1 ဒၲ စဴမၤရူၤ ဘူလှူၤ ဟီ ဟၴၤခၳၤ တိၤ အၤခဲးပးနၲုၤ, အၳး အဲ လၳး န တှဲၤလှးတှဲၤငှိ အၴူးတၲၤပြှဲၤနၲုၤ, အၤ အိၤထၲုးဒံၤ ဟဴ။ တှဲၤလှးတှဲၤငှိ အၴူးနၲုၤ အၤ အိၤ ကှၲုး န စဴမၤရူၤ ရဴ တှဲၤလှးတှဲၤငှိ အၴူးနၲုၤမၤ မှဟဴ စဴမၤရူၤ ဟဴ။ 2 ဒၲ စဴမၤရူၤ ဘူလှူၤ ဟီ ဟၴၤခၳၤ တိၤ အၤခဲးပးနၲုၤ အဲၤ အိၤတှၲကှၲုး န စဴမၤရူၤ ဒၲ ကၤလၳခဲး ပး စဴ။ 3 စဴမၤရူၤ နဴးဘူလှူၤ ဒီးတံ လၳး တှဲၤပွှိးတၲၤစၲၤ။ တှဲၤ ဒၲ အၤ ဘူလှူၤ တိၤ နၲုၤ အၤ အိၤ တၲၤစၲၤ꤮ တိၤ။ 4 အဲၤ မၤ တှဲၤထွှိးပြှဲၤ အၤ ခးဆၴူခးရှူၤ ရဴ တှဲၤထွှိးပြှဲၤ အၴူးနၲုၤ အၤ ဒၴူ တှဲၤလီး ဒၲ အၳး ပွှိး꤮ တၲၤပြှဲၤ အၤညၴး။ 5 အဲၤ မၤ အၤသူန တှဲၤလီး ရဴ အၤ လီးတၤခဲး ဒၲ တှဲၤခီတှဲၤလှဴၤ အၤကျဲး ရဴ တှဲၤခီတှဲၤလှဴၤ မှၴၤပၴကူး စှူ လၳး တိၤ။ 6 စဴမၤရူၤ နဴးဟူး ကၤယး တၲၤပြှဲၤ ဒၲ အၤမွှီၤ န ပျွိးထၴူး ခၳးယိးဟၤ။ 7 သူဖၳ ကၤယး ပွှိး꤮ တၲၤပြှဲၤ ကှံ နှီဟၲုး အၤ တှဲၤဟၴဆိၤဒၲၤညး တၤဟၴၤ ရဴ အၤ ကှံ ဇှံအၴၤညှအၴၤ အၤညၴးနၲုၤ, အၤ ဟူး ဟၴဆိၤသဲညၴး ပှၴ အၳး န ကၤယး ဒၲ စဴမၤရူၤ နဴးဟူးလှူၤ လၳး ဖၳ တှဲၤလီး အၴူးနၲုၤ တၲၤပြှဲၤ အၤရီၤအၤကူး။ 8 ခၳးယိးဟၤ နၲုၤမၤ တှဲၤလီး မှတိၤ။ မၤနရဴ အဲၤ မၤ ပြှဲၤ ဟူး ဟၴဆိၤသဲညၴး ပှၴ အၳး န တှဲၤလီး အၤရီၤအၤကူး တၲၤပြှဲၤ။ 9 တှဲၤလီး မှလၤကိး အၴူးနၲုၤ, အၤ ကှံရှၴ ဟူးနှၲုး ဟဴ ဒၲ ဟၴၤခၳၤအၴူး ဟဴ, ရဴ အၤ ကှံ လီးတၤခဲး ထူၤလှၲုး ပှၴ အၳး ပွှိး꤮ တၲၤပြှဲၤ။ 10 အၤ ဟူး အိၤထွှိးပြှဲၤ ထၲုးဟဴ ဒၲ ဟၴၤခၳၤအၴူး ဟဴ။ ရဴ အၤ ဘူလှူၤ နှီဒံၤ စဴ ဟၴၤခၳၤအၴူး တၤဒၲၤရဴ အဲၤ မၤ ကၤယး ဖၳတၴး တၲၤပြှဲၤနၲုၤ ဟၴၤခၳၤဖၳ သဲညၴးပျိး လၳး တိၤ။ 11 အၤ ဟူး ဒၲ အၤ ထၴူးဖၳကှၴဖၳ နှီဒံၤ အၴူးတၤဟၴၤ အၤ အိၤ တၤဒၲၤရဴ အၤကၤယး နှီဒံၤ တၤဟၴၤ အဲဆံၤ လၳး တိၤ။ 12 မၤနရဴ ကၤယး ဒၲ အၤ အဲဆံၤ လၳး တၤဟၴၤ ရဴ အၤ ဇှံအၴၤညှအၴၤ လၳး တၤဟၴၤနၲုၤ အၤ ဒၴူထွှိးထူၤ အဲၤသီး န စဴမၤရူၤ အၤ ဖၳမဴၤဖၳခၳး တၤဟၴၤ။ 13 အဲၤသီး ထွှိးထူၤ စှူ စဴမၤရူၤ အၤ ဖၳမဴၤဖၳခၳး န ဖၳ ကၤယး လှၴကျိး အိၤပၤစှဲလှူၤ နှီဒၴူ အၤဖၳ နၲုၤတၤဟၴၤ မှတိၤ။ ထၲုးရဴ ဖၳ မှၲုဖဲး အၤ တှဲၤသဲဇှံသဲလှဴး ရဴ အၤဖၳ အိၤ နှီဒၴူဒံၤ နၲုၤ မှတိၤ။ မှတၲၤခိနၲုၤ, အဲၤသီး ထွှိးထူၤ စှူ စဴမၤရူၤ အၤ ဖၳမဴၤဖၳခၳး ဖၳ စဴမၤရူၤ အၤသဲပျဴၤ အိၤနှီဒံၤ နၲုၤပြဲ။ 14 ကၤယး ဒၲ အၳး အဲ အဲၤ န တှဲၤလှးတှဲၤငှိ အၴူးတၲၤပြှဲၤနၲုၤ, အၤ ဟူးထွှိး ဖၳ ပြှဲၤလှၳၤကၤယး နၲုၤ ရဴ အၤ ဟူး အိၤထွှိးပြှဲၤ ဟဴ ဒၲ ပှဲၤကျဲး။ ပှဲၤ မူထၴူၤဟဴ အၤ တှဲၤတၤရၴူးဒၳၤ တၤရၴူးထၳး။ စဴမၤရူၤ အၤဖၳခၳး ယိး အိၤတံ တၲၤပြှဲၤပြဲ အၤခၳၤအၤခၴူး, အဲၤ နှီဘဲၤ လှဴးပျီး စဴ တှဲၤတၤရၴူးဒၳၤ တၤရၴူးထၳး အၴူး ဒၲ အၤဖဲးအိၤ စဴ။ အဲၤ မၤ ကၤယး ဒၲ အၤ လၲဘး န တှဲၤဘွီတှဲၤတၤရၴူး န တှဲၤမှတှဲၤစဴ တၲၤပြှဲၤ။ 15 ခၳးယိးဟၤ ဟၴဆိၤသဲညၴး အဲၤ အၤရီၤအၤကူး ရဴ အၤ အဲထိးထူၤ န, “ဖၳ ဗး ဟၴဆိၤ ထၲုးပှၴဟဴ သီး အဲၤ အၤရီၤအၤကူး န, ‘ကၤယး ဒၲ အၤ ကှံ ဟူး ဒၲ ဗးခၴူးခၳၤ ပှး တၲၤပြှဲၤနၲုၤ အၤ တၤရၴူးပြှိၤပြှူး ဒၳၤထၳးကျဴး စဴ န ဗး ပှး, မှၴၤတၴးဟၴရဴ ဘီ ဗး အိၤပၤစှဲလှူၤ ဟီတိၤ အၤခဲးနၲုၤ, အၤ အိၤနှၴၤ ထၲုးဒံၤဟဴ။’” 16 အၤဘွီအၤတၤရၴူး အိၤလၲအိၤဘး စဴ အၤခၳၤအၤခၴူး, ပှဲၤ လှဴး꤮ ပျီး နှီဘဲၤ ကှၲုးဒံၤဟဴ တှဲၤဘွီတှဲၤတၤရၴူး တၲၤစၲၤ ထၲုး တၲၤစၲၤ ဒၲ လၳးအိၤ ဟဴ။ 17 စဴမၤရူၤ ဒၴူတှး တှဲၤသိူတှဲၤသူၤ န ခၳးမဴစဲ ရဴ ခၳးမဴစဲ ဒၴူတှး ဒီးတံ န ပှဲၤ, တၤဒၲၤရဴ ယၴၤဆၳူခြီ မၤမှ ကၤယး ဒၲ အၤ ဒၴူတှး ပှၴ ပှဲၤ တှဲၤဘွီတှဲၤတၤရၴူး န တှဲၤမှတှဲၤစဴ။ 18 အၳး မူထၴူၤနဴ စဴမၤရူၤ တၲၤပြှဲၤ꤮ တိၤ တၤဒၲၤရဴ, အၤဖၳခၳး အိၤတံ တၲၤပြှဲၤ ဒၲ အၤ အိၤတှၲကှၲုး န လၳး အၴူး ဒၴူလှၲုးထူၤဟဴ ပှဲၤ န အၤ ဖဲး စဴမၤရူၤ ဟဴ။ 19 ဘဲၤတၲၤဖှၲု ယၳဒၤဖၳ ခၳၤကျဴခၳၤကျူး ဒၲ အၤ အိၤ ဒၲ ဗှီးယၤရၳဆူၤလၴၤ အၤကၳး တၤဟၴၤ နဴးစၲု ပြှဲၤလၳးတူးတှဲၤ န လၴၤဗီဖၳ ဒၲ အၤ မှၴၤစွှိ တှဲၤလၳးတူးဟိး တၤဟၴၤ ဒၲ ခၳးယိးဟၤ အၤ အိၤ ရဴ အၤ နဴးဆၳၤဒူး လၳး န, “နှဲၤ မၤ အၳးပၴး?” ရဴ ခၳးယိးဟၤ ဟၴလှၲုး သဲညၴး ပှၴ အဲၤသီး န, 20 “ဗး မၤ မၴၤဆီယၤ မှတိၤ။” အၤ အဴလှူၤ လှလှလီးလီး ဆံၤပှၴ အဲၤသီး ဖၳနၲုၤ။ 21 အဲၤသီး ဆၳၤဒူး ပှိ န, “ကီၤ မှၴၤဖၳနၲုၤရဴ, နှဲၤ မၤ အၳးပၴး? နှဲၤ မၤ ပြှဲၤပြှိၤ အၴလီၤယၤ ဟဲး?” ရဴ ခၳးယိးဟၤ ဟၴဆံၤ အဲၤသီး န, “မှတိၤ။” ထၲုးရဴ အဲၤသီး ဆၳၤဒူး ပှိ န, “နှဲၤ မၤ ပြှဲၤပြှိၤ ဒၲ စဴမၤရူၤ အဴလှူၤ ဒၲ အၤ ကှံ နဴးဟူးလှူၤ လၳး ပှး နၲုၤတၲၤပြှဲၤ ဟဲး?” ရဴ အၤ ဟၴဆံၤ န, “မှတိၤ။” 22 ထၲုးရဴ အဲၤသီး ဟၴ န, “သူဖၳ ပှဲၤ ကှံ ကှၤ ဟၴလှၲုးဘဲ ပှၴ ကၤယး ဒၲ အၤ နဴးစၲု ဆၳၤဒူး ပှဲၤ တၤဟၴၤ အၤညၴးနၲုၤ, ဟၴဆိၤလှၲုး ပှၴ ပှဲၤ န နှဲၤ မၤ အၳးပၴး? နှဲၤ ဟၴ နှီဒၴူ နှဲၤနှၴ န နှဲၤ မၤ အၳးပၴး?” 23 ခၳးယိးဟၤ ဟၴဆံၤ ဖၳ ပြှဲၤပြှိၤ ယၤဆူယၤ ဟၴနၲုၤ, ရဴ အၤ ဟၴဆံၤ အဲၤသီး န, “ဗး မၤ ကၤယး တၲၤပြှဲၤ ဒၲ အၤ အဲထိးထူၤ ဒၲ ကှၴဆဲးထၴူးကူၤ လှဴတၤမခၳၤ န, ‘မှၴၤစဴ အိၤနှၴၤ ပှၴ လၤဟူး ဘူၤစဲၤ လှၴဟူး ကျူ အၤညၴး နီ꤮,’ အၤ ကှံ အဲထိး ပှၴ အၳး နၲုၤတၲၤပြှဲၤ ပြဲ။” 24 ဖၤရီၤဆူဲဖၳ တၤဟၴၤ နဴးဟူး ကၤယး အၴူးတၤဟၴၤ ဒၲ ခၳးယိးဟၤ အၤ အိၤ, 25 ရဴ အဲၤသီး ဟူး ဆၳၤဒူး ပှိ ခၳးယိးဟၤ န, “နှဲၤ ကီၤ မှ ခြီ မှတိၤတိၤ, ပြှဲၤပြှိၤ အၴလီၤယၤ မှတိၤတိၤ, ပြှဲၤပြှိၤ ဒၲ စဴမၤရူၤ အဴလှူၤ ဒၲ အၤ နဴးဟူး လၳး နၲုၤတၲၤပြှဲၤ မှတိၤတိၤ ကီၤဟၴရဴ နှဲၤ စၲု ပျွိး ပှၴ တှၲု အၳး ထၴူး မှၴၤတၴး?” အဲၤသီး ဟၴ လၳး ဖၳနၲုၤ, 26 ရဴ ခၳးယိးဟၤ ဟၴဆံၤ အဲၤသီး န, “ဗး ပျွိး ပှၴ အၳး န ထၴူး တၤဒၲၤရဴ ဒၲ သီးကျဲး နၲုၤ ကၤယး အိၤ တၲၤပြှဲၤ မၤနရဴ သီး သဲညၴး လၳး တိၤ။ 27 အၤ ဟူး ဒၲ ဗးခၴူးခၳၤ ပှး ပြဲ တၤဒၲၤရဴ ဗး ကှံ အီၤလၴူးကူး ပှၴ ပြဲ အၤ ခၳၤဖပျၴူၤ ပှး ပြဲနၲုၤ ဗး ကဴၤ နှ လၳး တိၤ။” 28 လှဴး꤮ တှဲၤမှၴၤအၤနှၴ အၴူးတၤဟၴၤ နၲုၤမၤ, အၤ ထွှိးထူၤ ဘီ စှဴူၤဒၤ ထၴူးလှူးမှၲု ဘဲရှဲး, ဒဴးဘၴၤသၤနီ, ဘီ ခၳးယိးဟၤ လှၴပျွိး ပှၴ အၳး ထၴူး နၲုၤတၲၤဖိၤ။ 29 ဒၲခၴူး တၲၤညၴးနၲုၤ, ခၳးယိးဟၤ မူထၴူၤ ယၴၤဆၳူ ဟူး ဒၲ အၤ အိၤ ရဴ အၤ ဟၴ န, “မူမဴး, စဴမၤရူၤ အၤသီမှီဖၳ ဒၲ အၤ ဖၴူဗီးကူး ကူး ပြှဲၤလှၳၤ ဟၴၤခၳၤဖၳ အၤ တှဲၤသံတှဲၤအိၤရၤ တၤဟၴၤ အၴူးနၲုၤ တၲၤပြှဲၤ။ 30 ဗး ဟၴဆိၤ ထၲုးဟဴ သီး န, ‘ကၤယး တၲၤပြှဲၤ ကှံ ဟူး ဒၲ ဗးခၴူးခၳၤ ပှး ပြဲ တၤဒၲၤရဴ အၤ တၤရၴူးပြှိၤပြှူး ဒၳၤထၳးကျဴး န ဗး ပှး, မှၴၤတၴးဟၴရဴ ဘီ ဗး အိၤပၤစှဲလှူၤ တူၤဟီတိၤ နၲုၤ, အၤ အိၤနှၴၤ ထၲုးရှၴဟဴ။’ အဲၤ မၤ မှ ကၤယး ဒၲ ဗး ဟၴဆိၤ ပှၴ သီး နၲုၤတၲၤပြှဲၤ ဟဴ။ 31 ကၤယး ဒၲ ဗး ဟၴဆိၤ ပှၴ သီး ဒၲ အၤရှၴခဲး တၲၤပြှဲၤ နၲုၤမၤ အၳးပၴးနၲုၤ ဗး သဲညၴးတိၤ တၤဒၲၤရဴ သူဖၳ အီၤစၤရှၴလၤဖၳ ကှံ သဲညၴး တှးတှၴၤ အဲၤ အၤညၴးနၲုၤ, ဗး ဟူး ပျွိး ပှၴ အၳး န ထၴူး ပြဲ။” 32 ထၲုးရဴ ခၳးယိးဟၤ ဟၴဆိၤသဲညၴး ပှၴ အၳး န, “ဗး မူထၴူၤ ထၲုးဟဴ သဲစးဆဲး ဘူၤစဲၤ အိၤ ဒၲ မှဴခၳၤ ဟူးလှူၤ အိၤ ဒၲ လၳးလှိၤ သူန ထၳၤလွှီ နၲုၤဟဴ။ 33 ဒၲ အၤရှၴခဲး နၲုၤမၤ ဗး သဲညၴးဟီ န အဲၤ မၤ ကၤယး ထွှိး ဖၳအၴူးနၲုၤ တၲၤပြှဲၤ ဟီတိၤ တၤဒၲၤရဴ စဴမၤရူၤ ဒၲ အၤ နဴး ဗး ဒၲ ဗး ကှံ ပျွိး ပှၴ အၳး န ထၴူး အၴူးတၲၤပြှဲၤနၲုၤ အၤ ဟၴ ဗး န, ‘ဆၴူ꤮ နိၤပှး နၲုၤ, ကီၤ နှဲၤ မူထၴူၤ သဲစးဆဲး ဘူၤစဲၤ ဟူးလှူၤ အိၤ ဒၲ ကၤယး တၲၤပြှဲၤ အၤလှိၤ ပှး ဟၴနၲုၤ အဲၤ မၤ မှဟဴ ကၤယး ဒၲ အၤ ကှံ ပျွိး ပှၴ အၳး န သဲစးဆဲး ဘူၤစဲၤ ပှး နၲုၤတၲၤပြှဲၤ ဟဴ။’ 34 တှဲၤထွှိးထူၤ ဖၳအၴူးနၲုၤ, ဗး မူထၴူၤ ထၲုးဟဴ အၤခၳၤအၤခၴူး, ဗး ဟၴဆိၤစဴ ပှၴဟဴ သီး န အဲၤ မၤ စဴမၤရူၤ အၤဖၳခၳး မှလၤကိး တၲၤပြှဲၤ ဟဴ။” 35 အၤနိၤ တၲၤညၴးနၲုၤ ခၳးယိးဟၤ ကၤထဴၤ အိၤရှိကှၲုး ခၴူးသူ န အၤ ခိးပၤစှဲ သဲနၴူး။ 36 အၤ မူထၴူၤ ယၴၤဆၳူ စၲု ဒၲ ကျူလှိၤ ရဴ အၤ ဟၴ န, “မူမဴး လၤဟူး, စဴမၤရူၤ အၤသီမှီဖၳ ဒၲ အၳး ကှံ လၳးထူၤ လၳး ပှး နၲုၤတၲၤပြှဲၤ။” 37 အၤ ခိးပၤစှဲ အၴူးသဲနၴူး နှီဟၲုး ခၳးယိးဟၤ ဟၴဘဲၤငှိ ဖၳအၴူး ရဴ အၤ ကြွိးစၲုကှၲုး ယၴၤဆၳူ အၤခၴူး။ 38 ဘီ ယၴၤဆၳူ တၤရီ မူကှၤခၴူး အၤခဲး, အၤ မူထၴူၤ အဲၤသီး ကြွိးစၲုကှၲုး လၳး ဒၲ ခၴူး ရဴ အၤ ဆၳၤဒူး အဲၤသီး န, “သီး မူပှၳး အီးတၴး?” အဲၤသီး ဟၴဆံၤ န, “ရၤဘီ, နှဲၤ အိၤမၴူးအိၤတိး ဟီၤ ဘီတၴး တၲၤမၴးတၴး?” (ရၤဘီ အၤငှိလၤဆ မၤ သရ) 39 ရဴ အၤ ဟၴဆံၤ အဲၤသီး န, “ကြွိးစၲုမူ ကှၲုးဒံၤ ဗး,” ရဴ ကၤယး အၴူးသဲနၴူး ကြွိးစၲုမူ ကှၲုး လၳး အၤ လှၴအိၤမၴူး ခးလှၴ။ အဲၤသီး စၲုမူထၴူၤ ကှၲုး လၳး လှၴအိၤ ရဴ အဲၤသီး အိၤကှၲုး လၳး ဘီနၲုၤ တှၲုဒၲ မှဴခီပၤလှိ။ ယၴၤဆၳူ အဲ အဲၤသီး အၤခဲးနၲုၤမၤ အၤ တိးဘီ မှဴကွှီလှူၤ လွှီးမံး အၤခဲးနၲုၤ။ 40 အဲၤသီး နှီဟၲုး ထၲုး ပျွိးထၴူး ခၳးယိးဟၤ ဟၴ န, “မူမဴး လၤဟူး, စဴမၤရူၤ အၤသီမှီဖၳ ဒၲ အၳး ကှံ လၳးထူၤ လၳး ပှး နၲုၤတၲၤပြှဲၤ,” ဖၳနၲုၤ ထၲုးရဴ အဲၤသီး ကြွိးစၲုကှၲုး ယၴၤဆၳူ အၤခၴူး။ ဒၲ အၤ ကြွိးစၲုကှၲုး ယၴၤဆၳူ အၤခၴူး အၴူးသဲနၴူး အၤကျဲးနၲုၤ, တၲၤပြှဲၤ မၤ ခၳးဆီူမိၤ ပၴၤတၤရၳ အၤပှၲု ခၳးအဲၤဒြၳ ပြဲ။ 41 အၤ စၲု မူပှၳး ရှၴလၲ အၤဗှူ ခၳးဆီူမိၤ ရဴ အၤ ဟၴဆိၤ ပှၴ လၳး န, “ပှဲၤ မူထၴူၤဟဴ မၴၤဆီယၤ ဟဴ” (မၴၤဆီယၤ အၤငှိလၤဆ မၤ ခြီ) 42 အၴူးတၲၤဖှၲုရဴ အၤ သၳးစၲု ခၳးဆီူမိၤ ဒၲ ယၴၤဆၳူ အၤ အိၤ။ ယၴၤဆၳူ မူ လၳး ရဴ အၤ ဟၴ လၳး န, “နှဲၤ မၤ ဖဲးယိးဟၤ အၤဖၳခၳး ခၳးဆီူမိၤ။ အၳး ကှံ အဲ နှဲၤမွှီၤ န ခၳးကၴၤဖ ပှး,” (ခၳးကၴၤဖ အၤငှိလၤဆ မၤ ခၳးပၴၤတၤရၳ)။ 43 အၤနိၤ တၲၤညၴး မှဴလီး အၤခဲးနၲုၤ, ယၴၤဆၳူ ဒူၤလှူၤ ဟဴ အၤသဲပျဴၤ ဒၲ အၤ ကှံ စၲု ဒၲ ကဲလၤလီၤကှၴ။ အၤ မူထၴူၤ ခၳးဖီလီၤပၳၤ ရဴ အၤ ဟၴ လၳး န, “စၲု! ကြွိးကှၲုး ဗးခၴူး ရဴ ထွှိးထူၤကှၲုး ဗး ခိးပၤစှဲ ဟး။” 44 ခၳးဖီလီၤပၳၤ မၤ ဗှီးဘၴၤသၤစဲဒၤဖၳ, အၤ အိၤတှၲ သူကှၲုး ဟဴ ဗှီး န ခၳးအဲၤဒြၳ န ခၳးပၴၤတၤရၳ အိၤ နှီဒၴူ ဗှီးနၲုၤ တၲၤဗှီး ဟဴ။ 45 ခၳးဖီလီၤပၳၤ မူထၴူၤ ခၳးနၤသၤနၴလ ရဴ အၤ ဟၴ လၳး န, “ပှဲၤ မူထၴူၤဟဴ ကၤယး ဒၲ ခၳးမဴစဲ ရး လၳးရီၤလၳးကူး ဒၲ လီၤ တှဲၤသိူတှဲၤသူၤ အၤကၳးနၲုၤ န ပြှဲၤပြှိၤ တၤဟၴၤ ရးကှၲုး လၳးရီၤလၳးကူး နၲုၤ တၲၤပြှဲၤ ဟဴ။ အဲၤ မၤ ဖဲးစိူစဲ အၤဖၳခၳး ယၴၤဆၳူ ရဴ အဲၤ မၤ ဗှီးနၤစၤရဲဖၳ။” 46 ရဴ ခၳးနၤသၤနၴလ ဆၳၤဒူး ခၳးဖီလီၤပၳၤ န, “တှဲၤတွှိတှဲၤရူ တၲၤစၲၤစၲၤ အိၤထူၤ စှူ ဆလှၴ နူး ဒၲ ဗှီးနၤစၤရဲ အၤကၳး ဟဲး?” ရဴ ခၳးဖီလီၤပၳၤ ဟၴဆံၤ လၳး န, “စၲု꤮, ဗး စၲုဇှၳး နှဲၤ။” 47 ဘီ ယၴၤဆၳူ မူထၴူၤ ခၳးနၤသၤနၴလ ဟူး ဒၲ လၳးအိၤ အၤခဲးနၲုၤ, အၤ ဟၴ ခၳးနၤသၤနၴလ အၤရီၤအၤကူး န, “အဲၤ မၤ အီၤစၤရှၴလၤဖၳ မှလၤကိး တၲၤပြှဲၤ။ အၤ လၤဟိးလၤဟူၤ ကှၲုးအၳး တၤခူ꤮ တိၤ။” 48 ရဴ ခၳးနၤသၤနၴလ ဆၳၤဒူး လၳး န, “နှဲၤ စၲု သဲညၴး စှူ ဗး ဖၳတၴး?” အၤ ဟၴ ရဴ ယၴၤဆၳူ ဟၴဆံၤ လၳး န, “ဘီ ခၳးဖီလီၤပၳၤ အဲ တူၤဟီ နှဲၤ တိၤ အၤခဲးနၲုၤ, ဗး မူထၴူၤ နှဲၤ အိၤ ဘီ ကၤဒွီမှဴလှဲး နၲုၤ။” 49 ခၳးနၤသၤနၴလ ဟၴဆံၤ လၳး န, “ရၤဘီ꤮ နှဲၤ မၤ စဴမၤရူၤ အၤဖၳခၳး မှနူး ဟဴ, နှဲၤ မၤ အီၤစၤရှၴလၤ အၤစဴဖူၤ မှလၤကိး စဴ ဟဴ။” 50 ယၴၤဆၳူ ဟၴ လၳး န, “ဗး ဟၴ နှဲၤ န ဗး မူထၴူၤ နှဲၤ ဒၲ ကၤဒွီမှဴလှဲး နၲုၤမၤ နှဲၤ ဇှံအၴၤ မှလၤကိး ဗး န ဗး မၤ စဴမၤရူၤ အၤဖၳခၳး, အီၤစၤရှၴလၤ အၤစဴဖူၤ တၲၤပြှဲၤနၲုၤ ဟဲး? နှဲၤ ကှံ မူထၴူၤပှိ တှဲၤတၤကျီခိခၴူၤ ဒၳၤကျဴးလၲ စဴ န အၴူးတၤဟၴၤနၲုၤ ပှး။” 51 ထၲုးရဴ ယၴၤဆၳူ ဟၴ အဲၤသီး န, “ဗး ဟၴဆိၤစဴစဴ သီး, သီး ကှံ မူထၴူၤ မှဴခၳၤ ဘမိး ရဴ စဴမၤရူၤ တၤနၴဖၳ တၤဟၴၤ ကှံ ကၤထူၤ ကၤလှူၤ ဒၲ ပြှဲၤလှၳၤ အၤဖၳခၳး မှဟဴ ဗးအၴူး အၤလှိၤနၲုၤ ပှး။”
1 သၲုးညၴး တၲၤညၴးနၲုၤ ပွဲၤခိးမှဲး အိၤဒၲ ကဲလၤလီၤကှၴ, ဗှီးကၤနှ အၤကၳး တၲၤဖၳၤ, ရဴ ယၴၤဆၳူ အၤမှၲု အိၤကှၲုး ဘီနၲုၤ။ 2 ပွဲၤခိးမှဲး အၴူးနၲုၤ, အၳး မၴၤဟူး တှၲကှၲုး ယၴၤဆၳူ န အၤ ခိးပၤစှဲ တၤဟၴၤ။ 3 ဘီ စၤပီူထၴူးဇှး ဒၲ ဆီးပြှၴ တၤဟၴၤ အၤညၴး လှဴးကူးဟဴ အၤခဲးနၲုၤ, ယၴၤဆၳူ အၤမှၲု ဟၴဆိၤလှၲုး ယၴၤဆၳူ န, “အဲၤသီး အၤ စၤပီူထၴူးဇှး လှဴးဟဴ။” 4 ရဴ ယၴၤဆၳူ ဟၴဆံၤ လၳး န, “မှၲု꤮, နှဲၤ စၲုဟူး ဟၴဆိၤတှၲု ဗး မၴၤတၴး? ဆၲုခဲး တှၲုဟီ ဒၲ ဗး ကှံ ဒၴူလှၲုး ဗး တှဲၤပြှိၤတှဲၤပြှူး ဟီတိၤ။” 5 ယၴၤဆၳူ အၤမှၲု ဟၴဆိၤ ပြှဲၤမှၴၤတှဲၤဖၳ တၤဟၴၤ န, “ကီၤ အၤ နဴး သီး တၲၤစၲၤစၲၤ ဟၴရဴ မှၴၤပှၴ အဲၤ နီ꤮။” 6 တၤဗီးတၤဗှၤ ဘီနၲုၤ တၲၤဖိၤနၲုၤ သိးဒၳၤ အိၤ မၴး သၲုးသိူ ရဴ တၲၤမၴးနၲုၤ, အၳး ဇံးနှၲုး န ထၴူး ဟၴနၲုၤမၤ အၤ နှီ ပှူးဒၳၤ နၲုၤ ၈၀-၁၂၀။ သိးဒၳၤ အၴူးတၤဟၴၤနၲုၤ, ယၳဒၤဖၳ တၤဟၴၤ ဇံးနှၲုးအိၤ န ထၴူး ရဴ အဲၤသီး နဴးအၴၤ န အၤ လှၴဆီးပျီး န တၤခၳၤ ဖၳ အဲၤသီး တှဲၤစဴဘၳၤစဴဘဲး လှၴကျိး အိၤ အၤညၴး နၲုၤပြဲ။ 7 ယၴၤဆၳူ နဴး ပြှဲၤမှၴၤတှဲၤဖၳ နၲုၤတၤဟၴၤ န, “ဇံးနှၲုး ဘးလှဴးထၴူး ဒၲ သိးဒၳၤ နၲုၤတၤဟၴၤ အၤကၳးနၲုၤ။” ရဴ အဲၤသီး ဇံးနှၲုး ဘးလှဴး ထၲုးရဴ, 8 ယၴၤဆၳူ ဟၴ အဲၤသီး န, “ခိးညှအၴူး ဒံၤနှီထၴူး တၲၤဘၴး ရဴ စၲုဒၴူ ဒၲ ပွဲၤခၳၤကျဴဒၳၤ ဒၲ အၤ တၤရီၤ မူခွဲၤ နှီပှၴ လှဴး အၳး တှဲၤပွှိး꤮ တၲၤစၲၤ နၲုၤတၲၤပြှဲၤ အၤ အိၤ,” အၤ ဟၴ ရဴ အဲၤသီး ဒံၤစၲု ပှၴ လၳး။ 9 ပွဲၤခၳၤကျဴဒၳၤ အိးမူ ထၴူး ဒၲ အၤ ထွှိးထူၤ စၤပီူထၴူးဇှး အၴူးနၲုၤ။ မၤနရဴ စၤပီူထၴူးဇှး အၴူး အၤ အိၤ ဘီတၴး ဟူးနၲုၤ အၤ သဲညၴးတိၤ။ (ပြှဲၤမှၴၤတှဲၤဖၳ အၴူးတၤဟၴၤ ယိး ဒံၤထၴူး အၤခၳၤအၤခၴူး, အၤ သဲညၴး ပြဲတံ အဲၤသီး အၴူးတၤဟၴၤ ပြဲ) ရဴ ပွဲၤခၳၤကျဴဒၳၤ အၴူးတၲၤပြှဲၤ အဲဟူး ပြှဲၤခိးမှဲး ပြှဲၤခၳး, 10 ရဴ အၤ ဟၴ လၳး န, “အၳး ပွှိး꤮ တၲၤပြှဲၤ လှၴကျိး ဒၴူအိးရှၴ စၤပီူထၴူးဇှး ဒၲ အၤဗီၤအၤဆံး တၤဟၴၤ, ထၲုးရဴ အၳး သဲအိး ဘ꤮ တၴး ရဴ အၳး အိး ထၲုးဟဴ အၤခဲးနၲုၤ, အၳး ဒၴူအိးကၴၤ စၤပီူထၴူးဇှး ပၤအၴး တၤဟၴၤ။ မၤနရဴ နှဲၤအၴူး နှဲၤ ဘၴၤအိၤဒွိ နှီဒၴူ တှၲုပး နှဲၤ စၤပီူထၴူးဇှး အၤဗီၤအၤဆံး တၤဟၴၤ တှၲုခိးညှ စဴစဴ။” 11 ယၴၤဆၳူ မှၴၤတၤကျီ လၳ တှဲၤ တၲၤဖှၲုမၤ ဘီ ဗှီးကၤနှ, ကဲလၤလီၤကှၴ အၴူးနၲုၤဟဴ, ရဴ အၤ ဒၴူလှၲုးထူၤ အၤ တှဲၤလီးတှဲၤတၤခဲး ဘီနၲုၤ။ ဖၳနၲုၤရဴ အၤ ခိးပၤစှဲ တၤဟၴၤ ဇှံကှၤညှကှၤ လၳး။ 12 ထၲုးဟဴ ရဴ အဲၤ န အၤမှၲု န အၤပှၲု တၤဟၴၤ န အၤ ခိးပၤစှဲ တၤဟၴၤ လှူၤ လၤဟူး ဒၲ ဗှီးကၤပၴၤရၤနဴၤ အၤကၳး, ရဴ အဲၤသီး စၲု အိၤ လၤဟူး ဘီနၲုၤ နၴူးသၲုးညၴး။ 13 မှ ဒၲ ယၳဒၤဖၳ တှဲၤစၲုတၤလွိပွဲၤ ဖံၤဟူးဟဴ အၤခၳၤအၤခၴူး, ယၴၤဆၳူ စၲု ဒၲ ဗှီးယၤရၳဆူၤလၴၤ။ 14 ဘီ အၤ ဟူးတှၲု ဒၲ တှဲၤလၳးတူး ဟိးကၳး အၤခဲးနၲုၤ, အၤ မူထၴူၤ ကၤယး အီၤဆဲး ပှၳ, သီမှီ, ထၳၤလွှီ တၤဟၴၤ န ကၤယး အိၤနူး ထၳၤလှူၤ ရံး ဒၲ ဒီးရှဲ ခးဆၴူ တၤဟၴၤ။ 15 ဖၳနၲုၤရဴ အၤ မှၴၤ ဆၳၤပျၴူၤ အီၤပျီ ရဴ အၤ ဗှဲထၴၤကူး လှဴး သီမှီ န ပှၳ တၤဟၴၤ ဒၲ တှဲၤလၳးတူး ဟိးကၳး။ ထၲုးရဴ အၤ ထၳၤလၤကျှဴးကူး လှဴး အၳး လှၴထၳၤလှူၤ ရံး အၤ ဒီးရှဲထူၤလၲး နၲုၤတၤဟၴၤ ရဴ အၤ မှၴၤ လှၳၤပြၲုကူး လှဴးပျီး အဲၤသီး ရံးဇၴူၤ တၤဟၴၤ။ 16 ထၲုးရဴ အၤ ဟၴ ကၤယး အီၤဆဲး ထၳၤလွှီ နၲုၤတၤဟၴၤ န, “စှဴးထၴၤ တၤဖးကူး လှဴး အၴူးတၤဟၴၤ။ နဴးထွှိးထူၤ တဲး ဗးဖဲး အၤဟီၤ အၴူးနၲုၤ န ကျဲ တဲးမှၴ။” 17 အၤ ခိးပၤစှဲ တၤဟၴၤ တၤနှၴၤထူၤ တှၲု လီၤစးဆဲးကၳး ဟၴ န, “ဗး သဲပျဴၤဆိူၤ မှိၤနှီ နူၤစဴ နှဲၤဟီၤ။ ဗး တှဲၤသဲပျဴၤဆိူၤ မှိၤနှီ အၴူးနၲုၤမၤ အၤ ကှံ အံး လှဴးကူး စဴ ဗး သူန မီၤနၲုၤ စဴ ပှး။” 18 ဒၲ အၤ မှၴၤ ဖၳအၴူး အၤခၳၤအၤခၴူး, ယၳဒၤဖၳ ခၳၤကျဴ တၤဟၴၤ ဆၳၤဒူး လၳး န, “သူဖၳ ပှဲၤ ကှံ သဲညၴး န နှဲၤ နှီဘဲၤ တှဲၤတၤရၴူးဆိူၤဆဴး ဒၲ နှဲၤ ကှံ ဟူးမှၴၤ တှဲၤလှၳၤပြၲုလှၳၤပြူး ဖၳအၴူး မၤ အၤနှီ ပြဲ အၤညၴးနၲုၤ, နှဲၤ ကှံ ဒၴူလှၲုး ပှၴ ပှဲၤ တှဲၤတၤကျီ အီးတၴးတၴး ပှး တၴး?” 19 ယၴၤဆၳူ ဟၴဆံၤ န, “မှၴၤ တှးပြှဴၤကူး မဴး တှဲၤလၳးတူးဟိး အၴူးနၲုၤ။ သၲုးညၴး အၤကၳး, ဗး ကှံ အီၤဆဴထူၤ ခၴူးသူ ပှး။” 20 ထၲုးရဴ ယၳဒၤဖၳ ဆၳၤဒူး လၳး န, “သၲုးညၴး အၤကၳး, နှဲၤ ကှံရှၴ အီၤဆဴထူၤ ထၲုးဘဲ ခၴူးသူ နူး ပှး ဟဲး? တှဲၤလၳးတူးဟိး အၴူးနၲုၤမၤ အၳး အီၤဆဴထူၤ နှီ အဲၤ မၤ အၤညှၴး စဴ အၤနၤလွှီးဆၴူး န သၲုးသိူ စဴ မၴၤနၴး꤮။” 21 မၤနရဴ ဘီ ယၴၤဆၳူ ဟၴ န တှဲၤလၳးတူးဟိး အၤရီၤအၤကူး အၤခဲးနၲုၤ မၤ အၤ ဟၴလှူၤ နှီဒၴူဒံၤ အၤနှၴကျဴ ပြဲ။ 22 ဖၳနၲုၤ အၤခၳၤအၤခၴူး ဘီ ယၴၤဆၳူ ထွှိးပြှဲၤ ကှၤခၴူး ခၴူးသူ ဒၲ တှဲၤသၴူး အၤခဲးနၲုၤ, အၤ ခိးပၤစှဲ တၤဟၴၤ တၤနှၴၤထူၤ တှၲုဘဲၤ ခၴူးသူ ဒၲ အၤ ဟၴဘဲၤကူး အၤငှိ အၴူးနၲုၤ ရဴ အဲၤသီး ဇှံအၴၤ လီၤစးဆဲး န အဲၤ ဟၴအိၤကူး အၤငှိ နၲုၤတၤဟၴၤ။ 23 ဘီ ယၴၤဆၳူ အိၤပး ဘီ ဗှီးယၤရၳဆူၤလၴၤ တှဲၤစၲုတၤလွိ ပွဲၤကၳး အၤခဲးနၲုၤ, အၳး မူထၴူၤ အၤ မှၴၤ တှဲၤတၤကျီ နၲုၤတၤဟၴၤ အၤခၳၤအၤခၴူး အၳး ဇှံအၴၤ အဲနူၤစဴ လၳး။ 24 မၤနရဴ ယၴၤဆၳူ ဇှံအၴၤနှီ အဲၤသီး တိၤ, မှၴၤတၴးဟၴရဴ အၤ သဲညၴး လၳၤပျၳ လှဴးပျီး ဟဴ အၳးသဲပျဴၤ ဟဴ။ 25 အၳး လိၤ ဟၴဆိၤလှၲုး ပှၴ န ယၴၤဆၳူ န ကၤယး ပွှိး꤮ တၲၤပြှဲၤ အၤရီၤအၤကူး တိၤ မှၴၤတၴးဟၴရဴ ယၴၤဆၳူ သဲညၴး ထၲုးဒံၤဟဴ အၳး ပွှိး꤮ တၲၤပြှဲၤ အၤသဲပျဴၤ ဟဴ။
1 ယၳဒၤဖၳ ခၳၤကျဴ ဒၲ အၤမွှီၤ န ခၳးနီၤကၤဒၴမၳၤ အိၤ တၲၤပြှဲၤ။ အဲၤ မၤ အၤ အိၤတှၲကှၲုး ဒၲ ဖၤရီၤဆူဲဖၳ အၤပျဴအၤမှၳၤ တၤဟၴၤ အၤကၳး။ 2 တၲၤသဲးခဲးနၲုၤ ခၳးနီၤကၤဒၴမၳၤ ဟူး ဒၲ ယၴၤဆၳူ အိၤ ရဴ အၤ ဟၴ လၳး န, “သရ, ပှဲၤ သဲညၴး န နှဲၤ မၤ မှ သရ ဒၲ အၤ အိၤ ဒၲ စဴမၤရူၤ အၤ အိၤဟူး တၲၤပြှဲၤ။ ပှဲၤ သဲညၴး န စဴမၤရူၤ ကီၤ အိၤကှၲုး န ကၤယး တၲၤပြှဲၤပြှဲၤ တိၤ ဟၴနၲုၤမၤ အၤ မှၴၤစှူ တှဲၤတၤကျီ ဖၳ နှဲၤ မှၴၤ အၴူးနၲုၤ တၲၤပြှဲၤ꤮ တိၤ။” 3 ယၴၤဆၳူ ဟၴဆံၤ လၳး န, “ဗး ဟၴဆိၤစဴစဴ နှဲၤ, ကၤယး ဒၲ အၤ အိၤပၤစှဲလှူၤ ခၴူးသူ တၲၤဖှၲု꤮ တိၤ တၤဟၴၤနၲုၤ, အၤ မူထၴူၤဘဲ စဴမၤရူၤ အၤထၴူးအၤကှၴ တၲၤပြှဲၤ꤮ တိၤ။” 4 ခၳးနီၤကၤဒၴမၳၤ ဆၳၤဒူး လၳး န, “ကၤယး ဒၳၤပြှဲဟဴ တၲၤပြှဲၤနၲုၤ အၤ စၲု အိၤပၤစှဲလှူၤ စှူ ခၴူးသူ ဖၳတၴး? အၤ ကှၤ ကၤနှၲုး ခၴူးသူ ဒၲ အၤ မှၲုဟဴကၳး ရဴ အၤ အိၤပၤစှဲလှူၤ နၴူးဖှၲုတၲၤဖှၲု မၤ အၤ စှူ ပးနူး ဟဲး?” 5 ယၴၤဆၳူ ဟၴဆံၤ လၳး န, “ဗး ဟၴဆိၤစဴစဴ နှဲၤ, ကၤယး ဒၲ အၤ အိၤပၤစှဲလှူၤ ခၴူးသူ န ထၴူး န စဴမၤရူၤ အၤ သဲစးဆဲး တိၤ တၤဟၴၤနၲုၤ အၤ နှၲုးနှီ စှူ ဒၲ စဴမၤရူၤ အၤထၴူးအၤကှၴကၳး တိၤ။ 6 ပြှဲၤလှၳၤ ကၤယး အိၤပၤစှဲလှူၤ နှီဒၴူ ခၴူး ပြှဲၤလှၳၤ ကၤယး ပြဲ။ မၤနရဴ တှဲၤအိၤပၤစှဲလှူၤ န သဲစးဆဲး ဘူၤစဲၤ နၲုၤ, အၤ ဒၴူ အိၤထွှိးထူၤ တၤပျၴၤ အၳး ဒၲသၳၤဒၲသဲ တၲၤကၴူး။ 7 ဒၲ ဗး ဟၴ ပှၴ နှဲၤ န, ‘သီး တိးဘဲၤ အိၤပၤစှဲလှူၤ ပှိ တၲၤဖှၲု,’ ဖၳအၴူးနၲုၤ အၤခၳၤအၤခၴူးရဴ, ခၴူသၳၤခၴူသဲ တဲးမှၴ။ 8 ကှၴလၤသဲ နၲုၤ အၤ လၤသဲစၲု စှၳ꤮ ဒံၤ အၤတှဲၤ ပြဲ။ နှဲၤ နှီဟၲုး အၤပြှၤ တၤဒၲၤရဴ အၤ အိၤ ဘီတၴးဟူး မှတိၤရဴ အၤ ကှံရှၴ စၲုတိး ဘီတၴး နၲုၤ နှဲၤ သဲညၴးတိၤ။ လှဴး꤮ ကၤယး အိၤပၤစှဲလှူၤ န စဴမၤရူၤ အၤ သဲစးဆဲး တၤဟၴၤ နၲုၤမၤ အၤ သူဖၳ နၲုၤဟဴ။” 9 ခၳးနီၤကၤဒၴမၳၤ ဆၳၤဒူး လၳး န, “အၤ စၲု ထွှိးထူၤ စှူ ဖၳတၴး?” 10 ယၴၤဆၳူ ဟၴဆံၤ အဲၤ န, “နှဲၤ ထွှိး စဴ အီၤစၤရှၴလၤ အၤ သရဒၳၤ꤮ တၲၤပြှဲၤ ဗးဟၴတိၤ, ဖၳအၴူးပြဲ ရဴ နှဲၤ စၲု သဲညၴးတိၤ မှၴၤတၴး? 11 ဗး ဟၴဆိၤစဴစဴ နှဲၤ, ပှဲၤ ဟၴ ပှၴ အၳး တှဲၤ ဒၲ ပှဲၤ သဲညၴး တၤဟၴၤ, ပှဲၤ ဒၲၤညး ပှၴ အၳး တှဲၤ ဒၲ ပှဲၤ မူထၴူၤ တၤဟၴၤ တၤဒၲၤရဴ သီး ဖၴူဆံၤ ပှဲၤ တှဲၤဟၴဘဲၤ အၴူးနၲုၤ တၲၤပြှဲၤ꤮ တိၤ။ 12 ဗး ဟၴဆိၤ ပှၴထၲုးဟဴ သီး န ဟၴၤခၳၤ အၤရီၤအၤကူး အၴူးတၤဟၴၤ တၤဒၲၤရဴ သီး ဇှံအၴၤ ဗး တိၤ။ ဗး ကီၤ ဟၴဆိၤ ပှၴ ပှိ သီး န မှဴခၳၤ အၤရီၤအၤကူး တၤဟၴၤ ဟၴနၲုၤမၤ သီး ကှံရှၴ ဇှံအၴၤ စှူ ဗး ဖၳတၴး? 13 ကၤယး ထူၤတှၲုနဴ ဒၲ မှဴခၳၤ နၲုၤ အၤ အိၤ တၲၤပြှဲၤ꤮ တိၤ။ ပြှဲၤလှၳၤ အၤဖၳခၳး ဒၲ အၤ အိၤ ဒၲ မှဴခၳၤ ဟူးလှူၤ အၴူးတၲၤပြှဲၤ ထူၤတှၲု တံ꤮ ဒံၤ ပြဲ။ 14 သူဖၳ ကၤယး ပွှိး꤮ တၲၤပြှဲၤ ဒၲ အၤ ဇှံကှၤညှကှၤ ဗး တၤဟၴၤ, ကှံ နှီဘဲၤ သဲထွှိးပြှဲၤ တၤစှၳပြှဲၤ တၤလှဲၤကြဲ အၤညၴးနၲုၤ, ဗး ဒၲ အၤ မှဒံၤဟဴ ပြှဲၤလှၳၤ အၤဖၳခၳး အၴူး အၳး ကှံ တၤထွိထူၤ ကှၲုးဒံၤ ဗး ဖၳ ခၳးမဴစဲ မၳ꤮ နၳၤခဲး စဴးထူၤ ရှၳတၤလီးဘူး ဇှဇှိၤ ဒၲ ဟီၤထံၤလှိၤ ရဴ အၤ တၤထွိထူၤ အဲၤ ဒၲ ကှၴဆဲးထၴူးကူၤ လှဴတၤမခၳၤ နၲုၤ ပှး။ 15 that whoever believes in him may have eternal life. 16 “စဴမၤရူၤ မှိၤနှီ လှဴး စဴ ပြှဲၤလှၳၤ ဟၴၤခၳၤဖၳ လှဴး꤮ ပျီး။ လှဴး꤮ ကၤယး ဒၲ အၤ ဇှံအၴၤ အၤဖၳခၳး တၤဟၴၤနၲုၤ, သူဖၳ အၤ ကှံ နှီဘဲၤ သဲထွှိးပြှဲၤ တၤစှၳပြှဲၤ ရဴ အၤ ကှံ တှၲု တဲး ဒၲ တှဲၤပၴူတှဲၤကူး တဲးမှၴ နၲုၤ, အၤ ဒၴူလှူၤကူး အၤဖၳခၳး အိၤ တံ တၲၤပြှဲၤ အၴူးနၲုၤ ဒၲ ပြှဲၤလှၳၤ ဟၴၤခၳၤဖၳ တၤဟၴၤ အၤညၴး။ 17 မှၴၤတၴးဟၴရဴ, စဴမၤရူၤ နဴးဟူးလှူၤ အၤဖၳခၳး ဒၲ အၤ ကှံ စီၤရူၤ ကၤယး ဟၴၤခၳၤဖၳ အၤညၴးနၲုၤ မှတိၤ။ မှတၲၤခိနၲုၤ အၤ နဴးဟူး လၳး ဒၲ အၤ ကှံ ဟူး မှၴၤဆီးပျဲကှၤ ကၤယး ဟၴၤခၳၤဖၳ အၤညၴး နၲုၤပြဲ။ 18 ကၤယး ဒၲ အၤ ဇှံအၴၤ ဖၳခၳး တၤဟၴၤနၲုၤ, စဴမၤရူၤ စီၤရူၤ အဲၤသီး တိၤ။ ကၤယး ဒၲ အၤ ဇှံအၴၤ ဖၳခၳး တိၤ တၤဟၴၤနၲုၤ, စဴမၤရူၤ စီၤရူၤ အဲၤသီး ဟဴ, မှၴၤတၴးဟၴရဴ, အၤ ယိး ဇှံအၴၤ ကှၲုးအၳး စဴမၤရူၤ အၤဖၳခၳး ဒၲ အၤ အိၤ တံ တၲၤပြှဲၤ꤮ တၲုး အၴူးတၲၤပြှဲၤ တိၤ အၤခၳၤအၤခၴူး, အၤ စီၤရူၤဟဴ အဲၤသီး။ 19 မှၴၤတၴးရဴ အဲၤသီး ခူဘဲၤ တှဲၤစီၤရူၤ ဟၴနၲုၤမၤ, စဴမၤရူၤ အၤတှဲၤလီး ဟူးနှၲုး ဒၲ ဟၴၤခၳၤအၴူး တၤဒၲၤရဴ ပြှဲၤလှၳၤ ဟၴၤခၳၤဖၳ တၤဟၴၤ သဲဇှံ တှဲၤလီး အၴူးနၲုၤ တိၤ မှၴၤတၴးဟၴရဴ အဲၤသီး ယိး မှၴၤ တှဲၤမၳးမှူရီၤစှူ တၤဟၴၤ အၤခၳၤအၤခၴူး, အၤ မှိၤနှီကျဴး ဒၲ တှဲၤခီတှဲၤလှဴၤ။ 20 လှဴး꤮ ကၤယး ဒၲ အၤ မှၴၤ တှဲၤမၳးမှူရီၤစှူ တၤဟၴၤနၲုၤ, အၤ သဲထၴၤ တှဲၤလီး ရဴ အၤ ဟူး ဒၲ တှဲၤလီး အၤ အိၤ တိၤ, မှၴၤတၴးဟၴရဴ ကၤယး ဒၲ အၤ မှၴၤ တှဲၤမၳးမှူရီၤစှူ တၤဟၴၤနၲုၤ, အၤ သဲအီၤဆၴး န အၤ တှဲၤသံတှဲၤအိၤရၤ တၤဟၴၤ အိၤလှၲုးထူၤ ရဴ အၤ ဟူးတိး တိၤ။ 21 မၤနရဴ ကၤယး ဒၲ အၤ မှၴၤ တှဲၤစဴတှဲၤတှၴၤ တၤဟၴၤနၲုၤ, အၤ ဟူးတိး ဒၲ တှဲၤလီး အၤ အိၤ, မှၴၤတၴးဟၴရဴ သူဖၳ အၳး ပွှိး꤮ တၲၤပြှဲၤ ကှံ မူထၴူၤ လှၲုးရူ န အၤ မှၴၤတှဲၤ တၤဟၴၤနၲုၤ, အၤတိး န စဴမၤရူၤ အၤသဲပျဴၤ အၤညၴးနၲုၤ, အၤ ဟူးတိး ဒၲ တှဲၤလီး အိၤ။” 22 အၤ ဟၴထၲုး လၳး ရဴ, ယၴၤဆၳူ န အၤ ခိးပၤစှဲ တၤဟၴၤ ထၴၤစၲု ဒၲ ယၳဒၤကှၴ။ ရဴ အၤ စၲုအိၤ ညှၴးရၤရၴၤ ကှၲုး န အၤ ခိးပၤစှဲ တၤဟၴၤ ဘီနၲုၤ ရဴ အၤ စၲုပျွိး ပှၴ အၳး ထၴူး။ 23 ခၳးယိးဟၤ ပျွိး ပှၴ ကှၲုးပှိ အၳး ထၴူး ဘီ ခးလှၴ ဒၲ အၳး အဲ န အဲၤနိ နၲုၤတၲၤဖိၤ။ အဲၤနိ မၤ အၤ အိၤဖံၤ န ဒဴးဆူၤလီၤ ထၲုးရဴ ထၴူး အိၤအဲ။ ကၤယး ဟူး ဒၲ လၳးအိၤ ရဴ အၤ ပျွိး ပှၴ အဲၤသီး ထၴူး။ 24 (အၴူးမၤ ဘီ အၳး ဒဴတှး ဟီ ခၳးယိးဟၤ ဒၲ အၤပှိၤကၳး ဟီတိၤ အၤခဲးနၲုၤ) 25 ဘီနၲုၤအၤခဲး ခၳးယိးဟၤ အၤ ခိးပၤစှဲ တၤဟၴၤ န ယၳဒၤဖၳ တၲၤပြှဲၤ ကြၴကြှူ ခၴူးလၳး န လှၴကျိးလှၴခူၤ အိၤန တှဲၤမှၴၤမွှိးပျီး ဖၳတၴး နၲုၤ အၤရီၤအၤကူး။ 26 အဲၤသီး စၲု ဒၲ ခၳးယိးဟၤ အၤ အိၤ ရဴ အၤ ဟၴ လၳး န, “သရ꤮ ကၤယး ဒၲ အၤ အိၤကှၲုး န နှဲၤ ဘီ စှဴူၤဒၤ ထၴူးကျိး ဘဲရှဲး ရဴ နှဲၤ ခူလှၲုး ပှၴ အၳး န အဲၤ အၤရီၤအၤကူး နၲုၤတၲၤပြှဲၤ နီ꤮ ခိးညှအၴူး အၤ စၲုပျွိး ပှၴတှၲု အၳး ထၴူး ရဴ အၳး စၲု လှဴးပျီးဟဴ ဒၲ လၳးအိၤ ဟဴ။” 27 ရဴ ခၳးယိးဟၤ ဟၴဆံၤ လၳး န, “အၳးပၴး ဘဲၤဘဲၤ စဴမၤရူၤ ကီၤ ဒၴူတှး လၳး တိၤ နၲုၤ, အၤ နှီဘဲၤ စှူ တှဲၤ တၲၤစၲၤ꤮ တိၤ။ 28 ဗး ဟၴထၲုးဟဴ သီး န, ‘ဗး မၤ ခြီ မှတိၤ တၤဒၲၤရဴ စဴမၤရူၤ နဴးဟူး ရှၴ ဗး ဒၲ အဲၤညၴးဟူး ပြဲ။’ ဗး ဟၴထၲုးဟဴ အၤခၳၤအၤခၴူး သီး ထွှိးဟဴ ဗး ပြှဲၤခူသဲ တၤဟၴၤ ဟဴ။ 29 ဗး မၤ အၤသူန ပြှဲၤကြွိးကြၲုး ခိးမှဲး ပြှဲၤခၳး တၲၤပြှဲၤနၲုၤ။ ခိးမှဲး ပြှဲၤမဴၤ မၤ ခိးမှဲး ပြှဲၤခၳး အၤတှဲၤ။ မၤနရဴ ပြှဲၤကြွိးကြၲုး နၲုၤတၲၤပြှဲၤ ကၤထဴၤ နှီဒး ခိးမှဲး ပြှဲၤခၳး ဟၴဘဲၤ။ အၤ နှီဟၲုး လၳးငှိ အၤခၳၤအၤခၴူး, အၤ သဲကြှံးသဲလှဴး နူၤစဴ။ ဖၳနၲုၤဟဴ ဗး တှဲၤသဲကြှံး အၴူးနၲုၤ အၤ လၲထူၤဘးထူၤ ဟဴ။ 30 အဲၤ မၤ အၤ တိးဘဲၤ လိၤဒၳၤကျဴး, ဗး မၤ အၤ တိးဘဲၤ လိၤ ပၤတီကျဴး။ 31 “ကၤယး အိၤ ဒၲ မှဴခၳၤ ဟူး အၴူးတၲၤပြှဲၤနၲုၤ, အၤဒၳၤကျဴး န အၳး လှဴး꤮ ပျီး။ ကၤယး အိၤ ဒၲ ဟၴၤခၳၤ အၴူးတၲၤပြှဲၤနၲုၤ အၤ သဲညၴး ဟၴဘဲၤ ပြဲတံ ဟၴၤခၳၤ အၤရီၤအၤကူး ပြဲ။ ကၤယး အိၤ ဒၲ မှဴခၳၤ ဟူး အၴူးတၲၤပြှဲၤနၲုၤ အၤဒၳၤကျဴး န အၳး လှဴး꤮ ပျီး။ 32 အၤ ဟၴဆိၤလှၲုး ပှၴ အၳး န လှဴး꤮ အၤ မူထၴူၤ နၲုၤတၤဟၴၤ န လှဴး꤮ အၤ နှီဟၲုး နၲုၤတၤဟၴၤ။ မၤနရဴ အၤ ဟၴဆိၤလှၲုး ပှၴ အၳး နၲုၤ အၳး နှီဒး ဖၴူဆံၤ လၳးတှဲၤ တၲၤပြှဲၤ꤮ တိၤ။ 33 ကၤယး ဒၲ အၤ နှီဒး ဖၴူဆံၤ လၳး တှဲၤဟၴဆိၤလှၲုး တၤဟၴၤနၲုၤ အၤ ဇှံအၴၤ တှးတှၴၤ လၤဟူး န စဴမၤရူၤ မၤ အၤမှအၤစဴ။ 34 ကၤယး ဒၲ စဴမၤရူၤ နဴးတှး အဲၤ တၲၤပြှဲၤနၲုၤ, စဴမၤရူၤ ဒၴူ လၲဘး ဟဴ လၳး သဲစးဆဲး ဘူၤစဲၤ အၤခၳၤအၤခၴူး, အၤ ဟၴဘဲၤပြဲ စဴမၤရူၤ အၤလှးအၤငှိ တၤဟၴၤ ပြဲ။ 35 ဖဲး စဴမၤရူၤ မှိၤနှီ အၤဖၳခၳး ရဴ အၤ ဒၴူတှးလှဴး လၳး တှဲၤပွှိး꤮ တၲၤစၲၤ ဒၲ အၤ တၤခၳၤကၳး ဟဴ။ 36 ကၤယး ဒၲ အၤ ဇှံအၴၤညှအၴၤ ဖၳခၳး အၴူးတၲၤပြှဲၤ တၤဟၴၤနၲုၤ, အၤ နှီဘဲၤ သဲထွှိးပြှဲၤ တၤစှၳပြှဲၤ။ ရဴ ကၤယး ဒၲ အၤ နှီဒး ကှၲုးအၳး တိၤ ရဴ အၤ ဇှံအၴၤညှအၴၤ ကှၲုးအၳး ဖၳခၳးအၴူး တိၤ တၤဟၴၤနၲုၤ, အၤ နှီဘဲၤ ကှၲုးအၳး သဲထွှိးပြှဲၤ တိၤ။ စဴမၤရူၤ အၤ တှဲၤစီၤရူၤ တှး အိၤ ဒၲ ကၤယး နၲုၤတၤဟၴၤ အၤလှိၤ။”
