John 1

Hringna ṭong

1 A'nphutbia ṭong kha leika-om jo; ṭong kha Pathen leh leika-omsap hei; ṭong kha Pathen leikae. 2 Ṭong kha anphutbia Pathen leh leika-omsap hei. 3 Ama a inphut heirakip Pathen in asyem; asyem rakip ama inṭangna tei loa heite inkhatbek le'nsyem mak. 4 Ṭong kha hringna heisōkna kae. Khana hiva hringna hin mihring hneng vâr ahei rôn. 5 Vâr khan khō inthim asat manvâr, khō inthim khan vâr kha tor mak. 6 Pathen in aṭong karôn mi inkhat arahming John inti ajōngtir, 7 ṭong kha mi rakip in antheina sik leh antaksenna sik, vâr chungchânga akahrile sik a ajōngtir kae. 8 Ama chu vâr kha changmak, vâr chungchânga akahri inthang sik a akajōng kha kae. 9 Raleichunga akajōng mi rakip kasat invâr ama kha vâr kadik khet kha kae. 10 Ṭong kha raleichunga leika-om, Pathen in ama inṭangna vâng vânhnōi asyem, tâk vânhnōi in ama leimanhret mak. 11 Ama aram mihei hneng kajōng, tâk ami he'n ama leirahlâng mak hei. 12 Achang inum, mi ṭhahrep in, ama anlei rahlânga antaksen; khava jâra Pathen sa anchangna sik ratha apek hei. 13 Anmani khachu ngai dungjuia mihring pa inkhat in amatet heia Pathen sa ahong kachang emak hei; Pathen khet kha anpa leikae. 14 Ṭong kha mihring jōng kachanga maritna leh dikna kasip phet a nikâra ka-om. Alûrna kha kanleihmu, Apa Sapa inkhat rōk achangna aleichen lûrna kha kae. 15 John in ama chungchânga aleihri. Ama kapenga, “‘Ama chu kei kahnunga kajōng, tâk ama kha kei kanek a kalen jôk, ajârchu kei intet mak hma ama chu aleika-omsa kae,' tia kaleihri kha ama hi kae.” 16 Ama, maritna kasip phet achangna inphut mahâmṭhatna inkhat bânna inkhat eini nikhenga apek me. 17 Pathen in Mosea inphut Dân kha ajongpek me, tâk Jesu Christa a inphut lungset maritna leh akadik kha ajongpek me. 18 Tûte'n Pathen lahmu phung hêrmak. Pathen leh thakhat akae, khana Pa ângshunga aka-om, Sapa inkhat rōk khan Pathen manhretna amannei me.

Tui Inhlutpa John Ṭongrôn

19 Jerusalema ka-om Jehudi vaikarôn he'n, “Nang tu che mo?” tia ṭong akader sik a Thempuhei leh Levihei anleitir hei. 20 John in masôn makna sik a leitlo mak, tâk inthengtak a leh inphôngtak a amasôn hei, “Kei Messiah kha changmak eng.” 21 “Khan chu nang tu che mo? Elijah che mo?” tia ander. John in amasôn hei, “Kei changmak eng.” Anmani'n ander nôk, “Sânkathem kha che mo?” Ama'n, “Changmak eng,” tia amasôn hei. 22 “Achang inne nang tu che mo?” anti. Ani heikatir hei hneng keini'n kanva masônna sik hei. Nang nabinga tu mo a'nti che?” 23 John in Isaiah sânkathem ṭong kha ahrisōt a: “Rōngpu sena sik hlam mantlun ruh! tia nêrdiram thōia mi inkhat in a-ôn,' inti kha kei eng kae,” ati. 24 Phariseehei tahei tir ṭongkarônhei khan, 25 kha achang inchu John hneng, “Nang kadeisōt Messiah kha'm nachangmak a, Elijah kha'm nachangmak a, Sânkathem kha'm nachangmak inchu, heisa mo tui manhlutna ṭōn natlo?” tia ander. 26 John in amasôn hei, “Ke'nchu tuia tuimanhlut katlo; achang ravâng nangni'n nantamanhret mak nankâra akangir inkhat ka-om. 27 Ama kei kahnunga kajōng; kei chu akekōk hrui kasōt bek sik um karahōi changmak.” 28 Hiseng hi John tui manhlutna Jordan tuidung pang nisō rekhat Bethany a akasōk omchen kae.

Pathen Kemōngte

29 Abân kania John in Jesu ahnenga akahong kha ahmua ati, “Vânhnōi setna karôn Pathen Kemōngte kha hin ka-om. 30 Ke'n, ‘Kei kahnunga akajōng mi inkhat kha kei kanek a kalen jôk, ajârchu ka'ntet mak hma ama chu aleika-omsa jo kae,' kalei ti kha ama hi kae. 31 Ke'n ama tu achang sik leimanhret mak eng, tâk Israel mihe'n ama anmanhretna sik tui inhlut katlo sik a kei akajōng eng kae.” 32 John in sâkhi apek kha hi kae: “Ke'n Rathla kha vaṭhu kapōa marvâna inphut ama chunga ajōng kachu kha kahmu. 33 Khava katlunga ke'n leimanhret mak eng, tâk tuia tuimanhlut katlo sik a anijōng katir Pathen in, kahnenga, ‘Nang in Rathla kha mi inkhat chunga ajōng kaṭum nahmu sik; Rathla Inthenga tui manhlutna akatlo sik kha ama kae,' atipek eng. 34 Khavakha ke'n ama chunga kahmu jo, khana ama hi Pathen Sapa kha kae, tia kamanthei chei kae.”

Jesu Sonle Hma-Inkeihei

35 Abân kania John in asonle 2 leh khava hmun a leikangir nôk hei, 36 Jesu ahnengting akahong kha aleihmu. “Pathen Kemōngte so, son ka-om!” atia kae. 37 Sonle 2 hei khan ahri kha antheia Jesu kahnung anjui jo. 38 Jesu inhea anmani'n akahnung anta heijui kha ahmua, ader hei, “Nangni'n heimo nantajong?” Anmani'n anmasôn, “Rabbi, nang khon mo aka-om che?” anti. (Rabbi hi Oja, tina kae.) 39 Ama'n amasôn hei, “Hong una hong-en ruh!” (Pung 4 radon khōhlei ting jo kae.) Khava jâra anmani kase heia a-omna hmun anhmu jo, khava ning khan ama leh ka-omsap jo hei. 40 Ankâra inkhat chu Simon Peter naipa, Andrew kae. 41 Inrangtak a, a-upa Simon ahmua ahri pek “Messiah kha kanhmu jo.” (Messiah ti hi Christa tina kae.) 42 Ama'n Simon kha Jesu hneng aheiṭhōi. Jesu'n ama a-enna, “Nang rahming hi John sapa Simon che kae, tâk Cephas a'nti sik jo che kae,” ati. (Hivahi Peter tina leh in-angtling hlungpui inkhat tina kae.)

Jesu'n Philip leh Nathanael Abek hei

43 Abân kania Jesu Galileea se sik a inrei. Ama'n Philip ahmua ahnenga, “Ajui roh,” ati. 44 (Philip kha Peter leh Andrew omna Bethsaida khōpuia mi kae.) 45 Philip in Nathanael ahmua ahnenga, “Ama chungchânga Moses'n Dânrabu a amazet leh sânkathemhei talei mazet mipa kha keini'n kanhmu jo; ama kha Nazareth a Jesu, Joseph sapa kha kae,” ati. 46 Nathanael in ahnenga, “Nazareth a akaṭha heikhat akasōk tor a mo?” ati. Philip in ahnenga, “Hong inna va-en roh,” ati. 47 Jesu'n Nathanael ahnenga akahong kha ahmu pha, ama chungchâng ṭong ahri: “Enruh, Israel inchêntak inkhat so! Achunga ṭhena heite om mak.” 48 Nathanael in ahnenga ader: “Heikhong mo namanhret eng?” Jesu'n amasôn, “Philip in abek mak hma che, theichangkung thōia na-omlai khan kahmu che.” 49 Nathanael in ahnenga amasôn, “Rabbi, nang Pathen Sapa che kae. Israelhei Rengpa che kae.” 50 Jesu'n, “Theichangkung thōia na-omlai kahmu che kati jâr hrep a nang in nataksen eng mo? Nang in hiva kanek a akalelen ṭōnhei nalahmu sik kae,” ati. 51 Khana ama'n anhnenga ati, “Kadiktak a kahri pek chei kae, marvân inhlânga, Pathen ngevahei khan Mihring Sapa chunga ajōng kaṭum leh akake hei nantahmu sik kae.”

John 2

Kana a Hmōiṭhōi

1 Ni 2 sō leh Galilee ram a Cana khōa hmōiṭhōina inkhat leika-om. Khana khan Jesu nu leika-om, 2 khana Jesu leh asonle he'm khava hmōiṭhōina khan anleibek hei. 3 Anmani'n ju annei mak jo pha, Jesu nu khan Jesu hneng, “Anmani ju neimak jo hei,” ati. 4 Jesu'n amasôn, “Heimo tlo sik kha amanthei mak roh. Kapha latluk mak.” 5 Jesu nu khan sōk-hei hneng, “Ama tamanthei chei kha tlo ruh,” ati hei. 6 Jehudihei bek ngaia insuk inthengna ka-om, khava sik a anta leihmang hlungbe litre 100 sasâm kaken karuk leika-om. 7 Jesu'n sōk-hei hneng, “Hiva behei hi tui mansip ruh,” ati hei. Anmani'n tuibehei kha kasip a ansun jo hei. 8 Khava pha Jesu'n anhnenga, “Tûn tui kha ajing lōksōt una revei rōi kavorpa hneng choi ruh,” ati hei. 9 Anmani'n anchoia, rōi kavorpa khan tui kha amantem pha, ju leikachang jo. Ama'n khava ju kha khona inphut mo leimanhret mak a kae. (Tâk-kha tui kalōk sōk-hei khan chu anmanhret a kae.) 10 Khava jâra ama'n hmōipa kha abek a, ahnenga ati, “Mi rakip in hma inkeia ju katui pen ansem phung, khana mihe'n an-in manchim pha leh ju kasep ansem ri. Tâk-kha nang chu tûn katlung ju katui nalada hi.” 11 Hiva ṭōn-inlak hma inkeipen hi Jesu'n Galilee ram a Cana khōa atlosōt a kae; khana khan alûrna aphônga, asonle he'n antaksen jo. 12 Hivasōa Jesu sernu leh anaihei, khana asonlehei Capernauma kase heia, khava hmun a khan kani ṭhahrep vaka-om jo hei.

Jesu Bek-inna Akase

13 Jehudihei Rakan Kût sik pha kha ahnaitek jo jâra Jesu Jerusalema leikase. 14 Ama'n Bek-inna sehrat, kemōng, pherva kajōrhei leh sêr kathlenghei andokhâng hnenga an-inong kha ahmu hei. 15 Ama'n hrui akahrea sung vōkna sik asyema, Bek-inna inphut sehrat leh kemōnghei kha ahnong sōt a sêr kathlenghei dokhânghei kha amaletpek hei khana ansêr kha akathek pek hei. 16 Khana pherva kajōrhei hneng ama'n ṭong apek heia, “Hina inphut hivahei hi choisōt hei ruh! Kapa inn hi neinâk jōrna manchang mak ruh,” ati hei. 17 Asonle he'n ṭong intheng tahri, “Na-inn kha karangeia kamalunga hmei kakâng ka-ang,” ati kha anleimandonsōt a kae. 18 Khava pha Jehudi vaikarônhei khan ahnenga anhongder, “Nang in hinga tlotheina ratha nanei ti malârna heiṭōn inlak mo namanhmutor sik ung?” 19 Jesu'n amasôn hei, “Hiva Pathen inn hi ṭhet ruh khana ke'n ni 3 a kasak nôk sik.” 20 “Hiva Bek-inn hi asakna kum 46 kahlut, nang in ni 3 shunga nasak nôk sik mo?” tia ander. 21 Tâk-kha Jesu'n Bek-inn tia ahrina hi ataksa kalōng kha atina kae. 22 Ama thina inphut athōisōtsō pha, asonle he'n hiva aleihri hi anmandonsōt joa kae; khana anmani'n ṭong intheng kha leh ama'n aleihri ṭong kha antaksen jo.

Mihring Chungchânga Jesu Manhretna

23 Rakan Kût reveilai Jesu Jerusalema a-om shunga ṭōn-inlak katamtak atlosōt anhmu jâra mi katamtak in antaksen jo. 24 Achang ravâng Jesu'n chu anmani leitaksen tor mak hei, ajârchu amanhretpet heia kae. 25 Jesu'n anmalung shunga heimo aka-om ti amanhretsō, achang jâra tûte'n ama hneng mihei chungchânga manthei sik rangei mak a kae.

John 3

Jesu leh Nicodemus

1 Jehudihei hlamkakei, Phariseehei kâra rup inkhat, arahming Nicodemus inti mi inkhat leika-om. 2 Ama jân khat Jesu hneng kahonga, “Rabbi, nang Pathena inphut akajōng Oja che ti keini'n kanmanhret; ajârchu Pathen inthōpui tei loa tûte'n natlo ṭōn inlak-hei hi tlotor mak,” ati. 3 Jesu'n amasôn, “Kadiktak a kahri pek che kae; tu achang inum avea a'nte thermak inchu Pathen Rengram kha hmutor mak ning.” 4 Nicodemus in ader, “Heikhong mo mi inkhat upa achang sō kahnunga a'ntether nôk sik? Anu shunga akahlut nôk a a'ntether thei sik mo!” 5 Jesu'n amasôn, “Kadiktak a kahri pek che kae, tui leh Rathla a a'ntemak tûte inkhatbek Pathen Rengram hlut tor mak ning. 6 Mi inkhat hi taksa chu nu leh pa tamatet kae; tâk rathlating chu Rathla tamatet kae. 7 Nangni nankhenga a'ntether nger sik chei kae kati jâra mandonhla mak roh. 8 Thli so ahrâng hnō-hnōmna ting kahrâng, nang in arasa nathei, tâk nang in khontinga ahe'nphut a khonting ajōn manhret mak che. Khava kapōa Rathla a a'nte rakip kha khanga katia kae.” 9 Nicodemus in ader, “Heikhong mo hi akachang tor sik?” 10 Jesu'n amasôn, “Nang Israelhei Oja kalen inkhat kachang chea hivahi namanhret tor mak mo? 11 Kadiktak a kahri pek che kae. Keini'n kanta manhret kha kanmanthei chei, kantahmu kha kanhri pek chei, tâk nangni inkhatbek in kanṭong hri lohnōm mak chei. 12 Ke'n hiva vânhnōi chungchânga kahri hi nantaksen mak inchu, marvân chunga ṭong kahri pha heikhong mo nanta taksen tor sik? 13 Marvâna inphut ajōng kaṭum Mihring Sapa tei loa tûte marvâna akake la-om mak.” 14 Moses'n ram thōia sum-êng mari kha sungtlōn inkhat chunga aleimakhei manshâng kapōa mihring Sapa kha'm antamakhei sik kae, 15 akataksen rakip in kumsôt hringna aneina sik a kae. 16 Ajârchu Pathen in vânhnōi ralei hi hingtuk hrep alungset jâra Asapa inkhat rōk kha apek jo, tu achang inum ama kataksen kha thimak ning, tâk kumleikōa hringna anei sik kae. 17 Ajârchu Pathen in ralei ṭong katan sik a asapa ajōngtir changmak; tâk akahuk inhring sik a ajōngtir kae. 18 Tu achang inum Sapa kataksen rakip chu aṭong intanmak ning, tu achang inum akataksenmak rakip kha ṭongtansa jo hei kae, ajârchu ama'n Pathen Sapa inkhat rōk kha leitaksen mak jo. 19 Ṭongtan ṭōn kha hi kae: ti chu vâr kha raleichunga kajōng jo, tâk mihe'n ṭhatmak ṭōn kha antlo jâra, vâr kanek a a'nthim jôk kha anmadu. 20 Ṭōn kaṭhamak katlo rakip in vâr kha anhōt, khana anṭōn kaṭhamak tlohei kha inlâr sik tia vâra honghnōm mak hei. 21 Achang ravâng akadik katlo mi kha tu achang inum Pathen ṭong juina ṭōn atlo kae ti a'nlârsōt theina sik vâra khan kahong hei.

Jesu leh John

22 Hivasōa Jesu kha asonlehei leh Judea ramṭhenting kase jo hei. Khava hmun a khan ama'n pha ṭhahrep a-ompui heia, tui amanhlut jo hei. 23 John inum Salim hnenga Aenon khōa tui atam jâra tui manhlutna aleitloa kae. Ahnenga mi kahong hei khana tui amanhlut heia kae. 24 (Hivahi John kurkhum a anleikhum mak laia kae.) 25 John sonle ṭhahrep leh Jehudi inkhat beklanga insi intheng chungchânga inkhena anleiphut. 26 Khava jâra anmani John hneng kase heia, “Rabbi, Jordan nisō rea nale'nṭhōi puipa, ama chungchânga naleihripa kha namandonsōt mo? Kaṭha, tûnhin tuimanhlut atloa ka-om, khana mi rakip ahnenga kase heia kae,” anti. 27 John in amasôn hei, “Marvâna inphut a Pathen tajōng pek mak mi khan heite chentor mak. 28 Ke'n nanhnenga, ‘Kei chu kadeisōt Messiah kha changmak eng, tâk ahma a akase sik a ajōngtir eng kha kae,' tia kaleihrina sâkhi kha nangni chei kae. 29 Hmōinu kha hmōipa ta kae; tâk khava hnenga akangir hmōipa ṭhōnpa khan hmōipa rasa kha athei pha, inpâk a kae. Hing'hin kei inpâkna kha pui akatluk jo kae. 30 Ama chu akakhang chet-chet sik kae, kei chu akatlasuk chet-chet sik eng kae.”

Marvâna Inphut Akajōngpa

31 Marvâna inphut akajōng ama kha heirakip chunga akalenpen kae. Raleichung mi kha ralei ta kae, khana raleichung sik a ṭong kha ama'n ahri, marvân chunga akajōng ama kha heirakip chungpen kae. 32 Ama'n ahmu leh athei ṭong kha ahri, tâk tûte'n aṭong lopek mak hei. 33 Tu achang inum ama ṭong inhlâng mi khan, Pathen hi akadik kae ti amanchên jo. 34 Pathen tahei tir mi khan Pathen ṭong kha ahri; ajârchu Pathen in ama chunga arathla kha pui katluk a apek. 35 Pa khan asapa kha alungset, khana aratha neina thōia heirakip apek jo. 36 Tu achang inum Sapa kataksen mi khan kumsôt hringna anei jo; tu achang inum Sapa kataksen mak mi khan hringna hmuhêr mak ning, tâk Pathen karâkna thōia ka-om ṭhak sik.

