mai ai. 7 Kaning rai nme law, Hpung up wa gaw, Karai Kasang a kunhting wa zawn, mara n rawng ai wa, mai rai nga ai; tinang myit machyu ai wa, sindawng katawt ai wa, chyaru len ai wa, anu ajin re ai wa, nsan nseng ai sut marin ai wa, n mai rai ai sha, 8 manam daw ra ai, mai kaja ai lam tsawra ai, si si re ai, dinghpring ai, chyoi pra ai, tinang hkum hkang chye ai wa hte, 9 masan maseng re ai sharin shaga ai lam e shadum shahprang lu na mung, nhtan shai ai ni hpe shachye shachyang lu na mung, sharin tawn da ai lam hte maren kangka re ai mungga hpe manoi manat ai wa, mai rai nga ai. 10 Kaning rai nme law, gumlau gumle re ai, kaman lila ga tsun ai hte, hkalem chye ai masha law law nga ma ai; matu gadoi lam hkan ai ni hta grau nna law ma ai; 11 shanhte a n-gup mai matsut nga ai; shanhte gaw n san n seng ai sut matu n mai sharin ai lam sharin shaga ya nna, htinggaw ting ting hpe shabrun kau mu ai. 12 Shanhte hta na, tinang a amyu myihtoi langai mi gaw, Kreti masha ni tut tut masu, matse labye n hkru, nakru lagawn bu, nga nna jahta ai. 13 Dai sakse teng nga ai. Dai rai nna, Yuda maumawi hpe mung, tengman ai lam hpe jahka kau ai masha ni a htet da ai ga hpe mung, n madat la ai sha, 14 dai makam masham hta sanseng nga mu ga, shanhte hpe aja awa daru sharin nga u. 15 Sanseng ai ni a matu, yawng mayawng sanseng nga ai: n san n seng ai ni hte n kam n sham ai ni a matu chyawm gaw, hpa mung n san n seng nga ai; shanhte a myit mang hte kraw lawang gaw, n san n seng rai malu ai. 16 Karai Kasang hpe chye chyang ga ai, nga ma timung, matsat shabat re ai ni hte n madat mara ai ni rai nga nna, mai kaja ai amu yawng mayawng a matu n htuk ma ai majaw, tinang a arawn alai hte shi hpe nyet kau ma ai.

Titu 2

2:1 Nang chyawm gaw, masan maseng re ai sharin shaga ai lam hte jaw ang ai ga, a tsun nga u: 2 dingla ni gaw, myit sharam chye ai tem si re ai, myitsu nna, kamsham ai, tsawra ai hte shakut sharang ai hta, kunghpan wa mu ga. 3 Dai hte maren gumgai ni mung, hkungga lara ai lailen madun mai ai hte, shi wawn n htawn ai, chyaru n len ai, mai kaja ai lam sharin achyin chye nna, 4 Karai Kasang a mungga gaw shatan nhkan n hkrum u ga, hpawmi ni hpe, tinang madu wa hte tinang kashu kasha ni hpe tsawra ai, 5 shingdi ai, sari sadang rawng ai, kun dinghku shading chye ai, mai kaja ai myit madun nna, tinang madu wa hkang ai hku hkan ai ni rai lu na matu, len shalet chye ai gumgai ni rai nga mu ga. 6 Dai hte maren shabrang ni mung si si rai nga mu ga, shadum shahprang ngu u; 7 lam shagu hta kaja reng ai magam bungli a ningli nang hkum nan madun dan u: 8 nhtan shai ai wa gaw kaya hkrum nna, anhte a lam hpa mara n shagun lu u ga, na a sharin shaga ai lam hta, n sun n ang ai ga n nang ai, si si re ai hte kadai ndang shara n rawng ai, sanseng ai mungga madun dan u. 9 Mayam ni gaw, anhte a hkyehkrang la ai Madu Karai Kasang a sharin shaga mungga hpe, lam magup hta mawn sumli nga lu na matu, lam shagu hta tinang ni a madu npu e taw nga nna, shanhte kaw myiman pa lu hkra, ga nhkap n tsun ai hte, 10 masun la ai hku n hkan ai sha, lam yawng mayawng hta kaja reng ai kangka re ai myit madun dan nga mu ga, shanhte hpe shadum shahprang nga u. 11 Kaning rai nme law, a rawng ai myit mada ai lam ngu ai, galu kaba htum ai Karai Kasang hte anhte a hkyehkrang la ai Madu Hkristu Yesu a hpung shingkang a danpru na lam a la nga let; 12 tara n hkungga ai myit hte mungkan ga hpe marin marit ai lam koi kau nhtawm, ndai prat e si si re ai hte dinghpring nna tara hkungga ai lam hkan nang lu hkra, 13 anhte hpe sharin ya na matu, Karai Kasang a chyeju gaw danpru wa sai rai nna, masha yawng hpe hkyehkrang la ai lam hpaw wa sai: 14 dai Hkristu Yesu gaw, tara tawt lai ai mara yawng hta na anhte hpe hkrang shaw la nna, shi hkum nan a matu, san da ai hte kaja reng ai magam bungli shagu hkan shachyut ai amyu hpe jasan jaseng lu hkra, anhte a matu mara shi hkum dai hpe, ap ya kau nu ai. 15 Ndai lam ni hpe ahkang aya hkum hkum hte tsun dan u, shadum shahprang nna daru sharin nga u: kadai mung nang hpe n gawn n sawn n rai mu ga.

Titu 3

3:1 Ahkang aya lu ai du ni a npu e taw nga nna, madat mara nga na hte, kaja reng ai magam bungli shagu a matu chyip chyip rai nga let, 2 kadai hpe mung n shatan ai hte, ga law lam n tam ai sha, myit ngwi myit pyaw rawng nna, masha yawng hte hpe lam shagu hta sumnung ai myit madun dan mu ga, shanhte hpe shadum shahprang nga u. 3 Kaning rai nme law, anhte mung shawng de gaw myit ngawk ai, n madat n mara ai, lam dam nna, ngang kayut ai hte pyaw daw kadaw ai lam amyu myu hkan galaw yu ai ni, n hkru n hkra ai hte manawn masham hta hkan len nga let, matsat shabat re ai ni, manang shada da ndawng n yawt re ai ni, rai nga ga ai. 4 Raitimung, anhte a hkyehkrang la ai Madu Karai Kasang a chyeju hte n-gaw nwai myit danpru wa ai shaloi e, 5 anhte hkum nan galaw ai dinghpring ai magam bungli a majaw n re ai sha, shi a matsan dum ai chyeju majaw she, bai shangai lam hte seng ai kashin kamun kau ya ai hte, anhte a hkyehkrang la ai Madu Yesu Hkristu a marang e, 6 anhte a ntsa e n taw n tsang ru bun ya ai Chyoi pra ai Wenyi e myit ningnan galai ya ai hta e, shi anhte hpe hkyehkrang la mi ai: 7 dai rai nna, shi a chyeju hte dinghpring ai hkrum lu ga ai majaw, htani htana asak lu la na lam myit mada nga ai hte maren, anhte sali wunli hkam la ai ni rai na ga ai. 8 Ndai ga gaw kangka re ai ga rai nga ai rai nna, Karai Kasang hpe kamsham ai ni gaw kaja reng ai magam bungli a shachyen nga na myit dum nga mu ga, ndai lam ni hpe nang grai ngu tsun shangang ya na, ngai ra nga nngai. Dai lam ni gaw masha a matu mai kaja nga ai rai nna akyu rawng nga ai: 9 angawk angak nga nna san ai ndang kalang ga hpe mung, ahtik labau gawn ai lam hpe mung, jep ai tara a majaw ga law ga la nga nna gasat ningjet re ai lam hpe mung, koi kau u: kaning rai nme law, dai lam ni gaw akyu n rawng ai hte kaman lila sha rai nga ai. 10 Sharin shaga ai lam hte nhtan shai ai wa hpe langai lahkawng lang shadum shahprang ngut jang, jahka kau u; 11 shing re ai wa gaw, tinang dai tinang hkum hpe dawdan kau ngut nna, myit byak ai hte yubak galaw ai wa rai nga ai, chye dum u. 12 Ngai Artima hpe, shing n rai Tuhkiku hpe, nang kaw shangun dat yang, Nikopoli mare de ngai hpe sa tau na, tin tin rai u: dai mare e nshung ta shalai na ngu nna ngai myit da we ai. 13 Bawmung wa Zena yan Apolo hta lam jarit hpa mung n kadawn malu ga, shan hpe hkum hkum di nna shabawn dat u. 14 Anhte a masha ni mung asi kata ai ni n rai mu ga, lang ra ai lam hta lang lu hkra, mai kaja ai amu shachyen chye na sharin la mu ga. 15 Ngai hte rau nga ai ni nlang hte gaw, nang hpe shakram dat ma ai: kamsham ai lam hta anhte hpe tsawra ai ni hpe shakram ya mi. Chyeju gaw nanhte mahkra hte rau anga nga u ga law.

Hpilemon 1

1:1 Hkristu Yesu a bawngdung ai wa, ngai Pawlu hte hpunau Timohti gaw, anhte amu shingtau ai, tsawra ai wa Hpilemon hpe mung, 2 an a kajan Ahpia hpe mung, an a hpyen manang Arhkipo hpe mung, na a nta e shanu ai Hpung hpe mung, ga shana dat ga ai: 3 anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e anga nga malit ga law. 4 Madu Yesu hpe mung, chyoi pra ai ni yawng hte hpe mung, nang tsawra ai hte kamsham lam hkan ai hpe, ngai na nngai majaw, 5 Hkristu a matu anhte hta rawng ai kaja reng ai amu shagu a chye chyang ai lam hta, nang hkan shingtau ai makam masham gaw akyu shapraw lu lit ga, 6 nye a akyu hpyi ai ga hta nang hpe adum nga let, Karai Kasang hpe ngai tut tut a shakawn nga nngai. 7 Kaning rai nme law, hpunau wa e, na a marang e chyoi pra ai ni a myit masin shalan shabran hkrum lu ai majaw, na tsawra myit hta ngai grai wa kabu gara ai hte shangwi shapyaw hkrum nngai. 8 Dai rai nna, nang mai galaw ai lam nang hpe htet dat na, Hkristu hta e ngai grai nden ja ai ahkang lu nngai raitimung, 9 dingla wa Pawlu rai nga nngai hte, ya e Hkristu Yesu a bawngdung ai wa mung rai nga nngai majaw, tsawra ai hku she nang hpe hpyi nem dat na, ngai grau ra nngai: 10 Ngai bawngdung nga yang, ngai shangai la ai, ngai sha Onesimo a matu ngai nang hpe hpyi nem dat nngai; 11 shi gaw shawng de na a matu akyu n rawng timung, ya gaw na a matu mung, nye a matu mung, akyu rawng nga ai: 12 shi hkum nan hpe nang hpang de ngai bai wa shangun dat nngai; dai lam hta e nye a tsawra ai myit du nna lawm nga ai. 13 Dai kabu gara shiga majaw bawngdung ai hta, shi gaw na a malai ngai hpe galaw jaw na, ngai kaw woi nga mayu nngai raitimung, 14 na a chyeju gaw kaning n chyum nna n re ai sha, myit ra ai hku san san rai u ga, na a myit n lawm yang gaw, ngai kaning mung n rai mayu nngai. 15 Kaning rai nme law, hpang de na a mayam wa zawn n rai, ngai du lawm hkra tsawra ai hpunau wa re ai hta n-ga, masha hking hku yu yang mung, Madu a lam hku yu yang mung, na a matu grau nna tsawra mai ai, hpunau wa zawn, 16 tutnawng e nang kaw anga nga lu na she, shi nang hte tawng marang mi hka ai, rai dam nhten. 17 Dai re ai majaw, nang ngai hpe kanawn manang zawn nawn ndai rai yang gaw, ngai hpe zawn shi hpe hkap hkalum la u. 18 Shi nang hpe lama ma shut kau ai rai yang mung, hka kap ai rai yang mung, dai gaw nye a hka shatai u. 19 Ngai Pawlu gaw dai hka wa na, ngu nna nye a lata hte nan ka dat nngai: raitimung, na hkum nan pyi ngai hpe hka wa ra ndai, ngu nna ngai n tsun mayu nngai. 20 Rai sa, hpunau wa e, na a majaw, dai Madu hta, ngai kabu gara nga lu n-ga; Hkristu hta e nye a myit masin hpe shangwi shapyaw ya rit. 21 Na a madat mara na myit hpe kam ya lu de ai majaw, ngai tsun ai hta n-ga nang galaw na rin dai hpe, ngai chye let ka dat nngai. 22 Dai hta kaga, nye a matu nga na shara lajang tawn da u; kaning rai nme law, nanhte a akyu hpyi ai ga majaw, nanhte hpang de bai du na ahkang lu la na, ngai myit mada nga nngai. 23 Hkristu Yesu a majaw nye a bawngdung manang Epahpra gaw, nang hpe shakram dat ai: 24 nye a shingdep shingtau Marku, Aristaku, Dema, Luka mung, nang hpe shakram dat ma ai. 25 Madu Yesu Hkristu a chyeju gaw, nanhte a wenyi hte rau anga nga u ga law.

Hebre 1

1:1 Karai Kasang gaw moi na lakhtak e, myihtoi ni a n-gup hte, ga htap law law hte lam amyu law law hta, ji wa ni hpe ga tsun da nhtawm e, 2 ndai nhtoi ladaw na hpang jahtum ai hta, Kasha a n-gup hte anhte hpe ga matsun jaw da mani ai; dai Kasha hpe yawng mayawng a sali wunli hkam la ai wa tai na shi san da nu ai rai nna, shi hte mung nga yawng nga pra galaw da nu ai; 3 shi gaw Karai Kasang a hpung shingkang a ningchya hte, shi a gawng shing-yan a hkrang sumla rai nga ai rai nna, shi a mungga atsam hte yawng mayawng hte hpe bau sin da ai: yubak mara hpe jasan jaseng kau ngut jang, matsaw ningtsang na daru magam a hkra maga de shi dung nga ai rai nna, 4 lamu kasa ni hta reng grau ai amying ningsang hkam la lu ai majaw, shanhte hta grau reng ai wa tai nga ai. 5 Kaning rai nme law, Ngai Sha nang rai nga ndai, Dai ni ngai nang hpe shaprat sade ai, nga nna mung, Ngai gaw shi a Kawa tai nna, Shi gaw ngai Sha rai na ra ai, nga nna mung, gara lamu kasa hpe galoi me tsun yu a ta? 6 Dai hta kaga, dai Kasha alat hpe mungkan ga de bai shashawn dat ai shaloi e, Karai Kasang a lamu kasa ni yawng shi hpe nawku mu ga, nga dat ai. 7 Lamu kasa ni a lam gaw, Shi a kasa ni hpe shi nbung shatai nna, Shi a ali ama ni grung ai wan hpe shatai wu ai, nga nna shi tsun ai. 8 Bai, dai Kasha a lam chyawm gaw, Karai Kasang e, na a tingnyang htani htana anga nga ai; Shi a mungdan a sumdoi, dingman ai sumdoi rai nga ai. 9 Nang dinghpring ai tsaw nna, yubak hpe ndawng ndai; Dai majaw Karai Kasang gaw, na a Karai Kasang, Na a manang ni hta, kabu gara namman hte nang hpe grau nna chya ya nit dai. 10 Bai, Madu e, shawng ningpawt e, ginding aga hpe nang gaw da nna, Sumsing lamu, na a lata a amu rai nga ai: 11 Dai ni hten wa ma timung, nang agrin nga ndai: Yawng gaw hpun nba zawn dingsa mat na ma ai. 12 Nba hpe zawn nang dai hte hpe katsu nna, Hpun nba galai ai zawn, galai kau ai hkrum na mara ai. Nang chyawm gaw dinggrin anga nga nna Na a shaning ni, htum ngu ai n nga ai, nga nna tsun ai. 13 Dai hta kaga, Na a gumlau ni hpe na a lagaw na Kabye lahkum ngai shatai ai du hkra, Nye a hkra maga de naw adung nga u, nga nna, gara lamu kasa a lam galoi me tsun yu a ta? 14 Shanhte yawng mayawng gaw, hkyehkrang la ai Sali wunli hkam la na ni a matu mara, amu gunhpai shangun ai wenyi ni rai nga ma ai, n rai ni?

Hebre 2

2:1 Dai re ai majaw na la sai lam hta na anhte n yit mat wa u ga, dai hte hpe grau nna madat mara shara rai nga ai. 2 Kaning rai nme law, lamu kasa ni a n-gup hte tsun da ai ga gaw, agrin nga ai rai nna, shut hpyit tawt lai ai hte n madat n mara ai lam yawng hte gaw, dai hte ging ang ai ari hkrum lu ai rai yang gaw, 3 ndai hte wa galu kaba ai hkyehkrang la ai chyeju hpe n gawn n sawn di ga yang, anhte kaning rai lawt lu na ga ta? dai chyeju gaw shawng npawt e madu a n-gup hte nan tsun dan nna, na la ai ni gaw anhte hpe bai htawn tsun shangang da ai hte, 4 Karai Kasang mung shi myit ra ai hte maren, lamik kumla, mauhpa amu, atsam rawng ai amu amyu myu hte mung, Chyoi pra ai Wenyi a karan jaw ai chyeju kumhpa hte mung, shanhte hte rau sakse dan ya ai. 5 Kaning rai nme law, ya anhte tsun nga ga ai htawmhpang na mungkan ga hpe, lamu kasa ni a npu e, shi tawn da wu ai n rai. 6 Langai wa mi shara mi hta sakse hkam wu ai gaw, Nang adum nga ai shinggyim masha hte, Nang kawan yu nga ai masha kasha gaw, hpa wa mi rai nga a hka? 7 Lamu kasa ni hta nang shi hpe loi mi sha shagrit da nna, Hpung shingkang hte arawng sadang ka-up ya nu ai. Na lata amu a ntsa e nang shi hpe up shangun wu ai. 8 Nang yawng hte hpe shi a lagaw npu e tawn da nit dai, nga ai. Dai rai nna, shi a npu e yawng mayawng hte hpe ap tawn da ai, nga ai gaw, shi a npu e n tawn da ai arai langai mi mung n ngam nga ai. Raitimung, arai yawng mayawng shi a npu e tawn da nga ai gaw, anhte ya garai n mu ga ai. 9 Lamu kasa ni hta loi mi sha shagrit kau hkrum ai Yesu chyawm gaw, si hkrung si htan a nni nkri hkam la wu ai majaw, hpung shingkang hte arawng sadang ka-up nga ai hpe, anhte mu lu ga ai; shingrai shi gaw, Karai Kasang a chyeju majaw, masha yawng mayawng a matu, si hkam ai hkrum nga ai. 10 Kaning rai nme law, kashu kasha law law hpe hpung shingkang hkam la ai de woi wa yang, shanhte a hkyehkrang la ai lam a agyi wa hpe nni nkri hte jahkum shatsup na yawng hpe up nna, yawng a npawt rai nga ai Karai Wa gaw, mai di nga ai. 11 Shingrai shachyoi shapra ya ai wa hte, shachyoi shapra hkrum ai ni gaw, langai sha hta rum nga ma ai: dai re ai majaw shanhte hpe hpunau ngu na shi n kaya ai sha, 12 Na amying nye a hpunau ni hpe ngai shana ya na nngai, Hpawng shingra ka-ang e nang hpe mahkawn mangoi na nngai, nga nna mung, 13 Shi hta ngai shamyet shanat nga na nngai, nga nna mung, Yu u, ngai hte Karai Kasang ngai hpe jaw ya ai kashu kasha ni nga nga ga ai, nga nna mung, shi tsun nga ai. 14 Dai re ai majaw, kashu kasha ni asai ashan hkan dagraw ai zawn, shi mung, si lam up ai wa ngu ai Nat wa hpe shabyak kau lu na hte, 15 si lam hpe hkrit nna, prat tup yamnga ai ni yawng hpe shalawt dat lu na lam si hkam ai hte shabyin lu hkra, dai hte maren asai ashan hta shang dagraw wu ai. 16 Gaja wa teng teng, lamu kasa ni hpe hkap karum na shi sa ai n rai, Abraham a aru arat hpe hkap karum na she, sa ai rai nga ai. 17 Dai re ai majaw, shi gaw Karai Kasang hte seng ai lam hta, matsan dum chye ai hte kangka re ai hkinjawng agyi tai nna, shinggyim masha ni a matu mara gawng malai hkungga jaw lu u ga, lam shagu hta kahpu kanau ni hte bung lu na, sun ang nga ai. 18 Kaning rai nme law, agung alau hkrum let shi hkum nan nni nkri hkrum yu sai majaw, agung alau hkrum ai ni hpe shalan shabran lu nga ai.

Hebre 3

3:1 Dai re ai majaw, sumsing lamu na shaga la ai chyeju hkam la ai, chyoi pra ai hpunau ni e, anhte a nawku htung hpang ai Kasa hte Hkinjawng agyi wa Yesu hpe, myitsumru yu mu; 2 Mawshe gaw Karai Kasang a nta ting hta kangka re ai zawn, Yesu gaw shi hpe san da ai wa a matu kangka rai nga ai. 3 Kaning rai nme law, nta de da ai wa gaw, dai nta hta grau ai arawng sadang lu ai made, Yesu gaw Mawshe hta grau ai hpung shingkang lu ging nga ai. 4 Nta ngu ai hpe marai langai ngai e de da nga ai; yawng mayawng hpe de da ai wa chyawm gaw, Karai Kasang rai nga ai. 5 Mawshe gaw, htawmhpang e tsun shapraw na ra ai lam ni hpe sakse hkam ya na matu, Karai Kasang a nta ting hta e shangun ma zawn kangka rai nga ai; Hkristu chyawm gaw, Shi a nta up ai Kasha zawn kangka rai nga ai; 6 anhte mung, anhte a nden ja ai lam hte myit mada ai lam a gumrawng shara hpe, jahtum nhtoi du hkra ngang ngang manat nga ga yang gaw, dai nta nan rai nga ga ai. 7 Dai re ai majaw, dai Chyoi pra ai Wenyi tsun ai hte maren, Nanhte dai ni shi a nsen na myit yang gaw, 8 Nam e chyam yu nna, pawt bu shangun ai nhtoi e zawn, Nanhte a myit masin hpe hkum shaja myit. 9 Nanhte a nji nwoi ni dinglik yu let, ngai hpe chyam yu nna, Mali shi ning tup nye a amu hpe mu lu ma ai. 10 Dai re ai majaw, dai amyu hpe ngai ndawng nna, Shanhte galoi mung myit shut nga ma ai hte, Nye a lam, gaja wa, n chye nga ma ai, ngu let, 11 Nye a ban sa ai hta shanhte n shang lu na ma ai, Ngu nna, ngai pawt bu ai hte dagam we ai, nga ai. 12 Hpunau ni e, ahkrung nga ai Karai Kasang kaw na htak mat wa hkra, n hkru n shawp ai kam shut ai myit gaw, nanhte hta na langai mi hta muk n rawng malit ga, sadi nga mu; 13 yubak e hkalem hkalau kau ai hte nanhte hta na langai mi muk myit n shaja malit ga, Dai ni, ngu nna, naw tsun lu ai laman hte made hta, shani shagu shada da shadum shahprang nga mu; 14 kaning rai nme law, anhte a myit maju jung ai a npawt nhpang hta, jahtum nhtoi du hkra ngang ngang manat nga ga yang gaw, Hkristu hte jawm hpawng ai ni anhte rai nga ga ai. 15 Bai laika hta, Nanhte dai ni shi a nsen na myit yang gaw, Pawt bu shangun ai nhtoi e zawn, nanhte a myit masin hpe hkum shaja myit, nga nna tsun nga yang, 16 na la lu ninglen pawt bu shangun ai ni gaw, kadai ni rai nga ma ta? Mawshe a lata e Egutu mung na pru wa lu ai ni nlang hte, n rai ma ni? 17 Mali shi ning laman e ndawng kau ai ni gaw, kadai ni hpe rai ta? Yubak mara galaw nna, nam e tinang a hkum tsawp hpe kadawng si ai ni, n rai ma ni? 18 Shi a ban sa ai de n shang lu na ma ai, nga nna dagam kau hkrum ai ni gaw, madat mara ai myit n rawng ai ni sha, n rai ma ni? 19 Dai rai nna, kamsham ai myit n rawng ai majaw, shanhte n shang lu ma ai hpe, anhte chye lu ga ai.

Hebre 4

4:1 Dai re ai majaw, shi a ban sa ai de shang lu na, ga sadi naw nga nga dingsa, nanhte hta na langai ngai dai de hkoi n dep lu na hpe, anhte myit tsang nga ga. 2 Kaning rai nme law, shanhte hpe kabu gara shiga hkaw dan ai zawn, anhte hpe mung hkaw dan ma ni ai; raitimung, dai na la ai mungga gaw, na la ai ni hta kamsham ai hte n kayau gumhpawn ai majaw, shanhte a matu akyu n byin malu ai. 3 Anhte kamsham saga ai ni chyawm gaw, dai ban sa ai de shang wa nga ga ai; dai hte maren, Nye a ban sa ai hta shanhte n shang lu na ma ai, ngu nna pawt bu ai hte ngai dagam we ai shi nga ai; raitimung, ban sa ai gaw, ginding aga ningnan lat yang, shi a magam bungli ni ngut ma ai kaw nna, rai nga sai. 4 Kaning rai nme law, Karai Kasang gaw sanit ya nhtoi e shi a magam bungli ni mahkra ngut ma nna ban sa nga ai, nga nna sanit ya nhtoi a lam shara mi hta tsun da nga ai; 5 bai, ndai yang e mung, Nye a ban sa ai hta shanhte n shang lu na ma ai, nga nna bai rawng nga ai. 6 Dai rai nna, dai kabu gara shiga hpe shawng e na yu ai ni gaw, n madat mara ai a majaw dai ban sa ai de n shang lu ma ai raitimung, dai de shang lu ai ni nkau mi rai nga ma ai majaw, 7 shawng de tsun ni ai hte maren, Nanhte dai ni shi a nsen na myit yang gaw, Nanhte a myit masin hpe hkum shaja myit, nga nna, aten dai hte wa na la sayang, Dawi a n-gup hte, Dai ni, ngu ai nhtoi hpe bai daw da wu ai. 8 Kaning rai nme law, Yawshu gaw shanhte hpe ban sa shara jaw manu ai rai yang gaw, htawmhpang e nhtoi kaga a lam hpa tsun na nu ai n rai. 9 Dai rai nna, Karai Kasang a amyu masha ni a matu mara laban ban sa ai nhtoi naw nga nga ai. 10 Kaning rai nme law, Karai Kasang gaw shi a magam bungli ngut ma nna ban sa nga ai zawn, shi a ban sa ai hta shang lu ai wa mung, tinang a amu bungli ngut mat nna ban sa lu nga ai. 11 Dai re ai majaw, kadai wa mung n madat mara ai a ningli hkan nna, kataw kadawng n rai u ga, dai ban sa ai de shang lu hkra, anhte shakut shaja nga ga. 12 Kaning rai nme law, Karai Kasang a mungga gaw, ahkrung nga ai hte alet nga ai rai nna, nshan lahkawng maga dai ai hpa baw ningtawng nhtu hta mung grau dai ai hte, myit masin hte wenyi hpe mung, nra hkrihkraw hte lasawi hpe mung, dinghkren ginhka chye nna, kraw lawang na myit mamyit hte maw mawn ai hku hpe jeyang hparan ya lu ai. 13 Shi a man e n dan n leng ai hpan da ai arai langai mi mung n nga ai; yawng mayawng gaw shi myi a man e dan leng nga ai hte asan brang lang rai nga ai rai nna, anhte shi a man e jahpan dan lu na ga ai. 14 Dai rai nna, sumsing lamu de hkrang shang wa sai hkinjawng agyi kaba ngu ai, Karai Kasang a Kasha Yesu gaw anhte lu ga ai majaw anhte yin la ai nawku htung hta maju jung nga ga. 15 Kaning rai nme law, anhte a gawngkya ai lam hpe matsan n chye dum ai hkinjawng agyi wa anhte lu ga ai n rai; lam shagu hta anhte zawn gunglau hkrum yu timung, yubak mara n kap ai hkinjawng agyi wa she lu ga ai. 16 Dai rai nna, matsan dum ai hkam la lu na hte, kyindut ai aten e shadaw shalan ai chyeju mu lu hkra, chyeju tingyang man de, anhte nden ja ai myit hte sit shang wa ga.

Hebre 5

5:1 Kaning rai nme law, masha hta na lata la ai hkinjawng agyi shagu gaw yubak a jaw e kumhpaw kumhpa hte shagu hkungga nawng ya u ga, Karai Kasang hte seng ai lam hta e, shinggyim masha ni a matu mara aya dang da ai wa rai nga ai: 2 shi hkum dai mung gawngkya ai hte shinggrup nga ai majaw, n chye n chyang ai ni hte lam dam mat wa ai ni hpe, galu kaba ai myit chye madun ai wa rai nga ai; 3 shingrai, mung masha ni a yubak a matu hkungga nawng ya ra ai zawn, tinang dai a yubak a matu mung nawng la ra nga ai. 4 Dai hta kaga, kadai wa mung dai aya a arawng hpe tinang dai dang la lu ai n rai; Arun hpe zawn Karai Kasang shaga yang she, dang ya lu ai: 5 Dai hte maren Hkristu mung, hkinjawng agyi tai na matu, shi hkum dai shagrau la wu ai n re ai sha, Ngai sha nang rai nga ndai, Dai ni ngai nang hpe shaprat sa de ai, nga nna shi a lam tsun ai wa she, shi hpe shagrau wu ai. 6 Dai hta kaga, Nang gaw Melhkizedek a hkringhtawng lam hte maren, Htani htana hkinjawng rai nga ndai, nga nna shara kaga mi hta shi naw tsun nga ai. 7 Dai hkinjawng wa gaw, dinghta hkumshan hte naw pra nga ai nhtoi hte hta, si ai kaw na shi hpe mawai la lu ai wa kaw, akyu hpyi ai ga hte tawng ban ai ga hpe, hkrapngu hkrapngoi nna myi prwi law law hte nawng ya ngut yang, shi a hkum tsup ai myit majaw hkap madat la ya ai hkrum nhtawm, 8 Kasha wa teng nga ai raitimung, nni nkri hkrum ai hte madat mara ai lam sharin la yu ai; 9 dai hte hkum tsup wa lu ngut jang, shi gaw, shi a ga madat mara ai ni yawng mayawng a matu, htani htana hkyehkrang la ai a npawt tai wa ai hte, 10 Melhkizedek a hkringhtawng lam hte maren hkinjawng agyi rai nga ai, ngu nna Karai Kasang gaw shi hpe amying dang da wu ai. 11 Dai Melhkizedek a lam anhte tsun shara law law wa nga ai raitimung, nanhte a na dabang tsan nga malit dai majaw, ga lachyum tsun dan na yak la nga ai. 12 Kaning rai nme law, aten hpe tau yu yang gaw, nanhte sara tai ram manit dai, raitimung, Karai Kasang a mungga hta na shawng na ga kanu hpe pyi, marai langai ngai e nanhte hpe naw sharin ya ra ai ni rai nga myit dai rai nna, ja ai shahpa hte n ram ai ni, chyu sha naw lu ra ai ni, tai wa manit dai. 13 Chyu naw lu ai wa kadai mung, ma chyangai naw rai nga ai rai nna, mungga a dinghpring ai lam hta n man nga ai. 14 Ja ai shahpa chyawm gaw, kaja ai hte n kaja ai hpe chye ginhka lu hkra, tinang a myit mang ai lam hpe len shaman ai hte shakung jahpan chye nna, hkum tsup nga ai ni a matu rai nga ai.

Hebre 6

6:1 Dai re ai majaw, Hkristu a shawng npawt na ga kanu ngu ai, si ging ai magam bungli hta na myit malai lu ai lam, Karai Kasang hpe kamsham ai lam, 2 baptisma hkam ai hte seng ai sharin shaga ai lam, lata mara jaw ai lam, si ai kaw na bai hkrung rawt ai lam hte htani htana dawdan hkrum ai lam hte hta, anhte npawt nhpang naw n gaw nan nga ai sha, dai hpe tawn da nna, hkum tsup re ai de dep hkra hkan shachyut nga ga. 3 Rai sa, Karai Kasang hkraw a yang gaw, anhte shingrai hkan galaw na ga ai. 4 Kaning rai nme law, jahtoi ya ai lang mi hkrum yu nna, sumsing lamu na chyeju kumhpa hpe chyim yu ai hte, dai Chyoi pra ai Wenyi hpe jawm hkam la nna, 5 Karai Kasang a kaja htum ai mungga hte htawmhpang prat na hpung dagu hpe chyim yu nhtawm, 6 bai htak mat wa ai ni gaw, Karai Kasang a Kasha hpe tinang hkum nan wudang hta bai jen da nna, shi hpe n gawn n sawn di kau mu ai majaw, myit malai ningnan bai lu la na matu, lam kanang mung n hku malu ai. 7 Kaning nga yang, tinang a ntsa e law law lang htu bun ai marang ntsin hpe lu la nna, shawt hkai ai ni a matu mai ram ai hkai nmai shaprut ya ai aga gaw, Karai Kasang a shaman ya ai hkrum lu nga ai; 8 ju hpun hte atsing sha shatut yang chyawm gaw, kau da ai hkrum nna, dagam hkrum magang nga ai hte, de a jahtum gaw, wan nat kau hkrum na, rai nga ai. 9 Anhte ning nga tsun ga ai raitimung, tsawra htum ai ni e, dai hta grau kaja ai hte, hkyehkrang la ai lam hte seng ai baw nanhte lu la na myit dai, ngu nna nanhte a lam anhte myit tawng ya ga ai. 10 Kaning rai nme law, nanhte chyoi pra ai ni hpe galaw daw manit dai hta n ga, galaw daw ding-yang rai nga let, Karai Kasang a mying nsang a matu magam bungli gunhpai nna tsawra ai myit madun ai lam hpe, malap kau ya na gaw, shi n ding n hpring nga ai, n rai. 11 Dai rai nna, nanhte gaw n lanyan nga ai sha, makam masham hte shakut sharang ai a majaw, ga ndat ni a sali wunli hkam la lu ai ni a hkan sharau ai ni tai myit ga, 12 myit mada ai lam hpring tup wa na matu, langai hte langai prat htum hkra, dai zawn naw shaja nga na, anhte ra ga ai. 13 Kaning rai nme law, Karai Kasang gaw Abraham hpe ga ndat da ai shaloi e, shi hta grau ai wa hpe gang nna dagam na n nga ai majaw, tinang hkum hpe gang let, 14 Gaja wa, shaman ai gaw, ngai nang hpe shaman ya na de ai; shalaw ai gaw ngai nang hpe shalaw ya na de ai, ngu nna dagam wu ai. 15 Shingrai, shakut sharang let la nga ai majaw, dai ga ndat a akyu shi hkam la lu wu ai. 16 Shinggyim masha ni gaw, tinang hta grau kaba ai wa hpe gang nna dagam ga ma ai hte, shanhte a ndang kalang shara yawng hpe, dagam ai ga hte shagrin shangut kau lu ma ai; 17 Karai Kasang mung, shi atut agrin nga ai bawng hkut da ai lam hpe, ga ndat ni a sali wunli hkam la ai ni kaw grau nna madun dan mayu ai shaloi e, dagam ai ga hte amahkam da wu ai; 18 shingrai, Karai Kasang gaw galoi mung n masu kau lu ai, tut agrin nga ai lam lahkawng a majaw, anhte a man e tawn da ai myit mada shara hta manoi nga lu hkra, shingbyi shingwung shara de hprawng wa ai ni ngu ai, anhte a matu mara, ngang ngang kang kang re ai shalan shabran ai lam rai nga ai. 19 Dai myit mada shara chyawm gaw, anhte a myit masin a matu hpri chyinghkyi tai nga ai rai nna, dai gaw ngang mung ngang, grin mung grin rai nga ai hte, nba grang a nhku maga de nga ai chyeju du hkra shang manoi nga ai; 20 dai kata de gaw, Yesu mung, Melhkizedek a hkringhtawng lam hte maren htani htana hkinjawng agyi wa tai ngut jang, anhte a matu mara lam shawng wa tai nna, shang wa sai.

