1 Iri nopo di aupo novorun iti vonuvo om kivarono laaid iri ponguranan do Tinangaran diri. Om i Tinangaran nopo diri nga maja-vaja do Kinoringan om Tinangaran nopo diri nga Kinoringani. 2 Mantadpo di timpuun nga sirino di Kinoringan iri Tinangaran. 3 Om Isidono nipamaal kasangkat do onuu nopo diri vinaal do Kinoringan do nong auso Isido nga ausoi iso avaal di Kinoringan. 4-5 Om Tinangaran dirino nontodon do kovijaan om iri nopo kovijaan siri Disido nga patarang diri sinoromo di tongotulun. Om kovijaan nopo Disido om irino Tanavau do monitiu siri totuvong, irino duso, om au kadapat i totuvong momisok di Tanavau diri. 6 Om kivaro iso tulun, i susuuon do Kinoringan, ngaran nopo disido nga i Yaya. 7 Om ongoino dii isido do pasaksi di tongotulun pasal di Tanavau diri, irino i Koristus, supaya korongou i tongotulun diri kosoksianjo om aparsaya iolo di Yisus Koristus. 8 Nga i Yaya nopo om okoniko i Tanavau isido, nga nokorikot isido do porongou noopo pasal diri Tanavau. 9 Nga iri nopo i Tanavau do oinomod nga rumikot siti vonuvo do monitiu pointikid-tikid do tulun. 10 Sitino vonuvo iri ponguranan do Tinangaran, om nipavaal Disido iti vonuvo nga aui otutunan Isido di tongotulun siti vonuvo. 11 Om rinumikot Isido siri vonuvoJo kondiri nga aui Isido tinorima di bansaJo. 12 Nga isai-isai nopo monorima Disido om aparsaya Disido om irino noonuanJo do kuasa supaya sumiliu di tongotangaanak do Kinoringan. 13 Nga iri nopo sumiliu do tongotangaanak do Kinoringan nga okoniko irad diri kouvangan do misasavo siti vonuvo do midudun, nga i Kinoringanno poposiliu diolo do tongotangaanakJo. 14 Iri nopo ponguranan do Tinangaran diri nga sinumiliu do tulun do minindada siti daton om opuavang marong Isido, om oinomod marong i tinangaranJo, om naantanganja iri vinaang do kagajaanJo do irino koontok do pataakon di Tama siri di TanakJo tunggal. 15 Nga i Yaya nopo om opuod pasaksi di tongotulun do irad diti, “Isidono iri komoionku do, ‘Isidono i sumusuut dogo rumikot nga agajo pangkat kanogi mantad dogo, do aupo nokosirot oku om sinono Isido laaid,’ kangku,” kadi Yaya. 16 Om opuavang marong Isido daton, om onuan tokou do barakat Disido do auso gosob. 17 Do i Musa nopo nga sinuu di Kinoringan porikot diri Undang-undang Ugama do Joudi siti daton. Om i Yisus Koristus nopo nga opuavang daton om porikot di tinangaranJo do oinomod si daton. 18 Aupo insan tulun koontong do Kinoringan, nga irino i Tanakjo si sonib Disido, i TamaJo, do popointutun Disido daton. 19 Kivaro insan tadau do sinuu di tongokotua do tulun Joudi i tongoimam om i ponunulung diolo, i tongotulun do Liwi, do mampanau mantad Bandar Yorusalim mongoi si di Yaya. Tomodon nopo diolo nga mongoduat nong isai isido. Jadi itino nijawap di Yaya diolo, 20 do ka, “Ioku nopo diti om okoniko i Koristus, i pinili do Kinoringan sumiliu do Raja,” kadi Yaya, do mangakun do au mongolim isido. 21 Om pongoduatno dii kavagu iolo do, “Nong irad dino isaikoi bala, iIlia naku?” ka. Om jawap i Yaya do ka, “Okoni,” ka. Om, “Ika naku iri Nabi irad di Musa?” kadiolo do minongoduat kavagu. Om, “Okoni,” kadi Yaya jumawap diolo. 22 Om pongoduatno kavagu iolo do, “Isaikoi bato? Poiloo ikoi nong isaiko, supaya oilaanja mangaabar di tulun minonuu dagai. Onu i tangarnu pasal dika kondiri?” kadiolo. 23 Om jawapno dii i Yaya do, “Iokuno iri komoion di nabi Yasaya, i popolombus di tinangaran do Kinoringan di pogulu do, ‘Kivaro nogi iri dolou do tulun siri padang kovotuvan do moou-loou do, “Loisonno i ralan di vajaan di Tuhan,” kadi tulun,’ tinulis di Yasaya,” kadi Yaya. 24 Om iri nopo tongotulun mongoi sumamung di Yaya nga sinuu di kumpulan Porisi. 25 Om pongoduatno iolo kavagu di Yaya do ka, “Nong okoniko i Koristusko, om okoniko iIliako, om okonko iri nabiko, nokuro do mamatisko do tulun?” kadiolo. 26-27 Om jawapno i Yaya diolo do, “Ioku nopo diti om vaig noopo pamatisku do tongotulun. Nga kivaro iso tulun rumikot sumusuut dogo do mongoi siti dikovu do au otutunan muju. Nga insan mongujadpo di tali kasutJo nga au oku kobulun do au oku kotumi di kuasaJo,” kadi Yaya. 28 Pinitangaran nopo diolo diri nga si Bandar Boitani silo ponong kosilauon si sondipau do bavang Yurdon siri pinomotisan di Yaya di tongotulun. 29 Susuvab nopo dii om kaantangaino dii di Yaya i Yisus do rumikot siri disido om kadii disido, “Antangaino ilo Tanak do Kambing Biri-biri mantad do Kinoringan i sumiliu isogit supaya koidu i duso do tongotulun siti vonuvo. 30 Ilono komoionku do, ‘I Yisusno i sumusuut dogo rumikot nga agajo pangkat kanogi mantad dogo, do aupo nokosirot oku om sinono Isido laaid,’ kangku diri. 31 Ioku di pogulupo nga aupo kotutun di Yisus, nga kinorikatanku nopo siti mamatis do tulun, do i vaig pamatisku supaya koilo kou tulun do Israil do rumikot Isido siti,” kadi Yaya. 32-34 Om ponoritano dii i Yaya diri naantangan disido do ka, “Minonuu i Kinoringan dogon di pogulu mamatis do tulun diri vaig, om pinoilo oku do irad diti, ‘Koontongko nopo diri iso tulun do sakaan di Tatod do Kinoringan om mindada siri Disido om Isidono iri mamatis do tulun do Tatod Tolidang,’ kadi Kinoringan. Jadi nokoontong oku dii di Tatod do Kinoringan do minindaau kosubol do kungkur mantad si suruga do sinumako om minindada siri di Yisus. Om ontok diri au okupo daa kotutun Disido, nga aandamanku iri tangar di Kinoringan, om poiloonku dii ikovu do Isidono i Tanak do Kinoringan,” kadi Yaya. 35 Om susuvabno dii kavagu, sirino i Yaya om ikoi duvo tulunjo poingkakat. 36 Om kaantangaino dii di Yaya i Yisus do tumalib, om kadii disido, “Antangaino! Ilono Tanak do Kambing Biri-biri mantad do Kinoringan,” ka. 37-40 Om korongou nopo dii ikoi mongiduvo diri tangar di Yaya, om ongoino dii ikoi sumusuut do maja di Yisus. Iri nopo iso tulun nga iOndorias ngaranjo. Om kovili nopo dii i Yisus nga naantangan dii Disido ikoi do muut-suut, om pitangarno dii Isido dagai do, “Onu iumon muju?” ka. Om jawapno dii ikoi, “Rabi, inombo indadawonNu?” ka. -- Komoion nopo do “Rabi” nga “Guru”. -- Om pitangarno dii Isido dagai do ka, “Kayono pogi, ongoi kou ontong,” ka. Ontok nopo diri om kivaro kama do pukul ampat iri minsosodop, om ongoino dii ikoi mongontong diri inindadawonJo. Om indadapo dii ikoi duvo tulun siri ontok do tadau diri. IOndorias nopo nga iadijo di Simun Pitrus, 41 om iumono mogulu disido i Simun, iakajo. Om nakasamungno dii om kadisido, “Nakasamung ikoino di Mosias,” ka. -- Komoion nopo di Mosias nga Koristus, i pinili do Kinoringan sumiliu do Raja. -- 42 Om angataino dii diOndorias i Simun siri di Yisus. Om kaantangai dii di Yisus i Simun, om kadii Disido, “Ika nopo nga i Simun, i tanak di Yaya, nga roitonKu ino ngarannu do i Koipas,” kadi Yisus. -- Koipas nopo nga miirad di komoion diri ngaran do Pitrus, irino vatu. -- 43 Om susuvabno dii kavagu om tontuono dii di Yisus do mongoi soi Vonuvo Golilia. Iri aupo nakapanau Isido, sinumamung dii di Pilipus do ka, “Kaino vaja Dogo,” ka. 44 I Pilipus nopo nga tulun mantad si Bandar Boitsida, isoi bandar kinoijonon diolo diOndorias om i Pitrus. 45 Om iumono dii di Pilipus i Natanil, kosomungai nopo dii, om kadii disido, “Nakasamung ikoino dagai diri tulun i narait di Musa siri buuk pinotulisanjo diri Undang-undang Ugama tokou, om pinotulisan di tongonabi, irino i Yisus, tanak di Jusip mantad si Bandar Nasarit,” ka. 46 Nga jawap kadi Natanil disido, “Ombo kivaro nunuu do aandai do mimbulai mantad Nasarit?” ka. “Kayono pogi om antangannui kondiri,” kadi Pilipus. Om pampanauno dii iolo do mongoi sumamung di Yisus. 47 Om kaantangaino dii di Yisus i Natanil do rumikot siri Disido, om pitangarno dii i Yisus pasal di Natanil do ka, “Atino i tulun do Israil i otulid marong ginavo, om au ovuvudut,” kadi Yisus. 48 Korongou nopo dii i Natanil do irad diri om kadii disido, “Onu dii kotututunNu do gaagayaku!” ka. Om kadi Yisus, “Ii au kopo noloou di Pilipus, naantanganKuno laid ika siri puun do nunuk,” ka. 49 Kadii di Natanil, “Rabi, Ikano i Tanak do Kinoringan, i Raja do tulun do Israil!” ka. 50 Om pitangarno dii i Yisus disido do ka, “Aparsayakoi bala do tangarKu do naantanganKu ika siri puun do nunuk. Om okon iri-iri noo, nga kivaropo agajo mantad diti do aantangannu,” kadi Yisus. 51 Om pitangarno dii kavagu i Yisus do ka, “PatangaronKu marong dikovu iti do koontong kou do ivangan dino ilo suruga, om moloikat do Kinoringan nga moisusulang mindakod-mindaau mongoi siti Dogo, i Sinumiliu do Tulun,” kadi Yisus.
1 Ontok di tadau kotolu mantad di kinapanaan di Yisus mongoi si Vonuvo Golilia, kivaro mikawin siri Kampung Kana si Golilia, om iinoJo di Yisus nogi nga siri. 2 I Yisus om ikoi i tongotulunJo nga linoou sumapul. 3 Nga ontok diri moginiupon dii iolo, om kooviai dii di liing do anggur om pitangarno dii iinoJo di Yisus do ka, “Ausono i liing do anggur diolo,” ka. 4 Kadi Yisus, “Ino, nokuro mokitulungko Dogo, do aupo norikot iri masoKu?” ka. 5 Nga kadiinoJo di Yisus di tongotulun do monulung kumaraja siri, “Vojoo mujuno pogi ino tangaronJo dikovu,” ka. 6 Nga kivaro onom iri suvangan siri do poinsodia do pongugasan irad di adat di tulun Joudi, om pointikid-tikid do suvangan diri nga miinong do orumpos do duvo nopulu ko tolu nopulu gilin do vaig. 7 Om kadi Yisus di tongotulun do monguup kumaraja siri, “Ponuo muju pogi do vaig ilo suvangan,” ka. Om tunguaino dii diolo gosob do noponu. 8 Om pitangarno dii i Yisus diolo do ka, “Souko mujupo dino maino om ovitono silo kotua diti poginakanan,” ka. Om ongoino dii iolo diri. 9 Om tarajo nopo dii di kotua do poginakanan iri roso di vaig do nosiliu liing do anggur, nga aui noilaan disido nong inombo nontodon diri, iri noo tongotulun diri minonguup kumaraja do nokoilo diri. Om loovojono dii iri kinumawin, 10 om kadisido, “Koubasan nopo do tulun inombo nopo iri aandai om ipoiuppo mogulu, om nababasan nopo dino i tongotulun monijop ampa nogi dino do ipoiup iri au songkuro aandai, nga ika nopo potourijononnu nogi i aandai sampai maino,” kadi kotua diri poginakanan. 11 Itino pongintutunan vinaal di Yisus nokopogulu siri Kampung Kana si Golilia do pinopointalang diri kagajaanJo, om kaparsayaaino dii ikoi i tongotulunJo Disido. 12 Noikaspo dii iri kawin om ongoino dii i Yisus silo Bandar Kaparnaum minoivavaja diinoJo om oiadiJo om i tongotulunJo, om indadano dii iolo do piipirono tadau siri. 13 Om ontok diri oruaino dii i korikatan di Tadau Tagajo do Paska, irino tadau do pangandaman dagai di tulun Joudi di pinogiduan diodu-akija mantad si Vonuvo Masir di pogulupo, om pampanauno dii oi Yisus do tumakad mongoi soi Bandar Yorusalim. 14 Om korikot dii Isido siri natad do Valai Sasambayangan Tagajo om kaantangai dii Disido siri misoliput di Valai Sasambayangan Tagajo do kivaro piipiro tulun do padagang do tongosapi, tongokambing biri-biri om burungasang, om i tongotulun do mipalit-palit do siin songingogom siri kumaraja. 15 Om panabidno dii Isido diri tali do pangalabun, om sunsubono dii iolo kasangkat do mogidu mantad siri natad do Valai Sasambayangan Tagajo mivaja di sapi kambing biri-biri diolo, om pinrovusaiJo dii iri tongosiin di tulun mipalit-palit do siin om pintutuvadoJo dii iri tongomija diolo. 16 Om sunsuboJo dii i tongotulun padagang di burungasang do, “Rangkato mujuno iti kasangkat mogidu. Ada silio iti valai di TamaKu do padagangan muju,” kadi Yisus. 17 Om kaandamaija dii di tongotulunJo i tinangaran nokotulis siri Kitab pasal di Yisus do, “Kinoringan, ogorovot okuno do insan tadau do oolian koupus di valaiNu,” ka. 18 Om pongoduatno dii i tongokotua do Joudi di Yisus do ka, “Onuno pongintutunan do ipoontongNu dagai do kikuasaKo mantad si di Kinoringan do monunsub diri tongotulun siti misoliput di Valai Sasambayangan Tagajo?” ka. 19 Om jawapno dii i Yisus do, “Uyasopo dino iti valai om poingkokotonKui kavagu do toluno tadau,” ka. 20 Om kadii di tongokotua do Joudi, “Apat nopulu om onom toun linaid do popoingkakat do Valai Sasambayangan Tagajo diti om tolui dii naku tadauNu Dika popoingkakat kavagu diti valai!” ka. 21 Nga komoion nopo di Yisus do valai nga i kojuvanJo kondiri. 22 Jadi ontok diri vinijau i Yisus kavagu, ampa nogi do aandaman dagai di tongotulunJo i tinangar Disido diri, om aparsaya dii ikoi siri Kitab om i tinangaran di Yisus. 23 Om ontok di siripo i Yisus Bandar Yorusalim, ontok di Tadau Tagajo do Paska om oguu dii i tongotulun do naparsaya Disido sabap nokoontong iolo diri pongintutunan vinaal Disido. 24 Nga aui aparsaya i Yisus diolo do naparsaya Disido, 25 sabap kasangkat diolo nga otutunani Disido i ginavo diolo. Insan ausoi mangaabar Disido nga oilaanJoi kondiri iri tongoginavo di tongotulun.
1 Kivaro iso kotua do tulun Joudi, ngaranjo nopo nga i Nikodimus. Om isido nogi nga iso tulun do kumpulan Porisi. 2 Om kivaro insan sodop do rinumikot isido siri di Yisus do minintangar do irad diti, “Rabi, oilaanjai Ika do sinuuKo do Kinoringan sumiliu do Guru, sabap nong maja-vaja i Kinoringan di tulun ampa nogi kaanu isido mamaal irad dino pongintutunan vinaalNu,” ka. 3 Jawapno dii i Yisus do ka, “PatangaronKu marong dika iti do auso iiso tulun do kaasu si Kopomorintaan do Kinoringan nong aui aanak kavagu mantad di kuasa di Kinoringan,” ka. 4 Kadi Nikodimus di Yisus, “Potingkuro i tulun do aanak kumoinduvo nong lumoingno i tulun? Buli naku isido masu siri tijan diinojo om anakon nogi di kumoinduvo?” ka. 5 Jawapno dii i Yisus do ka, “PatangaronKu marong dika iti do misti aanak kavagu i tulun do mantad di vaig om kuasa di Tatod do Kinoringan ampa nogi do kaasu si Kopomorintaan do Kinoringan. 6 Isaai nopo aanak mantad do tulun om tuluni isido, nga isaai nopo aanak mantad di kuasa di Tatod do Kinoringan om irino ijanan di Tatod do Kinoringan. 7 Adano kosumboijai diti tangarKu, do misti aanak kou kavagu. 8 Sarup nopo nga tumongus inombo noopo pakaayanjo om orongounui i kinovus disido, nga okonko oilaannu nong inombo nontodonjo ko inombo ongoionjo. Om irad nogi dino pointikid-tikid tulun di naanak do kuasa di Tatod do Kinoringan do oilaan rumikot nga aui antangan,” kadi Yisus. 9 Jawapno dii i Nikodimus do, “Potingkuro do osiliu irad dino?” ka. 10 Nga kadi Yisus, “Ika nopo nga Guru do tulun Israil om aukoi dii kaarati naku diti? 11 PatangaronKu marong dika iti do nombo nopo iri oilaanja om irino patangaronja, om nombo nopo iri aantanganja om irino paabaronja. Nga au kovi aparsaya diri ipaabarja dikovu. 12 Popoilo Oku dikovu diri nosiliu siti vonuvo nga au kovi aparsaya Dogo. Jadi makinpo dii do au kou aparsaya nong popoilo Oku dikovu diri osiliu silo suruga. 13 Ausopo iiso tulun do mininsavat silo suruga, iso Oku nogi, i Sinumiliu do Tulun, i minindaau mantad suruga. 14 Do Iokuno, i Sinumiliu do Tulun, nga misti do poinsavaton siri kaju irad di vulanut vinaal mantad do tambaga i pinorilit si kaju do pinoinsavat di Musa ontok do silo padang do kovotuvan di pogulupo 15 supaya isai-isai nopo i tulun do aparsaya Dogo om kaanu do kovijaan diri auso koovion. 16 Do au marong kojuu i Kinoringan di tongotulun siti vonuvo gosob do pinataak Oku Disido do apatai, do Iokuno i TanakJo tunggal, supaya isai-isai nopo aparsaya Dogo om kaanu do kovijaan diri auso koovion om aui obinasa i tatodjo. 17 Do kinoponuuan nopo di Kinoringan Dogo i TanakJo siti vonuvo nga momijau di tongotulun, om okoniko do momutus. 18 Isai-isai nopo iri aparsaya Dogo om aui oukuman. Nga isaai nopo tulun di au aparsaya om pointantuno do ukuman sabap au isido aparsaya di ngaranKu, i Tanak do Kinoringan. 19 Do itino kopongukuman, sabap nokorikot Oku iri roitan do Tanavau siti vonuvo, nga uvang nogi i tulun diri totuvong, irino duso, ko i Tanavau sabap do araat i gaagaya diolo. 20 Do tikid-tikid do tulun diri araat gaagaya nga au moo di Tanavau om au nogi isido mongoi siri Tanavau do au moo kointalang i gaagaya disido diri taraat. 21 Nga iri nopo tulun di maja do oinomod om rumikot siri Tanavau, supaya kointalangno iri vaalonjo, do maja di kouvangan do Kinoringan,” kadi Yisus. 22 Koopodpo dii iri, om pampanauno dii i Yisus mivaja dagai di tongotulunJo do mongoi silo Vonuvo Yudia, om indada dii ikoi siri do piipiro linaid do mamatis di tongotulun siri. 23-24 Ontok nopo diri om aupo nokojiil i Yaya. Om mamatis isido do tongotulun si Kampung Ainun somok di Kampung Salim, do oguu i vaig siri, om sonririkot i tongotulun siri do mokibatis. 25 Om timpuunno dii i piipiro tulun di Yaya do kumisival di iso tulun Joudi pasal adat do kopongolidangan. 26 Om ongoi nogi dii iri tulunjo siri di Yaya do minitangar do irad diti, “Guru, aandamannupo dii i tulun di nokomoinu dagai di pogulu i kinumoruang dika silo sondipau bavang do Yurdon? Maino nopo nga mamatis Isido do tongotulun, om oguu dii i tongotulun do mongoi siri Disido,” ka. 27 Nga jawapno dii i Yaya do ka, “Nong okonko i Kinoringan manaak di tulun nga aui kaanu isido do onuu nopo. 28 Do ikovu kondiri nga nokorongou di tinangaranku do okonko i Koristus oku, i pinili do Kinoringan sumiliu do Raja, nga sinuu oku do Kinoringan mogulu mantad Disido. 29 Iri nopo kumawin nga irino sumanganu di kowinon. Nga iri nopo i mangagat om mingkakat noopo do mongkinongou di kumawin om aandaian nong korongou di tangar di tulun kumawin, om irad okuno diri mangagat do asanang marong i ginavoku maino. 30 I Koristusno nga misti do majo-gajo i kuasaJo, nga ioku nopo murang-kurang i kuasaku,” kadi Yaya. 31 Isaai nopo rinumikot mantad savat nga irino kikuasa mantad kasangkat do vokon. Nga isaai nopo iri mantad siti vonuvo nga irino moogijon siti vonuvo om tinangaran disido pun i tangar siti vonuvo. Isido nopo iri mantad suruga nga kikuasa mantad do vokon. 32 Om Isidono iri mangaabar kasangkat diri naantangan om i norongouJo, nga koguuan do tulun au aparsaya diri iabarJo. 33 Nga isaai nopo iri aparsaya diri iabarJo om irino mangakun do oinomod i Kinoringan. 34 Sabap iri nopo sinuu do Kinoringan siti vonuvo nga irino popoilo diri tinangaran do Kinoringan, om inonuan do Kinoringan Isido di TatodJo sampai auso gosob. 35 Au kojuuan diAmoJo i TanakJo, om nipokuasano kasangkat Disido do onuu nopo. 36 Om isai-isai nopo i aparsaya di Tanak om irino kaanu do kovijaan diri auso koovion. Nga isai-isai nopo iri au mangasip di Tanak om poinsodiano i karaatan do Kinoringan disido om okonnoko kavajapo dii isido do kovijaan.