John 4

Jesu leh Samaria Nuhmei

1 Jesu'n John kanek a mi katamtak tui manhlutna atlo heia, sonle'm akatam jôk asyem jo hei ti hi Pharisee he'n anthei jo tia Jesu'n amanhret jo. 2 (Kadiktak a chu, ama khet in tûte tui manhlutna leitlo mak, asonlehei tatlo kae.) 3 Antahri kha athei pha Jesu'n Judea ram adahlona Galileeting inle nôk jo. 4 Ama'n khan asena Samaria ahro nger sik kasōk. 5 Ama'n Samaria ram shunga khōpui inkhat Sychar inti aphâk jo, khavakha Jacob in asapa Joseph ram apekna hnenga kae. 6 Khava hmun a khan Jacob tuikhur kha leika-om, Jesu ahlam heihrona kachâm joa khava tuikhur panga khan in-ong jo. Apha kha sûnṭim radontak a leikae. 7 Samaria nuhmei inkhat tui kathe sik kahonga, Jesu'n amanu hneng, “In sik tui apek roh,” ati. 8 (Asonlehei khōpuia sâk incho sik leikase hei.) 9 Nuhmei khan amasôn, “Nang Jehudi inkhat che'n kei Samaria kachang inkhat hneng, heikhong mo tui in sik nader eng?” (Ajârchu Samariahei tahmang kōklei leh thlengkamhei Jehudi he'n hmanglo hei kae.) 10 Jesu'n amasôn, “Nang in Pathen kutchoi pek kha namanhret a, khana tui in sik nakaderpa kha namanhret a, nang in ama hneng jôk nalei der inchu, ama'n hringna tui apek sik che kae.” 11 Nuhmeinu khan ahnenga ati, “Apu, nang in alōkna sik heite neimak che, khana tuikhur hi inthûk a kae; khava hringna tui kha khona mo nalo sik. 12 Kanpa-kanpu Jacob in hiva tuikhur hi apek ung kae, ama leh asa he'n khan chu aran he'n hinna inphut anta lei-in kae. Ama kanek a nang akalen che mo?” 13 Jesu'n amasôn: “Tu achang inum hiva tui ka-in hei kha antui kahre nôk sik. 14 Khana tu achang inum kei tapek sik tui ka-in mi khachu atui hrenôk hêrmak jo ning. Kei tui pek sik khachu, kapek mipa shunga khan hringna tui kapût a kalōng sik, khana kumleikōa hringna apek sik kae.” 15 Nuhmei khan, “Apu, khava tui kha apek roh! Khana katui ahre nôk hêrmakna sik leh hiva hmun a tui kathe kahong nôk makna sik,” ati. 16 Jesu'n amanu hneng, “Se ina napuise vabek ina hin hong ruh,” atipek. 17 Nuhmeinu khan amasôn, “Kei puise neimak eng.” Jesu'n amanu hneng ati, “Nang in puise neimak eng nati hi kadik hranghra. 18 Nang in puise 5 nanei jo, tuna na-ompuipa hi napuise inchênkhet changmak; nang in akadiktak kha nahri pek eng.” 19 Nuhmei khan ati, “Apu, nang sânkathem inkhat che kae ti kamanhret jo che. 20 Kanpu sōn he'n hiva tlâng chunga hin Pathen anleikamuk, tâk Jehudi nangni'nchu, ‘Pathen kamukna sik hmun kha Jerusalem kae,' nanti.” 21 Jesu'n amanu hneng ati, “Eh nuhmei, ataksen roh! Mihe'n hiva hmun a achanga, Jerusalema achang inum Pa kha antakamuk makna sik pha kha alajōng katlung sik kae. 22 Nangni Samaria mi'n nantamanhret manchênmak kha nankamuk. Keini Jehudi'n tu mo kantakamuk kha kanmanhret. Ajârchu Jehudi heia inphut hukmanhringna hi akajōng kae. 23 Tâk-kha pha kha katluk jo, tûn jo hi kae. Kadiktak a inmuk hei khan Pa kha kadiktak a leh Rathla a antakamuk sik hi Pa tamadu kae. 24 Pathen hi Rathla kae, khana ama Rathla hratna vâng rōk khan mihe'n ama antakamuk tor kae.” 25 Nuhmei khan ahnenga, “Messiah kha kajōng sik, khana ama ajōng pha, heirakip amanthei sik me ti kha kamanhret,” ati. 26 Jesu'n amasôn, “Ama kha kei eng kae, nahnenga ṭongkahri eng hi kae.” 27 Khava laitak khan asonlehei kha hong inle jo hei; khana anmani'n ama nuhmei inkhat leh anle'nbek hei kha anhmu pha inlak ansak hêr jo, kha'num tûte'n, nuhmeinu kha, “Heimo namadu?” timak hei, a-emak leh Jesu hneng, “Heisa mo amanu na'nbekpui?” tia'm dermak hei. 28 Khava pha nuhmeinu khan atuibe adahlona, khōpuia inlea, mihei hneng, 29 “Ke'n kaleitlo rakip akhenga ani kahri pek mipa so hong una hong-en ruh! Ama so Christa changmak ning mo?” atia avabek hei. 30 Khava jâra anmani khōpui andahlona Jesu hneng kase jo hei. 31 Khava laitak khan sonle he'n Jesu hneng, “Oja, bu hongsâk jo roh,” tia anleingêk. 32 Tâk-kha ama'n amasôn hei, “Nangni taman hretmak busâk sik ke'n kanei.” 33 Khava jâra asonlehei inkhat leh inkhat indertō hei, “Tu mo inkhat in busâk sik ahei choi pek nâk mo?” 34 Jesu'n anhnenga, “Kei bu khachu anijōng katirpa lungdo pui katluk a tlo mathluk sik kha kae,” ati. 35 Nangni'n, “Sa-âtna sik thla 4 laka-om,” nanti. Ke'n kahri pek chei kae; Kaṭha a khō thlir una hlei rajeiso enruh: sâng kahmin sō jo, a-ât pha katluk joa kae. 36 Sâng ka-ât pa kha tloman inpek a kumleikōa hringna sik sâng kha amantûp; khang'khan akalingpa leh aka-âtpa kha inpâksap sik hei. 37 Ajârchu, ‘Mi inkhat in alinga, mihlop inkhat in a-ât kae,' inti kha akadik kae. 38 Nangni talei thlōmakna hleihmun a khan sâng ka-ât sik a ke'n nangni katir chei kae; khana khan milak he'n ṭōn antlo khana anmani ṭōna khan nangni'm hnemna nanchen,” ati. 39 Nuhmeinu khan, “Ama'n kaleitlo rakip ahrisōt pek eng,” ati jâra Samaria khōpui mi katamtak in Jesu kha antaksen jo. 40 Khava jâra Samaria mihei kha Jesu hneng kahong heia, Jesu'n ala-ompui sik heia anngek pha, Jesu'n anmani 2 ala-ompui heia kae. 41 Jesu ṭonghri jâra mi katamtak in antaksen jo. 42 Anmani'n nuhmei hneng khan anti, “Keini khet in aṭong hri kanthei joa, ama hi vânhnōi kahuk inhringpa akadik khet achang kha kanmanhret a kantataksen jo kae, nang hrina jâra changmak jo.”

Jesu'n Sarkâr Ṭōnkarôn Inkhat Sapa Amandam

43 Khava hmun a khan Jesu ni 2 a-omsō leh Galileeting kase jo. 44 Ajârchu Jesu khet in, “Sânkathem inkhat hi aram shunga mi'n kajana neimak hei,” aleiti. 45 Ama Galilee atlung pha, mihe'n anleiratō, ajârchu anmanitak inum Rakan Kût pha khan Jerusalema aleikase heia Jesu ṭōntlo inlak rakip kha anta leihmu jo kae. 46 Khava sōa Jesu'n tui kha ju amanchangna khō Galilee ram a Cana a inle nôk jo. Khava ram a sarkâr ṭōnkatlo mi inkhat asapa Capernauma akana leika-om. 47 Khava mipa khan Judea ram a inphut Galileea Jesu kahong jo ti ṭong athei pha, Jesu hneng kasea, asapa thi rong kati kha a'ndam sik a Capernauma ajōngna sik aleingek a kae. 48 Jesu'n ama hneng, “Ṭōn kalen leh ṭōn inlak-hei nanhmu mak inchu, ahei tik a tûte'n taksen mak tinnei,” ati. 49 Sarkâr ṭōn katlopa khan, amasôn, “Apu, kasapa athimak hma hong roh, se rih.” 50 Jesu'n ahnenga, “Se roh, nasapa kahring sik!” ati. Mipa khan Jesu ṭonghri kha ataksena kase jo. 51 A-innting ama kha khanga inlea aselai khan hlam a asōk he'n an-intō puia, “Nasapa kha kahring jo,” anleiti pek. 52 Ama'n asapa aṭhatdetna pha kha ader hei, anmani'n, “Jâning khōhlei pung khat a Ahritlun in amasō jo,” anti. 53 Jesu'n ama hneng, “Nasapa kahring sik jo,” atipek phatak achang kha apa khan amandonsōt a kae. Khava jâra ama leh a-innshung mi seng in antaksen joa kae. 54 Hivahi Judea ram a inphut Galilee ram a ahongsōa, ṭōn-inlak atlo vōi 2 tlukna kae.

John 5

Tuikhur Panga Akana Amandam

1 Hivasōa Jesu rehōi inkhat sik a Jerusalema leikase. 2 Jerusalema Kemōng Kot inti hnenga khan tuikhur inkhat leh aṭumna kechōn, kethonna 5 leika-om hei; khavakha Hebrew ṭonga, “Bethzatha,” inti. 3 Khava tuikhur ṭumna chōnke heia khan, hmitkacho, ke katlek, lang kathi, mikana katamtak leikaje hei; tui inhling kha anhngâk a leika-om hei. 4 Ajârchu Rōngpu ngeva inkhat kâklalak leh tuikhura khan jōng kaṭuma tui kha akachok manhling ria kae. Tui inhlinglai hmapena akaṭum mi kha heikhong khova nat achang inum kadam ri. 5 Khana khan, kum 38 akana mi inkhat leika-om. 6 Jesu'n mipa kha ahmu pha, pha kasôttak a akana jo kae ti amanhret jo; ahnenga, “Nang akadam hnōm che mo?” ati. 7 Mi kanapa khan amasôn, “Apu, tui hi ahon'chok inhling pha tuishung hlutna sik ani'nthōpui tûte neimak eng; kei vahlut rong tia ka'ntluklai mihlop inkhat in hma aleikeide ri jo enga kae.” 8 Jesu'n ahnenga, “Thōi ina nakapher inhrut roh, khana ke choi roh,” ati. 9 Khava laitak mipa kha kadam jo; ama'n akapher a'nhrut a ke achoi jo. Khava kani kha Châmhngat kani ning leikae. 10 Khava jâra Jehudi he'n mipa hneng khan, “Tuning Châmhngat kani ning kae khana nang in najena kapher na'ndom hi Dân kadōi che kae,” anti. 11 Ama'n amasôn hei, “Kei ani'ndam pa khan, ‘Najena kapher inhrut inna lôn roh!' ati eng kae.” 12 Anmani'n ander, “Nakapher inhrut ina lôn roh, anikati mi kha tu mo?” 13 Tâk-kha akana akadampa khan Jesu kha tu mo ti leimanhret mak, ajârchu khava hmun a khan mi antam jâra Jesu kha leikasesōt joa kae. 14 Khava sōa Jesu'n ama kha Bek-inna ahmua ahnenga, “Enroh, kadam jo che, akaṭhamak chet kha nachunga atlung makna sik set nôk mak jo roh,” ati. 15 Khava sōa mipa kha Jehudihei hnenga kasea a'ndampa kha Jesu kae tia ava manthei jo hei. 16 Hiva mi amandam hi Châmhngat kani ning achang jâra Jehudi he'n Jesu chunga suk manrimna anleiphut jo. 17 Jesu'n anmani amasôn hei, “Kapa'n ṭōn atlo ṭhak achang jâra ke'num katlo sik kasōk.” 18 Hi ahria hin Jehudi he'n ama alerchet a anthat hnōma kae; ajârchu ama'n Châmhngat kani dân rōk kha asukkhōi changloa Pathen kha apa amanchanga, Pathen leh ama in-anga ahri jâra kae.

Sapa Ratha neina

19 Khava jâra Jesu'n anmani amasôn hei, “Akadiktak kahri pek chei kae, Sapa khan abing rachama heite tlotor mak; apa tatlo ahmu hei rōk kha atlo kae. Apa tatlo kha, Sapa kha'num atlo kae. 20 Ajârchu Pa khan Sapa kha alungset khana ama'n atlo rakip kha amanhmu. Ama'n hiva kakhea ṭōn kalen chet tlo sik a amanhmu sik, khana nangni nankhenga nanta det-hla et sik kae. 21 Ajârchu Pa khan akathi kha akahringa akei mathōi nôk, khava kapōa Sapa kha'num apek hnōm hei hneng hringna kha apek hei. 22 Pa khan tûte ṭong tanmak. ṭong tanna sik ratha katluk a asapa hnenga apek jo. 23 Khava jâra mi rakip in Pa antakaja kapōa Sapa kha antakaja sik kae. Tu achang inum Sapa injamak mi khan, ajōng katir a-Pa kha akaja mak kae. 24 “Akadiktak kahri pek chei kae; tu achang inum kaṭong hri katheia anijōng katirpa kataksen mi khan kumsôt hringna anei jo. Anmani ṭong intanmak jo ning, tâk thina anrakansōt a hringna antaneisa jo kae. 25 Akadiktak kahri pek chei kae; akathi khan Pathen Sapa rasa anthei pha, akathei hei khan anhonghringsōtna sik pha kha jōng katlung jo, ajōng katlungsa jo kae. 26 Pa khan abinga hringna kung akachang kapōa asapa kha'm hringna kung achangna sik ama'n asyem jo. 27 Khana ama'n Sapa kha ṭong tanna ratha kha apek jo, ajârchu ama kha Mihring Sapa kae. 28 Hivahi mandonhla mak ruh; akathi rakip in thlânkhura inphut a ama rasa antheina sik, 29 thlânkhura inphut anhong sōkna sik, pha kha jōng katlung jo: ṭōn kaṭha katlohei kha kathōi sik hei khana kahring sik hei, ṭhatmak katlohei kha'm kathōi sik hei khana themmôna inpek sik hei.

Jesu Chunga Sâkhihei

30 “Ke'n kabing rōk rachama heite tlotor mak eng; Pathen tamanthei eng dungjuia ke'n ṭong katan. Khava jâra kaṭong tan kadik, ajârchu ke'n kamadu kha tlo sik reimak eng, tâk anijōng katirpa tamadu rōk kha katloa kae. 31 “Ke'n kabinga sik sâkhi katlo'nchu, kaṭong hri kha kadik khet tia inlo theimak. 32 Tâk-kha mihlop inkhat in kei chunga sâkhi akatlo ka-om, khana ama'n kei sik a sâkhi atlo kha kadik tia ke'n kamanhret a kae. 33 Nanṭong karôn nantatir hei kha John hnenga kae, khana John in kadik a ṭong aleihri pek jo hei. 34 Hivahi mi inkhat sâkhia nei nger rong katina chu changmak, nangni hukmanhring nanchangna sik jâr pena kahri kae. 35 John in thaihmei inkhat kapōa leikavâr, khana nangni'n ama vâr kha pha bongkhat rōk nanhōi puia kae. 36 Tâk-kha John sâkhi tlo kanek a akalen chet kachungchânga sâkhi inkhat ke'n kanei; Kapa khan katlo sik ṭōn apek eng, kaṭōn tlohei khan kei kahlânga ṭong anhria, kapa tahei tirna eng kha'm amalâra kae. 37 Khan chu anijōng katir Pa'num kei kahlânga ṭong ahria kae. Nangni'n ama rasa lathei phungmak chei, ahme um lahmu phungmak chei; 38 khava jâra aṭong nanshunga om mak, ajârchu ama'n ajōng tirpa kha nangni'n taksen mak cheia kae. 39 Nangni'n Ṭong intheng rabu shunga kumsôt hringna kanhmu sik tia nanteia nanjong. Khana hiva Ṭong intheng hei hin kachungchânga antahri kae! 40 Achang ravâng hringna nanchenna sik kahnenga honghnōm mak chei. 41 “Ke'n mihring tamanpâk sik jongmak eng. 42 Tâk-kha ke'n nangni heikhong khova mi chei mo kamanhret chei; nanmalung shunga Pathen lungsetna neimak chei ti ke'n kamanhret. 43 Kapa ratha neina leh inṭhōia kei kajōng eng; tâk nangni'n kei arahlâng mak chei; mi inkhat ama bing ratha neina leh inṭhōia ajōng inchu, nangni'n ama nanlei rahlâng sik. 44 Nangni inkhat leh inkhat a inphut inchoi inshâng sik nanmadu, tâk Pathen inkhat rōk a inphut choimanshângna chen sik khachu madu mak chei; khava jâra nangni'n heikhong mo nanta taksen tor sik? 45 Kha achang inum ke'n nangni kapa hnenga kamaset sik chei tia mandon mak ruh. Maset nankapek sik kha nan inhōrnapa Moses kha kae. 46 Kadiktak a nangni'n Moses kha nantaksen inchu, kei nantalei taksen sik jo eng kae; ajârchu ama'n kei chungchâng ṭong amazet kae. 47 Tâk-kha nangni'n ama tamazet kha taksenlo cheia, heikhong hmen kei ṭonghei nanta taksen tor sik?”

John 6

Jesu'n Mi 5,000 Avei

1 Hivasōa Jesu Galilee dîr rekhat ting (Tiberius tia'm inhret) inle nôk jo. 2 Mipui katamtak in ama kahnung anleijui, ajârchu Jesu'n mi kanahei amandama ṭōn-inlak atlo hei kha anmani'n anleihmua kae. 3 Jesu tlâng inkhat a kakea asonlehei leh in-ongsap hei. 4 Rakan Kût sik kha hong kahnai jo. 5 Jesu'n khō athlira mipui katamtak ahnengting ankahong hei kha aleihmu jo hei, khava jâra ama'n Philip hneng, “Mi soseng tlukna sik bu khona mo nirachôk tor sik?” ati. 6 (Hiva ṭong hi Philip enmansinna ahri kae; kadiktak a chu ama'n atlo sik kha amanhretsa jo.) 7 Philip in amasôn, “Mi inkha-khat in ahar ajing tete hrep anchenna sik, dangka 200 kakhea buhlom rachôkna kahlut sik.” 8 Sonlehei kâra ahlop inkhat, Simon Peter naipa Andreu in: 9 “Sathai buhlom pheng 5 leh nga 2 akanei rether naipang inkhat hin ka-om. Tâk-kha mi soseng sik a hiva hrep hin heimo akahnem sik?” ati. 10 Jesu'n, “Mihei kha man-ong hei ruh,” ati hei. (Khava hmun kha phi katamtak kakek a kae.) Khava jâra mi ankhenga 5,000 kapō hei kha in-ong jo hei. 11 Jesu'n buhlom kha aloa, Pathen amanpâk a khana mi a'n-ong hei hneng khan asempek jo hei. Nga kha'm khanga in-anghrep a atloa, anmani'n ankhopna et a ansâk joa kae. 12 Anmani ankhenga ankhopsō pha, Jesu'n asonlehei hneng, “Sâk manhlei ahar-ahak heite manhmang loa akhenga hrutsō ruh,” ati hei. 13 Khava jâra anmani'n akhenga anhrut sōa, buhlom pheng 5 leh nga 2 mihe'n antasâk manhlei kha hrai 12 kasip anhrutsōt a kae. 14 Mihei khan aṭōn inlak tlo kha anhmua anhri, “Kadiktak a ama hi raleichunga akajōng sik Sânkathem kha kae!” 15 Jesu kha ahnōm ada a reng manchang sik a, anmani akasur sik anhong sik kha Jesu'n amanhret a, tlâng ting abinga leikasesōt nôk jo.

Jesu Tui chunga Alôn

16 Khōhlei ahong tlung jo pha, asonlehei kha dîrting anjōn suk a, 17 rakōnga khan kahlut heia, dîr rekhat a Capernaum ting inle jo hei. Jân hongkachang jo, Jesu chu anhnenga lahong inlemak. 18 Khava phat a khan thli inhnaktak hongkahrânga tui in-nông joa kae. 19 Sonlehei khan kilometre 5 a-emak leh 6 kapō antôr pha, anmani'n Jesu tui chunga hongkalôna anrakōng ting aheijōn kha anhmu pha anmani inpir jo hei. 20 Jesu'n anhnenga, “Ṭimak ruh, kei eng kae,” ati. 21 Anmani'n rakōng chunga inpâktak a anmanchōnga, inrangtak a anjōnna langting ram chârna leikatlung jo hei.

Mihe'n Jesu Antajong

22 Abân kania dîr rekhat tinga ka-om mihei khan rakōng inkhat rōk aka-om kha anmanhret. Sonle he'n Jesu kha inveiloa a'ntôr heia anta leidahlon kha mihei khan anmanhret jo. 23 Tiberius a inphut akahong rakōnghei khan, Rōngpu'n Pathen manpâkna apeksōa mipui he'n buhlom ansâkna hmun kha heikatlung jo heia kae. 24 Mipuihei khan Jesu achanga asonlehei anchanga khava hmun a khan om mak jo hei ti anmanhret pha, anmani rakōng shunga kahlut heia Jesu kajong sik a Capernaum ting kase jo hei.

