Yohan 1

Ngio Aa

1 Ayating nai Ngiolu noiküla; naiuso Ngio Goa ko noiküla, naiuso Ngio Goa noiküla. 2 Apa ayating nai yakü Goa ko noiküla. 3 Alum apa tsangkü sung; naiuso tilüsong shantaim apa tsühakü titsüo tsüshan. 4 Apa da aa noiküla; naiuso aa nou Khaiunia Thso awon noiküla. 5 Naiuso awon nou anyakhem nai awonji, lüko anyakhem nou nung tsülunyat. 6 Goa ainou hongtsün khaiunia tsak apa nian Yohan shin, 7 apa ngiothi tsangkü apemüh monglamao naiuso khaiuniahoi ao awon thaiutha mitha kiuao apa shin. 8 Nung khaiunia nou awon tsüde, awon thaiutha mitha kiuao apa shin. 9 Nung atsüoting awon noiküla, nungüh apem awoniji apa goumchi ai shikü noiküla. 10 Apa goumchi ko noiküla, naiuso goumchi nou apa tsangkü sung, lüko goumchi nou apa tsüngesan. 11 Apa meshen khaiunia hoi dongai shin lüko meshen ün nou apa tsülu. 12 Lüko tititsoüh apa lu, nungti sau haiüh apa nianko monglam, ngüso hao Goa thsoso iulaao apaüh oukong nou kiu; 13 Goa thso iulaao saisile tsangkü tsüde, nung goumchi po ainou chettsün nou tsüde, Goa nou apa pem ngüso po noiküla. 14 Naiuso Ngio nou khaiunia iulan naiuso atsüojin naiuso ngiotsüo nou meankü sam ongko noi. Po nou thsosaan lütsüotsüokü apaüh ti ajinka ep nung ajinka nou samüh ep. 15 Yohanüh apa thaiutha mitha kiu, naiuso wekü ngiom, “Sau jüphiai shiji apa ngü tü song noin, tititenai apa jü khako noiküla ta sau thaiutha ngü ngiom nung Apa.” 16 Tititenai apa athapungtsün ainou sam apemüh haoson ep, naiuso ouk khako ouk nou ep. 17 Tititenai Ngiokhem nou Mosa tsangkü kiu; lüko atsüojin naiuso ngiotsüo nou Yisu Khrista tsangkü shin. 18 Khaiunia nou Goa laitsüo tsüep, Goa uai noitsün thsosaan sau Goa ko wekü noin apaüh lu sam hao tsangsheikü kiu.

Alimkiutsün Yohan Ngiongem

19 Tilai Yihuda haiüh Yirusalem ainou Yohan dongai, “Ni sau?” ta apa tü sangao mesonhoi naiuso Levi hoi hong, Yohanüh mitha kiutsün ngio nung: 20 Apaüh thalakü ngiom, “Ngo Messiah tsüde.” 21 Ngüsoüh apa tü sang, “Naito ni sau?” “Ni Elija süne?” Apaüh ngiom, “Ngo tsüde.” “Ni Goa E-po süne?” apaüh thala, “Tsüdeka.” 22 Nungtiphe ngüsoüh apa tü sangkü ngiom, “Sam hongtsünso tü samüh thalaao lümeikü ni sauko achite?” “Ni athaiutha ti ngio-e?” 23 Apaüh ngiom, E-po Isaiaüh ngiotsünli: “Apaou yam lukü lüshan ta liutsa nai vetsün sang nou ngo!” 24 Farisihai tsangkü ngiongem kankü hongtsünsoüh Yohan tü sangkü 25 ngiom, “Ni Khrista tsüde, Elija lüko tsüde, E-po lüko tsüde, naito ni tiao khiamai limkiuji?” 26 Yohanüh ngüso tü thalakü ngiom, “Ngü khiam ai limkiuji, lüko khaiunia tsak sau asamüh tsüngelu, 27 nungti apa jüphiai shiji, sau hokkhut ao sokthamao ngo tsümai, apa asam ongko tsakü noin.” 28 Yohanüh limkiutsün Yordan Haiu etsai noitsün Bethani nai nung thawao.

Goa Onnemok Thso

29 Nungthan nyap nai apa dongai Yisu shitsün epkü Yohanüh ngiom, sauüh “goumchi angei kankü khuji, Goa Onnemok Thso nungai noin! 30 Jüphiai khaiunia tsak shiji sau ngü tü song noin, tititenai apa ngü mochetkü aita noiküla, ta sau thaiutha ngü ngiom nung Apa! 31 Ngü apa tsünge; lüko apa Israel khako achiai sungiao thaiutha, ngü khiam ai limkiukü shin.” 32 Yohanüh mitha kiukü ngiom; “Asio Onthso mükhamli aün ainou saokü ngü epiu, naiuso nung apa da noi. 33 Ngü apa tsünge, lüko sauüh khiam ai limao ngo hong, apaüh ngü tü ngiom, ‘Sau da Onthso saokü naiuso noikü eppe, apaüh Asio Onthso nai limkiuji.’ 34 “Nung Goa Thso ta ngü epiu, naiuso mitha kiu-iu.”

Yisu Sahoi Ayating Nouso

35 Loüh nungthan nyap nai Yohan meshen sahoi nime ko tsakü noikü; 36 Yisu shitsün epnai apaüh ngiom, “Goa Onnemok Thso nungai noin!” 37 Sahoi nime nou apaüh ngiotsün lula, küta Yisu phiai hoilut. 38 Nai Yisuüh kha phoklekü apa phiai hoiluttsün epkü ngüso tü ngiom, “Asamüh ti yamji?” Ngüsoüh apa tü ngiom, “Rabi!” athat nou “Atsandetsün ni tai noiji?” 39 Apaüh ngüso tü ngiom, “Ashi, küta athaplu,” Nungtiphe ngüso shi naiuso apa tai noiküla nung ep; naiuso nungai ngüso apa ko noi; (nung taoko püle baji thatso noiküla.) 40 Yohanüh chitetsün luküta Yisu phiai hoiluttsün nime ongko tsak to Simon Peter nio Andria noiküla. 41 Apaüh aya nai apa dei Simon epkü apa tü ngiom, “Samüh Mesia (athat nou Khrista) epiu.” 42 Apaüh apa Yisu dongai nialukü shin. Yisuüh apa lukü ngiom, “Ni Yona thso Simon, Anian Kefa (nung Peter) ta jone.” “Athat nou lung tsak.”

Yisuüh Philip Naiuso Nathanel Jonji

43 Nungthan nyi nai Yisu Galil ai khuao aiukü noiküla. Apaüh Philip epküta ngiom, “Jüphiai ahoilut!” 44 (Lo Philip lüko Andria naiuso Peter nok hai Betsaida ainou noiküla.) 45 Philipüh Nathanel epkü apa tü ngiom, “Yosep thso Nazaret hai Yisu sau thaiutha Mosaüh Ngiokhem nai naiuso Goa E-po nousoüh sat, samüh apa epiu.” 46 Nathanelüh apa tü ngiom, “Nazaret ainou tso amei sungao shio-e süne?” Philipüh apa tü ngiom, “Shiküta athaplu.” 47 Yisuüh Nathanel apa dongai shitsün epkü apa thaiutha ngiom, “Laple tsüsünkü nou atsüoting Israel hai tsak nungai noin!” 48 Nathanelüh apa tü sang, “Ni titi thekü ngü ngen?” Yisuüh thalakü apa tü ngiom, “Philipüh ni mojonkünai ni latpaikhemai noi nai ngo ni ep.” 49 Nathanelüh apatü thalakü ngiom, “Atsandetsün, Ni Goa Thso! ni Israel hai Nokpao!” 50 Yisuüh ngiom, “Ngo ni latpai khemai epta ngo ni tü ngio nailu ni monglamji süne? Nungtü songkü chhi nou ni eppe!” 51 Naiuso Apaüh apa tü ngiom, “Atsüoting ngo ni tü ngioko; Aün sopkü Goa honghoi Khaiunia Thso chiai sung naiuso saotsün asamüh eppe.”

Yohan 2

Kana nai Haiyam Sümai

1 Samnyi nouko Galil ai noitsün Kana nokko haiyam sümai tsak noiküla, naiuso Yisu nyiu nungai noiküla; 2 naiuso haiyam sümai nai Yisu naiuso apa sahoi lüko jon. 3 Tilai theng kheman, Yisu nyiuüh apa tü ngiom, “Ngüso theng khemaniu.” 4 Yisuüh apa tü thalan, “Nyiuhai, ngo ti chhi-e nung thaiutha langio.” “Ngü nou atao loüh mosao.” 5 Apa nyiuüh tsamki hoi tü ngiom, “tilüsong apaüh asam tü ngio-e, nung lüchhi.” 6 Nungai Yihuda hai saisile nai atsaowanao thaiutha nungko lung nou shantsün meng luok loktaiukü noiküla. 7 Yisuüh ngüso tü ngiom, “Khiam meng nouso meankü khiam aleithio.” Nungtiphe ngüsoüh nung meankü leithio. 8 Yisuüh ngüso tü ngiom, “Lo akhaiusan, naiuso sümai akhemkhu ahei dongai kankü lükhu.” Naiuso ngüsoüh nung kankü khu. 9 Tilai sümai akhemkhu ahei nou lokü khiam thengao iulatsün shiulu (nung tsamki sauhaiüh khiam khaiusan ngüsoühlu ngen) nung ti ainou tsünge. 10 Apaüh haiyam sümai paou jonkü ngiom, “Khaiunia apem nou aya nai amei senji; naiuso khaiunia nou piakü shiukü phiailu tsümeikü nou senshiji: ni losaokü theng amei nou taiuwan!” 11 Apa athanga chhi nouso yalutsün nung Yisuüh Galil ai noitsün Kana nok ko chhin, naiuso apa ajinka achiai sung-in, nai apa sahoiüh apa da monglam. 12 Nungphiai Yisu naiuso apa nyiu, naiuso apa nioso, naiuso apa sahoiso Kapernaum ai sao küta ngüso nungai ajekhaiu intso noi.

Yisu Amkham Tsamai Khuji

13 Lo Yihuda hai Aasantsün Sümai shimkü noiküla, naiuso Yisu Yirusalem ai sung. 14 Apaüh Amkham Tsamai jangtso, onnemok, mükham jantsünso, naiuso tangka helutsünso moknoikü ep. 15 Apaüh ashiuao auo nou shan naiuso onnemok si jangtso hakü thainian apem Amkham Tsam ainou komshi-an; naiuso tangka helu-etsünso tangka hongpengankiu naiuso ngüso then chaijan pou lek-hongankiu. 16 Apaüh mükham jantsünso tü ngiom, “nungso nung ainou kankü lükhuwan! Jüpo tsam chaile oule tsam la-iula-i!” 17 “O Goa, atsam da ngo mongkiutsün nou jümongai in nyaili jekji” ta asiongio nai ngiotsün sahoi nousoüh yangsan. 18 Nungtiphe Yihuda haiüh thalakü apa tü ngiom, “Nung chhi chhi-ao shiom ta hanao ni sam tü ti ii chhi han-e?” 19 Yisuüh thalakü ngüso tü ngiom, “Nung Amkham Tsam aluthe-an naiuso samnyi nai ngü nung shanshi-e.” 20 Yihuda haiüh ngiom, “Nung Amkham Tsam pon aopülekü luok simkü loukü shan, Ni nung samnyi nai lahshi-e süne?” 21 Lüko apaüh Amkham Tsam ta ngiotsün meshen pem thaiutha chite. 22 Nungtiphe tilai apa ee ainou ahkü shin, apaüh nung thaiutha chiten ta apa sahoisoüh yangsan naiuso ngüsoüh asiongio naiuso Yisuüh ngiotsün da monglam.

Yisu da Khaiunia Saisile Ngeao Ange

23 Nungai Aasan Sümai taoko apa Yirusalem ai noinai, apaüh athanga chhi chhitsün nouso epkü apa nianko piakü nou monglam. 24 Lüko Yisuüh monglamkü meshen chija ngüso hao tsükiu, 25 tititenai apaüh khaiunia apem ngekü noiküla, naiuso sauüh khaiunia nouso thaiutha apa hao mitha kiuao apa da tsüpo; tititenai khaiunia da ti noin apaüh ngen.

Yohan 3

Yisu Naiuso Nikodema

1 Yihuda hai aniakei khaiunia tsak Nikodema ta niankü Farisihoi ainou noiküla. 2 Apaüh asu Yisu dongai shikü ngiom, “Atsandetsün, ni Goa ainou shitsün atsandetsün tsak ta samüh ngen; tititenai Goa tsühakü ni chhitsün athanga chhi nouso sauüh chhiao tsüshio.” 3 Yisuüh thalakü apa tü ngiom, “Atsüoting ngo ni tü ngioko; Müjam tsüchetshikünai khaiunia nou Goa nokshing epao tsüshio.” 4 Nikodemaüh apa tü ngiom, “Khaiunia tsak sonanküta apa titi thekü chetshi-e?” “Apa nyiu thai ai müjam napküta chetshiao tsüshioe!” 5 Yisuüh thala, “Atsüoting ngo ni tü ngioko,” “Khaiunia nou khiam naiuso Onthso nai tsüchetshikünai Goa nokshing nai napao tsüshio-e. 6 Khaiunia tsak posinyiu tsangkü shesinyih nai chetji, lüko apa Onthso nouto Asio Onthso tsangkü chetji. 7 Ni müjam chetshiao noin ta ngo ni tü ngionai langala. 8 Asheih tiai shei-e ta aiuji nungai sheiji, naiuso ni nung sangngem nou luji, lüko nung ti ainou shiji naiuso tiai khuji ni tsünge: Onthso nai chettsün apem nungti noin.” 9 Nikodemaüh thalakü apa tü ngiom, “Nung titi thekü shio-e?” 10 Yisuüh thalakü apa tü ngiom, “Ni Israel hai atsandetsün asong tsak thekü nung tsüngeso? 11 Atsüoting ngo ni tü ngioko, Samüh ti ngen nung chiteji naiuso samüh ti ep nung thaiutha mitha kiuji; lüko asam sauühtso samüh mitha kiutsün luao tsüaiu. 12 Ngo goumchi ngiolat chitenai asamüh mongtsülam, nai ngo tilai aün ngiolat chite-e nai asamüh titi monglame? 13 Aün ainou saotsün Khaiunia Thso, tü simkü khaiunia sau aün nai tsüsung.” 14 Mosaüh titi liutsa nai pao sotsom loksan nungti Khaiunia Thso loksankü hao noin. 15 Nungtiphe Khaiunia Thso da sauhaiüh monglam-e apaüh athontsüyang aa eppe. 16 Tititenai Goa nou goumchi hoikü tsüojin shiko, sauhaiüh apa da monglamji tsümowane lüko asaita aa epao thaiutha apaüh meshen Thso kiu. 17 Tititenai khaiuniahoi nou Thso hao aphio kiuao thaiutha tsüde, lüko apa tsangkü khaiuniahoi kipsanao thaiutha Goa nou meshen Thso goumchi ai hong. 18 Sauüh apa da monglamji apa hao aphio tsükiuji; sauüh apa da tsümonglamji apa hao aphio kiuwaniu, tititenai apaüh Goa Thso nou nianko tsümonglam. 19 Aphio kiutsün ngio nungti, awon nou goumchi ai shin lüko khaiunia nou awon tsüde anyakhem tübao tsüojin; tititenai ngüso chhi tsümeikü noiküla. 20 Tititenai sauüh tsümeikü chhiji, apaüh awon chinyanji, naiuso apa chhi nai aphio epküle ta apa awon dongai tsüshiji. 21 Lüko sauüh ngiotsüo chhi chhiji apa chhi Goa da chhin ta achiai sung-iao thaiutha apa awon dongai shiji.

Yisu naiuso Yohan

22 Nungphiai Yisu naiuso apa sahoiso Yihuda goumchi ai shi, nungai apa ngüso ko noi, naiuso khiamai limkiu. 23 Yohanüh lüko Salim shimkü Enon nok ko limkiukü noiküla; tiautenai nungko khiam piakü noiküla; naiuso khaiunia nouso apa dongai khu, naiuso apaüh ngüso limkiu. 24 (Nung Yohan akhou tsamai mothiukün tao noiküla.) 25 Nungai alusioao thaiutha Yihuda hai tsak Yohan sahoi nouko ngematkü noiküla. 26 Nungtiphe ngüsoüh Yohan dongai shikü apa tü ngiom, “Atsandetsün, Yordan Haiu etsai niko sau noiküla, sau thaiutha ni mitha kium, athaplu, apaüh limkiuji, naiuso khaiunia chikü apa dongai khuji!” 27 Yohanüh thalan, “Goa nou tsükiukü naito, sauüh ti jengtsaiulünou taiuao tsüshio. 28 ‘Ngo Khrista tsüde, lüko ngü apa khako hongtsün ta ngo ngiotsün mitha kiuao asamlu noin.’ 29 Sau thaiutha menyiu nou noin apa haiyampaou; lüko haiyampaou hai nou sauüh apa ngio angji apaüh apa sang lulakü thatü monglingji. Nung khekkü ngo monglingtsün saiukü iula-iu. 30 Apa to tekkü songkü iula-e lüko ngo to henlüshi-anao noin.”

Apa Aün ainou Saom

31 Sau aün ainou shiji apa chikü tü asong; sau goumchi ainou noin apa goumchi ün nou naiuso apaüh goumchi thaiutha chiteji: sau aün ainou shiji chikü tü asong. 32 Apaüh ti ep naiuso lula, nung thaiutha apaüh mitha kiukü nungti lüko apaüh mitha kiutsün sauühtso tsülo. 33 Sauüh apaüh kiutsün mitha luji apaüh Goa ngiotsüo nou losongkiuji. 34 Goa nou hongtsün khaiunia tsaküh Goa ngio chiteji, tiautenai Goa nou apa Asio Onthso nou mian-iji. 35 Po nou Thso tsüojinji naiuso apa phanai apem thumkü kiuwaniu. 36 Sauüh Thso nou da monglamji apa asai aa nou taim; lüko sauüh Thso nou da tsü-ang apaüh aa nou tsüeppe, lüko Goa mongmattsün apa khako noi-e.