1-3 Iri nopo kumpulan Porisi nga nokorongou do oguu dii i tongotulun maja di Yisus om binotisan Disido mantad diri tongotulun maja om binotisan di Yaya. Nga koilaai nopo dii di Tuhan do nokorongou iri kumpulan Porisi do irad diri, om pogiduno dii Oisido mantad siri Vonuvo Yudia om minuli kavagu siri Vonuvo Golilia. Nga oinomod nopo marong, iri nono ikoi, i tongotulun di Yisus, do minamatis di tongotulun toguu, om okoniko i Yisus nakapamatis diolo. 4 Nga vajaan nopo di Yisus muli siri Golilia nga misti do kavaja siri Vonuvo Somoria. 5-6 Om kira-kira jaam duabalas tangaadau kama iri, om nokorikotno dii i Yisus siri iso bandar i ponguranan do Sikar si Vonuvo Somoria somok siri tana iri nitaak di Yakub siri tanakjo, i Jusip, di pogulupo. Om kasamungno i Yisus di torobong di Yakub siri tana diri, nga koujanno dii Isido mampanau om ogomno dii Isido siri somok di torobong. 7-8 Nga iri nopo ikoi, i tongotulunJo, om nakapanauno mongoi pomoli do taakanon siri bandar. Om korikotno dii iri iso tongondu siri do mongovit do sasauk do mongoi managou, om pitangarno dii i Yisus disido do ka, “Onuai Oku vaig,” ka. 9 Nga kadi tongondu do Somoria, “Nokuro do mokiiupKo dogo do vaig do ioku nopo nga tulun oku do Somoria om Ika nopo nga tulunKo do Joudi?” kadi tongondu. Katangaran nopo disido do irad diri sabap i tongotulun Joudi nopo nga au uvang kumigavul di tongotulun Somoria. 10 Om jawapno dii i Yisus do ka, “Nong nokoiloko daa diri nitaak do Kinoringan om kotutunko nong isai Oku diti mokiiup dika, natatantuno do ika kondiri nga mokianu daa Dogo di vaig iri mongovit do kovijaan om oonuanKui ika,” kadi Yisus. 11 Nga kadi tongondu, “Tuan, ausoi sasaukNu om aralompo dino marong torobong diti om ombo dii pogonuanNu do vaig do kovijaan? 12 Agajo naku i kuasaNu mantad di takija i Yakub, i minanaak dagai diti torobong? Do adapo ka om i nanakanjo om totongguvonjo, insan isido kondiri nga mantad siti pogonuan do iuponjo,” kadi tongondu. 13 Nga jawapno dii i Yisus do, “Isaai nopo koiup do vaig diti nga tuuvanpo kavagu, 14 nga isaai nopo mongiup do vaig diri pataakonKu disido om auno tuuvan kavagu. Do vaig nopo diti pataakonKu disido om sumiliu irad do puun do vaig saralom kovijaanjo do posimpulok do koonuanjo do kovijaan diri auso koovion,” kadi Yisus. 15 Om pitangarno dii i tongondu Disido do, “Tuan, onuai okupo do vaig dino, om au okuno tuuvan om au okui apagon do miguguli managou do vaig siti,” ka. 16 Om jawapno dii i Yisus do, “Pouliaino, om loovono i savonu om poguliai kavagu siti,” ka. 17 Nga kadi tongondu, “Ausoi savoku,” ka. Nga jawapaino dii di Yisus do ka, “Oinomod kono dino do, ‘Auso savoku,’ kanu, 18 ombo iti do limono nakasavo dika, om maino ino nopo kusai poindada si valainu nga okoniko savonu marong. Om oinomodno marong ino tangarnu,” kadi Yisus. 19 Nga kadii di tongondu, “Tuan, oilaanku nogi dii Ika do nabiKo. 20 I iodu-akija nga sumamba do Kinoringan siti kulud diti, nga kadi bansaNu tulun Joudi do ka, ‘Oinomod nopo nga silono Bandar Yorusalim pantok do sambawon di tongotulun i Kinoringan,’ kamuju,” kadi tongondu. 21 Om jawapno dii i Yisus do ka, “Abu, aparsayano Dogo do orikot nogi dino i maso do sumamba i tulun di TamaKu nga okonnoko sitipo kulud diti om okonnoko silopo Yorusalim. 22 Do ikovu nopo tulun Somoria om sumamba kou diri au otutunan muju. Nga ikoi nopo tulun Joudi om sumamba ikoi diri otutunanja, sabap onuan do Kinoringan i tulun do kovijaan nga irino mantad di tulun Joudi nontodon. 23 Nga rumikot nogi i maso dii, ombo iti do oinomodno do nokorikotno dii maino i maso dino i sasambawon do tongotulun di susumamba di TamaKu nga mantad di tatodjo om ginavo do oinomod, do tulun nopo do sumamba do irad diri nga kouvangan di TamaKu. 24 Do Kinoringan nopo nga Tatodi, om tulun nopo di sumamba Disido nga misti do oinonomod do sumamba mantad di tatodjo om i ginavojo,” kadi Yisus. 25 Om jawapno dii kavagu i tongondu Disido do ka, “Oilaankui do rumikot i Mosias, i roitan do i Koristus i pinili do Kinoringan sumiliu do Raja. Om korikot nopo dino Isido om porongou nogi dino daton kasangkat do onuu nopo,” kadi tongondu. 26 Om jawapno dii i Yisus do ka, “Iokuno iri Koristus pogotuvang dika do mitangar,” ka. 27 Ontok nopo dii diri nga nokogunggulino dii ikoi, i tongotulun susuuon di Yisus, om oiranan dii marong ikoi do kumituturan dii Isido do iso tondu do kadi ginavoja, “Nokuro do kumituturan i Guru di tondu dilo?” ka. Nga ausoi iiso dagai do minongoduat Disido do, “Onu iumonnu, abu?” ka, ko, “Nokuro do kumituturanKo do tongondu dilo, Guru?” kapo, nga ausoi. 28 Nga iduaino dii di tongondu i suvangan panagaanjo siri, om pampanauno dii muli siri bandar do mangaabar di tongotulun siri do ka, 29 “Kayo tokou mongontong do iso kusai silo do pinavantangJo kasangkat dogo onuu nopo iri gaagayaku. Isidono naku iri Koristus, i pinili do Kinoringan sumiliu do Raja?” kadi tongondu. 30 Om pampanauno dii iolo mantad siri bandar do rumomut siri di Yisus. 31 Ontok nopo diri om angataino dii dagai, di tulunJo, i Yisus do mangakan do ka, “Rabi, kaino mangakan,” kaja. 32 Nga kadi Yisus dagai, “Kivaro taakanonKu di au muju oilaan,” ka. 33 Om poiduduatno dii ikoi, i tongotulunJo do, “Kivaro naku minangatod Disido taakanon?” kadagai. 34 Nga kadi Yisus dagai, “TaakanonKu nopo nga irino maja diri kouvangan do Kinoringan i minonuu Dogo siti vonuvo om mangavi diri karaja nisuu Disido Dogo. 35 Katangaran muju nopo nga, ‘Apatpo vulan om baaru masaan do mongomot,’ kamuju. Nga kangKu Dogo, antangai pogi iri tongotulun rumikot nga irad do kodumaan misoliput muju do naansakno om koinsuatanno do omoton. 36 Iri nopo tulun do mongoi patarang di tinangaranKu gosob do aparsaya iri tulun nga irad do mongomot om kotorima do gaji mantad di Kinoringan. Om untunon disido i tulun irad di parai om onuan iolo do kovijaan diri auso koovion, supaya i tulun do mananom om mongomot nga miirad do asanang i ginavo diolo. 37 Oinomodno poiradan diti do, ‘Sondiang i tulun di mananom om sondiang i mongomot,’ ka. 38 Iokuno i minonuu dikovu mongomot siri dumo di au muju kinaraja, do nipakarajano i tulun vokon siri di togina, om tinggalpo do monguntun kou maino diri parai do kinaraja diolo,” kadi Yisus. 39 Om oguu dii i tongotulun do Somoria mantad si bandar diri do naparsaya di Yisus sabap aparsaya iolo di tinangaran di tongondu do ka, “Pinavantang di Yisus kasaangkat dogo onuu nopo iri gaagayaku,” kadi tongondu. 40 Jadi korikot nopo dii i tongotulun do Somoria siri di Yisus, om oingod dii marong iolo do mokitulung Disido supaya mindada siri diolo, om indadano dii Isido siri do duvo tadau koloido. 41 Om makinpo dii koguuo di tulun siri naparsaya di Yisus do nokorongou di ponudukan Disido. 42 Om kadii diolo di tongondu, “Naparsaya ikoino maino, nga okoniko i natangarnu noopo do kinaparsayaanja, nga ikoi kondiri nokopinrorongou Disido om nokopingiilo ikoi do oinomod do Isidono iri Momimijau do tongotulun siti vonuvo,” kadi tongotulun Somoria. 43 Om katalibpo dii i koduvo tadau siri Bandar Sikar om lombusno dii oi Yisus muli silo Vonuvo Golilia. 44 Do i Yisus kondiri nakatangar do, “Nong siri kampungjo kondiri, au urumaton di tongotulun i nabi, i popolombus di tinangaran do Kinoringan,” ka. 45 Nga insan irad dino, korikot nopo dii Isido silo Golilia, om osuauno marong iolo do popoindakod Disido do iolo nga nokoontong kasangkat onuu nopo iri vinaalJo ontok do Tadau Tagajo do Paska silo Bandar Yorusalim maso do pangandaman dagai do pinogiduan diodu-akija mantad Vonuvo Masir di pogulupo, do iolo nogi nga nokoongoi siri ontok tadau tagajo diri. 46 Om nokorikotno kavagu oi Yisus siri Kampung Kana si Golilia. Om irino kampung diri nokinaman Disido mamaal di vaig pinosiliu do liing do anggur di pogulu. Om kivaro iso pagawai poingkaraja si porinta do kitanak do au kataru silo Bandar Kaparnaum. 47 Om korongou nopo dii isido do nokorikot i Yisus siri Golilia do mantad Vonuvo Yudia, om pampanauno dii i pagawai diri do mongoi sumamung di Yisus do mokitulung marong Disido rumikot silo Kaparnaum do mokilingos di toruol di tanakjo do sipapataino daa. 48 Om pitangarno dii i Yisus disido do ka, “Mimang au kou aparsaya nong au kou koontong do pongintutunan om koiranan,” ka. 49 Om jawapno dii iri pagawai diri do ka, “Tuan, kayono, do aupo oidu i ginavo di tanakku,” ka. 50 Nga kadii di Yisus disido, “Ulino pogi, do olingasani bo i tanaknu,” ka. Om aparsayano dii i tulun di tinangar di Yisus om pampanauno dii isido muli. 51 Om siripo tanga ralan iri pagawai om sinono iri tongoturiponjo do sinumamung mangaabar do ka, “Nolingasanno i tanaknu,” ka. 52 Om duatono dii disido iolo nong pukul songkuro tinumimpuun do nolingasan i toruol di tanakjo. Om kadiolo, “Lumingging i tadau di koniab om koluubno dii i kongkogjo,” ka. 53 Nga kaandamaino dii diamojo di tanak do irino jaam pinatangaran di Yisus disido do, “Olingasani bo i tanaknu,” ka. Om aparsayano dii isido om kasangkat diolo sampaganakan. 54 Om irino dii pongintutunan do kumoinduvo vinaal di Yisus silo Golilia ontok di korikot Isido mantad si Yudia.
1 Koopodpo dii i Yisus siri Vonuvo Golilia, om kivaro dii tadau tagajo do tulun Joudi, om takadno dii i Yisus mongoi silo Bandar Yorusalim. 2 Om silo nopo tobon do Yorusalim nga kivaro pintu roitan do, “Pintu do Kambing Biri-biri”. Om somok nopo diri nga kivaro iso kulam. Nong tangar do Ibrani ngaran nopo do kulam diri nga roitan do Boitsida. Om kivaro limo tindadawon misoliput diri kulam. 3 Om okonko nokukuyak tulun au kabaru do songodop-odop siri, irad di tongotulun bolou, kakung om kimai do mongindad do gumura i vaig siri kulam diri. 4 Do kivaro maso do mindaau i moloikat do Tuhan siri kulam do mongogura di vaig. Om isaai nopo iri kopogulu tumobung siri kulam ontok do gurawon di moloikat iri vaig om irino olingasan di toruoljo. 5 Nga kivaro dii iso kusai siri do toluno nopulu om valu toun koloido momoruui. 6 Om kaantangai dii di Yisus isido do poingodop siri om koilaai do alaaidno isido momoruui, om duatono dii di Yisus do, “Uvangkoi do olingasan?” ka. 7 Om jawapno dii i tulun di kitoruol do ka, “Uvang okui daa, Apa, nga kuroyonpo dii do ausoi potobung dogo silo kulam ontok do gumura ilo vaig, do ontok mindirikot oku silo kulam, nga nosoguluvanan okuno di tulun vokon tumobung,” ka. 8 Om tangaraino dii di Yisus do ka, “Tungagno pogi, om kakatono ino tikamnu om pampanauno,” ka. 9 Om ontokno diri do napangkau turus isido, om kakatojono dii iri tikam om ovitono mampanau. Om ontok nopo do tadau diri nga Tadau Koingkajadan. 10 Sabap diri do minitangar iri tongokotua di tulun Joudi diri tulun di nolingasan do ka, “Tadau Koingkajadan too maino! Auko apatut mongovit dino tikamnu,” ka. 11 Nga kadi tulun nolingasan, “Sinuu oku gia di tulun do minongolingos dogo, do mongovit diti tikamku mampanau,” ka. 12 Om pongoduatno dii iolo do, “Isai ngaran minonuu dika do mongovit dino tikamnu mampanau?” ka. 13 Nga kadi tulun di nolingasan, “Taau, aui kotutun oku nong isai tulun i minongolingos dogo,” ka. Do nakapanauno gia i Yisus lumamud di tongotulun siri sabap do oguu marong i tongotulun. 14 Aupo alaid mantad diri om kosomungaino dii di Yisus i tulun diri siri natad do Valai Sasambayangan Tagajo om pitangar disido do ka, “Napangkaukono dii, kon, nga ada nono mamaal do duso kavagu, om aukoi osuat do lobi kararaat mantad diri,” kadi Yisus. 15 Nga pampanauno dii i tulun do minongoi porongou di tulun Joudi do i Yisusi dii minongolingos disido. 16 Om irino dii koontodo di tongokotua di tulun Joudi do pokoruol di Yisus, sabap do minongolingos Isido ontok di Tadau Koingkajadan. 17 Nga kadi Yisus diolo, “IAmoKu i Kinoringan nopo nga kumarajai sampai do maino, om Ioku pun kumaraja nogi,” ka. 18 Nga iri pun karaatan di tongokotua di tulun Joudi om makinpo dii kookosog diolo do mogium koontodon do kapamatajan di Yisus, do okoniko iri noo nakalanggar di undang-undang diolo kondiri pasal do Tadau Koingkajadan, nga iripo i natangar Disido do TamaJo i Kinoringan, do nong irad dino rumantai Isido do Kinoringan. 19 Om pitangarno dii i Yisus di tongokotua di tulun Joudi do ka, “PatangaronKu marong dikovu iti do Ioku nopo i Tanak do Kinoringan om au Oku kadapat kondiri mamaal do onuu nopo, nga misti sumugut Oku diri karaja diAmoKu. Do onuu nopo iri karajawon diAmoKu om misti iri karajawonKu, do Iokuno i TanakJo. 20 Do Ioku nopo nga au kojuuan diAmoKu, om tudukan Oku Disido kasangkat diri karajawonJo, om tudukan Oku nogi dino di karajawon do agajo mantad diri gosob do ongoiranan kou. 21 Do koinong diAmo do popotungag om povijau di tulun do nongapatai, om inongno dino do Ioku i Tanak momijau do isaai nopo iri kouvanganKu. 22 Om iAmo nopo nga aui momutus Isido, nga Ioku noo i TanakJo do pinataakno Dogo diAmo kasangkat i kuasa manalasai diri kopomutusan. 23 Kinaa diAmo ino supaya kasangkat do tulun nga mongurumat Dogo irad di pongurumat do tulun diAmo. Do isaai nopo i au mongurumat Dogo om iAmoKu i minonuu Dogo siti vonuvo nga au nogi urumaton. 24 PatangaronKu marong dikovu iti do isai-isai nopo mongkinongou diti tangaronKu om aparsaya di Kinoringan i minonuu Dogo siti vonuvo om isidono kivaro kovijaan diri auso koovion. Au kavaja isido do ukuman, nga nakavaliuno isido mantad di kapatajan do minongoi siri kovijaan. 25 Om patangaronKu marong dikovu iti do orikot nopo i maso dii kangKu, nga mimang norikotno maino iri maso do kasangkat tulun di aupo nakaanu di kovijaan do auso koovion nga korongou di dolouKu, i Tanak do Kinoringan. Om tulun nopo di mongkinongou Dogo om ovijau. 26 Do inong diAmo do nontodon do kovijaan, om Ioku nogi i TanakJo nga siniliu diAmo do nontodon do kovijaan inongi Disido. 27 Om pinataakno Dogo diAmo i kuasa do manalasai di kopomutusan, do Iokuno i Sinumiliu do Tulun. 28 Nga ada kouno koiranai diti, do kivaro insan tadau do kasangkat di tulun di napatai nga korongou di dolouKu, 29 om lumabus mantad si lobongjo. Iri nopo tulun di maja di kouvangan do Kinoringan nga tungagon om vijauon. Nga iri nopo tulun di au maja di kouvangan do Kinoringan om tungagon nga ukuman. 30 Momutus Oku maja diri norongouKu si di TamaKu, om au Okui kadapat momutus nong mamakai Oku di kuasaKu kondiri. Nga koputusanKu nopo diri nga otulid sabap irino mantad di kouvangan di TamaKu i minonuu Dogo siti vonuvo, okonko mantad Dogo,” kadi Yisus. 31 Om kadi Yisus kavagu, “Nong misinsaksi Oku kondiri, aui oinomod iri saksiKu. 32 Nga kivaropo Iso do pasaksi pasal Dogo, nga oilaanKui do saksiJo diri nga oinomod. 33 Om nokoponuu kouno do tulun mongoi siri di Yaya Mamamatis do mongoduat disido pasal Dogo, om isido nga pasaksi diri oinomod. 34 Nga okonko oporlu Oku do pasaksi i tulun vokon pasal Dogo, tapi popoondom Oku dikovu pasal di Yaya supaya aparsaya kou Dogo om kaanu kou do kovijaan. 35 I Yaya nopo nga irad di lampu do milab-silab do monitiu ontok do popoilo do tulun pasal Dogo, om uvang kou do otitian diri vinaangjo do oruai. 36 Nga iri nopo karaja di navaalKu nga papasaksi Dogo om kosoksian nopo diri nga ogirot mantad diri kosoksian di Yaya pasal Dogo, do kasangkat nopo diri karaja nipavaal Dogo diAmoKu do mangavi nga irino karaja di notimpuunanKu do maino, om irino karaja diri papasaksi pasal Dogo do sinuu Oku diAmo. 37 Om iAmo i minonuu Dogo nga pinapasaksi pasal Dogo. Nga aupo insan korongou kou di suara di Kinoringan om pamarasanJo nogi nga au insan naantangan muju. 38 Om i tinangaran di Kinoringan nga ausoi sino ginavo muju sabap au kou aparsaya Dogo i sinuuJo siti vonuvo. 39 Ogiat kou monorisid mongilo dino tinangaran di Kitab do andasan muju nopo daa om irad dino koonuan muju do kovijaan do auso koovion, nga pasaksi i Kitab pasal Dogo, 40 nga au kovi uvang rumikot siti Dogo do mokianu diri kovijaan do auso koovion. 41 Nga okonko mokirajou Oku do tulun, 42 sabap otutunanKu ikovu om oilaanKui do auso ginavo muju do au kojuu di Kinoringan. 43 Rinumikot Oku siti dikovu saralom do ngaran di TamaKu nga aui torimawon Oku dikovu. Nga nong sondiang tulun rumikot siti dikovu saralom ngaranjo kondiri torimawon muju. 44 Ombo dii aparsaya kou do moisusuli kou uvang do urumaton do tulun vokon nga au kovi uvang do urumaton di Kinoringan iri Sosoiso. 45 Nga ada tandasai Oku do papasala dikovu si gotuvangon di Tama, do iri nopo papasala dikovu nga irino i tinulisan di nabi Musa, irino pangarapan muju. 46 Do nong aparsaya kou diri tinulisan di nabi Musa, Ioku nga aparsayaan mujui do i Musa nopo nga nokoponulisi di pogulu do Iokuno iri komoion. 47 Nga nong irad dino do au kovi aparsaya diri nokotulis di Musa pasal Dogo om ombo kou dii aparsaya diti tangaronKu?” kadii di Yisus.