Jesu Hringna Buhlom

25 Mihei khan Jesu kha dîr rekhat ting khan anhmu jo pha anmani'n ahnenga, “Oja, heitik a aleikase jo che mo?” anti. 26 Jesu'n amasôn hei, “Akadiktak kahri pek chei kae: ṭōn-inlak katlohei ariṭong nanmanhret jâra nantajong eng changmak, buhlom kha kakhōp a nansâk jâra nantajong eng kae. 27 A'nhmangthei bu jongna sik a ṭōn rahnak a tlomak ruh; khava kanek a, kumsôt hringna bu jongna sik ṭōn rahnak a tlo jôk ruh. Hiva bu hi mihring Sapa'n apek sik chei, ajârchu Pa Pathen khan ama chunga hnōm pekna mêrchîkna adapek jo kae.” 28 Khava jâra anmani'n ahnenga ander, “Keini'n Pathen tamantlo hnōm ung kha kantlo theina sik, hei-mo kantatlo sik?” 29 Jesu'n amasôn hei, “Pathen in nangni amantlo hnōm chei ṭōn kha hi kae; ama'n ajōng tirpa kha taksen ruh.” 30 Anmani'n anmasôn, “Keini'n heikhat kanhmu pha nang kantaksenna sik che, heiṭōn inlak mo natlosōt sik? Heimo natlo sik? 31 Ṭong intheng tahri: ‘Ama'n sâk sik buhlom marvâna inphut apek hei,' ati kapōa, kanpu sōn he'n, ram thōia manna anleisâk a kae.” 32 Jesu'n, “Akadik kha kahri pek chei kae: Moses'n aleipek chei kha marvâna inphut buhlom changmak; marvâna inphut buhlom kadiktak anikapek khachu kapa kae. 33 Pathen tapek chei buhlom khachu marvâna inphut a akajōng ama kha kae, ama khan vânhnōia hringna apek,” ati. 34 Anmani'n ama hneng ander, “Apu khava buhlom kha keini ahei tik a apek ṭhak roh.” 35 Jesu'n anhnenga ahri, “Hringna buhlom kha kei eng kae. Kei hnenga akahong mi kha ahei tik a avon ṭâmmak jo ning; kei anikataksen mi kha ahei tik a atui hremak jo ning. 36 Tûnchu, ke'n nangni kamanthei chei kae; nanhmu jo eng tâk ataksen mak tin chei. 37 Kapa'n apek eng hei seng kahnenga kahong sik hei. Kahnenga akahong mi kha tu achang innum ke'n hnongsōt hêrmak ning, 38 ajârchu kei anijōng katirpa lungdo katlo sik a marvâna inphut kei akajōng eng kae; kalungdo katlo sik a akajōng changmak eng. 39 Anijōng katirpa'n amantlo hnōm eng khachu hi kae; ti chu ama'n apek jo eng hei seng ankhenga manhmang loa, a'nchai ning hringna antachen sik kae. 40 Ajârchu Sapa kahmua akataksen rakip in kumsôt hringna anneina sik a kae. Khana a'nchai ning kani khan anmani kahringa kamathōi sik hei.” 41 Jesu'n ati, “Marvâna inphut akajōng buhlom kha kei eng kae,” ati jâra Jehudihei kachōr inphut jo hei. 42 Khava jâra anmani'n indertō hei, “Hiva mi hi Joseph sapa Jesu kae, changmak mo? Eini'n anu leh apa nimanhret hei. Khan chu tûn ama'n heikhong mo marvâna inphut akajōng eng ati?” 43 Jesu'n amasôn hei, “Nanbinga nangni nan-inbek chōr-chōr kha bâng ruh. 44 Anijōng katir ka-Pa'n kahnenga aheikei manhlut tei loa tûte kahnenga hongtor mak; khana a'nchai ning kani khan kahringa kakei mathōi sik kae. 45 Sânkathem he'n hing'hin anleimazet, ‘Pathen in mi rakip amanthei sik.' Tu achang inum Pa hnenga inphut aṭong kathei leh a'nchû mi kha kahnenga kahong. 46 Tu mo inkhat in Pa kha ahmu jo tina changmak; Pathena inphut a akajōng ama tei loa tûte'n Pa kha lahmu mak. 47 Akadiktak kahri pek chei kae: akataksen mi khan kumsôt hringna anei jo. 48 Kei hringna buhlom eng kae. 49 Nanpusōn he'n ram thōia manna kha anleisâk, tâk kathihei. 50 Tâk-kha marvâna inphut akajōng buhlom hichu tu achang inum akasâk rakip thimak jo ning. 51 Kei marvâna inphut akajōng hringna buhlom eng kha kae. Tu achang inum hiva buhlom kasâk mi kha ahei tik chen a kahring sik. Khana ke'n ama kapek sik buhlom kha kataksa ravōi hi kae, hivahi vânhnōi hringna sik a kapek kha kae.” 52 Hivahin anmani kâra hnuk kana tak a inkhena amanphut jo heia, “Hei-khong mo hiva mi hin sâk sik a ataksa ravōi apek sik me?” tia inder jo hei. 53 Jesu'n anhnenga ahri, “Akadiktak kahri pek chei kae; nangni'n Mihring Sapa taksa ravōi nansâk mak a, athisen nan-inmak inchu, nanbinga hringna neimak tin chei. 54 Tu achang inum kataksa ravōi kasâk leh kathisen ka-in mi khan kumsôt hringna anei jo, khana a'nchai ning ama kahringa kamathōi sik kae. 55 Ajârchu kataksa ravōi hi thlai sâk sik khet kae, kathisen hi in sik khet kha kae. 56 Tu achang inum kataksa ravōi kasâk a khana kathisen ka-in mi kha keia ama ka-om khana ama a kei ka-om eng. 57 Akahring ṭhak Pa khan ajōngtir eng, khana kei um ama jâra akahring eng kae. Khava kapōa khan tu achang inum kei anikasâk mi kha kei jâra kahring sik. 58 Khava jâra hiva buhlom hi marvâna inphut akajōng kha kae; nanpusōn he'n anta leisak a akathihei khava buhlom kapō kha changmak. Anmani hnunga chu kathihei, tâk hiva buhlom kasâk hei kha ahei tik chen a kahring sik hei.” 59 Hivahi Capernauma intûpna innpuia Jesu'n aman theina heia ahri kae.

Kumsôt a Hringna Ṭonghei

60 Asonle akatam lang in hiva ahri hei hi anthei pha, “Hiva aman theinahei hi manhret intak rei. Tu'n mo amanhret tor sik?” anti. 61 Manthei lo jen heia Jesu'n asonlehei leichōrna kha amanhret a anhnenga ati, “Hivahin nangni aman haihnōm jo chei mo? 62 Kha achang inchu, mandonna inkhat a, mihring Sapa kha ama aleiomna ting a'nle nanhmu inchu heikhonga sik jo chei hmen? 63 Hringna kapek kha Rathla kae; taksa chu ahnemna heite om mak. Ke'n nanhnenga kaleihri jo ṭong khan hringna kapek Pathen Rathla kha ajōng rôn. 64 Tâk-kha nankâra ṭhahrep in taksen mak cheia kae.” (Jesu'n anphutbia inphut akataksenmak sik leh mikut a akapek sōt sik inkhat kha amanhret a kae.) 65 Khana ama'n ahrisa, “Hiva sik khet jâra ke'n kalei hripeksa jo chei kae, ti chu Pa khan a-etheina sik aleisyemsa achangmak inchu tûte kahnenga hongtor mak.” 66 Hiva sik jâra khan akajui katamtak hei khan avea juihnōm mak jo heia ankahnungting inle jo hei. 67 Khava pha Jesu'n asonle 12 hei hneng, “Nangni'num nantadahlon hnōm jo eng mo?” ati hei. 68 Simon Peter in amasôn, “Rōngpu, tu hneng mo keini akase sik ung? Nang in kumsôt hringna kapek ṭong kha nanei kae. 69 Khana tûn nang Pathena inphut akahong a'ntheng inkhat nachang kanmanhret a kantaksen che.” 70 Jesu'n amasôn hei, “Ke'n nangni 12 kakadei chei changmak mo? Kha'num nankâra inkhat chu rathla kaṭhamak kae.” 71 Ama'n Simon Isca-riot sapa Judas akapek sōt sikpa kha atina kae. Ajârchu Judas kha sonle 12 hei kâra inkhat aleichang ravâng Jesu kha mikut chunga apek sōt sik kae.

John 7

Jesu leh Anaihei

1 Hivasōa Jesu Galilee ram a leikalôn lelea kae; ajârchu Jehudi hlamkakei he'n ama that sik a anjong jâra Judea ramting leise hnōm mak. 2 Khava lai khan Jehudihei Rabuk Kût (kumther rehōi) pha hong kahnai jo. 3 Khava jâra anai he'n Jesu hnenga, “Naṭōn tlohei kha nasonle he'n anhmu theina sik hiva hmun hi dahlon ina Judea ramting se jo roh. 4 Ajârchu inphông sik a'ndu mi tûte'n marûk a ṭōn tlophung mak hei. Nang in hiva ṭōnhei hi natlo achang jâra vânhnōi pumpui in manhret hei rasoh!” anti. 5 (Anaihei kapha'num leitaksen mak hei.) 6 Jesu'n anhnenga ati, “Kei sik a aphatak kha lajōngmak. Nangni sik a chu ahei tik a apha kachang ṭhak. 7 Vânhnōi in nangni chu hōtmak hei chei, tâk kei chu anṭōnhlam kadikmak karakôk hei jâra anhōt eng. 8 Nangni reveina khan se ruh, kei sik a chu aphatak kha lajōngmak, khava jâra kei hongmak ning.” 9 Anmani khang'khan ahri pek heia, ama chu Galileea ka-om jo.

Rabuk Kût Reveina Jesu

10 Anaihei reveia ansesō pha, Jesu'm vakasea kae. Achang ravâng inphôngtak a leise mak, marûk a leikase. 11 Jehudi hlamkakei he'n reveina hmun a khan an-ena, “Ama khon mo aka-om?” antia inder hei. 12 Mipui kâra khan Jesu chungchâng kaṭong heia, ṭhahrep in, “Ama mikaṭha kae,” anti. Alak her khat in, “Changmak, ama mikahōn kae,” anti. 13 Tâk-kha Jehudi vaikarônhei anṭit jâra, tûte'n inphôngtak a Jesu chungchâng ṭong leihri ngammak hei. 14 Revei kha aṭim kapō athleng jo pha Jesu Bek-inna kasea manthei aleiphut jo. 15 Jehudi Sehmang-Pa-chong he'n, “Hiva mipa hin inchûna chu neilo jena, heikhong mo hingtuk hrep manhretna anei?” mandonhla tak a anleiti. 16 Jesu'n amasôn hei, “Ke'n kamanthei chei hi keita changmak, tâk anijōng katirpa a inphut akajōng kae. 17 Tu achang inum Pathen lungdo tlo sik akatup mi khan kaman theina hi Pathena inphut akajōng a-emak leh kabing ratha neina vâng kahri kae ti hi amanhret sik. 18 Mi inkhat abing ratha neina vâng akaṭong khan abing lûrna sik ajong kae. Achang ravâng ajōng katirpa lûrna sik kajōng ama khachu amalung intheng, khana akadik mak heite neimak. 19 Moses'n Dân kha apek chei, changmak mo? Tâk-kha inkhatbek inum Dân kha juimak chei. Heisa mo kei that sik a nantarei eng?” 20 Mipuihei khan anmasôn, “Tu'n mo nang that sik a arei che? Nang ṭai narôn kae!” 21 Jesu'n amasôn hei, “Ke'n ṭōn-inlak inkhat katloa nangni'n nanmandonhla. 22 Moses'n nansahei anvun nantatan sik a ṭong apek chei (akaphut kha Moses changloa nanpu sōnhei taleiphut achang inum), nangni'n Châmhngat kani ning naipang inkhat vun nantan ria kae. 23 Châmhngat kani ning naipang inkhat vuntan hin Moses Dân kha akakōimak achang inchu, ke'n Châmhngat kani ning mi inkhat kaman dam jâra nangni'n kachunga nanhnuk akana mo? 24 Avâng pônga mi hmai ena ṭong tanmak ruh, tâk kadiktak a ṭong tan ruh.”

Ama Messiah kha mo?

25 Jerusalema mi ṭhahrep in anti, “Hlamkakei he'n that sik a antarei mi kha ama hi changmak mo? 26 Enruh! Mipui kâra inphôngtak a ama'n ṭong ahria, tûte'n heite hrimak hei; hlamkakei he'n ama hi Messiah achang inchêna antamanhret nâk mo? 27 Tâk-kha Messiah kha ajōng pha leh khona inphut akajōng mo, tûte'n manhret mak hei ning; tâk hiva mipa hichu eini'n ajōng inphutna nimanhret.” 28 Jesu'n Bek-inna amanthei lai hei khan rasa inhnaktak a ahri, “Nangni'n kei khona inphut akajōng eng inchêntak a nantamanhret mo? Kei kabing rachama akajōng eng changmak. Hei-achang inum anijōng katirpa kha akadik kae. Nangni'n manhret mak chei, 29 tâk ke'nchu kamanhret, ajârchu ahnenga inphut akajōng eng kae khana ama tajōngtir eng kae.” 30 Khava pha anmani'n sur sik a anrei, tâk tûte'n achunga ankut bânngam mak hei, ajârchu apha kha latluk mak hia kae. 31 Tâk-kha mipui kâra akatamtak in ama antaksena, “Christa ajōng pha leh, hiva mipa tatlo kanek a ṭōn kalen atlo tor sik nâk mo?” antia kae.

Jesu Kasur sik a Ram Kahrunghei Antatir hei

32 Pharisee he'n mipuihei kâra hiva Jesu chungchâng ṭong inhri hi anthei jâra anmani leh thempu kalen he'n Jesu kasur sik a mi antir jo hei. 33 Jesu'n ati, “Pha bongkhat rōk ke'n nangni ka'nṭhōipui sik jo chei kae, khava sō leh chu anijōng katirpa hneng akase sik jo eng kae. 34 Nangni'n kei nanjong sik eng, tâk ahmu mak jo tin chei; ajârchu ka-omna hmun a khan nangni hongtor mak chei ning.” 35 Jehudi hlamkakei he'n anmani kâra anhri, “Khon mo akasea eini'n ama nihmu mak sik hi? Jehudihei omna Greek khōpuia akasea Jehudihei ava manthei sik hei mo? 36 Nangni'n kei nanjong sik eng, tâk ahmu mak tin chei, khana ka-omna khan nangni hongtor mak tin chei ati hi, heimo atina?”

Hringna Kape Kava dunghei

37 Revei inchai ning alûrpen ning kani khan Jesu kangirsōt a rasa inhnaktak a ahri, “Tui kahre tu achang inum kahnenga akahong sik kae, 38 khana anikataksen tu achang inum anta-in sik kae. Ṭong intheng in ahri kapōa, ‘Tu achang inum kei kataksen mi kha amalung shunga inphut hringna tuidung kalōng sik a kae.'” 39 Jesu'n hiva ahri hi ama kataksen he'n hnunga Rathla antachen sik kha atina kae. Khava pha khan chu Rathla kha la'npek mak hi ajârchu ama kha kalûrtak a keimanke lachang mak a kae.

Mipuihei Kâra Insemṭhenna

40 Mipui kâra mi ṭhahrep in hiva ṭonghei hi anthei pha, “Hiva mipa hi inchêntak a Sânkathem kae!” anti. 41 Her khat in, “Ama kadeisōt Messiah kae!” anti. Tâk-kha her khat in, “Galileea inphut Messiah kha hongmak ning!” anti. 42 Ṭong Inthenga chu Messiah kha David phung hruia inphut, khana David leiomna khōpui Bethlehema a'nte sik a ahri,” anti. 43 Khava jâra khang'khan mipui kâra insemṭhenna ka-om jo. 44 Mi ṭhahrep in Jesu ansur hnōm, tâk tûte'n achunga ankut kabânmak heia kae.

Jehudi Vaikarônhei Taksen makna

45 Mikahrunghei kha thempu kalenhei leh Phariseehei hneng he'nle jo hei khana anmani'n ander hei, “Heisa mo ama nantaheiṭhōi mak?” 46 Mikahrunghei khan anmasôn hei, “Ama ṭonghri kapōa tûte'n ṭong lahri phungmak hei.” 47 Pharisee he'n anmasôn hei, “Nangni kapha'm amanvet jo chei mo? 48 Nihlam kakeihei leh Phariseehei inkhatbek in ama antataksen nanmanhret jo mo? 49 Hiva mipuihei hin Moses Dân kha manhret mak hei, khava jâra anmani Pathen hâksêrna antachen jo kae!” 50 Phariseehei kâra Nicodemus inti, hma khan Jesu inhmupuia aleikase jo inkhat leika-om. Ama'n alak-hei hneng, 51 “Nidân dungjuia mi inkhat ṭōntlo nijongsōt mak hma leh aṭong hri nithei mak hma eini'n maset theibât mak min,” ati hei. 52 Anmani'n anmasôn, “Kaṭha jo, nang um Galileea inphut mi che mo? Ṭong intheng kha tei roh, Galileea inphut sânkathem sōk phungmak ti namanhret sik.”

John 8

Ajông laitak Antasur Nuhmei

1 Khava sōa mi rakip an-ina inle jo hei, tâk Jesu chu Olive Tlânga leikasea kae. 2 Abân kani hmatak a Jesu Bek-inna inle nôk a kae. Mipui ankhenga ahnenga hong intûp jo hei, khana ama in-onga anmani manthei aphut jo hei. 3 Dân kathemhei leh Pharisee he'n nuhmei inkhat mi leh ajông laitak antasur anjōng ṭhōia ankhenga hmaikunga anman ngir jo. 4 Anmani'n Jesu hneng, “Oja, hiva nuhmeinu hi ajông laitak antasur kae. 5 Nidân dungjuia hinghiva nuhmei hi hlung vâng denghlon sik Moses'n ṭong apek. Tûn, nang in heimo nati?” anti. 6 Anmani'n ama anmaset theina sik, hivahi enmansinna inkhat a antahri kae. Tâk-kha Jesu kakhup a akutpâr vâng ralei aleimazet a kae. 7 Anmani'n khanga anngir pum a ṭong anderlai khan, Jesu kha kangir intluna, anhnenga, “Nankâra setna kanei hêrmak mi khan hmapena amanu deng rasoh,” ati hei. 8 Khava sōa ama kakhup nôk a raleia amazet a kae. 9 Anmani'n kha anthei pha, upa pena inphut inkha-khat a kasesōt heia, ankhenga andahlon jo. Jesu leh khana alakangir ṭhak nuhmeinu rōk kha anleidahlon jo hei. 10 Ama hong kangirsōt a nuhmeinu hneng, “Eh nuhmei, khō jo heihmen? Maset nakapek sik tûte om mak jo hei mo?” ati. 11 Nuhmeinu khan amasôna, “Apu, tûte om mak jo hei,” ati. Jesu'n, “Kaṭha jo, khan chu ke'num masetmak che eng. Kasethei sik jo che, tâk set nôk mak jo roh,” ati.

