लूका ओल केडा ईसु राः बढ़ियाँ: खभेर
लूका
नआँ बढ़ियाँ: खभेर लूका राः दोवारा ते ओल केना, लूका यहूदी जात मेनेय दोहो गना, हेंय डाक्टारिय दोहो एना। अवुर नेय पवलुस पेरेरित गतिय दोहो एना, अवुर नेय पवलुस पेरेरित सुदा सेसेवा लगड होय सेनेना। नेय लूका अवुर पेरेरित कगद होय ओल केडा। नआँ बनाटंग कगद थियुफिलुस लगाडीय ओल केडा। लूका चहोः दोहो एनु, कि थियुफिलुस ईसु मसीह राः बारे ते अवुर बढ़ियाँ- बढ़याँ तेय पपाड़ीः लगाडू। लूका चहोः दोहो एनु सींड़ जघा रे एटाः- एटाः जात कुहो ईसु मसीह राः बारे तेकू पपाड़ीः लगाडू। लूका ओल केडा बढ़ियाँ: खभेर रे लाय केडा, कि ईसु मसीह होड़कू अपन पाप वरि बंचो लगड ची मेनतेय कहनी तेडा, अवुर चीय बनो केडा। लूका, ईसु मसीह उऊबरय हवे मेनतेय लाय केडा। कनय हो भटको: तन कू छछापा, अवुर हेंकुय उबर कू लगाडीय मेजकेना। नआँ बढ़ियाँ: खभेर रे ईसु मसीह राः जनम वरि मड़ाँगआ टेबोः, अवुर ईसु मसीह राः सरग हनते चलोएन रा: टेबोईय लाय केडा। लूका नआँ टेबोः अच्छा बढ़ियाँ- बढ़ियाँ तेय लाय केडा, कि नआँ बढ़ियाँ: खभेर एटाः जात कू पाप रे डुबो केनकू, गरीब होड़कू अवुर सींड़ होड़कू लगड हवे। ईसु मसीह राः बारे ते बढ़ियाँ: खभेर यहूदी कू लगड भर न लगे, नआँ सींड़ होड़कू लगड हवे। जे जे ईसु थरे कू बिसवासेआ हेंकू होड़कू ईसु मसीह उबर कुआ। एटाः बढ़ियाँ: खभेर लिओलव कुहो नआँ टेबोः रेकू बिसवास केडा। लेकिन लूका नआँ टेबोः रे अनावुर बड़यड़ वतेय कहनी केडा
।रूप-रेखा:
भूमिका 1:1-4
1:5-16
कलीसिया मे हर समूहों के कर्तब्य 2:1-15
उपदेस और चेतावनी 3:1-11
उपसंहार 3:12-15
लूका ईसु राः जिवन राः बारे ते परिचित
1-2 एगा थियुफिलुस, ईसु मसीह अबु होड़कू राः मँझर रेय दोहो एना। हेना तोलोग कुछ होड़कू सुरु वरि हेंय राः काम कू ञेंलतेडा, नेकू भगवान रेनकू सेवेखिया कू दोहो एना, अवुर अबु ईसु राः बारे तेकू लाय वडबुआ। जे जे नआँ टेबोः कू अँजोम तेडा, हेंकू मेंडे कुछ होड़कू जेयसे कू लाय वडकुआ, हेन घयते कू ओलकेडा। 3-4 हेना ते इंञ नआँ सींड़ टेबोः दुबीत-जेड़ीत वरि धियान सेते, जाँच तेड दो बढ़ियाँ वडींञाँ। अम नेआँ टेबो: पढ़ो केते जो कुछ मी अँजोम केडा, हेना राः सत मी पपाड़ी: लगड ओरे ओर ते अम लगाडींञ ओलियाडा।
उहाना रा: जनम रा: चनक
5 हेरोदेस यहूदी देस रेनिय राजा दोहोन तोलोग अबिय्याह राः दल रे, जकरयाह मेनते कू ञुमू तडिय हेनी याजक दोहो एना, हेंय इंगत कू इलीसिबा हारून खुटी- खनदान रेनिय दोहो एना। 6 बना होड़ कुलगीया भगवान राः नंजेर रे धरमी कींञ दोहो एना, अवुर परभु राः सींड़ टेबो: अवुर नियम कींञ मनो दोहो एनु। 7 लेकिन हेंकीञ रेनकू चोंडीज कू मेने कू दोहो गना, कहेकि इलीसिबा बँजीय दोहो एना, हेंकींञ बना होड़कींञ सँयाहोड़ यन दोहो एनु। 8 एक दिन राः दिन रे अपन दल राः पारी रे, हेना तोलोग जकरयाह भगवान राः मंडिल रे, याजक रा: कामीय काम दोहो एनु। 9 भगवान राः मंडिल रे सकला जरो लगड, याजक कुराः रिति बिधी घयते जकरयाह ञुमू ते चिठा उडुंग एना। 10 सकला जरो तोलोगू सींड़ होड़कू बहेर हँडे कू बिनती: दोहो एनु। 11 सकला जरो तेड तोलोगू, हेना जघा वरि जोम गतर रे सरगदूत अचा कतेय मेज चड़ाँ एना, अवुर जकरयाह हेंयीय ञेंलवा डिया। 12 जकरयाह ञेंलकेडिय तेय अक- बको यनु, अवुर अखीरिय बोरो तेडा। 13 लेकिन सरगदूत कहनी तेडा, “ए जकरयाह अलोम बोरू, कहेकि अमा: बिनती भगवान अँजोम केडा, अम इंगापे इलिसिबा वरि अम लगड मियाँ टंग कोड़ा चोंडीजिय हँबुडा। 14 अम अखीर तेम खुसीआ, अवुर हेंय जनामु: हेना चलते ते अखीर होड़कू बहालुआ कू। 15 कहेकि हेंय भगवान रा: नंजेर रेय बडेआ, अवुर अंगुर रस अवुर नसा चीज कभी एरोय ञुँतेडा, हेंय इंनीगत लाज वरि पवितर आत्मा तेय भरोआ। 16 अवुर इसराएल देस रेनकू अखीर होड़कू, उहाना हेंकू रेनिय परभु भगवान हनतेय मिड़ा: कुआ। 17 हेंय एलिय्याह थरे दोहो एना हेना आत्मा अवुर सक्ति तेय भरोको:ते, उहाना परभु वरि होड़कू तयार लगाडीय मड़ांगा, अवुर बाप- ददा कू अवुर चोंडीज कुराः मानिय हेल- मेला, अवुर टेबो: मेने चेड कू भगवान राः टेबो: मनो कू घयते होड़कुय तियारा।” 18 हेना वरि जकरयाह सरगदूतीय होंबोर तेडा, “नआँ का:तेंञ पपाड़ीआ इंञ दोंञ हड़ाम यना, अवुर इंगाले होय बुडही यना।” 19 तहाँ सरगदूत जबाब तेडा, “इंञ भगवान मड़ंग रे दोहोनय जिबराईल हवे, अवुर अम सुदा टेबो: लगड अवुर बढ़ियाँ: खभेर लाय लगाडीय कुलकेडिञाँ। 20 अँजोम मी, अम इंञा: टेबो अपन समय रे, पुरा होया: हेना रे मेनेम बिसवास गडा, हेना ते अम गूँगा अमू अवुर नआँ टेबो: अनायीन पुरो: मेन दिन एरोम टेबो: सको एना।” 21 होड़कू जकरयाह कू तँगी दोहो एनु अवुर मंडिल रे न मेन ची लगाडिय देरी केडा मेनते कू अचरज यनु। 22 जकरयाह बहेर हनतेय उडुंग एना, तहाँ हेंय हेंकू सुदा मेनेय टेबो: सकोऊ, तहाँ कू पपाड़ीयन किदो नेय मंडिल रे कनायीय ञेंलवाडा। अवुर हेंकू थरेय तीब एपेल बेड़ायू अवुरिय गूँगा यनु। 23 जब हेंय राः सेसेवा राः दिन पुरो एना, तहाँ अनेज ओड़ा: हनतेय चलो एना। 24 कुछ दिन बितो केन राः बाद रे, जकरयाह इंगत कू इलीसिबा असा पति एनयु। 25 अवुर पाँच महिना अँगम न या:ते कहनी केतेय उकू तडा, ‘होड़कू अलो कू कहनी गेवेंञ लगड भगवान नआँ समय रे इंञ थरेय दया केनते, चोंडिज कू ञमु: तना।
ईसु रा: जनम रा: चनक
26 एलीसिबा राः छो महिना तना, हेन तोलोग भगवान हन वरि जिबराईल सरगदूत गलील राः नासरत गाँव रे, 27 डिंडा हपामोन थरेय कुल तेडिया, हेंय ञुमू मरियोम मेनते दोहो एना, हेंय राः मला- मठी उसुफ सुदा होया तना, उसुफ दाऊद खुटी- खनदान रेनिय होड़ दोहो एना। 28 सरगदूत भितर रे मेजकेन ते हेंय थरेय कहनी तेडा,“जोहर, अम भगवान सोग वड मिआँ! परभु अम सुदाया!” 29 तहाँ हेना टेबो: अँजोम केते अखीरिय अक- बको यनु अवुर न करा घियाः जोहर हवे? मेनतेय पसींदे दोहो एनु। 30 हेना वरि सरगदूत हेंय थरेय कहनी तेडा, “ए मरियोम, अलोम बोरू, कहेकि अम थरे भगवान मया केना। 31 अँजोमेमू, अम असा पति अमू अवुर अम मियाँ टंग कोड़ा चोंडीज मी हँबुडा, हेंय ईसु मेनतेम ञुमूयू। 32 हेंय बडे होड़ीय बनोआँ, सींड़ वरि बडेअय भगवान रेनिय होपोन कहोआ, परभु भगवान हेंय अपत दाऊद रा: राज गदिय ओवाया। 33 अवुर हेंय अकूब रा: पीढ़ी- पीढ़ी रे हमेसाय राजेआ; अवुर हेंय रा: राज कनर तोलोग एरो हनी एना।” 34 हेना वरि मरियोम सरगदूत थरेय कहनी तेडा,“न का:ते होयाआ इंञ दो कनय कोड़ाहोन सुदा बेनेगारिंञ गीतीजा।” 35 हेना वरि सरगदूत जबाब वडिया,“पवितर आत्मा अम थरे अगड़ू आ, अवुर सींड़ वरि बडेअय भगवान रा: सक्ति डबड़ीं मिआँ, हेना ते पवितर बले जनमुआ हेंय भगवान रेनिय होपोन मेनते कू कहनी वया। 36 अवुर अँजोमेमू, अम खनदान रेनिय इलीसिबा होड़कू बँजी मेनते कू कहनी वया, हेंय सयाँ होड़ यन रेहो कोड़ा चोंडीजिय हँबुड बंचो केडा, हेंय रा: छो महिना केना। 37 कहेकि भगवान हनवरि दोहोन हेना टेबो: एके ओत रे मेने लोजोरुआ।” 38 हेना वरि मरियोम कहनी तेडा, “अँजोम मी, इंञ दो भगवान रेनिय सेवेकहीन हवे, जेयसे अम कहनी केड घयते इंञ थरे होयाऊ।” तहाँ सरगदूत मरियोम वरिय चलो यनु।
मरियोम इलीसिबा सुदा जुमोईय सेनेना
39 हेन तोलोग मरियोम तुरेत्ते सँबह केनते, अहूदी देस रा: मियाँ टंग पहाड़ी गाँव रे, जकरयाह ओड़ाः इलीसिबा सुदा जुमोईय सेनेना। 40 जकरयाह ओड़ाः सेनकेन ते इलीसिबय जोहर वडा। 41 इलीसिबा मरियोम रा: जोहरिय अँजोम तेड सी, चोंडीज लाजतू रेय हिलो एना, अवुर इलीसिबा पवितर आत्मा तेय भरो यनु। 42 अवुर हेंय बडे बडे तेय कहनी तेडा, “अम सींड़ कोड़ी कू मेंडे, भगवान अम अवुर लजमी रे इदानिय हेंय बले हो असीर्वादिय ओवाडिया! 43 करा: करा:ते इंञा: भाग रे ञँनामकेना? इंञाँअय परभु इंगत इंञ सुदा जुमोईय मेजकेना! 44 अँजोम मी, अमा: जोहारिंञ अँजोम तेड सी चोंडीज इंञ लाज रे खुसी तेय उजेना। 45 परभु कहनी केड हेना टेबो: रे अम विसवास केडा, हेना ते भगवान अम थरेय मया केना!”
मरियोम सिरिंग एना
46 हेना वरि मरियोम कहनी तेडा, “इंञा: जीव परभु राः बड़हाई यडा, 47 अवुर इंञ उबारय हेंय भगवान थरे इंञा: कोठी कया बहल केना, 48 कहेकि भगवान इंञ घियाअय होडीञय सेवेखहीन थरे अखीरिय दया केना, हेना ते अँजोम पे, अब वरि पीढ़ी- पीढ़ी रेनकू होड़कू, इंञ तिमीन आसिर्वादिय ञंमकेडा मेनते कू कहनी वञाँ। 49 सक्तिदारय भगवान हेंय इंञ लगड बडे बडेअय कामीय काम केडा, हेंय ञुँमू पवितर गिआ। 50 अवुर कनय हो हेंय राः डर भय तेय दोहोना, हेंकू थरे भगवान राः दया पीढ़ी- पीढ़ी अँगम दोहोना। 51 हेंय अनेज रा: सक्तिय तिबकेडा, अवुर अपन- आप बडे गिअंञ मेनते कू अड़ींग दोहो एनु, हेंकू सींड़ कुय छितीर- बितीर गोत्तेड कुआ। 52 राजा कू राज गदी रेकू दुडूब तन हेंकू हेंय सींड़ कुय उडुंग गोत्तेड कुआ, अवुर गरीब होड़कुय रिमतेड कुआ। 53 हेंय रंगेज होड़कू बढ़ियाँ- बढ़ियाँ: चीज तेय पुरो तेडकुआ, अवुर धनी होड़कू एके तीतेय उडूंग गोत्तेड कुआ। 54 हेंय अनेज रा: हेना दयाय उहयार लगड, अनेज रेनकू सेवेखिया कू इसराएलिकुय सम्भरो तेडकुआ, 55 भगवान अबु रेनकू पुरबुज कू थरेय जबान तेडा, हेना दया अबराहम अवुर हेंय रेनकू खुटी- खनदान कू थरे जिनगीक जिनगी दोहोना।” 56 लग- भग तीन महीना मरियोम इलीसिबा सुदाय दोहो एना, हेना वरि अनेज ओड़ा: हनतेय मिड़ा: एना।
इलीसिबा उहानाय हँबुड तेडा
57 इलीसिबा राः दिन पुरती एना, हेना वरि मियाँ टंग कोड़ा चोंडीजिय हँबुड तेडा। 58 हेंय रेनकू परोसी कू अवुर हीत नात कू परभु हेंय थरे अखीरिय दया केना मेनाआँ, अँजोम केते हेंकू इलीसिबा सुदा बहाली कू मनो तेडा, 59 अवुर आठ दिन रे बले राः खतनाय लगड हित नात कू मेजेना, हेना वरि बले ञुमू अपत ञुमू घयते जकरयाह मेनते कु ञुमू सोताडिया। 60 लेकिन इलीसिबा कहनी तेडा, “न घयते अलो पे ञुमूयू, नेय ञुमू उहाना मेनते दोहोना।” 61 तहाँ हेंकू इलीसिबा थरे कू कहनी तेडा, “अपे खुटी- खनदान रे न या:ते कनय ञुमू कोवाआ!” 62 नेय ची मेनतेम ञुमूयाँ मेनते, अपत इसारा केडते कू होंबोर तेडिया। 63 हेंय ओले लगड सिलोटीय एर अक्तेडा, अवुरिय ओलतेडा, “नेय ञुमू उहाना हवे,” तहाँ सींड़ कुकू अचरज यनु। 64 हेनेन तोलोग जकरयाह तुरेत्तेय टेबो: बेड़ाऊ, अवुर भगवान धन्यावादीय ओवा दोहो एनु। 65 हेना वरि धरि कगर ते दोहोएन हेंकू थरे बोर समसो यनु, अवुर नआँ टेबो: सींड़ यहूदी देस राः पहाड़ी गाँव ते मिरिज यनु। 66 अवुर परभु हेंय सुदाय दोहो एना, हेना ते सींड़ कू अँआजोम कू मन- मन रे पसींद केत्ते कू कहनी तेडा, “नेय चोडींज चीय बनोआँ?”
जकरयाह सिरिंग एना
67 उहाना अपत जकरयाह पवितर आत्मा ते भरो केनते भगवान राः टेबोईय लाय तेडा: 68 “इसरायील देस कू रेनिय परभु भगवान बढ़ियाँ गिआ यू, कहेकि हेंय अपन होड़कू थरे ञेल मया केनते अबुय छडो केडबु अयू। 69 अवुर अपन सेवेखिया दाऊद राः खुटी खनदान रे अबु लगड मियाँ टंग उऊबरायीय कुलकेडा। 70 (नआँ हेंय पहील वरि भगवान रा: टेबो: लाय हेंकू रा: दोवारा तेय लाय अक्तेडा), 71 भगवान अबु रेनकू मुदेय कू वरि अवुर मेने बेसवाबु: हेंकू वरिय उबर केडबुआ। 72 अपन पवितर जबानीय उहयार केते अबु रेनकू खुटियारा कू थरेय दया केना। 73-75 भगवान अबु रेनिय अपाबु अबराहम थरे नआँ या:ते किरिया केनतेय कहनी तेडा, कि इंञ मुदेय कू वरिंञ छडो पेआ, अवुर पवितर अवुर धरमी बनो कोःते,निडर ते जिनगी भर इंञ मनोविंञ महल रेपे दोहोनु। 76 ए बाबू, अम सींड़ वरि बडेअय भगवान रेनिय टेबो: ललायय मेनते कू कहनी वमीआ, कहेकि भगवान राः होर तयार लगड, मसीहा वरि मड़ंग मड़ंग तेम सेनेआँ, 77 भगवान वरि पाप राः माफी ञमकेते, उबारुः लगड अम भगवान रेनकू होड़कू बुदहीम लाय वकुआ। 78 अबु रेनिय भगवान राः दया ते, अबु लगड सरग वरि इंजोर ञँमुआँ। 79 नआँ इंजोर अंधरा रे दोहोन कू, अवुर गोजु: कू बोरोवा: हेंकू थरे, इंजोरीय तीःवा कुआ अवुर अबु सान्ति ञमुः हेना होर तेय गो:बुआ।” 80 अवुर हेंय चोंडीज बडेऊ अवुर आत्मा तेय भरपुर चलो एना, अवुर इसराएल रेनकू थरे अनायीनिय परचारे मेन दिन, सुनसँन जघा रेय दोहो एना।
ईसु राः जनम करम (मत्ती 1:18-25)
1 हेन तोलोग सींड़ रोमी देस रेनकू होड़कू, अपन- अपन ञुमूत कू एर ओल लगड, रोम देस रेनकू राजा कू वरि बडेअय राजा अवगुस्तुस केयसर हुकूम तेडा। 2 किवरिनियुस सिरिया रेनिय बडे अय अघिकरीय दोहो एन तोलोग, नआँ सुरवत लेखा जोखा होया एना। 3 सींड़ होड़कू ञुमू एर ओल लगड अपन- अपन गाँव कू चलो एना। 4 उसुफ दाऊद खुटी खनदान रेनिय दोहो एना, हेना ते गलील जिला रा: नासरत सहर वरि यहूदी देस रे, दाऊद राजा बडे एन हेना सहर बयतुलामीय सेनेना। 5 मरियोम उसुफ लगड कू असी तडिया अवुर हेंय दोहरी देंह रेय दोहो एना। हेंय सुदा ञुमू एर ओल लगड कींञ सेनेना। 6 हेन हँडे दोहो एन तोलोग, मरियोम राः दिन पुरती होया एना। 7 मरियोम अगुल बेटाय हँबुड तेडा, अवुर हेंकींञ धरम साला रे दोहोन लगड, जघा मेने कींञ ञँमगाडा। हेना ते बले कपड़ा ते भेंटो केडिय ते, माल मोसी कू चरा कू ओवाकु: हेना जघा रेकींञ गितिज तडिया।
सरगदूत कू भेड़ी चरवाह कू खभेर कू लाय वड कुआ
8 हेना देस रे ञींद, केय्यो झन गयर कू खुधे खुधा ते डांड ओत रे, अपन-अपन भेड़ी कुकू पहरा दोहो एनु। 9 परभु रेनिय सरगदूत हेंकू थरे अचा कतेय मेजेना, हेन तोलोग हेना रे परभु रा: इंजोर हेंकू रा: चरयो गतर हँडे चमको एना, तहाँ हेंकू अखीर कू बोरो यनु। 10 हेना वरि सरगदूत हेंकूय कहनी वडा, “अलो पे बोरू; अँजोम पे, इंञ सींड़ होड़कू रा: जिव बहालु: हेना खबेरिंञ अगकेडा। 11 तेसींञ अपे लगड, दाऊद रा: सहर रे उऊबराय जनम केना, अवुर नेनी मसीहा हवें, अवुर अपे रेनिय परभु हवे। 12 अवुर हेंय राः निसाना हाँ: तेपे ञामेआँ, मियाँ टंग चोंडीज कपड़ा तेकू भेंटो केडिया, अवुर माल मोसी कू चरा कू ओवाकु: हेना जघा रेपे ञमेयाँ।” 13 तहाँ अचाकते हेंय सरगदूत सुदा, अखीर बगरा सरगदूत कू भगवान रा: कू स्तुति दोहो एनु, अवुर हाँ: तेकू कहनीय तोलोग कू ञेंल वड कुआ। 14 “पिरथी रे भगवान रा: स्तुति होयाऊ, धरती रे जे होड़कुय मंजुर वआ, हेंकू जिवीत कुय असतीरा।” 15 सरगदूत कू सरग हनते चलो एनसी गयर कू कहनी ओड़ेंग एना, “दू बू, परभु लाय वड बु: हेना टेबो: बयतुलम सेनको: तेबू ञेंल अगुयू।” 16 अवुर तुरेत्ते हेंकू सेनकेनते मरियोम अवुर उसुफ, बले माल मोसी कू ओवा: हेना जघा रेकींञ, गितिज तडिय तोलोग कू ञेंल ञँमतेडिया। 17 गयर कू हेंय बले ञेंलकेते, सरगदूत हेंकू थरेय लाय तडा, हेना टेबोः होड़कुकू लाय वडा। 18 अवुर सींड़कू अअँजोम कू गयर कू लाय तेड हेना, टेबो: तेकू अचरज यनु। 19 नआँ सींड़ टेबो: मरियोम मने- मन रे दोहो केतेय पसींदे दोहो एनु। 20 अवुर जेयसे गयर कू थरेय लाय तडा, हेनेन घयते सींड़ ञेंल केड अँजोम केते, भगवान रा: स्तुति अवुर बडेय बेड़ा वडियते कू मिड़ा एना।
ईसु कू ञुमू तेडा
21 हेंय बले राः आठ दिन पुरो एना, तहाँ हेंय राः खतनाय राः समय होया एना, तहाँ हेंय ईसु मेनते कू ञुमू तेडिया, नआँ याःते ञुमूय लगड सरगदूत मरियोम थरे, असापति एनवरि मड़ंग तेय लाय तडा। 22 परभु मूसा राः दोवाराते यहूदी होड़कू लगड ओलकेडा नियम राः अनुसार ते मरियोम गंबोलो एना, तहाँ ईसु परभु थरे जिमाय लगड एरूसेलेम कींञ इदी तेडिया। 23 परभु राः नियम रे नआँ याःते ओलकेड हेना इदाना, “सींड़ अगुल बेटा कू परभु लगड हिगरो कू।” 24 अवुर परभु राः नियम राः अनुसार ते: परेंवाँ मियाँ जोड़ा चहे बाटंग पनकी होपोन कींञ अक्के तेकू रकब किंञू।
सिमोन सिरिंग तेडा
25 एरूसेलेम रे सिमोन मेनते कू ञुमू तडिय हेनी, धरमी होड़ दोहो एना अवुर भगवान नियम एमकेड हेनय मनोवे दोहो एनु। अवुर हेंय थरे पवितर आत्मा दोहो एना, अवुर इसरायील होड़कू उबर हेंयीय तँगी दोहो एनु। 26 अवुर अम परभु रेनिय मसीहा ञेंलके बिना एरोम गोजेना मेनते, पवितर आत्मा पहील ते लाय मड़ंग तडा। 27 एक दिन रा: दिन रे पवितर आत्मा, सिमोन मंडिल रे सेनु: लगड कहनी वडिया। हेन तोलोग नियम इदान घयते एचेय लगड इंगत अपत ईसु भितर कींञ अदीर तेडिया। 28 तहाँ सिमोन अपन कोरा रे ईसु सिपींञ केडते भगवान धन्यावादीय ओवाडिया अवुरिय कहनी तेडा, 29 “परभु, अम इंञ थरेम कहनी तेडा, हेन घयतेम करो केडा, इंञ अमाअय सेवेखिया हवे, अब दो असतीर तेम एनेम गोजवाञू। 30 जे होड़ अम होड़कू उबर लगड मी कुलकेडिया, निहों हेंय अपन मेड तेंञ ञेंलके डिया। 31 नेय सींड़ देस रेनकू होड़कू उबर लगड अम पसींद अगतेडा, 32 नेय चोंडीज भगवान रा: होर तीब लगड सींड़ जात कू लगड इंजोर घयतेय होयाआ, अवुर इसरायील होड़कू थरे नेय राः चलते ते भगवान रा: मान मरजाद होयाआ।” 33 नआँ टेबोः अँजोम केते हेंय इंगत अपत एडकींञ अचरज यनु। 34 सिमोन हेंकींञ आसीर्वादीय ओवड कि़ञा, हेना वरि ईसु इंगत मरियोम थरेय कहनी तेडा, “अँजोम मी, नेय बले राः चलते ते अबु कुछ इसरायली होड़कू बंचोअकू। लेकिन नेय थरे मेने बिसवासेः कू बिलोअकू। नेय बले भगवान राः होर तीब लगड मियाँ टंग चिनहाँय होया: तना। नेय मान मनीस तेकू बदीया, 35 हेना ते नेय राः दोवाराते अखीर झन राः हिरदय राः विचार परगाटुआ। अवुर अम तरवार राः मरल बरोबर ते अखीर तेम दुः खीतुआ।”
हन्ना राः गोवाही
36 मियाँ होड़ हन्ना मेनते कू ञुमू तडिय हेनी कोड़ीहोन दोहो एना। हेंय भगवान रा: टेबो: ललायय दोहो एना, नेय चौरासी बरीस रेनिय दोहो एना, नेय फनुएल कोड़ी होपोन असेर गोति रेनिय दोहो एना। नेय अखीरिय बुढ़ी यनु। अवुर बियाह केनते सात बरिस अँगम अपत कू सुदय दोहो एना, तहाँय एकल यनु। 37 नेय मंडिल मेनेय बगी बेड़ा गडा, सींञ ञींद उपास अवुर बिनती कोःते भगवान राः सेवा रेय दोहो एना। 38 हेन तोलोग हन्ना ईसु इंगा अपा थरेय मेजेना। परभु धन्यावादीय ओवाडिया। जे जे एरूसेलेम रेनकू उऊबराय कू तँगि दोहो एनु, हेंकु हन्ना ईसु राः बारे तेय लाय वकू दोहो एनु।
नासरत कींञ मिड़ा: एना
39 जब ईसु इंगा अपा परभु एमकेडा हेना नियम घयते, सींड़ चीज कींञ करो केते, गलील जिला रे अनाकू सहर नासरत कींञ मिड़ाः एना। 40 लगे चोंडीज बडेऊ, अवुरिय जँगाड़ुऊ, अवुर कनहुन एना, अवुर भगवान राः मया हेंय थरे दोहो एना।
ईसु मसीह मंडिल रे
41 ईसु इंगा- अपा सलेना फसह परब मनो लगड, एरूसेलेम कींञ सेनु: दोहो एनु। 42 ईसु बारह बरिस रेनिय दोहोएन तोलोग हेंकू राः रिती बिधी घयते परब मनो लगड एरूसेलेम कू सेनेना। 43 हेना वरि परब मनो केते कू मिड़ा: मेजु: तोलोग, ईसु एरूसेलेम हँडेय दोहो यनु; नआँ इंगत अपत एडकींञ मेने कींञ पपाड़ी दोहो एनु। 44 हेंकींञ पसींद तेडा कनय एटाः गतिकू सुदाया मेनते, हेना वरि एक दिन सेनकेड राः बाद रे अपन कुटुम्ब कू अवुर हित नात कू थरे कींञ छपा बेड़ायू। 45 हेना वरि मेने कींञ ञँमगाडिय तहाँ, छपा- छपा ते एरूसेलेम कींञ मिड़ा: यनु। 46 हेना वरि तीन दिन बितो केन राः बाद रे, मंडिल रे नियम कनहून चेचेड हेंकू सुदा, दुड़ूब तन तोलोग कींञ सेन ञमतेडिया। अवुर हेंकू रा: टेबो: अँजोमेयू अवुर हेंकू थरे जबाब सवालीय होंबोर कू। 47 जेतना हेंय रा: टेबो: अवुर जबाब कू अँजोम दोहो एनु, हेंकू अचरज जोम कू। 48 तहाँ इंगत- अपत ञेंलके डियते कींञ अचरज यनु, हेना वरि इंगत ईसु थरेय कहनी तेडा, “ची लगड बाबू अम अलींञ सुदा न घयतेम करो तेडा? अपुम सुदा जघा- जघा ते अखीर मी एर छपा धँगेच यडलीञाँ।” 49 हेंय हेंकींञ थरेय कहनी तेडा, “अबा ची लगड बा छपांञ दोहो एनु? अबा मेने बा पपाड़ी दोहो एनु, कि इंञ अपुंञ ओड़ा: रे दोहोन जरूरी इदाना?” 50 जे टेबो:ईय लाय तेडा, हेना हेंकींञ मेने कींञ जेर गडा। 51 हेना वरि इंगत- अपत सुदा नासरत हनतेय चलो एना, अवुर हेंकींञ राः टेबोः चेडके ते हेंकींञ सुदाय दोहो एना। नआँ सींड़ टेबो: इंगत अनेज रा: मने-मन रेय जोगो तडा। 52 ईसु कनहुनुऊँ अवुरीय हरा: दोहो एनु, अवुर भगवान अवुर होड़कू रा: मन पसंद तेय बडे: दोहो एनु।
उहाना बतिसमा एमय ईसु रा: खभेरिय लाय तेडा (मत्ती 3:1-12; मरकुस 1:1-8; उहाना 1:19-28)