1 Antad diri gulino dii i Yisus siri Vonuvo Golilia om sinumondipau siri Botung Tagajo do Golilia. Ngaran nopo koduvo do botung tagajo diri nga Tobirias. 2-4 Nga ontok nopo diri om oruaino dii kavagu korikatan di Tadau Tagajo Paska, irino tadau do pangandaman dagai di tulun Joudi di pinogiduan diodu-akija mantad si Vonuvo Masir di pogulu. Om oguu dii i tongotulun do sinumusuut di Yisus mampanau sabap nokoontong iolo diri kosunduvan i vinaal Disido do mongolingos di tongotulun do kitoruol. Om nokorikot nopo dii i Yisus siri sondipau, om takadno dii Isido siri kulud om ogomno dii mivaja dagai di tongotulunJo. 5 Nga jangogno dii i Yisus, nokoontong dii Isido do oguu i tulun do moisusuut rumikot siri Disido, om pitangarno dii Isido di Pilipus do ka, “Sinombo naku dii pomolijan tokou do taakanon supaya kosukup iti tulun toguu mangakan?” ka. 6 Kinaa di Yisus mitangar do manarai di Pilipus do oilaanno Disido nong onu iri vaalonJo. 7 Jawapno dii i Pilipus disido do ka, “Aui kabagal diolo i kuui nong torogoi do duvo naatus pirok insan torokuyakan nga aui kotikid diolo,” kadi Pilipus. 8 Nga jawap kadi iso tulun di Yisus, irino iOndorias, iadijo di Simun Pitrus do ka, 9 “Ati iti tanak siti do kivaro limo noinan kuui om duvo tinan sada. Nga ausoi arati do irad diti ginuu do tulun,” kadiOndorias. 10 Om tangarono dii di Yisus ikoi i tongotulunJo do ka, “Suuo mujuno iti tongotulun do mogom,” ka. Om ogom-ogomno dii iolo kasangkat siri do siri kivaro oguu sakot. Om ginuu nopo diolo diri minangakan nga kivaro kama limo noribu tulun, nga kira kokusajan tosukod noopo. 11 Om onuono dii di Yisus iri kuui, do monorimakasi do Kinoringan om potikido nogi dii i tongotulun do songingogom siri. Om iri sada nga kinaa nogi di Yisus om pangakanno dii iolo kasangkat sogosob-gosob diri kouvangan diolo mangakan. 12 Om kabajak nopo dii i tongotulun toguu om tangaro nogi dii di Yisus ikoi i tongotulunJo do, “Pumpungo mujuno ilo noolu-olu om aui opirubatan,” kaDisido. 13 Om pumpungono dii dagai iri, om poosuono dii si poijanan, om opulupo om duvo dii i vakid do noponu do noolu-olu mantad diri limono noinan di kuui diri nopumpung dagai di nokoopod i tongotulun do mangakan. 14 Om naantangan dii di tongotulun iri sinunduvan vinaal di Yisus om nakatangar dii iolo do ka, “Oinomodno do Isidono iri Nabi irad di Musa do rumikot siti vonuvo,” kadiolo. 15 Nga koilaai nopo dii di Yisus do pajalon daa diolo Isido posiliu do raja om insoduno dii Isido sosoiso do tumakad kavagu siri kulud. 16 Om mintutuvongno dii i tadau om ongoino dii ikoi i tongotulun di Yisus rumuuk siri botung, 17 om sakono dii ikoi si talud om gaauno dii do sumondipau siri Bandar Kaparnaum. Nga otuvongno dii om aupo sino i Yisus do rumomut dagai. 18 Om lumogod marong dii iri sarup, jadi agajono dii iri tongoumbak. 19 Om sinodu nopo dagai do mingalud mantad diri inontodon nga kivarono kama diri do tolu nabatu ko apatpo nabatu sinodu diri. Om kaantangai dii dagai i Yisus minsomok di talud sinakaanja do manau-panau siri soribau do vaig, nga nokorosino dii marong ikoi. 20 Nga kadi Yisus dagai, “Ada kou rumosi do Iokui iti!” ka. 21 Om korongou dii ikoi ampa nogi dii do asanang i ginavoja pasako Disido siri talud, om pogsako dii Disido tigogi do nokoompitno ikoi siri rikoton dagai. 22-23 Om di susuvab om kivaro iri piipiro talud do mantad Bandar Tobirias do rinumikot om linumabu siri somok diri pantok pinonorimokosian di Tuhan do Kinoringan diri kuui do nipaakan Disido di tongotulun. Om kaandamai nogi dii iri tongotulun toguu do iso noo iri talud siri diri sodop om oilaan diolo do bubugol ikoi i tongotulun di Yisus sinumondipau do au nakavaja i Yisus. 24 Om koilaai nopo dii diolo do au sino i Yisus siri om ikoi i tongotulun di Yisus nogi nga au sino, om sakono dii iolo diri tongotalud iri mantad si Tobirias do minongoi silo Bandar Kaparnaum do sumuut do mogium di Yisus. 25 Kosomungai nopo dii di tongotulun i Yisus siri sondipau om duatono dii diolo i Yisus do ka, “Rabi, sombiaKono korikot siti?” ka. 26 Om kadi Yisus, “PatangaronKu marong dikovu iti, do koium-ium muju nopo Dogo nga sabap nabajakan kou diri kuui inakan muju, nga okoniko sabap do nokoontong kou diri pongintutunan do vinaalKu. 27 Ada kou karajin kumaraja mogium di taakanon do obimvunos. Nga pogium kouno diri taakanon di au moilo munos do irino manaak do kovijaan diri auso koovion, irino i pataakonKu dikovu. Do Ioku nopo diti nga i Sinumiliu do Tulun, om tinandaan Oku di Kinoringan, Tama, do sinuu Oku Disido om tanda nopo diri nga irino tongokosunduvan vinaalKu,” kadi Yisus. 28 Om pongoduatno dii iolo do ka, “Onu bato i apatut do gaagayaja iri kouvangan do Kinoringan?” kadiolo. 29 Nga jawapno dii i Yisus, “Itino gaagaya diri kouvangan di Kinoringan do vojoon muju do misti aparsaya kouno Dogo, iri sinuu do Kinoringan siti vonuvo,” ka. 30 Nga pitangarno i tongotulun Disido do ka, “Onu i kosunduvan do vaalonNu do ipoontongNu dagai do pongintutunanja do kikuasaKo, om ampa nogi do aparsaya ikoi Dika? Onu batoi karajawonNu? 31 Do iodu-aki tokou nopo nga nakapangakan diri taakanon i roitan do maana ontok di silo padang do kovotuvan di pogulupo do kivaro nokotulis siri Kitab do ka, ‘Pinaakan Disido iolo di taakanon mantad suruga,’ kadi Kitab,” kadi tongotulun. 32 Nga kadi Yisus, “PatangaronKu marong dikovu iti, do okoniko i Musa minanaak dikovu diri taakanon mantad suruga, nga i TamaKuno iri minanaak. Om manaak nogi Isido kavagu do taakanon diri oinomod mantad suruga. 33 Sabap taakanon nopo di mantad do Kinoringan nga irino minindaau mantad silo suruga inontodonJo, om irino i momijau do tongotulun siti vonuvo,” ka. 34 Om kadi tongotulun Disido, “Tuan, gaam do soumur-umur manaak dagai do taakanon dino,” ka. 35 Nga jawapno dii i Yisus do ka, “Ioku nopo nga irad diri taakanon do kovijau di tongotulun. Isaai nopo iri rumikot siti Dogo om aparsaya Dogo nga auno dino vitilon om tuuvan isido, sabap Iokuno iri sumiliu do taakanon disido. 36 Om nakatangar Okuno laid dikovu do, ‘Insan pun nokoontong kou Dogo nga aui aparsaya kou Dogo,’ kangKu gia dii. 37 Nga kasangkat nopo diri ipasanganu diAmo Dogo om irino rumikot siti Dogo. Om isaai nopo i rumikot siti Dogo om aui tulakonKu. 38 Iri sabap do minindaau Oku mantad suruga mongoi siti vonuvo do maja diri kouvangan diAmo i minonuu Dogo siti vonuvo om okoniko maja Oku di kouvanganKu kondiri. 39 Om itino kouvangan di minonuu Dogo siti vonuvo, do isaai nopo iri nipasanganu Disido Dogo om povijauonKu ontok do kiamat supaya auso olijot diolo. 40 Do itino kouvangan diAmoKu do pointikid-tikid di tulun mongontong Dogo i TanakJo mivaja do aparsaya nga kaanu do kovijaan diri auso koovion, om Iokuno i momijau disido ontok di kiamat,” kadi Yisus. 41 Om songungos-ungos dii i tongokotua do tulun Joudi di Yisus, sabap natangar gia do, “Iokuno irad di taakanon i minindaau mantad si suruga,” ka. 42 Om kadiolo, “I Yisus bo iti i tanak di Jusip. Otutunanjai bo iamoJo om iinoJo. Potingkuro tangaron Disido do, ‘Minindaau Oku mantad suruga,’ kaDisido?” kadi tongokotua. 43 Nga kadi Yisus diolo, “Ada kou mungos-ungos bo, 44 do auso iso tulun kadapat do rumikot siti Dogo nong okoniko mantad diAmo do mangangat disido poongoi siti Dogo. Om Iokuno iri momijau disido ontok di kiamat. 45 Kivaro nokotulis si buuk di nabi-nabi do, ‘Kasangkat do tulun nga tudukan do Kinoringan,’ kadiri tinangaran siri Kitab. Jadi nong irad dino pointikid-tikid do tulun diri korongou diAmo, om momit di ponudukanJo om irino i rumikot siti Dogo. 46 Okonko komoionKu do nokoontong i tulun diAmo, nga Ioku noo i rinumikot mantad do Kinoringan do nokoontong Disido. 47 Nga patangaronKu marong dikovu iti do isaai nopo iri aparsaya Dogo nga irino kaanu do kovijaan di auso koovion. 48 Om Ioku nopo nga irad di taakanon diri kovijau do tongotulun. 49 Iodu-aki muju nopo nga nakapangakan di taakanon, i roitan do maana, ontok silo padang do kovotuvan di poguulupo, nga iolo pun napatai. 50 Nga iri nopo taakanon do mantad suruga nga okoniko irad do maana, supaya tulun nopo di kaakan do taakanon mantad suruga om ausono kapatajan di tatodjo. 51 Om Iokuno i minindaau mantad si suruga, nga irad di taakanon do kovijau do tulun. Ii nopo tulun do kaakan do taakanon diti, irino aparsaya Dogo, nga ovijau gosob salaid-laid. Do ii nopo taakanon do pataakonKu om itino kojuvanKu do kovijau di tongotulun siti vonuvo,” kadi Yisus. 52 Korongou nopo dii i tongotulun do Joudi, kinamno dii iolo moisisival kondiri do ka, “Potingkukuro tulun diti manaak daton dilo kojuvanJo do ipaakan daton?” kadiolo. 53 Om pitangarno kavagu i Yisus diolo do ka, “PatangaronKu marong dikovu iti do Iokuno i Sinumiliu do Tulun. Nong au kou mangakan do kojuvanKu om mongiup di raaKu, om ausono kovijaan muju do oinomod. 54 Isaai nopo iri mangakan do kojuvanKu om mongiup do raaKu om irino kivaro kovijaan diri auso koovion. Om Iokuno iri momijau disido ontok di tadau kiamat. 55 Sabap kojuvanKu nopo nga irad do taakanon om raaKu nopo nga irad do tiiupon do oinomod. 56 Iri nopo tulun di mangakan di kojuvanKu om mongiup di raaKu, om irino atatap siri Dogo om Ioku nga atatapi si disido. 57 IAmoKuno minonuu Dogo siti vonuvo om poimvijau Isido, om Ioku nogi nga poimvijau mantad diAmo. Om irad nogi dino i tulun do mangakan Dogo nga ovijau sabap mantad Dogo. 58 Iti nopo irad do taakanon di minindaau mantad suruga om okoniko miirad diri inakan diodu-aki tokou, do nakaakanno iolo om minataipo. Nga tulun nopo do kaakan do taakanon diti om ovijau gosob salaid-laid,” kadi Yisus. 59 Kasangkat do tangar diti nga pinatangar di Yisus ontok di monuduk Isido di tongotulun si valai sasambayangan si Bandar Kaparnaum. 60 Om korongou dii ikoi kasangkat di tongotulun di Yisus diri tinangaran Disido om oguu dii minitangar do irad diti, “Apagon tinangaran dino, ausoi dii moo mongorongou dino,” ka. 61 Nga oilaani di Yisus do songungos-ungos iolo do korongou di tinangaran Disido om pitangarno dii Isido do ka, “Koluvau naku do ginavo muju i tinangarKu diri? 62 Insan koontong kou Dogo gumuli kavagu si nontodonKu nga au kou aparsaya Dogo. 63 Tatod nopo do Kinoringan nga popovijau do tulun, do kogiroto nopo do kojuvan do tulun nga auso guna. Iri nopo tinangaran do niabarKu dikovu nga irino mantad di Tatod do Kinoringan om irino i kovijau. 64 Nga insan irad dino kivaropo piipiro dikovu do au aparsaya,” kadi Yisus. Do oilaani di Yisus laid nong isai iri au aparsaya om isai iri pataak Disido siri di tongokotua do tulun Joudi. 65 Om pitangarno dii kavagu i Yisus do ka, “Inono kangKu dikovu do nong iAmo porikot siti Dogo ampa nogi kadapat iso tulun rumikot siti Dogo,” kadi Yisus. 66 Om mantadno diri do oguu i tongotulun di Yisus do tinumingkod maja Disido. 67 Om pongoduatno dii i Yisus dagai di opulu om duvo tongotulunJo do ka, “Potingkukuro? Uvang mujupo dikovu mogidu mantad siti Dogo?” ka. 68 Nga jawapno dii i Simun Pitrus do ka, “Tuhan, ausono tulun vokon vojoonja. Do Ikano i kitangar do kovijau gosob do auso koovion. 69 Ikoi nopo nga aparsayai Dika om koiloi do Ikano i Olidang mantad do Kinoringan,” ka. 70 Om jawapno dii kavagu i Yisus do ka, “Ikovu nopo opulu om duvo tulun mimang piniliKuno, nga kivaro iiso dikovu do irino rogon,” ka. 71 Nga komoion nopo di Yisus diri om i Yudas, i tanak di Simun, i tulun mantad soi Kampung Koriut, sabap insan pun isido iso dagai opulu om duvo tulun di Yisus nga itaak disido i Yisus si di tongokotua do tulun Joudi.
1 Koopod nopo dii iri, om pampanauno dii oi Yisus do tumongkop siri Vonuvo Golilia do monuduk di tongotulun siri, do au uvang Isido do mampanau silo Vonuvo Yudia sabap sipamatai i tongokotua do tulun Joudi Disido. 2 Om ontok nopo diri nga masaan do tadau tagajo di tulun Joudi, i roitan do Tadau Tagajo do Momusulap. 3 Om sabap diri do minitangar oiadiJo Disido do ka, “Iduai bo pantok siti om pakaayaino silo Yudia, supaya koontong i tongotulunNu diti kosunduvanNu. 4 Do ausoi tulun mokiinggojoo do ngaran do losokon ino kosunduvan. Nong osunduKo paantangaino di tongotulun siti vonuvo,” kadiadiJo di Yisus. 5 Do insan oiadiJo kondiri nga aui aparsaya Disido. 6 Om jawapno i Yisus do ka, “Sombibia nopo nga obuli kovi dikovu mamaal onuu nopo. Nga Ioku nopo om aupo norikot i masoKu. 7 Aui obonsi i tongotulun siti vonuvo dikovu, nga Ioku nopo kobonsijan diolo sabap pakaraaton soumurKu ilo gaagaya diolo. 8 Ongoi kou pogi sapul dikovu dino tadau tagajo, do aupo mongoi Oku Dogo do okonkopo norikot marong i masoKu,” kadi Yisus. 9 Iradno dino i tinangar di Yisus diadiJo om indadapo dii Isido siri Golilia. 10 Nga koongoino dii sumapul oiadiJo di Yisus siri raaramai tadau tagajo om susuut nogi dii Isido sosoiso, supaya au koilo i tongotulun Disido. 11 Nga songkoduatono dii diri tongokotua do tulun Joudi do mogium di Yisus, kadiolo, “Inombo naku dii Isido?” ka. 12 Om moikonos-konos nopo dii i tongotulun toguu do mitangar pasal Disido do kivarono mitangar do, “Tulun Isido taandai,” kano. Kivarono mitangar do, “Okoni,” ka, “do Isidono mamalid do tulun toguu,” kaano diolo. 13 Nga auso iiso tulun opusu mintalang do mitangar pasal Disido, sabap rumosi iolo di tongokotua do tulun Joudi. 14 Om pintangaanno dii diri tadau tagajo diolo om asu nogi dii i Yisus siri natad do Valai Sasambayangan Tagajo do monuduk. 15 Nga ongoiranan marong dii i tongokotua do tulun Joudi om kadiolo, “Potingkuro tulun diti koilo monuduk do aupo asavat sikul?” ka. 16 Nga jawapno dii i Yisus diolo do ka, “Iti nopo potudukonKu om okoniko Dogo nga mantad Disido iri minonuu Dogo siti vonuvo. 17 Om isaai nopo uvang maja diri kouvangan do Kinoringan om irino koilo diti potudukonKu, nong mantad do Kinoringan ko mantadpo Dogo kondiri mitangar. 18 Tulun nopo monuduk do mantad disido kondiri om okoniko nuu iri nga mokirajoui. Nga tulun nopo iri uvang do rojoon iri minonuu disido nga otulid i ginavojo om au momudut isido. 19 Nakataakno di Musa dikovu iri Undang-undang Ugama, nga iisopo dikovu nga auso maja di Undang-undang Ugama diri. Nokuro dii sipamatai kou Dogo?” kadi Yisus. 20 Nga jawapno dii i tongotulun toguu do ka, “RinosukanKo do rogon! Nga isai dii sipamatai Dika?” ka. 21 Nga jawapno dii i Yisus diolo do ka, “Iso nogi kusai do momoruui do nolingasanKu di Tadau Koingkajadan. Nokuro do oiranan kou kasangkat do iri nopo ontok Tadau Koingkajadan do nolingasanKu iri tulun? 22 Nga ikovu pun monunat di tanak muju ontok Tadau Koingkajadan irad di nisuu di Musa. Nga oinomod nopo om okoniko mantad di Musa noo, do mantadpo diodu-aki muju di nokopogulu mantad di Musa. 23 Nga nong koponunat kovi do tulun ontok Tadau Koingkajadan sabap rumosi kou do au kavaja diri nisuu di Musa dikovu, om aui apatut daa do araatan kou Dogo sabap kopongolingos Oku do toruol di kojuvan do tulun ontok Tadau Koingkajadan. 24 Ada kou papasala do vokon do antangan muju i pamarasan disido, nga timbangon mujuno nong inombo iri oinomod om otulid,” kadi Yisus. 25 Om kivaro i piipiro tulun si Yorusalim laid do moitututuran do ka, “Isidono iri pokipapatajan diolo, 26 antangaipo nga atalang Isido kumituturan di tongotulun. Otutunani kama marong di tongokotua tokou do Isido iri Koristus, i pinili di Kinoringan sumiliu do Raja. Nong aui, nokuro do auso komi diolo do pakasala Disido? 27 Nga oilaan tokovi nontodon do tulun diti. Nga korikot nopo i Koristus ka om auso iiso do koilo nong sombo nontodonJo,” kadi tongotulun. 28 Om di monuduk i Yisus siri natad do Valai Sasambayangan Tagajo, opuod Isido mitangar do ka, “Aupo kotutun kou marong Dogo, om aupo koilo kou nong inombo nontodonKu. Okoniko nokorikot Oku om mantad di kuasaKu kondiri. Iri nopo minonuu Dogo siti vonuvo nga oinomod, nga au muju otutunan. 29 Kotutun Okui Dogo Disido do mantadi silo Disido nontodonKu, om Isidono iri minonuu Dogo siti vonuvo,” kadi Yisus. 30 Nga korongou nopo dii i tongokotua do Joudi di ponudukan di Yisus om sipanangkapno daa iolo Disido, nga aui nolombusan do aupo norikot i maso do tangkapon Isido. 31 Nga oguu nogi tulun vokon siri do aparsaya Disido, om kadiolo, “Itino kama i Koristus do ausono vokon kosunduvan do lobi mantad diti vinaalJo maino,” kadiolo. 32 Nga i kumpulan Porisi nokorongou do songkonos-konos i tongotulun toguu do i Yisus komoion, om ponuuno dii iolo om iri tongokotua do imam di piipiro pulis do mongoi manangkap di Yisus. 33 Nga kadii di Yisus di tulun toguu, “Okonnoko alaid Okupo do poinrunggum dikovu om gumuli Okuno kavagu soi Disido iri minonuu Dogo siti vonuvo. 34 Om iumon Oku nogi dino dikovu nga au Okui osomungan dikovu sabap au kou korikot siri ongoionKu,” ka. 35 Om poitangar-tangarno dii i tongokotua do tulun Joudi do ka, “Sinombo naku pakaayanJo do au osomungan tokou? Mongoi naku Isido sumusuut di tulun do Joudi i songias-ias si ijonon di tulun Yunani om monuduk do tulun Yunani silo? 36 Onu naku arati di tangar Disido do, ‘Iumon Oku dikovu nga au Okui osomungan dikovu,’ ka, om, ‘Au kou korikot siri ongoionKu?’ kaDisido,” kadi kotua do tulun Joudi. 37 Om ontok do tadau do pongovianno diri tadau tagajo, om ingkakatno dii i Yisus mitangar do opuod do ka, “Isaai nopo dikovu iri tuuvan nga aandai do rumikot siti Dogo do mongiup. 38 Isaai nopo i aparsaya Dogo om irino i komoion siri Kitab do sonlujung-lujung i vaig do bavang i kovijau do mantad saralom do ginavojo,” kadi Yisus. 39 Komoion nopo di Yisus om irino i Tatod do Kinoringan do otorima di tulun do aparsaya Disido, do ontok nopo diri om aupo nakataak di Kinoringan i TatodJo sabap aupo nokoinggajo do Kinoringan i Yisus si suruga. 40 Nga korongou nopo dii iri piipiro tulun do mantad di tulun toguu di tinangar Disido, om pitangar dii iolo do ka, “Oinomodno bala do Isidono iri Nabi irad di Musa,” ka. 41 Om iolo vokon nga mitangar do ka, “Itino i Koristus, i pinili do Kinoringan sumiliu do Raja,” ka. Nga kadiolo vokon, “Okoniko bakai. Do okoniko silo Golilia imbulajon di Koristus. 42 Do tangar nopo siri Kitab do i Koristus nopo nga koturunan di Daud, om kosusuvan nopo Disido nga silono Boitlim i kampung di Daud,” ka. 43 Om nopiduvono dii i tongotulun toguu pasal di Yisus. 44 Om kivaro dii piipiro tulun do sipanangkap Disido nga aui dii nolombusan diolo. 45 Om koguli nopo dii i tongopulis di Valai Sasambayangan Tagajo siri di tongokotua do imam om i kumpulan do Porisi om duatono dii diolo i pulis do ka, “Nokuroi do au muju oviton Isido siti?” ka. 46 Nga jawapaino dii di tongopulis do ka, “Adii, apandai gia tulun diri. Auso iiso tulun do koirad di kuasaJo do monuduk,” ka. 47 Nga kadi kumpulan Porisi, “Nokuro kou irad dino? Ikovu nogi nga napalid bala Disido. 48 Ausopo kotua tokou ko ikoi kumpulan Porisi do aparsaya Disido. 49 Nga ii nopo tongotulun toguu diti do aparsaya Disido sabap au iolo koilo diri Undang-undang Ugama tokou nga potingkuro pun ovusung iolo diri,” kadi kumpulan Porisi. 50 Nga siri nogi i Nikodimus, iri iso tulun mantad diolo, i nakasamung di Yisus di pogulu, om kadi Nikodimus di kumpulan Porisi vokon, 51 “Nong vojoon iri Undang-undang Ugama tokou, iisopo tulun nga au buli ukuman nong aupo orongou i tangar disido nong onuu iri vinaaljo,” ka. 52 Om jawapno dii iolo do ka, “Ika nogi bala nga tulun do Golilia. Torisidono mongontong iri tinangaran si Kitab om koilokoi do auso iiso nabi do silo Golilia nontodon,” ka. 53 Om sompori-porino dii i tongotulun muli,