Jesu Kha Vânhnōi Vâr Kae

12 Jesu'n Phariseehei hneng ṭong ahri nôk: “Kei vânhnōi vâr eng kae. Tu achang inum kei kahnung kajui khan hringna vâr kha anei sik, khana khō inthim thōia lônmak ning.” 13 Pharisee he'n ahnenga, “Nang in nanbibinga sâkhi intlo che; nasâkhi dikmak,” anti. 14 Jesu'n amasôn hei, “Changmak, ke'n kabibinga sâkhi katlo achang inum, akadik kahri kae, ajârchu kei kajōng inphutna leh kasena ke'n kamanhret. Nangni'n kajōng inphutna leh kasena manhret mak chei. 15 Nangni'n mihring taksa dungjuia ṭong nantan; ke'nchu tûte chunga ṭong tanmak eng. 16 Tâk-kha ke'n ṭong katan inchu kaṭong tan akadik sik kae, ajârchu kabinga ṭongkatan changmak; anijōng katir Pa kha leh kantatan kae. 17 Nan-Dân a hinga inzet, ti chu sâkhi 2 an-intōk inchu, antahri kha akadik kae. 18 Ke'n kabibinga sâkhi intlo eng, khana anijōng katirpa kha'num kachunga sâkhi atloa kae.” 19 Anmani'n, ander, “Napa kha khon mo aka-om?” Jesu'n amasôn hei, “Nangni'nchu ke'm khana kapa'm amanhret mak chei, Nangni'n kei nanmanhret eng inchu kapa kha'm nantamanhret sik kae.” 20 Jesu'n hihei seng ahri hi Bek-inn shunga sêr tōk manbukna den shunga ahri kae; apha alatluk mak jâra tûte'n ama leisur mak hei.

Kei Sena Hmun a Nangni Setor mak Chei

21 Jesu'n anhnenga avea, “Kei akasesōt sik jo eng kae; kei nanjong sik eng, tâk nansetna khan nangni kathi sik chei. Kei sena hmun a khan setor mak tin chei,” ati. 22 Khava jâra Jehudi vaikarôn he'n, “Ama'n, asena hmun a eini setor mak tin chei ati. Hivahi abinga a'nthat hlon sik atina mo kae?” anti. 23 Jesu'n amasôn hei, “Nangni chu hiva raleichung ta chei kae, tâk kei chu chunga inphut akajōng eng kae. Nangni chu hiva raleichunga inphut chei kae, tâk kei chu hiva raleichunga inphut changmak eng. 24 Khava jâra nangni nansetna khan kathi sik chei tia kahri pek chei kae, ‘Kei hi kei eng kae,' tia nantaksen mak enga achang inchu, nangni nansetna heia khan akathi sik chei kae.” 25 Anmani'n ander, “Nang tu che mo?” Jesu'n amasôn hei, “A'nphutbia inphut kalei manthei jo chei kae. 26 Nanchungchâng ṭonghri sik ka-tamtak kanei khana maset sik chei katamtak ka-om, achang inum anijōng katir ama kha akadik kae, khana ke'n ama inphut a kathei kha vânhnōi kamanthei kae.” 27 Jesu'n Pa chungchâng ahri kha anmani'n leimanhret theimak hei. 28 Khava jâra Jesu'n anhnenga ati, “Nangni'n Mihring Sapa kha nanmakhei manshâng pha leh, ‘Kei hi kei eng kae,' tia nanmanhret sik eng, khava sōa ke'n kabing ratha neina heite tlomak eng, tâk Pa'n hri sik a amanthei eng rōk kha kahri kae ti hi nanhong manhret sik jo. 29 Khana anijōng katirpa khan a'nṭhōipui eng, kabinga amasō mak, ajârchu ke'n amalung tlaina aheitik a katlo ṭhak a kae.” 30 Jesu'n hihei hi ahrina aleikathei mi katamtak in anleitaksen jo.

Akadik khan Amasō sik chei

31 Khava jâra Jesu'n ama kataksenhei hneng ahri, “Nangni'n kaṭong hri nanjuia achang inchu, nangni kasonle kadiktak chei kha kae; 32 akadik kha nanmanhret sik, khana akadik khan nangni amasō sik chei.” 33 Anmani'n anmasôn, “Keini Abraham sōn ung kae, tûte sōk changmak ung, nang in, ‘Ning leh hnōma masō kachang sik chei,' nati hi heimo natina?” 34 Jesu'n anhnenga ati, “Akadiktak kahri pek chei kae; tu achang inum setna katlo mi kha setna sōk kae. 35 Sōk inkhat kha ahei tik a a-innshung mi changṭhak mak; tâk sapa inkhat khachu ahei tik a-innshung mi kachang ṭhak. 36 Sapa khan amasō chei inchu, inchêntak a amasō sik jo chei kae. 37 Ke'n nangni Abraham sōn chei ti kamanhret. Kha'num kei hi that sik a nanrei eng ajârchu nangni'n kaṭong lomak chei ning. 38 Ke'n ka-Pa tamanhmu eng kha kahri, tâk nangni'nchu nanpa tamanthei chei kha nantlo.” 39 Anmani'n anmasôn, “Keini pachu Abraham kae.” Jesu'n amasôn hei, “Takkhet a nangni Abraham sōn kha nanchang inchu, ama'n aleitlo ṭōnhei kha leh in-anghrep a nantatlo sik kae. 40 Ke'n kahei tlo rakip vâng hei hin kapa hnenga inphut kathei akadik kha kaman theina jo chei kae, kha'num nangni'nchu that sik a nanrei eng. Hinghiva hi Abraham in heite leitlo mak! 41 Nangni'n nanpa taleitlo kha nantatlo kae.” Anmani'n anmasôn, “Pa inkhat rōk kannei, khachu Pathen khet kha kae, keini asa kadiktak ung kae.” 42 Jesu'n anhnenga ahri, “Takkhet a Pathen kha nanpa achang inchu, kei nanlungset sik eng, ajârchu kei Pathen hnenga inphut a kajōng enga tûnhin ka-om eng. Kei kabing rachama akajōng eng changmak, tâk ama'n ajōngtir eng kae. 43 Kaṭong hri heisa mo nantamanhret theimak? Ajârchu nangni'n kaṭong hri rangei tor mak chei. 44 Nangni chu nanpa Rathla Kadikmak sa chei kae, khana nanpa kachang lungdo kha nantajui kae. Ama chu anphutbia inphut mikathat kae, ṭongdik langa khan omphung mak ajârchu ashunga ṭongdik kha om mak. Maleisei ahri kha ama ngaihrep ahri kae ajârchu ama chu malei kasei khana malei kaseihei pa kha kae. 45 Tâk-kha ke'n akadik kha kahri pek jo chei, khava jâra nangni'n ataksen mak chei. 46 Kei mikase kae tia masetna anikapek sik nankâra tu mo aka-om chei? Ke'n akadik kha kahria achang inchu, heisa mo nanta taksen mak eng? 47 Pathena inphut akajōng ama khan Pathen ṭong kha arangei. Nangni Pathena inphut changmak chei leh chu rangei mak chei.”

Jesu leh Abraham

48 Anmani'n Jesu hneng, “Nang Samaria mi che khana ṭai karôn che kae, kanta ti hi dikmak ung mo?” anhongti. 49 Jesu'n amasôn hei, “Ke'n ṭai neimak eng. Ke'n ka-Pa kakaja, tâk nangni'n kei akaja mak chei. 50 Ke'n kabing lûrna sik jongmak eng. Tâk-kha anijōng kapek inkhat ka-om, ama kha kei langa ṭong anikatanpek kha kae. 51 Akadik kha kahri pek chei kae. Tu achang inum kei mantheina kajui mi kha thihêr mak ning.” 52 Anmani'n ahnenga anti, “Nang ṭai karôn che kae ti hi tûn keini'n inchêna kanmanhret jo che. Abraham kathi jo, Sânkathemhei kathi jo hei, kha'num nang in, ‘Tu achang inum kei ṭong kajui mi kha ahei tik a thimak ning,' natia kae. 53 Kanpa Abraham kathi jo; Abraham kanek a kalen eng natina changmak mo? Sânkathem he'm kathi jo hei. Nang tu eng mo a'nti che?” 54 Jesu'n amasôn hei, “Kei kabinga a'nlûrsak kachang inchu, kabing inlûrsakna kha heite emak. Nan-Pathen kae nantati kapa amatak khan amanlûr eng kae. 55 Nangni'n ama lamanhret hêrmak chei, tâk ke'nchu kamanhret. Ke'n ama manhret mak eng kati'nchu, nangni kapōa malei kasei kachang sik eng. Tâk-kha ke'n ama kamanhret khana aṭong kajui. 56 Nanpa Abraham in kajōngna sik pha ahmu sik kha le'npâk; khana ahmua le'npâk jo.” 57 Anmani'n ahnenga, “Nang kum 50 hmen latluklo chea, Abraham nalei hmua mo?” anti. 58 Jesu'n amasôn hei, “Akadiktak kahri pek chei kae: “Abraham intet mak hma aleika-omsa jo eng kae.” 59 Khava sōa anmani'n adengna sik hlunghei anleihrut; tâk Jesu abinga inthup a Bek-inn adahlon jo.

John 9

A'ntetbia Hmitkacho Jesu'n Amandam

1 A'ntetbia hmitkacho pase inkhat Jesu'n khanga alônna aleihmu. 2 Asonle he'n ander, “Oja, ama hmit kachoa a'ntet hi, anu-apa setna jâra mo, ama bing setna jâra mo?” 3 Jesu'n amasôn hei, “Ama hmitkacho hi ama set jâra a-emak leh anu-apa set jâra heite changmak. Pathen ratha hratna kha ama chunga hin ṭōna hmuthei achangna sik a ahmit akacho kae. 4 Kani omlai seng, eini'n anijōng katirpa ṭōnhei kha nitlo manjôn nger sik kae; tûte inkhat ṭōn tlothei makna jân pha jōng katlung sik jo. 5 Kei raleichunga ka-omlai seng kei vânhnōi ralei sik a vâr eng kae.” 6 Hi ahrisōa Jesu'n raleia amachia bōn amannânga; bōnnâng kha mipa hmit chunga akano pek, 7 khana ahnenga, “Se ina Siloam tuikhura vasôp mathla roh,” ati. (Siloam tina chu, “Tirsōt,” tina kae.) Khava jâra ama kasea ahmai avaphet a, khō ahmua he'nle jo. 8 Khava pha, ama'n akut amadoa a'n-ong ri aleikahmu akhō avenhei leh mihei inder hei, “Hiva mipa hi kut indoa akader a'n-ong ri pa kha changmak mo?” 9 Ṭhahrep in, “Ama kae,” anti. Tâk-kha her khat in, “Ama changmak, ama kapō inkhat kae,” anti. Khava jâra ama'n abinga, “Khava mi kha kei eng kae,” aheiti. 10 Anmani'n ander, “Heikhonga mo nahmit akavâr?” 11 Ama'n amasôn hei, “Arahming Jesu inti mipa khan bōnnâng amannânga kahmit a akanoa, ‘Se ina Siloam tuikhura nahmai vaphet roh,' ati, khava jâra kei kase enga kavasôpsō lim leh khō kaleihmu tor jo.” 12 Anmani'n ahnenga, “Ama khon mo aka-om?” tia ander. Ama'n amasôn hei, “Kei manhret mak eng.”

Pharisee he'n Amandamna Ṭong Antajong

13 Khava pha anmani'n hmit leikachopa kha Phariseehei hneng anṭhōi jo. 14 Jesu'n bōnnâng amannânga hmitkachopa hmit amanvâr pek ning kha Châmhngat kani ning leikae. 15 Khava pha Pharisee he'n mipa kha heikhonga mo khō ahmu jo ti ṭong ander nôk. Ama'n amanthei hei, “Kahmit a bōnnâng ajing akanoa, ke'n kavaphet pha, tûnchu khō kahmu tor jo.” 16 Pharisee ṭhahrep in, “Hiva katlopa hi, Châmhngat kani anitmak jâra ama Pathena inphut changmak ning,” anti. Achang ravâng her khat in, “Mikase inkhat in hinghiva ṭōn kalen inlak hi khonga mo atlo tor sik?” Khang'khan anmani kâra loi hnia inṭhenna kasōk jo. 17 Khava jâra Phariseehei khan ama hneng avea ander nôk, “Nang in nahmit amanvâr pek jo eng nati, kaṭha jo, ama chungchâng heimo nati?” Ama'n amasôn hei, “Ama Sânkathem inkhat kae.” 18 Achang ravâng Jehudi hlamkakeihei khan ahmit aleikachoa khō aheikahmu jo ama nu leh pa anbek mak kârseng lataksen hnōm mak hei, 19 khana anmani'n anu leh apa ander hei, “Ama hi nansapa mo? Ama hi hmit kachoa a'nte nanti; khan chu heikhonga mo tûnchu khō ahmu jo?” 20 Anu leh apa'n anmasôn hei, “Ama hi ahmit kachoa a'nte kansapa kae ti kanmanhret. 21 Tâk-kha ama hmit hi heikhonga khō ahmu jo khan chu ahmit kacho kha tu'n mo amandam pek ti chu keini'n manhret mak ung. Ama kalenpang jo, abinga amasôntor sik jo chei, ama der ruh!” 22 Anu leh apa'n hinga antati hi Jehudihei anṭit jâra kae; ajârchu Jesu hi Messiah kae kati mi kha an-intûpna inna inphut hnongsōt sik a Jehudi he'n inhnōmtōna anta leinei dek jo kae. 23 Khava jâra anu leh apa'n, “Ama kalenpang jo, ama der ruh,” antati kae. 24 Ahmit aleikachoa akavâr jo mipa kha vōi 2 tlukna anbek male nôk a, ahnenga, “Pathen hmaikunga intep ina akadik kha hri roh! Khava mipa kha mikase ti keini'n kanmanhret,” anti. 25 Ama'n amasôn hei, “Ama mikase achang leh achangmak ke'n manhret mak eng. Ke'n kamanhret inkhat chu: kahmit leikacho kha tûnchu kahmu jo,” ati. 26 Anmani'n ander, “Nang hneng heimo aleitlo? Heikhong mo ama'n nahmit amanvâr pek che?” 27 Ama'n amasôn heia, “Ke'n kahri pek jo chei, khana nangni'n rangei hnōm mak chei. Heisa mo nangni'n nanta rangei hnōm nôk? Nangni'm ama sonle akachang hnōm chei mo?” 28 Anmani'n ama anhâksêra anti, “Nang khava mipa sonle che kae; keini chu Moses sonle ung kae. 29 Pathen in Moses a'nbekpui kanmanhret; ama khachu khona inphut akajōng mo ti kapha'm manhret mak ung!” 30 Mipa khan amasôn hei, “Nangni'n ama khona inphut akajōng mo nantamanhret mak hi a'nlak inkhat kae! Tâk-kha ama'n kahmit chu amanvâr pek jo enga kae! 31 Pathen in mikaset-hei tader theipek mak; tâk ama kajana kapek hei leh amadu hlam katlo mihei derna athei pek hei ti eini'n nimanhret. 32 Vânhnōi ralei anphutbia inphut, hmitkacho inkhat hmit kavâr jo ti ṭong lathei phungmak hi me; 33 Ama Pathena inphut akajōng achangmak inchu, ama'n hiva ṭōn hi atlo tor mak sik kae.” 34 Anmani'n anmasôn, “Nang setna chunga a'nte hrep che'n, keini manthei sik nalarei ung mo?” antia, intûpna inna inphut anhei namsōt jo.

Rathla a Hmitkacho

35 Jesu'n omchen kasōk kha aleithei jo pha, mipa kha aleihmua ahnenga, “Nang in Mihring Sapa kha nataksen mo?” ati. 36 Ama'n amasôn, “Apu, tu mo ke'n kataksen sik kha amanthei roh!” 37 Jesu'n ahnenga, “Nang in nahmu joa kae, tûntak a na'nbekpui ama kha kae,” ati. 38 Khava pha mipa khan, “Rōngpu, ke'n kataksen!” atia, ahma inkuna akamuk jo. 39 Jesu'n ahri, “Hmitkachohei khō hmuna sik, khō kahmuhei hmit chona sik, hiva raleichunga ṭong katan sik a kei akajōng eng kae.” 40 Pharisee ṭhahrep ahnenga ka-om he'n khava ahri kha antheia, ahnenga, “Keini hi'm hmitkacho natina ung chu changmak nu?” anti. 41 Jesu'n amasôn hei, “Nangni hmitkacho nanleichang inchu, maset nantachenmak sik kae; tâk nangni'n khō kanhmutor nanti, hiva tina chu tûn katlung maset nanlachena kae.”

John 10

Kemōng Kakhempa Tekâk

1 Jesu'n ati, “Akadiktak kahri pek chei kae: tu achang inum kemōng rōng kot a hlut loa, hlam hlop inkhat a akakea akahlut mi kha inru leh mikachom kae. 2 Kot a kahlut mi kha kemōnghei kakhempa kha kae. 3 Kekot kahngâkpa khan ama sik kot kha amahlâng pek; ama'n akemōnghei kha anrahminga abek hei pha arasa kha akemōnghei khan anmanhret, khana ama'n aṭhōisōt hei. 4 Ama'n aheiṭhōisōt hei pha, anhma akeia akemōng he'n akahnung anjui, ajârchu anmani'n arasa anmanhret. 5 Kemōnghei khan mihlop inkhat kahnung juimak hei ning; jui kanek a, arasa anthei phungmak jâra, ama inphut katlânsōt sik hei.” 6 Jesu'n anmani hneng hiva tekâk hi ahri pek hei, tâk anmani'n heimo ahri pek hei ti leimanhret mak hei.

Jesu Kemōng Kakhem Kaṭha

7 Khava jâra Jesu'n ahri nôk a, “Akadiktak kahri pek chei kae: kei kemōng kot eng kha kae. 8 Kei hma akahong alak-hei seng kha inru leh mikachom hei kae; kemōnghei khan anmani leidon mak hei ning. 9 Kei kot eng kha kae. Tu achang inum keia kahlut mi kha hukmanhring kachang sik; khana kahlut kasōk sik heia kha kahar dôngna hmun anhmu sik. 10 Inru khachu marûk sik, that sik, khana suk manhmang sik rōk a akajōng kae. Kei chu nangni'n hringna nanneitheina sik, khana khava nantanei kha hringna pui katluk achangna sik akajōng eng kae. 11 “Kemōnghei sik akathi ngam, kemōng kakhem kaṭha kha kei eng kae. 12 Kemōng kakhem khet kachangmak khana kemōng kapu kachangmak nikhō ratha hlō a'npek mi khan, kahne ahong ahmu pha, kemōnghei kha adahlona atlânde jo hei; khava jâra kahne khan ahnong kachek heia atlen jo hei. 13 Kanikhō ratha hlōa a'npek achang jâra kemōnghei sik khôk sakna neimak khana atlânde jo heia kae. 14-15 Kei kemōng kakhem kaṭha eng kha kae. Ke'n Pa kamanhret a, Pa'n kei amanhret eng kapōa, ke'n kakemōnghei kamanhret hei khana kakemōng he'n kei ani manhret. Khana kei anmani sik a kathi ngam eng. 16 Hiva kemōng rōng shunga teilo kemōnglak um kalanei hei; anmani'm kavaṭhōi manhlutsa nger sik hei; anmani'n karasa anmanhret sik a kha kahong sik hei, kemōng kakhem inkhat thōia kemōng rup inkhat kachang sik hei. 17 “Pa khan kei alungset eng, ajârchu ke'n kahringkhō kha avea kachen male thei nôkna sik khavakha katōksōt hnōma kae. 18 Kahringna hi keia inphut tûte'n losōt mak. Ke'n kalungdotak a katōksōt kae. Ke'n khavakha tōksōtna leh lo male torna ratha kanei. Hiva tlotorna sik a kapa khan ṭong apek jo eng.” 19 Hiva ṭong jâra hin mihei kâra loi hnia insemṭhenna annei nôk jo. 20 Anmani akatam lang in, “Ama ṭai karôn a'nvet kae! Heisa mo aṭong nanta rangei!” anti. 21 Tâk-kha alak he'n, “Ṭai karôn mi'n hing'hin ṭongtor mak ning! Ṭai khan hmitkacho heikhonga mo amanvâr tor sik?” anti.