1 ဖၤရီၤဆူဲဖၳ တၤဟၴၤ နှီဟၲုး န ယၴၤဆၳူ အၤ ခိးပၤစှဲ အိၤအဲထူၤ န အဲထူၤ ထၲုးရဴ အၤ ပျွိးနှီအဲ ပှၴ ကျဴး အၳး ထၴူး န ခၳးယိးဟၤ။ 2 ကီၤ ဟၴလၤကိး မၤ, ယၴၤဆၳူ ပျွိး ပှၴ အၳး ထၴူး တၲၤပြှဲၤ꤮ တိၤ, အၤ ခိးပၤစှဲ တၤဟၴၤ ပျွိး ဆၲုးဆံ ပှၴ အၳး ပြဲ။ 3 ဘီ ယၴၤဆၳူ နှီဟၲုး အၳး ဒူ လၳးဇှိၤ ဖၳအၴူး အၤခဲး, အၤ ထၴၤစၲုကူး ဒၲ ယၳဒၤကှၴ ထၲုးရဴ အၤ ကှၤခၴူး ခၴူးသူ ဒၲ ကဲလၤလီၤကှၴ။ 4 ဘီ အၤ စၲု အၤခဲးနၲုၤ, အၤ တိးဘဲၤ စၲုဘဲ န ဆူၤမၤရီကှၴ။ 5 ဖၳနၲုၤရဴ အၤ စၲုတှၲု ဒၲ ဗှီးစီခၤရၤ ဒၲ အၤ အိၤ ဘီ ဆူၤမၤရီ ကှၴကၳးနၲုၤ။ ဗှီး အၴူးတၲၤဗှီးနၲုၤ အၤ အိၤဖံၤ န ဖဲးယၤကိၤ လှၴဒၴူကူး အၤဖၳခၳး ခၳးစိူစဲ ဟၴၤခၳၤ ခးလှၴ နၲုၤတၲၤဖိၤ။ 6 ဖဲးယၤကိၤ အၤထၴူးကျံၤ အိၤ ဘီနၲုၤ။ ရဴ ယၴၤဆၳူ စၲု သဲပြှလၤဒူ ကျူ အၤခၳၤအၤခၴူး အၤ စၲု အိၤနူးအိၤကှၲု ဘီ ထၴူးကျံၤ နၲုၤတၲၤအဴၤ အၤခးဆၴူ။ ဘီနၲုၤခဲး နၲုၤမၤ ဖံၤ꤮ မှဴထၲုၤ ဟဴ။ 7 ရဴ ဆူၤမၤရီ မှၲု တၲၤပြှဲၤ ဟူးဒူထၴူး, ရဴ ယၴၤဆၳူ ဟၴ လၳး န, “ဒၴူအိး ပှၴကှၲုး ဗး ထၴူး တဲး꤮။” 8 (ဘီနၲုၤခဲး မၤ အၤ ခိးပၤစှဲ ထၴၤစၲု အီၤပြှီၤ လှၴအၴၤ ဒၲ ဗှီးကၳး။) 9 ဆူၤမၤရီ မှၲု ဟၴဆံၤ လၳး န, “နှဲၤ မၤ ယၳဒၤဖၳ, ဗး မၤ ဆူၤမၤရီဖၳ, နှဲၤ စၲု ကွီးအိး တှၲု ဗးထၴူး။” (အၤ ဟၴ ဖၳအၴူး မှၴၤတၴးဟၴရဴ ယၳဒၤဖၳ န ဆူၤမၤရီဖၳ နၲုၤမၤ အၤ ရှဲး လၳး တိၤ။) 10 ယၴၤဆၳူ ဟၴဆံၤ လၳး န, “နှဲၤ ကီၤ သဲညၴးဘၴူၤ စဴမၤရူၤ အၤ တှဲၤဒၴူကြး ဆၴူးဇှၳ ထၲုးရဴ ပြှဲၤ ဒၲ အၤ ကွီးအိး နှဲၤထၴူး အၴူးတၲၤပြှဲၤ မၤ အၳးပၴး နၲုၤ နှဲၤ ကီၤ သဲညၴး ပှိဘၴူၤ ဟၴမၤ, နှဲၤ ကှံ ကွီးအိး ဗး ထၴူး ပှး ရဴ ဗး ကှံ ဒၴူအိး နှဲၤ ထၴူး ဒၲ အၤ ဒၴူ အၳး သဲထွှိးပြှဲၤ အၴူးနၲုၤ ပှး။” 11 ပြှဲၤမဴၤ နၲုၤတၲၤပြှဲၤ ဟၴဆံၤ လၳး န, “သရ꤮ နှဲၤ စၲု ဒူထူၤ စှူ ထၴူး ဒၲ အၤ ဒၴူ အၳး သဲထွှိးပြှဲၤ အၴူးနၲုၤ ဘီတၴး ပှး? နှဲၤ ထၴူးလှၴစှဴး ရဴ အၤ အိၤ တိၤတိၤ, ထၴူးကျံၤ အၴူးတၲၤအဴၤနၲုၤ အၤ ဇှး နူၤစဴ တၲၤကှၲုၤရဴ။ 12 ပှဲၤဖဲး ဖဲးယၤကိၤ ဒၲ꤮ ညၴနၳၤ ဒၴူကူး ပှဲၤ ထၴူးကျံၤအၴူး။ ဖဲးယၤကိၤ န အၤဖၳအၤလှၴူၤ န အၤ တှဲၤဖၳတှဲၤလှၴူၤ တၤဟၴၤ ဒူအိး ထၴူးအၴူး။ မၤ နှဲၤ ဒၳၤကျဴးနူး န ပှဲၤဖဲး ဖဲးယၤကိၤ ဟဲး?” 13 ယၴၤဆၳူ ဟၴဆံၤ လၳး န, “ကၤယး ဒၲ အၤ အိးထၴူး အၴူးတၤဟၴၤနၲုၤ, အၤ သဲအိး ခၴူးသူ ပှး, 14 မၤနရဴ ကၤယး ဒၲ အၤ ကှံ အိးထၴူး ဒၲ ဗး ဒၴူအိး အဲၤ ပှး အၴူးနၲုၤ, အၤ သဲအိး ပှး ထၴူး တၲၤဖှၲု꤮ တိၤ။ ထၴူး ဒၲ ဗး ကှံ ဒၴူအိး အဲၤ ပှး အၴူးနၲုၤ, အၤ ကှံ ထွှိးထူၤ ထၴူးထၴၤခၳၤ ဒၲ လၳးကၳး ပှး။ ရဴ အၤ ကှံ ဒၴူ လၳး သဲထွှိးပြှဲၤ တၤစှၳပြှဲၤ တၤလှဲၤကြဲ ပှး။” 15 ပြှဲၤမဴၤ အၴူးတၲၤပြှဲၤ ဟၴဆံၤ လၳး န, “သရ꤮, သူဖၳ ဗး ကှံ သဲအိး ပှး ထၴူး တၲၤဖှၲု꤮ တိၤ, ထၲုးရဴ သူဖၳ ဗး ကှံ ဟူး ဒူအိးနဴ ပှး တဲး ထၴူး ဘီအၴူး တဲးမှၴနၲုၤ ဒၴူမဴး ဗး ထၴူး ဒၲ နှဲၤ ဟၴ အၴူးနၲုၤ။” 16 ယၴၤဆၳူ ဟၴဆံၤ လၳး န, “ကှၤ အဲဟူး နှဲၤဗှဲၤ ဘီအၴူး။” 17 ရဴ အၤ ဟၴဆံၤ ယၴၤဆၳူ န, “ဗးဗှဲၤ အိၤတိၤ။” ယၴၤဆၳူ ဟၴဆံၤ လၳး န, “နှဲၤ ဟၴ န နှဲၤဗှဲၤ အိၤတိၤ နၲုၤမၤ အၤတိး ပြဲ။ 18 နှဲၤဗှဲၤ အိၤထၲုးဟဴ ညှးထံး ရဴ ပြှဲၤခၳး ဒၲ နှဲၤအိၤ နှီဒၴူ ခိးညှအၴူး တၲၤပြှဲၤ နၲုၤမၤ နှဲၤဗှဲၤ မှတိၤ။ နှဲၤ ဟၴလှၲုးစဴ ဟၴလှၲုးတှၴၤ ပှၴ စဴ ဗး ဟဴ။” 19 ပြှဲၤမဴၤအၴူး ဟၴ လၳး န, “သရ꤮ ဗး မူထၴူၤ သဲညၴး တှးတှၴၤဟဴ န နှဲၤ မၤ ပြှဲၤပြှိၤ တၲၤပြှဲၤ။ 20 ပှဲၤ ကျွီးလူး ဆူၤမၤရီဖၳ ဒၲ꤮ ညၴနၳၤ တၤဟၴၤနၲုၤ, အၤ စဴဘဲးထူၤ စဴမၤရူၤ ဘီ ဆိၤ အၴူးနၲုၤတၲၤမၴး အၤလှိၤ။ မၤနရဴ သီး ယၳဒၤဖၳ တၤဟၴၤနၲုၤ သီး ဟၴ န အၳး တိးဘဲၤ စဴဘဲးထူၤ စဴမၤရူၤ ဒၲ ဗှီးယၤရၳဆူၤလၴၤ အၤကၳး နၲုၤ။” 21 ယၴၤဆၳူ ဟၴဆံၤ လၳး န, “မဴၤမှၲု꤮ ဇှံအၴၤ ဗးနၲုၤ, ဆၲုခဲး ကှံ ဟူးတှၲုဟဴ ဒၲ သီး ကှံ စဴဘဲးထူၤ ဖဲး စဴမၤရူၤ ပှး။ မၤနရဴ ဘီ ဆိၤ အၴူးတၲၤမၴး အၤလှိၤ နၲုၤ ဘဲၤဘဲၤ, ဒၲ ဗှီးယၤရၳဆူၤလၴၤ အၤကၳး အၴူးနၲုၤ ဘဲၤဘဲၤ, အၳး လိၤ ဟူးစဴဘဲး ပှး ဘီနၲုၤ တိၤဟဴ။ 22 သီး ဆူၤမၤရီဖၳ တၤဟၴၤနၲုၤ, သီး စဴဘဲးထူၤ အၳးပၴး နၲုၤ သီး သဲညၴး တှးတှၴၤ နှီဒၴူ တိၤ။ မၤနရဴ ပှဲၤ ယၳဒၤဖၳ တၤဟၴၤနၲုၤ, ပှဲၤ စဴဘဲးထူၤ အၳးပၴးနၲုၤ ပှဲၤ သဲညၴး နှီဒၴူ, မှၴၤတၴးဟၴရဴ တှဲၤမှၴၤဆီးပျဲကှၤ နၲုၤ အၤ အိၤထူၤ ဒၲ ပှဲၤ ယၳဒၤဖၳ အၤကျဲး ဟဴ။ 23 မၤနရဴ ကၤယး ဒၲ အၤ စဴဘဲး ဆးပြှဲညၤစဲး ဖဲး စဴမၤရူၤ တၤဟၴၤနၲုၤ, ဆၲုခဲး ဒၲ အဲၤသီး ကှံ စဴဘဲး ဒၲသၳၤဒၲသဲ န တှဲၤမှတှဲၤစဴ နၲုၤ, အၤ ကှံ ဟူးတှၲု ပှး။ အၤ ဟူးတှၲု စဴ ဟဴ ခိးညှ ဟဴ။ မှၴၤတၴးဟၴရဴ ဖဲး စဴမၤရူၤ မူပှၳး ကၤယး ဒၲ အၤ စဴဘဲးထူၤ လၳး ဖၳနၲုၤ တၤဟၴၤ ဟဴ။ 24 စဴမၤရူၤ မၤ မှသၳၤမှသဲ ရဴ ကၤယး ဒၲ အၤ စဴဘဲးထူၤ အဲၤ တၤဟၴၤနၲုၤ, အၤ တိးဘဲၤ စဴဘဲးထူၤ အဲၤ ဖၳ သဲစးဆဲး ဘူၤစဲၤ ဇှၳးကျူဇှၳးကျိး အဲၤ ဒၲ တှဲၤမှတှဲၤစဴ အၤကၳး နၲုၤ။” 25 အၤ ဟၴဆံၤ ယၴၤဆၳူ န, “ဗး သဲညၴး န မၴၤဆီယၤ (ဒၲ အၳး အဲ အၤမွှီၤ န ခြီနၲုၤ) ကှံ ဟူး ပှး, ရဴ ဘီ အၤ ဟူးတှၲု ပှး အၤခဲးနၲုၤ, အၤ ကှံ ဟူးဟၴဆိၤ ပှၴ ပှဲၤ တှဲၤလှဴး꤮ ပျီး ပှး အၤ ဟၴ ဖၳနၲုၤ။” 26 ယၴၤဆၳူ ဟၴဆံၤ အဲၤ န, “ကၤယး ဒၲ အၤ ဟၴဘဲၤ န နှဲၤ ခိးညှအၴူး တၲၤပြှဲၤ နၲုၤမၤ မှ နၲုၤတၲၤပြှဲၤ ဟဴ။” 27 ဘီနၲုၤအၤခဲး, ယၴၤဆၳူ အၤ ခိးပၤစှဲ တၤဟၴၤ ကှၤတှၲု ရဴ အၤ ခၴူသၳၤခၴူသဲ နူၤစဴ ဒၲ အၤ မူထၴူၤ ယၴၤဆၳူ ဟၴဘဲၤ န ပြှဲၤမဴၤ နၲုၤတၲၤပြှဲၤ။ “ပြှဲၤမဴၤ နၲုၤတၲၤပြှဲၤ သဲဇှံ အီးတၴး?” နၲုၤ, အဲၤသီး ဆၳၤဒူး လၳး တၲၤပြှဲၤ꤮ တိၤ, ထၲုးတိၤ “ဘူၤစဲၤ ယၴၤဆၳူ စၲုဟၴဘဲၤ တှၲု န ပြှဲၤမဴၤ နၲုၤတၲၤပြှဲၤ မှၴၤတၴး?” နၲုၤ, အဲၤသီး ဆၳၤဒူး လၳး တၲၤပြှဲၤ꤮ တိၤတိၤ။ 28 ထၲုးရဴ ပြှဲၤမဴၤ အၴူးတၲၤပြှဲၤ ဘၴၤကူး အၤထၴူးအိး ရဴ အၤ ကှၤဟၴဆိၤ အဲပှၴလး အၳး ဒၲ ဗှီးကၳးနၲုၤ န, 29 “ဟူး မူကှၲုး လၤဟူး မဴး ဗး ကၤယး တၲၤပြှဲၤ လၴ! အၤ ဟၴပြှိၤ လှဴးပျီး စဴ လှဴး ဗး မှၴၤထၲုးဟဴ နၲုၤတၤဟၴၤ။ အဲၤ မှ ခြီ စဴ ဟဲး?” 30 ဖၳနၲုၤ အၤခၳၤအၤခၴူး အဲၤသီး အိၤ ဘီ ဗှီးကၳး နၲုၤ ရဴ အၤ ဟူး လၤဟူး ဒၲ ယၴၤဆၳူ အၤ အိၤ။ 31 ဘီနၲုၤအၤခဲး, အၤ ခိးပၤစှဲ တၤဟၴၤ ကွီးသဲဇှဴၤ ယၴၤဆၳူ န, “ရၤဘီ꤮, အၴၤမဴး ဆဲၤအၴၤ အၴူး꤮။” 32 မၤနရဴ အၤ ဟၴဆံၤ အဲၤသီး န, “ဗး ဆဲၤအၴၤ လှၴအၴၤ ဒၲ သီး သဲညၴး တှၲုကှၲုး ဗး တိၤ နၲုၤ အၤ အိၤ ဒံၤ ဟဴ။” 33 ဖၳနၲုၤ အၤခၳၤအၤခၴူး အၤ ခိးပၤစှဲ တၤဟၴၤ ဆၳၤဒူး နှီဒၴူ လၳး တၲၤပြှဲၤ ထၲုး တၲၤပြှဲၤ န, “ကၤယး တၲၤပြှဲၤပြှဲၤ ဟူးဒၴူ ထၲုးဟဴ လၳး ဆဲၤအၴၤ ဟဲး?” 34 ယၴၤဆၳူ ဟၴ အဲၤသီး န, “ဗး မှၴၤတိး ပြှဲၤ ဒၲ အၤ နဴးဟူး ဗး အၴူးတၲၤပြှဲၤ အၤ တှဲၤသဲဇှံ ရဴ ဗး မှၴၤထၲုးကူး တှဲၤမှၴၤ ဒၲ အၤ ဒၴူ ဗး အၴူးနၲုၤမၤ မှဟဴ ဗးဆဲၤအၴၤ ဟဴ။ 35 သီး လှၴကျိး ဟၴ နှီဒၴူ လၤဟူး န, ‘အၤ ဘးဟဴ လွှီးလဲး ပှး မၤ ဆၲုခဲး တိး ကဲဟဴ ဘှၲု ပှး။’ တၤဒၲၤရဴ ဗး ဟၴ သီး, မူတှးတှၴၤ လၤဟူး ကၤယး အဲပြှဲၤ ဒၲ အၤသူန လှူ အၴူးတၤဟၴၤနၲုၤ, အဲၤသီး မၤ အၤသူန ဘှၲု မီးဘၳး တိးကဲ လှဴးပျီး ဟဴ ရဴ ဆၲုခဲး ဘဲၤဟဴ ဒၲ တိး ကဲ စဴ ဟဴ ခိးညှဟဴ။ 36 ခိးညှအၴူး စဴ ဘဲၤဘဲၤ, ပြှဲၤကဲဘှၲု တၲၤပြှဲၤနၲုၤ အၤ နှီဘဲၤ အၤခွိအၤကဲၤ ရဴ အၤ ဒူၤအိၤပျဴ တှဲၤသဲၤတှဲၤဖိး တၤဟၴၤ ဒၲ အၤ မှဟဴ တှဲၤထွှိးပြှဲၤ တၤစှၳပြှဲၤ အၤညၴး အၴူးနၲုၤ ဟဴ။ ဖၳနၲုၤရဴ ပြှဲၤအီၤဆဴဘှၲု အၴူး န ပြှဲၤကဲဘှၲု အၴူး သဲနၴူးလှဴး ကှံ သဲကြှံး ရှိလှဴး လၳး ပှး။ 37 မှၴၤဖၳနၲုၤရဴ ငှိဒၲၤညး ဟၴ န, ‘တၲၤပြှဲၤ ရဴ အီၤဆဴ, တၲၤပြှဲၤ ရဴ ကဲ’ နၲုၤမၤ အၤတိး ပြဲ။ 38 ဗး နဴးစၲု ကဲဟဴ သီး ဘှၲု ဒၲ လှူခၳၤ ဒၲ သီး မှၴၤနဴ န သီးနှၴ တၲၤဖှၲု꤮ တိၤ အၴူးတၲၤလှၴ ဟဴ။ ကၤယး ဒၲ အၤရှၲုၤ တၤဟၴၤ မှၴၤထၲုးဟဴ ဘီနၲုၤ ရဴ ဒၲ အဲၤသီး မှၴၤထၲုးရှၴ ဟဴ အၤခၳၤအၤခၴူး, သီး စၲု နှီဘဲၤ ကှၲုး ဟဴ တှဲၤဘွီတှဲၤတၤရၴူး ဘီနၲုၤဟဴ။” 39 ဒၲ ဗှီးအၴူး တၲၤဗှီး အၤကၳးနၲုၤ ဆူၤမၤရီဖၳ ဇှံအၴၤညှအၴၤ ကှၤ အဲလး ယၴၤဆၳူ, မှၴၤတၴးဟၴရဴ မှ ဒၲ ပြှဲၤမဴၤ နၲုၤတၲၤပြှဲၤ ခူသဲ ရဴ အၤ ဟၴ န, “အၤ ဟၴပြှိၤ လှဴးပျီး တှဲၤ ဒၲ ဗး မှၴၤထၲုးဟဴ တၤဟၴၤနၲုၤ,” အၤခၳၤအၤခၴူး အဲၤသီး ဇှံအၴၤညှအၴၤ ကှၤ အဲလး။ 40 ဖၳနၲုၤ အၤခၳၤအၤခၴူး ဘီ ဆူၤမၤရီဖၳ တၤဟၴၤ ဟူးတှၲု ဒၲ ယၴၤဆၳူ အိၤ အၤခဲး, အၤ ကွီးသဲဇှဴၤ လၳး န အၤ ကှံ ကှၤအိၤကှၲုး န အဲၤသီး ဒၲ အၤဗှီးကၳး ရဴ ယၴၤဆၳူ ကှၤအိၤကှၲုး န အဲၤသီး ဘီနၲုၤ နၴူးညၴး။ 41 အၳး ဟူး နှီဒး အဲလး အၤ တှဲၤဒၲၤညး တၤဟၴၤ ရဴ အၳး ဇှံကှၤညှကှၤ ရှိလး။ 42 အဲၤသီး ဟၴ ပြှဲၤမဴၤ နၲုၤတၲၤပြှဲၤ န, “ပှဲၤ ဇှံအၴၤ ယၴၤဆၳူ ခိးညှအၴူး နၲုၤမၤ မှဒၲ နှဲၤ ဟၴဆိၤ ပှၴ ပှဲၤ အၤခၳၤအၤခၴူး နၲုၤ မှတိၤ။ ဒၲ ပှဲၤ နှီဟၲုး အၤ တှဲၤဟၴဆိၤဒၲၤညး န ပှဲၤနှၴ ထၲုးရဴ ပှဲၤ သဲညၴး န အဲၤ မၤ ခြီ ဒၲ အၤ မှၴၤဆီးပျဲကှၤ ဟၴၤခၳၤဖၳ အၴူးနၲုၤ တၲၤပြှဲၤ မှလၤကိး ဟဴ, အၤခၳၤအၤခၴူး နၲုၤပြဲ။” 43 ယၴၤဆၳူ အိၤ ဘီနၲုၤ နၴူးညၴး ထၲုးရဴ အၤ ထၴၤစၲု ဒၲ ကဲလၤလီၤကှၴ။ 44 ယၴၤဆၳူ ဟၴထၲုး ဒံၤ ဟဴ န, “ပြှဲၤပြှိၤ နၲုၤ အၤဒဴးကၳးဖၳ နှီဒံၤ ဒူၤဇှံဒူၤညှ နှီဒၴူကှၲုး လၳး တိၤ။” 45 ဘီ အၤ စၲုတှၲု ဒၲ ကဲလၤလီၤကှၴ အၤခဲးနၲုၤ, ကဲလၤလီၤဖၳ ဘီနၲုၤ တၤဟၴၤ အဲမှိၤဆံၤ အဲၤ, မှၴၤတၴးဟၴရဴ အဲၤသီး စၲုနဴကှၲုး တှဲၤစၲုတၤလွိပွဲၤ ဒၲ ဗှီးယၤရၳဆူၤလၴၤ အၤကၳး ရဴ အၤ မူထၴူၤနဴ လှဴး ထၲုးဟဴ ဘူၤစဲၤ ယၴၤဆၳူ မှၴၤ တၤကျီခိခၴူၤ တှဲၤလှဴး꤮ ပျီး ဘီ ပွဲၤခဲး နၲုၤဟဴ။ 46 ထၲုးရဴ, ဘူၤစဲၤ ယၴၤဆၳူ ကှၤခၴူး ခၴူးသူ ဒၲ ဗှီးကၤနှ ဒၲ ကဲလၤလီၤကှၴကၳး ဘီ အၤလှၴ မှၴၤထွှိးထူၤ ထၴူး န စၤပီူထၴူးဇှး နၲုၤ။ ဘီ ဗှီးကၤပၴၤရၤနဴၤ အၤကၳး နၲုၤ, ကၤယး ထွှိး ခွီ အၤ ပြှဲၤမှၴၤတှဲၤဖၳ ခၳၤကျဴ အိၤတၲၤပြှဲၤ ရဴ အၤ ဖၳပြှဲၤခၳး သဲဆွီ။ 47 ဘီ အၤ နှီဟၲုး ဟဴ န ယၴၤဆၳူ အိၤ ဒၲ ယၳဒၤကှၴ ရဴ အၤ ဟူး ဒၲ ကဲလၤလီၤကှၴ အၤခဲးနၲုၤ, အၤ စၲု ဒၲ လၳးအိၤ ရဴ အၤ ကွီးသဲဇှဴၤ ယၴၤဆၳူ န အၤ ကှံ ကြွိးကှၤကှၲုး လၳး ဒၲ ဗှီးကၤပၴၤရၤနဴၤ ရဴ ကှၤ ဇၤဆီးမှၴ ပှၴ လၳး ဖၳခၳး ဒၲ အၤ ကှံရှၴ သၴူးတၤလီ လးဟဴ အၴူးတၲၤပြှဲၤနၲုၤ။ 48 ယၴၤဆၳူ ဟၴ အဲၤ န, “သီး ဒးမူထၴူၤ ပၴပှး တှဲၤတၤကျီခိခၴူၤ န တှဲၤခၴူသၳၤခၴူသဲ တၤဟၴၤ တိၤ ဟၴရဴ, သီး ဇှံအၴၤ စဴ တၤကီၤ꤮ တိၤ။” 49 ထၲုးရဴ ကၤယး ထွှိး ခၳၤကျဴဒၳၤ အၴူးတၲၤပြှဲၤနၲုၤ အၤ ဟၴဆံၤ လၳး န, “ဘူၤစဲၤ꤮ ကှၤ ကှၲုးန ဗး ခိးညှ ဘီ ဗးဖၳ သၴူး တူၤဟီတိၤ အၤခဲးအၴူး,” အၤ ဟၴ လၳး ဖၳနၲုၤ။ 50 ဘူၤစဲၤ ယၴၤဆၳူ ဟၴဆံၤ လၳး န, “ကှၤခၴူး ခၴူးသူ မဴး။ နှဲၤ ဖၳပြှဲၤခၳး ကှံ အိၤမှိၤ ကှၤခၴူး ဒံၤ ပှး။” ရဴ ကၤယး ထွှိး ဒၳၤ အၴူးတၲၤပြှဲၤ ဇှံအၴၤ ယၴၤဆၳူ အၤ တှဲၤဟၴဘဲၤ ရဴ အၤ ကှၤခၴူး ခၴူးသူ ဒၲ အၤဟီၤ။ 51 ဘီ အၤ ကှၤ ဒၲ ကျူလှိၤ အၤခဲးနၲုၤ, အၤ ပြှဲၤမှၴၤတှဲၤဖၳ တၤဟၴၤ ဟူး လှံၤဆံၤ အဲၤ ရဴ အၤ ဟၴဆိၤ လၳး န, “နှဲၤ ဖၳပြှဲၤခၳး အိၤမှိၤ ကှၤခၴူး ဟဴ။” 52 အၤ ဆၳၤဒူး အၤ ပြှဲၤမှၴၤတှဲၤဖၳ အၴူးတၤဟၴၤ န အၤဖၳခၳး အိၤမှိၤ ကှၤခၴူး ခၴူးသူ ဘီခဲးတၴး ရဴ အဲၤသီး ဟၴဆံၤ လၳး န, “အၤ တှဲၤကှၳ တှး ဘီ ပှဟၴနၳၤ မှဴကွှီလှူၤ တၲၤမံး အၤခဲးနၲုၤ။” 53 အၤဖဲး တၤနှၴၤထူၤ တှၲုဘဲၤခၴူး အၤဖၳ တှဲၤကှၳ တှး အၤဆၲုခဲး နၲုၤမၤ, အၤ တိးတံ ဘီ ဘူၤစဲၤ ယၴၤဆၳူ ဟၴ လၳး န, “နှဲၤ ဖၳခၳး ကှံ အိၤမှိၤ ကှၤခၴူး ဒံၤ ပှး ဆၲုခဲး ဘီနၲုၤ။” ဒၲ အၴူး အၤခၳၤအၤခၴူး အဲၤ န အၤ ဟီၤဖၳဖူးဖၳ တၤဟၴၤ ဇှံကှၤညှကှၤ လှဴးပျီး ဘူၤစဲၤ ယၴၤဆၳူ။ 54 အၴူးနၲုၤမၤ ဘူၤစဲၤ ယၴၤဆၳူ အိၤ ဒၲ ယၳဒၤကှၴ ရဴ ထၴၤစၲု ခၴူးသူ ဒၲ ကဲလၤလီၤကှၴ ရဴ အၤ ဒၴူလှၲုး အၤတှဲၤမှၴၤ တၤကျီခိခၴူၤ နၴူးဖှၲုတၲၤဖှၲု အၴူးနၲုၤ ဟဴ။
1 ဖၤရီၤဆူဲဖၳ တၤဟၴၤ နှီဟၲုး န ယၴၤဆၳူ အၤ ခိးပၤစှဲ အိၤအဲထူၤ န အဲထူၤ ထၲုးရဴ အၤ ပျွိးနှီအဲ ပှၴ ကျဴး အၳး ထၴူး န ခၳးယိးဟၤ။ 2 ကီၤ ဟၴလၤကိး မၤ, ယၴၤဆၳူ ပျွိး ပှၴ အၳး ထၴူး တၲၤပြှဲၤ꤮ တိၤ, အၤ ခိးပၤစှဲ တၤဟၴၤ ပျွိး ဆၲုးဆံ ပှၴ အၳး ပြဲ။ 3 ဘီ ယၴၤဆၳူ နှီဟၲုး အၳး ဒူ လၳးဇှိၤ ဖၳအၴူး အၤခဲး, အၤ ထၴၤစၲုကူး ဒၲ ယၳဒၤကှၴ ထၲုးရဴ အၤ ကှၤခၴူး ခၴူးသူ ဒၲ ကဲလၤလီၤကှၴ။ 4 ဘီ အၤ စၲု အၤခဲးနၲုၤ, အၤ တိးဘဲၤ စၲုဘဲ န ဆူၤမၤရီကှၴ။ 5 ဖၳနၲုၤရဴ အၤ စၲုတှၲု ဒၲ ဗှီးစီခၤရၤ ဒၲ အၤ အိၤ ဘီ ဆူၤမၤရီ ကှၴကၳးနၲုၤ။ ဗှီး အၴူးတၲၤဗှီးနၲုၤ အၤ အိၤဖံၤ န ဖဲးယၤကိၤ လှၴဒၴူကူး အၤဖၳခၳး ခၳးစိူစဲ ဟၴၤခၳၤ ခးလှၴ နၲုၤတၲၤဖိၤ။ 6 ဖဲးယၤကိၤ အၤထၴူးကျံၤ အိၤ ဘီနၲုၤ။ ရဴ ယၴၤဆၳူ စၲု သဲပြှလၤဒူ ကျူ အၤခၳၤအၤခၴူး အၤ စၲု အိၤနူးအိၤကှၲု ဘီ ထၴူးကျံၤ နၲုၤတၲၤအဴၤ အၤခးဆၴူ။ ဘီနၲုၤခဲး နၲုၤမၤ ဖံၤ꤮ မှဴထၲုၤ ဟဴ။ 7 ရဴ ဆူၤမၤရီ မှၲု တၲၤပြှဲၤ ဟူးဒူထၴူး, ရဴ ယၴၤဆၳူ ဟၴ လၳး န, “ဒၴူအိး ပှၴကှၲုး ဗး ထၴူး တဲး꤮။” 8 (ဘီနၲုၤခဲး မၤ အၤ ခိးပၤစှဲ ထၴၤစၲု အီၤပြှီၤ လှၴအၴၤ ဒၲ ဗှီးကၳး။) 9 ဆူၤမၤရီ မှၲု ဟၴဆံၤ လၳး န, “နှဲၤ မၤ ယၳဒၤဖၳ, ဗး မၤ ဆူၤမၤရီဖၳ, နှဲၤ စၲု ကွီးအိး တှၲု ဗးထၴူး။” (အၤ ဟၴ ဖၳအၴူး မှၴၤတၴးဟၴရဴ ယၳဒၤဖၳ န ဆူၤမၤရီဖၳ နၲုၤမၤ အၤ ရှဲး လၳး တိၤ။) 10 ယၴၤဆၳူ ဟၴဆံၤ လၳး န, “နှဲၤ ကီၤ သဲညၴးဘၴူၤ စဴမၤရူၤ အၤ တှဲၤဒၴူကြး ဆၴူးဇှၳ ထၲုးရဴ ပြှဲၤ ဒၲ အၤ ကွီးအိး နှဲၤထၴူး အၴူးတၲၤပြှဲၤ မၤ အၳးပၴး နၲုၤ နှဲၤ ကီၤ သဲညၴး ပှိဘၴူၤ ဟၴမၤ, နှဲၤ ကှံ ကွီးအိး ဗး ထၴူး ပှး ရဴ ဗး ကှံ ဒၴူအိး နှဲၤ ထၴူး ဒၲ အၤ ဒၴူ အၳး သဲထွှိးပြှဲၤ အၴူးနၲုၤ ပှး။” 11 ပြှဲၤမဴၤ နၲုၤတၲၤပြှဲၤ ဟၴဆံၤ လၳး န, “သရ꤮ နှဲၤ စၲု ဒူထူၤ စှူ ထၴူး ဒၲ အၤ ဒၴူ အၳး သဲထွှိးပြှဲၤ အၴူးနၲုၤ ဘီတၴး ပှး? နှဲၤ ထၴူးလှၴစှဴး ရဴ အၤ အိၤ တိၤတိၤ, ထၴူးကျံၤ အၴူးတၲၤအဴၤနၲုၤ အၤ ဇှး နူၤစဴ တၲၤကှၲုၤရဴ။ 12 ပှဲၤဖဲး ဖဲးယၤကိၤ ဒၲ꤮ ညၴနၳၤ ဒၴူကူး ပှဲၤ ထၴူးကျံၤအၴူး။ ဖဲးယၤကိၤ န အၤဖၳအၤလှၴူၤ န အၤ တှဲၤဖၳတှဲၤလှၴူၤ တၤဟၴၤ ဒူအိး ထၴူးအၴူး။ မၤ နှဲၤ ဒၳၤကျဴးနူး န ပှဲၤဖဲး ဖဲးယၤကိၤ ဟဲး?” 13 ယၴၤဆၳူ ဟၴဆံၤ လၳး န, “ကၤယး ဒၲ အၤ အိးထၴူး အၴူးတၤဟၴၤနၲုၤ, အၤ သဲအိး ခၴူးသူ ပှး, 14 မၤနရဴ ကၤယး ဒၲ အၤ ကှံ အိးထၴူး ဒၲ ဗး ဒၴူအိး အဲၤ ပှး အၴူးနၲုၤ, အၤ သဲအိး ပှး ထၴူး တၲၤဖှၲု꤮ တိၤ။ ထၴူး ဒၲ ဗး ကှံ ဒၴူအိး အဲၤ ပှး အၴူးနၲုၤ, အၤ ကှံ ထွှိးထူၤ ထၴူးထၴၤခၳၤ ဒၲ လၳးကၳး ပှး။ ရဴ အၤ ကှံ ဒၴူ လၳး သဲထွှိးပြှဲၤ တၤစှၳပြှဲၤ တၤလှဲၤကြဲ ပှး။” 15 ပြှဲၤမဴၤ အၴူးတၲၤပြှဲၤ ဟၴဆံၤ လၳး န, “သရ꤮, သူဖၳ ဗး ကှံ သဲအိး ပှး ထၴူး တၲၤဖှၲု꤮ တိၤ, ထၲုးရဴ သူဖၳ ဗး ကှံ ဟူး ဒူအိးနဴ ပှး တဲး ထၴူး ဘီအၴူး တဲးမှၴနၲုၤ ဒၴူမဴး ဗး ထၴူး ဒၲ နှဲၤ ဟၴ အၴူးနၲုၤ။” 16 ယၴၤဆၳူ ဟၴဆံၤ လၳး န, “ကှၤ အဲဟူး နှဲၤဗှဲၤ ဘီအၴူး။” 17 ရဴ အၤ ဟၴဆံၤ ယၴၤဆၳူ န, “ဗးဗှဲၤ အိၤတိၤ။” ယၴၤဆၳူ ဟၴဆံၤ လၳး န, “နှဲၤ ဟၴ န နှဲၤဗှဲၤ အိၤတိၤ နၲုၤမၤ အၤတိး ပြဲ။ 18 နှဲၤဗှဲၤ အိၤထၲုးဟဴ ညှးထံး ရဴ ပြှဲၤခၳး ဒၲ နှဲၤအိၤ နှီဒၴူ ခိးညှအၴူး တၲၤပြှဲၤ နၲုၤမၤ နှဲၤဗှဲၤ မှတိၤ။ နှဲၤ ဟၴလှၲုးစဴ ဟၴလှၲုးတှၴၤ ပှၴ စဴ ဗး ဟဴ။” 19 ပြှဲၤမဴၤအၴူး ဟၴ လၳး န, “သရ꤮ ဗး မူထၴူၤ သဲညၴး တှးတှၴၤဟဴ န နှဲၤ မၤ ပြှဲၤပြှိၤ တၲၤပြှဲၤ။ 20 ပှဲၤ ကျွီးလူး ဆူၤမၤရီဖၳ ဒၲ꤮ ညၴနၳၤ တၤဟၴၤနၲုၤ, အၤ စဴဘဲးထူၤ စဴမၤရူၤ ဘီ ဆိၤ အၴူးနၲုၤတၲၤမၴး အၤလှိၤ။ မၤနရဴ သီး ယၳဒၤဖၳ တၤဟၴၤနၲုၤ သီး ဟၴ န အၳး တိးဘဲၤ စဴဘဲးထူၤ စဴမၤရူၤ ဒၲ ဗှီးယၤရၳဆူၤလၴၤ အၤကၳး နၲုၤ။” 21 ယၴၤဆၳူ ဟၴဆံၤ လၳး န, “မဴၤမှၲု꤮ ဇှံအၴၤ ဗးနၲုၤ, ဆၲုခဲး ကှံ ဟူးတှၲုဟဴ ဒၲ သီး ကှံ စဴဘဲးထူၤ ဖဲး စဴမၤရူၤ ပှး။ မၤနရဴ ဘီ ဆိၤ အၴူးတၲၤမၴး အၤလှိၤ နၲုၤ ဘဲၤဘဲၤ, ဒၲ ဗှီးယၤရၳဆူၤလၴၤ အၤကၳး အၴူးနၲုၤ ဘဲၤဘဲၤ, အၳး လိၤ ဟူးစဴဘဲး ပှး ဘီနၲုၤ တိၤဟဴ။ 22 သီး ဆူၤမၤရီဖၳ တၤဟၴၤနၲုၤ, သီး စဴဘဲးထူၤ အၳးပၴး နၲုၤ သီး သဲညၴး တှးတှၴၤ နှီဒၴူ တိၤ။ မၤနရဴ ပှဲၤ ယၳဒၤဖၳ တၤဟၴၤနၲုၤ, ပှဲၤ စဴဘဲးထူၤ အၳးပၴးနၲုၤ ပှဲၤ သဲညၴး နှီဒၴူ, မှၴၤတၴးဟၴရဴ တှဲၤမှၴၤဆီးပျဲကှၤ နၲုၤ အၤ အိၤထူၤ ဒၲ ပှဲၤ ယၳဒၤဖၳ အၤကျဲး ဟဴ။ 23 မၤနရဴ ကၤယး ဒၲ အၤ စဴဘဲး ဆးပြှဲညၤစဲး ဖဲး စဴမၤရူၤ တၤဟၴၤနၲုၤ, ဆၲုခဲး ဒၲ အဲၤသီး ကှံ စဴဘဲး ဒၲသၳၤဒၲသဲ န တှဲၤမှတှဲၤစဴ နၲုၤ, အၤ ကှံ ဟူးတှၲု ပှး။ အၤ ဟူးတှၲု စဴ ဟဴ ခိးညှ ဟဴ။ မှၴၤတၴးဟၴရဴ ဖဲး စဴမၤရူၤ မူပှၳး ကၤယး ဒၲ အၤ စဴဘဲးထူၤ လၳး ဖၳနၲုၤ တၤဟၴၤ ဟဴ။ 24 စဴမၤရူၤ မၤ မှသၳၤမှသဲ ရဴ ကၤယး ဒၲ အၤ စဴဘဲးထူၤ အဲၤ တၤဟၴၤနၲုၤ, အၤ တိးဘဲၤ စဴဘဲးထူၤ အဲၤ ဖၳ သဲစးဆဲး ဘူၤစဲၤ ဇှၳးကျူဇှၳးကျိး အဲၤ ဒၲ တှဲၤမှတှဲၤစဴ အၤကၳး နၲုၤ။” 25 အၤ ဟၴဆံၤ ယၴၤဆၳူ န, “ဗး သဲညၴး န မၴၤဆီယၤ (ဒၲ အၳး အဲ အၤမွှီၤ န ခြီနၲုၤ) ကှံ ဟူး ပှး, ရဴ ဘီ အၤ ဟူးတှၲု ပှး အၤခဲးနၲုၤ, အၤ ကှံ ဟူးဟၴဆိၤ ပှၴ ပှဲၤ တှဲၤလှဴး꤮ ပျီး ပှး အၤ ဟၴ ဖၳနၲုၤ။” 26 ယၴၤဆၳူ ဟၴဆံၤ အဲၤ န, “ကၤယး ဒၲ အၤ ဟၴဘဲၤ န နှဲၤ ခိးညှအၴူး တၲၤပြှဲၤ နၲုၤမၤ မှ နၲုၤတၲၤပြှဲၤ ဟဴ။” 27 ဘီနၲုၤအၤခဲး, ယၴၤဆၳူ အၤ ခိးပၤစှဲ တၤဟၴၤ ကှၤတှၲု ရဴ အၤ ခၴူသၳၤခၴူသဲ နူၤစဴ ဒၲ အၤ မူထၴူၤ ယၴၤဆၳူ ဟၴဘဲၤ န ပြှဲၤမဴၤ နၲုၤတၲၤပြှဲၤ။ “ပြှဲၤမဴၤ နၲုၤတၲၤပြှဲၤ သဲဇှံ အီးတၴး?” နၲုၤ, အဲၤသီး ဆၳၤဒူး လၳး တၲၤပြှဲၤ꤮ တိၤ, ထၲုးတိၤ “ဘူၤစဲၤ ယၴၤဆၳူ စၲုဟၴဘဲၤ တှၲု န ပြှဲၤမဴၤ နၲုၤတၲၤပြှဲၤ မှၴၤတၴး?” နၲုၤ, အဲၤသီး ဆၳၤဒူး လၳး တၲၤပြှဲၤ꤮ တိၤတိၤ။ 28 ထၲုးရဴ ပြှဲၤမဴၤ အၴူးတၲၤပြှဲၤ ဘၴၤကူး အၤထၴူးအိး ရဴ အၤ ကှၤဟၴဆိၤ အဲပှၴလး အၳး ဒၲ ဗှီးကၳးနၲုၤ န, 29 “ဟူး မူကှၲုး လၤဟူး မဴး ဗး ကၤယး တၲၤပြှဲၤ လၴ! အၤ ဟၴပြှိၤ လှဴးပျီး စဴ လှဴး ဗး မှၴၤထၲုးဟဴ နၲုၤတၤဟၴၤ။ အဲၤ မှ ခြီ စဴ ဟဲး?” 30 ဖၳနၲုၤ အၤခၳၤအၤခၴူး အဲၤသီး အိၤ ဘီ ဗှီးကၳး နၲုၤ ရဴ အၤ ဟူး လၤဟူး ဒၲ ယၴၤဆၳူ အၤ အိၤ။ 31 ဘီနၲုၤအၤခဲး, အၤ ခိးပၤစှဲ တၤဟၴၤ ကွီးသဲဇှဴၤ ယၴၤဆၳူ န, “ရၤဘီ꤮, အၴၤမဴး ဆဲၤအၴၤ အၴူး꤮။” 32 မၤနရဴ အၤ ဟၴဆံၤ အဲၤသီး န, “ဗး ဆဲၤအၴၤ လှၴအၴၤ ဒၲ သီး သဲညၴး တှၲုကှၲုး ဗး တိၤ နၲုၤ အၤ အိၤ ဒံၤ ဟဴ။” 33 ဖၳနၲုၤ အၤခၳၤအၤခၴူး အၤ ခိးပၤစှဲ တၤဟၴၤ ဆၳၤဒူး နှီဒၴူ လၳး တၲၤပြှဲၤ ထၲုး တၲၤပြှဲၤ န, “ကၤယး တၲၤပြှဲၤပြှဲၤ ဟူးဒၴူ ထၲုးဟဴ လၳး ဆဲၤအၴၤ ဟဲး?” 34 ယၴၤဆၳူ ဟၴ အဲၤသီး န, “ဗး မှၴၤတိး ပြှဲၤ ဒၲ အၤ နဴးဟူး ဗး အၴူးတၲၤပြှဲၤ အၤ တှဲၤသဲဇှံ ရဴ ဗး မှၴၤထၲုးကူး တှဲၤမှၴၤ ဒၲ အၤ ဒၴူ ဗး အၴူးနၲုၤမၤ မှဟဴ ဗးဆဲၤအၴၤ ဟဴ။ 35 သီး လှၴကျိး ဟၴ နှီဒၴူ လၤဟူး န, ‘အၤ ဘးဟဴ လွှီးလဲး ပှး မၤ ဆၲုခဲး တိး ကဲဟဴ ဘှၲု ပှး။’ တၤဒၲၤရဴ ဗး ဟၴ သီး, မူတှးတှၴၤ လၤဟူး ကၤယး အဲပြှဲၤ ဒၲ အၤသူန လှူ အၴူးတၤဟၴၤနၲုၤ, အဲၤသီး မၤ အၤသူန ဘှၲု မီးဘၳး တိးကဲ လှဴးပျီး ဟဴ ရဴ ဆၲုခဲး ဘဲၤဟဴ ဒၲ တိး ကဲ စဴ ဟဴ ခိးညှဟဴ။ 36 ခိးညှအၴူး စဴ ဘဲၤဘဲၤ, ပြှဲၤကဲဘှၲု တၲၤပြှဲၤနၲုၤ အၤ နှီဘဲၤ အၤခွိအၤကဲၤ ရဴ အၤ ဒူၤအိၤပျဴ တှဲၤသဲၤတှဲၤဖိး တၤဟၴၤ ဒၲ အၤ မှဟဴ တှဲၤထွှိးပြှဲၤ တၤစှၳပြှဲၤ အၤညၴး အၴူးနၲုၤ ဟဴ။ ဖၳနၲုၤရဴ ပြှဲၤအီၤဆဴဘှၲု အၴူး န ပြှဲၤကဲဘှၲု အၴူး သဲနၴူးလှဴး ကှံ သဲကြှံး ရှိလှဴး လၳး ပှး။ 37 မှၴၤဖၳနၲုၤရဴ ငှိဒၲၤညး ဟၴ န, ‘တၲၤပြှဲၤ ရဴ အီၤဆဴ, တၲၤပြှဲၤ ရဴ ကဲ’ နၲုၤမၤ အၤတိး ပြဲ။ 38 ဗး နဴးစၲု ကဲဟဴ သီး ဘှၲု ဒၲ လှူခၳၤ ဒၲ သီး မှၴၤနဴ န သီးနှၴ တၲၤဖှၲု꤮ တိၤ အၴူးတၲၤလှၴ ဟဴ။ ကၤယး ဒၲ အၤရှၲုၤ တၤဟၴၤ မှၴၤထၲုးဟဴ ဘီနၲုၤ ရဴ ဒၲ အဲၤသီး မှၴၤထၲုးရှၴ ဟဴ အၤခၳၤအၤခၴူး, သီး စၲု နှီဘဲၤ ကှၲုး ဟဴ တှဲၤဘွီတှဲၤတၤရၴူး ဘီနၲုၤဟဴ။” 39 ဒၲ ဗှီးအၴူး တၲၤဗှီး အၤကၳးနၲုၤ ဆူၤမၤရီဖၳ ဇှံအၴၤညှအၴၤ ကှၤ အဲလး ယၴၤဆၳူ, မှၴၤတၴးဟၴရဴ မှ ဒၲ ပြှဲၤမဴၤ နၲုၤတၲၤပြှဲၤ ခူသဲ ရဴ အၤ ဟၴ န, “အၤ ဟၴပြှိၤ လှဴးပျီး တှဲၤ ဒၲ ဗး မှၴၤထၲုးဟဴ တၤဟၴၤနၲုၤ,” အၤခၳၤအၤခၴူး အဲၤသီး ဇှံအၴၤညှအၴၤ ကှၤ အဲလး။ 40 ဖၳနၲုၤ အၤခၳၤအၤခၴူး ဘီ ဆူၤမၤရီဖၳ တၤဟၴၤ ဟူးတှၲု ဒၲ ယၴၤဆၳူ အိၤ အၤခဲး, အၤ ကွီးသဲဇှဴၤ လၳး န အၤ ကှံ ကှၤအိၤကှၲုး န အဲၤသီး ဒၲ အၤဗှီးကၳး ရဴ ယၴၤဆၳူ ကှၤအိၤကှၲုး န အဲၤသီး ဘီနၲုၤ နၴူးညၴး။ 41 အၳး ဟူး နှီဒး အဲလး အၤ တှဲၤဒၲၤညး တၤဟၴၤ ရဴ အၳး ဇှံကှၤညှကှၤ ရှိလး။ 42 အဲၤသီး ဟၴ ပြှဲၤမဴၤ နၲုၤတၲၤပြှဲၤ န, “ပှဲၤ ဇှံအၴၤ ယၴၤဆၳူ ခိးညှအၴူး နၲုၤမၤ မှဒၲ နှဲၤ ဟၴဆိၤ ပှၴ ပှဲၤ အၤခၳၤအၤခၴူး နၲုၤ မှတိၤ။ ဒၲ ပှဲၤ နှီဟၲုး အၤ တှဲၤဟၴဆိၤဒၲၤညး န ပှဲၤနှၴ ထၲုးရဴ ပှဲၤ သဲညၴး န အဲၤ မၤ ခြီ ဒၲ အၤ မှၴၤဆီးပျဲကှၤ ဟၴၤခၳၤဖၳ အၴူးနၲုၤ တၲၤပြှဲၤ မှလၤကိး ဟဴ, အၤခၳၤအၤခၴူး နၲုၤပြဲ။” 43 ယၴၤဆၳူ အိၤ ဘီနၲုၤ နၴူးညၴး ထၲုးရဴ အၤ ထၴၤစၲု ဒၲ ကဲလၤလီၤကှၴ။ 44 ယၴၤဆၳူ ဟၴထၲုး ဒံၤ ဟဴ န, “ပြှဲၤပြှိၤ နၲုၤ အၤဒဴးကၳးဖၳ နှီဒံၤ ဒူၤဇှံဒူၤညှ နှီဒၴူကှၲုး လၳး တိၤ။” 45 ဘီ အၤ စၲုတှၲု ဒၲ ကဲလၤလီၤကှၴ အၤခဲးနၲုၤ, ကဲလၤလီၤဖၳ ဘီနၲုၤ တၤဟၴၤ အဲမှိၤဆံၤ အဲၤ, မှၴၤတၴးဟၴရဴ အဲၤသီး စၲုနဴကှၲုး တှဲၤစၲုတၤလွိပွဲၤ ဒၲ ဗှီးယၤရၳဆူၤလၴၤ အၤကၳး ရဴ အၤ မူထၴူၤနဴ လှဴး ထၲုးဟဴ ဘူၤစဲၤ ယၴၤဆၳူ မှၴၤ တၤကျီခိခၴူၤ တှဲၤလှဴး꤮ ပျီး ဘီ ပွဲၤခဲး နၲုၤဟဴ။ 46 ထၲုးရဴ, ဘူၤစဲၤ ယၴၤဆၳူ ကှၤခၴူး ခၴူးသူ ဒၲ ဗှီးကၤနှ ဒၲ ကဲလၤလီၤကှၴကၳး ဘီ အၤလှၴ မှၴၤထွှိးထူၤ ထၴူး န စၤပီူထၴူးဇှး နၲုၤ။ ဘီ ဗှီးကၤပၴၤရၤနဴၤ အၤကၳး နၲုၤ, ကၤယး ထွှိး ခွီ အၤ ပြှဲၤမှၴၤတှဲၤဖၳ ခၳၤကျဴ အိၤတၲၤပြှဲၤ ရဴ အၤ ဖၳပြှဲၤခၳး သဲဆွီ။ 47 ဘီ အၤ နှီဟၲုး ဟဴ န ယၴၤဆၳူ အိၤ ဒၲ ယၳဒၤကှၴ ရဴ အၤ ဟူး ဒၲ ကဲလၤလီၤကှၴ အၤခဲးနၲုၤ, အၤ စၲု ဒၲ လၳးအိၤ ရဴ အၤ ကွီးသဲဇှဴၤ ယၴၤဆၳူ န အၤ ကှံ ကြွိးကှၤကှၲုး လၳး ဒၲ ဗှီးကၤပၴၤရၤနဴၤ ရဴ ကှၤ ဇၤဆီးမှၴ ပှၴ လၳး ဖၳခၳး ဒၲ အၤ ကှံရှၴ သၴူးတၤလီ လးဟဴ အၴူးတၲၤပြှဲၤနၲုၤ။ 48 ယၴၤဆၳူ ဟၴ အဲၤ န, “သီး ဒးမူထၴူၤ ပၴပှး တှဲၤတၤကျီခိခၴူၤ န တှဲၤခၴူသၳၤခၴူသဲ တၤဟၴၤ တိၤ ဟၴရဴ, သီး ဇှံအၴၤ စဴ တၤကီၤ꤮ တိၤ။” 49 ထၲုးရဴ ကၤယး ထွှိး ခၳၤကျဴဒၳၤ အၴူးတၲၤပြှဲၤနၲုၤ အၤ ဟၴဆံၤ လၳး န, “ဘူၤစဲၤ꤮ ကှၤ ကှၲုးန ဗး ခိးညှ ဘီ ဗးဖၳ သၴူး တူၤဟီတိၤ အၤခဲးအၴူး,” အၤ ဟၴ လၳး ဖၳနၲုၤ။ 50 ဘူၤစဲၤ ယၴၤဆၳူ ဟၴဆံၤ လၳး န, “ကှၤခၴူး ခၴူးသူ မဴး။ နှဲၤ ဖၳပြှဲၤခၳး ကှံ အိၤမှိၤ ကှၤခၴူး ဒံၤ ပှး။” ရဴ ကၤယး ထွှိး ဒၳၤ အၴူးတၲၤပြှဲၤ ဇှံအၴၤ ယၴၤဆၳူ အၤ တှဲၤဟၴဘဲၤ ရဴ အၤ ကှၤခၴူး ခၴူးသူ ဒၲ အၤဟီၤ။ 51 ဘီ အၤ ကှၤ ဒၲ ကျူလှိၤ အၤခဲးနၲုၤ, အၤ ပြှဲၤမှၴၤတှဲၤဖၳ တၤဟၴၤ ဟူး လှံၤဆံၤ အဲၤ ရဴ အၤ ဟၴဆိၤ လၳး န, “နှဲၤ ဖၳပြှဲၤခၳး အိၤမှိၤ ကှၤခၴူး ဟဴ။” 52 အၤ ဆၳၤဒူး အၤ ပြှဲၤမှၴၤတှဲၤဖၳ အၴူးတၤဟၴၤ န အၤဖၳခၳး အိၤမှိၤ ကှၤခၴူး ခၴူးသူ ဘီခဲးတၴး ရဴ အဲၤသီး ဟၴဆံၤ လၳး န, “အၤ တှဲၤကှၳ တှး ဘီ ပှဟၴနၳၤ မှဴကွှီလှူၤ တၲၤမံး အၤခဲးနၲုၤ။” 53 အၤဖဲး တၤနှၴၤထူၤ တှၲုဘဲၤခၴူး အၤဖၳ တှဲၤကှၳ တှး အၤဆၲုခဲး နၲုၤမၤ, အၤ တိးတံ ဘီ ဘူၤစဲၤ ယၴၤဆၳူ ဟၴ လၳး န, “နှဲၤ ဖၳခၳး ကှံ အိၤမှိၤ ကှၤခၴူး ဒံၤ ပှး ဆၲုခဲး ဘီနၲုၤ။” ဒၲ အၴူး အၤခၳၤအၤခၴူး အဲၤ န အၤ ဟီၤဖၳဖူးဖၳ တၤဟၴၤ ဇှံကှၤညှကှၤ လှဴးပျီး ဘူၤစဲၤ ယၴၤဆၳူ။ 54 အၴူးနၲုၤမၤ ဘူၤစဲၤ ယၴၤဆၳူ အိၤ ဒၲ ယၳဒၤကှၴ ရဴ ထၴၤစၲု ခၴူးသူ ဒၲ ကဲလၤလီၤကှၴ ရဴ အၤ ဒၴူလှၲုး အၤတှဲၤမှၴၤ တၤကျီခိခၴူၤ နၴူးဖှၲုတၲၤဖှၲု အၴူးနၲုၤ ဟဴ။
