1 Di timpuun i' nopo nga' i Boos: i Boos nopo nga' miampai do Kinoingan om i Boos nopo nga' Kinoingan. 2 Miampai isido do Kinoingan di timpuun i'. 3 Nadadi o nuununu nopo maza' disido, aiso i' do iiso' do nadadi nung okon no ko' maza' disido. 4 Ii nopo nadadi do id disido nga' koposizon, koposizon i ninavau do tuhun ngaavi'; 5 om ii nopo ninavau nga' tumitiu id totuvong, om au' i' nakabaga dii o kotuvangan. 6 Koikot no o songuhun, i sinuu' do Kinoingan. Ngaan nopo dau nga' i John. 7 Nokoikot isido do ponokosasi', do sumasi' di ninavau mooi do otumḇazaan nodii o saviavi' tuhun maza' disido. 8 Okon ko' i ninavau isido, nga' sumasi' noopo isido di ninavau. 9 Ii nopo ninavau totopot nga' i Boos i manaak do ninavau doid saviavi' tuhun; isido no i minikot doid pomogunan. 10 Doiti' no haid id pomogunan isido, i nadadi maza' disido, om au' i' nokotutun disido o pomogunan. 11 Minikot isido doid doun disido om au' i' tinoimo isido di tuhun dau sonḏii'. 12 Nga' doid sontob di minonoimo disido nonuan disido do kuasa' do ḏumadi do tanak ngaavi' do Kinoingan, doid sontob di otumḇazaan do id ngaan disido, 13 i okon ko' nongosusu mantad zaa' do tuhun toi mantad kaanḏak do tonsi do tuhun toi kohizaban do tuhun nga' mantad i' do Kinoingan sonḏii'. 14 I Boos ḏuminadi do tuhun, minogiigizon isido do poingamung dotokou, om nokito dotokou i koḇontugan dau, i koḇontugan i notoimo dau mantad di Tama' do sabaagi do Tanak tontoisoon di Tama', i noponu' do graasia om katapatan. 15 Suminasi' disido i John. Moboos isido do: “Iti no i songuhun i noboos ku do: ii nopo mikot do sumusuut dogo' nga' i nakaahib dogo' tu' isido no i poinsanḏad no haid do poguhu dogo'.” 16 Otopot no, do mantad kaganapan disido, do saviavi' nokotoimo — do iso' titaak i pogohon di tiso', 17 tu' ii nopo Unḏang-unḏang nga' pinataak maza' di Moses, ii nopo graasia om katapatan nga' nokoikot maza' di Jesus Kristus. 18 Aiso i' songuhun do nokokiikito do Kinoingan; nga' ii-ii no i Tanak tontoisoon, i poinsomok do ginavo di Tama', i pinopointutun disido. 19 Iti no i kososian di John, di ontok pougado' di tuhun Johudi ngaavi' doid disido o padri' ngaavi' om i tuhun ngaavi' do Livai do mantad Jerusalem do muot disido do, “Iisai ko?” 20 Pinointahang disido, au' minogohim isido nga' pinopointahang do, “Okon ko' i Kristus zou.” 21 Dadi' uot no izioho' do, “Dadi' i Elijah ko naku?” Simḇa no isido do, “Okon.” “I profeta ko naku?” Simḇa no isido do, “Okon.” 22 Dadi' poboos nodii izioho' doid disido do, “Iisai ko dii? Mositi' no do kisisimḇa zikoi do oviton doid di pinopougad ngaavi' dagai. Nunu o booson nu do kokomoi diau sonḏii'?” 23 Dadi' poboos no isido do, “Tumanud di pinogoohungungan di Isaiah, Izou nopo nga': I ohou di songuhun i mizak-gizak id kotogisan do, ‘Potounḏa'o' no o lahan montok di Tuhan. Potuhido' no o lahan ngaavi' do vazaan dau!’ ” 24 Ii nopo pinougad nga' Pharisee ngaavi', om uot nodii izioho' doid disido do, 25 “Nookuo nodii tu' momodsu' ko nung okon no ko' i Kristus ko, om okon ko' i Elijah ko, om okon ko' i profeta ko?” 26 Simḇa no i John doid dioho' do, “Momodsu' zou miampai do vaig, nga' kivaa songuhun poingkakat do poingamung diozu — i au' diozu otutunan — 27 i mikot do sumusuut dogo'; om au' zou i' kapadan do monguzad do kagos do solipal dau.” 28 Naantakan iti doid Bethany, doihuu' id soboong do Jordan, i kinoizonon do maso momodsu' i John. 29 Di tadau suminusuut, kokito no disido i Jesus do mikot doid disido om poboos no do, “Intangai, iho' no i ḏoumḇa' do Kinoingan i mongidu' do ḏouso do pomogunan. 30 Isido no i komozon ku di ontok poboos zou do, ‘Mikot o songuhun do sumusuut dogo' i nakaahib dogo' tu' isido no i poinsanḏad no haid do poguhu dogo'.’ 31 Izou po sonḏii' nga' au' i' nokotutun disido, nga' tuḏu ku nopo do minikot do momodsu' miampai do vaig nga' mooi do kointahang nodii isido doid tuhun ngaavi' do Israel.” 32 Om pointahango' no di John do minoboos do, “Nokito ku i Spiritu do suminonḏot doid disido do mantad surga i miaga do tomḇohog asang om timpoon no doid disido. 33 Izou po sonḏii' nga' au' i' nokotutun disido, nga' nokoboos doid dogo' i pinopougad dogo' do momodsu' miampai do vaig do, ‘Ii nopo tuhun i okito nu do sonḏoton di Spiritu do munḏoong, nga' isido no i momodsu' miampai do Spiritu Toḇitua,’ ka. 34 Nokokito om sumasi' zou do isido no i Songuhun Nopihi' do Kinoingan.” 35 Di tadau sumusuut, di poingkakat vagu' i John do doiho' miampai di duvo di mokiki'ia' ngaavi' dau, tahib no i Jesus, 36 om intong no i John doid disido om poboos no do, “Intangai no, ihia iho' i ḏoumḇa' do Kinoingan,” ka. 37 Om noongou di duvo mokiki'ia' i binoos disido om tanud no izioho' di Jesus. 38 Kovihi no i Jesus, kokito no dau izioho' do manud-tanud dau om poboos no do, “Nunu o pokionuon diozu?” Simḇa no izioho' do, “Oi Rabbi” — i kikomozon do Mongingia' — “Id nomḇoo ko do poingizon?” 39 Simḇa no isido do, “Kanou, om kokito kou i';” dadi' ugad no izioho' om kokito no dioho' do id nomḇoo isido do poingizon, om tinḏooi no miampai disido do tadau dii. Ontok nopo dii nga' kuang hobi do jaam kaapat do minsosodop. 40 Songuhun nopo diti duvo i ḏuminadi do tutumanud di Jesus di ontok koongou po di boos di John nga' i Andrew, tobpinai di Simon Peter. 41 Guhu nopo do nimaan di Andrew nga' mogium di tobpinai dau om poboos no doid disido do, “Nokito no dagai i Messiah” — i kikomozon do i Kristus — 42 dadi' ovito' no disido i Simon doid di Jesus. Intong no disido i Jesus om poboos no do, “Iziau no i Simon i tanak di John; pungaanan ko do i Cephas” — i kikomozon do Pampang. 43 Di tadau suminusuut, di ontok katantu' di Jesus do mooi doid Galilee, kasaamaanai no disido i Philip om poboos no do, “Tanud dogo'.” 44 I Philip nga' mantad nogi' do kakaḏazan dii, Bethsaida, i kinoizonon di Andrew om di Peter. 45 Kasaamaanai no di Philip i Nathanael om poboos no doid disido do, “Nokito no dagai isido i kinomoi di Moses doid Ḇuuk Unḏang-unḏang om di profeta ngaavi' do, i Jesus tanak di Joseph, mantad Nazareth.” 46 Poboos no i Nathanael doid disido do, “Mantad Nazareth? Kivaa naku di tavasi' do mikot mantad kinoizonon diho'?” Simḇa no i Philip do, “Kano om kokito ko i'.” 47 Kokito nopo di Jesus i Nathanael do umikot, poboos no isido do kokomoi disido do, “Otopot no, do iho' no i bansa' do Israel i aiso do kopomudutan.” 48 Uot no i Nathanael do, “Ingkuo ko do kotutun dogo'?” ka. Simḇa no i Jesus do, “Poguhu i' do nokoikot do momohoou diau i Philip, nokito ku iziau do id susut do kazu fig.” 49 Simḇa no i Nathanael do, “Oi Rabbi, iziau no i Tanak do Kinoingan, iziau no i laja' do Israel.” 50 Simḇa no i Jesus do, “Otumḇazaan ko sabap no do minoboos zou do: nokito ku iziau do poinsusut do kazu fig. Kokito ko i' mai' di hobi po ngaavi' ginazo do mantad diho'.” 51 Om poboos no vagu' isido do, “Poihoon ku iziau totootopot, do kokito ko mai' do surga do poingivang, om i tasab ngaavi' di Kinoingan do minsavat om sumonḏot doid di tanak do tuhun.”
1 Ontok di tadau kumotohu kivaa do matod doiho' id Cana id Galilee. I tina' di Jesus nga' doiho', 2 om i Jesus om i mokiki'ia' ngaavi' dau nga' naahap nogi'. 3 Om kooviai no izioho' do anggur, tu' ii nopo anggur ngaavi' i nokotounḏa' montok di kalamazan nga' naavi' no, om poboos no i tina' di Jesus doid disido do, “Aiso no do anggur dioho'.” 4 Poboos no i Jesus do, “Oi tonḏu', nunu o pokionuon nu mantad dogo'? Au' po noikot o jaam ku.” 5 Poboos no i tina' disido doid di suupu ngaavi' do, “Maan no diozu o nunu noopo o pobooson dau diozu.” 6 Kivaa do onom kakanan do poinsumpak doiho', i gunoon do pomohiungan i koubasan do Johudi ngaavi': Iso' nopo dii nga' kosuang o duvo ngoopod toi tohu ngoopod galon. 7 Poboos no i Jesus doid di suupu ngaavi' do, “Suangai do vaig iho' kakanan ngaavi'.” Dadi' suangai no dioho' ii do somok no do kahabai. 8 Dadi' poboos no isido doid dioho' do, “Sogoo' nodii diozu om oviton no doid di buu'an do kalamazan.” 9 Maai no dioho' ii; kinamai no di buu'an do kalamazan dii i vaig om navahiu no ii do anggur. Au' isido nokoiho do mantad nomḇoo ii — nga' nokoiho i suupu ngaavi' i minanagou di vaig — hoovo' nodii di buu'an do kalamazan dii i minanansavo 10 om poboos no do, “Iisai-isai nopo nga' poposuung po haid do anggur tavasi' om angaavuk podii i tomḇuhui ngaavi' om ii nogi' dii i okuang o vinasi' o posuungon; nga' iziau nopo nga' poopio' nu po haid i anggur tavasi' gisom i' do baino.” 11 Iti no i tanḏa' di Jesus do kumoiso' nogi': iti nopo nga' doiho' id Cana id Galilee. Pinointahang disido o koḇontugan dau, om notumḇazaan disido i mokiki'ia' ngaavi' dau. 12 Kahapas iti, ugad no isido do doiho' id Capernaum miampai di tina' dau om di tobpinai ngaavi' dau do kusai om di mokiki'ia' ngaavi' dau, nga' tumininḏooi izioho' do doiho' do piipio no tadau. 13 Ontok nopo di osomok no i Pamakanan do Kinahapasan do Johudi ugad no i Jesus doid Jerusalem, 14 om kokito no disido o tuhun ngaavi' do id Panamḇazangan Tagazo dii do papadagang do sapi', kamḇing ḇiri'-ḇiri' om tomḇohog asang, om songinḏikau doiho' i popopoohon ngaavi' do usin. 15 Ponoodo no isido do papasut mantad dukug, uzazango' no disido izioho' saviavi' do papahabus mantad di Panamḇazangan Tagazo, kaampai no i sapi' om kamḇing ḇiri'-ḇiri', potovuko' no dau i usin di popopoohon ngaavi' do usin, om tinggongoo' no dau i mija' dioho' 16 om poboos no doid di papapadagang ngaavi' do tomḇohog asang do, “Pohobuso' ngaavi' iti do mantad doiti' om kada' dodizo' do pitomuvan o hamin di Tama' ku.” 17 Dadi' kosoou no di mokiki'ia' ngaavi' dau i boos ngaavi' do poinsuat id ḇuuk toḇitua do: “Minḏab-sinḏab po o kohizaban ku montok do hamin nu.” 18 Sampalag no i Johudi ngaavi' om poboos no do, “Nunu o tanḏa' do pokitanan nu dagai do apatut ko do mimang do miaga diti?” 19 Simḇa no i Jesus do, “Vuzaso' no iti Panamḇazangan Tagazo, om id daasom tohu tadau tuidongon ku vagu' iti.” 20 Simḇa no i Johudi ngaavi' do, “Apat ngoopod om onom toun do minonuidong diti Panamḇazangan Tagazo: kaanu ko do monuidong diti do tohu no tadau?” 21 Nga' minoboos isido do kokomoi di Panamḇazangan Tagazo do i i' tinan dau, 22 om kotungag nopo i Jesus do mantad poimpatai, kosoou no di mokiki'ia' ngaavi' dau do nokoboos isido diti, om kotumḇazaai no izioho' di ḇuuk toḇitua om nunu i noboos haid disido. 23 Ontok di potinḏooi isido do id Jerusalem montok do kalamazan do Pamakanan do Kinahapasan ogumu' o nongotumḇazaan doid ngaan disido ontok di kokito dioho' i tanḏa' ngaavi' di nimaan disido, 24 nga' nokoiho i Jesus do saviavi' tuhun om au' di pinapahansan dau sonḏii' doid dioho'; 25 tu' au' isido insan do momoguno do katahangan kokomoi do iisai noopo; koiho isido do nunu o id pomusaavan do tosoosonguhun.
1 Kivaa songuhun Pharisee pungaanan do i Nicodemus, songuhun huguan do Johudi, 2 i minikot doid di Jesus do doungosodop om poboos no do, “Oi Rabbi, nokoiho zikoi do mongingia' ko i nokoikot mantad Kinoingan; tu' aiso i' do kaanu do mimang di tanḏa' ngaavi' i nimaan nu nung okon no ko' miampai disido o Kinoingan.” 3 Simḇa no i Jesus do: “Poihoon ku iziau totootopot, do aiso i' do songuhun do kokito do kopomolintaan do Kinoingan do au' no ohodi' do mantad savat.” 4 Poboos no i Nicodemus do, “Ingkuo dii do ohodi' vagu' o tuhun di nohoing no? Kaanu po naku isido do sumuang vagu' doid pagaganakan om ohodi' no vagu?” 5 Simḇa no i Jesus do: “Poihoon ku iziau totootopot, do aiso i' kaanu sumuang do id kopomolintaan do Kinoingan do au' no ohodi' maza' do vaig om di Spiritu; 6 nunu i nohodi' do tonsi nga' doun tonsi; nunu i nohodi' di Spiritu nga' doun spiritu. 7 Kada' kosuvazai do moboos zou do: ‘Mositi' ohodi' ko do mantad savat.’ 8 Sumuugi' o tongus doid noonomḇoo o kaanangan dii; koongou ko do tuni dii, nga' au' ko kaanu do popoiho do mantad id nomḇoo ii toi id nomḇoo o pakaazan dii. Ingkaa nogi' doid iisai-isai i ohodi' mantad di Spiritu.” 9 Uot no i Nicodemus do, “Ingkuo dii do adadi ino'?” 10 Simḇa no i Jesus do, “Iziau no i Mongingia' do Israel om au' ko i' nokoiho do kokomoi ngaavi' diti! 11 Poihoon ku iziau totootopot, do ii-ii no i noihaan dotokou o booson dotokou om ii-ii no i nokito dotokou o sosion dotokou om nga' tuhun kou i' ngaavi' i au' monoimo di kososian dagai. 12 Nung au' kou nopo otumḇazaan dogo' do ontok moboos zou doid diozu kokomoi do nunu i doun pomogunan, ingkuo kou dii do otumḇazaan dogo' do ontok moboos zou kokomoi do nunu i doun surga? 13 Aiso po do nokoongoi doid surga suvai ko' i songuhun i minikot mantad surga, i Tanak do tuhun; 14 miaga di Moses tu' pinopoinsavat di vuhanut do doiho' id kotogisan, ingkaa nogi' i Tanak do tuhun do maan poinsavato' 15 mooi do iisai nopo i otumḇazaan nga' kaanu mai' do koposizon selajul id disido. 16 Tu' ingkaa no o Kinoingan do gumininavo do pomogunan: pinataak disido i Tanak tontoisoon dau, mooi do iisai nopo i otumḇazaan disido nga' au' mai' apatai nga' kaanu mai' do koposizon selajul. 17 Tu' pinougad do Kinoingan i Tanak dau doid pomogunan do okon ko' momḇisala' do pomogunan, nga' mooi do maza' disido atampasi no daa o pomogunan. 18 Aiso i' do songuhun i otumḇazaan doid disido do maan ḇisalao'; nga' iisai noopo i au' otumḇazaan nga' noḇisala' no haid, tu' au' otumḇazaan o tuhun diho' doid Ngaan di Tanak tontoisoon do Kinoingan. 19 Om Kopomḇisalaan nopo dino nga': sunḏung i' ma do nokoikot no doid pomogunan i ninavau nga' minomihi' o tuhun do kotuvangan ko' i ninavau tu' angalaat o koimaan dioho'. 20 Om otopot no, do iisai nopo i mimang di kahasa' nga' abaazatan di ninavau om modihiu mantad dii, mooi do au' di oimḇuhazan o koimaan ngaavi' dau; 21 nga' iisai nopo i mimang di totopot nga' mintahang doid ninavau, mooi do nunu nopo i maan disido nga' kointahang kozo do noimaan doid Kinoingan.” 22 Kahapas nopo iti, ugad no i Jesus miampai di mokiki'ia' ngaavi' dau do doiho' id uvang do Judaea, om tinḏooi no doiho' do miampai dioho' om minomodsu'. 23 I John nga' minomodsu' nogi' do doiho' id Aenon id doos do Salim, tu' ogumu' o vaig do doiho' om minodidikot doiho' o tuhun ngaavi' om nongopodsu'. 24 Tu' au' po notolungku' i John. 25 Om kadadi no o pibaasan do id piahatan di piipio mokiki'ia' di John om songuhun Johudi kokomoi do adat do kopomohidangan, 26 dadi' ugad no izioho' doid di John om poboos no do, “Oi Rabbi, ii nopo tuhun i miampai haid diau do doihuu' id soboong do bavang Jordan, i tuhun di sinasi' nu, nga' maamaso nogi' momodsu' do baino, om modidikot doid disido o tuhun ngaavi'.” 27 Simḇa no i John do, “Aiso i' do songuhun do kaanu monoimo do nuununu, nung okon no ko' pinataak ii do mantad surga. 28 “Iziozu sonḏii' nga' kaanu sumasi' dogo', do nokoboos zou do, ‘Okon i' ko' i Kristus zou; Izou nopo nga' i songuhun i sinuu' do moguhu disido.’ 29 “Ii no i manansavo i poinsanganu di sovoon, nga' ii nopo tamḇahut di manansavo, i poingkakat do doiho' om mokinongou disido, nga' oponu' do kounsikaan do ontok koongou do ohou di manansavo. Iti no i kounsikaan i topiumanan ku, om poinggonop nodii ii. 30 Mositi' gumazo isido, nga' izou nopo nga' mositi' do numini'. 31 Ii nopo mikot do mantad id savat nga' id savat do saviavi'; ii nopo doun pomogunan nga' poimpomogunan isido om moboos isido do id kalaalahano' do doun pomogunan. Nga' ii nopo mikot mantad surga 32 nga' sumasi' doid nunu i nokito om noongou dau, nga' aiso i' do songuhun do monoimo di kososian dau; 33 ii nopo monoimo do kososian disido nga' manaak do katahangan do otopot o Kinoingan, 34 tu' ii nopo i sinuu' do Kinoingan nga' moboos di boos ngaavi' do Kinoingan, tu' onuan do Kinoingan isido di Spiritu miampai do aiso gontob. 35 Guminavo di Tanak i Tama' om pinahansan dau o nunu noopo doid hongon disido. 36 Iisai nopo i otumḇazaan doid di Tanak nga' kikoposizon selajul, nga' iisai nopo i mada' do otumḇazaan di Tanak nga' au' i' kokito do koposizon: tumimpoon doid disido i kohohodong do Kinoingan.”