Jesu Antarahlâng mak

22 Khavakha phebi laitak kae, khana Jerusalema Bek-inn Tōksōtna Revei kha anleinit. 23 Bek-inna Solomon sumpuk a Jesu kalônna leika-om, 24 khava pha mihei ahnenga hong intûp heia, “Heituk kasôt mo kanmalung namankei chio sik? Nang Messiah che mo, inthengtak a amanthei roh?” anti. 25 Jesu'n amasôn hei, “Ke'n kahri pek dek jo chei, tâk nangni'n ataksen mak chei. Ke'n kapa ratha neina vâng ṭōn katlohei khan kei kahlanga ṭong ahri jo; 26 tâk nangni'n taksen mak chei, ajârchu nangni kakemōng changmak chei. 27 Kakemōng he'n karasa anmanhret, ke'n anmani kamanhret hei, khana anmani'n anijui. 28 Ke'n anmani kumsôt hringna kapek hei, khana anmani thihêr mak hei ning. Anmani kha keia inphut tûte'n akasut tor mak hei ning. 29 Kapa'n apek eng kha heirakip kanek a kalen chet; khana Pa hrungna heia inphut anmani tûte'n kasut tor mak hei ning. 30 Pa kha leh kei inkhat rōk ung kae.” 31 Khava sōa ama denghlonna sik a mipui he'n hlung anleihrut nôk a kae. 32 Jesu'n anhnenga, “Ke'n tlo sik a Pa tapek eng ṭōn kaṭha hingja nanhmai kunga katlo jo; khava jâr pena mo denghlon sik a nantarei eng?” ati hei. 33 Anmani'n anmasôn, “Keini'n nang ṭōn kaṭha natlo jâra denghlon sik che kantati changmak; tâk nang in Pathen nahmu masi jâra kae! Nang mihring inkhat-hrep che'n, Pathen nabinga inchangsak che!” 34 Jesu'n amasôn hei, “Nan-Dân a Pathen tahri, hing'hin inzet: ‘Nangni Pathen chei kae.' 35 Ṭong intheng tahri khachu ahei tik a kadik ṭhak ti eini'n nimanhret; khana aṭong intheng karônhei kha Pathen in pathenhei atia kae. 36 Pa khan kei akadei enga raleichunga ajōngtir eng kae. Ke'n Pathen Sapa eng kae kati jâra Pathen hnōi nase heikhong mo nantati eng? 37 Kapa'n amantlo hnōm eng ṭōn kha katlomak inchu, ataksen mak ruh. 38 Ke'n aṭōn kha katloa nantaksen mak enga achang inum, Pa kha keia ka-om, kei hi Pa a ka-om eng ti hi nanmanhret thangna sik kaṭōntlo bek khachu taksen ruh.” 39 Vōi khat tlit nôk anmani'n sur sik a anrei nôk, tâk ankut a inphut Jesu indûksōt jo. 40 John in hma tuimanhlut atlona Jordan rekhat ting Jesu avea inlea vaka-om jo. 41 Mi katamtak ahnenga kahong heia, “John in ṭōn-inlak akalen chu leitlo mak, tâk hiva mipa chungchânga atahri rakip chu kadiksōa kae,” anti. 42 Khana ka-om mi katamtak in ama antaksen jo.

John 11

Lazarus Thina

1 Bethany khōa pase inkhat arahming Lazarus intipa kha leikana a kae. Bethany hi Martha khana asōpuinu Mary omna khōpui kae. 2 (Hiva Mary hi Rōngpu ke thai marim katui akanoa asam vânga kahninu kha kae. Akana Lazarus hi ansōpuipa kae.) 3 Aser he'n Jesu hneng mi antira, “Rōngpu naṭhōn maritpa kana jo,” anva manti. 4 Jesu'n kha athei pha, “Hiva natna hin Lazarus kha akathi sik changmak; Pathen lûrna sik a akana kae; ama akathi sik changmak; hinna inphut Pathen Sapa khan lûrna achen sik kae,” ati. 5 Jesu'n Martha leh a-unu khana Lazarus alungset hei. 6 Jesu'n Lazarus kana ti ṭong athei ninga inphut a-omna hmun a khan ni 2 laka-omsa a kae. 7 Khava sōa ama'n asonlehei hneng, “Eini Judeating inle jo rih,” ati hei. 8 Sonlehei khan anmasôn, “Oja, mihe'n denghlon sik a anreina che lasôt loa, sonting se nôk sik a a'ntluk che mo?” 9 Jesu'n ati, “Ni khat shunga pung 12 aka-om changmak mo? Khava jâra tu achang inum sûn kanivâr thōia akalôn khan inpai inthlûkmak ning, ajârchu anmani'n vânhnōi vâr kha ahmua kae. 10 Tâk-kha anmani jân a anlôn inchu inpai inthlûk sik hei, ajârchu vâr kha anmani'n neimak hei.” 11 Kha ahrisō pha Jesu'n anhnenga, “Niṭhōn Lazarus kaje jo, tâk kase sik enga kha kavamathōi sik,” ati. 12 Sonlehei khan anmasôn, “Rōng-pu, ama aje jo'nchu, kadam sik jo.” 13 Tâk-kha Jesu'n chu Lazarus kathi jo atina kae; anmani'n chu angaia akajea antamandon kae. 14 Khava jâra Jesu'n inche'ntak a amanthei hei, “Lazarus kathi jo; 15 Tâk nangni'n nantaksenna sik, ahnenga kaleiom mak kha kei inpâk enga kae. Eini ahnenga se jo rih.” 16 Thomas (A'npher intipa) khan asonle changpui hei hneng, “Eini Oja leh nithisap theina sik akahnung jui rih,” atia kae.

Jesu hi Thōi nôkna leh Hringna

17 Jesu ahong tlung pha khan chu, Lazarus kha thlâna anleihrena ni 4 katluk jo ti amanhretsōt jo. 18 Bethany kha Jerusalema inphut kilometre 3 tluktaklo kapōhrep a'nkâr kae, 19 khana Judea mi katamtak Mary leh Martha hneng ansōpuipa thi jâra lungmōng kathlâk sik a kahong hei. 20 Martha'n Jesu kahong ti ṭong athei pha, kasesōt a avaratōa kae; tâk Mary chu innshunga in-onga leika-om. 21 Martha'n Jesu hneng ahri, “Rōngpu, nang hin naleiom inchu kasōpuipa leithi mak ning. 22 Kha achang inum tûn nang in Pathen hnenga nader rakip kha apek sik che ti kamanhret.” 23 Jesu'n amanu hneng, “Nasōpuipa kahringsōt sik,” atipek. 24 Amanu'n amasôn, “A'nchai ning kania akahringsōt sik ti khachu kamanhret.” 25 Jesu'n amanu hneng, “Kei thōi nôkna leh hringna eng kha kae; tu achang inum anikataksen mi kha akathi achang inum akahring sik kae. 26 Khana tu achang inum kei kataksen akahring mi kha thi nôk hêrmak jo ning. Hivahi nataksen mo?” ati. 27 Amanu'n amasôn, “Ôk, Rōngpu, nang Pathen Sapa raleichunga akajōng sik Messiah che kae ti ke'n kataksen che.”

Jesu Kaṭap

28 Martha'n hi ahrisō pha, asōpuinu Mary hneng inlea marûk a abek a, “Oja kha hin ka-oma nang ajong che,” tia ava manthei. 29 Mary in kha athei pha, kangirsōt a a'nhmupui sik inranga kasesōt jo. 30 (Tâk-kha Jesu chu Martha leh an-inhmuna hmun a khan laka-om hia, khōshunga laheihlut mak a kae.) 31 Mary inna lungmōng kathlâk a ka-om mihe'n Mary akangirsōt a inrangtak a asesōt kha anhmu pha akahnung anleijui. Ajârchu anmani'n Mary kha thlâna akasea avakaṭap sik tia anleimandon. 32 Mary in Jesu omna hmun atlunga ahmu pha, ahmai kunga inkuna, “Rōngpu, nang hin naleiom inchu, kasōpuipa leithi mak ning!” ati. 33 Jesu'n amanu kaṭap leh ahe'nṭhōipui mihei kaṭap kha'm aleihmu hei, amalung atônna, inphuhronga kae. 34 Ama'n ader hei, “Khon mo nantavûm?” Anmani'n anmasôn, “Hong inna va-en roh, Rōngpu,” anti. 35 Jesu leikaṭap. 36 Mihe'n, “Enruh ama heituk a alungset mo!” anti. 37 Tâk-kha ṭhahrep he'n, “Ama'n hmitkacho amanvâr changmak mo? Ama'n thina inphut Lazarus hi aleihuktor mak mo?” antia kae.

Lazarus Amanhring

38 Khana Jesu inphuhrong nôk a, hlungkhur, akot hlungpheng inkhat vâng a'nkhâr thlânting khan leikasea kae. 39 Jesu'n ṭong apek heia, “Hlung kha losōt ruh,” ati hei. Akathipa sernu Martha khan amasôn, “Rōngpu, a'nvûmna kani 4 jo kae, amarim kase sik jo!” 40 Jesu'n amanu hneng, “Nang in nataksen inchu, Pathen lûrna kha nahmu sik timak che eng mo?” ati. 41 Anmani'n hlung kha anlosōt jo, khana Jesu'n chungting a-ena, “Apa, kaderna nathei pek eng jâra kamanpâk che. 42 Ke'n kaderna rakip nathei pek eng kamanhret, tâk hinna mi ka-om hei hin najōngtir eng kachangna hi antaksen theina sik kader che,” ati. 43 Ama'n hi ahrisōa rasa inhnaktak a a-ôna, “Lazarus heisōk roh,” ati. 44 Mikathipa kha akalōng kazena vâng akut, ake inzea khana ahmai kha pōn a'nkhua heikasōk jo. Jesu'n anhnenga, “Sōt ruh, khana manse ruh,” ati.

Jesu Thatna sik Ṭōnmantluk

45 Mary hneng akahong mi katamtak he'n Jesu ṭōntlo kha anhmu pha, ama antaksen jo. 46 Tâk-kha ankâra ṭhahrep Phariseehei hneng inle heia Jesu tatlo kha anvahri jo. 47 Khava jâra Phariseehei leh thempu kalen he'n Sehmang-pachonghei an-inhmupui jo heia, “Heimo nitlo sik? Hiva mipa hin ṭōn-inlak rakip atlosōt jo heiso va-en ruh! 48 Eini'n ama hing'hin nimasō jo'nchu mi rakip in ama antaksen sik jo, khana Rome ratha kanei he'n ni-Bek-inn leh nijât anmanhmang sik jo!” anti. 49 Khava kum a Thempu Kalen hongkachang arahming, Caiaphas inti inkhat khan, “Heituk a akamo chei mo! 50 Jât pumpui inhmang kanek a, mipui sik a mi inkhat akathi sik hi akaṭha jôk kae ti hi manhret mak chei mo?” ati. 51 Ama'n hi ahri hi ama bing rachama ahri changmak. Khava kum a ama Thempu Kalen inkhat achangna dungjuia, Jehudi mihei sik a Jesu akathi sik kha asânsōt jôk kae. 52 Khana anmani sik rōk changloa, Pathen sahei seng inthek inchaia ka-om hei kha taksa pumkhat a ṭhōi manchuna sik um kae. 3 53 Khava kania inphut Jesu thatna sik Jehudi hlamkakei he'n mantlukna anleinei jo. 54 Khava jâra Judea ram a inphôngtak a Jesu lônngam mak jo, tâk nêrdiram hnenga khōpui inkhat arahming, “Ephraim,” inti hmun a khan asonlehei leh vaka-om jo hei. 55 Jehudihei Rakan Kût sik hong kahnai jo, khana aram aram a mi katamtak Rakan Kût mak hma Jerusalema suk inthengna katlo sik a leikase hei. 56 Anmani'n Jesu an-en lelea, Bek-inn shunga an-intûpna inkhat leh inkhat inder hei, “Heimo nanmandon? Tûn chunga Rakan Kût reveia hin ama akahongmak sik inchên jo mo, akahong sik mo?” 57 Khana thempu kalenhei leh Pharisee he'n Jesu kha ansur theina sik tu achang inum Jesu omna hmun inhret mi khan anmani antamanthei nger sik hei kae tia ṭong anleipek hei.

John 12

Jesu Bethany a Thai Antamanthi

1 Rakan Kût revei mak hma ni 6 omlai, ama'n akathia inphut amanhring Lazarus omna khō Bethany a Jesu leikasea kae. 2 Khana khan khōhlei thlai asâk sik a anmani'n anmantluk pek a, Martha'n razenna kha ale'nthōpui hei; Jesu thlaithleng ka-ô puihei kâra Lazarus le'nveisa a kae. 3 Mary in nard thai intheng vâng insyem marim katui mankatamtak litre her khat ahei choia Jesu kechunga akanoa asam vâng ake kha ahni pek a kae. Innshung kha amarim katui khan inhnamsō hêr jo. 4 Tâk-kha Jesu sonlehei kâra inkhat mikut a akapek sōt sikpa Judas Iscariot khan ati, 5 “Hiva thai marim katui hi dangka 300 a anjōra misarahei hneng heisa mo antapek mak?” 6 Ama'n hi ahri hi misarahei lum aloheia changmak, tâk inru inkhat achang jâra kae. Ama'n sêrkōk achoia arachama aleihmang ria kae. 7 Tâk-kha Jesu'n, “Amanu abinga dahlon ruh! Anei kha ka'nvûm ninga sik inda rasoh. 8 Ajârchu misarahei kha nanta-ompui ṭhak sik hei kae, tâk kei chu a-ompui ṭhak mak tin chei,” ati.

Lazarus Dōina Ṭōnmantluk

9 Mipui katamtak in Jesu Bethany a ka-om ti ṭong anthei jâra anmani kase jo hei, anmani anvase kha Jesu omjâr rōk a changloa Jesu'n thina inphut amanhring Lazarus kha'm anva-en hnōma akase hei kae. 10 Khava jâra thempu kalenhei khan Lazarus kha'm thatsa sik a anmantluk jo, 11 ajârchu Jehudi katamtak in Lazarus jâra anhlam kakeihei kha andahlon jo heia Jesu kha antaksen joa kae.

Jesu Kalûrtak a Jerusalem Ahlut

12 Abân kania khan, Jesu Jerusa-lema kajōng ti ṭong mipui katamtak Rakan Kût sik akahong hei khan anthei jo. 13 Khava jâra anmani'n kahno bō anchoia intōpui sik a kase heia, “Hosanna! Pathen manpâk rih! Rōngpu rahminga akajōng! Israel Rengpa kha amahâm kaṭha!” tia an-ôna kae. 14 Jesu'n shakōrtung inkhat ahmua achunga kachōng jo, ti chu ṭong intheng in ahri kapōa 15 “Zion khōpui, ṭimak roh! Tûn nanrengpa kha shakōrtung inkhat chunga kachōnga, nahnengting kajōnga kae,” 16 Khava phatak a khan chu Asonle he'n hivahi leimanhret mak hei; tâk Jesu kalûra mathōisōt achang pha khan chu ṭong intheng in achungchânga aleihri dungjuia anmani'n khanga anta leitlo kae tia anmandonsōt jo. 17 Jesu'n thlânna inphut abeksōt a thina inphut amathōlai Jesu hnenga aka-om mipuihei khan omchen kasōk kha anvahri manthang joa kae. 18 Khava jâra mipuihei khan ama anvaratō, ajârchu khava ṭōn inlak-hei kha ama tatlo hei tia anleithei jo. 19 Khava pha Phariseehei inkhat leh inkhat inbektō heia, “Enruh, eini'n heite tlotor mak jo me! Vânhnōi in ama kahnung anjui jo!” anti.

Greek Mi Ṭhahrep in Jesu Antajong

20 Revei shunga Jerusalema Pathen inmuk sik a Greek mi ṭhahrep um leikase hei. 21 Philip (Galilee ram a Bethsaida inphut akahong) hneng anmani kahong heia, “Oja, keini'n Jesu kanhmu hnōm,” anhongti. 22 Philip kasea Andreu hneng amanthei, an-inhnia inṭhōi heia Jesu hneng anvamanthei. 23 Jesu'n amasôn hei, “Mihring Sapa khan lûrna kalentak arahlângna sik pha tûn jōng katlung jo. 24 Akadik kha kahri pek chei kae; Gehu hmu sangkhat kha raleichunga atlâk a athimak inchu sangkhat rōk kha khanga ka-om. Khavakha athia achang inchu, kara katamtak amanpunga kae. 25 Tu achang inum anhringkhō inner hei khan inhmang sik hei; tu achang inum anhringkhō hiva raleichunga innermak mihei khan kumsôt hringna anhmu sik. 26 Tu achang inum kei inzen hnōm mi khan kakahnung ajui nger sik kae, khava jâra kasōkpa kha kei omna hmun a khan aka-om sik kae. Kapa'n kei inzen mi kha akaja sik kae.

Jesu'n Athi sik Ahrina

27 “Tûnchu kei kamalung inrim jo, heimo kahri sik? Hinga mo kati sik? ‘Apa, hiva pha hi kei chunga ajōng mathlung pek mak roh,' tia. Tâk-kha hiva khōdeng theina pha akathōk sik jâr pena kei akajōng eng kae. 28 Apa, narahming jōng manlûr roh!” Khava pha marvâna inphut rasa inkhat in, “Ke'n kamanlûr jo, khana ke'n khang'khan kamanlûr nôk sik,” ajōng tia kae. 29 Mipui khava hmun a akangir hei khan rasa kha antheia ṭhahrep he'n, “Khō inri kae,” anti. Alak her khat in, “Marvân ngeva inkhat in a'nbekpui,” anti. 30 Tâk Jesu'n anhnenga ati, “Hiva rasa hi kei sik a ajōng kaṭong changmak, tâk nangni sik a kae. 31 Tûn pha hi raleichung ṭong tanna sik pha jo kae; tûn hiva raleichung vaikarônpa kha nam mathlâk sik jo kae. 32 Kei raleichunga inphut kake pha leh, ke'n mi rakip kahnengting kakei manke sik hei.” 33 (Hi ahria hin, ama khōdeng katheia akathi sik kha ahrina kae.) 34 Mipui he'n anmasôn, “Nidân inchu Messiah kha ahei tik a akahring sik a ahri pek me. Kha achang inchu heikhong mo Mihring Sapa kha makheihlona aka-om nger sik kae nati tor? Khava mihring Sapa kha tu mo?” 35 Jesu'n amasôn hei, “Vâr kha nankâra pha bongkhat rōkte ka-om sik. Nanchunga khō inthim kha ajōng makna sik nangni'n vâr nanneilai hin nanhlam hro kha manjôn ruh; ajârchu khō inthima ka-om mi khan khonting ajōna akase manhret mak. 36 Nangni'n vâr kha nanneilai vâr kha taksen ruh, kha achang inchu nangni vâr mi kachang sik chei.”

Mihei Taksen makna

Jesu'n hi ahrisō kahnunga anhnenga inphut kasesōt a abinga inthup jo. 37 Ama'n anhmit hmu khet a ṭōn-inlak rakip hiseng atlosōt ravâng anmani'n leitaksen mak hei, 38 Isaiah sânkathem in aleihri kha huitlungna sik a kae: “Rōngpu kanṭong hri tu'n mo ataksen? Rōngpu khan aratha hratna tuhei hneng mo amalâr?” 39 Hiva jâra hin anmani'n taksen tor mak hei, ajârchu Isaia'num hing'hin aleihri: 40 “Anhmit in ahmu makna sik leh anmalung in amanhret makna sik, Pathen in anhmit amancho pek hei, anmalung akhârsi pek hei, khana ke'n anmani kamandamna sik hei kahnenga ho'nle mak hei ning, Pathen in ati.” 41 Isaiah'n Jesu lûrna kha ahmu jâra hivahi Jesu chungchânga ahri kae. 42 Kha achang ravâng, ratha kanei Jehudi katamtak in Jesu antaksena kae; tâk Pharisee he'n anmani kha intûpna inna inphut anhnongsōt makna sik hei inphôngtak a achungchâng ṭong leihrisōt mak hei. 43 Anmani'n Pathen hnōm pekna kanek a mihring hnōm pekna jôk anmadua kae.

