मरकुसु चेशीज सुसमाचार

जानकारी

मरकुसु चेशीज सुसमाचार होज्जु बातङहु देनज शुरु हाच्चिज्या तोह, परमेश्वरु छाङ यीशु मसीऊ सुसमाचार। "जुह किताबो यीशु पङ परमेश्वरु पूरोह होक रङ कामङ लानजया मिह चेशीज तोह। दोह होक शिक्षो देन रङ भूतोतु देन, आए मिहतु पापोतु माफ लानमो बारे चेशीज तोह। जुह किताबो यीशु मसीह आनु जङ, “मिह छाङ” लोहच्या तोह। दोह होज्जु नुस बइक्यो ताकि मिहतु जङ पापोज मुक्ति रानमो ताइएस आनु प्राण रानज गया। मरकुस यीशु वचन रङ शिक्षो देन मानी बल्कि दोह कामङहातु देन ज़ोर शेचया तोह। होज्जु नुस दोहस दोह कथ्या पङ सीधा, आसान आए ज़ोरदार ढंगीस जाङचिज्या तोह। यूहन्ना बपतिस्मा रानज्या रङ यीशु बपतिस्मा निम दोह परीक्षो दोकिच़ देस जानकारीऊ निम, किताब चेहज्या फटक यीशु चंगाइ रङ आए शिक्षा सेवा लानमो बारे रिङज्या तोह। हालिङ-हालिङ वक्त बितेदो ब्योक, होदेइ-होदेइ यीशु युमस वेनज़गा, आए ओभोल सोमझेझे ब्योक्याश, पर यीशु विरोध लानजगा आए ली बोदी तेज हाच्चो ब्योक्याश। आखरी अध्याय यीशु धरतीऊ जिन्दगीऊ आखरी सप्तो घटनगातु बारे जाङचिज्या तोह, जुगोतु माजो मुख्य होज्जु तोह, दोह जङ क्रूसो शेनमो आए दोह हेस्स शङमो।

1

यूहन्ना बपतिस्मा रानज्यो प्रचार

1 परमेश्वरु छाङ यीशु मसीऊ सुसमाचारु शुरुवात। 2 हाल्लाहि परमेश्वरु बातङ रिङजया यशायाह आनु किताबो चेहचेह रुह। खिऊ ! गह आङ दूतु जङ कान ओमसी शेदो रुग। हाइसी कान ताइएस ओम्म तैयार लानतो। 3 बोनिङहो इद टोकेच्यो शाद थासमो बदो रुह, “प्रभु ओम्म तैयार लानी, आए दोह सोलकेतु सोलडा लानी।” 4 होज्जु नुस यूहन्ना बोनिङहो प्रचार लानो रङ बपतिस्मा रानो बइक्यो। आए मिहतु लोच तेक्यो, “पापु ओम्मू छारयाया बपतिस्मा ऊन्नही, छुलोनमा परमेश्वरीस किनजू माफ लानचिज गया। 5 यहूदिया प्रदेशोज रङ यरुशलेम निजगा चइ मिह वेनवेन दोह दवा बइक्याश आए आनेतु पापोतु लोचिस, यरदन नदीयो युहन्ना दोक्च बपतिस्मा ऊनगयाश। 6 युहन्ना ऊंटू रोमङहातु गास्सा गाजिस निज तेक्यो आए आनु गाछकोओ चमड़ो गाछिङ छुहछुह निज तेक्यो। आए पटकुवगा रङ बोनिङहु वास्स जाज्या तेक्यो। 7 आए होज्जे लोच तेक्यो, आङ युमसी हाति बनमो रुह, दोह आङहोज बोदी सोतिङस्‍या तोह। गह शकोम हाचिस दोह पोनातु तस्मगा तोङमो काबिल ली माएक। 8 गत्ता किनजू तिहस बपतिस्मा केकिक, पर दोस्स किनजु चोकोस आत्मास बपतिस्मा केतो

।यीशु बपतिस्मा रङ परीक्षा

9 दोइ दयारोपो यीशु गलील प्रांन्तु नासरत गाँनिङज बहबह, यरदन नदियो युहन्ना दोक्च बपतिस्मा ऊनगयो। 10 आए तेरङहि दोह तिऊ कुमोज बेरिङ दोइक्यो, देरङहि दोहस्स सोरगङ दोङज ताङगयो, आए पवित्र आत्मा पङ कबूतर गान आनु थोग जाबच ताङगयो। 11 आए सोरगङहोज होज्जय बातङ थासमो बइक्यो, “काह आङ बेन्नङहु छाङ तन, गह कान दोक्च खुश तुक”। 12 दोनिम सिरिक पवित्र आत्मास दोपङ ‍जांगालु बिलङ फयोक्‍यो। 13 जांगालो निश-नेजा दयार स्तङ शैतानीस दोह पोरखयागयो, आए दोह जांगालो जानवरो रङ निगयो आए दोह सेवा परमेश्वरु दूतोस लानो तेक्याश।

यीशु सेवा लानमो शुरुवातु बारे

14 युहन्ना पङ जेलो शेनमो निम, यीशु गलील बहबह परमेश्वरु राजु दामक खबर लोच तेहक्यो। 15 यीशुस लोइक्‍यो वक्त पूरोह हाचिस तोह, आए परमेश्वरु राज ओशको बहबह तोह, पापोज मोनङ स्कावलि आए दामक खबरु देन विशवास लानी।

यीशुस पह मच्छली चुमजगातु आरयामो

16 गलीलु सोरङहु नङस बयोमो बेरङ, यीशुस शमौन रङ दोह बाइच अन्‍द्रियासु सोरङ जाली शेच ताङगयो, छुलोनमा दोसङ मछली चुमजगा तेक्याश। 17 यीशुस दोसङहू लोइक्यो, आङ निमस्कोज जीरिच, गह किसीऊ जङ मिहतु चुमजगा मच्‍छवारगा बनजयाचुक। 18 दोहसङ फटक जालीगा शोठ्ठयाया दोह निमस्‍कोज हाचिगयाश (ब्योक्याश)। 19 दोक ओमस्को बयोमो निम, दोहस जबदीयु छाङहा याकूब रङ युहन्ना पङ किशतीउ देन जाली ओभोल लानज ताङगयो। 20 दोहस देरङहि दोसङहू जङ आरयागयो आए दोहसङ आनु बाबा जबदी पङ कामङ लानजगा रङ किस्तीऊ देन शोठ्ठयाया, दोह निमस्कोज ब्योक्याश।

यीशुस भूत लागेच मिह पङ चंगा लानमो

21 दोनिम दोगो कफरनहूम बइक्याश, आए यीशु फटक यहूदीगातु आराम लानमोग दयार दोगोतु आराधनालय ब्योब्यो उपदेश रानमो देगयो। 22 आए मिहस दोह उपदेश थासथास हैरान हाचिगयाश, छुलोनमा दोहस दोगोतु शास्‍त्रीगातु गान मानी, पर होकदार गान उपदेश रानो तेक्यो। 23 होदेबेरोइ दोगोतु आराधनालय इद भूत लागेच मिह तेक्यो। 24 दोहस टोकेके लोइक्यो, हे यीशु नासरी, निङजु कान रङ छौग कामङ? काह छौग निङजु खत्म लानचिमो बहबह तना? गह कानजू नेजिच्या तुक, काह हात तन? परमेश्वरु चोकोस मिह। 25 यीशुस दोह पङ डाँटयाया लोइक्यो, चुटू निऊ, आए दोगोज दोहदोह बयो। 26 दोनिम भूतिस दोह पङ मेक्याया आए जोरीस टोकेके दोह कुमोज बयोक्‍यो (दोइक्यो)। 27 जुह निम चइ मिह बिशारेक्याश (हैरान हाचिस), आए आनेतु माजिङहो बहस लानो तेक्याश, जु छौग बातङ तोह? जु छौग दह न्यूग उपदेश तोह, दोह होक (अधिकार) रङ भूतोतुली आदेश रानज्या तोह। आए दोगो यीशु आदेश मोनयाजगा तिश। 28 आए दोह नामङ (फटक), होज्जयी गलीलो नेसलोह चइ परदेशोपो मशूर हाचिगयो।

यीशुस मुलूक चोचातु चंगा लानमो

29 यीशु फटक यहूदीगातु आराधनालयज दोहदोह याकूब आए यूहन्ना, रङ शमौन आए अन्द्रियासु किमो ब्योक्यो। 30 शमौनु युम्मे बुखारीस चोचो तेक्यो, आए दोगोस फटक दोह बारे दोपङ लोइक्याश। 31 दोनिम दोह ओशको ब्योब्यो दोह गोद चुमचुम दोपङ सारगयो, आए दोह बुखार जाबक्यो। दोनिम दोहस दोगोतु सेवा लानमो देगयो। 32 शुपेलिङ तेबेरोइ वेन रेक्यो दोनिम मिहस चइ मरीजोतु रङ भूतो लागेचातु, दोह दवा करगयाश। 33 आए‍ चइ नगरी खोलु दोङ जामशीगयाश। 34 दोहस मुलूक मिहतु, हातेइ भान्बान्‍ते पीरङस चोचो दुखङस तेक्याश, चंगा लानगयो। आए मुलूक भूतोतु तोइक्यो, आए भूतोतु बातेस्मो मा शेक्यो, छुलोनमा दोगोस यीशु पङ शेचगा तेक्‍याश।

यीशुस एकान्नङ प्रार्थना लानमो बारे

35 सोम-सोमसी साङ रातिङहि, लाए हाचिमोगोज मुलूक ओम्मसी, यीशु सारशीस दोइक्‍यो, आए जंगली जागोह ब्योक्यो। आए होदाह प्रार्थना लानमो देगयो। 36 दोनिम शमौन रङ दोह कोनया यीशु पङ पोचो ब्‍योक्याश। 37 यीशु पोरेनमो निम, दोपङ लोइक्याश, चइ मिहस कानजु जङ पोचो रूश। 38 यीशुस दोगोतु लोइक्यो, “जइ, किशा हाम नेस-लोह आए गोनिङहापो ब्योमे छुलोनमा गह होदोरली प्रचार लानज गयाक, होज्जु नुस गह दोहदोह तुक।" 39 होज्जु ताइएस यीशु चइ गलीलो, यहूदीगातु आराधनालयगापो ब्योब्यो प्रचार लानो आए भूतोतु त्वादोह निज तेक्यो।

यीशुस कोढ़स्या मरिजू चंगा लानमो

40 इद कोढ़स्या मिह यीशु दवा बइक्‍यो, दोहस दोह दोक्च अर्जी लानगयो, आए दोह ओमस्को पशबाङ रेबरेब दोपङ लोइक्‍यो, अगर कान इच्छा निमा, काह आङजु शुध्द लानचिमो थान तन। 41 यीशुस दोह देन तरस ताङताङ गोद बढ्‍ढयागयो आए दोपङ छुयाया लोइक्‍यो, आङ इच्छा रुग, काह हुन्नइ शुध्द हाच्च। 42 दोनिम देरङही दोह कोढ़ बिगयो, आए दोह शुध्द हाचिगयो। 43 दोनिम यीशुस, दोपङ फटक चेतावनी रानरान शेक्यो। 44 आए दोपङ लोइक्यो, "खिऊ, हातुइ छच़ी थाह लोहरा, दोहली ब्योब्यो, कान डेयङहु याजकु जाङ, चोकोस हाचिमो ताइएस छोगिङ (आज्ञा) रिति मुसास रिङ-रिङ रुह, होदेइ भेंट चढयो, छुलोनमा दोगो देन गवाइ निज गया। 45 पर दोनिम दोहस बेरिङ ब्योब्यो, जुह बातङहु मुलूक पराक्यो, होज्जु नुस यीशु पङ हेस्स चइकेतु ताङमोगो नगरो ब्योमो मुशकिल हाचिगयो। दोहच यीशु बेरिङ जांगालेपोस निज तेक्यो, आए चइ बिलङज मिह दहदह दोह दवा बच तेक्याश।

2

यीशु लकवो रोगी पङ चंगा लानमो

1 दोक दयारेज दोह कफरनहूम बइक्यो, आए मिहस थासगयाश, दोह किमो बहबह तोह। 2 दोनिम होनेस मिह जामशीगयाश, खोलु दोङ जागाह मा दाक्चीगयो, आए दोहस दोगोतु बोचोन सुन्याज तेक्यो। 3 आए मिहस इद अधरङगु मरिजू, पह मिहतु जङ थोमो शेहशेह, दोह दवा करगयाश। 4 दोनिम दोगो भीडू ताइएस, दोह ओशको ब्योमो मानक्याश, दोनिम दोगोस छापरङ टाइक्याश, हाति किमो यीशु तेक्यो, आए दोगोस छापरङ नेस लानमो निम। दोह चारपाइ पङ, हातुइ देन दोह लकवो मरिज तेक्यो, योग रानगयाश। 5 यीशुस दोगोतु विशवास ताङताङ, दोह लकवो मरिजू जङ लोइक्यो, आङ छाङ! कान पाप माफ हाचिगे। 6 दोनिम मुलूक शास्‍‍त्रीगा, हातेइ होदाह तोशीस तेक्याश, आने-आनेतु मोनङहो सुनच्याशीमो देगयाश। 7 जुह मिह होज्जय छुह लोच्या तोह, जुहदह परमेश्वरु निन्दा लानचया तोह, परमेश्वरु अलावा हाइस पाप माफ लानमो थानतो। 8 यीशुस फटक आनु आत्मो नेह गयो, दोगोस आनू-आनू मोनङ होज्जय सुनचयाशो रुश। आए दोगोतु लोइक्यो, किह होज्जय छुह सुनच्याशो रुइ? 9 आसान छौग तोह? लकवो मरिजू होज्जय लोनमोहा, कान पाप माफ हाचिग या होज्जय लोनमो, सारश कान चारपाइ थोह, आए वेन। 10 दोहली गह किन दवा साबित लानताक, जुह धरतीऊ देन मिहु छाङहु जङ, जुह होक रुह, दोहस पापोतु माफ लानजगया। आए यीशुस दोह लकवो मरिजू लोइक्यो। 11 गह कानजु रिङहो रुग, सारश, कान चारपाइ थोहथोह, कान किमो ब्योह। 12 दोह सारशीस आए फटक चारपाइ थोहथोह चइकेतु ओमस्कोज दोहदोह ब्योक्यो, होज्जु देनज चइ बिशारेक्याश आए परमेश्वरु तारिफ लानमो देगयाश, होज्जदह निह चोंगे मा ताङगीमा।

यीशुस लेवी पङ आरयामो

13 दोह हेस्स दहदह गलीलु सोरङहु नङ ब्योक्यो, चइ मिगा दोह निमस्कोज ब्योक्याश, दोनिम यीशुस दोगोतु उपदेश रानगयो। 14 ब्योमो बेरङ यीशुस हलफयु छाङ लेवी पङ चुंगी उनमोग जागोह तोशीस ताङगयो, आए दोहपङ लोइक्यो, "आङ निमस्कोज जोह, "दोनिम दोह सारशीस यीशु निमस्कोज हाचिगयो। 15 तेबेरोइ यीशु दोह किमो खाऊ ज़ामो तोशीगयो, देबेरो मुलूक चुंगी ऊनजगा रङ पापिगा, यीशु रङ आए दोह चेलगा रङ खाऊ ज़ामो तोशीगयाश, आए होदाह होज्जयी मुलूक मिह तेक्याश, हातेइ यीशु निमस्कोज हाचिस तेक्याश। 16 नियमोतु सिखयाजगा हातेइ फरीसीगास तेहक्याश होज्जय ताङताङ जुहदह पापिगा रङ आए चुंगी ऊनजगा रङ एकै खाऊ जोह रुह, दोह चेलगातु लोइक्याश, दोह पापीगा रङ आए चुंगी ऊनजगा रङ एकै छुह जाज्या, तुङज्या तोह। 17 यीशुस होज्जय थासथास दोगोतु लोइक्यो, भला चंगा मिगातु आमजी जरुरत मानीजया नितोह, गह धर्मीगातु मानी, पापिगातु आरयामो बहबह तुक

उपवाससु बारे सवाल

18 इपा युहन्ना बपतिस्मा रानज्यो चेलगा रङ फरीसीगा व्रत तोह तेक्याश, दोनिम इदे मिह यीशु दवा बहबह होज्जय एक्याश, युहन्नो चेलगा रङ फरीसीगातु चेलगाह व्रत छुह ताजगा तिश, आए कान चेलगा छुह व्रत मा ताजगा तिश। 19 यीशुस दोगोतु लोइक्यो, लाडा तेबेर स्तङही जान्या रङ नितोह, दोगोस व्रत लानताशा? आए तेरङ स्तङही लाडा दोगो रङ तोह, दोहस स्तङ दोगोस व्रत मा लानश। 20 दोहली जुह निम होनेस्के दयारो बतिश, देबेरोइ लाडा पङ जान्या दोक्च याइ लानताश, दोह वक्तो दोगोस व्रत लानताश। 21 न्यूग गास्सू टालङ ऊशक गास्सोह हाइसी मा शेत, छुलोनमा दोह न्यूग गास्सू टालङ सिकुडेतोह, दोनिम ऊशक गास्सू आए थरस्तो, दोनिम दोह ओमचोज ली बोदी जेरतो। 22 न्यूग शुध्दुङहु ऊशके खुलेपोस हाइसी माताश, छुलोनमा शुध्दुङस खुलेतु चेरतो, आए अगूंरी रङ खुलेह निशमी खत्म हाचिस, दोगिता न्यूग शुध्दुङहु जङ न्यूगे खुलेपोह पङताश।

यहूदीगातु आराम लानमोग दयारु बारे सवाल

23 होज्जय हाचिगयो, यीशु यहूदीगातु आराम लानमोग दयार रिमापोस हाचिस ब्योच तेक्यो, आए दोह चेलगास वेनबेरो छवातु बाल्ला चुनज तेक्याश। 24 दोनिम फरीसीगास दोह पङ लोइक्याश, खिऊ, जुगोस आरामू दयार जुह कामङ छुलानो रुश, छगिङ लानमो नियमोतु खिलाफ तोह 25 दोहस दोगोतु लोइक्यो, “किह छौग होज्जय चोंगे मा हुशीगेया, तेरङहि दाऊदु जरुरत खाम्मोग, आए तेबेरोइ दाऊद रङ दोह कोनया उपासङ तेक्याश, दोनिम दोहस छौग दाक। 26 दोहस हाल्ला अबियातार महायाजकु वक्तो, परमेश्वरु मन्दिरो ब्योब्यो, भेंट चढयाशीजा रोटे जामोग, आए दोह रोटेतु याजकोतु सिवाय आए हातुइ ज़ामो दाम बातङ मानीजया निहतोह, आए आनु कोनयातु ली रानमोग। 27 दोनिम यीशुस दोगोतु लोइक्यो आराम लानमोग दयार मिहतु भलाइयु ताइएस बन्याशीज तोह, पर मिह आराम लानमोग दयारु ताइएस मा बोन्याशीज तोह। 28 होज्जु नुस मिहऊ छाङ सब्तु दयारु ली मालिक तोह।

3

छारज गोदस्या मिह पङ चंगा लानमो

1 दोह हेस्स यहूदीगातु आराधनालय ब्योक्यो, दवा इद मिह तेक्यो, हातुइ गोद छारछार रुगयो 2 दोगो यीशु देन इल्ज़ाम शेनमो ताइएस दोह ताको तेक्याश, खिहखिह निमेह दोहस दोह पङ आरामू दयारो चंगा लानतो या मा लान। 3 यीशुस छारज गोद स्या मिह पङ लोइक्यो, माजिङ डेन हाच। 4 दोहस मिहतु ऐक्यो, “आराम लानमोग दयार किशो उसूल छौग लानमो अनुमति केच्या तोह? हातु दाम लानमो ठीक तोह या हानि? हातु जिन्दगी बच्यामो दाम तोह या सानमो? दोहली दोगो चुटू तेक्याश। 5 दोहस दोगोतु मोनङ काठस ताङताङ दुखी हाचिस, दोगोतु रोषङस चइ बिलङ खिहगयो, आए दोह मिह पङ लोइक्यो, “कान गोद बढ्‍ढयो”। दोहस बढ्ढयागयो, आए दोह गोद ओभोल हाचिगयो। 6 दोनिम फरीसीगा बेरिङ ब्योब्यो फटक हेरोदिगा रङ दोह खिलाफ राया लानमो देगयाश, दोह पङ हाल्ला सानमे।