1 nga i Yisus nopo om tinumakad siri Kulud do Jaitun. 2 Om asasarappo dii di susuvab om nokorikot dii i Yisus kavagu siri natad do Valai Sasambayangan Tagajo, om untunno dii kasangkat i tongotulun misoliput do rumongou Disido, om ogomno dii i Yisus do monuduk diolo. 3 Nga ontok nogi diri om minongovit nogi iri piipiro kotua do tulun Joudi diri iso tondu siri di Yisus do nokosupan iri tondu do lumapau, om polintangawono dii diolo iri tondu siri gotuvang diolo. Iri nopo tongokotua diri nga kumpulan Porisi om tulun monunuduk do Undang-undang Ugama Joudi. 4 Om pitangarno dii iolo di Yisus do ka, “Guru, tinangkap iti tondu do nokosupan lumapau. 5 Nga saralom Undang-undang Ugama nisuu di Musa daton di pogulupo, tondu nopo do irad diti nga misti dumpauon do vatu gosob do apatai. Nong Ika kukuroyonNu dii do irad diti?” kadi tongokotua do tulun Joudi. 6 Nga tinangar diolo irad diri do monsuba di Yisus supaya kivaro koontodon diolo papasala daa Disido. Nga singkuduno dii i Yisus do monulis siri tana do mamakai tunturuJo. 7 Nga pingguliai nopo dii di tongokotua mongoduat i Yisus, om laisno dii Isido mitangar do ka, “Isai-isai nopo dikovu iri auso duso om irino mogulu mongodumpau dilo tondu,” kadi Yisus. 8 Om singkuduno dii Isido kavagu do monulis siri tana do mamakai di tunturuJo. 9 Nga korongou nopo dii i tongokotua do tulun Joudi di tinangaran di Yisus om poisuut-suutno dii iolo kasangkat mampanau muli, om ii nopo minogulu muli nga i oloing marong om susuutno i tongovokon maja di umurjo om kolimumuson nopo dii nga i omulok marong. Jadi isopo dii i Yisus siri om i tondu do poingkakat siri gotuvang Disido. 10 Om laisno dii kavagu i Yisus om pitangarno dii do ka, “Abu, inombono dii iolo? Ausoi dii niukum diolo dikau?” ka. 11 Om jawapno dii i tondu do ka, “Tuan, ausoi dii niukum dogo diolo,” ka. Om kadii di Yisus disido, “Ioku nogi nga aui mongukum dikau, nga ulino pogi om mantad maino diti adano gulio kavagu ino dusonu,” kadi Yisus. 12 Om ponuturanno dii kavagu i Yisus di tulun toguu do kaDisido, “Iokuno nga irad do vinaang i pinakatanavau di tongotulun siti saralom vonuvo. Om isaai nopo maja Dogo nga onuanKu do kovijaan, om si Oku ginavojo do pinakatanavau supaya kotutun di Kinoringan, om auno mampanau i tulun diri siri totuvong,” kadi Yisus. 13 Nga kadi kumpulan Porisi, “TinangaranNu dino au oinomod, do Ika kokondiriNu mangaabar dino gaagayaNu,” ka. 14 Om jawapno dii i Yisus do ka, “Insan Ioku kondiri mangaabar dino gaagayaKu, nga oinomodi ino iabarKu dikovu sabap oilaanKu iri nontodonKu om pakaayanKu, nga ikovu nopo om aui koilo diri nontodonKu om pakaayanKu. 15 Nga ikovu nopo manalasai do tulun om maja kou di koubasan do tulun, nga Ioku nopo Dogo om au Okui manalasai do isaai nopo tulun. 16 Om insan manalasai Okupo nga irino oinomod, sabap okoniko bubugol Oku manalasai, nga miuup Ikoi diAmo i minonuu Dogo siti vonuvo do manalasai. 17 Kivaro nogi nokotulis siri Undang-undang Ugama muju do ka, ‘Nong kivaro duvo kojuvan saksi mangaabar diri naantanganjo, oinomod iri tinangaran diri,’ ka. 18 Om Ioku kondiri diti do mangaabar di gaagayaKu nga koduvo om iAmoKu i minonuu Dogo siti vonuvo nga mangaabari di gaagayaKu,” kadi Yisus. 19 Nga kadii diolo, “Nong irad dino, inombo iAmoNu?” ka. Om jawapaino dii di Yisus do ka, “Ioku om iAmoKu nga au muju otutunan, do nong kotutun kouno nong isai Oku, iAmoKu nga otutunan mujui,” kadi Yisus. 20 Pinitangaran nopo di Yisus diti nga ontok di monuduk Isido siri natad do Valai Sasambayangan Tagajo siri somok do poijanan do parsambaan, nga ausoi diolo manangkap sabap do aupo norikot i maso do kapanangkapan Disido. 21 Om ponuturanno dii kavagu i Yisus di tongotulun toguu do ka, “OiduanKu ikovu om iumon Oku dino dikovu, nga opimpatai kou sabap siisino kovi si duso muju. Om au kovi korikot siri ongoionKu,” ka. 22 Nga kadii di tongokotua do tulun Joudi, “Nokuroi? Kumiros naku Isido do tangaron Disido do, ‘Au kovi korikot siri ongoionKu,’ kaDisido?” kadiolo. 23 Om pitangarno dii kavagu i Yisus diolo do ka, “Ikovu nopo nga mantad siti suribak nga Ioku nopo om mantad silo savat. Ikovu nopo tulun siti vonuvo nga Ioku nopo om okoniko tulun siti vonuvo. 24 Om irino dii katatangarKu dikovu do, ‘Opimpatai kou sabap siisino kovi si duso muju,’ kangKu, do nong au kovi aparsaya do Iokuno I SINO SOUMUR, om misti do apatai kou sabap siisino kovi si duso muju,” kadi Yisus. 25 Nga pongoduatno dii iolo do ka, “Isaiko bato?” ka. Om jawapno dii Yisus do, “Iokuno iri komoionKu dikovu mantadpo di togina. 26 Om oguu patangaronKu dikovu pasal di gaagaya muju om salasaianKu daa ikovu. Nga Iri minonuu Dogo siti vonuvo om oinomod, om onuu nopo i norongouKu si Disido om irino i patangaronKu dikovu siti vonuvo,” kadi Yisus. 27 Nga au iolo kaarati do mitangar i Yisus diolo pasal di TamaJo. 28 Irino sabap do minitangar i Yisus do ka, “Iokuno i Sinumiliu do Tulun, om kogivis Okupo dikovu si kaju, ampa nogi kotutun kou do Iokuno I SINO SOUMUR, om okoniko misompopori Oku diti kurionKu nga onuu nopo iri nituduk Dogo diAmo om irino i tangaronKu dikovu. 29 Do Isido nopo iri minonuu Dogo siti vonuvo om maja-vaja Dogo, om aui posoisoon Oku Disido sabap maja Oku soumur diri kouvanganJo,” kadi Yisus. 30 Nga koompus nopo dii i Yisus kasangkat di tangaronJo om oguu dii tulun aparsaya Disido. 31 Om pitangarno dii i Yisus di tongotulun Joudi i naparsaya Disido do ka, “Nong atatap kou maja di tinangaranKu om oinomodno do tulunKu ikovu. 32 Om kopingiilo kou diri oinomod pasal di Kinoringan om irino i palapas dikovu,” kadi Yisus. 33 Nga kadiolo, “Ikoi nopo om koturunan diIbraim om au insan ikoi sumiliu turipon do vokon. Nokuro tinangarNu do, ‘Irino i palapas dikovu,’ kaNu?” kadi tulun Joudi. 34 Nga kadi Yisus diolo, “PatangaronKu marong dikovu iti, do pointikid-tikid do tulun mamaal do duso om irino turipon do duso. 35 Om turipon nopo nga au atatap siri samvalai. Nga irino i tanak marong do atatap siri valai. 36 Jadi nong i Tanak do Kinoringan palapas dikovu ampa do obojou kou sumiliu do tangaanak do Kinoringan. 37 Koilo Okui bo do koturunan kovi diIbraim, nga sipamatai kovi Dogo sabap au torimawon muju i ponudukanKu. 38 Iti nopo patangaronKu nga irino i inomitKu si diAmoKu, nga ino nopo vaalon muju om irino i norongou muju si di tama muju,” kadi Yisus. 39 Nga jawapno dii iolo do ka, “Takija nopo nga iIbraim,” ka. Nga kadi Yisus, “Nong oinomod do koturunan kou diIbraim atantu do osugutan muju iri gaagaya disido. 40 Aandai iti vaalonKu do monuduk Oku dikovu diri ongoinomod i norongouKu mantad do Kinoringan. Nokuro do pokipatajan Oku nogi dikovu? Maka IIbraim nopo nga okoniko do irad dino. 41 Nga gaagaya muju nopo om nakavajai kou diri gaagaya di tama muju,” kadi Yisus. Nga jawapai dii di tongotulun Joudi do ka, “Okoniko irad ikoi do tanak linapaan do isoi Tamaja, irino i Kinoringan,” ka. 42 Kadi Yisus diolo, “Nong oinomod do i Kinoringan i Tama muju, tantu do au kojuu kou Dogo sabap Iokuno i mantad do Kinoringan do siti dikovu maino, do okoniko kondiriKu rumikot siti, nga i Kinoringan i minonuu Dogo siti vonuvo. 43 Nokuro do au kou kaarati diti tinangaranKu? Irino sabap do au uvang kou mongkinongou diti ponudukanKu. 44 Do i tama muju nopo nga i kotua do rogon, om ikovuno dii inanak disido om onuu nopo iri kouvangan di tama muju nga vojoon muju. Om i kotua do rogon nopo nga irino i minamatai do tulun di timpuuni. Au insan isido mitangar do oinomod, sabap ausono oinomod si disido. Do sombia nopo do momudut i kotua do rogon, om mitangar isido do maja di koubasanjo kondiri. Do isidono momumudut om nogi nontodon do vudut. 45 Om ikovu nga irad nogi disido, om au kou aparsaya Dogo sabap do oinomodno iti tinangaranKu. 46 Auso dii dikovu mamantang do kiduso Oku. Mimang oinomod iti tangaronKu dikovu. Nokuro do au kou aparsaya Dogo? 47 Do isai iri mantad do Kinoringan om irino mangasip di tinangaran Disido. Nga ikovu nopo om okoniko mantad do Kinoringan nontodon muju, irino sabap do au kou mangasip di tinangaranJo,” kadi Yisus. 48 Om jawapno dii i tongotulun Joudi di Yisus do ka, “Oinomodi dii bala i tangarja dii do Ikano tulun Somoria, i musuja, om rinosukanKo do rogon,” ka. 49 Nga jawapno dii i Yisus diolo do ka, “Au Okui rinosukan do rogon do mongurumat Okui di TamaKu, nga ikovu nono do pakaraat Dogo. 50 Nga kivaro Iiso manalasai do pokoinomod Dogo om mogium di kourumatanKu, okoniko mokiurumat Oku kondiri. 51 Nga patangaronKu marong dikovu iti do isaai nopo mangasip do tinangaranKu om auno koirasa do kapatajan do auso koovion,” kadi Yisus. 52 Om pitangarno dii kavagu i tongotulun Joudi di Yisus do ka, “Maino oilaanja nogi dii do rinosukanKo do rogon, sabap antangaipo dino iIbraim om i tongonabi vokon di pogulupo nga napataii. Om nokokuro tangaronNu do, ‘Isaai nopo mangasip do tinangaranKu om auno koinam do kapatajan do auso koovion,’ kaNu? 53 Potingkuropo i taki tokou i Ibraim nga napataii om i tongonabi vokon pun napataii. Isaipo nokoinong ino kojuvanNu? Agajopo kuasaNu naku mantad diIbraim, i taki tokou?” kadi tongotulun Joudi. 54 Nga jawapno dii i Yisus diolo do ka, “Nong misinggagajo Oku kondiri om ausono dii arati di kagajaanKu, nga i TamaKu nono i monginggajo Dogo, iri komoion muju do, ‘Kinoringanja,’ kamuju. 55 Ombo iti do aupo nokotutun kou di TamaKu, nga kotutun Okui Dogo Disido. Sabap nong, ‘Au Oku kotutun Disido,’ kangKu, tantuno dii do kosugut Oku dikovu do momudut, nga kotutun Okuno Dogo Disido om mangasip Oku di tinangaranJo supaya auKuno kopomudut. 56 IIbraim nopo i taki tokou om aandaian marong do miintong orikot i tadau do korikatanKu om koontong nopo dii isido di tadau di korikatanKu om aandaian dii,” kadi Yisus. 57 Nga kadi tongotulun do Joudi di Yisus, “Aupo nokorikot do limo nopulu toun umurNu, ombo dii nokoontongKo diIbraim?” kadi tulun Joudi. 58 Om jawapno dii i Yisus diolo do ka, “PatangaronKu marong dikovu iti do aupo nosusu Ibraim om SINO OKU SOUMUR,” kadi Yisus. 59 Om paganuno dii i tongotulun do Joudi di vatu do pongodumpau daa di Yisus, nga linumosoki i Yisus, om labusno dii Isido mantad siri natad do Valai Sasambayangan Tagajo.
1 Om di manau-panaupo i Yisus, nokoontong Isido diri iso tulun bolou mantadpo si tijan diinojo. 2 Om pongoduatno dii ikoi i tongotulunJo di Yisus, do kadagai, “Rabi, isaino naku nakavaal do duso gosob do nobolou mantad si tijan diinojo iti tulun, nong isidopo kondiri ko mantadpo di moloingjo?” ka. 3 Om jawapno dii i Yisus do ka, “Okoniko duso disido om okoniko duso do moloingjo, nga irino supaya do buli kointalang i kuasa do Kinoringan siri disido. 4 Sabap ontok do tadaupo, komoion do ovijau tokoupo, misti kumaraja tokou diri karaja Disido i minonuu Dogo siti vonuvo, do sodop nopo dino om ausono kadapat kumaraja. 5 Salaidpo do siti Okupo vonuvo om Iokuno irad di pakatanavau diti vonuvo,” kadi Yisus. 6 Om koompus nopo dii i Yisus mitangar inong diri, om pongodulano dii Isido siri tana do mongolunang di tana om poliuto nogi dii Disido i butak siri mato di tulun bolou, 7 om tangaraiJono dii i tulun do ka, “Ongoino pogi pongolinggagup silo Kulam di Silaum!” ka. Komoion nopo do Silaum nga sinuu. Om ongoino dii isido pongolinggagup. Nga poglinggagup disido turus dii nokoontong om pouliaino dii disido si valai. 8 Om santangar-tangar dii i tongotulun siri somok om i tongotulun di nokoontong diri tulun do mokisadaka do siin, om kadiolo, “Okoniko bato i tulun di mogom-ogom i oubas mokisadaka do siin ilo?” ka. 9 Nga pintangar dii i vokon do ka, “Ilo nogi bo iri,” ka. Nga kadi vokon, “Okoniko isido ilo, nga nokosuboli di tulun ilo,” ka. Nga kondiri di tulun mangaabar do, “Iokuno bo iri,” ka. 10 Nga kadiolo do mongoduat disido, “Kinumukuroko dii do nokoontongko dii maino?” ka. 11 Nga jawapno dii disido do ka, “Iri tulun roitan do i Yisus do minongolunang do tana om poliuto nogi dii siti matoku, om tangarai oku nogi dii do, ‘Ongoino pogi mongolinggagup silo Kulam di Siluam,’ ka. Om ongoi okuno dii, om ontok di nokopongolinggagup oku turus do nokoontong oku dii,” ka. 12 Om “Inombono dii i tulun dino?” kadiolo. Nga kadisido, “Au oku nokoilo,” ka. 13 Om ovitono dii di tongotulun iri tulun do nobolou di nolingasan siri di kumpulan Porisi. 14 Nga tadau nopo dii pinongolunangan di Yisus diri tana supaya koontong i mato di tulun do bolou nga irino ontok do Tadau Koingkajadan. 15 Om irino ologos dii i kumpulan Porisi do mongoduat kavagu di tulun bolou nong potingkuro dii isido do nokoontong. Jawapno dii i tulun bolou, “Liniutan Disido do butak iti matoku, om pongolinggagup oku nogi dii turus koontong oku,” kadi bolou. 16 Nga kadi kumpulan Porisi vokon, “Okoniko mantad do Kinoringan tulun dino, do aui mogpantang do Tadau Koingkajadan,” ka. Nga kadi vokon mitangar do, “Nong i tulun do kiduso, au kadapat mamaal do kosunduvan do inong dino,” kaano. Nga irino dii tinimpuunon diolo do moisival-sival do kopisondiang i pandapat diolo. 17 Om duatono dii diolo i tulun do bolou diri do ka, “Onu dii pongoroitannu dika Disido iri popoontong dino matonu?” ka. Nga jawap kadi bolou, “Iri nopo tulun diri nga nabi,” kadisido. 18 Nga iri pun aui aparsaya i tongokotua di tulun Joudi do nobolou mantad tijan diinojo om koontong dii maino, gosob do linoou diolo iri moloing disido 19 do mongoduat do ka, “Banarno tanak muju iti komoion muju do, ‘Bolou mantadpo si tijan,’ ka? Om potingkuro dii isido do nokoontongi maino?” kadiolo. 20 Nga jawapno dii i moloingjo do ka, “Banarno tanakja iti om bolouno isido mantadpo si tijan, 21 nga au dii oilaanja nong potingkuro dii isido do nokoontong maino, om i pinopoontong disido nga au nogi nokoilo ikoi nong isai. Nga duaton isido kondiri do nosukodno isido om oilaan nogi do kondirino disido mangaabar,” kadiolo. 22 Tinangar di moloing di bolou inong diri sabap rumosi iolo di kotua do tulun Joudi, do nokopoiupapakatno laid iolo do poidu diri mangakun do i Yisusno i Koristus do mantad siri valai sasambayangan diolo. 23 Irino sabap do minitangar i moloing di bolou do, “Duato isido kondiri do nosukodno isido,” ka. 24 Om loovono dii kavagu diolo i tulun di bolou diri do mitangar disido do ka, “Sabanarono marong mitangar siti gotuvang do Kinoringan, do noilaanja do tulun nopo i komoionnu nga tulun do kiduso,” kadiolo. 25 Om jawapno dii isido do ka, “Taau, au oilaanku nong tulun kiduso naku Isido diri ko potingkuropo, nga irino oilaanku do bolou okupo dii diri pogulu om koontong okuno dii maino,” ka. 26 Nga kadiolo do mongoduat disido, “Potingkuro Isido? Kinokuro dii Disido ino matonu do koontongkono dii maino?” ka. 27 Nga jawapaino dii disido do ka, “Natangarkuno dikovu nga au mujui rongoon. Om onupo dii pokituturanan muju dogo kavagu? Ikovu nogi kama nga uvang sumiliu di tulunJo,” kadi bolou. 28 Nga insasanawono dii di tongokotua do tulun Joudi i tulun bolou do ka, “Ikano ino tulun di Yisus nga ikoi nopo om tulun di Musa. 29 Oilaanjai do minitangar i Kinoringan di Musa, nga tulun nopo dino om aui oilaanja nong sombo nontodon Disido,” kadi kumpulan Porisi. 30 Nga jawapno dii i tulun bolou diolo do ka, “Koiran-iranpo dino marong do au mujui oilaan sombo nontodon Disido, ombo iti do pinoontongno Disido iti matoku. 31 Oilaan tokovi do aui rongoon do Kinoringan i tulun do kiduso, nga irino rongoonJo i tulun di sumamba Disido om i maja di kouvanganJo. 32 Mantad di kovorun diti vonuvo gosob maino aupo insan norongou do kivaro tulun do popoontong di mato do tulun bolou mantad tijan diinojo. 33 Do nong okoniko mantad di Kinoringan tulun dino, aui kadapat Isido mamaal do onuu nopo,” kadi bolou. 34 Nga jawapaino dii di tongokotua do tulun Joudi isido do ka, “Mantad kopo do tijan diinonu om kidusokono. Adako monuduk dagai,” ka. Om sunsubono dii diolo palabus mantad siri valai sasambayangan. 35 Om korongou nopo dii di Yisus do nosunsub diolo i tulun diri nobolou mantad siri valai sasambayangan, om ontok do nosomunganJo isido, om tangarai dii di Yisus do ka, “Aparsayako naku diri Sinumiliu do Tulun?” ka. 36 Om jawapaino dii di tulun bolou do ka, “Tuan, poiloo oku nong isai ino, om aparsaya okui Disido,” ka. 37 Om kadii di Yisus, “Nokoontongkono Disido, om Iokuno iti kumitatangar dika,” ka. 38 Om jawapno dii isido do ka, “Tuhan, aparsaya okui,” ka. Om tungubno dii isido do sumamba di Yisus. 39 Om kadii di Yisus, “KinorikatanKu nopo siti vonuvo om momutus di tulun di aparsaya om i au aparsaya. Irino do isaai nopo iri oboloupo i ginavo nga aparsaya Dogo om irino irad do koontong. Nga isaai nopo iri mitangar do, ‘Koontong i ginavoku,’ ka, nga au aparsaya Dogo om iri nogi irad do obolou,” kadi Yisus. 40 Nga kivaro nogi piipiro tulun do kumpulan Porisi siri do poinrongou do tangar di Yisus om pitangarno dii iolo do ka, “Nong irad dino tangarNu ikoi nogi nga irad do bolou,” kadiolo. 41 Om jawapno dii i Yisus diolo do ka, “Nong, ‘Boloupo i ginavoja,’ kamuju nopo daa om ausoi duso muju, nga sabap do mitangar kou do, ‘Koontong i ginavoja,’ kamuju, irino dii do kiduso kou soumur-umur,” kadi Yisus mitangar.