Yohan 4

Yisu Naiuso Samaria Nyiuhai

1 Farisi haiüh Yohan konaito Yisuüh sahoi apia shioluwanji naiuso limkiuji ta lula. 2 (Atsüoting naito Yisuüh to sau haotso tsülimkiu, lüko apa sahoisoühlu limkiu.) 3 Nung luküta apaüh loüh Yihuda wankü Galil ai müjam khu. 4 Apa yam Samaria thsatkü khuao noiküla. 5 Nungko Yakobüh apa thso Yosep hao goh ehenthso kiutaiu, nou shimkü Samaria nai noitsün Saikar ta niankü nok tsakai apa shin. 6 Yakob temkhao nungai noiküla. Nai Yisu yamai tsakei nou tankü nung temkhao dongko moknoi. Nung chekü nime baji thatso noiküla. 7 Nungai Samaria nyiuhai tsak khiamkhaiu shin, Yisuüh apa tü ngiom, “Ngü hao khiam ashiuao akiu.” 8 (Nung taoko Yisu sahoiso nokai eheshiu tuh-ao khukü noiküla.) 9 Samaria nyiuhai nou apa tü thashin, “Ni Yihuda hai thekü ngo Samaria nyiuhai tü khiam ashiuao titi saoji?” (Yihuda haiüh Samaria haiüh kankeitsün thengkam naiuso chiu tsükankeiji.) 10 Yisuüh thalan, “Nilu Goa nou ti kiuji naiuso ni tü khiam ashiuao sauüh saoji, nung ngetünto apa tü saonai apaüh ni hao aa kiutsün khiam kiu-ela.” 11 Nyiuhai nou apa tü ngiom, “Apaou,” “ni khiam khaiuloau tsükan naiuso temkhao nou aokü noin, naito ni aa kiutsün khiam nou ti ainou? 12 Sam paosipo Yakob, sauüh sam hao temkhao nou kiu, nungko apa pem, thsoso, naiuso thainian nousoüh shiu, naito apako nai ni songtso süne?” 13 Yisuüh thalakü apa tü ngiom, “Sauhaiüh nung khiam shiu-e müjam leshi-e; 14 lüko sauhaiüh ngü kiutsün khiam shiu-e laitsüo tsüleshi-e. Ngü kiutsün sübao khiam noin nung apa mongpemai aa khiam iula-e naiuso athontsüyang aa kiu-e.” 15 Nyiuhai nou apa tü ngiom, “Asonghai,” “ngo tsüleao naiuso nungai khiam khaiu tsüshishiao nung khiam nou ngü hao akiu! 16 Yisuüh apa tü ngiom, “Khukü atsammongpo lüjon,” küta “nungai nialokü ashi.” 17 Nyiuhai nou thalakü apa tü ngiom, “Jü tsammongpo tsünoi,” Yisuüh thashin, “Jü tsammongpo tsünoi ta ni thakü ngio-iu; 18 tititenai atsammongpo pungo noiküla, naiuso lo niko sau noin apa atsammongpo tsüde nung ngio ni atsüo ngio-iu.” 19 Nyiuhai nou apa tü ngiom, “Asonghai, ni Goa E-po tsak ta ngü ngeji,” 20 “Jü paosiposo Samaria haiüh nung king nai Goa tü amkham, lüko asam Yihuda haiüh sam Goa amkhamthang Yirusalem noin ta ngioji.” 21 Yisuüh apa tü ngiom, “Nyiuhai, ngü da amonglam, asamüh nung king nai lüko, Yirusalem nai lüko Po nou da tsüamkhamao atao shiji. 22 Asamüh ti tsünge nung amkhamji, samüh ti nge-en nung amkhamji, tititenai Aasanao nou Yihuda hai ainou noin. 23 Tilai khaiunia nou Goa amkham-e Onthso nai atsüoting Goa lütsüotsüokü amkhamao noin, apa hao apaüh mongchiotsün amkham kiukü hao atao shiji, nung lo noin. 24 Goa to Onthso; naiuso sauhaiüh apa amkham-e Onthso nai naiuso atsüoting nai amkhamao noin.” 25 Nyiuhai nou apa tü ngiom, “Mesia (sau tü Khrista ta jonji) nung shiji ta ngo ngen; apa tilai shi-e nungai apaüh sam hao apem ngela-i-e.” 26 Yisuüh apa tü ngiom, “Niko sau chiteji nung Apa.” 27 Nungai apa sahoiso shinai Yisu nyiuhai nouko chitetsün epkü ngüso ngawan; lüko “Ni ti yamji, tsüdekünai, ni tiau nyiuhaiko chiteji?” ta sauüh tsüngio. 28 Nungtiphe nyiuhai nou apa khiam meng taiukü nokai khu, naiuso khaiuniahoi tü ngiom. 29 “Ngo tilüsong chhin nung chikü ngü hao chite-iu, nung khaiunia Messiah nou süne?” 30 Sahoi nouso nok ainou sungkü Yisu dongai shi. 31 Nung jetko sahoi nou apa tü kojakü ngiom, “Atsandetsün, lüheshiu!” 32 Lüko Yisuüh thalan, “Ngo asamüh tsüngekün eheshiu taim.” 33 Nungtiphe sahoi nouso chitekü ngiom, “Apa hao ajantsoüh tso eheshiu kanjikan süne?” 34 Yisuüh ngüso tü ngiom, “Jü eheshiu,” nungto “Ngo hongtsün mongtsam-ikü chhiao naiuso apa chhi shinap-iao nou noin. 35 Loüh ‘alei püle noiküta, nungai be-eiuyam shi-e’ ta asam tsüchiteji süne? Lüko ngü asam tü ngioko, Ngukü thsüokü eiu nou dongai athaplu, lou be-eiuyamao meikü nyankü noin! 36 Sauüh yamheji apaüh amai nou epji, naiuso asai aa thaiutha khülam nou kamshiji, nungtiphe le shiutsün naiuso ayam hetsün ngüne nemtso aikü monglingeji. 37 ‘Khaiunia tsaküh lethioji naiuso tsaküh yamheji’ ta ngiotsün ngio nung atsüo noin. 38 Tiai asamüh tsüchhi nung eiu-ai be-eiuyam yamheao ngü asam hong; amaohaiüh nungai chhi, naiuso ngüsoüh chhitsün ainou asam alesan epji!” 39 “Ngü tilüsong chhin nung chikü apaüh ngo tü ngio-iu, ta nyiuhai nou mitha kiukü ngiophe, nung nok ainou Samaria hai piakü nou apa da monglam. 40 Nungti tilai Samariahai apa dongai shin, ngüsoüh apa ngüsoko noihaao koja; naiuso apa nungai nenyi noi. 41 Loüh piakü nou Yisu ngio tsangkü monglam; naiuso ngüsoüh nyiuhai tü ngiom, 42 “Lo samüh monglamtsün nung ni ngiotsün nou tsüde; tititenai samüh sam chija lu-iu, naiuso nung atsüoting goumchi Aasantsün ta samüh ngen.”

Yisuüh Asonghai Thso Tsak Lomeikiuji

43 Ajekhaiu nenyi noiküta, Yisu nung ainou Galil ai khu. 44 “Tititenai E-pohoi meshen goumchiko nianlom tsünoi ta Yisuüh mitha kiu.” 45 Nungtiphe apa tilai Galil goumchi ai shin, Galil haiüh apa Yirusalem ai sümai taoko chhitsün apem epkü apa lu; tititenai ngüso lüko sümai nai khukü noiküla. 46 Nungtiphe Galil ai noitsün Kana nok tiko apaüh khiam nou theng iula-in, nungai apa müjam shin. Nung taoko asonghai thso tsak Kapernaum ai kiakü noiküla. 47 Tilai apaüh Yisu, Yihuda ainou Galil ai shikü noin ta lula, apa nungai khu, naiuso Yisu saoküta apa thso alomeikiu ta koja; tititenai methso nou eao noiküla. 48 Nungtiphe Yisuüh apa tü ngiom, “Asamüh athanga chhi nouso tsüepnai laitsüo mong tsülam-e.” 49 Asonghai nou apa tü ngiom, “Asonghai, jüthso mo-eankünai asao.” 50 Yisuüh apa tü ngiom, “Lükhu, athso aa noin!” Yisuüh ngiotsün ngio da nung khaiunia nou monglam, küta apa khu. 51 Naiuso apa yamai saokü noitsün tao apa tsamki nousoüh “apa thso meianji ta ngiokü apa ko pheten!” 52 Nungtiphe apaüh ngüso tü apa tilai yakü meiao yachu ta sang. Nai ngüsoüh apa tü ngiom, “münyi tsak baji thatso nai kiashi nou apa le-an.” 53 Nungtiphe, “athso aa noin” ta Yisuüh apa tü nung taoko ngiom ta po nou ngen; naiuso apa pemüh naiuso apa tsammong apem nou monglam. 54 Loüh nung Yisu Yihuda ainou Galil ai shiküta athanga chhi müjam nou noiküla.

Yohan 5

Khiamla nai Lomeitsün

1 Nungphiai, Yihuda hai sümai tsak nai Yisu Yirusalem ai khu. 2 Yirusalem ai Onnemok Bekhan shimkü Ibri ngio nou Bethzatha ta jontsün kamnoi pungo noitsün khiamla tsak noin. 3 Nung kamnoi nouso ko akiahoi niopek hoi, hokngek hoi, naiuso tsopai-ekiahoi piakü saikü noiküla. Ngüsoüh khiamla lemlem nou ta taiukü noi, 4 tititenai lolokü aün hong nou khiamla nai saokü khiam nou lemlem-ikü, Akia hoi nouso tilai khiam lemleme ayating khiamla nai sau hamthio-e apa ti akia sunlünou alomei epepkü noiküla. 5 Nungko pon aosam kü petjei kiatsün khaiunia tsak noiküla. 6 Yisuüh apa nungai saikü noitsün epkü, lotü apa nungti laiukü noitsün ngekü, apa tü sangkü ngiom, “Ni meilaao aiujimo?” 7 Akia khaiunia nou apa tü thala; “Asonghai, tilai khiamla lemleme nungai ngo nialüthioao khaiunia sau tsünoika; tilai ngo nappao koweji amaohai chong jükhako nappanji.” 8 Yisuüh apa tü ngiom, “Atsa, athenshim lülailo, küta lükomlükhun.” 9 Nungailu khaiunia nou meila; küta apa thenshim lailo küta komlükhunao tsalo. Nungnyi Yihudahai Anounyi noiküla. 10 Nungtiphe Yihuda hai petchehoi nousoüh alomeitsün khaiunia tü ngiom, “Lonyi sam Anounyi, naiuso ni athenshim kanao sam Ngiokhem nouko ayam tsünoi.” 11 Lüko apaüh ngüso tü thalan, “Ngü lomeikiutsün khaiunia nou ngo tü jü thenshim lailoküta lütsakei ta ngiom.” 12 Ngüsoüh apa tü sang, “Athenshim lülailo küta lütsakei ta ni tü ngiotsün khaiunia nou sau?” 13 Lüko alumei eptsün khaiunia nou nung Yisu sau ta tsünge; tititenai nungai khaiunia piakü noiphe, Yisu soikü khuwankü noiküla. 14 Phikü Yisuüh apa Amkham Tsamai epkü apa tü ngiom, “Anglu, ni lomei-iu; tekkü tsümeikü nou ni ta tsüshiao, lotü ni angei nou lakankeishi.” 15 Nungai alumei eptsün khaiunia nou khukü, apa lumeikiutsün nung Yisu noiküla ta Yihuda petchehoi nouso tü ngiom. 16 Nungtiphe Yisuüh nung alumei nou Yihuda Anounyi chhi nou shioko ngüsoüh Yisu jeiatkiuao tsalo. 17 Yisuüh ngüso tü thalan, “Jüpoüh asaita chhi nou chhiji nungti ngo lüko chhiao noin.” 18 Nung ngio lukü Yihuda haiüh apa luattao tekkü yam, tititenai apaüh Yihuda Anounyi lothetsünlu tsüde, lüko apaüh meshen chija Goa ko wekü iulakü naiuso Goa tü meshen po ta jon.

Goa Thso nou Oukong

19 Nungtiphe Yisuüh thalakü ngüso tü ngiom, “Atsüoting ngü asam tü ngioko, Thso nou meshen chija ti chhiao tsüshio; Po nou tilüsong chhikü epji Thso nou lüko nungti chhiji. 20 Tititenai Po nou Thso nou da tsüojinji, naiuso apaüh meshenüh chhitsün apem apa hao hanji; nung tü songkü Po nou apa hao han-e, naiuso asam ngala-e. 21 Tititenai Po nou titi ee nou ahshi-ikü ngüso aa iula-iji, nungtilu Thso nou lüko apaüh mongchiotsünso aa iula-iji. 22 Tititenai Po nou khaiunia sau hao mikhem tsükiuji, lüko apaüh Thso nou hao mikhemtsün apem kiuwaniu; 23 nungtiphe ngüsoüh Po nou lon hattsünli Thso nou lon lüko hatao noin. Sauüh Thso nou lon tsühatji apa hongtsün Po nou lon lüko tsühatji. 24 “Atsüoting ngü asam tü ngioji; sauüh jüngio angji, naiuso ngo hongtsün da monglamji apaüh asai aa nou taim, naiuso mikhem nai tsüshi-e, lüko ee ainou aa nai khu-iu. 25 “Atsüoting ngü asam tü ngioji; Atao shiji naiuso nung lo noin-tilai ee nousoüh Goa Thso, sang lula-e, ngüso aa noi-e. 26 Po nou meshen da titi aa nou noin, nungti apaüh Thso hao lüko meshen chija aa noiao kiu, 27 naiuso Po nou apa hao mikhemao oukong nou kiu, tiautenai apa Khaiunia Thso noin. 28 Nungthako langala, atao shiji tilai etam nai noinso apemüh apa sang lula-e, 29 naiuso etam ainou sunge; sauhaiüh amei chhin aa nai ahkü shi-e, naiuso sauhaiüh tümeikü chhin, ngüso ahkü shi-e lüko amowan nai taiu-e.

Yisu Tü Mitha Nouso

30 “Ngü jü chija oukong nou ti chhiao tsüshio; ngü lutsünli mikhem kiuji; naiuso ngü kiutsün mikhem atsüoting noin, tiautenai ngü mongchiotsün tsüde lüko ngo hongtsün mongtsamiao yamji. 31 “Ngü meshen thaiutha mitha kiunai, ngü kiutsün mitha atsüo tsüde. Amaohai tsaküh jü thaiutha mitha kiuji. 32 Naiuso apaüh mitha kiutsün atsüoting ta ngü ngen. 33 Asamüh asam hongthonso Yohan dongai hong, naiuso apaüh ngiotsüo thaiutha mitha kiu. 34 Lüko ngo khaiunia ainou mitha tsüyamji; nungti lüko asam aasanao thaiutha ngü ngio nung ngioji. 35 Yohan nung nyaikü noitsün tson nouli awonkü noiküla: naiuso asam apa awon nai monglingkü mongchiokü noiküla. 36 Lüko ngü mitha jü chija kiulutsün nung Yohanüh mitha kiutsün tü songkü noin; ngo ti chhiji nung Po nou chhiao kiutaiutsün, nungüh jü thaiutha mitha kiuji naiuso ngo Po nou hong ta hanji. 37 Naiuso nung chhi nouso ngü chhiji, nungüh ngo hongtsün Po nou jü thaiutha mitha kiuji. Asamüh laitsüo apa sang tsülu, tsüdekünai apa kha tsüepte. 38 Apa ngio asam da napkü tsünoiphe; sau apa hong, apa da asamüh tsümonglamji. 39 Asamüh Asiongio yamji, tititenai nungai asaita aa nou eppe ta asamüh yangji; naiuso nung Asiongio nou jü thaiutha mitha kiuji. 40 Lüko asai aa epao thaiutha jüdongai shiao asamüh tsümongchio. 41 “Ngü khaiunia ainou nianlom tsüyamji. 42 Lüko ngü asam ti khaiunia nung ngen, naiuso asam mongpemai Goa atsüojin tsünoi ta ngü ngen. 43 Ngo Jüpo nianko shin, naiuso asamüh ngo tsülu; amaohai tsak meshen nianko shinai, asamüh apa lu-e. 44 Asamüh tsaküh tsak ainou nianlom epao aiuji, lüko nianlom atsüoting tsak Goa ainou asamüh tsüyam, naito, titithekü asamüh ngü da monglame? 45 Po nou dongko ngü asam tsüphiokiu-e ta layang; asam phiokiuao nou nung Mosa, sau da asamüh asam amonglam taim. 46 Asamüh Mosa da monglam tünto ngü da lüko monglamela; tititenai apaüh jü thaiutha sat. 47 Lüko apaüh sat nou da asamüh mongtsülam naito jüngio da asamüh titi monglame?”

Yohan 6

Yisuüh Khaiunia Heng Pungo Tsadji

1 Nung phiai, Yisuüh Galil sheasong (Tiberia ta lüko jonji) etsai khu. 2 Naiuso hoi asong apa phiai hoilut, tititenai apa athanga chhi tsangkü akia nouso lomeitsün ngüsoüh ep. 3 Nungai Yisu kheng nai napkü apa meshen sahoi nousoko moknoi. 4 Nungai Yihuda hai Aasantsün Sümai tao shimkü noiküla. 5 Yisuüh lemkü lunai apaüh hoi asong apa dongai shitsün epkü Philip tü sang, “Nungso saiukü heshiuao thaiutha samüh themtsai tai tuh-e?” 6 (Apa liluao thaiutha Yisuüh nung ngiom, tititenai apaüh ti chhiao noin nung ngeankü noiküla.) 7 Philipüh apa tü thala, “Khaiunia pungkü nou thsaothsaokü he lüko tangka apai tsom nime mai themtsai nou ngüso tsüsaiu-e.” 8 Apa sahoi ongko tsak Simon Peter nio Andriaüh apa tü ngiom, 9 “Nungko methso tsak phamongko themtsai pungo naiuso ngou nime taim; lüko khaiunia nungtitso thaiutha titi saiu-e?” 10 Yisuüh ngiom, “Khaiunia nouso mokkü anoi-i,” (nungko khengliu piakü noiküla,) nungtiphe khaiunia nouso mokkü noi, ngüso haove heng pungo thatso noiküla. 11 Yisuüh themtsai nou lukü, Goa hao nianlom kiu, naiuso mokkü noitsün khaiuniahoi hao sunkiu. Apaüh ngou lüko lokü nungtilu chhin, naiuso ngüso apemüh aiutsünli mongtsamkü heshiu. 12 Tilai ngüso toklu, apaüh sahoi nouso tü ngiom, “Ti tsükhemsuwankü apoi anelang nou lükamshi.” 13 Nungtiphe ngüsoüh nung kamshi naiuso barli tso themtsai pungo ainou khaiunia hoi nou heküta apoi nou kim chekü nime mean. 14 Nungtiphe apaüh athanga chhitsün epkü khaiuniahoi nou ngiom, “Atsüoting goumchi ai ashiao noitsün E-po nou nung noin!” 15 Nungtiphe ngüsoüh apa thaloukü nokpao the-iao yangtsün Yisuüh ngekü, apa pemsa müjam king nai sungan.

Yisu Khiam Chiai Tsakeiji

16 Tilai ahsham shin, apa sahoiso sheasong ai sao; 17 kü ngüso kheng tsak ai nap, naiuso sheasong thsatkü Kapernaum ai khu. Ah-nya shinai Yisu loüh ngüso dongai moshikü noiküla. 18 Naiuso asheih athsüoting sheitsün tsangkü sheasong nai khiampek nou songjikan. 19 Nungtiphe ngüso mail süme tsüdekünai püle thatso kheng nai keiküta, Yisu khiam chiai keikü kheng shimkü shitsün ngüsoüh epnai ngüso hatkü noiküla. 20 Lüko Yisuüh ngüso tü ngiom, “Lahattat, nung Ngo kha!” 21 Nai sahoi nousoüh Yisu kheng mongai monglingkü nialu, naiuso kheng nou ngüso khuao noitsün athang nai shak ta sao-iu.