1 तिबिरियुस केयसर, रा: राज रा: पन्दरहवाँ बरिस रे, हेन तोलोग पुन्तियुस पिलातुस, यहूदी देस रेनिय बडेअय अघिकारीय दोहो एना। अवुर हेरोदेस, गलील जिला रेनिय बडेअय अधिकारी दोहो एना। इतूरया अवुर तीरखानीतिस जिला रे हेरोदेस मगत, फिलिप्पुस बडेअय अधिकारी दोहो एना। अवुर अबिलेने जिला रे लिसानियस, बडेअय अधिकारी दोहो एना। 2 हन्ना अवुर कयफा यहूदी कुरेनकींञ बड-बडे पुजेरी कींञ दोहो एना। हेन तोलोग भगवान राः टेबो: जकरयाह होपोन उहाना, सुनहर ओत रेय दोहो एन तोलोगिय अँजोम तेडा। 3 हेंय जरदन जोड़ रा: आस पास ते सींड़ जघा रे सेनकेन ते, पाप बगि वते मन बदलो केते भगवान थरे मेजकोः ते बतिसमा तिला रेदो, हेंय अपे राः पापिय माफेआ, मेनाअँय परचार तेडा। 4 भगवान रा: टेबो: लाय हेनी असायाह कहनी केड हेना कागद रे हाँ: ते ओलकेड हेना इदाना, “सुनहर जघा रे मियाँ होड़ होड़ गोहार यडा, परभु लगड होर पे तियारू, हेंय रा: होर पे सोझ साझू। 5 सींड़ डोडहा गी: हेना पटोवेपे, अवुर बुरू अवुर घुटरी बरोबरे पे, अवुर टेड़गा: होर सोझ साझे पे, अवुर उबड़ खबड़ गी: हेना समथारेपे। 6 अवुर सींड़ होड़कू भगवान कुलकेडिय हेनी उऊबरय कू ञेंलेया।” 7 हेना वरि अखीर होड़कू उहाना थरे बतिसमा तिला लगड कू मेजेना, हेन तोलोग हेंकू थरेय कहनी तेडा, “ए बींञ घयते जरजाठ होड़कू, अपे मेजु: तना दंड वरि बंचोआ मेनते इया सिखो केडपेआ? 8 भगवान थरे मेजकेनते मन कू बदलो केडा मेनाआँ, पपाड़ी लगड बढ़ियाँ: काम पे करो। अवुर अले अपाले दो अबराहम हवे, बंचो अले मेनते अलो पे फुलायू। अपे थरेंञ कहनी यडा, अनापे भर दो कोवाआ, भगवान दिरी वरि हो अबराहम लगड चोंडीज कुय बनो सकोआ। 9 टंगा काठ दुबी रे दोहोकेडा अवुर जे जे काठ बढ़ियाँ ते मेने जो: हेना गेरके ते सेंगेल रेय तुयाँगेआ।” 10 हेना वरि होड़कू हेंय कू होंबोर तेडिया, “हेंडे दोखा अले चीले बनोआँ?” 11 तहाँ हेंकुय जबाब वडा, “जे जे थरे बा टंग अंगा इदान हेनी, कोवाआ हेनी मियाँ टंगीय हटींगवा अवुर जे जे थरे खुदी- चुनी इदाना हेंय होय हटींगे।” 12 मलगुजारी तिला कुहो बतिसमा तिला कू मेजेना, अवुर कू होंबोर तेडिया, “ए गुरू, अले चीले बनोआँ?” 13 हेना वरि हेंकूय कहनी वडा, “अपे लगड जेतना रेट तोलकेना हेना वरि बगरा अलो पे तिलायू।” 14 पुलुस कुहो हाँ: तेकू होंबोर तेडिया, “अले चीले बनोआँ खा?” हेना वरि हेंय हेंकुय कहनी वडा, “जबरजस्ती चहे ञेंड बेड़ावकू ते पेयसा अलो पे असीयू अवुर झूठ मूठ ते कनय अलोपे दोसू, अपे जेतना ञँमुआ हेन मेना: रेपे संतोकता।” 15 यहूदी होड़कू उऊबरय असरा लगय तेकू तंगीय दोहो एनु, अवुर हेंकू अपन- अपन मन रे नेनी मसीहा हवे मेनते, उहाना रा: बारे तेकू पसींदे दोहो एनु। 16 हेना वरि उहाना हेंकू सींड़ कुय कहनी वडा, “इंञ दो अपे दा: ते बतिसमांञ ओवापेताना, लेकिन इंञ वरि तयोम तेय मेजु; तनय इंञ वरिय बडे गिआ यू, इंञ दो हेंय रा: जुता रसि लड़ा लायीक कोवाञाँ। हेंय अपे पवितर आत्मा अवुर सेंगेल ते बतिसमाय ओवापेआ। 17 हेंय रा: हटा: हे नी ती रेआ, अवुर खरियन तय बढ़ियाँ तेय अमीञेंआ। अवुर गोहोंम तुदो अनेज रा: कोठी रेय जवारेआ, लेकिन कुस्टत दो मेने ईड़ीजुआ सेंगेल रेय तुयाँगेआ।” 18 नेन या:ते हेंय अखीर सिकछा दे दे ते होड़कू बढ़ियाँ:खभेरिय लाय वकू दोहो एनु । 19 उहाना हेरोदेस राजा अखीरिय दबेट तेडिया, कहेकि मगत कन्याँ हेरोदियासीय रखो तडिया, अवुर अखीरिय गलती तेडा, 20 अवुर मियाँ टंग ए गलतीय गलती तेडा कि उहाना जेहेल रेय एर डलो तेडिया ।
ईसु बतिसमाय तिला तेडा (मत्ती 3:13-17; मरकुस 1:9-11)
21 जब सींड़ होड़कू बतिसमाय कू तिला तेडा, ईसु हो बतिसमाय तिला तेडा। अवुर बिनतीः दोहोन तोलोग अगस जीजयानु 22 अवुर पवितर आत्मा परेवाँ राः भेस ते हेंय थरे अगडू एना, अवुर अगस वरि न घयते अवाज मेजेना, “अम इञाँअय दुलर कोड़ा होपोन हवे, अवुर अम थरे खुस इदानीञाँ।”
ईसु रेनकू खुटीयारा कू (मत्ती 1:1-17)
23 लग भग ईसु तीस बारिस रेनिय दोहो एन तोलोग ललायीय बोहड़ी तेडा, (होड़कू नेन घयते कू अड़ींग दोहो एनु) ईसु उसुफ होपोन दोहो एना; उसुफ अपत एली दोहो एना, 24 एली अपत मत्तात दोहो एना, मत्तात अपत लेवी दोहो एना, लेवी अपत मलकी दोहो एना, मलकी अपत यन्ना दोहो एना, अवुर यन्ना अपत उसुफ दोहो एना, 25 उसुफ अपत मत्तियाह दोहो एना, मत्तियाह अपत आमोस दोहो एना, अवुर आमोस अपत नहूम दोहो एना, नहूम अपत असल्याह दोहो एना, असल्याह अपत नोगह दोहो एना, 26 नोगह अपत मात दोहो एना, मात अपत मत्तियाह दोहो एना, मत्तियाह अपत सिमी दोहो एना, अवुर सिमी अपत योसेख दोहो एना, अवुर योसेख अपत योदाह दोहो एना, 27 योदाह अपत उहाना दोहो एना, उहाना अपत रेसा दोहो एना, रेसा अपत जरूब्बाबिल दोहो एना, अवुर जरूब्बाबिल अपत सालतियेल दोहो एना, अवुर सालतियेल अपत नेरी दोहो एना, 28 नेरी अपत मलकी दोहो एना, मलकी अपत अदी दोहो एना, अदी अपत कोसाम दोहो एना, कोसाम अपत इलमोदाम दोहो एना अवुर इलमोदाम अपत एर दोहो एना, 29 एर अपत येसु दोहो एना, येसु अपत इलाजार दोहो एना, इलाजार अपत योरीम दोहो एना, अवुर योरीम अपत मत्तात दोहो एना, अवुर मत्तात अपत लेवी दोहो एना, 30 लेवी अपत समोन दोहो एना, समोन अपत यहूदाह दोहो एना, अवुर यहूदाह अपत उसुफ दोहो एना, अवुर उसुफ अपत योनान दोहो एना, योनान अपत इलयाकीम दोहो एना, 31 इलयाकीम अपत मलेआह दोहो एना, मलेआह अपत मिन्नाह दोहो एना, अवुर मिन्नाह अपत मत्तता दोहो एना, अवुर मत्तता अपत नातान दोहो एना अवुर नातान अपत दाऊद दोहो एना, 32 दाऊद अपत यिसय दोहो एना, यिसय अपत ओबेद दोहो एना, अवुर ओबेद अपत बोःज दोहो एना, अवुर बोःज अपत सलमोन दोहो एना, अवुर सलमोन अपत नहसोन दोहो एना, 33 नहसोन अपत अम्मीनादाब दोहो एना, अम्मीनादाब अपत अरनी दोहो एना, अवुर अरनी अपत हिरसोन दोहो एना, अवुर हिरसोन अपत फिरिस दोहो एना, अवुर फिरिस अपत यहूदाह दोहो एना, 34 यहूदाह अपत अकूब दोहो एना, अकूब अपत इसहाक दोहो एना, अवुर इसहाक अपत अबराहम दोहो एना, अवुर अबराहम अपत तिरह दोहो एना, अवुर तिरह अपत नाहोर दोहो एना, 35 नाहोर अपत सरूग दोहो एना, सरूग अपत रऊ दोहो एना, अवुर रऊ अपत फिलिग दोहो एना, अवुर फिलिग अपत एबिर दोहो एना, अवुर एबिर अपत सिलह दोहो एना, 36 सिलह अपत केनान दोहो एना, केनान अपत अरफछाद दोहो एना, अवुर अरफछाद अपत सेम दोहो एना, अवुर सेम अपत नूह दोहो एना, अवुर नूह अपत लिमिक दोहो एना, 37 लिमिक अपत मथूसिलह दोहो एना, मथूसिलह अपत हनोक दोहो एना, अवुर हनोक अपत यिरिद दोहो एना, अवुर यिरिद अपत महल्लेल दोहो एना अवुर महल्लेल अपत केनान दोहो एना, 38 केनान अपत इनोस दोहो एना, अवुर इनोस अपत सेत दोहो एना, अवुर सेत अपत आदम दोहो एना, आदम भगवान होपोन दोहो एना ।
ईसु राः परीछा (मत्ती 4:1-11; मरकुस 1:12-13)
1 ईसु पवितर आत्मा ते भरो केनते जरदन जोड़ वरिय मिड़ा: एना, हेंय पवितर आत्मा सुनहर जघा हनते गोःतेडिया चालीस दिन सुनहर जघा रेय दोहो एना, 2 हेना तोलोग ईसु कनर मेनेय जोम बेड़ागाडा। चालीस दिन पुरो केनरे रँगेज तेडिया, हेन तोलोग सयतान पाप रे लोजोरिय लगाडीय अजमो सोताडिया। 3 हेना वरि सयतान हेंय थरेय कहनी तेडा, “अगर अम भगवान रेनिय होपोन हवे रेदो, न दिरीम कहनीवाँ रोटी बनोऊ।” 4 तहाँ ईसु जबाब वडिया, नआँ घयते भगवान राः कगद रे ओल केना ‘होड़कू सिरीफ रोटी ते एरो कू जियो एना’।” 5 हेना वरि सयतान उसूल जघा रे हेंयूय गो:तेडा, अवुर तुरेत्ते सँवसार राः सींड़ राजीय ति:वाडिया। 6 अवुर कहनी तेडा, " नआँ राज राः सींड़ धन राः हाँकिंञ ओवा मिआँ; नआँ सींड़ इंञाः हाँय गाँथ रेआ, अवुर इंञ जेयूंञ बेसवआ हेंयूंञ एम सकोआ। 7 अगर अम इंञ मी मनो रेदो नआँ सींड़ अमा: हाँक होयाआ।” 8 हेना वरि ईसु हेंयूय जबाब वडा, भगवान राः कगद रे नआँ घयते हो ओलकेना कि: ‘अम अपन भगवान राः मी आराधना, सिरीफ हेनी राः सेवम सेवा,।” 9 तहाँ सयतान एरूसेलेम राः मंडिल रे, सींड़ वरि उसूल जघा रे इदी केडिय तेय कहनी वडिया, “अगर अम भगवान होपोन हवे रेदो न वरिम ऊजू। 10 अमा: बारे ते नआँ याःते भगवान राः कगद रे ओलकेना, ‘अम बंचो लगड सरग वरि सरगदूत कुय कूला।’ 11 अम कटाम रे दिरि ते अलो लोजोर टोवीजु: लगड सरगदूत कू हाथो हाथ तेकू तिला दरम मिआँ।” 12 तहाँ ईसु जबाब वडिया, “नआँ घयते हो भगवान राः कगद रे ओलकेना: ‘अपे अपन भगवान अलोपे अजमोयू।’” 13 हेना वरि सयतान सींड़ या:तेय अजमो केडिय ते चलो यनु, तहाँ दावीय जोहो दोहो एनु।
ईसु सेसेवाय बोंहड़ी तेडा (मत्ती 4:12-17; मरकुस 1:14-15)
14 हेना वरि फेर पवितर आत्मा राः बल ते भरो केनते ईसु गलील रेय मिड़ाः मेजेना, हेना वरि हेंय राः चरचा आस पास राः सींड़ जघा रे मिरिज एना। 15 हेना वरि हेंय हेंकू राः गिरजा ओड़ाः ते सिकछाय ओवाकू दोहो एनु, अवुर सींड़ होड़कू हेंय कू बडेय वडिया।
नासरत रे ईसु मेने कू बेस गडिया (मत्ती 13:53-58; मरकुस 6:1-6)
16 हेना वरि ईसु असुल बडे तेडिय हेना, नासरत गाँव रेय मिड़ा: मेजेना, अवुर यहूदी कू रा: रिति रिवाज रा: अनुसार ते सब्द रा: दिन गिरजा ओड़ाः रेय सेनेना। अवुर कागद पढ़ो लगड ईसु चड़ाँ एना। 17 भगवान रा: टेबोः लाय हेनी असायाह राः कागद कू ओवाडियू, हेना वरि हेंय हेनेन जघाय पोटा:अ ञँम तेडा, हेना रे न घयते ओल केना। 18-19 “परभु राः आत्मा इंञ थरे इदाना, गरीब होड़कू बढ़ियाँ: खभेर लाय वकु लगड इञींय चुनो केडा। अवुर गुलामी कू लाय वकू लगड अवुर अंधा कू एर ञेंल कू लगड, अवुर एटाः कुराः दाब ते खोट केनकू छडो, अवुर भगवान ञेंल मया केना हेना समय परचारे लगाडीय कुलकेडिञाँ।” 20 हेना वरि हेंय कागद बन्द केते सेसेवाअय ती रेय एम गोत्तेडु, अवुरिय दुड़ूब यनु। गिरजा ओड़ाः रे दोहोएन कू सींड़ होड़कू हेंय कू ञेंल हाँड़िवाडिया। 21 हेना वरि हेंय हेंकू थरेय कहनी तेडा, “भगवान राः कगद रे ओलकेना हेना, अपे अँजोमे तोलोग नआँ टेबोः तेनेसींञ मड़ंग पेरे उतरो यना।” 22 सींड़ होड़कू हेंय बडेय वडिया, अवुर हेंय बढ़ियाँ बढ़ियाँ टेबोईय टेबो: दोहो एनु, हेना अँजोम केते होड़कू अचरज यनकू तहाँ कू कहनियू, “एटागी उसुफ होपोन हवे।” 23 हेंय हेंकू थरेय कहनी तेडा, “इंञ थरे नआँ कहावत जरूर पे कहनियाँ ‘एय बयेध अनाम मी चीकानू! कफरनहुम रे जे काम मी काम केडा, हेना अले अँजोम केडा हेना काम अबु गाँव रेहोम तीबे।’” 24 अवुर हेंय कहनी तेडा, “इंञ अपे थरे सही मेतेंञ कहनी यडा, कनय भगवान राः टेबोः लाय हेनी हो अपन गाँव रे आदर इजेत एरोय ञँमतेडा। 25 उहयारेपे भगवान राः टेबोः लाय हेनी एलियाह रा: समय रे ची होया एना? सड़हे तीन बारिस अँगम इसरायील देस रे दा: मेने उयू: गडा अवुर अकाल तडा। हेना तोलोग हेना देस रे अखीर एकल तनकू कोड़ी कू दोहो एना। 26 भगवान हेना मेंडे कनय थरे एलिया मेनेय कुलगाडिया, सयदा रा: सारफत रे एकल तनाय कोड़ीहोन थरे भरिय कुलतेडिया। 27 अवुर भगवान राः टेबोः लाय हेनी एलीसा रा: सयम रे हो, इसरायील रे अखीर बगरा कुड़गा रोगिया कू दोहो एना, हेना मेंडे रे कनाय मेने चिकन गना सिरिया देस रेनिय नामान भर चिकन एना।” 28 तहाँ गिरजा ओड़ाः रेकू दुड़ूब तनकू, नआँ टेबो: अँजोम केते सींड़ होड़कू धको केनते कू मुर मुरो यनु। 29 हेना वरि हेंकू रिमकेनते हेंय गाँव वरि बहेर हनते कू उडुंग गोत्तेडियू, अवुर जे बुरू रे हेंकू रा: गाँव बसो तना, हेंय हेन बुरू चोटीत वरि बिड केयते लोजोरिय लगड कू इदी तेडिया। 30 तहाँ ईसु हेंकू मँझर वरिय उडुंग केनतेय चलो यनु।
मियाँ होड़ वरि भूतीय उडुंग तेडा (मरकुस 1:21-28)
31 हेना वरि ईसु गलील जिला राः कफरनहुम सहर रेय सेनेना, अवुर सब्द रा: दिन रे होड़कू भगवान रा: बढ़ियाँ टेबोईय चेडकू दोहो एनु। 32 तहाँ हेंकू हेंय रा: टेबो: अँजोम केते कू अचरज यनु, हेंय रा: टेबो: रे हँक दोहो एना। 33 गिरजा ओड़ाः रे मियाँ होड़ होड़ दोहो एना, हेंय थरे भूत लगो तना, 34 हेंय अच्छा तेय हाक एना, “एय नासरत गाँव रेनिय ईसु अले थरे अमा: ची काम इदाना? अम अले नास ले लगड मी मेजकेना किदो? इंञ आमींञ पपाड़ीआ भगवान चुनो केडमीअय पवितर होड़ हवे।” 35 तहाँ ईसु हेंयीय दबेट तेडिया, “जपनो को:मी, अवुर नेय वरिम उडुंग चलोऊ ” तहाँ भूत हेंय सींड़ कू मड़ंग रे पटको केडिय ते बेगर नोकसान तेय उडुंग यनु। 36 नआँ सींड़ ञेंल केड ते होड़कू अचरज यनु, अवुर अनाकू अनाकू कहनी ओड़ेंगू, “नेय रा: टेबो: रे तीमीन हँक अवुर सक्ति इदाना, भूत कुहो मेय रा: टेबो: कू मनो वेआ, अवुर कू उडुंग जोमा।” 37 अवुर ईसु जे जेय करो तेडा, हेना आस पास सींड़ जघा रे मिरिज यनु।
पतरस हनहार अवुर एटा: होड़कू होय चीकन तेड कुआ (मत्ती 8:14-17; मरकुस 1:29-34)
38 तहाँ हेंय गिरजा ओड़ाः वरि रिमकेनते सिमोन ओड़ा: कू सेनेना। हेना रे सिमोन हनहार जार लेनता डिया, अवुर सींड़ कू हेंय चीकानिय लगड ईसु थरे कू अरजी एना। 39 ईसु हेंय बंदे रेय चड़ा केनते जार केटेज अहा तेय कहनी वडू, तहाँ हेंय तुरेत तेय चिकन यनु, अवुर हेंय तुरेत ते रिमकेनते हेंकू सेवा तेडकू अयू। 40 बेर डुबो: तोलोग जे जे ओड़ा: रे केय परकार ते हसु तनकू ईसु थरे कू इदी तेड कुआ, अवुर सींड़ होड़कू छुँवो छुँवो तेय चीकन तेड कुआ। 41 अवुर केय झन होड़कू थरे भूत कू लगो तन हेंकू सींड़कू वरि कू उडुंग एना, अवुर अहीज अहीज तेकू कहनियू, “अम भगवान होपोन हवे,” लेकिन हेंय हेंकुय दबेट कू अवुर मेनेय एनेम टेबो: वकू, कहेकि हेंकू पपाड़ी दोहो एनु किदो नेय मसीहा हवे।
गिरजा ओड़ाः तेय परचार तेडा (मरकुस 1:35-39)
42 अखीर ञींदत ते ईसु हेना गाँव वरिय उडुंग केनते, सुनहार जघा हनते बिनतीः लगाडिय चलो एना। अवुर भीड़ कि भीड़ छपा छपा ते हेंय थरे कू मेजेना, हेना वरि कू ञँम केय तेकू हेंय थरे कू अरजी एना, किदो “अले बगी वते अलोम चलोऊ।” 43 लेकिन हेंय हेंकू थरेय कहनी तेडा, “एटा: एटा: गाँव सहर रेहो इंञ भगवान रा: राज रा: बड़ियाँ समाचार ललाय जरूरी इदाना, कहेकि इंञ नेन लगाडिय कुलके डिञाँ ।” 44 अवुर हेंय यहूदी देस रा: गलील रा: गिरजा ओड़ाः रे अधिकार रा: साँथ तेय परचारे दोहो एनु।
ईसु चेला कुय चुनो तेडा (मत्ती 4:18-22; मरकुस 1:16-20)
1 एक दिन राः दिन रे ईसु गन्नेसरत रे अखीर लम्बा चवड़ाआ दाह अड़ी रेय चड़ाँ तन तोलोगू, होड़कू भगवान राः टेबोः अँजोम लगड कू ठेला ओड़ेंगू। 2 हेना तोलोग हेंय बडेः दाह अड़ी रे बाटंग डोंगा कू चड़ाँ तडा हेनाय ञेंल ञँमतेडा, अवुर हकू ञेंड कू डोंगा वरि अगड़ू केनते जाल कू बुहल दोहो एनु। 3 हेन तोलोग ईसु सिमोन राः डोंगा रे रकब केनते अड़ी वरि दम भर राः मँझर हनते गोगे लगाडीय कहनी तेडा। हेना वरि डोंगा रेय दुड़ूब केनते सिकछाय ओवाकू दोहो एनु। 4 तहाँ हेंय टेबोः हनी केड राः बाद रे सिमोन थरेय कहनी तेडा, “डोंगा गहीर गतर हनतेम इदीयू अवुर हकुकू बझहो लगड जाल मी अटाड़ू।” 5 तहाँ सिमोन जबाब तेडा, “ठिके इदाना गुरू, इंञ रात भरींञ ञेंञेड एना, हेंडे रेहो मेनेंञ ञेंडगड कुआ, लेकिन अम कहनी यड रेदो जालींञ अटड़ यडा।” 6 हेना वरिय अटड़ तेड दो जाल घली ओडेजु: मेनमोट ते अखीर हकुकू बझहो एना। 7 हेना वरि हेंय एटा: डोंगा रेनकू गतीत कुहो सब देगय लगाडीय गविज वडकुआ। तहाँ हेंकू मेजेना, हेना वरि बनाटंग डोंगा हकुकू ते एतना कू पेरज तेडा डोंगा घली डूबो बंचो एना,। 8 नआँ ञेंलकेते सिमोन पतरस ईसु कटा दुबी रे ऊकड़ूम केनतेय कहनी तेडा, “ए परभु, इंञ मड़ंग वरिम चलोऊ, इंञ दो पापी होड़ हवे।” 9 तहाँ हेंय अवुर गतीत कू, अखीर हकुकू सबताडा ञेंल तेकू अचरज यनु । 10 जबदी कोड़ा होपोन कींञ अकूब अवुर उहन्ना हो सिमोन सुदा कींञ दोहो एना, हेंकींञ होकींञ अचरज यनु । हेना वरि ईसु सिमोन थरेय कहनी तेडा, “अलोम बोरू; अब वरि अम भगवान थरे होड़कुम आगा।” 11 हेना वरि हेंकू डोंगा अड़ी रेकू अगतेडा, अवुर सींड़ चीज बगी वते ईसु सुदा कू चलो एना ।
कुड़गा रोगियाय चीकन तेडा (मत्ती 8:1-4; मरकुस 1:40-45)
12 जब ईसु मियाँ टंग सहर रेय दोहो एन तोलोग, हेना रे मियाँ होड़ कुड़गा रोगिया अखीर दोहो एन हेंय मेजेना, हेना वरि हेंय ईसु ञेंलकेते गोड़ीय गिरो केनतेय अरजी एना, “ओ परभु, अगर अम चोहो: रेदो इंञ मी सुध सकोआ ।” 13 हेना वरि तीतिय सुहरू केते हेंयूय छुयों तेडिया, अवुरिय कहनी तेडा, “इंञ चहो: तना चीकानु: मी ।” हेना वरि हेंय राः कुड़गा रोग तुरेत ते छुटो यनु। 14 हेना वरि ईसु हेंयीय मतर तेडिया, “कनय थरे अलोम लाय बेड़ायू, सींड़ कू मड़ंग रे सखिया गोवाह होयाः लगड हलिते सेनकोःते याजक मी ति:वा। कुड़गा वरि चीकानुअय लगड भगवान मूसा राः दोवारा ते नियामीय एम केडा, हेना राः उनसार ते पुजम एमू।” 15 लेकिन ईसु राः चरचा अनावुर मिरिज चलो एना, भीड़ उपर भीड़ हेंय राः टेबोः अँजोम अवुर अपन रोग वरि चीकानुः लगड होड़कू जवर एना। 16 हेंडे रेहो हेंय सुनहार जघा रे सेनको: तेय बिनती: दोहो एनु ।
लवका ञेंडताडिया हेंयूय चीकन तेडा (मत्ती 9:1-8; मरकुस 2:1-12)
17 एक दिन एयसा होया एना कि जब ईसु सिकछाय ओवा कू दोहो एनु, हेना रे फरीसी कू अवुर नियम चेचेड हेंकू होकू दुडूब तना। नेकू गलील अवुर अहूदी देस राः सींड़ गाँव वरि अवुर एरूसेलेम वरि नेकू मेजताना। ईसु थरे होड़कूय चीकन लगड भगवान राः सक्ति दोहो एना । 18 कुछ होड़कू लवका ञेंडता डिय हेनी होड़ परकोम तेकू अकतेडिया, अवुर हेंकू हेंय भितर रे ईसु मड़ंग रे इदीय लगड कू एमेल तेमेलुः दोहो एनु। 19 हेंकू भीड़ राः चलते ते ईसु थरे मेने कू इदी सको गना, तहाँ सड़ीम अगस रे रकब केनते खपरा कू अड़ी तेडा। अवुर परकोम तू सुदा ईसु मड़ंग रेकू अगड़ू तेडिया । 20 तहाँ ईसु हेंकू राः बिसवास ञेंलके तेय कहनी तेडा, “ए मनवा, अमा: सींड़ पापींञ माफ गोत्तेडा ।” 21 हेना वरि फरीसी कू अवुर नियम चेचेड कू मन मन रेकू पसीदें दोहो एनु, “नेय इया हवे भगवानीय निन्दा यडा? भगवान छोड़ अवुर इया पाप राः माफी एम सको: तना?” 22 ईसु हेंकू मन- मन रेकू पसींद तेड हेना पपाड़ी केनते हेकूय होंबोर तेडा, “अपे इंञाः टेबोः रे न याःते ची लगड पे पसींद यडा?” 23 अमा: पाप माफ यना मेनाआँ किदो, रिमको: तेम सेन बेड़ाऊ मेनाआँ? न बनाटंग रे करा टेबोः सेथिया गिआ? 24 अपे पपाड़ी लगाडू इंञ होड़ होपोन धरती रे, पाप माफे लगड हो हँक इदाना ।” हेंय लवका ञेंडता डिया हेंय थरेय कहनी तेडा, “इंञ अम थरेंञ कहनी यडा, रिमु: मी, अवुर परकोम तम अलगो केते ओड़ा: हनतेम चलोऊ ।” 25 तुरेत ते हेंय सींड़कू मड़ंग रेय रिमेना, अवुर गितीज तनय हेना, परकोम अलगो केते भगवानीय बडेय बेड़ा वते, अनेज ओड़ा: हनतेय चलो एना। 26 हेना वरि सींड़कू अचरज यन कू, अवुर भगवान कू बडेय वडू अवुर अखीर बोरो यन तेकू कहनी तेडा, “तेसींञ अबु बडे: काम बू ञेंलकेडा!”
ईसु लेवी चेलाय बनो तेडिया (मत्ती 9:9-13; मरकुस 2:13-17)
27 हेना वरि ईसु बहेरीय उडुंग एना। अवुर लेवी मेनते कू ञुमू तडीय हेनी रोमी सरकार लगड मलगुजारी तिला अय नाका ओड़ा: रेय दुड़ूब तन तोलोगीय ञेंलवा डिया, अवुर हेंय थरेय कहनी तेडा, “दाव इंञाअय चेलाम बनोः लगड इंञ सुदाम मेजुऊ।” 28 तहाँ हेंय सींड़ चीज बगी वते ईसु तयोम तेय सेन तेडा। 29 हेना वरि ईसु आदर भोजन लगड, लेवी ओड़ा: तुरे बडे: खावा पिवा लगाडीय रा:तेड कुआ। हेंय सुदा मलगुजारी तिला कुहो अवुर एटा: होड़कू हो, बगरा ते जोमु: कू दुड़ूब तना। 30 हेना ञेंलके ते फरीसी कू अवुर फनारीसी कुराः नियम चेचेड कू, चेला कू थरे न या:ते कुरू बुसू केनते कू कहनी तेडा, “अपे मलगुजारी तिला कू अवुर पापी होड़कू सुदा ची लगड पे जोमु:- चरो: तना?” 31 हेना वरि ईसु हेंकूय जबाब वडा, “डाक्टर चीकन होड़कू लगड मेने, लेकिन हसू को:कू लगड जरूरत पड़ोआ । 32 इंञ बेगारींञ पापा मेनते पसींदे: कू इंञाः जरुरत कोवाआ, लेकिन इंञ पाप केडांञ मेनते पसींदेः कू लगड भगवान थरे पाप राः माफी असी वकू लगाडींञ मेजकेना।”
उपास रा: बारे ते ईसु कू होंबोर तेडा (मत्ती 9:14-17; मरकुस 2:18-22)
33 कुछ होड़कू ईसु थरे कू कहनी तेडा, “बतिसमाय एम हेनी उहाना रेनकू चेला कुदो हरदम कू उपास अवुर बिनती दरवारू: तना, अवुर फरीसी कुरेन कू चेला कुहो, लेकिन अमा:कू चेला कू जोमु: चरो: तनाकू।” 34 हेना वरि ईसु हेंकू थरेय कहनी तेडा, “जब तक बरातियाकू सुदा दुल्हा दोहोनू, हेंकू अपे का: तेपे एर उपास कुआ? 35 लेकिन हेना दिन मेजुआ, जब दुल्हा हेंकू वरिय हिगरो गोगेया, हेन तोलोग हेंकू उपासुआ।” 36 हेना वरि फेर ईसु हेंकू अवुर मियाँ टंग उदाहरड़ीय लाय वडकूआ, “कनय होड़ नवा: कपड़ा वरि ओड़ेज केते मरी: कपड़ा रे मेने कू टेपीया। नहीं तदो नवाआँ ओड़ेजुआ अवुर हेना टेपी मरीआ सुदा हो एरो सोभा एना। 37 अवुर नवाआँ अंगुर रस मरीआ खाल राः झोला रे कनय मेने भरोवेआ, कहेकि अंगुर रस खाल राः झोला ओड़ेज केते एंडाआ अवुर झोला हो बरबदुआ । 38 नवाआँ अंगुर रस नानावआँ खाल राः झोला रे भरो केते कू दोहोया । 39 कनय होड़ हो मरीआ अंगुर रस ञुँके वरि नवाआँ मेनेय बेस वआ, कहेकि हेंय कहनियाँ मनारिआ बढ़ियाँ गिआ” मेनते ।
सब्द रेनिय हो मालिक (मत्ती 12:1-8; मरकुस 2:23-28)
1 सब्द रा: दिन रे ईसु अवुर चेला कू गोहोम खेत तेकू चलो: दोहो एना। अवुर चेला कुतय गोहोम बली होड होड ते, तीत कुते दरमेस केते कू जोम गोगे दोहो एनु। 2 तहाँ फरीसी कू मेंडे कुछ होड़कू कहनी तेडा, “सब्द राः दिन रे जे नियम इदाना हेना ची लगड पे उजड़ यडा?” 3 हेना वरि ईसु हेंकुय जबाब वडा, “अपे भगवान राः कगद कबोह मेने पे पड़होगड किदो? दाऊद अवुर गतित कू रंगेज तडकू तोलोग चीय बनो तेडा? 4 “दाऊद भगवान ओड़ा: रे सेनकेनते भगवान लगड रकब तड हेना रोटी, याजक छोड़ एटा: कू मेने कू जोमसकोः हेना, रंगेज तडकू तोलोग दाऊद गतीत कू सुदा असी केते कू हटींग जोमतेडा। नेय होता नियामीय उजड़ तेडा।” 5 हेना वरि ईसु हेंकू थरेय कहनी तेडा, “सब्द रा: दिन रे ची सही ची गलत इदाना हेना निरलेये लगड इंञ होड़ होपोन थरे हँक इदाना।”
तीत लोहोड़ तनय होड़ीय चीकन तेडा (मत्ती 12:9-14; मरकुस 3:1-6)
6 अवुर एटा: सब्द रा: दिन रे ईसु गिरजा ओड़ाः रे सेनकेनते होड़कू सिकछाय चेडकू दोहो एनु। हेना रे मियाँ होड़ होड़ जोम गतर तीत लोहोड़ तनय दोहो एना। 7 अवुर सब्द राः दिन रेय चीकानिय किदो एरोआ, मेनाआँ ञेंल लगड फरीसी कू अवुर नियम चेचेड कू ईसु कू बदि लगड मोका कू ञँम बेड़ा दोहो एनु। 8 हेंय हेंकू पसींद तेड हेनाय पपाड़ी दोहो एनु, हेनाते हेंय लोहोड़ तना ती थरेय कहनी तेडा, “रिमु: मी, सींड़ कू मड़ंग रेम चड़ाऊ।” तहाँ हेंय रिम चड़ाँ यनु। 9 ईसु हेंकू थरेय कहनी तेडा, “इंञ अपेंञ होंबोर यडपेआ, सबद रा: दिन रे नियम राः उनसार ते ची बनो रे हेंडे बढ़ियाँ इदाना, सही काम करो रे किदो गलत काम करो रे; जीव बंचो हेना किदो बिलोः हेना?” 10 तहाँ हेंय चारो गतर हन सींड़ कू ञेंलके ते हेंय होड़ थरेय कहनी तेडा, “तीम मी सुहरू।” हेंय सुहरू तेडा, तहाँ हेंय ती चीकन यनु। 11 हेना वरि हेंकू अखीर धको केनते बहेर हँडे उडुंग केनते अनाकू अनाकू कहनी ओडेंगु, “अबु ईसु का:तेबु चीया?”