1 Om ponuturanno dii kavagu i Yisus do iso poiradan do Isidono irad di momimiara di kambing biri-biri do ka, “PatangaronKu marong dikovu iti do isaai nopo tulun diri masu siri kandang do kambing biri-biri do sokoindodokodo di rinding do au maja siri susuvangon om irino i tulun do mananakau om mamarampuk. 2 Nga isaai nopo iri masu maja siri susuvangon om irino i tulun do oinomod do momimiara do kambing biri-biri, 3 om irino ukaban di tulun di mangajaga do pintu. Om i tongokambing biri-biri nga mongkinongou di tangar disido, om pinroroiton disido i tongongaran di kambing biri-birijo do moninong om angatanjo nogi dino lumabus. 4 Om kalabus nopo dii kasangkat i tongokambing biri-biri diri, om moguluno isido mampanau, om vajano dii iri tongokambing biri-birijo sabap otutunan di kambing biri-birijo i dolou disido. 5 Nga tulun sondiang nopo om aui diolo vojoon, nga mogidu nogi iolo sabap au diolo otutunan i dolou di tulun sondiang,” kadi Yisus. 6 Irino pinoiradan nituduk di Yisus diolo nga au iolo kaarati diri komoion Disido. 7 Om irad nopo diri nga monudukno kavagu i Yisus diolo do papaarati diri iso pinoiradan do ka, “PatangaronKu marong dikovu iti do Iokuno irad di pintu do susuvangon di tongokambing biri-biri diri. 8 Kasangkat do tulun monunuduk diri au oinomod di nokopogulu mantad Dogo om irino irad do mananakau om mamarampuk, nga aui mongkinongou i tongokambing biri-biri di tangar diolo. 9 Ioku nopo nga irad di pintu. Isaai nopo masu siri pintu om irino kaanu do kovijaan om asanang isido masu om lumabus om kaayang do taakanon. 10 Korikatan nopo diri mananakau nga mongoi noopo manakau, mamatai om mominasa. Nga korikatanKu nopo Dogo om supaya do kivaro kovijaan diolo, om irino kovijaan diri kolobi mantad diri kovijaan do sondiang. 11 Ioku nogi nga i tulun di aandai irad diri tulun do momimiara di kambing biri-biri, do manaak Oku diti kovijaanKu gumanti diri kapatajan diri tongokambing biri-biriKu. 12 Nga ii nopo tulun di gojian, iri okonko momimiara mamarong di kambing biri-biri om okoniko iri sanganu di kambing biri-biri, sombia do koontong isido di dupot torongit do rumikot om iduan nopo disido mogidu i kambing biri-biri, om pintampaan nopo dii i kambing biri-biri diri dupot torongit om songias-ias iri tongokambing biri-biri diri do mogidu. 13 Mogidu gia isido sabap isido nopo nga makan gaji, om irino do au dii podulion disido i kambing biri-biri diri. 14 Ioku nopo nga irad di tulun di aandai iri momimiara do kambing biri-biri, om otutunanKu i tongokambing biri-biriKu om iolo nogi nga kotutun Dogo, 15 irad diAmoKu do kotutun Dogo om Ioku nga kotutun diAmoKu om itaakKu iti kovijaanKu do sumuvoli diri kapatajan diri tongokambing biri-biriKu. 16 Om kivaro nogi kambing biri-biriKu vokon, irino tulun di okonko bansa Joudi, iri aupo nakaasu siti kandang, om i tongokambing biri-biri diri nogi nga misti do angatanKu masu porunggumonKu diri tongokambing biri-biriKu laid. Om mongkinongoui iolo diri tinangaranKu, jadi sumiliu iolo kasangkat do iso pinorungguman do sosoiso momimiara. 17 Om itino do au kojuuan Oku diAmoKu, sabap pataakonKu iti Dogo do kovijaan supaya ovijau Oku kavagu. 18 Om irino Dogo do kouvangan kondiri do pataak di kovijaanKu, om auso iso tulun kadapat monolod diti Dogo do kovijaan, do kikuasa Oku do papataak om kikuasa Oku nogi do mongongoi do kovijaanKu kavagu. Om itino nisuu diAmo Dogo,” kadi Yisus. 19 Om poisisivalno dii kavagu i tongokotua do tulun Joudi do nokorongou di tinangaran di Yisus, 20 om oguu dii iolo mitangar do ka, “Nokuro do mongkinongou kou Disido do rinaganan Isido om mulaulau?” ka. 21 Nga kadi tongotulun vokon, “KatangaranJo nopo nga okoniko irad di tulun do rinaganan. Au kadapat Isido popoontong di tulun bolou nong rinaganan Isido,” kadiolo. 22 Om ontok nopo diri nga Tadau Tagajo Pangandaman do Pinongorosmian di Valai Sasambayangan Tagajo silo Bandar Yorusalim, om ontok diri masaan do osogit. 23 Nga pipanau-panauno dii i Yisus siri natad do Valai Sasambayangan Tagajo do siri navauon i roiton di Kakilima di Suliman. 24 Om liputaino dii di tongokotua do tulun Joudi i Yisus om pitangarno iolo Disido do ka, “Alaid ikoino mongindad daa Dika om auso koompusan i tangarNu. Porongoo ikoi nong oinomod do i KoristusKo, i pinili di Kinoringan sumiliu do Raja,” kadiolo. 25 Om jawapaino dii di Yisus iolo do ka, “NatangarKuno dikovu nong isai Oku, nga au kovi aparsaya Dogo. Kasangkat diri kosunduvan di navaalKu nga mantad do kuasa di ngaran di TamaKu om irino koilaan muju pasal Dogo. 26 Nga au kovi aparsaya Dogo sabap ikovu nopo nga okoniko kambing biri-biriKu, irino komoion do okoniko tulunKu. 27 Do tongokambing biri-biriKu nopo nga mongkinongoui di tangarKu om otutunanKui iolo kasangkat om maja iolo Dogo. 28 Om onuanKu iolo do kovijaan diri auso koovion, om soumur-umurno dii iolo do au obinasa, om auso iiso kosolod saralom do longonKu. 29 Om pataakon di TamaKu i tongotulunKu siti Dogo om Isido nogi nga agajo kuasa mantad di kasangkat. Auso iiso kosolod saralom longon di TamaKu. 30 Ioku om i TamaKu nga isooi,” kadi Yisus. 31 Om paganuno dii kavagu i tongotulun Joudi do vatu do pongodumpau daa di Yisus. 32 Nga kadi Yisus diolo, “Oguuno i vinaalKu aandai siti gotuvang muju do nipavaal Dogo diAmoKu om sombo iso diri vinaalKu do kopongodumpaan muju Dogo do vatu?” kadi Yisus. 33 Om jawapno dii iolo Disido do ka, “Okoniko ino vinaalNu aandai do kopongodumpaanja Dika do vatu, nga i mangararaatKo do Kinoringan, do tulunKoi toomod om mitangarKo do, ‘Iokuno i Kinoringan,’ kaNu,” kadiolo. 34 Om kadi Yisus diolo, “Nokotulisno siri buuk do Undang-undang Ugama muju do minitangar i Kinoringan di kotua do tulun Israil do ka, ‘Ikovuno roitan do tongokinoringan,’ ka. 35 Om oilaan tokouno dii do onuu nopo iri nokotulis siri Kitab nga misti do orikot, om i Kinoringan kondiri nga minitangar do iolono oroitan do tongokinoringan om iolo nogi pinorikatan diri tinangarJo. 36 Jadi nokuro dii do tangaron Okupo dikovu do, ‘MangararaatKo do Kinoringan,’ kamuju do mitangar Oku do, ‘Tanak Oku do Kinoringan,’ kangKu? Do Ioku nopo nga pinili om sinuu Oku diAmoKu do siti vonuvo. 37 Nong au nopo daa suutonKu iri nipakaraja Dogo diAmoKu om ada kouno aparsaya Dogo. 38 Nga nong suutonKu iri pakarajaan, insan au kou aparsaya Dogo nga misti do kaparsaya kouno diri sinunduKu, do aparsaya kou nopo diri sinunduKu om irino koilaan om korotijan muju do iAmoKuno saralom Dogo om Iokuno saralom di iAmoKu,” kadi Yisus. 39 Nga insanpo dii kavagu iolo do sipanangkap marong di Yisus nga nokoidu Isido mantad si longon diolo do au nopusus. 40 Mantad diri sondipauno dii kavagu i Yisus di Bavang do Yurdon do minongoi si sondipau si tinimpuunon di Yaya mamatis do tongotulun pogulu, om minindadapo dii Isido siri. 41 Om oguu dii i tongotulun do rinumikot siri Disido, om moitatangar iolo do ka, “Insan iiso pongintutunan navaal di Yaya nga auso, nga kasangkat di tinangar di Yaya pasal di Yisus diti nga oinomod marong,” ka. 42 Om oguu dii i tongotulun do naparsaya Disido siri do nokoontong diri sinunduJo.
1 Kivaro songulun kusai do au kataru, ngaran nopo disido nga i Lajarus. Kampung nopo disido nga silo Boitani, siri nogi kampung di Moria om iakajo i Marta. 2 Om iolono taka di Lajarus iri au kataru. I Moria nopo nga irino i mongumau di takod di Yisus do lana taangod om popiido nogi dii i tobukjo siri takod di Yisus. 3 Om ponuuno dii i Marta duvo di Moria do tulun do mongoi popoilo di Yisus do irad diti, “Tuhan, au kataru iadija, iri auNu kojuuan,” ka. 4 Korongou nopo dii i Yisus abar diri om pintangarno Isido do ka, “Au kataru i Lajarus nga okonbo ko kapatai toruol dino, nga irino supaya popoinggajo i tongotulun do Kinoringan om mantad do toruol nogi dino do koinggajo Oku i Tanak do Kinoringan,” kadi Yisus. 5 Nga aui gia kojuu i Yisus diolo i Marta om iadijo tongondu om i Lajarus. 6 Nga insan irad diri do auJo kojuuan iolo, nga ontok di korongou do au kataru i Lajarus, tinumomod Isido minindada siri pantok nindadawonJo duvopo tadau. 7 Katalib diri duvo tadau kaDisido dagai di tongotulunJo, “Kayo tokouno gumuli kavagu silo Vonuvo Yudia,” ka. 8 Nga kadagai Disido, “Rabi, ada tokouno gumungguli kavagu silo do aupo alaid mantad do sipongodumpau i tongotulun Joudi Dikau do vatu silo,” ka. 9 Nga itino poiradan di Yisus do auso korosijan salaid do aupo norikot i maso di kapatajanJo do ka, “Saralom sangadau kivaro opulu om duvo jaam. Isai mampanau do tadau om au isido kasadu sabap koontong isido do anavau iti vonuvo. 10 Nga isaai nopo tulun nong mampanau ontok do sodop, irino kasadu sabap auso tanavau saralom disido,” kadi Yisus. 11 Om iradno diri tinangaran Disido, komoion nopo do tadau nga poimvijau, sodop nopo nga apatai. Om mantad diri pitangar nogi dii Isido dagai do ka, “I Lajarus nopo diri i sulod tokou nga nokoodop, nga mongoi Oku silo do momosik disido,” kadi Yisus. 12 Nga kadagai, “Tuhan, nong nokoodop noopo isido, nga apangkaui,” kadi tongotulunJo. 13 Nga komoion nopo di Yisus do nokoodop nga irino do napatai, nga pikir nopo dagai diri tangar di Yisus om nokoodop toomod. 14 Nga sabap diri do vantango dii di Yisus do ka, “Napataino i Lajarus. 15 Nga aandaian Oku nogi do au Oku sino ontok diri, supaya koomit kovi potingkuro kou maja Dogo. Kayono tokou do mongoi soi disido,” kadi Yisus. 16 Jadi kadi Tumas, i roitan do Tapid, minitangar di tongotulun vokon di Yisus do ka, “Kayo tokouno pogi mongoi do maja Disido matai,” kadi Tumas. 17 Nga korikot nopo dii i Yisus siri Kampung Boitani, koilaaiJo dii do apatno tadau di Lajarus do poingiliu siri lobong. 18 Boitani nopo nga osomok do Bandar Yorusalim, kivaro kama iri do duvo nabatu sinodu. 19 Om oguu dii kotua do tulun Joudi do minongoi siri di Marta om i Moria do monoluod di ginavo diolo do moginupus di kinapatajan di tadijo. 20 Nga korongou nopo dii i Marta do nokorikot i Yisus, om ongoino dii sumamung isido di Yisus. I Moria nopo nga minindada siri valai. 21 Om kadi Marta di Yisus, “Tuhan, nong sino Koi siti daa diri tantu do aui daa apatai i tadija. 22 Nga oilaankui do insan maino pun onuu nopo ino pokionuonNu nga onuanKoi do Kinoringan,” kadi Marta. 23 Nga kadii di Yisus mitangar di Marta, “Ovijaui bo kavagu i tadi muju dino,” ka. 24 Om jawapno dii Marta, “Oilaankui do kovijaui isido kavagu do kavaja di tongotulun do ovijau kavagu ontok di kiamat,” ka. 25 Nga jawapno dii i Yisus, “Iokuno iri povijau mantad di kapatajon om manaak do kovijaan di auso koovion. Isaai nopo iri aparsaya Dogo insan pun apataipo isido nga ovijaui iri kavagu. 26 Om isaai nopo i aparsaya Dogo om ovijau nga auno moilo matai gosob salaid-laid. Aparsayakoi bato dino komoionKu?” kadi Yisus. 27 Kadi Marta, “Tuhan, aparsaya okui do Ikano i Koristus, i Tanak do Kinoringan, om Ika nogi iri porikoton siti vonuvo,” ka. 28 Om katangarno dii disido iri, om pouliai nogi si diadijo i Moria, om burungono dii disido do ka, “Silono i Guru mongoloou dikau,” kadiakajo. 29 Pogrongou di Moria turus miningkakat do mongoi rumomut si di Yisus. 30 Nga ontok diri masipo siri i Yisus pantok di kinosomungan di Marta Disido do aupo nokorikot Isido siri kampung diri. 31 Ontok diri siripo valai iri tongokotua do tulun Joudi do monoluod di Moria, om koontong dii iolo disido do turus miningkakat do minampanau lumabus, iolo pun sinumuut disido, sabap andasan daa diolo do mongoi isido siri lobong do mogiad. 32 Nga korikot nopo dii i Moria siri kinorikoto di Yisus, om koontong Disido, om turus noluluk isido siri somok takod di Yisus om pitangar do ka, “Tuhan, nong sino Koi siti daa diri, tantu do aui daa apatai i tadija,” ka. 33 Nga koontong nopo dii i Yisus do mogiad i Moria om i tongotulun Joudi maja disido, om kouup dii i Yisus do moginupus, om monikabo do araatan, 34 om pongoduatno do ka, “Inombo pinoilian muju disido?” ka. Nga kadiolo, “Tuhan, kayono antangai,” ka. 35 Om pogiadno dii i Yisus. 36 Nga kadi tongotulun Joudi, “Antangaipo i Yisus do aui kojuu marong di Lajarus!” kadiolo. 37 Nga kivaro dii piipiro tulun siri diolo do minitangar do ka, “Isidono iri popoontong di tulun bolou. Apatut do kadapat Isido monulung supaya aui otilombus i Lajarus apatai,” kaano diolo. 38 Nga i Yisus pun monikabo marong kavagu om ongoino dii siri lobong. Iri nopo lobong diri nga iso luvang do vatu om tinutuban di vatu. 39 Kadi Yisus, “Luvido muju pogi ilo vatu,” ka. Nga kadi Marta, iakajo di napatai, “Tuhan, novutongno isido do apatno tadau kinapatajanjo,” kadi Marta. 40 Jawapno dii i Yisus do ka, “NatangarKuno dikau iri nong aparsayako nopo nga koontongko do kagajaan di kuasa do Kinoringan,” kadi Yisus. 41 Om luvidono dii diolo i vatu, om tingaano dii i Yisus silo tavan om pitangarno do ka, “Ou Amo, monorimakasi Okui Dika do norongou Okui Dika sambayang. 42 OilaanKui do mongorongouKo Dogo soumur. Nga tangaronKu irad dino sabap do iti tongotulun songingkakat siti supaya aparsayai iolo do Ikano minonuu Dogo siti vonuvo,” kadi Yisus. 43 Koopodpo dii i Yisus mitangar inong diri, om loovono dii Disido i tulun napatai do opuod marong do ka, “Lajarus, labusno,” ka. 44 Om labusno dii i Lajarus, do songinrilitpo i kain di longon om takodjo, om pamarasanjo nga notopukanpo do somputangan i niponopuk, nga kadi Yisus di tongotulun, “Iduo mujupo ino kain nokorilit om obojoui isido mampanau,” kadi Yisus. 45 Om oguu dii i tongokotua do tulun Joudi iri minongoi siri di Moria do aparsaya di Yisus do nokoontong do vinijau Disido i Lajarus. 46 Nga kivaro nogi piipiro di kotua do tulun Joudi diri minongoi siri di kumpulan Porisi do minangaabar diolo do ka, “Vinijau di Yisus i Lajarus,” kadiolo. 47 Om loovono dii di tongokotua do imam om i kumpulan Porisi i Pinonguntunan di Tongokotua do muntun, om pitangar nogi dii iolo do ka, “Kukuroyon tokou tulun dilo? Do oguu kosunduvan do vinaalJo. 48 Do nong pobojoon tokou Isido diri, kasangkat do tulun nga aparsaya Disido, om i porinta do Ruum dino nga rumikot mongogorovot diti Valai Sasambayangan Tagajo tokou om i kopomorintaan tokou di bansa tokou,” kadiolo. 49 Nga kivaro iso tulun si diolo do i Kayapas ngaranjo, om isidono Imam Tagajo ontok di toun diri do minitangar isido diolo do ka, “Ikovu nopo nga ausoi toilalaan, 50 om au kou kaarati do gaam nogi nong kivaro iso tulun do apatai gumanti di bansa tokou supaya aui asangkat bansa tokou do obinasa,” kadi Kayapas. 51 Nga iri nopo tinangar disido diri om okoniko mantad di ginavojo kondiri, do isido nopo nga Imam Tagajo ontok di toun diri, om irino dii do popolombus isido di nituduk do Kinoringan si ginavojo do apatai i Yisus do gumanti do bansa di tulun Joudi. 52 Om okonko iolo noopo kinapatajan diri nga irino gumanti kasangkat di tangaanak do Kinoringan di nokopingias do poiuuntunon Disido om osiliui iolo do iso. 53 Om irino tadau dii do kinotimpuunan di tongokotua do imam om i kumpulan Porisi do moiupapakat nong kukuroyon diolo i Yisus mamatai. 54 Om irino dii kinoontodo do au mintalang i Yisus mampanau siri pialatan di tongotulun Joudi, nga minaliu Isido mantad siri do mongoi silo Bandar Ipraim somok si padang do kovotuvan, om silono dii nindadawon Disido om ikoi i tongotulunJo. 55 Nga ontok nopo diri om oruaino orikot i Tadau Tagajo Paska di tulun Joudi, irino tadau do kapangandaman dagai di kinopogiduan diodu-akija mantad Vonuvo Masir di pogulupo. Om oguu dii tongotulun mantad kokompungan do tumakad siri Bandar Yorusalim do mongolidang di kojuvanjo do maja di adat dagai ontok do aupo nokotimpuun i Tadau Tagajo Paska diri. 56 Om iumono dii diolo i Yisus, om poiduat-duatno dii iolo di tongotulun do songingkakat siri natad do Valai Sasambayangan Tagajo do ka, “Potingkurono kasaramanan muju? Au kama bo dii rumikot Isido ontok di tadau tagajo maino,” kadiolo. 57 Nga nokopomilinno laid i tongokotua do imam om i kumpulan Porisi do mokipoilo do isai-isai nopo tulun do koilo di pantok nijonon di Yisus supaya atangkap diolo Isido.
1 Nga onompo tadau om orikotno i Paska, irino tadau tagajo do tongotulun Joudi do pangandaman di kinopogiduan diodu-aki diolo mantad si Vonuvo Masir di pogulu, om gulino dii i Yisus siri Boitani, si kampung di Lajarus, i napatai nga vinijaui Disido. 2 Om sirino pinaakan di tongotulun i Yisus, om i Marta nogi nga siri do muup paakan, om iri nopo iso tulun songurukan di Yisus mangakan nga i Lajarus. 3 Om onuono dii di Moria iri tangakati vinagat diri lana di aangod marong do auso gavul om amaar marong, i vinaal mantad di gamut do sogumau taragang, om potuntugo siri takod di Yisus om piido nogi dii di tobukjo. Nga atukpo dii kaangod tavau di lana siri saralom do valai! 4 Nga pitangarno dii iri iso tulun di Yisus, irino i Yudas mantad Kampung Koriut, i pojual di Yisus, 5 do ka, “Nokuro do au nogi ijual ilo lana do torogo tolu naatus pirok om itaak di tongotulun do ongomiskin?” ka. 6 Nga okoniko tinangar disido irad diri om momoduli isido di tulun do ongomiskin, nga isido nopo om mananakau, do isido nopo gia nga mongunguut di kontungan poijanan do siin dagai, om oubas isido manakau do siin mantad siri poijanan kinuutanjo. 7 Nga kadi Yisus, “Poboyooni bo i Moria dino do ilo nopo nga isodia disido Dogo di tadau kapangalabangan Dogo. 8 Do tulun nopo tomiskin soumur poirunggum dikovu. Nga Ioku nopo om okoniko soumur poirunggum dikovu,” kadi Yisus. 9 Om okonko nokukuyak i tulun Joudi do rinumikot siri Kampung Boitani do nokorongou iolo do siri i Yisus. Nga okoniko mongontong noo di Yisus kinaangaian diolo siri nga mongontong nogi iolo di Lajarus i napatai nga vinijaui kavagu di Yisus. 10 Jadi poiupapapakatno dii i tongokotua di imam do i Lajarus nogi nga patajon diolo, 11 sabap oguu di tongotulun Joudi do nabajajatan do aparsaya di Yisus om rinumijang di kotua diolo sabap vinijau di Yisus i Lajarus. 12 Di susuvab om nokorongou dii i tongotulun do asapou marong, i rinumikot sumapul di tadau tagajo, do mindirikotno i Yisus silo Bandar Yorusalim, 13 om paganuno dii iolo diri papa do kurma om ongoi nogi dii iolo sumamung Disido om sonluvap-luvap mitangar do ka, “Usana! Rojoo tokouno i Kinoringan. Kibarakatno i Yisus do rinumikot Isido saralom ngaran do Tuhan, irino i Raja tokou tulun do Israil!” kaano di tongotulun. 14 Om onuono dii di Yisus iri iso tanak do kaladai om sako nogi dii Isido irad di nokotulis siri Kitab do ka, 15 “Oou dikovu siti Kulud Siun, adano korosi di onuu nopo. Antangaino i Raja muju do rumikot do poinsako do tanak kaladai,” ka. 16 Nga ontok nopo diri om aupo nakaarati ikoi i tongotulun di Yisus diri, nga koinggajo nopo dii Isido soi suruga om koilaai dagai nogi dii do kivaro pointulis siri Kitab do irad dino i Yisus om pasal do irad diri pongurumat di tongotulun Disido. 17 Om pangaabarno dii i tulun toguu di tongotulun vokon do nokoontong iolo di Yisus ontok di loovo i Lajarus palabus mantad si lobong do vinijau mantad kapatajan. 18 Irino nontodon di kinasapaan do tulun sumamung di Yisus sabap nokorongou iolo do nokovijau Isido di Lajarus. 19 Iri nopo dii kumpulan do Porisi nga moitatangar dii iolo kokondiri do ka, “Antangai pogi, ausoi dii arati di tujuan tokou, do antangai mujupo nga kasangkat do tulun siti vonuvo nga minaja Disido,” ka. 20 Om kivaro nogi piipiro tulun do Yunani siri pialatan di tongotulun Joudi do minongoi siri Bandar Yorusalim do sumamba di Kinoringan ontok di tadau tagajo di tulun Joudi. 21 Om ongoino dii iolo sumamung di Pilipus iso tulun mantad Kampung Boitsida si Vonuvo Golilia, om mitangar iolo disido do ka, “Tuan, sumamung ikoi daa di Yisus,” ka. 22 Om ongoino dii i Pilipus siri diOndorias do polombus di tangar diolo si disido om pivajano dii iolo duvo kojuvan do mongoi si di Yisus do porongou Disido. 23 Nga jawapno dii i Yisus diolo do ka, “Nokorikotno i maso do poinggojoon Oku do Iokuno i Sinumiliu do Tulun. 24 PatangaronKu marong dikovu iti do misti do apatai Oku irad do iso linsou do parai do potumposon siri tana do irad do napatai. Nga nong aui potumposon iri si tana, soumur-umurno iri do soiso linsou. Nga nong nokotumposno iri siri tana, sumobulno dii iri parai om monguva nogi dino do asapou. 25 Isai iri mogium do kasanangan diri kovijaanjo siti vonuvo, iri nogi oliangan do kovijaanjo do auso koovion. Nga isai iri pokoluvau di kovijaanjo siti vonuvo, iri nogi opiara di kovijaanjo do auso koovion. 26 Isaai nopo iri muup diti karajaKu om mistino do maja-vaja Dogo, om sombo-sombo Oku nga siri nogi i tongosusuuonKu. Om isai iri muup Dogo isido nogi nga urumaton diAmoKu. 27 Nga maino nopo om sumurauno iti ginavoKu. Onu naku tangaronKu diti, ‘Amo, poiduo Okuno mantad diti maso do kasansaraan,’ kangKuno naku daa? Nga irino kinorikatanKu do osuat diti maso kasansaraan,” kadi Yisus. 28 Nga, “Ou Amo, poinggojoono i ngaranNu,” kadii di Yisus do sumambayang diAmoJo. Om norongou dii diolo i dolou do Kinoringan mantad soi suruga do minitangar do, “NokoinggajoKuno iri, nga pogojoonKupo kavagu!” ka. 29 Nga iri nopo tongotulun do songingkakat siri nokorongou diri dolou om santangar-tangar dii do ka, “Tinggorud ilo,” ka. Nga kadi vokon, “Moloikati bo iri kumitatangar Disido,” ka. 30 Nga jawapno dii Yisus do ka, “Ikovuno iri pinorongou di tinangaran diri, okoniko Ioku. 31 Om itino maso maino do kopomutusan do Kinoringan di tongotulun siti vonuvo, om itino maso maino do sunsubon i kotua diti vonuvo, irino i kotua do rogon. 32 Om koinsavat Okupo dino siri kaju mantad siti tana om ontokno diri do isai-isai nopo dino iri tongotulun nga angatanKu do porikot si Dogo,” kadii di Yisus. 33 Tinangar Disido irad diri do popoilo do apatai Isido posolibon. 34 Nga jawapno dii i tulun kinoguuan do ka, “Tangar nopo diri siri Undang-undang Ugama tokou nga i Koristus nopo om poimvijaui gosob salaid-laid. Nokuro tangarNu do poinsavaton i Sinumiliu do Tulun mantad siti tana? Isai iri Sinumiliu do Tulun komoionNu bato?” kadi tongotulun. 35 Minaganu i Yisus do iso poiradan do ka, “Auno alaid i tanavau do poirunggum dikovu. Pampanau kouno ontokpo do kitanavau siti dikovu om au kovi otuvangan, do isaai nopo tulun di mampanau do otuvong om aujo oilaan nong sinombo pakaayan disido. 36 Parsaya kouno Dogo, do Iokuno i komoion do tanavau, do sitipo dikovu iti tanavau om osiliu kovi dii do tulun do tanavau,” kadi Yisus. Om koopodpo dii i Yisus mitangar diri om pampanauno dii Isido mogidu lumosok. 37 Do insan songkuropo ginuu pongintutunan do vaalon di Yisus siri gotuvang diolo pun, masi iolo do au aparsaya Disido. 38 Nga osiliu irad dino do mongorikot diri tangar di nabi Yasaya do irad diti, “Tuhan, ausoi gia aparsaya di niabarja. Om ausopo nokoilo do nokointalangNu i kuasaNu si diolo,” ka. 39 Om irino sabap do auso kaparsayaan diolo do kivarono tangar do Kinoringan pinolombus di nabi Yasaya do pogulupo do ka, 40 “ ‘NobolouKuno i mato diolo supaya au koontong i mato diolo, om nokokodouKuno i ginavo diolo supaya i ginavo diolo au moilo mangaarati gosob do aui kopuriman iolo do rumorogo di dusojo om ompunanKui daa iolo,’ kadi Kinoringan,” kadi Yasaya. 41 Katangar-tangar nopo di Yasaya irad diti sabap nokoontongno isido di vinaang do kagajaan di Yisus, om Isidono komoion di tangar di Yasaya diri. 42 Nga insan pun irad dino oguui i tongokotua di tulun Joudi do aparsaya di Yisus daa, nga au iolo kobulun mintalang mangakun do aparsaya Disido, do rumosi iolo do poiduon di kumpulan Porisi mantad siri valai sasambayangan. 43 Do iolo nopo nga agajopo ginavo do rojoon do tulun vokon mantadpo do rojoon di Kinoringan. 44 Nga pitangarno i Yisus do opuod do ka, “Isaai nopo aparsaya Dogo om okoniko Ioku noo kaparsayaan disido diri, nga Isidoi i minonuu Dogo siti vonuvo. 45 Om isaai nopo koontong Dogo om irad koontong nogi diAmo i minonuu Dogo siti vonuvo. 46 KinorikatanKu nopo siti vonuvo nga sumiliu do tanavau supaya isai-isai nopo aparsaya Dogo om aui pointatap siri totuvong, irino i taraat. 47 Nga iri nopo tulun do rumongou Dogo om aui vojoonjo, om okoniko Ioku momutus disido diri, sabap okoniko rinumikot Oku do momutus do tulun siti vonuvo, nga momijau Okui diolo. 48 Isaai nopo magada Dogo om au aparsaya di tangarKu nga kivarono momutus disido diri, irino i tinangaranKu do sumiliu momumutus ontok do kiamat. 49 Do mitangar Oku diti okoniko kuasaKu kondiri, nga irino mantad diAmo i minonuu Dogo siti vonuvo. Isidono minonuu Dogo do mitangar diri onuu nopo i apatut do potudukonKu. 50 Om oilaanKui do isuu nopo Disido diti om irino nontodon do kovijaan diri auso koovion. Om irino dii do nombo noopo iri nokobilin laid Dogo diAmo om irino patangaronKu,” kadii di Yisus.