Khaiuniahoi nou Yisu Yamji

22 Nungthan nyi nai khaiuniahoi sheasong etsai noi nounsoüh nungai kheng tsak nou lu noiküla ta ngekü, naiuso kheng nai Yisu apa sahoiko tsükhuha, lüko apa sahoi pemsalu khun ta ngen. 23 Lotü tiai Apaou nianlom kiuküta ngüsoüh themtsai nou he, nung shimkü Tiberia ainou kheng nouso shin. 24 Nungtiphe hoi nou Yisu naiuso apa sahoiso nungai tsünoi ta ngekü, ngüso kheng nai nap, naiuso Yisu yamkü Kapernaum ai shin.

Aa Eheshiu nou Yisu

25 Tilai ngüsoüh Yisu sheasong etsai ep, ngüsoüh apa tü sang, “Atsandetsün, ni nungai tilai shin?” 26 Yisuüh ngüso tü thalakü ngiom, “Atsüoting ngü asam tü ngio-e; Asamüh athanga chhi epnou shioko tsüde, lüko themtsai heküta toklu nou shioko ngo yamji. 27 Lotheanao noitsün eheshiu thaiutha layang, lüko ti eheshiu asai aa thaiutha noin, nung eheshiu thaiutha lüyang; nung eheshiu Khaiunia Thso tsangkü asam hao kiu-e; tititenai Po nou Goaüh apa da ii nou thanglut kiu-iu.” 28 Nungtiphe ngüsoüh apa tü sangkü ngiom, “Goa nou mongchiotsün chhi chhiao thaiutha samüh ti shan-e?” 29 Yisuüh thalakü ngüso tü ngiom, “Goa nou mongchiotsün chhi nung apaüh hongtsün da monglamao noin.” 30 Ngüsoüh apa tü thashikü ngiom, “Samüh monglamao thaiutha ni ti athanga chhi chhikü han-e? 31 Sam paosiposoüh liutsa nai manna nou he; asiongio nai satkü nointsünli, ‘Apaüh ngüso hao aün ainou eheshiu kiu.’” 32 Nungtiphe Yisuüh ngüso tü ngiom, “Atsüoting ngo asam tü ngio-e, asam hao aün ainou eheshiu kiutsün nung Mosa tsüde, nung, Jüpoüh asam hao aün ainou eheshiu atsüoting nou kiuji. 33 Tititenai Goa nou kiutsün eheshiu nung sau aün ainou saom naiuso goumchi hau aa kiuji, nung apa noin.” 34 Ngüsoüh apa tü jon, “Asonghai” “nung eheshiu nou sam hao asaita akiu.” 35 Yisuüh ngüso tü ngiom, “Aa eheshiu nou Ngo” “sau jü dongai shi-e apa tsünaiu-e; naiuso sauüh ngü da monglame apa tilaitso tsüle-e. 36 Asamüh ngo eplüko ngü da tsümonglame ta ngo asam tü ngio-iu. 37 Sauhai Po nou ngü hao kiuji ngüso jü dongai shi-e; naiuso sau jü dongai shi-e ngü apa tilaitso tsüwan-e. 38 Tititenai ngo ngü mongchiotsün chhiao thaiutha tsüde lüko ngo hongtsün nou mongchiotsün chhiao thaiutha aün ainou saom. 39 Naiuso ngo hongtsün nou mongchiotsün nung noin, nungti apaüh ngü hao kiu nouso apem tsümowan-ikü lotü athon ajekhaiu nai apem ahkü shi-iao noin. 40 Tititenai Jüpoüh mongchiotsün nung sauhaiüh Thso nou ep, naiuso apa da monglame asai aa nou epe; naiuso athon ajekhaiu nai ngü ngüso ahkü shi-i-e.” 41 “Ngo aün ainou saotsün eheshiu,” ta apaüh ngionai Yihudahai apa tü namnamkü chite. 42 Ngüsoüh ngiom, “Nung Yosep thso Yisu tsüdeso? Apa po naiuso nyiu samüh tsüngeso? Naito, Ngo aün ainou saotsün ta apaüh titi ngioji?” 43 Yisuüh thalakü ngüso tü ngiom, “asam ongko lanamnam.” 44 Ngo hongtsün Po nou tsütenshikü nai sauüh jüdongai shiao tsüshio: naiuso athon ajekhaiu nai ngü apa ahkü shi-i-e. 45 E-po thsam nai nungti satkü noin, ‘naiuso ngüso chikü tü Goa nou chime.’ Sau haiüh Po ainou lula-iu naiuso ngelu-iu, apa jüdongai shiji. 46 Khaiunia ajantsoüh Po nou epiu ta tsüde, nungti sau Goa ainou noin apaüh lu Po nou ep. 47 “Atsüoting ngü asam tü ngio-e, Sauüh monglamji apa asai aa noin. 48 Ngo aa eheshiu. 49 Asam paosiposoüh liutsa nai mana hekü ngüso ean. 50 Khaiunia nou heküta tsü-eao thaiutha nung aün ainou saotsün eheshiu. 51 Ngo aün ainou saotsün aa eheshiu: ajantsoüh nung eheshiu he naito, apa asai aa noi-e: loüh goumchi aa thaiutha ngü sübao eheshiu kiu-e, nung jünyih.” 52 Nungtiphe Yihuda haiüh ngüso si ngüso lihekü ngiom, “Nung khaiunia nou titi eheao thaiutha sam hao meshen nyih kiu-e?” 53 Nungtiphe Yisuüh ngüso tü ngiom, “Atsüoting ngü asam tü ngio-e: Asamüh Khaiunia Thso nyih tsühekü nai naiuso apa she tsüshiukü nai asam meshen chija da aa tsünoi. 54 Sauüh jünyih heji naiuso jüshe shiuji apa asai aa taim; naiuso athon ajekhaiu nai ngü apa ahkü shi-i-e. 55 Tititenai jünyih eheshiu atsüoting nou naiuso jüshe ashiuao atsüoting nou. 56 Sauüh jünyih heji naiuso jüshe shiuji apa ngü da noiji, naiuso ngo apa da noiji. 57 Aa noitsün Po nou titi ngo hong, naiuso Po nou ngo aa noiji; nungti sauüh ngo he-e, apa lüko aa noi-e. 58 Aün ainou saotsün eheshiu nou nung paosipo haiüh heküta eantsün li tsüde: sauüh nung eheshiu he-e, apa asai aa noi-e.” 59 Kapernaum nai tsandekü noi nai apaüh nung Yihuda kamthang nai chiten.

Asai Aa Ngio nouso

60 Nungtiphe nung lulanai apa sahoi ongko piakü nou ngiom, “Ngio nung to achek; sauüh nung ngela-e?” 61 Lüko nung thaiutha sahoi nou tsonjekji ta Yisuüh meshen mongai ngekü ngüso tü ngiom, “Nungüh asam tü cheki-ji süne? 62 Athatlu nai, Khaiunia Thso apa aya tiai noiküla nung ai laokü khukü asamüh ep nai titi the-e? 63 Aa kiutsün ti nung to Goa Onthso; khaiunia oukong to laitsüo atheao tsünoi, nung ngü ngiotsün ngio nou asam hao Goa aa Onthso kanjikan kiuji. 64 Tititenai sau haiüh tsümonglame, (naiuso apa sapthio-e nung Yisuüh aya ainou ngen.) 65 Apaüh ngiom, “Nung thaiutha Po nou tsükiu nai, sauüh jüdongai shiao tsüshio ta ngü asam tü ngio-iu.” 66 Nung ainou apa sahoi piakü laokü khu, naiuso lotü apa ko tsütsakei. 67 Nungtiphe Yisuüh chekü nime nouso tü ngiom, “Asam lüko khu-e ta aiuji süne?” 68 Simon Peterüh apa tü ngiom, “Apaou, sam sau dongai khu-e? Ni da asai aa ngio noin. 69 Ni Asio Goa nou ta samüh yangji naiuso ngen.” 70 Yisuüh ngüso tü thala, “Ngü asam chekü nime nou tsüsingsan süne? Lüko asam ongko tsak to biya thso noin!” 71 Nung ngio Simon Iskariot thso Yihuda thaiutha apaüh ngiom, tititenai chekü nime ongko sauüh apa sapthio-e nung apa noiküla.

Yohan 7

Yisu Naiuso Apa Nioso

1 Nungphiai, Yisu Galil, goumchi ko tsakei; tititenai apaüh Yihuda goumchi nai tsakeiao tsüaiu, tiautenai Yihuda haiüh apa luatao yam. 2 Lo Yihuda hai kamnoi sümai shimkü noiküla. 3 Nungtiphe apa niosoüh apa tü ngiom, “Asahoi nou lüko ni chhitsün epkü hao, nung ainou soikü Yihuda goumchi ai lükhu. 4 Tititenai sauüh meshen chija achiai sungiao aiuji, apaüh titsüo akauai tsüchhi. Ni nungso chhikü naito, goumchi khako achija achiai sungi-e!” 5 (Tititenai apa niosoüh apa da mong tsülam.) 6 Nungtiphe Yisuüh ngüso tü ngiom, “Ngü nou atao loüh mosao, lüko asam atao asai khemluko noin. 7 Goumchi nou asam lun chinyanao tsüshio; loto nungüh ngü lun chinyanji tititenai nung chhi nou tsümei ta ngü nung thaiutha mitha kiuji. 8 Sümai nai asam lüsung: ngü to loüh sümai nai tsüsung-e; tititenai ngü nou atao loüh mosao.” 9 Nungso ngüsotü ngioküta apa Galil goumchi nailu noi.

Yisu Sümai Nai Ha

10 Loto apa deisinio hoi sümai nai sungküta nai, khakhakü tsüdekü akauai apa lüko sümai nai sungh. 11 Nungtiphe Yihuda haiüh sümai nai apa yamkü ngiom, “Apa tai noin?” 12 Naiuso hoi ongko apa thaiutha engeng nou thatü noiküla: ajantsoüh ngiom, “Apa khaiunia amei noin” amao haiüh ngiom, “Tsüde” “lüko apaüh hoi atsüotsüdekü nai niaji.” 13 Nungti lüko Yihudahai hat nou shioko sauüh apa thaiutha khakhakü tsüchite. 14 Lüko tilai sümai ahwemshisao Yisuüh amkham tsamai sungkü tsande. 15 Yihudahai nokpao nokshing nouso thatü ngakü ngiom, “nung khaiunia nou laitsüo angelo tsükhukün nungti piakü titi ngen?” 16 Nungtiphe Yisuüh ngüso tü thalakü ngiom, “Ngü tsandetsün jüngio tsüde, lüko ngo hongtsün ngio noin. 17 Ajantsoüh apaüh mongchiotsün chhiao mongchio nai ngo tsandetsün nung Goa ngio süne, ngü meshen chija ainou chiteji, nung apaüh nge-e. 18 Sauüh meshen chija ainou chiteji apaüh meshen nianlom yamji: lüko sauüh ngo hongtsün nianlom yamji apa atsüoting, naiuso atsüo tsüdekü nou apa da tsünoi. 19 Mosaüh asam hao ngiokhem nou kiu, atsüo süne tsüde? Lüko asam sauühtso nung Ngiokhem tsüang. Asamüh ngo luatao tiauta koweji?” 20 Hoi nou thala, “Ni da biya noin!” “sauüh ni luatao yamji?” 21 Yisuüh ngüso tü thalakü ngiom, “Ngü chhi nou tsak chhi, naiuso asam apemüh ngaji. 22 Nung thaiutha Mosaüh asam hao atippanao kiu (nung Mosa ainou ta tsüde lüko paosipo ainou); naiuso Yihuda Anounyi nai asamüh khaiunia tippan kiuji. 23 Mosa ngiokhem tsüluthekü hao thaiutha naito Yihuda anunyi nai ngü khaiunia tsak thatü meikü lumeikiu nai asamüh ngü da mongmatji süne? 24 Achiai aloao nou asamüh mi nou lakhem kiu; lüko ngiotsüo nou lükhem kiu.”

Apa Mesia Nou So?

25 Nungtiphe Yirusalem nai noinso ajansoüh ngiom, “Ngüsoüh luatao yamtsün nung tsüdeso? 26 Athaplu! apaüh khakhakü chiteji, naiuso ngüsoüh apa tü ti tsüngio. Nung Khrista ta nokpao nokshing haiüh atsüo ngen so? 27 Nungti lüko nung khaiunia nou ti ainou ko sauüh tsünge-e.” 28 Nungtiphe Yisuüh amkham tsamai tsande nai wekü ngiom, “Asamüh ngo ngen, naiuso ngo ti ainou nung lüko ngen; ngo jü chija tsüshi, lüko sauüh ngo hong apa atsüoting: asamüh apa tsünge. 29 Ngü apa ngen; tititenai ngo apa ainou noin, naiuso apaüh ngo hong.” 30 Nungtiphe ngüsoüh apa thaluao yam: lüko sauüh apa da pha tsüpu, tititenai apa atao loüh mosao. 31 Lüko hoi ongko piakü nou apa da monglam; naiuso ngüsoüh ngiom, “Tilai Khrista shi-e nung khaiunia nou chhitsün ii chhi nou tü tekkü chhi-e süne?”

Yisu Kelo au Ehü Nouso Hong

32 Hoi nou apa thaiutha nungti tsonjektsün Farisi hoi nou lula; naiuso atengting mesonhoi si Farisi hoi nou apa thaluao nouso hong. 33 Nungtiphe Yisuüh ngiom, “Loto ngo asam ko intso noiküta ngo hongtsün dongai khu-e. 34 Asamüh yame, naiuso ngo tsüeppe: naiuso ngo tiai noin, nungai asam shiao tsüshio.” 35 Nungtiphe Yihuda haiüh ngüso si ngüso chitekü ngiom, “Samüh apa tsüepkü hao apa tai khu-e? Apaüh Yihuda hai pengkü Grik hai ko noitsün dongai khukü Grik hai tü tsande-e süne? 36 Asamüh yame, naiuso ngo tsüeppe: naiuso ngo tai noin, nungai asam shiao tsüshio-e ta apaüh ngiotsün ngio nung ti?”

Aa Kiutsün Khiam Tsange

37 Lo sümaitingnyi Yisuüh tsakü wekü ngiom, “Ajantso le nai, apa jüdongai ashi-i, naiuso lüshiu-i. 38 ‘Sauüh ngü da monglame Asiongio nou ngiotsün li apa akhei ainou aa khiam tsange.” 39 Lüko sauhaiüh apa da monglam, ngüsoüh ti Onthso epao noiküla, nung thaiutha apaüh nung chite: tititenai Onthso nou loüh mokiu; tititenai Yisu ajin mokha.

Hoi Ongko Ajanpek Sungh

40 Nungtiphe nung ngio lu nai, hoi ongko ajansoüh ngiom, “Atsüoting nung E-po!” 41 Amao haiüh ngiom, “Nung Khrista!” Lüko ajantsoüh ngiom, “Khrista Galil ainou sunge süne? 42 David kau ainou naiuso David nokpao noitsün Betlehem ainou Khrista shi-e ta Asiongio nou tsüngio so?” 43 Nungti apa thaiutha ahoi ongko ajanpek sungh. 44 Ngüso ongko ajantsoüh apa thaluao aiu; lüko sauüh apa da pha tsüpu.

Yihuda Nokpao Nokshing Tsümonglam

45 Nungtiphe hongthonhoi nou atengting mesonhoi naiuso Farisihoi dongai shin; naiuso ngüsoüh ngüso tü ngiom, “Asamüh tiao apa nialukü tsüshi?” 46 Hongthonhoi nou thala, “Nungti khaiunia nou laitsüo tsüchite!” 47 Nungtiphe Farisihoi nou ngüso tü thala, “Asam lüko atsüo tsüdekünai nia-iji süne?” 48 “Nokpao nokshinghoi tsüdekünai Farisihoi ongko ajantsoüh apa da monglam süne? 49 Nung hoi asong nousoüh Mosa Ngiokhem tsünge, nungtiphe ngüso Goa athesan khemai noin!” 50 Ngüso ongko tsak nou to Nikodema (sau kümi apa dongai shin) apaüh ngiom, 51 “Sam Ngiokhem tsangkü samüh khaiunia tsaktso apaüh ti chhin nung tsüyamkü naiuso ngio tsüanglukü to awanao tsüshio.” 52 Ngüsoüh thalakü apa tü ngiom, “Mei,” “Ni lüko Galil ainou süne? Asiongio nouso lüyam naiuso asamüh nge-e tititenai Galil ainou E-po laitsüo mosungh.”

Yohan 8

Tsütsamtsütsüokünai Thaloutsün Nyiuhai

1 (Nai ngüso khaiunia pungkü meshen tsamai khu, lüko Yisu to Olip king ai sungh.) 2 Ahom beta apa amkham tsamai laokü shin, naiuso khaiunia apem apa dongai shi; naiuso apa moknoi, naiuso ngüso tü tsande. 3 Ngiokhem tsandetsünso si Farisihoi nou nyiuhai tsak tsütsamtsütsüokü nai thalutsün apa dongai nialoukü shin; naiuso apa tilai ngüso awem nai taiukiu, 4 ngüsoüh apa tü ngiom, “Atsandetsün,” “nung nyiuhai tsütsamtsütsüo chhi noikü thalou. 5 Mosaüh Ngiokhem nai nungtin lung nou thupatao noin ta sam tü ngiom: naito ni lüko apa thaiutha ti ngio-e?” 6 Apa phio-iao apa lilukü ngüsoüh nung ngiom, Lüko Yisuüh kaokü napküta meshen phakhathso nou goh ai sat. 7 Lüko tilai ngüsoüh apa tü tsülaokü sang, apaüh ngüso tü ngiom, “Asam ongko sau da angei tsünoi, apaüh chong lung nou nung nyiuhai tü lüyak.” 8 Nungai Yisu müjam kaokü napshikü apa phakha nou goh ai sat. 9 Ngüsoüh tilai nung lula, petcheting ainou yakü aphiteng saokü tsakjam, tsakjam ta khuwan. Nai Yisu apa pemsa, naiuso nyiuhai nou apa tsanoitsün thangkolu tsakü noi. 10 Yisuüh tsakü chukü nyiuhai tü ngiom, “Nyiuhai, ngüso tiai noin? Ni phio-iau ngüso nungko tsaktso poikü tsünnoi süne?” 11 Nyiuhai nou ngiom, “Ah Apaou,” sauüh phio-ikü tsüngio. Nungai Yisuüh ngiom, “Ngü lüko ni hau aphio tsükiuji. Lükhu, küta lo yakü angei lakankei.”