1 Koongou nopo di Jesus do noihaan di Pharisee ngaavi' do ogumu' o mokiki'ia' do dodizon om podsuon disido ko' i' John — 2 sunḏung i ma do totopot nopo nga' ii i' mokiki'ia' ngaavi' dau o minomodsu', om okon ko' i Jesus sonḏii' — 3 tongkizad no isido do Judaea om poguhiai no doid Galilee. 4 Nga' mositi' do kavaza' isido do uvang Samaria. 5 Id tinḏahanon dau, koikot no isido doid kakaḏazan do Samaria i pungaanan do Sychar, i id somok do tana' i pinataak di Jacob doid di tanak dau i Joseph. 6 Doiho' no i toobong di Jacob om iikau no i Jesus id doos di toobong, tu' nouzan kozo isido doid pinamanaan dau. Ontok nopo dii nga' kuang hobi do jaam koopod om duvo do doungadau. 7 Koikot nopo o songuhun tonḏu' do Samaria do sumagou do vaig, poboos no i Jesus doid dosido do, “Onuai zou po do inumon.” 8 Nokougad do doiho' id kakaḏazan i mokiki'ia' ngaavi' dau do minongoi pomohi do takanon. 9 Poboos no doid disido i tonḏu' do Samaria do, “Iziau nopo nga' Johudi. Nookuo nodii tu' mokianu ko dogo' do inumon tu' tuhun Samaria?” — Totopot nopo nga' au' i' monongkisamo do tuhun Samaria o Johudi. 10 Simḇa no i Jesus doid dosido do: “Nung nokoiho ko po daa do nunu i pataakon do Kinoingan om iisai i maso moboos doid diau do, ‘Poinumo' zou po,’ ka, nga' iziau i' daa i mokianu dii, om oonuan ko i' daa disido do vaig poimpasi.” 11 Simḇa no i tonḏu' do, “Oi Tuan, aiso do sasagou nu, om aahom iho' toobong: ingkuo ko dii do kasagou do vaig poimpasi diti? 12 Agaagazo ko po naku ko i' tama' dagai i Jacob, i minanaak dagai diti toobong om i mininum sonḏii' do mantad diti miampai di tanak kusai ngaavi' dau om di sapi' ngaavi' dau?” 13 Simḇa no i Jesus: “ii nopo monginum diti vaig nga' tutuuvan po vagu'; 14 nga' ii nopo monginum do vaig i taakon ku nga' au' nodii tutuuvan po: ii nopo vaig i taakon ku disido nga' ḏumadi doid disido do tovud do vaig i sumimpuhak, kumaa doid koposizon selajul.” 15 Poboos no i tonḏu' do, “Oi Tuan, onuai zou do vaig dino do tokuudi' no mooi do au' zou nodii tutuuvan po toi ko' mikot vagu' do doiti' do sumagou.” 16 Poboos no i Jesus doid dosido do, “Ngozo' hoovo' i savo nu om gumuhi' no do doiti'.” 17 Simḇa no i tonḏu' do, “Aiso i' do savo ku.” Poboos no i Jesus doid dosido do, “Otopot no i boos nu do, ‘Aiso i' do savo ku,’ ka nu, 18 tu' sunḏung potuu do himo no haid tuhun do nakasavo diau nga' ii nopo miampai diau do baino nga' okon i' ko' savo nu. Pointopot ngaavi' i noboos nu.” 19 Poboos no i tonḏu' dii do, “Oi tuan, okito ku do profeta ko. 20 Suminamḇa i taki-aki dagai doid konuhuan diti, sunḏung i' ma do minoboos ko do doihuu' id Jerusalem i tizonon do apatut o tuhun do sumamḇa.” 21 Poboos no i Jesus: “Kotumḇazaai no dogo', oi tonḏu', tu' mikot nodii o jaam do sumamḇa kou di Tama' do okon ko' doid konuhuan diti toi ko' doiho' id Jerusalem. 22 Iziozu nopo nga' sumamḇa di nunu i au' diozu noihaahaan; nga' izikoi nopo nga' sumamḇa di noihaan no dagai, tu' koponomposizan nopo nga' mikot mantad Johudi ngaavi'. 23 Nga' mikot nodii o jaam — totopot nopo nga' doiti' no iho' — do sumamḇa mai' i susumamḇa ngaavi' totopot di Tama' doid spiritu om katapatan: tu' miaga no diho' i susumamḇa do iumon di Tama'. 24 Kinoingan nopo nga' spiritu, om iisai nopo i sumamḇa nga' mositi' sumamḇa doid spiritu om katapatan.” 25 Poboos no i tonḏu' doid disido do, “Nokoiho zou do mikot i Messiah — komozon do, i Kristus; om koikot po isido, polotion i' mai' disido o saviavi'.” 26 Poboos no i Jesus do, “Izou no ino', izou i maso monongkiboos diau.” 27 Ontok no diti do koguhi' no i mokiki'ia' ngaavi' disido om nosuvazan izioho' do nokokito disido do maso monongkiboos do songuhun tonḏu', nga' aiso dioho' do minuot do, “Nunu o pokionuon nu do mantad dosido?” toi ko', “nunu o booson nu doid disido?” 28 Povihio' no di tonḏu' i tunsina' do sagaan dau om agab-agab no do guminuhi' doid kakaḏazan do popoiho do tuhun ngaavi' do, 29 “Kanou mongoi intong di tuhun i pinopoiho dogo' do saviavi' i nimaan ku; Isido nodii ma naku i Kristus?” 30 Nokopogovit iti di tuhun ngaavi' do huminabus di kakaḏazan om pamanau no do mintutuk disido. 31 Do naamot dii, unsubo' no di mokiki'ia' ngaavi' dau isido do, “Oi Rabbi, imang po akan”; 32 nga' poboos no isido do, “Kivaa i' do takanon i akanon ku i au' diozu oihaan.” 33 Dadi' pogibooboos nodii i mokiki'ia' ngaavi' do, “Kivaa dii naku do minogovit disido do takanon?” 34 Poboos no i Jesus do: “Takanon ku nopo nga' mimang di hizab di songuhun i minonuu' dogo', om do momongo di kalaja' dau. 35 Okon naku ko' kiboobooson kou do: ‘Apat po vuhan om pangamatan nodii?’ ka. Nga' avasi' do poihoon ku iziozu, intong kou do posoihi' diozu, intangai no iho' pongumaan; ongopuak no ngaavi', songindansaan no do omoton! 36 Maamaso no do ḇalazan do gaji dau i mongongomot, maso no isido mogovit do tuva' do montok koposizon selajul, mooi do sompimunsikou i manananom om i mongongomot. 37 Tu' kosudong do doiti' i boovihan do: Songuhun o papasasad, i suvai o mongomot; 38 pinougad ku iziozu do mongomot do tomoton di okon ko' binuvat diozu. Vokon i' o minoobuvat dii om iziozu i' o noumḇosian do binuvatan dioho'.” 39 Ogumu' o tuhun Samaria do id kakaḏazan dii do notumḇazaan disido sabap no do vinakas di boos ngaavi' kasasian di tonḏu' do ontok minoboos do, “Pinosunud dogo' disido o saviavi' i nimaan ku.” 40 Kointutuk nopo disido i tuhun ngaavi' do Samaria, pokiinsian no izioho' disido do tuminḏooi isido miampai dioho'. Tinḏooi no isido do duvo tadau, om 41 ogumu' po vagu' o notumḇazaan disido sabap no do vinakas di boos ngaavi' do noboos disido doid dioho'; 42 om poboos no izioho' doid di tonḏu' do, “Do baino, okon nodii ko' otumḇazaan zikoi sabap no do nunu i noboos nu doid dagai; nokoongou zikoi no sonḏii' disido om nokoiho zikoi do totootopot do isido no i Mananampasi do pomogunan.” 43 Katahib nopo i duvo tadau, tongkizad no i Jesus do pinakaazan doid Galilee. 44 Tu' isido no sonḏii' i minoboos do au' i' pantangon o songuhun profeta do id kakaḏazan do kinoizonon dau sonḏii'. 45 Ontok nopo do koikot isido doid Galilee, tinoimo tavaavasi' do tuhun Galilee isido, tu' nongokokito do saviavi' i nimaan disido do id Jerusalem di ontok kivaa kalamazan i notinḏapou nogi' dioho'. 46 Ugad no vagu' isido doid Cana id Galilee, i kinoizonon do pinapavahiu isido do vaig do ḏuminadi do anggur. Om kivaa songuhun upisol i kitanak kitoluo do doiho' id Capernaum; 47 koongou nopo disido do nokoikot no i Jesus doid Galilee mantad Judaea, ugad no isido om pokiinsian no disido do mikot do momohingos di tanak dau, i maamaso no do mogimpapatai. 48 Poboos no i Jesus doid disido do, “Au' ko i' otumḇazaan sahagi-ngau' kokito ko po do tanḏa' om koimazaan ngaavi'!” 49 Simḇa no i upisol dii do, “Oi Tuan, ikot no do poguhu i' do apatai i tanak ku.” 50 Poboos no i Jesus do, “Uhi' no, apasi i' mai' i tanak nu.” Notumḇazaan di noboos di Jesus i tuhun om pamanau no do minuhi'; 51 om di kakaal po isido do id tinḏahanon, tukao' no isido di suupu ngaavi' dau i kiaḇal do napasi no i tanak disido. 52 Uoto' no dau izioho' do di songian i tanak do tuminimpuun do notibanasan. Om simḇa no izioho' do, “Nohinganganan isido do mantad toluo dau di koniab di jaam koiso' doungadau.” 53 Koihaai no di mohoing do ontok timpu diho' no do minoboos i Jesus do, “Apasi i' mai' i tanak nu”; om kotumḇazaai no isido om saviavi' puu do paganakan dau. 54 Tanḏa' kavavagu kumoduvo nopo diti, nga' i nimaan di Jesus ontok di guminuhi' isido mantad Judaea pakaazan doid Galilee.
1 Kahapas nopo ii, kivaa do kalamazan do Johudi, om ugad no i Jesus doid Jerusalem. 2 Do doiho' id Jerusalem, kivaa do botung pungaanan do Bethesda do id boos do Hebrew id doos di Botung Ḏoumḇa' i kivaa do himo hamin kinaakapa'; 3 om songinsusut nopo dii nga' tuhun togumu' i kitoluo, i nobohou, i nokimpo' om i napatai o sampapas tinan — songinganḏad do ohinggu' i vaig; 4 tu' kitimpu do mikot doid botung dii i tasab do Kinoingan, om ohinggu' no i vaig, om ii nopo kopoguhu do katabung doid vaig dii do ontok ohinggu' ii nga' ohingasan do nunu nopo i toluo dau. 5 Kivaa songuhun do doiho' dii do kitoluo do tohu ngoopod om vahu' toun no o hinaid, 6 om kokito nopo di Jesus isido do poinhuvi doiho' om koihaai dau do ahaid no isido dii do poingkaa nopo, poboos no isido do, “Mimang ko naku do ohingasan ko?” 7 Simḇa no i tuhun kitoluo do, “Oi Tuan, aiso songuhun do popoobug dogo' do doiho' id botung do ontok ohinggu' iho' vaig; om ontok do maso ku pakaazan do doiho', doiho' no o songuhun nokopoguhu dogo' do nakatabung.” 8 Poboos no i Jesus do, “Tungag no, onuo' ino tikam toodopon nu om mamanau no.” 9 Kohingasai no tuutulus o tuhun dii om onuo' no dau i tikam dau om pamanau no. Nga' tadau nopo dii nga' nokoontok do tadau Sabbath, 10 dadi' poboos no doid di tuhun nohingasan i Johudi ngaavi' do, “Tadau Sabbath iti; au' ko i' pakavasaon do mogovit dino tikam toodopon nu.” 11 Simḇa no isido do, “Nga' minoboos i tuhun i minomohingos dogo' do, ‘Onuo' ino tikam nu om mamanau no,’ ka.” 12 Uot no izioho' do, “Iisai o tuhun dino i minoboos diau do, ‘Onuo' ino tikam nu om mamanau no,’ ka?” 13 Au' i' nokoiho o tuhun dii do iisai ii, tu' nokoidu' no i Jesus do mantad doiho', tu' ogumu' o tuhun do doiho' dii. 14 Au' no ahaid do mantad dii kasaamanai no di Jesus isido do id suang di Panamḇazangan Tagazo, om poboos no isido do, “Nohingasan ko nodii do baino, kada' nodii pomiimidouso po, tu' alaalaat po dati' vagu' o koontok doid diau.” 15 Guhi' no ii tuhun om poihoo' no dau i Johudi ngaavi' do i Jesus i' i minomohingos dau. 16 Sabap no do minimang isido do miaga ngaavi' diti do ontok tadau Sabbath do tuminimpuun dii i Johudi ngaavi' do minonusa' di Jesus. 17 Simḇa nopo di Jesus doid dioho' nga', “Kakaal i' di Tama' ku do kumalaja', om izou nga' kumalaja' nogi'.” 18 Nga' hobi podii o kavaavakaso' do ginavo di Johudi ngaavi' do tipapamatai disido, tu' okon noopo ko' au' isido mamantang do tadau Sabbath nga' minama'ait nogi' do Kinoingan do i Tama' dau sonḏii' om minamadadi dau sonḏii' do miaga do Kinoingan. 19 Simḇa no i Jesus doid dioho' do: “Poihoon ku iziozu totootopot do, doid dau sonḏii' do aiso i' taanu-anu di Tanak do mimang; ii-ii no tokito disido do maan di Tama' o taanu disido do mimang: om nunu nopo i maan di Tama' nga' maan nogi' di Tanak. 20 Tu' guminavo di Tanak i Tama' om popokito disido do nuununu nopo i maan dau sonḏii', om pokitonon po mai' dau isido di hobi po ngaavi' ginazo ko' mantad ngaavi' diti, i kalaja' ngaavi' do kopopotigog mai' ngaavi' diozu. 21 Tu' miaga di Tama' tu' popotungag di nangapatai om manaak dioho' do koposizon, ingkaa nogi' i Tanak do manaak do koposizon doid iisai noopo i pihion dau; 22 tu' au' i' momḇisala' i Tama' do iisai-isai; nakataak no disido doid di Tanak o saviavi' kopomḇisalaan, 23 mooi do mamantang nodii di Tanak o saviavi' miaga nopo do mamantang izioho' di Tama'. Iisai nopo i au' mamantang di Tanak nga' au' nogi' mamantang di Tama' i pinopougad disido. 24 Poihoon ku iziozu totootopot do, iisai nopo i mokinongou di boos ku ngaavi'; om otumḇazaan doid di songuhun i pinopougad dogo'; nga' kikoposizon selajul; au' i' oovit doid kopomḇisalaan tu' nakavaza' no do mantad kapatazon kumaa doid koposizon o tuhun miaga diho'. 25 Poihoon ku iziozu totootopot, do mikot nodii i jaam — totootopot nopo nga' doiti' no ii — do mokinongou mai' di ohou di Tanak do Kinoingan i nangapatai om saviavi' i koongou dii nga' apasi mai'. 26 Tu' miaga di Tama' tu' kikoposizon doid dau sonḏii', ingkaa nogi' do nakapanaak isido di Tanak do koposizon doid disido sonḏii'; 27 om, sabap no do Tanak isido do tuhun, do nakapanaak dii disido do kuasa' do momḇisala'. 28 Kada' kosuvazai diti, tu' mikot nodii o jaam do tumongkizad mai' do hobong dioho' i nangapatai do ontok koongou do ohou disido: 29 ii nopo sontob nokoimang di tangavasi' nga' tumungag mai' doid koposizon; om ii nopo sontob nokoimang do tangalaat nga' tumungag mai' do maan ḇisalao'. 30 Aiso i' do taanu ku do mimang do soosonḏii'; kopomḇisala' zou noopo miaga di pinotuduk dogo' do momḇisala', om kopomḇisalaan ku nopo nga' otuhid, tu' okon ko' hizab ku sonḏii' o iumon ku nga' hizab i' disido i minonuu' dogo'. 31 Nung sumasi' zou do montok dogo' sonḏii', nga' au' i' otopot i kososian ku; 32 nga' kivaa i' do sasi' do suvai i moboos do id koobian ku, om koiho zou do otopot i kososian dau. 33 Pinopougad kou do susuu'on doid di John, om minanaak isido do kososian doid di katapatan — 34 okon i' ko' humansan zou do kososian do tuhun; au', moboos zou diti do montok do koponomposizan diozu. 35 I John nopo nga' i titiu i miisikit om maababang, om naanangan kou do munsikou do naamot nopo di ninavau i pinataak dau. 36 Nga' hobi po ginazo do kososian ku ko' i di John: ii kalaja' ngaavi' i pinataak di Tama' doid dogo' do maan tuhuko', kalaja' ngaavi' diho' maan ku sumasi' do sinuu' zou di Tama'. 37 Suvai ko iho', manaak do kososian sonḏii' doid dogo' i Tama' i minonuu' dogo'. Au' kou i' insan nokoongou do ohou dau, au' kou insan nokokito do okuukuo isido, 38 om au' i' kotinḏooi i boos disido doid diozu tu' au' kou otumḇazaan doid di songuhun i sinuu' dau. 39 Inoboson diozu i ḇuuk toḇitua, tu' otumḇazaan kou do kaanu kou do koposizon selajul doid dii; nga' ḇuuk toḇitua i' ngaavi' diti i sumasi' dogo', 40 nga' impio i' do au' kou mikot doid dogo' do monoimo do koposizon! 41 Koḇontugan nopo do tuhun nga' aiso i' do montok doid dogo'. 42 Suvai ko' iho', nokoiho zou kozo diozu: aiso i' do koginavaan do Kinoingan doid suang diozu. 43 Minikot zou doid ngaan di Tama' ku om au' kou i' monoimo dogo'; nga' nung kivaa mikot do id ngaan dau sonḏii', toimoon i' diozu isido. 44 Ingkuo kou dii do otumḇazaan, do mogium kou i' do koḇontugan do mantad tiso' om tiso' om au' kou i' opusou di koḇontugan i mikot mantad di Kinoingan i ii'iso' no? 45 Kada' kou pomusoou do papahasa' zou diozu do id dumḇangan di Tama': huminansan kou di Moses, om i Moses i mai' o pakahasa' diozu. 46 Nung totootopot kou do otumḇazaan disido tantu' no do otumḇazaan kou nogi' dogo', tu' kokomoi i' dogo' i sinuat dau; 47 nga' nung au' kou nopo otumḇazaan do nunu i sinuat dau, ingkuo kou nodii do otumḇazaan do nunu i binoos ku?”