बारह झन पेरेरित कुय चुनो तेडा (मत्ती 10:1-4; मरकुस 3:13-19)
12 हेना तोलोग ईसु बुरू रे बिनती: लगाडिय सेनेना, अवुर भगवान थरे रात भरीय बिनती एना। 13 अंगा एना तहाँ हेंय अनेज रेनकू चेला कू राःकेड कुते, हेंकू मेंडे रे बारह झनिय चुनो तेडा, अवुर हेंकू पेरेरित मेनतेय कहनी वडकुआ। 14 अवुर नेकू ञुमू नआँ या:तेआ, सिमोन ञुमू ईसु पतरस मेनतेय ञुमू तेडिया अवुर हेंय बोहोत अन्दिरयास अवुर आकुब अवुर उहाना अवुर फिलिप्पुस अवुर बरतुलमय, 15 अवुर मत्ती अवुर थोमा अवुर हलफई होपोन अकूब अवुर सिमोन, नेय जेलोतेस मेनते होकू कहनी वया, 16 अवुर अकूब होपोन यहूदा, अवुर यहूदा इस्करयोति नेनी ईसुय एर पकड़ो तेडा।
सिकछय ओवड कुआ अवुरिय चीकन तेडकुआ (मत्ती 4:23-25; 5:1-12)
17 हेना वरि ईसु हेंकू सुदा अगड़ू केनते, समथर जघा रेय चड़ाँ एना, अवुर चेला कू राः अखीर भीड़ दोहो एना। यहूदी, एरूसेलेम, अवुर समुन्धर अड़ी रा: सूर अवुर सयदा वरि हो अखीर होड़कू मेजेना। 18 नेकू ईसु राः टेबो: अँजोम लगड अवुर रोग वरि चीकानु: लगड हेंय थरे होड़कू मेजेना। अवुर भूत कू लगो तन कू होड़कू होय चीकन कू दोहो एनु। 19 हेंय वरि सक्ति उडुंग को:ते सींड़ कुय चीकन कू दोहो एनु, हेना ते होड़कू हेंय छुवों वीय मेनते कू सँबह तना।
आसीस अवुर दु:ख रा: टेबो:
20 तहाँ हेंय अनेज रेनकू चेला कू हनते तको केतेय कहनी तेडा, “अपे गरीब गिआ पे हेना ते अपे भगवान आसीसिय ओवापेआ, कहेकि भगवान राः राज अपे थरेआ, 21 “अपे रंगेज केनकू पुरो केपे ते भगवान आसीसिय ओवापेआ, अपे ईयम कू भगवान आसीसिय ओवापेआ, कहेकि अपे लाँदापे। 22 होड़ होपोन राः चलते ते अपे सुदा बयेर कू रखोवा, अवुर कू निन्दा पेआ, अवुर अपे होड़कू गलती गिआ कू मेनते, पसींद केते सामाज वरि कू बेघर पेआ, हेना ते भगवान अपे आसीसिय ओवापेआ। 23 हेना चेका खुसी तेपे ऊजू, कहेकि अँजोम पे अपे लगड सरग रे बडेआ ईनाम इदाना। नेकू रेनकू पुरबुज कुहो, भगवान राः टेबोः लाय हेंकू सुदा नेन घयते कू करोवे दोहो एनु । 24 “अपे धनी गिआ पे अखीर दु:ख रेपे पड़ोआ, कहेकि अपे धरती रे मवोज मस्ती पे ञँम चुको केडा। 25 अपे निहों सींड़ चीज पे ञँम चुको केडा, अखीर दु:ख रेपे पड़ोआ, कहेकि रंगेजुआ पे। अपे निहों लांद तनकू अखीर दुःख रेपे पड़ोआ, कहेकि पसतो अपे अवुर इया मपे। 26 सींड़ होड़कू अपे बढ़ियाँ गिआ मेनते कू कहनी वपेरेदो, ओहो, अपे अखीर दु:ख रेपे पड़ोआ, कहेकि नेकू रेनकू पुरबुज कुहो अँधेर बहेर ते भगवान राः टेबोः ललाय कुहो नेन घयते बढ़ियाँ गिआ मेनते कू कहनी वकू दोहो एनु।
बयरी कू सुदा परेम (मत्ती 5:38-48; 7:12)
27 “लेकिन इंञ अपे अआँजोम कु थरेंञ कहनी यडा, अपन मुदेय कू सुदा परेम पे रखो; अपे सुदा बयेर कू रखोवा हेंकू रा: भलेय पे करो। 28 कनय हो अपे कू बोलि वपेरेदो असीर्वाद पे ओवाकू, जे अपे कू मेरंग वपेः हेंकू लगड पे बिनतीऊ। 29 कनय हो मियाँ गतर जोहा पेरेय चाड़ो वेरे दो, एटा: गतर होपे एनेम चाड़ो वयू, अवुर कनय हो उयूआ तपे कू लुसी रेदो, हेंय अँगा हो पे ओवायू। 30 कनय हो अपे थअय असीय रेदो, हेंय ओवाय पे, अवुर अपे था: कनारा चीज होय लुसीय रेदो हेंय वरि अलोपे असीयू। 31 जे घयते अपे सुदा बेवहार पे चहो: तना, हेन घयते एटाः कू सुदा होपे बेवहारूऊ। 32 अगर अपे अपन परेम रखो कू सुदा परेम पे रखो रेदो, बड़ा भारी काम पे काम केडा किदो, नआँ या:ते दो पाप ता: हेंकू होड़कू हो अपन परेम रखोकु सुदा दो परेम कू रखोवा। 33 अपे अनापे रा: भलेय कू करो: हेंकू सुदा भलेय पे करो रेदो बड़ा भारी काम पे काम केडा,किदो नआँ या:ते दो पापी होड़कू होकू करोवेआ। 34 अगर अपे मिड़ाः सकोः घियाः कू उधार पे ओवा रेदो बड़ा भारी काम पे काम केडा, नआँ या:ते दो पापी कुहो पापी कू थरे फेर हेन मेन मोट ञाँमे लगड उधार कू ओवाकुआ। 35 अपन मुदेय कू सुदा हो परेम पे रखो, हेंकू सुदा भलेय पे करो, फेरिय मिड़ागेआ मेनते असरा को:ते उधार अलो पे एमे, नआँ घयते पे करोवे रेदो बडे: ईनाम ञँमुआ। अवुर अपे भगवान रेनकू होपोन कू होयाआ, कहेकि मेने धन्यावाद वय हेंकू थरे हो अवुर पापी होड़कू थरे हो भगवान राः दया इदाना। 36 जे घयते अपे रेनिय अपा दयादार गिअय हेन घयते अपे हो दयादार पे बनोऊ।
एटा: कू अलो पे दोस कू (मत्ती 7:1-5)
37 “अलोपे बदी कू रेदो, अपे हो भगवान एरोय बदी तेडपेआ। अवुर नेय हवे मेनते नाव टिपते अलो पे टिपो कू, हेंडे दो अपे हो भगवान एरोय बदी तेडपेआ। एटाः कू पे माफ वकू रेदो अपे हो भगवान माफ वपेअय।” 38 एमेय रेदो, अपे होकू ओवा पेआ, अवुर होड़कू नपो नपो ते सोकोजवते एन्डा: घयते अपे कू ओवा पेआ। जे नाप ते अपे नपोवेआ, हेन नाप ते अपे लगड होकू नपोवेआ।” 39 तहाँ मियाँ टंग उदाहरड़िय कहनी तेडा, “का:ते अंधा होड़ अंधा होरिय लाय वया? बना होड़ डोडहा रे एरो कींञ लोजोर एनाम किदो? 40 चेला अनेज रेनिय गुरू वरि बडे कोवाया, लेकिन सींड़ चेडकोः रे हेंडे गुरू राः बरोबारु अयू। 41 “एटा: कू मेड रा: तील भराः कचरा ची लगड मी ञेंलयाडा, अपन मेंड रा: बडेः कचरा दो मेन सुझो: तना? 42 अम अनम मेड रा: कचरा मेनेम ञेंलयाडदो, एटा: कू का:तेम कहनी सकोआ, ‘रहा चड़ाँ: पे अपे मेड वरि कचरांञ उडुंगा?’ एय कपटी होड़, पहिल ते अनम मेड वरि बडेः कचरा उडुंग के हेंडे एटा: कू मेड रा: कचरा, ञेंलके ते बढ़ियाँ तेम उडुंग सकोआ।
जेयसे दुबित तेयसे जोओत (मत्ती 7:17-20; 12:34-35)
43 “कनारा बढ़ियाँ: दुबी रे कड़हा कड़हीआ मेने जोआ।अवुर कड़हा कड़हीआ दुबी रे बढ़ियाँ: मेने जोआ। 44 सींड़ दुबी जोओत ते चीनहो जोमा। होड़कू जनोम भेंजुड़ वरि अंजीर जोओ थोरे कू गोडेआ, अवुर ओत बोयीर दुबी वरि हो अंगुर जोओ मेने कू गोडेआ। 45 बढ़ियाँ होड़ अपन कोठी कया वरि बढ़ियाँ: टेबोईय उडुंगा, अवर बेलूर होड़ अपन कोठी कया वरि बेलूरा टेबोईय उडुंगा, कहेकि जो कोठी कया रे भरो कोआ, हेनेना टेबो: हेंय अहा वरि उडुंगुआ।
बा होड़ ओड़ा: बनो कींञ (मत्ती 7:24-27)
46 जब अपे इंञा: टेबो: मेने पे चेडयड रेदो, ची लगड ए परभु, ए परभु, मेनते पे कहनी वंञ तना? 47 कनय हो इंञ थरे मेजु: हेनी, इंञा: टेबोईय अँजोमेआ, अवुर अँजोम केतेय चेडेः हेनी, हेंय करा घयगी अयू, हेंय इंञ अपेंञ लाय वताना: 48 हेंय होड़ नआँ घयगी अयु, अपन ओड़ा: बनो तोलोग गहीर अंगम ला ला ते चटाँड़ी तया: केते, हेन वरि नेवीय बोंहड़ीआ। जब ओड़ा: रे बाढ हलका मेजेना, हेंडे रेहो मेने टक्सो गना, कहेकि हेना ओड़ाः अमर जमर तेय बनो तडा। 49 लेकिन जे इंञा: टेबो: अँजोम केते मेने मनोवे हेनी, हेंय होड़ नआँ घयगी अयू, ओतेत रे बेगर नेव लाते ओड़ाईय बनोतेडा। जब हेना ओड़ा: रे बाढ हलका मेजेना, तहाँ हेना ओड़ाः तुरेत्ते धसगों यनु, अवुर हेंय रा: सींड़ बरबाद यनु ।
मियाँ होड़ दरोगा रा: बिसवास (मत्ती 8:5-13; उहाना 4:43-54)
1 हेना वरि नआँ सींड़ीय टेबोः हनी केते, ईसु कफरनहूम गाँव रेय मिड़ा: मेजेना। 2 हेना रे मियाँ होड़ रोमी सिपाही कुरेन कू दरोगा रेनिय नोकर दोहो एना। हेंय अच्छाई मँजुरवय दोहो एनु। हेंय दु:ख तेय गोजु: दोहो एनु। 3 दरोगा ईसु राः खभेर अँजोम केते, कुछ यहूदी समाज रेनकू सपायँड़ कू ईसु थरेय कुलतेड कुआ। ईसु मेजको: ते इञाँअय नोकर चीकानू मेना: टेबोः लाय लगाडीय कुलतेड कुआ। 4-5 हेना वरि हेंकू ईसु थरे कू मेजेना। अवुर गोड़े पइयाँ केनते कू कहनी तेडा, “दरोगा अबु जात न लगे, हेंडे रेहो अम हेंय रेनिय नोकर मी चीकानू। कहेकि नेय दरोगा अबु जात कू सुदा परेमीय रखोआ, अवुर हेनी अबु लगड गिरजा ओड़ाईय एर बनो तेडा।” 6 हेना वरि ईसु हेंकू सुदाय सेनेना, तहाँ हेंकू ओड़ा: कू तया: बंचोय तोलोग, हेंय दरोगा गतीत कू थरे हा: ते कहनीय लगाडीय कुलतेड कुआ, “मालिक इंञ नआँ लायीक कोवाञाँ, अम इंञ ओड़ा: रे मेजु: लगड परेसानी अलोम रीमे। 7 अम थरे मेजु: लायीक हो कोवाञाँ, हेनाते मेनेंञ मेजगाना, लेकिन अम मेन वरि मियाँ अखर मी टेबोः गोत्ते रेदो, इंञाअय नोकर चिकानुआयू। 8 इंञ हो कनय रेनिय नोकर हवे। इंञ उपर रेहो कुछ होड़कू राः अधिकार इदाना। इञाँ: पेदी रेहो कुछ नोकर कू कामा, हेंकू थरे इंञाः अधिकार इदाना। सींड़ कू इञाँ: टेबोः कू अँजोमेआँ, ‘ जु ’ मेंडे रेदोय चलोआ, मेजुःमी मेंडे रेदोय मेजुआ। अवुर इंञाँअय कनय नोकर हो नआँम काम मेनतेंञ कहनी वय रेदोय कामेआँ।” 9 हेना वरि ईसु नआँ टेबोईय अँजोम केतेय अचरज यनु, तहाँ अनेज तयोम ते सेने दोहो एन हेंकू थरे, तयोम हनते तेरेज केतेय कहनी तेडा, “इंञ अपेंञ लाय वताना सींड़ इसरायील रेहो नआँ घियाआ बिसवास कबोह मेनेंञ ञेंलगाडा।” 10 हेना वरि कुलतड कु: हेंकू होड़कू, ओड़ा: मिड़ा: केनते, हेंय नोकर चीकन हतड़ तन तोलोग कू मेज ञँमतेडिया।
एकल तनय कोड़ीहोन रेनिय चोंडीज ईसु जियो तेडिया
11 कुछ दिन बितो केनरे ईसु नाईन सहर रे, चेला कुतय सुदाय सेनेना। हेंय रेनकू चेला कुतय अवुर अखीर होड़कू हेंय तयोम तेकू सेने दोहो एनु। 12 गाँव कू बोल दोहोएन तोलोग, मियाँ होड़ मड़ा हरेय लगड होड़कू बहेर हनते कू गोगेय दोहो एनु। हेना रे इंगत होय दोहो एना, हेंय रेनिय मिनये टंग कोड़ाहोपोन दोहो एना, अवुर हेंय एकल तनायू। 13 ईसु मसीह हेंय ञेंलके ते अखीरिय दया एना अवुरिय कहनी तेडा, “अलोम इयामू।” 14 हेन तोलोग ईसु मटी बन्दे रेय सेनेना, अवुरिय छुवों तेडा तहाँ तुतूलकू चड़ाँ यनु। हेना वरि ईसु कहनी तेडा, “अम ढिंगवंञ कहनी वताना, रिमु: मी!” 15 हेनेन तोलोग हेंय जियो रिमयाँनू अवुरिय टेबोः बेड़ाऊ। तहाँ हेंय इंगत थरेय जीमा तेडिया। 16 नआँ ञेंलके ते सींड़कू अचरज यनकू, अवुर हेंकू परभु भगवान बडेय वते कू कहनी तेडा, “अबु मँझर रे मियाँ होड़ भगवान राः टेबोः ललाय हेनी मेजकेना, अवुर भगवान अपन होड़कू ञेंलकेड कुतेय बंचो केडबु आ।” 17 ईसु रा: बिसेय ते सींड़ अहूदी देस रे अवुर आस पास रा: सींड़ जघा रे टेबो: मिरिज यनु।
बतिसमाय एमय उहाना रा: सवाल (मत्ती 11:2-19)
18 ईसु जे जेय करो तेड हेना सींड़ टेबो: बतिसमा एमय उहाना, अनेज रेनकू चेला कू लाय वडिया। 19 तहाँ बतिसमा एमय उहाना, बा होड़ चेला कींञतय रा:केड ते, ईसु थरे नआँ होंबोर लगाडिय कुलतेड कींञा, “मेजुअय अनम हवे किदो अले एटागी गिले तंगीआ?” मेनते । 20 हेकींञ हेंय थरे मेजकेन तेकींञ कहनी तेडा, “उहाना बतिसमाय एमय नआँ होंबोर लगड अम थरेय कुल केड लींञा, “मसीहा ले तँगी यडा, हेंय अम हवे किदो अले एटागी ले तँगीआ? ’ ” 21 हेनेन तोलोग ईसु अखीर दु:ख बिपेत तन कू अवुर जेय होड़ थरे भूत कू लगो तना हेंकूय चीकन तेडा, अवुर अंदहा कू होय चीकन तेडकुआ। 22 अवुर हेंय हेंकींञ थरेय कहनी तेडा, “जू, मिड़ाः सेनको:ते नआँ हँडेबा ञेंल केड अँजोम केड हेना उहाना थरे बा लाये, किदो अंदहा कू ञेंलेआ कू, लंगड़ा कू सेनेआ कू, कुड़गा कू चीकनुआ कू, अवुर बेहरा कू अंजोमेआ कू, गोज को: कू जिओ कुआ अवुर गरीब होड़कू बढ़ियाँ: खभेर लाय वकुआ। 23 इंञ उपर रे बिसवास मेनेय टोविज हेंय थरे भगवान राः आसीस इदाना।” 24 हेना वरि उहाना रेनकींञ चेला कींञ चलोयन, तहाँ ईसु उहाना रा: बारे ते होड़कू थरेय लाय तेडा, “अपे सुनहर जघा रे ची ञेंल पे सेनेना? होय ते हिलो: हेना कँसा किदो? 25 अपे ची ञेंल पे सेनेना? महंगा दाम रा: कपड़ा तुसींञ तडाय होड़ किदो? अँजोम पे, चमको: हेना कपड़ा तुसींञ कू अवुर मवोज मस्ति ते दोहोन कू गड़ही रेकू दोहोना। 26 हेनावर फेर ची ञेंल पे सेनेना? कनय भगवान राः टेबोः लाय हेंकू किदो? हूँ, इंञ अपे थरे सही मेतेंञ कहनी यडा, भगवान राः टेबोः लाय हेंकू वरि हो बडे अयू ञेंञेल पे सेनेना। 27 नेय हेनी हवे, हेंय रा: बिसेय ते ओल केना: ‘अँजोम मी, इंञ इंञाअय दूत अम वरि मड़ंग मड़ंग तेंञ कुलिया डिया, अम वरि मड़ंग ते अमाआ होरिय सोझा।’ 28 इंञ अपे थरेंञ कहनी यडा, कनय होड़ धरती रेय जनम केना हेंय उहाना वरि बडे कोवाया। हेंडे रेहो भगवान रा: राज रे सींड़ वरि होडीञँय, उहाना वरि होय बडे गिआ।” 29 सींड़ कू अँजोम केते, अवुर मलगुजारी तिला कुहो उहाना वरि बतिसमाय तिला केते, ईसु राः टेबोः भगवान सिरीत गिआय मेनते कू मनो तेडा। 30 लेकिन फरीसीकू अवुर नियम चेचेड कू भगवान हेंकू लगाडिय पसींद तडा हेना कू बगी वडू। कहेकि हेंकू उहाना वरि बतिसमा मेने कू तिला गडा। 31 ईसु फेरिय कहनी तेडा, “नआँ जुग रेनकू होड़कू करा घयगी अकु, काःतेंञ लाय वपेआ? 32 हेंकू नेकू चोंडीज कू घयगी अकू, बजार रे दुड़ूब को:ते एटा: कू थरे हाक हाक तेकू कहनिया, ‘ अले अपे लगड खुसी ते बसरी ले बजा तेडा, अवुर अपे मेने पे सुसून गना, अले दु:ख रा: सिरिंञ ले सिरिंञ तेडा, अवुर अपे मेने पे ईयम गना।’ 33 लेकिन बतिसमाय एमायु उहाना खयना चिली हो मेनेय जोमगाडा, अंगुर रस हो मेनेय ञूँ दारवार गडा, अवुर ‘अपे कहनी वया नेय थरे भूत इदाना’ मेनते। 34 अवुर होड़ होपोन जोमु: चरो: तनायू अवुर अपे कहनी यडा, हरहाअयू अवुर मतवाड़ी अयू, अवुर मलगुजारी तिला कू अवुर पापी होड़कू रेनिय गति हवे मेनते। 35 उहाना अवुर इंञ काम केड हेना सिरीत गिआ मेनते, भगवान रेनकू होपोन कू जेरेआ कू,।
फरीसी ओड़ा: रे पापी कोड़ीहोन राः माफी
36 हेना वरि मियाँ होड़ फरीसी अनेज सुदा जोमु: लगड ईसुय रा:तेडा, तहाँ ईसु फरीसी ओड़ा: रे जोमु: लगाडीय दुड़ूब तना। 37 हेन तोलोग हेन सहर रेनिय मियाँ होड़ पापी कोड़ीहोन पपाड़ीयन किदो ईसु फरीसी ओड़ा: रे जोमुऊय दुड़ूब केना मेनते, तहाँ दिरी राः बोतल ते सोओं सुनूमिय अकतेडा, 38 हेंय ईसु कटा बंदे रे उकड़ूम केनतेय ईयम एना, मेडतू दा: ईसु कटा रे जोर दोहो एनु। हेना वरि हेंय कोड़ी होन ऊबतू ते ईसु कटाई जोड दोहो एनु, अवुर बित्ताही ते कटात चो: चो: ते हेंय ईसु कटा रे सोओं सुनूमिय ओजा: दोहो एनु। 39 तहाँ नआँ ञेंलके ते ईसुय राः तड हेंय फरीसी मने मन रेय पसींद तेडा, “अगर नेय भगवान राः टेबोः लाय हेंय दोहोएन रेदो, इया छुवों यडिंञ मेनाअय पपाड़ीयन मेनू; कहेकि नेय बयसी कोड़ी होन हवे।” 40 हेना वरि ईसु कहनी तेडा, “ए सिमोन, इंञ अम थरे कुछ कहेक इदाना ।” तहाँ हेंय कहनी तेडा, “कहनिय मिखा गुरु।” 41 ईसु कहनी तेडा, “कनय महाजन रेनकींञ बाहोड़ करजा कींञ तिला तेडा, मियाँ होड़ थरे पाँच सव चाँदी राः सिक्का, अवुर मियाँ होड़ थरे पचास सिक्का राः करज दारीय दोहो एना। 42 हेना तोलोग हेंकीञ बना होड़ थरे उधार मिड़ा: लगड पेयसा मेने दोहो गना, हेनाते हेंय हेंकीञ राः करजाय माफ तेडा। हेनाते नेकींञ बना होड़ वरि हेंय सुदा बगरा ते काय परेम रखो वेआ?” 43 हेना वरि सिमोन जबाब तेडा, “इंञा: मन रेदो जे राः बगराई माफ तेड हेनी ।” हेना वरि ईसु हेंय थरेय कहनी तेडा, “अम ठिकेम लाय तेडा।” 44 हेना वरि हेंय कोड़ी होन हनते तको केते, ईसु सिमोन थरेय कहनी तेडा, “अम नेय कोड़ी होन मी ञेंलयाडिया? इंञ अम ओड़ा: रेंञ मेजेना, कटांञ गोड़दोही लगड दा: घली मेनेम एमगाडा, लेकिन नेय इंञ कटा मेडतू दा: ते लोहा केते ऊबतू तेय जोडतेडा। 45 अम मेनेम चो:गाडिञाँ, लेकिन इंञ मेज केन वरि नेय कटांञ चोचो: मेनेय बगी गडा। 46 अम दो भोगींञ रे सुनूम मेनेम ओजा: गडा, लेकिन नेय कटांञ रे सोओं सुनूमिय ओजा: तेडा। 47 हेनाते इंञ आमींञ लाय वताना, नेय बगराय पाप तेडा हेना माफ यना, हेना ते नेय अखीरिय परेम तेडिञाँ। लेकिन जे राः दम भर माफ केना, हेंय दम भर ते परेमीय रखोआ।” 48 अवुर ईसु कोड़ी होन थरेय कहनी तेडा, “अमा: पाप माफ यना ” 49 हेना वरि जे जे हेंय सुदा जोमु: कू दुड़ूब तना, हेंकू अपन अपन मन रेकू सोचोवे दोहो एनु, नेय इया हवे पाप होय माफ गोत्तेआ?” 50 हेना वरि हेंय कोड़ी होन थरेय कहनी तेडा, “अम बिसवास तेडा ते अम भगवान बंचो केडमीआ, हँसी खुसी तेम चलोऊ ।”
ईसु रेनकू चेला कू
1 हेना वरि ईसु गाँव- गाँव सहर- सहर तेय परचारे दोहो एनु, अवुर भगवान राः राज रा: बढ़ियाँ: खभेर लाय लाय तेय मिड़ा: दोहो एनु, अवुर बारह झन चेला कू हेंय सुदा कू दोहो एना। 2 अवुर गोटा चार कोड़ी कुहो कू दोहो एना, भूत कू वरि अवुर रोग वरिय चीकन तेडकुआ, हेंकू ञुमूँ नआँ घयतेआ: मरियोम मगदलीनी नेय मगदलीनी गाँव रेनिय दोहो एना, नेंय वरि सात गोटंग भूतकूय उडुंग तेड दोहो एनु, 3 अवुर हेरोदेस रेनिय सरगदूत खुजा इंगत कू योअन्ना, अवुर सूसन्नाह, अवुरोह कोड़ी कुहो कू दोहो एना। नेकू अपन धन सम्पति तेहो ईसु अवुर चेला कुतय सहेता कू ओवा कू दोहो एनु।
बिहन मेमेराय राः उदाहरड़ (मत्ती 13:1-17; मरकुस 4:1-12)
4 जब ईसु राः टेबो: अँजोम लगड सहर- सहर वरि अखीर होड़कू मेजेना, हेंकू समझो: लगड उदाहरड़ीय कहनी तेडा, 5 “मियाँ होड़ किसान बिहन मेरिय उडुंग एना। मेरे तोलोग अवुरा: बिहन होर अड़ी ते लोजोर एना, अवुर होड़कू हेना कू धंगड़ा तेडा, अवुर अगस तेनकू तितिज कुहो कू डोंगो जोम जोपेडू 6 अवुरा: बिहन चटाड़ीवन ओत रे लोजोर एना, अवुर ओमोन एना, तहाँ हाल मेने ञँमगड ते गोजयानू। 7 अवुरा: बिहन जनोम भेंजुड़ ते लोजोर एना, अवुर मियाँ मियाँ ते हरा एना, तहाँ जनोम दाबो गोत्तेडू। 8 अवुराः बिहन बड़ियाँ ओत रे लोजोर एना, अवुर ओमोन एना, तहाँ साव गुना पयदा एना।” नआँ घयते कहनी केते बडे तेय कहनी तेडा, “जे अँजोम गिसन यडिया हेंय अँजोमेयू।”
उदाहरड़ राः मकसद
9 हेना वरि चेला कुतय ईसु कू होंबोर तेडा, “न उदाहरड़ रा: मतलोब ची हवे?” 10 तहाँ ईसु लाय वडकुआ, “अपे भगवान राः राज रा: भेद समझो: लगाडींञ लाय वड पेआ, एटा: होड़कू उदाहरड़ घयतेंञ लाय वकु तना, हेना ते हेंकू अँजोमेरे हो एरो कू समझो तेडा, अवुर ञेंले रेहो एरो कू चीनहो तेडा।”
बिहन मेमेराय रा: उदाहरड़ रा: मतलोब (मत्ती 13:18-23; मरकुस 4:13-20)
11 “उदाहरड़ राः मतलोब नआँ घयगीआ; बिहन भगवान रा: टेबो: हवे। 12 होर अड़ी रे लोजोर एन हेना बिहन नेकू हवे, नेकू अँजोम तुदो कू अँजोमेआँ। लेकिन सयतान नेकू अँजोमेः हेना रे विसवास केते अलो कू उबारू: लगड नेकू रा: मन वरि एर लिड़ींञ गोत्ते कुआयू। 13 चटाड़ीं ओत रे लोजोर एन हेना बिहन नेकू हवें, अँजोम केते खुसी ते अपनोत दोकू अपनो वेआ। लेकिन हेंकू रा: जीवित कू रे मेने मड़ोआ, कुछ दिन लगड कू बिसवास तआ, तहाँ हेंकू कनारा परेसानी मेजु: रे बिसवास तकू टोविज जोमा। 14 अवुर जनोवना रे लोजोर एन हेना बिहन नेकू हवे, अँजोम केते बिसवास तुदो कू बिसवासेआ। लेकिन हेंकू कुछ दिन राः बाद रे चिन्ता, धन दवलत, अवुर जिनगी रे मवोज- मस्ती रेकू फसो जोमा, अवुर बिसवास तकू टोविज जोमा। 15 अवुर बढ़ियाँ ओत रे लोजोर एन हेना बिहन नेकू हवे, अँजोम केते बढ़ियाँ ते मन रेकू जोगो तआ, अवुर अँजोम तआ हेना रे सुसताह तेकू पोठुआ।”
दिया रा: उदाहरड़ (मत्ती 4:21-25)
16 “कनय हो दिया सलगो केते परकोम पेंदी रे मेने कू दोहोया, अवुर भड़ाँ बरतन ते मेने कू हरूबेआ, लेकिन भितर बहेर बोल उडुंगु: कू मरसल वा लगड, सलगो केते देवल रेकू दोहो तआ। 17 भगवान राः राज रा: बारे ते निहो उकू केना, हेना टेबो: जे घयते दिया सलगो केते मेने कू उकुतआ, हेन घयते हेंय रा: राज रा: बारे ते सींड़ देखारूआ। 18 हेना ते सँवचेती तेपे दोहोनू। किदो अपे का:तेपे अँजोम यडा? जेय थरे इदाना हेंय अवुर ओवाया, अवुर जेय थरे कोवाआ, इंञ पपाड़ी यना मेनाआँ हेना हो हेंय अँगेर अविया।”
ईसु बोहोत अवुर इंगत (मत्ती 12:46-50; मरकुस 3:31-35)
19 एक दिन राः दिन रे ईसु इंगत अवुर बोहोत एडकू हेंय सुदा जुमो: कू मेजेना। लेकिन होड़कू राः चलते ते हेंय सुदा मेने कू जुमो सको गना। 20 हेन तोलोग कनय ईसु थरेय कहनी तेडा, “इंगम अवुर बोहोम एडकू अम सुदा जुमो: लगड बहेर हँडे कू चडाँ केना।” 21 हेना वरि ईसु जबाब तेडा, “भगवान राः टेबोः अँजोम केते मनोवे हेंकू, इंगञ अवुर बोहोंञ एडकू हवे।”
घरा घटाय थबदो तेडा (मत्ती 8:23-27; मरकुस 4:35-41)
22 एक दिन राः दिन रे ईसु चेला कू थरेय कहनी तेडा, “अबू दू बडेः दाह वरि मेना पार बू चलोऊ।” हेना वरि हेंकू डोंगा रे रकब केनते कू चलो एना। 23 अवुर हेंकू चलो: घनी ईसु गितीज यनु, अवुर हेंनाय गितीज घनी अखीर दाः हिलकोस मेजेना, तहाँ डोंगा तकू रे दाः पेरेज बंचो तना अवुर हेंकू बड़ा मुसकील रेकू पड़ो यनु। 24 हेना वरि चेला कुताय हाक जगो केडीय तेकू कहनी तेडा, “परभु! परभु! अबु डूबोः तनाबू।” तहाँ ईसु रिम केनते होय अवुर दाः हिलकोसु: हेना, दाईय दबेट तेडा, हेंडे थबदो एना। 25 तहाँ ईसु हेंकू थरेय कहनी तेडा, “अपे ची लगड मेने पे बिसवास यडा?” तहाँ हेंकू बोरो यनकू अवुर अकबको यनते अनाकू अनाकू ते कू कहनी ओड़ेंग दोहो एनु, “नेय इया हवे? दाः हिलकोसुः हेना घलीय कहनीवा रेदो, नेय राः टेबोः अँजोमेआँ ”
भूत सबताडिय हेंनिय चीकन तेडा (मत्ती 8:28-34; मरकुस 5:1-20)
26 फेर हेंकू मेना पार गलील दाह बंदेर गिरासेनी देस रेकू तया: तेडा। 27 ईसु अवुर चेला कुतय डोंगा वरि कू अगड़ू एना, हेन तोलोग हेना सहर रेनिय भूत कू लगो तनय हेंय होड़, हेंकू सुदाय जुमो एना। हेंय कनय ओड़ा: रे मेनेय दोहोन दोहो एनु, अवुर बेगर कपड़ा लता तेय होयोर बेड़ा: दोहो एनु, हेंय अखीर दिन वरि मरघटी तेय दोहोन दोहो एनु। 28 हेंय ईसु ञेंल तेड सी अखीरिय अहीजू अवुर हेंय मड़ंग रे ओतेत रे लोजोर केनते बडे आवाज तेय कहनी तेडा। “ए सींड़ वरि बडेअय भगवान होपोन ईसु! इंञा: अम थरे ची काम इदाना? इंञ अम थरेंञ गोड़े पय्याँ तना अलोम सतापिञू ।” 29 कहेकि ईसु पहिल ते हेंकू भूत कू थरे हेंय होड़ वरि उडंगु: लगाडीय कहनी तेडा। भूत कू हेंय होड़ बित्ताहीते कू कब्जा गोत्तेयू अवुर होड़कू तीत कटत सिकरी तेकू तोलता डिया, हेना हो भूत कुरा: सक्ति ते, सिकरी घलीय टोवीज केते जंगल हनतेय ञींरजोम दोहो एनु। 30 हेना वरि ईसु होंबोर तेडिया, “अम इया हवे,” हेना वरि हेंय कहनी तेडा, “दरहा ” कहेकि हेंय थरे अखीर भूत कू दोहो एना। 31 हेंकू भूत कू अथाह डोडहा रे अलो कुलकू लगड ईसु थरे कू गोड़े पय्या: दोहो एनु। 32 हेन बंदे रे मियाँ लेहाँड़ सुकरी कू बुरु रेकू चरो: दोहो एनु। हेंकू भूत कू सुकरी कू थरे ईकम सेनवा कू लगड ईसु थरे कू गोड़े पय्या एना। हेना वरि ईसु हेंकू थरे सेनु: लगड इकावड कुआ। 33 हेना वरि हेंकू भूत कू हेंय होड़ वरि उड़ूंग केनते, हेंकू सुकरी कू थरे कू झपटो एना। हेना वरि हेंकू सींड़ लेहाँड़ रेनकू हुंको सेनकेनते करखा वरि बडे: दाह रेकू डूबो गोजयानू। 34 हेना वरि सुकरी चरवाह कू हेना ञेंलकेते, सहर अवुर आस पास रा: गाँव हनते कू ञींरेना, अवुर हेंकू हेना घटना कू मिरिज तेडा । 35 तहाँ जो कुछ होया तना हेना ञेंञेल लगड कू मेजेना, अवुर ईसु थरे मेजकेन ते भूत कू लगो तन हेंय होड़ू चीकन यनुयू। अवुर ईसु कटा बंदे रे बढ़ियाँ ते कपड़ा तूसींञ केते कले कल तेय दुड़ूब तना, ञेंलके ते सींड़ होड़कू बोरो यनु। 36 भूत कू लगो तन हेंय ञेंल चीकन तेडिय हेकू, का: तेय चीकन एना हेना, ञेंञेल कुकू लाय वडा। 37 गिरासेनी जघा रे दोहोन हेंकू सींड़ कू अकू वरि चलो: लगड ईसु थरे कू गोड़े पय्याँ एना, कहेकि हेंकू अखीर कू बोरो यनु। हेना वरि ईसु हेना जघा वरि डोंगा ते रकब केनतेय मिड़ा एना। 38 भूत कू उडुंग तन हेंय होड़ू ईसु थरे गोड़े पय्या केनतेय कहनी तेडा, “इंञ हो अम तयोम ते सेनु: लगड इकावांञ मी सी।” हेना वरि ईसु जबाव वडिया, 39 “ओड़ा: रे सेनको: ते भगवान अमा: जीवन रे तिमीन बडेआ कामीय काम केडा, हेना सींड़ कुम लाय वकू ” मेनते कहनी केतेय बिदा तेडिया। तहाँ हेंय सेनकेन ते सींड़ सहर रे, ईसु इंञ लगड तिमीन बडे बडेआ कामीय काम केडा, मेनाँअय परचार तेडा।