Hebre 7

7:1 Abraham gaw hkawhkam ni hpe sat kau ai kaw na bai wa yang, shi hpe sa tau nna shaman ya wu ai hte, Abraham mung lanep yawng hta na htamshi hta htammi karan sak wu ai Melhkizedek ngu ai wa chyawm gaw: 2 Salem hkawhkam hte tsaw htum ai Karai Kasang a hkinjawng wa rai nga ai rai nna, ga lachyum hku hkan yang, shawng na gaw, dinghpring ai a Hkawhkam, bai, Salem hkawhkam ngu ai gaw, ngwi pyaw ai a Hkawhkam, ngu ai rai nga ai: 3 shi gaw kawa n nga, kanu n nga, ahtik labau ngu ai n nga, nhtoi ladaw nhpang mung, asak aprat htum ai mung n ngu lu ai majaw, Karai Kasang a Kasha hte bung hkra tai wa ai rai nna, dinggrin anga nga ai hkinjawng rai nga ai. 4 Wa daju Abraham e, reng htum ai lanep hta na, htamshi hta htammi karan sak ya ai wa gaw, gade galu kaba nga ai hpe, myitsumru yu mu. 5 Hkinjawng aya lu la ai Lewi a kashu kasha ni gaw, Abraham a nshang na hkrat ai ni, ngu ai, tinang a hpunau ni kaw na, tara hte maren htamshi hta htammi, hta sha na ahkang lu ma ai. 6 Raitimung shanhte hte ahtik labau n rum ai wa gaw, Abraham kaw na htamshi hta htammi hkam la nna, ga ndat ni lu la ai wa hpe nan, shaman ya dat wu ai. 7 Grau kaba ai wa mahtang, kaji ai wa hpe shaman ya ga ai gaw, hpa ndang shara n nga ai. 8 Nang e gaw, si chye ai ni htamshi hta htammi, hkam la ma ai; wo nang chyawm gaw, sakse nga ai hte maren ahkrung nga ai wa gaw, hkam la nu ai. 9 Dai re ai majaw, htamshi hta htammi hkam sha ai Lewi amyu mung, Abraham a lata hte htamshi hta htammi jaw nu ai, ngu mai nga ai: 10 kaning rai nme law, Melhkizedek gaw Abraham hpe tau la ai shaloi e, Lewi gaw shi kawa a nshang e naw rai nga ai. 11 Bai, lam mi gaw, Lewi a amyu hkinjawng ni a aprat e, mung masha ni gaw dai jep ai tara hpe lu la ma ai rai nna, dai hkinjawng aya a gawp e hkum tsup re ai lam dep la lu ai teng yang gaw, Arun a hkringhtawng lam hte maren n re ai sha, Melhkizedek a hkringhtawng lam hte maren re ai hkinjawng wa kaga gaw, hpa majaw paw pru shara naw nga a ta? 12 Kaning rai nme law, dai hkinjawng amyu galai mat lu yang gaw, dai jep ai tara mung n galai ai, nga lu na n rai: 13 ning ngu tsun ai gaw, ndai ga matsun hte seng ang ai wa gaw, amyu kaga hta lawm nga ai rai nna, dai amyu hta na kadai mung, tawn hkungri hta dawjau yu ai n rai, 14 Gaja wa, anhte a Madu, Yuda amyu hta na paw pru wa sai gaw, dan dan leng leng rai nga ai; dai amyu hpe hkinjawng aya a lam Mawshe gaw hpa mung n tsun da wu ai. 15 Dai hta n-ga, Melhkizedek a hkringhtawng lam hte maren hkinjawng kaga paw pru nga ai teng yang gaw, hkinjawng amyu galai mat sai gaw, grau nna dan leng wa sai: 16 shi gaw hkumshan hte seng ai tara matsun hte maren dang da hkrum ai wa n rai, galoi n mat chye ai asak a atsam hte maren, dang da hkrum ai wa rai nga ai; 17 kaning rai nme law, Nang gaw Melhkizedek a hkringhtawng lam hte maren, Htani htana hkinjawng rai nga ndai, nga nna shi a lam sakse hkam ya nga ai. 18 Jep ai tara gaw, hpa lam hpe mung n shatsup lu ai rai nna, shawng na ga matsun gaw n-gun kya nga ai hte akyu n rawng nga ai a majaw, yeng kau hkrum nna, 19 de a malai grau kaja ai myit mada shara shashawn ya ai lam rai nga ai; de a majaw anhte gaw Karai Kasang hpang de sit shang lu ga ai. 20 Bai, shanhte gaw dagam ai ga hte n re ai sha hkinjawng aya lu la ma ai: 21 Yesu chyawm gaw, Dai Madu dagam nhtawm, myit bai kayin na n rai. Nang gaw htani htana hkinjawng rai nga ndai, nga nna shi hpe sha-ang tsun ai dagam ai wa a ga majaw, hkinjawng aya lu la nu ai rai nna, 22 ning nga dagam ai ga hte aya hkam la lu ai wa gaw grau nga ai hte maren, Yesu gaw grau kaja ai ga shaka a ama hkam tai wa sai. 23 Shanhte gaw si hkrung si htan e numdan ai hte n grin lu ma ai majaw, hkinjawng aya hkam la ai ni marai law law wa rai wa ma ai: 24 shi chyawm gaw htani htana agrin nga ai majaw, shi a hkinjawng aya galai mat chye ai n rai. 25 Dai rai nna, shi gaw shinggyim masha ni a matu mara tawng ban ya nga na, tutnawng e ahkrung nga ai majaw, shi a marang e Karai Kasang kaw sit shang wa ai ni hpe hkum tsup wa hkra, mawai la lu na atsam, shi lu nga ai. 26 Kaning rai nme law, shingrai chyoi pra ai, sanseng ai, ra n rawng ai hte yubak kap ai ni hte ran ai wa rai nna, sumsing lamu hta shatsaw shagrau hkrum ai hkinjawng agyi wa gaw anhte a matu ram nga ai; 27 shi gaw hkinjawng agyi gale ni zawn, shawng e tinang yubak a matu, dai hpang e, mung masha ni a yubak a matu, shani shagu hkungga nawng ya ra ai n rai; shi hkum nan hpe nawng ya kau ai shaloi jang, dai lam hpe lang lata sha e shangut kau nu ai. 28 Jep ai tara gaw, hkinjawng agyi aya hta mara kap ai masha hpe dang da nga ai; jep ai tara a hpang e pru ai dagam ai ga chyawm gaw, tutnawng e hkum hkum tsup tsup re ai Kasha wa hpe dang da nga ai.

Hebre 8

8:1 Ya, anhte tsun dan ai lam ni a ga madung chyawm gaw, da ndai rai nga ai: Shing re ai hkinjawng agyi wa gaw anhte lu ga ai; shi gaw sumsing lamu na daru magam a tingnyang hkra maga de, wa dung nga nna, 2 chyoi pra ai arai ni hte, masha e n gap ai, dai Madu she gap tawn da ai nawku sum majing hte seng ai amu gunhpai ai wa, tai nga ai. 3 Kaning rai nme law, hkinjawng agyi shagu gaw kumhpaw kumhpa hte shagu hkungga jaw ya na matu dang da nga ai; dai re ai majaw, ndai hkinjawng agyi wa mung, lama ma jaw ya lu na, ra nga ai. 4 Ya shi gaw, ga ntsa e she nga taw-gaw, gaja wa hkingjawng tai na n rai; kaning rai nme law, jep ai tara hku hte maren, kumhpaw kumhpa dawjau ai ni nga nga ma ai: 5 Mawshe gaw dai nawku ai sum hpe gap magang nga ai shaloi e, Bum ntsa e nang hpe madun dan sade ai kasi hte maren, yawng mayawng hpe galaw lu hkra sadi nga u, nga nna Karai Kasang shi hpe tsun shadum ai hku hkan ai majaw, shanhte gaw sumsing lamu na arai ni a kanan hte shingna hpe sha, dawjau ma ai. 6 Ya chyawm gaw, grau kaja ai ga ndat hta jung da ai ga shaka a htinglu ya ai wa shi rai nga ai hte maren, grau reng ai dawjau ai aya shi lu la wu ai. 7 Shawng na ga shaka hta ra n rawng ai teng yang gaw, hpang na ga shaka hpe shashawn na lam, tam shara kanang na mi n nga ai. 8 Kaning rai nme law, shanhte hpe mara shagun let, dai Madu tsun wu ai gaw, Yu mu, Israela a nta hte Yuda a nta ntsa e, Ga shaka ningnan ngai tawn da na nhtoi du na ra ai; 9 Shanhte a kaji kawoi ni hpe lata hta dun la nna, Egutu mung na woi wa ai shaloi na, Shanhte hte tawn da ai ga shaka hte maren, n rai: Kaning rai nme law, nye a ga shaka hta shanhte maju n jung ma ai. Ngai mung shanhte hpe n yu n gawn mawe ai nga nna, dai Madu tsun nga ai. 10 Da ndai gaw, dai nhtoi ni a hpang e Israela a nta hte ngai shaka na ga shaka rai nga ai: Nye a tara hpe shanhte a myit hta ngai bang da nna, Shanhte a kraw lawang hta ka da na we ai; Ngai shanhte a Karai Kasang tai na we ai, Shanhte mung nye a amyu tai na mara ai; 11 Dai ni gaw, Dai Madu hpe chye u, nga nna langai hte langai Tinang a manang wa hte, tinang a hpunau wa hpe, sharin achyin ya nga na ma ai n rai: Kaning rai nme law, kaji htum ai wa kaw nna, shanhte a kaba htum ai wa du hkra, Nlang hte gaw, ngai hpe chye ma na mara ai. 12 Shanhte a mara hpe ngai matsan dum nna, Shanhte a yubak hpe bai dum ya na ni ai n rai, nga nna dai Madu tsun nga ai, nga ai. 13 Ya, ga shaka ningnan, nga nna shi tsun ai gaw, shawng na ga shaka hpe ningsa shatai kau wu ai; ningsa hte aprat kaba ai arai chyawm gaw, wai mat magang nga ai.

Hebre 9

9:1 Dai shawng na ga shaka hta pyi, nawku htung hte seng ai arawn alai ni hte, mungkan ga na chyoi pra ai nta lawm ga ai. 2 Kaning rai nme law, shawng na ngu ai nawku sum langai mi lajang da nga ai rai nna, dai hta e pyengdin shadun, muk mara ai ku hte madun dan ai muk ni rawng nga ai; dai hpe Chyoi pra ai shara, ngu nna shamying wu ai. 3 Bai, lahkawng na nba grang kata maga de, Chyoi pra htum ai shara, ngu ai sum, rai nga ai rai nna, 4 dai hta e manam pyaw ai baw nat ai aja hkungri hte, hkum ting ja sup ai ga shaka sumpu rawng nga ai: dai sumpu kata e, manna rawng ai ja di mung, apu pu ai Arun a dawhkrawng mung, ga shaka lungpa yan mung, rawng nga ai; 5 de a ntsa e mung hpung shingkang a Hkerubim lahkawng gaw dai chyeju magap hpe ka-up nga ma ai: dai hte a ga lachyum langai hte langai hpe, ya tsun shara n nga ai. 6 Shingrai yawng hte hpe lajang ngut jang, hkinjawng ni gaw dawjau ai amu gunhpai na matu, shawng na sum kata de tutnawng e shang nga lu ma ai: 7 lahkawng na shara kata de chyawm gaw, dai hkinjawng agyi wa hkrai sha, tinang a matu mara mung, masha ni a shut hpyit ai a matu mara mung, nawng ya ai asai lang let, laning mi hta e, lang mi sha, shang lu ai: 8 dai rai nna, shawng na sum naw grin nga dingsa, chyoi pra ai shara de shang lu na lam garai n danpru nga ai nga nna, Chyoi pra ai Wenyi gaw dai lam hte madun dan wu ai; 9 dai gaw ndai prat na matu kasi kanan rai nga ai rai nna, de a htung hte maren, kumhpaw kumhpa hte shagu hkungga jaw yu lu nga ai, raitimung, dawjau ai wa a myit masin hpe dai hte jahkum shatsup ya lu ai n rai: 10 dai lam ni gaw, shahpa, luhpa hte kashin kamun ai lam amyu myu hte nawng, htung nnan shashawn na aprat garai n du laman e, gan tawn da ai, hkumshan hte seng ai ahtung ahki sha rai nga ai. 11 Hkristu chyawm gaw, lata hte n gap tawn ai rai nna, ndai hpan tawn da ai mungkan ga hte n seng ai grau kaba nna hkum tsup re ai nawku sum hta, du na ra ai ngamu ngamai ai lam ni a hkinjawng agyi tai na matu, du sa ai re ai majaw, 12 bainam hte dumsu kasha a asai hte n rai, shi hkum nan a asai hte, dai chyoi pra ai shara kata de, lang lata sha shang nna, htani htana hkrang shaw la ai lam lu la nu ai. 13 Kaning rai nme law, bainam sai, usu sai, nga upra a wan wu hte awu asin hkrum ai ni hpe lapri ya yang, hkumshan hpe sanseng hkra shachyoi shapra ya lu ai teng yang gaw, 14 htani htana Wenyi hte Karai Kasang kaw, shi hkum dai hpe ra n rawng ai sha nawng ya ai Hkristu a asai gaw, ahkrung nga ai Karai Kasang hpe dawjau lu hkra, nanhte a myit masin hpe si ging ai arawn alai hta na, grau nna shachyoi shapra ya lu ai, n rai ni? 15 Dai rai nna mung, shaga la hkrum ai ni gaw, ga ndat hte seng ai htani htana sali wunli hkam la lu mu ga nga, shawng na ga shaka kata e tawt lai kau ai hpe hkrang shaw la na matu, si hkam lam byin pru sai majaw, shi gaw ga shaka ningnan a htinglu ya ai wa rai nga ai. 16 Kaning rai nme law, ga madat da ai nga yang gaw, ga madat tsun da ai wa a si ai mung lawm lu na rai nga ai; 17 ga madat ngu ai gaw, si lam byin yang she grin lu ai ga madat tsun da ai wa naw hkrung nga yang gaw, ga madat garai n tai mai ai. 18 Dai rai nna, shawng na ga shaka pyi, asai n lawm ai, tawn da ai, n rai nga ai, 19 Kaning rai nme law, Mawshe gaw jep ai tara hte maren htet da mada yawng hte hpe amyu masha ni e tsun dan ngut jang, dumsu kasha sai, bainam sai hte ntsin, chyaw jahkyeng ai sagu mun, maihkaw nhtan mi la nna, laika hpe mung, amyu masha ni yawng hte hpe mung, lapri bun let, 20 Ndai asai gaw, Karai Kasang nanhte hpe htet da ai ga shaka a asai rai nga ai, ngu nna tsun wu ai. 21 Dai hta kaga, nawku sum hte dawjau ai amu a arai ni yawng hpe mung, shi dai hte maren, dai asai hte lapri bun wu ai. 22 Jep ai tara hku hkan yang, arai yawng ganoi ma hkra hpe, asai hte jasan jaseng kau lu nga ai rai nna, asai ru hkaw kau ai n lawm yang gaw, yubak raw dat na lam n hku nga ai. 23 Dai rai nna, sumsing lamu na arai ni a sumla ni hpe shing re ai lam hte jasan jaseng lu mai nga ai; sumsing lamu na arai majing ni hpe chyawm gaw, dai hta grau kaja ai shagu hkungga ni hte jasan jaseng kau lu ai. 24 Kaning rai nme law, Hkristu gaw, lamu na kasi a sumla sha rai nga nna, masha lata hte gap tawn ai chyoi pra ai shara kata de n shang ai sha, anhte a matu mara Karai Kasang a man e dan dan pya nga na nga, sumsing lamu kata de nan shang wa sai: 25 shingrai shang yang, hkinjawng agyi ni gaw tinang a asai n re ai asai hte, dai chyoi pra ai shara kata de laning hte laning shang ra ai zawn, shi gaw tinang hkum hpe law law lang nawng ya ai n rai; 26 shingrai nawng ya ai rai yang gaw, ginding aga lat kaw nna law law lang si hkam hkam rai na nu ai; ya chyawm gaw, shi hkum dai nawng ya kau ai a marang e, yubak hpe yeng seng kau na matu, ndai prat a jahtum e, shi lang mi sha danpru wu ai. 27 Shinggyim masha ni mung, lang mi sha si wa nna, dai hpang e dawdan hkrum na ra ai zawn, 28 Hkristu mung, law law ni a yubak gunhpai kau na, lang mi sha nawng ya kau hkrum sai rai nna, hkyehkrang la ai hkrum la lu hkra, shi hpe ala nga ai ni a matu, yubak gun lam hte n seng ai sha, lahkawng lang ngu na hta, danpru na ra ai.

Hebre 10

10:1 Jep ai tara gaw du na ra ai ngamu ngamai lam ni a hkrang sumla majing n rawng ai sha, de a shingna sha rai nga ai majaw, shanhte gaw tutnawng e nawng ya nga ai, shaning shagu na shagu hkungga amyu hte, sit shang shani wa ai ni hpe, galoi mung jahkum shatsup ya lu na n rai: 2 jahkum shatsup lu ai rai yang gaw, dawjau ai ni hpe lang mi jasan jaseng kau ngut jang, hpang de galoi mung yubak mara a lam hpa myit dum shara n nga na majaw, shagu hkungga nawng ya na lam htum mat na sai, n rai ni? 3 Ya gaw, dai nawng ya ai lam hta, yubak hpe myit dum myit hprang na lam, shaning shagu a rawng nga ai; 4 kaning rai nme law, usu asai hte bainam asai gaw yubak mara hpe galoi mung yeng seng kau ya lu ai n rai, 5 Dai re ai majaw, Hkristu gaw ndai mungkan ga de du sa yang, Hkungga hte kumhpa hpe nang n ra nga ndai, Nang nye a matu hkum hkrang lajang da nit dai; 6 Hkum dingyawng nat ai shagu hkungga hte Mara raw ai hkungga hpe, nang n sharawng ndai: 7 Shaloi e, Laika shabawn hta nye a lam ka da nga ai gaw, Yu u, Karai Kasang e, nang myit ra ai hku hkan galaw na, ngai du sa ring ngai, ngu we ai, nga nna tsun ai. 8 Shingrai, Jep ai tara hte maren nawng ya mai ai lam shi gaw, Shagu hkungga, kumhpaw kumhpa, hkum dingyawng nat ai hkungga hte mara raw ai hkungga hpe nang n ra ndai hte, dai hpe n sharawng nga ndai, nga nna shawng tsun ngut jang, 9 Yu u, nang myit ra ai hku hkan galaw na, ngai du sa ring ngai, nga nna bai tsun ai. Dai rai nna, hpang na lam hpe shagrin tawn da na matu, shi shawng na lam hpe yeng seng kau wu ai. 10 Dai myit ra ai hku a gawp e, Yesu Hkristu a hkum hkrang hpe lang lata sha nawng ya ai a marang e, anhte gaw shachyoi shapra ai hkrum sagaw ai. 11 Hkinjawng ngu ai wa kadai mung, shani shagu dawjau nga let, yubak mara hpe galoi mung n raw kau ya lu ai, shagu hkungga amyu sha hpe law law lang nawng kahtap ya lu ai: 12 shi chyawm gaw yubak mara raw kau ya ai hkungga langai sha hpe, prat dingsa na matu nawng ya ngut jang, Karai Kasang a hkra maga de dung nga sai rai nna, 13 shi a gumlau ni hpe shi a lagaw npu e lagaw kabye lahkum tawn da ai du hkra, a la nga let, nga nga ai. 14 Kaning rai nme law, shi gaw nawng ya ai hkungga langai sha hte, shachyoi shapra hkrum ai ni hpe prat dingsa na matu jahkum shatsup ya wu ai. 15 Dai Chyoi pra ai Wenyi mung, anhte hpe sakse hkam ya mi ai: kaning rai nme law, 16 Da ndai, dai nhtoi ni a hpang e Shanhte hte ngai tawn da na ga shaka gaw, Ngai Madu nye a tara hpe shanhte a kraw lawang e bang da nna, Shanhte a myit hta ka da na we ai, nga nna shawng tsun ngut jang, 17 Shanhte a yubak hpe mung, shanhte tara tawt lai ai hpe mung, ngai bai n dum na nngai, nga nna bai tsun kahtap nga ai. 18 Dai rai nna yubak raw dat na lam nga ai rai yang gaw, yubak a matu hkungga nawng ya shara, n nga na sai. 19 Dai re ai majaw, hpunau ni e, Yesu a hkum hkrang ngu ai nba grang hkrang hkra, 20 anhte a matu shi waw ya ai ningnan hte hkrung ai lam hta, shi asai a gawp e dai chyoi pra ai shara kata de shang lu na, nden ja ai myit rawng nga ga ai hte, 21 Karai Kasang a nta hta kaba htum ai hkinjawng agyi wa lu ga ai majaw; 22 n hkru n hkra ai myit dum chyalu hte lawt hkra, anhte a kraw lawang hpe lapri bun nna, anhte a hkum hkrang hpe mung sanseng ai ntsin hte kashin kamun kau ngut jang, tengman ai myit masin hte, hkum tsup re ai makam masham hte, anhte sit shang wa ga: 23 anhte a myit mada shara hte seng ai nawku htung hta, n shamu n shamawt hkra, anhte maju jung nga ga; kaning rai nme law, ga ndat tawn da ai wa gaw, kangka re ai wa rai nga ai: 24 dai hta kaga, tsawra ai myit rawng wa na hte kaja ai amu bungli byin wa na matu, shada shingjawng hkat lu hkra, langai hte langai myit tau myit htang nga ga: 25 nkau mi wa htung nga ai zawn, anhte gaw tinang a zuphpawng ai lam hpe n koi n kau ai sha, shada da hpe shadum shahprang nga ga: dai nhtoi du magang ra ai hpe, nanhte chye myit dai majaw, shingrai shadum shahprang shara grau nna rai nga ai. 26 Kaning rai nme law, tengman ai a chye chyang ai lam hpe hkam la ngut sayang, yubak hpe dingsa sa galaw ga yang gaw, yubak a matu mara hkungga nawng ya na lam, naw nga sa na n rai: 27 dawdan hkrum na nga ai, nachying hkrithpa shara hte, nhtan shai ai ni hpe nat kau na sindawng kahtet ai wan sha, la nga na ra ai. 28 mawshe a tara hpe tawt lai ai wa gaw, matsan dum la ai n hkrum ai sha, sakse lahkawng masum a ga hte si ai hkrum lu ai; 29 dai rai yang gaw, Karai Kasang a Kasha hpe kabye shingkawt kau nna, tinang hkum hpe shachyoi shapra ya ai ga shaka a asai hpe awu asin di kau ai hte, chyeju madun ya ai Wenyi hpe n kaw n law di kau ai wa gaw, dai hta grau ai ari gade hkrum ging ai, ngu nna nanhte nawn da myit ta? 30 Kaning rai nme law, Matai htang na ahkang ngai lu nngai, ngai tai na we ai, nga nna mung, Dai Madu gaw shi a amyu masha ni hpe tara dara na ra ai, nga nna mung, tsun ai wa hpe, anhte chye nga ga ai. 31 Hkrung nga ai Karai Kasang a lata de hkrat wa ai lam gaw, nachying hkrithpa lam rai nga ai. 32 Raitimung, jahtoi la hkrum manit dai hpang, tsinyam tsindam kaba hte katut gasat hkrum ai shaloi na nanhte sharang lu ai, shawng de na nhtoi ni hpe bai dum nga mu: 33 Dai shaloi e, asawng asang hte zingri zingrat ai hkrum let, masha ni a man e yu chyai hpa mung, dai zawn hkrum ai ni hte jawm hkam ai manang ni mung, nanhte tai yu manit dai, 34 Dai hta n-ga, bawngdung ai ni hpe mung nanhte matsan dum manit dai; nanhte a arung arai kashun kashe la ya ai hpe mung, nanhte kabu gara ai myit hte hkam mana kau nna, dai hta grau reng ai dinggrin anga nga ai arung arai nanhte lu nga ai gaw, gaja wa chye dum myit dai. 35 Dai re ai majaw, shabrai kaba hte hpu ging ai nanhte a nden ja ai myit hpe, hkum kau hkum tat myit. 36 kaning rai nme law, Karai Kasang a myit ra ai hku hkan shachyen ngut jang, ga ndat a akyu hkam la lu hkra, shakut sharang ai myit nanhte naw ra nga myit dai. 37 Loi hkring sha mi rai jang, du sa na ra ai wa gaw N hkring n sa du sa na ra ai. 38 Nye a dinghpring ai wa chyawm gaw, kamsham ai hte hkrung na ra ai. Shi sit kanut mat wa yang gaw Nye a myit masin, shi hta sharawng awng na n rai, nga ai. 39 Anhte chyawm gaw hten byak ai de sit kanut wa ai ni n rai; myit masin hpe hkyehkrang la lu hkra, makam masham rawng ai ni gaw, anhte rai nga ga ai.

Hebre 11

11:1 Makam masham ngu ai gaw, myit mada ai arai ni a lam myit mu myit hkut nga ai hte, garai n mu yu ai arai ni a lam tau chye tawn lu ai hpe, ngu ai, rai nga ai: 2 de a majaw mung, moi na ni gaw, sharawng awng ai sakse hkam ya ai, lu la ma ai. 3 Nga yawng nga pra gaw Karai Kasang a mungga hte hpajang tawn da nga ai rai nna, mu lu ai arai ni gaw, dandawng nga ai arai ni hta na n byin wa ai hpe, kamsham ai hte anhte dum chye ga ai. 4 Kamsham ai hte Abela gaw Ka-in hta grau kaja ai hkungga Karai Kasang hpe nawng ya wu ai rai nna, Karai Kasang mung shi a kumhpa ni a lam sakse hkam ya wu ai majaw, shi dinghpring nga ai, nga nna de a gawp e sakse hkam ya ai lu la wu ai: dai hpe yu yang, shi si mat sai raitimung, ga naw a tsun nga ai. 5 Kamsham ai a majaw Enuk gaw si hkrung si htan n hkrum lu hkra, htawt la ai hkrum wu ai; Karai Kasang shi hpe jahtawt la wu ai majaw, shi n nga sai: kaning rai nme law, shi gaw Karai Kasang a sharawng awng ai wa rai nga ai, nga nna jahtawt la ai garai n hkrum yang, sakse hkam ya ai, lu la wu ai: 6 makam masham n rawng yang gaw, shi a man e sharawng awng ai lu la na n rai; kaning rai nme law, Karai Kasang kaw sit shang ai wa gaw, Karai kasang nga nga ai mung, shi e hkan tam ai ni hpe chyeju htang jaw lu ai mung, kamsham lu na rai nga ai. 7 Kamsham ai hte Noa gaw garai n mu yu ai arai ni a lam shadum shahprang ai hkam la lu ai rai nna, shi a nta masha ni hpe hkyehkrang la na matu hkrit hkungga ai myit hte shanghpaw li shachyaw wu ai: shingrai kamsham ai hte shi mungkan ga hpe jeyang nna, makam masham hte seng ai dinghpring ai a sali wunli hkam la ai wa, rai wa ai. 8 Abraham gaw, sali wunli hkam la lu na ra ai mung de pru hkawm wa na lam shaga la ai hkrum yang, gade sa wa ai shi n chye timung, kamsham ai hte madat mara nna pru hkawm wa ai. 9 Ga ndat hte seng ai mung hta e, masha tsasam a mung hta zawn, kamsham ai hte shi manam sa tai nga ai rai nna, ga ndat lam langai sha hta Sali wunli jawm hkam la lu ai Isak yan Yaku hte rau, sum hta sha rawng nga ma ai: 10 kaning rai nme law, npawt nhpang grin nga ai hte, Karai Kasang de da ai shachyaw ngut sai mare hpe, shi myit mada nga ai. 11 Kamsham ai hte Sara pyi, prat lai mat sayang, na-um nasin rai wa lu na atsam lu la wu ai: kaning rai nme law, ga ndat tawn da ai wa kangka rai nga ai, ngu nna myit la wu ai. 12 Dai re ai majaw, la chyasi zawn re ai wa langai hta na sha, sumsing lamu a shagan ni hte, nammukdara makau na n dang hti ai zaibru made, law htam wa ai kashu kasha ni pra wa masai. 13 Ndai ni nlang hte gaw, ga ndat hte seng ai sali wunli n hkam la lu ai hte, tsan kaw na dai hpe tau mu nna shaga gintan let, ndai ga ntsa e tsasam hte malet, nhprang manam sha tai nga ai hpe yi la nna, dai makam masham hta si wa masai. 14 Shingrai yin la ai ni gaw, tinang nga na buga tam nga ma ai hpe, leng leng madun dan nga ma ai. 15 Shanhte pru kau da ai buga hpe nan, bai dum ma ai rai yang gaw, nhtang wa lu na aten naw nga malu ai. 16 Ya chyawm gaw, dai hta grau ai, sumsing lamu na buga ngu ai hpe, shanhte marit nga ma ai: dai re ai majaw Karai Kasang gaw, shanhte a Karai Kasang ngu na hpe, kaya wu ai n rai; kaning rai nme law, shanhte a matu mara shanu nga na mare, shi lajang da nu ai. 17 Abraham gaw chyam yu hkrum ai shaloi, kamsham ai hte Isak hpe hkungga di nna nawng kau ya wu ai; Isak hta e na a amyu matu tai nga na ra ai, 18 nga nna ga ndat ni hpe hkap hkam la ai wa gaw, shi a kasha shingtai hpe nan nawng kau ya wu ai; 19 shing di nawng kau timung, Karai Kasang gaw si mat ai ni kaw na pyi bai sharawt ya lu ai, ngu nna myit kam wu ai: dai rai nna ga shadawn hku tsun yang, si mat ai ni kaw na shi hpe bai lu la wu ai. 20 Kamsham ai hte Isak mung, garai n byin yu ai arai ni a lam, Yaku yan Esaw hpe shaman ya wu ai. 21 Kamsham ai hte Yaku gaw, shi si wa magang yang, Yosep a kasha yan hpe shaman ya nna, shi a dawhkrawng matu hta madi let nawku wu ai. 22 Kamsham ai hte Yosep gaw, prat htum wa magang yang, Israela a kashu kasha ni a pru wa na lam tsun jahprang da nna, shi a nra la lung wa na lam, ga madat tsun da wu ai. 23 Mawshe hpe shangai ngut yang, shi a kanu yan kawa gaw kamsham ai hte shata masum tup shi hpe makoi da mu ai; kaning rai nme law, dai ma gaw hpraw tsawm nga ai hpe, shan mu mu ai rai nna, hkawhkam a hkangda ai mungga hpe n hkrit ma ai. 24 Mawshe gaw kaba wa jang, kamsham ai hte Hpara-u a shayi sha a kasha ngu na hpe ndang kau wu ai; 25 tawng marang mi yubak a pyaw daw kadaw na hte, Karai Kasang a amyu masha ni hte rau tsin-yam tsindam hkrum na hpe shi grau ra nga ai rai nna, 26 Hkristu a matu aroi arip hkrum ai gaw, Egutu mung na sutgan hta grau kaja ai sutgan rai nga ai, myit nawn wu ai: kaning rai nme law, bai lu la na ra ai shabrai hpe shi myit tau mada nga ai. 27 Kamsham ai hte, Egutu hkawhkam a masin pawt ai hpe n hkrit ai sha, dai mung na pru kau da wu ai, kaning rai nme law, myi hte n mu lu ai wa hpe mu lu ai hpe zawn, shakut sharang nga ai. 28 Kasha alat ni hpe sat kau ai wa, Israela masha ni hpe n hkra u ga, shi kamsham ai hte dai Shalai wa ai poi hte asai lapri bun ai lam, galaw hpang wu ai. 29 Kamsham ai hte shanhte gaw dai hkyeng ai nawng hta hkarang ntsa e zawn, rap lai wa ma ai: Egutu masha ni mung, dai zawn rap chyam yu ma yang, lup si ai hkrum ma ai. 30 Yerihku mare hpe sanit ya tup wang kawai hkawm ngut jang, kamsham ai hte de a bunghku ni daw ru hkrat mat wa ai. 31 Shawa num Rahab gaw, kin-yu ni hpe hkap hkalum la wu ai majaw, kamsham ai hte n madat n mara ai ni hte rau hten bya n hkrum wu ai. 32 Dai hta kaga ngai hpa naw tsun na rai ta? kaning rai nme law, Gidon, Barak, Samson, Yephta, Dawi, Samuela hte hte myihtoi ni a lam hkai dan na nga yang, nye a aten n dang law nga ai: 33 dai ni gaw, kamsham ai hte masha mungdan ni hpe dang kau lu ma ai, dinghpring ai lam shachyen lu ma ai, ga ndat ni hkam la lu ma ai, hkanghkyi a n-gup pat tawn lu ma ai: 34 wan nsa hpe sat kau lu ma ai, ri nhtu hta na lawt lu ma ai, gawngkya ai shani e n-gun shaja ya ai lu la ma ai, majan shani e share lu ma ai hte masha tsasam ni a luksuk ni hpe jahtaw kau lu ma ai. 35 Numsha ni mung shanhte hte seng ai si mat ai ni hpe hkrung sharawt ai lam langai mi hte bai lu la ma ai: nkau mi chyawm gaw, gawng hte gang jen sharim ai hkrum ma ai, raitimung, grau reng htum ai hkrung sharawt la ai hpe dep la lu hkra, tinang hpe raw dat kau na n yin la hkraw ma ai. 36 Bai kaga nkau mi gaw, asawng asang, anu kayat re ai hta n-ga, kyit hkang sharen ai hte htawng hta bang da ai di nna chyam yu dinglik ai hkrum ma ai: 37 shanhte gaw, nlung hte kabai sat ai, nhtum nni zingri zingrat ai, zingret hte ret dut sat ai hte nhtu e htau kau ai hkrum ma ai: matsan mayan rai nna, nni nkri, aroi arip re ai hkrum let, sagu hpyi, bainam hpyi bu hpun nna htawt hkawm nga ma ai: 38 nam mali hkan e, bum alang, ga na ginlawng hku hte lungpu hkan e, shanhte let hkawm ma ai: raitimung, mungkan ga gaw shanhte hte n ging n dan nga malu ai. 39 Dai ni nlang hte gaw, makam masham a majaw sharawng awng ai sakse hkam ya ai lu la ma timung, ga ndat ni a akyu ara garai n hkam la ma ai. 40 Kaning rai nme law, anhte n lawm yang gaw, shanhte mung jahkum jatsup ai n dep lu mu ga nga, Karai Kasang gaw anhte a matu grau kaja ai lam hpang da ya sai.

Hebre 12

12:1 Ya ndai hte wa law la ai sakse ni gaw, anhte hpe sumwi zawn wang kawan da mi ai majaw, anhte mung, numdaw numdan re ai lit nlang hte hte, kap loi la ai yubak hpe kau da nna, makam masham a npawt nhpang hte jahkum shatsup ya ai wa Yesu hpe azi yu let, anhte gat na matu san da ai lam hpe shakut sharang rai, gat shadu wa ga: 2 dai madu gaw, shi a man e ang wa ai kabu gara ai lam majaw, kaya kahpa hkrum ai hpe hpa zawn n nawn ai sha, wudang lam hpe hkam nu ai rai nna, Karai Kasang a tingnyang hkra maga de wa dung nga sai. 3 Nanhte a myit masin gawng run ai hte hki ba ai n hkrum malit ga, yubak kap ai ni a lata hte dai hte wa ndang kalang di kau hkrum sha ai wa hpe, myit dum nga mu. 4 Nanhte gaw yubak hpe katut gasat na matu asai pru hkra garai n hkap daw yu myit dai: 5 dai hta kaga, Ngai sha e, dai Madu sharin ai hpe n gawn n sawn hkum rai et; Shi nang hpe daru yang gawng hkum run et; 6 Madu gaw tsawra ai wa hpe sharin ga ai, Hkap la ai kasha nlang hpe kayat ga ai, nga nna ma hpe sharin ai zawn, nanhte hpe shadum shahprang ai ga hpe nanhte malap kau manit dai. 7 Daru sharin ya ai akyu lu la na matu, hkam sharang nga mu: Karai Kasang gaw nanhte hpe kasha zawn woi di da myit dai: kaning rai nme law, kawa e n daru sharin ai kasha, kanang nga a ta? 8 Yawng mayawng hkam ga ai daru sharin la ai nanhte n hkrum myit yang gaw, nanhte kasha majing n rai, n-gyi sha rai nga myit dai. 9 Bai lam mi gaw, anhte hpe daru sharin ya na matu, hkumshan hte seng ai kanu kawa anhte lu ga ai rai nna, anhte shanhte hpe hkungga lara di ga ai: dai hta grau nna, asak hkrung nga lu hkra, wenyi ni a Kawa npu e anhte mai taw nga ga ai, n rai ni? 10 Shanhte gaw tinang ra ai hku hte maren tawng marang mi sha daru sharin ya lu mi ai; shi chyawm gaw, shi a chyoi pra ai anhte hkam la lu u ga, anhte a akyu matu daru sharin nga ai. 11 Daru sharin ya ai lam magup gaw hkam sha ai shaloi e, pyaw hpa zawn n rai, yawn hpa zawn rai nga ai: raitimung, dai gaw htawmhpang e she dai hta sharin hkam sha ai ni a matu mara, dinghpring ngu ai ngwi pyaw ai asi si shapraw ya nga ai. 12 Dai re ai majaw, kya noi nga ai lata ni hte lapyin n rawng ai lahput ni hpe sharawt dating mu; 13 lagaw hten ai ni hkrihkraw n kashai ai sha, shamai ai hkrum lu mu ga, nanhte sa wa na matu, ding ai lam masun lajang mu. 14 Masha yawng mayawng hte ngwi pyaw lu hkra mung, chyoi pra ai hpe dep lu hkra mung, hkan tam nga mu; chyoi pra ai n rawng yang gaw, kadai mung dai Madu hpe mu lu na n rai. 15 Nanhte hta na langai ngai, Karai Kasang a chyeju hkam la ai hta n yet mat myit ga mung, nanhte hpe sharu shatsang lu hkra, hka la ai ru tu pru nna, law malaw hpe awu asin di kau ai n hkrum myit ga mung, 16 shat ma mi a matu sha hte kasha alat a akyu dut kau ai Esaw zawn, shut hpyit ai hte tara n hkungga ai wa n rawng nga malit ga mung, hkap yu sadi nga mu: 17 kaning rai nme law, hpang e dai shaman ya ai akyu lu la mayu yang, shi shinggan kau ai hkrum nga ai hpe, nanhte chye nga myit dai: myi prwi pru ai hte myit malai shara nhtang tam katu timung, kanang na n mu la nu ai. 18 Kaning rai nme law, nanhte gaw lata e ahtawk hkrum lu ai hte wan grung nga ai bum de mung, achyang amang re ai, nsin chyip mak re ai, laru ru ai, 19 pahtau ngoi ai hte ga jahtau ai nsen wu ai shara de mung, du yu manit dai n rai; dai nsen hpe na yu ai ni gaw, ga hkaw mi muk shanhte hpe bai n tsun kahtap nu ga, hpyi nem ma ai: 20 kaning rai nme law, Yamnga pyi dai bum hpe hkra yang, nlung hte kabai sat kau mu, nga nna jep dat ai mungga hpe shanhte n jan lu ma ai; 21 shingrai danpru wa ai gaw dai hte wa hkrithpa rai nga ai majaw, Mawshe pyi Ngai nachying hkrit gari mat nngai, nga ai. 22 Nanhte chyawm gaw, Ziun bum hte hkrung nga ai Karai Kasang a mare ngu ai sumsing lamu na Yerusalem mare de mung, hti n dang lu ai lamu kasa wunawng wuwa ni hpang de mung, 23 sumsing lamu na jahpan hta lawm ai shawa zuphpawng hte kasha alat ni a Hpung de mung, yawng mayawng a tara agyi wa Karai Kasang hpang de mung, jahkum shatsup hkrum sai dinghpring ai ni a wenyi ni hpang de mung, 24 ga shaka ningnan a htinglu wa Yesu hpang de mung, Abela asai hta grau kaja ai lam chye tsun ai lapri bun ai asai hpang de mung, du manit dai. 25 Nanhte gaw dai mungga tsun dat ai wa hpe n ningdang kau myit ga, sadi nga mu; kaning rai nme law, ga ntsa na shadum shahprang ai wa hpe ndang kau ai ni yubak n lawt lu ma ai teng yang gaw, sumsing lamu de na shadum shahprang ai wa hpe nawng kau ai ni anhte gaw, dai hta grau nna n lawt lu na ga ai: 26 dai shadum shahprang ai wa a nsen gaw, dai shaloi e ginding aga hpe a shun dat wu ai; ya tawn da ai ga ndat chyawm gaw, Ginding aga hpe sha n rai, sumsing lamu hpe mung ngai lang mi naw anawn shangun dat na we ai, nga nna tawn da nu ai. 27 Lang mi naw, nga ai ga a lachyum gaw, n shamu n shamawt lu ai arai ni gaw dinggrin anga nga u ga, shamu shamawt lu ai arai ni hpe galaw da ai arai ni hpe zawn, yeng kau na nga ai, rai nga ai. 28 Dai rai nna, n shamu n shamawt lu ai mungdan lu ga ai majaw, anhte gaw hkungga lara nna agam ai myit hte Karai Kasang sharawng awng ai hku dawjau lu hkra, chyeju dum chye ai myit rawng nga ga: 29 kaning rai nme law, anhte a Karai Kasang gaw, hkru wa ai wan rai nga ai.