1 Kahapas nopo iti, soboong no i Jesus di Daat Galilee — toi Tiberias — 2 om ogumu' o tuhun do tuminanud disido, tu' nongoimazaan di tanḏa' ngaavi' i nimaan disido do minomohingos di kitoluo. 3 Takad no i Jesus di nuhu om iikau no doiho' miampai di mokiki'ia' ngaavi' dau. 4 Oluai no om oikot no i kalamazan Pamakanan do Kinahapasan do Johudi. 5 Kotiangog nopo, nga' kokito no di Jesus o tuhun togumu' do minsomok om poboos no i Jesus doid di Philip do, “Id nomḇoo o bohizan dotokou do louti do paakanan diti tuhun ngaavi'.” 6 Minoboos isido diti do monginam noopo di Philip; tu' nokoiho isido sonḏii' do nunu i maan dau. 7 Simḇa no i Philip do, “Au' i' kogoogonop o duvo ngaatus dinarius do pomohi do toniininian po toi izioho' do songuhun.” 8 Poboos no o songuhun di mokiki'ia' ngaavi' disido, i Andrew, i tobpinai di Simon Peter do, 9 “Kivaa tanak doiti' do kivaa himo louti om duvo tinan sada', nga' nunu dii iho' do maan pogibooboogizo' do tuhun togumu'?” 10 Poboos no i Jesus doid dioho' do, “Suu'o' miikau iho' tuhun ngaavi'.” Oomḇung o sakot do doiho' dii, dadi' iikau no i tuhun ngaavi' i kiginumu' do himo ngoibu o kusai. 11 Dadi' onuo' no di Jesus i louti, ponongkotohuod no, om potikido' no ii doid di songinḏikau do doiho'; dadi' ingkaa nogi' o nimaan disido doid di sada', do pinopintikid dii do gisom i' do nogonop izioho'. 12 Kovizau nopo izioho' do makan, poboos no isido doid di mokiki'ia' ngaavi' dau do, “Puuvo' nodii diozu iho' nongoohu' mooi do aiso nodii do toubat.” 13 Dadi' puuvo' no dioho' ii om nokoponu' po do opod om duvo balatak tagazo o kinoohuan di takanon do himo o louti huvong. 14 Kokito nopo di tanḏa' i noimaan disido i tuhun ngaavi', poboos no izioho' do, “Totootopot no do i profeta iti i mikot doid pomogunan.” 15 Koihaai nopo di Jesus do miaga ko' mikot izioho' do mononsog do mogovit dau do dodizon do laja', pogidu' no isido soosonguhun do pinakaazan doid konuhuan. 16 Di kosodopon dii, ugad no i mokiki'ia' ngaavi' do doiho' id tisan di daat 17 om sakai no do padaau do pakaazan doid Capernaum i id soboong di daat. Otuvong nodii om au' po nokoikot doid dioho' i Jesus. 18 Modtongus do topuod, om i hakun do daat nga' mimang puod. 19 Kivaa no do tohu toi apat batu izioho' do momosi' di padaau do ontok kokito dioho' i Jesus do manau-panau do id soibau do daat om mintutuk di padaau. Nongoosizan izioho', 20 nga' poboos no isido do, “Izou i' iti. Kada' koosizai.” 21 Songintounḏa' izioho' do papasakai disido doid padaau, om tuutulus do kadapit no ii doid tisan daat di ngozon dioho'. 22 Di tadau suminusuut, kokito no di tuhun togumu' i tuminimpoon do doiho' id soboong do ii'iso' no o padaau do doiho', om do au' i' suminakai di padaau i Jesus do miampai di mokiki'ia' ngaavi' dau nga' nosonḏii'an i' do minugad i mokiki'ia' ngaavi' dau. 23 Nga' kivaa do padaau ngaavi' suvai nongokoikot do mantad Tiberias, id somok di pinangakanan do louti. 24 Kokito nopo di tuhun ngaavi' do aino' doiho' i Jesus om i mokiki'ia' ngaavi' dau, sakai no izioho' do padaau ngaavi' dii om soboong no do pinakaazan doid Capernaum do mogium di Jesus. 25 Kokito nopo dioho' isido do doiho' id soboong, poboos no izioho' doid disido do, “Oi Rabbi, di songian ko koikot doiti'.” 26 Simḇa no i Jesus do: “Poihoon ku iziozu totootopot do, mogium kou dogo' do okon ko' sabap do nokokito kou di tanḏa' ngaavi' nga' sabap do nongovizau kou do nakaakan di louti. 27 Kada' kou pakalaja' montok do takanon au' kataan, nga' pakalaja' no montok do takanon kataan montok do koposizon selajul, i pataakon mai' di Tanak do tuhun doid diozu, tu' i Tama', i Kinoingan sonḏii', o minananḏa' disido.” 28 Dadi' poboos no izioho' doid disido do, “Nunu di i mositi' do maan dagai nung maan no dagai i kalaja' i ponuu'an do Kinoingan?” 29 Simḇa no i Jesus doid dioho' do, “Ingkaa do mimang do kalaja' montok do Kinoingan: mositi' do otumḇazaan kou doid di songuhun i sinuu' disido.” 30 Dadi' poboos no izioho' do, “Nunu di o tanḏa' do pokitanan nu doid dagai, mooi do otumḇazaan zikoi diau? Nunu dii o kalaja' do maan nu? 31 Minangakan do manna id kotogisan i taki-aki dagai; miaga di poinsuat id ḇuuk toḇitua do: Nonuan disido izioho' do louti akanon do mantad surga, ka.” 32 Simḇa no i Jesus doid dioho' do, “Poihoon ku iziozu totootopot do, Okon i' ko' i Moses i minanaak diozu do louti mantad surga, i Tama' ku i' o manaak diozu do louti mantad surga, i louti totopot; 33 tu' louti nopo do Kinoingan nga' i louti i mikot mantad surga om i manaak do koposizon do id pomogunan.” 34 Poboos no izioho' do, “Oi tuan, onuai zikoi no tomoimo do louti dino.” 35 Simḇa no i Jesus doid dioho' do, “Izou no i louti do koposizon. Ii nopo mikot doid dogo' nga' au' nodii hoohouson po; om ii nopo otumḇazaan dogo' nga' au' nodii tuutuuvan po. 36 Nga', miaga di noboos ku diozu, do kokito kou dogo' om kakaal i' do au' kou otumḇazaan. 37 Saviavi' i taakon dogo' di Tama' nga' mikot mai' doid dogo'; om iisai nopo i mikot doid dogo' nga' tantu' no do au' ku i' tohikudan, 38 tu' nokoikot zou mantad surga, do okon i' ko' mimang do hizab ku sonḏii', nga' mimang di hizab disido i minonuu' dogo'. 39 Om ii nopo hizab disido i minonuu' dogo' nga' do aiso daa do atagak di saviavi' i pinataak dau doid dogo', nga' do potungagon ku daa ii do ontok tadau kohimpupuson. 40 Tu' ii nopo hizab di Tama' ku nga' iisai nopo i kotuubung di Tanak om otumḇazaan no doid disido nga' kikoposizan selajul, om potungagon ku i' o tuhun dino do ontok tadau kohimpupuson.” 41 Do naamot dii, au' navanangan disido i Johudi ngaavi', tu' nokoboos isido do, “Izou no i louti i nokoikot mantad surga.” 42 Poboos no izioho' do, “Iti no bo i Jesus dii, i tanak di Joseph, kotutun tokou di tama' om tina' dau. Ingkuo nodii isido do kaanu moboos do, ‘Minikot zou mantad surga?’ ka.” 43 Simḇa no i Jesus doid dioho' do, “Tood kou do mogikomi-komi. 44 Aiso i' do kaanu do mikot doid dogo' nung okon no ko' noovit isido di Tama' i minonuu' dogo', om tungagon ku i' mai' o tuhun dino do ontok tadau kohimpupuson. 45 Nokosuat ii doid ḇuuk di profeta ngaavi' do, ‘Ongo'ia' i' mai' izioho' do Kinoingan;’ om iisai nopo i nokopokinongou di Tama'; om nokopinsingiho mantad disido nga' mikot doid dogo'. 46 Aiso i' songuhun do nokokito di Tama', suvai ko' isido no i minikot mantad Kinoingan: i nokokito di Tama'. 47 Poihoon ku iziozu totootopot, do iisai nopo i otumḇazaan nga' kikoposizon selajul. 48 Izou no i louti do koposizon. 49 Minangakan do manna id kotogisan i taki-aki diozu om nangapatai izioho'; 50 nga' iti no i louti i mikot mantad surga, mooi do aakan do tuhun ii om au' dii apatai. 51 Izou no i louti i poimpasi i nokoikot mantad surga. Iisai nopo i mangakan do louti diti nga' apasi selajul; om louti nopo do pataakon ku nga' i tonsi ku, montok koposizon do pomogunan.” 52 Dadi' timpuun nodii i Johudi ngaavi' do minogiuva-uva do, “Ingkuo dii do kaanu o tuhun diti do manaak dotokou do tonsi dau do akanon?” 53 Simḇa no i Jesus do: “Poihoon ku iziozu totootopot do, nung au' kou nopo mangakan do tonsi di Tanak do tuhun om au' monginum do zaa' dau, nga' aiso i' do koposizon id suang diozu. 54 Iisai nopo i mangakan do tonsi ku om monginum do zaa' ku nga' kikoposizon selajul, om tungagon ku isido do ontok tadau kohimpupuson. 55 Tu' tonsi ku nopo nga' i takanon totopot om zaa' ku nopo nga' i tinumon totopot. 56 Ii nopo mangakan do tonsi ku om monginum do zaa' ku nga' mamaamasi id dogo' om mamaamasi zou id disido. 57 Miaga dogo' tu' sinuu' di Tama' poimpasi, om kaanu zou do koposizon mantad di Tama', ingkaa no do iisai nopo i mangakan dogo' nga' kaanu nogi' do koposizon mantad dogo'. 58 Iti no i louti i nokoikot mantad surga, okon ko' miaga di louti i nakan di taki-aki dotokou: nangapatai no izioho', nga' iisai nopo i mangakan do louti diti nga' apasi mai' do po'o'ompus.” 59 Iti no o pino'ia' disido do id sinagog do doiho' id Capernaum. 60 Koongou nopo dioho' ii, ogumu' di tutumanud ngaavi' disido do minoboos do, “Au' ataanan o boos diti. Ingkuo nodii do otoimo iho'?” 61 Nokoiho i Jesus do au' kotoimo i tutumanud ngaavi' dau do kokomoi dii om poboos no do, “Kakasou dii naku diozu iti? 62 Ingkuo nung kokito kou di Tanak do tuhun do minsavat kumaa doid nontodonon haid dau? 63 I Spiritu no i manaak do koposizon, tonsi nopo nga' aiso i' do titaak. Boos nopo ngaavi' i nokoboos ku diozu nga' spiritu om koposizon. 64 “Nga' kivaa do vookon diozu do au' otumḇazaan.” Tu' nokoiho i Jesus do mantad timpuun i' do iisai i au' otumḇazaan, om iisai i popotobus disido. 65 Poboos no vagu' isido do, “Iti no o sabap do nookuo tu' pinopoiho zou diozu do aiso i' do songuhun do kaanu mikot doid dogo' nung au' no isido pakavasaon di Tama'.” 66 Kahapas nopo iho', ogumu' di tutumanud ngaavi' disido do minogiduan disido om tuminood do tumanud disido. 67 Dadi' poboos no i Jesus doid di opod om duvo do, “Ingkuo kou iziozu, mogidu' kou nogi' naku?” 68 Simḇa no i Simon do, “Oi Tuhan, doid diisai dii o pakaazan dagai? Kivaa do diau do boos do koposizon selajul, 69 om otumḇazaan zikoi; om nokoiho zikoi do iziau no i Toḇitua di Kinoingan.” 70 Simḇa no i Jesus do, “Okon naku ko' pinihi' ku iziozu, i Opod om Duvo? Nga' songuhun diozu nopo nga' logon.” 71 Komozon nopo disido nga' i Judas i tanak di Simon Iscariot, tu' isido no i songuhun di Opod om Duvo, i popotobus disido.
1 Kahapas nopo iti douto' no di Jesus o Galilee; au' nakaanu isido do diminout do id Judaea, tu' mogium do lahan do mamatai disido i Johudi ngaavi'. 2 Di osomok nodii ii tadau-kalamazan-tagazo do Tabernakel do Johudi, 3 poboos no doid disido i tobpinai ngaavi' dau do, “Tongkizad no mantad doiti' om mugad no doid Judaea, mooi do i mokiki'ia' nu ngaavi' nga' kokito' nogi' di kalaja' ngaavi' i maan nu; 4 tu' aiso i' do tuhun di mimang do oihaan kozo do tuhun ngaavi' do mogohimu do mimang id kohimuvan; nung mimang ko do miaga diti, apatut do popointahang ko daa diau sonḏii' doid pomogunan.” 5 Tu' ii po tobpinai ngaavi' disido nga' aiso do kotumḇazaan doid disido. 6 Simḇa no i Jesus do, “Au' po noikot o timpu ku, nga' montok nopo diozu nga' soosongian noopo o timpu nga' koontok i'. 7 Au' i' kaanu do abaazatan diozu o pomogunan, nga' abaazatan dogo' ii, tu' manaak zou do katahangan do alaat o kalaja' ngaavi' dii. 8 Ugad kou no soosonḏii' doid kalamazan dino: Au' zou i' mugad doid kalamazan diti, tu' montok nopo dogo' nga' au' po noikot o timpu.” 9 Koboos nopo dau iho', timpoon no isido do id Galilee. 10 Nga' kotongkizad nopo i tobpinai ngaavi' dau do minugad doid kalamazan dii, nga' ponongkiugad no isido, do okon ko' noihaan do tuhun nga' minogohimu' i'. 11 Mogium disido do doiho' id kalamazan dii i Johudi ngaavi': “Nomḇoo no isido?” ka dioho'. 12 Ogumu' kozo o boos di tuhun togumu' do kokomoi disido. Vookon minoboos do, “Tuhun tavasi' isido;” nga' ii nopo suvai nga' minoboos do, “Okon, papapalavong isido dotokou.” 13 Nga' aiso i' do songuhun do moboos kokomoi disido do pointahang, tu' oosizan izioho' di Johudi ngaavi'. 14 Ontok do piintangaan do kalamazan dii, ugad no i Jesus doid Panamḇazangan Tagazo om timpuun no do mongia'. 15 Nangatangahan i Johudi ngaavi' om poboos no do, “Ingkuo dii isido do mininsingiho do mamḇasa'? Au' i' insan do no'ia' isido.” 16 Simḇa no doid dioho' i Jesus do, “Kopongia'an ku nopo nga' okon ko' mantad dogo' sonḏii': nga' mikot ii do mantad songuhun i minonuu' dogo'; 17 iisai nopo i pointounḏa' do mimang di hizab disido, nga' koiho mai' do mantad Kinoingan i kopongia'an ku ko' moboos zou montok dogo' sonḏii'. 18 Ontok nopo do moboos o tuhun do kokomoi dau sonḏii', nga' mogium isido do kapantangan montok dau sonḏii'; nga' ontok nopo do mogium isido do kapantangan montok di minonuu' disido nga' otopot no isido om aiso i' kopomudutan disido. 19 Okon naku ko' nonuan kou di Moses do Unḏang-unḏang? Nga' aiso tongosonguuhun diozu do minigit di Unḏang-unḏang! Nookuo nodii tu' ohizab kou do mamatai dogo'?” 20 Simḇa no i tuhun togumu' do, “Muhau ko! Iisai dii o mamatai diau?” 21 Simḇa no i Jesus do, “Nokoimang zou do iso' kalaja', om noimazaan kou dii. 22 Sinuu' kou di Moses do migit do kootulan do koponunatan — do okon ko' disido do ponuu' dii, nga' maamantad po di komohoingan ngaavi' ii — om monunat kou do ontok Sabbath. 23 Dadi' nung kavasa' do sunatan o tuhun do ontok do Sabbath do mooi do atanud nodii i Unḏang-unḏang di Moses, nookuo nodii tu' ohodong kou dogo' do kopomohingos zou do songuhun do ontok do Sabbath? 24 Kada' kou pomḇisala' tumanud do nunu i tokito diozu; nga' pomḇisala' kou no tumanud di nunu i totopot.” 25 Do naamot dii kivaa do vookon di tuhun do Jerusalem do minoboos do, “Okon naku ko' iti no i tuhun i maan dioho' patazo' dii? 26 Om doiti' isido diho', do okito do moboos, om aiso i' do kookomi dioho' doid disido! Otopot dii naku do nointutunan no di mongunguasa' ngaavi' do isido no i Kristus? 27 Nga' nokoiho tokou ngaavi' do mantad id nomḇoo isido, nga' ontok nopo do mintahang i Kristus, aiso i' do koiho do mantad nomḇoo isido.” 28 Dadi', di maamaso i Jesus do mongia' id panamḇazangan Tagazo, haad no isido do: “Koiho kou dogo' om koiho kou do mantad nomḇoo o nontodonon ku. Nga' okon i' ko' nopoizan zou do minikot: nga' otopot isido i minonuu' dogo'; au' kou i' nokoiho disido, 29 nga' koiho zou disido tu' mantad zou disido om isido no i minonuu' dogo'.” 30 Dadi' mimang daa izioho' do mamagakom disido, nga' sabap no do au' po noikot o timpu disido do aiso dii do minamagakom disido. 31 Nga', ogumu' di tuhun togumu', ii notumḇazaan doid disido; minoboos izioho' do, “Ontok nopo do mikot i Kristus, manaak i' naku isido do hobi gumu' do tanḏa' ngaavi' ko' tuhun diti?” 32 Koongou nopo do tumongkop doid di tuhun ngaavi' o boos do miaga diti do kokomoi disido, pougado' no di Pharisee ngaavi' i maamata' do panamḇazangan tagazo do mooi pamagakom disido. 33 Dadi' poboos no i Jesus do: “Oduuk nopo o timpu ku miampai diozu; dadi' gumuhi' zou nodii mai' doid di songuhun i minonuu' dogo'. 34 Mogium kou i' mai' dogo' om au' kou i' mai' ko'ium dogo'; au' kou i' kaanu mikot doid nomḇoo zou.” 35 Dadi' pogibooboos no i Johudi ngaavi' do, “Id nomḇoo dii o ngozon disido tu' au' tokou kaanu do mogium dau? Mugad dii naku isido doid di tuhun ngaavi' i nongokotongkop do id tuhun ngaavi' do Greek om mongia' do tuhun ngaavi' do Greek? 36 Nunu di komozon disido do ontok moboos do, ‘Mogium kou i' mai' dogo' om au' kou i' mai' ko'ium dogo'; au' kou i' kaanu do mikot doid nomḇoo zou,’ ka?” 37 Di tadau touvi nodii, i tadau tagazo kozo di kalamazan, ingkakat no i Jesus om haad no do: “Iisai nopo i tutuuvan nga' ikot no doid dogo'! 38 Pohogooso' i otumḇazaan doid dogo' do mikot om minum! Tu' ka di Ḇuuk Toḇitua: ‘Humuzung mai' do mantad tunḏuunḏu' disido o hokos ngaavi' do vaig poimpasi.’ ” 39 Komozon nopo dau dii nga' i Spiritu i toimoon mai' di sontob otumḇazaan disido; tu' au' po nakataak i Spiritu sabap au' po naḇantug i' Jesus. 40 Vookon di tuhun togumu' i minokinongou minoboos do, “Otopot no do profeta isido,” 41 om vookon minoboos do, “Isido no i Kristus,” om i suvai ngaavi' nopo nga' minoboos do, “Mantad dii naku do id Galilee i Kristus? 42 Au' naku noboos id Ḇuuk Toḇitua do i Kristus nopo nga' mositi' no do sinakagon di David om mikot mantad Bethlehem, i kampung nontodonon di David?” 43 Dadi' au' di kopogituutumḇozo' do kokomoi disido i tuhun ngaavi'. 44 Mimang daa do mamagakom disido o vookon, nga' aiso i' do songuhun dioho' do nakatama' do mamagakom disido. 45 Guhi' no i maamata' ngaavi' doid di huguan ngaavi' do padri' om doid di Pharisee ngaavi' i minoboos doid dioho' do, “Nookuo tu' au' diozu novit isido?” 46 Simḇa no i maamata' ngaavi' do, “Aiso po do songuhun i nokopoboos do miaga do tuhun diti.” 47 Simḇa no i Pharisee ngaavi' do, “Dadi', iziozu nga' noovit nogi' dii bo dino do uminahau? 48 Kivaa dii naku di mongunguasa' ngaavi' do notumḇazaan doid disido? Kivaa i' di Pharisee ngaavi'? 49 Tuhun ngaavi' diti nopo nga' aiso do toihaahaan kokomoi do Unḏang-unḏang — notou'an no izioho'.” 50 Songuhun mantad dioho', i Nicodemus, i guhu no kozo do nokoikot doid di Jesus minoboos doid dioho' do, 51 “Nga' tantu' no do au' i' tokou pakavasaon di Unḏang-unḏang dotokou do mongukum do tuhun do au' oongou po haid isido om soizukon po haid o nunu i nimaan dau?” 52 Simḇa no izioho' do, “Tuhun ko nogi' naku do Galilee? Soizuko' no, om bii'on no sonḏii': au' i' mikot mantad Galilee i profeta ngaavi'.” 53 Uhi' no ngaavi' izioho',
