The Old Testament of the Holy Bible

Semtil 1

Pathen thil sem thusim

1 Semtil’ in Pathenin van le leiset ahinsemtai. 2 Ahin leiset chu alim le agong bei, twipi thuh tah a ki khang chule achungnga thim pi jingahin, twipi chu Pathen Lhagaovin a-opkhum’ e. 3 Pathenin, “kho hungvah hen,” atile, ahungvahtai. 4 Pathenin khovah chu avetle apha lheh jengin, muthim le khovah asep khentai. 5 Pathenin khovah chu “sun” asah-in, muthimchu “jan” asah-e. Jan akichaijin jingkah ahitan, nikhat alhingtai. 6 Pathenin, Twipi lah a chun vanthimjol hung kidal hen, Twipi chu alang langa dalten hen, atin; 7 Vanthimjol ajamdoh-in, twipichu chung le noiya adaltanin asepkhentai. 8 Twipi daltenna chu Pathenin “vanthamjol” asah-e. Jan akichaiyin jingkah ahitan, ni ni alhingtai. 9 Pathenin, “vanthimjol noiya twipi mun khat’a veikhom hen, tolgo hung doh hen,” atileh, aseibangin aumtai. 10 Tolgo lai chu Pathenin, “leiset” asah-in, twipi veikhom chengse chu “twikhanglen” asahtai. Aphatdan chu Pathenin amudohtai. 11 Pathenin, “leiset’in hampa, amunei hamphung, agathei thing, achi ding amunei cheh, ama amachi dungjui cheh-in hinsepdohhen, leiset chunga kehdohhen,” atileh ahung kehdoh tauve. 12 Leiset’in hampa ahinsep doh tan, hamphung ama ama chi dungjuiyin akehdoh-in, agathei amunei thingphung achi dungjuiyin ahung kehdoh tauve. Ahoidanchu Pathenin amudoh tai. 13 Jan akichaiyin jingkah ahitan, nithum alhingtai. 14 Pathenin, “sun le jan sepkhendin vanthamjol’a avah thei vahho hung kigol’u hen, kum kiheichin kum simtoh nan jong panguhen; 15 Vanthamjol’a konin leiset hinsalvah-u hen,” atileh, aseibang in aumtauve. 16 Pathenin vah len cheh ni asemin, nichang chu sun laiyin avahsah-e. Hiti hin ahsi ho jong asemdoh tai. 17 Pathenin, vah cheng chu leiset salvah ding le 18 Sun lai le jan laiya vah ding, muthim le khovah sepkhen din vanthamjol’a agoldohtai. Aphatje chu Pathenin amudoh tan ahi. 19 Jan akichaiyin jingkah ahitan, nili alhingtai. 20 Pathenin, “twi lah a ahon hona kijot le ding ganhing hiungdimset hen, “atin; 21 Pathenin twi lah acheng din ganhing lentah tah ho le adang dang ganhing tamtah asemin, akijot le nauva Twi, akidil chet chut jin, chule alha lengthei vachate aloi loiyin asemdoh-e. Aphat dan Pathenin amudoh tai. 22 Abonchauvin Pathenin phatthei aboh-in, “Hinphauvin, pungun, Twikhanglen le twi lah jouse dimset’uvin, chule vachate jong leiset’a pungu hen,” ati. 23 Hichun jan akichaiyin jingkah ahitan, ni-nga alhingtai. 24 Pathenin, “leiset’in ganhinglen le neo, ina vahthei le gamlah alha ding hinsep doh hen,” atileh, asei bangin aumtauve. 25 Pathenin leiset’a ganhing le sa jouse chule tol’a kithol ganhing jouse aloiloiyin asemdoh-in, avet le apha lheh jenge. 26 Chujouvin Pathenin, “Eiho lim le mel pun mihem semu hitin, ama ho twi lah anga jouse le chunga vacha te, leiset’a ganhing namkim, ina kivah le gamlah alha ho, alen aneo jouse chunga thunei vaihomin panguhen,” atin; 27 Ama lim le mel tobangin Pathenin mihem asemin, numei le pasal asemdohtai. 28 Pathenin ama ni chu phatthei aboh-in, “Chinphan pung lhonin, nason napah lhon leiset hung dimhen, twilah a nga, ju le vachate, leiset chunga ganhing namkim chunga hung vaihomu hen,” ati. 29 Pathenin, “ven, leiset’a muchi chivo, thingphung gathei jouse naneh lhon din kapen, 30 Leiset’a sa jouse le vachate, tol’a kithol ganhing ho le adang ho nehdin hamhing kapetai,” atin, hiti chun aumtai. 31 Hichun Pathenin athilsemsa chengse avet le ahoi behseh jengin pha asai. Hiti hin jan akichaiyin jingkah ahitan, nigup alhing tai.

Semtil 2

1 Hiti hin thilsem pumpi akijousoh tai. 2 Ni sagi lhinnin Pathenin Athilsem ajousoh-in anatoh acholdotan ahi. 3 Athilsem aboncha ajosoh a, ni sagi lhinnia acholdo jeh-in hiche nikhohi Pathenin Phatthei aboh-in asuthengtai. 4 Hitia hi thilsempumpi hung kisemdoh ahi.

Eden hon

Pakai Pathenin thilsem pumpi ahinsemdoh chun 5 Leiset chunga hampa louhing akeh hih laiyin, muchijong adondoh hih laiye. Ajeh chu Pakai Pathenin go ajuh sah hih laiyin, loubol ding mihem jongaum hih laiye. 6 Leiset’ konjoh chun meijun ajamdoh jin, chutengle leichung ahinle chapkotjie. 7 Pakai Pathenin leiset alan mihem asemin, anahhom sunga hintheina hu ahailut peh le, mihem chu mihing asohdoh paiten ahi. 8 Chujouvin Pakai Pathenin niso lam Eden mun’a chun hon khat asemin, hikomma hin amihem sempa chu akoitai. 9 Honsunga hin vetnomnom thingphung gapha tahtah Pakai Pathenin akesah-in, alailungtah a chun hintheina thingphung le se le pha hetna thingphung jong akeh-e. 10 Edan honlei chap nou din hnleiya konin vadung khat ahung lhongin, honkal’a lhalka lin alongkhenin, vadung li asohdoh paitai. 11 Vadung masapen chu pishonahin, Havilah gamkol vel’in alongin, 12 Hiche gama hin sana theng atamin, samphai chang le songval chang jong akimui. 13 Vadung nina chu Gihon ahin, Cush gamkol vel’a alongin ahi. 14 Vadung thumna chu Tigris ahin, Assyria niso lama alongin, chule vadung li lhinna chu Euphrates ahi. 15 Pakai Pathenin mihempa chu aleibol ding le angah din Edanhonsunga akoitai. 16 Pakai Pathenin mihempa jah a, “honsunga thingga jouse naneh thei ahinan, 17 Se le pha hetna thingga vang khu naneh thei louhel dingahi; naneh ni ni le nathi tei tei ding ahi, ati. 18 Pakai Pathenin, “Mihempa achangseh a aum hi anompoi, aki- thopi ding aki- angtopi thei khatsempeh inge,” atin; 19 Leiset alan Pakai Pathenin sa namkim le vacha jouse asemin, ipi asah ding vetnan mihempa henga abonchan ahin hoiluttai. Hichea hi mihempan aminsah pen pen chu aminu hijeng ahitai. 20 HIti hin mihempan vacha jouse le sa namkim aminvo chehtan, ahinla khat cha beh jong ama kithopi thei le aki-angtopi thie aumtapoi. 21 HIjeh chun Pakai Pathenin mihempa chu a-imut milsah-in, a-ihmut lanin anahgu khat aheh lhan, anung chu aphen atonjol’in, 22 Anahgua kon chun numei khat asemdoh-in, mihempa henga ahinpuilut tai. 23 Hichun mihempan: “ Hiche hi kagu kachanga kon, Kaphe kavouva kiladoh ahijeh aPasal’a kona kiladoh ahijeh a ‘Numei’ kiti ding ahi.” ati. 24 Hijeh a chu Pasal’in anu le apa alhakanga aji akol chah joh a, chule ama ni phe khat vou khat hilhonahi. 25 Hichepet chun mihempa le ajinu asagohkeo ahilhonin, ahivangin akijapi lhonpoi.

Semtil 3

Mihemin Pathen Thupeh apelkeh

1 Pakai Pathen thilsem ganhinglah a doha thuh pen chu gul ahi. Gul hin numei nu jah a,” Honsunga theiga ho khu naneh lhon louhel dia Pathenin akha mongham?” atile; 2 Numei nun,” Theiga dang vang kinetheiye; 3 Honlai lunga vang khu neh jong kaneh thie lhon lou ding, katoh khah lhon jongle kathi tei tei lhondin Pathenin eiseipeh lhon nai, “ati. 4 Hichun gul’in numienu jah a, Thi lhon hih hel’in nate. 5 Naneh lhon teng namitlam lhon kikeodoh a Pathen masap’a thilpha thilse nahetdoh lhonding jeh a Pathenin akha ahibouve, “ati. 6 Thingphung chu numei nu mitvet’ in ahoi lheh jengin, akineh le mi achihsah ding jeh-in jong aducha cheh jenge. Hijeh chun numei nun theiga chu akilon anen, ajipa jong apen, aman jong anetai. 7 Chutah-in amitlamlhon akikeodoh paiyin, asagohkeoahi ahedoh lhonin, theichang na akilmat mat lhonin kaipelengin akikai lhontai. 8 Nisa dailhah lamin honlei laiya Pakai Pathen va le husa aja lhonin, mihempa le ajinu hongsung thing lah a akisel lhontai. 9 Ahivangin Pakai Pathenin, “Vo Adam, hoiya um nahim?” tin ahinkouve. 10 Mihempan, “Honsunga nahusa kajah le, sagohkeo kahijeh a kichaa kisel kahi, “ati. 11 Pakai Pathenin, “kon sagohkeo nahi atim? Neh lou dia kisei thingga chu naneh hitanteong?”ati. 12 Mihempan, “Eilenkhompi dia neipeh numei nu hin thingga chu eipeh a kaneh ahitai,” tin aseiye. 13 “Ibol’a hitabangpi chu nabol ham?” tia Pakai Pathenin numei nu adoh le, amanun, ‘Gul chun eidohabol’a kaneh hichu me, “ati.

Pathen Thutan

14 Chuphat’in Pakai Pathenin gul jah a, “Nathilbol jeh a hi gaosap nachan a, ganhing jouse lah atalen namat ding, nahinkho lhumkeiya na-op’a kithol’a leivei naneh ding ahi. 15 Numei nu to kakidousah a, ama chilhah le nang chilhah kigal to ding ahi. Ama chilhah pan nalu avoh chip’a, nangin akhotaljum nachuhpeh ding ahi.”ati. 16 Pakai Pathenin numei nu jah a, “Na-naovop teng gim gentheiyanaum a, nat hahsa thot acha nahinding ahi. Hijongle najipa jeng lhangaiya nahin’a aman nachunga vai ahom ding ahi, “ati. 17 Mihempa jah aPakai Pathenin, “Naji nu thua nanun aneh lou dia kaseipeh thiega na neh jeh a leiset jeng jong hi gaosap chang ahitai. Nahinkho lhumkeiya tohgim genthei puma tol natuh a neh ding nakihol ding ahi. 18 Nakidoupi din leiset’a theimi ling le meithai seltho ling hung keh-in tin, chule tollhanga anche louhing naneh ding ahi. 19 Nakisemdohna leiset”a nakile kit kah a, namaiya ulsa long longa na natohgim a’neh le chah nakihol ding ahi. Leivuiya kisemdoh nahin, Leivui nalesokit ding ahi, “ati. 20 Mihem nankim penna nu ahiphat’in Adamin ajinu chu amin Eve asah-e. 21 Pakai Pathenin mihempa le ajinu din savun ponsil asemin asilpehtai.

Eden hon’a Pathenin Adamle Eve asoldoh

22 Pakai Pathenin, “Mihemhi ilah-uva khat bangin thilpha thilse hethieyin aumtan, hichea hi hinna thiega khu neh khahsah atonsot’a hinsah louhel ding ahi,” ati. 23 Hijeh chun akisemdohna leiset loubol’a kivah din mihempa chu Pakai Pathenin Edan honna konin asoldoh tai. 24 Hinna thingphung lampi ngah din hon niso lama Vantil lhanei chu akoiyin, chemjam deuje ju chu akipei kimvelsah tai.

Semtil 4

Cain le Abel

1 Adamin ajinu Eve akitimetpin, amanu agaiyin chapa khat ahinge; “Pakai panpi jal’a achapa kahin,” tin amin Cain asah-e. 2 Chujouvin asopipa Abel ahing kit’in ahi. Abel chu kelngoi chingin apangin, Cain chu loubol’in apange. 3 Khongnungin Cain chun alhosoh gan Pakaiya kilhaina abol’in, 4 Abel’ in jong akelngoi peng masapen, athaopen khat athat’in, kilhai nananeiye. Hichea hin Abel kilhaina chunga Pakai alung lhaiyin, athilbol asanpeh tai. 5 Cain thilto vangchu asangpon, ama jong akhohsahtapoi. Cain alunghang behseh-in akaiku jenge. 6 Pakaiyin Cain jaha, “Ibol’a lunghanga kaiku jeng nahim? 7 Thildih bol le chun kipah ding nahin, thilse nabol jeh-in chonsetnan kotphunga nachang lhi jinge; jotho dia nagot vangin, nangin najotei ding ahinai,” ati. 8 Cain chun asopipa Abel jah a, “Gamlah a che hite, “atin; gamlah agei lhon phat’in Cain asopipa chunga achun athattai. 9 Hichejeh hin, “Nasopipa Abel la em?” tin Pakaiyin Cain ahindongtai. Aman, “Kei kasopipa ching gun set ka hi ong?” ati. 10 Pakaiyin, “Ibol’a nahim? Tol’ a kona naopipa thisanin eihinsap sap khu me’. 11 Hiche leiset hi pohkhia nasopipa thisan achop lut tah jeh hin, nang jong gaosap chang nahitan, leiset jeng jong hi lou va na bol thei lou ding ahitai. 12 Muchi tujongle chun hung kehdoh louhelding, chen mun det beiya leiset chunga vah thai ding beiya leiset chunga vah thai ding nahitai” ati. 13 Chuphat’in Cain chun Pakai jah a, “Neipeh talen hi alen behseh tan kapoh jouhoi ahitapoi. 14 Na- angsunga kona neisoldoh a, chenmun det beiya leiset’a kavah thai le ding, eitoh khapen penin eitha ding ahitai,” ati. 15 Ahinla Pakaiyin, “Chutiponte, Cain hinthat pen pen chunga sagi vei phuki la ding ahi,” atin; atoh kha khan atha louhel na din Cain chalpanga melchihna khat akoi-peh e. 16 Pakai angsunga konin Cain apotdoh-in, Eden solam gamkai, “Vahthai gam” sunga achengtai.

Cain chilhah ho

17 Cain ajinu akitimatpi le agaiyin, chapa khat ahingin, Enoch asah-e. Cain chun khopi khat asemdoh-in achapamin aputsah -in, Enoch asah-in ahi. 18 Enoch chun Irad ahingin, Irad-in Mahuja-el ahingin, Mahuja-el chun Methusha-el ahingin, Methusha-el ‘in Lemech ahinge. 19 Lemech chun ji ni akop, in Khatnu Adah ahin, khatjonu Zillah ahi. 20 Adah hin Jabal ahingin, Jabal hi ponbuh achengte le gancha ching miho penna pa ahunghi. 21 Jabal sopipa chu Jubal ahin, semjang saite le theile mutte chengse penna pa ahung hikhai. 22 Zillah hin Tubal Cain ahingin, amahin sum-eng manchah ding alhan, thih khengin apange; Tubal Cain sopinu chu Naamah ahi. 23 Lamech chun ajite nijah a, “Adah le Zillah kasei ngai lhonin, Vo Lamech jie ni kisei hi melchih lhontan; Gollhang khat’in eiden jeh-in kathat tai. 24 Cain tha jeh a sagi vei phu aki lah ding le Lamech tha jeh a som sagi le sagi vei phukila ding ahi,” ati.

Seth le Enosh

25 Adamin ajinu akitimatpi kit le cha pa khat ahing kit’in, “Cain thapa Abel khel’a chi khai din Pathenin chapa khat eipekit tai,” tin anun amin Seth asah -e. 26 Seth-in chapa khat ahingin Enoch asah-e. Ama khanglaiya pat hin min ‘Pakai’ minin chibai ahinboh pantai.

Semtil 5

Adam chilhah ho

1 Pathenin Ama lim ma bang banga asem mihem- Adam khanggui thusim chu hiti ahi. 2 Numei le pasal asemin, phatthei aboh-in, amin jong ‘Mihem’ asah tai. 3 Adam kum ja khat le somthum alhinin ama lim le melto kilo tah chapa khat ahingin, Seth asah-e. 4 Seth pen nungin Adam kum jaget ahinben, chanu chapa tampi ahingin, 5 Kum jako le somthum lhin kumin athitai. 6 Seth kum jakhat le nga ahin Enosh ahingin, 7 Enosh pen nungin Seth kum jaget le sagi ahinben, chanu chapa tampi ahingin, 8 Kum jako le som le ni alhin kumin athitai 9 Enosh kum somko ahin kenan ahingin, 10 kenan pen nungin Enosh kum jaget le som le nga ahinben chanu chapa tam pi ahingin, 11 Kum jako le nga lhin kumin athi. 12 Kenan kum som sagi ahin Mahalalel ahingin, 13 Mahalalel pen nungin Kenan kum jaget le som li ahinben, chanu chapa tampi ahingin, 14 Kumjako le som khat lhin kumin athi. 15 Mahalalel kum somgup le nga ahin Jared ahingin, 16 Jared pen nungin kum jaget kum jaget le somthum ahinben, chanu chapa tampi ahingin, 17 Kum jaget le somko le nga lhin kumin athi. 18 Jared kum jakhat le somgup le ni ahin Enoch ahingin, 19 Enoch pen nungin Jared kum jaget ahinben, chanu chapa tampi ahingin, 20 Kum jako le somgup le ni lhin kumin athitai. 21 Enoch kum som gup le nga ahin Methuselah ahingin, 22 Methuselah pen nungin kum jathum jen Pathen to akivop jingin, chanu chapa tampi ahinben, 23 Kum jathum le somgup le nga lhingin ahinge. 24 Enoch ahinkho lhumkeiyin Pathento akivop jingin, Pathenin ahing laiya alah phat’iin akiholmotai. 25 Methuselah kum jakhat le somget le sagi ahin Lamech ahingin, 26 Lamech pennungin Methuselah kum ja sagi le somget le ni ahinben, chanu chapa tampi ahingin, 27 Kum jako le somgup leko lhin kumin athi. 28 Leamech kum jakhat le somget le ni ahin chapa khat ahingin, 29 “Pathen gaosapsa, ikhut’ uva itoh gim nau hiche leiset’a kona hi hiche naosen hin eitha-ol sah diu ahi,” tinan amin Noah asah-e. 30 Noah pen nungin Lamech kum janga le somko le nga ahinben, cha tampi ahingin, 31 Kum ja sagi le som sagi le sagi lhin kumin athitai. 32 Noah kum janga ahin chapa thum ahingin; Sem, Ham chule Japheth ahiuve.

Semtil 6

Namtin vaipi gitlouna

1 Leiset chunga mihem hapunin apungin, cha le nao tampi ahing tauve. 2 Van miten mihem chanu hoitah tah ho amudoh phat’un adei dei ji din akipuiyui. 3 Ahivangin Pakaiyin, “Kalhagao mihem sunga tonsot’ in chengden deh ponte; mihem hi tahsaphe bou ahin, ahinkho jong kum jakhat le som ni bou hiding ahi, “ati. 4 Mihem chanu ho le van mite chihlhah ho hi chulai le khonung geiya leiset’a mihatte chu ahiuvin, khanglui laiya mihat minthang ho chu amaho ahiuve. 5 Leiset’a cheng mitin gitlu le niseh a thilse jeng agel’u Pakaiyin amudoh tan, 6 Mihem asem’a leiset’a achensah akisih-in, alung na behseh tai; hijeh chun kasemsa jouse, mihem geiyin leiset’a konin sugam tange, : tin Pakaiyin aseitai. 7 Noah chunga vang Pakai alung lhainai.

Noah

9 Noah hinkho chu hiti ahi: midih, akhang sunga nolnabei, Pathen to kivop jing mihem ahi. 10 Noah chun chapa thum ahingin, Shem, Ham, chule Japheth ahiuve. 11 Pathen mitmun leiset mihem abonchan aphamon, asegamtan, muntin’a pumhat jengin akinotauve. 12 Leiset’a cheng mihemte lam hilouva akihei gamtauvin, Pathenin avet le leiset asetsoh hel chu amudohtai. 13 Pathenin Noah jah a, “Leiset pumpi hi mihemte thilse bol dimsoh ahitan, hijeh a chu abonchauva kasuhgam’a, chitin namtin leiset puma kasuhgam ding ahitai. 14 Gopher thingin kong innei khat kisuiyin, kong sunga chu adan danin khah tanin, asung le apo begon loijol’in. 15 Kong innei chu adung tong jathu, avai tong som nga chule atun tong somthuma nasem ding. 16 kong innei chu inchung nakhua, alhung khu tongkhat bou len ding, kong kotpi asih lama nahon a, lhong danthuma nadoa, achungnungpen, aban’a chule anoinungpen nado ding; 17 leiset chunga haitheiya hing jose sumang dia keiman twiksang kaletsah ding, leiset’a ganhing namkim thisoh hel ding ahi. 18 Nangto vang kitepna khat kaphudoh a, naji le nachapte chule namoute chengtoh kong innei sunga nalut diu ahi. 19 Chule achikhai dinga ganhing namkim- anu khat le achal khat-kop khat cheh kong sunga napui lut ding ahi. 20 Vacha hihen ganhing dang hileh, tol’a kithol ho geiya ama ama jat dungjuiya chikhai dia nakoma hung kitol lut diu ahi. 21 Neh thei jouse nalo khoma, nang ho le ganhing namkim neh dia nakhol khom ding ahi,” ati. 22 Pathenin aseipeh bang bangin Noah-in aboltai.

Semtil 7

Twisang let

1 Pakaiyin Noah jah a, “Hiche khanga midih nang bou kamui, na-insung mite toh kong sunga luttan. 2 Satheng jat khat’a konin kop sagi-anu khat le achal khat cheh to, saboh jat khat’a konin vang kop khat bou-anu khat achal khat cheh lan, 3 Vacha jat a konin kop sagi cheh leiset’a achikhai din kong sunga kai lut’in. 4 Ni sagi lhinteng nisom le jan som li sunga go kajuh sah-a, kasemsa ahing thei jouse kasuh mang hel ding ahitai,” ati. 5 Pakaiyin aseipeh chan abang bangin Noah-in aboltai. 6 Leiset chunga twisanglet chun Noah kum jagup alhingtai. 7 Twisanglet’a hoidoh na din Noah le ajinu, achapte le ajiteu kong sunga alut tauve. 8 Pathen thupeh bangin satheng le sangboh kop khat che-anu khat le achal khat cheh toh, vachate le tol’a kithol ho geiyin, 9 ni nin Noah to kong sunga akijot lut tauve. 10 Ni sagi jouvin leiset’a twisang alentai. 11 Noah kum jagup lhin kum, lha ni na, nisom le sagi lhin nin twinah jouse ajal tan, van a gokot jouse jong akihong tai. 12 Chutah-in ni som li jan som li sung in go aju ju jenge. 13 Hiche nikho le lea chu Naoh le ajinu, achapate-Shem, Ham chule Japheth le ajiteu kong sunga lut ahiuve. 14 Ganhing namkim, insa le gamsa, alen aneo, vacha namkim, 15 Akop kop’in kong sunga alut’un, 16 Anu khat achal khat cheh, Pathenin Noah to akijot lut tauve. Noah alut phat’in Pakaiyin kongkot akhah tai. 17 nisom li le jan som li sungin leiset’a go ajun, twi apomtou tel tul’in Leiset sanga sang jon kong alet doh tai. 18 Leiset chung twi adimtel tul jengin, along matsoh tan, kong jong twi chunga akitol le lei. 19 Twi atamval’in van noiya molsang jouse geiyin achupsoh tai. 20 Twi chu akhang tou tou nalaiyin, molsang jouse sangin tongsom le ngan asangjoi. 21 Hijeh chun leiset ganhing namkim-ju le va, ahon honin, mihem geiyin athisoh heltauve. 22 Tolgoa cheng ganhing nah hai thei jouse athisoh tauve. 23 Leiset’a hing thei mihem le ganhing namkim, ju le va, tol’a kithol ho le chunga leng jouse Pakaiyin asugamin, Noah le kong sunga aumpi chengse chubou asoh chauve. 24 Ni jakhat le som nga sung geiyin twi akemsuh hih laiye.

Semtil 8

Twisanglet kichai

1 Noah le kong sunga aumpi ganhing chengse Pathenin agel khoh jingin, Leiset chunga hui anun sah le twi akemsuh pantai. 2 Twinah jouse le van’a go-kot chengse akikhah-in, go ahaiyin kho aphan, 3 Ni jakhat le som nga sungin leiset’a twi akang hei hoitai. 4 Lha sagi lhin na, nisom le ni sagi lhin nin Ararat lhanga molvum khat’a kong aki-ngamtai. 5 Twi vang akemsuh jing jengin, lha som lhinna, ni masapen nin molvum jouse akimu theitai. 6 Nisom li lhin nin Noah- in kong bangkot khat ahongin, 7 va-ah khat alha leh, leiset’a twi akanloulai jeh-in adung avaiyin alenglenahung kile kit tai. 8 Twi kan le kan lou hetnan Noah-in vakhu khat alha kit leh, 9 Leiset pumpi twiyin achup nah laijeh-in vakhu chun touna ding aholmon kong lama ahung kile kit;in, Noah-in agahsang lhan kong sunga achoilut tai. 10 Noah ni sagi akho ngaiyin, vakhu chu alha kit leh, 11 Nilhah lamin vakhuchun amuh a olive thing nathah khat ahinpon, ahenga ahung kile kit’e. Hichea hin Noah-in leiset’a twi kan ahe-tai. 12 Noah-in ni sagi ma a-ngah -in vakhu chu alhadoh kit leh, hichea vang hin vakhu chu ahenga ahung kile kit tapoi. 13 Noah kum jagup le khat (601) lhin kum, lha masapen, ni masa nin leiset’a twi akangsoh-in, Noah-inkong in chung khu ahodoh aavet leh, leiset chung twi akangsoh heltai. 14 Lha ni na nisom ni le sagi lhin nin leiset chung twi akang goheltan ahi. 15 Pathenin Noah jah a, 16 “Najinu le nachapate chule ajiteu toh kong sunga konin potdoh tauvin. 17 Naumpi ganhing namkim-ju le va, tol’a vah tahsaa hing jouse, apunjal’uva leiset adimsetna diuvin hinkai doh tan,” ati. 18 Hijeh chun konga konin Noah le ajinu, achapate le ajiteu apotdoh tauve. 19 Ganhing ho jong, tol’a kithol ho le vachate, leiset’a lhale jouse kong sunga konin akop kop’in ahung potdoh tauve.

Noah Kilhaina

20 Noah-in Pakai din maicham khat asemin, gancha theng le vacha theng lah akonin khat cheh adongkhomin, maichamphunga pumgo thilton agouvamtai. 21 Amuinam chun Pakai alung lhiayin alung sunga, “Aneocha pat mihem lungthim hi asesa kahet jeh-in, mihem thilse bol man a tukal leiset hi kagaosap kit lou hel ding ahitai. Tua kasuhgam banghin ganhing ho jong sumang ta ponge. 22 Leiset aum laisea muchi tuphat, lho lhun phat, gamsat le gamdap phat, nipi laile phalbi lai chule sun le jan um jing ding ahi,” ati.

Semtil 9

11 Itih hijongle ganhing namkim twiya kisumang talouding, a-itih geiya jong twisanglenin leiset asuhmang lou ding ahitai. 12 Nangho le ganhing namkim dinga mantih neilou kitepna kaphudoh het jingnan, 13 Meilhang lah a kathalpi kakoiye; hiche hi vannoito kakitep het jingna hiding ahi. 14 Vanthamjol’a meilhang kajinsah teng thalpi chu kimudoh ding, 15 Chule ganhing namkim-ahing jouse twilenin asuhmang louna dia nahenguva kakitepna kageldohji dingahi. 16 Hitia chu meilhang lah athalpi ahung kilah teng, leiset chunga ganhing jouse le kei kah a mantin neilou kitepna chu kageldoh ding ahi. 17 Thalpi hi ganhing namkim to kakitepna malchihna ahi,” ati.

Noah le achapate

18 Kong sunga hung potdoh Noah chapate chu Shem, Ham chule Japheth ahiuvin, Ham hi Canaan pa ahi. 19 Hiche Noah chapa thum ho hi leiset chung cheng mihem chitin namtin penna pului ahitauve. 20 Noah hi loubol mi ahin, leiset’a lengpilei bol masapenin apange. 21 Noah-in lengpitwi adon le akhamin, aponbuh sunga del cheng louvin alumtai. 22 Canaan pa Hamin apa Noah del cheng louva lum amun, polama asopite ni agaseipeh-e. 23 Shem le Japhet-in ponsilchol khat ala lhonin, alengkouva akhai lhonin, apa del chenglouva um chu mu lounadin akihei mangin, anunglam ngan pnonbuh sunga atoi lut lhonin, apa lhon chu agakhu khum lhone. 24 Noah lengpitwi kham alimdoh phat’in achapa neopenin abolna chu ahedoh-in, 25 Hijeh chun, “Canaan hi gaosap chang hen, Asopite nin soh-in nei lhon hen. 26 Pakai, Shem Pathen vang vahchoiyin umhen, Shemin Canaan hi soh-in hinneihen. 27 Pathenin Japheth punsah hen, Achilhahte Shem chilhahto hung chengkhomu hen; Canaan vang Japheth soh-in hung pang hen,” ati. 28 Twisanglet nungin Noah kum jathum le som nga ahing nalaiyin, 29 Kum jako le som nga lhin kumin athi.

Semtil 10

Noah chate sonle pah

1 Noah chapate Shem, Ham chule Japheth chilhah ho khanggui thusim chu, twisanglet nungin athum’uvin chapa tampi ahing cheh-ui. 2 Japheth chapate chu Gomer, Magog, Madai, Javan, Tubal, Meshech chule Tiras ahiuve. 3 Gomer chapate chu Ashkenaz, Riphath chule Togarmah ahiuve. 4 Javan chapate chu Elishah, Spain, Cyprus chule Rhodes ahiuvin; 5 Twikhanglen pang dunga hung cheng ho penna pului ahiuve. Hicheng hi Japheth chilhah ahiuvin, aphung phungin agamkai sung cheh a akichen’uvin, ama pao cheh akithouve. 6 Ham chapate chu Cush, Egypt, Libya chule Canaan ahiuve. 7 Cush chapate chu Seba, Havilah, Sabtah, Raamah chule Sabteca ahiiuve. Raamah chapate ni chu Sheba le Dedan ahi. 8 Cush-in Nimrod kiti chapa khat ahingin, leiset’a gal-hat masapenin apange. 9 Pakai panpi jal’in Nimrod hi sathat thei tah ahin, hijeh chun mihon, “Nimrod bangin Pakaiyin sathat thei nahisah hen,” akitijiuve. 10 Nimrod lenggam chun Babylon, Erech chule Accad, Babylon gamsunga um chengse ahopsoh keiye. 11 Hiche gama kon hin Nimrod Assyria gama achen, Nineveh khopi, Rehoboth Ir khopi, Calah khopi, 12 chule Nineveh khopi le khopi minthang tah Calah kikah a Resen khopi aphutdoh-e. 13 Egypt chapate chu Lydi, Anam, Lehab, Naphtuh, 14 Pathrus, Casluh chule Caphtor ahin, Caphtor hi Philistine mite penna pului ahi. 15 Canaan chapate chu amasan apeng masapen Sidon le Heth ahi lhonin, 16 chule Canaan chilhah chu Jebus mite, Amor mite, Girgash mite, 17 Hiv mite, Ark mite, Sin mite, 18 Arvad mite, Zemar mite le Hamath mite ahiuve. Khonung in Canaan insung kon chengse gamtin’a akithe chan soh keiyun, 19 agamgiu Sidon a pat Gerar lang jonin Gaza geiyin akilhung lut peh-in, Sodom lang jonin akilhungin, Gomorrah aphan, Admah ahinphan, chuin Zeboiim ahopan Lasha geiyin akilhung lut peh-e. 20 Hicheng hi Ham chihlhah ahiuvin, aphung phungin agamkai sung cheh a achengun, ama pao cheh akithouve. 21 Japheth upa Shem chu Hebrew mite penna pului ahi. 22 Shem chapate chu Elam, Asshur, Arpachshad, Lud chule Aram ahiuve. 23 Aram chapate chu Uz, Hul, Gether chule Meshkek ahiuve. 24 Arpachshad chapa chu Shelah ahin, Shelah chapa Eber ahi. 25 Eber hin chapa ni ahingin, khatpa khanga hi leiset mite paocheh jeh a akikhen jeh-un amin Peleg akitin, khatjo pa chu Jokatan ahi. 26 Joktan chapate chu Almodad, Shelph, Hazarmaveth, Jerah, 27 Hardoram, Uzal, Diklah, 28 Obal, Abimael, Sheba, 29 Ophir, Havilah, chule Jobab ahiuvin, abonchauva Joktan chapa jeng ahiuve. 30 Joktan chapate gamgi chu Mesha a pat Sephar lang jonin solam thing lhang gamsung geiyin akilhung lutpeh-e. 31 Hicheng hi Shem chilhah ahiuvin, aphung phungin agakai sung cheh a achengun, apao cheh akithouve. 32 Hiche miho hi ama ama jat dungjui le akondoh nau insung dungjuiya kisimtoh Noah insung kon cheh ahivin, twisanglet nunga leiset chung mihem hijat hi amahoa kondoh jeng ahiuve.

Semtil 11

Babylon Insung

1 Hiche laichun leiset miten paokhat seh athon, thu cheng jong tha khat amanguve. 2 Mihemte chu niso lama akitol leu leh Babylon gama phaicham khat’a ahung lut’uvin, hikoma chun achengtauve. 3 Amaho khat le khat akihouvun,” Hungun, cheh dengu hitin goutah lhengu hite,” atiuvin; song panna pangdin cheh adenguvin, song lou din leingan amangui. 4 Mihon,” khopi khat semu hitin, insang, atingvum vanto kibang khat sau hitin imin kithansah-u hite, achutiloule leiset chunga ikimoh thethang gam diu ahi,” atiuve. 5 Mihemte khopi sem le insang sah chu vedin Pakai ahung kum lhai. 6 Hichea hin Pakaiyin, “Mihemte hijat khat bou ahin, pao khatseh bou athouve; athilbol’u hi tua bana aboldiu apatna bou ahinalaiyin, tukal abolnom nom abol jeng diu dol ahitai’ 7 Kum lhau hitin apaovu gasucheh leu hen khat le khat kihou mon um’uvin tin atohban haitauvinte,” ati. 8 Hitia hi Pakaiyin miho chu leiset chunga ahtecheh soh phat’in akhopi sah ban ahaitauve. 9 Hikoma kona hi Pakaiyin mihemte pao asuh cheh a, leiset chunga athe chehsoh hel jeh-in akhopi min Babylon akisah lot tai.

Shem chilhah ho

10 Shem chilhah ho thusim hiti ahi. Twisanglet nung kum ni lhin kum, Shem kum jakhat ahin achapa Arpachshad ahinge. 11 Arpachshad pen nungin Shem kum ja nga ahingin, chadang tampi ahinbei. 12 Arpachshad kum somthum le nga alhinin achapa Shelah ahingin, 13 Shelah pen nungin Arpachshad kum ja li le thum ahingin, chadang tampi ahinbei. 14 Shelah kum somthum alhinin achapa Eber ahingin, 15 Eber pen nungin Shelah kum ja li le thum ahing nalaiyin, chadang tampi ahinbei. 16 Eber kum somthum le li alhinin achapa Peleg ahingin, 17 Peleg pen nungin Eber kum ja li le somthum ahing nalaiyin, chadang tampi jong ahinbei. 18 Peleg kum somthum alhinin achapa Reu ahingin, 19 Reu pen nungin Peleg kum ja ni le ko ahing nalaiyin, chadang tampi jong ahinbei. 20 Reu kum somthum le ni alhinin achapa Serug ahingin, 21 Serug pen nungin Reu kum ja ni le sagi ahing nalaiyin, chadang tampi jong ahinbei. 22 Serug kum somthum alhinin achapa Nahor ahingin, 23 Nahor pen nungin Serug kum ja ni ahing nalaiyin, cha dang tampi jong ahinbei. 24 Nahor kum som ni le ko alhinin achapa Terah ahingin, 25 Terah pen nungin Nahor kum jakhat le som le ko ahing nalaiyin, chadang tampi jong ahinbei. 26 Terah kum som sagi alhinin Abram le Nahor chule Haran ahinge.

Terah chilhah ho

27 Terah chilhah ho khanggui chu hiti ahi; Terah-in Abram le Nhor chule Haran ahingin ahi. Haran hin Lot ahinjou, 28 Apa Terah hinpet’ in Babylon gamsung achena khopi Ur a athitai. 29 Abramin Sarai akichenpin. Nahorin Haran chunu Milcah akichenpi: Haran hin Iscah jong ahingin ahi. 30 Sarai achingin cha neilouvin aumtai. 31 Terah hin achapa Abram le amou nu Sarai-Abram jinu, atupa Lot-Hanran chapa akipuiyin, Babylon gama Ur khopi dalhan Canaan gam jonin achetauve. Amahon Haran ahinphauvin, hikoma chun achengtauve. 32 Haran a chun Terah kum ja ni le nga alhinin athitai.

Semtil 12

Pathenin Abram akou

1 Pathenin Abram jah a, “Nagam leiset le na phung na chang, na- insung mite dalhan, keiman kavetsah got gam jonin chen. 2 Keiman nachilhah tampi kahisah a, nam lentah kaso ding, phatthei kaboh a min thang tah a ka koi ding, chu teng nangma phatthei bom nihi ding ahi. 3 Nangma phatthei na boh te phatthei kaboh a, Nagaosap jouse kagaosap thuh ding; Nang jeh achitin namtin phatthei kaboh ding ahi,” ati. 4 Abram kum som sagi le nga ahin, Pakaiyin aseipeh bangin, Haran akonin akipatdoh- in, Lot chun akilhonpi. 5 Abramin ajinu Sarai le asopipa cha Lot akipuiyin, Haran a alamdoh goujouse pon, soh chengse to kilhonin Canaan gam jonin achatauve. Canaan gam ahung lhun phat’ un, 6 Shechem muntheng lai, Moreh muna gangpi theng phung ahinphah kahsen Abramin gamsung chu akhol khol jenge. Hichepet hin gamsunga Canaan miho anachenguve. 7 Abram henga Pakai ahungkilah-in ajaha,” Nason nachilhahte kapehgot gam chu hiche hi ahi,” ati. Hichun ahenga hung kilah Pakai din Abramin maicham phung khat hikoma chun asemdoh tai. 8 Chujouvin Bethel khopi nisolam, lhanglam thinglhang gam manon Abram achen, nilhum lama Bethel le niso lama Ai kikah a ngahmun akisemtai. Hikoma jong hin maicham khat asemin Pakai minin ataove. 9 Hiti hin Abram muntin’a avah len, Canaan gamsung lhanglam gamkai sung ajontai.

Eygpt gama Abram

10 Canaan gamsunga kel lhah jeh a ahhsat behseh phat’ in Abram puhsuiya khopem din Egypt gam jonin achesuh-e. 11 Egypt gamsung alut ding konin Abramin ajinu Sarai jah a,” Veteh, mitvet’a numei mel-hoi tah nahi kahei. 12 Egypt miten namu tengu keiji nahi heuvintin, kei eithauva, nang nakihoi diu ahi. 13 Nang jeh a eihing hoijuva eibol phatna diuvin kei naovin kiseiyin,” ati. 14 Abram Egypt gamsung alut phat’ in Egypt mite mitvet’ in jong ajinu chu numei mel- hoitah ahi nget’e. 15 Pharaoh leng chapaten amudoh-un, Sarai mel- hoi dan lengpa jah a aseiyui; hijeh chun Sarai chu leng inpia apuilut tauve. 16 Sarai jal’ in lengpan Abram abol phan, kelngoi hon, kelchate, bong hon, sa-ngante, soh le kol chule sangonsao tampi apei. 17 Ahinla lengpan Abram jinu Sarai akipuijeh-in, Pakaiyin lengpa chung le a-insung mite chunga nat khoh tah alansah tai. 18 Hichun Pharoah- in Abram agakousah-in ajah a, “Idia hita neibol ham? Hiche nu naji hitaa idia naseida ham? 19 Ibol’ a nanao ahi na tia, jia naipuisah mongham? Hin hin naji hi, kipuiyin potdoh loiyin.” tin anotai. 20 Pharaoh-in amite aseipeh-in, amahon Abram le ajinu chule athil keo alokeo pumin gamsunga konin akaidoh tauve.

Semtil 13

Abram le Lot kikhen

1 Abramin ajinu akipuiyin, anei jouse apon, Lot to kilhonin, Egypt’ a konin Canaan lhanglam jonin achetai. 2 Abramin kelngoi le kelcha, bong chule sana dangka tampi aneiyinmihao tah ahitan ahi. 3 Canaan lhanglam gamkaiya konin akholjin len, muntin achonin, Bethel lang ahinjon’e. Masanga ngahmun asemna Bethel le Ai kikah ahinphan, 4 Masanga maicham asemna muna chun Pakai min ataove. 5 Lot’ in jong atumtah-in kelngoi le kelcha chule bong tampi le soh tampi aneiyin, a-insung mite toh ahiuve. 6 Abram le Lot’ in gancha tamtah gel anei lhon phat’in, ganchate neh ding gam aneo behseh tan acheng khom thei lhon tapoi. 7 Abram gancha ching ho le Lot gancha ching ho akinahso tauvin, akitohmo tauve. hichepet hin Canaan gamsunga Canaan mite le Periz mite acheng nalaiyui. 8 Abramin Lot jah a, “Insung khat kihi, namite le kamite kina thei pouvinte. 9 Kikhenta hite. Na- angsunga gam ongmo ngap lou, nadei dei lai kilhenin; jetlam nalhen le veilama cheng ting, veilam nalhen le kei jetlama chenge,” ati. 10 Lot akhodaa avet leh, Jordan phaicham pumpi, Zoar geiyin agah mun, twi atha lhingin, Pakai honsung le Egypt gamsung abang jengin ahi. Hichepet”a chu Pakaiyin Sodom le Gomorrah asuhmang loulai ahi. 11 Hi jeh chun Lot’ in Jordan phaicham pumpi akilhenin, nisolam jonin akitoldoh tai. Hitia cuh Abram le Lot kikhen ahilhon’e. 12 Abram Canaan gama acheng denin, Lot chu Jordan phaichama khopi ho lah a chun apansan, Sodom koma ngahmun asem’e; 13 Sodom kho mite chu a- engseuvin, Pakai dounan achonseuve.

Abram Hebrona achaolut

14 Lot’in adalhah nungin Pakaiyin Abram jah a,” Nadin mun laitah akonin najet navei, sah le lhang vegolsoh keiyin; 15 Gam hitepi nang le nason napah kapeh ding, tonsot’a nagamu hiding ahi. 16 Nason nachilhah hapuna kapunsah ding, tam behseh jenguva leivui jat pha diu koman asim jou lou ding ahi.’ 17 Keiman agam pumpia kapeh tah ding jeh-in, kipatdoh-in abonchan gakholsoh keiyin,” ati. 18 Chuphat’in Abram jong achen, Hebron a Mamre thingphung theng ho koma chun apansan, hikoma chun Pakai din maicham khat asemtai.

Semtil 14

Abramin Lot ahuhdoh

1 Hiche lai hin Babylon lengpa Amraphel le Ellasar lengpa Arioch, Elam lengpa Chaedorlaomer le Goiim lengpa Tidal 2 Akon’ uvin Sodom leng pa Bera le Gomorrah lengpa Birsha, Admah lengpa Shinah le Zeboiim lengpa Shemeber chule Bela ahiloule Boar lengpa chunga gal agabol tauve. 3 Tulaiya Twikhanglen thisa, Siddim phaichama hiche leng nga ho hi anapangkhom’ uve. 4 Kum somle ni sungin leng nga h hi Chedorlaomer lengpa noiya alut lo tauvin, nah nha- in kum som le thum kumin ahindou pan thie bep’ ui. 5 Ahin la kum som le li lhin kumin Chedorlaomer le apanpi leng ho ahung kon’ uvin, Ashteroth Karnaim a Rephaim mite ajouvun, Ham mun’ a Zuzim mite ajouvun, 6 Edom molsang lhanga Hor mite ajouvun, nelgam pamchim a Elparan geiyin agadel jampeh-uve. 7 Chua konin ahung kile kit’ uvin, masanga ‘Enmishpat kiti, tulai Kadesh mun akhun ahunguve. Hikoma hin Hazazon Tamar a cheng, Amor mite le Amalek mite ajouvun agam pumpi alauve. 8 Hichun Sodom le Gomorrah, Admah, Zeboiim chule Bela leng ho akikhom’ un Siddim phaiya galbol din akigotauve. 9 Leng nga hin Elam le Goiim, Babylon, Ellasal- leng li dou din agouve. 10 Siddim phai hi bon- ngan bol adimset’ in, Sodom le Gomorrah lengpa galmun’ a kona ajam lhon le bolsunga alha lut lhontan, leng dang thum vang chu molsang lama ajamdoh tauve. 11 Leng li honSodom le Gomorrah khopi sunga thilkeo ijakai, anneh geiyin akichom’ un achetauve. 12 Amahon Sodom khoa cheng, Abram sopipa chapa, Lot jong gal- hingin akaiyui, athilkeo jouse jong akipoh thauve. 13 Gal’ a hung jamdoh mi khat’ in thilsoh chengse hi Hebrew mi Abram jah a ahung seitai. Hichepet hin Abram hi Amor mi Mamre thingphung theng ho koma anachenge. Mamre’n sopi Eshcol le Aner aneiyin- Abram to pangkhom cheh ahiuve. 14 Asopipa chapa min gal- hinga akaimang jeng ajah phat’ in Abramin ainsung mi galbol thei cheh akhop le, jathum le som le get alhingun, ama lamkai nan leng li ho chu Dan geiyin agadel peh-ui. 15 Abramin asepaite chu aloi loiyin ahomkhenin, agalte chu janlaiyin anokhumin ajoutai, chu leDamascus sah lam, Hobah geiyin agadel jampeh-uve. 16 Abramin asopipa chapa Lot le numei chapang joouse ahin puiyin, athilkeo anei agou chengse le athil chomdoh-u abonchan ahin nungpoh kit’e,

Melchizedek-in Abram phatthei aboh

17 Chedorlaomer le leng dang ho agajao ahung kile kit chun ‘ lengpa phaicham’ kisah Shaveh phaiya Sodom lengpan Abram analamtoi. 18 Chu le Pathen Chungnungpen Thempupa, Salem lengpa Melchizedek chun Abram din changlhah le lengpitwi ahinchoipeh- in, 19 Phatthei boh nan ajah a, “van le leiset sem, Chungnungpen Pathenin Abram phatthei boh hen’ 20 Nagalte josah Chungnungpen Pathen chu vahchoiyin um hen.’” ati. Abramin athil chomdoh jat hopsom a hop khat cheh Melchizedek apei. 21 Sodom lengpan Abram henga, “Nathil chomdoh chengse chang denin lang, kamite vang neipen,” tin athum’e. 22 Sodom lengpan jah a Abramin, “Van le leiset sem, Chungnungpen Pathen, Pakai angsunga khut tunga kihahselsa kahi, 23 ‘Abram kahaosah-e,’ nati louna din, patse jang cha hihen, kengchot khao jang cha hijongle, nang thil pou pou laponge. 24 Golhang ho nehdoh le kalhonpi ho lahdoh tilou adangima ding katipoi; kapanpi Aner le Eshcol chu le Mamre’ n vang achan ding dol kilah cheh-u hen,’ ati.

Semtil 15

Pathenin Abram to Kitepna asem

1 Hicheng nung hin Abramin mu anei pet’in Pakaiyin ajah a, “Kicha hih-in Abram, nang dial um a kisung kahin, kipaman tampi namu tei ding ahi,” ati. 2 Abramin, “Thaneitah Pakai, cha le nao neilou kei tobang dinga kipamaan chu ijajong phachom ding ham? Kagou jeng jong hi Damascus khoa Eliezerin alo ding dan ahibouve. 3 Cha la neihinsah pon, kasohte khat hin kanei le kagou jouse alo ding ahitai,” ati. 4 Hichun Pakaiyin ajah a, “Hiche soh Eliezer khun nanei nagou alo louhel ding, nachapa mong mongin nagou alo ding ahinai, “ati. 5 Pakaiyin inpo lama apuidoh-in, “Van a ahsite khu gahsim gotemin; nason nachilhah jong hijat khu hung pha diu ahi, ;ati. 6 hichea khen beihel’a Abramin Pakai atahsan jeh chun, Pakai alung lhaiyin, them achansah tai. 7 Pakaiyin Abram jah a, “Babylon gam Ur khopia pat hinpuiya hiche gam nape goa Pakai chu Keima kahi,” ati. 8 Abramin, “Thaneitah Pakai, hiche gam keiya ahiding chu iti kahet ding ham?” tin adonge. 9 Adonbut nan Pakaiyin, “kumthum lhingsa cheh bongla khat le kel la khat chule kelngoi chal khat hinkaiyin, chule vakhu khat le vapal khat hinchoiyin hungin,” ati. 10 Abramin gancha ho chu Pathen henga din ahinkaikhomin, athat’in ahapsat cheh-in, ahap Langton ajamin, vachate ni vang chu asemkeh poi. 11 Sa ho chu muthongten ahinvel tengu Abramin adeldohjie. 12 Nisa lhumsuh lamin Abram nguijen juntah-in a-ihmutsoh tan, chule tijat umtah muthim lhangkhal’in ahinjin khumtai. 13 chutah-in Pakaiyin Abram jah a, “Nason nachilhahte gam hi loubeh, kholgam khat’a khopem diu, gasoh changuva kum ja li sunga min genthei hesoh tah a abolgim diu ahi. 14 Nachilhah ho soh a vul nam mite chu ken talen kapah a, nachilhah hon nei le gou tampi kipoh a migam chu adalhah diu ahi. 15 Nangin hinkho nomtah naman’a, nateh thia kivui ding, napu napate heng najot ding ahi. 16 Nachilhahte hi khangli channa a hikoma hung kile kit diu ahi; ajeh chu tu chan geiyin Amor mite gitlouna akichai hih laiye,” ati. 17 Hiche chu photlot louvin sahap kisat ho kah a chun ahung lengjap jengin ahi. 18 Hiche nikho hin hikoma chun Pakaiyin Abram to kitepna asemin, “Keiman nason nachoilhahte chu hiche gam, Egypt gamgia pat Euphrates luipi dung gei, 19 Ken mite gam jouse pum, keniz mite gam gei; e Kadmon mite gam puma, 20 Hit mite gam jong, Periz te gam, Rephaimite gam, 21 Amor mite gam gei, Canaan mite gam, Girgash mite gam le Jebus mite gam jouse puma kapeh dia kitep kahitai,” ati.

Semtil 16

Hagar le Ishmael

1 Abram jinu Saraiyin cha ahinpeh tapon, ahin Sarai hin Egypte numei Hagar chu soh-in anavul’e. 2 Hijeh chun Abram jah a, “Keila Pakaiyin cha neilouvin eikoitan, cha eihinpeh khat leh, kasoh nu-nugah khutoh galumkhomin,” ati. Sarai sei chu Abram anomtai. 3 Hiti hin Saraiyin asohnu Hagar chu Abram thaikem din apetai. Hiche hi Abram kum som jen Canaan gama achen nunga thilsoh ahi. 4 Abramin Hagar agaluppi le amanu agaitai. Hagarin agai akihet phat’in akiletsah-in Sarai anoise boltan ahi. 5 Chuphat’in Saraiyin Abram jah a, “Hibanga eikinoisena gu hi nachunga chuhen! Kenba nakikoipi din kasohnu kapen, aman agai akihet phat’in eihiti noisetai. Koijoh moa dih am Pakaiyin ikah lhona thu hintan jeng hen!” ati. 6 Abramin la Sarai jah a, “Nakhut’a um nasohnu chu me, nadei deiyin bol jeng tang-em,” atipeh-e. Hijeh chun Saraiyin Hagar chu thohda daa abolgim leh, ajammang lo tai. 7 Shur jotna lampia twisam phung khat’a Pakaiya kon Vantil khat’in Hagar akimupin, 8 ajah a, “Sarai sohnu Hagar, hoiya kona hoilam jon ding nahim?” tin adong e. Hagarin, “Kapi Sarai dalha hung jam kahi,” ati. 9 Vantil chun, “Napi henga kile kit’in asoh-in gapang kittah,” ati. 10 Pakaiya kon Vantil’in Hagar jah a hitin jong aseiye, “Keiman koima cha simsen lou son le pah kapeh ding na hi. 11 Chapa khat nahin ding ahin, hesoh a nataona Pakaiyin asanjeh a amin Ishamael nasah ding ahi. 12 Nachapa vang chug am sa-ngan ngol’a ngol ding, mitin adouva, mijousen ama aledou diu; ainsung mite to kikhena chang chen ding ahi,” ati. 13 Hagarin ajah a thusei Pakai chu aminin akouvin, “Mi mudoh thei Pathen nahi,” ati. Ajeh chu, “Tahbeh monga ken Pathen kamua ahivanga hing nalai kahim?” ati. 14 Hijeh a hi mihon Kadesh le Bered kikah a twikul chu, “Eimudoh a Hing jing Pa twikul,” atiu ahi. 15 Hagarin Abram chapa khat ahinpeh-in, Ishmael asah-e. 16 Hichepet hin Abram kum somget le gup alhing tai.

Semtil 17

Kitepna hetna Cheptan

1 Abram kum somko le ko alhinin ahenga Pakai ahung kilah-in ajah a, “Keima Hatchungnung Pathen kahi, kathunnungin thildih bol’in. 2 Nangto Kitepna kasema, nachilhah hapuna kapunsah ding ahi,” ati. 3 Hichun Abram tol’a abohkhup jengle, Pathenin ahenga, 4 “Hiche hi nahenga kakitepna ahi: Chitin namtin penna pa nahi ding; 5 namin jeng jong Abram hitalouva Abram* hiding ahi, ajeh chu chitin namtin penna paa kasem nahi. 6 Nachilhah mihem hapuna kapunsah a, abang bang jong leng le lal hung chang diu, nason napah tam behseh jenga nam lentah tah hungsoh diu ahi. 7 “Nang le khonung geiya nachilhahte, akhang khanga, tonsot teiya kakitepna chu kanit jing ding ahi. Nang Pathen jong kahiya, nachihlhahte Pathen jong kahi ding ahi. 8 Tua nakhopemna gamsung hi nang le nachilhahte kapeh ding; Canaan gam pumpi hi chilhah mite changuva, tonsot geiya apua pang diu, chu le Keima a-pathenu kahi ding ahi, “ati. 9 Abram jah a Pathenin, “Nahenga kakitepna hi nang nahin, khonunga nachilhah ho hijongle nanit soh kei diu ahi. 10 Nang le na chilhah ten na lah-uva pasal jouse chep natan cheh diu ahi. 11 I-kah lhon a kitepna het jingna dia nangin chep natan ding, 12 nakhang lhumkeiyuva, nachilhah insunga pengden mong hihen, suma kicho soh-midang hijongle, pasal jouse chu niget lhin nia chep natan cheh diu ahi. 13 Insung pengden hihen soh a kicho hijongle pasal jouse chap natan diu ahi. Hitia hi kakitepna chu natahsa vuna naput’uva, tonsot’a um jing jeng ding ahi. 14 Keito kitepna suhkeh a chep tanlou pasal koi hileh kamite lah a kisimtha louhel ding ahi,” ati. 15 Abraham jah a Pathenin, “Najinu min Sarai tilouva, tukal Sarah natijohding ahitai. 16 ama hi ken phatthei kaboh teng, chitin namtin penna nu hung hi ding, chule achilhahte lah a leng le lal jong hung pengdoh ding ahi,” ati. 17 Abraham tol’a aboh khup’in, “Kum jakhat lhingsa pasal’in cha anei mong ding hiya, kum somko nunga Sarah-in cha anei thei mong ding ham?” tia agel le, amoh nuijat lo tai. 18 Abrahamin Pathen koma, “Ishameal chu kagou nalosah jengle iti-am?” ati. 19 Ahinla Pathenin, “Ahipoi. Najinu Sarah hin chapa khat nahinpeh tei tei ding, amin Issac nasah ding ahi. Kakitepna chu ama le achilhahte dinga, tonsot geiya kanit jing ding ahi. Hichu kitepna guitan mo ahi. 20 Ishamael ding nasei jong kahenai, phatthei kaboh a cha le nao son leh pah tampi kapeh ding, lengvai pothei cheh pasal som le ni ahin ding, achilhah mite nam lentah kaso ding ahi. 21 Ahinla khovei tulai phat’a Sarah-in ahinding nachapa Issace chunga bou kakitepna kaphudoh ding ahi,” ati. 22 Abraham jah a thu aseisoh phat’in Pathen chu akaltoutai. 23 Abrahamin Pathen thusei anit’in achapa Ishmael leh a-insung mi pasal jouse, a-insunga pengden hihen suma achoh ho hijongle, soh pasal geiyin, hiche nikho le le chun chep atanpeh soh keiye. 24 Chep akitan chun Abraham kum somko le ko alhingtai, 25 achapa Ishmael kumsom le thum alhinge. 26 Anilhonin nikhat’in chep akitan lhonin, 27 Abraham soh pasal jouse jong ahiuve.

Semtil 18

Abraham chapa neiding Kiteppeh

1 Mamre thingphung theng mun achenna a, nisa hahsat jeh a ponbuh kotphungbul’a atoupet’in Abraham henga Pakai ahung kilah-in, 2 Abramham akhodaa agahvet leh, pasal thum anadinguve. Amu mun alamdot din alhaidoh paiye. Tol’a aboh khup’in, 3 “Kapu, nang jen dia hikoma ki-uma, ka-in hopa louvin neijot pai hih beh-in. 4 Nakeng dopna diu twi hindom ing ting, hikom thingphung noiya hin kicholdo’uvin. 5 Ka-in hinhopa ngal tauva, ikhat beh jong bolpeh ung ting, najin nauva natha nei theina diuvin na kamkhat beh jong nehsah unge,” ati. Miho chun, “Kipa aume, naseibangin hinboltan,” atiuve. 6 Lungkin tah-in Abraham ponbuh sunga alut’in Sarah jah a, “Nachangbonh neldi phapen dip’a konin atena thum tedoh-in, changlhah phabep hinkang loi temin,” agatin; 7 chuin bonghon lah a alut’in bongnou hoisel athao khat amanin, sohpa khat apen, aman jong athat’in ahon min loutai. 8 Abrahamin bongnoi le theilhum kihal, bongnoi twi chule bongnousa minsa chutoh ahindomin, miho angsunga aluiyin, thingphung noiya chun aneh laiseuvin amatah ajenlen apange. 9 Amahon Abraham jah a, “Najinu Sarah la?” atiuleh; aman, “Ponbuh sunga khun aum nai,” ati. 10 Jinpan, “Khovei tulai phat, nahenga kahung kit teng le najinu Sarah-in chapa khat ahinding ahi,” ati. Anung, ponbuh kotpunga chu Sarah uma angai lhih ahi. 11 Abraham le Sarah ateh lheh lhontan, Sarah chu athinei jong atangtai. 12 Hichun Sarah-in Alungthimin, “The nung voi nunga kitimatna ki nei jongle anopje jong imlou ding, kajipa jong tehse voisa hilou haimo?”ati. 13 Hichun Pakaiyin Abraham jah a, “I-bol’a Sarah nuiya, ‘The nung voi nunga cha kaneibeh ding hinam?’ati ham? 14 Pakai dia ipi ahah sa um am? Kaseisa banga khovei tulai phat le ka hung teng Sarah-in chapa khat ahin ding ahi,” ati. 15 Chuphat’in Sarah akichan akilep’in, “Nuibon kinui louva,” ati. Ahinla Pakaiyin, “Ahinpoi, nanui nai,” ati.

Sodom khopi dia Abraham taona

16 Amaho akipatdoh-un Sodom khopi gah vetsah theina mun khat ajon’uve; Abraham jong alhadoh diuvin amaho akilhonpi. 17 Pakaiyin, “Kathil bolgot hi Abraham impehda tange. 18 Ajeh chu ason achilhah mite nam hattah le nasatah hung hiya, amajeh a chitin namtin ken phatthei boh ngal ding chu. 19 Acha anao, ason achilhah miten kathu angaiyuva thildih le akitoh abol theina diuva hil dinga ama kilhengta. Achilhahten kathu angaivu le ken kathutep aboncha kabolpeh ding ahi,” ati. 20 Hiti chun Abraham jah a Pakaiyin, “Sodom le Gomorrah dounan thuse akihasei behseh tan, achonset nau jong aval thanghoitai. 21 Chesuh ing ting asset nau kisei chengse atah ajou gapho chen tange,” ati. 22 Mi nin chukom adalhan Sodom lang ajon lhontai; Pakaiyin vang Abraham aumpi. 23 Hichun Abrahamin Pakai anailut’in ajah a, “Mona beiho chu chonsete toh nasuhgam tha tahbeh ding ham? 24 Ijemtia khopia khun themmona bei mihem som nga um jongle akho pumpin nasugam nah nah dem? Mihem som nga um jongle akho pumpin nasugam nah nah dem? Mihem som nga huhdohna khopi chu na hinghoi lou ding ham? 25 Nangin midih le migilou kibanga nabol’a nathagel ding, akikhetna beiya nabol ding vang bolda hel le chun kadeiye! Leiset pumpi thutan Pan adih a atan lou ding ham?” ati. 26 Pakaiyin, “Sodom khopia themmona bei mihem som nga bang kamudoh joule, amaho jal’a kho pumpi kahinghoi ding ahi,” ati. 27 Abrahamin asei kit’in “Pakai, imacha lou, leivui le meivam bep ken ngamtah a na henga thu kaseijom kit ding jeh-in nei-ngaidamin. 28 Khosunga chun themmona bei mihem som nga lhing lel hen som li le nga she umta leh, midih nga lhahsam jeh chun kho pumpi nasugam jeng dem?” ati. Pakaiyin, “Midih som li le nga ka mudoh le khopi chu sugam ponge, “tin adonbut’e. 29 Abraham, “Ijemtin somli she hile la?” tin adonge. Pakaiyin, “Som li she um jongle khopi chu sumang ponge,” ati. 30 Abraham, “Pakai, lung himo hih beh-in, kasei kit nom’e. Ijemtin somthum sehseh umta leh?” ati. Pakaiyin, “Somthum jeng kamu jongle bolda tange, “ati. 31 Abrahamin, “Pakai, imacha lou, leivui le meivam bep ken ngamtah a nahenga thu kaseijom kit ding jeh-in nei-ngaidamin. Ijemtin midih som ni seh bou umta leh?” tin adong kitleuve. Pakaiyin, “Som ni she kamudoh jongle khopi chu sumang ponge,” ati. 32 Abrahamin, “Lung hang hih beh-in Pakai, khatvei seh bou gah sei kit tading’e. Midih som khatseh bou kimudoh le la?” ati. Pakaiyin, “Midih som khatseh um jongle sumang ponge,” ati. 33 Abraham to akihou jouvin Pakai chu achemangtai, chule Abraham jong in lama ahung kile tan ahi.

Semtil 19

Sodom khopi chonsetna

1 Vantil te ni chu Sodom khopia ahung lhun lhon le lot chu khopi kelkot phunga anatouve. Amani amu phat’in Lot chun agalamtoi. A-ang sung lhona aboh khup’in, 2 “Pu te ni, hikoma nangni kinbol dia umah kahi; ka-in a hung lhung lhonin. Keng kisil lhonin natin nage khovah thei lhon ahi. Jingpi tah-in thou lhonin natin chepai lhon nan nate,” ati.Amani adan, “Ahipoi, kholai dunga geh khovah lhon tange, “ati lhontai. 3 Lot ín amani chu ahajolten phat’in anom lhonin, Lot in lam ajontauve. Maljin te ni dinga changlhah kanpeh a anneh tuitah sempeh din Lot’in alhacha ho asol’in ahi. Lhachahon neh asem jou phat’uvin an anetauve. 4 Maljin ten in lupna ajot masangin, khopi sung mihon in chu ahin-umtauve, In umho lah a khosung gollhang upa apang soh keiyuve. 5 Amahon Lot ahinkouvun, “Tujan na-in a geh dia hung te ni chu hoiya um lhon tam? Hinpuidoh loiyin, numei bol’a kabol diu ahi!” tin asamtauve. 6 Lot apotdoh-in kotpi anungkhan, 7 miho jah a, “Golle paite, hitobang lom hin khang gilou hih beh-uvin! 8 Veuvin, pasalto kitimat louhel lai chanu nu kaneiyin, anin hinpuidoh peh-uving ting nanop nop’in bol jengun, maljin te ni vang imacha lodauvin, ka-in a hung lhung kamaljin ahilhon bouve,” ati. 9 Ahinla amahon ahoh lhauvin, “nei ot’un khopempa! I-tobang mi nahiya keiho toh ding neihil leu ham? Nei ot’uvin, ajo le amani sanga melse cheh a nang kabol lo diu ahi,” ati tauve. Hiti hin Lot chu anung sot’un, kotpi phung phujal ding akigotauve. 10 Chuphat’in insunga um ten in Lot chu akailut loi lhonin, kotpi akhah lhontai. 11 Kotphunga um mi alen aneo abonchauva Vantil ten in amit’u achotsah lhon leh, suhna ding helouvin akimaitho gamtauvin ahi.

Lot’in Sodom kho adalhah

12 Mi ten in Lot jah a, “Hiche khosunga hi heng le kom-chanu chapa, tu le cha-adang koi koi nanei nah laiyam? Abonchauvin puidoh loidoh loiyin; 13 ajeh chu hiche mun hi kasuh mang lhon ding a hitai. Hiche miho dounaa thuse melse tah kisei chengse chu Pakaiyin ajadoh tan, hijeh a chu Sodom sumang dia eihinsol lhon ahi,” ati lhone. 14 Chuphat’in achanu te nit oh kitepsa pasalte henga Lot achen, “Kapat’un hikoma konin jamdoh loiyun; mun hi Pakaiyin asuhmang ding ahitai,” agate. Ahinla amanin atot danin anagel lhon’e. 15 Jingkah khovah lhah-in Vantil te nin Lot anoloi lhonin, “Khopi hitoh nakisuh mang tha louna diuvin, nachanu te ni le najinu kipuiyin jamdoh loiyun,” ati lhon’e. 16 Lot akinomsot nah lai vangin, Pakaiyin akhohsah jeh-in, Vantil te nin akhut’in akai lhonin, ajinu le achanu te ni pumin khopi pamlama alhoh doh lhontai. 17 Hichun Vantil khat chun, “Nathi louna diuvin jamdoh loiyun! Kinung hei hih-un, phaicham dunga jong kibangpa hih hel’uvin, thinglhang gam a jamlut’uvin,” ati. 18 Lot’in adonbut’in, Ahipoi kapu, thing lhang lama neisol dauvin. 19 Khohsah tah a kahinkho bon huhhing ta, thing lhang lam agamla behseh-in, kalhun masanga manthah nan eihin lap den’a kathi den ding ahibouve. 20 Ven hiche khopi khu, naicha bou ahi, hikoma khun neijamlut sah-in, khopi neocha ahivanga hoidohna thei ahinai,” ati. 21 Vantil chun, “Aphai, hiche khopi khu suhmangda tange. 22 Man-gangin! Lhaiyin! Khukom nalhun ma imacha kabol thei l ou ding ahi,” atipeh-e. Khopi neo tinaa amin Zoar kisah ahitai.

Sodom le Gomorrah kisuhmang

23 Lot Zoar kho alhunin nisa ahung soh tai. 24 Phot lot louvin van a Pakaiya konin, Sodom le Gomorrah chunga Pakaiyin Kath le meikong goju bangin ajuhsah-in, 25 phaicham pumpi le khopi te ni, asunga cheng mihem jouse le tol’a keh thingna louna jouse geiyin asugamhel tai. 26 Hichun Lot jinu agah kinunghei leh, chilhang asoh-in, songkhom bangin akitungdentai. 27 jingkah matah-in Abraham alhaijel’in, Pakai masanga anadin na muna chun agadingin, 28 Sodom le Gomorrah gamkaise se agah vetsuh patep leh, hol kilhut khu bangin meikhu ahung kitungdoh jen jun jengtai. 29 Pathenin Lot chenna, phaicham akhopi te ni asuhmang jeng vangin Abraham agel khoh jeh-in Lot chu ahindohna thei muna ajamdohsah nai.

Moab mite le Ammon mite penna

30 Zoar khoa chenden ding akichan, achanu te nit oh Lot thing lhang gama acheuvin songko sung khat’a achengtauve. 31 Lot cha au-nun anao nu jah a, “I-pa la atehtan, hiche gamsunga eini kichenpi ding pasal dang jong aumpon, 32 i-pa hi ju donkhamsah hitin, luppia chi khaipeh din bol hite,” atin; 33 hiche jan chun ju adonkhamsah lhonin, au-nun apa akitimetpi leh, ju akham behseh jeh-in apan ima abollam ahephapoi. 34 Ajingin au-nun anaonu jah a, “Jan nilhah-in i-pa to kalumkhomtan, tujan jong ju donkhamsah hitin, nangin galuppin; chute leh i-pa to cha inei cheh lhon ding ahi, “ati. 35 Hijeh chun chuche janin jong apa ju adonkhamsah kit lhonin, acha neojo nun apa aluppin akitimatpi tai. Apa ju akham behseh jeh-in ima abollam ahephapoi. 36 Hiti hin Lot chanu ten in apaa konin nao avop gel lhontai. 37 Au-nun chapa khat ahingin amin Moab* asah-e. Moab hi tulai Moab mite penna pului anahi. 38 Anao nun jong chapa khat ahingin amin Benammin* asah-e. Ama hi tulaiya Ammon mite penna pului anahi.

Semtil 20

Abraham le Abimelech

1 Hichea kon hin Abrahamin Canaan lhanglam gam ajonsuh-in, Kadesh le Shur kikah a chengtai. Khonunga Gerar a achenlaiyin, 2 Abrahamin ajinu Sarah chu anao nun alep’in, hijeh chun Gerar lengpa Abimelech chun Sarah hi aji din anapui man’e. 3 Jan khat Abimelech mangin Pathen ahung kilah-in, “Nangin mi jisa hiche numei hi nakipui jeh a nathi tei tei ding ahi,” ati. 4 Abimelech vang chu Sarah koma analut kha loulai ahinai; hijeh chun aman, “Pakai, nangin themmona bei miho jong natha jeng ding ham? 5 Abraham jengin jong anaonua aseiya chule aman jong chutimaa asei ahi. Hijeh a chu lung thengsel’a kabol’a, thil dihmo kabol loulai ahi, “ati. 6 Amangin Abimelech chu Pathenin adonbut’in, “Adih-e, lung thengsel’a nabol ahi kahenai;hijeh achu kadoumah ten chonsetna chu bolsah louva, tugeiya hiche nu hi tongkha louva kakoi nahi. 7 Tun vang ama hi ajipa nungpeh tan. Hichepa khu Themgao ahin, aman nataopeh teng thi tapon nate. Nanungpeh lou vangle, kagih dim demsa nahi, nang jong namiten jong nathilo tei tei diu ahi,” ati. 8 Ajing jingkah matah-in Abimelech chun alhacha chengse akoukhomin thilsoh jouse abonchan aseipeh leh, akinlih leu jengui. 9 Hijeh chun Abimelech-in Abraham akouvin, “I-neilou ham? Ipi adih louva kabolpeh khah a kei le kalenggam chunga hitobang manthahna hi nahinpoh lut jeng ham? Eikibolna louhel ding khat’a neibol ahi. 10 Idinga hita chu neibol mong mong ham?” tin adongtai. 11 Abrahamin adonbut’in, “Hikoms Pathen tahsan mi aum dingla kagel loujeh a kajinu deichatnan eitha louvinte kati ahi. 12 Atah beh a jong ama hi kasopi ahinai. Kanu hin mong ahilou vangin kappa chanu ahin, jia kanei jeng ahibouve. 13 Hijeh a chu Pathenin kappa insung dalhaa gam choma eihinsoldoh a pat, ‘Nei ngailut phot chetnan mijouse henga nasopin neiseiyin’tia kahilsa mong jong anahi, “ati. 14 Abimelech-in Sarah chu Abraham anungpeh-in, kelngoi le gancha dang chule soh te jong apeh thai. 15 Abraham jah a, “Ven, namuphah chan hi kei gamsung ahi, nadei lai laiya chengin, “ati. 16 Sarah jah a Abimelech chun, “Ven, nasopipa dangka sang khat kapen, hiche hi nakoma um chengse mitmua jum ong huhna kapeh ahin, japi angsunga them nakichan ahitai,” ati. 17 Chuphat’in Abrahamin pathen henga ataopeh le, Abimelech le ajinu adamsah-in, soh numei ho geiyin adamsah-in amahon cha ahingtauve. 18 Ijeh-inem itile Abraham jinu Sarah jal’a abimelech insung numei jouse chu Pathenin chahingmoa anakoi ahi.

Semtil 21

Isaac Pen

1 Sarah chu ateppehsa bangin Pakaiyin phatthei ahungboh-in, 2 Abraham ateh nungin Sarah agaiyin chapa khat ahinpeh tai. Achapa chu Pathenin ateppeh dontah a chu hung peng ahi. 3 Abrahamin amin Isaac asah-in, 4 Pathen seibangin apenjou niget lhin nin Abrahamin achapa Isaac chu chep atanpeh-e. 5 Isaac pen chun Abraham kum jakhat alhingtai. 6 Sarah-in, “Pathenin eikipehsah a einuisah ahitan, ajapha chan nuiya eikipapi ding ahitai,” ati. 7 Aman, “Sarah hin cha le nao hinga nao noi chepsah dia koipenin Abraham anaseipeh ngam dem? Ahin la atehset nungin keiman Abraham chapa khat kahinpeh tai,” tin jong aseiye. 8 Isaac akhondoh a noichep aban phat’in Abrahamin naolop golvah loupi tah abol’e.

Hagar le Ishmael Abrahamin asolmang

9 Nikhat Egypt numei Hagar chapa Ishmael le Sarah chapa Isaac akichem lhon’e. 10 Akichep lhon aven Sarah-in Abraham jah a,” Sohnu le achapa hi solmang tan. Sohnu chapa hi kachapa Isaac chan ding nagou halcha jong chang theiponte,” ati. 11 Ishmael jong achapa ahijeh-in Abraham din Sarah thusei hi anommo lheh-e. 12 Ahin la Pathenin Abraham jah a, “Sohnu le chapa din lung gimdan. Sarah sei sei chu boltan, Isaac a kona nachilhah kisimjo ding ahibouve. 13 Nacha ahijeh chun sohnu chapa konin jong nam khat semdoh nange, “ati. 14 Jingpi tah-in Abraham athouvin changlhah alan, twipaiya twi akhumin Hagar apen, achapa akipohsaah-in asolmangtai. Hagar achen Beersheba gamthip laiya avah le lei. 15 Twipaiya twi adon jou lhon phat’in Hagarin Ishmael chu hampa nang noiya aleh lut’in, 16 meer jakhat jen gamlan ache paiyin, atouvin, “Kanao thi ding kave ngampoi!” ati. Hichepet tah chun anao chu ahung kaptai. 17 Nao kagin chu Pathenin ajan, Pathena kon Vantil’in Hagar jah a, “Hagar, i-bol’a lung gim nahim? Kicha hih-in, nao kagin chu Pathenin ajatai. 18 Chen lang nao khu gadomin, kipomin, lhembi loiyin, keiman ama chilhah akona nam lentah kasemdoh ding ahi,” ati. 19 Pathenin Hagar mit ahasah leh, aman twikul khat amudoh paiyin, achen savun twipai dimin twi agathal’in, nao chu themkhat adonsah tai. 20 Nao chu akhangtou touvin, Pathenin akivoppi jinge, Paran gamthip noi jenga apansan, sadel themtah ahin, 21 anun Egypt numei khat jin apuipehtai.

Abraham le Abimelech kinoptona

22 Hichelai hin Abimelech asepai lamkaipa phicol toh Abraham henga achen, “Nang hi natohna chan a Pathenin napanpi. 23 Khopema nahung chenna hiche gamsunga kei le kachate, kason kalhah chengse chunga hepina neiya naum’a, ken kabolna bang banga nabol’a neijou bol louhelna din Pathen maiya kitep masan,” ati. 24 Abrahamin, “Kakitep’e, “ati. 25 Twikhuh khat asohten alahpeh jeh-un Abimelech henga Abraham akiphin le, 26 Abimelech-in, “Twikhuh lahpeh a chu koipen hiuvam kahe hih beh-e. Seila neiseipeh pon, tua chu bou kajah ahi nalaiye,” ati. 27 Hichea hin Abrahamin kelngoi phabep le bongchal phabep Abimelech apen, kinoptona asemdoh lhontai. 28 Abrahamin akelngoi lah a konin kelngoi sagi agahoidoh leh, 29 Abimelech chun, “Idia nagahoi khen ham?” tin adonge. 30 Abrahamin, “Hiche twikhuh hi kei semsa ahi nanop phot chet nan hiche kelngoi sagi hi kilah-in,” ati. 31 Hikoma chu ama nin kitepna anasem lhonjeh a Beersheba kisah ahi. 32 Hitobang kihoutohna asem chai phat’un Abimelech le Phicol Philistine gama akilekit lhontai. 33 Beersheba muna chun Abrahamin chah thing khat aphut’in, Pakai tonsot Pathen henga ataove. 34 Philistine gamsunga sottah Abraham akhopem dentai.

Semtil 22

Isaac kilhaina aneidia Pathenin Abraham thu apeh

1 Phat chom khat nungin Pathenn Abraham apatep’in ajah a, “Abraham!” tin akouve. Aman, “Hikoma ka-um’e!” tin ahouve. 2 Pathenin, “Na-ngailut tah nachapa chang khat seh Isaac chu Moriah gama puiyin, kahinko peh ding molsang khatpen pen chunga pumgo thilto kilhai nan ganeitan,” ati. 3 Ajing jingpi tah-in Abraham athouvin, pugo thiltoa manchah din thing achomin sangan apohsah-in, alhacha mi nit oh Isaac apuiyun, Pathenin aseipehna mun jonin achetauve. 4 Nithumjen ajot nungun Abrahamin ajot nau mun chu gamla tah-in agah mupha bep nalaiye. 5 Lhachate ni jah a Abrahamin, kei le boipu hilampeh a khun gatao lhon ing ting, nahenguva hung kit lhon nange,” ati. 6 Pumgo thiltoa tiding thinglom chu Abrahamin Isaac aputsah-in, meicho na ding song meihol le chemcha aman achoiye. Achepet lhon hin 7 Isaac-in, “Hepa!” atileh; aman, “I-ham kanao?” ati. Isaac-in, “Hepa, meicho na ding song meihol le tiding thinglomla aumtan, kilhaina ding kelngoi hoiba ham?” ati. 8 Abrahamin, “Pathenin kelngoi hin ki-ngaito nante,” atin, akijotpai lhontai. 9 Pathenin akipehna mun alhun lhon phat’in, Abrahamin maicham khat asemin, maicham chunga thinglom agolchan akoiyin, Isaac akantumin, maicham chunga thinglom chunga chun alupsah-e. 10 Hichun chemcha asatdoh-in achapa tha din agotai. 11 Vana Pakaiya hungkon Vantil chun, “Abraham, Abraham!” tin ahinsamtai. Abrahamin, “Hikoma ka-um’e!” tin ahouve. 12 Vantil chun, “Chapang chu ima lodan, supop hih beh-in, Pathen nagin jeh a nachapa chang khatseh tha na dia jong khut kih louva napan kahetai,” ati. 13 Abraham akiheile leh, kelngoichal khat hampa nangtom lah a kit e nia kihen amudoh-in, agakailut’in achapa khel’in pumgo thilto kilhai nan aneitai. 14 Hichelai mun chu Abrahamin, “Pakaiyin thilto aki-ngaitona mun,” asah-in, hijeh chun tuni geiyin mihon, “Pakai molvuma aman thilto aki-ngaitona mun,” ati jingui. 15 Vana Pakaiya hungkon Vantil chun anivei nan Abraham ahinkou kit’in, 16 Pakai amatah kihahsel’a asei chu, “Neigin jeh a nachapa chang khatseh chunga jong khut kih louva napan hin kei kitep’ah kahitai. 17 Nangman phatthei kaboh a, nason nachilhah van a ahsite jat le Twikhanglen panga neldi jat hungpha ding, namelmate ahinjosoh hel diu ahi. 18 Kasei nanit jeh a nason nachilhah phatthei kaboh banga hi phatthei kaboh ding deiya chitin namtin kahenga hung tao diu ahi,” ati. 19 Alhachate ni henga Abraham ahung kile kit’in, Beersheba geiyin ahung kilhon’un, hikoma chun Abraham achengtai.

Nahor chilhah ho

20 Phat chom khat nungin Milcah-in asopipa Nahor chapa get jen ahinpeh thu mihon Abraham ahung seipeh tauve. 21 Nahor chate aping masapen pa Uz ahin, anaote chu Buz, Aram pa kemuel, 22 Chesed, Hazo, pildash, Jidlaph chule Bethuel- 23 Rebecca pa ahiuvin, abonchan Abraham sopipa Nahor chapate, Milcah hin chengse get ahiuve. 24 Nahor thaikem nu Reumah-in jong Tebah ke Gaham, Tahash le Maacah ahinge.

Semtil 23

Sarah thi, Abraham lhanmol choh

1 Sarah chu kum jakhat le som ni to sagi ahingin, 2 Canaan gamsung, Kir-iath-arba kiti, Hebron khoa athin, Abrahamin ajinu pul adouve. 3 Ajinu thilong phung dalhan Abraham achen Hit mite jah a, 4 “Keima maljin, nahenguva hung khopem kahin, kajinu long kavuina din gam leiset mun khat neichohsah-uvin,” agate. 5 Hit miten Abraham jah a, 6 “Ngaitemin kapu, kalah-uva nangma Pathen tun lamkai lentah hiya, kalhan semsau phapen khat’a khun najilong vui jengin; koi hijongle naji vuina din kipah tah-in lhan khat pejeng ung kate,” atiuve. 7 Hit mite masang tol’a Abraham abohkhup’in, 8 “Hikoma kaji neivuisah nomu ahinah leh, Zohar chapa Ephron henga khun, 9 aloupam chin a Machpelah songko khu neithumpeh-uvin. Hiche khu lhanmol’a kanei den din, nang ho maiya leiman lhingset’a eichohsahna din neiseipeh-uvin, “tin angeh-e. 10 Kelkot phung, mipi kikhopnaa hi Hit midang ho chutoh Ephron jong toukhom ahiuvin; mi jouse jah din ahindonbut’in, 11 “Kapu ngaitemin, lou pumpi le asunga songko pumin napenge. Najilong navuina din loumun le songko chu kamite angsung laitah a pejeng ing’e,” ati. 12 Ahivang in Hit mite angsunga Abraham akunin, 13 Ephron jah a chun mipi jah thei din, “Nei ngai themin ikhat dong inge. Loumun pumpin chotange, aman alhingin kilah-in, chule kajilong jong vui inge, “ati. 14 Ephronin Abraham jah a, 15 “Koi-ngaiyin kapu, dangka shekel ja li man bep leimun chu nang le kei kah a ipi tahpi ham? Najilong chu kivuina jengin,” ati. 16 Abraham anomin, Hit mite jah changtah a Ephronin aseidohsa dangka shekel ja li chu, kivei miho thiltena dungjuiyin atedoh peh tai. 17 Hitobanga hi Mamre niso lam Machpeleh mun a Ephron loumun le asunga songko lhan toh, loupam ching geiya keh, loulai thing jouse jong Abraham changkha ahitai. 18 Kikhopna hung pang Hit mi jousen jong loumun Abraham kipehdoh chu ahetpehsoh keiyui. 19 Canaan gamsung, chulai songko lhan sunga chun Abrahamin ajinu Sarah avuitai. 20 Hiti hin Hit mipa loumun le asunga songko pumin lhan din Abraham achan thatai.

Semtil 24

Semtil 25

Semtil 26

Semtil 27

Semtil 28

Semtil 29

Semtil 30

Semtil 31

Semtil 32

Semtil 33

Semtil 34

Semtil 35

Semtil 36

Semtil 37

Semtil 38

Semtil 39

Semtil 40

Semtil 41

Semtil 42

Semtil 43

Semtil 44

Semtil 45

Semtil 46

Semtil 47

Semtil 48

Semtil 49

Semtil 50

Potdoh 1

Egypt a Israelte kibol genthei

1 Egypt jon a Jacob to kilhon achate chu, ainsung cheh to lhon a che 2 Reuben, Simeon, Levi, Judah, 3 Issachar, Zebulun, Benjamin, 4 Dan, Naphtali, Gad, chule Asher ahiuve. 5 Jacob inkonse se abonchauvin som sagi alhingui. Achapa Joseph vang Egypt lhungsa ahitai. 6 Phat chom khat nungin Joseph le asopite, chule hiche khanga mite chu athisoh taove; 7 hijongle achilhah-u Israelte chun cha le nao tampi ahingun, apung lheh jenguvin, Egypt gamsung dimset’in ahunei lhehtauve. 8 Egypt a Joseph phatna hephalou lengthah khat ahung laltai. 9 Amahin amite jah a, “Hiche Israelte hi atamval’un ahunei behseh jeh-un eiho din kihol lel aumtai. 10 Galbolna khat um kha le melmate ajop’uva eisat’uva pang thei, gamsunga kona jamdoh diu ahi. Apunbe be louna diuva alonaje khat het ding ahi,” ati. 11 Hijeh chun Egypt miten Israelte na hahsa tohsah a suhgepsit set din ahunguva toh vaipo akoiyun, lengpa thil kholna munpi din Pithom le Rameses khopi asah sah ui. 12 Ahivangin Egyptten Israelte ahabol hesoh cheh-ule ahapun cheh-un, akithejao cheh jengun, gamsung alobe be jengui. Hiti hin Egypt ten Israelte akicha tauvin, 13 gim genthei thoh-in natongin agoiyun, 14 ada acham louvin soh goiyin agoiyun, voujang nalouhel’in insa loubol’in agoiyuve. 15 Egypt lengpan Hebrew numeite naodoma pang numei ni Shiphrah le Puah akihoupin, 16 “Hebrew numei ho nao nadop teng, pasal cha cha that’in, numei ho hinghoi lhonin,” ati. 17 Ahinla naodom ten in Pathen agin lhon jeh-in lengpa thu anit lhonpoi, pasal ho geiyin ahinghoi lhontai. 18 Lengpan naodomte ni agakousah-in, “Idia kasei ngai louva Hebrewte cha pasal ho nathada lhon ham? tin adonge. 19 Naodomte nin, “Hebrew numei ho hi Egypt numeiho tobang ahipouve, anaopen’u abaiyin, khatjoh sang kalhun masang lhonle aping lhaji tauve,” ati lhon’e. 20 Pathenin naodomte ni akhoton, Israelte apunbe be jengun, ahat lheh tauve. 21 Naodomte nin Pathen agin lhonjeh-in Pathenin ainsung lhon phattheina apei. 22 Akhonnan Pharaoh-in amite jah a, “Hebrewte cha naosen pasal peng jouse man khom’un Nile luidunga sep lut’un, naosen numei ho vang hung hoi peh-un,” tin thu apei.

Potdoh 2

Mose pen

1 Hiche lai hin Levi pasal khat’in Levi chanu khatma akichenpi. 2 Ajinu hin cha pasal khat aneiyin, mel-hoi tah ahijeh-in ait behseh-in lha thum jen aseltai. 3 Asel lel hel phat’in, pumping nanga kisa pocha khat’a naosen chu akoiyin, twi lut thei louna din gom aloiyin, luipang pumping lah a chun akitolsah tai. 4 Naosen u-nun gal’a pangin ave vei. 5 Lengpa chanu luidunga kisil din ahungin, vapanga achele len, pumping lah a pocha amudoh phat’in, nu-ngah khat agalahsah-e. 6 Lengpa chanun pocha ahondoh le naosen pasal hoitah chu amun, ahung ka phat’in avoujang anan, “Hebrewte cha hitei ding ahi,” ati. 7 Hichun naosen u-nun lengpa chanu jah a, “Naosen hi navahpeh dia Hebrew numei ho khat kagakoupeh ding ham?” ati. 8 Aman jong, “Neigakoupeh nget-o,” ati. Naosen u-nun anu ma ma chu agakoutai. 9 Hichenu jah a chun lengpa chanun, “Naosen hi neivah peh-in, nachol man penange,” ati. Aman jong akilah-in avah-in apangtai. 10 Naosen chu akikhan lhit phat’in lengpa chanu henga apuile, aman chapan akisimtai. Lengpa chanun, “Twi lah a kalahdoh jeh-in amin Moses ah ing’e,” ati.

Mose Midian gam a ajamlut

11 Mose akhanlhit phat’a amite vea ache le, gim hesoh thoh a na hahsa atoh-u agamui. Egypt mi khat hin Hebrew mi khat atha geiyin agamudoh-in, athapa chu Mose insung mite khat ahikhai. 12 Mose’n jet le vei, sah le lhang avegol’in, koima amu lou phat’in Egypt mipa chu athah’in nellei lah a avuilut tai. 13 Ajinga ache kit le Hebrew mi ni kina kibon agatoh khai. Athemmo jep pa jah a chun Mose’n, “I-bol’a na-Hebrew mi hipi chu navoh ham?” tin aphoh-e. 14 Aman ahin donbut’in, “Kon nang vaipo le thutan a natun em? Egypt mipa natha banga tha neigot ham?” ati. Hichun Mose jong akichan, “Kamitha hi mihon ahetdoh ahitai,” ati. 15 Pharoah-in ajahdoh phat’in Mose chu tha din aholtai. Mose ajamin Midian gamsugna cheng din achetai. Nikhat Mose chu twikul panga atoupet’in 16 Midian Thempupa Jethro chanu sagi jen chu apa kelngoite le kelcha te don ding twi thal’in ahungui. 17 Ahin kelngoiching midang phabep’in Jethro Chanute chu anodoh-un, hichea hin Mose’in akithopin, nu-ngahho ganchate chu twi achipsahsoh keiye. 18 Nu-ngah ho apa henga ahung lhun phat’un, apauvin, “I-atile tunia matah a hung nahiuvam?” tin anadonge. 19 Nu-ngahhon jong, “Egypt mi pasal khat’in kelngoi chingho eideljam peh-un, ganchate don ding twi geiyin eithalpeh-un ahi,” atiuve. 20 Apauvin, “Hoiya umtam? I-bol’a nahin dalhah-u ham? Gakouvun an beh nekho’u hite,” ati. 21 Mose chengden din akigon, Jethron jong achanu Zipporah to akichensah-in, 22 Zipporah hin chapa khat ahinpeh-e, . Mose’n jong, “Hiche gam a khopem kahin, amin Gershom kiti ding ahi,” ati. 23 Kum phabep nungin Egypt lengpa athitan, ahivangin Israelte sohchang hesoh genthei thoh-in, panpi ngaichan apeng peng jengui. Aka apen’u Pathen kom alhungin, 24 Pathenin Abraham, Issac chule Jacob to akitepna chu ageldoh-e. 25 Pathenin Israelte sohchan, gim hesoh thoh amun athoh lel pi.

Potdoh 3

Pathenin Mose akou

1 Nikhat Mose’n anupa pa Jethro, Midian Thempupa, kelngoite le kelchate chingin, gancha honte hoiyin, lhang theng, Sinai molsang aphatai. 2 Sinai molsanga Pakaiya kon valtil chu hamboh lah a meikouvin ahung kilah-in, hamboh meiya kouva, kavam thei louva um chu Mose’n amui. 3 Aman jong, “Akidang nah-e! Iti hamboh khu kavampai lou ham? gave tem’inge,” ati. 4 Mose’n anailut Pakaiyin amu phat’in, hamboh lah a kon chun “Mose! Mose!” tin ahinkouve. Mosen’n, “Hoi, ka-um nai,” ati. 5 Pathenin, “Hin nailutbe tahih-in. Nakengchot kisut’in, munthenga ding nahitai. 6 Kei hi napu napate-Abraham, Isaac, chule Jacob Pathen kahi,” ati. Pathen avet ngam lou phat’in Mose’n amai akitomtai. 7 Hichun Pakaiyin, “Egypt gamsunga kamite engse tah a abol’u kamun, tohvai pote bolsetnaa kon huhdoh ngaicha akau kajatai. Ahesoh genthei nao kahesoh tai. 8 Hijeh a chu Egypt mite khut’a kona amaho huhdoh dia hung kumlha kahin, mun lentah, gam phatah, Canaan mite le Hit mite, Amor mite, Periz mite, Hiv mite chule Jebus mite chenna gamsunga puilut ding kagot ahi. 9 Kamite ka le pen kaja mong mongin, Egypt miten abol hesoh nau kamudoh tai. 10 Agamsunga kona kamite puidoh dia Egypt lengpa koma kasol nahi,” ati. 11 Ahinla Mose’n Pathen kom a, “Kei bep hi iti Egypt lengpa koma chea Israelte kagapuidoh thei ding ham?” ati. 12 Ahivangin Pathenin, “Ken nalhonpi nange, Egypt a kona Israelte nahinpuidoh teng hiche molsang chunga hi neihou diu, hichu kei sol nahi phat chetna hi ding ahi,” ati. 13 Ahinla Mose’n adonbut’in, “Israelte henga cheng ting ‘Napu napateu Pathenin eihinsol ahi,’ gati jong leng, ‘Ama chu amin ipi ham?’ tin eina dongun tin, chuting ipi kaseipeh thei diing ham?” ati. 14 Pathenin, “Kei chu Kei kahijingin, naseipeh tei ding chu-‘KEIMA kiti chun nahenguva eihinsol ahi’ nati ding ahi, 15 Israelte jah a apu apateu Pathen, Abraham Pathen, Isaac Pathen, Jacob Pathen chun ahenguva nasol’a naseipeh ding ahi. Hiche hi tonsot’a kamin ahin, khang nu-nunga miten hiche a hi eikou diu ahi. 16 Israel lamkaite gakoukhomin lang, apu apateu Pathen, Abraham Pathen, Isaac Pathen chule Jacob Pathen chu nahenguva hung kilah a anseipeh ding ahi. Egypt miten abolsetnau kamu jeh a avil’uva hung kahi hi seipeh-in. 17 Egypt’a kona puidoh kagot ahitai, gim genthei thoh a aum nauva kona puidoh a gam phatah-Canaan mite, Hit mite, Amor mite, Periz mite, Hiv mite chule Jebus mite gamsunga puilut ding kagot ahi. 18 “Naseipeh chan chu kamiten angai diu ahi. Chuteng Israel lamkaite to Egypt lengpa henga nacheuva, ‘Pakai Hebrew te Pathen kahenguva ahung kilah-in, hiche Pakai ka-Pathenu koma chu kilhaina kabolna diuvin nithum sung din gamthip’a neisol’un,’ nati diu ahi. 19 Ada achamlouva akibol ngal loule Egypt lengpan nalhadoh lou diu kahenai. 20 Hijongle agama chu tijat um thil datmoa, katha hangsan a Egypt mite talen kamatsah ding ahi. Chuteng Egypt lengpan nalhadoh diu ahi. 21 “Egypt mite naginsah ungting, kamite akitoldoh tengu, khutgoh keova nalhadoh lou diu ahi. 22 Israel numei jousen achenpi le aheng akom Egypt numeiho koma nihchen ponsil le sana dangka, sanajem athum diu ahi. Athumdoh chengu chu Israelten achateu numei pasal jouse jepna aneiyuva, Egypt gamsung nei le gou apoh mang diu ahi,” ati.

Potdoh 4

Pathenin Mose thahat kidang apeh

1 Mose’n Pakai adonbut’in, “Israelten eitahsan dau hen kasei ngai hih leu, chule nang chu kahenga hung kilah louvin sei taleu ikati ding ham?” ati. 2 Hichea hin Pakaiyin, “Nachoi chu ipi ham?” ati. Mose’n “Kakiphu tenggol ahi,” ati. 3 Pakaiyin, “Tol’a seplha temin,” atile; Mose’n ase lhah lhah chun gul asoh paiyin, Mose’n ajamsan tai. 4 Pakaiyin Mose jah a, “Bungin lang ameiyin kimat temin,” atile; Mose jong bunga akimat le, kiphu thei tenggol asoh kittai. 5 Pakaiyin, “Pakai apu apateu Pathen, Abraham Pathen, Isacc Pathen chule Jacob Pathen nahenga hung kilah phot chetna dia hiche hi Israelte koma nabol ding ahi,” ati. 6 Pakaiyin Mose jah a asei kit’in, “Napon noiya nakhut koilut’in,” ati leh; Mose’n akoiyin, agah lah doh chun akhut josue anaphah-in, buhbang banin anabangtai. 7 Pakaiyin, “Napon noiya nakhut koilut kit’in,” atin, Mose’n jong akoiyin, agah lah doh phat’in anadamsel’in ati dang bang bang ahitai. 8 Pakaiyin, “Israelten thil kidang mai maiya natahsan dauva alung nachim louvu jongle, hiche geiya vang lung nachim tei diu ahi. 9 Hiche thil kidang te ni geiya jong natahsan dauva nasei angai dau le, Nile vadung twi phabep thaldoh-in tol’a sung lhan. Twi chu thisan soh jeng ding ahi,” ati. 10 Ahivangin Mose’n, “Ahipoi, Pakai neisol da tan. Thusei them la kahipon, neikihoupia jong hi kam kipeh lou kahi neihet hi-me. Mi paomo, pao gang thei lou, ngongkai chet chot kahi,” ati. 11 Pakaiyin ajah a, “Mihem kam sempeh koi hiya, na ngong le paomoa koiya koi ham? Kho musah le mit chotsah thei loi ham? Kei-Pakai hi kahi. 12 Tun che jengin! Thusei kithoping ting, nasei ding hil nange,” ati. 13 Ahivangin Mose’n, “Ahipoi Pakai, midang khat soljo tan,” ati. 14 Hiche hin Pakaiyin Mose alhunghan khumin, “Nasopipa, Levi chilhah Aaron chula em? Athusei themla kahenan. Nakimupi dia hungtah bah a khu, nakimupi teng kipah lheh veh ta. 15 Sei ding jouse nahil masah thei ahi. Sei ding kithpi lhon ing ting, nasei lhon ding hil nange. 16 Nakam sanga panga, nathalhenga mipi akihoupi ding ahi. Nangin Pathen banga asei ding chan nahil ding ahi. 17 Kiphuthei tenggol kichoiyin, hichea hin melchihna kidang nabol ding ahi,” ati.

Mose Egypt’a akile kit

18 Mose, anupa pa Jethro henga agache masan ajah a, “Egypt’a ka inkote dam le bit a um nauvem, gavil kit tange, neisolin,” agate. Jethron jong pha asan, lung lhaisel’in asoltai. 19 Mose chu Midian gamsunga asum nalaiyin, Pakaiyin ajah a, “Than ago jouse athisoh tai, Egypt a kile kit tan,” ati. 20 Mose’n ajinu le achapate sanga chunga atousah-in, Egypt jonin akitolpin, Pathenin ahil bangin kiphu thei tenggol chu akichoiye. 21 Pakaiyin Mose jah a aseikit’in, “Egypt gam nalejot kit ahitan, Egypt lengpa angasunga, boltheina tha kapeh banga, thil kidang chengse chu nabol tei tei ding ahi. Hijongle lengpa lung katahsa a, mipi alhadoh louhel ding ahi. 22 Chuteng kei Pakai thusei hi naseipeh a, ‘Israel hi kachapa masapen ahi. 23 Kachapa nalhadoh dia kasei ahi. Eihou dia kasol ahin, nalha doh poi. Hijeh a chu nachapa masapen khatha peh ding nahi,’ tin aseiye, tia nahil ding ahi,” ati. 24 Lampia gebuh khat’a Pakaiyin Mose akimupin tha din agotai. 25 Mose jinu Zipporah chun songhemkhat’in achapa chep atanin, Mose kengphanga aloiyin, “Cheptan chonchan dungjuiya jia kanei nahi,” ati. 26 Hijeh chun Pakaiyin Mose ahing hoiye. 27 Pakaiyin Aaron jah a, “Gamchang noiya Mose gakimupin,” tin asol’e. Aaron jong Mose kimupi din molsang theng lama achei; akimupi phat’in achop chuh chuh jengin ahi. 28 Hichun Mose’n Egypt gama kile kit dia Pakaiyin asol’a aseipeh chengse abonchan aseipehson tai; thil kidang bolsah dia ahil chengse jong aseitai. 29 Mose le Aaron chu Egypt’a ache lhonin, Israel lamkai jouse akhom lhontai. 30 Mose jah a Pakai thusei chengse Aaronin Israel lamkaite aseipeh-in, mipi angsung laitah a Mose’n thil kidang chengse chu abolsoh keiye. 31 Israelten atahsan’un, min engse tah a abolset nau amu jal’a avil’uva Pakai hung ahi ajah doh phat’un boh khup’in chibai aboh tauve.

Potdoh 5

Egypt lengpa angsunga Mose le Aaron

1 Mose le Aaron Egypt lengpa koma achen, “Pakai Israel Pathenin, ‘Gamchang noiya kut bola eihou theina diuvin kamite sol’in’ tin aseiye,” agate lhone. 2 Egypt lengpan, “Pakai kitipa chu koi hiya, athu kangaiya, Israelte kasoldoh ding ham? Pakai la kahepon, Israelte la soldoh ponge,” tin aseitai. 3 Mose le Aaronin adonbut’in, “Hebrewte Pathen chu kahenguva ahung kilahtai. Nithum lampi peh a Pakai ka-Pathenu gahouva, kilhaina kabolna diuvin neisolun. Kabol louvule natset ham, gal ham khat jo sanga eithagam diu ahi,” ati lhone. 4 Egypt lengpan Mose le Aaron jah a, “Mipin tohban iti ngah hen nati lhon ham? Soh ho khu na tohsahkit’un! 5 Nangho Egyptte sanga jong natamjoh tah-u khu! Aban jop’a na tohda nagot’u ahi-ong!” ati. 6 Hiche nikho chun Egypt lengpan sohte chunga tohvai pote le Israel lah a toh lamkai ho thu apen, 7 “Mipi hi cheh a sem ding changpol peh dauvin, amaho gakiholsah-uvin. 8 Chuti jongle changpol napeh pet’uva asemdoh-u cheh sanga khat cha jong lhasam deh louhel ding ahi. Toh ding aneilou phat’uva potdoh a a-Pathenu houva kilhai dinga kahenga tao tao ahiuve! 9 Na hatohsah-un, ong manlouvin lhauvin, chutile thujou kisei hoihi ngai manlouvin umtauvinte,” ati. 10 Sohte chunga tohvai pote le Israelte toh lamkaite acheuvin Israelte jah a, “Lengpan changpol napeh lou diuvin aseitai. 11 Namu thei thei nauva changpol nahol thu’uva, ahivanga niseh a nasemdoh jat’u chu lhasem thei louhel ding ahi,” atiuve. 12 Hichea hin mipi changpol holin Egypt gamsunga akithe chansoh jengui. 13 Sohte chunga tohvai poten changpol apeh laiyuva asemdoh jat’us cheh asemdoh theina diuvin ada acham louvin ano no jengui. 14 Egypt mi, sohte chunga tohvai poten Israelte toh lamkai ho chu adeng deng jengui. “I-bol’a masanga nasemdoh jat jat cheh semdoh jou louva um nahiuvem?” atiuve. 15 Israel toh lamkaite Egypt lengpa koma acheuvin, “Vo lengpa, idia hita neibol jengu hitam? 16 Changpol la eipetapouvin, cheh kasemdoh jat jat’u semdohsah eigouve! Tun eivo vo jengun, hiche hi nang thusah mong ahibouve,” atiuve. 17 Egypt lengpan adonbut’in, “Thasea natohda jal’a Pakai henga kilhaina boldia kilepdoh dia kahenga kithum thum nahiuve. 18 Na gatong loiyun! Changpol nakipe lou diu, ahivanga cheh nasemdoh jat jat lha louva nasemdoh diu ahi,” ati. 19 Israelte toh lamkaiten cheh asemdoh jat jat asemdoh diuva aseipeh phat’un abolset nom mong mongu ahedoh tauve. 20 Lengpa adalhah phat’un, amaho ngah jinga ana-um Mose le Aaron to akimutouve. 21 Mose le Aaron jah a, “Nathilbol lhon Pakaiyin amusoh tai, lengpa le avaitpote neihotsah jeh-uva Pakaiyin talen namatsah lhon ding ahi. Pansatna neiya eitha lo na diu nabol doh lhon ahitai,” atiuve.

Pakai koma Mose kiphin

22 Pakai lam ngan Mose akiphinin, “Pakai, idia namite nabolset ham? Ipi bol dia neisol ham? 23 Namina Lengpa henga thuseiya kache chea pat, Israelte engse sen aboltai. Nangin imacha kithopi din nagopon!” ati.

Potdoh 6

1 Hichun Pakaiyin Mose jah a, “Lengpa khu i-kalom, hinmu nan nate. Tahbeh a kasei ahi-Israelte khu Egypt a kona adeldoh tho dingjoh ahibouve,” ati.

Pathenin Mose akou

2 Pathenin Mose jah a aseiyin, “Kei hi Pakai chu kahi. 3 Abraham le Isaac chule Jacob henga Hatchungnung Pathenin kakilah-in, ahivangin kamintheng, Pakai hin kakihetsah hih laiye. 4 Amaho to kitepna kaneiyin, akhopem nau gam, Canaan gamsung khu peh din kakitep’e. 5 Tun Egyptten soh a avul, Israelte ka le mao ogin kajan, kakitepna kageldoh tai. 6 Hijeh chun Israelte dia kasei hi ajah-uva seipeh-in, ‘Kei hi Pakai chu kahi, nasohchan nau Egyptte khut’a nahuhdoh ung ting kajalen sah ding nahiuve. Kaban-gol jeng ting Egyptte talen kamatsah a, nang ho kahuhdoh diu ahi. 7 Kamiten nasem ung ting, na-Pathenu kahi ding; Egypt gam sohchanna muna kona kalhadoh tengu, Pakai na-Pathen kahi hetauvin nate. 8 Abraham le Isaac chule Jacob koma giltah a kakitep’a, peh dia kakoisa gamsung kalhut diu, leiset gou dia kapeh ding nahiuve. Kei hi Pakai chu kahi,’ tin aseiye, tin,” ati. 9 Hiche hi Mose’n Israelte aseipeh-in, ahivangin angaipouve, sohchan hesoh valjeh-in lhung lhalhop’in aum gamtauve. 10 Pakaiyin Mose jah a, 11 “Chen lang Egypt lengpan Israelte khu agamsunga kona asoldoh tei tei din gaseiyin,” ati. 12 Ahinla Mose’n adonbut’in, “Israelte bon kathu ngailou, lengpan kathu iti angai ding ham? Mi paomo kei tobang hi!” ati. 13 Pakaiyin Mose le Aaron thu apen, “Israelte leh Egypt lengpa jah a chun anng hi Egypt’a kona Israelte puidoh dia kasol ahi seipeh lhonin,” ati.

Mose leh Aaron insung mite

14 Jacob chapa masa pen Ruebenin chapa li aneiyin-Hanoch, Pallu, Hezron, chule Carmi ahiuvin; Reuben chilhah phungkhaiya upa cheh ahiuve. 15 Simeonin chapa gup ahingin, Jemuel, Jamin, Ohad, Jachin, Zohar chule Canaan mi numeito ahin lhon-Shaul ahiuvin, Simeon phungkhaiya upa cheh ahiuve. 16 Levin chapa thum ahingin, Gershon, Kohath chule Merari ahiuvin; Levi phungkhaiya upa cheh ahiuve. Levi hi kum jakhat le somthum le sagi ahinge. 17 Gershon hin chapa ni ahingin, son le pah tampi anei lhone. 18 Kohath hin chapa li ahingin, Amaram, Izhar, Hebron chule Uzziel ahiuvin, Kohath hi kum jakhat le somthum le thum ahinge. 19 Mararin chapa ni ahingin, Mahli le Mushi ah. Hiche hi phung khai khaiya kisim Levi chilhah ahiuvin, achilhah chengu to ahi. 20 Amaram hin apa sopinu Jochebed akichenpin Aaron leh Mose ahinge. Amram kum jakhat le somthum le sagi ahinge. 21 Izhar hin chapa thum ahingin, Korah le Nepheg chule Zichri ahiuve. 22 Uzziel’sin chapa thum ahingin, Michael, Ezaphan chule Sithri ahiuve. 23 Aaronin Amminadab chanu, Nahshon sopinu, Elisheba akichenpin, Nadab le Abihu, Eleazar chule Ithamar ahinge. 24 Korah in chapa thum ahingin, Assir, Elkanah chuleAbiasaph ahiuve; Korah phungkhai sung kihom khenna a amaho hi phung upa cheh ahiuve. 25 Aaron chapa, Eleazar chun Putiel chanu akichenpin, Phinehas ahinge. Hichengse hi Levi phunga ama ama insung dola phungkhai upa cheh ahiuve. 26 Pakaiyin, “Egypt’a konin Israelte puidoh lhonin,” tia asol teni chu Mose le Aaron ahi lhone. 27 Mose le Aaron hin Egypt lengpa chu Israelte lhadoh dinga asollhon ahi.

Mose le Aaron dia Pakai thupeh

28 Egypt gama Pakaiyin Mose jah a thu asei chun, 29 “Kei hi Pakai chu kahi. Kasei jong Egypt lengpa seipeh-in,” ati. 30 Ahinla Mose’n adonbut’in, “Kei mi paomo kahi nahet chume, lengpan iti kathu angai ding ham?” ati.

Potdoh 7

1 Pakaiyin Mose jah a, “Lengpa koma chu Pathen tobang kahisah a, nasopipa Aaronin lengpa koma nathemgao tobanga thu asei ding ahi. 2 Kaseipeh chengse hi Aaron hilsoh keiyin, aman lengpa chu agamsunga kona Israelte asoldohna din seipeh nante. 3 Amavang lengpa lung kasuhtah ding ahin, Egypt gamsunga itobang tijat um thil kidang bolkhum jong leng nathu ngaiponte. 4 Chuteng Egypt gamsunga talen gihsa tah chuhsah ing ting, agamsunga kona kamite kapuidoh ding ahi. 5 Kaban-gol kajet’a agamsunguva kona Israelte kapuidoh teng, Egypt ten Pakai kahin hedoh tauvinte,” ati. 6 Msoe le Aaronin Pakai thupeh peh chu abol lhon nai. 7 Lengpa koma thu aseilai lhonin Mose kum som get alhing tan, Aaron kum som get le thum alhingtai.

Aaron tenggol

8 Pakaiyin Mose le Aaron jah a, 9 “Nathanneina lhon phot chetna dia Pharaoh-in thil kidang nabolsah got lhon le, Aaron chu atenggol lengpa angsunga selhah sah in, gul hungsoh ding ahi,” ati. 10 Pakai thupeh bangin Mose le Aaron lengpa koma chen agabol lhontai. Lengpa le avaipote angsunga Aaronin tenggol aseplhan, gul ahungsoh tai. 11 Lengpan jong miching mithemte, mitpheldoi them ho akouvin, amahon jong hitobangma chu abol theiyui. 12 Atenggol’u aselhah-ule, gul asohgamtai. Ahivangin Aaron tenggol gul chun amahoa avallhum soh keiye. 13 Ahivangin Pakai sei bangin, lengpa alungtah den nalaiyin, Mose le Aaron sei angai deh poi. 14 Pakaiyin Mose jah a aseiyin, “Lengpa alungtah cheh in, Israelte sohdoh ding adai. 15 Jingkah teng Nile vadung ajotsuh phat le gakimupin, gul soh theiji tenggol chu choiyin, luipanga ana ngah-in. 16 Ahung teng ajah a, ‘Pakai, Hebrewte Pathenin amite nalhadoh a, gamchang noiya Ama agahouna diuva seipeh dia eihinsol ahi. Ahivangin tu geiyin kasei nangaipoi. 17 Vo lengpa, tua hi Pakai chu itobang ahi athilbol’a nahetdoh ding ahi. Ven hiche tenggola hi luidung twi jouse thisan soh ding ahitai. 18 Nga jouse thisoh a, twi jouse names ding, Egypte miten adon thei louhel ding ahi,’ tin gasei peh tan,” ati. 19 Pakaiyin Mose jah a aseiyin, “Aaronin hiche tenggol chu luidung jouse le twilam jouse, Egypte gamsunga twikul jouse chunga adop sang din seipeh-in. Twi jouse thisan soh ding, gamsung pumpi thisan soh a, thinghom dungle songko dung geiya thisan veisoh ding ahi,” ati. 20 Mose leh Aaronin Pakai thupeh bangin abol lhontai. Lengpa le avaipote angsung tah a Aaronin tenggol alamin, luidung twi ajep le twi josue thisan asoh gamtai. 21 Nga jouse athigamin, Egypt miten adon thei tapouve. Egypt gamsung thisan adimsoh jenge. 22 Egypt lengpa mitpheldoi themten jong chutobangma abol thei thouvun, lengpa jong angai bep’in alung tah cheh-in, Pakai seisa bangin Mose le Aaron thu angai deh poi. 23 Lunghei tah sangin leng inpi akijot’in, thilsoh ho chu nahsah in jong aneipoi. 24 Luidung twi adon thei lou phat’un Egypt miten luipang dung twichim holnan alhaiyun don ding ahol’ui. 25 Pakaiyin Nile vadung asuh nehna ni sagi alhing tai.

Potdoh 8

Egypt gamsunga thoh hahsa

1 Pakaiyin Mose jah a, “Egypt lengpa koma chen, Pakaiyin hintin aseiyin, ‘Eihou theina diuvin kamite sultan, 2 nada le nagamsung dimset’a uphoh kalha ding ahi. 3 Nile luidung uphoh dimset’a, na-leng inpi geiya hung kitol lut diu, nalupna indan, najalkhun, navaipote in jouse, namite in dung, nathuh phung le nakhangbel sung geiya dimset diu ahi. 4 Nang chung, navaipote chung le namite chung geiya hung chomdoh diu ahi,’ ati, tin gaseitan,” ati. 5 Pakaiyin Mose jah a, “Aaronin luidung jouse le twilam dung, twikul dung tenggol ajap a, Egypt gamsung dimset’a uphoh hungdoh din bolsah in,” ati. 6 Hiti chun Aaronin twi umna jouse tenggol ajapkhum jengle, uphohte ahungdoh-un gamsung adimset tauve. 7 Mitpheldoi themten jong chutiman abolun, gamsung uphoh adimsettai. 8 Egypt lengpan Mose le Aaron akouvin, “Uphohte asuh gamna din Pakaiya neitaopeh lhonin, Pakaiya kilhaina abol theina diuvin namite lhon solpeh tange,” ati. 9 Mose’n adonbut’in, “Kipah tah in taopeh nange, nang le navaipte, namite itih teng kataopeh ding phat chubou neiseipeh lhonin, chuting u-phoh ten dalhan natin, Nile luidung tilouva khatcha jong um taponte,” ati. 10 Egypt lengpan, “Jing teng neitaopeh-in,” ati. Mose’n, “Nasei bangin taopeh nange, chuting Pakai ka-Pathenu tobang pathen dang umlou hedoh tan nate. 11 Nang, navaipoho, chule namite u-phohten dalhauvin tin, Nile luidung tilouva u-phoh khat cha jong um lou ding ahi,” ati. 12 Mose le Aaronin lengpa adalha lhonin, lengpa chunga alonvuh sah u u-phoh te sumang din Pakaiya Mose atao tai. 13 Mose ngeh bang bangin Pakaiyin abol’in, in dung le thupi tanna in dung chule loujao dunga u-phohte athitam tauve. 14 Egypt miten u-phoh ho chu alhuh lhuh in aseuvin, gamsung khangngam leuvin alhauve. 15 U-phohte gamsoh amu phat’in lengpa angaiyin alungtah kit’in Pakaiyin asei bangin aumtai, Mose le Aaron thusei jong angaideh tapoi. 16 Pakaiyin Mosel jah a, “Aaron khu atenggol’in tol jepsah le chun, Egypt gamsung leivui jouse thousi vaibong soh diu ahi,” ati. 17 Hijeh chun Aaronin tenggol’in tol ajep le, Egypt gamsung leivui jouse thousi vaibong asoh-in, mipi le gancha jouse atomjol soh keiyui. 18 Mitpheldoi themten thousi vaibong sosah agot vangun abol thei tapouve. Muntin thousi vaibong adimsoh tai. 19 Chule mitpheldoi them hon lengpa jah a, “Hiche hi Pathen bol mong mong ahibouve,” atiuve. Ahivangin Pakai seisa bangin lengpa alungtah jingin, Mose le Aaron sei angai dehpoi.

Thoulhe ho

20 Pakaiyin Mose jah a, “Jingkah jingpi tah a lengpa luidunga ache teng gakimupin, ajah a Pakaiyin, ‘Eihou theina diuvin kamite sultan. 21 Kagih masah dim dem nahi-thu na-ngailou le nangle navaipote chule namite ka-engbol ding ahi. Egypt mite insung thoulhe dimset ding, toldung jouse dimsoh diu ahi. 22 Kamite chenna Goshen gamsung vang tongkha ponge, thoulhe khat cha lengle ponte, chuting Kei Pakai hi hiche gamsunga natong thilbol kahi hedoh tan nate. 23 Kamite le namite kah a lamdanga kabol’a hitobang thil kidang hi jing teng hungsoh ding ahi,’ tin aseiye gatin,” ati. 24 Pakaiyin thoulhe ahon honin leng inpi sungle avaipote insung dimset set’in alhalut tai. Egypt gamsung pumpi thoulhe dimset’in gamsung in amanlo tai. 25 Chuphat’in lengpan Mose le Aaron akouvin, “Cheuvin lang hiche Egypt gamsunga hin na-Pathen kom’uva gakilhai tauvin,” ati. 26 Mose’n, “Dih ponte, Pakai ka-Pathenu houna katha diu gancha ho chu Egypt miten alunghanlo diu ahi. Hiche ganchate hi Egypt miten amu phahna diuva that ung lunghanlo taleu, songa eise lih jeng diu ahi. 27 Ethupeh bang banguva nithum lam kajot’uva, gamchang noiya Pakai ka-Pathenu koma kilhai ding kahibouvui,” ati. 28 Egypt lengpan, “Nache gamlat behseh lou pouvule gamchang noiya Pakai na-Pathenu koma kilhai din sol nauvinge, neitaopeh pou pouvin,” tin angeh tai. 29 Mose’in, “Kapotdoh doh le Pakaiya taoving ting, jing teng nangle navaipote, chule namite thoulhe hon dalha taovin nate, amavang neilhep kit lou diu, Pakaiya kilhai dia mipi nasuh tang lou ding ahi,” ati. 30 Lengpa dalhan Mose Pakaiya ataovin, 31 chule Mose ngeh bangin Pakaiyin aboltai. Thoulhe ten lengpa le avaipote chule amite adalhan, khatcha jong aumtapoi. 32 Hichan gei jong hin lengpa alungtah nalaiyin, mipi soldoh deh louvin aum nalaiye.

Potdoh 9

Gancha pul

1 Pakaiyin Mose jah a, “Egypt lengpa koma chen Pakai, Hebrewte Pathenin, ‘Eihou din kamite soldoh-in. 2 Nasolda leh, 3 ka-engbol’a naganchate –sakolte le sa-ngan ho, sa-ngongsang ho le bong jouse, kelngoite, chule kelcha ho pul kalha khum ding ahi. 4 Israelte gancha ho le Egyptte gancha ho kasekhen a, Israelte gancha khatcha jong thi lou diu ahi. 5 Kei-Pakaiyin jing teng hiche hi abol kagot ahitai,’ tin aseiye gatin,” ati. 6 Ajingin Pakaiyin asei bangin aboltan, Egyptte gancha ho athigamin, Israelte a vang khat cha athipoi. 7 Lengpan thilsoh umchan adongtoh-in, Israelte gancha khatcha thilou aseipeh tauve. Ahivangin alungtah nalaiyin Israelte asoldehpoi.

Uilut lan

8 Pakaiyin Mose le Aaron jah a, “Thuh phunga vutvam khut dim khattou gaham lhonin, Mose’n lengpa angsunga vanlam ngan thethang hen. 9 Egypt gamsunga leivui khu banga leu ding, muntina uilut jangtea panga, mihem le gancha pomchet chut a alha ding ahi,” ati. 10 Mose le Aaronin vutvam phabep ahamdoh lhonin, lengpa angsunga adingin, Mose’n chunglama athe thangle, uilutjang asoh-in, mihem le ganchate pomchet chut in alhaitai. 11 Mitpheldoi themho geiyin, Egypt mite dang banga uilut avei jeh-in, Mose masanga ahung thei tapouve. 12 Ahivangin Pakaiyin lengpa lungthim atahsah-in, aseisa bangin lengpan Mose le Aaron sei angaidehpoi.

Gellen lhah

13 Pakaiyin Mose jah a, “Jingpi tah le lengpa kimupin, Pakai Hebrewte Pathenin, ‘Eihou din kamite sultan. 14 Tua vang navaipote le namite keo ka-engbol lou ding, vannoiya Kei tobang pathen umlou nahetna dia nang geiya ka-engbol ding nahi. 15 Nangle namite natset lhunkumsah dia khut kalapsa hile, nathigam diu ahitai. 16 Kathahat vetsahna, vannoi pumpi kaminthanna dia kahinsah nah lai nahi. 17 Hichan hin nahoithon, kamite soldoh ding nadai. 18 Jing teng tuphat don le, Egypt miten ahet khah louhellai, huise kalansah a, gellen kalhahsa ding ahi. 19 Tun ganhing jouse le tollhanga um thil jouse lim a kilhoh lutsoh loiyin. Tollhanga um ganchate le mihem ho gellenin aselih soh ding ahi,’ tin aseiye gatin,” ati. 20 Pakai thusei chu lengpa vaipote phabep’in akichan, asohteu le ganchaho in lima ahoilut’uve. 21 Adanghon Pakai migihna chu nahsah louvin, asohteu le gancha ho tollhanga amoh lhauve. 22 Hichun Pakaiyin Mose jah a, “Vanlam sangin, Egypt gam pumpia gellen hung lha ding-mihem le gancha chule loulai muchi jouse avoh lih ding ahi,” ati. 23 Mose’n tenggol’a vanlam ako le, Pakaiyin van athingin, gel alhahsah-in, tollhang dung keh-in aseptai. Pakaiyin, 24 huise hattah le gellen alhahsah-in, kol phelah lah jengin alhahsah-in, kol aphelah lah jengin ahi. Hitobang huise lang hi Egypt thusima kisei lah a akhohpen ahi. 25 Egypt gam pumpia tolhanga umtapou, mihem le ganchate geiyin, gellenin aseplih jenge. Loulai muchi jouse la avo mat tep jengin, thingphung jouse jong aseplhusoh tai. 26 Israelte chenna Goshen gamkol sung seh seh a chun gellen alhapoi. 27 Lengpan Mose le Aaron agakousah-in, “Tua vang chonse kahitai; Pakai adih-in, kei la kamite themmo kahitauve. 28 Pakaiya tao lhonin! Van kithin ka-ngai chimun, gellen kadou lel tauve! Nachetei diuva katep ahi; hi koma chenda jengun,” ati. 29 Mose’n ajah a, “Khopi kadalhah teng Pakai lam sangin tao ving ting, van ging talou ding, gellen lha lou ding ahitai. Chuteng leiset geiya Pakaiya ahi nahet ding ahi. 30 Hinla nangle navaipoten Pakai Pathen nagging hih laiyui,” ati. 31 Sakolchang minlai avoheosoh tan, patbo jouse jong avoheosoh tai. 32 Suhlou chang vang agei jep jeh in asuse behseh poi. 33 Mose’n lengpa adalhan, khopi polama achen, Pakai lam sangin ataove. vAn gin athip’in gellen atangin, go ajutapoi. 34 Thilsoh, kho phat amudoh phat’in lengpa achonse kittan, ama ti avaipote ti angai bep’in alung tah-un, 35 Pakaiyin Mose aseipeh masah bangin, lengpan Israelte asoldoh deh tapoi.

Potdoh 10

Khakhote

1 Pakaiyin Mose jah a, “Lengpa gakimupi kit’in. Lengpa le avaipote lungtah sah-a thil kidang hicheng hi bol kagot ahin, 2 nangin jong natu nachate khang geiya jong hitobang thil kidang bol’a Egypt mite lung jinga kalha hi nasei theina ding kati ahi. 3 Hiti hin Mose le Aaron Egypt lengpa koma ache lhonin, “Pakai, Hebrew mite Pathenin, ‘Itih chanpi kasei ngailouva naum ding ham? Eihou theina diuvin kamite sol tan. 4 Kasei na-ngai louhel le jing teng nagamsunga khaokhote kalhah lut ding ahi. 5 Khakho jamah hung lhaa, nagamsung atomjol diu, gellen vohlih mooh chengse, thingphung geiyha aneh chaidiu ahi. 6 Naleng inpi le navaipote, chule namite insung khaokhote dimsoh diu ahi. Napu napaten anamusah thilse josue sanga khohjo ding ahi,’ tin aseiye gati lhonin,” ati. 7 Lengpa vaipoten ajah a, “Iti hichepa hin eidolgim gim jeng diu ham? Pakai a-Pathenu akihou theina diuvin Israelte hi soldoh tan. Egypt gamsung kichai pai ding ahi helou tahbah nahim?” atiuve. 8 Mose le Aaron chu Egypt lengpa koma agapui lut kit’un ajah lhona, “Pakai na-Pathen chu gakihou thei nauvin nate, ahin ache ding pen chu koi koi ham?” atiuve. 9 Mose’n, “Kabonchauva, numei chapang, tehse geiya che ding kahiuve. Kachateu numei pasal, kelngoite le kelcha ho, bong jouse geiya kapui diu ahi, Pakai choi-atna kut lentah bol ding kahiuve,” ati. 10 Egypt lengpan, “Pakai min panna kasei ahi-itih hijong le numei chapang geiyin sol tha hih hel inge! Edou dia kigo nahiu akichentai. 11 Hithei lou hel ding ahi. Pakai hou nom mong nahiule, pasal chengse chethei ahi,” ati. 12 Hichun Pakaiyin Mose jah a, “Khakhote hung dimsetna din Egypt gamsunga nakhut jah-in, Khakhote hungun tin, Egypt gamsunga hampa louhing gellen voh lih moh geiya aneh chaisoh diu ahi,” ati. 13 Mose’n tenggol ajap khum jengle, Pakaiyin niso lama pat sun nilhum jan khovah geiyin hui anunsah-in, jingkah-in khaokhote ahung kitol tai. 14 Ahon honin ahung kitolun, gamsunga alop lop’in atolchai jengui. Khaokhote tamje chu kimu kha loulai hel, mu jong kimu kit louhel ding ahi. 15 Leiset atomjolsoh keiyun, avom leouve; gellen vohlih moh, thing na dum ho geiyin ane chai jengui Egypt gamsung pumpia thingna dum khat’a khat jong akimu tapoi. 16 Egypt lengpan Mose le Aaron agakousah loiyin, “Pakai na-Pathenu le nangni doumah bol’a chonse kahitai. 17 Tun kachonset ngaidamna din neitaopeh loi lhonin, gamlhahna hel thei talen eimatsah hi lahdoh sah din thum lhonin,” ati. 18 Lengpa dalhan Mose Pakaiya atao le, 19 Pakaiyin nisolam huipi chu lhumlam khohuiyin akhel’in, khakhote abonchan Suez twikola alhoh lutsah soh tai. Egypt gamsunga khaokhote khat cha akimudoh tapoi. 20 Pakaiyin Egypt lengpa lung atahsah-in, lengpan Israelte alhadoh kit tapoi.

Mujin lhun

21 Pakaiyin Mose jah a, “Vanlam sang le chun, Egypt gamsung tomjol khopset mujin hung lhung ding ahi,” ati. 22 Mose’n vanlam asanle, nithum sungin Egypt gamsung mu athimsoh hel’e. 23 Egypt mite khat le khat jong akimu thei tapouvin, insung dalha a potdoh jong aumtapouve. Israelte chenna sungsea vang kho avah jingnai. 24 Egypt lengpan Mose akouvin ajah a, “Pakai gakihou thei tauvin nate; numei chapang geiyin che jengun. Kelngoi le kelcha, bong ho geiyin vang pui dauvin, hikoma dalhauvin,” ati. 25 Mose’n, “Achutile Pakai ka-Pathenu houna dia pumgo thilto dia tha ding gancha neipeh diu ahi. 26 Achutilou vangle gancfha aboncha kapui diu khat cha jong kadalhah lou diu ahi. Ganchate lah a Pakai ka-Pathenu houna dia lom kalhehdoh diu ahi nalaiye. Kilhaina ding mun lhun masanga itobang gancha thapeh ding kihe thei loulai ding ahibouve,” ati. 27 Pakaiyin Egypt lengpa lung atahsah jing jeh-in, Israelte asoldoh deh tapoi. 28 Lengpan Mose jah a, “Kakoma konin potdoh loiyin! Mu jong neikimusah kit hih-in! Kamu ni ni le nathi ni kitoh ding ahi!” ati. 29 Mose’n jong, “Naseidih bouve, neimu kit louhel ding ahitai,” ati.

Potdoh 11

Cha peng masa thi ding Mose’n aphon

1 Pakaiyin Mose jah a, “Egypt lengpa le amite bolsetna ding talen khat bou kahentai. Hiche talen amat jou teng nalhadoh tauvinte. Nasol nom lot’uva nadeldoh tho diu ahi. 2 Tun Israelten aheng akomuva sana le dangka, sanajem pahvui akithum diuvin seipeh tan,” ati. 3 Pakaiyin Egyptte chu Israelte ajabolsah lheh jenge. Ahingmongin vaipote le mipin Mose chu mi nasatah a agel’u ahitai. 4 Mose’n Egypt lengpa koma, “Pakaiyin, ‘Jan khangkim teng Egypt gamsung kakholsoh ding, 5 chapa peng masa jouse, leng chang ding, lengpa chapaa pat sumheiya chang goi soh numei chapa geiya, Egypt gamsung chapa jouse thisoh diu ahi. Gancha peng masa jouse jong thigam ding ahi. 6 Egypt gamsung ka le mao ogin thongsoh ding, hitobang hi kija kha loulai, jajong kija kit lou ding ahi. 7 Israelte lah a vang uicha hamgin le ganchate uhpoh jong kija lou ding ahi. Chuteng Kei-Pakaiyin Israelte le Egyptte kadat khen dol nahetdoh ding ahi,’ ati, tin gaseiyin,” ati. 8 Achainan Mose’n, “Navaipote ka-angsunga hung bohkhup a, kamite kapuidoh dia hung tao diu ahi. Chutah le kadalhah ding ahi,” ati. Hiti hin lung hang tah-in Mose’n Egypt lengpa adalhai. 9 Pakaiyin Mose jah a, “Egypt gamsunga thil kidang hijat hi kaboldohna thei dia Egypt lengpan nasei angai deh loulai ding ahi,” ati. 10 Mose le Aaronin Egypt lengpa angsunga thil kidang hijat pi hi aboldoh lhonin, Pakaiyin Egypt lengpa lung asuh tah jeh-in Israelte Egypt gama konin asoldoh deh poi.

Potdoh 12

Kalchuh Kut

1 Egypt gama Pakaiyin Mose le Aaron jah a, 2 “Hiche lha hi kum sunga lha kipatna nasim diu ahi. 3 Israel pumpi hitin hilchah lhonin; hiche lha nisom lhin ni le a-inson a sungsa tha dia kelngoi ham kelchagol ham khat naki-ngaito cheh diu ahi. 4 Koi tobang insung chun sungsa kithat aneh lel dingle, a-inhengte to sa chu kihomuva, aneh khop bep dia chang thei ahiuve. 5 Kelngoi ham kelcha ham natha theiyu ahin, hoijoh hile kum khat lhingsa, nolnabei achal hiding ahi. 6 Hiche lha nisom le ni li lhin ni, nilhah lam teng Israel pumping an atha diu ahi. 7 Aganthau sa anehna diu in tin a, kotpi chung inkama thisan aloinat soh kei diu ahi. 8 Hiche jan hile sungsa chu ago min’uva, anche kha le cholsolou changlhah to ame diu ahi. 9 Asel’a jong, hon thota jong naneh lou diu, apumchang, alu pum, akeng pum, asungsa jouse puma gomin thoa naneh diu ahi. 10 Neh moh imacha jong jingkah khovah geiya nakoiden lou diu, neh moh pou pou nagovam jeng dingu ahi. 11 Kholjin dia gotsa, tenggol choiya, kengchot busa, chule dinmun pum le kinotah a naneh diu ahi. Hiche hi Pakai-Kei jabolna Kalchuh Kut ahi. 12 “Hiche jan hileh Egypt gamsung kakholsoh hel’a, mihem hihen gancha hile, apeng masa chengse kathagam ding, Egypt gamsung doi le kao jouse kasuhgama talen kamatsah ding ahi. Kei hi Pakai kahi. 13 Kotpi inkam chunga thisan kiloi chun nachen nau in eihetsah ding-melchihna ahi. Hiche thisanchu kamu teng kalchuh ing ting, Egypt mite talen kapehna nangho suse ponge. 14 Hiche nikho hi, Kei-Pakai thilbol geldohna, sakho kut a nanei diu ahi. Akhang khangin bol jinguvin,” ati.

Cholsolou changlhah kut

15 Pakaiyin, “Ni sagi sungin cholkiso changlhah nehhih hel’un, cholsolou changlhah bou neuvin. Kut kipatni le insunga chol kikoi chengse napai diu ahi, ajeh chu kut sung ni sagi sunga chol sa changlhah nekha chan chu kamite to kisimtha lou ding ahitai. 16 Kut kipatni le ni sagi lhin nia Pathen lhai dia nakikhop diu ahi. Hiche nikho te ni le anhon tilou thildang toh dang nabol thei lou diu ahi. 17 Hiche nikhoa hi Egypt’a kona kahin puidoh-u melchihna a hiche kut hi nabol jing diu ahi. Khonung jongle, akhang khanga hiche kut hi naman jing dingu ahi. 18 Hiche lha masa nisom le li lhin nilhah a pat, nisom ni le ni khatna nilhah geiya cholsosa changlhah naneh thei lou diu ahi. 19 Ni sagi sunga koimacha insunga cholsosa changlhah kikoi thei lou ding, cholsosa changlhah koi pen pen gamsung mi hihen, khopem hile-Israelte Houbunga kisimtha lou ding ahi. 20 Cholsosa changlhah him him naneh lou diu, na umna jouseuva cholso lou changlhah bou naneh diu ahi,” ati.

Kalchuh Kut masapen

21 Mose’n Israel lamkaite akousoh keiyin ajah-uva, “Kalchuh Kut bolna dia na-inko kouva kelngoi ham kelgol ham nakitha cheh diu ahi. 22 Naganthau thisan chu hyssop ponin deovin lang, kotpi khom le inkam jol’a loisan soh keiyun. Jingkah masanga koiman insung nakhokal thei lou diu ahi. 23 Egyptte sugam dia Pakaiyin Egypt gamsung achot teng, kot khom dungle inkam dunga thisan kiloi muntin, mi sugam Vantil na-insunguva alutsah daa, nahinghoi diu ahi. 24 Nangho le natu nachateu geiyin, hiche Dan hi a-itih a jong anit jing diu ahi. 25 Pakaiyin peh dia na teppeh nau gamsung nalhun tengu jongle hiche houdan hi najui diu ahi. 26 Nachateuvin, ‘Idia hiche Houdan ho hi kijui ham,’ atiu leh; 27 ‘Egypt gamsunga Pakaiyin Israelte in josue akalchuh jeh a Pakai jabolna kimang Kalchuh kut kilhaina gantha ahi, Pakaiyin Egypt mite athaa, eiho eihing hoiyu ahi,’ tia naseipeh diu ahi,” ati. Israelte kunin Pathen alhai cheh-ui. 28 Acheuvin Mose le Aaron jah a Pakai thupeh chu aboutauve.

Cha peng masa thi

29 Jan khangkim laiyin Egypt gamsung lengpa goulo ding chapa masa pen apat kulsunga kihen sohchang chapa masapen gei Egypt gamsung chapang masa jouse gancha peng masa ho geiyin Pakaiyin athath gamtai. 30 Hiche jan hin lengpa le avaipote athouvun, chapa thi louna in khat beh jong aum tah lou phat’in, Egypt gam pumpi ka le mao o athongsoh hel tai. 31 Ajan janin lengpan Mose le Aaron agakousah-in, “Na-Israelte toh potdooh loi lhonin! Kagam sung dalhauvin, Pakai chu nadei bangin kihou tauvin. 32 Nakelngoi, nakelchau, nabong jouse kikaihyun, cheloiyun, keijong vang neithumpeh-un,” ati. 33 Egypt miten Israelte chu Egypt gam dalha loi din angeh-un, “Nachedoh vah louvule kathigam pai diu ahitai,” atiuve. 34 Israelten umle bel akigot’un, cholsolou changbong ponin achun’uvin, lengkouva pun akitol tauve. 35 Israelten Mose sei bangin abol’un, Egypt mite koma sana le dangka, sanapah jem, chule ponsil akithum’uve. 36 Pakaiyin Israelte chu Egypt mite aginsah-in, athum chan’u apehsah-e. Hiti hin Egypt mite gou jouse Israelten apodoh tauve.

Potdoh 13

Chapa masa katdoh

1 Pakaiyin Mose jah a, 2 “Chapa peng masa le gancha peng masa achal josue kakoma nakatdoh diu ahi, ajeh chu Israelte chapa masa achal jouse kei ding ahi,” ati.

Cholsolou changlhah kut

3 Mose’n mipi jah a, “Nasoh chan nau mun, Egypt gamsung nadalhah nikhou hiche nikho hi Pakaiyin abangol thahat’a nahin puidoh-u ahi. Cholsosa changlhah naneh htei lou hel diu ahi. 4 Lha masa, Abid, hiche nikhoa hi Egypt nadalhah-u ahi. 5 Canaan mite le Hit mite, Amor mite, Hiv mite, chule Jebus mite gamsung napeh diuva napu napateu koma Pakai giltah a kitepsa ahi. Hiche gampha sunga nahin puilut tengule, kum seh a lha masa pena hiche kalchuh kut hi naman jing diu ah. 6 Ni sagi sunga cholsolou changlhah naneh diu, ni sagi lhin ni le Pakai choi-atna kut nabol diu ahi. 7 Ni sagi sunga cholsolou changlhah naneh lou diu, nagam sunguva chol le cholsosa changlhah nakoi da diu ahi. 8 Kut kipat teng, Egypt nadalhah-uva Pakaiyin thil nabolpeh jal’uva hiche thil nabol’u chu nachateu hilchen’un. 9 Kalchuh kut kinit hi khut’a chao kibut bang le chalpaunga sum-eng kikhai banga nanei diu, Pakaiyin ban-gol hat’a Egypt a nahin puidoh jal’uva, Pakai Danthu sim le lungchina seije nahil jing diu ahi. 10 Akitep phat chan kumseh le hiche kut hi mang jing jengun.

Cha peng masa

11 “Giltah a napu napateu koma napeh diuva akitepnasa Canaan mite gamsunga Pakaiyin nahin puilut tei diu ahi. Gam chu apeh tengu 12 cha peng masa jouse Pakai napeh diu ahi. Gancha peng masa achal jouse jong Pakai chan ding ahin, 13 sa-ngan peng masa achal chu kelngoiya nakile chohson diu ahi. Sa-ngan chal chu nalechoh nom loule, alol heh-bongun. Nachau pasal peng masa jouse nakile choh cheh diu ahi. 14 Khonung teng nachauvin ibol’a hich ekinit ahi nadoh tengu, ‘Kasohchan nau Egypt gamsunga kona Pakaiyin ban-gol hat’a eihin puidoh-u ahi. 15 Egypt lengpa alungtah a eisolda phat’uva, Pakaiyin Egypt gamsunga chapang peng masa jouse mihem hihen gancha hile athagam a, hijeh a chu gancha peng masa achal jouse Pakaiya kilhaina kithat’a, mihem peng masa ho kile chohson ahi. 16 Hiche hi chao kibut bang le chalpang a sum-eng kikhai banga milmao kinut jign ahi; Pakaiyin ban-gol hat’a Egypt a kona eihin puidoh-u geldohna kinei jing ding ahi,’ tia nahil chen ding ahi,” ati.

Meilom le meikou

17 Egypt lengpan Israelte asoldoh phat chun, lampi gompen ahivangin, Philisitia twipang lampia Pathenin apuipouve. Pathenin “Galsatpa ding amudoh tengu Israelten lung khel’a Egypt a kile kit agot diu kadei poi,” ati. Israelte chu 18 Lampi kolvel lam, Twipi san lam joh, nelgam lama apuijoi. Israelte chu galsat pa dia kigosa ahiuve. 19 Joseph-in Israelte giltah a akitepsah dungjuiyin, Mose’n Jospeh long apoi. Joseph chun “Pathenin nahuhdoh tengu hiche mun a kona kalong napoh doh tei diu ahi,” anati. 20 Israelten Sukkoth dalhan nelgam pamchin, Etham a kingauve. 21 Sun teng achunguva Pakai meilomin akisongin, alekhun, jan teng amasanguva meikouvin akidal’in asalvah-e; hijeh chun sun le janin lam ajot theiyu. 22 Sun nilhumin Israelte chunga meilom akidal’in, jan khovah vah-in meikouvin akitolpeh-e.

Potdoh 14

Twikhanglensan agalkaiyu

1 Pakaiyin Mose jah a, 2 “Israelte akiletol’uva, Baal Zephon kom, Migdol le Twikhanglensan kikah, Pi-Hahiroth gal a ki-nga din seipeh-in. 3 Egypt lengpan Israelte chu gamsunga vah thai leuva, nelgam hung naidol’in ngaiton tin, 4 ken alung tahsah ing ting kahin nungdel sah diu, asepaite le ama kajo teng kamin thang ding ahi. Chutah le Pakai kahi Egyptten hedoh tauvinte,” ati. Aseipeh banguvin Israelten abol tauve. 5 Israelte jamdoh thu Egypt lengpa aseipeh-u le, ama le avaipoten lung akhel’un, “I-bol kheltauve. Israelte isoldoh-u hi soh a inekhah lou diu ahitai!” atiuve. 6 Egypt lengpan agalsatna kangtalai akigot’in, asepaite jong akigotauve. 7 Lengpa kangtalaiyin akitol’in, sepai them cheh jagup le alamkaiteu to alhone. 8 Pakaiyin Egypt lengpa lung asuhtah-in, lengpan Israelte nomtah a kitol ho chu, adel del jenge. 9 Egypt sepaiten sakolte le kangtalai ho, kangtalai tolte pumin adel del jengun, Pi-Hahiroth le Baal Zephon kom, Twikhanglensan a aki-ngah nauva aphapa tauve. 10 Egypt lengpa le asepaiten ahindel khum amu phat’un, Israelte akichauvin Pakaiya panpi ngaichan ataotauve. 11 Israelten Mose jah a, “Egypt gama kivuina lhankhuh beiya nabol’a, nel gama lup kamsah dia neihin puiyu ham? I-khoh tah a Egypt a kona nei hin puidoh mongu ham! 12 Hiti dia hi ihung kipatdoh masanguva pat kasisau hilou ham? Neidon dauva Egyptte soh a pang den dia kaseipeh sau nahi. Gamchang noiya lup kam sanga Egyptte soh a pan phajo ta dinga,” atiuve. 13 Mose’n, “Kicha hih-un, pangdet’un, nahuhhingna diuva ahi. Hiche Egypt mite hi namu kit louhel diu ahi. 14 Nangho sat ngailouva Pakaiyin gal nasatpeh diu ahi,” ati. 15 Pakaiyin Mose jah a, “I-bol’a kithopi ngaiya toa nahiuvem? Mipi chu malam nodin seipeh-in. 16 Twikhanglen chunga natenggol jah-in. Twipi kikehson tin, akah tolgoa Israelte kijotdoh diu ahi. 17 Egyptte lung katahsah a Israelte adel lut diu, Egypt lengpa le asepaiteu, kangtalai ho le atolte kasuhgam a minthang ding ahi. 18 Amaho kajosoh teng Pakai kahi Egypt ten hedoh tauvinte,” ati. 19 Pathen Vantil, Israel gal lamkaipa chu anung lam’uva achen, meilom jong chu akiletol’in, 20 Egyptte le Israelte kah a akidaltai. Meilom chun Egyptte alejingin, Israelte din avah-e. Hiti hin sepaiho chu jan khovah-in akinailut thei pouve. 21 Mose’n Twikhanglen chunga akhut ajah le, Pakaiyin Twikhanglen chu niso lam khohui asemkhensah-in akiting kih tai. Hui anung khovah hel’in, Twikhanglen lai lung tolgo asoh tai. Twipi skihom khenin, 22 Israelten ajet aveiya twipi bangdan a kisung, Twikhanglen lailung tolgon ajotdoh tauve. 23 Egypt miten sakolte le kangtalai jouse chule atol ho pumin Israelte nung adel’un, Twikhanglen lailung ageitauve. 24 Khovah konchan Pakaiyin meilomle meikouva konin Egypt sepaite ahinven, ameidoisah soh hel tai. 25 Kangtalai velkol jouse a-odensah-in, atolchal tapouve. Egypt miten, “Pakaiyin Israelte panpi eikisatpi tauve. Jamdoh jengu hite!” tin aseitauve. 26 Pakaiyin Mose jah a, “Twikhanglen chunga khut jah le chun, twipi hung kichia, Egyptte le kangtalai ho chule atolte achupden ding ahitai,” ati. 27 Mose’n Twikhanglen chunga akhut ajah jengle, khovah lhah-in twipi ahung kichin, aveina ngai ngaiyin aveitan, Egyptte chu twi lah a kon jamdoh agot vangun Pakaiyin twi lailunga laeh lut soh tauve. 28 Twipi akichin kangtalai ho le atolte, Egypt sepaite, Israelte nung del Twikhanglen lailunga lutsa ho chu, khat beh jong khen louvin achup lihsoh hel’e. 29 Israelte vang chu jet le veiya twipi bangin akisungin, alailung tolgoa akijotdoh soh hel’uve. 30 Hiche nikho hin Egypt mite khut’a konin Pakaiyin Israelte ahuhdoh-in, Twikhanglen pamchin a Egyptte thilong akijamchap leu chu Israelten amutauve. 31 Pakaiyin tha hangsan taha Egyptte asuhgam amudoh phat’un, Israelten Pakai aging cha tauve.

Potdoh 15

Mose la

1 Mose le Israelten Pakai vahchoi nan hiche la hi asauve: “Pakai vahchoi la sange, Aman gal ajoutai! Sakolte le achunga toute Twikhanglen lailunga aleh luttai. 2 Kakulpi detpen Pakai ahin, Eihuhhinga Ama ahi. Ka-Pathen ahi vahchoiyinge, Kapa Pathen loupije sachoi lenge! 3 Pakai gal-hang ahin, Amin jong Pakai ahi. 4 “Egypt sepaite le kangtalai jouse Twikhanglena alehlut soh tai. Egypt sepai vaipo them josue Twikhanglensanin achupsoh tauve. 5 Twikhanglen thuh alut lhumun, Songtum kileh lutbangin lito ageitauve. 6 “Naban thahat akidange Pakai, Melmate nabottelsoh tai. 7 Loupi chung nungin Namelmate najoutai; Nalunghan chun abonchauvin changpol meiya kileo nabahsah tai. 8 Twikhanglen namut le Twipi alhuh lhuh-in akinongin; Banglai kksung abangin, Twito thuhpen jong leitah asoh jenge. 9 Melman, ‘Kadel’a kamuat ding; Agouvu kadei dei kachom ding, chemhem hat’a anei jouse kalah ding ahi,’ ati. 10 Vo Pakai nakisem husan Egyptte twiyin ahcuptai; Twithuh lailunga ngenchang kilehlut abangui. 11 “Vo Pakai Nangto tethei pathen koi ham? Thengpentah Nang tobang koiham? Nabol tobang thil kidang datmo boldoh ding koi ham? 12 Nakhut jetlam najahle leiyin namelmate aval lhumtai. 13 Kitepna Molson nahuhdohsa mite napuidohtai. Nathahat’in puiyin nagamtheng nalhut tai. 14 Namtin vaipin ajauvin akihot lhulsoh tauve; Philistine mite kicha lih pai diu ahitai. 15 Edom mite lamkai ho atijauvin, Moab mihatte akihot hot’ui. Canaan gam mite amei doi gamtauve. 16 Tijat kichat’in adimtauvin, Vo Pakai nathahat amu soh tauve; Sohchang nalhadoh namite kitoldoh soh kahsen atinaje helouvin lungdongin adingden tauve. 17 Nahin puilut’in nagamsung Mol le lhang natomjolsah-in; Nang-Pakaiyin nalhendohsa mun, na-in Houin-nasahsa dung nalhutsohtai. 18 Vo Pakai nangma, Tonsot tonsot’a leng chang ding nahi,” atiuve.

Miriam Labol

19 Israelten Twikhanglen lailung tolgon ajotdoh tauve. Egypt mite kangtalai ho le sakolte chule kangtalai tol ho puma Twikhanglen lailung agei phat’un Pakaiyin twipi akichisah kit’in achupsah soh tai. 20 Aaron sopinu Miriamin khutbeh akipat’in, numei dang sen jong ajop’un khutbeh bengin alamtauve. 21 Numeiho lamkaiyin Miriamin la asan: “Pakai vahchoiyun, Minthangtah-in gal ajoutai. Sakolte le achunga tou mihem josue Twikhanglen a aleh luttai,” atiuve.

Twikha

22 Israelte chu Mose’n Twikhanglensan apat Shur gamthip lama apuitai. Nithum sung nelgam jeng ajot’u le, twi him him amu tapouve. 23 Marah kiti lai ahinphauvin, chukoma twi chula akhan adon theipouve. Twikhat jeh a Marah asah lo’u ahi. 24 Mipi Mose koma akiphin’un, “Ipiba kadon diu ham?” tin anotauve. 25 Mose jong lunggil tah-in Pakaiya ataovin, Pakaiyin thing hal khat avet sah-in, hichu twikha lah a lelut le donthei asohtai. Hikoma hin Pakaiyin achonna diu Danthu apen, pajong apate’e. 26 Pakaiyin, “Thildih a kagel chu thakhen louva nabol’uva, kathupeh chengse nanit jingule, Egypt mite kathagamna nat ho khatcha nachunguva chuhsah ponge. Kei hi nadamsah-uva Pakai chu kahi,” ati. 27 Abanin Elim ahung lhungun, hikoma hin twinah phung som le ni aumin, chahthing hung som sagi akeh-e; twipanga chun aki-ngauvin ahi.