Hebre 13

13:1 Hpunau shada tsawra ai myit tutnawng rai nga myit ga. 2 Manam daw ai lam hkum malap kau myit: dai lam hta nkau mi gaw ndum n chye ai she, lamu kasa hpe daw hkrup masai. 3 Sharen rau hkrum ai ni zawn, bawngdung ai ni hpe mung; nanhte hkum hkrang hte naw rai nga myit dai majaw, nhtum nni hkrum ai ni hpe mung, adum nga mu. 4 Hkungran ai lam gaw, yawng mayawng a man e arawng lu u ga; hkungran ai yupra mung, sanseng nga u ga: kaning rai nme law, hpye ai amu galaw ai ni hte numshaw lashaw ai ni hpe, Karai Kasang tara dara na wu ai. 5 Gumhpraw marin ai lam hkum hkan myit; nanhte lu ai made hte myit dik nga mu: kaning rai nme law, Ngai nang hte teng teng n hka na nngai, gaja wa teng teng n kau da na nngai, nga nna shi nan tsun nga ai. 6 Dai re ai majaw, Dai Madu ngai hpe karum ai wa rai nga ai, Ngai hpa mung n hkrit nga nngai: Masha wa ngai hpe hpa di lu na a ta? ngu nna nden ja ai myit hte anhte tsun nga ga ai. 7 Karai Kasang a mungga nanhte hpe tsun dan ai, nanhte a lam woi ningshawng ni hpe, adum nga mu: shanhte prat lai hkra hkan wa sai lailen ningli hpe myitsumru yu nna, shanhte a kamsham ai hpunda hkap hkra, hkan sharau nga mu. 8 Yesu Hkristu gaw, mani, dai ni, htawm prat dingsa mung, maren anga nga ai. 9 Sharin shaga ai lam tsasam amyu myu de hkum htawt hkum hkan myit: hkan nang ai ni a matu hpa akyu n shabyin ya lu ai sha hpa lam hte n rai, chyeju lam hte she myit masin hpe shangang shakang lu na, mai kaja nga ai. 10 Naw ku ai sum hta dawjau ai ni, sha na ahkang n lu ai hkungri langai mi gaw, anhte lu ga ai. 11 kaning rai nme law, hkinjawng agyi wa gaw yubak raw ai hkungga a asai hpe chyoi pra ai shara de la shashawn ngut jang, dai hkungga mang ni hpe dap shinggan e nat kau wu ai. 12 Dai hte maren Yesu mung, shi hkum nan a asai hte dinghta masha ni hpe shachyoi shapra lu na matu, mare chyinghka shinggan e nni nkri hkam nu ai. 13 Dai rai nna, anhte mung, shi hte rau aroi arip hkam let, dai dap shinggan shi hpang de pru sa wa saga. 14 Kaning rai nme law, ndai dinghta ga e dinggrin nga na mare, anhte n lu ga ai; htawmhpang du na ra ai mare hpe, anhte tam nga ga ai. 15 Dai rai nna, Karai Kasang a mying ningsang kajai tsun hkai nga ai n-gup n-gau a asi ngu ai shakawn kungdawn hkungga hpe anhte Yesu a gawp e, Karai Kasang kaw tutnawng e nawng ya nga ga. 16 Mai kaja ai amu galaw na hte gam jaw gam ya ai lam, hkum malap kau myit; shing re ai hkungga hpe, Karai Kasang gaw sharawng awng nga ai. 17 Nanhte a lam woi ningshawng ni a ga madat mara nna, shanhte a npu e taw nga mu: kaning rai nme law, shanhte gaw jahpan dan na ni rai ma ai rai nna, nanhte a myit masin a matu mara a maja nga ma ai: jahpan dan ai shaloi e, nanhte a matu akyu n shabyin lu ai yawn madai ai hte n rai, kabu gara ai myit hte dan lu mu ga, shanhte a npu e taw nga mu. 18 Anhte a matu mara akyu hpyi ya mi; kaning rai nme law, lam shagu hta arawn alai kaja hkan mayu ga ai majaw, anhte a myit dum chyalu san pra mali ai, ngu nna myit mu nga ga ai. 19 Ngai nanhte kaw alawan du lu na ahkang lu la n ga, shingrai hpyi ya na grau nna shadut dat made ai. 20 Anhte a Madu Yesu ngu ai, sagu hpung ni a sagu rem wa kaba hpe, htani htana ga shaka asai hte si ai ni kaw na bai woi wa ai, ngwi pyaw ai a npawt Karai Kasang gaw, 21 Yesu Hkristu a marang e, shi a man e sharawng awng ai lam anhte hta shachyen ya let, shi a myit hkan nang lu hkra, kaja ai amu bungli shagu hta nanhte hpe jahkum shatsup myit ga; Yesu Hkristu kaw htani htana prat dingsa hpung shingkang anga nga u ga law. Amen. 22 Bai, lam mi gaw, hpunau ni e, dai shadum shahprang ga nanhte hkam sharang la na, ngai shadut jahkat dat made ai: kaning rai nme law, ga gadun hte sha ngai nanhte hpe ga shagun dat made ai. 23 Anhte a hpunau Timohti gaw raw dat hkrum sai hpe, chye nga manu; shi alawan du yang gaw, ngai shi hte rau sa nna, nanhte hte hkrum na ring ngai. 24 Nanhte a lam woi ningshawng ni nlang hte hte, chyoi pra ai ni yawng mayawng hte hpe, shakram ya mi: Itali mung na ni, nanhte hpe shakram dat ma ai. 25 Chyeju gaw nanhte mahkra hte rau anga nga u ga law. Amen.

Hebre 1

Hebre 2

Hebre 3

Hebre 4

Hebre 5

Hebre 6

Hebre 7

Hebre 8

Hebre 9

Hebre 10

Hebre 11

Hebre 12

Hebre 13

Yaku 1

1:1 Karai Kasang hte Madu Yesu Hkristu a mayam, ngai Yaku gaw, bra mat nga ai amyu shi lahkawng ni hpe ngwi pyaw ga shana dat nngai. 2 Nye a hpunau ni e, nanhte a kamsham ai myit hpe dinglik yu ai hkrum yang, shakut sharang chye ai myit jat nga ai hpe, nanhte chye nga myit dai majaw, 3 agung alau amyu myu hpe kadup hkrum myit dai shaloi e kabu gara shara kaba rai nga ai, myit la mu. 4 Dai hta n-ga, nanhte hkum hkum chyip chyip rai lu nna, hpa hta mung n kadawn myit ga, shakut sharang ai myit gaw tinang a atsup nga ai bungli hpe, shangut kau lu u ga. 5 Nanhte hta na marai langai ngai hpaji byeng-ya kadawn nga yang gaw, n jet kau ai sha, nlang hte hpe ndaw nhta a jaw nga ai Karai Kasang kaw, hpyi nga u ga; shaloi shi lu la na ru ai: 6 raitimung, kam shut ai n lawm ai sha, kamsham ai myit hte hpyi nga u ga; kaning rai nme law, kam shut ai wa gaw, nbung e ahtu nna hta wa ai nawng na hka leng ni hte bung nga ai. 7 Dai wa gaw, Madu kaw na lama ma lu la na zawn, hkum nawn nga u ga; 8 shi gaw myit mashe rawng nga ai rai nna, shi a lam shagu hta agyoi ai wa rai nga ai. 9 Grit nga ai hpunau wa gaw tinang a shagrau ai hta, sut su ai wa chyawm gaw tinang a shagrit ai hta, gumrawng nga mu ga; 10 kaning rai nme law, tsingdu a apu zawn shi wai mat wa nga ai. 11 Ajan gaw kahtet ai nbung hte rawt wa jang, dai tsingdu nyawi mat wa ai rai nna, de a apu run hkrat wa ai hte, de a hkrang na ahpraw tsawm ai gaw hten mat wa ai: sut su ai wa mung, dai hte maren, shi a maw mamaw hta, wai mat wa na ra ai. 12 Agung alau hkrum yang shakut sharang ai wa gaw, a nga lu ai: kaning rai nme law, dinglik yu ai hkrum ngut jang, Karai Kasang shi e tsawra ai ni hpe ndat da ai asak janmau gaw, shi lu la na ru ai. 13 Raitimung, gunglau hkrum yang, Karai Kasang ngai hpe gunglau da nngai, nga nna kadai mung hkum tsun u ga: kaning rai nme law, n hkru n hkra ai gaw Karai Kasang hpe gunglau di lu ai n rai; shi hkum nan kadai hpe mung gunglau jahkrum nga ai n rai. 14 Kadai raitimung, tinang a myit kayut ai hta, len nang ai hte agaw hkalem ai hkrum nga yang gaw, gunglau ai hkrum nga ai. 15 Dai myit kayut ai chyawm gaw na-um nasin rai wa jang, yubak hpe shangai dat wu ai; yubak mahtang gaw kunghpan wa jang, si ai hpe shaprat dat wu ai. 16 Nye a tsawra ai hpunau ni e, myit hkum dam myit. 17 Kaja ai kumhpaw nlang hte hte, hkum hkum re ai kumhpa yawng hte gaw, ntsa de nna rai nga ai hte, nhtoi hkum ni a Kawa kaw na yu hkrat wa ai rai nna, shi hta e gale galau re ai hte kayin kaye re ai shingnip rawng nga lu ai n rai. 18 Shi hpan tawn da ai amyu baw ni hta e, anhte alat amyu zawn tai wa u ga, shi myit ra ai hku hkan let dai dingman ai mungga hte shi anhte hpe shaprat dat mi ai. 19 Nye a tsawra ai hpunau ni e, ndai lam hpe nanhte chye nga myit dai. Masha kadai wa raitimung, na la na matu lawan nga u ga; ga tsun na matu hkum tin nga u ga, masin pawt na matu mung, hkum tin nga u ga: 20 kaning rai nme law, masha a masin pawt ai gaw, Karai Karai a dinghpring ai lam hpe shachyen nga lu ai n rai. 21 Dai re ai majaw matsat shabat yawng hte hte, ladu lai ai n hkru n hkra hte hpe yeng kau nna, nanhte a myit masin hpe hkyehkrang la lu na, kraw lawang e hkai da ai mungga hpe, sumnung ai myit hte hkam la nga mu. 22 Nanhte gaw tinang hkum hpe n hkalem kau myit ga, dai mungga hpe a na yu ai ni sha n rai, dai hpe hkan galaw ai ni nan, a tai nga mu. 23 Dai mungga hpe na la nhtawm, nhkan galaw ai wa kadai mung, tinang a hkum hkrang a myiman hpe jamna hta e yu yu ai wa hte bung nga ai; 24 shi gaw tinang hkum hpe yu yu nna, sa wa nhtawm, shi a gawng shingyan a shingna hpe shaloi jang malap mali kau wu ai. 25 Anhte hpe shalawt la lu ai, hkum tsup re ai tara hta azi yu nga nna, shingrai anga nga ai wa chyawm gaw, na la nhtawm malap mali kau ai wa n rai, magan shachyen ai wa a tai nga ai majaw, dai wa gaw shi hkan galaw ai bungli hta e awng wa na ra ai. 26 Ngai gaw nawku htung shadik ai wa rai nga nngai, nga nna marai langai ngai myit nawn dam timung, tinang a shinglet hpe n chye hkang ai hte, tinang a myit hpe hkalem kau yang, dai wa a nawku htung, kaman lila sha rai nga lu ai. 27 Naw ku htung chyawm gaw, Ru tsang kyindut hkrum ai jahkrat nmai ni hte, gaida gaina ni hpe kawan katsan yu yu nna, mungkan ga a awu asin re ai hpe koi kau na gaw, Kawa Karai Kasang a man e sanseng ai hte ra n rawng ai nawku htung rai nga ai.

Yaku 2

2:1 Nye a hpunau ni e, masha a myiman hpe tau yu let arawng sadang lu ai anhte a Madu Yesu Hkristu hpe kamsham ai lam, nanhte hkam la nga myi hka? 2 Kaning rai nme law, aja lachyawp chyawp nna, reng ai hpun palawng bu hpun ai masha langai mi; bai, agang chyalang re ai hpun palawng bu hpun ai matsan mayan masha langai mi, nanhte a tara jawng hta shang wa ma yang; 3 dai reng ai hpun palawng bu hpun ai wa hpe nanhte hkap yu mu ai rai nna, Nang e arawng lu ai shara hta dung nga u; bai, dai matsan mayan re ai wa hpe, Wo nang e tsap nga u; shing n rai, nye a lagaw nhpang e dung nga u, nga nna tsun myit yang gaw, 4 nanhte shada da ginhka wa nna, n hkru ai myit mang rawng ai dawdan ai ni tai wa myit dai, n rai myit ni? 5 Ngai tsawra ai hpunau ni e, madat mara la mu: kamsham ai sutgan hta lu su nna, Karai Kasang hpe tsawra ai ni a matu mara, ndat da ai mungdan a sali wunli hpe hkam la lu mu ga, Karai Kasang gaw mungkan ga na matsan mayan ni hpe lata la manu ai, n rai ni? 6 Nanhte mahtang matsan mayan wa hpe n gawn n sawn di kau mu hka; sut su ai ni chyawm gaw, nanhte hpe zingri zingrat di myit dai rai nna, tinang a lata hte nan tara tingnyang ni a man de, nanhte hpe dun ahkyik la myit dai, n rai ni? 7 Nanhte hpe shamying da ai, danhkung ai amying nsang hpe mung, shanhte nan shatan nhkan rai ma ai, n rai ni? 8 Dai rai nna, Na a htingbu wa hpe na a hkum hte maren nang tsawra lu na ndai, nga nna Chyum laika hta rawng ai hkawhkam tara hpe, nanhte shatup mu yang gaw, nanhte mai kaja ai hpe galaw nga myit dai. 9 Masha a myiman hpe nanhte tau yu nga myit yang gaw, nanhte yubak galaw nga myit dai rai nna, dai tara hpe tawt lai ai ni tai nga ai hte, jeyang ai hkrum nga myit dai. 10 Kadai raitimung tara ting hpe hkan shatup lu timung, dai hta na langai mi hpe kataw kau yang gaw, yawng hte hta ra ging ai wa rai nga ai. 11 Kaning rai nme law, Masha num hpe hkum shaw, nga nna hkangda ai wa gaw, Masha hpe hkum sat, nga nna naw tsun nga ai. Dai rai nna, masha a num hpe nang n shaw timung, masha hpe sat kau n yang gaw, dai tara hpe tawt lai ai wa nang rai nga ndai. 12 Dai re ai majaw, nanhte hpe shalawt lu na tara hte dawdan ai hkrum magang lu na ni zawn, ga a tsun nga mu; dai hte maren hkan galaw nga mu. 13 Kaning rai nme law, matsan dum na myit n rawng ai wa gaw, matsan dum ai hku n re ai sha, dawdan ai hkrum na ra ai. Matsan dum ai lam chyawm gaw, dawdan ai lam hta grau nna awng wa lu ai. 14 Nye a hpunau ni e, marai langai ngai, Ngai gaw makam masham rawng nga nngai, nga nna tsun nga timung, magam bungli n shachyen nga a yang gaw, hpa akyu nga a ta? Makam masham gaw dai wa hpe hkyehkrang la lu na a ni? 15 Hpunau wa langai ngai, shing n rai kajan langai ngai, singgu krin rai nga ma ai hte, shani shagu sha na lusha shahpa nhprut ma yang gaw, 16 nanhte hta na marai langai ngai, Ngwi pyaw ai hte wa masit; lum nga mu, hkru kat nga mu, ngu nna shan hpe tsun mu timung, hkum a matu ra nga ai hte maren, n jaw dat mu yang gaw, hpa akyu nga na a ta? 17 Dai hte maren, makam masham hta magam bungli n lawm yang gaw, tinang dai chyasi rai nga ai. 18 Bai lam mi gaw, Nang makam masham rawng nga ndai, ngai mahtang magam bungli rawng nga nngai, nga nna marai langai ngai tsun nga a yang gaw, magam bungli n lawm ai, na a makam masham gaw ngai hpe madun dan e, shaloi nye a magam bungli hte nye a makam masham, ngai nang hpe madun dan na de ai. 19 Karai Kasang gaw langai sha rai nga ai, nang kam nga n hka? Rai sa, mai kaja nga ndai: nat ni mung kamsham nga nna, hkrit gari nga ma ai. 20 Dai hta kaga, wa dan seng breng wa e, makam masham hta magam bungli n lawm yang gaw, kaman lila rai nga ai hpe, nang chye mayu da wu ni? 21 Anhte a wa Abraham dai hkungri ntsa e, shi a kasha Isak hpe hkungga shatai ai shaloi, magam bungli hte dinghpring wa lu ai, n rai ni? 22 Dai rai nna, dai kamsham ai gaw, shi a magam bungli hte rau shachyen nna, dai magam bungli a majaw, dai kamsham ai gaw tup wa lu ai hpe, nang mu lu ndai; 23 shingrai, Abraham gaw karai Kasang hpe kamsham wu ai rai nna, dai hpe dinghpring ai rai nga ai shi a matu ngu ya wu ai hte, Karai Kasang a jinghku wa shi hpe ngu da wu ai, nga nna tsun da ai laika gaw dik wa sai. 24 Dai rai nna, kamsham ai hte sha n rai, magam bungli hte masha gaw dinghpring wa lu nga ai hpe nanhte dum chye nga myit dai. 25 Dai hte maren, Rahab ngu ai shawa num gaw, kasa ni hpe hkap hkalum la nna, kaga lam hku e dat dat mu ai shaloi, magam bungli hte dinghpring wa lu ai, n rai ni? 26 Kaning rai nme law, dai hkum tsawp hta wenyi n rawng a yang gaw, chyasi rai nga ai zawn, dai makam masham hta mung, magam bungli n lawm yang gaw, chyasi rai nga ai.

Yaku 3

3:1 Nye a hpunau ni e, anhte sara ni grau nna dawdan ai hkrum na ga ai hpe, anhte chye nga ga ai majaw, marai law law wa sara hkum tai nga myit. 2 Kaning rai nme law, anhte nga manga hte hta, malaw maga gaw kataw ai hkrai rai nga ga ai. Marai langai ngai ga hte n kataw a yang gaw, hkum hkum tsup tsup re ai wa hte, tinang a hkum ting hpe hkang lu ai wa rai nga ai. 3 Gumra ni anhte a myit hkan lu hkra, n-gup hta gumhtung bang gaw yang, de a hkum ting hpe anhte hkang lu gaw ai. 4 Dai hta kaga, shanghpaw li ni hpe yu yu mu; dai ni dai hte wa kaba nga ai hte, ja la ai nbung laru e ahpawt gumpye ai hkrum mat wa timung, li hkang ai wa myit ra ai hte maren, grai kaji ai li hkang hte sha, dai ni hpe hkang la lu ai. 5 Dai hte maren, shinglet gaw daw shan kaji nga ai raitimung, gumrawng gumtawng kaba nga lu ai: yu mu, nte sha law ai wan gaw, ning san wa kaba ai maling hpe hkru kau lu a hka! 6 Dai shinglet mung wan rai nga ai; anhte a daw shan ni hta e, dai shinglet gaw, yubak a mungkan tai wa nga ai rai nna, anhte a hkum ting hpe awu asin di kau wu ai hte, dai gawng shing-yan a hkrang hpe nat kau wu ai rai nna, ngarai mung gaw dai hpe nan shachyi wu ai. 7 Kaning rai nme law, uni uzai hte u amyu myu, gumrawt hkawm ai baw hte hka kata na nga amyu myu hpe, masha a lata hte hku shani la lu nna, dai hte gaw ni mat wa masai. 8 Dai shinglet hpe chyawm gaw masha kadai raitimung, n hku shani la lu mu ai; dai gaw ndi nda n hkru n hkra re ai hte, chyasi ai tuk hte hpring chyat re ai baw rai nga ai. 9 Dai shinglet e, anhte gaw dai Madu hte Wa hpe sha-a nga ga ai; bai, Karai Kasang a hkum hkrang hte maren hpan tawn da mu ai shinggyim masha ni hpe mung, dai hte dagam dala nga kau ga ai. 10 N-gup langai hta nna sha, shaman ai ga hte dagam dala re ai ga pru wa ai. Nye a hpunau ni e, shing ngu ai gaw n mai nga ai. 11 Npun hpaw ai hka hpawk langai hta nna, mu ai ntsin hte hka ai ntsin pru lu a ni? 12 Nye a hpunau ni e, maihpang hpun hta tsanlun si, tsabyi ru hta maihpang si, n si lu ai, n rai ni? Dai hte maren, jum shum ai hka gaw, mu ai ntsin hpe n shapraw lu nga ai. 13 Nanhte hta e, hpaji byeng-ya hte chye chyang ai wa, kadai rai nga a ta? Dai wa gaw shingdi chye ai hpaji byeng-ya hte, kaja ai arawn alai hkan let, tinang a magam bungli hpe madun ruga. 14 Raitimung, nanhte a myit hta e ladu lai ai manawn masham hte gasat gala rawng nga myit yang gaw, dai tengman ai ga hpe hkum gumrawng kau myit, hkum masu kau myit. 15 Shing re ai hpaji byeng-ya chyawm gaw, ntsa de nna yu hkrat wa ai hpaji byeng-ya n rai; dai gaw, dinghta ga a, ashu ashan a hte ji nat a hpaji byeng-ya hkrai rai nga ai. 16 Kaning rai nme law, manawn masham hte gasat gala rai nga yang gaw, kashuk kashak hte n shawp ai amu amyu myu hkum nga ai. 17 Ntsa de na hpaji byeng-ya chyawm gaw, shawng npawt e sanseng ai rai nga ai; dai hpang e, htingrai htingrat chye ai, sumnung ai, shingdi ai, matsan dum ai hte kaja ai asi hte hpring nga ai, gale galau n re ai hte hpyi hpun n chye ai hpaji byeng-ya rai nga ai. 18 Dai hta n-ga htingrat htinglu shachyen chye ai ni a lata hte, dinghpring lu ai asi gaw, ngwi pyaw ai hte gat nga ai.

Yaku 4

4:1 Nanhte hta e majan hte hpyen gasat ai gaw, kanang na pru wa malit ta? Nanhte a daw shan ni hta e gasat hkying ai pyaw daw kadaw ai a majaw rai nga ai, n rai ni? 2 Nanhte myit kayut nga timung, hpa n lu la myit dai. Nanhte sat kau nga ai hte manawn masham rai nga timung, hpa n lu la lu myit dai: nanhte hpyen gasat nga ai hte, majan galaw myit dai; nanhte n hpyi myit dai majaw, hpa n lu la myit dai. 3 Nanhte hpyi timung, n hkam la lu myit dai; kaning rai nme law, nanhte a pyaw daw lam hta ginlut kau myit ga, n mai ai mahtang nanhte hpyi nga myit dai. 4 La shaw ai ni e, mungkan ga hpe jinghku hku ai myit gaw, Karai Kasang hpe ndawng n yawt ai myit rai nga ai, nanhte n chye nga myit ni? Dai rai nna, mungkan ga a jinghku tai mayu ai wa kadai raitimung, Karai Kasang hpe ndawng n yawt ai wa tai nga ai. 5 Dai hta kaga, anhte hta e bang rawng da ai Wenyi gaw, manawn masham du hkra myit marin nga ai kun? nga nna Chyum laika tsun ai gaw, kaman rai nga ai, nanhte nawn da mu ni? 6 Shi mahtang gaw grau kaba ai chyeju a jaw nga ai. Dai rai nna, Karai Kasang gaw gumrawng gumtawng ai ni hpe gang hkum kau nna, myit nem ai ni hpe chyeju jaw ya wu ai, nga nna laika tsun nga ai. 7 Dai re ai majaw, Karai Kasang a npu e a taw nga mu: nat gumlau hpe ban hkum kau mu; shaloi shi nanhte kaw nna hprang mat na ra ai. 8 Karai Kasang hpang de sit sa wa mu; shaloi shi nanhte hpang de sit wa na ra ai. Yubak galaw ai ni e, nanhte a lata hpe jasan jaseng kau mu; myit mashe rawng ai ni e, nanhte a myit masin hpe shachyoi shapra da mu. 9 Nji nmu, sharung shayawt ai hte, hkrapngu hkrapngoi rai nga mu; nanhte a mani ai gaw sharung shayawt ai hte, nanhte a kabu gara ai gaw yawn du krung ai hte galai mat u ga. 10 Dai Madu a man e myit shanem nga mu, shaloi shi nanhte hpe shagrau na marin dai. 11 Hpunau ni e, nanhte shada da nsu nnawn ga hkum tsun myit.Tinang a kahpu kanau hpe nsu nnawn ga tsun nga ai, shing n rai, jeyang ai wa gaw, dai tara hpe nsu nnawn ga tsun nga nna jeyang ai wa rai nga ai. Dai tara hpe nang jeyang nga ndai rai yang gaw, tara jeyang ai wa nang tai nga ndai. 12 Tara jaw da lu ai hte tara dara ai wa chyawm gaw, hkyehkrang la lu ai hte jahten kau lu ai wa chyu sha, rai nga ai: dai re ai majaw, na a htingbu wa hpe jeyang ai wa, nang gaw, kadai wa rai nga n ta? 13 bai lam mi gaw, Dai ni, shing n rai, hpawt ni e, ndai mare de anhte sa wa nhtawm, dai yang e laning mi hkring nga nna, hpaga ga na hte amyat lusha na gaw ai, nga nna tsun nga ai ni e, sa marit; 14 hpawt ni e pyi hpa byin na ra ai gaw, nanhte n chye nga myit dai; nanhte a asak gaw hpa rai nga malit ta? chyahkring chyahkra sha danpru nna, hkoi mat ai salu rai nga malit dai. 15 Dai rai nna, Dai Madu hkraw nga a yang gaw, anhte mung ahkrung nga lu na hte, ndai mung, wora mung galaw lu na ga ai, nga nna nanhte mai tsun na myit dai. 16 Ya chyawm gaw nanhte a grang ai ga hta nanhte gumrawng gumtawng rai nga myit dai: shing re ai gumrawng gumtawng nlang hte gaw, n shawp n kap rai nga ai. 17 Dai re ai majaw, kaja ai amu chye galaw ninglen n galaw ai wa gaw, yubak mara kap nga ai.

Yaku 5

5:1 Sut su ai ni e, sa marit; nanhte a ntsa e du magang ra ai tsin-yam tsindam majaw, hkrap shabam nga mu. 2 Nanhte a sutgan gaw yat mat ma ai rai nna, nanhte a hpun nba hpe manut e sha kau manu ai. 3 Nanhte a aja hte gumhpraw hta pyi nhkan jung ma ai rai nna, de a nhkan mung, nanhte a mara maga de sakse hkam ya ai hte, nanhte a hkumshan hpe wan zawn, sha kau na ru ai. Nanhte gaw hpang jahtum ai nhtoi ni hta e sutgan mahkawng da manu ai. 4 Yu mu, nanhte a yi hkauna ni hpe dan shangun nhtawm, nanhte hkalem sha kau ai bungli galaw ai ni a shabrai gaw, jahtau nga ai rai nna, mam dan ai ni a garu ai nsen mung, dai Madu Seba-ut a na hta e hkrang shang wa sai. 5 Nanhte gaw ga ntsa e shakawng ndawng rai nga ai hte, pyaw daw hkrai kadaw myit dai; sat ai shani hta e, nanhte gaw tinang a myit hpe kawn da manit dai. 6 Dai dinghpring ai wa hpe nanhte dawdan nna, sat kau manu ai; shi gaw nanhte hpe ban hkum nga ai n rai. 7 Dai re ai majaw, hpunau ni e, dai Madu bai du ai du hkra shakut sharang nga mu law. Yu mu, sun galaw ai wa gaw, ga a asau asi hpe ala nga ai rai nna, marang nhpaw hte hpang shadoi na marang dai hta e htu shaya ai du hkra, shakut sharang nga ai. 8 Nanhte mung shakut sharang nga mu; dai Madu a bai du na gaw ni wa magang ra ai majaw, nanhte a myit hpe shangang shakang da mu. 9 Hpunau ni e, nanhte dawdan ai n hkrum myit ga, shada da hkum aput angun nga myit; yu mu, tara agyi wa gaw, chinghka makau e a tsap nga ai. 10 Hpunau ni e, dai Madu a amying nsang hte hkaw tsun dan ai myihtoi ni a nni nkri hkrum ai hte, shakut sharang nga ai myit gaw, nanhte a ningli tai wa malit ga. 11 Yu mu, shakut sharang lu ai ni hpe, anhte a ngu gaw ai: Yoba a myit galu ai lam nanhte na yu manit dai; dai Madu a asak htum wa ai lam mung, nanhte mu chye manit dai: dai Madu gaw nachying myit yu machyi nga ai hte matsan yu dum nga ai law. 12 Ya mahkra hta n-ga nye a hpunau ni e, hpa hpe mung dagam dala hkum nga myit: sumsing lamu hte dinghta aga hpe dagam dala hkum nga myit: dagam dala ai ga kaga mung hkum tsun nga myit. Nanhte dawdan ai n hkrum myit ga, nanhte a aga gaw, Re ai gaw, re ai, N re ai gaw, n re ai, rai nga malit ga. 13 Nanhte hta langai ngai nji nmu hkoi hkrum nga myit ta? shi akyu hpyi nga u ga; langai ngai myit pyaw nga a yang gaw, shi mahkawn mangoi nga u ga. 14 Nanhte hta langai ngai machyi makaw hkoi hkrum nga myit ta? dai wa gaw, Hpung na salang ni hpe shaga la nhtawm, shanhte gaw dai Madu a amying nsang hte shi hpe namman chya ya let, shi a matu mara akyu hpyi ya mu ga: 15 shingrai kamsham ai myit hte akyu hpyi ai ga gaw, dai machyi ai wa hpe shamai shatsai lu nna, dai Madu gaw shi hpe sharawt la na ru ai; shi gaw yubak mi galaw hkrup dam timung, raw dat kau ai hkrum na ra ai. 16 Nanhte shamai shatsai hkrum myit ga, nanhte a yubak mara hpe shada da shapraw dan nna, shada da a matu mara akyu hpyi nga mu. 17 Dinghpring ai wa a hpyi nem ai ga gaw, shabyin lu na atsam law law rawng nga lu ai. Elia gaw anhte hte maren myit mang rawng nga ai shinggyim masha hkrai rai nga timung, marang n htu u ga aja awa akyu hpyi wu yang, masum ning e shata kru tup ga ntsa e marang n htu ai nga mat ai. 18 Bai akyu hpyi dat wu yang, sumsing lamu gaw marang jahtu dat wu ai rai nna, dai aga gaw, de a nsi nai si ni hpe shatut dat wu ai. 19 Nye a hpunau ni e, nanhte hta na marai langai ngai, dai tengman ai lam hta na dam mat wa nna, kaga langai ngai shi hpe shabai dat wu yang gaw; 20 yubak galaw ai wa hpe, shi a shut hpyit ai lam hta na shabai dat wu ai wa gaw, myit masin hpe si ai kaw na hkyehkrang la wu ai rai nna, yubak sumpum hpe makoi magap ai rai nga ai, dumhprang nga mu law.

Yaku 1

Yaku 2

Yaku 3

Yaku 4

Yaku 5

1 Petru 1

1:1 Yesu Hkristu a kasa, ngai Petru gaw, Wa Karai Kasang a moi na chye chyang ai a majaw, dai Wenyi a shachyoi shapra ai hta, madat mara nna, Yesu Hkristu a asai hte lapri ai chyeju hkam la lu na, 2 Puntu, Galati, Kapadoki, Asi hte Behtuni mung hkan e bra mat ai ni hte rau, lata la ai shingbyi nga ai ni hpe, ga shana dat nngai: chyeju hte ngwi pyaw ai gaw nanhte hta law htam wa malit ga law. 3 Anhte a Madu Yesu Hkristu a Kawa Karai Kasang gaw a nga u ga: si mat ai ni kaw na Yesu Hkristu a bai hkrung rawt wa ai a marang e, ahkrung nga ai myit mada shara hte, 4 n run n hten ai, awu asin n re ai, n wai n mat ai sali wunli hpe hkam la lu na matu, shi a galu kaba ai chyeju majaw, shi anhte hpe bai shangai mi ai: 5 hpang jahtum ai nhtoi e danpru u ga, nga nna lajang da sai hkyehkrang la ai chyeju hpe hkam la lu na hte, kamsham ai myit marang e, Karai Kasang a n-gun lagaw hte makawp maga hkrum nga ai, nanhte a matu mara, dai sali wunli gaw, sumsing lamu hta e kyem da nga ai. 6 Nanhte a jet ai kamsham myit gaw, wan hta e chyam yu ai hkrum nhtawm, hten mat chye ai aja hta grau hpu ai rai nna, Yesu Hkristu a danpru ai nhtoi hta e, dai gaw, shakawn kungdawn ai, hpung shingkang hte arawng sadang rawng ai arai tai wa u ga, 7 ya chyahkring chyahkra e gunglau amyu myu hte nanhte yawnhkyen hkrum nga myit timung, dai hkyehkrang la ai lam a gawp e, nanhte grai kabu gara nga lu myit dai. 8 Dai Yesu hpe nanhte n mu yu timung, tsawra nga manit dai; shi hpe garai n mada mu mu timung, shi hpe kamsham nga ai a gawp e, n dang tsun hkra danhkung ai kabu gara ai hte nanhte kabu gara nga myit dai rai nna, 9 myit masin hpe hkyehkrang la lu ai, ngu ai, kamsham ai a akyu hpe hkam la lu manu ai. 10 Dai nanhte kaw dep lu ai akyu ara lam hpe, myihtoi ga htawn tsun ai myihtoi ni mung, dai hkyehkrang la ai lam hpe azin ayang tam nna sawk yu manu ai: 11 Hkristu gaw nni nkri hkrum na hte dai hpang e hpung shingkang lu la na, nga nna shanhte hta e rawng nga ai Hkristu a Wenyi gaw, shawng e sakse hkam nga ai shaloi, gara aprat hte kaning re ai aten hta me, dai hte byin na ra ai kun, shanhte sawk yu nga ma ai. 12 Kaning rai nme law, ndai shanhte daw ai amu hte gaw, tinang a matu n re ai sha, nanhte a matu rai nga ai hte, sumsing lamu de na shangun dat ai Chyoi pra ai Wenyi a ahkang hte, kabu gara ai shiga, nanhte hpe hkaw dan ai ni, ya nanhte hpe gawn dan lu na amu rai nga ai gaw, shanhte hpe mung madun dan manu ai: dai amu hte hta lamu kasa ni mung, azi yu mayu nga ma ai. 13 Dai re ai majaw, nanhte a myit kraw lawang a nshang hta shingkyit kyit nna, htauli htaula hta grin nga let, Yesu Hkristu danpru wa ai shaloi e, nanhte hpang de la sa na ra ai chyeju hpe, myit mada nga mu. 14 Nanhte mung madat mara ai ma zawn rai nga let, nanhte garai n chye ai aten na shawng na myit marin kau ai hte hpe ya n hkan dagraw ai sha; 15 nanhte hpe shaga la ai wa gaw chyoi pra nga ai hte maren, nanhte mung arawn alai shagu hta chyoi pra nga mu: 16 kaning rai nme law, Ngai chyoi pra nga nngai majaw, nanhte mung chyoi pra nga myit ga, nga nna ka da nu ai. 17 Dai hta kaga, myiman n tau yu ai sha, langai hte langai a amu hte maren dawdan nga ai Kawa hpe nan, nanhte hpyi shaga myit yang gaw, nanhte manam tai hkawm nga ai aten hte yang, hkrit kamyin ai hte hkan shatup nga mu. 18 Kaning rai nme law, ji wa ni kaw nna hkan dagraw nga ai nanhte a n se ai arawn alai hta na, hten mat chye ai aja gumhpraw hte nanhte hpe galai hkrang la lu na n rai; 19 ana n kap ai, ra n rawng ai Hkristu ngu ai sagu kasha a hpu la ai asai hte sha, galai hkrang la lu na myit dai; 20 ginding aga garai n lat kaw nna, shi hpe chye tau wu timung, si ai ni kaw na shi hpe hkrung sharawt la wu ai hte, shi hpe hpung shingkang jaw ai Karai Kasang hpe, 21 shi a marang e kamsham ai ni, nanhte a matu mara, ndai hpang jahtum ai aten e danhkung pru wa sai: shingrai, nanhte a makam masham hte myit mada shara gaw, Karai Kasang hta jung nga na ra ai. 22 Dai dingman ai ga hpe madat mara nga let, nanhte kahpu kanau ni hpe gaja wa teng teng, tsawra lu ai du hkra, nanhte a myit masin hpe sanseng kau lu myit dai majaw, nanhte a myit ting hte shada da tsawra nga mu; 23 nanhte gaw hten mat chye ai nli hta na n rai, hten mat n chye ai, Karai Kasang ahkrung nga ai hte anga nga ai mungga nli hta, bai shangai wa lu manit dai. 24 Kaning rai nme law, Ashan yawng gaw tsingdu zawn rai nga ai, Dai ni a hpung shingkang ting, tsingdu a apu zawn rai nga ai; Dai tsingdu gaw nyawi mat wa ai rai nna, Apu ni mung, run hkrat mat wa ma ai. 25 Dai Madu a matsun chyawm gaw, prat mi hte prat mi anga nga ai. Dai gaw, nanhte hpe hkaw tsun dan ai kabu gara ai matsun rai nga ai.