याईर कोड़ी होपोन ईसु जियो तेडिया, अवुर रोगी कोड़ीहोनीय चीकन तेडा (मत्ती 9:18-26; मरकुस 5:21-43)
40 जब ईसु मिड़ा: एन तहाँ होड़कू हेंय सुदा खुसी ते कू जूमो एना, कहेकि सींड़ कू हेंय कू तँगी दोहो एनु। 41 तहाँ हेन तोलोग याईर मेनते कू कहनी वडिय हेनी गिरजा ओड़ाः रेनिय मुखिया मेजेना, अवुर हेंय ईसु थरे गोड़िय गिरो केनतेय कहनी तेडा, “दू सी इंञ ओड़ा: मी सेनुऊ,” 42 कहेकि बारह बारिस रेनिय मिनये टंग कोड़ी होपोन तू दोहो एना। हेंय अब- तबिय गोज बंचो तना। तहाँ ईसु चलो: तोलोग होड़कू लोजोर तील बंचोवियू। 43 बारह बारिस अंगम महेन वरि रोग रेय दोहोएना। हेंय कोड़ी होन अनेज रा: सींड़ धन सम्पति बयेध कू थरेय खरचा गोत्तेडू। हेंडे रेहो कनय बयेध मेने कू चीकन गडिया, 44 हेंय तयोम हन वरि सेन केनते ईसु रा: कपड़ा छोरिय छुवों तेडा। तहाँ तुरेत्ते हेंय रा: महेन वरि रोग बन्द यनु। 45 हेन तोलोग ईसु होंबोर तेडायू, “इंञ इया छुवों तेडिञा,?” हेना वरि सींड़ होड़कू नहकार तेडा, तहाँ पतरस अवुर हेंय गतित कू कहनी तेडा, “ए गुरू, अम दो भीड़ रेनकू ठेला यडमिआँ अवुर कू लोजोर तील बंचो यडमिआँ।” 46 लेकिन ईसु कहनी तेडा, “कनय दोय छुवों केडिञा, इंञ पपाड़ी यनाञूँ, इंञ वरि सकती उडुंग केना।” 47 तहाँ कोड़ीहोन पपाड़ीयन किदो इंञ एरोंञ उकू एना मेनते, हेना वरि थर थरो मेजकेनते। ईसु कटा बन्दे रे गोड़िय गिरो एना। ची करने तेय छुवों तेडिय हेना, अवुर का:ते तुरेत्तेय चीकन एन हेना, सींड़ कू मड़ंग रेय लाय तेडा। 48 ईसु हेंय थरेय कहनी तेडा, “बेटी, अमा: बिसवास रा: चलते तेम चीकन यना हँसी खुसी तेम चलोऊ।” 49 हेंय कनाहनिय दोहो एनु, हेन तोलोग गिरजा ओड़ाः रेनिय मुखिया ओड़ा: वरि कनय मेजकेनते लाय तेडा, “अम कोड़ी होपोन कोवाया, गुरू अलोम परेसानियू।” 50 हेना वरि ईसु नआँ अँजोम केतेय कहनी वडिया, “अलोम बोरू; बिसवासेरे दोम हेंय बंचोअयू।” 51 जब ईसु ओड़ाईय तयाः तेड दो अनेज सुदा, पतरस, उहाना, अकूब, अवुर कोड़ी चोंडीज इंगत अपत नेकू छोड़ कनय मेने ओड़ा: भीतारिय एनेम बोलो गडा। 52 हेन तोलोग ईसु ईयम कू थरेय कहनी तेडा, “अलो पे ईयामू; नेय बेगारिय गोजा नेय गितीज तनायू।” 53 नआँ टेबोः अँजोम केते हेंकू लंदा वडिया,, कहेकि गोजतन हेना कू पपाड़ी दोहो एनु। 54 हेना वरि हेंय कोड़ी चोंडीज ती सब केतेय कहनी तेडा, “ए बेटी, रिमु: मी!” 55 तहाँ हेंय रा: जीव मिड़ा: मेज यनु, अवुर तुरेत्तेय रिम दुड़ूब यनु। हेना वरि ईसु कहनी वडकू, “नेय जोमे लगड कनारा पे ओवायू।” 56 तहाँ हेंय ईगत- अपत अचरज यनु, अवुर ईसु हेंकीञींय चेतवन तेड कींञा, “नआँ कनय थरे अलोबा लाय बेड़ायू।”
ईसु बारह झन पेरेरित कू अनेज राः खभेर लाय लगाडीय कुलतेड कुआ (मत्ती 10:5-15; मरकुस 6:7-13)
1 फेर ईसु बारह झन पेरेरित कू राःकेड कुते भूत कू उडुंग लगड अवुर रोगिया कू चीकन लगड सक्ति अवुर हाँकिय ओवड कू। 2 अवुर हेंकू भगवान अपन होड़कू थरे राजे: हेना टेबोः परचार अवुर रोगिया कू चीकन लगाडिय कुल तेडकुआ। 3 हेना वरि ईसु हेंकू थरेय कहनी तेडा, “होर लगड कनर अलो पे सबजोमू न दो लाठी, झोला, रोटी, पेयसा, अवुर बबाटंग अंगा। 4 जेय ओड़ा: रेपे उतरोआ, हेना सहर वरि अनायीन चलो: मेन दिन हेनी ओड़ा: रेपे दोहोनु, अवुर हेनेन वरि पे बिदाऊ। 5 अवुर हेना गाँव रे कनय होड़ मेने कू आदर इजेत पेरे दो, चलो: तोलोग नेकू थरे गोवाही होया: लगड कटा पेराः धूड़ी पे कुटा अटू।” 6 हेना वरि हेंकू आस- पास ता: गाँव- गाँव ते होयोर बेड़ाः तिंग ते बढ़ियाँ: खभेर कू लाय तेडा, अवुर रोगिया कुकू चीकन तेडा।
हेरोदेस धको एना (मत्ती 14:1-12; मरकुस 6:14-29)
7 गलील जिला रेनिय हेरोदेस राजा ईसु काम तड हेना अँजोम केतेय अक बको यनु। कहेकि कुछ होड़कू कहनी तेडा, उहाना बतिसमाय एमय गोजतन वरिय जियो रिमकेना। 8 अवुराःकू कहनी तेडा, “नेय एलिय्याह हवे” अवुराःकू कहनीयू, “पहिल पहिला: कू भगवान रा: टेबो: लाय हेंकू मेंडे रे कनय जियो रिमकेना।” 9 तहाँ हेरोदेस कहनी तेडा, “उहाना भो: दोंञ एर पुजा तेडा, नेय इया हवे, हेंय रा: बारे तेंञ अँजोम यडा?” अवुर हेंय ईसु ञेंल लगाडीय तरसो: दोहो एनु।
पाँच हजार होड़कुय खियो तेडा (मत्ती 14:13-21; मरकुस 6:30-44; उहाना 6:1-14)
10 हेना वरि बारह झन पेरेरित कू मिड़ा: केनते हेंकू जे जे कू करो तडा, हेना सींड़ ईसु कू लाय वडू, तहाँ ईसु हेंकू अनेज सुदाय बतसयदा गाँव हनतेय गो:तेड कुआ। 11 लेकिन होड़कू पपाड़ीयन ते हेंय कू ओतोंग तेडिया, अवुर हेंय एनेम सेनवड कुअय। ईसु भगवान राः राज राः बारे तेय चेडकू दोहो एनु, अवुर रोगिया कुय चीकन तेडा। 12 हेना वरि अयूबु: तोलोग बारहो झन ईसु थरे सेनकेन तेकू कहनी तेडा, “जवार केनकू होड़कुम कुल गोत्तेकू चरो गतर रा: गाँव रे सेनको:ते दोहोन लगड अवुर जोमे लगड कनर कनारा कू लहो जोमा, कहेकि अबु सुनहर जघा रेबुआ।” 13 तहाँ ईसु हेंकू थरेय कहनी तेडा, “नेकू दो अनापे खियो कू, “हेना वरि चेला कू कहनी तेडा, “अले थरे पाँच गोटंग रोटी अवुर बाटंग हकू कींञ छोड़ अवुर कनर कोवाआ, नामेन होड़कू खियो लगड ले तिला अगुय किदो?” 14 लगभग नेकू पाँच हजार मेन मोट कोड़ाकू दोहो एना। तहाँ ईसु चेला कुतय थरेय कहनी तेडा, “नेकू पचास- पचास रा: पन्ति तेपे एर दुड़ूब कू।” 15 हेंकू सींड़ कू हेनेन घयते कू एर दुड़ूब तेड कुआ। 16 हेना वरि हेंय रोटी अवुर हकू कींञ अलगो केते सरग हन तको केतेय धन्यावाद वडा, अवुर टुटका केते चेला कुय ओवाडा, अवुर हेंकू दुड़ूब तन कुकू परोस वडा। 17 तहाँ होड़कू जोम केनते कू बीयानू, अवुर चेला कू बारह छनवा कू हटींग अटा तेडा।
पतरस ईसु मसीह मेनतेय अपनो तेडिया (मत्ती 16:13-19; मरकुस 8:27-29)
18 एक दिन ईसु मियाँ होड़ ते सुनहर जघा रेय बिनती: दोहो एनु। अवुर चेला कू हेंय सुदा कू दोहो एना, तहाँ ईसु हेंकू थरेय होंबोर तेडा, “होड़कू इंञ इया मेनते कू अड़ींग वंञ तना?” 19 हेना वरि हेंकू जबाब तेडा, “उहाना बतिसमाय एमायू, अवुर कोई कोई एलिय्याह मेनते, अवुरा:कू कहनिय, पहिला:कू भगवान राः टेबोः लाय हेंकू मेंडे रे कनय जियो रिम केना।” 20 हेना वरि हेंय हेंन कुय होंबोर तेडा, “अपे इया पे अड़ींग वंञ तना?” तहाँ पतरस लाय तेडा, “भगवान कुलकेड मिआँ हेनी मसीहा हवे।” 21 हेना वरि हेंय चेतवन केडकू तेय कहनी वडकू “नआँ कनय थरे अलो पे लाय बेड़ायू।”
ईसु अनेज रा: मिरतू रा: बिसेय तेय लाय तेडा (मत्ती 16:21-28; मरकुस 8:30-9:1)
22 ईसु कहनी तेडा, “इंञ होड़ होपोन लगड जरूरी इदाना। अखीर ते दु:खींञ रिमा। अवुर अघुवा कू अवुर बड बडे याजक कू अवुर नियम चेचेड कू इंञ कू नहकारिञाँ। अवुर कू ञेंड गोजेञाँ, तहाँ तीसरा दिन रेंञ जियो रिमुआँ।”
ईसु तयोम ते सेने राः मतलोब (मत्ती 16:21-28; मरकुस 8:30-9:1) 23 हेना वरि फेर ईसु सींड़ होड़कू थरेय कहनी
तेडा, “अगर कनय होड़ इंञ तयोम ते सेन गिसन पे रेदो, रोज दिन अनापेराः कुरूस रिमकेते इंञ तयोम तेपे सेने। 24 कहेकि कनय होड़ अनेज राः जिवीतीय मोंहवा रेदो, हेंय इंञ सुदा दोहोन हेना जिनगीय गँवोंआ। अवुर कनय इंञ लगड जिवीतीय एमा, हेंय भगवान सुदा हमेसा दोहोना हेना जिनगीय ञाँमा। 25 अगर कनय होड़ सींड़ चीज नआँ धरती रेय ञाँमे। अवुर अनेज रा: जीवीय गँवों रेदो ची फयदय ञाँमा? 26 कनय हो इंञ अवुर इंञा: टेबोईय गेव्वा रेदो, इंञ होड़ होपोन हो इनीञाँ: सोभा अवुर अपुंञ राः सोभा ते अवुर पवितर सरगदूत कुराः सोभा ते मेजुः तोलोग हेंकू सुदांञ गेवुआ। 27 इंञ अपे थरे सही मेतेंञ कहनी यडा, नआँ रे चड़ाँ केनकू मेंडे कुछ होड़कू, एयसा इदान कुआ, भगवान राः राज अनायीन कू ञेंले मेन दिन एरो कू गोजेना।”
ईसु रा: रुप बदलो एना (मत्ती 17:1-8; मरकुस 9:2-8)
28 करीब- करीब आठ दिन राः बाद रे ईसु, पतरस, अकूब अवुर उहाना नेकू सुदा मियाँ ते बिनती: लगड बुरू रेय सेनेना। 29 तहाँ ईसु बिनती: तोलोग चेहरात रा: रूप बदलो एना, अवुर हेंय राः कपड़ा पुंडी केनते लवको: दोहो एनु। 30 अचाकते मूसा अवुर एलिय्याह नेकींञ बाहोड़ कोड़ाकींञ ईसु सुदाकींञ टेबोः दोहो एनु। 31 नेकींञ बनाहोड़ कींञ चमको: दोहो एनु। हेन तोलोग ईसु एरूसेलेम रे का: तेय गोजुआ, हेना रा: बारे ते ईसु थरे कींञ चरचय दोहो एनु। 32 तहाँ पतरस एडकू पेनेय होड़ अखीर गितीज गिसन कू दोहो एनु, हेना वरि कू गितीज यनु। जगो एन तहाँ ईसु चमको: घनी, मूसा अवुर एलिय्याह हेंय सुदा चड़ाँ तन तोलोग कू ञेंलवड किञाँ। 33 तहाँ हेंय वरि मूसा अवुर एलिय्याह चलो: मेनते कींञ संबह तन तोलोग पतरस ईसु थरेय कहनी तेडा, “ए मालिक, अले नआँ रे दोहोन लगड बढ़ियाँ गिआ। अले नआँ रे पेय टंग तम्बू ले बनोआँ, मियाँ टंग अम लगड, मियाँ टंग मूसा लगड मियाँ टंग एलिय्याह लगड, ची मेनतेय कहनी यडा हेना मेनेय पपाड़ी दोहो एनु। 34 नेन या:तेय कहनीय तोलोग लिंबीर ते ऊकू गोत्तेड कू, तहाँ लिंबीर तिलतेड कुसी हेंकू बोरो यनकू। 35 हेना वरि हेन लिंबीर वरि आवाज मेजेना, “नेय इंञाअय कोड़ा होपोन हवे। इंञ चुनो केडीय हेनी हवे, नेय राः पे अँजोमू।” 36 हेना आवाज बंद एन सी ईसु हेना रे मियाँहोड़ तेय बंचो यनु। तहाँ चेला कू जपनो यनु, अवुर हेना रे जो कुछ कू ञेंलतड हेना, हेंय रा: टेबो: अखीर दिन अँगम कनय थरे मेने कू लाय बेड़ा गडा।
भूत लगो तनय चोंडीजिय चीकन तेडा (मत्ती 17:14-18; मरकुस 9:14-27)
37 हेना ञींदावत हेंकू बुरू वरि अगड़ू एन सी अखीर होड़कू ईसु सुदा कू जुमो एना। 38 अवुर हेन भीड़ वरि मियाँहोड़ बडे बडे तेय कहनी तेडा, “ए गुरू अम थरे गोड़ींञ गिरो: तना, कोड़ा होपोनींञ थरेम दया: सी, इंञ कोड़ा होपोन मिनये टंग गिआ यू। 39 हेंय थरे मियाँ टंग भूत अचाकते तेय झपटो जोमा, हेनाते हेंय अहीज बेड़ाअयू अवुर अखीरिय फेंड़गी बेड़ाआ। अहात ते गजा घलि उडुंग जोमा अवुर बड़ी मुस्किल ते नस- नस लुरू पुटू जोम रे हेंडेय अड़ागिया। 40 भूत कू उडुंग लगड अमा: कू चेला कू थरेंञ गोड़े पय्याँ एना, लेकिन हेंकू मेने कू उडुंग सको गना।” 41 हेना वरि ईसु जबाब तेडा, “ए, बेलूर अवुर अन बिसवास पीढ़ी रेनकू होड़कू इंञ तिमीन दिन अँगम अपे सुदांञ दोहोना, अवुर अपे रअंञ सहोआ? कोड़ा होपोन मी नआँ रेम अगेयू।” 42 तहाँ हेंय मेनेजु: घनी भूत झपटो केनते ओतेत रे, पटको केडिय ते अखीरिय मुरकुटो तेडिय। तहाँ ईसु भूतीय दबेट तेडा, अवुर हेंय चोंडीज चीकन केडिय ते अपातीय जिमा वडा। 43 तहाँ भगवान राः सक्ति ञेंलकेते सींड़ होड़कू अकबको यनु।
अनेज रा: मिरतू रा: बिसेय ते लाय तेडा (मत्ती 17:22-23; मरकुस 9:30-32)
44 ईसु राः चमत्कार ञेंलकेते सींड़ होड़कू अचरज यन तोलोग, ईसु अनेज रेनकू चेला कू थरेय कहनी तेडा, “इंञा: टेबोः पे अँजोमू अवुर कहनी यड हेना ऊहयर तपे। इंञ होड़ कोड़ा होपोन दुसमन कुराआ ती रेकू जिमाञाँ।” 45 ईसु कहनिय दोहो एनु हेना चेला कू मेने कू जेरे दोहो एनु। नआँ टेबोः रा: मतलोब हेंकू लगड उकू तना ते मेने कू जेर सको: दोहो एनु।अवुर हेंकू नआँ बिसेय ते होंबोरिय लगड बोर दोहो एनकू।
भगवान राः राज रे सींड़कू वरि बडे इया हवे? (मत्ती 18:1-5; मरकुस 9:33-37)
46 हेना वरि अबु मेंडे इया बडेआ? मेनते चेला कू अनाकू होंबोर ओड़ेंग दोहो एनु। 47 ईसु हेंकू राः मन राः टेबोईय पपाड़ीयानू। हेंय मियाँहोड़ चोंडीज अक्केड ते अनेज बंदेर रेय चड़ाँ तेडिया। 48 हेना वरि हेंकू थरेय कहनी तेडा, “नेय चोंडीज इंञ ञुँमू ते कनय अपनोवीय रेदो, हेंय ईंञींय अपनोआँ अवुर कनय हो ईंञीय अपनो रेदो, हेंय कुलके डीञाय अपुञींय अपनोआँ। अवुर अपे मेंडे रे जे होडींञ गिआ, हेनी सींड़ कू वरिय बडे गिआ।”
मेनेय बिरोध हेनी, अबु गतर रेया (मरकुस 9:38-40)
49 हेना वरि उहाना चेला तय ईसु थरेय कहनी तेडा, “ए गुरु, अले मियाँ होड़ू अम ञुँमू ते भूत कू उडुंग तोलोग ले ञेंवाडिया। हेंय अबु खुड़हा रेनिय न लगे हेनातेले ईसका सोवाडिया।” 50 तहाँ ईसु कहनी तेडा, “हेंय अलोपे ईसका वयू, अपे मेनेय बिरोध हेनी अबु गतर रेया।”
सामरिया रेनकू ईसु कू बिरोघ तेडा
51 तहाँ ईसु सरग हनते रिम गोगेय रा: दिन पुरो: दोहो एनु, हेंय एरूसेलेम सेनु: लगाडिय तय तेडा। 52 हेना वरि ईसु अनेज लगड सामरिया गाँव रे, जघा तयार हतड़ लगड खभेर लाय कुय कुल मड़ंग तेडा। 53 तहाँ एरूसेलेम हनते चलो: तना मेनाआँ, हेना गाँव रेनकू पपाड़ियन ते, हेंय अकू गाँव रे मेने कू इकम सेनगाडिया। 54 नआँ ञेंलके ते चेला कू मेंडे रे अकूब अवुर उहाना कहनी तेडा, “ए परभु, अम चहो: तन रेदो अले कहनी यडा, अगस वरि सेंगेल लोजोर को:ते हेंकू होड़कू नास गोते कू।” 55 लेकिन ईसु तेरज केडकू तेय दबेट तेडकुआ, “अपे मेने पे पपाड़ी तना, अपे थरे करा घिया: आत्मा इदाना। इंञ होड़ होपोन होड़कू राः जीव नासे लगड बेगारींञ मेजा, हेंकू रा: जीव बंचो लगाडींञ मेजकेना।” 56 तहाँ हेंकू हेना वरि एटा: गाँव हनते कू चलो एना।
ईसु रेनिय चेला बनोअय होड़ (मत्ती 8:19-22)
57 ईसु अवुर चेला कुतय चलो: दोहो एनु, हेन तोलोग मियाँ होड़ मेज केन ते ईसु थरेय कहनी तेडा। “जहाँ- जहाँम सेनुआँ इंञ हो अम तयोम तेंञ सेनेआँ।” 58 तहाँ ईसु हेंय थरेय कहनी तेडा, “बुवा: लगड लात अवुर अगस तेनकू तितिज कू लगड तुका दोहोना, लेकिन होड़ होपोन लगड गितीज मेनहो जघा कोवाआ।” 59 अवुर हेंय एटागी थरेय कहनी तेडा, “इंञ तयोम तेम सेने।” तहाँ हेंय कहनी तेडा, “ए परभु, पहिल ते अपुंञ हर लगड इकम गोडवंञ मी।” 60 लेकिन हेंय फेरिय कहनी वडियू, “आत्मिक रिती ते गोज केन हेंकू अकु रा: लास मी एनेम हरवा कू अमा: करतब हवे, सेनको:ते भगवान रा: राज रा: बारे तेम परचारे।” 61 तहाँ अवुर मियाँहोड़ कहनी तेडा, “ए परभु, इंञ हो अम तयोम तेंञ सेनेआँ, लेकिन पहील ते ओड़ा: हनतेम इकम गोडवाञू, ओड़ा: रेनकू इंञ कू बिदा गोत्तेंञ लगाडू।” 62 हेना वरि ईसु हेंय थरेय कहनी तेडा, “कनय होड़ नंगर मुठिया सबके ते, तयोम हनिय तको रेदो भगवान राः राज लयीक कोवाया।”
ईसु सत्तर झन चेला कुय कुलतेडा
1 नआँ टेबो: रा: बाद रे परभु सत्तर झन अवुर चेला कू चुनो केडकू ते भगवान राः कामीय जिमा वडकुआ। अवुर जे- जे सहर अवुर जघा अनेज सेनु: लगाडिय संबह तना हेना हेना ते बबड होड़ अनेज वरि मड़ंग तेय कुल मड़ंग तेड कुआ। 2 हेना वरि ईसु हेंकू थरेय कहनी तेडा, “बिली केना खेत दो अखीर इदाना, बनीयँर कू ठुवा गिआ, हेनाते खेत मुवँर थरे पे बिनतीऊ, किदो हेंय अनेज रा: खेत ईर लगड बनीयँर कुय कुल गोत्ते। 3 अँजोम पे, जू इंञ अपे भेड़ी कू घयते बिगवा कू मँझर रेंञ कुल यड पेआ। 4 हेना ते पेयसा, थयली अवुर झोला, अवुर पनही अलो पे सबजोमू अवुर चलो: तोलोग होर ते कनय अलो पे जोहर वा। 5 जे ओड़ा: रे मड़ंग तेपे उतरोआ, हेना रे पहिल तेपे कहनीयू, ‘न ओड़ा: रे सांति दोहोनु।’ 6 हेना रे कनय सांति ञँम लायीक इदान रेदो, अपे रा: सांति हेंय होय ञँमेआँ, नहींतर अपे थरे मिड़ा: मेजुआ। 7 जे ओड़ाः रेपे उतरोआ हेनेन ओड़ा: रेपे दोहोनु, ओड़ा: ओड़ा: ते अलो पे होयोर बेड़ाऊ। कनारा हो जोमुः चरोः लगड कू ओवापेआ, हे नपे जोमू अलो पे बगिवा तकू। कहेकि बनीयँर दो अपन बनी भर रा: भगी दोहोना। 8 “कनर सहर रेपे सेनुऊ, अवुर हेना रेनकू होड़कू अपन ओड़ा: रेकू राःपे रेदो, जेना जोमुः लगड ओवापे हें नपे जोमू। 9 अवुर हेना रेनकू रोगिया कुपे चीकानू, अवुर हेंकू थरे पे कहनीयू, ‘ भगवान राः राज अपे बंदे रे मेजियाना।’ 10 जे सहर रेपे सेनुआँ हेना गाँव रे कनय होड़ भगवान राः खभेर मेने कू अपनोवे रेदो, हेंकू रा: गली ते सेनको: तेपे कहनीयू, 11 अपे गाँव राः धुड़ी अले कटा लेरे जपाः तन हेना गोवाही होयाः लगड ले कुटा अटू तना, नआँ पपाड़ीको: पे भगवान राः राज अपे बंदे रे मेजियाना। 12 इंञ अपे थरेंञ सही मेतेंञ कहनी यडा, हेना चेका हेना सहर रेनकू होड़कू भगवान सदोम रेनकू होड़कू दंडीय ओवड कुआ, हेना वरि हो बगरा ते हेना सहर रेनकुय ओवाआ।
ईसु चेतोनिय ओवा कुआ (मत्ती 11:20-24)
13 यहूदी होड़कू राः देस “खुराजीन अवुर बयतसदा रेनकू होड़कू अपे अखीर दु:ख रेपे पड़ोआ। अपे थरे सक्ति राः जो कामींञ करो तेडा। हेना एटाः जात कुराः सुर अवुर सयदा रेंञ करो तेड रेदो, हेना रेनकू सुतरी बोरा घिया: कपड़ा, ते उयू केनते अवुर तोरोज ते भुरा केनते हेंकू पाप वरि मन कू मिड़ा: तेड मेनू। 14 नियोंवे देवह सुर अवुर सयदा रेनकू वरि हो अपे अखीर दंड ञँमुआँ। 15 ए कफरनहूम रेनकू, अपे पसींद यडा, सरग राज अँगम ले सेनुआँ मेनते? नरक रे अपे दो पेंदी हनतेय लोजोर पेआ। 16 “कनय अपे रआय अँजोमा हेंय, इंञा: टेबोईय अँजोम यडा; अवुर कनय अपेय मेरंगवा: हेंय, इंञीय मेरंगवाना; अवुर कनय इंञीय मेरंगवा: हेंय, इंञीय कुल केड हेंयीय मेरंगवा तना।”
सत्तर झन चेला कू मिड़ा: एना
17 सत्तर झन चेला कू हँसि खुसी ते मिड़ा: मेजकेनते कू कहनी तेडा, “ए परभु, अम ञुँमू ले ञुँमू तेड सी भूतकू अले राः टेबोः कू मनो तेडा।” 18 हेना वरि ईसु हेंकू थरेय कहनी तेडा, “सयतान हदुड़वा तोलोग बिजली चमको: घयते, सरग वरि लोजोरू: तोलोगींञ ञेंलेय दोहो एनु। 19 अँजोम पे, इंञ अपे बींञ कू अवुर कीदींञ कू, तीका कू लगड अवुर सयतान रा: सक्ति खतामे लगड हो अधिकारींञ ओवड पेआ। कना रहो अपे एरो नुकसान तेडपेआ। 20 हेंडे रेहो भूत कू अपे रा: टेबो:कू मनो यड मेना: रे अलो पे खुसीऊ, लेकिन नआँ टेबो: तेपे खुसीऊ किदो अपे ञुँमू सरग रे ओल केना।”
ईसु खुसी एना (मत्ती 11:25-27; 13:16-17)
21 हेनेन तोलोग ईसु पवितर आत्मा ते अखीर खुसी केनतेय कहनी तेडा, “ए अपा, अम सरग अवुर धरती रेनिय मुवाँरू, इंञ अम धन्यावादिंञ ओवामी तना, किदो अम न टेबो: बुधमान कू अवुर चलहाँक होड़कू थरे नआँ फोर ते मेनेम लाय गडा, हूँ लेकिन चोंडीज कू थरेम लाय तेडा, ए अपा, अम नेना बढ़ियाँ वडमीआ।” 22 हेना वरि ईसु नआँ घयतेय कहनी तेडा, “इंञ अपुंञ सींड़ ची जीय जिमा वडिञाँ। होपोन छोड़ कनय मेने कू पपाड़ी तना अपत इया हवे, अवुर अपत छोड़ कनय मेने कू पपाड़ी तना होपोन तू इया हवे, होपोन तू अपत तीब लगाडिय चुनोकुआ, हेनेन कू भर अपत कू पपाड़ीआ।” 23 हेना वरि ईसु फेर चेला कू थरे कले कल तेय कहनी तेडा, “अपे भगवान आसीसिय ओवड पेआ ते निहो इंञ पे ञेंलयाडिञाँ। 24 इंञ अपेंञ लाय वपे तना, अखीर भगवान राः टेबो: लाय हेंकू, अवुर राजा कू अपे ञेंलयड अँजोम यड हेना टेबोः ञेंल गिसन तेडकुआ। लेकिन हेंकू अपे ञेंलयड अँजोम यड हेना मेनेकू ञेंल सको गना।”
दयादार सामरी रा: उदाहरड़
25 एक दिन यहूदी नियम चेचेड हेनी गुरू, चड़ाँ केनते ईसु अजमो लगाडीय होंबोर तेडा, “ए गुरू, भगवान सुदा हमेसा दोहोन हेना जिनगी ञँम लगड इंञ चींञ बनोआँ?” 26 हेना वरि ईसु जबाब तेडा, “मूसा एमकेड हेना नियम रे ची मेनते ओल केना? हेना अम का: तेम समझो यडा?” 27 हेना वरि हेंय होड़ जबाब तेडा, “अम अपन भगवान पूरा मन लगय ते, अवुर जीव लगय ते अवुर पूरा बल लगय ते अवुर सींड़ बुदही लगय ते परेमियूँ; अवुर अपन परोसिकू अपन घयतेम परेम कू।” 28 हेना वरि ईसु हेंय थरेय कहनी तेडा, “अम ठिकेम जबाब तेडा, नेन या:तेम करोवे रेदो: जीवत तेम दोहोना।” 29 हेना वरि हेंय होड़ बढ़ियाँ गिअय मेनतेय अड़ींग वञूँ मेना:ते हेंय ईसुय होंबोर तेडा, “इंञाँअय परोसी इया हवे?” 30 तहाँ ईसु जबाब तेडा, ‘एरूसेलेम सहर वरि मियाँ होड़ यरीहो गाँव हनतेय चलो: दोहो एना। हेन तोलोग लाँवडा कू छेका केडीय ते कपड़ा लता लुसी केते अवुर ञेंड बेड़ा वडीय ते अदमरहा केडीय तेकू चलो यनु। 31 हेनेन तोलोग हेन होर ते मियाँहोड़ याजक चलोः दोहो एना। हेना वरि हेंय ञेंलकेडीय ते चोन अटु वडियू। 32 हेना वरि फेर मियाँ होड़ लेवी हेना थोव रेय मेजेना, तहाँ हेंय होय ञेंलकेडिय ते चोन अटु वडियू। 33 हेना वरि फेरेच हेना थोव रे सामरी देस रेनिय डगर रेंगवा मेजेना, तहाँ हेंय ञेंलकेडिय तेय सोग लगो एना। 34 अवुर हेंय मेजकेन ते घवतन हेना रे, अंगुर रस अवुर दवाई सुनूम लगो केते पट्टीय तोल तेडा। तहाँ गदहा तय रे रकब केयते धरम साला रेय इदी तेडिया, अवुर हेना रे हेंयीय सेवा- सत्कार तेडा। 35 हेना ञींदावत हेंय होड़ धरम साला रेनिय मुवँर तू, चाँदी राः बाटंग सिक्काय ओवाडिया, हेना वरि हेंय थरेय कहनी तेडा, “नेय बढ़ियाँ तेम सेवा सत्कार हताड़ीय, अवुर नआँ वरि अमा: खरचा: बगरा होयाः रेदो फेर मिड़ा: रेंञ भरोवेआ।” 36 हेना वरि ईसु हेंय होड़ीय होंबोर तेडा, “निहों अमा: मन रे नेकू पेनेय होड़ डगर रेंगवा कू भर रे, ञेंड बेड़ा वडीय हेनी रेनिय परोसी इया हवे?” 37 हेना वरि हेंय कहनी तेडा, “जे दया एन हेनी।” हेना वरि ईसु कहनी तेडा, “जू, अब वरि अम हो नेन घयतेम कामे।”
ईसु मरथा, मरियोम ओड़ाईय सेनेना
38 ईसु अवुर चेला कुतय चलो: तोलोगू मियाँ टंग गाँव रेकू सेनेना, हेना रे मरथा मेनते कू कहनी वडिय हेनी, कोड़ी होन अनेज ओड़ा: रेय राःतेड कुआ। 39 हेंय बोहोत ञुँमू मरियोम मेनते दोहो एना। हेंय ईसु बंदे रे दुड़ूब केनते ईसु राः टेबोईय अँजोम दोहो एनु। 40 तहाँ मरथा हेना तेरा बुता तेय अकबको केनते ईसु थरे मेजकेन तेय कहनी तेडा, “ए परभु, बोहोंञ मियाँ होड़ ते बुता लगाडीय ञेंल हड़ीवंञ तना, हेना अम मेनेम पसींदयड किदो? कहनी वय मी सबदेगाँ ञँयू।” 41 हेना वरि ईसु जबाब तेडा, “अँजोम मी मरथा, अम एटा: एटा: चिन्ता लगड अखीर मी परेसानु: तना। 42 लेकिन नआँ टेबो: पपाड़िको: मी। मरियोम बढ़ियाँ: टेबोईय चुनो केडा, हेंय वरि हेना कनय एरो लुसी सको एना।
ईसु चेला कू बिनती ईय चेडतेड कुआ (मत्ती 6:9-15)
1 एक दिन ईसु मियाँ टंग जघा रेय बिनती: दोहो एनु। बिनती पिटो केनरे मियाँ होड़ चेला कहनी तेडा, “ए परभु, उहाना दो चेला कुतय बिनती: लगाडीय चेड तेड कुआ, हेन घयते अले हो बिनती: मी चेड ले।” 2 हेना वरि ईसु हेंकू थरेय कहनी तेडा, “नआँ या:तेपे बिनतीऊ: “ए अले रेनिय अपा, अम ञुँमू पवितर गिआ, अमा: राज मेजुऊ। 3 अले रोज दिन राः आहार मी ओवाले। 4 अले हो अले राः बिरूध रेकू कसूरे: हेंकू ले माफा, हेन घयते अले राः पाप होम माफे अवुर कनर घयते अलोम एनेम पाप वले।”
माँगते रहो (मत्ती 7:7-11)
5 हेना वरि ईसु फिरीय कहनी तेडा, मान ले “अपे मेंडे रे कनय अदहा रात गतित ओड़ाः रे सेनको: ते, ‘ पँयचा ते पेय टंग रोटीम ओवाञू मेनतेय असीयू, 6 इंञ गती कनर हनतेय चलो: तोलोग निनी हो इंञ ओड़ा: रेय मेजकेना, हेंय खियो लगड इंञ थरे कनर कोवाआ।’ 7 अवुर हेंय भिनीतर वरिय कहनीयू, ‘ इंञ अलोम अफेतीञू, अले इंगन होपोन तेले गितीज तना, रात भर लगड दुवारींञ सींञकेडा। हेना ते निहो इंञ रिमको: ते कनर सहेता एरोंञ एम सको एना।’ 8 इंञ अपेंञ लाय वताना, हेंय गतित हवे ते हेंय रिमको: ते एरोय ओवाडिया। अगर बित्ताही ढीठ केते दुवारीय खटखटोवे रेदो, रिमको:ते जे चीजिय असीआ हेना जरुरीय ओवाया। 9 “हेना ते इंञ अपे थरेंञ कहनी यडा, भगवान थरे असीय महल रेपे दोहोन रेदो, असीय हेनाय ओवापेआ। छपई महल रेपे दोहोन रेदो, छपई हेना पे ञाँमेआँ। लेकिन खटखटोवे महल रेपे दोहोन रेदो, अपे लगड दुवारीय जीजेआ। 10 कनय हो असीय रेदो कू ओवाया। अवुर जे छपाई हेनी, ञाँमेआयू। अवुर दुवारिय खटखटो: हेनी लगड कू जीजेआ। 11 “अगर अपे मेंडे रे कनय हो, कोड़ा होपोन तू अपत थरे रोटीय असी रेदो, थोरे दिरीय ओवाया अवुर हकुय असी रेदो, हकु राः बदला ते थोरे बीञींय ओवाया। 12 चहे होनोनीय असी रेदो, किदींञ थोरेय ओवाया 13 अपे पापी होड़कू घलि, चोंडीज कू तपे बढ़ियाँ: चीज पे ओवाकुआ, अपे सरग रेनिय भगवान अपा, पवितर आत्मा असी: हेंकू ची लगड एरोय ओवड पेआ?”