Potdoh 16

Potdoh 17

Potdoh 18

Potdoh 19

Potdoh 20

Potdoh 21

Potdoh 22

Potdoh 23

Potdoh 24

Potdoh 25

Potdoh 26

Potdoh 27

Potdoh 28

Potdoh 29

Potdoh 30

Potdoh 31

Potdoh 32

Potdoh 33

Potdoh 34

Potdoh 35

Potdoh 36

Potdoh 37

Potdoh 38

Potdoh 39

Potdoh 40

Leviticus 1

Leviticus 2

Leviticus 3

Leviticus 4

Leviticus 5

Leviticus 6

Leviticus 7

Leviticus 8

Leviticus 9

Leviticus 10

Leviticus 11

Leviticus 12

Leviticus 13

Leviticus 14

Leviticus 15

Leviticus 16

Leviticus 17

Leviticus 18

Leviticus 19

Leviticus 20

Leviticus 21

Leviticus 22

Leviticus 23

Leviticus 24

Leviticus 25

Leviticus 26

Leviticus 27

Numbers 1

Numbers 2

Numbers 3

Numbers 4

Numbers 5

Numbers 6

Numbers 7

Numbers 8

Numbers 9

Numbers 10

Numbers 11

Numbers 12

Numbers 13

Numbers 14

Numbers 15

Numbers 16

Numbers 17

Numbers 18

Numbers 19

Numbers 20

Numbers 21

Numbers 22

Numbers 23

Numbers 24

Numbers 25

Numbers 26

Numbers 27

Numbers 28

Numbers 29

Numbers 30

Numbers 31

Numbers 32

Numbers 33

Numbers 34

Numbers 35

Numbers 36

Deuteronomy 1

Deuteronomy 2

Deuteronomy 3

Deuteronomy 4

Deuteronomy 5

Deuteronomy 6

Deuteronomy 7

Deuteronomy 8

Deuteronomy 9

Deuteronomy 10

Deuteronomy 11

Deuteronomy 12

Deuteronomy 13

Deuteronomy 14

Deuteronomy 15

Deuteronomy 16

Deuteronomy 17

Deuteronomy 18

Deuteronomy 19

Deuteronomy 20

Deuteronomy 21

Deuteronomy 22

Deuteronomy 23

Deuteronomy 24

Deuteronomy 25

Deuteronomy 26

Deuteronomy 27

Deuteronomy 28

Deuteronomy 29

Deuteronomy 30

Deuteronomy 31

Deuteronomy 32

Deuteronomy 33

Deuteronomy 34

Joshua 1

Joshua 2

Joshua 3

Joshua 4

Joshua 5

Joshua 6

Joshua 7

Joshua 8

Joshua 9

Joshua 10

Joshua 11

Joshua 12

Joshua 13

Joshua 14

Joshua 15

Joshua 16

Joshua 17

Joshua 18

Joshua 19

Joshua 20

Joshua 21

Joshua 22

Joshua 23

Joshua 24

Judges 1

Judges 2

Judges 3

Judges 4

Judges 5

Judges 6

Judges 7

Judges 8

Judges 9

Judges 10

Judges 11

Judges 12

Judges 13

Judges 14

Judges 15

Judges 16

Judges 17

Judges 18

Judges 19

Judges 20

Judges 21

Ruth 1

Ruth 2

Ruth 3

Ruth 4

1 Samuel 1

1 Samuel 2

1 Samuel 3

1 Samuel 4

1 Samuel 5

1 Samuel 6

1 Samuel 7

1 Samuel 8

1 Samuel 9

1 Samuel 10

1 Samuel 11

1 Samuel 12

1 Samuel 13

1 Samuel 14

1 Samuel 15

1 Samuel 16

1 Samuel 17

1 Samuel 18

1 Samuel 19

1 Samuel 20

1 Samuel 21

1 Samuel 22

1 Samuel 23

1 Samuel 24

1 Samuel 25

1 Samuel 26

1 Samuel 27

1 Samuel 28

1 Samuel 29

1 Samuel 30

1 Samuel 31

2 Samuel 1

2 Samuel 2

2 Samuel 3

2 Samuel 4

2 Samuel 5

2 Samuel 6

2 Samuel 7

2 Samuel 8

2 Samuel 9

2 Samuel 10

2 Samuel 11

2 Samuel 12

2 Samuel 13

2 Samuel 14

2 Samuel 15

2 Samuel 16

2 Samuel 17

2 Samuel 18

2 Samuel 19

2 Samuel 20

2 Samuel 21

2 Samuel 22

2 Samuel 23

2 Samuel 24

1 Kings 1

1 Kings 2

1 Kings 3

1 Kings 4

1 Kings 5

1 Kings 6

1 Kings 7

1 Kings 8

1 Kings 9

1 Kings 10

1 Kings 11

1 Kings 12

1 Kings 13

1 Kings 14

1 Kings 15

1 Kings 16

1 Kings 17

1 Kings 18

1 Kings 19

1 Kings 20

1 Kings 21

1 Kings 22

2 Kings 1

2 Kings 2

2 Kings 3

2 Kings 4

2 Kings 5

2 Kings 6

2 Kings 7

2 Kings 8

2 Kings 9

2 Kings 10

2 Kings 11

2 Kings 12

2 Kings 13

2 Kings 14

2 Kings 15

2 Kings 16

2 Kings 17

2 Kings 18

2 Kings 19

2 Kings 20

2 Kings 21

2 Kings 22

2 Kings 23

2 Kings 24

2 Kings 25

1 Chronicles 1

1 Chronicles 2

1 Chronicles 3

1 Chronicles 4

1 Chronicles 5

1 Chronicles 6

1 Chronicles 7

1 Chronicles 8

1 Chronicles 9

1 Chronicles 10

1 Chronicles 11

1 Chronicles 12

1 Chronicles 13

1 Chronicles 14

1 Chronicles 15

1 Chronicles 16

1 Chronicles 17

1 Chronicles 18

1 Chronicles 19

1 Chronicles 20

1 Chronicles 21

1 Chronicles 22

1 Chronicles 23

1 Chronicles 24

1 Chronicles 25

1 Chronicles 26

1 Chronicles 27

1 Chronicles 28

1 Chronicles 29

2 Chronicles 1

2 Chronicles 2

2 Chronicles 3

2 Chronicles 4

2 Chronicles 5

2 Chronicles 6

2 Chronicles 7

2 Chronicles 8

2 Chronicles 9

2 Chronicles 10

2 Chronicles 11

2 Chronicles 12

2 Chronicles 13

2 Chronicles 14

2 Chronicles 15

2 Chronicles 16

2 Chronicles 17

2 Chronicles 18

2 Chronicles 19

2 Chronicles 20

2 Chronicles 21

2 Chronicles 22

2 Chronicles 23

2 Chronicles 24

2 Chronicles 25

2 Chronicles 26

2 Chronicles 27

2 Chronicles 28

2 Chronicles 29

2 Chronicles 30

2 Chronicles 31

2 Chronicles 32

2 Chronicles 33

2 Chronicles 34

2 Chronicles 35

2 Chronicles 36

Ezra 1

Ezra 2

Ezra 3

Ezra 4

Ezra 5

Ezra 6

Ezra 7

Ezra 8

Ezra 9

Ezra 10

Nehemiah 1

Nehemiah 2

Nehemiah 3

Nehemiah 4

Nehemiah 5

Nehemiah 6

Nehemiah 7

Nehemiah 8

Nehemiah 9

Nehemiah 10

Nehemiah 11

Nehemiah 12

Nehemiah 13

Esther 1

Vashti lengnun Lengpa Xerxes ajumso

1 Persia gam munpi Susa khopi laltouna muna konin lengpa Xerxes hin India gam a pat Sudan gei, 2 gam ja khat le somni le sagi chunga vai ahom’e. 3 Alengvaipoh kal kumthum nan avaipote le vaihom chengse to nehkhom golvah abol’e. Golvahnaa hin Persia le Media gamhop sung sepaite le gamvaipote, milen milalte, akimsoh keiyui. 4 Lhagup lhungkeiyin lengpan lenggam haosatna le aloupi minthanje avetsah-e. 5 Ijakai avtsah soh phat’in, Susa tolpi sung mite din lengpan golvah chom khat bol’in, mihao mivai akousoh keiye. Golvah chu leng inpi hohnsunga hapta khat sungin abol’uve. 6 Leng inpi leitol chu pondum le ponkang adal khum’un, songval khom kiphut hoa chun tupat ponnemin dangka kol’a kitom abol-hom dunga akanbehuve. Leitol pumpia chun touna din sana le dangka kisem jeng akidon, song mantam, akang le asan, songval vahsel jeng, chule a-eng thipjet’in akitomjolsoj hel’e. 7 Donthei donna khon jouse sana jeng ahin, chule khon khat le khat kilo lou, lengpan leng inpi sung juneng jel’in ahom’e. 8 Judon tan phat umlou, lhacha ho chu min aduchan a donthei dia lengpan thu apehsah ahi. 9 Hiche sung hin leng inpi sunga lengnu Vashtin numeite din golvah abol’e. 10 Golvah vol kal ni sagi nin lengpan ju adonva set’in lung nomsel’in aumin, sole lhacha, nukiso sagi-Mehuman, Biztha, Harbona, Bigtha, Abagtha, Zethar chule Carkas akoulut’in, 11 Lengnu Vashtin lallukhuh puma akimupi ding agakousah tai. Lengnu hi numei hoitah ahin, lengpan avaipote le maljin ho chu amel-hoi vetsah agot ahi. 12 Solle hon lengpa thupeh lengnu Vashti koma aseipeh-ule, ahung nompoi. Hijeh hin lengpa alung hang hangtai. 13 Umchan chondan thudol’a thuh le phah hethem ho doh hi lengpa umdol khat ahin, hijeh chun lengnu i-loa pha ding dol doh toh-din thumop themho akouve. 14 Lengpan thu adohnom miho chu-Carshenam Shethar, Admatha, Tarshish, Meres, Marsena, chule Memucan ahiuvin, Persia le Media leng gamsunga vaipo thunei chungnung pen vaipo cheh sagi ahiuve. 15 Hiche ho jah a hin lengpan, “Lengpa Xerxes ken, Vashti lengnu kouva sole kasol le, kathu angaipoi! I-ilo diuva danthun aseiyam?” tin adonge. 16 Hichun Memucan hin lengpa le avaipote koma-“Lengnu Vashti hin lengpa keo noi lhah louva, avaipote geiya einoi lhah-u ahitai; tahbeh-in gamsunga pasal jouse jong anoi lhah ahi! 17 Lengnu thilbol ja masa numei tinin jipa noisena aneithu thu diu ahi. Numeihon, ‘Lengpa Xerxes-in bon lengnu Vasti kouva, koudoh jou lou,’ ati diu ahi. 18 Persia le Media leng inpia vaipote lengnu kisah hi ajahdoh tengu, nilhum masanga ajiteu houna aneipai diu ahitai. Chuteng muntin a numei hon ajabol lou diu, pasal jouse ajite chunga lung hang ding ahiuve. 19 Lengpan nadei dingle, lengpa masanga Vasti hung kilah kit louhel din thuphon khat kiso jengle phante. Khel kit thei louhel dia Persia le Media danthua jih lut dia thu napeh din aphai. Chule lengnu khel’in numei hoijo khat lhengdoh le chun ahijenge. 20 Hiche thupeh phondohna hilenggam lentah sunga akihetsah soh hel teng, hao hen vai jongle pasal jouse ajiten ajabol cheh diu ahi,” ati. 21 Lengpa le avaipoten thu kiseidoh chu pha asauvin, Memucan seibangin lengpan aboltai. 22 Leng gamhop sunga gamkai tin a, apaovu le lekhajem cheh-in hiche thuphon chu ajihdoh-un, pasal jouse hi a-insunga apua pang, aman thu chaina asei dingin alhahsah tai.

Esther 2

Esther lengnu chan

1 Lengpa alungdam nung geiyin jong Vashti chonchan, chule adouna thupondoh abol chu agel jing nalaiye. 2 Lengpa kinaipi, thumop phabep’in akoma, “Lengpan nu-ngah thah mel-hoi tah nahol’a phalou ham? 3 Lenggam sunga gamkai vaipoten nu-ngah mel-hoi lai jouse, hikom munpi lai, Susa khopi leng inpia ahinpui diuvin seipeh-in, Nu-ngah jouse chu numeite vetup’a nakoi, nukiso Hegai noiya umsah-in, abonchauvin kisemhoisah phat pen. 4 Chuteng nu-ngah hoipen chu Vashti khel’in lengnun pansah-in,” atiuve. Aseiyu hi lengpan thilphan agel’in aboltai. 5 Susa khopi a chun Juda mi Jair chapa Mordecai achenge. Mordecai hi Benjamin phunga mi, Kish le Shimei son ahi. 6 Babylon lengpa Nebuchadnezzarin Judah lengpa Jehoiachin le sohchang dang Jerusalema kona akaimang chun alah-uva Mordecai jong apange. 7 Mordecai hin asopite chanu khat achanu banga akisem, Hebrew paova amin Hadassah kiti Esther, nu-ngah mel-hoi tah le gongso hoitah khat aneiye. Anule apa thi phat’a mordecai hin achanu bang banga avopdoh ahi. 8 Lengpan nu-ngah jouse khop dia thuphondoh abol phat’in, Susa khopia nu-ngah ahinpuilut nauva Esther jong apangkhai. Esther jong leng inpia, leng numeiho in vaipo Hegai thu noiya akoitauve. 9 Hegaiyin Esther adeiyin, Eshterin jong hegai along lhaisah lheh-e. Hegaiyin man gangtah-in Esther semhoina ding le atahsa thaosah lai din na atongpanin, neh le chah pha pha apetai. Esther chu leng inpi numeiho umnaa mun nompen apen, akibol din leng inpia numei sagi jen apansah tai. 10 Mordecaiyin ahilchah masah jen-in, Estherin Judah mi ahi chu aseidoh poi. 11 Niseh le Esther chu itobanga, achunga ipi soh ding ti hetdoh gon, Mordecai chu leng inpi numeiho umna maiya adung avaiyin achelejie. 12 Numei semhoina phat chu angaiya kum khat ahin, lhagup ma myrrh kinua tahsa mehnou chet ding, chule balsam thao nu na lhagup ma lutbe ding ahi.Hichengse akichaisoh hel teng nu-ngahho chu khat khat a lengpa Xerxes anga puilut ding ahi. 13 Numei inpia pat leng inpi ajot teng nu-ngah chun ipi hijongle adei dei akivon ding ahi. 14 Nilhah teng lengpa henga lut ding, jingkah teng numei inpi chom khat’a apuilut’uva, lengpa thaikemho vaipo, nukiso Shaashgaz noiya um ding ahi. Hiche a lutsa chu lengpan adeiya amin a akou kit loule lengpa koma lut kit lou ding ahitai. 15 Amupha chan seiphat, Abihail chanu, Mordecai chagavopnu, Esther lengpa henga lutna ding phat ahitai. Esther alut phat’in, numei inpi vaipo, nukiso Hedgaiyin von dia aseipeh bangin akivontai. 16 Hiti hin Xerxes lengchan kal kum sagi na, lha som lhin, Tebeth lhan, leng inpia Xerxes lengpa angsunga Esther apuilut tauve. 17 Lengpan Esther chu nu-ngah dang dang sangin adeipenin, nu-ngah dang sangin aman lengpa sei abol’in angailotai. Lengpan lallukhuh akhuhpeh-in, Vashti khel’in lengnun asemtai. 18 Esther jabolnan lengpan golvah abol’in, vaipo vaibol chengse akousoh keiye. Lenggam pumpia choldo nikho aphongdoh-in leng khat peh lomtah thilpeh tampi ahomdoh-e.

Mordecaiyin lengpa ahuhhing

19 Hichepat hin lengpan Mordecai chu vaipo khat’in apansah tai. 20 Esther in Juda mi ahi aseidoh hih laiye. Mordecai hin koimacha aseipeh lou dia ahiljeh a, aneocha lhah thu anun jing banga, athua nunga aseidoh lou ahi. 21 Mordecaiyin leng inpia na atoh pet hin, lengpa indan sunga lutna kelkot ngahte ni-Bigthana le TEresh-in lengpa Xerxes adou lhonin, tha din ago lhontai. 22 Athilgon lhon hi Mordecaiyyin ahetdoh doh-in Esther ahil le, Mordecai thil het chu Estherin lengpa aseipeh tai. 23 Phatah a akholchil’u le, thudih ahin, mithat gote ni thingchunga akhailih tauve. Aumdol hi lenggam thusimbua jih lut din lengpan thu apetai.

Esther 3

Hamanin Judate suhmang agot

1 Chom khat jouvin lengpa Xerxes-in Haman kitipa chu Semang pipun atung lentai.Haman hi Agag chilhah, Hammedatha chapa ahi. 2 Akinbol vaipo jouse kun cheh a Haman jabolna chibai aboh cheh diuvin lengpan aseitai. Abonchan abol cheh-un, Mordecai seh she adai. 3 Leng inpia vaipo dangsen, lengpa thupeh anit louna jeh Mordecai adongun; 4 niseh-in anit teina din asol sol jengun, amala anom naisaipoi. Aman, “kei Juda mi kahin, Haman noiya kun a chibai kaboh thei lou ding ahi,” ati.Vaipoten athusoh hi Haman aseipeh-un, Mordecai umchan angaidam ding le angaidamlou didng along dong lheh-ui. 5 Akoma Mordicai kun a chibai boh ding nop lou ajah phat’in Haman alung hang behseh jengin; 6 chule Mordecai m aJuda mi ahi ahetdoh phat’in, Mordecai she talen matsah sanga khoh cheh bolagoi. Hiti hin Persia gamsung pumpia Juda mi jouse thagam ding thil agongtai. 7 Lengpa Xerxes lengchan kal kum somle ni lhinna, lha masa, Nisan lhan, athilgon molsona ding nikho pha le lha kitoh holdoh didng deinan Haman hin Purim phun san ding aseitai. 8 Hiti hin Hamanin lengpa jah a, “Naleng gamsunga hin mihem nam khat kithecheh a, gamkai jousea chegnsoh kei aum’e. Hiche nam mite hin midangto kitoh louhel chonchan dan aneiyui. Akhoh cheh-in, amaho hin gamsung danthu jong anit pouvin, hijeh a chu amaho hinghoi hoi ding nan gdin hung phaponte. 9 Nadeile thugahna khat sunin lang hiche nam mite hi kithatgamle phante. Nanop pou poule, leng gamsung kivaipohna manchah din dangka talent sangsom peng ting, leng thil kholnaa koiyinge,” ati. 10 Lengpan khutjem mohor a kisem, thuphondoh jouse kinamkhumji chu asut lhan, Judate melmapa, Agag chilhah Hamandatha chapa Haman apetai. 11 Haman jah a, “Judate le asum jouseu nanga ahitan, pha nasah lam lamin bol jengin,” ati. 12 Lha masapen nisom le nithum nin Hamanin lengpa lekhajihho jouse akoukhomin, leng gamsunga kimang lekhajem jouse le pao jouse aledoh a jih ding, chule vaipote l egamvaipo chengse thotsoh hel din, thuphondoh khat ajihsah tai. Lekha chu lengpa Xerxes min a kijih, amohor kinamkhum ahi. 13 Solle hon hiche lakha chu gamsunga ahomsoh tauve. Asunga kisun chun-nikhatseh sung, Adar lha nisomle nithum ni le-Judate abonchauva, ateh akhang, numei chapang thagam hel dia asei ahi. Hepi beihel’a thagam ding, anei agou chengseu chomsoh ding ahi. 14 Nikho alhin teng miho kigingsa aum theina diuva gamkai jouse thuphondoh chu phonjalsoh ding ahi. 15 Lengpa thupeh-in thugahna chu munpipen khopi Susa a aphongdoh-un sole hon athu ho gamkai jouse alhutsoh tauve.Susa khopi sung mipi lung donga kihel lei loi pet hin lengpanle Hamanin nomtah-in toumun ju adon lhon’e.

Esther 4

Mordecaiyin Esther panpi angeh

1 Thilsoh jouse Mordecaiyin ajahsoh phat’in lung gimin aponsil chengse abottelsoh tai. Khaodip pon asil’in, lujanga leivui kiloiyin, khopi lailunga avah len, lhase tah-in othongje jun akap’in, 2 leng inpi kulpi kotphung geiyin ahunge. Khaodip ponsil koima lut ding aphal loujeh-un leng inpia alut poi. 3 Lengpa thuphondoh kisseidohna gamkai jousea, Judate lah a lunghem ka ogin thong akijai, Judate an ngol le kap le lunghemin aum’un, atamjonkhaodip pon dil’in vutvam lah a akijamtauve. 4 Mordecai umchan hi nukiso ho le Esther aseipeh phat’un, alung gim lheh jenge. Khaodip pon kheldohna dia Mordecai hi ponsil athot vangin, Mordecaiyin akilah dehpoi. 5 Hichun Estherin alhacha dia lengpan akoipeh, leng inpia nukiso, Hathach chu akouvin, ipi jeh a Mordecai chute chon ahidol photoh din asoltai. 6 Hathach chu Mordecai umna, khopi ningkoi, leng inpi lutna kotphunga achei. 7 Thilsoh chengse Mordecaiyin aseipeh-in, Judate akithagam le leng inpi thil kholnaa Hamanin akoilut nom sum jat jong aseithai. 8 Judate kithagamna dia Susa khopia kona kihomdoh thuphondoh lekha jong pheng khat Hathach apei. Mordecaiyin Hathach hin lekha chu Esther koma apeh a, aumdol hilchet’a, chule Esther asol’a amite chunga lengpan hepina anei theina dia ngeh didn aseipeh-e. 9 Hathach chun asei bangin abol’in, 10 Estherin ma Mordecai henga thu lethah kit dingin asol’in, 11 “Numei hihen pasal hile, kou louva leng inpi sung gil’a lut tapou chu thi jeng ding ahi. Hiche hi Danthu ahin, lengpa thumop ho apat gamkai mitinin ahet cheh ahi. Hiche danthu peldohna ding lam khat aumin, lengpan aleng tenggol adop khumpa vang sohcha ding ahi. Ahinla lengpan eikou louna hi lha khat jen alhingtai,” ati. 12 Mordecaiyin Esther thu thot amu phat’in, 13 gihsalna thu alethot’in, “Leng inpia naum vangin Juda dang sangin hoidoh nang tin kinep dan. 14 Hitobang phat’a hi naum thim le van a konin Judate kithopi ding hunga, huhhinga um tei diu nang vang nathi tei ding, napa khanggui bei ding ahitai. Kon ija ahet’em, ijem itile hitobang phat hung lhun ding jeh alengnua napan khat jong hithei tah ahi!” ati. 15 Estherin hiti hin Mordecai adonbut’in, 16 “Susa khopia Judate gakhomin lang, kei din an ngol’in neitaoeh-un, nithum l ejanthumin neh le chan bolda jengun. Kalhacha nu-ngahho le kenjong chutima kabol diu ahi. Chujoule, Danthu to kikal hijeng jongle, lengpa koma kalut ding, kahtilo jeng idng hijongle kathi mai ding ahi,” ati. 17 Mordecai akipatdoh-inEsther sei jouse aboltai.

Esther 5

Esther lengpa le Haman annea akou

1 A-an ngol nithum lhin nin Estherin leng pochol sil’in, leng inpi sunggil’a lut’in, laltouna indan sung, laltouna touvin, kotphung lam ana ngai. 2 polam a lengnu Esther ding amudoh phat’in alung lhaiyin, sana leng tenggol agadop sangpeh tai. Esther ahung lut paiyin, tenggol muh agah thamtai. 3 Lengpan, “Ipi hitam lengnu Esther? Nadei dei seiyin kapeh ding nahi, kalenggam keh khat hijongle it poge,” tin aseiye. 4 Estherin, “Lengpan pha nasah le, tuni lhah teng lengpa le Haman nehkhom golvah kabolpi nom’e,” ati. 5 Hichun Esther golvah ankong umpi din lengpan Haman kinloitah-in agah kouve. Hiti chun lengpa le Haman Esther gaovahna ache lhontai. 6 Ju anop thim phat’in lengpan Esther jah a, “Nadei dei kapeh ding nahi, seiyin. Kalenggam keh khat geiyin thum jongle chun penange,” ati. 7 Estherin, 8 “Lengpa nalung lhai dingle, jing teng jong le hitobang golvah khat bol kit ing ting, Haman to neihung lhah peh kit lhonin. Chuteng kadei chu sei nange,” ati.

Hamanin Mordecai tha dia agot

9 Haman kipah tah-in golvah mun dalhan achedoh tai. Ahin leng inpi kulpi kot phunga Mordecai ajotpa teng, jabolna dingdoh louva aumji le along hang behseh jengin ahi. 10 Hijongle akitim nah nah-in in lam ajon’e. In a aloi agolte akoukhomin, ajinu Zeresh geiya pang din akouvin ahi. 11 Amaho hi ahao natsatje avetsah-in, hoitho tah-in chapa tampi aneile, lengpan panmun lena akhandoh thu, lengpa vaipote lah a thupipen ahidol jouse seiyin akiletsah-e. 12 Hamanin, “Ipi dang ngai nalaiyem? Lengnu Esther geiyin kei le lengpa bou golvah ankong um din eikou lhonin, jinga din jong eikou kit nalai lhon’e. 13 Ahivanginla leng inpi kulpi kotphunga Juda mi Mordecai tou kamu jing laisen, hichengpi jong hi imacha ahipoi,” ati. 14 Hichun ajinu le aloi agolten, “Ahi, thingpel metre somni le ni sang khat nasema, jingkah teng lengpa koma Mordecai khailih dia naseile iti-am? Chutile lung nom a golvah ankong naum thei ding ahi,” atiuve. Aseiyu chu Hamanin thilphan agel’in, thingpel chu asemtai.

Esther 6

Lengpan Mordecai thupi tah a abol

1 Janin lengpa ihmu mon aumtan, hijeh chun leng gamsung lekhabu jouse asimpeh diuvin angeh tai. 2 Asimpeh nauva chun lengpa indan kotpi ngah a pang, leng inpia nukiso te ni, Bigthana le Teresh-in lengpa athagot lhon, Mordecaiyin aphondoh thusim jong apangkhai. 3 Hichun pengpan, “Hiche aboljeh a chu itobang gunchena le kipaman Mordecai hi kipetam?” tin adongtai. Asohten, “Mordecai imacha jong akibolpeh khapoi,” tin aseiyui. 4 Lengpan, “Leng inpia hi kavaipote khatbeh um’uvam?” tin ahol’e. Hichepet tah hin Haman leng inpi hongcha ahung keiye; Haman hi asemsa thingpel chunga Mordecia khailih ding thu lengpa koma sei dia hung ahi. 5 Asohten, “Haman aumin, kimupi din na-ngah-e,” atiuve. Lengpan, “Hinpui lut’un,” ati. 6 Haman ahung lut chun lengpan, “Jabol dia kadeitah mi khat aum’e. Hitobang mi chu i-kalo ding lom ham?” tin adonge. Haman akigeltoh masan, “Lengpan hibanga ajabolnom hi koi ahidm? Kei hitei veh tang, ati. 7 Hiti hin Hamanin lengpa jah a, “Nangin nasilji mong mong leng ponsandup chol chu galahsah-in lang, 8 leng kijepna sanajem ho chu nasakol jepan, 9 chuteng namihat lah a hatpen khat’in hitobang mi chu jem hen lang, sakol chunga toudohdah hen, aman sakol kaile hen, khopi dung lhungsoh keiyin mihatpa hin, ‘Veuvin, veuvin, lengpan jabol’a kipaman apeh pa hi!’ tin sam le le hen,” ati. 10 Chutah-in lengpan Haman jah a, “Leng ponsandup chol galan, sakol gakai loiyin, chule hiche Juda mi Mordecai khu hitobang chun jabolna neiyin. Nasei jouse chu ama din bol jengin. Leng inpi kulpi kotpuhnga tou jing ahi,” ati. 11 Hiti chun Hamanin leng ponsandup chol alan, sakol agakaiyin, ponsandup chol Mordecai asilpeh-in, sakol chunga Mordecai atouvin, Hamaninkhopi dung lhungkeiyin akailen, achepum lhonin mipi jah din, “Veuvin veuvin, lengpan jabol’a kipaman apehnom mi chu iti abol hitam!” tin asamle lei. 12 Haman jum behseh a mai pon a jel’a in lam ajot chun, Mordecai leng inpi kulpi kotphunga ache kit’e. 13 Haman chun thilsoh jouse ajinu le aloi agolte koma aseitai. Ajinu le aloite michingtah tah hon, “Mordecaiyin nathaneina achulhah pan ahitai. Juda mi ahin, najo louhel ding ahi. Aman najotei ding ahi,” atiuve.

Haman athau

14 Amaho akihou nalaiyun, leng inpia nukisoho, Esther ankong um dia Haman pui din ahung paitauve.

Esther 7

1 Hiti hin lengpa le Hamanin Esther to 2 aniveina nakong aumkhomtauve. Ju anop thim phat’in lengpan Esther adongkit’in, “Lengnu Esther, ipi nadei ham, tun seitan? Seiyin kapeh ding nahi. Kalenggam keh khat hijongle penge,” ati. 3 Lengnu Estherin, “Lengpan neinop peh dingle nemhaova ka-ngeh nom chu kei le kamite hinghoina ding kadeiye. 4 Kei le kamite hi thagam dia johdohsa kahitauve. Soh a kijohdoh mai hiuving, ima dang thu umlou hile, umthim a nang suboi lou didng kahi; tua vang hi kabonchauva suhgam a, suhmang ding kahitauve!” ati. 5 Chutah chun lengpa Xerxes chun, “Hitobang thil bolngam ding chu koi hiya, ama chu hoiya um ham?” tin adongtai. 6 EStherin, “Eihehseuva kamelmau, hiche migiloupa Haman hi ahi!” ton akoh tai. 7 Lengpa lung hangval’in akipatdoh-in, indan sung dalhan, leng inpi polam honleiya agavah lei. Lengpan talen amatsah tei ding amudoh phat’in Haman aumdenin, lengnu Esther koma ahinghoi teina din atao tao jenge. 8 Ahepi teina dinEsther jalkhuna akisep lhun ataove. Hichepet tah chun honleiya konin lengpa ahung nungkit’in insung ahunglut’e. Aumchan amudoh phat’in lengpa akisenjah jengin, “Hichepa hin kaleng inpi sung jenga jong, kamitmu changtah a lengnu geiya suhset aot hitam?” tin aseitai. Lengpan asei jou lou laiyin nukiso hon Haman luchang atom paitauve. 9 Nukiso ho lah a Harbonah chun, “Nahuhhinga Mordecai thana din Haman hin thingpel semsan a-in a akoiye. Thingpel lentah, metre somni le ni jen sang ahi!” ati. Lengpan, “Ama khailih nan ganeiyun!” ati. 10 Hiti hin Mordecai khailihn adinga asemsa thingpel a chun Haman akhailih-un, lengpa jong alungdamtai.

Esther 8

Judate kihonna galsat ding aseipeh-u

1 Hiche nikho chun lengpa Xerxes chun Judate melma Haman thille lo, neile gou abonchan Esther apetai. Mordecai apa-ngah ahichu Estherin lengpa aseipeh-in, hichea pat hin Mordecai lengpa koma alut theitai 2 Lengpan Haman khut’a anunglah, akhutjem, mohor umna chu asut lhan Mordecai apetai. Estherin Mordecai chu Haman neile gou jouse chingtup din akoitai. 3 Esther lengpa khophangbul;a lhun akap’in, Agag chilhah Haman thilse gon, Judate thagam dia agot chu suhtangna dia thil khatbeh bolsah din a-ngeh tai. 4 Lengpan Esther din leng tenggol adop khumin, amanu dingdoh-in aseitai, 5 “Lengpan pha nasah a, kei thi ding nadaa, dih nasah le, Agag chilhah, Hammedatha chapa Haman thupeh, leng gamsunga Judate thagam dia thupeh aneisa suh tangna din thuphondoh khat sodoh le chun kati. 6 Hitobang manthahna kamite chunga lhunga ka-inkote geiya kithagam ding chu iti kathoh ding hitam?” ati. 7 Hichun lengpa Xerxes-in lengnu Esther le Juda mi Mordecai jah a, “Ve-lhonin, Hamanin Judate thagam agotjeh-in kakhailih-in, anei agou jouse Esther kapetai. 8 Lengpa min a thuphondoh kisema leng mohor kinam khum vang chu kikhel theiponte, Judate vang chu nadei deiya lekha nathot thei lhon ahi; kei min a najih lhon a leng mohor nanamkhum thei lhon ahi,” ati. 9 Lha thum lhinna, Sivan lha, nisom ni le nithum nia hiche hi soh ahi. Mordecaiyin lengpa lekhajih ho akoukhomin, Judate le gamvaipote, vaibolte, India pat Sudan gei gamkai ja khat le somni le sagi sunga athot’ui. Lekhaho chu agamkai pao le lekhajem cheh, Judate din jong Judate lekhajem le apaovun ajihsoh keiyui. 10 Mordecaiyin lekha thot ho chu lengpa Xerxes minin ajihsah-in, leng mohor anamkhumsoh keiye. Lekha thot jouse chu leng sakolbuh a kihen, sakol jangkhai cheh mangin mi atousah-in agahopsah sohkeiye. 11 Hiche lekha thot hoa kisei chu-khopi jousea cheng Judaten akihuhdoh na diuva pangkhom thei din lengpan aphalpeh-e. Gamkai hoilai hihen, itobang manchah choi min hindel khum’u jongle, asat thuh-uva, numei chapang geiya athagam diu, khatcha hing hoi louva, anei agou jouseu geiya akichom diduvin aseiye. 12 Hiche thugahna hi lha somle ni lhinna, Adar lha, nisom le nithum ni, Judate thagam pumpia manchah dia kisei ahi. 13 Athu hi pondoh a Danthua pang ding, gamkai jousea mitin hetsah ding, hiche nikho chule Judate amelmateuva akihuhdoh theina diuva, kigingsa aumna diuva seipeh ding ahi. 14 Lengpa thupeh-in sakol themte leng sakol chunga atouvun, jangkhai vel’in alhaitauve. Thugahna chu munpi pen Susa khopia jong japi ahetsah-ui. 15 Mordecaiyin leng inpi dalhan, leng pon loupe, adumle akang, tupat ponnem sil’in, lallukhuh loupe tah khuh-in akondodh tai. Susa khopi sung kipa ogin athongsoh hel’e. 16 Judate din kipa lung olle, nopna chule galjona lungthin aumdoh tai. 17 Khopi jouse le gamkai jouse, lengpa thuphondoh kisimphah na jousea, Judaten toh bangin kipa golnop abolsoh keiyui. Dihtah-in midang tampi jong Juda mi asoh gamtauve. Ajeh chu mijousen aginlo tauvin ahi.

Esther 9

Judaten melma asuhgam

1 Leng thuphondoh manchahna ding, Asar lha, nisomle nithum ni amelmateuvin Judahte matchom agot niu ahung lhungati. Ahinla Judahten amaho ajolotauve. 2 Leng gamsung, Judate chenna mun jousea, asat diuva kigochanto kisat jeng din Judate akikhomtauve. Muntin a min Judate akichauvin, koiman adehjou tapouve. 3 Tahbeh-in, Mordecai aginjeh-un, gamkai vaipote le, gamvaipo ho, vaibol ho chule leng thalhenga antong jousen, Judahte apanpi cheh tauve. 4 Lenggam pumpia, leng inpia Mordecia thenai, aneibe cheh cheh thudol akithangsoh tai. 5 Hijeh chun Judahten amelmateu alo nom nom alo thei tauve. Chemjam choiyin adekhum’un, asat chap jenguve. 6 Munpi pen Susa khopi sung jenga jong Judahten mihem ja nga athat’uve. 7 Amitha lah-uva Judahte melma, Hammedatha chapa Haman chapate som khat jong apangun, 8 Parshandatha, Dalphon, Aspatha, Parmashta, Arisai, Asidai, chule Vaizatha ahiuve. 10 Thilkeo ima vang achomtapouve. 11 Hiche nikhoa Susa khopia mihem kithah jat chu lengpa aseipeh-uve. 12 Lengpan lengnu Edther jah a, “Susa khopi sung jenga jong Judahten mihem ja nga athat’un, Haman chapa som khat jong apangtai. Gamkai dang danga ijat i-alo dda diu ham! Ipi nadeibe nah laiyam? Namu thei ahi. Seiyin, namu jeng ding ahi,” ati. 13 Estherin, “pha neisah peh dingle, thunia abol banguvin Judahten jing jongle bol kit tadiu hen. Chule Haman chapa som khat chu thingpel a khaisang din noppeh-in,” ati. 14 Lengpan hiche jong hi aphalpeh-in, Susa khopi sunga thuphondoh khat ahomjaltauve. Haman chapa som khat long chu japi vet din aphoujah tauve. 15 Adar lha nisomle nile nin, Susa khopia Judahte akikhom’un, khosunga mihem jathum jen athabe kit’ui. Thilkeo vang achomdeh kit pouve. 16 Gamkai jousea Judahte jong akikhom’un, akihuh cheh tauve. Avetdauva pang mihem sang som sagi le sang nga athat gam’un, amelmateuva konin aongthol tauve. Thilkeo ima vang achompouve. 17 Hicheng chu Adar lha nisomle nithum nia thilsoh ahi. Ajing nikho, nisomle nili nin vang mi athabe tapouvin, kipa golvah nikhon amangjo tauve. 18 Susa khopia Judahten vang nisomle nithum, nisomle ni nga nia ahaijeh-un, nisomle ni nga ni choldo nin amanguve. 19 Hijeh a chu khote dunga cheng Judahten Adar lha nisomle nili ni hi kipa nihtnega amanjiu ahin; golvah bolna le khat le khat neh le chah kipetou ahi.

Purim kut

20 Mordecaiyin thilsoh hicheng hi ajihdoh-in, Persia gam pumpi, gamla naiya cheng Judahte jouse athot’in, 21 kumseh le Adar lha nisomle nili ni, nisomle ni nga ni nithenga anit diuvin aseipeh-e. 22 Hiche nikhote nia hi Judahten amelmateu athagamu ahi; hiche lha hi lung gim hesoh a kona kipa nopna kiheidohn alha ahi. Hiche nikhote ni hi golnop kut le anlhung nehna, neh le chah kithah toa, vaichate anthahna nei din aseipeh tai. 23 Judahten Mordecai thupeh ajuiyun, hiche golnop hi kum vanlhah kut’in aumdoh lo tai. 24 Judahte melma, Agag chilhah, Hammedatha chapa Hamanin Judahte suhgamna din Purim kiti mangin phun anasanin, nikho hoipen a suhgam didn ahol’in, thagam hel din anagoi. 25 Ahivangin Esther lengpa koma alut’in, lengpan thugahna asemin, Judahte bolna sia thilgon chu Haman chungjoh a achuh lon, amati acahpate ti thingpel a akhaisoh tauve. 26 Hijeh a chu hiche nithengte ni hi Purim kisah lo ahitai, Mordecai lekha thot ho jeh le achunguva thilsoh ho jal’in, 27 Judahten Dan akisem lo’uvin, amaho tah le atu achateu, koi hile Judah mi hung hithei, Mordecai thupeh dungjuiya kumseh le aphat phat cha hiche nikho teni ho nit jing din aboltauve. 28 Kinoptona asem’un, Judah insung mite jousen, akhang khanga, gamkai jouse le khopi jousea, ahung lhun phat tin a, Purim nikho te ni hi geldoh a nit jing din aseitauve. 29 Lengnu Esther, Abihail chanu le Mordecaiyin jong lekha ajih lhonin, masangjep a Mordecia sutse Purim thudol asei chu, thalhingset’in namdetna anei lhontai. 30 Hiche lekha chu Judahte jouse athot’un, atobng cheh chu Persdia lenggam gamkai ja khat le somni le sagi sunga athotsoh hel’ui. Lekhaa chun Judahte lah a cham le lungmon len ding akiseiyin, 31 Lungkham lunghem a an ngol’a nit dia kisei bang banga, aphat phat cha Purim nikhote ni chu amaho le atu achateu geiyin anit diuvin aseipeh lhon’e. Hiche thupeh hi Mordecai le Estherin asei cheh lhon ahinai. 32 Estherin Purim nit dol Dan kisem namdetna anei chu lekhajol khat’a akisuntai.

Esther 10

Xerxes le Mordecai loupina

1 Lengpa Xerxes hin gamgil lama chengho hihen, Twikhanglen pang dunga cheng ho hileu-agamsung pumpia elbol natoh tohsah ding abol cheh-e. 2 Thil loupe le mingthang abol ho, Mordecai tohmun len a akhandoh thusim lhingkeiyin Persia le Media lengte thusimbua akijihsoh keiye. 3 Judah mi Mordecai chu lengpa Xerxes bantah ajauvin adei cheh-ui. Anam mite phatna dingle atu achateu lungmon theina ding jeng anatonge.

Job 1

Satanin Job apatep

1 Uz gamsunga Pathen ginga tahsan Job anachengin, chondih tah ahin, thilse bol louhel ahi. 2 Job’in chapa sagi le chanu thum aneiye; 3 kelngoi sang sagi le sa-ngonsao sang thum, bongchal sang khat le sa-ngan ja nga aneiyin, soh tampi avul’in, niso lama mihao pentah ahi. 4 Job chapate aban banin kilhan golvah abol jiuvin, adang ho hung lhasoh kei ahiuvin, asopiu numei thum jong akou jiuve. 5 Golvah boljou jingkah teng Job jingpi tah-in athouvin, achate suh theng nadin kilhaina aboljin ahi. Job geldol’a achate khattouvin hetoh louva Pathen a-enghoukah diu agin mo ahi. 6 Ni khat van mite Pakai anga ahung kikhop nauva Satan jong alah-uva apange. 7 Pakaiyin Satan jah a, “Hoilam galhah nahim?” atileh, Satanin, “Leiset chung kalhah len, dung le vaiyin kachon len, tua hikoma hung kahi,” ati. 8 Pakaiyin, “Kalhacha Job chu namum? Ama banga kitah le pha leiset chunga midang aumpoi. Aman chibai eiboh jingin, thilse pou pou bol louhel ahi,” ati. 9 Satanin, “Job’in ajeh beiya Pathen agin beh ham? 10 Nangin ama le a-insung mite chule anei jouse vettup peh jing chu. Anatoh jouse phatthei naboh-in, gamsung pumpi agancha nadimsah tai. 11 Tun ijemtin anei jouse lah peh le chun namai change nagaosap ding ahi!” ati. 12 Pakaiyin Satan jah a, “Aphai, anei jouse khu nanop nop gallon, ahinkho vang nasuhset thei lou idng ahi,” atileh, Satan akondoh paitai.

Job chate le aneijouse kisuhmang

13 Ni khat Job chaten a-upa pen’u in a golvah abol pet tah-un 14 solle khat Job henga ahung lhaijel’in, “Bongchal hon lou kakaiyun, akoma sa-ngante kavah-un, 15 het man louhel’in Sabea miten eihin del khum’un gancha jouse akitol mang tauve. Kei tilou nasohte jouse jong athat gam’un, kachangseh a hung jamdoh a hiche kaseipeh nahi,” ati. 16 Solle pan thu asei chai hih laiyin, lhacha khat ahung lhung paiyin, “Kelngoite le kelngoi ching ho keh’in asep lihsoh tan, kachangseh a hung jamdoh a kahungseipeh nahi,” ati. 17 Aman asei chai hih laiyin, lhacha chomkhatma ahung lhungin, “Chaldea sepai loi thum jenin eidel khum’un, kei tilou nalhachate athat gam’un, sa-ngongsao jouse akai mangun, kachangseh a jamdoh a nang kahung seipeh nahi,” ati. 18 Aman jong asei chai hih laiyin, lhacha khat ahung lhung pai kittan, “Nachaten a-upa pen’u in a kut abol laitah-un, 19 gamthip laiya konin khopi hui ahung langin, ain asem lhun, nachate adel lih soh tai, kachangseh a hung jamdoh a, nang kahung seipeh nahi,” ati. 20 Chutah chun Job akipatdoh-in, aponsil jouse abottel’in, asam avou chaiyin, tol’a amai asulut’in ataotao. 21 Job’in, “Sagoh keova peng kahin, sagoh keova kathi ding ahi. Pakaiyin eipeh ahin, Aman akilah kit ahitai! Nun nom hen Pakai min!” ati. 22 Thilsoh hijat jeh hin Job achonse deh pon, Pathen jong amosopoi.

Job 2

Satanin Job apatep kit

1 Pakai angsunga van mite ahung kikhop kit phat’uvin, Satan jong alah-uva apange. 2 Pakaiyin Satan jah a, “Hoilam galhah le nahim?” ati. Satanin, “Leiset chung kalhah len, dung le vaiyin kachon len, tua hikoma hung kahi,” ati. 3 Pakaiyin, “Kalhacha Job chu namun? ama banga kitah le leiset chunga midang aumpoi. Chibai eiboh jingin, thilse pou pou bollouhel ahi, ajeh beiya suhmang dia nagot’a nabolset soh tah vangin, Job alung lha hih laiye,” ati. 4 Satanin, “Mihemin ahinna ding pou pou ahileh imacha dalhah lel neiponte. 5 Tun atahsa khu natsah temin, namai changtah a nagaosap jeng ding ahibouve!” ati. 6 Pakaiyin Satan jah a, “Aphai, Job khu nanop nop nalo theiye, thavang that thei pon nate,” ati. 7 Pakai koma konin Satan apotdoh-in, Job chu apum alongin aphahsah soh hel tai. 8 Job akipatdoh-in vutbouva agatouvin, bel hal khat’in atipat lai ho akhot khot jenge. 9 Job jinun ajah a, “Tugeiya jong lung lhadeh lou nahi ong? Pathen chu gaosap’in lang thidoh jeng tam-em!” ati. 10 Job’in ajinu jah a, “Na-ngol thubuh nasei ham! Pathenin thilpha eipeh laisea ikipaa, thilse eipeh teng akiphin ding ham?” ati. Genthei hesoh chujat athoh vangin, Job’in Pathen dounan thu cheng khat cha aseipoi.

Job golte hung

11 Job hin gol thum aneiyin, amaho chu Teman khoa Eliphaz, Shuah gama Bildad, chule Naamath gam a Zophar ahiuve. Job hesoh genthei khohje ajah phat’un, alha mon din ahung kontauve. 12 Gal’a pang a Job ahin mu vangun, alim amel ahedoh thei tapouve. Ahetdoh phat’un aponsil abottel jengun, lung natah-in aluvum lam’uva leivui aleh thang’un, othongje jun akaptauve. 13 Anat hesoh behseh jeng amudoh phat’un, ni sagi sungin sun le janin atoupiuvin, a-uhpoh apaosa aumpouve.

Job 3

Job Pathen koma kiphin

1 Akhon nan Job apengjah-in apen nikho agaosap tai. 2 Job’in, 3 “Kapen nikho gaosap chang hen, Kakijil jan chu gaosap chang hen! 4 O Pathen, hiche nikho chu thimpi jinsah-in, Sumil del’in, kho vahsah da hel’in! 5 Muthim lhangkhal kiheh hen, Mei jing hen, nihu kilah da hen! 6 Kakijil jan chu kum sungin simtha dan, Kisimtha kit da hel hen! 7 Jan lunghem jan hisah-in, Lhaset jan hihen! 8 Kapen nikho chu gaothem hon gaosap hen, Levithan phin hang thei hon phin hang hen! 9 Jing valpa vahsah dan, Hiche jan chu khovah mon um hen! 10 Hiche jan hin eipensah jeh-in gaosap’in, Genthei hesoh eithohsah jeh-in gaosap’in 11 Kanu oisunga kathiden a, Kalong damsa ahung penlhah leh itim? 12 Idia kanun pheichunga eina pom’a, Idia noitwiya einavah ham? 13 Chulaiyin anathi ta leng, Tua kicholdo taing! 14 Leng inpi sapha leng le lalte to Lumkhom tange! 15 Chutileh sana dangka indim dim akoi, Leng le lal chapate toh lumkhom inge! 16 Nimel lhamel mu manlouva Chalam a eikipai tading! 17 Vuikhuh a migilou agilou tapon, Thacholte acholdotai! 18 Lhankhuh a sohchangte jong a-oltan, Songkul ngahpa hutot jong ajatapouve! 19 Milen mineo aumkhomsoh keiyun, Sohho jong achamlhat tauve. 20 Idia mihem hesoh gentheiya hinga, Lung nguiyan khovah amu ham? 21 Thikal angah lel lheh jengun, athimo hel’ui; Neile gou sangin buikhuh adeijo’uve! 22 Thia akivuidoh masangsen Nom asadeh pouve! 23 Akhonung thuu Pathenin aimpeh-in, Jet le veiya aumkimsoh tai! 24 Neh le chah khel’in lunghemin ka-umin, Gim genthei kathoh jinge! 25 Kaginpen thil’in eiphan, Katijatna penin eilhun dentai! 26 Lungmon le choldona kaneipoi, Kagentheina abei thei tapoi!

Job 4

Kihoulimna masa

1 Eliphaz-in Job jah a, “I-khat kiseileh ngaidan natem? 2 Paopoh louva umna thei la Nahitapon! 3 Mi tampi nahildoh-in, Lhasamte bantha nahatsah-e! 4 Cholle nanga kisep lhu jouse Natilkhouvin nahatsah me! 5 Genthei nan naphah phat’in Imacha dou thei louvin na-um’e! 6 Pathen ginga manabei nahin, Kisonna le kinepna nanei ding dol ahi! 7 Phate chan gel temin, Hoikom pen a midih-in manthahna atom? 8 Keihet’in vang thilse louma gut’a gut, Thilphalou muchi tua tun aga akilo teiye. 9 Hitobang mite chu Pathenin khopihui semmang abahsah jie. 10 Migiloute sakei banga akisenlet lut vangun, Pathenin ameh thipjin ahau avopusoh jie. 11 Neh ding sahing kimat jou lou sakeite thigam, Anoute vahcheh bangin aum’uve! 12 Thip beh chan thu khat ahung lhungin, Guh thim chan kajai! 13 Ihmutlan a singdel bangin Kahung kinkhangin; 14 Kakicha behseh jengin, Kapum changing kakithing thinge! 15 Kamai ahung kijep dap hoiyin, Katimul athousot’e! 16 I-khat ahung ding jang keiyin, Kavet vangin kamuchen theipoi. Athip del jengin, Chuin ogin khat kajai! 17 “Pathen mitmua them chang ding koi hiya, Asempa angsunga theng jou ding koi ham? 18 Pathenin vanmi alhachate jong aging chapon, Avantilte themmona jongaphoh jie! 19 Leiset a kisemdohho aginchat dia nabol’a, Nget banga thin lhah thei leivuiya kisem chu aginchat ding ham? 20 Jingkah a damseh mihem chu, Hetman louva nilhah kah a thi thei ahi. 21 Ahinlose akilahpeh teng, Ngoljeh-in mihem athiji tai,” ati.

Job 5

1 “Kouvin Job, koiham nahou ding? Nakiheina ding Vantil hoipen ham? 2 Lung gim hesoh nathipi ding vang, Pannabei ngol hoitah ahibouve. 3 Mi-ngol lungmong tah a um kamun, Hetman louvin ka-in gapsah jie! 4 Achapateu ameidoi gam’un, Thutann aphunga ding ngam jong aumpouve. 5 Lingle khao lah a keh jongle, gilkelten mingolte lhoga akilon; Midang chahten agou adei chauve. 6 Thilse hi tol’a hungkeh ddoh ahipon, Gentheina jong Leiset’a hungpeng ahipoi. 7 Meilhum sunga kona meisi alentou banga, Gentheina hi mihemin akiboldoh ahibouve. 8 Kei hivang leng Pathen heng jon ing ting, Kachung thu akoma sep lhang’e! 9 Athilbol loupitah tah ihekhen pouvin, Thil kidang abolla simjou ahitapoi. 10 Leiset chunga go ajuhsah jin, Loulai dung twi achap jie. 11 Miham domsanga, Lunghemte lhamon chu Pathen ahi. 12 Aman doha thuh ho htilgon asunoh-in, Imacha amolso sah hteipon; 13 Kichihsah ho achih nauvin amanin, Angaito jouseu asubei loijie. 14 Sun chang laiyin khon ajinden’un, Janlai bangin akimai leuve! 15 Pathenin vaichate ahinson, Bolset’a um milhasamte ahuhdoh jie! 16 Migiloute aphoh thip’in, Vaichate akinepsah-e! 17 Pathenin asuhdih thei mihem chu anun nom’e, Napho teng nagida hih-in! 18 Pathenin mi amavona atomjol jin, Navohna chengse aboldam jinai! 19 Gupvei jen hahsatnaa nahuhdoh ding, Sagi geiyin vang thilsen phapon nate! 20 Kel lhah teng jongle nahinso ding, Gal’a jong nathisah ponte! 21 Pathenin koima houset sah pon natin, Manthahnan phajongle chun huhdoh nannate! 22 Pumhat le kel nanuisat ding, Gamsa hang jong ging pon nate! 23 Hollei lah lhou khapon natin, Gamsa hangin jong sesepon nate! 24 Naponbuh a lung monga nachen ding, Nakelngoite jong ima tilou ding ahi. 25 Nason napah biha phaiha ja pha ding, Nacha nanao jong hampa jat pha ding ahi. 26 Chang minset akoi tobanga, Tehkem geiya nahin ding ahi. 27 Job kasei hi phat sotpi kasimtohsa ahi. Adih ahin, tun kisanin!” ati.

Job 6

1 Job’in adonbut’in, 2 “Ohe, kanat thoh genthei jouse Kitetoh thei leh, 3 Twikhanglen a neldi jat sangin gihjon tin, Hibanga kahansetna hi datmo pon nate! 4 Hatchungnung Pathen thalpin eikap paiyin, Athalgun eichansoh tai; Pathenin tijat jatnan eibol jenge! 5 Sa-nganin hamhing akimu teng along lhaiyin, Bongchal’in an aneh teng athip’e! 6 Koiham chiso lou anche tamne nom? Ahtui pokang khu almong nam? 7 Chu tobanga anneh kaduchapon, Kaneh jongle kaloh asoh-e! 8 Idia Pathenin kadei eipeh da a, I-bol’a kataona eihou lou ham? 9 Akhut’in eituh hen Eijep lih le ahijenge! 10 Eitha ding heleng kichom jeng inge, Itobang nat genthei thoh jong leng, Pathen thenje kahe jingin, Athupeh peh nel ponge! 11 Hinjouna ding thala kanei tapon, Athive ve ding ibol’a kahin hin ham? 12 Song tah a tah kahiya, Sum-eng lhouva lhou kahim? 13 Kihinsona thei tha kaneitapoi, Bel ding jong kaneitapoi. 14 Pathen heng he hih leng, Hitobang gim genthei teng golpha ka-ngaiye! 15 Kagol kapaiten la neilhem chavaiyun, Gotwi bei teng lhanghoh go neibahsah-ui! 16 Lhanghoh dunga buhbang alhang lhangin akisen, Thop chet chut’in akikhol’ui. 17 Kholum teng leh ajun lhan, Alon mang teng lhanghoh akeovin aumji tai. 18 Kholjin miten twi aholmo’uvin, Nelgam save vu lah a athidenji tauve. 19 Tema kon kholjinten twi ahol’un, Sheba a hungkonten mutei akinem’ui! 20 AKinepnau abei phat’in alhaseuvin, Lhanghoh go lah a akisudong’ui! 21 Keidin hiche lhanghoh gosa tobang nahiuvin, Kagenthei namu phat’un na-nung kin’ui! 22 I-khat neipeh diu kathumbeh ha, Khattou sumguh neigapeh peh diduva katem ham? 23 Melmapa akona neihuhdoh diu kasei ha, Mibolsepa a kona neilha doh diuva kasei ham? 24 Aphai, kamona iham neihil’un, Thip beh-in nasei ngaiyinge! 25 Thutah-in mi athu nuntei me, I_bol’a manlou thujeng naseiyu ham? 26 Ajeh beiya moh pen pen a neigel’um? Itiba gentheiya kasei neidonbut’u ham? 27 Chaga soh chang ho pou vang san a kihom, Nagol ngaitah tah kiveina nei nahiuve ong! 28 Neive changmel’un Jou sei ponge! 29 Naval behseh tauve, adihlou bolda jengun; Mo neichan hih-un, kadih nai! 30 Jousei bep’in neigel’un, Adih amo hekhen louva neigel mongum?

Job 7

1 Leiset mihem hinkho hi namnah a kisol sepai tobang, Thalah soh goiya kigoi tobang; 2 Che phat ni kihei ngah jing soh, Atohman ki-nga jing natong tobang ahi. 3 Lha hijat sung hi kahinlo aumpon, Jansim she-in gim genthei kathoh be be! 4 Kalup nah vnagin ihmu mon ka-umin, Khovah kal ngah lel’in kakipeh peh jie! 5 Katichung tinakhemdimin athansoh tai, Katinakhem akikhodoh leh vousan jeng ahi! 6 Kahinkho patphei kilham sangin achaljon, Kinepna beiyin abeiloi jitai. 7 O Pathen, kanopna abeitai, Kahinkho chomdan geldoh jingin! 8 Tua neimu vangin neimukit pon nate, Neive jongle chunbeipai tange! 9 Meilhang kitol mang banga Mihem athi teng hung kile kit lou ding, 10 Ama hesa jousen jong Asuhmil loi diu ahitai. 11 Ahipoi, moh umthim thei ponge, Hibanga gentheiya kilung hang Thu kasei tei ding ahibouve! 12 Twikhanglen ngapi ngap a neibol ham, Nei nga jing jeng ding? 13 Choldo din lum ing ting, Kanat ol domna ding gel’inge! 14 Hinla mangse se neimat sah-in, Mu nei neisah-in, sing neidelsah-e! 15 Hitobang nat genthei kathoh sangin, Kikhailih leng katijoi! 16 Kachim’e, kahin nompoi; Kahinlo jong aumpoi, neilimsah dan! 17 Mihem hi ija nabol’a hibanga thupia nagel’a, Idia abol chan namelchih keo ham? 18 Jingkah she-in nakholtoh-in, Phatseh-in napatep’e! 19 Kachil beh kaval manna dia Neivetda a nakihei mangle iti-am? 20 Vo mihemte Chingpa, kachonset nang dia ipi khoh am? Idia bidoiya neinei ham? Nang dia pohgih hahsa mong kahim? 21 Kachonset na-ngaidam joulou mong hiya, Kasuh khel nachulnam mo ham? Keila lhankhuh akijam loi tang ting, Neihol hol jongle chun Neiholmo tan nate!” ati.

Job 8

1 Shuh mi Bildad-in adonbut’in, 2 “Hamve vua nasei na-ngah lou li ham? 3 Patheninthudih aletun ngaipon, Itih-in jong adihlou abol ngaipoi! 4 Nachate jong chonsea hitei diu, Hijeh a chu Pathenin asuhamng ahi! 5 Hijongle hung kiheiyin, Tun Pathen henga taovin! 6 Lung theng lungdih nahileh, Pathenin hung panpin tin, Nadih man’a nanei kiledoh a Na-in kisah phat namu loi ding ahi. 7 Nanei mangjat hi imacha hilou, Pathenin napeh ding chuto tethei hilou ding ahi. 8 Golui lai chihna ho ven, Pule paten dih asah-u hi gel temin! 9 Kum lhomcha, imacha helou, Ihinkhou jong nilim kihei mang bep ahi. 10 Hijongle khanglui lai mite chihna kihilsah-in, Aseiyu nagi phan! 11 Sitwi nomna louva pengthei akeh pon, Dop lah louva akimu ngaipoi. 12 Sat lhuh amanchah thei ahi masangin jong, Twi kan teng agop masan apang’e. 13 Pathen heloute jong chu che pengthei tobang ahiuvin, Pathen asuhmil tengu akinepnau abeijitai! 14 Akinepnau achavai jin, Akison nau maimom panjang bep ahi. 15 Maimon pan a kingai leu adou jouva, Patjanga kikhaileu atuh jou ding ham?’ atiuve. 16 Migiloute sunlai loudong abangun, Honsung anche dongpha abangui. 17 Ajung kikhon song ho aveichah-in, Songpi khi kah dunga akigol dettai. 18 Hinla kibotdoh leh, Koiman akena lam jong heponte! 19 Migiloute nopna chu hiti bep chu ahin, Midangin amun alahpehji tai! 20 Mi kitah vang Pathenin adonda khapon, Migiloute apanpi khah poi. 21 Nolnabei hile chun nui heovin lhan natin, Kipa othongin thu seiyin nate! 22 Nahote vetdan tin, Migiloute in-gap diu ahi,” ati.

Job 9

1 Job’in adonbut’in, Hitin aseiye: 2 “Nasei jouse hi masanga kajahsa ahinai, Hinla Pathen maiya them chang ding koi ham? 3 Koiham Pathen to kinel thei ding? Koima adonbut joulou asang sang thudoh nei ding chu! 4 Pathen chu chingtah le hattah ahin, Koiman kidintepi theiponte. 5 Hetman louvin molsang ho atolmang jin, Alunghan teng asumangji tai! 6 Pathenin ling akihosah-in leiset akilinge; Leiset bulpi khom jouse ahot lingjin ahi. 7 Nisa athimsah jouvin, Janteng ahsite athimsah theiye. 8 Pathein van buhsona ason chun koima panpi angaipon, Twikhanglen ngapi achotphan koima athalah poi. 9 Vanlaijol ahsite, Ngambom uichal le Ngambom lungthu, bombel le Lhanggam ahsi jouse Pathen semsa ahicheh-e. 10 Athilbol loupe ho hejou poutin, Thil kidang abol jong akhonbei ahi. 11 Pathenin eihin hopa nan Kenla kamu thei hih beh-e! 12 Adei dei akilah thei, Aphoh tang ding umlou; ‘I-bol nahim? Ti-ngam koi ham? 13 Pathen alunghan teng Amelma amal tel jin; Adouva Rahab gulpi panpi jouse Asugoiyin asugam jitai! 14 Hiti ahijeh hin, Ipi seiya Pathen kadonbut thei ding ham? 15 Monabei hijong leng, Kachung thu tan ding Pathen henga chu Eilungset dia katao tho didng ahibouve! 16 Eipaosah mong jong le, Kasei ngaidin katahsangpoi. 17 Ajeh beihel’in jong eisuse din, Gopi huipi eidel khumsah bouve. 18 Hing gentheiyin eihinsah-in, Haisa theiyin eikoipoi. 19 Pumhat’a kano dingle, Koiham Pathen pumhat’a noding? Kihehpi ding kitijongle, Koiham Ama koulut jou ding? 20 Kitahle monabei kahinan Kasei chan thusen akilan, Kapaodoh chanin Kamona kaseidoh loi! 21 Monabei hijong leng khoh kasapoi, Hinjong kahin nom tapoi; 22 Moleng mohih leng imachom ahipoi, Pathenin hoijoh akhendeh poi. 23 Monabei mi hetman louva athi teng Pathenin anuisat’e. 24 Pathenin vannoi hi agiloupa apedoh tai. Vannoi thutan vaihomte mit achotsah-in, Pathen tilou koidangin Hitia abol thei ding ham? 25 Kahin nikho akitol jeng jungin, Thilpha mu man louvin ka-um’e. 26 Kahinkho kong kitol hattah abangin, Jucha man dia mu manlouva hung lenglha muvanlai abange! 27 Nui heova kanatna suhmil kagot vangin, Kagimna apong jitan; 28 Pathenin mo eichan kahen, Kichan gim genthei kathoh thou thouve. 29 Them channa chom deh lou, Ipi kakhohsah ngaiyam? 30 Buhbang twiyin kisil ing, Cha-ngel’in kisop jong leng, 31 Pathenin eh-khul sunga eileh lut’a, ponse nen sanga kibohjo ding! 32 Pathen hi mihem hileh Ddonbut’a kihehpi thei kahi. 33 Hijongle Pathen le kei kah thusei ding aumpon, Thu eitanpeh lhon ding aumpoi. 34 Talen neimatsah datan Pathen! Neihoh kichat chat datan! 35 Kalungthimin kamona kahepoi, Gin beiyin ngampel’in seiyinge!

Job 10

1 Kahin nom tapoi, Kiphin ing ting kanop nop seiyinge! 2 Themmo neichandan Pathen! Neiseipeh jon iham mo neichanna? 3 Giloutah anasemsa neidonda, Migiloute thilgon phasah hi dih nam? 4 Keiho mihem thilvet banga Nangin jong navet ngap hitam? 5 Kahinkhou chom banga Hinkho chom nahim? 6 I-bola kachonset jouse nakholsoh keiya, Kasuh khel chan namelchih ham? 7 Kathemmo loula nahen, Nakhut’a kona koiman eichulhah lou ding jong nahei! 8 Nakhuttah a neisemsa chu Nakhutma maa seisuhmang ahitai! 9 Geldoh-in leivuiya neisemdoh ahin, Leivui sosah kit neigot hitam? 10 Kapa thisan a neilhoh lhah a, Kanu naobu sunga neikijilsah ahi. 11 Kagu kachang kalhintwi nasemin, Kaguho phe le cunin natomjol’e. 12 Neihinsah-in nei ngailui, Neikhohsah jal’a ihngbou kahi. 13 Hina hichanpia hi kathemmo le, Thadoh dia guhthimcha neigot kahetai. 14 Kachonset leh ngaidam louva Suhmang din neichang lhi jinge. 15 Kachonset tih tih neibolgim jin, Thilpha bol jong leng kaphatchompi deh poi. Gin genthei leh jum le Jachat kathoh bep’e! 16 Kadinkang khen khe leh, Sakei mibolna bangin neichon lhun, Datmo mo neibol khum jin, Neimavo lo jitai! 17 Eihehse ding nanei jingin, Neilunghan jingin suhsetna thei khat nagong jinge! 18 Pathen, i-bol’a neipensah ham? Koiman eimu thei masanga thidoh hitave leng! 19 Chutileh hing man louhel’a, Naobua kona lhankhuh jonpai ta ding! 20 Thi ding koncha kahitai, Chomkhat beh nom sange, neidondan! 21 Hung kile kit lou din chevah tange, Mithim lhangkhal monmo nagam jon tange! 22 Muthim lungdon, noimigam, Khovah jeng jong muthim bep hina gam chu!

Job 11

1 Hichun Na-amath mi Zopharin adonbut’in: 2 Ngol-thubuh hijat donbut louva kikoiya, Kamtam man a mi them chang mong nam? 3 Kadonbut mou nahim, Job? Neidai chatvaiyu hi kamoh thip diu ham? 4 Nangsei bou dih nasan, Pathen vet dia thengin nakiseiye! 5 Pathen hung paodoh hen, Nahin donbut jengle katitave! 6 Pathenin chihna nahil’in tin, Mihem hetdoh theilou giltah tah aum’e. Nathoh ding sanga jangkhaijoa Pathenin talen napeh ahinalaiye! 7 Pathen thahat loupije athuh je le agilje Naholdoh jou mong ding hinam? 8 Van sangin asang jon naholdoh jou ahipon, Noimigam sangin athuh jon nahetthei ahipoi. 9 Pathen loupina leiset sanga lenjo, Twikhanglen sanga lenjo ahi. 10 Pathenin thutanna phunga kailut le chun Kon phoh lha theiyintem? 11 Pathenin pannabei jouse amun, Athilse bol chengseu amusoh-e. 12 Gamlah sa-ngan nou akivah ngoi teng Mi-ngol jong chingjep tante! 13 Lungdih pun, Job, Pathen lam sangin! 14 Thilpha lou chengse paidoh-in, Thil dihlou na-insunga koidan, 15 Chuteng mai lhaisel’a Hangtah a napan ding ahi. 16 Nagimna chengse sumil’in natin, Hohtwi kitolmang bep’a nagel ding ahi. 17 Nahinkho sunlai nisa sanga vahjoa, Muthim jeng jong jing khovah bang ding ahi. 18 Namelmate nagin lou ding, Mi tampin nang panpi ngai chante. 20 Migilouten jet le vei veu jongle Jamdohna ding lampi mupon tin, Akinepnau pen tah chu Laicha haisam chubou hitante.

Job 12

1 Hichun Job’in adonbut’in: 2 Nangho tamjo jongleur chun Nathi tengu nachihnau jong beitante. 3 Keijong nahetchanu hea, lhasam deh kahipon, Nasei jouseu min ahesoh keinai. 4 Tunvang kagol kapaiyin einuisat’un, Nolnabei adih hijong leng einuisat bep’ui; Hinla phat khat teng Pathenin kataona sang nante. 5 Hahsatna neilouva neidai thangu ahin, Thi dingkonsa kei neijep beuve ong! 6 Athahat nau Pathen banga songte Gucha le pathen heloute mongtah-in aum’ui. 7 Hetbe nom chanin ju le va kidoh-un, Chunga leng vachate le ganhing hon hil nauvinte. 8 Tol’a ganhing ho le Twikhanglen ngate Chihna kidoh-un, hil nauvinte. 9 Hiche ganhing jouse hin Pakai semsa ahiu akihet cheh-ui. 10 Asemsa chengse hinsah Pathen ahin, Mihem hinkho jong ama khut’a um ahi. 11 Naleiyin antui atekhah cheh bangin Nakhangin thu angai nom’e. 12 Tehsete aching theiyin, Ahingsot ten ima ahekhen theiye. 13 Chihna le thahat hi Pathena ahin, Thu mopthem, thil hekhen them ahi. 14 Pathenin aphet lhah teng kon asah phat’a, Pathenin songkul’a ahen teng kon alhadoh jou idng ham? 15 Pathenin twinah asipbing teng Gotwi akang jin; Twinah ahondoh teng Twisang alen ji’e! 16 Pathen hi hattah, gal lel ngailou, Mihema le alheppa ajotho cheh-e! 17 Vaihomte chihna alamangin, Lamkaite angolto abahsah-e! 18 Leng ho asu-lha jin, Sohchangin ahenji tai! 19 Thempute jong apui chavaiyin, Thahatte jong asu nemjie. 20 Son umtah miho aphoh thip’in, Upate chihna alamangjie! 21 Thuneite ajumson, Vaihomte hatna asubeijie! 22 Muthim lhangkhal kiheh lai ahoh doh-in, Muthim jinglah avahsah theiye! 23 Namtin vaipi achoi-an jin, Chuteng gal alelsah-in asu mangjie! 24 Alamkaiteu angolsah jin, Lung dongin avamangsah jie! 25 Muthim lah a akimai le leuvin, Jukham bangin alonle leuve!

Job 13

1 “Ven, hijatpi hi kamun, Kajan kahekhensoh nai. 2 Nahet jat’u kahen, Nang ho sangin kalhasamjopoi! 3 Pathen koma kiphin a Kinelpi hel ding nom kahi! 4 Joule nal’a kilep them, Panna bei Thempu jeng nahiuve! 5 Umthim beh leu chun Khattouvin michingin geljo’uvinte! 6 Ngai phauvin tun, Kachung chang thu seiyinge! 7 Idia thujou naseiyu ham? Najouthuu hi Pathen dia thilpha nagel’um? 8 Pathenchu huh dia go nahiuva, Thutanna in a kinelpi go nahiuvam? 9 Pathein nakholchil’u leh thilpha mun tem? Mihem lhep’a Pathen nalhep jou diu ham? 10 Guh thimin gingmo jongleur chun Patheninnaphosal tei diu ahi. 11 Pathen lal loupina naginlou diu hiya, Ama nakichat lou diu ham? 12 Nathuchih jouseu vutvai bep, Nakihon nau jong leipal chimbep ahi. 13 Thip chet’un kadei kagot seiying ting, Asoh soh soh jeng hen! 14 Thilo hel ding hijong leng Kagel gel kasei jeng ding ahi! 15 Kakiholpoi, Pathenin eitha thei ahi, A-angsunga kakihonna seiyinge! 16 Migilou bon Pathen angsunga pao ngamlou, Hangtah-in pang leng kahinlo thei ahi! 17 Kasei jouse ngai phauvin, Kaphondoh chan lung nachangin ngaiyun! 18 Kadih kahetjeh hin, Kachung thu sei ding kigoa kahi. 19 Mo neichan ding ham Pathen? Mo neichan dingle kihon dang ting thi tange! 20 Vo Pathen kachunga thil ni neibolpeh dan, Chutile namai kamu ngam ding ahi! 21 Talen neimatsah dan lang, Neihoh kichatsah dan! 22 Neikou masan Pathen, nahouvinge! Ahiloule ken seiyinge neihouvin! 23 Kachonset ipi pi hiya bolkel i-kanei ham? Mo neichanna ipi ham? 24 I-bol’a neidon da a, Melma banga neigel hitam? 25 Thingna bep kei hoh kichat neigot’a, Changpol gosa beo neisel khum got ham? 26 Kaneo lai chonset geiyin neiphul’in, Giloutah tah-in eihehsei! 27 Kakeng thihkhaovin nasomin, Kakho-lhah nave-lhi keiyin; Kakho-ni nung Namelchih jing jenge! 28 Hijeh chun thingmot kiloilhu kabangin, Nget nehsa ponsil kabangtai!

Job 14

1 “Mitin lhasam le panpi ngaiya peng, Hinkho chomcha, gim hesoh dimset ahicheh-e! 2 Pahcha banga pah a pulloiji, Nisa lim banga kihei mangloiji ahi! 3 Hitobang bep mi hi neivet chil’a, Neikhol’a kathu natan ding ham Pathen! 4 Mihem banga thilboh lah a Thil theng khatcha kiloidoh ponte! 5 Mihem hinkho kitepsa, lha jat kisimsa, Khelmo hel dia nasuhtohsa ahitai! 6 Ahithei le gim hesoh hinkho hi nom asahna din, Vet vet dan, limsah datan! 7 Thingphung phuhsa din jong kinep aum nalaiyin, Mit-thah kit’a hingdoh thei ahi! 8 Akungbul apkai hen, Leichunga ajung go jong leh, 9 Gotwi lhah teng akeh thah bangin dondoh-in tin, Thingtoi thah banga abah jemdoh didng ahi. 10 Mihem athi teng akichai ahitan, Athi teng hoiya um jim? 11 Twi long lai vadung kantan le Damvei lai twi kang bangin, 12 Mihem athi teng athoukit ji poi, Van kitolmang kah a mihem ihmut’a kon thou lou diu ahi. 13 Noimigama neiselmanga, Phat khat teng geldoh kit dia Nalunghan beikah a Neiselmang ding kadei lheh-e! 14 Mihem athi teng hingkit theiyam? Kenvang hesoh phat kichai, Phat pha hung lhun ding ngah jing inge! 15 Chutia neihin kou teng houving ting, Neisemsa kachunga Lung lhaitan nate! 16 Chuteng kakho-lhah melchih jong le chun Kachonset him him holdoh pon nate! 17 Mudoh jongle chun ngaidamon natin sumangtan nate, Kabol khel abonchan theh ngaim nate! 18 Molsang jouse chimsoh a, songpi lentah tah kitolmang ding; 19 Song jouse twiyin lhoh a, Songpi lentah tah tah kitolmang ding; Mihem hinkhoa kinepna jong Sumangin nate Pathen! 20 Mihem nasu-nemin, itih a din nasolmang jin, Athin amai molsoh ji tai! 21 Atu achaten gunche mujongle ahepon, Jum le ja toh jongleu ahetapoi! 22 Atahsa nat thoh lel bou ahen, Alung gim hesoh bou ahei!” ati.

Job 15

Kihoulim Nina

1 Hichea hin Teman mi Eliphaz chun adonbut’in: 2 “Michingin hita hi ahomkeova Khohui nung banga thu asei ding ham? 3 Miching koiman nasei bang aseipon, Lah theilouvin kihonna aseipoi. 4 Nadih mong le koiman Pathen ging pontin, Akoma tao nom jong umponte! 5 Nathuseiya nagitlou akilangdoh-in, Kilepdohna ding jeng thu naseiye! 6 Ken themmo kachan ngailouvin, Nasei chanin themmo nakichantai! 7 Mihem lah a peng masapen a kibol nahim? Mol le lhang hijat sanga kisem masa nahim? 8 Asemdoh masanga Pathen thilgon najah lhih ham? Mihem chihna nan gbou chang nahim? 9 Kahet louvu imacha nahepon, Kadat khen thei louvu imacha nadat khen thei deh poi. 10 Upa tehse tah a kihil ching, Napa sanga upajo koma kihil them kahiuve! 11 Pathenin nalhamon chu ida nadonda a, Lung geltah a kaseiyu nadonda ham? 12 Nalung phamo pai jengin, Mitdih mitchangin neive pouve! 13 Pathen nalunghan khumin, Nahouse se jenge! 14 Mihem hi theng jou mong ding hiya? Pahenkoma themchang jou um mong ding ham? 15 Pathenin Avantilte jong aging chapoi, A-angsunga them achangjou pouve. 16 Mihemin thilse twidonin adonin, Asea le ahomkeobou ahi! 17 Ngaiyin kahet chan Kamu chan seipeh inge! 18 Im beihel’a apu apateuvin ahil them, Thutah jouse eiseipeh tauve! 19 Agamsunguva gamchom mi alut theipon, Pathen a kona pui mang thei koima aumpoi. 20 Midang bolsea migilou chu Ahinkho lhumkeiya genthei ding ahi! 21 Tijat jatna thu jeng ajan, Nom asah pet tah-in guchan achomjie! 22 Muthima jamdoh din akinempon, Chemjam a lou dia um ahitai! 23 Muthongten athilong neh din angah jingun, Akhonung thu hahsat akihet’e! 24 Leng hattah bangin, Manthah nana del khumgoi! 25 Pathen douna khat lam a, Hatchungnung seisea Mihem chu chutobang ding ahi. 26 Hi tobang mihem chu, Kiletsah-in doumah mah abol’in, 27 Gal-lum choiyin Pathen jeng jong anakhumjie! 28 Amahin khopi jouse alan, In jouse alo teng aneiho ajam’un, Hinla hiche khopi ho le in ho hi Gal’in alah peh doh kei ding ahi. 29 Aneila umsot lou ding, haosot lou ding; Nisa lim bangin kihei mang loitante! 30 Muthima jamdoh lou ding, Mei hulgotsa thingphung le Apah jouse hui mutmang Thingphung to bang ding ahi. 31 Thilsea ngolman a kinem chun Thilse akisan ding ahi. 32 Aphat lhin kah-in gop lhan tin, thingbah gop bangin nou kit ponte. 33 Aga min masanga puljou lengpigui tobang, APah pulsa olive thing tobang ahi. 34 Pathen helouten son le pah neiponton, Nehguh a kisa in meiyin kante! 35 Thilse bol’a baotam pandoh chu hitobang ahiuvin, Lhep lhah ding bou agel’ui!

Job 16

1 Hichun Job’in adonbut’in: 2 “Hitobang hi kajahsa ahin, Neilhamon’u jong gimna bep ahi! 3 Nasei sei jeng ding ham? Ipi lunghimona neiya neidonbut kit ham? 4 Kei tobangin, nang ho tobang leng, Kalu peikhum ing ting Thu tampi kasei den ding, Nasei seiyu kasei thei ding ahi. 5 Nalhamonna diu seiya, Kamchah leuva katilkhou diu ahi. 6 I-kisei jongle aphachompon, Umthim jong leng kanat a-olpoi. 7 Ka-insung mite la nasubeisoh tan, Neichaisoh ahitai Pathen! 8 Neimanin kamelma nasoh tai, Kagu –lheng lhol bou aumtan, Hiche hi kachonset photchetnan Mihon agelsoh tauve! 9 Lung hangtah-in Pathenin einoigep’in, Midih michangin eivepoi. 10 Mihon anop agot eiseikhum’un, Eiumchah-un ka-ngeiphe abengun ahi. 11 Pathenin Pathen hephaloute eipedoh-tan, Migiloute khut’a eisep luttai! 12 Thei nop’a ki-umpet eileh kadah-in, Kalol’in eimanin eijep goiyin, Eive lhi jingin, Mitt hip tenin eibol’e! 13 Jet le vei sahle lhanga konin thalpi eikap’in, Athalchangin eidotpai jeng vangin eivoujang natpipoi. 14 Avel vel’in eimavon, Sepai ngol bangin eidel khumtai. 15 Lunghemin khaodip pon kasil’in, Leivui lah a katoutai! 16 Maisan hel’in kakap tan, Kamit kamai apomsoh tai! 17 Hinla thilse kabol pon, Kataona jong athenge! 18 Vo leiset! Kathisan vuhmang dan, Thudih ka-ngeh jong suthip hih-in! 19 Van a eidinpia Eipanpi ding khat aumnai! 20 Kagol kapaiten eihouse seuvin, Pathen koma ka-mit lhi alonge! 21 Min agol apai ding aseipeh banga Pathen henga eitaopeh ding ka-ngaiye! 22 Kakum abei hei hoitan, Thina gam kajonpantai!

Job 17

1 Haisam a thipai ding kahitan, Lhankhuh tilou imadang kaneipoi! 2 Ka-kiheina lam lam a Eidaithangun kadoujou tapoi! 3 Monabei kahi kasei neilahpeh-in Pathen! Eiseihu ding koima aumtapoi! 4 Alungthimu sumoh tajongle chun Kachunga noplensah hih hel’in! 5 ‘Agol apai lhep lhahna sumguh kilah chu Achaten mitchot lonte!’ kiti 6 Hiche thuchih hi kei housetnan amangun, Ahungun kamaiya chil eiset khum’ui. 7 Lunggim lhilonin kamit athimlon, Kakhut kakeng gu-lheng lhon keo ahitai! 8 Lungthenga kigel hi atijauvin, Pathen hephalou bangin eiboltauve! 9 Gin le ja akigel hon Themjo danin akigel cheh cheh jengui! 10 Hinla kamasanga hung idngu jongleh Alah-uva aching khat beh mudoh ponge. 11 Kanikho abeihei hoiyin, kathigon ho athontan, Kakinepna jong abeitai! 12 Kaloi kagolten janlai jong sun abahsah-un, Muthim jong kho vah loi din aseiyui! 13 Noimigam bou kakineppi ahitan, Hikoma chun muthim lah a kijam tange! 14 Lhankhuh chu pan neiying ting, Thante chu kanu le kasopinun bol inge! 15 Kakineppi ding hoikoma um a, Kakinepna thei kon amun? 16 Noimigam kajotsuh teng Kinepna neitaponge!

Job 18

1 Shuh mi Bildah-in adonbut’in: 2 “Job nang tobang nathip jengle iti-am? Sei ngaile chun kahil thei diu nahi! 3 Nangin keiho cheng hi Gancha ngol neibahsah-u ham? 4 Nalunghan chu nanatlo bep ahi. Nalunghan jeh a leiset kidonda a, Nalungdamna dinga Pathenin molsang jouse atolmang ding ham? 5 Migilou meivah kimut mit ding, Kongdoh kit lou ding ahi. 6 Migilou insunga mu athimin, Thaomei vah jong akimut mittai. 7 Golkha tah a kal ason jongle achomtan, Athilgon chengsea akipaltai. 8 Thangkol achonlut’in, Khuh sunga avah lut tai! 9 Akeng thanga a-oh den tan, thangkol a akihen-oh tai! 10 Alampia thang akikamin, Leivui akivuh khum’e! 11 Jet le vei sahle lhanga tijatna jengin, Akho-nung ajui jinge! 12 Mihao tah chunk el athoh tan, toset to akikhen tapoi! 13 Thina khop hel’in atipat’in, Akhut le akeng amonpai gotai! 14 Amonpi insunga alhop lhan, Thina angsunga akailuttauve! 15 Kat meiya akisuh theng teng, A-insunga apu louhel mi chengtante. 16 Abulbal ajung agop panin, Abah jouse agopantai! 17 Khosungle gamsunga amin thang tapon, Koiman ageldoh him him tapoi. 18 Son le pah la aneipon, Achilhah jong abeitai! 20 Niso le nilhuma ahinkho thusim japha chan, Tijan akihot lhul soh tauve! 21 Migilou, Pathen hephalou chu Hiti chih cheh ding ahi,” ati.

Job 19

1 Job’in adonbut’in: 2 “Idia neisuh lung jing jing uva, Neiseithan gdeh jengu ham? 3 Neiphin phin jengun, Neihousetnau jong najahcha pouve. 4 Bol khel nei mong jong leng, Nang ho dia i-khoh ham? 5 Keisanga phajoa kigel’a, Kagimna hi kachonsetgaa nagel’um? 6 Pathen bol kahi namu louvu ham? ka-o na ding thang eikampeh chume! 7 Pumhat’a eibol kanel vangin koiman angaipon, Thudih kakhohsah vangin koiman angaipoi! 8 Pathenin kalampi akhah-in kachepai theipon, Kalamlhah jouse asuchotai! 9 Kagou jouse eilahpeh tan, Kaminthanna asubeisoh tai! 10 Jetle vei sahle lhanga eijep chinton, Kakinepna thingboh abotdoh tai! 11 Pathenin lung hangin eidel khumin, Amelma giloupen abngineiboltai! 12 Asepaite eidelkhumsah-in, Ka-inkima apangun eiumchah tauve! 13 Pathenin kasopite eijamsan sah-in, Eihesa chengsen het louvin eiboltauve! 14 Kasopi, ka-insung mite, kagol ngaitah tah ten Eijamsansoh tauve! 15 Ka-in alhung jing maljin hon eisumilsoh tan, Kasoh numeiten hetphah lou maljin bangin eibol’ui! 16 Lhacha khat kakou jongle eihoupon, Kamdama katao jongle eidonpoi! 17 Kajinun jong kakam-ui ajanompon, Kasopiten jong einailut nompouve! 18 Chapangten nahsah mon eibol’un, Nuijat nopnan eineitauve! 19 Kagol ngaitah tah ten eivet dauvin, Ka-ngaipen tah hon eidoutauve! 20 Kagu le kavun keobou um ahitan, Kapao paojeh a hingdan kahibouve! 21 Pathenin eijep lhuh ahitai! Neivoujang natpiuvin kagolle kapaite! 22 Pathenin eibolna kah a idia neibolgim’u ham? Neibol gim nau chimlou nahiuvem? 23 Khattouvin kaseiho hi melchih din Lekhabua jihlut leh katitave! 24 Ahiloule songpheng chunga kijih pol’a Aman louna dia kajihvomsoh hel hileh! 25 Ahinla akhonna kheh a eihung panpi ding Van a khat um kahei! 26 Kavun jouse patsoh tajongleh Katahsaphea Pathen kamutei ding ahi! 27 Kamit tah a kamutei ding, Lamdang louhel ding ahi. kemeidoi lo hel tai, 28 ‘Keihon iti kabolgim beh-um?’ natijeh-un. Neidel khum theina diuvin Kamona ding nahol thu’ve! 29 Pathenin chonset satgamna alap Chemjam chu ginguvin! Thutah a khat aumdol nahetna diuva Chemjam alapji ahi!” ati.

Job 20

1 Naamath mi Zopharin adonbbut’in: 2 “Job, neilung hansah tan Kadonbut tei ding nahitai. 3 Miphinna thusei nahin, Adonbutje kahenai! 4 Khanglui laipeh, Leiset’a mihem kichensah a pat, 5 Mi phinse migilou ahingsot pon, Pathen helou jong anopsot lou nahei! 6 Migilou minthang hen, van pha ding, Van a meilah nol’in sang jongleh, 7 Huiya leivui kithe-mang banga, Ahesahon jong ageina lam ahetlou diu ahi. 8 Jan-mang banga leng mang ding, Jan-mang banga kimukit lou ding ahi. 9 Amusan jong mukit pontin, A-in mun a jong kilulah kit ponte. 10 Achaten vaichate henga thumin tin, Apau bat jouse choltah a asah diu ahi. 11 Atahsa nouchet jongleh Thia leivui sohvah ding ahi. 12 Gitlouna thu ngeitah-in sei hen, Thutah seilep le le hen, 13 Seidoh da hel hen Im mang jeng jongleh; 14 Agilpi sunga aneh jouse sentin, Gulse gu banga sesoh hel ding ahi. 15 Migilouvin aguchat gou lodoh-intin, Agilpi sung geisa jong Pathenin akhodoh peh ding ahi. 16 Migilouvin aneh chu gutwi tobang, Gul gu tobanga athipi ding ahi. 17 Olive thao luiya long amu lou ding, Khoiju le bongnoiya long vadung amu lou ding ahi. 18 Atohga chengse apehdoh soh ding, Aneile agou nopsahna anei man lou ding ahi. 19 Ajeh chu vaichate achomgamin, Nam nan mi in alahpeh-e! 20 Lung nachim tih la aneipon, Gouthil khat cha jong kholdoh ponte! 21 Aneh teng nehmoh la akhenpon, Tua hi agou beiloi didng ahitai! 22 Alolhin pet tah a hi Manthah nan atupai ding ahi. 23 Adu angai jouse nehen, Pathenin save vun hinbol nante! 24 Chemham masanga jamdoh jongle, Sum-eng thalchangin kap khante. 25 Thalchangin akap paiya athinkha akapjah teng, Thin long kangin tin, thi ding tija kihot ding ahi. 26 Agou kholsa aboncha mangthah a, Ama le a-insung mi meiyin akah vam ding ahi. 27 Vanin achonset jouse phongdoh-intin, Leiset’in adouna thu seiyinte. 28 Pathen chun lung hangtah a Agou chengse asuhmang ding ahi. 29 Hitobang thilse hi Pathenin migilou chan dia akoipeh chu ahi,” ati.

Job 21

1 Job’in adonbut’in: 2 “Kasei hi phaten ngaiyun, Chutileh neilhamon nau hijonte! 3 Kasei ngai lhauvin Chuteng atot nom nom tot’un! 4 Thi thei mihem to kinel kahipon, Umthim theihoi kahipoi! 5 Neivet’uva hi kam kisip a Thip beh a umma kahilou ham? 6 Kachunga thilsoh kagel teng, Kati ajan kithingin kakihotjie! 7 Idia Pathenin migiloute ahing hoiya, Ahaosah a ateh thisah ham? 8 Cha le tu anei jong jon’un, Akhan lhit geiyun ahingui! 9 Tijat kichat la anei khapouvin, A-in-gap kh apouve! 10 Aganchau aphat chan ajangmanin, Hahsa louhel’in anousoh jingui! 11 Atu achateu kelngoi noute bangin Alamkai le jengui! 12 Semjang kisaigin le Theile kimut gingin alam’uve! 13 Cham le lung mongin ahing lhumkeiyun, Nat genthei thoh louvin athijiuve! 14 Migiloute Pathen hohdal din agon, Ahinkhouva adeilam het ding anompouve! 15 Pathen kinbol phatchom nan agelpouvin, Ahenga tao jong iman agel pouve! 16 Athahatsan a pachangin akigel’un; Kenvang alunggel’u kadeipoi. 17 Migilouvin hahsa atojing monga, Manthah nan aphah jing mong am? Pathenin migilou chu Talen apeh jing mong ham? 18 khopi huiya changpol kithe bang le Chimpeiyin leivui apoh mang bang mong ham? 19 Apa chonset jeh a Pathenin achapa talen apeh-in naseiyin, Ahipoi, achonset akihetna diuvin amaho joh talen pejo hen! 20 Chonseten achonset mankipoh-u hen, Hatchungnung Pathen lungsat toh khau hen! 21 Mihem athi teng leh Atu acha akhohsah mong em? 22 Lengle lalte thutan ji Pathen chu Mihemin ahil thei ham? 23 Mihem abang khat nei le nga lhing, Tahsa dam theiyin, 24 Tahsa damthei leh hat’in, Adong hoi theiyin, chuteng athin; 25 Abang khatma gim genthei thoh-in, Lung gentheiyin hingin, chuteng athi. 26 Hinla hoijoh chu ahin athin akivuiyin, Thanjangten atomlhah deh-un aneuve. 27 Nalung gel’u kahen, Themmosah tei neigot’u ahibouve! 28 Nang hon, ‘Thilse bol, Milen milalpa in hoilam ham?’ natiuve. 29 Kholjinte toh nalhon khah-um? Ipi thu ahinpoh-u nahet lou ham? 30 Pathen lung hanga talen apeh nil eh, Migilo a-ongtholjo ji bouve! 31 Migilou chu athilse bol housea Lethuh ding koima aumpoi! 32 Athia phate cha ki-ngahtup Lhanphung jon a akiput teng, 33 Japi asang sangin akijot’un, Along jeng jong leiset’a ol heovin akijam’e. 34 Achutileh nanghon iti chutobanga Kahenga lhamonna thu naseiyuva, Jouthu jenga neidonbut’u ham?” ati.

Job 22

Kihoulim Thumna

1 Teman mi Eliphaz chun adonbut’in: 2 “Mihem aching chungnungpen jong Pathen dinga phachom ding hinam? 3 Nathildih bol chu Pathen dia phachom a Naphatna chu Pathen dia phachom mong nam? 4 Nakitah jeh a Pathenin talen napeh hiya, Nahougut jeh a Hatchungnungin nathu atan ham? 5 Ahipoi, nachonset val jeh leh Nathilse boljeh ahibouve! 6 Asum betjeh-in nasopi ponsil nahoh lhan, Sagoh keovin dap nathohsah-e! 7 Gilkel la an napepon, Dangchah la twi napepoi! 8 Nanei nathahat namangin, Gam pumpi chohdoh nagoi. 9 Meithaiho la nakithopi pon, Chagate jong nachom gamtai! 10 Hijeh a chu nakiheina lam lam nalhuhna ding jeng, Hetman louva kichat tijat dimset nahitai! 11 Mu athimin kho namutapon, Twisoh—innalonvuh tai! 12 Pathenchu chunglampeh a cheng hilou ham? Sangtah a kigel ahsite chunga cheng ahi! 13 Nangin, ‘Pathenin i-het’em? Meilhangin tomchah a, i-thuu tanthei ponte,’ nati. 14 Van le leiset kah a ava le nah a, Meilhangin tom a kho mulou ding nagel’e! 15 Migiloute nung nung jui dia Kigo mong mong nahim? 16 Migiloute chu athi phat lhin masangun Twisoh-in atolmangji tauve. 17 Hitobang ho hi Pathen nahsah loute, Imacha alo thei diuva tahsan lou ho ahiuve! 18 Aphat theisah-ula Pathen ahi-ngal’in, Migiloute lung gel hi kahethei hih beh-e! 19 Migilouten talen amat teng Miphale monabeite kipah-in anuiyui! 20 Migiloute nei akisumangtan, Amoh chengse meiyin akavamtai. 21 Job, Pathento kichamin lungmongle chun, Aman phatthei boh tan nate! 22 Nahilna chengse ngaiyin, Aseiho nalungthimin chingin! 23 Lungnem tah-in Pathen hinjon kit’in, Na-insung athilse kibol jouse sebeiyin! 24 Nasana jong pai mang jengin, Nasana lupen nelgum lah a vui mangtan! 25 Hatchungnung Pathen chu nasanan gel’in, Ama chu dangka kisevum bangin ngaiton! 26 Chuteng Pathen jenga ki-ngaiyin natin, Amaa kipana jeijing tan nate! 27 Natao teng nahouvin tin, Nakitepnasa nit jing tan nate! 28 Natoh jousea lolhingin natin, Nalampia khovah jingtante. 29 Kiletsahte Pathenin asu-lhan, Kineosahte achoisangjie! 30 Thildih nabol’a monabei nahileh Pathenin huhdoh tei nante!” ati.

Job 23

1 Job’in adonbut’in: 2 “Tugeiya lung himoa Pathena kiphin, Kanat thoh lel cheh cheh kahi! 3 Pathen umna kahet hihen lang, Aheng jotna lam kahet hitave leh! 4 A-angsunga kathu lhut’ing ting, kadeilamin kachungthu kisei tange! 5 Ipi eiseipeh a, Iti eidonbut ding kahenom lheh-e! 6 Hangsangin einel mong dem? Ahipoi, kasei nagijonte! 7 Monabei kahin, Pathenti kihoutoh ing ting, A-itih a monabeiyin eikoiteiyinte. 8 Pathen chu niso lam la kaholmon, Nilhum lama jong kamudoh poi! 9 Sah le lhanga na atoh jing vangin Chulama jong Pathen kamudeh poi! 10 Hinla Pathenin kakho lhah ahe jingin, Eipatep jongle kamona muponte! 11 Akhoni nung kajui jingin, Alampi ka-lho khel ngaipoi! 12 ASeichan kabol jing jengin, Ama lung lam jeng kabol’e! 13 Kikheltih neilou, nel theihoi ahipon, Abolnom suhtang thei ahipoi! 14 Eigonpeh chu amolso tei ding, Eigonpeh chu tamtah lah a khatbou ahi! 15 Hijeh chun Ama angsunga Gingkhen chan ka-um jinge! 16 Pathenin eisugim behseh jengin, Hatchungnungin eimeidoisah tai! 17 Pathenin mu eithim khumsah-in, Muthimin kamit chotlo tai!

Job 24

1 Idia Pathenin thutanna ding phat atepda a, Akinbolte them chan nikho akoida ham? 2 Migilouten gamgi song achon’un gam akeh-un, Kelngoi agu’vin akelngoihon lah a alhauve! 3 Chagate sa-ngan akai mangun, Meithai bongchal chu thilman din atunsah-ui! 4 Vaichate chan ding lom akhapeh-un, Tahlelte adeljam’un akiseltauve! 5 Hijeh hin vaichaten gamlah a sa-ngan bangin neh akihol’un, Achateu neh ding amujou tapouve! 6 Milouva neh lon chang a-at’un, Migiloute lengpiga alopeh-ui! 7 Janteng ponsil beiyin alum’un, Kihuilumna ding imacha aneipouve. 8 Molsanga kitatjal gotwi akotsoh tauvin, Songpi lim dung bel din ahol’uve! 9 Migiloute pabei naosen soh-in asem’un, Vaichate chate thilman din alauve. 10 Vaichate ponsil beiyin aumsah-un, Kel thoh pumin chang a-atsah-ui. 11 Olive thao alhoh-un, lengpiga achil’un, Amaho la dangchah athohsah-ui! 12 Khopi sunga mapua thi dingkon ho ataovun, Hinla Pathenin ataonau imab agelpoi! 13 Khova deimo mihem aum’un, Het din jong agel pouvin, jui din jong akhohsah pouve! 14 Tolthat chu jingpi tah-in athouvin, Tha din vaichate ahol’in, jan teng aguchai! 15 Numei jonpi chun khomut ave-lhin, Min amumo na din amai akitom’e! 16 Jan teng guchaten inbang aphevangun, Sun khovah teng akiselji tauve! 17 Sun khovah agingun, Muthima akichapouve!”ati.

Zophar

18 “Migilou chu twisoh-in alhoh-in, Agam leisset’jong Pathenin agaosap-in, Alengpi leiya jong Natong din akontapoi! 19 Buhbang nisan ajolsah a huiyin atolmang bangin, Chonsete jong mihing gamsunga abeijitai! 20 Anu jengin jong agelpha tapon, Thinglong lung neh bangin thanjangten anejouji tai! 21 Meithaite abolgima, chabei numei akhoto loujeh a Achunga hitobang thil shoji ahi! 22 Pathenin athanei nan mihat jong asumangin, Pathenin abol teng migilou athijie! 23 Pathenin ahinghoiya alungmon sah thei, Hinla avet lhih jing jeng ahibouve! 24 Migilou akhantou vangin, Changpal kisih tan le hampa bangin agop loiji tai! 25 Hiche hi kon aseilep theiya, Kasei ho adih louna seichen thei koi ham?”ati.

Job 25

1 Shuh mi Bildad chun adonbut’in: 2 “Pathen chu thanei tah ahin, Japin gin cheh ding ahi; Van a Alenggam sunga jong Cham alensah jinge! 3 Pathen kinbol Vantilte simjou ding koi hiya, Pathen khovah-in asalvah loukom hoilai ham? 4 Pathen angsunga dihjou ding koi hiya, Numei sung peng akoma thengjou ding koiham? 5 Pathen mitmun lha jong avah chenpon, Asite jong avah thengpoi! 6 Achutileh thanjang le lungtol tobang Mihem hi Pathen angsunga ipi hintem?” ati.

Job 26

1 Job’in adonbut’in: 2 “Vaicha le lhasam tah keima Neikithopi nau apha behseh jenge! 3 Keitobang mi-ngol hi nahetna neihil’in, Phatah-in thu neimop tai! 4 Koipen nagijou dia chujat naseiya, Kon nathumop’a hitobangpi hi nasei ham?” ati.

Bildad

5 “Lei noiya twito jouse akithingin, Twipi le asunga cheng jouse akichauve! 6 Pathen maiya noimigam jong akihongsa, Husih beiya akeova kijam ahi! 7 Pathenin sahlam vanthamjol ajamdoh-in, Leiset jong onghoma akhaithoi! 8 Pathenin twipi hi meilhangin ajeldoh-jin, Aki-ngapna meibol jeng jong apojalsah hih-e! 9 Lha jong atomjol jin, Meilhang abol khumsah jie! 10 Pathenin twipi chunga velkol ajel’in, Sun le jan ahomkhen’e! 11 Pathenin apho tengleh Vanthamjol khompi jouse kichan akithing jiuve! 12 Athahat’in Twikhanglen aphoh thip’in, Achihnan kiletsahte asu-thip’e! 13 Vanthamjol amut thengsel jin, Akhut’in gulpi kithol janglai athil paiye! 14 Hicheng hi athahat kihetna them khat, Athusa kijamai mai bou ahin, Pathen lal loupin akon ahetjou jai ding ham?” ati.

Job 27

1 Job’in aseiban ajop paiyin: 2 “Adih a thu eitanpeh nomlou, Hin gentheiya eihinsah Hatchungnung Pathen min a kitep kahi! 3 Hai theina hinna hu eipea Pathenin eihinsah laisen, 4 Thu gilou seipong ting, Thujou him him seiponge! 5 Nangho la dihsah naisai pong ting, Kathi ni geiya monabeiya kisei ding kahi! 6 Kadihna la lhaso pong ting, Lung opkaina him him jong kaneipoi! 7 Eidouva eikinahpi jousen Migilou midih lou bangin talen man cheh hen! 8 Pathenin ahinkhou athum teng Pathen hephaloute dia kinepna i-um am? 9 Gentheina hung lhun teng Pathenin atao nau ngai nantem? 10 Pathen kipana ngai chaiuvin tin, Ahenga tao jing teiyunte! 11 Pathen thahat thilbol thei hil’ung ting, Hatchungnung Pathen thilgon hilchen unge! 12 Amavang namusa cheh-u ahitan, I-bol’a ngolpao pao nahiuvam?

Zophar

13 “Migilou, pumhat’a mino chu Pathenin hitin bol’inte: 14 Chapa tampi nei jongleur galmuna thisoh ding, Ason apah jouseu vaicha tahlel jing diu ahi. 15 Ahingdoh cheng jong natset’a thia, Ajiteu meithaihon aka man lou diu ahi. 16 Migilouvin dangka simden lou nei hen, Ponsil alhuh lhuh-in sejong leh; 17 Aponsil chu miphahon kisil bep’in tin, Milungdih ho adangka chang bep’inte! 18 Migilou insah chu maimom pankai beep, Loubuh kisong bep ahibouve! 19 Haotah-in kitalle le jongleh, Athodoh teng vaichat’in tunte! 20 Tijatnan alonvuh jeng diu, Jankah a khohuiyin alhoh mang diu ahi. 21 Solam khopi huiyin A-inmun’uva konin atolmangtai! 22 Jamdoh ding agot vangun, Voujang nalouvin akhup athal’in aleh-in alhoh mangtai! 23 Ajamna lam lam’uvah asemlon len, Manthahna thei hel’in ahoh kichai!” ati.

Job 28

Chihna pachat

1 Leithao lah a dangka akilaidoh jin, Sana lhahjolna mun jong aum’e! 2 Min leiset’a thih alaidoh-in, Song a konin dah-thih asoldoh-e! 3 Min muthim lah a leinoi langpeh alaiyin, Muthim lah a songpi alaidoh doh-e! 4 Ganhing lenna lou, mihem kithahna khoh lou, Mihemin leithao lah alaiyun, Khuh sunga khaovin akikhaiyun Nunglen machop thon na atongui! 5 Leicuhnga neh thei chah thei ake vangin, Leinoi lam vnag meikouva kileo abange! 6 song lah a hin songmantam sapphire akimun, Asongdi jong sanadia jeng tobang ahi. 7 Leithao kilhaina lampi chu mubongin amukhapon, Muthong jong aleng lut khapoi. 8 Chukom lamthip’a chun Sakei hihen sahang dnag hijongleh alengkhapoi. 9 Mihemin hitobang songtah lah hi alaiyin, Molsang bulpi jong akalkang theiye. 10 Songpi lah avi nauva hin Song mantam jong alaidoh-ui. 11 Twisamphung luinah dung jong alaidoh-un. Itobang thilguh um jong ahedoh-ui. 12 Ahile Chihna hoiya kimun tin, Hetkhen themna hoiya kisimdoh tantem? 13 Mihem lah a chihna kiholdoh ponte, Koiman chihna gilje ahepoi. 14 Twikhanglen le twipi lithuh laiyin jong, Twithuh laiya chihna kimudeh lou aseibouve. 15 Chihna hi sana le Dangka chohjou jong ahipoi. 16 Ophir sana le onyx, sapphire song mantam Hicheng tojong hin chihna kilheh theiponte. 17 Sana sanga jong chihna manlujo, Sana dangka sanga jong mantamjo ahi. 18 Chihna hi song mantam carol. crystal chule twikohchang sanga manlujo ahi. 19 Chihna hi song mantampen topaz le Sana thengsel tojong tepi thi ahipoi. 20 Chihna hi hoiya hungkonba ham? Hoilaiya ihet khen them diu ham? 21 Ganhing khat chan amukhapon, chungleng vachan jong amupoi. 22 Thinale manthah nan jong Chihna thu thang ajah thon asei lhon’e. 23 Chihna lampi Pathenin bou ahen, Hoiya chihna kimu ding jong amun ahei. 24 Ajeh chu Pathenin van mong geiyin amudoh-in, vannoi thil jouse amusoh-e! 25 Pathenin huipi anunsah-in, Twikhanglen atetohsoh keiyin; 26 Go juhna ding mun asemtoh-in, Kolphe lampi asemjange. 27 Chuteng chihna umna aphongdoh-in, Angai nom jouse din aseiphonge. Akholtoh chet’in, Aphudet tai! 28 Chuin miho jah a Pathenin: “Chihna dia Pakai chibai boh ding, Hetkhen themna dia thilse bolda ding ahi,” ati.

Job 29

Job’in achungthu asei chaina

1 Job’in aseiban ajop kit’in: 2 “OPathenin eina khohsah lai Kahinkho chu kile kit thei leh kati! 3 Pathenin einalhonpi jingin, Muthim lah jot jong leng eisalvah jinge! 4 Chulai chu kaphat thei lai nikho ahin, Pathento kakijol’in ka-insung avengtup jinge! 5 Hatchungnung Pathenin eina umpin, Kachaten eina-um chah kheh-ui. 6 Kabongpi le kakelpi ho noitwi alhingin, Song-hol lah jenga jong ka-olive thing aphattheiye. 7 Khosung upate kikhopna chan a Ken jong tou mun kalon kapang jinge! 8 Khangdong hon lam ei-ot teiyun, Eija nan upate adin gdoh jiuve. 9 Japi lamkaite geiyin athip chet’un, 10 Athupipen ho jeng jong paopoh uhsa aumpouve. 11 Ka-umchan ja ho hihen eimu ho hileh, Abonchauvin katoh phat sei ding anei cheh-ui. 12 Vaichate atao tengu kapanpi teiyin, Suhna ding helou chagate kapanhui. 13 Genthei chungnung ten eipah Chauvin, Meithaite kakithopin along mongui. 14 Kitoh tah le dihtah-in Thil kabol’in thu katanjie. 15 Mitchote mit’in kapangin, Elbaite kengin kapange! 16 vaichate pan kapangin, Maljin gentheiho kakithopi. 17 Mi-engsete kasu-lhan, Amibolseteu kahuhdoh jie. 18 Sottah hinga inlum a Thi din bou kakinem’e. 19 Nanou jing jeng thingphung, Twi nomna leipha lah a keh tobang kahi. 20 Mitinin eivah choiyin, Katha alhasam kha hih hel’e. 21 Mi thu kamop teng, japi athip chet’un, Kasei phaten angai cheh-ui. 22 Kasei chaisoh tengleh seibe ding aneipouvin, kathusei gobah lha abngjie. 23 Chavang laiya loubol min gotwi ahomtho bangin, Mitinin kaseiho adei cheh-uve. 24 Kinepna aneilou tengu nuiheuvin kaven, Kamail lhaisel chun atilkhouji tauve! 25 Thu neitah-in atoh diu kasempeh-in, Lengpan sepaite alamkai bangin kalamkaiyin, Alung lhahna chan’uva kalhamonji’e!

Job 30

1 Hinla kasanga dongjo chengin eidai thangun, Apateu jong pannabei jeng, kelngoi chinga kikoi Uichate toh kivop dia jong kadeimo jeng ahiuve. 2 Mi meisan mithabei jeng ahiuvin, Imacha eibolpeh thei jong aumppouve. 3 Akelthi diu tengleh Janlaiyin gamlah munthip’a thing jungmot pou aket’uve. 4 Gamthip laiya hamjung pou, Tuile al neilou longlao bal pou akibo’uvin aneuve. 5 Gucha kihoh dal bangin, Amupha chanin ahohdal’un adeljam’ui. 6 Songko dunga achengun, Songpi pang dunga akisel’ui. 7 Gamlah a ganhing bangin a-aocheh chuh-un, phaiphung noi dung pouva ageh-ui. 8 Pannabei, minbei, imacha hilougol, Gamsunga nodohsa jeng ahiuve. 9 Tun eihung nuisat leuvin, Atot nopna diu bep kahi-ong! 10 Imacha sah louvin eibol’un, eijamsan’un, Kamaichanga chil eiset khum jengui. 11 Pathenin eisuh lhah a panpi beiya eikoijeh hin, Lung hangtah-in eidoutauve! 12 Hite ho pi hin sel del’in eidel’un, Nokhong kheh din eidel del jenguve. 13 Kajamdohna ding lampi akhah-un suhmang din eigouve; Aphoh tang diu jong koima aumpoi. 14 Kapal vangkah dunga ahung lut’un, Tolte eichil that ha jengui. 15 Kakicha behseh tan, kaloupina la abeitan, Kanei kagou jouse meilhang kitolmang bep ahi. 16 Tua vnag thi ding kahitan, Kanat oldomna ding jong aumtapoi. 17 Jan teng kagu kachangin eichip’in, Kanat jong a-oldom deh poi. 18 Pathenin kalochangin eimanin, Kaponsil eivei-lhop peh tai. 19 Bon-ngan lah a eileh lut’in, bonlhoh beh kahitai! 20 Vo Pathen nahenga kataovin, Nangin neihoupoi! 21 Engse tah-in neibol’in, Nathanei sunin neibolgimtai. 22 Huipi neilhohsah sah jengin, Khopihuiya neileh lenglei. 23 Athi dia neibol kahenai. Mihem thina jon’a neipui ahi. 24 Manthahna geisa, thildang beiya lungset thum bep Hitobang mihem hi idia nadel khum khum ham? 25 Akapte kakapi dam? Angaichate kapehda khah am? 26 Lung navah a nopna kakineppin, Lung jinna le muthimin eilhundentai. 27 Nat lung gim a thipai ding kahitan, Ani nin kanat akhoh cheh cheh jenge! 28 Lung navahna bei, lung jingin kavah len, Japi lah a kadingin panpi kathum’e! 29 Kagim behseh tan kamkei hamin kahamin, Va-ngongsao maovin kamaove! 30 Kagu kachang nan kakhosih-in, Katicuhng adupsoh tai! 31 Kipana tumging thei gin ka-ngai ngaiya, Tun vang lunghem a kagin bou kajatai!

Job 31

1 Nu-ngah him him jonlunga kavet louna din Kalung giltah-in kakitep’e. 2 Hatchungnung Pathenin i-eilo jiuva, Mihem tohman ipi apeh jim? 3 Thildih lou bolte chu Hamsetna le manthahna alhunkhumsah-e. 4 Kabol katoh Pathenin ahesoh keiyin, Kakalsonna chan jong amu jinge! 5 Thilse bolloudia kihahsel kahin, Midang jou lhep loudia kihahsel kahi. 6 Pathenin kitoh chet’in tetoh leh Monabei kahi mudoh tante. 7 Lamdih kapeldoh ham, Thilse kabolnom ham Kakhutte ni jong Thilse kibolnasa ahikhah leh, 8 Kamuchi tusa gamlha jeng hen, Kasemsa an midangin nehen! 9 Ka-inhengpa jinu kadeichat’a, Akptphunga kachan lhih khah leh, 10 Kajinun pasal dang an honpeh hen, Achunga pasal dang lum hem! 11 Ajeh chu hitobang chonset hi Thina thei tale peh dia lom mong ahi. 12 Talen chu damun meikong, Kanei kagou kavam thei manthahna ahi. 13 Lhacha kiphin aum jongleh Ka-ngaiyin phaten kabolpehjie. 14 Bolpeh da leng Pathen iti kamua, Pathenin kathu atan teng iti kihon tang-em? 15 Keima eisema Pathen chun Kalhachate jong asem ahi. 16 vaichate la kakithopi jingin, Meithai khatcha jong lung lengvaiyin kakoipoi. 17 Keiman kaneh laisen la Chagate nelouvin kakoipoi. 18 APenlhah a anun adalhah a pat, Apau bangin kahinvah khange. 19 Vaicha lhasam, Nihchen ponsil cholel kamu leh, 20 Keima kelngoi kul’a kisem mong mong, Samulpon kasilpeh teng eivahchoi cheh-ui. 21Thutamna phunga kajotho ding hesaa Chaga khattou kalep boll eh, 22 Kabanjangte ni kivobang jeng hen, Kalengkoute nia koin kisat lha hen, 23 Pathenin talen eipeh ding kagingin, Hitobang thilse hi bol ponge. 24 Neile gou, sana dangka Kakisonpi ngaipon; 25 Kahaona chengse jong hi Hoithonan kanei khapoi. 26 Nisa vah jong kahou khapon, Lha mel-hoi jong chibai kabohpoi. 27 Nisa lhathah hou din eikilhem lhapon, Ni le lha hounan kakhut kachop khapoi. 28 Hita bolna hin Hatchungnung Pathen ataitomin, Abol’a chu thina thei talen matsah lom ahi. 29 Kamelmate genthei kakipapi khapon, Hamset atotengu nom kasa khapoi. 30 Kamelmate thina dia taova, Hitobang chonset chu bol louhel kahi. 31 Maljin ho kalhunsah jing hi Kanatong jousen ahesoh keiyui. 32 Kholjin jouse in a kalhunsah jin, Kholai dung tol-lhanga alum khapouve. 33 Min achonset asel cheh-un, Kenvang kasel ngaipoi. 34 Japin eidem ding jong kagingpon, Mihouset ginnan kot kal lhah louvin kaumthim ngaipoi. 35 Koiman kasei eingaipeh lou ding ham? Adih cheh kaseiye, Hatchungnung Pathenin eidonbut hen! Min eiheh nau hi kasim thei dia Kijihdoh soh keiya kikoi hileh, 36 Kiletsahpi tah a kalengkouva kaput ding, Kalua lallukhuh banga kakhuh ding ahi. 37 kabol chan Pathen seipeh ing ting, A-angsunga kalu kadosangsah le ding ahi. 38 Kaloumun leiset hi Aneipaa kona kaguh thoa, 39 Hiche lousoh gilkel kathohsah leh, 40 Suhlou chang le sakol chang khel’in Lingle khao hung keijo hen!” ati. Job thusei akichaitai.

Job 32

Elihu thusei

1 Job chu ama them akichansoh hel phat’in, akinelpi pasal thum chun donbut louvin akoitauve. 2 Ahin akihouvu ngaiya pang, Ram phunga Buz insunga Barakel chapa, Elihu chu along hangtai. Ajeh chu Job’in Pathen mo apeh a amajoh them akichan hi nom asapoi. 3 Job golte mi thum chunga jong along hange; ajeh chu Job anel lhah thei louvu hin Pathen chu themmo dol’in akilange. 4 Alah a chun Elihu hi adongpen ahin, midang seichaisoh angah-in ahi. 5 Mi thumin Job adonbut thei lou phat’un, along hangtan, 6 thu aseipantai.

Elihu

“Nang ho upa nahitauvin, kei khangdong kahi nalaiye, Hijeh hin kalunggel sei ding jong kati ajai. 7 UPa domin naseiyuva, Khanglui dominchihna nahil diuva kagel ahi. 8 Hinla Hatchungnung Pathen Lhagao chu Mihem chunga hung chua chihna apeh ahibouve. 9 UPat man a mi chinga jong ahipon, Kum tam man a ima kihethem deh jong ahipoi. 10 Chapang jong leng kasei ngai leu chun kadeiye, Kalunggel seipeh-unge. 11 Naseiyu ka-ngai nagi jengin, Thu ngei ngei nahol’u jong ka-ngah-e. 12 Phatah a ka-ngai vangin, Khat chan jong Job nanel lhapouve. 13 Iti kachinge nati thei diu ham? Nanel lel’u ahitan, Pathenin Job donbut nante. 14 Job chu nang ho to kihou nahiuvin, kei eihoupoi; Hijongle nang ho donbut bangin donbut ponge. 15 Thu asei khel soh tauve, Job; Nadonbut thei pouve! 16 Sei din gbon neitalou ka-nga nah lai ding ham? Sei ding helouvin amoh dintauve. 17 Kenjong donbut ing ting, kalunggel kasei ding ahi. 18 Seikal ka-nga lel thotan, Kalungin kadoljou tapoi. 19 Kho-ngaisot leng, lengpitwi thah-in Savun peng atumkeh banga kapojal thei ahi. 20 Ka-ngah jou tapoi.Seijeng tange! 21 Langkaina jong nei pong ting, Koima jong lhemlha ponge! 22 Mi lhep lhahje jong kahepon, Lhem jong leng Pathenin eisuhmanglo ding ahi.

Job 33

1 Ahile tun Job, Kasei ding hi lunglut tah-in nagiphan. 2 Ipi hijongle kalunga akgel hi Seidoh jeng dinga kigoa kahitai. 3 Lung thengsel’a Thudih tah sei kahi. 4 Pathen Lhagoavin einasemin Eina hinsah ahi. 5 Naki-nga chat le neidonbut’in, Neinelna ding kigeltoh chet’in. 6 Pathen mitmua nang le kei thakhat ihin, Leivuiya kisemdoh cheh ihibouve. 7 Neiginna ding jong aumpon, Kenjong jothon bol ponge. 8 Nangin naseipen tah Kajahsa chu hiche ahi: 9 ‘Bol khel kaneipon, kathemmopoi; Monabei, chonsetna neilou kahi. 10 Pathenin eidouva, Melma banga eibol ahibouve. 11 Kakeng thih khaovin ahenin, Kakal chalna ave-lhi keove,’ nati. 12 Naseikhel heltai, Job: Pathen chu mihem sanga chungnungjo ahi. 13 Idia mihem kiphinna nahsah loudan a Pathen na-oimo ham? 14 Pathenin avel vel’a asei vangin Asei koiman nagisah-in aneipouve. 15 Mihem jan ihmut lanin jong Pathenin amangule Themgao thilmua thu aseiye. 16 Athusei mihemte ajahsah teng, Agihsaln aho jal’in atijauve. 17 Achonset jom louna diuva Pathenin asei ahin, Akiletsahda na diuva apho ahi. 18 Amanthahsah nom lou ahin, Thina theiya kona huhhing agot ahi. 19 Mihem adih dohna din Pathenin anatsah jin, Ati pumpi adammosah jie. 20 Adam louvin ima aduchapon, Antui tah mu jongle achil pulpoi. 21 Atahsa agongte tul’in, Agu aching keobou ahitai. 22 Lhankhuh sung jon ding kon, Mithigama kumsuh ding kon ahitai. 23 Mihemte toh ding hiljia Pathen Vantil asang sang lah a Khattouvin vang ahung panpi thei ahi. 24 Ahepi jeh a Vantil chun, ‘Lhadoh tan, Alhatdoh man aumnai, mithigam jotsuhda ta hen,’ ati thei ahi. 25 Chuteng ati noudoh kit’a, Atha hung kiledoh kit ding ahi. 26 Atao teng Pathenin houvintin, Kipah a Pathen ahou ding, Pathenin ijakai aboltoh peh ding ahi. 27 Aman japi lah a, ‘Kachonsen, thil dihlou kaboltai;Hichan jong hin Pathenin eihing hoiye. 28 Pathenin mithigam a eisol loulai jeh-in, Tugeiyin kahing nalaiye.’ 29 Hichengse hi Pathenin Mihem chunga avel vel’a abolji ahi. 30 Mikhat ahuhhing jin nomtah-in ahinsahjie. 31 Job, kasei hi ngaiyin lang, Umthimin ken seiyinge! 32 Seiding nanei vang leh seiyin, Them kachansah nom lheh nahi. 33 Seiding nanei loule ngai thimin, Chihje nahil inge,” ati. 33.11: Job 13.27 33.15: Job 4.13

Job 34

1 Elihun asei pai kit’in: 2 “Naching them thei lheh-ui, Tun kei sei ding hi ngaiyun! 3 An tui le tui lou kamsungin atep bangin, Thu ngei le ngei lu nabengin angaiye. 4 Hijeh chun thildih lhengu hitin, Thilpha datkhen temu hite. 5 Job them akichan nah vangin, Pathenin them achan nompoi. 6 Job’in, ‘Monabon kinei lou Jouseiyin bou eikigeltan, kachonset lou vangin Talen hah tah eikipetai,’ ati. 7 Pathen jabol louhel Job tobang mihem umkham? 8 Migiloute to bou akivop’in, Chonset toh akijot lei! 9 Pathen lungdei juigot hi A-itih a thilphan aseipoi. 10 Ima hethem nang hon kasei ngai phauvin, Hatchungnung Pathenin thil dihlou abol ngaiyam? 11 Pathenin miho atohman apeh cheh a, Achan diu lom achansah ahi. 12 Hatchungnung Pathenin itih-in thilse abolpon, Koima adih louvin abol ngaipoi. 13 Pathenin athaneina hi koi koma apalah ham? Kon Pathen chu vannoi poh theina tha apeh theiyam? 14 Pathenin mihema konin alhagao kilah hen, Hat theina hu kinung lah kit leh; 15 Mihing jouse thin tin, Leivui lesokit diu ahitai! 16 Miching nahileh Kasei ngaiphan! 17 Pathen dihtah chu mo nachansah a, Thudih ahot banga nagel ham? 18 Agitlouva aphatchom lou tengu Pathenin leng ho le vaihomte themmo achansahjie. 19 Mitin sempa ahijeh-in Pathenin Vaihomte panpia vaichate douna mihao panpi ahipoi. 20 Mihem hi jan ihmut lan a thi thei. Pathenin aden teng dihlhuh a mangthah thei, Mihat lai lai jong Imacha louhel’a atha thei ahi. 21 Pathenin mihem kho-lhah Kalson amelchih jinge. 22 Chonse kiselna din Khojin muthim jong ajingpoi. 23 Itih tah le mihem thu atanpeh ding Pathenin phat tep angaipoi. 24 Lamkaite haisah a akhel diu holna din, Het khel kholtoh khoh angaipoi. 25 Pathenin mi natoh ahe cheh-in, Jan kah-in akhup athal’in aleh-in asugoijitai. 26 Michonsete chu japi mitmun Pathenin ajep cheh jin ahi. 27 Ajeh chu Pathen nung ajui tapouvin, Athupeh chengse adonda tauve. 28 Vaichate Pathen henga akasah-un, Pathenin ataonau asangin panpi agoi. 29 Pathenin ima bolda agot teng Kon a-oimo theiyam Akihei mang tengleh Mihemin suhna ding heponte. 30 Pathen hephaloute achunguva avaihom teng, Namtin vaipin jong alonaje hepouvinte. 31 Job, nachonset jouse Pathen koma naphondoh a, Chonse kit loudia kitep nahitah em? 32 Namona chengse Pathenin navetsah dia nathuma, Thilse bol loudia nom nahitah-em? 33 Pathen thilbol bon deilou, Nadei nabolpeh ding kinam nahi nah em? Nathu thu ahi, kei kahipoi; nagel gel seidoh jengin! 34 Lung gel thei jouse nomteiyin tin, Kasei ngaiya miching jousen: 35 ‘Job hin hetoh louva asei ahin, Asei jouse lah thei aumpoi, tinte. 36 Job sei jouse hi geltoh chet’un, Asei jouse hi migilou thusei tobang ahi. 37 Achonset besen Pathen doumah abol’in, Imaichanguva Pathen ataitom jenge!” ati.

Job 35

1 Eluhun aseibe nalaiyin: 2 “Job, Pathen angsunga monabeiya Nakisei jeng hi nadihpoi! 3 Chule Pathen koma, ‘Kachonset loule ipi phachom a, Kachonset le na—ilou ham?’ nati hi adihpoi. 4 Nang jong donbut ing ting, Nagol napaite jong kahouset ding ahi. 5 Vanthamjol khu vetemin, Meilhangho khu vena sang thei lheh-e! 6 Chonse jongle chun Pathen din ima aloupoi. Thil bol khel jongle chun Pathen asuh khah am? 7 Dih lheh le chun Pathen ahu theiyem? Nanga konin Pathenin imacha angaichapoi. 8 Nachonset teng namihem chanpin athoh lel’in, Thilpha nabol leh aphatchompi, 9 Mihemin bolset ato teng na asauvin, Ahuhhing diu akouvui! 10 Agenthei pettah-uva kinepna pathei ASempau Pathen heng ajonpouve. 11 Ju le va, ganhing sanga eichihsah thei Chihna eipeu Pathen heng ajonpouve. 12 Agit louva akiletsah jeh-un, Panpi angeh vangun Pathenin adonpouve. 13 Pannabeiya kap a peng nahiuve; Hatchungnung Pathenin ajapon angaipoi. 14 Job, Pathen namuthei louvin seidan, Lung nengtah-in ngah-in a-ang sunga nathu alhungtai. 15 Pathenin chonset khohsah louva, Talen amatsah louvin nagel’e. 16 Napao pao jong pannabei ahi, Hetoh louva thusei nahi akichentai,” ati.

Job 36

1 Elihun aseibe kit nalaiyin: 2 “Lung nengtah-in kho-ngai jep’in, Pathen thalhenga kasei hi ngaiphan. 3 Kahetna ajaovin, Eisempa dihje Vetsahnan kahet bangin seiyinge, 4 Najah a jou khatcha kaseipoi; Namasanga miching tahbeh namutai. 5 Pathen itihat hitam! Koima anahsahmo pon, Ahet lou thil khatcha aumpoi. 6 Chonsete ahinghoi ngaipon, Vaichate adih-in abol jinge. 7 Midihte ahong jingin, leng bangin vai apohsah-in, Tonsot’in jabol achansahjie. 8 Hinla miho achonna dungjuiya Thihkhaova kihen amudoh tengleh, 9 Pathenin achonsetnau leh Akiletsah nau avetsah jie. 10 Thilsea kona akihei mangna diuvin Miho chu agihsal jin ahi. 11 Pathen thu angaiyuva alhacha apan’u leh, Ahao theiyun along mongui. 12 Achutilou leh khopho louvin athiuvin, Mithigam jonin luipi agalkaiji tauve. 13 Pathen heloute chu along hang jingun, Talen amat’u jongle panpi ngaiyin atao pouve. 14 Khangdong lai laiyin athiuvin, Mi maiya jumle ja thoh-in aum’ui. 15 Pathenin vang thoh gimna hi mihil nan amangin, Gentheina hi kho muthei nan amange. 16 Pathenin gimna konin napuidoh-in lang mongin nakoiyin, Nadokhang chung neh le chah adimtai. 17 Tun nachan ding lomin Talen namantai. 18 Nehguh jeh alhep chatvaiya naum louna ding, Hao deichat jal’a navamang louna din ching theiyin. 19 Panpi ngaiyin peng jongle chund phachom pontin, Nathahat’in jong ima boldoh peh theiponte. 20 Namtin vaipi manthahna ding, Jan hung lhun ding kinem hih-in. 21 Thilse nabol louna dia genthei kithohsah nahi. 22 Pathen thanei loupije geldoh-in, Ama mihil them chungnungpen ahi. 23 Pathen chu thilse bol’a moso thei le Abol ding hil masa thei koi ham? 24 Atohna chung aseiphat aching jingin, Nangin jong navahchoitei ding ahi. 25 Mitinin athilbol amucheh-in, Koiman vang ahejou jaipoi. 26 Aloupina kihechen joupontin, Akum jong kisim thieponte. 27 Leiset’a kona twi chopdoh a, Gotwiya hinjuhsah kitji Pathen ahi. 28 Mitin namtin dia hung ju-lha din, Meilhang lah a konin gotwi ajuhsah-e. 29 Pathen chenna vanpi kinim le Meilhang kitolle koiman ahetheipoi. 30 Vanthamjol’a kol aphetsah nan, Twikhanglen lithuh laila athim jing theiye. 31 Hitia hi Pathenin mipi avah jinga Neh le chah neng jeng junga apeh ahi. 32 Akhut’in kehchang achoiyin, Adoina mun sepkha din alhai. 33 Khopihui hung ding teng van akinimin, Ganchaten ahung ding aheuve.

Job 37

1 Hichea hin keijong kalung ling laovin, kalungchang achomdoh deh deh jenge. 2 Nabonchan Pathen ogin khu ngaiyuvin, Akamsunga kon van kinimpi khu! 3 Leiset mong langa kon lang khat geiyin, Vanthamjol’a kol aphetsah-e. 4 Chuteng a-ogin akijan, Van-gin kithong chutoh keh kisep akimui. 5 Pathen thusah jal’in datmo umtah thil asoh-in, Ihet thei louvu thil kidang asoh-e! 6 Leiset chunga buhbang alhahsah-in, Gobah le gose ajuhsah jin ahi. 7 Pathen natong jing ahi ahetdohna diuvin, Mihemte natoh avohaijin ahi. 8 Gamsa jousen jong abusing Akosung, age na akijot cheh-ui. 9 Lhanglama konin khopihui ahung nungin, Sahlama konin phalbi dap hui ahung nunge. 10 Pathen nahlai husan twipi amut leh, Twiho chu geltwi asohjie. 11 Pathenin meilhang lah ameilom asel’in, Meilom ho apokeh teng kol pheji ahi. 12 Meilhang ho hi Pathen deiyinakitol len, Vannoi gamtina Pathen lungdei abol’ui. 13 Leiset chapnou dia Pathenin go ajuhsah ahin, Mihem bolgimna le lungsetna go amanchah thei ahi. 14 Chomkhat kho-ngaiyin phaten nagiton-in. 15 Pathenin thu apeh a kol aphetsah Hiti ho hi nahet chet mong nah am? 16 Pathen thilbol kidang tah, Vanthamjol’a meilhang kitol dan nahet the-em? 17 Lhanglam khohuiyin leiset ahinsem hoh teng Gamsa nathoh lel ding chubou nahei. 18 Pathen banga nangin vanthamjol Phatvet banga dumje ju khu najamdoh theiyam? 19 Lungthima ima kicop pouvin sei idng kaneipouve. Pathenkoma kasei diu neihil’un. 20 Pathen to kihou ding ka-ngap chapoi, I-bol’a kakisuhmangsah ding ham? 21 Vanthamjol avah behseh-in kave-ngampouve, Khopihuiyin amut thengsel’e. 22 Sahlama sana vah chansel bangin akimun, Tijat umtah Pathen loupina vah chun eisalvah-ui. 23 Pathen thahat anasan kanai ngampouve, Adih-in thudih jengin mi abol’e. 24 Mitinin agin cheh ding mong ahi, Kichihsah ho vang iman agelpoi,” ati.

Job 38

Pakaiyin Job adonbut

1 Khopihui chimpei lah a konin Pakaiyin Job ahindonbut’e:

Pakai

2 “Kichihna song lel nang koi nahiya, Khopho louva thu hijat sei nahim? 3 Pasal nahileh dingdoh-in, kadoh chan neidonbut ding ahi. 4 Vannoi kasemdoh a chu naum am? Hijatpi nahet leh neiseipeh temin! 5 Vannoi itea sem ding kon aboltoh a, Kon atetoh ham nahet le seiyin! 6 Leiset khonpiho ipi chunga kitunga, Vannoi bulpi ning songkhom koi phu ham? 7 Chuche ni jinglah chun ahsi ten la asauvin, Van miten kipah-in asem’ui. 8 Twikhanglen twipi akoa kona alonjal ding teng Akotpi kamkhuma ting bingjia koi ham? 9 Twikhanglen meilhanga tomjol a, Muthim lhangkhal a sel chu Kei kahi! 10 Twikhanglen gamgi kasempeh-in, Kulpi kot kakam khumtai. 11 ‘Hichan gei hin veiyin lang, Hichan a bou natwidil ka-nga ding,’ katipeh-e. 12 Job, mahinkho sunga hi Nikhat beh jong jinglah khovah dia naseipeh-em? 13 Leiset pumpia kho vahsah a, Migiloute kiselna muna deldoh dia naseipeh khah am? 14 Sun khovah hin mol le lhang akimun, Ponsil kijal bang le leingan a mohor kinam bangin akimui. 15 Sunlai khovah hi migiloute din akichen behseh-in, Pumhat change thilbol angampouve. 16 Twikhanglen laigil twisam putna nache khah a, Twikanglen tonoi lama navale khah tah-em? 17 Noimigam mithikhul kotpi Kelkot pung dung navetsah tah-uvem? 18 Vannoi hi ite pham? Nahet leh neiseipeh-in. 19 Hoiya kona kho hungvah a, Muthim kipatna bulpi nahet-em? 20 I-chan geiya nasol theiya, Nalesol kit thei ding ham? 21 Vanno kisemdoh a bon anaumta a, Hibanga upate bol theiteiyin nate! 22 Buhbang le gelchang kakholna Hiche kikholna chu namu khah tah-em? 23 Gim hesoh ni le gal nikhoa Manchah dia kakhol khom ahi. 24 Nisa hung konna nagavet khah a, Solam khohui hung nun patna navet khah hitam? 25 Gotwi lonna ding kon asempeh a, Kehchang lhahna ding lampi kon asem ham? 26 Mihem chenna louhel nelgam geiya Go juhsah jing thei koi ham? 27 Hampa louhing hin theina dia Tolgo lah chapnouna dia go juhsah koi ham? 28 Geltwi le daitwi hin Ahinga Pa anei ngap lhon ham? 29 Geltwi le daibang Hinga anu lhon koiham? 30 Geltwi le daibangin twi chu song asosah-in, Twikhanglen chunga akidalsah jie. 31 Ahsi bombel ho khu nakan gom theiya, Ngambom lungthu ahsi khu nalhap kang theiyam? 32 Kum kiheichin hetna dia ahsi nalamkai theiya, Ngambom uichal ahsi len le neo nahil thieyam? 33 Vanthamjol’a kimang Danho nahet’a, Hiche Dan ho hi leiset’a naman theiyam? 34 Meilhang ho nahohsal theiya, Twi napehna dia nakou lhah theiyam? 35 Kol naphetsah thei leh Najah a, ‘Nathun kanunge,’ ati ding hinam? 36 Nile vadung twilet ding vachate seipeh koi hiya, Gojuh ding ahchal hilmasa koiham? 37 Meilhang simna theiya ching koi hiya, Gotwi sosah theiya ching koi hiya, Gotwi sosah theiya choh chamthei, 38 Gotwi chu leivui chapnou sah a, Bon ngan sosah thei koiham? 39 Sakei te ding neh le chah namupeh a, Sakeinou gilkelte navahna khah em? 40 Akosunga akisel’uva, Akhuh sunga an anga tengu leh! 41 Va-ahte gilkel nahol teng vahva koi hiya, Anouten an athum teng pejia koiham?

Job 39

1 Lhangvuma kolsa nou so phat nahet’a, Sakhi nou so phat nahet-em? 2 Itih chan nou akolpi nahet’a, Anouso ding phat nahet-em? 3 Itih tah leh kol’uva Nousoh diu nahet hinam? 4 Gamlah a anoute akhangdoh-un, Avah mangun ahung kile kitji pouve. 5 Koiham gam sa-ngante jalensah a, Lhathanga vathangsah a khu? 6 Gammang lah a chensah a, Chikhuh dunga lhatsah a Kei kahi! 7 Khopi husa kijah phah louna aum’un, Koiman vah a natohsah din ajoupoi. 8 Lhang sang dunga alhauvin, Neh din hamhing dum ahol leuve. 9 Gambong chal’in na natohpeh theiya, Nabongbuh a geh mong nam? 10 Khao nakhia lou nakaisah a, Naloulaiya langkon nakaisah theiyam? 11 Bongchal thahat nason a Na hahsa natohpeh ding naginchat am? 12 Changphal nalo khom peh a Cahngphol a nakaipeh dia nagel ham? 13 Va-ngonsaovin lha ijatvei ajap’a, Patva len alengthei nam? 14 Va-ngongsaovin tol’a tui aop’in, Leihu ahulsat sah theiye. 15 Ikhat’in achotkeh peh ding ahephapon, Gamsan aholgoi peh thei jong ahepoi. 16 Ama tui lou bangin agel’in, Hahsa tah a athah lhah jong khohsah lou bangin aum’e. 17 Hibanga ngolsah a Chihsah lou chu Kei kahi. 18 Hinla adin janga kithinga alhai leh, Sakol adeljamin achunga toupa geiyin akichai! 19 Hibanga sakol hatsah a, Angongmul bah kesah hi nang nahim Job? 20 Sakolte khaokhopi chop a chopsah a, Nah khon gin hamdeldul sah hi nang nahim? 21 Phaicham tolgo akhot’in, Galmun thal le teng lah anolut jeng jie. 22 Kichat tijat ahepouvin, Chemjam masanga gingdan ahipouve. 23 Sakol chung touho gal manchah Thal le tengkol nisan akhoval lah lah-e! 24 Lung hangtah-in sakolten maanouvin, Sumkon kimut teng adding thim theipouve. 25 Sumkon gin chai tengleh ahamin, Galmun aphah masangin Galvui nam ajan, Gal lamkaiten mano dia Lhang asap’u ajauve. 26 Mu khu lenje nahil hiya, Lhanglam nga leng thei ham? 27 Muvanlai khu molvum sang laiya Bu asahna dinga nang thupeh anga ham? 28 Songpi vum a bu akisen, Songpi khi kah chu kulpin aneiye. 29 Songpi chunga konin gamtin aven, Ganhing thaa neh ding ave-lhi. 30 Thilong phunga muthong akikhomun, Anoute thisan achop’ui,” ati.

Job 40

1 Pakaiyin Job jah a aseitei: 2 “Job, Nangin Hatchungnung Pathen nachouve, Na-ngah didng ham ahiloule nadonbut ding ham?” ati.

Job

3 “Ka-ngol thu kasei ahitai Pakai, Ipia kadonbut thei nah lai ding ham? 4 Ima ma jong keiman Seida tang’e! 5 Kasei ding abonchan kaseisoh tai, Velsei kit taponge,” ati. 6 Hichun huipi le gopi, chule chimpei lah akonin Pakaiyin Job jah a ahinseiyin:

Pakai

7 “Pasal nahileh dinginkadoh chengse neidonbut’in. 8 Kei hi moso ding neigot’a, Nang kithemsah a Kei mosah neigot ham? 9 Kei banga nahat am? Kei banga na-oginin van akithisah jouvam? 10 Najo leh, kilsetsah le gunche tah-in dingin, Minthangna le loupe nan kivontemin. 11 Mi kiletsahte khu ven lang, Lung hankhumin su-lha temin. 12 Ahi, ven lang loilhu, Migiloute adin muna noigep’in. 13 Leiset’a vuimangin lang, Mithigam a kanchahsan koiyin. 14 Chuteng Ken pahcha masapen ing ting, Najona thu sei masa pen inge. 15 Behemoth twisai khu vetemin, Ama jong nang jong kasem cheh ahin, aman bong bangin hampa anei. 16 Atahsa khi ichan geiya hat, Aphe avouva itobang thahat kisel ham! 17 Amei atun teng cedar thing tobang ahin, Amalphe ho jong atah cheh chuh jenge. 18 Agu aching jouse sum-eng tobang ahin, Akeng ho la thiljol abange. 19 Kathilsem lah a datmo umpen, Asempa Kenbou kajouve! 20 Hamhingin kavah khangin, Thinglhang gamsa lah a alhai, 21 Lingnang noi dunga akol jin, Si lah a pumpeng lah a akiseljie. 22 Lingnangho le luipanga huisum phung ho hi Ama din limin apangui. 23 Luidung soh jongle aging ppon, Jordan luipi soh jongle iman agelpoi. 24 Koipen hin amit chotsah a amat theiya, Nah vupeh a nahkhao avopeh ding ham?

Job 41

1 Leviathan khu ngakoiya nakoidoh theiya, Alei khu khaova nakan theiyam? 2 Anah hom sunga khao nathil lut theiya, Akhanoi jong thihtul’a nadotvang theiyam? 3 Nalhadohna dia nahenga taova, Nahepina dia nakoma tao ding ham? 4 Nakoma kitep’a aitih a nakinbol dia Kinoptona abol dia nagel ham? 5 Vacha banga nakhi theiya, Nalhacha nu-ngah ho kichepna napeh thei ham? 6 Nga manhon aman jat kidehna aneiyuva, Kiveihon joh dia ahoptel diu ham? 7 Alip khu ngatenga nasut theiya, Aluchang khu tenghema nasut thei ham? 8 Gaphin patep’in, bol kit ngampon nate; Kisatpi kit nom hih hel’in nate. 9 Leviathan mit a mu mai main jong Kinlih leova tol’a kisep lhu jeng ahi. 10 Akiphin hang teng akhoh a khoh, Koima kithahna ngam ahipoi. 11 Levithan kisatpia ahoidoh aumpon, Vannoi mi koiman thajou ponte. 12 Leviathan keng let dan le hatdan Naseipeh ing kate. 13 Athivun jeng jong koiman sukoh joulou, Aopvun jong kisunvang thei lou ahi. 14 Ahatu chalset sot khubang khu Kon akam akeh peh jou ding ham? 15 Atungtun vun la lumpho tobang ahin, Kimatsoh keiya songtum tobang ahi. 16 Alip jouse akijopmat soh keiyin, Alipkah a heojang cha jong lut theilou ahi. 17 Alip jouse akikilmat cheh-in, Imachan abokhen theidol ahipoi. 18 Anahhai teng meisi apahlah lah-in, Amitchang teni ma ninousoh tobang ahi. 19 Akamsunga meisi apah lah lah jengin, Meisi ahung kithotdoh jeng junge! 20 Anahhom sunga meikhu akitunglet lut’in, Beltoa tumbo kilhut khu abang jenge. 21 Ahai leh meikouvin alengin, Akamsunga mei akouve! 22 Alolchang atahbel bul’in, Akitopi akinlih deh deh-ui. 23 Avun la anemkom abeihel’in, Thihjol hekon lel hel abange. 24 Gin beihel’in alungchang tah-in, Sumhei song tah-in atah-e. 25 Adindoh teng mihat tah tah jong akichan, Kichat’a thigam pai diu ahi. 26 Asatbut ding chemjamla aumpon, Tengcha hihen thalchang hileh asunbut ding aumpoi. 27 Thihjong changpol danin agel’in, Sum-eng jong thingmot bangin agel’e. 28 Akap kina thei thalchangla abeitan, Songin kisep jongle changpol’a kisep dol’in ahei. 29 Mol jong changpol tobangin angaiton, Tengcha akikho jongleh akidai danin agel’e. 30 Aoinem lai lip ho jong bel-hal tobang ahin, Leiset chu thih-kangkuiya kihet abahsah-e. 31 Twikhanglen belphul abahsah jin, Belsunga twi sou toh abahsah-e. 32 Akhoni nung akichen veng vungin, Twikhanglen phonbem bumin alhai. 33 Leiset thil atepi thei aumpon, Gin neilouhel ganhing ahi. 34 Sahangtah jong imachan agelpon, Gamsa jouse leng ahi,” ati. 41.1:Ps 74.14; 104.26; Is27.1

Job 42

1 Job’in Pakai adonbut’in aseitai:

Job

2 “Thaneipen nahi kahei Pakai! Nangin nadeichan nabol theiye! 3 Khopholou ken Nang chihna Iti kasonlel ding ham? Kahet chet lou jeng kaseitan, Het dia nasaval ahi kei din! 4 Nasei sunga ka-ngai din neihil’in, Neidoh ho kadonbut din naseiye! 5 Hinla midangin eihil bep bou kahen, Tun vang kamit tah-in kamutai! 6 Kasei jouse kakijapin, Leivui le vutvam tobang hin lung kaheitai!” ati.

Thuchai khumkha

7 Pakaiyin Job jah a thu asei chai phat’in, Eliphaz jah a, “Kalhacha Job banga, nang le nagol te nin kachung thu nasei loujeh-in nachunguva kalung hange. 8 Tun bongchal sagi le kelngoichal sagi Job henga kaiyun lang, kilhaina gabol’uvin. Job’in nataopeh-un tin, vetda lom hijongle chun, ataona chu sanpeh-uvinge. Ama bangin nang hon kachung thu adih-in naseipouve,” ati. 9 Eliphaz le Bildah chule Zopharin Pakaiyin ahilnau bangin abol’un, Pakaiyin Job taona asangtai. 10 Job’in agolte thum ataopeh nungin Pakaiyin ama ahaodoh sah kit’in, masanga aneisanga ajat nia tamjon ahaosah tai. 11 Job sopi pasal ho le numei ho, chule agol lui ho ahungun, a-in a golvah abolpiuve. Pakaiyin abolgimna jouse chung thudol’a Job din lungmonna thu aseiyui. Mi khat khat’in sum phabep le sana khutjem khat cheh apeuve. 12 Ahinkho kipatna lam sangin ahinkho kichailam chu Pakaiyin Job phat thei ahaboh cheh-e. Job’in kelngoi sangsom le sang li avul’in, sa-ngongsao sanggup avul’in, bong sang ni avul’in, sangan sang khat avul’e. 13 Chapa sagi aneiyin, chanu thum aneiye. 14 Achanu lenpen Jemimah asah-in, aban a nu Keziah asah-in, alhumpen nu Keren Happuch asah-e. 15 Job Chanute tobanga numei mel-hoi vannoi leiset’a anaumpoi. Apauvin asopi pasalte toh gou ahop peh soh keiye. 16 Job chu kum ja khat le som li ahinbe nalaiyin, tu le tuson anei geiyin ahingin ahi. 17 Job ahing lhumkeiyin ateh thitai.

BU MASA (Labu 1-41)

Labu 1

Nun nop dihtah

1 Migiloute thumop sang lou, Chonsete umchan jomlou, Pathen taitom nomte jop lou chu Mi nun nom tah ahin; 2 Pakai Danthu nit akipapi jon, Danthu chu sun le janin asim jinge. 3 Hitobang mi hi luipanga thingphung keh, Aphat cha hung gatheiya, Anan goptih neita lou tobang ahin, Atoh lam jousea alolhing theiye. 4 Migiloute vang chuti ahi pon, Huiya vai kithe bep ahiuve. 5 Chonset jong Pathenin themmo achan a, Midihte kikhopna lha thei lou diu ahi. 6 Midihte chu Pakaiyin apuiyin ahoidamin, Migilouten vang manthahna lam ajontauve.

Labu 2

Pathen lhentum lengpa

1 Idia namtin vaipin galguh agon’uva, Pannabei thilsea pangkhom hiuvam? 2 Leiset lengten gal abol’un, Avaihomteuvin Pakai adouvun, Pathen lhentum lengpa Adoutauve. 3 “Avaihom nauva konin kiteldoh-u hitin, Eigah nauva konin kisut lhamute,” atiuve. 4 Van alaltouna konin Pakaiyin anuisat’in, Panna beiya agon jouseu adaithange. 5 Lung phamon Pakaiyin agihsal’in, Lung hangin ahoh kichasoh tai. 6 “Kalhang theng Zion a, Kalhentum leng laltouna katousah-e,” ati. 7 Lengpan, “Pakai thugahna phongdoh ing ting, Kajah a, ‘Nang hi kachapa, Tunia kahinsa nahi; 8 Thumin, namtin vaipi gou losah inge, Leiset pumpi nang ding ahi. 9 Namtin vaipi hi thih tenggol a najep cheh a, Leibel banga navohgoi ding ahi,’ tin aseiye,” ati. 10 Tun hiche thugahna hi leng hon gelphauvin, Hiche kahilna hi leiset vaihomten hethem’uvin. 11 Gingkhen chan Pakai kinbol’un, 12 Kithing thingin ahenga boh khup’uvin. Ajo le lung hang loi ding, Namanthah lo jeng diu ahi. Pakaiya kisel jingte chu Anun nom’ui.

Labu 3

Panpi ngaicha Jingkah taona

1 O Pakai, eidouva atamcheh cheh-in, Kamelma atam behseh jengtai! 2 “Pathenin panpi taponte,” tin Kamelmaten aseiyui. 3 Hijongle O Pakai, Kalumdal nahin, gal neijosah jin; Khodah ngamin neilha jingnai. 4 Othong leuvin Pakai henga kataovin, Alhang thenga konin eihouve. 5 Kalup’a ka-ihmut teng, Pakaiyin eihoidam jeh-in kathoukit jie. 6 Kamelma asang sangin eium jongleh Kagingtapoi. 7 Hung-o Pakai, neihuhhingin ka-Pathen! Kamelmate khagu suchip’in, Hapou loubangin koiyin! 8 Jo na chu Pakaiya kon ahin, Aman a mite phatthei boh jing hen! 3 Title: 2 Sam 15.13-17.22

Labu 4

Panpi ngaicha nilhah a taona

1 O them eichan a ka-Pathen, Kahung taove neihouvin! Kagimpet’in neihu jinge, Neikhoton kataona sangin! 2 Vo mihemte phat aichan geiya neijumsouva, Ichan geiya pannabei nahol’uva jouthu najui diu ham? 3 Hethem’uvin Pakaiyin midih akilhendoh tai, Ahenga katao teng eisanpeh jie. 4 Gingkhen chan um’un chonse hih-un, Janteng thip beh cha nalup naa hiti hi giltah-in gel’un. 5 Thil thengin kilhaiyun, Pakai henga ki-ngaiyun. 6 Mi tamtah atao teng, “O Pakai hamphatna neipeh beuvin, Lungset le khoton neiveuvin,” atiuve. 7 Ahinla neipeh kipana hin Neh le chah don ding haotah ho sangin Eikipasah joi. 8 O Pakai, damsel’a neihoijeh-in, Kalup teng nomsel’in ka-ihmui.

Labu 5

Hoidamna dia taona

1 O Pakai kaseiho neingaipeh-in, Katao gin ngaiyin! 2 Kithopi ngaicha kap kahi, Ka-Pathen le kalengpa! O Pakai nangbou kataona nahi! 3 Jingkah seh le kapengin najan, Nisa so teng neihou ding kinemin kataove. 4 Thilse kipahji Pathen nahipon, Thil phalouto umkhom thei nahipoi. 5 Mi kilsetsahte navetdan, Mi phaloute nahoi. 6 Jousei hatte nasu mangjin, Pumhatte le lepchete nakidah-e. 7 Nalungset kidang jeh-in Keivang nahouin a hung theiying ting, Nahouin theng sunga boh khup’ing ting Nangma jatah a kahou ding nahi. 8 O Pakai, kamelma atam behseh-e! Nadei bol din neipuiyin lang, Nalampi neijot jangsah-in. 9 Kamelmate thusei tahsan thei aumpon, Mi suhmangna ding bou adeiyuve. 10 O Pathen, mo sonlang talen pen, Athilgon’uvin kipalsah-in, manthahsah jengin. Nang douna chonset tampi aboljeh-un Na-angsunga konin delmangtan. 11 Nalim’a kiselte vang kipah jing hen, Phat tinin kipala sau hen. Nangma jeh a nom sa ahijeh-un, Na-ngailute chu hoidam jingin! 12 Pakai, nathu nit chu phatthei naboh jin, Na-ngailut chu lumbangin nadalpehjie.

Labu 6

Ginpat’a panpi ngehna

1 O Pakai, lung phamo jongle chun nei-eng boldan, Lunghang jongle chun talen neimatsah hih-in! 2 Abeipai ding kahitai, neikhoton Pakai! Kagu kachangin eichip’e, neidamsah-in! 3 Kapumpin kana behseh jenge, Kithopi louva itih chan neikoi nah lai ding ham? 4 Hungin neihuhhingin Pakai, Neikhoton thinaa konin neihuhdoh loiyin! 5 Mithi gama nangma geldoh jong aumpon, Navahchoi theiya jong aumpouve. 6 Kaha nat behseh jeh-in veipai ding kahitan, Janseh a kaka kanan ka-ulsan kajalkhun alhop jin, Kalukhap jeng jong Kamit lhin alhop jitai. 7 Kamelmaten eikasah sah nauva konin Kamit athimlon, kho kamuchen theipoi. 8 Pakaiyin kataona asangtai, Kakoma konin migiloute potdoh jengun! 9 Panpi ngaicha kakouna ajatan, Kataona asan ding ahitai. 10 Kamelmaten thina khop’a jum le ja athoh diu, Kinloi tah a kisudonguva Pathenin adelmang diu ahi.

Labu 7

Thudih deina taona

1 O Pakai ka-Pathen, neihoidam din naheng kahinjon’e, Kanung hindeltea konin neihuhdoh-in! 2 Neihuhdoh loule sakei sakai bangin eikai mangun tin, Koiman eihuhdoh joulou ding, katel kadah a eijanlo diu ahi. 3 O Pakai ka-Pathen, keiman thilse kabol khah a, 4 Kagol thilpha bol chu thilsea kathuh a, Ajeh beiya melma kachom leh; 5 Kamelmaten eihindel del jeng hen eiman hen, Eisat lih jengu hen lang, Kalong damsa tollhanga jamu hen! 6 O Pakai, lung soutenin hung kipatdoh-in, Kamelmate to kidinten, nangin neipan hun! Nangin thudih na-ngeh jinge, 7 Mitin mitang koukhomsoh-in Van a konin achunguva vaihomin. 8 Namtin thutan vaihom nangma nahi, Kadih dungjuiyin Thu neitanpeh-in O Pakai, Themmona bei kahi nahenai! 9 Pathen dih nahi, Kadeiyu le ka-ngaiyu kholtoh-in. Migiloute phatmona sutangin Miphate kipaman pen. 10 Pathen chu eihoidampa ahin, Athu nitte ahuhhing jie. 11 Pathen chu dihtah a thutan ahin, Niseh-in migilou chunga alung hange. 12 Migilouvin lung ahei louleh, Achemjam akinol hem jin; Thalpi aloiyin kamsalsan akoiyin, 13 Thal’an behsa thalchang kipat’in, Thalpi chang lheleh lah chun adoijie. 14 Ven, migilouten itobang thilse agel’u hitam! Gim gantheina ding agongun jou aseiyui. 15 Ahinla mi o-na dia thang akam nauva Amaho a-oh lih jiuve. 16 Athilse bol’uvin amaho asukhan, Ahusetnauvin amaho amavo lotai. 17 Adih jeh-in Pakai kathangvah-in, Chungnungpen Pakai vahchoi la kasai.

Labu 8

Pathen loupina, mihem gunche na

1 O Yahweh ka-Pakaiyu, Leiset pumpia naminthangtai! Navahchoina ogin van a akithongdoh tan, 2 Chapangte la naosen geiyin lan asauve. Namelmate dounan kulpi nakaiyin, Nadou jouse nasutang soh tai. 3 Nasemsa vanthamjol le Nagoltohsa lha le ahsi ho kavet teng, 4 Mihem hi ipi hiya hibanga nagel khoh a, Mihem chapa hi ipiham hibanga nakhohsah? 5 Nang ban tah a nakoiyin, Loupi tah-in lal lukhuh nakhuhpeh-in jabolna napei. 6 Nasemsa thil jouse chunga vai nahomsah-in, Thilsem aboncha ama noiya nakoiye: 7 Kelngoite le gancha dang ho, gamsa ho geiyin, 8 Vachate le nga jouse Twikhanglen a ganhing ho geiyin. 9 O Yahweh Ka-Pakaiyu, Leiset pumpia naminthangtai!

Labu 9

Adih jeh a Pathen thangvahna

1 Pakai, kalungthim pumpin vahchoiying ting, Nabolsa thil kidang ho seichoi lenge. 2 Nangma jal’in kipa la sang ting, Hatchungnung Pathen navahchoi la sange. 3 Nangma nahung kilah teng kamelmate anung jam’un, kisep lhun athidentauve. 4 Kitah le thudih-in thu natanin, Keijong them neichantai. 5 Namtin vaipi naphohsal’in, Migiloute nasumangjin, Geldoh kit louhel dingin Nanoi mangsohjitai. 6 Kamelmateu akichaisoh tan, Akhopi jouseu nasumangin, Koiman amaho ageldoh kit tapoi. 7 Pakai chu tonsot din alengchang tan, Thutan din laltouna atoutai. 8 Thudih-in vannoi vai apon, Namtin vaipi thu adih-in atanpeh-e. 9 Bolgentheiya umte dia Pakai hi kiselna kulpi ahin, Hesoh genthei pet’a hoidohna mun ahi. 10 Pakai, namin hesaten ki-ngai nan naneiyun, Naheng hinjon chan nadonda ngaipoi. 11 Zion a vaihom Pakai vahchoila sauvin, Athilbol namtin gaseipeh-uvin. 12 Phula them Pathenin gentheite agel jingin, Aka ginu asumilpon, abolseteu talen amatsahjie. 13 Neilungset’in O Pakai, Ven, kamelmaten eibolset nau hi! O Pakai, thinaa konin neihuhdoh loiyin! 14 Jerusalem mite masanga kadin a, Kavahchoina jeh jouse kaseipeh theina din. Neihuhhing jal’a kipah thanom ding kahitai. 15 Namtin vaipin khuh alaiyun, Akhuh laisauva alhalut’un athangkam’uva a-oh tauve. 16 Pakai chu adih a thu atanjal’in akiphongdoh tan, Migiloute vang athangkamsauva a-ohden soh tauve. 17 Pathen hephalou jouse, Migiloute aboncha thisoh hel diu ahi. 18 Angaichate donlouva kikoi koi lou ding, Vaichate kinepna jong kisumil deh lou ding ahi. 19 Hungin Pakai, mihem kijosah dan, Na-angsunga namtin vaipi koukhomin themmo pen. 20 Mihemte kiginsah-in Pakai, Thi thei mihem ahiu kihetdohsah tan.

Labu 10

Thudih deina taona

1 O Pakai, idia kidal khin khin a, Ngaichat pet leh kiselmang nahim! 2 Migiloute kiletsah-in vaichate abolseuve, Athang kamsauva osah-in. 3 Migilouvin thilse atup akiletsah pin, Mi kilosen jong Pakai ataitomloi. 4 Migilouvin Pakai aholpon, Akiletsah jeh-in Pathen agelkhohpoi. 5 Migilou chu atoh lam lama akhangtouvin, Pathen thutanna hephalouvin, amelma ahohdal thoi. 6 Migilouvin, “kelel bei hel ding, Gentheina katolou hel ding ahi,” tin agel’e. 7 Gaosap le jousei toh chule hutot to thon thu aseiyin, Geldet det louvin, thuse hotlam jeng aseiye. 8 Venglai golchih kah dudnga touvin Monabei miho that din achanglhi. Atha nom miho chu Amit lhi lhan aching jinge. 9 Sakei sachan bangin kisel’in Miho achanglhi le len, Tahlelte achang le len, Athanga a-o khah teng amanin akaimangjitai. 10 Panpaibei mi chu anoigep jin, Thahat changing avo-lhun ajamdenjitai. 11 Migilou chun, “pathenin bon khohsah lou, amit singta, eimutaponte,” ati. 12 O Pakai migiloute talen pen, Gentheite gelkhoh-in! 13 Migilouvin iti Pathen adonda a, “Talen eimatsah ponte,” ati thei ding ham? 14 Ahinla nangin namu na, Gim gentheile thoh hahsa namelchih jingin; Kithopi dinga kigosa jing nahi, Panpibei min nahinbel jin, Ngaicha geova um chu nakithopinai. 15 Migilou thilse bolte banjang vobongin, Abolkit louna diuvin thilse bolte talen pen. 16 Tonsot tonsot’a Pakai chu leng ahin, Doihoute chu agamsunga kona mangthah diu ahi. 17 O Pakai, mi lhasamte taona na-ngaiyin, Natilkhoujin nahatsah jie. 18 Bol gentheiya umte le chagate kagin na-ngai lhin, Mihemin asuh genthei kit louna diuvin athuu natan’e.

Labu 11

Pakaiya kisong

1 Kei-Pakaiya kisonga, I-atileh kajah a, “Vacha bangin molsang lama leng touvin, 2 Migilouten thalpi akamsal’un, Muthim laiya mipha ho kap din Thalchangin adoitauve. 3 Kulpi achimsoh teng Miphan ipi abol thei nah lai ding ahm?” natiu ham? 4 Pakai ahouin thenga achengin, Van a laltouna akidoi. Muntin a mitin aven, Athilbol anatoh-u ahesoh keiye. 5 Pakaiyin midih le migilou akholtoh jin, Pumhat mang ho vang alungthimin ahoi. 6 Pakaiyin migiloute chunga Kat le meikou asun khum ding, huipi savevu chu adousah ding ahi. 7 Pakai chu adih-in thildih angailui; Thildh bolte chu a-angsunga um jing diu ahi.