1 om ugad no i Jesus doid di Nuhu do Olives. 2 Kanavau nopo, imḇuhai no vagu' isido do doiho' id Panamḇazangan tagazo; om sabap no do minodidikot doid disido i tuhun ngaavi', do miniikau isido om tuminimpuun do mongia' dioho'. 3 Ovito' no di tangabaa do adat om di Pharisee ngaavi' o songuhun tonḏu' di nagakom do maso mimang talaat; om poingkakato' no zosido doid dumḇangan do saviavi', 4 poboos no izioho' doid di Jesus do, “Oi Tuan, nagakom o tonḏu' diti do maamaso mimang do koimaan talaat, 5 om id suang nopo do Unḏang-unḏang nga' nokoponuu' dagai i Moses do dunsongon do vatu o tonḏu' ngaavi' do miaga diti. Nunu ka nu iziau?” 6 Minuot izioho' diti do monginam disido, do mogium do kahasaan do pamadawa dioho' disido. Nga', tingkukub no i Jesus om timpuun no do monuat doid tana' do miampai di tuntuu' dau. 7 Sabap no do osonsog izioho' miampai di ti'uot dioho', tiangog no isido om poboos no do, “Kivaa nopo diozu i au' nokopomidouso nga' poguuguhu no do momodunsong dosido do vatu.” 8 Dadi' tingkukub no isido om ponuat no vagu' do id tana'. 9 Koongou nopo dioho' iti nga' pogigidu' no izioho' do toiso'-iso' i', tuminimpuun mantad di totuo no kozo, gisom i' do songuhun podii i Jesus do noohu' miampai di tonḏu', i au' mininsud do poingkakat do doiho'. 10 Tiangog no vagu' i Jesus om poboos no do, “Oi tonḏu', nomḇoo no izioho'? Aiso naku do songuhun do minongukum diau?” 11 “Aiso i', oi tuan,” ka dosido do suminimḇa. Om poboos no i Jesus do, “Izou nga' au' nogi' mongukum diau. Pamanau no, om kada' nodii pomidouso.” 12 Koboos nopo vagu' i Jesus doid di tuhun ngaavi', poboos no isido do: Izou no i ninavau do pomogunan; iisai nopo i tumanud dogo' nga' au' i' mai' mamanau do id totuvong nga' kininavau mai' do koposizon. 13 Poboos no doid disido i Pharisee ngaavi' do, “Sumasi' ko doid diau sonḏii'; kososian nu nopo nga' au' i' otopot.” 14 Simḇa no i Jesus do: “Sunḏung i' ma do sumasi' zou doid dogo' sonḏii', nga' kakaal i' do otopot i kososian ku, tu' koiho zou do mantad nomḇoo zou om nomḇoo o pakaazan ku; nga' au' kou i' koiho do mantad nomḇoo zou toi ko' id nomḇoo o pakaazan ku. 15 Momḇisala' kou do tumanud do tonsi; aiso i' do ḇisalaon ku, 16 nga' nung momḇisala' zou, nga' otopot mai' i pomḇiḇisala' ku, tu' okon ko' soosonguhun zou: miampai i' dogo' i songuhun i minonuu' dogo': 17 om nokosuat do id Unḏang-unḏang diozu do ii nopo kososian do duvo sasi' nga' otopot. 18 Sumasi' zou do id koobian ku sonḏii', nga' i Tama' i minonuu' dogo' nga' sumasi' nogi' do id koobian ku.” 19 Uot no disido izioho' do, “Id nomḇoo dii i Tama' nu?” Simḇa no i Jesus do: “Au' kou i' kotutun dogo' toi ko' di Tama' ku; nung nokotutun kou dogo' nga' nokotutun kou nogi' di Tama' ku.” 20 Binoos disido o boos ngaavi' diti do id doos di Poizazanan do Titaak, do maso mongia' id Panamḇazangan tagazo. Aiso songuhun do minamagakom disido, tu' au' po noikot o jaam dau. 21 Poboos no vagu' isido doid dioho' do, “Mogidu' zou nodii; mogium kou i' mai' dogo' om matai kou i' mai' doid ḏouso diozu. Au' kou i' koongoi doid nomḇoo o ngozon ku.” 22 Dadi' pogibooboos no i Johudi ngaavi' do, “Dumuso sonḏii' naku isido tu' moboos isido do, ‘Au' kou i' koongoi doid nomḇoo o ngozon ku,’ ka?” 23 Tihomḇus no i Jesus do minoboos do: “Mantad kou do id siibo'; mantad zou izou do id savat. Mantad kou do id pomogunan diti; okon ko' mantad zou do id pomogunan diti. 24 Nobiisaan ku no haid iziozu: apatai kou mai' doid ḏouso ngaavi' diozu. Oo', nung au' kou no otumḇazaan do izou no Isido, apatai kou mai' do id ḏouso ngaavi' diozu.” 25 Dadi' poboos no izioho' doid disido do, “Iisai ko?” Simḇa no i Jesus do: “Nunu i pinoihaan ku doid diozu do mantad timpuun i'. 26 Ogumu' o booson om ḇisalaon ku do kokomoi diozu; nga' otopot ii songuhun i minonuu' dogo', om nunu i noongou ku mantad disido nga' booson ku kumaa doid pomogunan.” 27 Au' i' izioho' nakalati' do moboos isido doid dioho' kokomoi di Tama'. 28 Dadi' poboos no i Jesus do, “Ontok nopo do koinsavat diozu i Tanak do tuhun, dadi' koiho kou nodii do izou no Isido om do aiso i' dii maan ku do mantad dogo' sonḏii'. Nunu i noko'ia' di Tama' doid dogo' nga' ii no i po'ia'on ku; 29 miampai i' dogo' i minonuu' dogo', om au' zou i' dinuanan dau do soosonguhun, tu' tomoimo zou do mimang do nunu i kopopounsikou ngaavi' disido.” 30 Di maamaso isido do moboos diti, ogumu' i notumḇazaan doid disido. 31 Poboos no i Jesus doid di Johudi ngaavi' i notumḇazaan disido do, “Nung dodizon diozu do tizonon diozu i boos ku nga' otopot no do mokiki'ia' ku iziozu; 32 kalati' kou i' mai' di katapatan, om pagabason kou i' di katapatan.” 33 Simḇa no izioho' do, “Sinakagon zikoi ngaavi' di Abraham om au' i' izikoi insan do nokosuupu do iisai nopo, nunu o komozon nu do, ‘Kagabas kou i' mai' ngaavi',’ ka?” 34 Simḇa no i Jesus do: “Poihoon ku iziozu totootopot, iisai nopo i momidouso nga' suupu. 35 Ii nopo tizonon di suupu do id hamin nga' au' i' potihomḇus, nga' ii nopo tizonon di tanak nga' potihomḇus. 36 Dadi', nung pagabason kou di Tanak, nga' totootopot kou i' do kagabas. 37 Nokoiho zou do sinakagon kou di Abraham; nga' mimang kou do mamatai dogo', tu' au' ko'ium do izonon do id diozu o boos ku. 38 Iti nopo booson ku nga' mantad do nunu i nokito ku do id di Tama' ku, om iziozu nga' mimang nogi' di kopongia'an ngaavi' i nopinsingihaan diozu mantad di tama' diozu.” 39 Poboos no vagu' izioho' do, “I tama' nopo dagai nga' i Abraham.” Poboos no i Jesus doid dioho' do, “Nung tanak kou nopo di Abraham, nga' imang no do miaga di noimaan di Abraham. 40 Nga', mimang kou i' do mamatai dogo', i songuhun i nokopononsunud diozu di katapatan i noihaan ku mantad Kinoingan; okon i' ko' ino' i nimaan di Abraham. 41 Kalaja' i' di tama' diozu ino maan diozu.” Simḇa no izioho' do, “Okon i' ko' nosusu zikoi do mantad nompou'an, i tama' nopo dagai nga' ii'iso' no i Kinoingan.” 42 Simḇa no i Jesus do: “Nung Kinoingan nopo o Tama' diozu, nga' guminavo kou i' dogo', tu' nontodonon ku nopo nga' Kinoingan om mantad zou i' doid disido; okon i' ko' nopoizan zou do minikot, nga' sinuu' zou i' disido. 43 Nookuo tu' au' kou kalati' do nunu i booson ku? Sabap nopo nga' au' kou kataan do mokinongou di boos ku ngaavi'. 44 Mantad kou i' di tama' diozu, i logon, om momihi' kou do mimang do nunu i pokionuon ngaavi' di tama' diozu. Momomoduso no haid isido do maamantad po; tu' isido nopo nga' au' insan katatap do id katapatan; tu' aiso i' do katapatan do id disido. Ontok nopo do momudut isido, nga' moboos isido do otopot tumanud di koulaalaho' dau, tu' momumudut isido, om i tama' do saviavi' vudut. 45 Nga' sabap no do moboos zou di totopot, do au' kou dii otumḇazaan dogo'. 46 Iisai diozu o kaanu do mononḏos do nokopomidouso zou? Nung moboos zou di totopot, nookuo nodii tu' au' kou otumḇazaan dogo'? 47 Iisai nopo i mikot mantad Kinoingan nga' mokinongou di boos ngaavi' do Kinoingan; sabap nopo do au' kou mokinongou nga' okon ko' mantad Kinoingan kou.” 48 Simḇa no i Johudi ngaavi' do, “Okon naku ko' pointunud zikoi do moboos do tuhun ko do Samaria om i nosuang do logon?” Simḇa no i Jesus do: 49 “Au' zou i' nosuang; nga' mamantang zou di Tama', om au' kou i' mamantang dogo'. 50 Okon i' ko' mogium zou do koḇontugan ku sonḏii'; kivaa i' do songuhun i mogium dii om i momḇiḇisala' dii. 51 Poihoon ku iziozu totootopot, iisai nopo i tumanud di boos ku nga' au' i' kokito do kapatazon.” 52 Poboos no i Johudi ngaavi' do, “Noihaan nodii dagai do baino do nosuang ko do logon. Napatai no i Abraham, om i profeta ngaavi' nga' napatai, om moboos ko po do, ‘Iisai nopo i tumanud di boos ku nga' au' i' kokinam do kapatazon,’ ka nu. 53 Agazo ko podii naku ko' i tama' dagai i Abraham, i napatai no? I profeta ngaavi' nga' napatai nogi'. Iisai ko dii do tosoou nu?” 54 Simḇa no i Jesus do, “Nung mogium zou do koḇontugan ku sonḏii' nga' aiso i' do hoohoogo do koḇontugan ku dii; totopot nopo nga', ii nopo koḇontugan ku nga' pinataak di Tama' doid dogo', i songuhun noboos diozu do, ‘Isido no i Kinoingan dagai,’ ka, 55 sunḏung i' ma do au' kou kotutun disido. Nga' kotutun zou i' disido, om nung moboos zou do, ‘Au' zou i' kotutun disido,’ ka nga' momumudut zou, miaga diozu tu' momumudut. Nga' kotutun zou disido, om ouhi' zou do tumanud di boos dau. 56 Minunsikou i tama' diozu i Abraham do momusoou do kokito isido do Tadau ku; nokokito isido dii om nounsikou.” 57 Dadi' poboos nodii i Johudi ngaavi' do, “Au' ko po nokohimo ngoopod toun, om nokokito ko no di Abraham!” 58 Simḇa no i Jesus do, “Poihoon ku iziozu totootopot, poguhuu i' do nohodi' i Abraham, izou no haid.” 59 Dadi' paganu no izioho' do vatu ngaavi' do pamagavad dioho' disido, nga' hosok no i Jesus om tongkizadai no dau i Panamḇazangan tagazo.
1 Do maso i Jesus mamanau, kokito no disido o songuhun i nobohou mantad po di kohodi'. 2 Uot no disido i mokiki'ia' ngaavi' dau do, “Oi Rabbi, iisai dii o nokopomidouso, tuhun diti ko' i mohoing dau, tu' nohodi' isido do poimbohou?” 3 Simḇa no i Jesus do, “Okon i' ko' tuhun diti toi ko' i mohoing dau o nokopomidouso, nga' nohodi' isido do poimbohou mooi do kointahang nodii doid disido i kalaja' ngaavi' do Kinoingan. 4 “Do maso po do anavau mositi' no do kalajaon dotokou i kalaja' di songuhun i minonuu' dogo'; kotuvong nopo mai' nga' aiso nodii kaanu do pakalaja'. 5 Do naamot ku do doiti' id pomogunan, izou no i ninavau do pomogunan.” 6 Koboos nopo disido iti, pomoduha' no isido doid tana', pomisi' no isido do tana' miampai di ḏuha', potopiso' no dau ii doid mato di tuhun nobohou 7 om poboos no doid disido do, “Ugad no om momohiung no doid Botung do Siloam” (i kilati' do, “i songuhun i sinuu'”). Dadi' ugad no isido om pomohiung no, om guhi' no om kokito nodii. 8 Poboos nodii i sungkad-tukad disido om i tuhun ngaavi' i noubas do kopikiikito haid disido (tu' mokikiukut haid isido) do, “Okon ko iti no i tuhun i noubas do miikau om mokiukut dii?” 9 Vookon minoboos do, “Oo', isido no iho'.” Vookon minoboos do, “Okon, nga' kokiikitanai nopo disido nga' miagaaga disido.” Poboos no i tuhun dii sonḏii' do, “Izou no i tuhun dii.” 10 Dadi' poboos no izioho' doid disido do, “Dadi' ingkuo dii ino mato nu do nokoungkahat?” 11 Simḇa no isido do, “I tuhun pungaanan do i Jesus minomisi' do tana', potopiso' no ii doid mato ku om poboos no doid dogo' do, ‘Pamanau no om momohiung no do doiho' id Siloam,’ ka; dadi' ugad zou no, om kopomohiung zou nopo nga' koungkahat no o mato ku.” 12 Uot no izioho' do, “Id nomḇoo no isido?” Simḇa no isido do, “Au' zou nokoiho.” 13 Ovito' no dioho' i tuhun nobohou haid dii doid di Pharisee ngaavi'. 14 Nokoontok do tadau Sabbath ii di ontok minomisi' i Jesus do tana' om pinopoungkahat do mato di tuhun, 15 dadi' uoto' nopo isido di Pharisee ngaavi' do ingkuo isido do nokokito, nga' poboos no isido do, “Tinopisan disido do tana' o mato ku, om pomohiung zou no om kokito zou no.” 16 Dadi' minoboos o vookon di Pharisee ngaavi' do, “Okon i' ko' mantad Kinoingan o tuhun diho': au' isido mamantang do tadau Sabbath.” Vookon minoboos do, “Ingkuo dii o momimidouso do kaanu mimang do tanḏa' ngaavi' do miaga diti?” Om nopibaabaagi dii izioho'. 17 Dadi' poboos no vagu' izioho' doid di tuhun nobohou do, “Kuo ka nu iziau sonḏii' do kokomoi disido, tu' do baino nokoungkahat nodii disido o mato nu?” Simḇa no o tuhun dii do, “Profeta isido.” 18 Nga' au' otumḇazaan i Johudi ngaavi' do nobohou haid o tuhun dii nung au' po kopomohoou di duuduvo mohoing di tuhun nokoungkahat o mato do muot dioho' do, 19 “Totootopot naku do tanak diozu o tuhun diti i noboos diozu do nohodi' do poimbohou? Nung ingkaa, ingkuo di isido tu' kokito do baino?” 20 Simḇa no ngoduvo i mohoing disido do, “Koiho zikoi do isido no i tanak dagai om koiho zikoi do nohodi' isido do poimbohou, 21 nga' au' i' zikoi koiho do ingkuo isido tu' kokito nodii toi ko' iisai i pinopoungkahat do mato dau. Uoto' no isido. Nosukod no isido: pohogoso' isido do moboos montok dau sonḏii'.” 22 Minoboos ngoduvo i mohoing disido do miaga diti tu' koosi izioho' di Johudi ngaavi', i nokopogiakun-akun no do popoidu' mantad di sinagog do iisai noopo i mangakun do i Jesus no i Kristus. 23 Iti no o sabap do minoboos ngoduvo i mohoing disido do, “Nosukod no isido; uoto' no isido.” 24 Dadi' pokihaavai no vagu' di Johudi ngaavi' o tuhun dii om poboos no doid disido do, “Ḇontugo' no o Kinoingan! Nokoiho zikoi no do tuhun nopo dii nga' momimidouso.” 25 Simḇa no o tuhun dii do, “Au' zou i koiho nung momimidouso isido; koiho zou noopo do nobohou zou haid om baino kokito zou nodii.” 26 Poboos no izioho' doid disido do, “Nunu o nimaan disido doid diau? Ingkuo isido do pinopoungkahat do mato nu?” 27 Simḇa no isido do, “Nobiisaan ku no haid iziozu om au' kou i' minokinongou. Nookuo nodii tu' mokisusui kou po vagu' do kokomoi dii? Mimang kou nogi' naku do ḏumadi do mokiki'ia' ngaavi' dau?” 28 Soosongio' no dioho' isido do, “Iziau no i mokiki'ia' dau, nga' izikoi nopo nga' mokiki'ia' ngaavi' di Moses: 29 koiho zikoi do minoboos o Kinoingan doid di Moses, nga' montok nopo do tuhun diti, au' i' izikoi koiho do mantad nomḇoo isido.” 30 Simḇa no i tuhun do, “Ino' no o au' olotian! Pinoungkahat disido o mato ku, om au' kou i' koiho do mantad nomḇoo isido! 31 Koiho tokou do au' i' mokinongou do momimidouso ngaavi' o Kinoingan, nga' mokinongou doid tuhun ngaavi' tobinsamḇayang om mimang di hizab dau o Kinoingan. 32 Mantad po di kavangun o pomogunan aiso po do songuhun do noongou do pinopoungkahat do mato do tuhun i nohodi' do poimbohou; 33 nung okon nopo ko mantad Kinoingan o tuhun diti, nga' au' i' kaanu isido do mimang do nuununu.” 34 Simḇa no izioho' do, “Kuminam ko naku do mongia' dagai, momimidouso ko no haid do maamantad po di kohodi' ko!” Om uzazango' no dioho' isido. 35 Noongou di Jesus do nouzazang dioho' isido, om kokito nopo dau isido, poboos no isido doid disido do, “Otumḇazaan ko naku doid di Tanak do tuhun?” 36 Simḇa no o tuhun dii do, “Oi tuan, poihoo' zou gia do iisai isido mooi do otumḇazaan zou nodii doid disido.” 37 Poboos no i Jesus do, “Nokokito ko no disido; maso isido moboos doid diau.” 38 Poboos no o tuhun dii do, “Oi Tuhan, otumḇazaan zou,” om samḇa no disido. 39 Poboos no i Jesus do: “Montok i' do kopomḇisalaan do nokoikot zou do doiti' id pomogunan, mooi do iisai nopo i au' kokito nga' kokito mai' om iisai nopo i kokito nga' obohou mai'.” 40 Koongou nopo di vookon di Pharisee ngaavi' i doiho' iti, poboos no doid disido do, “Dadi' nobohou dii naku izikoi?” 41 Simḇa no i Jesus do, “Nung nobohou kou daa, nga' au' kou i' kahasa', nga' sabap no do moboos kou do, ‘Kokito zikoi,’ ka nga' pointimpoon no i hasa' ngaavi' diozu.”