1 ဖၳနၲုၤထၲုးရဴ, ယၴၤဆၳူ ထၴၤစၲုကူး ဒၲ ကဲလၤလီၤ ထၴူးအဴၤဒၳၤ အၤဘဲရှဲး တၲၤကၴူး။ (အၳး အဲ န ထၴူးအဴၤဒၳၤ တီဘၴၤရီ မၤ အၤမှမှ။) 2 ကၤယး ဘဲမှၳၤ ယိး မူထၴူၤ ထၲုးဟဴ တှဲၤတၤကျီခိခၴူၤ ဒၲ ဘူၤစဲၤ စၲု မှၴၤဆီးမှၴ ပှၴ ကၤယးဆွီ ကၤယးဆဲး တၤဟၴၤ အၤခၳၤအၤခၴူး, အဲၤသီး ကြွိး စၲုပျၳၤစၲုဖဲၤ ကှၲုး လှဴး လၳးခၴူး။ 3 ရဴ ဘူၤစဲၤ ယၴၤဆၳူ ထူၤ ဒၲ ဆိၤလှိၤ ရဴ အဲၤ န အၤ ခိးပၤစှဲ တၤဟၴၤ ထူၤ အိၤနူးအိၤ လၤဟူး ဘီနၲုၤ။ 4 ဘီနၲုၤအၤခဲး ယၳဒၤဖၳ တှဲၤစၲုတၤလွိပွဲၤ အၴူး အၤ ဖံၤ꤮ ဘဲၤ ဟဴ။ 5 ဘီ ဘူၤစဲၤ ယၴၤဆၳူ တှၳမူ ရဴ အၤ မူထၴူၤ ကၤယး တၲၤမှၳၤဒၳၤ ဟူး တိး ဒၲ လၳးအိၤ အၤခဲး, အၤ ဟၴ ခၳးဖီလီၤပၳၤ န, “ပှဲၤ ကှံ စၲု အီၤပြှီၤ တိးပှၴ ကၤယး အၴူးတၤဟၴၤ လှၴအၴၤ ဘီတၴး အၴူး?” 6 အၤ ဆၳၤဒူး မူဘၴူၤပြဲ ခၳးဖီလီၤပၳၤ ပြဲ။ အၤ ကှံရှၴ မှၴၤပှၴ အဲၤသီး ဖၳတၴး ပှးနၲုၤ, အၤ တၤနှၴၤ အိၤနှၴၤ ထၲုးဟဴ ဒၲ အၤ သဲပျဴၤကၳး ဟဴ။ 7 ခၳးဖီလီၤပၳၤ ဟၴဆံၤ န, “ပှဲၤ အီၤပြှီၤ လှဴး ပှၴ စဴ အဲၤသီး န ရံးဇၴူၤ ဒၴၤနၤရီ တၲၤကိၤ ခးလှၴ စဴ မၤ, အဲၤသီး အၴၤ ပြဲ တၲၤပြှဲၤ တၲၤမှံး နၲုး꤮ အၤပဴၤအၴၤတိၤ။” 8 အၤ ခိးပၤစှဲ ဒၲ အၤရှၲုၤ တၲၤပြှဲၤ ဒၲ အၤမွှီၤ န ခၳးအဲၤဒြၳ, အၤ မှဒံၤ ခၳးဆီူမိၤ ပၴၤတၤရၳ အၤပှၲု အၴူးတၲၤပြှဲၤ ဟၴ ဘူၤစဲၤ န, 9 “ပၤစှဲ ပြှဲၤခၳးဖၳ အိၤ ဘီအၴူး တၲၤပြှဲၤ။ အၤခဴမၳး ဒၲ အၳး မှၴၤ န ဘှၲုဘၤလှီၤနၲုၤ အၤ အိၤ ညှးကျှဴ န တှဲးဖၳ နၴူးဘဲၤ။ မၤနရဴ အၤ ကှံ ပဴၤအၴၤ ပၴ ကၤယး ဘပြှဲၤတၴး?” 10 ဘူၤစဲၤ ယၴၤဆၳူ ဟၴ န, “နဴး အိၤနူးအိၤ ကၤယး နၲုၤတၤဟၴၤ,” အၤ ဟၴ ဖၳနၲုၤ။ ခးလှၴ ဘီနၲုၤ တၲၤဖိၤ မၤ မှီၤသၲုးလဲး ဒှၲုးတွှိရူလး။ ရဴ ဆၲုးဆံပြဲ လှဴး꤮ ပြှဲၤခၳးဒၳၤ ဒၲ အၤ အိၤနူးတှး ဘီနၲုၤ တၤဟၴၤနၲုၤ, အၤ ဖံၤ꤮ အိၤဒံၤ ညှးရီ စဴ။ 11 ဘူၤစဲၤ ယၴၤဆၳူ ဖၴူ ခဴမၳး အၴူးတၤဟၴၤ ရဴ အၤ ဟၴဘွီဟၴတၤရၴူးထူၤ စဴမၤရူၤ။ ထၲုးရဴ အၤ ဒၴူတှး န အၤ ခိးပၤစှဲ တၤဟၴၤ ရဴ အဲၤသီး ဇှၳတှး ပှၴလှဴး န ကၤယး အိၤနူးအိၤ ဘီနၲုၤ တၤဟၴၤ။ အၤ ဖၴူကၴၤ တှဲးဖၳဘီ အၴူးနၴူးဘဲၤ ရဴ အၤ မှၴၤ သူကှၲုး ဖၳ ခဴမၳးနၲုၤ။ ရဴ ကၤယး အၴူးတၤဟၴၤ အၤ သဲအၴၤ ကဴ စဴ ဘ꤮ တၴးနၲုၤ အၤ ဖၴူအၴၤ လၤဟူး စဴ။ 12 ဘီ အဲၤသီး အၴၤကဴအိးဘး လှဴးထၲုးဟဴ ပွှိး꤮ တၲၤပြှဲၤ အၤခဲးနၲုၤ, ဘူၤစဲၤ ယၴၤဆၳူ ဟၴ အၤ ခိးပၤစှဲ တၤဟၴၤ န, “ဖၴူဒွိပျဴ လှဴးခၴူး ဆဲၤအၴၤ အိၤလၲကူး နၲုၤတၤဟၴၤ, နဴးအိၤကူးလၲ ဒၴး တဲးမှၴ,” အၤ ဟၴ အဲၤသီး ဖၳနၲုၤ။ 13 ဖၳနၲုၤရဴ အၤ ခိးပၤစှဲ တၤဟၴၤ ဖၴူဒွိ ခဴမၳး ဘၤလှီၤ ညှးကျှဴ ဒၲ အၳး အၴၤ ထၲုးဟဴ ရဴ အၤ အိၤကူးလၲ တၤဟၴၤနၲုၤ အၤ အိၤဘး ပး စဴ န ကြှီနၲုၤ ဆၴူနၴူးမၴး စဴ။ 14 ဘီ ကၤယး အၴူးတၤဟၴၤ မူထၴူၤထၲုး ဘူၤစဲၤ ယၴၤဆၳူ မှၴၤ တှဲၤတၤကျီခိခၴူၤ အၴူးတၤဟၴၤ အၤခဲးနၲုၤ, အဲၤသီး ဟၴ လၤဟူး န, “ပြှဲၤပြှိၤ ဒၲ အၤ ကှံရှၴ ဟူးလှူၤ ဒၲ ဟၴၤခၳၤအၴူး ပှး အၳး ဟၴ နၲုၤမၤ အၤ မှ နူး ဟဴ အဲၤ ဟဴ,” အၤ ဟၴ လၤဟူး ဖၳနၲုၤ။ 15 ဘူၤစဲၤ ယၴၤဆၳူ သဲညၴး န အဲၤသီး ကှံရှၴ ဟူးနဴးဆိူၤ ထူၤထွှိး လၳး န ခွီ အၤခၳၤအၤခၴူး, အၤ စၲုထူၤ ခိကူး ဒၲ ဆိၤခၳၤ တံဒံၤ တၲၤပြှဲၤ ပြဲ။ 16 ဘီ မှဴဟၴလှူၤ ဟဴ အၤခဲးနၲုၤ, အၤ ခိးပၤစှဲ တၤဟၴၤ တှးကၤလှူၤ စၲု လၤဟူး ဒၲ ထၴူးအဴၤဒၳၤထံး။ 17 အဲၤသီး တှး ဆီၤဒူနှီ သဴၤကျၴူး ဘီနၲုၤ ရဴ အၤ ထၴၤစၲု လၤဟူး ဒၲ ဗှီးကၤပၴၤရၤနဴၤ။ ဗှီးအၴူးနၲုၤ အၤ အိၤ ဒၲ ထၴူးအဴၤ ဘဲရှဲး တၲၤကၴူး။ မှဴခီဟဴ တၤဒၲၤရဴ ဘူၤစဲၤ ယၴၤဆၳူ ကှၤတှၲု ကှၲုးဟီ အဲၤသီး တိၤ။ 18 ကှၴလၤသဲ ဒၳၤဟူး ရဴ ထၴူး ဟဟိဒၳၤဟဟိဆဴး ဟူး။ 19 ဘီ အဲၤသီး ခူးစၲုတှၲု ဟဴ သၲုးမီလၴၤ, လွှီးမီလၴၤ ဟဴ အၤခဲးနၲုၤ, အဲၤသီး မူထၴူၤ ဘူၤစဲၤ ယၴၤဆၳူ စၲု ဒၲ ထၴူးခၳၤ ရဴ ဟူးဖံၤတိး အဲၤသီး သဴၤကျၴူး။ ရဴ အဲၤသီး သဲအီၤဆၴး တၤရှဴၤသဲ လှဴးပျီး စဴ လၳးလှၴ။ 20 ရဴ ဘူၤစဲၤ ယၴၤဆၳူ ဟၴ အဲၤသီး န, “ဗးပြဲ! သဲအီၤဆၴး လၤဟူး တဲးမှၴ။” 21 အၴူးတၲၤဖှၲုရဴ အဲၤသီး သဲကြှံးသဲလှဴး အဲဆံၤ လၤဟူး ယၴၤဆၳူ ဒၲ သဴၤကျၴူးကၳး။ ရဴ တၲၤဖှၲုတၲုး, သဴၤကျၴူးအၴူး စၲုတှၲု ညၴး ဒၲ ထၴူးထံး ဘီ အဲၤသီး လှၴစၲုအၴူး တၲၤဖိၤ။ 22 ဆၴူပၤရိး တၲၤညၴးနၲုၤ, ကၤယး ဘဲမှၳၤ ဒၲ အၤ အိၤကူး ဒၲ ထၴူးအဴၤဒၳၤ ဘဲရှဲး တၲၤကၴူး တၤဟၴၤ သဲညၴး န ဒၲ ပှဟၴနၳၤခဲး နၲုၤ သဴၤကျၴူး အိၤကူးပြဲ တၲၤဘဲၤ ပြဲ။ ရဴ ဘူၤစဲၤ အၤ ခိးပၤစှဲ တၤဟၴၤ ဆီၤဒူနှီ လၤဟူး သဴၤကျၴူး နၲုၤတၲၤဘဲၤ ရဴ အၤ ထၴၤစၲု နှီဒၴူဒံၤ လၤဟူး ပြဲ။ ကၤယး ဘဲမှၳၤ တၤဟၴၤ သဲညၴး န ဘူၤစဲၤ ယၴၤဆၳူ ဆီၤဒူစၲု တှၲကှၲုး န အၤ ခိးပၤစှဲ နၲုၤတၤဟၴၤ တိၤ, အဲၤသီး ထၴၤစၲု နှီဒၴူဒံၤ လၤဟူး ပြဲ။ 23 ထၲုးရဴ သဴၤကျၴူး အိၤ ဒၲ ဗှီးတီဘၴၤရီ ရဴ အၤ ဟူး တၤဟၴၤနၲုၤ, အၤ ဟူး အိၤကှၲု ဖံၤ လၤဟူး ဘီ ဘူၤစဲၤ လှၴ ဟၴဘွီဟၴတၤရၴူး ထူၤ စဴမၤရူၤ ရဴ အၤ ဘှၲုၤအၴၤ ကၤယး ဘဲမှၳၤ တၤဟၴၤ န ခဴမၳး အၤခးလှၴ နၲုၤတၲၤဖိၤ။ 24 ဘီ ကၤယး ဘဲမှၳၤ တၤဟၴၤ မူထၴူၤ ပှး ဘူၤစဲၤ ယၴၤဆၳူ န အၤ ခိးပၤစှဲ တၤဟၴၤ ဘီနၲုၤ တိၤ အၤခဲး, သူဖၳ အဲၤသီး ကှံ စၲု မူပှၳး မူထၴူၤ ဘူၤစဲၤ ယၴၤဆၳူ အၤညၴးနၲုၤ, အဲၤသီး နှၲုး လၤဟူး ဒၲ သဴၤကျၴူး တၤဟၴၤ အၤကၳး ရဴ ထၴၤစၲု လၤဟူး ဒၲ ဗှီးကၤပၴၤရၤနဴၤ။ 25 ဘီ အဲၤသီး စၲု မူထၴူၤဟဴ ယၴၤဆၳူ ဒၲ ထၴူးအဴၤဒၳၤ ဘဲရှဲး အၤခဲးနၲုၤ, အၤ ဆၳၤဒူး လၳး န, “ရၤဘီ, နှဲၤ ဟူးတှၲု ဘီအၴူး ဘဴခဲးတၴး?” 26 ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး ဟၴစဴစဴ သီး, သီး မူထၴူၤ ဗး မှၴၤ တှဲၤတၤကျီခိခၴူၤ ရဴ သီး ပှၳး ဗး မှတိၤ။ သီး အၴၤကဴ ခဴမၳး ရဴ သီး ပှၳး ဗး ပြဲ။ 27 စၴူပြၴူး ရှူၤပှၴ တဲး ဆဲၤအၴၤ လှၴအၴၤလှၴအိး ဒၲ အၤ နှၲုၤသၲုၤ အၤ သဴးပၴူ စှူ နၲုၤတၤဟၴၤ အၤညၴး တဲးမှၴ။ စၴူပြၴူး ရှူၤပှၴ ဆဲၤအၴၤဆဲၤအိး ဒၲ အၤ ကှံ ဒၴူ သီး သဲထွှိးပြှဲၤ တၤစှၳပြှဲၤ အၴူးတၤဟၴၤ အၤညၴးနၲုၤ။ ပြှဲၤလှၳၤကၤယး အၤဖၳခၳးအၴူး, အၤ ကှံ ဒၴူ အၳး ဆဲၤအၴၤ ဖၳနၲုၤ တၤဟၴၤ ပှး, မှၴၤတၴးဟၴရဴ ဖဲး စဴမၤရူၤ ဒၴူလှၲုး ဟဴ န အၤ သဲပျဴၤအိၤ ဟဴ လၳး ဟဴ။” 28 ရဴ အဲၤသီး ဆၳၤဒူး လၳး န, “ကီၤ ဟၴဖၳနၲုၤ ရဴ, သူဖၳ ပှဲၤ ကှံ မှၴၤတိး စဴမၤရူၤ အၤသဲပျဴၤ ရဴ ပှဲၤ ဘဲၤမှၴၤ ကြူ꤮ မၤအီးတၴး?” 29 ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ဇှံအၴၤ လၤဟူး ဗး ဒၲ စဴမၤရူၤ နဴးဟူး အဲၤ အၴူးနၲုၤ။” 30 ဖၳနၲုၤရဴ အဲၤသီး ဆၳၤဒူး လၳး န, “သူဖၳ ပှဲၤ ကှံ မူထၴူၤ တှဲၤတၤကျီခိခၴူၤ ရဴ ပှဲၤ ကှံ ဇှံအၴၤ အၤညၴးနၲုၤ, နှဲၤ ကှံ ဒၴူလှၲုး ပှၴ ပှဲၤ တှဲၤတၤကျီ အီးတၴးတၴး ပှး? နှဲၤ ကှံ မှၴၤပှၴ ပှဲၤ မၤတၴးပှး အၴူး? 31 ဖၳ လီၤစးဆဲးကၳး ဟၴ န, ‘အၤ ဒၴူအၴၤ အဲၤသီး န ဆဲၤအၴၤ အိၤ ဒၲ မှဴခၳၤ ဟူးလှူၤ တၤဟၴၤ,’ လီၤစးဆဲးကၳး ဟၴဖၳနၲုၤ ရဴ, ပှဲၤဖၴူးပှဲၤဖှၲုး ဒၲ꤮ ညၴနၳၤ တၤဟၴၤ အၴၤ လၤဟူး ခဴမၳး ဒၲ အၳး အဲ န မၤန ဒၲ ကှၴဆဲးထၴူးကူၤ လှဴတၤမခၳၤ နၲုၤ။” 32 ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး ဟၴစဴစဴ သီး, ဆဲၤအၴၤ အိၤဒၲ မှဴခၳၤ ဟူးလှူၤ နၲုၤမၤ, ခၳးမဴစဲ ဒၴူအၴၤ အဲၤသီး မှတိၤ။ ဗးဖဲး ဒၴူအၴၤ အဲၤသီး ပြဲ။ ခိးညှရဴ အၤ ကှံ ဒၴူအၴၤ ဟဴ သီး ဆဲၤအၴၤ မှလၤကိး ဒၲ အၤ အိၤ ဒၲ မှဴခၳၤ ဟူးလှူၤ အၴူးနၲုၤ ပှး။ 33 မှၴၤတၴးဟၴရဴ စဴမၤရူၤ အၤဆဲၤအၴၤ မှလၤကိး မၤ အၤ အိၤ ဒၲ မှဴခၳၤ ဟူးလှူၤ ရဴ အၤ ဒၴူ ပှၴ ပြှဲၤလှၳၤ ဟၴၤခၳၤဖၳ သဲထွှိးပြှဲၤ နၲုၤတၲၤပြှဲၤ ဟဴ,” အၤ ဟၴ အဲၤသီး ဖၳနၲုၤ။ 34 ရဴ အဲၤသီး ဟၴ န, “ဘူၤစဲၤ, ပွှိး꤮ ညၴးညၴး꤮ ဒၴူ ပှၴ ပှဲၤ ဆဲၤအၴၤ အၴူးနၲုၤ။” 35 ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး မၤ ဆဲၤအၴၤ ဒၲ အၤ ဒၴူ အၳး သဲထွှိးပြှဲၤ ဟဴ။ ကၤယး ဒၲ အၤ ဟူးတိး ဒၲ ဗးအိၤ နၲုၤ, အၤ သဲဗှီးသဲအၴၤ ပှး တၲၤဖှၲု꤮ တိၤ။ ကၤယး ဒၲ အၤ ဇှံအၴၤ ဗး နၲုၤ, အၤ သဲအိးပှး တၤခူ꤮ တိၤ။ 36 မၤနရဴ, ဖၳ ဗး ဟၴထၲုးဟဴ သီးနၲုၤ, သီး မူထၴူၤ စဴ ဗး တၤဒၲၤရဴ သီး ဇှံအၴၤ ဗး တိၤ။ 37 လှဴး꤮ ကၤယး ဒၲ ဗးဖဲး ဒၴူ ဗး တၤဟၴၤနၲုၤ, အၤ ကှံ ဟူး ဒၲ ဗးအိၤ ပှး။ အၳးပၴးပၴး꤮ ဘဲၤဘဲၤ, အၤ ကီၤ ဟူး ဒၲ ဗးအိၤ နၲုၤ, ဗး ဗှဲထၴၤကူး နှ အဲၤ တၤကီၤ꤮ တိၤ။ 38 မှၴၤတၴးဟၴရဴ ဗး အိၤဒၲ မှဴခၳၤ ဟူးလှူၤ ရဴ ဗး ဟူးမှၴၤ စှၳ꤮ ဒံၤ ဗး သဲပျဴၤ ဖၳနၲုၤ မှတိၤ။ ဗး ဟူးမှၴၤ ဖၳ ပြှဲၤ ဒၲ အၤ နဴးဟူး ဗး အၴူးတၲၤပြှဲၤ အၤ တှဲၤသဲဇှံ နၲုၤပြဲ။ 39 တှဲၤ ဒၲ အၤတိး ပြှဲၤ ဒၲ အၤ နဴးဟူး ဗး အၴူးတၲၤပြှဲၤ အၤသဲပျဴၤ မၤ မးတၴး ဟၴနၲုၤမၤ, လှဴး꤮ ကၤယး ဒၲ အၤ ဒၴူ ဗး နၲုၤတၤဟၴၤ ဗး ဘဲၤပျွိး လၤမှၴကူးနှီ အဲၤသီး တိၤ။ ဆၴူ꤮ မှဴညၴး ဒၲ ခၴူးတၤဒံၤလၲ တၲၤညၴး ပှးနၲုၤ, ဗး ဘဲၤမှၴၤ အီၤထဴၤထွှိးပြှဲၤ ကှၤခၴူး အဲၤသီး ပှး။ 40 မှၴၤတၴးဟၴရဴ, ဗးဖဲး အၤ တှဲၤသဲဇှံ မၤ မှဟဴ လှဴး꤮ ကၤယး ဒၲ အၤ မူထၴူၤ အၤဖၳခၳး အၴူး ရဴ အၤ ဇှံအၴၤ တၤဟၴၤနၲုၤ, အၤ ကှံ နှီဘဲၤ သဲထွှိးပြှဲၤ တၤစှၳပြှဲၤ, ရဴ ဗး ကှံ မှၴၤ အီၤထဴၤထွှိးပြှဲၤ ကှၤခၴူး အဲၤသီး ဆၴူ꤮ မှဴညၴး ဒၲခၴူး တၤဒံၤလၲ နၲုၤတၲၤညၴး ပှး။” 41 “ဗး မၤ ဆဲၤအၴၤ အိၤဒၲ မှဴခၳၤ ဟူးလှူၤ,” ဘူၤစဲၤ ယၴၤဆၳူ ယိး ဟၴ ဖၳနၲုၤ အၤခၳၤအၤခၴူး, ယၳဒၤဖၳ တၤဟၴၤ တၤမွှိးတၤလဲး လှဴးပျီး လၳး။ 42 အဲၤသီး ဟၴ လၤဟူး န, “အဲၤ မၤ ဖဲးစိူစဲ အၤဖၳခၳး ယၴၤဆၳူ ဟၴနၲုၤ တၲၤပြှဲၤ ပြဲ ဗးဟၴတိၤ? အၤမှၲုအၤဖဲး မၤ ပှဲၤ သဲညၴး ပြဲ ဗးဟၴ? မၤမှၴၤတၴးရဴ အၤ စၲု ဟၴတှၲု နှီဒၴူ အၤနှၴ န, ‘ဗး အိၤ ဒၲ မှဴခၳၤ ဟူးလှူၤ’ ဖၳတၴး?” 43 ဘူၤစဲၤ ယၴၤဆၳူ ဟၴဆံၤ အဲၤသီး န, “တၤမွှိးတၤလဲး ပှး တဲး လၤဟူး တဲးမှၴ။ 44 ကီၤ မှ န ဗးဖဲး ဒၲ အၤ နဴးဟူး ဗးအၴူး တၲၤပြှဲၤ ကှံ နဴးဟူး အၳး ဒၲ ဗးအိၤ တိၤ ဟၴနၲုၤ, အၳး ဟူးဘဲ ဒၲ ဗး အိၤ တၲၤပြှဲၤ꤮ တိၤ။ ကၤယး ဒၲ အၤ ဟူး ဒၲ ဗးအိၤ တၤဟၴၤနၲုၤ, ဗး ကှံ မှၴၤ အီၤထဴၤထွှိးပြှဲၤ ကှၤခၴူး အဲၤသီး ဆၴူ꤮ မှဴညၴး ဒၲခၴူး တၤဒံၤလၲ တၲၤညၴး ပှး။ 45 ပြှဲၤပြှိၤ တၤဟၴၤ ရးအိၤကူး န, ‘စဴမၤရူၤ ကှံ အီၤသိူအီၤသူး အဲၤသီး လှဴး꤮ ပျီး ပှး။’ လှဴး꤮ ကၤယး ဒၲ အၤ နှီဟၲုး ဖဲး အၤ တှဲၤအီၤသိူအီၤသူး ရဴ အၤ ဟူး အီၤသိူအီၤသူး တှဲၤ ဒၲ လၳးအိၤ တၤဟၴၤနၲုၤ, အၤ ကှံ ဟူး ဒၲ ဗးအိၤ ပှး။ 46 ကၤယး မူထၴူၤနဴ ဖဲး စဴမၤရူၤ တၲၤပြှဲၤပြှဲၤ, ဗး သဲဇှံ ဟၴ ဖၳနၲုၤ မှတိၤ။ အၳး မူထၴူၤနဴ ဖဲး တၲၤပြှဲၤ꤮ တိၤ, မူထၴူၤနဴ ဖဲး မၤ တံပြဲ အၤ အိၤ ဒၲ စဴမၤရူၤ အၤ အိၤ ရဴ အၤ ဟူးလှူၤ နၲုၤတၲၤပြှဲၤ ပြဲ။ 47 ဗး ဟၴစဴစဴ သီး, ကၤယး ဒၲ အၤ ဇှံအၴၤညှအၴၤ ဗး တၲၤပြှဲၤပြှဲၤ နၲုၤ, အၤ ကှံ နှီဘဲၤဟဴ သဲထွှိးပြှဲၤ တၤစှၳပြှဲၤ ဟဴ။ 48 ဗး မၤ ဆဲၤအၴၤ ဒၲ အၤ ဒၴူ အၳး သဲထွှိးပြှဲၤ။ 49 သီး ဖၴူးဖှၲုး ဒၲ꤮ ညၴနၳၤ တၤဟၴၤ အၴၤ ခဴမၳးမၤန တၤဒၲၤရဴ အၤ သၴူးပး လၤဟူး ပြဲ။ 50 မၤနရဴ, ဆဲၤအၴၤ အိၤ ဒၲ မှဴခၳၤ ဟူးလှူၤ ဗး ဟၴ သီး နၲုၤမၤ, အၤ အိၤ ဘီအၴူး။ အၳးပၴးပၴး꤮ ဘဲၤဘဲၤ အၤ ကီၤ အၴၤ ဆဲၤအၴၤအၴူး ဟၴနၲုၤမၤ, အၤ သၴူး ပှးတိၤ။ 51 ဗး မၤ ဆဲၤအၴၤ ဒၲ အၤ ဒၴူအၳး သဲထွှိးပြှဲၤ ရဴ အၤ အိၤ ဒၲ မှဴခၳၤ ဟူးလှူၤ။ အၳးပၴးပၴး꤮ ဘဲၤဘဲၤ, အၤ ကီၤ အၴၤ ဆဲၤအၴၤ အၴူးနၲုၤ, အၤ ကှံ ထွှိးပြှဲၤ တၤစှၳပြှဲၤ ပှး။ ဆဲၤအၴၤ အၴူးနၲုၤမၤ မှဟဴ ဗးဇၴူၤ အၴူးနၲုၤ ဟဴ။ သူဖၳ ပြှဲၤလှၳၤ ဟၴၤခၳၤဖၳ ကှံ ထွှိးပြှဲၤ အၤညၴးနၲုၤ ဗး ဒၴူလှူၤကူး ဗး နှၴကျဴ အၴူး ဒၲ အဲၤသီးညၴး ဟဴ။” 52 ယၳဒၤဖၳ တၤဟၴၤ ကြၴသၴူးကြၴအိၤ နှီဒၴူလၳး န, “အၤ စၲု ဒၴူအၴၤ စှူ ပှဲၤ န အၤဇၴူၤ ဖၳတၴး?” 53 ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး ဟၴစဴစဴ သီး, သီး ကီၤ အၴၤ ပြှဲၤလှၳၤကၤယး အၤဖၳခၳး အၴူး အၤဇၴူၤ တိၤ, သီး ကီၤ အိး လၳးသွီၤ တိၤ ဟၴနၲုၤ, သဲထွှိးပြှဲၤ အိၤ ဒၲ သီးကၳး တိၤ။ 54 မၤနရဴ ကၤယး ဒၲ အၤ အၴၤ ဗးဇၴူၤ အိး ဗးသွီၤ တၤဟၴၤနၲုၤ, အၤ နှီဘဲၤ သဲထွှိးပြှဲၤ တၤစှၳပြှဲၤ, ရဴ ဆၴူ꤮ မှဴညၴး တၤဒံၤ ဒၲ ခၴူးလၲ တၲၤညၴး ပှးနၲုၤ, ဗး ကှံ မှၴၤထွှိးပြှဲၤ အီၤထဴၤကှၤခၴူး လၳး ပှး။ 55 မှၴၤတၴးဟၴရဴ ဗးဇၴူၤ မၤ လှၴအၴၤ မှလၤကိး, ဗးသွီၤ မၤ လှၴအိး မှလၤကိး ဟဴ။ 56 ကၤယး ဒၲ အၤ အၴၤ ဗးဇၴူၤ အိး ဗးသွီၤ တၲၤပြှဲၤပြှဲၤ နၲုၤ, အၤ အိၤထွှိးပြှဲၤ ဒၲ ဗးကၳး, ရဴ ဗး အိၤထွှိးပြှဲၤ ဒၲ အဲၤကၳး ဟဴ။ 57 ဖၳ ဗးဖဲး ဒၲ အၤ နဴးဟူး ဗးအၴူး တၲၤပြှဲၤ ထွှိးပြှဲၤ နၲုၤ, ဒၲ အဲၤခၳၤအဲၤခၴူး ရဴ ဗး ထွှိးပြှဲၤ ကှၲုး။ ဖၳနၲုၤရဴ ကၤယး ဒၲ အၤ အၴၤ ဗးဇၴူၤ တၲၤပြှဲၤပြှဲၤ နၲုၤ, ဒၲ ဗးခၳၤဗးခၴူး ရဴ အၤ ကှံ ထွှိးပြှဲၤ ကှၲုး ပှး။ 58 အၴူးမၤ ဆဲၤအၴၤ အိၤဒၲ မှဴခၳၤ ဟူး ဟဴ။ သီးဖၴူးသီးဖှၲုး မၳ꤮ နၳၤခဲး တၤဟၴၤ အၴၤ ခဴမၳးမၤန တၤဒၲၤရဴ အၤ သၴူး လၤဟူး ပြဲ။ မၤနရဴ ကၤယး ဒၲ အၤ အၴၤ ဆဲၤအၴၤ ဒၲ ဗး ဟၴ ပှၴ သီး ခိးညှ အၴူးတၤဟၴၤနၲုၤ အၤ ကှံ ထွှိးပြှဲၤ တၤစှၳပြှဲၤ ပှး။” 59 ဘီ အၤ အီၤသိူတှး အၳး ဒၲ ဗှီးကၤပၴၤရၤနဴၤ တှဲၤစဴဘဲး ဟိးကၳး အၤခဲးနၲုၤ, အၤ ဟၴ အၳး ဖၳနၲုၤ။ 60 အဲၤသီး နှီဟၲုး ဘူၤစဲၤ ယၴၤဆၳူ ဟၴဖၳနၲုၤ ရဴ, အၤ ခိးပၤစှဲ အဲပြှဲၤ ဟၴ လၤဟူး န, “အၤ တှဲၤအီၤသိူ အၴူး အၤပှူ နူၤစဴ။ အၳးပၴး တၲၤပြှဲၤ ကှံရှၴ ဇှံအၴၤဖၴူဆံၤ ဘဲကှၲုး အၤ တှဲၤအီၤသိူအၴူး ပၴး?” 61 အၤ ခိးပၤစှဲ တၤဟၴၤ တၤမွှိးတၤလဲး လၤဟူး ဖၳအၴူးနၲုၤ အၤ သဲညၴး အၤခၳၤအၤခၴူး, အၤ ဟၴ အဲၤသီး န, “ဗး ဟၴ ဖၳအၴူး ရဴ သီး သဲပျဴၤပၴူ လှဴး လၤဟူး န ဗး တှဲၤအီၤသိူ အၴူးတၤဟၴၤ ဟဲး? 62 ကီၤ မှၴၤဖၳနၲုၤ ဟၴရဴ, သီး မူထၴူၤ ပြှဲၤလှၳၤကၤယး အၤဖၳခၳးအၴူး ကှံ ကှၤကၤထူၤ ခၴူးသူ ဒၲ အၤခးလှၴ လှၴအိၤ ပှး ဟၴရဴ, သီး ကှံ တၤနှၴၤ လၤဟူး ဖၳတၴး ပှး? 63 သဲစးဆဲး ဘူၤစဲၤ နၲုၤ အၤ ဒၴူ သဲထွှိးပြှဲၤ တၤစှၳပြှဲၤ။ ပြှဲၤလှၳၤကၤယး နၲုၤ, အၤ ဒၴူ စှူ သဲထွှိးပြှဲၤ တၤစှၳပြှဲၤ တိၤ။ ငှိ ဒၲ ဗး ဟၴဘဲၤ သီး အၴူးတၤဟၴၤ နၲုၤမၤ, သဲစးဆဲး ဘူၤစဲၤ အၤ တှဲၤဟၴဘဲၤ တၤဟၴၤ ရဴ အၤ ဒၴူဘဲ အၳး သဲထွှိးပြှဲၤ တၤစှၳပြှဲၤ။ 64 မၤနရဴ ဒၲ သီးကျဲး နၲုၤ, ကၤယး ဒၲ အၤ ဇှံအၴၤ ကှၲုးအၳး တိၤနၲုၤ အၤ အိၤ တၤဟၴၤ။” မှၴၤတၴးဟၴရဴ ဘူၤစဲၤ ယၴၤဆၳူ သဲညၴး ပး စဴ ဒၲ အၤခးဆၴူ န, ဒၲ အဲၤသီးကျဲး နၲုၤ အၤ ဇှံအၴၤ လၳး တိၤ, ရဴ အၤ ကှံ အီၤဆဲးတှးကူး လၳး ပှးနၲုၤ အၤ အိၤတၲၤပြှဲၤနၲုၤ, အၤ သဲညၴး ရဴ အၤ ဟၴ အဲၤသီး ဖၳနၲုၤ ပြဲ။ 65 အၤ ဟၴ ပျၴၤဟူး ပှိ န, “ဒၲ သီးကျဲးနၲုၤ ကၤယး ဇှံအၴၤ ဗး တိၤ အိၤတၤဟၴၤ, တံရဴ ဗး ဟၴ ဟဴ သီး န, ဖဲး ကီၤ နဴးဟူး အၳး ဒၲ ဗးအိၤ တိၤ ဟၴနၲုၤ အၳး ဟူးဘဲ ဒၲ ဗးအိၤ တၲၤပြှဲၤ꤮ တိၤ, ဖၳနၲုၤ ဟဴ။” 66 စထူၤ ဘီနၲုၤ ရဴ အၤ ခိးပၤစှဲ တၤဟၴၤ ကှၤကူး အဲလး ရဴ ကြွိးကှၲုး ပှး လၳးခၴူး တိၤ။ 67 ရဴ အၤ ဆၳၤဒူး အၤ ခိးပၤစှဲ ဆၴူသဲနၴူး အၴူးတၤဟၴၤ န, “သီးလၴး, သီး သဲဇှံ ထၴၤကှၤကူး ကှၲုး ဗးလှၴ ဖၳနၲုၤ ဗးဟၴတိၤ?” အၤ ဟၴ အဲၤသီး ဖၳနၲုၤ။ 68 ခၳးဆီူမိၤ ပၴၤတၤရၳ ဟၴ ကှၤခၴူးဆံၤ လၳး န, “ဘူၤစဲၤ, ပှဲၤ ကှံရှၴ စၲုတိး ကှၲုး အၳးပၴး? တှဲၤအီၤသိူအီၤသူး ဒၲ အၤ ဒၴူ ပှဲၤ သဲထွှိးပြှဲၤ တၤစှၳပြှဲၤ နၲုၤ အၤ အိၤ ပြဲတံ ဒၲ နှဲၤအိၤ ပြဲ။ 69 ပှဲၤ ဇှံအၴၤ ရဴ ပှဲၤ သဲညၴး န နှဲၤ မၤ စဴမၤရူၤ အၤ ပြှဲၤစးဆဲးဖၳ တၲၤပြှဲၤ, ရဴ အၤ နဴးဟူးလှူၤ နှဲၤ ဟဴ။” 70 ထၲုးရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး နွိထူၤ ထၲုးဟဴ သီး ဆၴူသဲနၴူး, မှတိၤ ဟဲး? မၤနရဴ, ဒၲ သီးကျဲး နၲုၤ, ခီးနၴရီၤစှူ ခၳၤကျဴ အိၤတၲၤဒှၲုး,” အၤ ဟၴ အဲၤသီး ဖၳနၲုၤ။ 71 (အၤ ဟၴ ဖၳအၴူးမၤ အၤ သဲဇှံ ဟၴ ဖဲးဆီူမိၤ အီၤစၤကရီယိၤ အၤဖၳခၳး ခၳးယၳဒၤ။ အဲၤ မၤ အၤ အိၤတှၲကှၲုး ဒၲ ဆၴူသဲနၴူးအၴူး အၤကျဲး တၤဒၲၤရဴ ဒၲခၴူးနၲုၤ အၤ အီၤဆဲးတှးကူး ဘူၤစဲၤ ယၴၤဆၳူ။)
1 ဘူၤစဲၤ ယၴၤဆၳူ ဟၴထၲုး ဖၳအၴူး ရဴ, အၤ စၲု ဒၲ ကဲလၤလီၤကှၴ ရဴ, အၤ လၴး တၲၤဒဴး ထၲုး တၲၤဒဴး ဘီနၲုၤ။ ယၳဒၤဖၳ ခၳၤကျဴခၳၤကျူး တၤဟၴၤ ယိး မူပှၳး မှၴၤသၴူး လၳး အၤခၳၤအၤခၴူး, အၤ သဲဇှံ စၲု ဒၲ ယၳဒၤ ကှၴကၳး တိၤ။ 2 မၤနရဴ, ဘီနၲုၤခဲး, ယၳဒၤဖၳ အၤပွဲၤ အီၤဆဴလှၴသံၤ ကှံရှၴ ဘဲၤ နၲုၤ အၤ ဖံၤဟူး ဟဴ။ 3 ဖၳနၲုၤရဴ ဘူၤစဲၤ ယၴၤဆၳူ အၤ ပှၲုပြှဲၤခၳး တၤဟၴၤ ဟၴ လၳး န, “သူဖၳ နှဲၤ ခိးပၤစှဲ တၤဟၴၤ ကှံ မူထၴူၤကှၲုး နှဲၤ မှၴၤ တှဲၤတၤကျီခိခၴူၤ တၤဟၴၤ အၤညၴးနၲုၤရဴ, နှဲၤ တိးကဴၤ ထၴၤစၲု ခိကူး န ဘီအၴူး ရဴ စၲု ဒၲ ယၳဒၤ ကှၴကၳး နၲုၤ။ 4 ကၤယး ဒၲ အၤ သဲဇှံ မွှီၤ လှၲုးထၴူးလှၲုးကှၴ ဟၴနၲုၤမၤ, အၤ မှၴၤဟၲုၤမှၴၤသွဲ တှဲၤ တၲၤပြှဲၤ꤮ တိၤ။ နှဲၤ ကီၤ မှၴၤနူး ဟဴ တှဲၤတၤကျီခိခၴူၤ ဖၳနၲုၤတၤဟၴၤ ဟၴရဴ ဒၴူလှၲုး ပှၴ ကှၲုးအၳး နှဲၤနှၴ န ဟၴၤခၳၤ တၲၤဘၤလှဴး နၲုၤ ကိးကိး။” 5 မှၴၤတၴးဟၴရဴ ဘူၤစဲၤ အၤ ပှၲုပြှဲၤခၳး နှီဒၴူဒံၤ တၤဟၴၤစဴနၲုၤ꤮, အၤ ဇှံအၴၤ လၳး တိၤ။ 6 အၤ ဟၴ လၳး ဖၳနၲုၤ အၤခၳၤအၤခၴူး, ဘူၤစဲၤ ယၴၤဆၳူ ဟၴ အဲၤသီး န, “ဆၲုခဲးတိး ဆၲုခဲးဘဲၤနၲုၤ အၤ ဟူးတှၲု ဒၲ ဗးညၴး ဟီတိၤ။ မၤနရဴ ဒၲ သီးညၴးနၲုၤ သီးစၲုသီးကှၤ ဘီခဲးတၴး မၤ အၤနှီ ပြဲ။ 7 ပြှဲၤလှၳၤ ဟၴၤခၳၤဖၳ တၤဟၴၤ သဲထၴၤ စှူ သီး တိၤ။ မၤနရဴ အၤ သဲထၴၤ လၤဟူး ဗး, မှၴၤတၴးဟၴရဴ ဗး ယိး ဟၴထၴၤလှၲုး အဲၤသီး မှၴၤ တှဲၤမၳးမှူ တၤဟၴၤ နၲုး꤮။ 8 စၲုဒံၤမဴး လၤဟူး ဒၲ ပွဲၤကၳး နၲုၤ။ ဗး စၲု ဟီတိၤ, မှၴၤတၴးဟၴရဴ ဆၲုခဲးတိး ဆၲုခဲးဘဲၤ ဟူးတှၲု ဒၲ ဗးညၴး ဟီတိၤ။” အၤ ဟၴဆံၤ အၤပှၲု သီးတၤဟၴၤ ဖၳနၲုၤ။ 9 ဘူၤစဲၤ ယၴၤဆၳူ ဟၴထၲုး ဖၳအၴူး ရဴ အၤ အိၤကူး ဘီ ကဲလၤလီၤ ကှၴကၳး နၲုၤ။ 10 မၤနရဴ ဘီ အၤ ပှၲုပြှဲၤခၳး တၤဟၴၤ ထၴၤစၲုကူး ထၲုးဟဴ အၤခဲးနၲုၤ, အၤ ထၴၤ စၲုဟၲုၤစၲုသွဲ ကှၲုး ဒၲခၴူး, အၤ စၲုလှစၲုလီး တိၤ။ 11 ယၳဒၤဖၳ ခၳၤကျဴခၳၤကျူး တၤဟၴၤနၲုၤ, “ယၴၤဆၳူ အိၤတိး ဘီတၴး?” အၤ မူပှၳး ဆၳၤဒူး လၤဟူး လၳး ဖၳနၲုၤ။ 12 ကၤယး ဘဲမှၳၤ တၤဟၴၤ ဒၲၤညးဟၲုၤ ဒၲၤညးသွဲ အဲနူၤစဴ လၳးရီၤလၳးကူး။ တၤဟၴၤဟၴၤနၲုၤ, အၤ ဟၴ လၤဟူး န, “အဲၤ မၤ ကၤယး ရူ ပြဲ။” အၤခိးရှၲုၤ တၤဟၴၤ ဟၴဆံၤ န, “အၤရူ မှတိၤ။ အၤ ပှၳး အီၤလိၤလၤဟိး အၳး ပြဲ,” အၤ ဟၴ လၤဟူး ဖၳနၲုၤ။ 13 အၳး ယိး သဲအီၤဆၴး လၤဟူး ယၳဒၤဖၳ ခၳၤကျဴခၳၤကျူး တၤဟၴၤ ရဴ အၳး ဟၴလှဟၴလီး ဆံၤဘံၤ တၲၤပြှဲၤ꤮ တိၤ။ 14 ဘီ အၳး ပွဲၤ ဖံၤ꤮ ကျးမၴးဟဴ အၤခဲးနၲုၤ, ဘူၤစဲၤ ယၴၤဆၳူ စၲုထူၤနှၲုး ဒၲ တှဲၤလၳးတူး ဟိးကၳး ရဴ အၤ စထူၤ အီၤသိူအီၤသူး အၳး ဘီနၲုၤ။ 15 ယၳဒၤဖၳ ခၳၤကျဴခၳၤကျူး တၤဟၴၤ ခၴူသၳၤခၴူသဲ ရဴ အၤ ဟၴ လၤဟူး န, “အၤ ထူၤဒူနဴ ကှၲုးအၳး ဒၲ ယၳဒၤဖၳ သိူလီၤဟိး အၤ သရဒၳၤ တၤဟၴၤ အၤ ကၤဒးကၳး တိၤ တၤဒၲၤရဴ အၤ စၲု သဲညၴး အဲနူၤစဴ ဘအၴူး နၲုၤမၤ အၤ စၲု အီၤသိူနှီတိး ဘီတၴးတၴး?” 16 ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး အီၤသိူ အၳး အၴူးတၤဟၴၤ နၲုၤမၤ ဗး တှဲၤအီၤသိူအီၤသူး နှီဒံၤ မှတိၤ။ တှဲၤအီၤသိူ အၴူးတၤဟၴၤ နၲုၤမၤ အၤ ဟူး ဒၲ စဴမၤရူၤ ဒၲ အၤ နဴးဟူး ဗးအၴူး တၲၤပြှဲၤ အၤ အိၤ။ 17 ကၤယး တၲၤပြှဲၤပြှဲၤ ကီၤ သဲဇှံ လှံၤမှၴၤတိး စဴမၤရူၤ အၤသဲပျဴၤ ဟၴနၲုၤ, တှဲၤအီၤသိူအီၤသူး အၴူးတၤဟၴၤ နၲုၤမၤ အၤ အိၤ ဒၲ စဴမၤရူၤ အၤ အိၤဟူး ဟဲး? မှတိၤရဴ ဗး ဟၴဘဲၤ နှီဒၴူဒံၤ န ဗး တၤရၴူးဆိူၤဆဴး ဟဲး, နၲုၤ အၤကျူ သဲညၴး နူး ပြဲ။ 18 ကၤယး ဒၲ အၤ ဟၴဘဲၤ နှီဒၴူဒံၤ န အၤ တၤရၴူးဆိူၤဆဴး တၲၤပြှဲၤပြှဲၤ နၲုၤ, အၤ သဲဇှံ နဴးထၳၤသဲနှီ အၳး န အၤနှၴ ပြဲ။ မၤနရဴ ကၤယး ဒၲ အၤ သဲဇှံ နဴးထၳၤသဲနှီ အၳး န ပြှဲၤ ဒၲ အၤ နဴးဟူး လၳး အၴူးတၲၤပြှဲၤပြှဲၤ နၲုၤ, အၤ ဟၴဘဲၤစဴ ပြဲ, အၤ လၤဟိးလၤဟူၤ အၳး တိၤ။ 19 ခၳးမဴစဲ ဒၴူဟဴ သီး တှဲၤသိူတှဲၤသူၤ ဗးဟၴတိၤ? မၤနရဴ သီး လှံၤကြွိးမှၴၤ ကှၲုး တှဲၤသိူတှဲၤသူၤ တၲၤပြှဲၤ꤮ တိၤ။ သီး ပှၳး မှၴၤသၴူး ဗး မှၴၤတၴး?” 20 “ခီးနၴ မှၴၤဘဲၤ ဟဴ နှဲၤ ဟဴ။ အၳးပၴး တၲၤပြှဲၤ ပှၳးမှၴၤသၴူး နှဲၤ ပၴး?” ကၤယး ဘဲမှၳၤ ဟၴဆံၤ လၳး ဖၳနၲုၤ။ 21 ရဴ ယၴၤဆၳူ ဟၴဆံၤ အဲၤသီး န, “ဒၲ မှဴညၴးဒှၲုၤ အၤခဲးနၲုၤ, ဗး မှၴၤ ပှၴ သီး တှဲၤတၤကျီ တၲၤစၲၤ ရဴ သီး ခၴူသၳၤခၴူသဲ လှဴး စဴ ပွှိး꤮ တၲၤပြှဲၤ ဗှး! 22 ခၳးမဴစဲ မၴၤကူး သီး န, လှဴး꤮ သီး ဖၳပြှဲၤခၳး တၤဟၴၤနၲုၤ သီး ဘဲၤ ဒံတၤလီ လၳးဖ အၤ ဟၴ ရဴ သီး ဒံတၤလီ လၤဟူး အၤဖ ဘီ မှဴညၴးဒှၲုၤ နၲုၤတၲၤညၴး။ ကီၤ ဟၴကျူစဴ ရဴ ပြှဲၤ ဒၲ အၤ မှၴၤ ရှၴလၲ အၴူးနၲုၤမၤ, ခၳးမဴစဲ မှတိၤ။ သီးဖၴူးသီးဖှၲုး ဒၲ꤮ ညၴနၳၤ တၤဟၴၤ စထူၤ မှၴၤရှၴလၲ ပြဲ။ 23 ဖၳနၲုၤရဴ သူဖၳ သီး ကှံ ခဲးတၤလွိစၲုတၤလှၴူၤ တဲး ခၳးမဴစဲ အၤ တှဲၤသိူတှဲၤသူၤ တဲးမှၴ နၲုၤ, သီး ကီၤ တိး ဒံတၤလီ လၤဟူး သီး ဖၳပြှဲၤခၳး တၤဟၴၤ အၤဖ ဘီ မှဴညၴးဒှၲုၤ အၤခဲးနၲုၤ, ကီၤဟၴရဴ သီး ဒံတၤလီ လၤဟူး ပြဲ။ ဖၳနၲုၤရဴ ဘီ ဗး ဇၤဆီးမှၴ ကၤယးဆွီ ကၤယးဆဲး ဒၲ မှဴညၴးဒှၲုၤ အၤခဲး ရဴ သီး စၲု သဲပျဴၤဒၳၤ ဗး မှၴၤတၴး? 24 ဒူၤတှဲၤသံ တဲး အၳး ဖၳ သီး မူထၴူၤ အၳး ဒၲ အၤကျဴး နၲုၤတၤဟၴၤ တဲးမှၴၤ။ မှတၲၤခိနၲုၤ, ဒူၤလှူၤစဴ ဒူၤလှူၤတှၴၤ လၤဟူး သီး သဲပျဴၤ ဒၲ သီး ကှံ စီၤရူၤတိး စီၤရူၤဘဲၤ အၳး နၲုၤ နီ။” 25 ယၤရၳဆူၤလၴၤဖၳ တၤဟၴၤဟၴၤ ဟၴ န, “ယၳဒၤဖၳ ခၳၤကျဴခၳၤကျူး ပှၳး မှၴၤသၴူး လၳး နၲုၤမၤ အဲၤ ဟဴ ဟဲး? 26 မူမဴးလၴ, အၤ ဟၴဘဲၤစဴ ဒၲ ကၤယး တၲၤပျၳၤတၲၤဖဲၤ အၤညၴးဟူး စဴ ရဴ အၳး ဟၴ တှးတှံး လၳး တၲၤပြှဲၤ꤮ တိၤ။ ခိးညှအၴူး မၤ ပှဲၤ ခၳၤကျဴခၳၤကျူး တၤဟၴၤ သဲညၴး တှးတှၴၤ ဟူးနူး ဟဴ န အဲၤ မၤ မၴၤဆီယၤ တၲၤပြှဲၤ ဟဴ, ဖၳနၲုၤ ဟဲး ဟး? 27 အၳး ဟၴ န ခြီ ကှံ ဟူးပှး နၲုၤ, အၳး သဲညၴး အၤဒဴးအၤဆိၤ တၲၤပြှဲၤ꤮ တိၤ အၳး ဟၴ ဗးဟၴ, မၤနရဴ အဲၤအၴူး အၤ အိၤ တိး ဒဴးဘီတၴး နၲုၤ ပှဲၤ သဲညၴး ပြဲအၴူး။” အဲၤသီး ဟၴ လၤဟူး ဖၳနၲုၤ။ 28 ဘီ ဘူၤစဲၤ ယၴၤဆၳူ အီၤသိူတှးပး အၳး ဒၲ တှဲၤလၳးတူး ဟိးကၳး အၤခဲးနၲုၤ, အၤ အဲထိးထူၤ န, “သီး သဲညၴး ဗး နၲုၤမၤ အၤမှဗှး။ ဗး အိၤ တိး ဘီတၴး ဟူး နၲုၤမၤ သီး သဲညၴး မှလၤကိး နူး ဗး နီၤ။ ဗး ဟူး စှၳ꤮ ဒံၤ ဗး သဲပျဴၤ မှတိၤ။ ပြှဲၤ ဒၲ အၤ နဴးဟူး ဗး အၴူးတၲၤပြှဲၤ နၲုၤမၤ, သီး သဲညၴး လၳး တိၤ။ အဲၤ မၤ ပြှဲၤ ဒၲ အၤစဴ တၲၤပြှဲၤ။ 29 မၤနရဴ ဗး သဲညၴး လၳး, မှၴၤတၴးဟၴရဴ ဗး ယိး အိၤ ဒၲ လၳးအိၤ ဟူး ပြဲ နၲုး꤮။ ပြှဲၤ နဴးဟူး ဗး မၤ အဲၤ ပြဲ နၲုး꤮။” 30 အၤ ဟၴထၲုး ဖၳနၲုၤရဴ အဲၤသီး ပှၳးထံပှံ ဘူၤစဲၤ ယၴၤဆၳူ။ မၤနရဴ ဆၲုခဲး ဒၲ အၳး ကှံ ပှံ မှၴၤသၴူး လၳး အၤညၴးနၲုၤ, အၤ ဟူးတှၲု ဟီတိၤ အၤခၳၤအၤခၴူး အၳး ပှံဟီ လၳး တၲၤပြှဲၤ꤮ တိၤ။ 31 မၤနရဴ အၳး ဇှံအၴၤရှိ ဇှံအၴၤအဲ ပးနူး လၳး ပြဲ။ အဲၤသီး ဟၴ လၤဟူး န, “ဆၴူ꤮ ခြီ အၳး ဟၴ နၲုၤတၲၤပြှဲၤ ဟူးပှး အၤခဲးနၲုၤ, အၤ ကှံ မှၴၤ တၤကျီခိခၴူၤ အဲကျဴးပး စဴ န အၴူးတၲၤပြှဲၤ ပှး ဟဲး?” အၤ ဟၴ လၤဟူး ဖၳနၲုၤ။ 32 အဲၤသီး ဟၴဘဲၤဟၲုၤ ဟၴဘဲၤသွဲ နှီဒၴူလၳး န ဘူၤစဲၤ ယၴၤဆၳူခြီ အၤရီၤအၤကူး ဖၳအၴူး အၤခဲးနၲုၤ, ဖၤရီၤဆူဲဖၳ တၤဟၴၤ နှီဟၲုး ရဴ အဲၤသီး န ပြှဲၤလၳးတူး ခၳၤကျဴခၳၤကျူး တၤဟၴၤ နဴးစၲုပှံ ဘူၤစဲၤ ယၴၤဆၳူ န ကျၴူးဖၳ ဒၲ အၤ အိၤပှဴ တှဲၤလၳးတူးဟိး နၲုၤတၤဟၴၤ။ 33 ဘူၤစဲၤ ယၴၤဆၳူ ဟၴ န, “ဗး အိၤတှၲ ညှၴးကှၲုးပှး န သီး တိၤ။ ညှၴးတူၤတိၤ ပှးမၤ ဗး ကှံ ကှၤခၴူး ခၴူးသူ ဒၲ ပြှဲၤနဴးဟူး ဗး အၴူးတၲၤပြှဲၤ အၤ အိၤ ဟဴ။ 34 သီး ကှံ မူပှၳးသံ လၤဟူး ဗး ပှး, မၤနရဴ သီး မူထၴူၤ ဗး တိၤ။ ဒၲ ဗးလှၴအိၤ အၤခးလှၴ နၲုၤ, သီး စၲု စှူ ကှၲုး ဗး တၲၤပြှဲၤ꤮ တိၤ။” 35 ယၳဒၤဖၳ ခၳၤကျဴခၳၤကျူး တၤဟၴၤ ဟၴ နှီဒၴူ လၳး တၲၤပြှဲၤ န တၲၤပြှဲၤ ရဴ အၤ ဟၴ လၤဟူး န, “ပှဲၤ မူထၴူၤ စှူ အဲၤ တိၤ အၤ ဟၴ နၲုၤမၤ, အၤ ကှံရှၴ တၤနှၴၤ စၲု တိး ဘီတၴး ဟး? မၤ အၤ ကှံရှၴ စၲု ဒၲ ပှဲၤ ယၳဒၤဖၳ စၲုအိၤ ကှၲုးအၳး ဒၲ ကြီဖၳ နၲုၤတၤဟၴၤ အၤကျဲး ရဴ အၤ ကှံရှၴ စၲု အီၤသိူကၴၤ ကြီဖၳ ဘီနၲုၤတၤဟၴၤ ဟဲး ဟး? 36 ထၲုးရဴ အၤ ဟၴ န, ‘သီး ကှံ မူပှၳး ဗး ပှး တၤဒၲၤရဴ သီး မူထၴူၤ ဗး တိၤ,’ အၤ ဟၴ ဖၳနၲုၤ ထၲုးရဴ, အၤ ဟၴ ပှိ န, ‘ဒၲ ဗး လှၴအိၤ အၤခးလှၴ နၲုၤ, သီး စၲု စှူ ကှၲုး ဗး တိၤ,’ အၤ ဟၴ ဖၳနၲုၤမၤ အၤ သဲဇှံ ဟၴ အီးတၴး ဟး?” အၤ ဟၴ နှီဒၴူ လၳး တၲၤပြှဲၤ န တၲၤပြှဲၤ ဖၳနၲုၤ။ 37 ဘီ ပွဲၤဒၳၤလၲ ဒၲခၴူး တၲၤညၴး အၤခဲးနၲုၤ, ဘူၤစဲၤ ယၴၤဆၳူ ကၤထဴၤ အဲထိး န, “လှဴး꤮ ကၤယး ဒၲ အၤ သဲအိး ထၴူး တၤဟၴၤနၲုၤ, နဴးဟူး ဖၴူအိး လၤဟူး ထၴူး ဒၲ ဗးအိၤအၴူး။ 38 အၳးပၴးပၴး꤮ ဘဲၤဘဲၤ, ဒၲ အၤ ဇှံအၴၤညှအၴၤ ဗးနၲုၤ, ဖၳ လီၤစးဆဲးကၳး ဟၴ န, ထၴူး ဒၲ အၤ ဒၴူအၳး သဲထွှိးပြှဲၤ အၤထၴူးကျိး အၴူးနၲုၤ, အၤ ကှံ ထွီထၴၤ ဒၲ လၳးကၳး ပှး။” 39 ထၴူး ဒၴူ အၳး သဲထွှိးပြှဲၤ ဒၲ ဘူၤစဲၤ ယၴၤဆၳူ ဟၴ အၴူးနၲုၤမၤ မှ သဲစးဆဲး ဘူၤစဲၤ ပြဲ။ အၳးပၴးပၴး꤮ ဘဲၤဘဲၤ ဒၲ အၤ ဇှံအၴၤ လၳး တၤဟၴၤနၲုၤ, အၤ ကှံ နှီဘဲၤ ပှး။ ဘူၤစဲၤ ယၴၤဆၳူ နှီဘဲၤ ဟီ တှဲၤတၤရၴူးဒၳၤ တၤရၴူးထၳး တိၤ, မှၴၤတၴးဟၴရဴ အၤ သၴူး အီၤထဴၤကှၤခၴူး ရဴ အၤ ကှၤ ကၤထူၤ ဒၲ မှဴခၳၤ ဟီတိၤ။ ဖၳနၲုၤရဴ စဴမၤရူၤ အၤ သဲစးဆဲး ဟူးနှၲုးအိၤ ဒၲ အဲၤသီး သဲပျဴၤကၳး တၲၤပြှဲၤ ဟီတိၤ။ 40 ဘီ ကၤယး ဘဲမှၳၤ နှီဟၲုး ဘူၤစဲၤ ယၴၤဆၳူ အဲထိး ဟၴ ဖၳအၴူး အၤခဲးနၲုၤ, တၤဟၴၤဟၴၤ ရဴ အၤ ဟၴ န, “အဲၤ မၤ ပြှဲၤပြှိၤ ဒၲ ပှဲၤ အိၤပှဴမူဆံး လၳး နၲုၤတၲၤပြှဲၤ မှနူး ဟဴ။” အၤ ဟၴ လၤဟူး ဖၳနၲုၤ။ 41 တၤဟၴၤဟၴၤ ရဴ အၤ ဟၴ န, “မၴၤဆီယၤ မှနူး ဟဴ,” မၤနရဴ တၤဟၴၤဟၴၤနၲုၤ အၤ ဟၴ န, “မၴၤဆီယၤ အိၤ ဒၲ ကဲလၤလီၤကှၴ ရဴ အၤ ကှံ ဟူး ပှး မှတိၤ။ 42 လီၤစးဆဲးကၳး ဟၴ န, မၴၤဆီယၤ ကှံ ဟူး အိၤထူၤ ဒၲ ခွီဒၤဗီၤ အၤကျွီးအၤလူးကၳး ပှး, အၤ ကှံ ဟူး အိၤပၤစှဲလှူၤ ဒၲ ခွီဒၤဗီၤ အိၤ နှီဒၴူ ဗှီးဘဲၤသဲၤလဲၤဟဲၤ အၤကၳးနၲုၤ ပှး, ဗးဟၴတိၤ?” အၤ ဟၴ လၤဟူး ဖၳနၲုၤ။ 43 ဒၲ ခြီ အၤခၳၤအၤခၴူးရဴ ကၤယး ဘဲမှၳၤ တၤဟၴၤ တၤနှၴၤ လှၳၤခိခၴူးလၳး တၲၤမှၳၤ န တၲၤမှၳၤ။ 44 တၤဟၴၤဟၴၤနၲုၤ အၤ သဲဇှံ ပှံ လၳး, မၤနရဴ အၳး ပှံ လၳး တၲၤပြှဲၤ꤮ တိၤ။ 45 ဘီ ကျၴူးဖၳ အိၤပှဴ တှဲၤလၳးတူးဟိး တၤဟၴၤ ကှၤခၴူး ခၴူးသူ ဒၲ ပြှဲၤလၳးတူး ခၳၤကျဴခၳၤကျူး တၤဟၴၤ န ဖၤရီၤဆူဲဖၳ တၤဟၴၤ အၤ အိၤ အၤခဲးနၲုၤ, အၤ ဆၳၤဒူး အဲၤသီး န, “သီး ပှံကှၤနှီ အဲၤ တိၤ မှၴၤတၴး?” အၤ ဟၴ အဲၤသီး ဖၳနၲုၤ။ 46 ကျၴူးဖၳ အိၤပှဴ တှဲၤလၳးတူးဟိး တၤဟၴၤ ဟၴဆံၤ အဲၤသီး န, “အၳး ဟၴဘဲၤဒၲၤညး သူန အဲၤနၲုၤ အၤ အိၤ တၲၤပြှဲၤ꤮ တိၤ။” 47 ရဴ ဖၤရီၤဆူဲဖၳ တၤဟၴၤ ဟၴတၤကဲၤဆံၤ အဲၤသီး န, “မၤ အၤ အီၤလိၤ နှီကှၲုး စဴ ဟဴ သီး ကိး? 48 ပှဲၤ ဒၲ အၤ ထွှိး တှဲၤစဴဘၳၤစဴဘဲး အၤ ခၳၤကျဴခၳၤကျူး အၤကျဲး အၴူးတၤဟၴၤနၲုၤ ဘဲၤဘဲၤ, ဖၤရီၤဆူဲဖၳ အၤကျဲး အၴူးတၤဟၴၤ နၲုၤဘဲၤဘဲၤ, အၤ ဇှံအၴၤ ကှၲုး လၳး နၲုၤမၤ အၤ အိၤ နူး တၲၤပြှဲၤပြှဲၤ ဟဲး? 49 အၤ အိၤ တၲၤပြှဲၤ꤮ တိၤ။ ကၤယး ဘဲမှၳၤ နၲုၤတၤဟၴၤ မၤ အၤ သဲညၴး ကှၲုးအၳး ခၳးမဴစဲ အၤ တှဲၤသိူတှဲၤသူၤ တၲၤစၲၤ꤮ တိၤ အၤခၳၤအၤခၴူး, အၤ စၲု ဇှံအၴၤဘဴး ဇှံအၴၤဘၴူၤ ဒံၤညၴး လၤဟူး ပြဲ။ စဴမၤရူၤ ကှံ စီၤရူၤ အဲၤသီး ပှး,” ဖၤရီၤဆူဲဖၳ တၤဟၴၤ ဟၴတၤကဲၤဆံၤ အဲၤသီး ဖၳနၲုၤ။ 50 ကၤယးမွှီၤ န ခၳးနီၤကၤဒၴမၳၤ အိၤ တၲၤပြှဲၤ။ အဲၤ မၤ အၤ အိၤတှၲကှၲုး ဒၲ ဖၤရီၤဆူဲဖၳ အၤပျဴအၤမှၳၤကျဲး တၲၤပြှဲၤ။ ဒၲ အၤရှၴခဲး နၲုၤမၤ အၤ ဟူးနဴ ဒၲ ဘူၤစဲၤ ယၴၤဆၳူ အၤ အိၤ။ ရဴ ခၳးနီၤကၤဒၴမၳၤ အၴူး ဆၳၤဒူး အဲၤသီး န, 51 “ကၤယး တၲၤပြှဲၤ မှၴၤထၲုးဟဴ ကြူ꤮ မၤအီးတၴးနၲုၤ ပှဲၤ ကီၤ နှီဟၲုးဟီ အၤ ဟၴ တိၤ, ပှဲၤ ကီၤ မူပှၳးသဲညၴး ထၲုးဟီ အၤတှဲၤမှၴၤ တၤဟၴၤ ဟီတိၤ နၲုၤ, ပှဲၤ ဘဲၤ စီၤရူၤနှီ အဲၤ တိၤ ပှဲၤ တှဲၤသိူတှဲၤသူၤ အိၤဖၳနၲုၤ, ဗးဟၴတိၤ?” အၤ ဆၳၤဒူး အဲၤသီး ဖၳနၲုၤ။ 52 အဲၤသီး ဟၴဆံၤ လၳး န, “နှဲၤ မၤ꤮ ကဲလၤလီၤ ကှၴဖၳ ပြဲပြဲ။ မူပှၳး ရွိ ကှၤခၴူး ခၴူးသူ မဴး လီၤစးဆဲးနၲုၤ, နှဲၤ ကှံ မူထၴူၤ သဲညၴး န ပြှဲၤပြှိၤ နၲုၤတၲၤပြှဲၤ အိၤထူၤ ဒၲ ကဲလၤလီၤကှၴကၳး ပှး မှတိၤ။” 53 ထၲုးရဴ ကၤယး ကှၤကူး လှဴး ဒၲ အၤဟီၤ ပွှိး꤮ တၲၤပြှဲၤ။