Labu 12

Panpi ngaicha taona

1 Neipanpiuvin Pakai, Pathen gingmi abeitan, mi kitah jong aumtapoi. 2 Jouthu jengin akihouvun, Muh them kamthemin akilhemto touve. 3 O Pakai, muh them kamthema thusei ho sutangin, Sutangin kiletsah tah a thuseiya, 4 “Kamthema ideichan kisei thei, Inop nop kiseididng, kon rikham thei diu ham?” tiho hi. 5 Ahinla Pakaiyin, “Ngaichat neiho nabol gentheiyuva, Nabolsetteu nasatah a aka jeh-un, Hung ing ting amaho hi lungmon kapeh ding ahi,” ati. 6 Pakai thutep jouse tahsan thei ahin, Dangka kisou jolsel, meiphunga kiloidoh, Vel sagi jen kisoujol tobang ahi. 7 Muntin amigilou jeng aumin, mitinin thilse bou aseiphauve O Pakai neihoidam jingun, Hiche khang mitea kon hin neihong jingun. 8 Neihoidam jingun Pakai, Hitobang mitea kon hin neichingtup’uvin.

Labu 13

Panpi ngaicha taona

1 O Pakai, itih chan nei donda a, Ichan geiya vet louva neikoi ding ham? 2 Itih chan genthei kathoh a, Ichan gei sun le jan a lung hesoh a ka-um ding ham? Ichan geiya kamelmaten eikichepna diu ham? 3 Neiven Pakai ka-Pathen, neihouvin, kamit hasah-in, neithisah hih laiyin. 4 Kamelmate chu, “Kajoutauve,” tisah dan, Kahamset hi amaho kithang-atna hisah hih-in. 5 Nalungset long louvin kaki-ngaiye, Neihuhhingna kipa pinge. 6 O Pakai, kadia naphat jal’in Navahchoi la sange.

Labu 14

Mihemte gitlouna

1 Mi-ngol’in alunga, “Pathen aumpoi,” atin ahi. Mihem jouse asesa ahiuin, Melse tah tah thil abol’un, Thildih bol’a khat cha aumpoi. 2 Van a koin Pakaiyin Cingtheiya Pathen hol’a um’am, Tin mihem chate ahinvei. 3 Mihemte lam dihlouva achesoh tan, Aphatmo nau akibang cheh-e. Thildih bol khat cha aumpon, Khat a khat cha jong aumpoi. 4 Pakaiyin, “kamite bahgam get gut’a Thilse jeng bolte hin hetna aneilou mongu hiya, Kahenga jong hung tao louhel hiuvam?” ati. 5 Pathen ngailute vang Pathenin aumpin, thilse bolte hi kichat tijat’a mah thah diu ahi. 6 Thilse bolten mi nun nem thilgon dunoh jongle, Ama chu Pakaiya kisel jing ahinai. 7 Ohe Zion akona kon Israel ahuhhing ding ham? Pakaiyin amite apuikhom tengleh Jacob dia iti kipa uma, Israel dia nun nop iti um ding hitam?

Labu 15

Pathen thil dei

1 Pakai, koiham nahouin a lut thei? Koiham, nalhang theng Zion a Nangma houtheiya? 2 Ijakaiya Pathen thu nit’a, THildih bol jing jeng; Thudih le thutah jeng seiji, 3 Midang house louhel mi, Agol apaite alam louva bol lou, Aheng akom seise lou, 4 Pathen isah loumi not thap theiya, Pakai gingte jabol jing, Itobanga hahsa hi jongleh Akitepna tuhcha a khel kit lou mi hiding ahi. 5 Amahin akan beiyin sum aphal jin, Themmonabeite hehnan nehguh akilahpoi. Koi hileh hitobanga chona thilbol mi chu Imachan asuh long louhel ding ahi.

Labu 16

Lung ngamna dia taona

1 Kahinbel’e Pathen, Neihoidamin! 2 Pakai koma, “Ka-Pakai nahin, Thilpha kanei jouse nangin neipeh ahi,” kati. 3 Pakai dia kitah mite apha thei lheh jengun, alah-uva jao ding kakipana pen ahi. 4 Doihouten gimna tampi akiboldoh-un, Akithoinauva pang pong ting, Adoiyu jong houpeh ponge. 5 Pakai, kagoulupen nang nahin, ka-ngaichat abonchan neipei; Kakhonung thu jong nakhut’a aum’e. 6 Neithilpeh chengse akidang theiyin, Abonchan apha thei lheh jenge! 7 Eithumop jing Pakai kavahchoiyin, Jan teng jongle kalunggil’in eihil chah jinge. 8 Pakaiyin eiumpi jing kahen, Naicha aumjeh-in iman eisulong ponte. 9 Hijeh hin kakipah-in katha nom’e, Chule lung mongtah-in ka-um’e. 10 Thina thahat’a konin neichudoh tan, Na-ngailut mi chu noimigama nadalhapoi. 11 Hinna lampi neihil ding, Nei-umpi kakipah-in, a-itih, a din eilung lhaisah tai.

Labu 17

Monabei mi taona

1 O Pakai, thudih lenna dia katao ngaiyin, Panpi ngaicha kakougin khohsah-in! Lung thengsel’a kataona ngaiyin. 2 Thildih nahetjeh-in Them neichanin. 3 Kalungthim nahei. Janteng neihung vil jin, Neikholchil soh keiyin, kalung sunga thilse namudoh deh poi. 4 Midang bangin thuse ka seipon, Nathupeh kanit jingin, Hutot le pumhat kamangpoi. 5 Nalampi kajui jingin, kapampot kha hih laiye. 6 Neihouji kahen nahenga kataove Pathen! Hung kihei kit’in kasei neingaipeh-in! 7 Nalungset kidangtah hinphongin neihuhhingun, Nakoma ka-um tengu kamelmateuva konin kahoidoh theiyui. 8 Namit chang bangin neihuh-in, Nalhaving noiya neisel’in; 9 Migiloutea konin neihuhdoh-in. Mithat ngam melmaten eiumchah tauve; 10 Khotona bei, kiletsah tah a thusei ahiuve. 11 Eiumchah kheh tauvin, kakiheina lam lama voh lhuh din eichanguve. 12 Sakei sachan bangin eichanguvin, Boteljeng din eigouve. 13 Hungin Pakai, kamelmate kadintepin, Akhup athal’in leh-in jouvin! Nachemjam hemhat panin Migilotea konin neihuhdoh loiyin! 14 Vannoi leiset mihaotea konin neihuhhingin, Athoh diuva nagonsa gentheina chu achate diuvin jong thoh khop hihen, Atuteuvin jong hin thoh khopset’u hen! 15 Ken vang adih lou kabol pon, Namu tei nange; Ka-ihmut khahlo teng, nei-umpi jing kipa pinge.

Labu 18

David Gal jo la

1 Vo Kahatna Pakai, Nangma ka-ngailui! 2 Pakai chu eihoidam Kakulpi dettah bang ahi. Ka-Pathen chu eihoidam ahin, Eiumpi teng kalung monge. Keidin lungdal’in apang jin, Eihuh-in eihoidohjie. 3 Pakai kakouvin kamelmatea konin eihuhdoh-e. Vahchoiyun Pakai chu! 4 Thina khaovin eikanchalsoh tan, Manthahnan lui bangin eilonvuh tai. 5 Noimigam khaovin eihenchalsoh tan, Kamasanga thina thang akikamtai. 6 Kagenthei teng Pakaiya kataovin, Eipanpi din ka-Pathen kakouve. Ahouin a ka-ogin angaiyin, Kithopi din ka-kagin ajatai. 7 Leiset akilingin akihottai; Molsang bulpi jouse akithingsoh tai. Ajeh chu Pathen lung hang ahi. 8 Pathen nahhoma meikhu akitungdoh-in, akamsunga konin mi leolih thei maikoule mei-am ahungdoh-e. 9 Vanthamjol aphetkeh-in, Meilhang jinglet lut chotphan ahungkumlhai! 10 Cherub chunga touvin hamvil’in alengin, Khopihui lhavingin mangin akilhohsah-e. 11 Meilhang thimlai akitomsah-in, Twi dimset meilhang thimket kut akitomsah-e. 12 Meilhang thimlaiya konin gel alhan, Meisi apah lah lah-in kol aphelah lah-e. 13 Pakaiyin vanthamjolpi akithinsah-in, Hatchungnungpen ogin thong akijai. 14 Thalpi chang akap’in amelmate adeljamsoh tai; Kolphe vahlap lap’in alhan amelmate anojam’e. 15 O Pakai, namelmate naphoa, Lung hanga nahohsal tengleh; Twikhanglen tochin geiyin akimun, Leiset bulpi jouse geiyin akimudoh-e. 16 Chunga konin Pakaiyin eisangin eituh-in, Lithuh laiya konin eikaidoh jie. 17 Kadoulel hel melma thahat tah, Hot le mah a eibol chengsea konin Pakaiyin eihuhdoh tai. 18 Kagenthei pet’a einokhum vangun, Pakaiyin eihoidam jingnai. 19 Kichat tijatnaa jong eipanpin, Eilung lhaijeh-in eihuhdoh tai. 20 Thildih kaboljeh-in Pakaiyin kipaman eipen, Themmonabei kahijeh-in phatthei eiboh-e. 21 Pakai Danthu kanit jingin, Pathena konin kakihei mang khapoi. 22 Adanthu kanitsoh keiyin, Athupeh kanit lou aumpoi. 23 Monabei kahiya, adihlou bol lou kahi Pakaiyin ahesoh keinai. 24 Thildih kaboljeh leh themmonabei kahijeh a Pakaiyin kipaman eipeh ahi. 25 O Pakai nadia kitahte hcunga nakitah-in, Achamkimte chunga nachamkimsoh-e. 26 Alung thengte din nalung thengin, Agiloute vang doumah-in nabol’e. 27 Mi nun nemho nahuhdoh jin, Kiletsahte vang nasuneove. 28 O Pakai, nangin thaomei neivah peh-in, Kavel’a muthim nasalvah soh tai. 29 Kamelmate nokhumna thei thaneipen, Akulpiu chop khup theina thahat neipei. 30 Hitobang Pathen, atoh jousea chamkimsoh! Asei jouse ki-ngaina thei! Ama belte dinga Lumdal apang ahi. 31 Pathen kiti chu Pakai bou ahin, Ikiselnau Songpi Pathen bou ahi. 32 Hiche Pathen hi eihetsah a, Kalampi suhong jing ahi. 33 Kakengto jong sakhi kengto abahsah-in, Molvuma dettah-in eidinsah theiye. 34 Kakhutte ni galbolje ahil’in, Kaban thahat’in sum-eng thalvhang kaheh kontheiye. 35 Pakai, neihuhhingin neihoidamtai; Nabanjet’in neituh jingin, Nathahat chun neichoi-an’e. 36 Kachotna ding lampi jaotah-in nasemin Kakisap lhu khapoi. 37 Kamelmate kadeldel jengin kamanten, Kasuhgam kahsen kahai hih-e. 38 Kasat chap soh keiyin athou thei tapouve; Ka-angsunga akijam’uvin akchotphai. 39 Galsatna ding thahat neipen, Kamelmate jona neipetai. 40 Kamelmate nadeljamin, Eihotbolte kasumangtai. 41 Kithopi ding akou vangun koiman ahuhdoh poi; Pakai henga atao vangun adonbutpoi. 42 Kachilgoisel’in, hui lhoh mang thei Leivui kabahsah tai. Kholai dung bonlhoh bangin Kakengton kachil thang thange. 43 Pakai, doumah boltea konin neihuhdoh-in, Namtin vaipi chunga vaihomin neipansah tai; Kahetphah louhel mite jong Kalhachan napansah-e! 44 Gamchom mite ka-angsunga akun’un, Kasei seiyin achon jengui. 45 Ameidoi soh tauvin, Akulpiuva konin kihotset sut’in ahung potdoh-ui. 46 Hing jing Pakai, kakiselna Songpi chu vahchoiyun! Eihuhhing Pathen loupina phongjal leuvin! 47 Aman kamelmate eijosah tan, Kadougalte eijosah-in, 48 Namtin kanoiya alutsah soh tai! O Pakai, kamelmate neijosah tan, pumhat mitea konin neihoisamtai! 49 Namtin jalah a nachoi-an ing ting, Navahchoi la sang’e. 50 Lenga atun chu Pakaiyin minthangtah-in gal ajosah-in, Adeilhenpa chu anailu jing jenge! Ddavid le ahilhahte tonsot’in angailui.

Labu 19

Athilsem’a Pathen loupina

1 Van mun jousen Pathen loupina aphongin, Vanthamjol’in jong akhutsoh aseidoh-e! 2 Tunin jing nikho aseipeh-in, Tujanin jingnilhah aseison peh-e. 3 Hetthei thucheng amansauva, Jah thei oginga apao lou vangun; 4 Ahusau vannoiya akithangsoh tan, Leiset kolkimvel’a min ajasoh tai. Vanthamjol’a Pathenin nichang din ponbuh asonpeh-in, 5 Jingkah teng jinei thah pa kipah tah bangle Kilhaitetnaa pang dingpa bangin ahung soh dohjie. 6 Vanmong lang khat’a pat Van mong lang khat ajon’e. Nisa satnaa hin thil akisel thei aumpoi. Pakai Danthu 7 Pakai Danthu hi achamkimsoh-in, Tha akidosah jie. Pakai thupeh ho hi tahsan lomtah ahin, Lungthimbeite achihsah jie. 8 Pakai Danthu chengse adih cheh-in, Hicheng nit jing hin nom asauve. Pakai thupeh chengse akicheh-in, Lungthim sunga hettheina apetheiye. 9 Pakai hou hi thilphapen ahin, Beitih anei louhel ding ahi. Pakai thutan jouse adih cheh-in, Itih-in jong aphasoh keiye. 10 Sanathengsel sanga dei umjo ahin, Khoiju thengsel sanga lhumjo ahi. 11 Hiche ho hin nasoh keima ima eihetsah jin, Kanit jeh hin kipaman kasang’e. 12 Koiman ama themmona akihetdoh loujeh-in, Kathemmona kisel chengsea konin neisil thengin Pakai! 13 Hettoh lou chonset chengsea konin neihoidoh-in, Hiche ho chu neijotho sahdan! Chuteng chonset thilsea ongthol ing ting kachamkimsoh ding ahi. 14 Kasei ding chengse le kalunggel jouse hi Nang din santhei hihen, O Pakai, Kasongpi le Eilhandampu!

Labu 20

Galjona dinga taona

1 Nagenthei nin Pakaiyin nalhamon hen, Jacob Pathenin nahoidam jing hen! 2 Amunthenga konin panpi hinsolpeh hen, Zion lhanga konin nahu ding hinsol hen! 3 Nathilto chengse sanpeh hen, Nakilhaina chengsea lung lhai hen! 4 Pakaiyin nadeichan napehen, Nathilgon jouse lolhinsah hen! 5 Chuteng keihon nagaljo kipa piuving ting, Pathen vahchoiya naminthan kalop diu ahi. Nathum na-ngeh jouse Pakaiyin nape bukimsoh hen! 6 Pakaiyin alhentum lengpa gal ajosah kahen, Avan munthenga konin ahouvin, Minthangtah a galjona ding Thahat nasatah tah apei. 7 Mi kon khat’in galsatna kangtalai ho akisonpin, Abangin asakolteu akisonpiuve; Keiho vang Pakai Ka-Pathenu thahat’a kisong kahiuve. 8 Thilmanchah a kisongte kipal’uva lhu lham diu, Keiho vang kipatdoh ung ting kadin jang diu ahi. 9 O Pakai, kalengpau gal josah-in, Kakou tengu neihouvun!

Labu 21

Galjo jeh a vahchoina

1 O Pakai, nahatsah jeh-in Lengpa akipah-in; Gal najosah jeh-in atha nom’e. 2 Ataona nasangin, Alungdei napetai. 3 Phattheina tampi nahinpon, Sana lallkhuh nakhuhpeh tai. 4 Lengpan hintheina athumin, Nangman napetai, tonsot tonsot’a hinna! 5 Napanpi jal’in aloupi lheh jengin, Leng loupe minthangin nalhai. 6 Tonsot’in naphatthei boh achangin, Naumpi jing akipapi lheh jenge. 7 Lengpan Hatchungnung Pakai atahsanin, Pakai lungset longlou jal’in phatseh-in along monge. 8 Amelmate lengpan mankhom-in tin, Ahoa pang jouse amatsoh idng ahi. 9 Ahung kilah teng Meisi kijep cheh banga ajep cheh ding ahi. Pakaiyin lung hanga abahgam diu, Meiyin ahalvamsoh diu ahi. 10 Lengpan athagama Achi abo’u kiholmo hel didng ahi. 11 Akihoutoh-un lengpa douna asem’un, Ahivanga ajodeh lou du ahi. 12 Lengpan ajalah-u thalpia akap’a, Anocheh a adeljamsoh diu ahi. 13 Nahat jal’in kavahchoiyui Pakai, Nathahat vahchoiya lakasah diu ahi.

Labu 22

Gentheiya kana leh vahchoila

1 Ka-Pathen, ka-Pathen! I-bol’a neidalhah hitam? Napanpi ngaichan kasam sam jengin, Neipanpi deh hih hel’e! 2 Ka-Pathen, sunlaiyin kakouvin Neidonbut deh poi; Jan khovah-in kakouvin, Olnaneipe deh poi! 3 Hijongle Nangma nathengin, Laltouna natouvin Israelten navahchoiye. 4 Kapu kapateuvin naki-ngai nauvin, Nakisonpi jeh-un nahuhhingtai. 5 Nahenga ataovun ahoidoh jiuvin, Nakisonpi jeh-un alungthoi khapouve. 6 Keivang mihem tobang kahitapoi, Lungtol bep kahitai.Kidah lenotthap’in kaumin, Mitinin eihouse se jengui. 7 Eimupha chanin eidaithangun, Lei eilhah khumun, lu eithin khum’ui. 8 “Pakaiya kisong nahine, Iti Aman nahuhhing lou ham? Pakai dei nahileh Idia napanpi da hitam?” atiuve. 9 Pakai, damsel’in neipensah-in, kasenlaiyin jongkanu noitwiyin neivah jinge. 10 Kapen a pat kisonna kanei, Ka-Pathen nahi jinge. 11 Genthei anaiye neidalha hih-in, Eipanpi ding aumpoi! 12 Basan phaiya bongchal hattah ho bangin, Kamelmaten eiumkimsoh tauve. 13 Sakeiyin asatha akisenpia abotel bangin, Kam homlet lut’in eikisen khumtauve. 14 Twi kisung lha bangin katha alhasamin, Kagu kachang alhoiyin, kalungthim khoiluijol abange. 15 THi dia leivui lah a neidalhah jeh-in, kalolbuh nelgo abangin, kadanga kalei abeh dentai. 16 Uihon bangin thilse bol hon eiumkimsoh tan, Kakhut le kakengphang. asunchen chentauve. 17 Kagu kachang adohsoh tan, Nehgam ding bangin kamelmaten eive changmel mol’ui. 18 Kaponsil chang ding vang asan’un, kavon chengse akihomtauve. 19 Neidalha loujen O Pakai, Neihuhdoh louyin! 20 Chemjam masanga neihuhhingin, Ui tobang hoa konin neihuhhingin. 21 Sakeite tobang hoa konin neihuhdoh-in, bongchal hang ho tobangte masanga kapang joupoi. 22 Nathilbol kamite seipeh ing ting, Akhoppiuva navahchoila sange! 23 “Pakai lhachaten Ama vahchoiyun, Jacob chilhahten choi-an’uvin! Israel miten Pakai chibai boh cheh-un! 24 Pakaiyin vaicha gentheite Donlou le kidah-in aneipon; Ahenga atao chan’un ahouvin, Akiheimang den khapoi.” 25 Pakai, nathilbol chengse jeh-in, Houbung khoppia vahchoiyinge Nahou dia kikhomho angsunga Katepsa kilhaina chengse penge. 26 Vaichaten aduchan aneh diu, Aheng hinjon jousen Pakai avahchoi diu ahi. Alungthimu khangtou jing hen! 27 Chitin namtinin Pakai ageldoh-uva, Leiset kolkimvel’a Pakai henga ahinjot diu, Namtinin Pakai chu achibai aboh diu ahi. 28 Pakai hi leng achangtan, Namtin chunga vai ahom’e! 29 Mi kilsetsahte Pakai angsunga kun a, Thi theimihem jouse angsunga kun cheh diu ahi. 30 Khang nununga miten Pakai kin abol’uva, Khang masan khang nukhah jah a Pakai thu asei diu ahi. 31 Apeng loulai ho geiya “Pakaiyin amite ahuhhingtai,” ti kiseipeh diu ahi.

Labu 23

Kelngoi chin a Eichingpau Pakai

1 Pakai chu kelngoi chin a Eichingpa ahin, Keima lhasam ponge; 2 Aman hamhing dum lah lah a kelngoi kol’in Eikolsah jin, Kiling louva twi veina pang dunga eipui lei. 3 Pakaiyin katha akidosah kit’in, Akitepsa bangin lamdih jenga eipuiye. 4 Thina phaicham jinglah jotpa jong leng Neilhonpi jeh-in Ima kaging tapoi, Pakai Natenggol’in neihong in, namoljol’in neilha mon nai. 5 Kamelmate masang jenga jong, Kaneh ding dokanga neiluipeh-in; Kalua thao neinu peh-in, Kadon ding khon alet lhai. 6 Phatna le hepi nan Kahinkho lhumkeiyin eijuiyin tin, Kahin kumkhoa Pakai in a kachen den ding ahi.

Labu 24

Leng loupi

1 Vannoi leiset le asunga um thil jouse Pakaiya ahin, Leiset le achung chengte Abonchauva Pakaiya ahi. 2 Pakaiyin twipi lailunga leiset asemdoh a, Twikhanglen chunga atundoh ahi. 3 Pakai lhangvuma kalthei koi hiya, Ahouin thenga lut thei koiham? 4 Thilse bol lou, milung theng, Doi houlou, jouthua kitep lou mi ahi. 5 Amaho hi Pakaiyin phatthei boh-in tin Ahuhhing diu; Themmonabei ahinau Pathenin phongdoh inte. 6 Hitobang mi chu Pathen henga hunguva, Jacob Pathen angsunga lut diu ahi. 7 Vo kotpi, nang ho kihong len’un, Kotpilui cheng kihongun; Loupi leng hung lutna din! 8 Hiche Leng loupe hi koi ham? Pakai Hatchungnung, Galjousoh Pakai ahi! 9 Vo kotpi, nang ho kihong ken’un, Kotpilui cheng kihongun; Loupi Leng hung lutna din! 10 Hiche Leng loupe hikoiham? Galjousoh Pakai, Ama leng loupe ahi!

Labu 25

Puihoina le hoidamna dia taona

1 O Pakai nahenga kataove! 2 Nachunga ki-ngai kahi ka-Pathen, Neijumso dan, kamelmate kipasah hih-in! 3 Nanga kisongten ima alel khapon, Nadoumah bolloi minbou aleljie. 4 O Pakai, nalampi neihil’in, Abonchan neihetsah soh-in! 5 Ka-Pathen nahin, neihuhhinge; Nadih ddudngjuiya hinje neihil’in, Nanga ki-ngaijingkahi. 6 O Pakai, akhang khanga naphondohsa Namikhoto l enalungset long lou geldoh jingin! 7 Khangdon lai kachonset ho le katoh khel ho Nei-ngaidam tan. Lungset long lou le naphatna jal’in Neigeldoh jingin Pakai! 8 Pakai adih a aphat jeh-in Chonsete achena diu lampi ahil’e. 9 Mi nun nemte lamdoh a a puiyin, Alungdei ahiljie. 10 Lungsetnan kitah tah-in apuiyin, Akitepna le athupeh nit ho apuiye. 11 Pakai, nakitepna nit’in, Neingaidamin kachonset atam behseh tai. 12 Pakai thu nit hon amaa kona Achena diu lampi akiholdoh diu ahi. 13 Hitobang miho hikhagntou diu, Achateuvin gamsung ahinlo diu ahi. 14 Pakai chu athu ngaite jol ahin, Amaho din akitepna asudet jie. 15 Phat tinin panpi ngaichan Pakai kaven, Aman tijat kichatna eihuhdohjie. 16 Hung kiheiyin neikhoton Pakai, kachangin lhasam tah-in ka-ume! 17 Kalung gimna cheng subeiyin, Kagentheina chengsea konin neihuhhing! 18 Gentheiya kalunghemna neigel peh-in, kachonset jouse ngaidamin! 19 Kamelma ijat pham, vetemin! Vetan itobang loma eihot’u hitam! 20 Neihongin neihuhhingin, Hoidohna din kahinjon’e. neijumsah dan. 21 Nang kisonna kanei ahin, Kaphatna le kakitahnan eidamsah hen! 22 O Pakai namite Israel khu Agentheina chengseuva konin huhhingin!

Labu 26

Mipha taona

1 Nanga kisonga thildih bol kahi, O Pakai them neichanin! 2 Neikholtoh-in neipatep’in Pakai, kadei le kagel chengse photoh-in! 3 Nalungset long louvin eipui jinge, Nakitahnan eilamkai jing ahi. 4 Phatchomna bei mito kakiloipon, Miphalhemho toh kakivoppoi. 5 Mi phalouto kakiloi nompon, Migilou kapeldoh jinge. 6 Monabei kahi tin khut kasop’in, Katao teng namaicham kaveljie. 7 Thangvah la kasan, Nathilbol kidang chengse kaseiphonge. 8 O Pakai, naloupina ngahmun, Nachenna In chu ka-ngaiye! 9 Chonsete tih neisuhmang tha dan, Tol thatte toh neitha thadan! 10 Thilse bol jingte, Nehguh kilah jing jengte toh. 11 Kenvang thildih kabol’e, Neikhoton neihuhhingin! 12 Tijatna jousea kaoidoh-in, Amite khoppi lailunga Pakai kavahchoiye.

Labu 27

Vahchoiya taona

1 Pakai hi kameivah le eihuhhing ahin, Imacha kagingpoi. Tijatna chengsea Pakaiyin eihoidoh tai, Kicha kit taponge. 2 Migilouten einokhum’a eithagot vangun, Akipal’uvin alhutauve. 3 Sepai hon khat’in eium’u jongleh Kicha deh ponge.Melmaten eidel khum jongle Pathena ki-ngai jing nange. 4 Pakaiya thil khatseh ka-ngeh-in, Hiche thilkhat kadei chu: Kahinkhoa a-Houin a chen ding, Aphatna kidangsa a, ama kipuisah ding ahi. 5 Hahsat teng Aman eisel’in tin, Ahouin sunga mongtah a eikoiya, Songpi chunga eikhandoh ding ahi. 6 Hitia hi kavel’a um kamelmate kajoa, Ahouin sunga kipa otongin kilhaiying ting, Pakai vahchoi la sange. 7 Kakouna ngaiyin Pakai! Khoto tah-in neihouvin! 8 Kalungthima, “Hungun neihouvun,” nati teng, 9 “Pakai kahunge, kisel hih-in,” katijie. Neilung hand an, Neidel mang hih-in nalhacha. Eipanpi Nang nahin, Neidalhan neidonda hih-in, O Pathen Eihuhhhingpa! 10 Kanu le kapan eidalha jongleh Pakaiyin eiching nante. 11 Nalampi neihil’in Pakai, Kamelma atame, lampheiya neipuiyin! 12 Jouthua eihutot midel khum, Kamelmate kichepna din neidalha hih-in! 13 Mihing gansunga Pakai phatna kamuding kahei! 14 Pakaiya ki-ngaiyin, Tahsanin, lung lha hih-in, Ahi, Pakaiya ki-ngaiyin!

Labu 28

Panpi ngaiya taona,

1 O Eipanpia Pakai kahung taove Ngaiyin kataona! Neihouda leh Noimigam jonte toh kajotsuh ding kahitai. 2 Panpi ngaicha nahenga kataova, Nahouin Theng lam kasan teng, 3 Thilse bol migiloute, Kamthem, lungthima hotna jeng dimte Amaho chutoh themmo neichantha dan! 4 Thilse bolte chu Abolset jeh-un talen pen. Athilse boljeh-un talen matsah-in, Achandiu dol chansah jengin! 5 Pakai natoh iman agelpouvin, Athilsem jong ima asah pouve; Pakaiyin talen amatsah a Asuhmang hel ding ahi. 6 Panpi ngaiya kataona eihoutai, Vahchoiyun Pakai! 7 Pakaiyin eipanpin eihoidamtai, Ken Ama katahsan’e. Pakaiyin eipanpin eikipasah-e, Kipah thanomin Ama kavahchoiye! 8 Pakaiyin amite ahoidamin, Alhentum lengpa apanpin ahuhhinge! 9 Pakai namite huhhingin! Namite phattheiboh-in! Kelngaoi chinbangin chingin, Lha louvin ching jingin!

Labu 29

Hui le go kitho lah a Pakai ogin

1 Van miten Pakai vahchoiyun, Athahat loupina vahchoiyun! 2 Pakai min loupe vahchoiyun, Ahung kilah teng Athengpa anga boh khup’uvin! 3 Twipi chunga Pakai ogin akijan, Loupi Pathenin van athingin, Twikhanglen chunga a-ogin akithonge. 4 Thaneitah le loup tah-in Pakai ogin akijai. 5 Pakai ogin husan ceder thing ho alhun, Lebanon lhang ceder thing geiyin alhutai. 6 Pakaiyin Lebanon lhang bongnou chom abahsah-in, Hermon lhang bongchalnou kinunkho abahsah-e. 7 Pakai ogin husan Kol aphetsah-e. 8 Pakai oginin nelgam ahot lhingin, Kadesh nelgam akilingsoh hel’e. 9 Pakai oginin gangpi thing jouse athingsoh-in, Athingna jouse amut lhasoh tan, Houin sunga um hon, “Pathen loupe hen,” tin asam’ui. 10 Twipi chunga Pakaiyin vai ahomin, Tonsot’in leng achangtai! 11 Pakaiyin amite ahatsah-in, Phatthei aboh-in along mongui.

Labu 30

Thangvah a taona

1 Neihuhhinga kamelmate neikichepna sah loujeh-in Nangma kavahchoiye Pakai! 2 O Pakai ka-Pathen, neipanpi din kataovin, Nangin neidamsah tai! 3 Moimigama neisol tapon, Thikhul’a lut kon kahitan, Nangin neihinsah kit tai! 4 Pakai vahchoi la sauvin Amithengte jousen! Amithengpa thilbol gel jingun, Ama thangvah jinguvin! 5 Alunghan phat chomcha bou, Aphatna hinkho lhumkeiya ahi. Kana jamkhat kal hilou, Kipana jing nikho asohjitai! 6 Lung mongtah-in ka-umin, “Iman eijouponte,” kati. 7 Keidin naphai Pakai, Molsang bangin kadin kulpi nahi. Kadia nakiselmang teng Kakichan katijai! 8 Kahin kouve Pakai, Napanpi ka-ngaiye! 9 “Thi leng nangdia i-phachom a? Thilkhul lut leng i-nakan em? Mithin navahchoiya? Nakitahje aphonjal thei diu ham? 10 Neihouvin Pakai, neikhoton! Neipanpin O Pakai!” kati. 11 Kagimna kon kipah-in neilamsah tan, Kagimna ponsil khel’in kipana neidip tai! 12 Hijeh chun umthim louvin Navahchoi la sange. Pakai, nangma ka-Pathen nahin, Itih-in thangvah tange!

Labu 31

Pathen tahsan a taona

1 Neihoidam din kahinjon’e Pakai! Neijumso lou jen-o! O Pathen dihtah, Kataove, neihuhhingin 2 Neihouvin, neihuhhing tun! Kakiselna songpi kahoidamna hin, Eihongin neihuhhingin! 3 Kakiselna kulpi nahi, Nikitep bangin neipuiyin neilamkaiyin. 4 Min thang eikampehnaa nei-osah dan, Kichatnaa neisel’in! 5 Kahinkho nakhut’a kapei, Neihuhhing din, O Pakai! Kitah jing Pathen! 6 Doihou ho nahon, Kenvang nang katahsan’e. 7 Nalungset long loujeh-in Kipah thanom ing’e. Kathohna namusoh tan, Kagimna nahesoh tai. 8 Kamelmate neimatsah pon, Jalentah-in kanopna chana neichesah tai. 9 Kagentheiye, Neikhoton Pakai! Kaka kanan kamit chopai ding ahitan, Abeipai ding kon kahitai! 10 Genthei lih pai ding kahitan, Kap lih didng kahitai! Hesoh-in kacholtan, Kagu kachang alhoisoh tai! 11 Kamelma, kaheng kakom chengin Noise tah-in eiboltauve; Eihesa hon eiginguvin, Kholai dunga eimutengu ajamji tauve. 12 Athisa bangin eisumil’uvin, Leibel keh pai mangsa kabange. 13 Melmate kihou lhih, Kavel’a tijatna jeng kajai. Kei dounan thil agongun, Tha din eigouve. 14 Nanga ki-ngai kahi Pakai, O Nang ka-Pathen! 15 Nakhut’a um jing kahi, Kamelma, eibolsetea konin neihuhdoh-in! 16 Khoton neiven nalhachapa, Nalungset long louvin neihuhhingin! 17 Pakai tin kakouve, Neivetda loujen-o! Migilou vetda chang hen, thildel’in noimigam jonsuh-u hen! 18 Jousei, kiletsah, kithang-at Midihte noisea thusei jouse phoh tangin. 19 Najabolte dia nakoipeh Thilpha chu iti kidan hitam! Natahsante mongtah a nahoidama Naphatje mitinin ahei. 20 Min asuhsetna dia jong Naumpin mongsel’in nakoiye; Amelmateuvin aphin loh louna din Kiselna phalaiya nasel jinge. 21 Vahchoiyun Pakai! Min einokhuma eiumchah-in jong, Kidangtah-in Pakaiyin eilungset’e! 22 Pakaiyin akoma kona eidelmang ham, tin Kakicha lheh jengin; Eipanpi dia kataoteng, Aman eihou jing nai! 23 Pakai ngailu’vin amitheng jousen, Pakaiyin mi kitah ahoidamin, Aumchan dungjuiyin kiletsahte Talen amatsah jie. 24 Pakaiya kinem jouse Het’uvin hanguvin!

Labu 32

Chonset phondoh, ngaidam

1 Achonset chengse ki-ngaidama Asuhkhel jouse kichulnam mi chu anun nom’e! 2 Lepche lou, Pakaiyin mo achan lou Mi chu anun nom ahi. 3 Kachonset kaphondoh lout eng, Genthei thoh-in kapeng nilhum lhumjie. 4 Sun le janin talen neimatsah-e Pakai, Nipi lai nisan daitwi akahgot bangin katha abeitai. 5 Pakai, nahenga kachonset kaphon teng, Kasuhkhel jouse ka-imjipoi. Aboncha phondoh kadeiyin, Kachonset chengse nei-ngaidamtai. 6 Nigingte ngaichat chanin nahenga taohen, Gentheina twipi kinong bang jongleh Amaho hinpha ponte. 7 Kakiselna nahi, Gentheina konin neihuhhingin! Neihoisamjeh-in Nahuhhhingna othongin lan sange. 8 Pakaiyin, “Nachena ding lampi hil ing ting, Kathumop a kahilchah ding nahi. 9 Sakol ham sakolpol ham bangin ngol hih-in, tuhngoina dia kamdal kibupeh bang khun!” eiti. 10 Migilouvin genthei athoh-in, Pakaiya ki-ngaite vang lungset’in ahoidam’e. 11 Vo them change, Kipah thanom’uvin! Pakai thu ngaite, Kipa la sauvin!

Labu 33

Vahchoina la

1 Vo themchangte Pakaiya kipah-un, Athua nung jousen vahchoiyun! 2 Semjang saiyin Pakai thangvah-un, Tumgingto thon Ama vahchoiyun! 3 Semjang ngeitah saiyin, othongin, Akoma kipa Lathah sauvin! 4 Pakai thusei atah cheh-in, Anatoh nganse thei cheh ahi. 5 Pakaiyin adih le atah adeiyin, Alungset longlou leiset adim’e! 6 Pakai kamchengin van mun chengse akisemin, Athuseiyin Ni, Lha, Ahsite akisemdoh-e. 7 Twipi lai munkhat’a aveikhomsah-in, Twikhanglen lithuh lai jouse akhol khom’e. 8 Leiset pumpin Pakai gingun, Vannoi miten Pakai jabol’un! 9 Pakai thuseiya konin vannoi akisemdoh-in, Athupeh akonin thil ijakai aumdoh tai. 10 Namtin vaipi lunggel Pakaiyin asunoh-in, Athilgonu toh doh louna din asutange. 11 Pakai thilgon vang tonsot’a um jing Angaito aboncha beitih neilou ahi. 12 A-Pathenu Pakai hikha nam mite Anun nom’ui; Pakaiyin amite dia alhendoh mite Anun nom’uve! 13 Vana konin Pakaiyin ahinven, Mitin mitang amusoh keiye. 14 Alaltouna phunga konin ahinven, Leiset’a chengte amusoh-e. 15 Mihem lungthim Sempa ahijeh-in Athilbol jouseu jong ahesoh-e. 16 Asepaite hat jal’in lengpan gal ajoupon, Hat vangin sepaiyin gal ajoudeh poi. 17 Jo na dia sakolte jong pannabei, Athahat’un huhhing pouvinte. 18 Pakaiyin athu nitte aching jingin, Alungset long louva ki-ngaite akivettup jinge. 19 Amaho hi thinaa jong ahuhdoh jin, Kel le chah a jong ahinsoi. 20 Keiho Pakaiya kinem kahiuvin, Eipanpiuva eihoidamu Amabou ahi. 21 Pakai al’in kakipah-un, Amintheng katahsan’ui. 22 Pakai, Nanga kinem kahiuve, Nalungset long louvin eiumpi jingun!

Labu 34

Aphat jal’a Pathen vahchoina

1 Pakai thangvah jing ing ting, Avahchoi la sachim ponge. 2 Eikhoto jal’in Pakai vahchoiyinge, Bolganthei thoh ten ngaiyun kipah-uvin! 3 Pakai loupe phongja’u hitin, Amin choi-an’u hite! 4 Pakai kahol len Aman eihoutai, Kagin jousea konin eihuh tai. 5 Lengvai gentheiten ven akipah-un, Lungthoi kit louhel diu ahi. 6 Panpi beite ataovun Aman ahoutai, Agimna chengseuva anopsah tai. 7 Pakai thunitte chu Avantil a-ngasah-in, Kichatna tijatnaa kon ahuhdoh-e. 8 Pakai phatje kholtoh-in, Akoma hoidamte chu anun nom’ui. 9 Amithengten Pakai thu ngaiyun, Ama thu ngaiten adei chan amui. 10 Sakeiten jong an mulouvin kel athoh-un, Pakai thu ngaite vang thilpha alhasam khapoi. 11 Hung ngaiyun chate, Pakai ginje nahil’unge! 12 Hin noma hin ding nadeiya, Hin nomsel’a the thiding nadeileh, 13 Thuse sei dan lang, Tuhjou seisan. 14 Thilse dalhan thilpha bol’in, Nalungthim pumpin chamna hol’in! 15 Midihte Pakaiyin aching jingin, Ataonau angai lhi jinge. 16 Thilse bolte vang avetdan, Leiset’a koima ageldohsah poi. 17 Midihte Pakaiya atao teng Aman ahouve, Agim gentheinauva konin ahuhdohjie. 18 Lung kisihte henga Pakai aneiyin, Chonset gimpite ahuhhinge! 19 Miphan gimna tampi ato vangin, Hichengsea jong hin Pakaiyin ahuhdoh-e. 20 Midih chu Pakaiyin ahoidamjeh-in Agu aching khatcha jong akiheh bongpoi. 21 Migilou chu thilsen atha ding, Midih vetda chanin talen amat ding ahi. 22 Pakaiyin amite ahuhhing ding, Alim belte ahoidam ding ahi.

Labu 35

Panpi ngaichaa taona

1 Einel’a chu nel’in lang, Eidouva xhu kidoupin Pakai! 2 Nalum le napho kengin Neihung huhdoh loiyin! 3 Nateng lung leh-in Eihindelte khu khon! neihuhhing din seiyin! 4 Tha dia eigo chengse chu Noinunin lang jumson! Kathina ding ngaito ho chu Nungjam hen kisulongu hen! 5 Pakaiya kon Vantil’in deljam hen, Khohuiya changse kithe bangu hen! 6 Alampiu muthim hen nal hen, Pakaiya kon Vantil’in del jing jengu hen! 7 Ajeh beiyin thang eikampeh-un, Kalhan lutna din khuh alaiyui. 8 Hinla ahet lou kah-uva manthahnan aphah diu, Athangkam’uva oh didu, manthahna chu diu ahi. 9 Chuteng Pakai jal’in kipah ing ting, Eihuhhing jeh-in nomsange! 10 Kalunggil’in Pakaiyah, “Vo Pakai Nang banga, Mi huhaman kona tahlel chulha aumpoi,” tinge, Abolsetea kona tahlel chulha aumpoi,” tinge. 11 Migilouten eidounan thu aseiyun, Kahet phah lou thilse ei-ngoh-ui. 12 Thilpha jeng jong thilsen eithuh-un, Kadatmo behseh jenge! 13 Adammo tengu lungkhama khaodip pon sil’a, Adamna diuvin an ka-ngol jin; kunin kataopeh peh jie. 14 Kasopi le kagol ngaitah banga taopeh a, Nu pul dou banga Kaikua vah le le jia kahi. 15 Kei genthei phat’in akipah jo’uvin, Kavel’a akikhom’uvin eidai thangun; Hetphah louhel mijengin Eideng deng jenguve. 16 Elbai nuisat bangin einuisat’un, Mitt hip tenin ha eigel khum’uve. 17 Pakai itih chan namohvet ding ham? Sakei tobangtea konin neihuhdoh-in, Neihuh hing loiyin! 18 Chuteng Houbung kikhopnaa thangvah ing ting, Amasanguva Nangma vahchoi tange! 19 Kamelma, jouseiho khu Kalelna chunga kipasah dan; Ajeh beiya eihote khu Kachunga kipa thanopsah hih hel’in! 20 Odamin thu aseipouvin, Cham deite chunga jouthu jeng asemthu’ve. 21 Akambem bemin eisam’un, “Chi, nathilse bol kamutauve!” atiuve. 22 Pakai, Nangin hiche hi namutan, Otdoh dsn, umthimdan Pakai! 23 O Pakai, kipat’in neihung hun, Ka-Pathen keidin hung pangin! 24 O Pakai dih, Nangin them neichanin, Kamelmate kachunga kipasah dan! 25 “Idei bangun ama khu isumangtauve,” tin Kachunga kipasah hih hel’in! 26 Kagenthei jal’a kipah thanomte hi Lel’u hen kijumso cheh-u hen, Kasanga phajoa kigel ho chu Jum le ja thoh-in umu hen! 27 Kei themchan didng dei jousen Kipa othongin samu hen lang, “Pakai aloupin, alhachapa lolhin along lhaipi,” tin samu hen! 28 Chuteng nadihna phongjal ing ting, Nilhum lhumin vahchoiyinge.

Labu 36

Mihem gitlouna

1 Setnan migilou lunggil’a thu aseiyin, Hijeh chun Pathen adondan ajabolpoi. 2 Ama akigel sang val tan, Asetna Pathenin mudoh louva them chang din akigel’e. 3 Thuse aseiyin, jou jeng ahi, chihna le thilpha abolpoi. 4 Alupna jalkhun jenga jong thilse agon, Thilpha ima bol louvin, thilse jeng abol’e.

Pathen phatna

5 Pakai, nalungset longlou vana akilhungdoh-in, nakitahnan vanthamjol aphai! 6 Nadihna molsang bangin akikhangin, Nathutandih Twikhanglen thuh abange Sa le mihem nakhohsah gel’e. 7 O Pathen, nalungset longlou akidangin, Nalhalim noiya kahoidam’ui! 8 Neipeh-u an nengtah-in kaneuvin Naphatna twidonin don’uvinge! 9 Hinna twinah phung nahin, Navah-in khovah kamu’ve! 10 Nahete chu lungset jingin, Midihte thilpha bolpeh jingin! 11 Mi kiletsahte neidelkhumsah dan, Migiloute neino mangsah hih-in! 12 Hikoma khun migiloute akisep lhun, Thou thei louvin akijamtauve.

Labu 37

Mipha le migilou lhunna

1 Migiloute jeh-in lungkhamdan, Thil dihlou bolte jong thangset dan, 2 Amaho hampa banging op lhan tin, Hamhing banga gop’a thi loi diu ahi. 3 Pakaiya ki-ngaiyin thilpha bol’in, Lung mongin gamsunga chengin. 4 Pakaiya kipah thanomin, Aman nalunga nadei chan napeh ding ahi. 5 Pakaiya kipen, Ama tahsanin Napanpi ding ahi. 6 Pakaiyin nadihna khovah abahsah a Sunlai nisa abahsah ding ahi. 7 Thoh hat’in Pakai natoh ngah jingin, Mihao lungkhampi dan, Thilse bol’a lolhing ho jong Lungkhampi hih-in. 8 Lungkham lunghan boldan, Gentheina bou nalhut ding ahi. 9 Pakaiya ki-ngaiten gamsung alo diu, Migiloute vang kideldoh diu ahi. 10 Migiloute beiloi ding, Hol jongle chun mupon nate. 11 Mi nun nemin gamsung lontin, Haotah le mongtah a um diu ahi. 12 Migilouvin mipha adouvin, Vetdan ha agel khum khum’e. 13 Hinla abeivah diu ahetjeh-in, Pakaiyin migiloute anuisat’e. 14 Tahlel vaichate, thildih bolte thana din Migilouten chemjam satdoh-in thalpi akamsal’ui. 15 Achemjam’uva amaho thi diu, Athalpiuvin amaho akap lih ding ahi. 16 Miphan themcha anei chu Migiloute gou sangin aphajoi. 17 Pakaiyin migiloute thahat asuhbei ding, Midihte apanpi ding ahi. 18 Pakaiyin athu nitte agel khoh-in, Gamsunga tonsot’a cheng diu ahi. 19 Phat phatmo teng jongle genthei lou diu, Kel lha jongle nehkhop anei diu ahi. 20 Migiloute vang mangthah diu, Pakai melmate pahcha banga pul’a Meikhu banga leng mang diu ahi. 21 Migilouvin bat din alan alesah kitpon, Miphan vang hongphal’in thil ahom jinge. 22 Pakai vangboh changten gamsung alo diu, Agaosapte kidel doh diu ahi. 23 Mi achena lampia Pakaiyin apuiyin, Alung lhainate ahoiddam jinge. 24 Kiseplhuu jongle kijamden lou diu, Pakaiyin aphoh ding diu ahinai. 25 Tun katehtan, kahing sot lheh tan, Mipha Pakaiyin adonda jong kamu khapon, Achaten jong khutdonneh ahol ngaipoi. 26 Miphan manbeiyin thil ahom jingin, Bat din jong ahom thouve; Achate jong vangbohna ahiuve. 27 Thilse jamsanin thilpha bol’in, Chutile nachate gamsunga cheng jing diu ahi. 28 Ajeh chu Pakaiyin thildih angailun, Amithengte adalha khapoi. A-itih-in ahoidam jingin, Migilou chate vang adelmang ding ahi, 29 Midihten gamsung alo’uva, Achenpha jing diu ahi. 30 Miphan chihhoi thu aseiyin, Itih-in jong akampha jinge. 31 Alungthima a-Pathen Danthu aching jingin, Anitda ngaipoi. 32 Migilouvin mipha aching lhin, Tha din agojie. 33 Hinla Pakaiyin midih chu Migilou kichepnan aneisah pon, Patepna achuh khah tah jongle Themmo achansah ngaipoi. 34 Pakaiya kinemin athupeh chengse nit’in, Aman lungset’a gamsunga nachensah ding, Migiloute kideljam namu ding ahi. 35 Thoh lel aum migilou khat kahen, Lebanon a Cedar thing bangin mi chungvum a akikhang sange. 36 Chomkhat jouva kajotpa leh aumtapon, Kahol vangin kamudoh joupoi. 37 Mipha melchih-in, midih ching jingin; Cham dei min son le pah aneiyin, 38 Chonset vang asu amangun, Ason apah-u jong asubeihel tauve. 39 Midihte Pakaiyin ahuhhingin, Gentheipet jongle ahoidam’e. 40 Apanpin ahuhdoh-in, Akom abeljeh-un migiloutea konin ahuhhinge.

Labu 38

Mi hesoh taona

1 O Pakai, nalunghan teng Neibolgim hih-in! 2 Nathalpichangin neikap khan, Neikap lhutai! 3 Neilunghan jeh-in hatah-in kanan, Kachonset ho jeh-in katahsa aveisei. 4 Kachonsetnan eilonvuh tan, pohgih hahsa tah-in akneiye. 5 Ka-ngol behseh jeh-in Katina anaikolsoh-in akomsoh tai! 6 Kakaiku ku jengin kijel lhop pai ding kahitan, Nilhum lhumin lunghem kathoh-e. 7 Khosih-in kanan Thipai ding kon kahitai! 8 Beipaiya kijel lhop pai ding kahitan, Nat thoh lel’in kalung gimtai! 9 O Pakai, kadei ka-ngai nahen, Kataona najasoh keiye! 10 Kadip aphu phu jengin kathabeitai, Kamit jong athim tai! 11 Hengle kom, golle paiyin einai ngampon, Katinaho jeh-in ka-insungmi jong akidalseuve. 12 Eithat nomhon thang eikampeh-un, Eisuse nomten suhmang din einokhum’ui. Suhmang din eigo go jenguve. 13 Na-ngong bangin kho la kajapon, paomo bangin thujong kasei theipoi. 14 Khojalou mihou lou bangin Keijong ka-umtai! 15 O Pakai Nang katahsan’e, O Pakai ka-Pathen, nangin neihouvin! 16 Kagimnaa kamelmate kipasah dan, Kalhahsamnaa kamelmate kithang-atda hen! 17 Kana na jengten, Lhulham pai ding kahitai! 18 Kachonset chengse kaphongin Kakisih lheh jenge! 19 Kamelmate damtheiyin ahat theiyui, Ajeh beiya eihoa atam lheh-e. 20 Thildih kabolgot jeh hin Thilpha jeh a thilsea eidouvah atam’e. 21 Neidalha loujen-o Pakai, Kidal khin khin hih-in ka-Pathen! 22 Tun neipanpin, O Pakai eihuhhingpu!

Labu 39

Mi hesoh chonset phondoh

1 Keiman, “Ching theiyin na tong ing ting, Kakamin chonset thu seiponge; Kavel’a migiloute umlaidsen Imacha sei ponge,” kati. 2 Kathip beh-in imacha kaseipoi, Thilpha jeng jong kaseipoi! Hinla kathohgim akhoh cheh cheh-e. 3 Kalung jongle kagimbe cheh-e; Hijeh chun paolouvin ka-umthei tapon: 4 “Pakai, ichan kahin a itih kathi ding ham? Kahinkho itih bei ding ham neihil’in,” kati. 5 Iti kahinkho hichanseh a neisempeh ham! Navetdanin kahinkho imachan namupoi. Tahbeh mongin mihem jouse hi Haikhat kah a hingbou ahi. 6 Nilim kahei bep, Anatoh jouse pannabei, Neile gou apokhom khomin Koipen chang ding ahepoi. 7 I-baham Pakai kakineppi ding? Nanga kinem jing kahi! 8 Kachonset chengsea neihuhdoh-in, Mi-ngolte neinuiaat sah hih-in! 9 Nangin gim genthei neithohsah-e, Paopoh louvin umthim tange! 10 Mihem chonset chengse naphoh-in talen napen, Adeipen jong nget neh bangin nasubeijitai. Tahbeh mongin mihem hi Haikhat kah a hingbou ahi. 12 Kataona ngaiyin Pakai, kakagin ngaiyin; Kakateng neipanpin. Kapu kapate banga chom khat kholjin le khopem bou kahi. 13 Kathi kah beh a nopna kaneina din Neidondan neichanglha tan!

Labu 40

Vahchoina La

1 Thoh hattah-in Pakai panpi ka-ngah-in, Aman eikhohsah-in kataona asangtai. 2 Tijat umtah khokhuh a konin eikaidoh-in, Bolsung bon-ngan lah a eiloidoh tai. Songpi chunga mong tah-in eikhangdoh-in, Lung mongin eikoitai. 3 I-Pathenu vahchoina la Lathah sahje eihil’e. Amupha chan tijauvin tin Pakai atahsanlo didu ahi. 4 Doihou lou, pathen lhem houte jop lou Pakaiya ki-ngaite chu anun nom’e. 5 O Pakai ka-Pathenu, Thil tampi neibolpeh peh jengun, Nang tobang koima aumpon, Kadiuvin thilgon kidang tah tah nagong’e. Atam behseh jengtan Ajat mong kaseijoupoi. 6 Kilhaina gantha le thilpeh na-ngeh pon, Maicham phunga gan pumgo jong natipoi; Chonset ngaidamna pumgo thilto na-ngeh dehpoi, Kasei chan phate chan neingaipeh joi. 7 Hijeh chun kenjong, “Hikoma ka-umin, Neihilchahna jouse Danthubua akisunin, 8 Nalungdei bol ding kadeiye ka-Pathen! Neihilna kalungthima kachinge,” kati. 9 Houbung kakhopnaa neihuhhingnau Thupha kaphongdoh tai Pakai! Tang louhel’a kasei jing ding Nangman nahei. 10 Huhhingna Thupha chu ka-impon, nakitahna le napanpi kasei jinge. Houbung kakhopnaa ka-umthimpon, Nalal loupina le nalungset longlou kaseiye. 11 Pakai neikhoto jing ding kahei, Nalungset le nalal loupinan eihoidam jinge.

Panpi ngaichan taona

12 Simsen lou hahsatnan eiumkimsoh tan, kachonset hon seimantan kho kamutapoi. Kalujangsam sangin atamjon Kameidoilo tai. 13 Neihuhhingin Pakai! Neipanpin keima tun! 14 Tha dia eigote chun Gal lel’u hem kisudongu hen! Kahahsatna kipah thanomte chu Nungjamu hen jahchau hen! 15 Tot nopna eineiho chun Gal lel’u hen jum’u hen! 16 Naheng jin jouse kipah thanom hen! Nahuhhhingna thangvah ten, “Pakai chu loupe tah ahi,” Tin sei jing jengu hen! 17 O Pakai, vaicha kalhahsam vangin Nangin neisumil deh poi! Eihuhhingpa ka-Pathen nahi Neipanhu loiyin!

Labu 41

Mi dammo taona

1 Vaicha khotote anun nom’ui! Hahsa atokhah tengu pakaiyin apanpi. 2 Amaho chu Pakaiyin achingin ahoidam’e. Gamdsunga anomlensah jin. Amelmatei kichepnan aneisahjipoi. 3 Adammo tengu pakaiyin kithopin tin, Adamsah kit ding ahi. 4 Keiman, “Nang dounan kachonsetai Pakai, Neikhoton neidamsah-in,” tin kataove. 5 Kamelmaten setah tah-in eihouvun, kathia suhmil’a kaum ding adeiyui. 6 Eihungve ho along thengpon, Kaphatmoa chengse achingun, Apot tengu gamtin a Aseithangsoh tauve. 7 Eivetda chengse keithu akihou lhiuvin, Kachunga thilse cheh cheh agel’uve. 8 Amahon, “Amahi athinattan, Damdoh kit taponte,” atiuve. 9 Kaginchat tah, kagol phapen Kaneh khompi geiyin eidoutai! 10 Pakai, neikhoton neidamsah-in, kamelmate chunga phu lange! 11 Kachunga nalunglhai kahei, kamelmate neijosah hih-in, 12 Thildih kabol jinge, neipanpin nate; Na-anga neikoi jing ding ahi. 13 Pakai Israel Pathen vahchoiyun, Tonsot tonsot’in Ama Vahchoiyun! Amen! Amen!

BU NINA (Labu 42-72)

Labu 42

Sohchang mi taona

1 Sitwi votjen lha-ngai sakhi bangin, O Pathen Nangma ka-ngaiye! 2 Vo hing jing Pathen ka-ngaiye! Itih leh na-anga chibai kaboh ding ham? 3 Sun le janin kakap’in, An neh khel’in kalhi along longe! Kamelmaten, “Na-Pathen hoiba ham?” tin Ei dodng dong jengui! 4 Phat chesa kageldoh teng kalungnai. Japi toh lhonin Pathen HOuin kajonin, Mipi kijot kalamkaiyin, Thanomtah-in Pathen cahvhoi la san asam’ui! 5 Idia hibang lung nommo Gentheiya um kahim? Pathen jenga kinem leng, Eihuhhing ka-Pathen vahchoi kit nange. 6 Lunghel le lhachomtah-in, Mizar molsang, Hermon molsang Jordan dung lonna gamsunga kadingin, Namikhoto themje kagel jinge! 7 Na-ogin komtong te ni kah a athongin, Natwipi dil kinong laiyin eilonvuh tai! 8 Sunteng jongle Pakai neilungset’in, Janteng kahinna Pathen henga la sang ting taovinge! 9 Eipanpi jing Pathen henga, “Idia neisuhmil’a, kamelmae gitlouna chengse Kadou dou jeng ham?” kati. 10 Melmaten ei-enghou hou jengun, “Na-Pathen hoiba ham?” tin eidongui!

Labu 43

Sohchang khopem taona

1 O Pathen them neichanin, pathen heloute neidouhun, Migilou jouseitea konin Neihuhdoh-in! 2 Kakiselna Pathen nahime, Idia neidonda ham? Iti kamelmate gitlouna chengse kadou dou jeng ding ham? 3 Salvah-in nadihan phongin, Nalhangtheng Zion aeipui hen Nachenna Houin eilhut lhon hen! 4 Chuteng namaicham phung jontange Pathen! Nangbou kanopna nahi. Kasem jang saiyin navahchoi la sange. O Pathen ka-Pathen! 5 Idia hibang lung nommo Gentheiya um kahim? Pathen jenga kinem leng Eihuhhing ka-Pathen vahchoikit nange.

Labu 44

Hoidamna dia taona

1 O Pathen, khanglui lai, Kapu kapateu nikho laiya Thil kidang nabol chengse eiseipeh-un, kamit’in kamu’vin kanan kajatauve! 2 Namtin vaipi nadelmangin Namite gamsunga nachensah-e. Namite nakhantousah-e. 3 Gamsung hi chemhem hat’a namiten alah-u ahipon, Athahat man’uva ajo’u jong ahipoi; Na-ngailut jeh le naumpi jeh, ahibouve. 4 Nang kalengpa le ka-Pathen, Namite gal najosah-e. 5 Nathahat kengin Kamelmateu kajoutauve! 6 Kihinsona din kathalpi jong kasongpon, Kachemjam jong kasongpoi. 7 Kamelmateuva konin neihuhdoh tauvin, Eihot bolteu najoutai. 8 Nangma kavahchoi jing diu, Tonsot’a kathangvah diu nahi! 9 Hinla neipaiyun gal neilelsah tauve, Kasepaiteu to jong gal nakonkhompoi! 10 Kamelmateu masanga neideljam’un, Kathil jouseu amahon akilah tauve. 11 Kelngaoi kisatchap neibahsah-un, Vannoi gamtina neithecheh doh tauve. 12 Man lhomchan nagel’in, Namite man baitah-in najoh mangtai. 13 Neibolnau kaheng kakomun amun, Eidaithangun einuisat tauve. 14 Namtin vaipi seichah din neibol’un, Lu eithin khumun einuisat tauve. 15 Vetda jengin ka-umin, Jum le ja kathot-e! 16 Eihotbol kamelmate houset le ohin Ka-ngai ngai jengin ahi! 17 Neitepnau kasuh keh dauva, Nang kasuhmil lou vangun Hichengse hi kachunguva Alhungsoh tai. 18 Nangla lheptol’in kabol pouvin, Nathupeh chengse kanitda pouve. 19 Ahinla gamsahang lah a neidalhauvin, Muthim lhangkhal jing lah a neidondauve. 20 Ka-Pathenu chibai kaboh dauva, Doi kahoutah-u jongleh, 21 Nahetdoh tei ding ahi, Ajeh chu kalungthim jouseu nahesoh-e. 22 Tunla Nang kahoujeh-un thading salhemin eikikoiyun, Tha dia koisa kelngoi bangin eikiboltauve. 23 Thouvin Pakai! Idia na-ihmut ham? Kipat’in, donda hel din neigel hih-un! 24 Idia kiselmang nahim? Kagenthei hesoh nau sumil hih-in! 25 Tol’a eichit thangun, Kalel jeh-un leivui lah a kalumden tauve. 26 Neihung panpiuvin, Nalungset long loujeh-in neihuhhingun!

Labu 45

Lengte ji neina La

1 Kalungthima thu ngei adimtan, Lengpa kalachoiye! Lekhasunpa lekhamol gonsa bangin Labol din kalei akilehgotai. 2 Pasal mel-houpen nahin, Thusei nathemin, Pathenin vang naboh jinge! 3 Nachemjam kikon, Vo leng thahat! Naminthangin nalal loupi! 4 Adih a panga adih a thutan din Galjou din sakol chunga hung touvin! Nathahat chun minthangtah-in Gal jouvin nate! 5 Nathalpi chang ahem theiyin, Namelmate lungchang akap pai jel jel’e; Namtin vaipi Nakhomuh a aboh khup’ui! 6 O Pathen, nalenggamin beitih neipontin, Thudih-in namite vai nahoppeh-e! 7 Nangin thilpha nadeiyin thilse nahoi; Hijeh chun Pathen, na-Pathenin lengdin nalhenge. Leng dang joouse sangin Kipa nopna napei! 8 Naponsil jouse myrrh le aloe gimvui anamin, Saihaa kijem leng inpia lathemhon nalem’ui! 9 Naleng inpia lhacha numeiho jong Lengte chanu jeng ahiuvin, Nalaltouna jetlama lengnu adingin, Ophir gama sana hoipenin akijem’e! 10 Kasei ngaiyin lengpa jia kipuinu! Namite le na-insung mite geldatan! 11 Namel-hoi jeh-in lengpan deichan natin, Napu jong ahijeh a athu na-ngai ding ahi. 12 Tyre gam miten thilpeh ding thil hinpon tin, Mihaoten nalung lhaina ahinhol diu ahi! 13 Leng inpia leng chanu aumin, amel-hoi lheh-e! Sana monkenga kijem poncho asil’e. 14 Aponchol jempah pumin lengpa henga apuiyun, Alhacha nu-ngah hon ajuiyun, abonin lengpa henga apuitauve. 15 Kipah thanomin ahungun, Leng inpia alut tauve. 16 Vo nangama kalengpa, Chapa tampi hingin, Leng changu hen napate khel’u hen, Leiset pumpi vaihomin pansah-in! 17 Kalabol hin naming seithang jingin tin, Akhang khanga min navahchoi diu ahi!

Labu 46

Pathenin eiumpiuve

1 I-kiselnau le ihatnau Pathen ahin, Genthei teng kithopi din eigo jingui. 2 Hijeh chun leiset pumpi kihot ling hen, Molsang jouse Twikhanglena kileh lut jongle I-kichat lou diu ahi. 3 Twikhanglen kidil hen kinong hen, Thinglhang jouse hotjal jongle kichapoute. 4 Vadung khat alongin, Pathen khopi Chungnungpen Houin thenga kipana ahinlhut’e. 5 Khopia chun Pathen apansan, Koiman khopi chu sumangponte; Jingkah matah a hungkona Khopi chu Pathenin akithopi ding ahi. 6 Namtin vaipi akichauvin, Lenggam jouse akilingsoh tauve; Pathenin lhang asamin, Leiset ajol lhatai! 7 Thaneipen Pakaiyin eiumpiuvin, Jacob Pathena kisel ahiuve. 8 Hungun Pakai natoh hung veuvin, Veuvin itobang datmo thil abol hitam! 9 Vannoiya gal kisat jouse avotangin Thalchang aheh bongin, tengcha avobongin, Lum jouse ahal vamsoh tai! 10 “Umthim’uvin, heuvin Pathen kahi; Namtin vaipi lah a chungnungpen, Vannoiya thanei chungnungpen kahi,” ati. 11 Thaneipen Pakaiyin eiumpiuvin, Jacob Pathena kisel ahiuve!

Labu 47

Vaihom Chungnungpen-Pathen

1 Mitin vaipi kipah-in khut bengun! Othongin la san Pathen vahchoiyun! 2 Ginpen ding Hatchungnungpen Pakai ahin, Leng loupe ahin, vannoiya vai ahom’e! 3 Mitin vaipi eijosah-un, Namtin vaipi chunga vai eihomsah-ui! 4 Chemun gam eipeuvin, Angailut amite hoithopi gam anapei. 5 Pathenin alaltouna ajontouvin, Kipana kholhang akisamin sumkon akimut’e! Pakai akitol toutai! 6 Sauvin Pathen vahchoi la! I-Lengpau vahchoi la sauvin! 7 Vannoi pumpi leng Pathen ahi, Sauvin avahchoina La! 8 Pathen alaltouna thenga atouvin, Namtin vaipi vai ahompeh-e! 9 Namtin vaipi vaihomte Abraham Pathen mite toh akikhom’ui! Gal-hat jouse sanga hatpen Pathen ahin, Minthengtah-in vai ahom’e!

Labu 48

Pathen khopi Zion

1 Aloupi Pakai chu, I-Pathenu khopi, Alhang theng chunga Loupi tah a vahchoi ding ahi! 2 Pathen molsang Zion, Asangin ahoiye; Leng loupipen khopi Vannoi dia kipana ahi. 3 Akhopi kulpi sunga Pathen amatah Kulpidet’a apandan aphonge! 4 Leng jouse akikhom’un Zion mol nokhum din ahungtauve! 5 Ahin Zion molsang amuphat’un akichauvin, Atijauvin ajamtauve! 6 Kichan akihot lhulsoh tauvin, Numei naosoh ding bangin na asalheh-ui! 7 Tarshish kong innei Khopihui kinonglai toh kha abangui! 8 Thaneipen Pakai i-Pathenu khopi sunga Pathen natoh thu kanajauvin, Tun mit’in jong kamutauve; Pathenin akhopi ahoidam jing ding ahi. 9 O Pathen nahouin sunga Nalungset long lou kageldoh-ui! 10 Muntina min navahchoiyin, Leiset chunga naminthangsoh tai! Thudih-in vai nahomin, 11 Adih-in thu natan’e Zion mite kipah hen! Judah gam khopi jouse kipah hen! 12 Pathen mite Zion kimvel’in kijot’un, Insang lai jouse simtoh-un! 13 Khopipal malchih-un, Akulpi kholtoh-un! Khangkit’a mite naseipeh diu ahi. 14 “Hiche Pathen hi tonsot’a i-Pathenu ahin, Phat jousea eilamkai diu ahi,” tiuvin.

Labu 49

Haova kison ngolna

1 Hiche hi ngaiyun mitin vaipin, Muntin aching, 2 Alen aneo, ahao avaiyin Ngai cheh-uvin! 3 Thuh tah-in lung kagel’in, Chihna thujeng kaseiye. 4 Thuchih jeng ngai phang ting, Semjang saito thon hilchen inge! 5 Melman eiumchah a, Aneile agouva kisong ho 6 Ahao kiletsah piten eium jongleh Hitobang phatsea jong hin kakichapoi! 7 koila ama kilhatdam theipon tin, Ahinkho manjat Pathen apeh jou deh lou ding ahi. 8 Mihem man akisim joupon, Ijat kipejongleh lhing ponte; 9 Tonsot’a hing jinga Thina lhankhuh ajotda lou ding ahi. 10 Mi-ngol mivaichate thi bangin Michingte jong athin, Anei agou jouseu jong Midang adalhah pehji tauve. 11 Mihem gampi le pua anapan vangun Alhankhuh-uva akijamji tauvin, Hikoma hin aumdenji tauve. 12 Mihem aloupinan ahinso joupon, Ganchate thi bangin athi thouve. 13 Ngol-han a anei angaa kisongte Manthah ding dan chu, 14 Thadia koisa kelngoite bang diu, Thinan kelngoi chin a achin’uva Thiuva tahsa monloi ding, Noimigama cheng sen diu ahi; Midihte vang khovah a vah diu ahi. 15 Keivang Pathenin eihuhdoh ding, Thinaa kona eihuhhing ding ahi. 16 Mi khat ahaodoh a Gou alambe jongleh thangsen tijat dan, 17 Mi athi teng agou apothei pon, Aloupinan jong lhansunga ajuilut theipoi. 18 Ahinlaiya nomsa jing mi, Athilpha boljeh a pachat chang jong 19 Tonsot muthim thina geisa Apu pate henga chetai ding ahi. 20 Mihem aloupinan ahinso joupon, Ganchate thi bangin athi thouve.

Labu 50

Pathen houdih

1 Pakai, thaneipen Pathen apaovin, leiset pumpi, so le lhuma konin Mi akou kou jenge! 2 Khopi hoi chamkimsoh Zion a Pathen avah emsel’e. 3 I-Pathenu ahungin athongje jui, Amasanga mi halvam thei mei akongin, Huipi le gopi kithon atomsoh keiye! 4 Amite thu atanna hettohsah a pang din Pathenin van le leiset akouve, 5 “Kilhaina bol’a keito kitepna semdoh, Tansan umtah kamite hung kikhom’un,” tin akouve. 6 Pathen dihtah ahile thutanpa ahi Van mun jousen aphongdoh tai. 7 “Ngaiyun kamite thu seiyinge; Nang douna kasei ding ahi-Israel, Keima hi Pathen, Na-Pathen kahi. 8 Kilhaina hijat naboljeh le Tang louva pumgo thilto neipeh jeh a Them kachansah ding nahipoi. 9 Na-insoh bongchalte kaseipon, Nakel-hon lah a kelchate jong kadeipoi. 10 Ajeh chu gamsa jouse keiya ahin, Mol le lhang san gkhat’a lha Gancha jouse keiya ahi. 11 Vacha jouse jong keiya ahin, Gamlah ganhing namkim keiya ahiuve. 12 “Kel jong leng nahenga thum ponge, Leiset pumpi le adunga um jouse keiya ahi. 13 Bongchal sa kaneh monga, Kelcha thisan kadon mong-em? 14 Pathen koma nakilhai sangin Thangvah jon lang, Hatchungnung Pathen henga Nakitepna jat molson, 15 Nagenthei teng hung taovin, Nahuhhing ing ting neivahchoi ding ahi,” ati. 16 Mihilou jah a Pathenin, “Idia kathupeh chengse chinpha naseiya, kakitepna chu naseile ham? 17 Kahilgot le nadan, Kathupeh chengse napaitai. 18 Gucha namuphah chanto nakiloiyin, Mi jonbolte to nakivop’e. 19 “Thuse nasei nom jingin, Kho-ngai louhel’in joujeng naseiye. 20 Nasopite douna jeng naseigo jingin, Athemmo nau hodoh nago jingjie. 21 Hicheng hi nabolten, Kalimsah hih laiye; Hijeh chun nang tobang din neigel’in ahi. Tua vang kaphoa kahilchet nahi. 22 “Einahsah louten hiche hi ngaiyun, Achutiloule kasuhmanguva Koiman nahuhhing jou lou diu ahi. 23 Thangvahna neiyan kilhaiya eijabol ahin, kasei ngai jouse kahuhhing tei ding ahi,” ati.

Labu 51

Ngaidam thuma taona

1 O Pathen neikhoton, Nalungset longlou ahi; Namikhotona alene, Kachonset jouse theh ngimin! 2 kagitlouna jouse sop lhan, Kachonset’a kon neisuthengin! 3 Kamona jouse kahen, kachonset ho kahejinge! 4 Nang douna mong monga chonsea, Nahotpen kabol ahitai! Hijeh chun dihtah-in neibol’in, Mo neichanjeh-in nadih tai. 5 Chonsesa kajil’a Themmosa hung peng kahi! 6 Nangin kitahna le thutah nadeiyin, Hiche ding hin chihna kalunggil’a neikhumpeh-in! 7 Kachonset sumangle chun theng tange. Neisop le chun buhbang bangin bang jonge! 8 Neimehgep a neisuhgoisa hijongleh Kipana la thanopna ogin neijahsah kit’in, Chuteng kipah thanom kit tange! 9 Kachonset ho neivetpeh dan, Kagitlouna chengse theh ngimsoh-in! 10 O Pathen, kalungsung semthah-in, Kasunga tomngaina lhagao thah neikhumpeh-in! 11 Nakoma konin neisel mang dan, Kachunga na-Lhagao Theng lamang hih-in! 12 Namihuhhing kipana neipekit’in, Thanom tah-in nathua neinunsah-in! 13 Chuteng chonsete nathupehho kahil’a, Nahenga hung kilekit diu ahi. 14 O Pathen, neihuhhingin neilhing hoiyin, Chuteng kipah-in nadihna seichoi lenge! 15 Pakai kathusei neipanpin, Chuteng nangma vahchoiyinge! 16 Kilhaina jong nadeipon, Toh jeng jong leng pumgo thilto jong nadeipoi. 17 O Pathen, lung lengvaiya kisih hi Kilhaina sangin nadeijon; Hijeh chun lung lengvaiya kisihte Nahsah mo pon nate! 18 O Pathen, Zion khopi khoton panpin, Jerusalem kulpi jouse kaiphan! 19 Chuteng adih a kilhaina kibol’in tin Nalungna chim ding; Namaicham phunga pumgo thilto kipea, Bongchaltea kilhaina kinei ding ahi.

Labu 52

Pathen thutan le alungset

1 Vo mihatpa, idia nathilse bol Nakiletsahpi ham? Pathen mingailut hi tonsot’a ahibouve. 2 Midang suhmangna ding jeng nagon, Namuh themsiu seucin; Semthu jouthu jeng naseiye. 3 Thilpha sangin thilse nadeijon, Thutah sangin jouthu nadeijoi. 4 Mijoupa, midang suhgetna jeng naseiyem ong! 5 Pathenin nang nasuhmang hel ding, Namat’a na-ina kona nakaimang ding ahi; Mihing leiset’a kona Napaidoh ding ahi. 6 Midihten amuteng tijauvintin, Nanuisat’uva, 7 “Ven, Pathena kisong loupe, Anei anga jenga kisonga Athilse bol chengse Kisonnaa neipa pi khu,” tiuvinte. 8 Keivang Pathen Houin sunga Olive thing hing kabangin, Atonsot atonsot’a din Pathen lungset long louva kakisonge. 9 O Pathen, nathilbol ho jeh a Nangma kathangvah jing ding, Namite angsunga Naphatna kahonjal ding ahi.

Labu 53

Mihem gitlouna

1 Mi-ngolten, “Pathen aumpoi,” atiuvin, Nehguh a kivah jeng, Thet umtah tah bol ho, Thildih bol khatcha aumpoi. 2 Miching, Pathen hol aum khat leh, Tin Vana konin Pathenin mihemte ahinvei. 3 Hinla akiheimangsoh keiyun, Kibang cheh-in aphamouvin, Thildih bol khatcha aumpon, Khat’a khat jong abeihel’e. 4 “Kamite chomgama, Kahenga tao kha louhel, Hiche thilse jeng bolte hi Kho helou khat hiuva, Imacha jong ahetlou tah bah-u ham,” Tin Pathenin aseiye. 5 Anasoh kha louhel Pathenin Amite kidoupi ho gu le chang Athethangsoh tengleh Abonchauva tijat thi diu ahi. Pathenin adonlou ahitan, Amaho mangthah diu ahitai. 6 O Ziona konin Pathen hung hen Israelte gal josah tave leh! Pathenin Isarel ahaodohsah teng Jacob insung iti kipa thanop diu hitam!

Labu 54

Melmatea kona houbitna dia taona

1 Vo Pathen naminin neihuhhingin, Nathahat’in neihongin! 2 O Pathen kataona ngaiyin, Kasei neigelpeh-in! 3 Mi kiletsahten eidel khumun, Pathen ginglou engseten thadin eigo! 4 Hinla eipanpia Pathen ahin, Eihuh a Pakai ahi. 5 Kagalte hi Pathenin thilsen lethuh hen, Kitah tah Pathen ahijeh-in abonchan sumang hen! 6 O Pakai, naphat jal’in Kipah tah-in nahenga kilhiaying ting, Nangma thangvah tange! 7 Kagimna jousea neihoidoh tan, Kamelmate nasuhmang kamutai!

Labu 55

Agol’in alhep lhah mi taona

1 O Pathen kataona ngaiyin, Kathum nungsun dan! 2 Ngaiyin neihouvin, Lunggim lih pai ding kahitai! 3 Kamelmaten kindot dot’in eilhan, Migilouten einehgep pai diu ahitai. Gimna jeng eilhut khumun, Eilunghan’un eiho’uve! 4 Kakicha behseh jengin, Kathillo paiding ahi! 5 Kichan kakithing thingin, tijalih pai ding kahitai! 6 Ohe, vakhu bangin lhaving neiying, Leng mangin choldo mun gahol leng! 7 Gamla tah aleng ing ting, Gamthip laiya cheng tange! 8 Huipi le gopi masanga jong Kiselna mun muloi tange! 9 O Pakai, kamelmate kihoutoh mon lhan! Khopi sunga kinah l ekidou kamun, 10 Sun le janin khopi aum’uvin, Adihlou le hesohna jeng abol’uve. 11 Muntina thil le lo asuseuvin, Kholai dung jousea mi abolseuvin abolgentheiyui! 12 Melman eidaithang hileh Kathoh thei ding, Kakidoupin kiletsahna einei hileh Kakisel mang thei ahi. 13 Kadoulel hila kahetsa, kaloi kagol ngaitah nang nahibouve! 14 Thu ngei ngei iseikhom jin, Houin ikaikhom ji lhon me! 15 Kamelmate hi aphat lhon masangin thiu hen, Ahing laiyin noimigam jon’u hen; A-insunguva jong thilse jeng, Alunguva jong thilse jeng aum’e! 16 Hinla eipanpi din Pakai Pathena kataove, eihuhhing nante. 17 Jingkah nalhah sunin Kagimna le kakiphinna aheng alhung jinge, Aman ka-ogin janante. 18 Melma hijat kidoupi kanei vangin Galmuna konin jong Kitup keiyin eihinle pui kit nante. 19 Tonsot’a vaihom Pathenin Kataona ngaiyintin amaho ajo ding ahi. Ajeh chu amahon lung aheipouvin, Pathen jeng jong agingpouve. 20 Masanga kagol’in aloite adelkhumin, Akitepna jouse asukeh tai. 21 Athuseiho khoiyu sangin analhumjon, Alungthima vang mi avetdan ahoi; Asei jouse thao bangin anal’in, Hinla chemjam hem banga mithat thei ahi. 22 Nagimna jouse Pakai chunga sep lhan, Aman nakhankho gel nante; Aman itih-in jong midih Gal alelsah ngaipoi. 23 O Pathen, tolthatte le mijouho khu, Hinkho bang khaiyin kokhuh a leh lut’in! Keivnag hi Nanga ki-ngai jing inge!

Labu 56

Pathen kisonpia taona

1 O Pathen neikhoton, Nilhum lhumin kamelmaten Eibolgentheiyun, Kengton eichil chil jengui! 2 Nilhum hel’in eidel khum khum jengun, Eidouva atam behseh jengtauve. 3 Kakichat phat hin Nanga kakingaiye, O Hatchungnung Pakai! 4 Kicha louvin Pathena kakisongin, Athutep jal’in kathangvah-e! Tahsa mihem mai maiyin I-eilo thei idng ham? 5 Kamelmaten nilhum lhumin eibol gentheiyun, Kei dsuhsetna ding jeng agong’ui, 6 Kiselna thei channa akikhom’un, Eithana diuvin kabolchan amelchih-ui! 7 O Pathen, akhanset jeh-un engbol’in, Lung soutenin mitin vaipi tolse nan neiyin! 8 Kagimna nahesoh keiyin, Kamit lhilon namelchih jingnan, Abonchan nalekhabua najih lutsoh tai! 9 Nahenga katao ni nil eh Kamelmate nungjamsoh diu, Hijeh hin Pathenin eipanpi kahei! 10 Hiche Pakai hi Athutep chengse kathangvah-in; 11 Kison nan kaneiyin ima kagingpoi, Tahsa mihem mai maiyin I-eilo thei ding ham? 12 Vo Pathen, kakitepna jat napeng ting, Kathangvahna thilto peng’e! 13 Ajeh chu thi idngsa neihuhdoh tan, Gal neijosah tai. Hijeh chun Hinna khovah Pathen angsunga kavah lei. 56 Title: 1 Sam 21.13-15

Labu 57

Panpi ngaichaa taona

1 Neikhoton O Pathen neikhoton, Naheng kahinbel’e! Khopihui le gopin eidalhah kahsen Nalhaving noiya kakisel’e! 2 Chungnungpen Pathen, kangaichat chan eipethei Pathen henga kataove. 3 Vana kon eihouva eihuhhing ding, Eibolsete asuhnem’a kitahtah le Long louva eilungset ding ahi. 4 Mihingnea sakeite bangin Kamelmaten eiumkimsoh tauvin; Ahau tengham le thal-hem abange, Aleiyu jong chemjam hemtah abangin ahi. 5 Vo Pathen, vanthamjol’a nalalna phongin, Leiset pumpi chunga naloupi phongin! 6 Kamelmaten lenpel eisonpeh-un, Hesoh lih pai ding kahi. Kalampi khuh alaiyun, Hinla amahojoh alhalut tauve. 7 Vo Pathen, lung dettah-in kapange, Navahchoila sange! 8 Thouvin kalhagao, Kipat’un selangdah le kasemjang, Nipilai jeng jong Kahoh khah lo ding ahi. 9 O Pakai, namtin vaipi laiya Nangma thangvah inge; Namtin japi lah a Navahchoi la sange! 10 Nalungset longlouvin van aphan, Nakitahnan vanthamjol aphai! 11 Vo Pathen, vanthamjol’a nalalna phongin, Leiset pumpi chunga naloupi phongin!

Labu 58

Migilou chunga phula dia pathena taona

1 Vaihomten adih a thu natanu hinai, Mitin thu kitoh a nabolpeh jiu hinam? 2 Ahinaisaipoi, thilse jeng nagel’un, Leiset’a pumhat’in asejeng nabol’u! 3 Migiloute chu ahinkho lhumkeiyin Lamdih lou jenga acheuvin, Apen niuva pat Thujou jeng aseiyui! 4 Gul banga gu nei jeng ahiuvin, Gulsum na-ngong bangin akolseh-ui. 5 Gulsumin gulsaiho theile gin ajapon, Guldoi choiho phunsam jong ajapoi. 6 O Pathen sakei tobangte ha subongin, Sakeinou tobangte tenhem sunil’in Pakai! 7 Hohtwi long mang bangu hen, Hampa kichonthang bangu hen! 8 Dahdeng goden bangu hen lang, Ni mulou naosen pengsol bangu hen! 9 Ahet masnagun hampa kisattan bangu hen, Ahing laiyun Pathenin alunghan teng mu tmang hen! 10 Chonseten talen amat teng Midihte kipah diu; Midihten chonsete thisan kengtoa achil thang diu ahi. 11 Mihon, “Midih-in kipaman akisanin, Leiset thutan Pathen aum monge,” ati diu ahi.

Labu 59

Hoidohna dia taona

1 Kamelmatea konin neihuhhingin Pathen, Eisel khumtea konin neihuhdoh-in! 2 Migiloutea konin neihuhhingin, Tolthattea konin neihuhdoh-in! 3 Ven, tha din eichang lhiuvin, Eidou din migiloute akikhom’ui! Chinsetna le bolkhel kaneijeh jong ahipon, 4 Themmona kaneijeh jong ahipoi Pakai, Hibanga akinothe thu vangun! 5 Kipantan Pakai thaneipen Pathen, Keima neipanpin; Vo Israel Pathen! Namtin vaipi talen matsah tan. Joulhep hat thilse bolte Khatcha jong khoto dan! 6 Nilhah teng ahung kit jiuvin, Khopi sunga akijot’un uichate bangin apengset dot’ui. 7 Mi aphin’uva a-enghou nau ngeiyun, Aleiguiyu chemjam hem hat abangin, Athuseiyu koiman ajah loudin agel’ui! 8 Amaho khu nuisat’in Pakai, Namtin vaipi khu daithangin! 9 O Pathen kakisonpi Kakiselna nahi! 10 Eingailua ka-Pathenin eihung vil ding, kamelmate gal lel eimusah ding ahi. 11 Amaho hi thadan Pathen, Achutiloule kamiten sumil’unte; Nathahat’in thethangin lang Sunemdoh-in eihuhhingu Pakai! 12 Chonset thujeng aseiyun, Asei jouseu chonsetna jeng ahi. AKiletsah nauva kipal’u hen, Mi agaosap’un jou aseiyui. 13 Lung hangin sumangin, Abonchauvin sugamhel’in! Chuteng Israel chunga Pathen vaihom Mitinin ahetsoh ding, Leiset pumpia avaihom hi Kihedohsoh hel ding ahi. 14 Kamelmate nilhah teng ahung kit jiuvin, Khopi sunga akijot’un uichate bangin apengset sot’ui. 15 Ui anholmo helbangin Kholai dunga akijot le leuve. 16 Genthei nikhoa kakiselna kulpi Nang, Nathahat vahchoi la sang ting, Jingkah she leh nalungset longlou Jailan oiyinge! 17 Eingailua Pathen, Kakiselna Pathen, Eipanpi jing Nangma vahchoila sange!

Labu 60

Huhdohna dia taona

1 Neilunghan jeh-un, Kagalpal jouseu phe lhan lang, Neipaidoh ta jongleur chun Tun neihungvil kit’un Pathen! 2 Leiset lingpin hot’in lang, Akeh lhapai ding ahitai Tun kichisah kittan! 3 Namite neibolgim behseh-un, Jukham bangin kalonle letauve! 4 Amanthah louna diuvin Natahsante nahilchah masajie. 5 Namingailutte hoidohna din, Kataonau sangin lang Nathahat’in neihuhhingun! 6 Amunthenga konin Pathenin, “Kajothoa Shechem kahop khen ding, Sukkoth phai kamite kahoppeh didng ahi. 7 Gilead le Manasseh keiya, Ephraim kathih lukhuh, Judah kaleng tenggol ahi. 8 Moab kakengto sop ding, Edom kachotpha ding; Philistia hanla kasha den sing ahi,” ati. 9 Vo pathen, koiham kulpia eikailut’a, Edom a eikai ding koi ham? 10 Neipai mongu hitam Pathen? Kasepaiteu gal nakonpi lou ding ham? 11 Mihem kithopi pannabei ahi, Kagalteu neidou hu’vin! 12 Pathenin eipanhu leh kajotei diu, Aman kagalteu ajo ding ahi.

Labu 61

Hoidohna dia Taona

1 O Pathen kataona ngaiyin, Kathum neijah peh-in! 2 Ichan gama um jong leng Genthei teng Nangbou kakouve! Hoidohna kulpisa neisel’in! 3 Melmate dia kagalpal detpen, Eihoidohsah Nang nahi Pathen! 4 Kahinkho lhumkeiyin Munthenga neichensah-in; Nalhaving noiya neihoidamin! 5 O Pathen kakitepna chengse najan, Najabolte chanlom thil neipetai. 6 Lengpa hinkho sotsah-in, Tonsot kumkhon hing jing hen! 7 O Pathen, na-angsunga lengpa vaihom jinghen, Kitah a nangailutna long louvin hong jingin! 8 Chuteng niseh a kakitepna kapeh teng Tang louvin navahchoi la sange!

Labu 62

Pathen hoidamna kisonpi

1 Eihuhhing din Pathen ka-ngah jingin, Amabou kakingaina ahi! 2 Pathen bou eihuhhinga eipanpia ahin, Eipanpi jeh-in koiman eijouponte. 3 Pal kison chimsa sanga lhasamjo Mihem hi itih chan geiya naboncha nadelkhum diu ham? 4 Suh minset dia bou nabol’u ahin, Nop nop’in jou naseikhum’ui! Phattheina thu jeng naseiyun, Nalungthimun nagaosap sap’ui. 5 Pathen jenga kakingaiyin, Amabou kakineppi! 6 Pathen bou eihuhhinga eipanpia ahin, Eipanpi jeh-in koiman eijouponte. 7 Huhhing le jabol kachanna ding Pathen bou ahi; Eihoidam hattah, Kakiselna Pathen ahi. 8 Itih-in Pathena ki-ngaiyun kamite, Nagim nau hetsah-un Ambou ikiselnau ahi. 9 Mihemte hi hu haikhat tobang, Alen aneo pannabei cheh ahiuve; Thiltena tedin jong ima aleppon, Huijang sangin ajangjoi. 10 Pumhat kisonpi sauvin, Guhchat’a hao ding kinem hih-un; Haotel tul jongle chun Kison nan nei hih hel’in! 11 Thaneipen Pathen ahidol Aman aseina kaja jinge. 12 Pathen lungset long lou ahi, O Pakaim, mitin atoh dungjuiyin lethuh-in!

Labu 63

Pathen lhangaiya um

1 O Pathen, ka- Pathen nahin, Nangbou ka-lha ngaiye! Kahinkhon ka-ngai jingin, Twi bei, leigo Twi ngaicha geo leiset bangin Kahinkhon nangbou ka-ngaiye! 2 Munthenga neikimusah-in; Nahatje le naloupije neimusah-in! 3 Moh hinsangin nalungset long lou aphajon, Hijeh a hi kavahchoi ding nahi. 4 Kahinlaisen thangvah ing ting, Nangma kasan a katao ding ahi. 5 kalhagao vahvan natin, Kenjong nahenga vahchoiya kipala kasha ding ahi. 6 Kalup teng Nangma kageldoh jin, Jan khovah-in Nangbou kagel’e! 7 Eipanpi Nangbou nahi, Nalhaving noiya kipa la sange! 8 Nangma kakolchah jingin Nakhut’in eihoidam nai. 9 Eithatgote chu Noimigama kijotdsuh-u hen! 10 Gal’in thatgamu hen, Alongu se-alten ne hen! 11 Pathenin lengpa gal ajosah tai, Lengpa kipah thanom hen! Pathen mina Kitepten Pathen avahchoi diu; Jouseite vang apomoa um diu ahi.

Labu 64

Hoidohna dia taona

1 Kagentheiye Pathen, Kataona ngaiyin! Kagalte kakichai, Neihuhhingin! 2 MIgiloute thilsea konin neihoidoh-in, Mi-engsete thilgona konin neiselmangin. 3 Aleiguiyu chemjam hem abangin, Athuseiyun thalchang bangin mi adot’e. 4 Jum le ja helouvin jouthu aseilouyun, thusen miphaho asuminseuve. 5 Thilse boldin akitil touvin, Thang kamna mun ahol’un, “Koiman eimupouvinte,” tin agel’ui. 6 Thilse jeng agongun, “Thilse tahbeh igongui,” atiuvin; Mihem lungthim le lunggel vang Het theihoisan ahipoi. 7 Hinla Pathenin thalpin ahinkap’in, het manlouvin amvosoh tai. 8 Athusei jeh-uva Pathenin asuhmang ding, Amupha chan tija lu ahih khum diu ahi. 9 Abon a kichasoh diu, Pathen natoh agel’uva aseile diu ahi. 10 Pakai natoh chu Midihten akipapi diu; Midihte Pakaiya hoidoh diu Miphaten Pakai avahchoi diu ahi.

Labu 65

Vahchoi le Thangvah

1 Vo Pathen, Zion lhanga vahchoi lom nahin, Kakitepnau pehdoh lom nahi. 2 Nangin kataonau nasangin, Muntina min naheng ahinjon’e. 3 Achonset jal’un nahinhol’un, Kathemmo nauvin rijothouvin, Hinla nangin miho chonset Na-ngaidamjie. 4 Nadeilhen mi, munthenga nahinpui chu Minun nom ahi. Na-insunga thilphaho Nahou-in theng vangbohnan kalungnau chimsah tante. 5 Gal neijosah-un neihouvun, Eihuhhingna diuvin thil kidang dang nabol’e! Leiset kolkimvel mite leh TWikhanglen gal’a miten na-kingainai. 6 Nathahat’in mol le lhang natungdoh-in, Nathahat loupe mi namusah tai. 7 Twipi kinonglai naphoh thip’in, Twi kidil lai nasuhaitai; Mipi kinonglul lul jong navohaiye. 8 Nathildbol loupiho jeh hin Leiset pumpi akichatai; Nathilbol ho hin Leiset kolkimvel’a kipana alhut’e. 9 Leiset khohsah nan go najuhsah-in, Nachap nouvin leipha nasoi. Luidung jouse twi nadip’in, Leiset ga napunsah-e! Nathilbol dan chu: 10 Leichang tuhnemsa go najuhsah-in, Twiyin nachap nouvin, Go naphinsah-in leiset nachap nouvin, Hamthah louthah nadotsah-e. 11 Naphat jal’in lhoga nalhinsah tan, Nakithahna lam lama Neng jeng jungin nalhai! 12 Lungdong lah a kelngaoihon ademset’in, Mol le lhang pang dung vetnom nom aum’e. 13 Jaolah jouse kelngoite adimin, Phaicham jouse chang adim’e. Thil ijakaiyin Kipa thanop la asauve!

Labu 66

Vahchoina le thangvah La

1 Mitinin kipa othongin Pathen vahchoiyun! 2 Amin loupe lan sauvin Loupi tah-in vahchoiyun! 3 Pathen koma, “nathilbol iti kidan a, Nathahat iti let hitam! Namelmate kichan Na-anga aboh khuptauve. 4 Leiset’a cheng jousen chibai naboh-in, Navahchoila asauvin, naming vahchoila asauve. 5 Hungun mihemte lah a Pathen thilbol kidangtah hung veuvin! 6 Pathenin Twikhanglen taolgo asosah-in, Ipu ipateuvin vadung longlai tolgo ajotdoh-ui! Hiche aboljeh hin Eiho ikipah thanom’ui! 7 Pathenin athahat’in lengvai apon, Namtin vaipi avelhi jingin, Doumah bolten jong adou-ngampouve. 8 Namtinin i-Pathenu vahchoiyun, Navahchoinau kithong hen! 9 Pathenin eihing hoi nalaiyun, Eikipal lhuhsah hih laiyui! 10 Vo Pathen, Nangin keiho neipatep’un, Sana meiya kilhatheng bangin neipatep tauve! 11 Pel’a neilhah sah-un, Pohgih hahsa tah neipohsah-ui! 12 Melmate neichil thangsah-un, Meipi le twipi kapal galkaiyui! Tunvang hoidohna mun a neipuilut tauve! 13 Nahouin thenga pumgo thilto hinchoiying ting, Kakitepna chengse penge! 14 Kagimpet’a kaseisa Kakitepna jat lhingin penge! 15 Maichama pumgo din kelngoi peng ting, Bongchalte le kelchatea kakilhai ding, Akigona meikhu vanlai jol’a Kitungdoh ding ahi. 16 Pathen gingten hung ngaiyun, Itobang thil loupe eibolpeh deiyinge! 17 Pathena panpi kathumin, Vahchoilan kathangvah-e! 18 Kachonset ho khohsah da leng, Pakaiyin kataona sang ponte. 19 Tunvang pathenin eihouvin, Kataona asangtai! 20 Long louva eilungset jeh le Kataona asanjeh-in Pathen kavahchoiye!

Labu 67

Thangvahna La

1 Neikhoton phatthei neiboh-un Pathen! Hepitah-in neiveuvin! 2 Chuteng vannoiyin nadei hentin, Namtinin nahuhhingna hente! 3 O Pathen, mitinin navahchoi hen, Mitin vaipin navahchoi cheh hen! 4 Mitin thu adih a natanpeh a, Namtin vaipi nalamkaijeh-in Namtin vaipin kipa nop la sau hen! 5 O Pathen, mitinin navahchoi hen, Mitin vaipin navahchoi cheh hen! 6 Pathen, i-Pathen’un phatthei eiboh-un, Leiset ga alhung tai. 7 Pathenin phatthei eiboh tauve, Muntina miten Ama jabol cheh hen!

Labu 68

Nampi galjo La

1 Pathen akipat’in amelmate anocheh tai, Ama hotbolten alel’un ajamtauve! 2 Meikhu kimut mang bangin, Melmate Pathenin adelmangtai; Meihul’a khoilu jolmang bangin, Pathen masanga migiloute amang thah tai. 3 Midihte vang Pathen angsunga akipah thanom’un, Kipah thanomin a-aovui! 4 Pathen la sauvin, amin vahchoila sauvin; Meilhang chunga tou Pathen lampi semjangun, Amin Pakai ahi, a-angdsunga kipah-un! 5 Ahouin thenga pansa Pathenin Chagate le meithaiho akhohsah-e! 6 Pathenin chenmun beite chenmun apen, Sohchangte kipah a nomlen din alhadoh-e. Pathen doumah bolte vang Hollei lah a achensahjie. 7 O PAthen, namite napuidoh a, Nelgam najot galkaipi chun; 8 Sinai pathen ahungin, Israel Pathen ahung jeh-in, Ling akihot’in, go ajui! 9 Pathen, nengtah-in go najuhsah-in, Nagam leiset gosa nachapnouve! 10 Hikoma chun namite achengun, Naphat jal’in caichate natoi! 11 Pakaiyin thu aphongin, Numeiho geiyin aphongjal leuvin, 12 “Lengho le asepaiteu ajamtai,” atiuve. Akichomdoh ho in’a numeiho akihom’ui. 13 Vakhu lim sana kitomjol, Alhaving geiya sana thengsel’a kiloijol jong ajaove. Galpi nikhoa chu, Ibol’a kelngoi honga moh tou nahiuvem? 14 Zalmon lhanga thaneipen Pathenin Lengho athecheh nin, buhbang alhah sah-e! 15 Vo molsang vum sangtah, Pathenin chenmun dia alhenna, Iti thangset um nahim? Chua Pakai tonsot’a cheng ding ahi! 17 Akangtalai thaneiteh asang sang pumin, Sinaiya pat Pakaiyin muntheng ahinjon’e! 18 Gal-hing tampi akaiyin, Munsang lam ajontouve! Doumah bol jongleur mihemtea konin Thilpeh tampi akisanin; Pakai Pathen chu Hikoma cheng ding ahi. 19 Niseh a pohgih eipoh hu Pakai vahchoiyun, Eihuhhinguva Pathen Amabou ahi! 20 I-Pathenu hi huhhing Pathen ahin, Pakai ama hi thinaa kona eihuhdoh-u Pakai ahi. 21 Amelmate lu Pathenin atantei ding, Chonset lam jenga chete lu atan ding ahi. 22 Pakaiyin, “Bashan a kona namelmate kahinpuiya, Twikhanglen thuh laiya kahinpuidoh ding; 23 Chuteng athisan lah-u nanoh a, Uichaten athisanu ava va ale diu ahi,” ati. 24 Vo Pathen galjouva nahung kitol, Kalengpa Pathen Amuntheng phung jona hung Mintinin amusoh tai! 25 Lathemho alamkaiyin, Tumging themte anukhah-ui; Alailunguva Nu-ngah hon khatbeh abengui! 26 “Amite kikhopnaa Pathen vahchoiyun, Jacob chilhah jousen Pakai vahchoiyun!” atiuve. 27 Phung lhumpen Benjamin alamkaiyin, Abanin Judah lamkaihon aloiho aloiyun; Zebulun le Naphtali lamkaiten Anung ajuiyuve! 28 Vo Pathen, keho khel’a namanchah nathahat, Hiche nathahat chu phongjal’in! 29 Lengle lalten thilto tampia nahou nau, Jerusalem khopia nahouin a phongin! 30 Pumpeng lah a lhale gamsa tobang Egypt mite phoh-in lang, Bongchal hon anoute lah a kinomsah tobang Namtin vaipi khu phoh-in; Adangkai choiya nahenga aboh khup Kahseuvin khu the cheh doh keiyin! 31 Egypt’a konin palai hungun tin, Sudan mite Pathen lam Sanga tao diu ahi. 32 Leiset lenggam jousen Pathen pachat la sauvin, Sauvin Pakai vahchoi la! 33 Khangluiya vanthamjol, Hiche vanthamjil’a toupa Pathen sei ngaiyun Othongje jun sam’uvin! 34 Pathen thahat phongjal’un, vanthamjol’a athahat akilangin, Israel chunga alal loupitai! 35 Amunthenga ahung potdoh chun Pathen akidang behseh-e! Hiche Israel Pathen khu! Amana mite tha le jung apei! Pathen vahchoiyun!

Labu 69

Panpi ngaicha Kap

1 O PAthen neihuhhingin, Twiyin ka-ngong gei achuptai! 2 Bon-ngan lah a kalha lhum cheh cheh-in, Leitah kachon kha tapoi! Lithuh lai kageitan, Twidil’in eilonvuh pai ding ahitai! 3 Panpi kakou kounan kacholtan, kalolbuh apeh-in anai! Eipanpi didng kavet vet nan kamit thim pai ding ahi! 4 Ajeh beiya eihotbolte Kasamjang sangin atmjo’uve! Melmaten joujeng eiseikhum’un, Ahat’uvin tha din eigo’uve! Thil kaguh louhel jong Eisah sah-uvin ahi. 5 Vo Pathen, kachonset ho nakoma akiselpom, Ka-ngoldan nahesoh keiye! 6 Thanei chungnungpen Pakai, Nachunga kisongte neijumsisah san; Vo Isreal Pathen, Nangma chibai bohte neujumsosah hih-in! 7 Nangma jal’a jumle ja kathoh a, Min a-eng alouva eihou ahi. 8 Kasopite lah a kholjinmi kabangin, Ka-insung mite lah a gamchom mi kabange! 9 Nahouin dia katom ngaival jeh-in Kalungsung meikouva kileu abgnin, Min na-enghouna jouse Keichunga achuh lo tai! 10 An ngol’a kakineosah vangin, Mihon enghou nan eineibep’ui! 11 Lunghema khaodip pon kasil jongle Nuijat nopnan eineiyui! 12 Kholai dunga seichah-in eineiyun, Jukhamhon la-lhangin ei-oiyui! 13 Hijongle nahenga katao jinge Pakai! Nadei phat phat’in neihouvin Pathen! Nalungset anasan, huhhing dia nakitepna nanit jinge Neihouvin Pathen! 14 Bon-ngan lah a neiloidoh-in, Kamelmatea konin neihoidoh-in, Twithuh lah a neiloidoh-in! 15 Twisoh neichupsah dan, Twitoa neilhahsah dan lang, Lhankhuh a neilhah lutsah dan! 16 Phaten a lungset long lou nahi, Neihouvin Pakai! Namikhotona alen’e Neihung vil’in Pakai! 17 Nalhacha keidin kiselddan, Neihouvin kagim behseh tai tun! 18 Neihung huhhingin, Melmatea konin neichu-lhan! 19 Kamelmate namusoh-in, Iti eivetdauva eijumsou, Ei-enghouna jouseu nahei! 20 Ei-enghou nau kalung naval’in, Alha lhop pai ding kahi! Eidip dappeh diu kakinepna la abeitan; Lungmonsah kahol vangin Khatcha eilungmonsah ding aumpoi. 21 Kakel teng thinagu eipauvin, Kadangchah teng lengpitwi thuh eipeuve! 22 Agolvah bol’u manthahnan neiyu hen, kuttheng abol’u lhuh lhamnan neiyu hen! 23 Amit’u suchon! Ating akongu doisen tu hen! 24 Lunghan khum jingin, Nalungsat nan lonvuh-u hen! 25 Ingapsih she-u hen lang, Agam ngah diu kaholmo hen! 26 Talen namatsahho abolgentheiyun, Namavote genthei seichah-in aneiyui! 27 Achonset jouseu melchih-in, Them chansah hih hel’in! 28 Hinna lekhabua aminu kinoi mang hen, Midihte lah a kisimtha hih beh hen! 29 Kenvang na kasan kalhasam’e, O Pathen, neiphong dingin neihuhhingin! 30 Pathen vahchoila sang ting, Aminthan phongjal ing ting kathangvah ding ahi. 31 Hiche hin bongchal a hou sangin Pakai lung lhingset sangin Pakai lung lhaijonte! 32 Bolgenthei thoh ten amuteng kipah diu, Pathen chibai bohte kitikhou diu ahi! 33 Angaichat taona Pakaiyin angaiyin! Amite sohchangho asumilpoi! 34 Van le leiset, Twikhanglen le Asunga cheng jousen Pathen vahchoiyun! 35 Pathenin Jerusalem ahuhhinga Judah khopi jouse asah phat ding; Amite chenguva gamsung alo diu, 36 Alhachate chilhah hon alo’uva, Pathen ngailuten achenpha diu ahi.

Labu 70

Panpi ngaicha Taona

1 O Pathen, neihuhhingin, Neipanpi loiyin Pakai! 2 Eithatgote chu kisudong hen Gal lel’u hen! Kagenthei kipapite chu Nungjamu hen vetdan umu hen! 3 Eidaithengle hon Agal lel jumpiu hen tijau hen! 4 Nahinjon jouse kipah thanom hen, Namihuhhing kipapi jousen, “Pathen aloupi ngeiye,” Tin seijing jengu hen! 5 Lhasam le geochaovin ka-ume, Hung louyin O Pathen! O Pakai Eihuhhingpu Neipanpi loiyin!

Labu 71

Tehsepu Taona

1 Eihuh din kahinbel’e Pakai, Gal neilelsah hih-in! 2 Nangbou adih nahi! Neipanpin neihoidoh-in; Ngaiyin neihuhhing loiyin! 3 Kakiselna mundet, Kahoidohna kulpi detpen Kakiselna le kagalpal nahi. 4 Migilou, engse, thilse bolte Thaneinaa konin neihuhdoh-in Ka-Pathen! 5 Kakinepna nahi Pakai, Kaneo laiya pat kakisonpi nahi! 6 Kahinkhoa kakingaina nahin, Kapen lhah a pat neihoidam jinge; Phat tinin nangma vahchoiyinge! 7 Hattah a neipanpi jeh-in Mihon kahilnan aneitauve! 8 Nilhumkeiyin Nang kavahchoiyin, Naloupina kaphongjal lei! 9 The jong leng neidondan hih-in, Kachamo phat’in donlouvin neikoidan! 10 Kamelmaten eitha nom’un, Kei dounan akihousom’ui! 11 “Pathenin adondatai, Gamandoh jongleur hen Ahuh ding aumpoi,” atiuve. 12 Neilhakang hih-in O Pathen, Ka-Pathen neipanpi loiyin! 13 Eidelkhumten gal lel’u hen mangthah-u hen, Eisusegote kijumsou hen vetda changu hen! 14 Kakineppi jinga Kavahchoi jing ding nahi! 15 Naphatna kasei lea, Nilhumkeiya nahuhhingna kasei ding; Hekim hih jong leng kasei ding ahi. 16 Thanei chungnungpen Pakai, Nathahat pah chang ting, Naphatna kaphonjal ding ahi. 17 Kaneo laiya pat neihil jingin, Nathilbol kidang ho kasei jinge! 18 The a kasam kantah vangin, neidonda hih-in O Pathen! Ahung ding akhang khanga Nahatna thuneije kaphon teng nei umpin! 19 Vo Pathen nadih nan vanthamjol aphan, Thil nasatah tah nabol’in, Nakibahpi koimacha aumpoi. 20 Hesoh gentheiya neilha vangin, Neithahsem kit’in natin, Thina lhankhuh neimusah pon nate. 21 Mi neijabolsah cheh a Neilhamon kit ding ahi. 22 Semjang seiyin vahchoiying ting, Ka-Pathen, nakitahna vahchoiyinge! Vo Isreal Pathen Theng, kasemjang saiyin navahchoi la sange! 23 Neihuhhingtai, kalung pumpin Navahchoi la sange! Kipa othongin nathangvah nan Semjang saito thon la sange! 24 Eisuse nomte najothoa vetda nachansah jen-in Nilhum lhumin nadihna thu seichoi lenge!

Labu 72

Lengpa dia Taona

1 Vo Pathen, nadih banga thutanje lengpa hil’in, Adih a nathutanje lengpa hinpen! 2 Chuteng namite adih a avaihom ding, Bolgentheite adih a avaipoh ding ahi. 3 Gamsung mi haohen nom hen, Adih umdol hedoh hen! 4 Lengpan vaichate rhu dih-in tan hen, Pumhatte sunem hen ngaichate kithopi hen! 5 Nipi noi lhapi noiya, Ni le lha vah laisen namiten chibai naboh jing hen! 6 Lengpa hi jaolah a gophin bang hen, Gamsunga gobah lha bang hen! 7 Lengpa damlai sen adih leng hen, Ni le lha um laisen hao jing hen! 8 Alenggamin Twikhanglen jouse khokhong hen, Euphrates luiya pat kolmong gei hen! 9 Nelgam chengte lengpa anga boh khup hen; Amelmate tol’a boh khup’u hen! 10 Spain lente le twikol lengthen Lengpa kai peu hen! Arabia le Ethiopia lengthen jong Lengpa kei peu hen! 11 Leng jouse a-angsunga boh khup’u hen, Namtin vaipi alhachan pangu hen! 12 Donlouva um, angaicha geo, vaicha Ahenga tao chan lengpan ahinsoi! 13 Lhasam le vaicha akhoton, Angaicha chan ahinsoi! 14 Pumhat’a mibolgentheitea konin Ahuhhing jin, ahinkhou akhohsah-e! 15 Lengpa hingsot hen! Arabia gamma sana jouse chang hen; Phat tinin japin taopeh hen, A-itih-in achunga Pathen vangboh chu jing hen! 16 Gamsunga chang le min pung hen, Mol le lhang neh pha hen; Lebanon lhang chang phat bangin pha hen! Hampa loudong pha bangin Khopi jouse mihem dimsoh hen! 17 Lengpa min thang jing hen, Ni le lha man kahsen minthang hen! Namtinin pahcha hen Pathen vang thumpeh jingu hen Lengpa nopna ding khohsah-u hen! 18 Pakai Isreal Pathen vahchoiyun! Thil kidang dang bol Amabou ahi! 19 Tosot’in amin loupe vahchoiyun! Aloupinan vannoi losoh hen! Amen! Amen! 20 Jesse chapa David taona Abonchan akichaisoh tai!

BU THUMNA (Labu 73-89)

Labu 73

Pathen thudihna

1 Israel ding, Milungthengte din Pathen apha mong monge! 2 Kenla kakisonlelpi deh jengin, Tahsan kalhaso deh chet’e! 3 Kiletsahte umchan kathangsen, Migiloute phatthei kamuteng ka-otchai! 4 Natla athoh pouvin, Adamtheiyun ahat’ui! 5 Midang bangin genthei athoh pouvin, Adang bangin hesoh athoh khapouve! 6 Kiletsah-in ngong avaiput’un, Pumhat jengin thil abol’ui! 7 Lungthimin thilse jeng agel’un, Agilou bolna ding bou angaitouve. 8 Midang adaithangun ahouseuve; Akiletsah-un midang bolsetna ding agong’ui! 9 Van Pathen ahouseuvin, Leiset mite ahohsal’ui! 10 Pathen gingte geiyin ajuitan, Aseiyu angai jengjiuve. 11 “Pathenin hepha pontin, Hatchungnungin umdoh ponte,” atiuve. 12 Migiloute hitobang hi ahiuve, Akhopset aneiyun, aneibe jingui. 13 Chonselou thengsel’a ka-um hi Kei dinga pannabei mong ham? 14 Vo Pathen, nilhum lhumin neibolgimin, Jingkahseh leh neiphonsel’e! 15 Thilse kaseikhah tah leh Namite chon kajomlou hinte. 16 Gelchet tei kagon vangin keidin ahah behseh jenge! 17 Nahouin thenga kakai phat’in Migiloute manthahna ding kahedoh-e! 18 Migiloute khu kilindet’a nadinsah a Alhu lham ding salem a nakoi ahi! 19 Mitphet kah louvin amangthah jiuvin, Vet ngamlouvin abeiji tauve! 20 Jingkah teng janmang beibep ahiuvin, Nahung teng akilep mangji tauve Pakai! 21 Lunggim le lung donga Ka-um teng leh, 22 Gancha ngol bangin Pathen Nangma kaheji tapoi! 23 Nanginla nei-umpi jingin Kakhut’in neituh jinge! 24 Akhon nileh loupia neilahna din Neihilchah-in neilamkai jinge! 25 Vana jong nang tilou adang kaneipon, Nang kaneitan leiset’a idang ka-ngaichat ding ham? 26 Kalungle katahsa lhasam jongle Eihatsah jing Pathen ahi; Ka-ngaichat jing Amabou ahiye! 27 Nangma dalhate mangthah tei diu, Nahenga kitahloute nasuhmang ding ahi. 28 Keidin vang Pathento kinaiya, Hatchungnung Pakaiya kisel, Athilbol kidang ho seiphong hi Thilphapen ahiye.

Labu 74

Nampi hoidohna dia taona

1 O Pathen, idia neidondau hitam! Kelngoi vah a navahsa Namite chunga Iti neilung han jing diu ham? 2 Goulo dia nalhatdamsa phung mite, Khanglui laiya pat nakihensa Namite hingeldoh jingin, Napansatna Zion molsang geldoh jingin! 3 Khogem kisong lah a hin vah len, Houin thenga thilkeo jouse Kamelmateuvin asumang tai! 4 Nahouin thenga namelmaten hanla asauvin, Galjona ponlap atungdoh tauve! 5 Sahlam kelkotjol jouse Heichan atu lhu’vin achonpeh gamtauve! 6 Tingkhom kijempah jouse She-in avobongun heichan achen goi tauve! 7 Nahouin theng susen meiyin ahal’un, Nakihouna mun jeng jong asuboh tauce! 8 Chilgep hel din eigouvin, Gamsunga muntheng jouse ahalvam’ui! 9 Melchihna thil theng jouse abeitan, Themgaoho jong abeisoh tai; Itih chan hitia kiumding Koiman aseithei tapoi! 10 Vo Pathen, kamelmateu nakinuisat sah sah ding ham? Iti naming ataitom tom diu ham? 11 Idia neipanpi nom louvu ham? Idia khut kikhoitum nahim? 12 Semtil’a pat Kalengpau nahi Pathen! Tamtah vei neihuhhingsau jong ahitai! 13 Nathahat’in Twikhanglen navotanin, Twikhanglen dragonte lu navokeh-e! 14 Sampi Leviathan luchang navokeh-in, Atahsa gamsa vahnan naneiye! 15 Twisan nasemdoh-in twinah nason, Luipi lentah tah nakansah-e! 16 Sun le Jan nasemin, Ni le Lha natungdoh-e! 17 Leist kolkimvel najih jol’in, Phalbi le Nipi nasemdoh-e! 18 Vo Pakai, namelma, Pathen helouten Nanuisat’a nanotthapnau hi gel temin! 19 Melma gilote kichepna din Panpibei namite hi dalha hih-in! Bolgenthei thoh a um Namite dumil loujenin! 20 Neikiteppi nau geldoh-in, Gamsung thimlai jousea pumhat’in mi akinon ahi! 21 Bolset thohte jumso dan! Tahlelte le vaichaten navahchoiyu hen! 22 Hung kipanin nading kiseiyin Pathen! Pathen helouten nilhum lhumin nanuisat’ui! 23 Namelmate kisen gin, nakidoupite pocheichoi Sumil loujenin!

Labu 75

Thutanpa Pathen

1 Nangma kathangvah-ui Pathen, Nangma kathangvah-ui! Naloupije le nathilbol kidang ho Kaphongjal leuve! 2 Pathenin, “Kateppeh phat teng Kitoh chet’a thu katan ding; 3 Ganhing nam kim kithing thinga, Leiset kihot ling soh jong leh Leiset khompi katuhdet ding; 4 Migilou kiletsah kaphoa, 5 Kiletsah angah na diuva Kaseipeh ding ahi,” ati. 6 Nisolam ham nilhum lam ham, Sahlam ham lhanglam ham a Them channa hungsoh doh ding ahipon; 7 Them le themmo chansah ding Thutan Pa Pathen bou ahi. 8 Pakaiyin khon khat achoiyin, Alunghanna juthuh adimset’e; Ahinsun lhah teng Migilouten adousoh keiyuva Achim ava adon cheh diu ahi. 9 Kenvang Jacob Pathen thu kasei jinga, Avahchoila kasah jing ding ahi. 10 Jacob Pathenin migilou tha asuh beiya, Midih vang hat cheh cheh ding ahi.

Labu 76

Galjou Pathen

1 Judah gama Pathen akihen, Israel lah a amin akijabol jinge. 2 Jerusalem Pathenin chen munin aneiyin, Zion molsanga apansai. 3 Zion mol’a Pathenin Melmate thalchang jouse, Alum jouseu leh chemjam ho Abonchan aheh bongin asumangtai! 4 O Pathen naloupi ngeiye! Nagalte najona molsanga kona Nahung kilekit chun Nalal loupe ngeiye Pathen! 5 Melmate gal-hang jouse Khut keovin aumsoh tan; Alongu akijamchap’in, Ahatnau le athepnau pannabei ahitai! 6 Vo Jacob Pathen, melmate nahohsal chun Sakolte le achung touho akijamchap tauve! 7 Pakai, mitinin nagingin, Nalunghan teng nakoma koima apang ngampoi! 8 Vana kon thu natan jin, Vannoi mite a-uhsa ngampouve! 9 Leiset’a bolgentheita umte huhhing din Thutan din nahung kipanjitai! 10 Mihemte lunghan chun navahchoina asojon, Gal’a hingdoh chengin kut bolnan aneiyui! 11 Nakitepna jat Pakai na-Pathen peuvin, Naivel’a namtin vaipin thilto peuvin! Pathenin mite akiginsah-in, 12 Kilatsah leng chapate asu nemin, Leng loupitah tah ho Akinlihsah deh deh-e!

Labu 77

Hesoh pet’a kilungmon

1 Othongje jun pathen kakouvin, Oginglet lut’a katao teng eihoujie! 2 Gim genthei teng Pakaiya kataovin, Ama kasana katao khovah vah vangin, Kalung mong thei deh poi. 3 Pathen kageldoh teng na kasan, Kakigel gel teng katah asei! 4 Pathenin jan ihmu mon eilhan, Kagim behseh-in kapaomo loi! 5 Ni masa lai kagel teng Kum masa lai jong kageldoh jie. 6 Jan khovah-in kagel jin, Ka-ngaito chu hiche hi ahi: 7 “Pakaiyin eidondan jinguva, Eilunglhai kit louhel diu hitam? 8 Eivetdauva Akitepna bei ngap hitam? 9 Eikhoto diu Pathenin asuhmil’a, Voujang natpi sanga lung hangjo hitam?” kati. 10 “Kalung natna pen chu, Pathen thahat abeitai,” kati. 11 Pakai, nathilbol loupe tah tah geldoh ing ting, Masanga thil kidang nabol ho geldoh inge! 12 Natohsa chengse ngai tong ting, Thil nasa nabolsa ho gel inge! 13 Vo Pathen, nabolchan athengin, Nang banga loupe Pathen dang aumpoi! 14 Thil kidang bol Pathen nangbou nahin, Namtin vaipi nathahat navetsah tai! 15 Nathahat’in namite Jacob le Joseph son ho nahuhhinge. 16 Vo Pathen, twipin Nangma namu Phat’un, Lithuh tah tah ho jong kichan akidil’ui! 17 Meilhanga konin go ajun, Vanthamjol pohlhong lhongin agingin, Kolkimvel’a kol aphelhap lhap’ui. Van ging akitoljul jul’in, Kolphen vannoi asahvah-in; Leiset a kilingin akihotnemtai! 19 Twipi kinong lai najot paiyin, Twikhanglen thuh lai nagalkai vangin Nakhochotna nung akimudoh poi! 20 Kelngaoi chingpa bangin namite napuiyin, Mose le Aaron namangin Napuilen ahi!

Labu 78

Pathen le amite

1 Kahil ngaiyun kamite, kasei gal khoh-un! 2 Thulem kaseiya, Khanglui lai thu kisel ho 3 Ipu ipateuvin anasei, Ijah-uva ihetsau kahilchet ding ahi. 4 Pakai thahat le anatoh loupi tah tah, Thil kidang abol ho, ichate diuva jong i-impeh lou diu Khangkit’a jong iseipeh diu ahi. 5 Pakaiyin Jacob to kitepna aphutdoh-in, Israelte Danthu anapei; Danthu hi achateu ahil din Ipu ipateu anaseipeh-e. 6 Danthu ho hi khangkit’a miten Kihilna aneiyuva achate ahilson diu ahi. 7 Hichea hi amahon Pathen atahsan’uva, Athilbol asuhmil lou diu, Athupeh chengse anit jing diu ahi. 8 Apu apateu banga Pathen tahsan det lou, Pathena ki-ngai lou, Thu nung lou Doumah mah a chonte hilou diu ahi. 9 Ephriam mihon thalpi le thalchang apat vangun, Gal nikhon ajamtauve! 10 Pathento akitepnau anit pouvin, Adanthua jong anung pouve! 11 Thil kidang abol amusau jong Anatoh ho geiyin asumiltauve. 12 Egypt gam Zoan phaiya, Pathen thil kidang bol ho Apu apateuvin anavet vet jengu ahi. 13 Pathenin Twikhanglen avotanin, Apu apateu apui galakiyin, Twipi bang bangin akitinsah-e. 14 Sun teng meilhangin apuiyin, Janteng meikongin apuiye! 15 Gamthip laiya songpi apokhitsah-in, Leinoi lampeh a twi amaho adonsah-e. 16 Songpia konin tei aputsah-in, Luidung lonin alonsah-e! 17 Hinla amahon chonset abol jingun, Gamthip laiya jong Chungnungpen Pathen doumah jen gabol’ui! 18 Henasa san Pathen apatep’un, Akel lung changun An neh ding athum’ui! 19 Pathen dounan, “Gamthip laiya Pathenin Neh ding eipeh mong diu hinam? 20 Songpi avokhin, twi aputsah a Luibanga alonsah vangin; Amite eiho hi bu le sa eipeh thei diu hinam?” atiuve. 21 Aseiyu ajah hin Pakai along hangin, Alungna behseh-in Amite chu meiyin ahalvamtai! 22 Ajeh chu Pakai la atahsan pouvin, Amaho huhhing jou din jong Anatahsan pouve! 23 Hinla pathenin Vanthamjol Kotpi chengse kihong din aseiyin; 24 Vana konin buneh aneh thei Manna ahinsung lhai! 25 Pathenin aduchat jouseu apen, Israelten vantilte an aneuve. 26 Pathenin athahat’in sah le lhanga kon Huipi anunsah-in; 27 Amite din luipanga neldi jat leo Vachate ahinlhon lutsahin; 28 Vahchate chu abonchan Ngahmun lailung ponbuh veldung adimset’e! 29 Pathenin aduchat’u apen, Israelten vachate kithan anetauve! 30 Hinla agilkel chim masangu, A-an neh laitah-uvin; 31 Achunguva Pathen along hangin, Israel mi, pasal lhentum Mi thahat lai lai athat tai! 32 Hitipia aboltah vangin Israel achonse jingun; Thil kidang chujatpi abol vangin atahsanpouve. 33 Hijeh chun ahinkhou asuchomin, Kimlih leo leovin alhai! 34 Alah-uva mi phabep atha teng Adang ho ahenga ahungun, Lung aheiyun ahenga Lung laigil’in ataovui! 35 Chuteng apanpiuva ahoidamu chu Hatchungnung Pathen ahi ahedoh jiuve! 36 Amavang joujeng aseiyun, Lung thengsel’in imacha aseipouve! 37 Pathen din akitah pouvin, Akoma akitepnau jong alolhing pouve! 38 Pathenin vang amite ahepi jingin, Amaho sumang louvin asetnau angaidam’e; Alunghan tamtah vei adamin, Alungset akitim nah nah-e! 39 Khohui kitolmang banga Thi thei mihing ahiu ahe jinge! 40 Gamthip laiya ijat vei Pathen adouvuva, Ijat vei lung himoa alhau hitam! 41 Avel vel’in Pathen apatep’un, Israel Pathen theng chu aphinseuve! 42 Amelmateuva kona ahuhhing nia Pathen thahat loupije asumil’ui! 43 Egypt gam Zoan phaiya thil kidang abol, Anatoh nasatah tah chu asumil tauve. 44 Luidung jouse thisan asosah a Egupten don ding ahet lou asumil’ui. 45 Egypt thousi vaibong alha khumin, Asugenthei lheh jengun, Uphohte alhan Agamsungu asugam geiyin ahepouve. 46 Aloujaovuva khaokhopite alha a, Muchi chivo asuhgam jong ahaitauve! 47 Alengpigau gel avohchaisah a, Atheichangu daibang athasah asumil tauve. 48 Aganchau gel avoh lihsah a Kelngoi hon jouse keh aselihsah ahetapouve, 49 Egypt alunghan a mithat Vantil asol’a Athasah a alunghemu ahetapouve. 50 Alung han gpaiyin, Gamna alha khuma athagam asumil’ui. 51 Egypt insung jouse Pasal peng masa cheng athagam ahaitauve! 52 Kelngoi chingpa banga amite apuiya, Gamthip laiya apuidoh asumil’ui! 53 Kichatsah louvin amite apuiyin, Amelmateu twipi achupsah asumiltauve. 54 Gal’a alahsa molsang vum, Amunthenga amite apuidoh jong ahetapouve. 55 Amite kitol chun agamsunga chengte adelmangpeh-in, Agam’u Israelte ahoppeh a, a-in’uva amite Achensah geiyin asumiltauve. 56 Hinla Pathen Hatchungnung adou jingun, Apatep jiuvin athupeh ho anit pouve. 57 Kisonpi mo thalchang kon bang le Kitahna bei apateu bangin Doumah abol jingui! 58 Doiphung tampi asemdoh-un Pathen aphin lung hangun, Doilim tamtah asemjeh-un Hatah-in along hansah-ui! 59 Athilbol’u amujeh-in Pathen along hangin, Israelte apaimangtai. 60 I-lah-uva achenmun Shiloh a Aponbuh geiyin Pathenin adondai. 61 Athahat le aloupi melchihna Kitepna thingkong chu imelmateu amatsah-e. 62 Amite alunghanin, Amelmateu athagamsah-e. 63 Golhang jouse gal’a athitan, Nu-ngah hon ji ding aneitapouve! 64 Thempuho gal’in athat’un, Ajiteu jong akasah theipouve! 65 Ihmut’a kon thoudoh bangin Pakai ahung kipattan; Jukham pasal hattah bangin Pakai ahung kisentei! 66 A—itih a gal lel a jum din, Amelmate anung non adeljamtai! 67 Joseph chilhahte jong apaiyin, Ephriam phung jong alatapoi! 68 Adeipen Zion lhanga Juda phung joh alhengtai! 69 Zion lhanga van a a-in bangin Ahouin Theng akisah-e! Itih geiya kilong kit loudin, Leiset bangin asedettai! 70 Alhacha Davih alhengin, Akelngoi chinnaa akoudoh-e! 71 Kelngoi chingbanpi chu Israel lengpan atungin, Pathen mite chu kelngoi chinin achinsah tai! 72 David ama ki-itcha louvin Khut them to thon amite alamakaite!

Labu 79

Nampi huhdoh dia Taona

1 Vo Pathen, namdangten Nagam ahindel khumtauve! Nahouin theng asuhboh-un, Jerusalem asuchimsoh tauve! 2 Nalhachate muthong vah nan aneiyun, Atahsa longu sahang vah nan aneiyui! 3 Namite thisan tei kisung lha abahsah-un, Jerusalem kholaiya thisan teiyin alonge! thilong vui ding jong Mihem khatcha beh aumtapouve! 4 Kavel’uva chengten eng houle Daichatvai, nuisat’in eineiyui! 5 Neilunghan jing diu ham Pakai! Nalungset meibang kou jing ding ham? 6 chibai naboh lou, nahenga tao lou Namtin vaipi chunga lung hang jon! 7 Namite athat gam’un, Nagamsung asumangtauve! 8 Kapu kapateu chonset jal’a Telen matsah sangin, Tun neihepiuvin, Akinemlel gam kahitauve! 9 Vo Pathen, jabol nachan jingna din Kachonset’u ngaisamin, Neilhatdoh-un, neihuhhingun! 10 Ibol’a namtin vaipin, “Hoiba ham na-Pathen?” ati diu ham? Nalhachate thisan so jeh a Namtin vaipi telen namatsah Neimusah tauvin! 11 Tha dia kikoisate, Songkul lute kagin ngaiyin; Nathahat loupitah chun Amaho hi lhadoh-in jalensah tan! 12 Pakai, naphin phin a namdangte hi Sagi veijenin lethuh ten! 13 Chuteng, nakelngoihon tobang Namite keihon thangvah jing ung ting, Akhang khanga Nangma Kavahchoi jing diu ahitai!

Labu 80

Nam semphatna dia Taona

1 Ongiyin, Israel kelngoi chin a chinga, Joseph chilhah kelngoihon hoiya hoile Pa! Cherubim chunga touva, 2 Ephriam, Benjamin chule Manasseh phung hoa hung kiphongin, Thaneo tah-in hungin neihuhhingun! 3 Vo Pathen, huhhing kachan na diuvin, Neihepiuvin, neitahsemkit’un! 4 Vo, Pakai, thaneipen Pathen! Itih geiya namite taona nalunghan khum ding ham? 5 Neh le chah khel’in lungdon neipeuvin, Don ding khel’in mitlhi longin neikoitauve! 6 Jet le veiya namtinin gal eibol khumun, Melmaten eiphin phin’uve! 7 O thaneipen Pathen, Huhhing kachan theina diuvin Neihepiuvin, neithah semkit’un! 8 Egypt’a konin Lengpiphung nahinpon, Namtin vaipi nadeljamin, Agamsunguva lengpiphung chu naphuttai! 9 Lengpiphung phuna din tol nalaiyin, Ajung leigil’a alut’in abah-in gam leiset alosoh tai! 10 Alimin mol le lhang alen, Abahhon cedar thing sangtah tah ho akhui! 11 Abahho ajam jamin, Mediterranea Twikhanglen aphan, Euphrates luipi dung geiyin ajam’e! 12 Idia atho naphat lhah a, Atohkha chanin aga jouse akiguh ham? 13 Gamvohten achonpeh gamtan, Gamsaten kivahnan aneiyui! 14 Hung kihei kit’o thaneipen Pathen! Vana konin hinven, namite neihuhhingun! 15 Naphusa, hiche lengpiphung thah, Hoitah a nakhandohsah hi hinson! 16 Kamelmateuvin ahalgep’un aphuh lhutauve! Lunghan khumin sumang jengin! 17 Natundoh a nahatsah nalhensa namite vang Hoidamin vengtup jingin! 18 Nakoma konin kihei mangkit tapou vinge, Neihing hoiyun vahchoi jing unge! 19 Vo Pakai thaneipen Pathen! Huhhing kachan theina diuvin Neihepiuvin neithah semkit’un!

Labu 81

Kut La

1 Eipanpi Pathen, Jacob Pathen Vahchoi la othongin sauvin! 2 Tumging tumin khutbeh bengun, Tumging ngeito thon semjang le Selangsan saiyin vahchoiyun! 3 Lhathah ni le lhalih nin, Kut bolna din sumkon mut’un! 4 Hiche hi Israelte lah a Danthu, Jacob Pathen thupeh ahi! 5 Pathenin Egypt gam adelkhum chun Hiche dan hi Israelte anapei! Keiman mi kihelou thusei ogin kajan: 6 “Keiman napohgih-u kadom lhan, Chehtum gihtah jouse ka-ngahsah tai. 7 Nagenthei pet’a neikou chun Kanahuhhingtan; Meivom lhangkhal kakiselnaa konin Kahin donbut’e! Meribah twisam phunga jong Kanapatep’in ahi. 8 Kahilchahna ngaiphan kamite, Israel, kasei nangai ding kadei lheh-e! 9 Doi semthu nakoi dauva, Houjong nahou thei lou diu ahi! 10 Egypt’a kona nahinpuidoh, Pakai na-Pathen chu kahi; Kam kan, an nabah inge! 11 “Hinla kamiten kasei angaipon, Israel kathua anungpoi. 12 Hijeh chun along katahsah-in, Adei deiyu kabolsah-e! 13 O kamiten kasei ngai tavuo leh ! Kathua anun diu iti kadei hitam! 14 Chutileh amelmateu kajoa, Agal jouseu kajopeh ding ahi. 15 Eihot bolte kichan ka-anga kun’un tin, Tonsot’a hesoh genthei athoh diu ahi. 16 Nangho vang an thuipen kapeh-uva, Gam khoiju jadonsah diu ahi,” ati.

Labu 82

Vaihom pipen Pathen

1 Vanmite kikhopna a Pathenin vai ahomin, Pathen mite lailunga thu lhuhna asem’e! 2 “Ddih louva thutan ngauvin, Agiloute din lang neidauvin! 3 Cahgate panpiuvin, Panpibei, lhasamte phat bol’un! 4 Migiloute khut’a konin Lhasamle geochaote huhsoh-un! 5 “Lungthimbei mi-ngolte! Khosuh khotou helougam nahiuve! Vannoi leiset’a Thudih khatcha aumtapoi! 6 ‘Chungnungpen chate, Pathen mite nahiuve,’ kati ahi; 7 Hinla mihem thia nathiuva, Haosa chajeng jong athibanga nathi diu ahi,” ati. 8 Vo Pathen hungin leiset vaipon, Namtin vaipi namite jeng ahiuve.

Labu 83

Israel melmate jona dia Taona

1 Umthim loujen-o Pathen! Moh umthim hih hel’in! 2 Ven, namelmaten gal ahinbol’un, Nahoten doumah ahinbol tauve! 3 Namite dounan guh-in thil agongun, Nahon jingte ahindoutauve! 4 “Hungun, Israel kiphah poh kit louna din, Hiche nam hi sumanghel’u hite,” atiuve. 5 Nang dou din akihoutoh-un, Nadouna thil agongkhom’ui! 6 Edomte, Ishmaelte, Moab mite leh Hagar mite; 7 Gebal mite, ammonte leh Amalekte, Philistiate leh Tyre mite; 8 Assyria miten jong apanpin, Lot chilhah gal-hang jouse apangkhom’ui! 9 Midia mite le Kishon luiya Sisera le Jabin nabol bangin bol’in! 10 Amaho chu Endor a nathah’in, Tolgoa atahsau amonsah tai! 11 Alamkaiteu Oreb le Zeeb nabol bangin bol’in, Zebah le Zalmunna najo bangin Avaihomteu jousoh keiyin! 12 Hicheho hin, “Pathen gam leiset chu Kilah-ute,” anatiuve. 13 Vo Pathen, abonchauvin Vutvai kithe leh Changpol hui mutmang bahsah-in! 14 Gamkang kaa molle lhang Lhutvamhel bahsah jengin! 15 Khohui semjamsah-in lang Nahuise lhoh mangsah tan! 16 Mitjum maijumin lhan, Nathahat hetdoh sah-in! 17 Aitih-in kiphatlam le meidoiyin um’u hen, Jumle jan thigamu hen! 18 Leiset’a vaihom chungnungpen, Pakai nangbou nahi heu hen!

Labu 84

Pathen Houin ngaichat

1 O thaneipen Pakai! Nahouin theng dei le ngai aumin; 2 Chua lhah ding kanom’e! Pakai Houin ka-ngaiyin, Kahinkho pumpin hing jing Pathen ah Kipa la kasai! 3 O thaneipen Pakai, Kalengpa le ka-Pathen! Nahouin a vatoute le pelpalep jengin jong Bu asauvin, namaicham phung vel’a nou a-op’ui! 4 Nahouin apansaa, Navahchoi la sajingte anun nom’ui! 5 Zion jon a kijot’a, Nathahat’a kisongte anun nom’ui! 6 Kana Baca phaicham jot jong leu, Go masan twikul adipsoh a Kipana twisam phung ho tobang ding ahi. 7 Akijot nauva ahat cheh cheh-un, Zion a Van mite Pathen chu Agamu tei diu ahitai! 8 O Pakai thaneipen Pathen! Kataona ngaiyin lang, O Jacob Pathen! Neihouvin! 9 Vo Pathen, nathaonusa Kalengpau hi phatthei boh-in! 10 Mundanga ni sangkhat um sangin, Nahouina nikhat um aphajoi! Migiloute innom a chen sangin, Ka-Pathen inpi kotnga kanomjoi! 11 Pakai chu eihoidam’uva, leng loupe, Jabolna le hepina vang eiboh pau ahi! Aman thildih bolte din Thilpha a-itpeh khah poi! 12 O thaneipen Pakai, Nanga ki-ngai jingte anun nom’ui!

Labu 85

Nam phatna dia Taona

1 Pakai, nagamsung nahepin, Israel nahaosah kittai! 2 Namite toh khel jouse nachulnamin, Achonset chengseu na-ngaidamtai! 3 Achunguva lungsat nahaiyin, Nalunghan na-ngatai! 4 Vo Eihuhhingu Pathen, Neilungdamun neithahsem’uvin! 5 Neilunghan jinguva, Lungdam louhel dng nahin? 6 Neihatsah kitleu chun, Namiten vahchoi ki tnau vinge! 7 Pakai, longlouvin neilungset’un, Neipenpin neihuhhinguvin! 8 Pakai Pathen houlim ka-ngaiyin, Chonset ibol kit dau leh, Amite eiho chunga Cham leng din aseiye! 9 Ama jabolte huhhing nom jing, Huhhing dia igam’uva um jing ding ahi! 10 Ngailut le kitahna kilamtoa, Adidh le chamna kikoi ding ahi! 11 Leiset’a kona gunchuna kitungdoh a Van a kona adih kikhai lha ding ahi. 12 Pakaiyin eihaosah diu Gamga pungding ahi. 13 Adih masantin, Pakai lampi anasem ding ahi.

Labu 86

Panpi ngaicha Taona

1 Ngaiyin Pakai neihouvin! Lhasam le geo chaovin ka-um’e! 2 Neihuhhingin nadia lepthol bei kahi, Nanga ki-ngai nalhacha kahi neihuhhingin! 3 Neihepin ka-Pathen nahi, Nilhum lhumin nahenga kataove! 4 Kataona naheng ahunglhung tai, O Pakai nalhacha neikipahsah-in! 5 Neibol phauvin nei-ngaidam’ui, Nahenga taote dia lungset chamkim nahi! 6 Kataona nagiyin O-Pakai! Neihouvin panpi ka-ngaiye! 7 Neihouji jeh-in, Kagim nin Nangma kakouve! 8 O Pakai Nang tobang Pathen dang aumpon, Nabol tobang bol’a khatcha aumpoi! 9 Nasemsa namtin vaipi nahenga kun cheh diu, Namin achoi-at diu ahi! 10 Thahat tah, thil loupe pi boldoh, Nangbou Pathen nahi! 11 Neibolsh nom neihil’in Pakai, Nathu ngai molsonge! Lung sa-ih louhel’a Nakin bolje naihil’in! 12 O Pakai ka-Pathen, kalungthim pumpin vahchoiying ting, Nalal loupina tonsot Tonsot’in phongjal lenge! 13 Neingailutna aloupi ngeiye! Thina lhankhuh geisa neichohing tai! 14 Vo Pathen, ija nagel lou, Mi kiletsah engse loiyin tha din eidel khum’ui! 15 Pakai Nang vang hepi le ngailut them, Thoh hat jing, khoto them katah tah nahi! 16 Hung kiheiyin neilungset’in, kanu banga nakinbol kahi; Neihatsah-in neihuhhingin! 17 Nahot bolte jumsona din, Naphatje neimusah-in Pakai! Neipanpia neilhamon amu tengu jahchau hen!

Labu 87

Jerusalem choi-atna

1 Lhang theng chunga Pakaiyin akhopi aphutdoh-e! 2 Israelte khopi dang sangin, Pakaiyin Jerusalem akhohsah-e! 3 Vo Pathen khopi! Nachung thu loupin akiseiye! 4 “Kathu ngai nam mite lah a, Egypt le Babylon kisim than; Jerusalem tolkon lah a Philistiate, Tyre mite le Sudante kasim thai,” ati. 5 Zion thudol’a vang, Hatchungnungin phutdet’in tin, Namtin vaipi kikhol diu ahi. 6 Pakaiyin namtin vaipi asimtoh a, Abonchauva Jerusalem Khosung mia asim didng ahi. 7 Amahon,” I-phatheina jouseu Zion a hungkon ahi,” tia Lam’uva la asah diu ahi.

Labu 88

Panpi ngaiya Taona

1 O Eihuhhinga Pakai Pathen! Sun nilhum jan khovah-in na-anga kakap’e! 2 Kataona ngaiyin lang, Panpi ngaicha kakagin ngaiyin! 3 Gentheina ten eibomin, Thipai ding kahitai! 4 Alaichat chat ho kabangin, Thabei pai ding kahitai! 5 Don louva thilong lah a kijam, Thasaa lhankhuh a lum tobang kahi; Napanhu phah lou, Nasuhmilsa ho tobang kahi! 6 Kochong tong lai thimsung, Lhankhuh sunga neileh lut tai! 7 Neilunghan anasa behseh jengin, Natwipi kidil’in eichup tai! 8 Kagolte neidalhah sah tan, Avetda dauvin neisemin, kikul khup’a jamdoh thei lou kahitai! 9 Lung gimin kamit athimlon, Niseh-in kakoujin, Nangma sangin kataove Pakai! 10 Thilong damsa hi thil kidang bolpeh le chun, Thoudoh a navahchoi diu hinam? 11 Lhan’a lumsa nalungset long lou seiya, Manthahna geisan nakitahna aseimong-um? 12 Muthim gama thil kidang nabol amu’uva, Ihmut milna gama naphatna kihedoh nam? 13 Pakai, napanpi ngeh-in, Jingkah she-in nahenga kataove! 14 O Pakai idia neidonda a, Velouva kiheimang nahim? 15 Kaneocha lhah gim genthei kathoh-in, Thi ding konchan ka-um jinge; Neigimbolna cheng kathoh na a Apang joulou kahitai! 16 Nalunghan kadimtan, Neibolgimnaa mangthah pai ding kahi! 17 Hicheng hin twibang eichup nilhum lhumin, Jet le veiya eiumchah soh tai! 18 Kagol ngaitah tah jong neidalhah sah ten, Muthimlah a kalengtai!

Labu 89

Nam gentheipet’a La

1 Vo Pakai, nalungset long lou Tonsot jailan oiying ting; Nakitahna hi itih-in Phongjal lenge! 2 Nalungset beitih neilou kahen, Nakitahn avan banga kidal jing ahi. 3 Nangin, “kadeilhen mitoh kitepna kasemin, kalhacha David henga kakitep’in; 4 ‘Nachilhah khat leng chang jing ding, Nalengvai neina koipeh jing ding kahi,’ tin,” naseiye. 5 Pakai, thil kidang nabol ho Vanin lan asan; Nakitahna jalan a-oiyui! 6 Vana jong natobang aumpoi Pakai, Van mite khatcha jong Nangto kibang aumpouve! 7 Van mithengte kikhopna kijapen nahin, Nang gin nan adding cheh-ui! 8 Pakai thaneipen Pathen, Nahat kibahpi aumpon; Ijakaiya kitahpen nahi Pakai! 9 Twikhanglen huneitah chunga vai nahomin, Twipi kinong lai naphoh thip jie! 10 Gul- lhempi Rahab nachilgoiyin, Naban thahat’in namelmate najoutai! 11 Van la nanga, leiset jong nanga; Vannoi le asunga um jouse nasemsa ahi. 12 Sah le lhang nasemin, Tabor lhangle Hermon mol’in nahenga kipa la asai! 13 Nakhut tha aham lheh-in, Naban-gol tha ahat’e! 14 Nalaltouna adih le kitahna chunga akidon, Natohna chan a ngailut le kitahna akimui! 15 O Pakai, namaivah a vah lea, Kipa la sa chibai nabohte anun nom’ui! 16 Naphatna avahchoiyun, Nilhum lhumin nachunga akipah-ui! 17 Minthangtah tah-in gal neijosah-un, Neingailut jal’un hanla neisah sah-ui! 18 O Pakai, eihoidam diu nalhengdoh-in, Vo Israel Pathen theng, kalengpau napansah-e!

David henga Pathen thutep

19 Malaiyin nalhacha tahsan umte gaochannaa, “Sepai minthang khat kapanpin, Mipi lah a kalhendoh Mikhat chu laltona kapei, 20 Kalhacha David chu thao theng kanun, lengin katungdoh tai. 21 Kaban thahat’a katuh jinga, kaban-gol tha kapeh ding ahi. 22 Amelmaten adou joulouhel ding, Migilouten jong jouponte! 23 Agalte kasuhgep’a, Ahotbol chan katha ding ahi. 24 Ka-ngailut’a adia kakitah jing ding, Gal kajosah jing ding ahi. 25 Alenggam Mediterranea Twilen apat Euphrates luipi geiya kakeh let ding ahi. 26 Aman kajah a, ‘Kapa le ka-Pathen, Eihoidama le Eihuhhingpa nahi,’ tinte. 27 Chapa masapena kaneiya, Leng jouse sanga kachoi sang ding ahi. 28 Adin kakitepna nit jing ing ting, kakiteppina tonsot’a um ding ahi. 29 Alengvai neina Vanthamjol um jing bang ding, Achilhah khat leng chang jing ding ahi. 30 “Achilhahten ka-Danthu anitdauva, Kathupeh ho banga chon lou, 31 Kahilchahna cheng nahsah moa, Kathupeh chengse anitdau vangleh, 32 Achonsetnau jeh a talen kapeh a, Abol khel jal’uva genthei kathohsah ding ahi. 33 David vang kangailut jinga, Adia kakitepna kanit jing ding ahi. 34 Kakiteppina palkeh pong ting, Kateppeh khatcha bolda ponge! 35 “Kamitheng pan itih a dia kitepsa kahitan, David joulhep ponge! 36 Ason apah um jing ding, Ni le lha umlaisea alenggam kavettup jing ding ahi. 37 Vanthamjol’a hettohsah phatseh a kanei, Lha banga alenggam um jing ding ahi,” nati.

Lengpa gal lel lunghempi

38 Tunla nalhentum lengpa nalunghan khumin, Donlouvin napaidoh tai! 39 Nalhacha toh kitepna nasukeh-in, Alallukhuh vutbol lah a nasep luttai! 40 Akhopi pal jouse naloilhun, akulpi abonchan naloiphei! 41 Ajotpa chanin athilkeo akiguh-un, Aheng akom jousen anuisat’ui! 42 Agalte najosah tan, Agalte kipah thanomin naumsah-e! 43 Agal manchah jouse manmo nason, Galmuna gal nalelsah tai! 44 Aleng tenggol nasat lhan, Alaltouna toljepnan naneiye! 45 Gollhang manlouvin nalhan, Jumle ja thoh-in nakoiye!

Huhdohna dia Taona

46 Pakai, nakisel thip beh ding hitam? Itih chan nalungsat meibanga kou jing ding ham? 47 Kahinkho chomdan geldoh-in Pakai! Ngaiton, thi theiya neisem cheh-u ahime! 48 Thi lou ding koima aumpon, Lhana kivui lou didng jong aumpoi! 49 Masanga neingailut nau hoiham Pakai? David dia nakitepna ho hoiba ham? 50 O Pakai, nalhachapa eiphin nau, Melmate gaosap kathoh hi gel jingin! 51 Nalhentum lengpa aphinseuve Pakai! Achena chana aphin phin jengui! 52 Tonsot’in Pakai vahchoiyin um hen! Amen! Amen!

BU LINA (Labu 90-106)

Labu 90

Pathen chule Mihem

1 O Pakai, akhang khanga Kakiselnau kulpi nahi! 2 Vannoi naphudoh a mol le lhang nasem maa jong, umjingsa Pathen, um jing ding Pathen nahi! 3 Nangin mihem akisemna kile kit’a, Leivui nungso kit dingin naseiye! 4 Nang din kum sang jong hi Nikhat bep ahin; Janhi kitolmangloi bep, Jan mangkal khat bep ahi! 5 Twisoh milhoh bangin neilhoh mangun, Jan mangkal khat bep bou kahiuve! Jingkah daitwiya Hamdong noudoh bep kahiuve! 6 Akhangdoh loiyin apah-in, Nilhah lam teng agop jin athijitai! 7 Nalunghanin kamagnthah tauvin, Nalungsat’in kakihot lhul tauve! 8 Kachonsetnau nave jingin, Guh thima kasetna jouseu namu jinge! 9 Nalunghanin kahinkhou achomlon, Hai khat’in abeiji tai! 10 Kum somsagi bep kahing jiuvin, Damthei lheh jongleur, Kum somget bang bou kahingui! Kahin laiyun chol le nangin ka-umun, Hinkho alhing loi jin, kabeipaitauve! 11 Nalunghan khohje hea koi hiya, Nalungsat’in itobang kichatna ahin lhut ding kon hem? 12 Kachih theina diuvin, kahinkho chomjeu neihil’un! 13 Itih chan neilung han diu ham? O Pakai, nalhachate neikhotaouvin! 14 Kahinkho lhum’uva kipa nopla sa din, Jing khovah she leh long louvin neilungset’un! 15 Gentheina kum sunga neigimsahna jat mauvin, Kipan thanomin neilhauvin! 16 Nathilbol nasatah ho nalhachate neimusah-un; Nathahat loupi chu kachateu musah-in! 17 Pakai ka-Pathenu, phatthei neiboh-un; Kabolchan neilo lhinsah-un!

Labu 91

Eihoidam’uva Pathen

1 Chungnungpen Pakai kulsunga lut’a, Hatchungnung limdam noiya kisel chun 2 “Eipanpia eihoidam, ka-Pathen Ka-kingaina nahi,” atitheiye. 3 Chuteng Pakaiyin thangkol sung le Thihel theina natna konin jong hoidoh nante! 4 Alhavingin nakhuntin nasel nante; Akitahna luma nadalpeh ding ahi. 5 Jan teng kichapon natin, Sun teng gal nagin lou ding; 6 Muthima hise lang hihen, Sun laiya mithat hijongle gingpon nate! 7 Nakoma sangkhat din lhuh hen, Navel’a sangsom kijam jongle ima tipon nate! 8 Vele chun migilou Talen kimatsah chu namu ding ahi. 9 Ajeh chu Pakaiya kisel nahin, Hatchungnungin nahoidamtai! 10 Hatsahnan napha pontin, Na-insunga manthahna lut ponte! 11 Nachena lam lama nahoidam din Pathenin Avantilte nganse nante! 12 Songhoa nakeng kisuh khah louna din, Vantilten domkhang nauvin nate! 13 Sakeihole gulte, sakei hangtah ho, Gulse ho geiya nachotpeh ding ahi! 14 Pathenin, “Pakai kahi eihea nagilute chu Kahuhhinga kahoidam ding; 15 eikou tengu houving ting, Agim tengu ka-umpi ding; Kahuhdoh a kachoi-at ding; 16 Kahuhhinga sot tah tah kahinsah ding,” ati.

Labu 92

Vanchoina La

1 Vo Pakai Chungnungpen Pathen, Nangma thangvah le najabol lasah aphai! 2 Jingkah seh le nalungset long lou phon a, Nilhah she a nakitahna phon ding; 3 Tumging thei jouse le Semjang gin ngeito tho hi aphai. 4 Vo Pakai, nathilbol loupe hon eikipasah-e; Natoh thil nasa hojeh-in kipa la kasai! 5 Pakai, nathilbol anasan, Nalungel agil’e! 6 Mingol het the idol ahipon, Lungthimbei hetkhen hoi ahipoi! 7 Migilou hamdong pha bang hen, Bol khel neiho khangtou jongleh; Aboncha kisumang diu ahi. 8 Tonsot’a thahat jing nahi Pakai! 9 Namelmate thigam’a, Migiloute kithecheh soh diu ahi. 10 Keivang gambongchal bangin neihatsah-in, Vang neiboh-in neinopsah tai! 11 Kamelmate kisuhgep kamun, Migiloute kagin kajai! 12 Midih chu chahthing nanou bang ding, Lebanon lhang cedar thing bang diu ahi! 13 Pakai insunga kiphut thing phung bang diu, I-Pathenu Houin thenga thing nanu bang diu ahi! 14 Hitobang thing hi ateh geiyin agatheiyin, Anou jingin atah jingin ahi! 15 Hiche hin Pakai thudih aphongin, Eihoidampa monabei aseidoh-e!

Labu 93

Pathen Leng ahi

1 Pakai chu Leng ahin, Lal loupina kijem, thaneitah ahi. Leiset phudetsan akoiyin Kibotkang kit lou ding ahi. 2 Vo Pakai, nalaltouna long lou, Tonsot’a um jing jeng nahi! 3 Vo Pakai, Teikhanglen lithuh ho aging lul lul’un, Nangma choi-anin akithongje jui! 4 Van a Pakai thaneitah-in vai ahomin, Twikhanglen kithong sangin ahatjon, Twikhanglen kithong sangin ahatjon, Twipi kidil sangin jong ahuneijoi! 5 Pakai, Nadanthu ho abang ahijingin, Tonsot tonsot’a um jing ding ahi.

Labu 94

Ijakai Thutah Pathen

1 Vo Pakai, phulah them Pathen! Nalunghan hinphongin! 2 Namtin vaipi thutan nahi, Kipat’in kiletsahte achanlom pen! 3 Vo Pakai itih chan migiloute nakipasah a, Ichan geiya nakichoisang sah ding ham? 4 Kiletsahten lhajeng jungin thu aseiyun, Athilse bol’u kiletsah hoithonnan aneiyui! 5 Ven Pakai na-ngailut namite, Abolgimun achilngem ngem jengui! 6 Meithai ho le chagate athat’un, Kagamsunguva kholjin ho athat’ui! 7 “Pakaiyin la eimu pouvin, Israel Pathenin ahephapoi,” atiuve. 8 Vo hitobangloma ngol mihem ho, Itih ba nachih doh diu ham? 9 Nakhang sem Pathen chun ajah moa, Mit sem a Pathenin amu mom? 10 Vaipi vengtup Pan talen apeh moa, Mitin thumop chun ahetmo ding ham? 11 Miho ngaito Pakaiyin ahen, Athil ngaitou moh ahi ahei! 12 Vo Pakai, nahilchah mihem, Nadanthu nahilthempa chu anun nom’e! 13 Migiloute lhah lhumna ding khuh kilai kah, Gim genthei nikho sungin jong nacholdoh dah-e! 14 Pakaiyin amite dalha pontin, Agoulo mite donda ponte! 15 Thutanna in a thudih lenga, Midih jousen pha asah diu ahi! 16 Migiloute eidouhu ding koi hiya, Thilse bolte eidouhu ding koiham? 17 Pakaiyin eipanpi lou hileh, Lhan muthim noiya lum tange! 18 “Vo Pakai, kalhutai, nalungset long louvin Neiphong dingin! 19 Lung gim genthei kathoh teng, Neilhamonin neikipasah-e! 20 Thudih loud an asem, Dan dih louva thutante napanpi pon; 21 Miphate tha dia gong, Monabeite tha dia thutante napanpi poi! 22 Pakaiyin eipanpin, Ka-Pathenin eihoidam nai! 23 Pathenin agitlou jal’uva talen apeh ding, Achonset jal’uva asuhmang ding ahi; Pakai i-Pathen’un Amaho sumang nante!

Labu 95

Vahchoina La

1 Hungun Pakai vahchoiyute! Eihoidam Pathen a kipa la sauté! 2 Thangvah to thon a-anga lut’utin, Avahchoi la kipah-in sauté! 3 Ajeh chu Pakai hi Pathen loupe ahin, Semthu pathen dang sanga Leng hat ahi. 4 Pathenin van le leiset pumpi, Leiko tongpen a pat lhang sangpen geiyin vai apoi. 5 Asemsa Twikhanglen le atundohsa Leiset chunga vai ahom jinge! 6 Hungun, Eisempau Pakai anga kunin, Boh khup’in chibai boh cheh-ute! 7 Ajeh chu ama i-Pathenu ahin, Eiho avahsa amite, akaile kelngoi hon ihiuve! Tunin asei ngaiyun! 8 “Meribah a napu napateu bangin lungtah dan, Massah gamthip a bangin lungtah dauvin, 9 Hikom dunga hin kathilbol munasan Napu napateuvin eipatep leuvin; 10 Kum somli sungin kagim kathang anam leovun, ‘Itijong hiti lepcheuva, Kathupeh jouse anitdau ham’ kati. 11 Kalungsan giltah-in kakitep’in, ‘Nacholdo mun diuva kapeh Gamsunga nalut louhel diu ahi,’ kati,” ati.