भीडू यीशु निमस्कोज हाचिमो

7 यीशु आनु चेलगा रङ गलीलु सोरङहु बिलङ ब्योक्यो, दोह निमस्कोज तेग भीडू ब्योक्याश। 8 आए यहूदिया, यरुशलेम, इदुमिया रङ यरदनु नदिऊ नङ जगाह, आए सुर रङ सैदा देशङहु नेस लोज मुलूक मिह होज्जय थासथास दोह दवा बइक्याश, किह दोहस हाल्ला बिशारेनमोगा कामङ लानचया तोह। 9 दोहस आनु चेलगातु लोइक्यो भीडू नुस इद गाट्टो किशती आङ ताइएस तैयार ताहरे, छुलोनमा दोगोस आङजु मा टेमचिज गयाश 10 छुलोनमा दोहस मुलूक मिहतु चंगा लानलान रुगयो, होज्जु नुस तोइंङ मिह पीरङहा तेक्याश, दोह पङ छुयामो ताइएस दोह देन छोकोलशो ब्योच तेक्याश। 11 आए हातेतुइ भूतो लागेगे तेक्याश दोगो मिह दोह पङ ताङबेरो दोह ओमस्को बरालचगा तेक्याश, आए टोकेके लोचगा तेक्याश, काह परमेश्वरु छाङ तन। 12 आए यीशुस भूतोतु पक्का आदेश रानगयो हातुइ थाह लोहरे दोह हात तेहक।

सोनिश प्रेरितोतु चुनयामो

13 दोनिम दोह डोखङहु थोग ब्योक्यो, आए हातेतुइ दोहस गयाच्या तेक्यो, दोगोतु आनु दवा आरयागयो, आए दोगो दोह दवा बइक्याश। 14 जुह दोङज दोहस सोनिश मर्दोतु चुनयागयो, आए दोगोतु प्रेरितो लोइक्यो। ताकि दोगो दोह रङ निजगयाश, आए दोहस दोगोतु शेच गया, दोगोस प्रचार लानज गयाश। 15 आए भूतोतु तवानमो जङ हक ताज गयाश। 16 दोगो जुगो सोनिश मिह तिश, शमौन हातुइ नामङ यीशुस पतरस तागयो। 17 आए जबदीऊ छाङ याकूब आए याकूबु भाइच युहन्ना, हातुइ नामङ दोहस बुअनरगिस, "मतलब" गुरगुरी गान ताहगयो 18 आए अन्द्रियास, फिलिप्पुस, बरतुलमै, मती रङ थोमा, आए हलफयु छाङ याकूब, तद्दै रङ शमौन देश भक्त 19 आए यहूदा इस्करियोती हाइसी दोहपङ चुम्मो शेनमोग।

यीशु रङ बालज़बूल

20 दोनिम दोह किमो बइक्यो आए होनेस भीडू जामशीगयाश दोगोस खाऊ ज़ामो ली मा फारयागयाश 21 तेबेरोइ दोह पेरङहास होज्जय थासमोगा, दोनिम दोह पङ चुम्मो ताइएस दोइक्याश, छुलोनमा दोगो लोशीज तेक्याश, दोह मोनङ ठिकाने मा रूह। 22 यरुशलेमज बचगा शास्त्रीगा ली होज्जय लोच तेक्याश, “दोह कुमो बालज़बूल तोह” आए दोहस भूतोतु राजो मददिस भूतोतु तोच्या तोह। 23 होज्जु ताइएस यीशुस दोगोतु आनु दवा आरयाया, दोगोतु कोथ्यागापो सोमझयाज तेक्यो, शैतानीस हाल्ला शैतानु तवातो? 24 अगर हातु राज फूट देमा, दोनिम दोह राज हाल्ला बोन्नेने नितोह? 25 आए अगर हातु किमो फूट देमा, दोनिम दोह किम हाल्ला बोन्नेने नितोह? 26 होज्जेइ अगर शैतान आनुइ खिलाफ हाचिस आनुइ कुमो फूट शेनमा, दोह हाल्ला बोन्नेने नितोह? दोहता राज खत्म हाच्चो। 27 पर हातली मिहस हात बलवानु किमो घूस्से दोह माल लुटयामो मान, दोहस स्तङ मान, तेरङ स्तङ दोहस ओमस दोह बलवानु माछुत, दोनिम दोह किमु लुटयातो। 28 गह किनजु सच रिङहो रुग, मिहतु चइ पाप रङ परमेश्वरु निन्दा, आए छगाइ दोगोस लानताश दोगो माफ हाचिम ली थानताश। 29 दोहली हाइसी चोकोस आत्मो खिलाफ निन्दा लानतो, दोह पङ चोंगे ली माफी मा पोरेत: छुलोनमा दोह चोंगे खत्म मा हाचिज्या पापु अपराधी नारशो। 30 यीशुस जुह बातङ होज्जु ताइएस लोइक्यो दोगोतु माजो आधङ मिह लोशो तेक्याश, “दोह कुमो भूत घूस्से तोह”

यीशु आम्मा रङ भाइचा

31 दोनिम दोह आम्मा रङ दोह भाइचा बइक्याश, आए बेरिङ डेन हाचिस, दोह पङ कुनमो शेक्याश। 32 भीड़ दोह नेस लोह तोशीस तेक्याश, दोगोस दोह पङ लोइक्याश, "खिऊ" कान आम्मा रङ कान बाइचास बेरिङ कानजु पोचो रुश? 33 दोहस दोगोतु जबाव रानगयो, आङ आम्मा रङ आङ बाइचा हाते तिश? 34 आए दोगोतु देन हातेइ दोह नेस लोह तोशीस तेक्याश, नज़रो शेहशेह लोइक्यो, “खिह, आङ आम्मा रङ आङ बाइचा जुगो तिश! 35 छुलोनमा हात्तेइ परमेश्वरु इच्छा देन वेनज़गा तिश, दोइ आङ भाइच रङ रिङज आए आम्मा तोह।"

4

बातङहातु पारशी लोनमो

1 यीशु हेस्स सरोङ नङ उपदेश रानो तेक्यो, आए होनेस बोदी भीडू, दोह दवा जामशीगयाश, दोनिम दोह सोरङहो इद किशतीउ देन ब्योब्यो तोशीगयो, आए चइ भीडू धरतीऊ देन सोरङ नङ तेक्याश। 2 आए दोहस दोगोतु पारशी लोहलोह मुलूक बातङहा सुनयाज तेक्यो, आए आनु उपदेशो दोगोतु लोइक्यो। 3 “थासी! इद पशच्या मिह बीङ पशमो दोइक्यो। 4 पशमो बेरङ दोक ओम्मू नङ दाइक्याश, आए प्याच़ा बहबह बिङहातु रोगशीगयाश। 5 आए दोक बिङहा पानछाल माटिङहु देन दाइक्याश, होदाह बिङहातु बोदी माटिङ मा पोरेक्यो, आए डुगस माट्टिङ मा पोरेनमो निम फटक सुगयो। 6 आए तेबेरोइ वेन जरगयो, देबेरो दोह नालगयो, आए जिलङ माट्टिङ बोदी योग मा निमो नुस छारगयो। 7 दोक झाटङपो दाइक्यो, आए झाटङहा बोलबोल दोह छवापङ टेमगयाश, आए दोगो सीलङ मा देगयो। 8 पर दोनिम दोक बिङहा दाम माटिङहु देन दाइक्याश, आए दोगो सुगयाश, आए बोलबोल सीलङहा देगयाश, आए इदेस नेजो साये गुना, आए इदेस शुम नेजा गुना, आए इदेस राह गुना फोसोल करगयाश। 9 दोनिम दोहस लोइक्यो, “हातुदाइ थासमो ताइएस कानङहा रुइ, दोगोस थासी।

पारशीगा लोनमोगु मतलब

10 तेबेरोइ दोह ऐच्छि तेक्यो, देबेरो दोह बातङ रेनचिजगा रङ दोह सोनिश चेलगास दोह दोक्च जुगो पारशीगातु बारेओ ऐक्याश। 11 दोहस दोगोतु लोइक्यो किनजु परमेश्वरु राजु भेद पोरेरे रुइ, पर बेरिङ जगातु ताइएस चइ बातङ पारशीगापो तिश। 12 होज्जु ताइएस दोगोस खिह बेरो ताङजगयाश, आए दोगोतु पता मा चालेच गया, आए थास बेरो थासच ली गयाश आए मा सोमझेच गयाश, होज्जय मा हाचिज गया, दोगोस परमेश्वरु बिलङ मोनङ स्कवालज गयाश आए माफी पोरेच गया।

यीशुस बीङ पशमोग पारशी पङ सोमझयामो

13 दोनिम यीशुस दोगोतु लोइक्यो किह छौग जुह पारशीगातु मा छागेया, दोहच हाल्ला चइ पारशीगातु छातइ? 14 पशच्या मिहस परमेश्वरु बोचोन पशतो। 15 हात्तेइ ओम्मू नङ जगाह तिश, हामि बोचन पशते, जुगो दोगो मिह तिश हातेसी बोचन थासमोगा, दोनिम शैतान फटक बहबह बोचोनु हामिङहि पशपश रुगीमे, थोहथोह फयोमोग। 16 होदेइ छोगिङ पानछाल माटिङ पशते, जुगो दोगो तिश, हातेइ बोचोनु थासथास फटक खुशीस मोनयाताश। 17 पर आनु कुमो जिलङ मा निमो ताइएस, दोगो दोक दयारुइ नितिश, जुनिम तेबेरोइ बोचोनु ताइएस दोगोतु बिलङ दुखङ रङ विरोध (सत्याताश) हाच्चो। देबेरो दोगो फटक ठोकर जातिश। 18 हातेइ झाटङहा पो पशकिमे, दोगो जुगो तिश, हातेसी बोचोनु थासमोगा। 19 आए जिन्दगीऊ फिकोर रङ धनु धोखा, आए हाइदे चीजोतु लालच दोगोतु कुमो बहबह बोचोनु टेमताश, आए दोहस फसोल माकर। 20 आए हातेइ ओभोल माटिङ पशकिमे, जुगो दोगो तिश, हातेसी बोचोनु थासथास मोनयाताश आए फोसोल करताश, इदेस नेजो साये, इदेस शुम नेजा, इदेस राह गुणा।

यीशुस दिवो कोथ्या लोहलोह पारशी सोमझयामो

21 यीशुस दोगोतु लोइक्यो दिवा पङ होज्जु ताइएस करतेहा, दोह पङ जङ हातली बानिङहु या पलंग योग तामोजङ? छौग चाढङ तामो ताइएस मानिहा? 22 छच़ी चीज़ माङशीस माय, छोगिङ ताङमो माबत आए नाता छच़ी बातङ गुप्त तोह, पर होज्जु ताइएस तोह दोह चइस नेचगयाश 23 अगर हात्तुइ थासमो जङ कानङ रुइताह दोगोस थासी। 24 दोनिम दोहस दोगोतु लोइक्यो, चौकस निह, किह छौग थासो रुइ, छगिङ बर्ताव किह लानो रुइ, होदेइ बर्ताव किन रङ ली परमेश्वरस लानतो, आए किन रङ बोदी लानतो। 25 आए हातुदाइ रुह, दोह पङ आइ पोरेतो, आए हातुदाइ मा रुह, दोह दोक्च, दोह ली छगिङ दोह दवा रुह उनताश।

सुजया बीयङहु कोथ्या

26 दोनिम दोहस लोइक्यो, “परमेश्वरु राज होनेस तोह, हाल्लाइ इद मिहस रिमो बीङ पशतो, 27 आए शुप्पा याक्शो, आए लाये सारशो, आए दोह बीङ होन्ने सुमा आए बोढेनमा, दोह पङ पता मा चालेनमा। 28 धरतीस आनीस छवा पङ सुमो शेतो, ओमस परोलेतो, दोनिम सीलङ आए सीलङ तैयार बीङ। 29 आए तेबेरोइ बीङ फटक पाकेतो, देबेरोइ दोहस फटक जितरङ शेतो, छुलोनमा लाम्मोग वक्त बहबह तोह।

राइउ बीयङहु पारशीयो लोनमो

30 दोनिम यीशुस लोइक्यो, “किशा परमेश्वरु राजु बराबरी हात रङ लानमे, आए हात पारशी रङ दोह बयान लानते? 31 दोह राइउ बीङ गान तोह, तेबेरोइ माटिङ पशते, देबेरो धरतीऊ चइ बिङहा पोज गोट्टोह नितोह। 32 दोहली पशमो निम, दोह सुहसुह चइ बालङहापोज तेग हाच्चो, आए दोगो होनेस तेगे बाराह दोतिश, दोनिम सोरगङहो पया दोह छादरङ वाह बन्यामो थानताश। 33 दोहस दोगोतु होजेस्के मुलूक किस्मु पारशीगा लोहलोह, तोइङ दोगोस सोमझेतिश होदोइ परमेश्वरु बोचन पारशीगापो लोच तेक्यो। 34 बगैर पारशीगातु दोहस दोगोतु छच़ी मा सोमझयाज तेक्यो, पर एकान्नङ दोहस आन्नु खास चेलगातु चइ बातङहातु मतलब सोमझयाज तेक्यो।

यीशुस लिहलानु थोम्यामो

35 दोइ दयार, शुपेलिङ हाचिमो निम, यीशुस चेलगातु लोइक्यो, “पइ, किशा सोरङहु नङ ब्योमे।” 36 आए दोगोस भीडू जङ शोठ्ठयागयाश, चेलगा दोह किशतीयो ब्योक्याश हाति किशतीयो यीशु तेहक्यो आए होदेइ दोह पङ फ्योक्याश, होदाह आए ली किशतीगा तेक्याश। 37 फटक मुलूक लिहलान बइक्यो, आए तिऊ लहरो किशतीउ देन होन्ने बच तेक्याश, दोह तिहस बङज तेक्याश। 38 दोहली यीशु किशतीउ निमस्को बिलङ यागशीस तेक्यो, दोनिम चेलगास दोह पङ सारसार लोइक्याश, गुरु जी, कानजु फिकोर मा हाच्चो रुहा, किशा शिमो रुहमे? 39 दोनिम दोहस सारशीस लिहलानु हुकुम रानगयो, आए तिह पङ लोइक्यो, “चुटू निऊ, डेम” आए लिहलान डेमक्यो आए मुलूक शान्ति हाचिगयो। 40 आए चेलगातु लोइक्यो, “किह छुह ब्याङचगा तइ? किनजु छौग हुनस तङ विशवास मा रुइया?” 41 दोगो मुलूक ब्याङक्याश आए आनेतु कुमो लोशीगयाश, “जु हात तोह, लिहलान रङ तिहस ली दोह हुकुम रेनचो रुश?

5

भूत लागेच मिह पङ ठीक लानमो

1 दोगो सोरङ नङ गिरासेनिगातु देशङ पइक्याश, 2 तेबेरोइ दोह किशतीउ देनज जाबक्यो, दोनिम फटक इद मिह हातुइ कुमो अशुद्ध आत्मा तेक्यो, ऐलिङहापोज दहदह दोह पङ छुगशीगयो। 3 दोह ऐलिङहापो निज तेक्यो, आए शाङलिङस छुनमो जङ दोह पङ हाइसी मानज तेक्याश। 4 छुलोनमा दोह पङ बार-बार बेडिगा रङ शाङलिङस छुहछुह रुगयाश, पर दोहस शाङलिङतु चगचग आए बेडिगातु टुकरा-टुकरा लानलान रुगयो, आए हाइसी दोह पङ काबू लानमो मानज तेक्यो। 5 दोह रोज रातिङ-लाये ऐलिङहापोस रङ डोखङहा देनस टोकेदो आए आनु रागास घायल लानजया तेक्यो। 6 दोहस यीशु पङ वारक्योज ताङताङ ठुरेक्यो, आए यीशु ओमस्को पशबाङहा रेबरेब, 7 आए जोरीस आवाजिस टोकेके लोइक्यो, “यीशु! महाप्रधान परमेश्वरु छाङ! आङजु कान दोक्च छौग कामङ? गह कानजु परमेश्वरु कसम क्यो रुग, काह आङजु सजा थाहके।” 8 (छुलोनमा यीशुस दोह पङ लोहलोह रुगयो, “हे लाकिया आत्मा, जुह मिहु कुमोज बेरिङ दोहत!”) 9 यीशुस दोह पङ ऐक्यो, “कान नामङ छौग रुन?” दोहस दोह पङ लोइक्यो, “आङ नामङ सेना रुग, छुलोनमा निह मुलूक तनमा।” 10 आए दोहस यीशु दोक्च मुलूक विनती लानगयो, “निङजु जुह देशङज बेरिङ थाह शेच।” 11 होदाइ डोखङ देन इद सुअरोतु शालङ रोगशो तेक्याश। 12 भूतोतु सेनास यीशु दोक्च विनती लानन लोइक्याश, “निङजु नुगो सुअरो पोह शेच, निह दोगोतु कुमो ब्योच गयामा।” 13 दोनिम दोहस दोगोतु हुकुम रानगयो आए लाकिया आत्मगा दहदह सुअरोतु कुमो ब्योक्याश आए हाती शालङ लोनमा तकरिबन निश हज़ार स्तङ तेक्याश, दोह शालङ डोखङ देनज लाङगोटे शेदो सोरङ ब्योक्याश आए डुबेबे शिगयाश। 14 दोगोतु पालास‍ ठुरेरे नगरी रङ गाँनिङहापो खबर सुन्यागयाश, आए छोगिङ हाचिस तेक्यो, दोह खिमो मुलूक मिह बइक्याश। 15 यीशु दवा बनमो निम, दोगोस दोह पङ हातुइ भूतो लागेगे तेक्याश, मतलब हातुइ सेना लागेगे तेक्यो, गास्सा गाजिस रङ चुटू तोशीस ताङताङ ब्याङक्याश। 16 हातेसी होज्जय ताङगयाश, भूत लागेच मिह आए सुअरो रङ छोगिङ बितेते तेक्यो, होदोह बारेओ दोगोतु लोइक्याश। 17 दोनिम दोगोस यीशु पङ विनती लानलान लोनमो देगयाश, निङ जागोज बेरिङ ब्योह। 18 यीशु किशतीउ देन ब्योमो बेरङ, हात्तुइ मिह पङ भूतो लागेगे तेक्यो, यीशु दोक्च विनती लानमो देगयो, “आङजु कान रङ निमो शेच।” 19 पर यीशुस दोह पङ हुकुम मा रानगयो, आए दोह जङ लोइक्यो, “कान किमो ब्योह-ब्योह कान मिहतु लोत कान देन दया लानलान प्रभुस कान ताइएस हाल्ला तेग कामङ लानमोग।” 20 होज्जु नुस दोह ब्योह ब्योह दिकापुलिसो जुह बातङ प्रचार लानज तेक्यो, यीशुस आङ ताइएस हालिस तेग कामङ लानमोग, आए चइ मिह हैरान हाचिज तेक्याश।