1 “Poihoon ku iziozu totootopot, iisai nopo i au' maza' di vavazaan do sumuang doid kukuungan di ḏoumḇa', nga' muva' i' doid vazaan suvai, nga' mananakau om magagaau. 2 Ii nopo sumuang maza' di vavazaan nga' i gugumompi di ḏoumḇa'; 3 posuangon isido di mintatamong do vavazaan, koongou do ohou disido i ḏoumḇa', hoovon disido o toiso'-iso' di ḏoumḇa' dau om oviton no disido izioho' do humabus. 4 Ontok nopo do kahabus disido o saviavi' i doun dau, moguhu no isido dioho', om tumanud no i ḏoumḇa' ngaavi' tu' kotutun izioho' do ohou dau. 5 Au' i' mai' izioho' tumanud di songkosuvazan, nga' mogidu' izioho' mantad disido tu' au' i' izioho' kotutun do ohou di songkosuvazan ngaavi'.” 6 Pinosunud di Jesus doid dioho' o boovihan diti nga' au' i' nakalati' izioho' do nunu i booson disido doid dioho'. 7 Dadi' poboos no vagu' i Jesus doid dioho' do, “Poihoon ku iziozu totootopot, Izou no i vavazaan do kukuungan do ḏoumḇa'. 8 Saviavi' i nokoikot do poguhu dogo' nga' mananakau om magagaau ngaavi', nga' au' i' nokotutun dioho' i ḏoumḇa' ngaavi'. 9 Izou no i vavazaan. Iisai nopo i sumuang maza' dogo' nga' atampasi mai': om sumuang om humabus mai' isido om ko'ium i' do pagkatapan. 10 Ii nopo mananakau nga' mikot noopo do manakau om mamatai om mogohimas. Nokoikot zou mooi do kikoposizon nodii izioho' om kasanganu dii do poimponu'. 11 Izou no i gugumompi tavasi': ii nopo gugumompi tavasi' nga' popounḏun do kiniopon dau do montok di ḏoumḇa' ngaavi' dau. 12 Ii nopo gogojihon, tu' okon i' ko' i gugumompi isido om okon ko' disido di ḏoumḇa' ngaavi', nga' manangkus do mogiduan di ḏoumḇa' ngaavi' do ontok kokito di tasu-tahun do mikot, om dadi' tabpaan om pogitootongkizadon nodii di tasu-tahun i ḏoumḇa' ngaavi'; 13 manangkus isido do mogidu' tu' isido nopo nga' gogojihon noopo om au' i' oupus di ḏoumḇa' ngaavi'. 14 Izou no i gugumompi tavasi'; kotutun zou i' di doun dogo' om i doun dogo' nga' kotutun dogo', 15 miaga nopo do kotutun dogo' i Tama' om kotutun zou di Tama'; om pounḏunon ku o kiniopon ku montok di ḏoumḇa' ku ngaavi'. 16 Om kivaa po do ḏoumḇa' ku ngaavi' do suvai i au' poingampai do id kukuungan diti, om iti ngaavi' nga' mositi' nogi' do buu'anon ku. Mokinongou nogi' mai' izioho' do ohou ku, om ii'iso' po dii mai' o panon om iso' o gugumompi. 17 Guminavo dogo' i Tama', tu' pounḏunon ku o kiniopon ku mooi do aanu ku vagu' ii. 18 Aiso i' kapagaau dii do mantad dogo'; izou i' sonḏii' o popounḏun dii om sabap no do kikuasa' zou do popounḏun dii, do kikuasa' zou po nogi' do maganu vagu' dii: om iti no i ponuu' i notoimo ku mantad di Tama' ku.” 19 Hobi po do nopibabaagi vagu' i Johudi ngaavi' sabap no do boos ngaavi' diti. 20 Ogumu' o minoboos do, “Nosuang isido do logon, muhau isido; nookuo tu' mokinongou kou disido?” 21 Minoboos o vookon do, “Okon i' ko' ingkaa o boos ngaavi' do tuhun i nosuang do logon: kaanu dii naku o logon do popoungkahat do mato di nobohou?” 22 Timpu do kalamazan tagazo do Kapamantangan do Hamin Sasamḇayangan Tagazo do id Jerusalem do ontok dii. Timpu tosogit ii, 23 om doiho' id Panamḇazangan tagazo i Jesus do minzuzu do mamanau do id Bantaan di Solomon. 24 Dadi' guumungai no isido di Johudi ngaavi' om poboos no do, “Songkuo di hinaid do popohogos ko dagai doid koompuvangan? Nung i' Kristus ko, poihoo' no izikoi do pointahang.” 25 Simḇa no i Jesus do, “Nokoiho ku no iziozu, nga' au' kou otumḇazaan. Kalaja' nopo ngaavi' i maan ku do id ngaan di Tama' ku nga' sumasi' doid dogo'; 26 nga' au' kou otumḇazaan, tu' okon i' ko' i ḏoumḇa' ku ngaavi' iziozu. 27 Ii nopo dogo' do ḏoumḇa' nga' mokinongou do ohou ku; kotutun zou dioho' om tumanud dogo' izioho'. 28 Onuan ku izioho' do koposizon selajul; au' i' mai' atagak izioho' om aiso i' mai' do kaanu do manakau dioho' do mantad hongon ku. 29 Hobi po ginazo di Tama' i pinapataak dioho' doid dogo', ko' i suvai, om aiso i' kaanu do manakau do nunu noopo do mantad hongon di Tama'. 30 I Tama' om izou nopo nga' isoo' i'.” 31 Paganu no do vatu do pomodunsong disido i Johudi ngaavi', 32 dadi' poboos no i Jesus doid dioho' do, “Ogumu' o kalaja' tangavasi' do pinokitanan ku diozu do mantad di Tama' ku; toomḇo nodii diho' o kopomodunsangan diozu dogo' do vatu?” 33 Simḇa no disido i Johudi ngaavi' do, “Okon i' ko' momodunsong zikoi diau do vatu sabap do nokoimang ko do kalaja' tavasi', nga' sabap i' do pakalaat ko do Kinoingan; tu' tuhun ko' i' toomod, om magampa ko do Kinoingan ko.” 34 Simḇa no i Jesus do, “Au' naku poinsuat do id Unḏang-unḏang diozu: do minoboos zou do, kinoingan kou ngaavi'? 35 Dadi' momoguno iho' do boos do ‘kinoingan ngaavi'’ do montok di tuhun ngaavi' di pinotuḏuvan di boos do Kinoingan — om au' i' miho do pobibion o Ḇuuk Toḇitua. 36 Dadi' kumaa doid songuhun i noḇitua di Tama' om i pinougad doid pomogunan moboos kou do, ‘Pakalaat ko do Kinoingan,’ ka tu' minoboos zou do, ‘Tanak zou do Kinoingan.’ 37 Nung au' zou kumalaja' di kalaja' di Tama' ku, au' i' tagal do otumḇazaan dogo'; 38 nga' nung kumalaja' zou dii, dadi' sunḏung potuu do au' kou otumḇazaan dogo', nga' sokuukuang no do kotumḇazaai no daa di kalaja' di nimaan ku; dadi' pointantu' dii do koiho kou do i Tama' nopo nga' id suang dogo' om id suang zou di Tama'.” 39 Dadi' maan daa dioho' gokomo' isido, nga' pogidu' no isido mantad dioho'. 40 Guhi' no vagu' isido doid soboong di Jordan i uvang i pinomodsuan haid di John om izon no doiho'. 41 Ogumu' o tuhun i minikot doid disido do minoboos do, “Aiso i' do tanḏa' ngaavi' do nimaan di John, nga' ongotopot i noboos disido kokomoi do tuhun diti;” 42 om ogumu' dioho' o notumḇazaan disido.
1 Kivaa tuhun pungaanan do i Lazarus do mantad Bethany, i kampung di Mary om di tobpinai dau tonḏu', i Martha, om kitoluo isido. 2 I Mary no ii, i tobpinai di tuhun kitoluo i Lazarus, i minongumau di Tuhan do miampai do tumau toongid om piido' no dau do tobuk dau o gakod disido. 3 Pobuzuo' no do tonḏu' miobpinai dii o pason kumaa doid di Jesus do, “Oi Tuhan, kitoluo i tuhun i koginavaan nu.” 4 Kotoimo nopo di Jesus i pason poboos no isido do, “Au' i' popoikot doid kapatazon o toluo diti, nga' montok i' do koḇontugan do Kinoingan mooi do maza' diti do aḇantug nodii mai' i Tanak do Kinoingan.” 5 Guminavo i Jesus di Martha om di tobpinai tonḏu' dosido om di Lazarus, 6 nga' koongou nopo disido do kitoluo isido nga' timpoon po vagu' isido do duvo po tadau do id nomḇoo isido dii 7 do poguhu i' do minoboos doid di mokiki'ia' ngaavi' dau do, “Kanou gumuhi' doid Judaea.” 8 Poboos no i mokiki'ia' ngaavi' do, “Oi Rabbi, au' po ahaid mantad di nimaan ko daa di Johudi ngaavi' dunsongo' do vatu; gumuhi' ko po naku vagu' do doiho'?” 9 Simḇa no i Jesus do: “Okon naku ko' opod om duvo jaam do sangadau? Aiso i' do kasadu do mamanau do ontok anavau, tu' kininavau i' o pomogunan diti do pamabang; 10 iisai nopo i mimpanau do ontok doungosodop nga' kasadu, tu' aiso do ninavau do popotunud disido.” 11 Binoos disido iho' om oputai no vagu' do, “Poingunḏoong no i Lazarus i tamḇahut dotokou; mugad zou do momosik disido.” 12 Poboos no i mokiki'ia' ngaavi' doid disido do, “Oi Tuhan, nung poingunḏoong isido nga' atampasi i' mai' isido.” 13 Binoos nopo di Jesus nga' kokomoi do kapatazon di Lazarus, nga' soou dioho' do komozon nopo disido do “munḏoong” nga' “modop”; 14 dadi' patahango' no di Jesus do, “Napatai no i Lazarus; 15 om nga' montok i' diozu do ounsikou zou do aino' zou do doiho' sabap do baino otumḇazaan kou nodii mai'. Nga' kanou no mongoi do doiho' disido.” 16 Dadi' poboos no i Thomas — i pungaanan do i Tapid — doid di mokiki'ia' ngaavi' suvai do, “Kanou no mongoi nogi' patai miampai disido.” 17 Koikot nopo, koihaai no di Jesus do apat nodii tadau i Lazarus do poinsuang do id hobong. 18 Bethany nopo nga' kuang hobi do duvo no batu mantad Jerusalem, 19 om ogumu' o Johudi do minikot doid di Martha om di Mary do monginsasamod dioho' sabap no di tobpinai kusai dioho'. 20 Koongou nopo di Martha do mikot i Jesus, ngozo' no dosido tukao' isido. Au' mininsud do poinḏikau do id daamin i Mary. 21 Poboos no i Martha doid di Jesus do, “Oi Tuhan, nung doiti' ko daa dii, nga' au' i' daa apatai i tobpinai ku, 22 nga' baabaino po diti nga' koiho zou do nunu nopo i pokionuon nu do Kinoingan nga' onuan ko i' disido.” 23 Poboos no i Jesus doid dosido do, “Tumungag i' mai' vagu' i tobpinai nu.” 24 Poboos no i Martha do, “Koiho zou do tumungag i' vagu' isido do ontok kopotungagan do id timpu kohimpupuson.” 25 Poboos no i Jesus do: “Izou no i kotungagan. Iisai nopo i otumḇazaan dogo', sunḏung potuu do apatai isido, nga' apasi mai', 26 om iisai nopo i masi om otumḇazaan doid dogo' nga' au' mai' apatai. Otumḇazaan ko naku diti?” 27 Poboos no zosido do, “Oo', oi Tuhan, otumḇazaan zou do iziau no i Kristus, i Tanak do Kinoingan, i songuhun mikot do doiti' id pomogunan.” 28 Koboos nopo dosido iti, ngozo' no dosido hoovo' i tobpinai dau i Mary, buungai no dau do, “Doiti' i Tuan om ohizab do tumuubung diau.” 29 Koongou nopo dosido iti, sikapo' no di Mary do miningkakat om ongoi no tuka' disido. 30 Au' po nokoikot i Jesus doid kampung dii; kakaal po isido do doiho' id kinasaamaanan di Martha disido. 31 Kokito nopo di Johudi ngaavi' i doiho' id daamin do ontok dii do monginsasamod di Mary, do magab-agab i' zosido do mingkakat om habus no, tonudo' no dioho' zosido, soou dioho' do mugad zosido doid kahabangan do mooi pogiad. 32 Ongoi no tuka' di Jesus i Mary om kasaamaanai nopo dosido isido singkotud no zosido do id doos do takod disido do moos-boos do, “Oi Tuhan, nung doiti' ko daa dii, nga' au' i' daa apatai i tobpinai ku.” 33 Kokito nopo di Jesus zosido do miad, om di Johudi ngaavi' i maatanud dosido, noikot no do nosusa' i Jesus, om miampai do onsu topuod poboos no isido do, 34 “Id nomḇoo o pinoizanan diozu disido?” Poboos no izioho' do, “Oi Tuhan, kanou mongoi intong.” 35 Iad no i Jesus; 36 om poboos no i Johudi ngaavi' do, “Bii'o' no do songkuo o koupuupuso' dau disido!” 37 Nga' kivaa do vookon minoboos do, “Pinoungkahat disido i mato di tuhun nobohou. Au' dii naku daa isido kaanu manahob do tuhun diti do mantad kapatazon?” 38 Pongonsu no vagu i Jesus, kadampot no doid hobong: ii nopo nga' luak-ungib miampai do kitutub do vatu. 39 Poboos no i Jesus do, “Iduo' iho' vatu.” Poboos no i Martha, i tobpinai di tuhun napatai, doid disido do, “Oi Tuhan, kivongi' nodii isido do baino; tu' iti no o tadau kumaapat do mantad di kinapatazon disido.” 40 Simḇa no i Jesus do, “Au' ku naku nobiisaan iziozu do nung otumḇazaan kou, kokito kou mai' do koḇontugan do Kinoingan?” 41 Dadi' iduo' no dioho' i vatu. Om tingaa' no i Jesus om poboos no do, “Oi Ama', monongkotohuod zou diau tu' mokinongou ko do samḇayang ku. 42 Nokoiho zou sonḏii' do mokinongou ko dogo' tomoimo, nga' moboos zou sabap no diti tuhun ngaavi' i poingkakat do poinhiput dogo', mooi do otumḇazaan nodii izioho' do iziau no i minonuu' dogo'.” 43 Koboos nopo disido iti, haad no isido do topuod do, “Oi Lazarus, habus no!” 44 Habus no i tuhun napatai, noihitan do kagos o hongon om takod dau, om tinakapan do kain o voos disido. Poboos no i Jesus doid dioho' do, “Iduai isido diho' kagos, do kapanau nodii isido.” 45 Ogumu' di Johudi ngaavi' i nokoikot do tumomḇuhui di Mary, om nokokito di nimaan disido, do notumḇazaan disido, 46 nga' vookon dioho' do minugad doid di Pharisee ngaavi' do popoiho dioho' do nunu i nimaan di Jesus. 47 Dadi' pogitiitimḇungak nodii i huguan ngaavi' do padri' om i Pharisee ngaavi'. Poboos no izioho' do, “Doiti' no iti tuhun i mimang do tanḏa' ngaavi' diti, om nunu dii o mangan dotokou? 48 Nung pohogoson dotokou isido do mimang do miaga diti nga' umavi' o tuhun do otumḇazaan disido, om mikot mai' i tuhun ngaavi' do Rome om punsoon no i Tizonon Toḇitua om bansa' dotokou,” ka. 49 Songuhun mantad dioho', i Caiaphas, i padri' takavas do toun dii, minoboos do, “Miaga ko' au' kou i' kalati' do kaantakan ngaavi' diti; 50 au' kou kokito do montok i' do kovosian diozu do apatut do apatai o songuhun do montok do songovian tuhun, ko' opunso po o saviavi' bansa'.” 51 Okon i' ko' minoboos isido do dau sonḏii', nga' sabaagi do padri' takavas do toun dii do minogoohungung isido do matai i Jesus montok do bansa' — 52 om okon ko' montok noopo do pogun, nga' monimung nogi' do popisompuu di tanak ngaavi' di Kinoingan i nokotongkop. 53 Mantad nopo dii do tadau diho', do nakapapatantu' izioho' do mamatai disido. 54 Dadi' au' nodii huminongot di Johudi ngaavi' i Jesus, nga' tongkizad no do mantad do uvang dii do pinakaazan doid kakaḏazan i pungaanan do Ephraim, i pogun do id somok do kotogisan om timpoon no doiho' do miampai di mokiki'ia' ngaavi' dau. 55 Osomok nodii i Pamakanan do Kinahapasan di Johudi ngaavi', om ogumu' di tuhun mantad pogun dii i minugad doid Jerusalem do poguhu i' di Pamakanan do Kinahapasan do mooi pomohidang dioho' sonḏii' 56 do mogium di Jesus di ontok songingkakat izioho' do id suang di Panamḇazangan tagazo om sombooboos do, “Ingkuo tosoou nu? Mikot naku isido doid kalamazan toi ko' au'?” 57 Nokoponuu' no i huguan ngaavi' do padri' om i Pharisee ngaavi' do: iisai nopo i nokoiho do id nomḇoo isido nga' mositi' do popoiho dioho' mooi do kaanu izioho' do mamagakom disido.
1 Onom po tadau poguhu i' do Pamakanan do Kinahapasan, ugad no i Jesus doid Bethany, i kinoizonon di Lazarus, i pinotungag disido mantad poimpatai. 2 Nonuan dioho' isido do makan sosodopon do doiho'; i Martha nopo nga' minonompuan dioho' om poingamung i Lazarus di sontob doiho' id mija' taakanan. 3 Pogovit no i Mary do somḇutul tumau toongid i apagon o hoogo, tumau notinagas i oongid, om umaai no i takod di Jesus, om piidai no dau ii di tobuk dau; noponu' o hamin dii do vongi' do tumau dii. 4 Dadi' i Judas Iscariot — songuhun di mokiki'ia' ngaavi' dau, i tuhun i popotobus disido minoboos — do, 5 “Nookuo nodii tu' au' dinagang o tumau diti do tohu ngaatus dinarii om taakon no i usin doid tuhun tongomosikin?” 6 Binoos disido iti, do okon ko' momohizo isido di tongomosikin, nga' sabap i' do mananakau isido; isido nopo nga' momoopi' do kousinan dioho' om noubas isido do mabpaganu do mantad di notiitimung. 7 Dadi' poboos no i Jesus do, “Pohogoson zosido; pohogoson zosido do popoopi' diho' do montok tadau do hobongon zou. 8 Miampai i' diozu tomoimo i tongomosikin, nga' okon i' ko' tomoimo zou do miampai diozu.” 9 Do naamot dii, ogumu' o Johudi do nokoongou do doiho' isido om minikot do okon ko' saasabap no di Jesus nga' mooi nogi' soomo' di Lazarus i pinotungag disido do mantad poimpatai. 10 Dadi' potontuo' nodii di huguan do padri' ngaavi' do mamatai nogi' di Lazarus, 11 tu' sabap no disido do ogumu' di Johudi ngaavi' o minogiduan dioho' om notumḇazaan di Jesus. 12 Di tadau suminusuut nongokoongou i tuhun ngaavi' togumu', i minodidikot do montok di kalamazan, do id tinḏahanon no i Jesus do pakaazan doid Jerusalem. 13 Paganu no izioho' do laan ngaavi' do paam om ugad no do minooi tuka' disido, do songgiigizak do, “Hosanna! Oḇitua no isido i mikot doid ngaan di Tuhan, i laja' do Israel.” 14 Kokito no di Jesus o tananak do kuḏa'-kalḏi' om sakazai no dau ii — miaga di noboos do id Ḇuuk Toḇitua do: 15 “Kada' koosizai, oi tanak tonḏu' do Zion; intangai no, mintutuk nodii i laja' nu, poinsakai do tananak kuḏa'-kalḏi'.” 16 Au' haid nakalati' diti i mokiki'ia' ngaavi' dau, nga' di touvi nodii di ontok naḇantug nodii i Jesus, kosoou nodii dioho' do nokosuat iti kokomoi disido om ingkaa no do naantakan iti doid disido. 17 Ii nopo tuhun ginumuan i tuminanud disido di ontok hoovo' disido i Lazarus do humabus mantad di hobong om potungago' no isido do mantad poimpatai nga' tuminihomḇus do suminasi' dii; 18 iti no vagu' o sabap do minodidikot i tuhun ginumuan do minooi tuka' disido: nokoongou izioho' do nokoimang isido do tanḏa' diti. 19 Dadi' pogibooboos no i Pharisee ngaavi' do, “Bii'o' no, aiso i' do kobuu'on diozu; intangai, nakatanud no disido o sompomogunan!” 20 Songingamung nopo di sontob minooi samḇa do id kalamazan dii nga' vookon do tuhun Greek. 21 Suminoomo' izioho' di Philip i mantad Bethsaida doid Galilee om uot no disido do, “Oi tuan, aanangan zikoi daa do tumuubung di Jesus.” 22 Ngozo' no poihoo' di Philip i Andrew, om ugad no zo Andrew di Philip do minooi popoiho di Jesus. 23 Simḇa no i Jesus doid dioho' do, “Baino noikot nodii o jaam do ḇontugon i Tanak do tuhun. 24 Poihoon ku iziozu totootopot, sahagi-ngau' aatu' po doid tana' o songhinsou o ganḏum om matai no, nga' au' i' munḏahiu ii do soosonghinsou no; nga' nung apatai ii nga' kapanaak ii do tomoton togumu'. 25 Iisai nopo i guminavo do koposizon dau nga' atagakan dii; iisai nopo i abaazatan do koposizon dau do doiti' id pomogunan nga' kopopotihomḇus dii doid koposizon selajul. 26 Iisai nopo i monompuan dogo', mositi' do tumanud dogo', om id nomḇoo zou nopo nga' doiho' nogi' i suupu ku. Iisai nopo i monompuan dogo', nga' pantangon i' mai' di Tama'. 27 Baino nopo nga' id kountingaan o koduuduvo ku. Nunu kangku dii: ‘Oi Ama', tomposizo' zou do mantad jaam diti?’ Nga' montok i' do sabap diti do nokodimpot zou doid jaam diti. 28 Oi Ama', ḇontugo' no o ngaan nu!” Koongou no o ohou mantad surga do, “Naḇantug ku no ii, om ḇontugon ku po vagu' ii.” 29 Koongou nopo diti i tuhun ginumuan i songingkakat, nga' poboos no do, “Tuni i' do tinggoud ii,” om vookon nopo nga' minoboos do, “Tasab i' ii do minonongkiboos disido.” 30 Simḇa no i Jesus do, “Okon i' ko' montok do sabap dogo' do noongou i ohou, nga' montok diozu songovian. 31 Baino nopo nga' nakaatu' no doid pomogunan diti o kopongukuman, baino nopo nga' uzazangon nodii i tanak laja' diti pomogunan. 32 Om ontok nopo do koinsavat zou mantad tana', oviton ku nodii o tuhun ngaavi' kumaa doid dogo'.” 33 Miampai do boos ngaavi' diti, pinopointahang isido do kovoovozoo' di kapatazon disido. 34 Simḇa no i tuhun ginumuan do, “Nokopongia' dagai i Unḏang-unḏang do tumimpoon mai' selajul i Kristus. Dadi' ingkuo ko nodii do moboos do, ‘Mositi' do poinsavaton i Tanak do tuhun?’ Iisai iti Tanak do tuhun?” 35 Dadi' poboos no i Jesus do, “Au' no ahaid do miampai diozu i tanavau. Pamanau kou no do kivaa po do tanavau, tu' okosupan kou mai' do totuvong, om aiso i' di mamanau doid totuvong do koiho doid nomḇoo o pakaazan dau. 36 Naamot do miampai diozu i tanavau, kotumḇazaai no di tanavau mooi do adadi kou do tanak ngaavi' di tanavau.” Koboos nopo disido iti, tongkizadai no di Jesus izioho' om kohosok no do mantad dioho'. 37 Sunḏung potuu do songintinḏapou izioho' di ontok minimang isido do tanḏa' togumu', au' i' izioho' notumḇazaan disido; 38 iti nopo nga' monuhuk di boos ngaavi' di profeta Isaiah: “Oi Tuhan, iisai o nokopopokito do kotumḇazaan doid nunu i nongoongou dioho' do mantad dagai, om iisai o nokokito doid suang dii do kinopointahangan do kuasa' di Tuhan? 39 Otopot no, do au' izioho' kaanu do otumḇazaan, tu' miaga di noboos vagu' di Isaiah: 40 Binohou disido i mato ngaavi' dioho', pinahangas disido o ginavo ngaavi' dioho', do au' dii izioho' kopomoguno di mato dioho' do pongintong, do momoguno do ginavo dioho' do mamalati', do popounḏahiu do kozuuzuvo' dioho' om ohingasan ku no.” 41 Minoboos i Isaiah diti tu' nokokito isido do koḇontugan disido, om boos nopo ngaavi' disido nga' kokomoi di Jesus. 42 Sunḏung potuu do ingkaa, nga' ogumu' i' o notumḇazaan disido, kaampai no i tuhun ngaavi' momumuu'an, nga' okon i' ko' pinointahang dioho' ii, tu' sabap no di Pharisee ngaavi' om oosizan izioho' do au' pasagaon do sumuang do panamḇazangan: 43 poguhuonon dioho' o koḇontugan do tuhun do mantad ko' di doun Kinoingan. 44 Poboos no i Jesus doid dumḇangan do saviavi' do, “Iisai nopo i otumḇazaan dogo' nga' okon i' ko' otumḇazaan dogo' nga' doid di songuhun i minonuu' dogo', 45 om iisai nopo i kokito dogo', nga' kokito di songuhun i minonuu' dogo'. 46 Nokoikot zou doid diti pomogunan do sabaagi do ii tanavau, do mongumohig di otumḇazaan dogo' mooi do au' nodii kotinḏooi doid totuvong. 47 Iisai nopo i koongou di boos ku ngaavi' om au' no isido ouhi' do tumanud dii, nga' okon i' ko' izou i momḇisala' do tuhun dino, tu' okon i' ko' nokoikot zou do momḇisala' do pomogunan, nga' manampasi do pomogunan: 48 iisai nopo i mamazada' dogo' om au' monoimo do boos ku ngaavi' nga' kivaa no do potounḏa' do momḇisala' dau: ii no boos i noboos ku o ḏumadi do momḇisala' disido do ontok tadau kohimpupuson. 49 Tu' okon i' ko' minoboos zou doid koobian dogo' sonḏii'; nga' i Tama' ku i', i minonuu' dogo' do nunu o booson om nunu o pobooson, 50 om noihaan ku do ponuu' nopo ngaavi' disido nga' koposizon selajul. Om iho' no poogi' do nunu i nokosunud di Tama' doid dogo' nga' iho' no i booson ku.”