Yisu Goumchi Awon

12 Yisuüh loüh ngüso tü chitekü ngiom, “Ngo goumchi awon; sau jüphiai hoilute apa anyakhem nai tsütsakei-e, loto aa awon nou eppe.” 13 Nungai Farisihoi nou apa tü ngiom, “Ni meshen thaiutha mitha kiuji; ni mitha kiutsün atsüo tsüde.” 14 Yisuüh thalakü ngüso tü ngiom, “Ngü meshen thaiutha mitha kiu lüko ngü mitha kiutsün atsüo noin; tititenai ngo ti ainou shin, naiuso tai khu-e nung ngü ngen; loto ngo ti ainou shin naiuso tai khu-e nung asamüh tsünge. 15 Asamüh nyih yangkü mikhem kiuji; ngü to sau mi tsükhemkiu. 16 Lüko ngü mikhem kiu-e ta nai ngü mikhem kiutsün atsüo-e; tititenai ngo jüpemsa tsüde, loüh ngo lüko noin naiuso ngo hongtsün Jüpo lüko noin. 17 Ah, naiuso khaiunia nime nou mitha kiutsün atsüo noin ta asam Ngiokhem nai satkü noin. 18 Meshen thaiutha mitha kiutsün ngo noin, naiuso ngo hongtsün Po nou jü thaiutha mitha kiuji.” 19 “Apo tiai noin?” ta ngüsoüh apa tü sangh. Yisuüh thalan, “Asamüh ngo naiuso Jüpo tsünge,” “asamüh ngo ngetünto, Jüpo lüko nge-ela.” 20 Yisuüh nung ngio nou amkham tsam tsampai nai chaishi paidan taiutsünai apaüh chitetsün li ngiom. Naiuso apa sauüh tsüthalu, tiautenai apa atao moshisao.

Ngo Tiai Khuji Nungai Asam Khuao Tsüshio

21 Nungai apaüh ngüso tü ngiom, “Ngo khuji, naiuso asamüh ngo yame lüko asam to meshen angei nai e-e; ngo tai khu-e asam nungai shiao tsüshio-e.” 22 Nungtiphe Yihuda haiüh ngiom, “Ngo tai khu-e asamüh nungai shiao tsüshio-e ta apaüh ngiojiphe, apaüh meshen chija luat lo-e ta ngioji süne?” 23 Naiuso apaüh ngüso tü ngiom, “Asam akhem ainou, ngü to akheng ainou; asam nung goumchi ün nou; ngü to nung goumchi ün tsüde. 24 Nung thako ngü asam tü ngio-iu, asam to meshen angei nai e-e ta ngiom: tititenai asamüh ‘Ngo sau nung Ngo’ da tsümonglam kü nai asam meshen angei nai e-e.” 25 Nungtiphe ngüsoüh apa tü ngiom, “Ni sau?” Yisuüh ngüso tü ngiom, “Nungbao ngü lüko asam tü aya nai ngiokülamo. 26 Asam thaiutha ngü ngioau naiuso mikhemao piakü taim: nungti lüko sauüh ngo hong apa atsüo noin; naiuso ngü apa ainou ti lula, nung atsüojin thso khako chiteji.” 27 Apaüh ngüso tü Po nou thaiutha chiteji ta ngüsoüh tsüngela. 28 Nungtiphe Yisuüh ngiom, “Tilai asamüh Khaiunia Thso loksane, nungai ‘Ngo sau Ngo’ apaka ta naiuso ngü meshen chija nou ti tsüchhi, lüko Po nou ngü tü chimtsün li ngü nung chiteji ta asamüh nge-e. 29 Sauüh ngo hong apa ngü ko noin; apaüh ngo jüpemsa tsüwan; tititenai ngü asaita apa mongtsamao chhi chhiji.” 30 Apaüh nung chite nai, piakü nou apa da monglam.

Khaiuniatsüo Naiuso Sua

31 Nungtiphe Yisuüh Yihudahai sauhaiüh apa da monglam, ngüso tü ngiom, “Asam jüngio nai noi naito asam atsüoting jü sahoi; 32 naiuso asamüh ngiotsüo nou nge-e, naiuso ngiotsüo nou asam khaiuniatsüo iula-i-e.” 33 Ngüsoüh apa tü thala, “Sam Abraham le, naiuso laitsüo sau sua tsütheha. Asam khaiuniatsüo-au iula-e ta ni titi ngioji?” 34 Yisuüh ngüso tü thala, “Atsüoting, ngü asam tü ngioji, sauhaiüh angei kankei-e, apa angei sua noin. 35 Sua khaiunia tsak tsamai asaita hao tsünoiji lüko thso nou to asaita noiji. 36 Nungtiphe Thso nou asam khaiuniatsüo iula-i naito, asam atsüoting khaiuniatsüo noi-e. 37 Asam Abraham le ta ngü ngen; nungti lüko jüngio asam da meikü tsünoiphe, asamüh ngo luatao yamji. 38 Jüpo ko ngü ti ep nung ngü chiteji naiuso asamüh lüko asam po ainou ti lula nung chhiji.” 39 Ngüsoüh apa tü thalakü ngiom, “Sam po Abraham noin.” Yisuüh ngüso tü ngiom, “Asam Abraham thsoso tünto, asamüh Abraham chhi chhiela. 40 Lüko Goa ainou ngiotsüo ngo lulaküta asam tü ngiotsün ngo, naiuso lo asamüh ngo luatao yamji. Abrahamüh nung tsüchhi. 41 Asamüh asam po chhi chhiji.” Ngüsoüh apa tü ngiom, “Sam peikhem thso tsüde; sam po tsak Goa noin.” 42 Yisuüh ngüso tü ngiom, “Goa asam po tünto, asamüh ngo tsüojinela; tititenai ngo Goa ainou shin tititenai ngo jü chija nou tsüshika, lüko apaüh ngo hong. 43 Tiao asamüh jüngio tsüngela? Tititenai nungti asamüh jüngio angao tsüshio. 44 Asam meshen po biya ün noin, naiuso asam poüh aiutsün chhiao asamüh mongchioji. Apa aya ainou khaiunia luattsün noiküla, naiuso ngiotsüo nai tsütsa, tititenai apa da ngiotsüo tsünoi. Apaüh tilai atsüo tsüdekü chiteji, apaüh meshen mong ainou chiteji: tititenai apa atsüo tsüdekü nou naiuso atsüo tsüdekün po. 45 Lüko, ngo ngiotsüo chite nai, asamüh ngü da mong tsülam. 46 Asam ongko sauüh ngo angei khaiunia ta mitha kiuao shioji? Ngü ngiotsüo ngio nai, asamüh tiao ngü da mong tsülam? 47 Sau Goa ün noin apaüh Goa ngio angji: asamüh nung tsüang, tititenai asam Goa ün tsüde.”

Yisu Naiuso Abraham

48 Yihuda haiüh thalakü apa tü ngiom, “Ni Samaria hai, naiuso ni da angei onthso noin ta samüh ngioao tsütha süne?” 49 Yisuüh thala. “Ngü da angei onthso tsünoi; lüko ngü Jüpo asu hatji, naiuso asamüh ngo asu tsühat. 50 Lüko ngü meshen nianlom tsüyam: nung yamao naiuso mikhemao tsak noin. 51 Atsüoting, ngü asam tü ngio-e: Ajantsoüh jüngio kankei nai, apaüh laitsüo e nou tsüeppe.” 52 Yihuda haiüh apa tü ngiom, “Lo samüh ni da angei onthso noin ta ngen. Abraham naiuso E-po nouso ean-iu; naiuso ni ngioji, Ajantsoüh jüngio kankei nai, apa laitsüo tsüe-e. 53 Sam po Abraham sau ean-iu, apa ko ni song süne? Naiuso E-po nouso ean-iu! Ni meshen chija sau da ngioji?” 54 Yisuüh thala, “Ngo jü chija ajinka naito, ngo ajinkatsün ti tsüde: ngo ajinkatsün Jüpo noin: apa tü asamüh asam Goa ta chiteji; 55 naiuso asamüh apa tsünge: lüko ngü apa ngen: naiuso ngü apa tsünge ta ngio nai ngo asam li atsüotsüdekü noi-e; lüko ngü apa ngen, naiuso apa ngio kankeiji. 56 Asam po Abrahamüh jü ajekhaiu epao mongling; naiuso apaüh nung ep naiuso monglingkü noiküla.” 57 Nungtiphe Yihuda haiüh apa tü ngiom, “Ni chetküta loüh pon aopungo mongoi, ni to Abraham ep so?” 58 Yisuüh ngüso tü ngiom, “Atsüoting ngü asam tü ngio-e, Abraham mochetkü nai ngo noin.” 59 Nungtiphe ngüsoüh apa da yakao lung nou sem: lüko Yisuüh meshen chija tsang, naiuso amkham tsam ainou khuwan.

Yohan 9

Achet Nai Yakü Niopek Chettsün Tsak Lomeji

1 Yisu khu nai, achet nai yakü niopek chettsün khaiunia tsak ep. 2 Apa sahoi nou apa tü sangkü ngiom, “Atsandetsün, nung khaiunia niovei pekkü chetao apaüh süne, apa posinyiu nou süne, sauüh angei kankei?” 3 Yisuüh thala, “Nung khaiunia nou lüko, apa posinyiu nou lüko angei tsükankei; lüko apa da Goa chhi achiai sung-iao thaiutha noin. 4 Awon nai ngo hongtsün chhi samüh chhiao noin; tilai sauüh chhiao tsüshiokü nou nungtin anyakhem shiji. 5 Ngo goumchi ko noi nou ko yangkü ngo goumchi awon.” 6 Apaüh nungti chiteküta, goh ai lei thuplut, naiuso lei nou puchet shankü, nung puchet nou apa niovei nai tsomlutkü, 7 apa tü ngiom, “Khukü Siloam, khiamla nai akha lüpengan” (athat nou hong.) Nungtiphe apa khukü pengannai epkü laokü shin. 8 Nungti phaohai sauhaiüh apa kümi asaohetsün tsak ta ngen ngüsoüh ngiom, “Moknoikü saohetsün nung tsüde so?” 9 Ajantsoüh ngiom, “Nung kha,” Amao haiüh ngiom, “Nung tsüdeka, lüko apa khekkü,” Nungai apa pemüh ngiom, “Nung khaiunia nou ngo noin.” 10 Nungai ngüsoüh apa tü sang, “Naito aniovei titi lusat kiu?” 11 Apaüh thala, “Yisu ta niankü khaiunia tsaküh puchet shan, naiuso jü niovei nai tsomkiukü ngü tü ngiom, Siloam nai khukü akha lüpengan! nungai ngü khukü pengan nai ep.” 12 Naiuso ngüsoüh, “apa tiai noin?” ta sang. Nai apaüh thalan, “Ngü tsünge.”

Farisihoi Nou Alomeitsün Milou au Yamji

13 Sau niopek noiküla nung khaiunia ngüsoüh Farisihoi dongai nialoukü shin. 14 Nung Yisuüh puchet shankü apa niovei lusat kiutsün ajekhaiu nou Yihuda Anonyi noiküla. 15 Nungti Farisihoi nou lüko apaüh titi ep ta apa tü sang. Apaüh ngüso tü ngiom, “Apaüh jü niovei nai puchet tsomlut naiuso nung ngo pengan nai ep.” 16 Nung thako Farisihoi ajantsoüh ngiom, “Nung khaiunia Goa ainou tsüde, tititenai apaüh Yihuda Anonyi tsükankei.” Lüko amao haiüh ngiom, “Khaiunia sau angei khaiunia noin, apaüh titi nungtin ii nou chhiao shio?” Nungai ngüso ongko ajanpek noiküla. 17 Nungtiphe ngüsoüh müjam niopek khaiunia tü ngiom, “Apaüh aniovei lusatkiu nouko ni apa thaiutha ti ngioji?” Apaüh ngiom, “Apa E-po tsak noin.” 18 Apa niopek noiküla naiuso epkü iulan, ta Yihuda hai nokpao nokshingüh epkü iulatsün posinyiu mojonkün lektso apa thaiutha atsüo ta tsüyang, 19 naiuso ngüso tü sangkü ngiom, “Achet nai yakü niovei pekkü chet ta asamüh ngiotsün nung asam thso süne? Naito lo apaüh titi epji?” 20 Apa posinyiu nou thalakü ngiom, “Nung jethso, naiuso apa niovei pekkü chet ta samüh ngen; 21 lüko lo apaüh titi epji, samüh tsünge; tsüdekünai sauüh apa niovei lusatkiu samüh tsünge; apa tü lüsang; apa songaniu apaüh meshen thaiutha chite-e.” 22 Yihudahai lun hatkü apa posinyiu nou nungti ngiom, tititenai ngüsoüh nungti ngiotsün lulan, khaiunia ajantsoüh apa Khrista ta thalou nai, Yihuda kamthang ainou apa wanan-e. 23 Nungtiphe apa posinyiu nou ngiom, “Apa songaniu; apa tü lüsang.” 24 Nungtiphe ngüsoüh müjam niopek khaiunia nou jonkü apa tü ngiom, “Goa hao nianlom lükiu; nung angei khaiunia ta samüh ngen.” 25 Nungtiphe apaüh thala, “Apa angei khaiunia süne tsüde, ngü tsünge; ngo niopek noiküla, lo ngo epji, nunglu ngü ngen.” 26 Nungai ngüsoüh apa tü ngiom, “Apaüh ni tü ti chhin? Apaüh aniovei titi lusatkiu?” 27 Apaüh ngüso tü thala, “Ngü lolu ngiowaniu, lüko asamüh tsüang. Tiau asamüh müjam angao aiuji? Asam lüko apa sahoi theao aiuji süne?” 28 Ngüsoüh apa tü atheshan kiukü ngiom, “Ni apa sahoi; lüko sam to Mosa sahoi noin. 29 Goa nou Mosa ko chiten ta samüh ngen; lüko nung khaiunia to, apa ti ainou samüh tsünge.” 30 Khaiunia nou apa tü thalakü ngiom, “Naito athanga ao nou nungko noin! apa ti ainou nung asamüh tsünge, lüko apaüh jüniovei lusatkiu. 31 Goa nou angei hoi tü tsüange ta samüh ngen: lüko khaiunia tsak Goa tü amtsün noinai, naiuso apaüh mongchiotsün chhi nai apa tü Goa nou angji. 32 Niovei pekkü chettsün khaiunia tsak niovei ajantsoüh lusatkiu ta achetsinyim ainou laitsüo tsüluhakha. 33 Nung khaiunia Goa ainou tsüde tünto, apaüh ti chhiao tsüshio-ela.” 34 Ngüsoüh apa tü thalakü ngiom, “Ni angei nailu chet, naito ni sam tü tsandetsün süne?” Naiuso ngüsoüh Yihuda kamthang ainou apa nian wanan.

Onthso Yamko Niopek

35 Ngüsoüh apa Yihuda kamthang ainou nian wananiu ta Yisuüh lula; nai apa epkü Yisuüh ngiom, “Ni Goa Thso da monglamji süne?” 36 Apaüh thalakü ngiom, “Apaou, ngü apa da monglamao apa sau?” 37 Yisuüh thalan, “Ni apa epiu, naiuso sau niko chiteji nung Apa.” 38 Nai alomei eptsün nou ngiom, “Apaou, ngü monglamji,” Nai apaüh Yisu tü amkham. 39 Nungai Yisuüh ngiom, “Sauhaiüh tsüep ngüsoüh epao naiuso sauhaiüh epji ngüso niopek iula-iao, mikhemao thaiutha ngo nung goumchi ai shin.” 40 Farisihoi sauhai apako noiküla, ngüsoüh nung ngio nou lulakü apa tü ngiom, “Sam lüko niopek süne?” 41 Yisuüh ngüso tü ngiom, “Asam niopek tünto, asam angei tsünoi-ela; lüko lo asamüh ngioji, ‘Samüh epji,’ nungüh asam angei noin.”

Yohan 10

Onnemok Jimtsün Athatlu

1 Yisuüh ngiom, “Ngü asam tü atsüoting ngioji: khaiunia sau, onnemok tsamai bekhan tsangkü tsüdekü lüko amao bekhan ai siangthiokane; apa to kau naiuso laple; 2 Lüko sau koukhan tsangkü nappe, apa Onnemok jimtsün. 3 Apa hao tsam jimtsün nou koukhan nou sop kiuji; naiuso onnemok hoi nou apa sang lulaji; naiuso apaüh meshen onnemok nian tsonkü jonji, küta nialoukü khuji. 4 Apaüh meshen ün nou onnemok apem nialouküta ngüso khako khuji, naiuso onnemok hoi nou apa phiai hoilutji; tititenai ngüsoüh apa sang ngen. 5 Amao phiai ngüsoüh tsühoilute, apa dong ainou to ngüso khupenge; tititenai ngüsoüh amao sang tsünge.” 6 Nung athatlu ngio Yisuüh ngüso tü ngiom, lüko apaüh ngüso tü ti ngiom nung ngüsoüh tsüngela.

Yisu Onnemok Jimtsün Amei

7 Nungtiphe Yisuüh ngüso tü müjam ngiom, “Atsüoting ngü asam tü ngio-e, Ngo Onnemok koukhan. 8 Ngü tü chong shitsün apem kau naiuso laple nouso; lüko onnemok hoi nou ngüso ngio tsüang. 9 Ngo koukhan; ngo tsangkü ajantso napnai, apa kipsane, naiuso nappe, sunge, naiuso eheshiu nou eppe. 10 Kau nou akauloao, aluatao naiuso lotheankiuao thaiuthalu shiji; naiuso ngo to ngüsoüh aa nou eppao, naiuso nung chikü athapem nai eppao thaiutha shin. 11 “Ngo onnemok jimtsün amei, onnemok jimtsün amei nou onnemok hoi thaiutha meshen aa taiukiuji. 12 Sau onnemok jimtsün tsüde, lüko chaichenlu, naiuso onnemok hoi apa ün tsüde, apaüh chiu shitsün epji, naiuso onnemok hoi wankü khuwanji, küta chiu nou ngüso thalouji naiuso khupeng-iji. 13 Apa chaichen, naiuso onnemok hoi thaiutha tsüyang, nungtiphe apa khuwanji. 14 Ngo onnemok jimtsün amei; naiuso Jüpoüh ngo titi ngen naiuso ngo titi Po nou ngen, nungti ngü Jü onnemok ngen, naiuso Jü onnemok nou ngo ngen; 15 onnemok hoi thaiutha ngü jüpem aa taiukiuji. 16 Nung onnemok hoi ai tsühakü nou ngü ün loüh amao onnemok noin: nungso lüko ngü nialoukü shiao noin, naiuso ngüsoüh Jüsang ange, naiuso ngüso hoi tsak, onnemok jimtsün tsak iula-e. 17 “Nungtiphe Jüpoüh ngo tsüojinji, tititenai müjam laokü loshiao thaiutha ngü mongchiokü jüpem aa taiukiuji. 18 Nung ngo ainou sauüh tsütsolu, lüko jü chija ngü nung taiu kiuji. Nung taiukiuao jü oukong noin, naiuso nung müjam laokü loshiao jü oukong noin. Nung Ngiokhem ngü Jüpo ainou ep.” 19 Nungso ngio thaiutha Yihudahai ongko müjam ajanpek sungh. 20 Naiuso ngüso piakü nou ngiom, “Apa da angei onthso noin! naiuso, apa waiwai! tiao asamüh apa ngio angji?” 21 Amaohaiüh ngiom, “Nung to angei onthso nou thaloutsün ngio tsüde. Angei onthso nou niopek hai niovei lusat kiu-e süne?”