याइरु शिज चिमे रङ इद चोच़ छेचमि

21 तेबेरोइ यीशु हेस्स किशतीउ देन नङ ब्योक्यो, देबेरो इद तेग भीडू दोह दवा जामशीगयाश। दोह सोरङहु नङहि तेक्यो, 22 देबेरोइ आराधनालय मुखियागातु माजो याइर लोनमोग इद मिह बइक्यो, आए दोह पङ ताङताङ दोह बाङहापो पोरेक्यो 23 आए होज्जय लोहलोह दोह दोक्च मुलूक विनती लानगयो, “आङ गाट्टो चिमे शिमो दोङस्तङ बहबह तोह, काह बहबह दोह देन गोद तोह, छुलोनमा दोह चंगा हाचिस शङ निजगया। 24 दोनिम यीशु दोह रङ ब्योच तेक्यो, आए तेग भीडू दोह निमस्कोज हाचिगयाश, यीशु देन बरालोइ होनेस भीडू तेक्याश। 25 इद छेचमि होदाह तेक्यो, हातुइ खुन बोएनमोग पीरङ लागेगे, सोनिश बोरशङ हाचिस तेक्यो। 26 दोहस मुलूक वैधोतु दोक्च इलाज लानो-लानो मुलूक दुखी हाचिस तेक्यो, दोह दवा तोइङ माला रुगयो, चइ खर्चयामो निम, दोमरी ली दोह छच़ी फोरोक मा बहबह रुगयो, पर दोनिम आए ली दोह पीरङ बोढ्‌ढे रुगयो। 27 दोहस यीशु चर्चा थासथास भीडू माजिङहोज, दोह निमस्को बइक्यो आए दोह कापरा छुयागयो। 28 छुलोनमा दोह छेचमिहस सुनचयाशो रुगयो, अगर गह दोमरी ली नूह गास्सातु, छुय्यामो थानमा, गह चंगा हाचुक। 29 आए फटक दोह खुन बोऐनमो पीरङ बंद हाचिगयो, आए दोहस आनु डेयङ नेगयो गह दोह पीरङस चंगा हाचिस तुक। 30 यीशुस फटक आनु कुमो नेगयो, आङ कुमोज सोतिङ दोइक, आए भीडो निमस्को पोलटेटे ऐक्यो “आङ कापरा हाइस छुय्यामोग?” 31 दोनिम दोह चेलगास दोह पङ लोइक्याश, काह ताङहो रुन भीडू कान देन बरालो रुश, आए काह ऐहचो रुन, आङजु हाइस छुय्याजिग" 32 दोनिम यीशुस दोह मिह पङ खिमो ताइएस हाइस दोह गास्सु छुय्यामोग, चइ बिलङ खिगयो। 33 दोनिम दोह छेचमिह होज्जय नेहनेह, गह हाल्ला पीरङ ठीक हाचिगिक, भयाङ भयाङ कांपेदो, दोह ओमस्को बइक्यो आए दोह बाङहापो बराल बराल चइ सोच-सोच लोइक्यो। 34 यीशुस दोह पङ लोइक्यो, “आङ चिमे” कान विशवासीस कानजु चंगा लानचिग, खुशीस बयो, आए काह जु पीरङस बोच्चे निऊ। 35 यीशुस होज्जय लोदोइ तेक्यो देबेरो आराधनालय मुखियो किमोज मिहस बहबह लोइक्याश, कान चिमे ताह शिग, ऐब्बे गुरु पङ छुह कोष्टङ रानो रुन? 36 छोगिङ बातङहा दोगोस लोदो तेक्याश, दोगो बातङहातु यीशुस माथाच हाचिस, आराधनालय मुखिया पङ लोइक्यो, “थाह ब्याङ, सिर्फ विशवास लान।” 37 दोनिम यीशुस पतरस, याकूब, याकूबु भाइच युहन्नो सिवाय हातुइ आनु रङ बनमो हुकुम मा रानगयो। 38 आराधनालय मुखियो किमो पनमो निम। यीशुस मिहतु जङ मुलूक जोर-जोरीस टोकेदो क्राबच ताङगयो। 39 दोनिम यीशु कुमो ब्योब्यो, दोगोतु लोइक्यो, “किह छुह हल्ला मच्चयो रुइ? आए छुह क्राबो रुइ? चिमे शिशी थोरीतोह, दोह यागशो रुह। 40 जु बातङहु देनज दोगोस यीशु ठाट्टे लानगयाश, दोनिम यीशुस चइ मिहतु बेरिङ शेक्यो आए चिमेयो अम्मा, बोऊ, हातेइ चेलगा यीशु रङ तेक्याश, सिर्फ दोगोतु आनु रङ तागयो। 41 आए चिमेयो गोद चुमचुम, दोह पङ लोइक्यो, “तलीता कूमी।” जु मतलब तोह- “हे चिमे, गह कानजु रिङहो रुग, सारश!” 42 दोनिम चिमे फटक सारशीस नेस लोह हालेनमो देगयो, (दोह सोनिश बोरशङहु तेक्यो) होज्जय ताङताङ मिह भान्ति बिशारेक्याश। 43 दोनिम यीशुस दोगोतु सख्त चेतावनी रानरान आदेश रानगयो किह जु बातङ हाइसी मानेज गयाश, आए लोइक्यो, “जु जङ छौगताह ज़ामो रानी।”

6

गोन्यास यीशु मसीह पङ मा मोनयामो

1 होदोरज दहदह यीशु आनु गोनिङ नासरतो बइक्यो, दोह चेलगा ली दोह निमस्कोज ब्योक्याश। 2 आराम लानमोग दयारो दोह आराधनालयो उपदेश रानमो देगयो, दोनिम मुलूक मिहस थासथास हैरान हाचिस लोशीज तेक्याश, जुस जु बातङ हामच नेमोग? जु हामचु ज्ञान तोह, छोगिङ दोह पङ रानरान रुश? हाल्ला सोतिङहु कामङ नूह गोदोज हाचिज ताङ बचगा तिश? 3 जुह होदोइ मिस्त्री मानिहा? हाती मरियमु छाङ, आए याकूब, योसेस, यहूदा रङ शमौनु आते तोह? दोह रिङजा होज्जोर मा निजगा तिशा?” होज्जु नुस दोगोस दोह जङ मा मोनयागयाश। 4 यीशुस दोगोतु लोइक्यो, “भविष्यवक्तो आनु देशङ आए आनु पेरङहापो आए आनु किमु बसक्याङ आए हामि अपमान मा हाचिज्या नितोह। 5 यीशुस होदोर छच़ी सोतिङहु कामङहा मा लानगयो, सिर्फ दोकिच़ चोचातु देन गोद ताहताह दोगोतु चंगा लानगयो। 6 आए यीशु दोगोतु विशवास मा लानमोगु देनज बिशारेक्यो, आए दोह चइ बिलङ गोनिङपो उपदेश रानो ब्योच तेक्यो।

यीशुस सोनिश चेलगातु शेनमो

7 यीशुस चइ सोनिश चेलगातु आनु दवा आरयागयो, आए दोगोतु निश-निश कोनया जुरयाया शेक्यो आए दोगोतु अशुध्द आत्मगा देन (अधिकार) होक रानगयो। 8 यीशुस चेलगातु आज्ञा रानगयो, “ओमोस वेनमो ताइएस मुडेगा सिवाये, छच़ी थाह फ्योइ, नाता रोटे, ना झोल्ली, ना बटुओ रुपया। 9 पर पोना गाजी, आए निश कमीचा थाह फ्योइ। 10 आए यीशुस दोगोतु होज्जय ली लोइक्यो हामली किह हातुली किमो ब्योतई, तेरङस्तङ दोह किमोज मा ब्योइ, दोहस्तङ होदोइ किमो रुकेके निहरे। 11 हामि जागोह किन विशवास मा लानश, आए किन बातङ मा रेनचिस, दोनिम दोगोतु शोठ्ठयाइ, दोगोतु खिलाफ गवाइ निमो ताइएस किन बाङहापोज दोरजु माट्टिङ ठालरे । 12 दोनिम दोगोस ब्योब्यो प्रचार लान गयाश “पाप लानमो छारयाया परमेश्वरु बिलङ पोलटेइ” 13 आए मुलूक भूत-प्रेतोतु तोइक्याश, आए मुलूक पीरङसगा मिहतु तेलङ शेलशेल, दोगोतु चंगा लान गयाश।

युहन्ना बपतिस्मा रानज्या पङ सानमो

14 हेरोदेस राजास ली यीशु चर्चा थासक्यो, छुलोनमा दोह नामङ मुशूर हाचिस तेक्यो, आए इदे मिहस लोशीज तेक्याश, “युहन्ना बपतिस्मा रानज्या शिजातु माजिङज शङ हाचिस तोह, दोगिता दोह दोक्च जुह सोतिङहु कामङहा हाचिज ताङ बदो रुश।” 15 हाइदे मिहस लोइक्याश, “जुह एलिय्याह तोह।” पर आइ हाइदेस लोइक्याश, “भविष्यवक्ता या ओमचू भविष्यवक्तगातु माजिङज इदु गान तोह।” 16 हेरोदेसीस होज्जय थासथास लोइक्यो, “हाती युहन्नो बपतिस्मा रानज्या पङ गह बाल शुम्म शेकिक, दोह हेस्स शङग हाचिस तोह।” 17 हेरोदेसीस आनु भाइच फिलिप्पुसु दोरजे हेरोदिया ताइएस, युहन्ना पङ चुम्मो सैनिकोतु शेहशेह, जेल शेक्यो। छुलोनमा दोस्स हेरोदिया रङ शादी लानलान रुगयो। 18 आए युहन्नास हेरोदेसु लोच रुगयो, “कानजु कान भाइचु दोरजे पङ ताहमो दाम बातङ मानी। 19 होज्जु नुस हेरोदिया युहन्ना रङ दुशमनी ताहजे तेक्यो, आए युहन्ना पङ सानमो गयाया तेक्यो, पर दोहस्स हेरोदेसु वजेस सानमो मानमान तेक्यो। 20 छुलोनमा हेरोदेस युहन्ना पङ धर्मी रङ चोकोस मिहतो नेहनेह, दोह दोक्च भयाङच्या तेक्यो, आए दोह रक्षा लानचया तेक्यो, आए दोह बातङहा थासथास मुलूक ब्याङच्या तेक्यो, दोहली खुशीस रेनचिज्या तेक्यो। 21 हेरोदियो ताइएस ठीक मौका देबेरो बइक्यो, तेबेरोइ हेरोदेसीस आनु जोरमङहु दयार आनु प्रधानोतु रङ सेनापतिगातु, आए गलीलु मुखियगातु भोजिङहु ज़ामो जङ आरयागयो। 22 दोनिम हेरोदियो चिमे कुम्म बइक्यो, आए चाहचाह हेरोदेस रङ दोह मेहमानोतु खुश लानगयो। होज्जु नुस राजास दोह चिमे पङ लोइक्यो, “काह छगिङ गयातन आङ दोक्च उनच, गह कानजु केतुक। 23 आए दोहस दोह जङ कसम जाजा लोइक्यो, “आङ आधङ राज्य ली, छगिङ काह उनचन, गह कानजु केतुक। 24 दोहस बेरिङ ब्योब्यो आनु आम्मा पङ ऐक्यो, “गह छौग ऊनग?” दोहस लोइक्यो युहन्ना बपतिस्मा रानज्यो बाल्ल।” 25 दोह फटक राजो दवा कुम्मो बइक्यो आए राजा पङ लोइक्यो, “गह गयाया तुक हुन्नइ युहन्ना बपतिस्मा रानज्यो बाल्ल इद नाङ ताहताह आङजु केत। 26 दोनिम राजा मुलूक उदास हाचिगयो, पर आनु कसम ज़ामो ताइएस आए ऐके तोशीजगा मेहमानोतु ताइएस दोह पङ इंकार लानमो दाम मा चालगयो। 27 दोनिम राजास फटक इद सिपाही पङ हुकुम रानरान शेक्यो ताकि दोह बाल्ल करज गया 28 दोह जेलो ब्योब्यो दोह बाल्ल शुबक्यो आए इद नाङ ताहताह करगयो, आए दोह चिमे पङ रानगयो, आए दोहस आनु आम्मा पङ रानगयो। 29 होज्जे थासमो निम युहन्नो चेलगा बइक्याश, आए दोह लाशु जङ फयोक्याश आए आगो तागयाश।

चेलगातु वापस बनमो रङ एकान्नङ ब्योमो

30 चेलगा यीशु दवा वापस बइक्याश, छोगिङ दोगोस लानलान रुगयाश आए सिखयाया रुगयाश, चइ यीशु पङ लोइक्याश। 31 यीशुस चेलगातु लोइक्यो, “पइ किशा चइ हामता एकान्नङ जागोह ब्योमे होदोर किह आराम लानरे।” छुलोनमा मुलूक मिह बदो-ब्यो निज तेक्याश आए दोगोतु खाऊ ज़ामो ली वक्त मा पोरेच तेक्यो। 32 होज्जु बातङहु देनज दोगो किशतीउ देन देहदेह एकान्नङ जागोह याइ हाचिस ब्योक्याश।

ङहा हज़ार मिहतु खाऊ रानमो

33 मुलुक मिहस दोगोतु ब्योच ताङताङ शेसक्याश, आए चइ नगरो पोज जामशीस, होदोस स्तङ ठुरयाशीस दोगोपोज ओमस पइक्याश। 34 दोहस जाम्मो निम मुलूक भीडू ताङगयो आए दोगोतु देन तरस देगयो, छुलोनमा दोगो दोह जेहतु गान तेक्याश, हातुइ हाति पालस मान्नी, आए यीशुस दोगोतु मुलूक बातङ सिखयाज तेक्यो। 35 शुपेलिङ हाचिमो निम, दोह चेलगा दोह दवा बहबह लोच तेक्याश, “जुह सुनसान जागाह तोह, आए लाए मुलूक डोलेले तोह। 36 आए मिहतु विदा लान, छुलोनमा चइ बिलङ गोनिङहा रङ बस्तिगापो ब्योब्यो, आनेतु ताइएस छौग ताह ज़ामो जोक्च गयाश।” 37 दोहस जबाब रानगयो, “किहि नुगोतु ज़ामो रानी।” दोगोस यीशु पङ लोइक्याश, “निह छौग निश राह चाँदीउ सिक्कगातु खाऊ ज़ोगज़ोग दोगोतु रानमाहा?” 38 यीशुस दोगोतु लोइक्यो “ब्योब्यो खिह किन दवा तोह रोटे रूइ?” दोगोस पता लानलान लोइक्याश, “ङहा रोटे रङ निश मच्छलीगा।” 39 दोनिम यीशुस दोगोतु हुकुम रानगयो चइकेतु राग चिऊ देन टोल बन्याया स्तोइ।” 40 दोगो राह-राह रङ आए निश नेजो सायु टोल बन्नयाया तोशीगयाश। 41 यीशुस दोह ङहा रोटेतु रङ निश मच्छलीगातु ऊनगयो आए स्वर्गू बिलङ खिहखिह परमेश्वरु धन्यावाद लानगयो, आए रोटेतु खानयो-खानयो चेलगातु रानो तेक्यो छुलोनमा दोगोस मिहतु काक्च गयाश, आए दोह निश मच्छलीगातु ली दोगो चइकेतु काक्यो। 42 चइस जाहजाह गरिक्याश, 43 आए चेलगास टुकरगास पङपङ सोनिश छाटोगा रङ दोक मच्छलीगास बङशीजा ली थोगयाश। 44 हातेसी रोटे जागयाश, दोगो ङहा हज़ार स्तङ छौङ मिह तेक्याश।

यीशु तिऊ देन वेनमो

45 दोनिम यीशुस फटक आनु चेलगातु किशतीउ देन ब्योमो मजबूर लानगयो छुलोनमा आनीस मिहतु विदा लानस स्तङ, दोगो आनोज ओमस नङपाशो बैतसैदा पचगयाश। 46 दोगोतु विदा लानलान दोह डोखङहु देन प्रार्थना लानमो ब्योक्यो। 47 दोनिम शुपेलिङ हाचिमो निम किशती सोरङहु माजिङहो तेक्यो, आए दोह ऐच्छि धरतीऊ देन तेक्यो। 48 तेबेरोइ यीशुस ताङगयो लान दोगोतु खिलाफ तोह, आए दोगो किशती चालयो-चालयो यालयाल तिश, दोनिम यीशु साङ रातिङ हाचिमो बेरङ सोरङहु देन वेनो दोगो दवा बइक्यो, आए दोगोपोज ओमस दोनमो गयाच्या तेक्यो। 49 पर दोगोस दोह पङ सोरङहु देन वेनज ताङताङ चालगयाश दोह प्रेत तोह, आए टोक्याशीगयाश। 50 छुलोनमा चइ दोह पङ ताङताङ भयाङ-भयाङ तेक्याश। दोनिम यीशुस फटक दोगोतु बातयागयो आए लोइक्यो “हिम्मत ताइ: गह तुक, थाह भयाङहि!” 51 दोनिम यीशु दोगो दवा किशतीउ देन बइक्यो, आए लान डेमक्यो: आए दोगो मुलूक बिशारेक्याश। 52 दोगोतु दोह रोटे तोनमोगु सोतिङ बारेओ पता मा चालेले तेक्यो, छुलोनमा दोगोतु समझ बंद हाचिस तेक्याश।

यीशुस गन्नेसरतो चोचातु चंगा लानमो

53 दोगो नङ जाबजाब गन्नेसरत पइक्याश, आए किशती किनारे शेक्याश। 54 तेबेरोइ दोगो किशतीउ देनज जाबक्याश, दोनिम दोह मिहस फटक शेसशेस, 55 नेस लोह चइ गोनिङपोज ठुरेक्याश, आए बीमारोतु चारपाइ देन शेहशेह, हामि-हामि समाचार थासक्याश दोह तोह, होदोर-होदोर लिगशीस ब्योक्याश। 56 आए हाम ली दोह गोनिङपो, नगरोपो रङ बस्तिगापो ब्योच्या तेक्यो, मिहस मरिजोतु बाजारो ताहताह दोह दोक्च विनती लानजगा तेक्याश दोहस दोगोतु आनु गासातु हिस्सा पङहि छुयामो शेच: आए तोइङ मिहस दोह पङ छुयाजगा तेक्याश, चइ चंगा हाचिजगा तेक्याश।

7

रिति-रिवाजु बारे सवाल

1 दोनिम फरीसीगा रङ हातेइ शास्त्रीगा यरुशलेमज बहबह तेक्याश, यीशु दवा जामशीगयाश। 2 आए दोगोस यीशु आधङ चेलगातु रिति-रिवाज मुताबिक गोद मा जिशीस खाऊ जाज ताङगयाश। छुलोनमा दोगोस अशुध्द मोनयाजगा तेक्याश। 3 (छुलोनमा फरीसीगा रङ चइ यहूदिगा, पुर्वजोतु बोन्याशीजा रिति मुताबिक वेनज़गा तेक्याश, आए तेरङ स्तङ ओभोल ढंगीस गोद मा जिशीजगा तेक्याश, दोहस्तङ खाऊ मा जाजगा तेक्याश, 4 आए दोगोस करशीजा चीजोतु माचिस स्तङ माझाज तेक्याश, आए ली होजेस्के मुलूक रिति-रिवाजो रूगयाश, जुह रिति-रिवाजोतु दोगोस पालन लानज तेक्याश, रिवाजो लोनम: कटोरगा, आए लोशटिगा, आए त्रोम्ङहु बानिङहातु माज्जयाया चिमो।) 5 होज्जु नुस दोगो फरीसीगा रङ शास्त्रीगास यीशु पङ ऐक्याश कान चेलगास बुजुरगोतु रिति-रिवाजोतु छुह मा मोनयाजगा तिश, आए रिति-रिवाजु मुताबिक छुह गोद मा जिशीस खाऊ जाजगा तिश? 6 दोहस दोगोतु लोइक्यो यशायाह भविष्यवक्तास किन कपटिगातु बारेओ एकदम ठीक भविष्यवाणी लानलान रुह; हालिङ चेशीज तोह: 'जुह मिहस खाकङ ताह आङ तारिफ लानजगा तिश, पर नुगोतु मोनङ आङहोज वारक्यो निजया तोह। 7 जुगो फोइ आङ उपासना लानजगा तिश, छुलोनमा जुगो मिहतु नियमोतु आङ नियमो तिश लोहलोह सिखयाजगा तिश। 8 "किह परमेश्वरु नियमो मा रेनचिस मिहतु नियमोतु मोनयाजगा तइ।" 9 यीशुस दोगोतु आए ली लोइक्यो, "रिति-रिवाजोतु मोनयामो ताइएस परमेश्वरु आज्ञा पङ हाल्ला ओभोल ढंगीस मा मोनयाजगा तइ।" 10 छुलोनमा मुसास रिङशिज तोह, “आनु आम्मा रङ आनु बाबो आदर लान, आए हाइसी आम्मा रङ बाबा पङ माज लोतोह, दोह पङ जरुर सारेह। 11 पर किह लोचगा तइ हाइसी आनु आम्मा रङ बापु पङ लोनमा, छगिङ आङ दोक्च किनजु लाभ हाचिम रूमोग, दोह कोरबान, मतलब परमेश्वरु ओचिशीज तोह। 12 दोनिम किह दोह पङ आनु आम्मा रङ बाबाओ छच़ी सेवा लानमो मा शेचगा तइ। 13 होज्जु वजेस किह किन रिति-रिवाजोतु ताइएस, छगिङ नियमोतु किह बन्नयाया रूइ, परमेश्वरु वचन मा मोनयाजगा तइ; आए होजेस्के-होजेस्के मुलूक कामङ लानजगा तइ।