1 မၤနရဴ ဘူၤစဲၤ ယၴၤဆၳူ ရဴ အၤ စၲုထူၤကူး ဒၲ အဴလီဗၤဆိၤခၳၤ။ 2 အၤနိၤတၲၤရိး မှဴလီးရှိၤမံ အၤခဲးနၲုၤ, ဘူၤစဲၤ ယၴၤဆၳူ ကှၤခၴူး ခၴူးသူ ဒၲ တှဲၤလၳးတူး ဟိးကၳး။ ကၤယး ပွှိး꤮ တၲၤပြှဲၤ ဟူး အိၤတၤဗှၤ လှဴးပျီး လၳး။ ထၲုးရဴ အၤ အိၤနူးတှး ရဴ အၤ အီၤသိူအီၤသူး အဲၤသီး။ 3 ပြှဲၤအီၤသိူ တှဲၤသိူတှဲၤသူၤ အၤသရ တၤဟၴၤ န ဖၤရီၤဆူဲဖၳ တၤဟၴၤနၲုၤ အၤ ပှံဟူးနှီ ပြှဲၤမဴၤ တၲၤပြှဲၤ ဒၲ ဘူၤစဲၤ ယၴၤဆၳူ အၤ အိၤ။ အဲၤသီး မူထၴူၤ လဲနှီ ပြှဲၤမဴၤ အၴူးတၲၤပြှဲၤ ဘီ အၤ စၲုသံ ပြှဲၤခၳး အၤခဲးနၲုၤ။ အဲၤသီး နဴးအီၤထဴၤအိၤ ပြှဲၤမဴၤ အၴူးတၲၤပြှဲၤ ဒၲ ကၤယး ဘဲမှၳၤ အၤ မဲၤသဲၤညၴး။ 4 ထၲုးရဴ အၤ ဟၴ ဘူၤစဲၤ ယၴၤဆၳူ န, “သရ, ပြှဲၤမဴၤ အၴူးတၲၤပြှဲၤ မၤ ပှဲၤ မူထၴူၤ လဲနှီ စဴ လၳး ဘီ အၤ စၲုသံ ပြှဲၤခၳး အၤခဲးနၲုၤ စဴ။ 5 ခၳးမဴစဲ အၤ တှဲၤသိူတှဲၤသူၤ အၤကၳးနၲုၤ, အၤ မၴၤကူး ပှဲၤ န ပြှဲၤမဴၤ ဖၳအၴူး တၤဟၴၤ နၲုၤမၤ တိးဘဲၤ တှသၴူးကူး အဲၤ န လှဴ။ နှဲၤ ကှၲုးကၴၤလၴ꤮, နှဲၤ ကှံရှၴ ဟၴကှၲုး ဖၳတၴး?” 6 သူဖၳ အဲၤသီး ပှံနှီ ဘူၤစဲၤ ယၴၤဆၳူ အၤ တှဲၤဟၴဘဲၤသံ ငှိ တၤဟၴၤ အၤညၴးနၲုၤ, အၤ ဟူးပှၳး ဆၳၤဒူး ခိၤဘၴူၤပြဲ လၤဟူး ယၴၤဆၳူ။ မၤနရဴ ဘူၤစဲၤ ယၴၤဆၳူ အိၤနူး ပဲၤလိၤတှး ရဴ အၤ ငှဴၤလှူၤ ရး လီၤ န အၤကၤနဴး ဒၲ ဟၴၤမံၤကျဲး။ 7 အဲၤသီး ယိး ဆၳၤဒူး ထၲုးထၲုး ဆၳၤဒူး သူသူ လၳး အၤခၳၤအၤခၴူး, အၤ အီၤထဴၤ ရဴ အၤ ဟၴ အဲၤသီး န, “ကၤယး ဒၲ သီးကျဲး တၲၤပြှဲၤပြှဲၤ နၲုၤ, အၤ ကီၤ ဟၴ နှီဒၴူ အၤနှၴ န အၤတှဲၤသံ အိၤတိၤ ဟၴနၲုၤ, တှ ရှၴလၲမဴး ပြှဲၤမဴၤ အၴူးတၲၤပြှဲၤ န လှဴ နၲုၤ,” အၤ ဟၴ ဖၳနၲုၤ။ 8 ဘူၤစဲၤ ယၴၤဆၳူ အိၤနူးတှး ခၴူးသူ ရဴ အၤ ရးတှး ခၴူးသူ လီၤ န အၤကၤနဴး ဒၲ ဟၴၤမံၤကျဲး။ 9 ဘီ အဲၤသီး နှီဟၲုးဟဴ ယၴၤဆၳူ ဟၴဖၳနၲုၤ အၤခဲး, အဲၤသီး ထၴၤကှၤကူး လှဴး တၲၤပြှဲၤ ထၲုး တၲၤပြှဲၤ။ အၤ မှၲုပြှဲ တၤဟၴၤ ထၴၤကှၤ ရှၴလၲ အၳး။ ဒၲခၴူး ရဴ ပြှဲၤမဴၤ နၲုၤတၲၤပြှဲၤ အီၤထဴၤ အိၤကူး တံကှၲုးဒံၤ န ယၴၤဆၳူ ပြဲ။ 10 ဘူၤစဲၤ ယၴၤဆၳူ အီၤထဴၤ ရဴ အၤ ဆၳၤဒူး လၳး န, “မဴၤမှၲု, အဲၤသီး စၲုတိးလှဴး ဘီတၴး? အၳး စီၤရူၤ ပှး နှဲၤ တၲၤပြှဲၤ꤮ တိၤ ဟဲး?” 11 ရဴ အၤ ဟၴဆံၤ လၳး န, “အၤ အိၤပှး တၲၤပြှဲၤ꤮ တိၤ။” ရဴ ဘူၤစဲၤ ယၴၤဆၳူ ဟၴ လၳး န, “ဗး မၤ꤮ ဗး စီၤရူၤ နှဲၤ တိၤတိၤ။ ကှၤမဴး ရဴ မှၴၤပှး တဲး တှဲၤသံ တဲးမှၴ နီ꤮,” အၤ ဟၴ လၳး ဖၳနၲုၤ။ 12 ဘူၤစဲၤ ယၴၤဆၳူ ဟၴ ခၴူးသူ ကၤယး နၲုၤတၤဟၴၤ န, “ဗး မၤ ဟၴၤခၳၤ အၤတှဲၤလီး။ ကၤယး ဒၲ အၤ ကြွိး ဗးခၴူး တၲၤပြှဲၤပြှဲၤ နၲုၤ, အၤ စၲု ပှး ဒၲ တှဲၤခီတှဲၤလှဴၤ အၤကျဲး တၤခူ꤮ တိၤ။ အၤ ကှံ နှီဘဲၤ တှဲၤလီး ဒၲ အၤ ဒၴူ လၳး သဲထွှိးပြှဲၤ အၤသဲး အၴူးနၲုၤ ပှး။” 13 ဖၤရီၤဆူဲဖၳ တၤဟၴၤ ဟၴ လၳး န, “နှဲၤ ဟၴဆိၤလှၲုး နှီ နှဲၤရီၤနှဲၤကူး တၤဟၴၤနၲုၤ လှၴဇှံအၴၤနှီ အၤခးလှၴ အိၤ နှတိၤ။ မၤမှၴၤတၴးရဴ ပှဲၤ ဇှံအၴၤနှီ နှဲၤ တှဲၤဟၴဘဲၤ တိၤ ဟၴရဴ နှဲၤ ဟၴဘဲၤ နှီဒၴူ လှဴးဒံၤ ပြဲ နှဲၤရီၤနှဲၤကူး ပြဲ,” အဲၤသီး ဟၴ လၳး ဖၳနၲုၤ။ 14 ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး ဟၴ နှီဒၴူ စဴ ဗးရီၤဗးကူး တၤဒၲၤရဴ ဗး ဟၴ အၴူးတၤဟၴၤ နၲုၤမၤ အၤတိး ပြဲ မှၴၤတၴးဟၴရဴ ဗး အိၤဘီတၴးဟူး နၲုၤ ဗး သဲညၴး နှီဒၴူ, ဗး ကှံရှၴ စၲု ဘီတၴး ပှး နၲုၤ ဗး သဲညၴး နှီဒၴူ ပြဲ။ မၤနရဴ ဗး အိၤဘီတၴးဟူး, တိၤမၤန, ဗး ကှံရှၴ စၲုတိး ဘီတၴး ပှးနၲုၤ သီး သဲညၴး တိၤ။ 15 သီး ဒးစီၤရူၤ အၳး ကီၤဟၴရဴ သီး စီၤရူၤ အၳး ဖၳ ပြှဲၤလှၳၤ ဟၴၤခၳၤဖၳ အၤလှၴကျိး မှၴၤနၲုၤ ပြဲ။ ဗး ရဴ ဗး စီၤရူၤ အၳး တၲၤပြှဲၤ꤮ တိၤ။ 16 မၤနရဴ ဗး ကီၤ စီၤရူၤ အၳး ဟၴနၲုၤ, ဗး ကှံ စီၤရူၤ စဴစဴတှၴၤတှၴၤ အၳး ပြဲ, မှၴၤတၴးဟၴရဴ ဗး စီၤရူၤ တံဒံၤ တၲၤပြှဲၤ မှတိၤ။ ဗး မှၴၤရှိ တှၲကှၲုး န ဗးဖဲး ဒၲ အၤ နဴးဟူး ဗး အၴူးတၲၤပြှဲၤ။ 17 ဒၲ သီး တှဲၤသိူတှဲၤသူၤ အၤကၳး နၲုၤ, အၳး ရးအိၤ န ကီၤ ကၤယး သဲနၴူး ဟၴဘဲၤထၴၤ သူလၳး ဟၴနၲုၤ, အဲၤသီး တှဲၤဟၴဘဲၤ တၤဟၴၤနၲုၤ အၳး ဒူၤ န အၤ တိးဟဴ။ 18 ဗး ဟၴဘဲၤ နှီဒၴူ ဗးရီၤဗးကူး ဗှး။ ဗးဖဲး ဒၲ အၤ နဴးဟူး ဗး အၴူးတၲၤပြှဲၤနၲုၤ, အၤ ဟၴဆိၤဒၲၤညး နှီကှၲုးဒံၤ ဗးရီၤဗးကူးကူး, ဖၳနၲုၤရဴ ပှဲၤ သဲညၴး ဟၴထၴၤ သူလၳး ပြဲ။” အၤ ဟၴ အဲၤသီး ဖၳနၲုၤ။ 19 “နှဲၤဖဲး အိၤတိး ဘီတၴး?” အဲၤသီး ဆၳၤဒူး လၳး ဖၳနၲုၤ။ ရဴ အၤ ဟၴဆံၤ အဲၤသီး န, “ဗး ရဴ သီး သဲညၴး တိၤတိၤ, ဗးဖဲး ရဴ သီး သဲညၴး တိၤတိၤ။ သီး ကီၤ သဲညၴး ဗး ကီၤဟၴရဴ သီး သဲညၴး ကှၲုးဒံၤ ဗးဖဲး ပြဲ။” အၤ ဟၴဆံၤ အဲၤသီး ဖၳနၲုၤ။ 20 ဘီ အၤ အီၤသိူ အၳး ဒၲ တှဲၤလၳးတူး ဟိးကၳး အၤခဲးနၲုၤ, အၤ ဟၴ အဲၤသီး ဖၳနၲုၤ။ အၤခးလှၴ လှၴအီၤသိူ အၳး ဒၲ တှဲၤလၳးတူး ဟိးကၳး အၴူးနၲုၤမၤ, အၤ အိၤဖံၤ န လှၴဘၴၤအိၤပျဴ တှဲၤမှၴၤလၳးတၲ အၤခးဆၴူ။ မၤနရဴ ဒၲ စဴမၤရူၤ တၤရီၤတၤရူး အိၤနှၴၤ ပှၴ ယၴၤဆၳူ ဒၲ အၳး ကှံ မှၴၤသၴူး လၳး အၤညၴးနၲုၤ, အၤ ယိး တှၲု တူၤဟီတိၤ အၤခၳၤအၤခၴူး, အၳး ပှံ လၳး တၲၤပြှဲၤ꤮ တိၤ။ 21 ဘူၤစဲၤ ယၴၤဆၳူ ဟၴ ပှၴ ပှိ အဲၤသီး န, “ဗး ကှံ ထၴၤစၲုဟဴ ပှး, ရဴ သီး ကှံ ပှၳးသံ ဗး ပှး။ သီး ကှံ သၴူး ပှး တၤဒၲၤရဴ စဴမၤရူၤ ပျွိးကူး သီး တှဲၤသံ အၴူးတၤဟၴၤ တိၤ။ ဘီ ဗး လှၴစၲု ခးလှၴနၲုၤ သီး စၲုစှူတိၤ,” အၤ ဟၴ အဲၤသီး ဖၳနၲုၤ။ 22 ဖၳနၲုၤရဴ ယၳဒၤဖၳ ခၳၤကျဴခၳၤကျူး တၤဟၴၤ ဟၴ လၳး န, “အၤ ဟၴ န ဘီ အဲၤလှၴစၲု အၤခးလှၴ နၲုၤ, ပှဲၤ စၲုစှူတိၤ အၤ ဟၴ ဖၳနၲုၤမၤ အၤ ကှံရှၴ မှၴၤသၴူး နှီဒၴူဒံၤ အၤနှၴ ပှး ဟဲး ဟး?” အၤ ဟၴ လၤဟူး ဖၳနၲုၤ။ 23 ဘူၤစဲၤ ယၴၤဆၳူ ဟၴ အဲၤသီး န, “ဗးရဴ မှဴခၳၤ အၤ ထၴူးဖၳကှၴဖၳ တၲၤပြှဲၤ, မၤနရဴ သီး မၤ ဟၴၤခၳၤ အၤ ထၴူးဖၳကှၴဖၳ ပြဲ။ လှဴး꤮ သီး တှဲၤတၤနှၴၤ တၤဟၴၤနၲုၤ, အၤ အီစံး လှဴး န ဟၴၤခၳၤ ပြဲ။ လှဴး꤮ ဗး တှဲၤတၤနှၴၤ တၤဟၴၤနၲုၤ, အၤ အီစံး န မှဴခၳၤ။ 24 ဖၳနၲုၤရဴ, ဗး ဟၴ သီး န သီး ကှံ သၴူး ပှး တၤဒၲၤရဴ စဴမၤရူၤ ပျွိးကူး သီး တှဲၤသံ အၴူးတၤဟၴၤ တိၤ ဗး ဟၴ သီး နၲုၤမၤ အၴူးဟဴ။ ဗး မၤ အၳးပၴးနၲုၤ ဗး ဟၴဆိၤ ပှၴထၲုးဟဴ သီး ရဴ သီး ကီၤ ဇှံအၴၤတိၤ ဟၴနၲုၤ, သီး ကှံ သၴူး ပှး တၤဒၲၤရဴ စဴမၤရူၤ ပျွိးကူး သီး တှဲၤသံ အၴူးတၤဟၴၤ တိၤ။” 25 အဲၤသီး ဆၳၤဒူး လၳး န, “နှဲၤ မၤ အၳးပၴး?” ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး မၤ အၳးပၴးနၲုၤ, ဗး ဟၴထၲုးဟဴ သီး ဒၲ ကၤလၳခဲး နၲုၤပး စဴ။ 26 ဗး ကီၤ ဟၴ သီးရီၤသီးကူး ဟၴနၲုၤမၤ, အၤ လှၴဟၴ အိၤအဲလးပး, ထၲုးတိၤ ဗး လှၴဒူၤ သီး တှဲၤသံ နၲုၤ, အၤ အိၤအဲလးပးပး။ မၤနရဴ ငှိ ဒၲ ဗး ဟၴ ပှၴ ပြှဲၤလှၳၤ ဟၴၤခၳၤဖၳ အၴူးတၤဟၴၤ နၲုၤမၤ မှပြဲ ဗး နှီဟၲုး ဒၲ ပြှဲၤ ဒၲ အၤ နဴးဟူး ဗး အၴူးနၲုၤ တၲၤပြှဲၤ အၤ အိၤ ရဴ တှဲၤ ဒၲ အၤ ဟၴ တၤဟၴၤ နၲုၤမၤ အၤ တိးပြဲ,” အၤ ဟၴဆံၤ အဲၤသီး ဖၳနၲုၤ။ 27 ဘူၤစဲၤ ယၴၤဆၳူ ဟၴ ပှၴ အဲၤသီး န အၤဖဲး အၤရီၤအၤကူး နၲုၤ, အဲၤသီး သဲညၴးပျိး လၤဟူး တိၤ။ 28 ဒၲ အဲၤသီး သဲညၴးပျိးတိၤ အၤခၳၤအၤခၴူး ဘူၤစဲၤ ယၴၤဆၳူ ဟၴ အဲၤသီး န, “ဆၴူ꤮ သီး မှံးသၴူးထူၤ ပြှဲၤလှၳၤ အၤဖၳခၳး မှ ဗးအၴူး ဒၲ တိးလူး ဟီၤထံၤလှိၤ အၤခဲးပှးနၲုၤ, သီး ကှံ သဲညၴးနိၤ န ဗး မၤ ကၤယး ဒၲ ဗး ဟၴဆိၤလှၲုး ထၲုးပှၴဟဴ သီး နၲုၤတၲၤပြှဲၤ ပှး။ ထၲုးတိၤ သီး ကှံ သဲညၴးဟူး န ဗး မှၴၤ စှၳ꤮ ဒံၤ ဗး သဲပျဴၤ မှတိၤ, ရဴ ဗး ဟၴဘဲၤပြဲ တှဲၤ ဒၲ ဗးဖဲး အီၤသိူအီၤသူး ဗး နၲုၤတၤဟၴၤ ပြဲ နၲုၤ သီး သဲညၴးဒံၤ ပှး။ 29 ထၲုးရဴ ပြှဲၤ ဒၲ အၤ နဴးဟူး ဗး အၴူးတၲၤပြှဲၤနၲုၤ, အၤ အိၤကှၲုး န ဗး။ ဗး မှၴၤတိး လၳးသဲပျဴၤ ပွှိး꤮ တၲၤဖှၲု စဴ အၤခၳၤအၤခၴူး အၤ ဗီးကူး ဗး တိၤ။” 30 ဘီ အၳး နှီဟၲုး အၤ ဟၴ ဖၳအၴူး အၤခဲးနၲုၤ, အၳး ဇှံအၴၤညှအၴၤ အဲနူၤစဴ လၳး။ 31 ဘူၤစဲၤ ယၴၤဆၳူ ဟၴ ယၳဒၤဖၳ ဒၲ အၤ ဇှံအၴၤညှအၴၤ လၳး နၲုၤတၤဟၴၤ န, “ကီၤ သီး စှၳးအၴၤ ပှံမၤနှီ ဗး တှဲၤအီၤသိူအီၤသူး အၴူးတၤဟၴၤ ဟၴနၲုၤမၤ, သီး ထွှိးဟဴ ဗး ခိးပၤစှဲ ဒၲ အၤ တှးတှၴၤ တၤဟၴၤ ဟဴ။ 32 ရဴ သီး ကှံ သဲညၴး တှဲၤမှတှဲၤစဴ ပှး။ ရဴ တှဲၤမှတှဲၤစဴ ကှံ ပျွိးထၴၤ သီး ပှး,” အၤ ဟၴ အဲၤသီး ဖၳနၲုၤ။ 33 အဲၤသီး ဟၴဆံၤ လၳး န, “ပှဲၤ မၤ ဖဲးအၤဘြှၤဟၤ အၤကျွီးအၤလူး တၤဟၴၤ, ပှဲၤ စၲုထွှိးနဴ န အၳးစှံ တၲၤဖှၲု꤮ တိၤ။ နှဲၤ စၲု ဟၴ တှၲု န တှဲၤမှတှဲၤစဴ ကှံ ပျွိးထၴၤ သီး ပှး, ဖၳနၲုၤ ဖၳတၴး?” အဲၤသီး ဆၳၤဒူး လၳး ဖၳနၲုၤ။ 34 ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး ဟၴစဴစဴ သီး, လှဴး꤮ ကၤယး ဒၲ အၤ မှၴၤ တှဲၤသံ နၲုၤတၤဟၴၤ မၤ အၤ ထွှိးဟဴ တှဲၤသံ အၤစှံဟဴ။ 35 စှံ ဟၴနၲုၤမၤ, အၤ အိၤစံး တှၲကှၲုး န ဟီၤဘူၤစဲၤ နၲုၤမၤ အၤနှီ တိၤ။ မၤနရဴ ဖၳပြှဲၤခၳး တၲၤပြှဲၤ ဟၴနၲုၤမၤ, အၤ အိၤစံး တှၲကှၲုး န ဟီၤဖၳဖူးဖၳ တၤစှၳပြှဲၤ။ 36 ဖၳနၲုၤရဴ စဴမၤရူၤ အၤဖၳခၳး မှ ဗးအၴူး ကီၤ အီၤလၴူး ပျွိးထၴၤကူး ဟဴ သီး န တှဲၤသံတှဲၤအိၤရၤ အၴူး ဟၴနၲုၤ, သီး နှီဘဲၤဟဴ တှဲၤပၤလး မှလၤကိး ဟဴ။ 37 သီး ထွှိး ဖဲးအၤဘြှၤဟၤ အၤကျွီးအၤလူး နၲုၤမၤ ဗး သဲညၴး ပြဲ။ မၤနရဴ ဗး အီၤသိူ သီး ရဴ သီး ခးလှီကၳး အိၤကှၲုးအၳး တိၤ အၤခၳၤအၤခၴူး, သီး ပှၳးမှၴၤသၴူး ဗး။ 38 ဗး ဟၴဆိၤလှၲုး ပှၴ သီး ဖၳ ဗးဖဲး ဟၴဆိၤလှၲုး ပှၴ ဗး နၲုၤတၤဟၴၤ။ သီး ကှၲုးကၴၤ ရဴ, သီး မှၴၤ ဖၳ သီး နှီဟၲုး ဒၲ သီးဖဲး တၤဟၴၤနၲုၤ အၤ အိၤ။” အၤ ဟၴ အဲၤသီး ဖၳနၲုၤ။ 39 အဲၤသီး ဟၴဆံၤ လၳး န, “ပှဲၤဖဲး မၤ ဖဲးအၤဘြှၤဟၤ။” ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “သီး ကီၤ မှလၤကိး ဖဲးအၤဘြှၤဟၤ အၤဖၳ တၤဟၴၤ ဟၴနၲုၤ, သီး ကှံ မှၴၤ သူဖၳ အဲၤ မှၴၤနၲုၤ ကိးကိး။ 40 ဗး ဟၴဆိၤလှၲုး ပှၴ သီး န တှဲၤမှတှဲၤစဴ ဒၲ ဗး နှီဟၲုး ဗးဖဲး ဟၴဆိၤပှၴ ဗး နၲုၤတၤဟၴၤ တၤဒၲၤရဴ သီး ပှၳးမှၴၤသၴူး ဗး။ ဖဲးအၤဘြှၤဟၤ မှၴၤနဴ ဖၳနၲုၤ တၲၤဖှၲု꤮ တိၤ။ 41 သီး ကြွိးမှၴၤကှၲုး ဖၳ သီးဖဲး ဆၴူးတှဴ မှၴၤနၲုၤ စဴ,” အၤ ဟၴ အဲၤသီး ဖၳနၲုၤ။ ရဴ အဲၤသီး ထၴဆံၤ န, “ပှဲၤဖဲး အိၤတံ စဴမၤရူၤ တၲၤပြှဲၤ꤮ တၲုး။ ပှဲၤမှၲုပှဲၤဖဲး စၲုသံစၲုပျ လၳး ရဴ အၤဖၳ အိၤ နှီဒၴူ ပှဲၤ မှတိၤ။” အၤ ထၴဆံၤ ဖၳနၲုၤ။ 42 ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “သီးဖဲး ကီၤ မှလၤကိး စဴမၤရူၤ ဟၴရဴ သီး မှိၤနှီကၳး ဗး ကိးကိး, မှၴၤတၴးဟၴရဴ ဗး အိၤ ဒၲ လၳးအိၤ ဟူး ရဴ ခိးညှအၴူး ဗး ဟူးအိၤ ဘီအၴူးပြဲအၴူး။ ဗး ဟူး စှၳ꤮ ဒံၤ ဗး သဲပျဴၤ မှတိၤ, ဗးဖဲး နဴးဟူး ဗး ပြဲ။ 43 ဗး ဟၴ ပှၴ သီး ရဴ သီး စၲု သဲညၴးပျိး စဴ တၤကီၤ꤮ တိၤ ရဴ မၤ အၤ မှၴၤ စဴ ဖၳတၴး? သီး သဲညၴးပျိး တိၤ မၤမှၴၤတၴးဟၴရဴ သီး သဲဇှံ နှီဒး စဴနူး ဗးငှိ တၤကီၤ꤮ တိၤ။ 44 သီးဖဲး မၤ ခီးနၴရီၤစှူ ခၳၤကျဴ ဒၲ အၳး အဲ န စၴၤထၲၤ နၲုၤတၲၤဒှၲုး ဟဴ။ သီး သဲဇှံ ကြွိးမှၴၤကှၲုး ဖၳ သီးဖဲး အၤ တှဲၤသဲဇှံ နၲုၤပြဲ။ သီးဖဲး မၤ အၤ ထွှိး ပြှဲၤမှၴၤသၴူး ကၤယး ဒၲ ကၤလၳခဲး ပး စဴ။ တှဲၤမှတှဲၤစဴ အိၤ ဒၲ လၳးကၳး တိၤ အၤခၳၤအၤခၴူး, အၤ နှီဒး ကြွိးမှၴၤ ကှၲုးအၳး တှဲၤမှတှဲၤစဴ တိၤ။ ဘီ အၤ ဟၴဘဲၤ အၤခဲးနၲုၤ, အၤ တှဲၤလၤဟိးလၤဟူၤ တၤဟၴၤ နၲုၤမၤ အၤ ထွှိး ဟဴ လၳး လှၴကျိး ဟဴ။ အဲၤ မၤ ကၤယး လၤဟိးလၤဟူၤ တၲၤပြှဲၤ ရဴ အၤ ထွှိး ဟဴ လှဴး꤮ တှဲၤလၤဟိးလၤဟူၤ တၤဟၴၤ အၤဖဲး ဟဴ။ 45 မှၴၤတၴးဟၴရဴ ဗး ယိး ဟၴဘဲၤ ပှၴ သီး တှဲၤမှတှဲၤစဴ အၤခၳၤအၤခၴူး, သီး ဇှံအၴၤ တိၤ။ 46 ဗး မှၴၤတှဲၤ နၲုၤမၤ အၤ သံပြဲ အၤ ဟၴ ရဴ အၤ ဇှၳးဘဲ နၲုၤမၤ ဒၲ သီးကျဲး နၲုၤ အၤ အိၤတၲၤပြှဲၤပြှဲၤ ဟဲး? ဗး ကီၤ ဟၴဘဲၤတှဲၤ ဒၲ အၤမှအၤစဴ တၤဟၴၤပြဲ ကီၤဟၴရဴ မၤမှၴၤတၴး ရဴ သီး ဇှံအၴၤ ဗး တိၤ။ 47 စဴမၤရူၤ အၤဖၳအၤလှၴူၤ တၤဟၴၤ နၲုၤမၤ အၤ သဲကြှံးသဲလှဴး နှီဒး စဴမၤရူၤ အၤငှိ။ မၤနရဴ သီး မၤ စဴမၤရူၤ ဖၳမဴၤဖၳခၳး တၤဟၴၤ မှတိၤ အၤခၳၤအၤခၴူး, သီး နှီဒး လၳးငှိ တိၤ။” 48 ဖၳနၲုၤရဴ ယၳဒၤဖၳ တၤဟၴၤ ဟၴ ဘူၤစဲၤ ယၴၤဆၳူ န, “ပှဲၤ ဟၴ နှဲၤ န, နှဲၤ မၤ ဆူၤမၤရီဖၳ တၲၤပြှဲၤ, ထၲုးရဴ ခီးနၴ မှၴၤဘဲၤ နှဲၤ, ပှဲၤ ဟၴဖၳနၲုၤ မၤ အၤမှနူးတိၤ ဟဲး?” 49 ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ခီးနၴ မှၴၤဘဲၤ ဗး မှတိၤ, ဗး ဘၴၤဒၳၤဘၴၤထၳး ဗးဖဲး ရဴ သီး ဘၴၤဒၳၤဘၴၤထၳး ဗး တိၤ။ 50 ဗး သဲဇှံ နဴးထၳၤသဲ အၳး န ဗးနှၴ ဖၳနၲုၤ မှတိၤ။ မၤနရဴ စဴမၤရူၤ မၤ ပြှဲၤ ဒၲ အၤ သဲဇှံ ထၳၤသဲနှီ ဗး။ ပြှဲၤ ဒၲ အၤ ကှံ စီၤရူၤ အၳး ပှးနၲုၤမၤ အဲၤ ဟဴ။ 51 ဗး ဟၴစဴစဴ သီး, ကၤယး တၲၤပြှဲၤပြှဲၤ ကီၤ အၤ စှၳးအၴၤ နှီဒး ဗးငှိ ဟၴနၲုၤ, အၤ သၴူးပှး တၤခူ꤮ တိၤ,” အၤ ဟၴ အဲၤသီး ဖၳနၲုၤ။ 52 ယၳဒၤဖၳ တၤဟၴၤ ဟၴ လၳး န, “ခိးညှရဴ ပှဲၤ သဲညၴး တှးတှၴၤဟဴ န ခီးနၴ မှၴၤဘဲၤ နှဲၤ ဟဴ။ ဖဲးအၤဘြှၤဟၤ သၴူးထၲုးဟဴ, ပြှဲၤပြှိၤ တၤဟၴၤ꤮ မၤ အၤ သၴူး ထၲုးဟဴဟဴ။ မၤနရဴ နှဲၤ စၲုဟၴတှၲု န ကၤယး တၲၤပြှဲၤပြှဲၤ ကီၤ စှၳးအၴၤ နှီဒး ဗးငှိ ဟၴနၲုၤ, အၤ သၴူးပှး တၤခူ꤮ တိၤ, နှဲၤ ဟၴ ဖၳနၲုၤ။ 53 မၤ နှဲၤ ဒၳၤကျဴးနူး န ပှဲၤဖဲး ဖဲးအၤဘြှၤဟၤ ဟဲး? အဲၤ သၴူး ထၲုးဟဴ, ပြှဲၤပြှိၤ တၤဟၴၤ꤮ မၤ အၤ သၴူး ထၲုးဟဴဟဴ။ နှဲၤ တၤနှၴၤ နှီဒၴူ နှဲၤနှၴ န အၳးပၴး?” အဲၤသီး ဟၴဆံၤ လၳး ဖၳနၲုၤ။ 54 ရဴ ဘူၤစဲၤ ယၴၤဆၳူ ဟၴကှၤခၴူးဆံၤ အဲၤသီး န, “ဗး ကီၤ ထၳၤသဲ နှီဒၴူ ဗးနှၴ ကီၤဟၴရဴ ဗး တှဲၤထၳၤသဲ အၴူးနၲုၤ, လှၴဇှံအၴၤ သဲလှဲၤနှီ နှ တၲၤစၲၤ꤮ တိၤ။ ဗးဖဲး ဒၲ သီး ဟၴ နှီဒၴူ န သီး စဴမၤရူၤ အၴူးတၲၤပြှဲၤနၲုၤ, အဲၤ မၤ ပြှဲၤမှၴၤလီး မှၴၤတၤခဲး ဗး ဟဴ။ 55 သီး သဲညၴး လၳး တိၤ တၤဒၲၤရဴ ဗး သဲညၴး လၳး။ ကီၤ ဗး ဟၴ န ဗး သဲညၴးနဴ လၳး တိၤ ဟၴရဴ, ဗး ထွှိး ကၤယး လၤဟိးလၤဟူၤ သူန သီးနၲုၤ ဟဴ။ ဗး သဲညၴး တှးတှၴၤ စဴ အဲၤ ရဴ ဗး နှီဒး လၳးငှိ။ 56 သီးဖဲး ဖဲးအၤဘြှၤဟၤ သဲလှၲု မူထၴူၤ ဒၲ ဗး ကှံ ဟူး ဒၲ ဟၴၤခၳၤအၴူး။ အၤ မူထၴူၤဟဴ ရဴ အၤ သဲကြှံးသဲလှဴး ဟဴ,” အၤ ဟၴဆံၤ အဲၤသီး ဖၳနၲုၤ။ 57 ရဴ ယၳဒၤဖၳ တၤဟၴၤ ဟၴ လၳး န, “နၤညှးဆၴူး꤮ ရဴ နှဲၤ ဘး ဟီတိၤ ရဴ နှဲၤ စၲု မူထၴူၤနဴ ဖဲးအၤဘြှၤဟၤ ဖၳတၴး?” 58 ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ဗး ဟၴစဴစဴ သီး, ဖဲးအၤဘြှၤဟၤ အိၤဟီတိၤ အၤခဲး, ဗး အိၤနှၴၤ ရှၴ ထၲုးဒံၤ ဟဴ,” အၤ ဟၴဆံၤ အဲၤသီး ဖၳနၲုၤ။ 59 အၴူးတၲၤဖှၲုရဴ အဲၤသီး အီၤထၲုၤ လၤဟူး လှဴ ရဴ အၤ ကှံရှၴ တှသၴူး လၤဟူး န ဘူၤစဲၤ ယၴၤဆၳူ။ မၤနရဴ ဘူၤစဲၤ ယၴၤဆၳူ စၲု တၤဒွိးအှၲုၤဘီကူး အၤနှၴ ရဴ အၤ ထၴၤစၲုမှၴကူး ဘီ တှဲၤလၳးတူး ဟိးကၳးနၲုၤ။
1 ဘီ ဘူၤစဲၤ ယၴၤဆၳူ စၲု ဒၲ ကျူလှိၤ အၤခဲး, အၤ မူထၴူၤ ကၤယးဖဲး မဲၤသဲၤခီ ဒၲ အၤ မှၲုဟဴကၳး တၲၤပြှဲၤ။ 2 အၤ ခိးပၤစှဲ တၤဟၴၤ ဆၳၤဒူး လၳး န, “သရ, ကၤယးဖဲး အၴူးတၲၤပြှဲၤ စၲု မဲၤသဲၤခီ ပး စဴ ဒၲ အၤ မှၲုဟဴကၳး မၤ, ဒၲ အဲၤတှဲၤသံ ခၳၤခၴူး ဟဲး, မှတိၤရဴမၤ, ဒၲ အၤမှၲုအၤဖဲး တှဲၤသံ ခၳၤခၴူး ဟဲး?” အၤ ခိးပၤစှဲ တၤဟၴၤ ဆၳၤဒူး လၳး ဖၳနၲုၤ။ 3 ရဴ အၤ ဟၴဆံၤ န, “အၤ တှဲၤသံ မှတိၤတိၤ, အၤမှၲုအၤဖဲး တှဲၤသံ မှတိၤတိၤ။ မၤနရဴ သူဖၳ စဴမၤရူၤ အၤ တှဲၤပြှိၤတှဲၤပြှူး ကှံ အိၤလှၲုးထူၤ ဒၲ အဲၤ တှဲၤအိၤထွှိးပြှဲၤ အၤကၳး ရဴ အၤ ခီ ပြဲ။ 4 ဒး မှဴခီ ဟီတိၤ နၲုၤ, ပှဲၤ ဘဲၤ မှၴၤ ပှၴ ပြှဲၤ ဒၲ အၤ နဴးဟူး ဗး အၴူးတၲၤပြှဲၤ အၤတှဲၤမှၴၤ။ မှဴခီ ရဴ အၳး မှၴၤစှူ ပှး တၲၤပြှဲၤ꤮ တိၤ နၲုၤ, အၤ ကှံ ဟူးတှၲု ပှး။ 5 ဘီ ဗး အိၤပး ဘီ ဟၴၤခၳၤအၴူး အၤခဲးနၲုၤ, ဗး မၤ ဟၴၤခၳၤ အၤတှဲၤလီး ရဴ အၤ ဒၴူ အၳး တှဲၤသဲခၳၤသဲညၴး ဒၲသၳၤဒၲသဲ တၲၤကၴူး တၲၤပြှဲၤ ဟဴ,” အၤ ဟၴ အဲၤသီး ဖၳနၲုၤ။ 6 အၤ ဟၴထၲုး ဖၳနၲုၤ ရဴ, အၤ ထၳၤပျတှး အၤပျှီၤထၴူး ဒၲ ဟၴၤခၳၤ ရဴ အၤ နှီစဴပဲ ဟၴၤ န အၤပျှီၤထၴူး ရဴ အၤ ကှီရှဲး ဒၲ ကၤယးဖဲး အၴူးတၲၤပြှဲၤ အၤ မဲၤသဲၤပျဴၤလှိၤ။ 7 ရဴ အၤ ဟၴ ကၤယးဖဲး မဲၤသဲၤခီ အၴူးတၲၤပြှဲၤ န, “စၲုမဴး, စၲု ပျှဲပျီးကူး နှဲၤ မဲၤသဲၤအၴူး ဒၲ စီလိၤ ထၴူးအဴၤနၲုၤ နီ꤮” (စီလိၤ အၤငှိလၤဆ မၤ ‘နဴးစၲု’)။ အၴူးတၲၤဖှၲုရဴ ကၤယးဖဲး အၴူးတၲၤပြှဲၤ စၲု ပျှဲပျီးကူး ထၲုး အၤမဲၤသဲၤ, ရဴ အၤ ကှၤ အၤခဲးနၲုၤ, အၤ မဲၤသဲၤ လီး ဟူး။ 8 ရဴ အၤဟီၤ ခးဆဴးခးဆၴူ တၤဟၴၤ န ကၤယး ဒၲ အၤ မူထၴူၤနဴ လၳး ကွီးအၴၤဆဲၤ တၤဟၴၤနၲုၤ, အၤ ဆၳၤဒူး နှီဒၴူ လၳး တၲၤပြှဲၤ ထၲုး တၲၤပြှဲၤ န, “ကၤယးဖဲး မဲၤသဲၤခီ အိၤနူး ကွီးအၴၤဆဲၤ နၲုၤတၲၤပြှဲၤ မၤ အဲၤဟဴ ဟဲး?” အၤ ဟၴ လၤဟူး ဖၳနၲုၤ။ 9 ရဴ တၤဟၴၤဟၴၤ နၲုၤ, အၤ ဟၴ လၤဟူး န, “အဲၤ ဟဴနၲုး။” တၤဟၴၤဟၴၤ ရဴ အၤ ဟၴ လၤဟူး န, “အဲၤ မှတိၤ, အၤ စၲၤ န အဲၤ ဖၳနၲုၤပြဲ,” အၳး ဟၴ လၤဟူး ဖၳနၲုၤ။ မၤနရဴ အၤနှၴဘူၤစဲၤ နှီဒံၤ ရဴ, အၤ ဟၴ ဆဴးကၤဒှၲု နှီဒၴူ အၤနှၴ န, “အၤ ကွီးအၴၤဆဲၤ နၲုၤတၲၤပြှဲၤ မၤ ဗးဟဴ,” ဖၳနၲုၤ။ 10 “ရဴ နှဲၤ စၲု မဲၤသဲၤလီး ကှၤခၴူး စှူ ခၴူးသူ ဖၳတၴး?” အဲၤသီး ဆၳၤဒူး လၳး ဖၳနၲုၤ။ 11 “ယၴၤဆၳူ ဟၴ နၲုၤတၲၤပြှဲၤ နှီစဴပဲ ဟၴၤမံၤ ရဴ အၤ ကှီရှဲး ဒၲ ဗး မဲၤသဲၤပျဴၤလှိၤ။ ရဴ အၤ နဴးစၲု ပျှဲပျီးကူး ဗး ဒၲ စီလိၤ ထၴူးအဴၤ။ ဗး စၲု ပျှဲပျီးကူး ထၲုး ရဴ ဗး ကှၤ အၤခဲးနၲုၤ, အၤ လီးဟူး ပှၴ ဗး,” အၤ ဟၴ ပှၴ အဲၤသီး ဖၳနၲုၤ။ 12 “ခိးညှရဴ ကၤယး နၲုၤတၲၤပြှဲၤ အိၤဘီတၴး?” အဲၤသီး ဆၳၤဒူး လၳး, ရဴ “ဗး သဲညၴးတိၤ,” အၤ ဟၴဆံၤ အဲၤသီး ဖၳနၲုၤ။ 13 အဲၤသီး အဲစၲု ကၤယး မဲၤသဲၤခီနဴ တၲၤဖှၲု နၲုၤတၲၤပြှဲၤ ဒၲ ဖၤရီၤဆူဲဖၳ တၤဟၴၤ အၤ အိၤ။ 14 ဘီ ဘူၤစဲၤ ယၴၤဆၳူ နှီစဴပဲ ဟၴၤမံၤ ရဴ အၤ မှၴၤလီးကှၤ ကၤယးဖဲး မဲၤသဲၤခီ နၲုၤတၲၤပြှဲၤ မၤ အၤ ယိး တှးတိး န မှဴညၴးဒှၲုၤ နၲုၤတၲၤညၴး။ 15 ရဴ ဖၤရီၤဆူဲဖၳ တၤဟၴၤ စၲု ဆၳၤဒူးကှၲုး လၤဟူး အဲၤ န အၤ စၲု မဲၤသဲၤလီး ကှၤ ဖၳတၴး နၲုၤ အၤရီၤအၤကူး။ ရဴ အၤ ဟၴ ပှၴ ဖၤရီၤဆူဲဖၳ တၤဟၴၤ န, “အၤ ကှီရှဲး ပၤအ ဒၲ ဗး မဲၤသဲၤပျဴၤလှိၤ ရဴ ဘီ ဗး စၲု ပျှဲပျီးကူး ထၲုး လၳး နၲုၤ ဗး မဲၤသဲၤလီး ကှၤခၴူး,” အၤ ဟၴ ဖၳနၲုၤ။ 16 ဖၤရီၤဆူဲဖၳ တၤဟၴၤ ဟၴ န, “အဲၤ မၤ အၤ အိၤ ဒၲ စဴမၤရူၤ အၤ အိၤ ဟူး မှတိၤ, မှၴၤတၴးဟၴရဴ အၤ ဒှၲုၤ ကှၲုးအၳး မှဴညၴးဒှၲုၤ တိၤ နၲုး꤮။” မၤနရဴ တၤဟၴၤဟၴၤနၲုၤ အၤ ဟၴ လၤဟူး န, “ပြှဲၤအိၤရၤဖၳ တၲၤပြှဲၤ စၲုမှၴၤ စှူ တှၲု တှဲၤတၤကျီခိခၴူၤ ဖၳအၴူး တၤဟၴၤ ဖၳတၴး?” ဖၳနၲုၤရဴ အဲၤသီး သဲပျဴၤ လှၳၤခိ လှဴးခၴူးလၳး တၲၤမှၳၤ န တၲၤမှၳၤ။ 17 ဒၲခၴူး ရဴ အဲၤသီး ဆၳၤဒူး ခၴူးသူ ကၤယးဖဲး မဲၤသဲၤခီနဴ တၲၤဖှၲု အၴူးတၲၤပြှဲၤ န, “အဲၤ မှၴၤ လီး ကှၤဟဴ နှဲၤမဲၤသဲၤ ဟဴ, ဖၳနၲုၤရဴ နှဲၤ ကှံ ဟၴ အဲၤ န အဲၤ မၤ အၤ ထွှိး ကၤယး ဖၳတၴး တၲၤပြှဲၤ တၴး?” ရဴ အၤ ဟၴဆံၤ အဲၤသီး န, “အဲၤ မၤ ပြှဲၤပြှိၤ တၲၤပြှဲၤ,” အၤ ဟၴဆံၤ ဖၳနၲုၤ။ 18 အဲၤ မၤ မဲၤသဲၤခီနဴ ထၲုးတၲၤဖှၲု ရဴ ခိးညှအၴူး အၤ လီး ကှၤခၴူး နၲုၤ, ဖၤရီၤဆူဲဖၳ တၤဟၴၤ ဇှံအၴၤ နူး ဟီ လၳး တိၤတိၤ, ရဴ အၤ နဴးစၲု အဲ ကၴၤ အၳး န အၤမှၲုအၤဖဲး။ 19 ရဴ အဲၤသီး ဆၳၤဒူး အၤမှၲုအၤဖဲး န, “အၴူးမၤ သီးဖၳ ဒၲ သီး ဟၴ နှီဒၴူ အဲၤ န အၤ မဲၤသဲၤခီ ပး စဴ ဒၲ မှၲုဟဴကၳး နၲုၤတၲၤပြှဲၤ ဟဲး? ခိးညှရဴ အၤ စၲု မဲၤသဲၤလီး ကှၤခၴူး စှူ ဖၳတၴး?” အၤ ဆၳၤဒူး အၤမှၲုအၤဖဲး ဖၳနၲုၤ။ 20 “အဲၤ မၤ ပှဲၤဖၳ မှလၤကိး နီၤ။ အၤ မဲၤသဲၤခီ မှလၤကိး ပးနူး ဒၲ မှၲုဟဴကၳး နီၤ။ 21 မၤနရဴ ခိးညှအၴူး, အၤ မဲၤသဲၤ လီးကှၤခၴူး ဖၳတၴး, မၤအၳးပၴး မှၴၤလီး ကှၤခၴူး ပှၴ လၳး ပၴး နၲုၤ ပှဲၤ သဲညၴးတိၤ။ ဆၳၤဒူး မူဒံၤ အဲၤနၲုၤ။ အၤ ဒၳၤတှးသဲနှၴတှၴၤ ဟဴ။ အၤ ဟၴဆံၤပျိး ဟၴဆံၤဖဲ စှူ နှီဒၴူဟဴ အၤနှၴဟဴ,” အဲၤသီး ဟၴဆံၤ ဖၳနၲုၤ။ 22 ဘီနၲုၤခဲး နၲုၤ, ယၳဒၤဖၳ ခၳၤကျဴခၳၤကျူး တၤဟၴၤ သဲပျဴၤ ဆၳၤကၳး လှဴး လၳး န, ကၤယး တၲၤပြှဲၤပြှဲၤ ဒးဟၴဟဴ န ယၴၤဆၳူ မၤ မၴၤဆီယၤ ဟၴနၲုၤမၤ, အဲၤသီး ဗှဲထၴၤကူး စဴ ကၤယး ဒၲ အၤ ဟၴ ဖၳနၲုၤ တၲၤပြှဲၤ ဒၲ တှဲၤစဴဘဲး ဟိးကျဴး အၤခၳၤအၤခၴူး, အၤမှၲုအၤဖဲး တၤဟၴၤ သဲအီၤဆၴး ယၳဒၤဖၳ ခၳၤကျဴခၳၤကျူး တၤဟၴၤ အၤလှၴ ရဴ, အၤ ဟၴ လၤဟူး န ပှဲၤ သဲညၴးကှၲုး တိၤ, အၤ ဟၴ ဖၳနၲုၤ ပြဲ။ 23 တံရဴ အၤမှၲုအၤဖဲး ဟၴ န, “ဆၳၤဒူးဒံၤ လၳး နၲုၤ, အၤ ဒၳၤတှးသဲနှၴတှၴၤ ဟဴ,” အၤ ဟၴ ဖၳနၲုၤမၤ ဒၲ တှဲၤရီၤတှဲၤကူး အၴူး အၤခၳၤအၤခၴူး ဟဴ။ 24 ဖၤရီၤဆူဲဖၳ တၤဟၴၤ အဲဟူး ခၴူးသူ ကၤယး မဲၤသဲၤခီနဴ အၴူးတၲၤပြှဲၤ ရဴ အဲၤသီး ဟၴ လၳး န, “အဴလှူၤစဴစဴ ဒၲ စဴမၤရူၤ အၤညၴးဟူး နၲုၤ, ပှဲၤ သဲညၴး န ကၤယး မှၴၤလီးကှၤ နှဲၤ မဲၤသဲၤ နၲုၤတၲၤပြှဲၤ မၤ ပြှဲၤအိၤရၤအိၤသူးဖၳ ပြဲ,” အၤ ဟၴ လၳး ဖၳနၲုၤ။ 25 ရဴ အၤ ဟၴဆံၤ အဲၤသီး န, “ပြှဲၤအိၤရၤအိၤသူးဖၳ မှ ဟဲး, မၤ တိၤ ဟဲး နၲုၤ ဗး သဲညၴး တိၤ။ ဗး သဲညၴး ပြဲတံ ဒၲ အၤရှၴခဲး ဗး မဲၤသဲၤခီ, ခိးညှရဴ ဗး မဲၤသဲၤလီး ဟဴ အၴူးနၲုၤ ပြဲ။” 26 ထၲုးရဴ “အဲၤ မှၴၤကြူ꤮ ပှၴ နှဲၤ ဖၳတၴး? အၤ မှၴၤ လီးကှၤ ပှၴ နှဲၤ ဖၳတၴး?” အဲၤသီး ဆၳၤဒူး ခၴူးသူ လၳး ဖၳနၲုၤ။ 27 “ဗး ဟၴ ပှၴထၲုးဟဴ သီး ရဴ သီး နှီဒး တိၤ။ သီး သဲဇှံ နှီဟၲုး ခၴူးသူ မှၴၤတၴး? သီး သဲဇှံ ထွှိးကှၤကှၲုး အၤ ခိးပၤစှဲ ဟဲး?” အၤ ဟၴဆံၤ အဲၤသီး ဖၳနၲုၤ။ 28 အၴူးတၲၤဖှၲုရဴ, အဲၤသီး သဲပျဴၤဒၳၤ, ဟၴ တၤခွိတၤကဲၤ လၳး န, “နှဲၤ မၤ အဲၤခိးပၤစှဲ။ ပှဲၤ မၤ ခၳးမဴစဲ အၤ ခိးပၤစှဲ ဒံၤ,” အၤ ဟၴ လၳး ဖၳနၲုၤ။ 29 “စဴမၤရူၤ ဟၴဘဲၤ န ခၳးမဴစဲ မၳ꤮ နၳၤခဲး နၲုၤမၤ ပှဲၤ သဲညၴး။ မၤနရဴ ကၤယး အၴူးတၲၤပြှဲၤ, အၤ အိၤတိး ဘီတၴးဟူး နၲုၤ ပှဲၤ သဲညၴးနဴ စဴ တၤကီၤ꤮ တိၤ။” 30 ကၤယးဖဲး အၴူးတၲၤပြှဲၤ ဟၴဆံၤ ကှၤခၴူး ပှိ အဲၤသီး န, “ကၤယး အၴူးတၲၤပြှဲၤ အၤ မှၴၤလီး ကှၤခၴူး စှူ စဴ ဗး မဲၤသဲၤပျဴၤ စဴ ရဴ, အၤ အိၤတိး ဘီတၴးဟူး နၲုၤ ပှဲၤ သဲညၴးတိၤ သီး စၲုဟၴ တၲၤကှၲုၤရဴ အၤ တၤပှၤအီၤဟံ စဴနူး ဗးဟဴ။ 31 ပြှဲၤအိၤရၤဖၳ ကွီး တှဲၤမှၴၤစွှိ နၲုၤ, စဴမၤရူၤ နှီဒး တိၤ နၲုၤမၤ ပှဲၤ သဲညၴး။ အၤ နှီဒးပြဲ တံ ကၤယး ဒၲ အၤ ဇှံအၴၤ လၳး ရဴ အၤ မှၴၤတိး လၳးသဲပျဴၤ နၲုၤတၤဟၴၤ ပြဲ။ 32 အၳး မှၴၤလီး ကှၤ စှူ ကၤယး မဲၤသဲၤခီ ဒၲ မှၲုဟဴကၳး နၲုၤ ဒၲ ဟၴၤခၳၤ ထွှိးလၳ မှဴခၳၤ ထွှိးသဲး တှၲုခိးညှ နၲုၤ ပှဲၤ နှီဟၲုးနဴ တၲၤပြှဲၤ꤮ တိၤ။ 33 ကၤယး အၴူးတၲၤပြှဲၤ အၤ အိၤဒၲ စဴမၤရူၤ အၤ အိၤဟူး ကီၤမှတိၤ ဟၴနၲုၤမၤ, အၤ မှၴၤစှူ တၲၤစၲၤ꤮ တိၤ,” အၤ ဟၴ ကှၤခၴူးဆံၤ အဲၤသီး ဖၳနၲုၤ။ 34 ဖၤရီၤဆူဲဖၳ တၤဟၴၤ ဟၴဆံၤ ကှၤခၴူး လၳး န, “နှဲၤ တှဲၤသံတှဲၤအိၤရၤ ဒၳၤပး စဴ ဒၲ နှဲၤ အိၤပၤစှဲလှူၤ အၤခဲး ရဴ နှဲၤ စၲု အီၤသိူ ကှၤခၴူး ပၴ ပှဲၤ ဖၳတၴး?” အၤ ဟၴ လၳး ဖၳနၲုၤရဴ အၤ ဗှဲထၴၤကူး လၳး ဒၲ တှဲၤစဴဘဲး ဟိးကျဴး။ 35 ဘီ ယၴၤဆၳူ နှီဟၲုး န အၳး ဗှဲထၴၤကူးဟဴ ကၤယး မဲၤသဲၤခီ အၴူးတၲၤပြှဲၤ အၤခဲးနၲုၤ, ဘူၤစဲၤ ယၴၤဆၳူ စၲုပှၳး မူထၴူၤ လၳး ရဴ အၤ ဟၴ လၳး န, “နှဲၤ ဇှံအၴၤ ပြှဲၤလှၳၤကၤယး အၤဖၳခၳး ဟဲး?” 36 ရဴ အၤ ဟၴဆံၤ ယၴၤဆၳူ န, “သရ, အဲၤ မၤ အၳးပၴး? သူဖၳ ဗး ကှံ ဇှံအၴၤ အဲၤ ရဴ ဟၴလှၲုး ပှၴ ဗး,” အၤ ဟၴ လၳး ဖၳနၲုၤ။ 37 ဘူၤစဲၤ ယၴၤဆၳူ ဟၴ လၳး န, “နှဲၤ မူထၴူၤ ထၲုးဟဴ အဲၤ ဟဴ။ နှဲၤ ဟၴဘဲၤ လၳး ခိးညှ အၴူးတၲၤပြှဲၤ နၲုၤမၤ အဲၤ ဟဴ။” 38 ရဴ ကၤယး အၴူးတၲၤပြှဲၤ ဟၴ လၳး န, “ဘူၤစဲၤ, ဗး ဇှံအၴၤ ဟဴ,” အၤ ဟၴ ရဴ အၤ ဒငှံၤလှူၤ စဴဘဲးထူၤ ဘူၤစဲၤ ယၴၤဆၳူ။ 39 ရဴ ဘူၤစဲၤ ယၴၤဆၳူ ဟၴ လၳး န, “သူဖၳ ပြှဲၤလှၳၤ ဟၴၤခၳၤဖၳ တၤဟၴၤ ကှံ မူထၴူၤ လှူၤ နှီဒၴူ အၤတှဲၤသံ အၤညၴးနၲုၤရဴ, ဗး ဟူးလှူၤ ဒၲ ဟၴၤခၳၤအၴူး ဟဴ။ ကၤယး ဒၲ အၤသူန ကၤယး မဲၤသဲၤခီ ရဴ အၤ သဲညၴးကှၲုး စဴမၤရူၤ အၤ တှဲၤမှတှဲၤစဴ တိၤ တၤဟၴၤနၲုၤ, ဗး ကှံ မှၴၤလီး ကှၤ အဲၤသီး မဲၤသဲၤ ပှး။ မၤနရဴ ကၤယး ဒၲ အၤ ဟၴ လှူၤ နှီဒၴူ အၤနှၴ န ဗး သဲညၴး ထၲုးဟဴ စဴမၤရူၤ အၤ တှဲၤမှတှဲၤစဴ တၤဟၴၤနၲုၤ, အၤ ကှံ ထွှိး သူန ကၤယး မဲၤသဲၤခီ နၲုၤတၤဟၴၤ ပှး။” 40 ဖၤရီၤဆူဲဖၳ ဒၲ အၤ အိၤ လၤဟူး ဘီနၲုၤ တၤဟၴၤ နှီဟၲုး အၤ ဟၴ ဖၳအၴူး ရဴ အၤ ဆၳၤဒူး ယၴၤဆၳူ န, “နှဲၤ သဲ ဟၴ ပှဲၤ န ပှဲၤ မဲၤသဲၤခီ ကှၲုး ဖၳနၲုၤ ဟဲး?” 41 ရဴ ဘူၤစဲၤ ယၴၤဆၳူ ဟၴ အဲၤသီး န, “သီး ကီၤ မဲၤသဲၤခီ ကီၤဟၴရဴ သီး သဲညၴး တှးတှၴၤဟီ တှဲၤမှတှဲၤစဴ တိၤ အၤခၳၤအၤခၴူး သီး တှဲၤသံ အိၤတိၤ။ မၤနရဴ ခိးညှအၴူး သီး ဟၴ န သီး မဲၤသဲၤလီး အၤခၳၤအၤခၴူး, သီး တှဲၤသံအိၤ,” အၤ ဟၴ အဲၤသီး ဖၳနၲုၤ။