1 Poguhu i' di kalamazan do Pamakanan do Kinahapasan, nokoiho no i Jesus do nokoikot no i jaam dau do tumahib do pomogunan diti kumaa doid di Tama', miampai do nokoginavo no di sontob doun disido do id pomogunan diti, gumininavo isido dioho' gisom i' doid kopupuson. 2 Di maso izioho' makan, om nakatanom no di logon do id ginavo di Judas Iscariot tanak di Simon do popotobus disido. 3 Nokoiho i Jesus do nakataak no di Tama' doid hongon ngaavi' disido o nuununu nopo, om do minikot isido do mantad Kinoingan om gumuhi' nodii doid Kinoingan, 4 om ingkakat no isido mantad di mija', iduo' i kuihib dau, om paganu no do tuala', pokogoso' no dau ii do id tavak dau; 5 dadi' potunguo' no disido doid mimpun i vaig om timpuun no do momohiung di hapap di mokiki'ia' ngaavi' dau om piido' no dau ii di tuala' i pitaataagkos dau. 6 Kodimpatai no dau i Simon Peter, i minoboos doid disido do, “Oi Tuhan, hiungan nu dii naku o hapap ku?” 7 Simḇa no i Jesus do, “Au' ko po koiho do baabaino do nunu o maan ku, nga' kalati' ko i' do touvi.” 8 “Kada' no!” ka di Peter, “Kada' no pomohiung do hapap ku.” Simḇa no i Jesus do, “Nung au' ku nopo iziau hiungan, au' ko i' kaanu do baagi miampai dogo'.” 9 Poboos no i Simon Peter do, “Dadi' ingkaa nopo ino, oi Tuhan, nga' okon noopo ko' hapap ku, nga' hongon om tuhu ku nogi'.” 10 Poboos no i Jesus do, “Aiso i' di nokopimpodu' no do mokihiung vagu', tu' tuhun nopo dino, nga' ohidang nodii kozo. Iziozu nga' ohidang nogi', sunḏung i' ma do okon ko' saviavi' kou.” 11 Nokoiho isido do iisai i popotobus disido, om iho' no poogi' do minoboos isido do, “Sunḏung i' ma do okon i' ko' saviavi' kou.” 12 Kohiungai nopo disido i hapap dioho' om kokuihib vagu' dau i kuihib dau, guhi' no isido doid mija'. Poboos no isido do, “Kalati' kou naku do nunu i nimaan ku doid diozu? 13 Pungaanan zou diozu do i Mongingia' om i Tuhan, om otopot no; ino zou no. 14 Dadi', nung nokopomohiung zou do hapap diozu, izou, i Tuhan om mongingia', iziozu nga' mositi' do mogihiihiung do hapap diozu. 15 Noonuan ku no iziozu do poomitanan mooi do momit kou nodii daa do nunu i nimaan ku doid diozu. 16 Poihoon ku iziozu totootopot, do aiso i' do suupu i hobi gazo ko' i tuan dau, aiso i' do susuu'on i hobi gazo ko' i minonuu' disido. 17 “Do baino, tu' koiho kou nodii diti, ongounsikou kou no nung ingkaa o maan diozu. 18 Okon i' ko' moboos zou kokomoi do saviavi' kou: nokoiho zou di nopihi' ku ngaavi'; nga' mositi' tuhukon i noboos do Ḇuuk Toḇitua do: ‘Ii nopo mihang do id mija' taakanan ku, nga' momuaka dogo'.’ 19 Poihoon ku iziozu diti do baabaino, do poguhu i' do aantakan iti, mooi do aantakan nopo iti nga' otumḇazaan kou nodii daa do izou no Isido. 20 Poihoon ku iziozu totootopot, iisai nopo i monoimo di suu'on ku nga' monoimo dogo', om iisai nopo i monoimo dogo' nga' monoimo di minonuu' dogo'.” 21 Koboos nopo iti, kosusa' no kozo i Jesus, om poboos no do, “Poihoon ku iziozu totootopot, potobuson zou do songuhun diozu.” 22 Pogi'ii'intong no i mokiki'ia' ngaavi', nobuuvong do iisai o komozon disido. 23 Ii nopo mokiki'ia' i koupusan di Jesus nga' poinsonḏiu id doos di Jesus; 24 hamḇazo' no di Simon Peter isido om poboos no do, “Uoto' do iisai o komozon dau,” 25 dadi' sonḏiu no vagu' isido id doos di kangkab di Jesus om poboos no do, “Iisai ino, oi Tuhan?” 26 Simḇa no i Jesus do, “Isido nopo nga' i onuan ku do kinokokiban do louti i pososokon ku doid pinggan pangakanan.” Kososok nopo disido i kinokokiban do louti, taako' no dau ii doid di Judas tanak di Simon Iscariot. 27 Kaakan nopo di Judas i louti, tuutulus do suango' no isido di Saitan. Dadi' poboos no i Jesus do, “Nunu i maan nu, maai no do tosiisikap.” 28 Aiso i' di suvai i doiho' id dabping mija' taakanan do nakalati' do nookuo tu' binoos disido iti. 29 Sabap no do mononoina' i Judas do kousinan dioho', do minomusoou dii o vookon dioho' do minonuu' i Jesus disido do, “Pomoomohi no do kagaaganapan montok di kalamazan,” toi ko' monuu' disido do monohuod doid di tongomosikin. 30 Kaakan nopo di Judas i kinokokiban di louti habus no isido. Ontok nopo dii nga' doungosodop. 31 Kahabus nopo isido, poboos no i Jesus do, “Naḇantug nodii do baino i Tanak do tuhun om naḇantug no o Kinoingan do id disido. 32 Nung naḇantug nopo o Kinoingan do id disido, ḇontugon nogi' mai' do Kinoingan isido do id dau sonḏii', om ḇontugon i' mai' isido do oluai no. 33 Oi tanak ku ngaavi', oduuk zou no do miampai diozu. Mogium kou i' mai' dogo', om, miaga di noboos ku doid Johudi ngaavi', do au' kou i' koongoi doid nomḇoo o pakaazan ku. 34 Onuan ku iziozu do ponuu' kavavagu: pigiiginavo kou no; mositi' mogiiginavo kou miaga nopo do gumininavo zou diozu. 35 Mantad no do pogigiiginavaan diozu, do ointutunan kou mai' do saviavi' do sabaagi mokiki'ia' ku ngaavi'.” 36 Poboos no i Simon Peter do, “Oi Tuhan, nomḇoo o pakaazan nu?” Simḇa no i Jesus do, “Do baabaino nopo nga' au' ko po kaanu do tumanud dogo' doid nomḇoo pakaazan ku; nga' katanud ko i' mai' dogo' do touvi.” 37 Poboos no i Peter doid disido do, “Nookuo tu' au' zou kaanu tumanud diau do baabaino? Pounḏunon ku o kiniopon ku do montok diau.” 38 Nga' samḇa no i Jesus do, “Popounḏun ko do kiniopon nu do montok dogo'? Poihoon ku iziau totootopot, poguhu i' do kopingkukuuk o tanḏaa' intohu ko no mai' kopogohim dogo'.
1 “Kada' posusao' o ginavo diozu. Kotumḇazaai kou no doid Kinoingan, kotumḇazaai nogi' doid dogo'. 2 Ogumu' o tizonon do izonon id hamin di Tama' ku; tu' nung okon ko' ingkaa nga' nosunudan ku no motuu iziozu. Mugad zou nodii do mooi popotounḏa' do izonon diozu, 3 om kougad zou nopo om kopopotounḏa' do izonon diozu, gumuhi' zou vagu' do mogongoi diozu do kumaa doid dogo' sonḏii', mooi do miampai kou di daa dogo' doid nomḇoo zou. 4 Koiho kou i' do lahan kumaa doid izonon i pakaazan ku.” 5 Poboos no i Thomas do, “Oi Tuhan, au' i' izikoi koiho doid nomḇoo pakaazan nu, dadi' ingkuo zikoi dii do koiho di lahan?” 6 Poboos no i Jesus do, “Izou no i Lahan; i Katapatan om Koposizon. Aiso i' do koongoi doid di Tama' nung okon no ko' maza' dogo'. 7 Nung kotutun kou dogo', nga' kotutun kou nogi' mai' di Tama' ku. Mantad do baabaino kotutun kou i' disido om nokokito kou disido.” 8 Poboos no i Philip do, “Oi Tuhan, pokitono' zikoi gia di Tama' om asantaban zikoi dii daa.” 9 Poboos no i Jesus doid disido do, “Ahaid zou no do miampai diozu, oi Philip, om kakaal kou po naku do au' kotutun dogo'? Iisai nopo i nokokito dogo' nga' nokokito no di Tama', dadi' ingkuo ko nodii do moboos do, ‘Pokitono' zikoi di Tama'?’ 10 Au' ko naku otumḇazaan do izou nopo nga' id suang di Tama' om i' Tama' nopo nga' id suang dogo'? Okon i' ko' mantad dogo' sonḏii' i booson ku doid diau: i Tama' i' ii, i poingizon do id dogo', i maamaso kumalaja' do kalaja' ngaavi' dau. 11 Mositi' no do otumḇazaan ko dogo' do ontok moboos zou do, izou nopo nga' id suang di Tama' om i Tama' nopo nga' id suang dogo'; toi ko' sokuukuang no do kotumḇazaai no daa do id katahangan do kalaja' ngaavi' diti. 12 Poihoon ku iziau totootopot, iisai nopo i otumḇazaan dogo' nga' koimang mai' do isoo' i' di kalaja' ngaavi' i maan ku sonḏii', om koimang mai' do poinhoohobi po ginazo do kalaja' ngaavi', tu' mugad zou nodii doid di Tama'. 13 Nunu nopo i pokionuon diozu do id ngaan ku nga' maan ku ii, mooi do aḇantug nodii i Tama' do id di Tanak. 14 Nung mokianu kou dogo' do nunu noopo do id ngaan ku, nga' maan ku i' mai' ii. 15 Nung guminavo kou dogo' nga' tonudon i' mai' diozu i ponuu'an ku ngaavi'. 16 Mokianu zou i' di Tama', om onuan kou i' mai' disido do iso' po o Mananampung do tuminḏooi id diozu do sohiihinaid, 17 i Spiritu do katapatan i au' i' tootoimoon do pomogunan tu' au' i' kokito ii toi ko' kotutun disido ii; nga' kotutun kou i' disido, tu' miampai diozu isido, id suang diozu isido. 18 Au' ku i' duanan iziozu miaga di tanak nangapatazan do mohoing; gumuhi' zou i' mai' doid diozu. 19 Au' no ahaid om au' nodii mai' kokito dogo' o pomogunan; nga' kokito kou i' mai' do apasi zou om iziozu nga' apasi nogi'. 20 Ontok tadau dino, koiho kou mai' do poinsuang zou di Tama' ku om poinsuang kou dogo' om poinsuang zou diozu. 21 Iisai nopo i migit do ponuu'an ku ngaavi' om mimang ngaavi' di nga' isido no i guminavo dogo'; om iisai nopo i guminavo dogo' nga' oginavo mai' di Tama' ku, om guminavo zou mai' disido om mintahang zou mai' sonḏii' doid disido.” 22 Poboos no i Judas — iti nopo nga' okon ko' i Judas Iscariot — doid disido do, “Oi Tuhan, nunu o sabap tu' kituḏu ko do popointahang diau sonḏii' doid dagai om okon ko' doid pomogunan?” 23 Simḇa no i Jesus do, “Iisai nopo i guminavo dogo' nga' tumanud i' mai' di boos ku, om ginovoon i' mai' di Tama' ku isido, om mikot i' mai' izikoi doid disido om mizon no do id disido. 24 Ii nopo au' guminavo dogo' nga' au' i' tumanud di boos ku ngaavi'. Om ii nopo boos i oongou diozu nga' okon i' ko' i dogo' sonḏii': ii nopo nga' boos di Tama' i minonuu' dogo'. 25 Noboos ku ngaavi' iti doid diozu do kakaal zou po do poingampai diozu; 26 nga' ia'on kou i' di Mananampung, i Spiritu Toḇitua, i suu'on di Tama' do id ngaan ku, do nuununu nopo om poposoou diozu di saviavi' i noboos ku doid diozu. 27 Potimpoonon ku do id diozu o pibabasan, pibabasan ku sonḏii' i pataakon ku doid diozu, pibabasan i au' aanu do pomogunan do papataak, iti no i titohuod ku doid diozu. Kada' diozu posusao' toi ko' potohoo' o ginavo diozu. 28 Nokoongou kou dogo' do moboos do: tumongkizad zou nodii om gumuhi' i' mai' vagu'. Nung gumininavo kou dogo' nga' oonḏos kou i' daa do gumuhi' zou doid di Tama', tu' agaagazo i Tama' ko' izou. 29 Nokopopoiho zou diozu diti do baino, do poguhu i' do aantakan iti, mooi do otumḇazaan kou nodii do ontok aantakan iti. 30 Au' zou i' humaid do moboos doid diozu, tu' id tinḏahanon no dau i tanak laja' diti pomogunan. Aiso i' do kuasa' disido doid dogo', 31 nga' mositi' do koiho o pomogunan do guminavo zou di Tama' om do mimang zou do miaga nopo di pinonuu'an dogo' di Tama'. Kanou no, mamanau tokou nodii.
1 “Izou no i guvas anggur totopot, om i Tama' ku nopo nga' i momumutanom do anggur. 2 Kotobon disido o tikid-tikid laan do id dogo' i au' momiuva', om potitikid laan i momiuva' nopo nga' pudungan disido mooi do hobi ginumu' do tuva' di. 3 Nongokohidang kou nodii ngaavi', sabap no di boos i noboos ku doid diozu. 4 Tinḏooi no doid dogo', miaga dogo' doid diozu. Miaga di laan tu' au' i' kopomiuva' do osonḏii'an no, sahagi-ngau' pointimpoon ii doid guvas di anggur, ingkaa kou nogi' sahagi ngau' pointimpoon kou id dogo'. 5 Izou no i guvas anggur, iziozu no i laan ngaavi'. Iisai nopo i tumimpoon id dogo', om izou id disido, nga' kopomiuva' tasapou; aiso i' do taanuanu diozu do kopidan kou no mantad dogo'. 6 Iisai nopo i au' tuminḏooi id dogo' nga' kagavad miaga di laan — om kumoing; timungon o laan ngaavi' di om pataamon doid tapui om tutudan no. 7 Nung tuminḏooi kou id dogo' om pointinḏooi id diozu i boos ku ngaavi', pokianu kou no do nunu noopo o kohizaban diozu om kotoimo kou i' mai' di. 8 Montok i' do koḇontugan di Tama' ku do apatut kou do momiuva' tasapou om do mokiki'ia' ku iziozu. 9 Nokoginavo zou diozu miaga nopo di Tama' tu' nokoginavo dogo'. Tinḏooi no do id koginavaan ku. 10 Nung tonudon diozu o ponuu'an ku ngaavi' nga' pointinḏooi kou i' mai' do id koginavaan ku, miaga nopo do natanud ku i ponuu'an ngaavi' di Tama' ku om pointimpoon do id koginavaan dau. 11 Nokosunud ku diozu iti mooi do id diozu nodii daa o kounsikaan ku sonḏii' om ogonop no daa i kounsikaan diozu. 12 Iti no o ponuu'an ku: pogigiiginavo kou no, miaga do nokoginavo zou diozu. 13 Aiso i' di kikoginavaan do hobi gazo mantad ko' popounḏun do koposizon dau do montok tamḇahut ngaavi' dau. 14 Tamḇahut ku iziozu, nung tonudon diozu i ponuu'an ku diozu. 15 Au' zou nodii momohoou diozu do suupu, tu' au' i' koiho o suupu do nunu o maan di tuan dau; pungaanan ku iziozu do tamḇahut ngaavi', tu' nokosunud ku no doid diozu o saviavi' i noihaan ku mantad di Tama' ku. 16 Okon ko' iziozu o minomihi' dogo', au', pinihi' ku iziozu; om minonuu' zou diozu do mugad om momiuva', i tuva' totogui; mooi do onuan kou di Tama' do nunu noopo o pokionuon diozu disido do id ngaan ku. 17 Ponuu'an ku nopo diozu nga' mogigiiginavo. 18 “Nung abaazatan nopo diozu o pomogunan, mositi' do soovon diozu do nabaazatan dogo' ii do poguhu i' do abaazatan diozu. 19 Nung doun pomogunan kou, nga' ginovoon kou i' do pomogunan sabaagi do doun dau; nga' sabap no do okon ko' doun pomogunan kou, tu' kinopomihian ku nopo diozu nga' nakapapahabus diozu do mantad pomogunan, iho' no poogi' do abaazatan diozu o pomogunan. 20 Soovon no i boos ngaavi' i noboos ku doid diozu: Okon i' ko' agaagazo mantad di tuan dau i suupu. Nung nokopongunḏoso dogo' izioho', nga' unḏosoon kou nogi' mai' dioho', nung tonudon dioho' o boos ku, nga' tonudon nogi' mai' dioho' i diozu. 21 Nga' sabap i' mai' dogo' do maan mai' dioho' ngaavi' iti doid diozu, tu' au' izioho' kotutun di minonuu' dogo'. 22 Nung au' zou daa nokoikot, nung au' zou daa nokoboos doid dioho', nga' aiso i' daa do hasa' dioho'; nga' miaga nopo di diho' nga' aiso di do sabap do aiso hasa' dioho' do sabap no do ḏouso dioho'. 23 Iisai nopo i abaazatan dogo' nga' abaazatan di Tama' ku. 24 Nung au' zou daa nokoimang do kalaja' ngaavi' diho' doid dioho', miaga di aiso po tongosonguuhun do nokoimang, nga' aiso i' daa do hasa' dioho'; nga' sabap no do ingkaa di iho', sunḏung i' ma do ingkaa i nongokito dioho', nga' kakaal i' do abaazatan izioho' dogo' om di Tama' ku. 25 Nga' monuhuk noopo ngaavi' iti di boos ngaavi' i songinsuat id Unḏang-unḏang dioho' do: ‘Aiso sabap dioho' do nabaazatan dogo',’ ka. 26 Koikot nopo i Mananampung, i poikoton ku mai' doid diozu mantad di Tama', i Spiritu do katapatan i humabus mantad di Tama', nga' isido no mai' o sasi' ku. 27 Om iziozu nga' sasi' nogi' ngaavi', tu' nakasanḏad kou miampai dogo' mantad po di timpuun i'.