मिहतु अशुध्द लानमोगा बातङहा

14 दोनिम यीशुस मिहतु आनु दवा आरयाया, दोगोतु लोइक्यो, "किह चइ आङ बातङहा थासी” आए सोमझेइ। 15 होजेस्क छच़ी चीज़ माये, छोगिङ बेरिङज मिहु कुमो ब्योब्यो दोह पङ अशुध्द लानतो, पर छोगिङ चीजो मिहतु कुमोज दवा तिश, होदोसी मिह पङ लाकिया लानतो। 16पर हातुइ रेनचिमो कानङहा रूइ, दोगोस थासी 17 तेबेरोइ यीशु भीडू दोक्च किमो ब्योक्यो, देबेरो दोह चेलगास जु उदाहरणु बारेओ दोह दोक्च ऐक्याश। 18 दोहस दोगोतु लोइक्यो, “किह ली छौग छच़ी मा सोमझेचगा तइया? किह छौग मा सोमझेझे तइया, छोगिङ चीज़ बेरिङज मिहु कुमो ब्योतो, दोहस दोह पङ लाकिया मा लान? 19 छुलोनमा दोह चीज़ दोह मोनङ मानी, पेटिङहो ब्योतो, आए पेटिङज बेरिङ दोहतो?” होज्जय लोहलोह दोहस चइ जामोगा चीजोतु चोकोस तिश लोइक्यो। 20 दोनिम दोहस लोइक्यो, “छोगिङ मिहु कुमोज दोच्या नितोह, होदोसी मिह पङ लाकिया लानजया नितोह। 21 किशो कुमोज लोनमा, मिहतु मोनङहोज, माजा-माजा विचारो, अनैतिक यौन सम्बन्ध, चोरी लानमो, खुन लानमो, हाइदू नार निमस्कोज ब्योमो, 22 लालच, दुष्टता, छल, बदतमीज, जलन, निन्दा, शेखी रङ मुर्ख बातङहा दोच़गा तिश। 23 जुह चइ माजा बातङहा मिहतु कुमोज ही दवाचगा नितिश, आए मिह पङ अशुध्द लानजगा नितिश।”

इद छेचमिऊ विशवास

24 दोनिम यीशु होदोह जागोज सारशीस सुर देशङ बइक्यो, आए इद किमो ब्योक्यो आए गयाया तेक्यो हाइसी मानेज गयाश, पर दोह माङशीश निमो मानगयो। 25 आए फटक इद छेचमिस, हातुइ गाट्टो चिमे पङ भूत लागेगे तेक्यो, दोह चर्चा थासथास बइक्यो, आए दोह बाङहापो बरालक्यो। 26 जुह छेचमि यूनानी आए सीरिया देशङहु फिनीकी जागोज तेक्यो। दोहस दोह दोक्च विनती लानगयो, चिमेयो कुमोज भूत पङ तवात। 27 यीशुस दोह पङ लोइक्यो, “ओमस छाङहातु गरिङमो शेत, छुलोनमा छाङतु रोट लिगशीस कुवेतु ओमस्को शेनमो दाम माय।” 28 दोह छेचमिस यीशु पङ जबाब रानगयो “सोच तोह प्रभु; कुवेस ली ताह, छाङस ज़ामो बेरङ बोचेशीजा टुकरगा जातिश। 29 दोहच यीशुस लोइक्यो, जुह बातङ ताइएस काह ब्योह, भूत कान चिमेयो कुमोज दवादवा तोह।” 30 दोहस आनु किमो बहबह ताङगयो, चिमे चारपाइ देन यागशीस तोह आए भूत ली दवादवा तोह।

लाटस रङ ठोठोलशीजया मिह पङ चंगा लानमो

31 दोनिम दोह सुर देशङज दहदह, दिकापुलिस मतलब साए-नगरु ओमोस सिदोन हाचिस गलीलु सोरङहु दवा पइक्यो। 32 दोनिम मिहस इद लाटसु हाति ठोठोलशीजया तेक्यो, यीशु दवा करकर दोह दोक्च विनती लानगयाश, कान गोद दोह देन तोह। 33 दोनिम यीशुस दोह पङ भीडोज याइ फयोक्यो, आए आनु पराचा दोह कानङहा पोह शेक्यो, आए थुक्याया दोह लेह पङ छुयागयो; 34 आए स्वर्गू बिलङ खिहखिह लाम्बस सासङ उनगयो, आए दोह पङ लोइक्यो, “इप्फतह!” मतलब “खुलेत”! 35 फटक दोह कानङहा दोङ गयाश, आए दोह लेयो गान्ठङ दोइक्यो, आए साफ-साफ बातेस्मो देगयो। 36 दोनिम यीशुस दोगोतु चेतावनी रानगयो, हातुइ थाह लोहरे, पर तोइङ दोहस दोगोतु चेतावनी रानगयो होदोइ दोगोस आए पराङमो देगयाश। 37 दोगो मुलूक बिशारेरे लोच तेक्याश, “दोहस छोगिङ लानमोग, चइ ओभोल लानमोग; दोहस लाटस मिगातु थासमो जङ, आए मा बातेस जगा मिहतु बातेसमोग सोतिङ रानज्या तोह।”

8

पह हज़ार मिहतु खाऊ रानमो

1 दोह दयारोपो हेस्स इद दयार मुलूक मिह जामशीगयाश आए दोगो दवा छच़ी ज़ामो मा रुगयाश, दोनिम यीशुस आनु चेलगातु आरयाया दोगोतु लोइक्यो। 2 हुन्ना नुगो दवा ज़ामो छच़ी मारूश, छुलोनमा जुगो शुम दयारेज लागातार आङ रङ तिश, आए आङजु नूह मिहतु देन तरस बदो रुह। 3 अगर गह नुगोतु उपासङ किमोजु शेकिक ताह, नुगो ओमोइ छागछाग नितिश, छुलोनमा नुगोतु माजोइदे-इदेह मिह वारक्योज बहबह तिश। 4 चेलगास यीशु पङ ऐक्याश, “होजोर बोनिङहो होनो रोटे, हाइस हामच करतो जुगो गरिक्च गयाश?” 5 दोहस दोगोतु ऐक्यो, “किन दवा तोह रोटे रूइ?” दोगोस लोइक्याश, “स्तीश।” 6 दोनिम यीशुस मिहतु धरतीऊ देन तोशीमो हुकुम रानगयो, आए दोह स्तीश रोटे ऊनगयो आए परमेश्वरु धन्यावाद लानलान खानयागयो, आए आनु चेलगातु रानो ब्योक्यो, छुलोनमा दोगोस मिहतु रानजगयाश, आए दोगोस मिहतु कागो ब्योक्याश। 7 दोगो दवा दोकिच़ गान गाट्टो मच्छलीगा ली रूगयाश, दोहस परमेश्वरु धन्यावाद लानलान दोगोतु ली मिहतु काङमो रानगयो। 8 दोगो जाजा गरिक्याश आए चेलगास बचेचा टुकरगास स्तीश छाटोगा पङपङ थोगयाश। 9 आए मिह तकरिबन पह हज़ार दौह तेक्याश, दोनिम दोहस दोगोतु विदा लानगयो, 10 आए यीशु फटक आनु चेलगा रङ किशतीउ देन तोशीस, दलमनुता प्रदेशो जुह ब्योक्यो।

फरीसीगास यीशु पङ स्वर्गू सार जाङच लोनमो

11 दोनिम फरीसीगा बहबह दोह रङ बहस लानमो देगयाश, आए दोह पोरखयामो ताइएस दोह जङ परमेश्वरु दोक्च स्वर्गोज बनमोग, सार जाङचिस साबित लान लोइक्याश। 12 दोहस आनु आत्मो आह! उनउन लोइक्यो, “जुह वक्तु मिगास छुह सार पोचिजगा तिश? गह किनजु सोच रिङहो रूग होज्जु वक्तु मिगातु छच़ी सार मा पोरेत।” 13 आए दोहस दोगोतु छारयाया हेस्स किशतीउ देन चढ्ढेक्यो आए नङ ब्योक्यो।

फरीसीगा रङ हेरोदेसु सुरग चिसङ

14 चेलगास रोटे फ्योमो बोशीस तेक्याश, आए किशतीउ देन दोगो दवा इद ही बुटूरु रुगयाश। 15 दोहस दोगोतु चेतावनी रानरान लोइक्यो, “खिह, फरीसीगातु सुरग चिसङ रङ हेरोदेसु सुरग चिसङ दोक्च बोचेचे निहरे।” 16 दोगो आनेतु माजो राया लानलान लोशीगयाश, “किशो दवा बुटूरु मा रुमे।” 17 होज्जे नेहनेह यीशुस दोगोतु लोइक्यो, “किह छुह किन कुमो होज्जय राया लानो रूइ, किशो दवा बुटूरू मा रूमे? किह छौग हुनस स्तङ मा नेओ रङ आए मा सोमझेदो रूइया? किन दिमागीस छौग कामङ मा लानो रुहा? 18 मीगा निहनिह ली छौग मा ताङहो रूइया, आए कानङहा निहनिह ली मा थासो रुइया? आए किनजु छौग याद मा रुइया, 19 तेबेरोइ गह ङहा हज़ार मिहतु ताइएस ङहा रोटे खानयागिक दोनिम किह टुकरगास पङपङ तोह छाटटो थोहगे?” दोगोस दोह पङ लोइक्याश, “सोनिश छाटोगा।” 20 आए तेबेरोइ पह हज़ार मिहतु ताइएस स्तीश रोटे तेहके, दोनिम किह टुकरगास पङपङ तोह छाटोगा थोहगे?” दोगोस दोह पङ लोइक्याश, “स्तीश छाटोगा।” 21 दोहस दोगोतु ऐक्यो, “किह छौग हुनस स्तङ मा सोमझेकेहा?”

बैतसैदो इद ताबसो पङ ठीक लानमो

22 दोगो बैतसैदा बइक्याश; आए मिहस इद ताबसो पङ यीशु दवा करगयाश आए दोह दोक्च विनती लानगयाश, किह दोह पङ छुयो। 23 यीशुस दोह ताबसो पङ गोद चुमचुम दोह पङ गोनिङज बेरिङ फ्योक्यो, आए दोह मीगापो थुक्यागयो आए गोद ताहताह, दोह जङ ऐक्यो, “काह छौग ताङहो रून?” 24 दोहस बाल सारसार लोइक्यो, “गह मिहतु जङ वेनज़गा बोठङहा गान ताङ रूग।” 25 दोनिम दोहस हेस्स दोह मिगापो गोह तागयो, आए ताबसोस ध्यानिस खिहगयो। दोह ठीक हाचिगयो, आए चइ साफ-साफ ताङज तेक्यो। 26 यीशुस दोह पङ होज्जय लोहलोह “किमो शेक्यो, वापस गानिङहू कुमो थाह ब्योरा।”

पतरसीस यीशु पङ मसीह मोनयामो

27 यीशु रङ दोह चेलगा कैसरिया फिलिप्पीयु गाँनिङपो ब्योक्याश। ओमस दोहस आनु चेलगातु दोक्च ऐक्यो, “मिहस आङ हात तोह लोशीजगा तिश?” 28 दोगोस उतर रानगयाश, “इदेस युहन्ना बपतिस्मा रानज्या, इदेस एलिय्याह आए इदे-इदेस भविष्यवक्तगा पोज इद तोह लोशीजगा तिश।” 29 दोहस दोगोतु ऐक्यो, “पर किह आङ हात तोह, लोशीजगा तइ?” पतरसीस यीशु पङ लोइक्यो, “काही मसीह तन।” 30 दोनिम यीशुस दोगोतु चेतावनी रानरान लोइक्यो, आङ बारेओ होज्जय हातुइ थाह लोहरे।

यीशुस शिमो रङ दुखङहु बारेओ लोनमो

31 दोनिम यीशुस चेलगातु सिखयाज तेक्यो, मिहऊ छाङहु मुलूक दुखङ थोमो जरुरी तोह, आए स्यानोस रङ प्रधान याजकोस, आए शास्‍त्रीगास फोइ चालचाल मा मोनयास। दोनिम दोह पङ साताश आए दोह शुम दयारु निम शङतो। 32 यीशुस होज्जु बातङ दोगोतु साफ-साफ लोइक्यो। होज्जु देनज पतरसीस दोह पङ याइ फ्योफ्यो डाँटयो तेक्यो, 33 दोनिम यीशुस पोलटेटे आनु चेलगातु बिलङ खिगयो, आए पतरसु डाँटयाया लोइक्यो, “हे शैतान, आङ ओमस्कोज वारक्यो ब्यो, छुलोनमा काह परमेश्वरु बातङहातु देन मानी, पर मिहतु बातङहातु देन मोनङ शेचया तन।”

यीशु निमस्कोज वेनमोगु मतलब

34 दोनिम यीशुस आनु चेलगा रङ भीडू जङ आनु दवा आरयाया, दोगोतु लोइक्यो, “हाति आङ निमस्कोज बनमो गयातो, दोहस आनु ली इंकार लानरे आए आनु क्रूस थोहथोह, आङ निमस्कोज जिहरे। 35 छुलोनमा हाइसी आनु डेयङहु जिन्दगी बोच्यामो गयातो दोहस जिन्दगी पङ शोह शेहतो, पर हाइसी आङ रङ सुसमाचारू ताइएस आनु डेयङहु जिन्दगी शोह शेहतो, दोहस जिन्दगी पङ हासील लानतो। 36 अगर मिह पङ चइ संसार ली पोरेनमा आए आनु जिन्दगीऊ पङ नुक्सान हाचिमा, दोनिम दोह पङ छौग फायदा हाच्चो? 37 मिहस आनु जिन्दगीऊ बोदला छौग रानतो? 38 हात ली जुह व्यभिचारी रङ पापी पीड़िऊ माजो, आङ रङ आए आङ बातङहा दोक्च सोरमयाशो, आए मिहऊ छाङ ली तेबेरोइ दोह पवित्र दूतो रङ आनु बाबो महिमा रङ बतो, देबेरो दोह दोक्च सोरमयाशो।”

9

1 यीशुस दोगोतु लोइक्यो, “गह किनजु सोच रिङहो रूग हातेइ होज्जा डेन तिश, दोगोतु माजिङ इदे-इदे होजेस्के तिश, तेबेर स्तङ परमेश्वरु राज पङ सोतिङ रङ बच मा ताङश, दोहस स्तङ दोगो मा शिश।

यीशुस रुवङ स्कालमो

2 टोग दयारु निम यीशुस पतरस, याकूब आए युहन्ना पङ आनु रङ फ्योक्यो, आए ऐकानङहो हादह राङक डोखङहु देन फ्योक्यो। होदाह दोगोतु ओमस्को रूवङ स्कावलगयो, 3 आए दोह गास्सा होन्ने चमकेदो तेक्याश आए होनो छौग हाचिगयो, धरतीऊ देन हात ली गास्सा चिज्यास होदेस छौग मा लान। 4 आए चेलगातु मुसा रङ एलिय्याह ताङ देगयो; दोगो यीशु रङ बातयाशो तेक्याश 5 होज्जु देनज पतरसीस यीशु पङ लोइक्यो, “हे गुरु जी, किशो होज्जा निमो दाम तोह: होज्जु नुस निह शुम छ़न्नी जुरयात्मा; इद कान ताइएस, इद मुस्सो ताइएस, आए इद एलिय्योह ताइएस।” 6 दोह मा नेच्या तेक्यो छौग उतर रानग? छुलोनमा दोगो मुलूक भयाङ-भयाङ तेक्याश। 7 दोनिम दुइङ जाबजाब दोगोतु छिक्यो, आए दुइङहु कुमोज होज्जय बातङ थास्मो बइक्यो, “जुह आङ प्यारा छाङ तोह, जुह थासी।” 8 दोनिम दोगोस फटक चइ बिलङ नज़र शेक्याश, आए यीशु सिवाय, आने रङ हातुइ मा ताङ गयाश। 9 डोखङहु देनज जाम्मो बेरङ यीशुस दोगोतु हुकुम रानगयो, तेरङ स्तङ मिहु छाङ शिजातु माजिङज शङग मा हाच, दोहस‍ स्तङ किह छोगिङ ताङताङ तइ दोह हातुइ थाह लोहरे। 10 दोगोस जुह बातङहु याद तागयाश; आए आनेतु कुमो बहस लानो तेक्याश, “शिजा पोज शङ हाचिमो छौग मतलब तोह?” 11 आए दोगोस यीशु पङ ऐक्याश, “शास्त्रीगास छुह लोचगा तिश; एलिय्योह ओमस बनमो जरुरी तोह?” 12 यीशुस दोगोतु उतर रानगयो, “सच्ची, एलिय्योह ओमस बहबह चइ ओभोल लानतो, पर मिह छाङहु बारेओ होज्जय छुह चेशीज तोह, दोह पङ मुलूक दुखङ पोरेतो, आए मामुली नारशो? 13 पर गह किनजु रिङहो रूग, एलिय्याह ताह बहबह तोह, आए हाल्लिङहि दोह बारेओ चेशीज तोह, मिहस हाल्लिङहि गयाचगा तेक्याश, दोह रङ बुरा लानमोगा।”