1 Sangadaupo om orikot iri Tadau Tagajo Paska do pangandaman dagai di tongotulun Joudi di kinopogiduan diodu-akija mantad si Vonuvo Masir di pogulu, om noilaanno dii di Yisus do norikotno dii i maso Disido do mogidu mantad siti vonuvo do gumuli kavagu silo diAmoJo. Om au kojuu i Yisus di tongotulunJo siti vonuvo gosob do poingompus. 2 Ii nokoruungpo i Yisus di tongotulunJo mangakan sodop diri om nosuuno maantad di kotua do rogon do rumaat i ginavo di Yudas, i tanak di Simun mantad soi Kampung Koriut, do itaak i Yisus si di musuJo. 3 Nga noilaanno dii di Yisus do nakataakno diAmoJo kasangkat di kuasa siri Disido. Om noilaan nogi Disido do mantad do Kinoringan nontodon Disido om gumuli kavagu Isido soi di Kinoringan. 4 Om ingkakatno dii Isido ontok di mangakan om olusono dii Disido i sabungJo om paganu dii do tuala om poongkoso siri tavakJo. 5 Om tunguaiJo nogi do vaig i bisin om timpuunno dii Isido do mingungugas di tongolukap dagai di tongotulunJo om piidai nogi dii ikoi di Yisus diri tuala, iri pinoongkos siri tavak Disido. 6 Om korikataino dii Disido i Simun Pitrus. Nga kadi Pitrus, “Tuhan, nokuroi do Ika nogi mongugas diti lukapku?” ka. 7 Nga jawapno dii i Yisus do ka, “Do maino aupo oilaannu nong onu komoion diti vaalonKu, nga oilaannui do talaaid,” ka. 8 Kadi Pitrus, “Adano ugasai iti lukapku,” ka. Nga kadi Yisus, “Nong au nopo ugasanKu ika, nga aukono dii kopiiso Dogo,” ka. 9 Nga kadii di Simun Pitrus, “Irad nopo dino, Tuhan, okonko iti lukapku noopo, nga palad om tuluku nogi ugasan,” ka. 10 Nga kadii di Yisus mitangar disido, “Isaai nopo nokoponsu om oborisino kasangkat; auno oporlu do ugasan kavagu, nga iri lukap noo. Om ikovu nopo ongoborisi kasangkat i ginavo muju nga iri isopo dikovu do au,” kadii di Yisus. 11 Do noilaanno Disido i tulun diri pojual Disido siri musuJo om irino dii katatangar Disido do, “Ikovu nopo nga ongoborisi kasangkat i ginavo muju nga iri isopo dikovu do au,” ka. 12 Koopod nopo dii i Yisus mongugas diri lukap dagai, om panansabungno dii kavagu Isido, om gulino dii Isido kavagu siri somok mija do minitangar diolo do irad diti, “Orotijan muju dii iti karajaKu si dikovu? 13 Pongoroitan muju Dogo, ‘Guru’ ko ‘Tuhan’, om nokoontokno ino do Iokuno Guru om Tuhan muju. 14 Jadi nong Ioku do Tuhan om Guru muju do minongugas dino lukap muju om mistino do moisusuli kou mongugas do lukap muju kondiri, 15 do irino vinaalKu diri osiliu do suguton muju supaya suuton muju miinong diri gaagayaKu si dikovu. 16 Do patangaronKu marong dikovu iti do ausoi turipon do agajo pangkat mantad di tuanjo om ausoi susuuon agajo pangkat mantad di tulun minonuu disido. 17 Nong oilaan mujuno do oinomod iri nitudukKu dikovu, nga ososogit kovi nong suuton muju. 18 Okonko kasangkat dikovu do komoionKu, do oilaanKui iri nopiliKu. Nga misti do korikot i nokotulis siri Kitab di pogulu do irad diti, ‘Iso tulun i nokoruung Dogo mangakan nga lumavan Dogo,’ ka. 19 Nga patangaronKu dikovu iti maino do aupo ajadi ino, supaya ajadi nopo iri om aparsaya kou nogi Dogo do, ‘IOKUNO SINO SOUMUR.’ 20 PatangaronKu marong dikovu iti do isaai nopo iri monorima di tulun sinuuKu nga irino monorima Dogo; om isaai nopo iri monorima Dogo nga irino monorima di Kinoringan, i minonuu Dogo siti vonuvo,” kadi Yisus. 21 Katangarpo dii di Yisus iri om osurauno dii marong Isido om pintangar Isido do ka, “PatangaronKu marong dikovu iti, do kivaro iso tulun sino dikovu do pojual Dogo,” kadi Yisus. 22 Om moiontong-ontong dii ikoi do nobingung do au oilaan nong isai i komoion Disido. 23 Nga iokuno, i Yaya, iso tulun di Yisus do au kojuuanJo marong do sinumonib siri Disido. 24 Om ponikalno dii i Simun Pitrus dogo do monuu dogo mitangar di Yisus do ka, “Duatono nong isai komoion Disido!” ka. 25 Om kovili okuno dii si di Yisus om tangaroku dii Isido do, “Tuhan, isai komoionNu?” kangku dii. 26 Om jawapno dii i Yisus do ka, “Isidono iri onuanKu diti kuui potutuonKu,” ka. Katangarpo dii Isido diri om potutuoJono dii i kuui, om pataako nogi dii di Yudas, i tanak di Simun mantad soi Kampung Koriut. 27 Om naanu nopo dii di Yudas i kuui diri, inosuanno dii i ginavojo di Soitan, i kotua do rogon. Nga pitangarno dii i Yisus do, “Googoono pogi polombus dino kouvangannu,” kadii di Yisus. 28 Nga insan iso dagai diri mangakan siri nga auso koilo nong onu komoion di Yisus mitangar di Yudas inong diri. 29 Do i Yudas nopo nga mongunguut gia di poijanan do siin, jadi andasanpo daa di vokon nong sinuu di Yisus i Yudas momoli do onuu nopo kogunaan dagai ontok di tadau tagajo diri ko sinuupo di Yisus do manaak do siin si tulun do miskin. 30 Om karamitpo dii di Yudas iri kuui, piogono dii mampanau. Om ontok diri otuvongno dii. 31 Kapanau nopo dii i Yudas, om pitangarno dii i Yisus do ka, “Iokuno i Sinumiliu do Tulun om maino poinggojoon Oku, om i Kinoringan nogi nga koinggajo saralom Dogo. 32 Om koinggajo nopo i Kinoringan saralom Dogo, i Kinoringan nogi nga popoinggajo Dogo saralom Disido kondiri, om ontok ditino popoinggajo Isido Dogo. 33 Ikovuno irad do tongotangaanakKu, okonnoko alaid Okupo do poinrunggum dikovu. Iumon Oku nogi dino dikovu, nga mitangar Oku nogi dikovu irad di tangarKu di tongotulun Joudi do iri nopo ongoionKu om au kou korikot siri. 34 Kivaro isuuKu dikovu do kavavagu, irino misti kou moisusuli do au kojuu irad Dogo, do au Oku kojuu dikovu om ikovu pun misti do irad dino. 35 Nong moisusuli kou do au kojuu, oilaan kou do tulun vokon do tulunKu ikovu,” kadi Yisus. 36 Kadi Simun Pitrus mongoduat di Yisus, “Tuhan, nombo dino pakaayanNu?” ka. Nga jawapno dii i Yisus do ka, “Auko kadapat maja maino siri pakaayanKu, nga insan tadau om kosuutko nogi Dogo,” ka. 37 Om pongoduatno dii kavagu i Pitrus do, “Tuhan, nokuro maino do au kavaja oku Dika? Do ioku nopo nga poinsodiano do rumundun Dika do patajon,” ka. 38 Nga jawapno dii i Yisus do ka, “Oinomod naku do poinsodiako nogi do rumundun Dogo do patajon? Nga patangaronKu marong dika iti do aupo kopongingkukuuk ilo tandaa om intolukono mitangar do, ‘Au oku kotutun di Yisus,’ kanu dino Pitrus,” kadi Yisus.
1 Om kadii di Yisus kavagu dagai di tongotulunJo, “Ada kouno sumurau. Parsaya kouno do Kinoringan om parsaya kou nogi Dogo. 2 Siri valai diAmoKu soi suruga oguu ijonon, om mongoi Oku posodia diri ijonon muju soi. Nga nong auso irad dino tantu do patangaronKui dikovu. 3 Om koongoi Oku nopo dino soi, do posodia di ijonon muju, om rumikot Oku nogi dino kavagu do mongovit dikovu siri pantokKu diri, supaya koiso kou Dogon do nijonon. 4 Om kopulanu kovi dino diri vajaanKu do mongoi siri,” kadi Yisus. 5 Nga kadi Tumas mintangar di Yisus, “Tuhan, au ikoji koilo nong inombo pakaayanNu, om potingkukuro ikoi dii do koilo di vajaan mongoi silo?” ka. 6 Nga kadii di Yisus mintangar disido, “Iokuno irad do vajaan mongoi soi di Kinoringan, om nokoilo kou do toinomod mantad Dogo, om manaak Oku do kovijaan di tongotulun. Nong okonko mantad Dogo, auso iiso tulun korikot soi diAmoKu. 7 Nong kotutun kou Dogo, iAmoKu pun otutunan mujui. Om otutunan mujuno dii Isido maino sabap nokoontong kouno Disido,” kadi Yisus. 8 Nga pintangarno i Pilipus Disido do ka, “Tuhan, poontongo ikoipo bo diAmoNu om obobos i ginavoja,” ka. 9 Kadii di Yisus, “Pilipus, alaid Okuno poinrunggum dikovu, nga au koupo kotutun Dogo? Isaai nopo nokoontong Dogo, om irad nokoontong diAmoKu. Om nokuro do mintangarkopo Dogo do, ‘Poontongo ikoipo bo diAmoNu,’ kanu? 10 Au kopo bala aparsaya do Ioku nopo nga saralom diAmo, om iAmo nogi nga saralom Dogo. Kasangkat diti tinangarKu dikovu nga okoniko tangaronKu mantad di kuasaKu kondiri, nga irino iAmo, i poindada saralom Dogo, mamaal do pakarajaan Disido. 11 Parsayano pogi do Ioku nopo nga saralom diAmo om iAmo nogi nga saralom Dogo, ko insan au kou aparsaya do Ioku saralom diAmo om iAmo saralom Dogo nga misti aparsaya kou Dogo sabap diri kosunduvan nopimvaalKu. 12 PatangaronKu marong dikovu iti do isaai nopo aparsaya Dogo om irino i kadapat mamaal kasangkat diri nopimvaalKu om muu-guupo pimvaalon disido mantad diri pimvaalonKu, sabap Ioku nopo nga mongoi Oku soi diAmo. 13 Om onuu nopo iri pokionuon muju nga onuanKu ikovu nong mokianu kou sabap maja kou Dogo supaya koinggajo iAmo saralom Dogo, i TanakJo. 14 Nong mokianu kou do onuu nopo saralom di ngaranKu nga onuanKui ikovu,” kadi Yisus. 15 Om kadi Yisus kavagu, “Nong aui kojuuan Oku dikovu, vojoon mujui iri nisuuKu dikovu. 16-17 Mokianu Okupo diAmo, om onuan kou nogi dino Disido do iso Mongunguup, irino i Tatod do Kinoringan i monuduk diri oinomod, do maja-vaja dikovu gosob salaid-laid. Au kotorima tulun siti vonuvo Disido, sabap au Isido aantangan diolo om au Isido otutunan diolo. Tapi ikovu nopo nga kotutun Disido sabap Isidono mindada si dikovu, om kopiiso dikovu do talaaid. 18 AuKui iduan ikovu irad do tanak di auso minaganak sabap do gumuli Okui kavagu siti dikovu. 19 Okonko alaidpo tulun siti vonuvo mongontong Dogo, nga koontong kovi bo Dogo. Om sabap do ovijau Okui, ikovu nogi nga ovijaui. 20 Korikot nopo dino iri tadau do korikatan di Tatod do Kinoringan i monuduk diri oinomod, ampa oilaan muju do Ioku nga saralom diAmoKu, om ikovu nga saralom Dogo om Ioku nogi nga saralom dikovu. 21 Nga isaai nopo iri nokoilo maja diri nisuuKu om vojoon disido, irino au kojuu Dogo. Om isaai nopo iri au kojuu Dogo, om irino i au kojuuan diAmoKu, om Ioku nogi nga au kojuu disido, om mintalang Oku siri disido,” kadi Yisus. 22 Om pongoduatno dii i Yudas -- iri okoniko i Yudas tulun mantad Kampung Koriut -- do ka, “Tuhan, potingkuroKo dino mintalang siti dagai om au aantangan di tongotulun siti vonuvo?” ka. 23 Om jawapno dii i Yisus do ka, “Isaai nopo iri au kojuu Dogo, om irino mangasip di tinangaranKu, om au kojuuan isido diAmoKu, om rumikot Ikoi diAmo si disido om mijon Ikoi siri disido. 24 Isaai nopo iri auso ginavo do au kojuu Dogo om irino au maja di tinangaranKu. Om iri nopo tinangaran do norongou muju om okoniko mantad Dogo nga mantad diAmo, iri minonuu Dogo siti vonuvo. 25 Kasangkat do tinangaran diri nga patangaronKu dikovu salaid do poinrunggum Okupo dikovu. 26 Nga iri nopo i Mongunguup, irino i Tatod Tolidang, om suuon Isido diAmo sumuvoli mongoi siti dikovu saralom di ngaranKu. Om Isidono iri monuduk dikovu do kasangkat onuu nopo, om popoondom dikovu kasangkat diti natangarKu dikovu. 27 PataakonKu dikovu iti kasandadan do ginavoKu, supaya osondod i ginavo muju. Nga iri kasandadan do ginavo itaakKu dikovu om okoniko irad di kasandadan do ginavo itaak di tulun siti vonuvo. Ada kou kosurau om ada kou korosi. 28 Nokorongou kouno do tinangaranKu dikovu do, ‘Mongoi Oku si diAmoKu, nga gumuli Oku kavagu siti dikovu,’ kangKu. Jadi nong au kou kojuu Dogo tantu do aandaian kou do mongoi Oku silo diAmoKu, do iAmoKupo nga agajo mantad Dogo. 29 Om patangaronKu dino kavagu dikovu maino do aupo ajadi iri, supaya ajadipo dino iri om aparsaya kou nogi dino. 30 Okonko alaid Okupo kumitatangar dikovu do mikot-rikot ilo kotua diti vonuvo, nga okonko kikuasa isido Dogo. 31 Nga vojoonKu iri nisuu diAmoKu Dogo supaya koilo i tongotulun siti vonuvo do au Oku kojuu diAmo. Ingkakatno om kayo tokouno mampanau,” kadi Yisus.
1 Kadi Yisus di tongotulunJo, “Iokuno irad do guvas do anggur diri oinomod, om iAmoKuno i momimiara di puun do anggur diri. 2 Pointikid-tikid diri raanKu iri au monguva nga tutuon di TamaKu, om pointikid-tikid diri raan iri monguva nga pinrarapan Disido supaya gumuu marong iri tuvajo. 3 Nopingugasan iri tongoginavo muju mantad di Abar do Aandai iri nitudukKu dikovu. 4 Tatap kouno siti Dogo om Ioku pun tumatap sino dikovu. Irad di raan nong au pointatap siri guvasjo au kadapat monguva, om irad kou nogi dino, nong aui tumatap kou siti Dogo au kou kadapat monguva, irino komoion do au kou kadapat mamaal do aandai. 5 Iokuno irad do guvas do anggur om ikovuno irad do raanjo. Nga isaai nopo tumatap siti Dogo om Ioku nogi nga tumatap siri disido om irino monguva do asapou, do korijang kou nopo Dogo nga au kou kadapat mamaal do onuu nopo. 6 Isaai nopo iri au tumatap siti Dogo om irino taaman irad di raan, om olonot nopo iri, untunon om tutudan nogi dino siri tapui. 7 Nga nong tumatap kou siti Dogo om potoouon muju i tinangaranKu siri ginavo muju, om irad nopo diri buli mokianu onuu nopo iri kouvangan muju om onuan kovi. 8 Nong soumur kou mamaal do aandai, irino tuva muju, nga rojoon do tongotulun iri vinaang do kagajaan diAmoKu, om irad nogi dino nokointalang kouno do nosiliu do tongotulunKu. 9 Au Oku kojuu dikovu irad diAmo do au kojuu Dogo. Patatapono ino ginavo muju mongondom do au Oku kojuu dikovu. 10 Nong vojoon muju ino nisuuKu dikovu, atatapno do oilaan muju do au Oku kojuu dikovu, irad Dogo do minaja diri nisuu di TamaKu om atatapno do oilaanKu do au kojuu Isido Dogo. 11 TinangarKu irad dino supaya opurimanan mujui i kasanangan do ginavoku om supaya aavi-avi i ginavo muju asanang. 12 Itino isuuKu dikovu do misti kou moisusuli au kojuu irad Dogo iri au kojuu dikovu. 13 Nong posuvolijon di tulun iri niawajo do matai gumanti di tongosongkoruanganjo nga irino au marong kojuu di songkoruanganjo. 14 Nong vojoon mujui iri tongonisuuKu dikovu, nga ikovuno i tongosongkoruanganKu. 15 RoitonKu ikovu do tongosongkoruanganKu sabap do pinoiloKuno ikovu kasangkat iri norongouKu mantad di TamaKu. Nga auno loovonKu ikovu maino do turipon, sabap iri turipon nopo nga au koilo nong onu vaalon di tuanjo. 16 Om okoniko ikovu minomili Dogo, nga Ioku nono iri minomili dikovu, om tinantuKuno ikovu supaya do popoimbulai kou do tuva, irino mamaal do aandai, om i tuva muju nopo diri nga auso kotingkadan, supaya onuu nopo iri pokionuon muju si di TamaKu saralom di ngaranKu nga onuan kovi Disido. 17 Nga itino isuuKu kavagu dikovu do misti do moisusuli kou do au kojuu,” kadi Yisus. 18 Om kadi Yisus kavagu, “Nong obonsijan kouno diri tulun siti vonuvo di au maja di tinangaran di Kinoringan nga ondomo mujuno do nokopogulu Okuno do binonsijan diolo. 19 Nga nong tulun kouno daa do siti vonuvo, mimang do au kojuuan kou di tongotulun siti vonuvo sabap iolono sanganu dikovu. Nga obonsi iri tongotulun siti vonuvo dikovu sabap okoni tulun kou siti vonuvo, sabap ikovu nopo diti nga piniliKu do maja Dogo. 20 Ondomono mujuno iri tinangaranKu dikovu do, ‘Auso turipon iri agajo kuasa mantad di tuanjo,’ kangKu. Om nong pinokoruol Oku diri tongotulun, ikovu nogi nga pokorualan diolo. Om nong mangasip iolo di tinangaranKu, nga mangasip iolo nogi di tinangaran muju. 21 Nga posusawon kou diri tongotulun siti vonuvo di au mangasip di tinangaran di Kinoringan sabap maja kou Dogo, do au iolo kotutun di TamaKu i minonuu Dogo siti vonuvo. 22 Nga nokointalang iri duso diolo sabap nokorikot Oku siti vonuvo do popoilo diolo. Om maino nopo dii nga ausono dii koontodon diolo do mongolim diri duso diolo. 23 Isaai nopo iri obonsi Dogo, isido nogi nga obonsii di TamaKu. 24 Om aupo nokointalang iri duso diolo nong aupo vinaalKu iri kosunduvanKu siti gotuvang diolo, iri aupo insan avaal di tulun vokon. Nga insan nokoontongpo iolo kasangkat diri kosunduvanKu maino nga masii iolo do obonsi Dagai diAmo. 25 Nga natantuno irad dino iolo obonsi Dagai diAmo do mongorikot di komoion diri tinangaran siri saralom buuk do Undang-undang Ugama diolo do irad diti, ‘Ongobobonsi iolo Dogo do auso koontodon,’ ka. 26 Nga suuonKu iri Mongunguup mongoi sino dikovu mantad di TamaKu. Isidono i Tatod do Kinoringan i monuduk diri oinomod. Om korikot nopo Isido mantad diAmo do mongoi sino dikovu, popoilo Isido pasal Dogo. 27 Om ikovu nogi nga apatut do popoilo pasal Dogo, sabap ikovuno iri maja-vaja Dogo mantad di toginapo,” kadi Yisus.