Jesu Ṭong in Ṭong Atan

44 Jesu'n rasa inhnaktak a, “Tu achang inum kei anikataksen mi khan kei rōk ataksen eng changmak, tâk anijōng katirpa kha'm ataksen jo kae. 45 Tu achang inum kei ani kahmu mi khan, anijōng katirpa kha'm ahmu jo kae. 46 Kei anikataksen mi rakip inthim kâra a-om makna sik, kei raleichunga vâr inkhat a akajōng eng kae. 47 Tu mo inkhat in kaṭong atheia akajuimak mi kha ke'n aṭong tanmak ning. Kei raleichung ṭong katan sik akajōng changmak eng, akahuk inhring sik akajōng eng kae. 48 Khava kei inhlângmak leh kaṭong hri kajuimak mihei khan, anṭong katan sik inkhat annei. Ke'n kahrisōt ṭong hin a'nchai ning anṭong atan sik kae 49 Hivahi akadik kae, ajârchu ke'n kabing ratha neina kahri changmak; tâk anijōng katirpa kapa khan kahri sik kasōk hei kha amanthei eng kae. 50 Khana ama ṭongpek khan kumsôt hringna ajōng rôn ti ke'n kamanhret. Khava jâra ke'n kahri hei hi Pa khan hri sik a amanthei eng kha kae.”

John 13

Jesu'n Asonlehei Ke Asôp

1 Hivahi Rakan Kût mak hma kani kha kae. Jesu'n hiva ralei hi adahlona Pa hneng ase sik pha hong kahnai jo ti amanhret jo. Ama'n hiva raleichunga ami kachang hei kha ahei tik a alungset hei, khan chu a'nchaina katlunga anmani amalung kase hei. 2 Jesu leh asonlehei khōhlei thlai an-o jo. Simon sapa Judas Iscariot in Jesu kha mikut chunga pek sōtna sik lungthim Seitan in amalunga aleidapek dek jo. 3 Pa khan ahnenga pui katluk ratha apek ti hi Jesu'n amanhret; Pathen hnenga inphut ajōng leh Pathen hneng akase nôk sik hi amanhret. 4 Khava jâra dokhâng chunga inphut kangirsōt a, apōnsi vâng intong kha alosōt a, hnina pōn inkhat akhōna akhit a kae. 5 Khava pha ama'n thlengkông inkhat a tui asun a asonlehei ke asôp inphut a, akhōna pōn akhit vâng khan anke ahni manhi pek jo hei. 6 Ama Simon Peter hneng aheiphâk jo pha, Peter in ahnenga “Rōngpu, nang in kei ke nasôp sik a mo?” ati. 7 Jesu'n amasôn, “Tûn, nang in hiva katlo hi lamanhret mak che, tâk hnung leh nang in nahong manhret sik.” 8 Peter in ahnenga ati, “Nang in ahei tik a kake sôp hêrmak tin che!” Jesu'n amasôn, “Ke'n nake kasôpmak inchu, nang kasonle changmak jo che ning.” 9 Simon Peter in amasôn, “Rōngpu, kha achang inchu, kake rōk changloa kakut leh kalu'm asôp pek roh!” ati. 10 Jesu'n, “Tu achang inum a'nsi jo mi kha a'nthengsō jo kae, ake rōk tei loa sôp rangei mak jo. Nangni mi inkhat rōk tei loa nankhenga inthengsō jo chei,” ati. 11 (Jesu'n mikut a akapek sōt sikpa kha amanhret dek jo jâra “Inkhat rōk kha tei loa nangni nankhenga inthengsō jo chei,” ati kae.) 12 Jesu'n anke asôpsō pha apōn a'nlo nôk a dokhâng chunga a'n-ongna hmun a in-ong nôk jo. Khana ama'n ader hei, “Tûna ke'n nanhnenga katlo kha nanmanhret mo?” 13 “Nangni'n kei Oja leh Rōngpu nanti eng, kei khavakha kachang jâra nantati kha kadik a kae. 14 Nan-Rōngpu leh nan-Oja kachang eng ke'n nanke kasôppek jo chei. Khava jâra nangni'm inkhat leh inkhat ke a'nsôppek sik chei kae. 15 Nangni'n kei tatlo kapōa nanhong tlona sik ke'n manhmu theina inkhat kamannei chei kae. 16 Akadiktak kahri pek chei kae: sōk he'n anrōngpu kanek a lenjôk mak hei, khana tirle he'n ankatirpa kanek a lenhêr mak hei. 17 Tûnchu nangni'n hiva dikna hi nanmanhret jo; nangni'n hivahi ṭōn vânga nantlosōt inchu heituk a akahōi sik chei mo! 18 “Ke'n nangni nankhenga chungchânga kahri changmak; ke'n kakadei jo hei kha kamanhret hei. Tâk-kha ṭong inthenga, ‘Kabu kasâkpui mi kha kakadōia inṭang,” inti kha hui akatlung nger sik kae. 19 Omchen kha ahong sōk pha nangni'n “Kei kha kei eng kae,” tia nantaksen theina sik eng, tûnhin kha asōk mak hma kahri pek dek chei kae.' 20 Akadiktak kamanthei chei kae; tu achang inum kei mitir inhlâng mi khan kei um arahlâng eng kae, tu achang inum kei inhlâng mi khan anijōng katirpa kha arahlâng kae.”

Jesu'n Akapek sōt sikpa Amak hma Ahri sōt

21 Jesu'n hiseng ahrisō pha, amalung inrim joa, inphôngtak a “Akadik kha kahri pek chei kae; nangni kâra inkhat in mikut chunga apek sōt sik eng kae,” ati. 22 Tupen mo atina jo ti hi manhret mak heia inhmakban jo hei, khat leh khat le'n entō hei. 23 Asonlehei kâra Jesu talungsetpa inkhat kha Jesu hneng in-onga leika-om. 24 Ama hneng khan Simon Peter in alu akachuk a “Tu mo atina der roh,” atia kae. 25 Khava jâra ama'n Jesu ahnaia, ader, “Rōngpu, ama kha tu mo?” 26 Jesu'n amasôn, “Ke'n buhlom har kōklei shunga kamachea kapek sik mi kha kae.” Khava jâra ama'n buhlom har inkhat aloa amachea, Simon sapa Judas Iscariot kha aleipek jo. 27 Judas khan buhlom kha alosōlim leh Seitan ashunga kahlut jo. Jesu'n ahnenga, “Natlo sik kha inranga tlo jo roh,” ati. 28 Jesu'n ahnenga ahri kha tûte'n heimo ahrina ti leimanhret mak hei. 29 Sonle ṭhahrep in Judas kha ansêr katinta sêrkōk kachoi achang jâra reveia hmangchâk sik a-emak leh misarahei pek sik heikhat incho se rasoh ati kachang sik tia anmandon. 30 Judas in buhlom kha arahlâng leh inrangtak a kasesōt jo. Khavakha jân leikae jo.

Ṭongpek Ther

31 Judas in adahlonsō hei kahnunga, Jesu'n, “Tûnchu Mihring Sapa lûrna kha hong-inphông jo; tûn ama inphut Pathen lûrna kha hong-inphông jo. 32 Khana Pathen lûrna kha ama inphut a'nphông achang inchu, Pathen in Mihring Sapa lûrna kha abingkhet chunga amanphông sik jo, inrangtak a khanga atlo sik jo. 33 Kasahei, nangni leh omsôt mak jo min. Nangni'n nanjong sik eng; Jehudi hlamkakeihei hneng kaleihri kapōa, nanhnenga kahri pek chei kae, ‘Kei sena sik hmun a khan nangni setor mak chei ning,' 34 Khana tûn ke'n nangni ṭongpek ther kapek chei kae: khat leh khat inlungset ruh. Ajârchu ke'n nangni kalungset chei kapōa, nangni khat leh khat a'nlungset nger sik chei kae. 35 Nangni khat leh khat nan-inlungset a achang inchu, nangni kasonle chei kae tia mi rakip in anmanhret sik chei.”

Jesu'n Peter Inphe sik Amak hma Ahri sōt

36 Simon Peter in ahnenga ader, “Rōngpu, nang khon mo akase sik che?” Jesu'n amasôn, “Kei kasena sik hmun a khan, nang in tûn ajuitor mak che ning, tâk hnung leh chu nang in nahei jui sik eng.” 37 Peter in ader, “Rōngpu tûn heisa mo kajuitor mak sik che? Nang sik akathi sik a intluk eng!” 38 Jesu'n amasôn, “Kadiktak a nang kei sik a akathi sik a a'ntluk che mo? Akadiktak kahri pek che kae: Ârkhōng akhōng mak hma vōi 3 manhret mak eng nati sik eng kae.”

John 14

Jesu hi Pa Jōnna Hlam Kae

1 Jesu'n ahnenga ati, “Nanmalung manrim mak ruh: Pathen taksen ruh, khana ke'm ataksen ruh. 2 Kapa inna omna sik den katamtak ka-om, khana kei nangni sik omna hmun intluk akase sik eng kae. Kha achangmak inchu ke'n nanhnenga hivahi kaleihri mak sik kae. 3 Khana kavasea nangni sik hmun kavamantluk sō leh jōng inle sik eng khana ka-omna hmun a khan nan-omna sik kahnenga kaṭhōi sik jo chei. 4 Kasen a hmun jōnna sik hlam kha nangni'n nanmanhret.” 5 Thomas in ahnenga, “Rōngpu, keini'n nasena sik hmun kha manhret mak ung; khava hmun jōnna sik hlam kha heikhong mo kanta manhret sik?” ati. 6 Jesu'n amasôn, “Kei hlam leh akadik khana hringna eng kha kae; keia tei loa tûte Pa hneng semak. 7 Tûn nangni'n kei nanmanhret jo eng, kapa kha'm nantamanhret sik kae, khana tuna inphut chu nangni'n ama nanmanhret jo khana nanhmu jo.” 8 Philip in ahnenga, “Rōngpu, Pa kha amanhmu roh; khavakha kantamadu pen kha kae,” ati. 9 Jesu'n amasôn, “Hingtuk pha kasôt nankhenga ka-ompui jo chei; kha'num nantala manhret mak eng mo, Philip? Tu achang inum kei kahmu jo mi khan Pa kha ahmu jo kae. Kha achang inchu heisa mo, ‘Pa kha amanhmu roh,' nalati? 10 Kei Pa a ka-om eng, khana Pa kha keia ka-om ti hi nalataksen mak mo? Ke'n nanhnenga kahri hei hi, keia inphut ajōng kasōk changmak hei. Keia ka-om Pa khan aṭōn kha a'ntlo kae. 11 Kei Pa a ka-om eng, khana Pa kha keia ka-om ti hi ataksen ruh. Kha a-emak leh kaṭōn tlohei jâra hin taksen ruh. 12 Akadiktak kahri pek chei kae; tu achang inum kei anikataksen mi khan kaṭōn tlohei hi atlo sik; kadik, anmani'n hiva kanek a ṭōn kalen antlo sik a kae; ajârchu kei Pa hnenga kase sik jo eng. 13 Sapa inphut Pa lûrna kha anhmu theina sik, karahminga nantader rakip kha ke'n katlo pek sik chei. 14 Karahminga hei-achang inum nander eng inchu, khavakha ke'n katlo pek sik chei.

Rathla Intheng sik Intepna

15 “Nangni'n kei nanilungset a achang inchu, kaṭong pek chei jui ruh. 16 Ke'n Pa hneng nangni inthōpui ahlop inkhat akadiktak Rathla kha nanka-ompui ṭhak sik a ajōng pekna sik chei kader sik. 17 Ama kha Pathen chungchânga akadik kaphôngsōt Rathla kha kae. Ama kha vânhnōi in chentor mak, ajârchu hmu um hmutor mak khana manhret um manhret tor mak a kae. Tâk-kha ama'n nangni a-ompui cheia nanshunga a-om jâra, nanmanhret a kae. 18 “Kei kasesōt pha, nangni nanbinga dahlon thangmak chei ning; nanhnenga kajōng nôk sik eng. 19 Pha bongkhat shunga vânhnōi in kei ahmu mak jo ning, tâk nangni'nchu nanhmu sik eng; ajârchu kei kahring jâra nangni'm akahring sik chei kae. 20 Khava kani kha ajōng tlung pha leh kei kapa a ka-omje, nangni keia nan-omje, khana nangnia kei ka-omje kha nangni'n nanmanhret sik jo. 21 “Tu achang inum kaṭong pek hei inhlânga akajui mi kha kei inlungset hei kae. Kei ani inlungset mi kha kapa'n amalungset sik kae; ke'num ama kalungset sik khana ama hneng kei khet inlâr sik eng.” 22 Judas (Judas Iscariot kachangmak) khan ader, “Rōngpu, heikhong mo vânhnōia changloa kanhnenga nabingkhet a a'nlârthei sik che?” 23 Jesu'n amasôn, “Tu achang inum kei inlungset mi khan kaṭong hri ajuia kae. Kapa'n amalungset sik, khana kapa leh kei ahnenga kajōng sik unga kha ama leh ka-omsap sik ung. 24 Tu achang inum kei ani'nlungset mak mi khan kaṭong mantheina hi juimak. Khana nangni'n nantathei jo mantheina hi kei ṭong changmak, tâk anijōng katir kapa hnenga inphut akajōng kae. 25 “Kei nangni leh nila-omlai hivahi kahri pek jo chei kae. 26 Pa khan Inthōpui, Rathla Intheng kei rahminga ajōngtir sik khana heirakip amanthei sik chei khana kaleihri pek chei rakip mandonsōtna apek sik chei. 27 “Ke'n kadahlon pek chei khachu mōngna hi kae, kapek chei hi kei khet mōngna kha kae. Vânhnōi tapek chei kapōa kapek chei changmak. Nanmalung mandong mak ruh, ṭi'm ṭimak ruh. 28 Hinga kaleihri pek chei, ‘Ke'n kadahlon sik chei, tâk nanhnenga kajōng nôk sik eng,' kati kha nantheia kae. Nangni'n nanilungset a achang inchu, ke'n Pa hnenga kase sik hi a'npâk jôk sik chei kae; ajârchu kei kanek a Pa kha akalen jôk kae. 29 Hivahei hi ahong sōk pha nantaksenna sik, tûnhin heirakip asōk mak hma kamanthei dek chei kae. 30 Ke'n nanhnenga kasôttak a ṭong hri tor mak jo ning, ajârchu hiva raleichung vaikarônpa kha kajōng joa kae. Ama'n kei chunga ratha neimak, 31 achang ravâng ke'n Pa kha kamalungset ti hi vânhnōi in antamanhret nger sik kasōk; hiva jâra Pa ṭongpek eng heirakip kha ke'n katlo kae. “Hong ruh, eini hinna inphut se jo rih.

John 15

Jesu Vomhrui Kadiktak

1 “Kei vomhrui kadiktak eng kae, khana kapa'n arahōn kathlō kha kae. 2 Ama'n keia ka-om abâk a'nramak rakip kha atuk mathlâk hei, khana kara kanei abâk seng kha a'nthengna sik leh akara atam chetna sik amanhleng heia kae. 3 Nangni chu ke'n mantheina kaleinei jo chei khana amanthengsa jo chei kae. 4 Keia omṭhak ruh, khana kei nangnia ka-om ṭhak sik eng. Vomhrui bâk inkhat kha abinga kara nei tor mak; athlurpuia akai leh rōk khan a'nrator kae. Kha leh in-angtlinga nangni keia nan-om ṭhak mak inchu kara nei tor mak tin chei. 5 “Kei vomhrui eng kha kae, khana nangni abâk chei kha kae. Keia aka-om ṭhak hei leh kei anmania aka-om ṭhak eng, khahei kha'n kara katamtak annei sik; ajârchu kei tei loa nangni'n heite tlotor mak tin chei. 6 Tu achang inum keia aka-om ṭhak mak khachu abâk inkhat kapōa hlonsōt a ka-om khana kachâr ri jo; khang khava bâk-hei kha chom mantûp a hmeishunga anhlon manhlut ri hei khana khan kakâng jo hei. 7 Nangni keia nan-om ṭhak a, khana kaṭong nangni shunga a-omṭhak a achang inchu, hei-achang inum nangni'n nanta madu nantader kha nanchen sik. 8 Kara katamtak nannei jâra kapa lûrna kha a'nlâr kae; khang'khan nangni kei sonle akachang chei kae. 9 Pa'n kei alungset eng kapōa, ke'n nangni kalungset chei; kalungsetna cheia khan omṭhak ruh. 10 Ke'n kapa ṭongpek kajuia alungsetna a khan aka-om ṭhak eng kapōa, nangni'n kaṭong pek chei nanjui inchu, kalungsetna cheia khan aka-om ṭhak chei kae. 11 “Nanchunga ka'npâkna kha a-omna sik, khana nangnihei inpâkna kha pui atluk theina sik, hivahi kahri pek dek chei kae. 12 Ke'n nangni kalungset chei kapōa, nangni khat leh khat inlungset ruh, ti hi kaṭong pek chei kae. 13 Mi inkhat in aṭhōnhei sik lungsetna kalenpen anei tor khachu, anmani sik ahringkhō aphesōt kha kae. 14 Nangni'n kaṭong pek chei nanjuia achang inchu, nangni kaṭhōn chei kha kae. 15 Ke'n nangni sōk timak jo chei ning. Ajârchu sōk inkhat in akapu tatlo kha manhret mak; khava kanek a nangni kaṭhōnhei kati jo chei kae, ajârchu ke'n kapa hnenga kathei rakip kha nangni kamantheisō pet jo chei. 16 Nangni'n kei nantakadei eng changmak; nangni nanvase leh kara katamtak kasôttak a a'nra sik a, ke'n nangnijôk kakadei cheia kamanṭang chei kae. Khava jâra hei-achang inum kapa hneng karahminga nantader kha Pa khan apek sik chei. 17 Khava jâra hivahi kaṭong pek chei kae: khat leh khat inlungset ruh.

Vânhnōi Tamater

18 “Vânhnōi in nangni anmater chei inchu, hma inkeitak a kei antahōt eng kae, ti hi mandonsōt ruh. 19 Nangni vânhnōi ralei ta nanchang inchu, vânhnōi in atâ kapōtak a alungset sik chei kae. Tâk-kha ke'n nangni hiva vânhnōi raleia inphut kakadei chei kae, khana vânhnōi ralei ta changmak chei, khava jâra vânhnōi in nangni antahōt chei kae. 20 “Sōk-hei kha ankapuhei kanek a akalen jôk changmak hei,” tia kalei manthei chei kha mandonsōt ruh. Anmani'n kei antloset enga achang inchu, nangni'm antasukset sik chei kae; anmani'n kaṭong anjuia achang inchu, nangni ṭong um antajui sik kae. 21 Tâk-kha nangni keita nanchang jâra, anmani'n nanchunga hiva rakip hi anta hongtlo sik kae; ajârchu anmani'n anijōng katirpa kha manhret mak heia kae. 22 Kei kajōng mak a, anhnenga kaleihri mak achang inchu, anmani'n ansetna jâra masetna antachen mak sik kae; tâk tûnchu anmani ansetnahei kha rangei mandamna sik om mak jo. 23 Tu achang inum kei inter mi khan kapa kha'm amater kae. 24 Ke'n anmani kâra tûte taleitlo phungmak ṭōnhei kha kaleitlo mak achang inchu, ansetnahei jâra masetna antachen mak sik kae; tâk tûnchu anmani'n kaṭōntlo kha anhmu jo khana kei leh kapa kan-inhnia anhōt jo ung. 25 An-Dân a aleika-om: ‘Anmani'n ajâr kasea anhōt eng,' tia ale'nzet hi hui atlungna sik a hivahei hi akasōk nger sik kae. 26 “Pathen chungchânga akadik inlârpa khana Pa hnenga inphut akajōng Rathla Inthōpui kha kajōng sik. Pa hnenga inphut ke'n nanhnenga kajōngtir sik khana ama'n kachungchânga ahri sik. 27 Nangni'm a'nphutbia inphut kei leh ahon'thlop me nichang jâra kachungchânga nanta hri sik jo kae.