भूत लागेच छाङहु ठीक लानमो

14 तेबेरोइ यीशु पतरस, याकूब आए युहन्ना रङ हाइदे चेलगा दवा बइक्यो, दोनिम ताङगयो किह दोगोतु फिरकोट मुलूक मिह जामशीस तिश आए शास्त्रीगास दोगो रङ बहस लानो रूश। 15 यीशु पङ ताङमो निम मिह मुलूक बिशारेक्याश, आए दोह बिलङ ठुरेरे दोह पङ नमस्कार लोइक्याश। 16 यीशुस दोगोतु ऐक्यो, “किह जुगो रङ छौग बहस लानो रूइ?” 17 भीडू माजिङज इद मिहस यीशु पङ उतर रानगयो, “हे गुरू जी, गह आङ छाङहु जङ, हातुइ लाटस लानजया भूत लागेगे तोह, कान दवा करकर रूगीक। 18 हामिङ-हामिङ भूतिस दोह पङ चुमज्या तोह, होदाइ फिक्याया शेचया तोह: दोहस खाकङ शेपु पङपङ करजया तोह, गारा कोट्टयाज्या तोह आए डेयङ शकलज्या तोह। गह कान चेलगातु लोइकिक किह भूतु जङ तोइ, पर दोगोस तनमो मानमोगा।” 19 होज्जे थासथास दोहस दोगोतु उतर रानरान लोइक्यो, “हे अविशवासी मिहगा, गह तेबेर स्तङ किन रङ नितुक? आए तेरङ स्तङ किन सहन लानो नितुक? दोह पङ आङ दवा कइ।” 20 दोनिम दोगोस दोह पङ यीशु दवा करगयाश: आए तेबेरोइ भूतिस यीशु पङ खिहगयो, दोनिम भूतिस छाङहु फटक मेक्याया माटिङहु देन बरालक्यो, आए खाकङज शेपु तवादो बरिनलेदो तेक्यो। 21 यीशुस दोह बाबा दोक्च ऐक्यो, “जुह होजेस्क हालात तेपोक्च निम रूह?” दोहस लोइक्यो गाटोचुम्याक्ची रूह। 22 भूतीस जुह पङ खत्म लानमो ताइएस तेबेर मेह दोर आए तेबेर तिऊ दोर फरालमोग, अगर काह छौग लानमो थानमा, निङ देन तरस ताङताङ ऐसान लान।” 23 यीशुस दोह पङ लोइक्यो, “अगर काह लानमो थानमा?” जुह छौग बातङ तोह! विशवास लानजया पङ चइ मुमकिन तोह।” 24 छाङहु बाबास फटक पोरज्याया लोइक्यो, “हे प्रभु, गह विशवास लानो रूग, आङ अविशवासु उपाय लान।” 25 तेबेरोइ यीशुस ताङगयो मिह ठुरेरे भीडू हाच्चो रुश, दोनिम दोहस भूतु जङ होज्जय लोहलोह डाँटयागयो, “हे टोनहो रङ लाटस आत्मा, गह कानजु हुकुम क्यो रूग, छाङ कुमोज दवात, आए हेस्स चोंगे थाह लागेरा।” 26 दोनिम भूत टोकेके आए छाङहु मुलूक मेक्याया, दवाइक्यो; आए छाङ शिज गान हाचिगयो, होज्जेस हालात हाचिगयो मुलूक मिह लोशीज तेक्याश, दोह शिग। 27 पर यीशुस छाङहु गोद चुमचुम सारगयो, आए दोह डेन सारशीगयो। 28 तेबेरोइ यीशु किमो बइक्यो, दोनिम यीशु चेलगास ऐकान्‍नङहो यीशु दोक्च ऐक्याश, “निह भूत पङ छुह तोनमो मान किमा?” 29 दोहस दोगोतु लोइक्यो, “जुह किस्मु आत्मा बेगेर प्रार्थनो, आइ छच़ी तरीकास मा दोत।”

यीशुस आनु मौतु बारेओ हेस्स लोनमो

30 यीशु रङ दोह चेलगा होदोक्च दोइक्याश आए गलील हाचिस ब्योच तेक्याश। दोह इच्छा रुगयो “हाइसी मा नेजिज गया गह हाम तुक”, 31 छुलोनमा यीशुस आनु चेलगातु सिखयाज तेहक्यो आए दोगोतु लोच तेक्यो, “मिहु छाङहु जङ, मिहतु हवाले लानताश, आए दोगोस दोह पङ साताश; आए दोह शिमो निम शुम दयारेज शङ हाच्चो।” 32 पर जुह बातङहु मतलब चेलगातु सोमोज मा देगयो, आए दोगो यीशु दोक्च ऐहमो भयाङचगा तेक्याश।

चइके पोज तेग हात तोह?

33 दोनिम दोगो कफरनहूम शहरो बइक्याश आए किमो बहबह यीशुस चेलगातु ऐक्यो, “ओमापोस किह छौग बातङहु देन बहस लानो तेहके?” 34 दोगोस छच़ी मा लोइक्याश, छुलोनमा ओमापो दोगोस आनेतु कुमो होज्जय बहस लानलान रुगयाश, किशो माजिङहो चइके पोज तेग हात तोह। 35 दोनिम यीशुस तोशीस सोनिश चेलगातु आरयागयो आए दोगोतु लोइक्यो, “अगर हातिस तेग हाचिम गयामा, दोनिम दोह चइके पोज निमस रङ चइकेतु सेवक हाचिरे।” 36 आए यीशुस इद छाङहु जङ दोगोतु माजिङ डेन लानगयो, आए दोह पङ थोम्मपो थोहथोह, दोगोतु लोइक्यो, 37 “हाइसी आङ नामङस होज्जेस्के छाङहातु माजिङज हात ली इद छाङहु जङ मोनयातो, दोह आङजु जङ मोन्याजो, आए हाइसी आङजु मोनयाजिज्या तोह, दोहस आङ मानी, पर आङ शेचिज्या पङ मोनयातो।

हाति खिलाफ मायश दोगो किशो बिलङ तिश

38 दोनिम युहन्नास यीशु पङ लोइक्यो, “हे गुरू जी, निह इद मिह पङ कान नामङस भूतोतु तोच ताङगीमा आए निह दोह पङ मना लानो तेकिमा, छुलोनमा दोह किशो निमस्कोज मा बच्या तोह।” 39 यीशुस लोइक्यो, दोह पङ मना थाह लानी; छुलोनमा होज्जेक हाति माय, हाइसी आङ नामङस सोतिङहु कामङहा लानज गया; आए फटक आङजु माज रिङमो मान, 40 छुलोनमा हाति किशो खिलाफ मायश, दोगो किशो बिलङ तिश। 41 हाइसी इद गिलास तिह ली किनजु होज्जु ताइएस तुङमो केतो, किह मसीऊ तइ, दोनिम गह किनजु सोच रिङहो रूग, दोहस आनु बदला हाल्लाहि शोह मा शेत।

पाप लानमो शेनमोगु कारण हाचिमो

42 “हाइसी जुह गाटोतु माजो हातेइ आङ देन विशवास लानजगा तिश, हातुली पाप लानमो शेनमोगु कारण हाच्चो, होदोह जङ होज्जय दाम तोह इद तेग गोटङहु राग दोहस काक्चो शेहशेह आए दोह पङ सोमोदरङहो शेनमा। 43 अगर कान गोदिस कान दोक्च पाप लानमो शेचिमा, दोनिम दोह पङ मोलमोल शेत, टुन्डो हाचिस सौदाचु जिन्दगी पोरेनमो दाम तोह, निश गोह निहनिह ली नरकु मेह दोर ब्योम खाम्मोगोज, हामि चोंगे मेह मा बिग, कान ताइएस होज्जय दामो दाम तोह। 44हामि दोगोतु होङ मा शित आए मेह मा बिग। 45 अगर कान बाङहिस कानजु पापु ओम्मो फयोचिमा, दोह पङ मोलमोल शेत, लेङरो हाचिस सौदाचु जिन्दगी पोरेनमो मुलूक दाम तोह, बाङहास्या निहनिह नरको शेचिमोगोज, होज्जय दामो दाम तोह, 46हामि दोगोतु होङ मा शित आए मेह मा बिग। 47 अगर कान मीगीस कान दोक्च पाप लानमो शेचिमा, दोनिम दोह पङ तोहतोह फिक्याया शेत, ताबसो हाचिस परमेश्वरु राज ब्योमो मुलूक दाम तोह, निश मीगास्या निहनिह नरको ब्योमोगोज, होज्जय दामो दाम तोह। 48 हाति होङहास दोगोतु जातिस दोगो होङहा चोंगे मा शिश, आए मेह ली मा बिग। 49 इद-इद मिहतु मेहस शुध्द लानताश, हाल्लिङहि बलि पङ छाहस नमकीन लानताश 50 छाह ताह दाम तोह, पर अगर‌ छौह स्वाद ब्योमा, दोनिम दोह पङ छगिस नमकीन लानतई? किन कुमो छाह ताइ, आए किन-कुमो गालशीस निहरे।

10

शिङ चङमो बारे उपदेश

1 दोनिम यीशु सारशीस यहूदियो सीमङस हाचिस आए यरदनु नदी नङ बइक्यो। भीडू दोह दवा हेस्स जामशीगयाश, आए दोहस हेस्स ओम्मचु गान उपदेश रानमो देगयो। 2 दोनिम फरीसीगास दोह दवा बहबह दोह परखयामो ताइएस दोह जङ ऐक्याश, “होज्जय छौग ठीक तोहा छोङमिस आनु छेचमिह पङ शिङ चङमो लोनमो?” 3 दोहस दोगोतु उतर रानगयो, “मुसास किनजु छौग हुकुम कैहकै रुह?” 4 दोगोस लोइक्याश, “मुसास राजीनामा चेहचेह शिङ चङमो हुकुम केहके रूह।” 5 यीशुस दोगोतु लोइक्यो, “मुसास किन ताइएस जुह हुकुम होज्जु नुस चेहचेह रूह, किह परमेश्वरु हुकुम मोनयामो तैयार माएके। 6 आए बन्यामोगोज ओमच परमेश्वरीस छेचमि रङ छोङमि रूवङहो दोहसङहु बन्याया रूह। 7 होज्जु नुस छोङ मिह आनु आम्मा रङ बाबो दोक्च यायी हाचिस, आनु नार रङ निहतो, 8 आए दोहसङ इदही डेयङ हाचसङ, ऐब्बे दोहसङ निश डेयङ मानी, पर इदही डेयङ तसङ। 9 होज्जु नुस हातेतुइ परमेश्वरीस जोडयाया रूह, दोहसङहु मिहस यायी थाह लानरे। 10 किमो चेलगास जुह बारेओ दोह दोक्च हेस्स ऐक्याश। 11 दोहस दोगोतु लोइक्यो, “हाइसी आनु नारू शोठ्ठयाया हाइद रङ शादी लानतो, दोनिम दोहस दोह ओमचे नारू खिलाफ व्यभिचार लानतो; 12 आए अगर छेचमिस आनु पति पङ शोठ्ठयाया हाइद रङ शादी लानमा, दोनिम दोहस व्यभिचार लानतो।”

छाङहातु आशीर्वाद

13 दोनिम मिहस छाङहातु यीशु दवा करोह तेक्याश, ताकि दोहस दोगो देन गोद ताजगया, पर चेलगास दोगोतु डाँटया गयाश। 14 यीशुस होज्जय ताङमो निम रोषङ ताङताङ दोगोतु लोइक्यो, “छाङहातु आङ दवा बनमो शेइ आए दोगोतु मना थाह लानी, छुलोनमा परमेश्वरु राज होज्जेस्केतुइ मिहतु तोह। 15 गह किनजु सोच रिङहो रूग, हाइसी परमेश्वरु राज पङ छाङ गान मा मोनयो, दोह परमेश्वरु राज कुमो चोंगे मा ब्योह।” 16 आए दोहस छाङहातु थोम्मपो स्तोशतोह दोगो देन गोद ताहताह आशीष रानगयो।

सोऊकार मिह

17 तेबेरोइ यीशु होदोरज दहदह ओमोस ब्योच तेक्यो, दोनिम इद मिह ठुरेरे दोह दोह दवा बइक्यो, आए दोह ओमस्को पशबाङहा टेक्याया दोह जङ ऐक्यो, “हे दामक गुरू जी, सौदाचु अस्ली जिन्दगी हासील लानमो ताइएस आङ छौग लानमो जरुरी तोह? 18 यीशुस दोह पङ लोइक्यो, “काह आङजु दामक छुह रिङहो रून? हाति दामक माय, सिवाये इदु लोनमा परमेश्वरु। 19 काह नियमोतु जङ ताह नेच्या तन: खुन थाह लानरे, कान जीवन साथी रङ धोखा थाह लानरा, चोरी थाह लानरा, झूठा शादत थाह हाचिरा, धोखा थाह लानरा, आनु आम्मा रङ बाबो आदर लानरा। 20 दोहस दोह पङ लोइक्यो, “हे गुरू जी, जुह चइ हुकुमोतु गह गाट्टोमयाक्ची मोनयो बदो रूग।” 21 यीशुस दोह जङ खिहखिह दोह पङ बेन्नङ लानगयो, आए दोह जङ लोइक्यो, “कान कुमो इद बातङहु कमी रून। ब्यो-छोगिङ कान दवा रून दोह पङ रेहरेह गरीबोतु रान, आए कानजु स्वर्गो धन पोरेतो, आए बहबह आङ निमस्कोज पाए।” 22 जुह बातङहु देनज दोह स्थो जाबक्यो आए उदास हाचिगयो, आए दोह दुखी हाचिस ब्योक्यो, छुलोनमा दोह मुलूक सोऊकार तेक्यो। 23 यीशुस चेलगातु बिलङ खिहखिह लोइक्यो, “सोऊकारोतु परमेश्वरु राज ब्योमो तोह कठिन तोह!” 24 चेलगा दोह बातङहा देनज बिशारेक्याश। जुह देनज यीशुस हेस्स दोगोतु लोइक्यो, “हे आङ छाङहा, परमेश्वरु राज कुमो ब्योमो तोह मुशकिल तोह! 25 परमेश्वरु राजो कुमो सोऊकारोतु ब्योमोगोज केबचु मिगोस ऊंट दोनमो आसान तोह!” 26 दोगो मुलूक बिशारेरे आनेतु कुमो लोशीज तेक्याश, “दोनिम हातु मुक्ति हाच्चो?” 27 यीशुस दोगोतु बिलङ खिहखिह लोइक्यो, जुह मिहतु ताइएस ना मुमकिन तोह, पर परमेश्वरु ताइएस मुमकिन तोह; छुलोनमा परमेश्वरु दोक्च चइ हाच्चो।” 28 दोनिम पतरसीस दोह पङ लोच तेक्यो, “खिऊ, निहता चइ चीजो शोट्टयाया कान निमस्कोज हाचिस तनमा।” 29 यीशुस लोइक्यो, “गह किनजु सोच रिङहो रूग, हाति होजेस्क माय, हाइसी आङ ताइएस रङ सुसमाचारू ताइएस किम-रिम अम्मा रङ बाबा, बाजा-रिङजा रङ छाङहातु शोट्टयाया रूह, 30 आए हुन्ना होज्जु वक्तो युङजा-रिङजा छाङहा रङ आमगातु किमा-रिमातु जङ राह गुणा बोदी, मिहु विरोध रङ बच्या दुनियो सौदाचू जिन्दगी। 31 आए मुलूक मिह हातेइ हुना जुह दुनिया तेगे तिश, दोगो गाट्टो हाचिस; आए हातेइ हुना गाट्टो तिश, दोगो बच्या दुनियो तेगे हाचिस।”

आनु मौतु बारेओ यीशुस शुम जबचु बेरङ लोनमो

32 दोगो यरुशलेम ब्योम बेरङ ओमोस तेक्याश, आए यीशु दोगोतु ओमस-ओमस ब्योच तेक्यो: चेलगा बिशारेरे तेक्याश आए हातेइ मिह निमस-निमस वेनो तेक्याश, दोगो भयाङ-भयाङ तेक्याश। दोनिम यीशु हेस्स सोनिश चेलगातु यायी फ्योफ्यो दोगोतु दोह बातङहा लोच तेक्यो छगाइ दोह देन बितेनमो रूगयाश 33 “खिह, किशा यरूशलेमजु ब्यो रूमे, आए मिहऊ छाङ प्रधान याजकोतु रङ शास्त्रीगातु गोपोज चुमशो, आए दोगोस दोह पङ मौतु सजा काबिल ठहरयाताश, आए गैर यहूदीगातु गोदोह रानताश 34 दोगोस दोह ठाट्टे लानताशा, दोह देन थुक्याताश, आए दोह पङ कोड़गास ठिसताश आए दोह पङ साताश, आए शुम दयारे हेस्स शङतो।”

याकूब रङ यूहन्नो विनती

35 दोनिम जबदिऊ छाङहा याकूब रङ युहन्ना यीशु दवा बहबह लोइक्याश, “गुरु जी, निसी गयाया तहच, छगिङ निसी कान दोक्च ऊनच्छ, दोह काह निसीऊ ताइएस लान। 36 यीशुस दोहसङहु ऐक्यो, “किसी छौग गयाया तहच गह किसीऊ ताइएस लानग?” 37 दोहसङ दोह पङ लोइक्याश, “निसीऊ होज्जु होक केह, काह सोतिङहु शासनु सिंहासन देन तोशीबेरो, निसीऊ माजो इद कान जाखङ बिलङ आए इद कान खोजजिङ बिलङ तोशीज गयाच।” 38 यीशुस दोगोतु लोइक्यो, “किसीऊ पता मा रुच, किसी छौग ऊनचो रुच? छगिङ दुखङहु कोलिच गह तुङमो रुग, किसी दोह पङ तुङमो थानताचहा? आए छगिङ बपतिस्मा गह ऊनमो रुग, किसी छौग ऊनमो थान ताचहा?” 39 दोहसङस यीशु पङ लोइक्याश, “निसी लानमो थानताच।” यीशुस दोगोतु लोइक्यो, “छगिङ कोलिच गह तुङमो रुग, किसी तुङताच; आए छगिङ बपतिस्मा गह ऊनमो रुग, दोह पङ ऊनताच। 40 आए हातेतुइ ताइएस परमेश्वरस तैयार लानशीज तोह, दोगोतु सिवाय आए हातु जङ ली आङ जाखङ रङ आङ खोजिङ स्थोनमो आङ दाह होक मा रुग।” 41 होज्जे थासमो निम आए साय चेलगातु, याकूब रङ युहन्नो देन रोषङ देगयाश। 42 दोनिम यीशुस दोगो चइकेतु ओशको आरयाया लोइक्यो, “किन पता रूइ, हातेइ गैर यहूदीगातु देन शासक तिश, दोगो दोगोतु देन शासन लानजगा तिश, आए दोगोतु माजो हातेइ मुखियगा तिश दोगो दोगोतु देन होक लानजगा तिश। 43 पर किन माजो होज्जय माय किन माजो हाति महान बन्नेनमो गयातो, दोह पङ चइकेतु सेवा लानमो खाबतो। 44 आए हाति किन माजो मुखिया बन्नेनमो गयातो, दोह पङ चइकेतु दास बन्नेनमो खाबतो। 45 छुलोनमा मिहऊ छाङ होज्जु नुस मा बहबह तोह, दोहस आनु सेवा लानमो शेनमो, पर आनीस सेवा लानमो ताइएस, आए मिहतु पापोज छुडयामो ताइएस आनु प्राण रानमो बहबह तोह।”

ताबसो बरतिमायु मीगा ठीक लानमो

46 दोगो यरीहो शहरो बइक्याश, तेबेरोइ दोह रङ दोह चेलगा आए भीडू यरीहोज दोहच तेक्याश, देबेरो तिमाइऊ छाङ बरतिमाइ लोनमोग इद ताबसो भिखारी, सोलकु नङ तोशीस तेक्यो। 47 दोहस होज्जय थासक्यो दोह यीशु नासरी तोह, दोनिम दोहस जोर-जोरीस टोकेदो लोच तेक्‍यो, “हे दाऊदु छाङ, यीशु आङ देन दया लान।” 48 मुलुक मिहस दोह पङ डाँटयागयाश चुटू निऊ, दोनिम ताह दोह आए ली मुलूक जोरीस टोकेनमो देगयो, “हे दाऊदु छाङ, आङ देन दया लान!” 49 दोनिम यीशुस रूकेके लोइक्यो, “दोहपङ आरयाइ।” आए मिहस दोह ताबसो पङ आरयाया दोह पङ लोइक्याश, “हिम्मत तोह! सारश! दोहस कानजु आरयाजो रूह।” 50 आए दोहस आनु कापरा फिक्याया फटक सारशीगयो, आए यीशु दवा बइक्यो। 51 जुह देनज यीशुस दोह पङ ऐक्यो, “काह छौग गयाया तन, गह कान ताइएस लानग? दोह ताबसो मिहस यीशु पङ लोइक्‍यो, “हे गुरु जी, गह होज्जय गयाया तुक, गह ताङज गयाक।” 52 यीशुस दोह पङ लोइक्यो, “ब्यो, कान विशवासीस कानजु चंगा लानचिस रूह।” दोह पङ फटक ताङमो देगयो आए ओम्मो यीशु निमस्कोज ब्योक्यो।