Yisu Tsülou

22 Lo Yirusalemai amkham tsam lusiotsün sümai noiküla; 23 nung ahou tao; naiuso Yisu Solomon tsamsu ai tsakeikü noiküla. 24 Nungtiphe Yihudahaiüh apa lemlouküta apa tü ngiom, “Ni sam tilektso soisoilekleki-e? Ni Khrista naito, sam tü sasakü angio?” 25 Yisuüh ngüso tü thala, “Ngü asam tü ngio-iu, lüko asamüh mong tsülam: Jüpo nianko ngü ti chhi chhiji, nungüh jü thaiutha mitha kiuji. 26 Lüko asamüh mong tsülam, tititenai asam jü onnemok ongko tsüha. 27 Jü onnemok hoi nou jü sang angji, naiuso ngü ngüso ngen, naiuso ngüso jüphiai hoilutji: 28 naiuso ngüso hao asaita aa kiuji; naiuso ngüso laitsüo tsümo-e, naiuso jüpha mong ainou ngüso sauüh tsoloukü khuau tsüshio. 29 Jüpo sauüh ngü hau ngüso kiu, apa chikü tü asong; naiuso Jüpo pha ainou sauüh ngüso tsoloukü khuao tsüshio. 30 Ngo naiuso Jüpo je tsaklu.” 31 Nungüh Yihuda haiüh apa da yakao lung nou sem. 32 Yisuüh ngüso tü ngiom, “Ngü asam noikü tisübao Jüpoüh ngü hau chhiao kiutsün ngo piakü chhin, nung mongko tisübao thaiutha asamüh ngü ta lung nou yakao aiuji?” 33 Yihuda haiüh apa tü thala, “Chhi amei thaiutha samüh ni da tsüyak, lüko Goa lotsaotsün shioko; naiuso ni khaiunia theküta achija Goa iulatsün shioko!” 34 Yisuüh thalan, “Nung asam Ngiokhemai Goa nou ngiotsün satkü taim, ‘asam goa nouso.’ 35 Asiongio nou ti ngioji nung asaita atsüo ta samüh ngen, naiuso Goa nou apaüh ngiokiu taiu nouso khaiuniahoi tü goa ta jonji. 36 Jü haosonto, Jüpoüh chosanküta ngo goumchi ai hong. Naito, ngü Goa Thso ta ngiotsün Goa lutsaoji ta asamüh titi ngioji? 37 Ngü jüpo chhi tsüchhi nai, ngü da lamonglam. 38 Lüko ngü nungso chhi naito, asamüh ngü da tsümonglam lüko, ngü chhitsünso tü amonglam, nung thako asamüh apem thaiutha jamaolu ngeluao Po nou ngü da noin naiuso ngü Po nou da noin.” 39 Ngüsoüh müjam apa thalouao yam, lüko apa ngüso ainou soikü khuwan. 40 Yisu müjam Yordan Haiu etsai Yohanüh khiam aya limkiukü noitsün nai khukü noi. 41 Khaiunia piakü Yisu dongai shikü ngiom, “Yohanüh ti athanga chhi tsüchhi, lüko nung khaiunia thaiutha apaüh ngiotsün atsüo noiküla.” 42 Naiuso khaiunia piakü nou nungai apa tü monglam.

Yohan 11

Lazar Eantsün

1 Bethani nai Lazar nian nou khaiunia tsak kiakü noiküla. 2 (Nung Mari sauüh Apaou, hao anganyam nyamtsün khaiutsom tsomkiuküta meshen khaiuo nou apa hok beiankiu, apa nio Lazar kiakü noiküla.) 3 Nungtiphe nosinio neüh apa dongai hongkü ngiom, “Apaou, ni sau tsüojinji apa kiakü noin.” 4 Tilai Yisuüh nung lula, apaüh ngiom, “Nung akia nou Lazar eantsün athonting tsüde, lüko nung Goa Thso nou ajinka epao noi-e.” 5 Nungtiphe tilai apaüh apa kiaji ta lula, 6 nung taoko apaüh apa tai noiküla nungai nenyi shaman. 7 Nung yankütünai apaüh sahoi tü ngiom, “Sam Yihuda goumchi ai khushiko.” 8 Sahoi nou apa tü ngioji, “Atsandetsün,” “lome thatsolu Yihuda haiüh ni da lung nou yakao yamkü noiküla; naiuso ni nungai müjam khu-e süne?” 9 Yisuüh thala, “Ajekhaiu tsakko ghontao chekü nime tsüdeso? Anyi tsakei nai khaiunia nou hok tsüthek-e, tititenai apaüh nung goumchi awon nou epji. 10 Lüko khaiunia nou asu tsakei nai hokkha thekji, tititenai awon apa da tsünoi.” 11 Nung ngio chitenai, apaüh ngüso tü ngiom, “Sam hai Lazar saila-iu; lüko apa saitsün ainou chu-iao ngo khuji.” 12 Nungtiphe sahoi nou apa tü ngiom, “Apaou, apa sailakü noi naito, apa mei-e.” 13 Yisuüh apa ean nou thaiutha chite: lüko sailakü shioaloutsün thaiutha chiteji ta ngüsoüh yang. 14 Nungai Yisuüh ngüso tü sasakü ngiom, “Lazar eaniu. 15 Asam monglamiao thaiutha ngo nungai tsünoiküla, asam thaiutha ngo monglingji; nungti lüko sam apa dongai khuko.” 16 Nungtiphe Toma, (sau tü thso-ib ta jonji) “apaüh meshen hai sahoi tü ngiom, Sam lüko apako hakü eao khuko.”

Müjam Ahshitsün Naiuso Aa Nou Yisu

17 Nungtiphe tilai Yisu shin, apa loto etam nai pülenyi ngoi-iu ta ep. 18 Lo Bethani nok Yirusalem shimkü mail nime thatsolu pungekü noiküla; 19 nio thaiutha mongsaiu ludang kiuao Martha si Mari ne dongai Yihuda hai piakü shikü noiküla. 20 Tilai Marthaüh Yisu shiji ta lula, apa Yisu tü wao khu, lüko Mari to tsamai noiküla. 21 Nai Marthaüh Yisu tü ngiom, “Apaou, ni nungko noitünto, jünio tsü-e-ela! 22 Lüko ngü ngen, lo lüko ni tilüsong Goa tü sao-e, Goa nou ni hao kiu-e.” 23 Yisuüh apa tü ngiom, “Anio ahkü shi-e.” 24 Marthaüh apa tü ngiom, “athon ajekhaiu nai müjam ahkü shitsün taoko apa ahkü shi-e ta ngü ngen.” 25 Yisuüh apa tü ngiom, “Müjam ahshitsün naiuso aa ngo; sauüh ngü da monglame, apa e lüko, aa noi-e; 26 naiuso sauhai aa noikü ngü da monglame laitsüo tsü-e-e. Ni nung monglamjimo?” 27 Apaüh Yisu tü ngiom, “Ah, Apaou!” “goumchi ai ashiao noi nou Goa Thso, Khrista ni ta ngü yangji.”

Yisu Shap

28 Nung ngioküta apaüh khukü meshen nio Mari asu ai jonkü ngiom. “Apaou nungko noin naiuso ni jonji.” 29 Apaüh nung lulanai, shakta tsaloukü apa dongai khu. 30 (Loüh Yisu nokai moshikü Marthaüh apa phetetsün nailu noiküla.) 31 Nungai Yihudahai sauhai apa alu-ikü apa ko tsamai noiküla, ngüsoüh Mari shakta tsaloukü sungtsün epkü, apa etam nai shapao khuji ta yangkü apa phiai hoilut. 32 Nungtiphe Yisu tai noiküla Mari nung saoküta apa epkü, apa khako kaukü ngiom, “Apaou, ni nungko noi tünto, jünio tsü-e-ela!” 33 Nungtiphe tilai Yisuüh Mari naiuso apako hakü shitsün Yihudahai shapkü ep, apa mongkia, naiuso mongtsüo, 34 kü ngiom, “Asamüh apa tiai wan?” Ngüsoüh apa tü ngioji, “Apaou, shikü athaplu.” 35 Yisu shap. 36 Nungtiphe Yihuda haiüh ngiom, “apaüh apa titengkü tsüojin athaplu!” 37 Lüko ngüso ajantsoüh ngiom, “nung khaiunia sauüh niopek nou niovei lusatkiu, apaüh nung khaiunia tsü-ean-i-e sau-i? Apaüh Lazar e ainou tsülou aa süne?”

Lazar Aa Shishi-iu

38 Nungtiphe Yisu müjam mong kiakü etam nai shi, Nung etam nou lung etam tsak, naiuso koukhan nai lungpun tsak noiküla. 39 Yisuüh ngiom, “Asamüh lungpun nou alokan!” Sau e noiküla, apa nuüh apa tü ngiom, “Apaou, apa loto nyamji; tititenai apa eküta pülenyingoianiu!” 40 Yisuüh apa tü ngiom, “Ni monglam naito, Goa ajinka nou eppe, ta ngü ni tü tsüngio süne? Nungtiphe ngüsoüh lung nou lokan.” 41 Yisuüh koyai thapkü ngiom, “Jüpo, ni jüngio lutsün tsangkü ngü anian lomji. 42 Ni jüngio asai angji ta ngü ngen: loto lemkü tsakü noitsün hoi nou ni ngo hong ta ayang taiu ao ngü ngeo nung ngiom,” 43 Apaüh nungti chiteküta, sang asong nou we, “Lazar, achüo!” 44 Sau e noiküla, apa phasihok meatsan ne nou nyingpokkü sung; naiuso kha lemkü beiantsün ne nou nyingpokkü noiküla. Yisuüh ngüso tü ngiom, “Apa asoktham,” “küta lükhu-i.”

Yisu Loatao Mongthat Nou That

45 Nungtiphe Yihudahai piakü sauhai Mari dongai shin naiuso Yisuüh chhitsün ep, nai ngüsoüh apa da monglam. 46 Lüko ngüso ajantso Farisihoi dongai khukü Yisuüh ti chhin nung ngüso tü ngiom. 47 Nungtiphe atengteng mesonhoi nouso naiuso Farisihoi nou ajeiaikam nai ngiom, “Samüh ti chhi-e? Tititenai nung khaiunia nou ii nou piakü chhiji! 48 Samüh apa nungtilu wan nai, khaiunia apem nou apa da monglame: naiuso Rom hai shiküta sam Amkham Tsam naiuso sam mele lomowane!” 49 Ngüso ongko Kaifa, nian nou tsak sau nung pon ko Akhengting Meson thekü noiküla, apaüh ngüso tü ngiom, “Asamüh ti tsünge! 50 Sam mele apem mowan nouko to apem thaiutha khaiunia tsak ean chen ta asamüh tsüyang!” 51 Lo apaüh nung meshen mong chija tsüngio, lüko nung ponko apa Akhengting Meson the nou shioko, naiuso Yihuda mele thaiutha Yisu eao noin, 52 naiuso Yihuda mele thaiuthalu tsüde, lüko pengkeikü noi nouso Goa thsoso tsakao iulakü apaüh nialouao thaiutha, apaüh nung ngiokiu. 53 Nung ajekhaiu ko yakü ngüsoüh apa luatao mongkhem. 54 Nungtiphe Yisu loto Yihudahai ongko khakhakü tsütsakei, loto nung ainou liutsa shimkü noitsün goumchi Efraim ta jontsün nok ai soikü khu, naiuso nungai apa sahoi nouko noi. 55 Lo Yihudahai Aasantsün sümai shimkü noiküla: naiuso sümai nou mosaokü nai, kau ainou khaiunia piakü meshen chija lusioluao thaiutha Yirusalemai sungh. 56 Nungtiphe ngüsoüh Yisu yam, naiuso amkham tsamai tsakü ngüso si ngüso chitekü ngiom, “Asamüh ti yangji? Apa sümai nai tsüshi süne?” 57 Apa thaluau thaiutha, apa tai noianko, ajantsoüh nge naito, nung han nai meila, ta atengting mesonhoi naiuso Farisi hoi nou ngiokhem kiukü noiküla.

Yohan 12

Yisu Bethani Nai Tsomkiu

1 Nungtiphe Aasantsün Sümai loüh luoknyi noikü, Lazar sau Yisuüh e ainou ahkü shi-in, apa kihtsün Bethani nokai apa shin. 2 Nungshioko nungai ngüsoüh apa thaiutha asu eheshiuao sümai tsak shan: naiuso Marthaüh yathsüokü kiu; naiuso Lazar apa ko chih hetsün nai noitsün ongko tsak noiküla. 3 Nungtiphe Mariüh tangka piakü mai anganyam nyamtsün khaiutsom tsoi apaitso kankü shikü Yisu hok nai tsomkiu, naiuso meshen khaiuo nou Yisu hok beiankiu: naiuso khaiutsom anganyam nou tsam mean. 4 Lüko Yihuda Iskariot, apa sahoi ongko tsak, sauüh apa janhe, apaüh ngiom, 5 “Khaiutsom nung tangka apai tsom süme he janküta tiao tsosilu hai hao tsükiu?” 6 Apaüh nung tsosilu hai yangkü tsüngio; lüko apa kau, naiuso apa dongko tangka tsop taiuphe, nungai ti taiu nung kankü khu. 7 Lüko Yisuüh ngiom, “Apa nungti lütaiu! ngo etam nai khanao ajekhaiu thaiutha apa hao nung lütaiu-i. 8 Tititenai tsosiluhai to asamko asai noin; lüko ngo to asamko asai tsünoi-e.”

Lazar Loatao Mongkhem

9 Nungtiphe Yihudahaiüh apa nungai noin ta lula: naiuso ngüsoüh Yisu thaiuthalu tsüde, lüko Lazar sau apaüh e ainou ahkü shi-in, apa tü loao thaiutha shin. 10 Lüko atengting mesonhoi nouso Lazar lüko luatao thaiutha ngemloum; 11 tititenai apa thaiutha Yihudahai piakü khuwan, naiuso Yisu da monglam.

Ashio Epkü Yirusalemai Naptsün

12 Lühomli nai Yisu Yirusalemai shiji ta luküta, sümai nai shitsün hoi asong tsaküh 13 mepai thsam nou kankü apa tü awao khu, naiuso wen, “Lükipsan! Sau Goa nian ko shiji, nung Israel nokpao nian lülomsan!” 14 Yisuüh gado thso tsak epkü, Asiongio nai ngiotsün li nung chiai moknoi; 15 “Zion thso lahat! athaplu, asam nokpao gado thso tsak ko moknoikü shiji.” 16 Ngio nung apa sahoi nou aya naito tsüngela: lüko tilai Yisu ajin nou kha, nungai ngio nung apa thaiutha Asiongio nai sat, naiuso ngüsoüh apa tü nungti chhi-e ta yangsan. 17 Nungtiphe tilai apaüh Lazar etam ainou jonkü, e ainou ahkü shiin, nungai sübao hoi apako noiküla, ngüsoüh mitha kiu. 18 Nung thako hoi nou khukü apa ko pheten, tititenai apaüh nung ii nou chhi-e ta ngüsoüh lula. 19 Nungüh Farisihoi nou ngüso si ngüso chitekü ngiom, “Athaplu, samüh titsüo ashio tsüep! Athaplu, goumchi athum apa phiai hoilutiu!”

Grik hai Ajantsoüh Yisu Yamji

20 Amkhamao thaiutha sümai nai sauhai sungh, ngüso ongko Grik hai ajantso noiküla: 21 Nungtiphe ngüsoüh Galil nai noitsün Betsaida hai Philip dongai shikü sang, “Asong hai, samüh Yisu epao aiuji.” 22 Philip khukü Andria hau chite, naiuso Andria si Philip ne khukü Yisu hau chite. 23 Yisuüh ngüso tü thalakü ngiom, “Khaiunia Thso ajinkaao atao sao-iu. 24 Atsüoting, ngü asam tü ngio-e, Jinyak woipem tsak goh ai sawanji, nai apa meshen pemsa noiji; lüko apa e naito, apa eiu nou piakü eiuji. 25 Sauüh meshen aa tsüojinji, nung mowanji; sauüh nung goumchi ko meshen aa chinyanji, apaüh nung asaita aa saokü taiu-e. 26 Ajantsoüh ngo yathsüoao aiunai, apa jüphiai ohoilut-i; naiuso ngo tiai noi-e, nungai ngo yathsüotsün lüko noi-e: ajantsoüh ngo yathsüo naito, Po nou apa nian lome.

Yisuüh Apa Eao Thaiutha Ngioji

27 “Lo jümongai kiajikanji; naiuso ngü ti ngio-e? ‘Jüpo, nung taoko ngo akipsan.’ Lüko nung thaiutha ngo nung tao nai shin. 28 Jüpo, anian ajin lükha-i!” Nungtiphe aün ainou sang tsak sungkü ngiom, “Ngü nung ajinkai-iu, naiuso nung müjam ajinkha-i-e.” 29 Nungtiphe shimkü tsakü noitsün hoi nou nung lulanai ahmok-iu ta ngiom, amao haiüh ngiom, “Aün honghoi tsaküh apa ko chete-iu.” 30 Yisuüh thalakü ngiom, “Nung sang nou jüthaiutha tsüde, lüko asam thaiutha shin. 31 Lo nung tao nouko nung goumchi thaiutha mikhemao noin, nung goumchi nokpao nou lo sawane. 32 Tilai ngo goumchi ainou loksane, ngü khaiunia chikü meshen chija jüdongai tenshi-e.” 33 (Lüko titi in angja omhe nou apa e-i-e, nung nge-iao thaiutha apaüh nung ngio nou ngiom.) 34 Nungtiphe hoi nou apa tü thala, “Khrista to asai noiji ta samüh ngiokhem Asiongio nai nou lula: naito Khaiunia Thso loksanao noin ta ni titi ngioji? Nung Khaiunia Thso nou sau?” 35 Nungtiphe Yisuüh ngüso tü ngiom, “Loto atao letletkülu awon nou asam ongko noin.” Anyakhem nou asam tsüthaao thaiutha, asam ko awon noi nai lütsakei: sauüh anyakhem nai tsakeiji apa tiai khuji tsünge. 36 Awon asam ko noi nai, asam awon thsoso iulakü hao, awon da lümonglam.

Khaiuniahoi Mong Tsülamkün

Yisuüh nung ngio chite nai soikü khukü ngüso ainou pamkü noi. 37 Lüko apaüh ngüso dongko ii nungtitso chhi lüko, ngüsoüh apa da tsümonglam. 38 Nungtiphe E-po Isaiaüh chitetsün ngio nung atsüo shinap: “Apaou, sauüh sam ngem da monglam? Sauhai hao Apaou nou apa oukong tsangsheikü han?” 39 Nung thaiutha ngüsoüh mong tsülam, tititenai Isaiaüh lüko ngiom, 40 “Apaou nou ngüso niopek iula-in naiuso ngüso mongpem kongkü iula-in, nungtiphe ngüso niovei nou tsüeppe, naiuso ngüso mongpem nou tsüngela-e, ngüso ngo lomeikiuao thaiutha jüdongai phoklekü tsüshi-e ta Goa nou ngioji. 41 Isaiaüh nung ngio ngiom, tititenai apaüh Yisu ajinka ep; naiuso apaüh apa thaiutha chite. 42 Nungti nokpao nokshing ongko lüko piakü nou apa da monglam; lüko ngüso Yihuda kamthang ainou wanküle ta hat nou shioko, Farisihoi khako ngüsoüh nung tsüthalou. 43 Tititenai ngüsoüh Goa nianlom nouko to khaiunia nianlom tekkü tsüojin.