Labu 96

Leng loupi Pathen

1 Pakaiya lathah sauvin! Sauvin vannoi pumpin Pakaiya! 2 Pakai vahchoi la sauvin amin choi-an’un; Eihuhhingnau Thupha nitinin phongjal’un! 3 Chitin namtin lah a aloupina phongun, Athilbol kidang ho mitin lah a phongleuvin! 4 Aloupipen Pakai, minthangtah a vahchoi lom ahi; Semthu pathen dang sanga jabol ding ahi. 5 Namdangten Pathen ahisah-u hi semthu bou ahin, Pakai vang hin Vanmun geiya asem ahi. 6 Pakai kimvel’a lal loupina jana dim, Amuntheng phung thahat le mel-hoi adem’e! 7 Leiset miten Pakai vahchoiyun! Vahchoiyun aloupi le athahat! 8 Pakai min loupe vahchoiyun! Thilto choiyin a-inpia hung lut’un! 9 Hinkho theng mel-hoiyin Pakai chibai boh-un; Pakai anga leiset pumpi tijau hen! 10 Namtin vaipi jah a, “Pakaiyin lengvai apoi; Leiset akiphutdettai killing ponte; Thudih manga vannoi thu atan ding ahi,” tiuvin! 11 Lei le van kipah hen! Twikhanglen le asunga chengten Othongin oiyu hen! 12 Loujao ho le asunga keh jouse kipah hen! Gammang thing jousen kipa la sau hen! 13 Leiset vaihom dia Pakai hung teng, Thudih le thuphaa vannoi mite thu atan ding ahi!

Labu 97

Thunei Chugnung Pathen

1 Pakai aleng changtai! Leiset kipah hen! Kipah-un twikol gam jouse! 2 Pakai, meilhang jinglei loiyin atomin, Thudih le atah mangin vai apoi! 3 Amasang meikouje jun alengin, Akimvel’a melmate ahalvamsoh tai! 4 Keh alhahsah teng vannoi asalvah-in, Leiset’in amun akihot lhul’e! 5 Lhangsang jouse Pakai anga khoilu bangin ajol’in, Leiset pumpi Pakai anga ajolsoh tai! 6 Vanmun jousen Pakai dihna aphongin, Namtin vaipin aloupi amui! 7 Doi hou chan ajah chan, Semthu pathen dang ho Pakai anga akuntauve! 8 Vo Pakai, nathutan dih jal’in, Zion mite akipah-in, Judah khopi ho athanom’ui! 9 Thaneipen Pakai, leiset pumpi vaipo nahi; Semthu pathen dang ho sangin naloupi ngeiye! Amite ahoidamin migiloutea konin ahuhdohjie. 11 Midihte din khovah tan, Miphate din kipana ahune! 12 Midihte Pakaiya kipah-un, Amintheng vahchoiyun!

Labu 98

Vannoi vaihom Pathen

1 Pakaiya lathah sauvin! Pakaiyin thil kidang dang aboltai! Aban-gol ajen athahat’in Gal ajousoh tai! 2 Pakaiyin galjo aphongdoh tan, Namtin vaipi athahat ahetsah tai! 3 Israelte dia kitah dingle longlouva Lungset dia akitepna amolsoi! Leiset kolkimvel’a min I-Pathenu gakjo amusoh tai! 4 Leiset pumpin Pakaiya kipa la sauvin! Vahchoiyun kipa lan, oiyun thanomin! 5 Semjang saigin to thon Pakai vahchoi la sauvin! 6 Sumkon le saki mut’un, Kipah-in oiyun Pakai i-Lengpau! 7 Twikhanglen le asunga chengten oiyun! Leiset le achung chengten sauvin kipa la! 8 Luidung jousen khut bengun! Mol le lhang jousen Pakaianga kipa la sauvin! 9 Leiset vaihom din Pakai ahunge! Thudih le apha vannoi mite vai ahom ding ahi!

Labu 99

Leng Chungnung Pathen

1 Pakaiyin lengvai apoi, Mitin vaipi tijau hen! Cherubim chunga laltounna atouve, Leiset killing hen! 2 Zion a Pakai alaltai, Chitin namtin chunga achungnungpen’e! 3 Mitinin amin lal loupe vahchoi ding, Amabou atheng ahi! 4 Thaneitah Leng, adih ngailu, Israel lah a thudih tungdoh, Thudih le apha napolut’e! 5 Pakai i-Pathenu vahchoiyun, Alaltouna maiya chibai boh-un, Amabou atheng ahi! 6 Athempu lah a Mose le Aaron akisim than, Amina tao lah a Samuel jong apange; Thempuho Pakaiya atao tengu Aman adonbut jie! 7 Meilom lah a konin Thempuho akihoupin, Danthule thupeh apeh hi Thempuhon amit’ui! 8 O Pakai ka-Pathen, namite taona nasangin; Achonset nau talen namatsah vangin, Namite din mi-ngaidam pathen nahi namusah-e! 9 Pakai i-Pathenu vahchoiyun, Alhang thenga Ama chibai boh-un! Pakai i-Pathenu hi athenge!

Labu 100

Vahchoina La

1 Vannoiyin Pakaiya la sauvin! 2 Kipah-in Pakai chibai boh-un, Kipa la san a-ang sunga Hung lut’uvin! 3 Sumil loujen’un Pakai chu Pathen ahi. Asemsate, Amaa ihiuve; Amite ahiuvin, akelngoihon ihiuve! 4 Thangvah-un Ahouin kelkot’a lut’un, Vahcoi pumin a-inpia lut’un; Thangvah-un amin choi-an’un! 5 Pakai nun nem ahi; Alungset longlou, Akitahna um jing jeng ahi!

Labu 101

Leng khat Kitepna

1 Nakitehna le nathudihje Pakai ken lan sange! 2 Nolnabeiyin chon nange! Kahenga itih nahung dem? Ka-insunga lungthengin um ing ting, 3 Thilse umsah ponge. Kipalna neisaho natoh kahon, Hiche ho hin eisuboh ponte. 4 Lung thengmon um pong ting, Thilse tongkha pong! 5 Guhthima aheng akom house chu Kasuhmang ding; Mi kiletsah hoitho chu Nom lensah ponge! 6 Gamsung mi kitahho hebol ing ting, kaleng inpia kachensah ding; Lung thengsel ho chu Semang pachonga kapansah ding ahi. 7 Mijou kaleng inpia cheng lou ding, kakoma miphalhem um theilou ding ahi. 8 Igamsunguva migiloute Niseh a katha tha jeng ding; Migilouse se Pakai khopia kona kadelmang ding ahi.

Labu 102

Gollhang hesoh taona

1 Kataona ngaiyin O Pakai! Najah din kakap’e! 2 Kahesoh teng Neinungsun loujenin! Ngaiyin, kakou teng neihou loiye! 3 Kahinkho la meikhu bangin abeihei hoiyin, Kagu kachang meisa bangin Akihul let lut jenge! 4 Hamgo kinoigep bangin kalungthim agon, Anjong kaneh nompoi! 5 Kapen pen nan Kagu lheng lhon bou aumtai! 6 Gamthip laiya songthoi ham kabangin, Khogem lah a simbupi ham kabange! 7 Kalup vangin ka-ihmu thei pon, Intingvuma vacha chang khat tou kabange! 8 Kamelmaten eiphin nilhumkeiyun, Eidaithang hon kamin agaosap’ui! 9 Anneh khel’in vutvam kaleh-in, Twidon khel’in kamitlhi kaval’e! 10 Ajeh chu lungphamon neilunghan khumin, Neidom sangin neipai mangtai! 11 Kahinkho la nisa kihei bep ahin, Loudong gopsuh bep kahi! 12 Hinla O Pakai, Nangma tonsot Leng nahin, Akhang khangin naminthang jinge! 13 Hung kipat’in Zion khoton, Zion khoto phat alhingtai; 14 Kisumang ta jongleh NalhachatenZion angailun; Khogemsa ahitah vangin, Zion chunga avoujang nauve! 15 Namtin vaipin Pakai gingun tin, Leiset leng jousen athahat gingunte! 16 Pakaiyin Zion asemphat teng, Alal loupina phongdoh tante! 17 Donlousa amite taona ngaiyin tin, Athum chanu bulhitpeh tante! 18 Apeng loulaiho geiyin avahchoi thei nan, Pakai natoh hi khatkit’a te din sundoh-in! 19 Pakaiyin chunglam aumna muntheng Van a koninleiset ahinvei! 20 Songkul lute taona angaiyin, Tha dia thutansate alhasoh-e! 21 Zion a Pakai kiseiphongsoh ding, Jerusalem a Aman kivahchoi ding ahi! 22 Lenggam jousea chitin namtin kikhom’uva Pakai chu chibai aboh cheh diu ahi! 23 Kahat laiyin Pakaiyin katha asubeiyin, Aphat louvin kahinkho asuchom’e! 24 Vo Pathen katahman neithisah dan! Tonsot kumkhoa hing jing nahi Pakai! 25 Semtil’in leiset nasemin, Van mun jouse nakhuttah-in nasemdoh-e! 26 Nasemsa jouse mangsoh ding, Nang vang um jing ding nahi; Nasemsa ho ponset’a sea, Pon banga naseimoa, mangsoh diu ahi! 27 Nang vang abang nahi jingin, Nahinkho beitih aumpoi! 28 Kachateu lung monga chenguva, Achilhah teu na-anga hoidam diu ahi.

Labu 103

Pathen mi-ngailut

1 Ka-lhagaovin Pakai vahchoiyin, Kahinkho pumpin amintheng choi-anin! 2 Ka-lhagaovin Pakai vahchoiyin, Aphat kidang ho sumil loujenin! 3 Pakaiyin kachonset jouse angaidamin, Kaveiset adamsah soh tai! 4 Lhankhuh gei dingsa eicho hingin, Lungset le hepitah-in phatthei eiboh-e! 5 Kahinkhon thilpha jengin eingoichon, Haljingin muvanlai bangin kahat jinge! 6 Bolset thohte Pakaiyin akhoton, Thu adih lamin atanpeh-e! 7 Pakaiyin athilgon Mose henga aphongin, Athilbol kidang ho Israel chate amusah-e! 8 Pakai chu hepi le lungset them, Lunghangvah lou, lungset longlouhel ahi! 9 Mi apho jing lou ding, Lung jong lung hang jing ponte! 10 Ichan diu dol talen eipepouvin, Ichonset nau le bolkhel ho jat’in eilethuh pouve. 11 Angailua jabolte din Pakai mingailut van chanin asange! 12 Ichonset jouseu Niso le nilhum chanin atolmangtai! 13 Ajabolte hi Pakaiyin Mipa chate hepi bangin ahepi! 14 Pakaiyin ikisemdol’u ahen, Leivuiya kon ihiu ahejinge! 15 Ihinkhou vang hampa bep, Hampa khan a khang chomcha pah bou ihiuve! 16 Hui nun teng hampa amut mangin, Koiman amuphaji tapoi! 17 Pakai jabolte din vang Alungset guitanmo, akhang khanga aphatna um jing ahi! 18 Athutep’a tah pante, Athupeh chan nit themte dia chute ahi. 19 Pakaiyin van a laltouna akidon, Ijakai chunga lengvai apoi! 20 Vantil hat, thaneitah hon vahchoiyun Pakai! Athupeh nit themten asei ngaiyun! 21 Alhacha adei bol, van a thaneitah hon Vahchoiyun Pakai! 22 Alengvai neina chan a asemsaten Vahchoiyun Pakai! O ka-lhagao Vahchoiyin Pakai!

Labu 104

Eisempau vahchoina

1 Ka-lhagao Pakai vahchoiyin! O Pakai ka-Pathen naloupi ngeiye! Jabolna le Lal loupinan Nakijem’e! 2 Khovah loupin nakivonin, Pondal bangin van nasungin; 3 Twipi chunga in nasan, Meilhang kangtalaiyin namange’ Huipi chunga natouvin ahi. 4 Khopihui solchah-in nanaeiyin, Lhacha kolphe namange! 5 Leiset bulpi naphutset’in, Kilong kit ponte! 6 Leiset chu Twikhangin nakhun, Molsang ho jong twiyin achup’e! 7 Napho teng twipi akinongin, Na-ogin ajah tengu akitol tol jiuve! 8 Mol le lhang akhotan’un phaichama ahung longun; nasemna mun jousea alongui! 9 Leiset achup kit louna din Akhokal lou diu gamgi nasempeh-e! 10 Phaicham dunga twisam naputsah-in, Lhang le lhang kah a luidung nalonsah-e! 11 Luidung hao hin gamsaten twi adon’un, Gamlah sa-nganten dang noun an aneiyui! 12 Vapang thingphung dunga Vachate busan kipah-in la asauve! 13 Van a konin mol le lhang gotwi nachapsah-in, Leiset hi navangboh adimset’e! 14 Gancha neh din hamhing napousah-in, Mihemin avatchaiya muchi tuna aneidin hampa nakesah-e! 15 Akipana din lengpitwi napensah-in, Athanopna din olive thao napen; Akithadona din anneh napei! 16 Pakai phusa thingphung, Lebanon lhanga Cedar ho Gotwi nengtah-in adou jingui! 17 Cedar thing chung dunga vachaten bu asan, Chahthing phung dunga vakangten bu asai! 18 Molsang dunga gamkelte achengun, Songkol khikah dunga kolsate akisel’ui! 19 Kum kiheichin melchihnan Lha nasemin, Nisa alhum phat akihet’e! 20 Jan nasemin, khojin teng Gamsa jouse alhadoh jiuve! 21 Sakei noute sadel’in akisen sen’un; Neh ding Pathena akithum’ui! 22 Nisa so teng changsunga akileuvin, Akhosung dunga alum jiuve! 23 Hiche kah hin mihem avaikon’un, Nilhah geiyi na atongui! 24 Pakai, thil hijatpi hi chingtah-in nasemin, Nasemsa leiset adimtai! 25 Twikhanglen lentah le jaotah, Asunga ganhing len le neo adimset’ui! 26 Twipi chunga kong innei akitol’un, Nasemsa Leviathanin alamtinjie! 27 Ganhing hijat kel le chah khoto din, Abonchannasanglam avecheh-ui! 28 Aduchanu napen, aneuvin; Anneh napen, anevaiji tauve! 29 Nakihei mang teng akichauvin, Nahaisam sah teng athiuvin leivuiya akilekitji tauve! 30 Nalhagao napeh teng semdoh ahitauvin, Leiset’a amaho hi hinkho thah napei! 31 Tonsot’in Pakai loupe jing hen; Asemsa chunga pakai kipah jing hen! 32 Pakaiyin leiset avet teng akilingin, Molsang dung athamleh akhulet lut’e! 33 Kahin laisen Pakai choi-at la sang ting, Hinlai damsungin ka-Pathen vahchoi la sange! 34 Pakaiyin kipah thanom kahi, Kalasah chunga lung lhai hen! 35 Leiset’a chonsete kisugam hen, Migilou kilulah kit da hen! Ka-lhagaovin Pakai vahchoiyin! Vahchoiyun Pakai!

Labu 105

Pathen chule Amite

1 Thangvah-un Pakai, aloupina phongjal’un; Namtin lah a athilbol seichoi leuvin! 2 Pakai vahchoiyun, Thil kidang abol ho sei leuvin! 3 Kipah-un Amaa ahiuve, Ama chibai hoh jouse kipah hen! 4 Pakai panpi hol’un, Ama chibai boh jinguvin! 5 Thil kidang abol ho jeh leh Athutan dih jeh hin, 6 Alhacha Abraham chilhahte le Alhenchom Jacob chilhahten Pakai gel jingun! 7 Pakai hi i-Pathenu ahin, Athupeh ho vannoi pumpi ding ahi! 8 Akitepna nit jing ding, Athutep ho khang sang sanga anit ding ahi! 9 Abraham to akinopto na, Isaac athutep anit tei ding ahi! 10 Pakaiyin Jacob to kitepna asemchu, Tonsot tonsot’a um jing ding ahi! 11 “Canaan gam napeng ting, Nagoulo gam hiding ahi,” ati. 12 Pathen mite lhomcha ahi laiyun, Canaan gama akhopem’un; 13 Agam gama avah leuvin, Lenggam khat’a konin achom khat’a acheuve! 14 Hinla Pathenin koima abolgenthei sah pon, Ahoidamna diuvin keng ho agihsal jie! 15 “Kalhentum lhachate suse hih-un, Ka-Themgaote bolse hih-un!” ati. 16 Pakaiyin gamsunga kel alhan, Neh le chah asumangtai! 17 Soh joh a ajoh-u Joseph chu Israelte masanga asol masan; 18 Joseph chu akenga thih khaovin ahen’un, Alol’a thih-kol’in ahen’ui! 19 Pakai thun athemna aphondoh a, Aseidohsa guilhun kahsen ahen’uve! 20 Chuin Egypt lengpa, namtin vaipo pan Joseph alhadoh-in achamlhatsah tai! 21 Agamsunga apipun apansah-in, Anei jouse chunga vaipon akoitai! 22 Lengpa natong ho hithei leh Athumopte hilchah thei din apansah-e! 23 Jacob jong achen, Egypt gamsunga achengtai! 24 Pakaiyin amite cha le nao apunsah-in, Akidoupiteu sangin tha aneisah-e! 25 Amite chu Egypt mite ahotsah-in, Alhachate khut thah lhau nan aneitauve! 26 Hichun alhacha Mose le Alhendoh Aaron asol’e! 27 Mose le Aaronin Egypt gama Pathen vangin thil nasatah tah le kidang abol lhon’e! 28 Pathenin Egypt gama thim ajinsah-in, Hinla Egypt miten athu angaipouve! 29 Aluidung twi jouseu thisan asosah-in, Nga jouse jong athatgamtai! 30 Agamsungu uphoh adimtan, Leng inpi geiyin adimtai! 31 Pathenin thu apeh leh Thou vaisi ahung langin gamsung adimtai! 32 Gotwi khel’in kol aphetsah-in Agamsunguva gel alhahsah tai! 33 Lengpigui le theichang phung ho, Thingphung ho asumangsoh tai! 34 Pathenin aseile, simsen lou Khaokhote ahung langin; 35 Gamsunga hamdong jouse le Lhosah ga jouse anechaitauve! 36 Pathenin Egypt mite insunga Chapa peng masa jouse athatai! 37 Hichun Israelte apuidoh-in, Amahon dangka le sana akiph-un Ahao theiyun ahat lheh tauve! 38 Egypt miten akichauvin, Israelten adalhah-u akipapaive! 39 Pathenin sun teng amite Meilhangin adal jin, Janteng meikong asalvah sahjie! 40 Israelten athumjeh-un vanmite alhalut peh-in, Van akonin anneh apei! 41 Songpi ahongdoh-intwi aputsah-in, Nelgama vadung bangin alonsah-e! 42 Alhacha Abraham henga Akitepna theng chu agel jinge! 43 Hiti hin alhenchomte apuidoh-in, amahon kipa la san a-oiyui! 44 Pathenin amaho hi midang ho gam alosah-in, aloumun jouseu atouphasah tai! 45 Amiten Adanthu ho le ahtupeh chengse Anit jingna diuva hitia abol ahi. Vahchoiyun Pakai!

Labu 106

Amite dia Pakai phatna Vahcoiyun Pakai!

1 Vahchoiyun Pakai! Thangvah-un Pakai nun nem, alungset longlou ahi! 2 Pakai thilbol loupiho seijou ding hiya, Kithuh bep a vahchoi jou ding koi ham? 3 Pakai thupeh ho nit’a Thildih bol jing mi anun nom’e! 4 Namite napanhu teng neigeldoh-in Pakai! Amaho nahuhhing teng keijong neipansah-in! 5 Namite hamphat neimusah-in, Nagoulo mite kithang-at a anopnauva neipansah-in! 6 Kapu kapateu bangin kachonseuvin, Migiloule mi-engse kahiuve! 7 Egypt’a Pathen thilbol kidang ho chu Kapu kapateuvin ahethem pouvin; Analungset jingo chu asumil’un, Twisan phunga Hatchungnung dounan achon’ui! 8 Pakaiyin vang akitepna bangin ahuhhingin, Athahat loupe musah din abol’e! 9 Twisan dung aseipeh leh akangin, Amite tolgoa apui galkaiye! 10 Ahotbolteuva konin ahuhhingin, Amelmateuva konin ahuhdoh tai! 11 Amelmateuva vang twiyin achuptan, Khatcha beh akhenpoi! 12 Hichun amiten athutep ho atahsan’un, Pakai vahchoi la asauve! 13 Ahin Athilbol asumil loiyun, Athumop ngah louvin anopchon tauve. 14 Gamthip laiya adu du athum’un, Pathen apatep’uve! 15 Gamthip athum chanu apen, Gamna hise jong vang alansah-e! 16 Gamhtip laiya Pakai lhacha theng Mose le Aaron chunga athangset’u chun 17 Leiset apoh khin Danthan achop lut’in, Abiramle ainsung mi achup’e. 18 Aseijuiteu chunga meikou achun, Migiloute chu akavamsoh tai! 19 Sanan bangchal lim asem’un, Hiche semthu doi chu ahoutauve! 20 Pathenloupina chu hamhing nea Gancha limsemthun akheldoh-ui! 21 Egypt gama thil nasa tah tah bol, Ahuhhingpau Pathen asumil tauve! 22 Egypt gama datmo thil itobang abol’a, Twisan phunga tijat um itobang abol hitam! 23 Pathenin amite suhmang dia asei chun, Alhendoh lhacha Mose’in Pathen akidintepin; Miho asuhmang louna din Alungdamsah nah nah-e! 24 Lungtup gam chu aseiseuvin, Pathen thutep atahsan pouve! 25 Aponbuh dunguva aphun phun’un, Pakai thusei angaipouve! 26 Pakaiyin khut ajah-in agihsal’in, Ganthip laiya athagam a, 27 Achilhahteu gamtin athecheh a, Gamchoma athigamdah din aseiye. 28 Peor a jong Ba’al ahouvun, Doi thisa houna sa aneuve! 29 Athilbolu hin Pakai aphin hangun, Alah-uva gamna hise alangtai! 30 Phinehas akipat’in themmona neiho talen apen, Hichun gamna hise ahaitai! 31 Hiche abol hi Phinehas din Them channan akisimpeh-in itih a het jing ding ahitai! 32 Meribah twisam phunga mihon Pakai alunghansah-un, Hijeh chun Mose’n Genthei hesoh anathoh-e! 33 Mose alungna behseh-in, Thu ngeimo tah tah anaseiye! 34 Pakai thupeh bangin Chidang namdangte athat’un; 35 Hinla akichengtouvin, Adoihouvu ajomtauve! 36 Pathen miten doi demthu ahouvun, Amanthah lo tauve! 37 Canaan gam semthu doi hounan Achateu numei pasal atoh jengui! 38 Themmonabei chapang ho athat’un, Atoltha jeh-un gamsung asuboh-ui! 39 Anatoh-un akisuboh-uvin, Pathena akitah tapouve! 40 Hijeh hin Pakai amite chunga along hangin, Agoulo mite alo-lhatai! 41 Chidang namdangte khut’a ahenin, Amelmateu achunguva vaihomin apangui! 42 Amelmateuvin gantheitah-in abol’un, Khut thah lhau nan aneiyui! 43 Pakaiyin amite avel vel’in ahuhdoh nan, Amahon adoumah jeng abol’un chonset’a alha lhumjitauve! 44 Hichan geiyin jong Pakaiyin ataonau angaiyin, Ahesoh nau akhohsah jing nalaiye! 45 Akhohsah jal’in akitepna ageldoh-in, Alungset longlou jeh-in lung aheijie! 46 Soh a hente mitmun Voujang nat nat aumsah jie! 47 Neihuhhingun, Pakai ka-Pathenu! Namtin vaipi lah a konin neilongkhomun, Chuteng kipah-in Namintheng vahchoiyunge! 48 Pakai Israel Pathen vahchoiyun! Tule tonsot’in vahchoi jingun! Mitinin, “Amen!” tiu hen! Vahchoiyun Pakai!

BU NGANA (Labu 107-150)

Labu 107

Pathen Phatdan vahchoina

1 Thangvah-un Pakai nun nem chu, Alungset longlou ahi! 2 Gim gentheiya kon Pakai lhatdamsaten hitin seiyun; 3 Gamtin so le lhum a kon, Sah le lhanga kon kikhomho seiyu hen! 4 Abang bang nelgama avah thaiyun, Chen mun khopi kimu louvin aum’ui! 5 Kel le chah athoh-un, Alhasamden gamtauve! 6 Ahesoh teng Pakaiya ataovun, Agenthei nauva kon Pakaiyin ahuhdoh tai! 7 Achenna theiyu khopi jonin Lamjang keiyin Pakaiyin apuiyuve! 8 Lungset longlou jeh a thil kidang abolpeh jal’a Pakai chu athangvah lom mongu ahi; 9 Dangchahte adang nousah-in, Gilkelte anpha phan avah-e! 10 Abang muthim lah a mai nguiyin atouvun, Sohchangte gentheiyin thihkhaovin ahen’ui! 11 Ajeh chu thaneipen Pathen thupeh ho adouvun, Ahilchahna anahsah pouve! 12 Toh hahsat jeh-in chol thi ding ahitauvin, Adin lhuh tengu panpi ding aumpoi! 13 Agenthei tengu Pakaiya ataovun, Pakaiyin agenthei nauva kon ahuhdoh tai! 14 Muthim lah, mai nguiya atou nauvah apuidoh-in, Akihen nau thihkhao abotanpehsoh tai! 15 Lungset longlou jeh a thil kidang abolpeh jal’a Pakai chu athangvah lom mongu ahi! 16 Sum-eng kotpi jouse aphujal’in, Thih kotgol chengse atumbong tai! 17 Mi-ngol phabep chonset jeh-in, Abang bang gitlou jeh-in ahesoh-ui! 18 Anhim him la alo-lha jengun, Athi tah bah ding ahitauve! 19 Agenthei tengu Pakaiya ataovun, Agenthei nauva konin ahuhdoh tai! 20 Pakaiyin athu neinan adamsah-in, Lhankhuh gei dingsa achohingtai! 21 Lungset longlou jeh a thil kidang abolpeh jal’a Pakai chu athangvah lom mongu ahi! 22 Thangvah kilhai diu, Athilbol jousekipa la asah diu ahi! 23 Abang Twikhanglena kong ineiyin akitolsuh-un, Twipi chunga kiveina abol’uve! 24 Amaho hin twithuh tolama Pakai thilbol kidang dang amudoh-ui! 25 Pakaiyin asol leh huipi anungin, Twipi akidil paiye! 26 kong inneiho van vum vuma aleh-in, Twito lama alhalut kit’un; Hitobang kichat tijatnaa Miho kichan ameidoi gamtauve! 27 Jukham bangin asuh atouvin alon leuvin, Athepna jouseu manmo asoh tai! 28 Agenthei teng Pakaiya ataovun, Agenthei nauva kon ahuhdoh tai! 29 Huipi aphoh tangin, Twipi kidil athip del tai! 30 Athip del phat’in akipah-un, Ajotnau kong kaimun bitkeiyin apuiluttai! 31 Lungset longlou jeh a thil kidang abolpeh jal’a Pakai chu athangvah lom mongu ahi! 32 Mipi khoppia Pakai loupe aphonjal’uva, Lamkaiho kikhopnaa avahchoi diu ahi! 33 Pakaiyin luidung jouse nelgo ason, Twisam phung jouse asing bingtai! 34 Gamsung mite gitlou jal’in Leipha lai jouse hollei-chikhuh asotai! 35 Nelgum lah a dim aveisah-in, Sephou lah atwisam aputsah-e! 36 Neh ding beite chukoma achensah-in, pansatna ding khopi akisem’ui! 37 Muchi chivo tun lengpigui aphut’un, Lhoga tampi pi akilo’uve! 38 Amite vang apen cha le nao tampi ahingun, Agachau kemlouvin akoiye! 39 Thoh genthei le hesoh jal’a Pathen mite lhasam a aum teng, 40 Abolseteu chunga athangtomin, Nelgama avathaisah jitai! 41 Genthei thoh amite vang ahuhsoh-in, Ainsungu jong kelngoihon bangin apunsah-e! 42 Midihten amun akipah-un, Migiloute vang athip chel chul’ui! 43 Michinghon hiche hi geltoh hen, Pakai lungset longlou phongdoh- hen!

Labu 108

Kidoupi toh kisatna panpi ngeh a taona

1 Vo Pathen Nanga dettah a kisong kahi; Thouvin ka-lhagao Pathen vahchoi la sange! 2 Kipat’un sempi le semjang gin, Nipi lai suthong inge! 3 Vo Pakai, namtin vaipi laiya thangvah ing ting, Mitin jalaiya vahchoiyinge! 4 Nalungset longlou van chan aphan, Nakitahna vanthamjol ageoye! 5 Vanthamjol’a naloupi phongin, Leiset’a nalalna tah langin! 6 Nabanthan neihuhhingun, Kataona sangin! Hiti hin nangailutte Huhhingin um’u hen! 7 Muntheng phunga konin Pathenin, “Gal’a kajoa Shechem kakehsoa, Sukkoth phaicham Kamite kahoppeh ding ahi. 8 Gilead Manasseh keiya, Ephraim kathih lukhuh, Judah kaleng tenggol ahi. 9 Kanei kisilna konga Kaman ding; Philistinete hanla kasah khum ding ahi!” ati. 10 Vo Pathen, kulpi kikaikhum khopia eipuilut ding koi hiya, Edom a eipui ding koi ham? 11 Neidonda mongu hita a, Kasepaiteu gal nakonpi lou ding hitam! 12 Mihem panpi pannabei ahi, Kamelmateu neidou hu’vin! 13 Pathenin eipanpiu leh kajotei diu, Aman kamelmateu ajo ding ahi!

Labu 109

Gim thohpa kiphin

1 Kavahchoi jng Pathen, Umthim loujenin! 2 Migilou jouseihon eidel khumun, Kachunga jouthu jeng aseiyui! 3 Kachunga ase se aseiyun, Ajeh beihel’in eidel khum’ui! 4 Adiu kakhohsah a kataopeh vangin Eidou doujengui! 5 Kaphatna asen eileuvin, kangailutna eihot bol’ui! 6 Athutan din migilou pansah-in, Amelma khat hehset sah-in! 7 Athu kitannaa mochang hen, Ataona jong chonset’in kisimpeh hen! 8 Kithidoh loi hen! Midangin agou lo hen! 9 Achate chaga soh hen! Ajinu meithai hen! 10 Achate in le lou beiyin khut dou hen! Achen nau ingem lah a min deldoh-u hen! 11 Athil khol anei jouse kilah hen, Kholgam min atohga kilo’u hen! 12 Koiman khotoda hen, Adalhah chaga ho khohsah da hen! 13 Achi abo gamhen, Khangkit teng min lutoa panda hen! 14 Apu apate thilse bol Pakaiyin gel jing hen, Anu chonset chengse ngaidam da hen! 15 Achonset jouseu Pakaiyin gel jing hen! Leiset’a kigeldoh kit da hel’u hen! 16 Mi bolse, vaicha, tahlel panpibei thatgam Khoto ding gelpha louhel pa, 17 Hansepa-gaosap chang hen! Mi phatna deiloupa koiman vangboh da hen! 18 Gaochoi choijengpa, Agao jouse apum alongin dim hen! Thaotwi bangin Aguhom kah kah a long lut hen! 19 Gao chun pontomin tom hen, Konggah kikanchal bangin kan hen! 20 Eihouse sea kamelmate chu Pakai, hitobang hin talen pen! 21 Nathutep bangin keivang neipanpin, Nalungset hoidam jal’in neihuhdoh-in Pakai ka-Pathen! 22 Vaicha le lhasam kahin, Kalung laigil’a Na kasa behseh jenge! 23 Nilhah nilim bang kihei mang pai ding kahitan, Ganhing kimut man gbanga eikithing lha ahi! 24 Kel kathoh thoh nan kakhup alhoiyin, Kagu lheng lhonkeo kahitai! 25 Eimupha chanin einuisat’in, Lu eithin khum khum jengui! 26 Vo Pakai ka-Pathen neipanpin! Nalungset long louvin neihuhhingin! 27 Eihuhhingpu nahi Kamelmate hetsah-in! 28 Eigaosap jongleur vang neiboh-in, Eibolseten gal lel hen, Nalhacha kei vang kipah inge! 29 Kamelmate vetda chang hen, Pon akijel bangin Jum le jan tomjolsel’u hen! 30 Othongin Pakai thangvah ing ting, Japi kikhopnaa Ama kavahchoi ding ahi! 31 Pakaiyin vaichapa apanpin, Tha dia thutansa chu ahuhhinge!

Labu 110

Pakai le alhentum lengpa

1 Pakaiyin ka-Pakai jah a, “Namelmate chotpha kaneisah masangsen Kajet lam a tou jingin,” ati. 2 Pakaiyin Zion a thaneitah a Leng tenggol nachoisah a, “Namelmate chunga Vai homin,” ati ding ahi! 3 Namelmate toh nakisat nil eh Namiten manbeiya napan hu diu; Lhang thenga jingkah daitwi banga Gollhang ho nahenga hung kikhom diu ahi! 4 Khelkit lou din Pakai giltah-in kaitep’in, “Malchizedek Themput bana Tonsot Thempu ding nahi,” ati. 5 Pakai najetlama atou jinge, Athangtom tengleh Leng jouse asuhmang ding ahi! 6 Namtin vaipi thu atan’a, Galmuna thilong ajamchap ding; Leiset leng jouse Ajosoh ding ahi! 7 Lengpan lampam luidunga twi donin tin, Tha kidoa, gal ajo ding ahi!

Labu 111

Pakai vahchoina

1 Vahchoiyun Pakai! Amite khoppia kalungthim pumpin, Pakai thangvah inge! 2 Pakai thilbol jouse akidangin, Adei jousen het khentei agoi! 3 Abolchan ja aum cheh-in Alal loupe ta ngeiye! Aitih-in adih jing jenge! 4 Pakaiyin athilbol ho eisuhmilsah pouvin, Khoto them, hepi lhingset ahi! 5 Agingte anneh apen, Akitepna ahaipoi! 6 Athanei vetsah nan Midang gam jouse amite apei! 7 Abolchan a akitah-in adih-e! Athupeh chengse kisonpi thei ahi. 8 Athupehho adih le atah a kipe, Tonsot’a umdet jing ahi! 9 Amite ajalensah-in Tonsot’a din kitepna asempi! Athengle ahat Pakai ahi! 10 Pakai gin hi chih kipatna, Athupeh nit chanin ima ahekhen theme; Tonsot’a vahcoi ding Amabou ahi!

Labu 112

Mipha nopna

1 Vahchoiyun Pakai! Athupeh lung lhaisel’a nit jing Pakai jabol jing chu anun nom’e! 2 Mipha chate chu gamsunga thanei ding, Achilhahte hampha diu ahi! 3 Ainsunga nei le nga adimin, A-itih-in ahao jinge! 4 Mipha, khoto them chule midih din Muthim lah jenga jong Kho avah jinge! 5 Hongphal tah a thil hom, Lungthengsel’a natong chu anun nom’e! 6 Mipha thon lou ding Kigeldoh jing ding ahi; 7 Miphan thuse kithang agingpon, Tahsan det’in Pakaiya aki-ngaiye! 8 Tijat lungdon abolpon, Amelmate gal lel ding ahekeove! 9 Angaicha chan hongphal tah-in apen, Mi khoto achim hih-e! Ahunei lheh jengin Min ajabol cheh-e! 10 Miilouten hiche hi amuteng along hangui! Mitsat lhap lhap’in akilep mangun; Akinepna jouseu abeihel tai!

Labu 113

Pakai phatje vahchoina

1 Vahchoiyun Pakai! Pakai lhachaten amin vahchoiyun! 2 Tu le tonsot’in Pakai min Vahchoiyin um hen! 3 So le lhum a min Pakai min vahchoiyun! 4 Pakaiyin namitn chunga lengvai apoi, Aloupina van sangin asangjoi! 5 Pakai i-Pathenu tobang aumpon, Vanchung sanga cheng ahi! 6 Ahung kunjin, Van le leiset avei! 7 Leivui lah a konin vaichate akaithouvin, Angaicha chan agimnaa konin aphong dinge! 8 Amaho chu leng le lalte toh akijolsah-in, Amite milen milal ho toh akivopsah-e! 9 Numei ching nao neilou inching theiyin alhan, Cha aneisah-in kaipasah tai! Vahchoiyun Pakai!

Labu 114

Kalchuh Kut La

1 Israel chaten Egypt adalhah a, Hammah paomah gama Jacob chate apotdoh chun; 2 Judah chu Pakai mitheng ahin, Israel chu agoulo gam ahi! 3 Twisan dungin aven ajamtan, Jordan lui alelontai! 4 Mol le lhang ho kelchal chop’in achomin, Lhang sang jouse kelngoi chop’in achom’ui! 5 Vo Twikhanglen, ipi kichaa jam nahim? Vo Jordan lui ibol’a lelon nahim? 6 Vo Molsang ho, idia kelcha chop’a kichom nahiuvam? Lhangsang hon idia kelngoi chop nathou ham? 7 Vo leiset, Pakai ahunge, Jacob Pathen masanga kithingin! 8 Songpi ho twikul sosah Songpi khikah a twisam putsah Pathen!

Labu 115

Pathen dih khatseh

1 O Pakai, keiho joh hilouvin, Nang jeng bou Lungset longlou le nakitahna jal’in Namin choi-anin! 2 Ibol’a namtin vaipin, “Na-Pathenu hoilam hitam?” atidiu ham? 3 Ka-Pathenu van a cheng, Adei dei bol jeng ahi! 4 Mihon pathen ahisah vang, Sana le dangkaa kisem, Mihem khut’a kisemdoh ahibouve! 5 Semthu honk am aneiyun apao thiepoi, Mit aneiyun kho amupoi! 6 Nabeng aneiyun kho ajapon, Nahhom aneiyun gimnam ajapoi! 7 Khut aneiyun thil atham theipon, Keng aneiyun ache theipoi! Hujong ahusa theipouve! 8 Hicheng sem a tahsan ho chu Asemsau doilim ho tobang cheh-u hen! 9 Israel chaten Pakai tahsanun, Aman napanpiuvin Nahoidam jingui! 10 Pathen Thempua pang hon Pakai tahsanun, Aman napanpin nahoidam jingui! 11 Pakai ginten Ama tahsanun, Aman napanpin nahoidam jingui! 12 Pakaiyin eihejingun phatthei eiboh diu ahi; Israelte le Pathen Thempuho phatthei aboh ding ahi! 13 Alen aneo ama jabol chan Phatthei aboh ding ahi! 14 Pakaiyin nang ho le nachilhah teu Cha le nao punsah jing hen! 15 Van le leiset sempa Pakaiyin vang naboh-u hen! 16 Van hi Pakaiya ahin, Leiset hi mihem apei! 17 Mithisa lhanthip alutsan! Pakai avahchoiji poi! 18 Eiho mihingin vang tu le tonsot’a Pakai ithangvah jing diu ahi! Vahchoiyun Pakai!

Labu 116

Athisa ahuhhingin Pathen avahchoi

1 Kataona sanga kathum eipe jing Pakai ka-ngailui! 2 Kakou chanin Pakaiyin eihou jinge! 3 Kavel’a thi theina adimin, Lhankhuh kichan ka-umtai! 4 Hichun Pakaiya kataovin, “Neihuhhingin Pakai,” kati. 5 Hepi them pakai pha! Eidipdappehjiu ka-Pathenu! 6 Panpibeite hoidam Pakai, Kakichat teng eihuhhinge! 7 Pakai phatah kaneiye Kalungthim linglao loujenin! 8 Thita dingsa Pakaiyin eicho hingin, Gal eijosah-in ka-lhi atheh ngimtai! 9 Mihing chenna vannoiyah Pakaito kalhon jingnai! 10 “Eikinehgep hel ahitai” kati geiyin katahsan jing nai! 11 “koima kisonpi thei aumpoi,” aktin jong Katahsan jing thei nai! 12 Pakaiyin eibolphatna ho hi Ipia kalethuh jou ding ham? 13 Eihuhhing thangvah jal’in Pakaiya lengpitwi thilto penge! 14 Amite khopi lailunga Kakitepna jat Pakai penge! 15 Amithengte thi hi Pakaiyin avelel lheh jenge! 16 Nalhacha kahi Pakai, Thi dingsa neichohing jal’in Kanu toh bangin Ken jong nakin bol jing nange! 17 Thangvahnan kilhaiying ting, Nahenga tao vinge! 18 Pakaiya kakitepna chengse, Namite khoppi lailung, 19 Jerusalem kholai Pakai Inthenga kato ding ahi! Vahchoiyun Pakai!

Labu 117

Pakai vahchoina

1 Namtin vaipin Pakai vahchoiyun! Ami janel’in choi-an’un! 2 Eiho din alungset anasan, Akitahna abang ahijinge! Vahchoiyun Pakai!

Labu 118

Galjo thangvah Taona

1 Thangvah-un Pakai nun nem, Tonsot kumkhon alungset jinge! 2 Israel chaten, “Tonsot kumkon alungset jinge,” tiu hen! 3 Pathen Thempuhon, “Tonsot kumkhon alungset jinge,” tiu hen! 4 Pakai ging jousen, “Tonsot kumkhon alungset jinge,” tiu hen! 5 Pakai genthei pet’in Pakaiya kataovin, Eihuuvin eichamlhatsah tai! 6 Pakaiyin eilhonpin ima kagingpoi, Kon i-eilo thei ding ham? 7 Pakaiyin eipanpi, kamelmate jo ding kakat jinge! 8 Mihem kisonpi sangin Pakaiya ki-ngaidet aphajoi! 9 Mihem lamkaite kisonpi sangin Pakaiya ki-ngaidet aphajoi! 10 Melmaten eiumkimsoh nan, Pakai thahat’in kasumangsoh tai 11 Kavel’a adimset’un, Pakai thahat’in kasumangsoh tai! 12 Kavel’a khoilhah kai abangun, Gamkang ka bangin adeuje ju’vin, Pakai thahat’in kasumangsoh tai! 13 Eilonvuh jenguva eijotho phat’un Pakaiyin eipanpi! 14 Pakaiyin hatjou paojouvin eilhan Eihuhhing tai! 15 Ngaiyun Pathen mite ponbuh dunga galjo la kisa! “Pakai thahat loupin gal ajouvin, 16 Athahat’in gal eijopeh-un, Galmang gal asat chaitai! 17 Thilou ding, kahin jinga Pakai thilbol kaponjal ding ahi! 18 Pakaiyin eibolgim lheh vangin Eithisah deh hih nai! 19 Houin kelkot ho neihonpeh-in, Lu ing ting Pakai thangvah ing! 20 Hiche hi Pakai kotpi ahi, Midih bou lut theiyinte! 21 Kataona sanga gal neijosah jeh-in Nangma kathangvah-e Pakai! 22 Insahon deimoa apaiyu song chu Inning songpi khomdet penin apangtai! 23 Hiche hi Pakai thilbol ahin, Vet din akidang lheh-e! 24 Hiche hi Pakai galjo ni ahi, Kipah thanomin lengkhomu te! 25 Neihuhhingun Pakai, neihuhhingun! Neilo lhinsah-un O Pakai! 26 Pakai min a hungpa anun nom’e! Pakai Houin akon vang kaboh-ui! 27 Pakai chu Pathen ahin, adiuvin aphai! Thingna kichoiyin kut bolpan’un! Maicham kimvel’in kijot’un! 28 Ka-Pathen nahi, thangvah inge! Naloupina phongjal lenge! 29 Thangvah-un Pakai nun nem, Tonsot kumkhon alungset jinge!

Labu 119

Pakai Danthu

1 Nolnabeiya chon, Pakai Danthu jui Mihem chu anun nom’e! 2 Athupeh jouse juiya Alungthim pumpia asei ngai chu anun nom’e! 3 Amaho hin bolkhel aneipon. Pakai Danthu jeng ajuiyui! 4 Pakai, nangin Danthu neipeuvin, Kitah tah a jui din neihil’ui! 5 Nahilchahna nit’a Kitah tah ajui ding iti kakinep hitam! 6 Nathupeh chengse khohsah leng Jumna muponge! 7 Dih tah a thu natan ho kasim teng Lungthengsel’in Nangma vahchoiyinge! 8 Neidalha loujenin! Nadanthu ho nit nange!

Pakai Danthu nit

9 Gollhang hi itileh chontheng thei ding ham? Nathupeh ho anit leh hitheiyinte! 10 Kalung pumpin nakin bol kagoi, Nathupeh ho bangin neichonsah-in! 11 Nang douva kachonset louna din Kalungthimin Nadanthu kaching jinge! 12 Kavahchoiye Pakai! Nachondan jouse neihil’in! 13 Neipeh Danthu jouse Othongin velseiyinge! 14 Gou tampi neisangin Nathupehho jui kathanomjoi! 15 Nahilchahna ho kasimin, Nathuhil ho kakholtoh-e! 16 Nadanthuho kakipapin, Nathupeh changse sumil ponge!

Pakai Danthua nopna

17 Nalhacha kei niphatbol’in Pakai, Dam’a nathuhil kanitna din! 18 Nadanthua thudih kidang ho Kamutheinan kamit hasah-in! 19 Leiset’a chomchabou hing kahi, Nathupehho nei-impeh dan! 20 Phat tinin nathutan ho kahet nomin Kalungthimin ka-ngaicha lheh-e! 21 Mi kiletsah naphohsal jin, Nathupeh nitloute gaosap achangui! 22 Nadanthu kanit jingnai, Hiche ho hi neiphinsah dan neihousetsah dan! 23 Vaipoho geiya kei douna akikhop vangun, Nasanthu ho kagel jing ding ahi. 24 Nahilchahna ho kadeiyin, Eithumop’in apangui!

Pakai Danthu nit dia dindet

25 Kalel’in leivui lah a kakijam’e! Natepsa bangin neisuhal kit’in! 26 Kachonna jouse kaphongin neihouve, Nachondan ho neihil’in! 27 Nadanthuho neihetsah-in, Nathuhil kidang ho gel jing inge! 28 Kagim behseh tai, Natepsa bangin neihatsah kit’in! 29 Lam hilouva neisol dan, Lungset’in Nadanthu neihil’in! 30 Thua nung tange, Nathutan ho kakhohsah tai! 31 Nahilbangin kachon nai Pakai, Neijumso loujenin! 32 Neihetsah be ding jeh-in Nathupeh cheng kipah tah-in nit nange!

Hetkhen themna dia Taona

33 Nadanthuhoa ipi kisei ham neihil’in Pakai! Abonchan nit jing jeng nange! 34 Nadanthu neihilchenin nit ing ting, Kalungthima ching jing nange! 35 Nadanthuho kakipana ahi Anit themje neihil’in! 36 Nei le nga sangin Nadanthuho nit ding neithanopsah-in! 37 Pannabeiya neithanopsah dan, Natepsa bangin neihepin! 38 Nasei ngaite dia nathutep, Hiche nathutep chu nalhacha keidin sudet’in! 39 Nei-engboldan kaginge, Nathutan ho akidang theiye! 40 Nathupehho kanit nom’e, Hinkhothah neipen, nangma dihtah nahi!

Pakai Danthua kisong

41 Neingailut gilje neimusah-in Pakai! Natepsa banginneihuhhingin! 42 Nathua kisong kahin Eiphinse ho kadonbut thei ding ahi! 43 Nachondanhoa kinem kahi, Thutah neiseisah jingin! 44 Tonsot tonsot’in Nadanthu nit jing nange! 45 Nahilna jui ding kagoi, Kachamlhat tahbeh ding ahi! 46 Jahcha louhel’a leng ho koma Nathupeh chengse kaphondoh ding ahi! 47 Nathupeh chengse kadeiyin Kanit nom jing nai! 48 Nathupeh ho kajan kadeiye, Nahilchahna ho gel jing nange!

Pakai Danthu kisonpi

49 Nalhacha kahenga nakitepna geldoh jingin, Hiche hin eikinepsah jinge! 50 Kagimpet jengin jong eilhamonin, Nathutep chun eikhou khah ahi! 51 Kiletsahten eihou kha cheh chuh jongle Nadanthu nahsah mon kabolpoi! 52 Malaiya nathutanho kagel leh, Hiche ho hin eilhamon’e Pakai! 53 Migilouten nadanthu apalkeh teng Kalung hang lheh jie! 54 Kaleiset hinkho chomcha sungin Nathupeh ho kalachoiye! 55 O Pakai janteng Nangma kagel jin, Nadanthu umdol ka-ngaitoi! 56 Nathupehho kanit teng Kipana kaneijie!

Pakai Danthua lunglut

57 OPakai Nangbou kadeipenin! Nadanthu nit ding kakitep’e! 58 Natepsa banga neihepi din Kalungthim pumpin kataove! 59 Ka-umchan khankho kagel’in, Nahilna juidin kakitep’e! 60 Nathupeh chegnse nit didn kinomsot louvin kakinotai! 61 Migilouten thang eikampeh jongle Nadanthu kasumil poi! 62 Nathutan ho dih jal’in, Nang vahchoi din jankimin kathouve! 63 Nathupeho nit’a nakinbolte toh loi le gol’in ka-um jinge! 64 O Pakai, leiset hi nalungset longlou adim’e, Neihil’in nachondan ho chu!

Pakai Danthu manlutje

65 Vo Pakai, nasei dungjuiyin Nalhacha kei neikhotoi! 66 Nathupehhoa kisong kahi, Chihna le hetna neipen! 67 Talen neimatsah masangin kachon khel jin, Tun vang nathu ka-ngaiye! 68 Mihepi khoto them nahi! Nachondan ho neihil’in! 69 Kiletsahten jouvin eidem jongleur kalungthim pumpin neihilna ka-ngai jinge! 70 Kiletsahten ima hetna aneipon, keivang nadanthua kipah kahi! 71 Eikibolgim chu keidin aphai, Hichun nadanthu eihil’e! 72 Leiset sum jouse sangin Danthu neipeh hi amanlujoi!

Danthu dihje

73 Neisemin, neihoidamin, Nadanthuho kahetna din hetna neipei! 74 Nathutep akisong kahijeh-in Jatah a nabolten eimuteng kipah-unte! 75 Pakai nathutan jouse adih cheh-e, Nakitah jal’a neibolgim ahi! 76 Nalhacha neiteppeh bangin Nalungset longlouvin neilhamonin! 77 Nadanthua kipah jing kahi, Kadamtheina din neihepin! 78 Jouva eiheh kiletsahte kijumdsou hen, Kenvang neihilna kachin jing ding ahi! 79 Nathupehho hephachan, Jatah a nabol chan kahegna hungu hen! 80 Gal kalel a kajum louna din Nathupehho lhingkeiyin juithei tave leng!

Lhatdamna dia taona

81 Nathu kineppin neihuhhing ding Ka-ngah lel lheh tai Pakai! 82 Neiteppeh kavet vetnan kamit akhamtan, “Itih tah le neipanpi dem,” kati! 83 Meiya kihulgo lengpitwipai savun go kabangnan, Nachondan ho vang kasumil deh poi! 84 Itih chan ngah leng Eibolse ho talen namatsah dem? 85 Nadanthu nit lou kiletsah ten Kalhah lutna din khuh alaiyui! 86 Nathupeh chengse kisonpi thei cheh ahin, Min jouthun eidem dem’ui, neipanpin! 87 Eithapai tahbah diu ahitan, Hinla nadanthu ho kapaipoi! 88 Nadanthuho kanit theina din Long louvin neilungset’in!

Pakai danthu tahsan

89 O Pakai nathu hi tonsot’a ding, Van aum jing ding ahi! 90 Akhang khanga kitah jingnahin, Leiset naphutdet’in aum jinge! 91 Naseipeh bang bangin thil ijakai tuni geiyin aumun, Abonchan namanchah-in apang cheh-ui! 92 Nadanthua kipah jing lou hileng, Genthei thoh a kathiden ding ahitai! 93 Neihinsona ahijeh-in Nathuhil ho nahsahmo hih hel’inge! 94 Nanga kahi, neihuhhingin! Nathupehho nit tei kagoi! 95 Migilouten thadin eichang jingun, Kenvang nadanthu kagel jinge! 96 Thil jousen kikhonna anei cheh-in, Nang thupeh vang chamkimsoh ahi!

Pakai Danthu ngailut

97 Pakai nadanthu kadei lheh jengin, kagel nilhum lhum’e! 98 Nathupeh kachin jing jeh-in Kamelmate sangin eichihsah tai! 99 Nahilna kachin jing jeh-in Eihil ho sangin kahethemjoi! 100 Nathupehho kanit jeh-in Upate sangin jong kachingjoi! 101 Nasei kanit nom jeh-in Chon gitlou khatcha kabolpoi! 102 Eihilpa Nangtah nahijeh-in Nahilna nahsah mon kabolpoi! 103 Namihil angei behseh-in, Khoiju sanga lhumjon kabol’e! 104 Nadanthu chihnan kaneiyin< Chonphat lou kahoi!

Pakai Danthua khovah

105 Nathu hi kakalsena thei thaomei ahin, Kalampi salvah a pang ahi! 106 Nahilna dihtah ho nitna dia Giltah a kakitepna molsonge! 107 Kathoh lel behseh tai Pakai! Natepsa bangin neicho hingin! 108 Thangvah a kataon asangin O Pakai! Nathupehho neihil’in! 109 Thi ngam a pang jing kahin, Nadanthu kasumil poi! 110 Migilouten thang eikampeh nan, Nathupehho kanitda deh poi! 111 Nathupeh chengse katonsot gou ahin, Kalungthima kakipana ahi! 112 Kathi ni geiya Nachondan ho jui din ka-umtai!

Pakai Danthua hoidohna

113 Lung tho neiho kahon, Nadanthu kadei lheh jenge! 114 Eipanpea eihoidam nahin, Nathutep kakineppi! 115 Chedoh-un michonsete, Ka-Pathen thupeh chengse ni tnange! 116 Hinso dia neitepna bangin tha neipen, Kakinepna subei loujenin! 117 Neituh le chun hing jouving ting, Nathupeh chengse khohsah jing nange! 118 Nadanthu nit lou ho napamsen, Jouva athilgonu pannabei ahi! 119 Leiset migiloute iman nasimpon, Kenvang namihilna hi kadeipen’e! 120 Nang gin nan kakithing thingin, Nathutan ho pi kakichai!

Pakai Danthu nit

121 Adih le apha kabolnai, Kamelmate kachepna din neidalha hih-in! 122 Nalhachapa neipanpi din seiyin, Pathen heloute neibolgimsah dan! 123 Huhdoh dia nathutep ngah a Namihuhhing kavet vetnan kamit akhamtai! 124 Neilungset jing jengin, Nathupehho neihil jingin! 125 Nalhacha kahi, namihilna ho kahet theina din, Hetkhen themna neipen! 126 Pakai, migilouten nadanthu apalkehtai! Phoh-in lang sutang loiyin! 127 Sana thengsel le hoitah sangin Nathupehho kadeijoi! 128 Nahilna chengse kajuiyin, Lamdih lou jouse kahoi!

Pakai Danthu nitnomna

129 Namihilna ho akidang lheh-e, Kalungthim pumpin kajuiye! 130 Namihilna hilchet hikhovah tobang, Khopolou chihsah jeng thei ahi! 131 Nathupehho deichan Kakahel hol jenge! 132 Na-ngailute nabolna bangin, Hung kiheiyin neihepin! 133 Natepsa bangin neilhuhsah dan, Thilse neijosah hih-in! 134 Nathupehho kanit theina din Eibolsetea konin neihuhdoh-in! 135 Namaivah-in neisalvah jingin, Nadanthu ho neihil jingin! 136 Mihon nadanthu anit loujeh-un Ka-lhi twilonin alonge!

Pakai Danthu dih dan

137 O Pakai Nangma nadidh-in, Nadanthu akitah cheh-e! 138 Dan nasemsa ho hi Achamkimin, adih-in aphai! 139 Kamelmaten nathupehho anahsah loujeh-in, Kalung hang behseh jenge! 140 Nathutep thon mo ahin, Kadei lheh jenge! 141 koi isah loule ima kahi lou vangin, Namihilna ho kadonda poi! 142 Itih a dih jing nahin, Nadanthu jong adih jinge! 143 Lung gim genthei kathoh nan Nathupehhon eikipasah jie! 144 Namihilna ho adih jinge, Kahin theina din hetkhen themna neipen!

Huhdoh dia Taona

145 Lungthim pumpin nahenga kataove, Neihouvin Pakai, nathupehho nit nange! 146 Nahenga kataove, neihuhhingin Nadanthuho nit nange! 147 Niso man neipanpi din kataovin, Nathutep kakineppi! 148 Namihilna ho kagel gel nan Jan khovah-in mitsing mon ka-um’e! 149 Guitan mon neilungset’in, neihouvin O Pakai! Neihepin, neihoidam sel’in! 150 Nadanthu nit lou, Giloutah a eibolsete ahung naiye! 151 Hinla kakoma naum jing nan, Nathupehho kilonglou ahi Pakai! 152 Masangin jong namihilna ho kasimtan, Tonsot’a um jin gdia nasei ahi!

Panpi ngehna

153 Kathohna ven neihuhhingin Pakai! Nadanthu kasumil khapoi! 154 Neipanhun chamlhat neimusah-in, Natepsa banginneihuhhingin! 155 Nadanthuho nit lou, Migiloute huhhingin umponte! 156 Neilainatpina alen’e Pakai! Neihepin, neihuhhingin! 157 Mibolse melma kahao lheh nan, Nadanthuho kanitdapoi! 158 Nathupehho la nit lou Mi lhemchavai ho kamuteng kalung ana behseh-e! 159 Namihilna ho kadeidan vetan Pakai! Milungset jing nahi neihuhhingin! 160 Nadanthu migil chu atah ahin, Dihtah a thu natanho ho tonsot’a ding ahi!

Pakai Danthua kiphal theng

161 Mi huseten alam louvin eidel khum jongle Nadanthu kaging jingnai! 162 Goukhol mudoh pa kipa bangin Nathutep ho kakipapi lheh-e! 163 Jouthu pou pou kalohsoh-in kahoi, Nasanthu vang kadei lheh-e! 164 Nathutan ho dih jal’in Niseh-in sagi vei vei kathangvah jinge! 165 Nadanthu ngailute lung mongin aumun, Akipal lhuhna diu imacha aumpoi! 166 Eihuhhing din ka-ngah-in Nasei sei kabol’e Pakai! 167 Nasei jouse kanit’in, Kalungthim pumpin kadei lheh-e! 168 Nathupehho le nahilna ho kajuiyin, Kabol katoh chan neimui!

Panpi ngaicha Taona

169 Panpina kathum’e ngaiyin Pakai! Neiteppeh bangin hetkhen themna neipen! 170 Kataona ngaiyin lang, Nathutep bangin neihuhhingin! 171 Nadanthu neihil jeh a Kavahchoi jing ding nahi! 172 Nathupehho adih jeh-in Nadanthu lachoiyinge! 173 Nathupehho kajui jinge, Eipanpi din kigo jingin! 174 O Pakai neipanpia neihuhhing ding ka-ngaiye! Nadanthua kipah thanom kahi! 175 Nang kavahchoina din neicho hingin! Neihilna hon eikithopiu hen! 176 Kelngoi vah mang banga kava mang vangin, Nadanthuho kasumilpoi, nalhacha keima neiholdoh-in!

Labu 120

Panpi ngaicha Taona

1 Gim hesoh teng Pakai kakouvin, Aman eihoutai! 2 Mijoute le lhemchavaitea konin Neihuhhingin Pakai! 3 Mijouho, Pathenin inalo diu? Itobanga nabolgim diu ham? 4 Galkappa thalcahng hemtah le Longlaobal meiya kito-am leng lung ducha nahiuvam? 5 Nalah-uva chen hi Meshech a chen le Kedar mite lah a chen nommo bep ahi! 6 Cham deimote lah a kacheng sot behseh tai! 7 Chamna thu kisei teng Gal asohji tauve!

Labu 121

Eihoidamuvah Pakai

1 Molsang dunga kona Eipanpi hung dia kagaldot ding ham? 2 Van le leiset Sempa pakaiya kona Eipanpi hung ding ahibouve! 3 Nachingpan nave jing nai, Nakipal lhuhsah ponte! 4 Israel chingpa chu Kisep lhun akijamden ngaipoi! 5 Pakaiyin na-ngah jingin, Nahuh din najet’a adding jinge! 6 Sun teng nisan sang ponnatin, Jan teng lhavah-in sal pinnate! 7 Pakaiyin thilse jousea daldoh intin, Nahoidam jing nante! 8 Tua pat tonsont geiyin Pakaiyin Navaikon navailhunin ching jing hen!

Labu 122

Jerusalem choi-atna

1 “Pakai Houin a cheute” atiu chun Kakipah lheh jenge! 2 Tun Jerusalem kulpi sunga Kadingsoh tauve! 3 Hoitah le kitoh chet’a kisem Jerusalem khopi! 4 Athupeh ddungjuiya Pakai thangvah dia Israel phung namkim kijot touna! 5 Israel lengte ahungun, Mipi thutan din atoutauve! 6 Jerusalem cham lenna din taovin; “Nakhohsah mite khangtou hen; 7 Nakhosung cham leng hen, Naleng inpi dunga lung mon um hen,” tiuvin! 8 Ka-inkote le kagolte khohsah jal’in, Jerusalem jah-a “Nasunga cham leng hen,” kati. 9 Pakai i-Pathenu Houin khohsah jal’in Naphatna din katao jinge!

Labu 123

Hepi ngaicha taona

1 O Pakai, van a nalaltouna lam Dah-in kahinvei! 2 Sohpan apu aki-ngainaa Sohnun api aki-ngaina bangin, O Pakai ka-Pathenu, neihepi masang seuvin Naheng lam jeng kaveuve! 3 Neihepiuvin O Pakai, neihepiuvin! Hitobang hin min eihot bol’ui! 4 Mihaote eihouse se jengun, Kiletsah gilouten eihou thanguve!

Labu 124

Amite hoidama Pathen

1 Pathenin eipanpi dau hileh I-atiding nahet’um Israel? 2 “Pathenin eipanpi dau hivangleh Melmaten eidel khumu chun, 3 Eilunghanjeh-uva Eibahgam hel theiyu ahi; 4 Twipin eichup’uva Twisoh chun eilhoh manghel theiyu ahi. 5 Lhanghoh ongje jun Eichupsoh hel diu ahi,” tiuvin! 6 Melmate eisuhmang sah dau Pakai chu thangvah jingute! 7 Vacha thangkol’a toldoh bangin Eiho jong i-toldoh tauvin; Thangkol akibottoan tan, I-ongdoh tauve! 8 Van le leiset Sempa Pakaiyin eipanpiuve!

Labu 125

Pathen mite lungmonna

1 Pakaiya ki-ngai jingte chu Zion molsang bangin suh linghoi hiponte! 2 Jerusalem khopi molsangin akol khum bangin, tu le tonsot’in Pakaiyin amite aumchan jinge! 3 Migilouvin midih gamsunga Vai ahom louhel ding; Ahomuleh midih chun Thilse abol lo diu ahi! 4 Pakai, nathupeh nit jing miphate Phatbol jingin! 5 Migilou talen napeh teng Nadanthu dondate jong talen pen! Israel lah a cham leng hen!

Labu 126

Huhdohna dia Taona

1 Pakaiyin Jerusalem eihin lhut kit phat’un Mang lheh lheh ahibouve! 2 Kambem bemin kanuiyun Kipa la kasauve; Chuin namdangten, “Pakaiyin thil loupitah abolpeh tauve,” atiuve! 3 Pakaiyin thil loupitah eibolpeh nauve, Iti kipa um hitam! 4 Luidung kangsa twi dimkit bangin, Kagam lamuva neipui kit tauvin Pakai! 5 Mit lhi puma muchi tuten Kipah tahnomin aga kilo’u hen! 6 Kap puma muchi tua vaikon chu Lhoga pon kipa la san hung kile hen!

Labu 127

Pathen phatna vahchoi

1 Insaa Pakai apan louleh Insa hon pannabeiya asah-u ahin, Pakaiyin kho a-nga louleh Kho-ngah ho mohseh a janhah ahiuve! 2 jingpi tah a nathouva Jan khangkima nalup’uva Hitobanga na nahatoh-u hi Pannabei ahibouve! Ajeh chu Pakaiyin aphatcha Amite acholdohdah nom ahi! 3 Chate hi Pakai thilpeh ahin, Pakaiyin vang abohna ahi! 4 Khangdong laiya pasal’in chapate aneihi Gal-hangpa thalvhang ho tobang ahi! 5 Thalchang banga chapa tampi neipa anun nom’e, Thupi phunga melmate akidintepi teng lel pote!

Labu 128

Pakai thua nun kipaman

1 Pakai thu achon a athupeh Nit jing ho anun nom’ui! 2 Natohga nakivah teng Nahaova nom nasah ding ahi! 3 Insunga najinu lengpigui gaphatah bang ding, nachapate olive bah lha banga Na-ankong dokhang vel’a tougol diu ahi! 4 Pakai thu nitpa chu Hitobanga hi phatthei chang ding ahi. 5 Zion konin Pakaiyin phatthei naboh hen, Nahinkho lhumkeiyin Jerusalem phatna mun! 6 Nangman vang Natuson geiyin hin mun! Israel lah a cham leng hen!

Labu 129

Israel melmate douna Taona

1 Nakhangdonglaiya pat namelmaten naabolgim nau seiyin Israel! 2 “Kakhangdon laiya pat kamelmaten Engse tah-in einabolgim’un; Hinla eijoudeh pouve. 3 Katungtun ko cheh chuh-in a-at’un, Kangkuiya kikai abahsah-ui! 4 Hinla Pakai dihtah chun Kihenna kul’a konin eilhadoh tai!” tin! 5 Zion hotbol chanin Gal lel hen nungjam hen! 6 Inchunga hamhing keh, Akikhanlhit masanga gopden tobangu hen! 7 Chang-at pan amaimoa Changphal kanpan som ding aholmo bang hen! 8 Ajotpa ho khatchan jong, “Pakaiyin phatthei naboh-u hen, Pakai minin vang kaboh-ui,” tida hen!

Labu 130

Panpi ngaicha taona

1 Kokhuh sunga konin Kahin kouve Pakai! 2 Kataona ngaiyin lang O Pakai, Panpi ngaicha kakou ngaiyin! 3 Kachonsetnau melchih ding hile chun Themmo chang lou ding aumpoi! 4 Kajabol chehna diuvin Neingaidam’uvin! 5 Kinemtah-in Pakai panpi ka-ngah-in, Athu katahsan jinge! 6 Jan ngahhonkhovah nga lel sang chun Pakai ka-ngah lel joi! 7 Pakai chu lungset longlou Huhhing nom jing ahi, Tahsanin Israel Achonset chengeuva konin huhhinginte!

Labu 131

Chapang banga Pakaiya ki-ngai

1 Pakai, kiletsah kabangin, Hoitho ka-ngatai! Thil loupe tah tah jong kagelpon, Ahahsa behseh jong kadonpoi! 2 Naosen anu pheichunga atip del bangin, Lung ol-heo, lung mongin ka-umjoi! 3 Israel, tu le tonsot’in Pakaiya ki-ngai jingin!

Labu 132

Houin choi-atna

1 Pakai, David gim gantheina ho Sumil loujenin-o! 2 Vo Hatchungnung Jacob Pathen, Nahenga David kitepna chu geldoh-in Pakai! 3 “In jon lou, Jalkhun jon louvin um ing ting; 4 Choldo louleh Ihmu louhel’in um inge; 5 Hatchungnung Jacob Pathen dia Mun kamua Houin kasah peh masangsen,” anati. 6 Bethlehem a Kitepna thingkong thu kajauvin, jearim loujaova kamudoh-uve! 7 “Pakai Houin a cheutin, Alaltouna maiya chibai boh-uhite,” katiuve. 8 Kitepna thingkong to lonin, Nathahatna kihetna pumin Tonsot’a um jing din Houn sung hinjontan Pakai! 9 Nathempute chondih jing hen, Namithengten kipa othongin samu hen! 10 Nalhacha David henga nakitepme, Nalhensa leng chu pai loujenin Pakai! 11 David henga giltah-in nakitep’in, Suhmil louhel dia nakitep chun: “Nachapate khat leng kachansah ding, Naban’a hung vaihom ding ahi. 12 Nachaten Kakitepna anit’uva, Kathupeh chengse ajuiyu leh; Achateu geiya tonsot’a Nang banga leng chang diu ahi,” nati. 13 Pakaiyin Zion alhengin, Pansatna din adeiye! 14 “Hikom hi tonsot’a kapansatna ding, Hilaiya hin vai kahom nom’e. 15 Zion khopi adeichan nengtah a kapeh a, Asunga vaichate kavahva ding ahi! 16 Athempute abolchan phatthei kaboh a, Amiten kipah othonga la asah diu ahi! 17 Hikoma hi David chilhah khat lal loupe kahisah a, Kalhentum lengpa vai neina ka-umsah ding ahi. 18 Amelmate jumsong ting, Ama lenggam vang khangtouva kithang jing ding ahi,” ati.

Labu 133

Sopi cha banga kipumkhat pachatna

1 Vetan, sopi le sopi kipum khat’a Achenkhom teng Iti phat’a pha Lunglhai um hitam! 2 Lua thao mantam kinua Khamul geiya jolsuh peh, Aaron khamul’a jolsuh a Asangkhol chol ngongkol geiya longsuh tobang ahi! 3 Hermon mol’a kikhol daitwi, Zion lhang geiya hung phinlha tobang ahi! Zion khopi dia Pakaiyin phattheina, Tonsot hinna atepsa ahitai!

Labu 134

Pathen vahchoi dia temna

1 Jan khovah a Ahouin theng kinbol’a, Pakai lhachate hungun vahchoiyun! 2 Houin sunga Pakai lam sangin, Taovun vahchoiyun! 3 Zion khopia van le leiset Sempa Pakaiyin phatthei naboh hen!

Labu 135

Vahchoi La

1 Vahchoiyun Pakai! Amin vahchoiyun Pakai lhachaten! 2 Pakai i-Pathenu Houin sunga Lhacha ding jing nang hon! 3 Vahchiyun Pakai nun nem chu, Mi khoto them ahi amin vahchoila sauvin! 4 Pakaiyin Jacob akilhenin, Israelte agou din akisem’e! 5 I-Pakaiyu loupije kahen, Pathen dang jouse sangin aloupi! 6 Lei le van, Twikhanglen le asunga Pakaiyin adei dei abol jinge! 7 Leiset monga konin gose huise ahintol’in, Gose lah a keh alhahsah jin, Khohui jouse jong Akholna ina konin ahintoldohjie! 8 Egypt gamsunga chun Mihem le gancha peng masa ho athat gam’e! 9 Egypt lengpa le avaibolte talen matsah nan Thil kidang datmo tah tah anabol’e! 10 Namtin vaipi asumang jengin, Leng hattah tah ho anthah’e! 11 Amor leng Sihon, Bashan leng Og, Canaan leng jouse anathattai! 12 Hiche leng ho gam jouse hi, Amite Israelte anapei! 13 Pakai, nangbou Pathena kithang ding, Akhang khanga miten nageldoh jing inte! 14 Pakaiyin amite panpin tin, Alhachate voujang natpinte! 15 Namdangte pathen ho sana dangka kisemthu ahin, Mihem khut’a kisemthu ahibouvui! 16 Kam aneivangun apaothei pon, Mit aneivangun amuthei pouve! 17 Nakhang aneiyun kho ajapon, Haijong ahaisa theipouve! 18 Hiche ho semdoh a tahsan jouse Adoi semthuu hito bang chih cheh-u hen! 19 Israelten Pakai vahchoiyun! Pathen Themputen vahchoiyun! 20 Levite vahchoiyun, Ama chibai boh jousen vahchoi cheh-un! 21 Zion khopia Pakai vahchoiyun, Ahouin, Jerusalem a vahchoiyun! Vahchoiyun Pakai!

Labu 136

Thangvahna La

1 Thangvah-un Pakai nun nem chu, tonsot’in alungset jinge! 2 Semthu pathen jouse Pathen thangvah-un, Tonsot’in alungset’jinge! 3 Leiset pakai jouse Pakai thangvah-un, Tonsot’in alungset jinge! 4 Thil kidang bolthei Amabou ahin, Tonsot’in alungset jinge! 5 Achih nan vanmun jouse asemin, Tonsot’in alungset jinge! 6 Twipi chunga leiset ajal’in, Tonsot’in alungset jinge! 7 Ni le Lha asemin, tonsot’in alungset jinge! 8 Sunlai vaihom din Nisa asemin, Tonsot’in alungset jinge! 9 Janlai vaihom din Lha le ahsite asemin, Tonsot’in alungset jinge! 10 Egyptte cha masa jouse athat nan, Tonsot’in alungset jingnai! 11 Egypt’a konin Israelte apuidoh-in, TOnsot’in alungset jinge! 12 Aban-gol hatsanin apuipeh-in, Tonsot’in alungset jinge! 13 Twilensan dung avotanin, Tonsot’in alungset jinge! 14 Twi lailunga amite apui galkaiyin, Tonsot’in alungset jinge! 15 Egypt lengpa le asepaite twi achupsahnan, Tonsot’in alungset jingnai! 16 Nelgama amite apui galkaiyin, Tonsot’in alungset jinge! 17 Leng hattah ho athat nan, Tonsot’in alungset jingnai! 18 Leng minthangtah tah atha vangin Tonsot’in alungset jingnai! 19 Amorte leng Sihon atha vangin Tonsot’in alungset jingnai! 20 Bashan leng Og atha vangin Tonsot’in alungset jingnai! 21 Hiche leng ho gam amite apeh vangin Tonsot’in alungset jingnai! 22 Lengho hi alhacha Israel apehdoh vangin Tonsot’in alungset jingnai! 23 Gal i-let tengu eisumil deh pouvin, Tonsot’in eilungset’ui! 24 I-melmateuva konin eilhadoh-un, Tonsot’in eilungset jingui! 25 Ganhing jouse neh ding apen, Tonsot’in alungset jinge! 26 Thangvah-un Van Pathen! Tonsot’in alungset jinge!

Labu 137

Babylon a sohchangte lunghemna

1 Zion khopi kageldoh phat’un, Babylon luipanga touvin kakaptauve! 2 Huisum phung dunga Kasemjangu kakhaiyui! 3 Soh a eihenteuvin lasan eisol’un, Nopsahna anei diu, “Zion la neisahpeh-un,” Tin eisol’uve! 4 Namdangte gamsunga Pakai vahchoila iti kasah diu ham? 5 Vo Jerusalem, Nang kasuhmil leh Khutngoiyin semjang saimon umtange! 6 Kakipa chungnungpenna kagel louva Nang kasuhmil khah leh, Hinkhoa lasa mon um jeng tange! 7 Vo Pakai, Jerusalem kilah nia Edom mite thilbol chu geldoh-in! “Phe lhasoh hel’uvn,” Atiu chu geldoh jingin! 8 Vo Babylon, nakisumangtei ding ahi! Neibolnau to kithuh a nabol chu nun nom hen! 9 Nachasen jouse geiya chomkhoma, songpia jepgoi jeng chu nun nom hen!

Labu 138

Thangvah a Taona

1 O Pakai kalungthim pumpin kathangvah-in, Semthu pathente maiya navahchoi la kasai! 2 Nahouin theng lamngan bohkhup ing, Nalungset long lou le nakitahna jal, Nathupeh gilje leh nathaneije namusah jal’in, Namin kavahchoiye! 3 Kakou nin neihouvin, katha nakidosah tai! 4 Vo Pakai leiset lengthen nathutep ho ajatauve, Nangma vahchoi tauvinte! 5 Nabol chengse le naloupi kidanje La asah diu ahi! 6 Lal loupitah nahivangin Lhasamte kho naton, kiletsahte nakoma akisel theipoi! 7 Gim hesohna kadimset vangin, Neihoidam jingin; Kamelmate lunghan nadoudal’in, Naban thahat’in neihuhhingtai! 8 Natepsa aboncha nabolsoh ding ahi O Pakai tonsot’in nalungset toh ban chu Suchamkimsoh teiyin!

Labu 139

Hesoh musoh mikhohsah Pathen

1 O Pakai neikholchil’in Neihesoh tai! 2 Kabol katoh jouse nahen, Gamla tah a konin kagel nahenkhen theiye! 3 Chatloh in gcholdo jong leng namun, Kabolchan nahesoh keiye! 4 Kapaodoh masang leh Kasei ding nahesohji tai! 5 Nei-umkimsoh keiyin, Nathahat’in neihoidam’e! 6 Neihegil behseh jengin, Kagelphah hoidan ahipoi! 7 Nakoma kona iti kajamdoh a, Na-angsunga iti kajam mang ding ham? 8 Vanna kaldoh jong leng umin natin, Noimigama kumlha jong leng umin nate! 9 Niso kalpeh a leng mang ing, Nilhum kalpeh acheng jong leng; 10 Chukoma neilamkaiya, Chumun jenga jong neipanpi ding ahi! 11 “Mun neithim khum jengin, Kavel’a khovah thimtan,” tijong leng; 12 Nang din muthim jong ajingpon, Jan jong sunlai bep ahi; Nang din jin le vah akibange! 13 Kahalsi sia neisemsoh keiya, Kanu oisunga neijopmatsoh ahibouve! 14 Ginpen ding nahijal’in, kavahchoiye! Nabolchan kidanje le datmo umkalunggil’in kahei! 15 Kagu kachang kisemdoh chun, Kanu oisunga kitup keiyin eikijopmat’in; Het thei louva kahung khandoh chun, naobua ka-um nahejinge! 16 Kapen lhah masangin neimutan, Kahinpat man kahin nikho jat najihdoh tai! 17 Vo Pathen nageldoh het hahsa kasai, Ijat mong nagel hitam! 18 Simjou mong jong leng neldi sangin tamjon tin, Kakhahlo geiyin jong kakoma na-um jinge! 19 Vo Pathen migiloute nathadoh ding kadeiyin, Pum hat miten eidonda theileh kati! 20 Naseise seuvin, Namin soudal nan thilse jeng aseiyui! 21 Vo Pakai nang hotbolte kahon, Nadoumah bolte kakidah lheh jenge! 22 Hot’a tin kahon, kamelma bang banga kagel ahi! 23 Vo Pathen, neikholchil’in kalungthim hen; Neipatep’in kagel jouse mudoh-in! 24 Kalunga agilou aumleh holdoh-in, Tonsot lampia neipuiyin!

Labu 140

Hoidam ngaicha Toana

1 OPakai migiloutea konin neihuhdoh-in! pumhattea konin neihoidanin! 2 Thilse abol bol jengun, Kiboina jeng asodoh-ui! 3 Aleiguiyu gul gunei lei abangin, Athuseiyu gulse gu abange! 4 O Pakai migilouten thang eikampeh-un, Eisumang gotea konin neihoidamin! 5 Kiletsahten thang eikampeh-un, Ka-ona din lenpel eisonpeh-ui! Lam dung lhungin thang eikampeh-uvin ahi! 6 Pakai koma, “ka-Pathen nahi,” kati. Ngaiyin panpi kathum’e Pakai! 7 Pakai ka-Pathen, eipanpi huneitah, Galpi ninneihoidamtai! 8 Migiloute deichat peh dan Pakai! Thilse agonu jong lolhinsah dan! 9 Kamelmate kasangin hatsah dan, Eigihsalna jouseu achunguvah chuhsah-in! 10 Achunguva mei-am kisunkhum hen, Khuhsunga lhalut’uhen potdoh mohel’u hen! 11 Jouva mihehsete lolhing lel jing hen, Pumhatte thilsen lhunkhum hen sumang hen! 12 Pakai vaichate napanhu a, Tahlelte dihna napanpi kahei! 13 Midihten navahahoitei diu, Na-angsunga pansa diu ahi!

Labu 141

Nilhah aTaona

1 Nahenga kataove neipanpin Pakai! Ngaiyin kakouteng! 2 Kataona gamnamtui bangin sangin, Khut’a kasan hin nilhah kilhaina bangin gel’in! 3 Pakai kamdal neikoipeh-in, Kakam simbingin paosah dan! 4 Thildih lou boldana le Migiloute kiloipidanna lung neipen! Migiloute golvahna a Pangkit hih hel’inge! 5 Miphan eikhoto jal’a eiphoa talen eipeh thei, Migilou phat lhemna vang iding katipoi. Athilse bol jouseu dounaa Tao jing jeng kahibouve! 6 Avaibolteu themmo akichansah teng, Kasei kitahdol miten hedoh tauvinte! 7 Thingtum ki-eh keh a ahal hal’a lenglha bangin, Lhankhuh dunga agu achangu thang ding ahi! 8 Kenvang Nangbou kakisonpi Pakai ka-Pathen! Kiselnan kaneiye neithisah dan! 9 Athanguva nei-osah dan, Thilse bolte thangkol’a neisut lhan! 10 Keima kitoldoh ing ting, Migiloute athangkam’uvah oh-u hen!

Labu 142

Panpi ngaicha Taona

1 Pakaiya panpi kathumin, Ahenga kataove! 2 Ahenga kakiphinin Kagimna chengse kaseikhum’e! 3 Kalhah dah teng jongle Pakaiyin kakiheina ding ahen; Kachena lampia chun Kamelmaten thang eikam khum’ui! 4 Kakiheile le vangin Eipanpi ding kamupoi; Eihoidam ding aumpon, Eikhohsah jong aumpoi! 5 Neipanpin a-Pakai! Eihoidampa Nang nahi Pakai! Kahillai damsungin Nangbou ka-ngaichai! 6 Alha lhoppai ding kahi, Ngaiyin panpi kathum’e! Kamelmate ahatval’ui, Neihuhhingin! 7 Kagimnaa konin ol neipen; Kadia naphat jal’in Namite khoppia navahchoiyinge!

Labu 143

Panpi ngaicha Taona

1 Kataona ngaiyin Pakai! Nadihna jal’in kathum neigelpeh-in! Kitah tah nahi neihouvin! 2 Neipatep loujenin nalhacha! Namit mua themchangjou aumpoi! 3 Kamelman eidel’in Toljepnan eineitai! Songkul thim sunga eikhumin, Thilong damsa kabange! 4 Kalel behseh-in lhasam pai ding kahi! 5 Ni masa lao kageldoh-in, Nabolsa natohsa chengse ka-ngaitoi! 6 Gotwi ngai leiset pohkhi bangin Nang ngaichan kasangin kataove! 7 Kakinemlal tai, Tun neihouvin Pakai! Thia mithigam jon ding kahitai, Don louvin neikoidan! 8 Kaki-ngaina nahi, Jingseh le nalungset longlou neihetsah-in! Kataona naheng alhung jinge, Neihil’in hoilam kajot ding! 9 Neihoidam din kahinbel’e Pakai, Kamelmatea koninneihuhdoh loiyin! 10 Ka-Pathen nahi, Nadeilam bolje neihil’in! Nalhagao nun nemtah chun HOidohna lampia neipuiyin! 11 Natepsa bangin neihuhdoh—in Pakai, Nadih jal’in kagimna jousea neihuhhingin! 12 Neingailut jal’in kamelmate that’in, Nalhacha kahi eidoubolte sumangin!

Labu 144

Galjo jeh a lengpan Pathen athangvah

1 Eihoidama Pakai vahchoiyun! Galbolje eihil’in galkon din eigonge! 2 Eipanpia eihoidampu, Kakiselna le huhhing, Hoidamna dia kaki-ngaina ahi! Namtin vaipi eisotkunpeh tai! 3 Pakai, mihem ipi hiya hibanga nagelkhoh, Mihem chapa mai mai jong hibanga nakhohsah? 4 Mihem hi haikhatseh bang hing, Ahin nikho jong nilim kihei mang bep ahi! 5 Pakai vanthamjol loikunin hung kumlhan, Molsang ho thamle chun meikhun len gmangunte! 6 Keh kisesah-in namelmate nocheh-in! Nathalchang kap’in deljamin! 7 Chunga konin twithuh lah a neiloidoh-in, Namdangte ban thahat’a neichu lhan! 8 Amahon thudih la aseipouvin, Akihahselnau jong aseilepji tauve! 9 Vo Pathen kipa lathah sang ting, Semjang saiyin nahenga la sange! 10 Lengte gal najosah jin, Nalhacha David nahuhdoh-e! 11 Kamelma engsetea konin neihuhdoh-in, Namdangte ban thahat’a konin neihuhdoh-in! Amahon thudih la aseipouvin, Akihahsaelnau jong aseilepji tauve! 12 Kachateu gollhang ho Thingtoi dong khanpha bangu hen! Kachateu nu-ngah ho Leng inpi jepna khompah bangu hen! 13 Kachangpangu chang chichom chom dim hen! Kaloujaovuva kelngoiten nou snagsom cheng hingu hen! 14 Bongpite nou pengsol le athol lha beiyin Neng jeng jungin pungu hen! Kakholai dunguva Ka le mao ogin kija hih beh hen! 15 Hitobang vangphat chang Nam mi chu nun nom hen! A-Pathenu Pakai hikha Nam mi chu nun nom hen!

Labu 145

Vahchoina La

1 Nachoi-an inge ka-Pathen, kelengpa! Tonsot’in thangvah jing tange! 2 Niseh le thangvah ing ting, Tonsot’in vahchoi jing tange! 3 Pakai loupipen, loupitah a vahchoi lom ahi! Aloupije kholsoh dan ahipoi! 4 Nathilbolsa akhang khangin vahchoi ding, Nathilbol loupije phongjal’unte! 5 Mihon nalal loupije seiyun tin, Keiman thil kidang nabolsagel jing inge! 6 Mihon nathilbol natsatje seiyuntin, Keiman naloupije phongjal inge! 7 Naphatna jouse seiyun tin, Namikhotoje lan sauvinte! 8 Milungset khoto them Pakai, Lungset thingset lung hangvah lou! 9 Mitin dia phasoh, Asemsa jouse lainatpi cheh! 10 Nasemsaten vahchoiyune Pakai! Namiten thangvah-un nate! 11 Nalal loupe thaneije seiyuntin, Nathahat seichoi leuvinte! 12 Chuteng mitinin nathilbol natsatje, Nalenggam lal loupe seichoi leuvinte! 13 Tonsot’a vaihom jing, Tonsot len gloupi nahi! Pakai-atepsa jousea akitah jingin, Abol jouse aphasoh keiye! 14 Gim genthei thohte apanpin, Alhute akaidinge! 15 Ganhing jousen kinemtah-in naveuvin, Aduchat jouse nape jinge! 16 Bulhingin nape jingin, Gilkel jouse navahva cheh-e! 17 Pakai hi abolchan a adih-in, Atoh chan a mi ahepi! 18 Pakai chu akoma lungthengsel’a Taote henga anai jinge! 19 Ajabolte ngaichat chan apen, Ataonai ngaiyin ahuhhingjie! 20 Ama ngailu chan ahoidamsel’in, Migiloute vang sumanginte! 21 Pakai vahchoi jing inge; Asemsaten amintheng vahchoi cheh-un!

Labu 146

Huhhinga Pathen vahchoina

1 Vahchoiyun Pakai! Kalhan Pakai vahchoiyin! 2 Kahinlaisen vahchoiying ting, Kahinkhon ka-Pathen vahchoi la sange! 3 Lengle lalte kisonpi dan, Mihemin huhhing joupon nate! 4 Mihemte athi teng vut asoh jin, Athilgon jouseu athi ni hin abeitai! 5 Jacob Pathen panpi chu anun nomin, Jacob Pakai Pathena ki-ngai chu anun nom’e! 6 Aman van le leiset, Twikhanglen le Asunga um jouse asemin; Atepsa jouse abulhit jinge! 7 Bol hesohte khotonan thu atanin, Gilkelte neh ding an apei! Sohchangte Pakaiyin alhadoh-in; 8 Mitcho kho amusah-e! Alhute akai dingin, midihte angailui! 9 Igamsunguva cheng gamchom mi ahoidamin, Meithai chaga akhoton, migiloute thilgonho asumange! 10 Pakai chu tonsot leng ahin, Vo Zion, na-Pathenintonsot din lengvai apoi! Vahchoiyun Pakai!

Labu 147

Hatchungnung Pathen vahchoina

1 Vahchoiyun Pakai! I-Pathenu vahchoi la sah thilpha ahin, Avahchoi hi thildih, lung nachimna ahi! 2 Pakaiyin Jerusalem asemphan, Sohchang bulpute ahinlepuitai! 3 Lung kisihte adamsah-in, Amahau atomjolpeh tai! 4 Ahsi jat asimtoh-in, Amin cheh-in akouve! 5 Loupitah a thanei i-Pakaiyu ahin, Achihna tejou ahipoi! 6 Mi nun nen ho achoisangin, Migiloute tolgoi nan aneiye! 7 Pakai vahchoina la asauvin, I-Pathen diuvin tumging thei semjang saiyun! 8 Vanthamjol’a mei ajamsah-in, Gotwiyin leiset achap nouve! Mol le lhanga hamhing apousah-e! 9 Gancha hing jouse neh ding apen, Va-ah nouten an athum teng Avahva soh keiye! 10 Sakol hattah ho akipapi pon, Sepai hangtah jong along lhaipi poi! 11 Alungset longlouva ki-ngaiya, Ama jabolte chunga bou akipah-e! 12 Vo Jerusalem Pakai vahchoiyin! Vo Zion, na-Pathen vahchoiyin! 13 Nakulpi kotgol alhousah-in, Namite phatthei aboh jinge! 14 Nagamgi jouse ahongbit’in, Suhlou chang tuipenin navah-e! 15 Leiset’a thupeh aneiteng, Aseibangin akitongdoh jenge! 16 Buhbang ponphan aphan, Daibang vutvai kithejal abahsah-e! 17 Gel songchang kisunglha abahsah-in, Adapsah teng koima thoh jouhoi ahippoi! 18 Chuteng agahsei leh gel ajun lhan, hui anunsah le twiyin alonge! 19 Amite thu aseipeh-in, Danthu le ahilchahna Israelte Amahon jong Adanthu ahepouve! Vahchoiyun Pakai!

Labu 148

Pakai vahchoi dia vannoi temna

1 VahchoiyunPakai! Van miten Pakai vahchoiyun, Chunga chengten vahchoiyun! 2 Vanmi janel, Avantil jousen Vahchoiyun Pakai! 3 Ni le lhan vahchoiyun, Ahsi vahtah tahhon vahchoiyun! 4 Van chungnung penin jong vahchoiyin, Van vuma twipin jong vahchoiyin! 5 Abonchauvin Pakai min vahchoi cheh-u hen! Ama thusah a kisem jeng ahiuve! 6 Pakai thusah a tonsot’a dia amun cheh akigol, Apalkeh lou diu gamgi kisempeh ahiuve! 7 Leiset’a konin vahchoiyun Pakai! Lithuh lai jousea ngapi len lai jousen; 8 Kolphe le gellen, buhbang le meilhang ho, Athupeh a nung huise jousen vahchoiyun! 9 Molle lhang sang jouse, Gammang thing gathei jousen vahchoiyun! 10 Vahngoisa le gamlah sanamkim, Tol a vah le chunga leng jousen vahchoiyun! 11 Mipite le leng jouse, Leng le lal, vaibol jousen; 12 Nu-ngah gollhang, The le khang jousen vahchoiyun! 13 Abonchan Pakai min vahchoi cheh-u hen! Amin loupipenin, aloupinan van le leiset akhokheltai! 14 Adeitah amite Israel ahatsah jal’in, Abonchan Pakai avahchoitauve! Vahchoiyun Pakai!

Labu 149

Vahchoina La

1 vahchoiyun Pakai! Pakai vahchoina lathah sauvin, Tahsan nei amite khoppi sunga vahchoiyun! 2 Nasempa chunga kipah-in Israel! Nalengpa chunga kipah-un Zion mite! 3 Lamin amin vahchoiyun! Avahchoi nan khong bengun semjang saiyuvin! 4 Pakai amite chunga akipah-in, Mi nun nemte choi-atnan gal ajosah tai! 5 Gal ajoteng Pathen mite kipah hen, Jan khovah-in kipa la sau hen! 6 Chemjam hemtah choiyin, Othongin Pathen vahchoiyu hen! 7 Namtin jousoh a Mitin talen matsah din; 8 Alengtau somkonsoh a, Alamkai jouseu thih khaova hen din; 9 Pathen thusah a namtin talen matsah dingin! Hiche hi Pathen mite galjona ahi! Vahchoiyun Pakai!

Labu 150

Vahchoiyun Pakai

1 Vahchoiyun Pakai! Ahouin a Pathen vahchoiyun! Van a jong ahatna vahchoiyun! 2 Athilbol minthang ho jeh-in vahchoiyun! Aloupina seithei loujal’in vahchoiyun! 3 Sumkon gin to thon vahchoiyun! Theile mut le selangdah saiyin vahchoiyun! 4 Khong beh le lam to thon vahchoiyun, Semjang sai le kuli gin to thon vahchoiyun! 5 Khutbengun vahchoiyun! Hamlah lah-in khut bengin vahchoiyun! 6 Ganhing namkimin Pakai vahchoiyun! Vahchoiyun Pakai!

Proverbs 1

Proverbs 2

Proverbs 3

Proverbs 4

Proverbs 5

Proverbs 6

Proverbs 7

Proverbs 8

Proverbs 9

Proverbs 10

Proverbs 11

Proverbs 12

Proverbs 13

Proverbs 14

Proverbs 15

Proverbs 16

Proverbs 17

Proverbs 18

Proverbs 19

Proverbs 20

Proverbs 21

Proverbs 22

Proverbs 23

Proverbs 24

Proverbs 25

Proverbs 26

Proverbs 27

Proverbs 28

Proverbs 29

Proverbs 30

Proverbs 31

Thuhilpa 1

Hinkho pannabei

1 Jerusalem khopia leng chang, David chapa, michingthempa thusei ho chu hicheng hi ahi. 2 Michingthempan thil ijakai hi pannabei jengin aseiye. Hinkho jong pannabei, ijakai hi pannabei ahi. 3 Hinkhon cholle nangin na natongun, ahivangin ipi phatchomna vetsah ding naneiyum? 4 Mihem khang akichaiyin khang chom chom ahungin, leiset la baep’in aum jinge. 5 Nisa la asona ngaiya asoh jingin, alhumna ngaiya alhumin, chille nangin ahung kipat kitna ding mun a akile kit’in ahi. 6 Hui jong sahle lhang, simle mal, kolkimvel’a avel vel’in anung kimvel vel jenge. 7 Vadung jouse Twikhanglen la along lut’in, Twikhanglen la adim deh poi. Twi chu luidung nah dunga ahung kipanlit’in, avel’in ahung kitol kit’e. 8 Thil ijakai cholna jeng ahin, chol aum behseh jengin seijou jai ahipoi. Mit la vet achimpoi. 9 Asohsa thil chu hung soh kit ding ahi. Akibolsa thil chu kibol kit ding ahi. Vannou pumpia hin thil thah aumpoi. 10 Mihon, “ven, hikoma thil thah aum’e!” atiuve. Ahivangin hiche jong hi masang, ipen masangpeh-uva sohsa ahitai. 11 Masanglai thilsoh chu koiman ageldoh pon, tulai min jong khonung thilsoh ding le tukah a thilsoh ding geldoh ponte.

Thuhilpan tahsa ahetsa thil

12 Michingthempa kei hi Jerusalem khopia, Israel chunga, leng kana change. 13 Vannoi leiset’a kibol kitong thil jouse hi kholchil ding, phot chet din kakiteptai. Pathenin mihem abolna vang hi nopna him him ahipoi. 14 vannoi leiset’a kibol thil jouse kamun, kaseipeh nahi, aboncha pannabei jeng hai. hui leng lai mat ding go bep akihi. 15 Akonsa le sujang theipon natin, aum loula simtha theipon nate. 16 Kalungthimin, “kaminthang lheh tan, kamasanga Jerusalem a lengvaippote jouse sangin kachingjoi. Chihna le hetna jong ipi mong mong kiseina ahi kahetai,” kati. 17 Hetna le ngolna kibah lou je, chih le ngol kibah louje hetdoh kagoi. Hichea jong hin hui lenglai mat godol’in kakihei. 18 Nachih cheh le nalung gimbe cheh, nahetbe jep le nalung natbe cheh ding ahi.

Thuhilpa 2

1 Nom satah a uma, nopna hi hatchet tei kagoi. Ahinla hiche jeng jong hi pannabei ahi kamu dohtai. 2 Nui ngolna ahiya, nopsah nan thilpha aso sah lou jong kahe dohtai. 3 Kachih nom behseh jeh-in, kisuh lipna din ju kadonin nom um ding kagoi. Leiset hinkho chomcha sunga hitia umding hi mihem dia thil phapen din kanegel’e. 4 Thil loupe tah tah katongdoh tai: in tampi kakisah-in, Lengpilei tampi kakibol’e. 5 Hon le pahcha lei kabol’in, thei gathei jouse kaphut’e; 6 achap nouna ding twikul kalaiye. 7 Soh tampi kachon, ka-insunga peng den soh jong tampi kavul’e. Kamsasanga Jerusalema leng ho sangin kahaojon gancha tamjo kaneiye. 8 Kavaipohna gamsunga leng inpi thil kholna chengsea konin sana dangka kapokhomin kasevum leove. Kei nopsahna din numeiyin la asauvin, pasal deichat lom numei chamkim keiyin kaneiye. 9 Kaloupi lheh jengin, kamasanga Jerusalema cheng leng ho sangin loupin kaumdoh tan, kachihna athon ngaipoi. 10 Kadeichan kamun; nopsahna thei kalhaso ngaipoi. Katohdoh chan kahoithopin, hiche hi katohman ahimaiye. 11 Hicheng tohdohna dia hahsa kathoh chengse kagel le imacha pang din aumdoh theipoi. Pannabei hui lenglai mat go bep kahi. 12 Akhonna kheh a leng khat’in abol thei chu leng masa ho bolsa chubou ahi. Hijeh chun hcihna le chihgil chule ngolna umdol hi kagel pantai. 13 Hiche vang hi kahetai—“Chihna hi ngolna sangin aphajon, muthim sanga khovah phatchom tobang ahi. 14 Michingin kaselna ding akihet’in, mi-ngol’in kho amupoi,” kati. Chule iboncha ithi cheh diu jong kahe dohtai. 15 Kalungin, “Mi-ngol ho banga kathitei ding ahi. Achutile hibanga kahcih hi ipi kaphat chompim?” kati. Kei le ken, “Thil imcha cha phat chompi kaneipoi,” tin kaseiye. 16 Miching geldohna jong aumppon, mi-ngol geldodhna jong aumppoi. Khonung tengle koiman eigeldoh pouvinte. Miching mi-ngol iboncha itih cheh diu ahi. 17 Hijeh hin mihem hinkho hi imacha ding katipoi, ajehc hu hinkhon gim hesoh tilou adang ima eipetheipoi. Pannabei hel ahin, hui lenglai man go bep kanahi. 18 Katohsa le kabolsa chengse phatchom nan kaneipon, kakhel’a pang dinga dia kadalhah ding kahei; 19 ama chu miching hithei, mi-ngol hithei-kon ija ahet’em? Hoijoh hile katohsa, kachihnan hiche leiset’a atohdoh chengse, aman alo ding ahi. Aboncha pannabei jeng ahibouve. 20 Hibang hahsa na katoh chu kakisih lheh jenge. 21 Nachihna le nahetna, nathepna mangcha natohdoh chengse chu atong louhel khat nadalhah peh didng ahi. Pannabei hel, thil dih lou ahi! 22 Hinkhoa lung gim hesoh a na natoh a, ipi tohman nasan ding ham? 23 Nahinlai damsunga natohdoh chengsen thil dang sodoh pontin, lung gimna le lung natna bou asodoh ding ahi. Janin jong lung ol’in naum thiepoi. Aboncha pannabei jeng ahi. 24 Mihem toh thei thilpha pen chu-atohga neh a don ding, nomsa tah aum didng hi ahi.Ahinla hiche jeng jong hi Pathen peh a kimubou ahi kahedoh tai. 25 Hiche tilou chu thil dang ipi neh a nomsa naum thei ding ham? 26 Pathenin adei bolte chu chihna, hetna chule nopna apeh ahi; chonsete vang natong sumhol’a apansah a, alodohsah a akholsah kit’a, Pathen lungtohte peh dia akoisah ahi. Aboncha hi pannabei bep, hui lenglai man dia kigo bep ahibouve.

Thuhilpa 3

Thil ijakaiyin phat anei cheh

1 Hiche vannoi leiset a thilsoh jouse hi Pathenin asosah nom phat dungjuiya soh cheh ahi. 2 Pen phat aumsah-in, thi phat aumsah-e; Thing phu phat aumin, thing bodoh phat aum’e. 3 Suhlih phat aumin, boldam phat aum’e. Sahdoh phat aumin, phet lhah phat aum’e, 4 Gim phat aumsah-in, nop phat aumsah-e; Lunghem phat aumin, lam phat aum’e. 5 Kidei phat aumin, kihotphat aum’e; Kichopto phat aumin, kichop lou phat aum’e. 6 Thil holdoh phat aumsah-in, thil mansah phat aumsah-e; Loidoh phat aumin, semang phat aum’e. 7 Bo-eh phat aumin, khuibit phat aum’e; Umthim phat aumin, paopoh phat aum’e. 8 Ki-ngai phat aumsah-in, kihot phat aumsah-e; Kisat phat aumin, kicham phat aum’e. 9 Itoh gimchengseuva kona ipi imudoh-um? 10 Pathenin pohgih hahsa eipohsah-u kahei. 11 Aman thil ijakai din phat kitoh che’tin akoiye, Khonung thu ding hetnomna eipeuvin, ahivangin athilbol lhingset’a het’a lung nachimpi ding eiphalpeh pouve. 12 Hijeh chun ihinlai damsunguva itoh thei chan toh a nopsah pi ding hi toh thei penin kahei. 13 Ibonchauva itohga neh a don ding, nopsah pi ding ahi. Hiche hi Pathen thilpeh ahi. 14 Pathen thilbol jouse beitih neilou ding kahei. Bolbe thei jong hilou, lahdoh thei jong hilou ahi. Pathen thilbol khat chu-ibonchauva Ama eiginsah got’u ahi. 15 Thilsoh ho le asoh ding ho hi asohsa ahitai. Asohsa chu Pathenin avel vel’a asosah ahibouve.

Vannoiya thudih lou

16 Achung chonin, vannoiya hin thudih kiseiya thildih bolna dinga gitlouna namudoh ding kahetai. 17 Kachangseh-in, “Thilsoh jouse le thil kibol chengse hi aphat dungjui cheh a soh ahijeh-in, Pathenin midih le migilou thu kibanga atan ding ahi,” tin kagel’e. 18 Eiho hi ganchate sanga phajo deh lou ihiu vetchetna dia Pathenin eipatep dol’un kahei. 19 Hoi hileh-mihem hihen gancha hileh thei cheh ding ahi. Khat thi banga jong thi thou ahi.Ahoi hoi hiya thilsem gel ahi. Mihem jong gancha sangin aphachom dehpoi, ajehc hu hoijoh ding ahin hinlo aumpoi. 20 Mun khat ajot lhon a, leivui sohgel ding ahi. Leivuiya kisemgel, leivui sohgel ding ahi. 21 Mihem lhagao van a akaldoh mongin, gancha lhagao lei noiya ache monge, ti kon asei thei dang ham? 22 Hijeh chun thilpha pen a kagel chu itohsa chunga lung nom a um ding hi ahi. Bol thei dang ineipouve. Ithi nung tengu ipi aso ding hetdoh theina lampi ineipouvin ahi.

Thuhilpa 4

1 Vannoi leiset’a thil dihlou kibol chengse kavei. Bolsetna thohte aka vangun koiman apanpi deh poi. Abolsetau chu thanei thu neiloi ahijeh-un koiman apanpi nagmpoi. 2 Thia mangsa ka-otchajo tai; ahing nalaiho sangin amaho chun nom asajouve. 3 Athi le ahing sanga phajo cheh kit chu-apen a peng lou, vannoiya thil dihlou kibol mukha louhel ho chu ahiuve. 4 Mihon hibanga kihanlhoten a na atoh-u jong kahe dohtai; midang tohna thangset jal’a abol’u ahi. Hijongle hiche jong hi pannabei ahibouve.Hui lenglai mat ding kigo bep ahi. 5 Amahon khut kikhoitum a an ngol’a thia chu angol’in bou aseiyui. 6 Dih khat nante, ahivnagin khut ong man louhel’a hui lenglai mat ding goa kiseimo jeng sangin, lung ol heocha themcha bou nei aphajoi. 7 Ken hinkho sunga pannabei khat jong kamudoh-e. 8 Pasal khat hi achangseh-in achenge. Cha la neipon, sopi jeng jong aneipoi; ahivangin umthim thei louvin na atongin, anei chasun along lhaipipoi. Koi ding bep ngaitoa kicholdoh man louhel’a hibanga na atoh ham? Hiche hi pannabei, hinkho hahsa tah ahibouve. 9 Khatseh sangin mi ni aphajoi, ajeh chu mi ni akitho theiye. 10 Khat joh sang lhu lhon jongle khat’in aphong ding theiye. Mi khatseh vang chu lhu ta le aphong ding aumtapoi. 11 Adap teng mi nin lumkhom alum asah thei ahin, nachangseh a iti lum nasah diu ham? 12 Mi khat nan lel chu mi nin ananjou tei ding ahi. Khao jang thum kihel lhop botan hahsa ahi. 13 Leng tehse mi-ngol, thumop sang lou hisangin, vaicha khangdodng miching hi aphajoi. 14 Hitobang gollhang chu songkul lutsa leng hung chang hijongle, vaicha chaga cha peng hijeng jongle aphajo nalaiye. 15 Vannoiya cheng mihem jouse kagel’in, hoikom ham alah-uva gollhang khat pen chu lengpa mun hilo ding umkahedoh tai. 16 Lengin vai apohna sunga hin mipi simsen lou unman tin, lengpa athi teng atohsah koiman gelpha ponte. Hiche hi pannabei, hui lenglai mat dia kigoa tobang ahi.

Thuhilpa 5

Geltoh louva kitepna sem

1 Houin kaidol ching theiyin. Kho pholou mi-ngolten abol’a kilhaina thil moh to to jeng sanga, thu ngaiya kihil them dia Houin kai aphajoi. 2 Napaodoh masangin geltoh masan, chule geltoh louvin Pathen koma kitepna bol jeng dan. Pathen van a um, nang leiset’a um bou nahin, nasei dia lombep kalval’in imacha sei hih-in. 3 Nalung gim cheh le mangse naneibe cheh thei, thu nasei tam chan a ngol-hoi thu naseidoh be thei ahi. 4 Pathen koma kitepna naneikhah le, tong doh loi jengin, Pathenin mi-ngol adeipoi, bol dia naseisa chu bol jengin. 5 Kitepsa bolda sangin, kitepna him him boldan aphajoi. 6 Naseisan kipal dan, Pathen Thempu jah a geldoh louva nabol’in seidan. Idia Pathen nakiphin lung hang ding ham? Nabolse chu i-bol’a nasuh mangsah ding ham? 7 Mangle bul ijat neiyin lang, pannabei na ijat tongin, thu ijat sei jongle chun, Pathen nagin tei tei ding ahi.

Hinkho pannabei

8 Leiset vaipoten vaichate abol hesoh a, thu dih tanpeh louva, achan diu lom apeh d anamu jongle datmo hih-in. Vaihom thunei jouse chu asanga lenjo khat cheh-in ave-lhi, alenpen jong chu alen cheh khat’in avet lhi jing ahi. 9 Lengpa jong alalna lhosoh chunga ki-ngam ahibouve. 10 Sum nadei behseh le, itih-in jong lung nachimna neipon natin; hao lung nagul le, nadei chanmusoh pon nate. Pannabei ahibouve. 11 Nahao cheh le naneh peh ding jong tambe cheh ahi. Naphat chompi pen chu nahao nahet tho chu ahibep’e. 12 Natong jing vang chun neh kham kimu hen kimu hih jongle nomsel’in a-ihmu theiyin, mihao vang chu anei lung jin pin ihmu mon akhovah jitai. 13 Vannoiya thil melse tah khat kamui; mihon khonunga nom neh dingin sum akhol khol’un, 14 ahivangin hamsetna khat jeh hamin amoh suh mang hel jiuvin, atu acha ding khen louhel’in aumlo jitauve. 15 Imacha polut louva vannoiya ihung lut bangun, pohdoh neilouvin adalhaji tauve.Tong gim lheh jong leu hen ipohdodh theiyu khat cha aumpoi. 16 Dih louhel ahi! Ihung lut banguva potdoh kit ahiuve. Itong gim’un, hui lenglai mat ding geiyin igo’uvin, ipi ikimu’vem? 17 Mitsin khojin le gim hesoh thoh-in ihingun, lung gim le lung phamo chule nat hesoh ithoh-ui. 18 Hiche hi kamudoh bep’e. Thilpha pen chu min Pathenin apeh ahinkho chom cha sunga hi atohga alhosoh ne le don a nop sahna anei hi ahi; hiche hi mihem chan ahibep’e. 19 Pathenin mihem chu haole gou pehen, nop sahnan neisah le atoh lo chu kipa pinte. Hiche hi Pathe thilpeh ahi. 20 Pathenin nomsan akoiyin, hinkho chomje chu khohsa behseh ponte.

Thuhilpa 6

1 Vannoiya hin thil dihlou kibol khat kamui. 2 Pathenin mihem khat nei le gou, jabolna, ijakai adeichan apen, ahivangin hicheng chu nop sahnan aneisah hih beh-e. APeh louhel khat’in nopsah nan aneijie.Hiche hi pannabei hel, thil dih lout ah ahi. 3 Mihem khat’in cha ja khat jen nei hen sotpi hing hen, itih chan ahin vangin nop sahna neikha louhel le phate keichan kivui hihle, apenlhah lhah a thipai jeng naosen ma aphajoi, tin kagel’e. 4 Hiche naosen chu apenlo vang umlou, mitsin khojin gam alut kit, koiman geldoh kit lou ahitai. 5 Nisa vah jong mupha lou, mihem hinkho umje jong helou ahin, kichol dona beh vang akimui. 6 Kum sangni jen hing jongle hin nopna hephalou mihem sangin aphajoi.Anigel lhon’a mun khat jon a che lhon ahi. 7 Mihemin atoh chan kamsung ding ahin, chimla achimdeh poi. 8 I-atile mi-ngol sanga miching phajo ham? Mi vaichan hinkho manje ahet them chun ipi aphat chomsah mong ham? 9 Pannabei she, hui lenglai mat go bep ahi. I-khat ngaicha jinga um sanga nanei lung lhaipi chu thil phajo ahi. 10 Thilsoh jouse hi aso masanga gontohsa ahitan, mihemin asanga hatjo akinelpi thei lou jong ihecheh-ui. 11 Nakinelpi sot chan a pha mo cheh ahin, phatchom nan naneideh poi. 12 Nisa lim banga kihei mang loi, hiche pannabei hinkho chomcha sunga hi mihemin ahinkho dia thilpha iti akihet thei ding ham? Athi nung teng leiset’a thilsoh ding kon ija ahet thei ding ham?

Thuhilpa 7

Hinkho dia lunggel

1 Min phat hi thao namtui sangin aphajon, napen nikho sangin nathi in aphajoi. 2 Golvah na in a lhah sangin lunghemna in a che aphajoi, ajeh chu mihing jousen athi ding sumil louvin aum theiye. 3 Nui sangin lungkham aphajoi; maiso hoimo sah jongle, lungthim he themna apetheijoi. 4 Nopsah ding jeng gel mihem chu a-ngol’ah ahi. Michingin thina bou agelkhoh-e. 5 Mi-ngolten navahchoi la sah sangun, naphoh ding miching nanei aphajoi. 6 Mi-ngol nuigin chu linghema belto kihet tobang ahin, ajeh apol beihel ahibouve. 7 Michingin mi alepthol teng ngolchon ahitai. Nehguh nalah teng naming phat kisuhmang nahi. 8 Thil ijakai akipatna sangin akichina aphajoi. Kiletsah sangin thoh hat aphajoi. 9 Lung han gloi hih-inl lung ul jing hi ngol thubuh bou ahi. 10 Itih-in jong, “Itia tulai sanga masanga thil phajo ham?” tin sei hih hel’in. Hiche hi chih hoi thudoh ahipoi. 11 Mihing jouse chih lom tah ahi; chihna hi gou kilamdoh tobang ahin, 12 sumin asemdoh thei banga lungmon napethei ahi. Chihnan nahoidoh sah thei ding ahi-hiche hi hetna phat chomna ahi. 13 Pathen thilbolsa gel’in.Pathenin asemkonsa chu kon ahejang thei ding ham? 14 Thil ijakai aphat thei pet le kipah-in, gim hesoh hung lhun teng, nopna le gimna Pathen a kon gel ahi geldoh-in; akit teng thilsoh ding ipi ahi nahepoi. 15 Pannabei kahinkho sung hin thil ijakai kamusoh tai; mipha thi thi jeng thei, migilou hing hing jeng thei ahi. 16 Hijeh chun phat behseh le chih behseh bol dan-idia nang le nang nakitha ding ham? 17 Engset val le ngol val jong boldan-idia naphat masanga nathi ding ham? 18 Chonval tho dan. Hougut nahile lolhing thouvin nate. 19 Vaipo som khat’in khopi khat akithopi sangin, chihna hin mi ahatsah joi. 20 Leiset’a hin bol khel neilou thildih bol jing koima aumpoi. 21 Mi sei jouse ngai hih-in, nasoh pan nahoutom na jong jadoh get’in nate. 22 Nangin jong tamtah vei midang nahoutom nakihet chu me. 23 Chihnan hicheng hi kapatep soh tai. Chih ding kago lheh nan sophan hoi ahipoi. 24 Hinkho umje dol hedoh jou ding koiham? Eiho din athuh val’in, hetdoh hahsa tah ahi. 25 Hijongle het ding gultenin sim kagon; chihna holdoh tei kagon, kahetnom cheng donbutna mudoh a, ngolna phatmo dan mong mong photchet ding kagoi. 26 Hichea hin thina sanga khohjo khat kamudoh-e. Hichu numei ahi. Numeiyin nadeichat teng thangkam kilhopel khah le khaova kihen nabah ding ahi; numeiyin nakoichah den teng thih khaova kihen bang bang hin nate. Pathen lung deiya chonpa vang jam doh nan tin, chonsepa vang oh den ding ahitai. 27 Michingthempan aseiyin, thil ijakai kakhol tohnaa kona hiche hi athem thema kamudoh ahi, tin aseiye. 28 Thildang kahol vangin khatcha jong kamudohpoi. Pasal sang khat lah a jabol theidol khat bou kamun, numei khatcha jong kamupoi. 29 Hicheng hi kasimdoh ahi; Pathenin baikhen cha eisemdoh-u ahin, eiho le eiho kisunoh den ahiuve.

Thuhilpa 8

1 Michingin bou thil ho umdol ahethem’e. Chihnan mail lhaisel’in aumsah-in, amelse aselpeh theiye.

Lengpa thun nungun

2 Lengpa sei sei bol’in, geltoh louvin Pathen koma kitepna neiloi hihin. 3 Lengpan abolnom nom abol thei ahi, hijeh chun a-angsunga konin potdoh loiyin, tijat umtah mun ahin umsot dan. 4 Thuneina neiya lengpa thil bol ahin, athilbol phoh ngam aumpoi. 5 Athupeh nanit chan a nadia pha, michingin bou itih a ipi bol ding akihet thieye. 6 Thil ijakai hi adih a bol phat umcheh ahi, eihon imacha ihepouve! 7 Thil hungsoh dingla ihepouvin, eiseipeh theiyu jong koima aumpoi. 8 Koima thilou thei aumpon, nathina ding nikho vochon thei jong aumpoi. Hiche hi ijamdoh thei lou nau galmun ahi; lepthol’in jamdoh theipoute.

Migilou le midih

9 Vannoiya thil kibol n akitong chengse kagel gelle hicheng hi kamudoh-e, vannoiya hin mihem thanei phabep noiya adangsen gim hesoh athoh-e. 10 Ahimonge, migiloute thia lhana akivui kamun, lhanphunga konin in lam jot pet’in, masanga thilse tampi abolnau khopia mihon, migilou kavuisa ho pachatna thu aseiyui. Hiche hi mohseh mong ahi. 11 Ipi dia mipin thilse amoh bol bol jeng ham? Thilse bolte talen kimatsah vah vah loujeh ahi. 12 Chonsen thilse ja khat cheng bol jongle ahing thei thei nalaiye. Hiche hon asei kahedoh tai, “Pathen thu nanit pou le ima tiponte, 13 amavang migilouvin hoidohna neiponte. Ahinkhou la nisa lim kihei bep, Pathenthu angai loujeh-uva donthi diu ahi,” atiuve. 14 Ahinla hiche hi ngol thubuh ahi. Vannoiya ipi soh tam; abang kom le midih-in migiloutalen mat ding amanin, migilouvin midih kipaman san ding asange. Hijeh chun pannabeiyin kaseiye. 15 Min nom asah ding bou dihjon kageltai; ajeh chu ahinkho lung nopna pen chu aneh a adon a nomsa um ding hi adeipen ahi. Hiche beh hi vannoiya Pathenin apeh hinkho anei laisunga abol thei ahi. 16 Kichihsah a vannoiya thilsoh hetdoh kagot chanin, sun le jan a hah khovah vah, tou nilhum thei nahi, 17 Pathen thilbol khat beh nahetdoh thei louhel ding kahedoh tai. Itobanga khohsah-in gut jongle chun mudoh jou deh pon nate. Michingten het go nauvin tin, hedeh pouvinte.

Thuhilpa 9

1 Hiche thudol hi sopi le giltah-in kagel’in, Pathenin michingte le midihte natoh thilbol jouse athu nunin, angailut nau le amihot nau geiyin athu thun ahei theiye. Mihem koiman amsanga thilsoh ding ahepoi. 2 Imacha akikhenna aumpoi. Midih le migilou, mipha l emiphalou, hougut le houbei, kilhaina thilto pe jingle pelou-kibanga thi cheh diu ahi.Mi chonse sangin mipha aphachom deh pon; kihahsel bolpa jong abol loupa sangin apha dehpoi. 3 Mi jouse kibanga thi cheh diu ahin, hiche jeng jong hi vannoiya thilsoh lah a dih lou thou thou ahi. Mihemte ahin leisen alung sungu thilse le ngolna dim, het man louva thiji ahiuve. 4 Amavang mihing gamsunga cheng chun kinepna phabep aneiteiye; uicha hin ghcu sakei thisa sangin aphachom’e. 5 Ahing’an thi ding akihet’in, athisan vang ima ahetapoi. Kipaman san ding jong anei tapouvin, koiman ageldoh tapouve. 6 Angailutnau le ahotnau, alung gul’u aboncha thi tha ahitauve. Hiche vannoiya thilsoh lah a pang kit louhel ding ahitauve. 7 Chen kipah thanomin an kineh-in;lengpitwi kidonin lang kisuhal’in. Pathen din aphanai. 8 Halpel’in thanom jing jengin. 9 Vannoiya Pathenin pannabei hinkho naneisah sungsen nadeitah naji to nomsa lhonin. Pannabei nikho ho hi nomsan mangin, hibou chu nacholman ahibep’e. 10 Natoh chan thakhen louhel’in tongin, ajeh chu nachena ding noimigama chun toh dingle lunggel, hetna le chihna jong abeitai. 11 Kahetdoh kit thil khat chu-vannoiya hin lhai hatpa jengin jong kilhai tet ajoudeh pon, gal-hangpan jong gal ajo jing ahideh poi. Michingin neh le chah akimuchom a, lungthim chingin haona anei chom a, atongthempan tohmun sang alo chom deh ahipoi. Mitinin toset atoh cheh theiye. 12 Itih a i-nati ding phat nakihetpoi. Hetman louva vacha thang-oh bang le, nga len a kijeldoh tobanga igel loupet tah-uva phat gilou khat’a oh denji ahiuve.

Chle ngolna thua lunggelihna

Thilchom beh khat, vannoiya chihna itidol’a kigel vetkah phatah khat jong kamudoh-e. 14 Mihem tam beh lou chenna, khopi neo thim khat aum’e. Leng thanei tah khat hin adel khumtai. Khopi chu aum chah kheh-in, pal voh chim din agoi. 15 Khopi sunga hin mi vaicha, ahivanga khopi huhdoh theina khop a ching khat acheng’e. Ahinla koiman ama chu iman agelpoi. 16 Ken kaei jing chu-chihna hi thahat sanga phachomjo ahin, hijongle koiman vaichapa chu michingin agelpon, asei jong koiman ngaisah-in aneippoi. 17 Mi-ngolte kikhopnaa lengpa kisen gin ngai sangin, thip beh cha miching houlim ngai aphajoi. 18 Chihnan gal manchah kimang sangin na ahatoh jon, ahin chonse khat’in thilpha tampi bolsa asuse theiye.

Thuhilpa 10

1 Thicheng phung thoulhen thao namtui kithe jong a-uisah theiyin, ngolna them khat’in chihna loupitah tah asumang hel theiye. 2 Michingin thildih bol’a, mi-ngol’in thildih lou bol hi chon ngai dol mong ahi. 3 Mi-ngol ngolna chu hephah lou lampi dunga akitopin jong ahedoh theiye; aman angol chu mitin ahetsah jin ahi. 4 Nachunga vaipon nalung han teng, haina lekha peh dan; umthim beh le chun bol khel melse tah geiya ngaidam um thei ding ahi. 5 Vannoiya hin thil dohlou-vaihomten thil dih lou tah abol’u kamudoh tai. 6 Mi-ngolte panmun len lai lai apeuvin, mihao ho nahsah louvin aumsah tauve. 7 Soh ho sakol chunga touvin, milen milal ho kengin acheuvin ahi. 8 Khuh laile chun nang lhalut’in natin, pal tumjal le chun gul’in nachuh ding ahi. 9 Songtum tangle chun songin nasekhah ding ahi. Thing ehle chun thinghal’in nasekhah ding ahi. 10 Naheicha mol’a nol-hem louvan hatuh a natuh ngai ahi. Thil ijakai gontoh masah chu chihna joh ahi. 11 Gul nakihcuh masah sah thei le nagul saithemlo aumpoi. 12 Michingin thu aseiteng min agin lon, mi-ngol vang aseisaa thi ahibouve. 13 Chapang thu jeng thupat nan aneiyin, ngol thubuh-in achaiye. 14 Mi-ngol’in thuchaije helouvin asei sei jengjie. Khonung thilsoh ding koiman ahepon, ithi nung tengu thilsoh ding eihil theiyuva jong koima aumpoi. 15 Mi-ngol inlam jotle jong kihet lou mi chu natoh achimvah jin ahi. 16 Lengpa achapan behseh a, lamkaiten jan khovah vah agolnop abol teng gamsungin hahsa athoh lo jie. 17 Ama chamtah a thu ngahna semdoh thei leng le aphat cha neh le chah kijon thei, kitim them a jukham lou lamkaite neikhaa gamsung chu ahampha ahiuve. 18 Mihem athaset behseh a inchungse lai tholbit nom lou chu, go vantin, in lhuh lo ding ahi. 19 Golvah hin nakipasah-in, judon hin nalipsah chom nai; ahivangin sum beiyin khat’a khat jong nabol theipoi. 20 Guh thim hijongle lengpa seiset dan, najalkhun thip sung hijongle mihao chu seise hih-in. Naseidoh chu vacha khat touvin pontin agaseipeh thei ahi.

Thuhilpa 11

Miching thilbol

1 Gamchom mito kiveikhom nan sum toh le chun, tu tiphat khat le sumkan namu tei ding ahi. 2 Muntin gamtin a sum koisoh keiyin, ajeh chu hiche vannoiya hi itobang hamsetna nato ding nakihet masahpoi. 3 Thingphung chu hoilam pen ngan lhu jongle, alhuhnaa chu kijam den jeng ding ahi. Meilhang ajin teng go ajuijie. 4 Huile go khophat kito phat ngah a natong louva naumle lho lhung ding neipon nate. 5 Numei naobu sunga naosen hinkhothah hung kipat nahet thei lou banga thil ijakai sem Pathen natoh thilbolje nahet thei lou ding ahi. 6 Jingkah nilhah-in muchi tun, natulut chan pha, khangdoh doh ding ham, alah a khatseh bou khangdoh ding ham nahepoi. 7 Sunlai khovah hi nomsahna dinga nomtah ahi. 8 Nahinkhon kum lhunseh le kipah-in. Itih chan hing jongle chun sot louva nathi ding geldoh jingin. Kinemtah a nga jing ding jong aum sampoi.

Gollhang hilchahna

9 Vo khangdong, nakhangdon kipapin! Nakhangdon pat’in kipah jingin. Nabolnom nom bol’in, nadei deiyin chonin. Amavnag ipi hile nabol chan chu Pathenin thu natanpeh ding geldoh jingin. 10 Imacha lung gimpi dan, thoh lel jong nei hih-in. Khangdong sot ding naihpoi.

Thuhilpa 12

1 “Kahin nomtapoi,” natina ding-ni le lha kum ho hunglhun masang, nakhangdon pet hin Nasempa geldoh jingin! 2 Nateh teng-nisa vah le lha vah, ahsite vah geiyin nang din thimtan tin, namaiya meibol jing tobang dingahi. 3 Chuteng nakihonna banjangte ni kithingin tin, tua hatna lai nakengte ni hung thabei ding, naha pulsoh a, lhom behseh ding-an nalhaimo ding, namit thim a namu chen thei lou ding ahi: 4 Na-ngongin natin, kholai dung husa jatapon nate. Sumheiya chang kigot gin le tumging thei kitum jacheo cheovin natin, ahivangin vacha hamin kinkhangin nate. 5 Khousang laiya kaldoh ngam pon natin, chele vale jong tijat umtante. Nasem kangin tin, kisuh hei kitouhei hahsa nasah a, imacha lung gul naneilou ding ahitai. Ngahmun jon a che ihitauvin, kholai dunga ka le lunghem umtante. 6 Dangla khang kobottan ding sana thaomei hung lhaa keh ding twikul’a twi thalna khao tan a twibel lenglhaa kitatjal ding ahi. 7 Itahsapheu leiset’a kile kit’a leivui soh ding, hinna hu hi eipeuva Pathen henga kile kit ding ahi. 8 Pannabei seh-in michingthempan aseiyin, aboncha hi pannabei hel’in aseiye.

Thu kaigop

9 Michingthempa hi achih jal’in mipi chu ahet jouse ahil jing jeng theiye. Thuchihho kihilna aneiyin, adihjeu apatep cheh-e. 10 Michingthempan lungmonna thuh holdoh agon, asutdoh thucheng ho hi thu kitah jeng ahi. 11 Michingte thusei ho hi kelngoi chingten kelngoi hoikhomna aman’u tenggol lhoutah tobang ahin, thuchih kidong khom ho jong thilkil’a kikhendet kheh banga umsot ding ahi.Hicheng hi kelngoi chin a Eichingpau Pathen thilpeh ahi. 12 Kachapa, kichih theina ding khat auim nalaiye. A-ngahbu ajobu um louva lekha kijih jing ahi, hasim behseh hi nacholsah bep hinte. 13 Hijat kalval hin seibe ding thil khat aum’e: Pathen gingin, athupeh chengse nit’in; ajeh chu hiche dinga hi mihem asemdoh ahi. 14 Thil ijakai-apha hihen ase hileh, guh thima kibol ho geiya Pathenin ibol ho’u cuhnga ithuu atan cheh ding ahi.

Song of Solomon 1

Song of Solomon 2

Song of Solomon 3

Song of Solomon 4

Song of Solomon 5

Song of Solomon 6

Song of Solomon 7

Song of Solomon 8

Isaiah 1

Isaiah 2

Isaiah 3

Isaiah 4

Isaiah 5

Isaiah 6

Isaiah 7

Isaiah 8

Isaiah 9

Isaiah 10

Isaiah 11

Isaiah 12

Isaiah 13

Isaiah 14

Isaiah 15

Isaiah 16

Isaiah 17

Isaiah 18

Isaiah 19

Isaiah 20

Isaiah 21

Isaiah 22

Isaiah 23

Isaiah 24

Isaiah 25

Isaiah 26

Isaiah 27

Isaiah 28

Isaiah 29

Isaiah 30

Isaiah 31

Isaiah 32

Isaiah 33

Isaiah 34

Isaiah 35

Isaiah 36

Isaiah 37

Isaiah 38

Isaiah 39

Isaiah 40

Isaiah 41

Isaiah 42

Isaiah 43

Isaiah 44

Isaiah 45

Isaiah 46

Isaiah 47

Isaiah 48

Isaiah 49

Isaiah 50

Isaiah 51

Isaiah 52

Isaiah 53

Isaiah 54

Isaiah 55

Isaiah 56

Isaiah 57

Isaiah 58

Isaiah 59

Isaiah 60

Isaiah 61

Isaiah 62

Isaiah 63

Isaiah 64

Isaiah 65

Isaiah 66

Jeremiah 1

Jeremiah 2

Jeremiah 3

Jeremiah 4

Jeremiah 5

Jeremiah 6

Jeremiah 7

Jeremiah 8

Jeremiah 9

Jeremiah 10

Jeremiah 11

Jeremiah 12

Jeremiah 13

Jeremiah 14

Jeremiah 15

Jeremiah 16

Jeremiah 17

Jeremiah 18

Jeremiah 19

Jeremiah 20

Jeremiah 21

Jeremiah 22

Jeremiah 23

Jeremiah 24

Jeremiah 25

Jeremiah 26

Jeremiah 27

Jeremiah 28

Jeremiah 29

Jeremiah 30

Jeremiah 31

Jeremiah 32

Jeremiah 33

Jeremiah 34

Jeremiah 35

Jeremiah 36

Jeremiah 37

Jeremiah 38

Jeremiah 39

Jeremiah 40

Jeremiah 41

Jeremiah 42

Jeremiah 43

Jeremiah 44

Jeremiah 45

Jeremiah 46

Jeremiah 47

Jeremiah 48

Jeremiah 49

Jeremiah 50

Jeremiah 51

Jeremiah 52

Lamentations 1

Lamentations 2

Lamentations 3

Lamentations 4

Lamentations 5

Ezekiel 1

Ezekiel 2

Ezekiel 3

Ezekiel 4

Ezekiel 5

Ezekiel 6

Ezekiel 7

Ezekiel 8

Ezekiel 9

Ezekiel 10

Ezekiel 11

Ezekiel 12

Ezekiel 13

Ezekiel 14

Ezekiel 15

Ezekiel 16

Ezekiel 17

Ezekiel 18

Ezekiel 19

Ezekiel 20

Ezekiel 21

Ezekiel 22

Ezekiel 23

Ezekiel 24

Ezekiel 25

Ezekiel 26

Ezekiel 27

Ezekiel 28

Ezekiel 29

Ezekiel 30

Ezekiel 31

Ezekiel 32

Ezekiel 33

Ezekiel 34

Ezekiel 35

Ezekiel 36

Ezekiel 37

Ezekiel 38

Ezekiel 39

Ezekiel 40

Ezekiel 41

Ezekiel 42

Ezekiel 43

Ezekiel 44

Ezekiel 45

Ezekiel 46

Ezekiel 47

Ezekiel 48

Daniel 1

Daniel 2

Daniel 3

Daniel 4

Daniel 5

Daniel 6

Daniel 7

Daniel 8

Daniel 9

Daniel 10

Daniel 11

Daniel 12

Hosea 1

1 Judah gama Uzziah le Jotham, Ahaz chule Hezekiah lal lai le Israel gamsunga Jehoash chapa Jeroboam lal laiya Beeri chapa Hosea kama Pakai thusei chu hiche hi ahi.

Hosea jinu le chate

2 Pakaiyin Hosea henga thu asei masah chun akoma hitin aseiye, “Ji gakipui le chun numei chavai soh-in tin, nachateu jong anuu to bangunte. Kamiten jong eidalhah-uva kitah lou, chavai soh ahitauve,” ati. 3 Hiti hi Hosea’n Diblaim chanu, Gomer chu akichenpi. Chapa khat anei nung lhonin 4 Pakaiyin Hosea jah a, “Apu Jehun Jezreel phaiya tol atha jeh a Israel lengpa talen kamatsah vah ding jeh-in nachapa min hi ‘Jezreel’ sah-in. Jehu leng vai neina kasuh bei ding ahi. 5 Chuteng Jezreel phaiya Israel sepai tha neina kasuh bei ding ahi,” ati. 6 Gomerin cha numei khat aneikit’in ahi. Pakaiyin Hosea jah a, “Israelte ngailu louva, achonset nau jong ka-ngaidam tah lou sing jeh-in nachanu hi amin ‘Ngailutlou’ sah-in. 7 Judah mite vang ngailu nange. Kei-Pakai, a-Pathen’un amaho huhhing ing ting, galmun a chemjam le thalpi, chule thalchang ham sakolte ham le sakol touthemte ham manchah a bol kagot ahipoi,” ati. 8 Gomer chanun noi aban nungin Gomerin nao avop kit’in chapa khat ahing’e. 9 Hosea jah a Pakaiyin, “Israelte hi kamite ahitapouvin, keijong a-Pathenu kahitapoi, hiijeh chun nachapa hi amin ‘Kamite-hilou’ sah-in,” ati. Israel Pathenin asemphat ding 10 Israelte hi mihem simsen lou le tejou lou, Twikhanglen panga neldi jat pha diu ahi. Tun Pathenin ajah-uva aseiyin, “Kamite nahitapouve,” atin; hijongle, “Hingjing Pathen chate nahiuve!” atina ding nikho hung lhung ding ahinalaiye. 11 Chuteng Judahte le Israelte kigom kit diu ahi. Achunguva lamkai khatseh kilhen’untin, agamsunguva phatheiya khongtou diu ahi. Ahi, Jezreel nikho chu lamdang tah hinte!

Hosea 2

1 Hijeh chun name Israelte chu, “Pathen mite, Pakai ngailut ho,” tin minvon.

Numei chavai Gomer-Kitahlou Israel

2 Vo kachate, kaji bangin umta hih hen lang, keijong aji hita hih jong leng, nanuu gajol’un. Notia apan a mito ajon jon khu jol lhauvin ngahsah-un. 3 Angah louhel le avon jouse lahpeh ing ting, apen nikho banga akeova kalha ding ahi. GAmkang golah bahsah ing ting, dangchah a kathisah ding ahi. 4 Achate jong khohsah-in hepi ponge, ajeh chu jum helou noti cha ahibouvui. 5 Amapi jong, “Kadongmate koma lut leng, neh le chah eipeuvin tin, samul pon le tupat ponnem eipeh-uva, olive thao le ju eidonsah diu ahi,” ati. 6 Hiche nu hi lingle khao kaikhum ing ting, pal kaget khum ding, alampi kakha bing ding ahi. 7 Adongma ho delle le jongle, maipha pon tin, gahol hol jongle muponte. Chuteng, “Kaji masapa henga kile kit tenge, tulai sangin chulaiyin nom kasajoi,” tinte. 8 Baal hou nan nei jongle, sana la dangka, olive thao, lengpitwi le chang pejing hi Kei kahilam ahedoh hih hel’e. 9 Hijeh a chu lho lhun tengle kathilpeh-chang le lengpitwi kile lah ing ting, samul pon le tupat ponnem kapehsa jong kalahpeh a ponsil beiya kakoi ding ahi. 10 Adongmate angsunga akeovin jam ing ting, koiman kakhut’a eichu lhah jou louhel ding ahi. 11 Kumhei golnop abol chengse, kumlhun kut hihen, lha lhin kut hile, Choldo nikho kut ahiya, houthua kikhopna abol jouse kasuh tang hel ding ahi. 12 Ama deichat sum a adongmaten apeh a asei, alengpigui ho le atheichang phung ho kasuhgam peh ding ahi. Alengpilei ho le apahcha lei jouse gammang lai kasosah ding, gamsaten achil thang diu ahi. 13 kei eisuh mil a Baal houna gimnamtui ahalnam a, sanapah a kijem a adongmae adelle le lai, chuche phat angolna jeh a chu talen kamatsah tei ding ahi. Pakaiyin aseisa ahitai.

Pakaiyin amite angailutna

14 Hiche nu hi gammang noiya pui lut ing ting, onem heova houva kathu nun ding ahi. 15 HIche nu hi alengpilai nungpeh ing ting, gimna phaicham jong kinepna kotpi kasosah ding ahi. hikoma hin anu-ngah laiya bangin kasei ngai nante, Egypt’a kona ahung doh til’a abol bang chun. 16 Chutengle ajinpan eikou kit’in tin, ama dinga Baal eiti kit louhel ding ahitai. 17 Baal min him him kaphah pohsah lou didng ahi. 18 Hiche tengle kamite asuh khah louna diuva gamsate le vachate ti kitepna kasem ding ahi. Gamsunga gal manchah pou pou, chemjam jouse le thalpi jouse kasuhmang ding, kamite lung ol le lung monga kachensah ding ahiuve. 19 Vo Israel, jia kanei ding, Nadia kitah tah le dihtah kahiya, Long louvin lungset ing ting, kahepia Katonsot gouva kasem ding kani. 20 Kakitepna nit’a Keiya kasem ding, Nangin Pakaiya nei nei ding ahi. 21 Hiteng chule kamite Israel taona sang ing ting, Leiset’a gotwi kanensah ding, 22 Leiset’in gaphatah tah, Changle lengpiga, olive apunsah ding ahi. 23 Gamsunga kamite chensah ing ting, Kaphat tousah ding ahi. “Ngailut lou,” kitiho ngailung ting, “Kamite hilou,” kiti ho chu “Kamite,” tia kasei ding, Amahon, “Ka-Pathenu,” tia eidonbut diu ahi.

Hosea 3

Hosea chule numei kitahlou

1 Pakaiyin kajah a aseiyin, “Akideipi to chonse jing numei khat gahel’in. Doichom chom houvu hen, milimdoi ho hounan lengpithei changlhah toh jingo jongle Israelte ka-ngailut jing banga, hiche numei chu na-ngailut tei tei ding ahi,” eiti. 2 Hijeh chun hiche nu man din dangka som le nga kapen, sakol chang kilogram ja le som nga pen kagachoi. 3 Hiche nu hin sotpi ei-nga, notia jong pang lou ding, pasal dangto jong jong lou din kaseipeh-e. Kenjong ama ka-nga jing din kaseiyin ahi. 4 Hitobanga chu Israelte jong phat sotpi leng le lamkai bei, kilhaina gan that lou, doikhom song jong phut lou, phunsanna dinga milimdoi ho le milim sem louva um diu ahi. 5 Israelte hi Pakai a-Pathenu henga ahung kihei phat khat hung lhungin tin, David chilhah leng khat koma hung kikhom diu ahi. Chuteng Pathen ging’un tin, thilpha apeh chengse kisan tauvinte.

Hosea 4

Pakaiyin Israel ahehna

1 Hiche gamsunga chengte douna Pakaiyin hehsetna khat apohdoh ahi. Ngaiyin Israel Pakai thusei hi: “Gamsunga kitahna l engailutna alengpoi, amiten jong Kei hi Pathenin eigel pouve. 2 Kitepna abol chengseu la apal keh jiuvin, jou aseiyun, tol athat’un, aguchauvin, chule akijonbol’ui. Chonval la apung cheh cheh-in, tol la akithat that jengtai. 3 Gamsung hung go-lhan tin, ijakai gopsoh ding ahi; gancha jouse le ganhing ho, ju le va, nga ho geiya thigam ding ahiuve,” ati.

Pakaiyin Thempuho ahehset

4 Pakaiyin aseiyin, “Mipi kinah dau hen kihehto dau hen: vo Thempuho, nang ho bou kahehset nahiuve. 5 Sunle jan a nakipal lhuh lhuh jeng diu, Themgao ho jong phachaom deh lou diu ahi. Ken nanu Israel hi kasuhmang ding ahi. 6 Kei eihet loujeh-uva kamite mangthah ahitauve. Nang ho Thempuhon neihe pouvin, kahil nasang pouve, hijeh a chu kapaidoh diu, nachateu jong Thempua kapansah lou ding ahi. 7 “Thempu natambe cheh-u le Kei dounan chonset nabolbe cheh-ui, hijeh a chu min najabolnau chu vetdana kaheidoh peh diu ahi. 8 Kamite chonset bol chu nanghon haodoh nan naneiyun, hijeh chun chonset nabolsah sah nom’ui. 9 Mipi thoh gim banga nanghon jong genthei hesoh nathoh diu ahi! Thilse nabol jal’uva talen kamatsah a kahtohsah ding ahiuve. 10 Nachan diu kilhaina gantha sa nejong leu chun, gilkel thoh a naum jing diu ahi. Cha tam neina din doiphunga notin pang jong leu chun, doichom chom nahoujeh-uva cha nanei deh lou diu ahi.

Doihou Pakaiyin amah

11 “Ju lui jut hah don’in, kamite angol gamtauve! 12 Kungbul phung pou phunin asan’uvin, tenggol chun ahetnom’u aseipeh bangin agel’ui! Eidalhatauve. Notia pang numei bangin, doichom chom kom ajonsoh tauve. 13 Molvum doiphung dunga kilhaina abol’uvin, lhangvum vum, thingphung dang nou dunga kithoina gimnamtui ahal’un, ali nom sah jeh-in theoboh adah-uve. “Hiche kon hin nachanu jouseu notin apangun, namouteu mito ajong tauve. 14 Hijongle athilbol jeh-u hin amaho talen matsah ponge, ajeh chu nangho tah jong doiphunga kijoh noti ho to kijot manga chonse, chule kilhaina thil toh khomji nahiuve. Thuchih-in, ‘Lungthimbei mite chu mangthah diu ahi’ ati bang diu ahi. 15 “Kei dia Israelte nakitah lou vangun, Judahte vang hitobang thil hin athemmo pouve. Gilgal le Bethel mun a jong doihou din hung dauvin, hikoma chun hing jing Pathen minin kitepna jong bol sauvin. 16 Lahlou sakol pol bangin Israelte vang alouchal behseh jengui. Hamhing lah a kelngoi vah banga iti kivah vah ding ham? 17 Israelte hi doihouvin angol tauve. Anop nop’in um jengu hen. 18 Ju adon khamset’un, notin apangun, jabol sangin jachatna adeijo’uve. 19 Hui lhoh mang bang diu, doichom chom houjeh a jahcha diu ahi.

Hosea 5

1 “Vo Thempuho, ngaiyuvin! Ngai phauvin Israelte! Leng insung miten ngaiyuvin! Adih a thutan dia kigelte, nachunguva thu kitan lo ding ahitai! Mizpah a chun kipalnan napangun, Tabor lhanga lenpel’in nakisongun, 2 Acacia khopia thuh tah khuh kilai nabanguivn, hijeh a chu nabonchauva talen kamatsah ding nahiuve. 3 Israel itobang ahi kahenai, kakoma kisel theiponte. Numei kitahlou tobang ahi, amite jong eihou din alolhing pouve,” ati.

Hosea’n milimdoi adeh

4 Mipi thilse bol hin a-Pathen komu ahin jot lutsah thei lou ahitai. Milimdoi ahou nom behseh-un, Pakai ahepha tapouve. 5 Mipi kiletsahna chu amaho douvin apangtai. Achonset nauvin akipalsah-in alhuhsah tai, Judah te geiyin alhuh tha tauve. 6 Pakai koma kilhaina din kelngoite le bong ho akai nauvin, ahivangin phatchom nan aneippouve. Pakai amudoh jou pouve, ajeh chu Aman adalhatauve. 7 Pakaidin akitah pouvin, achateu jong Pakaiya ahipouve. Hijeh a chu amaho jong agamsungu jong kisubei ding ahitai.

Judah le Israel kah a Gal

8 Gilead a gal konna din sumkon mut’un! Ramah khoa gal khongpi vouvin! Bethel khoa galsat din kho-lhang sam’un! Gal kon’uvin, Benjamin chilhah ho! 9 Talen matna ding nikho ahung lhunge, Israel mangthah ding ahitai. Vo Israelte, hiche hi soh tei ding ahi! 10 Pakaiyin aseiyin, “Judah lamakien Israel asat’uva, agamsung alahpeh jeh-un kalung ahange. Hijeh a chu achunguva talen twipi kisunglha kabahsah ding ahi. 11 Israel hi min abolsen, achanlom tah gamsung geiyin, panpi phachom louhel ho akineppi jal’in, min alahpeh tai. 12 Israel sumang ing ting, Judahte manthahna kalhut khum ding ahi. 13 “Israel’in aveiset akimudoh a, Judah-in amaput akimudoh teng, Israel’in Assyria gam kumpipa henga panpi gathumin tin, amanla damsah a amaput boldam peh thei deh lou ding ahi. 14 Israelte le Judahte chu sakei midel khum banga kadel khum ding, atel adah-uva kajan a kadalhah ding ahi. Kakai mang teng koiman eichu lha theiponte. 15 “Achonset jeh-uva athoh khopset’uva, eihung ho kahseuva, kamite hi kadonda ding ahi. Athoh gim behseh tengu eimudoh thei maiyu ahi,” ati.

Hosea 6

Lungtheng louva mipi lunghei

1 Mipin aseiun, “Pakai koma kile kit taute! Eibolgimu ahitan, damjong eidamsah teiyunte; eimavosau ahitan, imahau eitompeh tei lou diu ham? 2 Ni ni nithum jou teng eisuhal’un tin, a-angsunga inom hin diu ahi. 3 Pakai het tei din goute. Jing kho avah tei tei bangle, chuh lai gotwiyin leiset achap nou banga, ihenguva hung tei ding ahi,” atiuve. 4 Ahivangin Pakaiyin aseiyin, “Vo Israel le Judah, i-kalo didng ahiuvam? Jingkah daitwi kang loi bangin, nei ngailutnau abeiloiji tai, sun nisa daitwi kanghei hoi bep ahi. 5 Hijeh a chu thutanna le suhgamna thu pohsah a ka-Themgao te kahinsolpeh nahiuve. Nahenguva ka-ngeh hi akichen jenge; 6 kilhaina gantha sangin ngailutna kadeijon, pumgo thilto eipeh sangun kamiten eihet diu kadeijoi. 7 “Ahinla gamsung ahung lut lut’un Adam mun a kakitepna asukeh tauve. 8 Gilead khopi sung mihiloute le tolthat ho adimset’ui. 9 Thempuho jong mi changlhi jing gucha hon abangui. Shechem mun theng lampi jenga jongmi athat’uve. Thilse hijatpi hi henasa saa abol’u ahitai! 10 Israel sunga kidah dah um kahitan, milimdoi houvin kamite akisubohsoh tauve. 11 “Vo Judah mite, nathilbol chengseu jeh a nang ho talen pehna ding phat khat kakoinai.

Hosea 7

1 “Kamite Israel damsah a, haodoh sah kit kanop phat phat le, agitlou nau le thilse abol ho’u kamudohji tai. Khat le khat akilhem to’uvin; bang aphujal’un, aguchauvin; kholai dunga mi achom’ui. 2 Thilse hijat abol’u kagel jing didng hi lungin jong agel phapouve. Achonset nauvin avuh tauvin, kamu khel aumppoi.”

Leng inpia kibaona

3 “Mipin thilse bol’in lengpa le avaipote geiyin alhem lhauve. 4 Mijong jeng le mi kitahlou jeng ahiuve. Mi ahotnau meilhum sung meisa abangin, kan ding changlhah kigon jou kah a changlhah kangpan mut kou hih jongle deoje ju tobang ahi. 5 Lengpa gaolvah nin lengpa le avaipote ju atul kham’un, asu-ngolsoh tauve. 6 Athilse bolnom danu meilhum abangin, along hang khovah vah-un, jingkah teng meikou deojah jeng abangui. 7 “Alunghan val jeh-un avaihomteu athat’un, alengteu aban banin athat’un, ahivangin kahenga taova aum hih hel’ui.

Israel le Numtin vaipi

8 “Israelte hi changlhah alang kan minlou tobang ahiuve. Akimvel’uva namtin vaipi akison piuvin, 9 hitobang gamchom mite chunga kison hin athahat alah mang ahilam helouvin aum’ui. Amanna didu nikho dimtohsa ahitan, amahon la ahedoh pouve. 10 Israelte kiletsahna amaho douna thu aseitai. Thil hijatpi soh tajongle kahenga hung kile kit ding agel pouvin, Pakai a-Pathenu eihol pouve. 11 Israel hi lungthimbei vakhu tobang ahin, amasan amiten apanpi diuvin Egyptte akouvun, chuin Assyria lam asel’ui! 12 Ahivanga achenna chan’uva lenpel kason a vacha banga kamatdoh ding ahiuve. Thilse abol chengseu jal’a talen kamatsah tei ding ahiuve. 13 “Ohe ada ahiuve! Eisalhauvin eidou tauve! Kasuhgam ding ahiuve. Kahuhhing nom vangin, jou jouvin eihouvui. 14 Lungtheng sel’in kahenga atao pouve, chiding namdangte umchan bangin tol dunga akipehle leuve. Chang le lengpitwi athum tengu jongle chiding namdangte umchan atho’uve. Vo doumah bolte! 15 Kavahdoh a kahatsah vangin, kei douna jeng abol’uve. 16 Eida lhauvin, thabei, semthu pathen abel’ui. Kisonpi theilou thalchang kon tobang ahiuve. Alamkaiteu kiletsah thusei jal’a thisea thisoh diu, Egypt miten anuisat diu ahi.

Hosea 8

Milimdoi ahoujeh-uva Pakaiyin Israel mo achan

1 “Gal sumkon mut loiyun, melmaten kagamsung chu, muvanlai lengsuh bangin ahindelsuh tauve! Kamiten amaho to kakitepna asukeh-un, kahilna thuhil adoutauve. 2 A-Pathena eiseiyuva, kamitea akiseiyuva, eihet banga asei vangun, 3 thilpha apaitauve. Hijeh a hi amelmateuvin adel del jeng diu ahi. 4 “Kamiten leng ho akilhen vangun, acham cham a abol’u ahibouve. Kei phatsah louvin lamkai akilhen’ui. Amanthahna diuvin, sana le dangka adongkhom’un milimdoi akisem’ui. 5 Samaria kho sung miten sanaa kisem bongchal lim ahouvu kahoi. Acunguva kalung hange. Itih tah le milimdoi ahouda diu ham? 6 Israel mi khut them khat’in asemdoh ahin, pathen ahinaisai poi. Samaria khopia kihou sana bongchal lim chu kisugep ding ahi. 7 Huise tu ahiuvin, khopihui aki-at diu ahi. Chang min louna louma changlhah ding kilamdoh ponte. Kilamdoh mong jongle gamchom min nedoh bep’unte. 8 Israel jong namdang bep ahitan, pannabei bel kehsa tobang ahitai. 9 Lahlou sa-ngan banga louchal Israelte anop nop’in akihei tauve. Assyria mite panpi ngai chan acheuvin, ahuh diuvin namdang ho tohman apeuve. 10 Ahivanga abonchauva kakhop ding, talen kamatsah ding ahiuve. Assyria kumpipan abolset tengu nasa asah behseh jeng diu ahi. 11 “Chonset suh beina dia Israelten maicham asembe vangun chonsetna ding mun tampi aneibe cheh-ui. 12 Mipi hilna ding simsen lou kajih doh tan, ahivangin datmo le thilchom beh-in agel’un apaitauve. 13 Kahenga gam athat’un asa aneuve. Hijongle Kei-Pakai hi achunguva kalung lhaipoi. Hijeh a chu achonset’u kageldoh a, talen kamatsah ding, Egypt gama kanungsol kit ding ahi! 14 “Israelten leng inpi tampi asemdoh-un, ahivangin Asempau asumil tauve. Judahten kulpi kikaikhum khopi tamtah asadoh-un, ahivanga leng inpiho le khopi chengse chu kahal lhahding ahi,” ati.

Hosea 9

Israelte talen mat ding Hosea’n aphondoh

1 Vo Israelte, doihou ho banga kut nabol chengseu hi ngauvin. Na-Pathenu dalhan navah mangun, Ama din kitahna nanei tapouve. Gamsung pumpia Baal koma noti bangin nakijoh tauvin, aman napeh-uva nagel’u chang nadei lheh-ui. 2 Ahivanga nachangu beivah ding, olive thao beisoh a, lengpitwi jong lhasam ding ahi. 3 Pakai gamsunga Israelte chengsot lou diu, Egypt gama kile tol kit’uva, Assyria gamsungaanboh aga neh diu ahi. 4 Hiche migam sunga chu Pakai koma lengpitwiya kilhai thei lou diu, kilhaina gan jong atha thei lou diu ahi. Aneh chah-uvin anechan asuh boh a, thi-opsa kine tobang hiding ahi. Oivana dia kinebou hi ding, Pakai Houin a kitoh banga kisei thei louding ahi. 5 Pakai choi-atna kut bol phat hung lhun teng ipi abol diu hitam? 6 Manthahna hung lhun a mipi kithecheh teng, Egypt miten achop khom diu, alhoh khom’uva Memphis a vui diu ahi! Agouvu dangka le ain mun jouseu chu lingle khao dimset’a hung keh ding ahi. 7 Talen matsah phat ahung lhung tan, athoh ding mipin athoh phat ahunglhungtai. Hiche hi asoteng Israel’in hanante. Nanghon, “Hiche themgaopa a-ngol’in, Pathen hu-lha khumpa hi atanangtai,” natiuve. Nachonset behseh jeh-un mipin hibang hin neiho’uve. 8 Pathenin amite Israel gihsal dia eihinsol ahi. Ahivangin kachena chan a vacha thang kikampeh bangin kipalsah neigo’uve. Pathen gamsung nah nah aching miten Themgaopa adouvuve ong! 9 Gibeah a aumchan bangun, kinepna beihel thilse jeng bol ahitauve. Pathenin achonsetnau gel jingintin, talen amatsah tei ding ahi.

Israel chonset man

10 Pakaiyin aseiyin, “Israel kamudoh til chun gammang laiya jam lengpigui tobang ahi. Napu napate kamu til chun, aphatcha theichang ga min mudoh kabangin ahi. Ahinla Peor molsang ahung geiyun Baal doi ahou pan’un, aseichat’u doiho bangin kidah dah aumdoh tauve. 11 Israel loupina vacha banga leng mang loi ding, cha le nao jong aneikit lou diu, numei naovop l aumpon tin, nao peng jong umbe ponte. 12 Cha le nao vahdoh jongleu kathagam a khat beh kahoipeh lou didng ahi. Hiche mite kadalhah teng achunguva datmo umtah thil soh ding ahi,” ati. 13 Vo Pakai, achateu min athagam peh kamui. 14 Hiche mite hi ipi nabolpeh dia ka-ngeh ding ham? Anumeite jouseu chinsah-in, vah ding chasen neisau hen! Israel chunga Pakai thutan 15 Pakaiyin aseiyin, “Athilse bol chengseu hi Gilgal a hung kipan ahi. Gilgal a pat kahinvet da pan ahitauve. Thilse abol jeh-uva kagamsunga kona kadeldoh ding ahiuve. Alamkai jouseuvin eidouvun, lungset kit taponge. 16 Israelte hi ajung gosa, gathei lou thingphung tobang ahiuve. Cha le nao nei tapouvinten, nei mongu jongle a-it tah tah-u achateu kathagampeh ding ahi,” ati.

Themgaopan Israel thu asei

17 Alhacha kapan Pathenin amite paiyinte; ajeh chu amahon athu ngaipeh aneipouve. Namtin vaipi lah a vah thai ding ahiuve.

Hosea 10

1 Israelte hi lengpigui ga phatah bang ahiuve. Ahao cheh-ule maicham asembe cheh-ui. Agam gau apun cheh le, doikhom song asemhoi cheh cheh-un chibai aboh-uve. 2 Lungthima lepche jing miten achonset man athoh gim tei diu ahi. Pathenin amaicham jouse susen tin, doikhom dong jouse sumanginte. 3 Hetman louva hiche mite hin, “Pakai igin loujeh-un leng inei tapouve. Neijong leu hen leng chun eiho dia ipi aboljou nah ding ham?” tiuvinte. 4 Thu homkeo aseiyun, jouva kitepna asem’un, chule pannabei kigahna asem’ui. Thudih thudihlou asouvin, lou laiya lounamse pungtel tul jeng abange. 5 Samaria khopia chengte kichauvin tin, Bethel a sana bongchal lim kisem manjeh a lungthoi diu ahi. Amaho le milimdoi limbol’a pang Thempuho kap diu ahi. Sana giltah tah akikhodoh teng kapsoh diu ahi. 6 Hiche sana milimdoi hi Assyria gam kumpi minthangpa kaiya peh dia apoh mang diu ahitai. Thumop ajui ho jal’a Israel min avetda a, jumle ja athoh ding ahi. 7 Twichunga thinghal kilap banga, alengpau min akai mang ding ahi. 8 Aven lhangvum doiphung, Israelten milimdoi ahou nau mun chu min asuhmang ding ahi. Amaicham phunguva ling le khao hng keh ding, mipin molle lhang sang ho jah a, “Neisel’un, neikhu’vin,” tia asap diu ahi.