1 ဘူၤစဲၤ ယၴၤဆၳူ ဟၴခိၤငှိ န, “ဗး ဟၴစဴစဴ သီး, ကၤယး ဒၲ အၤ ဟူးနှၲုးတိး ဒၲ သီမှီပှိၤ အၤ ကၤဒးကၳး တိၤ တၲၤပြှဲၤပြှဲၤ, ရဴ အၤ ကီၤ ဟူးထူၤ နှၲုးဘဲ ဒၲ အၤရှၲုၤ တၲၤဖိၤဖိၤ ဟၴနၲုၤမၤ, ပြှဲၤအၴၤဟၲုၤအၴၤဟီ, ပြှဲၤ ပှံဖၴၤ ယဲပျဲအၴၤ အၳး ပြဲ။ 2 မၤနရဴ ကၤယး ဒၲ အၤ ဟူး နှၲုးတိး ဒၲ ကၤဒးကၳးအၴူး တၲၤပြှဲၤပြှဲၤ နၲုၤမၤ ပြှဲၤကၴူးသီမှီ မှ ဟဴ။ 3 ပြှဲၤအိၤပှဴ ကၤဒးကၳး အၴူးတၲၤပြှဲၤနၲုၤ, အၤ ကှံ ဘမိးဆံၤ ပှၴ ပြှဲၤကၴူးသီမှီ အၴူးတၲၤပြှဲၤ ကၤဒးကၳး ပှး။ သီမှီ တၤဟၴၤ နှီဒး သဲညၴး လၳးငှိ။ ရဴ အၤ အဲထၴၤ နှီဒၴူ အၤသီမှီ တၤဟၴၤ တၲၤဒှၲုး န အၤမွှီၤ တၲၤစၲၤ, တၲၤဒှၲုး န အၤမွှီၤ တၲၤစၲၤ ဒၲ အၤပှိၤကျဴး ရဴ အၤသီမှီ တၤဟၴၤ ကြွိးကှၲုး လှဴး လၳးခၴူး။ 4 အၤသီမှီ တၤဟၴၤ ယိး တှိးနှီ ဒၴူ လၳးငှိ အၤခၳၤအၤခၴူး, ဘီ အၤ အဲထၴၤ ထၲုးလှဴး ဟဴ အၤသီမှီ တၤဟၴၤ ဒၲ အၤပှိၤကျဴး အၤခဲးနၲုၤ, အဲၤ ရဴ အၤ စၲု ရှၴ ဒၲ ညၴး, အၤသီမှီ တၤဟၴၤ ရဴ အၤ ကြွိးကှၲုး လှဴး လၳးခၴူး။ 5 သီမှီ အၴူးတၤဟၴၤနၲုၤ, အၤ ကြွိးကှၲုး ကၤယး ဒၲ အၤရှၲုၤတၤဟၴၤ အၤခၴူးတိၤ, မှၴၤတၴးဟၴရဴ အဲၤသီး နှီဟၲုးနဴ လၳးငှိ တိၤ, အၤ သဲညၴးနဴ လၳး တိၤ အၤခၳၤအၤခၴူး, အၤ ကျူၤ တၤဖးကူး လှဴး꤮ ကၤယး ဒၲ အၤရှၲုၤ တၤဟၴၤ အၤလှၴ ပြဲ။” 6 ဘူၤစဲၤ ယၴၤဆၳူ ဒၲၤညး ပှၴ အဲၤသီး ငှိခခိၤ အၴူးတၲၤတှိ တၤဒၲၤရဴ အဲၤသီး သဲညၴးပျိး လၤဟူး အၤငှိလၤဆ တိၤ။ 7 ဖၳနၲုၤ အၤခၳၤအၤခၴူး, ယၴၤဆၳူ ဟၴ ခၴူးသူ န, “ဗး ဟၴစဴစဴ သီး, ဗး မၤ သီမှီပှိၤ အၤ ကၤဒးကၳး ဟဴ။ 8 လှဴး꤮ ကၤယး ဒၲ အၤ ဟူး ရှၴ ဒၲ ဗးညၴးဟူး နၲုၤတၤဟၴၤ မၤ, ပြှဲၤအၴၤဟၲုၤအၴၤဟီ, ပြှဲၤ ပှံဖၴၤ ယဲပျဲအၴၤအၳး တၤဟၴၤ ပြဲ။ ရဴ သီမှီ တၤဟၴၤ နှီဒး အဲၤသီးငှိ တိၤ။ 9 ဗး မၤ ကၤဒးကၳး ဟဴ။ လှဴး꤮ ကၤယး ဒၲ အၤ ဟူးနှၲုး ဒီးတံ န ဗး ဒၲ အၤ မှဒံၤ ကၤဒးကၳး အၴူးတၤဟၴၤ နၲုၤ, အၤ ကှံ နှီဘဲၤ တှဲၤမှၴၤဆီးပျဲကှၤ ပှး။ အၤ ကှံ ဟူးထၴၤ ဟူးနှၲုး ရဴ အၤ ကှံ မူထၴူၤ အၤ လှၴအၴၤဆဲၤ အၤခးလှၴ ပှး။ 10 ပြှဲၤအၴၤဟၲုၤနၲုၤ အၤ ဟူးမှၴၤတၴး ဟၴနၲုၤမၤ, သူဖၳ အၤ ကှံ ဟူး အၴၤဟၲုၤအၴၤဟီ နှီ, အၤ ကှံ ဟူး မှၴၤသၴူးနှီ အၳး, အၤ ကှံ ဟူး မှၴၤပၴူမှၴၤကူး အၳး အၤညၴးပြဲ။ ဗး ရဴ သူဖၳ အၳး ကှံ နှီ တှဲၤထွှိးပြှဲၤ ထၲုးတိၤ သူဖၳ အၳး တှဲၤအိၤထွှိးပြှဲၤ ကှံ လၲဘး တှးပဴၤတှးပှဲး အၤညၴး နၲုၤရဴ ဗး ဟူး ပြဲ။ 11 “ဗး မၤ ပြှဲၤကၴူးသီမှီ ဒၲ အၤရူ တၲၤပြှဲၤ။ ပြှဲၤကၴူးသီမှီ ဒၲ အၤရူ တၲၤပြှဲၤနၲုၤ အၤ ဒၴူလှူၤကူး အၤသဲပျဴၤ ထွှိးပြှဲၤ ဒၲ သီမှီ တၤဟၴၤ အၤညၴး။ 12 ကီၤ ဒၤကဲၤကၴူးအၴၤ သီမှီ န အၳး ဟၴနၲုၤမၤ, သီမှီ အၴူးတၤဟၴၤနၲုၤ အၤတှဲၤ မှတိၤ အၤခၳၤအၤခၴူး, ဘီ အၤ မူထၴူၤ ထွီၤမှီၤ ဟူး အၤခဲး, အၤ ဒူၤကူး သီမှီ ရဴ အၤ ထၴၤကျူၤကူး ပြဲ။ ရဴ ထွီၤမှီၤအၴူး ကှံ ဟူး အှၤသၴူး ပှံအၴၤကူး သီမှီ ပှး, ရဴ အၤ ဟူး မှၴၤ ကျူၤပြၲု ကျူၤပြူးကူး လှဴး သီမှီ ပှး။ 13 ပြှဲၤ ဒၤကဲၤကၴူးအၴၤ သီမှီ အၴူးတၲၤပြှဲၤနၲုၤ, အၤ ထၴၤကျူၤ တၤဖးကူး, မှၴၤတၴးဟၴရဴ အၤ မှိၤ နှီဒၴူ သီမှီ အၴူးတၤဟၴၤ တိၤ။ 14 “ဗး မၤ ပြှဲၤကၴူးသီမှီ ဒၲ အၤရူ တၲၤပြှဲၤ။ ဗး သဲညၴး ဗး သီမှီ ရဴ ဗး သီမှီ သဲညၴး ဗး။ 15 အၤသူန နၲုၤဟဴ, ဗးဖဲး သဲညၴး ဗး ရဴ ဗး သဲညၴး ဗးဖဲး, ရဴ ဗး ဒၴူလှူၤကူး ဗး သဲပျဴၤ ဒၲ ဗး သီမှီ တၤဟၴၤ အၤညၴး။ 16 ဗး သီမှီ ဒၲ အၤရှၲုၤ ဒၲ အၤ အိၤ ဘီ အၤပှိၤကၳး အၴူးတိၤနၲုၤ အၤ အိၤပး တၤဟၴၤ။ ဗး ဘဲၤ အဲကှၤ ကှၲုး အဲၤသီး ပှး။ အဲၤသီး ကှံ နှီဒးကှၲုး ဗးငှိ ပှး, ရဴ အဲၤသီး ကှံ ကှၤ ထွှိး တှၲ လှဴး လၳး သီမှီ တၲၤမှၳၤတၲုး, ပြှဲၤကၴူးသီမှီ အၤ ဘူၤစဲၤ တၲၤပြှဲၤ꤮ တၲုး ပှး။ 17 ဗးဖဲး မှိၤနှီ ဗး မှၴၤတၴးဟၴရဴ သူဖၳ ဗး ကှံ ထွှိးပြှဲၤ ကှၤခၴူး ခၴူးသူ နၲုၤ, ဗး ဒၴူလှူၤကူး ဗး သဲပျဴၤ ထွှိးပြှဲၤ။ 18 ဗး ကီၤ နဴးမှၴၤသၴူး အၳး န ဗးနှၴ တိၤ ဟၴနၲုၤ, အၳး မှၴၤသၴူး စှူ ဗး တၲၤပြှဲၤ꤮ တိၤ။ ဗး ဒၴူလှူၤကူး ဗး သဲပျဴၤ အၴူးနၲုၤမၤ, အၳး နဴးဆိူၤ ဗး တၲၤပြှဲၤ꤮ တိၤ, ဗး သဲပျဴၤ န ဗး သဲပျဴၤ ဒၴူလှူၤ နှီဒၴူဒံၤ ပြဲ။ ဗး အိၤ န ဗး တှဲၤပြှိၤတှဲၤပြှူး ဒၲ ဗး သဲဇှံ ဒၴူလှူၤကူး ဗးသဲ မၤ အၤ နှီနှီ, ဗး သဲဇှံ ဖၴူဒွိခၴူး အဲၤ မၤ꤮ အၤ နှီနှီ ပြဲ။ ဗးဖဲး မၴၤဟူးနှီ ဗးငှိ န ဗး ဘဲၤမှၴၤ ဖၳအၴူး,” အၤ ဟၴ ပှၴ အဲၤသီး ဖၳနၲုၤ။ 19 ဒၲ အၤ ဟၴဘဲၤ ဖၳနၲုၤ အၤခၳၤအၤခၴူး, ယၳဒၤဖၳ တၤဟၴၤ လှၳၤခိကူး ခၴူးလၳး နၴူးမှၳၤ။ 20 ကၤယး အဲပြှဲၤ ဟၴ န, “အဲၤ မၤ ခီးနၴ မှၴၤဘဲၤ လၳး ရဴ အၤ တၤမွီး ပြဲ။ စၲု နှီဒးတှၲု လၳးငှိ မှၴၤတၴး?” 21 မၤနရဴ ဒၲ အၤရှၲုၤ တၤဟၴၤနၲုၤ အၤ ဟၴ ကှၲုးကၴၤ န, “ခီးနၴ မှၴၤဘဲၤ ကၤယးနၲုၤ အၤ ဟၴဘဲၤ မှၴၤဖၳအၴူး တိၤ။ ခီးနၴ မှၴၤလီးကှၤ စှူ နူး အၳးမဲၤသဲၤ ဟဲး?” အၤ ဟၴ လၤဟူး ဖၳနၲုၤ တၤဟၴၤ။ 22 ဘီနၲုၤခဲး ဒၲ ဗှီးယၤရၳဆူၤလၴၤ အၤကၳးနၲုၤ, အၤ တိးန ယၳဒၤဖၳ သီးတၤဟၴၤ မှၴၤ ပွဲၤ တၲၤပွဲၤ ဒၲ အၳး အဲ န တှဲၤသဲနှၴထူၤ ကှၤခၴူး တှဲၤဘၴၤ စးဆဲး တှဲၤလၳးတူးဟိး မၳ꤮ နၳၤခဲး နၲုၤ, အၤ အိၤ တၲၤပွဲၤ။ 23 ဘီနၲုၤခဲး အၤ တိးန ကှၴရှိခဲး ရဴ ယၴၤဆၳူ အိၤ ဘီ တှဲၤလၳးတူး ဟိးကၳးနၲုၤ ရဴ အၤ စၲုရွိ ဘီ ခးလှၴ တၲၤဖိၤ ဒၲ အၳး အဲ န ခွီဆဴၤလၤမိၤ ဟီၤဒကှၲု နၲုၤတၲၤဖိၤ အၤလှဲး။ 24 ယၳဒၤဖၳ တၤဟၴၤ ဟူး အိၤပျၳၤ တၤဗှၤလှဴး လၳး ရဴ အၤ ဟၴ လၳး န, “နှဲၤ မၤ အၳးပၴး နၲုၤ နှဲၤ ဟၴဆိၤလှၲုးပၴ ပှၴ ပှဲၤ တၲၤဖှၲု꤮ တိၤ, နှဲၤ နဴးအိၤပှဴ မူဆံး ညှၴးပှိ ပး စဴ ပှဲၤ ဘ꤮ တၴး ပှး စဴ? နှဲၤ ကီၤ မှလၤကိး ခြီ ဟၴရဴ ဟၴဆိၤလှၲုး ပှၴ ပှဲၤ,” အၤ ဟၴ လၳး ဖၳနၲုၤ။ 25 “ဗး ဟၴထၲုး ပှၴ ဟဴ သီး ရဴ သီး ဇှံအၴၤတိၤ။ တှဲၤတၤကျီခိခၴူၤ ဒၲ ဗး မှၴၤ န ဗးဖဲး အၤမွှီၤ တၤဟၴၤနၲုၤ, အၤ ဟၴဘဲၤ ပှၴဟဴ ဒၲ ဗးညၴး ဟဴ။ 26 မၤနရဴ သီး ယိး ထွှိး ဗး သီမှီ မှတိၤ အၤခၳၤအၤခၴူး, သီး ဇှံအၴၤ ဗး တိၤ။ 27 ဗး သီမှီ တၤဟၴၤ နၲုၤမၤ အၤ နှီဒး ဗးငှိ။ ဗး သဲညၴး အဲၤသီး, ရဴ အဲၤသီး ကြွိး ဗးခၴူး။ 28 ဗး ဒၴူ အဲၤသီး သဲထွှိးပြှဲၤ တၤစှၳပြှဲၤ။ အၤ ကှံ သၴူး ပှး တၲၤဖှၲု꤮ တိၤ။ အၳး ဟူး စွီၤထၴၤ စှူ ပှး အဲၤသီး ဒၲ ဗး တၤခၳၤကၳး တၲၤပြှဲၤ꤮ တိၤ။ 29 ဗးဖဲး အၴူးနၲုၤ အၤဒၳၤကျဴး စဴ န အၳး ပွှိး꤮ တၲၤပြှဲၤ။ သီမှီ အၴူးတၤဟၴၤ နၲုၤမၤ အဲၤ ဒၴူ ဗး ရဴ အၳး ဟူး စွီၤထၴၤကူး စှူ ပှး အဲၤသီး ဒၲ ဗးဖဲး အၤ တၤခၳၤကၳး တၲၤပြှဲၤ꤮ တိၤ။ 30 ဗး န ဗးဖဲး မၤ တၲၤပြှဲၤ꤮ တၲုး ပြဲ။” 31 ယၳဒၤဖၳ တၤဟၴၤ အီၤထၲုၤလှူၤ ခၴူးသူ လၤဟူး လှဴ ရဴ ကှံရှၴ တှသၴူး လၳး။ 32 မၤနရဴ ဘူၤစဲၤ ယၴၤဆၳူ ဟၴ အဲၤသီး န, “တှဲၤမှၴၤရူ ဒၲ ဗးဖဲး နဴးမှၴၤ ဗး တၤဟၴၤနၲုၤ, ဗး ဒၴူလှၲုး အဲ꤮ ပှၴလးဟဴ သီး ဟဴ။ မၤနရဴ သီး ကှံရှၴ တှတှၲု ဗး န ဗး မှၴၤ တှဲၤရူ အၴူးတၤဟၴၤ ဘီတၴး တၲၤစၲၤတၴး?” အၤ ဟၴ အဲၤသီး ဖၳနၲုၤ။ 33 “ဒၲ နှဲၤ တှဲၤမှၴၤရူ အၴူးတၤဟၴၤ အၤခၳၤအၤခၴူးရဴ ပှဲၤ ကှံရှၴ တှ နှဲၤ န လှဴ မှတိၤ။ နှဲၤ ယိး ဟၴဘဲၤသံ စဴမၤရူၤ အၴူးနၲုၤ ပြဲ, မှၴၤတၴးဟၴရဴ နှဲၤ ထွှိး ပြဲ ပြှဲၤလှၳၤ ဟၴၤခၳၤဖၳ တၲၤပြှဲၤပြဲ ရဴ နှဲၤ စၲု ဒကွိ လှူၤ နှီဒၴူ စဴ နှဲၤနှၴ န စဴမၤရူၤ,” အဲၤသီး ဟၴ လၳး ဖၳနၲုၤ။ 34 ရဴ ဘူၤစဲၤ ယၴၤဆၳူ ဟၴဆံၤ အဲၤသီး န, “ဒၲ သီး တှဲၤသိူတှဲၤသူၤ အၤကၳး နၲုၤ, အၤ ရးအိၤ တၲၤမှး န, ‘ဗး ဟၴ န သီး မၤ စဴမၤရူၤ တၤဟၴၤ,’ အၤ ဟၴ ဖၳနၲုၤ ဗးဟၴတိၤ? 35 စဴမၤရူၤ အၤလှးအၤငှိ နၲုၤမၤ အၤတိးအၤဘဲၤ တၤစှၳပြှဲၤ စဴ။ အၳး ထၳၤလှူၤ တၤပျၴၤ စှူ လၳး တၲၤပြှဲၤ꤮ တိၤ။ 36 ဖၳနၲုၤရဴ ဖဲး နွိထူၤ ဗး ရဴ အၤ နဴးဟူးလှူၤ ဗး ဒၲ ဟၴၤခၳၤအၴူး။ ရဴ ဘီ ဗး ဟၴ န, ‘ဗး မၤ စဴမၤရူၤ အၤဖၳခၳး တၲၤပြှဲၤ’ အၤခဲးနၲုၤ, သီး စၲု ဟၴတှၲု ဗး န ဗး ဟၴသံ စဴမၤရူၤ ဖၳတၴး? 37 ဗး ကီၤ မှၴၤတိး ဖၳ ဗးဖဲး မှၴၤနၲုၤ တိၤ ဟၴရဴ ဇှံအၴၤ တဲး ဗး တဲးမှၴ။ 38 မၤနရဴ ကီၤ ဗး မှၴၤဟဴ ဖၳ ဗးဖဲး မှၴၤနၲုၤ ဟၴရဴ သီး ကီၤ ဇှံအၴၤ လၤဟူး စဴ တၤကီၤ꤮ တိၤ ဟၴနၲုၤ, ပၤတီတၤဒံၤ ရဴ သီး တိးကဴၤ ဇှံအၴၤ ဆလှၴ လၤဟူး တှဲၤ ဒၲ ဗး မှၴၤ တၤကျီခိခၴူၤ နၲုၤတၤဟၴၤ။ သီး ကီၤ ဇှံအၴၤ ဗး တှဲၤမှၴၤ တၤဟၴၤ ဟၴရဴ သီး ကှံ သဲညၴးဟူး န ဖဲးအိၤ ဒၲ ဗးကၳး ရဴ ဗး အိၤဒၲ အဲၤကၳး ပှး,” အၤ ဟၴ အဲၤသီး ဖၳနၲုၤ။ 39 အဲၤသီး သဲဇှံ ပှံ လၳး တၤဒၲၤရဴ အၤ ထၴၤစၲု တၤဖးကူး အဲၤသီးလှၴ။ 40 ဘူၤစဲၤ ယၴၤဆၳူ ကှၤခၴူး ခၴူးသူ ဒၲ စှဴူၤဒၤ ထၴူးကျိး ဘဲရှဲး တၲၤကၴူး, ဘီ ခၳးယိးဟၤ လှၴပျွိး ရှၴလၲ ပှၴ အၳး ထၴူး အၤခးလှၴ နၲုၤတၲၤဖိၤ, ရဴ အၤ ကှၤအိၤ ဘီနၲုၤ။ 41 ကၤယး ဟူးရှိဟူးအဲ နူၤစဴ ဒၲ လၳးအိၤ။ ရဴ အဲၤသီး ဟၴ နှီဒၴူ ခၴူးလၳး တၲၤပြှဲၤ ထၲုး တၲၤပြှဲၤ န, “ခၳးယိးဟၤ မှၴၤလှၲုး တှဲၤတၤကျီခိခၴူၤ တၲၤစၲၤ꤮ တိၤ တၤဒၲၤရဴ လှဴး꤮ အၤ ဟၴ ကၤယး အၴူးတၲၤပြှဲၤ အၤရီၤအၤကူး နၲုၤ, အၤတိး လှဴးပျီးစဴ,” အၤ ဟၴ လၤဟူး ဖၳနၲုၤ။ 42 ကၤယး ဘီနၲုၤတၤဟၴၤ ဇှံအၴၤညှအၴၤ ကှၤ အဲလး ယၴၤဆၳူ။
1 ကၤယးမွှီၤ န ခၳးလၤစၤရၳ ဟၴ အၴူးတၲၤပြှဲၤနၲုၤ အၤဆွီ။ အဲၤ န အၤ ဗှူပြှဲၤမဴၤ မဴၤမၤရီ န မဴၤမၤသ မၤ အၤ အိၤ လၤဟူး ဒၲ ဒဴးဘၴၤသၤနီ။ 2 မဴၤမၤရီ အၴူးတၲၤပြှဲၤ မၤ မှဟဴ အၤ လှူတှး ထၴူးနှၲုၤမံ ဒၲ ဘူၤစဲၤ အၤ ခးဒှၲုၤလှိၤ ရဴ အၤ ထံပျီး န အၤခၳၤလှၲုၤ နၲုၤတၲၤပြှဲၤ ဟဴ။ ခၳးလၤစၤရၳ ဒၲ အၤဆွီ အၴူးတၲၤပြှဲၤ နၲုၤမၤ အၤ ပှၲုပြှဲၤခၳး ဟဴ။ 3 အၤ ဗှူပြှဲၤမဴၤ အၴူးသဲနၴူး နဴးစၲု ဟၴဆိၤ အၳး န ယၴၤဆၳူ, ရဴ အဲၤသီး စၲု ဟၴ ယၴၤဆၳူ န, “ဘူၤစဲၤ, နှဲၤ ခိးဘဴသိူမှိၤ ခၳးလၤစၤရၳ သဲဆွီ ဟဴ။” 4 ဘီ ယၴၤဆၳူ နှီဟၲုး တှဲၤရီၤတှဲၤကူး အၴူး အၤခဲးနၲုၤ, အၤ ဟၴ န, “ဒၲ တှဲၤဆွီအၴူး အၤခၳၤအၤခၴူး အၳး ကှံ မူထၴူၤ စဴမၤရူၤ အၤလီး အၤတၤခဲး ပှး။ ထၲုးတိၤ ဒၲ တှဲၤဆွီအၴူး အၤခၳၤအၤခၴူးရဴ အၳး ကှံ မှၴၤလီးမှၴၤတၤခဲး ကှၲုးဒံၤ စဴမၤရူၤ အၤဖၳခၳး အၴူးနၲုၤ ပှး။” 5 ယၴၤဆၳူ မှိၤနှီ လှဴးပျီး မဴၤမၤသ န အၤပှၲုပြှဲၤမဴၤ, န အၤ ပှၲုပြှဲၤခၳး ခၳးလၤစၤရၳ သဲသၲုးလှဴး။ 6 ရဴ အၤ နှီဟၲုး န ခၳးလၤစၤရၳ ဆွီ တၤဒၲၤရဴ အၤ အိၤ တၤဒံၤ ပျၴၤဟူးပး ဘီနၲုၤ နၴူးညၴး။ 7 ထၲုးရဴ အၤ ဟၴ အၤ ခိးပၤစှဲ တၤဟၴၤ န, “ပှဲၤ ကှၤ ဒၲ ယၳဒၤကှၴ ပိ꤮။” 8 မၤနရဴ အၤ ခိးပၤစှဲ တၤဟၴၤ ဟၴ လၳး န, “သရ, ဒၲ ပှနၳၤနၳၤ꤮ ဟၳၤပြဲ ရဴ ယၳဒၤဖၳ တၤဟၴၤ သဲဇှံ ပှၳး တှ နှဲၤ န လှဴ ရဴ နှဲၤ ကှံရှၴ ကှၤခၴူးတိး ခၴူးသူ အဲၤသီး ဘီနၲုၤ ဟဴၤ?” 9 ယၴၤဆၳူ ဟၴဆံၤ အဲၤသီး န, “တၲၤညၴး မၤ အၤ အိၤ ဆၴူနၴူးမံး ဟဲၤ ဗးဟၴ? ကၤယး တၲၤပြှဲၤပြှဲၤ ဒၲ အၤ စၲုကျူ ဒၲ မှဴဆဲးကျဲး အၴူးနၲုၤ, အၤ တၤဖဴး လၤခံ နှတိၤ, မှၴၤတၴးဟၴရဴ အၤ ယိး မူထၴူၤ ဟၴၤခၳၤ အၤတှဲၤလီး နၲုး။ 10 မၤနရဴ ကၤယး တၲၤပြှဲၤပြှဲၤ အၤ ကီၤ စၲု ဒၲ မှဴခီ ဟၴနၲုၤ, အၤ ကှံ တၤဖဴး လၤခံ ပှး, မှၴၤတၴးဟၴရဴ အၤ ယိး ခီ နၲုး။” 11 အၤ ဟၴထၲုး ဖၳအၴူး ရဴ, အၤ ဟၴ ပျၴၤဟူး ပှိ အဲၤသီး န, “ပှဲၤ ခိးဘဴသိူ ခၳးလၤစၤရၳ အိၤမၴူးနှီ ဆိးတၤပှၤ ဟဴ, မၤနရဴ ဗး ကှံ စၲု ထၳၤရှူး အီၤထဴၤ လၳး။” အၤ ဟၴ အဲၤသီး ဖၳနၲုၤ။ 12 “အၤ ကီၤ အိၤမၴူးနှီ ဆိးတၤပှၤ ပြဲ ဟၴရဴ, အၤ အိၤမှိၤအိၤရူ ဟူးခၴူး ဒံၤ ပှး ကိးကိး,” အၤ ခိးပၤစှဲ ဟၴဆံၤ လၳး ဖၳနၲုၤ။ 13 ယၴၤဆၳူ သဲဇှံ ဟၴ အၤငှိလၤဆ န ခၳးလၤစၤရၳ သၴူး ဟဴ မၤနရဴ အဲၤသီး တၤနှၴၤပြဲ န အၤ အိၤမၴူးနှီ ဖၳနၲုၤပြဲ။ 14 အၴူးတၲၤဖှၲုရဴ အၤ ဟၴ လှၲုးလီး ပှၴ အဲၤသီး န, “ခၳးလၤစၤရၳ သၴူးဟဴ, 15 မၤနရဴ, ဗး အိၤကှၲုး န ခၳးလၤစၤရၳ ဘီနၲုၤ တိၤ ရဴ ဗး သဲကြှံး ပြဲ, မှၴၤတၴးဟၴရဴ ဒၲ အၤ ထွှိးထူၤ ဖၳအၴူး အၤခၳၤအၤခၴူး, သီး တှဲၤဇှံအၴၤ ဗး ကှံ ဒၳၤထူၤ န ဒၳၤထူၤ ပှး။ တှဲၤအၴူးတၤဟၴၤ ထွှိးထူၤ ဖၳအၴူး နၲုၤမၤ, အၤ ထွှိးထူၤ ဒၲ အၤ ကှံ ထွှိးဘွီထွှိးတၤရၴူး ဒၲ သီးညၴး ပြဲ။ ဖၳနၲုၤရဴ စၲု꤮, ပှဲၤ စၲုကှၲုး အဲၤ ပိ꤮။” 16 ခၳးသိမ ဒၲ အၳး အဲပှိ လၳးမွှီၤ န ခၳးဒီဒီၤမၳ အၴူးတၲၤပြှဲၤ ဟၴ ယၴၤဆၳူ အၤ ခိးပၤစှဲ တၤဟၴၤ န, “ပှဲၤ စၲုသၴူး ရှိကှၲုး န ပှဲၤ ဘူၤစဲၤ ပိ!” အၤ ဟၴ ဖၳနၲုၤ။ 17 ဘီ ဘူၤစဲၤ ယၴၤဆၳူ စၲုတှၲု ဒၲ ဒဴးဘၴၤသၤနီ အၤခဲးနၲုၤ, အၳး အီၤလှၲု ခၳးလၤစၤရၳ နၲုၤ အၤ အိၤဟဴ လွှီးညၴး ဟဴ။ 18 ဒဴးဘၴၤသၤနီ အၴူး အၤ အိၤဇၴူၤ န ဗှီးယၤရၳဆူၤလၴၤ အၤ ဖံၤ꤮ အိၤ နၴူးမီလၴၤ။ 19 မဴၤမၤသ န မဴၤမၤရီ အၴူး အၤ ပှၲုပြှဲၤခၳး သၴူး အၤခၳၤအၤခၴူး, အၳး ဟူး အီၤလဴး အဲၤသီး, အၳး ဟူး အိၤကြၲုးအိၤလှဲၤ အဲကှၲုး လး အဲၤသီး။ 20 ဘီ မဴၤမၤသ နှီဟၲုး န ဘူၤစဲၤ ယၴၤဆၳူ ဟူးဟဴ အၤခဲးနၲုၤ, အၤ ထၴၤစၲု မူဆံၤ လၳး။ မၤနရဴ, မဴၤမၤရီ ရဴ အၤ အိၤကူး ဒၲ ဟီၤ ပြဲ။ 21 မဴၤမၤသ ဟၴ ဘူၤစဲၤ ယၴၤဆၳူခြီ န, “ဘူၤစဲၤ, နှဲၤ ကီၤ အိၤကှၲုး န ပှဲၤ ဘီအၴူး ဟၴနၲုၤမၤ, ဗး ပှၲုပြှဲၤခၳး သၴူး စှူ အီးတၴး။ 22 မၤနရဴ, ခိးညှအၴူး စဴ ဘဲၤဘဲၤ, ဗး သဲညၴး န နှဲၤ ကွီး စဴမၤရူၤ အီးတၴးတၴး꤮ နၲုၤ, အၤ ကှံ ဒၴူ နှဲၤ ပြဲ။” 23 ယၴၤဆၳူ ဟၴဆံၤ လၳး န, “နှဲၤပှၲု ကှံ ထွှိးပြှဲၤ ကှၤခၴူး ခၴူးသူ ပှး။” 24 ရဴ မဴၤမၤသ ဟၴဆံၤ လၳး န, “ဘီ အၳး ပွှိး꤮ တၲၤပြှဲၤ အီၤထဴၤကှၤခၴူး လှဴး ဒၲ တှဲၤသၴူး ဒၲ ခၴူးလၲ တၲၤညၴး ပှးနၲုၤ, အဲၤ ကှံ သၴူးအီၤထဴၤ ကှၤကှၲုး ပှးနၲုၤ ဗး သဲညၴး ပြဲ,” အၤ ဟၴဆံၤ လၳး ဖၳနၲုၤ။ 25 ဘူၤစဲၤ ယၴၤဆၳူ ဟၴ လၳး န, “ဗး မၤ ပြှဲၤ ဒၲ အၤ မှၴၤထွှိးပြှဲၤ ကှၤခၴူး ကၤယးသၴူး တၤဟၴၤ။ ဗး မၤ ပြှဲၤ ဒၲ အၤ ဒၴူ အၳး သဲထွှိးပြှဲၤ။ ကၤယး ဒၲ အၤ ဇှံအၴၤ ဗး တၤဟၴၤနၲုၤ, အၤ သၴူး စဴ တၤဒၲၤရဴ အၤ ကှံ ထွှိးပြှဲၤ ကှၤခၴူး ပှး။ 26 မှၴၤတၴးဟၴရဴ ကၤယး ဒၲ အၤ ဇှံအၴၤ ဗး တၤဟၴၤနၲုၤ, အၤ ကှံ နှီဘဲၤ သဲထွှိးပြှဲၤ တၤစှၳပြှဲၤ ပှး, အၤ သၴူးပှး တၲၤဖှၲု꤮ တိၤ။ ဗး ဟၴအၴူး နှဲၤ ဇှံအၴၤ ဟဲး, မဴၤမၤသ?” 27 “အဴၤ, ဗး ဇှံအၴၤ ဗး, ဘူၤစဲၤ,” အၤ ဟၴဆံၤ ဖၳနၲုၤ။ “ဗး ဇှံအၴၤ မှလၤကိး စဴ န နှဲၤ မၤ မၴၤဆီယၤ မှဟဴ စဴမၤရူၤ အၤ ဖၳပြှဲၤခၳး ဒၲ အၤ ကှံရှၴ ဟူး ဒၲ ဟၴၤခၳၤ အၴူးတၲၤပြှဲၤ နၲုၤဟဴ။” 28 မဴၤမၤသ ဟၴထၲုး ဖၳနၲုၤရဴ အၤ ကှၤ ဒၲ အၤပှၲု မဴၤမၤရီ အိၤ ရဴ အၤ ကှၤ ဟၴဘဲၤဟၲုၤ လၳး န, “သရ ဟူးတှၲု ဘီအၴူး ဟဴ, ရဴ အၤ ဆၳၤဒူး နှီဒၴူ နှဲၤ။” 29 မဴၤမၤရီ နှီဟၲုး ရဴ အၤ တၤပျၲုတၤပျၴူး ထၴၤစၲုတိး ဘူၤစဲၤ ယၴၤဆၳူ။ 30 မၤနရဴ ဘီနၲုၤအၤခဲးနၲုၤ, ယၴၤဆၳူ နှၲုးဟီ ဒၲ ဒဴးကၳး တိၤ။ အၤ အိၤပးပြဲ ဘီ မဴၤမၤသ လှၴစၲု မူထၴူၤ တှးဆံၤ လၳး နၲုၤတၲၤဖိၤ ပြဲ။ 31 ဘီ ယၳဒၤဖၳ ဒၲ အၤ ဟူး အိၤကြၲုးအိၤလှဲၤ, အၤ ဟူး အီၤလဴး မဴၤမၤရီ သီးတၤဟၴၤ မူထၴူၤ န မဴၤမၤရီ အီၤထဴၤ ထၴၤစၲု တၤပျၲုတၤပျၴူး အၤခဲး, အဲၤသီး ကြွိးစၲုကှၲုး လၳးခၴူး။ အဲၤသီး တၤနှၴၤ န အၤ ကှံရှၴ ဟူးငှၲု ဒၲ လှၲုးခၳၤ။ 32 ဘီ မဴၤမၤရီ စၲုမူထၴူၤ န ယၴၤဆၳူ အၤခဲးနၲုၤ, အၤ ဟူးဒငှံၤလှူၤ ဒၲ လၳးခးဒှၲုၤ ခးဆၴူ ရဴ အၤ ဟၴ လၳး န, “ဘူၤစဲၤ꤮ ကီၤ နှဲၤ အိၤကှၲုး န ပှဲၤ ဘီအၴူး ဟၴနၲုၤမၤ, ဗး ပှၲုပြှဲၤခၳး သၴူး စှူ အီးတၴး?” 33 ဘီ ယၴၤဆၳူ မူထၴူၤ မဴၤမၤရီ န ယၳဒၤဖၳ ဒၲ အၤ ကြွိး ဟူးကှၲုး လၳး တၤဟၴၤ ငှၲု အၤခဲးနၲုၤ, အၤ သဲပျှဲး, အၤ သဲမှၲု ရဴ အၤ သဲပျဴၤမှိၤတိၤ။ 34 အၤ ဆၳၤဒူး အဲၤသီး န, “သီး စၲု အီၤလှၲုတိး လၳး ဘီတၴး?” ရဴ အဲၤသီး ဟၴဆံၤ လၳး န, “ဘူၤစဲၤ, ဟူးမူမဴး။” 35 ရဴ ယၴၤဆၳူ ငှၲု။ 36 ရဴ ယၳဒၤဖၳ တၤဟၴၤ ဟၴ လၤဟူး န, “မူမဴးလၴ, အၤ မှိၤ စဴ လၳး ဘ꤮ တၴးနၲုၤ။” 37 မၤနရဴ တၤဟၴၤဟၴၤ ရဴ အၤ ဟၴ န, “အၤ မှၴၤ လီး စှူ စဴ အၳးမဲၤသဲၤ ဗး ဟၴ ရဴ အၤ စၲု ပျွိးသၴူးတှၲု ကၤယး အၴူးတၲၤပြှဲၤ ဖၳတၴး?” 38 ယၴၤဆၳူ သဲပျှဲး သဲမှၲု ခၴူးသူ ရဴ အၤ စၲုတိး ဒၲ အၳး လှၴအီၤလှၲု နှၲုး လၳး ဒၲ လှဴကၳး အၴူးနၲုၤ အၤ အိၤ။ လှၲုးကၳး အၴူးနၲုၤ အၳး ထၳၤလဴးဘီ လၳး န လှဴဒၳၤ တၲၤမၴး။ 39 ရဴ အၤ ဟၴ အၳး န, “ထၳၤလဴး တၤဖးကူး လှဴဒၳၤ အၴူးနၲုၤ။” မၤနရဴ ကၤယးသၴူး အၴူးတၲၤပြှဲၤ အၤ ဗှူပြှဲၤမဴၤ မဴၤမၤသ ဟၴဆံၤ လၳး န, “ဘူၤစဲၤ, တှၲုခိးညှ အၴူးနၲုၤ, အၤ သၴူး ဘးဟဴ လွှီးညၴးဟဴ။ အၤ ကှံ နှၲုၤသဴးနှၲုၤမှူ လှဴးဟဴ,” အၤ ဟၴ လၳး ဖၳနၲုၤ။ 40 “ဗး ဟၴထၲုးဟဴ နှဲၤ န, နှဲၤ ကီၤ ဇှံအၴၤ ရဴ နှဲၤ ကှံ မူထၴူၤ စဴမၤရူၤ အၤ တှဲၤလီးတှဲၤတၤခဲး ပှး, ဗးဟၴတိၤ?” ဘူၤစဲၤ ယၴၤဆၳူ ဟၴ အဲၤသီး ဖၳနၲုၤ။ 41 ဖၳနၲုၤရဴ အဲၤသီး ထၳၤလဴး တၤဖးကူး လှဴဒၳၤ နၲုၤတၲၤမၴး။ ရဴ ယၴၤဆၳူ တှၳထူၤ ဒၲ မှဴလှဲး ရဴ အၤ ဟၴ န, “ကၲ꤮ ဖဲး, နှဲၤ နှီဒး ဗး တှဲၤကွီးစဴဘဲး အၤခၳၤအၤခၴူး, ဗး ဟၴဘွီဟၴတၤရၴူး နှဲၤ။ 42 ဗး သဲညၴး န နှဲၤ နှီဒး ဗး တှဲၤကွီးစဴဘဲး ပွှိး꤮ ဖှၲု။ မၤနရဴ ဗး မူ ဒၲ အၤ ကှံ ထွှိးဘွီ ထွှိးတၤရၴူး ပှၴ ကၤယး ဒၲ အၤ အီၤထဴၤ ဘီအၴူး တၤဟၴၤ အၤညၴး, ရဴ သူဖၳ အဲၤသီး ကှံ ဇှံအၴၤ န နှဲၤ နဴးဟူး ဗး အၤညၴးနၲုၤရဴ, ဗး ဟၴ ဖၳအၴူး ပြဲ။” 43 ဘီ ဘူၤစဲၤ ယၴၤဆၳူ ကွီးစဴဘဲး ထၲုးနၲုၤ, အၤ အဲထိးထူၤ န, “ခၳးလၤစၤရၳ! ထၴၤမဴး!” 44 ရဴ ကၤယး သၴူး အၴူးတၲၤပြှဲၤ ထၴၤ။ အၤတၤခၳၤ ခးဒှၲုၤ တၤဟၴၤနၲုၤ အၤ တၤလၳးအိၤမၤ လှဴးပး န အီၤကှဲး ဘပျီး ရဴ အၤမဲၤသဲၤ နၲုၤ အၤ ဘိၤ တၤဗှၤဘီ လှဴးပး န အီၤကှဲး။ ရဴ ယၴၤဆၳူ ဟၴ အဲၤသီး န, “ထၳၤလၴူးကူး ပှၴ လၳး ရဴ နဴးစၲု အဲၤ နၲုၤ။” 45 ယၳဒၤဖၳ ဒၲ အၤ ဟူး အိၤလၴး ကှၲုး မဴၤမၤရီ တၤဟၴၤ မူထၴူၤ ယၴၤဆၳူ မှၴၤအၴူး အၤခၳၤအၤခၴူး အၤ ဇှံကှၤညှကှၤ အဲလး ယၴၤဆၳူ။ 46 မၤနရဴ တၤဟၴၤဟၴၤ နၲုၤ အၤ စၲု ဒၲ ဖၤရီၤဆူဲဖၳ တၤဟၴၤ အၤ အိၤ ရဴ အၤ စၲု ဟၴဆိၤလှၲုး ပှၴ အဲၤသီး န ယၴၤဆၳူ မှၴၤတှဲၤအၴူး။ 47 ဖၳနၲုၤရဴ ပြှဲၤလၳးတူး ခၳၤကျဴခၳၤကျူး တၤဟၴၤ န ဖၤရီၤဆူဲဖၳ တၤဟၴၤ အဲပျဴ ယၳဒၤဖၳ ခၳၤကျဴခၳၤကျူး ဒၲ အၤရှၲုၤ တၤဟၴၤ ရဴ အိၤကၳအိၤကူ နှီဒၴူ လၳး။ ရဴ အဲၤသီး ဟၴ န, “ပှဲၤ ကှံ မှၴၤဖၳတၴး အၴူး? ကၤယး အၴူးတၲၤပြှဲၤ မှၴၤလှၲုး ပှၴ အၳး တှဲၤတၤကျီခိခၴူၤ အဲလး ဟဴ။ 48 ပှဲၤ ကီၤ ဒူၤအိၤ တၤဒံၤ အဲၤ ဖၳအၴူး ဟၴနၲုၤမၤ, အၳး ဇှံအၴၤ ကှၲုးလှဴး လၳး ဟဴ။ ထၲုးပှးရဴ ရှိမၴၤ ကျၴူးဖၳ တၤဟၴၤ ကှံ ဟူး ပှး ရဴ ဟူး မှၴၤပြၲုကူး လှဴး ပှဲၤ တှဲၤလၳးတူးဟိးဟိး, ပှဲၤ မၴူးစၲၤဖၳဖၳ နၴူးစၲၤလှဴး ပှး။” 49 အၴူးတၲၤဖှၲုရဴ ဒၲ အဲၤသီး အၤကျဲး နၲုၤ, ကၤယးမွှီၤ န ဖဲးကၤယၤဖ အိၤတၲၤပြှဲၤ။ ဘီနၲုၤ တၲၤနၤ မၤ အၤ ထွှိး ပြှဲၤလၳးတူး ခၳၤကျဴဒၳၤလၲ။ ရဴ အၤ ဟၴထူၤ န, “သီး သဲညၴး လၤဟူး တၲၤစၲၤ꤮ တိၤ။ 50 ဒၲ ယၳဒၤဖၳ မၴူးစၲၤ အၴူးတၲၤမှၲု တၲၤစၲၤလှဴး ကှံရှၴပၴူကှံရှၴကူး လှဴး အၤညၴးနၲုၤ, ကၤယး အၴူးတၲၤပြှဲၤ ကှံ သၴူးကူး ဒၲ ယၳဒၤဖၳ အၴူးတၤဟၴၤ အၤညၴး နၲုၤ အၤရူကျဴး နၲုၤမၤ, သီး သဲညၴးတိၤ ဟဲး?” 51 အၤ ဟၴ ဖၳအၴူး နၲုၤမၤ အၤ ဟၴ နှီဒၴူဒံၤ န အၤ တှဲၤစှူတှဲၤဒဲၤ နၲုၤမှတိၤ။ စဴမၤရူၤ နဴးဟၴဘဲၤ လၳး ပြဲ။ ဘီနၲုၤ တၲၤနၤ အၤကၳးနၲုၤ, အဲၤ ယိး ထွှိး ပြှဲၤလၳးတူး ခၳၤကျဴဒၳၤလၲ ရဴ အၤ ဟၴပြှိၤ အိၤနှၴၤ ရှၴ န ယၴၤဆၳူ ကှံ သၴူး ဒၲ ယၳဒၤ မၴူးစၲၤဖၳ တၤဟၴၤ အၤညၴး ပှး, ဖၳနၲုၤပြဲ။ 52 ထၲုးရဴ အၤ တှဲၤဟၴပြှိၤ အၴူးနၲုၤ, အၤ တိးပြဲတံ ယၴၤဆၳူ ကှံ သၴူး ပှၴ ဒၲ ယၳဒၤဖၳ တၤဟၴၤ အၤညၴး နၲုၤမှတိၤ, အၤ ကှံ သၴူးတှၲု ပှၴကှၲုး စဴမၤရူၤ အၤဖၳအၤလှၴူၤ ဒၲ အၤ အိၤ လၤဟူး ဒၲ ထၴူးကှၴ အၤရှၲုၤ တၤဟၴၤ အၤညၴးညၴး။ သူဖၳ အၤ ကှံ မှၴၤထွှိးထူၤ ကၤယး အၴူးတၤဟၴၤ တၲၤမှၳၤတၲုး ပှး အၤညၴးနၲုၤ, အၳး ဘဲၤ မှၴၤသၴူး လၳး ပှး။ 53 ဖၳနၲုၤရဴ, စထူၤ ဘီနၲုၤ တၲၤညၴး တှးပျၴၤဟူး ရဴ ကၤယး ထွှိး ယၳဒၤဖၳ ခၳၤကျဴခၳၤကျူး တၤဟၴၤနၲုၤ, အၤ ပှၳး ကြၴၤမှၴၤသၴူး လၤဟူး ဟဴ ယၴၤဆၳူ။ 54 ဖၳနၲုၤရဴ, ယၴၤဆၳူ စၲု နှၲုးလှနှၲုးလီး ပှး ဒၲ ယၳဒၤဖၳ တၤဟၴၤ အၤကျဲး တိၤ။ အၤ စၲု အိၤခိကူး ဒၲ ကှၴဆဲးထၴူးကူၤ လှဴတၤမခၳၤ အၤခးဆၴူ ခးလှၴ တၲၤဖိၤ။ အၤ စၲု အိၤ နှီဒၴူ ဒဴး အၴူးတၲၤဒဴး နၲုၤမၤ အၳး အဲ န ဒဴးအၴဗၤရၴၤ, အၤ စၲု အိၤတှၲရှိ ကှၲုး န အၤ ခိးပၤစှဲ တၤဟၴၤ ဘီနၲုၤ။ 55 ယၳဒၤဖၳ ပွဲၤ ဒၲ အၳး အဲ န တှဲၤစၲုတၤလွိ ပွဲၤဒၳၤအၴူး အၤ ဖံၤဟူးဟဴ ရဴ, ကၤယး ဒဴးဖၳဆိၤဖၳ အိၤတၤဗီးတၤဗှၤ ဘီနၲုၤ တၤဟၴၤ ထူၤရှိ အဲကၳ꤮ လး လၤဟူး ဒၲ ဗှီးယၤရၳဆူၤလၴၤ။ ဘီ ပွဲၤ ဘဲၤတူၤဟီတိၤ အၤခဲးနၲုၤ, သူဖၳ အဲၤသီး ကှံ မှၴၤ မွှိးပျီးရှၴ လၤဟူး အၤသဲပျဴၤ ဖၳ တှဲၤစဴဘဲး လှၴကျိး အိၤ နၲုၤ ရဴ အၤ စၲု ရှၴ လၤဟူး ဒၲ ဗှီးယၤရၳဆူၤလၴၤ ပြဲ။ 56 အဲၤသီး မူပှၳး လၤဟူး ယၴၤဆၳူ။ ရဴ ဘီ အဲၤသီး အိၤပျဴ တှၲလၳး ဒၲ တှဲၤလၳးတူး ဟိးကၳး အၤခဲးနၲုၤ, အၤ ဆၳၤဒူး နှီဒၴူ ခၴူးလၳး တၲၤပြှဲၤ န တၲၤပြှဲၤ ရဴ အၤ ဟၴ န, “သီး တၤနှၴၤ ဖၳတၴး? အၤ ဟူး ပွဲၤ ပှး ဗးဟၴ?” 57 ဘီနၲုၤအၤခဲး ပြှဲၤလၳးတူး ခၳၤကျဴ တၤဟၴၤ န ဖၤရီၤဆူဲဖၳ တၤဟၴၤနၲုၤ အၤ ဟၴတှး လၤဟူး အၤငှိ န, သူဖၳ ပှဲၤ ကှံ ပှံနှီ ယၴၤဆၳူ နၲုၤ ရဴ, ကၤယး ဒၲ အၤ မူထၴူၤ လၳး တၲၤပြှဲၤပြှဲၤ နၲုၤ, အၤ တိးဘဲၤ ဟၴဆိၤလှၲုး ပှၴ ပှဲၤ။
1 ဘီ တှဲၤစၲုတၤလွိပွဲၤ ဘဲၤတူၤ ဟီတိၤ အၤညၴး သၲုးသိူ အၤခဲးနၲုၤ, ယၴၤဆၳူ စၲု ဒၲ ခၳးလၤစၤရၳ အိၤ နှီဒၴူ ဒဴးဘၴၤသၤနီ နၲုၤ။ ခၳးလၤစၤရၳ အၴူးတၲၤပြှဲၤ နၲုၤမၤ မှဟဴ ယၴၤဆၳူ မှၴၤ အီၤထဴၤထွှိးပြှဲၤ ကှၤခၴူး လၳး နၲုၤတၲၤပြှဲၤ ဟဴ။ 2 အၳး တၤရီၤတၤရူး ဘှၲုၤအၴၤဘှၲုၤအိးဆံၤ ဘူၤစဲၤ ယၴၤဆၳူ န ဒီးမှဴဟၴ ရဴ မဴၤမၤသ ဘှၲုၤအၴၤဘှၲုၤအိး ကှၲုးအၳး ဘီနၲုၤ။ ခၳးလၤစၤရၳ အိၤနူး အိၤတှၲကှၲုး ဒၲ ကၤယး အိၤနူး အၴၤ လၤဟူး ဒီး ဘီ ဒီးရှဲ ခးဆၴူ အၤကျဲး နၲုၤတၤဟၴၤ။ 3 ဘီနၲုၤအၤခဲး မဴၤမၤရီ ဖၴူဟူးနှီ ထၴူးနှၲုၤမံ ဒၲ အၳး အဲ န နှၤဒၳ အၴူးတၲၤပှူး။ ထၴူးနှၲုၤမံ အၴူးနၲုၤမၤ အၤငှၳၤဒၳၤ နူၤစဴ ရဴ အၤ ဖံၤ꤮ လှူၤထၲုၤ တၲၤစီး ခးလှၴ စဴ။ အၤ ဟူး လှူတှး ဒၲ ဘူၤစဲၤ ယၴၤဆၳူ ခးဒှၲုၤလှိၤ ရဴ အၤ ထံသၳးကူး န အၤခၳၤလှၲုၤ။ ထၴူးနှၲုၤမံ အၴူးနၲုၤ, အၤ နှၲုၤမံ စၲုပၴူၤ လှဴး စဴ ဟီၤ တၲၤမၴး စဴ။ 4 မၤနရဴ, ဒၲ အၤ ခိးပၤစှဲ အၤကျဲးနၲုၤ, အၤမွှီၤ န ခၳးယၳဒၤ အီၤစၤကရီယိၤ ဟၴအၴူးနၲုၤ အၤ အိၤတၲၤပြှဲၤ။ ဒၲ ခၴူး ရဴ အၤ အီၤဆဲးကူး ဘူၤစဲၤ နၲုၤတၲၤပြှဲၤ ဟဴ, ရဴ အၤ ဟၴ န, “အီၤဆဲးကူး ထၴူးနှၲုၤမံ ရဴ အၤ နှီ ရံး အၴူးနၲုၤ စၲုဒၴူ န ကၤယး ဆိးဖဆိးရှူၤဖၳ နၲုၤတၤဟၴၤ တိၤ မှၴၤတၴး? နှဲၤ ကီၤ အီၤဆဲးကူး မၤ အၤ နှီ စဴ ရံးဇၴူၤ ဒၴၤနၤရီ သၲုးစွှဲ စဴ မှၴၤနၴး!” 5 “Why was this ointment not sold for three hundred denarii and given to the poor?” 6 အၤ သဲဇှဴၤနှီ မှလၤကိး ကၤယး ဆိးဖဆိးရှူၤဖၳ ရဴ အၤ ဟၴ ဖၳအၴူးနၲုၤ မှတိၤ, မှၴၤတၴးဟၴရဴ အဲၤ မၤ အၤ ထွှိး ပြှဲၤအၴၤဟၲုၤ။ အၤ ဘဲၤ ပှံ ပှၴ အၳး ရံး, ဆးပှၴ အၳး ရံးပှၴူး ရဴ အၤ ဘဴဖၴူဟၲုၤ တၤမိးမိး ရံး ရဴ အၤ နဴးအၴၤ နှီဒၴူဒံၤ န အၤညၴးပြဲ။ 7 “အၤ အိၤ ဒံၤ, မှၴၤဒီဒူး တဲး အဲၤ တဲးမှၴ” ဘူၤစဲၤ ယၴၤဆၳူ ဟၴကှၤခၴူးဆံၤ ဖၳနၲုၤ။ “အၤ ဖၴူ အိၤဒွိ ပှၴဟဴ ဗး ထၴူးနှၲုၤမံ ဒၲ အၳး လှၴအီၤလှၲု ဗး ပှး တၲၤညၴး အၤညၴးဟဴ။ 8 ကၤယး ဆိးဖဆိးရှူၤဖၳ တၤဟၴၤ အိၤတှၲကှၲုး န သီး ပွှိး꤮ တၲၤဖှၲု စဴ, မၤနရဴ ဗးအၴူးနၲုၤ ဗး အိၤတှၲလး ကှၲုး နှ သီး တိၤ။” 9 ယၳဒၤဖၳ ဘဲမှၳၤဒၳၤ တၤဟၴၤ နှီဟၲုး န ဘူၤစဲၤ ယၴၤဆၳူ အိၤဘီ ဒဴးဘၴၤသၤနီ နၲုၤ ရဴ အၤ စၲု လၤဟူး ဘီနၲုၤ။ အဲၤသီး သဲဇှံ ဟူးမူထၴူၤ လၤဟူး တံ ဘူၤစဲၤ ယၴၤဆၳူ နၲုၤ မှတိၤ, အဲၤသီး သဲဇှံ ဟူး မူထၴူၤ တှၲုကှၲုး ခၳးလၤစၤရၳ ဒၲ ဘူၤစဲၤ ယၴၤဆၳူ မှၴၤထွှိးပြှဲၤ ကှၤခၴူး လၳး နၲုၤတၲၤပြှဲၤပြှဲၤ။ 10 ဖၳနၲုၤ အၤခၳၤအၤခၴူး ပြှဲၤလၳးတူး ခၳၤကျဴ တၤဟၴၤ တၤနှၴၤ ကြၴၤမှၴၤသၴူး တှၲကှၲုး ခၳးလၤစၤရၳ။ 11 မှၴၤတၴးဟၴရဴ ဒၲ ခၳးလၤစၤရၳ အၤခၳၤအၤခၴူး, ယၳဒၤဖၳ အဲပြှဲၤ ဗီးကူး ပြှဲၤလၳးတူး ခၳၤကျဴခၳၤကျူး တၤဟၴၤ ရဴ ထၴၤစၲုခိ လၤဟူး ဒၲ ယၴၤဆၳူ အိၤ ရဴ ဇှံအၴၤ လၤဟူး ဘူၤစဲၤ ယၴၤဆၳူ အၤခၳၤအၤခၴူး အၤ တၤနှၴၤ ကြၴၤမှၴၤသၴူး တှၲကှၲုး လၳး ပြဲ။ 12 ဒၲခၴူး တၲၤညၴးနၲုၤ, ကၤယး ဘဲမှၳၤ ဒၲ အၤ ဟူး တှဲၤစၲုတၤလွိပွဲၤ အၴူးတၤဟၴၤ နှီဟၲုး လၤဟူး န ယၴၤဆၳူ ဟူး ဒၲ ဗှီးယၤရၳဆူၤလၴၤ အၴူး ဒၲ ကျူလှိၤ ဟဴ ဖၳနၲုၤ။ 13 ဖၳနၲုၤရဴ အၤ ပှံနှီ လၤဟူး ကၤနဴးဒၳၤလဲၤ တၤဟၴၤ ရဴ အၤ ထၴၤစၲု မူဆံၤ လၳး, ရဴ အၤ အဲထိး လၤဟူး န, “ထၳၤသဲထူၤ လၤဟူး စဴမၤရူၤ!” “စဴမၤရူၤ ကှံ ဆဴးရီၤ အဲၤ ဒၲ အၤ ဟူး န ဘူၤစဲၤ အၤမွှီၤ အၴူးတၲၤပြှဲၤ!” “စဴမၤရူၤ ကှံ ဆဴးရီၤဒံၤ အီၤစၤရှၴလၤ အၤစဴဖူၤ အၴူးတၲၤပြှဲၤ နီ꤮” 14 ဘူၤစဲၤ ယၴၤဆၳူ ဖၴူနှီ မှူၤအဴလူ တၤလိဖၳ တၲၤဒှၲုး ရဴ အၤ ထူၤ ဆီၤဒူနှီ လၳး။ ရဴ အၴူးမၤ အၤ မှၴၤ လၲဘးဟဴ လီၤစးဆဲးကၳး ဟၴ န, 15 “ကၲ꤮ ယၤရၳဆူၤလၴၤ ဗှီးဖၳ သီး꤮! သဲအီၤဆၴး တဲး လၤဟူး တဲးမှၴ နီ! မူမဴး လၤဟူး, သီး ခွီစဴဖူၤ ဒူနှီ မှူၤအဴလူ တၤလိဖၳ ရဴ အၤ ဟူးတိးကှၲုး ဒၲ သီးအိၤ ဟဴ။” 16 ဘီနၲုၤအၤခဲး အၤ ခိးပၤစှဲ တၤဟၴၤ သဲညၴးပျိးဟီ တှဲၤမှၴၤထွှိးထူၤ အၤငှိလၤဆ အၴူးတၤဟၴၤ ဟီတိၤ။ တှဲၤ အၴူးတၤဟၴၤ နၲုၤမၤ အၤ မှၴၤ လၲဘးထူၤဟဴ ပြှဲၤပြှိၤ အၤ တှဲၤဟၴအိၤနှၴၤ မၳ꤮ နၳၤခဲး တၤဟၴၤဟဴ။ မၤနရဴ, ဘီ ဘူၤစဲၤ ယၴၤဆၳူ ကှၤကၤထူၤ ထၲုးဟဴ ဒၲ မှဴခၳၤ အၤခဲးနၲုၤ, အဲၤသီး သဲနှၴထူၤဘဲၤ နိၤပြဲ န အၤ မှၴၤ တှဲၤအၴူးတၤဟၴၤနၲုၤ အၤ တိးလှဴး န ပြှဲၤပြှိၤ အၤ တှဲၤဟၴအိၤနှၴၤ မၳ꤮ နၳၤခဲး တၤဟၴၤ။ ရဴ အၤ ခိးပၤစှဲ တၤဟၴၤ သဲနှၴထူၤ တှၲုဘဲၤ န အၤ မှၴၤတိး ပှၴလှဴး လၳး ဖၳ ပြှဲၤပြှိၤ ဟၴအိၤနှၴၤ နၲုၤတၤဟၴၤ။ 17 ကၤယး ဘဲမှၳၤ ဒၲ အၤ မူထၴူၤ ယၴၤဆၳူ အဲထၴၤ ခၳးလၤစၤရၳ ဒၲ လှၲုးကၳး ရဴ မှၴၤထွှိးပြှဲၤ ကှၤခၴူး လၳး တၤဟၴၤနၲုၤ, အဲၤသီး ဟၴဆိၤလှၲုး ပျၴၤဟူး ပှၴ ပှိ အၳး ဖၳ အဲၤသီး မူထၴူၤ နၲုၤ။ 18 အဲၤသီး နှီဟၲုး လၤဟူး န ဘူၤစဲၤ ယၴၤဆၳူ မှၴၤ တၤကျီခိခၴူၤ ပှၴ အၳး တှဲၤအၴူး အၤခၳၤအၤခၴူး, အဲၤသီး ထၴၤစၲု မူပျၳၤမူဖဲၤ လၳး န တှဲၤရီၤတှဲၤကူး အၴူး အၤခၳၤအၤခၴူး ဟဴ။ 19 ဖၳနၲုၤရဴ ဖၤရီၤဆူဲဖၳ တၤဟၴၤ ဟၴ နှီဒၴူ လၳး တၲၤပြှဲၤ န တၲၤပြှဲၤ ဖၳတၴး ဟၴရဴ, “မူမဴးလၴ! ပှဲၤ ဟၴပၴ ပှး အဲၤသီး တိၤဟဴ။ ဟၴၤခၳၤ တၲၤဘၤလှဴး ကြွိးကှၲုး လှဴး လၳးခၴူး ဟဴ!” 