11

यरुशलेमो जोरदार स्वागत

1 तेबेरोइ दोगो यरूशलेमु ओशको, जैतूनु डोखङहु दवा बैतफगै रङ बैतनियो ओशको बइक्याश, दोहच यीशुस आनु चेलगातु माजो निशतु होज्जय लोहलोह शेक्यो, 2 “ओमस्को ज्यो गोनिङ ब्योइ, आए दोह गाँनिङ पदेरङ इद फोचु छाङ छुशीज किसीऊ पोरेतो। आए दोह देन हाति मिह चोंगे मा तोशीस तिश, दोह पङ तोङतोङ कइ। 3 आए अगर किसीऊ हातेस एचिमा, किसी होज्जय छुह दोह रूच? दोनिम किसी लोहराच, प्रभु पङ जुह जरुरत रुह, आए दोहस फटक दोह जङ वापस होज्जा शेतो।” 4 दोनिम दोहसङ होदोक्च ब्योक्याश, आए दोहसङस फोचु छाङहु इद गलियो खोलु बेरिङ छुशीज ताङगयाश, दोनिम दोहसङ दोह पङ टोगयाश। 5 हातेइ मिह होदाह डेन तेक्याश, इदे-इदेस दोहसङहु ऐक्याश, “होज्जय छुह दोह रुच, जुह फोचु छाङहु जङ छुह टोहहो रूच?” 6 हाल्लाइ यीशुस लोहलोह रूमोग, होदेइ दोसङस दोगोतु लोइक्याश दोनिम मिहस दोसङहूजङ फ्योमो शेक्याश। 7 दोगोस फोचु छाङहु यीशु दवा करकर दोह थोग आनेतु गासा लादयागयाश, आए यीशु दोह थोग तोशीगयो। 8 दोनिम मुलूक मिहस आनेतु गासा ओम्मो पोशक्याश, आए हाइदे मिहस रिमापोज बाराह थाबथाब ओम्मो पोशक्याश। छुलोनमा स्वागत लानमो ताइएस। 9 हातेइ यीशु ओमस-ओमस रङ निमस-निमस तेक्याश, दोगो टोकेदो ब्यो तेक्याश, “होशाना”! मतलब परमेश्वरु स्तुति हाचिज गया, हाति परमेश्वरु नामङस बच्या तोह, दोह पङ परमेश्वरस आशीष रानतो। 10 किशो बाबा दाऊदु राज पङ, हाति बदो रूह, परमेश्वरस आशीषीत लानज गया! सोरगङ होशाना।” 11 दोह यरुशलेम पनमो निम मन्दिरो ब्योक्यो, आए चइ बिलङ चइ चीजोतु खिहखिह, सोनिश चेलगा रङ बैतनिया ब्योक्यो, छुलोनमा शुपेलिङ हाचिस तेक्यो।

बगैर फोलङहु तिरमोलु बोठङ

12 हाइद दयार तेबेरोइ दोगो बैतनिया देशङज दोइक्याश, देबेरोइ यीशु पङ ऊन्न देगयो। 13 दोहस वारकोज इद तिरमोलु राग बोठङ ताङगयो आए ओशको बयोक्यो, छौग पता दोगो फोलङ पोरेनमा, पर पाचङहातु सिवाय छच़ी मा पोरेक्यो, छुलोनमा फोलङहु वक्त मायक्यो। 14 जुह देनज यीशुस दोह बोठङहु लोइक्यो, “हुनक्च निम कान फोलङ हाती मिहस चोंगे मा जाज गयाश!” आए दोह चेलगास रेनचो तेक्याश।

यीशुस मन्दिरोज सौदा रेचगातु तनमो

15 दोनिम दोगो यरुशलेम बइक्याश आए यीशु मन्दिरो ब्योक्यो, आए हातेइ होदोर सौदा लानो तेक्याश दोगोतु खेरयागयो, दोहस पैसातु लेन-देन लानजगातु मेजोतु फरालगयो आए कबूतर रेचगातु मेजो पौलटयागयो। 16 आए मन्दिरु सान्थङहो छच़ी चीजो करमो रङ फ्योमो मा शेक्यो। 17 दोनिम यीशुस उपदेश रानो दोगोतु लोइक्यो, “धर्मशास्त्रो होज्जय मा चेशीज तोहा, आङ किम चइ जातिगातु प्रार्थना लानमोग स्थान नारशो? पर किह दोह पङ डाकूगातु आढडा बन्याया रूइ। 18 होज्जे थासथास प्रधान याजको रङ शास्त्रीगा दोह सानमो ताइएस मौका पोचिज तेक्याश, दोगो दोह दोक्च भयाङचगा तेक्याश छुलोनमा चइ मिह दोह उपदेश थासथास हैरान हाचिजगा तेक्याश। 19 शुपेलिङ हाचिमो निम, दोगो नगरोज बेरिङ ब्योक्याश।

छारज तिरमोलु बोठङहु दोक्च शिक्षा

20 हाइद सोम तेबेरोइ यीशु आनु चेलगा रङ ब्योच तेक्यो देबेरो दोगोस दोह तिरमोलु बोठङहु, जिलङ स्तङ छारछार ताङगयाश। 21 पतरसु दोह बातङ याद देगयो, आए दोहस यीशु पङ लोइक्यो, “हे गुरू जी, खिऊ! हाति तिरमोलु बोठङहु जङ काह स्राप रानगिन, दोह छारछार तोह।” 22 यीशुस दोगोतु जबाब रानगयो, “परमेश्वरु देन विशवास ताइ। 23 गह किनजु सोच रिङहो रूग हाइसी जुह डोखङ लोहतोह, काह दोहदोह सोमोदरङ बयो, आए आनु मोनङहु कुमो शक मा लानमा, पर विशवास लानमा, छगिङ गह जोह रूग दोह हाच्चो, दोनिम दोह ताइएस होदेइ हाच्चो। 24 दोगिता गह किनजु रिङहो रुग, छोगिङ किह प्रार्थना लानलान ऊनतइ, दोनिम विशवास लानरे किनजु पोरेक आए किन ताइएस हाच्चो 25 आए तेबेरोइ किह डेन हाचिस प्रार्थना लानजगा तइ, देबेरो किन मोनङ हात मिहऊ खिलाफ बातङ रूइ, दोह पङ माफ लानी, छुलोनमा किन स्वर्गू बाबास किन वामङ दाशिजा कामङहातु बोदला किनजु ली माफ लानचिजगया। 26 आए अगर किह माफ मा लानमा, दोनिम किन बाबा हाति स्वर्गो तोह, किन वामङ लानशीजा कामङहा बोदला किनजु ली माफ मा लानच।"

यीशु होकु बारे सवाल

27 दोनिम दोगो हेस्स यरुशलेम बइक्‍याश, आए तेबेरोइ दोह मन्दिरो हालेदो तेक्यो, देबेरो प्रधान याजक रङ शास्त्रीगा आए स्यानोस दोह दवा बहबह ऐहच तेक्याश, 28 “काह जुह कामङहा छौग होकिस लानजया तन? आए जुह होक कानजु हाइस केहके रूह, जुह कामङहा काह लान? 29 यीशुस दोगोतु लोइक्यो, “गह ली किन दोक्च इद बातङ एचिम रूग; आङ जुह जबाब केइ, दोनिम गह किनजु रिङतुक, जुह कामङहा गह हातु होकिस लानजया तुक। 30 युहन्नो बपतिस्मा परमेश्वरु बिलङज तेहका या मिहतु बिलङज तेहक, आङजु जबाब केइ।” 31 दोनिम दोगोस आनेतु कुमो बहस लानो तेक्याश, अगर किशा लोनमा ‘परमेश्वरु बिलङज’ तेहक, दोनिम दोहस रिङतो, ‘किह दोह देन विशवास छुह मा लानगे।’ 32 आए अगर किशा लोनमा मिहतु बिलङज तेहक, दोनिम मिहतु भयाङ तोह, छुलोनमा चइ नेचगा तिश युहन्ना सोचक्योहि भविष्यवक्ता तेहक। 33 दोनिम दोगोस यीशु पङ जबाब रानगयाश, “निह मा नेचगा तनमा।” यीशुस दोगोतु लोइक्यो, “गह ली किनजु मा रिङग जुह कामङ गह हातु होकिस लानजया तुक।”

12

यीशुस पारशीयो लोनमो

1 दोनिम यीशुस दोगोतु पारशीयो बातङ सोमझयाज तेहक्यो: “इद मिहस दाखङहु बगीचा शेक्यो आए फिरकोट बारयागयो, दोनिम दाखङहु रसु ताइएस इद पान्नु देन खारङ बन्यागयो आए इद शेनङ बन्यागयो दोनिम दोह पङ कामङ लानजगा मिहतु गारङस रानरान परदेस ब्योक्यो। 2 दोनिम फोसल पाकेनमोगु बेरङ आनु हिस्सा ऊनमो जङ मालिकिस कामङ लानजगा मिह दवा आनु इद सेवकू शेक्यो, 3 दोनिम दोगोस दोह पङ चुमचुम कुलगयाश आए शागी गोद वापस शेक्याश। 4 दोनिम मालिकिस हाइद सेवकू दोगो दवा शेक्यो, दोगोस दोह बाल्ल खुसक्याश आए दोह बेजित लानगयाश। 5 दोनिम मालिकिस आइदु जङ शेक्यो, दोगोस दोह पङ साइक्याश। दोनिम मालिकिस आए मुलूक सेवकोतु शेक्यो, दोगोतु माजो आधङतु दोगोस कुलगयाश आए आधङतु साइक्याश। 6 हाति मालिकु प्यारा छाङ रूगयो, ऐब्बे दोह इदही बोच्चे तेक्यो। आखरी वक्तो दोहस आनु छाङहु ली दोगो दवा होज्जय सुनच्याशीस शेक्यो। दोगो आङ छाङहु इज्जत लानताश। 7 दोनिम कामङ लानजगास राया लानगयाश, ‘जुहीता होकदार तोह, जइ किशा जुह जङ सानमे, दोहच होक किशो हाच्चो’ 8 दोनिम कामङ लानजगास दोह छाङहु जङ चुमचुम साइक्याश आए दाखङहु बगीचो बेरिङ फिक्यागयाश 9 यीशु ऐक्यो, “जुह दोङज दाखङहु बगीचो मालिक छौग दाहतो? मालिक बहबह दोगो कामङ लानजगातु खत्म लानतो आए दाखङहु बगीचा हाइदेतु रानतो। 10 किह छौग चोकोस शास्त्रो जुह बोचन मा हुशीगेया हाती रागु जङ राजो मिस्त्रिगास निक्मा लोहलोह रुमोगा, होदोइ पौह राग हाचिगयो 11 जुह प्रभु बिलङज हाचिज आए किशो नजरोपो बिशारेनमोग तोह!” 12 दोनिम दोगो यीशु पङ चुम्मो गयाया तेक्याश, छुलोनमा दोगो सोमझेक्याश यीशुस निङ खिलाफ जुह पारशी रिङ-रिङ रुह, पर दोगो मिहतु दोक्च बयाङक्याश आए दोह जङ शोठ्ठयाया ब्योक्याश।

यीशु दोक्च करु बारे ऐहमो

13 दोनिम इदेस यीशु पङ बातङहापो फोसयामो ताइएस, फरीसीगा रङ हेरोदिगातु दोह दवा शेक्याश 14 दोगोस बहबह दोह दोक्च ऐक्याश, “हे गुरु जी, निङ पता रुमा काह सोच्चा तन आए हातुइ परवा मा लान ज्या तन, छुलोनमा काह मिहतु हैसियत खिहखिह मा बातेसच्या तन, पर मिहतु ताइएस परमेश्वरु छोगिङ इच्छा रुह दोह बारे शिक्षा सच्चाई लोच्या तन, पर कैसरु लगान रानमो ठीक तोह या माय? निह रानमा या मा रानमा?” 15 यीशुस दोगोतु छल लानो रूश नेहनेह दोगोतु लोइक्यो, “आङजु छुह पोरखयाजो रूइ? इद मुलू सिक्का आङ दवा कइ, गह दोह जङ खिमो रूग।” 16 दोगोस सिक्का करगयाश आए दोहस दोगोतु लोइक्यो, “जुह छाप रङ नामङ हात्तु तोह?” दोगोस लोइक्याश, “कैसरु तोह।” 17 यीशुस दोगोतु लोइक्यो, “छोगिङ कैसरु तोह होदोह कैसरु रानी, आए छोगिङ परमेश्वरु तोह होदोह परमेश्वरु रानी।” दोनिम दोगो दोह बातङहु देनज मुलूक बिशारेक्याश।

शिमो निम हेस्स डेयङ पोरेनमो बारे लोनमो

18 दोनिम सदुकिगा ली, हातेइ लोशीज तेक्याश शिजा मिहतु हेस्स न्यूग डेयङ मा पोरेत, यीशु दवा बहबह दोह दोक्च ऐक्याश, 19 “गुरु जी, मुसास निङ ताइएस चेहचेह रुह, अगर हातु बाज छाङहा पैदा मा लानलान शिमा, आए दोह दोरजे शङ निमा, दोनिम दोह भाज़ीस दोह दोरजे रङ शादी लानलान आनु आतेओ ताइएस वंश बढयाज गया। 20 स्तीश बाजा तेक्याश। चइकेपोज तेग बाज शादी लानमो निम छाङ पैदा मा लानलान शिगयो 21 दोनिम हाइद भाज़ीस दोह दोरजे रङ शादी लानगयो दोहली छाङ पैदा मा लानलान शिगयो, आए होदेइ हाइदू दोङज स्या भाज़ीस ली लानगयो। 22 आए स्तीश भाजा दोक्ची छाङ मा हाचिगयो। दोनिम दोह छेचमि ली शिगयो। 23 तेबेरोइ चइ शिजा मिहतु न्यूग डेयङ पोरेतो दोह दयार दोह छेचमि दोगो स्तीश बाजातु माजो हातु नार हाच्चो? छुलोनमा दोह स्तीश बाजातु नार हाचिस तेहक?” 24 यीशु दोगोतु लोइक्यो, “नता किह चोकोस शास्त्र पङ नेचगा तइ आए ना परमेश्वरु सोतिङहु नेचगा तइ? पक्का, किह होज्जु ताइएस ओम्म पीशिस तइ। 25 छुलोनमा तेबेरोइ दोगो शिजातु माजो हेस्स शङ हाचिस दोनिम दोगोस शादी मा लानश आए शादीगा ली मा हाचिस, दोनिम दोगो स्वर्गो परमेश्वरु दूतो गान नितिश। 26 शिजापोज शङमोगु बारेओ किह छौग मुस्सो किताबो झाटङहु कोथ्यो जुह मा हुशीगेया। परमेश्वरीस दोह जङ लोनमोग, ‘गह अब्राहमु परमेश्वर, इसहाकु परमेश्वर आए याकूबु परमेश्वर तुक?' 27 आए दोगो शिमो निम ली शङग तिश, परमेश्वर शङ निजगातु परमेश्वर तोह, शिजातु मानी। होज्जु नुस किह मुलूक तेग गलती लानो रुइ।

चइकेपोज तेग आज्ञा

28 दोनिम इद धर्म शास्त्री बइक्यो आए दोगोतु बहस लानज थासक्यो, दोनिम होज्जय नेहनेह यीशुस दोगोतु हाल्ला ठीक जबाब रानमोग, दोहस यीशु दोक्च ऐक्यो, “चइकेपोज तेग आज्ञा छौग तोह?” 29 यीशुस दोह जङ जबाब रानगयो, “चइ हुकुमोतु माजिङ होज्जु बातङ तेग तोह: ‘हे इस्राएल थास! किशो प्रभु परमेश्वर सिर्फ इदही प्रभु तोह। 30 आए काह प्रभु कान परमेश्वर रङ कान चइ मोनङस, आए कान चइ प्राण, रङ कान चइ समझ रङ आए कान चइ ताकत रङ बेन्नङ ताहराह।’ 31 आए हाइद होज्जय तोह, ‘काह कान पडोसी रङ आनु गान बेन्नङ ताहराह, जुगोज तेग आए छच़ी आज्ञा माय। 32 शास्त्री दोह पङ लोइक्यो, “हे गुरु, काह ठीक रिङगिन! काह सोच रिङगिन, प्रभु परमेश्वर सिर्फ इदही तोह, परमेश्वरु छारयाया आए हाति मायश 33 आए दोह रङ चइ मोनङ रङ आए चइ समझ, रङ आए चइ ताकत रङ बेन्नङ ताहरे , आए पडोसी रङ आनु गान बेन्नङ ताहमो, चइ होमबलि रङ बलिदानोपोज बढ्ढेह तोह। 34 तेबेरोइ यीशुस ताङगयो, दोहस सोमझेझे ठीक उतर केक, दोनिम दोह पङ लोइक्यो, “काह परमेश्वरु राजोज वारको मायन।” आए हातुइ हेस्स दोह दोक्च छच़ी सवाल ऐहमो हिम्मत मा देगयो।

मसीह हातु छाङ तोह?