ईसु अवुर भूत कुरेनिय मुखिया बालजबूल (मत्ती 12:22-30; मरकुस 3:20-27)
14 एक दिन फेर ईसु गुँगी भूतीय उडुंग तेडा। हेंय उडुंग एन तहाँ दो गुँगा होड़ टेबोः दोहो एनु, हेना वरि हेंय ञेंलकेते होड़कू अचरज यनु। 15 लेकिन हेंकू मेंडे रे कुछ होड़कू कहनी तेडा, “नेय दो भूत कू रेनिय मुखिया बालजबूल राः सहेता ते भूत कुय उडुंग यडा।” 16 सही मेते ईसु भगवान कुलकेडिया किदो बेगर मेनाआँ पपाड़ी लगड कुछ होड़कू अगस वरि मियाँ टंग चिन्ह तीब लगड कू कहनी सोवाडिया। 17 हेंकू मन मन रेकू पसींद तेडा, हेना ईसु पपाड़ीकेनते हेंकू थरेय कहनी तेडा, “जे जे राज रेनकू होड़कू एक जूट ते मेने कू दोहोना हेना, राज रेनकू होड़कू अलग तलग जोमा कू; अवुर जे ओड़ा: रे एक जूट ते मेने कू दोहोन हेंकू होकू अलग तलग जोमा। 18 इंञ दोपे कहनीवंञ तना सयतान राः सहेता ते भूत कुय उडुंग यडा मेनते, अगर सयतान अनानेज रअय बिरोध रेदो, हेंय राः राज का:ते बनो बगीकोआ? 19 अगर इंञ सयतान राः सहेता ते भूतकुंञ उडुंग यड रेदो, अपे रेनकू चेला कू इया राः सक्ति तेकू उडुंग कुआ? हेना ते अपे राः हेन कू नियोंवेआ। 20 अगर इंञ भगवान राः सक्ति ते भूत कुंञ उडुंग यड रेदो, भगवान राः राज अपे राः मँझर रे मेजयाना। 21 “अगर बहगँड़ होड़ हथियार सबकेते ओड़ा: तुय पहरा रेदो, हेंय राः धन सम्पति कनय एरो लुसी सको एना। 22 अगर हेंय वरि मियाँ होड़ बहगाँड़य टुटो: रेदो, हेंयूय हरोविया अवुर जे हथियारिय असरावआ हेना, लुसी केते हें राः सींड़ धन सम्पति हटींग गोत्तेआ। 23 “इंञ गतर रे कोवाय हेनी होड़ू, हेंय इंञाअय मुदेय हवे, अवुर इंञ सुदा मेनेय सकेल कु: हेनी, होड़कूय अलग तलागा। 24 “कनय होड़ वरि भूत उडुंग जोम रेदो, दोहोन लगड सुनहर जघाय ञँमबेड़ाआ, हेना वरि मेनेय ञाँमे तहाँय कहनियाँ, 'जे ओड़ा: वरिञ उडुंग केना हेन ओड़ा: रे, फेरिंञ मिड़ा: सेनुआँ।' 25 मिड़ा: मेजु: तहाँ हेंय हेना ओड़ा: साफ- सुथरा अवुर सजोता तोलोगिय ञाँमेआँ। 26 हेना वरि हेंय अनेज वरि हो सात गोटंग अवुर जरजठ भूत कुय आगा। हेना वरि हेंकू हेंय होड़ थरे कू बसो जोमा। हेंय होड़ राः दसा पहिला: वरि हो बेहेज जोमा।”
इया बढ़ियाँ गिआ (मत्ती 12:43-45)
27 ईसु नआँ टेबोईय टेबोः तोलोग हेना, भीड़ वरि मियाँ होड़ कोड़ीहोन बडे- बडे तेय कहनी तेडा, “आमीय जनम केडमीआँ अवुर दुदूय पियो केडमी: हेनी, तिमीन आसिसीय ञँमकेडा। 28 हेना वरि ईसु कहनी तेडा, “भगवान राः टेबोः अँजोम केते, मनोवें हेंकू आसीस कू ञाँमा।”
योना रा: निसाना
29 अखीर होड़कू जवारू: दोहो एनु, तहाँ ईसु कहनी तेडा, “नआँ जबाना रेनकू होड़कू अखीर कू उजड़ यना, नेकू निसाना कू ञँम बेड़ा यडा। योना रा: निसाना छोड़ अवुर कनर निसाना एरो तिबवड कुआ। 30 जे घयते योना नीनवे सहर लगड निसानय ठहरो एना, हेन घयते होड़ होपोन हो, नआँ जबाना रेनकू होड़कू लगड निसाना ठहरोआ। 31 सिबा देस रेनिय रानी, अवुर नआँ जबाना रेनकू होड़कू सुदा नियोंवे देवह चड़ाआँ को:ते नेकूय दोस कुआ, कहेकि नेय धरती रा: छोर वरि सुलेमान राः टेबो: अँजोम लगाडिय मेजेना। अवुर अँजोम पे, नआँ रे सुलेमान वरि हो बडेअय होड़ हवे। 32 नीनवे रेनकू होड़कू नियो देवह नआँ जबाना रेनकू होड़कू सुदा कू चड़ाआँ, कहेकि नीनवे रेनकू योना रा: परचार अँजोम केते मन कू बदलो तेडा, अवुर अँजोम पे, नआँ रे योना वरि हो बडे अय इदाना।
ईसु आत्मिक ढिबरी रा: बारे तेय चेडकू दोहो एनु (मत्ती 5:15; 6:22-23)
33 “कनय होड़ ढिबरी जब केते मेने कू उकूया, अवुर हेना कनारा चीज ते मेने कू हरूबेआ। हेना भितर बहेर बोल उडुंगु: कू मरसल वा लगड अगस रेकू टेंगवा तआ। 34 लेकिन अपे देंह रा: ढिबरी मेंड पे हवे, मेंड पे बढ़ियाँ गिरे दो ढिबरी घयते देंह तपे रे मरसालेआ। लेकिन मेंडपे बढ़ियाँ कोवा: रेदो देंह तपे अंधरा ओत हनते गोगेआ। 35 हेना ते सँवचेती तेपे दोहोनु, भगवान अपे राः देंह रे इंजोतीय एमकेड हेना, अलो पे इकम अंधरावा। 36 अपे राः देंह इंजोत ते भरो केन रेदो, कनर हँडे अंधरा कोवाआ। हेंडे ढिबरी जबता घयते एयसा चमकोआ।”
ईसु नियम चेचेड कू रा: गलतीय लाय तेडा (मत्ती 23:1-36; मरकुस 12:38-40; लूका 20:45-47)
37 ईसु टेबो: दोहो एनु, हेन तोलोग कनय मियाँ होड़ फरीसी इंञ ओड़ा: रेम जोमु: मेनते गोड़ीय गिरो एना, हेना वरि हेंय ओड़ा: सेनकेन ते ईसु जोमुईय दुड़ूब एना। 38 अवुर हेंय बेगर अंचा तेय जोमुईय दुड़ूब एना, हेना ञेंल ते फरीसी कू अचरज यनु। 39 तहाँ परभु हेंकू थरेय कहनी तेडा, “ए फरीसी कू, अपे डुबहा अवुर टठिया अगस अगस दोपे मँजो वेआ, लेकिन अपे भितर रे कचरा अवुर ललसा इदाना। 40 “ए बोया, होड़कू बबानोवय बहेर तुय बनो केड दो, भितर तू बेगारिय बनोवा? 41 अपे, बरतन भितर रा: चीज कनय गरीब होड़कू पे ओवा रेदो, अपे लगड सींड़ चीज साफुआ। 42 फरीसी कू अपे अखीर दु:ख रेपे पड़ोआ, अपे तेने मेनाः अपन कर कमाय राः दस बंटा रे मियाँ बंटा, भगवान दोपे ओवाया। लेकिन होड़कू सुदा बढ़ियाँ ते मेने पे चाल बेवहारुआ, अवुर भगवान सुदा परेम हो मेने पे रखोवेआ। दसवां बंटा रे मियाँ बंटा होपे एमे, अवुर मियाँ मियाँ ते नआँ होपे करोवे। 43 “ए फरीसी कू अपे हो अखीर दु:ख रेपे पड़ोआ, गिरजा ओड़ाः रे बड बडेआ पद, अवुर बजार ते जोहर वपे: हेना पे ञँम बेड़ाआ। 44 अपे हो अखीर दु:ख रेपे पड़ोआ, कहेकि अपे ओतेत रे मिलो कोआ मरघटी घयते इदान पेआ, अवुर होड़कू हेना अगस तेकू सेनेआ, लेकिन भितर रे सोया कोआ हेना मेने कू पपाड़ीआ।” 45 यहूदी नियम चेचेड कू वरि मियाँ होड़ जबाब वडिया, “ए गुरु, नआँ घयतेम कहनी यड रेदो, अम अलेम निन्दा यडा।” 46 ईसु कहनी तेडा, “अपे यहूदी नियम चेचेड कुहो अखीर दु:ख रेपे पड़ोआ, कहेकि मेने रिमसको: हेना बोझवा, एटा: कू पे कहनी वआ, खुदे अंगरी पेते घली मेने पे छुवों वेआ। 47 अपे अखीर दु:ख रेपे पड़ोआ, नआँ तिमीन दु:ख रा: टेबो: हवे, अपे भगवान राः टेबोः लाय हेंकू लगड मरघटी पे बनो यडा, अपे रेनकू दादी- पुरखा कुहो हेंकुकू ञेंड गोजतेड कुआ। 48 अपे दादी- पुरखा कुरा: काम रे सहमत इदान पेआ, कहेकि हेंकू भगवान राः टेबोः लाय हेंकू कू ञेंड गोजतेडा, अवुर अपे हेंकू रा: मरघटी पे बनो यडा। 49 हेना ते अपे राः बारे ते भगवान अपन गियान तेय कहनी केडा, ‘इंञ हेंकू थरे भगवान राः टेबोः लाय हेंकू अवुर पेरेरित कुंञ कूला, हेना मेंडे केय झन कू ञेंड गोजा, अवुर केय झन कू सतो कुआ।’ 50 “हेना ते दुनिया रा: बोहड़ीत वरि भगवान रा: टेबो: लाय हेंकू राः खुन कू बोहो तेडा, हेंकू रा: हिसाब भगवान नआँ जबाना रेनकू होड़कू थरेय तिलाया। 51 हाबिलीय ञेंड गोज तेड वरि अखरी रे जकरयाह वेदी अवुर पवितर जघा राः मँझर रेकू ञेंड गोज तेडिया। इंञ अपे थरे सही मेतेंञ कहनी यडा, जकरयाह अँगम राः हिसाब भगवान नेन समय रेनकू होड़कू थरेय तिलाया। 52 “यहूदी नियम चेचेड कू अपे हो दु:ख रेपे पड़ोआ। भगवान थरे काःते सेनुआ, हेनापे पपाड़ी तन रेहो मेने पे लाय यडा। अपे खुदे मेने पे सेनयाडा, अवुर सेनयड कुहो मेने पे इकाम सेनवाँ कू तना।” 53 हेना वरि ईसु उडुंग एना, तहाँ अहूदी नियम चेचेड कू, अवुर फरीसी कू अखीर टेबो: चोरा लगड सवाल कू होंबोरियू, अवुर हेंय रा: पीछा कू लगो यनु। 54 अवुर हेंय अहा वरि कनर गलती टेबो: पकड़ो लगड तक तक रेकू दोहो एना।
सहचाँ होड़कू वरि बच बच तेपे दोहोनु
1 हेनेन तोलोग अखीर होड़कू जवर एना तहाँ कू ठेला ओड़ेगु, “हेना वरि ईसु पहील ते अनेज रेनकू चेला कू थरेय कहनी तेडा, “अपे टेबो: बेहड़ों कू फरीसी कू वरि सँव चेती तेपे दोहोनु। 2 नआँ घिया: दिन मेजु: तना, गड़ल तोपल सींड़ टेबो: होड़कू थरे देखा रूआ, अवुर उपता टेबोः सींड़ कुकू पपाड़ीआ। 3 कनारा टेबो: अंधरा ओत रे कू टेबो: केडा, हेना टेबो: मरसल रेकू लायेआ। ओड़ा: दलंग रे लोटो: केनते कू टेबो: केडा, हेना सींड़ टेबो: सड़ीम अगस वरि चड़ाँको:ते कू लायेआ।
इया पे बोरोवा? (मत्ती 10:28-31)
4 “अपे इंञ गति कू हवें इंञ लाय वपे तना, हेंकू जान सेयते कू ञेंड गोज पेआ। हेंकू तयोम ते कनार एरोकू बनो तेडा, हेंकू अलो पे बोरू वकू। 5 इंञ अपेंञ लाय वताना इया पे बोरोवा, “भगवान गोजके कुते नरक रे डलो कुरा: सक्ति इदाना हेनी पे बोरोवा। 6 पाँच गोटंग गोरेला कू दु पेयसा वरि बगरा ते मेने कू केजाआ, तबोले हो भगवान हेंकू मेंडे रे मियाँ टंग हो मेनेय लिड़ींञ कुआ। 7 अपे भो: राः सींड़ ऊबीय लेखा केडा, हेना ते अलो पे बोरू, अपे गोरेला कू वरि हो बगरा कीमती गिआ पे।” 8 “इंञ अपे थरेंञ कहनी यडा, कनय हो होड़कू मड़ंग रे इंञीय अपनो रेदो, होड़ होपोन हो भगवान रेनकू सरगदूत कू मड़ंग रेय अपनो विया। 9 लेकिन होड़कू मड़ंग रे इंञीय नहकार हेंय, भगवान रेनकू सरगदूत कू मड़ंग रे इंञ हो हेंयींञ नहकारा। 10 कनय होड़ हो भगवान होपोन रा: बिरोध रे कनर टेबो: कू टेबो: रेदो हेंकू रा: माफी ञँमुआँ, लेकिन पवितर आत्मा रा: बिरोध रे निन्दा टेबोईय टेबो: रे, हेनी रा: माफी एरो ञँमेना। 11 “अपे कनय राज चलो कू थरे अवुर दरबार रे अवुर बड बडे अघिकारी कू थरे कू इदी पेरे ची ले कहनीआँ मेनते पसींद पसींद ते अलो पे फिकीरूऊ। 12 कहेकि पवितर आत्मा चीपे कहनी: हेना, हेनेन तोलोगिय लाय वपेआ।”
मियाँ होड़ बोया धनमन रा: टेबो:
13 हेना वरि फेर भीड़ वरि मियाँ होड़ कहनी तेडा, “ए गुरू, मगंञ थरेम कहनीयू अपुंञ रा: हिसा बंटाय हटींग वञूँ।” 14 तहाँ ईसु हेंय थरेय कहनी तेडा, “ए होड़, हहाटींगय अवुर निनीयोवय इया चुनो केडीञाँ?” 15 अवुर ईसु हेंकू थरेय कहनी तेडा, “अपे सँवचेती तेपे दोहोनु, अपे कनारा रेहो अलो पे लोभियाऊ। बगरा धन दवलत कमाय भर जिनगी रे बड़ी बात कोवाआ।” 16 हेना वरि ईसु हेंकू थरे मियाँ टंग उदाहरड़ीय लाय तेडा, “मियाँ होड़ धनवान रा: खेत रे अखीर कमाय होया एना। 17 “हेंय नआँ याःते अनेज मन रे पसींद तेडा, ‘न मेनमोट हुड़ू इंञ थरे इदान हेना चींञ बनोआँ, दोहोय लगड जघा हो कोवाआ। 18 कोठी टोवीज केते बडे तेंञ बनोवेआ, हेना रे सींड़ होड़ू तँञींञ दोहोआ। 19 अवुर इंञ इंनीञींञ कहनी वआ, अखीर बरिस लगड अम थरे हुड़ू इदाना, जोमु: चरो: मी अवुर खुसीम मनो।” ’ 20 लेकिन भगवान हेंय थरेय कहनी तेडा, ‘ ए बोया! तेनेसींञ ञींद अमा: जीविंञ गोगे रेदो, नआँम जवार केडा, हेना हुड़ू इया रा: होयाआ?’ 21 न सँवसार रे हुड़ू जवार हेंकू होड़कू भगवान राः नँजेर रे धनी कोवा कुआ।”
अलो पे पसींदे (मत्ती 6:25-34; 19-21)
22 हेना वरि ईसु अनेज रेनकू चेला कू थरेय कहनी तेडा, “जियो: लगड ची ले जोमा, अवुर ची ले तुसींञाँ मेनते, देंह लगड हो अलो पे पसींदे। 23 कहेकि जोमु: चरो: अवुर कपड़ा लता वरि हो, अपे रा: जीव अखीर किमती गिआ। 24 काहू कुपे तियागु; हेंकू मेने कू मेरेआ न हेंकू कोठी रे कू दोहोया, तबो लेहो भगवान हेंकूय असुल कुआ। अपे तितिज कू वरि हो अखीर किमती गिआ पे। 25 अपे मेंडे इया इदाना, चिन्ता केते अनेज रा: उमेर मियाँ घड़ी होय बड़हो सको अय? 26 नआँ घिया: मियाटंग होडींञाँ काम घली मेने पे करो सकोआ दो, अवुर एटाः- एटाः चीज लगड ची पे चिन्ता यडा? 27 “जंगल राः बहा पे तीयागू, हेना का:ते बडेआ, न कपड़ा तुसींञाँ, न बुताआ, तबो लेहो इंञ अपेंञ लाय वताना, निमीन बडेअय सुलेमान राजा घली धनमान रह ते बहा वरि हो हेंय रा: बढ़ियाँ: कपड़ा कोवाआ। 28 भगवान डांड रा: बीर घली तेसींञ इदान हेना, अवुर एटा: चेका कू तुयाँगेआ, हेना घली बढ़ियाँ तेय सींगारेआ, दो ए कमजोर बिसवासी कू, अपे भगवान नआँ वरि हो बगरा तेय धियान पेआ। 29 दो अपे ची ले जोमु: चरो: मेनाआँ खोज रे अलो पे दोहोनु, न पे फिकीरुऊ। 30 कहेकि दुनिया रेनकू होड़कू नआँ सींड़ चीज रा: खोज रेकू दोहोना, अवुर अपे रा: ची जरूरत इदाना हेना अपे रेनिय भगवान अपा पपाड़ी तना। 31 भगवान राः राज रा: खोज रे पे दोहोन रेदो, नआँ सींड़ चीज अपे हेंय ओवा पेआ।”
सरग रा: अनाज
32 इंञा: कू चेला कू ठुवा गिरे हो अलोपे बोरू, कहेकि भगवान अपा अपे सरग राज ओवापे लगड अखीर खुस इदानियाँ। 33 अपे थरे जे चीज इदाना, हेना केजा केते जे राः जरूरत इदान हेनी होड़ दान तेपे ओवायू। अवुर अनापे लगड एयसा बटू पे बनो जोकि कबोह मेने मरिआ। सरग रे धन दवलत पे जवर रेदो कबोह एरो अधियों एना, अवुर हेना ञिंदीर कुहो एरो जोम सको एना अवुर चोरहा कुहो एरो कू चोरा सको एना। 34 कहेकि जहाँ रे अपे राः धन दवलत दोहोना, हेंडे अपे राः मन दोहोना।
सँवचेति तेपे दोहोनु (मत्ती 24:42-51)
35 “भगवान राः काम लगड तयार पे दोहोनु, अवुर अपे जो काम करेक इदाना हेना पे काम हताड़े। 36 मालिक तबु बियाह वरि तिमीसीय मिड़ाः मेनते कू तँगीया। अवुर हेंय मेजको: ते दुवारीय खटखटो सी तुरेत तेकू जिजवाया। हेनकू नोकर कू घयते अपे होपे बनोऊ। 37 जगो हतड़ को: तोलोग मालिक मेज ञँमकूः हेंकू नोकर कू अखीर तेकू खुसीआ। इंञ अपे थरे सही मेतेंञ कहनी यडा, खुदे मालिक तयार को:ते हेंकू जोमु: लगाडीय दुड़ूब कुआ, अवुर मेजको:ते हेन कुय सेवाआ। 38 अगर अदहा रात चहे भींसारीय मेजको:ते हेंकू जगल तेय ञँमकुआ, हेंकू नोकर कू अखीर तेकू खुसीआ। 39 अपे नआँ टेबोः पपाड़ी को:पे, चोर तिमीन जुवारिय मेजुआ मेनाआँ ओड़ा: मालिक पपाड़ी रेदो, जगालिय दोहो एन मेनु, अवुर ओड़ा: तुरे एरोय एनेम बुचा: वड मेनू। 40 हेना ते अपे हो तयार पे दोहोनु, कहेकि होड़ होपोन कनर तोलोग होय मेजुआ।”
इमानदार अवुर अलढेलिया नोकर (मत्ती 24:45-51)
41 हेना वरि पतरस होंबोर तेडा, “ए परभु, नआँ उदाहरड़ सिरीफ अले लगड हवे किदो, सींड़ कू लगड मी कहनी यडा?” 42 हेना वरि ईसु जबाब तेडा, “बुधमान अवुर इमानदार नोकर इया इदाना? जे मालिक ओड़ा: रा: देख रेख लगड अवुर सही समय रे हरवाह- चरवाह कू हिसत कुय खियो हताड़ा। 43 मालिक तू नेन घयते बढ़ियाँ काम हतर तोलोगिय मेज ञँमेय हेंय नोकर अखीर तेय खुसीआ। 44 सही मेते इंञ अपे थरेंञ कहनी यडा, हेंय अनेज राः सींड़ धन सम्पती देख रेखे लगड अधिकारिय ओवाया। 45 लेकिन इंञाअय मालिक मेजुईय देरी यडा मेनते पसींदेअय, हेंय नोकर हरवाह हरवाहीन कू ञेंड बेड़ा कू, अवुर मतवाड़ीऊय, अवुरिय जोमु: चरोऊ रेदो, 46 हेंय नोकर मालिक मेनेय तँगी घनी अवुर मेनेय पपाड़ी तोलोग अचाकतेय मेजुआ। अवुर मालिक हेंय अखीर सजा एमकेय ते, जे इमानदार कोवाकुआ हेंकू सुदाय कुलेया। 47 “जे नोकर मालिक राः मरजीय पपाड़ी दोहो एनु, हेंडे रेहो हेंय जिमा वडिय हेना बढ़ियाँ ते मेनेय कामे रेदो, हेंय नोकर बगरा सजाय ञाँमा। 48 लेकिन अनजान ते गलती काम कू काम हेंकू, बगरा सजा एरो कू ञँमतेडा। बगरा ओवड कुआ, हेंकू वरि बगरा असीया, अवुर अखीर बगरा जिमा वड कुआ, हेंकू वरि बनगरा ते असीया।
ईसु अलग- तलग कू लगाडीय मेजेना (मत्ती 10:34-36)
49 “इंञ धरती रे सेंगेल सलगो लगाडींञ मेजकेना, इञा: इच्छा इदाना कि हेना निनीहो जबेनू! 50 हेना वरि पहिल ते इंञ मियाँ टंग बतिसमाय ते खँडा: जरूरी इदाना, नआँ अनायीन पुरो: मेन दिन इंञ थरे अखीर तकलीफ इदाना! 51 अपे अड़ींग तना, इंञ धरती रे मेल- मिलाप लगाडींञ मेजकेना? मेने, इंञ अपेंञ लाय वताना, अपे अलग तलग लगाडींञ मेजकेना। 52 कहेकि पाँच झन अब वरि मियाँ ओड़ाः रेनकू एठेड ओड़ेंगा, पेय होड़ बा होड़ सुदा, बा होड़ पेय होड़ सुदा। 53 अपत कोड़ा होपोन तू सुदा, अवुर कोड़ा होपोन तू अपत सुदा कींञ एठेड ओड़ेंगा, इंगत कोड़ी होपोन तू सुदा, अवुर कोड़ी होपोन तू इंगत सुदा, हनहार तू किमीन तू सुदा अवुर किमीन तू हनहार तू सुदा, कींञ एठेड ओड़ेंगा।”
समय रा: भेद (मत्ती 16:2-3)
54 ईसु भीड़ रेनकू थरेय कहनी तेडा, “अपे पछु हन वरि लिबींर रकब तहाँ तुरेत तेपे कहनियाँ, दाः उयुगेआ मेनते, अवुर हेनेन घयते होयाआ; 55 अवुर देखीन हंडा: होय चलो: रेदो पे कहनियाँ एएलगाँ मेनते, अवुर हेनेन घयते होयाआ। 56 ए कपटी होड़कू, अपे धरती अवुर अगस राः चिन्ह ञेंलकेते परथींञ गोत्ते अपे, लेकिन नआँ समय रे जो कुछ होयाः तना हेना ञेंलकेते ची लगड मेने पे परथींञ सको: तना?”
अपन मुदेय कू सुदा पे मेरवन कोऊ (मत्ती 5:25-26)
57 “सही ची हवे मेनाआँ अनापे ची लगड मेने पे नियों यडा? 58 अम अमाअय मुदेय सुदा नियोंवे लगड अघिकारी कू थरे सेनु: तोलोग होनोर रे हेंय सुदा मेरवानु: मी, नहीं तदो हेंय निनीयोंवय थरेय ओर इदी मिआँ, अवुर हेंय सिपाहिकुय जिमा वआँ, अवुर हेंकू जेहेल रेकू डलो मिआँ। 59 इंञ अपे थरेंञ कहनी यडा, डाँड़ अनायीन पे भरोवे मेन दिन एरो कू एनेम उडुंग वडपेआ।”
पाप वरि बंचो: लगड पसतो: पे नहीं तदो बिलो: पे
1 हेन तोलोग कुछ होड़कू ईसु थरे मेजकेन ते गलील रेनकू होड़कू, भगवान लगड बलिदान कू रकब तोलोग, पिलातुस एर ञेंड गोज तेड कुआ, हेना रा: बारे ते ईसु कू लाय वडा। 2 नआँ अँजोम केते हेंय हेंकू थरेय कहनी तेडा, “गलील रेनकू होड़कू वरि नेकू अखीर पाप तडा ते, नेकू थरे नआँ बिपेत मेजेना मेनते पे अड़ींग तना किदो? 3 कोवानु; इंञ अपे थरेंञ कहनी यडा, अगर पाप वरि बंचो: लगड मेने पे पसतो: रेदो, सींड़ कू नेन घयते पे बिलोआ। 4 एरूसेलेम रे दोहोन कू मेंडे रे अठारह झन बगरा कू कसूर तडा ते, सिलोह रा: बडा: ओड़ाः तेकू तेपेड गोजेना। मेनते पे अड़ींग तना किदो? 5 कोवानू; इंञ अपे थरेंञ कहनी यडा, अगर मन तपे मेनेपे बदलो रेदो, सींड़ कू नेन घयते पे बिलोआ।”
मेने जो: हेना अंजीर दुबी रा: उदाहरड़
6 हेना वरि ईसु नआँ उदाहरड़िय कहनी तेडा, “मियाँ होड़ होड़ रा: अंगुर बरी रे मियाँ टंग अंजीर दुबीय रोहे तडा, हेना रे हेंय जो: तन कि मेने मेनाआँ ञेंञेंलीय सेनेना, हेंडे रेहो मेनेय ञँमगाडा। 7 तहाँ हेंय बगेयचा रेनिय पहरदार थरेय कहनी तेडा, ‘ अँजोम मी, तीन बारिस वरि इंञ नआँ अंजीर दुबी रा: जोओ छपांञ मेजु: तना, हेंडे रेहो मेनेंञ ञँमयाडा, नआँ गेर केते घीर गोत्ते जघा भर एसेड केडा।’ 8 पहरदार हेंय थरेय कहनी तेडा, ‘मालिक नेएस दिना:मी एनेवा, नआँ दुबी चायिरो गतर हन कोड़ी केते खादींञ लगो सोवाआ।’ 9 मड़ंग हँडे जो: रेदो इकावआ, नहीं तदो गेर गोत्तेआ।’ ”
ईसु सबद रा: दिन रे कुबड़ी कोड़ीहोनिय चीकन तेडा
10 सबद रा: दिन रे गिरजा ओड़ाः रे ईसु होड़कुय चेड दोहो एनु। 11 हेना रे मियाँ होड़ कोड़ीहोन दोहो एना, हेंय अठारह बारिस अँगम लटोविय हेनी भूत हेंय थरे लगो तना, अवुर हेंय कुबड़ी तनायू, कनर या: ते मेनेय सोझ सको: दोहो एनु। 12 ईसु हेंय ञेंलके डियतेय राः तेडिया, अवुरिय कहनी वडियू, “अम लटो केन वरिम चीकन यना।” 13 तहाँ हेंय तीत तेय छुवों तेडिया, हेना वरि तुरेत तेय सोझ यनु, अवुर भगवानिय बडेय वडा। 14 ईसु हेंय सबद राः दिन रेय चीकन तेडिया, हेना ते गिरजा ओड़ाः रेनिय मुखिया धको केनते होड़कू थरेय कहनी तेडा, “बुता लगड छो दिन इदाना हेन देवह मेज को: तेपे चीकानुऊ, सबद रा: दिन रे अलो।” 15 नआँ अँजोम केते ईसु कहनी तेडा, “ए ठक लबरा होड़कू, सबद रा: दिन रे अपे मेंडे सींड़ होड़कू अपन बयेल कू चहे गदहा कू खुटा वरि लड़ा केकुते दा: पियो मेने पे गो: कुआ किदो? 16 नेय कोड़ीहोन अबराहम खुटी- खानदान रेनिय हवे, सयतान अठारह बारिस अँगामिय लगो तना, सबद राः दिन रेंञ चीकन केडिया बढ़ियाँ कोवा: किदो?” 17 तहाँ हेंय नआँ टेबोईय कहनी तेड सी, सींड़ बिरोधी कू लाजयो यनु, अवुर ईसु अदभुत कामिय करो तेडा, हेना ञेंल केते सींड़ होड़कू खुसी यनु।
सरसों दना राः दिरीस्टान्त (मत्ती 13:31-33; मरकुस 4:30-32)
18 हेना वरि हेंय कहनी तेडा, “भगवान राः राज ची घयतेआ? अवुर हेना ची सुदा बरो बार केतेंञ लाय वपेआ? 19 हेना मियाँ दना सरसों रा: बारो बार गिआ, हेना मियाँ होड़ होड़ बारी तय रेय मेर तेडा, अवुर बडे दुबी केनते डाड़ एना, अवुर अगस तेनकू तितिज कू हेना रे कू डेरा एना।”
खमीर राः उहाहरड़
20 हेंय फेरेचीय कहनी तेडा, “इंञ भगवान राः राज ची सुदा बरो बर केतेंञ लाय वपेआ? 21 हेना दमभरा: खमीर घयतेआ, कनय कोड़ीहोन हेना, तीन पसेरी अटा रे सुवेड मेड़वा तेडा, तहाँ हेना सींड़ अटा बुँबुड सयो यनु।”
सकताहा दुवर (मत्ती 7:13-14, 21-23)
22 “ईसु एरूसेलेम हनतेय चलो: तोलोग सहर- सहर ते गाँव-गाँव ते सिकछाय ओवा कू दोहो एनु। 23 हेना वरि कनय मियाँ होड़ ईसुय होंबोर तेडा, “ए परभु, भगवान ठुवा होड़कूय उबारा किदो?” 24 हेना वरि ईसु कहनी तेडा, “भगवान राः राज रे सेनु: लगड सकताहा दुवर ते बोल रा: पे कोसीसे। इंञ अपेंञ कहनी वताना, अखीर होड़कू बोल मेनते कू संबाहुआ, लेकिन एरो कू बोलो सको एना। 25 'जब ओड़ाः रेनिय मुवार रिमको:ते दुवारिय सींञ गोतेआ, अवुर अपे बहेर हँडे चड़ा को:ते केंवड़ खटखटो केते पे कहनीयू।, ‘ए परभु, दुवर मी जीजवा ले।’ हेना वरि हेंय अपे नआँ या:तेय जबाब वपेआ, ‘ इंञ अपे मेनेंञ पपाड़ी तना,' करेन कू हवे?' 26 हेना वरि अपे कहनिया, ‘अले अम सुदा ले जोमेन- चरो एना, अवुर अले गाँव ते सिकछाम लाय वडलेआ।’ 27 तहाँ परभु कहनियाँ, ‘इंञ मेनेंञ पपाड़ीआ अपे करेन कू हवे, ए गलत काम हेंकू होड़कू, अपे सींड़ कू इंञ वरि ञींर पे।’ 28 “भगवान राः राज रे अपे अबराहम, इसहाक, अकूब, अवुर भगवान रा: टेबो: लाय हेंकू, दुडूब को: तोलोग पे ञेंल कू रेदो, अवुर अपे बहेर हनते कू उडुंग पेआ हेना ञेंलके ते ईयामा पे, अवुर तिरींग पे पे लुकड़ूमा। 29 हेना वरि पुरूब पछु अवुर उतर देखिन चारो खुट रेनकू मेजको:ते भगवान रा: राज रा: भोज रेकू सामिलुआ। 30 अवुर अँजोम पे, जे तयोम केन हेंकू मड़ाँगुआ कू, अवुर जे मड़ंग केन हेंकू तयोमुआँ कू।”
एरूसेलेम सहर रेनकू लगड ईसु दु:खीत एना (मत्ती 23:37-39)
31 हेन तोलोग गोटाचार फरीसी कू मेजकेन ते ईसु कू लाय वडा, “अम हेरोदेस एर ञेंडमी मेनते, नआँ वरि उडुंग चलो: मी।” 32 हेना वरि ईसु हेंकू थरेय कहनी तेडा, “सेनको: ते बिगवा घयते चलहाँकय पे लायवा,‘ अँजोम पे, इंञ तेसिंञ अवुर गपा भूत कू उडुंग यडा अवुर रोगिया कुंञ चिकन यडा, तीन दिन रे इंञाँ: कामींञ पुनूरोया।’ 33 कनर घयू इंञू तेसिंञ गपा अवुर मियाँग जयेक जरुरी इदाना, कहेकि कनय भगवान रा: टेबोः लाय हेंकू एनेरुसलेम रेकू ञेंड गोजकुआ एटा: हँडे एरोआ। 34 “ए एरूसेलेम रेनकू! अपे भगवान रा: टेबो: लाय हेंकू पे ञेंड गोज गोत्ते कुआ। अवुर अपे थरे कुल कु: हेंकू तिकी गोज गोत्ते कुआ पे। तिमीन एस इंञ चहो सोताडा, जेयसे सीम होपोन कुताय फंकीत तेय उकू तकुआ। हेन घयते इंञ एरूसेलेम रेनकू जवर लगाडींञ पसींद तेडा, लेकिन अपे नआँ घयते मेने पे इकाम गडिञाँ। 35 अँजोम पे, अपे दोहोन तना हेना ओड़ाः उजाड़ यना, नेन या:तेंञ अटु तना। अपेंञ कहनी वताना, ‘ परभु रा: ञुमू ते मेजु: तन हेनी बढ़ियाँ गिआ यू, मेनते पे कहनिय रे हेंडे पे ञेंलेंञाँ।”
फरीसी ओड़ाः रे ईसु
1 ईसु मसीह सब्द रा: दिन रे, फरीसी कुरेन कू मुखिया कू मेंडे रे, मियाँ होड़ ओड़ाः रे जोमुईय सेनेना, अवुर हेंकू हेंय रा: तक तक रेकू दोहो एना। 2 हेना रे मियाँ होड़ दोहो एना, हेंय थरे ती कटा ओआ रोग दोहो एना। 3 ईसु यहूदी नियम चेचेड कू, अवुर फरीसी कुय होंबोर तेडा, “सब्द रा: दिन रे चीकन कू लगड बढ़ियाँ इदान किदो कोवाआ?” 4 तहाँ हेंकू जपनो यन कू, हेना वरि हेंय छुवों केडिय तेय चीकन तेडिया, अवुरिय इकम गोडवा डियू। 5 हेना वरि हेंकू थरेय कहनी तेडा, “अपे मेंडे रे कनय रेनिय चोंडीज चहे बयेल सबद रा: दिन रे इंदारा रेय लोजोरू: रे, तुरेत ते एरो पे उडुंग तेडिया किदो?” 6 अवुर हेंकू नआँ टेबो: रा: कनर जबाब मेने कू एम सको गना।
ईसु पोहना कू आदर भोजन लगाडिय चेड तेड कुआ
7 हेना वरि नेवता रा: तड कू हेंकू बड बडे कू दुड़ूबा हेना जघा कू हथियोआ, हेना ञेंलकेते ईसु मियाँ टंग उदाहरड़ीय कहनी तेडा। 8 “कनय हो अपे बियह रेकू राः पे रेदो, बड बडे कू दुड़ूबा हेना जघा रे अलो पे दुड़ूबु। हो सके अपे वरि कनय बडेअयीय नेवता केड रेगा। 9 अवुर नेनेवताअय अबा बना होड़िय नेवता तबा रे, अवुर हेंय मेजको:ते अम थरेय कहनीयू, ‘ नआँ जघा रेम इकावायू,’ तहाँ अम लजियो को:ते पेंदी रे बेयठेक पड़ोआ। 10 जब अपे कू राः पे रेदो सींड़ वरि पेंदी जघा रेपे सेन दुड़ूबु, नेवताईय रा:ता पे: हेंय मेजको:तेय कहनी वपे लगाडू, ‘ अँजोम यडा पेगा, अपे मड़ंग हँडे मेजको:ते पे दुडूबु,’ हेंडे अपे सुदा दुड़ूब को:कू मड़ंग रे अपे रा: आदर इजेत होयाआ। 11 कनय हो बडे गिआँञ मेनतेय फुलाय रेदो, हेंय होडीञियाँ, अवुर कनय होडींञ गिआँञ मेनतेय पसींदे रेदो, हेंय बडेया।” 12 हेना वरि ईसु नेवता रा:ताडिय हेनी थरे होय कहनी तेडा, “जब अम सींञ चहे ञींदाआ खवा पिवाम रा: कू रेदो, गति कुतम चहे भाई बंधु कू, चहे हित नात कू चहे धनमान परोसिकू नेकू घिया: कू बदला मिड़ा: सको: हेंकू अलोम रा: कू। 13 जब अम खवा पिवा: लगड मी रा: कू रेदो, गरीब कू, ठुठा कू, लगंड़ा कू, अवुर अंदहा कुम राःऊ। 14
बडे: खवा पिवा रा: उदाहरड़ (मत्ती 22:1-10)
15 हेंय सुदा लेटे कू जोमु: दोहो एनु, हेंकू मेंडे रे, मियाँ होड़ नआँ टेबो: अँजोम केते ईसु थरेय कहनी तेडा, “भगवान आसिस ओवाड कूः हेंकू भगवान राः राज रेकू जोमुआँ।” 16 हेना वरि ईसु हेंय थरेय कहनी तेडा, “एक दिन रा: दिन रे, मियाँ होड़ होड़ बडे खवा पिवा दिन केते, अखीर होड़कू नेवताय ओवाडा। 17 लेटे उसरो केते हरवाह तुतय नेवेथरि कू उसरो केना मेनाआँ रा:कू लगाडिय कुल तेडिया। 18 तहाँ सींड़े कुकू बहानायू, मड़ाँगअय रराअय थरेय कहनी तेडा, ‘खेतींञ तिला केड हेना ञेंञें लींञ सेनुआ, इंञ अम थरे गोड़ींञ गिरो: तना माफींञ मी।’ 19 अवुर मियाँ होड़ कहनी तेडा, ‘ इंञ पाँच जोड़ी बयेल कुंञ तिला केडा, अवुर हेंकू सिसीखोंञ चलो: तना, इंञ अम थरे गोड़ींञ गिरो: तना माफींञ मी।’ 20 तहाँ अवुर मियाँ होड़ कहनी तेडा, “दनारवा इंञाआँ बियह होया केना, हेना ते इंञ एरोंञ सेन सको एना।” 21 तहाँ हेंय हरवाह मिड़ा: मेजकेन ते मुवर तू थरे सींड़ टेबोईय लाय तेडा। हेना वरि ओड़ाः मुवर धको केनते हरवाह थरेय कहनी तेडा, ‘सहर रा: राह अवुर गली ते सेनको:ते तुरेत ते गरीब, ठुठा, लंगड़ा, अवुर अंदहा कू नआँ रेम अगकू।’ 22 तहाँ कुछ समय राः बाद रे हरवाह गिरहत थरेय कहनी तेडा, ‘गिरहत, जेयसेम कहनी तेडा तेयसेंञ काम केडा, अवुरोह जघा खाली इदाना।’ 23 हेना वरि गिरहत हरवाह थरेय कहनी तेडा, ‘गाँव अवुर गलि गलि तेम सेनुऊ, ओड़ागींञ पेरेजु: लगड कनर या:तेम अनाग कू। 24 इंञ अपेंञ लाय वताना, मड़ंग ते राःतड कू मेंडे कनय इंञा: लेटे एरो कू जोमतेडा।’ ”