20 ကၤယး စၲု လၤဟူး တှဲၤစၲုတၤလွိ ပွဲၤဒၳၤ ဒၲ အၤ ကှံ စၲု စဴဘဲး စဴမၤရူၤ ဒၲ ဗှီးယၤရၳဆူၤလၴၤ အၴူးတၤဟၴၤ အၤကျဲးနၲုၤ, ကြီမၴူးစၲၤဖၳ အိၤကှၲုး တၤဟၴၤ။ 21 ကြီဖၳ အၴူးတၤဟၴၤနၲုၤ, အၤ စၲုတိး ဒၲ ခၳးဖီလီၤပၳၤ အၤ အိၤ, ရဴ အၤ ဟၴ လၳး န, “သရ, ပှဲၤ သဲ မူထၴူၤ ကှၲုးလး ဘူၤစဲၤ ယၴၤဆၳူ။” ခၳးဖီလီၤပၳၤ မၤ ဗှီးဘၴၤသၤစဲဒၤ, ကဲလၤလီၤ ကှၴဖၳ တၲၤပြှဲၤ။ 22 ခၳးဖီလီၤပၳၤ စၲု ဟၴဆိၤ ပှၴ ခၳးအဲၤဒြၳ ရဴ အဲၤ န ခၳးအဲၤဒြၳ စၲု ဟၴဆိၤလှၲုး ပှၴ ယၴၤဆၳူ။ 23 ရဴ ဘူၤစဲၤ ယၴၤဆၳူ ဟၴ န, “ဆၲုခဲး ဟူးတှၲုဟဴ ဒၲ ပြှဲၤလှၳၤကၤယး အၤဖၳခၳးအၴူး ကှံ နှီဘဲၤဟဴ တှဲၤတၤရၴူးဒၳၤ တၤရၴူးထၳး ဟဴ။ 24 ဗး ဟၴစဴစဴ သီး, ဘှၲုကၳးလးပျဴၤ တၲၤပျဴၤနၲုၤ, အၳး ကီၤ အီၤလှၲုတှး လၳး ဒၲ ဟၴၤခၳၤ တိၤ ဟၴနၲုၤ, အၤ ဖဲထူၤ အၤ သဲၤထူၤ စှူတိၤ။ မၤနရဴ အၳး ကီၤ အီၤလှၲုတှး လၳး ဟၴနၲုၤ, အၤ ကှံ ဖဲထူၤ သဲၤထူၤ အဲနူၤစဴ ပှး။ 25 ကၤယး ဒၲ အၤ မှိၤ နှီဒၴူ အၤ သဲထွှိးပြှဲၤ ဒၲ ဟၴၤခၳၤအၴူး တၲၤပြှဲၤပြှဲၤ နၲုၤ, အၤ နှီဘဲၤ သဲထွှိးပြှဲၤ တၤစှၳပြှဲၤ တိၤ။ မၤနရဴ ကၤယး ဒၲ အၤ ကီၤ သဲလိး နှီဒၴူ အၤ သဲထွှိးပြှဲၤ ဒၲ ဟၴၤခၳၤအၴူး တိၤ တၲၤပြှဲၤပြှဲၤ နၲုၤ, အၤ ကှံ နှီဘဲၤ သဲထွှိးပြှဲၤ တၤစှၳပြှဲၤ ပှး။ 26 အၳးပၴးပၴး꤮ ဘဲၤဘဲၤ ဒၲ အၤ မှၴၤ ဗး တှဲၤမှၴၤ နၲုၤ, အၤ ဘဲၤကြွိး ဗးခၴူး။ တံမၤ, ဗး အိၤဘီတၴး꤮ တၲၤဖိၤ ဘဲၤဘဲၤ, အဲၤ ကှံ အိၤကှၲုး ဘီနၲုၤ ပှး။ ဗးဖဲး ကှံ မှၴၤလီးမှၴၤတၤခဲး ကၤယး ဒၲ အၤ မှၴၤ ဗး တှဲၤမှၴၤ နၲုၤတၲၤပြှဲၤ ပှး။ 27 “အၤ စှၴူး နူၤစဴ ဗး သဲပျဴၤ။ ဗး တိးဘဲၤ ဟၴ ဖၳတၴး? ‘ကၲ꤮ ဗးဖဲး သဲဒိး, နဴးခူဘဲၤ တဲး ဗး န တှဲၤစှၴူးတှဲၤစှံၤ အၴူး တဲးမှၴ နီ꤮’ ဗး တိးဘဲၤ ဟၴ ဖၳနၲုၤ ဟဲး? ဗး တိးဘဲၤ ဟၴ ဖၳနၲုၤ တိၤ။ ဗး ဟူးလှူၤ နူး ဟဴ ဒၲ တှဲၤအၴူးနၲုၤ အၤညၴးဟဴ။ 28 ကၲ꤮ ဖဲး, နှဲၤ တၤရၴူးဒၳၤထၳး စဴ ဘ꤮ တၴး နၲုၤ, ဒၴူလှၲုး ပှၴ အၳး နီ꤮။” အၴူးတၲၤဖှၲုရဴ ငှိ အိၤ ဒၲ မှဴခၳၤ ဟၴတှး န, “ဗး ဒၴူလှၲုး ထၲုးဟဴ ဗး တှဲၤတၤရၴူးဒၳၤ တၤရၴူးထၳး ဟဴ, ဗး ကှံ ဒၴူလှၲုး ခၴူးသူ ပှး။” 29 ကၤယး ဘဲမှၳၤ အိၤ လၤဟူး ဘီနၲုၤ တၤဟၴၤ နှီဟၲုး လၤဟူး အၤပြှၤအၴူး ရဴ တၤဟၴၤဟၴၤ နၲုၤ အၤ ဟၴ လၤဟူး န, မဴကြှဴး ပြှၤရံပြှၤတဲ, တၤဟၴၤဟၴၤ ရဴ အၤ ဟၴ န, မှဴခၳၤ တၤနၴဖၳ ဟၴဘဲၤတှး လၳး။ 30 “ငှိပြှၤထူၤ အၴူးနၲုၤမၤ သီး လှၴနှီဘွီ နှီတၤရၴူး အၤညၴးပြဲ, ဗးညၴး မှတိၤ,” အၤ ဟၴ အဲၤသီး ဖၳနၲုၤ။ 31 “ခိးညှရဴ ဆၲုခဲး ဟူးတှၲုဟဴ ဒၲ အၳး ကှံ စီၤရူၤ ပြှဲၤလှၳၤ ဟၴၤခၳၤဖၳ ဟဴ။ ခိးညှရဴ ဆၲုခဲး ဟူးတှၲုဟဴ ဒၲ အၳး ကှံ ဗှဲထၴၤကူး ခီးနၴရီၤစှူ ခၳၤကျဴ စၴၤထၲၤ ဒၲ အၤ ပၲ ကၤယး ဒၲ အၤ ဇှံအၴၤတိၤ တၤဟၴၤ အၴူးနၲုၤ တၲၤဒှၲုး ဟဴ။ 32 မၤနရဴ ဆၴူ꤮ အၳး မှံးသၴူးထူၤလၲးဟဴ ဗး ဒၲ တိးလူး ဟီၤထံၤလှိၤ အၤခဲးပှးနၲုၤ, ဗး ကှံ အဲဟူး လှဴး ကၤယး ပွှိး꤮ တၲၤပြှဲၤ ဒၲ ဗးအိၤ ပှး။” 33 အၤ ဟၴ ဖၳအၴူး နၲုၤမၤ အၤ သဲဇှံ ဒၴူလှၲုး သဲညၴး ပှၴ အၳး န အၤ ကှံ သၴူး ဖၳတၴး ပှး နၲုၤပြဲ။ 34 ကၤယး ဘဲမှၳၤ ဟၴဆံၤ န, “ပှဲၤ နှီဟၲုးနဴ တှဲၤသိူတှဲၤသူၤ ဟၴ န ခြီနၲုၤ အၤ ဘဲၤ အိၤထွှိးပြှဲၤ တၤစှၳပြှဲၤ ဗး, ရဴ နှဲၤ စၲု ဟၴတှၲု န, ‘အၳး ဘဲၤ မှံးသၴူးထူၤ ပြှဲၤလှၳၤကၤယး အၤဖၳခၳးအၴူး ဒၲ ဟီၤထံၤလှိၤ’ ဖၳတၴး? ‘ပြှဲၤလှၳၤကၤယး အၤဖၳခၳး’ မၤ အၳးပၴး?” အၤ ဟၴ လၤဟူး ဖၳနၲုၤ။ 35 အၴူးတၲၤဖှၲုရဴ ဘူၤစဲၤ ယၴၤဆၳူ ဟၴလှူၤ နှီဒၴူ အၤနှၴ န, “တှဲၤလီး အၴူးနၲုၤ အၤ အိၤကှၲုးပှိ န သီး တၤပျှၲၤဖၳ ပှးပြဲ။ ဘီ တှဲၤလီး အိၤကှၲုးပး န သီး အၤခဲးနၲုၤ, တၤရှၳ စၲုပျၴၤဟူး လၤဟူး။ တှဲၤခီ ကှံ ဟူးတှၲု ခၴူး သီး ပှး။ ကၤယး စၲု ဒၲ တှဲၤခီကျဲး တၲၤပြှဲၤနၲုၤ, အၤ စၲုတိး ဘီတၴးနၲုၤ, အၤ သဲညၴး နှီဒၴူ အၤနှၴ တိၤ။ 36 သူဖၳ သီး ကှံ ထွှိးထူၤ တှဲၤလီးဖၳ တၤဟၴၤနၲုၤ, ဘီ တှဲၤလီး အိၤကှၲုးပး န သီး အၤခဲးအၴူး, ဇှံအၴၤ လၤဟူး အဲၤ နီ꤮။” အၤ ဟၴဘဲၤ ထၲုး ဖၳနၲုၤ ရဴ အၤ ထၴၤစၲု တၤဖး အှၲုခိကူး န အဲၤသီး။ 37 ဘူၤစဲၤ ယၴၤဆၳူ ဒၴူလှၲုး ပှၴ စဴ အဲၤသီး လှဴး တှဲၤမှၴၤ တၤကျီခိခၴူၤ အၴူးတၤဟၴၤ ဒၲ အဲၤသီး မဲၤသဲၤညၴး စဴ တၤဒၲၤရဴ အၤ ဇှံအၴၤ ပးနူးဟီ လၳး တိၤတိၤ။ 38 ဒၲ အၤ ဇှံအၴၤ ဖၳအၴူး တိၤ အၤခၳၤအၤခၴူး, အၤတိး လှဴးဟဴ ပြှဲၤပြှိၤ ယၤဆူယၤ လှၴဟၴအိၤနှၴၤ အၤငှိအၴူး န, “ကၲ꤮ ဖဲး, အၳးပၴး ဇှံအၴၤဟဴ ပှဲၤ ဟၴဆိၤဒၲၤညး ပှၴ အၳး အၴူးနၲုၤ တၤဟၴၤ ပၴး? နှဲၤ ဒၴူလှၲုး ပှၴဟဴ နှဲၤ တှဲၤပြှိၤတှဲၤပြှူး အၴူး န အၳးပၴးဟဴ?” ပြှဲၤပြှိၤ ယၤဆူယၤ ဟၴဖၳနၲုၤ။ 39 မှၴၤတၴးဟၴရဴ အဲၤသီး ဇှံအၴၤဘဲ တိၤ ဟၴနၲုၤ, ပြှဲၤပြှိၤ ယၤဆူယၤ ဟၴကှၲုးပး န, 40 “သူဖၳ အဲၤသီး ကှံ ကှၤခၴူးတိး တဲး လၤဟူး ဘူၤစဲၤ တဲးမှၴ, ထၲုးတိၤ သူဖၳ အဲၤသီး နဴးဇၤဆီးမှၴ တဲး လၤဟူး အၤနှၴ န ဘူၤစဲၤ တဲးမှၴ နၲုၤရဴ, ဘူၤစဲၤ မှၴၤခီဟဴ အဲၤသီး မဲၤသဲၤ, ဘူၤစဲၤ မှၴၤပြၴူးဟဴ အဲၤသီး သဲပျဴၤ ခၳၤခၴူး အဲၤသီး မူထၴူၤ စှူ န အၤမဲၤသဲၤ တိၤ, အဲၤသီး တၤနှၴၤပျိးဘဲ လၤဟူး န အၤသဲပျဴၤ တိၤ။” အၤ ဟၴ ဖၳနၲုၤ။ 41 ပြှဲၤပြှိၤ ယၤဆူယၤ ဟၴဖၳအၴူး မှၴၤတၴးဟၴရဴ အၤ မူထၴူၤနဴ ဘူၤစဲၤ ယၴၤဆၳူ အၤ တၤရၴူးဒၳၤတၤရၴူးထၳး တံရဴ အၤ ဟၴ လၳးရီၤလၳးကူး ဖၳအၴူး ပြဲ။ 42 မၤနရဴ ဘီနၲုၤခဲး ကၤယး ဇှံအၴၤ ရှိအဲလး ဘူၤစဲၤ ယၴၤဆၳူ။ ယၳဒၤဖၳ ခၳၤကျဴဒၳၤ ကၤဆၳၤထၳး အၤကျဲး တၤဟၴၤနၲုၤ အၤ ဇှံအၴၤကှၲုး စဴ လၳး စဴ။ မၤနရဴ သဲအီၤဆၴး န ဖၤရီၤဆူဲဖၳ တၤဟၴၤ ဗှဲထၴၤကူး အဲၤသီး ဒၲ တှဲၤစဴဘဲး ဟိးကျဴး ရဴ, အဲၤသီး ဟၴဆိၤထၴၤ လှၲုးဘံၤ ပှၴ အၳး န အၤတှဲၤဇှံ တိၤ။ 43 မှၴၤတၴးဟၴရဴ, အဲၤသီး သဲဇှံ နဴးထၳၤသဲနှီ လၤဟူး အၤနှၴ န ပြှဲၤလှၳၤ ကၤယး နၲုၤ အၤဒၳၤ လၲကျဴး စဴ န အၤ သဲဇှံ နဴးထၳၤသဲနှီ အၤနှၴ န စဴမၤရူၤ စဴ။ 44 အၴူးတၲၤဖှၲုရဴ ဘူၤစဲၤ ယၴၤဆၳူ အဲထိးထူၤ န, “ဘီ ကၤယး တၲၤပြှဲၤပြှဲၤ ဇှံအၴၤ ဗး အၤခဲးနၲုၤ, အၤ ဇှံအၴၤ တံ ဗး မှတိၤ, အၤ ဇှံအၴၤ တှၲုကှၲုးဟဴ ပြှဲၤ ဒၲ အၤ နဴးဟူးလှူၤ ဗးအၴူး တၲၤပြှဲၤ ဟဴ။ 45 ကၤယး ဒၲ အၤ မူထၴူၤ ဗး နၲုၤ, အၤ မူထၴူၤ ကှၲုးဟဴ ပြှဲၤ ဒၲ အၤ နဴးလှူၤ ဗးအၴူး တၲၤပြှဲၤ ဟဴ။ 46 သူဖၳ လှဴး꤮ ကၤယး ဒၲ အၤ ဇှံအၴၤ ဗး တၤဟၴၤ ကှံ အိၤပှး တဲး ဒၲ တှဲၤခီကျဲး တဲးမှၴ နၲုၤ ဗး ဟူး လီးတၤခဲးထူၤ ဖၳ တှဲၤလီး တၲၤမၴး ဒၲ ဟၴၤခၳၤ အၴူးနၲုၤဟဴ။ 47 “ကၤယး တၲၤပြှဲၤပြှဲၤ ကီၤ နှီဟၲုး ဗးလှးဗးငှိ ရဴ အၤ ကှံ ဇှံအၴၤတိၤ ဟၴနၲုၤ, ဗး စီၤရူၤ လၳး တိၤ။ မှၴၤတၴးဟၴရဴ, ဗး ဟူးလှူၤ ဒၲ ဟၴၤခၳၤ အၴူးနၲုၤမၤ, ဗး ကှံ ဟူး စီၤရူၤ အၳး အၤညၴးနၲုၤ မှတိၤ, ဗး ကှံ ဟူး မှၴၤဆီးပျဲကှၤ အၳး အၤညၴးပြဲ။ 48 ကၤယး ဒၲ အၤ ထၴဆံၤ ဗး ရဴ အၤ ဖၴူဆံၤ ကှၲုး ဗးလှးဗးငှိ တိၤ တၤဟၴၤနၲုၤ, ပြှဲၤစီၤရူၤ အဲၤသီး အၤ အိၤတၲၤပြှဲၤ။ မှဴညၴးမှဴသဲး ဒၲခၴူးလၲ တၲၤညၴးပှး နၲုၤ, ငှိ ဒၲ ဗး ဟၴဘဲၤ အၴူးတၤဟၴၤ ကှံ ထွှိး အဲၤသီး ပြှဲၤစီၤရူၤ တှဲၤ ပှး။ 49 မှၴၤတၴးဟၴရဴ, ဗး ဟၴဘဲၤ အၴူးနၲုၤ, ဗး ဟၴဘဲၤ န ဗး တၤရၴူးဆိူၤဆဴး နှီဒံၤ နၲုၤ မှတိၤ။ မှတၲၤခိနၲုၤ ဗး ဟၴဘဲၤ ဖၳ ဗးဖဲး ဒၲ အၤ နဴးဟူး ဗးအၴူး တၲၤပြှဲၤ နဴးဟၴဘဲၤ ဗး နၲုၤပြဲ။ 50 ဗး သဲညၴး န ဗးဖဲး အၤ တှဲၤမၴၤကူးငှိ အၴူးနၲုၤ အၤ သၳးစၲု အၳး ဒၲ တှဲၤထွှိးပြှဲၤ တၤစှၳပြှဲၤ။ ဖၳနၲုၤရဴ ဗး ဟၴ ဖၳ ဗးဖဲး နဴးဟၴ ဗး နၲုၤတၤဟၴၤ ပြဲ။”
1 ဘီ တှဲၤစၲုတၤလွိပွဲၤ ဘဲၤတူၤ ဟီတိၤ အၤခဲးနၲုၤ, ဘူၤစဲၤ ယၴၤဆၳူ သဲညၴးဟဴ န ဆၲုခဲး ဒၲ အၤ ကှံ ဘဲၤ ဗီးကူး ဟၴၤခၳၤ ရဴ အၤ ဘဲၤ ကှၤ ဒၲ အၤဖဲးအိၤ နၲုၤ အၤ ဟူးတှၲုဟဴ။ ရဴ အၤ မှိၤနှီ အၤ ခိးပၤစှဲ ဒၲ အၤ အိၤ ဒၲ ဟၴၤခၳၤ အၴူးတၤဟၴၤ ပွှိး꤮ တၲၤဖှၲု စဴ။ အၤ မှိၤ တှၲု စဴ အဲၤသီး ဒၲ အၤ တၤဒံၤ စဴ။ 2 ဘီနၲုၤခဲး ဘူၤစဲၤ ယၴၤဆၳူ န အၤ ခိးပၤစှဲ တၤဟၴၤ အၴၤ လၤဟူး ပး ဒီး မှဴဟၴ။ ရဴ ခၳးဆီူမိၤ အီၤစၤကရီယိၤ အၤဖၳခၳး ယၳဒၤ အီၤစၤကရီယိၤ အၴူးတၲၤပြှဲၤနၲုၤ, သူဖၳ အၤ ကှံ အီၤဆဲးတှးကူး ဘူၤစဲၤ ယၴၤဆၳူ အၤညၴးနၲုၤ, ခီးနၴရီၤစှူ ခၳၤကျဴ စၴၤထၲၤ ဟၴဘဲၤနှၲုး ထၲုးဟဴ အၤငှိ ဒၲ လၳး သဲပျဴၤကၳး ဟဴ။ 3 ဘူၤစဲၤ ယၴၤဆၳူ သဲညၴးဒံၤဟဴ န အၤဖဲး ဒၴူတှး ထၲုးလှဴးဟဴ လၳး တှဲၤပြှိၤပြှူး ဆိူၤဆဴး ဒၲ တှဲၤလှဴး꤮ ပျီး အၤခၳၤ ဟဴ။ အၤ သဲညၴး န အၤ အိၤ ဒၲ စဴမၤရူၤ အိၤဟူး ရဴ အၤ ကှံ ကှၤခၴူး ခၴူးသူ ဒၲ စဴမၤရူၤ အၤ အိၤ ပှး။ 4 ဖၳနၲုၤရဴ အၤ ကၤထဴၤ ဒၲ အဲၤသီး လှၴအၴၤ ဒီးရှဲ ခးဆၴူ ရဴ အၤ ပျွိကူး အၤ စှၤကျဴးထၳး ထၲုးရဴ အၤ စဴးမၤ အၤညှတှး န ကၤထိး လှၴထံသၳး တၲၤဘၤ။ 5 အၤ မှၴၤထၲုး ဖၳနၲုၤရဴ, အၤ ဇံးနှၲုး ထၴူး ဒၲ ဘၴးလှဴ တၤအဲၤဒၳၤ ကၳးဇှး တၲၤဘဲၤ အၤကၳး ရဴ အၤ စထူၤ ဆီးပျီး ပှၴ အၤ ခိးပၤစှဲ တၤဟၴၤ အၤခးဒှၲုၤ။ ရဴ အၤ ထံသၳးကူး ပှၴ အဲၤသီး န ကၤထိး ဒၲ အၤ စဴး ဒၲ အၤ ညှတှးကၳး နၲုၤတၲၤဘၤ။ 6 အၤ စၲုတိး ဒၲ ခၳးဆီူမိၤ ပၴၤတၤရၳ အၤ အိၤ ရဴ အၤ ဟၴဆံၤ လၳး န, “ဘူၤစဲၤ နှဲၤ ကှံရှၴ ဆီးပျီး ဗး ခးဒှၲုၤ ဟဲး?” 7 ရဴ ဘူၤစဲၤ ယၴၤဆၳူ ဟၴကှၤခၴူးဆံၤ လၳး န, “ဗး စၲုမှၴၤ တှၲု ဖၳအၴူး မၤမှၴၤတၴးဟၴရဴ ခိးညှအၴူး နှဲၤ သဲညၴး ဟီတိၤ တၤဒၲၤရဴ တၲၤညၴးညၴး ပှးနၲုၤ, နှဲၤ သဲညၴးပျိးဒံၤ ပှး။” 8 “တိၤ꤮, နှဲၤ ဘဲၤ ဆီးပျီးနှီ ဗး ခးဒှၲုၤ တၤကီၤ꤮ တိၤ,” ခၳးပၴၤတၤရၳ ဟၴဆံၤ လၳး ရဴ ဘူၤစဲၤ ယၴၤဆၳူ ဟၴ လၳး န, “ဗး ကီၤ ဆီးပျီးနှီ နှဲၤ တိၤ ဟၴရဴ, နှဲၤ ထွှိး ဗး ခိးပၤစှဲ မှတိၤ။” 9 ရဴ ခၳးဆီူမိၤ ပၴၤတၤရၳ ဟၴ ခၴူး န, “ကီၤ မှၴၤဖၳနၲုၤရဴ, ဘူၤစဲၤ, ဆီးပျီး တံ တဲး ဗး ခးဒှၲုၤ တဲးမှၴ။ ဆီးပျီး တှၲု ပှၴကှၲုး လှဴးဒံၤ ဗး တၤခၳၤ န ဗး ခၳၤကျဴ အၴူးနၲုၤ။” 10 ရဴ ဘူၤစဲၤ ယၴၤဆၳူ ဟၴဆံၤ ကှၤခၴူး လၳး န, “ကၤယး ဒၲ အၤ အီၤလှၲု ထၲုးဟဴ ထၴူး တၲၤပြှဲၤနၲုၤ, အၤနှၴ တၲၤပြှဲၤလှဴး အၤ ပျီးလှဴးဟဴ, အၤ လိၤ ဆီးပျီး ပြဲတံ အၤခးဒှၲုၤ ပြဲ။ သီး သဲပျဴၤ မွှိးပျီးသီးပျိၤ လှဴးဟဴ ဗး, မၤနရဴ အၤ မွှိးပျီးသီးပျိၤ လှဴး ပွှိး꤮ တၲၤပြှဲၤ တိၤ။” 11 မှၴၤတၴးဟၴရဴ အၤ သဲညၴး န အၳး ကှံရှၴ အီၤဆဲးတှးကူး လၳး တၲၤပြှဲၤ ပှး, တံရဴ အၤ ဟၴ န သီး မွှိးပျီးသီးပျိၤ လှဴး ပွှိး꤮ တၲၤပြှဲၤ တိၤ, အၤ ဟၴ ဖၳနၲုၤ ပြဲ။ 12 ဘီ အၤ ဆီးပျီး ထၲုးဟဴ အဲၤသီး ခးဒှၲုၤ အၤခဲးနၲုၤ, အၤ သူထူၤ ခၴူးသူ အၤစှၤကျဴး ရဴ အၤ ကှၤခၴူး အိၤနူး ခၴူးသူ ဒၲ အၤခးလှၴ။ ရဴ အၤ ဆၳၤဒူး အဲၤသီး န, “ဗး မှၴၤ ပှၴ သီး ဖၳအၴူး နၲုၤမၤ သီး သဲညၴးပျိး လၤဟူး ဟဲး?” အၤ ဟၴ ဖၳနၲုၤ။ 13 “‘သရ,’ တိၤမၤန, ‘ဘူၤစဲၤ,’ သီး အဲ လၤဟူး ဗး ဖၳနၲုၤမၤ အၤတိး ပြဲ, မှၴၤတၴးဟၴရဴ ဗး ထွှိး မှလၤကိး ဖၳ သီး အဲ ဗး နၲုၤနၲုး꤮။ 14 ဖၳနၲုၤရဴ ခိးညှအၴူး ဗး ထွှိး သီး ဘူၤစဲၤ သီး သရ စဴ ရဴ ဗး ကီၤ ဆီးပျီး ပှၴ သီး ခးဒှၲုၤ ကီၤဟၴရဴ သီး တိး ဆီးပျီး ပှၴကှၲုး လၳး ခးဒှၲုၤ တၲၤပြှဲၤ န တၲၤပြှဲၤ နီ꤮။ 15 ဗး မှၴၤကူး ပှၴ သီး လှၴကြွိး မှၴၤဘူဘံး အၴူးတၲၤစၲၤ ဟဴ။ သီး တိး ကြွိးမှၴၤကှၲုး လၤဟူး ဖၳ ဗး မှၴၤ ပှၴ သီး အၴူးနၲုၤ။ 16 ဗး ဟၴစဴစဴ သီး, လၳၤလၴနၲုၤ အၤဒၳၤကျဴး န အၤဘူၤစဲၤ တၲၤပြှဲၤ꤮ တိၤ။ ကၤယး ဒၲ အၳး နဴး လၳး အၴူးတၲၤပြှဲၤနၲုၤ အၤဒၳၤကျဴးလၲ န အၤ နဴး လၳး နၲုၤတၲၤပြှဲၤနၲုၤ အၤ အိၤ တၲၤပြှဲၤ꤮ တိၤ။ 17 ခိးညှရဴ သီး သဲညၴး လၤဟူး ဟဴ တှဲၤအၴူးတၤဟၴၤ ဟဴ။ သီး ကီၤ အိၤထွှိးပြှဲၤ ကြွိးမှၴၤ တှဲၤအၴူးတၤဟၴၤ ဟၴနၲုၤ, သီး ကှံ နှီဘဲၤ တှဲၤဆဴးရီၤ။ 18 “ဗး သဲ ဟၴ လှဴးပျီး သီး ပွှိး꤮ တၲၤပြှဲၤ ဖၳနၲုၤ မှတိၤ။ လှဴး꤮ သီး ဒၲ ဗး နွိထူၤ အၴူးတၤဟၴၤ နၲုၤမၤ ဗး သဲညၴး နှီဒၴူ လှဴး သီး ပွှိး꤮ တၲၤပြှဲၤ။ မၤနရဴ သူဖၳ လီၤစးဆဲးကၳး ဟၴအိၤနှၴၤ ကှံ လၲဘးထူၤ အၤညၴးနၲုၤ, ‘ကၤယး ဒၲ အၤ အၴၤတှၲအိးတှၲကှၲုး တှဲၤ န ဗး အၴူးတၲၤပြှဲၤ သဲထၴၤ ဗး ရဴ အၤ တၤပှဲး ကှၤခၴူးကူး ဟဴ ဗး န အၤခးနှၲုၤကူး ဟဴ။’ 19 “ဆၴူ꤮ အၤ ထွှိးထူၤဟဴ ပှးနၲုၤ, သူဖၳ သီး ကှံ ဇှံအၴၤ န ဗး မၤ မၴၤဆီယၤ နၲုၤ တၲၤပြှဲၤဟဴ နၲုၤရဴ, ဗး ဟၴဆိၤလှၲုးကူး ပှၴ ဟဴ သီး ခိးညှ ဟဴ။ 20 ဗး ဟၴစဴစဴ သီး, ကၤယး တၲၤပြှဲၤပြှဲၤ ဒၲ အၤ အဲမှိၤဆံၤ ကၤယး ဒၲ ဗး နဴးဟူး အဲၤ အၴူးတၲၤပြှဲၤ နၲုၤမၤ, အၤ အဲမှိၤဆံၤ ဟဴ ဗး ဟဴ။ ကၤယး တၲၤပြှဲၤပြှဲၤ ဒၲ အၤ အဲမှိၤဆံၤ ဗး နၲုၤမၤ အၤ အဲမှိၤဆံၤ ဟဴ ပြှဲၤ ဒၲ အၤ နဴးဟူး ဗးအၴူး နၲုၤတၲၤပြှဲၤ ဟဴ။” 21 အၤ ဟၴထၲုး ဖၳနၲုၤရဴ, အၤ ဆိးရှူၤ နူၤစဴ လၳးသဲပျဴၤ ရဴ အၤ ဟၴထၴၤ လှၲုးလီးကူး ပှၴ အဲၤသီး န, “ဗး ဟၴစဴစဴ သီး, ဒၲ သီးကျဲး အၴူးနၲုၤ ကၤယး ဒၲ အၤ ကှံ အီၤဆဲးတှးကူး ဗး ပှးနၲုၤ အၤ အိၤ တၲၤပြှဲၤ,” အၤ ဟၴလီးကူး အဲၤသီး ဖၳနၲုၤ။ 22 အၤ ခိးပၤစှဲ တၤဟၴၤ မူအိၤတှူ နှီဒၴူ လှဴး လၳး တၲၤပြှဲၤ န တၲၤပြှဲၤ ရဴ အၤ သဲဇှံ ဟၴ ဘီတၴး တၲၤပြှဲၤ နၲုၤ, အၤ တၤနှၴၤပျိး လၤဟူး တိၤ, အၤ ထၴၤ တၤပှၤ လှဴးပျီး စဴ အဲၤသီး။ 23 ဒၲ အၤ ခိးပၤစှဲ အၤကျဲး ဒၲ အၤ မှိၤ နှီဒၴူ နူၤစဴ လၳး အၴူးတၲၤပြှဲၤနၲုၤ, အၤ အိၤနူးဖံၤ ဒၲ ဘူၤစဲၤ ယၴၤဆၳူ ခးဆၴူ တၲၤကၴူး။ 24 ခၳးဆီူမိၤ ပၴၤတၤရၳ နှၲုၤစၲု အၤခၳၤကျဴ ဒၲ အၤ အိၤနူးဖံၤ လၳး ခးဆၴူ နၲုၤတၲၤပြှဲၤ ရဴ အၤ ဟၴ လၳး န, “ဆၳၤဒူး အဲၤ နၲုၤ, အၤ သဲဇှံ ဟၴ မၤအၳးပၴး?” အၤ ဟၴဟၲုၤ စၲု လၳး ဖၳနၲုၤ။ 25 အၤ တၤတၴၤရှဲး ဘူၤစဲၤ ယၴၤဆၳူ ရဴ အၤ ဟၴ လၳး န, “ဘူၤစဲၤ, နှဲၤ ဟၴ နၲုၤတၲၤပြှဲၤ မၤ အၳးပၴး?” အၤ ဆၳၤဒူး လၳး ဖၳနၲုၤ။ 26 ဘူၤစဲၤ ယၴၤဆၳူ ဟၴ လၳး န, “ဗး တၲၤနှၲုး ခဴမၳး တၲၤကၴူး ဒၲ အီၤသွီဘၴးကၳး ရဴ ဗး ဒၴူရှဲး န လၳး နၲုၤတၲၤပြှဲၤ မၤ အဲၤဟဴ။” အၤ ဟၴထၲုး ဖၳနၲုၤ ရဴ အၤ ဖၴူ ခဴမၳး တၲၤကၴူး ရဴ အၤ တၲၤနှၲုး ဒၲ အီၤသွီဘၴးကၳး ရဴ အၤ ဒၴူစၲု န ဖဲးဆီူမိၤ အၤဖၳခၳး ခၳးယၳဒၤ အီၤစၤကရီယိၤ။ 27 ခၳးယၳဒၤ ဖၴူထၲုးထၲုး ခဴမၳး န, ခီးနၴရီၤစှူ ခၳၤကျဴ ဟူးနှၲုး ဒၲ လၳးကၳး။ “နှဲၤ ကှံရှၴ မှၴၤ အီးတၴးနၲုၤ, စၲု မှၴၤပြူးမဴး,” ဘူၤစဲၤ ယၴၤဆၳူ ဟၴ လၳး ဖၳနၲုၤ။ 28 မၤမှၴၤတၴးဟၴရဴ ဘူၤစဲၤ ယၴၤဆၳူ စၲု ဟၴတှၲု လၳး ဖၳအၴူး မၴၤတၴး꤮ နၲုၤ, အဲၤသီး အိၤ ဘီ ဒီးရှဲ ခးဆၴူ နၲုၤတၤဟၴၤ သဲညၴး တၲၤပြှဲၤ꤮ တိၤ။ 29 ခၳးယၳဒၤ ယိး ပှံ ပှၴ အဲၤသီးရံး ခၳၤခၴူး, အဲၤသီး တၤဟၴၤဟၴၤ နၲုၤ, အၤ တၤနှၴၤ လၤဟူး ပြဲ န ဘူၤစဲၤ ယၴၤဆၳူ နဴးစၲု အီၤပြှီၤ လၳး န တှဲၤ ဒၲ အၤ လိၤ န ပွဲၤဒၳၤအၴူး အၤညၴး တိၤမၤန အၤ နဴးစၲု ဒၴူ လၳး န ကၤယး ဆိးရှူၤဆိးဖဖၳ တၤဟၴၤ တှဲၤတၲၤစၲၤစၲၤ ပြဲ, အၤ တၤနှၴၤ လၤဟူး ဖၳနၲုၤ။ 30 ခၳးယၳဒၤ ဖၴူထၲုးထၲုး ခဴမၳး န, အၤ ထၴၤစၲု စဴ။ ဘီနၲုၤခဲး မၤ မှဴခီ ဟဴ။ 31 ခၳးယၳဒၤ ထၴၤစၲု ထၲုးဟဴ အၤခဲးနၲုၤ, ဘူၤစဲၤ ယၴၤဆၳူ ဟၴ အဲၤသီး န, “ခိးညှအၴူး ဆၲုခဲး ဟူးတှၲုဟဴ ဒၲ ပြှဲၤလှၳၤကၤယး အၤဖၳခၳး မှဟဴ ဗးအၴူး ကှံ နှီဘဲၤဟဴ တှဲၤတၤရၴူးဒၳၤ တၤရၴူးထၳး ဟဴ။ စဴမၤရူၤ ကှံ နှီဘဲၤ ဒီးတံ တှဲၤတၤရၴူးဒၳၤ တၤရၴူးထၳး ဒၲ ပြှဲၤလှၳၤ ကၤယး အၤဖၳခၳးအၴူး အၤ အိၤ ဟဴ။ 32 စဴမၤရူၤ ကီၤ နှီဘဲၤ ဒီးတံ အၤ တှဲၤတၤရၴူးဒၳၤ တၤရၴူးထၳး ဒၲ အဲၤ အိၤ ကီၤဟၴရဴ စဴမၤရူၤ ကှံ မှၴၤလီးမှၴၤတၤခဲး အၤဖၳခၳးအၴူး န အၤနှၴ နှီဒံၤ ပှး။ အၤ ကှံ မှၴၤလီးမှၴၤတၤခဲး စဴ လၳး ခိးညှစဴ။ 33 “ဗးဖၳဗးလှၴူၤ သီး, ဗး အိၤတှၲ ညှၴးကှၲုးပှး န သီး တိၤဟဴ။ သီး ကှံ မူပှၳးသံ ဗး ပှး။ ဖၳ ဗး ဟၴထၲုးဟဴ ယၳဒၤဖၳ ခၳၤကျဴခၳၤကျူး တၤဟၴၤနၲုၤ, ဗး ကှံ ဟၴ ပှၴ ပှိ သီး ခိးညှအၴူး န ခးလှၴ ဒၲ ဗး ကှံရှၴ စၲု အၴူးနၲုၤ, သီး စၲုစှူတိၤ။ 34 “ဖၳနၲုၤရဴ ခိးညှအၴူး ဗး ကှံ မၴၤကူး သီး ငှိ အၤသဲး တၲၤမံး။ မှိၤ နှီဒၴူ လၤဟူး လၳး တၲၤပြှဲၤ န တၲၤပြှဲၤ နီ꤮။ ဖၳ ဗး မှိၤ နှီဒၴူ သီးနၲုၤ, သီး ဘဲၤ မှိၤ နှီဒၴူ လၳး တၲၤပြှဲၤ န တၲၤပြှဲၤ။ 35 သီး ကီၤ မှိၤ နှီဒၴူ လၳး တၲၤပြှဲၤ န တၲၤပြှဲၤ ဟၴနၲုၤ, အၳး ပွှိး꤮ တၲၤပြှဲၤ ကှံ သဲညၴး န သီး ထွှိး ဗး ခိးပၤစှဲ ပှး။” 36 “ဘူၤစဲၤ, နှဲၤ ကှံရှၴ စၲု ဘီတၴး တၲၤဖိၤတၴး ပှး?” ခၳးဆီူမိၤ ပၴၤတၤရၳ ဆၳၤဒူး လၳး ဖၳနၲုၤ။ ရဴ ဘူၤစဲၤ ယၴၤဆၳူ ဟၴဆံၤ လၳး န, “ခးလှၴ ဒၲ ဗး ကှံရှၴ စၲု အၴူးတၲၤဖိၤနၲုၤ, ခိးညှရဴ နှဲၤ ကြွိးစၲု စှူ ကှၲုးဟီ ဗး တိၤ။ မၤနရဴ နှဲၤ ကှံ ကြွိးစၲု ကှၲုးနိၤ ဗး ဒၲခၴူး ပှး။” 37 “ဘူၤစဲၤ, ဗး ကှံ ကြွိးစၲုကှၲုး နှဲၤ ခိးညှရဴ အၤ စၲု စှူတှၲုတိၤရဴ မှၴၤတၴး? ဗး အိၤ တၤရီၤတၤရူး အိၤနှၴၤဟဴ ဗးနှၴ န ဗး ကှံ သၴူး ဒၲ နှဲၤညၴးဟဴ အၴူး။” အၤ ဆၳၤဒူး လၳး ဖၳနၲုၤ။ 38 အၴူးတၲၤဖှၲုရဴ ဘူၤစဲၤ ယၴၤဆၳူ ဟၴဆံၤ လၳး န, “နှဲၤ အိၤ တၤရီၤတၤရူး အိၤနှၴၤ ဟဴ နှဲၤနှၴ န နှဲၤ ကှံ သၴူး ဒၲ ဗးညၴး မှလၤကိး ဟဴ ဟဲး? ဗး ဟၴစဴစဴ နှဲၤ, ဘီ ဆၴူးဖဲး အီၤအၳၤထူၤ တူၤဟီတိၤ နၲုၤ, နှဲၤ ကှံ ထၴဘီကူးဆံၤ အၳး န ဗး သဲညၴးနဴ အဲၤ တိၤ သၲုးဖှၲု စဴ ပှး,” အၤ ဟၴ လၳး ဖၳနၲုၤ။
1 ဘူၤစဲၤ ယၴၤဆၳူ ဟၴ အဲၤသီး န, “သဲပျဴၤကှၳ သဲပျဴၤကှူး လၤဟူး တဲးမှၴ နီ꤮။ ဇှံအၴၤ လၤဟူး စဴမၤရူၤ ရဴ ဇှံအၴၤကှၲုး လၤဟူး ဗး နီ꤮။ 2 ဒၲ ဗးဖဲး အၤဟီၤကၳး နၲုၤ, ဟီၤဒဴကၳး လှၴအိၤ အၤခးလှၴ အိၤ အဲနူၤစဴ။ အၤ ကီၤ အိၤမှတိၤ ဟၴရဴ, ဗး စၲု ဟၴ တှၲု သီး မှၴၤတၴး? ဗး ကှံရှၴ စၲု တၤရီၤတၤရူး အိၤနှၴၤ ပှၴ ဟဴ သီး ခးလှၴ တၲၤဖိၤ ဟဴ။ 3 ဗး စၲု တၤရီၤတၤရူး ပှၴ ထၲုး သီး ခးလှၴ တၲၤဖိၤ ပှး ရဴ ဗး ဟူး ခၴူးသူ ဒၲ သီးအိၤ ပှး။ သူဖၳ သီး ကှံ ကှၤ အိၤတှၲကှၲုး န ဗး ဘီ ဗး လှၴကှၤအိၤ အၤခးလှၴ အၴူးပှးနၲုၤ ရဴ, ဗး ဟူး အဲကှၤ ခၴူးသူ ဒံၤ သီး ပှး နီ꤮။ 4 ကျူ ဒၲ ဗး ကှံရှၴ စၲု အၴူးတၲၤဖိၤနၲုၤ, သီး သဲညၴးပြဲ,” အၤ ဟၴ အဲၤသီး ဖၳနၲုၤ။ 5 ခၳးသိမ ဟၴ လၳး န, “ဘူၤစဲၤ, နှဲၤ ကှံရှၴ စၲုတိး ဘီတၴး တၲၤဖိၤ နၲုၤ ပှဲၤ သဲညၴးတိၤ, ဖၳနၲုၤရဴ ပှဲၤ စၲု သဲညၴး စှူ ကျူ ဖၳတၴး?” 6 ရဴ ဘူၤစဲၤ ယၴၤဆၳူ ဟၴဆံၤ လၳး န, “ဗး မၤ ကျူ န တှဲၤမှတှဲၤစဴ န တှဲၤထွှိးပြှဲၤ ဟဴ။ ဗး ထွှိး ပှၴဟဴ အၳး ကျူစၲု ဒၲ ဖဲး အၤ အိၤ အၤခၳၤအၤခၴူး, အၳးပၴးပၴး꤮ ဘဲၤဘဲၤ, အၤ ကီၤ စၲု ဒီးတံ န ဗး တိၤ ဟၴနၲုၤ, အၤ စၲုတှၲု စှူ ဒၲ ဖဲး အၤ အိၤ တၲၤပြှဲၤ꤮ တိၤ။ 7 သီး ကီၤ သဲညၴး တှးတှၴၤဟဴ ဗး ဟၴနၲုၤ, သီး သဲညၴး တှၲုကှၲုး ဒံၤဟဴ ဗးဖဲး ဟဴ။ စထူၤ ခိးညှအၴူး တှးပျၴၤဟူးနၲုၤ, သီး ကျူ သဲညၴး နူးဟဴ ဗးဖဲး ဟဴ ရဴ သီး ကျူ မူထၴူၤနဴ နူး ဟဴ အဲၤ ဟဴ။” 8 ခၳးဖီလီၤပၳၤ ဟၴ လၳး န, “ဘူၤစဲၤ, နှဲၤ ကီၤ ဒၴူလှၲုး ပှၴ တံ ပှဲၤ န ဖဲး ဟၴနၲုၤမၤ ပဴၤဟဴ။” 9 ဘူၤစဲၤ ယၴၤဆၳူ ဟၴဆံၤ လၳး န, “ခၳးဖီလီၤပၳၤ, ဗး အိၤတှၲကှၲုး န သီး ညှၴးကၳ꤮ လး စဴဟဴ ရဴ မၤ နှဲၤ သဲညၴးနဴ နူး ဗး တိၤ ဟဲး? ကၤယး ဒၲ အၤ မူထၴူၤနဴ ဗး နၲုၤ, အၤ မူထၴူၤနဴဟဴ ဖဲး ဟဴ။ ရဴ, ‘ဒၴူလှၲုး ပှၴ ပှဲၤ န ဖဲး,’ နှဲၤ စၲုဟၴတှၲု ဖၳနၲုၤ မှၴၤတၴး? 10 ဗး အိၤကှၲုး ဒၲ ဖဲးကၳး ရဴ ဖဲး အိၤကှၲုး ဒၲ ဗးကၳး နၲုၤမၤ, နှဲၤ ဇှံအၴၤ နူးတိၤ ဟဲး? ဗး ဟၴဘဲၤ သီး အၴူးနၲုၤမၤ, ဗးငှိ နှီဒၴူဒံၤ မှတိၤ။ ဗး မှၴၤ တှဲၤ အၴူးတၤဟၴၤ နၲုၤမၤ ဖဲး ဒၲ အၤ အိၤ ဒၲ ဗးကၳးအၴူး တၲၤပြှဲၤ မှၴၤနှီ လှဴးပျီး ပြဲ။ 11 ဘီ ဗး ဟၴ ပှၴ သီး န ဗး အိၤကှၲုး ဒၲ ဖဲးကၳး ရဴ ဖဲး အိၤကှၲုး ဒၲ ဗးကၳး အၴူးနၲုၤမၤ, တၤရှၳ ဇှံအၴၤ လၤဟူး။ သီး ကီၤ꤮ ဇှံအၴၤလး ဗး တိၤ ဟၴရဴ, ပၤတီတၤဒံၤ ရဴ သီး တိး မူ ဗး မှၴၤ တှဲၤတၤကျီခိခၴူၤ ဒၲ ဗး ဒၴူလှၲုး ထၲုးဟဴ နၲုၤတၤဟၴၤ ရဴ ဇှံအၴၤတှဲၤ ဒၲ ဗး ဟၴ ပှၴ သီး အၴူးတၤဟၴၤ နၲုၤ။ 12 ဗး ဟၴစဴစဴ သီး, ကၤယး ဒၲ အၤ ဇှံအၴၤ ဗး တၤဟၴၤနၲုၤ, အၤ ကှံ မှၴၤတှဲၤ ဒၲ ဗး မှၴၤထၲုးဟဴ အၴူးနၲုၤတၤဟၴၤ ပှး။ ဗး ကှံရှၴ စၲုဟဴ ဒၲ ဖဲး အၤ အိၤ အၤခၳၤအၤခၴူး, အၤ ကှံ မှၴၤဒၳၤ မှၴၤလှူ မှၴၤအဲလၲ ကျဴးပး စဴ န အၴူးတၤဟၴၤ ပှး။ 13 ဒၲ ဗးခၳၤဗးခၴူး ရဴ သူဖၳ အၳး ကှံ မှၴၤလီးမှၴၤတၤခဲးထူၤ ဗးဖဲး အၤညၴးနၲုၤ, သီး ကွီးတှဲၤ အီးတၴးတၴး꤮ ဘဲၤဘဲၤ, သီး ကီၤ ကွီး န ဗးမွှီၤ ဟၴနၲုၤ, ဗး ကှံ ဒၴူ သီး ပှး။ 14 သီး ကွီး တှဲၤအီးတၴးတၴး꤮ ဘဲၤဘဲၤ, သီး ကီၤ ကွီး န ဗးမွှီၤ ဟၴနၲုၤ, ဗး ကှံ မှၴၤပှၴ သီး ဖၳ သီး ကွီးနၲုၤ ပှး။ 15 “သီး ကီၤ မှိၤ ဗး ဟၴရဴ, သီး ကှံ နှီဒး စှၳးအၴၤ ဗး တှဲၤမၴၤကူးငှိ တၤဟၴၤ။ 16 ဗး ကှံ ကွီးထူၤ ဖဲး ဒၲ အၤ ကှံ သၳးတှး ပှၴ သီး ပြှဲၤမှၴၤစွှိ သီး တၲၤပြှဲၤ ဒၲ ဗး ခးလှၴ အၴူးနၲုၤ ပှး။ ရဴ အၤ ကှံ အိၤကှၲုး န သီး တၤစှၳပြှဲၤ ပှး။ 17 အဲၤ မၤ မှဟဴ သဲစးဆဲး ဘူၤစဲၤ ဟဴ။ အဲၤ ကှံ အီၤသိူအီၤသူး ဇှၳးကျူဇှၳးကျိး သီး န တှဲၤမှတှဲၤစဴ အၴူးနၲုၤ ပှး။ ပြှဲၤလှၳၤ ဟၴၤခၳၤဖၳ တၤဟၴၤ မူထၴူၤနဴ လၳး တိၤတိၤ, သဲညၴးနဴ လၳး တိၤတိၤ အၤခၳၤအၤခၴူး, အၤ အဲဆံၤ လၳး တိၤ ပှး။ မၤနရဴ သီး သဲညၴးဟဴ လၳး, မှၴၤတၴးဟၴရဴ အၤ အိၤထွှိးပြှဲၤ တှၲကှၲုး န သီး ရဴ အၤ ကှံ ဟူးအိၤ ဒၲ သီး သဲပျဴၤကၳး ပှး။ 18 ဗး ဒူၤအိၤကြူကူး သီး တိၤ။ ဗး ကှံ ဟူး ခၴူးသူ ဒၲ သီးအိၤ ပှး။ 19 တၤပျှၲၤဖၳ အၤကၳးနၲုၤ, ပြှဲၤလှၳၤ ဟၴၤခၳၤဖၳ တၤဟၴၤ မူထၴူၤ ပှး ဗး တိၤ။ မၤနရဴ သီးရဴ, သီး ကှံ မူထၴူၤ ဗး ပှး။ ဗး ထွှိးပြှဲၤ အၤခၳၤအၤခၴူးရဴ သီး ကှံ ထွှိးပြှဲၤ ကှၲုး ပှးပှး။ 20 ဘီနၲုၤတၲၤညၴး ပှးနၲုၤ, သီး ကှံ သဲညၴး န ဗး အိၤ ဒၲ ဗးဖဲး အၤကၳး ရဴ သီး အိၤ ဒၲ ဗးကၳး ရဴ ဗး အိၤ ဒၲ သီးကၳး ပှး။ 21 ကၤယး တၲၤပြှဲၤပြှဲၤ ဒၲ အၤ ပှံမၤနှီ ဗး တှဲၤမၴၤကူးငှိ အၴူးတၤဟၴၤ, ရဴ အၤ ကြွိး အိၤထွှိးပြှဲၤ တၤဟၴၤ နၲုၤမၤ မှဟဴ ကၤယး တၲၤပြှဲၤ ဒၲ အၤ မှိၤ မှဟဴ ဗး ဟဴ။ ကၤယး ဒၲ အၤ မှိၤ ဗး နၲုၤ ဗးဖဲး ကှံ မှိၤနှီ လၳး ပှး။ ဗးရဴ, ဗး ကှံ မှိၤနှီကှၲုး အဲၤ ပှး ရဴ ဗး ကှံ ဒၴူလှၲုး ဆၴူးကျှဴ စဴ အဲၤ န ဗးနှၴ ပှး။” 22 အၴူးတၲၤဖှၲုရဴ ခၳးယၳဒၤ (ခၳးယၳဒၤ အီၤစၤကရီယိၤ မှတိၤ) ဟၴ န, “ဘူၤစဲၤ, နှဲၤ သဲဇှံ ဒၴူလှၲုး ပှၴ ပှဲၤ န နှဲၤနှၴ တၤဒၲၤရဴ မၤမှၴၤတၴးရဴ နှဲၤ ဒၴူလှၲုး တှၲုပှၴကှၲုး ပြှဲၤလှၳၤ ဟၴၤခၳၤဖၳ တၤဟၴၤ တိၤ မှၴၤတၴး?” 23 ဘူၤစဲၤ ယၴၤဆၳူ ဟၴဆံၤ ကှၤခၴူး လၳး န, “လှဴ ကၤယး ဒၲ အၤ မှိၤ ဗး တၤဟၴၤနၲုၤ, အၤ ကှံ မှၴၤ ဖၳ ဗး ဟၴ လၳး နၲုၤ ပှး။ ဗးဖဲး ကှံ မှိၤနှီ အဲၤသီး ပှး, ရဴ ပှဲၤ ကှံ ဟူး ဒၲ အဲၤသီး အၤ အိၤ ပှး ရဴ ပှဲၤ ကှံ ဟူး အီၤဆဴ အိၤ စဴ ပှဲၤဟီၤပှဲၤဖူး ဒၲ အၤ သဲပျဴၤကၳး ပှး။ 24 ကၤယး တၲၤပြှဲၤပြှဲၤ ဒၲ အၤ မှိၤ ဗး တိၤ နၲုၤ, အၤ နှီဒး ဗး တှဲၤအီၤသိူအီၤသူး တိၤ။ ငှိ ဒၲ သီး နှီဟၲုး အၴူးတၤဟၴၤ နၲုၤမၤ ဗးငှိ နှီဒံၤ မှတိၤ။ မှဒံၤ ဖဲး ဒၲ အၤ နဴးဟူး ဗး အၴူးတၲၤပြှဲၤ အၤငှိ ပြဲ။ 25 “ဘီ ဗး အိၤကှၲုးပး န သီး ခိးညှခဲး အၴူး, ဗး ဟၴဆိၤလှၲုး ပှၴဟဴ သီး တှဲၤအၴူးတၤဟၴၤ ဟဴ။ 26 မၤနရဴ, ဖဲး ကှံ နဴးဟူး ပှၴ သီး ပြှဲၤမှၴၤစွှိ သီး သဲစးဆဲး ဘူၤစဲၤ န ဗးမွှီၤ ပှး။ အဲၤ ကှံ အီၤသိူအီၤသူး ပှၴ သီး တှဲၤလှဴး꤮ ပျီး ပှး, ထၲုးတိၤ လှဴး တှဲၤ ဒၲ ဗး ဟၴထၲုးဟဴ သီး တၤဟၴၤနၲုၤ, အၤ ကှံ ဒၴူသဲနှၴ ကှၤခၴူး ခၴူးသူ သီး ပှး။ 27 ဗး ဒူၤကူး ပှၴ သီး သဲပျဴၤ အၤ တှဲၤကၤစှၳကၤဘဲ ဟဴ။ ရဴ ဗး ဒၴူ ပှၴ ဟဴ သီး ဗး တှဲၤကၤစှၳကၤဘဲ ဟဴ။ ဗး ဒၴူ သီး အၴူးနၲုၤမၤ အၤသူန ပြှဲၤလှၳၤကၤယး ဒၴူ သီး နၲုၤတၤဟၴၤ မှတိၤ။ သဲပျဴၤကှၳ သဲပျဴၤကှူး တဲး လၤဟူး တဲးမှၴ။ သဲအီၤဆၴး တဲး လၤဟူး တဲးမှၴမှၴ။ 28 “သီး နှီဟၲုး ထၲုးဟဴ ဗး ဟၴ သီး န, ‘ဗး စၲုကူး သီးလှၴ ပှး တၤဒၲၤရဴ ဗး ကှံ ကှၤတိးကှၲုး ခၴူးသူ သီး ပှး။’ ဗး ကှံရှၴ စၲု ဒၲ ဖဲး အၤ အိၤ ပှး, ဗး ဟၴ သီး ဖၳအၴူးနၲုၤ, သီး ကီၤ မှိၤ ဗး ဟၴရဴ သီး သဲကြှံး ပြဲ, မှၴၤတၴးဟၴရဴ ဗးဖဲး နၲုၤ အၤဒၳၤကျဴး န ဗး။ 29 ဆၴူ꤮ အၤ ထွှိးထူၤဟဴ ပှးနၲုၤ, သူဖၳ သီး ကှံ ဇှံအၴၤ အၤညၴးနၲုၤရဴ, ဗး ဟၴဆိၤ အိၤနှၴၤ ပှၴ စဴဟဴ သီး ဘီ အၤ ထွှိးထူၤ တူၤဟီတိၤ အၴူးနၲုၤ ဟဴ။ 30 ဗး ကှံ ဟၴဘဲၤ ညှၴးညှၴး န သီး နၲုၤမၤ အၤဆၲုအၤခဲး အိၤ အဲ ပှးတိၤဟဴ။ ခီးနၴရီၤစှူ ခၳၤကျဴ စၴၤထၲၤ ဒၲ အၤ ပၲ ဟၴၤခၳၤ အၴူးတၲၤဒှၲုးနၲုၤ, အၤ ကှံရှၴ ဟူးဟဴ။ အၤ တှဲၤတၤရၴူးဆိူၤဆဴး အၴူးနၲုၤ, အၤ မှၴၤ ပၴ နှ ဗး တိၤ။ 31 သူဖၳ ပြှဲၤလှၳၤ ဟၴၤခၳၤဖၳ ကှံ သဲညၴးဟူး လၤဟူး န ဗး မှိၤ ဖဲး အၤညၴးနၲုၤ, ဗး မှၴၤ တိးတံပြဲ ဖၳ ဖဲး မၴၤဟူး ဗး ငှိ နၲုၤတၤဟၴၤ ပြဲ။ “စၲု꤮! ပှဲၤ ထၴၤစၲုဟဴ ပိ!”