35 यीशुस मन्दिरो उपदेश रानबेरो, दोगोतु ऐक्यो, धर्म शास्त्र नेचगा हाल्ला रिङजगा तिश, मसीह दाऊदु वंशोज तोह? 36 दाऊदिस आनीस चोकोस आत्मो बङबङ रिङरिङ रूह: 'परमेश्वरस आङ प्रभु पङ लोनमोग: आङ जाखङहो तोश, तेरङ स्तङ गह कान दुशमनोतु कान बाङहातु छङ मा करग'। 37 दाऊदिस ताह आनीस मसीह पङ प्रभु लोच्या तोह, दोनिम मसीह दाऊदु छाङ हामच हाचिग? आए भीडू मिहस दोह बातङहा खुशिश रेनचो तेक्याश।

शास्त्रीगातु दोक्च सावधान

38 दोहस आनु उपदेशो दोगोतु लोइक्यो, “धर्मशास्त्रीगा दोक्च चौकस निहरे। दोगो आनेतु डेयङहो लाम्बा-लाम्‍बा गास्सा गाजिस हालेनमो पंसद लानजगा तिश आए बाजारोपोस दोगोतु नमस्ते लोनमा दाम चालजगा तिश 39 आए आराधनालयो दाम-दाम जागोह तोशीमो रङ खाऊ ज़ामो बेरङ ली ओभोल जागाह गयाचगा तिश 40 दोगो रांडोलेतु धोखा रानजगा तिश किमातु लुटयाजगा तिश, आए दोगोतु जाङमो जङ मुलूक देर स्तङ प्रार्थना लानो निजगा तिश, जुगोतु मुलूक सजा पोरेतो।

गरीब रांड छेचमिऊ दान

41 यीशु मन्दिरो दानु पेटिऊ ओमस्को तोशीस खियो तेक्यो, मिहस दानु पेटियो तोह-तोह रुपया शेदो रुश, मुलूक अमीरो मिगास मुलूक रुपया शेक्याश। 42 जुनिम इद रांड छेचमि बइक्यो, दोहस निश त्रोमङहु सिक्कगा शेक्यो, निश त्रोमङहु सिक्कगा इद रुपयो बराबर ली मायक्याश 43 दोनिम यीशुस आनु चेलगातु आरयाया, दोगोतु लोइक्यो, “गह किनजु सोच रिङहो रुग, मन्दिरो दानु पेटियो शेचगा मिहतु माजो, जुह गरीब रांड छेचमि चइकेपोज बोदी शेनमोग; 44 छुलोनमा, चइकेस आनु बोदी रुपयातु माजो दान शेनमोगा, पर जुहस आनु दवा कम रुपया निहनिह ली छोगिङ दोह दवा रुमोग, आनु चइ कमाइ शेहशेह रुह।

13

मन्दिरु नाश हाचिमोगु बारे लोनमो

1 तेबेरोइ यीशु मन्दिरोज बेरिङ दोहच तेक्यो, देबेरो दोह चेलगातु माजो इद चेलास दोह जङ लोइक्यो, “हे गुरु जी, खिऊ, हाल्ला तेगे रागा रङ हालिस शारे भवनो तिश!” 2 यीशुस लोइक्यो, “काह नूह तेगे भवनोतु खियो रुना: होजोर इद रागु देन हाइद राग ली टिकेके मानी, इद-इद रागातु जङ फरालताश।”

मुसीबत रङ दुखङ

3 तेबेरो यीशु जैतूनु डोखङहु देन मन्दिरु ओमस्को तोशीस तेक्यो, दोनिम पतरस, याकूब, युहन्ना रङ अन्द्रियासीस यायी ब्योब्यो, दोह दोक्च ऐक्याश, 4 “निङजु जङ रिङ जुह चइ बातङहा तेबेरो बीतेतिश? आए तेबेरोइ जुह चइ बातङहा बितेनमो नितिश, दोह वक्तो छौग निशान निहतोह?” 5 यीशुस दोगोतु लोच तेक्यो, “चौकोस नीह, हाइसी किनजु मा बेक्याजिज गया। 6 मुलुक मिगास आङ नामङस बहबह रिङतिश, ‘गह होदोइ तुक!’ आए मुलूक मिगातु बहक्याताश 7 तेबेरोइ किह लडाइगा रङ, लडाइगा हाचिमो बारे बातङहा थासतइ, देबेरो थाह भयाङरे, छुलोनमा जुह चइ पक्का हाचिस, पर दोह वक्तो खत्म मा हाच। 8 इद जातिश हाइद जातिऊ देन, इद राज्य हाइद राज्य खिलाफ हाचिस कुलिशस, चइ जागगापो जुङगू बतो आए अकाल बतो, पर जुह चेल्लो हाचिमोगु ओमस दुखङहु शुरूवात गान नितोह। 9 "पर किह किन बारेओ चौकोस निह, छुलोनमा मिहस किनजु गिरफ्तार लानचिस रङ कोट्टो फ्योचिस, आए आराधनालयगापो किनजु कुलचिस आए किनजु आङ ताइएस नेतगा रङ राजगातु ओमस्को डेन लानचिस, छुलोनमा आङ वजेस दोगोतु सुसमाचार सुनयाज गयाइ। 10 पर खत्म हाचिमोगो ओमस, सुसमाचार चइ मिहतु प्रचार लानमो जरुरी तोह। 11 तेबेरी दोगोस किनजु चुमचिस कोट्टो फ्योचिस, दोगोतु हवाले लानचिस। देबेरो किह ओम्मसी चिन्ता थाह लानरे, किशा छौग लोहते, दोह वक्तो छोगिङ किनजु रिङतो होदोइ लोहरे, छुलोनमा देबेरो बातेसच्या किह मानी, किन कुमो चोकोस आत्मा तोह। 12 भाजीस भाजु जङ, बाबास छाङहु जङ सानमो शेताश आए छाङहास आनु आम्मा रङ बाबो खिलाफ हाचिस, दोगोतु सानमो शेताश। 13 आए आङ नामङहु ताइएस चइ मिहस किन रङ दुशमनी लानताश, पर दोहली हाति जिन्दगी खत्म हाचिस स्तङ बोन्नेने नितोह, दोह उध्दार हाचो।

मुलुक मुसीबतोतु वक्त

14 दोनिम किह तेबेरोइ दोह खत्म लानिचमोग चीजु हामिङ दोह मा निमो गयाच, होदोऱ डेन ताङतई, (हुशिजगा सोमझेरे) देबेरो हात्तेइ मिह यहूदियो नितिश, दोगो डोखङहु देन ब्योरे। 15 हात्तेइ मिह आनु किमु छापरङहे नितिश, दोगो योग जाबजाब, छौग चीज़ करमो ताइएस किमु कुम्मो ब्योब्यो, वक्त बर्बाद थाह लानरे; 16 आए हातेइ बेरिङ रिमापोस नितिश, दोगो आनु कापरा करमो ताइएस निमस्को थाह ब्योरे 17 दोह छेचातु ताइएस हातेइ छाङहा ताजगा नितिश आए हातेतुइ खेरङ तुङजगा छाङहा नितिश, दोगोतु ताइएस मुलूक दुखङसगा दयारो नितिश। 18 प्रार्थना लानी जुह चइ गुण दयारो मा हाचिज गया। 19 दोह दयारोपो होजेस दखुङहा बतिश, जुह संसारु शरुवातोज, हातुइ परमेश्वरीस बन्याया रुह, तोरोस स्तङ नाता हाचिग आए नता हेस्स हाच्चो। 20 पर परमेश्वरस आनु बिन्याशिजातु ताइएस, दोह दयारोतु कम लानलान रुह, अगर मा लानलान निमा, हाति मिह मा बोचेचा, 21 दोह दयारोपो हाइसी किनजु रिङमा, ‘खिह, मसीह होज्जा तोह’, या ‘खिह, होदाह तोह’, देबेरो दोगोतु विशवास थाह लानरे; 22 छुलोनमा जाली मसीह रङ जाली भविष्यवक्तगा ताङमो बतिश आए निशानो रङ बान्ते सोतिङहु कामङहा बिन्याशिजातु बेक्यामो जाङचिस, अगर लानमो थानमा। 23 दोहली किह चौकोस निह; खिह, गह किनजु चइ बातङहातु दोह वक्त बनमोगु ओमसी रिङरिङ रुग।

मिहऊ छाङहु हेस्स बनमो

24 दोह दयारोपो दोह मुसीबतु वक्तु निम वेन अंधेरा हाच्चो आए गोलसङस छाग माके 25 आए सोरगङज स्कारा दानमो शुरु लानताश आए सोरगङहु सोतिङहातु चुक्याताश। 26 दोनिम मिहस, मिह छाङहु जङ मुलूक सोतिङ रङ आए महिमा रङ दुइुङहो बच ताङताश। 27 दोह वक्तो दोहस आनु दूतोतु शेहशेह, धरतीऊ जुह किनारे, सोरगङहु दोह किनारे स्तङ, चइ दिशोज आनु बिन्याशिजा मिहतु राशङ लानतो।

तिरमोलु बोठङहु उदाहरण

28 “तिरमोलु बोठङहु दोक्च जुह बातङहु मतलब सोमझेइ: तेबेरोइ दोह डालङ नरम हाचिज्या निहतोह आए न्यूगे पाचङहा दोनमो शुरु लानताश दोनिम किह नेचगा तइ किह गरिमगातु दयारो बनमो रुश। 29 होजेइ तेबेरोइ किह जुह बातङहातु बीतेच ताङतई, दोहच सोमझेरे, दोह वक्त, ओशको बहबह तोह, आए शुरु हाचिमो रुह। 30 गह किनजु सोच रिङहो रुग तेबेर स्तङही जुह चइ बातङहा मा बितेश, दोह स्तङ जुह मिह मा शिश 31 सोरगङ रङ धरती खत्म हाचिस दोहली आङ बातङहा चोंगे खत्म मा हाचिस

खियो निह आए चौकोस निह

32 “दोह दयार रङ दोह वक्तु बारेओ हाती मा नेच्या तोह, नता स्वर्गू दूत, ना छाङहिस, पर सिर्फ बाबास नेच्या तोह। 33 थासी, खियो निह आए चौकस निह, छुलोनमा किह मा नेचगा तइ, दोह वक्त तेबेर बच्या तोह। 34 होज्जु दोह मिहु हालत देस तोह, हाति परदेस ब्योमो बेरङ आनु किम छारयाया ब्योतो आए आनु नौकरोतु होक रानतो, आए चइकेतु आनु-आनु जिम्मेदारी रानतो आए दवारपालु खियो निमो हुकुम रानतो। 35 आए होज्जु ताइएस खियो निह, छुलोनमा किह मा नेचगा तइ, किमु मालिक तेबेरो बच्या तोह, शुपेलिङ बतो या माजरा रातिङ या कुखरस बाशेनमो वक्तो या सोम। 36 होज्जय मा हाचिज गया, दोहस अचानक बहबह, किनजु याक्शीस ताङचिज गया। 37 आए छोगिङ गह किनजु रिङहो रुग, होदेइ गह चइकेतु लोदो रुग: खियो निह!”

14

यीशु खिलाफ साज़िस

1 निश दयारु निम फसह रङ अखमीरी रोटेतु खोदिङ बच्या तेक्यो, प्रधान याजको रङ शास्त्रीगा जुह बाना पोचिज तेक्याश, किह दोह पङ हाल्ला धोखास चुमचुम सानमे। 2 दोनिम दोगो लोशीज तेक्याश, खोदिङहु दयारोपो मानी, हाम होज्जय मा हाचिज गया, मिहस छौगता मुसीबत खडा लानमा।

बैतनियो यीशु बाल्ले इत्र ओसमो

3 तेबेरोइ यीशु बैतनियो शमौन हातुइ कोढ़ रुमोग, दोह किमो खाऊ ज़ामो तोशीस तेक्यो, देबेरो इद छेचमिहस संगमरमरु बानिहो जटा मासिऊ, शुध्द मुलूक किमती ईत्र लिगशीस बइक्यो; आए बानिङ चगचग ईत्र दोह बाल्ले ओसक्यो। 4 जुह दोङज होदाह हातेदह मिहस चिड़डेह लोशीगयाश, “जुह इत्र छुह बर्बाद लानगे? 5 छुलोनमा जुह इत्र शुमराह मुलू सिक्कगापोज बोदी किमतो रेशीजद आए दोह सिक्कगा गरीबोतु कागमा दाम तेहक” आए दोगोस दोह पङ डाँटयामो देगयाश। 6 यीशुस लोइक्यो, “दोह पङ निमशेइ; दोह छुह परेशान लानो रुइ? दोहस्ता आङ रङ भला लानमोग। 7 गऱिबो किन रङ सौदाइ निजगा तिश, आए किह तेरङहि गयातइ, देरङ दोगोतु भला लानमो थानतइ, पर गह किन रङ सौदाइ मानिग। 8 छगिङ दोहस लानमो थानमोग, दोहस लानमोग, दोहस आङ आडयाजिमोगु तैयारिऊ ओमची, आङ डेयङ इत्र शेहशेह लानमोग 9 गह किनजु सोच रिङहो रुग, चइ संसारो हामिङ सुसमाचार प्रचार हाच्चो, होदोर दोह कामङहू चर्चा, दोह याद ताहमो लानताशो।”

यहूदो विशवासघात

10 दोनिम यहूदा इस्करियोती हाति सोनिश चेलगातु माजो, इद तेक्यो, प्रधान याजको दवा बइक्यो, छुलोनमा यीशु पङ दोगोतु गोदोह चुम शेनमो जङ। 11 दोगो जुह बातङ थासथास मुलूक खुश हाचिगयाश आए दोगोस दोह पङ रुपया रानमो वादा लानगयाश, दोनिमज निम यहूदा यीशु पङ धोखास चुम शेनमो ताको तेक्यो।

चेलगा रङ फसह खोदिङहु आखरी भोज ज़ामो

12 बटुरु मा जामोग खोदिङहु पहला दयारो, दोगोस फसह खाच्चु बलि रानजगा तेक्याश, यीशु चेलगास यीशु पङ ऐक्याश, “काह हाम गयाच्या तन, निह ब्योब्यो कान ताइएस फसह ज़ामो जङ तैयारी लानमा?” 13 यीशुस आनु चेलगातु माजो निशतु होज्जय लोहलोह शेक्यो, “नगरो ब्याही, आए इद मिह तिहसे घोर थोहथोह किसीऊ पोरेतो, दोह निमस्कोज ब्योराच; 14 आए दोह मिह हाति किमो ब्योतो, दोह किमु मालिकु जङ लोहराच, ‘गुरु जी रिङहो रुह, दोह कोमरा हाम रुन, हामिङहि गह आङ चेलगा रङ फसह भोज ज़ामो रुग। 15 दोहस किसीऊ इद सोज्याशि, तैयार लानशीज थोग तेग कोमरा जाङचो, होदाइ निङ ताइएस तैयारी लानी।” 16 दोह निश चेलगा दहदह नगरो बइक्याश, यीशुस दोहसङहु जङ हालिङ लोहलोह रुगयो, होदेइ पोरेक्यो, दोनिम फसह तैयार लान गयाश 17 शुपेलिङ हाचिमो निम, यीशु सोनिश चेलगा रङ बइक्यो। 18 तेबेरोइ दोगो तोशीस खाऊ जोह तेक्याश, “देबेरो यीशुस दोगोतु लोइक्यो, गह किनजु जङ सोच रिङहो रुग, किन माजिङज इद, हाइसी आङ रङ खाऊ जोह रुह, आङ जुह चुमचिमो शेहतो।” 19 दोनिम दोगोस दुखी हाचिस, इद-इद यीशु पङ ऐक्यो, दोह गह तुका 20 यीशुस दोगोतु लोइक्यो, “दोह किन सोनिश चेलगातु माजो इद तोह, हातिसी आङ रङ कोलिचो गोद शेदो रुह। 21 छुलोनमा मिहऊ छाङहु ताह, हाल्लाहि दोह बारेओ चेशीज तोह, होदेइ शिमो रुह, दोहली दोह मिह पङ हाय! हातुइ दोक्च मिहऊ छाङ चुमशो, अगर दोह मिहऊ जोरमङ मा हाच्चिस निमा, दोह ताइएस भला निजद”

प्रभु भोज ज़ामो

22 तेबेरोइ दोगोस प्रभु-भोज जोह तेक्याश, यीशुस रोट थोगयो, दोनिम धन्यावादु प्रार्थना लानलान खानया गयो, आए दोगोतु रानगयो, आए लोइक्यो, ओईई, जुह आङ डेयङ रुग।” 23 दोनिम यीशुस कोलिच थोहथोह धन्यावाद रानगयो, आए दोगोतु रानगयो; आए दोगो चइ कोलिचोज तुङगयाश 24 आए यीशुस चेलगातु लोइक्यो, “आङ जुह खुन परमेश्वरु न्यूग इकरारनामा पङ पक्का लानचया तोह, हाति मुलूकु ताइएस ब्योह रुग, 25 गह किनजु जङ सोच रिङहो रुग, दोह दयार स्तङ शुध्दुङहु जङ, हेस्स चोंगे मा तुङग, तेरङ स्तङ परमेश्वरु राज न्यूग मा तुङग।” 26 दोनिम दोगो भजन लानलान बेरिङ जैतूनु डोखङहो ब्योक्याश।

पतरसु मुकरेनमो बारे भविष्यवाणी

27 दोनिम यीशुस दोगोतु लोइक्यो, “किह चइ विशवासोज भटक्याशइ आए आङ शोट्टयाजइ, छुलोनमा चेशीज तोह: ‘परमेश्वरस पालसु सातोह आए चइ जेह छितर-कितर हाचिस।’ 28 दोनिम परमेश्वरस आङ शङग लानचिमो निम, गह किनोज ओमस गलीलु जङ ब्योतुक।” 29 पतरसीस दोह पङ लोइक्यो, “चाऐ चइ शोट्टयाजिमा, पर गह कानजु चोंगे मा शोट्टयाजुक।” 30 यीशुस दोह जङ लोइक्यो, “गह कानजु सोच रिङहो रुग तोरोइ हुजुइ रातिङ काह निश बार कुखरस बाशेनमोगु ओमस, काह शुम जब आङ मा शेचया तुक लोतन।” 31 जुह बातङहु देनज पतरसीस आए ली जोर-जोरीस लोइक्यो, “अगर आङजु जङ कान रङ शिमो ली खाम्मा, दोहली गह कान मा शेचया तुक मा लोक।” आए होज्जेइ चइ चेलगास ली लोइक्याश।

गतसमनी जागोह प्रार्थना

32 दोनिम दोगो गतसनी लोनमोग इद जागोह बइक्याश आए दोहस आनु चेलगातु लोइक्यो, “होज्जा तोशीस निह, तेरङ स्‍तङ गह प्रार्थना लानताक। 33 आए दोहस पतरस, याकूब रङ युहन्ना पङ आनु रङ फ्योक्यो, आए मुलूक दुखी रङ चिंतित हाच्चो तेक्यो, 34 आए दोहस लोइक्यो, “आङ मोनङ मुलूक दुखी तोह, होनो तोह, गह शिमो दोङस्तङ तुक, किह होज्जा निह, आए ज़ोन निह।” 35 दोनिम दोह दोक ओमस्को ब्योक्यो, आए माटिङहु देन बराल बराल प्रार्थना लानमो देगयो, अगर लानमो थानमा, जुह दुखङ वक्त आङ देन मा बितेच गया 36 आए लोइक्यो, “हे पापा, हे अब्बा, कान ताइएस ताह चइ मुमकिन तोह; जुह दुखङहु कोलिचु आङ दोक्च वारको लान, दोहली गह हाल्लिङ गयाच्या तुक, होदेह मानी, पर हाल्लिङ काह गयाच्या तन, होदेइ लान।” 37 दोनिम दोह बइक्यो आए दोगोतु याकशीज ताङताङ पतरसु लोइक्यो, “हे शमौन, काह याक्शो रुना, काह छौग इद घंटा ली ज़ोन निमो मानगीना?” 38 आए दोहस लोइक्यो, “खियो निह, आए प्रार्थना लानो निह, छुलोनमा किह परीक्षो मा बयोच गयाइ! मोनङ ताह तैयार तोह, पर डेयङ कमज़ोर तोह। 39 दोनिम दोह हेस्स ब्योक्यो, आए होदोइ बातङपो प्रार्थना लानगयो। 40 आए हेस्स बनमो निम, दोगोतु यागशीस ताङगयो, छुलोनमा दोगोतु मिगापो निदरङ बहबह तेक्यो, आए दोगोतु छच़ी सोमोझ मा देगयो, दोह जङ छौग जबाब रानमा। 41 दोनिम हेस्स शुम जबचु बारो बहबह दोगोतु लोइक्यो, “ऐब्बे याकेशो निह आए आराम लानी? बस! दोह घंटा बइक! खिह, ऐब्बे मिहऊ छाङ पापिगातु गोदोह चुमशो। 42 सारशी, पइ! खिह, आङ चुमचिम शेचिज्या मिह होज्जा बहबह तोह!”