1 Om kadi Yisus kavagu, “Om natangarKuno dikovu kasangkat diri supaya aui oluvau ino ginavo muju. 2 Nga poiduon kou di tongotulun iri au aparsaya Dogo mantad si valai sasambayangan, om orikot nogi dino iri maso do panantaman nopo daa di tulun nong mamatai isido dikovu om irino jalan disido do kumaraja si di Kinoringan. 3 Koyon kou gia diolo do irad diri sabap au iolo kotutun Dagai diAmo. 4 Nga maino tangaronKu ikovu laaid pasal diri kasansaraan supaya ajadi nopo kasansaraan diri om ondomon mujui do natangarKuno dikovu laaid pasal diri,” kadi Yisus. Nga mitangar i Yisus kavagu, “Aupo minitangar Oku dikovu pasal diri kasansaraan salaid diri sabap poinrunggum Okupo dikovu. 5 Nga maino nopo dii om muli Okuno soi diAmo iri minonuu Dogo siti vonuvo, om insan iiso dikovu ko kivaro mongoduat Dogo do ka, ‘Ou Guru, ombo ongoionNu?’ ka nga auso mongoduat Dogo. 6 Nga kasangkat kou do lumudus do natangarKu do, ‘Muli Okuno soi diAmo,’ kangKu. 7 Nga oinomodno iti tangaronKu dikovu do gaam nogi do kouli Oku, do au Oku nopo kouli om aui korikot i Mongunguup siti dikovu, irino i Tatod do Kinoringan. Nga nong kouli Oku suuonKu nogi dino Isido mongoi siti dikovu. 8 Om korikot nopo dino Isido siti vonuvo, om Isidono dino i popuriman di tongotulun siti vonuvo i duso diolo. Om popoilo Isido nong onu iri abanar om popoilo nogi pasal do kopomutusan do Kinoringan. 9 Do popuriman Isido diolo diri duso do au aparsaya iolo Dogo. 10 Om popoilo Isido do abanar Oku, do mongoi Oku soi diAmoKu om auno dii koontong kou Dogo. 11 Om popoilo Isido nogi pasal do kopomutusan di Kinoringan, sabap natantuno noukumanno i kotua diti vonuvo, irino i kotua do rogon. 12 Oguupo daa patangaronKu dikovu, nga au kovi kasanggup do maino. 13 Nga korikotpo dino i Tatod do Kinoringan, i monuduk diri oinomod, om tudukan kou nogi dino Disido onuu nopo iri oinomod sabap okoniko kuasa diri tinangaranJo kondiri, nga i orongou Disido si diAmo patangaronJo si dikovu, om mangaabar Isido dikovu kasangkat i korikot do insan tadau. 14 Om rojoon Oku di Tatod do Kinoringan, do iabar Disido dikovu kasangkat diri naramitJo mantad Dogo. 15 Nga kasangkat do onuu nopo iri diAmo om irino Dogo. Irino kangKu do iabar di Tatod do Kinoringan dikovu kasangkat diri naramitJo mantad Dogo. 16 Auno alaid om au kouno koontong Dogo, om aui alaid om koontong kou nogi dino Dogo kavagu,” kadi Yisus. 17-18 Om poitatangarno dii iri piipiro dagai tulun di Yisus do ka, “Onu naku arati tinangar Disido daton dii do, ‘Auno alaid om au kouno koontong Dogo, om aui alaid om koontong kou nogi dino Dogo kavagu?’ kadi Yisus, om ‘Mongoi Oku soi diAmo,’ ka. Onu naku komoion tangar Disido dii do, ‘Auno alaid?’ ka. Aui oilaan tokou nong onu komoion Disido diri,” kadagai. 19 Om koilaai nopo dii di Yisus do sipongoduat daa ikoi Disido, om pitangarno dii Isido dagai do ka, “Moiduduat kou dii bala diri tinangarKu dii do, ‘Auno alaid om au kouno koontong Dogo, om aui alaid om koontong kou nogi dino Dogo kavagu,’ kangKu dikovu. 20 PatangaronKu marong dikovu iti do mogiad kou do moginupus, nga i tongotulun nopo siti vonuvo om asanang ginavo. Ikovu nopo nga sumurau, nga iri kosuraan muju diri suvolijan sumiliu do kasanangan do ginavo. 21 Iri nopo tongondu do monsusu om sumurauno isido, nga osusu nopo iri tanak dino auno aandaman disido iri kinosusaanjo di monsusu, do nasanang dii i ginavojo do kivaro tanak nosusu siti vonuvo. 22 Om irad kou nogi diri do lumudus do mainopo, nga kasamung Okupo dino kavagu dikovu om asanang nogi dino i ginavo muju, om auso iiso tulun kadapat sumolod diri kasanangan do ginavo muju. 23 Om ausono pokionuon muju Dogo ontok do orikot tadau diri. Nga patangaronKu marong dikovu iti do onuu nopo pokionuon muju si diAmo saralom di ngaranKu om onuan kovi Disido. 24 Nga sampai maino aupo insan kou mokianu do onuu nopo sabap do maja kovi Dogo. Nga pokianu kouno pogi om oonuan kovi supaya aavi-avi i ginavo muju do asanang,” kadi Yisus. 25 Om kadi Yisus kavagu, “Kasangkat diti patangaronKu dikovu nga irino poiradan, nga orikot nopo dino iso masoKu do okonnoko mitangar Okupo dikovu do poiradan, nga turus ivantangKu pasal diAmoKu. 26 Om ontok do tadau diri mokianu kou Disido saralom di ngaranKu. Om aui oporlu do pokionuanKu ikovu diAmo, 27 do iAmo kondiri nga au kojuu dikovu sabap ikovu nga au kojuu Dogo, om aparsaya kou do silo Kinoringan nontodonKu. 28 Om oinomodno iri do mantad Oku silo diAmo do rinumikot siti vonuvo, nga iduanKuno kavagu iti vonuvo do gumuli Oku kavagu silo diAmo,” kadi Yisus. 29 Om pitangarno dii ikoi i tongotulun Disido, “Antangai pogi nga sondikotonNu nopo mitangar do auso poiradan. 30 Om oilaanja nogi dii maino do onuu nopo nga oilaanNu kasangkat om au oporlu do kivaro tulun mongoduat Dika. Irino sabap do aparsaya ikoji do rinumikotKo mantad si Kinoringan,” kadagai. 31 Om kadii di Yisus jumawap dagai, “Aparsaya kouno naku Dogo maino? 32 Antangai pogi, nga rumikot nogi dino i maso, om maino diti nga norikotno iri maso do kopoiririjangan muju do sompori-ori muli do pobubugolon Oku, nga au Okui kobubugol do koruangan Okui diAmo. 33 TangaronKu kasangkat dikovu ino supaya osondod i ginavo muju do nokopiiso kou Dogo. Nga siti nopo vonuvo om asansara kou nga pasanangono ino ginavo muju do nakalaKuno iti vonuvo,” kadi Yisus.
1 Koopod nopo dii i Yisus mitangar, om tingaano dii Isido soi suruga om pitangar do sinumambayang do, “Amo, norikotno dii i masoKu. Pointalangono kagajaanKu, i TanakNu, supaya Ioku nga pointalangi di kagajaanNu. 2 NipokuasaNuno Dogo kasangkat iti tongotulun om isai-isai nopo iri tulun iri nipasanganuNu Dogo nga onuanKu kovijaan di auso koovion. 3 Om komoion nopo do kovijaan diri auso koovion nga irino otutunanKo di tongotulun do Ikano Kinoringan diri sosoiso om oinomod, om otutunan Oku nogi, i Yisus Koristus diri sinuuNu siti vonuvo. 4 NokointalangKuno i kagajaanNu siti vonuvo, do noopodKuno dii i karaja do nipakarajaNu Dogo. 5 Amo, pointalangono iri kagajaanKu sino gotuvangNu maino, irad diri kagajaanKu diri poirunggum Okupo Dika di aupo novorun iti vonuvo. 6 NokointalangKuno Ika siri tulun di nipasanganuNu Dogo i mantad siti vonuvo. Iolo nopo nga tulunNu laid, om nipasanganuNu Dogo om mangasip iolo di tinangaranNu. 7 Om nokoilono dii iolo maino, do kasaangkat diri pinataakNu Dogo nga mantad sino Dika. 8 Do kasangkat diri tinangaran do nitudukNu Dogo nga nokotudukKuno diolo om noilaan dii diolo. Om kotutunno dii iolo do oinomod do mantad Oku sino Dika, om aparsaya nogi dii iolo do Ikano minonuu Dogo siti vonuvo. 9 Om sambayanganKu i tongotulunKu, nga okoniko kasangkat tulun minijon siti vonuvo do sambayanganKu, nga iri noo i tulun di nipasanganuNu Dogo do Ikano sanganu diolo. 10 Sabap kasangkat diri tongotulun songonuvonKu om irino Dika, om iri tongotulun songonuvonNu nga iri nogi Dogo, om mantad nono diolo do popointalang di kagajaanKu. 11 Amo, Ioku nopo diti nga okonko siisiti Okupo vonuvo, tapi iolo nopo nga siisiti vonuvo, do rumikot Oku sino Dika maino. Amo, i tolidang, piarawono iolo mantad di kuasa do ngaranNu, irino ngaran do nakataakNu Dogo, supaya osiliu iolo do iiso inong Dato. 12 Salaidpo do poinrunggum Okupo di tongotulunKu om piarawonKui iolo mantad do kuasa di ngaranNu, iri ngaranNu di pinataakNu Dogo do pomiaraKu diolo, om najagaanKui marong iolo. Om ausopo tulun nolijot, nga iripo iso tulun do natantu laaid do nolijot supaya porikot di nokotulis siri Kitab. 13 Nga maino rumikot Oku sino Dika, om patangaronKu kasangkat Dika iti do siti Okupo vonuvo, supaya aavi-avi i ginavo di tongotulunKu do kopuriman di kasanangan di ginavoKu. 14 NakaabarKuno di tongotulunKu iri tinangarNu, nga i tongotulun siti vonuvo diri au maja di tangarNu nga obonsi diolo, do iri nopo tongotulunKu nga okoniko tulun do sanganu diti vonuvo, irad Dogo do okonko tulun do sanganu diti vonuvo. 15 Nga okoniko mokianu Oku Dika do ongoionNu iolo mantad siti vonuvo, nga pokitirunganKu nono Dika iolo supaya au iolo porintawon di Taraat, i kotua do rogon. 16 Iri nopo tongotulunKu nga okoniko tulun do sanganu diti vonuvo, irad Dogo do okonko tulun do sanganu diti vonuvo. 17 Mantad di ponudukanNu polidangono iolo do sumiliu di tulunNu do oinomod, do i tinangaranNu nopo nga oinomod. 18 Minonuu Oku diolo mongoi potongkop di Abar do Aandai siti vonuvo, irad Dika do minonuu Dogo mongoi potongkop di Abar do Aandai siti vonuvo. 19 PataakonKu iti kojuvanKu do olidang si Dika do kumaa si di tongotulunKu supaya oinomod do olidang iolo si Dika. 20 Nga okoniko bubugol iti tongotulunKu sambayanganKu, nga sambayanganKu nogi iri tongotulun vokon di aparsaya Dogo sabap popolombus i tongotulunKu diti di tinangaranKu si diolo. 21 Mokianu Oku supaya kasangkat iolo moiiso. Amo, Ika saralom Dogo, om Ioku nga saralom Dika, irad nopo dino nga aandai do moiiso iolo saralom Dato, supaya i tongotulun siti vonuvo di au maja di tangarNu nga aparsaya do Ikano i minonuu Dogo siti vonuvo. 22 Om nokopintataakKuno diolo i vinaang do kagajaan diri nitaakNu Dogo, om osiliu iolo do iiso, irad Dato do nokopiiso. 23 Ioku saralom diolo, om Ika saralom Dogo supaya kopiiso marong iolo, om sabap diri koilo i tongotulun siti vonuvo di au maja di tangarNu do Ikano i minonuu Dogo siti vonuvo, om koilo iolo nogi do auKo kojuu di tongotulunKu irad do auKo kojuu Dogo. 24 Amo, kouvanganKu do poirunggum soumur i tongotulunKu di nipasanganuNu Dogo do sinombo nopo i koijononKu, supaya koontongi iolo di vinaang do kagajaanKu di nitaakNu Dogo di aupo novorun iti vonuvo sabap auKo kojuu Dogo. 25 Amo, iri otulid ginavo, i tongotulun siti vonuvo di au maja di tangarNu nga au kotutun Dika, nga kotutun Okui Dogo Dika. Om iti tongotulunKu diti nga nokoilono kasangkat do Ikano i minonuu Dogo siti vonuvo. 26 Om pinoiloKuno i tongotulunKu pasal Dika, om au Oku tumingkod popoilo diolo pasal Dika supaya iolo nopo nga au kojuu do vokon irad Dika do au kojuu Dogo, om Ioku nga saralom diolo,” kadi Yisus do sumambayang.
1 Koopod nopo dii i Yisus sumambayang om pampanauno dii Isido mivaja dagai di tongotulunJo sumondipau di Lokos Kirdun. Om siri nopo dii nga kivaro kabun, om sirino dii inongoion di Yisus om ikoi tongotulunJo. 2 Nga i Yudas nopo i pojual di Yisus om nokoilono laid do pantok diri, do soumurno i Yisus mongoi muntun siri di poirunggumpo dagai di tongotulunJo. 3 Jadi ongoino dii i Yudas do minangangat di somposukan soujor om piipiro i pulis di jumaga di Valai Sasambayangan Tagajo silo Bandar Yorusalim sabap sinuu di tongokotua do imam om i kumpulan do Porisi do rinumikot siri, do songingkuut do lampu om solunsung om tongosindata. 4 Nga noilaanno di Yisus laaid iri kasangkat i ajadi si kojuvanJo. Om insomokno i Yisus diolo om pitangar do, “Isai iumon muju?” ka. 5 Jawapno dii iri tongotulun do ka, “I Yisus, i tulun mantad Bandar Nasarit,” ka. Nga kadi Yisus, “Iokuno iti,” ka. Om i Yudas diri i pojual di Yisus nga siri poingkakat do poimvaja diolo. 6 Nga ontok di minitangar i Yisus do, “Iokuno iti,” ka, nga nokosunsuri iolo om turus do noluluk siri tana. 7 Om pongoduatno kavagu i Yisus diolo do ka, “Isai iumon muju?” ka. Nga jawapno dii iolo do, “I Yisus, i tulun mantad Nasarit,” ka. 8 Om pitangarno dii i Yisus kavagu do, “ ‘Iokuno iti,’ kangKu dikovu dii, nga nong Iokuno iumon muju papanauonno iti tongotulunKu siti,” kadi Yisus. 9 Do kinatangaran nopo di Yisus diri nga porikot di tangar i pinatangar Disido ontok di sambayang Isido diAmoJo do ka, “Iri tongotulun di nitaakNu Dogo iisopo nga auso nolijot,” ka. 10 Nga i Simun Pitrus nopo diri nga kigampa om unusono dii i gampa disido om tibasojo dii i turipon di Imam Tagajo gosob do napapasi dii i tolingojo ponong vanan. Ngaran nopo di turipon diri nga i Malkus. 11 Nga pitangarno dii i Yisus di Pitrus do, “Poosuono kavagu ino gampanu sino sarungjo. Apatut Oku sumanggup di kasansaraan di nitantu diAmoKu,” kadi Yisus. 12 Om kasangkat di soujor om i kopitan doisido om i tongopulis di tulun Joudi nga minanangkap di Yisus, om kagasai nogi dii diolo Isido. 13 Om ovitopo dii diolo i Yisus siri diAnas mogulu, do iAnas nopo dii nga tivanon di Kayapas, irino Imam Tagajo toun diri. 14 Om i Kayapas nopo nga minitangar diri tongokotua di tulun Joudi di pogulu do ka, “Gaam nogi do iso tulun apatai, ko kasangkat bansa diti do apatai,” ka. 15 Om suutno dii i Simun Pitrus di Yisus om iso tulun vokon di Yisus nga sinumuut nogi. Om iri nopo iso tulun di Yisus diri nga kotutun di Imam Tagajo, jadi suutno dii isido di Yisus masu siri natad di valai di Imam Tagajo. 16 Nga i Pitrus nopo om minindada siri gotuvang di pintu. Om labusno kavagu iri iso tulun di Yisus, iri kotutun di Imam Tagajo, do minongoi sumamung di tongondu, i mangajaga di pintu, om poosuo nogi dii i Pitrus. 17 Nga kadi tongondu, i minangajaga di pintu, do mitangar di Pitrus do ka, “Okoniko bato ika nga tulunJo dilo tulun tinangkap?” ka. Om jawapno i Pitrus do, “Okoni,” ka. 18 Nga ontok nopo diri om osogit, jadi iri nopo tongoturipon om i tongopulis nga minomurakit diri tarong, om songingkakat dii iolo siri do dumadang, om i Pitrus nogi nga minongoi dii mingkakat do rinumunggum diolo dumadang. 19 Om timpuunno dii iAnas, i Imam Tagajo laid, do minongoduat di Yisus pasal di tongotulunJo om i ponudukanJo. 20 Om jawapno dii i Yisus di Imam Tagajo do, “Minintalang Okui monuduk di tongotulun om soumur Okui monuduk siri valai sasambayangan do tongokokokompungan om silo natad do Valai Sasambayangan Tagajo, i tuuntunon kasangkat do tulun Joudi. Au Okupo insan do lumosok-losok do mitangar. 21 Nokuro do duaton Okupo dika? Duatono i tongotulun di nokorongou di tangarKu nong onu kadiolo diri tinangarKu, do nokopingiiloi iolo dii di tinangarKu,” kadi Yisus. 22 Nga ontok di jinumawap Isido diri, turus tompilingo Isido di iso tulun pulis di poingkakat mangajaga siri somok Disido, om pitangar do ka, “Kivaro dii naku minangajar Dika do irad dino nijawapNu dilo Imam Tagajo?” ka. 23 Om jawapno dii i Yisus do ka, “Nong nakasala nopo i tangarKu, om poiloono nong onu nasala di tinangarKu. Nong oinomod nopo ino tangarKu, nokuro do tompilingon Oku dikau?” ka. 24 Nga poingkogospo i Yisus dii om suuono diAnas do pogotuvang di Kayapas, irino i Imam Tagajo di toun diri. 25 Nga i Simun Pitrus nopo om siripo poingkakat do dumadang diri tapui. Nga duato nopo isido di tongotulun siri do ka, “Okoniko bato ika nogi nga tulunJo dilo tulun tinangkap?” ka. Om pongolimno dii kavagu i Pitrus do, “Okoni,” ka. 26 Nga kadiri iso tulun, turipon di Imam Tagajo, sonsuladan di turipon di tinibas di Pitrus i tolingo do ka, “Okoniko ika iri naantanganku maja-vaja Disido di siri kabun?” ka. 27 Om pongolimno dii kavagu i Pitrus do kotutun di Yisus do ka, “Okoni,” ka, om turus pongingkukuukno dii i tandaa. 28 Om ovitono kavagu diolo i Yisus do mantad siri di Kayapas do mongoi siri valai di gobonor iri asaraappo. Nga i tongotulun Joudi nopo om aui masu siri sirang di valai di gobonor supaya ada iolo do osoiman do au maja di adat ugama diolo, om obuli iolo mangakan di taakanon di tadau tagajo diolo nong au kaasu. 29 Jadi labusno dii i gobonor, i Pilatus ngaranjo, do sumamung di tongokotua do tulun Joudi, om duato disido iolo do ka, “Onu kapangadaawaan muju di tulun diti?” ka. 30 Om jawapno iolo do ka, “Nong aui araat Isido, nga auja dii oviton Isido siti dikau,” ka. 31 Nga kadi Pilatus diolo, “Ovito mujuno pogi Isido om bisarawo mujuno do maja diri undang-undang muju,” ka. Nga kadi tongokotua do tulun Joudi, “Au ikoji dagai apatut mamatai do tulun,” ka. 32 Katangar-tangar nopo diolo do irad diri supaya porikot diri tangar di Yisus laaid dagai di tongotulunJo do ka, “Posolibon Oku,” ka. 33 Om asuno dii kavagu i Pilatus siri sirang di valai om loovo nogi dii disido i Yisus do mongoduat Disido do, “Ikano naku i Raja do tulun Joudi?” kadi Pilatus. 34 Om jawapno dii i Yisus do, “Tangarnu kondiri naku ino ko tulun vokonpo do mangaabar dika dino pasal Dogo?” ka. 35 Nga kadi Pilatus, “Okonko tulun Joudi oku. Onu vinaalNu, sabap iri nopo tongokotua do imam om iri tongotulun vokon do bansaNu kondiri nga minongovit Dika do papataak siti dogo?” ka. 36 Om jawapno dii i Yisus do ka, “Okoniko do sumiliu Oku do Raja siti vonuvo. Nong sumiliu Oku do Raja siti vonuvo, tantuno do monguup i tongotulunKu Dogo supaya aui daa kataak Oku si kotua di tulun Joudi. Nga okoniko sumiliu Oku do Raja siti vonuvo,” kadi Yisus. 37 Pongoduatno dii kavagu i Pilatus Disido do, “Nong irad dino, Ikano naku Raja?” ka. Om jawapno dii i Yisus do ka, “Oinomodno ino tangarnu do Iokuno Raja. Itino sabap do kinosusuvan Dogo do mongoi Oku siti vonuvo do paabar di ongoinomod. Om pointikid-tikid do tulun di maja diri oinomod om irino mongkinongou di tangarKu,” kadi Yisus. 38 Om pitangarno i Pilatus Disido do ka, “Isai dii nokoilo nong onu iri oinomod?” ka. Om katangarpo dii i Pilatus iri om labusno dii isido do minongoi kavagu siri di tongokotua do tulun Joudi, om pitangar nogi dii i Pilatus do ka, “Auso oilaanku kasalaan Disido. 39 Nga noubas kouno do papalabus oku do iso tulun mantad si jiil si dikovu do ontok diti Tadau Tagajo do Paska. Jadi kouvangan muju bato do polobusonku dikovu ilo Raja do tulun Joudi?” kadi Pilatus. 40 Nga linumuvap nogi dii iolo do ka, “Okoniko ilo tulun, nga i Badabas nono pokilobusonja,” ka. Nga i Badabas nopo diri om tulun do parampuk.