Israel chung thutanna Pakaiyin aphondoh

9 Pakaiyin aseiyin, “Gibeah a achonset’uva pat Israelten Kei douna chonset atang tapouve. Hijeh a chu Gibeah agal’in alap den diu ahi. 10 Hiche mi chonsete hi delkhum ing ting talen kamatsah ding ahi. Amaho dou din namtin vaipi pangkhomin tin, achonset chengseu jal’a talen amat tei diu ahi. 11 “Israel hi phat khat’in bongla gol lahngoisa, chang chil ding gosadema um ahin, angong jolsel’a namkol pohsah a natoh hahsa jo hil kagot anahi. Judah chu lou kaiyin kamangin, Israel thingtum kakaisah-e. 12 Keiman, ‘Louthah thah kaiyun lang, thudih muchi tun tu’uvin, kahenga nakipeh lut jal’uva vangboh chu lhosoh ga bangin kilo’uvin. Na-Pakaiyu Kei henga nahung phat’u ahitai, kahunga vangbohna kabuh lhah khum ding nahiuve,’ kati. 13 Ahinla thilsejo muchi tun natu’vin, aga nalou tauve. Najouseiman naneh-u ahitai. “Ajeh chu nakangtalaiho le nasepai tampi nakison piuvin, 14 ahinla namite gal’in hindel khumin tin, nakulpi chengseu asuhamng ding ahi. Shalman lengpan Betharbel khopi gal a asuhmanga, nu nao chapang jouse asuhgam hel nikho chutoh bang dingahi. 15 Vo Bethel mite, nathilse bol’u melset veng vung jal’a hitobang thil chu nachunguva soh ding ahi. Gal kisat pat pat le Israel lengpa thipai jeng ding ahi,” ati.

Hosea 11

Doumah bol mite Pathenin alungset

1 Pakaiyin aseiyin: “Israel asen laiyin kalungsen, Egypt’a konin kachapa kakoudoh-e. 2 Kahakou cheh le alhai gamla cheh-ui. Kamiten Baal kilhaina abol’un, milimdoi hou nan gimnamtui alhut’ui. 3 Ahinla Israel lamjotje hil’a kahin, Kamite ka-angjangin kapomin; Ahivangin amaho kakhou khahna Amahon ahepha hih hel’ui. 4 Hepi le ngailun kakou lut’in, Kabengto kasip beh jingin; kabungin aneh diu an kapei. 5 “Ahivangin kaheng ahinjon nom pouvin, hijeh a chu Egypt’a kile kit tei tei diu, achunguva Assyria mite vaihom ding ahi. 6 Akhopi chengseu galten lonvuh-in tin, kulpi kelkot chengse atumboh diu ahi. Thilpha pena agel’u thil jeng abol jal’uva gal’in kamite asuhmang ding ahi. 7 Kakoma kona jamdoh dingbou aseiyun, apoh-u namkol jeh a peng peng diu, koimanla asut peh deh lou diu ahi. 8 “Vo Israel, iti kapaidoh jouva, Iti kadonda thei ding ham? Admah bol’a kabol theiya, Zeboiim banga kabol thei nahim? Kalungthimin hiti chu eibolsah ponte, Ka-ngailutna asang behseh bouve. 9 Lunghan vangin talen matsah dang ting, Israel suhmang kit da tange. Pathen kahin, mihem kahipoi, Naumpi jing Athengpa chu kahi. Lung hangin hung kit taponge. 10 “Amelmateu chu sakei kisen banga kakisen khum teng, kamiten eijui kit tauvinte. Lhumlam a konin eihin del del jengunte. 11 Egypt’a konin vacha len hin thouvin tin, Assyria gama kona vakhu len ahintho diu ahi. Keiman a-inlum’uva kahin puilut kit ding ahi. Kei-Pakaiyin kasei ahitai,” ati.

Israel le Judah themmo chan

12 Pakaiyin aseiuin, “Israelten kajet kavei, kasha kalhanga joule nal jeng eiseikhum’un, Judahte la tugeiyin kitah tah le Atheng Pathen-Kei doumah bol’in apang jingui.

Hosea 12

1 Jingkah a pat nilhah geiya Israelten abol’u hi pannabei le manthahna bou ahi. Lepthol le pumhatna alah-uva apung jinge. Assyria mite toh kitepna asem’un, Egypt mite to kiveikhom din akihouvui,” ati. 2 Pakaiyin Judah mite douna sei ding aneiye: Israel jong amite umchan khan chah jal’a talen amatsah ding ahi. Athilbol dungjuiyuva alethuh cheh ding ahinai. 3 Apuluiyu Jacob jong chu apenkhoppi a-upa Esau toh anu oisung, naobua aumlai lhonin akisato lhone; Jacob akhandoh phat’in Pathen to akibon’e. 4 Vanil to akibonin ajouve, akap’in vangboh athum jenge. Bethel muna ipuluiyu Jacob henga pathen ahungin akihoupi. 5 Hiche hi Pakai Pathen Hatchungnung ahi. Pakai kiti min ahin Ama chibai boh ding ahi. 6 Chuti ahile tun Jacob son ho, na-Pathenu tansan’un lang adih-in chon’un, na-Pathenu panpina chu thoh hat tah-in ngah jinguvin.

Thutanna kiseibe

7 Pakaiyin aseiyin, “Israelte jong Canaan mite bangin alepthol’ui; nahenguva thilcho ho lepthol’in, adih lou thilte nan atepeh-uve. 8 Amaho pin, ‘Ikivei kan’un haodoh ihitauve, lepthol’a ihaodoh- hi koiman eihehse thei pouvinte,’ tin aseiyui. 9 Hichea hi Kei-Pakai na-Pathenu, gamthip laiya nahung vil pau, Egypt a kona hinpuidoh pan, ponbuh a nachen banguva kachensah kit ding nahiuve. 10 “Themgaote jah a thu tampi kaseiyin, mu tampi kaneisah-e, chule Themgaote mangchan kamite kagihsal jinge. 11 Ahivangin Gilead a milimdoi pou ahouvun, hiche houchengse chu thigam diu ahi. Gilagal a Bongchal ho kilhainan aneiyun, chukoma maicham ho jong chu a-onglai jousea songtum alhuh lhuh-in aseuve,” ati. 12 Kapuluiyu Jacob Mesopotamia gama jamlut din aumin, hikoma chun ji kilo nan mi na tongin akelngoite achinpeh-e. 13 Pakaiyin Egypt gama sohchang Israelte puidoh avetup din Themgao khat asolpeh-e. 14 Israelten Pakai asulung hang lheh jengun, achonset jel’un thi din akilom’uve. Pakai asuh jum jal’uva Pakaiyin talen amatsah tei diu lom ahi.

Hosea 13

Israel chunga thutan chaina

1 Masang laiya Ephraim phung miten thu asei teng, Israel phung dang ho akichauve; mihon Ephraim phung chu jatah-in aveuve. Ahinla amahon Baal ahouvun achonsetauve, hijeh a chu athilo tei diu ahi. 2 Chonset abol jom jingun, hou din milimdoi, dangka akhengun, mihem lung suhtoa kigel doh, mihem khut’a kisem ho pou ahouvui. Amahon, “Hiche ho hi kithoinan neiyun,” tin aseiyui. Hitobang milimdoi ho hi min iti achop theiya, bongchal lim a kisemthu chu iti kitahsan theiding ham! 3 Hiche mite hi jingkah daitwi banga leng mang diu, sunlai nisa kahgot bang ding ahiuve. Changphol a changpol hui lhoh mangbangle, meikhu longa meikhu kitungdoh tobang bep hi ding ahiuve. 4 Pakaiyin aseiyin, “kei hi Egypt a kona nahinpuidoh-u Pakai na-Pathenu kahi. Kei tilou Pathen dang nanei pouve. Keibou nahuhhingpu kahi. 5 Nelgam go lah a kakhou khah-un ahi. 6 Ahivangin gampha nalut phat’un naming lhingun na-oiva tauvin, kiletsah hoithon neisumil tauve. 7 Hijeh achu sakei mibokhum banga kabokhum diu, lutnu michan banga nalampiuva kachan lhih ding nahiuve. 8 Anou mansah savom midel le kabah ding, kabotel ding nahiuve. Sakei mibolna banga amun akaval lhum jeng diu ahi, chule gamsa hang mibolna banga natel nadah a kajan diu ahi. 9 “Kasuhmang ding nahiuve, Israelte! Kon nakithopi jou ding ham? 10 Leng khat nathum’un, lamaki ding mi tampi na-ngeh-ui, hiche ho hin najet’u iti ahuhhing jou ding ham? 11 Lung phamosa sa kapeh leng ho chu kalunghan phat’in kasumangtai. 12 “Israel chonset le themmona lekha ajihdoh soh tan, phate chan akikoihe tai. 13 Israel hin kihinsona thei phat pha khat aneiyi, angol behseh jeh-in akisan thiepon, naosen penglha din naobua hungdoh ding ada tobang bep ahitai. 14 Hiche mite hi noimigama lutna dia konin huhdoh pong ting, thina thahat’a konin jong huhdoh ponge. Vo thina namidena hinpo lut tan! Vo noimigam, manthahna hinlhut loiyin! Hiche mite hi voujang natpi kit taponge. 15 Israel hi pumping bangin nalhasil sel jongle, nelgama kon niso lama kon huisave vuhung nungin tin, teinah phungle twikul jouse asemgot ding ahi. Thil manlu jouse alhoh mang ding ahi. 16 Eidou jal’a Samaria khopin talen amat tei ding, amite galmuna thia, naosen ho tol’a chil thang diu, numei gai akhedoh diu ahi,” ati.

Hosea 14

Hosea’n Israel a-ngehna

1 Vo Israelte, Pakai na-Pathen henga hung kile kit tauvin. Chonset jal’a kipal lhu nahiuve. 2 Pakaiya kile kit’un, ahenga hitin taovun: “Kachonset’u ngaidamin, katao nau sangin, kakitepsau bangin navahchoi unge. 3 Assyria miten eihuh joupontin, galsat them dakolten eidal jou pouvinte. Milimdoi kasemho’u chu ka-Pathen danun sei kit hih hel unge. O Pakai Nangin bel ding neiloute nahepiji mong ahi,” toiuvin.

Pakaiyin Israel dia hinkhothah ateppeh

4 Pakaiyin aseiyin: “Kamite kinungpui kit ing ting, Lung giltah a kalungset ding, Achunguva lung hang kit taponge. 5 Israelte dia gamgo lah a Gotwi julhah kabah ding; Pacha banga pah diu ahi. Lebanon lhang thingphung banga jungkho det chet diu ahi. 6 Thing nanou banga hingdiu, Olive thing hoiya hoi ding ahiuve. Lebanon lhang cedar thing banga Muinam jen jun diu ahi. 7 Kahoidamna kulpi sunga cheng kit’uva, Honlei phatah bang diu; Lengpigui ga phatah banga, Lebanon lhang lengpiga pha minthang bang diu ahi. 8 Israelten milimdoi ahoukit louhel diu, Ataonau sanpeh a kahoidam ding, Thingna dum jing banga kanou sah ding, Vangbohna amu jouseu Keiya kon ahi,” ati.

Joel 1

1 Pathuel chapa Joel koma Pakai thusei chu hiche hi ahi.

Andong kisuhgam mipi lunghemlo

2 Ngaiphauvin upate, Judah gama chengten ngaiyuvin! Nangho khang hihen napu napateu khang hile, Hitobang thil hi soh khan am? 3 Nacha nanaoteu seipeh-un lang, Amahon jong acha anaoteu aseipeh diu, amahon jong khang kit kit’a Mite aseipehson son dingu ahi. 4 Khaokhopiten ahon honin andong aneuve, Khaokhopi masaloi neh moh aban banin anetai. 5 Vo jukhamho, thouvun kap’un pangun julop ho. Lengpitwi thah thah semna ding Lengpiga chengse asumangtauve. 6 Khaokhopi hon jamah-in igamsungu alonvuh tan, Ahuse behseh jengun simsen jong ahipouve. Ahau jong sakei ha bangin ahemtheiye. 7 Ilengpiguiyu asumangsoh-un, Itheichangna anechaisoh tauve. Ana anechaisoh-un abah agosh tai. 8 Nuh-ngah-in adongma thilong aka bangin, Mipi nabonchan kap jenguvin. 9 Houin a to ding chang le lengpitwi abeisoh tai, Pakai koma toding beijeh-in Thempute along dongtauve. 10 Loujao la akeovin akijamtan, Chang kisuhgam leiset geiyin adoulel’e. Cahngdong kisuhgam phat’in Lengpigui jouse agop soh tai. Olive thing jouse agamtai. 11 Lunghem’uvin loubol jouse, Lengpilei bolte kap’uvin; Suhlou change sakol chang, Cahngdong mimdong asugamhel tauve. 12 Lengpigui le theichang phung agosoh tan, Agathei thing jouse aheovin athitai. Hijeh chun mipi kipana jong abeitan ahi. 13 Khaodip pon sil’in kap’un, Maicham phung lhacha Thempuho! Houin akitol touvn jan khovah-in lung gim’un, Na-Pathen napeh diu chang le lengpitwi abeitai. 14 Japi khom’un lang an ngol ding deiyun, Lamkai chengse le Judahte khomsoh-un, Pakai na-Pathenu Houin sunga Kap’un ahenga thum’uvin! 15 Pakai Nikho ahung naiye, Hatchungnungin manthahna abol ding Nikho chu ahung naitai; Hiche hikhon itobang tijatna aso ding hitam! 16 Ka-andong jouseu kinechai jeng kamoh vet’un, Ka-Pathen Houin a jong kipana abeitai. 17 Leigo lah a muchi athi thu thun, Changsal’a koi ding changla abeitan, Cahngsal keosa ho hi alhenglhona kijam ahitai. 18 Neh ding hamhing umlou jal’in, Gancha jouse, bong le kelngoi hon Akel lel soh gamtauve. 19 Vo Pakai, meikah banga hamhing le Thingphung jouse got jeh a nahenga tao kahi. 20 Luidung joouse akan jeh-in Gamsa ho geiyin nahenga ataovui.

Joel 2

Khaokhote hi Pakai Nikho dinga gihsalna

1 Sumkon mut’un, Pathen lhang theng Zion a kiginna khongpi vouvin. Kithing thing jengun Judahte, Pakai Nikho hung lhungvah ding ahitai. 2 Muthim khojin nikho, Muthim lhangkhal kiheh ni hinte. Molsang meilomin atom bangin, Khaokhote ahon honin ahung kitol’ui. Hitobang thil hi soh kha loulai ahin, Sohjong soh kit lou ding ahi. 3 Hamhing jouse meikah bangin anechaiyun, Alut masanguva Eden hon tobang gamsung chu Adalhah nungle akeohel’in, Imacha cha pou louhel’in, aumtai. 4 Sakolte lheh lheh ahiuvin, Galsat sakolte lhaiyin alhaiyui. 5 Molvuma akichop doh tengule Kangtalai kitagih abangun, Gamkanglai meikah abahsah-un, GAlsat dia kigoltoh sepai hon jamah abangui. 6 Ahung neitel tul’ule mitin akichan, Mitin mai anguisoh heljie. 7 Gal-hangho midel khum abngun, Sepaite bangin pal dunga akal’ui. Malam non akitol tol jengun, Ajotnau khel louhel’in acheuvin, 8 Khat masanga khat asingpoi. Tho kikaiho jong adelpeh jengun, Imacha chan asutang joupoi. 9 Khopi alonvuh jengun, Palvum vuma akaldoh-uvin; Intingvum geiya akaltouvun, Guchate bangin in bangkot Sung dunga alut lut jengui. 10 Ahung kitol tengu leiset akiling leuvin, Vanthamjol geiyin akithing jin ahi. Nisa le lha athim leuvin, Ahsite jong avahji tapoi. 11 Pakaiyin asepaite kolphe bangin thu apen, Athu ngai sepaite tamtah le hattah ahiuve, Pakai Nikho itobanga kichat um hitam! Ahingdoh thei idng koiham?

Lunghei dia kouna

12 Pakaiyin aseiyin, “Tu hijeng jongle, Thangsel’in lung heiyun lang, Kap le lung kisih chule an ngol thon Kahenga hung kilt kit’uvin. 13 Nakisih nau chun nalung gim phongdoh-un, Ponsil botel maimaiyin alhingpoi. Pakai na-Pathen heng hinjon kit’un. Mi khoto them, hepina lhingset ahi; Athoh hat’in akitepna anit jinge; Talen matsah louva ngaidam go jing ahi. 14 Pakai na-Pathen’un lung akhel’a, Changle mim phatheiya nalha theiyu ahi. Chuteng nang hon chang le Lengpiteiya Ama nahou theiyu ahi. 15 Zion lhanga sumkon mut’un lang, An ngol ding seiyun, japi khom’uvin! 16 Japi koukhom’uvin, Houbung kikhopna sem’uvin; Upa cheng koukhom’un, Chapangho le naosen ho koukhom’un. Kichengtil hon jong Indan sung dalha hung diu ahi. 17 Houin hongchal le maicham kah a Pakai kinbol Thempu ho kap a tao diu: “Pakai namite khoton, Namdang ho totna le daithangin neikoi dauvin, ‘Na-Pathenu hoilamba hitam?’ tin seidau hen,” atiuve.

Pathenin gam leiset asemphat

18 Pakaiyin agamsung khohsahna aneitan, Amite ahepitan ahi. 19 Ataonau adonbut’in aseiye: “tua vang change lengpitwi olive thao Kapeh ding nahitauvin, Lung nachima nanei diu, Namdang miten totna le Daithanga nanei lou diu ahitai. 20 Sahlama hungkon khaokhote sugam ing ting, phabeppi nelgam sunga kadel lut’a, Amasa chengse Twimanga kalelut ding, Anunung chengse Mediterranea Twikhanglena kalelut ding ahi. Athilongu uijen jun ding, Athilongu uijen jun ding, Athilongu uijen jun ding, Athilbolset chengseu jal’a kasuhmang ding ahi. 21 “Vo loujaoho kicha hih hel’un, Pakaiyin nabolpeh thil ho jeh-un kipah thanomjo’uvin. 22 Gancha ho, kicha hih hel’un, Hamhing adumsoh tan, Gathei thingphung ho agatan; Theichangle lengpithei tampi agatai. 23 “Vo Zion mite, Pakai na-Pathenu Thilbol jal’in kipah thanom’uvin. Chavang go nengsel’in napeuvin, Phalbi gotwi le khallai gotwi nengtah-in napeuve. 24 Changphol jouse chang dimsoh ding, Lengpitwi le thao chilna khuh ho let lha ding ahi. 25 Khaokhoten na-andongu anehgam kum sunguva Namansah chengseu kapeh kit diu ahi. Khaokhote hinsol’a jong Keima kahi. 26 Neh le chah nengtah a naneiyuva, Lung nachimtah a naum diu ahi. Pakai na-Pathenu navahchoi diu, Thil kidangtah nabolpeh Pau nathangvah diu ahi. Kamite kidaithang kit louhel diu ahi. 27 Chuteng nalah-uva ka-um jing hetauvin nate, Israel, Koidang umlou Kei-Pakai na-Pathenu kahi hateuvin nate. Kamite daithanga kikoi kit louhel ding ahi.

Pakai Nikho

28 “Khong teng mitin chunga ka-Lhagao bung lhang ting, Nachateu numei pasal’in kathu asei pong diu; Na-upateuvin mang aneiyuva, Nalhagaoteuvin mu anei diu ahi. 29 Chutengle lhacha numei pasal chunga Ka-lhagao kabuh lhah ding ahi. 30 “Nikho hung lhung ding jeh a hi Vanthamjol le leiset’a hilchahna kapeh ding; Thisan hung longa, mei ka ding, Meilhang meikhu banga jing ding ahi. 31 Nisa hung thim a, Lha jong thisan banga san ding; TIjat kichat umtah Pakai Nikho Hung lhun masanga hicheng hi soh ding ahi. 23 Chuteng Pakai panpi holchan huhinga um ding, Pakaiyin asei banga, Jerusalema um phabep jamdoh a, Kalhendohsa cheng hingdoh ding ahi,’ ati bang,” ati.

Joel 3

Pathenin namtin vaipi thu atan ding

1 Pakaiyin aseiyin: “Hicheteng chule Keiman Judah gam le Jerusalem Hamphatna kasem phat peh ding ahi. 2 Namtin vaipi khom ing ting, Thutanna phaicham kalhutsoh ding; Hikoma chu kamite abolnau jal’a Athuu katanpeh ding ahi. Israelte gamtin a athe thenguvin, Kagamsung, Israel akihomtel tauve. 3 Sohchangho angsanin akihom’un, Noti l eju chohna din nu-ngah gollhang soh-in ajoh-ui. 4 “Vo Tyre, Sidon chule Philistia gam pumpi, ilo neigot’u ham? I-khat khat lethuh neigot’u ham? Neigot’u le mangangtah a kalethuh ding nahiuve! 5 Kasana dangka nachomgam’un, kagou chengse nahouin sunguva napolutsoh tauve. 6 Judah gam le Jerusalem mite chu agamsunguva konin gamla tah a nakai mangun, Greekte koma soh-in najoh mangtauve. 7 Tua hi najohna muntin chenguva kona kahinpuidoh kit ding ahitai. Amaho nabol bang banguva nangho kabol ding nahiuve. 8 Nachateu numei pasal jouse Judah mite koma soh dia kajohsah diu; amahon gamla tah, Sabea mite koma ajohson diu ahi. Kei Pakaiyin kaseisa ahitai. 9 “Hiche thupeh hi namtin lah a gaphong leuvin, ‘Galkon din kigouvin, gal-hang jouse koukhom’un, Nasepaiteu abonchan khom’un, Galsat din kijot’uvin! 10 Langkon tupeh chu chemjamin kikhen’uvin, Thih kangkui chu teng chan khengun, Mi thabei geiyin dal asat ding ahi. 11 Kinoloiyun hunguvin, Jetle vei, sah le lhanga kon namtin vaipi Phaichama hung kikhom loiyun,’ tin seiyun,” ati. Vo Pakai, hiche ho sat din Nasepaite hinsol lhan! 12 “Namtin vaipi kigouva, Thutanna phaichama hung kikhom diu; Hikoma chu jetle vei, sahle lhang Namtin vaipi thutan dia Kei-Pakai katou ding ahi. 13 Agilou behseh jengui, Chang-at’in at’un lang; Lengpitwi let lhah geiya Lengpiga chilna khuh akichil bangin chil’uvin,” ati. 14 Mi asang sangin thutanna phaiya akitit’un, Hikoma hi Pakai Nikho hung lhung loi ding ahi. 15 Nisa le lha athimtan, Ahsite jong avah tapoi.

Pathenin amite vang aboh

16 Zion mol’a konin Pakai akisenin, Jerusalema konin othong leuvin thu aseiye; Lei le van a kithing leuvin, Pakaiyin vang amite ahuh ding ahi. 17 “Chuteng Pakai na-Pathen kahi nahet ding ahi Israel. kalhang tehng Zion cheng kahi. Jerusalem chu khopi theng hintin, Gamchom miten gal’a ajo kit louhel diu ahi. 18 Chuteng molsang jouse lengpilei dimsoh a, Molle lhanga gancha dimsoh ding; Judah gam luidang twi dimsoh ding; Pakai Houina kona luiding khat hung longa, Acacia phaicham achapnou didng ahi. 19 “Egypt gam nelgam soh a, Edom gam ahomkeova kijam ding; Judah gam adelkhum’uva Themmonabei mi athagam jeh-uva chute ding ahi. 20 Amithengteu phu kalah ding, Themmona nei chu kakhen lou ding ahi. 21 Judah le Jerusalem tonsot chenna kineiya, Kei- pakai hi Zion molsanga cheng ding kahi,” ati.

Amos 1

1 Hiche ho hi Tekoa khoa kelngoi ching mi Amos thusei ho ahi. Ling kiho masang kum ni na, Judah gama Uzziah lal lai, Israelgama Jehoash chapa Jeroboam lal laiyin, thil hijat hi Pathenin Israel thudol’in aphongdoh tai. 2 Amos’in aseiyin: “Zion lhanga Pakai akisenin, Jerusalema konin a-ogin akithonge. Hamhing jouse agopsoh tan, Carmel molsang hampa ageosoh tai,” ati.

Pathenin Israel kinaipiho thu atan

3 Pakaiyin asiyin, “Damascus kho mite achonse se jengun, hijeh a hi talen kamatsah tei didng ahi. Galead mite sei theilouvin abolseuve. 4 Hijeh a chu Hazael sahdoh leng inpia mei kahal’a, Benhadal lengpa kulpi jouse akahvam ding ahi. 5 Damascu khopi kelkot jouse tumbong ing ting, Aven phaiya chengte le Betheden a vaihompa kadeldoh ding ahi. Syria gama chengte chu Kir gama sohchanga min akai diu ahi,” ati. 6 Pakaiyin aseiyin, “Gaza mite achonse se jengun, hijeh a chu talen kamatsah tei didng ahi. Mihem nam khat apumpin Edom langa soh-in ajoh chai hel’uve. 7 Hijeh a hi Gaza kulpi pal jouse kahal’a, akulpi jouse akah lhah ding ahi. 8 Ashdod khopi le a Ashklon khopia vaihom ho kalahdoh ding ahi. Ekron khopi talen kamatsah a, Philistinete amoh chengse thigam ding ahiuve,” ati. 9 Pakaiyin aseiyin, “Tyre mite achonse se jengun, hijeh a chu talen kamatsah tei ding ahi. Mihem nam khat apumpin soh-in Edom gama ajoh chai hel’uvin, jol le gol’a kitepna asemsau jong anit pouve. 10 Hijeh a hi Tyre khopi pal jouse kahal’a, akulpi chengse akah lhah ding ahi,” ati. 11 Pakaiyin aseiyin, “Edom mite achonse se jengun, hijeh a chu talen kamatsah tei ding ahi. Asopiteu Israelte chu sadel’in adel’un, voujang natpina aneipeh pouve. Alung hang han gjengun, lung damlou hel’in aum’uve. 12 Hijeh a chu Teman khopi kahal’a, Bozrah kulpi chengse akah lhah ding ahi,” ati. 13 Pakaiyin aseiyin, “Ammon mite achonse se jengun, hijeh a chu talen kamatsah teiding ahi. Gam keh letna dia gal asat laiyun Gilead nupi gai geiyin ache jengui. 14 Hijeh a chu Rabbah khopi pal jouse kahal’a, akulpi chengse akah lhah ding ahi. Chuteng gal kisat khosam kithonga, kisatgin chu huise le gose kitho bang ding ahi. 15 Alengpau le avaipote chengse sohchang dia kitol diu ahi,” ati.

Amos 2

1 Pakaiyin aseiyin, “Moab mite achonse se jengun, hijeh a chu talen kamatsah tei didng ahi. Noise manjen she-in Edom lengpa gabuh jouse ahalvam’un vutdi asohsah-ui. 2 Moab gamsung kahal ding, Kerioth kulpi jouse kalhasoh didng ahi. Sepaiten sumkon mut’a kholhang asap tengu, Moab mite chu gal husa thigam diu ahi. 3 Moab gamsung vaihomte le gamsung lamkai jouse katha ding ahi,” ati. 4 Pakaiyin aseiyin, “Judah mite achonse se jengun, hijeh a chu talen kamatsah tei didng ahi. Kahilna la angaipouvin, kathupehho jong anit pouve. Apu apateu hou Pathen dihlou hon apui chatvaiyu ahitai. 5 Judah gam kahal’a, Jerusalem kulpi jouse akahvam ding ahi,” ati.

Israel chunga Pathen thutan

6 Pakaiyin aseiyin, “Israelte achonse se jengun, hijeh a chu talen kamatsah tei ding ahi. Abat salel milungdih ho le kengchot to khat man jeng jong lepeh joulou vaichate soh-in ajoh-uve. 7 Mi lhasam le panpi ngaite chotphan aneiyun, vaicahte lampia aneh doh-ui. Apa le achapan soh-nungah khat akitimatpi gel lhonin, hitobang hin kamintheng asuboh tauve. 8 Pathen lhaina muntin a vaichate thil tun man a alah-u pon sil’in alum’ui. A-Pathenu Houin sunga jong sum batman a alah-u ju adon jiuve. 9 “Ahivangin kamite, nang ho khohsah jal’a, gangpi tah a tah, cedar thing san a sang Amor mite geiya kasuhmang ahi. 10 Egypt’a konin kahin puidoh-un, kum som li sungin gamthip noiya kapuilen, Amor mite gam chu nangho kapeuve. 11 Nagollhangteu phabep Themgaovin kapanssah-in, adang phabep jong Nazirin kapansah-e. Kasei hi dih lou ham Israel te? Kei-Pakaiyin kasei ahitai. 12 Ahinla Nazir ho ju nadonsah-un, Themgaoten kathu aseiphong diu nakhah-ui. 13 Tua vang toljepna kanei diu, changing kangtalai adelnem kabehsah ding nahiuve. 14 Mi kaljangtah jong jamdoh lou ding, thahat’a jong thabeiya, sepaite jong kihinso jou lou diu ahi. 15 Thal thempa jong pang jou lou ding, kaljang jong jamdoh man louva, sakol touthemho jong kihinso jou deh ponte. 16 Hiche nikho chule sepai hangpenin jong manchah paiya jamding ahi,” ati.

Amos 3

1 Vo Israelte, Egypt’a kona ahinpuidoh nam pumpi, nachung changuva Pakaiyin asei thu hi ngaiyuvin. 2 “Leiset namtin vaipi hijat lah a kahet le kakhohsah-nang ho bou nahiuve. Hijeh a chu nachonsetnau jong khoh deh a kigel, hicheng jeh tah a chu talen kamatsah tei ding nahiuve,” ati.

Themgaopa natoh ding

3 Kihoutoh masa louva mi ni kholjin khom nam? 4 Sa manlou gamthip’a sakei kitum nam? Mat khah neilou sakei nou akosunga kithol lem? 5 Thang kampeh louva vacha thanga oh ngaiyam? I-toh khah louva thang jangkam kipel ngaiyam? 6 Khopi sunga gal sumkon kimut teng mipi kicha louva um theiyem? Pakai sol tilouva khosunga manthahna lut ngaiyam? 7 Alhacha Themgaoho koma phongdoh masa louvin Hatchungnung Pakaiyin athilgon ima atongdoh ngaipoi. 8 Sakei kisen teng kicha lou didng koi ham? Hatchungnung Pakaiyin thu asei teng, athusei phongdoh lou ding koi umngaiyum?

Samaria manthahna

9 Egypt le Ashdoh khopi leng inpi dunga chengte koma gaphongun, “Samaria kimvel lhang sang joudsea hung kikhom’un, akhosunga kinahla le kitonona, thilse kibol chengse khu veuvin,” tiuvin. 10 Pakaiyin aseiyin, “Hiche miho hin ain jouseu pumhat le dih louva kichom doh thilkeo adip’un, lungthenje jong ahepouve. 11 Hijeh a chu melma khat’in agamsungu umchah-in tin, akulpi chengseu asuhmanga, a-in ho’u jong achomgam ding ahi,” ati. 12 Pakaiyin aseiyin, “Kelngoi chingpan sakei nehmoh kelngoi keng ni ham ahiloule abilkol khatseh ham amudoh banga, tua insung choldo mun nomtah tah a aning anop’a chon Samaria khosung mite amoh themcha bou hingdoh diu ahi. 13 Tun ngaiyuvin, Jacob chilhah ten, Thanei Hatchungnung Pakaiyin aseiyin, 14 ‘Israel achonset jal’uva talen kamatsah ni le Bethel a maicham sumang ing ting, maicham ningli saki chengse kiheh bonga tol’a lhamang diu ahi. 15 Phalbi lai le nipi lai in jouse jong lhu lhama inngem soh diu, in len chengse jong kisumang ding ahi,’ tin aseiye,” ati.

Amos 4

1 Hiche hi ngaiyuvin Samaria khosung numeiho, Bashan phaiya kivah thao bongpi banga kivah thao ho, tahlelte bolsea, vaichate sugenthei, najipateu henga jut hum jing jeng ho! 2 Hatchungnung Pakai hi athen bangin akihahsel’in, “mihon thihkoiya nakoiyuva, amichang cheh thihkoiya nga kiman banga namatna diu nikho hung lhung ding ahi. 3 Pal chim anaipen koma nakailut’uva polama napai mang diu ahi,” ati.

Israel’in kihilna asanda

4 Hatchungnung Pakaiyin aseiyin, “Vo Israelte, Bethel a namuntheng phunguva cheuvin, deilheh nahiule gachonsetau! Gilgal’a cheuvin najochanin chonseuvin! Cheuvin, jingkah seh a kilhaina din dancha hintol tol jengun, nithum lhinseh le hopsom toh toh jenguvin1 5 Kipat’un thangvahna din changlhah thilto toh toh jengucin, chule natoval jeh-un kithang-at at jengun! Hitobang thil ho holnom nahiuve. 6 “Nakhopi jouseu kel lhahsah Kei kahin, ahivangin kaheng nahin jon deh pouve. 7 Na-anche louhingun gotwi lhahsah lou Kei kahi, Khopi khat din go kajuhsah-in, achom khat din kavotangin, loujao khat din go kajuhsah-in, achom khat din kavotange. 8 Dangchah a thi din naum’un, khopi tam tah a min kho chom khat’a twi thal ding kinemin acheuvin, donkham cha jong amupouve. Hichan geiyin jong neihin jon deh pouve. 9 “Nalhosoh ga chengseu semheo din huise kalansah-in, nahonlei jouseu le nalengpi lei jouseu, natheichang phungu, chule olive thingna jouse khaokhoten anegamtan, hichan gei hin jong neihinjongpouve. 10 “Egypt s kalansah tobang gamna hise kalansah-in, nagollhangteu galmuna kathat gamin, nasakolteu kalahpehsoh hel’in, na-ngahmun dunguva thilong monsa uithe thu kanahsah-un, ahivangin neihin jondeh pouve. 11 “Sodom le Gomorrah kabolna bangin abang bang kasumangun, ahingdoh cheng jong gamkang ka akiloidoh mei leoheosa molkang nabangun, hichan gei hin jong neihinbel deh pouve,” tin Pakaiyin aseiyin; 12 “Vo Israelte, hijeh a chu talen kamatsah ding ahiuve. Hita kabolgot’u ahitan, kathutanna thoh din kigo jengun,” ati. 13 Pathen hi molle lhang huile go sempa ahin, Alunggel mihemte ahetsah jin; Senlai nisa jong jan asohsah theiye. Leiset sanglai molvum vuma kengto angam’e. Pakai Pathen thaneipen kiti hi Ama min ahi!

Amos 5

Lung heina dia kouna

1 Vo Israel, hiche thivui la kasha khumu hi ngai tem’un: 2 Nu-ngah tobang Israel alhutai, Kiphongdoh kit louhel ding ahi! Donlouvin tol’a akijamtan, Akaithou ding abeitan! 3 Hatchungnung Pakaiyin aseiyin, “Israel sung khopi khat’a galkon sepai sang khat soldoh thei chun, ja khat bou ahung kile kit’e. Khopi khatman jakhat asoldoh le som khat she ahung kilei,” ati. 4 Pakaiyin Israelte jah a aseiyin, “kaheng hinjon’un kihinsouvin! 5 Pathen hou didn Beersheba a chedauvin, Bethel’a jong neihung hol dauvin, Bethel chu mohseh soh iddng ahi. Gilgal’a che dauvin, amite min gal-hinga akai mang diu ahibouve,” ati. 6 Pakai kom jon leu chun hinlo jo’uvin nate. Nache daule Israelte chunga mei-am kisunkhum hung bang ding ahi. Hiche meiam chun Bethel khosung mite kavamin tin, aphelmit jou umponte. 7 Mipi achan ding lom lepthol’a, thudih dunghei vaihei tho loi ada nahiuve! 8 Pakaiyin ahsi hijat asemin, Bombel le ngambom lungthu jong asem’e. Muthim jinglai avahsah-in, Sunlaipi mu athimsah theiye. Twikhanglen twi achopdoh-in Leiset tolhanga aphi lhai. Amin jong Pakai ahi. 9 Ahat apaote le akulpi jouseu asumangtai. 10 Vo thutanna phunga thudih seite hotbol’a, thudih lou nelkal ho kidintepi jing ho! 11 Mi vaichate bolsen, aching jouseu inhoi tah tah nasah-uva cheng thei louva, lengpilei hoitah tah a naphusau lengpitwi nadon lou diu ahi. 12 Nachonset melsetjeu le naboljat’u thilse kahe jinge. Mipha bolsen, nehguh nalauvin, thutanna phunga vaichate themchan ding napheltan’ui. 13 Hitobang phat pha lou laiya umthim beh chu chihhoijo ahitai. 14 Nahin theina diuvin thilse boldan, thilphajoh bol’uvin. Chutile nasei bangun Pakai Pathen thaneipen chun naumpi tahbeh diu ahi. 15 Thilse hotbol’un, thilpha boljo’uvin, chule thutanna phunga thudih lensah-un. Chutile tegeiya hingna lai hiche nam mite hi Pakaiyin ahepi thei mai ahi. 16 Hiti hin Pakai thaneipen Pathenin aseiyin, “Kholai dung jousea ka le mao o-thong ding. Thi-opte lunghempi dinga loubolte geiya kikoulo ding ahi. 17 Lengpilei lai tina mi kap’intin, nangho talen kamatsah ding jeh a hicheng hi soh tei ding ahi,” ati. Pakaiyin aseitai. 18 Akineppite din Pakai Nikho chutijat umtah ahi! Hiche Nikho chun ipi thilpha nasodoh peh diu ham? Nangho din khovah hilou, muthim khojin nikho ahibouve. 19 Sakei ginna jam’an savom ato tobang ahibouve. Insunga jamlut tobang atuhnaa gul’in achuh tobang ahi. 20 Pakai Nikhoa chu mu thim ding, kho vah lou ding ahi; lung navah bei, lung jin nikho ahi. 21 Pakaiyin aseiyin, “Nakut bol jouseu kahon, kathoh nampoi! 22 Pumgo thilto bol’un, changing kilhai jongleur chunsang ponge; kahenga to dia navah thaochet’u ganchate jong sanpeh pouvinge. 23 Thumje jua la nasah-u jong ngauvin, naselangdah gin’u jong kangai nompoi. 24 Chusangin thudih chu vadung twilong bahsah-un, adih chu kantih bei vadung long bahsah tau. 25 “Vo Israelte, kum somli sunga gamthip laiya kapui leu chun kilhaina gantha le thilto ka-ngeh poi. 26 Ahinla tua doilim kisem Sakkuth Pathen leng le ahsi pathen Kaiwam milimho nahou phat’un, 27 Damascus khopi kalpeh a gal-hinga kakai tengu nakipohle diu ahitai,” tin asieyin ahi, Pakai, amin thaneipen Pathen kiti chun.

Amos 6

Israel kisuhmang

1 Ohe nadau ahi-Zion lhanga nomtah a chengte, Samaria khopia lung mongtah a um, hiche nam lentah Israel milen milalte, mipin akithopi dia angaichat jing ho! 2 Calneh khopi gaveuvin. Hamath khopi minthang gaveuvin, kitolsauh-un Philistinete khopi Gath gaveuvin. Hicheng hi Judah le Israel lenggam te ni sanga phajo mong am? Agamu khu nang ho gam sanga lenjom? 3 Manthahna nikho hung lhung lou din naseiyun, nathilbol chengseu hinla anaisah tel tul’e. 4 Ohe nadau ahi-saihaa kisem jalkhun chunga kijaole lea, kelngoi thao lailaiya kivah ho! 5 David boldan danin la nabol’un, semjang saiyin nasaiyuve ong! 6 Khon letlha hel hel ju nadon’un, gimnamtui pen nakinu’vin, Israel manthahna lung gimpi louvin na-um’uve. 7 Hijeh a chu min gal-hinga akai masah pen ding nahiuve. Chuteng nakut’u le golvah kibol kit lou ding ahitai. 8 Thaneipen, Hatchungnung Pakaiyin hitin aseiye, “Israelte kiletsah hi kahoi, a-in’u loupe tah tah jong imacha ding katipoi. Akhopiu le asunga thil jouse amelmateu kapeh ding ahi,” ati. 9 Insung khat’a mi som hingdoh nah nah jong thi thou thou ding ahi. 10 Mithipa hengle kom, thivuiya pang chun alongu insunga akaidoh thoding ahi. Thivui pan insunga umpen pen jah a, “Khatbeh to naumkhom lou ham?” ati ding ahi. Chuteng ogin khat’in, “Aumtapoi,” tinte. Chutah le thivuipan, “Paopoh hih-in! Pakai min geiya iphah poh lou diu ahi,” tia asei ding ahi. 11 Pakaiyin suhmang dia asei teng ni lentah tah hihen neocha cha hijongle ahalsi sia leng mang jeng thei ahi. 12 Songpi chunga sakolte lhai theiya, min Twikhanglen langkon a akai theiyum? Nanghon akaleh beh-in thudih gutwi nasouvin, thildih dih lou nasouve. 13 Lodebar khopi nalah-u nahoithopiuvin ahi. Kiletsah tah-in, “Karnaim khopi ilah jengu iha lheh-ui,” natiuve. 14 Pakai thaneipen Pathenin, “Vo Israel nagamsungu lo dia gamchom mi sepaite kahinsol ding ahi. Hicheho hin sahlam Hamath lamlen a pat lhanglam Arabah phaicham geiya nabol hesoh diu ahi,” ati.

Amos 7

Themgaopan khaokhote amu

1 Hatchungnung Pakaiya konin mu kaneiye. Kathilmu naa hi-lengpan hamhing a-at nung, hamdong thah hung kepat dontah-in Pakaiyin khaokhote simsen lou asemdoh tai. 2 Hiche mu kaneinaa hin-khaokhoten gamsunga ipi hile adong lai lai-hamhing jouse anechaiyun, hijeh chun kenjong, “Hatchungnung Pakai, mipi hi ngaidam jengin! Athigam lo diu ahitai! Alhom’un lhasam tah ahibouvui,” tin kaseiye. 3 Pakaiyin lung aheiyin, “Namu bang hin kabolda tante,” ati.

Themgaopan Mei amu

4 Hatchungnung Pakaiya kon thil khat kamu kit’e. Hichea hin Pakaiyin amite maiya halgam agoi. Meipi hin vannoi Twikhanglen lentah geiyin akavam jengin, gam leiset jong akapantai. 5 Chuphat’in kenjong, “Vo Pakai Pathen, namiten iti addoujou ding ham, nga jengin-alhom behseh-un lhasam tah ahiuve!” tin kataove. 6 Pakaiyin lung aheiyin, “Hiche jong bolda ding hitante,” ati.

Themgaopan songkhai intena amu

7 Pakaiya kon mu khat kanei kit’e. Hichea hin Pakai chu songkhai intenaa kitetoh a kigen bang koma adingin, songkhai intena chu achoiye. 8 Pakaiyin kajah a, “Ipi namun, Amos?” tin eidonge. Kenjong, “Songkhai intena khat,” kati. Hichun Aman, “Bang onsa tobang kamite tetohna dia hiche songkhai intena hi Kaman ahi. Amaho talen matsah kagot hi lung hei lou ding kahi. 9 Isaac chilhahte doiphung jouse suhmang ding ahi. Israel muntheng geiya ahomsa kijam ding ahi. Jeroboam lengpa leng vai neina kasuhbei ding ahi,” ati.

Amos le Amaziah

10 Bethel a Thempu Amaziah hin Israel lengpa Jeroboam henga thu athot’in, “Mipi jalah a Amos hin nang demna jeng aseiyin, athusei hi gamsungin adou jou tapoi. 11 Amos sei chu, ‘Jeroboam galmuna thi ding, Israelte hi agamsunga thi ding, Israelte hi agamsunguva kona min gal-hinga akai mang diu ahi,’ tia asei ahi,” ati. 12 Amaziah hin Amos aphoh-in, “Vo mitva neipa navaltai! Judah gam a kile kit’in chukoma thu gaseitan. Chule mihon tohman penauvinte. 13 Bethel a vang thu hung seikit hih-in. Nampi Houin, lengpa pathen houna mun ahi,” ati. 14 Amos chun, “Kei hi tohman neiya gaothusei Themgao kahipoi. Kelngoi chingmi, theipi na kivei kahi. 15 Ahinla Pakaiyin kelngoi ching kahinaa eikoudoh a amite Israelte koma gaothusei dia eisol ahi. 16 Hijeh chun Pakai thusei ngaiyin. Israelte kaphoa, gaothu kasei ding najah dai. 17 Ngaiyin Amaziah Pakaiyin hiche hi naseipeh ahi, ‘Najinu kholai dunga notia panga, nachate galmun a thisoh diu; nagamsung kihomtel tel’a midang kipedoh ding, nangtah jeng jong chiding namdangte gamsunga nagathi ding ahi. Thon louhel’a Israelte hi agamsunguva kona min gal-hinga akaimang tei diu ahitai,’ tia asei ahi,” ati.

Amos 8

Theiga paipeh dimset

1 Hatchugnung pakaiya konin mu khat kanei kit’e. Hichea hin theiga dimset paipeh khat kamui. 2 Hichun Pakaiyin, “Ipi namun, Amos?” tin seidonge. Ken jong, “Theiga dimset paipeh khat,” kati. Hichun Pakaiyin, “Kamite Israel beina ding ahung lhungtai. Talen matsah kagot hi hai taponge. 3 Hiche nikho chuleh leng inpia la kisa jouse lunghem kana kaheidoh ding ahi. Muntin a thilong jeng thilong jeng akijam ding, min thip beh cha apai pai jeng diu ahi,” ati.

Israel manthahna

4 Gamsunga vaichate sumanga, neilelte kengchotpha neihom hiche hi ngaiyuvin. 5 Nangho pin, “Choldo nikho ho beivah vah hen chang kijoh leu hen. Choldo Nikho beivah hen thil kijoh loi leh. Thil manval val lah a, thiltena lhem a te ding, thil cho le thiljoh ho lepthol’a thiltena dih lou kimang ding ahi. 6 Suhlou chang manmo jong manlu tah a kijoh a, a bat salel, kengchot to khat man jeng jong pejou lou vaichate chu soh dia ikichoh diu ahi,” natiuve. 7 Pakai Israel Pathen kahisel’in aseiyin, “Thilse abol chengseu sumil ponge. 8 Ling kihot’a gamsung mi abonchauva lung hesoh diu ahi. Gam pumpi kihot ding . Nile va dung banga kinuh lap lap ding ahi. 9 Sun laiya nisa kalhumsah a, khovah laiya leiset kathimsah ding phat hung lhung ding ahi. Kei-Hatchungnung Pakaiyin kasei ahitai. 10 Golnop kut nabol jouseu thivuina kaheidoh a, kipa la nasah chengseu lunghem kana kaehidoh ding ahi. Sam vouchaiya khaodip pon kasilsah diu, chapa khatseh thi kapi minu le mipa kabahsah diu ahi. Hiche nikho chu a chai ni geiya thoh lel hi ding ahi. 11 “Gamsunga kel kalhahsahna ding phat ahung lhunge. Mipi kel thoh ding chu neh le chah ngaichat hipontin, twi ducha dangchah jong hipouvinte. Pakai thusei ngaicha gilkel le dangchah hiuvinte. Kei-Hatchungnung Pakaiyin kasei ahitai. 12 Mipi hin sah le lhang simle mal adel le jeng diu ahi. Muntin a Pakai thusei del leuvin tin, mu la mudoh deh pouvinte. 13 Hiche nikho tengle numei pasal khangdong thahat lai lai jong dangchah a lhu lham soh diu ahi. 14 Samaria khopia milimdoi pan a kihahsel ji, ‘Dan a pathen jeh, Beersheba pathen jeh,’ tia sei chengse chu dinlhuhsoh hel diu, thou kit lou diu ahi,” ati.

Amos 9

Pakai thutanna

1 Maicham phunga Pakai din jing kamun, thu apen, “Houin khompi chengse luvum chu havoh voh-in von lang, in pumpi kilingsoh hen. Vojal’in mipi luvum a kitajalsah tan. Athimoh chengse galmun a kathagam ding ahi. Ahin gdodh ajamdoh beihel ding ahi. 2 Noimigam geiyin jamsuh jongleur, kamatdoh tei tei ding, vanchung geiya kaldoh jongleur, kaloi lhahsoh ding ahi. 3 Carmel molvum a kisel jongleur, kaholdoh a kamasoh didng ahi. Twikhanglen noiya kisel jongleur gul-lhempi sol ing ting kachuhsah ding ahiuve. 4 Amelmateuvin gal-hinga akai tengle, athagam diuva kaseipeh ding ahi. Kithopi daa suhgam kagot mong mong ahitai, “a ti. 5 Hatchungnung, thaneipen Pakaiyin Leiset atham leh ling akihot’in, Leichung chengte alunghemsoh tauve. Leiset pumpi Nile vadung bangin akinuh lap lap’e. 6 Pakaiyin van a in asan, Leiset chunga vanthamjol adal’e. Twikhanglen twipi achopdoh-in, Leiset chapnou nana mange. Ama hi amin Pakai ahi! 7 Pakaiyin aseiyin, “Vo Israelte, nangho hi midang to ichomin kagelpon, Sudan mite bangin kagel’e. Nangho Egypt a kahin puidoh bang hin Crete a konin Philistinete kahinpuidoh-in, Kir a konin Syria mite kahin puidoh-e. 8 Kei-Hatchungnung Pakaiyin hiche chonset dimset Israel lenggam hi kave vei, leiset chunga kasuhgam hel ding ahi. Jacob chilhahte vang abonin sugam ponge. 9 “Israelte hi tengsa changchi kiloh chil banga kalosah ding, namtin vaipi lah a kalothangsoh a, pannanbei chengse kapaidoh ding ahi. 10 Kamite lah a chonset chengse galmun a thiden diu- ‘Pathenin thilse eiphahsah pouvinte,’ ti jouse thisoh diu ahi,” ati.

Khonunga Israel kisemphat ding

11 Pakaiyin aseiyin, “Ingemsa tobang David lenggam kasemphatna ding Nikho khat ahung lhunge. Apal jouse semphang ting, katundoh kit ding ahi. Kasah phat’a masang laiya tobang kahisah ding ahi. 12 Chutengle Edom gamsung jolou chengse Israelten ajo diu, Keiya hisa namtin vaipi ajotho diu ahi,” ati. Hiche sosah ding Pakai chun aseitai. 13 “Nikhoho chu ahunglhunge,” tin aseiye Pakaiyin; Loukaipan chang-atpa aphah thu ding, Lengpitwi childo pa Lengpiga loupan aphah thu ding ahi. Mol le lhang jouse lengpitwi dimsoh a, Alhang lhganga hoh a long ding ahi. 14 Kamite agamsunguva kahin puilut kit’a, Khopi gemsa jouse sephaa cheng kit diu ahi: Lengpilei bol’a kivah diu; Honlei bol’a kivah ding ahiuve. 15 Kapehsa gamsunga kamite kachensah ding, Kikalkang kit lou diu ahitai,” ati. Pakai na-Pathen’uvin aseitai.

Obadiah 1

1 Obadiah gaothusei chu hiche hi ahi: Edom mite chung thudol’a Hatchungnung Pakai thusei chu hiche hi ahi.

Pakaiyin Edom talen amatsah ding

Pakaiyin asolle chu namtin henga asol’in, keihon athusei kajatauve: “Kigouvin, Edom sat din kontaute,” atiuve. 2 Pakaiyin Edom jah a seiyin, “Lhasamin nalhang ting, Namtinin nanoise ding ahi. 3 Nahoi tho nan nalhem lhan, Nakhopi kulpi songthum jeng ahin, Molvum a in kisah nahi; Hijeh hcun naseiyin, ‘Eisu lhu jou ding koi ham?’ nati. 4 Na-in chu muvanlai bu banga sangtah a nasah a, Ahsite to akivet chep jeng vangin, Kaloilhah a kakai lhah ding nahi. 5 “Janteng gucha ahungle alahnom bou alai. Mihon lengpiga alo teng them khat asalhateiye. Nang vang namelmaten nasuhgam hel ding ahi. 6 Esau chilhahte, nagou jouseu min achomsoh tai. 7 Napanpi ten nalepthol’un, nagamsunga konin nadelmangtauve. Chamdel’a nalenpiten gal’in nabol’un najoutauve. Ankong khat naso khompiten kipalna thang nakampeh-ui. Amahon nathudol aseiyun, ‘Achihna hoiya um hitam?’ atiuve. 8 “Edom talen kamatsah ni leh amichingteu kasuhgam a, achihnau aboncha kasuhbei ding ahi. 9 Teman gal-hangte tija lih diu, Edom gamsung sepaite aboncha min athagam ding ahi.

Edom talen matna jeh

10 “Nasopite, Jacob chilhah ho nachomgama natha jal’a, nakisugam hel ding, a-itih a jum thoh a na um ding ahi. 11 Melmaten akelkot jouse aphutjal nikho, nangin jong napeldoh ni leh, Jerusalem gou jouse pomanga kihomsoh gamchom miho chutoh nabah ding ahi. 12 Judah gama nasopite hamset chu nakipapi lou ding dol ahi. Ahamset nikhouva chu nakipa lou ding, agim nau chu nuisat hoh a nanei lou ding ahi. 13 Kamite khopi sunga chu agenthei hesoh nau nuisat a, ahamset nikhouva agou jouseu chomgam dia nalut lou diu dol ahi. 14 Ajamdoh go ho mantan dia lamsom ajong nadin lou ding ahi. Ahamset nikhouva amaho hi amelmatau khut’a napehdoh lou ding ahi. Pathenin namtin vaipi thu atan ding 15 “Kei-Pakaiyin namtin vaipi thu Katanna ding nikho anaiye. Vo Edom, mi nabol banga nakibol ding ahi. Napehsa chu nachan kit ding ahi. 16 Kamiten talen ju kha tah adontauve, ka lhang theng chunga chun, ahinla akimvel’a cheng namtin vaipin akhacheh talen ju adon diu ahi. Ju donchimset’untin leng mang jel diu ahi.

Israel galjo

17 “Zion molsanga phabep hung jamlut’un tin, alhang jeng jong muntheng soh ding ahi. Jacob chaten agoulo gamu chu alo kit diu ahitai. 18 Jacob chate le Joseph chate chu meikou bang jeng diu, meiyin changpol akah banga Esau chate asuhgam diu ahi. Esau chilhah khatcha hingdoh ponte, Kei-Pakaiyin kasei ahitai. 19 “Judah gam lhanglama chengten Edom gamsung alo diu ahi. Lhumlam thinglhang bul’a chengten Philistia gam alah diu ahi. Israelten Ephraim le Samaria alah diu, Benjamin chaten Gilead alah diu ahi. 20 Israel gam sahlam a sohchang sepaite hung kile kit’untin Phoenicia alah diu, Zarephath geiya alah diu ahi. Sardis a sohchang Jerusalema umten Judah gamsung lhanglam khopi chengse alah diu ahi. 21 Jerusalema galjouten Edom delkhumintin achunga vaihom diu, Pakai amatah leng chang ding ahi,” ati.

Jonah 1

Jonah Pakai thua anunda

1 Ni khat hi Amittai chapa Jonah koma Pakaiyin thu aseitai. 2 Aman, “Khopi lentah, Nineveh a chen lang, khopi dounan thu gaseitan; khosung mite gitlou engsetna jouse kahetai,” ati. 3 Ahivangin pakai thupeh peldohna din Jonah lamchom beh a akiheitai. Joppa achen, Spain gam jon ding kon gkhat amudoh-in, Pakaiya kona gamlat ding ngaoti nan, kong touman pen, Spain gam jon din gkong tol ho to akilhontai. 4 Ahin Pakaiyin Twikhanglen chu huise hattah anunsah-in, huise chu ahat behseh jengin, kong inneichu apeichip pai ding ahitai. 5 Kongtol ho atija lih gamtauvin, amichan cheh-in ama ama pathen kom cheh a ataovun, panpi athumtauve. Chujongle kong innei chu ajandomna din kong sunga thilkeo chu apaidoh doh tauve. Hichepat tah hin Jonah chu kong tolam indan sunga alut’in khomang meiyin a-ihmui. 6 Jonah chu kongtol lamkaipun amudoh-in ajah a, “I-atileh hitobanga ihmu a nahim? Thouloiyin na-Pathen henga panpi thumin tao loi tang-em. Chutile eilungset’uva eihinso theiyu hichu men,” ati. 7 Kongtol ho akihouvun, “hitobang hamset itolo nau hi koipen ahiding vang san’uhitin holdoh temu hite,” akitiuve. Hitia abol’u le Jonah min ahung potdoh tai. 8 Hijeh chun amahon jong ajah a, “Ngoh thei mong nahim neihil’un. Hikoma ipi bol’a jong hung nahim? Hoiche gama hungkon, ipi jat mi nahim?” tin adongtauve. 9 Jonah-in adonbut’in, “Kei Hebrew mi kahin Twikhanglen le leiset Sempa Pakai Van Pathen hou mi kahi,” ati. 10 Pakaiya kona jam ahijong chu Jonah hin aseipeh tai. Kongtol ho chu atija lih jel jengun ajah a, “Tijat umtah thil nabol hita chu men!” atiuve. 11 Huise Chula akhoh cheh cheh jengin, hijeh chun kongtol hon, “Huise thipna dia nang hi i-kalo diu ham?” tin adongui. 12 Jonah-in adonbut’in, “Twikhanglen a neisep lut leu chun huise hi thip tante. Kei jal’a hiche huise nato khah-u kahenai,” ati. 13 Hijongle kongtol hon kong inneichu twi pamchin a toldoh tei din thahangsanin apangui. Ahinla huise chu akhoh cheh cheh tan, suhna ding ahetapouve. 14 Hijeh chun Pakai henga akap jengun, “Vo Pakai, hichepa tha nagot jeh-in keiho jong neitha tha dauvin! Hitobangpi hi Nang bol ahin, Nang mopohna bou ahi,” tin ataovui. 15 Hiti hin Jonah chu Twikhanglen a aselut’u le, apet pet’in huise chu athip del tai. 16 Hiche hin Kongtol ho akichatsah tan, pakaiya akilhaiyun, Ama kinbol din akitep lo tauve. 17 Pakai thupeh jal’in ngapi lentah khat’in Jonah aval lhumtai, chule ngapi oisunga hin Jonah nithum le janthum aum’e.

Jonah 2

Jonah taona

1 Twito lam ngapi oisunga konin Jonah chu Pakai a-Pathen koma ataovin: 2 “Vo Pakai, kagimpet’in kakouvin, Nangin jongneihouve. Noimigama konin kahin kouvin, Panpi ngaiya katao najai. 3 Twikhanglen tothuh laiya neileh lut’in, Twipin eichupsoh tan, Natwipi kinonglaiyin Eilonvuh soh tauve. 4 Na-angsunga kona paidoh a um, Na-Houin theng mukit dia kinem lou kahitai. 5 Twipin wichuptan, akichisoh tai, Twikhanglenin eichupsoh hel ahitai, Twipi kidil’in eilonvuh tai. 6 Molsang bulpi kaheitan, Kot kihontih umlou Gamsung kageitai. Hijongle vo Pakai ka_pathen, Lithuh laiya konin kahingin neipuidoh-in ! 7 Kahinkho beihel kahetan, Hijeh chun nahenga kataovin, Na-Houin theng sunga Kataona ogin najai. 8 Pananbei milimdoi houten, Nang dia akitahnau apaitauve. 9 Kenvang navhachoi la sang ting, Nakoma kilhaiying ting kakitepna molsonge. Huhingna chu Pakaiya kon bou ahi!” tin ataove. 10 Hijeh chun Pakaiyin ngapi chu Jonah lodoh din asol’in, ngapin jong aseipeh bangin twi pamchin a alodoh tai.

Jonah 3

Jonah-in Pakai thu angai

1 Pakiyin Jonah koma thu asei kit’in, 2 “Kaseipeh thu hi Nineveh khopi minthang tah dudnga gaseitan,” ati. 3 Hijeh chun Jonah hin Pakai sei angaiyin, Nineveh khopi lentah, nithum sunga jong jotdoh lel a chun achei. 4 Jonah hin khopi chu ajot panin, nikhat lhumkei ajot nungin lhang asamin, “Nisom li sunga hiche Nineveh khopi hi kisumang ding ahitai,” ati. 5 Nineveh khopi miten Pathen thusei cu atahsan tauve. Hijeh chun alungheiyu vetsahnaa mitinin an ngol’a, alen aneo aboncha khaodip pon sil cheh din pha asatauve. 6 Nineveh khopi lengpan ajahsoh phat’in alaltouna akipatdoh-in, aponchol hoh lhan, khaodip pon sil’in, leivui lah a atoutai. 7 Nineveh khopi mite koma phonjal ding thu khat alhan, “Hiche lengpa le avaipote thupeh ahi Koimacha cha, mihem hihen bong ho hile, kelngoiho geiya an nei twidon um thei louhel ding ahi. 8 Mihem jouse le gancha jousen jong khaodip pon asilsoh hel ding ahi. Mitinin thilse bol angah a, chonthanghoi angah diu, lung giltah a Pathen henga tao cheh diu ahi. 9 Chutile Pathenin lung aheiya, eihinso theiyu jong ahi!” ati. 10 Lungheiya athilbol’u hi Pathenin amutai; achon gitlou nau angah jengu chu amudohtan ahi. Hijeh chun Pathenin lung aheiyin, aseisa bangin talen amatsah tapoi.

Jonah 4

Jonah lunghan Pathen mihepi

1 Jonah hin nommo san along hangtai. 2 Hijeh hin ataovin, “Vo pakai, hitia hi nabol dia kaseisa hilou ham? Hijeh a chu Spain langa jamsoh tei kanagot ahi! Milungset them le mihepi them, thoh hat jing, khoto jing lunghei ding go jing talen matsah lougo nahi kahei. 3 Vopakai tunvang kahin sangin neithat le chun phajonte,” ati. 4 pakaiyin adonbut’in, “nalunghanpi thei ipi ham?” ati. 5 Jonah chu apotdoh-in khopi niso lama agatouve. Hikoma hin lim kisonin alim noiya atouvin, Nineveh khopia e-aso ding ve-lhi jingin aum’e. 6 Hichun Pakaiyin Jonah limbel din umphung khat akesah-in ahi. Jonah-in umphung akipapi lheh jenge. 7 Ahinla ajing khovah lhah-in umphung chu Pathen thusah-in lungin anen athitai. 8 Nisa son Pathenin niso lam huisa alansah-in, nisan aluchang asah peh behseh phat’in Jonah chu alhu lham pai ding a hitai. Jonah chuathi nom leo jengin, “Thi leng kadeijoi,” tin aseitai. 9 Ahivangin Pathenin ajah a, “Hiche umphung jeh a lunghanna thei ipi naneiyem?” ati. Jonah chun adonbut’in, “Lunghang dia kilom mong, thi geiya lung hang thei kahi!” tin aseiye. 10 Pakaiyin ajah a aseiyin, “Hiche umphung hi jankah a hung kehdoh, ajinga thi kit ahin, nang kesah jon ghilou nathisah hilou-ahivangin nalung natpi lheh-e! 11 Achutile Nineveh khopi lentah khu Ken ichan geiya ka-itjoh ding hitam! Ahimongin jong akhosunga khun monabei chapang mai mai jong milhing sang ja khat le sang som ni lahingin, gancha simsen lou to aumthai!” ati.

Micah 1

1 Judah gama Jotham le Ahaz chule Hezekiah lengvai poh laiyin Moresheth khoa cheng Micah henga Pakaiyin asei chu hiche hi ahi. Pakaiyin Micah henga Samaria le Jerusalem khopi te ni chung chang thudol abonchan aphongdoh-e.

Samaria le Jerusalem kachamna

2 Namtin vaipin ngaiyuvin; Leiset chung chengten jasoh keiyun! Hatchungnung Pakaiyin nangho douna aseiye. Ngaiyun, avan Houin a thu aseitai! 3 Pakai amunthenga konin ahungin, Hung kumlhan, molvum jouse achot ding ahi. 4 Achot ten gmolsang jouse jolsoh din g, Molsang jouse molvuma twilhaisuh banga phaichama longlha diu ahi. 5 Pathen douna Israelte chonsea doumah abol jal’uva thil hicheng hi hungsoh ding ahi. Israel doumah bol hi koipen mochang ding ham? Akhopiu Samaria ngoh ding ahi! Judah gamsunga milimdoi kihou hi koi themmio ding ham? Jerusalem khopi themmi ding ham? Jerusalem khopi ngoh ding ahi! 6 Hiti hin Pakaiyin aseiye, “Samaria khopi hi khogem kaso ding, lengpileiya bol thei kahisah ding ahi. Khopi sung thilse jouse phaicham khat’a kasun lhah ding, khopi bulpi khom jouse alheng lhol’a kajam ding ahi. 7 Milomdoi manlu tah tah ho kasuhgoiya, Houin a noti ho kipe chengse chu kahalvam ding, amilimdoi chengse alhuh lhuh a kise ding ahiuve. Semaria khopin hicheng hi leiphatna dia kithoina amanu ahin, tua vang melmaten munchom a doi hou dia akaimang diu ahitai,” ati. 8 Micah hin aseiyin, “Hichejeh hin kap’in maovinge. Kalung gim vetsahna sagohkeo le kengto keova kavale ding ahi. Kamkei penin peng ing ting, va-ngongsao hamin ham ing’e. 9 Samaria maha kiboldam thei lou ding, Judah jong hitobanga chu genthei thoh ding koncha ahitai; kamite chenna Jerusalem kelkot phunga manthahna ahung lhungtai,” ati.

Melman Jerusalem anailut

10 Gal ilel’u hi Gath a kamelmateu gaseipeh dauvin: nakau jong musah hih-un. Beth Leaphrah mite, nalung gim chu vetsahnan leivui lah a kilih leuvin! 11 Vo Shaphir mite, sagoh keo, jum le ja thoh-in ohchangin kitol’uvin. Zaanan khoa chengte akhopiuva konin apotdoh ngam tapouve. Bethezel kho mite lunghem najah tengu, kiselna aum loudol hetauvinnate. 12 Pakaiyin manthahna Jerusalem kom ahinlhut phat’in Maroth miten onthol ding angah lel lheh tauve. 13 Lachish a chengten sakolte kangtalai to tolloiyun. Israelte nachonset nakom’un, Jerusalem geiyin nachonset sah tauve. 14 Hijeh chun tun Judah tan Moresheth Gath lhadoh tauvin. Isdrael lengthen Achzib khopia konin panpina imacha mutapouvinte. 15 Vo Mareshah mite, nakhopiu toupha din gmelma khut’a Pakaiyin naoehdoh diu ahitai. Israel lamkai loupe the the ho jong Adullam songkoa gakisel diu ahi. 16 Vo Judahte, na-it lai lai yu chapang ho lung gimpin sam kivochai jengun. Muthong bangin lutol’in um’uvin, nachateu akikaimangin sohchangin atol tauve.

Micah 2

Vaicha bol gentheite tohman

1 Jalkhuna mitsing louva thilse jeng gel jingte ada nahiuve! Jingkah khovah vah-in, agonsau thilse chu amasapenin abol pan jengui. 2 Loumun adei le alauvin, mi thil imacha cha abit’a aum theipoi. 3 Hijeh chun Pakaiyin aseiyin, “Hahsatna lhun khumsah kagot nahiuvinm jamdoh theipouvin nate. Gim hesohna nato diu, hoi tho tah a lam najot lou diu ahitai. 4 Hiti hi ahung lhun teng, nathoh nai mihon gim hahsa khohje kihilna hiche anoiya la hi asah diu: Amangthah hel kahitauve, Kagamu Pakaiyin alamangtan, Soh a eihenteu apedoh tai,” tiuvinte ati. 5 Hichea hi Pakai mite agamsung hi akilepeh ki tphat jongle nangho chan ding umponte. 6 Mihon eihil’un kajah a, “kakom’uva thu seiphong hih-in. Nasei phong ho chengse seiphong phong dan. Pathenin eihot louhel diu ahi. 7 Israelte hi gaosap chang a nagel ham? Pakaiyin lung alhaso hitam? Hitobangpi hi abolmong ding ham? Thildih bolte dia thilpha khoto to um asei lou ham?” atiuve. 8 Pakaiyin adonbut’in, “kamite nadel khum’un, inluma choldo nom a galmuna hung kile kit ho geiyin ponsil nihchen lahpeh kit din nachang lhiuve. 9 kamite numeiho inluma konin nadeljam’un, achateu chu kavangboh changkit louhel din nahcom gamtauve. 10 Kipatdoh-in chen, hikoma lungmon abeitai. Nachonsetnauvin hiche mun jeng jong hi manthahna achuhsah ding ahitai. 11 “Hiche miten adeiyu Themgao chu jouthu le lepthol thu jeng seile lea, ‘Lengpitwi le ju nadon jing theina diuvin gaopeh nange,’ ti ho chubou ahi. 12 “Kenvang kaikhom ung ting, Israel amoh chengse kachop khom ding ahi. Akulsung jon dia kihoikhom kelngoi hon banga kahoi khom ding nahiuve. Hamdong lah kelngoite dimset banga nagamsungu hi mihem tamtah hung dim kit ding ahi,” ati. 13 Pathenin lampi semdoh-in tin, amaho hi sohchanna muna konin puidoh-inte. Khopi kelkot phujal’un tin, jalen diu ahi. Alengpau –Pakai Amatah-in apuidoh diu ahi.

Micah 3

Micah-in Israel lamkaite adem

1 Ngaiyuvin Israel vaipoten! Thudih khohsah dia kigel nang hon, 2 thilpha naho’uvin, thilse nadeijo’uve. Kamite vun nalip’un, apheu na-at lhauvin, 3 kamite nanegam tauve. Avun’u nalipdoh-un, aguu naheh bongun, aphe avouvu belsunga hontheiyin na-atpan pan’ui. 4 Pakai henga natao phat’u hung lhung ding, Aman la nahou lou diu ahi. Thilse nabol jal’un natao nau sang ponte. 5 Sum apeh tengu chamna um ding seipeh a, apeh da tengu gal hung kon jeng dia thusei Themgaoten kamite alhemlha gamtauve. Hiche Themgaoho jah a hin Pakaiyin aseiyin, 6 “Vo themgaoho, hingsot tapouvin nate! Nisan nalhum khum diu ahitai. Kamite lam hilouva napui jal’uva, Themgao thilmua jong ima namu lou diu, thilsoh ding imacha jong nasei thei lou diu ahitai,” ati. 7 Khonung thilsoh ding seiho chu aguilhun lout eng mi vetda chang diu ahi. Pathenin adonbut lout eng min avet neo diu ahi. 8 Keivang Pakaiyin A-Lhagaoeidip’in, thahat eipen, thudih le hanna eipen, Israelte chonsetna chengse kaseipeh ngamin ahi. 9 Ngaiyuvin Israel vaipote, thudih deimoa, thildih chu adih louva kheldoh ho! 10 Jerusalem khopi chu tolthana ke thudih louva natousah-u ahitai! 11 Khopi sung vaipoten nehguh akilah-un, Themputen Danthu chu tohman neiyin ahilchen’un, themgaohom sum lo nan thu aphonguve. Abonchauvin Pakaiyin aumpi dol’in akiseiyuve. “Pakaiyin eiumpiuve,” ati cheh-ui. 12 Nangho jal’a Zion lhang hi loukaiya kikaiya, Jerusalem hi khogem doh ding, Houin kisahna lhang hi gammang thim lai soh ding ahi.

Micah 4

Vannoiya Pakaiyin chamna lengvai apoh

1 Houin kisahna molsang hi Molsang pen ahina ding nikho hung lhunga, Molle lhang jouse sanga Sangjo ding ahi. Namtin vaipi simsen louvin Hiche molsang chu hinbel’in tin, 2 Amiteuvin jong asei diu, “Pakai molsanga kal’u hitin, Israel Pathen Houin a cheute. Eibolsahnom’u eihil diu, Asemsa lampia iche diu ahi. Pakai hilchahna Jerusalema hungkon ahin, Zion a konin Pakaiyin Amite jah a thu seiye,” tiuvinte. 3 Pakaiyin gamla naiya thaneitah tah Namtin vaipi kidou thu seichaminte. Agal chemjamu langkonin khengun tin, Tengcha jouse kangkuiya akhen diu, Namtin vaipi gal kon kit louva, Galsat dia jong kigo lou didu ahi. 4 Mitin lung monga um diu, Alengpilei le theichang leiya chenguva, Ahoh kicha ding beihel ding, Hiche Thaneipen Pakaiyin atepsa ahitai. 5 Mi anam namin adoi-apathen cheh ngaiyintin, akihou cheh diu, eihon vang tonsot tonsot’a Pakai i-Pathenu ihouvuva athua inun diu ahi.

Sohchanna kona Israel hungkile kit

6 Pakiyin aseiyin, “Talen kamatsah a, sohchang genthei thohte kakhop khomna din gphat ahung lhunge. 7 Elbai chatmoa, in a kona gamla tah gei ahitauvin, ahingdoh amoh chengse to abul kapatdoh a thah a, nam lentah kasosah ding ahi. Hichea pat hi Zion a pansa, tonsot tonsot geiya achunguva vai kahomding ahi,” ati. 8 Vo Jerusalem, kelngoi chingpa banga Pathenin amite achin jingna mun, nalenggam dinga khopi lenpen mun nahi kit tei ding ahi. 9 Idia hibang othonga peng nahim? Iti namei naoso nat nabah ham? Leng beiya nauma, thumop them jouse thigam jeh ham? 10 Vo Jerusalem mite, tua khopi dalha gamchang noiya nachen ding jeh-in, numei naoso nat bangin, na san kipehle le jengin. Babylon gam najot din gahitan, hijongle namelmatea konin pakaiyin nahuhhing nante. 11 Nadelkhum din namtin vaipi akikhomtauve. Amahon, “Jerusalem hi suhmang tei tei ding ahi! Hiche khopi hi alheng alhol’in jam jengu hite,” atiuve. 12 Ahivangin hiche nam mite hin Pakai lunggel ahepouve. Cahngphal kipukhoma kichilngem banga Pakaiyin talen matsah dia apuikhom lam akihet phah pouve. 13 Pakaiyin aseiyin, “Jerusalem mite, cheuvin namelmateu talen matsah-un! Aki thih to bang, atin sum-eng tobang bongchal hat’a kahatsah diu, namtin vaipi nasuhgep’uva, pumhat’a achomdoh-u neile gou chengse chu, Vannoi pumpi Pakai-Kei neipeh diu ahi,” ati.

Micah 5

1 Vo Jerusalem mite, sepaite khomsoh loiyun! Galmin eiumchah tauve! Israel lamkaipu adelkhum tauve!

Bethlehema vaipo hung dia Pathenin atep

2 Pakaiyin aseiyin, “Vo Bethlehem, Ephrathah, Judah gamsunga kho neo pen hijongle chun, nasunga kona Israel vaipo ding khat kapensah ding, aphunggui jong khanglui laipeh a to kisut mat ding ahi,” ati. 3 Hitia hi chapa nei ding nu nao pen masangsea pakaiyin amite hi amelmateu khut’a pehdoh a donda dingahitai. Chujou teng agamsung mite, gamchoma sohchangte chu amiteu tik igom kit diu ahi. 4 Ama ahung teng, Pakai thahat mangcha amite chunga vaihom ding, Pakai Pathen loupina jal’a vaihom ding ahi. Amite lung mongtah a cheng mitinin alal loupina aphondoh a, 5 aman chm alensah ding ahi.

Huhdohna le Talen matsah

Assyria miten igamdsungu adel khum’uva, i-gal pal jouseu atumboh tengu, i-lamkaiyu hat tah tah kisatpua isol siu ahi. 6 Gal manchah thahat a Assyria mite ajo diu, Assyria miten i-gamsungu adel khum tengule eihuhdoh diu ahi. 7 Israel mi ahingdoh amoh chengse chu, namtin dia Pakaiyin alhahsah daitwi dapjen le hamhing chunga gophin tobang hi diu ahi. Pathen kisonpia, mihem chunga ki-ngai lou diu ahi. 8 namtin vaipi lah a dalhah chengse chu gammang noiya hamjing lah a sakei neh hol bang diu; sakeiyin kelngoi amat khah teng, abokhum jenga, atel adah a ajan a, huhdohna thei beihel’a alha tobang hi diu ahi. 9 Israel’in amelmate jothon tin, aboncha asuhgam diu ahi. 10 Pakaiyin aseiyin, “Hiteng chule nasakolteu le kangtalai chengse kaimang in gting kasuhgam ding ahi. 11 nagamsunguva khopi chengse sumang ing ting, nakulpi pal jouseu kaphet lhahsoh ding ahi. 12 Namanchah jingo mitphel doi lathem sumang ing ting, phunsan them khat beh khenpeh pouvinge. 13 Namilimdoi jouseu le doikhom song jouse kasuhmang ding, nasemsau thil ho chibai boh kit tapouvin nate. 14 Angamsunguva nanungjai nuu-Asherah milimdoi loilhung ting, nakhopi chengseu kasuhgam dingahi. 15 Kalunghan behseh teng kathu nit lou namtin vaipi chunga phu kalah ding ahi,” ati.

Micah 6

Pakaiyin Israel adou

1 Ngaiyin Pakaiyin Israel adouna thu hi! Vo Pakai, kipat’in Israel nadouna thu seiyin; molle lhang jousen nasei ngaiyu hen. 2 Vo molsang ho, tonsot leiset bulpi khom ho, Pakai thusei hi ngai tem’un! Pakaiyin amite douna thu khoh tah aneiye. Israel hehna thu alhut ding ahi. 3 Pakaiyin aseiyin, “Vo kamite, ipi kabolpeh um? Itobang pohgih kahim? Neidonbut’un. 4 Egypt’a konin kahinpuidoh-un; sohchanna konin kahuhdoh uvin; nalamkai diuvun Mosea le Aaron chule Miriam kasol’e. 5 Vo kamite, Moab lengpa Balak chun i-nalo got’uva, Beor chapa Balaamin iti adonbut’em geldoh tem’un. Acacia ngahmun a pat Gilgal gei lampi dunga thilsoh chengse chu geldoh tem’uvin. Hicheng hi geldoh-un chuteng nangho huhhingna kabol chengse chu hedoh tauvin nate,” ati.

Ipiham Pakaiyin angeh

6 Pakai van Pathen hou dia kahung teng ipi kachoi ding ham? Pumgo thilto dia bongnou hoipen kapeh ding ham? 7 kelngoi asang sang kaiying, olive thao kanglou luiyin lonsah leng Pakai lung lhaiyin tem? Kachonset thoina kachapa peng masapen kapeh ding gam? 8 Ahipoi, thilpha chu Pakaiyin eihil tauve. Aman eibolsah nomu chu hiche hi ahi: thilsih bol ding, tantih neilouva lungset umsah ding, kneosah nun nemtah a i-pathenu to kiloikhom jing ding ahi. 9 Pakai gin chihna ahi. Aman khopi akouvin, “Ngaiyuvin khopi sunga kakhomhon! 10 Migiloute insunga chun lepthol’a alah-u gou akikhol’e. Kamah tah thiltena dih lou amangun, 11 hitobang thiltena dih loule kicheh lou mang ho hi iti ka-ngaidam thei ding ham? 12 nalah-uva mihaohon vaichate kichepnan aneiyu, naboncha mijou jeng nahiuve. 13 Nachonset jal’uva namanthahna diu thil kagon pan ahitai. 14 An nejongleu chun valou ding, kel nathoh thoh jongleur chun kheh doh nei pouvin nate; nakhendoh chengu jong galmun akasuhmang ding ahi. 15 Chang tujongleu chun na-at lou diu; olive thing thao chil jongleur chun mang thei deh pouvin nate. Lengpitwi kisem joungleu chun nadon lou diu ahi. 16 Omri lengpa le achapa Ahab thilse bol chengse najom jal’uva hicheng hi soh tei ding ahi. Ama ni umchan thilgon najop jal’uva kasuhmang diu, japi hot’a naumdoh diu ahi. Muntin a min navetda soh hel diu ahi,” ati.

Micah 7

Israel chon chatvai

1 kakinem tapo! Gilkel pet’a theichang ga holmo le lengpiga holmo kabangtai. Lengpiga jouse le thiecahngga ph alai jouse min alouheo tai. 2 Gamsunga milungdih khatcha beh aumtapoi, Pathen dia kitah a abeitai. Toltha ding changlhi geh cheh ahiuve. Mitinin agamsung mi chanpi tha din ago’uve. 3 Thilse bolthem jeng ahiuve. Vaihomte le thutan hon nehguh athum thum’un, mi thu nun theihon jong adei dei adeiyun, hiti hin akihoutoh toh-uve. 4 Apha pen le lungdih pen a kiseiho jong pannabei nangtom lah tobang bou ahiuve. Themgaote kama agihsal banga Pathenin mipi talen amatsahna ding nikho ahung lhuntai. Tun akisudong tauve. 5 Naheng nakom tahsan dan, nagol jong gingcha hih-in. Naji koma thusei jeng jong ching theiyin. 6 Tulai hin mi chapaten apateu jeng jong a-ngol bol’ui, cha numei hon ma anuteu adouvun, mouthah geiyin atehpi chengseu to akinauve; min melma anei chu a-insung mite ahiuve. 7 Kenvang Pakai ve-lhi jing ing ting, tahsan tah-in Pathen ngah jing inge, Aman eihuhhing nante. Ka-Pathenin kataona ngaiyinte.

Pakaiyin huhhingna apohdoh

8 Imelmateu ichunguva akipana diu aumpoi. Lhua ihitauvin, hingjongle ithodoh kit tei diu ahi. Tun muthima um jongleur hen Pakaiyin kho vahsah kit nante. 9 Pakai dounan ichonseuvin, chom khat vang alunghan ithot tei diu ahi. Akhonna vangle eihuh-un tin, dih louva min eibolnau chu asuhdih ding ahinai. Khovah eilhut’untin, eihuhhingu imu diu ahi. 10 Imelmateuvin hiche hi amu teng kijumso diu, “Pakai, na-Pathen hoilam hitam?” tia eidonguva melma ho chu ahiuve. Gal lel’uva min keng chotpha aneiyu, kholai lamlen dunga achil thang thangu imu diu ahi. 11 Vo Jerusalem mite, khopi pal ho semphatna ding phat ahung lhunge. Hiche tengle nagamgiu jong kikeh len ding ahi. 12 Muntina konin namiten nahengu hinjon intin, niso lam Assyria gama kon, lhanglam Egypt tama kon, Euphrates luipang dunga kon, Twikhnglen gamla tah tah a kon le molle lhang sang lai laiya hung kon diu ahi. 13 Leiset vang hi achung chengte gitlou jal’a gamthip soh ding ahi.

Israel dia Pakai dipdap

14 O Pakai, nalhensa namite hi kelngoi chingpa kelngoi chin bangin chingin! Gamthip laiya cheng jongleur, ajet aveiyuva gampha lah tampi aum’e. Masanglai aum banguvin, Gilead le Bashan hamhing phalaiya kivah-u hen. 15 Vo Pakai, Egypt’a kona neihin puidoh niu bangin thil kidang bol’in. 16 Thahat lheh jongleur namtin vaipin amu tengu kisudong diu ahi. Dongman a nakhang kisip’a kam kihup diu ahi. 17 Leivuiya gul bangin kithol’un tin, akulpi dung tin’uva hung potdoh-uva, kicha kithing thing diu ahi. Kichat jeh a Pakai i-Pathenu ahinbel diu ahi. 18 Vo Pakai, nang tobang pathen dang aumpoi; namite ahingdoh ho chonset na-ngaidamin; lunghan jing louvin, tantih beiya lungset din neideiyui. 19 Neihepi kit tei diu ahi. Kachonsetnau chotphan, Twikhanglen noilam a sonlhan nate. 20 Nakitahna le nalungset longlou namite, kapuiluiyu, Abraham le Jacob chihlhah ho hi, masanglaiya nakitepna bangin musah-in.

Nahum 1

1 Hichea kisun cheng hi, Elkosh khoa mi Nahumin Nineveh khopi thudol’a themgao thilmua amu thu kisun ahi.

Nineveh khopi chunga Pakai lunghan

2 Pakai Pathenin kidoupi koima anop lensah pon, Adouva pangte talen amatsah cheh-e. Alunghan tengleh Alethusoh keiye. 3 Pakai chu along hangvah pon, Hinla thahat tah ahin, Themmona nei chengse Talen matsah louvin akoipoi, Pakaiyin lam ajot teng leivui akitungin, Meilhang jouse jong Ama chot khut leivui ahi. 4 Aman asei teng Twikhanglen jong kang jeng, Luiddung jouse jong twi bwiya alupsah ahi. Bashan phaiya lou ho tei kanga, Carmel molsang jong go jeng, Lebanon lhanga pahcha jouse Gosoh hel jeng ahiuve. 5 Pakai angsunga molle lhang jouse killing jeng, Lhang sang jouse amasanga jolsoh jeng ahi. Pakai hung kilah teng leiset kithinga, Leiset le amite kithing jeng ahi. 6 Pakai lunghanna hingdoh jou ding koiham? Alungset tijat umtah a hingdoh thei koi ham? Alunghan mei-am kisunglha abangin, Amasanga songpi ho geiyin leivuiyin aleng’ui! 7 Pakai hi anun nemin, Gim hesoh nikhon amite ahoidamin; Aheng jon chan avetup theiye. 8 Amelmate chu twisoh laiyin atolmang abhsah-in, Ama doute chuathagam jin ahi. 9 Ibol’a Pakai douna nagonu ham? Aman nasuhmanglo diu ahi. Adou chan chu khatvei she a asuhgam ding ahi. 10 Lingnang kihel lhop le changpol gosa banga Meiya nahalvam diu ahi. 11 Vo Nineveh, nakhosunga hi thilse jeng bol mi, Pakai dou khat hun gpeng doh ding ahi. 12 Pakaiyin amite Israel jeh a asei chu hiche hi ahi: “Assyria mite hi hat hen lang tam jong leu, kisugam a amngthah diu ahi. Vo kamite, hesoh genthei kathohsah nahiuvin, avel’in bol kit taponge. 13 Nachunguva Assyria mite tha neina su lhang ting, nakan nau thih khao kabotan ding ahi,” ati. 14 Assyria mite gahna Pakai thusei chu hiche hi ahi: “Amin pu siu son le pah anei lou diu ahi. Adoi hounau houin dunga milimdoi ho kasuhmang ding ahi. Hing dia kilom ahitapouvin, Assyria mie din lhan kalaipeh tai,” ati. 15 Ven, molsanga hung sole pa khun kipana thupha ahinpoi! Ama hi gajo thu phongdoh dia hung ahi! Vo Judate, kut bol’uvin lang, giltah a nakitepnau chu Pathen peuvin. Migilouten nagamsungu gal’a abol kit lou diu ahitai. Abonchauva kisugamsoh ahitauve!

Nahum 2

Nineveh khopi chim

1 Vo Nineveh, min nahindel khumtai! Nasucheh ding thaneipa ahungtai! Kulpi geiya mi pansah-in, Lamlen dung nga sah-in! Galte to kisat din kigon! 2 Israelte hi min achomgam, masang laiya aloupina tobanga semphat kit din Pakaiyin agotai. 3 Melma sepaiten lumsan achoiyun, Avon jouseu jong asan jeng ahi. Hindel khum jeng din ago’uvin. Asakol kangtalaiyu Meisi pah lah lah abangin, Asakolteu kengto jaten ten ahiuve! 4 Kholai dunga kangtalai eijon junin alhaiyun, Kholai sunga adung avaiyin akitol’uve. Meikap bangin avahjep jep’in, Kholphe bangin akikhojen jun’e! 5 Vaihomte akoukhom’un, Malam noa kijotna kisep lhun alhuh lhuh-in alum’ui. Ahindelkhumten pal lam ajon’un, Lumho leiyin ado’uvin ahi. 6 Luipanga kelkot phung ho atumjal’un, Leng inpi sung tijat lungdon aumtai. 7 Lengnu soh-in akai tauvin, Alhachate vahui maovin amaovui. Chule dip le lai kidop’in aumtauve. 8 Twito kiting phujal abngin, Nineveh khopia konin ajam cheh tauve! “Kho ngaiyun! Kho ngaiyun!” tin akisam nan, Akinungheiya koimacha aumpoi. 9 Dangka sana kichoi’uvin! Khopi sunga gou dimset’in akikhol’e. 10 Nineveh khopi asumangun, min adalhan, akeovin akijamtai! Mihem lung kichat’in anemsoh tan; Thabeiyin khupbuh kithing thingin, Mihem mai adangsoh tai! 11 Sakei kokhuh tobang khopi hoiba hitam! Sakei noute tobang ho kivahna, Sakei challe pi kijot le na, Anoute mong tah a umtheina khopi chu! 12 Sakeichal’in sa athat jin, Sakeipi le anoute ahal hal’in aoppeh-in, akosung chu athasa Agu aphe adimset’in ahi. 13 Thaneipen Pakaiyin aseiyin, “Nakidoupi Kei kahi. Nakhangtalai jouse hall hang ting, naseipaite min galmun a athagam diu, midang nalahpeh thil aboncha kalahpeh ding nahi. Vannoiya nahusa hin hin kijadoh ki tlouhel ding ahitai,” ati.

Nahum 3

1 Vo thisan sohat khopi nada ahi! Nanei nagou mi kichomgam ding bep ahitai! 2 Ngaiyun, sakol kijep gin, Kangtalai kitah gin, Sakolte lhai gin le kangtalai kipei gin pi khu! 3 Sakol tou themten adel chum’un, Chemkol aval lah lah-in tengkol aphelap lap’in, thilong akisevum the thu jengin, Mithi long simsen ahitapoi. Thilong chunga mi akipal thu thu jenguve. 4 Noti tobang Nineveh khopin talen amantai! Manthahna lam a mijol heo hou nu! 5 Thaneipen Pakaiyin aseiyin, “Vo Nineveh khopi, talen kamatsah ding nahi! Nakeovin jam ing ting namtin vaipi kavetsah ding, Najamo jouse amudoh diu ahi! 6 Noise se le kidah dah a kabol’a Thilboh jouse kanot khum ding nahi. Namupha cham mihem chu Tija kinlih leu leu diu ahi. 7 namudoh chan nungjam a, Nineveh khopi khogem asoh tai! Voujang natpia koi ham? Alhem lung mong nom koi ham?’ tia asei diu ahi,” ati. 8 Vo Nineveh, Egypt khopi Thebes sanga naphatjoh beh am? Thebes chu Nile luidung alongin, pal’in akikhang’e. 9 Sudan le Egypt chunga vai apon, athahat akhonbei ahi; Libya jong akigolpi. 10 Ahivangin Thebes kho mite jong sohchangin min akaitauve. Kholai lamkon tin a achateu minavo lih lih jengin ahi. Alamakiteu thihkhaovin akaiyun, sohchangte lah a ahomthanguve. 11 Vo Nineveh, nang jong ju khamin ngol’in natin, melmatea konin jamdoh gon nate. 12 nakulpi chengse jong theichang ga minsa tobang ahin, theichang phung chu loh le chun aga nakamsunga lenglut jel ding ahi! 13 nasepaite jong asildap soh tan, namelmate masanga pang jou ding abeitai. Nakelkot gol jouse meiyin akahvam ding ahi. 14 Min naumchah teng don ding twi kikhol’in, nakulpi chengse kaiphan! Leingan ho chu cheh a den din chilgoi loiyin, cheh denna ding gonsan koiyin. 15 Hinla ipi bol’in tong jongle chun meiyin halvaminnatin, ahiloule galmun a min that teiyin nate. Khaokhote banginnapunge! 16 Van a ahsite sanga tamjo kivei mi nasepdoh tai! Tunla khaokhoten lhaving jah a alen mang hel bangin, abeisoh tauve. 17 Navaibolte jog khodap nikhoa bang dunga kibemchal chul khaokhote ahiuvin, nisa sat ten glen gmang jel’a, hoilam agei koiman ahet lou tobang bep ahiuve! 18 Vo Assyria kumpipa, nagam vaipote athisoh tai, namilen milalte jong akijamddap soh tauve. Namite molle lhanga akithe thangsoh-un, in a puilut jou koima aumtapoi. 12 Namaha a nu didng damdoi aumpon, namaha damtheiponte. Namanthah thusim japha chan kipah-in khut abeng beng jengui. Tang louhel’a thilse nabolnaa hoidoh jou koi ham?

Habakkuk 1

Habakkuk 2

Habakkuk 3

Zephaniah 1

1 Judah gama Amon chapa Josiah lengpa khanga Pakaiyin Zephaniah henga asei thu hiche hi ahi. (Zephaniah hi Hezekiah lengpa son ahin, Hezekiah cha Amariah ahin, Amariah cha Gedariah, Gedaliah cha Cushi, chule Cushi cha chu Zephaniah ahi.)

Pakai thutan nikho

2 Pakaiyin aseiyin, “Keiman leiset thil jouse kasuhmang ding ahi. 3 Mihem jouse, ganhing jouse, vachate le nga namkim, migiloute manthahna didng kabol ding ahi. Mihem namkim kasuhgam a, hinghoi kanei lou didng ahi. Kei-Pakaiyin kasei ahitai. 4 “Jerusalem khosung mite le Juhdah gamsung mite abonchauva kasuhgam ding ahi. Baal doi houna halsi sia kasuhmanga, koiman Baal kinbol Thempuho jong ageldoh louhel ding ahi. 5 Intingvuma kaldoh a nisa, lha chule ahsite chibai boh ho jong kasuhgam ding ahi. Kei eihouva, Kei dia tahpan dia kihalsel, chujou teng Milcom pathen mina kihahsel chan jong kasuhmang ding ahi. 6 Nungjam a hung kile kit lou, kaheng hinjon lou, apui hoi diuva kahenga taolou jouse jong kasuhmang ding ahi,” ati. 7 Pakai Nikho anaitai, Pathenin thil bola got nikho chu; hijeh chun thip beh chan um’in. Pakaiyin amite hi kilhaina gamtha banga athagot ahi. 8 Pakaiyin aseiyin, “Mi kathagam got nikho le vaipote le leng chapate chule namdangte chonchan jop jouse talen kamatsah ding ahi. 9 namdangte doi houva le adoi houvu in dimset dia miho that gama anei chasun chomgam ho chengse chu talen kamatsah soh ding ahi,” ati 10 Pakaiyin aseiyin, “Hiche nikho le chun Jerusalem khopi nga-kelkot’a ka ogin kija ding ahi. Khopi sah thahna mun a jong ka le mao ogin kija a, thinglhanglama jong ogin husa nasa tah kija ding ahi. 11 Kivei mi ho thigam ahijeh-in, ka le mao ogin najah tengu, khoto lama change kap’uvin! 12 “Hiteng chule thaomei devah a Jerusalem khosung kakhol ding, kisongtah a aning anop’a paova, ‘Itilam lam ahin Pakayin ipi abol ngaipoi,’ tia seiho chu talen kamasah soh ding ahi. 13 A-in jouseu kisuchim a, anei chengseu kichomgam ding ahi. Asah sau in a cheng lou diu, abolsau lengpi leiya lengpitwi adon louhel diu ahi,” ati. 14 Pakai nikho loupe tah chu anaitai-anai behseh jengtan, ahung kitol jel jul jengtai! Thohmo hel nikho, sepai hangpen jong lha lhop’a kap a pengjah ding ahi. 15 Hiche nikho chu lungsat nikho, gim gentheina, manthahna le mah thahna, muthim lung jinna, mitsin khojin, 16 galkon dia sumkon kimut ni, kulpi kaisa khopi ho le inchungsang ho delkhum dia gal-lhang kisap nikho hi didng ahi. 17 “Namtin mihem chunga hitobang manthahna kalhut khum ding jeh hin mitin mitcho banga kimail ele diu ahi. Kei dounan achonseuvin, tua hi athisanu teisih kisung lha bang ding, athilong, monsau tol’a kijam chap ding ahi,” ati. 18 Pakaiyin lungsat amusah nikho le asana dangkauvin jong ahuhhing lou diu ahi. Vannoi pumpi hi alunghanna meiyin akahvam ding ahi. Leiset chung cheng jouse hetman louva haisama alha ding ahi.

Zephaniah 2

Lungheina dia ngehna

1 Vo jumle ja helou nam mite! Hung kikhom loi tau, 2 pahpul’a napul kah-u, pakai lunghan deoje jun naphah masangu, Pakaiyin lunghan aphondoh masang hin! 3 Pakai thupeh nit jing, gamsung mi nun nemte, Pakaiya hung kiheilut loiyuvin. Thildih bol’un, pakai angsunga kineosah-uvin, chutile ijem tia Pakai lunghan nikho teng talen man louva nahoidoh theiyu ahi.

Israel kimvel’a vaipi manthahna

4 Gaza kho sung a koima kikhen lou didng ahi. Ashkelon kho min dalha soh- intin, Ashdod kho mite nilanga kiseljamsoh ding ahiuvin, Ekron khosung mite khosunga kona kinodoh ding ahiuve. 5 Vo Twikhanglen pamchin dunga cheng Philistinete ada nahiuve. Pakaiyin nachung thuu atantai. Khat beh jong khen neilouva nasuhgam hel diu ahi. 6 Twikhanglen pang dung gam nanei joouseu gamchangnoi soh a, kelngoi chingho ngahmun sonna le kelngoite dia neh thei hamhing dimset ding ahi. 7 Judah mi ahingdoh hon nagamsung alo diu, kelngoihon vahna aneiyuva, Ashkelon khosung in hoa jan geh diu ahi. Pakai a-Pathen’un umpintin, ahaodohsah kit diu ahi. 8 Thaneipan Pakaiyin aseiyin, “Moab le Ammon miten kamite aphin’uva ahoutom nau kajan, agamsungu jong lahpeh dia hoitho tah a hamhoi tho’u kajai. 9 Kikhel lou Hing jing Israel Pathen kahinaa kihahsel kahi-Moab le Ammon hi Sodom le Gomorrah banga kasuhgam ding ahi. Akhomun jouseu jong chikhuh soh didng, tonsot khogem a kijam a, lingle khao keh dimset ding ahi. Kamite ahingdoh chengin amaho hi chomgam’untin, agamsungu alahpeh diu ahi,” ati. 10 Thaneipen Pakai mite aphin’uva, kiletsah hoitho abol jal’uva Moab mite le Ammon mite hitobanga hi talen kimatsah ding ahiuve. 11 Pakaiyin hoh kichantin, leiset mite doihou jouse imacha lou aso ding, chutah l enamtin vaipin Pakai bou houva, agamsung cheh a chibai aboh diu ahi. 12 Pakaiyin Sudan mite jong athagam ding ahi. 13 Pakaiyin Assyria suhamngna din tha jedoh-intin, Nineveh khopi chu khogem lah asosah a, twi bwina nelgam ahisah ding ahi. 14 Kelngoite le bong ho chule satinin kolle na bou anei diu ahi, khogem lah a hin simbupi hung chengin tin, bangkot dunga ham ham diu ahi. Kotpi phung dunga va-ahte hung hamlah lah-uvinte.Inthing cedar thinga kimang jouse jong alheng lhol a kijam a, akeova um ding ahi. 15 Athahat kisonpia hamhoitho, lung mongtah a kigel khopi chu hitia hung um sing ahi. Khosung miten akhopiu chu vannoiya lengpen le minthang penin agel’ui. Itobang melsea gamsate kititna le gamthip lai hungdoh ding hitam! Ajotpa jouse kinleh leu leu diu ahi.

Zephaniah 3

Jerusalem chonset chule lhatdamna

1 Ohe ada ahi-chonset le doumah bol, mite bolgim khopi! 2 Pakai thu la angaipon, gahna jong asangpoi. Pakaiya ki-ngai lou, apanpi jong ngeh lou ahi. 3 Avaibolte sakei kisen abngun, thutan ho jong kamkei gilkelte nehmoh dagu khovahsah lou tobang ahiuve. 4 Themgaoten la khohsah neilou, mi lhem chavai bep; Thempuho jong thil theng suboh a, Pathen Danthu geiya adeilama kihei jen gahiuve. 5 Ahinla khopi sunga Pakai pansaa itih a jong thildih jen gbol ahi. Niso she le amite din thudih-in na atong jingin ahi. Hiche jong hin midih louten kumle ja helouvin thildih lou jeng abol jinguve. 6 Pakaiyin aseiyin, “Namtin vaipi kasugamin, akhopiu l ekulpi pala ho, intingvum sang jouse kasumangtai. Khopi jouse akamsel’in lamlen ho keovin akijamin, mihing abeihel tai. 7 Kabol gimna hi kamiten gel jinga, kagahna asan diu, chuteng eija lheh diuvin kanagel’e. Ahinla chomkah louvin chavai bubah-in alamkittauve,” ati. 8 Pakiyin aseiyin, “Namtin vaipi hehse dia kakipat ngah-un. Kalunghan husa thamsah dia namtin vaipi le lenggam jouse khop khom dia kagel lhuh ahitai. kalunghanna meikouva leiset pumpi kahalvam ding ahi. 9 “Chuteng namtin vaipi lung heidah ing ting, kei tilou Pathen dang koma tao louhel ding ahiuve. Kei thubou ngaitauvinte. 10 Sudan gam lang peh a thechehsa kamiten jong kahenga kilhaina thilto ahinchoi diu ahi. 11 hiteng chule neidou jal’uva mit le maim oh aum lou din gnahitauve. Kelietsah hoitho chengse tolmang ing ting, kalhang theng chunga neidou kit louhel diu ahi. 12 Mi nun nem le kineosah chengse khen in gting, kahenga panpi ngaiya hun gjing diu ahi. 13 Israel ahin gdoh chengin mi koima dih louvin bol pouvintin, jou sei lou ding, lhep lhah thu jong sei pouvinte. Lung mong le khangtouva um a, gin nei lou didng ahiuve,” ati.

Kipana La

14 Vo Israelte, kipa la sauvin! Vo Jerusalem nalungthim pumpin kipah-in! 15 Pakiyin nathohna asubeitan, Namelmate atolmangdoh tai. Pakai, Israel Lengpan naumpiuve, Kichatna ding him him aumtapoi. 16 Phat ahung lhunge mihon Jerusalme jah a, “Kicha hih-in Zion khopi! Ban-gol jesal jingin! 17 Pakai na-Pathenin naimpi jinge, Athahat’in gal najosah tai. Pakaiyin kipapin natin, Alungset jal’in hinkhothah pen nate, Nachung change kipa la santé. 18 Kut laiya kipah ho bang ding ahi,” ati diu ahi. Pakaiyin aseiyin: “hutotna ka-ngatan, Vetda nachan kasubeitai. 19 Phat ahung lhungtai! Nabolse talen matsah ing ting, Elbai chengse kahuhdoh ding, Sohchangte inlama hin puiyinge. Jumle ja athohna chengseu Ginle jabolna kaheidoh a, Vannoi miten apachat diu ahi. 20 Phat ahung lhunge! Namite cheh chaosa puikhom ing ting, Vannoi minthang kihisah ding, Naphat theiya nahaodoh kit ding ahi,” ati. Pakaiyin aseitai.

Haggai 1

Houin sah phatna dia Pakai thupeh

1 Darius Persia gamvaipoa apan kal kum ni lhinna, lha gupna, ni masapen nin Haggai Themgao kamin Pakaiyin thu ahinseiye. Athusei hi Judah gam vaipo Zerubbabel, Shealtiel chapa le Thempu chungnung Joshua, Jehozadak chapa ding ahi. 2 Thaneipen Pakaiyin Haggai jah a aseiyin, “Hiche ho hi Houin sah phatna ding hilou laiyin aseiyui,” ati. 3 Hijeh chun Pakaiyin mipi dingin hiche thu hi Haggai Themgao kamin aseiye: 4 “Vo kamite, idia nang ho, in phatah tah a chenga, Kei Houin asesa kijam ham? 5 Nachunguva thilsoh mulou nahiuvem? 6 Muchi tampi natu vangun lhosoh ga themcha bou namu’uve. Neh ding nanei vangun oivana kham ahipoi. Lengpitwi don ding naneiyun, chimna kham ahipoi! Ponsil naneiyun, lum nasahpi khamu ahipoi. Natong’an oivana amujoupoi. 7 I-tile hiti ho hi soh ahi namudoh louvu ham? 8 Tun thinglhang lama kaltouvun; inthil gajongun Houin saphauvin; kalung lhai ding, eikihou dol’a eikihou ding ahi. 9 “Lhoga tampi mu ding nakinem’un, amala lhomcha ahiji. Lhosoh in a nahinpoh lut tengu jongle kamut mangpehjitai. Idia kabol ham? Ka-Houin sesa um a, nading cheh bolna nakisah lel jal’u ahi. 10 Hijeh a chu gotwi lha louva muchi chivo phalou-keh lou ahi. 11 Gamsunga gotwi kang a, molle lhang gosoh, bulei le lengpilei jouse go a, olive honlei jouse gosoh, muchi chivo jouse gotwi ngai, mihem le gancha chule thil ijakai gotwi ngaiya umsoh ahitai,” ati.

Mipin Pakai thupeh angaiyu

12 Babylon a sohchang hung kile kit-Zerubbabel le Joshua chule mipin Pakai a-Pathen’un bol dia aseipeh-u chu aboltauve. Pakai sole Themgao Haggai chu aging cheh-un asei angaiyui. 13 Hichun Haggaiyin Pakai thusei chu mipi aseipeh-in: “Kakitep ahitai-kaumpi jing ding nahiuve,” ati. 14 Sohchang hung kile kit-Zerubbabel, Judah gam vaipopa, Thempu chungnung Joshua, chule mipi abonchauvin Houin sapha din Pakaiyin atildoh tai. Hijeh chun thaneipen Pakai a-Pathenu Houin asapantauve. 15 Asah patnau chu Darius gamvaipoh kal kum nina, lhagup lhin, nisom ni le li ni ahi.

Haggai 2

Houin thah loupije

1 Darius leng chankal kum ni lhinna, lha sagi lhin, nisom ni le khat nin Pakaiyin Haggai Themgao kamin thu ahinsei kit’e. 2 Aman Haggai chu Judah gam vaipo Zerubbabel le Thempu chungnung Joshua, chule mipi jah a thu sei din asol’in, 3 “Houin loupije chu geldoh theiya nalah-uva mihem khat beh umlou ham? Itobanga namujiu vem? Tunvang imacha ahitapoi. 4 Hijongle khatchan jong lungthoinan neidauvin. Tongpan’un, Ka-umpi jing nauve. 5 Egypt’a kona nahungdoh-u chun ka-umpi jing diuvin kakiteptai. Tunjong kaumpi jingui kicha hih-uvin. 6 “Phat chomkah louva van le leiset, Twikhanglen kaholingsoh ding ahi. 7 Namtin vaipi lehkhup soh ing ting, anei agou chengseu hikoma kahin poh khom ding, Houin hi nei le gou dimset ding ahi. 8 Vannoiya sana dangka jouse aboncha Keiya ahi. 9 Houin luipa sanga Houin thah loupijo cheh ding, chuteng kamite chamle lungmon, haona kapeh ding ahi,” ati. Thaneipen Pakaiyin asei ahitai.

Themgaopan Thempupa akihoupi

10 Darius gamvaipoh kal kum ni na, lha ko lhin, nisom ni le ni li lhin nin thaneipen Pakaiyin Haggai Themgao kamin thu ahinseiyin, 11 “Aban a kisei thudol’a hin Thempuhon ilo ding agot’um dong temin: 12 Mihem khat touvin kilhaina sathenga kithat sahal khat tou aponsil’in kichundoh hen, hiche ponsil hin ipi thil hijongle: changlhah ham, an minsa ham, lengpitwi ham, olive thao ham, khat pen pen tongkha le, atoh khah pen pen chu sutheng theiyin tem?”a ti. Hiche thudoh hi adoh phat’un thempuhon, “Theng theiponte,” atiuve. 13 Haggaiyin adong kit’in, “Mihem khat’in thilong tongkhan kisuboh taleh, aman atoh khah khah neh le chah ho chu boh thei ding ham?” ati. Thempuho, “Boh theiyinte,” atiiuve. 14 Haggaiyin aseiyin, “Pakaiyin aseiyin, hitobanga chu hiche nam mite chunga jong chuti ding ahin, atohdoh aboldoh chengseu jong chuti ding ahi; hiti hin maicham phunga atodoh chengseu jong abohsa jeng ahibouve,” ati.

Pakaiyin avangboh ateppeh

15 Pakaiyin, “Nachunguva thilsoh hi nahetdoh thei louvu ham? Houin sah phat napat masangun, 16 chang kilogram ja ni jen tedoh din che leu chun kilogram jakhat bou umintin, lengpitwi litre jakhat thaldoh din lengpitwi bel gave leu chun litre som li bou um ding ahi. 17 Ke dohsah tei dia natu anche louhing jouse semchai din khohui hamve vun kalansah-in, lungnaheideh pouve. 18 Tuni hi lha ko na, nisom ni le ni lhin na, Houin inmun kilaijou nikho ahi. Tua pat ipi hungsoh ding vetem’uvin. 19 Changsal keosoh hen, lengpiga heosoh hen lang, theichang ga heo hen, kolbuthei le olive thing ga heo ta jongle, tua pat vang phatthei kaboh diu ahitai,” ati.

Pakaiyin Zerubbabel thu ateppeh

20 Chuche lha, nisom ni le ni li lhin nin Pakaiyin Haggai kam a, thu asei kit’in, 21 athusei hi Judah gam vaipo, Zerubbabel ding ahin, “Ken Van le leiset kaholing a, 22 lenggam jouse le athaneina chengse akhup athal’a kakoi ding ahi. Kangtalai ho le atol ho akhup athal’a kale a, sakolte thigam a, achung toute kithat to diu ahi. 23 Hiche nikho tengle kalhacha Zerubbabel, nang hi kamin a vaihom dia kalhendoh ding nahi. Kalhendohsa nahitai,” ati. Thaneipen Pakaiyin aseitai.

Zechariah 1

Hung kile kit dia Pakaiyin amite akou

1 Darius hin Persia gamvai apoh kal kum ni na, lha get nan Iddo tupa, Berechiah chapa, Zechariah Themgao henga Pakaiyin hiche thu hi aseiye. 2 Thaneipen Pakaiyin Zechariah hi mipi aseipeh din aseiyin, “Kei-Pakai hi napu napateu chunga lung hang kahi, 3 hijongle nang ho hi, ‘hung kit’un, Keijong nahenguva hungkit nange.’ 4 Napu napateu umchan jop dauvin. Masangin themgao hon thilse boldin ail’un, chonse lou din asei peh-ui.Ahivangin kasei ngailou, kathu nit louvin aum’ui. 5 Napu napateu le Themgao ho chu abeisoh tai. 6 Kalhacha Themgao ho mang chan-napu napateu thu kapen, kagisaljie, ahivangin nahsah mon aum’un gim genthei athoh lo’uve. Chutah le thaneipen Pakai Ken talen matsah lom ahi banguva kabol hon, lung aheiji tauve,” ati.

Themgaopan Sakolte mu neiya amu

7 Darius gamvai poh kal kum ni na, lha som le khat, Shebat lha, nisom ni le ni li lhin nin, jan a mu kaneinaa Pakaiyin sei ding thu khat eihil’e. 8 Pakai Vantil khat hi sakolsan chunga atouve. Vantil chu phaicham a huisum thing lah a adingin, anunga hin sakol dang-asan le abong, akang tampi aum’uve. 9 Kenjong, “Pu, hiche dakolte hi ipito tekah ham?” tin kadonge. Aman, “Nahilchen nange. 10 Leiset gakholtoh dia Pakaiyin asol ho chu ahiuve,” ati. 11 Hiche ho hin Vantil jah a thu ahinlhut’un, “Vannoi leiset kagakhol soh keiyun, vannoi pumpi panpibei le mi noiya umkamu’ve,” tin aseiyui. 12 Hichun Vantil’inaseiyin, “Vo Thaneipen Pakai, Jerusalem khopi le Judah gamsung khopi jouse chungakum som sagi sungin nalung hangin, itih tah le ba nahepi ding ham?” ati. 13 Pakaiyin Vantil chu lungmon na thun adonbut’in, 14 Vantil chun thaneipen Pakai thusei phongjal din eihil’in, “Kakhopi theng, Jerusalem ka-it behseh jengin, 15 chamle lungmonga nomtah a um nam mite chunga kalung hangtai. Kamite chunga chom khat lung dam kabol kahseh-in jong, hiche nam mite hin kamite melse cheh-in abolgentheiyui. 16 Hijeh a chu Jeruslem khopi hepi dia hungkile kit ahi. Jerusalem khopi kisapha a, Ka-Houin kisemthah didng ahi,” ati. 17 Vantil’in kaphonjal din aseiyin, “Thaneipen Pakaiyin akhopi jouse khangtou kit’a, Jerusalem jong akithopia, Ama khopi mong monga asei din aseiye,” ati.

Saki ho Themgao thilmua kimu

18 Kagao chan naa bongchal ki li jen kamui. 19 Kakoma thusei jing Vantil chu kadongin, “Hiche bongki ho hi ipi to tekah ham?” kati. Aman, “bongki ho hi leiset thaneina-Judah le Israel chule Jerusalem mite nocheh ho chutoh tekah ahi,” ati. 20 Pakaiyin thih khengthem she choiya pasal li eivetsah-e. 21 Kenjong, “Hiche ho hi Judah gamsung sugam a amite nocheh nam vaipi deljam a akhup athal’a leh dia hung ahiuve,” ati.

Zechariah 2

Themgaopan Thiltena jol amu

1 Kagaochan na a thilte-na jol choi pasal khat kamui. 2 Kenjong, “Hoiche ding nahin?” tin kadonge. Aman, “Jerusalem khopi let le neo, asaodol tetoh didng kahi,” ati. 3 Hichun kajah athusei jing Vantil chun eihin nailut’in, Vantil chom khat man ahinjonin akitoh lhon’e. 4 Vantil masan khatjoh jah a, “Thilte-na choi golhangpa khu gaseipeh-in, Jerusalem khopi sunga mihem l egancha tamval’a kulpin adol lou ding ahi. 5 Pakai Amatah kitep’a, khopi kimvel’a chu Ama meikou banga pal a kigen ding, Aloupina hunei tah apanga khopi a-nga ding ahi,” ati.

Sohchangte In jon dia kouna

6 Pakaiyin amite jah a aseiyin, “Nabonchauvin sahle lhang, simle mal’a kathecheh-un, 7 tunvang sohchang chengse Babylon a kon jamdoh loiyun, Jerusalem hinjon tauvin. 8 Min najepnau hi kamitchang kikaldoh tobang ahi,” ati. Hiti hin amite chomgam namtin vaipi henga hiche thu hi seipeh din Pakaiyin eisol’in: 9 “Pakai Amatah-in nadouvuntin, khatvei soh a navulteuvin nachomgam diu ahi,” ati. Hitobang thil hi aso teng, thaneipen Pakaiyin eisol ahi-mitinin hedoh tante. 10 Pakaiyin, “Vo Jerusalem mite, kipa la sauvin! Nalah-uva cheng din kahunge!” ati. 11 Hiteng chule namtin vaipi Pakai henga hungun tin, amite hi diu ahi. Nalah-uva chenga, nahenguva eihinsol nahetdoh diu ahi. 12 Agamtheng sunga Judah hi agou lhantum hiya, Jerusalem hi angailut pen khopi hi didng ahi. 13 Achenna munthenga konin Pakai ahunge, amasanga mitin thip chet’in um’uvin.

Zechariah 3

Themgaopan Themgpu chungnung amu

1 kagaochanna khat’a Pakaiyin Thempu chungnung Joshua, Pakai Vantil masanga ding eivetsah-e. Joshua koma chun Satan adingin, ahehse din gonsan aum’e. 2 Pakai Vantil’in Satan jah a, “Vo Satan, Pakaiyin mo nachan hen! Jerusalem ngailua Pakaiyin themmo nachan hen! Hichepa hi meilhum sunga kiloidoh tenggol tobang ahi!” ati. 3 Joshuan ponsil nen sil’in hikoma chun adinge. 4 Vantil’in Vanmi lhachate jah a, “Hichepa ponsil nen ho hi sut lhauvin,” ati. Hichun Joshua jah a, “Naconset kalamangtai, sil ding ponthah kapeh ding nahi,” ati. 5 Chuin lhacha hon Joshua chu delthah akop peh diuvin aseiye. Lhacha hon asei bangin abol’un, Pakai Vantil dinpet hin ponthah jeng asil peh atauve. 6 Vantil chun Joshua jah a 7 Thaneipen pakaiyin aseitai, “Kadanthu nit’a nganse na cheng natohdoh le, Ka-Houin lhachan pangin natin, hongcha dung limbol’a napan ding, chule kamasanga um jing Vantilte taona kasan banga nataona kasan ding ahi. 8 Ngaiyin Joshua, nang thempu chungnung nahin, chule a Themputpi dang hon jong ngaiyun-khonung hamphatna ding dol’a um nang hon: kalhacha-Abah kiti chu kaphondoh ding ahi! 9 Joshua masanga maisagi jen a kisem song khat kakoiye. Song chunga hin lekhajem jih in gting, nikho khatseh sunga hiche gamsung chonsetna kasuhmang ding ahi. 10 Hiche nikho chu ahung lhun teng, nanghon nahenga nakom kouva, lengpilei le theichang ga thalhingset chu kipa lungmon pi dinga natem didu ahi,” ati.

Zechariah 4

Gaochanna thaomeikhom kimu

1 Kajah a thusei Vantil chu ahungin, a-ihmu kibolna bangin eihung suthouve. 2 Chule kajah a, “Ipi namun?” tin eidonge. Kenjong, “Sanaa kisem thaomeikhom kamun, achunga khun thaokhon khat akikoiye. Thaomeikhom chunga khun thaomeikhom chunga khun thaomei sagi aumin, thaomei khat khat’in meijang sagi cheh aneiyui. 3 Thaomeikhom koma hin olive thing phung ni cheh akeh-in, ajet aveiya khat khat’in akeh-e,” kati. 4 Vantil chu kadongin, “Hiche ho hi ipito tekah ham, kapu?” kati. 5 Aman, “Nahet lou ham?” eiti. Kenjong, “Kahepoi,” tin kadonbut’e. 6 Hichun Vantil’in Pakaiya konin hiche hi Zerubbabel seipeh din eihil’in, “Sepaite le thahat vang hilouva, Ka-Lhagao vanga najo tei ding ahi. 7 Kisuhmona ding molle lhang kikhangsang bang jongle, namasanga kitol mangsoh diu, Houin nasah phat’a, Inmun song nukhah pen nakoiteng, mipin sam’untin, ‘Ahoiye, ahoiye!’ tia aseidiu ahi,” ati. 8 Pakaiya konin kahenga thu khat ahung lhung kit’in, 9 Zerubbabel’in Houin mun asep joutai, Houin jong asah jou ding ahi. Asah jou teng kamiten ahenguva nang sol’a Kei kahi hedoh tauvinte. 10 tohban chalmo jeh-in lung himon aum’un, Zerubbabel’in Houin sah ban ajop jing amudoh tengu kipah thanom lheh-unte,” ati. Vantil chun kajah a, “Thaomei sagi hileiset pumpi musoh hel Pakai mit sagi ahiuve,” ati. 11 Kenjong, “Thaomeikhom jet le veiya olive thingphung te ni khu ipito tekah ba ham? 12 Chule olive thaotwi lonna sana-long te ni kom a olive thing bathe ni khu ipito tekah ham?” tin kadonge. 13 Aman, “Nahet lou ham?” tin eidonge. Kenjong, “Pu kahepoi,” kati. 14 Hichun aman, “Hiche te ni hi, leiset pumpi Pakaiyin alhachaa pang dia alhendoh te ni chu ahi,” ati.

Zechariah 5

Lekhajol lengthei kimu

1 Kagah vet kit le, vanlaijol’a leng lekhajol khat kamui. 2 Vantil chun ipi kamu eidonge. Kenjong, “Vanlaijol’a lengle, metre ka sao, metre li le keh len, lekhajol khat kamui,” kati. 3 Aman kajah a aseiyin, “Hichejol’a khu leiset pumpi chunga thejal ding gaosapna kisun ahi. Lekhajol lang khat’a khu gamsunga gucha jouse nodoh ding kisun a, alang khat’a khu jou pan a kihahsl chengse tolmang ding kisei ahi. 4 Thaneipen Pakaiyin hiche gaosapna lhadoh ding aseiyin, gucha jouse le jou pan a kihahsel’a thusei jouse insunga lut didng ahi. A-insunguva pansan tin, asuhgam hel’a adalhah ding ahi,” ati. Pocha sunga numei khat gaochanna kimu 5 Vantil chu ahung kilah kit’in, “Ven, thil chom beh khat ahungdoh kit’e!” ati. 6 Kenjong, “Ipi ham?” tin kadonge. Aman, “Pocha khat ahin, gamsung pumpi chonset to tekah ahi,” ati. 7 Pocha sin chu hahngeh a kisem ahi. Kavet le asin ahongdoh-un, pocha sunga chun numei khat atouve! 8 Vantil chun, “Hiche numei hi gitlouna to tekah ahi,” ati. Hichun numei nu chu pocha sunga asonlut’in asinkhumtai. 9 Kagah vet le vasai lhaving tobang neiya, numei ni kaheng lam ngan ahung leng lhone. Pocha chu akhaidoh lhonin, alen mangpi lhontai. 10 Kenjong Vantil chu kadongin, “Hoilam lhut agot lhon ham?” kati. 11 Aman eodonbut’in, “Houin asahna diuva Babylon gama apoh mang lhon ahitai. Houin chu asah jou tengu, pocha chu koiyuntin, chule hichu ahou diu ahi,” ati.

Zechariah 6

Gaochanna Kangtalai li kimu

1 Gaochan nan mu kanei kit’e. Sum-eng molsang ni kah a konin kangtalai li ahung kitoldoh-e. 2 Kangtalai masapen chu sakolsan in akaiyin, anina chu sakolvomin akaiyin, 3 thumna chu sakolvomin akaiyin, li lhinna chu sakolpol’in akaiye. 4 Vantil jah a hin kenjong, “Pu, hiche kangtalaiho hi ipito tekah ham?” tin kadonge. 5 Aman, “Amaho hi kolkimvel ning lia khopihui ahiuvin, leiset pumpi Pakai ang sunga hung kondoh ahiuve,” ati. 6 Sakolvom ho kai kangtalai chun sahlam Babylon lang ajonin, sakolkangte kaiyin lhumlam ajonin, sakolpolte kaiyin lhanglam gamsung ajon’e. 7 Sakolpolte akijotdoh phat’in leiset gakholtoh loi ding a-ngah lel’ui. Hijeh chun Vantil’in, “Leiset gakhol loiyun!” tin aseiye. Hiti chun agakhol tauve. 8 Hichun Vantil’in eihin kouvin, “Sahlam Babylon lang jon sakolten Pakai lunghan asuthip tauve,” ati.

Joshua lallukhu khuhpeh dia solna

9 Pakaiyin hitin thu eiseipeh-e, 10 “Sohchang mi Helsai le Tobijah, chule Jedaiah thilpeh ho hi choiyin lang, Josiah, Zephaniah chapa koma gache loiyin, Amaho hi abonchauva Babylon gama sohchang hung kile kit ahiuve. 11 Athilpeh-u dangka le sana ho hin lallikhuh khat semin, Thempu chungnung, Joshua, Jehozadak chapa khu khuhpeh-in. 12 Ajah a Thaneipen Pakai thusei seipeh-in, ‘Abah kitipa chu hung phattheiya, Pakai Houin asah phat ding ahi. 13 Ama hin Houin saphan tin, leng khat chanlom tah change, amite chunga vaihom ding ahi. Alaltouna koma Thempu khat ding jingin tin, lung khat le chamnan na tong lhoninte,’ tin. 14 Lallukhuh hi Helsai le Tobijah, chule Jedaiah le Josiah het jingna dia Pakai Houina kikoi jing ding ahi,” ati. 15 Muntin le gamtin a chengte hunguntin, Pakai Houin sapha hung pan gdiu ahi. Houin kisah phat jou teng, nahenguva Thaneipen Pakaiyin eihinsol hi nahetdoh diu ahi. Pakai na-Pathenu thupeh chengse nanit’u le thil hijetpi hi guilhung ding ahi.

Zechariah 7

Dihlouva an ngol Pakaiyin amah

1 Darius lengvaipoh kal kumli na, lha ko, Kislev lha, ni li nin Pakaiyin thu khat eiseipeh-e. 2 Bethel kho miten Sharezer le regemmelech chu amiteu to Pakaiya vangboh thum din, Thaneipen Pakai Houin a asol’un, 3 chule Thempuho le Themgaote chu thu gadonga, “Kum hijat sunga kahinbol jingo, lha nga lhin she le houin kisuhmang jal’a an ngol’a lunghem kabol’u hi kajom nah lai diu ham?’ ti din asol’uve. 4 Pakaiyin kajah a sei thu chu hiche hi ahi. 5 “Gamsung mite le Thempuho seipeh-in, kum som sagi sunga, lha nga le lha sagi lhinseh le an ngol’a lunghem athoh jui khu, Kei jabolna abol’u ahipoi. 6 Aneh-uva adon tengu jongle oiva na dinga nea don ahibouvui,” ati. 7 Jerusalem khopi phatthei lai, khosung dimset’a mihem chen lai, khopi kimvel kholen dunga mihem chen dimset, lhanglam le lhumlam thinglhang bul dung geiya mihem chen dimset laiya Themgao masate koma Pakai thusei chu hiche hi ahi.

Thu ngai loujeh a sohchanlo

8 Pakaiyin Zechriah jah a aseiyin, 9 “Masanglaiyin kamite kaseipeh-in, ‘Thildih bol’uvin, khat le khat khoton kihepi to cheh-un. 10 Meithai le chagate, nalah-uva cheng gamchom mi, chule koi hile neilel tapou bolse hih-un. Khat le khat kisuhsetna ding thil gon dauvin,’ kati. 11 Ahivangin kamiten lungtah tah-in ajadauvin ahi. Lungkot hong louvin aum’un, 12 alungthimu songtah-in atahsah-ui. Masang lai Themgaote kama kaseisa thu ho angai loujeh-un kalung hangtai. 13 Thu kaseipet’a angai loujeh-un, atao tengu jongle kasangpoi. 14 Twisoh thil lhoh bangin abonchauvin gamchom a cheng din kalhoh mangtai. Gam phatah hiche gam hi ahomkeovin akijamin, koimachan chennan aneitapoi,” ati.

Zechariah 8

Jerusalem semphat dia Pakaiyin atep

1 Thaneipen Pakaiyin Zechariah jah a hiche thu hi aseiye. 2 “Kamite kakhohsah beh seh, khohsah val jeh a amelmate chunga kalunghan lo nah in Jerusalem kithopi nom jinga um kahi. 3 Kakhopi theng, Jerusalema hung cheng kit ding kahi. Khopi kitah, Thaneipen Pakai lhang chu lhang theng kiti ding ahi. 4 Numei pasal tehse kembet net, tenggol phut’a lamjot ho chu kholai nin gkoi dunga hung tou kit diu ahi. 5 Kholai lemlen dunga kichem ding nu-ngah golhang hung dimset ki tdiu ahi. 6 “Hitobang thilsoh ding hi tua amoh cheng na mite lah a hingdoh ho gel din soh dia kilomlou hel ding ahin, Kei didn imacha ahimo poi. 7 Kamite min ahen nau gamsunga konin huhdoh ing ting, 8 Jerusalema cheng dia niso le nilhum a kona kahinlepui kit ding ahiuve. Kamite hiuvintin, a-Pathenu, kitah le dih tah a chunguva vaihom kahi ding ahi. 9 “Hanguvin! Ka-Houin sah phatna dia inmun kiset phat laiya themgaote thusei ho ma ma chu najah kit’u ahi. 10 Hiche masang chun mihem hihen gancha hile thalah didng akimujoupoi, melmate masanga hoidoh thei jong ana umpoi. Ken miho chu khat le khat kakisousah-e. 11 Tunvang hiche nam mite lah a ahingdoh chengse hi lamchonbeh-in kaboltai. 12 Chamle lung mongin vaikon’untin, alengpiguiyu gatheiya, leiset’in muchi chivo asemdoh ding, gotwi nengsel sing ahi. Kamite ahingdoh chengse vangbohna hijatpi hikapeh ding ahi. 13 Vo Juddah le Israel mite! Malaiyin gamchom mite khat le khat akigaosap’un,’Hitobang hamsetna Judah le Israel lhunkhum hin nang jong lhun khum hen!’ akitiuve. Ahivangin nahuhhing ung ting, hiche gamchom mite chu khat le khat,’Judah le Israel chunga lhung vangbohna cheng nang jong changing,’ kiti diu ahi. Hijeh chun hangtah-in pangun, kicha hih hel’un,” ati. 14 Thaneipen Pakaiyin aseiyin, “Napu napateuvin eiphin lung hang phat’un, sumang din kagon, khelchom louvin kasumangtai. 15 Tua vang Jerusalem le Judah mite vang boh kagot ahi. Hijeh chun kicha hih-un. 16 Hitobanga hi naum diu ahi: Khat le khat thutah-in kihouvun. Thutanna phunga thudih mong mong, cham len theina seiyun. 17 Khat le khat susuhsetna ding thil gon dauvin. Jouvin kihahsel dauvin. Jousei le thudihlou, pumhat kahoi,” ati. 18 Thaneipen Pakaiyin Zechariah jah a hiche thu hi aseiye; 19 “Lha li, lha nga, lha sagi, chule lha som lhin na an ngol kibolji ho hi Judah mite dia kipa thanopna kut akiheidoh ding ahi. Thudih le chamna khohsah-uvin,” ati. 20 Thaneipen Pakayin aseiyin, “khopi tina miten Jerusalem ahinjotna diu phat ahung lhunge. 21 Khopi khat’a hung kon hon khopi choma hung kon ho jah a, ‘Thaneipen Pakai xhibai boh a ahenga vang thum ding kahiuve. Hungin kilhonute,’ ati diu ahi. 22 Namtin a mi, nam hunei tah tah ho thaneipen Pakai chibai boh dia Jerusalema hung diu, ahenga vang athum diu ahi. 23 Hiteng chule gamchom mi som jen Judah mi khatseh koma hunguva, ‘Patheninnaumpiu kajauvin, Najotna mun’uva din kihon jengute,’ tia asei diu ahi,” ati.

Zechariah 9

Khonel dung nam mite chunga thutanna

1 Pakai thusei chu hiche hi ahi: Hadrach gamsung le Damasus khopi talen man din akoitai. Israelte khopi maiseh hilouvin, Syria khopi maiseh hilouvin, Syria khopi jong Paakiya ahibouve. 2 Hadrach to kigamgi Hamth jong Pakaiya ahin, Tyre le Sidon chule athepna chengseu jong Pakaiya ahi. 3 Tyre hin kulpi akisemin, dangka sana ahao behseh-in imalou bangin aumtai! 4 Hinla anei chasun Pakiyin alah mangpeh ding ahi. Anei agou jouse Twikhanglen a leh lut’intin, akhopi kavamhel ding ahi. 5 Hiche thilsoh hi Ashkelon khopin amudoh teng tija ding ahi. Gaza khopin mudoh-intin, a thoh lel lheh ding ahi. Ekron khopi jong chute ding, akinepna chengse beisoh ding ahi. Gaza lengpa thi ding, Ashkelon khopi ahomkeova um ding, 6 Ashdod khopi jong nam choplop hung chengkhom diu ahi. Pakaiyin aseiyin, “Hiche Philistine mi kiletsahte hi kasuhnem ding ahi. 7 Sa jong thisan puma aneh lou diu, nehmo ho jong aneh da diu ahi. Ahingdoh amoh cheng chu kamite lah a kisimtha a, Judah phungbah khat banga um diu ahi. Ekron jong, Jebua mite banga kamite to kisimtha diu ahitai. 8 Kagamsung ki-ngang ting, sepaite kajotpa sah lou ding ahi. Vaipo giloute kamite bol gentheisah ponge. Itobanga kamiten ganthei hesoh athoh kamudoh tai,” ati.

Kho-nunga Leng chang ding

9 VO Zion chate, hachangpan kipah-un! Kipah-in khosam’un, Jerusalem mite! Ven, nalengpau ahunge! Galjo minthangin ahungin; Nun nemtah-in sa-ngan chunga touvin, Sa-ngan nou lagol chunga touvin ahung! 10 Pakaiyin aseiyin: “Israelte galsatna kangtalai jouse sumang ing ting, Jerusalema sakolte kakai mang ding; Galmuna manchah thlpi kaheboh doh ding ahi. Nalengpauvin namtin vaipia chamna semintin, Twikhanglen lang khat’a pat langkhat geiya vai ahoma, Euphrates luipia pat leiset mong geiya vai ahom didng ahi,” ati.

Pathenin mite semphatna

11 Pakaiyin aseiyin: “Kilhaina thisan a mohor namkhumsa Eikitepnau jal’a, Namiteu chamlhatsah ing ting, Twi beina sohchanna muna ongthonl diu ahi. 12 Vo Sohchang kinem jing ho, hung kile kit’un; Nalungmonna mun hinjon’uvin! Nathohgim nau jat nia vangboh dia Tua hi kateppeh nahitauve! 13 Judah hi sepai Thalpin mang ing ting, Isdrael hi Thalchanga Kaman ding ahi. Zion mite chamjam banga kaman’a, Greek mite satna kanei ding ahi,” ati. 14 Pakai amite chungvuma kitahdoh-intin, Athalchang kolphe banga alensah ding; Hatchungnung Pakaiyin sumkon mut’in tin, Lhanglama pat go le huipia hung kitol ding ahi. 15 Thaneipen Pakaiyin amite ngah-intin, Amahon amelmateu asuhgam diu ahi. Galmuna jukhan pen-ohjen jun banguntin, Amelmateu thisan alonsah diu; Kilhaina gan thisan long banga, Maicham phunga khona kisunglha bang ding ahi. 16 Hiche nikho hi haung lhun teng. Pakaiyin amite ahuhhing ding; Kelngoi chingpan akelngoite Thidingsa ahuhdoh bang ding ahi. Lallukhuh a sum-eng pah banga Agamsunga vah jing diu ahitai. 17 Gamsung phat ding le hoi ding je chu! Cahngle lengpitwi vanga khangdong thahat diu ahi.

Zechariah 10

Huhdoh dia Pakai thutep

1 Chavang laiya go juhna din Pakaiyin taovun! Mei kaisah, dai lhahsah chule go juhsah Pakai ahin, mitin dia louma phatsah Amabou ahi. 2 Mihon doi asan’un, phunsan ho pou adongun, jouthu le ngol thubuh bou akimu’ve. Abang bangin mang aleuvin, lam hilou lama napuitauve; nalhamon nau jong pannabei ahi. Hijeh chun mipi hi kelngoi mangsa bangin suhna ding helouvin avah le leuve. Lamkai beiyin hesoh genthei athoh tauve. 3 Pakaiyin aseiyin, “Kamite chunga vaipo gamchom miho chunga kalung hange, amaho khu talen kamatsah ding ahi. Jusahte kami ahin, Kei-thaneipen Pakaiyin kivet tep nange. Galsatna sakol hattah banga kanei ding ahiuve. 4 Kamite chunga vaipo ding alah-uva vaihom le lamkai, sepai lamkai sing hung pengsoh ding ahi. 5 Kholai dunga amelmateu bon-ngan lah a chil thang thang sepaite banga Judah miten gal ajo diu ahi. Pakaiyin apanpi jeh-uva gal asat diu, melma sakol touthem ho geiya ajo diu ahi. 6 “Judahte hatsah ing ting, Israelte kahuhdoh ding ahi. Abonchauvin voujang natping ting, In a kahinlepui doh kei ding ahiuve. Kapaidoh khah louhel bang diu, Pakai a-Pathenu kahi, atao nau sang inge. 7 Israel sepai hattah bang diu, Lengpitwi donchima kipah ho bang diu ahi. Hiche agaljo’u hi ason apah-un geljingun tin, Pakai thilbol hi akipapi diu ahi. 8 “Kamite kakoukhom ding, Huhdoh ing ting angaiya katamsah didng ahi. 9 Namtin vaipi lah a thecheh jong leng, Gamla tah a kona eigeldoh diu ahi. Amaho le achateu ahingdoh cheng, In a hung kile kit diu ahi. 10 Egypt le Assyria kona In a kahinpui ding, Agamsunguva kachensah ding ahi. Gilead gam le Lebanon a chensah ing ting, Gamsung pumpi midim ding ahi. 11 Gim hesohna Twikhanglen kinong bangin jot’u jongle, Kei-Pakaiyin twi kinonglai kaphothip ding ahi. Nile lithuh geiya kansah a, Assyria hoitho tah nemlhan tin, Egypt hunei tah jong thabeiya um ding ahi. 12 Kamite hatsah ing ting, Chibai boh a kathua nung diu ahi,” ati. Pakaiyin asei ahitai.

Zechariah 11

Vaipo husete lhuh

1 Vo Lebanon, cedar thing jouse halvamna din Nakotpi chengse hongdoh loiyin! 2 Kap’in maovin, thinggi jouse le Cedar thing ho alhusoh tai; Thing minthangtah tah ho asugamtauve. Bashan phaiya gangpi thing hokap’in maovun! Gammang thimlai atuchaitauve. 3 Vaipote lunghemin akap’ui, aloupi nau amangtai; Sekeie kisen ginpi khu ngaiyun; Achen nau gammang lai Jordan pang atuchaitauve!

Kelngoi chingte ni

4 Pakai ka-Pathenin kajah a, “Thangam dia kikoi kelngoi hon chingpa bangin umin. 5 Aneihon kelngoite thatgam’untin, talen man louva umdiu ahi. Asa kijoh-untin, ‘Vahchoiyun Pakai, ihaodoh tauve!’ tiuvinte. Kelngoi chingho jengin jong adipdappi pouve,” ati. 6 Pakaiyin aseiyin, “Leiset mi khat cha jong khoto taponge. Mihemho hi achunguva vaipote noiya kalutsah ding ahi. Hiche vaipoe hin leiset sugamhel’untin, akhut’uva konin chu-lha ponge,” ati. 7 Kelngoi choa joh hon eithalah-un, thadia kikoi kelngoite kachinge. Tenggol ni kalan, khat chu, “Deichom,” katin, khat chu, “Kipumkhatna,” kati Chuin kelngoi hon kachinge. 8 Kelngoi chingma ma midang thum, eiho jing chunga kalung hangjah-in, lha khat sungin athum’un kasumangtai. 9 Hichun kelngoihon jah a, “Ken naching tapouvinge. Athi thi ding kithi hen. Suhgam ding ding kisugam hen. Amoh ahing cheng jong khat le khat kisumangu hen,” kati. 10 Chuin “Deichom,” kisah tenggol chu kalan, Pakaiyin namtin vaipi to akitepna suhkehna din kahehbongtai, 11 Hiti hin hiche nikho hin kitepna chu akisuhkeh tai. Kelngoi choa le joh hon eive lhi jingun, kathilbol chu Pakaiyin thuseina anei ahe jingui. 12 Ken ajah-uva, “Nanop’u le katohman neipeuvin, nadaule kikoitauvin,” kati. Hijeh chun katohman din dangka somthum eipeuve. 13 Pakaiyin kajah a aseiyin, “Sum chu Houin goukholnaa koiyin,” eiti. Hijeh chun sum dangka somthum hi-manlu tah a agel’u chu-Houin goukholnaa kakoitai. 14 Chuin tenggol nina, “Kipumkhatna,” kiti chu kahehbongin, Judah le Israel kipumkhatna akehtai. 15 Pakaiyin kajah a aseiyin, “Kelngoi chingin pang kit’in, tua napan vang hi pannabeiya napan ding ahi. 16 Mi khat kakelngoite ching din kakoiyin, ahivangin aman mangthah goa kelngoite akithopi poi; amangla ahol pon, mapu jong aboldam poi; ahing cheng jeng jong avahva pon ahi. Athao lai lai akithan, atin kikah abottel kelngoi chingpa chu adana-e! Kelngoi hon adalhatai! Athaneina gal’in asuhbei hel ding, aban tha ngoiya, amitchang jetlem cho ding ahi,” ati.

Zechariah 12

Khonunga Jerusalem lhatdohna

1 Mihem hinsah a, Leiset semdoh, vanthamjol jaldoh Pakai, hiche Pakaiyin Israel thudol asei chu hiche hi ahi. 2 “Jerusalem hi judonna khon tobanga kasemdoh ding ahi; akimvel’a namtin vaipin don’un tin, jukham banga lonle le siu ahi. Jerusalem khopi aumchah tengu, Judah gamsung khopi dang jouse jong min aumchah ding ahi. 3 Hiche phat hi ahung lhun teng, Jerusalem hi songtum gihtah kabahsah a, dopkhang dia doa nammite chu kisanchat diu, vannoi namtin vaipi kithouva adel khum didu ahi. 4 Hiteng chule asakolteu hoh kin ing ting, achunga toute ka-ngolsah soh didng ahi. Judahte vetup ing ting, amelmateu sakolte mit kachotsah ding ahi. 5 Chutah le Judah phunga miten, ‘Jerusalema cheng Thaneipen Pakai Pathenin amite thahat apei,’ ati diu ahi. 6 “HIteng chule Judah phunga mite hi gamkang le changkung go lah a kihal meikou kabahsah a, akinel’a namtin vaipi asuhgam ding ahi. Jerusalem kho mite vang khosunga lung monga cheng diu ahi. 7 “Kei-Pakaiyin amasaa Judah sepaite gal kajosah a, David son le pah, chule Jerusalem sn lom jabolna chu, Judah gamsung san ding sanga thupijo deh lou ding ahi. 8 Chutengle Jerusalema chengte Pakaiyin ngah-intin, alah-uva lhasampen jong David hat’a hat ding ahi. David chilhahten miho chu Pakai vantil, Pathen tah tah banga alamkai diu ahi. 9 Chuteng Jerusalem delkhum dia kigo namtin vaipi koi hile kasuhmang ding ahi. 10 “David chilhahte le Jerusalema cheng midang ho jong hepina le taona Lhagao kasipsoh ding ahi. Mihem asutlihoh chu veuvintin, cha khatseh thijal’a laina tah a kap ho banga alainatpi diu ahi. Chapa peng masapen thi jal’a kap ho bangin lhase tah-in kap’unte. 11 Hiteng chule Jerusalem lunghem ka le mao chu, Migiddo phaiya Hadadrimmon dia lunghema kap ho kagin husa bang ding ahi. 12 Gamsung miten a-inko koa pul adou didu, David insungin a-insung pul adouva, ajiu numeihon pul adou diu; Nathan insungin Nathan insungpul adouva, numeihon jong adou diu; 13 Levi insungin jong Levi insung pul adouva, ajiu numeihon jong adou diu; Shimei insungin jong Shimei insung pul adouva, ajiu numeihon jong adou diu: 14 insung dang dangin jong hitobanga hi ainsung cheh-u pul adouvuva, anumeiteuvin jong pul adou cheh diu ahi.

Zechariah 13

1 “Hiche phat hi ahung lhun teng, David chilhahte le Jerusalem mite chonset le doi houva kona sop theng dia twsam hung put ding ahi. 2 Chuteng gamsunga milimdoi min him him kaphahpoh sah lou ding ahitai. Ki-Themgaosah ho kasuhmanga, milimdoi hou nomna kasuhamng ding ahi. 3 Gaothu seitei tei aumle, Pakai thu seiya kigel’a, ou jeng seipan atilo tei ding chu anule apan aseipeh ding ahi. Gaothu aseipet tah a anule apan asutlih jeng ding ahi. 4 Hiteng chule mu nei Themgaovin ahoithopi lou ding, themgao umchan thoa, mipi lhep lhahna dia Themgao von jong avon lou ding ahi. 5 Hisanga chu, ‘Themgao kahipoi, loubol mi, kahinkhoa lou natong kahibouvin, ‘Na-op le natungtuna mapon ho chu ipijeh ham?’ tia adoh khah le; ‘Kagol kapaite in a eivohnau ahibouve,’ ti hen,” ati.

Pathen kelngoi chingpa tha dia kisei

7 Thaneipen Pakaiyin aseiyin, “Vo chemjam, thouvin kakelngoi chingpa delkhumin. Thet’in, kelngoite kithe cheh nante. Kamite delkhum ing ting, 8 gamsung mi hop thuma hop ni thigam diu ahi. 9 Chuteng hop khat hingdoh chengchu, meiya dangka kilhatheng bangin, sutheng inge. Sana kipatep bangin patep ing ting, chuteng kahenga hung tao diu, ataonau kasan ding ahi. Kamite ahiu seipeh ing ting, a-Pathenu kahi phongdoh tauvinte,” ati.

Zechariah 14

Jerusalem chule namtin vaipi

1 Thupi tannaa Pakai touna ding nikho anaitai. Chuteng Jerusalem khopi min chomgamintin, namit mu tah a thil chomdoh kihom diu ahi. 2 Jerusale sat din Pakaiyin namtin vaipi koukhomintin, khopi alah diu in jouse achom’uva, numeiho abol thang diu ahi. Mipi keh khat hel sohchanga kitol diu, adangse vang khopi sunga konin kaidoh pouvinte. 3 Chuteng Pakai kipat’a hiche namtin vaipi ho chu asat ding, gollui laiya asat banga asat ding ahi. 4 Chuteng olive molsang, Jerusalem niso lama hung pansantin, olive molsang chu pohkeh a, akah a phaicham lentah umdoh ding ahi. Molsang keh khat sahlama kitolsuh ding ahi. 5 Molsang kehni soa phaichama hi najamdoh diu; Judah lengpa Uzziah khanga ling kihopet’a napu napateu jamdoh banga najam diu ahi. Pakai ka-Pathen chu Vantilto lhonna hung ding ahi. 6 Hiche phat hile dap lou didng, geltwi kai lou ding, 7 mujong thimponte. Janteng jongle khovah jing ding ahi. Itih phat le hitia um ding hi Pakaiyin bou ahei. 8 Hiche teng hile Jerusalema kona twitheng hung longa, akeh khat Twikhanglen twimang dunga lon glut’a keh khatma Mediterranea Twikhanglena long lut ding ahi. Kum lhung hel, chuh le khal’a jong long jing jeng ding ahi. 9 Chuteng leiset pumpia Pakai leng chang ding;mitinin Ama Pathen ahina bangin chibai boh-umtin, min khat’a ahet diu ahi. 10 Sahlam Geba pat lhanglam Rimmon gei, gamsung pumpi kilai Jerusalem kikhang sangpen ding; khopi chu Benjamin kelkot’a pat, masanga kelkot kisem nasa, inning kelkot phungpeh gei ding, Hananel intingvuma pat lengte lengpitwi chilna phung gei ding ahi. 11 Hikoma hi manthah ding ging louhel’a, mipi ho lung mongtah a cheng diu ahi. 12 Jerusalem khopi sat namtin vaipi chunga Pakaiyin natset alansah a, ahing laiya atahsau natset’a monlha ding ahi. Amit’u le aleiguiyu vang monponte. 13 Hiteng chule Pakaiyin abonchauvin kisuh dongsah-intin, kichatmana min akinaipi pen pen abokhum jeng diu ahi. 14 Jerusalem huhna Judahten gal abol diu ahi. Namtin vaipi neile gou-sana, dangka, chule nihchen ponsil-thalhingset’a akichomdoh diu ahi. 15 Sakolte le sakolte, sa-ngongsaote le sa-ngante, melmate ngahmun a gancha jouse chunga tijat umtah natsat lang ding ahi. 16 Jerusalem delkhum namtin vaipi lah a hingdoh amoh chengsen, kumseh le Thaneipen pakai, Leng chu Jerusalema chibai ahung boh diu, lhambuh kut ahung manji diu ahi. 17 Koi to bang nam min Thaneipen Pakai, Leng chu chibai ga boh ding adaule, agamsunguva gotwi lha lou ding ahi. 8 Egypt miten lhambuh kut abol dau le, Jerusalem ache nomlou namtin vaipi chunga lang natseh chu Pakaiyin achunguva alhunsah ding ahi. 19 Lhambuh kut abol daule Egypt mite le namtin vaipi chunga bol hesohna dia hiche natset chu chucheh ding ahi. 20 Hiche nikho chule sakolte khaova jong, “Pakaiya kikatdohsa,” tia kijih cheh ding ahi. Houin sunga anhonna bel ho jeng jong, maicham a khon ho banga theng ding ahi. 21 Jerusalem le Judah gamsunga anhonna bel ho geiya Thaneipen pakai chibai boh teng man dia kikhen ding ahi. Mipin kilhaina sa honna aneidiu ahi. Hiche teng hileh Thenneipen Pakai Houin a kiveimi umlou ding ahitai.

Malachi 1

1 Pakaiyin Israel mipi seipeh dia Malachi jah a asei thu chu hiche hi ahi.

Pakaiyin Israel angailutna

2 Pakaiyin amite jah a, “nangho ka-ngalu jingui,” ati. Amahon, “Iti nei-ngailut’u ham?’ atiuve. Pakaiyin adonbut’in, “Esau le Jacob sopi ahi lhonin, ahivangin Jacob le achilhahte ka-ngailun, 3 Esau le achilhahte vang kahoi. Esau chenna thinglhang gamsung kasuchaiyin, gamsate chenna din kapetai,” ati. 4 Esau chilhah, Edom miten, “Ka-khopi jouse kisuse jongle kisah phat kit tauvinge,” tijongleu; Pakaiyin donbut’intin, “Sapha kit’u hen, kaphet lhah peh diu ahi. Mihon, ‘Migiloute gam,’ atiuve, ‘Tonsot’a Pakai lunghan nam mite,’ ati diu ahi,” tin te. 5 Israelten hiche hi amit tah a amu diu, chuteng amahon, “Israel gam kalpeh a jong Pakaiyin eilunghan’u ahi!” tiuvinte.

Pakaiyin thempuho aphosal

6 tahneipen Pakaiyin thempute jah a aseiyin, “Chapan apa ajabol teiyin, soh-in apu ajatei me. Na Pau Kei idia neijabol dau ham? Nahsah mon neibol’un, ‘Iti nahsah moa kabol’um? Pou neitiuve. 7 kamaicham phunga manmo thil jeng nato jeh-uva nei nahsahmou ahi. Nangho pin, ‘Iti nang jabol louva kakoi diu ham?’ natiuve! Kamaicham thang le dol’a nabol jeh-uva neija louvu ahi. 8 Kakoma kilhaina dia gancha mitcho ham, dammo ham, elbai ham khat nahin kaiyu hi thildih bol’a kigel nahiuvam? Hitobang gancha hingmo hi gam vaipo katnan ganeitem’un! Nakipia nathum thum napeh ding hinam?” ati. 9 Tun themgaopuho, ichunguva Pathen lung lhaina din taovun. Nataonau asan lout eng, nang ho themmo ahibouve. 10 Thaneipen Pakaiyin aseiyin, “Pannabeiya akamaicham phunga mei natikou kou sangun, khattouvin Houin kotpi jouse gakamchah le katitave! Nachunguva kalung lhaipoi; neithilpeh-u sang ponge. 11 Vannoi kolkimvel lhungsoh min eijabol cheh nauve. Muntin a gimnamtui alhuntan’un, santhei dol tah kilhaina thil atoh nauve. Abonchan eijabol cheh-uve! 12 Nanghon vang kamaicham isah louva nabol’uva, deimosa neh le chah todohna nanei jeh-un nahsahmon neikoitauve. 13 Nanghon, ‘Thilto to jong kachimtai!’ natiuvin, nanah neikhon khum’uve. Kahenga to dia nahin kaiyu jong gancha naguh thou ham, adammo ham, a-elbai ham ahi. Hitiho hi kasan peh dia nagel’um? 14 kei peh dia tepsa kelngoi hon lah a kelngoi hoitah tah sel’a, kelngoi hingmoa kilhina boljia eilhem ho chu gaosap chang hen! Ajeh chu Leng loupe tah kahin, namtin vaipin eiging cheh-uve!” ati.

Malachi 2

1 Thaneipen Pakaiyin thempuho jah a aseiyin, “Hiche thupeh hi nangho ding ahi. 2 Natoh nabol chan’uva neijadiu ahi. Kasei na-ngai louvu le kagaosap ding nahiuve. Nachan diu thil ho geiya kagaosap ding ahi. Kathupeh nagel khoh loujeh-uva kagaosapsa jong nahitauve. 3 Natu nachateu telen matsah ing ting, namaiyuva kilhaina gan nathau eh kaloikhum diu-gancha eh puma kakaidoh ding nahiuve. 4 Chutah l ethempuho le Levite to kakitepna suhkeh louna dia hiche thupeh hi kapeh nahetdoh diu ahi. 5 “Kakitepnaa hin hinnop le damtheina kateppeh-in, eijabolna diuva hiche chu kapeh ahi. Hiche lai chun eigingun eijabol nauve. 6 Mi thudih ahil’un, adih lou ahil pouve. Keito kitoh del’in aum’un; amaho she-in thildih abol pouvin, midang ho geiyin thilse abolsah dauve. 7 Min Pathen adih a ahet ding hi thempuhon ahil diu ahi. Kalungdei chu mipin Thempuho koma agahetdoh diu ahi, ajeh chu amaho hi Thaneipen Pakai sole ahiuve. 8 “Tunla Thempuhon lamdih napel tauve. Namihil’un mi tamtah apuisei. Nanghon kakitepna nasukeh tauve. 9 kalungdei nadondauve, kamite nahil tengu langkaina nanei jeh-un, Kenjong ISraelte nahsahmoa ka-umsah ding anhiuve,” ati.

Pathen koma mipi kitahlouna

10 Pa khat lhah ihi louvu ham? Pathen semcheh ihi louvu ham? I-bol’a kha le khat kitepna isuh keh-uva, ipu ipateu le Pthen kitepna nahsahmoa ibol’u ham? 11 Judahten Pathento kitepna asukeh-un, Jerusalem le Judah gam pumpia tijat umtah abol tauve. Pakaiyin a-it pen Houin asuhboh tauve. Pasal hon douhou numeiho akichenpiuve. 12 Hitobang thil bol jouse Pakaiyin Israel lah a konin kaidoh hen, Thaneipen Pakai dia thilto inam miteu lah a pang hih hel’u hen. 13 Hitobang jong hi nabol’ui. Nathilto chengseu asan lou phat’in kap le maovin na-um’un, Pakai maicham phung chu lhi le nap nadiptauve. 14 I-atile nathiltou asanlou nadatmo’uve. Nasenji nakikhenpi jal’uva asan lou ahi. Najinu hcu natibah ahin, Pathen angsunga achunga kitah jing dia kitep ngalta, nakitepna nasukeh tai. 15 Pathenin hiche numei chuto tahsa le lhagao khat’a nagopsa hilou ham? Ipi ngaitoa abol hitam? Pathen midih tah hidia cha le nao naneipi ding ahi. Hijeh chun koiman ajinu kikhenpida hen. 16 Pakai Israel Pathenin, “Nupa kikhen hi kamah ahi. Pasal’in abol thang jong kaseipoi. Hijeh chun najinu chunga kitah jing dia nakitepnau sukeh hih hel’un,” tin aseiye.

Thutan nikho ahungnaiye

17 Nakam tam behseh-un Pakaiyin ajadai. Nangho pin, “Iti eithei chim diu ham? Thaneipen Pakaiyin thilse bolte mipha agel’a, amaho chubou adeijoh ahi,” natiuve. Chuma le, “Thildih bol dia kigel Pathen chu hoiba hitam?” tin nahol’ui.