1 “Nokosunud ku ngaavi' diozu iti mooi do au' kou nodii aatu'. 2 Uzazangon kou mai' dioho' do mantad panamḇazangan ngaavi', om totootopot no do mikot nodii o timpu do iisai nopo i mamatai diozu nga' momusoou mai' do mimang isido do kalaja' toḇitua montok do Kinoingan. 3 Maan mai' ngaavi' dioho' iti tu' au' izioho' nokookoiho di Tama' toi ko' dogo'. 4 Nga' nokosunud ku no ngaavi' iti doid diozu, mooi do oikot nopo o timpu di nga' osoou mai' diozu do nokopononsunud zou diozu. “Au' ku haid pinoiho iziozu diti mantad di tinimpuun i', tu' miampai zou haid diozu; 5 nga' do baino mugad zou nodii doid di minonuu' dogo'. Aiso tongosonguhun diozu do muot do, ‘Nomḇoo o pakaazan nu?’ ka. 6 Nga' osusa' i' ma o ginavo diozu tu' nokosunud ku diozu iti. 7 Kakaal i', do popoiho zou diozu totootopot: do montok i' do kavasian diozu do mugad zou, tu' sahagi ngau' kougad zou, au' mai' mikot doid diozu i Mananampung; nga' nung mugad zou, pougadon ku isido doid diozu. 8 Om koikot po isido, pokitonon i' mai' disido o pomogunan do songkuo kahaahasao' di, kokomoi do ḏouso, om kokomoi do iisai i pointunud, om kokomoi do kopomḇisalaan: 9 kokomoi do ḏouso: do iho' no do mada' izioho' do otumḇazaan dogo'; 10 kokomoi do iisai i pointunud: do iho' no do mooi zou nodii doid di Tama' om au' kou di mai' kokito po dogo'; 11 kokomoi do kopomḇisalaan: id dino no do i tanak laja' do pomogunan diti nga' noukum no. 12 Ogumu' po daa o booson ku doid diozu nga' oinḏaanḏamaan kozo dati' do montok diozu do baino. 13 Nga', ontok nopo do koikot i Spiritu do katapatan tudukan kou i' disido kumaa doid katapatan poinggonop, tu' okon i' ko' moboos isido do montok dau sonḏii'; nga' popohomḇus noopo do nunu i nokosunud doid dau; om pointahangon i' mai' disido doid diozu o ahal ngaavi' i umikot. 14 Ḇontugon zou mai' disido, tu' saviavi' i pointahangon disido doid diozu nga' mantad mai' ngaavi' di nunu i dogo'. 15 Nunu nopo i kivaa di Tama' nga' dogo'; iho' no poogi' do minoboos zou do: do saviavi' i pointahangon disido doid diozu nga' naanu mantad di nunu i dogo'. 16 “Oduuk no om au' kou di mai' kokito dogo', om dadi' au' i' ahaid om kokito kou di vagu' dogo'.” 17 Dadi', minogibooboos o vookon di mokiki'ia' ngaavi' disido do, “Nunu komozon disido do, ‘Oduuk no om au' kou di mai' kokito dogo', om dadi' au' i' ahaid om kokito kou di mai' vagu' dogo',’ ka, om, ‘Mugad zou doid di Tama',’ ka? 18 Nunu o komozon diti, ‘Oduuk no,’ ka? Au' tokou i' kalati' do nunu ngaavi' o komozon disido.” 19 Nokoiho no i Jesus do ohizab izioho' do muot disido, dadi' poboos no isido do, “Mogi'uu'uot kou do nunu kinomoi ku do minoboos do, ‘Oduuk no om au' kou di mai' kokito dogo', om dadi' au' no ahaid om kokito kou di mai' vagu' dogo'.’ 20 “Poihoon ku iziozu totootopot, do miad om mogkoudu' kou mai' do maso munsikou o pomogunan; tumongob kou mai' nga' umohon i' doid kounsikaan i katangaban diozu. 21 Ounḏoso i tonḏu' do maso mogkoosusu, tu' nokoikot no o timpu dau; nga' kopogkoosusu nopo zosido di tanak, ohiivan nodii dosido i kounḏasaan dau tu' ounsikou zosido do nohodi' o songuhun tuhun do id pomogunan. 22 Ingkaa kou nogi': tumongob kou do baino, nga' kokito zou i' vagu' diozu, om oponu' mai' do kounsikaan o ginavo ngaavi' diozu, om aiso mai' do kaanu do magaau do kounsikaan di do mantad diozu. 23 Koikot nopo o tadau dino, au' kou i' mai' muot dogo' do tongoiso' o ponguot. Poihoon ku iziozu totootopot, nunu nopo o pokionuon diozu mantad di Tama', nga' onuan kou i' mai' disido do id ngaan ku. 24 Gisom do baino, au' kou po nokopokianu do nuununu do id ngaan ku. Pokianu no om kotoimo kou i' mai', om ogonop nodii mai' o kounsikaan diozu. 25 Nokoboos ku ngaavi' iti doid diozu do id boos i au' poimbuhat. Mikot nodii o jaam do au' zou nodii mai' moboos doid diozu do id boos i au' poimbuhat nga' popoiho diozu kokomoi di Tama' do id boos ngaavi' tatahang. 26 Koikot nopo o tadau dino, mokianu kou mai' do id ngaan ku; om au' zou i' moboos do sumamḇayang zou doid di Tama' do montok diozu, 27 tu' guminavo diozu i Tama' sonḏii' tu' guminavo kou dogo' om otumḇazaan do minikot zou mantad Kinoingan. 28 Minikot zou mantad di Tama' om nokoikot doid pomogunan om baino tumongkizad zou di do pomogunan om pakaazan ku doid di Tama'.” 29 Poboos no i mokiki'ia' ngaavi' disido do, “Poimbuhat nodii o boos nu do baino om okon nodii ko' au' poimbuhat. 30 Koiho nodii izikoi do baino do nokoiho ko do saviavi' om au' i' tagal do manḏad do ponguot do maan pohomḇuso': sabap no diti do otumḇazaan izikoi do minikot ko mantad Kinoingan.” 31 Simḇa no i Jesus doid dioho' do, “Ongotumḇazaan kou nodii naku ngaavi'? 32 Pokinongou kou po; mikot nodii mai' o timpu — totopot nopo nga' nokoikot no ii — do kotogizas kou mai', sandaadau do pakaazan om mogiduan dogo' do soosonguhun. Nga' okon i' ko' soosonguhun zou, tu' miampai dogo' i Tama'. 33 Nokosunud ku ngaavi' iti doid diozu mooi do ko'ium kou nodii do pibabasan do id dogo'. Kikosusaan kou mai' do id pomogunan, nga' kada' kou koosizai: naaha' ku no o pomogunan.”
1 Kahapas nopo do minoboos diti, tingaa' no i Jesus doid surga om poboos no do: “Oi Ama', nokoikot no i jaam: ḇontugo' no i Tanak nu mooi do ḇontugon ko nodii di Tanak nu; 2 mooi do, miaga di noonuan nu isido do kuasa' doid saviavi' tuhun, kapanaak no daa isido do koposizon selajul kumaa doid saviavi' i nakataak nu doid disido. 3 Om koposizon selajul nopo nga' itia: mintutun diau, i Kinoingan totopot i ii'iso' no, om di Jesus Kristus i sinuu' nu. 4 Naḇantug ku no iziau do id tana' miampai pinongo ku i kalaja' i nitaak nu dogo' do kalajaon. 5 Baino, oi Ama', ḇontugo' zou nodii miampai di koḇontugan di miampai zou po haid diau di poguhu i' do navangun o pomogunan. 6 Nokointahang ku no o ngaan nu doid di sontob i nanu nu do mantad pomogunan i pinataak nu dogo'. Iziau no o sanganu haid dioho' om pinataak nu izioho' doid dogo', om natanud dioho' i boos nu. 7 Noihaan nodii dioho' do baino do saviavi' i nakataak nu doid dogo' nga' mantad diau 8 tu' nakataak ku no doid dioho' i kopongia'an i pinataak nu dogo', om totootopot no do notoimo dioho' ii om au' miniduvo o ginavo do minikot zou mantad diau, om nongotumḇazaan do iziau no i minonuu' dogo'. 9 Montok no dioho' do sumamḇayang zou. Okon ko' sumamḇayang zou montok do pomogunan nga' montok i' dioho' i pinataak nu dogo', tu' iziau no i sanganu dioho'. 10 Saviavi' i dogo' nga' diau om saviavi' i diau nga' dogo', om aḇantug zou doid dioho'. 11 Okon nodii ko' id pomogunan zou, nga' id pomogunan po izioho', om mikot zou nodii doid diau. Oi Tama' Toḇitua, gompizo' no i sontob pinataak nu dogo' do otopot doid ngaan nu, mooi do kopiiso' no daa izioho' miaga dito. 12 Ontok di miampai zou po haid dioho', ginompi ku i sontob pinataak nu dogo' do otopot do id ngaan nu. Natamangan ku izioho' om aiso songuhun do natagak nga' ii no songuhun i nakasai' do atagak, om iti nopo nga' monuhuk di Ḇuuk Toḇitua. 13 Nga' baino, mikot zou nodii doid diau om booson ku ngaavi' iti doid pomogunan do papabaagi do kounsikaan ku miampai dioho' do poimponu'. 14 Pinohomḇus ku o boos nu doid dioho', om nabaazatan dioho' o pomogunan, tu' miaga nogi' dogo' izioho' tu' okon ko' doun pomogunan. 15 Okon i' ko' monuu' zou diau do popoinsud dioho' do mantad pomogunan, nga' do mongumohig dioho' do mantad di Iso' Talaat. 16 Miaga dogo' tu' okon i' ko' doun pomogunan ingkaa nogi' kozo izioho'. 17 Bituaho' no izioho' do id katapatan; boos nu nopo nga' katapatan. 18 Miaga dogo' tu' pinougad nu doid pomogunan, pinougad ku nogi' izioho' doid pomogunan, 19 om montok no dioho' do papataak zou dogo' sonḏii' do maan bituaho' mooi do kataak nogi' daa izioho' do maan bituaho' do id katapatan. 20 Okon ko' iziizioho' no o samḇayangan ku nga' montok nogi' dioho' i otumḇazaan mai' do id dogo' do ontok koongou di kopongia'an dioho'. 21 Kopiiso' no daa izioho, Oi Ama', miaga nopo do iziau id dogo' om izou id diau, mooi do id dito nogi' daa izioho', mooi do otumḇazaan nodii daa o pomogunan do iziau no i minonuu' dogo'. 22 Nakataak ku no doid dioho' i koḇontugan i pinataak nu doid dogo', mooi do kopiiso' no daa izioho' miaga dito tu' iso'. 23 Miampai do izou id dioho' om iziau id dogo', poinggonop no daa kozo o piisaan dioho' do ointutunan di mai' do pomogunan do iziau no i minonuu' dogo' om do gumininavo ko dioho' miaga do gumininavo ko dogo'. 24 Oi Ama', mimang zou di sontob pinataak nu dogo' do miampai nopo dogo' do nomḇoo zou, mooi do kokito nodii daa izioho' tomoimo do koḇontugan ku i nakataak nu dogo' tu' gumininavo ko dogo' di au' po navangun o pomogunan. 25 Oi Ama', i Totuhid, au' i' nokotutun diau o pomogunan, nga' nokotutun zou diau, om nokoiho ngaavi' iti do nokoponuu' ko dogo'. 26 Nokointutun ku no o ngaan nu doid dioho' om otihomḇusan mai' do popointutun di, mooi do id dioho' nodii daa i koginavaan i pinoginavo nu dogo', om mooi do id dioho' zou nodii daa.”
1 Koboos nopo ngaavi' disido iti, tongkizad no i Jesus miampai di mokiki'ia' ngaavi' dau om soboong no do suok Kidron i kikaḇun om doiho' no o pinakaazan disido miampai di mokiki'ia' ngaavi' dau. 2 Nokoiho nogi' i Judas i popopotobus, do tizonon di, tu' saasau' i Jesus do suminoomo' di mokiki'ia' ngaavi' dau do doiho', 3 dadi' ovito' no di Judas o sontinimungan susumangod kuminaa' doid tizonon di do miampai do mintatamong ngaavi' i sinuu' di huguan do padri' ngaavi' om di Pharisee ngaavi', do songingigit do sumḇu, titiu ngaavi' om sinḏata' ngaavi'. 4 Miampai poingiho do nunu o aantakan ngaavi' doid dau, intutuk no i Jesus om poboos no do, “Iisai o iumon diozu.” 5 Simḇa no izioho' do, “I Jesus do Nazareth.” Poboos no isido do, “Izou no isido.” Poingkakat do poingamung dioho' i Judas i popopotobus disido. 6 Koboos nopo i Jesus doid dioho' do, “Izou no isido,” pogunḏul no izioho' om kodunsong no do id tana'. 7 Uot no isido dioho' do kumoinḏuvo do, “Iisai o iumon diozu?” Poboos no izioho' do, “I Jesus do Nazareth.” 8 Simḇa no i Jesus do, “Nobiisaan ku no iziozu do izou no isido. Nung izou nopo o iumon diozu, pohogoso' itia suvai ngaavi' do mogidu'.” 9 Iti nopo nga' monuhuk di boos ngaavi' i noboos dau do, “Aiso i' songuhun di pinataak nu dogo' do natagak ku.” 10 Kodongo' no di Simon Peter i ilang dau, om tibaso' no i suupu di padri' takavas miampai noputu o tohingo vanan dau. Ngaan nopo do suupu di nga' i Malchus. 11 Poboos no i Jesus doid di Peter do, “Posusuko' ino ilang nu do id tangkap dino; au' ku naku inumon i sasavan i pinataak dogo' di Tama' ku.” 12 Gokomo' no di tinimungan do susumangod om di upisol do unḏang-unḏang om di mintatamong do Johudi ngaavi' i Jesus om kagasai no isido. 13 Ovito' po haid dioho' isido doid di Annas, tu' i Annas nopo nga' tivan di Caiaphas, i padri' takavas do toun di. 14 I Caiaphas no i minonontuduk do Johudi ngaavi' do, “Moomogot no do apatai o songuhun do montok do tuhun ngaavi'.” 15 Tuminanud di Jesus i Simon Peter miampai songuhun po o mokiki'ia'. Mokiki'ia' nopo diti i otutunan di padri' takavas nga' suminuang miampai di Jesus doid hamin tagazo di padri' takavas, 16 nga' tuminimpoon i Peter do id habus di vavazaan. Dadi' habus no i mokiki'ia' tiso', i otutunan di padri' takavas, om ponongkiboos no di mintatamong di vavazaan om ovito' no suminuang i Peter. 17 Poboos no doid di Peter i tonḏu' i mintamong di vavazaan do, “Okon ko' iziau nga' mokiki'ia' nogi' do tuhun diho'?” Simḇa no isido do, “Okon.” 18 Osogit do ontok di, om podsudu' no do alang i suupu ngaavi' om i mintatamong ngaavi', om ingkakat no izioho' do moginsiamut do doiho'; dadi', poingkakat nogi' i Peter do doiho' do moginsiamut dau sonḏii' miampai di suvai. 19 Uoto' no di padri' takavas i Jesus kokomoi di mokiki'ia' ngaavi' dau om di kopongia'an dau. 20 Simḇa no i Jesus do, “Nokopoboos zou do pointahang do montok kinongoon do pomogunan; tomoimo zou do minongia' do id suang do sinagog om id suang do Panamḇazangan Tagazo i titimungon do Johudi ngaavi': Aiso i' do nokoboos ku do poinghosok. 21 Nookuo tu' muot kou dogo'? Uoto' no i nongokoongou dogo' do nunu i pino'ia' ku; koiho izioho' do nunu o noboos ku.” 22 Koboos nopo o boos ngaavi' diti, tapapo' no di songuhun di mintatamong songingkakat doiho' o voos di Jesus do moos-boos do, “Ingkaa ko no naku do sumimḇa do padri' takavas?” 23 Simḇa no i Jesus do, “Nung kivaa nopo do nakahasa' do id nunu i noboos ku, pointahango' no ii; nga' nung aiso, nookuo nodii tu' tapapon zou diau?” 24 Dadi', ponuu'ai no di Annas isido do papaatod doid di Caiaphas i padri' takavas do poingkagos o hongon. 25 Ontok di poingkakat i Peter do doiho' do moginsiamut, poboos no doid disido o songuhun do, “Okon naku ko' iziau nga' songuhun di mokiki'ia' ngaavi' disido?” Ohimo' no disido ii miampai minoboos do, “Okon.” 26 Songuhun di suupu ngaavi' di Padri' takavas, i koobpinoizan di tuhun i noputuhan do tohingo do tinibas di Peter, minoboos do, “Okon naku ko' iziau no i nokito ku do doiho' id kaḇun do miampai disido?” 27 Om ohimo' no vagu' di Peter ii; om imang no pingkukuuk o iso' tanḏaa'. 28 Dadi' ovito' no dioho' i Jesus do mantad hamin di Caiaphas do kuminaa' doid Tizonon do Gounal. Ontok nopo di nga' doungosuvab. Au' i' izioho' sonḏii' suminuang do id Tizonon do Gounal mooi do au' izioho' ozomutan om do kaakan nodii di Pamakanan do Kinahapasan. 29 Dadi' habus no i Pilate doid dioho' om poboos no do, “Nunu o kahasaan do pononḏos diozu do tuhun diti.” Simḇa no izioho' do, 30 “Nung okon nopo ko nakahasa' o tuhun diti, nga' au' i' dagai oviton isido doid diau.” 31 Poboos no i Pilate do, “Ovito' no diozu sonḏii' isido, om ḇisalaon no isido tumanud di Unḏang-unḏang diozu sonḏii'.” Simḇa no i Johudi ngaavi' do, “Au' zikoi i' pakavasaon do mongukum do tuhun do patazon.” 32 Iti nopo nga' monuhuk di boos ngaavi' i noboos di Jesus do popointahang di lahan do ingkuo isido do matai. 33 Dadi' guhi' no doid Tizonon do Gounal i Pilate om hoovo' no i Jesus om uot no disido do, “Laja' ko naku do Johudi?” 34 Simḇa no i Jesus do, “Iziau naku sonḏii' o muot diti, toi ko' kivaa suvai do pinopoboos diti doid diau kokomoi dogo'?” 35 Simḇa no i Pilate do, “Tuhun zou naku do Johudi? Tuhun nu no ngaavi' sonḏii' om i huguan do padri' ngaavi' o pinapataak diau doid dogo': nunu o nimangan nu?” 36 Simḇa no i Jesus do, “Kopomolintaan ku nopo nga' okon ko' doun pomogunan diti; nung doun pomogunan diti o kopomolintaan ku, nga' nokoponongkihavan no daa o tuhun ku ngaavi' do mongumohig dogo' do kada' do kataak zou doid Johudi ngaavi'. Ingkaa no iti, kopomolintaan ku nopo nga' okon ko' doun doiti'.” 37 Poboos no i Pilate do, “Dadi', laja' ko di naku?” Simḇa no i Jesus do, “Iziau no o somboos do laja' zou. Nohodi' zou do montok diti, minikot zou doid pomogunan do montok diti: do sumasi' di katapatan; om saviavi' ii id ponong do id katapatan nga' mokinongou do ohou ku.” 38 “Katapatan?” ka di Pilate, “Nunu di ino?” Koboos nopo do ingkaa, habus no vagu' isido do kuminaa' doid di Johudi ngaavi' om poboos no do, “Aiso i' do kahasaan do to'ium ku do id disido. 39 Nga' tumanud nopo do koubasanan diozu nga' apatut zou do papahapas do songuhun i pointolungku' do ontok Pamakanan do Kinahapasan; dadi' mimang kou naku do pahapason ku montok diozu i laja' do Johudi ngaavi'.” 40 Gizak no izioho' do, “Okon ko' tuhun diti, nga' i Barabbas?” I Barabbas nopo nga' mananakau.