1 Om ongoiono dii di Pilatus i Yisus, om suuono dii i soujor do mangalabun Disido supaya popoilo nong onu kinasalaan Disido. 2 Om ponulapidno dii i tongosoujor di rugi inong do mokuta om posingalo nogi dii diolo siri tulu di Yisus, om sobungai dii diolo Isido diri sabung do obilau-bilau irad di sabung do raja, 3 om pokoyo si gotuvang diolo om poisusuvolino dii iolo mitangar do, “Tabi Tuan, Raja tulun do Joudi!” ka, om pintompilingaino dii diolo Isido. 4 Om labusno dii kavagu i Pilatus om pitangar diolo do ka, “Antangaino, ovitonku Isido siti dikovu, supaya koilo kovi do auso oilaanku kasalaan Disido,” ka. 5 Om labusno dii i Yisus do poinsingal di rugi om kisabung do obilau-bilau. Nga kadii di Pilatus, “Antangai mujuno dii iti tulun!” ka. 6 Kaantangai nopo dii di tongokotua di imam om i pulis siri, om sonluvap-luvap nogi dii iolo do ka, “Posolibo nopo tulun dino! Posolibo nopo tulun dino!” ka. Nga kadii di Pilatus do mitangar diolo, “Ongoiono pogi Isido om posolibo muju Isido, do ausoi bo oilaanku kasalaan Disido,” ka. 7 Nga jawap kadi tongotulun Joudi, “Ikoi nopo nga kivaro iso undang-undang, do tinangaran nopo siri nga misti osuat do ukuman do patajon tulun diti, sabap katangaran Disido, ‘Tanak Oku do Kinoringan,’ kaDisido,” kadi tongokotua do Joudi. 8 Nokorongou nopo dii i Pilatus di tinangar diolo om makinpo dii do rumosi isido, 9 om asuno dii iolo kavagu siri sirang di valai om tangarono dii di Pilatus i Yisus do ka, “Inombo bato nontodonNu?” ka. Nga insan iiso ko kivaro nijawap di Yisus disido. 10 Nga kadi Pilatus, “AuKo moo jumawap dogo? AuKo naku koilo do kikuasa oku too palabus Dika om kikuasa oku nogi do pasalib Dika?” kadi Pilatus. 11 Nga jawapno dii i Yisus do ka, “Ausoi kuasanu do monguasa Dogo, nong okoniko i kuasa mantad do Kinoringan pataakon dika. Irino sabap do agajopo duso di tulun minongovit Dogo do pataak siti dika,” kadi Yisus. 12 Mantad diri mogium daa i Pilatus do koontodon do palabus di Yisus. Nga luvap nogi dii i tongokotua do tulun Joudi do mitangar irad diti, “Ilabusnu nopo ino tulun om okoniko kumikoruangko di Raja Koisar, do isai-isai nopo tulun di misingkondiri sumiliu do raja om irino lumavan di Raja Koisar,” kadiolo. 13 Korongou nopo dii i Pilatus di tinangar diolo om suuono dii disido iolo mongovit di Yisus do lumabus, om ogomno dii isido siri toogomonjo do momisara si pantok di roitan do, ‘Sinusunan do vatu do vinaal do rinantai’. Pinonguranan nopo do pantok diri do tangar Ibrani nga ‘Gabata’. 14 Ontok nopo diri nga oruaino do pukul duabalas tangaadau di Ari Lima, iri kinosiapan dagai tulun Joudi do balanja do Tadau Tagajo do Paska, irino tadau do pangandaman dagai di pinogiduan diodu-akija mantad si Vonuvo Masir di pogulupo. Om pitangarno i Pilatus di tongotulun Joudi do ka, “Antangai mujuno dii, itino Raja muju,” ka. 15 Nga sonluvap-luvap nogi iri tongotulun do jumawap do ka, “Patajono Isido. Patajono Isido. Posolibo nopo Isido,” kadiolo. Om pitangarono dii kavagu i Pilatus diolo do ka, “Apatuti bato do posolibonku iti Raja muju?” ka. Nga jawap nopo iri tongokotua di imam do, “Ausoi rajaja vokon, nga irino i Raja Koisar noo,” kadiolo. 16 Sabap diri do nipoovit dii di Pilatus di tongosoujor i Yisus do posolibon. Om ovitono dii di tongosoujor i Yisus, 17 om simbanono dii Disido i salibJo do mampanau mantad si bandar do minongoi siri iso pantok i ponguranan do ‘Tulang do Tulu’. Tangar nopo do Ibrani nga ‘Gulguta’. 18 Om sirino dii pinosoliban diolo di Yisus om i duvo tulun do nokoontok Disido pinasalib do ponong gibang om vanan om siri i Yisus pialatan diolo. 19 Om potulisai dii di Pilatus diolo iri iso papan om posokoto nogi siri salib si savat di tulu di Yisus do pinotulis siri do irad diti, “Yisus mantad Bandar Nasarit, i Raja do tulun Joudi,” ka. 20 Om asapou nogi tongotulun Joudi do kabasa di tulisan diri sabap pantok nopo do pinosoliban diolo di Yisus nga osomok si bandar. Om tongotangar nopo di tinulisan nga tangar do Ibrani, tangar do Ruum om tangar do Yunani do pointulis siri. 21 Nga kadi tongokotua di imam do tulun Joudi mitangar di Pilatus, “Ada potuliso do, ‘Raja do tulun Joudi,’ ka, nga tuliso nono do, ‘ “Iokuno i Raja do tulun Joudi,” kadi Yisus,’ kanto,” kadi tongokotua di imam. 22 Nga jawapno dii i Pilatus do, “Ombo nopo i nokotulisku irino,” ka. 23 Nga nakasalib nopo dii di tongosoujor i Yisus, om ongoiono dii i tongopakaian Disido om pinoibabaagi dii do apat boogian do noikidan do toroisaan i tongosoujor. Om iri iso sabung Disido talanggau nogi inanu diolo om sabung nopo diri om auso tombir do iri nopo nga nasangkaju. 24 Om poitatangarno dii iolo do ka, “Ada tokovi poipuputulo iti sabung talanggau mamaagi, nga aandai nogi do mamakai tokou iri tongovatu nong isai katandop di vatu kitanda nga irino kaanu,” ka. Om irino vojoon diolo do irad diri do porikot diri tinangaran di nokotulis siri Kitab do irad diti, “Pinoibabaagino dii diolo i pakaianKu, om sabungKu nogi pinitatandapan diolo nong isai kaanu,” ka. Om irino dii kavavaja di tongosoujor diri. 25 Om iri nopo poingkakat siri somok di salib di Yisus nga iinojo, om i sulod diinojo di Yisus, om i Moria, i savo di Kolupas, om i Moria, i tulun mantad si Bandar Madala. 26 Kaantangai nopo dii di Yisus iinoJo om ioku, i Yaya, do poingkakat siri somokJo do au oku kojuuan Disido, om pitangarno dii i Yisus diinoJo do ka, “Ino, Yayano tanaknu!” ka. 27 Om turus lumombus Isido mitangar dogo do ka, “Yaya, inono iinonu,” ka. Om antadno diri do pinokoinoku iinoJo di Yisus om pinoijonku disido si valaiku. 28 Koompus nopo dii i Yisus mitangar om noilaanJono dii do ontok diri nga naavino dii kasangkat iri nisuu do Kinoringan Disido, om pitangarno dii Isido do, “Tuuvan Oku,” ka. Nga kinatangaran nopo Disido diri om supaya orikotno iri tinangaran di nokotulis siri Kitab. 29 Nga siri nopo om kivaro iso mangkuk do poimponu di vaig anggur do topodi, om poisopono dii di tulun iri rongilut dii di vaig do anggur diri, om posusuko nogi dii siri bonduk di guvas di opoyok roitan do isup om posuvuono dii siri kabang di Yisus. 30 Om kososoppo dii di Yisus i vaig do anggur diri, om naavino dii iri kurionJo siti vonuvo om pitangarno dii Isido do, “Naavino dii,” ka. Om tukuno dii Isido om koiduno dii i ginavoJo. 31 Nga tadau nopo diri nga Ari Lima, irino Tadau di Kinosiapan dagai di Tulun Joudi do Balanja diri tadau tagajoja. Om rikotno dii i tongokotua di tulun Joudi diri do mongoi sumamung di Pilatus, do mokilila do pintipuan iri takod di tulun di pinasalib, om nogi poindoouon mantad siri savat do salib, do au moo iolo do poopungon i kojuvan di tulun napatai siri salib ontok di Tadau Koingkajadan, do iri nopo Tadau Koingkajadan diri nga olidang marong. 32 Om nokorikotno dii i tongosoujor diri do mintipu diri takod di tulun do tumimpuun mantad si kotiso tulun om tumilombus di koduvo tulun, i nokopiontok di Yisus nasalib supaya osikap iolo matai. 33 Nga korikatai nopo dii diolo i Yisus om kaantangaino dii do napataino, om aui dii tinipuan diolo i takod Disido, 34 nga suakono dii di iso soujor diri gatan do monokon di tobik di Yisus om pongontis nopo dii i raa mivaja do vaig. 35 Om iokuno i Yaya do nokoontong kinojodian diri do mangaabar dikovu supaya ikovu nogi nga aparsaya. Om oinomodno abar diri om oilaankui do oinomod iti tangarku. 36 Do najadi do irad dino do porikot di tangar siri Kitab do irad diti, “Iisopo tulang Disido nga aui tipuon,” ka. 37 Om kivaropo tinangaran vokon si Kitab do irad diti, “Kivaro nogi i tongotulun koontong Disido, i tinobok diolo,” ka. 38 Om koopodno dii iri, om kivaro iso tulun mantad si Bandar Romotia, ngaranjo nopo nga i Jusip, om isido nopo nga tuluni di Yisus nga aui mintalang si kinoguuan di tongotulun sabap rumosi diri tongokotua di tulun Joudi. Om ongoino dii i Jusip do minokilila di Gobonor Pilatus do ongoionjo i kojuvan di Yisus. Om polilawo nopo di Pilatus i Jusip do mongongoi di kojuvan di Yisus, jadi polintuunono dii di Jusip iri kojuvan di Yisus do mongovit mongolobong. 39 Om i Nikodimus nogi nga nakavaja di Jusip. Om minongovit isido di muur di taangod do migavul do dila buajo, do onom nopulu kati kama vinagat diri. Nga i Nikodimus nopo dino nga iri rinumikot siri di Yisus di totuvong di pogulu. 40 Om ongoiono dii diolo i kojuvan di Yisus, om lopotono dii diolo diri kain do opurak mivaja do monuntug diri tongorampa-rampa do iradno diri koubasan do tongotulun Joudi ontok do kivarono lobongon. 41 Nga siri nopo pinosoliban di Yisus nga kikabun, om siri nopo kabun diri nga kivaro iso luvang vatu di vagupo do pangalabangan di aupo insan kalabangai. 42 Om sirino dii pinangalabangan diolo di Yisus, do iri lobong nopo nga nokoinsomok siri pinosoliban di Yisus, om mogoogo iolo do tadau nopo diri om irino tadau do kinosiapanja tongotulun do Joudi do balanja diri tadau tagajoja.
1 Om otutuvongpo dii di minsarap di Tadau Minggu, irino tadau koiso saralom sominggu, om ongoino dii i Moria, i tulun mantad si Bandar Madala, siri lobong di Yisus om kaantangai dii disido i vatu do noluvidno mantad si pintu do lobong. 2 Om panangkusno dii i Moria do mongoi siri dagai di Simun Pitrus do iokuno, i Yaya, i tulun di Yisus om au Isido kojuu dogo. Om pitangarno dii i Moria dagai do, “Inongoi do tulun i Tuhan do mantad siri lobong om auno dii oilaan dagai nong inombo pinoilian Disido,” kadi Moria. 3-4 Om pivaja ikoino dii di Pitrus do minanangkus mongoi siri lobong. Nga kopogulu okupo mantad di Pitrus korikot si lobong sabap osijau okupo ko i Pitrus. 5 Om tijongkud okuno dii moniliu siri saralom lobong, om kaantangaiku dii i kain do topurak do poingiliu, nga au okui minasu siri saralom lobong. 6 Nga kosusuut nopo dii i Simun Pitrus do rumikot om asu siri lobong. Om kaantangai dii disido i kain do topurak do poingiliu. 7 Om ii nopo kain, iri nisingal si tulu di Yisus, om aui nokoinsomok di kinoilio di kain do topurak nga poinlulun siri sondiangko pantok. 8 Om asu oku nogi dii siri lobong sumusuut di Pitrus, om ioku dii nga nokoontong om kaparsayaai nogi dii diri tinangar di Moria. 9 Nga aupo nakaarati ikoi di tangar siri Kitab i minitangar do misti vijauon i Yisus mantad do pialatan di tulun napatai. 10 Om uli ikoino dii mongiduvo sompori-ori siri valai kondiri. 11 Nga ginumuli i Moria, i tulun mantad si Bandar Madala, siri lobong om poingkakat siri pintu di lobong do miad-iad, om tiliuno dii isido di lobong di miad-iad isido. 12 Om kaantangai dii disido i duvo moloikat do kipakaian topurak, do pinisomputulan mogom i pinoilian di kojuvan di Yisus. 13 Om pongoduatno dii mongiduvo i moloikat di Moria do, “Abu, nokuroko do mogiadko?” ka. Om jawapno dii i Moria do ka, “Mogiad oku do inongoi do tulun i Tuhanku om okonko noilaanku dii nong sinombo pinoilian Disido,” ka. 14 Koopodpo dii isido mitangar do inong diri om kovilino dii, kaantangai dii disido i Yisus do poingkakat, nga aui otutunan disido nong isai. 15 Om pongoduatno dii i Yisus disido do, “Abu, nokuroko do mogiad? Isai iumonnu?” ka. Nga andasan nopo daa di Moria nong tulun diri mangangajaga di kabun om kadii di Moria Disido, “Tuan, nong Ika minaganu Disido, poiloo oku nong sinombo pinoijanannu om ongoionkui Isido,” ka. 16 Om pitangarno dii i Yisus disido do ka, “Moria!” ka. Om gotuvangai dii di Moria i Yisus do minitangar Disido do tangar do Ibrani, “Rabuni,” ka. Komoion nopo diri nga ‘Guru’. 17 Om pitangarno dii i Yisus disido do ka, “Ada Oku kuutai marong do au Okupo nokoinsavat silo diAmoKu. Nga ongoi nono porongou di tongokosusuladanKu do ka, ‘Minsavat Okuno silo diAmoKu, irino KinoringanKu, om iAmo muju, irino Kinoringan muju nogi,’ kanto diolo,” kadi Yisus. 18 Ongoino dii i Moria om pitangar di tongotulun di Yisus do ka, “Nokoontong oku di Tuhan,” ka, om pinaabar nogi dii disido iri nisuu di Yisus. 19 Sodop di tadau diri, irino Tadau do Minggu, om songingkunsi i pintu nijonon dagai di tongotulun di Yisus do rumosi ikoi di tongokotua do tulun Joudi. Om tigogi dii do nokorikot i Yisus do poingkakat siri lintanga dagai, om pitangarno dii Isido dagai do ka, “Asanang-sanang kovi?” ka. 20 Om natangarpo dii Disido iri om paantangai nogi dii Disido ikoi diri damat si palad om tobikJo. Om kotutunai dii dagai i Tuhanja om asanang nogi dii marong i ginavoja. 21 Om pitangarno kavagu i Yisus dagai do, “Asanang-sanang kovi? Potingkuro iAmoKu minonuu Dogo siti vonuvo pogulupo, om irad nogi dino Ioku monuu dikovu potongkop di Abar do Aandai siti vonuvo,” kadi Yisus. 22 Om natangarpo dii Disido iri, om obusaino dii ikoi Disido, om pitangarno do, “Torimawo mujuno i Tatod Tolidang. 23 Om isaai nopo oompunan muju di duso om oompunanno i duso do tulun diri. Om isaai nopo tulun di au muju oompunan di dusojo nga auno oompunan i duso do tulun diri,” kadi Yisus. 24 Ontok di rikot i Yisus sodop diri, nga au sino siri dagai i Tumas, i pangalaavan dagai i Tapid, iri iso dagai di opulu om duvo tulun di Yisus. 25 Om pitangarno dii ikoi i songkoruangan di Tumas do ka, “Nokoontong ikoino dagai di Tuhan,” ka. Nga kadi Tumas do ka, “Nong aukupo nokoontong di ralap di pinapakan siri palad Disido, om aupo nokotudu iti tunturuku si ralap do pinapakan, om aupo nakaavor iti paladku siri tobik di sinuak om au okupo aparsaya,” kadi Tumas. 26 Nga somingguno mantad diri kinovijaan di Yisus kavagu om nountunno kavagu ikoi i tongotulun Disido siri valai diri, om i Tumas nogi nga siri dagai, om i pintu di valai nga songingkunsi. Om tigogi dii nokorikot kavagu i Yisus do poingkakat siri lintanga dagai om pitangar dii dagai do ka, “Asanang-sanang kovi?” ka. 27 Om pitangar nogi dii Isido di Tumas do, “Antangaino pogi iti paladKu om potuduono ino tunturunu siti paladKu, om porolojono ino longonnu om ovoro siti tobikKu. Adano opiduvo ino ginavonu, kaparsayano Dogo,” ka. 28 Om kadi Tumas di Yisus, “Ikano Tuhanku om Kinoringanku,” ka. 29 Kadii di Yisus disido, “Nokoontongko Dogo om aparsayako nogi. Nga ososogitno iri tulun i aparsaya insan au nokoontong Dogo,” kadi Yisus. 30 Oguupo i pongintutunan do vinaal di Yisus siri gotuvang di tongotulunJo do au nokotulis siti buuk. 31 Nga tinulisku iti buuk supaya aparsaya kou do i Yisus nopo nga i Koristus, i pinili di Kinoringan sumiliu do Raja, om Isidono i Tanak do Kinoringan. Om kaanu kou do kovijaan mantad di kuasa di ngaranJo.
1 Om mantad diri intalangpo dii kavagu i Yisus siri dagai di tongotulunJo do silo Botung Tagajo do Tobirias. Om kinointalangon nopo Disido nga irad diti. 2 Nokopoiuntun i Simun Pitrus, om i Tumas, i ponguranan do i Tapid, om i Natanil, i mantad si Kampung Kana siri Vonuvo Golilia, om duvo ikoi misulod tanak di Jobidi, om duvopo tulun di Yisus vokon. 3 Om pitangarno dii i Simun Pitrus dagai do ka, “Ongoi okupo magarambat,” ka. Om jawapaijano i Pitrus do ka, “Maja ikoi,” kanja. Om sako ikoino dii di talud do mongoi magarambat, nga nosuvaban ikoji, insan iiso ko kivaro. 4 Sumilau iri tadau, om naantanganja i Yisus poingkakatno siri disan do vaig, nga aui otutunan dagai nong isai iri. 5 Om pongoduatno dii Isido do ka, “Oi dikovu, kivaroi dii sada muju?” ka. Jawapaija dii do, “Insan iiso nga ausoi naanuja,” ka. 6 Om pitangarno kavagu i Yisus dagai do, “Posilingo pogi ino rambat muju sino ponong vanan dino talud om kaanu kovi,” ka. Om posilingono dii dagai iri rambat, nga au dii oovit dagai mangakat pakaa si talud do oguu marong iri sada. 7 Nga ioku, iri au kojuuan di Yisus, do mitangar di Pitrus, “I Tuhan ilo,” kangku. Nga korongou nopo di Simun Pitrus do, “I Tuhan ilo,” ka, om panansabungno dii isido sabap noidujo i sabungjo om tuunno dii siri vaig. 8 Nga ikoi nopo tongotulun vokon om poinsako di talud do rumikot siri diolo mangagajat diri rambat do nososok di sada, do aui songkuro osodu ikoi mantad diri disan do vaig, do limono rantai kama sinodu diri. 9 Om kotindal nopo dii ikoi, nga kaantangai dii dagai iri tarong do kisada do pinotunu siri om kivaro nogi kuui. 10 Pitangarno dii i Yisus dagai, “Pongovit koupo do piipiro sada i kararambat muju,” ka. 11 Om sakono dii i Simun Pitrus si talud do minangagajat potindal diri rambat, nga oguu marong i sada tongogagajo, aatus limo nopulu om tolu noinan ginuu. Nga insan irad diri koguu iri sada nga aui dii noruak i rambat. 12 Om pitangarno dii i Yisus dagai do ka, “Kayo tokouno mongintopod,” ka. Nga auso iiso dagai kobulun do mongoduat nong isai Isido sabap oilaanno dagai do i Tuhanno Isido. 13 Om ongoiono dii di Yisus iri kuui om iri sada om pataakono dii dagai. 14 Irino kumointolu i Yisus minintalang siri dagai di tongotulunJo, do novijau Isido mantad pialatan di tulun nongapatai. 15 Kaakan dii ikoi diri om pongoduatno i Yisus di Simun Pitrus do irad diti, “Simun, tanak di Yaya, auko kojuu Dogo lobi mantad diolo diti?” ka. Nga jawapno dii i Pitrus Disido do, “Oo, Tuhan, oilaanNui laid do kouvanganku Ika,” ka. Om pitangarno dii i Yisus disido do ka, “Paakanono iri tongotangaanak do kambing biri-biriKu, irino i tongotulunKu,” kadi Yisus. 16 Om pongoduatno kavagu i Yisus disido di kumoinduvo do ka, “Simun, tanak di Yaya, auko kojuu Dogo lobi mantad diolo diti?” ka. Nga jawapno dii i Pitrus do ka, “Oo, Tuhan, oilaanNui laaid do kouvangankui Ika,” ka. Om pitangarno dii i Yisus do, “Piarawono iri tongokambing biri-biriKu,” ka. 17 Om pongoduatpo kavagu i Yisus disido di kumointolu do ka, “Simun, tanak di Yaya, kouvangan Oku dika lobi mantad diolo diti?” ka. Nga sumusano dii i ginavo di Pitrus do kumointoluno dii i Yisus mongoduat disido do ka, “Kouvangan Oku dika?” ka, om jawapno dii isido do, “Tuhan, onu nopo nga oilaanNui, om oilaanNu nogi do kouvanganku Ika,” ka. Om pitangarno i Yisus do, “Paakanono iri tongokambing biri-biriKu. 18 PatangaronKu marong dikau iti, do ontok do omulokkopo om ika kondiri manangkambot om mimpanauko sinombo-nombo pantok di kouvangannu, nga orikot nopo dino oloingko om ino longonnu porolojonnu om tulun vokon dino mongongkos dika do longon om mongovit dika mongoi siri pantok di okonko kouvangannu,” kadi Yisus. 19 Katangaran nopo di Yisus diri nga popoilo nong potingkuro kapatajan di Pitrus, do kapatajan nopo di Pitrus nga mongovit do popoinggajo di Kinoringan do insan tadau. Koopod nopo dii iri tinangar di Yisus, om pitangarno Isido kavagu di Pitrus do, “Vajano Dogo,” ka. 20 Nga kovilino dii i Pitrus, om kaantangai oku dii disido siri likudjo, do iokuno i tulun di Yisus i au kojuuanJo, iri tulunJo diri poinsonib Disido di maso mangakan di totuvong, om minongoduat oku di Tuhan nong isai pojual Disido si tulun. 21 Om kaantangai oku nopo dii di Pitrus om pongoduatno dii isido di Yisus do ka, “Tuhan, potingkuro iti tulun diti?” ka. 22 Om jawapno dii i Yisus disido do ka, “Nong kouvanganKu do poimvijau isido gosob do kogungguli Oku, nga nuu dii koiloilonu dikau dino. Ika nopo nga maja Dogo,” kadi Yisus. 23 Om irino dii nontodon di tulun do papaabar diri tongokosuladan do au apatai oku. Nga ausoi tangar di Yisus do au apatai oku, nga irino do, “Nong kouvanganKu do poimvijau isido gosob do kogungguli Oku om nuu dii koiloilonu dikau dino?” ka noopo Disido. 24 Om iokuno i Yaya, i nokoontong om papaabar diti om minonulis kasangkat diti, om oilaanja do oinomod iti kosoksianku. 25 Om oguupo vokon do vinaal di Yisus, nga nong torisidonno potulis kasangkat iri, osoromoku do au orumpos iti vonuvo do buuk do potulisan.