John 16

1 “Nangni nantaksenna kha nanmasō makna sik hivahi kahri pek chei kae. 2 Anmani'n nangni intûpna inna inphut anhnongsōt sik chei. Khana nangni kathat mi khan aṭōntlo kha Pathen karazen kae tia anmandonna pha alakahong sik kae. 3 Anmani'n ke'm khana kapa'm anmanhret mak jâra, nanchunga hiva ṭōnhei hi anta hongtlo sik kae. 4 Anmani'n hiva ṭōnhei hi nanchunga anhongtlo pha leh, kaleihri hei kha nanmandonsōtna sik a, hivahi kamanthei dek chei kae.

Rathla Intheng Ṭōn

“Nangni leh aka-omsap me nichang jâra, a'nphutbia hivahi leihripek mak chei eng. 5 Tâk-kha tûnchu anijōng katirpa hnenga akase sik jo eng kae; achang ravâng tûte'n, ‘Khon mo akase sik che?' tia adermak chei. 6 Khana tûnchu kamanthei jo chei, khana nanmalung châmna kasip jo. 7 Tâk-kha akadiktak kahri pek chei kae; kei sesōt sik hi nangni sik a akaṭha jôk kae, ajârchu kei kasemak a achang inchu, Inthōpui kha nanhnenga jongmak ning. Tâk-kha kei kase joa achang inchu, ama kha kajōngtir pek sik che kae. 8 Khana ama ajōng pha leh vânhnōi ralei mipuihei hin setna leh dikna khana Pathen ṭong tan sik chungchânga anloṭhena kha amalâr manchên pek sik hei. 9 Anmani'n setna chungchânga anṭhe, ajârchu anmani'n kei ataksen mak hei; 10 anmani akadik chungchânga anṭhe, ajârchu kei kapa hneng kase sik eng, nangni'n ahmu nôk mak jo chei ning. 11 Anmani ṭongtan chungchânga anṭhe, ajârchu hiva raleichung vaikarônpa kha aṭong a'ntansōsa jo kae. 12 “Ke'n hripek sik chei katamtak kanei; tâk tûn nangni ladetor mak tin chei. 13 Achang ravâng Pathen chungchânga akadik inlârpa Rathla kha ajōng pha, ama'n akadik rakip a hlam akei sik jo chei. Ama'n abing ratha neina ṭong hrimak ning, tâk aṭong thei kha ahri sik khana ajōng katlung sik kha amanthei sik chei. 14 Ama'n kei amanlûr sik eng, ajârchu kei tahri leh mantheina chei kha ama'n alo sik kae. 15 Kapa tanei rakip kha keita kae, khava jâra ke'n kahri kae, ke'n kapek kha Rathla khan a'nloa nanhnenga amanthei sik chei.

Lung dongna leh Inpâkna

16 “Pha bongkhat nangni'n kei ahmu nôk mak jo chei ning; khana khava sōa pha bongkhat sō leh nanhmu sik eng,” ati. 17 Asonlehei kâra ṭhahrep anbinga inder heia, “Hivahi heitina mo? Pha bongkhat eini'n ama nihmu mak sik khana pha bongkhat sō leh eini'n ama nihmu nôk sik, tia amanthei me; khan chu ama'n ahri nôk a, ‘Hivahi kapa hneng kei kase sik jâra kae,' ati. 18 Hiva ‘pha bongkhat' hi heitina mo? Ama'n heimo ahrina eini'n manhret mak me!” 19 Anmani'n ahnenga antader hnōm kha Jesu'n amanhret a anhnenga, “Ke'n kahrisōt, ‘Pha bongkhat nangni'n ahmu mak chei ning, khava sōa pha bongkhat sō leh nangni'n nanhmu sik eng,' tina chungchânga nangni nanbinga a'nder chei mo? 20 Akadik kha kahri pek chei kae: nangni ka-ônga kaṭap sik chei; tâk vânhnōi chu a'npâk sik hei kae; nangni chu inrim sik chei, tâk nan-inrimna kha inpâkna ahong kachang sik kae. 21 Nuhmei inkhat in nai anei sik ting amalung inrim, ajârchu a'nrengna pha kha jōng katlung jo; tâk nai kha aneisō pha anat ade manrim seng kha amahngi jo, ajârchu amanu'n raleichunga nai inkhat anei jo jâra inpâk joa kae. 22 Khang'khan nangni'm kati sik cheia kae: tûn nangni inrim chei, tâk ke'n nangni ka'nhmupui nôk sik chei, khana nanmalung shunga inpâkna kasip sik, nangnia inphut tûte'n antalosōt tor mak sik jo inpâkna kae. 23 “Khava kani kha ajōng tlung pha, nangni'n kei hneng heite adermak jo chei ning. Akadik kha kahri pek chei kae: Pa hnenga karahminga nantader rakip kha ama'n apek sik chei. 24 Tûn katlunga hin nangni'n kei rahminga heite lader mak hi chei; nan-inpâkna pui atluk theina sik, der ruh, khana nantahmu sik kae.

Vânhnōi Ralei Torna

25 “Ke'n hihei hi tekâk vâng kamanthei jo chei. Tâk-kha Pa chungchâng ṭong kha inthengtak a tekâk loa kahri pekna sik chei pha kha alajōng katlung sik kae. 26 Khava kani ajōng tlung pha leh nangni'n karahminga nantader sik jo kae; khana ke'n nangni kahlanga kaderpek sik chei kati changmak. 27 Ajârchu Pa ama khet khan nangni alungset chei. Ama'n alungset chei ajârchu nangni'n kei nanlungset eng khana Pa hnenga inphut kei akajōng eng hi nantaksena kae. 28 Kei Pa inphut kajōng enga raleichunga jōng katlung jo eng; khana tûn ke'n raleichung hi kadahlona Pa hnengting kase bei sik jo eng.” 29 Khava pha asonle he'n ahnenga, “Enroh, tûnchu tekâk loa inthengtak a nahri jo. 30 Tûnchu nang in heirakip namanhret ti keini'n kanmanhret jo che; tu inkhat in ṭong ader sik che rangei mak jo. Hivahin nang Pathena inphut akajōng che kae tia taksenna kannei jo che,” anti. 31 Jesu'n amasôn hei, “Tûnchu nanta taksen jo mo? 32 Nangni nankhenga inchek sik cheia kha nan-inn et a kase sik chei, khana kei kabing rōk a nandahlon sik eng, apha kha hong katlung jo, hinahin hong katlungdek jo. Tâk-kha kadik khet a chu kei kabing rōk a changmak eng ajârchu Pa khan a-ompui eng. 33 Nangni kei leh ni'nchuna inphut lung mōngna nanneitheina sik hivahi kahri pek chei kae. Vânhnōi in nangni khōdeng anmanthei sik che. Tâk nanmalung manngam ruh! Ke'n raleichung hi kator jo kae!”

John 17

Jesu'n Asonlehei sik Ader

1 Jesu'n hi ahrisō pha, marvânting a-enna ati, “Apa, pha hi jōng katlung jo, Sapa'n nang amanlûr theina sik che, Sapa kha manlûr jo roh. 2 Ajârchu nang in ama napek sōt mihei seng kha kumsôt hringna apek theina sik hei, mihring rakip chunga ratha neina kha ama hneng napek jo. 3 Khana kumsôt hringna ti hi chu nang, akadik Pathen inkhat rōk, manhret hi leh najōngtir Jesu Christa manhret hi kae. 4 Nang in tlosōt sik a napek eng ṭōn kha katlo mathluk sō jo; raleichunga nalûrna kamalâr jo. 5 Apa, ralei insyem mak hma nang leh inṭhōia lûrna nilei neisap kha leh in-anghrep a, tûn nahmai kunga lûrna kha apek jo roh. 6 “Vânhnōi raleia napek eng mihe'n nang anmanhretna sik che ke'n katlosō jo. Anmani natahei kae, khana kei napek eng kae. Anmani'n naṭong anjui, 7 khana napek eng heirakip hi nanga inphut akajōng kae ti hi tûn anmanhret jo. 8 Ajârchu nang in napek eng ṭongpui kha ke'n anmani kapek heia, anrahlâng jo; nang in najōngtir enga nanga inphut kei kajōngna ṭong hi kadik tia anmanhret jo. 9 “Anmani sik a kader kae. Vânhnōi sik kader changmak, tâk napek eng hei sik a kae, ajârchu anmani nangta hei kae. 10 Kanei rakip hi nangta hei kae; khana nanei rakip kha keita hei kae; khana anmania inphut kalûrna hi a'nlâr kae. 11 Khana tûnchu kei nahnenga kahong sik jo eng; raleichunga ka-om hi sôtmak jo ning, tâk anmani chu raleichunga alaka-om hei kae. O A'ntheng Apa! nang leh kei pumkhat nichang kapōa, anmani pumkhat anchangna sik, rahming napek eng, narahming ratha neina vâng anmani hrung hei roh. 12 Ke'n anmani ka-ompuilai hei napek eng rahming, narahming ratha neina vâng khan anmani kahrunghei. Ke'n kahrungsōt heia, ṭong intheng huitlungna a'nhmang sikpa rōk kha tei loa, inkhatbek inhmang mak hei. 13 Tûnchu kei nahnenga kahong sik jo eng, khana anmani malung shunga kei inpâkna hi pui katluk a anneitheina sik, ke'n raleichunga hihei hi kahri kae. 14 Ke'n anhnenga ṭongpui hi kapek hei khana vânhnōi in anmani ahōt hei, ajârchu kei vânhnōi ta kachangmak kapōa anmani vânhnōi ta changmak hei. 15 Anmani vânhnōi raleichunga inphut nalosōtna sik heia dermak che eng, tâk Akaṭhamak Inkhatpa inphut nahrung sik hei hi kader che kae. 16 Kei raleichung ta kachangmak kapōa anmani raleichung ta changmak hei. 17 Akadik vâng khan anmani hei hi nahnenga tōksōt hei roh; nang ṭong chu akadik kae. 18 Nang in kei raleichunga najōngtir eng kapōa, ke'n anmani vânhnōi raleichunga katir jo hei. 19 Anmani'm kadiktak a nang hneng an-intōksōt theina sik anmani sik kei kabinga nahnenga a'ntōksōt eng kae. 20 “Anmani sik rōk a kader changmak tâk anṭonghri katheia kei kataksenhei sik a'm kadersa kae. 21 Anmani ankhenga pumkhat anchangna sik a kader che. O, Apa, nanga kei ka-om enga, keia nang na-om kapōa anmani einia pumkhat a an-oma, nang in najōngtir eng hi vânhnōi in anmanhretna sik a kader che. 22 Nang leh kei pumkhat nichang kapōa, anmani pumkhat anchangna sik napek eng lûrna mama kha ke'n anmani kapek jo hei. 23 Anmani pui katluk a pumkhat rōk anchang theina sik, kei najōngtir eng leh kei nalungset eng kapōa anmani nalungset hei kha vânhnōi in anmanhret theina sik kei anmania ka-om eng khana nang keia ka-om che. 24 “Apa! lûrna naleipek eng, khava kalûrna kha anmani'n anhmu theina sik nang in napek jo eng hei kha kei omna hmun a kaman om hnōm hei; ajârchu vânhnōi alei insyem mak hma nalei lungset jo eng. 25 Nunchen kadik Apa! Vânhnōi ralei in nang manhret mak hei che, tâk ke'nchu kamanhret che, khana anmani'num nang in najōngtir eng hi anmanhret. 26 Nang in kei namalung setna eng kha anmani shunga a-omtheina sik, khan chu kei um anmania ka-om theina sik, nang anmanhretna sik che katlo jo khana kalatlo ṭhak sik.”

John 18

Jesu Antasur

1 Jesu'n hiva derna aneisō pha, asonlehei leh Kidron kavadung rekhat ting kase jo hei. Khava hmun a rahōn inkhat leika-oma Jesu leh asonlehei khan kahlut jo hei. 2 Judas, mikut a akapek sōt sikpa, khan khava hmun kha amanhret ajârchu Jesu'n asonlehei leh khana khan ve katamtak ale'ntûp puiri hei. 3 Khava jâra Judas in Rome sepei rup khat, thempu kalenhei, Phariseehei tahei tir Bek-inn kahngâk-hei kha khava rahōna khan aheiṭhōi hei; khana re hmangchâk, thaihmei leh hmeiser invonna kahong hei. 4 Jesu'n achunga ahong kasōk sik rakip amanhret; khava jâra anhmating kasea anhnenga, “Nangni tu mo nantajong?” ati hei. 5 “Anmani'n anmasôn, “Nazareth Jesu.” Ama'n, “Kei eng kae,” ati. Akapek sōt sikpa Judas kha anmani leh kangirsap a leika-om. 6 Jesu'n anhnenga, “Kei eng,” ati pha, anmani ankahnungting inle heia raleia inbok jo hei. 7 Jesu'n anhnenga ader nôk heia, “Nangni tu mo nantajong?” Anmani'n, “Nazareth Jesu,” anti. 8 Jesu'n, “Ke'n kei eng kae tia kahri pek jo chei, kei nantajong eng achang inchu, hiva hlop hei hi sesōt hei hi rasoh,” atia kae. 9 (Ama'n hiva ahrina jârchu: “Apa, nang in napek eng hei seng inkhatbek manhmang mak eng,” aleiti kha hui atlungna sik a kae.) 10 Simon Peter in chemjâm inkhat anei kha aradok a Thempu Kalen sōkpa kōr achang tinga atuk mathlâk pek jo. Khava sōkpa rahming kha Malchus kae. 11 Jesu'n Peter hneng, “Nachemjâm kha apaia thōn male roh! Kapa tapek jo eng khōdeng theina kōklei kha ke'n ka-inmak sik a namandon mo?” ati.

Jesu Annas Hmaikunga Angir

12 Khava sōa Rome remihei, anhlam kakeipa, leh Jehudihei ram kahngâk he'n Jesu kha ansura ankhit jo, 13 khana anmani'n hmapena Annas hneng anleikei. Ama kha khava kum a Thempu Kalen ahong kachang Caiaphas terpu kae. 14 “Mi rakip sik a mi inkhat athi kaṭha jôk,” tia Jehudi vaikarônhei hneng alei inthei kha Caiaphas hi kae.

Peter in Jesu Ahri Manhlem

15 Simon Peter leh sonle ahlop inkhat in Jesu kahnung anleijui. Khava sonle ahlop kha Thempu Kalen khan kaṭhatak a amanhret, khava jâra Thempu Kalen lâmte katlunga Jesu kahnung aleijui, 16 Peter chu kekot vânga leikangir. Sonle ahlop inkhat khan vângting hong inlea kekot kahngâk sōknu hneng avahria, Peter kha avaṭhōi manhlut jo. 17 Kekot a nuhngâknu khan Peter hneng, “Nang hiva mipa sonlehei kâra inkhat changmak che mo?” ati. Peter in amasôn, “Changmak, Kei changmak eng.” 18 Leikadai hêr, khava jâra sōk-hei leh mi kahngâk he'n hmei ansyema akimvea kangir heia antak anleimanlum. Khana Peter anhnenga vakasea ankâra kangira hmei ava-oa kae.

Thempu Kalen in Jesu Ṭong Ader

19 Thempu Kalen khan Jesu hneng asonlehei chungchâng leh ami mantheina chungchânga ṭong ader a kae. 20 Jesu'n amasôn, “Ke'n ahei tik a mi rakip hneng inphôngtak a ṭong kahri; mi rakip intûpna Bek-inna leh intûpna innheia kamanthei hei. Ke'n heite marûk a hrihêr mak eng. 21 Khava jâra heisik a mo kei ṭong nander eng? kaṭong hri kathei mihei kha der hei ruh, heimo ke'n kamanthei hei kha anmani'n antamanhret kae.” 22 Jesu'n hi ahri pha, khava hmun a akahngâk inkhat in, “Nang in Thempu Kalen inkhat khanga narakôk ngam mo!” atia akaben. 23 Jesu'n ama amasôn, “Ke'n heikhat kahri ṭhe achang inchu, khavakha heimo kae, hinna mi rakip hneng hin hri roh. Tâk-kha ke'n kahri kha akadik achang inchu, heisa mo navōk eng?” 24 Khava sōa Annas khan Caiaphas Thempu Kalen hneng ama kha ankhit pum a atir jo.

Peter in Jesu Ahri Manhlem nôk

25 Peter chu khang'khan kangira hmei a-oa laka-om. Khana mihlop ralak he'n ahnenga, “Nang hiva mipa sonlehei kâra inkhat changmak che mo?” anti. Tâk-kha Peter in ahri manhlema, “Changmak, kei changmak eng,” ati. 26 Thempu Kalen sōk Peter in akōr atuk mathlâk pekpa innkō mi inkhat hongkaṭong, “Nang rahōn shunga khan amale kahmu chei changmak che mo?” tia ader. 27 Avea Peter in, “Changmak eng,” ati, khava laitak ârkhōng hong kakhōng joa kae.

Jesu Pilate Hmaikunga Akangir

28 Jîngkâr hmatak a Jesu kha Caiaphas inna inphut ram vaikarôn Pilate innpuia anṭhōi jo. Jehudi hlamkakei he'n Rakan Kût thlai ansâk theina sik bekdân dungjuia anmani inthenga an-om sik anmadua reng-innpui shunga chu hlutmak hei. 29 Khava jâra Pilate in anmani inhmupui sik a vânga hong kasōk a, “Hiva mipa hi heimo nanta maherna?” ati hei. 30 Anmani'n anmasôn, “Hiva mi hin tlomanset aneimak inchu, nahnenga heiṭhōi mak ni'ung.” 31 Pilate in anhnenga, “Nangni'n nanbinga inṭhōi una nandân dungjuia aṭong tan jo ruh,” ati hei. Anmani'n anmasôn, “Keini'n tûte inkhat thatna sik ratha neimak ung.” 32 (Hivahi heikhonga akathi sik mo tia Jesu'n aleihrisōt kha hui atlungna sik a omchen hi akasōk jo kae.) 33 Pilate kha innpuia kahlut nôk a Jesu abek a, “Nang Jehudihei Reng che kha mo?” tia ader. 34 Jesu'n amasôn, “Hiva nader eng hi nabing rōk malunga nader eng mo a-emak leh milak he'n kachungchânga anhri jâra mo?” ati. 35 Pilate in amasôn, “Kei hi Jehudi inkhat a nalo eng mo? Najât mihei leh thempu kalen he'n nang hi kakut a anta heipek eng kae. Nang in heimo naleitlo jo?” ati. 36 Jesu'n ati, “Hiva raleichung hi kei rengram changmak; hiva raleichung hi karengram achang inchu, Jehudihei kut chunga inpek sōt makna sik kakahnung kajui he'n re anta leitlo sik kae. Hiva raleichung hi kei rengram changmak.” 37 Khava jâra Pilate in ama ader, “Khan chu nang reng inkhat che mo?” Jesu'n amasôn, “Nang in kei reng inkhat che nati eng. Hiva akadik inkhat akahri sik jâra kei ajōng inte enga raleichunga akajōng eng kae. Akadik a ka-om seng khan kaṭong anrangei.” 38 Khana Pilate in, “Akadik kha heimo?” tia ader.

Jesu Thatna sik Ṭong tanna

Khava sōa Pilate Jehudihei hneng vângting inle nôk a, anhnenga ati, “Ke'n ama maset manchenna sik ajâr heite hmusōt tor mak eng. 39 Tâk-kha nanchôndân dungjuia Rakan Kût nit-lai kurkhum shunga a'nkhum mi inkhat et kamasō ṭhakpek richeia kae. Jehudihei Rengpa kha ke'n nangni sik a kamasō sik nanta madu mo?” 40 Anmani ka-ông heia, “Changmak, ama changmak! Barabbas jôk kanmadu!” tia anmasôn. (Barabbas hi inru mikachom inkhat kae.)