Malachi 3

1 thaneipen Pakaiyin, “Kalampi semtoh din kasolle sol nange. Chutah le nahol jingo Pakai chu hetman louva a-Houin hun glut jeng ding ahi. Na-nga jingo sole chu hunga kakitepna aphonjal ding ahi,” ati. 2 Ahinla hiche nikho hunglhun tang thoh jou didng koi ham? Ama hung kilah ten ghingdoh ding koi ham? Ama chu ponsop theng dabon hattah le thih gojolna mei-am hatah tobang ahi. 3 Dangka goujol’a suthengpa banga thutam dia hung ding ahi. Thih-khengpan dang ka le dana agojol banga, Pakaiyin thildih apha ato theina diuva, Pakai sole pan Thempuho asuh theng ding ahi. 4 Chuteng masang laiya banga, Judah gam le Jerusalem miten Pakai dia thilto ahinchoiyu chu lung lhaina anei ding ahi. 5 Thaneipen Pakaiyin aseiyin, “Thutan din nalah-uva hung kiphong ing ting, mitpheldoi themho le numei jonpi ho, jouva hettohsah ho, mi tohman lepthol ho, meithaiho le chagate, gamchom mi maljin ho-kinopsahna nei ho, Kei jalou chengse kahehset ding ahi.

Hopsom pehdol

6 “kei hi Pakai, kikhel lou kahi. Hijeh chun nnangho Jacob chilhahte namangthah hel hih laiyui. 7 Malai napu napateu bangin nan ghon jong Kadanthu jouse napeldoh-un nanit tapouve. Hung kile kit’un, nahengu hinjon inge. Nanghon, ‘Naheng kahinjot theina diuva ipi kabol diu ham?’ tin naseiyui. 8 Kadoh nahiuve, min Pathen alepthol theiyam? Alhem ngaipoi, nang hon vang neilhem’ui. Nanghon, ‘Iti kalhep’um?’ natiuve. Hopsoma hop khat le htilto peh dol’in neilhem’ui. 9 Nam pumpin neilepthol jeh-un nabonchau chunga gaosapna achutai. 10 houin a neh le chah lhingset’a koi din hopsom ahop khat lhingkeiyin hinchouyun. Neive patep’un, van a bangkot chengse hongdoh ing ting thilpha jouse nang jeng junga kasun lhah peh ding anhiuve. 11 Nachangdong laiyu ganhingte duhmang sah pong ting, nalengpiguiyu gaboh keikoi ding ahi. 12 Chuteng nagamsungu chen mun pha soh a, namtin vaipin min nun nom nahisah diu ahi. 13 “Kachung change tijat jat um thu naseiyui,” tin Pakaiyin aseiye. “Ahivangin nanghon, ‘Nathudol ipi kaseibeh-um?’ natiuve. 14 Nanghon, ‘pathen kinbol jong pannabei ahi. Asei sei bol jong i-phachom a, i-bolse chunga thaneipen Pakai koma kisih thusei jong ipi phachom ham? 15 Mi hoithote anompen a pang imuukhu me. Migiloute la hao thei keo hilouvin, Pathen phinna monga thilse abol’u jongle ahoidoh thouvui,’ tin naseiyui,” ati. 16 Pakai gingte akihou lim’un, aseiyu Pakaiyin ajatai. Pakai angsunga, Pakai ginga jabolte thudol lakhabu khat’a ajih luttauve. 17 Thaneipen pakaiyin aseiyin, “Amaho hi kamite hi diu, kachaloh ni nil eh, kalhentum chom beh hi di ahi. Akinbol jing chapa chunga mipa hepina dingahiuve. 18 Chuteng kamiten avel’a, midih le migilou kibah louje, kakinbol pa le bol loupe kah a thilsoh amudoh ki tdiu ahi,” ati,

Malachi 4

Pakai Nikho hung lhung

1 Thaneipen Pakaiyin aseiyin, “mi kiletsah le giloute changpol kavam banga halvamna ding nikho ahung lhunge. Hiche nikho chule kavam’untin, khendoh beihel diu ahi. 2 Nangho kathu nit chengse vang, kamihuhingna thahat nachunguva nisa banga vah-in tin, nisalum midamsah banga nadomlo diu ahi. Bongnou kul’a kilhadoh navah banga najalen diu ahi. 3 Kachaloh ni nil eh migiloute najotho’uva, leivui banga nachotpha diu ahi. 4 “Israelte jui ding Sinai mongsanga kalhacha Mose kapeh kihilna chengse le Danthu ho chule thupeh chengse chu geldoh jingun. 5 “Amavang tijat umtah Pakai ni loupe hung lhun masangin, Elijah Themgao hinsol peh nauvinge. 6 Elijah hin pate le chate akichamsah din gahi; achutiloule nagamsungu kasumanglo ding ahi,” ati.

The New Testament of our Lord and Saviour Jesus Christ

Matthew 1

Jesu Christa pendol

1 Abraham chilhah David guiya peng Jesu Christa khanggui thusim hitia kisun ahi. 2 Abrahamin Isaac ahingin, Isaac chun Jacob ahinge; Jacob hin Judah le asopi pasal dang ho ahinge. 3 Judah hin Tamara konin Perez le Zerah ahingin, Perez hin Hezron ahinge; Hezron chun Ram ahingin, 4 Ramin Aminadab ahinge; Aminadab chun Nahshon ahingin, Nahshonin Salmon ahinge; 5 Salmonnin Rahab’a konin Boaz ahingin, Boaz hin Ruth a kon in Obed ahinge; Obed hin Jesse ahingin, 6 Jessen David lengpa ahinge. David hin Uriah jinua kon in Solomon ahingin, 7 Solomonin Rehoboam ahinge; Rehoboamin Abijah ahingin, Abijah chun Asa ahinge; 8 Asan Jehoshaphat ahingin, Jehoshaphat’in Joram ahinge; Joramin Uzziah ahingin, 9 Uzziah chun Jotham ahinge; Jothamin Ahaz ahingin, Ahaz chun Hezekiah ahinge; 10 Hezekiah hin Manasseh ahingin, Manasseh chun Amon ahinge; Amonin Josiah ahingin, Babylon lama gal-hinga akai laiyun Josiah chun Jechoniah le asopi pasal dang ho ahinge. 12 Babylon lama gal-hinga akai nungun Jechoniah chun Shealtiel ahingin, Shealtiel chun Zerubbabel ahinge; 13 Zerubbabel hin Abiud ahingin, Abiud chun Eliakim ahinge; Eliakimin Azor ahingin, 14 Azor chun Zadok ahinge; Zadok hin Achim ahingin, Achimin Eliud ahinge; 15 Eliud chun Eleazar ahingin, Eleazarin Matthan ahinge; Matthanin Jacob ahingin, 16 Jacob chun Joseph ahinge; hiche Joseph hi Messiah kiti Jesu hingnu Mary jipa ahi. 17 Hiti hin Abraham a pat Davin gei khang som le khang li ahin, David a pat Babylon lama gal-hinga akai mang geiyu chu khang som le khang li ma ahi kite’e; chule Babylon lama gal-hinga akai manguva pat Messiah pen gei chu khang som le li ahi.

Jesu Christa pen

18 Jesu Christapen um chan chu hiti ahi. Anu Mary cu Joseph to kicheng dinga kitepsa ahinm ahinla akigop masang lhonin Lhagao Thenga kona agai chu Mary hin akihet doh tai. 19 Ahin ajipa joseph hi midih tah ahijeh-in Mary hi lhangphonga mipi seithanga umsah ding a nompon, guh thim cha akitepna lhon suh keh a kikheni din agoi. 20 Joseph-in hitobang lung agel laitah hin Pakaiya kon Vantil khat’in mangin akimusah-in, “David chilhah Joseph, Mary khu kipuiya jia nei ding tija hih hel’in; ijeh-inem itile Lhagao Thenga kona gai ahibouve. 21 Chapa khat ahinding, amin Jesu nasah ding ahi; ajeh chu amatah hin amite achonset’uva klna ahuhhing ding ahi,” tin aseipeh-e. 22 thil chicheng hi Pakaiyin Themgao kama aseisa gui lhun theina dinga soh ahin, asei chun, 23 “Ven, nu-ngah chu gaiyin tin chapa khat ahin ding, amin ‘Emmanuel’ kiti ding ahi, Amin hi, ‘Pathenin eiumpiuve,’tina ahi” ati. 24 Joseph a-imut khah phat’in Pakaiya kon Vantil’in ahil bang bangin abol’in, Mary chu ji dingin akipuitai; 25 ahin Maryn chapa ahinahin masangsen nupaa kitimatpina vang aneipi khah hih hel;e, Naosen ahung pen phat’in amun chu Jesu asah tai.

Matthew 2

Niso lama naosen Jesu vea hung ho

1 Judah gama Herod lengpa lal laiyin Bethlehem khopia Jesu ahung pengin, niso lama ahsi umdol hethem mihoJerusalem khopia ahungun, 2 “Judate chunga leng chang dia hung peng naosen chu hoiya um tam? Ama pen jeh a niso lama ahsi hung kilah kamu-va naosen chu chibai boh dinga hung kahiuve,” tin aseiyui. 3 Athudoh-u ajah phat’un Herod lengpa ti Jerusalem mite ti along jing lheh tauve. 4 Hejeh chun Herod’in Thempu pipu ho leh mipi lah a Danthu lekha them ho akoukhom loiyin, “Messiah chu hoiya hung peng ding ham?” tin adonge. 5 Amahon, “Judea gamsung Bethlehem khopia peng ding ahi; ajeh chu Themgaopan hitin asun’e” 6 ‘Vo Judea gama Bethlehem! Judah vaipote lah a itina ma jongleh aneopen nahipoi; Nanga kona kamite Israel lamkai ding khat Hung peng doh dong ahi,’ ati.” Atiuve. 7 Chuphat’in Herod chun ahsi umdol hethem miho chu atimin akimupinm itih phat tah a ahsi hung kilah chu aphochentai. 8 Chujouvin amaho chu Bethlehem lama asol’in, “Cheuvin lang naosen che phat chan gahol doh-un, keijong ka chea chibai kagabohna dinginm namudoh tenguleh neihung seipeh tauvin,” tin athu lhah-e. 9 Lengpa thsei ajah pha’un akipatdoh paiyun, ahin mupeh sau niso lama ahsi chu amasanguva achepeh-in, naosen umna chung aphah phat’in aki-ngai. 10 Ahsi amudoh kit phat’un akipah behseh jenguve! 11 Chuin insunga agalut’u leh naosen chu anu Mary toh agamu thauvinm boh khip cheh-in chiabi aboh tauve. Chujongle agoubomu hongin thil manlu cheh-sana, bego chule myrrh atoh-un, thilpeh hicheng hi apetauve. 12 Herod henglam ahopa kit louhelna diuva Pathenin amanguva ahilchah phat’ in lamchom khat ajuiyun agam olanguva akile kit tauve.

Egypt’a Jesu ajampiu

13 Ahsi umdol hethem miho che nungin, Pakaiya kon Vantil khat Joseph manga akilah-in, “Thouvin, naosen le anu puiyin lang Egypt langa jampinm kahinkou masangsen ta-umpi tan; ajeh chu herod’in naosen hi suhmang din angaiton ahol’e,” ati. 14 Joseph jong athouvin naosen le anu apuiyin janlaiyin Egypt langa ajampin, 15 Herod thi kahsen aga-umpitai. Hitobang thil hi Pakaiyin themgao kama aseisa, “Egypt’a konin kachapa kakoudoh tai,” ati chu guilhunna dinga soh ahi.

Herod’in naosente athagam

16 Ahsi umdol hethem mihon alhim lhah ahetdoh phat’inHerod along hang behseh jeenginm mi asol’in ahsi umdol hethem mihoa kona naosen pen ahetdoh phat chutoh kitoh chet’in asimin, Bethlehem khopi le khovel dunga naosen pasal kum nia lhah noi lames se athagam sah tai. 17 Hechea hin Jeremiah Themgao kama kiseia- 18 “Ramah koa lhaset lunghem Ka le mao ogin nasatah akijan, Rachel in achate aka ka jengin, Athigam tah jeh-un lhepbi jou ahita poi,” kiti chu agui lhung tai.

Egypt gama kona Jesu ahinle puiyu

19 Herod thi nungin Pakaiya kon Vantil khat’in, Egypt gama aumna a Joseph chu amangin kimusah-in, 20 “Thouvin, naosen le anu puiyin lang Israel gam jontan, naosen tha dinga hol ho athigam tauve,” ati. 21 Joseph athoupaiyin, naosen le anu apuiyin Israel gamsung jonin ahung kile kit tai. 22 Ahin Judea gama apa Herod khel’a Archelaus leng chan ajah doh phat’in Judea gama chenden ding Joseph akichanm amang ma akihil chah jeh chun Galilee gamsung joh ajonin, 23 Nazareth khopia achengtai. Hiche hi Themgaohon, “Nazareth mi kiti ding ahi,” atiu gui lhunna dia chute ahi.

Matthew 3

John Baptist thuhil lhangsap

1 Hiche lai hin John Baptist thu ahil lhang len, 2 “Nachonset lung khel’unm ajeh chu van a lenggam chun hikom ahinpha tai!” tin asam’e. 3 John hi Isaiah Themgaovin anaseisa; “Gamthip laiya khosam ogin khat’in, “Pakai lampi semtoh-un lang, Alamlen semjangsan koiyinm tin aseiye,” ati chu ahitai. 4 John pon-ah chu sa-ngongsao mul ahin, akonggah savunm a-anneh khaokhote le gam khoiju ahi. 5 Jerusalem khomite leh Judea gam pumpia mi, chule Jordan gamkol sung pimpia konin miho John henga acheuvin, 6 achonset nau aphong cheh-un, Jordan vadunga john khut’in baptize achangtauve. 7 Pharisee ho leh Saducee ho tamtah ama khut’a baptize chang dia hung amu phat;in Johnin ajahuva, “Vo gulse son ho, kho nunga hung lhung ding Pathen lungsatnaa kona jamdoh dia thu namop’u koi peh ham? 8 Nalung khel’u natohgan phongdoh-un; 9 ‘Abraham son kihina chu,’ tin nalah-uva kiholim nan neidauvin; kaseipeh nahiuve, Pathenin hiche song ho geiya Abraham chilhah a asemthei ahi. 10 Thingphung bul tin’a heicha aki phutsoh tai, aga pholou chengse kiphuh lhua meilhum sunga kileh lut ding ahi. 11 Nalung khel’u phot chetna twiya baptize kachansah nahiuvinm kei bana hungpa vang khu keisanga gamchenga chungnung jo ahinm kei hi akengchot te I sut dinga kilom jong kahipoi; ama chun Lhagao Teng le meikonga baptize nachasah diu ahi. 12 Akhut a chang japna achoiyin, phola chang jap ngimsel;in tin, chuteng achangtah ho changsal’a akhum tip ding, asi chengse vang mit thie lou meilhim sunga agovam ding ahitae,” ati.

Jesu Baptize chan thu

13 Hichepet hin Glilee gama konin Jesun Jordan lui ahin jonin, John khut’a bapize chang din ahung tai. 14 Ahivangin John anathu phan, ‘Keijoh nang khut’a baptize kachan dingsih a kei henga nahung tan’e!” anati. 15 Jesun adonbut paiyin, “tun hit hin molso pou pouvinm ajeh chu hitobanga hi Pathen dei chan ibol bulhingsoh ding ahi,” ati, Hichen John jong anomtai. 16 baptize achan jouva Jesu twiya kona apotdoh chunm ama din van akihongin Pathen Lhagao vakhu bang a hung kumlha achunga chu amui. 17 Chuin van a konin o-khat ahung ginginm “Ama hi kachapa deitah ahinm achugna kalung alhai ta ngeiye,” ati.

Matthew 4

Satanin Jesu alhep patep

1 Hiche jou hin Diabol lhep patep dingin Jesu chu Lhagaovin gamthip’ah apui toutai. 2 Nisom li le jan som li geiya an ngol’a aum jouvin Jesu agilkeltai. 3 Hichun alhempatep chu ahungin ajah a, “Pathen chapa nahileh hiche song ho hi changlhah so na dingin seipeh-in,” ati. 4 Jesun adonbut’in “Pathen lekhabua kisun chun Mihem hi changlhah keova hing theilou ding, Pathen kamsoh thuhoa bou hing dinga kisei ahi,” ati. 5 Hichun Diabol’in Jesu khopi thenga apui yin, Houin tingvum asang laiya adinsahin, 6 “Pathen chapa nahileh keleh lha jengin, ‘songa nakisuh khah louna dingin Pathenin a-Vantilte thu pentin akhut’uvin nadom nauvinte,’ tin Pathen lekhabua akisun nai,” ati. 7 Jesun aseipeh paiyin, “Hitin jong, ‘Pakai na-Pathen patep a na -lhep chatvai louhel ding ahi,’ tin akisun’e,” ati. 8 Chujouvin diabol chunmolsang tah khat chunga Jesu apui touvin vannoi leiset lenggam jouse le aloupina chengseu avetsah soh keiyin 9 ajah a, “Kahenga naboh khup’a chibai neiboh le hichengpi hi peng kate.” ati. 10 chutah chun Jesun ajah a, “Chedohin Satan! ‘Pakai na-Pathen chu chibai naboh a, ama jeng bou nahou ding ahi,’ tin Pathen lekhabua akisun bouve!” atitai. 11 Chuphat’in Diabol chun adalhatai. Hichun Vantilte ahungun Jesun angaichatna jouse ahung jenle tauve.

Galilee gama Jesun na atoh pat

12 John songkul a akhum’u ajah phat’in Jesu jong Galilee gam langa akikhindoh tai. 13 Amavang Nazareth kho dalhan achen, Zebulun le Naphtali gamsung, Galilee dillen pang, Capernaum khoa apansai. 14 Hitia aum hi Isaih Themgao kama kiseisa; 15 “Zebulun gam le Naphtali gam, Jordan gal’a Twikhanglen lampi; Namtin vaipi chenna Galilee, 16 Muthim lah a chengten Khovah vah tah amutauvin; Thina muthim gama chengte chunga Kho ahung vah tai,” kiti chu gui lhunna dinga chuti ahi. 17 Hichelaiya pat chun Jesun thu ahil lhanglen, “Van a Lenggam chun ahinphatai, nachonset lung khel’uvin,” ati.

Jesun nga man pasal li akou

18 Galilee dillen panga Jesu ava le le pet’in nga man mi ni Peter kitipa Simon le anaopa Andrew Twikhanglen a lensep pet amui. 19 Chuin ajah lhona, “Neijui lhonin mihem matje hil lhon inge,” atileh; 20 alen lhon dalhan Jesu ajui pai lhontai. 21 Ache kit leh ucha chom dang ni, Jacob le anaopa John kiti Zebedee to len anakhui phat pet’u amun, amani jong akouve. 22 Jacob le Johnin kong le apa Zebedee dalhan nung ajui lhontai.

Jesun jai kin abolpeh

23 Galilee gam pumpia Jesu ache le len japi houkhomna in tin ah thu ahil len, Lenggam Kipana Thupha aseiphong len, mipilah a nat jat chom choma na ho aboldamin ahi. 24 Chutah chun Syria gam pumpia achung chang thu athangsoh tan, nat jat chom choma naa, natthoh lel, thilhavop, buh thi chule langthi ho jouse Jesu henga ahinpuiyun aman aboldamsoh keitai. 25 Chutjongle Galilee, Decapolis, Jerusalem, Judea gam le Jordan gal langa konin mipi tamtah-in Jesu nung ajuitauve.

Matthew 5

Molvuma Jesu thuhil

1 Mipi amu phat’in Jesu molvuma akaltouvin atou leh aseijuite ahenga ahung kikhomtauve. 2 Hichun Jesu apaodoh-in mipi thu ahil’in hitin aseiye:

Nopna tahbeh

3 “Lhagaova chimthih neilou ho anun nom’ui, Van a Lenggam chu amahoa ahi! 4 Lung lengvai ho anun nom’ui, Pathenin alhamon diu ahi! 5 Milung neng ho anun nom’ui, Amahon leiset alo diu ahi! 6 Pathen dei holna gilkel dangchah thoh ho anun nom’ui, Pathen deiya lung nachim diu ahi. 7 Mi hebol ho anun nom’ui, Pathenin amaho ahebol ding ahi. 8 Milung theng ho anun nom’ui, Amahon Pathen amu diu ahi. 9 Mi sucham ho anun nom’ui, Pathen chate kiti diu ahi. 10 Pathen dei boljeh a bolset thoh ho anun nom’ui, Van a Lenggam amahoa ahi. 11 “Keima jal’a min nabolset, nahouset’uva chule nang ho douna jouthu le thu gilou ijakai naseikhum tengu leh anun nom nahiuve. 12 Hitobang tah a hi nang ho sanga masajo Themgao ho jong anabol setsau ahitai! Kipah-un tha nom’un, van a nasan diu kipaman tampi akikoiye.

Chi le meivah

13 “Nang ho leiset chi nahiuve. Chi khu tamtah le ipia ki-alsah kit ding ham? A-al lou teng panna bei ahitan, akipai mang jin, min keng chotphan aneijitai. 14″Nang ho vannoi salvah nahiuve. Molchunga khopi kisem chu akisel theipoi. 15 Koiman thaomei avah-in lo akhu khum ngaipoi, thaomei khom chunga atungin insunga um jouse asalvahsoh keijie. 16 Hitobang chun navah-u miho masanga kilang hen, chutileh min natoh phat nau muntin, van a um na-pau avahchoi diu ahi.

Jesun Danthu umdol ahilna

17 “Kei hi Mose Danthu l eThemgao ho thuhil sumang dia hungin neigel hih hel’un, asumang ding hilouva amolso ding joh a hung kahibouve. 18 Dih tah a kaseipeh nahiuve, van l eleiset man kahse le thil jouse bei kah sea Danthu kisun lekhajem neopen le ahalsi khat jeng jong mang lou ding ahibouve. 19 Hijeh a chu hiche thupeh lah a aneopen khat susea, midang jong chu tibol dinga hilchan chu van a Lenggama aneopen a pang ding, chu tobangma a anit them le midangin anit themna dinga hilchan chu van a Lenggama alen a kisei ding ahi. 20 Chuti ahijeh a kaseipeh nahiuve, Danthu them ho le Phrisee ho sanga nathem chan nau achung nun joh loule van aLenggamma nalut louhel diu ahi.

Lunghan thudol’a Jesu thuhil

21 “‘Tol natah lou diu ahi, koi hijongle tol that chu achung thu kitan ding kicha jing ding ahi,’ tia malai mite jah a kiseisa chu najtauve. 22 Kenvang kaseipeh nahiuve, koi hijongle asopi chunga lung hang chan chu achung thu kitan ding kicha jing ding ahi; chu jongle koi ahi asopi jah a, ‘Pananbei’ tia house jouse chu hou vaipoloi kikhopnaa athu kitan ding kipha lam jinga, chule asopi jah a, ‘Panabei mi-ngol’ tia house chan jong damun neidil’a lut ding kicha geova um ding ahi. 23 Hijeh chun maicham phunga thiltoh din hung t ajongle chun, chua chu nasopi nachunga lung himona nageldoh leh, 24 maicham maiya nathilto ding dalhan, nasopi chutoh gakicham masan, chujou teng hung kit’in lang thil chu Pathen koma toh-in. 25 “Naheh pan thutanpu heng nalhut masangin lampia kichampin, achuti loule thutanpa koma nakai lut’in tin, thutan pan songkul ngah pa pehdoh-in natin, aman songkul’a nakhum lo ding ahi. 26 Tahbeh a kaseipeh nahi, paisa nongnai geiya napeh theng hel masangin songkul’a koin potdoh thei pon nate.

Numei le pasal kijonbol thua Jesu thuhil

27 “‘Mito najon lou ding ahi,’ tia kisei chu najatauve. 28 Ken vang kichentah a kaseipeh nahiuve, koi hijongle numei jon lung gul’a vea chun alungthima ajonpi ahitai. 29 Hijeh chun namit jelamin nachon setah l ekaldoh-in lan gpai mang jengin; tahsa pumpia damun a nakile lut sangin, natibah khat lhin lel ding aphajoi. 30 Nakhut jetlamin nachonset sah jong le sat lhan pai mang jengin, tahsa pumpia damun a nakile lut sangin natibah khat lhin lel ding aphakoi.

Kida thudol’a Jesu thuhil

31 “‘Koi hileh ajinu daa chun jida na lekha pehen,’ kitisa ahi. 32 Kenvang kaseipeh nahiuve, mito ajonjeh tilouva jida chan chun ajinu ajonso ahin, dasa numei kichenpi jong chu mito jong-ah ahi.

Kihahsel thudol’a Jesu thuhil

33 “Chukit leh, ‘Nakitepna sukeh hih-in, nakitepna jat chu Pakai koma molson,’ tia malai mite kiseipeh chu najatauve. 34 Kenvang nahihahsel louhel diuva kaseipeh nahiuve; van panin kihahsel dauvin, Pathen laltouna mun ahi, 35 Leiset panin jong kihahsel hih-un Pathen kengto ngapna ahi, Jerusalem panin kihahsel dauvin, Leng loupi khopi ahi, 36 naluchang jong panin kihahsel dauvin, nasamjang khat jeng jong nakansah navomsah theipouve. 37 Naseiyu chu ahile hijeng hen, ahida l ehida jeng hen; hiche kalval vang hcu Agiloupaa kon ahibouve.

Phulah thudol’a Jesu thuhil

38 “‘Mit khel’a mit, ha khel’a ha,’ tia kiseisa chu najatauve. 39 Kenvang kaseipeh nahiuve, Agiloupa chu lethuh hih-un, chusangin nangeiphe jet lem benga chu naveilam jong dopeh-in. 40 Hehset’a nasongkhol sung nung lah peh ding gopa chu nasangkhol ponungalenpa geiyin peh than. 41 Koi hile nada nacham louva mile khat napuigoa chu mile ni geiyin kilhonpin. 42 Nahenga thil thuma chu pen, bat ding deiya jong peh louvin koidan.

Melmate ngaitlut ding

43 “‘Naheng nakom ngailut’a melma vang nahot ding ahi,’ tia kiseisa chu najatauve. 44 Kenvang kaseipeh nahiuve, Namelmateu ngailu’vin, nabolse jouseu taopehun; 45 chutilh van a um na-Pau chate nahi theidiu ahi. Ajeh chu Aman migilou le mipha chunga kibangin nisa asat sah gel’in, midih le midih lou chunga go ajuhsah gel’e. 46 Ahimonga jong na-ngailute bou na-ngailut’u leh ipi kipaman namu diu ham? Kaidong chonse hon jong chutia abol’u hi louham? 47 Chule nasopi bou nasalam’u leh midang sanga nachungnun nau ipi um am? Pathen heloute jengin jong chutia abol’u hilouham? 48 Hichejeh chun vana um na-Pau chamkimsoh banga naphat chamkimsoh diu ahi.

Matthew 6

Pathen thilto thua Jesu thuhil

1 “Houva nakitah nau miho mu ding deina nabol louna diuvin ching theiyun. Chutia nabol vangu leh van a um na-Pava kona kipaman nanei lou diu ahi. 2 “Mi thil napeh teng, mipha lhem hon pachat deinaa Hou thua kikhopna in tin le lam lhong tin’a abol bangun, namasang sanga sumkon kimut bahsah hih hel’in. Dihtah a kaseipeh nahiuve, amahon kipaman akisanu ahitai. 3 Mi thil napeh tengleh, nathilpeh chu guh thim ahi theina din nakhut jetlama napeh chu veilam jeng jong hetsah dan. 4 Chutileh guh thima vejing na-Pan kipaman napeh tei ding ahi.

Taona thudol’a Jesu thuhil

5 “Natao tengu leh mipha lhem ho toh bang hih-un, amahon mi mu ding deinan Hou thua kikhopna in tin a dindoh a tao le kholai lamkon dunga din a tao ding bou adeiyui. Dih tah a kaseipeh nahiuve, amahon kipaman akisanu ahitai. 6 Nang vang natao teng, na-indan sunga lut’in, kotpi kikam khumin, mit’a mu thei lou na-Pa hengah guh thimin taojon; chutileh guh thima vejing na-Pan kipaman pejon nate. 7 “Natao tengu le chidang namdang ho bangin tampi kisei chu ajah chom ding ngaiton thu hom keo tamtah seidauvin. 8 Amaho umchan tho hih-un; ajeh chu nathum masanguva jong na-pauvin na-ngai chat jouseu ahetsa ahitai. 9 Hijeh chun hiti hin taovun: ‘Van’a um ka-Pau, namintheng kijabol jing hen, 10 Nalenggam hung lhung hen, Van’a bangin leiset’a nalungdei kim soh hen; 11 Tunia kaneh khop diu an neh neipeuvin, 12 Eibolseteu ka-ngaidam bangun, Kasuh khelnau ngaidamin; 13 Chonset lona thei patepna neilhut dauvin, Agiloupaa konin neihuhdoh jo’uvin,’ tin. 14 “Ajeh chu mi suhkhel na-ngaidamu leh van a um naPauvin jong nasuh khel nau ngaidamin te. 15 Mi suh khel na-ngaidam lou vanguleh, na-pauvin jong nasuh khel’u ngaidam ponte.

An ngol thudol’a Jesu thuhil

16 “An na-ngol tengu mipha lhem ho bangin ki-nguisah dauvin. Mipha lhem hon vang an angol’uvin, mi het ding deinan amaisou achom sah jiuve. Tahbeh a kaseipeh nahiuve, amahon kipaman akisanu ahitai. 17 Nangin vang an na-ngol teng nalu thao kinujol’in, namai kiphet ngimjon; 18 na-anngol chu miho hetsah louvin, guh thima um, na-Pa hetsah in; chutileh guh thima vejing na-Pan kipaman pejon nate.

Van gama goukhol

19 “Nget le thih-eh suhmang theina, guchan aphet vanga aguh mang theina leiset chunga gou khol hih-in; 20 chusangin nget le thih-eh suhmang thei louna, guchan jong aphet vanga aguh mang thei louna van a gou khol jo’uvin. 21 Ijeh-inem itile nagou umnaa chu nalung cheng jing ding ahi.

Mihem tahsa meivah

22 “Mit hi tahsan meivah ahin, namit chim leh natahsa pumpi vahsoh ding ahi. 23 Namit aphat lou vang leh natahsa pumpi thim jeng ding ahi. Hijeh chun nasunga vah thim taleh iti khoh ding hitam!

Pathen chule nei le gou

24 “Soh koiman Pakai ni kin abolkop joupoi, kop taleh khat hotbol’in tin, khat joh alungset ding, ahiloule khat’a hakaiya khat joh anahsahmo lo ding ahi. Hijeh chun Pathen kinbol le sum hol kop thei pouvin nate. 25 “Hichejeh a chu kaseipeh nahiuve, hinkhoa neh le chah chunga lungkham bol dauvin, tahsa sille chen dingin jong lungkham hih-un; anneh twidon sanga hinkho thupi joa, nihchen ponsil sanga tah sa khoh jo hilou ham? 26 Vanlai jol’a akhol sampouvin, hijongle changsal’a akhol sampouvin, hijongle van a um na-Pauvin avah nauve. Vachate sanga khu nang ho manlu jo nahi louvu ham? 27 Nalah-uva lungkham hat’a ahinkho tong khat jopbe thei koi nahiuvam? 28 I-bol’a nihchen ponsil jal’a lungkham nahiuvam? Gamlah apahcha ho khu iti khandoh ham gel phauvin, na la atong pouvin, sil ding patse bol’a ponkhong jong ahipouve; 29 ahinla kaseipeh nahiuve, Solomon jeng jong ahao dungjui tah akijep vangin hiche pahcha ho khat hoi bangin ahoi joupoi. 30 Gamlah hampa tunia kimu, jing teng gop’a meilhum sunga kileh lut ta ding bon Pathenin achuti jep hoi leh, Aman hiche ho sanga najep hoijoh lou diu ham? Vo tahsan lhomho! 31 Hijeh chun, ‘Ipi kanehuva ipi kadon diu, ipi kasil’uva akchen diu ham?’ tin lungkham dauvin. 32 Hicheng hi Pathen hepha louten ahol’un, Nang hon na-ngai chat’u jong van a um na-Pauvin ahesoh keiye. 33 Hijongle amasan Pathen dei le alenggam hol masauvin, chuteng adang ho chengse hi nakipehbe dingu ahinai. 34 Jing dingin lungkham hih-un, jing chun anikhoa ding hinkigel nan e. Nikho khat cheh-in agimpi khop cheh anei nai.

Matthew 7

Midang oimoa athu khol

1 “Oimo nachan louna diuvin midang oimo dauvin; 2 mithu nakhol bang banga nathu kikhol cheh ding ahin, midang nabol nau dan dungjuiya kibol ding nahiuve. 3 Ipi dinga nasopi mit’a bohsi chu namelchih keova, nang mit’a thing long tejen chu mulouva um nahin? 4 Iti jong nasopi jah a, ‘Namit’a bohsi chu neilahdoh sah-in,’ tia nasei ngam a, nang mit’a thing long tejen chu don louva um nahim? 5 Vo mipha lhem, namit’a thinglong tejen chu kilahdoh masah l echun nasopi mit’a bohsi chu muchenin natin, ladoh thei tan nate. 6 Thil theng chu uichate peh dauvin, hung kiheiya nape lou diu ahi; vohchate masanga jong natwikoh chang sep lha hih-un, akengtoa achil thang bep diu ahi.

Thumin, hol’in, kiuvin

7 “Thum’un kipauvin nate, hol’un namudiu ahi; kiuvun nakihonpeh diu ahi. 8 Ijeh-inem itile athum chan kipe ding, ahol’an amuding akiuva kihonpeh ding ahi. 9 Nalah-uva achapan neh ding changlhah athum l esong pea, 10 nga athum leh gul peding koiham? 11 Migiloutah nang hon bon nachateu thilpha pehje nahet’uleh, van a um na-Pauvin ahenga thumte chu itobang tah a thilpha apeh ding hitam! 12 Hijeh chun min iti nabol le nadeiyum, nang hon jong hitobnagma chun bolpeh-uvin, hitia bolding hi Danthule themgaote thuhil to kitoh ahi.

Kotjim

13 “Kot jim a lut’un, ajeh chu manna lam chu akot lentah ahin, alampi alenin, mitamtah hichea chun alut’ui. 14 Hinna lam chu akot jong akichin, alampi ahah-in, hijeh chun alut’a mi lhomcha ahiuve.

Thingphung agan akihei

15 “Kelngoi phat’a kiphatsah, asung lam ngeihang tah tobang Themgao lhem nahenguva hungji ho koma kichih theiyun. 16 Itobang ahiu atohgauva nahet diu ahi.Ling phunga lengpi theiga kilouva, meithai seltho linga theichang ga ikilou ngaiyam? 17 Hitobang hin thing phung phalou ga aphapoi. 18 Thingphung phaa ga pha lou ga ngai lou, thing phung phalouva jong ga pha ga ngai lou ahi. 19 Aga phalou thingphung jouse chu akiphuh lhun meilhum sunga akileh lutjitai. 20 Hijeh a chu mi atohgauva nahetdoh diu ahi.

Ken kahekhapouve

21 “Pakai, Pakai eiti chan chu van a lenggam lut lou ding, van a um ka-Pa deilam bol’a bou lut ding ahi. 22 Hiche Nikho chuleh mi tamtah hunguva, ‘Pakai, Pakai, keiho namin a gaothu seisa, thilha nodohsa chule thil kidang bolsa kahilouuvu ham? ati diu ahi. 23 Chuteng ajah-uva phong tah a, ‘Vo Dan dih lou bolte, kakoma konin potdoh louyun, nang ho kahe kha hih hel’ui,’ kati ding ahi.

Bul kiphu gotni

24″ Chuti ahijeh chun kathusei hiche hi ja a bol’a chu mi lungthim pha, song chunga in kisah to kitekah ding ahi. 25 Gon ajuh khuma, vadung in aso den a, huipin ahin mut vangin, hiche in chu aluden poi; ajeh chu a-inbul khom songpi chunga kiphut det chet ahi. 26 Kathusei hicheng hi ja abol lou vang chu milungthimbei, nellei chunga in kisah toh kitekah ding ahi. 27 Gon ajuh khuma, vadungin aso den a, huipin amut tengleh in chu alhujitan, alhuh chu melse tah ahi,” ati.

Jesu thanei dol

28 Jesun chujat asei chai chaiyin mipin athuhil chu kidang asa lheh jenguvin ahi. 29 Ijeh-inem itile aman Danthu themho hil banga hil louva thunei tah banga ahil jeng thei ahi.

Matthew 8

Jesun miphah khat asuh theng

1 Jesu molvuma ahung kumsuh chun mihonpin ahin juiyui. 2 Hichun miphah khat ahungin akoma bohkhup’in, “Pakai, nalung ahileh neidam theng sah thei ahi,” ati. 3 Jesun athamin, “Kalung ahinai damthengtan,” ati leh, apettah chun aphahnat adamthengtai. 4 Chuphat’in Jesun ajah a, “Koimacha henga seidoh hih hel’in, amavang chen lang Thempu gakivetsah-in, nadamtheng hi phot chetna din Mose thu peh dungjuiyin nathilto ding lom gatoh tan,” tin ahil’e.

Jesun sepai jalamkaipa lhachapa adamsah

5 Jesu Capernaum khoa alut chun sepai jalamkai khat ahenga ahungtaovin, 6 “Pakai, in a um kalhacha chapang khat langthin agen thei lheh jenge,” ati. 7 Jesun, ajah a, “Hung damsah nang e,” atileh; 8 jalamkaipan adonbut’in, “Pakai, nang hi kei in sunga lut dinga kilom nahipoi, thu mai mai sei jong le chun kalhacha chapang chu dam jeng thei ahinai. 9 Ajeh chu kei jong thunei ho noiya um kahin, kei noiya jong sepaite aum’uvin, khat pen pen jah a, ‘Chen,’ katile achen; achom dang khat jah a, ‘Hungin,’ katil eahunge; chule kalhacha jah a, ‘Hiche hi bol’in,’ katileh, abolji nai,” ati. 10 Athujah hi Jesun kidang asa behseh jengin, anunga hung ho jah a, “Dih tah a kaseipeh nahiuve, Israelte lah jenga jong hitobnag tahsan len kamudoh hih laiye. 11 Hi jeh a chu kaseipeh nahiuve, niso lam le nilhum lama kon a mitamtah hung kikhom’uva van a Lenggam a Abraham le Isaac chule Jacob toh ankong aumkhom diu ahi. 12 Ahin lenggam chate dia kigel ho joh chu polam muthim lah a kileh lut diu, hikoma chu ka le hagel um ding ahi,” ati. 13 Chuin Jesun jalamkaipa jah a, “Chetan, natahsan banga lhung ding ahinai,” atipeh-e.

Jesun Peter nupanu adamsah

14 Jesu Peter insunga alut leh, Peter nupanu nat lhut’a na a lum agatoh khai. 15 Jesun akhut agah tham leh anat lhut chun alhan, amanu ahung thoudoh paiyin ajen len apangtai. 16 Nilhah lamin thillhavop mi tampi Jesu henga ahin puiyun, Aman thu cheng khatseh seiyin thilhaho anodoh-in, damloute adamsah soh keitai. 17 Hitobang kiseisa, “Aman inatna jouseu le iveiset chengseu akilah-in apomangtai’” kiti chu guilhunna dinga chutiso ahi.

Jesu seijui lom

18 Akimvel’a mipi kikhom amudoh phat’in Jesun dil gal lang khat’a galkai ding asomtai. 19 Hichun Danthu lekha them khat ahungin ajah a, “Houhil, nache che naa juiyinge,” ati. 20 Jesun ajah a, “Gam-uiten ko aneiyun, chunga leng vachaten bu aneiyui; mihem Chapan mun aneipoi,” ati. 21 Seijuiho lah a khat’in, “Pakai amasan kapa vui din neisol tadin,” ati. 22 Jesun ajah a, “Neijui jengin, mithi hon athilongu kivui nauvinte,” ati.

Jesun dil kinonglai aphothip

23 Jesu kong sunga alut’in aseijuiten akilhonpiuve. 24 Hetman louva dilpi chu khopihui hattah-in ahin nuh leh, twi kinongin kong chu achup pai ding ahitai. Jesu vang aihmu nalaiye. 25 SEijuiten agasukhang loiyun, “Pakai neihuhhing loiyun twiyin eichup lih diu ahitai!” atiuve. 26 Jesun ajah-uvah, “Vo tahsan lhom ho idia chuti kichat nahiuvem?” atin, athoudoh-in khopihui le dillen chu haphoa apho leh athip del jenge! 27 Mihon adatmo soh keiyun, “Ipi mi bep hiya hui l edillen geiyin athu angai jeng hitam!” atiuve.

Jesun thilhavop mi ni adamsah

28 Jesu agalkaiya Gadara gamsung alhunin, lhankhuh lah a hung kon thilhavop mi nin akimutopi lhon’e. Thilhavop te ni chu kichat aum behseh jeh-in aumna lhon lampi chu koiman ahopa ngampoi. 29 Amani apengjah lhonin, “Vo Pathen Chapa, ilo ding neitiu ham? Akitep Phat lhin masanga keiho bolgentheiya hung nahim?” ati lhon’e. 30 Akom’uva kon chun muphah don khat’a hin vohcha tampi hon khat alhai. 31 Thilhahon ahenga, “Neikaidoh tei diu leh hiche vohchate sunga khun neisol’uvin,” tin ataovui. 32 Jesun “Lut tauvin,” ati phat’in, ahung potdoh-un vohchate sunga aluttauve. Chutah chun Vohhonpi chu ha-lhaiyin alhaiyun, kol’ah a alhai lhauvin, dil sunga achomlut soh hel’auvin, twi lah a athidentauve. 33 Chuphat’in vohcha ching ho kho sunga ajamlut’un, thilhavop te ni chunga thusoh le athilmu jouseu agaseisoh tauve. 34 Chutah chun kho sung mite abonchan Jesu henga ahungun, Ama chu agamsunguva kona potdoh din ajoltauve.

Matthew 9

Jesun pasal langthi khat aboldam

1 Jesu konga alut’in, ahung kile tol galkaiyin khopi sung ahung lhungtai. 2 Hichea hin mihon pasal langthi khat alupna pumin Jesu henga ahinpuiyui. Jesun atahsanu amuchet phat’in langthipa jah a, “Kihol lel hih-in chapa, nachonset jouse ki-ngaidam ahitai,” ati. 3 Hichun Danthu lekha them phabep’in, “Hichepan Pathen ataitom’e,” tin agel’ui. 4 Alung gel’u Jesun ahen, “Idia hitobang thilse nagel’u ham? 5 ‘Nachonset aki-ngaidamsoh tai,’ ti leh “Thouvin lam jottan,’ ti hoijoh seibai jom? 6 Leiset chunga Mihem Chapan chonset ngaidamna tha anei kavetsah nahiuve,” atin, lang thipa jah a, “Thouvin, nalupna kilah-in na-inlam jontan,” ati. 7 Langthipa akipatdoh paiyin inlam ajontai. 8 Mipin hiche hi amu phat’un akichauvin, ahinvangin mihemte chunga hitobang thaneina pea Pathen avahchoitauve.

Jesun Matthew akou

9 Jesun hikom chu dalhan ache leh Matthew kiti mi khat a kaidonna mun a tou amun, ajah a, “Neijuiyin,” atileh; Matthew akipatdoh-in ajuitai. 10 Matthew in a Jesun ankong aum phat’in kaidong ho tamtah l ethet umtah tah miho ahungun Jesu le aseijuite toh ankong aumkhom’uve. 11 Pharisee hon hichu amuphat’un aseijuite jah a, “I-bol’a na Houhil pauvin kaidong ho le thet um tah tah ho to an aneh khom ham?” tin adongui. 12 Jesun aseiyu ajan, “Midamin louthem angaipon, adam louvin bou angaiye. 13 Keiman hepina bou kangeh-in, kilhaina ka-ngeh poi,’ kiti hi ipi kiseina ham gakhiltoh-un. Ajeh chu midohho kouva hung kahipon, chonset kouva hung joh kahibouve,” ati.

An-ngol thudol’a kidohna

14 John seijuite Jesu henga ahungun, “I-atileh keiho le Pharisee hon an-ka-ngol mat chet juva, nang seijuiten an ngol khah louvu ham?” tin ahung dongui. 15 Jesun adon but’in, “Kichen golvahna hung lha ho chu aji neipan alenkhomi laisea lunhham ngaiyam? Amavang aji neipa akom’uva kona akipui mang nikho hung lhung ding ahin, chutengleh kichen golvah a hung lha hon an ngol diu ahinai. 16 “Koiman sopnem loulai ponhal’in ponlui abeh ngaipoi, beh leh abehnan pon lui chu bot-eh jontin, haset cheh lo ding ahi. 17 Chujongle min savun peng lui sunga jong lengpitwi thah akhum ngaipoi, khum ta leh alengpitwi pen gchu tumkeh intin, lengpitwi long jal’a apeng jong mang lo ding ahi. Hijeh chun lengpitwi thah chu savun peng thah a akikhum jin, lengpitwi le apeng anigel’in ahoidoh theiye,” ati.

Vaihompa chanu le jesu pon thamkha numei

18 jesun hiche hi asei nalaiyin, vaihom pasal khat akom’a ahung bohkhup’in, “Tutah chun kachanu athitai, hinla hungin achunga na khut ngamle chun hingkit teiyinte,” tin ataove. 19 Jesu akipatdoh paiyin vaihompa to akilhon phat’in aseijuiten jong ajuitauve. 20 Lampia chun kum som-le kum ni thi longa dammi numei khat hi Jesu nunga ahungin apon mong kai atham’e. 21 Amanu kigel’a chu, “Apon mong jeng jong thamkha len gdam inge,” ati ahi. 22 Jesu agah kihei leh numei nu chu amun, “Kihol lel hih-in chanu, natahsanin nadamsah ahitai,” ati. Hiche pet tah chun ama nu adamsel tai. 23 Jesu vaihompa in a alut leh thi-opna akuli mut h leh mipi poh chei choiya um amun, 24 “Nabonchan potdoh-un, chapangnu hi athi-ah ahipoi, a-ihmu ahibouve,” atileh amahon amoh nuisat atauve. 25 Hinla mipi adeldoh phat’in Jesu insunga alut’in, chapangnu chu akhut’a akaileh chapangnu athudoh tai. 26 Hiche thusoh hi chuche gamsungse sea akithangsoh tai.

Jesun mitcho ni kho amusah

27 Chukom dalha a Jesu acheleh, mitcho mi nin ajui lhon’in, “Vo David chapa neilungset’in,” tin asam lhontai. 28 Insung khat’a agalut phat’in mitcho tenin jong ajuilut lhontai. Hichun Jesun ajah lhon’a, “Namit lhon hahsah thei ding monga neitahsan lhon ham?” atileh; amanin jong, “Henge Pakai!” ati lhon’e. 29 Chuphat’in Jesun amit lhon athampeh-in, “Natahsan lhon bang in mit hah lhontan,” atileh; 30 hichun amitlhon ahah paitai. Jesun amani akham chah kheh-in, “Koima hetsah-lhon hih beh-in,” ati. 31 Mitchote ni chula apotdoh lhonin chuche gamkol sungse seah Jesu thudol athechansoh lhontai.

Jesun paomo khat apaosah thei

32 Agah potdoh-u leh thilhavop mi paomo khat Jesu henga ahinpuiyui. 33 Jesun thilha anodoh peh phat’in paomopa apaothei paitai. Chutah chun mipin kidang asauvin, “Israelte lah jenga jong, hitobang thil akimu kha hih laiye,” atiuve. 34 Pharisee hon vang, “Thilha lengpa vanga thilhate adeldoh hichume,” atiuvin ahi.

Jesun mipi akhoto

35 Jesun khopi jouse l ekhoneo jouse achonsoh keiyin, Houthua kikhopna intin a thu ahil len, Lenggam Kipana Thupha ahil lhangin, veise dammo jouse aboldamin ahi. 36 Jesun mipi avet leh alainatpi lheh-e. Ajeh chu achingbei kelngoite bangin gim le da athoh-un, apan hu diu aumpoi. 37 Hijeh chun Jesun aseijuite jah a, “Chang-at ding atam lheh nan, natonga alhom’e, 38 chang-at ding mi ahinsol be na din chang-at thunei Pakai henga taovun,” ati.

Matthew 10

Solchah som le ni

1 Jesun aseijui som le ni chu akoukhomin, lhagaoboh ho deldohna ding le dammo veiset jouse boldam theina tha aei. 2 Solchah som le ni ho min chu: amasapenin Peter kisah Simon le asopipa Andrew ahin, adang Zebedee chapa t eni Jacob l easopipa John, 3 Philip l eBartholomew, Thomas, kaidongpa Matthew, Alpheus chapa Jacob, Thaddaeus, 4 Canaan mi Simon, chule Jesu matsah a pang Judas Iscariot-hicheng hi ahiuve.

Seijui som le ni kisol lo na

5 Som le ni asoldoh chun Jesun hitin ahilchah-e: “Chidang nam dangte gamsung le Samaria mite khoi ho jot dauvin. 6 Kelngoi mang sa tobang Israel insung mite henga chejo’uvin. 7 Nache pum pum’un, ‘Van a Lenggam chun hikom ahin phatai,’ tin samleuvin. 8 Ana damsah-un, mithi kaithouvun, aphah suthengun, thilha nodoh-un, manbeiya nakisanu ahi, manbeiyin homjal’un. 9 Nasum dip sunga sana, dangka sumsan kipoh sauvin; 10 cholam ding sum thumna din sakhao jen gjong kendauvin, sangkhol tho ni ah hih-un, kengchot hihen tenggol hileh kendauvin. Ajeh chu natong’an aneh ding amu lom ahi. 11 “Khopi hihen khoneo hileh naphah phah nauva nalhunsah nom miu holdoh-un, chukom nadalhah kahseuvin umpiuvin. 12 Nalut lut nau insung jah a, ‘Lungmon leng hen,’ tin salam cheh-uvin. 13 Insung khattaouvin lamtoa nalhunsah-u leh salam’un lang, nalhunsah nom lou vangu leh salam datauvin. 14 Insung khattou le khopi khattouvin lamto loule lhunsah da akop’uva, nathu seiyu jong angaidau leh, nakengphanguva leivui geiyin thin lhah khum’un dalhauvin. 15 Tahbeh a kaseipeh nahiuve, Thupi tan nikho leh chuche mun mite thoh ding sanga Sodom le Gomorrah khopi thoh baijjo ding ahi.

Bolsetna hung lhung ding

16 “Veuvin, ngeihon lah a kelngoi kilha lut banga kasol nahiuve. Hijeh chun gul bangin ching theiyun, vakhu bangin lung nem’un. 17 Chingtheiyun, mihon man’uvin natin Hou vaipoloi kikhopna nakai lut diu, Houthua kikhopna in dunga najep diu ahi. 18 Keima jal’in vaipote le leng ho anga kailut’un tin, hinla amaho le chidang namdangte henga kathupha hettohsah a napan diu ahi. 19 Hitia nakailut tengu leh nasei diu le nasei ding dol’un lung kham hih-un, apettah leh kipenauvin nate. 20 Ajeh chu nalunggel mai mai nasei diu ahipon, nasunguva cheng na-Pau Lhagao chun naman chah-uva asei ding ahibouve. 21 “Pasal’in asopite aheh lih a, mipaten achate chutima abol diu, chaten jong anu apa adouva athiso cheh diu ahi. 22 Keima jal’a mitin hot le paiya na-um diu, hinla akhon ni geiya thoh lhumpa bou huhhinga um ding ahi. 23 Khopi khat’a nabolset tengu khopi chom khat’a jam lut’in, tahbeh a kaseipeh nahiuve. Mihem Chapa hung kah a Israelte khopi jouse nachotsoh louhel diu ahi. 24 “Seijui chu ahilpa sangin achungnungjo pon, soh jong apu sangin achungnung ngaipoi. 25 Seijui chu ahilpa tobang bep ahiya, soh apu toh abah joule aphaset ahi. Ainneipa bon Beelzebul ahisah ngamu leh a-insung mite ipi ahisah da diu ham?

Gin ding pen koiham

26 “Mihem kichah hih-un. Ajeh chu phondoh louva sel mang ding aumpon, hetdoh louva im-mang ding jong aumpoi. 27 Muthima kaseipeh-u hi khovah a naphonjal diu, guh thima kahil’u hi intingvuma naphonjal diu ahi. 28 Tahsa sunmang thei jongle lhagao that thei lou chu kichat dauvin, chusangin tahsa le lhagao akop’a damun a sol a sumang thei Pathen joh ginguvin. 29 Vasah ni paisa khatseh man a kijoh ji lou ham? Ahivangin na Pau phatsah louva khat jeng cha jong tol’a kimoh selhah lou ding ahi. 30 Nang ho jong nalujang sam jouseu geiya simtohsa kikoi ahitai. 31 Hijeh chun kicha hih-un, vahsah ho sanga manlujo nahiuve.

Mihem maiya Christa phondoh

32 “Koi hile japi lah a Christa mi ahi kiphongdoh chan chu Ken jong van a um ka-Pa angsunga kaphondoh ding ahi. 33 Koi hi leh Christa mi ahina japi lah a immang chan chu Ken jong van a um ka-Pa angsunga kaseilep ding ahi.

Chamna thu hilouva chemjama kidouna

34 “Leiset chunga chambol’a hungin neigel dauvin, chambolma lah chemjama kidouna dinga hung kahibouve. 35 Ajeh chu pa le chapa kidohsah a, nu le chanu kidohsah ding, tehpi leh mounu kidohsah dinga hung kahibouve. 36 Mihem dia amelma khohpen tahchu a-insung mi ma ma hiding ahi. 37 “Koi hile Kei sanga anu apa lungset jo jong kaseijui lom ahipoi. 38 Athingpel kiput’a kanung jui lou chu kaseijui lom ahipoi. 39 Koi hile kihinso nom chun athilo ding, keijal’a thilo chanin kihinsona anei ding ahi.

Kipa man ho

40 “Koi hileh nang ho lem a lhunsah chanin Kei eilem a lhunsah a kila ding, Kei eilem a lhunsah jouse chu Eisolpa lema lhunsah a ahi. 41 Pathen Themgao lem a lhunsah chun Themgao kipaman akihoppi ding ahin, mipha lem a lhunsah jong chu mipha kipaman amuding ahi. 42 Dihtah a kaseipeh nahiuve, kaseijuite lah a aneopen khat hijong leh seijui ahina jeh a twidap khon khat pejeng jong chu kipaman akisan tei ding ahi,” ati.

Matthew 11

John Baptist misol-ho

1 Jesun aseijuite som le ni ahilchahsoh phat’in chukom dalhan, naivel khopi dunga thuhil’a seiphong le din achetai. 2 Akihenna songkul’ah Messiah natoh thilbol kithang ajan, John chun aseijui phabep Jesu henga asol’e. 3 Amahon Jesu jah a, “Hung dia kisei chu nahim, achom dang khat ka-nga nah lai diu ham” atiuve. 4 Jesun ajah-uvah, “Kile kit’un lang najah chengseu le namu chengseu hi gaseipeh tauvin; 5 mitchon kho amun, elbaiyin lam a jot tan, miphah suhthengin aumin, na-ngongin kho ajan, mithi kaithouvin aumtai, chule vaichate Kipana Thupha akiseipeh tai. 6 Kachunga lung opkaina neilou chu anun nom’e,” ati. 7 John seijuite kile phat’in, John thudol mipi jah a Jesun aseiyin; “Gamthip laiya ipi vetnom’a che nahiuvem? Hui mut ling peng venom nahiuvam? 8 Ipi vedia che mong nahiuvem? Kile lah ponsil mi ham? Pon kikhel sil miho leng inpia achengbouvui! 9 Ipi vetnoma cheba nahiuvem? Themgao ham? Ahinai, Themgao mai mai ahi poi, thupitah Themgao ahi. 10 Pathen Lekhabua Pathenin, ‘Nalampi sem toh din namasanga kasolle kasol masai,’ tia asei chu John hi ahitai. 11 Tahbeh a kaseipeh nahiuve, numei sung peng cheh ahivangin John Baptist sanga lenjo mihem apeng kha hih laiye; hinla van a lenggama neopen jong ama sangin alenjo nalaiye. 12 John Baptist thuseiphong nikhoa pat tuni geiyin van a lenggam hi min pumhat jengin anon, mi huseten pumhat’a lah din agouve. 13 John khang geiya Themgao jouse le Mose Danthun Lenggam thudol aseiyu ahin, 14 nakisan nom’u leh John hi hung dia kisei Elijah chu ahitai. 15 Nakhang neiyan ngai hen! 16 “Hiche khang mite hi ipi to kitekah theiyin tem? Kailhang dunga tou chapang ho loikhat’in adang ho jah a, 17 Kipana kuli kamut vangun nalam pouvin, thi lhah la kasah-u jongle nakap pouve,’ tia kihouho tobang ahiuve. 18 Ajeh chu John hi muhem neloule midon don louva aumle ‘THilhavop ahi,’ atiu vin; 19 mihem Chapan mineh ngai aneh a midon ngai adon vangin, Neh het le lengpitwi lop, kaidong ho le chonsete jol le gol,’ tin asei kit’ui. Hoi hileh chihna chu atohgan them achan ahibouve,” ati.

Atahsan lou khopi ho da na

20 Jesun thil kidang ahabol dehna mihon lung ahei loujeh-un aphohsal’in, 21 “Ohe Chorazin khopi nada ahi! Ohe Bethsaida khopi nada ahi! Nakhosunga thil kidang kibol chengse hi Tyre le Sidon kho sunga kibol hileh, khomiten kisihin khaopon sil’a vut kinu’vintin achonset lung heisoh tauvinte. 22 Tahbeh a akseipeh nahiuve, thupi tan nikho le nang ho thoh sanga Tyre le Sidon kho mite thoht oljo ding ahi! 23 Chule Capernaum nang hi! Van geiya kichoisang go nahim? Noimigam a nasot lhah diu ahibouve. Nakho sunga thil kidang kibol sengse hi Sodom kho sunga kibol leh mangthth hih laiyinte. 24 Tahbeh a kaseipeh nahi, thupi tan nikho leh nang thoh sanga Sodom thoh oljo ding ahi,” ati.

Kahenga hungin choldo’uvin

25 Hichepat hin Jesun, “Pa van le leiset Pakai! Michingte le mi themte dia na-impeh chengse mimol ho naseipeh jeh-in kathangvah-e! 26 hiti dinga hi nadeimong hinte he-Pa! 27 “Ka-Pan thil ijakai eippedoh tai. Pa tilou koiman Chapa ahepon, Chapa le aman aphondoh peh nom ho tilou koima dangin Pa ahepouve. 28 “Tong gimte leh pohgihte kahenga hungun, Keiman choldoh sah unge! 29 Kanamkoljon kilah-un pouvin, Keiya kihil’un, Keima lung nengtah le nun nemtah kahi, Keiya hinjouna nanei diu ahi. 30 Ijeh-inem itile kanamkoljon apoh anop’in, kapoh jong ajang’e,” ati.

Matthew 12

Choldo Nikho thudol’a thudoh

1 Chom khat jouvin Choldo nin Jesun bulei lai ajotpai. Aseijuiten gilkel jeh-in changvui asih pantauve. 2 Athilbol’u hi Pharisee hon amu’uvin Jesu jah a, “Ven, naseijuiten Choldo nin dan ngailou abol’ui!” atiuve. 3 Jesun adonbut’in, “David l ealoite agilkel’uva chu ipi abol’u nasim khah louvu ham? 4 I-atileh Pathen Houin a lut’a, Thempu tilou neh ngai louhel, Pathen um jing hetna kitohsa changlhah aloite toh aneh jengu ham? 5 Ole Choldo niseh leh Houin sunga lutji Thempu hon Choldo nikho asuhkeh vanguva themmo achanda diu Danthu chu nasim khah louvu ham? 6 Kaseipeh nahiuve, Houin sanga thupijo khat hikoma aum’e! 7 Pathen lekhabua, ‘Gan alhai ka-ngeh poi, hepina bou kadeiye,’ kiti chu heleu chun monabei miho themmo nachan lou diu ahi. 8 Ijeh-inem itile Mihem Chapa hi Choldo nikho Pakai ahi,” ati.

Khut lang ngoipa damdoh

9 Hikom chu dalhan Houthua kikhopna in khat’a Jesu aluttai. 10 Kikhopn ain a chun pasal khut lang ngoi khat ana umin, alah-uva chun Jesu thilbol dihsah lou jeh a hehse nom mi phabep jong aum’e. Amaho hin, “Choldo nikhoa damlou boldam hi Danthu to kikal hilou ham?” tin adongui. 11 Jesun adonbut’in, “Choldo nikhon nalah-uva koiham khat kelngoi kokhuuh a lahlut taleh aneipan agakaidoh lou ding ham? 12 Mihem hi Kelngoi sanga gam chenga mantamjo ahi! Hijeh chun i-Danthuu hin Choldo nikhoa mi kithopi ding aphal’e,” ati. 13 Hijeh chun Jesun khut lang ngoipa jah a, “Nakhut langin,” ati. Khut ngoipan alhandoh jen gleh adamtan, adamlang bep bep ahitai. 14 Chuphat’in Pharisee h apotdohun Jesu thana ding akihousomtauve.

Pathen lhentum Lhachapa

15 Ama than ding akihousomu ahet doh phat’in Jesu chukom dalhan apotdoh le japin ajuitauve. ana jouse aboldamin 16 Ama thusim chu midang aseipeh da diuvin ahilchah-e. 17 Hitobang thil hi Isaiah Themgao kama kiseisa: 18 “Ven, kalhentum lhacha deitah, Kadeitah le kalung lhaina pen! Achunga ka-Lhagao chensah ingting, Chitin namtin lah a kathutan aphondoh ding ahi! 19 O-sanga mi anelkal lou ding, Kholai dunga jong lhang asap lou ding; 20 Tahlelte dia nun nem ding, Panpibeite akhoto ding ahi! Dan dihtah a thu akitan kahsea Adou dou jeng ding ahi! 21 Chule namtin vaipin akineppi diu,” kiti chu guilhunna dia soh ahi.

Jesu chule Beelzebul

22 Hichepet hin thilhavop mitcho paomo mi khat hi Jesu henga ahin puiyun, Jesun aboldam phat’in apao theiyin kho amutai. 23 Jesu thil kidang bol hi japin adatmo behseh jengun, “Hichepa hi David Chapa hi-ngap ding hitam?” akitiuve. 24 Pharisee hon ajahdoh phat’un, “Thilha lengpa Beelzebul thahat’a thilahte anodoh hichu me!” atiuve. 25 Alunggel’u ahet phat’in Jesun ajah-uvah, “Kilang khen a kidouto lenggam tapou mangthah ding, ki lang khen a kidouto khopi hihen insung hi jong le mangthah vah ding ahi. 26 Satanin Satan anodoh leh akilangkhen ahitauvin, alenggam beivah ding ahitai. 27 Thilha lengpa Beezebl thahat vanga thilhate nodoh a neiseiyu leh naseijui teuvin koi thahat vanga anodoh-u ba ham? Namo nau phongdoh a naseijuiteu pang diu ahi. 28 Pathen Lhagao vanga thilhate nodoh kahi vang leh Pathen Lenggam chu nalah-u lhung ahitai. 29 “Mihat insunga lut chun ama somkon masa louva kon anei achom thei ngaiyam? Inneipa asomkon jou tengle bou anei achompeh ding ahi. 30 “Koi hileh eipanpi lou chu eidou mong ahin, eilhoh khomhu lou mi chu athecheh a pang ahibouve. 31 Hijeh a chu kaseipeh nahiuve, mihemte chonsetna le Pathen ataitom nai itobang hijongl eki-ngaidam thieyin tin, Lhagao Theng taitom vang ngaidam chang louhel ding ahi. 32 Mihem Chapa douna thusei jong ki-ngaidam thieyin tin, Lhagao Theng taitom vang hcu itih chan a jong ngaidam chang louhel ding ahi!

Thingphung chule Aga

33 “Thingga pha deiyan thing phung pha nei angaiye, nathing phung aphat loule thingga phalou nanei ding ahi. Ajeh chu thingphung hi agan akihei. 34 Gulse guiya peng ho, gitlou puma iti thupha nasei theidiu ham? Ajeh chu lungsung alet teng kamsunga hungpotdoh ahibouve. 35 Miphan athilpha kholna lung sunga konin thipha asodoh jin, misen athilse kholna lungsunga konin thilse asodoh jie. 36 “Kaseipeh masah nahiuve, thupi tan Nikho leh mintinin manlou thu asei jouseu geiya asuhto soh kei diu ahi. 37 Naseisau thu hoa chu nathem namo nahcung thu kitan diu ahi,” ati.

Khang gilouten melchihna ahol’u

38 Danthu them phabep le Pharisee phabep’in Jesu jah a, “Houhil, thil kidang nabol kavetnom’ui,” atiuve. 39 Jesu a-eojah-in, “Pathen hephaloute leh khang gilouva miten melchihna nahol’um? Jonah Themgao melchihna itlou melchihna dang kipelou ding nahiuve. 40 Ngapi oisunga Jonah nithum le janthum athamden banga Mihem Chapa jong leiset Lailunga nithum le janthum thamden ding ahi. 41 Thupi tan nikho leh Nineveh kho mite chu hiche khang mite toh hung ding khom’uva themmo achan diu ahi; ijeh-inem itile Nineveh kho miten Jonah thuseu ajah phat’un chonset lung aheiyui; hinla veuvin Jonah sanga lenjo khat hikoma aum’e! 42 Thupi tan nikho leh Sheba lengnu chu hiche khang mite toh idng khoma themmo achan ding ahi; ajeh chu leiset kolmang lang peh a konin Sheba lengnun Solomon chih thusei ahung ngai gunset theiye; tunla veuvin Solomon sanga lenjo khat hikoma aum’e!

Lhagaoboh hung kilekit

43 “Lhagaoboh hi mihem sunga apotdoh teng gamgo lah a avah len choldo mun ahol lelen, mu la amuji poi. 44 Chutengleh, ‘Kahung potdoh namun ma ma a lut kit tange,’ atin, ahung kile kit leh, mihem chu sagoh keova kithen ngimsel’a um amun, 45 ache kit’in ama sanga khohjo lhagaoboh sagi ma agapui ben, mihem sunga chun alut’un achenpha tauve; chutah chun mipa umchan hi amasa sangin akhoh cheh tai. Hiche khanga migiloute jong hung chuiti diu ahi,” ati.

Jesu nu le Jesu sopite

46 Jesun mipi jah athu asei nalaiyin anu le asopite ama to kihou nomin ahungun inpo-ah angah-ui. 47 Hijeh chun mi khat hin Jesu jah a, “Ven, nanu le nasopite nang to kihou nomin ahungun inpo-ah na-ngah-ui,” atipeh-e. 48 Ajah a thuseipa jah a Jesun, “Kanu koi hiya, kasopite koi koi hiuvam?” atin, 49 aseijuite akoh-in, “Ven kanu l ekasopite hi! 50 Ajeh chu koi hileh van a ka-pa lungdei bol’a chu kasopipa, kasopinu chule kanu ahiuve,” ati.

Matthew 13

Muchi thepa thulem

1 Hiche nikhoa hi Jesun in dalha dil pang lama chea atou phat’in 2 mipi ahung kikhom’un, Ama kong sunga alut’in atouve. Mipi vang va0kam a adingui. 3 Hichun Jesun mipi ajah a thu tampi thulemin aseiye: “Pasal khat muchi the din akontai. 4 Muchi athephat’in abang lamsih a achun, vachaten akilogam tauve. 5 Muchi phabep jong song lheo chung, lepatnaa achun, aleiphat jeh-in ahung keh doh loiye. 6 Hinla nisan asah phat’in leipat jeh a ajungkho thuh loujeh chun asang gop jitai. 7 Muchi phabep ma ling lah a achukhan, ling ho akhandoh phat’in adep lih jin ahi. 8 Muchi phabeppi vang leipha laiya achun, akhangdoh-in agatan, abang jakhat cheng, abang somgup cheng chule abang som thum chengin apunge, 9 “Nakhang neiyan ngai hen.” ati.

Thulem kiseilona

10 Seijuiten anailut’un Jesu jah a, “I-bol’a mipi koma thulem jenga thu nasei ham?” atiuve. 11 Jesun adonbut’in “Nang ho hi van a lenggam thuguh hetna kiseipeh nahitauvin, amaho vang kisepeh nailou lai ahi. 12 Aneiya chu anei let setna dia kipeh be ding, aneilou vang themcha nei jongle kilahpeh ding ahi. 13 Ijeh-inem itile amaho hin veu jongle muthei lou ding, ngai jongle ajah thei lou diu ahi jeh a thulema kisei ahi. 14 Hichea hin Isaiah Themgao seisa: ‘Ja jong leu nahet khen thei lou diu, Ve jong leu chun namu chet thei lou diu; 15 Ijeh-inem itile hiche nam mite hi alungthimu amoh-in, Akolseh gam’un, amit’u achosoh tai; Chutilou leh mit’in mu’vin tin naa ajah diu, kadamsah diu ahi,’ ati chu guilhung ahitai. 16 “Nanghon vang namu’va najah tah jeh-un hampha tah nahiuve! 17 Tahbeh a kaseipeh nahiuve, namu chengseu hi Themgao tampi le midih tam tah-in amu nom vangun amupouvin, ajah nom lheh vangun ajapha pouve.

Jesun muchi thepa thulem ahilchet

18 “Hijeh chun muchi thepa thulem hi ngaiyuvin. 19 Lenggam thu kiseipeh la ja a hekhen thei lou miho chu lamsih a chu muchi tobang chu ahiuve. Alung sunguva kikhum lutsa jong Agiloupan ahung lah mangpeh jitai. 20 Lenggam thu kisei ajah teng kipah tah a kisan pai jeng ho chu songlheo chung leipatna a chu muchi tobang ahiuve. 21 Asunguva alut gil loujeh-in chom khat aum jin, akisansau thu jeh a bolsetna ahung teng adonda paijitauve. 22 Ling lah a chu muchi hi lenggam thu ja a, ahivanga leiset khan khoa lungkhamna l ehaova nopsah ding deinan adep lihji miho ahiuvin, galouvin aumjitauve. 23 Leipha laiya chu muchi hi lenggam thu ja a hetthem miho ahiuvin, ahung gaphan, abang ja khat cheng, abang somgup cheng chule abang somthum chengin apungjie,” ati.

Changlhem thulem

24 Jesun ajah-uva thulem khat aseikit’in: “ Van a Lenggam chu mi khat loulaiya muchi pha thea to bang ahi. 25 Jan khat mi ihmut thip nungin melma khat ahungin chang lah achun changlhem athen ache mangtai. 26 Chang kung kikhan lhit’a changpah do phat’in changlhem ho jong akilangdoh tai. 27 Hichun in neipa sohte ahungun ajah a, “Kapu, lolaiya muchi pha jeng nahte me, hoilam kona changlhem ho keh ham?” atiu leh, 28 aman, ‘Melma khat touvin abol hinte,’ ati. Hichun asohten, ‘Changlhem ho khu kagabo doh diu nadeiyem?” atiuve. 29 Aman ajah-uva, ‘Gabodoh datauvin, changlhem nabodoh nauva changtah jong bodoh tha khauvin nate, 30 Chang-at phat kah-in changtah le changlhem keh khom tante, chang-at phat tneg keiman chang-at ho chu changlhem chengse meiya govam di akankhom’uva chule changtah chengse kachangpang sunga akhum diuvin seipeh nange,’ tin aseiye,” ati.

Ankam mu thulem

31 Jesun thulem khatma aseipeh kit’in, “Van a Lenggam chu mi khat’in loulaiya ankam mu athe to bang ahi. 32 Ankam mu hi muchi lah a aneo pen ahivangin akhandoh phat’in thingphung tejen aphan, chunga leng vacha ten jong bu sahna le ge nan aneitauve,” ati.

Cholsosa thulem

33 Jesun thulem khat asei kit’in, “Van a Lenggam chu numei khat’in changbong danthum leh a chol avuiya, apomsoh kahsea abil tobang ahi,” ati.

Jesu thulem seiho

34 Jesun mipi jah a thulem hijat hi aseiyin, thulem louvin thucheng khat cha aseipoi. 35 Thulem asei hi, “Thulem seinan pao ving ting, Lei set bul kiphu til’a pat kisei thuguh chengse phongdoh inge,” kiti Themgao seisa chu gui lhunna dia asei ahi. Jesun changlhem thu ahilchet 36 Mipi dalhaa Jesu insung agalut leh aseijuite ahungun, “Lou laiya changlhem chu ipi kiseina ham neihil chen’un,” atiuve. 37 Jesun adonbut’in, “Muchi pha thea chu Mihem Chapa ahin, 38 loulai chu vannoi leiset ahi; muchipha chu Lenggama lut chate ahiuvin, changlhem chu Agiloupa mite ahiuve; 39 chule changlhem thepa chu Agiloupa ahiye. Chang-at phat chu Vannoi khang kichaina ahitan, chang-at ho chu Vantilte ahiuve. 40 Changlhem chengse akhop khom’uva meiya ahalvam banguva vannoi leiset khang kichai nikho jong hiding ahi. 41 Mihem Chapan avantilte sol’in tin Alenggam sunga kisuhmo na bolte leh akhangse jouse akhop khomsah a, 42 meilhum deuje ju sunga alelut diu, hikoma chu kap le hagel gel’a um diu ahi. 43 Midih chengse vang a-Pau lenggama nisa banga vah emsel diu ahi. Nakhang neiyan ngai hen!

Gou kisel

44 “Van a lenggam chu loulaiya gou kiselguh, mi khat’in amudoh a, ima akhu khuma kipah tah a chea anei jouse joh a hiche lou chu kichoh jeng tobang ahi.

Twikohchang manlu tah thulem

45 “Van a Lenggam chu sumkolvei min twikohchang manlu tah ahol tobnag ahi. 46 Twikohchang chu amudoh phat’in acheloiyin anei jouse ajoh-in twikohchang chu achotai.

Len thulem

47 “Van a LEnggam chu min Twikhanglen lai lunga len aseuva nga tin nga tang amat khomu tobang ahi. 48 Len chu nga adim phat’in akaidoh-un, atoupin nga pha jouse paipeh sunga akhol’un, manmo chengse apaitauve. 49 Vannoi khang kichai nikho jong chutobang ding, Vantilte kon’un tin midih lah a migiloute alhendoh diu, 50 meilhum deuje ju sunga alelut’uva, hikoma chu kap l ehagel gel’a um diu ahi.

Thudih thah le alui

51 Jesun, “Hicheng hi nahet chet tah-um?” atileh; Mihon, “Henge,” atiuve. 52 Hichun Jesun ajah-uvah, “Hijeh a chu Danthu them mi Van a Lenggam dia seijuiya pang chu akholna in a kona thil thah le alui hinpo doh doh jeng in neipa to bang ahi,” ati.

Nazareht khoa Jesu asandau

53 Thulem hijat asei jou phat’in chukom dalhan 54 Jesun akho ajonin, Houthua kikhopna in dunga thu ahil le leh, mihon kidang asauvin, “Hitobang chihna l ethaneina hi houya akilah ham? 55 Ama hi thingthem bolpa chapa hilou haimo? Anu min jong Mary kitia, asopite Jacob, Joseph, chule Simon l eJudas hilou ham? 56 Asopi numei ho jong ilah-uva cheng ahimeu? Hijat chihna le thaneina hi houya akilah hintem?” atiuvin, 57 asanda gam tauve. Hijeh chun Jesun ajah-uva, “Themgao chu akho sung le a-insung tilou mundanga vang akija bol tei nai,” ati. 58 Atah san loujeh-un hikoma chun Jesun thil kidang tampi abolpoi.

Matthew 14

John Baptist thi

1 Hiche lai hin gambih vaipo Herod-in Jesu thudol kithang ajan, 2 alhachate jah a, “Hichepa hi athisa John Baptist chu thoukit hitei ding ahitai; hijeh a chu hitobang thil kidang ho hi abol thei ahi,” ati. 3 Herod hin anaopa Philip jinu Herodias thumop jal’a John chu songkul’a anakhum ahi. 4 Ajeh chu John hin Herod jah a, “Herodias nakichenpi hi Dan ngai ahipoi,” tia anaphosa ahi. 5 Herod-in John anatha nom vangin mipin John hi Themgaova agel jeh-un tha jeng ding akichai. 6 Herod pen nikhon Herodias chanu japi lah a ahung lamin, Herod alung lhaisah lheh-e. 7 Hijeh chun Herod-in, “Ipi hijongle nadeipen pen kapeh jeng ding nahi,” tin aki hahselin akiteptai. 8 Anu thumop dungjuiyin Herodias chanun, “Tutah-in John baptist luchang chu kongin hindomin neipen,” tin athumtai. 9 Lengpa alung kham lheh jeng nan, ankong phunga atoupi ho angsunga akitepna jeh chun John luchang apeh tei din anomtai. 10 Mi asol’in Songkul’a John luchang agatansah-in, 11 John luchang chu ahindop’uva nu-ngah chu agapeh-u leh, aman anu agapetai. 12 John seijuite hunguva John long chu agavuiyu ahi; chujouva hunguva Jesu ahung hetsah-u ahiye.

Jesun mi sang nga avahva

13 John kibolna thusim ajah phat’in Jesun chukom dalhan achangseh-in gamthip laiya din kongin akitol tai. Mipin achedoh ahet phat’in akhopi chenguva konin ahungun Jesu nung ajuitauve. 14 Jesu konga kona vaokama ahung potdoh leh mipi atoh paiyin, avet leh alainatpi lheh kengin, adamlou ho chu aboldamtai. 15 Nilhah phat’in aseijuite Jesu henga ahungun, “Hikom la gam thip lai ahin, nisa ma lhum pai ding ahitan, akho khoa acheuva neh ding agakichoh na diuvin mipi hi sol ngap tan,” atiuve. 16 Jesun ajah-uva, ‘Ache louvu akhoh poi, nang hon neh ding peuvin,” ati. 17 Seijuiten ajah a, “Changlhah pheng nga le nga ni seh bou kanei yui,” atiuve. 18 Jesun, “Changlhah le nga chu hinchoiyun,” atin; 19 chule japi chu hampa dum lah a tou din asol’e. Chuin changlhah pheng nga le nga ni chu alan, van lam ven Pathen athangvah-in, changlhah ho chu aheh bal bal’in seijuite apen seijuiten mipi ahoppeh tauve. 20 Japin anevaset cheh-un, anehval chengseu paipeh som le paipeh ni dimset alohdoh-ui. 21 Anea chu numei chapang sim louvin pasal sang nga jen ahiuve.

Jesun twichunga lam ajot

22 Jesun Mipi alhah doh phat’in aeijuite chu masaa gal lang khat kai masa din kong kha tsunga alut sah-in asoltai. 23 Mipi asoldoh nung in achangseh a mol chunga tao din akaltouve. Nilhah geiyin mol chunga Jesu achangseh-in aum’e. 24 Hiche don hin kong chu dil lailung ageitai. Huiyin ale lama anuh jehin twi kinongin kong chu aleh le jengin ahi. 25 Jingkah lam nidan thum le nidan gup kikah-in seijuite heng jonin dil’a twi chunga Jesun lam ahinjot’e. 26 Twichunga lam ahinjot chu seijuiten amudoh phat’un, “Lhadam ahi,” tin kichan a-aosot jengui. 27 Jesun ahin houpaiyin, “Lung linglao hih-un Kei kahibouve, kicha hih-un,” ati. 28 Peterin ahin houvin, “Pakai nang nahi nah leh twi chunga naheng kahinjotna din neiseipeh in,” ati. 29 Jesun, “Hungin,” atileh; Peter jong konga akumlhan, twi chunga achen Jesu heng ajontai. 30 Hinla huiyin twi anon amuphat’in akichan alha lut pantan, apeng jah jengin, “Pakai, neihuhhingin!” tin asam tai. 31 Jesun akhut’in agah manloiyin, “Vo tahsan lhom! I-bol’a natahsan lel ham?” tin aphoh-e. 32 Jesu le Peter kong sunga alut lhon phat’in hui jong athip tai. 33 Chuphat’in kong sunga um seijuiten Jesu chu chibai aboh-un, “Pathen Chapa mong mong nahibouve,” tin aphongtauve.

Gennesaret gama Jesun damloute aboldam

34 Akitol gal kaiyun Gennesaret gamsunga akum lhauve. 35 Agam miten Jesu anahe masauvin, mi asol’un gamsunga ana damlou jouse jesu henga ahin puikhom’un, 36 apon mongkai beh atham diuvin ataovui. Apon mong jeng tham kha a jong adamhel hel’uve.

Matthew 15

Puchon Pachon

1 Jerusalema konin Pharise ho le Danthu them ho Jesu henga ahungun, 2 “Ipi dia nasei juiten an aneh tengu khut sil louva puchon pachon apal keh-u ham?” tin adongui. 3 Jesun adonbut’in, “I-bol’a ba nang hon jong puchon pachon khohsah jal’a Pathen Danthu napal keh-u ham? 4 Ajeh chu Pathenin, ‘Nanu napa jabol’un,’ chule, Koi hile anu le apa house jousen, athilo diu ahi,’ ati ahi. 5 Nang hon la, ‘Koi hile anu ham apa ham jah a, “Kavanga naphat chomna thei thil ho chu Pathen thilto ding ahitai,” atileh, 6 ama hin anu apa aja bol khoh angaipoi,’ natiuvin; hiti hin puchon pachon khohsah nan Pathen thujoh nathai mil jiuve. 7 Mipha lhem ho! Isaiah-in nachung changu gaothua asei: 8 ‘Hiche nam mite hin kamsungin jabol thu aseiyun, Alunghtimu la Keiya konin agamla lheh-e! 9 Thujong mihem thupeh jeng ahil jeh-un Eihouvu jong mohseh ahi,’ ati chu adih lheh jenge,” ati.

Mihem suhboh thei thil ho

10 Jesun mipi akoulut’in ajahuvah, “Phaten ngaiyun hechen’un. 11 Mihem suboh thei chu akamsunga lutjoh ahipon, akamsunga hung potdoh joh chun asuhboh ahibouve,” ati. 12 Jesun seijuite ahungun, “Nathusei jeh a Pharisee ho lung himo khu nahet’em?” atiuve. 13 jesun adonbut’in, “Van a um ka-Pa phu hilou changphung jouse chu kibotdoh ding ahi. 14 Hite ho khu limsah hih-un, mitcho ahiuvin, mitcho ma man alamkaiyu ahi. Mitchom mitcho alamkai leh kokhuh a lhalut tei ding ahi,” ati. 15 Peterin Jesu jah a, “Ipi thu lema nasei ham neihil chen’un,” ati. 16 Jesun, Tugeiya nahet khen thei louvu ham? 17 Ipi hijongle kamsunga lut jousen gilpi ahopaa chujou teng kithadohji ahi helou nahiuvam? 18 Lunggil’a kona kamsunga hung potdoh vang chun mihem asuboh theiye. 19 Ijeh-inam itile lunggil’a konin lung gilou, thilse, mi thana, mito jon na, huhna, guhchatna-hicheng hi ahungpot jie. 20 Hicheng hin mihem asuhboh thieyin, khut sil louva an neh vang in koima aboh theipoi,” ati.

Canaan numei khat tahsan

21 Jesun chukom dalhan Tyre le Sidon gamkol alhah tai. 22 Chu che gamsunga cheng Canaan numei khat ahungin, “David chapa kapu, neilungset’in kachanu thilha gilou tah khat ti akivop’in akhoh lheh tai!” tin ahinsam’e. 23 Jesun la kamcheng khat’in jong adonbutpoi. Aseijuite ahung un, “Hichenu hi kanung nunguva ahungin apen gpeng jenge, sol mang loiyin,” atiuve. 24 Jesun agah houvin, “Israel insung kelngoi mangsa ho henga bou eikisol’a kahi,” ati. 25 Chutah chun numeinu akeng bul’a aboh khup’in, “Kapu, neikithopi tei teiyin!” tin ataotai. 26 Jesun adonbut’in, “Chate neh ban lahpeh a uichate peh ding aphapoi,” ati. 27 Numei nun, “Ahinai kapu, hijongle uichaten jong dokang chunga apu anmal lhathang anehji khu me!” ati. 28 Chutah chun Jesun adonbut’in, “Numei natahsan alen’e! Nadei banga kibolpeh ding nahi,” ati. Hichepet tah chun achanu adamtai.

Jesun mi tamtah aboldam

29 Jesun chukom dalhan Galilee dillen pang alhah-in, molvum khat’a akaldoh-in atouve. 30 Ahenga mipi ahungun, ana damlou elbai, mitcho, paomo, ;hemvei, chule adang dang hivei tampi vei mihem ahinpuiyun, Jesun aboldamsoh hel’e. 31 Paomo paothei, lhemvei damhel, elbai lamjot, mitcho khomu, -mipin amudoh phat’un Israel Pathen avahchoi choi jenguve.

Jesun mi sangli avahva

32 Jesun aseijuite akoulut’in, “Kakoma mipi nelou chalouva aum nau hi nithum alhingtan, kalung asei; mohsol ding la nelou chalouva lampia lha lhoppa diu ahin kasol nompoi,” ati. 33 Aseijuiten, “Gamthip laiya japi hijat neh ding hoiya kalah diu ham?” tin adongui. 34 Jesun, “Changlhah ijat nanei yum?” ati. Amahon, “Changlhah phengsagi le nga them khat kaneiyui,” atiuve. 35 Jesun mipichu tol’a tousah din aseiyin, 36 chuin changlhah pheng sagi l enga them khat chu alan, Pathen athangvah jouvin aheh bal bal’in aseijuite apeh leh, seijuiten mipi ahoppeh tauve. 37 Mipin vaset cheh-in aneuvin, aneh noh-u anong nai longkai sagi dimset aloh doh-ui. 38 An nea chu numei cha pang sim louvin pasal cheh sangli alhinge. 39 Mipi alhah doh phat’in Jesu kong khat’a alut’in Magadan gam kol ajontai.

Matthew 16

Mihon melchihna a-ngeh-u

1 Pharisee ho le Sadducee ho Jesu henga ahungun, akipal sah nom jeh-un, van a kona melchihna khat avetsah diu a-ngeh ui. 2 Jesun adonbut’in, “Nilhah teng, ‘Vansan asoh-e, kho pha ding ahi,’ natiuvin; 3 jingkah leh, ‘Vansan asoh-in, van anim’e, kho phalou ding ahi,’ natiuve. Vandang gongso bon nasuhto theiyu leh phat kiheichin melchihna ho nasuhto thei louuham? 4 Agilou le Pathen helou khang miten melchihna ahol ‘un, Jonah melchihna tilou adang kipe louhel ding ahi,” ati. Chuin amaho dalhan achemangtai.

Pharisee ho le Sadducee ho phatlou chol

5 Dil gal lang khat akaidoh-un Seijuiten changlhah anapo haitauve. 6 Jesun ajah-uva, “Chang theiyun; Pharisee ho le Sadducee ho chol phalou lah a kihong phauvin,” ati. 7 Seijuite akihou lhiuvin, “Changlhah ihai jeh-uva asei hinte,” akitiuve. 8 Aseiyu ahe-lhin jesun ajahuvah, “Changlhah nanei loujehuva idia kihou khohten nahiuvem-tahsan lhom ho! 9 Nahet thei lou mongu ham? Pasal sang nga lah a changlhah pheng nga nahop’uva chu amoh paipeh ijet nalo doh-uva, 10 chule pasa sang li lah a changlhah pheng sagi nahop’uva chu amoh long kai ijat nalodoh uvam? 11 Najh-uva changlhah thu bon kisei lou iti nahet khen thei louvuham? Pharisee ho le Sadducee ho gu phalou lah a kichih thie dia kaseipeh nahibouvui,” ati. 12 Hichun changlhah lah a kisoji chol asei hilouva’ Pharisee ho l eSedducee ho thuhil gu phalou lah a kichih thei dia asei joh ahi Seijuiten ahedoh tauve.

Peterin Jesu koi ahi aphondoh

13 Jesu chu Caesarea Philippi gamkol ageiyin, “Mihem Chapa hi mihon koi ahisah-um?” tin asei juite adonge. 14 Amahon, “Mi kim khat’in John Baptist ahisah-un, adangin ma Jeremiah ahiloule Themgao dang khat hiei din aseiyui,” atiuve. 15 Amahon jah a, “Nang hon koiba neihisah-uvam?” tin adonge. 16 Simon Peterin, “Pathen hing jing Chapa, Messiah chu nahi!” tin adonbut’e. 17 Jesun adonbut’in, “John chapa Simon nanun nom’e! Hiche thudih hi tahsa mihema kon ahipon, vana um ka-Pan naphondohsah ahibouve! 18 Hijeh a hi kaseipeh nahi Peter: nangma songpi nahin, hiche songpi inbul’a hi ka-Houbung kasah doh a, mithi kul kotpin jong anan joulou ding ahi. 19 Keiman van a Lenggam kot-heh kapeh ding, leiset’a nakha chan van’a jong kikhah ding, leiset’a nahon chan van a jong kihong ding ahi,” ati. 20 Chujouvin Jesun ama Messiah ahi chu mikoma aseidoh louna diuvin aseijuite akham chah kheh-in ahi.

Athoh ding le athi ding Jesun asei masah

21 Hichea pat hin Jesun aseijuite jah a kichentah-in aseiyin, “Jerusalem a kachetei ding, upate le Thempu pipu ho chule Danthu them hon eibol gentheiyuva, eitha diu, hijongle nithum lhin nia Pathenin eikaithou ding ahi,” ati. 22 Hichun Peterin achangseh-in apuidoh-in, akihan lhon, “Pathen lungset’a hitobang hi nachunga chulou hel ding ahi Pakai!” tin aseiye. 23 Hitah chun Jesu akiheiyin Peter jah a, “Kinung che jengin Satan! Neikipalsah lo ding ahi, Pathen deibanga lung gel louvin mihem deilam joh nagel’e,” ati. 24 Hichea hin Jesun aseijuite jah a, “Koi hi le eijui nom chu ama ki-ngaitom a, athingpel kiput’a eijui ding ahi. 25 Ijeh-inem itile kihinso nom chun athiloa, amavang Keima jal’a thi loa chun hinna anei ding ahi. 26 Ajeh chu min vannoi leiset pumpi nei jongle ahinkho akisuh mang teng ipi phat chompi tem? Ahiloule min ahinkho lhenga ipi apeh ding ham? 27 Ijeh-inem itile Mihem Chapa chu a-Pa loupinaa a-Vantilte toh hung ding, mitin atoh dungjui cheh tohman apeh ding ahi! 28 Tahbeh a kaseipeh nahiuve, hikoma ding ho lah a mi phabep hi Mihem Chapa leng loupia ahung amu masang seuva thina tep kha lou ding aum’uve,” ati.

Matthew 17

Jesu vou kikhel

1 Nigup jouvin Jesun Peter le Jacob chule Jacob naopa John toh apuiyin amaho seh molchunga akal toupi. 2 Amaho thum angsunga Jesu vou akikheltan, amai nisah vah bangin avah-in, avon jouse jong avah emsel jenge. 3 Mose le Elijah Jesu henga ahung kilah lhonin akihou lim’uve. 4 Hichea hin Peterin Jesu agah houvin, “Pakai, hikoma i-umu anom lheh jenge, pha nasah le nang ding khat, Mose ding khat chule Elijah ding khat-lhumbuh thum song inge,” ati. 5 Pater thusei pettah hin meibang lhang khat’in amaho chu alekhun, meibang lah a konin ogin khat hin, “Hiche hi ka-Chapa deitah ahi, achunga kalung alhai ta-ngeiye, athu ngaiyun,” ati. 6 Ogin ajah phat’un seijuiho akicha behseh jengun, tol’a mai asulut gamtauve. 7 Jesu ahungin agah thamin “Dah doh-un, kicha hih-un!” ati. 8 Agah dadoh phat’un Jesu changseh bou aumin koima dang amupouve. 9 Molchunga kona ahung kumsuh phat’un Jesun amaho hi ahilchah masan, “Mihem Chapa thinaa kona kaithouva aum masangsen nathilmuu hi koima seipeh hih hel’un,” ati. 10 Hichun seijuiten, “I-bol’a ba Danthu them hon Elija hung masa tei dia aseiyu ham?” atiuve. 11 Jesun, “Elijah chu hung masa ahinai, aman thil ijakai agontoh masah ding ahi. 12 Kaseipeh nahiuvee, Elijah ahung tan, mihon ahettoh loujeh-un anop aningin aboltauve. Mihem Chapa jong chutobangma abol tei diu ahi,” ati. 13 John Baptist thudol aseipeh-u ahi seijuiten ahedohtauve.

Jesun lhagaoboh vop chapang khat aboldam

14 Mipi lah ahung geiphat’un pasal kha tJesu masanga ahung boh khup’in, 15 “Kapu, kachapa lung set’in! Abuh thi ahin, abang le meilhum sung’ah, abang kom l etwilah a aleh lut jin, athoh gim behseh tai. 16 Naseijuite henga kahin pui vangin aboldam theipouve,” tin ataove. 17 Jesun, “Vo tahsan bei khang lamvai mite! Itih chan ka-umpia kakho ngaiding nahiuvem? Chapang pa chu hinpuiyun!” ati. 18 Lhagaoboh chu Jesun haphoa apho leh, hichepet tah chun chapang a konin ahung potdoh paiyin chapang pa adamtai. 19 Seijuite guh thim chan Jesu henga ahungun, “I-ati leh keihon kanodoh jou louvu ham?” tin adongui. 20 Jesun, “Natahsan lhom je-u ahi, tahbeh a kaseipeh nahiuve, tah sanna ankam mu te neijong leu chun hiche molsang jah a hin, ‘Hikoma konin khukoma kichonin,’ tijongleu chun kichon jeng ding ahin, imacha bolmo nanei lou diu ahi. 21 (hitobnag hi an ngol’a taona beiyin asoh doh theipoi,)” ati.

Jesun athi idng avelsei kit

22 Seijui chengse le Jesu Galilee gamsunga akilhon khom pet’un Jesun ajah-uva, “Mihem Chapa hi mite khut’a kipedoh ding ahin, 23 amahon atha diu, amavang nithum lhin ni le kikaithou kit ding ahi,” ati. Seijuite alung kham lheh jengui.

Houin kai peh dol

24 Jesu le aseijuite Capernaum a ahungu leh Houin kaidong ho ahungun Peter jah a, “Nahouhil pau hin Houin kai apehji lou ham?” tin adongui. 25 Peterin, “Apeji nai,” ati. Peter insung agalut leh Jesun ahin hou masan, “Simon iti nagel’em? Leiset lengte hin kai hihen sumlam man hijongle koi lah a don jiuvem? Gamsung mite lah a adon’um?” tin anadonge. 26 Peterin, “Gamchom mite lah a,” ati. Jesun, “Achutile gamsung mite ongthol’a hita chula. 27 Hijongle kaidong ho lung himo louna din Twikhanglen achen nga gakoi le chun, nakoi doh masah pen chu akamsung kel le chun itokham bep sum namu ding ahin, hichu choiyin gapetan,” ati.

Matthew 18

Alenpen chu koiham

1 Hichepet hin seijuite Jesu henga ahungun, “Van a lenggama lenpen chu koi ham?” tin adongui. 2 Jesun chapang khat akoulut’in, alai lunguva adinsah-in, 3 “Dihtah a kaseipeh nahiuve, nakikhel hel’uva chapang ho toh nabah louvu leh van a Lenggama lut pouvin nate. 4 Hiche chapang te bep a kigel’a kineosah a ki-ngaitom chan chu van a Lenggama alen a pang ding ahi. 5 Chule kamin a hitobnag chapang khohsah chun Keima eisan ahi.

Chonset lo na thei lhepna

6 “Koi hile aneocha hokhat tansan sudoiya chu angonga sumhei song lentah kikhai hen Twikhanglen akileh lut le ama din aphajoi. 7 Ohe vannoi mite nadau ahi! Ajeh chu mihemte tansan suhoi thei thil tampi aum’e. Kipalna chu hung umtei ding van gahin, hichea kipal lhuhna bol’a chu ada na-e! 8 “Nakhut ham nakeng hamin naahsan aduh doi leh tan bong in paimang jengin. Khut l ekeng kim a tonsot mitmo meidil’a nakile lut sangin khut lan gle keng lang beiya hin naa lut ding aphajoi. 9 Namit’in nakipalsah jong lekaldoh in pai mangin! Mit ni neiya damun meidil’a nakile lut sangin mit lang chon hin naa lut le chun aphajoi.

Kelngoi mansah thulem

10 “Hiche aneocha ho khat nahsahmoa nabol louna diuvin vhing theiyun; kaseipeh nahiuve, van a um avantilteuvin ka-Pa mai amu jingui. 11 (Ijeh-inam itile Mihem Chapa chu amangsa huhing dia ahi.) 12 “Iti nagel’um? Mi khat’in kelngoi ja khat neihen, khat pen pen che mang taleh, somko le ko chu molvuma dalha a che mang khatseh chu aahol lou ding ham? 13 Kaseipeh nahiuve, agamudoh teng ache mang lou somko le ko sangin amukit khatseh chunga akipah joi. 14 Hiche bangchun hiche aneocha ho khat man ding hi van a um naPau lungdei ahipoi.

Chonset bol sopi

15 “Nasopi nachunga achonset tah leh, chen lang achangseh a aumpet’in athemmona gaphoh-in. Napho angai leh sopi neikit nahitan; 16 angai lou vang leh, Pathen lekhabua, ‘Mi ni le thum hettohsah a kichai thei ding,’ kiti dungjuiyin michom khat le ni puiyin chen. 17 napuiho thu geiya angai loule Houbung henga thulhut’in. Houbung thu geiya angai lou vang leh chidang namdang le kaidong ho bolna bangin bol tan.

Gah chah le phalpeh

18 “Dihtah akaseipeh nahiuve, ipi hijongle leiset’a nakhau chu van a jong kikhah ding, leiset’a nahon’u chu van a jong kihong ding ahi. 19 “Kaseipeh kit nahiuve, leiset’a mini lung kitoh tah a nataovu leh van a um ka-Pan nabolpeh tei diu ahi. 20 Ajeh chu hoikom hileh kamin a ni le thum nakikhopna chan’uva ka-umpi jingui,” ati.

Mi ngaidam theilou lhachapa

21 Peter Jesu henga ahungin, “Pakai, kasopi kachunga chonse se jeng tahleh ijat vei ka-ngaidam ding ham? Sagi vei gei ham?” tin adonge. 22 Jesun adonbut’in, “Ken, ‘Sagi vei gei’ katipoi, sagi mun som sagi geiyin katibouve. 23 Ijeh-inem itile van aLenggam chu asohte sum chin suhto ding goa lengpa to tekah thei ahi. 24 Sum asuto pantan, talent sangsom bat soh khat ahinkai lut’un, 25 soh pan sum sahna ding aneilou hel phat’in ama jong ajinu le achate, anei jouse jong joh a abat sah doh sah tei din apupan thu alhuhsah tai. 26 Chutah chunsohpa jong akoma aboh khup’in adilsun, ‘Nei ngah ta din abonchan sadoh kit nange,’ tin ataotai. 27 Chuphat’in apupan sohpa chu alungsen abat jouse angaidamin, alhadoh tai. 28 “Hiche sohpa hi apotdoh doh-in asoh chanpi ama denarii ja khat bat’a chu atoh khan, atuh chah denin, alol ameh peh-in, Nabat chu neipen,’ tin anotai. 29 Asoh chanpi pa jong boh khup’in adil sun, ‘Nei ngah ta din sadoh kit nange,’ tin ataove. 30 Ahivangin aman anop peh pon, abat chengse asahdoh kahsea din songkul’a agakhumtai. 31 Aumchan hi soh dang hon amu phat’un alung himo lheh jengun, athilsoh ho chu apu pau aseipeh tauve. 32 Apupan hiche sohpa chu akoulut’in ajah a, ‘Soh gilou, kahenga natao tao jeh a nabat chengse kamoh ngaidam nahita me! 33 Ken kalai natpi banga nang in jong nasoh chanpi chu nalai natpi ding hilo ham?’ tin aphoh tai. 34 HIti hin apupa alung hang jah-in abat chengse asahdoh kahsea din mi bol genthei ho khut’a apedoh tai. 35 “Nang hon jong lung giltah a nasopi na-ngaidam louvu leh van a um ka-Pan hitobanga chu nabol diu ahi,” tin Jesun aseiye.

Matthew 19

1 Jesun thu hicheng asei jouvin Galille gam dalhan Jordan luigal Judea gamsung alhungtai. 2 Mi tamtah-in ajuiyun, hikoma chun Aman ana jouse aboldamtai. 3 Pharisee mi phabep ahungun apatep nan thu khat adongun, “I-lou them a min ji ada jeng ding hi Dan ngai hinam?” atiuve. 4 Jesun adonbut’in, “Hiche thua hi ‘Semtil’a pat Asempan pasal le numeiya asemsa ahi,’ kiti Pathen lekhabu nasim khah louvu ham? 5 Chule “Hijeh a hi min anu le apa dalha a ajito kigom ding ahin, amani tikhat hilhon ding ahi,’ kiti ahi. 6 Hichea hi amani pum ni hita louva pumkhat hilhon ding ahi. Hijeh chun Pathen gopsa chu mihemin sukhen hih hen,” ati. 7 Pharisee hon, “Ahile i-bol’a Mose’n, ‘Min ajinu ada leh da na lekha pehen sol hen.’ atiham?” atiuve. 8 Jesun adonbut’in, “Nalungtah jeh-uva Mose’n jida ding naphal peh-u ahibouve, semtil’a chuti ahipoi. 9 Kaseipeh nahiuve, mito ajon jeh tilouva aji daa numei dang kichenpi chan chu mito jong ahi bouve,” ati. 10 Jesu seijuiten ajah a, “Pasal le ajinu chung changa chuti ahi vang leh jinei da phajoi,” atiuve. 11 Jesun adonbut’in, “Mi jouse jop thei ahipoi, Pathenin chuti dia agon hon bou ajop theiye. 12 Ajeh chu apen a thaidepsa peng aumin, mihem semthua nukiso loi aumin, chule van a Lenggam jal’a ama kibol aumin, koi hile ajop thei dol’in jop hen,” ati.

Jesun chapang neoho phatthei aboh

13 Achunga khut ngap’a taopeh din mihon chapang phabep Jesu henga ahin puiyui. Chapang hinpui ho chu seijuiten haphon anaphoh ui. 14 Hinla Jesun, “Chapang ho chu kahenga hinsol’un jada hih-un, ijeh-inem itile van a Lenggamchu amaho tobangte bou chang diu ahi,” ati. 15 Jesun chapang ho chunga khut angamin apotdoh tai.

Khangdong mihaopa

16 Veuvin pasal khat Jesu henga ahungin, “Houhil tonsot hin na kanei theina dia thilpha itobang kabol ngaiyam?” tin adonge. 17 jesun, “Itobnag thilpha nei doh ham? Apha Khatseh bou aum’e! Tonsot’a nahin nom le Thupeh chengse nit’in,” ati. 18 Aman Jesu jah a, “Hoipen chu am?” ati. jesun adonbut’in, “tol that hihin, mito jong hih-in, gucha hih-in jouvin hettohsah dan, 19 nanu napa jabol’in, chule nang naki-ngailut bangin naheng nakom ngailun,” ati. 20 Khangdongpan adonbut’in, “Hichengse chu kahin nit jing nai, ipi kabol lou um nalaiyam?” tin adonge. 21 Jesun ajah-ah, “Chamkimsoh ding nadeileh chen lang nanei jouse gajoh-in, sum chu vaicha gentheite to nan neiyin, chutileh van a gou nanei ding ahi; chujo tneg neihin juitan,” ati. 22 Khangdongpan athusei ajah phat’in, gou haotah ahijeh-in lung himo tah-in ache mangtai. 23 hijeh chun Jesun aseijuite jah a seiyin, “Tahbeh a kaseipeh nahiuve, mihoa dia van a Lenggam alut hah sa lheh ding ahi. 24 Kaseipeh kit nahiuve, mihao Pathen Lenggam a lut sangin heobil hom a sa-ngongsao lut ding abaijoi,” ati. 25 Seujuiten athu chu adatmo behseh jengun, “Achutile koi huhhinga umjou ding hitam!” atiuve. 26 Jesun avechang mel’in ajahuvah, “Mihem bol dia vang hithei louhel ahin, Pathen din ijakai ahithei doh keiye,” ati. 27 Peter apotdoh-in, “Ven, keihon ima jouse dalhan nanung kahin juiyun, achutile keiho i-kati diu ham?” tin adonge. 28 Jesun ajah-uva, “Dahtah a kaseipeh nahiuve, ahug lhung khangthah a chu Mihem Chapa loupitah aLaltouna atou teng, nang ho kanung jui chengse laltouna som le nia touva, Israel phung som le ni thu natan diu ahi. 29 hitia chu koi hijongle kamin jal ‘a in le lou, sopi ule nao, nu le pa, cha le nao chule gam leiset geiya dalha jousen ajat ja khat cheng amubea, tonsot hin na aneitei ding ahi. 30 Amavang amasa tamtah nkhah ding, anukhah tamtah masa ding ahi.

Matthew 20

Lengpi leiya natong ho

1 “Van a Lenggam chu mihao khat jingpi tah a kondoh a alengpi leiya natong dia tha hol’a chepa tobang ahi. 2 Thahol pa chu natong ding ho to, nikhat tohman Denarii* khat din akinop touvin, alengpi leiya natong din asoltai. 3 Vai nunga apotdoh kit leh kailhang dunga mohseh a ding ho amun, 4 ‘Nang ho jong lengpi leiya kon’uvin natoh man diuva kilombep pe nang’e tin asol kit’e. 5 Amaho akontauve. Sunkim don le nilhangkai donin jong apotdoh kit leuvin hito bangma chun agabol kit’in ahi. 6 Vaiche kontah a jong apotdoh leh midang hitobanga ding ho agamudoh kit’in, amaho jah a jong, I-bol’a nilhum keiya hikoma mohjeh seh a ding nahiuvem?’ atileh; 7 amahon, ‘Koima eigoi diu um louva,’ atiuve. HIche ho jah a jong, ‘Nang ho jong lengpi leiya kon’uvin,’ ati. 8 “Nilhah phat’in lengpi lei nei pan natoh vaibolpa jah a, ‘Natong ho koukhomin, akon nukhah pen a pat akon masa pen geiyin atoh man’u petan,’ ati. 9 Vaiche phat’a kon ho ahungun Denarii khat cheh akisantauve. 10 Akon masa pen hon asan tam tei diu gingcha ahunguleh, amahon jong Denarii khat cheh akisan bouvui. 11 Akilah vangun mihaopa chunga aphun cheh-un, 12 “Keihon sun nilhum keiya na kitonga nisa hah lai kithoh lhum keiya, hiche nidan khat seh tongho toh kibangin tohman neipeuve,” tin aseiyui. 13 “Mihaopan adonbut’in alahuva mi khat jah a, ‘Golapa, ken adih lou kabolpoi, Denarii* khat bou lo dinga ikinopto lhon hilouham? 14 Natohman kilah-in chetan. Akon nukhah pen pa jong nang kapeh jat jat kapeh nom ahin, 15 kanei chu kadei dei ya kabol thei lou ding ham? Kaphat jeh a hi neimit thip ngap hitam?’ ati. 16 “Hitobanga chu amasa tamtah nukhah ding, anukhah tamtah masa ding ahi,” ati.

Jesun athi ding asei masah thumna

17 Jesun Jerusalem ajonin lampi dunga seijuite chu achomin apuidoh-in achepum pum’un ajah-uva, 18 “Veuvin, Jerusalema icheuvin, hikoma chu hihon Mihem Chapa hi Thempu pipu ho le Danthu them ho apeh doh diu, amahon tha ding pha asah-uva, 19 kichepna anei diu, ajep’uva thingpel’a khetbeh dia chi dang namdangt eapeh doh diu ahin, hijongle nithum nia ama kaithouva umtei ding ahi,” ati.

Jacob le John nu thil ngeh

20 Zebedee chapate ni anun apuiyin Jesu henga aboh khup’in ngeh khat neiyin ataove. 21 Jesun, “Ipi nadeiyem?” tin adonge. Amannun, “Leng nahi tneg hiche kachapate ni najet naveiya tou sah idn teppeh-in,” ati. 22 Jesun, “Nathumu hi nahet louvu ahi. Nangin kadon ding khon a hi nadon ngam lhon idng hinam?” ati. Amanin, “Ka-ngam’e” ati lhon’e. 23 Jesun kakhon a hi nadon tei lhon ding vang ahinan, hijongle kajet kaveiya tousah ding vang hi Kei peh thei ahipoi; hiche touna hi ka-Pan gonsa akoipeh miho tou ding ahibouve,” ati. 24 Seijui somni hichu ajah doh phat’un ucha te ni chugna alung himotauve. 25 Ahivangin Jesun amaho akouvin, “Chidang namdangte lah a vaipoten amite chunga thu aneiyuva, alamkaiteuvin atha neinau ajedoh jing naheuve. 26 Nang ho lah avang chuti lou ding ahi, koi hileh nalah-uva alenpen hinom chu nalha chauva panga, 27 achungnung pen hinom chu nasohuva pang ding ahi. 28 Hitobanga chu Mihem Chapa jeng jong jen dinga hung ahipon, ajen ding le mitamtah lhatdamna a ahinkho toh doh dia hung ahibouve,” ati.

Jesun mitcho ni kho amusah

29 Jesu le aseijuiten Jericho khopi agah dalhah-u leh mi tamtah in ajuiye. 30 Mitcho ni lampama anatouvin, Jesun ahin hopa chu aja lhonin, “Vo David Chapa kapu, neilungset’in,” tin asam lhon’e. 31 Amani chu mipin pho thip din agouve. Amanin la ahasap cheh kit lhonin, “David Chapa neilungset’in!” ati kit lhon’e. 32 Jesu adingin amani chu agah kouvin, “Ipi eibolpeh-in nati lhon ham?” ati. 33 Amanin, “Kho neimusah lhonin kapu!” atilhone. 34 Jesun alainat pin, amit lhon akhoipeh leh, kho amu thei pai jeng lhonin, Jesu nung ajui lhontai.

Matthew 21

Jesu loupi tah a Jerusalem alut

1 Jesu le aseijuiten Jerusalem anai lam tauvin, Olive lhanga Bethphage kho ahung geitauve. Hichea hin Jesun seijui ni asol masan, 2 “Namasang khoa khun lut lhon le chun sa-ngan khat anouto kihen tha mupai lhonin nate; hinsut’in hinkai lhonin. 3 Mi khat touvin i-khat asei leh, ‘Aneipan angaichat ahi,’ ti lhon le chun, aman hinlhah peh lhontannate,” ati. 4 Hiche hi Themgao kama kiseisa: 5 “Zion khopi seipeh-un, Ven, na -Lengpan na hinjon’e! Lung nengtah-in sa-ngan chunga atouvin, Sa-ngan nou chunga atouve,” kiti chu guilhung ahitai. 6 Seijuite ni achen, Jesun ahil bang bangin agabol lhon’e. 7 Sangan le anou ahinkai lhonin, achunga pon aphauvin Jesu atouve. 8 Mitamtah-in lampi dunga pon aphauvin, abangin theoboh alham’un, lam dunga aphauve. 9 Jesu nung le maa kijot mipin, “Pakai min a hung pa anun nom’e! David Chapan huhing hen!” atiuve. 10 Jesu Jerusalem khopi sung alut phat’in, “Hiche Pa hi hoi, koi hitam!” atiuvin, khopi sung akiloh soh jengui. 11 Japin, “Galilee gam Nazareth khoa hung kon Themgao Jesu ahi,” atiuve.

Jesun Houin asuh theng

12 Jesu Houin a alut’in, asunga thiljoh ho leh thil cho ho anodoh soh keiyin, sum lheng ho dokhang jouse alekhup peh-in, vapal joh ho touna jong alekhup peh soh keiye. 13 Chule miho jah a aseiyin, “Ka-in chu taona in kiti ding ahi, tia kisun ahin, nang hon michom ho gebuhin nasemtauve,” ati. 14 Jesu Houin a aumpet chun mitcho ho le elbai ho ahenga ahungun, Aman abonchan aboldam soh keiye. 15 Thempu pipu ho le Danthu them hon thil kidang aboldoh chengse chu amu’vin, chule Houin sunga chapang hon kho asap’uva, “David Chapan huhing hen” atiu chu ajah phat’un alung hangun, 16 Jesu jah a, “Hite ho hin ipi aseiyu najah nah em?” atiuve. Jesun, “Kaja nai, ‘Naosen ho le noi chep lai ho kamsunga konin vahchoina nachamkimsah tai,’ kiti Pathen lekhabu chu nasim khah louhel’u ham?” ati. 17 Jesun mipi adalhan, khopia konin apotdoh-in Bethany kho ajonin, aga jan geh tai.

Jesun theichang phung agaosap

18 Jingkah a Jesun khopi lam ahinjot leh agilkel pantai. 19 Hichun lampam a theichang phung khat amun, agavet leh ana tilou aga amupoi. Hijeh chun theichang phung jah a, “Imatih chanin ga kit hih beh-in,” tia agaosap leh, hichepet tah chun agop jenge. 20 Seijuiten amudoh phat’un kidang asa behseh jengun, “I-atileh theichang phung gop jeng hintem?” atiuve. 21 Jesun ajah-uva, “Dih tah a kaseipeh nahiuve, lung opkai louhel’a natahsanu leh theichang phung kibolna tobang keo hilouva hiche molsang jah a khun, ‘Kichon doh-in lang Twikhanglen a kileh lut tan,’ tijongleu chun hithei jeng ding ahi. 22 Hitia chu tahsan tah a nathum chan namu jeng diu ahi,” ati.

Jesu thanei dol’a thudoh

23 Jesu Houin a alut’a thu ahil pet’in Thempu pipu ho le upate ahungun, “Ipi tha neina a hiti ho hi nabol’a, hiche thuneina hi koipenin napeh ham?” tin adongui. 24 Jesun adonbut’in, “Kenjong thu khat dong ung ting naseidoh theiyu leh ipi tha neina kaneiye hiti ho hi kabol seipeh nau ivnge. 25 John baptize bolji pa hin bol theina van a kon alah ha mihem a kona alah ham?” ati. Chuphat’in amaho le amaho akinel’un, ‘Van a kon ahi,’ tileu hen la, ‘Achutile i-bol’a natahsan dau am?’ tin tin! 26 ‘Mihem a kon ahi,’ ti ding la japi kichat aumin, ajeh chu mi jousen John chu Themgaova agel cheh ahi,” atiuve. 27 Hijeh chun Jesu jah a, “Kahepoi,” atitauve. Jesun ajah-uvah, “Kahepoi,” atitauve. Jesun ajah-uvah, “Kenjong ipi thaneina jeh a hiche ho kabol sei peh deh pou vinge.

Chapa ni thulem

28 “Iti nagel’um? Pasal khat’in chapa ni aneiyin, apeng masa pa jah a, ‘Chapa, tunin lengpi leiya konin lang na gatongin,’ ati. 29 Achapan, ‘Kon ponge,’ ati. Ahinla chom khat jouvin lung aheiyin akontai. 30 Mipa chu achapa khat joh henga achen hitobangma a chu agaseileh, ‘Kon nange hepa,’ atin, konla akonpoi. 31 Amani koi joh hin apa dei abol ham?” ati. Amahon, “Apeng masapan,” atiuve. Jesun ajah-uvah, “Tahbeh a kaseipeh nahiuve. nang ho sangin kaidong ho le noti ho Pathen Lenggama alutmasajo tauve. 32 Ijeh-inem itile John chun adih a hinje lampi nahil’u ahitan, natahsan pouve; hichea hin kaidong ho le noti hon anatahsan’ui. Ama namutah vangun lungheiyin natahsan deh pouve.

Lengpi leiya natong ho

33 “Thulem khat ngai kit’uvin: mihaotah khat’in lengpi lei khat abol’in, akimvel’a tho akaiyin, lengpiga chilna leiko alaiyin, loubuh asan, kemsang adoi. Chuin lengpilei chu aleibol ho ngansen kholgama achetai. 34 Theiga lo phat’in lengpiga po din aleibol ho ngansen kholgama achetai. 35 Lengpilei bol hon asoh te chu aman’un abang avouvin, abang athat’un chule abnag songin asep’ui. 36 Chuin asol masah sohte sanga tamjo asol kit vangin, amahon abol ngai bang bangin anabol’ui. 37 Akhon na keiyin, ‘Kachapa beh jabol teiyunte,’ tin lengpilei bol ho henga achapa asoltai. 38 Ahinla lengpilei bol hon achapa amudoh phat’un, ‘Hichepa hi agoulo dingpa ahi,’ that’u hitin agou eiho changute,’ akitiuvin, 39 aman’un lengpilei polama akaidoh-un athat tauve. 40 “Lengpilei neipa chu ahung teng aleibel ho chu i-lotan tem?” ati. 41 Amahon, “lengpilei neipan hiche migilou ho chu engbol’in tin asuhgam ding, lengpilei chu aphat cha aga pethei lengpilei bol thei dang khat petante,” atiuve. 42 Jesun ajah-uva,” Pathen lakhabua: ‘Insa hon deimoa apaiyu song chu. In-ning songkhom det penin apangtai! Hiche hi Pakai thilbol ahi, Imit mu’vin thil kidangtah ahi,’ kiti lai chu nasim khah louvu ham? 43 “Hijeh a chu kaseipeh nahiuve, Pathen Lenggam chu nakilah peh-uva apunbe sah thei nam mite kipedoh ding ahitai. 44 Koi hile hiche song chunga kitat kha chan chu kisep chip jeng ding ahin, alhah khah pen pen jong atagep jeng idng ahi,” ati. 45 Thempu pipu ho le Pharisee hon Jesu thulem sei ajah phat’un, amaho gotna asei chu ahedoh tauve. 46 Ahinla mat dia agot vangun mipi akichauve. Ajeh chu mipin Jesu chu Themgaova angaito cheh u ahi.

Matthew 22

Mou kipui golvah thulem

1 Jesun mipi henga thulemin aseikit’in, 2 “Van a Lenggam chu achapa dinga jinei golvah bol ding goa lengpa khat tobang ahi. 3 Golvahna lha dia ki-ngeh chengse koukhom dia lengpan asohte asol vangin koima ahung pouve. 4 Soh dang phabep asol kit’in, ‘Akikou ho jah a, “Bongchal ho le gancha thaotah tah kathat’in golvah ankong akigong tupsoh tai, golvahnaa hung lha cheh-un,” ati gatiuvin,’ ati. 5 Ahinla akikouhon imachan agelpouve, abang louva akonin, abang ma kinchom choma achen, 6 adangin ma asohte chu aman’un, melse tah-in avouvin athat tauve. 7 Lengpa alung hang behseh tan, asepaite asol’in mithat ho asugamin, akhopiu ahalvamtai. 8 Hichun asohte jah, ‘Kichen golvah akigong soh tai, ane dia kikouho la ahungpon, 9 cheuvin lan gkhopi kelkot phunga namuphah chanu koi hileh golvah an ne din hinkhom’un, ati. 10 Sohte chu lamlen dunga acheuvin, amu phah chan, mise mipha ahinpuiyule kichen golvahna ami adimset tai. 11 ″Lengpan akikou jin ho ahung vet leh moupui golvah vonbei khat amudoh-e. 12 Ajah a, ‘Jol, moupui golvah vonbeiya iti hung lut nahim?’ ati vangin, ama la athip beh jenge. 13 Hichun lengpan lhacha ho jah a, “Akhut akeng kan’un lang polam muthim lah a paidoh-un, hikoma chu kap le hagel gel’a um ding ahi,’ ati. 14 “Akikou atam lheh nan lhen doh vang lhomcha ahi,” ati.

Kaipeh thudol’a thudoh

15 Pharisee ho apotdoh-un Jesu chu alona je khat het’a kinelpia kipalsah din akihou lhiuve. 16 Pharisee hon aseijuiteu phabep le Herodia loi phabep asol thauvin, “Houhil, nang hi midih nahin, Pathen lampi dih tah nahil’in, mile mi kah a dat naneipoi, chule mihem polam maiput gin nanei lou kaheuve. 17 Ahile Caesar henga mikai kipe hi dih hai dih lou ham? Iti nagel’em?” tin adongui. 18 Athilse gonu chu Jesun ahen, “Mipha lhem ho! Ibol’a kipalsah ding neigot’u ham! 19 Mikaiya napeh-u sum chu neivetsah-un!” ati.

Sum chu ahinchoi phat’un,

20 Jesun “Hiche suma hi koi lim le koi min chong-am?” ati. 21 Amahon, “Caesar lim le min,” atiuve. Hijeh chun Jesun “Ceasar a chu Caesar peuvin, Pathen a chu Pathen petau,” ati. 22 Hiche hi ajah phat’un kidang asa lheh jengun, Jesu dalhan achetauve.

Mithi thokit thudol’a thudoh

23 Hiche ni ma ma chun mithi thokit tahsan lou Sadducee loi Jesu henga ahungun, 24 “Houhil, ‘Pasal khat cha neilouva athi leh asopipan ajinu avetpeh a chi akhaipeh ding,’ tin Mose’n aseiye. 25 Kalah-uva sopi pasal sagia peng aum’un, a-upapen ajine leh cha neilouvin athin, ajinu anaopa vet din adalhatai. 26 Asopite chu nina pa, thumna pa, aban bain sagina geiyin athisoh hel tauvin ahi. 27 Achaina keiyin numei nu jong athitai. 28 Hichea hin thokit nil eh numeinu hi koipen ji hitan tem? Ajeh chu aboncha jia anei cheh-u ahi,” atiuve. 29 Jesun adonbut’in, Pathen lekhabua thu hihen, Pathen thahat hijongle nahet pen’u aum loujeh a nakhel del’u ahitai. 30 Ijeh-inem itile thokitnaa chu nu le pa kichen jong umlou, chen jong akichensahlouvu ahitan, van a Vantilte tobang ahitauve. 31 Hiti hin mithi thokit thudol ahileh Pathenin naseipeh sau chu nasim khah louvu ham? 32 ‘Keima Abraham Pathen, Isaac Pathen, chule Jacob Pathen kahi,’ atilou ham? Pathen chu mithi ho Pathen ahipon, miheng ho Pathen joh ahi,” ati. 33 Mipin hiche hi ajah phat’un athuhil kidang asa behseh jengui.

Thupeh lenpen

34 Jesun Sadducee ho anel khup del jeng phat’in Pharisee ho akikhom’un, 35 alah-uva Danthu them khat’in apatep nan, 36 “Houhil Danthu lah a thupeh lenpen hoiche ham?” atin adonge. 37 Jesun adonbut’in, “Nangman Pakai na-Pathen chu nalungthim pum pia, nahinkho pumpia chule nahet theina pumpia na-ngailutding,’ kiti ahi. 38 Hiche hi thupeh lenpen leh amasapen ahin, 39 thupeh lenpen nina chu: ‘Nang naki-ngailutbanga naheng nakom na-ngailut ding,’ kiti ahi. 40 Thupeh hiche te nia hi Danthu pumpi le Themgaote thuhil ki-ngamsoh kei ahi,” ati.

David Chapa hidoh’a thudoh

41 Pharisee ho ahung kikhop phat’un Jesun amaho chu adongin, 42 “Messiah thudol iti nagel’um? Koi chilhah ham?” ati. Amahon, “David chilhah ahi,” atiuve 43 Jesun “Iti hinte ahile, Lhagao haikhum jal’in David jengin jong Ama chu, ‘Pakai,’ asah-in; 44 ‘Pakai chun ka-Pakai jah a, namelmate nakeng chotpha kakoisoh masangsen Kajet lama tou jingin,’ atin; 45 David-in Ama chu ‘Pakai atileh, Messiah chu achilhah a iti pen thei ding ham?” ati. 46 Jesu thudoh chu koman cheng khat chan jong adonbut thei pon hiche nia pat chun koiman jong ima adong ngam tapouve.

Matthew 23

Jesun Danthu them ho le Pharisee ho aphosal

1 Jesun mipi le aseijuite jah a, 2 “Danthu themho le Pharisee ho hi Mose Danthu hilchen a pang ahiuvin, 3 ipi hijongle naseipeh-u nit’un bol jong bol’un, amaho chon bangin vang chondauvin. 4 Amahon pohgih hahsa akan’un milengkouva aputsah-uvin, akhut jung jeng chan jong akhoiloh dong agoupouve. 5 Abol atoh chanu mi mitmu din bou abol’un ahi. Danthuchih bom akibuu le akibeh chengseu chu apeh aletsah-ui. 6 Golvahna le Houthua kikhopna in dunga touna pipen adeiyun, 7 kailhangdunga min salam abol’a, ‘Rabbi,’ ati diu bou adeiyui. 8 Nang hon vang mi, ‘Rabbi,’ kitisah hih-un, ajeh chu Houhil khat bou naneiyun, naboncha sopi cheh nahiuve. 9 Leiset chunga koima, ‘Pa,’ sah hih-un, van a na-Pau khat bou aum’e. 10 Miho, ‘Lamkai,’ kitisah dauvin, lamkai khatseh, Messiah chu nanei nauve. 11 Nalah –uva alenpen chu nalhachauva pang ding ahi. 12 Mi ama kichoi sang chu kisunem ding, ama kineosah chu kichoi sang ding ahi.

Jesun phat lhemna adeimo

13 “Ohe, danthu them ho le Pharisee mipha lhem ho nadau ahi! Mipha lhem ho! Miho din van a Lenggam kot nakhah tan’un, nang ho la nalut thei deh pouvin, lut dia kigo ho geiyin nalutsah pouve! 14 (Ohe Danthu them ho le Pharisee mipha lhem ho nadau ahi! Meithai ho in dunga sottah tah nataovun nabahgam jiuve. Hijeh a chu genthei hesoh chungnung nathoh diu ahi.) 15 “Ohe, Danthu them ho le Pharisee mipha lhem ho nadau ahi! Mi khatseh jong Juda hou housah din Twikhanglen jousea nakitol’un, gamkai jouose nachonsoh-un, nahousah tengule nangho sanga ajat nijen khoh jon Damun jon din nasemdoh jiuve. 16 “Ohe nadau ahi, ‘Koi hile Houin pan a kihahsel chu ajeh pon, Houin a kikoi sana pan a kihahsel vang ajeh theiye,’ tia mihil lamkai mitcho ho! 17 Mitcho mi-ngol ho! Houin jeh a sana athenga kisimpi chu hoijoh thupi jom sana ham Houin ham? 18 Chuma leh, ‘Maicham pan a kihahsel vangin akijeh pon, maicham chunga kitoh thil-ho pat jeh-in je na aum theiye,’ na tiuve. 19 Mitcho ho! Maicham jeh a a thilto thenga kisimpi chu hoijoh thupijom-maicham ham thilto ham? 20 Ajeh chu maicham pan a kihahsel chanin maicham chunga kitoh thil geiya apat tha a kihalsel ahitai. 21 Hitobanga chu Houin pan a kihahsel jong chun Houin sunga Chenga Pathen apat’a kihahsel ahi. 22 Chule van pan a kihahsel’an jong Pathen laltouna min le achunga Toupa pan a kihahsel ahi. 23 “Ohe, Danthu them ho le Pharisee mipha lhem ho nadau ahi! Nang hon pudina le pa-thikhom chule jira-hicheng hi som a khat na toh jiuvin, Danthua thil khoh cheh, adih a thu tan ding, mi hepi ding le tahsan ding hicheng hi don louvin nakoi jiuve. Adang nabol’u chutoh kilhon a hicheng jong hi nabol diu ahi. 24 Lamkai mitcho ho! Nang hon thou vaisi nalhiuvin, sa-ngongsao napum val’ui. 25 “Ohe, Danthu them ho le Pharisee mipha lhem ho nadau ahi! Khon le lheng polam nasil ngim’un, asunga la phumhat’a nathil lah-u le papsetna adimset’e! 26 Pharisee mitcho ho! Khon chu asung silngim leu chun apolam jong ngim ding ahi! 27 “Ohe, Danthu them ho le Pharisee mipha lhem ho nadau ahi! Nang ho hi lhan kiloi bang, polam vet dia hoi, asung la mithigu le aboh anen ijakai dimset tobang nahiuve. 28 Hitobang hin polam vet din dihtah bangin na-um’un, nasungu vang phat lhemna le chonsetna dimse nahiuve.

Jesun mipha lhemho talen mat ding asei

29 ‘Ohe, Danthu them ho le Pharisee mipha lhem ho nadau ahi! Nang hon Themgaote lhan nasem’un, midih ho lhan khuh najem jem’un, 30 ‘Kapu kapateu khang laiya hing lileu vang Themgaote atha nauva pang kha pou vinge,’ tin na seiyui. 31 Hitobang hin Themgaote that’a pang ho chihlhah nahi nau nang hon naphongdoh tauve. 32 Napu napateu toh ban chu tong molso ngal’un! 33 Vo gulse son, gulsete! Damun a talen namat diu chu iti otdoh theiying natiu ham? 34 Veuvin Themgaote le miching ho chule Danthu them ho kahinsol peh-e, abang nathauva, abang thingpel’a nakhet beh diu, abangma Houthua kikhopna in dunga najep’uva, khotin a nadel le diu ahi. 35 Hiche naboljeh-uva hi monabei Abel thisan kisoa pat, muntheng le maicham kah a nathau Berechiah chapa, monabei Zechariah thisan kiso geiya themmona bei miho thisan, tol’a long lha ho jeh a themmona chengse nachunguva chuh lo ding ahi. 36 Kichentah a kaseipeh nahiuve, hicheng jeh a themmona chu hiche khang mite chunga chu ding ahi.

Jesun Jerusalem akacham

37 “O Jerusalem, Jerusalem! Themgao ho that’a, akisolpeh jouse songa a sep lih-ah! Ahpin anoute ahuikhom banga ijatvei nachate huikhom ding kagot hitam! Hinla neinoppeh poi! 38 Hijeh a chu na-in kamdel’a kidalhah peh ding nahi! 39 Kaseipeh nahiuve, tua pat, ‘Pakai min a Hungpa anun nom’e,’ nati masangseuva neimukit lou diu ahitai,” ati.

Matthew 24

Jesun Houin kisuhmang ding asei masah

1 Houin dalha apotdoh chun Jesu henga aseijuite ahungun, Houin kisah loupije vetsah agouve. 2 Jesun ajah-uva, “Ahinai, aloupije hi vesoh keiyun, amavang kaseipeh nahiuve, song khat chunga khat kisethom hung umlou hel ding, kipehsoh kei ding ahi,” ati.

Gim genthei le bolsetna

3 Olive molchinga Jesu atoupeh’in guh thim chan aseijute ahungun, “Hitobang thilse ho chu ith hung lhunga, nahung kit ding phat leh lseiset kichai ding chu ipia kimel chih ding ham?” tin adongui. 4 Jesun adonbut’in, “Ching theiyun koima kilhep lhahsah dauvin. 5 Mihem tamtah kamin a hunguva, Keima Messiah kahi,’ atiuva mitampi alhep lhah diu ahi. 6 Gal kisat husa le gal kisat thukithang najah tdiu, hi jongle kicha hih-un; hitobang ho hi soh tei ding, amavang achaina hilou lai ding ahi. 7 Gam khat le gam khat kidouva, lenggam khat le lenggam chom khat kisat ding, muntin a kel lhantin, ling kihot ding ahi. 8 Hicheng hi naoso nat bang da kipatna ahi nalaiye. 9 Min namat’uva midang ho khut’a napeh diu, talen namatsah uva natha diu ahi. Keima jal’a namtinin nahotlo diu ahi. 10 Chutah le mi tampi tahsan a pull ha a, khat le khat kipedoh toa kihoto diu; 11 Themgao lhem tampi sohdoh-in tin, mi tamtah alhep lhah diu ahi. 12 Chon chatvaina pung cheh cheh-in tin, mi tamtah ngailutna dailha diu ahi. 13 Hinla akhon ni geiya thoh lhumkeiya chu huhhinga umtei ding ahinai. 14 Chule hiche Lenggam Kipana Thupha hi vannoi pumpia kiseiphonga kihettohsah ding, chu jou tengleh kichai ding ahibouve.

Thoh hahsa nasatah

15 “Hichejeh chun mi sumang thet umtah, Daniel Themgao kama kiseisa chu muntheng phunga adin namu tenguleh! (asim sim an he hen) 16 ‘Judea gama um chengse molsang sanga jam’u hen. 17 Inting vuma um jong insunga thilkeo kilah din kumlhah da hen. 18 Loukon jong ponsil kilah din kile da hen. 19 Ohe, chulai ta a numei agaiya le nao noi chepsah nalai ho chu ada na-e! 20 Najam cheh nau phat chu phalpi lai le Choldo nikho ahilouna din taovun! 21 Chutengle hesoh genthei chungnung hung um ding, hitobang hi vannoi kisemtil’a pat tulai geiya soh kha louhel lai ahin, hung jong hungsoh kit lou ding ahi. 22 Hiche niho chu Pathenin asuhchom lou hileh tahsa mihing khat cha jong soh cha lou ding ahi, hijeh a chu lhenchomte jal’a hiche nikho hi kisuchom ding ahi. 23 “Hichepet hileh min najahuva, ‘Ven, hiche hi Messiah ahi,’ ati ham, ahiloule ‘Hiche hi Ama ahi,’ ati ham hijongle tahsan hihuvin. 24 Ajeh chu Messiah lhem le Themgao lhem tampi hung kisem doh-un tin, ahithei le bon thenchomte geiya pui mangna dia melchihna le thil kidang nasa tah tah ahinbol diu ahi. 25 Veuvin, ahung lhun masanga kahil masah dem nahiuve. 26 “Ahilouva, ‘Veuvin, Messiah gamthip laiya aum’e,’ atiu jongle chedoh a vet din gel dauvin; ‘Veuvin indan sung nunga aum’e’ tijongleu tahsan hih-un. 27 Ajeh chu kolphe nisolama ahung phet leh nilhom lam geiya asalvah banga Mihem Chapa hung kit ding chuti ding ahi. 28 “Hoikom hileh thilong phunga muthong kikhom tei ding ahi.

Mihem Chapa hungkit ding

29 “Thoh genthei hesoh nikho kichaisohtengleh nisa thim a, lha jong vah talou ding, vanlaijol’a kona ahsite pul lhan tin, van a thaneina jouse kihot lingsoh ding ahi. 30 Chutah le vanlaijol’a Mihem Chapa melchihna hung kilang ding ahin vannoi leiset phungtin a min dip le lai kidoh’uva, van meilhang lah a Mihem Chapa thanei tah le loupe tah a hung amu dingu ahi. 31 Mihem Chapa sumkon gin nasatah ho thoa Avantilte’asol ding, lhenchomte chengse van mong lang khat’a pat among lang khat geiya, kolkimvel ning lia akhop khom diu ahi.

Theichang phunga kihil ding

32 “Theichang phung hin thulem kihil’un. Ajih adot’a ana anou teng nipi naidol naheuve. 33 Hihe chun hichengse hi namu tengu leh naiya hung ding koncha ahi heuvin. 34 Tahbeh a kaseipeh nahiuve, thil hicheng hi aguilhun masangsea hiche khang hi kichai lou ding ahi. 35 Van le leiset mang ding ahin, kathusei ho vang mang lou ding ahi.

Mihemin aniho le anidan ahepoi

36 “Hiche Nikho hi Pa tilou van a Vantilte le Chapan jong chule koimachan ahepoi. 37 Mihem Chapa hungkit hi Noah nikho lai thilsoh banga hungsoh ding ahi. 38 Noah nikho lai twisang let masang, Noah kong alut ni geiyin, mihon aneuvin adon’un, akichengun, chen jong akichensah-ui; 39 twisang lenin achup mang kahseuvin, kho helouvin aum’uve. Mihem Chapa hungkit jong chute ding ahi. 40 Chuteng mi ni louva umkhom jong khat kila khat kida lha ding, 41 numei ni sumhei khat’a chang goikhom te ni jong khat kila khat kida lha ding ahi. 42 Hijeh chun na-Pakaiyu hung ding nikho nahet loujeh-un kiging phauvin. 43 Gucha itih a hung ding inneipan heleh kiging jinga um ding, a-in aphet vangsah lou ding naheuve. 44 Hichejeh chun kiging jingin um’un, nakigin loupet tah-uva Mihem Chapa hung ding ahi.

Lhacha kitah le kitah lou

45 “Soh tahsan um le chingtah, a-insung mite aphat cha neh le choh hoppeh dia, insung vaipoa apun anganse chu koi ham? 46 Apu hung teng hitobanga anatoh atokhah soh chu anun nom’e! 47 Tahbeh a kaseipeh nahiuve, ama chu apun anei jouse chunga vaipoa akoi ding ahi. 48 Soh gilou chun alung gel’in, ‘Kapu hungvah ponte,’ tin 49 asoh chanpi chengse deng panta hen, anop nop nehen don taleh, 50 hiche sohpa chun agel lou nikho le ahet loupet tah a apu hung ding, 51 asohpa chu tum ni asoa, mipha lhem ho talen amatsah ding, hikoma chu kap le hagel gel’a um ding ahi

Matthew 25

Nu-ngah som thulem

1 “Hiche phat hileh van a Lenggam chu athaomeiyu kichoi cheh a ji nei dingpa lamto goah nu-ngah som tobang ding ahi. 2 Nu-ngah nga chu lungthimbei ahiuvin, nga chu lungthim pha ahiuve. 3 Lungthimbei hon thaomei aken vangun thaotwi akeng pouve; 4 lungthim pha hon vang athaomeiyuva det kham thaotwiya akenthauve. 5 Ji nei dingpa ahung geibehseh phat’in nu-ngah ho alu lhu’uvin, a-ihmusoh tauve. 6 “Jan khangkim laiyin ji nei dingpa ahungtai! Hungun galam touvin” akiti. 7 Chutah-in nu-ngah ho athouvun thaomei akigot tauve. 8 Hichun lungthimbei hon lungthim pha ho jah a, ‘Kathaomeiyu thaotwi aumtapoi, thaotwi them khat beh neipeuvin,’ tin athum tauve. 9 Ahinla lungthim pha hon adonbut’un, ‘Igom’uva din lhing ponte, chusangin cheuvin lang ajoh ho koma gakichoh vah tauvin,’ atiuve. 10 Lungthimbei ho thaotwi choa ache lan’un ji nei dingpa ahung paiyin, kigingsa um chengsen kichen golvahna mun’ah akijot lut piuvin, kot kikhah tai. 11 “Chom khat jouvin lungthim bei nu-ngah ho ahungun, ‘Kapu, kapu, kot neihon’un!’ tin asamtauve. 12 Ji nei dingpan, ‘Tahbeh a kaseipeh nahiuve, nang ho kahe khapoi,’ ati tai. 13 “Anikho le anidan tah nahet loujeh-un kigingun.

Lhacha thum thulem

14 “Hiche phat hileh van a Lenggam chu khol gamla tah chedoh goa, asohte koukhoma, anei jouse asohte ngansepa thusim tobang ding ahi. 15 Soh khat chu talent nga apen, khat talent ni apen, khatma chu talent khat apen, athan ajokhop cheh-in ahoppeh-in khol’a achetai. 16 Talent nga sangpa akipat’a kiveina aneileh talent nga ma aveikan bei. 17 Talent ni sangpa akipat’a kiveina aneileh talent ni ma aveikan bei. 18 Talent khat sangpan vang lei alaiyin apupa sum chu asel tai. 19 “Phat sotpi nungin hiche soh ho pupa hi ahung kile kit tan, asohte toh som asutouve. 20 Talent nga sangpan talent nga ma ahinchoi ben, ‘Kapu, talent nga neipen, talent nga ma kavei kan bei,’ tin apetai. 21 Apun, ‘Tahsan umtah soh pha, nabol pha lheh jenge! Thil themcha chunga kitah nahin, tampi chunga vai kahomsah ding nahi. Hungin napu kipana a hung kipah-in,’ ati. 22 Talent ni sangpan, ‘Kapu, talent ni neipen, talent ni ma kaveikan bei,’ tin apetai. 23 Apun, ‘Tahsan um soh pha, nabol pha lheh jeng! Nang jong thil themcha chunga kitah nahin, tampi chunga vai kahomsah ding nahi. Hungin napu kipana a hung kipah-in,’ ati. 24 Talent khat sangpa jong ahungin, ‘Kapu, mi kikhel nahikahen, natuna louva at theiya, nathe na louva jong chomkhom thei nahin, 25 nang kagin jeh-in kachen natalent chu lei noiya kaseltai. Hiche hi nasum ma ma nakilah kit ahi,’ tin apetai. 26 Apun jong, ‘Vo soh gilou le thase! Katuna louva ka-atjia kathe na louva kachomkham ji nahet ahiye ong! 27 Kasum chu sumkolvei ho koma apung dia nanakoi leh itim? Chutileh kahung phat’a kasumpi le akan kilah that a ding! 28 Hichepa talent chu lahpeh-un lang taleng som neipa chu petauvin, 29 ijeh-inem itile aneiya kipehbea anei letset ding, anei lou vang aneisun jong kilahpeh ding ahi. 30 Chule hiche soh phachomlou hi polam muthim lah a gapai mangun, hikoma chu kap le hagel gel’a um ding ahi,’ ati.

Thutan khumkhana

31 “Mihem Chapa aloupinaa Vantilte toh ahung teng leh alaltouna loupe tah a tou ding, 32 namtin vaipi a-angasunga kikhom kimsoh keiya, kelngaoi chingpan keltah lah a kelngoi chengse alhendoh bang, Ama jong miho alhen khen a, achom khen ding, 33 kelngoi chengse ajet lama akhindoh a, keltah chengse aveilama akhindoh ding ahi. 34 Chutha le lengpan ajet lama umte jah a, ‘Hungun ka-Pa phatthei boh change, vannoi kisemtil’a pat nang ho dia gonsa kikoi Lenggam chu hung lo’uvin, 35 ajeh chu kakel pet’in neh ding neipeuvin, kadangchah pet’in don ding neipeuve; Kakholjin naa nei lhunsah-un, 36 ponbeiya ka-umin jong pon neisilpeh-ui. Kadammon nei hung veuvin, songkul kalut’in jong neihung vil’ui,’ ati ding ahi. 37 “Chuteng midih hon, ‘Pakai, itih a nakel pet toh khan eh ding kapeh-uva, chule nadangchah toh kha don ding kapeh khah-uvam? 38 Hoikom nakholjin na kalhunsah khah-uva, itih a ponbeiya naum kamu’va pon kasilpeh khah-u ham? 39 Itih nadammo veiset pet’a kahung vet’uva, itih a nasongkul lutpet kahung vil’uvam?’ ati diu ahi. 40 Lungpen adonbut’a, ‘Kichentah a kaseipeh nahiuve, hiche kasopite lah a aneopen khat nabol nau chu kei neibol nau ahi,’ tinte. 41 “Chuteng aveilama umho jah a, ‘Gaosap chang ho, kakoma konin potdoh’un lang Satan le avantilte dia gonsa kikoi tonsot mitmo meilhum sunga lut tauvin, 42 ijeh-inem itile kakelpet’in neh ding neipepouvin, kadangchah-in don ding neipepouvin, 43 kakholjin na a neilhunsah dauvin, ponbeiya ka-um jong pon neisilpeh pouve; kadammo la neihung ve pouvin, songkul kalut’in la neivil pouve,’ ati ding ahi. 44 “Chutah le amahon donbut’un tin, ‘Pakai, itih a keihon nagilkel, nadangchah, nakholjin, ponbeiya naum, nadammo chule songkul’a na-um kamu’va don louva kakoi khah-um?’ tin sei yunte. 45 Lengpan ajah-uva, itobang ijase loupen hijongle hiche ho lah a khat nabol lou nau chu Keima neibol louvu ahi,’ ati ding ahi. 46 Chuteng amaho hi tantih neilou talen man dia cheuva, midih ho vang tonsot hin naalut diu ahi,” ati.

Matthew 26

Jesu thana dia thilgon

1 Hicheng hi ahilchaisoh phat’in Jesun aseijuite jah a, 2 “Nahet banguva ni ni jou teng Kalchuh kut hi ding, Mihem Chapa hi thingpel a khetbeh dia min apehdoh ding ahitai,” ati. 3 Hichepet hin Thempu pipu ho le upate Thempulen Caiaphas inpia akikhom’un, 4 Jesu chu doha bol’a mat ding, chule tha theina ding akihou somtauve. 5 Ahivangin, “Kut lai hida le phante, ajo le japi lah a boina um khante,” atiuve.

Bethany khoa Jesu thao anu’u

6 Jesu chu Bethany khoa Simon mipha pa ina aum pet’in, 7 numei khat’in songval hai khat’ah thao namtui manlu tah ahinchoiyin, Jesun ankong aum pet’in aluchanga asun khum’e. 8 Athilbol hi seijuiten amu phat’un alung hanguvin, “I-bol’a thao namtui hi amoh suh mang ham? 9 Sum tampi man a joh a vaicha gentheite peh khamset hi la ahin,” atiuve. 10 Jesun akihou nau ahen ajahuvah, “Idia numei nu chu nasuh lung gim’u ham? Aman thilpha tah eibolpeh ahi, 11 ajeh chu mivaicha gentheite chu nakom’uva um jing ding ahin, Keivang nakomu’va um jing ding kahi poi. 12 Aman thao namtui eisun khum hi vui ding lima eisem ahitai. 13 Tahbeh a kaseipeh nahiuve, hoikom hijongle vannoiya hiche Kipana Thupha kiseiphongna chan a athilbol jong hi amanu het jingna dia kiseitha jing ding ahi,” ati.

Jesu mat ding Judas anop

14 Seijui som le nil ah a khat Judas Iscariot kitipa chu Thempu pipu ho henga achen, 15 “Jesu khu matsah leu veng ipi neipe nom’un natem,” atileh, amahon, dangka somthum apeuve. 16 Hichea pat hin Judas-in Jesu matsahna thei phat kitup kom ave-lhi jingtai.

Jesu le seijuiten Kalchuh kut anneh

17 Cholsolou changlhah kut ni masa nin seijuite Jesu henga ahungun, “Kalchuh kut an nanehna ding hoikom gago leu veng nadeivem?” tin adongui. 18 Jesun, “Khopi sunga lut’uvin pasal khatpen jah a, “Houhil’in Keidia phat kiteppeh ahung naitai, kaseijuite toh na-in a kalchuh kut an kaneh diu ahi,’ tin aseiye gatiuvin,” ati. 19 Jesun ahil bangun seijuiten abol’un kalchuh kut an chu agagong tauve. 20 Nilhah phat’in Jesun seijui som le nit oh ankong aumtai. 21 Aan neh laitah-un aman, “Tahbeh kaseipeh nahiuve, nalah-uva khat’in mi eimatsah ding ahi,” ati. 22 Seijuite alung dong lheh jengun, khat khat’in, “Keivang kahilou ahina ong Pakai?” atiuve. 23 Jesun adonbut’in, “Lheng sunga changlhah kadekotpi pa tah hin eimatsah ding ahi, . 24 Mihem Chapa aumchan ding Pathen lekhabua kisun banga soh tei ding ahin, hinla Mihem Chapa matsahna dia manchah a pangpa chu ohe adana-e! Ama chu apen a peng lou hileh ama dia phajo ta dinga!” ati. 25 Jesu pehdoh a matsah dingpa Judas chun adonbut’in, “Kei neisei ahipoi ong Houhil?” ati. Jesun adonbut’in, “Chutia nasei ahi,” ati.

Pakai Anjon kiphudoh

26 An neh laitah-in Jesun changlhah alan, phatthei aboh jouvin aheh bal bal’in seijuite apen, “Kilah-un neuvin, hiche hi katahsa ahi,” ati. 27 Chuin khon chu alan, athangvah jouvin seijuite apen, “Nabonchan donsoh keiyun; 28 hiche hi chonset ngaidamna dia mi tamtah dinga kilhoh lha kathisan ahi. 29 Kaseipeh nahiuve, ka-Pa Lenggama nang ho to athah a kadon khom nikho hung lhun kit kahsea lengpiga twi hi kadon kit lou ding ahitai,” ati. 30 Chuin la khat asauvin Olive mol jonin achetauve.

Peterin Jesu aseilep ding kise masah

31 Jesun aseijuite jah-a, “Tujan teng kachunga nakisuhmo soh hel diu ahi, ajeh chu, ‘Kelngoi chingpa kavoh lhuh teng kelngoite cheh soh diu ahi,’ tin Pathen lekhabua akisun’e. 32 Hijongle hinga eikikaithou teng Galilee gama nang ho sangin masajo tange,” ati. 33 Peterin Jesu jah a, “Midangin nadalhah soh hel jongle kenvang dalha hih hel inge,” ati. 34 Jesun Peter jah a, “Tahbeh a kaseipeh nahi, tujan ah khon masanga thumvei neiseilep ding ahi,” ati. 35 Peterin ajah a, “Nangto thitha ding hi jong leng naseilep hih hel inge,” ati. Seijui dangsen jong chutin asei cheh-ui.

Gethsemani hon sunga Jesu tao

36 Jesu le seijuite chu Gathsemani kiti laiya acheuvin, Jesun ajah-uvah, “Khu koma kachea kaga tao sungsen hikoma hin anatou jingun,” ati. 37 Jesun Peter le Zebedee chapa te ni akipuiyin, chuin lung gim hesoh nasa tah-in ahinphan, 38 ajah-uva, “Thina khop hel’in kalung hesoh behseh tai, hikoma hin um’un neikiginpi jngun,” ati. 39 Chuin themkhat ache chonin, tol’a mai asulut’in, “Hepa! Ahithei leh hiche khon hi Keiya konin tolmangin, hinla Kei dei hilouvin Nang lungdei joh hihen,” tin ataove. 40 Chujouvin seijui thum henga ahung leh ana-ihmut’u atoh khan, Peter jah a, “Iti nidan khat jeng jong neikiginpi jou louvu ham? 41 Lhepna nalhah louna din kigingin tao jingun, lhagaovin ago nan tahsa lahasam behseh jenge!” ati. 42 Anivei nan Jesu ache kit’in, “Hepa! Hiche khon hi kadon lousea kitol mang thei lou ahileh Nangma lung got got hita hen!” tin ataove. 43 Ahung kile kit leh, seijuite ihmutsoh behseh a ihmut mildel ahungtoh-e. 44 Seijuite dalhan athumvei chan nan agataovin, asei ngai ngai agaseiyin ahi. 45 Chuin aseijuite henga ahungin, “Ihmua kicholdo nalai nahiuvem? Veuvin phat alhingtan, Mihem Chapa hi mi chonsete khut’a apehdoh diu ahitai. 46 Kipat’un chetaute. Veuvin! Eipedoh pan kakom ahin phatai!” ati.

Jesu amat’u

47 Jesun thu asei nalaiyin, seijui som le nil ah a Judas chu Thempu pipu ho le, Thempulen ho le upate hinsol, chemjam le moltum thoa hung kon, mipi toh lhonin ahung lhungtai. 48 Jesu pedoh a pangpan miho chu melchihna ahilmasah a, “Kachop pen pen chu Ama ahi, man jengun!” ati ahi. 49 Judas chun Jesu ajon jangkeiyin, “Chibai, Houhil!” tin achoptai. 50 Jesun ajah a, “Golpa, nahung lo na bol jengin,” ati. Chutah chun mipin ahindelvuhun Jesu man’un akantauve. 51 Jesu to umkhom ho khat’in chem.jam asatdoh-in Thempu pipu soh pa asat jengleh, abilkol lang khat asat lhai. 52 Jesun, “Nachemjam chu apaiya khum jengin, chemjam pan jouse chemjama lou ding ahi. 53 Tutah jenga jong ka-Pan Vantilte sang som sagi le sang ni val jen eihinsolpeh dia kathummo a nabol ham? 54 Chutin kibol leh Pathen thu hitobanga thilsoh dia asei chu iti guilhun thei ding ham?” ati. 55 Hichea hin Jesun mipi jah a, “Gucha michom man ding banga, chemjam le moltum thoa Kei man dia hungkon nahiuvam?” ati. Niseh-in Houin a katouvin mi kahil jin la nei man pouvin,” ati. 56 Hoi hileh Pathen lekhabua Themgaote sutsa jouse guilhunna dinga hicheng hi soh ahi,” ati. Chutah chun seijuiten adalhauvin ajam mang tauve.

Hou vaipoloi anga Jesu

57 Jesu man hon Jesu chu Thempu chungnung Caiaphas in a akaiyu leh, hikoma chun Danthu them ho le upate anakikhom’ui. 58 Peterin Jesu chu galkangin ahinjuipeh-in, Thenpu chungnung inpi leitol geiyin ahunge; hichea hin, “Achaina munge,” tin alut’in lhacha ho lah a atouve. 59 Thempu len chengse le HOu vaipoloi chengsen Jesu tha theina din adou nan jouthu jeng hettohsah ahol’un, 60 mitampin jou thua hettohsah abol vangun athina thei lom khat cha aseidoh pouve. Akhon nan mi nin, 61 “Hiche Pa hin, ‘Pathen Houin kaphet lhah a nithum sunga kasahdoh thei ahi,’ tin aseiye,” atilhone. 62 Thempu Chungnung akipat doh paiyin, “Nahehset na cheng seu hi nadonbut lou ding ham?” tin Jesun adonge. 63 Jesu la athip beh jeng. Hichun Thempu chung nungin ajah a, “Hing jing Pathen min a kahahsel’a kasol nahi, Pathen Chapa Messiah chu nahi nahilou ham-seiyin?” tin anoi. 64 Jesun adonbut’in, “Chutia nasei ahi! Hinla kaseipeh nahi, tua pat Mihem Chapa hi Thaneipen jet’a touva, vanlaijol, meilom lah a hung namu diu ahi, : ati. 65 Chutah chun Thempu chungnungin aponsil akibo-eh paiyin, “Pathen ataitomtai. Hettohsah dang angai tapoi! Tutaha Pathen ataitom najah cheh tah-u chu me! 66 Iti nagel’um?” ati. Mihon, “Athemmoi, thi tei tei ding ahi,” atiuve. 67 Chutah chun mihon Jesu maiya chil asetkhum’un, achum’un, gaovin lang seitemin, koiham na denga chu?” tin ahouseuve. 68 “Messiah, gaovin lang seitemin, koiham nadenga chu?” tin ahouseuve.

Peterin Jesu aseilep

69 Peter chu polam leitol’a atouve. Soh nu-ngah khat ahungin, “Nang jong Galilee mi Jesu to kiloi nahibouve,” ati. 70 Hinla Peterin japi angsunga aseilep’in, “Ipi nasei ham kahepoi,” ati. 71 Kelkot polam a agapotdoh leh, soh nu-ngah khatman amudoh kit’in chukoma um ho ja a chun, “Hichepa jong hi Nazareth Jesu toh kivohsa ahi,” ati. 72 Peterin kihahsel to thon aseilep kit’in, “Hichepa khu kahe khapoi,” ati kit’e. 73 Chom khat jouvin chu koma ding miho ahungun Peter jah a, mong nahibouve, napao dan hin nakiphong doh tai,” atiuve. 74 Hiche phat vang hin Peter jong kigaosap le kihahsel thon, “Hiche pa him him kahe kha hih hel’e!” tia aseilep pet tah-in ah ahung khongtai. 75 Hichun, “Ah khon masanga thumvei neiseilep ding ahi,” tia Jesun asei chu Peterin ageldoh tan, polama apotdoh loiyin lhase tah-in akaptai.

Matthew 27

Pilate anga Jesu akailut’u

1 Jingpi tah-in Thempulen ho le upate Jesu than a thei ding akihousom tauve. 2 Jesu chu thihkhaovin akan’un, akaiyun Rome gam vaipo Pilate apedoh tauve.

Judas thi

3 Jesu matsah a pang Judas chun, Jesu tha dia thu kitan ahetdoh phat’in akisih behseh jengin, dangka somthum chu Thempu len ho le upaho alepeh kit’in, 4 “Themmonabei tha dinga kapehdoh chu kathemmotai!” ati. Amahon la, “Keiho i-kin hiya ong? Nangin kivet tange,” atiuve. 5 Judas-in sum chu Houin sunga aseplhan, apotdoh paiyin agakikhai lihtai. 6 Thempulen hon dangka chujat chu alauvin, “Hiche sum hi thisan man ahin, Houin sung sumkholnaa koi ngai ahipoi,” atiuve. 7 Akihoutoh phat’un gamdang miho lhan mol din, beldengpa lou mun achoh natauve. 8 Hijeh a chu tuni geiya hiche mu khu, “Thisan mun,” kiti ahi. 9 Hichea hin Jeremiah Themgao seisa, “Israel miten man tuh a atepsau dangka somthum chu mihon alauvin, 10 Pakaiyin eithupeh bangin beldingpa loumun choh nan anei tauve,” kiti chu aguilhunge.