Yisu Ngio Nouso Tsangkü Mikhem

44 Naiuso Yisuüh wekü ngiom, “Sauüh ngü da monglamji, nung ngü da tsüde, lüko ngo hongtsün da monglamji. 45 Naiuso sauüh ngo lou-e apaüh ngo hongtsün louji. 46 Sauhaiüh ngü da monglame, apa anyakhem nai tsünoi-ao ngo goumchi ai awon tsak shin. 47 Naiuso ajantsoüh jüngio lulakü nung tsükankei naito, ngü apa mi tsükhem kiu-e tititenai goumchi mi khemao tsüde lüko goumchi kipsanao thaiutha ngo shin. 48 Sauüh ngo tsülou-e naiuso jüngio tsüange, apa mi khemao tsak noin: ngü ti ngio chite nungühlu athon ajekhaiu nai apa mi kheme. 49 Nung atsüo tiautenai ngü meshen mongchija nou tsüchite; lüko ngü ti ngio-e, naiuso ti chite-e, nung ngo hongtsün Po nou ngü hao ngiokhem kiu. 50 Apa ngiokhem asaita aa ta ngü ngen: nungtiphe ngü ti chiteji, nung Po nou ngü tü titi ngioji nungti ngü chiteji.”

Yohan 13

Yisuüh Sahoi Hok Tsaowankiuji

1 Lo Aasantsün sümai mosaokü nai, Yisuüh nung goumchi ainou Po nou dongai pungeao atao sao-e ta ngekü, goumchi ko noitsün meshen ün tsüojin, nou ngüso athon saokü tsüojin. 2 Naiuso asu chih henai loto Simon thso Yihuda Iskariot mongpemai Yisu janheao biya nou mongthat lothiowankü, 3 Po nou apa pha mongko apem kiuwaniu naiuso apa Goa ainou shin, naiuso Goa dongai khuji ta Yisuüh ngekü, 4 chih hetsün ko tsaküta apa ne losankü taiu; naiuso apaüh pem beiantsün ne tsak kankü shikü meshen om nai omthsa thsalo. 5 Nungai apaüh chiukau nai khiam lothio, küta sahoi hok tsaowanao, naiuso pem peiantsün ne ti in nou apa oumthsa thsakü noiküla, nungüh ngüso peiankiuao yachu. 6 Nungko Yisu Simon Peter dongai shinai Simon Peterüh Yisu tü ngiom, “Apaou, ni jühok tsaowan kiuji süne?” 7 Yisuüh thalakü apa tü ngiom, “Ngü ti chhiji ni loto tsünge; lüko ni nung phiai nge-e.” 8 Peterüh apa tü ngiom, “Ni laitsüo jühok tsütsaowankiu-e!” Yisuüh apa tü thala, “Ngü ni tsütsawan kiunai, ni ngüko ti haoson tsünoi.” 9 Simon Peterüh apa tü ngiom, “Apaou, jühoklu tsüde, lüko jüpha naiuso jükhaiu lüko atsaowan kiu!” 10 Yisuüh apa tü ngioji, “Sau khiam peng-iu, apaüh hok nou chiai tsaowanao tsünoi: apa chikü yanthsüokü noin; naiuso asam apem yanthsüokü noin lüko tsak tsüyanthsüo.” 11 (Tititenai sauüh apa janhe-e, nung apaüh ngen; nungtiphe apaüh nung ngiom, “Asam chikü yanthsüokü tsüde.”) 12 Nungtiphe apaüh ngüso hok tsaowankiuküta, meshen ne tenkü moknoi, küta ngüso tü ngiom, “Ngü asam tü ti chhin nung asamüh ngejimo?” 13 “Asamüh ngü tü Atsandetsün, naiuso Apaou, ta jonji: naiuso asamüh atsüo ngioji: tititenai nung ngo. 14 Nai ngo, Apaou naiuso Atsandetsün nou asam hok tsaowankiu naito, asamüh lüko tsaküh tsak hok tsaowankiuao noin. 15 Tititenai ngü asam tü chhitsünli asamüh lüko chhiao thaiutha, ngü asam hao athatluao tsak kiu-iu. 16 Atsüoting ngü asam tü ngio-e, meshen tsampao nouko tsamki asong tsüde; naiuso meshen hongtsün nouko honghoi asong tsüde. 17 Asamüh ngüso ngekü kankeinai asam thaiumei! 18 “Ngü asam chikü thaiutha chiteji tsüde, ngü sauhai shingsan ngüso ngü ngen: lüko Asiongio shinapao thaiutha nung atsüo, ‘Sauüh ngü ko heshiuji apaüh jüthako meshen hok loksan.’ 19 Nung tilai shinape, ngo apa kha ta asamüh monglamao thaiutha moshinapkünai lo yakü ngü asam tü ngioji. 20 Atsüoting ngü asam tü ngioji, Ngo hongtsün khaiunia sauüh louji apaüh ngo louji; sauüh ngo louji; apaüh ngo hongtsün louji.”

Yisuüh Apa Janheao Piamkü Ngiotaiuji

21 Yisuüh nung ngioküta apa mongkiakü sasakü ngiom, “Atsüoting ngü asam tü ngio-e, Asam ongko tsaküh ngo janhe-e.” 22 Apaüh sau thaiutha chiteji ta ngakü sahoi nou ngüso si ngüso thape. 23 Nungai sahoi ongko tsak, Sau Yisuüh tsüojin, apa Yisu kong nai niolutkü then dongko noiküla. 24 Nungtiphe Simon Peterüh apa tü thapkü ngiom, “Sau thaiutha nung chiteji.” 25 Apa noitsünli apaüh Yisu kong nai niolutkü apa tü ngiom, “Apaou nung sau?” 26 Nungtiphe Yisuüh thalaji, “themtsai ko kian khiam lao-ekü sau hao ngü kiu-e, nung apa.” Nungtiphe Yisuüh themtsai nou kian khiam lao-ekü Simon thso Yihuda Iskariot hao kiu. 27 Themtsai nou kiuküta, Biya apa da nap. Nungai Yisuüh apa tü ngiom, “Ni ti chhiao noin, shakta lüchhi. 28 Loto apaüh ti thako ngio nung apa tü ngiom, chih he nai noitsün ongko sauüh tsünge!” 29 Tititenai Yihuda dongko tangka hiu nou noiphe, Sümai thaiutha sam ti pokü noin nung lütuh ta tsüdekünai tsosilu hai hao tso tsak lükiu ta Yisuüh apa tü ngioji lamkü ajantsoüh yang.

Ngiokhem Ayan Tsak

30 Themtsai nou louküta apa nungailu kingchiai khu: naiuso nungai asu noiküla. 31 Yihuda Iskariotüh hoi nou wankü khuwankütünai, Yisuüh ngiom, “Lo Khaiunia Thso ajinka nou achiai sungiu; Goa ajinka apa tsangkü achiai sungiu. 32 Naiuso Goa nou meshen da apa ajinkha-e, naiuso apaüh apa liukü ajinkha-i-e. 33 Ehen methsohoi, loto ajekhaiu thsaothsaokülu ngo asam ko noiküta, Asamüh ngü tü yame: naiuso ngü Yihudahai tü titi ngiom, nungti lo ngü asam tü ngio-e, ‘Ngo tiai khu-e, asamüh nungai shiao tsüshio-e.’ 34 Ngioklhem ayan tsak ngü asam hao kiuji, nungti asamüh haisihai lütsüojine; ngü asam tü titi tsüojin nungti asamüh haisihaine lütsüojine. 35 Asamüh haisihai tsüojine naito, nungüh asam jü sahoi ta apemüh nge-e.”

Yisuüh Peterüh Tsüthaloutsün Piamkü Ngiotaiuji

36 Simon Peterüh apa tü ngiom, “Apaou, ni tiai khu-e?” Yisuüh thalan, “Ngo tiai khu-e, ni loto nungai jüphiai hoilutao tsüshio-e.” “Lüko ni phikü to hoilute.” 37 Peterüh apa tü ngiom, “Apaou, tiau loto ngü aphiai hoilutao tsüshio-e?” “Athaiutha ngü jüpem aa taiu kiuao khemkü noin!” 38 Yisuüh thalan, “Ni jü thaiutha apem aa taiukiu-e süne? Atsüoting ngü ni tü ngio-e, Waio nou mokokün khako ni ngo samjam tsüthalou-e.

Yohan 14

Po Nou Dongai Khuao Yam

1 Yisuüh ngüso tü ngiom, “Asam mong laluthe.” “Goa da lümonglam, naiuso ngü da lüko amonglam. 2 Jüpo tsamai tsampai piakü noin, naiuso ngo asam thaiutha athang tsak khemtaiuao khuji. Nungti tsüdetünto ngo asam tü nung tsüngio-ela. 3 Naiuso ngo khukü asam thaiutha athang tsak khemtaiuküta ngo asam dongai laokü shikü jüdongai nialou-e, nungaito ngo tiai noi-e asasm lüko nungai noi-e. 4 Ngo tiai khuji, nung yam nou ti athangai niaji asamüh ngen.” 5 Tomaüh apa tü ngiom, “Apaou, ni tiai khu-e samüh tsünge; naito samüh yam nou titi ngen?” 6 Yisuüh apa tü ngiom, “Yam nou, Ngiotsüo nou, naiuso Aa nou Ngo: Ngü tsangkü tsüdekünai sauüh Jüpo dongai tsüshi. 7 Asamüh ngo ngetünto, Jüpo lüko nge-ela,” “loyakü asamüh apa ngen, naiuso apa eppe.” 8 Philipüh apa tü ngiom, “Apaou, sam tü Po nou ahan, nungüh sam thaiutha saiuwane.” 9 Yisuüh apa tü ngiom, “Philip, ngo asam ko nunglektso noi lüko, ni ngo tsüngeso? Sauüh ngo epiu, apaüh Po nou epiu; Sam tü Po nou ahan ta ni titi ngioji? 10 Ngo Po nou da noin, naiuso Po nou ngo da noin, ta ni mong tsülamso? Ngü ti ngio asam tü ngioji nung jü chija ainou tsüchiteji: lüko Po nou ngü da noikü, apaüh meshen chhi chhiji. 11 Ngo Po nou da noin, naiuso Po nou ngü da noin ta jüngio nung da amonglam. 12 Atsüoting ngü asam tü ngio-e, Sauüh ngü da monglamji, ti chhi ngü chhiji, apaüh lüko nung chhi-e; naiuso nung chhi nou tü tekkü apaüh chhi-e; tititenai ngo Po nou dongai khu-e. 13 Asamüh jünianko tilüsong sao-e, nung ngü chhi-e, nungtiphe Thso nou da Po nou ajinka-e. 14 Asamüh ngü tü jünian ko tso tsak saonai, nung ngü chhi-e.

Asio Onthso Hongao Thaloutsün

15 “Asamüh ngo tsüojin nai, jüngiokhem asamüh kankei-e. 16 Ngo Po nou tü asam ko asaita noiao thaiutha, apaüh asam hao amao shioalu-itsün kiuao sao-e. 17 Nung ngiotsüo Onthso; sauüh Goa thaiutha ngiotsüo hane; apa goumchi nou loau tsüshio; tititenai goumchi nou apa tsüep, naiuso ange lüko tsünge: asamüh apa ngen; tititenai apa asam ko noin, naiuso asam da noi-e. 18 “Ngü tilai khu-e asam pemsa tsüwane: ngo asam dongai laokü shi-e. 19 Letlettsokü noikütünai, loto goumchi nou ngo tsüeppe; lüko asamüh to ngo eppe: ngo aa noin, nungüh asam lüko aa noi-e. 20 Nung ajekhaiu nai ngo Jüpo da noin, naiuso asam da noin, naiuso ngo asam da noin, ta asamüh nge-e. 21 “Sau ko jüngiokhem noin, naiuso nung kankeiji, apaüh ngo tsüojinji, Jüpoüh apa tsüojine naiuso ngo jü chija apa tü achiai sungkü hane.” 22 Yihudaüh (Iskariot tsüde) apa tü ngiom, “Apaou, titi thekü goumchi khako ni meshen chija achiai tsüsungkü sam khakolu achiai sunge?” 23 Yisuüh thalakü apa tü ngiom, “Ajantsoüh ngo tsüojin nai, apaüh jüngio ange; naiuso Jüpoüh apa tsüojine, naiuso sam apa dongai shi-e, naiuso apako noi-e. 24 Sauüh ngo tsütsüojin apaüh jüngio tsüang: naiuso asamüh ti ngio luji nung jüngio tsüde, lüko ngo hongtsün Jüpo ngio. 25 “Loüh asam ko noikü ngü nung ngio asam tü chite-iu. 26 Lüko shioalu-itsün, nung Asio Onthso sau Po nou jünian ko honge, apaüh asam tü apem tsande-e, naiuso ngü asam tü ngiotsün apem yangsani-e. 27 “Ngü asam ko shioalu taiukiuji; goumchi nou kiutsünli ngü asam hao tsükiu. Asam mong laluthe, naiuso hatkü lanoi 28 ‘Ngo khuji, lüko asam dongai laokü shi-e,’ ta ngü asam tü ngiotsün asamüh lula. Asamüh ngo tsüojin tünto, asamüh lüko monglingela, tititenai ngo Po nou dongai khuji: tititenai Po nou ngü tü song. 29 Tilai atao shisao-e asamüh monglamao thaiutha, atao moshikünai ngü sasm tü ngio-iu. 30 Asam ko ngo loto piakü tsüchite-e, tititenai nung goumchi nokpao shiji. Apa ngüko ti haoson tsünoi. 31 Lüko ngo Po nou tü tsüojinji, naiuso Po nou ti ngiokhem kiu nung ngü chhiji ta goumchi nou ngeao thaiutha apa shi-e. “Ashi, sam nung athang ainou tsaloukü khuko.”

Yohan 15

Sainao Atsüoting Nou Yisu

1 “Ngo atsüoting Sainao naiuso eiu a tsün Jüpo. 2 Ngü da noitsün sübao akia nouso eiu tsüeiu-e apaüh nung shapanji: naiuso sübao akia nouso eiu eiuji, tekkü eiu eiu-iao thaiutha apaüh nung losiokiuji. 3 Ngü asam tü chitetsün ngio nou loto asam to lusiokü noin. 4 Ngü da anoi naiuso ngo asam da noi-e. Paipem nou da tsünoi nai, titi akia nou eiu eiuao tsüshio: nungti ngü da tsünoi nai, asamüh lüko eiuao tsüshio. 5 “Ngo paipem naiuso asam akia nou: Sau ngü da noin naiuso ngü sao da noin, nungüh eiu piakü eiuji: tititenai ngü ainou pungekü asamüh ti chhiao tsüshio. 6 Ajantso ngü da tsünoi nai, apa akia nou li wanji, naiuso wonanji; naiuso ngüsoüh nung kamshiji, naiuso aokhan nai lothiokü jahji. 7 Asamüh ngü da noi nai, naiuso jüngio asam da noi nai, asamüh tilüsong aiuji lüsao, naiuso nung asam tü chhi-e. 8 Jüpo ajinka asam chhi singkü khutsün tsangkü hanji; naiuso nungli asam jü sahoi iula-e. 9 Jüpoüh titi ngo tsüojin, ngo lüko nungti asam tsüojin: asam ngü tsüojintsün nai lünoi. 10 Ngü titi Jüpo ngiokhem kankei naiuso apa atsüojin nai noiji; nungti asamüh jüngiokhem kankei nai, asam lüko ngü tsüojintsün nai noi-e. 11 “Ngo monglingtsün asam da noi-e naiuso asam monglingtsün saiukü iulaao thaiutha, ngü asam tü ngio nung chiten. 12 Ngü asam titi tsüojin, nungti asam lüko hai si hai lütsüojine; nung ngü ngiotsün noin. 13 Khaiunia nou hai thaiutha meshen aa taiu kiu-e, nungtü songkü sau atsüojin tsünoi. 14 Ngü asam tü ti ngioji nung asamüh chhi nai, asam jü hai. 15 Ngü loto asam tü tsamki ta tsüjon shi-e, tititenai meshen tsampao nou ti chhiji nung tsamki nou tsünge: lüko ngü asam tü hai ta jone; tititenai Jüpo ainou ngü ti lula nung apem asam hao ngü ngelu-i-e. 16 Asamüh ngo shingsan tsüde, lüko ngü asam shingsan, naiuso asamüh khukü eiu eiuao thaiutha naiuso asam eiu noi ao thaiutha ngü asam thomthio: nungtiphe asamüh jünianko Po nou tü tilüsong sao-e, nung apaüh asam hao kiu-e. 17 Asamüh hai si hai tsüojineao nung ngü asam tü ngioji.

Goumchi Nou Chinyantsün

18 “Goumchi nou asam chinyan nai, asam mochinyan, khako aya ngo chinyan ta asamüh lüyangsan. 19 Asam goumchi ün tünto, goumchi nou meshen ün tsüojinela: lüko asam goumchi ün tsüde, loto ngü asam goumchi ainou shingsan, nungüh goumchi nou asam chinyanji. 20 ‘Meshen tsampao ko tsamki asong tsüde,’ ta ngü asam tü ngiotsün ngio lüyangsan. ‘Ngüsoüh ngo omheani, naito ngüsoüh asam omheani-e: ngüsoüh jüngio ang, naito ngüsoüh asam ngio lüko ange. 21 Lüko ngüsoüh asam tü nung chikü chhi-e, tititenai asam ngü ün ngüsoüh ngo hongtsün tsünge. 22 Ngo shikü ngüso tü tsüchite tünto, ngüso angei tsünoiela: lüko loto ngüso angei thaiutha athakhuao tsünoi. 23 Sauüh ngo chinyanji apaüh Jüpo lüko chinyanji. 24 Sübao chhi amao sauüh tsüchhi, nung chhi nou ngüso ongko ngü tsüchhi tünto ngüso angei tsünoi-ela: lüko loto ngüsoüh epiu naiuso Jüpo je nemtso chinyaniu. 25 ‘Lüko ngüsoüh yaang nai ngo chinyan,’ ta ngiokhem nai satkü noitsün ngio shinapao thaiutha nung sungji. 26 “Lüko Aalu-itsün nungti ngiotsüo Onthso, sau Po ainou asam dongai ngü honge, sau Po ainou shiji, apa tilai shi-e apaüh jüthaiutha mitha kiu-e. 27 Naiuso asamüh lüko mitha lükiu, tititenai asam aya ainou ngü ko noiküla.

Yohan 16

1 Asam tsüthekkatao thaiutha ngü asam tü ngio nung chiten. 2 Ngüsoüh asam Yihuda kamthang ainou wane: ah, sauhaiüh asam luate apaüh goa chhi chhiji ta yangao atao shiji. 3 Khaiunia hoi nou Po nou tsüdekünai ngü tsüngekün shioko asam da nung chhi-e. 4 Lüko tilai nung chhi nou thaiutha atao shi-e, ngü asam tü nung thaiutha ngiomka ta asamüh yangsanao thaiutha ngü asam tü nung chikü ngioji.