John 19

1 Khava sōa Pilate in Jesu kha aṭhōia amanvōk jo hei. 2 Remihei khan rahling lukhu inkhat anphera alu chunga anmankhu; anmani'n pōn sendup inkhat anmansia, 3 khana ahnenga kahong heia, “Jehudihei Rengpa ahringsei sôt rasoh!” anti. Khana anmani'n ankaben. 4 Mipuihei hneng Pilate vōi khat kasōk inle nôk a, “Enruh, ke'n ama masetna sik ajâr heite kahmu sōt mak kha man enna sik chei nanhnenga hin kaheiṭhōisōt sik kae,” ava ti hei. 5 Khang'khan Jesu kha rahling lukhu anmankhua, pōn sendup a'nsia vâng heikasōk jo. Pilate in anhnenga, “Enruh! Mipa kha hin ka-om!” ati hei. 6 Thempu kalenhei leh bek-inn kahrung he'n ama anhmu pha, an-ôna, “Thingrakea hem mankop roh! Thingrakea hem mankop roh!” antia kae. Pilate in anhnenga, “Ke'nchu ama masetna sik ajâr heite hmumak eng, nangni'n inṭhōi una thingrakea hem mankop jo ruh,” ati hei. 7 Mipui he'n anmasôn male, “Keini'n dân inkhat kannei, khava jâra ama akathi nger sik kae, ajârchu ama abinga Pathen Sapa eng kae ati.” 8 Hivahi Pilate in athei pha, ama kaṭichet jo. 9 Ama innpuia kahlut nôk a Jesu hneng, “Nang khona inphut akajōng che mo?” tia ader. Tâk-kha Jesu'n masôn mak jo. 10 Pilate in ahnenga, “Na'n amasôn mak tin che mo? Nang masōna sik leh thingrakea hem mankopna ratha kanei ti hi mandonsōt roh,” ati. 11 Jesu'n amasôn, “Nang in kachunga ratha naneina hichu Pathen in apek che jâr rōk a kae. Khava jâra nakut chunga ani heikapek sōt mi kha asetna kalen chet.” 12 Pilate in kha athei pha, amasō hnōm hranghra; tâk mipui he'n ka-ông male heia, “Nang in ama namasōa achang inchu nang Caesar ṭhōn changmak che! Ajârchu reng inkhat kadōi che kae,” anti. 13 Pilate in hiva ṭong hi athei pha, ama'n Jesu vânga aṭhōisōt a Hlungpheng inti ṭongtan in-ongna (Hebrew ṭonga, “Gabbatha,” inti) chunga in-ong joa kae. 14 Khava ning kha Rakan Kût mak hma kani sûnṭimvet jo kae. Pilate in mihei hnenga, “Nanrengpa hin ka-om,” ati hei. 15 Anmani'n ka-ông male heia, “That roh, that roh! Ama thingrakea hem mankop roh!” anti. Pilate in ader hei, “Nangni'n nanrengpa Thingrakea kahem mankop sik nanta madu mo?” Thempu kalenhei khan anmasôn, “Caesar rōk kha kanreng kae.” 16 Khava pha Pilate in Jesu kha thingrakea hem mankop sik a ankut chunga apek sōt jo hei.

Jesu Thingrakea Antahem Mankop

Khava jâra Jesu kha anmani'n anṭhōi jo. 17 Jesu'n athingrake akadoma, kasōk a “Lurōk hmun,” inti, (Hebrew ṭonga, “Golgotha,” inti.) katlung jo. 18 Khava hmun a khan anmani'n ama thingrake chunga anhem mankop jo, khan chu anmani'n mi 2 he'm avei leh achanga anhem mankopsa heia, Jesu kha alaia anda a kae. 19 Pilate in lekha inkhat amazet a thingrake chunga khan antâr, “Nazareth Jesu, Jehudihei Reng.” 20 Hivahi Jehudi katamtak in anteia kae, ajârchu Jesu thingrakea anhem mankopna hmun kha khōpui hnengtak kae. Khava ṭong intâr kha Hebrew, Latin, Greek ṭong heia le'nzet a kae. 21 Thempu Kalen he'n Pilate hneng, “Jehudihei Reng tia mazet mak roh, tâk ama'n, ‘Kei Jehudihei reng eng kae ati,' tia mazet roh,” anti. 22 Pilate in amasôn heia, “Ke'n kamazet jo kha inzet jo,” ati. 23 Remi he'n Jesu kha anhem mankop sō pha, anmani'n apōn kha an-inloa ahar 4 a ansem, harkhat et sepeihei khan anchen. Khana anmani'n azakkō kha'm an-inlo, khachu apum a a'nkhông inthlung, ahar-har vâng a'nṭhuikop hêrmak inkhat kae. 24 Khava jâra sepeihei kha inkhat leh inkhat inbe heia, “Hiva hichu keihler mak rih, tu mo akachen sik tlâ sânna nei rih,” anti. Hivahi ṭong inthenga, “Anmani'n kapōn insem hei, anmani'n kazakkō kha vâng-enna annei,” inti kha huitlungna sik a kae. Hiva omchen hi sepeihei khan anleitlo joa kae. 25 Jesu thingrake hneng inhnaia kangir mihei kha anu leh, anu nainu, Cleopas nuhmei Mary, khana Magdalene Mary hei kae. 26 Jesu'n anu leh sonle alungsetpa kha khana ankangir ahmu hei pha, anu hneng, “Ama kha nasapa kae!” ati. 27 Khava sōa ama'n sonle hneng khan, “Amanu kha nanu kae,” ati. Khava pha inphut a sonle khan amanu kha a-inna ka-om sik a aṭhōi jo.

Jesu Akathi

28 Tûnchu heirakip pui katluk a inchai jo ti Jesu'n amanhret jo; khana ṭong inthenga a'nzet kha hui atlung theina sik, ama'n, “Katui kahre,” atia kae. 29 Khava hmun a khan ju kasep kasip thlengkam inkhat leika-om; anmani'n patjôn anmachea sungtlōn inkhat bâk a anjep a ahner katlunga ankadom manshâng pek a kae. 30 Jesu'n khava ju kha amajôp a, “Inchai jo,” ati. Khava sōa alu amankun a kathi jo.

Jesu Manâk Antakadôt

31 Khava sōa mi antathat hei kha anke vōk mathlekna sik, thingrake hei chunga inphut ankalōng lo mathlâkna sik, Jehudi hlamkakei he'n Pilate hneng anhongder. Ajârchu khava ning kha Misyem ning kae khana akahong Châmhngat kani ning kha ahlop mônga kani intheng achang jâra Thingrake chunga an-inkhei thang sik kha leimadu mak hei. 32 Khava jâra sepeihei kase heia Jesu leh antamakhei sap mi 2 hei ke kha anvavōk mathlek pek heia kae. 33 Tâk-kha anmani Jesu hneng anhong pha, Jesu aleikathi cher jo kha anhmua ama kechu vōk mathlek mak jo hei. 34 Kha achang ravâng remi inkhat in akasei vâng amanâk akadôt a, sôt loa thisen leh tui jōng kalōnga kae. 35 (Nangni'num nantaksenna sik khava omchen kahmupa khan hihei hi ahri kae. Ahri hei hi kadik, khana ama'n akadik ahri kae ti hi amanhret.) 36 Ṭong intheng taleihri, “Aru inkhat rōk tlek mak ning,” inti kha hui atlungna sik a omchen kha akasōk kae. 37 Khan chu ṭong intheng hlop inkhat in, “Anmani'n antakadôtpa kha mihe'n anta-en sik kae,” tia ahri.

Jesu Antavûm

38 Hivasōa, Arimathea khōpuia Joseph in Jesu taksa kalōng kha alo theina sik Pilate hneng avader a kae. (Hiva Joseph hi Jehudihei ṭit jâra marûk a Jesu kahnung kajui inkhat leikae.) Pilate in Jesu kalōng kha Joseph in a'nlothei sik atipek jâra kasea akalōng kha avalo jo. 39 Hma inkeia jânthōia Jesu inhmupui Nicodemus kha Joseph leh inṭhōia kasea bero leh aloe inti marim katui inchôm kilograme 30 kapō achoia kae. 40 Anmani 2 he'n Jesu kalōng kha anloa Jehudihei akathi invûmna ngai dungjuia hruipōn innem vâng marim katui kha leh ankatōma kae. 41 Jesu anthatna hmun a khan rahōn inkhat leika-om, rahōn shunga khan tûte la'n vûmnalo thlânther inkhat leika-om. 42 Khava kani kha Châmhngat kani ning mak hma achang jo jâra khan chu thlân kha ahnai jâra anmani'n Jesu kalōng kha khana khan anleihre jo.

John 20

Jesu Athōisōt

1 Pathen kani ning jîngkâr hmatak khōvâr hma, Magdalene Mary thlâna kasea thlânkhur kot a hlung kha ale'nlosōt avahmu. 2 Amanu katlâna Simon Peter leh sonle inkhat, Jesu talungsetpa hneng, “Anmani'n Rōngpu kha thlâna inphut anchoi jo. Khon mo antada jo, keini'n manhret mak jo ung!” tia anvamanthei hei. 3 Khava pha Peter leh sonle inkhatpa kha kasōk heia thlânting kase jo hei. 4 Anmani 2 katlân hei, tâk sonle inkhatpa khan Peter kha akhea thlân hmun kha hma leikatlung masa jo. 5 Ama'n kakhup a a-en pha hruipōn innem kha ahmu, tâk ashung chu hlutmak. 6 Khava sōa Simon Peter kha hong katlunga thlânkhur shung katlunga leikahlut jo. Ama'n hruipōn innem ankasûnna kha aleihmu, 7 Khana Jesu lu ankasûnna kamsapōn kha ahlop a a'nzea aleika-om ahmua kae. 8 Khava sōa thlâna hma aleikatlung sonle inkhatpa kha'm kahlut a khana ahmua ataksen jo. 9 (Ṭong intheng tahri ti chu ama thina inphut akathōi nger sik kae ti kha anmani'n leimanhret tor mak heia kae.) 10 Khava sōa sonlehei kha inna le'nle jo hei.

Jesu Mary Magdalene Hneng A'nlâr

11 Mary kha thlân vânga kangira leikaṭap, aṭap pum a inkuna thlân shung kha a-en, 12 marvân ngeva 2, kachek-hlak a a'nret hei, Jesu kalōng anmanjena luthlōnting inkhat, kethlōnting inkhat in-ong ahmu heia kae. 13 Anmani'n, “Eh nuhmei, heisa mo akaṭap che?” tia ander. Amanu'n amasôn hei, “Ka-Rōngpu anleilosōt jo, khon mo antada jo ke'n manhret mak jo eng.” 14 Amanu'n hi ahrisōa ahe'nhe pha, khava hmun a Jesu leikangir kha ahmu jo; tâk Jesu ti kha leimanhret mak. 15 Jesu'n amanu hneng ader, “Nuhmei, heisa mo akaṭap che? Tu mo najong?” Amanu'n ama kha rahōn kathlōpa kachang sik tia amandona ahnenga, “Apu, nang talosōt achang inchu, khon mo nada amanthei roh, kei se eng sona valo rong,” ati. 16 Jesu'n amanu hneng “Mary!” ati. Amanu khan ahnengting inhea khana Hebrew ṭonga, “Rabboni,” ati. (“Oja,” tina kae.) 17 Jesu'n amanu hneng, “Asit mak roh, ajârchu kei Pa hneng lasemak hi eng. Tâk-kha nang kasōpuihei hneng vase ina vahri pek hei roh, “Kapa khana an-Pa, ka-Pathen khana an Pathen hneng a'nle sik jo eng kae.” 18 Khava jâra Magdalene Mary kasea Rōngpu ale'nhmu puina leh ahnenga aleimanthei ṭonghei kha sonlehei hneng ava manthei jo hei.

Jesu Asonlehei Hnenga A'nlâr

19 Khava Pathen kani ninga khōhlei ting khan, sonle he'n Jehudi Sehmang-Pachonghei anṭit hei jâra kot ankama le'ntûp hei. Khava pha Jesu kahonga ankâra hong kangira, “Mōngna'n ompui chei rasoh,” ati hei. 20 Ama'n hi ahrisō pha, akut-hei leh amanâk amanhmu hei. Sonlehei khan Rōngpu kha anhmu pha, inpâk hêr jo hei. 21 Khava sōa Jesu'n anhnenga ahri nôk a, “Mōngna'n ompui chei rasoh, Pa'n kei atir eng kapōa, ke'n nangni katir chei kae,” ati hei. 22 Ama'n hi ahria, anchunga akaphuk amasâ khum heia, “Rathla Intheng kha chen ruh! 23 Nangni'n mihei setna nanrangei mandam he'nchu, anmani'n rangei mandam anchen sik; nangni'n nanrangei mandam mak he'nchu, anmani'n rangei mandam chenmak hei ning,” ati.

Jesu leh Thomas

24 Jesu sonlehei hneng ahong pha 12 hei kâra Thomas (A'npher antatipa) kha leiom mak. 25 Khava jâra sonle alak-hei khan ahnenga, “Keini'n Rōngpu kha kanhmu jo!” antipek. Thomas in anhnenga, “Ke'n akut jôtpia a'nhemna bi kahmua kakut vâng kakahmei mak a khana amanâk a khan kakut kathōn mak hma seng, ke'n taksen mak ning,” ati hei. 26 Kani vekhat sōa sonlehei kha Thomas inveina innshunga intûp nôk jo heia kae. Kot-hei ankirpet, tâk Jesu ankâra hong kangira anhnenga, “Malung mōngna'n ompui chei rasoh,” ati hei. 27 Khava sōa ama'n Thomas hneng, “Hin nakut hong kahmei roh, kakut hei hong-en roh; khan chu nakut heikalâng inna kamanâk hongsit roh, na'nkei-chio kha bâng jo roh khana taksen jo roh!” ati. 28 Thomas in “Ka-Rōngpu leh Ka-Pathen!” tia amasôn. 29 Jesu'n ahnenga, “Nang in kei nahmu eng pha tōa nataksen mo? Kaka hmumak a akataksenhei heituk-hrep a anmahâm akaṭha jo mo!” atipek.

Hiva Lekha Tatup

30 Hiva lekha shunga a'nzet inhlutmak ṭōn kalen katamtak Jesu'n asonlehei hmaikunga aleitlo ka-om hei. 31 Khana nangni'n Jesu hi Messiah, Pathen Sapa kae ti nantaksen theina sik, khana ama nantaksenna vâng khana hringna nanneitheina sik hivahei hi a'nzet hei kae.

John 21

Jesu Sonle Sarihei hneng A'nlâr

1 Hivasōa hin, Jesu abinga Tiberius dîra asonlehei hneng inlâr nôk a kae. Hing'hin omchen kha leikasōk. 2 Simon Peter, Thomas (A'npher intipa), Nathanael (Galilee ram a Cana mi,) Zebedi sahei, khana sonle alak 2 hei seng hi le'nkhôm hei. 3 Simon Peter in alak-hei hneng khan, “Kei nga kasur kase sik eng,” ati. Anmani'n, “Keini'm kahong sik ung,” anti. Khava jâra anmani rakō-nga kachōng heia kasōk jo hei, tâk khava ning jân kathang anmani'n heite leisur mak hei. 4 Kani ahong sōk pha, tuipanga khan Jesu leikangir, tâk anmani'n Jesu ti kha leimanhret mak heia kae. 5 Khava pha ama'n anhnenga, “Retherhei nangni heite lasurmak chei mo?” ati hei. Anmani'n, “Heite surmak ung,” tia anmasôn. 6 Ama'n anhnenga, “Rakōng pang changting khan nanlen vor ruh, nangni'n ajing nansur sik,” ati hei. Khava jâra anmani'n anlen anvora keimale tor mak jo hei, ajâr chunga katamtak ankhum joa kae. 7 Jesu talungset sonle khan Peter hneng, “Ama hi Rōngpu kae!” ati. Peter in ama Rōngpu kae ti ṭong athei pha, ama'n azakkō kalen kha a'nneia (ajârchu Peter kha apōn ader aleisōt pet a leika-om,) tui shunga inchôm jo. 8 Alak sonlehei khan nga kasiptak len kha ankei sona tuipangting rakōnga intôr jo hei. Anmani tuipanga inphut hlarei mak jo hei, metre 100 kapō rōk le'nkâr hei. 9 Tuipang anheikesōt pha, buhlom leh nga kha hmeira-ê chunga aka-om kha anleihmu. 10 Jesu'n anhnenga, “Tûna nantasur nga kha ajing hin heichoi ruh,” ati hei. 11 Simon Peter kasea len kha tuipanga akeisōt a, nga kalen akhenga 153 hei kae; nga khangtuk hrep atam ravâng len kha le'nhler mak. 12 Jesu'n anhnenga, “Hong una hongsâk ruh,” ati hei. Sonle tûte'n, “Nang tu che mo?” tia der ngammak hei; ajârchu ama Rōngpu achang kha anmani'n anmanhret a kae. 13 Khava jâra Jesu kasea, buhlom kha aloa, apek jo hei; khana nga kha'm aloa apek jo hei. 14 Khana hivahi Jesu'n thia inphut athōisōt sōa asonlehei hneng a'nlârna vōi 3 tlukna kha kae.

Jesu leh Peter

15 Anmani'n ansâksō pha, Jesu'n Simon Peter hneng, “John sapa Simon, hihei lungsetna eng kanek a nang in nalungset chet eng mo?” ati. Ama'n amasôn, “Ôk, Rōngpu, kamalungset che nang in namanhret.” Jesu'n ahnenga, “Kakemōngtehei hrung hei roh,” ati. 16 Vōi 2 tlukna Jesu'n ahnenga, “John sapa Simon, kei nalungset eng mo?” ati. Ama'n amasôn, “Ôk, Rōngpu, ke'n kamalungset che nang in namanhret.” Jesu'n ahnenga, “Kakemōnghei hrung hei roh,” ati. 17 Vōi 3 tlukna Jesu'n ahnenga, “John sapa Simon, kei nalungset eng mo?” ati. Peter kha amalung kadông jo ajârchu vōi 3, “Kei nalungset eng mo?” tia ader a kae. Khava jâra ama'n Jesu hneng, “Rōngpu, nang in heirakip namanhret; kei lungsetna che kha nang in namanhret a kae,” ati. Jesu'n ahnenga, “Kakemōnghei hrung hei roh! 18 Akadik kha kahri pek che kae; naipang nachanglai nang intluk chea namadu-duna hmun a leikase che; tâk-kha upa nahong chang jo pha, nakut nakeisōt a mihlop inkhat in akhit sik che, nase hnōmmakna hmun a aṭhōi sik che,” ati. 19 (Hi ahrina hin Peter kha athi sik omchen khana Pathen amanlûr sik kha Jesu'n akhinga ahrina kae.) Khava sōa Jesu'n ahnenga, “Ajui roh!” atia kae.

Jesu leh Alak Sonle

20 Peter kha hong inhea, Jesu'n alungsetpa, khōhlei thlai sâkna Jesu hneng ale'nhngapa khana, “Rōngpu, mikut a nakapek sōt sik kha tu mo?” tia akader sonle ahlop-pa kha akahnungting aleihmua kae. 21 Peter in ama kha ahmu pha, Jesu hneng, “Rōngpu, hiva mipa hi-e heihmen akachang sik?” tia ader. 22 Jesu'n amasôna, “Kajōng mak kârseng ama aleikahring sik a kamadu'n chu, khavakha nang hnenga heimo akhôkna ka-om? Kei ajui roh!” ati. 23 Khava jâra Jesu kahnung kajuihei kâra hiva sonlepa hi akathimak sik a anhri manthang jo. Tâk-kha Jesu'n chu ama thimak ning atina changmak; ama tati khachu, “Kajōng mak kârseng ama aleikahring sik a kamadu'n chu, khavakha nang hnenga heimo akhôkna ka-om?” ati kae. 24 Hihei seng akahri leh a'nzet inhlut kachang sonle kha ama hi kae; ama tahri hei kha kadik tia kanmanhret.

Ṭongchaina

25 Jesu'n ṭōn katamtak aleitlosōt ka-om. Khavahei seng kha inkha-khat a a'nzet inhlut a achang inchu, mazet sik lekhahei kha raleichung hin kenmak ning tia kamandon.