Pilate’n Jesu thu adoh

11 Jesu chu Rome gamvai popa angsunga adinsah tauvin, gamvaipon ajah a, “Judate lengpa nahim?” tin adonge. Jesun, “Chutia nasei ahi,” ati. 12 Thempulen ho le upaten ahehsetna thudol’a vang imacha adonbut poi. 13 Pilate’in Jesu jah a, “Mihon hijat’a nahehset nau hi najah lou ham?” ati. 14 Jesun thu cheng khat cha jong adonbut lou phat’in gamvaipopan kidang asa lheh jenge.

Pilate’n Jesu tha dia asei lhuh

15 Kalchuh kut sunga hi sohchang koi hileh japi dei pen pen khat Gamvaipon alhadoh peh ji ahi. 16 Hichepet hin sohchang minse tah Jesu Barabbas-khat akihen’e. 17 Mipi hung kikhop phat’in Pilate’n ajah uvah, “Jesu Barabbas kalhadoh peh diu ha, Messiah kiti Jesu joh kalhahdoh peh diu ham?” tin adonge. 18 Ijeh-inem itile Juda lamkaiten thangset suma Jesu apehdohu chu ahet ahi. 19 Thutanna muna Pilate atoupet man ajinun thu ahin thot’in, “Themmona bei hichepa chu limsah hih-in, ama jeh hin tunin kamangin kathoh gim lheh jenge,” ati. 20 Ahin Thempulen ho le upa ten Jesu asuhmanga Barabbas joh alha na din mipi atilseuvin, angeh sah tauve. 21 Gamvaipopan mipi adongin, “Hite ni kah a hoijoh kalhadoh peh ding nadeiyum?” ati. Mipin, “Barabbas!” atiuve. 22 Pilate’n, “Ahile Messiah kiti Jesu hi iba kalo ding hitam?” ati. Mipin, “Thingpel’a khenbehtan!” tin asamtauve. 23 Pilate’n, “Ipi suhset aneiyam?” tin adonge. Miho la a-olheh lheh-in apengun, “Thingpel’a khenbeh-in!” tin asam’ui. 24 Athilbol phat chomlou, boina asohjoh amu phat’in Pilate’in twi alan mipi angsunga khut asil’in, “Hichepa thina chung change mona po ponge, nang hon kivet tauvin,” ati. 25 Mipin adonbut’un, “Hichepa thisan phu chu keiho le katu kachateu chunga chu nante,” atiuve. 26 Pilate’n Barabbas alhadoh peh in, Jesu vang chu ajep’in thingpel’a khetbeh din apedoh tai.

Sepaihon Jesu Kichepna aneiyu

27 Gamvaipopa sepaiten Jesu chu gamvaipo inpi sunga apui lut’un, sepia hon lhingset’in akikhomui. 28 Jesu ponsil ahoh lhauvin, pon sandup asilpeh-un, 29 ling lukhuh apheh-un akhuh peh-uvin, akhut jet lama peng tenggol khat achoisah-un, tot nan aangsunga aboh khup’un, “Judate lengpa hingsot’in!” atiu ve. 30 Chil set khumun, atneggol’in aluchang ajep’un 31 tot nopna anei jou phat’un asilpeh-u ponsan chu ahoh lhauvin, ama pon asilpeh-un, thingpel’a khetbeh din apui mang tauve.

Jesu thingpel’a akhetbeh-u

32 Akijotdoh-u leh sepia hon, Cyrene gam mi Simon atoh khauvin, Jesu thingpel put hu did nada acham louvin aman’ui. 33 Golgotha, “lugu mun,” kiti lai ahung ge phat’un, 34 adon din cheikha toh kihal lengpitwi chu Jesu apeh-u leh, aman la atep’in adon nompoi. 35 Sepaihon Jesu chu thingpel’a akhenbeh-un, vang asan’un apon sil chengse akihomtauve. 36 Hikoma chun atouvun Jesu chu angah-ui. 37 Jesu luvuma ahehsetna, “Hichepa hi Jesu Judate lengpa ahi,” tia kisun chu atah-uve. 38 Gucha michom ni jong Jesu jet le veiya akhetbeh thauve. 39 Ache le avah le jouse Jesu chu ataitom nan akhasuh khum khum’ui. 40 “Houin phelha a nithum sunga sadoh ding Pa! Pathen Chapa nahileh Nangma kihuhhingin lang, thingpel’a konin hung kumlhan! Atiuve. 41 hitobangma chun Thempulen ho le Danthu them ho chule upaten jong a-eng houvun, 42 “Midang bon huhhinga, ama akihuhhing theipoi! Israel leng ahi-ong! Tutah-in thingpel’a konin hung kumlha hen tahsan unge! 43 Pathen a kisong ahi me, Pathen lungdei ahileh tutah-in huhdoh hen; ajeh chu, ‘Pathen chapa kahi,’ ati me,” atiuve. 44 Akikhetbeh pi gucha michom te geiyin jong chutobangma chun ahouse lhon’e.

Jesu thi

45 Nidan gup a pat nidan ko geiyin leiset pumpi chunga mu athimtai. 46 Nidan ko donin Jesu hapenin apengin, “Eli, Eli, lemasabachthni?” ati. Hichu “Ka-Pathen, i-bol’a neilha hitam?” tina ahi. 47 Chukoma ding mi phabeh’in apen gin ajauvin, “Hei, Elijah akouve,” atiuve. 48 Alah-uva mi khat alhaijel’in, twichop phon khat alan, lengpitwithuh adekot’in, tenggol leh a atah-in Jesu chu donsah ding agoi. 49 Midang hon, “Limsah hih-un, ahuhhing dia Elijah hung nam, veu hite,” atiuve. 50 Jesu hapenin apengin ahaitan paitan. 51 Chutah chun Houin pondal chu achunga pat anoi geiyin keh ni akison, ling akihot’in, songpi jouse apoh keh gamtai; 52 hijeh chun lhankot tampi akihongtan, mitheng thisa ho kaithouvin aum’ui. 53 Amahon lhan adalhauvin, Jesu thodoh nungin khopi thenga alut’un, mi tamtah henga akilah-ui. 54 Sepai jalamkai pa le aumpi sepia, Jesu ngah a pang hon, ling kihot le thilsoh chengse amu’vin, akicha behseh jengun, “hiche Pa hi Pathen Chapa tahbeh ahi,” atitauve. 55 Galilee gama pat Jesu nung hinjui, ajen lea pang numei ho chun galkanga konin Jesu ave-lhi jingui. 56 Alah-uva hin Magdalene khoa Mary toh, Jacob le Joseph nu Mary chule Zebedee chapate ni nu jong apanguve.

Jesu avuiyu

57 Nilhah phat’in, jesu seijuisa, Arimathea khoa amin Joseph kiti mihao tah khat ahungin, 58 Pilate henga achen Jesu long chu agathumtai. Pilate’n Jesu long chu Joseph din aphalpeh tai. 59 Joseph-in Jesu long chu adom lhan, tupat pon ngimseh-in atomin, 60 songpi akhet homa akisemsa, ama lhan thah beh sunga chun alupsah-in, lhankot’ah song lentah khat atnag lut’in asing chah-in achetai. 61 Magadalene khoa Mary le Mary khat joh chu hikoma chun lhan lam ngan atou lhone.

Lhan ngah ho

62 Ajing nikho, kigot ni kichai jouvin thempulen ho le Pharisee ho Pilate henga ahungun, 63 “Pu, hiche milhem chavai pa hin, ahinlaiyin, ‘Nithum jou le kaithouva ka-um ding ahi,’ ati kageldoh-uve. 64 Hijeh chun nithum geiya kitup tah a lhan ngah din mi koiyin, achutiloult aseijuite hunga atahsa longdamsa aguh mang diu, miho jah a, ‘Thina konin kaithouvin aumtai,’ atiuva, amasa eilhep chatvai sanguva anukhah tneg khoh cheh a eilhep diu ahi,” atiuve. 65 Pilate’n adonbut’in, “A-ngah ding naneiyu chu me, cheuvin lang pha nasah bangun lhan chu gaki-nga tup tau!” ati. 66 Amahon acheuvin. Lhankot song chu mohor anam khum’un, angah ding akoitauve.

Matthew 28

Jesu thodoh

1 Choldo nikho kichai, hapta kipatna ni masa jingkah khoovah thin thenin Magdalene khoa Mary le Mary khat nu chu lhan vedin ahung lhone. 2 Phulou helouvin ling hahon akihot’in, van a konin Pakaiya kon Vantil khat ahung kumlhan, lhankot sin song chu atangdohin, song chu kolphe vah-in avah-in, aponsil meibang banin abnage. 3 Vantil vouso chu kolpha vah-in avah-in, aponsil meibang banin abnage. 4 Lhan ngah hon akicha behseh jengun athisa abnag jengui. 5 Vantil chun numeiho ahin houvin, “Kicha hih-un, thingpel’a kikhetbwh Jesu chu nahol’u ahin, kahenai. 6 Ama hikoma aumtapoi, Aman aseisa bangin athoudoh tai. Hungin alupna hung veuvin. 7 Cheloiyun aseijuite jah a, ‘Ama thinaa konin athoudoh-in, Galilee gama nang ho sangin amasajotai, hikoma chu nakimupi diu ahi,’ tin gaseiyun. Ngai phauvin kaseipeh nahitauve,” ati. 8 Numeihon kichat le kipa thon lhan phung dalhan, seijuite gaseipehdin lhaijel tauve. 9 Phulou helouvin jesun numeiho chu akimupin, “Lung monguvin!” ati. Numeihon ahin nailut’un, akeng phang atuh-un aboh khup tauve. 10 Jesun ajah-uva, “Kicha hih-un, kile kit’uvin, kasopite chu Galilee gama che din gaseipeh-un, hikoma chu eimu diu ahi,” ati.

Lhan ngah ho thulhut

11 Numeho lamkai agei nalaiyun, lhan ngah sepia hokhopi sunga alut’un, thilsoh chengse abonchan Thempulen ho kom alhut tauve. 12 Thempulen ho le upaho akihou toh loiyun, sepia ho hi sum tampi apeuvin, 13 “Nang hon, ‘Jan ka-ihmut lan’un aseijuiten along ahung gu mang tauve,’ tia nasei tei tei diu ahi. 14 Hiche thu hi Gamvaipon ajah tah jongle keihon houjol’ung ting, nang ho lung olmosah pou vinge,” atiuve. 15 Lhan ngah sepaihon sum chu akilah un, ahil nau bangin abol tauve. Hitobang thujou

Jesun seijui som le khat tha apeh

16 Jesun che dia atepeh nau Galilee lhanga chun seijui somle khat chu anachetauve. 17 Abang bang along opkai vangun, seijuihon Jesu amu phat’un chibai aboh tauve. 18 Jesun ahin nailut’in ajah-uvah, “Van le leiset’a tha neina jouse eikipetai. 19 hijeh chun cheuvin lang muntin a mi jouse seijuiyin gasem tauvin, amaho chu a-Pa, a-Cha chule Lhagao Theng minin baptize galbol’un, 20 chule kathupeh chengse anitna diuvin hilun; veuvin leiset khang kichai ni geiyin Keiman nang ho ka-umpi jing nauve,” ati.

Mark 1

John Baptist thuhil lhangsap

1 Pathen chapa Jesu Christaa Kipana Thupha chu hitia kipan ahi. 2 Isaiah Themgao lekhabua kisun: “Ven keiman kasolle chu namasang’ah kasol’e, Aman nalampi semtohsa akoi ding ahi, 3 Gamthip’a khosam ogin khat’in, ‘Pakai lampi semtoh-un leng, Alamlen semjang san koiyun,’ tin akiseiye,” kiti bang chun, 4 gamthip’a John ahung kilah-in, chonset lung heiya baptize chan ding thu ahil lhang len chule baptize achansah-e. 5 Judea gam mun tin’a miho le Jerusalem khopia mi jouse John henga acheuvin, achonset chengse aphongun, Jordan vadunga ama khut’a baptize achang tauve. 6 John chun sa-ngongsao mul ponin akivonin, savun konggah aki-gah-in, chule khaokhote anen, gam khoiju adon’e; 7 lhang asamin, “Kei sanga hatjo khat ka-nunga ahunge, kei hi kun’a akengchot khao sut lham dinga kilom jong kahipoi. 8 Ken nang ho twiya baptize kachansah ahin, Aman vang Lhagao Thenga baptize nachansah diu ahi,” ati.

Jesu baptize chan

9 Hiche lai chun Galiee gam Nazareth khoa konin Jesu ahungin Jordan vadunga John khut’a baptize achangtai. 10 Twi lah a ahung dindoh doh chun van akikehson Lhagao Theng vakhu banga hung lenglhaa achunga chu amui. 11 Chule vana konin O-khat’in, “Nangma kachapa deitah nahin, nachunga kalung alhai ta-ngeiye,” ati.

Satanin Jesu alhep patep

12 Lhagaovin Jesu chu gamthip’a anolut paiyin, 13 hikoma chun nisom li jan som li athamin, Satan lhep patep’in aume; chule gamsate toh alha khomin, chuin Vantilten ahung jen’uve.

Jesun Galilee gama Pathen na atohpet

14 John amat nungun Jesu Galilee gama ahungin Pathenna kon Kipana Thupha alhangsam len, 15 “Phat alhinge, Pathen lenggam chun hikom ahinphatai; nalung heiyun lang Kipana Thupha hi tahsanun,” tin aseiye.

Jesun nga man pasal li akou

16 Jesun Galilee dillen ajotpan nga man mi ni Simon le asopipa Andrew dillena lensep amui. 17 Jesun ajah lhon’ah, Neijui lhonin, mi manin pansah lhon inge,” atileh; 18 ama nin alen dalhan Jesu nung ajui pai lhontai. 19 Them khat achebe kit leh Zebedee chapa Jacob le asopipa John jong kong sunga len anakhui phat lhon amun, 20 ama ni jong akou kit leh, kong sunga chun apa Zebedee le thalah soh chengse dalhan Jesu nung ajui lhontai.

Lhagaoboh vop mikhat

21 Capernaum kho ahung lhun phat’un, Choldo nikhon Jesu Houthua kikhopna in’ah alut paiyin thu ahiltai. 22 Athuhil japha chanin kidang asa lheh jengui; ijeh-inem itile Aman Danthu sun ho hil banga hil louvin thu neitah-in mi ahil’e. 23 Houthua kikhopna ina chun mi lhagaoboh vop khat anaumin, amah in ahinsam pai jengin, 24 “Nazareth Jesu, iti taute nati ham? Eisu mang diuva hung nahim? Nang koi nahi kahenai, Pathena kon Atheng chu nahi,” ati. 25 Jesun lhagaoboh chu aphoh in, “Thip’in, amaa kon chun hung potdoh-in!” atileh; 26 lhagaoboh-in amapa chu aveingol’in, hapenin apengin amaa koin ahungpotdoh tai. 27 Chutah chun mipin kidang asa soh keiyun, khat le khat akidong touvin, “Hiche hi ipi thu hitam! Thuhil Thah beh leh thu neitah a Aman lhagaoboh ho apho le angai jengui!” akitiuve. 28 Hiti chun Galilee gam kim vel’a gangtah-in Jesu min akithang soh tai.

Jesun mi tampi aboldam

29 Amahon houthua kikhopna in chu adalhanvin Jacob le John toh kilhonin Simon le Andrew ina alut paitauve. 30 Simon nupa nu chu nat lhut a nan alumin, mihon anat thudol Jesu jah a aseipeh paiyui. 31 Hichun Jesu achen akhut atuh-in akaithou leh, anat lhut’in alha paitan, amanu jong ajen leuvin apangtai. 32 Nilhah nisa lhum lamin Jesu henga adammo jouse leh thilhavop chengse ahin puiyun, 33 khopi sunga mi abonchan kot phung bul’a akikhom tauve. 34 Hichun Jesun hivei chom chom veiya dammo tampi aboldamin, thilhavop ho jong anodoh peh-in, thilha hon Jesu ahetjeh-un apao poh a-uhsa aumpouve.

Pathen Thupha hil lhangdia Jesu vaikon

35 Jingpi mahtah, khovah lhah masangin Jesu athouvin, gamthip’a achen hikoma chun agataove. 36 Hichun Simon le aloiten anung ajuiyun, 37 amudoh phat’uvin ajah a, “Mi jousen Nang nahol cheh-a!” atiuve. 38 Jesun ajah-uvah,” Anaivel kholen dom doma jong Thupha kaseiphong theina din cheu hite, hiche dinga chu hung vaikon kahi,” ati. 39 Hiti hin Galilee gam a akholsoh keiyin kikhopna in tin’a thupha aseiphongin, thilha ho anodoh-e.

Jesun miphah khat asuh theng

40 Miphah khat Jesu henga ahungin aboh khup’in ajah a, “Nalung ahileh neidam thengsah thei ahi,” tin ataotai. 41 Hichun Jesun alainat pin akhut alhangin athamin ajah a, “Kalung ahi damtheng tan!” atileh; 42 chupet tah chun atiphah chu apha paiyin ama adam thengtai. 43 Apet tah chun Jesun agihsal paiyin 44 ajah a, “ven, koima cha jah a seidan; amavang chen lang Thempu gakivetsah-in, miphah chu adamtheng tai ti phot chetna Mose’n kilhaina thilto peh ding aseisa chu gapetan,” atin asoldohtai. 45 Ahinla mipa chu apotdoh-in athu hi muntin’a aseiphong pantai; athusoh hi ahaseiphong behseh phat’in Jesu kholen hoa lhang phongin alut thei tapon, gamthip thip’a achangin akitheh doh le len; mipin vang muntin’a kon in aheng ahinjon jon jenguve.

Mark 2

Jesun langthipa aboldam

1 Nikho phabep nugnin Jesu Capernaum khoa ahung kitleh in’a aum ajasoh tauve. 2 Hijeh chun mitamtah ahung kikhom’un, aum na diu mun, kotphung jeng jong a-ong tapoi. Hichun Jesun miho thu ahiltai. 3 Miphabep’in langthi mi khat ahenga ahin puiyun, lin ahinpou’ve. 4 Mipi jeh chun Jesu henga apulu thei pouvin, aumna don inching aphet vangun, lang thipa chu alupna pumin akhai lhauve. 5 Jesun atahsanu amudoh phat’in langthipa jah-a, “Chapa nachonset chengse aki-ngaidam tai,” ati. 6 Chukoma tou Danthu them phabep chun agel’un, 7 “Ibol’a hi chepan hitobang thu asei jeng ham? Pathen ataitome. Pathen tilou koi dang chonset ngaidam jou umam?” atiuve. 8 Alungthim’uva chutobang agel’u hi Jesun alungin ahepai jengin ajah-uvah, “Ibol’a nalung gil’a chutobang nagel’u ham? 9 Langthipa jah a, ‘Nachonset chengse ki-ngaidam ahitai,’ ti leh, ‘Thouvin, nalupna kilah-in lam jot tan,’ ti hoijoh baijom? 10 Hoi hileh leiset chunga Mihem Chapan chonset ngaidamna thahat anei nahetna diuvin,” atin langthipa jah a chun, 11 “Kaseipeh nahi, thouvin nalupna kilah-in na-in langa kile kit tan,” ati. 12 Ama jong akipatdoh paiyin alupna akilah-in japi mitmu tah a apotdoh jeng leh, amahon kidang asa behseh jengun Pathen athangvah-uvin, “Hitobang thilsoh kamu kha hih hel’e,” atiuve.

Jesu Levi akou

13 Jesu dilen lam jona apotdoh kitleh mipi aheng’ah ahung kikhomun, aman thu ahiltai. 14 Hitia ache naa hin Alphaeus chapa Levi, kaidonna inmuna tou amun, ajah a,” Neijuiyin,” atileh; akipatdoh-in ajuitai. 15 Jesun Levi ina ankong aum phat’in kaidong ho le chonse ho tampin jong Jesu le aseijuite toh ankong aum khomun ahileh atam lheh tauve. Hichun anung jui 16 Danthu them ho le Phariseehon, chonse ho le kaidong ho toh an anehkhom amu’vin aseijuite jah a, “Itidana Aman kaidong ho le chonsete toh an aneh khom ham?” atiuve. 17 Jesun hichu ajah phat’in ajah-uvah, “Atidamten louthem angaipoi, adamlouten bou angaiyui; Keijong adih ho kouva hung kahipon, chonse ho kouva hung kahi bouve,” ati.

An ngol thudol’a Jesu adoh-u

18 John seijuiho le Pharisee hon an angolji jeh-un miho Jesu henga ahungun ajah a, “Itidana John seijuiho le Pharisee hon an angol jiuva, nang seijuihon angol ji louvu ham?” tin adongui. 19 Jesun ajah-uvah, “Kichen golvahna hung lha ho chu ajinei pan alenkhompi laisea an ngol’a um theiyum? Aji neipan alenkhompi dung seuva an ngol thei lou diu ahi. 20 Amavang alah-uva kona aji neipa akipui mang nikho hung lhung ding ahin, hiche teng chuleh amahon an angol diu ahi. 21 Koiman sopnem loulai pon hal’in ponlui abeh ngaipoi; beh leh abehna chun ponlui chu kaieh jon tin haset lo cheh ding ahi . 22 Chujongle min savun peng lui sunga lengpitwi thah akhum ngai poi; khum taleh lengpitwi peng chu tumkeh intin, alengpitwi le apeng ho geiya manlo ding ahi. Hijeh a chu lengpitwi thah chu peng thah a khum ding ahi,” ati

Choldo nikhoa seijuihon changvui asiu

23 Choldoh nikhon Jesun bulei lai ajotpa naa aseijuiten ache pum pum’un changvui akisiuve. 24 Hichun Pharisee hon ajah a, “Ven, hiche ho khun itidana choldo nikhoa bol ngailou abol’u ham?” atiuve. 25 Jesun ajah-uvah, “David le aloite gilkel’a an ngaicha aum pet’uva chu ipi abol’u nasim khah louhel’u ham? 26 Abiathar Thempu chungnung ahilaiyin David chu Pathen Houin sunga alut’in, Thempuho tilouvin aneh ngailou, Pathen umjing hetna changlhah katdohsa chu anen aloite jong apei,” ati. 27 Chujongle ajah-uva aseiyin, “Choldo nikho hi mihem khohsahnaa kisem ahin, Choldo nikho khohsahnaa mihem kisem ahipoi, 28 hijeh chun Mihem Chapa hi Choldo nikho Pakai jong ahi,” ati.

Mark 3

1 Jesu houthua kikhopna ina alut kit leh, pasal khut langthi khat anaume. 2 Mihon ahehset theina diuvin langthipa chu Jesun Choldo nikhoa aboldam got le got lou aching lhiuve. 3 Jesun khut langthipa jah a, “Alailunga hung dingin,” atin; 4 miho jah a, “Choldo nikhoa thilpha bol ngai ha, thilse bol ngai ham? Hinkho huhhing ngai ha suhmang ngai ham?” atileh; Amahon la athip chet jengui. 5 Jesun miho chu lung hang pumin avegol’in, alung tah jeh-uvin alung gimpeh jon, lang thipa jah a, “Nakhut lhangdoh-in,” atileh, akhut alhandoh phat’in adamhel’e. 6 Chutah chun iloa Jesu suhmang theina ding Herodian ho toh kihou som din Phariseeho apotdoh paitauve.

Twikhanglen panga mipi

7 Jesu le aseijuite twikhanglen jona acheu lah, Galilee gama hung kon mipin jong ajuiyui; Judea gama hung kon, 8 Jerusalema kon, Idumea gam le Jordan lui gal’a kon, chule Tyre le Sidon gamkol sunga hung kon mipin anatoh ho ajah jeh-uvin ahenga ahunguve. 9 Mipi atam behseh jeh chun aneh chinto louna diuvin Jesun aseijuite chu kongneo khat gotsa anakoipeh diuvin aseipeh-e. 10 Mi tamtah aboldam ahitah jeh-in dammona nei jousen Ama chu toh khah tei ding dei nan ahindel jengun ahi. 11 Lhagaoboh ho hin Jesu amu tengu leh amasanga aboh khup’un, “Nangma Pathen Chapa nahi,” tin asamu’vin; 12 ahin la Ama aphondoh louna diuvin Jesun hakhamin akham chah-e.

Jesun mi som le ni alhendoh

13 Jesu mol chunga akaltouvin angaichat chengse akouleh, amaho ahenga achetauve. 14 Hichun mi som le ni alhengdoh-in, aminu solchah asah-in, akoma aum jingu va chule thuhil lhanglea jong asol doh theina dingin, 15 thilha ho nodoh theina tha jong apei. 16 Hitia alhendoh som le ni chu: Peter tia aminvo Simon ahin, 17 Zebedee chapa Jacob le John, ‘Van gin chate,’ ti naa amin lhon Boanerges asah te ni ahin, 18 Andrew le Philip, Bartholomew le Matthew, Thomas le Alphaeus chapa Jacob, Thaddaeus le Canaan mi Simon, 19 chule ama matsah a pang Iscariot Juda toh ahiuve.

Jesu chule Beelzebul

20 Jesu ina ahung lut tai; mipi ahung kikhop kit phat’un an jeng jong anethei tapouvve. 21 A-inkoten ajahdoh phat’un mat tho jeng din ahung kon’ui; ijeh-inem itile a ngol’a agel’u ahi. 22 Jerusalema kona hungsuh Danthu themhon jong Beelzebul vop hiya, thilha ho anodoh jong chu avaihompau thahat vanga anodoh-in aseiyui. 23 Jesun amaho akouvin ajah uvah thulemin aseiyin, “Satanin satan iti anodoh thei ding ham? 24 Gamsung khat atum apaiyin kikhentel hen kidouto taleh, hiche gamsung chu dingdoh thei lou ding ahi. 25 Insung khat jong kikhentel leh ding jou lou ding ahi. 26 Hijeh chun Satanin Satan adouleh akikhentel ahitan, ding jou louva bei ding ahiye. 27 Koiman mihat ina lut’a ama kan masa louvin anei achom theipoi, akan jou teng le ain achom ding ahibouve. 28 Tahbeh a kaseipeh nahiuve, mihemte achonsetna chengseu le Pathen ataitom nau aboncha ngai dam chang diu ahin, 29 Lhagao Theng taitom vang chu ngaidam chang louhel ding ahi; tonsot’a chonset themmo changa um ding ahitai,” ati. 30 Lhagaoboh vop a aseijeh-uva chutia asei ahiye.

Jesu nu le asopite

31 Jesu nu le asopite ahunguvin inpo’ah adingun, mi asol’uvin Jesu agakousah-ui. 32 Akimvel’a tou mihon ajah a, “Ven, nanu le nasopite polama adingun nahol’ui,” atiuve. 33 Jesun miho chu adonbut’in, “Kanu chu koi hiya chule Kasopite chu koi koi hiuvem?” atin; 34 akim vel’a tou chengse avegil’in, “Hiche ho hi kanu chule kasopite ahiuve. 35 Koi hijongle Pathen lungdei bol jouse chu kasopipa kasopinu chule kanu ahiuve,” ati.

Mark 4

Muchi thepa thulem

1 Jesun dil pang’a mi ahilpan kit leh, mipi ahung kikhomun, Ama dil laiya um kong khat sunga alut’in atouve. Mipi chengse vang twipam chin tol’a atouvui. 2 Jesun mipi chu thu tampi thulem jengin ahil’in, athuhilnaa chun ajah-uva aseiyin: 3 “Ngaiyun! Muchi thepa chu muchi then akondoh tai. 4 Hitia muchi athe naa hin muchi phabep lamsih a achun ahileh vachaten akilogam tauve. 5 Muchi phabep ma songlheo chung, leipatnaa achun, leiset asa loujeh-in akedoh loi vangin 6 nisan ahinsah teng jung anei lou jeh-in agopjitai. 7 Muchi phabeh jong ling lah a achun, ling ho ahung khandoh teng adep lih jin, ga louvin aumlo jitai. 8 Muchi phabepse vang leipha laiya achun, akehdoh paiyin, akhangin, agan, somthum cheng, somgup cheng, chule ja khat chengin agai,” ati. 9 Chuin aman ajah uva, “Angai na ding na neiyan ngai hen,” ati.

Thulemho kiseilo na ajeh

10 Jesu achangseh a aum pet’in athuhil ja ho phabep le seijui som le ni chun thulemho thudol adongui. 11 Aman ajah-uvah, “Nang ho vang Pathen lenggam thuguh chu kiseipeh nahitauvin, polama umte vang ijakai thulem jenga kisei ahi, 12 hitia chu ‘Ve jong leu amu chet thei lou diu, Ja jong leu ahet khen thei lou diu, chutilou hileh hung kihei kit’uva ngaidam chang ding ahiuve,’ tia kisei ahi,” ati.

Jesun muchi thepa thulem ahilchet

13 Jesun ajah-uva, “Hiche thulem hi nahet khen louvu ham? Achutile thulem dang ho iti nahet thei diu ham? 14 Muchi thepan Thu athe ahi. 15 Thu kithea lamsih a chu kiti ho hi thu ajah tah-u leh Satan ahung pai jenin asunguva lutsa thu chu alah mang pehji tai. 16 Chule songlheo chunga chu muchi kiti ho hi, thu ajah tah-u leh thanom tah a kisan jeng ho ahiuvin; 17 ahinla jung neilou ahiuvin apangsot pouve, athujah jeh-uva gim genthei nan ahinphah tengu leh akipal thu paiji tauve. 18 Chujongle linglah a chu muchi kiti ho hi, thu ajatauvin 19 amavang hiche hinkho lungkhamna le hao ding deina, chule thil dang dang deichat nan thu chu adep lih jin, gadoh louvin aumloi. 20 Leipha laiya chu kiti ho vang hi, thu jaa kisan ho ahiuvin, abang somthum cheng, phabeh ma somgup cheng chule phabeh jong ja khat chengin apunguve,” ati.

Thaomeikhom noiya thaomei vah

21 Jesun ajah-uvah, “Thaomei kivah khu pocha kikhu khum ngai lou, jalkhun noiya jong kitung ngai lou hilou ham? Thaomeikhom chunga tun dia kivahji hilou ham? 22 Phondoh lou dinga kiselguh aumpon, chule hodoh lou dinga kikhu khum jong aumpoi. 23 Koi hileh a-ngaina ding nakhang neiyan ngaihen,” ati. 24 Jesun ajah-uvah, “Nathujah u hi melchih-un. Nate bang banguva nakitepeh diu, akhohjoa bon nakibol diu ahi. 25 Ajeh chu aneiya kipehben tin, aneilou vang aneilou vanga aneichasun jong kilahpeh ding ahi.

Muchi khantou pet thulem

26 Jesun aseiyin, “Pathen leng gam chu min loulaiya muchi athe tobang ahi; 27 jan leh a-ihmun, sun teng athouve; ahin muchi chu anakeh-in akhangdoh tai, aman vang iti kea iti khan ahi ahepoi. 28 Leiset’in acham chamin ahin gasah jin, amasan ananou ahin, abanin avui, chujou kit leh avuiya konin achang lhingjie. 29 Achang chu amin phat leh a-at phat ahitah jeh-in koiten a-at paijitai,” ati.

Ankammu thulem

30 Jesun aseiyin, “Pathen leng gam chu iti itekah-uva, ipi thulema isei diu hitam? 31 Ankammu tobang vang ahi, leiset’a akithe teng vannoiya muchi dang jouse sangin aneo pen’e; 32 ahin akithe jou teng akehdoh-in, akhangin muchi dang sangin alenjoi, abah lentah tah asepdoh jin, chunga leng vachate jong aboh lim noiya ageh theiyui,” ati.

Jesun thulem jenga thu asei

33 Hitobang hin miho het thei kham khamin Jesun ajah-uva thu ahil’e. 34 Thulem louvin vang ajahuva imacha asei khapoi; aseijuitevang atumin ijakai ahil chensoh nai.

Jesun twipi kinonglai apho thip

35 Hiche ni hin nilhah ahiphat’in Jesun aseijuite jah-a, “Dil gallang khat’a galkaiyu hite,” ati. 36 Hijeh chun mipi adalhauvin, Jesu umna konga alut’uvin akitolpi tauve; hia chun kong dang jong aumin ahi. 37 Chuin khopihui hattah ahung nungin, kong sunga twi akinong lut mat chattan ahileh, kong sung twi dim mai ding ahi tai. 38 Jesu la kong meilama lukhap khap’in a-ihmui. Seijuiten asukhangun ajah a, “Houhil, keiho thigam ding kihita, khoh nasah lou ham?” atiuve. 39 Jesu athoudoh-in khopi hui chu haphon aphoh-in, twikhanglen jah a “Thip hel’in, umthimin,” atileh; huipi athip hel’in aumthimbeh tai. 40 Hichun ajah-uva, “Ibol’a chute kichat nahiuvam? Tahsanna nanei loulai hel’u ham?” ati. 41 Amaho la akicha behseh jengun, khat le khat akihouvun, “Hichepa hi hoi koibep hitaa, huipi le twikhanglen geiyin athu angai jeng ham?” atiiuvin ahi.

Mark 5

Jesun Gerasenes gama lhagaoboh vop mi khat aboldam

1 Amaho twikhanglen gal langa Gerasa gamsung’ah ahung tauve. 2 Jesu konga kona apotdoh doh-in lhan lah a hungkon lhagaoboh vop mikhat’in akimutopi paijen’e. 3 Lhagaoboh vop pa hi lhan lah jenga pansa ahin, koiman thih khaova jong ahen jou lou ahitai. 4 Bul akituh a thih khaova akikan vangin, thih khao jouse atumtan jin, bul ho aphukeh jin, koiman abol ngoi jou lou ahi. 5 Sun le janin lhan lah a avah len mol chung dunga a-ao le a-ao len, songin aki-at chen chen jengin ahiye. 6 Gamla tah a konin Jesu ahin mun, ahung khaiyin a-ang’ah aboh khup tai. 7 Chuin going tah-in asam in, “Pathen chungnugnpen Chapa Jesu, ilo ding neitiu ham? Pathen mina ka-ngeh nahi neisu genthei hih beh-in,” ati. 8 Jesun, “Mipa sunga kon chun hung potdoh-in, lhagaoboh,” atijeh a chutia asei ahiye. 9 Chuin Jesun, “Namin ipi ham?” atileh; aman, “Tamtah kahijeh-un kamin, ‘Janel,’ ahi,” atin; 10 chuche gamsunga kona asoldoh louna dingin hataovin ataove. 11 Akoma lhang panga chun vohcha tampi honk hat alhan, 12 lhagai ho chun, “Hiche vohchate sunga khu kalut theina diuvin nei sol tauvin,” tin Jesu henga ataovui. 13 Jesun asol tai. Chuin lhagaoboh ho apotdoh-un vohchate sunga alut’u leh vohcha sang nijen, hon khat chu kol’a alhai lhauvin, twilena alha lut’un athi gamtauve, 14 Vohcha ching ho chu ajam uvin thusoh hi khopi sung le loujao dunga aglhutsoh tauve. Hijeh chun athilsoh umchan vedin miho ahung uleh, 15 Jesu kom ahung lhun’un thilha janel voppa pon kisil’a lung lima anatou amu’vin, akicha lheh jenguve. 16 Thilha voppa le vohchate chunga thilsoh amit tah a muhon ahung ho chu aseipeh-uvin ahi. 17 Chuphat’in mihon Jesu chu agamsunguva kona potdoh din ajoltauve. 18 Jesu konga alut pet’in ma sanga thilha voppan akoma aum jing na ding athume. 19 Jesun ajadan, “Na-ina chen lan gPakaiyin nakhotoa thil nasatah nabolpeh chu na-inkote gasei peh tan,” atipeh-e. 20 Hijeh chun ama achen Jesun thil nasatah abolpeh chu khopi som sunga aphongjal len, ajapha chanin kidang asasoh keiyuve.

Jairus chanu le Jesu ponsil thamkha numeinu

21 Jesu konga akile tolgalkai kit phat’in, ahenga mipi ahung kikhop jeh-un Ama twikhanglen panga aumden’e. 22 Hichun houthua kikhopna in vaipo ho lah a Jairus chu ahungin, Jesu amu phat’in akhomuh a aboh khup paiyin, 23 “Kachanu thi ding koncha ahitai, adamdoh a ahinthei teina din, hungin achunga nakhut hung ngamin,” tin ha-ngeh-in angeh tai. 24 Jesu amato kilhonin achei. Ahin mipin ajuiyun, ajet aveiya aneh chinto jenguve. 25 Numei khat hikum som le kum ni jen athi longa damlou, 26 louthem mi tamtah akijensah a, anei chasun asuh mangsoh ahitan, ahivanga damdoh louva khoh cheh cheh jo ahi. 27 Hiche nu hin Jesu thudol ajan, mipi lah a Jesu nung’ah ahungin aponsil athamtai. 28 Ijeh-inem itile, “Aponsil ho jeng jong tham kha leng damteiyinge,” ati ahi. 29 Athi long chu akang heltan, aman jong atahsa natnaa kona adamtheng chu akihet paitai. 30 Apet tah chun Jesun atichunga kona thaneina apotdoh ahe paiyin, mipi lah avekimvel’in, “Kaponsil ho thamkha koiham?” tin ahol’e. 31 Aseijuiten ajah’a “Mipin naneh chinto jing mua iti, ‘Eithama koiham?” natiham,” atiuve. 32 Hichun Jesun aponsil tham mi chu muleng tin ave-lei. 33 Numeinun achunga thilsoh chu ahen, kichasa san ahungin kithing thingin a-anga aboh khup’in adih tah aseidoh tai. 34 Chuphat’in Jesun ajah a, “Chanu, natahsanin nadamsah ahitai, lung mongin chen lang nanat genthei naa konin damtan,” ati. 35 Jesun thu asei nalaiyin, houthua kikhopna in vaihompa ina konin mi phabep ahungun, “Nachanu athitai, ibol’a Houhilpu nasuh lung gim ding ham?” atiuve. 36 Jesun aseiyu chu ijasep louvin, houthua kikhopna in avaihom p ajah a, “Olmo hih-in, tahsan poutan,” ati. 37 Jesun Peter le Jacob chule Jacob naopa tilou midang akijuisah nompoi. 38 Houthua kikhopna in vaihompi in ahung lhun phat’un miho akap amao pohchei choiya um amun, 39 asung lhan ajahuvah, “Ibol’a pohchei choiya kap nahiuvem? Chapangnu hi athi ahipoi, a-ihmu ahibouve,” ati. 40 Mihon anuisat tauve. Ahi vangin abonchauvin adeldoh-in, chapangnu nu le pa toh akilhonpi chengse toh chapangnu um naa alut tauve. 41 Chapangnu chu akhut’in atuh-in ajah a, “Boinu thouvin kati nahi, tinan, “Tilitha koum,” ati. 42 Chapangnu chu athou paiyin lam ajottai; ama hi kum som le ni chapang ahi. Hichun mihon adatmo behseh jenguve. 43 Hichun jesun koimacha ahetsah louna diuvin akham chah kheh-in chule, “Chapangnu chu neh ding peuvin,” tin aseiye.

Mark 6

Nazareth khoa Jesu asandau

1 Jesun chukom dalhaa achenna khoa ahung leh, aseijuiten ahin juiyui. 2 Choldo nikho lhin phat’in houthua kihopna ina thu ahil’in athuhil ngaiya mi tampin adatmouvin, “Hichepan hichengpi hi hoiya alah hi-nga na? Ama kipea hi itobang chihna hiya, hibanga bolmo kidang abol ham? 3 Jacob le Joseph, Judas le Simon sopipa, Mary cha thingthembolpa chu hilou ham? Asopi numeiho jong ilah-uva aching meu?” atiuvin, kipal nan aneilo tauve. 4 Jesun ajah-uvah, “Themgao chu mun dang danga akijabol vangin agamsung le amite lah chule a-inkote lah a kijabolji lou mong ahi,” ati. 5 Hikoma chun ana damlou phabep chunga khut angap’a adam sah tilouvin, thil kidang ima abol thei tapoi. 6 Atahsan louvu chu kidang asa lheh jenge.

Seijui som le ni kisol lo na

Jesu anaivel kho hoa achen thu ahil le tai. 7 Seijui som le ni chu akouvin, lhagaoboh nodohna thei tha apen, mini nin asoldoh panin ahi. 8 Amaho chu lamkah a dinga tenggol tilou changlhah hihen, sakhao hijongle, sumdip sunga jong sum apoh lou diuvin aseipeh-e. 9 Kengchot vang aseuva sangkhol chol tho ni aki-ah lou diuvin aseiye. 10 Ajah-uva aseiyin, “Hoikom hijongle nalhun nauva kona napotdoh kahseuvin chukoma umden jingun; 11 hoimun hijongle min nalhunsah dauva nathu jong angai louvu leh, dalhauvin lang, ahettohsah nan nakengphanguva leivui thin lhah khum’uvin,” ati. 12 Amaho apotdoh-uvin min chonset lung ahei teina din ahil lhang leuve. 13 Thilha tampi anodohun, adamlou tamtah thao anu’vin, aboldam tauve.

John Baptist thi

14 Gamtina Jesu min kithang hi Herod lengpan ajadoh tai. Mi phabep’in, “John baptist chu thinaa kona thoukit’a hitobang thil kidang bol theina thahat hi anei hiya chu,” atiuvin; 15 kon khat’in, “Elijah ahi,” atiuvin; adangsen vang, “Malai Themgao ho tobang khat hinah ta,” atiuve. 16 Herod vang chun, “Alu katansa John chu hiya thoudoh kit hichu,” ati ahi. 17 Ijeh-inem itile Herod hin asopipa Philip jinu Herodias aki chenpi ahin, hiche nu jal’a hi mi asol’a John hi amasat a asongkul’a anakhum ahi. 18 Ajeh chu Johnin Herod jah a, “Nasopipa ji nakichenpi hi dan ngai ahipoi,” tia aphosa ahi. 19 Hijeh a hi Herodias hin John ahot’a athanom jing ahin, athat theipoi; 20 ijeh-inem itile Herod’in John hi midih le atheng ahi ahetjeh-in akichan apanpijitai. Athuhil ajah jongle along akichiah lheh jin, ahivangin kipah tah-in angaipehji nai. 21 Chuin nikho gomkom cha khat ahung um khan, Herod so nikho lhin nin golvah abol’in, amite lamkaiho le sepai vaipo ho chule Galilee gama milen milalte akouve. 22 Hichun Herodias chanu ahung lut’in alam leh, Herod le a-ankong umpi chengse akitaisah lheh-e. Lengpan nu-ngah jah achun, “Nadei jouse kahenga thumin, Peng, kate,” atitai. 23 Herod akihahsel’in, “Kahenga nathum jouse kagamsung keh khat geiyin penge,” ati. 24 Nu-ngah chu apotdoh-in anu henga, “Ipipen kathum dingham?” agatileh; “John Baptist luchang,” tin aseipeh-e. 25 Apet tah chun nu-ngah jong lengpa henga ahungin, “Tutah hin John Baptist luchang ankong khat’a neipe le chun kadeiye,” ahung ti. 26 Lengpa chu alung gim lheh jengin, ahivangin a-ankong umpi ho ansunga akihahselna jeh chun adathei tapoi. 27 Hiti hin lengpan a-ngah a pang sepia ho khat John lu la dingin asoltai. Ama achen songkul’a John lu agatanin, 28 ankong sunga ahindomin nu-ngah chu apetai. Nu-ngah chun anu agapen ahi. 29 Athu hi John seijuiten ajah phat’un along ahung pu’vin lhan’a avuitauve.

Jesun mi sang nga avahva

30 Solchah ho Jesu henga ahung kikhom’un, athilbol jouseu le athuhil’u aseipeh soh keiyui. 31 Mi ahung le ache le atam behseh phat’in an jeng cha jong ane man tapouvin, hijeh chun Jesun, “Abung in hung kikhin doh-un lang munthip lai khat’a kicholdouvin,” ati. 32 Hijeh chun kongin akitol’un gam thip lai khat ajontauve. 33 Mi tamtah-in acheu amu’va ahet phat’un akimvel khopi jousea konin kengin anacheuvin, amaho sangin analhung masatauve. 34 Jesu kong ahung potdoh le mipi kinonglul lul chu amun, achingbei kelngoite toh abah jeh-uvin alungset’in thu tampi ahil pantai. 35 Agei behseh phat’in aseijuite ahungun, “Agei behseh tan, ium nau ma gamthip lah ahin, 36 miho hi cheuva akimvel loujao ho le kho dunga neh le chah akichohna diuvin soltan,” ahung tiuve. 37 Jesun adonbut’in ajah-uvah, “Nang hon neh ding peuvin,” ati. Amahon, “Kacheuva changlhah denarii ja ni man kachoh-uva mipi neh dia kapeh diu ham?” atiuleh; 38 Jesun ajah-uvah, “Changlhah pheng ijat naneiyum, gaveuvin,” ati. Agavet chet phat’un, “Pheng nga le nga ni ahi,” atiuve. 39 Hichun mipi chu hamhing chunga aloi loiya tousah din aseijuite aseipeh-e. 40 Miho chu agol gol’in ja khat cheng som nga chengin atoutauve. 41 Chuin changlhah pheng ngale ngani chu alan, van lam aven, phatthei aboh jouvin aheh bal bal’in mi ang’a luipeh din aseijuite apen, nga ni jong ahoppeh soh keiye. 42 Mipin aneuvin avasoh keiyui; 43 changlhah chu anong nai amoh paipeh som le ni dim le nga nong phabep toh aloh doh-uvin ahi. 44 Changlhah ne ho chu Pasal sang nga alhinguve.

Jesun twichunga lam ajot

45 Jesun mipi alhah dohpet chun agallang khat, Bethsaida ache masa din aseijuite kong sunga alutsah loi jengin ahi. 46 Amaho hi alhah doh soh phat’in tao din molchunga akaltoutai. 47 Nilhah ahi phat’in kong la dil lai lung ageitan, ama changseh-in tol lhaga aum nalaiye. 48 Seijuite dil’a akitol nauva huiyin ale lama anuh jeh-uva alung gimu ahin mun, jingkah nidan li donin dil’a twi chunga kengin lam ahinjot’in, amaho khel din agoi. 49 Twi chunga lam jot’a ahung amu phat’un joumi danin agel’un a-aosot jengui. 50 Ajeh chu Ama amu cheh-uva kichasoh kei ahiuve. Chutah chun Jesun ahinhou paiyin ajah-uva, “Olmo hih-un, Kei kahi, kicha hih-uvin,” ati. 51 Aum nau kong sunga Jesu akaldoh phat’in hui athip del’in ahileh adatmolheh jenguve. 52 Ijeh-inem itile changlhah chunga thilsoh jong gelpha talouva lungmoh chehjo ahiuve.

Jesun Gennesaret khoa anaho adamsah

53 Agal kaiyuva tolgo agei phat’un kong angauvin, Gennesaret lam ajontauve. 54 Kong adalhah lhah-uvin mipin Jesu anahepai jenguvin, 55 agamsunga alhai leuvin, Jesu aumna ajah phahna chan’uva adamlou jouse alupna pumin ahin pupu jenguve. 56 Khote sung hihen, khopi sung hijongleh, loujao dung geiyin, ache na chan’ah kailhang dung jenga jong adamlou ho alupdsah-uvin, apon mong kai beh atham sah din angeh-uve. Ama tongkha chan vang adamsoh keiyui.

Mark 7

Puchon pachon

1 Jerusalema konin Pharisee ho le Danthu them phabep Jesu henga ahungun ahi. 2 Jesu seijuiten khutnen sil lha louva an aneh-u amutauve. 3 Ijeh-inem itile Pharisee ho le Judaten puchon pachon amangun, khut phatecha silngim masa louvin neh le chah abol ngaipouve. 4 Kailhang dunga kona ahungkile tengu jong le kisil lha louvin an anepouve. Chondan dang, khon ho, belcha ho, sum-eng bel ho, lupna ho geiya sop theng ding Dan tampi aneiyui. 5 Hijeh chun Pharisee ho le Danthu them hon, “Itidana naseijuiten puchon pachon jui louva khut sil masa louva an aneh jiu ham?” tin Jesu adongui. 6 Aman ajah-uva, “Mipha lhem nang ho thudol hi Isaiah-an kitoh chet’a gaothu aseiya, hitia kisun ahi: ‘Hiche nam mite hin akamsung’uvin eijabol’un, Alungthimu la keiya konin agamla lheh jenge; 7 Athuhil’u jong mihem thupeh jeng ahil jeh-un, Eihouvu jong hi mohseh ahi,’ tia asei chu. 8 Pathen thupeh napaiyun, mihem chondan joh nanit’uvin ahi,” ati. 9 Hiti jong hin ajah-uvah, “Pathen thupeh phatah-in napaiyun, nachondanu joh nitna ding na-ngaitouve ong? 10 Ajeh chu Mose’n ‘Nanu napa jabol’un,’ chule ‘koi hile anu apa douna thuse sei jouse chu thihel hen,’ ati ahin, 11 nang hon la, ‘Mi khat touvin nu ham pa ham jah a, ‘Keivanga naphat chomna ding thil ho chu Pathen dinga thilpeh ahi,’ atileh, 12 ama hin nu hihen pa hileh akithopi lou akhoh poi,’ tin 13 akhang khanga nahin juipeh-u puchon pachon jeh chun Pathen seisa nathaimil’uve. Hitobang hin thil tampi nabol’uvin ahi,” ati.

Mi suhboi thei thil ho

14 Jesun mipi chu ahenga akou kit’in ajah-uvah, “Nabonun kasei ngaiphauvin, hetoh-un. 15 Thil imacha polama kona mihem sunga lut’a ama suboh thei aumpoi, asunga kona potdoh bou chun asuhbohji ahi! 16 (Angaina ding nakhang neiyan ngaihen, “) ati. 17 Jesun mipi adalhah a insunga alut chun aseijuiten hiche thulem hi adong chen’uve. 18 Hijeh chun Jesun ajah-uva, “Nang ho jong midang banga hetna lhasam nahiuvam, polama kona mihem sunga lut chun ama asuboh poi, 19 ijeh-inem itile alung sunga lut louvin, a-oi sunga lut’a aposo naa ahung potdohji dol hekhen theilou nahiuvem?” ati. (Hichea hin neh thei jouse athengin aseiye.) 20 Aman, “Mihem sunga kona hung potdoh bou chun mi asuhboh ahi. 21 Ajeh chu mihem lung sunga konin lung gilou, jon thanhoi, guchatna, tolthana, 22 mito jonna, papsetna, gitlou, engsetna mi doha bol, huhna, 23 thilse hichengpi hi misunga kona hung potdohjia mi asuhbohji ahi,” ati.

Syrophoenicia numeinu tahsan

24 Jesun hikom chu adalhan Tyre gamkai jonin achetai. In sunga alut’in, koimacha akihetsah nompoi. Ahinla akisel thei dehpoi. 25 Achanu lhagaoboh vop numei khat’in ajahdoh phat’in ahungin akhomuh-a aboh khup jenge. 26 Numei chu Greek mi ahin, Syria gam Phoenicia khoa peng ahi; aman achanu sunga thilha nodoh peh dingin athume. 27 Jesun ajah-a, “Chate va masa ta diu hen, chate neh ban lahpeh a uichate se-lhah peh ding aphapoi,” ati. 28 Aman adonbut’in a jah a, “Pakai, uichaten jong dokang noiya anmal lhathang aneh jiu khu me,” ati. 29 Numei nu jah a hin Jesun, “Hiche nasei jeh chun chetan, nachanu sunga konin thilha chu apotdohtai,” atipeh-e. 30 Numei chu acheleh anao jalkhuna lum agatoh-in, asunga konin thilha anapotdoh tai.

Jesun na-ngong le paomo aboldam

31 Jesun Tyre gamkai ajot’in, khopi som ajotpeh-in, Galilee dillen ahung lhung tai. 32 Ahenga mi na-ngong paojong paochen theilou khat ahinpuiyun achunga khut angap din ataovui. 33 Jesun mipi adalhan achangseh-in apuidoh in akhut jungin anakhang te ni akhoipeh-e; chuin chil aphikhumin aleigui jong athampeh-in, 34 chujouvin van lam aven, akhoisan, ‘Kihongin,’ ti nan ajah a, “Ephphatha,” ati. 35 Apet tah chun ana avangin, aleigui akilhamin, oh louhel’in thu asei theitai. 36 Hichun koimacha jah a aseidoh louna diuvin akham chah kheh-e; ahinla ahakham cheh le ahaseiphong cheh-un ahi. 37 Ajapha chanin kidang asa behseh jengun, “Ijakai abol phasoh keiyin, nangong la kho ajah sah tan, paomo jong apaotheisah tai,” atiuve.

Mark 8

Jesun mi sang li avahva

1 Hichelai chun mipi nasa tah ahung kikhop kit leh neh ding anei lou phat’un Jesun seijuite akouvin ajah-uvah, 2 “Mipi kakoma nelou chalouva aumnao hi nithum alhingtan, kalungset lheh jenge. 3 Abang hi gamla tah a hung ahuvin, gilkel dangchah pumin kisol jengleh lampi dunga lha lhop pe tei diu ahi,” ati. 4 Aseijuiten adonbut’un, “Hikom gamthip’a mi hichengpi vahna kham changlhah kon hoiya alah ding ham?” atiuve. 5 Jesun “Changlhah ijat naneiyum?” atileh; :P heng sagi atiuve. 6 Hichun mipi tol’a tou din asol’in, changlhah pheng sagi chu alan, phatthei aboh jouvin mipi ang’a luipeh din aseijuite apetai. 7 Amahon nga phabep jong anei yun, hijong chu phatthei aboh jouvin miho ang’a luipeh din aseipeh-e. 8 Mihon anevasoh keiyuvin, aneh moh-u anong longkai sagi dim aloh doh-uve. 9 Anea pasal sang li jen ahin, Jesun amaho chu alhadoh tai. 10 Chuin aseijuite toh konga alut paiyun Dalmanutha gamsung alhung tauve.

Pharisee hon melchihna angeh-u

11 Pharisee ho ahungun thu adong pan’uvin, apatep nan van’a konin melchihna ahol’uve. 12 Jesu along gil’in nasa tah-in akhoisan, “Ibol’a hiche khang mite melchihna ahol’u ham? Ddih tah a kaseipeh nahiuve, hiche khang mite hi melchihna kipe louhel ding ahi,” ati. 13 Chuin miho adalhan konga alut kit’in gallang khat’a achetai.

Pharisee ho le Herod chol kiso

14 Seijuiten changlhah apo haiyun, kong sunga neh thei dan gneilouvin, changlhah pheng khat she bou aneiyuve. 15 Jesun ajahuvah, “Ching theiyun, Pharisee ho le Herod chol lah a kihong phauvin,” ati. 16 Seijiute akihou lhiuvin, “Changlhah inei pouve,” akitiuve. 17 Hichu Jesun ahen ajah-uva, “changlhah nanei lou jeh-uva ibol’a kihou lhi chet chut nahiuvem? Tugeiya hejong hekhen louva lungmoh gam nahiu hitam? 18 Mit nineiya namu thei lou, nakhang nineia najah thielouvu ham? Gel jong nageldoh lou mong uham? 19 Mi sang nga lah a changlhah pheng nga kahoppeh a chu anong paipeh ijat nalodoh um?” atileh; “Paipeh som le ni,” atiuve. 20 Mi sang li lah a changlhah pheng sagi kahopeh a Chula anong longkai dim ijat nalodohuvem?” atileh; amahon, “Longkai sagi” atiuvin, 21 hijeh chun ajah-uvah, “Nahet khenu hitam?” ati.

Jesun Bethsaida mitcho mi khat kho amusah

22 Bethsaida ahung lhung rauve. Hichun mitcho mi khat Jesu henga ahinpuiyun, atham din ataovui. 23 Jesun mitchopa chu khopam langa apuidoh-in, amit te nia chil aphin achunga khut angapjouvin ajah a, “Ipi pi na mun?” tin adonge. 24 Ama adah-in, “Mihem kamun, thingphung holheh lheh ahin, ahivangin ava leu kamui,” ati. 25 Amit te ni thampeh leh kichentah-in kho amutai. Ama jong adamin gamla tah a thil ho geiyin kichentah-in amutheitai. 26 Hichun, “Khosunga lutda tan,” tin, ainlama asol mangin ahi.

Peterin Jesu aphondoh

27 Jesu le aseijuite Casarea Philippi khoneo hoa ache leuvin, lampia Jesun aseijite jah a, “Mihon Keima hi koi ahi, eitiuvem?” tin adonge. 28 Amahon, “Mi phabep’in, ‘John Baptist ahi,’ atiuvin; pha bep’in ma, ‘Elijah ahi,’ atiuvin; kon khat sen vang, ‘Themgao ho khat pen ninah ta,’ tin aseiyui,” atiuve. 29 Jesun adongin, “Nang hon la koiba ahi neitiuvem?” atileh; Peterin adonbut’in ajah a, “Nangma Messiah chu nahi,” ati. 30 Hichun aman koima jah a asei louna diuvin hakhamin akham chah-e.

Jesun athia athodoh ding asei masah

31 Jesun ajah-uva Mihem Chapan genthei hesoh tamtah athoh a upate le Thempu pipu ho, Danthu them hon asan dauva, atha diu chule nithum jouva athodoh kit tei ding thu ahilpanin, 32 ajah-uvah phongtah-in aseiye. Hichun Peterin atumin apuidohin abelhatai. 33 Jesu akiheiyin aseijuite aven Peter chu haphon aphohin, “Kinung le jengin Satan, ajeh chu nangin Pathen gel bang gel louvin mihem lung gel jeng na gel’e” ati. 34 Jesun aseijiute le mipi akou vin ajah-uva, :Koi hile eijuinom chu amatah kisumil hel’a athingpel akiput’a eijui ding ahi. 35 Ijeh-inem itile koi hile akihinso nom chun athi o ding, amavnag Keijal le Kipanathupha jal’a thi lo jouse kihinso na anei didng ahi. 36 Ajeh chu min vannoi leiset pumpi neihen lang ahinkho kisuh mang ta leh ipi phat chompin tem? 37 Chujongle min ahinkho lhenga ipi apeh ding ham? 38 Ijemtia mikhat touvin hiche chonse lekitah lou khanga hi Kei le kathuho ajachat pi leh Mihem Chapan jong Vantil thengte toh Apa loupinaa ahung teng leh ama chu ajumso ding ahi,” ati.

Mark 9

1 Jesun ajah-uva, “Dih tah a kaseipeh nahiuve, hikoma ding ho lah ahin Pathen lenggam thu neitah a hung amu kah seuva thina tep kha lou ding aum’uve,” ati

Jesu vou kikhel

2 Nigup jouvin Jesun Peter le Jacob chule John toh achanguvin molsang chunga apuitouve. Chuin a-ang sunguvah avou akikhel’in, 3 aponsil ho chu abanlot lot’in alhelah alh jengin, leiset’a koiman hitobangin asop bang theipoi. 4 Hichun Elijah le Mose ahenguva ahung kilah lhonin Jesu toh akihou lim’uve. 5 Hichea hin Peterin Jesu adonbut’in, “Rabbi, hikoma ium’u hi anome, Nang ding khat, Mose ding khat chule Elija ding khat, lhambuh thum song ung kate,” ati. 6 Akichat behseh jehuva sei ding hetmoa asei ahibouve. 7 Chuin meilhang khat’in ahile khu’uvin, meilhang lah a kon chun ogin khat hin, “Hiche hi kachapa deditah ahi, athu ngaiyun,” ati. 8 Akimvel’u avetu leh koima dang amu tapouvin, Jesu le amaho changseh bou aumtauve. 9 Molchunga kona ahung kumlhah pet’un Jesun amaho chu akham chah-in, “Mihem chapa thinaa kona thodoh kit kahsen nathilmu hi koimacha jah a seidoh hih hel’un,” ati. 10 Asei chu amelchih jingun, “Thinaa kona thodoh kit ati hi ipi aseina hintem,” tin akidong touve. 11 Hijeh chun Jesu adongun, “Ibol’a Danthu them hon Elijah hung masatei ding ahi, tia aseiyu ham?” atiuve. 12 Jesun adonbut’in, “Elijah chu ahungin ijakai got tohsan ahung koiye; ahile i-atileh, Mihem Chapa chun gim genthei athoh a hot le paiya kibol ding ahi, tia asumchan ding dol kisun hintem? 13 Kenvang kaseipeh nahiuve, Elijah chu ahungtan, aumchan ding kisun bangin miho aning anop’in aboltauve,” ati.

Jesun chapang lhagaoboh vop khat aboldam

14 Seijuite henga ahung phat’un mipin seijuiho chu ana umchah kheh-un, Danthu them phabep’in anakinelpiuve. 15 Mipin Jesu amu phat’un abonchan kidang asauvin, ahenga alhai lut’uvin chibai aboh tauve. 16 Jesun seijuite jah a, “Amaho khutoh ipi kinel nahiuvem?” atileh; 17 mipilah a khat ‘in, “Houhil, kachapa paomo lhagaoboh vop khat nahenga kahinpuiye. 18 Ama hi lhagaoboh in amat khah na chan’ah aheh lhujin, achilphon alhan, aha geljin, atahsa jong agongsuh suh jenge; naseijuihon einodoh peh diuva kasei leh ajoupouve,” ati. 19 Jesun amaho ahousal’un “Vo tahsan bei khang mite! Itih chan ka-umpi dding nahiuva, itih chan geiya kakho ngai ding nahiuvem? Chapng chu kahenga hinpuiyun,” ati. 20 Mihon ahenga ahinpui phat’un, lhagaoboh-in Jesu amun, chapang chu avei ngol’in aheh lhu pai jengin, achil phon alhan, tol’a chun akilih le le jeng tai. 21 Jesun apa jah a, “Ahitina itih chan hitam?” tia adoh leh; “Aneova pat ahitan, 22 hiti hin suhmang din agon, abang le meilhum sung, abang le twi lah a aleh lut jin ahi. Alo naje khat nahet le neikho ton neikitho piuvin,” tin aseiye. 23 Jesun ajah, a “Alo naje nahet leh! Atahsan din ijakai ahitheisoh keiye,” ati. 24 Chutah chun chapangpa pa chun ahinsam jengin, “Katahsan’e, kalhahsamna neikithopin,” ati. 25 Mipi ahenga hung lhaikhom amu phat’in Jesun lhagaoboh chu haphon aphoh-in, “Lhagao paomo le na-ngong, amaa konin potdoh-in lang lut kit lou hel dia kaseipeh nahi,” ati. 26 Hichun hatah-in apengin, chapang chu avei ngoiyin apotdoh tai. Chapang chu athi abang jengin ahileh, mi atamjon athi tahbehin agel’uve. 27 Jesun atuh-in akaithou leh adding jang tai. 28 In’a ahung lut phat’in aseijuiten guh thim chan adongun, “I-atileh keihon kanodoh jou louvu ham?” atiuve. 29 Jesun ajah-uvah, “Hitobang hi taona tilouvin akinodoh theipoi,” ati.

Jesun athi ding asei masah kit

30 Hikom chu adalhauvin Galilee gam ajot’un ahi; Jesun aumna mi ahetsah nompoi. 31 Ajeh chu aseijuite ahilpeh-in, ajahuva, “Mihem Chapa hi miho khut’a kipedoh ding,, amahon athauva, atha jouvu nithum nung leh toudoh kit ding ahi,” tin aseiye. 32 Seijuiten asei chu ahethei pouvin, doh ding la akichauve.

Alenpen koiham

33 Capernaum ahung lhuna insunga aumpet’un seijuite jah a, “Lampi dunga chu ipi kinelji nahiuvem?” atileh; 34 amaho chu lampi dunga alenpen koi hiding thu kinel ahijeh-uvin athip chet jenguve. 35 Jesu atouvin som le ni chu akouvin ajah-uva, “Koi hileh amasapen hinoma chu nukhah pen a, japi lhacha pang ding ahi,” ati. 36 Chuin Jesun chapang khat akeiyin amasanguva adinsah-in, akoiyin ajah-uvah, 37 “Kamin a hiche cha pang tobang khat sanga chun Eisan ahi; Eisang chan chun Kachanga Eisan ahipon, Eisolpa geiya asana hi,” ati.

Eidoulou chu Eipanpiu ahi

38 Johnin Jesu jah-a, “Houhil, naming a thilha nodoh pasal khat kamu’vin eiho lah a apanda jeh-in abolda din kaseipeh tauve,” ati. 39 Jesun ajah-uva, “Kham dauvin. Kamin a thil kidang bol’a koiman eiseise loi ponte. 40 Ajeh chu eidoulouva chu eipanhu-vah ahi. 41 Phatah a kaseipeh nahiuve Keiya nahijeh-un don ding twi khon khat na pechanin kipaman asantei ding ahi.

Chonsetlona thei lhepna

42 “Hiche chapang tobang ho khat eitahsanda sah chan chu a ngonga sum hei song kikhai hen Twikhanglen a kileh lutle phajonte. 43 Hijeh chun nakhut’in nakipalsah le tanbongin! Khutni neiya damun nalut sangin, khut lang beiyin hinna lutle chun aphajoi. 44 Damun chu alungla thimo meikong jong mitmo ahi. 45 Nakengin nakipalsah le, tanbongin! Kengni neiya damuna nalelut sangun, keng lang beiya hinna nalut aphaajoi. 46 Damun chu alongtol jouse la thimo, amei kong jong mitmo ahi.) 47 Namit’in nakipal lhuh sah le kaldoh jengin, mit ni neiya damuna nalelut sangin mit lang beiya Pathen leng gama lut nang din aphajoi. 48 Ddamun chu alungtol jouse la thimo, ameikong jong mitmo ahi. 49 “Mi jouse meiya chisoa kiso cheh ding ahi. 50 Chi hi aphai; ahin chi hi alta hih leh iti naalsah kit diu ham? Nasunga chi nei cheh-un, kichamdel’in um’uvin,” ati.

Mark 10

1 Jesun chukom dalhan Judea gama ahungin Jordan lui agalkaitai. Mipi ahenga ahung kikhop kit phat’un, angaiyin thu ahil kittai. 2 Pharisee ho ahenga ahungun apatep nan, “Pasal’in ji ada hi Dan ngai hinam?” atiuve. 3 Jesun adonbut’in ajah-uvah, “Mose’n ipi thu napeh-uvem?” atileh; 4 amahon, “Mose’n kidana lekha sutpeh a da sing aphel’e,” atiuvin ahi. 5 Jesun ajah-uvah, “nalung tah jeh-uva Mose’n hiche thupeh chu anasut ahibouve. 6 Amavang semtil’a pat Pathenin amani pasal le numeiya a semsa ahitai. 7 Hijeh a chu min anu le apa adalhah a aji toh kigom ding, 8 pum nimi ni hita louva tikhat pum khat hi-lhon ding ahitai. 9 Hijeh chun Pathen gopdsa chu mihemin sukhen hih hen,” ati. 10 Insung alut kit phat’un aseijuiteen hiche thudol hiJesu adongui. 11 Aman ajah-uvah, “Koi hile aji daa numei dang kichenpi jousen aji ajonkhum ahi; 12 numeiyin jong aji adaa pasal dang akichenpi le ajong’ah ahi,” ati.

Jesun chapang neoho phatthei aboh

13 Hichun atham din mihon chapang phabep Jesu henga ahin puiyui. Ahin sseijuiten ahinpuiho chu haphon anaphoh-ui. 14 Jesun amudoh phat’in along phamon ajah-uvah, “Chapang ho chu kahenga hungsah-un, jada hih-uvin; ijeh-inem itile Pathen lenggam chu hitobangte hoa bou ahiye. 15 Tahbeh a akseipeh nahiuve, koi hi jongle chapang thilsan banga Pathen lenggam kisan lou chu asunga lut louhel ding ahi,” ati. 16 Chuin chapang ho chu apomin, achunguva khut angamin phatthei aboh tai.

Mihaopa

17 Jesu lampia ahug pet’in pasal khat ahenga alhai touvin, a-ang’ah aboh khup’in ajah a, “Houhil pha, tonsot hinna kanei theina dia ipi kabol ding ham?” tin adonge. 18 Jesun ajah a, “Ipi dia apha neiti ham? Pathen tilou koimacha apha aumpoi. 19 ‘Tol that hih-in, mitoh jong hih-in, gucha hih-in jouthun hettohsah-in pandan, dohan mi boldan, nanu napa jabol’in,’ kiti thu peh chengse nahet chume,” ati. 20 Mihaopan ajah a, “Houhil, hichengse hi kaneocha pat kahin nit jingsa ahitai,” ati. 21 Jesun avechen chet’in ahileh alungset’in, “Bat khat nanei nalaiye, van’a gou naneina din chenlang nagou abonchan gajohin, sum chu vaichate hoppeh tan; chutengle hungin neijuiyin,” ati. 22 Mihaopan achutisei ajah phat’in amai thimkut jengin, gou haotah ahijeh chun lung himo tah-in ache mangtai. 23 Jesun aseijuite avegol’in ajah-uvah, “Gou haoho dia Pathen langgama lut hahsa lheh ding ahi!” ati. 24 Jesu thusei ho jeh chun aseijuite along dong lheh jengui. Ahivangin Aman adonbut’in ajahuvah, “Chate, Pathen lenggama lut ding chu iti hahsat hitam! 25 Mihao Pathen lenggam alut sangin heobil hom sunga sangongsao lut ding abaijoi,” tin aseikit’e. 26 Amahon kidang asa cheh jenguvin, “Achutile koi huhhinga umjou ding ham?” tin akihoutauve. 27 Jesun amaho aven, “Mihem din vang hitheihoi ahipoi, Pathendin ahimopoi, ajeh chu Pathen din ijakai ahithei sohkeiye,” ati. 28 Peterin, “Neiveuvin, keihon ijakai dalhaa Nang kijuitaa,” tin aseipantai. 29 Jesun adonbut’in, “Tah beh a kaseipeh nahiuve, Leima jal le Kipana Thupha jal a in, sopi pasal numei jouse, nu le pa, chate, gam leiset ham dalhaa 30 bolsetna jouse jong thoh ham ham a chun tukhang jenga jong ajat jaa in, sopi numei pasal, nu, chate, chule gam leiset kimube lou ding koima aumpoi; chujongle ahung lhung ding khanga jong tonsot hinna chang louvin umponte. 31 Amavang amasa tamtah nukhah ding, chule anukhah tamtah masa ding ahi,” ati.

Thumvei lhinna Jesun athi ding asei masah

32 Jerusalem jon’a acheuleh lampi dunga Jesu amasapen-e. Hijeh chun amahon kidang asauvin. Chule anung jui ho jong akichauve. HIchun aman som le ni chu atumin apuidoh kit’in ama chunga thilsoh ding aseipeh masah-in, 33 Ven, Jerusalem jona che ihiuvin, Mihem chapa hi thempu pipu ho le Danthu them ho apehdoh diu ahin, amahon thana dia themmo achan’uva chiding namdangte apehdoh diu ahi. 34 Chidang namdang hon tot nopna aneiyuva chil asset khum diu, hijongle Ama nithum jou teng thoudoh ding ahi,” ati.

Jacob le John thil thum

35 Zebedee chapa te ni Jacob le John Jesu henga ahung lhonin ajah a, “Houhil, nahenga kathum chan neibolpeh ding kadeiye,” ati lhone. 36 Aman, “Ipi bolpeh leng nadei lhon em?” tin adonge. 37 Amanin ajah a, “Naloupinaa anjet naveiya neitousah-in,” ati lhone. 38 Jesun amani jah a, “Nathum hi nahe lhonpoi. Kadon ding khona nadon ngama, kachan ding baptize nachan ngam lhon nah em?” atileh; 39 amanin, “Kangame,” ati lhontai. Ahivangin Jesun amani jah-ah, “Kadon ding khona chu nadontei ding, kacha ding baptize jong nachantei lhon ding ahinai, 40 kajet kaveiya tousah ding vang Keima peh thei ahipoi, akigonpeh ho dinga kikoi ahibouve,” ati. 41 Seijui som khat’in hichu ajah phat’un Jacob le John chungah along phamo tauve. 42 Jesun akouvin ajah-uvah, “Chidang namdangte lah a vaihoa kigel hon achunguva thunei tah-in vai ahomun, amilen amilalteu jong khun achunga atha neinau ajedohuve. 43 Nang ho lah a vang vhutilou ding ahi; nalah-uva alen hinom chu nalhachauva pang ding, 44 amasapena pan nom chu mi jouse soh apang ding ahi. 45 Ijeh-inem itile Mihem Chapa jeng jong jen dia hung ahipon, ajena pang ding le mi tamtah lhatdohna dia ahinkho tohdoh dinga hung joh ahibouve,” ati.

Jesun mitcho Bartimaeus kho amusah

46 Amaho Jerichoa ahung tauve. Aseijuite le mipi nasatah toh kilhona Jesun Jericho adalhah chun Timaeus chapa mitcho Bartimaeus khutdopa chu lampama antouve. 42 Mitchopan Nazareth Jesu ahi ahetdoh phat’in apengjah jengin, “David chapa Jesu, neikhoton!” tin asamtai. 48 Mihon umthim beh din aphohsl cheh-un, ahinla ama ahapen chehjengin, “David chapa, neikhoton,” tin aseiye. 49 Hichun Jesu adingin, “Gah kouvun,” atileh; mihon mitchopa akouvun ajah a, “Kinemin, kipatdoh-in nakouve,” atiuvin ahi. 50 Chutah chun apon aleh lhan, akichom jang khaileh-in Jesu henga ahung tai. 51 Jesun adonbut’in ajah’a, “Ipi neibolpeh-in nati ham?” atileh; mitchopan, “Rabboni, kho neimusah-in,” ati. 52 Jesun jah a, “Chetan, natahsanin nadamsah tai,” ati. Chutah chun aman kho amu paiyin lampia chun Jesu ajuitai.

Mark 11

Loupi tah a Jesu Jerusalem khopia alut

1 Jerusalem kho koma Olive mol’a Bethphage le Bethany ageiyun Jesun aseijui mi ni asol’in, 2 ajah a, “Nagah galmu kho sunga khun lut lhon le chun mitouna khah lou sa-ngan nou kihen khat namupai lhon ding ahin, hinsut lhan hinkai lhonin. 3 Mi khat touvin, ‘Idia nabol lhon ham?’ ati leh, ‘A-Pakaiyin manna nom aneiye, hinthah vahkit tante,’ tin seipeh lhonin,” ati. 4 Amani ache lhon lehkot polam, khopi dsung lamlena sa-ngan nou kihen chu amun asut lhontai. 5 Chukoma ding ho khat’in, “Ibol nahiya sa-ngan nou chu nasut lhon ham?” ahinti. 6 Amanin Jesu ahil banga asei lhon leh alhatauve. 7 Chuin sa-ngan nou chu Jesu henga ahinkai lhonin, achunga pon aphauvin, Jesu atoutai. 8 Mihon phabep’in loulaiya theoboh alhamun lampia aphauve. 9 Chuin anung le ama kijot chengsen: “Huhhing hen! Pakai min a hungpe anun nom’e! 10 I-Pao David lenggam hung lhung chu nun nom hen!” tin asamtauve. 11 Hichun Jesu Jerusalem khopi alut’in Houin a aluttai. Thil ijakai avetgolsoh leh nilhah lam ahitan, som le ni chutoh Bethany jonin apot dodh tauve.

Jesun theichang phung agaosap

12 Ajinga Bethany a kona ahung ki le kit phat’un Jesu agilkeltai. 13 Gamla thima theichang phung dod nei khat amun, aga um ding ging cha nave din achei. Ahinla aga phat ahiloujeh-in ado tilou ima dang amudoh tapoi. 14 Jesun theichang phung chu, “Tukal’in koiman naga nekit hih hel hen,” atileh; hichu aseijuiten ajauve.

Jesun Houin asuh theng

15 Jerusalem ahung lhungun Jesu Houina alut’in asunga thiljoh le thil cho ho anodoh-in, sum lheng ho dokhang joouse le vapal joh ho touna alikhup peh-in, 16 Houin sunga koi ma thil apoh le sah tapoi. 17 Miho ahil’in, “Ka-in chu namtin dia taona in kiti ding ahi,’ tia kisun hilou ham? Nang hon gucha michomho kikholnan nasemdoh tauve,” ati. 18 Thempu pipu ho le Danthu them hon ajauvin, suhmangna ding lampi aholtauve. Ahinla amihil chu mipin kidang asah cheh jeh-un akichauvin ahi. 19 Nilhah ahi phat’in Jesu le aseijuite khopia konin apotdoh tauve.

Theichang kigaosap thua kihilna

20 Jingpi tah-in thiechang phung chu ahinho paule, ajung ajaa agop jeng chu amu’uve. 21 Thilsoh chu Peterin agel doh phat’in Jesu jah a, “Rabbi, ven, theichang phung na gaosap chu agoptai,” atileh; 22 Jesun ajah-uva, “Pathen tahsanun. 23 Tahbeh a kaseipeh nahiuve, koi hile alungthima ginchat lelna beihel’a hiche mol khu ‘Kitol’in twikhanglen’ah kileh lut jengin,’ tia asei banga soh tei dia tahsan chun, asei bang banga soh ding ahi. 24 Hijeh a chu najah-uva kasei ahi, nataovuva thil nathum jouseu namusen gel leu chun namu diu ahi. 25 Tao dia nadin pet le van’a um na-pan Jong nasuh khel jouseu angaidam theina din, koi itobang hijongle nalungdou chu ngaidamin. 26 (Nang hon mi na-Pauvin jong nasuh khel’u angaidam lou ding ahi).

Jesu thuneidol adoh-u

27 Jerusalema ahungkit tauve. Jesu Houin sunga ava le pet’in Thempu pipu hole Danthu themho chule upa ho ahenga ahungun ajah-ah, 28 “Ipi tha neina a hiti ho hi nabol ham? Hicheng bolna ding hi kon tha napeh ham?” tin adongui. 29 Jesun ajah-uvah, “Nang ho thu khat dong inge, neidonbut’un, chutengleh ipi tha neinaa hiti ho hi kabol seipeh nauvinge. 30 John Baptist chu van’a kon ha mihema kon ham? Neidonbut’un” ati. 31 Amaho akinelden tauvin,” ‘Vana kon ahi,’ tileu hen la, ‘Ahileh ibol’a natahsan louvu ham?” tin tin; 32 Mihema kon ahi,’ iti diu ham?” akitiuve. Ahinla mipin John hi Themgao dih a agel jeh-in akichauvin ahi. 33 Hijeh chun Jesu jah a, “Kahepouve,” atiuve. Chuphat’in ajah-uva, “ken jong ipi tha neinaa hichenghi kabol ahi naseipeh pouvinge,” atitai.

Mark 12

Lengpilei le aleilhouho thulem

1 Jesun ajah-uvah thulemin thu aseipanin, “Pasal khat’in lengpilei abol’in, tho akaikhumin, lengpiga chilna din khuh alaiyin, thing chung buh asan, chuin aleilhouho apedodh-in khol’a achetai. 2 Lengpiga lhun phat donin achan ding lengpiga la din aleilhouho henga soh khat asol’e. 3 Aleilhou hon sohpa chu amanun avouvin khutgoh keovin asoltauve. 4 “Ahin asoh khat asol kittai. Hichepa hi aluchang mapun alhauvin, jachat umtah-in anbol’ui. 5 Soh, chom khatma asol kit leh, amahi athat tauve. Hitobang hin soh tampi, abang avouvin, adangse athat’ui. 6 Aman Chapa chang khat bou aneitai. Akhon nan, ‘Kachapa hi anajabol khat’u leh,’ tin ahenguva asol tai. 7 Ahinla lengpilei lhou ho chun, ‘Hichepa hi agoulopa ahi, hungun that’u hitin agoulo ding eiho change hite,’ akitiuvin; 8 amanun atha jou phat’uvin lengpilei polam’ah apaidoh tauve. 9 Lengpilei neipan ipi bol tantem? Ama hung kona aleilhouo ho asuh mang ding, lengpilei chu mi chomdang apeh ding ahi. 10 Nang ho, ‘In sahon adeimouva apaiyu song chu, In ninga khomdetpenin apangtai; 11 Hiche hi Pakai bol ahin, Imit vet’uva thil kidangtah ahi,’ tia kisun Pathen lekhabua chu nasim khah lou laiyu ham?” ati. 12 Amahon athulem sei chu agot nauva asei ahi aheuvin, mat din agouve; ahinla mipi agin jeh-un ada lhauvin ache mangtauve.

Kaipeh thudol’a Jesu adoh-u

13 Jesu chu kinelpia gaman din Pharisee loi phabep le Herodias loi phabep ahenga asoltauve. 14 Amaho chu ahungun ajah a, “Houhil, midih tah nahin, koi mai jamana thilbol jong hilou Pathen lamdih bou nahilji kaheuve. Caesar henga mikai kapeh-u Dan ngai hi na hilou ham? Kapeh diu ha kapeh da diu ham?” atiuve. 15 Jesun akiphat lhemsah-u ahen ajah-uvah, “Idia neilung lah-u ham? Denarius khat hinchoiyun venge,” ati. 16 Ahinchoi phat’un, “Hiche hi koi lim le koi min ham?” atileh; amahon, “Caesar’a,” atiuve. 17 Hichun Jesun ajah-uva, “Caesar thil chu Caesar pauvin, Pathen thil chu Pathen peuvin,” ati. Hichun amah on adatmo lheh jengui.

Mithisa thokit thudol Jesu adoh-u

18 Mithisa thokit tahsan lou sadducee loi Jesu henga ahungun ajah a, 19 “Houhil’ Mose’n ‘Pasal khat’in cha anei masanga aji athi le asopipan meithaini chu avet’a asopipa chu akhaipeh ding ahi,” tin ei sut peh-ui. 20 Sopi pasal sagite aumun, a-upapen ajinei jouvin chikhai louvin aumtai. 21 Anichanna pan avetpeh kit leh amajong chikhai louman athin, chuin athum lhinna pa jong chutiman aumtai. 22 Hiti hin khat chan jong chu akhai apouve. Achainan numeinu jong athitai. 23 Mithi thikitnaa athodoh tengu leh hiche nu hi koipen ji hitan tem? Ajeh chu asagiuva jia anei cheh-u ahi,” tin adongui. 24 Jesun adonbut’in ajah-uva, “Pathen lekhabu le athahat nahetjoh sangu aum loujeh a hiba nakheljiu hilouham? 25 Ijeh-inem itile mihem thinaa kona athodoh tengleh kichen abol paovin, kicheng din jong akilato tapouve; van’a Vantilte tobang ahitauve. 26 Mithi thokit thudol kisutna, Pathenin, ‘Keima Abraham Pathen, Isaac pathen chule Jacob Pathen kahi,’ atina nasim khah lou laiyu ham? 27 Ama mithi ho Pathen ahipon, mihing ho Pathenjoh ahi. Nagel khel lheh-ui,” ati.

Thupeh nasatah

28 Danthu them ho khat ahung leh akinel’u ajan, Jesun kitoh tah a adonbut amun ajah a, “Thupeh lah a amasapen ipi ham?” atileh; 29 Jesun adonbut’in, “Thupah masapen chu, ‘Ngaiyuvin vo Israel, Pakai i-Pathenu chu Pakai khatseh bou ahi; 30 hijeh a chu nangman pakai na-Pathen chu nalungthim pumpia, nahinkho pumpia, nalung gel jouse leh natha neina jousea na-ngailut ding ahi,’ kiti ahin; 31 anina chu, ‘Nangma naki-ngailut banga naheng nakom na-ngailut ding ahi,’ akiti. Hiche te ni sanga thupijo thupeh dang aumpoi,’ ati. 32 Hichun Danthu thempan ajah a, “Adih-e Houhil, Pathen khatseh tilou adang aumpoi, nati hi adih-in, 33 Ama chu lungthim pumpi le hetna pumpia chule tha neina jousea ngai lut’a chule eima ki-ngailut banga heng le kom ngailut kiti ho hi pumgo thilto le kilhaina gantha jouse sangin athupijoi, nati hi naseidih lheh-e,” ati. 34 Hetoh thema adonbut hi Jesun ahen ajah a, “Pathen lenggam to nakilat poi,” ati. Chukal’in koiman thu adong ngam tapoi.

David Chapa thudol Jesu adoh-u

35 Houin a thu ahil pet’in Jeun, “I-atileh Danthu themhon Messiah chu David guiya peng ding ai atiu ham? 36 Lhagao Thenga konin David amatah-in, ‘Pakai chun ka-Pakai jah a, Keiman namelmate nakeng chotpha kakoisah masangsen, Kajet lama tou jingin,’ atin; 37 David amatah-in ‘Pakai’ asah leh, iti ama guiya peng hithei ding ham?” tin adonge.

Jesun Danthu themho ahousal

Mipin Jesu thuhil chukipah thanom tah-in angaiyui. 38 Jesun athuhilnaa chun, “Ching theiyun, thepna sangkhol chol ki-ah a vah le nom kailhang dunga min asalam ding deiya, 39 Houthua kikhopna in dunga touna pipen dei, golvahna mun jousea munpha hola ho, 40 mei thaiho bahgama, mi mu dia sottah tah taoji hoa konin kihong phauvin, amaho hithemmo chugnnung chang diu ahi,” ati.

Meithainu thilto

41 Jesu Houin sum kholna maitah a atouvin, mihon sumkholna sunga sum alhah-u chu avei. Mihao hon sum tampi pi alhah lut’ui. 42 Meithai vaicha khat ahungin, paisa kha ttoh kikot sumsan nongsi ni alhah lut’e. 43 Jesun aseijuite akouvin ajah-uvah, “Tahbeh a akseipeh nahiuve, hiche meithai vaichanu hin midang jouse sangin sumkholna sunga atoh tam pen’e. 44 Ajeh chu mihon aneival’u atou ahin, hiche numei hin avaichat lheh vangin akivah hingna ding anei chasun aboncha ato ahitai,” ati.

Mark 13

Jesun Houin suhmang ding asei masah

1 Jesu Houina apotdoh pet’in aseijuite khat’in ajah a, “Houhil ven, ipi song kimanga hitobang inhoi kisa hitam!” ati. 2 Jesun ajah a, “Hiche in loupitah kisa hinamu ong? Kisumanga song khat chunga song kise-thom him him umlou ding ahi,” ati.

Gim genthei kipat

3 Houin to kigalsai Olive mol’a Jesu atoupet’in Peter le Jacob, John le Andrew’in guh thim chan adongun, 4 “Naseiho hi itih le hung lhunga, hichengse kichaisohna ding hi amelchihna ipi hiding ham, neiseipeh-un,” atiuve. 5 Jesun ajah-uvah, “Koiman nalhep chatvai louna diiuvin ching theiyun. 6 Mi tampi kamin’a hunguva, ‘kei ama chu kahi,’ tia mi alhep chatvai diu ahi. 7 Gal kisat husa le thuthang najah tenguleh kicha hih-un. Hichu soh tei ding ahi, achaina hilou lai ding ahi. 8 Ajeh chu nam le nam hung kidouva, lenggam le lenggam kidou ding; muntin’a ling kihot’a, kel lha ding, hicheng hi gim genthei kipatna ahitai. 9 “Nang ho ching theiyun; min namat’uva houvaipoloi kikhopna nakailut diu, Houthua kikhopna in dunga navoh-uva, gamvaipo ho le leng ho ang sung jenga jong hettoh sah-a pang dinga nakidinsah nalai diu ahi. 10 Amavang namtin vaipia Kipana Thupha kiseiphong masa tei ding ahiye. 11 Min namat’uva napeh doh tengu le ipi sei ding lung kham masa hih-un, amavang apettah a nakiseipeh pen pen sei jengun; ijeh-inem itile aseiya nang ho hilouvin Lhagao Theng ahibouve. 12 Sopin asopipa, pan acha tha dia ahinpeh doh idng, chate anu le apa chunga chungsoh a atha lo diu ahi. 13 Keima min’jal’a mi jousen nahot diu, hi jongleh akhonna geiya thoh lhumpa bou huhhinga um ding ahi.

Thoh gen thei hahsa tah

14 “Misumang thet umtah chu adinna dol louva ding namu tengule (asim sim’an he hen), Judea gama um ho thinglhang lama jamu hen; 15 intingvuma umpa jong kum lhah da hen, a-insunga thil kilah din jong galut da hen; 16 loujaova um jong avon kilah din kile kit hih hen. 17 Ohe, chulaiya numei gai le nao noichep neiho ada ahiuve! 18 Hiche phat hi phalbi lai ahilouna din taovun, 19 ajeh chu hiche hi hesoh gen theina nasatah hiding ahin, hitobang hi Pathenin vannoi asemtil’a pat soh khalou lai ahin, soh jong soh kit lou idng ahi. 20 Pakaiyin aphat hi asuh chomlou hileh mihing koima sohcha louhel ding ahi, hijeh a chu alhenchomte jal’a aphat asuh chom ahi. 21 “Hiche phat hileh khat touvin najah-uva, ‘Ven, hikomah Messiah aume,’ atia, ‘Ven khukomah aume,’ atijongle tahsan hih-un. 22 Ijeh-inem itile Messiah lhem ho le Themgao lhem ho hungsoh dodh-un tin, mi lhep lhahna ding le ajochan a lhen chomte geiya lhep lhahna dia melchihna tampi le thil kidang tampi abol diu ahi. 23 Ching theiyun ijakai kahil masah dem nahitauve.

Mihem Chapa lung ding

24 “Chulaiya gim genthei kichaijou tah le, ‘Nisa thimin tin, Lha jong vah lou ding, 25 vanlaijol’a ahsite pul lhantin, Van’a thaneina chengse kihot lingsoh ding ahi,’ akiti. 26 Chutah le Mihem Chapa tha neitah le loupe tah a meiloma hung mihon amudiu ahi. 27 Chuteng Aman a-Vantilte sol’in tin kol kimvel ninglia leiset monga pat van mong geiya alhen chomte akhop khom diu ahi.

Theichang phung thulema kihilna

28 “Theichang phunga konin thulem kihil’un: abah adot’a ajih akilhap teng nipi nai naheuve. 29 Hitobanga chu thilsoh hicheng hi namu tengu le phat anaiya kotbul ahung gei nahet diu ahi. 30 Tahbeh a kaseipeh nahiuve, thil hichengse hi aso kahsea tukhang hi kichai lou ding ahi. 31 Van le leiset mang ding ahin, kathusei ho vang mang lou ding ahi.

Koiman anikho le anidan ahepoi

32 “Pa tilou anikho le anidan tah chu va’a Vantilte le Chapan jong, koiman ahepoi. 33 Aphat nahet loujeh-uvin ching theiyun, kiging jingun. 34 Hiche hi mikhat’in asohte atoh ding cheh a ngansea, kotngah pa jong kiging jing dia seipeh a, chujouva a-insung dalhaa kholgamla tah a che mang tobang ahi. 35 Hijeh chun kiging jingun, in neipa itih le hung ding nahepouve; nilhah ham, khangkim ham, ah-khon ham, jingkah ham a hung thie ahi. 36 Photlot louva hunga na-ihmut pet’u atokhah louna dia 37 najah-uva kaseipeh hi mi jouse kaseipeh ahitai, kigingun,” ati.

Mark 14

Hou lamkaihon Jesu athagot’u

1 Kalchuhkut le cholsolou changlhah kut bolna ding ni nibou aumtan, Thempu pipu ho le Danthu themhon Jesu chu doha bol’a mat’a chule thana thei ding aholtauve. 2 Amahon, “Ajo le japi lah a boina um get’inte, kut sung hida hen,” atiuvin ahi.

Bethany khoa Jesu thao anu

3 Bethany khoa Simon miphahpa in’a Jesun ankong aumpet’in numei khat’in songval hai kaht’in nard thao namtui man tamtah ahin choiyin, ahai avokeh-in thaotwi chu Jesu luchunga asun khume. 4 Alah-uva mi kon khat along himouvin, “Ibol’a hitobang thao namtui hi komoh suh mang ham? 5 Denarii jathumval a joh a mivaichate peh thei khula ahin,” atiuvin, amanu chunga aphuntauve. 6 Jesun vang, “Hiche nu chu limsah dauvin, ibol’a nasuh lunggimu ham? Aman thilpha tah eibolpeh ahi. 7 Ajeh chu vaicha gentheite nakom’uva aum jingin, nagot chan’a thilpha nabolpeh theiyu ahi, Keivang nakom’uva um jing ponge. 8 Aman ajokham kham ahung bol’a, kalong hi vui dia thao einu masah ahi. 9 Tahbeh a kaseipeh nahiuve, vannoiya Kipana Thupha kiseiphongna chan’a athilbol hiamanu het jingna dia kisei thapeh ding ahi,” ati.

Jesu pehdoh ding Judas anop

10 Seijiu som le nil ah a khat Judas Iscariot chu Jesu pedoh din Thempu ho henga achetai. 11 Amahon ajah phat’un akipah-un sum peh din atep’ui. Judas chun amat theina din agomkom aching lhi’e.

Jesun seijuite toh kalchuhkut an anehkhom

12 Cholsolou changlhah kut ni masa kalchuhkut gantha nin Jesu seijuiten ajah a, “Kalhchuhkut an naneh na ding hoikom mun gago leu veng nadeiyem?” tin adongui. 13 Aman aseijui mi ni asol’in ajah lhona, “Khopi sunga lut lhon le chun twibel pua pasal khat toh lhonin natin, ama chu jui lhonin, 14 alutna in-neipu jah a, ‘Houhil’in, “Kaseijuite toh kalchuhkut an kanehna ding ka-indan chu hoilai ham?” tin ahol’e,’ gati lhonin. 15 Chuteng aman inching dan lentah, suhngimsa gotsa kikoi khat navetsah lhonin tin, hikoma chun ibonchauva din anagong lhontan,” ati. 16 Seijuite ni achen, khopi sunga alut’in, thil ijakai asei bangin agatoh-in, kalchuhkut anagong lhone. 17 Nilhah ahiphat’in Jesu som le ni chutoh ahungtai. 18 Chuin touva an aneh laitah-un Jesun, “Tahbeh a akseipeh nahiuve, nalah-uva khat, kaneh khompipa tah hi eipedoh a pang ding ahi,” atitai. 19 Hichun alungkham pantauvin, khat khat’in ajah-ah, “Keivang kahilou ahinai ong?” tin adonguve. 20 Jesun ajah-uvah, “Som le nilah a khat, lhenga changlhah kadekot khompi pa hi ahi. 21 Miihem Chapa vang chu aumchan didng kisun banga chetei ding ahin, ahivangin amajeh a Mihem Chapa kimat lo dingpa chu, ohe, ada na’e! penglou hileh ama dia phajo ta dinga!” ati.

Pakai anjon kiphudoh

22 An aneh laitah-un Jesun changlhah alan phatthei aboh jouvin aheh bal bal’in amaho apen, “Kilah-un, hiche hi katahsa ahi,” ati. 23 Khon jong chu alan athang vah jouvin amaho apen, abon Chauvin khona chun adonsoh keiyui. 24 Chuin ajah-uvah, “Hiche hi mi tamtah dinga kilhoh lha, kathisana kitepna ahi. 25 Tahbeh a kaseipeh nahiuve, Pathen lenggama athah kadon kit ding nikho hung lhun kahsea lengpiga twi hi kadon lou ding ahitai,” ati. 26 Chuin la asah jouvun Olive mol lam jonin achedoh tauve.

Peterin aseilep ding Jesun asei masah

27 Jesun ajah-uva, “Nang ho nakipal lhuhsoh diu ahi, ajeh chu, ‘kelngoi Chingpa kavoh lhuh a kelngoite chehgam diu ahi,’ tin akisune. 28 Hijongle kathodoh jou teng Galilee gam lhung masajo ding kahi,” ati. 29 Peterin adonbut’in “Khat khat’in kipal lhu jong leu keivang kipal lhu ponge,” ati. 30 Jesun ajah a, “Tahbeh a kaseipeh nahi, tujanle lea ah nivei akhon masanga thumvei neiseilep ding ahi,” ati. 31 Ahinla Peterin, “Nang to kathi tha tei ding, kaseilep louhel ding ahi,” atichang mel’e. Abonchauvin achutisei cheh-uve.

Gathsemane hon’a Jesu tao

32 Gethsemane kiti mun ahinphah phat’un Jesun aseijuite jah a, “Kagatao sungsen hikom’ah anatou jingun,” ati. 33 Chuin Peter le Jacob chule John apuiyin, kidang asa behseh-in nasatah-in alunghem pantai. 34 Hijeh chun ajah-uvah, “Thina khop hel’in kalung hesoh tai, hikoma umun kiging jinguvin,” ati. 35 Chule masang lama phabep ache chonin, tol’ah akhup boh-in alhun, ahitheile hiche phat chu akoma kona kitol mang din ijakai ahitheiye, hiche khon hi keiya konin tolmang tan; hinla Kei dei hilouvin Nang deijoh hihen,” ati. 37 Ahung phat’in khatte ho a-ihmut lhuh-u atoh khan, Peter jah a, “Simon, na-ihmut hitam? Nidan khat jeng jong kiginga umjou lou nahim? 38 Lhepna nalhah louna diuvin kigingin tao jingun. Lhagaovin ago lheh nan, tahsa alhasame, “ati. 39 Achedoh kit’in asei ngai bang seiyin agataove. 40 Chuin ahungkit leh a-ihmut lhuh-u ahung toh khan, mit phah chet’a anaum jeh-un adonbutje jong ahetapouve. 41 Thumvei channa ahung chun ajah-uvah, “Ihmua kicholdo nalai nahiu ong? Aphasettai! Nidan alhinge! Mihem Chapa hi michonsete khut’a pehdoh a um ahitai. 42 Kipat’un chetaute. Ven, eipedoh pan eihin phatauve,” ati.

Jesu apehdoh-u le amat’u

43 Jesun thu asei nalaiyin, som le nil ah a khat, Judas chu Thempu pipu ho le Danthu themhoa kona, chemjam le moltum thoa hung miho chutoh ahung paitai. 44 Apedoh pan miho melchihna ahil masan, “kachop pen pen chu Ama ahi, manun lang kitup keichan kai mang tauvin,” ati. 45 Judas ahung lhunin Jesu ajon paiyin, “Rabbi,” tin achoptai. 46 Mihon achung’ah khut alhauvin amantauve. 47 Akoma ding ho khat chun chemjam asatdoh-in Thempulen sohpa asat jeng leh abilkol asat lhai. 48 Hichun Jesun ajah-uvah, “Gucha michom man ding banga, Kei man dia chemjam le moltum thoa hungkon nahiu ong? 49 Niseh a Houina thu kahil chunla neiman pouvin. Ama vang Pathen lekhabua kiseisa thu guilhung hiya hi,” ati. 50 Chutah-in aloiten adalhauvin ajamtauve. 51 Tupat ponnem khatseh sil gollhang khat jesu nungjui ahin, ama hi amat’u leh, 52 tupat ponnem chu dalhan asagoh keovin ajam mangtai.

Hou lamakaiho anga Jesu

53 Jesu chu Thempulen henga apuiyun, Thempu pipu ho le upa ho chule Danthu them chengse akikhomsohkeiyui. 54 Peterin galkanga ajuipeh-in Thempulen leltol geiyon ajui luttai. Chuin lhacha ho to atoukhomin mei a-oiye. 55 Thempupipu hole Hou vaipoloise sen Jesu thana thei hehsetna hettohsah ahol’un amu joupouve. 56 Ajeh chu mitampin Jesu hehsetna hettohsah asei vangun, akitoh hih-ui. 57 Chuin miphabep adingdohun jouthun ahehseuvin, 58 “Amahin, ‘Hiche khut’a kisa Houin hi suseng ting, nithum sunga khut’a sah lou achom khat katundoh ding ahi,’ tia asei kajaove,” atiuvin ahi. 59 Hichea jong hin akitoh kit pouve. 60 Chuphat’in Thempulen chu alah-uva adingdoh-in Jesu adongin, “nadonbut lou ding ham? Hite hon nahehset nau hi ipiba ham?” atileh; 61 Jesu athip behin, adonbut poi. Thempulen chun adong kit’in ajah a, “Nangma nun nom Chapa, Messiah chu nahim?” atileh; 62 Jesun, “Kahi; Nang hon Mihem Chapa chu Tha neipen jet lama touva, Vanlaijol meilom lah a hung namu diu ahina laiye,” ati. 63 Chutah chun Thempulen chun athemputna sangkhol abot eh-in, “Hettohsah dang iding ititah diu ham? 64 Pathen ataitom na naja cheh tauve. I-lo ding natiuvam?” atileh; abonchauvin athi dia lomin athemmosah tauve. 65 Abangin chil asset khumin, chuin amai atomun avouvin, ajah-ah, “Gaovin,” atiuvin; chuin lhachahon amanun angeiphe abengun, hiti hin abolpan tauve.

Peterin Jesu aseilep

66 Peter noiolam leitol’ah aum nalaiyin, Thempulen soh nu-ngah khat ahungin 67 Peter mei oi chu amui. Peter aven, “Nang hi Nazareth Jesu toh kiloisa nahi,” ati. 68 Peterin aseilep tan, “Kahepoi, ipi nasei ham kahe chenpoi,” atin, leitol maiya apotdoh le ah akhongtai. 69 Soh nu-ngah chun amudohin avel’a ding ho jah din, “Hichepa vang hi amaho loi khat ahi,” ati pan kitai. 70 Paterin aseilep kit’e. Chomkhat jouvin akoma ding hon Peter jah a, “Nang hi amaho loi khat mong mong nahibouve, ajehchu Galilee gam mi nahi,” atiuve. 71 Ahivangin Peterin kigaosap le kihahsel athopanin, “naseipau hi kahekhpaoi,” ati. 72 Chutah-in ah lailha akhongpaitai. Hichun Peterin, “Ah nivei akhon kah a thumvei neisilep ding ahi,” tia Jesun asei chu agel doh-in alungna behseh-in hakan akaptai.

Mark 15

Pilate anga Jesu

1 Jingpi tah-in Thempuho le upaho, Ddanthu them ho le Hou vaipolai chengse akihoutoh paiyun, Jesu akan’un Pilate henga akaitauve. 2 Pilate chun Jesu adongin, “Judate lengpa nahim?” atileh; Aman adonbut’in ajah a, ‘Nangsei ahi,” ati. 3 Thempu pipuhon jong thu tampin ahehse se jengui. 4 Pilate chun adong kit’in, “Nadonbut lou ding ham? Ven, nahehset set jengu khu?” 5 Jesun adonbut louhel phat’in Pilate’n adatmo lheh jenge.

Jesu tha dia thu kitan

6 Kut sunga mihon athumpen pen sohchang khat Pilate’n alhadoh pehji ahi. 7 Kivaipoh deimoa galbol mithah ho toh songkul’a kihentha amin Barabbas kiti anaume. 8 Mipi akitol touvun Pilate’n sohchang alhadohpeh nagi banga bolpeh din angeh pantauve. 9 Pilate’n adonbut’in ajah-uva “Judate lengpa hi lhadoh peh leng nadeiyum?” ati. 10 Ajeh chu Thempu pipuhon thangset suma apehdoh-u ahet ahi. 11 Ahinla Thempu pipuhon Barabbas joh alhadoh pehna diuvin mipi atilseuve. 12 Pilate chun adonbut kit’in ajah-uva, “Acutile Juddate lengpa ahi natipau hi i-kalo ding ba ham?” atileh; 13 “Thingpel’a khenbeh-in!” tin asamtauve. 14 Hichun Pilate’n ajah-uvah “Ib0l-inem? Ipi suhset aneiyem?” atileh; amahon, “Thingpel’a khen beh-in!” tin ahasap cheh tauve. 15 Mipi along lhaisah nom jeh-in Pilaate’n Barabbas alhadoh peh-in, Jesu joh chu ajep jouvin thingpel’a khetbeh din apedohtai.

Sepaihon Jesu totna aneiyu

16 Sepaihon Jesu chu gamvaipopa inpi thutanna lhong laiya akailut’un, sepia hon pumpi akoukhom tauve. 17 Chuin Jesu chu ponsandup asilpeh-un, ling lukhuh apheh’un akhuh peh-uvin, 18 salam abol’un, “Hingsot’in Judate lengpa!” atiuve. 19 peng tenggol khat’in alu avouvin, chil asset khum’ui; a-anga dilsun akun’uve. 20 A-el el-a tot nopna anei jouvun ponsandup chu ahoh lhauvin Ama pon asilpeh tauve.

Jesu thingpel’a akhetbeh-u

Jesu chu thingpel’a khetbeh din apuidoh tauve. 21 Loujaova kona hintoh kha, Cyrene gam mi, Alexander lle Rufus pa, simon chu sepaihon acham louvin aman’un Jesu thingpel aputsah-ui. 22 Jesu chu “Lugu mun” Kiti Golgotha alhut tauve. 23 Myrrh le lengpitwi kihal apeh vangun Jesun adonpoi. 24 Hichun thingpel’a akhenbeh-un aponsil jouse chu koi ipi chang dingahmtin vang asanun akihomtauve. 25 Thingpel’a Jesu akhetbeh nau chu jingkah lam nidan ko ahi. 26 Achung thu hehsetna kisun chu, “Judate lengpa,” tia kijih ahi. 27 Gucha hi, Jesu jet le veiya akhetbeh thauve. 28 (Hichea hin, “Aman Dan sukeh ho toh akisim thatai,” tia kisei Pathen lekhabu thuchu aguilhung tai.) 29 Ajotpa jousen akhasuh khumun, a-engkal nan, ‘Kadah, Houin susea nithum sunga tungdoh ding pa, 30 kihuhhingin lang thongpel chunga koin hung kumlha tang-em!” atiuve. 31 Hitobang hin Thempu pipu ho le Danthu themhon kidai naa aneiyun, “Midang la ahuhingnan, Ama akihuhing joupoi, 32 Kamu’uva katahsan theina diiuvin Israel lengpa Messiah chu tutah hin thingpel chunga konin hung kumlhan tem hen,” atiuve. Ama toh thingpel’a kikhetbeh tha te ni geiyin ahouse lhontai.

Jesu thi

33 Nidan som le ni sunkima pat nilhah nidan thum geiyin leiset pumpi chunga mu athimtai. 34 Nilhah nida thum chun Jesu hapenin apengin, “Ka-Pathen, Ka-Pathen, ibol’a neilha hitam?” tinan “Eloi, Eloi lema sabachthni?” atileh; 35 akoma ding ho phabep’in ajauvin, “ven, Elijah akouve,” atiuve. 36 Hichun mikhat alhaijel’in lengpitwi thuh lah a twichoppon ase-lhop’in, peng tenggol leh a atah-in adon din agah pen, ‘Limsah hih-un, adomlha dia Elijah hung nam veu hite,” ati. 37 Hichun Jesu hapenin apengin atantai. 38 Chutah chun Houin pondal len chu ahunga pat anoi geiyin kehni akison, a-eh lhangtai. 39 Akoma ding sepia jalamkaipan hitobanga athi amun, “Hichepa hi Pathen Chapa mong mong ah!” tin aseitai. 40 Numei phabep’in jong galkanga pat’in aven, alah-uva Magdalene Mary le Jacob neojo le Joseph nu Mary, chule Salome apangin, 41 Jesu Galilee gama alenlaiya juilea alhacha ho ahiuve; Chule numei dang tampi Jesun Jerusalema ahin lhontoupi hojong ahiuve.

Jesu avuiyu

42 Nilhah lam ahitan, Choldo nikho dia kigot ni ma ahin, 43 Arimathea khoa vaipo gin le ja umtah, Pathen lenggam ngah jinga um Joseph chu achen, Pilate henga ngampel’in alut’in Jesu long chu agathume. 44 Athivah jeng chu Pilatein kidang asan, sepia jalam kai chu akouvin, athina sottam tin adonge. 45 Sepai jalamkaipaa kona het chet phat’in Pilatein Jesu long chu Joseph apetai. 46 Josephin tupat ponnem khat achon, Jesu long chu adom lhan, atomin songlhan kilao dsunga chun alupsah-in, lhankot achun song khat atang lut’in asingtai. 47 Magdalene Mary le Joseph nu Mary Jesu alupsahna chu avelhi jinglhone.

Mark 16

Jesu thodoh

1 Choldo ni akichai phat’in Magdalene Mary l eJacob nu Mary chule Salome hicheng hi chea Jesu long nu nam din lou namtui achouve. 2 Hapta ni masa ni, jingpi matah, nisa so-thin thenin numeiho chu lhan phung’ah ahungui. 3 Numei ho chun, “Lhankot sin song kon eitahdoh peh diu ham?” tin akihouvun ahi. 4 Song chu lentah ahin, agah vet’u leh tahsohsan aumtai. 5 Lhan sung a agalut’u leh ponbang sil’a gollhang khat jet lama anatouvin, akinlih deh jenguve. 6 Ama chun ajah-uvah, “Kicha hin-un, thingpel’a kithahsa Nazareth Jesu nahol’u ahin, Ama athoudoh-in hikom’ah aumtapoi. Ven, hikoma hi alupsah-u ahi. 7 Chule kile kit’un langa aseijuite le Peter jah a, “Ama nang ho sangin Galilee gam alhung masatai. Najah-uva aseisa banga chua Ama namu diu ahi,’ tin gaseipeh-un ati. 8 Amaho lhana konin ahung potdoh-un helouvin ajamtauve. Atijat behseh jeh-un koima imacha aseipeh pouvin ahi.

Jesu Magdalene Mary henga akilah

9 Hapta ni-masapen ni, jingpia athodoh jouvin masanga asunga thilha sagi anodohnanu Magdalene Mary henga Jesu akilah masapen’e. 10 Amanu achen Jesu kiloipisa, ahijeh a lunghema kapte ho agaseipeh-e. [Mi abang in 16:9-10 gei hi apaiyin, abangin vang akoiyin hintin asune:] 9 “Numeihon gollhangpa sei chengse chu Peter le aloite akaigop’in aseipeh-ui. 10 Khonungin Jesun amaho amang chan atheng le suhmang theilou huhhing thu chu solama pat lhumlam geiyin athutsah tai, Amen!” 11 Amahon Jesu ahindoh a Mary akimusah ajah vangun atahsan pouve.

Jesu seijui ni henga akilah

12 Hiche nung hin Jesun alah-uva mi ni gamlang jon’a ache na lhona lim chombeh pun akimusah-in ahi. 13 Amani chea adang ho agaseipeh lhon vangin, amani thusei geiyin atahsan deh pouve.

Jesun seijui som le khat thu apeh

14 Chujouvin som le khat’in ankong aum laitah-un Jesu ahenguva akilah-in, athodoh jouva amuho thusei atahsan loujeh-u leh alungtah jeh-un aphoh-in ahousal’e. 15 Aman ajah-uva, “Vannoi gamtin’a cheuvin, Kipana Thupha gaseiphongun. 16 Atahsan baptize chang jouse huhhinga um ding, atahsan lou vang chu them changa kikoi ding ahi. 17 Atahsante chu melchihna hicheng hin ajuiya; Keima min a thilha anodoh diu, paochom chom athouva, 18 khut’a gulte adop sang diu; thina thei gutwi don jong leu imatilou diu ahi; ana dammo chunga khup angap’u leh dam ding ahi,” ati.

Jesu van’a akaltou

19 Pakai Jesun ajah-uva thu asei chai phat’in van’a lah touvin aumtan, Pathen jet lama atoutai. 20 Miho vang chu acheuvin muntin’a alhangsam leuvin, athuseiyu chu Pakaiyin akithopin, melchihna tampin aphu det peh-e.

Luke 1

Theophilus henga pehdoh

1 I-lah-uva hung guilhung chengse sutdohna mi tamtah-in abol pan banguvin, 2 athilsoh kipat’a pat amit tah a mua athu lhachaa pang hon eihil bangun, 3 michungnung Theophilus, thilsoh ho hi ken jong kahet themsa banga ban neicha le kitoh tah a hinsut doh peh ding kaseiye; 4 chutileh nakiseipehsa thilsoh ho hi nahet chet thei ding ahi.

John Baptist so ding kisei masah

5 Judea gama Herod lengpa vaipoh laiyin Abijah themput dol’a thempu, Zechariah kiti khat aume. Ajinu chu Aaron chilhah ahin, amin Elizabeth akiti. 6 Anupa lhonin Pathen vet dia midih gel, nolnabeiya Pakai thupeh jouse le chondan chengse nit bukimsoh ahilhone. 7 Elizabeth achinjeh-in cha vang anei lhonpon, teh la atehse lheh lhontai. 8 Thempu chon ngaiya Zechariah loiho panna ding nikhon, Pakai Houin thenga lut’a gimnamtui lhutnam na dia 9 vang kisan chu Zechariah chunga achuh khah jeh-in aman Pathen angsunga themput kin anabol’in ahi. 10 Gimnamtui kilhutnam laisen mipi polama adingun ataovui. 11 Hichun Zechariah henga Vantil khat ahung kilah-in, gimnamtui kilhut namna maicham jet lama chun ahung dinge. 12 Vantil amu phat’in Zechariah alungkhamin kijong akichai. 13 Ahinla Vantil chun ajah a, Zechariah, kicha hih-in, nataona akisangin, najinu Elizabeth in chapa khat ahin’a, amin John nasah ding ahi; 14 kipah thanom lheh in natin, chule ama penjal’a mitampi kipah diu ahi. 15 Ajeh chu ama hi Pakai mitmua nasatah hiya, lengpitwi hihen khamna thei ju hijong leh adon louhel ding, apenlhah a pat Lhagao Theng dimset ding ahi. 16 Chule Israelte tamtah Pakai a-Pathenu henga alepui lut kit ding ahi. 17 Elijah Themgao Lhagao le thahat aken’a, Pathen sol lea panga, mipate lunggel chate lama aheidoh a, thua nung loute chihna thudih agelsah-a Pakai dia miho kigosadema akoipeh ding ahi,” ati. 18 Zechariah chun Vantil jah a, “Keila kateh lheh tan, kajinu jong tehsesa ahitan, cha kanei mong lhon ding chu iti kahet thei ding ham? atileh; 19 Vantil’in, “Keima hi Pathen angsunga ding jing Gabriel kahin, hiche thupha hi najah a seipeh dia eihinsol ahi. 20 Ven, hichengse hi akitep phat cha hung guilhung tei ding ahin, kaseipeh natahsan loujeh a aguilhun nikho geiya paomoa naum ding ahitai,” ati. 21 Mipin Zechariah chu a-ngah jingun, munthenga achuti sotden adatmo lheh jengui. 22 Ahungdoh phat’in apaomo tan, muntheng sunga mu nei ahi mihon aheuvin, aman jong thilsoh umchan chu akhut’in athon, paomon aumtai. 23 Chuin thempu kin abol chaisoh phat’in Zechariah in lama ahung kile kittai. 24 Nikho phabep nungin ajinu Elizabeth chun nao avop tan, lha nga sungin akiselgun, hiti hin, 25 “Teh nunga Pakaiyin nao eivopsah a, japi maiya kajachatna lahmang peh eigot ahi,” ati.

Jesu pen ding kisei masah

26 Elizabeth gai kal lhagup lhin nan Vantil Gabriel chu Pathena konin Galilee gam Nazareth khoa 27 David chilhah Joseph toh kicheng dia kitepsa nu-ngah Mary henga akisol’e. 28 Vantil chu alut’in ajah a, “Nun nomin sah chungnung nu, Pakaiyin naumpi jinge!” ati. 29 Mary chu alung kichi-ah lah jengin, ipi thudol’a kilemna ahiding giltah-in agel’e. 30 Hichun Vantil’in ajah a, Mary kicha hih-in, Pathen lungdei namui. 31 Na gaiya chapa khat nahin ding, amin Jesu nasah ding ahi. 32 Ama thupi tah hiya Chungnungpen Chapa kitia, Pakai Pathenin apu David laltounaa atousah ding ahi. 33 Jacob chihlhah te chunga lengvai pontin, alenggam chun beitih neita lou ding ahi,” ati. 34 Ahinla Maryn Vantil jah a chun, “Iti cha kanei thei ding ham, keila pasalto kakitimat khapon?” atileh; 35 Vantil’in ajah a, Lhagao Theng nachunga hung chun tin, Chungnungpen tha neinan nahinlekhu ding, hijeh a hi apeng ding naosen theng chu Pathen Chapa kiti ding ahi. 36 Nanulamnu Elizabeth-in jong teh nungin chapa khat avop’in, achinga kiseinu agaiyin lhagup alhingtai; 37 ajeh chu Pathen dingin imacha ahimopoi,” ati. 38 Chuphat-’in Mary, “Ven, Pakai nalhachanu kei, nasei bangin kachunga guilhung hen,” ati. Hichun Vantil’in Mary adalhatai.

Maryn Elizabeth agavil

39 Hichelai hin Mary akipat paiyin Judea thinglhang gam khopi khat’ah thanom tah-in achei. 40 Zechariah in’a alut’in Elizabeth salam agabol’e. 41 Mary salam chu Elizabeth-in ajah pet tah-in aoisunga naocha akichomin, Elizabeth chu Lhagao Theng adimtai. 42 Chuin Elizabeth chun othongin asamin, Numei jouse lah a nunnom nu, nanaobu sunga um jong anun nome! 43 I-atile ka-Pakai hungnu lomlom kahenga hung jeng hitam! 44 Ajeh chu salam thu nasei kajah jah chun ka-oisunga naocha kipah-in akichom jenge. 45 Ahenga Pakai thusei guilhung ding tahsan nu anun nome,” ati. Maryn vahchoi la asah 46 Hichun Maryn aseiyin: “Kahinkhon Pakai kachoi an’in, 47 Eihuhhing Pakai Pathen chunga Kalhagao akipah-e. 48 Ajeh chu alhacha nu lhasam tah eigeldoh-in, Ven, tua pat akhang khanga miten Nun Nom nua eisei diu ahitai. 49 Ijeh-inem itile Hatchungnungin thil nasatah eibolpeh-in, Amin jong athenge. 50 Ama gingte chu akhang khangin alungset jinge. 51 Aban thahat ajesal’in thanei tah-in thil abol’in, Alunggel’uva kiletsah hoithote athecheh soh tai. 52 Vaihom thanei tah ho alaltouna konin aloilhan Tahlel chagate achoisangtai. 53 Agilkelte antui tuiyin avah van, Mihaote khutgoh keovin asolmang’e. 54 Alhacha Israel henga akitepna, I-pu i-paute Abraham le achilhahte henga aseisa, 55 Tonsot kumkhoa alungset long lou chu Ageldoh jing jenge,” ati. 56 Mary chu Elizabeth koma lha thum jen anichongin, chuin in lama akile kittai.

John baptist pen

57 Elizabeth naoso phat alhingin chapa khat ahingtai. 58 Aheng akom ho leh aphung gol hon Pakaiyin nasatah a Elizbeth alungset hi ajauvin akipapi cheh-uve. 59 Niget lhin nin naosen chep tan din ahungun, apa min putsah a Zechariah hisah ding agouve. 60 Ahinla anun ajadan, “Amin John kiti ding ahibouve,” ati. 61 Amahon Elizabeth jah a, “Naphung sunguva chutobang minneikha bon um louva,” atiuve. 62 Chuphat’in mihon apan ipi asah nom chu mit heiyin adongui. 63 Zechariah chun asutna ding pheng khat athumin, “Amin John ahi,” tia ajih leh abonchan adatmo soh hel’uve. 64 Hichepet tah chun Zechariah apaodoh jeng theiyin, Pathen avahchoiye. 65 Aheng akom jouse akichauvin, hiche thusoh hi Judea thinglhang gamsung athangsoh tai. 66 Athusoh japha chanin alungthim’ah, “Hiche naosen khu ipi hungsoh ding ham?” ati cheh-ui. Ajeh chu Pakai ban thahat’in naosen chu aumpi jinge.

Zechariah gaothusei

67 Naosen Pa Zechariah Lhagao Theng adimin gaothu aseitai: 68 “Pakai, Israel Pathen vahchoiyute, Aman amite akithopin jalenna amusah tai. 69 Alhacha David insunga konin Huhhing hattah khat saki bangin atungdoh tai. 70 Hiche hi masang laiya Athemgao theng ho kama aseisa ahi. 71 Imelmateu le eihot bolteu khut’a kona Eihuhdoh jing diuva thu atepsa ahin; 72 I-Pu i-Pateu alungset tei tei ding, Akitepna theng suhmil lou dia aseisa ahi. 73 I-Pu luiyu Abraham henga kihahsel’a, Imelmateu khut’a kona eihuhdoh diu, 74 Gin neilouva Ama kin ibol theiyuva, 75 Ihinkho lhumkeiyuva dih tah a akin ibol diu ati ahi. 76 Naosen nang jong Chungnungpen Pa Themgao nakitia, Pakai masanga chea alampi nasempeh ding; 77 Amite hi achonsetnau ki-ngaidama Huhhingna chang dia naseipeh ding ahi. 78 I-Pathenu hi lung nemtah lungset them ahin, Thina muthim jing lah a touho chunga 79 Nisa loupi tah avahsah a, chamna lampi jon’a akijotsah diu ahi,” ati. 80 Naosen chu ahung khang khangin tahsa le lhagaova hattah ahitai. Israelte henga lhang phonga akilah masangsen gamthip lah jenga apansai.

Luke 2

Jesu pen

1 Hiche lai chun Caesar Augustus in leiset chung cheng mijouse simtoh a min sutdoh din thu apei. 2 Hiche hi min kisim masah pen ahin, hichepet hin Quirinius Syria gamvaipon apange. 3 Mihem jouse ama ama khopi cheh a min kisut din acheuve. 4 Joseph jong David insung chilhah ahijeh-in Galilee gam Nazareth khoa konin Judea gam David khopi, Bethlehema achetouve. 5 Min kisut dia ache hin ajihol Mary gai hamset chutoh alhon’e. 6 Chukoma aum pet lhonin Mary navah phat alhing’in, 7 achapa masapen ahingtai. Jin lhun in’a amani ding mun onlou jeh-in Maryn naosen chu ponin ajel’in gan ankong-ah alupsah-e.

Kelngao ching ho le Vantilte

8 Hiche gama chun kelngoi ching phabep loujaova ageh-un, janin kelngoi hon ngah akilha lhauve. 9 Chuin Pakaiya kon Vantil khat akom’uva ahung dingin, Pakai loupi nan akimvel’u asalvah soh jenge; amaho akicha behseh jengun ahi. 10 Vantil chun ajah-uvah, “Kicha hih-un, ajeh chu ve, nang ho dia hachangpa kipana Thupha kahinpoh peh nahiuvin, mi jouse kipana hi ding ahi. 11 Ijeh-inem itile tunin nang ho din David khopia huhhingpa Pakai Messiah chu apengtai. 12 Naphot chetna diu chu: naosen pon’a kijel’a gan ankong sunga lum nagamu diu ahi,” ati. 13 Phot lot louvin Vantil chutoh vanmi janelten Pathen avahchoiyun hiti hin, 14 “Chungnungpena Pathen loupi hen, Leiset’a alungdei mite chunga cham leng hen,” atiuve. 15 Vantilte chu van lam jona akile kit phat’un kelngoi ching ho khat le khat akihouvun, “Bethlehema cheu hitin Pakaiyin eihetsah-u hiche thilsoh hi gaveu hite,” akitiuvin ahi. 16 Kinloi tah a acheu le Mary le Joseph toh naosen gan ankonga lum chu agamu’ve. 17 Amu phat’uvin naosen chung chang thudol ajah-uva kisei chengse chu miho aseipeh tauve. 18 Ajah-uva kelngoi ching ho thusei japha chanin kidang asa lheh jengun, 19 Maryn vang hichengse chu achingin alung gil’in agel jinge. 20 Kelngoi ching hon akiseipeh banguva thil amu jeh-un Pathen choiat le thangvah thon akile kittauve.

Jesu min asah-u

21 Niget lhin nin naosen chep tan phat ahitan, naobua akijil masanga Vantil’in amin asahsa Jesu asah tauve.

Houin’a Jesu apuiyu

22 Mose Danthu dungjuiya kisuh theng phat alhinin Jesu chu Pakai henga din Jerusalema ahinpui touvui. 23 Pakai Danthua, “Naobu tumkeh masa pasal tapou Pakaiya atheng ding ahi,” tia kisei bangin, 24 chule Pakai Danthua kisei, “Vakhu kop khat ahiloule vapal nou ni ham,” kiti dungjuiyin kilhaina bol din agouve. 25 Ven, Jerusalema chun amin Simeon kiti pasal khat, midih le hougut tah, Israel kilhatdoh ding ngah jinga um ahin; Lhagao Theng vop, 26 Pakaiya kon Messiah amu kahsea thilou dia Lhagao Thengin aphondoh mi khat aume. 27 Simeon chu Lhagaovin Houin’a ahinpui lut’in, Danthua kisei banga naosen Jesu kin abolpeh lou khoh ho bolpeh dia anu le apan ahinpui lut lhon phat’in 28 Simeonin naocha chu akipomin, Pathen vahchoiyin aseiye: 29 “Pakai* tua hi nasei banga Nalhachapa lung monga neilhadoh ahitai; 30 Ijeh-inem itile kamit tah-in Nahuhhingna kamutai. 31 Hiche hi namtin mitmua Gontohsa nakoi, 32 Chidang namdangte henga nadei chu vah a kiphongdoha Namite Israel loupina dia nabol ahi,” ati. 33 Naosen chung changa Simeon thusei chu anu le apan adatmo lheh jeng lhone. 34 Simeonin amaho phatthei aboh-in, anu Mary jah a, “Ven, hiche naosen hi Israel sunga mi tamtah kipal lhuhna ding le hindohna dia kitung, nahsah moa kikoiji ho khel’a melchihna pang ding, 35 nang jeng jong nalung chang chemjama kidotpai abahsah a, mi tamtah lunggil selguh geiya aphondoh ding ahi,” ati. 36 Asher phunga Phanuel chanu Anna themgaonu chu aji nei nunga ajipa toh kum sagi seh bou cheng khom lhona, tehse lheh jeng, 37 kum som get le li meithaiya um, Houin dalha kholou, sun le jan’a Pathen kinbol’a pang anngol’a tao jing jeng ahi. 38 Hichepet tah hin ahungin Pathen athangvah-in, Jerusalem lhatdoh ding kat jingte jah a naosen thudol hi aseipeh tai. Jesu Nazareth khoa ahung kile kit 39 Pakai Danthua kisei kinkhoh jouse abol chai phat’un Galilee gama akhou Nazareth a ahung kile kittauve. 40 Naosen chu akhang khangin ahatdoh tan aching lheh jengin, Pathen phattheinan aumpi jinge.

Jerusalem Houin’a chapang Jesu

41 Jesu nunle pa kumseh leh kalchuh kut’a din Jerusalema acheji lhone. 42 Jesu kum som le ni alhinin angaiya kal chuh kut mang din achetou kit’uve. 43 Kut kichaiua in lam ahinjot phat’un chapang Jesu chu Jerusalema aumdenin, anu le apanla ahedoh lhonpoi. 44 Amanin mihon lah a chedanin agel lhonin nikhat nilhum keiyin ahung tauve; chuin aheng akomte leh akihetpi ho lah a Jesu ahol lhon leh 45 amudoh jou lhon tapoi. Hijeh chun Jerusalema ahung hol lhontai. 46 Nithum nungin Houin sunga agamudoh lhonin, houhite lah a anatouvin, athuseiyu angaiyin dong jong adongjie. 47 Athusei japhan chanin achih dan le athu donbut themdol chu kidang asalheh jenguve. 48 Anu le apan amudoh lhon chun adatmo lheh jeng lhonin, anun ajah a, “Naosen, idia neihitibol jeng lhon ham? Veta, napa le ken lung dong tahin kahol hol lhone,” ati. 49 Aman ajah lhona, “Idia neihol khoh lhon ham? Ka-Pa insunga kaumtei ding nahet lhon lou ham?” atipeh-e. 50 Ajah lhona asei chu ahedoh thei lhonpoi. 51 Chuin amani toh lhonin Nazareth khoa ahungin athu thu lhonin anunge. Anun thilsoh chengse hi alung gil’in aching jinge. 52 Jesu chu tahsa le chih nan akhang tou touvin, Pathen le mihem deiyin aumtai.

Luke 3

John Baptist thuhil lhangsap

1 Tiberius Caesar lengchan kal kum som le nga lhin chun Pontius Pilate’n Judea gam vai apon, Herod-in Galilee gambih vai apon, asopips Philip’in Iturea le Trachonnitis gambih vai apon, Lysanias chun Abilene gambih vai apon, 2 Annas le Caiaphas them pulenin apang lhone. Hichepat hin gamthip’a um Zechariah chapa John henga Pathenin thu ahinseitai. 3 John Jordan luipang gamkol’a achelen, mihon lung aheiyuva batize chang diu, chuteng achonset’u ki-ngaidam ding thu alhangsam lei. 4 Isaiah themgao lekhabua chun akisunin: “Gamthip’a khosam ogin khat’in, Pakai lampi semtoh-un lang, Alamlen semjangsen koiyun. 5 Damkom jouse kidip chama, Mol le lhang jouse kilai cham ding, Lamkon jouse kisujanga aboh laise jong kisunam ding ahi. 6 Chutengle tahsa mihing jousen Pathen huhhingna amudoh cheh diu ahi,” akiti. 7 Ahenga baptize chang dia hung ho jah a chun Johnin, “Vogulse son ho, ahung lhung ding lunghanna jamdohna ding thu namop’u chu koiham? 8 Nachonset lung nakhel’u phot chet nan nachon nauvin phongun; ‘Abraham chilhah kihina chu,’ tin kisonghih-un; ajeh chu Pathenin hiche song ho hi alah a Abraham chilhah a asemdoh thei ahi. 9 Thingphungbul tin’a heicha kiphutsoh ahitan, aga phalou thingphung jouse kiphuh lhua meilhum sunga kileh lutsoh ding ahi,” ati. 10 Mipin John chu adongun, “Achutile ipi kabol diu hitam?” atiuleh; 11 aman ajah-uvah, “Sangkhol chol ni neiyan aneilou hophen anneh neiyan jong chutiman bol hen,” ati. 12 Kaidong ho geiyin ahenga baptize chang din ahungun ajah a, “Houhil iti kachon diu ham?” tia adoh-u leh, 13 Johnin ajah-uvah, “Nakiteppeh kalval’un lah dauvin,” ati. 14 Sepaihon jong, “Iti kachon diu ham?” tin adongun, aman ajah-uva, “Sum hihen ipi hi jongle alam louvin koima ima lahpeh dauvin, nasandoh jat jat’in lung lhaiyuvin,” ati. 15 Mipin alungthimuva John akatjingu Messiah hitheiya agel laith-un, 16 Johin adonbut’in ajah-uvah, “Ken twiya baptize kachansah bou nahiuvin, keisanga hatjo khat ahunge, kei hi akengchot khao sut lham dia kilom jong kahipoi, aman Lhagao Theng le meikonga baptize nachansah diu ahi. 17 Akhut’a chang japna achoiyin, phol’a chang jap ngimsel’in tin, chuteng achangtah ho changsal’a akhum tup ding, asi chengse vang mit theilou meilhum sunga agovam ding ahitai,” ati. 18 Johnin tilkhouna tamtah toh thon mipi chu Kipana Thupha aseiphongpeh-e. 19 Gambih vaipoa pang Herod jong chu asopipa Philip jinu Herodias akichenpi jeh le thilse dang tampi aboljeh-in aphoh-e. 20 Hichea hin Herod chun John hi songkul’a akhumin thilse khoh cheh khat abolbe kit’e.

Jesu baptize chan

21 Miho baptize achansah phat’un Jesu jong baptize achange. Chuin atao leh van akihongin, 22 Lhagao Theng tahsa vouvin vakhu bangin achunga ahung leng lhan, van’a konin ogin khat’in, “Kadeitah kachapa nahin, Nachunga kalung alhai ta-ngeiye,” ati.

Jesu penna khanggui

23 Anatoh kipat chun Jesu kum som thum bang alhintan, mingaiton ama chu Joseph chapa ahi. Joseph chu Eli chapa ahi; 24 Eli chu Matthat chapa ahin, Matthat chu Levi chapa ahi; Levi chu Melchi chapa ahin; Melchi chu Jannai chapa ahin, Jannai chu Joseph chapa ahin, 25 Joseph chu Mattathias chapa ahi; Mattathias chu Amos chapa ahin; Amos chu Nahum chapa ahi; Nahum chu Esli chapa ahin, Esli chu Naggai chapa ahi; 26 Naggai chu Maath chapa ahin, Maath chu Mattathias chapa ahi; Mattathias chu Semein chapa ahin, Semein chu Josech chapa ahi; Josech chu Joda chapa ahin, 27 Joda chu Joanan chapa ahin; Joanan chu Rhesa chapa ahin, Rhesa chu Zerubbabel chapa ahi; Zerubbabel chu Shealtiel chapa ahin, Shealtiel chu Neri chapa ahi; 28 Neri chu Melchi chapa ahin; Melchi chu Addi chapa ahi; Addi chu Cosam chapa ahin; Cosam chu Elmadam chapa ahi; Elmadam chu Er chapa ahin, 29 Er chu Joshua chapa ahi: Joshua chu Eliezar chapa ahin, Eliezar chu Jorim chapa ahi; Jorim chu Matthat chapa ahin, Matthat chu Levi chapa ahi; 30 Levi chu Simeon chapa ahin, Simeon chu Judah chapa ahi; Judah chu Joseph chapa ahin, Joseph chu Jonam chapa ahin, Jonam chu Elaikim chapa ahin, 31 Eliakim chu Melea chapa ahi; Melea chu Menna chapa ahin, Menna chu Mattatha chapa ahin, Mattatha chu Nathan chapa ahin; Nathan chu David chapa ahi; 32 David chu Jesse chapa ahin, Jesse chu Obed chapa ahi; Obed chu Boaz chapa ahin; Boaz chu Salmon chapa ahi; Salmon chu Nahshon chapa ahin; 33 Nahshon chu Amminadab chapa ahi; Amminadab chu Admin chapa ahin, Admin chu Arni chapa ahi, Arni chu Hezron chapa ahin, Hezron chu Perez chapa ahi; Perez chu Judah chapa ahin; 34 Judah chu Jacob chapa ahi; Jacob chu Isaac chapa ahin, Issac chu Abraham chapa ahi; Abraham chu Terah chapa ahin, Terah chu Nahor chapa ahi; 35 Nahor chu Serug chapa ahin, Serug chu Reu chapa ahi; Reu chu Peleg chapa ahin, Peleg chu Eber chapa ahi; Eber chu Shelah chapa ahin, 36 Shelah chu Caina chapa ahi; Cainan chu Arphaxad chapa ahin, Arphaxad chu Shem chapa ahi; Shem chu Noah chapa ahin, Noah chu Lamech chapa ahi; 37 Lamech chu Methuselah chapa ahin, Methuselah chu Enoch chapa ahi; Enoch chu Jared chapa ahin, Jared chu Mahalaleel chapa ahi; Mahalaleel chu Kenan chapa ahin, 38 Kennan chu Enosh chapa ahi; Enosh chu Seth chapa ahin, Seth chu Adam chapa ahi; Adam chuPathen chapa ahi.

Luke 4

Diabol’in Jesu alhep patep

1 Jordan luiya konin Jesu Lhagao Theng dimset’in ahung kile kit’in, lhagaovin gamthip’a apuilut’in, 2 nisom li sungin Diabol lhep patep’in aga-ume. Nisom li sunga imacha nelou ahin, akhonnan agilkeltai. 3 Hichun Diabol’in ajah a, “Pathen Chapa nahileh hiche song hi changlhah sosah-in.” ati. 4 Jesun adonbut’in, “Pathen lekhabua kisun chu, ‘Mihem hi changlhah keova hing theilou ding,’ kiti ahi,” ati. 5 Diabol’in Jesu apuitouvin mitphet kah louvin vannoi mihemchenna lenggam jouse avetsah-in, 6 “Hicheng chunga thu neina le aloupina abonchan napenge, ajeh chu kapeh nom nom kapeh dia eikipe-ah ahitai. 7 Hijeh a chu naboh khup’a chibai neiboh leh aboncha nanga hi ding ahi,” ati. 8 Jesun adonbut’in “Pathen lekhabua, Pakai na-Pathen chibai naboh a Ama kinbou nabol ding ahi,” tin akisune,” ati. 9 Jerusalema apui kit’in Houin tingvuma adinsah-in ajah a “Pathen Chapa nahi leh hikoma kon hin chomlha jengin; 10 ajeh chu Pathen lekhabua, ‘Pathenin Avantilte hinsol peh-in tin Amahon nachang nauvinte, 11 Chule akhut’uvin nadom nauvinte; Achutiloule songa nakeng kisuh khah get’in nate,’ tin akisune,” ati. 12 Jesun adonbut’in, “Pathen lekhabua,’Pakai na-Pathen nalhep patep lou ding ahi,’ tin akiseiye,” ati. 13 Diabol’in Jesu alhep patepna ding achaisoh phat’in phat khat’a din adalhatai.

Jesu Galilee gama Pathenna atohpat

14 Jesu Lhagao thahat kengin Galilee lama ahung kile kittai. Chuin Ama thudol gamsunga akithangsoh tai. 15 Houthua kikhopna in tina miho ahil len, mihon Ama aseipha soh keiyui.

Nazareth khoa Jesu asandau

16 Ahung seiletna Nazareth khoa Jesu ahungin, achon na ngai bangin Choldo nin houthua kikhopna in’a achen, Pathen lekhabu sim dingin adingdoh tai. 17 Hichun Isaiah Themgao lekhajol apeuvin, lekhajol alhap lhah a amudohna laiya chun, 18 “Pakaiya kon Lhagao kachunga aumin, Tahlelte henga Kipana Thupha seipeh ding, Sohchangte lhadohna thu seipeh a, Mitcho ho khomuna ding seipeh ding, Nehchintoa um ho lha-ong ding seipeh a, 19 Pakai deilhen kum seipeh dinga thao einu ahitai,” tin akisun’e. 20 Jesun lekhajol chu ajeldoh-in lhachapa apen atoutai. Hichun houthua kikhopna insunga um mi jousen Ama avesoh keiyui. 21 Jesun ajah-uva, “Hiche najah-u Pathen lekhabua thu hi tunia guilhung ahitai,” tin aseipantai. 22 Mihon Ama aseipha soh keiyun, akamsungsoh thu ngai ngai ho jeh chun kidang asalheh jengui. “Hichepa hi Joseph chapa hilou haimo?’ atiuve. 23 Jesun ajah-uva, “Thuchih a kisei, ‘Louthem nangma kiboldam’in, kiti hi naseiyuva, “Nakhosunga jong Capernauma thil kidang kibol kajah ho’u tobang bol tangem,’ neiti khum diu hina hi,” ati. 24 Aman, “Dih tah a kaseipeh nahiuve, Themgao chu akhosunga i-kisahji lou mong ahinai. 25 “Ahinla dihtah a kaseipeh nahiuve, Elijah nikho laiya vankot akikhaa kumthum le lhagup gotwi kanjeha gamsung pumpia kel laiyin Israelte lah a meithai numei tamtah aum vangun 26 Elijah chu amaho khat cha henga akisolpoi, Sidon gama Zarephath khoa meithainu koma akisoljo bouve. 27 Elisha themgao khangin jong Israelte lah a miphah tampi aum nan, Khat cha jong suh thengin aumpoi, Syria mi Naaman suh thengin aume,” ati. 28 Jesu thusei ajah-u chun houthua kikhopna in’a um chengse alung hang behseh jengun, 29 akipatdoh-un khosunga koin Jesu alhoh doh-uvin, achen nau molvum, koldeh a sot lhah dingin agouve. 30 Ahinla Jesu akah lah-uva akiheh doh-in ache mangtai.

Mi lhagaoboh voppa

31 Jesu Galilee gama Capernaum khoa ahung suh-in, Choldo nin miho thu ahil leh, 32 athuhil tha neije chu mihon kidang asa lheh jengui. 33 Houthua kikhopna in’a chun lhagaoboh vop pasal khat aumin, amahin oging tah-in ahinsamin, 34 “Vo Nazareth Jesu, I-lo ding neigot ham? Eisu manguva hung nahim? Koi nahi kahenai, Pathen solchah theng chu nahi,” ati. 35 Jesun haphon aphoh-in, “Thip’in! Mipaa kon chun hung doh-in!” atileh; thilhan mipa chu a-angsung laitah-uva aheh lhun ima suse louvin asunga konin ahung potdohtai. 36 Mihon adatmo soh keiyun, “Ipipen asei khum hitam? Thu neitah le thahat tah a lhagao boh ho thu apeh le ahungdoh doh jengui,” tin akihouvui. 37 Hiti hin akimvel gamkol’ah Jesu thudol akithangsohtai.

Jesun mi tampi aboldam

38 Jesun houthua kikhopna in dalhan Simon in-ah aluttai. Simon nupanu hatah-in khosih nat’in ana nan, mihon Jesu henga aseipeh-ui. 39 Jesu amanu jalkhun panga adingin khosih nat chu haphoa apho leh, akhosih chun alhan, amanu athou paiyin amaho jenlen apangtai. 40 Nisa lhumin hivei chom chom veiya damlou neihon Jesu henga ahinpuiyun, Aman achung cheh-uva khut angamin aboldamsoh keiye. 41 Mi tamtah sunga konin thilha ho apotdoh-uvin, “Pathen Chapa nahi,” tin asamui. Jesun amaho chu haphon aphoh-in apaopoh sahpoi, ijeh-inem itile amahon Messiah ahi ahe cheh-ui.

Jesu thuhil lhang dia avaikon

42 Khovah phat’in Jesu apotdohin munthip lai khat’ah achetai; ahinla mipin Ama ahol hol jengui. Hiti hin ahenga ahunguvin adalhah louna dingun alhotauve. 43 Ahinla Jesun ajah-uvah, “Kho dang danga jong Pathen lenggam Thupha hi kaseiphong tei tei ding ahi. Hiche dia chu hung kisol kahi,” ati. 44 Hijeh chun Judea gam Houthua kikhopna in hoa jong ahil lhanglei.

Luke 5

Jesun seijui akou masah ho

1 Jesu Gennesaret dil panga adin pet’in Pathen thu ngai nom hon akimvel’a aneh chinto jengui. 2 Jesun twipam chin’a kong ni kihen amui; ngaman kong neiho chu potdoh a len asoppet’u ahiye. 3 Jesu Simon kong’a alut’in twipam chin’a kona kong chu tol lut jep din asol’in, chuin atouvin kong’a pansan mipi chu thu ahiltai. 4 Athusei jouvin Simon jah a, “Twithuh laiya tol lut’in nga matna din len sep lhauvin,” atileh; 5 Simonin adonbut’in, “Pu, jan khovah hel’a imacha man lou kahiuvin, nang thupeh-in len septem unge,” atin, 6 len aseu leh nga tampi aman khauvin alen jouseu a-ehpai ding ahitai. 7 Hichun kong danga pang aloiten ahung kithopi diuvin agah jap’ui. Amaho ahungun kong te ni chu nga akhol dimset’un ahileh alhalut deh deh jenguve. 8 Athilsoh hi Simon Peterin amuchet phat’in Jesu khomuh a aboh khup’in, “Pakai, neidalha jengin, michonse kahibouve,” atitai. 9 Peter le akiloipi chengsen nga chujat amat jengu chu kidang asabehseh jenguve. 10 Simon loite ni, Zebedee chpa te ni Jacob le John jong chutima chu ahilhone. Jesun Simon jah a, “Tija hih-in, tua lhah mi man’a napan ding ahi,” ati. 11 Amahon kong te ni chu vaokama ahintoldoh-un ijakai adalhauvin Jesu ajuitauve.

Jesun miphah khat asuh theng

12 Jesu khopi khat’a aumpet’in akhosunga chun apum changa phah pasal khat aumin, Jesu amudoh phat’in a-angsunga aboh khup’in amaitol’a asulut’in, “Pakai, nalung ahileh eisutheng thei nahi,” tin atao tai. 13 Jesun athamin ajah a, “Kalung ahinai, damtheng tan,” atileh; apet tah chun aphah atheng jenge. 14 Koima jah a asei louna din Jesun akham chah-in, “Chen, Thempu gakivetsah-in, nadam theng hettohsah nan Mose thupeh banga thilto ding gatoh tan,” tin asol’e. 15 Ahinla aumchan thudol akihathanjal cheh jengin athu ngai ding le aveiset kiboldamsah din mipi ahungbe cheh cheh jenguve. 16 Ahinla Jesu gamthip’a achangin achedoh jin agataojie.

Jesu langthi mi khat aboldam

17 Nikhat Jesun thu ahilpet’in Galilee gam le Judea gam khotin’a kon le Jerusalema hung kon Pharisee ho leh Danthu hil ho hikoma chun atouvui. Hichea chun Jesun mi adamsah theina din Pakai thahat’in aumpi. 18 Hichepet tah hin mihon pasal langthi khat alupna pumin ahinpu’vin, put lut paiya Jesu angsunga jam din ago’uve. 19 Japi jeh a aput lut thei louhel phat’un inchunga akaldoh-uvin cheh pheng vang kah a alupna pumin, mipi lailung, Jesu angsung dontah a agah khai lhauve. 20 Atahsanu amu phat’in Jesun mipa jah a chun, “Golpa, nachonset jouse ngaidam ahitai,” ati. 21 Athuseijeh chun Pharisee ho le Danthu themhon, “Hichepa hi koibeh hiya Pathen taitomna thu asei hi nga na? Pathen tilou koidangin chonset angaidam jou ding ham?” tin agel pantauve. 22 Agel’u hi Jesun ahedoh paiyin ajah-uva “Ibol’a chutobang nagel’u ham? 23 ‘Nachonset jouse ngaidam ahitai,’ ti leh, ‘Thouvin lamjot tan,’ ti hojoh baijom? 24 Hoi hileh leiset chunga mihem Chapan chonset jouse ngaidamna thahat anei nahetna diuvin,” atin, langthipna jah a, “Kaseipeh nahi, thouvin, nalupna kilah-in inlama chetan,” ati. 25 Langthipna mipi maiya ahung dingdoh paiyin, alupna akilah-in inlam jonin achen Pathen athangvah peh-e. 26 Mihon adatmo soh keiyuvin Pathen thangvah to thon, atija thei lheh jengun, “Tunin thil kidang datmo umtah imutauve,” tin aseiyui.

Jesun Levi akou

27 Hiche nung hin Jesu apotdoh leh kaidonna muna tou Levi, kaidongpa, chu amudoh-in ajah a, “Neijuiyin,” ati. 28 Levin ijakai dalhan akipat’in Jesu ajuitai. 29 Levin a-in’a Jesu vah nan golvah lentah abol’in kaidong ho tampi le midang hon ankong aumpiuve. 30 Hichun Pharisee ho leh danthu them ho Jesu seijuite chunga aphun’un, “Ibol’a kaidong ho le chonsete toh naneh khomu ham?” atiuve. 31 Jesun amaho hi adonbut’in, “Adamin louthem angaipoi, adamlouvin bou angaiye. 32 Keijong midihsa kouva hung kahipoi, chonsete lungheisah dinga hung kahibouve,” ati.

An ngol thudol Jesu adoh-u

33 Mihon Jesu jah a, “John seijuihon an angol matchet’un taojong atao jiuvin, Pharisee seijuihon jong chutiman abol’ui; nang seijui hon vang aneuvin adon’ui” tin aseiyui. 34 Jesun ajah-uvah, “Kichen golvahnaa hung lha ho chu aji nei pan aumpi pet’a an na-ngolsah theiyum? 35 Amavang alah-uva kona aji neipa kipui mang phat hung lhung ding ahin, hiche sungsea chu an angol diu ahinai,” ati. 36 Jesun amaho chu thulem khat jong aseipeh-in, “Koiman pon thah abot-eh jin ponlui behnan anei ngaipoi; behna taleh ponthah jong abo-eh ding ahin, chule ponthah hal jong chu ponlui chutoh alhoukitoh ponte. 37 Koiman lengpitwi thah jong savunpeng luiya akhum ngaipoi; khum taleh lengpitwi thah chun savunpeng atumkehding, lengpitwi moh lon kanga, savunpeng jong kisuh manglo ding ahi. 38 Hijeh a chu lengpitwi thah savunpeng thah a khum ding ahi. 39 Koiman lengpitwi lui adon nungin lengpitwi thah adon nompoi; ajeh chu, “Lengpitwi lui bou alhume,’ tin aseijie,” ati.

Luke 6

Choldo nia Jesu seijuiten changvui asiu

1 Choldo nia Jesun buleijao ajotnaa aseijuiten changvui asih-un, akinoiyun abah pantauve. 2 Hichun Pharisee ho phabep’in “Ibol’a Choldo nia bol ngailou abol’u ham?” atiuve. 3 Jesun amaho chu adonbut’in, “David le aloite agilkel’uva chu ipi abol’u nasim khah louvu ham? 4 David chu Pathen insunga alut’in Pathen umjing hetna changlhah kitoh, Thempu tilouvin aneh ngailou chu anen aloite jong apei,” ati. 5 Ajah-uvah, “Mihem Chapa hi Choldo ni Pakai ahi,” ati.

Khutlang ngoipa

6 Choldo nidang khat man Jesu Houthua kikhopna in’a alut’in thu agahil’e. Hikoma chun pasal khut jetlam ngoi khat ana umkhai. 7 Danthu them ho le Pharisee hon ahehset theina diuvin, Choldo nia mi aboldam aboldam lou achang lhiuve. 8 Jesun alungthimu ahen khutlang ngoipa jah a chun, “Kipatdoh-in alailunga hung dingin,” atileh; ama akipatdoh-in ading tai. 9 Hichun Jesun ajah-uva, “Kadoh nahiuve, choldo nia apha le ase hoijoh bol ngai ham? Huhhing ding ha suhmang ding ham? ati. 10 Jesun abonchauvin avegolsoh keiyin khutlang ngoipa jah a, “Nakhut lhangdoh-in,” atileh; alhandoh phat’in akhut adamhel’e. 11 Chutah chun amaho athangtom behseh jengun Jesu i-lo ding thu akihousom tauve.

Jesun seijui som le mi alhendoh

12 Hichelai hin Jesu tao dingin molchunga achen, jan khovah geiyin Pathen’ah ataove. 13 Khovah lhah phat’in aseijuite akouvin, alah-uva konin mi som le ni alhengdoh-in amaho chu amin’u solchah asah-e. 14 Amaho chun Peter asahpa Simon, asopipa Andrew, Jacob le John, Philip le Bartholomew, 15 Matthew leh Thomas, Alphaeus cha Jacob, gam ngailu atiu Simon, 16 Jacob chapa Judas, chule amatsah apangpa Iscariot Judas ahiuve.

Jesun japi kin abol

17 Jesu amaho hitoh ahung kumsuh-in jangcham lai khat’a adinge; hia chun seijui tamtah le Judea gama kon, Jerusalema kon, chule Tyre le Sidon twikol pang dunga hung mipi nasatah toh ahiuvin, 18 abonchauva Jesu thuhil ngai nom le adammo veiset nau kibol damsah dia hung ahiuve. Chule Lhagaoboh suh genthei ho jong aboldam soh keiye. 19 Jesu tahsaa kona thahat hungpot’a amaho adamsah theijeh chun japin Ama tham khah tei din ago’uve.

Phattheina le Da na

20 Jesu akhodah-in aseijuite aven aseiye: “Vaichate anun nom nahiuve, Ijeh-inem itile Pathenlenggam nang hoa ahi. 21 Tulaiya gilkelte anun nom nahiuve, Ijeh-inem itile nakivahva diu ahi. Tulaiya kapte anun nom nahiuve. Ijeh-inem itile nui ding nahiuve. 22 Mihem Chapa jal’a min nahot bol’uva, Migilouva nahouset, nadonda tengu leh anun nom nahiuve. 23 Hitia nahou niu chuleh kipah thanomin lam’un, ven, vana nasan diu tohman alen’e. Apu apateuvin jong Themgao ho hitobanga chu anabolsau ahi. 24 Ohe mihaoho ada nahiuve, Ijeh-inem itile hinkho nom naneitauve. 25 Ohe tulaiya oivaho ada nahiuve, Ijeh-inem itile gilkel nahin thoh diu ahi. Ohe tulaiya nuihi ada nahiuve. Ijeh-inem itile lunghema nakadiu ahi. 26 Ohe mi jouse seiphat chang ho ada nahiuve. Apu apateuvin jong Themgao lhem ho chutia anaseiyu ahi.

Melma lungset ding

27 “Kathu ngaiho kaseipeh nahiuve, namelmau ngailu’vin, nahot bolteu thilpha bolpeh-un, 28 nagaosapteu phatthei boh-un lang, nabolseteu taopeh-uvin. 29 Nangeiphe lang khat beng chu lang khatjong dopeh-in, nasangkhol len lahpeh a chu nasangkhol sung nung jong peh than. 30 Nahenga thil thum chan pen, mi lahsa nathil ipi hijongle nung thum kit hih-in. 31 Min iti bol le chun nadeiyam chutobang chun miho bol’in. 32 Na-ngailuteu bou na-ngailut’u le ipi pachat nachan diu ham? Chonsete jengin jong angailuteu angailu’ve. 33 Nabolphateu jeng nabolphat’u leh ipi pachat nachan diu ham? Chonsete jengin jong chutia abol’u ahi. 34 Mukit ding nakinep nau miho bou napeh-u leh ipi pachat nachan diu ham? Chonsete jengin jong apeh jat amukitna diu chonseho henga apejiuve. 35 Amavang namelmateu ngailu’vin, thilpha bolpeh-un, mukit ding imacha gel louvin thil homun; chutile kipaman nasatah nasan diu, Chungnungpen chate nahi diu ahi; ajehchu Ama chu khohsahna heloute le Migiloute khoto them ahi. 36 Napau mi khoto them bangin mi khoto them’uvin.

Midang thu tanpeh

37 “Mi oimo hih-un, chutile oimo nachan lou diu ahi; mi them mosah hih-un, chutile themmo nakichansah lou diu ahi; ngaidamun, chutile ngaidam nachan diu ahi. 38 Peuvin chutile nakipe diu ahi; atena dimset, hongphal tah a kipea kiloh det kheh-a kison chah kheh alet lha hel’a kipe ding nahive; ijeh-inem itile mi natepehna ma maa nakitepeh diu ahi,” ati. 39 Jesun miho chu hiche thulem hi aseipeh-in: “Mitchon mitcho alamkai theiyem? Anilhona kokhuh alha lut lhonlou ding ham? 40 Ahilpa sangin seijui achungnung ngaipoi, akihil themsoh teng vang leh seijui tapou ahilpa tobang bang ahiji nai. 41 “Ibol’a nasopi mit’a bohsi chu namelchih keova, nang mit’a inkam tejen chu mulouva um naham? 42 Namit’a inkam tejen mudoh louva nasopi jah a, ‘Sopi, namit’a bohsi chu neilahdoh sah-in,’ nati theiham? Vo mipha lhem! Namit’a inkam tejen chu kilahdoh masah le chun nasopi mit’a bohsi chu kichentah a namutheiding ahi.

Thingphung agan akihei

43 “Thingphung phan gaphalou asep ngaipon, thingphung phalouvin jong gapha asep ngaipoi. 44 Hijeh chun thingphung agan akihei. Min lingphunga theichang ga aloupon, lingboh lah a jong lengpithei ga aloujipoi. 45 Miphan thilpha akholna alung gil’a konin thilpha asosah jin, misen thilse akholnaa konin thilse asodoh jie. Ajeh chu mihem lung gil’a kikhol chu athusei naa hung potdohji ahi.

Bul kiphu gotni

46 “Kaseibon bol louva ibol’a, ‘Pakai, Pakai,’ neitiu ham? 47 Ka henga hunga kasei ngaiya bol’a michu itobang ham vetsah unge. 48 Ama chu lei thuh tah laiya abul songpi chunga tunga insapa tobang ahi. Twisang alet’a vadungin asokhum vangin phatah a kisadet ahijeh-in hiche in chu asulong jou tapoi. 49 Koi hileh ja la ja naa bol lou chu abulpi bei leiset’a insapa tobang ahi. Vadungin asokhum teng hiche in chu alhupai jin, ain setdol chu amelse lheh jenge,” ati.