1 Petru 2

2:1 Dai re ai majaw, dai Madu gaw n-gaw n-nyeng rai nga ai hpe, nanhte chyim yu manu yang gaw, 2 n hkru n hkra, hkalem hkalau, sawt masawt, manawn masham hte nsu nnawn ai bawlaw ai ga nlang hte hpe kau da nhtawm, 3 ma chyangai zawn dai hkyehkrang la ai chyeju hta kaba wa lu myit ga, kunghpan ai hte jet ai chyu hpe, myit marin nga mu. 4 Dai Madu hpang de nanhte sit sa wa nna, shi gaw ahkrung nga ai nlung rai nga ai: masha ni dai hpe sai kau mu timung, Karai Kasang a man e lata la ai hte hpu la ai nlung shi rai nga ai. 5 Nanhte mung ahkrung nga ai nlung hte zawn, wenyi hte seng ai nta hpe de nga manit dai rai nna, Yesu Hkristu a marang e, sharawng awng wa nna, wenyi hte seng ai hkungga Karai Kasang hpe jaw lu na matu, chyoi pra ai hkinjawng amyu tai wa manit dai. 6 Kaning rai nme law, Yu mu, lata la ai hte hpu la ai jut na nlung gaw, Ziun hta e ngai gaw da se ai rai nna, Dai hpe kamsham ai wa gaw, kaya kahpa n hkrum na ra ai, nga nna laika hta rawng nga ai. 7 Dai re ai majaw, nanhte kamsham ai ni a matu mara, dai gaw arawng rai nga malit dai: raitimung, n kam n sham ai ni a matu mara, Wahpang gaw ai ni sai kau ai nlung gaw, Ningjut jahtum nlung tai sai rai nna, 8 Ahtu kataw shara hte myit kataw shangun na lunghkrung mung tai wa sai. N madat n mara nga ma ai majaw, dai mungga hta shanhte kataw wa masai: shingrai hkrum mu ga mung, shanhte hpe san da ngut sai rai. 9 Nanhte chyawm gaw, nsin kata de nna shi a mauhpa nhtoi de nanhte hpe shaga bang ai wa a danhkung ai magam hpe shabrawng dat ya myit ga, lata la ai amyu, hkawhkam hkinjawng ni, chyoi pra ai amyu baw hte, Karai Kasang lahku la ang ai masha ni, rai nga myit dai. 10 Nanhte mung, shawng e amyu rai nga myit dai n rai, ya chyawm gaw, Karai Kasang a amyu rai wa manit dai; shawng e chyeju hkam la manit dai n rai, ya chyawm gaw, chyeju hkam la lu manit dai. 11 Ngai tsawra ai ni e, myit masin hte gasat hkat nga ai hkumshan kayut la ai baw hpe koi kau myit ga, ga ntsa e shingbyi nga ai ni hte, bu hkawn manam zawn rai nga ai ni nanhte hpe, ngai nem da made ai: 12 tara maigan de na ni, nanhte hpe bawlaw nna n kaja ai hku shatu ma yang, nanhte a kaja ai amu mu la nna, dai dawdan ai nhtoi hta e Karai Kasang hpe shagrau lu mu ga, shanhte a man e nanhte a arawn alai tsup nga lu u ga law. 13 Dai madu a marang e, masha hta na san tawn da ai aya shagu a npu e, a taw nga mu; 14 tsaw htum nga ai hkawhkam a npu e raitimung, n hkru ai ni hpe dawdan na hte, kaja ai amu galaw ai ni hpe awlaw na matu mara, shi san dat ai munggyi ni a npu e raitimung, ataw nga mu: 15 kaning rai nme law, kaja ai bungli shachyen let, myit n gring ai ni a n chye n chyang ai ga hpe nanhte jasim lu na gaw, Karai Kasang myit da ai hku rai nga ai. 16 Nanhte shanglawt rai myit timung, n kaja ai amu hpe shinggang kau na matu, nanhte a lawt ai akyu hpe hkum lang myit: Karai Kasang a shangun ma ni zawn, shanglawt tai nga mu. 17 Nlang hte hpe hkungga lara di mu; kahpu kanau ni hpe tsawra nga mu. Karai Kasang hpe hkrit kamyin nga mu; hkawhkam wa hpe hkungga lara di mu. 18 Shangun ma ni e, nanhte a madu ni a npu e, hkrit kamyin ai myit hte ataw nga mu; kaja ai ni hte myit ngwi ai ni a npu e sha n rai, kajet kaje re ai ni a npu e mung, ataw nga mu. 19 Kaning rai nme law, marai langai ngai Karai Kasang hpe nawku nu ai majaw, mara n rawng timung, nni nkri hkrum nna, yawnhkyen hkrum let shakut sharang nga a yang gaw, dai hta akyu lawm nga lu ai. 20 Nanhte yubak galaw ninglen, htwi ai bye ai hkrum sha nna, machyi sharang nga myit yang gaw, hpa arawng lu la myit ta? Kaja ai amu galaw ninglen, nni nkri hkrum sha ai hte machyi sharang nga myit yang gaw, dai gaw Karai Kasang a man e akyu rai nga ai. 21 Dai lam gaw nanhte hpe shaga da ai lam rai nga ai; Hkristu mung nanhte a matu mara nni nkri hkrum wu ai hte, nanhte shi ahkang hta hkan nang lu myit ga, nanhte a matu ningli tawn da nu ai. 22 Shi gaw yubak galaw yu ai n rai; shi a n-gup hta na hkalem ai ga mung n mu hkrup ai. 23 Shi aroi arip hkrum yang, bai roi htang ai n rai; nni nkri hkrum yang, ahkrim nga ai n re ai sha, dingman ai hku dawdan ai wa a lata hta e, shi a hkum hpe ap da nu ai. 24 Anhte gaw yubak mara hta si mat wa nga ga ai rai nna, dinghpring ai hta e hkrung nga lu u ga, shi gaw, shi hkum hta nan, dai hpun ntsa e, anhte a yubak mara hpe gun kau nu ai: shi a nma a gawp hte e, anhte shamai shatsai ai hkrum ga ai. 25 Kaning rai nme law, nanhte nlang sagu zawn lam dam mat myit timung, ya gaw, dai Sagu rem wa hte nanhte a myit masin a Hpung up wa hpang de, nhtang wa manit dai.

1 Petru 3

3:1 Dai hte maren, numsha ni e, tinang a madu wa a hkang ai hku hkan nga mu: shanhte hta na langai ngai dai mungga hpe n madat ma timung, nanhte hkrit kamyin ai myit hte hkan nga ai chyoi pra ai arawn alai mada mu ma yang gaw, 2 ga nlawm timung, madu jan a arawn alai majaw, shanhte hpe lau lu na rai nga ai. 3 Nanhte a mawn sumli ai gaw, kara lajang ai, aja gumhpraw hte sumli ai, hpun palawng shareng let hkum jahtap nga ai hku n rai; 4 Karai Kasang a man e hpu ging ai, myit masin hta makoi nga ai masha ngu ai, hten byak n chye ai, amu sha hte sumnung nga ai wenyi a lam hta, mawn sumli nga mu. 5 moi shawng na Karai Kasang hpe myit mada nga ai, chyoi pra ai num ni mung, tinang a hkum hpe shingrai jahtap mu ai rai nna; 6 Sara gaw Abraham hpe madat mara wu ai majaw, shi hpe Madu ngu wu ai hte maren, tinang a madu wa ni a hkang ai hku hpe hkan nga ma ai: kaja ai amu galaw nna, hpa hkrit shara hta mung, n hkrit n kang nga myit yang gaw, nanhte mung Sara a shayi sha ni rai nga myit dai. 7 Dai hte maren, lasha ni e, chye chyang ai hku hkan nna, n-gun kya ai hkum hkrang ngu ai numsha hte rau kanawn mazum nga mu: nanhte a akyu hpyi ai ga gangkau ya ai n hkrum myit ga, nanhte hte maren asak a sali wunli akyu lu la na ni hpe zawn, shanhte hpe hkungga lara di mu. 8 Dai hta n-ga, nanhte nlang shada da myit hkrum nna, myit yu machyi ai, hpunau shada da tsawra nna, matsan dum ai hte myit gyip ai; 9 n hkru ai a matu n hkru ai bai n tai na hte, roi rip ai a matu roi rip ai bai n tai ai sha, shaman ya na mahtang gaw, a daw nga mu; kaning rai nme law, shaman ya da sai sali wunli hpe hkam la lu myit ga, nanhte hpe shaga da manit dai. 10 Dai rai nna, Asak hkrung ai tsawra nga ai hte Nhtoi kaja mu mayu ai wa kadai mung, Shi a shinglet hpe n hkru ai kaw na, Shi a nten hkalem ga kaw na, jahka la u ga. 11 N hkru ai hpe koi kau nhtawm, kaja ai galaw nga u ga, Ngwi pyaw ai hpe tam nna, hkan sa nga u ga. 12 Kaning rai nme law, dai Madu a myi, dinghpring ai ni hpe a yu nga ai rai nna, Shanhte a hpyi ai ga hpe, shi a na madat nga ai. Dai Madu a myiman chyawm gaw, n hkru ai amu galaw ai ni hpe matsing nga ai. 13 Nanhte kaja ai lam hta htep lahti rai nga myit yang gaw, nanhte hpe sharu shatsang lu na, kadai wa rai nga a ta? 14 Dai rai nna, dinghpring ai lam a majaw, nanhte nni nkri hkrum myit yang gaw, nan- hte a lu nga myit dai; shanhte a jahkrit ai hpe mung, hkum hkrit nga myit; de a majaw sha pyi hkum ung-ang nga myit; 15 dai Madu hpe madu a shatai nga na matu, nanhte a myit masin hta e Hkristu hpe san da nga mu: nanhte hta rawng ai myit mada nga ai lam, kadai raitimung nanhte hpe ga san dam ma yang gaw, ga lachyum tsun dan lu na matu, tut e ajin nga mu; raitimung, dai hpe sumnung ai hte hkrit kamyin ai myit hte, a galaw nga mu: 16 shingrai, nanhte myit nsam kaja rawng myit yang gaw, Hkristu hta lakap nna, nanhte hkan ai arawn alai a majaw, nanhte hpe ndang hkat nga ai hte aroi arip nga ai ni, kaya kahpa hkrum mat mu ga. 17 Dai rai nna, Karai Kasang dai hku hkraw nga a yang gaw, n kaja ai amu galaw nna nni nkri hkrum nga ai hta, kaja ai amu galaw ninglen nni nkri hkrum ai gaw, grau nna kaja nga ai. 18 Kaning rai nme law, Hkristu mung yubak a majaw kalang sha mi si hkam nu ai; Karai Kasang hpang de anhte hpe woi wa lu hkra, dinghpring ai wa gaw, n ding n hpring ai ni a matu mara si hkam ai hte, dai hkum tsawp nan si mat timung, dai wenyi hta ahkrung nga ai: 19 dai wenyi hte nan pru wa yang, dai htawng hta e rawng nga ai tsu ni hpe shi wa hkaw dan mu ai; 20 dai ni gaw, moi shawng na Noa lakhtak e, Karai Kasang a matsan dum ai myit ala nga timung, masha law ma ai n rai, marai matsat sha, hka hta na sai la jahkrum ai shanghpaw li hpe shachyaw da nga ai shaloi e, n madat mara re ai ni hpe nan, rai nga ma ai. 21 Dai hka hta na zawn, ya e baptisma ngu ai kumla gaw, nanhte hpe hkyehkrang la lu nga ai; dai gaw, hkumshan hta e kap ai matsat shabat hpe sharun kau na lam n rai; Yesu Hkristu a bai hkrung rawt wa ai a marang e, Karai Kasang a man e sanseng ai myit nsam tam san ai lam rai nga ai. 22 Yesu Hkristu mahtang gaw, sumsing lamu de lung shang mat wa nhtawm, Karai Kasang a hkra maga de anga nga ai rai nna, lamu kasa ni, ahkang aya lu ai ni hte, hpung dagu rawng ai ni gaw, shi a npu e a daw nga ma ai.

1 Petru 4

4:1 Shingrai, Hkristu gaw dai hkumshan hta nni nkri hkrum nu ai rai nna, dai hkumshan hta nni nkri hkrum ai wa gaw, yubak hte hka mat lu ai majaw, 2 ndai hkum tsawp hta e naw ahkrung nga ai aprat e, masha a myit marin ai hku n hkan ai sha, Karai Kasang a myit hpe hkan nang lu myit ga, nanhte mung dai myit hpe nan, hpyen palawng zawn ahpun da nga mu. 3 Kaning rai nme law, tara maigan ni a bawng hkut ai lam hpe shadik lawm nna, myit mak ai, ngang kayut ai, tsabyi lu lai ai, tangpyaw shalai ai, lusha marin ai hte arawng n nga ai sumla nawku na lam hta hkawm sa ai gaw, ya lai wa ai aprat hte ram la sai. 4 Nanhte gaw shawng na ladu nan ahkut ai matsat shabat lam hta e, shanhte hte rau n gat nang lawm manit dai majaw, nanhte hpe shatan nhkan let, amau nga ma ai; 5 raitimung, ahkrung nga ai ni hte si mat ai ni hpe dawdan na jin jin rai nga ai wa a man e, shanhte nan lala, jahpan gawn dan na maru ai. 6 Kaning rai nme law, hkum tsawp lu ai shinggyim masha ni zawn, dawdan na hkrum ma timung, Karai Kasang a gawp e wenyi hta hkrung nga lu na matu mara, dai kabu gara ai shiga si mat ai ni hpe mung, hkaw dan da mu ai. 7 Arai yawng mayawng htum mat na aten ni magang wa ra ai. Dai re ai majaw, nanhte myitsu rai nga nna, akyu hpyi na matu htauli htaula rai nga mu. 8 Mahkra, hta n-ga, nanhte shada da tsawra ai myit makyit rawng nga mu; kaning rai nme law, tsawra ai myit gaw, yubak mara law law hpe magap da lu ai. 9 Aput apai n nga ai sha, nanhte shada da manam daw ai lam adaw nga mu. 10 Langai hte langai chyeju kumhpa lu la ai hte maren, Karai Kasang a chyeju amyu myu hpe, kaja ai hpajau wa jau ai zawn, nanhte shada da dai hpe jau hkat nga mu. 11 Yesu Hkristu a marang e, lam shagu hta e, Karai Kasang gaw shagrau shatsaw ai hkrum wa u ga, marai langai ngai ga tsun nga a yang gaw, Karai Kasang a mungga hte maren tsun nga u ga; langai ngai galaw daw nga a yang gaw, Karai Kasang jaw da ai n-gun lagaw hte maren, galaw daw nga u ga. Yesu Hkristu nan, hpung shingkang hte n-gawn tawa hpung dagu, htani htana prat dingsa e anga nga ai law. Amen. 12 Tsawra ai ni e, nanhte hpe chyam yu na matu, nanhte a kata e du bang ai wan dinglik gaw, mauhpa amu zawn nanhte hta byin nga ai, nga nna hkum nawn nga myit: 13 Hkristu gaw shi a hpung shingkang hta paw pru ai shaloi, kabu gara ai kaba hte nanhte kabu gara wa lu myit ga, shi a nni nkri hkrum ai lam hta, nanhte lawm lu myit dai majaw, kabu gara nga mu. 14 Hkristu a amying nsang a majaw, nanhte asawng asang hkrum nga myit yang gaw, nanhte a lu myit dai; kaning rai nme law, hpung shingkang a Wenyi hte Karai Kasang a Wenyi gaw, nanhte a ntsa e awam nga ai. 15 Dai hta kaga, masha hpe sat ai wa lagu lagut, n hkru n hkra galaw ai wa hte, masha amu hpe hkan kajam ai wa zawn, nanhte hta na kadai mung, nni nkri n hkrum u ga; 16 raitimung, Hkristu sape rai nga ai majaw nni nkri hkrum a yang gaw, shi kaya kahpa n dum ai sha, dai amying nsang hta e, Karai Kasang hpe shagrau shatsaw nga u ga. 17 Kaning rai nme law, Karai Kasang a nta na ni hpe tara dara hpang na aten du ra ai: dai gaw anhte a ntsa e shawng ang pru wa yang gaw, Karai Kasang a kabu gara shiga hpe n madat mara ai ni a jahtum ai gaw, kaning rai na ra ai kun? 18 Dingman ai wa gaw, hkyehkrang la ai kaw, du yak la nga ai teng yang gaw, tara n hkungga ai hte yubak kap ai wa gaw, kanang ang bang wa na ra ta? 19 Dai rai nna, Karai Kasang a myit da ai hku hte maren nni nkri hkrum ai ni gaw, kaja ai amu bungli galaw nga let, sadi sahka nga ai Hpan wa Ningsang a lata e, tinang a myit masin hpe ap bang ya mu ga.

1 Petru 5

5:1 Dai re ai majaw, Hkristu a nni nkri hkrum ai lam hta sakse tai nga ai hte paw pru magang ra ai hpung shingkang hta hkambum lu ai nanhte a kanawn salang, ngai gaw, nanhte hta lawm ai Hpung salang ni hpe shadum shahprang dat mawe ga; 2 nanhte hte rau rai nga ai Karai Kasang a sagu hpung hpe arem nga mu; adip ahkrip re ai hku zawn n nawn ai sha, dingsa myit hte galaw nga mu; nsan n seng ai amyat majaw n re ai sha, htau li htaula myit hte galaw mu; 3 dai hpung hpe madu mayu ai myit hte n re ai sha, dai hpung hta lawm ai ni a man e ningli apawt tai nga myit ga. 4 Shingrai yang gaw, dai Hpung rem agyi wa danpru ai shaloi e, nanhte gaw n wai n mat ai a rawng sadang a janmau hpe, lu la na mu ai. 5 Dai hte maren, brang ram ni e, salang ni a npu e a taw nga mu. Dai hta n-ga, nanhte nlang shada da daw nga myit ga, myit gyip ngu ai hpajet hpe kyit nga mu: kaning rai nme law, Karai Kasang gaw gumrawng ai ni hpe shadang da timung, myit gyip ai ni hpe chyeju jaw mu ai law. 6 Dai rai nna, Karai Kasang gaw ram ging ai aten e, nanhte hpe shagrau shatsaw dat myit ga, shi a n-gun rawng ai lata npu e, tinang dai myit anem nga mu: 7 shi nanhte hpe myit dum ya nga ai majaw, nanhte a myit ru myit tsang ai nlang hte nan, shi a ntsa e kabai mara da mu. 8 Nanhte htauli htaula rai nga mu; a maja nga mu; nanhte a gumlau wa ngu ai, Nat gaw, kadai wa hpe mahtang mayu kau lu na, nga nna shabam ai hkanghkyi zawn, ningwan kahkrang hkawm nga ai. 9 Mungkan ga e nga ai nanhte a nhpu nnau ni mung, dai zawn re ai nni nkri hkrum nga ai hpe nanhte chye lu nna, kamsham ai myit hte dai Nat hpe dakring dakan di ahkap nga mu. 10 Nanhte mahtang chyahkring chyahkra nni nkri hkrum ai hpang, Hkistu hta e htani htana nga ai hpung shingkang a matu, nanhte hpe shaga la da ai, chyeju hkum hkum rawng ai Karai Kasang gaw, shi hkum nan, nanhte hpe shakup shatsup na, shangang shakang na hte n-gun sharawng na marin dai. 11 Shi kaw htani htana e, n-gawn tawa hpung dagu anga nga u ga law. Amen. 12 Shingrai, dai lam gaw, Karai Kasang a chyeju lam teng teng rai nga ai hpe, shadum shahprang nna sakse hkam ya na matu, ngai nawn nga nngai hte maren, sadi sahka re ai Silwanu ngu ai hpunau a lata hte, ndai ga gadun ngai nanhte hpe ka ya dat nngai: ndai chyeju hta e mung nanhte anga nga myit dai. 13 Babelon mare hta e nga ai, nanhte hte rau lata la ai Hpung gaw, nanhte hpe shakram dat ga ai. Ngai sha Marku mung, nanhte hpe shakram dat nga ai. 14 Nanhte shada da tsawra ai pup ai hte a shakram nga mu. Hkristu hta e lawm ai ni nlang hte kaw, ngwi pyaw nga myit ga law.

2 Petru 1

1:1 Yesu Hkristu a mayam hte, kasa tai nga ai, ngai Simun Petru gaw, anhte a Karai Kasang hte, Hkyehkrang la ai Madu Yesu Hkristu a dinghpring ai lam hta, anhte zawn hpu la ai makam masham lu la nga ai ni hpe, ga shana dat nngai. 2 Karai Kasang hte anhte a Madu Yesu hpe chye chyang ai lam hta, chyeju hte ngwi pyaw ai gaw, nanhte hta e law htam wa malit ga law. 3 Hpung shingkang hte arawng sadang e anhte hpe shaga la ai wa a chye chyang lu ai nyan a gawp e, shi a Karai Wa atsam gaw, asak hkrung nga ai hte tara hkungga ai lam hta seng maseng hte anhte hpe jaw da mi ai rai nna, 4 nanhte gaw mungkan ga a myit marin ai hten bya ai lam na lawt lu wa let, Karai Wa a myit marai hpe dagraw la lu myit ga, arawng lu ai hte galu kaba la ai ga ndat ni, shi anhte hpe jaw dat mi ai. 5 Dai re ai majaw, nanhte mung, tin tin larau ladau rai nga let, nanhte a kamsham ai myit hta sanseng ai marai a shajat nga mu; sanseng ai marai hta chye chyang ai; 6 chye chyang ai hta koi gam ai, koi gam ai hta shakut sharang ai, shakut sharang ai hta tara hkungga ai, 7 tara hkungga ai hta hpunau hpe tsawra ai, hpunau hpe tsawra ai hta, n-gaw nwai ai myit, a shajat nga mu. 8 Kaning rai nme law, dai hte gaw nanhte hta e rawng nga nna, law htam wa myit yang gaw, anhte a Madu Yesu Hkristu a chye chyang ai lam hta, nanhte kaman lila rai nga ai hte asi nsi lu na myit dai, n rai. 9 Dai hte hpe kata nga ai wa chyawm gaw, myi hten ai hte myi pat kau ai masha rai nga ai rai nna, shi a moi na yubak dingsa hpe jasan jaseng kau ai lam nan, malap mali di kau nu ai. 10 Dai re ai majaw hpunau ni e, nanhte hpe shaga da ai hte lata la ai chyeju hpe shangang shakang rai lu u ga, larau ladau rai nga mu: dai hku galaw nga myit yang gaw, nanhte galoi mung kataw katan rai wa na myit dai n rai: 11 dai lam hkan nga myit taw gaw, anhte a Madu hte hkyehkrang la ai wa Yesu Hkristu a htani htana prat dingsa na mungdan de shang wa lu na lam, nanhte hpe n taw n tsang di ya na marin dai. 12 Dai rai nna, nanhte dai hte hpe chye nga ai hte, ya rau rai nga ai tengman ai ga hta agrin nga myit timung, dai lam ni nanhte hpe shadum shahprang na, ngai tut tut naw atsang nga nngai. 13 Dai hta kaga, ndai hkum tsawp hta e ngai naw anga nga yang, nanhte a dumhprang na myit hpe jasu ya na, sut nga ai hpe ngai myit da we ai; 14 kaning rai nme law, anhte a Madu Yesu Hkristu gaw, ngai hpe madun dan nngai hte maren, gade nna yang ndai hkum tsawp hpe ngai kau da na we ai, ngai chye nga nngai. 15 Rai sa, ngai pru mat wa ai hpang, nanhte galoi mung ndai hte hpe dumhprang nga lu myit ga, ngai naw shakut sharang nga na nngai. 16 Kaning rai nme law, anhte a Madu Yesu Hkristu a hpung atsam hte, du sa wa na ra ai lam, shi nanhte hpe shana dan ai shaloi e, hpaji maumawi ga hpe hkan let, anhte hkai ga ai n rai;anhte hkum nan shi a danhkung ai hpung shingkang hpe tinang dai mu lu ai ni rai nga ga ai. 17 Shi gaw Kawa Karai Kasang kaw na, arawng sadang hte hpung shingkang hpe lu la wu ai shaloi, daru magam hpung shingkang kaw na ning nga ai nsen shi kaw danpru nna, Ndai wa gaw ngai sharawng awng nga ai, ngai tsawra ai ngai sha rai nga li ai, ngu wu ai: 18 dai chyoi pra ai bum ntsa e shi hte rau nga nga ai shaloi e, dai nsen sumsing lamu de na shi kaw danpru ai gaw, anhte nan na lu gaw ai. 19 Dai rai nna, grau grin wa nga ai myihtoi ga mung, anhte lu sagaw ai; nanhte a myit masin hta e nhtoi leng wa nna, nhtoi gintawng pru wa ai ten du hkra, nsin sin ai shara de htoi tu nga ai pyengdin hpe zawn, dai myihtoi ga hpe nanhte a hkan nang nga na, mai kaja nga ai. 20 Dai hta kaga, laika hta rawng ai gara myihtoi ga raitimung, tinang a myit shasat ai hte maren, ga lachyum shapraw lu ai n rai, shawng chye la mu. 21 Kaning rai nme law, masha a myit shasat ai hku majaw, hpa myihtoi ga galoi mung byin pru yu ai n rai; Chyoi pra ai Wenyi e myit shadut ya hkrum ai masha ni gaw, Karai Kasang kaw na ga htawn tsun ma ai.

2 Petru 2

2:1 Raitimung, amyu masha ni hta e, masu ai myihtoi ni mung paw pru ma ai;dai hte maren, nanhte hta e mung, masu ai sara ni paw pru wa na mara ai rai nna, jahten shabya chye ai bra wa ai ga hpe, mayun shashawn la nna, shanhte hpe mari la sai Madu hpe nyet kau ai hte, tinang dai a ntsa e tsin-yam tsindam hpe, larau ladau du shangun na maru ai. 2 Masha law law wa mung shanhte a mak mat ai lam hkan nang ma ai hte, shanhte a matu mara, dai tengman ai lam gaw, shatan nhkan hkrum mat na ra ai. 3 Shanhte gaw law hpa ai myit hkan let, hkalem ai ga hte nanhte hpe hpaga ga na marin dai: shanhte hpe dawdan na ari chyawm gaw, moi chyaloi nhkoi kaw nna n lanyan ai hte, shanhte hkrum sha na tsin-yam tsindam gaw gaungwi gausi yup shamawi nga ai n rai. 4 Kaning rai nme law, Karai Kasang gaw yubak galaw kau ai lamu kasa ni hpe pyi lahpawt lama n di ai sha, ngarai mung de jahkrat kau mu ai rai nna, tara dara ai nhtoi du hkra shanhte hpe rim da let, chyang htat ai nsin sin ai nhkun hta e rawng da mu ai hte; 5 moi moi na mungkan ga hpe mung lahpawt lama n di ai sha, dinghpring ai tara hkaw dan ai sara Noa hte masha sanit hpe makawp maga la nhtawm, tara n hkungga ai ni a mungkan ga a ntsa e sha-u sha-ing dat wu ai hte; 6 Sodom hte Gomora mare yan hpe mung, wan mang shatai kau nna, sharun shabyak kau mu ai hte, hpang e du pra ai, tara hpe n hkungga ai ni a matu mara ningli shatai mu ai; 7 raitimung, dai mare na n se ai masha ni a n san n seng ai arawn alai majaw, myit tsang hkrum ai dinghpring ai Lawt hpe gaw, shi mawoi la wu ai: 8 kaning rai nme law, dai dinghpring ai wa gaw, shanhte hte rau a nga ga ai shaloi e, shanhte a tara n lang ai amu hpe mu lu, na lu na majaw, shi a dinghpring ai myit masin gaw shani shagu yu nai mat nga lu ai. 9 Dai madu gaw, tara hkungga ai ni hpe agung alau kata na mawai la na hte, nding nhpring ai ni hpe ari jahkrum na matu, tara dara na nhtoi du hkra hkang tawn da na nga, chye nga ai: dai hkumshan a matsat shabat marin ai lam hta hkawm wa ma ai rai nna, ahkang aya lu ai ni hpe n gawn n sawn di mu ai ni nan, grau nna dai zawn di na, shi chye nga ai. 10 Dai ni gaw nden ja ai ni hte, tinang a myit hkan nna, hpung shingkang rawng ai ni hpe n hkrit kamyin ai sha, shatan nhkan nga ai ni rai nga ma ai; 11 lamu kasa ni mahtang gaw shanhte hta n-gun hte atsam grau rawng nga ma timung, dai ni gaw shanhte a lam shatan nhkan re ai dawdan ai ga, dai Madu a man e, n tsun yu ma ai. 12 Dai masha ni mahtang gyit hkang la nna, jahten shabya na matu mara myit n leng ai ashu ashan ni zawn pra wa ai ni nan, rai nga ma ai; n chye n chyang ai hpa lam hpe mung shanhte shatan nhkan mu ai rai nna, tinang ni e jahten shabya di ai lam hta jahten shabya ai hkrum na hte, n ding n man ai amu a matu mara n ding n man ai shabrai hkam la na maru ai. 13 Shanhte gaw shani gangwan e pyi, shut lai ai amu hpe, tangpyaw dum nga ma ai; nanhte hte rau poi galaw sha nga ma yang, tinang a hkalem ai hta e shanhte tawt lai nga ma ai rai nna, agang chyalang hte matsat shabat re ai ni rai nga ma ai. 14 Shanhte a myi gaw num shaw ai amu hte yubak baw sumhpa hte hpring chyat nga ma ai rai nna, shanhte gaw n ngang n hkang re ai ni hpe lau la mu ai: shanhte myit lawhpa ai hta maju jung nga malu ai; dagam dala hkrum ai kashu kasha ni mung, shanhte rai nga ma ai. 15 Dai malang ai lam hpe shanhte kau da manu ai rai nna, n ding n man ai shabrai hpe tsawra wu ai Beora a kasha Balam a lam hta, hkan nga ma ai: 16 raitimung, dai wa gaw tinang a tawt lai ai amu majaw, daru kau ai hkrum sha wu ai; ga n chye tsun ai lawze gaw, masha a nsen hte shaga wa ai rai nna, dai myihtoi a n gring ai amu hpe kajet kau nu ai. 17 Shanhte gaw, hka n rawng ai hka htung ni hte, nbung e shapoi ai sai wan rai nga ma ai rai nna, dai chyang htat nna mang nga ai nsin gaw, shanhte a matu mara mazing da nga ai. 18 Kaning rai nme law, hkumshan a myit marin nna, mak kayuk nga ai hku hkan yang, kaman lila grang ai ga kaba a tsun nga let, lam dam mat ai ni kaw na lawt lu magang wa ai ni hpe, shanhte lau la mu ai; 19 shanhte gaw dai ni hpe lawt lu na ahkang, ga ndat da ma ai raitimung, tinang pyi hten byak wa ai a mayam ni rai nga ma ai; kaning rai nme law, dang kau ai hkrum ai wa gaw, shi hpe dang lu ai wa a mayam rai nga ai. 20 Dai hta kaga, anhte a Madu hte Hkyehkrang la ai wa Yesu Hkristu hpe chye chyang lu ai a gawp e, shanhte gaw mungkan ga a matsat shabat lawt lu nhtawm e, dai hta e a gyit ahkang da nga ai hpe bai hkrum hkrup nna, dai gaw shanhte hpe bai dang kau mu yang gaw, dai ni a hpang na gaw shawng na hta grau nna yak wa nga ai. 21 Kaning rai nme law, dai dinghpring ai lam hpe chye chyang la nhtawm e, shanhte hpe ap da mu ai chyoi pra nga ai hkangda ai ga hpe tawt lai kau ai hta, dai lam hpe n chye nga yang mahtang gaw, shanhte a matu grau nna mai nga ai. 22 Gwi gaw tinang a nhpat hpe nhtang sha ai, wa hku mung kashin ai hpang hkumpup hta bai hkalawi nga ai, nga nna tengman ai ga shadawn gaw, shanhte hta dik wa sai.

2 Petru 3

3:1 Tsawra ai ni e, da ndai gaw ya nanhte hpe lahkawng lang na ka shagu dat ai laika rai nga ai; chyoi pra ai myihtoi ni moi shawng e tsun dan ai ga hte hpe mung, nanhte a kasa ni a lata hta ap da ai, 2 dai Madu hte Hkyehkrang la ai wa a htet da ai ga hpe mung, nanhte adum nga myit ga, ndai laika yan hta nanhte a sanseng ai myit hpe shadum shahprang let, ngai jasu da made ai. 3 Kaning rai nme law, hpang jahtum na nhtoi hte hta, tinang a myit kayut ai hku hkan nna, asawng asang rai let, Dai Madu bai du na ra ai, nga ai ga ndat gaw, kanang rai nga a ta? 4 Ji wa ni yup lai mat wa ai kaw nna, lamu ga nnan lat da ai aten hta na, nga yawng nga pra nga nga ai hte maren, ya e mung a rai nga ai, nga nna du na ra ai jahpoi ai ni tsun pru na mara ai hpe, shawng e chye nga mu. 5 Raitimung, sumsing lamu ni gaw, moi chyaloi nhkoi kaw nna nga nga ai hte, hka hta na dawng pru nna, hka e gaw da ai ginding aga hpe mung, Karai Kasang a mungga a majaw agrin nga ai hte, 6 dai hte mung dai aprat na mungkan ga hpe, hka lim kau hkrum ai hte hten mat nga ai hpe shanhte gaw dingsa malap kau mu ai. 7 Ya e nga ai sumsing lamu ni hte ginding aga hpe chyawm gaw, tara n lang ai ni a dawdan ai hte jahten shabya hkrum na nhtoi du hkra, wan jahkru na matu mara, moi na mungga hte nan a rem da nga nu ai. 8 Raitimung, tsawra ai ni e; dai Madu a man e nhtoi langai mi gaw shaning hkying mi hte, shaning hkying mi gaw nhtoi langai mi hte maren rai nga ai lam langai sha hpe, malap mali hkum rai nga myit. 9 Nkau mi gaw, Ala nga ai, nga nna myit ma ai hte maren, dai Madu gaw shi a ga ndat hpe shadik na ala nga ai n rai: raitimung, yawng mayawng myit kayin wa nna, kadai raitimung, hten bya ai n hkrum mu ga, shi ra nga ai majaw, shi nanhte hpe myit galu kaba madun nga ai. 10 Dai Madu a nhtoi chyawm gaw, lagu lagut zawn du na ra ai; dai nhtoi hta e sumsing lamu ni kadu ai nsen hte lai mat wa nna, arai guji guyang ni, kahtet lai ai hte krawp ayai mat wa nna, aga hte dai hta e nga ai yawng mayawng hte gaw, hkru hkat mat na ra ai. 11 Shingrai, arai yawng mayawng krawp ayai mat ai hkrum na teng nga ai majaw, sumsing lamu ni hpe wan hkru kau ai hta krawp ayai mat nna, arai guji guyang hpe kahtet lai ai hte shabyawng kau na Karai Kasang a nhtoi hpe, nanhte ala nga nna myit marit nga myit dai gaw, 12 chyoi pra ai arawn alai hte tara hkungga ai myit rawng let, nanhte kaning re ai masha mai tai na myit ta? 13 Shingrai byin wa timung, shi a ga ndat majaw, dinghpring rawng ai sumsing lamu nnan hte ginding aga nnan hpe, anhte myit mada nga ga ai. 14 Shingrai myit mada ai lam ni rai nga myit dai majaw, tsawra ai ni e, ngwi pyaw ai hku hkan let, shi a man e, matsat shabat hte agang chyalang n kap myit ga, shakut sharang nga mu. 15 Anhte a tsawra ai hpunau Pawlu mung, shi lu la ai nyan a hpaji majaw, nanhte hpe ka dat nna, shi a shagun dat ai laika ni yawng hte hta e ka dat nu ai hte maren, dai Madu a galu kaba ai chyeju myit gaw hkyehkrang la ai lam rai nga ai, ngu nna myit tau la nga mu. 16 Dai laika ni hta e chye yak ai lam langai ngai rawng nga ai rai nna, n sharin yu ai ni hte myit n gring ai ni gaw, dai Chyum laika ni kaga hpe zawn, tinang dai a jahten shabya na matu shanut kau mu ai. 17 Nanhte chyawm gaw, tsawra ai ni e, ndai hte hpe shawng e chye manit dai majaw, tara n lang ai ni a lam dam mat ai hta e nanhte mung n lawm ai hte, nanhte a ngang hkang ai myit, jahten shabya kau ai n hkrum myit ga, a maja nga mu: 18 Anhte a Madu hte Hkyehkrang la ai wa Yesu Hkristu a chyeju hte chye chyang ai lam hta e, nanhte kaba wa nga myit ga. Ya e mung, htani htana prat dingsa e mung, Yesu Hkristu kaw hpung shingkang anga nga u ga law.

