1 Kata kaba la long na ka bamynnyngkong, ia kaba ngi la ioh-sngew, ia kaba ngi la iohi da ki khmat jong ngi, ia kaba ngi la ioh-khmih pyllaw, bad ki kti jong ngi ki la ioh tba, shaphang uta U Ktien ka jingim. Bad ia uta u jingim la pynpaw, bad ngi la iohi, bad ngi iaphla, bad ngi iathuh-shai ha phi ia uta u jingim b'ymjukut, uba la don bad U Kpa, bad la pynpaw ia u ha ngi. Ia kata kaba ngi la iohi bad ngi la ioh-sngew, ngi iathuh-shai ha phi, ba ma-phi ruh phi'n ioh ka jingiasyllok lem bad ngi; bad kata ka jingiasyllok de ka jong ngi ka long lem bad U Kpa, bad U Khum jong u ruh U Jisu Khrist. Te ia kine kiei-kiei-ruh ngi thoh ha phi, ba ka jingkmen jong ngi ka'n ioh long kaba-la-dap. Te kane ka long kata ka khubor ia kaba ngi la ioh-sngew na u, bad ngi ia pynbna ha phi, ba U Blei u long ka jingshai, bad ha u ka jingdum ka'm don satia. Lada ngi ong ba ngi don ka jingiasyllok lem bad u, bad ngi iaid ha kata ka jingdum, ngi lamler, bad ngi'm leh ia ka jingshisha. Hynrei lada ngi iaid ha kata ka jingshai, kumba u long ma-u ha kata ka jingshai, ngi don ka jingiasyllok lem paralok-hi, bad ka snam U Jisu U Khun jong u, ka pynkhuid ia ngi na ka pop baroh. Lada ngi ong ba ngi'm don ka pop, ngi shukor ia lade, bad kata ka jingshisha ka'm don ha ngi. Lada ngi phla ia ki pop jong ngi, u long u ba-iaineh bad u bahok, ba u'n map-noh ia kita ki pop jong ngi, bad ba u'n pynkhuid ia ngi na ka b'ymhok baroh. Lada ngi ong ba ngi'm shym la leh pop, ngi pynlong ia u uba lamler, bad kata ka ktien jong u ka'm don ha ngi.

2 Ko ki khun-hep jong nga, nga thoh ia kine kiei-kiei-ruh ha phi, ba phi'n ym leh-pop; Te lada uno-uno-ruh u leh-pop, ngi don kein U Riwsaid bad U Kpa, U Jisu Khrist U Bahok.