ईसु रेनिय चेला बनो अयु (मत्ती 10:37-38)
25 अखीर होड़कू ईसु तयोम तेकू सेने दोहो एनु, तहाँ हेंय तयोम हन तेरेज केते हेंकू थरेय कहनी तेडा। 26 “कनय हो इंञाँअय चेला बनो गिसानिय रेदो, इंग आप, भाई बेहिन,बाल बच्चा कू अवुर कनियातु अवुर अपन जीवित घली अलोय मोंहवा, नहींतर दो इंञाँअय चेला एरोय बनो एना। 27 अगर कनय होड़ अनेज राः कुरुस रिमके ते इंञ तयोम ते मेनेय सेने रेदो, हेंय हो इंञाँअय चेला न लगे। 28 “अपे मेंडे कनय ओड़ा: बनो गिसानीय रे, बनो सकोअंञ किदो एरोआ मेनाआँ खरचा, बेगर हिसाब ते थोरेनय बनो वेआ। 29 नहीं तरदो नेव बोहड़ी केते पेयसा हनी: रेदो, एटा: कू हँडे: ते मजाग कू उड़ोविया, 30 ‘ नेय होड़ बोंहड़ींत दोय बोंहड़ीं तेडा, लेकिन मेनेय तियार सको गना।’ 31 “चहे मियाँ होड़ राजा रेनकू दस हजार सयना कू दोहो एना। अवुर एटागी राजा रेनकू बीस हजार सयना कू दोहो एना। इञाँ: कू सयना कू बीस हजार सयना कू सुदा लड़ायुः सकोः किदो एरोआ मेनाआँ, इया राजा बेगर पसींद ते सेनुआँ? 32 नहीं तर मेनेय सको: रेदो, अनायिन कू लड़ायू:ते सनागींञ वरि खभेरिया कू कुलके ते हेंकू सुदा कू समझो ओड़ेंगा। 33 नेन घयते अनेज राः सींड़ चीज मेनेय बगीवा रेदो, इंञाँअय चेला एरोय बनो एना।
मेने चहाटा बुलुंग (मत्ती 5:13; मरकुस 9:50)
34 “बुलुंग बढ़ियाँ चीज हवे, लेकिन बुलुंग राः चहट तू उजड़ जोम रेदो, हेना ची ते चहाटेआ? 35 सिठा को: बुलुंग खेत लगड नदो खाद राः काम रे मेजुआ। कनय हो अँजोम गिसन यड पे रेदो अँजोम जोम पे।”
अडतानयू भेड़ी रा: उदाहरड़ (मत्ती 18:12-14)
1 मलगुजारी तिला कू, अवुर पाप तड हेंकू होड़कू ईसु रा: टेबो: अँजोम लगड कू मेजु: दोहो एनु। 2 तहाँ फरीसी कू अवुर यहूदी नियम चेचेड कू, कुरू बुसु केनते कू कहनी तेडा, “नेय दो पाप केड हेंकू सुदय जुमो: तना, अवुर हेंकू सुदय जोमु: चरो: तना।” 3 हेना वरि ईसु नआँ उदाहरड़िय लाय तेडा: 4 “अपे मेंडे रे कनय थरे सव गोटंग भेड़ी कू दोहोनु। अवुर हेना मेंडे मियाँ टंग अडुऊ। दो निनानाबे गोटंग भेड़ी कू डाँड रे अटु केकुते। मियाँ टंग अडकोअयू अनायीनीय ञँमेय मेन दिन एरोय छपा तेडिय किदो? 5 अवुरिय ञँमेय तहाँ हेंय खुसी ते खँदीत रेय खँधेलिया। 6 हेना वरि ओड़ाः रे मेजको: ते गतित कू, अवुर परोसी कू जवार केतेय कहनीया, ‘ दाव मेजु: पे, इंञाँअय अडतानय भेड़ी ञँमयानयू, हेनाते इंञ सुदा खुसी पे मनो।’ 7 इंञ अपे थरेंञ कहनी यडा, जे जे बढ़ियाँ गीः हेंकू, अवुर पसतोः राः जरुरत कोवाः हेंकू, निनानबे झन होड़कू लगड हो सरग रे खुसी मेने होयाआ, लेकिन मियाँ होड़ पापी होड़ पसतोः रेदो सरग रे हेंय लगड अखीर बगरा ते खुसी होयाआ।
अडतना सिक्का रा: दिरीस्टान्त
8 “कनय मियाँ होड़ कोड़ीहोन थरे, दस गोटंग चाँदी रा: सिक्का दोहो एना। हेना मेंडे मियाँ टंग अडु: रे, हेंय ढिबरी जबके ते, अवुर ओड़ा: जो: जो: ते अयीन ञँमु: मेन दिन, मन लगय ते एरोय छपा तेड किदो? 9 अवुर हेंय ञाँमे तहाँ, अनेज रेनकू गतित कू अवुर परोसी कू, जवार के कुतेय कहनीया, ‘इंञाआँ अडतना मियाँ टंग सिक्का ञँमयना, हेना ते अपे दाव इंञ सुदा खुसी पे मनो।’ 10 इंञ अपे थरेंञ कहनी यडा, नेने घयते मियाँ होड़ पापी, पाप वरि बंचो: लगड पसतो: रेदो, भगवान रेनकू सरगदूत कू खुसी कू मनोवा।”
भुलेटहा चोंडीज रा: दिरीस्टान्त
11 हेना वरि फेरेचीय कहनी तेडा, “मियाँहोड़ होड़ रेनकींञ बा होड़ कोड़ा होपोन कींञ दोहो एना। 12 तहाँ होडी़ञाँय अपत थरेय कहनी तेडा, ‘अपा अमा: धन सम्पति वरि इंञा: बंटा हटींग वंञमी।’ हेना वरि अपत अनेज राः सम्पति बना होड़ीय हटींग वड किञाँ। 13 “कुछ दिन बितो केनरे होडीञाँय कोड़ा होपोन जो कुछ दोहो एन तय हेना सींड़ जवर केते सगींञ देस हनतेय चलो एना। हेना हँडे हेंय सींड़ पेयसा तय अलतू- फलतू तेय खरचा हनी गोत्तेडू। 14 हेंय सींड़ पेयसाय खरचा हनी गोतेड तहाँ, हेना देस रे अखीर अकाल तेडा, हेना वरि कंगाल यनते हेंय रँगेज तेय ससीतु: दोहो एनु। 15 तहाँ हेना देस रेनिय मियाँहोड़ थरे बुता छपय सेनेना, हेना वरि हेंय होड़ अनेज रेनकू सुकरी कू चरो लगाडिय कुल तेडिया। 16 अवुर हेंय कनर मेनेकू ओवाय दोहो एनु, हेंना ते हेंय रँगेज ते सुकरी कू जोमेआँ, हेना जोओ जोमके ते दोहोन मेनतेय पसींद तेडा। 17 हेना वरि ओड़ा: हनीय उहयर तेड तहाँय कहनी तेडा, ‘अपुंञ ओड़ा: रे हरवाह कू घलि कू जोम अटा गोत्तेआ, नआँ रे इंञ रँगेज तेंञ गोजु: तना। 18 इंञ अपुंञ थरे सेनको: तेंञ कहनियाँ, “अपा इंञ अमा: अवुर सरग रेनिय भगवान राः बिरूध रेंञ पाप केडा। 19 अब इंञ अम कोड़ा होपोन कहे लायीक कोवाञाँ, इंञ हरवाह घयते तेहो तम रखो विञू मेनते ” ’। 20 “हेना वरि हेंय अपत ओड़ा: हनतेय मिड़ा: मेजेना। तहाँ ओड़ा: तुकू वरि सगींञ रेय दोहोएन तोलोग मेजु: घनी अपत ञेंल ञँम केयतेय दया एना, अवुर हुंको सेनकेनते तेय ओंगोड तेडिया, अवुर अखीरिय चो:ते डिया। 21 हेना वरि कोड़ा होपोन तू कहनी तेडा, ‘ अपा इंञ सरग रेनिय भगवान अवुर अमा: बिरूध रेंञ पाप केडा, अवुर अब अमाअय कोड़ा होपोन कहे लायीक हो कोवाञाँ।’ 22 “लेकिन अपत हरवाह कू थरेय कहनी तेडा, ‘ हलीते एक दम बढ़ियाँ- बढ़ियाँआ कपड़ा अक्केते तुसींञ वयपे, अवुर तीत रे अंगठी अवुर कटत रे पनही पे तुसींञ वयू। 23 अवुर अबू खुसी मनो लगड असुल केडिय हेनी बछवा, अक्केय तेपे ञेंडू अवुर जोमकेते खुसियालीबू मनो। 24 कहेकि कोड़ा होपोनींञ गोजतन हेनी जियो रिमकेना, अडतन हेनी ञँमयाना।’ अवुर हेंकू खुसियाली कू मनो तेडा। 25 'हेना तोलोग बडेअय कोड़ा होपोन तू खेत रेय बुता दोहो एनु। हेना वरि ओड़ा: हनतेय मिड़ा: तोलोग एना, तहाँय तया: तेड दो हेंय सुसून हेना अवुर बजा सडीअय अँजोम तेडा। 26 हेना वरि मियाँहोड़ हरवाहीय राःकेयते होंबोर तेडा, ‘ बेतेआ ची होया: तना?’ 27 हेना वरि हरवाह लाय तेडा, ‘ अम बोहोम बढ़ियाँ तेय मेजकेना,हेना ते अम अपुंम असुल तडिय हेनी बछवाय एर गेडकेडा।’ 28 “नआँ अँजोम केते बडेअय धको यनु, अवुर भितर मेनेय बोलो सोगाना, हेना वरि अपत बहेर हँडेय मेज केन तेय समझो तेडिया। 29 तहाँ हेंय अपातीय जबाब वडा, ‘निमीन साल वरि इंञ अमाअंञ बुता यडा, अवुर अमा: टेबोः कबोह मेनेंञ अँजोम गोडगाडा। हेंडे रेहो अम गति कू सुदा खुसी मनो लगड, मियाँ टंग मेरोम होपोन अनमन मेनेम एमगाडिञाँ। 30 लेकिन होडीञाँय कोड़ा होपोन मी, अमा: सींड़ धन सम्पति एटाः कोड़ी कू सुदा उड़ो केतेय मिड़ा: मेजकेना। हेनी लगड अम असुल तडिय हेनी बछवाम एर गेडकेडा।’ 31 “हेना वरि अपत बडेअय कोड़ा होपोन तू थरेय कहनी तेडा, ‘बाबू, अम सरलो संदन इंञ सुदामा, जो कुछ इंञ थरे इदाना, सींड़ दो अना मआ हवे। 32 अम बोहोम गोज तन हेनी, फेरिय जियो यना, अडतन हेनी ञँमयाँ नयू, हेना ते अबु लगड खुसी मनो राः दिन हवे।' "
चलहाँकय बराहील
1 हेना वरि हेंय चेला कू थरेय कहनी तेडा, “मियाँ होड़ धनमान धन सम्पति देख- रेख लगड बराहिलीय रखो तेडा। हेंय बराहील रा: बारे ते होड़कू धन सम्पति तमिय उड़ो यडा मेनते धनमान कू लाय वडा। 2 तहाँ धनमान बराहिलीय राःके डियतेय होंबोर तेडिया, “नआँ ची घिया: टेबो: हवे, इंञ अमा: बारे तेंञ अँजोम यडा? अमा: सींड़ काम रा: हिसाब- किताब मी ओवाञू, कहेकि अम इंञ थरे बराहील एरोम दोहो सको एना। 3 हेना वरि बराहील पसींद तेडा, ‘अब इंञ चींञ बनोआँ? मालिकींञ बराहील काम वरि होय उडुंग यडिञाँ। हास पोड़ा: लगड जँगाड़ींञ हो कोवाआ, अवुर असी जोमु: होंञ गेवुआ। 4 इंञ जेर गोत्तेडंञु, इंञ चींञ ची: हेना, इंञ बराहील कमींञ बगीवा रेदो, होड़कू इंञ अपन ओड़ाः तेकू इदिञाँ कनारा जोमे लगड दोकू ओनोवाञाँ।’ 5 तहाँ हेंय अनेज मालिक थरे कू करजा तन हेंकू मियाँड होंड़- मियाँड होंड़ तेय राः केड कुते मड़ाँग:अयीय होंबोर तेडा, “अम थरे मालिक रा: करजा तिमीन इदाना।” 6 तहाँ हेंय कहनी तेडा, “सव मन सुनुम, ” तहाँ बराहील हेंय थरेय कहनी तेडा, “दुड़ूब को:ते अमा: परची रे तुरेत ते पचास मेनतेम ओल गोत्ते।” 7 हेना वरि एटागीय होंबोर तेडा, “अम थरे तीमीन करजा इदाना? हेंय कहनी तेडा, “सव बोरा गोहोम, “तहाँ बराहील हेंय थरेहोय कहनी तेडा, “अपन परची रे तुरेत ते अस्सी बोरा गिआ मेनतेम ओल गोत्ते।” 8 “मालिक हेंय जलकट होड़ चलाकी तेय काम केडा मेनाआँ तेय बडेय वडिया। कहेकि नआँ दुनिया रेनकू अपन काम वरि निपटो: लगड भगवान रेनकू होड़कू वरि हो अखीर कू हुसियारा। 9 इंञ अपे थरेंञ कहनी यडा, नआँ दुनिया रा: धन सम्पति ते, होड़कू पे मदद वते हेंकू अपन गति पे बनो कू। नआँ धन हनी: रे, सरग रे अपे खुसी तेकू मान मरजाद पेआ। 10 “कनय हो दम भरा: टेबो: रे इमानदारिय दोहोन रेदो, हेंय बडेआ टेबो: रे हो इमानदारिय दोहोना। अवुर कनय हो दम भराः टेबो: रेय ठकलबरा: रेदो, हेंय बडेआ टेबो: रे होय ठकलबराआ। 11 हेना ते अपे दुनिया रा: धन सम्पति रे मेने इमानदार पे दोहो गना, दो सरग रा: धन सम्पति अपे इया जिमा वापेआ? 12 अवुर अपे एटा: कुराः धन सम्पति रे इमानदार मेने पे दोहो गना, दो अपे लगड सरग रे इदान हेना इया ओवा पेआ? 13 “कनय हरवाह बा होड़ मालिक कींञ राः काम एरोय करो सको एना। कहेकि हेंय मियाँ होड़ सुदा परेमिय रखोआ, अवुर मियाँ होड़ एरोय बेस वडिया। अपे भगवान अवुर धन मियाँ मियाँ ते एरो पे सेवा सको एना।”
लोभिया फरीसी कू (मत्ती 11:12-13)
14 हेना वरि धन सम्पति रे भरोसा कू रखो तआ, हेंकू फरीसी कू नआँ टेबो: अँजोम केते ईसु कू मजाक तेडा। 15 तहाँ ईसु हेंकू थरेय कहनी तेडा, “अपे होड़कू मड़ंग रे बढ़ियाँ गिअंञ मेनते देखोटी पे तीबा। लेकिन भगवान अपे मन राः टेबो: घलीय पपाड़ीआ। नआँ दुनिया रेनकू होड़कू अखीर किमती गिआ मेनते कू पसींदेआ, हेना भगवान रा: नजेर रे बढ़ियाँ कोवाआ। 16 भगवान रा: टेबो: लाय हेंकू अवुर मूसा ओवाडा नियम उहाना अँगम दोहो एना। हेन वरि भगवान रा: राज रा: बढ़ियाँ: खभेर लाय यडा, सींड़ कू हेना ते सेने लगड कू कोसिस यडा। 17 अगस अवुर ओतेत मेटियोः सेथिया गिआ, लेकिन भगवान रा: टेबो: तेने मेन होडिंञाँ कनर चेका एरो मेटियो एना। 18 अवुर कनय होड़ अनेज इंगत कू बगी वते एटागी होड़ीहोन सुदाय बियाहु: रेदो, हेंय सुदा बयसा कामीय कामा अवुर कनय बगीवयाय कोड़ीहोन सुदाय बियाहु: रेदो, हेंय हो हेंय सुदा बयसा कामीय कामा।
धनी होड़ अवुर लाजर रा: उदाहरड़
19 “मियाँ होड़ अखीर धनमानिय दोहो एना, हेंय महंगा- महंगा तआ, कपड़ाय तुसींञ दोहो एनु। अवुर रोज दिन मान मनिसय जोम लिंबड़ दोहोनु अवुर मवोज मस्ती तेय दोहोन दोहो एनु। 20 हेनी दुवार रे मियाँ होड़ लाजर मेनते कू ञुमू तडिय हेनी, घाव तेय खलखँदर तन हेनी धनमान होड़ दुवर रेय दोहोन दोहो एनु। 21 धनमान होड़ थाः सीत चिली तेय जोम कयासुः लगाडिय तरसो: दोहो एनु; अवुर कुतू कुहो हेंय घावतन हेना कू जड़ा: दोहो एनु। 22 “एक दिन राः दिन रे गरीब होड़ गोजेना, अवुर सरगदूत कू हेंय अबराहम दोहो एना रेकू इदी तेडिया। हेंय धनी होड़ होय गोजेना, अवुर कू हर तेडिया। 23 अवुर नरक रे हेंय अखीर हहस तेय तड़पोः दोहोएनु। हेन तोलोग सगींञ रे अबराहामीय ञेंल ञँमतेडा। अवुर अबराहम बंदेर रे लाजर होय ञेंल ञँमतेडिया। 24 तहाँ हेंय हाक एना, ‘अबराहम अपा, इंञ थरे दयाः मी, अवुर लाजर अंगरीत लोहा केते अलाँगींञ रे दाःते तेय जोरो कयासींञ लगड मी कुल गोत्तेयू। कहेकि इंञ नआँ सेंगेल रेंञ तड़पो: तना।’ 25 “हेन तोलोग अबराहम कहनी तेडा, ‘ओ बाबु उहयारेमु, अम अपन जिनगी रे सुखे- सुख रेम दोहो एना, अवुर हेना तोलोग लाजर अखीर दु:ख रेय दोहो एना। नेय नआँ रे सान्ति तेया अवुर अम बिपेत रेमा। 26 नआँ दु:ख छोड़ अलींञ अवुर अम मँझर रे अखीर बडेआ मियाँ टंग गहीरा डोडहा इदाना, हेना ते कनय हो नआँ वरि अम हन सेन गिसन कुरे दो, एरो कू सेन सको एना, न मेना वरि अलींञ थरे एरो कू मेज सकोआ।’ 27 “तहाँ धनमान कहनी तेडा, ‘हेंडे रेदो ओ अपा, अम थरेंञ अरजी: तना, अम मेय इंञ अपुंञ ओड़ाः हनतेम कुल गोत्तेयू। 28 कहेकि पाँच झन मगंञ एडकू इदाना। हेंकू थरे सेन को:ते लाजर नआँ टेबोईय चेतवन कू, ताकि हेंकू दु:ख सहो: हेना जघा रे अलो कू मेजुऊ।’ 29 हेना वरि अबराहम धनमान थरेय कहनी तेडा, ‘हेंकू थरे मूसा अवुर भगवान रा: टेबो: लाय हेंकू रा: कागद इदाना, हेंकू हेन कुराः कु अँजोमा।’ 30 तहाँ धनमान कहनी तेडा, ‘कोवानू, अबराहीम अपा, अगर कनय मियाँ होड़ गोजको: वरि जियो को:ते हेंकू थरेय सेनु: रेदो, हेंकू अपन पाप राः माफी असी केते भगवान हनते कू मिड़ाआ।’ 31 फेर अबराहीम हेंयीय कहनी वडा, ‘जब हेंकू मूसा अवुर भगवान रा: टेबो: लाय हेंकू राः मेने कू अँजोम यडा, दो गोजको: वरि जियो रिमको: कुरा: हो एरो कू अँजोम तेडा।’
ईसु माफी रा: टेबोईय लाय तेडा (मत्ती 18:6-7, 21-22; मरकुस 9:42)
1 फेर ईसु चेला कुतय थरेय कहनी तेडा, “नआँ दुनिया रे होड़कू भगवान वरि अलग कू लगड पाप रा: परीछा मेज सकोआ। लेकिन पाप रे लोलोजोरय हेंय अखीर दु:ख रेय पड़ोआ! 2 जे होड़ नेकू होडहोडींञ कू वरि कनय मियाँ होड़ हो एर पाप केकू ते, भगवान वरि अलग कू रेदो, हेंय होड़ होटो: तुरे जनता चकी तोलके ते, समुन्दर रे अटड़ गोजेय हेना अखीर किलिस सजा घयते बुझोआ। लेकिन नआँ वरि हो भगवान बगरा सजाय ओवाया। 3 हेना ते इंञ अपे सँवचेती तेपे दोहोन लगाडींञ कहनी यडा। “कनय भाई पापे रेदो हेंय दबेट केयते पे समझो वियू, अवुर हेंय पाप वरि पसतो: रेदो माफीय पे। 4 अगर दिन भर रे सात छेव अपे रा: बिरूध रेय पापे रेदो, सातो छेव अपे थरेय मेज को:तेय कहनीयू, ‘ इंञ पाप केड हेना वरिंञ पसतो: तना’ मेनतेय कहनीय रेदो हेंय सातो छेव पे माफीयू।” 5 तहाँ पेरेरित कू परभु थरे कू कहनी तेडा, “अम थरे बगरा ते बिसवासे लगड सहेतम ओवाले।” 6 परभु कहनी तेडा, “अपे रा: बिसवास सरसों दाना मेन मोट दोहोन रेदो, ‘तुड दुबी 'पटु: को:ते समुन्दर रे सेन को:ते जड़ी चुवेरुऊ’ मेनते पे कहनी वा रेदो, हेना अपे रा: टेबो: अँजोम तेड मेनू।”
मियाँ होड़ हरवाह राः बुता
7 ईसु कहनी तेडा, “मान ले अपे मेंडे कनय रेनिय हरवाह नंगारिय सी सी चहे भेड़ीं कुय चरो। अवुर जब हेंय खेत वरिय मेजुऊ, अपे हेंय थरे ‘तुरेत ते मेजु: सी लेटे जोम लगड दुड़ूब मी’ मेनते एरो पे कहनी तेडा किदो? 8 अवुर हेंय हँडेः तेय कहनियाँ, ‘इंञ लगड लेटेम इसीनू अवुर अनायिनींञ जोमु:- चरो: मेन दिन खियो पियो वींञ मी, हेना वरि तयोम ते अम होम जोमुऊ?' 9 हरवाह कू जिमा वडकुआ काम काम हनीय रेहो मालिक हेंकू धन्यावाद एरोय ओवड कुआ। 10 नेन घयते अपे हो भगवान राः सींड़ टेबो: पे मनो रेदो, अपे नआँ या:ते पे कहनीयू, ‘अले आदर ञँम लायीक कोवा लेआ। अले दो हरवाह कू हवे, जे बुतम जिमा वड लेआ हेना भर ले बुता केडा।” ’
ईसु दस झन कुड़गा तनकूय चीकन तेडा
11 ईसु सामरिया अवुर गलील जिला मँझर तेय एरूसेलेम हनतेय चलो: दोहो एनु। 12 हेन तोलोग मियाँ टंग गाँव रेय बोल तोलोगू दस झन कुड़गा तनकूय ञँम तेडा। 13 हेंकू संगींञ वरि हाक केनते कू कहनी तेडा, “ओ ईसु, ओ मालिक, अले थरेम दयाऊ!” 14 ईसु हेंकू थरेय कहनी तेडा, “चलो: पे, सेन को:ते अपन देंह याजक कुपे ति:वा।” अवुर हेंकू चनालो: तोलोग कू सुध्द यनु। 15 हेंकू मेंडे रे मियाँ होड़ चीकन यनाञू मेना: पपाड़ी केनते, अच्छाते भगवान राः स्तुति तींग तेय मिड़ा: एना; 16 अवुर हेंय ईसु कटा दुबी रे उकड़ूम केनतेय धन्यावाद वडिया। नेय होड़ सामरी देस रेनिय दोहो एना। 17 तहाँ ईसु होंबोर तेडा, “दसो झन मेने पे सुध्द गना किदो, फिर हेंकू नव झन करे कुआ? 18 भगवान राः स्तुति लगड नेय एटागी जात छोड़ अवुर कनय मेने दोहो एना किदो?” 19 तहाँ ईसु हेनी थरेय कहनी तेडा, “अम इंञ थरेम बिसवास तेडा, हेनातेम चीकन यना रिमको:ते चलो:मी।”
बिसवास (मत्ती 24:23-28, 37-41)
20 भगवान होड़कू थरे तिमीसीय राजेआ मेनते, मियाँ एस फरीसिकू ईसु कू होंबोर तेडा, हेना वरि ईसु हेंकूय लाय वडा,“भगवान राः राज मेड ते ञेंलेआ हेना घयते मेन ञेंलुआ। 21 अवुर ‘अँजोम पे, भगवान राः राज अपे जीवी पेरे इदाना, हेना ते होड़कू न रेआ, मेना रेआ, मेनते एरो कू कहनी सको एना।” 22 हेना वरि फेर चेला कुताय थरेय कहनी तेडा, “एयसा समय मेजुआ, अपे इंञ होड़ होपोन मेजु: हेना दिन ञेंले लगड पे पसींदेआ, लेकिन एरो पे ञेंल सको एना। 23 इंञ होड़ होपोन मिड़ा: मेजयन मेनते अपे खभेर ञाँमुआ, ‘हेंय न रेया’ चहे ‘मेना रेया’ मेना: खभेर रे अलोपे बिसवासे, अवुर हेंकू तयोम ते अलो पे सेने। 24 पिलकेडवा तोलोग सींड़ कुकू ञेंलेञाँ, हेन घयते इंञ होड़ होपोन मेजु: चेका सींड़ कुकू ञें लेआ। 25 लेकिन हेना वरि पहिल ते इंञ होड़ होपोन अखीर दु:खींञ सहोआ, अवुर न जुग रेनकू होड़कू इंञ कू नहकारिञाँ। 26 “जब इंञ होड़ होपोन फेरींञ मिड़ा: मेजु: रे, दुनियाँ रेनकू होड़कू थरे, नूह राः जबाना रे होया एना हेन घयते होयाआ। 27 नूह जहाज रे अनायिनीय रकब मेन दिन होड़कू जोमु: चरो: कू अवुर बर- बियाहु: दोहो एन कू, तहाँ भरो एना अवुर कू बिलो यनु। 28 अवुर लूत राः जबाना रेहो होड़कू जोमु: चरो: दोहो एनु। लेन- देनुऊ अवुर कू खेती बरीयू अवुर ओड़ाः कू बनो दोहो एनु। 29 जे देवह सदोम देस वरि लूत उडुंग एना, तहाँ अगस वरि सलगोः हेना दिरी अवुर सेंगेल लोजोर केनते सींड़ कू भूरटो गोज तेड कुआ। 30 “इंञ होड़ होपोन मेजु: चेका हो नेन घयते होयाआ। 31 हेना चेका कनय होड़ ओड़ा: वरि बहेर रेय दोहोन रे, कनारा समान उडुंग लगड भितर अलोय बोलो देरीऊ, नेन घयते कनाय खेत रे काम हेनी हो ओड़ा: हनते अलोय मिड़ाऊ। 32 लूत इंगत कू ची एनायू उहयार तपे, सदोम राः चीज उहयार के ते तयोम हनतेय तको तेडा दो बुलुंग राः खुटाय बनो एना। 33 कनय हो नआँ दुनियाँ राः जीवन बंचोवे मेनतेय पसींदेआ, हेंय अनेज राः जीव एरोय बंचो तेडा, अवुर कनय हो इञा: चलते ते जीवितीय गवों रेदो हेंय राः जीव बंचोआ। 34 इंञ अपेंञ लाय वताना, हेना चेका बा होड़ मियाँ टंगाआ परकोम रेकींञ गितीज कोआ, मियाँ होड़ बगी अटु वया मियाँहोड़ रिम गोगेया। 35 अवुर बा होड़ कोड़ी कींञ मियाँ तेकींञ ददाड़ोआ, मियाँ होड़ रिम गोगेया, मियाँ होड़ बगी अटु वया। 36 अवुर बा होड़ खेत रेकींञ बुताआ, मियाँ होड़ रिम गोगेया अवुर मियाँ होड़ बगी अटु वया। 37 नआँ अँजोम तेड सी हेंकू ईसु कू होंबोर तेडा।“परभु न करे होयाआ?” हेना वरि ईसु हेंकू थरेय कहनी तेडा, जे जघा रे मड़ी-मटी दोहोना हेंडे, गीद कू जवारुआ ।”
बेयमानय फफस लअय और एकल कोड़ीहोन रा: उदाहरड़
1 हेना वरि फेर ईसु नआँ बिसेय तेय कहनी तेडा, किदो सरलो- संदन पे बिनतीऊ, अवुर अलो कू असकाटुः लगड नआँ उदाहरड़ीय कहनी तेडा। 2 “मियाँ टंग सहर रे निनीयोवय होड़ दोहोन- दोहो एनु। हेंय भगवान मेनेय बोरो वयु, अवुर कनय होड़ हो मेनेय गदान वकू। 3 हेनेन गाँव रे मियाँ होड़ एकल तनय कोड़ीहोन दोहो एना, अवुर हेंय थरे मेज को:तेय कहनी वयू, “इंञा: कू बिरोधी कू वरि बढ़ियाँ ते नियो केते इंञ मी बंचो विञू।” 4 कुछ समय अँगम दो हेंय मेनेय अँजोम गडा, हेना वरि तयोम ते मन रेय पसींद केतेय कहनी तेडा, “इंञ भगवान घली मेनेंञ बोरो वया, अवुर होड़कू हो मेनेंञ गदान वकुआ। 5 हेंडे रेहो नेय एकल केनय कोड़ीहोन बित्ताही तेय अफेत केडिञाँ, तयोम ते अलोय कनारिंञ लगाडू नेय बढ़ियाँ तेंञ नियों वया।’ ” 6 परभु कहनी तेडा, “नेय बढ़ियाँ ते मेनेय निनियोवय हेनी घली ची मेनतेय कहनी यडा? 7 अँजोम केडा पे नेय बढ़ियाँ ते मेनेय निनीयोवय हेनी घलि नेय कोड़ीहोन राः टेबोः अँजोम तेडा। दो भगवान अनेज चुनो केडकुः हेंकू दिन- रात हेंय थरे कू बिनती: तना, हेंकू रा: ची लगड हली ते एरोय अँजोम तेडा? 8 इंञ अपे थरेंञ कहनी यडा, भगवान तुरेत ते हेंकू राः बिनतीय अँजोम यड रेहो, इंञ होड़ होपोन मेजु: तोलोग नआँ धरती रे ठुवा बिसवासी कुंञ ञाँमा।”
फरीसी अवुर मलगुजारी तिला रा: उदाहरड़
9 कुछ होड़कू अनाकू थरे कू भरोसा तडा, किदो अले धरमी होड़कू हवे, अवुर एटा: होड़कू कू मेरंग वआ। ईसु नआँ घिया: कू लगड मियाँ टंग उदाहरड़िय लाय तेडा: 10 “बा होड़ होड़ कींञ मंडिल रे बिनती: लगड कींञ सेनेना; मियाँ होड़ फरीसी अवुर मियाँ होड़ मलगुजारी तिलाअय दोहो एना, 11 फरीसी चड़ाँ केनते नआँ घयतेय अपन मन रेय बिनती एना, ‘ए भगवान, इंञ अम धन्यावादींञ ओवा मिताना, इंञ एटा: कू होड़कू घयते लुटेर, बईमान, बयसा अवुर नेय मलगुजारी तिलाअय घयते कोवाञाँ। 12 इंञ हपता रे बार एसींञ उपासुआ, अवुर इंञ अपन सींड़ कार- कमाय रा: दसवा भाग होंञ एमेया।’ 13 “मलगुजारी तिलाअय सँगींञ रे चड़ा केनते, अपन पाप तड हेना रा: चलते ते सरग हन घली मेनेय सँगील गडा, हेंय कुड़ाम तू घीट- घीट केतेय कहनी तेडा, ‘ए भगवान, इंञ पापी होड़ थरेम दयाऊ!’ 14 इंञ अपे थरेंञ कहनी यडा, नेनी भगवान राः नजेर रे धरमीय ठहरो केनते ओड़ा: हनतेय चलो एना। लेकिन फरीसी मेने। कहेकि कनय होड़ हो अनेज बडे गीअंञ मेनतेय पसींदे रेदो, हेंय होडीञियाँ। अवुर कनय होड़ हो अनानेज होडींञ गीअंञ मेनतेय पसींदे रेदो हेंय बडेया।”
चोंडीज कू असीरवादिय ओवड कू (मत्ती 19:13-15; मरकुस 10:13-16)
15 हेना वरि होड़कू चोंडीज कुय छुवों लगड ईसु थरे कू अगतेड कू दोहो एनु; तहाँ चेला कू हेंकू ञेंल तेकू दाबेट तेड कुआ। 16 ईसु चोंडीज कू अनेज बंदे रेय राः केड कुतेय कहनी तेडा, “चोंडीज कू इंञ थरे पे इकम मेजवा कू अलो पे मंदा कू, कहेकि भगवान राः राज चोंडीज कू घिया: कुराः हवे। 17 इंञ अपे थरे सही मेतेंञ कहनी यडा, दम भराअय चोंडीज इंग आप कींञ थरे बिसवासेआ। नेन घयते भगवान थरे मेनेय बिसवासे रेदो, अवुर हेंय राः सींड़ टेबोः मेनेय मनोवे रेदो, भगवान राः राज रे हेंय एरोय सेनेना।”
धनमान होड़ अवुर भगवान सुदा हमेसा दोहन हेना जीवन (मत्ती 19:16-30; मरकुस 10:17-31)
18 यहूदी कुरेनिय मुखिया ईसुय होंबोर तेडा, “ओ बढ़ियाँ गुरू, भगवान सुदा हमेसा दोहोन हेना जीवन ञँम लगड चींञ बनोआँ?” 19 हेना वरि ईसु हेंय थरेय कहनी तेडा, “अम इंञ बढ़ियाँ गीअंञ मेनतेम कहनी वंञ तना, अवुर सहीम कहनी यडा, भगवान छोड़ अवुर कनय बढ़ियाँ कोवाआ। 20 अम अगीया दोम पपाड़ीआ: “अलोम बयसाऊ कनय अलोम ञेंड गोजू, अवुर अलोम चोचोरा, जलिया ते गोवाही अलोम लाये अपन इंगम अपुंम रअम आदर इजेतू, नआँ सींड़ अगीया दोम पपाड़ीआ।” 21 हेंय कहनी तेडा, “नआँ सींड़ इंञ चोंनोडिज वरिंञ मनो दरवार यडा।” 22 नआँ अँजोम केते ईसु हेंय थरेय कहनी तेडा, “अम थरे निहों हो मियाँ टंग टेबो: रा: कमी इदाना, अमा: सींड़ धन सम्पति केजा केते गरीब कुम हटींगवा, हेंडे अम लगड सरग रे अखीर धन ञँमुआ। पहिल ते नअँम करो, फेर इंञ तयोम तेम सेने।” 23 तहाँ धनी होड़ नआँ टेबो: अँजोम केते जीवीत खोट यनु, कहेकि हेंय अखीर धनमानिय दोहो एना। 24 ईसु नेय होड़ ञेंलके तेय कहनी तेडा, “जे धनी होड़कू अपन जिवन रे भगवान मेने कू इकम राज वया, नेकू घिया: कू भगवान राः राज रे सेनु: लगड अखीर किलीस गिआ। 25 ऊँट सुजी बुचा: ते खँडाः तिमिन किलीस गिआ, लेकिन नआँ वरि हो भगवान राः राज रे धनी होड़कू सेनु: लगड अखीर किलीस गिआ।” 26 नआँ टेबो: अँजोम तेडकू कहनी तेडा, “हेंडे दो इया बंचोआ?” 27 ईसु कहनी तेडा, “होड़कू मेने सकोः हेना भगवान सकोआ।” 28 तहाँ पतरस कहनी तेडा, “अँजोम मी, अले ओड़ा: भर रेनकू सींड़ कू बगी वते अम तयोम तेले सेनयाडा।” 29 हेना वरि ईसु हेंकू थरेय कहनी तेडा, “अपे थरे इंञ सही मेतेंञ कहनी यडा, अगर भगवान राः राज लगड ओड़ा: चहे इंगत कू, चहे मगत कू, चहे इंगत- अपत, अवुर चोंडीज कुय बगी वड रेदो। 30 नआँ जिवन रेहो केय गुना ञँमुआँ। अवुर मेजु: तना, जुग रे भगवान सुदा हमेसा दोहोन हेना जीवन कू ञाँमा।”
ईसु अनेज कू ञेंड गोजेया अवुर तीसरा दिन रेय जियो रिमुआ हेनाय लाय तेडा (मत्ती 20:17-19; मरकुस 10:32-34)
31 हेना वरि ईसु बारहो झन चेला कू अनेज सुदय गो:तेड कुआ। हेना वरि हेंकू थरेय कहनी तेडा, “अबु निहो एरूसेलेम सहर हनतेबू चलो: तना, अवुर इंञ होड़ होपोन राः बिसेयते पहिल पहिला: कू, भगवान रा: टेबो: लाय हेंकू रा: दोवारा ते जेयसे कू ओल केडा, हेना सींड़ उतरोआ। 32 अवुर इंञ दुस्मन कुराआ हाथ रेकू जिमाञाँ, अवुर हेंकू इञाँ: मजाक कू उड़ोआ, अवुर इंञ कू मेरंग वञाँ, अवुर इंञ थरे कू बेजेआ। 33 अवुर इंञ कोड़ा (चित्र) तेकू ञेंडेञाँ, अवुर कू गोजेञाँ, अवुर इंञ तीसरा दिन रेंञ जियो रिमुआ। 34 लेकिन चेला कू नआँ टेबोः कनय मेने कू जेर गडा, अवुर नआँ टेबोः राः मतलोब तू उकू तना, अवुर जे कहनी तेडा हेना टेबोः हेंकू मेने कू जेर गडा।
अंदहा भिखारी (मत्ती 20:29-34; मरकुस 10:46-52)
35 ईसु अवुर चेला कू यरिहो सहर बंदे तया: तेड दो, मियाँ होड़ अंदहा भिखारी होर अड़ी रेय दुड़ूब तना। 36 हेना वरि होड़कूय अनवर केते होंबोर तेडकूआ, “ची होया: तना?” 37 हेना वरि हेंकू लाय वडिया, “नासरेत सहर रेनिय ईसु चलो: तना।” 38 हेना वरि अंदहा हेना अँजोम केतेय हाक एना, “ओ दाऊद खनदान रेनिय ईसु, इंञ थरेम दयाऊ।” 39 मड़ंग-मड़ंग तेकू सेने दोहो एनकू, जपनो को: लगड कू दाबेट सोताडिया, लेकिन हेंय अवुर अच्छा तेय अहीज एना, “ओ दाऊद खनदान रेनिय ईसु, इंञ थरेम दयाऊ।” 40 हेना वरि ईसु चँड़ा केनते हेंकू थरेय कहनी तेडा, “इंञ थरे पे अगेयू” तहाँ बंदेतीय तेयाः तेड दो ईसु अंदहाय होंबोर तेडा। 41 “अम चीम ञँम बेड़ा यडा? इंञ अम लगड चींञ बनोआँ?” तहाँ अंदहा कहनी तेडा, “परभु इंञ ञेंल गिसन यडिञाँ।” 42 हेना वरि ईसु हेंय थरेय कहनी तेडा, “अम इंञ थरेम बिसवास केडा तेम चीकन यना, निहो वरि अम ञेंल सको आमू।” 43 हेना वरि हेंय तुरेत ते मेडतू जीज यनु, तहाँ भगवानीय बडेय वडते ईसु तयोम तेय सेनेना, अवुर सींड़ होड़कू ञेंलके डीय ते भगवान राः कू स्तुति तेडा।