यीशु पङ धोखास चुम शेनमो

43 यीशुस होज्जय लोदोइ तेक्यो, देबेरोइ यहूदा हाति सोनिश चेलगातु माजो इद तेक्यो, दोहस आनु रङ शोठ्ठगा रङ तलवारो लिगशीस इद भीडू करगयो, आए दोगोतु प्रधान याजको, शास्त्रीगा रङ स्योनोस शेहशेह रुगयाश। 44 दोह चुम्मो शेचयास होज्जय इशारा रानरान रुगयो, हातुइ गह पोपिच रानताक, होदोइ तोह, दोह चुमचुम‍ चौकोसीस फ्योरे। 45 दोह बइक्यो आए फटक दोह दवा बहबह लोइक्यो, हे गुरु जी, आए दोह जङ पोपिच रानगयो। 46 दोनिम दोगोस दोह गोद चुमचुम दोह पङ चुमगयाश 47 दोगोतु माजो हातेइ दवा डेन तेक्यो, इदीस आनु तलवार तोहतोह महा याजकु दासु देन चल्यागयो, आए दोह कानङ तोइक्यो। 48 दोनिम यीशु दोगोतु लोइक्यो, “किह आङजु जङ डाकू चालचिस तलवारो रङ शोठ्ठोगा लिगशीस चुमचिम ताइएस बहबह तइया? 49 गहता दयारो मन्दिरो किन रङ निहनिह उपदेश रानो तेकिक, आए देबेरो किह आङजु जङ छुह मा चुमचिगे, पर होज्जय होज्जु नुस हाचिग, ताकि चोकोस शास्त्ररु बातङ पूरोह हाचिज गया। 50 दोनिम जुह दोङज चइ चेलगास दोह जङ छारयाया भागया शिगयाश। 51 इद जवान आनु सालगी डेयङहो चादर फोगशीस, दोह निमस्कोज हाचिगयो आए मिहस दोह पङ चुमगयाश। 52 २पर दोह चादर छारयाया सालगी भागेक्यो।

महासभो ओमस्को यीशु

53 दोनिम दोगोस यीशु पङ महायाजकु किमो फ्योक्याश, आए चइ प्रधान याजको, शास्त्रीगा आए स्यानो दोह दवा जामशीगयाश 54 पतरस वारको-वारको नियो, दोह निमस-निमस महायाजकु खातङहोस स्तङ कुमो बइक्यो आए होदाह मन्दिरु रुमजगा रङ तोशीस, मेह पालशिज तेक्यो। 55 प्रधान याजको रङ चइ यहूदी महासभा यीशु पङ सानमो ताइएस, दोह खिलाफ शादतो पोचिज तेक्याश, पर दोगोतु हाति मा पोरेक्यो 56 मुलुक मिहस दोह खिलाफ जाली गवाही रानगयाश, पर दोगोतु बातङ इद ली आनेतु कुमो मा रुकशीज्या तेक्यो। 57 दोनिमइदे मिहस सारशीस, दोह खिलाफ जाली गवाही रानगयाश, 58 “निह जु जङ होज्जय जहज थास्सकिमा, गह जुह मिहतु गोपोज बन्याशीज मन्दिरु फरालताश, आए शुम दयारु कुमो हाइद बन्याताक, हाति गोदिस मा बोन्याशिज तोह।” 59 जुह बातङ देन ली दोगोतु गवाही मा रुकशो तेक्याश 60 दोनिम महायाजकिस माजिङहोज डेन हाचिस यीशु पङ ऐक्यो, “काह छुह छच़ी जबाब माक्यो रुन? जुह मिहस कान खिलाफ छौग गवाही क्यो रुश?” 61 दोहली यीशु चुटू तेक्यो, आए छच़ी जबाब मा रानगयो। महा याजकिस दोह जङ हेस्स ऐक्यो, “काह छौग दोह परम धन्य परमेश्वरु छाङ मसीह तना?” 62 यीशुस लोइक्यो, “गह तुक: आए किह मिहऊ छाङहु जङ च़ेइकेपोज बोदी सोतिङ स्या परमेश्वरु जाखङ बिलङ तोशीस, आए सोरगङहु दुइङ रङ बच ताङतई।” 63 दोनिम महा याजकिस आनु गास्स चरचर लोइक्यो, “ऐब्बे किशो गवाहीगातु आए छौग जरुरत तोह?” 64 किह जुह परमेश्वरु निन्दो बातङ थास्के, किन छौग सलाह रुइ? दोगो चइकेस लोइक्याश, जुह मौतु सजो काबिल तोह 65 दोनिमइदे मिहस दोह देन थुक्या गयाश, आए इदेस दोह स्थो छिहछिह, आए दोह जङ मुठुगास ठिसो आए दोह जङ लोनमो देगयाश, “ऐब्बे रिङ हाइस कुलचिग!” बितेनमोग बातङहा रिङ आए दोनिम मन्दिर रुमजगास दोह जङ चुमचुम कुलगयाश।

पतरसु मुकरेनमो बारे

66 तेबेरोइ पतरस योग खातङहो तेक्यो, देबेरो महायाजकु दासीगातु माजो इद दासी होदाह बइक्यो। 67 आए पतरसु मेह पालशिज ताङताङ दोह पङ ओभोल खिहखिह शेशक्यो, आए लोइक्यो, “कालिताह दोह नासरी यीशु रङ तेकिन।” 68 दोह मुकरेक्यो, आए लोइक्यो, “गह नता नेच्या तुक, आए ना ही सोमझे दोह रुग, काह छौग रिङहो रुन।” दोनिम दोह बेरिङ डेलङ दोङ ब्योक्यो; आए कुखरस बाशेक्यो। 69 दोह दासीस दोह जङ ताङताङ, हातेइ दवा डेन तेक्याश, हेस्स लोनमो देगयो, “जुह दोगोतु माजिङज इद तोह।” 70 दोनिम दोह हेस्स मुकरेक्यो, दोक देरु निम दोगो मिहस हातेइ होदाह डेन तेक्याश, हेस्स पतरसु जङ लोइक्याश, “पक्का काह ली दोगोतु माजो इद तन; छुलोनमा काह गलीललोज तन। 71 दोनिम पतरसीस लोइक्यो, गह कसम जोह रुग आए किनजु सोच रिङहो रुग! गह दोह मिह पङ, हातुइ बारेओ किह रिङहो रुइ, मा नेचयातुक, दोनमा परमेश्वरस आङजु सजा केहच गया, 72 दोनिम फटक हाइजब ली कुखरस बाशेक्यो। पतरसु दोह बातङ छगिङ यीशुस दोह जङ लोहलोह रुमोग, याद देगयो: “कुखरस निश बार बाशेनमोज ओमस काह शुम जब आङ इंकार लानतन।” आए पतरस जुह बातङ सुनचेचे क्राम्मो देगयो

15

पिलातुसु ओमस्को यीशु

1 सोम साङ रातिङ फटक प्रधान याजको, शास्त्रीगा रङ स्यानोस, आए चइ महासभास सलाह लानलान, दोनिम यीशु पङ छुइक्याश, आए यीशु पङ फ्योफ्यो पिलातुसु हवाले रान गयाश। 2 पिलातुसीस यीशु पङ ऐक्यो, “काह छौग यहूदीगातु राजा तना?” यीशुस लोइक्यो, “काह आनीसी रिङहो रुन।” 3 प्रधान याजकोस दोह देन मुलूक इल्ज़ाम शेदो तेक्याश 4 पिलातुसीस दोह जङ हेस्स ऐक्यो, काह छौग छच़ी जबाब मा रानमो रुना, खिऊ, जुगोस कान देन तेहक बातङहातु इल्ज़ाम शेदो रुश। 5 यीशुस दोहली छच़ी जबाब मा रानगयो, होज्जु देनज पिलातुस मुलूक हैरान हाचिगयो

मौतु सजो हुकुम रानमो

6 पिलातुस फसह खोदिङहो, हालिङहि मिह गयाचगा तेक्याश, दोगोतु ताइएस इद कैदि पङ छारयाज्या तेक्यो 7 हातेसी विद्रोह लानबेरो मिलेले खुन लानलान रुगयाश, दोह वक्तो बरअब्बा नामङस्या इद मिह, विद्रोह लानजगा रङ कैद तेक्यो, दोनिम चइ मिह थोग ब्योब्यो, दोह दोक्च अर्जी लानमो देगयाश,हाल्लाहि काह निङ ताइएस लानो बदो रुन, होदेइ लान। 9 पिलातुसीस दोगोतु ऐक्यो, “किह छौग गयाचगा तइ, गह किन ताइएस यहूदीगातु राजा पङ छारयागाह?” 10 दोहली दोहस नेच्या तेक्यो, प्रधान याजकोस यीशु पङ जलन ताङताङ चुमचुम करकर रुश। 11 दोनिम प्रधान याजकोस मिहतु जङ बहक्याया लोनमो शेक्याश, बरअब्बा पङ दोगोतु ताइएस छारयो। 12 होज्जे थासथास पिलातुसीस दोगोतु हेस्स ऐक्यो, “हातुइ किह यहूदीगातु राजा लोचगा तइ, दोह जङ गह छौग ताक?” 13 दोगो हेस्स टोकेक्याश, “दोह जङ क्रूसु देन शेत!” 14 पिलातुसीस दोगोतु ऐक्यो, “छुह, जुहस छौग गुनाह लानलान रुह?” दोनिम दोगो आए ली बोदी टोक्याशी गयाश, “दोह जङ क्रूसु देन शेत!” 15 दोनिम पिलातुसीस मिहतु जङ खुश लानमो ताइएस, बरअब्बा पङ दोगोतु ताइएस छारयागयो आए यीशु पङ कोड़गास कुलकुल दोगोतु हवाले रानगयो, छुलोनमा क्रूसु देन शेच गयाश।

सिपाईगास यीशु पङ पारशी लानमो

16 सिपाईस यीशु पङ ऱाज्यपालु किमु कुमो खातङहो फ्योक्याश, आए चइ सिपाईगातु पोलटन आरया गयाश। 17 दोनिम दोगोस यीशु पङ रोक, शविग आए नीला रंगु गास्स स्कागयाश आए चोहतु ताज बन्याया दोह बाल्ले शेक्याश। 18 आए होज्जय ठाट्टे लोहदोह लोइक्याश, “हे यहूदीगातु राजा, काह सौदाइ निहरा!” 19 दोगोस दोह बाल्लु देन शोठ्ठोस कुलोह तेक्याश, आए दोह देन थुक्यो रङ पशबाङहा टेक्याया, यीशु पङ नमस्कार लोच तेक्याश। 20 तेबेरोइ दोगो ठाट्टे लानलान यालगयाश, दोनिम दोह डेयङहोज रोक, शविग रङ नीला गास्सु टोहटोह, दोही गास्स स्कागयाश आए यीशु पङ क्रूसु देन शेनमो ताइएस बेरिङ फ्योक्याश।

यीशु पङ क्रूसु देन शेनमो

21 सिकन्दर रङ रुफुसु बाबा शमौन, कुरेन गोनिङहो निज तेक्यो, देबेरो दोह गोनिङज बच तेक्यो, आए दोगो ओम्मो छुगशीगयाश, सिपाईगास दोह जङ जरक्याया लोइक्याश, यीशु क्रूसु थोहथोह पाए। 22 दोगोस यीशु पङ गुलगुता लोनमोग जागोह करगयाश, हातुइ मतलब तोह खोपडीऊ जागाह। 23 दोनिम दोगोस दोह मुर्र नामङ स्या दवाई स्कशीज शुध्दुङ तुङमो रानगयाश , पर दोहस मा तुङगयो, 24 दोनिम दोगोस दोह पङ क्रूसो शेक्याश, दोह गास्‍सा दोगोस कागशीगयाश, हात्तु छौग पोरेतो, होज्जु खिमो ताइएस दोगोस पर्चीगा शेक्याश, 25 सोम स्कुइ बाजेजे तेक्यो, तेबेरोइ दोगोस दोह पङ क्रूसु देन शेक्याश 26 आए दोह खिलाफ इद तख्तो चेगयाश, “यहूदीगातु राजा” 27 दोगोस दोह रङ निश डाकूगातु क्रूसो शेक्याश, इद दोह जाखङ बिलङ आए हाइद दोह खोजिङ बिलङ शेक्याश 28दोनिम चौकोस शास्त्र दोह बोचन पूरोह हाचिगयो दोह नामङ अपराधिगा रङ नारशीगयो 29 आए ओमोस ब्योचगा मिहस बाल्ल चुक्यो-चुक्यो, होज्जय लोहलोह दोह निन्दा लानज तेक्याश, "वाह! काह होदोइ तन, मन्दिरु फरोस फरोस शुम दयारेज हेस्स बन्याज्या। 30 ऐब्बे क्रूसु देनज योग ताह जाब आए आनु जानुता बच्यो।” 31 आए होज्जयी प्रधान याजको रङ शास्त्रीगा ली आनेतु कुमो ठाट्टे लानो लोशीज तेक्याश, “जुस हाइदेतु बच्यामोग पर आनु जङ बच्यामो मानमोग। 32 इस्राएलु राजा, मसीह, ऐब्ब क्रूसु देनज योग जाबच गया, निह खिहखिह विशवास लानज गयामा।” आए हातेइ दोह रङ क्रूसु देन शेहशेह रुमोगा, दोह सङ ली दोह निन्दा लानज तेक्याश।

यीशु प्राण छारयामो

33 लाये सोनिश बाज्जे चइ देशङहो रातिङ हाचिगयो, आए शुम बाज्जे स्तङ आन्यारीङ तेक्यो। 34 शुम बाज्जे यीशुस मुलूक जोरीस टोकेके लोइक्यो, “इलोइ, इलोइ, लमा शबक्तनी?” हातुइ मतलब तोह, “हे आङ परमेश्वर, हे आङ परमेश्वर, काह आङजु छुह शोठ्ठयाजिगीन?” 35 हातेइ ओशको डेन तेक्याश, दोगोतु माजो इदेस होज्जय थासथास लोइक्याश, “खिह, दोहस एलिय्याह पङ आरयो रुह।” 36 दोनिम इद मिहस ठुहरे दाखङहु सुरग रसु डुब्याशीज स्पंज इद डेगो शेहशेह दोह जङ रानगयो आए लोइक्यो, “रुकेइ, खिमेह, नूह योग चाम्मो ताइएस एलिय्याह बतोह या माबत।” 37 दोनिम यीशु जोरीस टोकेक्यो आए शिगयो। 38 मन्दिरो पर्दा थोक्चि योग स्तङ जेरजेर निश टुकरा हाचिगयो। 39 हाति सूबेदार दोह ओशको डेन तेक्यो, तेबेरोइ दोह जङ होज्जय टोकेके प्राण छारयाज ताङगयो, दोनिम दोहस लोइक्यो, “सोच्चि जुह मिह, परमेश्वरु छाङ तेक” 40 मुलुक छेचास ली वारकोज खियो तेक्याश, दोगोतु माजो मरियम मगदलीनी, कोनसङ याकूब रङ योसेसु आम्मा मरियम, आए सलोमी तेक्यो। 41 तेबेरोइ दोह गलीलो तेक्यो, जुगो दोह निमस्कोज ब्योचगा तेक्याश, आए दोह सेवा लानजगा तेक्याश, आए हाइदे मुलूक छेचपेरङहा ली होदाह तेक्याश, हातेइ दोह रङ यरुशलेम बहबह तेक्याश।

यीशु पङ आगो ताहमो

42 तेबेरोइ शुपेलिङ हाचिगयो, छुलोनमा तैयारी दयार तेक्यो, हाति सब्तु दयारु, इद दयार ओमस बच्या तेक्यो, 43 अरिमतिया निजया यूसुफ, हाति महासभो सदस्य तेक्यो, आए आनीस ली परमेश्वरु राज इन्तजार लानो तेक्यो। दोहस हिम्मत लानलान पिलातुसु दवा ब्योक्यो आए यीशु लाश ऊनगयो। 44 पिलातुस हैरान हाचिगयो दोह होनो फटक हाल्ला शिग, दोहस सूबेदारु आरयागयो आए दोह जङ ऐक्यो, यीशु पङ शिशी छौग मुलूक देर हाचिस तोहा? 45 तेबेरोइ दोहस सूबेदारु दोक्च पूरोह बयोरा ऊनगयो, दोनिम लाश यूसुफु रानमो लोइक्यो। 46 दोनिम दोहस मुखमलु इद गास्स जोक्यो, आए लाशु जङ चाबचाब दोह जङ गास्सो मेशलयागयो, आए इद आगो हाति डोखङ कोरशिज तेक्यो, तागयो आए आगो पितिङ दोङ इद तेग राग तागयो। 47 मरियम मगदलीनी रङ योसेसु आम्मा मरियम खियो तेक्याश, दोह लाशु हाम ताहताह रुश।

16

यीशु हेस्स शङग हाचिमो

1 तेबेरोइ आरामू दयार बितेक्यो, दोनिम मरियम मगदलीनी, आए याकूबु आम्मा मरियम, आए सलोमीस खुशबु सगा चीजो ज़ोगज़ोग दोह जङ शेनमो बइक्याश। 2 इतवारु दयार सोम वेन जरेरङ, दोगो आगु दङ बइक्याश। 3 आए दोगो आनेतु कुमो लोशीज तेक्याश, “किशो ताइएस आगु पितिङहु दोङज राग हाइस नेस लानतो?” 4 तेबेरोइ दोगोस, नज़र शेहशेह खिगयाश, दोह मुलूक तेग राग, पितिङहु दोङज नेस लानशीज तोह। 5 आगु कुमो ब्योमो निम दोगोस इद जवान मिह पङ छोगेह गास्सा गाजिस, जाखङ बिलङ तोशीस ताङगयाश, आए मुलूक हैरान हाचिगयाश। 6 दोहस दोगोतु लोइक्यो, “हैरान थाह हाचि” किह यीशु नासरी पङ पोचो रुइ, हाति क्रूसु देन चढयाया शिशी तेहक, दोह शङग हाचिस तोह, पर होज्जा माय, खिह, होज्जुइ दोह जागाह तोह, हामिङहि दोह लाशु ताहताह रुमोगा। 7 ऐब्बे किह ब्योइ, आए दोह चेलगा रङ पतरसु लोइ, दोह किनोज ओमस गलीलु ब्योतो। हाल्लाहि किनजु रिङरिङ रुमोग, किह होदाइ दोह पङ ताङतई।” 8 आए दोगो दहदह आगोज ठुरयाशो कांपेदो रङ भयाङहो ब्योक्याश, आए दोगोस हातुइ छच़ी मा लोइक्याश, छुलोनमा भयाङ-भयाङ तेक्याश।

मरियम मगदलीनी पङ यीशु ताङ देहमो

9 इतवारु दयार सोम हाचिमो बेरङ दोह शङ हाचिस ओमस मरियम मगदलीनी पङ, हातुइ कुमोज दोहस स्तीश भूतोतु तोहतोह रुगयो, ताङ देगयो। 10 दोहस ब्योब्यो यीशु कोनयातु, हात्तेइ शोपङ लानो तेक्याश आए क्राबो तेक्याश, दोगोतु लोइक्यो। 11 दोगोस होज्जय थासथास, दोह शङ तोह आए दोहस यीशु पङ ताङताङ तोह, विशवास मा लानगयो।

निश चेलगातु यीशु ताङ देहमो

12 जुह निम दोह हाइद रुवङो, दोगोतु माजो निशतु ताङ देगयो, तेबेरोइ दोगो गोनिङज बेरीङ ब्योच तेक्याश। 13 दोहसङस ब्योब्यो आइदेतु लोइक्याश, पर दोगोस दोहसङहु ली विशवास मा लान गयाश।

सिहद चेलगातु यीशु ताङमो देहमो

14 दोनिम दोह आनु सिहद चेलगातु दवा, तबेरोइ दोगो खाऊ ज़ामो तोशीस तेक्याश, ताङमो देगयो, आए दोगोतु अविशवास रङ काठस मोनङहु ताइएस डाँटयाया, छुलोनमा हातेसी दोह शङग हाचिमो निम ताङताङ तेक्याश, दोगोतु देन विशवास मा लानलान रुगयाश। 15 आए दोहस दोगोतु लोइक्यो, “किह चइ संसारो ब्योब्यो मिगातु सुसमाचार प्रचार लानी। 16 हाइसी विशवास लानतो, आए बपतिस्मा ऊनतो, दोही उध्दार हाच्चो, पर हाइसी विशवास मा लान, दोह पापी नारशो आए दोह सजा पोरेतो; 17 विशवास लानजगापो जुह निशानी नितोह, दोगोस आङ नामङस, भूतोतु तोहताश, न्यूगे-न्यूगे स्कादा जहतिश, 18 सापातु थोताश आए अगर दोगोस प्राणु नाश लानजया चीजु ली तुङमा, दोहली दोगोतु छच़ी हानि मा हाच, दोगोस चोचातु देन गोद ताहताश, आए दोगो चंगा हाचिस।”

यीशु पङ स्वर्गो जु जङ फ्योमो

19 प्रभु यीशु दोगो रङ बातयाशीमो निम, स्वर्गू जु जङ फ्योक्याश, आए परमेश्वरु जाखङ बिलङ तोशीगयो। 20 आए दोगोस ब्योब्यो चइ जागोह प्रचार लानगयाश, आए प्रभुस दोगो रङ कामङ लानज तेक्यो, आए दोह निशानीगा रङ हातेइ दोगो रङ हाचिजगा तेक्याश, वचनु साबित लानज तेक्यो। आमीन