Ashio Onthso Chhi

Ngü nung asam tü aya ainou tsüngio, tititenai ngo asam ko noiküla. 5 Lüko lo ngo meshen hongtsün dongai khu-e; lüko asam ongko sauüh ni tai khu-e? ta ngü tü tsüsang. 6 Asam mongpem amongkia nou meaniu ta lo ngo asam tü ngio-iu. 7 Nungti lüko ngü asam tü atsüoting ngioji; ngo khunai asam thaiutha ameiting: tititenai ngo tsükhunai, Aalu-itsün asam dongai tsüshi-e; lüko ngo khunai ngü apa asam dongai honge. 8 Naiuso apa tilai shi-e, apaüh angei thaiutha, naiuso asio thaiutha, naiuso mikhem thaiutha; goumchi ko atsüowan nou mitha kiu-e. 9 Angei thaiutha, tiautenai ngüsoüh ngü da mong tsülam. 10 Asio thaiutha, tiautenai ngo Po nou dongai khu-e, naiuso loto asamüh ngo tsüeppe; 11 mikhem thaiutha, tiautenai nung goumchi nokpao mi nou khemiu. 12 “Ngü asam tü ngioao loüh ngio piakü noin, lüko asamüh nung lo tsüjeilu-e. 13 Nungti lüko tilai ngiotsüo Onthso shi-e, apaüh chikü ngiotsüo nou dongai asam nia-e: tititenai apaüh meshen chija ainou tsüchite-e; lüko tilüsong apaüh lu-e, nung apaüh chite-e: naiuso ti ashiao noin, nungso thaiutha apaüh asam hao ngela-i-e. 14 Apaüh ngo ajinka-i-e: tititenai apaüh ngü ainou lu-e, naiuso nung asam hao ngela-i-e. 15 Po nou tilüsong taim nung chikü ngü nou: nungtiphe apaüh ngü ainou lu-e: naiuso nung asam hao ngela-i-e, ta ngü ngiom.

Amongsaiu naiuso Amongling

16 “Atao letletkü noikütü nai loto asamüh ngo tsüeppe; naiuso loüh atao letletkü noikütü nai, asamüh ngo eppe.” 17 Apa sahoi ongko ajantso ngüso si ngüso chitekü ngiom, “atao letletkü noikütü nai loto asamüh ngo tsüeppe; naiuso loüh atao ‘letletkü noikütü nai’ asamüh ngo eppe: ‘tititenai ngo Po nou dongai khu-e,’” ta ngiotsün nung ti? 18 Nungtiphe ngüsoüh ngiom, Atao letletkü ta apaüh ngiotsün nung ti? Apaüh ti ngioji samüh tsünge!” 19 Ngüsoüh apa tü sangao aiuji ta Yisuüh ngekü ngüso tü ngiom, ‘Atao letletkü noiküta,’ asamüh ngo tsüeppe, naiuso loüh atao letletkü noiküta asamüh ngo eppe, ta ngionai nung thaiutha asam ongko sangelatjiso? 20 Atsüoting ngü asam tü ngio-e, Asam shape naiuso mongsaiu-e, lüko goumchi nou monglinge: asam mongmate, lüko asam amongmat nou amongling iula-e. 21 Tilai nyiuhai tsak thsohalo tao angjaji, tiautenai apa angja atao nou shisao-iu; lüko tilai apaüh methso nou haji, apaüh meshen angja beyanji, tiautenai methso tsak goumchi ko kihatsün thaiutha apa monglingji. 22 Nungtiphe lo asam amongsaiu taim: lüko ngü asam müjam epshi-e, naiuso asam mongpem monglinge, naiuso asam amongling sauüh tsütsolu-e. 23 “Nung ajekhaiu ko asamüh ngü tü ti tsüange. Atsüoting ngü asam tü ngio-e, Asamüh Po nou tü tso tsak saonai, apaüh nung asam hao jünian ko kiu-e. 24 Lo saokü asamüh jünian ko titsüo mosao: lüsao naiuso asamüh eppe, nungtiphe asam amongling saiukü iula-e.

Goumchi Chiai Shiolutsün

25 “Ngü athatluao nou asam tü nung chiten: tilai ngü asam tü loto athatluao nou tsüchite-e, lüko Po nou thaiutha khakhakü asam tü ngio-e, nungtin atao shiji. 26 Nung ajekhaiu nou ko asamüh jünian ko sao-e: naiuso asam thaiutha ngü Po nou tü sange ta ngü asam tü tsüngio. 27 Tititenai Po nou asam tü tsüojinji. Apaüh asam tsüojinji, tiautenai asamüh ngü tsüojin naiuso ngo Goa ainou shin ta monglam. 28 Ngo Po ainou shin, naiuso goumchi ai shin; müjam ngü goumchi wane naiuso Po nou dongai khu-e.” 29 Apa sahoi nou ngioji, Athaplu, “lo ni athatluao nou tsüchitekü khakhakü chiteji. 30 Ni apem ngen, naiuso sauüh ni tü sangao tsünoi ta lo samüh ngen: nungüh ni Goa ainou shin ta samüh monglamji.” 31 Yisuüh ngüso tü thala, “Lo asamüh mong lamji süne? 32 Athaplu, asam khaiunia pungkü meshen noitsün nai penge, naiuso jüpemsa wane, nungtin atao shiji, ah, nung shisao-iu; nungti lüko ngo jüpemsa tsüde, tititenai Po nou ngü ko han. 33 Ngü da asam aalu epao thaiutha ngü asam tü nung chiten. Goumchi ko asam angja omhe taim: lüko mong nou lüsong! ngü goumchi shio-iu!”

Yohan 17

Yisuüh Apa Sahoi Thaiutha Misaoji

1 Yisuüh nung ngio chiteküta aün nai thapkü ngiom, “Jüpo, atao shisao-iu; Thso nou ni ajinka-iao thaiutha ni Athso ajin aka-i: 2 tititenai ni tilüsong apa hao kiu ngüso chikü hao apaüh asaita aa nou kiuao thaiutha ni atsüojin thso apem khako apa hao oukong nou kiu. 3 Asaichi aa ta ngiotsün to Ni atsüoting Goa ta ngetsün shioko, naiuso ni sau Yisu Khrista goumchiai hong apa ngetsün tsangkü noin. 4 Ni ngao ti chhi chhiao kiu, nung chhikhemküta ngü ni goumchi ko ajinka-in. 5 O Jüpo! goumchi mosaikünai niko noinai ngo ti ajinka noiküla nung ajinka nou ni meshen ko ngo ajinka-i. 6 “Goumchi ainou khaiunia sauhai ni ngao kiu ngüso tü ngü anian achiai sung-in: ngüso ni nou noiküla, naiuso ni ngüso ngao kiu; küta ngüsoüh angio ange. 7 Tilüsong ni ngao kiu nung chikü ni ainou noin ta ngüsoüh ngen: 8 tititenai ni ngao ti ngio kiu nung ngü ngüso hao kiu-iu; naiuso ngüsoüh nung lu, naiuso ngo ni ainou shin ta ngüsoüh ngen, naiuso ni ngo hong ta ngüsoüh monglam. 9 “Ngü ngüso thaiutha sangji: ngü goumchi thaiutha tsüsang, lüko ni sauhai ngao kiu, ngüso thaiutha sangji: tititenai ngüso ni nou noin: 10 naiuso ngü nou ti, nung chikü ni nou, naiuso ni nou ti nung ngü nou; naiuso ngü ngüso da ajinkaji. 11 Ngo loto goumchi ko tsünoi-e, naiuso ngüso to noi-e, naiuso ngo adongai shi-e. Asio Jüpo! sam titi tsaklu noin, nungti ngüso lüko tsaklu noiao, ni sauhai ngao kiu, ngüso anian oukong tsangkü tsüsiokü ainou kipsankü ataiu. 12 Ngo ngüso ko noin chiküko ni ngao kiutsün oukong nou ngü ngüso jimkü noi, naiuso ngü ngüso jim, naiuso Asiongio shinapao amowanao thso nou tü simkü, ngüso ongko tsaktsüo tsümowan. 13 Lüko lo ngo adongai shiji; naiuso ngo amongling ngüso meshen chija da saiukü iulaao thaiutha ngü goumchi ko ngio nung chiten. 14 Ngü ngüso hao angio kiu-iu; naiuso goumchi nou ngüso chinyan, tititenai ngo titi goumchi ün tsüde. 15 Ni ngüso goumchi ainou nialoukü lükhu ta ngü tsüsangji, lüko ni ngüso tsümeikü ainou alulaokiu ta ngü sangji. 16 Ngo titi goumchi ün tsüde, nungti ngüso lüko goumchi ün tsüde. 17 Ngiotsüo nai ngüso alusiokiu: angio ngiotsüo noin. 18 Ni ngo titi goumchi ai hong,’ nungti ngü lüko ngüso goumchi ai hong. 19 Ngüso thaiutha ngü meshen chija losioluji nungtiphe ngüso lüko ngiotsüo nai losiolu-e. 20 “Nung thaiuthalu ngü sangji tsüde, lüko ngüso ngio tsangkü sauhaiüh ngü da monglame ngüso thaiutha lüko ngü sangji. Ngüso chikü tsaklu lünoi-i. 21 Jüpo! ni titi ngü da noin, naiuso ngo ni da noin, nungti ngüso lüko sam da anoi-i: nungtiphe ni ngo hong ta goumchi nou monglame. 22 Sam titi tsaklu noin, nungti ngüso tsaklu noi-e. 23 Ngo ngüso ko noin naiuso ni ngü ko noin, nungtiphe ngüso tsak haolu saiukü iulaao, nung thako nung goumchi nou ni ngo hong naiuso ni ngü tsüojintsünli ngüso tsüojin ta nge-e. 24 “Jüpo! ni sau hai ngao kiu, ngo ti ai noi-e, ngüso lüko ngü ko noi-e, nung ngü mongchioji; nungtiphe ngo ajinka ti ni ngao kiu, nung ngüsoüh epe: tititenai goumchi mosaikü nai ni ngo tsüojin. 25 O Asio Jüpo! goumchi nou ni tsünge, lüko ngü ni ngen; naiuso ni ngo hong ta ngüsoüh ngen; 26 naiuso ngü ngüso hao anian nge-in; naiuso loüh nge-i-e; nungtiphe ti atsüojin nou ni ngo tsüojin, nung ngüso da noi-e naiuso ngo ngüso da noi-e.”

Yohan 18

Yisu Thaloutsün

1 Nung misao saoküta Yisuüh meshen sahoi nou ko Kidron haiu etsai khun, nungai aimong tsak noiküla, nung mongai apa naiuso apa sahoi nap. 2 Lo Yihuda sauüh apa janhe, apaüh lüko akhutsün ngen: tititenai Yisuüh meshen sahoi nou ko piakü jam nung ko pheten. 3 Nungai Yihuda akong hoi naiuso nokshing nouso atengting meson nouso si Farisi nouso ainou lusankü khaiutsom tson, tsonke, naiuso sah si lai kankü nungai shi. 4 Nungtiphe Yisuüh apa da tilüsong shinape nung chikü ngekü, kha-ai khukü ngüso tü ngiom, “Asamüh sau yamji?” 5 Ngüsoüh apa tü thala, Nazaret hai Yisu. Yisuüh ngüso tü ngiom, “Ngo apa,” Yihuda sauüh apa janhe, apa lüko ngüso ko tsakü noiküla. 6 Nungtiphe tilai apaüh ngüso tü “ngo apa” ta ngiom, ngüso phiai soikü khukü goh ai khia-an. 7 Nungtiphe apaüh müjam ngüso tü sang, “Asamüh sau yamji?” Ngüsoüh ngiom, “Nazaret hai nou Yisu.” 8 Yisuüh thala, “Ngo apa ta ngü asam tü ngio-iu.” “Nungtiphe asamüh ngo yamji naito, nung khaiunia nouso lükhu-i.” 9 (“Jüpo, nung ni ngao kiutsün ongko tsaktsüo tsümowan, ta apaüh ngiotsün ngio shinapao thaiutha noiküla.”) 10 Nungai Simon Peterüh sah kankü noiküla, nung tensankü akhengting meson tsamki da he, naiuso apa noukhan uai nou heankiu. Nung tsamki nou nian Malka noiküla. 11 Nungai Yisuüh Peter tü ngiom, “Asah sahsop nai lüsop! thengkam sübao Po nou ngü hao kiu, nung ngü tsüshiu-e süne?”

Yisu Ana Khako Tsaji

12 Nungai Rom akong hoi naiuso ngüso leng, naiuso Yihudahai nokshing haiüh Yisu thaloukü ke, 13 naiuso aya nai Ana dongai nialokü khu; tititenai apa Kaifa tsammongnyiu po, naiuso Kaifa nung pon ko, Akhengting meson noiküla. 14 Khaiunia chikü thaiutha ko khaiunia tsak eao noin ta Yihudahai nokpao nokshing nouso ta alutsüo kiutsün nung Kaifa noiküla. Peterüh Yisu Tsüthalouji 15 Simon Peter Yisu phiai hoilut, loüh amao hai tsaküh hoilut. Lo nung sahoi nou Akhengting meson nou ngekü noiküla, naiuso apaüh Yisu ko Akhengting meson kamai nap; lüko Peter to kengai kuokhan nai tsakü noiküla. 16 Nungtiphe Akhengting meson nou ngetsün sahoi nou sungkü kuokhan jimtsün ko chiteküta Peter nialüthio. 17 Kuokhan nou ko nai meso nou Peter tü ngiom, “ni nung khaiunia sahoi ongko tsak süne?” Apaüh ngiom, “Ngü tü tsüde.” 18 Nungai tsamki nouso naiuso ehü nousoüh chongphe in jahkü, nungai in lamhekü tsakü noiküla: naiuso Peter lüko tsakü in lamhekü ngüso ko noiküla.

Akhengting Meson Nou Yisu Tü Sangji

19 Akhengting Meson nou Yisu tü apa sahoi naiuso apaüh tsandetsün thaiutha sang. 20 Yisuüh apa tü thala, “Ngü khakhakü goumchi tü chite-iu; Yihudahai aikü kamshitsün amkhamtsam naiuso Yihuda kamthang nai ngü asai tsande; naiuso tsamsu ai ngü ti tsüchite. 21 Ni lüko tiao ngü tü sangji? Ngü chitetsün sauhaiüh lu ngüso tü lüsang: athaplu, ngü ti ngiom ngüsoüh ngen.” 22 Tilai apaüh nung ngiom, shimkü tsakü noitsün nokshinghoi ongko tsaküh Yisu da meshen pha nou la kü ngiom, “Ni Akhengting Meson tü nungti thalajiso?” 23 Yisuüh apa tü thala, “Ngü tsümeikü chitekü noi nai, tsümeikü nou mitha akiu: lüko amei chitekü noi nai, ni tiao ngü da lahji?” 24 Nungtiphe Anaüh apa kekü Akhengting Meson Kaifa dongai hong.

Peterüh Yisu Müjam Tsüthalouji

25 Lo Simon Peter tsakü in lamhekü noiküla. Nungtiphe ngüsoüh apa tü ngiom, “Ni apa sahoi ongko tsak süne?” Apaüh tsüthaloukü ngiom, “Ngü tü tsüde.” 26 Peterüh sau noukhan heankiu, apa tsammong Akhengting Meson tsamki ongko tsaküh ngiom, “Ngü ni Yisu ko aimongai tsüep so?” 27 Nungtiphe Peterüh müjam “tsüthalou” naiuso nungailu waio nou ko.

Pailat khako Yisu Tsaji

28 Ahom ngüsoüh Yisu Kaifa dongai nou nokpao tsamai nialoukü khu; naiuso ngüso tsüngela-iau aasan sümai heao thaiutha ngüso to nokpao tsamai tsünap. 29 Nungtiphe Pailat ngüso dongai sungkü ngiom, “Nung khaiunia thako asamüh ti tsütsüokü kankü shiji?” 30 Ngüsoüh thalakü apa tü ngiom, “nung khaiunia tsümekü chhitsün tsak tsüdetünto, samüh apa ni hao thumkü tsükiu-ela.” 31 Nungtiphe Pailatüh ngüso tü ngiom, “Asamüh asam chija apa nialoukü khukü, asam ngiokhem nai noitsünli apa mi lükhem. “Yihuda haiüh apa tü ngiom, “Khaiunia luatao sam ngiokhem nai ayam tsünoi.” 32 (Nung ngio Yisuüh apa tisübao aküo in tsangkü eao noin ta ngiotsün ngio atsüoting shinapao noiküla.) 33 Nungtiphe Pailat müjam nokpao tsamai napkü Yisu jonkü apa tü ngiom, “Ni Yihudahai nokpao süne?” 34 Yisuüh thala, “Ni nung achija ngioji süne tsüdekünai amao haiüh jü thaiutha nung ni tü ngiom?” 35 Pailatüh thala, “Ngo Yihudahai süne? Ni meshen kau nou naiuso atengting mesonhoi nou ngühau thümkü kiu: ni ti chhin?” 36 Yisuüh thala, “Jü nokshing nung goumchi nokshing tsüde, jü nokshing nung goumchi nokshing tünto, Yihudahai pha nai ngo tsükiuao thaiutha jütsamki nousoüh lihe-ela: lüko lo jü nokshing to nung ainou tsüde!” 37 Nungtiphe Pailatüh apa tü ngiom, “Naito ni nokpaoka yi?” Yisuüh thala, “Ngo nokpaoka ta ni ngioji. Ngo ngiotsüo thaiutha mitha kiuao chet, naiuso nung thaiutha ngo goumchiai shin. Ngiotsüo ün nou sauhai noin ngüso apemüh jüngio angji.” 38 Pailatüh sang, “Ngiotsüo nou ti?”

Yisu Eao Khem

Nai Pailat kengchiai shiküta khaiuniahoi nouso ta ngiom, “Ngü nung khaiunia da ti tsümeikü tsüepsan. 39 Lüko Aasan Sümai taoko ngü asam dongai khaiunia tsak sokao asam sai tsak noin: nungtiphe ngü asam dongai Yihudahai nokpao sokao asamüh mongchiojimo?” 40 Nungai ngüsoüh müjam wekü ngiom, “Nung khaiunia tsüde! lüko Baraba!” (Nung Baraba laple khaiunia noiküla.)