जकाई रा: मन ईसु ञेंलके ते बदलो जोमा
1 ईसु यरीहो सहर बोलो केनतेय खँडाः दोहो एनु। 2 हेना रे जक्काई मलगुजारी तिला कुरेनिय मुखियाय दोहो एना, हेंय धनमानीय दोहो एना। 3 ईसु काय हवे मेनते ञेंलेय लगड जक्कई पसींद तेडा। लेकिन हेंय भीड़ रा: चलते ते मेनेय ञेंल सको गना, कहेकि हेंय नटवय दोहो एना 4 तहाँ हेंय ञेंलेय लगड मड़ंग हनते हुंको सेन केनते मियाँ टंग डुमरी काठ रेय रकब यनु, कहेकि ईसु हेनेन गली तेय सेनु: दोहो एनु। 5 ईसु हेना जघाय तया: तेडसी, अगस हन ञेंल केड ते हेंयीय कहनी वडु, “ए जक्काई, हली तेम अगडुऊ; कहेकि तेसींञ इंञ अम ओड़ा: रे दोहोन जरूरी इदाना।” 6 तहाँ हेंय तुरेत तेय अगडु एना, अवुर खुसी यनते अनेज ओड़ा: हनतेय गो:तेडिया। 7 हेना ञेंल ते सींड़ होड़कू कुरू-बुसू केनते कू कहनी तेडा, “मेय दो मियाँ होड़ पापी ओड़ा: रेय सेन उतरो केना।” 8 हेना वरि चड़ाँ केनते जक्काई परभु थरेय कहनी तेडा, “ए परभु, अँजोम मी, इंञा: अदहा सम्पति गरीब होड़कुंञ ओवाआ। अगर कनय रा: ठको केडकू तेंञ अंगेर केड रेदो हेंकू चार गुनांञ मिड़ा: वकुआ।” 9 तहाँ ईसु कहनी तेडा, “तेसींञ अमाः अवुर अपे ओड़ा: रेनकू राः पाप वरि माफी ञँम यना, अम अपन काम तेम तिबकेडा, अम हो अबराहम घयते भगवान थरेम बिसवास केडा। 10 कहेकि इंञ होड़ होपोन भगवान वरि अलग यन हेंकू होड़कू, छपा कू लगड अवुर बंचो कू लगाडींञ मेज केना।
दास गोटंग चाँदी रा:सिक्का (मत्ती 25:14-30)
11 ईसु जो कुछीय कहनी दोहो एनु, हेना होड़कू अँजोमे दोहो एनु। हेंकू एरूसेलेम कू तेया: दोहो एनु, ईसु हलिते राजा बनो को:ते भगवान राः राजीय बोहड़ींआ मेनते कू अड़ींग दोहो एनु। हेनाते ईसु मियाँ टंग उदाहरड़िय कहनी तेडा। 12 ईसु कहनी तेडा,“मियाँ होड़ राजा होपोन राजा बनो कोःते मिड़ाः मेजुः लगड सगींञ देस हनतेय चलो एना। 13 चलो: वरि पहिल ते अपन हरवाह कू मेंडे हेंय दस झन हरवाह कुय राः तेडा। अवुर हेंकू चाँदी राः कुछ सिक्कय ओवड कुआ, तहाँ हेंकू थरेय कहनी तेडा, ‘इंञ अनायीनींञ मिड़ा: मेजु: मेन दिन अपे लेन देन को:ते पे बढ़ो हताड़े।’ 14 लेकिन हेना सहर रेनकू हेंय मेने कू बेस गडिय दोहो एनु, तयोम ते खभेरिया कू थरे नआँ या: ते खभेर कू कुलतेडा किदो, “मेय अले थरे राजे लगड मेने ले चहो: तना” मेनते। 15 “हेंडे रेहो हेंय होड़ राजा बनो केनतेय मिड़ा: मेजेना, तहाँ सिक्कय ओवड कु: हेंकू, तिमीन कू कमाय केडा मेनाआँ पपाड़ी लगड दसो झन हरवाह कू अनेज थरेय एर रा: तेड कुआ। 16 हेना वरि मड़ाँगअय मेज केनतेय कहनी तेडा, “ए मालिक, अम ओवाडिञाँ सिक्का ते अवुर दस गोटंग सिक्कांञ कमाय केडा।” 17 तहाँ हेंय हेनी थरेय कहनी तेडा, “अम दम भरा: रे घली इमानदार मी उडुंग एना, अम बढ़ियाँ अय हरवाह हवे। अब वरि अम दस गोटंग सहर रेम राजे।” 18 हेना वरि अवुर मियाँ होड़ मेज केनतेय कहनी तेडा, “ए, मालिक, अम ओवाडिञाँ सिक्का ते अवुर पाँच गोटंग सिक्कांञ कमाय केडा।” 19 हेना वरि हेनी थरे होय कहनी तेडा, “अम हो पाँच गोटंग सहर रेम राजे।” 20 हेना वरि अनावुर मियाँ होड़ मेजकेन तेय कहनी तेडा, “ए मालिक, अम ओवाडियाँ सिक्का नेयाना, नआँ इंञ उरमल रे घंटी केतेंञ दोहो तडा। 21 इंञ आमींञ बोरोवा दोहो एनु, कहेकि अम खतरनाक होड़ हवे, जहाँ रे मेनेम दोहोया, हेना वरिम रिम गोगेआ, अवुर अम मेनेम मेरेआ हेना वरि होम ई रेआ।” 22 तहाँ हेंय हेनी थरेय कहनी तेडा, “ए कोढ़िया हरवाह, इंञ अनामा: टेबो: तेंञ बदी यडमीआँ। अम पपाड़ी दोहो एनु, इंञ खतरनाक होड़ हवे, जहाँ रे मेनेंञ दोहो तआ, हेना वरि होंञ रिम गोगेआ, अवुर जहाँ रे मेनेंञ मे रेआ हेना वरि होंञ ई रेआ; 23 दो अम इंञा: पेयसा बेंक रे ची लगड मेनेम दोहो गडा,? इंञ मेजकेन ते ब्याज तू सुदांञ तिला तेड मेनु।” 24 “अवुर जे जे होड़कू ठांव रेकू चड़ाँ तना, हेंकू थरेय हेंय कहनी तेडा, “मेना सिक्का मेय वरि पे असीयू, जे थरे दस गोटंग सिक्का इदाना हेंय पे ओवा।” 25 हेना वरि हेंकू मालिक थरे कू कहनी तेडा, ‘ ए मालिक, मेय थरे दो दस गोटंग सिक्का इदाना।’ 26 हेना वरि राजा कहनी तेडा, ‘जे थरे इदाना, हेंय अवुर ओवाया, अवुर जे थरे कोवाआ हेंय थरे जो कुछ इदाना हेना हो अंगेर अविया। 27 इंञा: कू दुस्मन कू अकू थरेंञ राजे लगड मेने चहो गन कू, इंञ मड़ंग रे अक्केकुते पे ञेंड गोजकू।”
एरूसेलेम रे ईसु कू आदर इजेत तेडा (मत्ती 21:1-11; मरकुस 11:1-11; उहाना 12:12-19)
28 नआँ टेबोः कहनी केते ईसु चेला कू सुदा एरूसेलेम सहर हनते चलो: तोलोग, हेंकू मड़ंग- मड़ंग तेय सेने दोहो एनु। 29 हेना वरि ईसु जयतुन मेनते कू कहनी वआ हेना रे, बयेतफगे अवुर बयतानियाह गाँव थोवीय तया: तेड दो ईसु बा होड़ चेला कींञ तय थरे न या:ते कहनी केतेय कुल तेडकीञाँ। 30 “मेना मडंग हँडा: गाँव रेबा सेनुऊ, अवुर जेयसे हेना बा तया: सी, मियाँ टंग गदही होपोन बा ञाँमा, हेंय थरे कनय बेगर घोड़ा बेड़ाआ। तोलके डिया कू हेंय लड़ा केते बा अगेयू। 31 अगर कनय होड़कू, ‘ची लगड बा लड़ा यडिया’ मेनते कू होंबोर बा रेदो, न या:ते बा कहनीयू, ‘परभु ईसु लगड नेय राः जरुरत इदाना।’ ” 32 कुलतड कींञ हेंकीञ चेला कींञ ईसु जेयसे हेंकीञ थरेय लाय तेडा, हेनेन घयते गदही होपोन तोलता डिय घनी कींञ ञँमतेडिया। 33 तहाँ हेंकींञ गदही होपोन कींञ लड़ा तोलोग मुँवर तुकू होंबोर तेडकिञाँ, “नेय गदही होपोन ची लगड बा लड़ा यडिया?” 34 हेना वरि हेंकीञ कहनी तेडा, “परभु ईसु लगड नेय राः जरुरत इदाना। 35 हेना वरि हेंकीञ लड़ा केडिय ते, ईसु थरे कींञ इदी तेडिया, तहाँ गदही होपोन थरे अपन कपड़ा तकुकू लदगो तेडा, अवुर ईसु हेंय थरेय घोड़ा एना। 36 हेना वरि ईसु एरूसेलेम सहर हनतेय सेनु: तोलोग, भीड़ रेनकू होड़कू स्वागतेय लगड, कपड़ा तकू होर तेकू बीले दोहो एनु। 37 हेंकू जयतुन काठ इदान हेना बुरू राः उतरान्ती बोहड़ींआ, हेना जघा वरि सींड़ चेला कू अपन मेंड ते चमत्कार काम कू ञेंलताडा हेना राः चलते ते, खुसी यन ते बडे-बडे तेकू सिरिंग एना, अवुर भगवान राः कू बड़हाई तेडा।” 38 “परभु राः ञुमू तेय मेजु: तना हेनी राजा भगवान आसिसीय ओवाया। अवुर होड़कू मँझर रे सांति दोहोनू, अगस रे भगवान राः बड़हाई होयाऊ!” 39 तहाँ भींड वरि कुछ फरीसी कू ईसु थरे कू कहनीय दोहो एनु, “ए गुरू, चेला कुताम मी दाबेटू।” 40 हेना वरि हेंय जबाब तेडा, “इंञ अपे थरेंञ कहनी यडा, अगर नेकू जपनो को: रेदो इंञ लगड दिरी घली बड़हाई वञाँ।”
ईसु एरूसेलेम रेनकू लगाडीय पसतो एना
41 जब ईसु एरूसेलेम सहर बंदेरिय तया: तेड दो, एरूसेलेम सहर ञेंलके तेय इयाम एना। 42 अवुरिय कहनी तेडा, “भगवान सुदा सान्ति ते दोहोन हेना टेबो: तेनेसींञ पे पपाड़ी एन रेदो बढ़ियाँ दोहो एन मेनु, लेकिन अब वरि सींड़ टेबो: भगवान अपे वरिय उकू गोत्तेडा। 43 कहेकि एयसा दिन मेजु:आ, अपे रेनकू दुसमन कू चरो गतर वरि कू घेरो केपे तेकू बन्द पेआ। 44 अपे अवुर चोंडीज कू अपे सुदा कू दोहोना, हेंकू नास केकू ते हास रेकू मिलो कुआ, अवुर नआँ राः सींड़ ओड़ाः कू नासेआ। दिरी उपर दिरी एरो दोहो एना, कहेकि अपे भगवान बंचो पे लगड मोकय ओवड पेआ, हेना अपे मेने पे चिन्हो गडा।”
मंडिल वरि बेयपारी कुय उडुंग तेडा (मत्ती 21:12-17; मरकुस 11:15-19; उहाना 2:13-22)
45 हेना वरि ईसु एरूसेलेम रा: मंडिल रे सेनकेन ते केकेजा कू बहेर हनतेय उडुंग कू दोहो एनु। 46 अवुर हेंकू थरेय कहनी तेडा, “भगवान राः कगद रे ओलकेना, इंञ ओड़ा: बिनतीआ ओड़ाः दोहोना, लेकिन अपे नआँ चोर कुरा: ओड़ा: पे बनो गोत्तेडा।” 47 हेंय रोज दिन मंडिल रे सिकछाय चेडकू दोहो एनु; अवुर बडे-बडे याजक कू अवुर नियम चेचेड कू अवुर होड़कू रेनकू एटा:-एटा: नेता कुहो ञेंड गोजेय मेनते मोका कू ञँम बेड़ा दोहो एनु। 48 लेकिन हेंकू न घयते करोवे लगड कनर मोका मेने कू ञँमगाडा, कहेकि सींड़ होड़कू मन लगय ते हेंय राः टेबो: कू अँजोम दोहो एनु।
यहुदी कू ईसु कू होंबोर तेडा (मत्ती 21:23-27; मरकुस 11:27-33)
1 एक दिन राः दिन रे ईसु मंडिल रे होड़कुय चेड दोहो एनु, अवुर सुसमाचारिय लाय दोहो एनु। बड- बडे याजक कू, अवुर नियम चेचेड कू, अवुर सपायँड़ कू मेजकेन ते हेंय बंदे रेकू चड़ाँ यनु। 2 तहाँ कू होंबोर तेडिया, “अलेम लाय वा, अम नआँ काम लगड अघिकार इया ओवाड मिआ, इया रा: अघिकार ते नआँ सींड़ मी काम यडा?” 3 तहाँ हेंय हेंकूय जबाब वडा, “इंञ हो अपे मियाँ टंग टेबोइंञ होंबोर यड पेआ, अपे लायेपे। 4 युहन्ना बतिसमाय एम तेडा हेना, भगवान हन वरि दोहो एना, किदो होड़कू हन वरि दोहो एना?” 5 हेना वरि अनाकू- अनाकू कहनी ओड़ेंग एना,“अबु कहनीयू, ‘भगवान हन वरिय दोहो एना,’ मेंडे रेदोय कहनी वबुआ, फेर ‘अपे हेंय रा: ची लगड मेने पे बिसवास गडा?’ 6 अगर बु कहनीयू, ‘होड़कू हन वरि दोहो एना,’ मेंडे रेदो सींड़ होड़कू अबु दिरी तेकू ञेंड बुआ, कहेकि नेकू होड़कू सींड़ कुकू बिसवासेआ, किदो युहन्ना भगवान राः टेबोः लाय हेनी दोहो एना।” 7 तहाँ हेंकू ईसु कू जबाब वडा, “अले मेने ले पपाड़ी तना, उहाना अधिकार इया ओवाडिया।” 8 हेना वरि ईसु कहनी तेडा, “हेंडे दो इंञ हो अपे एरोंञ लाय वडपेआ, नआँ काम इया राः अघिकार तेंञ करो यडा।”
किसान कुरा: उदाहरड़ (मत्ती 21:33-46; मरकुस 12:1-12)
9 हेना वरि ईसु होड़कू थरे मियाँ टंग उदाहरड़िय कहनी तेडा, “मियाँ होड़ होड़ अंगुर राः बगानीय लगो तेडा। हेना वरि अधिया ते देख- रेखे लगड किसान कू थरेय जिमा अटु केते, अखीर दिन लगड एटाः देस हनतेय चलो एना। 10 हेना वरि अंगुर गोड राः समय मेजेना, तहाँ बगान रा: कुछ बंटा असी लगड किसान कू थरे मियाँ होड़ हरवाहिय कुल तेडा। हेना वरि हेंकू किसान कू ञेंड बेड़ा वडिय तेकू कुल गोतेडियू। 11 हेना वरि फेर हेंय होड़ एने टगी हरवाहीय कुलतेडा, हेना वरि हेंय हो ञेंड बेड़ा वडिय अवुर मजाक कू उड़ो केडिय ते एके तेकू कुल गोत्तेडियू। 12 हेना वरि हेंय होड़ फेरेच मियाँ होड़ हरवाहीय कुलतेडा, हेना वरि हेंय हो हेनेन घयते कू ञेंड दल मुला केडिय तेकू उडुंग गोत्तेडियू, 13 “हेना वरि अंगुर बगान रेनिय मुवर तू अपन मन-मन रेय कहनी तेडा, ‘इंञ चींञ बनोआ? इंञ बढ़िञाँ अय दुलर कोड़ा होपोनींञ हेंकू थरेंञ कुलेया, हेंय दोकू बेस वया जहानू।’ 14 मेनते पसींद केते अपन दुलाराय कोड़ा होपोन तुय कुलतेडा। हेना वरि किसान कू ञेंलके डिय ते अनाकू सलाह ओड़ेंगू। ‘अपत राः मेनी राः हाँथ- गाँथ होयाआ, हेना ते नेय ञेंड गोजेय बू, हेना वरि अंगुर बगान अबु राः हाँथ-गाँथ रे होयाआ।’ 15 अवुर हेंकू अंगुर बगान वरि तीड़खो उडुंग केडिय तेकू ञेंड गोज गोत्तेडियू।“ हेंडे नीहो अंगुर बगान रेनिय मुवर तू हेंकूय ची कुआ? 16 हेंय मेज को:ते हेंकू किसान कुय नास कुआ, अवुर अंगुर बगान एटा: किसान कुय जिमा वआ।” हेना वरि अँआँजोम कू होड़कू कहनी तेडा, “भगवान न घयते कभी एरोय ईकावडा।” 17 “हेना वरि ईसु हेंकू हनते तको केतेय कहनी तेडा, “फेर भगवान रा: कगद रे का:ते ओल केना, ‘जे दिरी राज मिसतिरी कू बढ़ियाँ कोवा: मेनते कू मेरंग वडा, हेनेना दिरी कोना राः बनो एना।’ 18 अवुर कनय हेना दिरी रेय लोजो रु: रेदो, हेंय राई- छाई अयू, अवुर कनय थरे हो हेना दिरी लोजो रु: रेदो, हेंय लेंगेज चुवेरुअयू।”
रोमी सरकार लगड मलगुजारी (मत्ती 22:15-22; मरकुस 12:13-17)
19 नियम चेचेड कू, अवुर बड- बडे याजक कू हेंय हेनेन तोलोग सबेय मेनते कू सँबह तना, कहेकि हेंकू पपाड़ीयन किदो अबु पसींद केते नआँ उदाहरड़िय कहनी तेडा, लेकिन होड़कू कू बोरो वडा ते मेने कू सबगाडिया। 20 हेंकू ईसु कनर न कनर टेबो: रे गलती लोजोर केयते, रोमी राजपाल थरे एर पकड़ोविय रा: मोका कू ञँम बेड़ा दोहो एनु। नआँ लगड यहूदी होड़कू रेनकू नेता कू टेबो: चोरा लगड सही मेते ईसु रा: टेबोः अअँजोम कुरा: भेस तेकू कुलतेड कुआ। 21 टेबो: चोचोरा कू हाँ:तेकू होंबोर तेडिया, “ए गुरू अले पपाड़ी: तना ले अम बढ़ियाँ तेम लायेआ, अवुर मी चेड यड कुआ, अवुर कनय गतर हँडे मेनेम मेड़वाआ, अवुर भगवान राः होर सही- सही तेम लाय वकुआ। 22 अलेम लायवा केयसर लगड मलगुजारी एम जरूरी इदान किदो कोवाआ?” 23 हेंय हेंकू राः हुसयारी ञेंल तेय कहनी तेडा, 24 “एक दिनार राः सिक्का इंञ पे ओवा। ना रे इया राः छाप अवुर ञुमू इदाना?” हेना वरि हेंकू कहनी तेडा, “केयसर रआ।” 25 हेना वरि हेंय कहनी तेडा, “केयसर जो कुछ पे ओवाआ हेना केयसर पे ओवा, भगवान जो कुछ पे ओवाआ, हेना भगवान पे ओवा। 26 हेंकू होड़कू मडंग रे न टेबो: ते मेने कू पकड़ो सको गना, अवुर हेंय राः जबाब अँजोम केते कू अचरज यनते कू जपनो यनु।
जियो रिमु: अवुर बियाह (मत्ती 22:23-33; मरकुस 12:18-27)
27 सदूकी कू गोज को: वरि एरो कू जियो रिमेना मेनते बिसवासे: कू दोहो एना। हेंकू मेंडे रे कुछ होड़कू ईसु थरे मेजकेन तेकू होंबोर तेडिया। 28 “ए गुरू, अबु लगड नआँ घयते मूसा नियम ओल केतेय एमकेडा, अगर कनय होड़ बेगर चोंडीज कू जनमो ते इंगत कुय गोज उर अटु रे, हेंय कोड़ीहोन ईरवील तू बियाहियू, अवुर हेंय मगत लगड चोंडीज कुय जनमो। 29 मियाँ टंग गाँव रे सात झन मगी यकू दोहो एना, बडेअय मगत कू बियाह केडियते हेंय बेगर चोंडीज कू वन तेय गोजयनु। 30-31 तहाँ हेंकू जेतना कू गोज चलोऊ, हेना वरि हेंय कोड़ीहोन सुदा, सातो झन ईरवील तुकू मियाँयड होड़- मियाँयड होड़ तेकू बियाह तेडिया, अवुर हेंकू हो बेगर बल- बाच्चा तेकू गोजयानू । 32 अखरी रे हेंय कोड़ीहोन होय गोजयनु। 33 दो जियो रिमु: रे हेंकू मेंडे रे काय कनियाँय होयाआ, कहेकि हेंकू सातो झन कू कनिया तेडिया।” 34 हेना वरि ईसु हेंकू थरेय कहनी तेडा, “नआँ दुनिया रेदो होड़कू बर- बियाहुआ। 35 सरग राज रे जे भगवान सुदा दोहोन लायीक इदाना, हेंनकू गोजको: वरि जियो रिमुआ, अवुर हेना रे हेंकू एरो कू बर- बियाह एना। 36 अवुर गोज को: वरि भगवान जियो केड कुआ, हेनाते हेंकू भगवान रेनकू चोंडीज कू हवे। अवुर हेंकू सरगदूत कू घयते कू दोहोना, अवुर कबोह एरो कू गोजेना। 37 गोजकोः वरि जियो रिमुआँ मेनाआँ टेबों: मूसा होय लाय केडा, जब हेंय झवुड़ सलगो एना हेना रा: बारे तेय ओल केडा, हेना तोलोग मूसा, अबराहम रेनिय भगवान, इसहाक रेनिय भगवान अवुर अकूब रेनिय भगवान मेनमेय हाक दोहो एनु। (हेना तोलोग अबराहम, इसहाक अवुर अकूब पहिल तेकू गोजताना)। 38 भगवान गोज केन कुरेनिय ना लगे, हेंय दो जीवत कुरेनिय भगवान हवे, कहेकि हेंय नंजेर रे सींड़ कुकू जीवत गिआ।” 39 नआँ टेबो: अँजोम केते अहूदी नियम लाय कू मेंडे कुछ होड़कू कहनी तेडा, “ए गुरू, अम नआँ बढ़ियाँ तेम कहनी तेडा।” 40 फेर हेंकू अवुर होंबोरिय लगड मेने कू हियो गडा।
मसीहा इया होपोन हवे? (मत्ती 22:41-46; मरकुस 12:35-37)
41 हेना वरि फेर ईसु हेंकूय होंबोर तेडा, “मसीहा दाऊद पीढ़ी रेनिय मेनते ची लगड कू कहनी वया? 42 दाऊद अनेज भजन सहिंता राः कागद रेय कहनिया, ‘भगवान इञाँअय परभु थरेय कहनी तेडा। 43 “इंञ अमा: कू दुस्मन कू अनायीन हरो कू मेन दिन इंञा: जोम गतर आदर इजेत जघा रेम दुड़ुबू।” ’ 44 दाऊद अनेज मसीह दो परभु मेनतेय कहनी वया, हेना वरि करे:ते हेंय पीढ़ी रेनिय होया एना?”
नियम चेचेड कू वरि खबेरदार (मत्ती 23:1-36; मरकुस 12:38-40; लूका 11:37-54)
45 नआँ टेबोः सींड़ होड़कू अँजोमे तोलोग हेंय चेला कू थरेय कहनी तेडा, 46 “नियम चेचेड कू वरि बच- बच तेपे दोहोनू। नेकू जोंगोर जोगोरा कपड़ा तुसींञ केते होयोर बेड़ा: बढ़ियाँ वकुआ। अवुर बाजार ते एटा: कू जोहार वकु: हेना, अवुर गिरजा ओड़ाः ते, अवुर खवा पिवा: जघा ते मड़ंग हँडे दुड़ूब बढ़ियाँ वकुआ। 47 नेकू एकल को: कुराआ धन सम्पति होकू छरो जोमा, ञेंलेञ मेनते दो अखीर देरी अँगम मेनते कू बिनतीआ। भगवान नेकू अखीर ते सजाय ओवाकुआ।”
एकल तनय कोड़ीहोन राः दान (मरकुस 12:41-44)
1 धनी होड़कू अपन-अपन दान मंडिल राः पेटी रे कसोवे तोलोग ईसु ञेंल वड कुआ। 2 हेना रे मियाँ होड़ एकल तनय कोड़ीहोन हो, बा टंग दम- दमा तँबा राः सिक्का कसोवे तोलोगीय ञेंलवा डिया। 3 तहाँ ईसु कहनी तेडा, “इंञ अपे थरे सही मेतेंञ कहनी यडा, नेय एकल केनय कोड़ीहोन सींड़ कू वरि बगरा दानिय लोजोर केडा। 4 कहेकि नेंकू सींड़ कू अपन-अपन बढ़ती वरि कुछ दान कू लोजोर केडा। लेकिन एकल केनय अनेज थरे जियो जोमू: मेन दोहो एना, हेना हो सींड़ दानिय लोजोर केडा।”
ईसु मड़ंग हँडा: रा: बारे तेय लाय तेडा (मत्ती 24:1-14; मरकुस 13:1-13)
5 ईसु रेनकू चेला कू मेंडे, कुछ होड़कू मंडिल राः बिसेय ते हाँ: तेकू कहनिय दोहो एनु, बढ़ियाँ- बढ़ियाँ दिरी ते अवुर होड़कू भगवान राः मंडिल सजो लगड जो जो दान एमकेड हेना ते तिमीन बढ़ियाँ ते मंडिल कू सिंगर केडा। 6 तहाँ ईसु कहनी तेडा, “एयसा समय मेजु: तना, न रे अपे जेतना पे ञेंलयाडा, नआँ सींड़ कू उजाड़ेआ दिरी ऊपर दिरी हो एरो दोहो एना।”
संकट अवुर कलेस
7 हेना वरि चेला कुताय ईसु कू होंबोर तेडा, “ए गुरू, न सींड़ तिमीस होयाआ? अवुर नआँ सींड़ टेबो: पूरो: रेदो, हेना समय मेजु: वरि मड़ंग ते ची घिया: चिन्ह ञेंलुआ?” 8 हेना वरि हेंय कहनी तेडा, “कनय हो बहको पेआ मोका अलोपे ओवाकू, कहेकि इंञ ञुमू ते अखीर होड़कू मेजुआ, अवुर नआँ या:ते कू कहनिया, ‘इंञ मसीहा हवे’, अवुर हाँ: तेहो कू कहनिया ‘समय मेजयाना’ हेना तोलोग अपे हेंकू थरे अलो पे बिसवासे। 9 अपे लड़नी राः चरचा पे अँजोम रे अलो पे बोरू, कहेकि न सींड़ टेबोः मड़ंग ते जरूर होयाआ, लेकिन हेना तोलोग तुरेत ते अंत एरो होया एना।” 10 ईसु हेंकू थरे फेरिय कहनी तेडा, “एटा: जात कू एटा: जात कू सुदा, अवुर एटा: राज रेनकू एटा: राज रेनकू सुदा कू लड़ायुआ। 11 बडे-बडे ते भूईडो लुआ, जघीन जघा ते आकालेआ, अवुर बडे-बडेआ रोग मेजुआ, अगस वरि बोर बुकूरा टेबोः, अवुर बडा-बडेआ चिन्ह चमत्कार देखारूआ। 12 “लेकिन नआँ सींड़ टेबोः वरि मड़ंग ते, हेंकू इंञाँ: चलते ते अपे कू एर पकड़ोआ, अवुर कू सतो पेआ, अवुर अहूदी कुराः गिरजा ओड़ा: रेकू इदी पेआ, जेहेल रेकू डलो पेआ, अवुर राजा कू थरे अवुर अधिकारी कू थरे कू इदी पेआ। 13 लेकिन नआँ तोलोग अपे इञाँआ गवाही हेंकू मड़ंग रे लाये लगड मोका ञँमुआ। 14 अवुर अपे बिरोध रेकू टेबोगेआ, हेना राः जबाब का: तेले एमेआ, मेनाआ मड़ंग ते अलो पे पसींदे। 15 इंञ अपे हेंकू मड़ंग रे सही जबाब एम लगाडींञ लाय वपेआ, अपे रेनकू विरोधी कू अपे रा: टेबोः रा: जबाब एरो कू एम सको एना। 16 इंञ थरे मेने कू बिसवासे: कू इंगापे-अपापे कू अवुर भाई पटी कू, कुटुम्ब कू, अवुर गति पेकू, नेकू एर सबपे अकू, अवुर अपे मेंडे कुछ होड़कू कू एर ञेंड गोजकुआ। 17 सींड़ होड़कू इंञ ञुमू राः चलते तेकू बिरोध पेआ। 18 लेकिन हेंकू अपे राः कनारा एरो कू उजाड़ तेडा। 19 अपे सहो एनेज रेदो अनापे रा: जीव पे बंचोआ।”
ईसु एरूसेलेम उजाड़ू: राः बारे तेय लाय तेडा (मत्ती 24:15-21; मरकुस 13:14-19)
20 “अपे एरूसेलेम सहर, बिरोधी कू घेरोता तोलोग पे ञेंले रेदो, अपे पपाड़ी किदो नआँ बिलो: रा: समय मेजयाना। 21 हेना तोलोग कनय हो यहूदी देस रेय दोहोना, हेंय बुरू हनतेय ञींर जियोऊ; अवुर कनय हो एरूसेलेम सहर रेय दोहोना हेंय हेना सहर वरि बहेर हनतेय ञींरू; अवुर कनय हो सहर वरि बहेर हँडेय दोहोन रेदो, हेंय सहर हनते अलोय मिड़ाऊ। 22 कहेकि हेना चेका भगवान बदलाय मिड़ा: रा: दिन होयाआ, अवुर भगवान राः कगद रे ओल केना सींड़ टेबो: पुरा होयाआ। 23 हेना तोलोग असापति रेय दोहोना हेंय, अवुर बले कू दुदु कू पियो हेंकू कोड़ी कू अखीर दु:ख रेकू पड़ोआ, कहेकि देस रे अखीर बिपेत मेजुआ, अवुर भगवान सींड़ होड़कू सजाय ओवा कुआ। 24 केय झन होड़कू दो तलवार तेकू ञेंडुआ, अवुर सींड़ देस रेनकू होड़कू एरूसेलेम रेनकू होड़कू गुलामी बनो केकुतेकू गो:कुआ। भगवान हेंकू थरे राजे लगाडू अनुमतिय एमकेडा हेना मेन दिन एटाः जात कू एरूसेलेम रे कू राजेआ।”
होड़ होपोन फेरिय मेजुआ (मत्ती 24:29-31; मरकुस 13:24-27)
25 हेना वरि फेर ईसु कहनी तेडा, “हेना चेका बेर बाँगो अवुर ईपील कू वरि मन मनीसा चिन्ह ञेंलुआ, अवुर धरती रे सींड़ देस रेनकू थरे संकट मेजुआ, कहेकि समुधर रा: आवाज अँजोम केते होड़कू थरे बोर समसोआ। 26 अगस राः सींड़ सक्ति हिलो चुवेरुआ। हेना बोर ते अवुर सँवसार रे मेजु: घटना ञेंलके ते होड़कू लोरमो चुवेरुआ। 27 हेंडे होड़कू, इंञ होड़ होपोन लिंबीर रे मेजु: तोलोग सक्ति अवुर आदर इजेत राः साथ ते मेजु: घनी कू ञेंलेञाँ। 28 नआँ टेबोः होया: तहाँ तयार पे दोहोनु, कहेकि अपे भगवान दु:ख संकट वरि बंचो पे राः समय आय लिघियोआ।”
अंजीर काठ रा: उदाहरड़ (मत्ती 24:32-35; मरकुस 13:28-31)
29 ईसु हेंकू थरे मियाँ टंग उदाहरड़ीय कहनी तेडा, “डुमरी अवुर सींड़ काठ पे ञेंल तहाँ। 30 नवा पल्वा ञेंलकेते झूर मेजु: तना मेनते पे पपाड़ी जोमा। 31 नेन घयते नआँ टेबोः होया: सी पपाड़ी को: पे, किदो भगवान राजे: रा: समय आय लिघयो यना। 32 इंञ अपे सही-सही तेंञ लाय वपे तना, नआँ सींड़ टेबोः अनायीन होया: मेन दिन ना पीढ़ी रेनकू राः अंत कभी एरो होया एना। 33 ओत अवुर अगस मेटियोआ, लेकिन इंञा: तेने मेन होडिञाँ टेबो: कभी एरो मेटियो एना।
तयारू: महल रेपे दोहोनु
34 “अपे अलढेलिया, मतवाड़ी अवुर जीनगी राः चिन्ता रे हर दम अलो पे दोहोनु, कहेकि फंदा घयते अचा कते हेना दिन अपे थरे मेजुआ, हेना ते अपे तयार पे दोहोनू। 35 कहेकि धरती रे दोहोन तन हेंकू सींड़ होड़कू थरे हेना दिन नेन घयते मेजुआ। 36 हेना ते अपे हर दम तयार को:पे अवुर कनर घनी हो बिनती: महल रेपे दोहोनु, कि अपे न सींड़ मेजु: हेना घटना वरि खँडा: लगड अवुर इंञ होड़ कोड़ा होपोन मड़ंग रे चड़ा: लायीक पे बनोऊ।” 37 ईसु रोज दिन मंडिल रे सिकछाय चेडकू दोहो एनु, अवुर ञींद तू हन दो जयतून काठ दोहोएन हेना बुरू हनतेय चलो जोम दोहो एनु। 38 अवुर अखीर ञींदाते सींड़ होड़कू हेंय राः टेबोः अँजोम लगड मंडिल रेकू मेजु: दोहो एनु।
ईसु राः बिरोध (मत्ती 26:14-16; मरकुस 14:10-11)
1 अखमीरी रोटी जोम हेना फसह राः परब तया: बंचो तना। 2 अवुर बड-बडे याजक कू अवुर नियम चेचेड कू का: ते ईसु ले ञेंड गोजेया मेनाआँ दाव कू जोहो दोहो एनु, लेकिन हेंकू होड़कू कू बोरोवा दोहो एनु। 3 बारह झन चेला कू मेंडे रे, मियाँ होड़ अहूदा इस्करयोती मेनते कू कहनी वय दोहो एनु, हेंय सयतान गोः बेड़ाय दोहो एनु। 4 हेना वरि हेंय बड-बडे याजक कू अवुर मंडिल पपाहराकू रेनकू अधिकारी कू थरे सेनकेन ते इंञ का:ते ईसु धोखा ते नेकू रेंञ एर पकड़ोविया मेनाआँ, हेंकू सुदाय चरचा तेडा। 5 हेना वरि हेना मेन अँजोम केते कू खुसी एना, अवुर हेंय पेयसा ओवाय लगड कू जबान वडिया। 6 तहाँ हेंय रजू यनियू, अवुर हेंय भीड़ मेने दोहोन घनी हेंकू ती रे एर पकड़ोविय राः दावीय जोहो दोहो एनु।
चेला कुतय सुदा फसह परब राः तयारी (मत्ती 26:17-25; मरकुस 14:12-21; उहाना 13:21-30)
7 अखमीरी रोटी जोमा परब दिन मेजेना, हेना परब रे भेड़ी होपोन पुजा लगड जरुरी दोहो एना। 8 ईसु पतरस अवुर उहाना हाँ:ते कहनी केतेय कुल तेड किञा, “सेन को:ते अबु लगड परब रे जोमेआ रोटी बा तयारू।” 9 हेना वरि हेंकींञ होंबोर तेडिया, “अम करेम चहो: तना अलींञ नआँ लिंञ तयारू?” 10 तहाँ हेंय हेकींञ थरेय कहनी तेडा, “अँजोमेबा, सहर बा बोल तोलोग मियाँ होड़ कोड़ाहोन गगेर ते दा: गो: तोलोग बा ञँमेया, जे ओड़ाः रे हेंय सेनुआँ, अबा हो हे नी तयोम तेबा सेनुऊ। 11 अवुर ओड़ा: मुवर थरे बा कहनीयू, ‘गुरू, कहनी यडा, पोहना कू दुड़ूब हेना जघा करेआ, इंञा: कू चेला कू सुदा रोटींञ जोमा।’ 12 हेंय अबा छत अगस रे सजो केडा कोठरीय ति:वा बाआ, हेंडे बा तयारे।” 13 जेयसे हेंकींञ थरेय कहनी तेडा, हेन घयते कींञ सेन ञँमतेडा, अवुर हेना रे परब लगड रोटी कींञ तयार तेडा।
परभु रा: आखरी खवा पिवा (मत्ती 26:26-30; मरकुस 14:22-26; 1 कुरिन्थियो 11:23-25)
14 हेना वरि जोमु: राः समय होया एना, तहाँ पेरेरित कू हो ईसु सुदा जोमु: लगड कू दुड़ूब एना। 15 अवुर हेंय कहनी तेडा, “दु:ख सहो वरि मड़ंग ते, नआँ परब रा: रोटी अपे सुदा जोमे लगड इंञाँ: अखीर मन दोहो एना। 16 इंञ अपे थरेंञ कहनी यडा, भगवान राः राज रे सींड़ कू नआँ राः सही मतलोब तू जेर केते फसह रोटी कू जोमा, हेना मेन दिन इंञ एरोंञ जोमतेडा।” 17 तहाँ हेंय डुबहा रे अंगुर रस दुलकेतेय धन्यावाद वडा, अवुरिय कहनी तेडा, “ने तिलाय पे अवुर हटींग जोम पे। 18 कहेकि अपे थरे इंञ कहनी यडा, भगवान अनेज रेनकू होड़कू थरे अनायीनीय राजे मेन दिन, इंञ अंगुर रस अब वरि कभी एरोंञ ञू तेडा।” 19 हेना वरि हेंय फेर रोटी सब केते धन्यावाद वडतेय टोवीज तेडा; अवुर हेंकू थरे न या:ते कहनी केतेय एम तेडा, “नआँ इंञाँ: देह हवे, अपे लगाडींञ एम यडा; इंञ उहयार लगड नेन घयते पे कामे।” 20 नेनेन घयते हेंय जोम केन- चरो केन वरि तयोम ते, हेंय डुबहा सबके तेय कहनी तेडा, “इञाँ: रकती एमके ते भगवान अवुर होड़कू राः मँझर रे मियाँ टंग नवाँ: नियम होयाआ, नआँ अंगूर रस हेना नियम राः चिन्ह हवे। 21 अँजोमेपे, इंञ एर साबय होड़ इंञ सुदा इदानियाँ। 22 इंञ होड़ होपोन दो भगवान रा: मरजी घयतेंञ गोनोजुअञूँ, लेकिन जेय होड़ एर सबेञाँ हेंय अखीर दु:ख रेय पड़ोआ।” 23 तहाँ हेंकू अनाकू अनाकू होंबोर ओड़ेंगू, किदो अबु मेंडे रे न घयते इया कामेआ। 24 हेंकू अनाकु-अनाकू होंबोर ओडेंग एना, “अबु मेंडे इया बडे गीआ।” 25 ईसु हेंकू थरेय कहनी तेडा, “नआँ धरती रेनिय राजा होड़कू थरेय राजेआ, अवुर होड़कू थरे अधिकार कू रखो: हेंकू सहेता एमय होड़ मेनते कू कहनी वकुआ, 26 लेकिन अपे न घयते अलो पे बनोऊ, अपे मेंडे रे जे बडे गिआ, हेंय होडीञँय घयते दोहोनु, अवुर मुखिया सेवेखिया घयतेय बनोऊ। 27 अपे मेंडे इया बडे गिआ, जोमूईय दुड़ूब केन हेनी किदो सेसेवतन हेनी? जोमूईय दुड़ूब केन हेनी बडे गिआ। लेकिन इंञ अपे मँझर रे सेसेवाअय घयगिआञू। 28 “अपे इंञा: दु:ख संकट रे इंञ सुदा दोहोएन हेंकू हवे; 29 अवुर जेयसे अपुंञ इंञ राजे लगड हाँकीय ओवाडिञाँ, हेन घयते अपे हो राजे लगड हाकींञ ओवापे तना। 30 हेंडे अपे भगवान राः राज रे इंञ सुदा पे जोमु: चरोआ, अवुर राज गद्दी रे दुड़ूब को:ते इसराएल रेनकू बारह गोति कुराः पे नियोंआ।