1 Yawhan 1

1:1 Shawng npawt kaw nna nga ai rai nna, anhte na yu ai hte, anhte a myi hte mu yu ai hpe, anhte mada yu ai hte anhte a lata hte hkra ai, asak hkrung ai mungga a lam, anhte nanhte hpe gawn dan ga ai; 2 Dai asak gaw danpru wa ai rai nna, Kawa hte rau nga nga yu sai hte, nanhte kaw danpru wa sai, htani htana na asak hpe, anhte mu yu nna, de a lam nanhte hpe sakse hkam ya ai hte gawn dan ga ai; 3 Rai sa, nanhte mung anhte hte kanawn mazum lu myit ga, anhte mu yu ai hte na yu ai lam hpe, anhte nanhte hpe mung gawn dan ga ai; anhte chyawm gaw, dai Kawa hte shi a Kasha Yesu Hkristu hte kanawn mazum nga ga ai. 4 Anhte a kabu gara ai lam dik wa mali ga, ndai hte gaw anhte ka ya dat ga ai. 5 Karai Kaasang gaw nhtoi rai nga ai hte, shi hta nsin hpa mung nrawng nga ai, da ndai gaw, shi kaw na anhte na yu ai hte, nanhte hpe gawn dan ai shiga rai nga ai. 6 Anhte shi hte kanawn mazum ai ni rai nga ga ai, nga ninglen nsin hta hkawm nga yang gaw, anhte masu ga ai rai nna, tengman ai amu hpe n-galaw nga ga ai. 7 Shi gaw dai nhtoi hta rawng nga ai hte maren, anhte mung dai nhtoi hta hkawm nga yang gaw, anhte langai hte langai kanawn mazum ai ni rai nga ga ai hte, shi a Kasha Yesu a asai gaw, anhte hta na yubak nlang hte hpe jasan jaseng kau ya mi ai. 8 Anhte yubak n rawng ga ai, nga nna tsun ga yang gaw, anhte hkum hpe anhte hkalem kau ga ai rai nna, tengman ai myit anhte hta n rawng saga ai. 9 Anhte a yubak hpe anhte madun nem ga yang gaw, anhte a yubak hpe raw dat kau na hte n ding n man ai nlang hte hta na, anhte hpe jasan jaseng mi ga, shi kangka nga ai hte dinghpring ai wa rai nga ai. 10 Anhte yubak n-galaw saga ai, nga nna tsun ga yang gaw, anhte shi hpe masu ai wa shadu nna, shi a mungga anhte hta nrawng ga ai.

1 Yawhan 2

2:1 Ngai shu ngai sha ni e, nanhte yubak n-galaw myit ga, ndai hte gaw ngai nanhte hpe ka dat nngai. Raitimung, masha langai ngai yubak galaw hkrup a yang gaw, dai Kawa a man e, htinglu htinglai ya ai wa, Yesu Hkristu ngu ai dinghpring ai Madu gaw, anhte lu ga ai; 2 shi gaw, anhte a yubak a matu mara gawng malai hkungga rai nga ai; anhte a yubak a matu mara sha n rai, mungkan ting a matu mara mung rai nga ai. 3 Shi a hkangda ai ga hte hpe anhte hkan nang ga yang gaw, anhte shi hpe chye chyap nga ai hpe, anhte chye ga ai. 4 Ngai shi hpe chye chyap nngai, nga nna marai langai ngai tsun a timung, shi a hkangda ai ga hpe n hkan nang a yang gaw, dai wa gaw masu ai wa rai nga ai hte, dai tengman ai gaw shi hta n rawng nga ai. 5 Kadai raitimung shi a mungga hpe hkan nang a yang gaw, Karai Kasang a tsawra ai lam, dai wa hta e kaja wa teng teng dik wa salu ai: anhte shi hta rawng nga ga ai gaw, ndai lam majaw anhte chye lu ga ai. 6 Shi hta de nga nngai, nga nna tsun ai wa gaw, shi rai nga ai hte maren, dai wa mung rai nga u ga. 7 Tsawra ai ni e, ningnan hkangda ai ga nrai, shawng npawt kaw nna nanhte lang nga ai hkangda ai ga ningsa hpe, ngai nanhte hpe ka dat nngai: nanhte na yu manu ai mungga gaw, dai hkangda ai ga ningsa rai nga ai. 8 Bai maga mi de hkangda ai ga ningnan ngai nanhte hpe ka dat nngai: dai gaw shi hta e mung, nanhte hta e mung, teng nga ai: kaning rai nme law, dai nsin gaw hkoi mat wa nna, dai tengman ai nhtoi gaw, ya e pyi htoi tu nga ai. 9 Ngai dai nhtoi hta e de nga nngai, nga ninglen shi a kahpu kanau hpe ndawng n yawt ai wa kadai mung, dai nsin hta e ya du hkra naw alup nga ai. 10 Shi a kahpu kanau hpe tsawra ai wa gaw, dai nhtoi hta e de nga ai rai nna, shi hta e myit kataw shara n rawng nga ai. 11 Shi a kahpu kanau hpe ndawng n yawt ai wa chyawm gaw, dai nsin hta e de nga ai rai nna, dai nsin hta e hkawm sa nga ai: dai nsin gaw shi a myi hpe shakyaw kau ya wu ai majaw, tinang sa wa ai lam hpe shi nchye wu ai. 12 Shu sha ni e, shi a mying nsang a marang e nanhte yubak hpe raw dat kau ai hkrum myit dai majaw, ngai nanhte hpe ka dat nngai. 13 Ji Wa ni e, shawng npawt kaw nna nga nga ai wa hpe, nanhte chye nga myit dai majaw, ngai nanhte hpe ka dat nngai. Shabrang ni e, ndai nhkru ai wa hpe, nanhte dang kau myit dai majaw, ngai nanhte hpe ka dat nngai. 14 Ma kaji ni e, dai Kawa hpe nanhte chye nga myit dai majaw, ngai nanhte hpe ka dat masa de ai. Ji wa ni e, shawng npawt kaw nna nga nga ai wa hpe, nanhte chye nga myit dai majaw, ngai nanhte hpe ka dat masa de ai. Shabrang ni e, nanhte n-gun ja myit dai rai nna, karai Kasang a mungga gaw, nanhte hta rawng nga ai hte, ndai nhkru ai wa hpe dang kau myit dai majaw, ngai nanhte hpe ka dat masa de ai. 15 Dinghta ga hte dinghta ga e nga ai arai hpe, hkum tsaw ra myit. Marai langai ngai dinghta ga hpe tsawra a yang gaw, dai Kawa a tsawra ai myit gaw, shi hta e n rawng nga ai. 16 Kaning rai nme law, dinghta ga hta e nga ai, hkumshan kayut ai lam, myit marin ai lam hte ndai prat na grang ai lam nlang hte gaw, dai Kawa kaw nna pru ai nrai: dai gaw dinghta ga kaw nna pru ai rai nga ai. 17 Dai dinghta ga hte de a marin ai lam chyawm gaw, lai mat lu ai rai ti mug, Karai Kasang a myit ai hku hpe hkan galaw ai wa gaw, htani htana e anga nga ai. 18 Ma kaji ni e, hpang jahtum ai ahkying ya e rai nga ai rai nna, nanhte na yu mu ai hte maren, antihkristu ngu ai wa gaw du na ra ai; rai sa, ya e pyi, antihkristu law law wa paw pru masai: dai re ai majaw, hpang jahtum ai ahkying, ya e rai nga ai hpe anhte chye nga ga ai. 19 Anhte kaw na shanhte pru ma timung, anhte hte nseng ga ai. Kaning rai nme law, anhte hte seng taw gaw shanhte anhte hte anga nga na mara ai: raitimung, shanhte nlang anhte hte n seng ga ai gaw dan wa u ga, shanhte pru wa ma ai. 20 Nanhte mahtang gaw dai Chyoi Pra ai wa kaw na nam man chya ai chyeju hpe hkam la lu myit dai rai nna, yawng mayawng hte hpe chye lu myit dai. 21 Dai tengman ai ga hpe nanhte nchye myit dai majaw, ngai nanhte hpe ka dat made ai nrai; nanhte dai hpe chye nna, hpa masu ai ga mung, tengman ai ga hte n seng nga ai majaw, ngai nanhte hpe ka made ai. 22 Yesu gaw, Hkristu nrai nga ai, nga nna n dang kau ai wa sha nrai yang gaw, masu ai wa gaw kadai rai nga a ta? Dai Kawa hte dai Kasha hpe n dang kau ai wa nan, dai antihkristu ngu ai wa, rai nga ai. 23 Dai Kasha hpe n dang kau ai wa kadai raitimung, dai Kawa hte mung nseng lu ai. Dai Kasha hpe aw law ai wa chyawm gaw, dai Kawa hte mung seng nga ai. 24 Shawng npawt kaw nna nanhte na yu ai lam gaw, nanhte hta anga nga u ga. Shawng npawt kaw nna, nanhte na yu ai ga hte nanhte hta anga nga myit yang gaw, nanhte mung dai Kasha yan Kawa hta e anga nga na marin dai. 25 Anhte hpe jaw da ai ga n dat chyawm gaw, n htum n wai asak hkam la na ga n dat rai nga ai. 26 Nanhte hpe lam shadam ai ni a majaw, ndai hte gaw ngai nanhte hpe ka dat masade ai. 27 Nanhte hta chyawm gaw, shi kaw nna nanhte lu la ai nam man chya ai chyeju gaw, anga nga ai rai nna, kadai wa mi nanhte hpe sharin shaga lu na shara nnga ai. Raitimung, shi a namman chya ai chyeju gaw, lam shagu hta e nanhte hpe sharin shaga nga ai hte, dai gaw tengman nga ai rai nna, masu ai hpa n lawm ai sha, nanhte hpe sharin shaga nga ai hte maren, shi hta e nanhte anga nga myit dai. 28 Ya chyawm gaw, shu sha ni e, shi danpru a yang gaw, shi du ra ai nhtoi hta e, anhte nden ja ai myit rawng lu nna, shi a man e kaya kahpa n hkrum u ga, shi hta e anga nga mu. 29 Shi gaw dinghpring nga ai hpe nanhte dum nga myit yang gaw, dinghpring ai amu galaw ai wa kadai raitimung, shi e shangai dat ai wa rai nga ai, nanhte chye nga myit dai.

1 Yawhan 3

3:1 Yu mu, Karai Kasang a kashu kasha ni anhte hpe ngu shamying mi ai majaw, dai Kawa gaw anhte hpe kade wa tsawra da mi hka: shi a kashu kasha ni mung anhte rai nga ga ai. Dai rai nna, mungkan ga gaw shi hpe nchye wu ai majaw, anhte hpe mung nchye mi ai. 2 Tsawra ai ni e, Karai Kasang a kashu kasha ni, anhte ya e rai nga ga ai rai nna, anhte hpa mi tai na, garai n danpru nga ai: raitimung, shi danpru nga yang, anhte shi hte bung na ga ai, anhte chye ga ai: kaning rai nme law, shi hkum hpe nan anhte mu lu na gaw ai. 3 Shi hta e, dai zawn myit mada lu ai masha gaw, shi hkum nan chyoi pra nga ai hte maren, tinang hkum hpe mung shachyoi shapra nga ai. 4 Yubak galaw ai wa kadai raitimung, tara tawt lai ai amu mung galaw nga ai. Yubak gaw tara hpe tawt lai ai amu rai nga ai. 5 Shi gaw yubak hpe la kau na matu danpru nga ai hpe, nanhte chye myit dai: shi hta e mung yubak n rawng nga ai. 6 Shi hta e nga ai wa kadai raitimung, yubak n galaw nga ai: yubak galaw ai wa kadai raitimung, shi hpe nmu nchye wu ai. 7 Shu sha ni e, kadai mung nanhte hpe lam n shadam myit ga: shi gaw dinghpring nga ai hte maren, dinghpring ai amu galaw ai wa kadai mung, dinghpring nga ai. 8 Yubak galaw ai wa gaw, Nat kaw na rai nga ai; kaning rai nme law, Nat gaw shawng npawt kaw nna, yubak galaw nga ai. Dai rai nna, Nat a amu bungli hpe sharun jahten kau u ga, Karai Kasang a Kasha gaw paw pru wa sai. 9 Karai Kasang kaw nna shangai ai wa gaw, yubak n galaw ai: kaning rai nme law, shi a nli gaw shi hta rawng nga ai rai nna, Karai Kasang kaw nna shangai wa sai majaw, shi yubak galaw lu ai nrai. 10 Dai lam hte Karai Kasang a kashu kasha ni hte, Nat a kashu kasha ni gaw dan ginhka pru ai: kadai raitimung, dinghpring ai amu n galaw ai hte, shi a kahpu kanau hpe n tsaw n ra ai wa gaw, Karai Kasang kaw nna, rai nga ai n rai. 11 Anhte shada da tsawra nga u ga she, da ndai gaw shawng npawt kaw nna nanhte na yu ai ga matsun rai nga ai. 12 Dai n hkru ai wa hte seng ai Ka-in gaw, shi a kanau hpe sat kau wu ai zawn n rai. Shi hpe hpa re ai majaw, sat kau wu hka? Shi a amu bungli n kaja nga lu ai hte, shi kanau a amu bungli mahtang kaja nga ai majaw, shi hpe sat kau wu ai rai. 13 Hpunau ni e, mungkan ga gaw nanhte hpe ndawng n yawt nga ai hpe hkum mau nga myit. 14 Hpunau ni hpe tsawra nga ga ai majaw, anhte si ai kaw nna hkrung ai de kawt lu sagaw ai, anhte chye ga ai: tsawra ai myit n rawng ai wa gaw, si ai hta naw nga nga ai. 15 Shi a kahpu kanau wa hpe ndawng n yawt ai wa kadai raitimung, masha hpe sat kau ai wa rai nga ai: masha hpe sat kau ai wa kadai raitimung, n htum n wai asak shi hta n rawng nga ai, nanhte chye nga myit dai. 16 Shi gaw anhte a matu mara shi a asak kau da ai lam hpe yu yang, tsawra ngu ai lam hpe anhte chye nga ga ai: anhte mung, hpunau ni a matu mara, anhte a asak kau da na, sut nga ai. 17 Kadai raitimung, ga ntsa a sutgan lu nga ai hte, shi a kahpu kanau matsan mayan rai nga ai hpe, mu ninglen, shi a matsan dum ai myit hpe pat kau wu yang gaw, Karai Kasang a tsawra ai myit gaw, dai zawn re ai wa hte e kaning rai nga lu na rai ta? 18 Shu sha ni e, ga hte shinglet hte sha n rai, amu bungli hte, tengman ai ga hte, anhte tsawra nga ga. 19 Shingrai yang, anhte gaw tengman ai hta nga nga ai hpe, anhte chye lu ga ai rai nna, Karai Kasang a man e, anhte a myit hpe jahkam da lu ga ai: 20 kaning rai nme law, anhte a myit anhte hpe yubak shagun a yang gaw, Karai Kasang gaw anhte a myit hta grau kaba nga ai rai nna, yawng mayawng hte chye nga ai. 21 Tsawra ai ni e, anhte a myit anhte hpe yubak n shagun yang gaw, Karai Kasang a man e, anhte n den ja ai myit rawng nga ga ai rai nna, anhte a hpyi mahpyi shi kaw nna, anhte lu la na ga ai: 22 kaning rai nme law, shi a hkangda ai ga hpe anhte hkan shatup ga ai rai nna, shi a man e sharawng awng ai amu hpe galaw ga ai. 23 Shi a anhte hpe hkangda mi ai hte maren, shi a Kasha Yesu Hkristu a amying nsang hta kamsham nna, shada da tsawra myit ga, dai gaw shi a hkangda ai ga rai nga ai. 24 Shi a hkangda ai ga hpe hkan shatup ai wa gaw, shi hta e anga nga ai rai nna, shi mung dai wa hta e anga nga ai: shi anhte hpe jaw da ai Wenyi a majaw, anhte hta e shi anga nga ai gaw, anhte chye nga ga ai.

1 Yawhan 4

4:1 Tsawra ai ni e, wenyi shagu hpe hkum kam nga myit; dai wenyi ni Karai Kasang kaw na rai nga ma ai kun, chyam yu nga mu; kaning rai nme law, masu ai myihtoi law law wa, mungkan ga de sa wa masai. 2 Karai Kasang a Wenyi hpe chye matsing na lam da ndai rai nga ai: Yesu Hkristu gaw masha a hkumshan dagraw nna du sa ai, nga nna yin la nga ai wenyi shagu gaw, Karai Kasang kaw na rai nga ai: 3 Yesu hpe n yin la ai wenyi shagu chyawm gaw, Karai Kasang kaw na rai nga ai, n rai: dai wenyi gaw, nanhte na yu manit dai hte maren, du magang ra ai, rai sa, ya e pyi, mungkan ga de sa nga ai, antihkristu a wenyi rai nga ai. 4 Shu sha ni e, nanhte gaw Karai Kasang kaw na rai nga myit dai rai nna, shanhte hpe dang kau manu ai: kaning rai nme law, nanhte hta e rawng nga ai wa gaw, mungkan ga e nga nga ai wa hta grau nna kaba nga ai. 5 Shanhte mahtang dai mungkan ga kaw nna rai nga ma ai: dai re ai majaw, shanhte gaw mungkan ga a aga hpe ga ma ai rai nna, mungkan ga gaw shanhte hpe madat mara nga ai: 6 Anhte mahtang Karai Kasang kaw nna rai nga ga ai: Karai Kasang hpe chye chyang ai wa gaw, anhte a ga hpe madat mara nga ai; Karai Kasang kaw na n rai nga ai wa chyawm gaw, anhte a ga hpe madat mara nga ai n rai. Dai lam hpe yu yang, tengman ai lam a wenyi hte, lam shadam ai wenyi hpe, anhte chye ginhka lu ga ai. 7 Tsawra ai ni e, anhte shada da tsawra nga ga: tsawra ai myit gaw, Karai Kasang kaw na rai nga ai rai nna, tsawra ai myit rawng ai wa kadai raitimung, Karai Kasang kaw na shangai wa sai hte, Karai Kasang hpe chye chyang nga ai. 8 Tsawra ai myit n rawng ai wa gaw, Karai Kasang hpe chye chyang wu ai n rai: kaning rai nme law, Karai Kasang gaw tsawra ai myit rai nga ai. 9 Karai Kasang gaw shi a Kasha shingtai hpe mungkan ga de shangun dat wu ai rai nna, anhte gaw shi a marang e ahkrung nga ma li ga, nga ai rai nna, dai gaw anhte hta e, Karai Kasang a tsawra ai myit danpru ai lam rai nga ai. 10 Anhte gaw, Karai Kasang hpe tsawra nga ga ai n rai, shi hkum nan anhte hpe tsawra nga ai hte, anhte a yubak a matu mara gawng malai hkungga tai u ga, shi a Kasha hpe shangun dat ai lam gaw, tsawra ai lam madung rai nga ai. 11 Tsawra ai ni e, Karai Kasang gaw anhte hpe ndai hte wa tsawra mi ai teng yang gaw, anhte mung shada da mai tsawra nga ga ai. 12 Karai Kasang hpe gadai muk, galoi e mung, n mada mu lu ai: anhte shada da tsawra nga ga yang gaw, Karai Kasang gaw anhte hta e rawng nga ai rai nna, shi a tsawra ai myit gaw, anhte hta e dik wa lu ga ai. 13 Shi a Wenyi a chyeju shi anhte hpe jaw da mi ai majaw, shi hta e anhte anga nga ai hte shi mung anhte hta e anga nga ai hpe, anhte chye nga ga ai. 14 Mungkan ga a Hkyehkrang la ai madu tai u ga, Kawa gaw dai Kasha hpe shangun dat wu ai gaw, anhte mada mu ai hte sakse hkam ga ai. 15 Yesu Hkristu gaw Karai Kasang a Kasha rai nga ai, nga nna yin la ai wa kadai hta e raitimung, Karai Kasang anga nga ai rai nna, shi mung Karai Kasang hta e anga nga ai. 16 Karai Kasang gaw anhte e rawng da ai tsawra ai myit hpe, anhte chye nga ga ai hte kamsham nga ga ai. Karai Kasang gaw tsawra ai myit rai nga ai; tsawra ai lam hta e anga nga ai wa gaw, Karai Kasang hta e anga nga ai rai nna, Karai Kasang mung shi hta e anga nga ai. 17 Dai dawdan ai nhtoi hta e, anhte nden ja ai myit rawng lu hkra, dai tsawra ai lam gaw, anhte hta e dik wa sai: kaning rai nme law, shi rai nga ai hte maren, anhte mung ndai mungkan ga e a rai nga ga ai. 18 Tsawra ai myit hta e hkrit kang ai myit n rawng lu ai; hkrit kang ai myit ari hkrum nga ai majaw, hkum chyip re ai tsawra ai myit gaw, hkrit kang ai myit hpe shaden kau wu ai: hkrit kang nga ai wa chyawm gaw, tsawra ai myit garai n hkum lu ai. 19 Shi gaw shawng nnan e anhte hpe tsawra mi ai majaw, anhte mung, tsawra nga ga ai. 20 Marai langai ngai, Ngai gaw Karai Kasang hpe tsawra nga nngai, nga nhtawm me, shi a kahpu kanau wa hpe ndawng n yawt nga yang gaw, dai wa gaw masu ai wa rai nga ai. Kaning rai nme law, tinang mu lu ai kahpu kanau wa hpe n tsawra a yang gaw, tinang n mu lu ai Karai Kasang hpe tsawra lu na n rai. 21 Karai Kasang hpe tsawra nga ai wa gaw, shi a kahpu kanau wa hpe mung tsawra lu na, nga ai dai gaw shi kaw nna anhte lu la ai hkangda ai ga rai nga ai.

1 Yawhan 5

5:1 Yesu gaw Hkristu nan rai nga ai, nga nna kamsham ai wa kadai raitimung, Karai Kasang kaw na shaprat ai wa tai nga ai rai nna, dai shaprat ai wa hpe tsawra ai wa kadai raitimung, shi kaw na shaprat hkrum ai wa hpe mung tsawra wu ai. 2 Karai Kasang hpe tsawra nga ai hte, shi a hkangda ai ga hpe hkan galaw ga yang gaw, Karai Kasang a kashu kasha ni hpe mung anhte tsawra nga ga ai hpe, anhte chye nga ga ai. 3 Kaning rai nme law, Karai Kasang a hkangda ai ga hpe hkan galaw ai lam gaw, shi hpe tsawra ngu ai lam rai nga ai; shi a hkangda ai ga chyawm gaw, yak la nga ai n rai. 4 Karai kasang kaw nna shaprat ai wa kadai raitimung, dai mungkan ga hpe dang kau nu ai: padang lam chyawm gaw, anhte a makam masham rai nga mali ai. 5 Yesu gaw Karai Kasang a Kasha rai nga ai, nga nna kamsham ai wa sha n rai yang gaw, mungkan ga hpe dang kau ai wa, kadai rai nga a ta? 6 Dai wa gaw hka hte mung, asai hte mung sa du nna, Yesu Hkristu ngu ai nan rai nga ai: hka hta sha n rai, hka hta e raitimung, asai hta e raitimung, shi sa du nga ai. 7 Dai Wenyi gaw tengman ai npawt rai nga ai majaw, dai Wenyi nan sakse hkam nga ai. 8 Kaning rai nme law, masum hte ngu ai gaw, Wenyi mung, ahka mung, asai mung sakse hkam ya ma ai rai nna, dai masum hte gaw langai sha rai nga ma ai. 9 Masha a sakse anhte hkam ga yang gaw, Karai Kasang a sakse dai hta grau nna kaba nga ai: kaning rai nme law, Karai Kasang shi a Kasha hpe sakse hkam ya ai gaw, nga nna Karai Kasang a sakse lam rai nga ai. 10 Karai Kasang a Kasha hpe kamsham ai wa hta e, ndai sakse ga a rawng nga ai: Karai Kasang hpe n kam n sham ai wa chyawm gaw, shi hpe masu ai wa shadu wu ai; kaning rai nme law, Karai Kasang gaw shi a Kasha a lam sakse hkam ya ai sakse ga hpe, shi n kam wu ai. 11 Dai sakse ga chyawm gaw, Karai Kasang anhte hpe n htum n wai asak jaw mani ai hte, ndai asak mung shi a Kasha hta e rawng nga ai, rai nga ai. 12 Dai Kasha hpe lu ai wa gaw, asak hpe mung a lu nga ai: Karai Kasang a Kasha hpe n lu ai wa chyawm gaw, dai asak hpe mung n lu wu ai. 13 Karai Kasang a amying nsang hpe kamsham ai ni, nanhte gaw, n htum n wai asak lu la manit dai, nanhte chye lu myit ga, ndai lam hte ngai nanhte hpe ka dat masade ai. 14 Karai Kasang a myit ai hku hte maren, anhte lama ma hpyi ga yang gaw, shi anhte hpe madat mara na ra ai, nga nna, dai gaw shi a man e anhte a myit sharawng ai lam rai nga ai. 15 Anhte a hpyi mahpyi hpe shi madat mara nga ai, anhte chye ga yang gaw, shi kaw anhte hpyi nga ai lam hpe anhte lu la gaw ai, anhte chye nga ga ai. 16 Kahpu kanau langai ngai nsi ging ai yubak galaw nga ai hpe, marai langai ngai mu hkrup a yang gaw, shi akyu hpyi mai ai rai nna, n si ging ai yubak galaw ai ni hta lawm ai rai yang, Karai Kasang gaw dai wa hpe asak jaw na ra ai. Si ging ai yubak mung rai nga ai: de a matu mara hpyi nem na ngai n tsun nngai. 17 N ding n hpring ai amu nlang hte gaw, yubak rai nga ai: raitimung, n si ging ai yubak mung rai nga ai. 18 Karai Kasang kaw na shaprat ai wa kadai raitimung, yubak n galaw ga ai, anhte chye ga ai; Karai Kasang kaw na shaprat ai wa gaw, shi hkum hpe hkang lu ai hte, dai n hkru ai wa gaw, shi hpe n kahtep lu ai. 19 Anhte gaw Karai Kasang kaw na rai nga ga ai, rai nna, mungkan ting gaw dai n hkru ai wa hta e lup mat wa ai hpe, anhte chye nga ga ai. 20 Dai hta kaga, Karai Kasang a Kasha du wa sai rai nna, dai tengman ai wa hpe chye chyang lu na myit, shi anhte hpe jaw da mi ai gaw, anhte chye nga ga ai: dai tengman ai wa hta e, ngu ai, shi a Kasha Yesu Hkristu hta e, anhte anga nga ga ai. Dai wa gaw, tengman ai Karai Kasang hte, n htum n wai asak mung, rai nga ai. 21 Ngai shu ngai sha ni e, gawngngu sumla ni hpe koi gam nga mu law.

2 Yawhan 1

1:1 Ndai salang, ngai gaw, tengman ai lam hta e ngai tsawra nga ai, lata la ai majan hte shi a kashu kasha ni hpe, ga shana dat nngai; ngai chyu sha tsawra nga mawe ai n rai, anhte hta e anga nga ai rai nna, 2 prat dingsa e anhte hta e anga nga lu na tengman ai ga a majaw, dai tengman ai lam hpe chye chyang ai ni nlang hte mung, shanhte hpe tsawra mu ai. 3 Kawa Karai Kasang kaw nna mung, dai Kawa a Kasha Yesu Hkristu kaw nna mung, tengman ai hte tsawra ai lam hta e, chyeju matsan dum ai hte ngwi pyaw ai gaw, anhte hte rau anga nga na ra ai. 4 Dai Kawa kaw nna hkangda ai ga hpe anhte lu la sagaw ai hte maren, na a nshu nsha ni nkau mi, dai tengman ai lam hta e hkannang nga ma ai hpe, ngai mu hkrup nngai majaw, ngai ja ja kabu gara nga nngai. 5 Ya chyawm gaw, majan e, hkangda ai ga nnan hte n rai, shawng npawt kaw nna anhte lu la sagaw ai ga hte ngai nang hpe ka dat nna, anhte shada da tsawra nga u ga, nang hpe hpyi dat de ai. 6 Shi a hkangda ai ga hte maren, anhte hkan galaw ga yang gaw, dai gaw tsawra ai lam rai nga ai. Nanhte shawng npawt kaw nna na yu manit dai hte maren, nanhte mung hkan galaw mai ai hkangda ai ga gaw, ndai ga rai nga ai. 7 Kaning rai nme law, Yesu Hkristu gaw masha a hkumshan hpe dagraw nna du sa ai hpe, ndang kau ai hkalem ai masha law law wa mungkan ga de pru sa mara ai. Dai wa gaw, dai hkalem ai wa hte antihkristu mung rai nga ai. 8 Anhte galaw da ai amu hpe nanhte n shamat kau myit dai sha, nanhte hkum hkum re ai shabrai hpe hkamla lu myit ga, tinang dai sadi nga mu. 9 Hkristu a sharin shaga ai lam hpe tawt lai ai hte n hkannang ai wa kadai raitimung, Karai Kasang hte n seng nga ai; dai sharin shaga ai lam hta e a hkan nga ai wa chyawm gaw, Kawa yan Kasha hte seng nga ai. 10 Marai langai ngai nanhte kaw sa du nna, dai sharin shaga ai ga hpe n lang a yang gaw, dai wa hpe nta kata de hkum shashawn mu; shi hpe hkum hkap shachyen nga mu: 11 kaning rai nme law, dai wa hpe hkap shachyen ai masha gaw, shi a n kaja ai hpai lau hta e lawm mat wa ai. 12 Ngai nanhte hpe ka dat na lam law law nga raitimung, maisau hta laika tsi hte ka da mayu nngai n rai: nanhte a kabu gara ai lam dik wa lu myit ga nanhte hpang de sa du nhtawm, n-gup ga hte tsun chyai lu na, ngai myit mada nga nngai. 13 Na a lata la ai, ning na a kashu kasha ni gaw, nang hpe shakram dat ma ai law.

3 Yawhan 1

1:1 Ndai salang, ngai gaw, tengman ai lam hta e ngai tsawra nga ai, nja la ai Geu hpe, ga shana dat nngai. 2 Tsawra ai wa e, na a myit masin ngamu ngamai nga ai hte maren, lam shagu hta e nang ngamu ngamai rai nna hkam kaja nga lu n ga, ngai hpyinem nga nngai. 3 Kaning rai nme law, dai tengman ai lam hta nang hkannang nga ai hte maren, hpunau ni sa du nna, na a tengman ai lam sakse hkam ya ma ai shaloi, ngai ja ja kabu gara nga nngai. 4 Ngai shu ngai sha ni gaw, dai tengman ai lam hta hkan hkawm ma ai hpe, ngai na lu ai kabu gara ai shara hta, grau nna kabu gara ai shara ngai n lu nngai. 5 Tsawra ai wa e, hpunau sumtsan manam ni hpe, nang daw lu ai amu nlang hte gaw, myit kup kangka re ai amu rai nga ai: 6 shanhte mung, na a tsawra ai lam hpe Hpung ni a man e sakse hkam ma ai; Karai Kasang a man e ging dan ai hku hte maren, shanhte hpe naw sa dat mu yang gaw, nang kaja ai amu galaw na ndai: 7 kaning rai nme law, dai Mying nsang a majaw, shanhte pru sa wa nna, tara maigan ni hta na hpa mung n hkamla ma ai. 8 Dai re ai majaw, dai tengman ai lam hta e anhte mung shingdep shingtau tai lu na, dai zawn re ai masha hpe anhte hkap hkalum la na mai nga ga ai. 9 Dai Hpung de ngai lama ma ka dat se ai: raitimung, shanhte hta na grau tsaw mayu ai Diotrehpi gaw anhte hpe hkap hkalum la mi ai n rai. 10 Dai re ai majaw, ngai sa du yang gaw, shi galaw dan ai amu hpe, ngai shi hpe shadum shhprang na we ai; n shawp ai ga hte shi anhte hpe bawlaw da mi ai: dai hta n-ga shi hkum nan hpunau ni hpe n hkap hkalum la mu ai sha, hkap hkalum la mayu ai ni hpe mung, shi hkum kau mu ai rai nna, dai Hpung de na shaden kau mu ai. 11 Tsawra ai wa e, n kaja ai hku n rai, kaja reng ai hku hpe hkan sharau nga u; kaja ai amu galaw ai wa gaw, Karai Kasang hte seng nga ai: n kaja ai amu galaw ai wa chyawm gaw, Karai Kasang hpe n mu chye ai. 12 Masha mahkra raitimung, dai tengman ai ga nan raitimung, Demetri a lam sakse hkam ma ai. Anhte mung sakse hkam ga ai rai nna, anhte a sakse ga tengman nga ai, nang chye nga ndai. 13 Ngai nang hpe ka dat na lam law law nga raitimung, laika tsi hte kanyit hte nang hpe ka da mayu nngai n rai. 14 Dai hta kaga, gade n na yang, nang hpe hkrum lu na ngai myit mada nga nngai; shaloi jang, an lahkawng n-gup ga hte tsun chyai lu na ga ai. 15 Nang ngwi pyaw nga u ga. Jinghku jingyu ni gaw nang hpe shakram dat ma ai. Nang mung, jinghku jing-yu ni hpe, langai hte langai a amying hkan nna, htawt shakram u law.