1 Dadi' pokiovitai no di Pilate i Jesus om pokiposutai no; 2 om kahapas nopo iti, ponoodo no do siga mantad ugi i susumangod ngaavi' om posigaai no disido om goungai no isido do gaung i aagang-agang binulou. 3 Mingguguhion izioho' do mikot doid disido om mimboos no do, “Tabi', oi laja' do Johudi ngaavi'!” ka, om tapapon dioho' o voos disido. 4 Habus no vagu' i Pilate om poboos no doid dioho' do, “Bio', oviton ku isido do humabus doid diozu do popokito diozu do aiso i' do hasa' dau do tokito ku.” 5 Dadi' habus no i Jesus do poinsiga do ugi om poinggaung do gaung i aagang-agang binulou. Poboos no i Pilate do, “Doiti' no iti tuhun.” 6 Kokito nopo dioho' isido, gizak no i huguan do padri' ngaavi' om i mintatamong ngaavi' do, “Papapakon isido! Papapakon isido!” Poboos no i Pilate do, “Ovito' no diozu sonḏii' isido om papapakon no isido: aiso i' do hasa' disido do tokito ku.” 7 Simḇa no i Johudi ngaavi' do, “Kivaa i' Unḏang-unḏang dagai, om tumanud nopo diho' Unḏang-unḏang nga' apatut isido do patazon, tu' minagampa' isido do Tanak isido do Kinoingan.” 8 Koongou nopo di Pilate izioho' do minoboos diti, ko'uangai no o ko'o'osi disido. 9 Suang no vagu' isido do id di Tiizonon do Gounal, poboos no isido doid di Jesus do, “Mantad ko nomḇoo?” Nga' au' suminimḇa i Jesus. 10 Dadi' poboos no i Pilate doid disido do, “Au' ko naku mimang do moboos doid dogo'? Tantu' no do koiho ko do kikuasa' zou do papagabas diau om kikuasa' zou do papapapak diau?” 11 Simḇa no i Jesus do, “Aiso i' daa do kuukuasa' nu doid dogo' nung au' no nakataak doid diau ii do mantad savat; iho' no poogi' do poinhoohobi no o hasa' di songuhun i pinapataak dogo' doid diau.” 12 Mantad nopo di diho' do tipapagabas nopo di daa disido i Pilate, nga' gizak no i Johudi ngaavi' do, “Nung pagabason nu nopo isido nga' okon i' ko' tamḇahut ko di Caesar; iisai nopo i mamadadi dau sonḏii' do laja' nga' humavan di Caesar.” 13 Koongou nopo di Pilate o boos ngaavi' diti, ovito' no dau do huminabus i Jesus, om po'iikoo' no dau do id tiikoon pomḇiḇisalaan id iso' tizonon i pungaanan do Nuhudan do Vatu, id Hebrew nopo nga' Gabbatha. 14 Ontok nopo di nga' Tadau Kopotounḏaan do Pamakanan do Kinagabasan, kuang hobi do jaam koopod om duvo tangaadau. “Doiti' no iti laja' diozu,” ka di Pilate doid di Johudi ngaavi'. 15 Nga' gizak no izioho' do, “Patazon isido, patazon isido, papapakon isido.” Poboos no i Pilate do, “Papapakon ku di naku o laja' diozu?” Simḇa no i huguan ngaavi' do padri' do, “Aiso i' do laja' dagai nga' i Caesar no.” 16 Dadi' pataako' no di Pilate isido doid dioho' do maan papapako'. Dadi' ovito' no dioho' i Jesus, 17 om habus no isido do poinsaan do salip dau do kuminaa' doid Tizonon do Bangkavan, toi ko' id Hebrew nopo nga' Golgotha, 18 i pinapapakan dioho' disido miampai do duvo tuhun, sopisonguhun do miampaping disido, id tanga' nopo nga' i Jesus. 19 Ponuat no i Pilate do kopoihaan om posokoto' no ii do id di salip; ii nopo poinsuat nga', “I Jesus do Nazareth, Laja' do Johudi ngaavi'.” 20 Ogumu' o Johudi ngaavi' do nakabasa' do kopoihaan diti, tu' ii nopo pinapapakan di Jesus nga' au' i' osodu' mantad di kakaḏazan tagazo, om suat nopo di nga' id boos do Hebrew, Latin om Greek. 21 Dadi' poboos no doid di Pilate i huguan ngaavi' do padri' do Johudi do, “Au' ko apatut do poposuat do, ‘Laja' do Johudi ngaavi',’ ka, nga' ‘Minoboos o tuhun diho' do Laja' zou do Johudi ngaavi',’ ka.” 22 Simḇa no i Pilate do, “Nunu nopo i nokosuat ku, nga' nokosuat ku no.” 23 Kopongo nopo di susumangod ngaavi' do pinapapapak di Jesus, onuo' no dioho' i basaan disido om pogibooboogizo' no ii do id apat boogizan, iso' montok do songuhun susumangod. Ii nopo gaung saahom disido nga' aiso do hupi, navo do pasalangkai mantad hiou gisom doid hinupian id siibo'; 24 dadi' pogibooboos nodii izioho' do, “Kada' dotokou kiniso' iti, nga' kanou no pinsimpuutai dotokou iti do manantu' do iisai o kaanu diti.” Id lahan diti no do notuhuk i boos ngaavi' di Ḇuuk Toḇitua do: “Piboboogizon dioho' o basaan ku ngaavi' tahaab om pinsimpuutan dioho' o basaan ku ngaavi'.” Ingkaa no i nimaan di susumangod ngaavi'. 25 Poingkakat id doos di salip di Jesus i tina' dau om i tobpinai tonḏu' di tina' dau, i Mary savo di Clopas om i Mary do Magdala. 26 Kokito nopo disido i tina' dau om i mokiki'ia' i kinoginavaan dau do poingkakat id doos dosido, poboos no i Jesus doid di tina' dau do, “Oi tonḏu', iti no i tanak-kusai nu.” 27 Dadi' poboos no isido doid di mokiki'ia' dau do, “Iti no i tina' nu.” Om mantad do jaam di do ovito' no di mokiki'ia' zosido doid hamin dau. 28 Kopongo nopo iti, nokoiho i Jesus do nopongo nodii o saviavi', om do mooi do otuhuk nodii kozo i Ḇuuk Toḇitua, poboos no isido do, “Tuuvan zou.” 29 Kivaa do sontunsina' noponu' do anggur toonsom do doiho' di; dadi' poobugo' no dioho' doid anggur o totogop di om posonggio' no do id sampatod o laan kazu hisop om posungguvo' no ii doid kabang disido. 30 Koinum nopo di Jesus i anggur, poboos no isido do, “Notuhuk no iti;” om potidukuo' no dau o tuhu om kovodtuai no isido do ginavo. 31 Ontok nopo di nga' Tadau Kopotounḏaan, om mooi do au' kotinḏooi doid salip i tinan ngaavi' do ontok tadau Sabbath — tu' tadau Sabbath nopo nga' tadau i pantangon poimḇiḏa' — pokianu no do kasagaan di Pilate i Johudi ngaavi' do monipu' di takod ngaavi' om do mogovit di tinan ngaavi' dioho'. 32 Dadi' ngozo' nodii tipuo' di susumangod ngaavi' o takod ngaavi' di songuhun i nakapapak miampai disido om ii nogi' tiso'. 33 Kodimpatai nopo dioho' i Jesus, nga' kokito no dioho' do napatai no isido, om au' di tinipuan dioho' isido do takod ngaavi' dau, 34 nga' ḏuako' no di songuhun di susumangod ngaavi' o tobik disido miampai do tanḏus; om tuutulus do huminuzung o zaa' om vaig. 35 Iti no o kososian di songuhun i nokokito di — i kososian totopot, om nokoiho isido do ii nopo booson dau nga' otopot — om manaak isido diti mooi do iziozu nga' otumḇazaan nogi' daa. 36 Tu' nangaantakan iti do monuhuk di boos ngaavi' di Ḇuuk Toḇitua do: “Aiso mai' tongoiso' do tuhang dau do otipu';” 37 om noboos vagu' do id sinuatan suvai do id ḇuuk toḇitua do, “Mintong mai' izioho' di songuhun i ḏinuak dioho'.” 38 Kahapas nopo iti, pokianu no di Pilate do kasagaan do mogongoi di tinan di Jesus i Joseph do Arimathaea, i mokiki'ia' i mogohimu do tumanud di Jesus tu' oosizan isido di Johudi ngaavi'. Panaak no i Pilate do kasagaan, dadi' ngozo' no dioho' ii om ovito' no. 39 I Nicodemus nga' minikot nogi' — isido no i minikot haid doid di Jesus do doungosodop — om minogovit isido do kamazan piniguo' do tumau kazu toongid, i kivinagat do kuang hobi atus paun. 40 Ngozo' no dioho' i tinan di Jesus om hopoto' no dioho' ii do kain sutala' miampai di lampa, tumanud do koubasanan do Johudi ngaavi' do momohobong. 41 Kivaa do kaḇun do doiho' id pinapapakan disido do id salip, om id kaḇun nopo di nga' kivaa do luak hobong i vagu po, i aiso po do songuhun nohobong. 42 Sabap no do Tadau Kopotounḏaan do Johudi ngaavi' ii om osomok i kahabangan, hobongo' no dioho' i Jesus do doiho'.
1 Osuvab po kozo di ontok tadau koiso' do minggu' om kakaal po do otuvong, do ontok koikot doid hobong i Mary do Magdala. Kokito no dosido do nosuung mantad di hobong i vatu 2 om panangkus no do minongoi doid di Simon Peter om doid di mokiki'ia' tiso', i kinoginavaan di Jesus. Poboos no zosido do, “Nongoi dioho' do mantad di hobong i Tuhan, om au' di izikoi nokoiho do id nomḇoo pinoizanan dioho' disido.” 3 Dadi' ugad no i Peter do doiho' id hobong miampai di mokiki'ia'. 4 Mininamot izioho' do minanangkus, nga' oidau-idau i mokiki'ia' tiso' do minanangkus ko' i' Peter, om nokopoguhu di isido do nokoikot doid hobong di; 5 tingkukub no isido om kokito no dau i kain sutala' ngaavi' do poimḇihiu id tana', nga' au' i' suminuang isido. 6 I Simon Peter, i muugusa' disido, nga' nokodimpot nogi', suang no di hobong, kokito no dau i kain sutala' ngaavi' do poimḇihiu id tana' 7 om ii nogi' kain i pointokop haid di tuhu disido; i poimpidan mantad di kain sutala' ngaavi' om poinghingkum sonḏii' do id iso' pinovihian. 8 Dadi' suminuang nogi' i mokiki'ia' tiso' i nokopoguhu do nokoikot doid hobong; nokokito isido om notumḇazaan. 9 Gisom do timpu diti, au' i' izioho' nakalati' di ḇuuk toḇitua, do mositi' tumungag isido mantad poimpatai. 10 Dadi' uhi' nodii doid hamin dioho' i mokiki'ia' ngaavi'. 11 Nga' poingkakat i Mary do id habus id somok di hobong, do miad-iad. Dadi', do maso miad zosido, tingkukub no zosido do minintong doid suang, 12 om kokito no do duvo tasab do poimbasaan do opuak, poinḏikau do id kinovihion haid di tinan di Jesus, iso' ponong id tuhu om iso' ponong id takod. 13 Poboos no izioho' do, “Oi tonḏu', nookuo tu' miad ko?” Simḇa no zosido do, “Nongoi dioho' i Tuhan ku, om au' zou di nokoiho doid nomḇoo o pinoizanan dioho' disido.” 14 Do maso zosido moboos diti, kovihi no zosido om kokito no dau i Jesus do poingkakat do doiho', nga' au' i' zosido nokoiho do i Jesus ii. 15 Poboos no i Jesus doid dosido do, “Oi tonḏu', nookuo tu' miad ko? Iisai iumon nu.” Soou dosido do i momumutanom isido, poboos no zosido do, “Oi tuan, nung iziau nopo o minogongoi disido, poihoo' zou do id nomḇoo o pinoizanan nu disido, om ngozon ku i' ovito' isido.” 16 Poboos no i Jesus do, “Mary!” Dadi' kovihi no zosido om poboos no doid disido do id boos do Hebrew do, “Rabbuni!” — kikomozon do oi Mongingia'. 17 Poboos no i Jesus doid dosido do, “Kada' igit dogo', tu' au' zou po nokoinsavat doid di Tama'. Nga' ngozo' no iumo' i tobpinai ku ngaavi', om poihoon no izioho' do: Minsavat zou doid di Tama' ku om Tama' diozu, doid di Kinoingan ku om di Kinoingan diozu.” 18 Dadi' poihoo' no di Mary do Magdala i mokiki'ia' ngaavi' do, “Nokokito zou di Tuhan,” om do noboos ngaavi' disido iti doid dosido. 19 Di sosodopon do tadau om tadau di, i tadau koiso' do minggu', songingangob i vavazaan di hinimput i kinotimungon di mokiki'ia' ngaavi', tu' ongoosizan izioho' do Johudi ngaavi'. Ikot no i Jesus om ingkakat no do poingamung dioho'. Poboos no isido doid dioho' do, “Pibabasan doid diozu,” 20 om koboos po disido iti, pokitanai no disido dioho' i hongon ngaavi' om tobik dau. Noikot no do nongounsikou do nokokito di Tuhan i mokiki'ia' ngaavi', 21 om poboos no vagu' isido doid dioho' do, “Pibabasan doid diozu. Miaga di Tama' tu' minonuu' dogo', ingkaa nogi' tu' suu'on ku iziozu.” 22 Koboos po disido iti, puabaai no dau izioho' om poboos no do, “Toimoo' no i Spiritu Toḇitua. 23 Nung pohiongon diozu o ḏouso diisai noopo, nga' ongohiong ii; nung timpoonon diozu o ḏouso diisai noopo; nga' ongotimpoon ii.” 24 I Thomas nopo, i pungaanan do i Tapid, i songuhun di opod om duvo, nga' aino' do miampai dioho' di ontok koikot i Jesus. 25 Dadi' biisaai no di mokiki'ia' ngaavi' suvai isido do, “Nokokito zikoi di Tuhan,” nga' simḇa no isido do, “Sahagi-ngau' okito ku i luak ngaavi' di paku' ngaavi' do id hongon ngaavi' disido om kosusuk ku o tuntuu' ku do id luak ngaavi' di, om sahagi-ngau' kosusuk ku o hongon ku do id tobik dau, au' zou i' otumḇazaan.” 26 Vahu' nodii tadau mantad di, doiho' vagu' id hamin di i mokiki'ia' ngaavi' om miampai dioho' i Thomas. Songingangob i vavazaan ngaavi', nga' suang no i Jesus om ingkakat no do minamung dioho'. Poboos no isido do, “Pibabasan doid diozu.” 27 Dadi' poboos no isido doid di Thomas do, “Posusuko' ino tuntuu' nu do duutia; bii'o', itia iti hongon ku ngaavi'. Poohozo' no ino hongon nu; posusuko' ino do id tobik ku. Kada' nodii do au' otumḇazaan nga' kotumḇazaai no.” 28 Simḇa no i Thomas do, “Oi Tuhan om Kinoingan ku!” 29 Poboos no i Jesus doid disido do, “Otumḇazaan ko tu' kokito ko dogo'. Ongounsikou no i au' ngaavi' nokokito nga' otumḇazaan i'.” 30 Ogumu' o tanḏa' ngaavi' suvai i nimaan di Jesus do nokito di mokiki'ia' ngaavi', nga' au' i' nongokosuat ii do id ḇuuk diti. 31 Itia nopo nga' nongokosuat do otumḇazaan kou nodii daa do i Jesus no i Kristus, i Tanak do Kinoingan, om do otumḇazaan kou nopo diti nga' kikoposizon kou mai' maza' do ngaan disido.
1 Kahapas nopo iti, intahang no vagu' sonḏii' i Jesus doid di mokiki'ia' ngaavi' dau. Doiho' id tisan daat do Tiberias ii, om ingkaa ii do naantakan: 2 Notimung zo Simon Peter, i Thomas i pungaanan do i Tapid, i Nathanael mantad Cana do Galilee, i tanak ngaavi' di Zebedee om duvo po vagu' di mokiki'ia' ngaavi' disido. 3 Poboos no i Simon Peter do, “Mongoi zou ponginsada'.” Simḇa no izioho' do, “Tumanud zikoi diau.” Ugad no izioho' om sakai no di padaau nga' aiso do naanu dioho' do sodop di. 4 Kanavau nopo, poingkakat doiho' id papak i Jesus, nga' au' i' nokoiho i mokiki'ia' ngaavi' do i Jesus ii. 5 Pomohoou no i Jesus do, “Oi tamḇahut ku ngaavi', kivaa i' do naanu diozu?” Om kosimḇa nopo izioho' do, “Aiso,” 6 poboos no isido do, “Pahanato' ino pukot do id ponong vanan dino padau om kaanu kou i' mai'.” Dadi', pahanato' no dioho' i pukot om au' izioho' nakagazat di tu' noikot no ginumu' do sada'. 7 Poboos no doid di Peter i mokiki'ia' i kinoginavaan di Jesus do, “I Tuhan iho'.” Koongou nopo o boos ngaavi' diti, “I Tuhan iho',” poihito' po di Simon Peter i basaan dau do soibau (tu' pobuhagas isido) om tuun no do id vaig. 8 Ii nopo mokiki'ia' ngaavi' suvai nga' minikot do poinsakai di padaau, poinggazat di pukot miampai di sada'; kuang hobi do atus no ila izioho' mantad di papak. 9 Kotinḏa nopo izioho', kokito no dioho' do kivaa louti do doiho' om kisada' do maamaso huguon do id popou. 10 Poboos no i Jesus do, “Pogovit kou do tokuudi' di sada' i ka'a'anu diozu.” 11 Ongoi no sakai di padaau i Simon Peter om gazato' no i pukot do pinopoingisan i noponu' do sada' tangagazo, kiginumu' do atus om himo ngoopod om tohu; om ingkaa potuu o ginumu' di nga' au' i' navanḏak i pukot. 12 Poboos no i Jesus doid dioho' do, “Kanou no makan.” Aiso songuhun di mokiki'ia' ngaavi' do nakatama' do muot do, “Iisai ko?”; nokoiho izioho' do i Tuhan no ii. 13 Insomok nodii i Jesus, om paganu no di louti om pataako' no ii doid dioho', om ingkaa nogi' do id di sada' ngaavi'. 14 Iti no i kumointohu di Jesus do minintahang sonḏii' doid di mokiki'ia' ngaavi' di mantad kotungag isido mantad di poimpatai. 15 Kaakan nopo izioho' poboos no i Jesus doid di Simon Peter do, “Oi Simon tanak di John, guminavo ko naku dogo' do hobi ko' mantad koginavaan diti suvai ngaavi'?” Simḇa no isido do, “Oo', oi Tuhan, nokoiho ko do guminavo zou diau.” Poboos no i Jesus doid disido do, “Sumado' no i kamḇing ḇiri'-ḇiri' ku ngaavi'.” 16 Poboos no isido do kumoinḏuvo doid disido do, “Oi Simon tanak di John, guminavo ko naku dogo'?” Simḇa no isido do, “Oo', oi Tuhan, nokoiho ko do guminavo zou diau.” Poboos no i Jesus doid disido do, “Tamangai no i kamḇing ḇiri'-ḇiri' ku ngaavi'.” 17 Dadi' poboos no isido doid disido do kumointohu do, “Oi Simon tanak di John, guminavo ko naku dogo'?” Kotongob no i Peter do minuot dau isido do kumointohu do, “Guminavo ko naku dogo'?” om poboos no isido do, “Oi Tuhan, koiho ko do saviavi'; koiho ko do guminavo zou diau.” Poboos no i Jesus doid disido do, “Sumado' no i kamḇing ḇiri'-ḇiri' ku ngaavi'. 18 Poihoon ku iziau totootopot, ontok nopo di omuhok ko po nga' soosonḏii' ko do minanantaagkos om minamanau doid nomḇoo noopo o kinaanangan nu; nga' ohoing ko nopo nga' pahanaton nu o hongon nu ngaavi', om vokon i' mai' o manaagkos diau om oviton ko no doid di okon ko' kaanangan nu.” 19 Miampai do boos ngaavi' diti, pinopointahang disido do okuukuo o kapatazon di Peter i kapamḇantug do Kinoingan. Kahapas nopo iti poboos no isido do, “Tanud dogo'.” 20 Kovihi no i Peter om kokito no i mokiki'ia' i kinoginavaan di Jesus do manud-tanud dioho' — i songuhun i suminonḏiu do id kangkab disido di ontok makan touvi no om minoboos doid disido do, “Oi Tuhan, iisai ino popotobus diau?” 21 Kokito nopo di Peter isido, poboos no isido doid di Jesus do, “Ingkuo isido do dau, oi Tuhan?” 22 Simḇa no i Jesus do, “Nung mimang zou do kotimpoon isido gisom i' do koikot zou, kokuukuo di diau ino? Iziau nopo nga' tumanud dogo'.” 23 Dadi', kotongkop no doid di tutumanud ngaavi' i aḇal do au' i' apatai o mokiki'ia' diti. Nga' au' i' nokoboos i Jesus doid di Peter do, “Au' i' mai' apatai isido,” nga', “Nung mimang zou do kotimpoon isido gisom i' do koikot zou.” 24 Iti no i songuhun mokiki'ia' i suminasi' ngaavi' diti om pinoposuat ngaavi' diti, om nokoiho tokou do otopot i kososian dau. 25 Ogumu' po suvai o nimaan di Jesus; nung soinigon ngaavi' ii do poposuat, nga' opiumanan ku do pomogunan po sonḏii' nga' au' koumpos di ḇuuk ngaavi' do osuatan.