ईसु मसीह पतरस नहकारिय हेनय लाया (मत्ती 26:31-35; मरकुस 14:27-31; उहाना 13:36-38)
31 “सिमोनू! अँजोमेमू, जेयसे गोहोम गुमके ते कुसटत वरि कू हिगरो वेआ, हेन घयते सयतान अजमो पे लगड भगवान वरि अनुमतिय असी केडा, 32 लेकिन इंञ अमा: बिसवास अलो टोवीजु: लगाडींञ बिनती केना। अम पसतो को: ते फेर इंञ थरेम मेजुआ, हेना वरि अम गति कू बिसवास रेम मजबूत कुआ।” 33 हेना वरि सिमोन ईसु थरेय कहनी तेडा, “परभु इंञ अम सुदा जेहेल सेनु: अवुर गोजु: लगड हो तयार इदानिञा।” 34 तहाँ ईसु कहनी तेडा, “ए पतरस, इंञ अम थरेंञ कहनी यडा, तेनेसींञ ञींद मुर्गा कुकड़ू चु: वरि पहील ते ‘मेनेंञ पपाड़ी तना’ मेनते पेय एस मी नहकारि़ञाँ।”
बिरोध सहो लगड पे तयार कोऊ
35 हेना वरि फेर ईसु चेला कुय होंबोर तेडा, “अपे इंञ बेगर पेयसा ते, बेगर झोला ते अवुर बेगर फनहीं तेंञ कुल तेड पेआ, हेना तोलोग कनर चीज राः कमी होया एना किदो?” हेना वरि हेंकू जबाब तेडा, “कनर चीज राः कमी मेने होया गना।” 36 अब वरि चेला कुरा: अखीर बिरोध होया: रे तयार दोहोन लगड ईसु हेंकू थरेय कहनी तेडा, “जे जे थरे पेयसा अवुर झोला इंदान हेंकू हेना कू सबजोमू; अवुर जे जे थरे तरवार कोवा: हेंकू अपन कपड़ा केजा केते तरवारीय तिला जोमू। 37 ‘हेंय कसूर केड हेंकू सुदा कू लेखा एड़वा केडिया,’ नआँ याःते इंञाँ: बिसेय ते पहील ते भगवान राः कगद रे ओल केना हेना, उतारा होया: राः समय मेजयाना।” 38 हेना वरि चेला कुताय कहनी तेडा, “परभु न रे बाटंग तरवार इदाना ” हेना वरि फेर ईसु हेंकू थरेय कहनी तेडा, “बस निहो दो तरवार राः बिसेय ते अलोपे टेबोगे।”
जयतून काठ राः बुरू रे ईसु बिनती एना (मत्ती 26:36-46; मरकुस 14:32-42)
39 हेना वरि ईसु ओड़ा: वरि बहेर उडुंग केनते पनाहील घयते जयतून काठ राः बुरू रेय सेनेना अवुर चेला कुहो हेंय कू ओतोंग तेडा। 40 हेना वरि हेना रे सेन को: ते ईसु चेला कुतय थरेय कहनी तेडा, “परीछा वरि खँडा: लगड बिनती: महल रेपे दोहोनु।” 41 हेना वरि ईसु हेंकू वरि दम भर अड़ी केनते, ऊकड़ूम कनते न या:तेय बिनती एना, 42 “ए अपा अगर अम चहो: तन रेदो नआँ दुख इंञ वरि अड़ी गोत्तेमू, लेकिन इंञाँ: मेने अनामाआँ मरजी पूरा होयाऊ।” 43 तहाँ सरग वरि मियाँ टंग दूत मेजेना, अवुर हेंय सक्तिय ओवाडिया। 44 अवुर हेंय अखीर दुखीत केनते मन लगाय तेय बिनती एना; अवुर उगर तेडिय हेना एक दम रक्ती घयते बूँदे बूँद ते ओतेत रे जोर दोहो एनु। 45 हेना वरि हेंय बिनती: वरि रिमकेन ते, चेला कू फिकीर लंगा यनते गितीज तन तोलोगिय सेनञँम तेड कुआ। 46 हेना वरि हेंकू थरेय कहनी तेडा, “ची लगड पे गितीज तना? रिमु: पे परीछा वरि खँडा: लगड बिनती: पे।”
ईसु कू एर सबतेडा (मत्ती 26:47-56; मरकुस 14:43-50; उहाना 18:3-11)
47 ईसु कनाहनिय दोहो एनु, तबले भीड़ केनते होड़कू मेजयानू, अवुर बारह झन मेंडे रे मियाँ होड़ ञुमू यहुदा मेनते दोहो एना, हेंय होड़कू मड़ंग- मड़ंग तेय सेन अगतेडा, ईसु थरेय तया: तेड दोय चो: तेडिया। 48 हेना वरि ईसु हेंय थरेय कहनी तेडा, “ए यहूदा, अम इंञ होड़ होपोन चो: केंञ तेम एर पकड़ो यडिञाँ किदो?” 49 हेना वरि चेला कू ञेंल तेड कुआ, तहाँ कू पसींद तेडा कनारा दो होयाआ, हेना वरि कू होंबोर तेडा, “परभु, अले तरवार ले चलो किदो?” 50 अवुर हेंकू मेंडे रे मियाँ होड़ सींड़ कू वरि बडेअय याजक रेनिय नोकर, तलवार ते ञेंड गोजेय मेनते मियाँ होड़ चेला पुजा सोताडीय मेना: दो, जोम गतर रा: लुतूर तुय फंको गोत्तेडू। 51 नेन तोलोग ईसु कहनी तेडा, “बस नेन मेनू होया यना।” अवुर हेंय लुतूर तुय सबकेड तेय जोरो तेडा। 52 हेना वरि बड- बडे याजक कू, अवुर मंडिल रेनकू अधिकारी कू, अवुर चेचेड हेंकू सपायँड़ कू हेंय सब कू मेजताना। अवुर ईसु हेंकू थरेय कहनी तेडा, “अपे इंञ चोर पे अड़ींग वंञतन ते तलवार अवुर लठी सबके तेपे मेजकेना? 53 इंञ मंडिल रे रोज दिन अपे सुदांञ दोहो एना, दो मेने पे सबगाडींञाँ, न अपे रा: समय हवे, अवुर सयतान राः राज बोहड़ीं यना।”
ईसु इंञ गति ना लगे मेनते पतरस कहनी तेडा (मत्ती 26:57-58, 69-75; मरकुस 14:53-54, 66-72; उहाना 18:12-18, 25-27)
54 तहाँ हेंकू ईसु कू सब गो: तेडिया, अवुर सींड़ कू वरि बडेअय याजक ओड़ाः रेकू इदी तेडिया। अवुर पतरस तयोम- तयोम ते ईसुय जोपोल दोहो एनु। 55 अवुर कुछ होड़कू जवार केनते राच रे सेंगेल सलगो केते कू जूरू तना, हेना वरि पतरस हो हेंकू मँझर रेय दुड़ूब यनु। 56 दुड़ूब तन तोलोग मियाँ होड़ हरवाहिन कोड़ीहोन हेंय सेंगेल मरसल रे ञेंल ञँमकेडिय तेय कहनी तेडा, “नेय होता मेनी सुदाय दोहो एना।” 57 पतरस कोड़ीहोन थरेय कहनी तेडा, “ए बेहिन, इंञ मेय मेनेंञ पपाड़ी तना।” 58 तहाँ मियाँ घड़ी रे अवुर मियाँ होड़ ञेंलकेडिय तेय कहनी वडियू, “अम होता हेनी सुदाम दोहो एना।” तहाँ पतरस कहनी तेडा, “ए भाई, इंञ न लगे।” 59 कुछ समय बितो केन रा: बाद रे, अवुर मियाँ होड़ जिद्हाय तेय कहनी तेडा, “सहीच मेते नेय हो मेनी सुदाय दोहो एना, कहेकि नेय हो गलील जिला रेनिय होड़ हवे।” 60 हेना वरि पतरस कहनी तेडा, “ए भाई, इंञ मेनेंञ पपाड़ी तना, अम ची मेनतेम कहनी यडा!” हेन घयतेय मियाँ हनतेय कनाहनियाडू, तहाँ तुरेत्ते मुर्गा कुकड़ूचु: यनु। 61 तहाँ परभु मुहयों केनते हेंय हनीय तको तेडा, अवुर पतरस न या:ते परभु कहनी वडिया हेना, टेबोईय उहयार तेडा, “तेसींञ मुर्गा रा: वरि मड़ंग ते अम पेय एस इंञ मेनेंञ पपाड़ी तना मेनतेम नहकारिञाँ।” 62 अवुर हेंय बहेर हँडेय उडुंग केनते एग बरगीय ईयम एना। 63 जे होड़कू ईसु कू सबताडा, हेंकू मजाग कू उड़ोवियू, अवुर कू ञेंडेयू; 64 अवुर हेंय मेड रे कपड़ा तेकू तोलकेडिय तेकू होंबोरियू, “भगवान वरि अँजोम केतेम लाये अम इया ञेंडतेड मिआँ।” 65 अवुर हेंकू अखीर निन्दा राः टेबोः हेंय रा: बिरोध रेकू कहनी तेडा।
बडे सभा रे ईसु (मत्ती 26:59-66; मरकुस 14:55-64; उहाना 18:19-24)
66 हेना वरि अंगा एन तहाँ, सपायाँड़ अघुवा कू जवार एना हेना रे बड- बडे याजक कू, अवुर नियम चेचेड कुहो कू दोहो एना, अवुर ईसु अना कुराः कोट रेकू इदी केडिय तेकू होंबोर तेडिया। 67 “अम मसीहा हवे रेदो अले थरेम लाय गोत्ते,” हेना वरि हेंय हेंकू थरेय कहनी तेडा, “अगर अपे थरेंञ लाये रेदो एरो पे सरी वडा। 68 अवुरिंञ होंबोर पेरे हो जबाब एरो पे एम सको एना।” 69 अब वरि इंञ होड़ होपोन सर्व सक्तिमान भगवान वरि जोम गतर रेंञ दुड़ूबा।” 70 नआँ अँजोम केते सींड़ होड़कू होंबोर तेडिया, “अम भगवान होपोन हवे किदो?” हेना वरि हेंय हेंकू थरेय कहनी तेडा, “जो अपे कहनी यडा हेना सही गिआ।” 71 तहाँ हेंकू कहनी तेडा, “अबु एटा: कू अहा वरि गोवाही अआँजोम रा: जरूरत कोवाआ, कहेकि अबु अनानेज अहा वरि बु अँजोम केडा।”
पिलातुस ईसुय होंबोर तेडा (मत्ती 27:1-2, 11-14; मरकुस 15:1-5; उहाना 18:28-38)
1 हेना वरि सभा रेनकू सींड़ होड़कू रिमकेनते, ईसु पिलातुस निनीयोवय थरे कू इदी तेडिया। 2 हेना वरि हेंकू न या:ते कहनी केते कू दोसीय दोहो एनु: “नेय होड़कुय बहको दोहो एनु। अवुर रोमी सरकार लगड मलगुजारी अलो पे एमेय मेनतेय मँदा कू दोहो एनु, अवुर खुद अनानेज मसीह, मियाँ होड़ राजा मेनतेय कहनी दोहो एनु, नआँ सींड़ अले अँजोम केडा।” 3 हेना वरि पिलातुस ईसुय होंबोर तेडा, “सही मेते अम यहूदी कू रेनिय राजा हवे किदो?” हेना वरि ईसु पिलातुस थरेय जबाब तेडा, “अम कहनी यडा हेनेन घयतेआ।” 4 तहाँ पिलातुस बड-बडे याजक कू अवुर होड़कू थरेय कहनी तेडा, “इंञ नेय होड़ थरे कनर दोस मेनेंञ ञँमगाडा।” 5 लेकिन होड़कू अवुर जिदहाय तेकू कहनी तेडा, “नेय गलील जिला वरि नआँ एरूसेलेम सहर अँगम सींड़ यहूदी देस रेनकू होड़कू सिकछा दे दे तेय भड़को यड कुआ।” 6 हेना वरि नआँ अँजोम केते पिलातुस होंबोर तेडा, “सही मेते नेय होड़ गलील जिला रेनिय हवे किदो?” 7 गलील जिला हेरोदेस राः अधिकार रेआ मेनाआँ पपाड़ी केनते, ईसु हेरोदेस राजा थरेय कुलते डिया। हेंय हेना तोलोग हेन एरूसेलेम सहर रेय दोहो एना।
हेरोदेस मड़ंग रे ईसु
8 हेरोदेस राजा ईसु ञेंलके ते अखीरिय खुसी एना। हेंय ईसु राः बिसेय तेय अँजोम तडा ते अखीर दिन वरि ञेंलेय मेनतेय पसींद तडा। ईसु ती वरि चमत्कार काम ञेंल गिसन तडिया। 9 हेंय अखीर टेबोईय होंबोरिय दोहो एनु, लेकिन ईसु कनर जबाब मेनेय एमगा डिया 10 बड-बडे याजक कू अवुर नियम चेचेड कू चड़ाँ केनते जिदहाय तेकू दोसीय दोहो एनु। 11 हेना वरि हेरोदेस राजा अनेज रेनकू सिपाही कू सुदा ईसु मजाक कू उड़ो तेडिया अवुर मजाक कू उड़ोविय लगड चमकोआ कपड़ा तुसींञ केडियते पिलातुस थरे कू मिड़ा: अकतेडिया 12 नआँ वरि पहिल ते पिलातुस अवुर हेरोदेस मुदेय कू घयते कींञ ञेंल ओड़ेग दोहो एनु; लेकिन हेन चेका वरि हेंकींञ दोस्ती कींञ बनो यनु।
पिलातुस ईसु मिरतु दंडीय ओवाडिया (मत्ती 27:15-26; मरकुस 15:6-15; उहाना 18:39-19:16)
13 पिलातुस बड-बडे याजक कू अवुर अधिकारी कू अवुर होड़कू हो मियाँ तेय राः तेड कुआ 14 अवुरिय कहनी तेडा, “नेय होड़ अपे एटा: होड़कूय बहको यडा मेनते दोस केडिय ते इंञ थरे पे अगकेडिया। अवुर अँजोम पे, इंञ अनापे मड़ंग रेंञ होंबोर तेडिया। जे टेबोः रे अपे नेय पे दोस यडा हेना टेबोः राः बिसेय ते नेय थरे इंञ कनर गलती बेगारिंञ ञाँमा। 15 अवुर हेरोदेस राजा हो कनर गलती बेगारिय ञाँमा। हेना ते सजा मेनेय एमगाडिया, अवुर इंञ थरेय मिड़ा: गोत्तेडिया। अवुर अँजोम पे, नेय कनर बेगारिय गलतीआ हेना ते नेय मिरतु दंड एरो ञँमेना। 16 इंञ नेय कोड़ा तेंञ एरञेंड केयतेंञ बगी वया।” 17 पिलातुस परब रा: समय रे मियाँ होड़ बंधवा होड़ आड़ागिय राः नियम दोहो एना । 18 तहाँ सींड़ होड़कू मियाँ तेकु हल्ला एना “नेय होड़ पे ञेंड गोज गोत्तेयू, अवुर अले लगड बरअब्बा पे अड़ा: गोत्ते।” 19 बरअब्बा अखीर होड़कू उरयलीलिके ते एरूसेलेम रेय लड़ाई एना। अवुर होड़कुय ञेंड गोज तेडा, हेना राः चलते ते हेंय जेहेल रेकू डलो तेडिया। 20 लेकिन पिलातुस ईसु बगीवय रा: मन दोहो एना, कहेकि होड़कू फेरिय समझो तेडकुआ। 21 तहाँ होड़कू हल्ला केनते कू कहनी तेडा, “नेय कुरूस रेपे ठोको गोजेयू।” 22 हेना वरि हेंय तीसरा बार हेंकुय होंबोर तेडा, “नेय होड़ चीय गलती केडा? इंञ मेय थरे मिरतू दंड ओवय लायीक कनर गलती बेगारिंञ ञाँमा। हेनाते इंञ नेय कोड़ा ते एर ञेंड केय तेंञ बगी वया।” 23 लेकिन होड़कू कुरूस रेम रकाबियू मेनते अनावुर कू हल्लाऊ, अवुर हेंकू जेयसे कू हल्ला एना हेन घयते होया एना। 24 तहाँ पिलातुस मेनेन कुरा: अरजी घयते होयाऊ मेनते हुकूम तेडा। 25 हेना वरि बरअब्बा होड़कुय ञेंड गोज तड दोहो एनु, हेना चलते ते जेहेल रेय दोहो एना। होड़कू नेनी कू असीय दोहो एनु, तहाँ पिलातुस नेनीय अड़ाः तेडा, अवुर जेयसे मरजी तेयसे कू करोवे लगड ईसु हेंकू ती रेय जिमा तेडिया।
ईसु कुरूस रेकू रकब तेडिया (मत्ती 27:32-44; मरकुस 15:21-32; यूहन्ना 19:17-19)
26 सिपाही कू ईसु कू गो: तोलोग कुरेनी सहर रेनिय सिमोन, गाँव वरि एरूसलेम हनतेय मेजु: दोहो एनु। ईसु तयोम-तयोम ते कुरूस गो: लगड सबकेडिय ते खँदीत रे कुरूस कू लदगो तेडा। 27 अखीर होड़कू हेंय तयोम तेकू सेने दोहो एनु, अवुर हेना रे कोड़ी कुहो अखीर कू दोहो एना, अवुर अखीर दु:खीत केनते कू इयाम दोहो एनु। 28 ईसु हेंकू हन मुहयो केनतेय कहनी वडकू, “एरुसलेम रेनकू बेहिन कू, इंञ लगड अलो पे इयामू, अनापे अवुर चोंडीज कू लगड, मेजु: तना दु:ख-बिपेत वरि बंचो: लगड पे इयामू। 29 कहेकि अँजोम पे, एयसा दिन मेजु: तना, हेना तोलोग होड़कू कहनियाँ, ‘जे बाँजी गिआ कू अवुर चोंडीज कू मेने कू जनम गड हेंकू अवुर दुध मेने कू पियो गड कु: हेंकू कोड़ी कू अखीर कू भाग वना मेनते।’ 30 हेना तोलोग होड़कू बुरू कू कहनी वआ, ‘अले थरे लोजोरुऊ,’ अवुर घुटरी कू कहनी वआ, ‘अले थरे लोजोर को:ते तेपेड गोज गोत्तेले’ मेनते। 31 हेंकू होड़कू हरियारा दुबी सुदा नआँ घयते कू करो यड रेदो, लोहोड़ा दुबी सुदा ची हालत होयआ?” 32 बाहोड़ कसूर तडकींञ हेंकींञ हो हेंकू ईसु सुदा ञेंड गोजकींञ लगड कू गो: तेड कींञा। 33 हेना वरि खोपड़ी मेनते कू कहनी वआ हेना जघा कू तेया: तेडा, तहाँ हेंकू ईसु अवुर बाहोड़ कसूर तड हेंकींञ हो कुरूस रेकू रकब तेडकींञाँ, मियाँ होड़ दो ईसु वरि जोम गतर रे अवुर मियाँ होड़ दो कोंञ हन गतर रे तेकू रकब तेडिया। 34 तहाँ ईसु कहनी तेडा, “अपा अम नेकूम माफीम ओवा कू, कहेकि नेकू चीले बनो यडा मेनाआँ मेने कू बुझहो तना।” तहाँ सिपाही कू चिठा कू डलो केते जे राः ञुँमू ते चिठी उडुंग एना, हे नी ईसु राः अँगा अंगेर तेडा। 35 होड़कू चड़ाँ केनते कू ञेंल हड़ीवय दोहो एनु, अवुर अधिकारी कुहो कू मजाक उड़ो केयते कू कहनिय दोहो एनु: “नेय एटा: कुय बंचो तेडा, अगर नेय भगवान होपोन मसीहा हवे रेदो, अवुर भगवान चुनो केडिय रेदो अनानेज बंचोऊ।” 36 सिपाही कुहो बंदेत रे सेनकेन ते सिरका कू एम सोवाडिया, अवुर मजाग केयते कू कहनी वय दोहो एनु 37 “अगर अम यहूदी कू रेनिय राजा हवे रेदो अनाम बंचोऊ।” 38 अवुर हेंय भो:तू अगस हँडे दम भराआ पटरा रे न घयते ओल केते कू ठोको तडा, “नेय यहूदी कू रेनिय राजा हवे।”
मन तयीय बदलो हेनी कुकरमी
39 बाहोड़ ईसु राः अगल-बगल ते कुरुस रेकू ठोको तड कींञ हेंकीञ कसूर तड कींञ मेंडे मियाँ होड़ निन्दय लगाडीय कहनी तेडा, “अगर अम सही मेते मसीहा हवे रेदो? अनाम अवुर अलींञ होम बंचोलिञू।” 40 नआँ अँजोम केते एनेटागी केटेज अहा तेय कहनी वडियू, “अम भगवान मेनेम बोरो वयतन किदो? मेय सजाय ञँमयड हेना, सजा अम होताम ञँमयाडा, 41 अवुर अलंग गलती केडा ते सजा लंग ञँमयाडा, लेकिन मेय कनर बेगर अलत-गलत रे घली सजा ञँमु: तना।” 42 हेना वरि हेंय ईसु थरेय कहनी तेडा, “ओ ईसु, अम राजे लगड मी मेजु: रे, उहयर केंञ ते इंञ थरेम दयाऊ।” 43 हेना वरि ईसु हेंय थरेय कहनी तेडा, “इंञ अम थरे सही मेतेंञ कहनी यडा, तेनेसींञ अम इंञ सुदा सरग रेम दोहोना।”
ईसु साँसीय अड़ाःतेडा (मत्ती 27:32-44; मरकुस 15:21-32; उहाना 19:17-19)
44 लगभग बारह बजे वरि तीन बजे अँगम सींड़ देस अंधरा यनु, 45 सितोंग तड हेना अंधरा यनु, अवुर मंडिल राः अखीर पवितर जघा राः मड़ंग रे लगो तड हेना परदा माँजे माँज ते ओड़ेज यनु, 46 ईसु बडे ते हाक केनतेय कहनी तेडा, “ओ अपा, इंञाँ: आत्मा अम थरेंञ जिमा यडा।” नेन या:ते कहनी केतेय असीड यनु। 47 हेना वरि रोमी सिपाही कू रेनिय दरोगा जो कुछ होया तना ञेंलकेते भगवान रअय बड़हाई तेडा, अवुरिय कहनी तेडा, “सही मेते नेय होड़ कनर मेनेय गलती गडा।” 48 अवुर ञेंञेल कू जवर तन हेंकू न घटना ञेंलके ते कुड़ाम तुकू कू गील-गील ते कू मिड़ा: चलो एना। 49 अवुर ईसु कू चिन्हों तड हेंकू कुछ होड़कू गलील जिला वरि कू मेजताना। हेंकू सुदा कोड़ी कुहो कू दोहो एना, नेकू सींड़ कू बीच रे चड़ाँ केनते कू ञेंल एनेज दोहो एनु।
ईसु कू जतान तेडा (मत्ती 27:32-44; मरकुस 15:21-32; उहाना 19:17-19)
50 हेना रे उसूफ बढ़ियाँ अवुर धरमी होड़ दोहो एना, हेंय अहूदी कुरा: बनाडेआ कोट कछेरी रेनिय सदस्य दोहो एना। 51 अहूदी सपायँड़ कू ईसु मिरतु दंड कू ओवाय लगड कू गुट तेड हेना काम मेनेय बेस गडा। हेंय यहुदी देस अरिमतिया सहर रेनिय दोहो एना, अवुर हेंय भगवान राः राज मेजुआ मेनतेय असरा तना। 52 हेना वरि हेंय पिलातुस थरे सेनकेनते ईसु राः लास अगड़ू केते जतानिय लगड आदेसिय असी तेडा। 53 हेना वरि हेंकू ईसु राः लास अगड़ू केडते मोलामा कपड़ा ते कू गुरघेट तेडा। एटा: कुराः लास दोहो लगड मियाँ टंग चटाड़ीं कू खोदयार केते मरघटी कू बनो तडा, हेना रे कनय मेने कू दोहो गडा, हेंडे इदी केडिय ते ईसु कू दोहो अटु तेडिया। 54 हेना चेका सुख दिन दोहो एना। अगला दिन लगड एक दिन राः पहिल ते सींड़ चीज तयार केते कू दोहोता दोहो एनु कहेकि सब्द राः दिन सुरुः दोहो एनु। 55 गलील वरि ईसु सुदा कू मेजतन हेंकू कोड़ी कू, लास कू गो: तोलोग तयोम- तयोम ते सेनकेनते हेना मरघटी कू ञेंलतेडा, अवुर का:ते लास कू दोहोकेड हेना होकू ञेंलतेडा। 56 तहाँ हेंकू कोड़ी कू मिड़ा: केनते ईसु थरे लगोवे लगड सोंओं: हेना चीज अवुर सेन्ठ कू तयार तेडा। हेंकू सबद राः दिन रे लुड़ू: राः नियम दोहो एना, अवुर हेंकू हेना चेका कू लुड़ू एना।
ईसु जियो एना (मत्ती 28:1-10; मरकुस 16:1-8; उहाना 20:1-10)
1 हपता राः सुरवात दिन एतवार चेका एक दम ञींदाते कोड़ी कू ईसु थरे सेन्ठ लगोवे लगड तयार तडा, हेना कू सबकेते मरघटी रेकू सेनेना। 2 हेंकू मरघटी दुवर दिरी तेकू सींञ अटु तडा, हेना अड़ी तन तोलोग कू सेन ञँमतेडा। 3 हेना भितर रे बोलो एन दो परभु ईसु राः लास मेने कू ञँमगाडा। 4 तहाँ हेंकू न ञेंलके तेकू बोर दोहो एनु, अवुर अचा कते बाहोड़ चमकोआ कपड़ा तुसींञ केते हेंकू मड़ंग रेकींञ चड़ाँ यनु। 5 अवुर हेंकू बोरो यन ते आँख-मुह तुकू ओतेत हनते कू केटुब गोत्तेडू, तहाँ हेकींञ हेंकू थरे कींञ कहनी तेडा, “अपे गोजको: कुरा: जघा रे जियो रिमकेन हेनी ची लगड पे छपा बेड़ा यडिया? 6 हेंय ना रे कोवाया, हेंय दोय जियो रिमकेना। उहयारे पे, हेंय अपे थरे गलील जिला रेय दोहो एन तोलोगिय कहनी तेडा। 7 ‘नआँ जरुरी इदाना इंञ होड़ होपोन पापी होड़कू रेंञ एर पकड़ोआ, अवुर कुरूस रेकू ठोको गोजेञाँ, अवुर तीन दिन रेंञ जियो रिमुआँ।’ ” 8 तहाँ हेंकू ईसु कहनी तडा टेबोः कू उहयर तेडा। 9 हेना वरि मरघटी वरि हेंकू कोड़ी कू मिड़ाः केनते, गारह झन पेरेरीत कू अवुर एटा: कुहो नआँ टेबोः कू लाय वडकू। 10 मरियोम मगदल गाँव रेनिय, योअन्ना, अकूब इंगत मरियोम नेकू सुदा अवुर कोड़ी कू दोहो एना, नेकू पेरेरित कू थरे नआँ टेबो: कू लाय तेडा। 11 लेकिन हेंकू राः टेबोः नेकू लँदा वडकू घयते कू बुझो तेडा, अवुर हेंकू राः टेबोः मेने कू सरि गडा। 12 तहाँ पतरस रिमकेन ते मरघटी हनतेय हुंको चलो एना, अवुर कुबूंग केनतेय कोटे तेड दो, कपड़ा ते गुरघेट तडिय हेना भरिय ञेंल ञँमतेडा। अवुर जो कुछ होया तना हेना ञेंलकेतेय अकबको यनु, अविरय मिड़ाः चलो यनु।, अवुर ची होयाः तना मेनतेय पसींदे दोहो एनु।
इम्माऊस हनते चलो: तोलोग चेला कींञ थरे ईसु देखर एना (मरकुस 16:12-13)
13 हेनेन चेका ईसु तयोम ते सेने दोहो एन हेंकू मेंडे रे, बाहोड़ इम्माऊस मेनते कू कहनी वआ हेना गाँव हनते कींञ चलो: दोहो एनु, हेना गाँव एरूसेलेम वरि लगभग ग्यारह किलो मीटर सँगीञ रे दोहो एना। 14 हेंकींञ नआँ होया तना हेना राः बिसेय तेकींञ बरता चलो: दोहो एनु, 15 अवुर हेंकींञ बरताऊ अवुर होंबोर ओड़ेंग तोलोग ईसु हो हेंकींञ थरे मेज केन ते हेंकींञ सुदाय सेनतेडा। 16 लेकिन हेंकीञ ईसु अलो कींञ चिन्होवीय लगड भगवान हेंकींञ राः नंजेरीय बंद तडा। 17 ईसु हेंकीञीय होंबोर तेडा, “ची टेबोः सेनयड तींग तेबा बरताः तना?” तहाँ हेंकींञ मन उदास केनते कींञ चड़ाँ बगी यनु। 18 नआँ अँजोम केते हेंकीञ मेंडे रे मियाँ होड़ क्लियोपास मेनते कू ञुमू तडीय हेनी कहनी तेडा, “एरूसेलेम सहर रे मेजकेन ते दोहोन तन हेंकू मेंडे रे अनाम भर दरवा दरवा बितो केना हेना टेबोः मेनेम पपाड़ी तना जहानू।” 19 हेना वरि ईसु हेंकीञींय होंबोर तेडा, “ची ची टेबोः ख?” हेना वरि हेंकींञ ईसु थरे कींञ कहनी तेडा, “नासरत सहर रेनिय ईसु राः टेबोः हवे, नेय एयसा होड़ दोहो एना, जो कुछीय करो तेडा, अवरिय कहनिय दोहो एनु, हेना भगवान अवुर सींड़ होड़कू राः मड़ंग रे सींड़ कू वरि बडेअय भगवान रेनिय टेबोः लाय हेनी हवे, मेनाअय ती:वड कू दोहो एनु। 20 बड-बडे याजक कू अवुर अबु रेनकू अधिकारी मिरतू दंड कू ओवय लगड एर पकड़ो केडीय ते रोमी सरकार थरे कू जिमा तेडिया, अवुर हेंकू कुरूस रेकू एर ठोको गोजतेडिया। 21 अले इसरायली रेनकू नेनी दुसमन कू वरि बंचो लेआ मेनते ले असरा तना। नआँ सींड़ घटना बितो केनते तीसरा दिन हवे। 22 अवुर तेसींञ एक दम ञींदा ते अले मेंडे रे कुछ कोड़ी कू मरघटी वरि सेन मिड़ाः केनते कू लाय अकबको गोत्तेड लेआ; 23 हेंकू लास मेने कू ञँमगड दो हाँ: तेकू लाये दोहो एनु, अले सरगदूत कुले ञेंलवाडा, हेंकू लाय तेडा ईसु जिवत गिआ यू मेनते! 24 हेना वरि अना ले गतिकू मेंडे रे कुछ होड़कू मरघटी ञेंञेल कू सेनेना अवुर जेयसे कोड़ी कू लाय तेडा हेनेन घयते हेंकू हो लास मेने कू ञँमगाडा।” 25 हेना वरि ईसु हेंकींञ थरेय कहनी तेडा, “अपे तिमीन बोको होड़कू हवे! भगवान रा: कगद रे भगवान राः टेबोः लाय हें कू जो कुछ कू ओल केडा, हेना रे बिसवासे लगड अपे तिमीन कठिन लगो: तना! 26 भगवान राः कागद रे हाँ:ते ओलकेना मसीहा दु:खीय रीमा अवुर बड़ा आदर इजेत राः साथ ते सरग रेय सेनुआँ।” 27 हेना वरि ईसु मूसा अवुर भगवान राः टेबोः लाय हेंकू रा: कागद रे ओल केना दुबीत जेड़ीत वरि सींड़ भगवान रा: कागद वरि अनेज राः बिसेय ते ओल केना, हेना टेबोः राः मतलोब तुहो हेंकीञींय समझो तेडा। 28 हेनेन तोलोग हेंकू गाँव कू तया: बंचोय दोहो एनु, तहाँ ईसु अवुर मड़ंग हनतेय चलोः तना मेनते कींञ अड़ींग एना। 29 तहाँ हेंकींञ हाँ:ते कहनी केते कींञ टेको तेडिया, “अलींञ सुदाम दोहोनू, निहो दो अंधरा: तना, अवुर बेर हो मुलूक तेय डुबो यना।” हेना वरि हेंकींञ सुदा दोहोन लगड भितर हनतेय बोलो एना। 30 हेना वरि हेंय हेनेन कींञ सुदा जोमु: लगाडिय दुड़ूब एना, तहाँ हेंय रोटी सबके ते भगवान धन्यावादीय ओवाडिया, अवुर टोविज केते हेंकीञींय ओवाड दोहो एनु। 31 तहाँ हेंकींञ राः नंजेर झीझयानू, अवुर हेन तोलोग हेंकींञ ईसु कींञ चिन्हो गोत्तेडियू, अवुर हेंय हेंकींञ नंजेर वरि फेरीय छपीत यनु। 32 हेंकींञ अनाकींञ-अनाकींञ कहनी ओड़ेग एना, “हेंय होर ते अलंग सुदाय बरता एना, भगवान रा: कगद रे करे ओल केना, हेना रा: मतलोब तुहोय समझो लंग दोहो एनु, दो अलँग अपन मन रे मेने लंग खुसी गन किदो?” 33 हेनेन तोलोग हेंकींञ रिमकेनते एरूसेलेम हनते कींञ मिड़ा: सेनेना, अवुर हेंकू गारह झन पेरेरित अवुर एटाः कुहो हेंकू सुदा जवर तन तोलोग कींञ सेन ञँमतेड कुआ। 34 अवुर हेंकू हेकींञ बाहोड़ थरे कू लाय तेडा, “परभु सहिचो मेतेय जियो रिमकेना, अवुर सिमोन थरेय देखर एना।” 35 तहाँ हेकींञ होर तेकू बरता एना हेना हेंकू कींञ लाय वडू, अवुर हेकींञ रोटी टोविज तोलोग का: तेकींञ चिन्हो तेडिया हेना होकींञ लाय तेडा।
चेला कुताय ईसु कू ञेंल तेडा (मत्ती 28:16-20; मरकुस 16:14-18; उहाना 20:19-23; प्रेरितों के काम 1:6-8)
36 नआँ घयते हेंकू कहनी यडु, हेनेन तोलोग परभु ईसु मसीह हेंकू बंदे रेय मेज चड़ाँ यनु अवुर हेंकू थरेय कहनी तेडा, “अपे सांति ञाँमुऊ:” मेनतेय जोहार वड कुआ। 37 तहाँ हेंकू अक-बको यन तेकू बोरो तेडा, अवुर भूत ले ञेंलयाडा मेनते कू अड़ींग एना। 38 हेना वरि हेंय हेंकू थरेय कहनी तेडा, “ची लगड पे बोर तना? अपे अपन मन रे ची लगड मेने पे बिसवास यडा? 39 इंञ ती कटा रे छेदा केडा पे ञेंलू, इंञ ईसु हवे। इंञ छुयों सोंञ पे, कहेकि जेयसे इंञ थरे पे ञेंलयाडा घयते भूत कू थरे जील अवुर जाँग मेने दोहोना।” 40 नेन घयते कहनी केते अनेज तीत कटातीय ती़:वड कुआ। 41 तहाँ हेंकू खुसी राः मार ते मेने कू सरि गडा, अवुर हेंकू अकबको यन दोहो एनु, तहाँ हेंकुय होंबोर तेडा, “अपे थरे ना रे जोमेआँ कनारा चीज इदाना किदो कोवाआ?” 42 हेना वरि हेंकू रपा: तडिया हकू टुटका कू ओवाडियू, 43 अवुर हेंय तिला केते हेंकू मड़ंग रेय जोमतेडा। 44 मियाँ घड़ी रे हेंय हेनेन कू थरेय कहनी तेडा, “इंञ अपे सुदा दोहोएन तोलोग नआँ घयतेंञ लाय तेडा, सही मेते जेतना टेबोः मूसा राः नियम अवुर भगवान राः टेबोः लाय हेंकू रा: कागद अवुर भजन सहिंता राः कागद रे इंञाँ: बिसेयते ओल केना, हेना सींड़ उतरोआ।” 45 हेना वरि हेंय भगवान राः कागद रा: टेबोः जेरे लगड हेंकू बुदहीय ओवड कू दोहो एनु। 46 अवुर हेनेन कू थरेय कहनी तेडा, “हाँ:ते ओल केना, मसीहा दुखीय रिमा, अवुर तीसरा दिन गोज केन कू मेंडे रेय जियो रिमुआँ, 47 अवुर एरूसेलेम वरि बोहड़ीं केते सींड़ जात कू थरे हेनी ञुँमू ते मन बदलो रा: और पाप वरि माफी ञँमु: हेना रा: परचार होयाआ। 48 अपे नआँ सींड़ टेबोः रा: गोवाही एम कू हवे। 49 अवुर अँजोम पे, पवितर आत्मा एमेय लगड अपुंञ जबान केडा, हेना इंञ अपे हलीतेंञ ओवापेआ, अवुर भगवान वरि सक्ति अनायीन ञाँम मेन दिन नेन सहर रेपे दोहोनू।”
ईसु सरग हनतेय चलो एना (मरकुस 16:19-20; प्रेरितों के काम 1:9-11)
50 तहाँ हेंय एरुसलेम वरि बयतानियाह गाँव अँगामिय गो:तेड कुआ, अवुर हेंय अनेज ती सुहरू केते हेंकू आसीसिय ओवड कुआ, 51 अवुर आसीसिय ओवड कुसी ईसु हेंकू वरिय अलग यनु, अवुर हेंकू रा: देखते देखत भगवान सरग हनतेय रिम गो: तेडिया। 52 तहाँ हेंकू धन्यावाद वडियू अवुर अखीर खुसी केनते एरूसेलेम हनते कू मिड़ा: मेजेना। 53 अवुर हेंकू रोज दिन मंडिल रेकू जवर को:ते भगवान राः कू स्तुति महल रेकू दोहो एना।