3 Yawhan 1

Yuda 1

1:1 Yesu Hkristu a mayam hte, Yaku a kanau, ngai Yuda gaw, Kawa Karai Kasang hta tsawra nna Yesu Hkristu a matu bau sin hkrum ai, shaga da ai ni hpe, ga shana dat nngai: 2 matsan dum ai, ngwi pyaw ai hte tsawra ai gaw, nanhte kaw e law htam wa malit ga law. 3 Tsawra ai ni e, anhte guji gumyu a hkyehkrang la ai lam, nanhte hpe ka da na, ngai shaja nga nngai shaloi e, chyoi pra ai ni kaw lang lata sha ap ya da ai makam masham lam a matu mara gasat shakang na, nanhte hpang de ka dat nna shadum shahprang shara nga ai, ngai mu hkrup nga nngai. 4 Kaning rai nme law, tara n hkungga ai, anhte a Karai Kasang a chyeju hpe mak kayut ai amu hte galai kau ma ai rai nna, anhte a Hpareng wa hte Madu shingtai ngu ai Yesu Hkristu hpe nyet kau nhtawm, ndai dawdan ai hkrum na matu, moi chyaloi nhkoi kaw nna, ka matsing da ai masha nkau mi gaw, anhte kaw e mayun shang wa masai. 5 Nanhte chyawm gaw, nlang hte hpe lang lata sha, chye nga myit timung, ngai nanhte hpe shadum shahprang mayu ai lam da ndai rai nga ai: dai Madu gaw Egutu mung de nna amyu baw hpe shaw la ngut jang, hpang de e n kam n sham ai ni hpe jahten kau mu ai: 6 bai shi gaw tinang a aya hpe hprai kau nna, tinang nang a buga kau da ai lamu kasa ni hpe mung, dai dawdan ai nhtoi kaba du hkra, prat dingsa na hpri sumri hte, nsin kata de gyit hkangda mu ai. 7 Dai hte maren, Sodom yan Gomora hte, dai mare yan zawn, grupyin na mare ni mung, shut hpyit lai ai amu galaw nna, lasha shada da tam shut nga ai a jaw e, dai ni hpe ningli shatai na matu, prat dingsa na wan nhpra hta e ari hkrum sha mu ai. 8 Shanhte chyawm gaw dai hte maren tinang a yupmang hta, hkumshan hpe awu asin di kau mu ai, ahkang aya lu ai wa hpe ndang kau mu ai hte, hpung shingkang rawng ai ni hpe, shatan nhkan di kau mu ai. 9 Dai lamu kasa agyi Mihkaela chyawm gaw, dai Nat hte ga law ga la nga yang, Mawshe a moi mang a lam ndang kalang hkat nga ai rai nna, shatan nhkan re ai dawdan ai ga, shi hpe n tsun wam ai sha, Dai Madu nang hpe daru kau u ga, ngu wu ai. 10 Dai ni mahtang gaw, shanhte n chye n chyang ai hpa lam hpe mung, shatan nhkan nga ma ai; myit n leng ai ashu ashan ni zawn, tinang myit hte chye na lu ai lam hta pyi, tinang dai tinang hkum hpe jahten shabya kau mu ai. 11 Shanhte gaw dingnye lu mu ga! kaning rai nme law, Ka-in a lam hta e shanhte hkan hkawm ma ai rai nna, shabrai lu la na matu Balam a lam dam mat ai hta gumbawm ma ai hte, Kora a gumlau gumle ai amu hta e hten bya mat ma ai. 12 Shanhte gaw, nanhte hte rau poi galaw sha ai shaloi jang, nanhte a tsawra poi ni hta makoi nga ai lungbra ni, rai nga ma ai: hpa n hkrit kaya let, tinang hkum sha jau la ai sagu rem ai ni mung, rai nga ma ai: nbung e shapoi nna marang n rawng ai sumwi; lahkawng lang si mat nna, ri hte nawng baw kau ai, asi n si ai ginhtawng jaga na hpun; 13 tinang a kaya kahpa hpe hkumbawp zawn shabawp ma ai, nawng na hta wa ai hka leng ni hte, prat dingsa na chyang htat ai nsin hta e rim da hkrum ai, pran mat ai shagan ni zawn, shanhte rai nga ma ai. 14 Adam kaw na prat sanit hta du ai Enuk mung, shanhte hpe myihtoi ga tsun mu ai rai nna, Yu mu, yawng mayawng hte hpe tara dara na mara ai rai nna, 15 tara n hkungga ai ni nlang hte gaw, tara n hkungga ai myit hte galaw dan ai tara n hkungga ai amu mahkra a matu mara mung, tara n hkungga ai yubak galaw ai ni, shi a lam tsun dan mu ai n hkru ai ga mahkra a matu mara mung, shanhte hpe madun dawdan mu ga, dai Madu gaw shi a chyoi pra ai luksuk mun sen ni hte, du sa ra ai, nga ai. 16 Shanhte gaw, wu wu di di rai nna, put ngun nga ai ni, rai nga ma ai; tinang a myit marin ai hku hte maren shanhte hkan hkawm ma ai; shanhte a n-gup grang ai ga kaba tsun nga ai; sake manawn lusha hkra, masha a myiman hpe tau yu ai ni, shanhte rai nga ma ai. 17 Nanhte chyawm gaw, tsawra ai ni e, anhte a Madu Yesu Hkristu a kasa ni nanhte hpe shawng e tsun dan manit dai ga hpe, adum nga mu: 18 kaning rai nme law, shanhte gaw, Hpang jahtum ai aten e tinang a n se ai myit marin ai hku hte hkan hkawm ai asawng asang re ai ni, du na mara ai, ngu nna nanhte hpe tsun dan manit dai. 19 Dai masha ni gaw, hpawng shingra sharun ai ni, wenyi kata ai tuk shamak re ai ni, rai nga ma ai. 20 Nanhte chyawm gaw, tsawra ai ni e, dai Chyoi pra ai Wenyi hta akyu hpyi let, nanhte a chyoi pra ai makam masham lam hta, tinang dai shangang shakang nga mu: 21 n htum n wai asak lu la hkra, anhte a Madu Yesu Hkristu a matsan dum ai lam hpe a la nga let, tinang dai, Karai Kasang a n-gaw nwai ai myit hta anga nga mu. 22 Kam shut nga ai ni nkau mi hpe matsan dum nga mu; 23 kaga nkau mi hpe wan hta na kare la mu ai zawn, hkyehkrang la mu; bai kaga nkau mi hpe, hkrit kang ai hte matsan dum nga mu; raitimung dai hkumshan hta na matsat shabat kap ai palawng hpe pyi, ndawng n-yawt rai nga mu. 24 Ya chyawm gaw, kataw katan nrai hkra nanhte hpe bau sin lu ai rai nna, mara n rawng let, kabu gara la ai hte shi a hpung shingkang a man e nanhte hpe tawn da lu na, 25 anhte a Hkyehkrang la ai Madu, langai sha rai nga ai Karai Kasang kaw, anhte a Madu Yesu Hkristu a marang e, hpung shingkang, daru magam hpung dagu hte ahkang aya, chyi nma pri npra kaw nna, ya e raitimung, htani htana prat dingsa e raitimung, anga nga u ga law. Amen.

Shingran 1

1:1 Da ndai gaw, ahkying ladaw gade n na yang, byin wa na ra ai lam ni hpe, Hkristu a shangun ma ni e madun dan na matu, Karai Kasnag gaw dai Madu hpe jaw dat ai, Yesu Hkristu a shingran ga rai nga ai; dai Madu gaw shagun dat nna shi a lamu Kasa a lata hte shi a shangun ma Yawhan hpe dai shingran ga shadan dan wu ai: 2 Yawhan mung, Karai Kasang a mungga hte, Yesu Hkristu hte seng ai sakse a lam mu mamu hte hpe sakse hkam ya wu ai. 3 Ahkying ladaw ni wa magang ra ai majaw, ndai ga hpe hti dan ai wa hte, ndai myihtoi ga hte hpe madat mara nna dai hta ka da mada hpe hkan galaw ai ni gaw, a lu ma ai. 4 Ngai Yawhan gaw, Asia mung e nga ai Hpung sanit hte hpe, ga shana dat nngai; ndai aprat e, moi na aprat e anga nga nna, htawmhpang e du na ra ai wa kaw nna mung; shi a tingnyang man e nga ai wenyi sanit kaw nna mung; 5 kangka re ai sakse wa, si mat ai ni hta na kasha alat, dinghta ga na hkawhkam ni hpe up ai Madu Yesu Hkristu kaw nna mung, chyeju hte ngwi pyaw ai gaw nanhte hta anga nga malit ga. Anhte hpe tsawra nna, shi hkum nan a asai hte anhte a yubak kaw na anhte hpe raw dat mi ai hte, 6 shi a Kawa Karai Kasang a matu anhte hpe mungdan amyu hte hkinjawng amyu shatai ai wa kaw, hpung shingkang hte daru magam ahkang gaw, htani htana e anga nga u ga law. Amen. 7 Yu mu, shi gaw sumwi hte du sa wa nna, myi yawng mayawng mung, shi hpe galun baw ai ni mung, shi hpe hkap mu na mara ai rai nna, dinghta ga na amyu nlang hte gaw, shi a majaw sharung shayawt na mara ai. Rai sa, Amen. 8 Ngai gaw Alhpa mung rai nga nngai, Omega mung rai nga nngai, nga nna ndai aprat e, moi na aprat e anga nga ai hte, htawmhpang du na ra ai wa, Chyahtum chyalai n-gun rawng ai Madu Karai Kasang gaw tsun nga ai. 9 Yesu a nni nkri hta mung, mungdan hta mung, hkam sharang ai hta mung nanhte a kanawn manang rai nga ai, nanhte a hpunau wa, ngai Yawhan gaw, Karai Kasang a mungga hte Yesu a sakse majaw, Patmu ngu ai tsunlawng hta nga nga nngai. 10 Dai Madu a nhtoi hta e Wenyi hta ngai nawng mat wa ai rai nna, Nang mu ai hte maren laika hta ka la nhtawm, Ehpesu, Samurna, Pergamu, Htuatira, Sardi, Hpiladehpi hte Ladoki mare ni hta nga ai, 11 Hpung sanit hpang de shagun dat u, nga nna nye a shingdu de hpahtau zawn ngoi ai nsen kaba ngai na nngai. 12 Dai ngai hte shaga ai nsen hpe mu lu hkra ngai kayin yu nngai. 13 Shingrai kayin yu yang, ja pyengdin sanit hte dai pyengdin ni a ka-ang e masha Kasha zawn san ai wa langai mi ngai mu nngai: dai wa gaw lahkre du ai palawng galu bu hpun nna, sinda hta aja shingkyit kyit nga ai. 14 Shi a baw hte kara gaw, hpraw ai sagu mun hte hkyen zawn hpraw nga ai; shi a myi gaw wan shinglet zawn tu nga ai; 15 shi a lagaw yan gaw, wanhtung hta jen kau sai magri jet zawn san nga ai; shi a nsen gaw, hka law law kadu ai nsen zawn wu nga ai. 16 Shi a hkra lata hta shagan sanit lang da wu ai; shi a n-gup hta na nshan lahkawng dai ai ntawng nhtu pru nga ai; shi a myiman gaw htoi kang ai jan zawn tu ala nga ai. 17 Dai wa hpe mu jang, shi a lagaw nhpang e si ai wa zawn ngai kadawng taw mat nngai. Shi gaw shi a hkra lata nye a ntsa e mara ya nna, Hkum hkrit et, ngai gaw ningshawng wa mung, jahtum wa mung, rai nga ai hte, 18 ahkrung nga ai wa mung, ngai rai nga nngai; ngai si ni ai raitimung, yu u, htani htana prat dingsa e ngai ahkrung nga nngai: si hkrung si htan mungdan a sumsaw hte, katsan ga na sumsaw ngai lang nngai. 19 Dai re ai majaw, nang mu lu sai hpe mung, ya nga nga ai hpe mung, htawmhpang e du na ra ai lam hte hpe mung, ka da u: 20 nye a hkra lata hta nang mu lu ai shgan sanit hte, aja pyengdin sanit ni a mau htum ai lam, ka da u; dai shagan sanit gaw, Hpung sanit ni a kasa ni rai nga ma ai, dai pyengdin sanit mung, Hpung sanit rai nga ai.

Shingran 2

2:1 Ehpesu mare na Hpung a kasa hpe ning ngu ka dat u; Hkra lata hta dai shagan sanit lang da nna, aja pyendin sanit ni a ka-ang e hkawm sa ai wa ning nga nga ai: 2 Na a arawn alai, na a amu bungli hte na a hkam sharang ai hpe mung, n hkru n hkra re ai masha hpe nang n hkam lu ndai mung, kasa n re ai kasa hpyi hpun ai ni hpe nang san dinglik yu nna, shanhte a masu ai hpe shadan kau ya lu ndai mung, ngai chye nga nngai. 3 Nang shakut sharang nga nna, nye a amying nsang a matu mara tsin-yam tsindam hkam ai hte, nang n hki n ba nga ndai. 4 Raitimung, shawng na tsawra ai lam hpe nang kau da ndai majaw nang hta mara shagun shara ngai mu nngai. 5 Dai re ai majaw, nang garai n hkrat yang na shara hpe bai dum u; myit malai lu u, shawng na arawn alai bai hkan u: shing n rai yang, ngai nang kaw du nna, nang myit malai n lu yang gaw, na a pyengdin hpe de a shara na sit kau ya na de ai. 6 Raitimung, ngai ndawng n yawt ai Nikola a sape ni a arawn alai hpe, nang mung ndawng n yawt nga ndai majaw, akyu langai mi nang lu ndai. 7 Wenyi gaw Hpung ni hpe kaning nga tsun ai gaw, na tu ai wa gaw na la u ga. Dang lu ai wa hpe, Karai Kasang a Hparadisu e tu ai asak hkrung ai hpun a asi, sha lu na ahkang, ngai jaw na we ai. 8 Bai, Samurna mare na Hpung a kasa hpe ning ngu ka dat u: Si sai raitimung ahkrung nga ai ningshawng wa hte jahtum rai nga ai wa gaw, ning nga nga ai: 9 Nang hkrum ai zingri zingrat hte matsan mayan hpe ngai chye nga nngai; raitimung, nang sut su nga ndai: Yuda masha ngu ai, raitimung, Yuda masha n teng ai sha, Satan a nawku jawng ngu ai ni a shatan nhkan ai hpe, ngai chye nga nngai. 10 Nang hkrum magang ra ai nni nkri hpe hkum hkrit et; yu u, nanhte hpe chyam yu na, Nat gaw nanhte hta na nkau mi hpe htawng hta sharen da nna, nanhte n htoi shi ya tup zingri zingrat ai hkrum na marin dai. Si hkra maju jung nga u, shaloi ngai nang hpe asak janmau jaw na de ai. 11 Wenyi gaw Hpung ni hpe kaning nga tsun ai gaw, na tu ai wa gaw na la u ga. Lahkawng lang ngu na si ai lam gaw, dang lu ai wa hpe hkra lu na n rai. 12 Bai, Pergamu mare na Hpung a kasa hpe ning ngu ka dat u: Nshan lahkawng dai ai nhtawng nhtu lang ai wa gaw, ning nga nga ai: 13 Nang de nga ai shara ngai chye nga nngai; Satan a tingnyang dung nga ai shara e nang de nga ndai. Nye a mying nsang hpe nang manoi nga ndai rai nna, Satan de nga ai shara e ngu ai, nanhte a ka-ang e, nye a kangka re ai sakse wa Antipa sat kau hkrum ai nhtoi hte hta pyi, nye a makam masham lam hpe nang n nyet kau ndai. 14 Raitimung, sumla ni hpe nawng ya ai hkungga sha na hte hpye ai amu galaw na lam ngu ai myit kataw shara hpe, Israela kashu kasha ni a man e tawn da na, Balak hpe hpaji daw ya ai Balam a sharin shaga ai lam hta hkan nang ai ni nkau mi, na a hpung hta lawm nga ma ai majaw, nang hhpe mara shagun shara loi mi, ngai mu nngai. 15 Nikola a sape ni sharin shaga ai lam hta dai hte maren, hkan nang ai ni nkau mi mung, nang hta lawm nga ma ai. 16 Dai re ai majaw myit malai lu u; shing n rai yang, ngai nang kaw alawan du nna, nye a n-gup nna pru ai ntawng nhtu hte shan hte hpe gasat na we ai. 17 Wenyi gaw Hpung ni hpe kaning nga tsun ai gaw, na tu ai wa gaw na la u ga. Dang lu ai wa hpe, makoi da ai manna hpe mung, ahpraw nsan ai lung din hpe mung, ngai jaw na nngai: dai lung din hta amying ningnan ka da nga ai rai nna, dai hpe lu la ai wa hta kaga, kadai mung dai amying hpe n chye ya lu ai. 18 Bai, Htuatira mare na Hpung a kasa hpe ning ngu ka dat u: Wan shinglet zawn tu ala ai myi hte, magri jet zawn san ai lagaw tu ai Karai Kasang a Kasha gaw, ning nga nga ai: 19 Na a arawn alai, tsawra ai myit, makam masham, amu gunhpai ai hte shakut sharang ai hpe mung, na a hpang jahtum na amu bungli gaw shawng na hta grau law nga ai hpe mung, ngai chye nga nngai. 20 Raitimung, tinang dai myihtoi num nga ai, dai numsha Yezebela gaw, nang hta naw nga lu ai majaw, nang hpe mara shagun shara ngai mu nngai: shi gaw nye a shangun ma ni hpe, hpye ai amu galaw na hte sumla ni hpe nawng ya ai hkungga sha na lam sharin ya nna, shanhte hpe shut shangun mu ai. 21 Ngai shi hpe myit malai lu na aten jaw da raitimung, shi a hpye ai amu a lam hta na myit malai n lu hkraw nga ai. 22 Yu u, ngai shi hpe yupra hta kabai tawn na we ai; shi hte rau numshaw lashaw ai amu galaw ai ni hpe mung shi a arawn alai hta na myit n malai ma yang gaw, tsin-yam tsindam kaba hta, ngai kabai tawn na mawe ai. 23 Shi a kashu kasha ni hpe si lam hte ngai sat kau na we ai: shaloi, nhkyun hte kraw lawang hpe sawk yu ai wa ngai rai nga nngai gaw, Hpung ni yawng chye lu n mara ai: nanhte hta na langai hte langai hte hpe, tinang ni a amu hte maren ngai htang jaw na made ai. 24 Dai hta kaga, masha ni shamying dam ai, Satan a sung htum ai lam hpe n chye n chyap ma ai hte, dai sharin shaga ai lam hpe n hkan nang ai, Htuatira mare hta naw ngam nga ai ni nanhte hpe ngai tsun made ai gaw, Ngai nanhte hta lit kaga naw n shajat na ni ai: 25 raitimung, nanhte lu ai made gaw, ngai du ai du hkra a manat nga mu. 26 Dang lu ai wa hte, prat htum hkra nye a arawn alai hkan nang ai wa hpe, masha mungdan ni a ntsa e up ai ahkang ngai jaw na we ai: 27 shi gaw shanhte hpe hpri sumdoi hte up nna, di bu sama a di bu ni hpe zawn a grawp kau ai, shanhte hkrum na mara ai: ning re ai ahkang nye Wa kaw na ngai lu la ai rai nna, 28 dai nhtoi gintawng ngai shi hpe jaw na we ai. 29 Wenyi gaw Hpung ni hpe kaning nga tsun ai gaw, na tu ai wa gaw na lu u ga.

Shingran 3

3:1 Bai, Sardi mare na Hpung a kasa hpe ning nga ka dat u: Karai Kasang a wenyi sanit hte shagan sanit hpe lang ai wa gaw, ning nga nga ai: Na a arawn alai ngai chye nga nngai; nang gaw asak hkrung ai wa ngu timung, nang chyasi rai nga ndai. 2 A maja nga u, naw ngam nga ai si magang wa nga ai hte hpe shadaw shangang ya u: kaning rai nme law, nye a Karai Kasang a man e na a amu bungli hkum tsup nga ai hpe, ngai n mu ya de ai. 3 Dai re ai majaw, nang kaning rai hkam la lu ai hte, na la lu ai lam hpe bai dum u; dai hta hkan nang nga nna, myit malai lu u. Nang n maja nga taw gaw, lagu lagut zawn ngai du na ring ngai; gara aten e ngai nang kaw du sa na ring ngai mung, nang n chye na ndai. 4 Raitimung, tinang a hpun palawng hpe awu asin n shakap ai amying nkau mi, Sardi hpung hta lawm nga lit dai: shanhte gaw ging dan nga ma ai majaw, hpraw ai bu hpun let, ngai hte rau hkawm sa lu na mara ai. 5 Dang lu ai wa gaw, ning re ai hpun palawng ahpraw bu hpun lu na ra ai; shi a amying hpe dai asak laika hta na ngai gaja wa shaprai kau ya na n rai; dai wa a amying hpe nye Wa a man e mung, shi a lamu kasa ni a man e mung, ngai shadan ya na we ai. 6 Wenyi gaw Hpung ni hpe kaning nga tsun ai gaw, na tu ai wa gaw na la u ga. 7 Bai, Hpiladehpi mare na Hpung a kasa hpe ning ngu ka dat u: Chyoi pra ai wa, tengman ai wa, Dawi a sumsaw lang ai wa, kadai n la da lu hkra hpaw da nna, kadai n hpaw lu hkra la da ai wa, ning nga nga ai: 8 Na a arawn alai ngai chye nga nngai; yu u, kadai mung n la da lu ai chyinghka na a man e ngai hpaw malang da se ai; nang n-gun loi mi rawng n dai, nye a mungga hpe nang hkan nang nit dai, nye a amying nsang hpe mung nang n nyet kau nit dai, ngai chye nga nngai. 9 Yu u, Yuda masha ngu ai, raitimung n teng ai sha, masu nga ma ai, Satan a nawku jawng hta na nkau mi hpe ngai ap ya na de ai; yu u, na a lagaw nhpang e ngai shanhte hpe sa naw dingnyawm shangun na mawe ai rai nna, ngai nang hpe tsawra nga ai gaw, shanhte chye lu na mara ai. 10 Ngai hte seng ai shakut sharang ai lam a mungga hpe nang hkan nang ndai majaw, ga ntsa e nga ai ni hpe chyam dinglik yu na matu, dinghta ga hproi hkra du na ra ai chyam dinglik yu ai nhtoi hta na, ngai nang hpe makawp maga na de ai. 11 Ngai alawan du na ring ngai; na a janmau hpe kadai mung n la kau ya u ga, nang lu ai made hpe a sin nga u. 12 Dang lu ai wa hpe, nye a Karai Kasang a nawku Htingnu hta daw nu ngai shatai na we ai: shi galoi mung dai kaw na hpang de pru na n rai; nye a Karai Kasang a mying nsang hpe mung, nye a Karai Kasang Kaw na pru nna, sumsing lamu na yu hkrat wa ai Yerusalem mare ningnan ngu ai, nye a Karai Kasang a mare amying hpe mung, ngai hkum nan a amying hpe mung, dai wa a ntsa e ngai ka shakap ya na we ai. 13 Wenyi gaw Hpung ni hpe kaning nga tsun ai gaw, na tu ai wa gaw na la u ga. 14 Bai, Ladoki mare na Hpung a kasa hpe ning ngu ka dat u: Kangka re ai hte tengman ai sakse wa, Karai Kasang hpan tawn da ai a npawt nhpang, Amen ngu ai wa, ning nga nga ai: 15 Na a arawn alai ngai chye nga nngai; nang katsi ai mung n rai, kahtet ai mung n rai nga ndai Nang katsi ai, shing n rai kahtet ai, mai rai nga ndai. 16 Ya gaw, nang kahtet ai mung n rai, katsi ai mung n rai, lum nai rai nga ndai majaw, nye a n-gup hta na ngai nang hpe nhpat kau magang sade ai. 17 Kaning rai nme law, Ngai gaw sut su nga nngai, ngai hta sut ring gan chying sali ai, ngai hpa n ra ni ai, nga ninglen, tsin-yam tsindam hkrum ai wa, chyaren garen ai wa, matsan mayan, myi kyaw ai hte singgu krin re ai wa, nang rai nga ndai hpe, nang n chye n hka! 18 Dai re ai majaw, nang sut su u ga, wan mang hta jen kau sai ja jet hpe mung, na a singgu krin re ai kaya hpa masha man e ndawng lit ga, nang lawai na matu hpraw ai hpun palawng mung, na a myi mu lu lit ga, chya na matu myi tsi mung, ngai kaw na mari la lu na, ngai nang hpe hpaji daw ya de ai. 19 Ngai tsaw matsaw kadai hpe mung, ngai mara madun nna daru sharin ga nngai. Dai re ai majaw, dumhprang let nga u, myit malai lu u. 20 Yu u, ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai kaw raitimung, ngai shang nna shi hte rau lu rau sha na nngai, shi mung ngai hte rau lu rau sha lu na ra ai. 21 Ngai dang lu nna, nye Wa a tingnyang e shi hte rau dung nga lu ai zawn, dang lu ai wa gaw, nye a tingnyang e ngai hte rau dung nga lu na ahkang, ngai jaw na we ai. 22 Wenyi gaw Hpung ni hpe kaning nga tsun ai gaw, na tu ai wa gaw na la u ga, nga nna tsun nga ai.

Shingran 4

4:1 Dai hte byin ngut jang ngai mu nngai, gaw, yu u, sumsing lamu e chyinghka hpaw malang nga ai rai nna, ngai na hkrup ai shawng na nsen gaw, hpahtau zawn ngoi nga ai hte, Nang de lung rit, htawmhpang e byin na ra ai lam hte hpe ngai nang hpe madun dan de ga, nga nna ngai hte ga tsun nga ai. 2 Dai hte tsun ngut ai shaloi jang, wenyi hta ngai nawng mat wa nngai; shaloi, yu u, sumsing lamu hta e tingnyang dung nga ai rai nna, dai tingnyang hta marai langai mi dung nga ai. 3 Dung nga ai wa a ahpraw asam gaw, nagahtoi hte patemya lungseng zawn san nga ai rai nna, dai tingnyang grupyin e gaw, mya lungseng nsan ai n-goilatum jung nga ai. 4 Dai tingnyang grupyin e tingnyang hkun mali naw nga nga ai; dai tingnyang ni hta hpraw ai hpun palawng bu hpun nna, baw hta ja janmau gup ai salang hkun mali grup rai dung nga ma ai. 5 Dai tingnyang kaw na myi hprap gala ai, mahku ngoi ai nsen hte mu ngoi ai gaw, pru nga ai. Dai tingnyang a man e mung, Karai Kasang a wenyi sanit ngu ai, wan pyengdin sanit tu nga ai: 6 bai, dai tingnyang man e, pat seng nsan ai nawng ing nga ai; dai tingnyang a kata e mung, grupyin e mung, shingdu aman grup ting myi tu ai dusat amyu mali nga nga ma ai. 7 Langai ngu na dusat amyu gaw, hkanghkyi hte bung nga ai; lahkawng ngu na dusat amyu gaw, dumsu kasha hte bung nga ai; masum ngu na dusat amyu gaw, shinggyim masha a myiman man nga ai; mali ngu na dusat amyu gaw, pyen nga ai langda hte bung nga ai. 8 Dai dusat amyu mali gaw singkaw kru hpra hpra tu nna, hkum grup e mung, kata e mung, myi hkrai pri rai nga ai: shanhte gaw shani shana n sim n na, ning nga, Moi na aprat e, ya na aprat e, htawmhpang na aprat e dinggrin anga nga ai, Chyahtum chyalai n-gun rawng ai Madu Karai Kasang gaw, chyoi pra, chyoi pra, chyoi pra a rai nga ai law, nga nna tsun nga ma ai. 9 Dai dusat amyu mali gaw, tingnyang hta dung ai htani htana prat dingsa ahkrung nga ai wa kaw, hpung shingkang, arawng sadang hte chyeju jaw ma ai shaloi e, 10 dai salang hkun mali mung, tingnyang hta dung nga ai wa a man e dingnyawm nna, htani htana prat dingsa ahkrung nga ai wa hpe nawku let, dai tingnyang man e tinang ni a ja janmau ni hpe raw tawn da nna, 11 Anhte a Madu Karai Kasang e, nga yawng nga pra hte hpe nang hpan tawn da nna, dai hte gaw na a myit ra ai hku jaw e tai ma ai hte hpan tawn da hkrum ma ai majaw, nang gaw hpung shingkang, arawng sadang hte hpung dagu lu la na ging dan nga ndai law, nga nna shakawn na ma ai.

Shingran 5

5:1 Bai, tinguyang hta dung nga ai wa a hkra lata hta, kata e mung ntsa e mung ka da nna, dazik sanit hte shakap da sai laika shabawn hpe ngai mu nngai. 2 Shaloi n-gun ja ai lamu kasa gaw, Dai laika hpaw na hte de a dazik hpe gaw kau na, kadai ging dan nga a ta? nga nna nsen kaba hte jahtau tsun ai, ngai mu nngai. 3 Raitimung, sumsing lamu lahta tang, ginding aga ntsa, aga a lawu tsang hte hta, dai laika hpaw nna dai hpe yu lu na, kdai n dang di lu ma ai. 4 Dai laika hpaw nna dai hpe yu ging ai wa langai mi mung n mu tam ai majaw, ngai grai wa hkrap nngai. 5 Dai rai nna, salang ni hta na langai mi gaw, Hkum hkrap et; yu u, Yuda amyu hta na hkanghkyi ngu ai Dawi a aru madung gaw, dai laika hte de a dazik sanit hpe hpaw lu hkra dang kau nu ai, nga nna ngai hpe tsun dan nngai. 6 Shaloi, dai tingnyang hte dusat amyu mali a ka-ang e mung, dai salang ni a ka-ang e mung sat kau hkrum sai nsan ai Sagu Kasha langai mi tsap nga ai hpe, ngai mu nngai; dai Sagu Kasha gaw nrung sanit hte myi sanit tu nga ai; dai myi sanit gaw, dinghta ga ting hproi hkra shangun dat ai, Karai Kasang a wenyi sanit rai nga ai. 7 Shaloi dai Sagu Kasha sa nna tingnyang hta dung nga ai wa a hkra lata na dai laika hpe la wu ai. 8 Dai laika hpe lu la ai shaloi jang, dai dusat amyu mali hte salang hkun mali gaw, dai Sagu Kasha a man e dingnyawm ma ai; shanhte langai hte langai tingse hte chyoi pra ai ni a akyu hpyi ai ga ngu ai manam pyaw ai baw hte hpring chyat nga ai ja gawm lang nga ma ai: 9 shanhte gaw, Nang sat kau hkrum ndai hte, baw lakung shagu hta na mung, ga amyu shagu hta na mung, amyu baw shagu hta na mung, masha mungdan shagu hta na mung, Karai Kasang a matu na a asai hte masha hpe mari la nit dai rai nna, 10 anhte a Karai Kasang a matu mara shanhte hpe hkawhkam mungdan hte hkinjawng amyu shatai nu ai hte, shanhte gaw ga ntsa e up nga ma ai majaw, nang gaw dai laika hpe la nna, de a dazik ni hpe gaw kau na, ging dan nga ndai law, nga nna mahkawn mangoi ga ningnan hte mahkawn mangoi nga ma ai. 11 Dai shaloi ngai yu yang, tingnyang grupyin e, lamu kasa ga daga hte, dusat amyu mali hte salang ni a nsen hpe ngai na nngai; dai ni gaw mun mi lang mun mi, hkying mi lang hkying mi law nga ma ai rai nna, 12 shanhte gaw Sat kau hkrum ai Sagu Kasha gaw, hpung dagu, sutgan, hpaji byeng-ya, n-gun lagaw, arawng sadang, hpung shingkang hte shakawn kungdawn ai hpe hkam la na, ging dan nga ai law, nga nna nsen kaba hte tsun shakawn nga ma ai. 13 Dai hta n-ga, lamu lahta tang na mung, ginding aga ntsa na mung, aga lawu tsang na mung, nammukdara kata na mung, de a shara magup hkan e rawng nga ma ai hpan tawn da ai arai yawng mayawng hte gaw, Tingnyang hta dung nga ai wa hte, dai Sagu Kasha gaw, htani htana prat dingsa, shakawn kungdawn ai, arawng sadang, hpung shingkang hte daru magam, anga nga u ga law, nga nna shanhte tsun ma ai mung, ngai na nngai. 14 Shaloi dai dusat amyu mali gaw, Amen, nga ma ai; salang ni mung dingnyawm nna nawku ma ai.

Shingran 6

6:1 Dai Sagu Kasha gaw, dazik sanit hta na langai mi hpaw dai ai shaloi, ngai hkan yu yang, dusat amyu mali hta na langai mi, mu ngoi ai nsen zawn nga ai hte, Sa rit, nga nna tsun ai gaw, ngai na nngai. 2 Shaloi yu u, gumra ahpraw langai mi ngai mu nngai, dai hta jawn ai wa gaw ndan lang nga ai; ja janmau mung shi hpe shagup ya wu ai rai nna, dang kau let dang kau na matu nlaw pru sa wa ai. 3 Bai, lahkawng ngu na dazik hpe hpaw dat wu yang, lahkawng ngu na dusat amyu gaw, Sa rit, nga nna tsun ai, ngai na nngai. 4 Shaloi gumra kaga, ahkyeng nsan ai gumra, pru wa ai; dai hta jawn ai wa gaw, ga ntsa na angwi apyaw nga ai lam dawm kau na hte, masha shada da sat hkat shangun na, ahkang lu wu ai rai nna, nhtu kaba mung shi hpe jahpye ya wu ai. 5 Bai, masum ngu na dazik hpe hpaw dat wu yang, masum ngu na dusat amyu gaw, Sa rit, nga nna tsun ai, ngai na nngai. Shaloi ngai yu yang, yu u, gumra achyang nga nga ai; dai hta jawn ai wa gaw shi a lata hta joi lang nga ai rai nna, 6 dusat amyu mali a ka-ang nna, Hkaulan mam bye mi na gumhpraw lap mi, mukyaw mam bye masum na gumhpraw lap mi, ging nga ai; dai tsanlun sau hte tsabyi jahku hpe chyawm gaw, hkum jahten kau et, nga nna nsen tsun pru ai gaw, ngai na nngai. 7 Bai, mali ngu na dazik hpe hpaw dat wu yang, mali ngu na dusat amyu a nsen gaw, Sa rit, nga nna tsun ai, ngai na nngai. 8 Shaloi ngai yu yang, yu u, atsit nsan ai gumra nga nga ai rai nna, dai hta jawn ai wa a amying gaw, Si du rai nga ai; katsan ga mung dai wa kaw hkan nang nga ai. Ri nhtu hte, hku hku ai hte, ana ahkya hte ga ntsa na matse labye zingri ai hte sat kau na matu, lamu ga daw mali hta na daw mi a ntsa e up ai ahkang, shanhte lu la ma ai. 9 Bai, manga ngu na dazik hpe hpaw dat wu yang, Karai Kasang a mungga a majaw mung, tinang hkan nang ai sakse lam a majaw mung, sat kau hkrum ai ni a tsu ni hpe, dai tawn hkungri npu e, ngai mu nngai. 10 Shanhte gaw, Chyoi pra ai hte tengman ai Madu e, dinghta ga e nga ai ni a ntsa e anhte a asai matai htang na, nang gaten du hkra tara n dara ai nga nga na n ta? nga nna nsen kaba hte a jahtau nga ma ai. 11 Dai ni langai hte langai hpe hpraw ai hpun palawng galu jahpun nna, shanhte zawn sat kau hkrum na mara ai, tinang ni a kanawn manang ni hte kahpu kanau ni hkum tsup wa lu ai nhtoi du hkra, chyahkring mi naw sim sa nga lu na rai myit dai, nga nna shanhte hpe tsun dan mu ai. 12 Bai, kru ngu na dazik hpe hpaw dat wu yang, ngai mu nngai gaw, nnang nawn kaba a nawn wa ai; ajan gaw amun chyang hte da ai sumpan zawn asin amang nsan mat nna, shata hkum ting mung asai zawn san mat wa ai; 13 lakum hpun hpe nbung kaba e ahpawt yang, de a n myin ai asi hpe sharun kau ai zawn, sumsing lamu na shagan ni gaw, ga ntsa de run hkrat mat wa ma ai: 14 sumsing lamu gaw katsu kau ai laika zawn htawt kau ai hkrum nna, bum ni hte tsunlawng ni nlang hte mung, tinang a shara kaw nna sit kau ai hkrum ma ai. 15 Mungkan ga na hkawhkam hkawseng ni, daru magam rawng ai ni, hpyenbu hpyen gyi ni, sahti kunmi ni, n-gun lagaw ja ai ni mung, mayam ni hte shanglawt ni nlang hte mung, ga na ginlawng hku ni hte bum ga na lunghkrung ni hta tinang nang gawp makoi nga let, 16 bum ni hte lunghkrung ni hpe shaga nna, Anhte a ntsa e hkrat bun mi; tingyang hta dung ai wa a myit man hte, Sagu Kasha a pawt bu ai hta na anhte hpe magap maga la mi; 17 shan a pawt bu ai nhtoi kaba du wa ra hka; kadai wa mi tsap lu na a ta? nga mu ai.

Shingran 7

7:1 Dai hpang lamu kasa mali gaw, lamu ga a njut mali hta tsap nga nna, ga ntsa e mung, nammukdara ntsa e mung, hpun magup a ntsa e mung, nbung n bung lu u ga, ga man mali mga de na nbung ni hpe manat shadang da nga ma ai gaw, ngai mu nngai. 2 Bai, jan praw maga de na pru lung wa nna, ahkrung nga ai Karai Kasang a dazik lang ai lamu kasa kaga hpe, ngai mu nngai. Shi gaw, Anhte a Karai Kasang a shangun ma ni hpe lahtan e dazik garai n shakap kap gaw, aga hpe mung, nammukdara hpe mung, hpun ni hpe mung hkum zingri myit, 3 nga nna lamu ga hte nammukdara hpe zingri na ahkang lu ai lamu kasa mali hpe, nsen kaba hte jahtau wu ai. 4 Shaloi dazik shakap hkam la ai ni hpe hti ai nambat ngai na nngai; Israela kashu kasha amyu yawng hta na sen mi mun mali e hkying mali dazik shakap ai hkam la masai; 5 Yuda amyu hta na mun mi hkying lahkawng, Rubin amyu hta na mun mi hkying lahkawng, Gad amyu hta na mun mi hkying lahkawng; 6 Ashu amyu hta na mun mi hkying lahkawng, Naphtali amyu hta na mun mi hkying lahkawng, Manashe amyu hta na mun mi hkying lahkawng, 7 Simun amyu hta na mun mi hkying lahkawng, Lewi amyu hta na mun mi hkying lahkawng, Yishahka amyu hta na mun mi hkying lahkawng, 8 Zebulun amyu hta na mun mi hkying lahkawng, Yosep amyu hta na mun mi hkying lahkawng, Ben-yamin amyu hta na mun mi hkying lahkawng, dazik shakap ai hkam la masai. 9 Dai hpang, yu u, masha mungdan shagu hta na mung, baw lakung shagu hta na mung, amyu baw shagu hta na mung, kadai ndang hti lu ai wunawng wuwa kaba ngai mu nngai; dai ni gaw hpraw ai hpan palawng bu hpun nna, tinang a lata hta namhtan hpun lakung lang let, dai tingnyang a man e mung, Sagu Kasha a man e mung tsap nga nna, 10 Tingnyang hta dung nga ai anhte a Karai Kasang hte Sagu Kasha gaw, hkyehkrang la ai lam rai nga ai law, nga nna nsen kaba hte jahtau ma ai. 11 Bai, dai tingnyang hte salang ni hte dusat amyu mali a grupyin e, lamu kasa ni nlang hte gaw kawan tsap nga ma ai; shaloi shanhte dai tingnyang nhpang e myiman dagup nna, Karai Kasang hpe nawku let, 12 Amen: Shakawn kungdawn ai, hpung shingkang, hpaji byeng-ya, mahkawn shagrau ai, arawng sadang, hpung dagu hte n-gun lagaw gaw, htani htana prat dingsa e, anhte a Karai Kasang kaw anga nga u ga law, Amen, nga nna tsun ma ai. 13 Shaloi salang ni hta na langai mi, Hpun palawng ahpraw bu hpun ai, ndai ni gaw, kadai ni rai nga ma ta? kanang nna pru wa ma ta? nga nna ngai hpe hkap san nngai. 14 Ngai gaw, Nye a Madu e, nang chye nga ndai, ngu nna shi hpe htan we ai. Shaloi shi gaw, Dai ni gaw, dai ru tsang kaba kata na hkrang pru wa nna, tinang a hpun palawng hpe Sagu Kasha a asai hta hkrut jahpraw la ai ni rai nga ma ai. 15 Dai re ai majaw, shanhte gaw Karai Kasang a tingnyang man e ningngai nga lu ma ai hte, shi a nawku Htingnu hta shani shana shi hpe dawjau nga ma ai: tingnyang hta dung ai wa mung, shanhte a ntsa e shi a sum hpyan ka-up na ra ai. 16 Shanhte gaw hpang de galoi mung kawsi hpang kara n hkrum na masai; jan shingna mung, hpa kahtet ai mung, shanhte hpe hkra lu na n rai: 17 Kaning rai nme law, tingnyang ka-ang e nga ai Sagu Kasha gaw, shanhte a sagu rem ai wa tai na ra ai rai nna, asak hka hpawk du hkra shanhte hpe lam woi madun na ra ai: Karai Kasang mung, shanhte a myi hta na myi pruwi yawng tsai hkra katsut kau ya na ra ai.