1 “ဗး မၤ စၤပီူမှဴ ဒၲ အၤ မှလၤကိး တၲၤမှဴ, ဗးဖဲး မၤ ပြှဲဘူၤစဲၤ။ 2 စၤပီူဖူး ဒၲ အၤ အီစံး န ဗး ရဴ အၤသဲၤအၤဖိး ထၴၤတိၤ တၤဟၴၤနၲုၤ, အဲၤ ကှံ ပှးကူး လှဴး ပှး။ အၤဖူး ဒၲ အၤသဲၤအၤဖိးထၴၤ တၤဟၴၤနၲုၤ ဘဲၤဘဲၤ, သူဖၳ အၤ ကှံ သဲၤထၴၤ အဲထူၤပှိ အၤညၴးနၲုၤ အၤ လှကူး လှဴးကၴၤ အၤဖူး တၤဟၴၤ။ 3 သီး မွှိးပျီးဘၳးဖှၲု ဟဴ န ဗးလှးဗးငှိ ဒၲ ဗး ဟၴ ပှၴ သီး အၴူး အၤခၳၤအၤခၴူး ပြဲ။ 4 အိၤကျှဴၤဆဴမၤ လၤဟူး ဒၲ ဗးကၳး ရဴ ဗး ကှံ အိၤကျှဴၤဆဴမၤ ဒၲ သီးကၳး ပှး။ စၤပီူဖူး တၲၤဖူးဖူး ဒၲ အၤ အိၤဆဴအီစံးမၤ န ဗး တိၤ နၲုၤ, အၤ သဲၤထူၤ စှူ နှီဒၴူဒံၤ အၤနှၴ တၲၤဖူး꤮ တိၤ။ ဖၳနၲုၤဟဴ သီး ကီၤ အိၤကျှဴၤဆဴမၤ ဒၲ ဗးကၳး တိၤ ဟၴနၲုၤ, သီး သဲၤထၴၤဘဲ စှူ သဴၤသဲၤ ဒၲ အၤ မှဒံၤ မှၴၤတှဲၤရူ အၴူးနၲုၤ တၲၤပြှဲၤ꤮ တိၤ။ 5 “ဗး မၤ စၤပီူမှဴ, သီး မၤ အၤဖူး တၤဟၴၤ။ ကၤယး ဒၲ အၤ ကီၤအိၤကီၤဆဴ ဒၲ ဗးကၳး ရဴ ဗး ကီၤအိၤကီၤဆဴ ဒၲ အဲၤသီး အၤကၳး တၤဟၴၤနၲုၤ, အဲၤသီး ကှံ သဲၤထူၤဖိးထူၤ အဲနူၤစဴ ပှး။ မှၴၤတၴးဟၴရဴ သီး ကီၤ အိၤ အီစံး န ဗး တိၤ ဟၴနၲုၤ, သီး မှၴၤစှူ တှဲၤ တၲၤစၲၤ꤮ တိၤ။ 6 ကၤယး တၲၤပြှဲၤပြှဲၤ ဒၲ အၤ အိၤကျှဴၤဆဴမၤ ဒၲ ဗးကၳး တိၤ နၲုၤ, အၤသူန သဴၤဖူး ဒၲ အၳး ဗီးထၴၤကူး အဲၤ ဒၲ အၤကျဴး, ရဴ အၤ နိကူးကြးကူး တၤဟၴၤ နၲုၤပြဲ။ သဴၤဖူး ဖၳနၲုၤ တၤဟၴၤနၲုၤ, အၳး အီၤထၲုၤပျဴ အဲၤ ရဴ အၳး ဗီးနှၲုးကူး လၳး ဒၲ မီၤကၳး ရဴ အၳး အီၤဆံအံးကူး အဲၤ ပြဲ။ 7 သီး ကီၤ အိၤကျှဴၤဆဴမၤ ဒၲ ဗးကၳး, ရဴ ဗးလှးဗးငှိ ကီၤ အိၤဆဴကျှဴၤမၤ ဒၲ သီးကၳး ကီၤဟၴရဴ သီး သဲဇှံကွီး အီးတၴးတၴး꤮ ဘဲၤဘဲၤ နၲုၤ, ဗး ကှံ ဒၴူ သီး ပှး။ 8 ဒၲ သီး သဲၤထူၤဖိးထူၤ အဲ သဴၤသဲၤ ဒၲ အၤ မှဟဴ မှၴၤတှဲၤရူ အၴူးတၤဟၴၤ အၤခၳၤအၤခၴူး, အၳး ကှံ မှၴၤလီးမှၴၤတၤခဲးထူၤ ဗးဖဲး ပှး။ ဒၲ သီး သဲၤထူၤအဲ ဖၳနၲုၤ အၤခၳၤအၤခၴူး သီး ဒၴူလှၲုးဟဴ န သီး ထွှိး ဗး ခိးပၤစှဲ တၤဟၴၤ ဟဴ။ 9 “ဗး မှိၤကှၲုး သီး ဖၳ ဗးဖဲး မှိၤ ဗး နၲုၤ, ခိးညှရဴ အိၤကျှဴၤဆဴမၤ လၤဟူး ဒၲ ဗး တှဲၤမှိၤ အၤကၳး အၴူးနၲုၤ နီ꤮။ 10 သီး ကီၤ နှီဒး စှၳးအၴၤ ဗး တှဲၤမၴၤကူးငှိ အၴူးတၤဟၴၤ ဟၴနၲုၤမၤ သီး အိၤကျှဴၤဆဴမၤ ဟဴ ဒၲ ဗး တှဲၤမှိၤ အၤကၳး ဟဴ။ သီး ကီၤ မှၴၤ ဖၳအၴူး ဟၴနၲုၤမၤ အၤ သူဟဴ န ဗး နှီဒး ဗးဖဲး အၤငှိ ရဴ ဗး အိၤကျှဴၤဆဴမၤ ဒၲ အၤ တှဲၤမှိၤကၳး အၴူးနၲုၤ ဟဴ။ 11 သူဖၳ သီး ကှံ သဲလှၲုဖဴၤဖံး သူကှၲုး ဖၳ ဗး သဲလှၲုဖဴၤဖံး အၴူး အၤညၴးနၲုၤ, ဗး ဟၴဆိၤလှၲုး ပှၴ ဟဴ သီး ဟဴ။ 12 မှိၤ နှီဒၴူ လၳး တၲၤပြှဲၤ န တၲၤပြှဲၤ ဖၳ ဗး မှိၤ နှီဒၴူ သီး အၴူးနၲုၤ နီ꤮, အၴူးမၤ မှဟဴ ဗး တှဲၤမၴၤကူးငှိ ဟဴ။ 13 တှဲၤမှိၤ ဒၲ အၤဒၳၤကျဴးလၲ န ကၤယး တၲၤပြှဲၤပြှဲၤ ဒၲ အၤ ခူသၴူးကူး စဴ အၤသဲ ဒၲ အၤ ခိးဘဴသိူ တၤဟၴၤ အၤညၴးနၲုၤ အၤ အိၤ ပှး တိၤ ဟဴ။ 14 သီး ကီၤ မှၴၤ ဖၳ ဗး မၴၤကူး သီး ငှိ အၴူး ဟၴနၲုၤမၤ, သီး ထွှိးဟဴ ဗး ခိးဘဴသိူ ဟဴ။ 15 ဗး အဲ ပှး သီး န လၳၤလၴ တိၤ ဟဴ, မှၴၤတၴးဟၴရဴ လၳၤလၴ ဟၴနၲုၤမၤ အၤ သဲညၴး နှီဒၴူ ကှၲုး အၤဘူၤစဲၤ အၤတှဲၤမှၴၤ အၤရီၤအၤကူး တိၤ။ ဗး ကှံ အဲခိ ဟဴ သီး န သီး မၤ ဗး ခိးဘဴသိူ တၤဟၴၤ ဟဴ, မှၴၤတၴးဟၴရဴ လှဴး꤮ ဗး နှီဟၲုး တှဲၤ ဒၲ ဗးဖဲး အၤ အိၤ တၤဟၴၤနၲုၤ, ဗး ဟၴဆိၤလှၲုး ပှၴလှဴးဟဴ သီး ဟဴ။ 16 သီး နွိထူၤ ဗး မှတိၤ။ ဗး နွိထူၤ သီး ရဴ ဗး ဒူၤထူၤဟဴ သီး ဒၲ သီး ကှံ ထၴၤစၲု လၤဟူး ရဴ စၲု သဲၤထူၤဖိးထူၤ အဲ လၤဟူး။ ဗး ဒူၤထူၤဟဴ သီး န သီး ကှံ သဲၤအီစံးမၤတှၲု လၤဟူး ဒၲ အၤတၤဒံၤ။ သီး ကီၤ မှၴၤဖၳနၲုၤ တံမၤ သီး ကွီး အီးတၴးတၴး꤮ ဘဲၤဘဲၤ, သီး ကီၤ ကွီး န ဗးမွှီၤ ဟၴနၲုၤ, ဖဲး ကှံ ဒၴူ သီး ပှး။ 17 ဗး တှဲၤမၴၤကူးငှိ အၴူးနၲုၤမၤ မှဟဴ မှိၤ နှီဒၴူ လၳး တၲၤပြှဲၤ န တၲၤပြှဲၤ အၴူးနၲုၤဟဴ။” 18 “ပြှဲၤလှၳၤ ဟၴၤခၳၤဖၳ တၤဟၴၤ ကီၤ သဲထၴၤ သီး ဟၴရဴ တၤနှၴၤထူၤ တှၲုဘဲၤ လၤဟူး န အၤ သဲထၴၤ ရှၴထၲုးဟဴ ဗး နၲုၤ နီ꤮။ 19 သီး ကီၤ သူန ပြှဲၤလှၳၤ ဟၴၤခၳၤဖၳ အၴူးတၤဟၴၤ ဟၴနၲုၤ, အၤ ကှံ မှိၤ နှီဒၴူ သီး ဖၳ အဲၤသီး ကၤယး နှီဒံၤ နၲုၤတၤဟၴၤ ပှး။ မၤနရဴ သီး ရဴ, သီး ခိဒံၤ န အဲၤသီး ဟဴ။ ဗး နွိထၴၤခိကူး ဟဴ သီး ဒၲ ပြှဲၤလှၳၤ ဟၴၤခၳၤဖၳ တၤဟၴၤ အၤကျဲး ဟဴ။ အဲၤသီး သဲထၴၤ သီး အၤခးဆၴူခးရှူၤ မၤ မှဟဴ ဒၲ သီး ယိး ခိဒံၤ န အဲၤသီး ဟဴ, ထၲုးတိၤ ဗး ယိး နွိထၴၤခိကူး ဟဴ သီး န အဲၤသီး အၴူး အၤခၳၤအၤခၴူးရဴ အဲၤသီး သဲထၴၤသဲဟး ဟဴ သီး ဟဴ။ 20 သဲနှၴထူၤဘဲၤ လၤဟူး ငှိ ဒၲ ဗး ဟၴ ပှၴ သီး န, ‘လၳၤလၴ ဒၳၤကျဴးလၲ န အၤဘူၤစဲၤ နၲုၤ အၤ အိၤ တၲၤပြှဲၤ꤮ တိၤ,’ အၴူးနၲုၤ နီ꤮။ အဲၤသီး မှၴၤစှၴူးမှၴၤစှံၤ ထၲုးဟဴ ဗး အၤခၳၤအၤခၴူး, အၤ ကှံ မှၴၤစှၴူးမှၴၤစှံၤ ကှၲုး ကၴၤ သီး ပှး။ အဲၤသီး ကီၤ စှၳးအၴၤ နှီဒး ထၲုးဟဴ ဗးငှိ ဟၴနၲုၤ, အၤ ကှံ စှၳးအၴၤ နှီဒး ကှၲုးဒံၤ သီးငှိ ပှး။ 21 သီး ထွှိး ဗး ခိးပၤစှဲ အၤခၳၤအၤခၴူး ပြှဲၤလှၳၤ ဟၴၤခၳၤဖၳ တၤဟၴၤ ကှံ မှၴၤစှၴူး သီး ပှး, မှၴၤတၴးဟၴရဴ အဲၤသီး သဲညၴး လၤဟူး ဖဲး ဒၲ အၤ နဴးဟူး ဗး အၴူးနၲုၤ တၲၤပြှဲၤ တိၤ။ 22 ဗး ကီၤ ဟူး ဟၴဆိၤဒၲၤညး ပှၴ အဲၤသီး တိၤ ကီၤဟၴနၲုၤ, စဴမၤရူၤ ဒူၤ န အဲၤသီး တှဲၤသံ တိၤ။ မၤနရဴ ခိးညှအၴူး ဗး ဟူး ဟၴဆိၤဒၲၤညး လှၲုး ပှၴ အဲၤသီး အၤခၳၤအၤခၴူး, အၤလှၴဟၴ ဆီးပျဲ နှီဒၴူ အၤငှိ န အၤတှဲၤသံ အၤညၴးနၲုၤ အၤ အိၤပှး တၲၤမံး꤮ တိၤ ဟဴ။ 23 ကၤယး ဒၲ အၤ သဲထၴၤ ဗး နၲုၤ အၤ သဲထၴၤ တှၲုကှၲုးဟဴ ဗးဖဲး ဟဴ။ 24 တှဲၤမှၴၤ တၤကျီခိခၴူၤ ဒၲ အၳး မှၴၤစှူ တၲၤပြှဲၤ꤮ တိၤ အၴူးတၤဟၴၤနၲုၤ, ဗး ကီၤ ဒၴူလှၲုး ဒၲ အဲၤသီး အၤကျဲး တိၤ ဟၴနၲုၤ, အဲၤသီး တှဲၤသံ အိၤ တၤခူ꤮ တိၤ။ မၤနရဴ, ခိးညှအၴူး, အဲၤသီး မူထၴူၤ တှဲၤမှၴၤ တၤကျီခိခၴူၤ အၴူးတၤဟၴၤ ရဴ အၤ သဲထၴၤ လှဴးပျီး ဟဴ ဗး န ဗးဖဲး ဟဴ။ 25 မၤနရဴ အၴူးနၲုၤမၤ, အဲၤသီး မှၴၤလၲမှၴၤဘးထူၤ ပှၴဟဴ ဖၳ လီၤစးဆဲး ဟၴအိၤ ထၲုးဟဴ န, ‘ဗး မှၴၤ သဲထၴၤသဲဟးနဴ အဲၤသီး န ဗးနှၴ တၲၤစၲၤ꤮ တိၤ တၤဒၲၤရဴ အဲၤသီး သဲထၴၤ ဗး။’ 26 “ဗး ကှံ နဴးဟူး ပြှဲၤမှၴၤစွှိတှဲၤ ဒၲ အၤ အိၤ ဒၲ ဖဲးအိၤ အၴူးနၲုၤ တၲၤပြှဲၤ ဒၲ သီး အိၤ ပှး။ အဲၤ မၤ တှဲၤမှတှဲၤစဴ အၤ သဲစးဆဲး ဘူၤစဲၤ ဒၲ အၤ အိၤ ဒၲ ဖဲး အၤ အိၤ ဟူး။ ဆၴူ꤮ အၤ ဟူးတှၲု ပှးနၲုၤ, အၤ ကှံ ဟၴဆိၤလှၲုး ပှၴ သီး န ဗးရီၤဗးကူး ပှး။ 27 သီး အိၤတှၲကှၲုး န ဗး ဒၲ အၤခးဆၴူခဲး ပး စဴ အၤခၳၤအၤခၴူး သီး ဘဲၤ ဟၴဆိၤ ပှၴ ကှၲုးအၳး န ဗးရီၤဗးကူး နီ꤮။”
1 “သူဖၳ သီး ကှံ ဗီးကူး တဲး သီး တှဲၤဇှံတှဲၤညှ တဲးမှၴ နၲုၤ, ဗး ဟၴဆိၤလှၲုး လှဴးပှၴ ထၲုးဟဴ သီး တှဲၤအၴူးတၤဟၴၤ ဟဴ။ 2 အၳး ကှံ ဗှဲထၴၤကူး သီး ဒၲ တှဲၤစဴဘဲးဟိး တၤဟၴၤ အၤကျဴး ပှး။ ကၤယး ဒၲ အၤ မှၴၤသၴူး သီး တၤဟၴၤနၲုၤ အၤ တၤနှၴၤ နှီဒၴူ အၤနှၴ န, ‘ပှဲၤ မှၴၤ ဟဴ စဴမၤရူၤ အၤတှဲၤမှၴၤ ဟဴ,’ ဆၲုခဲး ဖၳအၴူးနၲုၤ, အၤ ကှံ ဟူးတှၲု ပှး။ 3 အၤ စၲု မှၴၤတှၲု လၤဟူး ဖၳအၴူး မှၴၤတၴးဟၴရဴ အဲၤသီး သဲညၴးနဴ ဖဲး တၲၤဖှၲု꤮ တိၤ, ထၲုးရဴ အၤ သဲညၴးနဴ ဗး တၲၤဖှၲု꤮ တိၤ။ 4 ဆၴူ꤮ တှဲၤဆၲုတှဲၤခဲး ဟူးတှၲုဟဴ ပှး အၤခဲးနၲုၤ, သီး ကှံ ခူဘဲၤ တှဲၤစှၴူးတှဲၤစှံၤ တၤဟၴၤ ပှး။ သူဖၳ သီး ကှံ သဲနှၴထူၤဘဲၤ တှၲု တှဲၤ ဒၲ ဗး ဒၴူရှဴၤ အိၤနှၴၤ သီး တှဲၤအၴူးတၤဟၴၤ အၤညၴးနၲုၤရဴ, ဗး ဟၴဆိၤအိၤနှၴၤ ပှၴ ဟဴ သီး ခိးညှအၴူး ဟဴ။ ဒၲ အၤခးဆၴူခဲး နၲုၤမၤ ဗး ယိး အိၤကှၲုး န သီး အၤခၳၤအၤခၴူး ဗး ဟၴဆိၤလှၲုးနဴ ပှၴဟီ သီး တိၤ။” 5 “ခိးညှရဴ, ဗး ကှံ ကှၤဟဴ ဒၲ ပြှဲၤ ဒၲ အၤ နဴးဟူး ဗး အၴူးတၲၤပြှဲၤ အၤ အိၤ ဟဴ။ ‘နှဲၤ ကှံရှၴ စၲုဘီတၴး တၲၤဖိၤတၴး ပှးနၲုၤ,’ သီး ဆၳၤဒူး ဗး တၲၤပြှဲၤ꤮ တိၤ။ 6 ဗး ဟၴလှၲုး ပှၴ သီး ဖၳအၴူး ရဴ သီး သဲပျှဲးသဲဇှဴၤ လှဴးပျီး စဴ။ 7 ကီၤ ဟၴ လှဴးလှဴး꤮ ငှိ မၤ, ဗး စၲုကူး သီးလှၴ မၤ အၤရူ ကျဴးလၲ စဴ ဒၲ သီးညၴးစဴ, မှၴၤတၴးဟၴရဴ ဗး ကီၤ စၲု တိၤ ဟၴနၲုၤ, ပြှဲၤမှၴၤစွှိ မှဟဴ သဲစးဆဲး ဘူၤစဲၤ အၴူးတၲၤပြှဲၤ ဟူး ဒၲ သီးအိၤ တိၤ။ မၤနရဴ ဗး ကီၤ စၲု ဟၴနၲုၤ, ဗး ကှံ နဴးဟူးလှူၤ ကၴၤ လၳး ဒၲ သီးအိၤ ပှး။ 8 ဘီ သဲစးဆဲး ဘူၤစဲၤ ဟူးတှၲုဟဴ ပှး အၤခဲးနၲုၤ, အၤ ကှံ ဒၴူသဲညၴး ပှၴ ပြှဲၤလှၳၤ ဟၴၤခၳၤဖၳ တၤဟၴၤ န အဲၤသီး မှၴၤ တှဲၤသံ ပှး, ထၲုးရဴ အၤ ကှံ ဒၴူသဲညၴး ပှၴ ပှိ အဲၤသီး န တှဲၤစဴတှဲၤတှၴၤ အၤကျူ ပှး။ ထၲုးတိၤ, အၤ ကှံ ဒၴူသဲညၴး ပှၴကှၲုးပှိ အဲၤသီး န စဴမၤရူၤ ကှံ စီၤရူၤ အဲၤသီး ပှး။ 9 ဒၲ အဲၤသီး ဇှံအၴၤ ဗး တိၤ အၤခၳၤအၤခၴူး, အၤ ဒၴူသဲညၴးဟဴ အဲၤသီး န အဲၤသီး တှဲၤသံ အိၤ ဟဴ။ 10 မှၴၤတၴးဟၴရဴ, ဗး ကှံ ကှၤ ဒၲ ဖဲး အၤ အိၤ ပှး ရဴ သီး မူထၴူၤ ပှး ဗး တိၤ အၤခၳၤအၤခၴူး, သဲစးဆဲး ဘူၤစဲၤ ကှံ ဒၴူသဲညၴးပျိး ပှၴ အဲၤသီး န တှဲၤစဴတှဲၤတှၴၤ အၤကျူအၤကျိး ပှး။ 11 စဴမၤရူၤ စီၤရူၤဟဴ ခီးနၴရီၤစှူ ခၳၤကျဴ စၴၤထၲၤ ဒၲ အၤ ပၲ ဟၴၤခၳၤ အၴူးတၲၤဒှၲုး ဟဴ အၤခၳၤအၤခၴူး, အၤ ဒၴူ သဲညၴးပျိး ပှၴဟဴ ပြှဲၤလှၳၤ ဟၴၤခၳၤဖၳ တၤဟၴၤ န စဴမၤရူၤ ကှံ စီၤရူၤ အဲၤသီး ပှး ဟဴ။ 12 “တှဲၤ ဒၲ ဗး သဲဇှံ ဟၴ ပှၴ ပှိ သီး တၤဟၴၤနၲုၤ အၤ အိၤ အဲလးပး, မၤနရဴ သီး သဲညၴးပျိးဘဲ လှဴးဟီတိၤ။ 13 ဘီ သဲစးဆဲး ဘူၤစဲၤ ဒၲ အၤ ဒၴူလှၲုး တှဲၤမှတှဲၤစဴ အၴူး ဟူးပှး အၤခဲးနၲုၤ, အၤ ကှံ ဇှၳးကျူဇှၳးကျိး ပှၴ သီး န လှဴး တှဲၤမှတှဲၤစဴ နၲုၤတၤဟၴၤ ပှး။ အၤ ကှံ ဟၴဆိၤလှၲုး ပှၴ သီး န အၤ တှဲၤတၤနှၴၤ နှီဒံၤနၲုၤ မှတိၤ။ အၤ ကှံ ဟၴဆိၤလှၲုး ပှၴ သီး ဖၳ အၤ နှီဟၲုး ဟူးနှီ ဒၲ စဴမၤရူၤ အၤ အိၤ နၲုၤတၤဟၴၤ ပှး။ အၤ ကှံ ဒၴူလှၲုး ပှၴ သီး န တှဲၤ ဒၲ အၤ ထွှိးထူၤ ဟီတိၤ နၲုၤတၤဟၴၤ ပှး။ 14 ဒၲ အၤ ဟူး ဟၴဆိၤလှၲုး ပှၴ သီး န လှဴး အၤ နှီဟၲုး တှဲၤ ဒၲ ဗးအိၤ နၲုၤတၤဟၴၤ အၤခၳၤအၤခၴူး, အၤ ကှံ မှၴၤလီးမှၴၤတၤခဲး ဗး ပှး။ 15 လှဴး꤮ တှဲၤ ဒၲ အၤ အိၤ န ဖဲး တၤဟၴၤ နၲုၤမၤ ဗးတှဲၤ လှဴး꤮ ပျီး ဟဴ။ တံရဴ ဗး ဟၴ ပှၴ သီး န သဲစးဆဲး ဘူၤစဲၤ ကှံ ဟူး ဟၴဆိၤလှၲုး ပှၴ သီး လှဴး꤮ အၤ နှီဟၲုး တှဲၤ ဒၲ ဗးအိၤ နၲုၤတၤဟၴၤ ပှး, ဖၳနၲုၤ ဟဴနၲုး။” 16 “ညှၴးတူၤတိၤ ပှးမၤ သီး မူထၴူၤနဴ ပှး ဗး တိၤ ဟဴ, မၤနရဴ ညှၴးတူၤတိၤ ခၴူးသူ ပှးမၤ သီး မူထၴူၤ ခၴူးသူ ဗး ပှး။” 17 အၤ ခိးပၤစှဲ တၤဟၴၤဟၴၤ နၲုၤ, အၤ ဆၳၤဒူး နှီဒၴူ လၳး တၲၤပြှဲၤ န တၲၤပြှဲၤ ရဴ အၤ ဟၴ လၤဟူး န, “အၤ စၲု ဟၴ တှၲု န, ‘ညှၴးတူၤတိၤ ပှးမၤ သီး မူထၴူၤနဴ ပှး ဗး တိၤ ဟဴ, မၤနရဴ ညှၴးတူၤတိၤ ခၴူးသူ ပှးမၤ သီး မူထၴူၤ ခၴူးသူ ဗး ပှး’ အၤ ဟၴ ဖၳအၴူးနၲုၤမၤ အၤ သဲဟၴ အၤငှိလၤဆ ဖၳတၴး?” ထၲုးရဴ အဲၤသီး ဟၴ လၤဟူး န, “‘မှၴၤတၴးဟၴရဴ ဗး ကှံရှၴ စၲု ဒၲ ဖဲး အၤ အိၤ ဟဴ,’ အၤ ဟၴ ဖၳနၲုၤမၤ အၤ သဲဇှံ ဟၴ အၤငှိလၤဆ ဖၳတၴးတၴး?” 18 ရဴ အဲၤသီး န အဲၤသီး ဆၳၤဒူး တၤဒံၤ နှီဒၴူ ပးလၳး န, “‘ညှၴးတူၤတိၤ ပှးမၤ,’ အၤ ဟၴ အၴူးတၲၤမံး နၲုၤမၤ အၤ သဲဟၴ အီးတၴး? အၤ သဲဇှံ ဟၴ မၤတၴးနၲုၤ, ပှဲၤ သဲညၴးပျိး ထွှိပှးတိၤ ဟဴ။” 19 ဘူၤစဲၤ ယၴၤဆၳူ သဲညၴး ဒၲ အဲၤသီး သဲဇှံ ဆၳၤဒူး လၳး တှဲၤရီၤတှဲၤကူး အၴူး အၤခၳၤအၤခၴူးရဴ အၤ ဟၴ အဲၤသီး န, “ဗး ဟၴ ပှၴ သီး န, ‘ညှၴးတူၤတိၤ ပှးမၤ သီး မူထၴူၤနဴ ပှး ဗး တိၤ ဟဴ, မၤနရဴ ညှၴးတူၤတိၤ ခၴူးသူ ပှးမၤ သီး မူထၴူၤ ခၴူးသူ ဗး ပှး,’ အၴူးနၲုၤ ဗး သဲ ဟၴ အၤငှိလၤဆ အီးတၴးနၲုၤ သီး ဆၳၤဒူး နှီဒၴူ ခၴူးလၳး တၲၤပြှဲၤ န တၲၤပြှဲၤ ဗးဟၴတိၤ? 20 ဗး ဟၴစဴစဴ သီး, ဘီ ပြှဲၤလှၳၤ ဟၴၤခၳၤဖၳ တၤဟၴၤ ကှံ သဲကြှံးသဲလှဴး တၤပံၤလံၤဆံၤ စဴ ပှး အၤခဲးနၲုၤ, သီး ကှံငှၲုကှံဟဲၤ လၤဟူး ပှး။ ဒၲ ဗး ခူဘဲၤ တှဲၤစှၴူးတှဲၤစှံၤ အၤခၳၤအၤခၴူး, သီး ကှံ သဲပျှဲးနှၴၤဘဲၤ နူၤစဴ ပှး, မၤနရဴ သီး တှဲၤသဲပျှဲးနှၴၤဘဲၤ အၴူးနၲုၤ အၤ ကှံ ထွှိးထူၤ တၤပျၴၤခိ ပှၴကၴၤ သီး န သီး တှဲၤသဲလှၲုဖဴၤဖံး ပှး။ 21 အၤသူန ပြှဲၤမဴၤ ဖၳအိၤ ဟဴဆဲး နၲုၤ ပှး။ ဘီ အၤ ဟဴဆဲး အၤခဲး, အၤ ခူဘဲၤ တှဲၤဆိးဖဆိးရှူၤ တၤဒၲၤရဴ ဘီ အၤဖၳအိၤဟဴ အၤခဲးနၲုၤ, အၤ ဆိးတၤပှၤကူး အၤ တှဲၤဆိးဖဆိးရှူၤ တၤဟၴၤ, မှၴၤတၴးဟၴရဴ အၤဖၳအိၤနှီ ပၤစှဲဖၳ တၲၤပြှဲၤ ဒၲ ဟၴၤခၳၤအၴူး အၤခၳၤအၤခၴူး အၤ သဲကြှံးသဲလှဴး ဟူး ပှး။ 22 တှဲၤ ကှံ ထွှိးထူၤ သူကှၲုးဒံၤ န သီး ဖၳအၴူးနၲုၤ ပှး။ ခိးညှရဴ သီး ကှံ သဲပျှဲးနှၴၤဘဲၤ ပှး, မၤနရဴ ဗး ကှံ မူထၴူၤ ခၴူးသူ သီး ပှး ရဴ သီး ကှံ သဲကြှံးသဲလှဴး နူၤစဴ ပှး။ ထၲုးတိၤ အၳး ဖၴူကူး စှူ ပှး စဴ သီး တှဲၤသဲကြှံးသဲလှဴး တၲၤပြှဲၤ꤮ စဴတိၤ ပှး။ 23 ဘီနၲုၤတၲၤညၴး ပှးနၲုၤ, သီး ဆၳၤဒူး ပှး စဴ ဗး တၲၤစၲၤ꤮ တိၤ ဟဴ။ ဗး ဟၴစဴစဴ သီး, သီး ကှံ ကွီး ဗးဖဲး အီးတၴးတၴး꤮ ဘဲၤဘဲၤ, သီး ကီၤ ကွီး န ဗးမွှီၤ ဟၴနၲုၤ, ဗးဖဲး ကှံ ဒၴူ သီး ပှး။ 24 တှၲုခိးညှ အၴူးနၲုၤ, သီး ကွီး န ဗးမွှီၤ တၲၤစၲၤ꤮ တိၤ။ ကွီး လၤဟူး, သီး ကှံ နှီဘဲၤ ပှး။ ရဴ သီး ကှံ နှီဘဲၤ လၲဘး စဴ တှဲၤသဲလှၲုဖဴၤဖံး ပှး။ 25 “ဗး ဟၴဘဲၤ ပှၴ သီး တှဲၤအၴူးတၤဟၴၤ န ငှိခခိၤ တၤဟၴၤ။ မၤနရဴ ဆၲုခဲး ဒၲ ဗး လိၤ ဟၴဘဲၤ ပှး န ငှိခခိၤ တိၤ နၲုၤ, အၤ ကှံ ဟူးတှၲု ပှး။ ဗး ကှံ ဟၴလှၲုးလီး ပှၴလှဴး သီး န ဗးဖဲး အၤရီၤအၤကူး ပှး။ 26 ဘီနၲုၤတၲၤညၴး ပှးနၲုၤ, သီး ကွီးစဴဘဲးထူၤ လၤဟူး န ဗးမွှီၤ ပှး။ ရဴ ဗး လိၤကွီး ပှၴ ပှး ဒၲ သီးညၴး တိၤ။ 27 မှၴၤတၴးဟၴရဴ ဗးဖဲး မှိၤနှီ သီး န အၤနှၴ နှီဒံၤစဴ။ ဒၲ သီး မှိၤနှီ ဟဴ ဗး, သီး ဇှံအၴၤနှီ ဟဴ ဗး န ဗး အိၤ ဒၲ ဖဲး အၤ အိၤ ဟူး အၤခၳၤအၤခၴူး, အၤ မှိၤနှီ ဟဴ သီး ဟဴ။ 28 ဗး အိၤ ဒၲ ဖဲးအိၤ ဟူး ရဴ ဗး ဟူးလှူၤ ဒၲ ဟၴၤခၳၤအၴူး။ ခိးညှရဴ ဗး ကှံ ထၴၤကှၤကူး ဒၲ ဟၴၤခၳၤအၴူး ရဴ ဗး ကှံ ကှၤခၴူး ခၴူးသူ ဒၲ ဗးဖဲး အၤ အိၤ။” 29 အၴူးတၲၤဖှၲုရဴ အၤ ခိးပၤစှဲ တၤဟၴၤ ဟၴ လၳး န, “ခိးညှ ရဴ နှဲၤ ဟၴဘဲၤ ပှး န ငှိခခိၤ တိၤ ရဴ အၤ ပျိးရူလး။ 30 ပှဲၤ ဆၳၤဒူး တူၤဟီ နှဲၤ တၲၤစၲၤ꤮ တိၤ တၤဒၲၤရဴ နှဲၤ သဲညၴး လှဴးရှၴဒံၤဟဴ တှဲၤ ဒၲ ပှဲၤ ကှံရှၴ ဆၳၤဒူး နှဲၤ နၲုၤတၤဟၴၤ ဟဴ။ ဖၳနၲုၤရဴ ခိးညှအၴူး ပှဲၤ သဲညၴး န နှဲၤ သဲညၴး လှဴး တှဲၤပွှိးတၲၤစၲၤ။ ဒၲ နှဲၤ သဲညၴး ဖၳအၴူး အၤခၳၤအၤခၴူး, ပှဲၤ ဇှံအၴၤ န နှဲၤ အိၤ ဒၲ စဴမၤရူၤ အၤ အိၤ ဟူးလှူၤ မှနူး ဟဴ။” 31 ရဴ ဘူၤစဲၤ ယၴၤဆၳူ ဆၳၤဒူး အဲၤသီး န, “ခိးညှရဴ သီး ဇှံအၴၤ မှလၤကိး ဟဴ နၲုး꤮? 32 မၤနရဴ ဆၲုခဲး ဒၲ သီး ကှံ ကျူၤပြၲုကျူၤပြူး လှဴး ပှး, ရဴ သီး ကှံ ကှၤကူး လၤဟူး ဒၲ သီးဟီၤ တၲၤပြှဲၤ န တၲၤပြှဲၤ နၲုၤ, အၤ ကှံ ဟူးတှၲု ပှး။ ဟၴတှးတှး꤮ မၤ အၤ ဟူးတှၲု စဴဟဴ။ သီး ပွှိး꤮ တၲၤပြှဲၤ ကှံ ဒူၤအိၤကူး တံဒံၤ ဗး ပှး။ မၤနရဴ ဗး အိၤတံဒံၤ မှတိၤ, မှၴၤတၴးဟၴရဴ ဗးဖဲး အိၤကှၲုး န ဗး။ 33 “သူဖၳ သီး ကှံ နှီဘဲၤ တှဲၤသဲပျဴၤ ကၤစှၳကၤဘဲ အၤညၴးနၲုၤ, ဗး ဟၴ ပှၴ ထၲုး လှဴး ဟဴ သီး လှဴး꤮ အၴူးတၤဟၴၤ ဟဴ။ ဒၲ သီး ထွှိးထူၤဟဴ တှဲၤတၲၤစၲၤ꤮ တၲုး န ဗး အၤခၳၤအၤခၴူး, သီး နှီဘဲၤဟဴ သဲပျဴၤ အၤ တှဲၤကၤစှၳကၤဘဲ ဟဴ။ ဒၲ ဟၴၤခၳၤ အၴူးနၲုၤ, သီး ကှံ မူထၴူၤဘဲၤ န တှဲၤပှူတှဲၤဆဲး တှဲၤစှၴူးတှဲၤစှံၤ ပှး, မၤနရဴ ဒူၤဆိူၤဒူၤဆဴး လၤဟူး သီး သဲပျဴၤ နီ꤮။ ဗး မှၴၤပၴ ထၲုးဟဴ ဟၴၤခၳၤနှၴခၳၤ အၤ တၤရၴူးဆိူၤဆဴး အၴူးတၤဟၴၤ ဟဴ။”
1 ဘူၤစဲၤ ယၴၤဆၳူ ဟၴထၲုး ဖၳအၴူး ရဴ အၤ တှၳထူၤ ဒၲ မှဴခၳၤ ရဴ အၤ ကွီးစဴဘဲး ရဴ အၤ ကွီး ဖၳအၴူး, “ဖဲး꤮, ဆၲုခဲး ဟူးတှၲုဟဴ။ သူဖၳ ဗး ကှံ မှၴၤလီးမှၴၤတၤခဲး ထူၤလှၲုး နှဲၤနၲုၤ, မှၴၤလီးမှၴၤတၤခဲး မဴး ဗး မှဒံၤ နှဲၤ ဖၳခၳးအၴူး။ 2 မှၴၤတၴးဟၴရဴ သူဖၳ လှဴး꤮ ကၤယး ဒၲ နှဲၤ ဒၴူ ဗး တၤဟၴၤ ကှံ နှီဘဲၤ သဲထွှိးပြှဲၤ တၤစှၳပြှဲၤ အၤညၴးနၲုၤ, နှဲၤ ဒၴူ ထၲုးလှဴးဟဴ ဗး တှဲၤတၤရၴူးဆိူၤဆဴး ဒၲ ဗး ကှံ ပၲ လှဴး ကၤယး အၴူးတၤဟၴၤ ဟဴ။ 3 စဴမၤရူၤ မှမၤ တံ နှဲၤ တၲၤပြှဲၤပြဲ, ရဴ ကၤယး ဒၲ အၤ သဲညၴး နှဲၤ ရဴ အၤ သဲညၴး န ဗး မၤ ယၴၤဆၳူခြီ ဒၲ နှဲၤ ပျွိးဟူး လၳး တၲၤပြှဲၤ တၤဟၴၤ နၲုၤမၤ မှဟဴ တှဲၤသဲညၴး ဒၲ အၤ ဒၴူ အဲၤသီး သဲထွှိးပြှဲၤ တၤစှၳပြှဲၤ ဟဴ။ 4 ဗး မှၴၤ ပှၴ ထၲုးလှဴး ဟဴ နှဲၤ တှဲၤမှၴၤ ဒၲ နှဲၤ နဴးမှၴၤ ဗး နၲုၤတၤဟၴၤ အၤခၳၤအၤခၴူး, ဗး မှၴၤလီးမှၴၤတၤခဲး ဟဴ နှဲၤ ဒၲ ဟၴၤခၳၤအၴူး ဟဴ။ 5 ဖဲး꤮, ဖၳ ဗး တှဲၤလီးတှဲၤတၤခဲး အိၤတှၲကှၲုး န နှဲၤ ဒၲ ဟၴၤခၳၤ ထွှိးထူၤ တူၤဟီတိၤ ပး အၤခဲးနၲုၤ, ဒၴူခၴူးမဴး ဗး တှဲၤလီးတှဲၤတၤခဲး အၴူးနၲုၤ ဒၲ နှဲၤညၴးဟူး ခိးညှအၴူး တဲး။” 6 “ကၤယး ဒၲ နှဲၤ နွိထၴၤခိ အဲၤသီး ဒၲ ဟၴၤခၳၤအၴူး ရဴ နှဲၤ ဒၴူ န ဗး တၤဟၴၤနၲုၤ ဗး ဒၴူလှၲုး ပှၴဟဴ အဲၤသီး န နှဲၤ ဟဴ။ အဲၤသီး တၤဟၴၤ နၲုၤမၤ နှဲၤတှဲၤ ဟဴ။ အဲၤသီး တၤဟၴၤနၲုၤ, နှဲၤ ဒၴူ န ဗး ရဴ အဲၤသီး နှီဒး လၤဟူး နှဲၤငှိ။ 7 ခိးညှရဴ လှဴး꤮ တှဲၤ ဒၲ ဗးဟၴဗးမှၴၤ အၴူးတၤဟၴၤနၲုၤ, အၤ အိၤ ဒၲ နှဲၤအိၤ ရဴ အၤ ဟူး ပြဲနၲုၤ အဲၤသီး သဲညၴး ဟဴ။ 8 မှၴၤတၴးဟၴရဴ, တှဲၤရီၤတှဲၤကူး ဒၲ နှဲၤ ဒၴူ ဗး နၲုၤတၤဟၴၤနၲုၤ, ဗး ဒၴူ န အဲၤသီး ရဴ အဲၤသီး ဖၴူဆံၤ ထၲုးဟဴ။ အဲၤသီး သဲညၴး တှးတှၴၤ ဟဴ န ဗး အိၤ ဒၲ နှဲၤ အိၤ ဟူး ရဴ အဲၤသီး ဇှံအၴၤ န နှဲၤ နဴးဟူး ဗး။ 9 ဗး ကွီးစဴဘဲး ပှၴ ဒၲ အဲၤသီး အၤညၴး။ ဗး ကွီးစဴဘဲး ပှၴ ပြှဲၤလှၳၤ ဟၴၤခၳၤဖၳ နၲုၤတၤဟၴၤ အၤညၴး မှတိၤ။ မၤနရဴ ကၤယး ဒၲ နှဲၤ ဒၴူဟဴ ဗး တၤဟၴၤနၲုၤ, နှဲၤတှဲၤ အၤခၳၤအၤခၴူး, ဗး ကွီးစဴဘဲး ပှၴ ဒၲ အဲၤသီးညၴး။ 10 လှဴး꤮ အၤ အိၤ န ဗး တၤဟၴၤနၲုၤ, နှဲၤတှဲၤ ဟဴ, ရဴ လှဴး꤮ အၤ အိၤ န နှဲၤ တၤဟၴၤနၲုၤမၤ, ဗးတှဲၤ ဟဴ။ ဗး နှီဘဲၤ ဒီးတံ တှဲၤလီးတၤခဲး ဒၲ အဲၤသီးအိၤ။ 11 ဗး အိၤ တၤဒံၤ ပှး ဒၲ ဟၴၤခၳၤအၴူး တိၤ, မၤနရဴ အဲၤသီး အၴူးတၤဟၴၤ ကှံ အိၤ တၤဒံၤပး ဒၲ ဟၴၤခၳၤအၴူး ပှး။ ဗးရဴ, ဗး ကှံ ကှၤခၴူး ခၴူးသူ ဒၲ နှဲၤအိၤ ပှး။ ကၲ꤮ ဖဲး စးဆဲး! သူဖၳ အဲၤသီး ကှံ အိၤလၳး န သဲပျဴၤ တၲၤမၴး꤮ စံး ဖၳ ဗး န နှဲၤ အိၤလၳး န သဲပျဴၤ တၲၤမၴး꤮ စံး အၤကၳးနၲုၤ, တၤကဴတၤကဲၤ ဘီနှီဒံၤ အဲၤသီး န နှဲၤမွှီၤ ဒၲ အၤပြှိၤအၤပြှူး, နှဲၤမွှီၤ ဒၲ နှဲၤ ဒၴူ ဗး အၴူးနၲုၤ နီ꤮။ 12 ဘီ ဗး အိၤတှၲကှၲုး န အဲၤသီး အၤခဲးနၲုၤ, ဗး တၤကဴတၤကဲၤဘီ နှီဒၴူ အဲၤသီး ဟဴ, ဗး အိၤပှဴ မူခွဲၤနှီ အဲၤသီး န မွှီၤ ဒၲ နှဲၤ ဒၴူ ဗး နၲုၤ ဟဴ။ အၤ လၤမှၴကူး နှ တၲၤပြှဲၤ꤮ တိၤ။ သူဖၳ လီၤစးဆဲး ကှံ လၲဘးဟူး အၤညၴးနၲုၤ, အၤ လၤမှၴကူး တံပြဲ ကၤယး နၲုၤတၲၤပြှဲၤ ဒၲ အၳး ဒူၤ အိၤနှၴၤ နူးဟဴ အဲၤ ဒၲ အၤ ကှံ ပၴူနူး ပှး နၲုၤတၲၤပြှဲၤ တံဒံၤ ပြဲ။” 13 “ဗး ဟူးဟဴ ဒၲ နှဲၤအိၤ ခိးညှ ဟဴ။ သူဖၳ အဲၤသီး ကှံ အိၤလၲဘး န တှဲၤသဲလှၲုဖဴၤဖံး အၤညၴးနၲုၤ, ဘီ ဗး အိၤပး ဘီ ဟၴၤခၳၤအၴူး အၤခဲး, ဗး ဟၴလှၲုး ပှၴ ဟဴ အဲၤသီး န တှဲၤအၴူးတၤဟၴၤ ဟဴ။ 14 ဗး ဒၴူသဲညၴး ပှၴဟဴ အဲၤသီး န နှဲၤလှးနှဲၤငှိ, ရဴ ကၤယး ဒၲ အၤ ဇှံအၴၤ ဗး တိၤ တၤဟၴၤနၲုၤ, အၤ သဲထၴၤသဲဟး လှဴး အဲၤသီး မှၴၤတၴးဟၴရဴ ဖၳ ဗး အိၤအီစံးတှၲ န ဟၴၤခၳၤ တိၤ နၲုၤ, အဲၤသီး သူကှၲုး ဟဴ န ဗး အၤခၳၤအၤခၴူး, အၳး သဲထၴၤသဲဟး လှဴး အဲၤသီး။ 15 ဗး ကွီးစဴဘဲး န ဖၴူထၴၤ တၤဖးကူး အဲၤသီး န ဟၴၤခၳၤအၴူး ဖၳနၲုၤ မှတိၤ။ မှတၲၤခိနၲုၤ, ဗး ကွီးစဴဘဲး န နှဲၤ ကှံ တၤကဴတၤကဲၤ ဘီနှီ အဲၤသီး န ကၤယးစှၴူး ကၤယးရီၤစှူ ဒၲ အၳး အဲ လၳး န စၴၤထၲၤ အၴူးနၲုၤ တၲၤဒှၲုး။ 16 ဖၳ ဗး အိၤအီစံးတှၲ န ဟၴၤခၳၤ တိၤ နၲုၤ, အဲၤသီး သူကှၲုးဒံၤ န ဗး ဟဴ။ 17 မှၴၤစးဆဲး ခဴၤဒံၤ အဲၤသီး န နှဲၤလှးနှဲၤငှိ ဒၲ အၤစဴ အၴူးနၲုၤ နီ꤮။ 18 ဖၳ နှဲၤ နဴးဟူး ဗး ဒၲ ဟၴၤခၳၤ အၴူးနၲုၤ, ဗး နဴးစၲုဟဴ အဲၤသီး ဒၲ ဟၴၤခၳၤဖၳ အၴူးတၤဟၴၤ အၤ အိၤ ဟဴ။ 19 သူဖၳ အဲၤသီး ကှံ ဘၴၤစးဆဲး ကှၲုး လၤဟူး အၤသဲ န နှဲၤလှးနှဲၤငှိ အၤ တှဲၤမှတှဲၤစဴ အၴူးနၲုၤ ရဴ, ဗး ဒၴူလှူၤ လှဴးလှတၤကျီၤ ထၲုးဟဴ ဗး သဲထွှိးပြှဲၤ ဒၲ အဲၤသီး အၤခးလှၴ ဟဴ။” 20 “ဗး ကွီးစဴဘဲး ပှၴ တံ ဗး ခိးပၤစှဲ အၴူးတၤဟၴၤ အၤညၴးနၲုၤ မှတိၤ။ အဲၤသီး အၴူးတၤဟၴၤ စၲု ခူသဲ ပှး ရဴ ကၤယး ဒၲ အၤ နှီဟၲုး ရဴ အၤ ဇှံအၴၤညှအၴၤ ကှၤ ကှၲုး ဗး ပှး တၤဟၴၤ အၤညၴးဘဲၤဘဲၤ, ဗး ကွီးစဴဘဲး ပှၴ တှၲကှၲုး လှဴး ဒၲ အဲၤသီးညၴးညၴး။ 21 ကၲ꤮ ဖဲး, ဖၳ နှဲၤ အိၤ ဒၲ ဗးကၳး, ရဴ ဗး အိၤ ဒၲ နှဲၤကၳး အၴူးနၲုၤ, သူဖၳ အဲၤသီး လှဴး꤮ ပျီး ကှံ အိၤကှၲုးဒံၤ လၳး န သဲပျဴၤ တၲၤမၴးတၲုး ရဴ, ဗး ကွီး သဲဇှဴၤထူၤ ဟဴ နှဲၤ ဟဴ။ ထၲုးတိၤ သူဖၳ ပြှဲၤလှၳၤ ဟၴၤခၳၤဖၳ တၤဟၴၤ ကှံ ဇှံအၴၤ န နှဲၤ နဴးဟူးလှူၤ ဗး နၲုၤရဴ, ဗး ကွီးစဴဘဲး န အဲၤသီး ကှံ အိၤကှၲုဒံၤ ဒၲ ပှဲၤကၳး နီ꤮။ 22 သူဖၳ အဲၤသီး ကှံ အိၤလၳး န သဲပျဴၤ တၲၤမၴး꤮ စံး ဖၳ ဗး န နှဲၤ အိၤလၳး န သဲပျဴၤ တၲၤမၴး꤮ စံး အၤကၳးနၲုၤ ရဴ, ဗး ဒၴူ ဟဴ အဲၤသီး တှဲၤလီးတှဲၤတၤခဲး ဒၲ နှဲၤ ဒၴူ ဗး အၴူးနၲုၤ ဟဴ။ 23 သူဖၳ အဲၤသီး ကှံ သဲပျဴၤ အီစံးရူ လၳး တၲၤမၴးတၲုး အၤညၴး, ထၲုးတိၤ သူဖၳ ပြှဲၤလှၳၤ ဟၴၤခၳၤဖၳ တၤဟၴၤ ကှံ သဲညၴးဟူး န နှဲၤ နဴးဟူးလှူၤ ဗး, ရဴ နှဲၤ မှိၤနှီ ပြှဲၤ ဒၲ အၤ ဇှံအၴၤ ဗး တၤဟၴၤ ဖၳ နှဲၤ မှိၤနှီ ဗး နၲုၤရဴ, ဗး အိၤ ဒၲ အဲၤသီး အၤကၳး ရဴ နှဲၤ အိၤ ဒၲ ဗးကၳး။” 24 “ကၲ꤮ ဖဲး, ကၤယး ဒၲ နှဲၤ ဒၴူ န ဗး အၴူးတၤဟၴၤနၲုၤ, ဗး အိၤ ဘီတၴး တၲၤဖိၤနၲုၤ, ဗး သဲဇှံ အဲ အိၤကှၲုး အဲၤသီး ဘီနၲုၤ။ ဗး သဲဇှံ ဒၲ အဲၤသီး ကှံ မူထၴူၤ ဗး တှဲၤလီးတှဲၤတၤခဲး ဒၲ နှဲၤ ဒၴူ ဗး အၴူးတၤဟၴၤ, မှၴၤတၴးဟၴရဴ, နှဲၤ မှိၤ ပး ဗး ဒၲ ပှဲၤ ဘူလှူၤ တူၤဟီ ဟၴၤခၳၤ တိၤ အၤခဲး ပး စဴ။” 25 “ဖဲး ဒၲ အၤစဴအၤတှၴၤ꤮, ပြှဲၤလှၳၤ ဟၴၤခၳၤဖၳ တၤဟၴၤ သဲညၴး နှဲၤ တိၤ တၤဒၲၤရဴ ဗး သဲညၴး နှဲၤ, ထၲုးတိၤ ကၤယး ဒၲ အၤ ဇှံအၴၤ ဗး အၴူးတၤဟၴၤ သဲညၴး န နှဲၤ နဴးဟူး ဗး။ 26 သူဖၳ နှဲၤ တှဲၤမှိၤ ဗးအၴူး ကှံ အိၤ ဒၲ အဲၤသီး အၤကၳး, ထၲုးတိၤ သူဖၳ ဗး ကှံ အိၤကှၲုး ဒၲ အဲၤသီး အၤကၳး အၤညၴးနၲုၤ, ဗး ဒၴူသဲညၴး ပှၴဟဴ အဲၤသီး န နှဲၤ, ရဴ ဗး ကှံ ဒၴူသဲညၴး ပျၴၤဟူး ပှၴ ပှိ အဲၤသီး န နှဲၤ ပှး,” ဘူၤစဲၤ ယၴၤဆၳူ ကွီးစဴဘဲး ရဴ အၤ ဟၴ ဖၳနၲုၤ။
1 အၤ ကွီးစဴဘဲး ထၲုးရဴ အဲၤ န အၤ ခိးပၤစှဲ တၤဟၴၤ ထၴၤစၲုဘဲ ကၴၤဒြိၤ လှူးဇှးကြး နၲုၤတၲၤဘိး။ ဒၲ လှူး ဘဲရှဲး နၲုၤ, အဴလီဗှၤဖဲၤ ပြှဲလှၴ အိၤတၲၤလှၴ။ ရဴ အဲၤ န အၤ ခိးပၤစှဲ တၤဟၴၤ စၲုနှၲုး လၤဟူး ဘီနၲုၤ။ 2 ဘူၤစဲၤ ယၴၤဆၳူ န အၤ ခိးပၤစှဲ တၤဟၴၤ စၲု မူထၴူၤ တှးဆံၤ တၤမိးမိး နှီဒၴူ လၳး ဘီ ခးလှၴ နၲုၤတၲၤဖိၤ အၤခၳၤအၤခၴူး, ခၳးယၳဒၤ ဒၲ အၤ အီၤဆဲးတှးကူး ဘူၤစဲၤ ယၴၤဆၳူ အၴူးတၲၤပြှဲၤနၲုၤ, ခးလှၴ နၲုၤတၲၤဖိၤ မၤ အၤ သဲညၴး ပြဲ။ 3 ဖၳနၲုၤရဴ, ခၳးယၳဒၤ စၲု ဒၲ ပြှဲနၲုၤ တၲၤလှၴခၳၤ။ ရဴ ပြှဲၤလၳးတူး ခၳၤကျဴခၳၤကျူး တၤဟၴၤ န ဖၤရီၤဆူဲဖၳ တၤဟၴၤ နဴးဟူး တှၲကှၲုး ရှိမၴၤ ကျၴူးဖၳ တၤဟၴၤ န ကျၴူးဖၳ ဒၲ အၤ အိၤပှဴ တှဲၤလၳးတူးဟိး နၲုၤတၤဟၴၤ န ခၳးယၳဒၤ။ အဲၤသီး ဖၴူဟူးနှီ မီၤကဴး သီးတၤဟၴၤ, မီၤကှူး တၤရဲဘိး တၤဟၴၤ န တၤကှၲုၤတၤဘဲး တၤဟၴၤ။ 4 တှဲၤ ကှံရှၴ ထွှိးထူၤ အၤနှၴ န ယၴၤဆၳူ ဖၳတၴး နၲုၤ, အၤ သဲညၴး လှဴးပျီး အၤခၳၤအၤခၴူး အၤ ဟူးတိး အဲၤသီး ရဴ အၤ ဆၳၤဒူး အဲၤသီး န, “သီး မူပှၳး အၳးပၴး?” 5 အဲၤသီး ဟၴဆံၤ လၳး န, “ပှဲၤ မူပှၳး ဗှီး နၤစၤရဲဖၳ ယၴၤဆၳူ,” အၤ ဟၴ ရဴ ယၴၤဆၳူ ဟၴဆံၤ အဲၤသီး န, “ဗး မၤ အဲၤဟဴ။” ရဴ ခၳးယၳဒၤ ဒၲ အၤ အီၤဆဲးတှးကူး လၳး နၲုၤတၲၤပြှဲၤ အီၤထဴၤ တှၲကှၲုး န အဲၤသီး ဘီနၲုၤ။ 6 ဘီ ဘူၤစဲၤ ယၴၤဆၳူ ဟၴ အဲၤသီး န, “ဗး မၤ အဲၤဟဴ,” အၤခဲးနၲုၤ, အဲၤသီး သၴူကှၤခၴူး ရဴ အၤ လၤခံတှး လှဴး ဒၲ ဟၴၤခၳၤ။ 7 အၴူးတၲၤဖှၲုရဴ ဘူၤစဲၤ ယၴၤဆၳူ ဆၳၤဒူး ခၴူးသူ အဲၤသီး န, “သီး မူပှၳး အၳးပၴး?” ရဴ အဲၤသီး ဟၴဆံၤ န, “ပှဲၤ မူပှၳး ဗှီး နၤစၤရဲဖၳ ယၴၤဆၳူ,” အၤ ဟၴဆံၤ လၤဟူး ဖၳနၲုၤ။ 8 “ဗး ဟၴထၲုးဟဴ သီး န ဗး မၤ အဲၤဟဴ။ သီး ကီၤ မူပှၳး မှ ဗး ဟၴရဴ ပျွိးကှၤကူး ကၤယး ဒၲ အၤရှၲုၤ နၲုၤတၤဟၴၤ,” အၤ ဟၴဆံၤ အဲၤသီး ဖၳနၲုၤ။ 9 တှဲၤဟၴဘဲၤ အၴူးတၲၤမံးနၲုၤ, အၤ မှၴၤ လၲဘးထူၤ ငှိ ဒၲ အၤ ဟၴထၲုးဟဴ န, “ကၤယး ဒၲ နှဲၤ ဒၴူ ဗး တၤဟၴၤနၲုၤ, အၤ လၤမှၴကူးနဴ တၲၤပြှဲၤ꤮ တိၤ,” အၴူးနၲုၤဟဴ။ 10 အၴူးတၲၤဖှၲုရဴ ခၳးဆီူမိၤ ပၴၤတၤရၳ ဒၲ အၤ ဖၴူဟူးနှီ နဲ တၲၤဘဲၤ အၴူးတၲၤပြှဲၤ ဘထၴၤ အၤနဲ ရဴ အၤ ပှးတှံးကူး ပြှဲၤလၳးတူး ခၳၤကျဴဒၳၤလၲ အၤ ပြှဲၤမှၴၤတှဲၤဖၳ တၲၤပြှဲၤ အၤ ခးလဲၤကှၲု ဒၲ စဴထွိ တၲၤကၴူး။ ကၤယး အၴူးတၲၤပြှဲၤနၲုၤ အၤမွှီၤ န ခၳးမၤလၤခၳ။ 11 ရဴ ဘူၤစဲၤ ယၴၤဆၳူ ဟၴ ခၳးပၴၤတၤရၳ န, “ရှူးနှၲုး ဒွိကူး နှဲၤ နဲ ဒၲ အၤကျိၤကၳး နၲုၤ။ တှဲၤစှၴူးတှဲၤစှံၤ အၤဘၴးလှဴ ဒၲ ဗးဖဲး နဴးအိး ဗးအၴူး နၲုၤမၤ, ဗး တိး အိး နူး တိၤ ဟဲး?” 12 ထၲုးရဴ ရှိမၴၤ ကျၴူးဖၳ န အဲၤသီး ကျၴူးခၳၤကျဴ တၲၤပြှဲၤ န ယၳဒၤ ကျၴူးဖၳ ဒၲ အၤ အိၤပှဴ တှဲၤလၳးတူးဟိး တၤဟၴၤ ပှံ စဴးကျှဴၤမၤ လှဴး ယၴၤဆၳူ။ 13 ရဴ အၤ အဲ စၲု ရှၴလၲ လၳး ဒၲ ဖဲးအၤန အၤဟီၤ။ အဲၤ မၤ ဖဲးကၤယၤဖ အၤပြှဲ။ ဖဲးကၤယၤဖ မၤ ဘီနၲုၤ တၲၤနၤကၳး အၤ ထွှိး ပြှဲၤလၳးတူး ခၳၤကျဴဒၳၤလၲ ဟဴ။ 14 ဖဲးကၤယၤဖ မၤ ကၤယး တၲၤပြှဲၤ ဒၲ အၤ ဒၴူ သဲညၴးစွှိ ပှၴ ယၳဒၤဖၳ ခၳၤကျဴခၳၤကျူး တၤဟၴၤ န, “ဖံၤ꤮ န ကၤယး လှဴး꤮ ပျီး ကှံ သၴူးလှဴး နၲုၤ, ကၤယး အၴူးတၲၤပြှဲၤ ကီၤ သၴူးကူး နၲုၤမၤ အၤရူကျဴး” အၤ ဟၴ ဖၳနၲုၤ။ 15 ခၳးဆီူမိၤ ပၴၤတၤရၳ န ယၴၤဆၳူ အၤ ခိးပၤစှဲ ဒၲ အၤရှၲုၤ တၲၤပြှဲၤနၲုၤ, အၤ ကြွိးစၲုကှၲုး ဘူၤစဲၤ အၤခၴူး။ အၤ ခိးပၤစှဲ ဒၲ အၤရှၲုၤ အၴူးတၲၤပြှဲၤနၲုၤ, ပြှဲၤလၳးတူး ခၳၤကျဴဒၳၤလၲ အၴူးတၲၤပြှဲၤ သဲညၴး တှးတှၴၤ လၳး အၤခၳၤအၤခၴူး အၤ စၲုနှၲုးကှၲုး န ဘူၤစဲၤ ယၴၤဆၳူ ဒၲ ပြှဲၤလၳးတူး ခၳၤကျဴဒၳၤလၲ အၴူးတၲၤပြှဲၤ အၤဟီၤ ဗှီးကၳး။ 16 မၤနရဴ ခၳးပၴၤတၤရၳ အီၤထဴၤ အိၤကူး ဒၲ လှိၤကၤဒးကျဴး ပြဲ။ အၤ ခိးပၤစှဲ ဒၲ အၤရှၲုၤ ဒၲ ပြှဲၤလၳးတူး ခၳၤကျဴဒၳၤလၲ သဲညၴး လၳး အၴူးတၲၤပြှဲၤနၲုၤ, အၤ ထၴၤခၴူး ရဴ အၤ ထၴၤဟၴ ပြှဲၤအိၤပှဴ လှိၤကၤဒး ပြှဲၤမဴၤဖၳ အၴူးတၲၤပြှဲၤ ရဴ အၤ အဲနှၲုး ခၳးပၴၤတၤရၳ အၴူး ဒၲ ဟီၤဗှီးကၳး။ 17 ပြှဲၤမဴၤဖၳ အိၤပှဴ ကၤဒး အၴူးတၲၤပြှဲၤ ဟၴ ခၳးပၴၤတၤရၳ န, “နှဲၤ မၤ နှဲၤ အိၤတှၲကှၲုး ဒၲ ယၴၤဆၳူ ဟၴနၲုၤ တၲၤပြှဲၤ အၤ ခိးပၤစှဲ နၲုၤတၤဟၴၤ အၤကျဲး တၲၤပြှဲၤ ဟဴ, ဗးဟၴတိၤ?” ရဴ အၤ ဟၴဆံၤ လၳး န, “ဗး မှတိၤ။” 18 ယိး ကှၴရှိ ရဴ ပြှဲၤမှၴၤတှဲၤဖၳ တၤဟၴၤ န ကျၴူးဖၳ ဒၲ အၤ အိၤပှဴ တှဲၤလၳးတူးဟိး တၤဟၴၤ အီၤထဴၤဆွီ တၤဗှၤ လှဴးပျီး မီၤ။ ရဴ ခၳးပၴၤတၤရၳ အီၤထဴၤဆွီ တှၲကှၲုး မီၤ န အဲၤသီး။ 19 ပြှဲၤလၳးတူး ခၳၤကျဴဒၳၤလၲ နၲုၤတၲၤပြှဲၤ ဆၳၤဒူးမူ ယၴၤဆၳူ န အၤ ခိးပၤစှဲ တၤဟၴၤ အၤရီၤအၤကူး န အၤ တှဲၤအီၤသိူအီၤသူး တၤဟၴၤ အၤရီၤအၤကူး။ 20 ဘူၤစဲၤ ယၴၤဆၳူ ဟၴဆံၤ လၳး န, “ဗး အီၤသိူဟၲုၤ အီၤသိူသွဲနဴ နှ အၳး တိၤ, ဗး အီၤသိူလှအီၤသိူလီး အၳး ဒၲ ကၤယး ပွှိး꤮ တၲၤပြှဲၤ အၤညၴးဟူး ပြဲ။ လှဴး꤮ ယၳဒၤဖၳ တၤဟၴၤ လှၴဟူး မူထၴူၤ တှးဆံၤ နှီ လၳး အၤခးလှၴ ဒၲ တှဲၤစဴဘဲး ဟိးကၳး နၲုၤ ဘဲၤဘဲၤ, ဒၲ တှဲၤလၳးတူး ဟိးကၳးနၲုၤ ဘဲၤဘဲၤ ဗး အီၤသိူ အၳး ပွှိး꤮ တၲၤဖှၲု စဴ။ 21 ဖၳနၲုၤရဴ နှဲၤ စၲု ဆၳၤဒူးတှၲု ဗး မှၴၤတၴး? ဆၳၤဒူးကၳး ကၤယး ဒၲ အၤ နှီဟၲုး ဗး တှဲၤဒၲၤညး နၲုၤတၤဟၴၤ ကိးကိး။ ဗး ဒၲၤညး ပှၴ အဲၤသီး ကြူ꤮ မှၴၤတၴး နၲုၤ, အၤ သဲညၴး လှဴးပျီး ပြဲ,” ဘူၤစဲၤ ယၴၤဆၳူ ဟၴကှၤခၴူးဆံၤ အဲၤသီး ဖၳနၲုၤ။ 22 ဘီ ဘူၤစဲၤ ယၴၤဆၳူ ဟၴ ဖၳအၴူး အၤခဲးနၲုၤ, ကျၴူးဖၳ အိၤပှဴ တှဲၤလၳးတူးဟိး ဒၲ အၤ အိၤဖံၤ ဘီ လၳးခးဆၴူ နၲုၤတၲၤပြှဲၤ ပျှူ လၳး ခးလီဆၴူ ရဴ အၤ ဟၴ လၳး န, “နှဲၤ စၲု ဟၴဆံၤတှၲု ပြှဲၤလၳးတူး ခၳၤကျဴဒၳၤလၲ အၴူးတၲၤပြှဲၤ ဖၳနၲုၤ မှၴၤတၴး?” အၤ ဟၴ လၳး ဖၳနၲုၤ။ 23 ဘူၤစဲၤ ယၴၤဆၳူ ဟၴဆံၤ လၳး န, “ဗး ကီၤ ဟၴ သံ ဟၴရဴ အၤ သံကြူ꤮ အီးတၴးနၲုၤ, ဇှၳးလှၲုး ပှၴမူ ဗး, အၤ ကီၤ တိး ဟၴရဴ မၤမှၴၤတၴးရဴ နှဲၤ စၲု ပျူတှၲု ဗး ခးလီဆၴူ မှၴၤတၴး?” အၤ ဟၴဆံၤ လၳး ဖၳနၲုၤ။ 24 ထၲုးရဴ ဖဲးအၤန စဴးကျှဴၤမၤ ပးပြဲ လၳး ရဴ အၤ နဴးသၳးစၲု အၳး န ယၴၤဆၳူ ဒၲ ပြှဲၤလၳးတူး ခၳၤကျဴဒၳၤလၲ ဖဲးကၤယၤဖ ဟၴ အၴူးတၲၤပြှဲၤ အၤ အိၤ။ 25 ခၳးဆီူမိၤ ပၴၤတၤရၳ အီၤဆွီလှဲၤ တၤဒံၤပး မီၤ ဘီနၲုၤ။ ရဴ ကၤယး ဒၲ အၤရှၲုၤ တၲၤပြှဲၤ ဟၴ လၳး န, “နှဲၤ မၤ အဲၤခိးပၤစှဲ ဗးဟၴတိၤ?” အၤ ဆၳၤဒူး လၳး ရဴ အၤ ဟၴ ကှၤခၴူးဆံၤ န, “ဟုံ ဟုံၤ, ဗး မှ နှတိၤ။” 26 ပြှဲၤလၳးတူး ခၳၤကျဴဒၳၤလၲ အၤ ပြှဲၤမှၴၤတှဲၤဖၳ ဒၲ အၤပှၲုဗှူ န ခၳးပၴၤတၤရၳ ပှးတှံး လၳး ခးလဲၤကှၲု နၲုၤတၲၤပြှဲၤ ဆၳၤဒူး လၳး န, “ဗး မူထၴူၤနဴ နှဲၤ ဒၲ အဴလီဗှၤဖဲၤ တၤရဲကၳး နၲုၤရဴ နှဲၤ အိၤတှၲကှၲုး န ယၴၤဆၳူ ဗးဟၴတိၤ?” အၤ ဆၳၤဒူး လၳး ဖၳနၲုၤ။ 27 ခၳးပၴၤတၤရၳ ထၴဆံၤ ဘီကူး ခၴူးသူ န ဗး မှတိၤ အၤ ဟၴထၲုးထၲုး န ဆၴူးဖဲး အီၤအၳၤထူၤ။ 28 အၴူးတၲၤဖှၲုရဴ ယၳဒၤဖၳ တၤဟၴၤ အိၤ ဒၲ ဖဲးကၤယၤဖ ဟီၤ ရဴ အၤ အဲစၲု လၤဟူး ဘူၤစဲၤ ယၴၤဆၳူ ဒၲ ရှိမၴၤ ခွီပီလ ဟိးကၳး။ အဲၤသီး အဲစၲု လၳး ဘီ မှဴလီး ရှိၤမံ အၤခဲးနၲုၤ။ ယၳဒၤဖၳ တၤဟၴၤ သဲဇှံ အိၤ မွှိးပျီးသီးပျိၤ လၤဟူး အၤနှၴ ဖၳ အဲၤသီး တှဲၤစဴဘဲး လှၴကျိးလှၴခူၤ အိၤ နၲုၤ။ ဖၳနၲုၤရဴ အဲၤသီး နှၲုး လၤဟူး ဒၲ ခွီပီလ ဟိးကၳး တိၤ, မှၴၤတၴးဟၴရဴ အဲၤသီး ကီၤ နှၲုး ဟၴနၲုၤ, အၳး ဒၴူအၴၤ အဲၤသီး တှဲၤစၲုတၤလွိပွဲၤ အၤဆဲၤအၴၤ မှဴဟၴ အၴူးနၲုၤ တိၤ။ 29 ဖၳနၲုၤ အၤခၳၤအၤခၴူး, ခွီပီလ ထၴၤ ဒၲ ဟိးကျဴး ရဴ အၤ မူထၴူၤ ဟၴဘဲၤဆံၤ န အဲၤသီး ရဴ အၤ ဆၳၤဒူး အဲၤသီး န, “သီး စၲု ဒူၤတှဲၤသံ လၳး န အီးတၴး အၤခၳၤအၤခၴူး တၴး?” 30 အဲၤသီး ဟၴဆံၤ န, “အၤ ကီၤ မှၴၤသံ တှဲၤ တိၤ ရဴ ပှဲၤ အဲဟူး လၳး ဒၲ နှဲၤအိၤ တၤခူ꤮ တိၤ,” အၤ ဟၴဆံၤ လၳး ဖၳနၲုၤ။ 31 ခွီပီလ ဟၴဆံၤ အဲၤသီး န, “အဲ စၲု နှီဒၴူဒံၤ လၤဟူး ရဴ စီၤရူၤ နှီဒၴူဒံၤ လၤဟူး ဖၳ သီး တှဲၤသိူတှဲၤသူၤ အိၤနၲုၤ။” မၤနရဴ ယၳဒၤဖၳ တၤဟၴၤ ဟၴဆံၤ လၳး န, “ပှဲၤ တၤရၴူးဆိူၤဆဴး ဒၲ ပှဲၤ ဘဲၤ စီၤရူၤ သၴူးကူး ကၤယး နၲုၤ, အၤအိၤတိၤ,” အၤ ဟၴဆံၤ ဖၳနၲုၤ။ 32 အၤ ဟၴ လၤဟူး ဖၳအၴူး မၤ သူဖၳ အၤ ကှံ လၲဘးထူၤ ဖၳ ဘူၤစဲၤ ယၴၤဆၳူ ဟၴအိၤနှၴၤ ဟၴခိၤကူး န အၤ ကှံရှၴ သၴူး ဖၳတၴး တၲၤစၲၤ ပှး နၲုၤဟဴ။ 33 ဖၳနၲုၤရဴ ခွီပီလ နှၲုး ဒၲ အၤဟိးကၳး ရဴ အၤ နဴးအဲနှၲုး အၳး န ဘူၤစဲၤ ယၴၤဆၳူ ရဴ အၤ ဆၳၤဒူး လၳး န, “နှဲၤ မၤ ယၳဒၤဖၳ အၤခွီ တၲၤပြှဲၤ မှလၤကိး ဟဲး?” ဖၳနၲုၤ။ 34 ဘူၤစဲၤ ယၴၤဆၳူ ဟၴဆံၤ လၳး န, “အၴူးမၤ နှဲၤ တှဲၤတၤနှၴၤ ဟၴထၴၤ နှီဒၴူဒံၤ ဟဲး? မှတိၤရဴ ကၤယး တၲၤပြှဲၤပြှဲၤ ဟူးဒူ ပှၴ နှဲၤ န ဗးရီၤကူး ဟဲး?” အၤ ဆၳၤဒူး ကှၤခၴူးဆံၤ လၳး ဖၳနၲုၤ။ 35 ရဴ ခွီပီလ ဟၴ လၳး န, “နှဲၤ တၤနှၴၤ ဗး န ယၳဒၤဖၳ ဟဴၤ? ပြှဲၤ ဒၲ အၤ သၳးဟူး နှဲၤ ဒၲ ဗးအိၤ တၤဟၴၤ နၲုၤမၤ နှဲၤ မၴူးစၲၤဖၳ နှီဒံၤ န နှဲၤ ပြှဲၤလၳးတူး ခၳၤကျဴခၳၤကျူး နှီဒံၤ နၲုၤတၤဟၴၤ ပြဲ။ နှဲၤ စၲုမှၴၤသံ ကြူ꤮ အီးတၴးတၴး?” ခွီပီလ ဆၳၤဒူး လၳး ဖၳနၲုၤ။ 36 ဘူၤစဲၤ ယၴၤဆၳူ ဟၴဆံၤ လၳး န, “ဗးထၴူးဗးကှၴ မၤ ဘီ ဟၴၤခၳၤအၴူး မှတိၤ။ ကီၤ အၤ မှ ဘီ ဟၴၤခၳၤအၴူး ဟၴနၲုၤ, သူဖၳ ဗး ကှံ တှၲုဒၲ ယၳဒၤဖၳ အၤ ခၳၤကျဴခၳၤကျူး အၴူးတၤဟၴၤ အၤ တၤခၳၤကၳး တဲးမှၴ နၲုၤ, ဗးခိး ဒၲ အၤ ကြွိးကှၲုး ဗး တၤဟၴၤ ကှံ ဗံဆံၤ ထၲုးဟဴ အဲၤသီး ကိး။ ဖၳနၲုၤရဴ ဗးထၴူးဗးကှၴ မၤ ဘီ ဟၴၤခၳၤအၴူးနၲုၤ မှတိၤ။” အၤ ဟၴ ဖၳနၲုၤ။ 37 ခွီပီလ ဟၴ လၳး န, “ကီၤ ဟၴဖၳနၲုၤ ဟၴရဴ နှဲၤ ထွှိး ခွီ တၲၤပြှဲၤ ဟဴ နၲုး?” အၤ ဆၳၤဒူး လၳး ဖၳနၲုၤ။ ဘူၤစဲၤ ယၴၤဆၳူ ဟၴဆံၤ လၳး န, “ဗး မၤ ခွီ တၲၤပြှဲၤ မှလၤကိး ဖၳ နှဲၤ ဟၴ နၲုၤဟဴ။ သူဖၳ ဗး ကှံ ဟၴဆိၤပှၴ အၳး န တှဲၤမှတှဲၤစဴ နၲုၤရဴ, ဗး ဟူး အိၤပၤစှဲလှူၤ ဒၲ ဟၴၤခၳၤအၴူး ဟဴ။ လှဴး꤮ ကၤယး အိၤကှၲုး ဒၲ တှဲၤမှတှဲၤစဴ တၲၤကၴူး တၤဟၴၤနၲုၤ အၤ ကှံ နှီဒး ဗးငှိ ပှး။” အၤ ဟၴ ဖၳနၲုၤ။ 38 ခွီပီလ ဆၳၤဒူး လၳး န, “တှဲၤမှတှဲၤစဴ မၤ အီးတၴးတၴး?” ဖၳနၲုၤ။ ရဴ ခွီပီလ ထၴၤတိး ခၴူးသူ ဒၲ ယၳဒၤဖၳ အၴူးတၤဟၴၤ အၤ အိၤ ရဴ အၤ ဟၴ အဲၤသီး န, “ဗး ကှံရှၴ စီၤရူၤ အဲၤ အၤညၴးနၲုၤ ဗး မူထၴူၤ အၤတှဲၤသံ တၲၤစၲၤ꤮ တိၤ။” အၤ ဟၴ အဲၤသီး ဖၳနၲုၤ။ 39 “မၤနရဴ ဖၳ သီး တှဲၤစဴဘဲး အၤလှၴကျိး အိၤ န ဘီ သီး မှၴၤဟဴ တှဲၤစၲုတၤလွိပွဲၤ အၤခဲးနၲုၤ, ဗး ပျွိးထၴၤ ပှၴ သီး ကၤယး တှး ဒၲ အၤပှိၤကၳး တၲၤပြှဲၤ ပွှိး꤮ တၲၤဖှၲု။ ဖၳနၲုၤရဴ မၤ သီး သဲဇှံ ပျွိးထၴၤကူး ‘ယၳဒၤဖၳ အၤခွီဒၳၤ အၴူးတၲၤပြှဲၤ’ ဟဲး?” အၤ ဆၳၤဒူး အဲၤသီး ဖၳနၲုၤ။ 40 ရဴ အဲၤသီး အဲထိးထူၤ လၤဟူး န, “ပျွိးထၴၤ တိၤ။ ပျွိးထၴၤ ဒၲ ခၳးဘၤရၤဘ နၲုၤ,” အၤ ဟၴ လၤဟူး ဖၳနၲုၤ။ ခၳးဘၤရၤဘ မၤ ပြှဲၤပှံဖၴၤ ယဲပျဲအၴၤ အၳးတှဲၤ တၲၤပြှဲၤ။