Yohan 19

1 Nungai Pailatüh Yisu nialükhunkü shiuh-in. 2 Süpaihoi nou tsao nou thsa-ekü nokpao kandio tsak shan küta apa khaiu nai kei-i, naiuso anyakhao leng sheitho apa hao tho-in; 3 ngüsoüh apa dongai shikü ngiom, “Yihudahai nokpao meikü lünoi!” Naiuso ngüsoüh apa da meshen pha nou la. 4 Pailatüh müjam sungkü ngüso tü ngiom, “Ngü apa da ti tsümeikü tsüep ta asamüh ngeao thaiutha ngü apa asam dongai nialoukü sungji.” 5 Nungtiphe Yisuüh thsao kandio keikü naiuso anyakhao leng sheitho tholoukü sung. Pailatüh ngüso tü ngiom, “Athaplu! Khaiunia nou nungai noin!” 6 Tilai atengting mesonhoi naiuso nokshinghoi nou apa ep, ngüsoüh wekü ngiom, (Apa paiphu nai lülalut!) Pailatüh ngüso tü ngiom, “Asamüh asam chija apa nialoukü khukü paiphu nai lülalut: tititenai ngü apa da ti aphio tsüep.” 7 Yihuda haiüh apa tü thala, “Sam ngiokhem nou apa ekühao noin, tititenai apaüh meshen chija Goa Thso ta ngiom.” 8 Nungtiphe tilai Pailatüh nung ngio lula, apa tekkü hatkü noiküla; 9 naiuso apaüh nokpao tsamai müjam napkü Yisu tü ngiom, “Ni ti ainou?” Lüko Yisuüh apa hao ti athalatsün tsükiu. 10 Nungtiphe Pailatüh apa tü ngiom, “Ni ngü ko tsüchitejiso? Ni sokao ngü da oukong noin, naiuso ni paiphu nai lalutao ngü da oukong noin, ta ni tsüngeso?” 11 Yisuüh apa tü thala, “Halai nou ni hao tsükiu tünto, jü thako ni oukong ti tsü taiu-ela, lüko eh sauüh ni hao ngo thumkü kiu, apa angei songtso noin.” 12 Nungüh Pailatüh apa sokao yam, lüko Yihuda haiüh wekü ngiom, “Ni nung khaiunia sok nai, ni Kaisar hai tsüde: sauhaiüh meshen chija nokpao iulaji, apaüh Kaisar thako chiteji!” 13 Tilai Pailatüh nung ngio lula, apaüh Yisu nialoukü sung, naiuso lungpun nou lahtsün ta jontsün, (lüko Ibri ngio nou “Gabatha” ta thekü tsak ko mikhem kiutsün noikham nai apa noi.) 14 Nung Aasantsün Sümai thaiutha akhemloutsünnyi noiküla; nai anyiwem chekü nime baji thatso noiküla. Nai apaüh Yihudahai tü ngiom, “Asam nokpao, athaplu!” 15 Nungai ngüsoüh wen, “Apa lüluat! apa lüluat! apa paiphu nai lülalut!” Pailatüh ngüso tü ngiom, “Ngü asam nokpao paiphu nai lalute süne?” Atengting mesonhoi nou thala, “Kaisar chiai sam nokpao sau tsünoi!” 16 Nungtiphi Paiphu nai lalutao thaiutha Pailatüh ngüso hao Yisu thumkü kiuwan.

Yisu Paiphu nai Lalut

Nungtiphe ngüsoüh Yisu da pha nou pu. 17 Nai ngüsoüh Yisu nialoukü khukü apaüh meshen Paiphu kankü Ibri ngio nou “Golgotha” khaiuo goh ta jontsün athang tsak ai khu: 18 nungko ngüsoüh Apa paiphu nai lalut naiuso apako amao khaiunia nime, uai tsak, tsatai tsak, ta Yisu awem nai thekü lalut. 19 Loüh Pailatüh angela ao thsamsat tsak sat, küta nung paiphu chiai leplut. Nai nungko nung satkü noiküla. “NAZARET HAI YISU, YIHUDA HAI NOKPAO.” 20 Nungtiphe Yihudahai piakü nou nung asat nou welu, tititenai Yisu paiphu nai laluttsün nok shimkü noiküla: naiuso nung Ibri, Grik naiuso Latin ngio nou satkü noiküla. 21 Nungtiphe Yihudahai atengting mesonhoi nou Pailat tü ngiom, “Yihudahai Nokpao, ta lasat! lüko Ngo Yihudahai nokpao ta apaüh ngiom, nungti lüsat.” 22 Pailatüh thala, “Ngü ti satiu nung ngü satiu.” 23 Nungtiphe süpaihoi nou Yisu paiphu nai lalutküta apa nese püleao janekü ngüso pungkü haoson tsak tsak lou: lo nekhut nou achiotsünthang tsüpokü achi ainou athon saokü alatsün noiküla. 24 Nungtiphe ngüso tsaküh tsak tü ngiom, “Samüh nung lachipeko, lüko nung sau ün the-eko, nung thaiutha phung deluko.” “Ngüsoüh jü nese ngüso ongko janelou, naiuso jünekhut thaiutha ngüsoüh phung delu ta Asiongio nou ti ngiom, nung shinapao thaiutha nung sungh.” Nungti süpaihoi nou chhin. 25 Lüko Yisu paiphu shimkü apa nyiu naiuso apa nyiu ün nio, Klopa tsamko nou Mari, naiuso Mari Magdalin tsakü noiküla. 26 Tilai Yisuüh apa nyiu naiuso apaüh tsüojintsün sahoi shimkü tsakü ep, apaüh meshen nyiu tü ngiom, Nyiuhai, “athso athaplu.” 27 Nungai apaüh sahoi tü ngiom, “Anyiu athaplu! nung taoko sahoi nou apa meshen tsamai nialoukü khu.

Yisu Eantsün

28 Yisuüh loto chhi apem khemiu ta ngekü, Asiongio shinapao thaiutha, “Ngo leji” ta ngiom. 29 Nungko ehejek khiam nou meankü lak tsak noiküla: nungtiphe ngüsoüh ehejek khiam nou lüpoi tsak esop pai nai lolutkü apa son nai chilut kiu. 30 Nungti ehejek khiam nou shiukütü Yisuüh ngiom, “Nung khemlou-iu!” nai Apa khaiu ngamkü napkü ean.

Yisu tü Tsoki nai Chi

31 Nung sümai thaiutha akhemlutsünnyiphe, Yihuda Anonyi nai e mea nou paiphu nai tsütaiukü hao (tititenai nung Yihuda Anonyi ajekhaiu asong noiküla.) ngüso hok longekkü pem nou kankü khuao thaiutha Yihuda haiüh Pailat tü ngiokhem saolou. 32 Nungtiphe süpaihoi nou shikü ayating khaiunia nou naiuso amao sau apa ko paiphu nai lalut ngüso hok nou longek kiu: 33 lüko tilai ngüso Yisu dongai shi, ngüsoüh apa eankü ep, nungtiphe ngüsoüh apa hok tsülongek: 34 Nungti lüko süpaihoi ongko tsaküh lai nou apa tsoki nai chi, naiuso nungailu she naiuso khiam hongshin. 35 Sauüh ep, apaüh mitha kiu, naiuso apaüh mitha kiutsün atsüoting noin: naiuso asamüh lüko monglamao thaiutha, apaüh ti ngiom nung atsüoting naiuso apaüh nung atsüoting ngio chiteji ta ngen. 36 “Tititenai apa ou tsaktsüo tsülouthekiu,” ta Asiongio nou ngiotsün shinapao thaiutha nung chhin. 37 Naiuso loüh Asiongio ajantso ko ngiom, “Sau da ngüsoüh lai nou chi, ngüsoüh apa eppe.”

Yisu Mea Khanji

38 Nung phiai Yosep sau Arimathia noksong ainou noiküla, apaüh Pailat tü Yisu mea loao sang, (Yosep nung Yisu sahoi tsak noiküla, apa Yihudahoi nokpao nokshing lun hat nou asu ai sanglu.) Pailatüh loao shio-e ta ngioküta Yosep khukü Yisu mea lokloukü khu. 39 Nikodima sau ayanai Yisu dongai asu shiküla, apaüh lüko anganyam nyamtsün thangkoinek naiuso anganyam pai lao-etsün tsoi aupungo thatso kankü shin. 40 Nungtiphe ngüsoüh Yisu pem nou loukü Yihudahai khantsün saili, angannyamtsün jengtsaiu nouko nung ne ashethop nai tsan. 41 Apa paiphu nai laluttsün athang tsakko aimong tsak noiküla; naiuso nung aimong nai loüh khaiunia laitsüo tsütaiutingkü etam ayan tsak noiküla. 42 Nung Yihudahai sümai thaiutha akhemlou ajekhaiuphe, naiuso nungko etam shimkü noiphe, ngüsoüh Yisu nungai taiukiu.

Yohan 20

Etam Akeng

1 Anonyap ah shiothsan shakta, Mari Magdalin etam nai shi, naiuso etam khankiap lung nou lekkankü ep. 2 Nungtiphe apaüh kopkü khukü Simon Peter, naiuso amao sahoi sau Yisuüh tsüojin ngüso dongai shin, küta ngüso tü ngiom, “Ngüsoüh Apaou etam ainou kankü khuwaniu naiuso ngüsoüh apa tai wan samüh tsünge!” 3 Nungtiphe Peter naiuso amao sahoi nou nok ainou sungküta ngüne nung etam dongai khu. 4 Nai ngüne nemtso aikü kop: nai amao sahoi nou Peter shelakü aya etam shisao; 5 küta kaukü napkü akheiai thapnai, apaüh ne ashethop nou taiukü ep: lüko apa akheiai tsünap. 6 Nungko Simon Peter lüko apa phiai shikü, saitha etamkhan nai nap. Apaüh nungko ne ashethop nou taiukü ep, 7 nung ne üh Yisu khaiu lemkü khijeiküla, nung meatsan ne ashethop nou mothikü laikü khukü noiküla. 8 Nungai amao sahoi sübao etam nai aya shin, apa lüko nap naiuso apaüh epkü monglam. 9 (Apa e ainou müjam ahkü shiao noin ta ngiotsün Asiongio ngüsoüh loüh tsüngela.) 10 Nungko sahoi nou meshen tsamai laokü khuwan.

Yisu Mari Magdalin hau Eppi

11 Mari etamkhan chinai shapkü tsakü noiküla. Apa shapshapkün taoko etamkhankhei nai kauthiokü thapnai 12 apaüh aün hong nime, tsak Yisu pem taiutsün khaiu dongai, naiuso tsak hok dongai ne athaiu tenkü moknoikü ep. 13 Nai ngüsoüh apa tü, “Nyiuhai, ni tiau shapji?” ta sang. Apaüh ngüne tü thalan, “Ngüsoüh jü Apaou kankü khuwaniu, naiuso ngüsoüh apa tiai wan ngü tsünge!” 14 Nung ngioküta, apaüh kha nou phiai sheikü shinai Yisu tsakü ep, lüko apaüh nung Yisu ta tsünge. 15 Yisuüh apa tü, “Nyiuhai, ni tiauta shapji?” ta sang. “Ni sau ta yamji?” Mariüh apa nung aimong jimtsün ta yangkü, apa tü ngiom, “Asong hai, ni apa nung ainou kankü khuwankü noinai, apa tiai wan, ngü hau achite, küta ngo khukü apa kankü shi-e.” 16 Yisuüh apa tü ngiom, “Mari!” Mariüh apa dongai lapkü shikü Ibri, ngio nai apa tü, “Rabboni!” (alat nou, “Atsandetsün.”) ta jon. 17 Yisuüh Mari tü ngiom, “Ngü da lahelou.” “Tiautenai ngo loüh Jüpo dongai mosungh. Lüko jü deisinioso dongai khuküta, ngo Jüpo sau noin naiuso ngüso po, Jü Goa naiuso ngüso Goa nung dongai laokü khuji ta lüchite.” 18 Mari Magdalinüh shikü, Ngü Apaou epiu; naiuso Yisuüh apa tü ngiotsün nung ngüso tü ngiom.

Yisu Apa Sahoi Dongai Sungh

19 Nung Anonyi ahsham, phikü Yihudahai lun hat nou, sahoi nouso kou kiapkü aikü kamshikü noinai, Yisu shikü ngüso ongko awem nai tsakü ngüso tü ngiom, “Asam ko aalu lünoi.” 20 Apaüh nung ngioküta, ngüso hau apa phakha naiuso tsoki nou han. Sahoi nousoüh Apaou epnai, amongling nou meankü noiküla. 21 Yisuüh ngüso tü loüh ngiom, “Asam ko aalu lünoi. Po nou titi ngo hong nungti ngo lüko asam hongji.” 22 Nai apaüh nung ngioküta ngüso da ii matthio kiukü ngiom, “Asamüh Asio Onthso nou alou. 23 Asamüh amaohai aphio nouso wankiu naito, nung hao nung wankiuwaniu; asamüh ngüso hau tsüwankiu naito, ngüso hao nung tsüwankiu.”

Yisu naiuso Toma

24 Lüko Yisu shinai, Toma, chekü nime ongko tsak, (sau tü thsoip ta jonji) apa ngüso ko tsünoiküla. 25 Nungtiphe amao sahoi nou apa tü ngiom, “Samüh Apaou epiu!” Lüko Tomaüh ngüso tü ngiom, “Ngü apa phakha nai sonla mou nou tsüep nai, naiuso sonla muo nouko jüphakha tsüchinthiokü naito, ngü mong tsülame.” 26 Petjeinyi yankütünai, loüh sahoi nouso tsammongai kamshikü noiküla, naiuso Toma ngüso ko noiküla. Kou nou kiapankü noikü Yisu shikü ngüso ongko awem nai tsakü ngiom, “Asam ko aalu lünoi.” 27 Nungai apaüh Toma tü ngiom, “Nung ko aphakha achinthio, naiuso jüphakha athaplu, naiuso aphakha loshikü tsoki nai achinthio: küta mong tsülamkü lanoi. Ni henyitsün lülaolou küta monglamkü lüthe!” 28 Tomaüh thalakü apa tü ngiom, “Jü Apaou, naiuso Jü Goa!” 29 Yisuüh apa tü ngiom, “Ni ngo epnou shioko monglamji süne? Sauhaiüh ngo tsüep lüko monglamji ngüso thaiumei!”

Nung Thsam thaiutha Athattaiu

30 Nung thsam nai tsüsattaiuhakün amao ii athanga piakü Yisuüh sahoi khako chhin. 31 Lüko Yisu to Khrista, Goa Thso, ta asamüh monglamao thaiutha naiuso monglamkü, apa nianko asamüh aa nou epao thaiutha ngio nung satji.

Yohan 21

Yisu Apa Sahoi Chinyat Nouso Dongai Sungji

1 Nungphiai Tiberia khiamjet nai Yisuüh sahoi hau müjam achiai sungkü han; 2 Simon Peter naiuso (thso-ib thso ta jontsün) Toma, naiuso (Galil ai noitsün Kana hai) Nathanel, naiuso Zebedi thsoso, naiuso amao sahoi nime aikü noiküla. 3 Simon Peterüh ngüso tü ngiom, “ngo ngouphek khuwanji.” Ngüsoüh apa tü ngiom, “Sam lüko niko khuha-e.” Nungtiphe ngüsoüh sungkü kheng nai nap, lüko nungsu ngüsoüh ti tsütha. 4 Ajepek taoko Yisu khiam kuk nai tsa, lüko sahoi nou nung Yisu kha ta tsünge. 5 Nungai Yisuüh ngüso tü, “Methsoso, asamüh tso thamo?” ta sang. Ngüsoüh apa tü, “titso tsütha” ta thala. 6 Nai apaüh ngüso tü ngiom, “kheng uai nyao nou lüsukthio, naiuso asamüh tha-e.” Nungtiphe ngüsoüh sukthio nai ngou nou piakü thaloukü lo ngüsoüh nyao tensanao tsüshio, tiautenai ngüsoüh ngou piakü thaloukü noiküla. 7 Sahoi sau Yisuüh tsüojin, apaüh Peter tü ngiom, “Nung Apaou nou noin!” Nung Apaou nou noin ta apaüh lulanai, Simon Peterüh nekhut lolet (tititenai apa tsosa noiküla) naiuso khiamai hamthiowan. 8 Amao sahoi nouso kheng nai noikü, nyao nou ngou nou meankü haiu tsai-ai tenkü shin. Ngüso gohtsüo ainou thatü laiukü tsüdekü phasab tsom nime thatsolu noiküla. 9 Tilai ngüso gohwai nai sungh, ngüsoüh nungai inkaio tü in nyaikü, naiuso nung chiai ngou naiuso themtsai ep. 10 Nai Yisuüh ngüso tü ngiom, “Asamüh lo thatsün ngou intso kankü ashi.” 11 Nungtiphe Simon Peter kheng nai sungkü ngou asong tsom tsak aopungokü süme nou meankü noitsün nyao nou gohwai nai tensan: naiuso ngou nungti piakü noi lüko nyao to tsüchipek. 12 Yisuüh ngüso tü ngiom, “Ashi küta lühe.” Nung Apaou ta ngekü, “Ni sau?” ta apa tü sangao sahoi sauüh mong tsüsong. 13 Yisuüh shikü themtsai naiuso ngou nou semkü ngüso hao kiu. 14 Yisu ahkü shiküta sahoi hau achiai sungkü hantsün, nung samjam nou noiküla.

Yisu naiuso Peter

15 Ngüsoüh heshiuküta nai, Yisuüh Simon Peter tü ngiom, “Yona thso Simon, nung amaohai nouso konai ni ngo tekkü tsüojinji süne?” Peterüh apa tü thalan, “Ah, Apaou” “ngü ni tsüojinji ta ni ngeji.” Yisuüh apa tü ngiom, “Jü Onnemok thsoso lütsad.” 16 Yisuüh Peter tü müjam ngioshin, “Yona thso Simon, ni ngo tsüojinji süne?” Apaüh Yisu tü ngiom, “Ah, Apaou,” “ngü ni tsüojinji ta ni ngeji.” Yisuüh apa tü ngiom, “Jü Onnemok nouso lüjim.” 17 Yisuüh Peter tü, “Yona thso Simon, ni ngo tsüojinji süne?” ta samjam ngionai Peter mongmat. Naiuso apa tü ngiom, “Apaou, ni apem ngeji; ngü ni tsüojinji ta ni ngen!” Yisuüh apa tü ngiom, “Jü onnemok nouso lütsad.” 18 Atsüoting ngü ni tü ngio-e; Ni oum taoko, ni tiai khuao aiuji nungai khuao khemloukü noiküla; lüko tilai ni sunan-e, ni apha loksan-e naiuso pha ai jungkü ni tiai khuao tsüaiu nungai niakü khu-e.” 19 (Nung ngio nou Yisuüh Peter ti aküo nou ean-e küta Goa hau ajinka kiu-e ta nung thaiutha ngiokü noiküla.) Nai Yisuüh apa tü ngiom, “Jüphiai ohoilut!”

Yisu naiuso Amao Sahoi

20 Peterüh phiai sakü thapshinai, sahoi sau Yisuüh tsüojinkü noiküla, nungüh Yisu tü niolutkü noikü, “Apaou, sauüh ni kausaiate?” ta sangkü ep. 21 Tilai Peterüh apa ep, apaüh Yisu tü, “Apaou, nung khaiunia nou thaiutha titi the-e?” ta sangkü ep. 22 Yisuüh apa tü thalan, “Ngü moshikün lektso apa aa kih ao aiu lüko, athaiutha nung ti noin? Jüphiai ohoilut!” 23 Nungtiphe nung sahoi nou tsü eane ta deisinioso ongko nung ngio nou lupeng. Lüko Yisuüh apa tü apa tsüe-e ta tsüngio; apaüh ngiom, “Ngo moshikün lektso ngü apa aa kih-iao aiu lüko, athaiutha nung ti in?” 24 Nung thaiutha sauüh mitha kiuji naiuso sauüh nungso lüko sat; naiuso apaüh mitha kiutsün atsüo ta samüh ngeji.

Aphilu

25 Yisuüh chhitsün amao chhi nousoüh piakü noin. Nung apem sat tünto, nung goumchi ko ti thsamko lüko tsüthsomtaiu-ela ta ngü to yangji. Amen.