Shingran 8

8:1 Bai, sanit ngu na dazik hpe hpaw dat wu yang, sumsing lamu e ahkying chyen mi daram, atsin sha rai nga ai. 2 Shaloi, Karai Kasang a man e a tsap nga ai lamu kasa sanit hpe ngai mu nngai; shanhte hpe pahtau sanit ya mu ai. 3 Bai, manam pyaw ai baw nat ai n-gawt lang ai lamu kasa kaga, dai tawn hkungri makau e sa tsap nga ai; dai tingnyang man e nga ai aja hkungri ntsa e, chyoi pra ai ni yawng hte a akyu hpyi ai ga hte rau nawng jau u ga nga, manam pyaw ai baw law law dai wa hpe ya wu ai. 4 Shaloi, dai lamu kasa a lata hta na, manam pyaw ai baw a wanhkut gaw, chyoi pra ai ni a akyu hpyi ai ga hte rau Karai Kasang a man de mawng lung wa ai. 5 Bai, dai lamu kasa gaw dai n-gawt hpe la nna, tawn hkungri na wan jahpring la ngut jang, mungkan ga ntsa de dai hpe jahkrat dat wu ai: shaloi mu ngoi ai, wu kadu ai nsen, myihprap kala ai hte nnang nawn byin pru wa ai. 6 Shaloi jang, pahtau sanit lang ai lamu kasa sanit gaw, pahtau dum na hkyen nga ma ai. 7 Ya, shawng na wa pahtau dum dat wu ai: shaloi asai kayau ai sin hte awan htu wa ai; dai hpe ga ntsa de jahkrat dat yang, dinghta ga daw masum hta na daw mi hkru mat wa ai; nam maling hpun ni mung htam masum hta na htammi hkru mat wa ai; tsit lali ai tsingdu yawng gaw hkru mat wa ai. 8 Bai, lahkawng ngu na lamu kasa pahtau dum dat wu ai: shaloi, wan hkru ai nsan ai bum kaba hpe nammukdara de jahkrat dat wu ai: dai rai nna nammukdara daw masum hta na daw mi, asai tai mat wa ai; 9 nammukdara na hkrung ai baw, htam masum hta na htammi mung si mat wa ai; shanghpaw li ni mung, htam masum hta na htammi grawp mat wa ai. 10 Bai, masum ngu na lamu kasa pahtau dum dat wu ai: shaloi shanan zawn htoi tu ai shagan kaba lamu de na di hkrat wa nna, hka nu ni htam masum hta na htammi hte hka npun ni a ntsa e hkrat taw nga ai: 11 dai shagan a amying gaw, lashi pila lap ngu ai rai nga ai; hka htam masum hta na htammi lashi pila lap tai mat wa ai; dai hka hpawng ni grai hka mat wa nna, dai hka lu ai a majaw masha law law wa si mat wa ai. 12 Bai, mali ngu na lamu kasa pahtau dum dat wu ai: shaloi lamu a nhtoi hkum ni hta na htam masum hta na htammi sin mak mat nna, shani daw masum hta na daw mi nhtoi n htoi lu na hte, shana mung dai hte maren rai mat wa na matu, ajan gaw daw masum hta na daw mi, shata gaw daw masum hta na daw mi, shagan ni mung htam masum hta na htammi grawp nip mat wa ai. 13 Bai, ngai yu nga yang, langda langai mi lamu a ka-ang hpatwat e pyen yawn nga nna, Naw dum na ra ai lamu kasa masum a pahtau nsen majaw, dinghta ga e nga nga ai ni a matu, dingnye, dingnye, dingnye hkrai rai nga ai, nga nna nsen kaba hte jahtau nga ai gaw, ngai na nngai.

Shingran 9

9:1 Bai, manga ngu na lamu kasa pahtau dum dat wu ai: shaloi, lamu de na ga ntsa de di hkrat mat sai shagan langai mi ngai mu nngai: shi hpe dai sung htum ai shara na nhkun a sumsaw ap ya wu ai. 2 Shaloi, dai sung htum ai shara na nhkun hpe shi hpaw dat wu ai rai nna, wanhtung kaba a wanhkut zawn, dai nhkun hta na wanhkut mawng lung wa ai hte, dai nhkun a wanhkut majaw, ajan hte lamu ganghkau lapran e nsin sin wa ai. 3 Dai wanhkut hta na mung, ga ntsa de dinggam-yaw pru wa nna, ga na n-gawgawk lu ai ahkang zawn, dai ni hpe mung ahkang jaw mu ai. 4 Dai ni gaw, ga ntsa na tsingdu hpe mung, tsit lali ai baw magup hpe mung, hpun magup hpe mung, naw madat da nna, tinang a lahtan hta Karai Kasang a dazik n kap ai masha ni hpe sha zingri mu ga, shanhte hpe jep dat wu ai: 5 raitimung, dazik n hkam la ai ni hpe si hkra di na ahkang gaw, shanhte n lu ma ai; shata manga tup zingri na ahkang sha lu ma ai: dai masha ni hkrum ai tsin-yam tsindam gaw, n-gaw gawk e na ai zawn machyi ai tsin-yam tsindam rai nga ai. 6 Dai nhtoi hte hta masha ni gaw si nhpang tam timung n mu na mu ai; nachying si mayu ma timung, si hkrung si htan gaw, shanhte kaw na hprawng mat na ra ai. 7 Dai dinggamyaw ni a hkum hkrang gaw, hpyen gasat na matu byau tawn ai gumra hte bung nga ai; shanhte a baw hta ja janmau nsan ai gup nga ai; dai ni a myiman gaw masha a myiman zawn san nga ai. 8 Dai ni a kara gaw, numsha ni a kara zawn san ai tu nga ai; dai ni a wa gaw, hkanghkyi wa zawn rai nga ai. 9 Dai ni a sinda magap gaw, hpri sinda magap zawn rai nga ai; dai ni a singkaw wu ngoi ai gaw, hpyen gasat htim ai gumra leng law law a wu ai nsen zawn, wu ngoi nga ai. 10 Dai ni a nmai gaw n-gawgawk a palen tu ai nmai hte bung nga ai; masha ni hpe shata manga tup zingri na ahkang tinang a nmai ni hta rawng nga malu ai. 11 Dai ni a hkawhkam gaw sung htum ai shara na ngarai a kasa rai nga ai; shi a amying gaw, Hebre ga hte Abadon; bai, Heleni ga hte shi a amying Apolion rai nga ai. 12 Shawng na dingnye gaw lai mat wa sai; yu u, ya hpang de dingnye amyu lahkawng naw du na ra ai. 13 Bai, kru ngu na lamu kasa pahtau dum dat wu ai; shaloi, Karai Kasang a man e nga ai aja hkungri a nrung ni hta na nsen langai mi pru nna. 14 Uhprat hka nu kaba makau e sharen da ai lamu kasa mali hpe raw dat u, nga nna pahau lang ai kru ngu na lamu kasa hpe tsun ai gaw, ngai na nngai. 15 Dai rai nna, shingyim masha ni hpe htam masum hta na htammi sat kau na nga, ahkying, nhtoi, shata, shaning a matu hkyen tawn da ai lamu kasa mali hpe, raw dat wu ai. 16 Gumra jawn ai luksuk ni gaw mun lahkawng lang mun mi, law nga ma ai: shanhte a nambat hpe ngai na nngai. 17 Bai, dai shingran hta ning re ai gumra ni hte, dai ni hta jawn ai ni hpe ngai mu nngai; shanhte gaw wan, wakintu hte kan nsan ai sinda magap dagap ma ai: gumra ni a baw gaw hkanghkyi baw zawn san nna, n-gup hta na wan numli, wanhkut hte kan pru nga ai. 18 Dai ni a n-gup hta na pru ai wan numli, wanhkut hte kan ngu ai tsin-yam masum a majaw, shinggyim masha htam masum hta na htammi si mat ai hkrum ma ai. 19 Kaning rai nme law, dai gumra ni a nmai gaw lapu zawn san ai hte, baw tu nna, dai hte achye chye lu ai majaw, dai ni a atsam gaw n-gup hte nmai hta rawng malu ai. 20 Raitimung, ndai tsin-yam tsindam hta na lawt lu nna, naw ngam nga ai shinggyim masha ni gaw, ji nat hpe mung, myi n mu, na n na lu ai hte n chye hkawm ai, aja, gumhpraw, magri, nlung hte hpun sumla ni hpe mung, n naw n ku ai nga na hpe, tinang lata a amu bungli hta na myit malai nlu ma ai: 21 masha sat ai amu hta na mung, mandan lakle amu hta na mung, num shut hpyit ai amu hta na mung, lagu lagut re ai amu hta na mung, shanhte myit malai n lu ma ai.

Shingran 10

10:1 Bai, sumwi lawai nna, sumsing lamu de na yu hkrat wa ai n-gun ja ai lamu kasa kaga hpe ngai mu nngai; shi a baw hta n-goilatum jung nga ai, shi a myiman gaw jan zawn htoi tu nga ai, shi a lagaw yan wan shadaw zawn rai nga ai: 2 shi a lata hta hpaw nga ai laika shabawn kaji lang da wu ai; shi a hkra lagaw hpe nammukdara ntsa e, pai lagaw hpe hkarang ntsa e kabye da nna, 3 hkanghkyi shabam ai zawn, nsen kaba hte jahtau dat wu ai; shi jahtau dat wu yang, dai mu ngoi ai mahku sanit tinang a nsen shapraw ma ai. 4 Dai mu ngoi ai mahku sanit tinang a nsen shapraw dat ma yang, ngai ka da na maw nga nngai; shaloi, Dai mu ngoi ai mahku sanit shapraw ai lam hpe dazik shakap u, dai hte hpe hkum ka da et, nga nna sumsing lamu de na tsun pru ai nsen ngai na nngai. 5 Dai shaloi, nammukdara ntsa hte hkarang ntsa e tsap nga ai, ngai mu ai lamu kasa gaw, shi a hkra lata lamu de ladawn nna, 6 sumsing lamu hte dai hta e nga ai, ginding aga hte dai hta e nga ai, nammukdara hte dai hta e rawng ai hte hpe hpan tawn da nna htani htana prat dingsa ahkrung nga ai wa hpe gang nna dagam wu ai gaw, Ahkying ladaw ngu ai n nga na sai; 7 sanit ngu na lamu kasa a pahtau dum shangoi ai nhtoi hte hta, Karai Kasang gaw shi a shangun ma ni ngu ai myihtoi ni hpe tsun da ai kabu gara shiga hte maren, shi a sung htum ai lam dik wa na sai, nga ai. 8 Dai hta n-ga, lamu de na ngai na yu ai nsen ngai hkarang ntsa e tsap nga ai lamu kasa a lata e hpaw nga ai laika hpe sa la su, nga ai. 9 Shaloi dai lamu kasa kaw ngai sa nna, Dai laika shabawn kaji ngai hpe jaw rit, ngu we ai. Shi gaw, La nna sha kau u; dai gaw na a kan hta hka na ra ai, raitimung, n-gup e gaw, lagat jahku zawn dwi na ra ai, nga nna ngai e tsun ai. 10 Shaloi dai laika shabawn kaji hpe lamu kasa a lata na ngai la nna sha dat we ai: dai gaw nye a n-gup hta lagat jahku zawn dwi li ai; raitimung, dai hpe sha ngut jang, nye a kan hka mat li ai. 11 Bai shanhte gaw, Amyu baw law law, masha mungdan law law, ga amyu law law hte hkawhkam law law a lam, myihtoi ga nang bai tsun lu na ndai, nga nna ngai hpe tsun mi ai.

Shingran 11

11:1 Bai, ri lan zawn re ai maiaw nren langai mi ngai hpe ya nna, marai langai mi, Rawt u, Karai Kasang a nawku Htingnu hpe mung, tawn hkungri hpe mung, dai yang e nawku ai ni hpe mung, shadawn yu u. 2 Dai Htingnu a shinggan wing hpe chyawm gaw, shinggan kau da u, dai hpe hkum shadawn et; dai gaw maigan amyu ni hpe ap ya kau ngut sai rai nna, shanhte gaw dai chyoi pra ai mare hpe shata mali shi lahkawng tup kabye dip na mara ai. 3 Bai, nye a sakse yan lahkawng hpe ngai ahkang jaw na mawe ai rai nna, shan gaw lachyit nba bu hpun let, nhtoi hkying mi ni tsa e kru shi ya tup, myihtoi htoi na mara ai. 4 Dai yan gaw, lamu ga Madu a man e jung tawn da nga ai tsanlun hpun lahkawng hte pyengdin shadun lahkawng rai nga ma ai. 5 Masha langai ngai shan hpe zingri mayu yang, shan a n-gup hta na wan pru nna, hpyen ni hpe hkru kau na mu ai; marai langai ngai mung shan hpe zingri mayu yang, shing re ai hte sat kau ai shi hkrum lu na ra ai. 6 Shan a myihtoi htoi ai nhtoi hte hta marang n htu lu u ga, lamu hpe pat kau na ahkang shan lu ma ai; hka nu ni hte hka htung ni hpe sai shatai na hte, galoi galaw mayu yang, shan gaw ga ntsa hpe ana ahkya amyu myu hte tsin-yam dat na ahkang mung, lu ma ai. 7 Shan lahkawng tinang a sakse ga hkam ngut jang, sung htum ai shara de na lung wa ai matse labye gaw, shan hpe gasat nna dang kau na hte, shan hpe sat kau na ra ai. 8 Ga malai hku Sodom hte Egutu ngu shamying ai, wudang hta shan a Madu jen da hkrum ai mare kaba a nmaw lam hta, shan a moi mang taw nga ai. 9 Shaloi masha amyu baw hta na ni mung, baw lakung hte hta na ni mung, ga amyu myu hta na ni mung, masha mungdan ni hta na ni mung, shan a moi mang hpe masum ya e chyingdaw mi tup sa hpu yu nna, dai yan a moi mang hpe lup makoi kau na n hkraw ma ai. 10 Ga ntsa e nga ai ni gaw shan a majaw kabu gara rai nna pyaw pyaw nga ma ai; shanhte shada da mung kumhpaw kumhpa galai jaw chyai na mara ai: kaning rai nme law, dai myihtoi yan gaw ga ntsa e nga ai ni hpe grai sharu shatsang masai, nga ai. 11 Ya dai nhtoi masum ya e chyingdaw mi lai jang, Karai Kasang kaw nna jahkrung ai nsoi nsa shan hta shang wa nna, shan gaw jan rai rawt tsap nga ma ai; shan hpe mu mada ai ni gaw, nachying hkrit gari nga ma ai. 12 Bai shan gaw, Nang de lung wa marit, nga nna lamu de na shan hpe shaga ai nsen kaba na mu ai; dai re ai majaw shan gaw sumsing lamu de sumwi hte lung wa ma ai rai nna, shan a hpyen ni shan hpe hkan mu dat ma ai. 13 Dai ahkying hta e nnang nawn kaba anawn wa nna, dai mare daw shi hta daw mi ru hkrat mat wa ai; dai nnang nawn hta si lawm mat ai masha ni a amying hkying sanit rai nga ai: naw ngam nga ai ni chyawm gaw hkrit kamyin nga ma ai rai nna, sumsing lamu a Karai Kasang hpe shagrau shakawn nga ma ai. 14 Lahkawng ngu na dingnye gaw lai mat wa sai; yu mu, masum ngu na dingnye gaw alawan du na ra ai. 15 Bai, sanit ngu na lamu kasa gaw pahtau dum dat wu ai: shaloi sumsing lamu hta e nsen kaba ni pru wa ai gaw, Mungkan ga na mungdan gaw, anhte a madu a mungdan hte shi a Hkristu a mungdan tai wa sai rai nna, shi gaw htani htana prat dingsa hkawhkam aya hta up nga na sai law, nga nna shakawn nga ma ai. 16 Shaloi, Karai Kasang a man e, tinang a tingnyang ni hta dung nga ma ai salang hkun mali gaw, shanhte a myiman dagup let Karai Kasang hpe nawku nna, 17 Ya aprat e, moi na aprat e dinggrin anga nga ai Chyahtum chyalai n-gun rawng ai Madu Karai Kasang e, nang gaw, na a daru magam ahkang dagraw nna a up nga ndai majaw, anhte nang hpe shakawn kungdawn ga ai: 18 masha amyu ni n-yun bu nna, na a sindawng pawt ai danpru ra ai; si ai ni hpe tara dara nna, na a shangun ma myihtoi ni hpe mung, na a chyoi pra ai ni hpe mung, na a mying nsang hpe hkrit hkungga ai kaji kaba ni hpe mung, shabrai htang jaw na hte, lamu ga jahten shabyak kau ai ni hpe bai jahten shabyak kau na nhtoi du ra ai law, nga nna shakawn nga ma ai. 19 Shaloi sumsing lamu hta e Karai Kasang a nawku Htingnu hpaw malang nna, shi a Htingnu kata e, shi a ga shaka hte seng ai sumpu danpru nga ai; shaloi jang, myi-hprap kala ai, nsen kadu ai, mu ngoi ai, nnang nawn hte sin marang kaba byin wa ai.

Shingran 12

12:1 Bai sumsing lamu kata e mauhpa amu kaba danpru ai gaw: ajan lawai nna, shata kabye ai hte, shagan shi lahkawng kap ai janmau gup re ai numsha langai mi danpru ai: 2 shi gaw na-um nasin rai nna, shangai na matu shinggyim machyi ai majaw, grai jahtau hkrap nga ai. 3 Bai, mauhpa amu kaga sumsing lamu kata e danpru ai gaw: yu u, hkyeng ai baren nemraw kaba danpru ai; shi gaw baw sanit hte nrung shi tu nna, shi a baw ni hta ja lagup sanit gup nga ai. 4 Shi a nmai gaw lamu shagan htam masum hta na htammi magawn la nna, ga de jahkrat dat wu ai: kasha shangai magang ai num shangai ngut jang, shi a kasha hpe sha kau na nga, baren numraw gaw dai num a man e la tsap nga ai. 5 Shaloi dai numsha gaw, amyu baw shagu hpe hpri sumdoi hte up na ra ai shadang lasha shangai wu ai: shi a kasha hpe Karai Kasang a man de mung, shi a tingnyang man de mung, gare shalun la wu ai. 6 Dai numsha gaw, nam mali de hprawng mat wa ai; dai yang e nhtoi hkying mi ni tsa e kru shi ya tup shi hpe bau mu ga, Karai Kasang gaw shi a matu nga shara lajang da ya wu ai. 7 Bai, sumsing lamu kata e majan gasat nga ai: Mihkaela hte shi a ali ama ni gaw dai baren numraw hte gasat nga ma ai; dai baren numraw hte shi a ali ama ni mung, gasat nga ma ai raitimung, 8 shanhte n dang lu ma ai rai nna, sumsing lamu kata e shanhte a matu nga shara naw n nga masalu ai. 9 Shaloi, mungkan ga ting hpe hkalem kau ai, Nat hte Satan ngu ai, moi na lapu rai nga ai baren numraw kaba gaw, jahkrat kau ai hkrum wu ai: shi gaw, le ga de jahkrat kau hkrum ai rai nna, shi a ali ama ni mung shi hte rau jahkrat kau ai hkrum ma ai. 10 Shaloi sumsing lamu kata na nsen kaba gaw, Ya gaw anhte a Karai Kasang a hkyehkrang la ai lam, hpung dagu hte mungdan mung, shi a Hkristu a ahkang aya mung, rai wa sai: kaning rai nme law, anhte a Karai Kasang a man e, anhte a hpunau ni hpe shani shana mara shagun ai, jahte tam wa gaw, jahkrat kau ai hkrum nu ai. 11 Shanhte gaw, Sagu Kasha a asai majaw mung, tinang sakse hkam ai mungga a majaw mung, shi hpe dang kau lu mu ai rai nna, si ai du hkra tinang a asak hpe n lahpawt ma ai. 12 Dai re ai majaw, sumsing lamu ni hte dai hte hta rawng nga ai ni e, kabu gara nga mu: ginding aga hte nammukdara chyawm gaw dingnye lu ma ai: kaning rai nme law, Nat gaw, shi a nhtoi loi mi sha ngam sai chye wu ai majaw, n-yun bu let nanhte hpang de yu wa sai, nga nna tsun ma ai hpe, ngai na nngai. 13 Dai baren numraw gaw ga de jahkrat kau hkrum ai chye wu jang, shadang lasha shangai ai num hpe zingri zingrat wu ai. 14 Dai num gaw lapu kaw na lawt lu nna, nam mali na shi a shara de pyen wa lu nhtawm, dai yang e prat mi, prat lahkawng hte prat ka-ang hkup bau lanu ai hkrum lu hkra, dai landa kaba a singkaw lahkawng maga, shi hpe jaw dat wu ai. 15 Dai num hpe hka hpungla hte shayawng kau na nga, lapu gaw shi a n-gup hta nna hka nu na hka zawn, dai numsha hpang de shalawi dat wu ai. 16 Lamu ga, chyawm gaw dai numsha hpe karum ya wu ai; aga gaw shi a n-gup mahka wa nna, dai baren numraw a n-gup hta na shalawi dat ai hka nu hpe mayu kau ya wu ai. 17 Dai baren numraw mung dai numsha a lam sindawng kahtet bu nna, Karai Kasang a hkangda ai ga hkan nang ai hte, Yesu a sakse ga lang ai ni ngu ai, shi a amyu matu gale ni hpe gasat kau na pru wa nna, 18 shi gaw nammukdara a zaibru jang e tsap nga ai.

Shingran 13

13:1 Shaloi nammukdara hta na dawng pru ai matse labye langai mi ngai mu nngai; dai gaw nrung shi hte baw sanit tu nga ai; de a nrung ni hta ja lagup shi gup nna, shi a baw ni hta arawng jahpoi ai amying kap nga ai. 2 Dai ngai mu ai matse labye gaw rawng gawk hte bung nna, shi a lagaw tsap lagaw zawn, shi a n-gup hkanghkyi n-gup zawn rai nga ai: baren numraw gaw, shi a hpung dagu hte shi a tingnyang mung, kaba la ai ahkang aya mung, dai matse labye hpe ap ya wu ai. 3 Shi a baw langai mi gaw, si hkra adup kau sai zawn rai nga ai, ngai mu nngai; raitimung, shi hpe jasi kau ai nma bai mai wa nna, mungkan ting dai matse labye a lam mau mahka nga ai hte, 4 dai matse labye hpe ahkang aya ap ya ai baren numraw hpe nawku ma ai; shanhte dai matse labye hpe mung nawku nna, Ndai matse labye hte kadai wa bung nga a ta? kadai wa shi hpe gasat lu na a ta? nga shajang ma ai. 5 Ga kaba hte shatan nhkan tsun chye ai n-gup shi hpe jaw da sai rai nna, shata mali shi lahkawng tup amu galaw na ahkang shi hpe ap ya nu ai. 6 Shaloi Karai Kasang hpe shatan nhkan ai ga tsun na shi a n-gup shi hpaw nna, Karai Kasang a mying nsang hpe mung, shi a nawku ai sum hpe mung, sumsing lamu kata e de nga ai ni hpe mung, shatan nhkan nga ai. 7 Chyoi pra ai ni hpe gasat dang kau na ahkang mung, shi hpe jaw wu ai; baw lakung shagu, amyu baw shabu, ga baw amyu shagu hte mungdan shagu a ntsa e up na ahkang mung shi hpe jaw wu ai. 8 Sat kau hkrum sai Sagu Kasha a asak laika hta, ginding aga garai n pra kaw nna amying n ka lawm ai mungkan masha nlang hte gaw, dai matse labye hpe nawku na mara ai. 9 Na tu ai wa gaw na lu u ga. 10 Masha wa hpe sharen ai wa gaw, sharen da ai hkrum na ra ai; nhtu hte sat ga ai wa mung, nhtu hte si na ra ai. Ndai lam hta chyoi pra ai ni a shakut sharang shara hte makam masham lam danpru nga ai. 11 Bai, aga kata de na pru lung wa ai matse labye kaga ngai mu nngai: shi gaw sagu kasha a nrung hte bung ai nrung lahkawng tu nna, baren numraw zawn ga tsun nga ai. 12 Shi gaw shawng na matse labye a ahkang aya nlang, de a man e dagraw lang nna, jasi ai nma mai ngut sai shawng na matse labye hpe, dinghta ga hte dai hta nga ai ni hpe, nawku shangun mu ai. 13 Dai hta kaga, shi gaw masha ni a man e lamu de nna ga ntsa de wan pyi jahkrat lu hkra, lamik kumla kaba galaw dan nga ai. 14 Shawng na matse labye a man e galaw lu ai lamik kumla ni hte ga ntsa de nga ai ni hpe shi hkalem kau wu ai rai nna, nhtu hkang nma hkrum timung, naw hkrung nga ai matse labye a hkrang sumla galaw na, ga ntsa nga ai ni hpe tsun dat wu ai. 15 Dai matse labye a hkrang sumla ga tsun lu na matu, dai matse labye a hkrang sumla hta nsoi nsa ban bang na ahkang hte, dai matse labye a hkrang sumla hpe n naw n ku ai nga manga hte hpe sat kau na ahkang mung, shi hpe jaw wu ai. 16 Dai hta kaga, kaji kaba, sahti kunmi, matsan mayan ni, shanglawt ni hte mayam ni nga manga hte gaw, tinang a hkra lata hta, shing n rai, tinang a lahtan hta, masat dingsat shakap shangun na hte, 17 dai matse labye a amying, shing n rai, de a amying a nambat ngu ai masat dingsat, n kap ai wa kadai mung, arai mari na hte dut na ahkang n lu na lam, shabyin dat wu ai. 18 Nang e hpaji byeng-ya rawng nga ai; zai byeng ya rawng ai wa gaw dai matse labye a nambat sawn chye u ga; dai nambat gaw masha langai mi a nambat rai nga ai; shi a nambat gaw kru tsa e kru shi kru rai nga ai.

Shingran 14

14:1 Bai, yu u, dai Sagu Kasha gaw Ziun bum ntsa e tsap nga ai hpe ngai mu nngai; shi a amying hte shi Kawa a amying tinang a lahtan hta ka kap ai masha sen mi mun mali e hkying mali mung, shi hte rau tsap nga ma ai. 2 Bai, sumsing lamu kata nna hka rum law law kadu ai nsen hte, mu ngoi kaba a nsen zawn wu ai nsen hpe, ngai na nngai; ngai na ai nsen gaw, tingse dum ai ni tinang a tingse ni hpe dum dat yang na nsen zawn rai nga ai. 3 Shanhte gaw, dai tingnyang man e mung, dusat amyu mali hte salang ni a man e mung, mahkawn ga ningnan zawn mahkawn mangoi nga ma ai: ga ntsa na mari la hkrum sai ni, ngu ai, masha sen mi mun mali e hkying mali hta kaga, dai mahkawn ga hpe kadai mung n sharin la lu ma ai. 4 Dai ni gaw numsha hte awu asin n rai yu ai ni rai nga ma ai; shanhte gaw hkawn jet zawn rai nga ma ai; shanhte gaw Sagu Kasha sa wa ai shara shagu de hkan nang ai ni rai nga ma ai; dai ni gaw, Karai Kasang a matu mung, Sagu Kasha a matu mung, shawng si ai asi tai mu ga nga, shinggyim masha ni hta na mari la ai ni rai nga ma ai: 5 shanhte a n-gup hta masu magaw n rawng malu ai; shanhte hta hpa mara mung n kap malu ai. 6 Bai, dinghta ga ntsa e nga ai ni hte, amyu baw shagu, baw lakung shagu, ga amyu shagu hte masha mungdan shagu hpe, htani htana a kabu gara shiga hkaw dan lu ai lamu kasa kaga gaw, sumsing lamu hpatwat e pyen nga ai hpe, ngai mu nngai: 7 shi gaw, Karai Kasang hpe hkrit hkungga mu, shi a hpung shingkang shagrau mu; shi a tara dara ai ahkying du ra ai: sumsing lamu hte ginding aga, nammukdara hte hka hpawk ni hpe hpan tawn da ai wa hpe nawku nga mu, nga nna nsen kaba hte hkaw tsun nga ai. 8 Bai, lahkawng ngu na lamu kasa kaga gaw hkan sa nna, Masha amyu shagu hpe hpye ai amu ngu ai pawt shabu ai tsabyi jahku lu shangun ai, galu kaba ai Babelon mare gaw, kadawng daw mat sai, kadawng daw mat sai, nga nna tsun ai. 9 Bai, masum ngu na lamu kasa kaga gaw, shan kaw hkan nang nna, Dai matse labye hte shi a hkrang sumla hpe nawku nna tinang a lahtan hta, shing n rai, tinang a lata hta, masat dingsat hkam la ai wa kadai raitimung, 10 Karai Kasang a sindawng kahtet ngu ai gawm hta hpaw bang tawn ai pawt bu ai tsabyi jahku jet lu lu na ra ai; dai hta n-ga shi gaw chyoi pra ai lamu kasa ni a man e mung, dai Sagu Kasha a man e mung, wan hte kan kayau ai hta nni nkri zingri ai hkrum na ra ai: 11 shanhte hpe nni nkri zingri ai hta na wanhkut gaw, htani htana prat dingsa a mawng lung nga ai; dai matse labye hte shi a hkrang sumla hpe nawku ai ni hte, shi a amying a masat dingsat hkam la ai wa gaw, shani shana n ban n sa lu ma ai, nga nna nsen kaba hte tsun nga ai. 12 Karai Kasang a hkangda ai ga hte Yesu a makam masham lam hkan nang ai ni ngu ai, chyoi pra ai ni a shakut sharang shara gaw, ndai lam hta danpru nga ai. 13 shaloi, Ya kaw nna dai Madu hta si wa ai ni gaw, a lu ma ai, ngu nna ka da u, nga ai nsen gaw sumsing lamu de na, ngai na nngai: dai Wenyi mung, Rai sa, shanhte a amu bungli a akyu gaw, shanhte kaw hkan nang nga ai majaw, tinang a magam bungli hta na, shanhte ban sa ai hkrum mu ga, nga ai. 14 yu mu, sumwi ahpraw ngai mu nngai; dai sumwi ntsa e masha kasha hte bung ai wa dung nga ai; shi a baw hta aja janmau gup nna, shi a lata hta dai ai nhkyau lang da wu ai. 15 Bai, lamu kasa kaga gaw dai nawku Htingnu kaw na pru nna, Ga ntsa e mam myin krawp wa sai; mam dan na aten du ra ai majaw mam dan na matu na a nhkyau hpe dan shangun dat u, nga nna sumwi ntsa e dung ai wa hpe nsen kaba hte jahtau wu ai; 16 shaloi sumwi ntsa e dung nga ai wa gaw, ga ntsa de shi a nhkyau kabai dat wu ai rai nna, aga gaw dan ngut mat nga ai. 17 Bai, sumsing lamu na nawku Htingnu kaw nna lamu kasa kaga pru wa ai; shi mung dai ai nhkyau lang da wu ai. 18 Bai, wan hpe up ai ahkang lu ai lamu kasa kaga gaw, tawn hkungri de na pru nna, dai ai nhkyau lang ai wa hpe nsen kaba hte jahtau let, Na a dai ai nhkyau dat dat nna, aga na tsabyi ru a asi sumbaw hpe gadoi shingkyin la u; de a tsabyi si myin sai, ngu wu ai. 19 Shaloi dai lamu kasa gaw ga ntsa de shi a nhkyau kabai dat nna, aga na tsabyi ru a asi hpe shingkyin la nhtawm, Karai Kasang a pawt bu ngu ai tsabyi htumbyen kaba hta, ru bang da wu ai. 20 Dai tsabyi htumbyen hpe mare shinggan e kabye shup nna, dai hta na pru ai asai gaw, gumra runghtung dep hkra tung nna, stadia hkying mi kru tsa du hkra lwi wa ai.

Shingran 15

15:1 Bai, sumsing lamu hta e galu kaba nna mau ging ai mauhpa amu kaga hpe ngai mu nngai; ari zinli sanit lang ai lamu kasa sanit rai nga ma ai: dai ari zinli ni gaw jahtum na ari rai nga ai; kaning rai nme law, Karai Kasang a pawt bu ai gaw dai hte hte ngut wa na ra ai. 2 Bai, wan hte kayau ai pat nawng zawn re ai, ngai mu nngai: dai matse labye hte shi a hkrang sumla kaw na mung, shi amying a nambat kaw na mung, dang pru wa ai ni gaw, Karai Kasang a tingse lang let, dai pat nawng makau e tsap nga ma ai. 3 Shanhte gaw Karai Kasang a shangun ma Mawshe a mahkawn ga hte, Sagu Kasha a mahkawn ga hpe mahkawn mangoi let, Chahtum chyalai n-gun rawng ai Madu Karai Kasang e, na a magam bungli gaw kaba htum ai hte mauhpa rai nga ai: Ju majat prat janat na Hkawhkam wa e, na a magam lam ni gaw dinghpring ai hte tengman ai hkrai rai nga ai; 4 Madu e, nang hpe n shagrau ai gaw kadai wa rai na a ta? Nang chyu sha chyoi pra nga ndai; na a dinghpring ai lam ni danhkung nga ai majaw, masha amyu baw shagu na a man e sa nawku na mara ai law, nga nna tsun ma ai. 5 Dai hte a hpang e, sumsing lamu na sakse sum a nawku Htingnu hpaw nga ai hpe ngai mu nngai: 6 dai Htingnu kaw na ari zinli sanit lang ai lamu kasa sanit pru sa ma ai; shanhte gaw htoi tu san pra ai lungseng mawn sumli nna, tinang a sinda e aja shingkyit kyit nga ma ai. 7 Bai, dai dusat amyu mali hta na langai mi gaw, htani htana prat dingsa ahkrung nga ai Karai Kasang a sindawng kahtet ai hte hpring chyat re ai gawm sanit, dai lamu kasa sanit hte hpe ya mu ai. 8 Shaloi dai nawku Htingnu gaw Karai Kasang a hpung shingkang hte shi a atsam majaw wanhkut hpring ing nna, dai lamu kasa sanit a ari zinli garai n htum htum gaw, dai nawku Htingnu kata de kadai mung n shang lu ai.