1 ဖၳနၲုၤရဴ ခွီပီလ အဲ ဘူၤစဲၤ ယၴၤဆၳူ ရဴ အၤ နဴးမှံး အၳး န ဆၳၤပျၴူၤ အီၤပျီ။ 2 ကျၴူးဖၳ တၤဟၴၤ အီၤခၳၤ တၤဗှၤ သဴၤဆူမှဴ သူန ခၳၤကျွှိး နၲုၤရဴ အၤ ကျွှိးထူၤ ပှၴ န ယၴၤဆၳူ။ ရဴ အၤ သူထူၤ ပှၴ လၳး စှၤစွှိၤ တၤဖဲၤအဴထၳး ဒၲ အၤသူန ခွီ လှၴသူ အၴူးတၲၤဘၤ ထၲုးရဴ, 3 အၤ ဟူးတိး လၳး ရဴ အၤ ဟူးဟၴ ကှၤခၴူးခၴူး ဟူးညၴးညၴး လၳး န, “ကၲ꤮ ယၳဒၤ အၤခွီဒၳၤ, အိၤထွှိးပြှဲၤ မှဴညၴး ထၳးဒံၤ နီ꤮!” အၤ ဟၴ လၤဗီၤလၤဗဴး ကၤနီးကၤနှိ ထၲုး လၳး ဖၳနၲုၤ ရဴ အဲၤသီး ပျှူ လၳး ခးလီဆၴူ။ 4 ခွီပီလ ဟူးထၴၤ ခၴူးသူ ရဴ အၤ ဟၴ ယၳဒၤဖၳ တၤဟၴၤ န, “သူဖၳ သီး ကှံ သဲညၴး လၤဟူး န ဗး စှၴၤမူ အဲၤ ရဴ ဗး မူထၴူၤ အၤ မှၴၤ တှဲၤသံ တၲၤစၲၤ꤮ တိၤ အၤညၴးနၲုၤ, ဗး ကှံ အဲထၴၤလှၲုး ပှၴ ခၴူးသူ သီး ဘီအၴူး။” 5 ဘူၤစဲၤ ယၴၤဆၳူ ကျွှိးထၴၤနှီ ခၳၤကျွှိး သဴၤဆူ ရဴ သူထၴၤနှီ စှၤစွှိၤ တၤဖဲၤအဴထၳး တၲၤဘၤ ရဴ ထၴၤတိး အဲၤသီး။ ရဴ ခွီပီလ ဟၴ အဲၤသီး န, “အၴူးလှၴ, အဲၤ မၤ ကၤယး နၲုၤတၲၤပြှဲၤ ဟဴ။” အၤ ဟၴ အဲၤသီး ဖၳနၲုၤ။ 6 ပြှဲၤလၳးတူး ခၳၤကျဴခၳၤကျူး တၤဟၴၤ န ကျၴူးဖၳ ဒၲ အၤ အိၤပှဴ တှဲၤလၳးတူးဟိး တၤဟၴၤ မူထၴူၤ လၳးလၳး န, “မှံးသၴူးထူၤကူး အဲၤ ဒၲ တိးလူး ဟီၤထံၤလှိၤ နၲုၤ, မှံးသၴူးထူၤကူး အဲၤ ဒၲ တိးလူး ဟီၤထံၤလှိၤ နၲုၤ,” အၤ အဲထိးထူၤ လၤဟူး ဖၳနၲုၤ။ မၤနရဴ ခွီပီလ ဟၴ အဲၤသီး န, “အဲစၲု နှီဒၴူဒံၤ လၤဟူး ရဴ မှံးသၴူးထူၤ နှီဒၴူဒံၤ လၤဟူး ဒၲ ဟီၤထံၤလှိၤ နၲုၤ။ ဒၲ ဗးညၴး ရဴ, တှဲၤသံ ဒၲ ဗး ကှံ စီၤရူၤ အဲၤ နၲုၤ, ဗး စှၴၤမူ အဲၤ ရဴ ဗး မူထၴူၤ တၲၤစၲၤ꤮ တိၤ,” အၤ ဟၴ အဲၤသီး ဖၳနၲုၤ။ 7 ယၳဒၤဖၳ တၤဟၴၤ ဟၴ တၤဒံၤ လၤဟူး န, “ပှဲၤ တှဲၤသိူတှဲၤသူၤ အိၤ န အဲၤ ဘဲၤသၴူး ပြဲ, မှၴၤတၴးဟၴရဴ အၤ ဒကွိ လှူၤ နှီဒၴူ အၤနှၴ န ဗး မၤ စဴမၤရူၤ အၤဖၳခၳး, အၤ ဟၴ နှီဒၴူ အၤနှၴ ဖၳနၲုၤ။” အၤ ဟၴထူၤ တၤဒံၤ လၤဟူး ဖၳနၲုၤ။ 8 ခွီပီလ နှီဟၲုး ပှိ ငှိဖၳအၴူး ရဴ အၤ လၴ သဲအီၤဆၴး ဟူးဆိူၤဆိူၤ။ 9 အၤ ကှၤ ကၤနှၲုး ခၴူးသူ ဒၲ အၤဟိးကၳး ရဴ အၤ နှၲုး ဆၳၤဒူး ယၴၤဆၳူ န, “နှဲၤ အိၤဘီတၴး ဟူး?” မၤနရဴ ယၴၤဆၳူ ဟၴကှၤခၴူးဆံၤ လၳး တၲၤစၲၤ꤮ တိၤ။ 10 ရဴ အၤ ဟၴ ယၴၤဆၳူ န, “နှဲၤ ဟၴကှၤခၴူးဆံၤ ဗး တၲၤစၲၤ꤮ တိၤ မှၴၤတၴး? ဗး နှီဘဲၤ တှဲၤတၤရၴူးဆိူၤဆဴး ဒၲ ဗး ကှံ ပျွိးကူး နှဲၤ မၤ အၤ နှီနှီ, မှတိၤရဴ ဗး ကှံ မှံးသၴူးထူၤကူး နှဲၤ ဒၲ ဟီၤထံၤလှိၤ နၲုၤမၤ အၤ နှီနှီ ပြဲ နၲုၤမၤ နှဲၤ သဲညၴး တိၤ ဟဲး?” အၤ ဟၴ လၳး ဖၳနၲုၤ။ 11 ရဴ ဘူၤစဲၤ ယၴၤဆၳူ ဟၴဆံၤ လၳး န, “စဴမၤရူၤ ကီၤ ဒၴူတှး နှဲၤ တၤရၴူးဆိူၤဆဴး အၴူး တိၤနၲုၤ, နှဲၤ နှီဘဲၤ စှူ တိၤ။ ဖၳနၲုၤရဴ ကၤယး ဒၲ အၤ ဒၴူတှးကူး ဗး ဒၲ နှဲၤ တၤခၳၤကၳး အၴူးတၤဟၴၤနၲုၤ, အၤတှဲၤသံ ဒၳၤကျဴးလၲ ပး စဴ န နှဲၤ။” 12 စထူၤ ဘီ အၤ ဟၴထၲုး ဖၳနၲုၤ ရဴ, ခွီပီလ အူစံ မူပှၳး ကျူ ဒၲ အၤ ကှံ ပျွိးထၴၤကူး ယၴၤဆၳူ။ မၤနရဴ ယၳဒၤဖၳ တၤဟၴၤ အဲထိး ပျၴၤဟူး တၤဒံၤပှိ န, “နှဲၤ ကီၤ ပျွိးထၴၤကူး ကၤယး နၲုၤတၲၤပြှဲၤ ဟၴမၤ, နှဲၤ မၤ စဴဖူၤ ကဲစၤ အၤခိးဘဴသိူ မှတိၤ။ ကၤယး တၲၤပြှဲၤပြှဲၤ ဒၲ အၤ ဒကွိ လှူၤ နှီဒၴူ အၤနှၴ န စဴဖူၤ နၲုၤ, မှဟဴ ကၤယး ဒၲ အၤ ထၴဆံၤ ခွီကဲစၤ ဟဴ။” 13 ဘီ ခွီပီလ နှီဟၲုး အဲၤသီး ဟၴဖၳအၴူး အၤခဲးနၲုၤ, အၤ အဲထၴၤ ယၴၤဆၳူ ရဴ အၤ အိၤနူးတှး ဒၲ တှဲၤစီၤရူၤ လှၴအိၤနူး ခးလှၴ ဒၲ အၳး အဲ န, အၳး ဘူသၴူၤ ကၤယး လှၴစၲု န လှဴ။ ဟီဘြၳငှိ မၤ အၤ ဟၴ န, ကၤဘၤသၤ။ 14 ဘီနၲုၤ တၲၤညၴး မၤ အၤတိး ဘီ မှဴထၲုၤခဲး အၳး တၤရီၤ အိၤနှၴၤ တှဲၤစၲုတၤလွိပွဲၤ အၤညၴး နၲုၤတၲၤညၴး။ ရဴ ခွီပီလ ဟၴ ယၳဒၤဖၳ တၤဟၴၤ န, “အၴူးလှၴ သီးခွီ,” အၤ ဟၴ အဲၤသီး ဖၳနၲုၤ။ 15 မၤနရဴ အဲၤသီး အဲထိးထူၤ လၤဟူး န, “မှၴၤသၴူးကူး အဲၤ, မှံးသၴူးထူၤကူး လၳး ဒၲ တိးလူး ဟီၤထံၤလှိၤ နၲုၤ။” ရဴ ခွီပီလ ဆၳၤဒူး အဲၤသီး န, “သီး သဲဇှံ နဴး မှံးသၴူးထူၤကူး ဗး န သီးခွီအၴူး ဒၲ တိးလူး ဟီၤထံၤလှိၤ ဟဲး?” ရဴ ပြှဲၤလၳးတူး ခၳၤကျဴခၳၤကျူး တၤဟၴၤ ဟၴ န, “ပှဲၤ ခွီ အိၤပြဲတံ ခွီကဲစၤ တၲၤပြှဲၤ တၲုး။ ပှဲၤခွီ ဒၲ အၤရှၲုၤ မၤ အၤ အိၤ တၲၤပြှဲၤ꤮ တိၤ,” အဲၤသီး ဟၴ လၤဟူး ဖၳနၲုၤ။ 16 ဒၲခၴူးတၤဒံၤ ရဴ ခွီပီလ ဒၴူတှးကူး ယၴၤဆၳူ ဒၲ အဲၤသီး အၤတၤခၳၤကၳး ဒၲ အဲၤသီး ကှံ မှံးသၴူးထူၤကူး လၳး ဒၲ တိးလူး ဟီၤထံၤလှိၤ။ ဖၳနၲုၤရဴ ကျၴူးဖၳ တၤဟၴၤ ပှံစၲုကူး ယၴၤဆၳူ။ 17 ရဴ အၤ ဇှစၲု နှီဒၴူဒံၤ အၤ တိးလူးဟီၤထံၤ ရဴ အၤ ထၴၤစၲု ဒၲ ခၳၤကျဴကြွီ အၤခးလှၴ။ ခးလှၴ အၴူးတၲၤဖိၤ မၤ ဟီဘြၳငှိ ဟၴ န, “ကဴၤလၤကဴၤသ။” 18 အၳး မှံးသၴူးထူၤကူး လၳး ဒၲ တိးလူး ဟီၤထံၤလှိၤ ဘီနၲုၤ။ အၳး မှံးသၴူးထူၤ တှၲ လၳး န ကၤယး သဲနၴူး, တၲၤကၴူး န တၲၤပြှဲၤပြှဲၤ။ ယၴၤဆၳူ ရဴ အၤ အိၤ ဒၲ အၤကျးမၴးကၳး။ 19 ခွီပီလ နဴးရး အၳး တှဲၤမတှဲၤဒူး အၤလီၤပျဴၤ ရဴ အၤ နဴးမှံးသၴူးထူၤ အၳး ဒၲ တိးလူး ဟီၤထံၤလှိၤ။ အဲၤသီး ရး လီၤပျဴၤအၴူး န, “ယၳဒၤဖၳ တၤဟၴၤ အၤခွီ, ဗှီးနၤစၤရဲဖၳ ယၴၤဆၳူ” ဖၳနၲုၤ။ 20 အၳး မှံးသၴူးထူၤ ယၴၤဆၳူ အၴူးနၲုၤ, အၤ အိၤဖံၤပြဲ န ဗှီး အၤခၳၤအၤခၴူး, ယၳဒၤဖၳ တၤဟၴၤ ဟၲမူ အဲလး လီၤအၴူး။ ရဴ လီၤအၴူးနၲုၤ အၳး ရးအိၤ လှဴးပျီး န ဟီဘြၳငှိ ဒၲ ယၳဒၤဖၳ ဟၴဘဲၤ နှီဒၴူ အၴူးနၲုၤ, န လှၤတၴၤငှိ န ကြီမၴူးစၲၤဖၳ အၤငှိ။ 21 ပြှဲၤလၳးတူး ခၳၤကျဴ တၤဟၴၤ ဟၴ ခွီပီလ န, “‘ယၳဒၤဖၳ တၤဟၴၤ အၤခွီ,’ ရးဖၳနၲုၤ တဲးမှၴ။ ရး တၤပျၴၤ ခၴူးသူ န ကၤယး အၴူးတၲၤပြှဲၤ မၤ အၤ ဒကွိလှူၤ နှီဒၴူ အၤနှၴ န ယၳဒၤဖၳ တၤဟၴၤ အၤခွီ,” ရး တၤပျၴၤ ခၴူး ဖၳနၲုၤ။ 22 မၤနရဴ ခွီပီလ ဟၴ လၳး န, “တှဲၤ ဒၲ ဗး ရးထၲုးဟဴ နၲုၤမၤ, အၤ ထၲုးဟဴ။” 23 ဘီ ကျၴူးဖၳ တၤဟၴၤ မှံးသၴူးထူၤ ထၲုးဟဴ လၳး ဒၲ ဟီၤထံၤလှိၤ အၤခဲးနၲုၤ, ကျၴူးဖၳ သဲလွှီး အၴူးနၲုၤ အၤ ဖၴူ ဘူၤစဲၤ ယၴၤဆၳူ ဟၴူၤစှၤ တၤဟၴၤ ရဴ, အၤ အီၤဘၴး နှီဒၴူ လၳး တၲၤပြှဲၤ တၲၤဘၤ။ ရဴ အဲၤသီး ဖၴူ ပှိ လၳး စှၤစွှိၤထၳး ဒၲ အၳး ဘဴစံး တှးထၳးပျံ ပြဲ လၳး ရဴ အၳး လှၴအီၤဆဲထံး လၳး အိၤတိၤ အၴူးတၲၤဘၤ။ 24 အဲၤသီး တၲၤပြှဲၤ န တၲၤပြှဲၤ ဟၴ နှီဒၴူလၳး န, “ပှဲၤ ထဴဇှဲး အဲၤ တိၤ ဟး, အၳးပၴး တိး နှီဘဲၤပၴး ပှးနၲုၤ, ပှဲၤ ဘဴ တှဲၤဘူးဘွီ တၲၤစၲၤ ပိ!” အၤ ဟၴ နှီဒၴူ လၳး ဖၳနၲုၤ။ သူဖၳ လီၤစးဆဲးကၳး ကှံ လၲထူၤဘးထူၤ ရဴ တှဲၤထွှိး အၤနှၴ ဖၳအၴူး ပြဲ။ လီၤစးဆဲးကၳး ဟၴ န, “အဲၤသီး အီၤဘၴး ဖၴူ နှီဒၴူ လၤဟူး ဗးစှၤ တၤဟၴၤ ဟဴ။ သူဖၳ အဲၤသီး ကှံ ဖၴူနှီ ဗးစှၤ ရဴ အၤ ဘဴ လၤဟူး တှဲၤဘူးဘွီ ဟဴ။” ရဴ ကျၴူးဖၳ အၴူးတၤဟၴၤနၲုၤ, အၤ မှၴၤ လၤဟူး ဖၳနၲုၤ ဟဴ။ 25 ဘီ ဘူၤစဲၤ ယၴၤဆၳူ အၤ တိးလူးဟီၤထံၤ အၤခးဆၴူနၲုၤ, ဘူၤစဲၤ အၤမှၲု န ဘူၤစဲၤ အၤမှၲု အၤပှၲုပြှဲၤမဴၤ, န ခၳးကျဴဖ အၤမၴး မှၲုမၤရီ န မၤကၤဒၤလ ဒဴးကၳးမှၲု မဴၤမၤရီ အီၤထဴၤ အိၤ လၤဟူး ဘီနၲုၤ။ 26 ဘီ ဘူၤစဲၤ ယၴၤဆၳူ မူထၴူၤ အၤမှၲု န အၤ ခိးပၤစှဲ ဒၲ အၤ မှိၤ နှီဒၴူ လၳး အၴူးတၲၤပြှဲၤ အီၤထဴၤ အိၤဖံၤ န လၳး အၤခဲး, အၤ ဟၴ စၲု အၤမှၲု န, “မှၲု꤮ ခိးညှအၴူး ကၤယး အၴူးတၲၤပြှဲၤ မၤ အၤ ထွှိးဟဴ နှဲၤဖၳ ဟဴ,” အၤ ဟၴ စၲု အၤမှၲု ဖၳနၲုၤ။ 27 ထၲုးရဴ အၤ ဟၴ ကှၲုးကၴၤ အၤ ခိးပၤစှဲ နၲုၤတၲၤပြှဲၤ န, “ခိးညှအၴူး ဗးမှၲုရဴ အၤ ထွှိးဟဴ နှဲၤမှၲု ဟဴ။” စထူၤ ဘီနၲုၤ ရဴ အၤ ခိးပၤစှဲ အၴူးတၲၤပြှဲၤ အဲကှၤအိၤ ဘူၤစဲၤ အၤမှၲုအၴူး ဒၲ အၤဟီၤ။ 28 အၤ ဟၴထၲုး ဖၳနၲုၤ ရဴ ဘူၤစဲၤ ယၴၤဆၳူ သဲညၴး န အၤ မှၴၤထၲုးလှဴးဟဴ တှဲၤပွှိး꤮ တၲၤစၲၤ ဟဴ။ ရဴ သူဖၳ လီၤစးဆဲး ကှံ လၲဘးထူၤ အၤညၴးနၲုၤ, ဘူၤစဲၤ ယၴၤဆၳူ ဟၴ န, “ဗး သဲအိးထၴူး” အၤ ဟၴ ဖၳနၲုၤ။ 29 ဘီနၲုၤ တၲၤဖိၤနၲုၤ, ထၴူးဇှးဆၴူၤ အိၤ တၲၤသိး။ ရဴ အဲၤသီး ကျူၤစၲုဖၴူ တှဲၤတၲၤစၲၤ ဒၲ အၤသူန ဖပျၴူ ရဴ အၤ စၲုစှၴၤနှၲုး ဒၲ ထၴူးဇှးဆၴူၤ သိးကၳး ရဴ အၤ စဴးကျှဴၤမၤ ဒၲ သဴၤဖူး ဒၲ အၳး အဲ န ဟီစိဖူးအၴူး အၤလှိၤ ရဴ အၤ တှၳဒူၤထူၤတိး ဒၲ ဘူၤစဲၤ အၤ ခးအၳၤလှိၤ။ 30 ဘီ ဘူၤစဲၤ ယၴၤဆၳူ ပှၲုၤမူ အၴူး အၤခဲးနၲုၤ, အၤ ဟၴ န, “အၤ ထၲုးဟဴ။” ရဴ အၤ ခၳၤကျဴ တှးငှဴၤကူး, ထၲုးရဴ အၤ ဒၴူလှူၤကူး အၤသဲပျဴၤ ထွှိးပြှဲၤ ဒၲ စဴမၤရူၤ အၤ တၤခၳၤကၳး။ 31 ဘီနၲုၤ တၲၤညၴးနၲုၤ အၤတိး န မှဴညၴး ဒၲ အၳး တၤရီၤတၤရူး အိၤနှၴၤ ဆၴူပၤရိး ယၳဒၤဖၳ အၤ မှဴညၴးဒှၲုၤ နၲုၤတၲၤညၴး အၤညၴး။ မှဴညၴးဒှၲုၤ အၴူးနၲုၤမၤ မှဒံၤ မှဴညၴးဒှၲုၤ ဒၲ အၤ တှးတိး ခိဒံၤ ဘီ ပွဲၤ ဒၲ အၳး အဲ န တှဲၤစၲုတၤလွိပွဲၤ အၤခဲးနၲုၤ။ ဖၳနၲုၤရဴ ယၳဒၤဖၳ ခၳၤကျဴဒၳၤ ကၤဆၳၤထၳး တၤဟၴၤနၲုၤ, ဘီ မှဴညၴးဒှၲုၤ အၤခဲးအၴူး, အဲၤသီး သဲဇှံ ဒူၤအိၤ လှၲုးတှိၤ အၴူးတၤဟၴၤနၲုၤ ဒၲ တိးလူး ဟီၤထံၤလှိၤ တိၤ။ သူဖၳ အဲၤသီး ကှံ သၴူးပြူးနၲုၤ ရဴ, အဲၤသီး စၲု ကွီး ခွီပီလ ဒၲ အၤ ကှံ နဴးဒဴၤကှဲကူး အၳး န အဲၤသီး နၲုၤတၤဟၴၤ အၤခၤပှူး ရဴ ကှံ ဖၴူတှးကူး အဲၤသီး ဒၲ တိးလူး ဟီၤထံၤလှိၤ။ 32 ဖၳနၲုၤရဴ ကျၴူးဖၳ တၤဟၴၤ ဟူးဒဴၤကှဲ ရှၴလၲ အၳး မှံးသၴူးထူၤ တှၲန ယၴၤဆၳူ အၴူးသဲနၴူး အၤကျဲး တၲၤပြှဲၤ။ ထၲုးရဴ အၤ စၲု ဒဴၤကှဲ ကှၲုးပှိကၴၤ အၤ အိၤကူး နၲုၤတၲၤပြှဲၤ။ 33 မၤနရဴ ဘီ အဲၤသီး စၲုတှၲု ဒၲ ယၴၤဆၳူ အိၤ အၤခဲးနၲုၤ, အဲၤသီး မူထၴူၤ န အၤ သၴူး ထၲုးဟဴ အၤခၳၤအၤခၴူး အၤ ဒဴၤကှဲ လၳး ခၤပှူး တၲၤခိ꤮ တိၤ။ 34 မၤနရဴ ကျၴူးဖၳ အၴူးတၤဟၴၤ အၤကျဲး တၲၤပြှဲၤနၲုၤ, အၤ ဆံး ယၴၤဆၳူ ရှဴးကျဲး န တၤဘူး ရဴ တၲၤဖှၲုတၲုး သွီၤ န ထၴူး ဆတှးထၴၤ။ 35 ကၤယး ဒၲ အၤ မူထၴူၤ အၤ ထွှိးထူၤ ဖၳအၴူး တၲၤပြှဲၤနၲုၤ အၤ ဟၴဆိၤလှၲုး ပှၴ အၳး။ ရဴ အၤ ဟၴဆိၤ လှၲုးတိး ပှၴ အၳး ပြဲ။ အၤ သဲညၴး တှးတှၴၤ နှီဒၴူ န အၤ ဟၴ အၴူးနၲုၤမၤ အၤစဴအၤတှၴၤ ပြဲ။ သူဖၳ သီး ကှံ ဇှံအၴၤ ကှၲုးအၳး နၲုၤ, အၤ ဟၴဆိၤလှၲုး ပှၴ သီး ပြဲ။ 36 သူဖၳ လီၤစးဆဲး ကှံ လၲဘးထူၤ အၤညၴးနၲုၤ, တှဲၤအၴူးတၤဟၴၤ ထွှိးထူၤ ဟဴ။ လီၤစးဆဲးကၳး ဟၴ န, “အၤကြွီ ကှံ လၤကှဲနှီ တၲၤဘိး꤮ တိၤ,” အၤ ဟၴ ဖၳနၲုၤ။ 37 လီၤစးဆဲး ဒၲ အၤရှၲုၤတၲၤဖိၤ ဟၴ ပှိ န, “အဲၤသီး ဆံး နှီဒၴူလၳး န တၤဘူး အၴူးတၲၤပြှဲၤနၲုၤ, အဲၤသီး ကှံ မူ လၳး ပှး။” 38 ထၲုးရဴ ဗှီးအၤရီမသဲဖၳ ခၳးစိူစဲ စၲုကွီး ယၴၤဆၳူ အၤလှၲုးတှိၤ အၴူး ဒၲ ခွီပီလ အၤ အိၤ။ ခၳးစိူစဲ မၤ ဘူၤစဲၤ ယၴၤဆၳူ အၤ ခိးပၤစှဲ တၲၤပြှဲၤ, မၤနရဴ အၤ ယိး သဲအီၤဆၴး ယၳဒၤဖၳ တၤဟၴၤ အၤလှၴ အၤခၳၤအၤခၴူး အၤ ထွှိးဟၲုၤထွှိးသွဲ ပြဲ လၳး ခိးပၤစှဲ ပြဲ။ အၤ စၲုကွီး ခွီပီလ အၴူးနၲုၤ, အၤ စှၳး လၳး ရဴ အၤ ဟူး ဖၴူဒွိ စၲုကူး ဘူၤစဲၤ အၤလှၲုးတှိၤ အၴူး။ 39 ခၳးနီၤကၤဒၴမၳၤ ကြွိးစၲုကှၲုး န အဲၤ။ ကၤယး ဒၲ အၤ ဟူး အိၤလၴး ကှၲုး ဘူၤစဲၤ ယၴၤဆၳူ ဒၲ မှဴခီခဲး ဒၲ အၤရှၴခဲး နၲုၤတၲၤပြှဲၤ မၤ ခၳးနီၤကၤဒၴမၳၤ ဟဴ။ အၤ ဖၴူဟူးနှီ လှၴပျှဴ နှၲုၤမံ နၴူးစၲၤ ဒၲ အၳး အဲ န, မၳရၤ န အၤလၳစၤ။ အၤ လှူၤထၲုၤနၲုၤ, အၤ ဖံၤ꤮ အိၤ စဴ နၴူးဆၴူး န ညှးစွှဲ စဴ။ 40 အဲၤသီး အၴူးသဲနၴူး ဖၴူ ယၴၤဆၳူ အၤ လှၲုးတှိၤအၴူး ရဴ အၤ ဘိၤ တၤလၳး န အီၤကှဲး ဘပျီး တၲၤဘၤ ရဴ အၤ ဘိၤဘီ တၤလၳး တှၲ လၳး န တှဲၤနှၲုၤမံ နၲုၤတၤဟၴၤ။ ယၳဒၤဖၳ အၤလှၴကျိး အီၤလှၲု လှၲုး နၲုၤမၤ အၤ မှၴၤ လၤဟူး ဖၳနၲုၤ။ 41 ဘီ အၳး လှၴမှံးသၴူးထူၤ ယၴၤဆၳူ ဒၲ တိးလူး ဟီၤထံၤလှိၤ အၤခးဆၴူနၲုၤ, ပြှဲ အိၤ တၲၤလှၴ။ ဒၲ ပြှဲ နၲုၤတၲၤလှၴ အၤကၳးနၲုၤ, အၳး အီၤခံၤကၳးနှၲုး အိၤသဲး လှၲုးကၳး တၲၤကၳး ဒၲ လှဴကၳး, ရဴ အၳး အီၤလှၲုနဴ ဟီ န လှၲုးတၲၤတှိၤ꤮ ဟီတိၤ။ 42 ဘီနၲုၤ တၲၤညၴးနၲုၤ အၤတိး န မှဴညၴး ဒၲ အၳး တၤရီၤတၤရူး အိၤနှၴၤ ဆၴူပၤရိး ယၳဒၤဖၳ အၤ မှဴညၴးဒှၲုၤ နၲုၤတၲၤညၴး, ထၲုးတိၤ လှၲုးကၳး ယိး အိၤဖံၤ ဘီနၲုၤ တၲၤကၳး အၤခၳၤအၤခၴူး, အဲၤသီး စၲု အီၤလှၲုနှၲုးကူး လၳး ဘီနၲုၤ။
1 ယၳဒၤဖၳ အၤ မှဴညၴးဒှၲုၤ ထၲုး အၤနိၤတၲၤရိး မှဴလီး ရှိၤမံ မှဴခီအဴပး အၤခဲးနၲုၤ, မၤကၤဒၤလ ဒဴးကၳးမှၲု မဴၤမၤရီ ဟူး ဒၲ လှၲုးခၳၤ ရဴ အၤ မူထၴူၤ န လှဴဒၳၤ ဒၲ အၳး ထၳၤလဴးဘီ လၳး န လှၲုးကၳး နၲုၤတၲၤမၴးနၲုၤ အၳး ထၳၤလဴးတၤဖး စၲုကူး လၳး။ 2 ရဴ အၤ ကျူၤကှၤ ဒၲ ခၳးဆီူမိၤ ပၴၤတၤရၳ န ယၴၤဆၳူ အၤ ခိးပၤစှဲ ဒၲ အၤ မှိၤ နှီဒၴူ လၳး ဒၲ အၤရှၲုၤတၲၤပြှဲၤ အၤ အိၤ ရဴ အၤ ဟၴဆိၤ ပှၴ အဲၤသီး န, “အဲၤသီး ဖၴူစၲုကူးမှၴ ဟဴ ဘူၤစဲၤ နၲုၤ ဒၲ လှၲုးကၳး ဟဴ။ အဲၤသီး စၲုဒူၤအိၤတိး လၳး ဘီတၴး꤮ နၲုၤ ပှဲၤ သဲညၴး တိၤ။” 3 အၴူးတၲၤဖှၲုရဴ ခၳးပၴၤတၤရၳ န ဘူၤစဲၤ အၤ ခိးပၤစှဲ ဒၲ အၤရှၲုၤ တၲၤပြှဲၤ ကျူၤဟူး လၤဟူး ဒၲ လှၲုးခၳၤ။ 4 အဲၤသီး ကျူၤဟူး ပြွိ လၳး ပြဲ တၤဒၲၤရဴ ဘူၤစဲၤ အၤ ခိးပၤစှဲ ဒၲ အၤရှၲုၤ အၴူးတၲၤပြှဲၤ ကျူၤပြူးကျဴး န ခၳးပၴၤတၤရၳ အၤခၳၤအၤခၴူး, အၤ ကျူၤဟူး တှၲုရှၴကျဴး လၳး ဒၲ လှၲုးခၳၤ။ 5 အၤ ဟူး ငှဴၤမူစိးနှၲုး ဒၲ လှၲုးကၳး ရဴ အၤ မူထၴူၤ အီၤကှဲး ဘပျီးထၳး အၴူး အိၤကူး ဘီနၲုၤ, မၤနရဴ အၤ ဟူးနှၲုး ဒၲ အၤကၳး တိၤ။ 6 အၴူးတၲၤဖှၲုရဴ ခၳးဆီူမိၤ ပၴၤတၤရၳ ဒၲ အၤ ကျူၤဟူး တှးနိၤ ဒၲ လၳးခၴူးခၳၤ အၴူးတၲၤပြှဲၤ ဟူးတှၲု ရဴ အၤ ဟူးနှၲုး ဒၲ လှၲုးကၳး။ ရဴ အၤ မူထၴူၤ အီၤကှဲး ဘပျီးထၳး နၲုၤတၲၤဘၤ အိၤကူး ဘီနၲုၤ။ 7 ထၲုးရဴ အၤ မူထၴူၤ တှၲုကှၲုး ကၤထိး ဒၲ အၳး ဘိၤဘီ ပှၴ န ဘူၤစဲၤ ယၴၤဆၳူ အၤခၳၤကျဴ နၲုၤတၲၤဘၤဘၤ။ အၤ ကၤထိးဖၳ အၴူးတၲၤဘၤနၲုၤ အၤ အိၤတှၲကှၲုး န အီၤကှဲး ဘပျီးထၳး နၲုၤတၲၤဘၤ တိၤ။ အၤ ဘိၤတၤလၳး ကူး ခိဒံၤ တၲၤဖိၤ။ 8 ဒၲခၴူး ရဴ အၤ ခိးပၤစှဲ ဒၲ အၤ ကျူၤဟူး တှၲုရှၴ ဒၲ လှၲုးခၳၤ အၴူးတၲၤပြှဲၤ ဟူးနှၲုး ဒၲ အၤကၳး။ အၤ ဟူး မူထၴူၤ ရဴ အၤ ဇှံအၴၤ န ယၴၤဆၳူ ထွှိးပြှဲၤ ကှၤခၴူး ဟဴ။ 9 လီၤစးဆဲး ဟၴအိၤနှၴၤ စဴဟဴ န, ဘူၤစဲၤ ယၴၤဆၳူ ကှံ သၴူး အီၤထဴၤကှၤခၴူး ပှး တၤဒၲၤရဴ, တှၲု စဴဟဴ ဘီနၲုၤခဲးနၲုၤ, ဖၳ လီၤစးဆဲး ဟၴအိၤနှၴၤ အၴူးနၲုၤ, အၤ ခိးပၤစှဲ တၤဟၴၤ သဲညၴးပျိး ဟီတိၤ။ 10 ထၲုးရဴ အဲၤသီး အၴူးသဲနၴူး ကှၤခၴူး လၤဟူး ဒၲ အၤဟီၤ။ 11 မၤနရဴ မဴၤမၤရီ ရဴ အၤ အီၤထဴၤ အိၤကူး ဘီ လှၲုးကၳးထံးနၲုၤ ရဴ အၤ ငှၲု။ ဘီ အၤ ငှၲု ခဲး, အၤ ငှဴၤ တၤကဴၤ မူစိးနှၲုး ဒၲ လှၲုးကၳး။ 12 ရဴ အၤ မူထၴူၤ မှဴခၳၤ တၤနၴဖၳ သူနှီ ဟၴူၤစှၤဘၳး သဲနၴူး အိၤနူးအိၤ ဒၲ ယၴၤဆၳူ လှၲုးတှိၤ လှၴအိၤ နၲုၤ။ တၲၤပြှဲၤ ရဴ အၤ အိၤ ဒၲ အၤ ခၳၤကျဴထဲ တၲၤကၴူး, တၲၤပြှဲၤ ရဴ အၤ အိၤ ဒၲ အၤ ခၤယိ တၲၤကၴူး။ 13 ရဴ အဲၤသီး ဆၳၤဒူး မဴၤမၤရီ န, “မဴၤမှၲု, နှဲၤ ငှၲု မှၴၤတၴး?” ရဴ မဴၤမၤရီ ဟၴ ကှၤခၴူးဆံၤ အဲၤသီး န, “အဲၤသီး ဖၴူစၲုကူးမှၴ ဟဴ ဗး ဘူၤစဲၤ ဟဴ, အဲၤသီး စၲုဒူၤအိၤ တိး လၳး ဘီတၴးနၲုၤ ဗး သဲညၴးတိၤ,” အၤ ဟၴဆံၤ ဖၳနၲုၤ။ 14 ဘီ အၤ တၤရီ ကှၤခၴူး အၤခဲးနၲုၤ, အၤ မူထၴူၤ ဘူၤစဲၤ ယၴၤဆၳူ ကၤထဴၤအိၤ ဒၲ လၳးခၴူးခၳၤ တၤဒၲၤရဴ အၤ သဲညၴး န ဘူၤစဲၤ ယၴၤဆၳူ မှတိၤ။ 15 “မဴၤမှၲု꤮, နှဲၤ ငှၲု မှၴၤတၴး? နှဲၤ မူပှၳး အၳးပၴး?” အၤ ဆၳၤဒူး လၳး ဖၳနၲုၤ။ မဴၤမၤရီ တၤနှၴၤတှူ ဘူၤစဲၤ ယၴၤဆၳူ န ပြှဲၤအိၤပှဴ မူခွဲၤ တၤရဲ ရဴ အၤ ဟၴ လၳး န, “ဗှူ, နှဲၤ ကီၤ ဖၴူစၲု လၳး ဟၴရဴ နှဲၤ စၲုဒူၤအိၤ တိး လၳး ဘီတၴး တၲၤဖိၤနၲုၤ, ဟၴလှၲုး ပှၴ ဗး ရဴ ဗး ကှံ စၲုဖၴူခၴူး အဲၤ,” အၤ ဟၴ လၳး ဖၳနၲုၤ။ 16 “မဴၤမၤရီ,” ဘူၤစဲၤ ယၴၤဆၳူ ဟၴ လၳး ဖၳနၲုၤ။ ရဴ အၤ တၤရီ စၲုတိး လၳး ရဴ အၤ ဟၴဆံၤ လၳး န ဟီဘြၳငှိ ရဴ အၤ ဟၴ န, “ရၤဘၤနီ꤮။” (အၤငှိလၤဆ မၤ သရ) 17 ရဴ ဘူၤစဲၤ ယၴၤဆၳူ ဟၴ လၳး န, “ပှံ တဲး ဗး မှၴ, မှၴၤတၴးဟၴရဴ ဗး ကှၤ ဒၲ ဗးဖဲး အိၤ ဟီတိၤ။ စၲု ဒၲ ဗး ပှၲုဗှူ နၲုၤတၤဟၴၤ အၤ အိၤ ရဴ စၲုဟၴ ပှၴ အဲၤသီး န, ‘ဗး ကှံ ကှၤကၤထူၤ ဒၲ ဗးဖဲး မၤ အၤမှမှ, အဲၤသီး အၤဖဲး မၤ အၤမှမှ, ဗး စဴမၤရူၤ မၤ အၤမှမှ, အဲၤသီး စဴမၤရူၤ မၤ အၤမှမှ အၴူးတၲၤပြှဲၤ အၤ အိၤပှး’” အၤ ဟၴ လၳး ဖၳနၲုၤ။ 18 မၤကၤဒၤလ ဒဴးကၳးမှၲု မဴၤမၤရီအၴူး စၲု ဒူဆိၤပှၴ အၤ ခိးပၤစှဲ တၤဟၴၤ န တှဲၤရီၤတှဲၤကူး အၴူး ရဴ အၤ ဟၴ ပှၴ အဲၤသီး န, “ဗး မူထၴူၤဟဴ ဘူၤစဲၤ ဟဴ!” ရဴ အၤ ဟၴလှၲုး ပှၴ အဲၤသီး န ဘူၤစဲၤ ဟၴ ပှၴ လၳး နၲုၤတၤဟၴၤ။ 19 ဘီ ယၳဒၤဖၳ အၤ မှဴညၴးဒှၲုၤ မှဴကၤတှဴၤ နၲုၤတၲၤညၴး ထၲုး ဆၴူပၤရိး တၲၤညၴး မှဴခီပၤလှိ အၤခဲးနၲုၤ, အၤ ခိးပၤစှဲ တၤဟၴၤ သဲအီၤဆၴး လၤဟူး ယၳဒၤဖၳ အၤ ခၳၤကျဴဒၳၤ တၤဟၴၤ အၤလှၴ ရဴ အၤ မှၴၤမၤ လၤဟူး ကၤဒး, ရဴ ဘီ အဲၤသီး အိၤပျဴ တှၲလၳး ဒၲ ဟီၤဒဴကၳး အၤခဲးနၲုၤ, ဘူၤစဲၤ ယၴၤဆၳူ ဟူးအီၤထဴၤ အိၤလှၲုးခၴူ ပှၴ ဒၲ အဲၤသီး ကျးမၴးကၳး ရဴ အၤ ဟၴ အဲၤသီး န, “တှဲၤသဲပျဴၤ ကၤစှၳကၤဘဲ ကှံ အိၤကှၲုးဒံၤ န သီး နီ꤮,” အၤ ဟၴ အဲၤသီး ဖၳနၲုၤ။ 20 အၤ ဟၴထၲုး ပှၴ အဲၤသီး ဖၳနၲုၤရဴ အၤ ဒၴူလှၲုး ပှၴ အဲၤသီး န အၤတၤခၳၤ န အၤရှဴးကျဲး။ ဘီ အၤ ခိးပၤစှဲ တၤဟၴၤ မူထၴူၤ လၳး အၤခဲးနၲုၤ, အၤ သဲကြှံးသဲလှဴး တၤပှၤ လၤဟူး စဴ။ 21 ဘူၤစဲၤ ယၴၤဆၳူ ဟၴ ခၴူးသူ အဲၤသီး န, “တှဲၤသဲပျဴၤ ကၤစှၳကၤဘဲ ကှံ အိၤဒံၤ န သီး နီ꤮! ရဴ ဖၳ ဗးဖဲး နဴးဟူး ဗး နၲုၤ, ဗး နဴးစၲုကှၲုး သီး။” 22 အၤ ဟၴထၲုး ဖၳနၲုၤရဴ အၤ သဲစၲု ဒၲ အဲၤသီးခၳၤ ရဴ အၤ ဟၴ အဲၤသီး န, “ဖၴူဆံၤ လၤဟူး သဲစးဆဲး ဘူၤစဲၤ အၴူး။ 23 သီး ကီၤ ပျွိးကူး အၳးတှဲၤသံ တၤဟၴၤ ဟၴရဴ အၳးတှဲၤသံ ကှံ ပျွိးကူး ပှး။ သီး ကီၤ ပျွိးကူး အၳးတှဲၤသံ တိၤ ဟၴရဴ, အၳးတှဲၤသံ ကှံ ပျွိးကူး တိၤ။” 24 ဘီ ယၴၤဆၳူ စၲုနှၲုး အိၤလှၲုး ပှၴ အၤ ခိးပၤစှဲ ဒၲ ဟီၤကၳး အၤခဲးနၲုၤ, ခၳးသိမ ဒၲ အၳး အဲပှိ လၳးမွှီၤ န ခၳးဒီဒီၤမၳ အၴူးတၲၤပြှဲၤ အိၤကှၲုး န အဲၤသီး ဘီနၲုၤ တိၤ။ 25 အၤ ခိးပၤစှဲ အၴူးတၤဟၴၤ ဟၴ ခၳးသိမ န, “ပှဲၤ မူထၴူၤဟဴ ဘူၤစဲၤ ဟဴ,” အၤ ဟၴ ပှၴ လၳး ဖၳနၲုၤ။ မၤနရဴ အၤ ဟၴဆံၤ အဲၤသီး န, “ဗး ကီၤ မူထၴူၤ လီၤပၤနၤ အၤခးလှၴ စွဲးအိၤကူး ဒၲ အၤ တၤခၳၤကၳး တိၤ, ထၲုးရဴ ဗး ကီၤ ကၤအၳးဘဲၤနှီ လီၤပၤနၤ စွဲးခးလှၴ န ဗး ကၤနဴး တိၤ, ဗး ကီၤ ဖံးဘဲၤနှီ အၤရှဴးကျဲး အၤစွဲး န ဗး တၤခၳၤ တိၤ ဟၴနၲုၤ, ဗး ဇှံအၴၤတိၤ။” 26 ဒၲခၴူး သၲုးသိူတၲၤညၴးနၲုၤ, ဘူၤစဲၤ ယၴၤဆၳူ အၤ ခိးပၤစှဲ တၤဟၴၤ အိၤပျဴ တှၲခၴူးလၳး ဒၲ ဟီၤနၲုၤ တၲၤမၴး အၤကၳး။ ဘီနၲုၤအၤခဲး ခၳးသိမ အိၤတှၲကှၲုး န အဲၤသီး ဘီနၲုၤ။ အဲၤသီး မှၴၤမၤ ကၤဒး တၤဒၲၤရဴ ဘူၤစဲၤ ယၴၤဆၳူ ဟူးနှၲုး အီၤထဴၤအိၤ ဒၲ အဲၤသီး ကျးမၴးကၳး ရဴ အၤ ဟၴ အဲၤသီး န, “တှဲၤသဲပျဴၤ ကၤစှၳကၤဘဲ ကှံ အိၤကှၲုးဒံၤ န သီး နီ꤮” ဖၳနၲုၤ။ 27 အၴူးတၲၤဖှၲုရဴ အၤ ဟၴ ခၳးသိမ န, “ဟူးမူမဴး ဗး တၤခၳၤကၳးအၴူး, ဟူး ရဴ ကၤအၳးမူဒံၤ န နှဲၤ ကၤနဴး နၲုၤ။ ဇှိဟူး နှဲၤ တၤခၳၤနၲုၤ ရဴ ဖံးမူဒံၤ ဗး ရှဴးကျဲး အၤစွဲးအၴူး။ သဲပျဴၤ ရၤရၴၤ တဲးမှၴ။ တၤရှၳ ဇှံအၴၤနၲုၤ။” အၤ ဟၴ လၳး ဖၳနၲုၤ။ 28 “ဗး ဘူၤစဲၤ, ဗး စဴမၤရူၤ,” ခၳးသိမ ဟၴဆံၤ လၳး ဖၳနၲုၤ။ 29 ထၲုးရဴ ဘူၤစဲၤ ယၴၤဆၳူ ဟၴ လၳး န, “နှဲၤ ယိး မူထၴူၤ ဗး ခၳၤခၴူးရဴ နှဲၤ ဇှံအၴၤ ပြဲ။ ကၤယး ဒၲ အၤ မူထၴူၤ ဗး တိၤ ရဴ အၤ ဇှံအၴၤ တၤဟၴၤနၲုၤ အၤ ကှံ နှီဘဲၤ တှဲၤဆဴးရီၤ,” အၤ ဟၴ လၳး ဖၳနၲုၤ။ 30 ဘူၤစဲၤ ယၴၤဆၳူ ဒၴူလှၲုး ပှၴ တှဲၤမှၴၤ တၤကျီခိခၴူၤ ဒၲ အၤ ခိးပၤစှဲ တၤဟၴၤ အၤညၴးဟူး ဒၲ အၳး ရးမနှၲုး တှၲ ဘီ လီၤ အၴူးတၲၤဘၤ အၤကၳး တိၤ တၤဟၴၤနၲုၤ အၤ အိၤအဲလး ပး စဴ။ 31 မၤနရဴ အၳး ရးအိၤ လီၤ အၴူးတၲၤဘၤ မၤ သူဖၳ သီး ကှံ ဇှံအၴၤ န ယၴၤဆၳူ မၤ မၴၤဆီယၤ, အဲၤ မၤ စဴမၤရူၤ အၤဖၳခၳး တၲၤပြှဲၤ, ရဴ ဒၲ သီး ဇှံအၴၤ လၳး အၤခၳၤအၤခၴူးရဴ, သီး ကှံ နှီဘဲၤ သဲထွှိးပြှဲၤ အၤညၴးနၲုၤ, အၳး ရး ပှၴ သီး ပြဲ။
1 ဒၲခၴူး ညှၴးတူၤတိၤ နၲုၤ, ဘူၤစဲၤ ယၴၤဆၳူ အိၤလှၲုးထူၤ ပှၴ အၤ ခိးပၤစှဲ တၤဟၴၤ ဒၲ တီဘၴၤရီ ထၴူးအဴၤဒၳၤထံး။ အၤ အိၤလှၲုးထူၤ ပှၴ လၳး ဖၳတၴး ဟၴရဴ, 2 ခၳးဆီူမိၤ ပၴၤတၤရၳ, ခၳးသိမ ဒၲ အၳး အဲပှိ လၳးမွှီၤ န ခၳးဒီဒီၤမၳ, န ကဲလၤလီၤကှၴ ဗှီးကၤနှဖၳ ခၳးနၤသၤနၴလ န ဖဲးဇၴဘၴၤဒဲ အၤဖၳပြှဲၤခၳး သဲနၴူး န ယၴၤဆၳူ အၤ ခိးပၤစှဲ ဒၲ အၤရှၲုၤ သဲနၴူး စၲု အိၤပျဴ ရှိလှဴး လၳး။ 3 ခၳးဆီူမိၤ ပၴၤတၤရၳ ဟၴ အဲၤသီး န, “ဗး စၲုပှံအၴၤ တှဲး,” အၤ ဟၴ ရဴ, အဲၤသီး ဟၴ လၳး န, “ပှဲၤ စၲုကှၲုး န နှဲၤ,” အၤ ဟၴ လၳး ဖၳနၲုၤ။ ဖၳနၲုၤရဴ အဲၤသီး ဆီၤဒူနှီ သဴၤကျၴူး ရဴ ထၴၤစၲု ပှံအၴၤ လၤဟူး တှဲး တၤဒၲၤရဴ တၲၤသဲး꤮ တၲၤသဲး အၤ နှီ တၲၤဘဲၤ꤮ တိၤ။ 4 မှဴလီးဘၳးဟဴ ရဴ ဘူၤစဲၤ ယၴၤဆၳူ အီၤထဴၤအိၤ ဒၲ ထၴူးထံး နၲုၤ, မၤနရဴ အၤ ခိးပၤစှဲ တၤဟၴၤ သဲညၴး န ယၴၤဆၳူ မှတိၤ။ 5 အၤ ဆၳၤဒူး အဲၤသီး န, “ခိးဘဴသိူ သီး, တှဲး နှီ ဆလှၴ ဟဲး?” ရဴ အဲၤသီး ဟၴဆံၤ လၳး န, “အၤနှီ တၲၤဘဲၤ꤮ တိၤ။” 6 ရဴ ယၴၤဆၳူ ဟၴ အဲၤသီး န, “စှဴတှး သီးမိၤ ဒၲ သီး သဴၤကျၴူး စဴထွိ နၲုၤတၲၤကၴူး, တှဲး နှီဒံၤ ပှး။” ရဴ ဘီ အဲၤသီး မှၴၤဖၳ အၤ ဟၴ အၤခဲးနၲုၤ, တှဲးနှီ အဲနူၤစဴ အၤခၳၤအၤခၴူး, အၤ စွီၤထူၤ ပၴ နှီဒၴူ ပှး စဴ အၤမိၤ ဒၲ သဴၤကျၴူးကၳး တိၤ။ 7 အၴူးတၲၤဖှၲုရဴ ယၴၤဆၳူ အၤ ခိးပၤစှဲ ဒၲ အၤ မှိၤ နှီဒၴူ အၴူးတၲၤပြှဲၤ ဟၴ ခၳးပၴၤတၤရၳ န, “အဲၤ မၤ ဘူၤစဲၤ နၲုၤ꤮” အၤ ဟၴ ပှၴ လၳး ဖၳနၲုၤ။ ဘီ ခၳးဆီူမိၤ ပၴၤတၤရၳ နှီဟၲုး လၳး ဟၴ န, “အဲၤ မၤ ဘူၤစဲၤ နၲုၤ꤮,” ဖၳနၲုၤ အၤခဲး, တၲၤဖှၲုတၲုး အၤ သူထူၤ ခၴူးသူ အၤစှၤ ဒၲ အၤ ပျွိကူး လၳး နၲုၤတၲၤဘၤ ထၲုးရဴ အၤ ပှတှး ဒၲ ထၴူးကၳး။ 8 အၤ ခိးဘဴသိူ ဒၲ အၤ အိၤကူး ဒၲ သဴၤကျၴူးကၳး အၴူးတၤဟၴၤနၲုၤ, အၤ ကြွိးခူးကှၤ ကှၲုး လၳး။ အဲၤသီး ခူး စွီၤတၤရှၳ ကှၤနှီ မိၤ ဒၲ အၤ နှီဘး န တှဲး အၴူးနၲုၤတၲၤဘၤ ဒၲ ထၴူးထံး။ အဲၤသီး အိၤဇၴူၤ လး န ထၴူးထံး တိၤ, အၤ အိၤဇၴူၤ ပြဲ အၤပျှဲ နၴူးဇှဲၤ ပြဲ။ 9 ဘီ အဲၤသီး ကှၤဘ အိၤဟဴ အၤသဴၤကျၴူး ဒၲ ကၤလိးခၳၤ အၤခဲးနၲုၤ, အဲၤသီး မူထၴူၤ အၳး အီၤဆံအၴၤ တှဲး ဒၲ မီၤကျွိခၳၤ ထၲုးန ခဴမၳး တၤဟၴၤ။ 10 ဘူၤစဲၤ ယၴၤဆၳူခြီ ဟၴ အဲၤသီး န, “ဖၴူ ဟူးပှၴမူ ဗး တှဲး ဒၲ သီး ပှံနှီ နၲုၤတၲၤကျဴ ဘီအၴူး တၤဟၴၤ။” 11 ရဴ ခၳးဆီူမိၤ ပၴၤတၤရၳ စၲုထူၤနှၲုး ဒၲ သဴၤကျၴူးကၳး ရဴ အၤ စွီၤတၤရှၳထူၤ မိၤ ဒၲ အၤ နှီဘး န တှဲးအၴူး ဒၲ ကၤလိးခၳၤ။ လှဴး꤮ တှဲးဘဲၤဒၳၤ ဒၲ အၤ နှီ နၲုၤမၤ အၤ အိၤ တၲၤဇှဲၤ န ညှးဆၴူး န သၲုးဘဲၤ။ တှဲး နှီ အဲနူၤစဴ တၤဒၲၤရဴ မိၤ လၤဇူဲး တၲၤစၲၤ꤮ တိၤ။ 12 ဘူၤစဲၤ ယၴၤဆၳူ ဟၴ အဲၤသီး န, “ဟူး အၴၤမဴး လၤဟူး။” အဲၤသီး သဲညၴးဟဴ လၤဟူး န အဲၤ မၤ ဘူၤစဲၤ ယၴၤဆၳူ အၤခၳၤအၤခၴူး, “နှဲၤ မၤ အၳးပၴး?” အဲၤသီး ဆၳၤဒူး ဘံၤ လၤဟူး လၳး တၲၤပြှဲၤ꤮ တိၤ။ 13 ဘူၤစဲၤ ယၴၤဆၳူ ဖၴူနှီ ခဴမၳး ရဴ အၤ စၲုတိး အဲၤသီး ရဴ အၤ ဇှၳအၴၤ ပှၴ အဲၤသီး။ ရဴ အၤ ဖၴူနှီ တှဲး ရဴ အၤ စၲု ဇှၳအၴၤ ပှၴကှၲုး အဲၤသီး ဖၳနၲုၤနၲုၤ။ 14 ဘူၤစဲၤ ယၴၤဆၳူ သၴူး အီၤထဴၤထွှိးပြှဲၤ ကှၤခၴူး ထၲုးရဴ အၤ ဒၴူလှၲုး ပှၴ အၤနှၴ န အၤ ခိးပၤစှဲ တၤဟၴၤနၲုၤ, အၴူး မၤ သၲုးဖှၲုတၲၤဖှၲု ဟဴ။ 15 အဲၤသီး အၴၤ ထၲုးရဴ, ဘူၤစဲၤ ယၴၤဆၳူ ဆၳၤဒူး ခၳးဆီူမိၤ ပၴၤတၤရၳ န, “ဖဲးယိးဟၤ အၤဖၳခၳး ခၳးဆီူမိၤ, နှဲၤ မှိၤကျဴး မှလၤကိး ဗး န ကၤယး အၴူးတၤဟၴၤ မှိၤ ဗး နၲုၤ ဟဲး?” အၤ ဆၳၤဒူး လၳး ရဴ ခၳးဆီူမိၤ ဟၴဆံၤ လၳး န, “အဴၤ, ဘူၤစဲၤ, ဗး မှိၤ နှဲၤ နၲုၤမၤ နှဲၤ သဲညၴးဒံၤ ဟဴ,” အၤ ဟၴ လၳး ဖၳနၲုၤ။ ဘူၤစဲၤ ယၴၤဆၳူ ဟၴ လၳး န, “မူ ဘှၲုၤအၴၤနှီ ဗး သီမှီဖၳ နၲုၤတၤဟၴၤ နီ꤮။” 16 ရဴ ဘူၤစဲၤ ယၴၤဆၳူ ဆၳၤဒူး ခၴူးသူ လၳး န, “ဖဲးယိးဟၤ အၤဖၳခၳး ခၳးဆီူမိၤ, နှဲၤ မှိၤ မှလၤကိး ဗး ဟဲး?” အၤ ဆၳၤဒူး လၳး ရဴ အၤ ဟၴဆံၤ ဘူၤစဲၤ န, “အဴၤ, ဘူၤစဲၤ, ဗး မှိၤ နှဲၤ နၲုၤမၤ နှဲၤ သဲညၴးဒံၤဟဴ။” ရဴ ဘူၤစဲၤ ယၴၤဆၳူ ဟၴဆံၤ လၳး န, “မူခွဲၤနှီ ဗး သီမှီဒၳၤ နၲုၤတၤဟၴၤ နီ꤮။” 17 ထၲုးရဴ အၤ ဆၳၤဒူး ပှိ လၳး သၲုးဖှၲုတၲၤဖှၲု န, “ဖဲးယိးဟၤ အၤဖၳခၳး ခၳးဆီူမိၤ, နှဲၤ မှိၤ ဗး ဟဲး?” ဘူၤစဲၤ ယၴၤဆၳူ ယိး ဆၳၤဒူး လၳး န, “နှဲၤ မှိၤ ဗး ဟဲး?” နၲုၤ သၲုးဖှၲုဟဴ အၤခၳၤအၤခၴူး, အၤ မှိၤ လၳးသဲပျဴၤ တိၤ။ ရဴ အၤ ဟၴဆံၤ လၳး န, “ဘူၤစဲၤ, နှဲၤ သဲညၴး လှဴး တှဲၤပွှိးတၲၤစၲၤ, ဗး မှိၤ နှဲၤ နၲုၤမၤ နှဲၤ သဲညၴး ဟဴ,” အၤ ဟၴ လၳး ဖၳနၲုၤ, ရဴ ဘူၤစဲၤ ယၴၤဆၳူ ဟၴ လၳး န, “မူ ဘှၲုၤအၴၤဘှၲုၤအိးနှီ ဗး သီမှီဒၳၤ နၲုၤတၤဟၴၤ နီ꤮။ 18 ဗး ဟၴစဴစဴ နှဲၤ, ဘီ နှဲၤ နၤစှဲပး အၤခဲး, နှဲၤ ညှထူၤဘဲ နှီဒၴူဒံၤ နှဲၤညှထဴ, နှဲၤ သဲဇှံစၲု ဘီတၴး꤮ နၲုၤ နှဲၤ စၲုဘဲ။ မၤနရဴ ဆၴူ꤮ နှဲၤ မှၲုပြှဲဟဴ ပှးနၲုၤ, နှဲၤ ကှံ ဇှိထၴၤ နှဲၤ တၤခၳၤ နၴူးခိ ပှး။ အၳး ကှံ စဴးကျှဴၤမၤ နှဲၤ တၤခၳၤ ရဴ အၳး ကှံ စှဴးစၲု နှဲၤ ဒၲ ခးလှၴ ဒၲ နှဲၤ သဲဇှံ စၲု တိၤ နၲုၤ ပှး။” 19 ဘူၤစဲၤ ယၴၤဆၳူ ဟၴ လၳး ဖၳအၴူး နၲုၤမၤ, အၤ သဲ ဟၴလှၲုး လၳး န ခၳးပၴၤတၤရၳ ကှံ သၴူး ဖၳတၴး ပှး ရဴ စဴမၤရူၤ အၤလီးအၤတၤခဲး ကှံ အိၤလှၲုးထူၤ ဖၳတၴး ပှး အၤညၴးနၲုၤ ပြဲ။ ထၲုးရဴ ဘူၤစဲၤ ယၴၤဆၳူ ဟၴ လၳး န, “ကြွိး ဗးခၴူး။” 20 ဘီ ခၳးပၴၤတၤရၳ မူကှၤခၴူး အၤခဲးနၲုၤ, အၤ မူထၴူၤ ဘူၤစဲၤ ယၴၤဆၳူ အၤ ခိးပၤစှဲ ဒၲ အၤ မှိၤဒၴူ လၳး နၲုၤတၲၤပြှဲၤ ကြွိးကှၲုး အဲၤသီးခၴူး။ (အဲၤ မၤ ပြှဲၤ ဒၲ အၤ အိၤ တၤတၴၤရှဲး ဘူၤစဲၤ ယၴၤဆၳူ ဘီ အဲၤသီး အၴၤဆဲၤအၴၤ မှဴဟၴ အၤခဲး နၲုၤတၲၤပြှဲၤ ဟဴ, ရဴ အၤ ဆၳၤဒူး လၳး န, “ဘူၤစဲၤ, အၳးပၴး ကှံရှၴ အီၤဆဲးတှးကူး နှဲၤ ပှး ပၴး?” နၲုၤတၲၤပြှဲၤ ဟဴ။ အၴူးမၤ ဘူၤစဲၤ ယၴၤဆၳူ သၴူးဟီတိၤ အၤခဲး) 21 ဘီ ခၳးပၴၤတၤရၳ မူထၴူၤ လၳး အၤခဲးနၲုၤ, အၤ ဆၳၤဒူး ယၴၤဆၳူ န, “ဘူၤစဲၤ, အဲၤကှၲုးလှၴ, အၤ ကှံ ထွှိးထူၤကှၲုး ဖၳတၴး ပှး?” အၤ ဆၳၤဒူး ယၴၤဆၳူ ဖၳနၲုၤ။ 22 ဘူၤစဲၤ ယၴၤဆၳူ ဟၴဆံၤ လၳး န, “ဗး ကီၤ သဲဇှံ နဴးအိၤထွှိးပြှဲၤ တှၲု လၳး ဒၲ ဗး ဟူးပှး ကီၤဟၴရဴ, စှၳ ဗး ပြဲ။ နၲုၤမၤ နှဲၤ တှဲၤမှၴၤ မှတိၤ, နှဲၤ တှဲၤမှၴၤ မၤ နှဲၤ ဘဲၤ ကြွိးကှၲုး ဗး ပြဲ,” အၤ ဟၴ လၳး ဖၳနၲုၤ။ 23 ဒၲ ဘူၤစဲၤ ယၴၤဆၳူ ဟၴ ဖၳအၴူး အၤခၳၤအၤခၴူး, ငှိ လှၲုးပၤဆီးစၲု ဘဴးဘၴူၤလှဴး ဒၲ ပှၲုဗှူ ပြှဲၤဇှံအၴၤတှဲၤဖၳ တၤဟၴၤ အၤကျဲး န အၤ ခိးပၤစှဲ နၲုၤတၲၤပြှဲၤ အၤ သၴူးတိၤ ဟၴနၲုး, အၤ ဟၴ လၤဟူး ဖၳနၲုၤ။ မၤနရဴ ဘူၤစဲၤ ယၴၤဆၳူ ဟၴ န အၤ သၴူးတိၤ ဖၳနၲုၤ မှတိၤ။ အၤ ဟၴ န, “ဗး ကီၤ သဲဇှံ နဴးအိၤထွှိးပြှဲၤ တှၲု လၳး ဒၲ ဗး ဟူးပှး ကီၤဟၴနၲုၤ ရဴ စှၳ ဗး ပြဲ, နၲုၤမၤ နှဲၤ တှဲၤမှၴၤ မှတိၤ,” အၤ ဟၴ ဖၳနၲုၤ ပြဲ။ 24 ပြှဲၤ ရးမရးဒူး တှဲၤ အၴူးတၤဟၴၤ မၤ ဗး ဒၲ အၤ ထွှိး ဘူၤစဲၤ ယၴၤဆၳူ အၤ ခိးပၤစှဲ အၴူးတၲၤပြှဲၤ ပြဲ, ရဴ အၤ မူထၴူၤ လှဴး လှဴး꤮ တှဲၤမှၴၤထွှိးထူၤ အၤနှၴ အၴူးတၤဟၴၤ ရဴ အၤ ရးမရးဒူး ပြဲ။ အၤ တှဲၤဟၴဆိၤလှၲုး ပှၴ အၴူးတၤဟၴၤ နၲုၤမၤ အၤတိး လှဴး ပြဲ နၲုၤ ပှဲၤ သဲညၴး။ 25 ခိးညှအၴူး, ဘူၤစဲၤ ယၴၤဆၳူ မှၴၤတှဲၤ ဒၲ အၤရှၲုၤ တၤဟၴၤနၲုၤ အၤ အိၤအဲလးပး။ ကီၤ ရးမရးဒူး လှဴး လှဴး꤮ အၤ မှၴၤ နၲုၤတၤဟၴၤ ဟၴနၲုၤမၤ, ဗး တၤနှၴၤ န ဟၴၤခၳၤအၴူး တၲၤဘၤလှဴး စဴနၲုၤ, လှၴဒူၤလီၤ အၤခးလှၴ ပဴၤပှး စဴတိၤ ဟဴ။