Shingran 16

16:1 Bai, dai lamu kasa sanit hte hpe, Pru sa wa mu, Karai Kasang a sindawng kahtet rawng ai gawm sanit hpe ga ntsa de ru bun dat mu, nga nna dai nawku Htingnu kaw na pru ai nsen kaba, ngai na nngai. 2 Shaloi shawng na wa pru sa nna, shi a gawm ga ntsa de ru bun dat wu ai: dai gaw, matse labye a masat dingsat kap ai hte shi a hkrang sumla nawku ai masha ni hta, matsat shabat re ai aju machyi ai hpye shanam ai ana byin wa ai. 3 Bai, hpang na wa shi a gawm nammukdara hta ru bun dat wu ai: dai gaw masha chyasi a asai zawn tai wa nna, nammukdara kata e rawng ai nsoi nsa hkrung mahkrung hte gaw si mat ma ai. 4 Bai, masum ngu na wa shi a gawm hka nu ni hte hka hpawk ni hta ru bun dat wu ai: dai gaw asai tai mat ai. 5 Shaloi hka sin ai lamu kasa gaw, Ya aprat e, moi na aprat e, dinggrin anga nga ai Chyoi pra ai wa e, ning rai jeyang nga ndai majaw, nang gaw dinghpring nga ndai law; 6 kaning rai nme law, chyoi pra ai ni a asai hte myihtoi ni a asai shanhte ru kau ma ai rai nna, nang shanhte hpe asai bai lu shangun mu ai; dai gaw shanhte hkrum ging ai hku rai nga ai, nga nna tsun ai, ngai na nngai. 7 Bai, dai tawn hkungri na mung, Rai sa, Chyahtum chyalai n-gum rawng ai Madu Karai Kasang e, na a je yang ai lam ni gaw tengman ai hte dinghpring nga lit dai law, nga nna tsun ai, ngai na nngai. 8 Bai, mali ngu na wa shi a gawm ajan hta ru bun dat wu ai: shaloi jan gaw masha ni hpe wan hte jahkat na ahkang lu la wu ai. 9 Dai rai nna masha ni gaw kahtet kang la ai hte jahkat kau ai hkrum nna, ndai ari zinli ni hpe up byeng ai Karai Kasang a amying nsang hpe matsa shatan ma ai; dai hte wa hkrum ma timung, shi a hpung shingkang shagrau na gaw, shanhte myit malai n lu ma ai. 10 Bai, manga ngu na wa shi a gawm dai matse labye a tingnyang ntsa de ru bun dat wu ai: shaloi shi a mungdan nsin chyip rai mat wa nna, mung masha ni gaw aju machyi la ai majaw, tinang a shinglet kawa udik nga ma ai: 11 Shingrai aju machyi la ai majaw, shanhte gaw, sumsing lamu na Karai Kasang hpe matsa shatan ma ai; dai hte wa hkrum ma timung, tinang a arawn alai hta na myit malai n lu ma ai. 12 Bai kru ngu na wa, shi a gawm Uhprat hka nu kaba hta ru bun dat wu ai: dai rai nna, jan praw mung na hkawhkam ni sa wa na lam hku na matu, dai hka nu gaw hkyet mat wa ai. 13 Shaloi, baren numraw a n-gup hta na mung, matse labye a n-gup hta na mung, masu ai myihtoi a n-gup hta na mung, shu zawn n san n seng ai wenyi masum pru wa ai hpe, ngai mu nngai: 14 dai ni gaw lamik kumla galaw dan nna, Chyahtum chyalai n-gun rawng ai Karai Kasang a nhtoi kaba shani na majan gasat na matu, mungkan ting na hkawhkam ni hpe jahpawng la na pru sa wa ai nat a wenyi ni rai nga ma ai. 15 Yu mu, lagu lagut zawn ngai du ring ngai. Masha a man e singgu krin n hkawm na hte, tinang a kaya hpa ndawng lu ga, a maja nga let tinang a labu palawng sin nga ai wa gaw, a lu ai. 16 Dai nat wenyi ni gaw hkawhkam ni hpe, Hebre ga hte Hara Magedon ngu ai shara de jahpawng da mu ai. 17 Bai, sanit ngu na wa shi a gawm nbung hta ru gat dat wu ai: shaloi, Ngut mat sai, nga nna nawku Htingnu kata tingnyang kaw na nsen kaba pru wa ai: 18 dai hta kaga, myihprap kala ai, nsen kadu ai hte mu ngoi ai byin wa ai; nnang nawn kaba mung byin wa ai; ga ntsa e masha nnan lat kaw nna dai zawn kaba ai hte ja la ai nnang nawn gaw, galoi mung n byin yu ai. 19 Dai rai nna, dai galu kaba ai mare gaw masum brang ga mat wa ai; masha amyu ni a mare ni mung kadawng daw mat shajang ma ai; Babelon mare kaba hpe mung Karai Kasang a sindawng kahtet ai pawt bu ngu ai tsabyi jahku a gawm lu shangun na, shi a man e dai mare hpe matsing da nga ai. 20 Tsunlawng ni yawng hprawng mat nna, bum ni mung n nga mat ma ai. 21 Shaloi lamu de na joi mali tsa daram li ai sin kaba gaw masha ni a ntsa e htu bun nna, dai sin a ari majaw masha ni gaw Karai Kasang hpe matsa shatan ma ai: dai ari zinli gaw nachying yak kaba ai ari rai nga ai.

Shingran 17

17:1 Dai shaloi gawm sanit lang ai lamu kasa sanit hta na langai mi gaw, Sa sa, nang de sa rit, hka law law a ntsa e dung nga ai shawa num kaba hpe daw ai lam, ngai nang hpe madun dan de ga: 2 ga ntsa hkawhkam ni gaw shi hte hpye ai amu galaw nna, mungkan ga e nga ai ni gaw, shi ahpye ai amu a tsabyi jahku hte nang ma masai, nga nna ngai hpe tsun ai. 3 Shaloi shi ngai hpe wenyi hte nam mali de woi nawng mat wa ai rai nna, baw sanit hte nrung shi tu nna, matsa shatan ai amying hkrai pri re ai hkyeng kabrim ai matse labye a ntsa e dung nga ai numsha hpe, ngai mu nngai. 4 Dai numsha gaw hkyeng mang ai hte hkyeng kabrim ai hpun palawng bu hpun nna, aja, lungseng, pale hte mawn sumli nga ai; shi hpye ai amu a n san n seng ai hte, matsat shabat lam hpring chyat re ai aja gawm, shi a lata hta lang da wu ai: 5 shi a lahtan e, Ga ntsa na shawa num ni hte matsat shabat lam ni a Kanu, galu kaba ai Babelon, nga nna sung htum ai hte seng ai amying ka da nga ai. 6 Bai, dai numsha gaw chyoi pra ai ni a asai hte mung, Yesu a sakse ni a asai hte mung, nang nga ai hpe, ngai mu nngai. Shi hpe mu yang mau kaba hte ngai mau mahka mat nngai. 7 Dai rai nna, dai lamu kasa gaw, Hpa majaw nang mau mahka nga n ta? Dai numsha a sung htum ai lam mung, baw sanit, nrung shi tu nna shi hpe gun ai matse labye a sung htum ai lam mung, ngai nang hpe tsun dan de ga. 8 Nang mu ai matse labye gaw, shawng de nga yu sai, ya gaw n nga ai, raitimung sung htum ai shara kaw na lung wa magang ra ai rai nna, hten byak ai de sa wa na ra ai. Ginding aga nnan lat kaw nna tinang a amying asak laika hta n ka lawm ai, ga ntsa e nga ai masha ni gaw, dai matse labye a nga yu sai hte ya n nga ai., bai nga na ra ai lam ni hpe mu lu ai shaloi, mau mahka na mara ai. 9 Ndai yang e hpaji rawng ai nyan lawm nga ai. Baw sanit gaw, dai numsha dung ai bum sanit rai nga ai: 10 hkawhkam sanit mung rai nga ai; manga gaw hkrat sai, langai mi gaw ya nga nga ai, ngam ai langai mi gaw garai n du ai; dai wa du ai shaloi aten loi sha mi nga lu na ra ai: 11 shawng de nga yu nna ya n nga ai matse labye mung, dai hte maren rai na ra ai; dai wa gaw matsat ngu na wa rai nga ai, rai ti ming, dai sanit hta lawm nga ai; shi gaw hten byak ai de sa wa na ra ai. 12 Bai nang mu ai nrung shi gaw, mungdan garai n hkam la lu ai hkawhkam shi rai nga ma ai: shanhte gaw dai matse labye hte rau hkawhkam aya ngu ai hpe ahkying mi ting hkam la ma ai. 13 Dai ni gaw myit langai sha rawng nna, dai matse labye hpe tinang a hpung dagu hte ahkang aya ap ya ma ai. 14 Dai ni gaw, dai Sagu Kasha hte hpyen gasat na ma ai rai nna, dai Sagu Kasha gaw shanhte hpe dang kau na ra ai: kaning rai nme law, shi gaw madu ni a Madu, hkawhkam ni a Hkawhkam rai nga ai: shi hte rau nga ai ni mung, shaga da ai ni, lata la ai ni, kangka re ai ni, rai nga ma ai, nga nna ngai hpe tsun ai. 15 Bai, dai wa gaw, Shawa num dung nga ai hka nu ni gaw, masha baw amyu ni, wunawng wuwa ni, masha mungdan ni hte ga amyu ni, rai nga ma ai. 16 Bai, nang mu ai nrung shi hte dai matse labye gaw, dai shawa num hpe ndawng n yawt na mara ai rai nna, shi hpe katsi katsang hte singgu krin shatai kau nhtawm, shi a shan hpe sha kau nna, krawp mat hkra wan hte nat kau na mara ai. 17 Kaning rai nme law, Karai Kasang a myit hku shadik na hte, shanhte myit langai sha rawng lu na, Karai Kasang a mungga dik wa ai nhtoi du hkra, tinang a mungdan dai matse labye hpe ap ya mu ga nga, Karai Kasang gaw shanhte a kraw lawang hta hpaji daw bang ya mu ai. 18 Nang mu lu ai numsha mung, mungkan hkawhkam ni hpe madu lu ai mare kaba rai nga ai, nga nna ngai hpe tsun ai.

Shingran 18

18:1 Dai hte a hpang e lamu kasa kaga gaw sumsing lamu de na yu wa ai, ngai mu nngai; shi gaw ahkang aya kaba lu nna, lamu ga gaw shi a hpung shingkang hte htoi ala nga ai. 2 Dai wa gaw, Galu kaba ai Babelon gaw kadawng daw mat sai, kadawng daw mat sai; dai shara gaw, nat tsasam ni a de nga ai shara, n san n seng ai wenyi shagu a shingwung shara hte n san n seng ai matsat shabat re ai u amyu myu a shingbyi shara, tai mat sai. 3 Kaning rai nme law, shi a hpye ai amu ngu ai tsabyi jahku hte masha amyu baw shagu kadawng daw mat masai; ga ntsa hkawhkam ni mung shi hte rau hpye ai amu galaw nna, shi a hpung dagu hte sawse lawklek ai lam a majaw, mungkan ga na hpaga ni sut su wa masai, nga nna ja ai nsen hte jahtau wu ai. 4 Bai, sumsing lamu de na nsen kaga gaw, Nye a amyu masha ni e, dai mare a yubak hta nanhte n lawm myit ga mung, de a ari zinli n hkrum myit ga mung, shi kaw na pru wa mu: 5 kaning rai nme law, shi a yubak lamu dep hkra law wa ai rai nna, Karai Kasang gaw shi a n ding a hpring ai lam ni hpe matsing da nu ai. 6 Shi di ai hte maren shi hpe di htang mu; shi galaw ai lam hte maren htam lahkawng bai htang mu: shi hpaw ai gawm hta shi hpe htam lahkawng bai hpaw jaw mu. 7 Shi tinang hkum shareng nna sawse lawklek kaba wa ai made, zingri zingrat ai hte sharung shayawt ai, shi hpe htang jaw mu: kaning rai nme law, shi gaw, Ngai hkawhkam jan hkaw dung nga nngai; ngai gaida jan n rai; galoi mung sharung shayawt ai ngai n hkrum na nngai, nga nna kraw kata e tsun nga ai. 8 Dai re ai majaw, shi hkrum na ra ai ari zinli ngu ai, si hkrung si htan, sharung shayawt ai hte hku hku ai gaw, lani jan sha du nna, wan hte krawp hkra nat kau ai hkrum na ra ai: kaning rai nme law, shi hpe dawdan ai Madu Karai Kasang gaw, n-gun atsam kaba rawng nga ai. 9 Shi hte hpye ai amu galaw nna, sawse lawklek ai ga ntsa hkawhkam ni gaw, dai mare hkru ai wanhkut mu ma ai shaloi, shi hkrum ai ari hpe hkrit nna tsan tsan e tsap nga let, 10 Galu kaba ai mare, atsam rawng ai mare, Babelon e, dingnye lu n hka, dingnye lu n hka! ahkying mi hta sha nang hpe dawdan ai lam du sahka gaw! nga nna shi a majaw hkrapngu hkrapngoi ai hte sharung shayawt let tsun na mara ai. 11 Ga ntsa na hpaga ni mung shi a majaw hkrapngu hkrapngoi ai hte sharung shayawt nga ma ai; kaning rai nme law, ya kaw nna kadai mung shanhte a gun rai mari lu sa na n rai: 12 gun rai ngu ai gaw, ja arai, gumhpraw arai, lungseng, pale, lachyit sumpan, zingnyung, lai nba, hkyeng kabrim ai nba; manam pyaw ai hpun amyu myu, magwi kawng arai amyu myu, manu rawng ai hpun arai, magri arai, hpri arai, lung hpraw arai amyu myu; 13 maza hpun, shatmai tsi, manam pyaw ai baw, mura, lawban, tsabyi jahku, asau, muk shadung, hkaulan mam, dumsu, sagu, gumra, gumra leng, masha hkum hte ma sha amyit masin hpe, ngu ai rai nga ai. 14 Na a myit masin ra sharawng ai namsi namsaw gaw hkoi mat masai; hpum sau ai hte tsawm htap ai arai nlang hte mung nang jasum kau nit dai rai nna, hpang de kadai mung dai hte hpe bai mu lu sa na n rai. 15 Dai gun rai dut nna dai mare a majaw lu su ai hpaga ni mung shi hkrum ai ari hpe hkrit nna, tsan tsan e tsap nga let, Lachyit sumpan, zingnyung hte hkyeng kabrim ai hpun palawng bu hpun nna, aja, lungseng, pale mawn sumli ai galu kaba ai mare gaw, dingnye lu a hka, dingnye lu a hka! 16 ahkying mi hta sha dai hte wa law ai sutgan jahkoi kau ai hkrum sahka gaw! nga nna hkrapngu hkrapngoi ai hte sharung shayawt let tsun na mara ai. 17 Shanhpaw li agyi ni yawng, shanghpaw li hta ga hkawm ga sa ai ni yawng, shanghpawli ma ni hte nammukdara a majaw asak bau lu ai ni yawng hte gaw, tsan tsan e tsap nga nna dai mare hkru ai wanhkut hpe yu let, 18 Dai galu kaba ai mare hte bung ai gaw, gara mare rai nga a ta? nga nna jahtau ma ai. 19 Shanhte gaw tinang a baw hta dap hte bun nna, Dai galu kba ai mare gaw dingnye lu a hka, dingnye lu a hka ! nammukdara hta shanghpaw li shayawng lu ai ni yawng hte gaw, dai mare a sutgan kaba ai a mjaw sut su wa masai: ahkying mi hta sha shi a katsi katsang rai mat sahka gaw, nga nna hkrapngu hkrapngoi ai hte sharung shayawt let jahtau ma ai. 20 Sumsing lamu hte chyoi pra ai ni, kasa ni hte myihtoi ni e, dai mare a majaw kabu gara nga mu: kaning rai nme law, nanhte a matu matai htang na lam, Karai Kasang gaw shi a ntsa e dawdan nu ai, nga nna tsun ai, ngai na nngai. 21 Dai hpang n-gun ja ai lamu kasa langai mi htumrin lung kaba nsan ai nlung kawaw la nna, nammukdara kata de kabai bang kau dat let, Ndai hkrat shang wa ai zawn, galu kaba ai Babelon mare mung kabai bang kau ai hkrum na ra ai! htawmhpang galoi mung shi hpe bai mu lu na n rai. 22 Tingse dum ai ni, laka ka ai ni, sumhpyi dum ai ni hte pahke dum ai ni a nsen, nang hta htawn hpang galoi mung ngoi lu na n rai; hpa hpaji maka lam hta raitimung, hpaji maka rawng ai masha nang hta htawmhpang galoi mung paw pru lu na n rai; htumrin rin ai nsen mung, nang hta htawmhpang galoi mung na lu na n rai; 23 pyengdin a ahtoi mung, nang hta htawmhpang galoi mung htoi tu lu na nrai; la nnan hte num ningnan a nsen mung, nang hta htawmhpang galoi mung na lu na n rai; kaning rai nme law, na a hpaga ni gaw, ga ntsa na daru magam rawng ai ni, rai wa masai; na a mandan lakle amu hte masha amyu baw shagu ni hkalem kau ai hkrum masai. 24 Myihtoi ni a asai, chyoi pra ai ni a asai hte ga ntsa e sat kau hkrum mahkrum ni a asai, dai mare kata e mu hkrup lu sai, nga nna tsun ai.

Shingran 19

19:1 Dai hte a hpang e sumsing lamu kata e wunawng wuwa law law a wu ai nsen kaba gaw, Haleluya: Hkyehkrang la ai lam, hpung shingkang hte hpung dagu gaw anhte a Karai Kasang hte seng nga ai: 2 shi a tara dara ai lam ni tengman ai hte dinghpring nga lu ai; hpye ai amu hte ga ntsa ting hpe shut hpyit shangun ai shawa num kaba hpe shi dawdan nna, shi a shangun ma ni a asai matai, dai num a ntsa e bai htang ya nu ai law, nga nna tsun ai, ngai na nngai. 3 Bai lang mi shanhte gaw, Haleluya: dai mare a wanhkut gaw, htani htana prat dingsa a mawng lung nga ai, nga ma ai. 4 Shaloi dai salang hkun mali hte dai dusat amyu mali hte gaw, dingnyawm dagup nna, tingnyang hta dung nga ai Karai Kasang hpe nawku let, Amen, Haleluya, nga ma ai. 5 Bai dai tingnyang kaw na nsen pru ai gaw, Karai Kasang a shangun ma ni ngu ai, shi hpe hkrit kamyin ai kaji kaba yawng hte e, anhte a Karai Kasang hpe shakawn kungdawn mu law, nga nna tsun ai. 6 Bai wunawng wuwa law law a nsen zawn, hka law law kadu ai a nsen zawn, mu ngoi kaba ai a nsen zawn, Haleluya: Chyahtum chyalai n-gun rawng ai Madu anhte a Karai Kasang gaw, a up nga ai: 7 Anhte kabu gara nga ai hte sharawng awng nga ga, shi a hung shingkang hpe shagrau nga ga: kaning rai nme law, dai Sagu Kasha a hkung ran ai poi du ra ai hte, shi a num ningnan jan gaw shi hkum hpe mawn sumli ngut sai rai nna, 8 hpraw tu ai hte sanseng ai lachyit nba hte tinang hkum hpe mawm sumli na ahkang shi lu la nu ai: shing re ai lachyit nba gaw chyoi pra ai ni a dinghpring ai a amu bungli rai nga ai law, nga nna tsun ai gaw ngai na nngai. 9 Bai, dai lamu kasa gaw, Dai Sagu Kasha a hkungran ai poi de shaga la hkrum ai ni gaw, a lu ma ai, ngu nna ka da u, nga nna mung, Ndai ga gaw Karai Kasang a tengman ai mungga rai nga ai, nga nna mung, ngai hpe tsun nngai. 10 Shaloi, ngai shi hpe nawku na nga, shi a lagaw nhpang e dingnyawm dagup nngai. Shi gaw, Shing hkum rai et: ngai gaw Yesu a sakse ga gunhpai ai na a mung, na a kahpu kanau ni a mung, shangun ma manang shada she rai nngai: Karai Kasang hpe nawku u: kaning rai nme law, Yesu a lam sakse hkam ai gaw, myithoi htoi ai wenyi a myit hku rai nga ai, nga nna ngai hpe ginhtim tsun ai. 11 Bai, sumsing lamu hpaw malang nga ai hpe, ngai mu nngai, shaloi, yu mu, gumra ahpraw danpru nna dai hta jawn ai wa gaw, Kangka hte Tengman ngu ai wa rai nga ai; shi gaw dinghpring ai hku tara dara ai hte majan gasat nga ai. 12 shi a myi gaw wan shinglet rai nga ai; shi a baw hta ja kagup law law gup nga ai; shi hta kaga kadai n chye ya lu ai amying ka kap nga lu ai. 13 Asai lapri bun ai hpun palawng shi bu hpun nna, shi a amying gaw, Karai Kasang a Mungga, nga nna mying nga ai. 14 Sumsing lamu na luksuk ni mung, gumra ahpraw jawn nna sanseng hpraw tu ai lachyit nba bu hpun let, shi hpang e hkan nang ma ai. 15 Masha amyu baw ni hpe kahtam na matu, shi a n-gup hta na dai ai ntawng nhtu pru nga ai; shanhte hpe mung hpri sumdoi hte shi up na ra ai: Chyahtum chyalai n-gun rawng ai Karai Kasang a sindawng kahtet ai pawt bu ngu ai tsabyi htumbyen hta shi kabye shup nga ai. 16 Shi ahpun palawng hte magyi hta, Hkawhkam ni a Hkawhkam, Madu ni a Madu, nga ai amying ka kap nga ai. 17 Bai, lamu kasa langai mi jan kata e tsap nga ai hpe, ngai mu nngai; shi gaw ntsa malen pyen ai u ni mahkra hpe, Sa marit, hkawhkam ni a ashan, hpyenbu ni a ashan, share shagan ni a ashan, gumra hte gumra jawn ai ni a ashan, 18 shanglawt hte mayam ni a, masha kaji kaba mahkra ni a ashan sha lu na matu, Karai Kasang a poi kaba de zuphpawng marit, nga nna nsen kaba hte jahtau wu ai. 19 Dai rai nna, dai matse labye mung, ga ntsa na hkawhkam ni hte shanhte a luksuk ni mung, dai gumra jawn ai wa hte shi a luksuk ni hpe majan gasat na matu zuphpawng nga ma ai gaw, ngai mu nngai. 20 Shaloi dai matse labye rim la ai hkrum wu ai; dai matse labye a masat dingsat hkam la nna, de a hkrang sumla nawku ai ni hpe hkalem kau na matu, matse labye a man e lamik kumla gawlaw dan ai masu ai myihtoi mung, shi hte rau rim la ai hkrum wu ai: shan lahkawng gaw, kan hte hkru nga ai wan nawng kata de, chyahkrung jahkrat bang kau ai hkrum ma ai: 21 ngam nga ai ni gaw gumra jawn ai wa a n-gup hta na pru ai ntawng nhtu hte sat kau hkrum ma ai rai nna, u ni mahkra gaw shanhte a shan hte hkru hkru kat kat rai nga ma ai.

Shingran 20

20:1 Bai, lamu kasa langai mi gaw, sung htum ai shara na sumsaw hte hpri sin-yu kaba shi a lata hta lang let, lamu de na yu hkrat wa ai hpe, ngai mu nngai. 2 Shi gaw Nat hte Satan rai nga ai, moi na lapu ngu ai baren numraw hpe rim la nna, shaning hkying mi du hkra, sharen da na matu, gyit hkangda wu ai: 3 dai shaning hkying mi garai n lai ai laman e, masha amyu baw ni hpe n hkalem kau lu u ga, dai sung htum ai shara kata de shi hpe jahkrat bang da nna, dai shara hpe la da ai hte de a ntsa e dazik shakap da wu ai: dai shaning hkying mi lai jang, ladaw mi sha shi hpe naw raw dat na rai nga ai. 4 Bai, magam tingnyang ni ngai mu nngai: dai tingnyang ni hta dung nga ai ni gaw tara dara na ahkang lu ma ai: dai hta kaga, Yesu a lam sakse hkam ai majaw mung, Karai Kasang a mungga majaw mung htau sat kau hkrum ai ni hte, dai matse labye hpe mung, shi a hkrang sumla hpe mung n naw n ku ai hte, shi a masat dingsat hpe tinang a lahtan hte lata hta n hkam la ai ni a tsu ni hpe, ngai mu nngai: shanhte gaw hkrung nga let, shaning hkying mi tup Hkristu hte rau up nga ma ai: 5 ngam nga ai masha chyasi ni chyawm gaw, dai shaning hkying mi garai n htum ai laman e, bai n hkrung lu ma ai, Dai gaw shawng na ngu ai bai hkrung rawt wa ai lam rai nga ai. 6 Shawng na ngu ai bai hkrung rawt wa ai lam hta shang lawm lu ai wa gaw, a lu ai wa, chyoi pra ai wa, rai nga ai: lahkawng lang na si ai lam gaw, shanhte a ntsa e ahkang n lu nga ai: shanhte gaw Karai Kasang a hkinjawng ni, Hkristu a hkinjawng ni, rai na mara ai rai nna, dai shaning hkying mi tup Hkristu hte rau up nga lu na mara ai. 7 Dai shaning hkying mi lai jang, Satan gaw htawng hta na raw dat ai hkrum nna, 8 lamu ga njut mali na Goga hte Magoga ngu ai masha amyu baw ni hpe hkalem la nna, majan gasat na matu jahpawng la na, pru sa wa na ra ai; shanhte a nambat gaw nammukdara zaibru daram law nga ai. 9 Dai ni gaw lamu ga pang pat lung wa nna, chyoi pra ai ni a dap hte, dai tsawra ai mare hpe, wang nga ma ai: shaloi sumsing lamu de na wan hkrat nna, shanhte hpe hkru kau mu ai. 10 Shanhte hpe hkalem la ai Nat mung, wan hte kan grung ai nawng hta jahkrat bang kau ai hkrum wu ai: dai yang e, dai matse labye hte, dai masu ai myihtoi mung, rawng nga ma ai rai nna, shanhte gaw shani shana nni nkri hkrum let, htani htana prat dingsa a rawng nga lu na mara ai. 11 Bai, galu kaba ai tingnyang ahpraw mung, dai hta e dung nga ai wa hpe mung, ngai mu nngai; shi a myiman kaw na aga hte lamu gaw hkoi mat wa nna, dai yan a matu nga shara n nga mat ai. 12 Si mat wa ai ni mung kaji kaba dai tingnyang a man e tsap nga ma ai hpe, ngai mu nngai; shaloi laika ni hpe hpaw tawn nga ai: asak laika ngu ai laika kaga hpe mung hpaw tawn nga ai: si mat wa sai ni gaw, tinang a arawn alai hte maren, laika ni hta ka da ai hku hkan nna, tara dawdan ai hkrum ma ai. 13 Shaloi nammukdara gaw tinang hta rawng ai, masha chyasi ni hpe bai ya wu ai; si hkrung si htan hte katsan ga mung, tinang ni hta rawng ai chyasi ni hpe bai ya mu ai; masha langai hte langai gaw tinang a arawn alai hte maren, tara dawdan ai hkrum ma ai. 14 Shaloi si hkrung si htan hte katsan ga gaw, dai wan nawng hta jahkrat bang kau ai hkrum ma ai: dai wan nawng gaw lahkawng lang na si lam rai nga ai. 15 Asak laika hta amying n lawm ai wa kadai mung, dai wan nawng hta jahkrat bang kau ai hkrum nga ai.

Shingran 21

21:1 Shaloi, sumsing lamu ningnan, ginding aga ningnan, ngai mu nngai; shawng na lamu hte shawng na aga gaw lai mat wa sai: nammukdara mung dai kaw nna n nga sai. 2 Shaloi chyoi pra ai mare ngu ai Yerusalem ningnan gaw, la ningnan a matu mawn sumli ai num ningnan zawn, lajang shachyip ngut nna, Karai Kasang a man sumsing lamu de na yu hkrat wa ai, ngai mu nngai. 3 Bai, dai tingnyang kata na nsen kaba gaw, Yu mu, Karai Kasang a sum gaw shinggyim masha ni hte rau rai nga ai rai nna, shi shanhte hte rau hpawng de nga na hte, shahte gaw shi a amyu ni tai na mara ai: Karai Kasang gaw shi hkum nan shanhte hte rau nga nga nna, shanhte a Karai Kasang tai na ra ai: 4 shi gaw shanhte a myi hta na myi prwi pru mapru katsut kau ya na ra ai: htawmhpang e si hkrung si htan n nga lu na sai; sharung shayawt ai, hkrapngu hkrapngoi ai, hki si ba si ai mung, n nga lu na sai: shawng na lam nga manga hte gaw lai mat wa sai. nga nna tsun ai, ngai na nngai. 5 Dai tingyang hta dung nga ai wa mung, Yu u, arai yawng mayawng hpe ngai ningnan bai gaw da nngai, nga nna tsun ai. Bai shi gaw, Ka da u; ndai ga gaw kangka re ai ga, tengman ai ga rai nga ai, nga nna tsun ai. 6 Dai hta kaga shi gaw, Dai hte gaw ngut mat sai; ngai gaw Alhpa hte Omega, apawt ningshawng mung, ahpang jahtum mung, rai nga nngai: hpang kara ai wa hpe asak hka hpawk na ntsin, manu jahpu n hpyi ai sha, ngai jaw na we ai. 7 Dang lu ai wa gaw ndai hte a Sali wunli hkam la lu na ra ai rai nna, ngai gaw shi a Karai Kasang tai na hte, shi gaw nye a kasha tai na ra ai. 8 Hkrit ai myit rawng ai ni, n kam n sham ai ni, matsat shabat re ai ni, masha sat ai ni, hpye ai amu galaw ai ni, mandan lakle galaw ai ni, sumla nawku ai ni hte masu magaw ga tsun ai ni yawng hte gaw, wan hte kan grung ai nawng hta ari hkrum lu na mara ai: dai gaw lahkawng lang na si lam rai nga ai, nga nna ngai hpe tsun ai. 9 Shaloi, hpang jahtum na ari zinli hte hpring chyat re ai gawm sanit lang ai lamu kasa sanit hta na langai mi sa du nna, ngai hte ga tsun ai gaw, Sa rit, dai Sagu Kasha a madu jan ngu ai num ningnan, ngai nang hpe madun dan de ga, nga ai. 10 Shaloi shi ngai hpe wenyi hta woi nawng mat wa ai hte, galu kaba, tsaw la ai bum ntsa de woi du nna, Karai Kasang a hpung shingkang danhkung ai hte, Karai Kasang a man sumsing lamu de na yu hkrat wa ai chyoi pra ai mare Yerusalem, ngai hpe madun dan nngai. 11 Dai mare a htoi tu ala ai gaw, pat zawn sanseng nna, hpu la ai nagahtoi lungseng hte bung nga ai: 12 de a bunghku gaw galu kaba ai hte tsaw la nga ai: mare chyinghka shi lahkawng hpaw nga ai rai nna, dai chyinghka ni a ntsa e lamu kasa shi lahkawng sin nga ma ai: dai hta n-ga, Israela a kashu kasha amyu shi lahkawng ni a amying mung dai hta ka kap nga ai. 13 Sinpraw maga de mare chyinghka masum, dingdung maga de mare chyinghka masum, dingda maga de mare chyinghka masum, sinna maga de mare chyinghka masum, hpaw nga ai. 14 Dai mare a bunghku gaw npawt shi lahkawng hte gaw da nga ai rai nna, dai ni a ntsa e Sagu Kasha a kasa shi lahkawng ni a amying shingteng shi lahkawng kap nga ai. 15 Ngai hte ga tsun ai wa gaw, mare hpe mung, mare chyinghka ni hpe mung, de a bunghku hpe mung, shadawn na matu aja maiaw nren lang nga ai. 16 Dai mare gaw njut mali rai nga nna, de a dingdung maga hte nda maga maren rai nga ai: shaloi dai maiaw nren hte dai mare hpe shadawn wu yang, mai hkying mi sanit tsa manga shi daram rai nga ai: de a dingdung maga, nda maga hte tsaw de maren rai nga ai. 17 Bai, dai bunghku hpe shadawn wu yang, masha shadawn ai hte bung ai, lamu kasa a shadawn ai lam gaw, dawng latsa e mali rai nga ai. 18 Dai mare a bunghku gaw, nagahtoi lungseng rai nga ai; dai mare gaw sanseng ai pat hte bung ai ja jet rai nga ai. 19 Dai mare a bunghku npawt ni gaw lungseng amyu myu hte mawn da nga ai: shawng na npawt gaw nagahtoi, lahkawng ngu na gaw nila, masum ngu na gaw mahoya, mali ngu na gaw mya, 20 manga ngu na gaw chyaung, kru ngu na gaw patemya, sanit ngu na gaw seng mut, matsat ngu na gaw myek-yoi, jahku ngu na gaw utahpaya, shi ngu na gaw mahoya tsit, shi langai ngu na gaw wakintu, shi lahkawng ngu na gaw htitun nila rai nga ai. 21 Dai mare chyinghka shi lahkawng mung pale shi lahkawng rai nga ai; mare chyinghka langai hte langai, pale langai ngai rai nga ai: dai mare a nmaw lam gaw pat zawn tu san ai ja jet rai nga ai. 22 Dai mare kata e nawku Htingnu ngai n mu nngai; kaning rai nme law, Chyahtum chyalai n-gun rawng ai Madu Karai Kasang hte Sagu Kasha gaw, dai mare a nawku Htingnu rai nga ai. 23 Dai mare e htoi ya na matu ajan mung, shata mung, n ra nga ai: Karai Kasang a hpung shingkang dai mare hpe jahtoi ya nna, Sagu Kasha gaw de a pyengdin rai nga ai. 24 Masha amyu ni dai mare a nhtoi hte hkawm sa lu na mara ai; ga ntsa na hkawhkam ni mung, dai mare de tinang a hpung shingkang shashawn na mara ai. 25 Dai mare chyinghka ni hpe shani e galoi n la da yu ai; dai yang e shana mung n nga ai. 26 Masha amyu baw ni a hpung shingkang hte arawng sadang hpe, dai mare de shanhte shashawn na mara ai. 27 Awu asin re ai hpa mung, matsat shabat hte masu magaw lam hkan ai wa gaw, dai mare de galoi mung shang lu na n rai: Sagu Kasha a asak laika hta amying lawm ai ni chyu sha shang lu na ma ai.

Shingran 22

22:1 Bai, Karai Kasang hte Sagu Kasha a tingnyang kaw na pru nna, dai mare a nmaw lam ka-ang hku lwi wa ai pat zawn htoi san ai asak hka nu mung, shi ngai hpe madun nngai. 2 Dai hka nu a hkingau maga mi hte maga mi de, asi amyu shi lahkawng si ai asak jahkrung ai hpun tu nga ai rai nna, de a asi mung shata shagu si nga ai: dai hpun a lap ni mung, masha amyu ni a ana shamai shatsai na matu rai nga ai. 3 Dagam dala ngu ai hpa mung htawmhpang n nga na ra ai; Karai Kasang hte Sagu Kasha a tingnyang gaw, dai mare kata e anga nga na ra ai rai nna, shi a shangun ma ni shi hpe dawjau na mara ai: 4 shanhte gaw shi a myiman hpe a yu nga lu na mara ai rai nna, shanhte a lahtan ni hta shi a amying nsang kap na ra ai. 5 Htawmhpang e shana mung n nga na ra ai; pyeng din a ahtoi mung, jan a nhtoi mung shanhte n ra ma ai: kaning rai nme law, dai Madu Karai Kasang gaw shanhte hpe ahtoi jaw na wu ai; dai hta n-ga, shanhte gaw htani htana prat dingsa up nga lu na mara ai. 6 Bai shi gaw, Ndai ga gaw kangka re ai ga, tengman ai ga rai nga ai: myihtoi ni a wenyi ni hpe up ai Madu Karai Kasang gaw, ahkying ladaw gade n na yang byin wa na ra ai lam ni hpe, shi a shangun ma ni kaw madun dan na matu, shi a lamu Kasa shangun dat nu ai. 7 Yu u, ngai alawan du na ring ngai: Ndai laika hta rawng ai myihtoi ga hpe hkan nang nga ai wa gaw, a lu ai, nga nna ngai hpe tsun nngai. 8 Ngai, Yawhan gaw, ndai lam ni hpe na lu ai hte mu lu ai wa, rai nga nngai. Ndai hte hpe na lu ai hte mu lu ngut jang, ndai lam ni ngai hpe madun dan ai lamu Kasa a lagaw nhpang e nawku na, ngai dingyawm dagup nngai. 9 Shi gaw, Shing hkum rai et; ngai gaw, na a mung, na a kahpu kanau myihtoi ni hte ndai laika a mungga hkan nang nga ai ni a mung, shangun ma manang shada she rai nngai: Karai Kasang hpe nawku u, nga nna ngai hpe ginhtim tsun ai. 10 Bai shi gaw, Ndai laika hta rawng ai myihtoi ga hpe dazik hkum shakap et; kaning rai nme law, ahkying ladaw ni wa magang ra ai. 11 Nding n hpring ai wa gaw, n ding n hpring ai hku naw hkan nga u ga; n san n seng ai wa gaw, n san n seng naw rai nga u ga; dinghpring ai wa gaw, dinghpring ai hku naw shachyen nga u ga; chyoi pra ai wa gaw, naw chyoi pra nga u ga. 12 Yu u, ngai alawan du na ring ngai; langai hte langai hpe tinang a amu hte maren bai htang jaw na, ging dan ai shabrai ngai lang da we ai. 13 Ngai gaw Alhpa hte Omega, ningshawng wa hte jahtum wa, apawt ningshawng mung, ahpang jahtum mung, ngai rai nga nngai. 14 Asak jahkrung ai hpun hpang de du lu na hte, mare kata de chyinghka hku shang lu na ahkang lu la hkra, tinang a hpun palawng hkrut kau ai ni gaw, a lu ma ai. 15 Shinggan e gaw, gwi nre ai ni, mandan lakle galaw ai ni, hpye ai amu galaw ai ni, masha sat ai ni, sumla nawku ai ni hte masu magaw lam sharawng awng let hkan galaw ai ni yawng hte nga ma ai, nga nna ngai hpe tsun nngai. 16 Ngai Yesu gaw, Hpung ni a matu, lam ndai hte nanhte hpe sakse hkam ya mu ga, ngu nna nye a lamu Kasa shangun dat nngai. Ngai gaw Dawi a aru madung hte lakung rai nga nngai; htoi tu ai nhtoi gintawng mung, ngai rai nga nngai. 17 Dai Wenyi hte Num ningnan gaw, Sa rit, nga ma ai; na la ai wa mung, Sa rit, ngu u ga. Hpang kara ai wa gaw sa ruga; lu mayu ai wa kadai mung, manu jahpu n hkrat ai sha, asak ntsin lu la u ga. 18 Ndai laika hta rawng ai myihtoi ga na lu ai ni yawng hte hpe ngai sakse hkam dat nngai gaw, Ndai ga hte hta kahtap jat ai wa kadai hpe mung, ndai laika hta ka da ai ari zinli ni, Karai Kasang shi a ntsa e kahtap jaw na ra ai: 19 ndai laika hta rawng ai myihtoi ga hta na shaw kau ai wa kadai hpe mung, ndai laika hta ka da ai asak jahkrung ai hpun hte chyoi pra ai mare kaw na, shi hte seng ai wunli wungau hpe, Karai Kasang shaw kau ya na ra ai. 20 Ndai lam hte hpe sakse hkam ya ai wa gaw, Rai sa; ngai alawan du na ring ngai, nga ai. Amen: Madu Yesu e, Yu wa rit law. 21 Madu Yesu Hkristu a chyeju gaw, chyoi pra ai ni hte rau anga nga u ga law. Amen.