Luke 7

Jesun sepai jalamkaipa sohpa aboldam

1 Jesun mipi aseipeh nom jouse aseisoh phat’in Capernaum khoa aluttai. 2 Sepai jalamkai khat hin sahtah soh khat aneiyin, asohpa hi ana lel lheh jengin athi pai ding ahitai. 3 Jesu thudol ajah phat’in sepai jalamkaipan Jesu chu hunga asohpa boldam din akouding Juda mi upaho asol’e. 4 UPaho hi Jesu henga ahungun khohsah tah-in ataovun, “Hichepa hi nabolpeh dia kilom mong ahi; 5 ajeh chu ijat’u alungset’in Houthua kikhopna in jong eisah peh-ui,” atiuve. 6 Hijeh chun Jesu amaho toh ahung kilhontai. In kom ahung gei phat’in sepai jalamkaipan aloite asol’in ajah a, “Pakai, hung kigimbol datan, ajeh chu ka-insung nahung lut ding hi kakilompoi. 7 Hijeh a chu katahsa tah a nahenga hung dia jong kilom kisalou kahi; thun seitho jongle chun kasohpa chu dam jeng nante. 8 Keijong mi thu noiya natong kahin, kanoiya natong sepaiho aum kit’e. Khat jaha, ‘Chen,’ katileh achen, achom khat jah a, ‘Hungin,’ katileh ahungjin; kasohpa jah a jong, ‘Hiche bol’in,’ katileh aboljin ahi,” agatisah-e. 9 Jesun hiche hi ajah phat’in amapa chu kidang asa behseh jengin, anung jui mipi lama akiheiyin, “Kaseipeh nahiuve, Israel lah a jong hitobang tahsan len kamudoh poi,” ati. 10 Ahung kisol ho in lama ahung kile kit’u leh sohpa chu adamsan agatoh tauve.

Jesun Nain khoa meithainu chapa thisa ahinsah

11 Hiche nung hin Jesu Nain khoa alut’in, aseijuite leh mi tampin akilhonpiuve. 12 Khopi dongkot phung agah phah konchan ven, mithilong khat ahung kipudoh-in, athipa chu anun chapa chang khatseh a anei ahin, anu jong meithaisa ahitai. Khopi sunga pat mipin meithainu chu ahin lhonpiuvin ahi. 13 Pakaiyin meithainu hi amudoh phat’in alai natpin ajah a, “Kap hih-in,” ati. 14 Anai lut’in thilong kong atham leh alongpu ho ading tauve. Aman, “Vo golhang, kaseipeh nahi, thoudoh tan,” atileh; 15 mithipa chu atoudoh paiyin thu aseiyin, chuin Jesun ama chu anu apetai. 16 Mi jouse atija behseh jengun Pathen avahchoiyun, “Pathenin amite ahung vil’in, i-lah-uva Themgoa nasatah khat asohdoh tai,” atiuvin ahi. 17 Hiche Jesu chung chang thudol hi Judea gam pumpi le akimvel gamkol dunga akithangsoh heltan ahi.

John baptist misol ho

18 Aseijuiten John jah a thilsoh hicheng hi aseipeh uleh Johnin aseijuite mi ni akouvin 19 Pakai henga asol’in, “Ahung ding chu Nang nahi hitam, ahilouleh achom dang khat ka-nga nah lai diu ham?” tin agadohsah-e. 20 Solle teni Jesu henga ahung lhonin, “John baptist chun, ‘Ahung ding chu Nang nahi hitam, ahiloule achomdang khat ka-nga nah lai diu ham?’ tia dong dinga nahenga eihinsol lhon ahi,” ati lhone. 21 Hichepet tah a hi Jesun amaho, hivei chom chom veiho, lhagao gilou vop ho aboldama mitcho jong kho amusah ahi. 22 Hijeh chun Jesun solle te ni adonbut’in, “Kile kit’in John jah a chun nathilmu le najah lhon, mitchon kho amu’uva, elbaiin lam ajot’u, miphah ho suh thenga auma, na-ngongin kho ajah, mithisa kaithouva auma tahlelte Kipana Thupha akiseipeh hi gaseipeh lhonin; 23 chule keiya kipal lhuhna neilou mi chu-anunnom ahi,” ati. 24 John solle te ni che nungin Jesun John thudol aseiyin, “Gamthip’a ipi vedia cheji nahiuvem’? Huiyin peng amut ling ham? 25 Ipi vedia ba chadoh ji nahiuvem? Ponnem sil mi ham? Ven, von hoitah a kivona nom satah a um ho chu leng inpi dunga aumbouvui. 26 Achutile ipi vetnoma ba chedohji nahiuvem? Themgao ham? Ahi, najah-uva kasei ahi, Themgao sanga thupijo ahiye. 27 Ama thudol hi, ‘Ven, kasolle Nang sangin kasol masai, Aman nachena lampi semsa anakoi ding ahi,’ tia kisun chu ahitai. 28 Kaseipeh nahiuve, numei sung peng cheh ahivangin John pen geiyin ama sanga lenjo aumpoi, ahinla Pathen lenggama aneopen ama sangin alenjo nalaiye. 29 Mipi le kaidong hon asei ajah phat’un, John baptist chansah dol’a baptize changsa ahijeh-un, Pathen apah chauve. 30 Pharisee ho le Danthu them hon vang John baptist khut’a baptize achan lou jeh-un adiuva Pathen thilgon chu apaituve. 31 “Tukhang miho hi ipi to kitekah ding hi tam? Itobang mi hiuvem? 32 Amaho hi kailhanga tou chapang ho khat’in achom khat jah a, ‘Kuli kamutpeh-u le la nalam pouvin, Lapi kasah-u jongle nakap deh pouve,’ tia kihou ho bep ahiuve. 33 Ijeh-inem itile John baptist chu ahungin changlhah la nelou leng pitwi jong don louvin aum nan, ‘Thilhavop ahi,’ atiuvin; 34 Mihem Chapa ahungin changlhah anen lengpitwi adon leh, ‘Ven, neh hat le lengpi twi loppa, kaidong ho jolpa hi,’ atiuve. 35 Ahinla chihna chu achaten adihna aphot chet ahibouve,” ati.

Simon Pharisee pa in a Jesu

36 Pharisee khat’in Jesu chu nehkhompi din akouvin, Ama Phariseepa in’a alut’in atoutai. 37 Hiche khopi sunga hin chonse numei khat aumin, Jesu Phariseepa in’a anne dia tou ahen songval bom khat’a thao namtui choiyin ahungin, 38 Jesu nung, akhotaljum koma dingin, akap’in akengphang chu amitlhin asop’in, chuin asamin atheh ngimin, achop’in thao namtui chu anui. 39 Neh khompi dia kou Phariseepan hiche hi amu phat’in alung sunga, “Hichepa hi Themgao ahinah le ahung thama numei khu itobang mi ahi hentin, chonse ahijong he nah ta,” tin gel’e. 40 Jesun ajah a, “Simon nahenga seinom khat kaneiye,” atileh; aman, “Seijengin Houhil,” ati. 41 Aman, “Mi nin sumpa hom mikhat sum abat lhone. Khat’in denarii ja nga aban, khat pan som nga abai. 42 Asah lel lhon phat’in aman abat lhon angaidam tai. Hiche te ni koijoh hin ama chu hangailut jon tem?” atileh; 43 Simon in adonbut’in, “Atamjo angaidam peh pa hin te kati,” ati. Jesun ajah a, “Naseidih lheh-e,” ati. 44 Numei nu lam angan Simon jah a, “Hichenu hi ven! Na-ina kahung lut tan, kakeng silna din twibon neipe poi; hiche nu hin kakengphang te ni amit lhia asop’a asama atheh ngim ahi. 45 Nangin chop jong neichop pon, hichenu vang kahung lut’a pat tang louhel’in kakeng phang te ni achop chop jenge. 46 Nangin kalu jengbon thao nu louva, hichenun kakengphang te ni geiyin thao namtui anui. 47 Hijeha chu najah a kasei ahi, hichenun hibanga angailutna hi achonset tampi ki-ngaidam phot chenna ahin, lhomcha ki-ngaidampeh chun angailu lhome,” ati. 48 Jesun amanu jah a, “Nachonset chengse ki-ngaidam ahitai,” atipeh-e. 49 A ankong umpihon, “Chonset geiya ngaidam thei Ama hi koibep ham?” akitiuve. 50 Jesun numeinu jah a, “Natahsanin nahuhhing ahitai, lung monin chetan,” ati.

Luke 8

1 Phatchom khat nungin Jesun khopi jouse le khote jouse aban banin achonlen, Pathen lenggam Kipana Thupha ahil lhang len, seijui som le nin jong alhonpiuve. 2 Numei phabep, lhagao gilouvop’a kona adamsa ho le natna chom chom kona adamsah hon jong alhonpiuvin, hiche ho lah a hin Magdalene kiti Mary, asunga kona thilha sagi anodoh pehnu, 3 Herod neichingpa Chuza jinu Joanna, Susanna le adang ho tampi ahiuve. Numeiho hin Jesu le aseijuite chu amaho neiya konin ajenjiuve.

Muchi thepa thulem

4 Khopi jousea konin mi ahung hung jengun Jesu koma mi tamtah akikhomun ahile Jesun thulemin thu khat aseiyin; 5 “Muchi thepa alouva muchi then akonin athe leh muchi phabep lamsih a achun, min achonlih-in, chunga leng vachaten akilodoh tauve. 6 Phabepma songlheo chunga achun, ahintheina ding leithao aum loujeh-in ahung kedoh vangin agop paijitan ahi. 7 Phabep jong ling lah a achun, ling hon adep lihji tauve. 8 Phabep vang leipha leiya achukhan, ahung khangdoh in ajat jakhat chengin agai,” ati. Hicheng asei hin asamin, “A-ngaina ding nakhang neiyan ngai hen!” ati.

Thulem kiseilona

9 Hiche thulem hi ipi kiseina ham, tin aseijuiten Jesu adongui. 10 Hijeh chun Aman, “Nang ho hi Pathen lenggam thuguh chengse het dia kipea nahitauvin, adang ho vangin vejong leu amuchet thei lou diu jajong leu ahet khen thei lou diu jeh a a thulem jenga kiseipeh ahiuve,” ati.

Jesun muchi the thulem ahilchen

11 “Thulem chu hiche kiseina ahi; muchi chu Pathen thupha ahi. 12 Lamsih a chu kitiho chu Pathen thupha jataa, ahivanga atahsan dauva huhhinga aum louna diuva, Diabol hunga alung gil’a Thupha chu alahmang pehji miho ahiuve. 13 Songlheo chung leipatnaa chu kitiho chu thupha ajah tenguleh kipah tah a kisanpai jenga, ahivanga jungbei ahijeh-uva chomkhat tahsan jong le patepna phat ahung lhun phat le pul lhaji miho ahiuve. 14 Linglah a chu kitiho chu thupha ajatauvin, ahinla hinkhoa lungkhamna tin cheng, haona le leiset nopsahna chengsen alonvuh a, aga pilhing thei louva um miho ahiuve. 15 Leipha laiya chu kitiho vang chu thupha ajah tengu leh lungthim phatah le dih tah akolchahkheh a aga pilhin kahsea pangdet jing miho ahiuve.

Bel kikhuden meivah

16 “Koiman mei avah-in bel akhu ngaipon, jalkhun noiya jong atung ngaipoi. Ahung lut chanin meivah chu amusoh din thaomei akikhu khum jong ima aumpoi. 17 Ajeh chu khovah a kiphong doh lou ding ima akiselguh aumpon, phondoh a hetdoh lou ding akikhu khum jong ima aumpoi. 18 Iti najah-um ching theiyun; ajeh chu aneiya kipah bea, aneilou chu aneiya agel chengse jong kilahpeh ding ahi,” ati.

Jesu nu le Jesu sopite

19 Jesu nu le Jesu sopi pasal ho ahenga ahungu leh mipi jeh chun akom alut theipouve. 20 Mihon, “Nanu le nasopi pasal hon namu nomun pama adingui,” tin Jesu jah a aseipeh-ui. 21 Aman ajah-uva, “Kanu le kasopite chu Pathen thu jop’a bol ho chu ahiuve,” tin adonbut’e.

Jesun twipi ki-nonglai aphothip

22 Nikhat Jesu aseijuite toh kong sunga alut’in, chuin ajah-uva, “Dil gallang khat’a galkaiyu hite,” atijeh chun akitol tauve. 23 Akitolnauva Jesu a-ihmutai. Hichun huipi hatah-in dil chu anuh leh kong sung twi dimpai ding ahitan, seijuite akicha lheh tauve. 24 Seijuite ahungun Jesu athou khangun, “Kapu, kapu, amangthah kahitauve!” atiuvin ahi. Jesu athouvin huipi le twi kinonglai chu haphoa apho leh, huisepi chu athip’in, abeihel jenge. 25 Jesun ajah-uva, “Natahsanu hoilam ba hitam?” atileh; amahon kidang asauvin atijauvin, khat’in khat jah a, “Hichepa pi hi hoi koi hitam, huipi leh twikinong jeng jong apho leh athun anung jenge,” atiuve.

Jesun Gerasa a thilhavop aboldam

26 Jesu le seijuite chu Galilee to kigalsai Gerasa agamkol’a akitol lut tauve, 27 Konga ahung kumlhah lhah-in khopia hungkon pasal khat’in akimupin, ama chu phat sotpi thilhavop ahitan, pon pona sil lou, in’a cheng jong hilou lhan lah jenga cheng ahitai. 28 Amahin Jesu amudoh phat’in oging tah-in ahinsamin, “Pathen chungnungpen Chapa Jesu, itile nati ham? Nahenga katao ahi, neibol gim hih-in!” ati. 29 Ajeh chu Jesun lhagaoboh hi mipaa kona hung potdoh dia asol ahi. Tamtah vei lhagaoboh hin mipa chu amatjia, bul atuh-uva thih khaova ahen vangun, bul atumkeh-in akihenna abot tanjin, lhagaoboh chun gam thip laiya anolutji tai. 30 Jesun, “Namin ipi ham?” ati leh, asunga thilha tampi lut ahijeh-in, “Janel kahi,” tin adonbut’e. 31 Hichun noimigama asol louna diuvin Jesu henga atao tauve. 32 Vohcha tampi hon khat lhang chunga chu lha ahiuvin, vohcha ho sunga chu alutsahna diuvin thilha ho chu Jesu henga ataovu leh, anoppeh tai. 33 Thilha ho chu mipaa koin ahung potdoh-un, vohchate sunga alut’u leh, vohchate chu songkol’a alhai lhauvin twikhanglena alha lut’un athigamtauve. 34 Vohcha ching hon thilsoh hi amuphat’un ajam’uvin khopi sung le loujao dunga thu alhutsoh tauve. 35 Mipi athilsoh vedia Jesu henga ahungu leh, asunga kona thilha potdohna mipa chun pon kisil’a lung lima Jesu kengbul’a tou amu’vin, atijatauve. 36 Thilha voppa kidamsah amittah a muhon aseipehui. 37 Akimvel Gerasa gamkol’a cheng jouse atija behseh jengun Jesu chu akom’uva kona potdoh din angeh-uvin ahi. Hijeh chun Jesu konga alut’in akile kittai. 38 Thilhaho potdohnapa chun Jesu koma aum jingna dia athumleh, aman asol’in ajah a, 39 “Na-in lama kile kit’in, Pathenin nabolpeh thil chu gaseijon,” ati. Hijeh chun ama achen, Jesun abolpeh thil chu khopi sung thongsoh-in agaphongjal tai.

Jairus chanu le Jesu ponsil thamkha numeinu

40 Jesu hung kile kit chu mipin ana ngah jingun alamtouve. 41 Hichun ven, Houthua kikhopna in vaipo Jairus kitipa chu ahungin, Jesu kengbul’a aboh khup’in a-in’a hungpeh din a-ngeh tai. 42 Ajeh chu achanu khatseh, kum som le ni lhing bep chu alaichat chat’in ahi. Jesu achephat’in mipin aneh chinto jengui. 43 Numei khat hi kum som le ni athia long, anei chasuna louthem ho akijensah vanga koimachan ajen dam joulou ahitai. 44 Hichenu hi Jesu nung lama ahungin apon mongkai atham leh athi lon atang hel’e. 45 Hichun Jesun, “Koiham ei tham’ah?” atileh; Koimachan kahi atipon, Peterin, “Pipu, mipin toma neh chinto jinga,” ati. 46 Ahivangin Jesun, “Mi khat’in eitham monge, ajeh chu keiya kona thilbol theina thahat apotdoh kahei,” atichang mel’e. 47 Numeinun aki-imthei louhel ding ahet phat’in kihot pum pumin ahungin Jesu angsung laitah a Jesu athamkhahna jeh ahil chenin, chule apettah a damhel thu aphongdoh tai. 48 Hichun Jesun ajaha a, “Chanu, natahsanin nadamsah ahitai, lung mongin chetan,” ati. 49 Jesun thu asei nalaiyin Houthua kikhopna in vaipopa in’ a hungkon mi khat’in, “Nachanu athitai, Houhil chu sulung gim ta hih-in,” ati. 50 Asei hi Jesun ajan, “Olmo hih-in, tahsan poutan, chutile kihinsah tei nante,” atipeh-e. 51 Jesu vaipopa in alhunin Peter le John chule Jacob, chapangnu nu le pa tilou midangin ajui lut ding anompoi. 52 Mipin chapangnu akauvin, adip abeng beng jenguvin ahi. Jesun, “Kap hih-un, athi ahipoi, a-ihmu ahibouve,” ati. 53 Ahinla athi ahetjeh-un amoh nuisat tauve. 54 Jesun akhut’in abanin, “Boinu, thouvin,” tin akoutai. 55 Hichun alhagao ahung kile kit’in ahileh chapangnu athoudoh pai jenge. Chuin Jesun neh ding apeh diuvin aseiye. 56 Anu le pan kidang asa behseh jeng lhonin, ahivangin athilsoh chu koimacha jah a aseipoh louna diuvin Jesun akham chah kheh-e.

Luke 9

Som le ni kisol na

1 Jesun som le ni chu akoukhomin thilhaho nodohna ding thu nei na le hivei chom chom boldam na thei thahat apei; 2 chuin amaho chu Pathen lenggam phongjal ding le adammo boldam din asoltai. 3 Ajah-uvah, “Lampi dunga din thil imacha, tenggol hihen, sakhao hileh, changlhah le sum jeng jong kiken dauvin, sangkhol jong tho ni ah dauvin. 4 Itobang in hojongle nalut nauva chun pansauvin, 5 Nalhunsah lou ho vang chu khosung nadalhah tengule gihsal hetsah nan nakengphanguva leivui thing lha dentauvin,’ ati. 6 Amaho akipatdoh-un akho khoa Kipana Thupha ahil lhang leuvin muntina ana aboldam’uve.

Herod lungjin

7 Gambih vaipo Herod chun nakitong thil kibol chengse ajan, mi kimkhat’in John athia kona thoudoh kit a aseijeh-un Herod alung gimin, 8 abangman Elijah hung kilah kit’in aseiyun, kon khat’in jong gol luilai Themgao ho khat pen thoudoh kit bangin aseiyui. 9 Herod chun, “John la alukatan tan, athudol kajah pahi koiba hintam?” tin aseiyin mujong amunom lheh-e.

Jesun mi sang nga avahva

10 Solchah ho ahung kile kit-un athilbol anatoh jouseu Jesu aseipeh tauve. Jesun amaho chu Bethsaida khopia atumin apuidoh tai. 11 Ahinla mipin amudoh-uvin anung ajuitauve. Jesun amaho jong hi alamdot cheh-in ajah-uvah Pathen lenggam thudol aseipeh-in, dam ding ngaicha chan aboldamin ahi. 12 Nisa lhumtel tul phat’in som le ni chu ahungun ajah a, “Eiho gamthip laiya um ihiuvin, akimvel kho dung le loujao dunga acheuva ge-na ding le neh le chah akiholna diuvin mipi hi solmang tan,” atiuve. 13 Jesun ajah-uvah, “Nanag hon nah ding peuvin,” atileh; amahon, “Keihon changlhah pheng nga le nga ni val kinei louva, kacheuva mi hijatpi neh khop ding kaga choh diu ham?” atiuve. 14 Miho chu sang nga jen ahiuve. Jesun aseijuite jah a, “Miho hi som nga chengin aloi aloiyin tousahun,” atileh; 15 amahon hiti chun abonchan atousah tauve. 16 Chuin changlhah pheng nga le nga ni chu alan, van lam aven, phatthei aboh jouvin ahehbal bal’in mi ang sunga luipeh din seijuite apetai. 17 Mihon avaset geiyin aneuvin, aneh moh alokhomu leh paipeh som le ni adimset’e.

Peterin Jesu thudol aphondoh

18 Phat khat hi Jesu atuma ataopeh’in seijuite ahung kikhomun, Aman ajah-uva, “Mipin Kei hi koi ahi, eitiuvem?” tin adonge. 19 Amohon, “John baptist,’ tiloi aumin, abangin, ‘Elijah ahi,’ atin, konkhatsen vang, ‘Gollui laiya Themgao hokhatpen thoudoh kit hiya chu,’ tin aseiyui,” atiuve. 20 Amaho jah a, “Nang hon koiba ahi neitiuvem?” atileh; Peterin, “Pathen hungkon Messiah nahi,” ati.

Jesun athi le athodoh ding asei Masah

21 Hiche thu hi koima jah a asei louna diuva Jesun seijuite ahil chah-in 22 “Mihem Chapan genthei tintang athoh a, upate le Thempu ho chule Danthu themhon apaidohuva atha diu, hijongleh nithum ni leh kaithouva um ding ahi,” tin aseiye. 23 Jesun miho jah a, “Keima eijui nom chu ama ka-ngaitoma niseh a thingpel kiput’a eijui ding ahi. 24 Ijeh-inem itile ama kihuhhing nom chun athilto ding, Keima jal’a thilto chun kihinsona aneiding ahi. 25 Ajeh chu min vannoi leiset pumpi neihen lang ahinkho kisuh mang leh ipi phatchompin tem? 26 Mi khattouvin Kei le kathu ajachatpi leh Mihem Chapan jong Ama loupina le Pa le Vantil Thengte loupina ahung teng ama chu ajumso sing ahi. 27 Dihtah akaseipeh nahiuve, hikoma ding ho lah a miphabep hi Pathen lenggam amu kahseuva thina tep kha lou ding aum’uve,” ati.

Jesu vou kikhel

28 Thu hicheng aseijou niget nungin Jesun Peter le John chule Jacob apuiyin tao din molchunga akaltouve. 29 Ataopet chun amaiso vou akikhel’in aponsil abanlot lot’in alhe lah lah jenge. 30 Ven, mi ni toh akihou linm’in, amani hi Mose le Elijah ahin, 31 loupi tah-in ahung kilah lhonin, Jerusalema Jesu athia Pathen thilgon asuh bulhit ding thu akihouvui. 32 Peter le aloite ni chu a-ihmut soh ngui ngui jengun; ahung lipdoh phat’un Jesu loupina le akoma ding te ni chu amu’ve. 33 Mose le Elijah chun Jesu adalhah pet lhonin Peterin Jesu jah a, “Pipu. hikoma i-umu hi anom’e, Nanag ding khat, Mose ding khat chule ELijah ding khat lhambuh thumsong ung kate,” tin ipi aseilam helouvin aseiye. 34 Aman hiche aseipet chun meilhang khat’in ahinle khu’vin, meilhang lah a akitol lut jengu chun akichauve. 35 Meilhang lah a konin ogin khat hin, “Hiche hi kadei lhen Ka-chapa ahi, asei ngaiyun,” ati. 36 Ogin kichai phat’in Jesu chu achangseh ahitai. Seijuiten athilmi hi hichepet hin koimacha seipeh louvin a-im chah kheh-uve.

Jesun lhagaoboh vop chapang khat aboldam

37 Ajing nikhoa molchunga kona ahung kumsuh leh mi tamtah-in analamdot’uve. 38 Mipi lah a konin mi khat ahung pengjah-in, “Houhil, lungset’in kachapa neivetpeh-in, chapa chang khatseh a kanei ahin, 39 lhagao khat’in amatji teng phot lot louvin apengjah jin, aveilhuh teng chilphon alhan, lhalel lel’in alha jin, ama la abeipai ding ahijitai. 40 Naseijuiten eideldoh peh diuva ka-ngeh vangin anodoh joupouve,” ati. 41 Jesun adonbut’in, “Vo, tahsanan bei khang lamvai mite!Itih chan ka-umpia kakho ngai ding nahiuvem? Nachapa chu hikom’ah ahinpuiyin,” ati. 42 Ahungpet tah-in thilhan aheh lhun avei ngoi jenge. Hichun Jesun lhagaoboh chu haphon aphoh-in, chapangpa chu aboldamin, apa koma anungsol pehtai. 43 Mihon Pathen Thahat chungnung chu kidang asalheh jenguve.

Jesun athi ding asei masah kit

Mihon athilbol kidang asah laitahun Jesun aseijuite jah a, 44 “Hicheng thu ho hi nang ho dia kisei ahi, lung nachangin ngaiyun; Mihem chapa hi mihemte khut’a pehdoh aum ding ahi,” ati. 45 Seijuiten asei chu ahechenpouve, ipi kiseina ahi ahetdoh louna diuva kiselpeh ahin; athusei doh chet ding la akichauvin ahi.

Alenpan koiham

46 Seijuite lah a alenpen ding thua kinelna asohtai. 47 Jesun alung gil’uva akikal nau chu ahen, chapang khat akaiyin akoma atousah-e. 48 Chuin seijuite jah a, “Koi hijngle Keima min’a hiche chapang kisan chan chun Keima eisan ahin, Keima eisanga chun Eihinsolpa asan ah; ajeh chu nalha-uva aneopen chu alenpana pang ding ahi,” ati.

Nadou lou chu nang lama pang ahi

49 Johnin adonbut’in, “Pipu, mikhat namin a thilha nodoh kamu’vin, keoho toh lhona nang najui loujeh-in kakhamtauve,” ati. 50 Jesun ajah a, “Kham dauvin, nadou lou pouvu chu nang ho lama pan gahi,” ati.

Samaria miho kho khat’in Jesu asandau

51 Jesu lah touva aumna ding phat anai jep jep phat’in Jerusalema che din akiheitai. 52 Jesun solle ho asol masan, aamho chu acheuvin alhunna ding gonsa koipeh din Samaria miho kho khat’a alut’uve. 53 Samaria mihon Jesu chu Jerusalema jon a chego ahijeh-in asang tapouve. 54 Aseijuite ni Jacob le Johnin asandau hi amudoh lhon phat’in, “Pakai, vana kona meikou kakou lhah lhona kakahvamsah diu nadeiyem?” ati lhone. 55 Jesu akiheiyin amani chu haphon aphoh-e. 56 Chuin khodanga achetauve.

Jesu seijui dia kilomho

57 Alamjot laiyun pasal khat’in Jesu jah a, “Nache na chan a jui ing kate,” ati. 58 Jesun ajah a, “Gam-ui hon koaneiyun, chunga leng vachaten jong bu aneiyui, Mihem Chapan vang alu ngapna ding mun jeng jong aneipoi,” ati. 59 Michom khat jah a jong, “Neijuiyin,” ati. Ahinla aman, “Pakai, amasan cheng ting kapa gavui ta dinge,” ati. 60 Jesun ajah a, “Mithi chu mithi kivui din dalhan lang, chen Pathen leng gam thu seiphongjon,” ati. 61 Midang khat’in jong, “Kenvang najui jeng inge Pakai, ahin amasan ina umho ga-lha tadinge,” ati. 62 Jesun ajah a, “Loukai dia langkon tuhsa haidia kihei kit chu Pathen lenggam din aphachompoi,” ati.

Luke 10

Som sagi le ni kisol lo na

1 Hiche nung hin Pakaiyin misom sagi le ni alhengdoh-in, chedia agotna khopi jouse le muntin’a ni nin asol masai. 2 Amisol ho jah a, “Chang-at ding atam lheh jengin, natong’ah alhome; chang-at ding mi ahinsol na din chang-at na Pakai henga taovun. 3 Cheuvin, ven, ngeihon lah a kelngoinoute kilhalut banga kasol nahiuve. 4 Sumbom hihen sakhao hileh kengchot ho geiyin kiken dauvin, lampi dunga jong koima salam bol dauvin. 5 Nalut nau in tin’a amasan, “Hiche in’a hin lung mon leng hen,” tiuvin. 6 Hikoma chu chamna dei mi aum leh ama chunga chu nalungmonu chun tin, aumlou vangleh nahenguva hung kile kit ding ahi. 7 Hiche in’a chun pansauvin, amahon napeh peh-u chu neuvin don’un ajeh chu natong’an atohman asan lom ahi. In khat’a konin inchoma kichon dauvin. 8 Khopi sung nalut’uva mihon nalamdot’u jong leh, na-anga aluiyu chu ne jengun; 9 chukoma adamlou ho boldamun, ajah-uvah, “Pathen lenggam chun nakomu ahinphatai,’ tin seiph-un. 10 Khopi sung nalut’uva mihon nalamdot lou vangu leh akhosung lamlen dunga potdoh-un lang, 11′Imacha kitimatna inei louvu ahitai, nakhopi sunguva leivui kakengphanguva beh geiya kathin lhah khum nahiuve; hijongleh Pathen lenggamin hilai ahinphatai, ti nahet diu ahi,’ tin seipeh-uvin. 12 Najah-uva kasei ahi, thupitan nikhoa chuche khopi thoh sanga Sodom khopi thoh oljo ding ahi.

Lunghei lou khopi adajeu

13 “Ohe Chorazin khopi nada ahin, ohe Bethsaida khopi nada ah! Ajeh chu nakhosunga na kitong thil kibol thahatna ho hi Tyre le Sidon a kibol hileh sot’a lungaheiyuva, vutvam kinu’va khaodip pon kisil’a tou diu ahitai. 14 Thupi tan ni leh nathoh diu sanga Tyre le Sidon thoh oljo ding ahi. 15 Capernaum nangma van geiya choisanga um ding nahim? Noimigama kikai lhading nahiubouve. 16 Koi hileh naseiyu ngaiya chun Kei seijong angai ahin, nang ho pamsea chun Keijong eipamse ahi; Keima eipamsea chun Eihinsolpa geiya apai ahitai,” ati.

Som sagi le ni hung kile kit

17 Som sagi le ni ho chu kipah thanom tah-in ahung kile kit’uvin, “Pakai, Nangma min jal’in thilha ho geiyin kathu’uva anung jenguve,” atiuve. 18 Jesun ajah-uvah, “Vana kona Satam kolpha banga hung lhasuh kamui. 19 Ven, gul ho le aipi ho chotphana thei, chule melmapa chunga thahat kapeh nahiuvin, imachan nasuhset lou diu ahi. 20 Chule lhagao ho nathu’va anunjeh seh chun kipah hih-un, vana naminu akisutjeh-in joh kipahuvin,” ati.

Jesu kipa

21 Hichepet chun Lhagao Thengin Jesu kipana adimin hijeh chun aman, “Hepa, van le lei Pkai; thil hicheng hi michingte le lungthim themte na-impeh a, milham ho hengjoh a naphondoh jeh-in kapah chai. Henge, Hepa hitia bol hi nadeilam ahiye. 22 “Thil ijakai ka-pan eipehdoh ahitai; Pa tilouvin Chapa aheon, Chapa le Chapan aphodoh peh mi tilou koiman Pa ahepoi,” ati. 23 jesun seijuite lama akiheiyin atumbeh-in, “Nang ho thilmu hi amu jouse vangpha ahiuve. 24 Kaseipeh nahiuve, nathilmun hi Themgao tamtah le leng tamtah-in mu atup lheh vangun amupha tapouvin, jehding adei lheh vangun najah tobangu ajapha tapouve,” ati.

Samaria mi miphapa

25 Jesu patepna din Danthu themho khat adingdoh-in, “Houhil, tonsot kmelou hinna kanei theina dia ipi kabol ding ham?” atileh; 26 Jesun ajah a, “Danthua ipi kisun nasimdoh-em?” ati. 27 Aman adonbut’in, “Nangman nalungthim pumpi le nahinkho pumpi, nathahat pumpi le nalung gil pumpia Pakai na-Pathen na ngailut’a chle nangma nakingailut ding ahi akiti,” ati. 28 Jesun ajah a, “Nadonbut dih lheh-e, hiti chun bol le chun nahin ding ahi,” ati. 29 Ama them akichan nomjehin Jesu jah a, “Kaheng kakom chu koipen ham?” tin adonge. 30 Adonbutnan Jesun,’Pasal khat Jerusalema konin Jericho lama avah lut’in, amahon aponsil ahoh lhauvin, avouvin athibang bangin adalha tauve. 31 Hichepet tah hin Thempu khat’in hiche lampi chu ahokhan, mipa chu amudoh phat’in lamchom langa apeldoh tai. 32 Hitobang hin Levi mi khat man hikom chu ahinjot pan, mipa chu amudoh phat’in lamchom lang khatma apeldoh kittai. 33 Ahin Samaria mi kholjin vah le khat’in ahintoh khan, amudoh phat’in alainatpi lheh jenge. 34 Mipa chu anailut’n amaha chengse atompeh-in, thaotwi lw lengpitwi anun, atouna gancha chunga adomtoh-in, jinlhunin’a ahinpo lut’in ajentai. 35 Ajing nikhon denarii ni alan, jinlhun inngahpa apen, ‘Hichepa hi analimbol’in, sum nasuh mangbe leh kahung kit teng sa-nange,’ ati. 36 Hicheng mi thum lah a hi gucha michomho lah a vah lutpa heng le kom chu koipen hinte natim?” atileh, 37 aman, “Ama hepi tah a bolpa chu,” ati. Jesun ajah a, “Nang jong chen lang chutin gabol tan,” ati.

Jesun Martha le Mary agavet

38 Jesu le aseijuite akholjin nauva kho khat’a alut tauvin, Martha kiti numei khat’in a-in’ah alhunsah-e. 39 Ama hin sopi numei Mary kiti khat aneiyin, ama chu Pakai kengbul’a atouvin aseichan angai ngai jenge. 40 Martha vang atoh idng tamjeh-in thu ngai manin aumpon, ahungin, “Pakai, kasopiun kachangseh a na eitohsah hi khoh nasah lou ngap ham? eikithopi din seipeh tang-em,” ati. 41 Pakaiyin Martha adonbut’in, “Martha, Martha, thil tampi ngaitoa lung gim nahi. 42 Khohsah ding thil khatseh bou ahin, Maryn aphalai akilhentan, kilahpeh kit louhel ding ahitai,” ati.

Luke 11

Jesun taoje ahil

1 Munkhat’a Jesu ataovin, atao jouvin aseijuite khat’in ajah a, “Pakai, JOhn aseijuite taoje aahil bangin taoje neihil’un,” ati. 2 Jesun ajah-uvah, “Natao teng hitin seiyun: ‘Pa namin theng kijabol jing hen, Nalenggam hung lhung hen; 3 Niseh a kaneh diu anneh neipeuvin, 4 Eiba jouseu ka-ngaidam bangun Kachonsetnau jouse ngaidamin; Chonset lo na thei petepnaa neilhut hih-un,’ tiuvin,” ati. 5 Jesun ajah-uva, “Nang ho khatpenin jol neihan, ama chu jan khangkimin ahenga chehen lang ajah a, ‘Kajol, bat din changlhah pheng thum neipen. 6 Kajol kholjin khat ahun lhungin aneh dia a-ang a luipeh ding ima kaneipoi, ti hen; 7 aman insunga konin, ‘Neisu gim hih-in kot akikhah tan, kachate jong kei jong jalkhuna aklumtauve, hung thouva nang ima pethei kahipoi,’ ati. 8 Kaseipeh nahiuve, ajol ahijeh chun thova ima peh ding go hih jeng jong leh, khatpan jummo tah a athum tun tun jeh chun thouvintin angaichat jat chu apeh tei ding ahi. 9 “Kaseipeh nahiuve, thumun namu diu ahi, kiuvin kihonpeh ding ahiuve; 10 ijeh-inem itile athum chan achangin, ahol’an amun, akiuva akihonpehji. 11 Nalah-uva mipa koipen nahiuvem achapan nga athum leh akhel’a gul pea; 12 ahtui athum teng aipi peding’ah? 13 Migiloutah nang hon bon thilpha pehji nahet’u leh ichan geiya phajoa vana Pa Pathenin ahenga thumte Lhagao Theng apeh ding hitam!” ati.

Jesu chule Beelzebul

14 Jesun thilhavop paomo khat anodoh leh, thilha apotdoh phat’in paomopa chu apao theiyin, mipin kidang asalheh jengui. 15 Mi phabep’in vang, “Thilha ho nodohna dinga thilha lengpa Beelzebul’in tha apeh hibouva hi,” atiuve. 16 Konkhat man apatepnan vana kona melchihna avetsah diuvin a-ngeh-ui. 17 Alung gel’u ahen Jesun ajah-uvah, “Lenggam kikhentel’a ama le ama kidouva chu amangthah jin, insung kkhen tel jong alhujin ahi. 18 Satan jong kikhentel hen kidouto leh alenggam iti dinjou ding ham? Beelzebul kamanchah a thilha ho nodoh a neisei jeh-uva kasei ahi. 19 Ken thilha ho nodohna dia Beelzebul kamanchah leh nachateuvin koiba amanchah hiu ham? Hijeh a chu nachatauvin thammo nachan diu ahi. 20 Thilha ho nodohna dinga Pathen khutjung kaman ahivangleh Pathen lenggam nalah-uva hung lhung ahitai. 21 Mihat’in manchah akipat’a a-in aki-nga laisen anei chengse ahoiye; 22 mihatjon abulna ajotho teng vangleh akisonna galvon alahpeh jin, athil ho chompeh-in ahomjaljitai. 23 Koi hile Keilama pang lou chu eidouvah ahin, eikhop khompi lou chu athecheh ahiye.

Lhagaoboh hung kile kit

24 “Lhagaoboh chu mihem sunga kona apotdoh tengleh twibeina muntin’a avah len, choldo mun aholjie. Mun amu lou teng leh, “Kahung potdohna ka-in’a chun kile kit tange,’ atiji. 25 Ahung leh akitheh ngima akigontoh amui. 26 Chuin achen ama sanga gilou cheh lhagao sagi agapuiyin, mipa sunga chun alut’un achengtauve; chutah chun mipa um chan hi amasaa sangin akhoh cheh jon ahi,” ati.

Nopna tahbeh

27 Jesun hiche hi asei nalaiyin, mipi lah a pangin numei khat’in ahinsamin, “Navop’a noitwiya navahdoh numei chu anun nom’e,” ati. 28 Jesun vang, “Pathen Thupha ngaiya nit ho chu anun nomjoi,” ati.

Khang gilou miten melchihna ahol

29 Mipi ahung kikhopsoh phat’un Jesun, “Hiche khang hi khang gilou ahi, melchihna ahol vangun Jonah melchihna tilou adang kipe louhel ding ahi. 30 Jonah Nineveh kho mite dia melchihna ahibanga, Mihem Chapa hiche khanga dia melchihna pang ding ahi. 31 Lhang gam lengnu chu hiche khang mite toh hung thoudoh khoma thupi tannaa amaho themmo achansah ding ahi; ijeh-inem itile ama chu leiset kolmonga konin Solomon chih thu ngai din ahungin, ahinla ven, Solomon sanga loupijo khat hikoma aume. 32 Nineveh kho mite toh chu hiche khang mite toh hung thoudoh khoma thupi tannaa hiche khang mite hi themmo achansah diu ahi; ajeh chu amahn Jonah thusei phongin lung aheiyuve; ahinla ven, Jonah sanga loupijo khat hikoma aume.

Tahsa dinga meivah

33 “Koiman mei avah-in ningchong muthim’ah akoi ngaipon, lo jong akhu khum ngaipoi; ahung lut chan muthei din meivah khom chunga atungji bouve. 34 Namit hi natahsa meivah ahin, namit achim laisen natahsa pumpi avah-in, achim lou teng natipumpi athimjitai. 35 Nasunga um vah chu thim am avephan. 36 Athimkom beihel’a natahsa pumpi avah leh meivah vah tah-in nasalvah banga apumpia vah jeng ding ahi.

Jesun Pharisee ho le Danthu them ho ahousal

37 ″Jesun thu asei chai phat’in Pharisee khat hin an nehpi din akouve; ama achen ankong aumtai. 38 Ahin an neh kona akisil lou chu Phariseepan adatmo lheh-e. 39 Pakayin ajah a, “Tun ahile Pharisee nang hon khon le lheng apolam nasil ngim’un, nasungu la hunamalah le gitlou dimset ahi. 40 Lungthimbei ho, apolam sempan asung lam jong asem hilou ham? 41 hijeh chun asunga thil ho chu vaichate peuvin, chuteng ven, nang ho dia thil jouse theng ding ahi. 42 “Ohe, tun vang Pharisee nadau ahi! Nang hon pudina le louna kha geiyin, anche louhing jousea soma khat napeuvin, thu adih-in natanpouvin, Pathen ngailut ding nadonpouve. Adang ho nabol’u toh kitoh a hiche te ni jong nabol diu ahi. 43 “Ohe Pharisee ho ada nahiuve! Nang hon Houthua kikhop na indunga touna pha pha nalhengun, kailhanga min nasalam diu nadeiyui. 44 Ohe ada nahoiuve! Heshen louva mihon achotpeh peh buikhuh ho tobang nahitauve,” ati. 45 “Danthu them ho khat’in adonbut’in, “Houhil, hiche naseiho hin keiho nei-engkal’uve,” ati. 46 Jesun, “Ohe, Danthu them nang ho jong ada nahiuve; Poh jouhoi hilou pohgih hahsa mi nagonpeh-un, nang hon nakhut muh jenga jong khoiloh din nagopouve. 47 Ohe nadau ahi! Napu napateuvin Themgao ho athat’un, nang hon alhanu nasempeh-ui. 48 Napu napateu thilbol chengse chu phatsah a ahettohsah nahiuvin, amaho athat’a pang’a nang hon alhan nasempeh-u ahi. 49 Hijeh chun Pathen chihnan aseiyin, ‘Keinan nalha-uva Themgao ho le solle ho kasol ding, hiche ho chu abang bang athauva, adang abol hesoh diu ahi,’ ati. 50 Hichu vannoi kisemtil’a pat Themgao ho thisan kiso jouse hiche khang mite chunga hi, 51 Abel thisana pat, maicham le muntheng kah a Zechariah thisan kiso geiya phu lahna ding ahi. Henge, kaseipeh nahiuve, hiche khanga hi aphu kila ding ahi. 52 “Ohe Danthu themho nadau ahi! Hetna kot-heh nala mangun, nang ho geiyin nalut pouvin, lutkigo ho jong nalutsah pouve,” ati. 53 Jesu chukoma kona apotdoh phat’in Danthu them ho le Pharisee ho alung himo lheh jengun thu tampi adong lhoiyun, 54 athuseiya mat din achang lhigeh jenguvin ahi.

Luke 12

Phat lhem louna dia Jesun mi agihsal

1 Mi asang sang akikhop’a khat’in khat chunga lam ajot leu phat’un amasan Jesun aseijuite jah a aseiyin, “Pharisee ho phat lhemna chol lah a kiging phauvin. 2 Hodoh lou dia kikhu khum aumpon, hetdoh lou dia kiselguh jong aumpoi; 3 ajeh chu muthima naseiyu khovah akija ding, indan sung nunga mi nabenga naseiyu chu intingvuma kisap tho ding ahi. 4 “Kagol kapai nang ho jah a kasei ahi, tahsa thah theiya abana ima bol thei louho kicha hih hel’un. 5 Gin ding pentah vetsah unge: mithat’a da muna lelutna tah neiya Pathen bou gingun. Henge, kaseipeh nahiuve, Amabou ginguvin! 6 “Vasah nga khu Paisa ni man a kijohji lou ham? Ahin alah-uva khat jeng cha jong Pathen ang’ah suhmil’in aumpoi. 7 Nalu chunguva nasamjang jouseu geiya simtohsa kikoi ahi; kicha hih-un, vasah tampi sanga jong nang ho manlujo nahiuve.

Mihem maiya Christa phondoh

8 “Kaseipeh nahiuve, koi hi le mihem angsunga Keima eiphongdoh chan chu Mihem Chapan jong Pathen Vantilte angsunga aphondoh sing ahi. 9 Koi hi le mihem angsunga eiseileppa chu Pathen Vantilte angsunga seilep’a um ding ahi. 10 Koi hi le Mihem Chapa douna thusei chu ngaidam chang ding, Lhagao Theng taitom vang chu ngaidam chang louhel ding ahi. 11 Mihon Houthua kikhopna in dung le vaibol ho angsung, chule thunei ho angsunga nakailut tengu leh iti nakihon’a ipi nasei diu lungkham hih-un, 12 ipipen nasei diu apettah le Lhagao Thengin nahil nauvinte,” ati.

Hao-ngolpa thulem

13 Mipi lah a konin mi khat’in Jesu jah a, “Houhil, kasopipan gou eikihoppi din seipeh-in,” ati. 14 Jesun ajah a, “Jol, nangni chunga thutan ding le thil hoppeh dia kon eitun beh em?” ati. 15 Jesun ajah-uvah, “Chingtheiyun neipap kiloset’a konin kikangseuvin, ajeh chu nei le gou bulhin jeh a mihem hing’ah ahidehpoi,” ati. 16 Aman thulem khat aseiyin, “Mihao khat louva neh le chah apung lheh-in, 17 hijeh chun aman, “Ipi kabol ding ham? Kalhosoh kholna idng mun a-ong tapoi,’ atin, 18 Hitin bol inge, kachangsal ho phe lhang ting asanga lencheh sange; hikoma kasuhlou chang jouse leh thil dang jouse koitange; 19 chutengleh, “Kahinkho, kum tamtah nahding thil lhing set’in nakholsoh tai, choldon, nen, donin nomsa tah-in um tan,” tinge,’ ati. 20 Ahinla Pathenin ajah a, Mi-ngol, tujan teng nahinkho kisubei ding ahitai, hichea kholsa thil jouse hi koi chang ding hitam?’ ati. 21 “Hitobang mi hi ama chang dia gou khol’a Pathen lama hao lou ahi,” ati.

Lungkham lungjin

22 Jesun seijuite jah a, “Hichejeh a chu ipi naneh-uva chule ipinasil’uva nachen diu natahsa din lungkham hih-un kati ahi. 23 Hinkho hi neh le chah sanga thupijo ahin, tahsa jong nihchen ponsil sanga thupijo ahi. 24 va-ahte khu gel’un; muchi la atupouvin, atjong a-at pouvin, akholna ding in hihen changsal hijongle aneipouve; ahinla Pathenin avah nauve. Nang ho vachate sanga thupijo nahiuve. 25 Nang ho koipen hin lungkham hat vanga ahinkho tong chan ajopbe theiyem? 26 Chutia aneopen bon nabol thei louvu leh, thil dang dia iti lungkham nahiuvem? 27 Lily pah ho khu iti khan ham ngaitouvin; natong jong ahipovin, thilkhuijong ahipouve; ahinla kaseipeh nahiuve, Solomon jeng jong athil loupi chengsea akijep vangin hiche ho khat sangin akijemhoi joupoi. 28 Pathenin hitobanga tunia loujaova keh jing teng meilhum sunga kileh lut tading hampa bon achuti jep hoi leh, vo tahsan lhom ho, nang ho ichan geiya nakhohsah-uva nihchen ponsil napeh diu hitam! 29 Hijeh a chu neh le don ding gel’a nalunggim louhel diu ahi. 30 Vannoi namtinin hichengse hi abol’u ahin, nang ho ding vang napauvin ahesoh nai. 31 Alenggam joh hol masauvin, chuteng hichengse jong nakipehbe nauvinte.

Vana gou kikhol

32 “Kicha hih-un hon lhom ho, nang ho na-Pauvin lenggam napeh nom’ui. 33 Nanei chengse joh-un lang vaichate to nan neiyun, guchan anailutna thei lou, nget’in jong asuhset thei louna vana kemlouva akikholna din sum bei theilou sumbom kisemun. 34 Ajeh chu nagou umnaa chu nalungthimu jong cheng jing ding ahi.

Kiging jing lhacha

35 “Nakong kigah-un nathaomei devah jingun. 36 KIchen golvahna ahung kilea kot akiu leh honpeh dia apu hung ding kho the ngaigeh miho tobang hiuvin. 37 Apupa ahung kit teng kiging jinga um ahung tokhah lhacha ho chu anun nom’ui. Tahbeh a kaseipeh nahiuve, apun kong kigah-in tin, amaho ankong phunga atousah a, amatah ajenleuva pang ding ahi. 38 Jan khangkimin hung hen, jing lam nida thumin hung jong leh, kiging jinga um atokhah ho chu nun nom ahiuve. 39 Inneipan gucha hung ding phat heleh a-in chu aphetvang sah louhel ding kichentah-in naheuve. 40 Naginchat loupet tah-uva Mihem Chapa hung ding jeh-in nang ho jong kigingsa demin umun, “ati.

Soh kitah le kitah lou

41 Peterin, “Pakai, hiche thulem hi keiho dia naseiha, mipi jah dia naseiham?” tin adonge. 42 Pakaiyin, “Tahsan um lemiching, apun aphat cha soh dang ho neh le chah hopehji dia anganse ding neiching michu koi hitem? 43 Apu inlama ahung teng anatoh pet atolhah soh chu anun nom’e. 44 Dihtah akaseipeh nahiuve, ama chu apun anei jouse chunga vaipoa apansah ding ahi. 45 Ama vang sohpa khat hin, ‘Kapu ahung gei lheh tai,’ tihen lang soh pasal ho le numei ho vopan hen, aneh nom nehen adon nom don kham leh, 46 hiche soh chun agel loupet tah le ahet loupet tah a apu hunga ama chu tumin aso ding, tahsanbei ho toh kibanga abolding ahi. 47 “Apu dei chengse hea, ahivanga adei banga gonpeh lou, toh jong tohpeh loupa chu tamtah vei kijep ding ahi; 48 amavang apu dei helouva kivoh lo na thei boldohpa chu kivo lhomjo ding ahi. Tamtah kipea chu tampi kibeng ding, thil tamtah a ki-nganse paa kona jong tampi ki-ngeh ding ahiye.

Jesu kikhentelna

49 “Leiset’a mei hal’a hung kahi, hung kadoh jeng ta leh kati nave! 50 Keiman baptize chan ding khat kaneiyin, akimolso kah a iti kaning noh hitam!! 51 Leiset’a chambol’a hunga neigal’um? ahipoi, kaseipeh nahiuve, kikhenna boljoh kahibouve. 52 Ajeh chu tua pat mi nga chenna insung chu kikhentel’a, mithumin ni adouva, nin thum adou ding; 53 pan achapa adouva, chapan pa adou ding; nun chanu adouva, chanun nu adou ding; tehpin amou nu adouva, mou nun tehpi adou ding ahi,” ati.

Phat umdol dan hetna

54 Jesun mipi jah a, “Lhumlama meilom kikhom namu tengu ‘Go ju ding ahi,’ natipai jengun, jujong ajuji nai. 55 Lhang lam hui nun namu tengu ‘Sa ding ahi,’ natiuvin, sajong asai. 56 Vo vanthamjol um ehan bon nasuhto theiyu leh iti tulai thil um chan nasuhto thei louvu ham?

Nahehpa toh kichamin

57 “Ibol’a thildih bolje kihil lou nahiuvem? 58 Nahehpa toh thutanpa heng najot lhon teng le lampia kihouchampi din gel’in, ajo le thutanpan vaibol henga napehdoh a, vaibol pan songkul’a nakhum ding ahi. 59 Kaseipeh nahi, nabet jat nasah thenghel masanga nahung potdoh thei louhel ding ahi,” ati.

Luke 13

Lunghei lou mi mangthah ding

1 Hichepet tah chun mi phabep ahungun Pilate’n Galilee miho athaa athisanu doihouna thil toh achopel thu Jesu jah a aseiyui. 2 Jesun ajah-uva, “Hitobang thi gentheiya athijeh-uva chu Galilee midang ho sanga chonsejoa nagel’uvem? 3 Ahipoi, najah-uva kasei ahi, lung nahei louvu leh ama ho banga namanthah soh hel diu ahiye. 4 Ahiloule Siloam intingvum achima adel lih mi som le get ho chu Jerusalema cheng midang jouse sanga chonsejoa nagel’uvem? 5 Ahidehpoi, kaseipeh nahiuve, lung nahei louvu leh amaho banga chu namanthah cheh diu ahiye,” ati.

Theichang gabei thulem

6 jesun miho chu hiche thulem hi aseipeh-in, “Mi khat’in alengpi leiya theichang phung khat aneiyin, aga ahung hol leh amupoi. 7 Aman honbolpa jah a, ‘Kumthum alhing tan, hiche theichang phung hi kahungvet le aga khat cha kamudohpoi, hijeh chun phuh lhu tan, leiset pamaisah a ikhoh a kihoi hoi ding ham?’ atileh; 8 honbolpan adonbut’in, ‘Pakai, tukum jong hoitadin keiman akimvel leiying ting leiphatna lou sung nange; 9 chujou teng ahung ga nah leh aphan, aga lou vang leh phuh lhu tan nate,’ tin aseiye,” ati.

Jesun Choldo nia numei tingbong khat aboldam

10 Choldo nin Jesun Houthua kikhopna in khat’a thu ahil’e. 11 Hichun ven, hikoma hin kum som le get lhagao boh vop’a chatmo numei khat aumin, amanu hi ating bong ahin, achama ding jang theilou ahi. 12 Jesun amudoh phat’in akoulut’in ajah a, “Numei, nachamonaa kona kilhadoh nahitai,” atin; 13 chunga khut a-ngap leh, apettah chun ading jang paiyin, Pathen athangvah tai. 14 Jesun Choldo nia mi aboldamjeh-in Houthua kikhopna invaihompa alung himon, mipi jah a, “Natohna ding nigup jen uma chu, hungun hiche sung chun kiboldamah tau, Choldo nin vang hung dauvin,” ati. 15 Amapa donbut nan Pakaiyin aseiyin, “Mi pha lhem ho, nang hon Choldo nia nabongchal’u hihen na-sa nganu hijongleh nalhadoh jiuva, twi donsah dia twikhuh geiya nakaijiu hilou ham? 16 Achutileh hiche Abraham chilhah numei, Satanin kum som le get ahen hi akihennaa kona Choldo nia lhadoh ding hilouham?” ati. 17 Jesun hiche asei hin ama douho ajah chauvin, mipi vang thil loupi tah tah abol ho jeh-in akipah cheh-uve.

Ankammu thulem

18 jesun, “Pathen lenggam chu ipi toh katakah ding ham? 19 Min honsunga atheji ankam mutobang vang ahi; ankam mu chu ahung khangin, thingphung te aphan, abah lah a chunga leng vachate geiyin ageh theiye,” ati.

Chol thulem

20 Jesun, “Pathen lenggam chu ipitoh katekah ding ba ham? 21 Pathen lenggam chu suhlou chang changbonga kisem chahlhah danthum noiya numeiyin avuiya achansoh kahsea akoi chol tobang ahi,” atikit’e.

Kotjim

22 Jesun khopi chengse le khote chengse ajotsoh keiyin, Jerusalemlam ajot pumin thu ahilpeh-e. 23 Mi khat’in ajah a, “Pakai, mithemcha bou huhhinga um ding hitam?” tin aseiye. Aman ajah-uva, 24 “Kotjima lutding gel khoh-un, ajeh chu kaseipeh nahiuve, mi tampin lut agot diu, lut thei lou ding ahiuve. 25 Inneipu akipatdoh a kotpi akha tengleh polama pansan kot kiuvun,’Pakai, kot neihonun,’ ti jong leu chun, aman, ‘Nang hi kahepouve, hoiya hungkon nahiuvem?’ tia asei ding, 26 chutengle nang hon, ‘Keihon na-angsunga an kinea twi kidona, nangin kakholai lamlen dunguva thuhil lea,’ nati diu ahi. 27 hijongleh aman najah-uva, ‘Nang ho kahe khapoi, hoiya hungkon nahiuvem? Thil gilou bolte, neidalha loiyun,’ ati ding ahi. 28 Abraham, Isaac chule Jacob chule Themgao dang jouse Pathen lenggama aum namu diu, nang ho vang polama na-um’uva hikoma chu ka le hagel um ding ahi. 29 Niso lam, nilhum lam, sah lelhang kona miho hung Pathen lenggama ankong aum diu ahi. 30 Chule ven, anukhah abang masan tin, amasa kon khat nukhah ding ahiuve,” ati.

Jesun Jerusalem akacham

31 hichepet hin Pharisee mi phabep Jesu henga anungun, “Hikoma konin potdoh-in nakholjin ban kijintan, Herod-in tha din nagoi,” atiuve. 32 Jesun ajah-uva, “Cheuvin hiche se-al chu gaseipeh-un, “Keiman tuni le jinga thlha ho kanodoh a, Mi kadamsah ahin, nithum lhin ni vang leh kanatoh molso tange,’ atitin. 33 Kakholjin vang tuni le jing chule thaini geiya kachepeh ding ahinai, ajeh chu Jerusalem khopama Themgao mah thah ngailou ahi. 34 “Vo Jerusalem, Jerusalem, themgao ho thatgama, ahenga kisol ho songa seplih, ahpin anoute lhaving noiya ahiukhom banga ijat vei nachate hiukhom dia kagot hitam, ahinla nangin nadeipoi. 35 Ven, na-in’u chu thip del’a kidalhah peh ding nahiuve. Kaseipeh nahiuve, ‘Pakai min a hungpa chu anun nom’e,’ nati phat’u hung lhun kahsea neimu kit lou diu ahitai,” ati.

Luke 14

Jesun thongpohvei mi khat aboldam

1 Choldo nin Jesu Pharisee vaihom khat in’a an ne din achen, amahon ave lhi jingui. 2 Hichun ven, amasanga thongpoh veiya na mi khat aume. 3 Hichea hin Jesun Danthu hilthem ho le Pharisee ho jah a, “Choldo nia mi damsah ngai ham hilou ham?” atileh; 4 amaho athip beh-uve. Aman mipa chu atuh-in aboldam phat’in asolmangtai. 5 Jesun amaho jah a, “Choldo nin nachapau ha nabongchal’u ham twikul sunga lhalut taleh nagakaidoh jeng lou diu ham?” atileh; 6 amahon adonbut thei tapouve.

Jindot them le lungnem

7 Mi kikouhon touna pha pha akilhenu amu phat’in Jesun ajahuva thulem khat aseiyin, 8 “Mi khattouvin moupui golvahnaa nahung kouvu leh, toumun phapena tou dauvin. Inneipa chun nang sanga thupijo midang akou mai thei ahi, 9 nani lhona koupa chu hunga najah a, ‘Hichepa ji toumun ot’in,’ ati ding; chuteng nalungdon man’a toumun nu nungpenaa natou lo ding ahi. 10 Hijeh chun nakikou teng toumun nukhahpena touvin, chutileh nakoupa hunga, ‘jol, toumun sangjep’a kikhangdoh-in’ ati ding ahi. Chutengle natoupi chengse maiya jabolna anchan ding ahi; 11 ijeh-inem itile mi ama le ama kichoisang chan kisu nem’a, ama le ama kisunem chan chu choisanga um dingahi,” ati. 12 Aman inneipa jah a jong “Jan an neh khom hihen golvah hileh nabol teng najol nagol le nasopi,, naphung nachang le naheng nakom mihao ho jeng koudan, koule chun amahon lekou kit’un tin nasahsoh diu ahi. 13 Neh khm nabol teng vaichate le tikim loute chule mitcho elbai ho bou kouvin, 14 chutile anun nom nahi, ajeh chu amahon nalepeh lou diu ahin, midih thodoh kit ni leh nakilepeh ding ahi,” ati.

Golvah loupi thulem

15 A-ankong umpi ho khat’in hiche hi ajah phat’in Jesu jah a, “Pathen lenggama an neidingpa chu anun nom’e,” ati. 16 Jesun ajah a, “Pasal khat’in golvah loupitah abol’in mi tamtah akouve. 17 Golvah kipat phat’in akikousa ho henga asohpa asol’in, ‘Hung tauvin thil ijakai akigongtoh tai,’ agatisah-e. 18 Ahinla amahon ahilelnau khat cheh aseiyun, amasapan, ‘Lou khat kachom kagavet lou akhoh-e, kiphatlam thu kasei jeh-in neilha ongin,’ atin; 19 khat’in jong, ‘Bongchal to-nga kachon, hicheng chu gapatep kagoi, kiphatlam thu kasei jeh-in nei lha ongin,’ atin; 20 khatpa man, ‘Tu le lea jinei kahin, hung thei ponge,’ ati. 21 “Sohpa ahungin apu jah a hichengse hi aseitai. Hichun inneipu alung hangin sohpa jah a, ‘potdoh loiyin, kholai lamlen dung l ekhopi veng ningkoi dunga vaicha genthei le tikimlou, mitcho eibai ho gakoutan,’ ati. 22 Sohpan, ‘Kapu, nasei bangin kabol’in, ahivangin mun a-ong nalaiye,’ ati. 23 Inneipun sappa jah a, ‘Potdoh-in lang lamlhong dung l edaipama um ho ka-in dimset din gakoutan. 24 Kaseipeh nahi, aki kouho khat chan jong kagolvah an atep khah louhel diu ahi,’ gatin tin aseiye,” ati.

Jesu seijui manlutje

25 Mi tamtah-in akilhonpi pet’un Jesu akiheiyin ajah-uvah 26 Kahenga hunga anu apa, ajinu le achate, asopi pasal ho le numei ho chule ama hinkho geiya itcha louva bol lou mi chu kaseijui hithei lou ding ahi. 27 Athingpel kiput’a eijui lou chu kaseijui hithei louhel ding ahi. 28 Nang hi koipen hi insang sah ding go’a aman lut ding jat suto masa lou na-um um? Asa nom chun ajo na kham sum anei aneilou avet toh masah ding ahi, 29 chutilouvin abul phutdoh hen joulel taleh amupha chanin tot nopna aneiyuva, 30 ‘Hichepan in sah din apanin ajoulel ta ong,’ ati diu ahi. 31 “Ahiloule midangto kidou ding sepai sangsom seh neiya lengpan amasat dia sepai sang som ni toh hungkonpa chu atinjou atinlel ding touva ageltoh masah lou ding ham? 32 Ajo lou ding leh palai asol’a leng chompa gamla tah a aumpet’a kichamna thu agaseisah ding ahi. 33 Hitobanga chu nang ho lah a jong anei agou chengse dalha lou chu kaseijui hithei louhel ding ahi.

Chi allou

34 ″Chi hi thilpha ahi, amavang a-al hi al ta hih leh iti ki-alsah kit ding ham? 35 Leining din jong leiset semphatna din jong pannabeiji tauve. A-ngaina ding nakhang neiyan ngai hen,” ati.

Luke 15

Kelngoi mansah thulem

1 Kaidong ho le chonsehon athuhil ngai din Jesu ahin nailut’ui. 2 Pharisee ho le Danthu them ho aphun’un, “Hichepan michonse ho aloiyin aneh khompi,” atiuve. 3 Hichun Jesun ajah-uva thulem khat aseiyin: 4 “Nalah-uva khat’in kelngoi jakhat neihen lang khat mansah leh, aman som ko le ko chu gamthip’a adalhah a amangpa chu amu kahsea agahol lou ding ham? 5 Amudoh teng leng kouva apun kipah thanom tah a 6 in’a ahung teng jong leh agol apai, aheng akom akoukhomin ajah-uva, ‘Neikipa piuvin, kakelngoi mansah chu kamudoh tai,’ ati. 7 Kaseipeh nahiuve, hitobang hin lunghei ngai cha lou midih som ko le ko chunga sangin michonse khat lunghei jehin van’a kipa thanop um ding ahi,” ati.

Sum mansah thulem

8 “Numei khat’in dangka som neihen lang khat mansah leh, thoamei kidet’a, muntheh kipat’a amudoh kahsea in theh a ahol hol jeng lou ding ham? 9 Amudoh phat’in agol apai, aheng akom akoukhomin, ‘Kasum mansah chu kamudoh tai, neikipa piuvin,’ ati. 10 Kaseipeh nahiuve, hitobang hin michonse khat lunghei jeh-in Pathen Vantilte lah a kipa thanopna aume,” ati.

Chapa jammangpa thulem

11 Jesun “Pasal khat’in chapa ni aneiye. 12 Anaopan apa jah a, ‘Hepa, gou kachan ding chu neipetan, atin, hijeh chun apan agou chu achate ni ahopeh tai. 13 Ni phabep jouvin chapa neojopen anei jouse achomkhomin kholgam la tah a ache mangin, chukoma chun anei jouse aning anop’in agamange. 14 Anei jouse aneh jousoh hel tah-in hiche gamsunga chun kel nasatah ahung lhan, aman neh le chah angaicha pantai. 15 Hijeh chun achen agam miho khat agabel’in, mipa chun alouva vohchate vah din asoltai. 16 Hichea chun vohchate an neh chu neh jenga oiva ding ago lhehin, koiman la neh ding apepoi. 17 Chutah chun ahung khangdoh lap’in, ‘Kapa thalah sohten neh le chah khujat neng jeng junga neiyuva, kei hikoma kel thi dinga um kahim! 18 Kipatdoh ing ting kapa henga cheng ting ajah a, “Hepa, van houna le nangma dounan kachonsetai, 19 nachapa tidin jong kakilom tapoi, nasoh thalah ho khat bangin neisemtan,” gatinge,’ ati. 20 Akipatdoh-in apa heng jonin achetai. “Gamla tah ahung gei nalaiyin apan agalmun, alaina behseh jengin, alhaijel’in akoiyin achop chuh chuh tai. 21 Achapan ajah a,’Hepa, van douna le nangma dounan kachonsetai, nachapa tidin jong kakilom tapoi,’ atileh; 22 apan asohte jah a, ‘Von phapen tah galauvin vonpeh loiyun, khutjem bupeh-un, kengchot sepeh loiyuvin. 23 Bongnou thaotah chu gaman’un lang that loiyun, neu hitin kipa thanop bol’u hite, 24 ajeh chu hiche kachapa hi athisa hing kit’a amangsa kimudoh kit ahitai,’ ati. Hiti hin kipa thanop abol’uve. 25 “Ahin a chapa aupajo loukon pa chu ahung vailhunin inlam ahungnaijep jep leh tumging kitum leh mi lamgin ajan, 26 soh ho khat akouvin adonge. 27 Sohpan ajah a, ‘Nasopipa chu ahung lhungtai, hijeh a chu napan hing le dama amikit jeh a bongnou thaotah chu athapeh ahi,’ ati. 28 “Hichun apa ahung potdoh-in ajol jol jenge. 29 Aman apa adonbut’in, ‘Ven, kum hijat hin sohbangin na katohpeh-in, khatvei jeng cha jong nasei ngailouvin kaumpoi, ahinla kagol kapaite toh kakipa thanop khomna din kelnou khat jeng cha jong neithapeh khah poi. 30 Ahinla hiche nachapa, natiho toh nanei nagou chengse sumangpa, ahung phat’in bongnou thaopen nathapeh-e,’ ati. 31 Apan ajah a,’Chapa, nangma kakoma um jing nahin, kanei aboncha nanga ahi. 32 Hiche nanaopa hi athisa hing doh kit, amangsa kimudoh kit ahijeh a ikipa thanop diu mong ahibouve,’ tin ajol’e,” ati.

Luke 16

Sumching kitahna beipa

1 Jesun seijuite jaha, “Mihao khat’in neiching khat aneiye. Neichingpan anei aman chatvai jeh-in min aheh-in ahi. 2 Mihaopan ama chu akouvin ajah a, ‘Nachung chang thu kajah hi ipi iti ham? Nanei chinjat sutohnloiyin tukal neichinga napan theilou ding ahi,’ ati. 3 Hichun neichingpa akigel’in, ‘Kapun kaneichin, eilahpeh dingla ahitan, ikati ding hitam? Loubol’a lei lai ding la kathan ajoupon, khutdo dingjong kajah achai. 4 “Kaneichin kahai teng mihon a-in’uva eilhunsahna diu bol ding khat kahetai,’ atin; 5 apupa sumba ho akouvin, amasapen pa jah a, ‘Kapu sum ijat nabat’em?’ atileh; 6 aman, ‘Thao tae-na dim jakhat,’ ati. Aman ajah a, ‘Nathil simna hinchoiyin, tou loiyin ate-na som nga bou aunin,’ ati. 7 Chuin achomdang khat jah a, ‘Nangin la ijat nabat nah laiyem?’ atileh; aman,’Suhlou chang ate-na jakhat,’ ati. Aman ajah a, ‘Nathilsimna hin lan, somget bou sunin,’ ati. 8 Hichun chondih lou neichingpan ching theitah a thil aboljeh-in apupan apahchai; ajeh chu hiche khang mite hi akibahpi houlah a khovah chate singin achingjo’uve. 9 “Kaseipeh nahiuve, leiset gouvin gol le pai semun, gou abeiteng mihon tonsot chenmuna nalhunsah diu ahi. 10 Thil neochaa kitah lou mi chu thil lenpia jong kitah lou ahiye. 11 Leiset gouva bon tahsan naum louvu leh goutahbeh chu kon nachinsah diu ham? 12 Midang gou neichinga ankitah louvu leh nang ho gou ding kon napeh diu ham? 13 “Insung lhacha khatseh-in pipu ni ajenkop theipoi; jenkop taleh khatjoh ahot’a khat jog angailut ding, ahiloule khat chu akolchah joa a khat chu donlouva akoiding ahi. Nang ho Pathen le sum soh a napankop thei lou diu ahi,” ati.

Jesu thusei phabep

14 Sum ngailu Pharisee hon Jesu thusei ho ajauvin anelpah khum’uve. 15 Jesun ajah-uva, “Nang ho hi mihem mitmua them kichan loi nahiuvin, Pathenin vang nalungthimu ahenai; ijeh-inem itile mihemte lah a sang tah a kijabol chu Pathen mitmue thet umtah ahibouve. 16 “John khang geiya chu Danthu l eThemgaoho th che ah ahi. Ama hung apat Pathen lenggam Thupha kiseiphong a ahin, amitakip’in asunga thahat lekhajem khat paidoh sangin van le lei kitolmang abaijoi. 18 “Koi hile ajinu daa achom khat kichenpi chan mito jong ahin, chule ajipan adasa numei kichenpi jong mito jong ahi. 19 “Mihao khat hin, ponsandup le tupat ponenm jeng asil jin, niseh-in aning anop’in aum jin ahi. 20 Apum changa phah mivaicha Lazarus kiti chu akotbul’a alumin, 21 mihaopa ankong dokang chunga lhajah anmal chu aducha tun tun jenge; akhoh cheh kit chu, uichaten atipat laiho chu aleh-uvin ahi. 22 “Chujouvin mivaichapa chu athin, Vantilten Abraham jet lama din apotauve. Mihaopa jong athin avuitauve. 23 Aman Damuna gim genthei athohna konin chunglam avet leh gamla tah a Abraham amun, ajet lama Lazarus jong amui. 24 Akouvin jah a, ‘Kapa Abraham, neikhoton, Lazarus hin sol’in akhut jungin twi ga dekot han lang kalei beh eihung dedap peh hen, ajeh chu hitobang meikou leh a gim genthei thoh-in kaum tai,’ ati. 25 “Abrahamin, ‘Chapa, naleiset hinkhon thilpha chengse namun, Lazarus chun thilse amui, tun aman kikoma nom asan, nangma chukoma gim genthei thoh-in naume. 26 hiche kal jong chun i-kah-uva onghom lentah akikhangin, hikoma kona nang ho hin jon nom jong hung theilou ding, chukoma kona jongkoima hilama hung galkai theilou dinga kibol ahi,’ ati. 27 Aman, ‘Hepa achutileh Lazarus chu ka-inkote henga nasolna din kataove, 28 ajeh chu sopi pasa; nga kaneiyin, Lazarus chehen lang amaho chu gahil chah masa leh kati, achuti lou leh hiche danmuna hi hung kit diu ahitai,’ ati. 29 “Abrahamin, ‘Ahilchah diuvin Mose le Themgaoho aneiyui, amaho hil ngai tauvinte,’ ati. 30 Ahinla aman, ‘Ahipoi kapa Abraham, mithi lah a kona mi khat che le bou lung ahei diu ahi,’ ati. 31 Ahinla Abrahamin ajah a, ‘Amahon Mose le Themgaoho thu angailouvu leh mithi leh a konin mi khat thoudoh kit jong leh kithu nundeh pouvinte,’ tin aseiye,” ati.

Luke 17

Chonset’a lhahna thei lhepna

1 Jesun aseijuite jah a, “Kipal lhuhna thei thil chu soh thei ahinai, ahin kipalna bol chu ohe ada ahi! 2 Ama chun hitobang aneocha ho khat akipal lhuhsah sangin a-ngonga sumhei song lentah ki-opeh hen lang Twikhanglena kileh lut le phajo ding ahi. 3 Chingtheiyun! “Nasopi achonset leh phoh-in, lung ahei leh ngaidamin. 4 Ni khat sunga nachunga sagi vei, chonse hijongleh, nahenga ahunga sagi vei jen, ‘Kalung kaheiye,’ atileh na-ngaidam tei ding ahi,” ati.

Tahsan

5 Solchah hon pakai jah a, “Katahsanu khansah ben,” atiuve. 6 Pakaiyin, “Nang hon tahsan na ankam mu tebep neiyun lang, hiche thing theimi khu, ‘Kibotdohin lang Twikhanglen lailunga kiphut lut’in,’ tijong leu chun nathuu ngai jenginte.

Lhachapa toh ding kin

7 “Nalah-uva mi khat’in loubol’a pang ham, kelngao ching ham soh khat aneileh, ahung vailhun teng ajah a, ‘Hung loiyin ankong hung ki-um loiyin,’ ti nan tem? 8 Chusanga ajah a, ‘Kajan an neh ding gon, natai kigah-in lang kaneh kachah sungsen neijenin, chujou teng nangin nen natin don nannate,’ atijoh lou idng ham? 9 Hichepa chun asohpan asei sei abol peh jeh a chu apachat hinam? 10 Hitobanga hi nang hon jong nakiseipeh chengse nabol jou tengu jong leh, ‘Soh mai mai kahiuve, keihon katoh ding dol bep bou katoh-u ahi,’ tiuvin,” ati. Jesun miphah som asuh theng 11 Jesu Jerusalema achen Samaria le Galilee kah ahopeh-e. 12 Kho khat’a alut leh miphah som khat’in analamtouve. Miphah ho chu gamla thima adingun, 13 “Pipu, Jesu neikhotouvin,” tin asamuve. 14 Jesun amaho amu phat’in ajah-uva, “Cheuvin lang Thempu ho gakivetsah tauvin,” ati. Acheu leh adamthengsoh tauve. 15 Alahuva khat chun adamtheng akihet phat’in ahung kile kit’in oging tah-in Pathen athangvah-in, 16 chule Jesu kengbul’a amai asult’in athangvah tai. Ama chu Samaria mi ahi. 17 Jesun adonbut’in, “Miphah som jen kisutheng hilou ham? Mi ko hoilamba hitam? 18 Hiche chidang namdangpa tilou khat chajong Pathen thangvah dia hung kile lou hiuvem?” ati. 19 chule khatpa jah a chun, “Thouvin lang chetan, natahsanin nadamsah ahitai,” ati.

Pathen lenggam hung lhun

20 Pharisee hon Jesu jah a Pathen lenggam hung lhung ding phat adoh nauva aman, “Pathen lenggam chu melchih theiyin ahungpoi. 21 Koiman, ‘Ven, hikom’ah aume,’ ahiloule, ‘Khukoma aume,’ atilou ding ahi. Ijeh-inem itile ven, Pathen lenggam chu nalah-uva aumtai,” ati. 22 Jesun seijuite jah a, “Nikhatle Mihem Chapa nikho namu nom lheh diu, ahivanga namu thei lou diu ahi. 23 Mihon najah-uva, ‘Ven, khu koma aume,’ atiuva, ‘Ven, hikoma aume,’ atiu jongle chesauvin, anung del hih-in; 24 ajeh chu kolphen kolmong lang khat’a pat kolmong lang khat geiya vanthamjol asalvah jeng banga Mihem Chapa hung ni jong leh chuti ding ahi. 25 Amavang amasa hesoh genthei tampi athoh a, hiche khang mite not thap’a um tei ding ahi. 26 Noah nokholai bang a Mihem Chapa nikho ho jong chuti ding ahi. 27 Mihon aneuvin adonun, akichengun, Noah kong sunga alut ni geiyin kicheng din akipetouvin, chutah-in twisang ahung lenin abonchauvin asumangtai. 28 Hitobang hin Lot nikho laiyin jong mihon aneuvin adonun, thil achouvin, hon abol’uvin in asauvin, 29 Sodom khoa Lot apotdoh nikhon vang vana koin meikou l ekat ahung julhah abonchauvin asumangtai. 30 Mihem Chapa kiphondoh nikho jong chuti ding ahiye. 31 Hiche nikhoa chu inchunga uma inusunga thilkeo kilah din kumlhah da hen, chule loujaova um jong hung kile kit da hen. 32 Lot jinu chu geldoh-un. 33 Koi hile kihinso noma chun athilo ding, athiloa chun hinna aneiding ahi. 34 Kaseipeh nahiuve, hiche jan chuleh jalkhun khat’a lumkhom te ni jong khat kilaa khat kidalha ding ahi. 35 Numei chang goikhom teni jong khat kilaa khat kidalha ding… 36 (Loujaova bung pasal te ni jong khat kilaa khat kidalha ding ahi)” ati. 37 Amahon adonbut’un ajah a, “Hoikom hintem Pakai?” atiuleh; aman ajah-uva, “Thilong lupnaa chu muthong kikhom ding ahi,,” ati.

Luke 18

Meithainu le thutanna thulem

1 Lhadah louhel’a tantih neilouva atao jing theina din Jesun aseijuite chu thulem khat ahil’e. 2 ″Khopi sung khat’ah Pathen ging lou mihem jong jalou thutan khat aume. 3 Hiche khopi sunga hin meithainu khat jong acheng’in, thutanpa henga ahung jin, ‘Kakihehpi sangin them neichanin,’ atijie. 4 Phat chom khat chun aman don louvin akoinan, chom khat jouvin, ‘Pathen kagin daa mihem kajabol lou vangin 5 hiche meithainun eisuhgim jing jeh hin athem channa ding gelpeh tange, achutilou le hung jingin tin eisuh lung gim jing ding ahi,’ tin aseiye,” ati. 6 Pakaiyin aseiben, “Midih lou thutanpan ipi aseiyem ngaiyun. 7 Sun le jan’a ahenga tao jing jeng alhenchomte chu Pathenin kithopi ding ngongkai louhel’a achunguva thu adih a atanpeh lou ding ham? 8 Najah-uva kasei ahi, aman ngongkai louhel’a amaho them achansah loi ding ahi. Hijongle Mihem Chapa ahung teng leiset chunga tahsan hung toh nantem?” ati.

Pharisee le Kaidong thulem

9 Jesun mi ama bou them kichana midang jouse isah lou ho din hiche thulem hi aseiyin: 10 “Mi ni Houin a tao dingin achetou lhonin, khat chu Pharisee ahin, khat chu Kaidong ahi. 11 Phariseepa adingin chamtahin hitin ataove, ‘Pathen keima midang banga milop, kitahna bei, chonthanghoi, chule hiche Kaidong pa tobang khu kahi loujeh-in Nangma kathangvah-e. 12 Hapta khat sungin nivei an ka-ngol jin, kalamdoh jat hopsom hop khat kape jingin ahi,’ ati. 13 “Kaidongpa vang chu gamla thimtaha adingin, dah a van lam jong ve-ngam louvin, adip alai akidop’in ‘Pathen neilungset’in keima michonse kahibouve,’ ati. 14 Kaseipeh nahiuve, Phariseepa sangin hichepa joh hi them achangin a-inlama achesuh tai; ajeh chu koi hileh ama kichoi sang chu kisunem ding, ama kisunem chu kichoi sang ding ahi,” ati.

Jesun chapang neocha ho phatthei

15 Miphabep’in achateu chunga Jesun khut angap din ahinpuiyui Seijuien amun aphoh-uve. 16 Ahinla Jesun chapang ho akouvin, “Chapang ho chu kahenga hungsahun, kham dauvin, Pathen lenggam chu hitobang ho ding bou ahi. 17 sumil hih-un, chapang thilsan banga Pathen lenggam sang lou chu lut lou ding ahi,” ati.

Mihaopa

18 Judate vaihom khat’in Jesu adingin, “Houhilpha, tonsot hinna kanei theina dia ipi kabol ding ham?” atileh; 19 Jesun ajah a, “Ibol’a ‘Apha’ neiti ham? Pathen tilou apha aumpoi. 20 Thupeh chengse nahet chu me. ‘Mito jong hih-in, tol that hih-in, gucha hih-in, jouthun hettphsah-in pandan, nanu napa jabol’in,’ kiti chu,” ati. 21 Aman, “Kakhangdong laiya pat hichenghi kanitsa ahitai,” ati. 22 Jesun hichu ajah phat’in, “Nalhah samna khat aum nalaiye, nanei chengse joh-in lang sum chu vaichate petan, chutile vana gou nanei ding ahi; chuteng hungin neijuiyin,” ati. 23 Hiche hi ajah phat’in mihao tah ahijeh-in alung nom mo lheh jenge. 24 Jesun alung himo natsatje amu phat’in, “Sum haoho dinga Pathen lenggama lut ding iti hah sat hitam! 25 Mihao Pathen lenggama lut sangin heobil homa sangonsang lut idng abaijoi,” ati. 26 Hiche thu ja hon, “Achutile koi huhhinga umjou ding ham?’ atiuve. 27 Jesun, “Mihem dinga himo thil jouse dalhaa nang kijuita,” ati. 28 Peterin, “Ven, keihon kanei jouseu dalhaa nang kijuita,” ati. 29 Jesun ajah-uva, “Tahbeh a kaseipeh nahiuve, koi hijongle Pathen lenggam jal’a in le lou ji le cha, sopi u le nao, nu le pa dalha jouse 30 koi ahin tukhanga ajat tamjo cheh mu lou ding le ahung lhung ding khanga tonsot hinna kimu lou idng aumpoi,” ati.

Jesun athi le athodoh ding asei masah thumveina

31 Jesun som le ni atumin apuidoh-in ajah-uva, “Ven, Jerusalem ijon touvun, chule Mihem Chapa thudol’a Themgao ho lekhabu kisun chengse guilhung ding ahi; 32 ajeh chu Ama chidang namdangte khut’a pehdoh a um ding, tot nopna aneiyuva, a-eng eng a abol diu, chule chil aset khum diu ahi; 33 avoh-uva atha diu, ahivanga nithum ni leh thoudoh kit ding ahi,” ati. 34 Seijuiten aseiho hi khat cha jong ahechen theipouve. Ajeh chu akisei ho hi amaho dia kiselguh ahin, hijeh chun ipi kiseipen ahiding ahedoh theipouve.

Jesun mitcho khutdo khat aboldam

35 Jesu Jericho khopi ahung naichun, lamlen panga mitcho khat touvin khut adoi. 36 Mitchopan lampia mipi kitol husa ajah phat’in ipithu ahi ding adonge. 37 Mihon Nazareth Jesun ahinjotpa ahi, aseipeh-uve. 38 Aman ahinsamin, “David Chapa jesu, keima neilungset’in,” ati. 39 Amasanga chehon umthip beh dia haphoa apho vangun aman ahasap cheh-in, “David Chapa, neikhoton,” ati kit’e. 40 Jesu ading denin mipa chu ahinpui diuvin aseiye. Mitchopan ahin naiphat’in ajah a, 41 “Ipi eibolpeh le nati ham?” atileh; aman, “Pakai, kho neimusah-in,” ati. 42 Hichun Jesun ajah a, “Mu tan. Natahsanin nadamsah ahitai,” ati. 43 Apettah chun mitchopan kho amutan, Jesu ajuiyin Pathen athangvah tai. Mipin hichu amuphat’un Pathen athangvah chehuve.

Luke 19

Jesu chule Zacchaeus 1 Jesu Jericho alut’in kho sung ajotpeh-e. 2 Khosunga hin Zacchaeus kiti kaidong pasal khat ahengin, ahaova hao ahiye. 3 Amahin Jesu chu amu nom lhehin, ahinla mi nem ahijeh-in mipin alen amupha poi. 4 Hijeh chun analhai masan, amuteina din ahung na ding lampia chun theiba chung khat’a anakaldoh-e. 5 Jesun hikom chu ahinphah phat’in agada doh leh amun, “Zacchaeus, hung kumlha loiyin, tunia na-in’a kalhun tei ding ahi,” ati. 6 Zacchaeus, chu kinloi tah-in ahung kumlhan kipah tah-in Jesu alamtoi. 7 Mipin amu’uvin, “Hiche michonsepa in’a khu lhung din ache teget’e,” tin aphuntauve. 8 Zacchaeus vang chu adingin Pakai jah a, “Ven, Pakai kanei chengse akeh khat vaichate peng ting, ada acham louva mi kalahpeh aum jong leh ajat lin leng’e,” ati. 9 Hichun Jesun ajah a, “Tunin hiche insunga huhingna ahung lhungtai, ama jong hi Abraham chilhah ahiye. 10 Ijeh-inem itile amangsa holdoh a huhing dia Mihem Chapa hung ahi,” ati.

Sum som khat thulem

11 Jesu Jerusalem ahung lhung deh deh tan, mihon ma Pathen lenggam hung lhung jeng dia agel jeh-uvin Aman thulem khat ahil’in, 12 ″Milun tah khat leng tha neina gakisana hung kile kit din kholgamla tah a cheding agon; 13 asohte som khat akouvin Mina khat cheh apen ajah-uvah, Kahung kile kit kah-in kivei nan anamangun,’ ati. 14 Ahinla agam miten ama ahot bol’in anunga palai asol’uvin, ‘hichepa hi kachunguva leng chang din kadeipouve,’ agati sah-ui. 15 “Aman leng tha neina kenga ahung kile kit phat’in kivei dinga apeh asohte chengse ijat cheng aveikan’u ahet nom jeh-in gakou khom din thu apei. 16 Ahung ma sapan,’Pakai, nang Mina khat chu Mina som kalhinsah-e,’ ati. 17 Aman ajah a, Nabolpha lheh-e, sohpha nahi! Themcha chunga tahsan thei nahijeh-in khopi som chunga tha neiyin pang tan,’ ati. 18 Anilhinnapa ahungin,’Pakai, nang Mina khat chu nga kasosah-e,’ ati . 19 Aman, ‘Nang jong khopi nga chunga vaipo ding nahi,’ ati. 20 “Thumnapa ahungin, ‘Pakai, nang Mina chu ponin kajel’in kakoi hen hiche hi ahi, 21 ajeh chu nakoin alouva loi doh theiya, natuna louva atdoh thei, acham louva milahpeh jeng nahijeh-in nangma kakichai,’ ati. 22 Aman, ‘Soh gilou! Nakamsoh a nathu katan ding ahi. Kakoina louva kalahdoh theiya, katunalouva ka-at theiya, acham louhel’a mi kalahpeh thie nahet ahiyeong? 23 chuti-an ibol’a kasum chu sumkholpungnaa nakoida ham? Koile chun kahung kile teng ken apung puma kilah thata dinga!’ ati. 24 “Akoma ding ho jah a chun, ‘Mina khat chu lahpeh-un lang, Mina som neipa chu gapeuvin, ati. 25 Mihon,’Pakai, aman Mina som khat jen neina chu,’ atiuleh; 26 aman,’Kaseipeh nahiuve, aneiya chu kipeh ben tin, aneilouva chu anei chasun jong kilahpeh ding ahi. 27 chule achunguva lengvaipo dinga eideimo hiche migilou melmate hi kakoma hinkai lut’uvin kamitmun that gam’uvin,’ tin aseiye,” ati.

Jesu loupitah a Jerusalem alut

28 jesun hiche aseijou hin amasan jerusalem ajon toutai. 29 Olive thinglah kiti mol’a Beth phage le Bethany aphah koin seijui ni asol’in, 30 “namasang jon lhona kho’a khun lut lhon le chun komacha tou khahna louhel sangan nou kihen khat namu lhon ding ahi; sut lhan hinkai lhonin; 31 mi khattouvin najah lhona, ‘Ibol’a nasut lhon ham?’ atileh; ‘Pakaiyin aman nom’e,’ ti lhontan,” ati. 32 Solle te ni ache lhon leh ijakai asei bangin agatoh lhone. 33 Sa-ngan nou chu asut lhon leh aneiten, “Ibol’a sa-ngan nou chu nasut lhon ham?” tin adongui. 34 Amanin, “Pakaiyin aman nom’e,” ati lhone. 35 Hichun Jesu henga ahinkai lu tlhonin, chiin sangan nou chunga aponsil jouseu aphasoh phat’un Jesu chu achunga adom doh tauve. 36 Jesu ahung chun lampi chunga aponsil jouseu aphauvin ahi. 37 Jesun khopi ahinphah ding kon, Olive mol’a kumlhahna huang geiin seiyui mipin abonchauvin tha neitah a thil kibol amu chengseu jeh chun ogin sang tah-in asamun kipah thanom tha-in Pathen vahchoinan 38 hitin aseiyui: “Pakai min a hung lengpa anun nom’e; Van’a cham leng hen, chung nungpena loupina hihen,” atiuve. 39 Mipi lah a Pharisee mi phabep chun Jesu jah a, “Houhil, naseijuite phoh-in,” atiuve. 40 Jesun adonbut’in, Najah-uva kasei ahi, hite ho thip leu song ho aojah jeng diu ahi,” ati. 41 Ahung naijep jep’a khopi amu phat’in Jesun akachamin, 42 “Ohe, nangin tunia hi lung monna thei ngaichat nakihet hitave leh! Tunla namuthei tapoi! 43 namelmaten nahin umkhuma, galpal nakai khum’uva, akimvel lhung keiya natin chah niu hung lhung ding; 44 huhhing dia nakivil nikho nahet loujeh a nangle nasunga nachate kisugam ding, song khat chunga khat kise-thom beihel’a alha diu ahi,” ati.

Jesun Jerusalem Houin asuh theng

45 Jesu Hoiin a alut’in thiljoh ho anodoh panin ajah-uvah, 46 “Hiti hin, ‘Ka-in chu taona in kiti ding ahi,’ tin akisun me, nang hon la gucha michomho kikholnan nasemdoh tauve,” ati. 47 Jesun niseh-in Houin a thu ahiljin, Thempu pipu ho le Danth themho, chule mipi lamkaihon vang ama suhmangna ding ahol jingui. 48 Ahivangin la angai lhihgeh jeh-un alonaje ding aholdoh thei pouve.

Luke 20

1 Nikhat jesun Houin a mipi thu ahila Kipana THupha aseiphong pet’in, Thempu pipu ho l eDanthu themho chule upaho ahungun, 2 ajah a, “Ipi thu neinaa hicheng hi nabol’a, kon hiche thu neina hi napeh ham, neiseipeh tem’un?” atiuve. 3 Jesun ajah-uva, “Kenjong thu khat dongunge, neiseipeh-uvin; 4 John Baptist chu van’a kon ha mihema kon ham?” atileh; 5 amaho akihouvun, “Eihon, ‘Van’a kon ahi,’ tileu hen la, ‘Chuti-an ibol’a natahsan louvu ham?’ tiget’in tin, 6 Mihema kon ahi,’ tijong leu hem, mipin John chu Themgao khat’a atahsan cheh jeh-un, songin eiselo bep’un tin,” atiuve. 7 Hijeh chun, “Hoiya hung kon ham kahepouve,” atiuve. 8 Hichun Jesun ajah-uva, “kenjong ipi thu neinaa thil hicheng kabol seipeh pouvinge,” atitai.

Lengpilei le aleilhouho thulem

9 Jesun mipi chu hiche thulem hi ahil panin, “Mi khat’in lengpilei abol’in, aleilhouho abolsah-in phat sotpi um din kholgama achetai. 10 Aga lhun phat donin lengpitga ahinpohsah diuvin aleilhouho henga soh khat asol’e; ahinla aleilhouhon sohpa chu avouvin khut gohkeuvin asolmang tauve. 11 Soh khatma asol kit leh; ama jong hi avouvin, noise tah-in abol’un khut goh keman asolmang kit tauve. 12 Soh thum lhinnapa asol kit leu leh, amahon amavouvin ahi nleh doh kit tauve. 13 Lengpilei neipan, ‘Ipi kalo ding hitam? Kachapa chang khat seh hi sol tange, amahi jabol teiyunte,’ ati. 14 aleilhouhon achapa amu phat’un akihou lhiuvin ‘Hichepa hi agoulo dingpa ahi, agou ichan theina diuvin ama hi thatdoh jengu hite,’ akitiuve. 15 Hijeh chun ama chu lengpilei polama alehdoh-un athat tauve. Hiche lengpilei neipa chun amaho hi i-lotan tem? 16 Ama hunga hiche lengpilei chu midang apeh ding ahi,” ati. Hichu ajauvin amahon, “Achuti louleh!” atiuve. 17 Jesun amaho chu aven, “Ahile, ‘Insa hon deimoa apaiyu song chu, In ning khomdet penin apangtai,’ tia Pathen lekhabua kisun chu ipikiseina ba ham? 18 Koi hileh hiche song chunga chukha chan chu kitah ngem’a chule songin alhah den jong chu adelngem ding ahi,” ati.

Kaipeh thudol Jesu adoh-u

19 Hiche thulem hi amaho gotna asei aheuvin Danthu themho le Thempu pipu hon hichepet tah a chu Jesu chunga khut lhah din agouvin, ahinla mipi akichauve. 20 Amahon Jesu chu athuseiya kipalsah a, mat ding gamvaipo tha neina le athu noiya peh thiena dingin phat kitup kom achang lhiuvin, chonpha lhemin changlhi phabep achinsah-ui. 21 Changlhi ho hin Jesu jah a, “Houhil, nathusei le namihilna hi adih-in, maipha velouvin Pathen lampi dihtah a nahil kaheuve; 22 Caesar kai kapeh-u hi dan ngai himong nam?” tin adongui. 23 Jesun alungthim bol’u ahen ajah-uvah, 24 “Denarii khat neivetsah temun, koi lim hiya koimin chong am?” atileh; 25 amahon, ‘Caeasar’a,” atiuve. Hichun Aman “Chuti ahile Caeasar’a chu Caesar peuvin, Pathena chu Pathen petau,” ati. 26 Mipi maiya athuseiyin man thei tapouve; adonbutna ma chu adatmo lheh jengun athip beh tauve.

Mithi thokit thudol Jesu adoh-u

27 Mithi thokit tansan lou Sadducee phabep ahungun Jesu jah a, 28 “Houhil, Mose’n ‘Pasal khattou ji neiya cha hing man louva athi leh, ajinu meithai chu asopipa akichenpia asopipa chi akhai peh idng ahi,’ tia eisutpeh-u ahi. 29 Pasal sagite aum’un, aupapenin ji aneileh cha hing louvin athitai. 30 Ani lhina pan jong, 31 thum lhinna pan jong, aban banin amanu chu jin anei cheh-un, asagiuvin cha hinglouvin athisoh tauve. 32 Achaina keiyin numeinu jong thu athitai. 33 Chuti ahijehchun mithi thokitnaa hiche nu chu koipen ji hiding hitam?” tin adongui. 34 Jesun amaho jah a, “Hiche khanga mite hi akichengun, kicheng din jong akipeuve, 35 thinaa kona thudoh, ahung lhung ding khang mu dia kilomho vang chu akicheng pouvin, kicheng din jong akipeto tapouve. 36 ahimongin amaho chu athi thei tapouvin, Vantilte tobang ahiuvin, thinaa kona thoudoh kit’a Pathen chate hiuva ahitai. 37 Chule mithiho thodoh tahbeh hi Mose, n lhambuh thua chun Pakai chu Abraham Pathen, Issac Pathen chule Jacob Pathen ahidol kichentah-in aphong. 38 Pathen chu mihtiho Pathen ahipon, mihing ho Pathen ahibouve; ijeh-inem itile ama koma mi jouse ahing cheh-e,” ati. 39 Danthu themho phabep’in, “Houhil nasei dih lheh jenge,” atiuve. 40 Ajeh chu thu dang adoh ngamlouvu ahitai.

Jesu David chapa ahidol thudol

41 Jesun ajah-uva, “I-atileh mihon Messiah chu David guiya pen gidng ahi, tia aseiyu ham? 42 David jengin jong labua chun, ‘Pakaiyin ka-Pakai jah a Kajet lama tou jingin 43 Namelmate chengse Nakeng chotpha kaneisah masangsen,’ tin aseibouve. 44 David amatah-in ‘Pakai’ asah leh iti aguiya peng hithei ding ham?” ati.

Jesun Danthu themho aphosal

45 Jesun mijouse jah din aseijuite henga, 46 “Ching theiyun, Dan thepna sangkhol chol ki-ah a vah le nom, kailhang dunga mi salam ding deiya, Houthua kikhopna in dunga touna phapen, golvahna mun’a munpha pen lo nom, 47 meithaiho thil le lo bahgam, mimu dia sottah tah taoji hoa konin kihong phauvin; amaho hi themmona chungnung chang diu ahi,” ati.

Luke 21

Luke 22

Luke 23

Luke 24

John 1

Thu chu tahsa ahungsoh tai

1 Semtil chun thu anaumtan, thu chu Pathento umkhom ahin, chule thu chu Pathen masap ahi. 2 Thu chu semtil’a Pathento umkhom ahi. 3 Ama jeh a thil jouse hung umdoh ahin, Ama louva um dohkhat cha aumpoi. Aumdoh chengse jong hi 4 Ama hinkhoa hingson cheh ahiuvin, hiche hinkho chu mihem dia khovah ahi. 5 Vah chun muthim lah ahinsaltan, muthimin anahe joupoi. 6 Pathena kona hung kisol amin John kiti khat aumin, 7 ama hi hettohsah a hung pang, ama jeh a mitinin atahsan theina dia vah thudol hettohsah ahung ahi. 8 Ama chu vah ahipon, vah thudol hettohsah a hungjoh ahibouve. 9 Vah tahbeh mitin salvah chu vannoi leiset’a hung ahitai. 10 Ama jeh a vannoi leiset hung umdoh ahin, Ama vannoiya ahungin, ahinla vannoiyin anahepoi. 11 Agamsunga hung ahin amitenla Ama anasang pouve. 12 Ahin amina tahsana Ama kisan chengse chu Pathen chate hitheina thu apetai. 13 Amaho chu mihem thisan gui le tahsa dei chule mihem deiya peng hilouvin, Pathen guiya peng joh ahibouvui. 14 Thu chu tahsaphe ahungdsoh-in, i-lah-uva ahung chengin, keihon aloupina, Paa kon Chapa chang khatseh loupina chu lungset le thutah lhingset’in kamutauve. 15 Johin Ama thudol hettohsah nan lhang asamin “Keiman kaseipa, ‘Kanunga hungpa khu aum Jingsa ahijeh-in kei sangin achungnung joi,’ kiti chu Ama hi ahi,” ati. 16 Ama bulhinset ahijeh-in eihon kinon jel’in lungsetna imutauve. 17 Ijeh-inem itile Danthu chu Mosea hung kipe ahin, lungsetna le thudih vang Jesu Christa jeh a hung umdoh ahi. 18 Koiman Pathen amu khapoi, Pathen hingjing khatseh chu Pa op’a beh jingpan bou aphondoh ahi.

John Baptist hettohsah

19 Hiche hi John thu hettohsah chu ahi, Jerusalema hung kon Juda hon, “Koi nahim?” tia dong dia thempu hole Levi ho asol’u chun 20 aman seilep louhel’in phongtah in, “Keima Messiah kahipoi,” ati. 21 Hijeh chun amahon adongun, “Koiba nahim? Elijah nahim?” atiuleh; aman, “Kahipoi,” ati. “Themgao nahim?” atiu jongleh, “Kahipoi,” tin adonbut’e. 22 Chu phat’in ajah a, “Koiba nahim? Eihinsol teu kaseipeh theina dinguvin, koi kahiba nakitim?” atiuleh; 23 aman, “Kei hi “Gamthip’a khosam ogin khat’in, Pakai lampi semjangun,’ ati tia Isaiah Themgaovin aseipa chu kahi,” ati. 24 Pharisee phabep jong ahinsol’un, 25 amahon ajah a, “Messiah nahi louva, Elijah jong nahi hih a chule Themgao jong nahidrh lou leh ibol’a baptize nachansahji ham” tin adongui. 26 Johnin amaho adonbut’in, “ken twiya baptize kachansahji ahin, nalah-uva nahet louvu khat adinge; 27 kanunga hunga chu Ama ahin, Keima akeng chot khao sut lham didnga jong kilom kahipoi;” ati. 28 Thil hicheng hi Jordan luigal Johnin baptize achangsahji na, Bethany khoa thu soh ahi.

Pathen kelngoi nou

29 Ajing nikhon Jesu ahenga hung amun Johin, “Ven, Pathen kelngoi nou vannoi chonset pamang khu. 30 Keiman, ‘Kanunga hung khu aum jingsa ahijeh-in keisangin achungnung joi,’ katipa chu Ama hi ahi. 31 Ken jong ama hi kahepoi, Israel lah a Ama akikhon doh theina dinga hung twiya baptize chansah kin kabol ahi,” tin 32 Johnin ahettohsah-in, “van a kona lhagao vakhu banga hung kumlhaa achunga chu kamui. 33 Ken Ama kahepon, twiya baptize chansah dia eihonsolpan, ‘Lhagao hungkhumlhaa achunga chu namuna chu lhagao Thenga baptize chan sahpa ahi,’ ati. 34 Hichu keiman kamutan Ama hi Pathen Chapa ahi, tia kahettohsah ahi,” ati.

Seijui masaho

35 Ajing nikhon John aseijuite mi nit oh adidngin, 36 agahvet leh Jesun lam ajotpet amun, “Ven, Pathen kelngoi nou khu,” ati. 37 Aseijuite nin John thusei hi aja lhonin Jesu nung ajui lhontai. 38 Jesu akihei leh amanin ahinjui lhon amun ajah lhona, “Ipi nahol lhon ham?” atileh amanin ajah a, “Rabbi (Hichu Houhil tina ahin,) hoiya nalhun em?” tin adong lhone. 39 Jesun ajah lhona, “Hung in hung ve lhonin,” ati. Hijeh chun amani ache lhonin alhunna agamudoh-in, hiche ni chun amatoh aum khomtauve. Aphat hi nilhah lam nidan li don ahiye. 40 John thusei jaa Jesu nungjuite ni lah a khat chu Simon Peter naopa Andrew ahi. 41 Aman asopipa Simon akimupi masah-in ajah a, “Keinin Messiah (hichu leng chang dia thao nusa kiti) chu kamudoh lhontai,” ati. 42 Andrewn Simon chu Jesu henga ahinpuiye. Jesun Simon chu aven, “Nang hi John chapa Simon nahin, nangma Cephas Peter nakiti ding ahi,” ati.

Jesun Philip le Nathaniel akou

43 Ajing nikhon Galilee gama che ding akigon, Philip amudoh-e. Jesun ajah a, “Neijuiyin,” ati. 44 Philip hi Andrew le Peter chenna Bethsaida khoa mi ahi. 45 Philip’in Nathanael amun ajah a, “Achung thu Mose’n Danthua asut, Themgaohon jong autpa chu keihom kamu’uvin, Nazareth khoa Joseph chapa Jesu ahi,” ati. 46 Nathanael’in ajah a, “Nazareth khoa thilpha soh thei ding ong?” atileh; Philip’in ajah a, “hungun hung ven,” ati. 47 Nathanael aheng lama hung Jesun amun, achung thu aseiyin, “Ven, Israel midih tah, phat lhem nabei mi khu,” ati. 48 Nathanael’in ajah a, “Hoiya kona iti neihet ham?” atileh; Jesun adonbut’in ajah a, “Philip’in nakou masang, theichang phung noiya naum pet’a chu kamu nahitai,” ati. 49 nathanael’in adonbut’in, “Rabbi, Nangma pathen Chapa nahin, Israel lengpa nahi!” atitai. 50 Jesun adonbut’in ajah a, “Theichang phung noiya naum pet’a kamu nahitai katijeh a chu natahsan ham? Hiche ho sanga lenjo cheh nahin muding ahi,” ati. 51 Chujongle ajah a, “Kichen tah a kaseipeh nahiuve, van kihonga Mihem Chapa chunga Pathen Vantilte kaltou le kumsuh namu diu ahi,” ati.

John 2

Cana khoa moupui golvah

1 Nithum lhinin Galilee gama Cana khoa moupui golvah akibol’in, Jesu nu jong apange. 2 Jesu le aseijuite jong hiche moupui golvahnaa chun akouvui. 3 Lengpitwi alhahsam phat’un Jesu nun ajah a, “Lengpitwi anei tapouve,” atileh; 4 Jesun ajah a, “Numei, nang le Kei i-kin um am? Kaphat lhing loulai chu,” ati. 5 Anun lhacha ho jah a chun, “Najah-uva asei chan bol jengun,” ati. 6 Hikom chu Judate chonna ngaiya kisuh thengna ding tia songbel twi atena ni ham thum ham dol cheh bel gup kitung ahi. 7 Jesun ajah-uvah, “Bel ho chu twi sung dim’uvin,” ati. Amahon abelgei let cheh-in asung dim’ui. 8 chujouvin Jesun ajah-uva, “Tun phabep thal’un lang golvah lamkaipa henga dom’un,” atileh; amahon adomtauve. 9 Golvah lamkaipan twisih lengpitwi kiso sah chu atep’in, hoiya kila ham, ti ahepon, twi hinthal’a hindom lhachahon vang ahenauve. Hijeh chun aman aji neipa chu kouvin, 10 ajah a, “min lengpitwi chih ahom masan, mi achim tengleh tugeiyin lengpitwi chih nakoi nalaiye,” ati. 11 Jesun hiche hi Galilee gam Cana khoa melchihna abol patna ahin, aloupina aphongdoh tai; hijeh chun aseijuiten Ama tahsanlo tauve. 12 Hiche jou hin Jesu le anu chule Jesu seijuite Capernaum khoa achesuh-un, hikoma chun nikho phabep anichonguve.

Jesun Houin asuh theng

13 Judate kalchuh kut anai phat’in Jesu Jerusalema achetoutai. 14 Houina bong le kelngoi chule vapal joh ho, sumlheng ho agol gol’a tou agatoh khai. 15 Chuin Jesun khao alan ajepna ding akisemin abonchauvin Houin a konin bong ho le kelngoite pumin ajepdoh than, sum nong lhenga pang ho anocheh-in, adokhangu alekhup peh-in, 16 vapal joh ho jah a, “Hiche ho hi hikoma konin podohun, ka-pa in chu kiveina mun naso lou diu ahi,” ati. 17 Aseijuiten, “Na-in din katompanin einechaiye,” tia kisun chu ageldoh tauve. 18 Hichea hin Judaten adonbut’in, “Thil hicheng nabol theina ding hi melchihna ipi neivetsah diu ham?” atiuleh; 19 Jesun adonbut’in aj ah-uva, “Hiche Houin hi sumangun, nithumin tungdoh inge,” ati. 20 Hichun Judahon aseiyun, “Hiche Houin sahnaa kum som li le gup jen lut chu nangin nithuma natundoh ding ong?’ atiuve. 21 Jesun Ama tahsa chu Houin dol’a aseina ahibouve. 22 Jesu thinaa kona athodoh chun aseijuiten hiche asei hi ageldoh bep’ui; hijeh chun Pathen lekhabua thu le Jesu thusei chu atahsantauve.

Jesun mitin lungthim ahesoh-e

23 Kalchuh kut sunga Jerusalema aum sungin melchihna abol ho amu’vin mi tampin Ama atahsantauve. 24 Jesun vang mitin lung thim ahetoh-in amaho chu akisonpi poi; 25 mi lung sunga ipi um ahet sa ahijeh-in mihem chu hitobang ahitia min ama ahettohsah angaipoi.

John 3

Jesu le Nicodemus

1 Pharisee ho lah a amin Nicodemus kiti Judate vaipo mi khat 2 janin Jesu henga ahungin ajah a, “Rabbi, Nangma Pathena hungkon Houhil nahi kaheuve, ajeh chu Pathento kivoplou min melchihna nabol ho hi abol theipoi,” ati. 3 Jesun adonbut’in ajah a, “Kichentah a kaseipeh nahi, peng kit louvan koiman pathen lenggam amu theipoi,” ati. 4 Nicodemus chun ajah a, “Mi ateh teng iti pen thei ding ham? Anu oisunga lut’a anivei nap eng theila ahipon?” ati. 5 Jesun adonbut’in, “Kichentah-a kaseipeh nahi, koi hileh twi le Lhagaova peng lou chu Pathen lenggam alut thei poi. 6 Tahsaphea kona peng chu tahsaphe ahin, Lhagaova kona pengchu Lhagao ahi. 7 Najah a, “Abul’a kona napentei tei diu ahi,” kiti chu dat mo hih-in. 8 Hui khu anun anomna lam lam’ah anungjin, nangin agin naja nan hoiya hungkon hoilama kitol ahi nahepoi; Lhagaova peng tapou chuti chu ahiuve,” ati. 9 Nicodemus chun adonbut’in ajah’a, “Hiche ho chu iti hithei ding ham?” atileh; 10 jesun adonbut’in ajah a, “Israel Houhil khat hiya hiche ho hi nahet lou ham? 11 Kichen tah a kaseipeh nahi, keihon kahettohsah-u hi nasangpouve. 12 Najah-uva leiset thil umdol kaseiya nahet thei louvu le vana thil umdol seipeh-u leng iti natah san diu ham? 13 Vana kona hung kumlha Mihem Chapa tilou koima vana akaltou khapoi. 14 “Gamthip noiya Mose’n gul adop sang banga Mihem Chapa hi kidom sang ding ahin, 15 atahsan chanin Amaa tonsot hinna anei ding ahi. 16 Ajeh chu Pathenin hi banga hi vannoi angailut ahin, Koi hijongle atahsan chan chu mangthah louva tonsot hinna anei theina din a-Chapa chang khat chu apetai. 17 Ijeh-inem itile vannoi themmosah ding hilouvin, Ama jeh a vannoi huhhinga aumtheina dia Pathen Chapa chu vannoiya ahinsol ahbouve. 18 Ama tahsanna chu themmo chang louva, atahsan lou vang chu Pathen Chapa chang khat min a tahsan loujeh a themmo kichansah ahitai. 19 Themmo channa chu hiti ahi, vannoiya khovah ahungtan, anatoh-u aphat loujeh-in mihon khovah sangin muthim adeijo’uve. 20 Ajeh chu thilse bol jousen khovah ahoi, athilse bol chu akiphonjal louna didngin khovah a ahingji poi; 21 thildih bol’a vang chu abolchan Pathen dia bola hi, ti akiphondoh theina din khovah a ahungjin ahi,” ati.

Jesu chule john Baptist

22 hicheng nung hin Jesu le aseijuite Judate gama ahungun, hikoma chun amahotoh aumkhom in baptize achansahjie. 23 Salim koma Aenon kiti laiya chun twiatam jeh-in Johnin jong mi baptize aboljin, miho ahungun baptize achangjiuve. 24 ijeh-inem itile John chu songkul’a akhum hih laiyuve. 25 John seijui phabep le Juda mi khat houthua kisuh theng thudol’in akineltauve. 26 Amaho John henga ahungun ajah a, “Rabbi, Jordan gal’a naumpi, athudol nahettohsahpa khu ve, baptize achan sah jin, mihon Amah eng ajon cheh tai,” atiuve. 27 Johnin adonbut’in, “vana kona akipeh loule min ima akilah theipoi. 28 Keiman, ‘Kei hi Messiah kahipoi, ama sanga eihung kisol masa kahibouve,’ tia kasei chu nang ho tah ahettoh nahiuve. 29 Mou change chu aji neipa ahin, aji neipa jol, a koma dinga athusei ngaiya chun a-ogin ajah leh hachangpan akipahjie. Keijong kakipahna achamkimtai. 30 Ama thupi cheh cheh ding, keima lhasuh jep jep ding kahi.

Vana hungkon Jesu

31 “Chunga hungkon chu mi jouse sanga chungnungpen ahin, leiset’a kon vang chu leiset ahin, leiset thubou aseiye. Vana hungkon vang chu achungnungpen ahi. 32 Aman ajahsa le amusa ahettohsahji ahin, ahinla koima athu hettohsah asangpoi. 33 Ama hettohsah kisan chun Pathen chu adih-e tia anamdet ahitai. 34 Pathen hinsolpan vang Pathen thuho aseiye; ijeh-inem itile Pathenin tepten Lhagao apepoi. 35 Pan Chapa angailun thil ijakai akhut’a apetai. 36 Chapa tahsana chun tonsot hinna anei ahitai; Chapa thu ngai lou vang chun tonsto hinna chu amu louhel ding, Pathen lungsatna achunga umden ding ahi,” ati.

John 4

Jesu chule Samaria mi numei

1 John sangin Jesun seijui atam semjon baptize abol’e, ti Pharisee hon ajah-u chu Jesun ahedoh tan, 2 (Jesu mongin baptize abolpoi, aseijuiten bou abol’ui). 3 Judea gam dalhan Galilee lama akile kittai. 4 Hichea hi Samaria gam ajotpa tei ding ahin; 5 Samaria gama Sychar kiti khoa chun ahungtai; hikom chu Jacob’in achapa Joseph lou mun khat apehna kom ahiye. 6 Hilaiya hi Jacob twikul um ahi. Sunkim don ahitan, Jesu chu alamjot thachol’in twikul koma atouve. 7 Samaria mi numei khat twi thal din ahunge. Jesun amanu henga, “Twi don ding neipen,” ati; 8 ajeh chu seijui ho ma neh cho dinga khopi sung lama cheuvah ahitai. 9 Samaria mi numeinun ajah a, “Iti Juda mi nangin Samaria mi numei kei koma don ding twi nathum ham?” ati. (Ijeh-inem itile Juda mi le Samaria mi ima kimangto lou ahiuve). 10 Jesun adonbut’in ajah a, “Pathen thilpeh hen lang chule nahenga, ‘Don ding neipen,’ tipa chu kihet le chun, nang joh-in ahenga thuma, Ama hinna twi pe ta dinga,” ati. 11 Numeinun ajah a, “Pakai, athalna dingla naneipon, twikul ma thuh tah ahin, hinna twi chu hoiya nalah ding ham? 12 Hiche twikul eisempeh-uva, ama jengin jong anadon, achate le aganchad ho geiya donsah, kapuu Jacob sanga chung nungjo nahim?” ati. 13 Jesun amanu adonbut’in ajah a, “Koi hileh hiche twi don chan chu dang-chah kit ding ahin, 14 Ken kapeh ding twi dona vang chu dangchah kit louhel ding, kapeh ding twi chu asunga tonsot hinna twinah soh doh ding ahi,” ati. 15 Numeinun ajah a, “Pakai, kadangchah louna ding leh hichan geiya twi thal’ kahung louna din hiche twi chu neipen,” ati. 16 Jesun ajah a, “Chen najipa gakouvin hikoma hung kit’in,” atileh; 17 Numeinun adonbut’in ajah a, “Keiman ji kaneipoi,” ati. Jesun ajah a, “Nangin, ‘Ji kaneipoi,’ nati chu naseidih nai; 18 ajeh chu ji nga jen nanei ahitan, tua naneipa khu naji ahipoi, hichu nasei dih-e,” ati. 19 Numeinun ajah a, “Nangma Themgao khat nahi, ti kahe-tai. 20 Kapu kapateuvin hiche molchunga hin Pathen ahoujiuvin, nang hon ‘Jerusalem muna bou min ahou ding ahi,’ natiuve,” ati. 21 Jesun amanu jah a, “Numei neitahsanin, anng hon Pa chu hiche molchung jong hilou Jerusalem jong hideh louva nahou theina diu phat ahung lhunge. 22 Nang hon nahet lou nahouvu ahin, keihon vang kahet kahouvu ahi; ajeh chu huhhingna hi Judate lah a konbou ahi. 23 Ijeh-inem itile Pa chu ahou tahbeh hon lhagao le thutah a ahouna diu phat ahung lhungtan, tun hikomah aume; ajeh chu Pan hitobang miho chu bou Ama hou dia ahole ahiye. 24 Pathen chu Lhagao ahin, Ama houten Ama hina Lhagao va ahou mong diu ahi,” ati. 25 Numeinun ajah a, “Keiman, ‘Thao kinu kiti,’ Messiah hung ding vang kahenai. Ahung teng leh ijakai eiseipeh nauvinte,” atitai. 27 Hichepet hin Jesu seijuite ahungu leh numei khat toh anakihou chu adatmo lheh-un, ahivang in, “Ipi nadoh hiya,” ahiloule, “Hichenu khutoh ibol’a kihou nahim?” tia khat cha aumpouve. 28 Numeinun atwibel dalhan khopi sunga chen miho jah a, 29 “Hungin kathilbol kachonna jouse eiseidoh peh jeng mi khat hung veuvin, hiche hi Messiah hikhat ding hi tam?” agati. 30 Miho khopia konin apotdoh-un Jesu henga ahungui. 31 Hiche kah lah a hin seijuiten, “Rabbi, an nen,” tin a-ngeh-ui. 32 Jesun ajah-uva, “Nang hon nahet louvu neh ding an kanei nai,” ati. 33 Hichun seijuite khat le khat akihouvun, “Mi khattouvin neh ding ahinchoipeh ham?” akitiuve. 34 Jesun ajah-uva, “Keima anneh chu Eihinsolpa dei bol’a natoh molso ding hi ahi. 35 Nang hon, ‘Chang atna ding lha li aum nalaiye,’ natiji hih-um? Ven najah-uva kasei ahi, khodahun loujao dung veuvin, agusoh-in aminin a-at phat ahitai.

Tahbeh-in

36 atupa le a-atpa akipa khom theina didngin a-atpan tohman akisanin aga ronsot hinaa akhol’e. 37 Hijeh chun khat’in atun chom khat-in a-atji kiti hi adih-e. 38 Ken natoh gim lou nauva at dia kasol nahiuve, midangin atoh gim aatohgauva lut mahiuve,” ati. 39 Chuche khopi sunga Samaria mi tamtah-in jong, “Kathilbol kachonna chengse eiseidoh peh-e,” tia nameinun ahettohsah jeh chun Jesu atahsantauve. 40 Samaria miho ahungun akom’uva nichong din angeh u leh, Aman chukoma ni ni aninchonge. 41 Ama thusei jal’in mi tampin atahsan beuvin, 42 numeinu jah a chun, “Nangma thusei keova katahsanu ahitapoi, keiho tah-in kajauvin, chule hiche Pa hi Vannoi huhingpa ahi, kahetauve,” atiu vin ahi.

Jesun vaibolpa chapa adamsah

43 Ni ni jouvin Jesu chukom dalhan Galilee gama achetai. 44 Ajeh chu Jesu amatah-in Themgao achenna gama akijabol lou thu ahettohsah ahi. 45 Galilee gam ahung lhun leh agam miten anasang cheh-ui; amaho jong kut a che ahijeh-un, kut laiya Jesun Jerusalema thil abol jouse amusoh keiyu ahiye. 46 Galilee gama twisih lengpitwi asosahna

Cana khoa chu Jesu ahung kit leh, hikoma chun lengvaipoa pang loi mi khat anaumin, achapa chu dammoa Capernaum khoa um ahi.

47 Hichepa hin Judea gama kon Jesu Galilee gama hung ajah phat’in ahenga achen, achapa athipai ding phat chun, hungsah a achapa dam sah din a-ngeh-e. 48 Jesun ajah a, “Melchihna le thil kidang namu lousen tahsan pouvin nate,” ati. 49 Lengvaipoa pangpan ajah a, “Pakai, kachapa thi kah-in hungsuh jengin, “ati. 50 Jesun ajah a, “Chetan, nachapa ahingtai,” atileh; aman ajah a Jesu thusei chu atahsanin achetai. 51 Ama achesuh nalaiyin asohten ahung lamton achapa hindoh thu aseipeh tauve. 52 Aman achapa itih don tah a phadom ahi adoh leh, amahon ajah a, “Jan hi nil hah lam nidan khat chun khosih-in alhatai,” atiuve. 53 Hichun apan, “Nachapa ahingtai,” tia Jesun ajah a aseipeh pet tah chu ahi, ahedoh tan, ama le a-insung pumpiuvin atahsan tauve. 54 Hiche hi Judea gama kona Galilee gam ahunglhun kal’a Jesun melchihna abol aniveina ahi.

John 5

Bethzada twikul’a Jesun chatmopu aboldam

1 Hicheng nung hin Judate kut khat aumin, Jesu Jerusalema aga chetouve. 2 Jerusalema chun kelngoi kotphunga Hebrew paova, “Bethzada” kiti twikul khat aumin, leibuh nga aume. 3 Hiche dunga hi ana damlou mitcho, elbai, nakong chatmo tampi um ahiuve.(Amaho hin twi kilin angau ahi; 4 ijeh-inem itile phat khat khat leh Vantil twikul’a hi hung kumlhaa twi chu ahinsuh lingjia, hiche twi kicholong joutah leh chomlut masapen pen chu itobang hiveiya na hijongleh damhelji ahi.) 5 Hikoma hin mi khat kum som thum le get jen na chatmo aume. 6 Ama chua alup Jesun amun, phat sotpi hichea hi lum ahi, ahen ajah a, “Nadam nom em?” atileh; 7 anapan adonbut’in ajaih a, “Pakai, twi hung kicholoh teng twikul sunga eidomlut dingla koima kaneipon, kacheleh kalhun kah-in min eikheljin achimlut masajitai,” ati. 8 Jesun ajah a, “Thouvin nalupn apheh kilah-in lamjot tan,” ati. 9 Apettah chun mipa chu adamhel’in alupna akijeldoh-in lam ajottai. Hiche nikho chu Choldo ni ahi. 10 Hijeh chun Judah on adamdohpa jah a, “Tuni hi Choldo ni ahin, nalupna nakiput jeng chu dan ngai ahipoi,” tin aphoh-ui. 11 Aman adonbut’in, “Eidam sahpan kajah a, ‘Nalupna pheh kilah-n lam jottan,’ eiti chume,” ati. 12 Amahon, “Najah a, ‘Nalupna kilah-in lang lam jot’in,’ tia chu koipen ham?” tin adongui. 13 Ahinla adamdohpan amuna mi atam beheh phat’a, Jesu ache mang tah jeh-in, aboldampa chu koiham ahetapoi. 14 Hicheng nung hin Jesun ama hi Houin a amudoh-in ajah a, ‘Ven, adam nahitai; akhoh chehjo nachunga achuh louna din chonse kit ta hih-in,” ati. 15 Mipa chu achen Judda miho jah a adamsah chu Jesu ahi agaseitai. 16 Hitia agaseidoh phat hin Choldo nikhoa hitiho aboljeh chun Judah on Jesu abolsetauve. 17 Jesun amaho hi adonbut’in, “Tu chan geiya hi ka-Pan na atoh jing jeh a Ken jong katoh ahi,” ati. 18 Hichea hin Juda hon Jesu chu tha din ahahol cheh tauve; ijeh-inem itile aman Choldo nikho asuhkeh keo ahipon, Pathen chu Amaseh Paa aseiya, pathento kibanga akiseijeh ahi.

Pathen Chapa tha neina

19 Jesun miho chu adonbut’in ajah-uva, “Kichentah a kaseipeh nahiuve, Chapan achamin ima abolpoi, Pa bol amuchan abol ahi; ajeh chu ipi hileh Pan abol chan chu Chapan jong abol ahi. 20 Ijeh-inem itile Pan Chapa angailun, atoh chan avetsah jin, nadatmo helna diuva hicheng sanga thupijo jong ahinvetsah ding ahi. 21 Pan mithi ho athodoh a ahinsah banga, Chapan jong ahinsah nom chan ahinsah ahi. 22 Pan koima thu atanpoi, thutan ding jouse apumpia Chapa apehdoh ahitai; 23 hitia min Pa ajabol banguva mitinin Chapa ajabolna ding ahi. Chapa jabol lou mi chun asol’a Pa geiya ajabol lou ahi. 24 “Kichentah a kaseipeh nahiuve, kasei ngaiya Eihinsolpa tahsan chun tonsot hinna anei ahitan, thupi tan naa lut louva thinaa kona hinna galkai ahitai. 25 Kichentah akaseipeh nahiuve, mithihon Pathen Chapa ogin ajah-uva, ajaph chanin hina aneidiu phat ahung lhunin, tun hikoma aume. 26 pa Amatah hinna bulpi ahibangin, Aman Chapa jong hinna bulpi hina apetai. 27 Mihem Chapa ahijehin jong Pan thupi tanna apetai. 28 Hiche hi datmo hih-un, ajeh chu lhankhuh dung alum mithihon aogin ajahna diu phat ahung lhunge, 29 mithiho lhankhuh hoa kona hung potdoh-uva, thilpha bol chengse kikaithouva hing diu, thilse bol chengse vang kikaithouva athuu kitan ding ahi,” ati.

Jesu thudol hettohsah ho

30 “Keiman kachamin ima kabolpoi; pan eihil banga thu katanjeh-in kathutan adih-e; ijeh-inem itile keima dei khohsah louva Eihinsolpa lungdei kaholjoh ahi. 31 “Keiman kachung thu kakiseihileh kathu hettohsah chu dih lou ding ahi. 32 Kei chung thu hettohsah achom khat aumin, ama hettohsah chu adih kahei. 33 Nang hon John henga mi nasol’un, aman adih ahettohsah-e. 34 Ken mihem hettohsah chu kison nan kaneipoi, huh hinga naum theina diuva kasei ahibouve. 35 John chu thaomei kivah vahchansel ahin, ama vah a chun nang hon chom khat nomsah ding nadeiyui. 36 Keima hettohsah vang hi John’a sanga thupijo ahi, ajeh chu ka-pan molsa dinga eipeh toh ding ho katoh chengse hin pan eihinsol kahi thudol ahettohsah ahi. 37 Eihinsol’a Pa chun kachung thudol ahettohsah ahin, nang hon a-ogin jong najapouvin, alim jong namupouve. 38 Ahinsolpa natahsan loujeh-un nasunguva jong athu achengpoi. 39 Pathen lekhabu hoa chu tonsot hinna neithei din nagel’un nasim jiuvin, hiche ho chun Kei thudol ahettohsah-u ahibouve. 40 Nahinna diuvin kakoma nahung nompouve. 41 “Keiman mihem choi-at kakisonpipoi, 42 nalung sunguva Pathen na-ngailut louvu kahenai. 43 Keima ka-pa min’a hung kahin, nang hon neisang pouve; achomdang khat ama le ama minin hung le amajoh chu sangun nate. 44 Nang hon mihem choi-at kisonpiuva Pathen khatseh pachat didngjoh holl ou chu iti natahsan thei diuba ham? 45 Ama vang Keihin Pa henga kaheh-in gel hih-un, nang hon nakineppiu Mose chu naheh-uva pang ahi. 46 Mose natahsanu le Keijong neitahsan tei diu ahi, ajeh chu aman kei thudol asut ahibouve. 47 Aman asut thuho natahsanlou vangu leh kathuseiho jong natahsan lou diu ahi,” ati.

John 6

Jesun mi sang nga avahva

1 Hicheng nung hin Jesu Tiberias dillen kiti, Galilee dillen agal kaitai. 2 Jesun adammo ho aboldama melchihna kidang tampi abol amujeh-un mupin ajuitauve. 3 jesu mol chunga akaltouvin, aseijuite toh atouve. 4 Hichun kalchuh kut kiti Judate kut anaitai. 5 Jesu akhoda leh mipi ahenga hung amun, Philip jah a, “Mipi hicheng neh khop ding hi changlhah hoiya ichoh diu ham?” ati. 6 Hiche hi Aman patepna asei ahi; ajeh chu ipi abol ding Aman akihetnai. 7 Philip chun adonbut’in, “Denari ja ni man changlhah kicho jongleh them kha khat’in jong chang pouvinte,” ati. 8 Aseijuite lah a khat, Simon Peter sopipa Andrewn ajah a, 9 “Hikoma hin pasal chapang khat’in sap change kisem changlhah pheng nga le nga ni vang aneiyin, mi hijat lah a ipi khama pang ding ham?” ati. 10 Jesun “Miho chu tousah-un,” ati. Hikoma chu hamhing tampi umah ahin, miho chu atouvu leh amijat sangnga bang ahiuve. 11 Jesun changlhah pheng ho chu alan athangvah jouvin miho chu atou nauva ahoppeh-in, nga te nijong chutiman abol’in, amahon agot chanin aneuve. 12 Mihon anehva soh phat’un Jesun aseijuite jah a, “Nehval anong nai geiyin, amang thah beihel’in loh khom’uvin, “ati. 13 Hiti chun aloh khomun ahileh, sap change kisem changlhah pheng ngaa kon mihon anehmoh nong siu chu paipeh som le ni aloh dim’uve. 14 Thil kidang abol mu hon, “Hichepa vang hi vsnnoiya hung dia kisei Themgao chu ahimong mongtai,” atiuve. 15 Hichea hin mihon hunga achamlouva leng chansah din ago’uve, ti Jesun ahen, achangseh-in molchunga akitheh doh tai.

Jesun twichunga lam ajot

16 Nilhah ahiphat’in Jesu seijuite dillen lama achesuh-un, 17 kong khat’a lut’in Capernaum join dillen chu apal’uve. Kho ajing lheh tan, Jesu la ahenguva ahung hih laiye; 18 chule huipi hattah ahung nungin twipi akinong sang tul tul jenge. 19 Kilometer thum le li ham akitol’u leh Jesun twichunga lam ajot’a kong lang ahinjot amu’vin akicha lheh jengui. 20 Jesun ajah-uva, “Kei kahibouve, kicha hih-un!” ati. 21 Hichun Ama kong sunga puilut ding agot’u leh, kong chun ajotnau tol aphapaitai.

Mipin Jesu ahol’u

22 Ajing nikhon dillen gal lang khat’a um mipin chukoma kong dang beiya khatseh um chu amu’vin, chule hiche konga chun Jesu seijuite toh lut khom louvin, asdejuite achanguva chea Ama adalhah-u aheuve. 23 Pakaiyin athangvah jouva changlhah aneh nau mun kom, Tiberias a kona vang kong dang jong hung ahinai. 24 Hijeh chun Jesu le asei juite chukoma aumtapouve, ti ahet phat’un mipi chu acham chamin kong sunga alut’uvin Capernauma ahungun Jesu ahol’uve.

Jesu hinna changlhah ahi

25 Mihon Jesu chu dillen gal langkhat’a amudoh phat’un ajah a, “Rabbi, itih a hikoma hung nahi tah em?” atiuve. 26 Jesun amaho adonbut’in, “Kichentah a kaseipeh nahiuve. Nang hon melchihna ho namu jeh-uva neihol’u ahipon, changlhah nachan’uva nanehva jeh-uva neihol’u ahibouve. 27 Amangthah ji anneh holnan tong gim hih-un, Mihem Chapan napeh diu a-itih a um jing, tonsot hinna thei anneh holnan tong gim jo’uvin, ajeh chu Pa Pathenin Chapa chu tha neina mohor anamkhum ahi tai,” ati. 28 Amahon jah a, “Pathen na katoh thiena diuva ipi kabol diu ham?” atiuve. 29 Jesun adonbut’in ajah-uva, “Pathen na toh ding kiti chu ahin solpa natahsan diui hi ahiye,” ati. 30 Hichun amahon, “Nang katahsan theina diuva melchihna ipi nabol’em? I-ham nabol? 31 Ka pu kapateuvin Pathen lekhabua kisun, ‘Aman aneh diuvin vana koin changlhah apei,’ kiti dungjuiyin gamthip noiya Manna anneuvin ahi,” atiuve. 32 Jesun ajah-uva, “Kichentah a kaseipeh nahiuve, Mose’n vana konin Manna napepouve, ka-Pan vana kon changlhah dihtah chu napeh-u ahibouve. 33 Ijeh-inem itile Pathen changlhah chu vana kona hung kumlhaa vannoi dia hinna pepa chu ahi,” ati. 34 Amahon Jesu jah a, “pakai, hiche changlhah chu neipe jing jengun,” atiuleh; 35 Jesun ajah-uva, “Kei hi hinna changlhah kahin, kaheng hinjon jouse gilkel lou ding, chule Keima eitahsan chu dang chah kit lou hel ding ahi. 36 Amavang kaseipeh nahiuve, nang hon neimu tauvin, neitahsan pouve. 37 Pan eipeh chengse kahenga hungin tin, kaheng hinjon chu koi hileh kaledoh lou ding ahi, 38 ajeh chu Keima chama vana kona hung kumlha kahipon, Eihinsolpa lungdeiya hung kahibouve. 39 Eihinsolpa lungdei chu Aman eipeh chengse khat cha mansah louva, phatchai nikhoa kakaithou ding hi ahiye. 40 Ijeh-inem itile ka-pa dei chu Chapa mu jousen atahsan’a tonsot hinna anei ding, phat chai nikhoa Keiman kakaithou ding hi ahi,” ati. 41 Jesun, “keima vana kona hung kumlha changlhah kahi,” atijeh chun achunga Judate aphun’un, 42 “Hichepa hi Joseph chapa, anu apa i-hetsau Jesu chu hilou haimo? I-tileh aman, ‘Vana kona hung kumlha kahi,’ ti ham?” atiuve. 43 Jesun adonbut’in ajah-uva, “Kihou lhi chet chut’in phun dauvin, 44 Eihinsol’a Pan aloilut lou chu koiman kaheng ahinjon theipoi; ahunga chu phat chai nikhoa Keiman kakaithou ding ahi. 45 Themgaoho lekhabua chun, ‘ Abonchauva Pathenin ahil diu ahi,’ tin akisun’e. Pa thu ngaiya Amaa kihilna neichan kahenga ahungjie. 46 Mi koiman Pa chu amukhapoi, Pathena kona hungpa, amanbou Pa chu amu ahi. 47 Kichentah a kaseipeh nahiuve, atahsana chun tonsot hinna anei ahitai. 48 Keima hinna changlhah kahi. 49 napu napateuvin gamthip’a Manna aneh vangun athigam tauve. 50 Vana kona hung kumlha cahnglhah chu min aneh teng thi lou ding ahi. 51 Keima vana hung kon changlhah hing kahi, min hiche changlhah hi aneh leh tonsot’a hing jing ding ahi; Keiman kepeh ding changlhah chu katahsa ahin, vvannoi hina dinga kapeh ahi,” ati. 52 Judaho lung phamo tenin akihouvun, “Hichepa hin neh dia atahsa iti eipeh didu ham? Atiuve. 53 Jesun ajah-uva, “Kichen tah a kaseipeh nahiuve, nang hon Mihem Chapa sa naneh louva athi nadon louvu leh nasunguva hinna naneipouve. 54 Kasa nea kathi don’a chun tonsot hinna anei ahitan, phat chai nikhoa Keiman kakaithou ding ahi. 55 Ajeh chu kasa hi neh ding mong ahin, kathi hi don ding mong ahi. 56 Kasa nea kathi don’a chu kasunga aumin, keima ama sunga kaume. 57 pa hing jing chun eisol’a Keijong pa vanga kahin banga, Keima einea jong chu Keivanga hing ding ahi. 58 Vana kona hung kumlha changlhah chu hiche hi ahi: pute paten aneh-uva thi khemlouva aum nau tobang ahipoi, hiche changlhah nea vang chu tonsot’a hing ding ahi,” ati. 59 Jesun hicheng hi Capernaum khosung Houthua kihopnaina thu ahilpet’a asei ahi.

Tonsot hinna thu

60 Jesu seijui tampin hiche hi ajah phat’un, “Asei hi ahahsa behseh jenge, kon angai thei ding ham?” atiuve. 61 Aseijuite hiche thua aphun chu Jesun along gil’in ahen ajeh-uva, “Kasei hin nakipalsah-u hita ong? 62 Mihem Chapa hi masanga aumna ngaiya akaltou muleu chun iti tauvin natem? 63 Hinna pea Lhagao ahin, tahsaphen ima atahpoi; najah-uva kathuseiho hi Lhagao le hina ahi. 64 Ahinla nalahuva atahsan lou jong naum’uv,” ati. Ijeh-inem itile Jesun abul’a pat atahsan lou ding koi koi hiuva chule Ama matsah dingkoiham, ahet jingsa ahi. 65 Aman aseiyin, “Hichejeh a chu, ‘Pan aphalpeh tilouvin koiman kaheng ahinjon theipoi,’ ti najah-uva kasei ahi,” ati. 66 Hichea pat hin Jesu seijuitampi akinung leuvin, Amatoh akilhon le tapouve. 67 Hichun Jesun som le ni jah a, “Nang ho la nakinungle nom louvu ham?” atileh; 68 Simon Peterin adonbut’in, “Pakai koiheng kabel diu ham? Nangin tonsot hinna thu hijat neiya; 69 chule Pathena hung kon Athengpa chu nahi katahsan kihe ta chu,” ati. 70 Jesun amaho adonbut’in, “Nang ho som le ni kalhen chil hilou ham? Nalah-uva khat Dia bol nanalai ong?” ati. 71 Jesun Iscariot Simon chapa Judas aseina ahi; ajeh chu som le nil ah a apan vangin Jesu matsah a pang ding chu ama ahi.

John 7

1 Hicheng nung hin Juda lamkai hon tha dia aholjeh-un Jesu Judea gamsunga avahle nom tapon Galilee gamsunga bou akholjin lei. 2 Juda ho lhambuh kut ding phat anaitai. 3 Hijeh chun asopiten Jesu jah a, “Nathilbol natoh ho hi naseijui hon jong amu theina diuvin hikom dalhan Judea gama chetan. 4 Ijeh-inem itile minthan dei mi koiman guh thimin thil abol ngaipoi. Thil hicheng nabol ahileh vannoi kimusah ngal’in,” atiuve. 5 Ajeh chu asopite jengin jong atahsan pouve. 6 Hijeh chun Jesun ajah-uva, “Nang ho didnga phat ahijing vangin Keidin phat ahi hih laiye. 7 Anatoh chengse phat louna kahettohsah jeh-in vannoiyin Keima eihon nang ho vang naho pouve. 8 Nang ho kut’a chun chetauvin, Keivang kaphat alhin loulai jeh-in hiche kut’a hin cheponge,” ati. 9 Hicheng hi aseiyin Ama Galilee gamsunga aumdentai.

Lhambuh kutlaiya Jesu

10 Asopi kut’a dia ache nungun Jesu jong lhang phong hilouvin guh thimin achetouve. 11 Kut laiyin Judah on Jesu ahol’uvin, “Ama chu hoiya um ham?” atiuve. 12 Japi lah a chun Jesu thudol’a kinel baotamna asoh-in, loi khat’in, “Ama hi mipha ahi,” atiuvin; abangin, “Ahipoi, mipi apui chavai boue,” atiuve. 13 Juda ho agin jeh-un koiman vang athudol lhang phongin asei ngampouve. 14 Kut lai tah-in Jesu Houina achetouvin thu agahil’e. 15 Hichea hin Judah on adatmo lheh jengun, “Hichepan kahilna bon nei louva iti lekha hiti thep hi nga na?” atiuve. 16 Jesun amaho adonbut’in, “Kathuhil hi Keiya ahipoi, Eihinsolpaa ahibouve. 17 Eihinsolpa lung dei bolnom mi chun thu kihil hi Pathena kon ha, kachama kasei ham, ahet didng ahi. 18 koi hileh achama thuseipan Ama kichoi atna ding bou aholjin, ahinsolpa choi tana ding holpa vang chu adih ahin, ama sunga chun adih lou aumpoi. 19 Mose’n danthu napeh-u hilou ham? Ahinla nang ho khat cha beh-in danthu chu namangpouve. I-bol’a tha dia neihol’u ham?” ati. 20 Mipin adonbut’un, “Nang hi thilhavop nahi. Kooiham tha dia nahol’ah?” atiuve. 21 Jesun adonbut’in ajah-uva, “Ken na khat katongin nabonchauvin nadatmouve. 22 Amaa kon ahilou vangin pu le patea konin Mose’n chaptan ding thu napeuvin, hijeh chun Choldo ni jeng jongleh mihem chep natanjiuve. 23 Mose Danthu suhkeh louna dia Choldo mikhoa mikhat chep akitan leh, Choldo bikhoa mikadamthengsah hel jeha i-bol’a kachunga lung hang nahiuvam? 24 Polam mitvet’a thu tan louvin adih bangtah-in tan’uvin,” ati.

Jesu chu Messiah ham

25 Jerusalem Kon miphabep’in “Mihon tha dia ahol’u chu hichepa hi hilou naimo? 26 ahinla ve, aman lhang phongtah-in thu asiyin, amahonla ajah a imacha aseipouve. Vaipoten ama hi Messiah ahi tia ahet chet mongu hitam? 27 Keihon hichepa ahung kina kihea, Messiah ahung teng vang leh koiman akonna ahet lou ding ahi,” atiuve. 28 Jesun hitea Houina thu ahilpet hin asamin, “Nang hon Keima neiheuvin, kahung konna geiyin naheuve. Ahinla Keima kachama hung kahipoi, Eihinsolpa chu dih tah ahin, nang hon Ama nahepouve. 29 Kenvang Ama kahei, ajeh chu Amaa hung kon Ama sol kahi,” ati. 30 Hichun mihon mat dingago’uvin, aphat lhin loulai jeh-in koiman achunga khut alhapouve. 31 Mipilah a tampin Ama atahsanun, “Messiah hung teng jongle hichepa bol sanga tamjo melchihna abol mong ding hinam?” atiuve.

Vaibol hon Jesu man ding asol’u

32 Jesu thudol’a mipi akinel baotam nau chu Pharisee hon ajauvin, hijeh chun thempu pipuho leh Pharisee hon Jesu man din lhacha ho asoltauve. 33 Jesun, “Phat chomcha ka-umpiuva, chutengleh Eihinsolpa henga kache ding ahitai. 34 Nang hon neihol’uvaneimu lou diu, Kei umnaa la nahung thei lou dingu ahi,” ati. 35 Judaho akihouvun, “Hoiya che idng kigo hiya, eihon i-hol’uva imu lou diu ham? Chi dang namdang lah akithecheh Judate lah a chea, chiding namdang h gahil ding agot kha tham? 36 Athusei, ‘Neihol’uva neimu lou diu, Kei umna la nahung thei lou dingu ahi,’ ati hi ipi atina mong ham?” atiuve.

Hinna twidung

37 Kut kichai ni, ni loupe nin Jesu adingin o-ging tah-in asamin, “Koi hileh adangchah a chu kahenga hung hen lang don hen, 38 Pathen lakhabun, ‘Keima eitahsana chu along sunga hintwi put’a luiya long ding ahi,’ ati banga um ding ahi,” ati. 39 Jesun Ama tahsanhon Lhagao akisan diu aseina ahi, ijeh-inem itile Jesu choi-at a aum loulai jeh a hiche ni geiya hi Lhagai kihom loulai ahi.

Mipi kikhente

40 Hiche aseiho hi mipi phabep’in ajauvin, “Hichepa hi Themgao tahbeh ahibouve,” atiiuvin ahi. 41 Adang hon ma, “Hichepa hi Messiah ahi,” atiuvin, konkhat’in vang, “Galilee gama Messiah sohdoh din gong?” 42 Pathen lekhabun, ‘Messiah chu David guiya kona Bethlehema hung sohdoh ding ahi,’ ati lou ham, David chenna khopia chu?” atiiuve. 43 Hijeh chun Ama jehin mipi akibung khentauve. 44 Abang bangin mat din ago’uvin, koi manla achunga khut alhapouve.

Thu neihon Jesu atahsan lou

45 Lhachaho chu Thempu pipu ho le Pharisee ho henga ahung phat’un amahon, “I-bol’a nahin kaidiu ham?” tin anadongui. 46 Lhachahin adonbut’un, “Khu cheap thusei tobangin koiman thu asei khapoi,” atiuve. 47 Pharisee hon adonbut’un, “Doha nalhah-u hitalou ong? 48 Vaipo ho lah a khat beh le Pharisee mikhat beh-in atahsan em? 49 Danthu hetoh lou hiche mipi vang hi sapset chang hiuva khu,” atiuve. 50 Alah-uva mikhat, masanga Jesu henga hungsa, Nicoddemua vang chun ajah-uva, 51 I-danthu’vin mi athu ngai masa loule athilbol muchen louva achung thu eitahsanji nah um?” ati. 52 Amahon adonbut’un ajah a, “nang jong Galilee mi nahim? Hol’in vetang, Galilee kona Themgao sohdoh ngai lou chu,’” atiuve. 53 Mihon inlam ajon cheh-un,

John 8

Ajon pettah a kiman numei

1 Jesu chu Olive mol lama achei. 2 Jingkah matah-in houina agache kit’e. Ahenga mipi abonchan ahung kikhomun, Ama atouvin miho thu ahiltai. 3 Danthu them ho le Pharisee hon ajon pettah a kimandoh numei khat ahin kailut’un, Jesu to akah-uva adinsah-un, 4 ajah a, “Houhil hiche nu hi ajon petah a kimandoh ahi. 5 Danthua chun Mose’n hitobang numei ho songa selih dinga asei ahi. Nangin iti na-ngaitom?” atiuve. 6 Ama hetsahna theiya akipalna dia aseiyu ahin, ahinla Jesu abungin akhut jungin tol ajih tai. 7 Amahon adoh tei tei jeng phat’un Jesu adding jangin ajah-uva, “nalahuva chonsetna neilou pen chun amanu hi songin sep masapen hen,” atin; 8 abungin tol ajih kittai. 9 Hiche hi ajah phat’un a-upapen hoa pat’in khat khat’in adalhauvin Jesu le numeinu chubou alailunga aumtai. 10 Hichun Jesu adahdoh-in ajah a, “Numei, hoiya umtauvem? Koiman themmo nachan lou hitam?” tin adonge. 11 Amanun, “Pakai, koiman themmo eichan tapoi,” ati. Jesun, “kenjong themmo kachan poi, chen lan gchonse kit ta hihin,” ati.

Jesu Vannoi Vah

12 Jesun ajah-uva aseikit’in, “Keima vannoi slvah kahin, kanung juiya chun muthima lam’ajot lou ding, hinna khovah anei idng ahi,” ati. 13 Pharisee hon ajah a, “Nangin nachung thu nahettohsah jeh-in nahettohsah chu adihpoi,’ atiuve. 14 Jesun adonbut’in jah-uva, “ken kachung thu hettohsah jong leng kahettohsah hi adih-e; ajeh chu hoiya hung kona hoi lam kajot kakihet’in, nang hon hoiya hungkona hoi lam kajot nahepouve. 15 Nang hon tahsa dol’in thu natan jiuvin, Ken koima thu katanpoi. 16 ijehtin tan jeng jong leng kathutan adih-e, ajeh chu kachang kahinpon, Eihinsol’a pa chun eiumpi. 17 Ajeh chu nadanthu va jong mini thu hettohsah chu adihna akisune. 18 Kachung thu hettohsah a pang Kei kahin, chule Eihinsol’a panjong kachung thu ahettohsah-e,” ati. 19 Amahon ajah a, “Napa hoiya um ham?” atiuleh; Jesun adonbut’in, “Nang hon Keila neihepouvin, ka-pa jong nahepouve; Keima neihetsau hileh ka-Pa jong nahet diu ahi,” ati. 20 Hicheng hi Jesun Houina athuhil pet’a thil kholna muna asei ahin, Ama phat ahung lhun loulai jeh-in koiman aman pouve.

Kache naa hung theipouvin nate

21 Jesun ajah-uva asei kit’in, “Keima che mang ing ting, nang hon neihol diu, ahinla nachonset’a nathiden’uvaa kache naa nahung thei lou dingu ahi,” ati. 22 Juda hon, “Ama le ama kithat ngap ding ham, ‘Kache naa nahung thei lou diu,’ ati khu?” atiuve. 23 Jesun ajah-uva, “Nang ho hoiya kon nahiuvin, Keima chunga kon kahi; nang ho hiche vannoiya nahiuvin, Keima vang hiche vannoiya kahipoi. 24 “Hichejeh a chu nachonset ho’uva nathi diu ahi, tia kasei ahi; nang hon Kei hi, ‘Ama chu ahi,’ tia natahsan louvu leh nachonset ho’uva nathi tei diu ahi,” ati. 25 Hichun amahon ajah a, “Nang koi nahim?” atiuleh; Jesun ajah-uva, “Atil’a pat koi kahi kaseipeh-u chu la? 26 Nachung change thu Pathena siya tan ding tampi kaneinan, Eihinsolpa amatah Adih ahijeh-in Amaa kona kajah cheng chu Vannoi mite kaseipeh ahibouve,” ati. 27 Pa thudol’a ajah-uva asei chu ahdoh thei pouve. 28 Hijeh chun Jesun ajah-uva, “Nang hon Mihem Chapa hi nakhai san gtengu leh Kei hi Ama chu kahi nahetdoh-uva, imacha kachama bol louva, hicheng kaseiho jong hi Pan eihil’a kasei ahi, nahet diu ahi. 29 Chule Eihinsolpa chun alungdei kaboljeh-in eiumpin, kachangin eidalhapoi,” ati. 30 Aman hicheng hi asei nalaiyin mi tampin ama atahsantauve.

Adih chun najalensah diu ahi

31 Ama tahsan Jusa hojah a Jesun, “Nang hon kasei najom jingo leh kaseijui tahbeh mong nahiuvin, 32 chuteng atah chu nahet’uva, atah chun najalensah diu ahi,” ati. 33 Amahon adonbut’un ajah a, “Keiho Abraham chilhah kahiuvin itih-in jong koima koma soh-in kalut khapouve; ati dan a nangin ‘Najalen diu ahi,’ natiham?” atiuve. 34 Jesun amaho chu adonbut’in, “Kichen a kaseipeh nahiuve, koi hileh achonsea chu chonset’a kihen soh ahi. 35 Soh chu tonsot’in in’a acheng pon, Chapa vang acheng jinge. 36 Hijeh chun Chapan jalensah leu chun najalen tahbeh diu ahi. 37 Abraham chilhah nahiu kahenai; ahinla nasunguva kathun mun anei lou jeh-in tha din neigo’uve. 38 Ka-pa koma kamu chukasei ahin, nang hon jong na-pauva kaona najah chan nabol’u ahi,” ati.

Napau Diabol ahi

39 Amahon Jesu adonbut’un ajah a, “Ka-pau Abraham ahi,” atiuleh; Jesun ajah-uva, “Abraham chate hileu chun Abraham thilbol ho nabol diu ahi. 40 Tunla Pathenna kona thutah ja a nahenguva sepia Kei hi tha din neigo’uve, Abrahamin hitobang hi abolpoi. 41 Nang hon napau thil bol nabol’u ahi,” ati. Amahon ajah a, “Keiho bolam kahipouve, ka-pau khat Pathen ahi,” atiuve. 42 Jesun ajahuva, “Pathen na-pau hile Kei nei ngailut diu ahi, ajeh chu Kei hi Pathena hung kon hikoma um kahi, kacham hung kahipon, Aman eihinsol ahi. 43 Idinga kasei nahet khen thei louvu ham? Kahil hi-na-ngai jou loujeh-u ahibouve. 44 Nang ho napau Diabol’a nahiuva napauva hung kon alungdei chu namolso namu ahi. Ama chu semtil’a pat tolthat ahin, thutah aum loujeh a atah a pang ngailou ahi. Aman thujou asei teng along chama aseiji ahi; ajeh chu jousei ahin, jou penna pa ahi. 45 Kenvang atah kasei ahin, ahinla neitahsan pouve. 46 Michonse ahi eiti thei ding koipen nahiuvem? Atah kasei ahileh ibol’a neitahsan dau ham? 47 Pathena kon chun Pathen thu angaiyin, nang hon thu na-ngailouvu hi Pathena kon nahilou jeh-u ahi,” ati.

Abraham masanga umsa kahi

48 Judahon adonbut’un ajah a, “Nangma Samaria mi nahin, thilhavop nahi katiu hi dih lou ham?” atiuve. 49 Jesun adonbut’in, “Keima thilhavop kahipon, ka-Pa kajabol ahin, nang hon Keima neijabol pouve. 50 Keiman kaloupina ding kaholpon, ahol’a athutan khat aum nai. 51 Kichentah a kaseipeh nahiuve, kathu nit chun itih chan hijongle thina atep khah lou ding ahi,” ati. 52 Juda hon ajh a, “Thilhavop nahi tun kahetauve. Abraham athitan, Themgao jouse jong athitauvin, ahinla nangin, “Kathu nit chun itih chan hijongle thina atep khah lou ding ahi,’ nati. 53 Kapu luiyu Abraham athitan, asanga lenjo nahim? Themgao jouse jong athigamtan, koipenba kahi nakitim?” atiuve. 54 Jesun adonbut’in, “Kei kichoi-an kahileh kaloupina chu ima ahipoi, nang hon, “Ka-pau ahi,’ natiu hiche ka-Pa chun eichoi-at joh ahibouve. 55 Ama chu nang hon nahe hih laiyun, Kenvang kahenai; Ama chu kahepoi tileng nang ho banga jousei kahi ding ahi, Ken ama kahen athu kanit’e. 56 Na-pau Abraham chu Keima nikho mu ding athanomin, amun akipah lheh jenge,” ati. 57 Juda hon ajah a, “Nakum som nga bon lhing lou laiya Abraham namusa hiya ong?” atiuve. 58 Jesun ajah-uva, “Kichentah a kaseipeh nahiuve, Abraham pem masanga jong um jing Keima kahi,” ati. 59 Amahon ase na didng song akilo phat’un Jesu achamin akiseldoh-in, Houina kon chun ache mangtai.

John 9

Jesun apena mitcho khat aboldam

1 Jesu ache naa mi apen’a pat mitcho khat amui. 2 Aseijuiten ajah a, “Rabbi, hichepa mitchoa apen hi ama chonset jeh ha anu le apa chonset jeh ham?” tin adongui. 3 Jesun adonbut’in, “Hiche hi ama chonset vang jong ahipon; Pathen natoh ho kiphondoh theina dinga ama hi mitchoa peng ahibouve. 4 Sun ahipet’a Eihunsolpa na i-tih tei diu hiveh ta, koiman na atoh thei louna ding jan hung lhung ding hita hi. 5 Vannoiya kaum laisea vannoi salvah kahi,” ati. 6 Jesun hiche hi aseiyin, tol’ah achil aset lhan, achil’in bonlhoh asemin, mitchopa mit te nia aloiyin 7 ajah a, “Chen lang Siloam (Siloam hi ‘sol’ kiti ahi) twikul’a gakiphet lhah tan,” ati. Ama achea agakiphet lhah leh kho amun ahung kile kittai. 8 Mitchopa heng le kom ho, khutdoa apan lai musa hon, “Touva khutdoji chu ama hi hilou haimo?” atiuve. 9 Abangin, “Ama ahinai,” atiuvin, kim khat’in, “Ahipoi, amato lim kilo ahibouve,” atiuve. Mitchopa ama tah-in, “Kei ama chu kahinai,” ati. 10 Amahon ajah a, “I-atileh namit te ni hah hitam?” atiuve. 11 Aman adonbut’in, “Jesu kitipa khun bonlhoh asemin, kamit te nia aloiya, ‘Siloam a chen gakiphet lhah tan,’ atia, kachea kagaphet lhah leh kho kamu ahitai,” ati. 12 Amahon ajah a, “Ama hoiya umtam?” atiuleh; aman, “Kahepoi,” ati.

Pharisee hon mitchopa damdol akhol’u

13 Amahon masanga mitchopa chu Psarisee ho henga apuitauve. 14 Jesun bonlhoh asema mitchopa mitt e nia aloiya ahasah ni chu CHoldo nikho ahi. 15 Pharisee hon amapan kho amu thudol chu akhol kit’uvin ahileh aman ajah-uva, “Aman bonlhoh asemin kamit te nia aloiya kagasop lhah phat’a kho kamuthei ahi,” ati. 16 Pharisee ho phabep’in, “Choldo ni anit loujeh-in hichepa hi Pathena kon loujeh-in,” atiuvin; abangman, “Michosen hitobang thil kidang ho abol thei ngai ong?” tin, hitobang hin alah-uva kibung khenna asohtai. 17 Amahon mitchopa jah a avel’in, Amahon namit ahasah jeh a chu nangin Ama chu koi ahiba natim?” atiuleh; aman, “Themgao ahi,” ati. 18 Juda hon ama chu mitchosa ahi kho amu kit hi anu le apa kouva, 19 amani jah a, “Hichepa hinachapa lhon, amitchosa peng niti lhonpa lhon, amitchosa peng nati lhonpa chu himong nam? Ahileh iti kho amu kitham?” tia adoh masang seuvin atahsanpouve. 20 Anu le apan adonbut lhonin, “Amahi kachapa lhon ahiya chule mitcho anahi chu kahe lhon nai; 21 i-atileh kho amu kit’a, koipenin amit te ni ahasah ham vang kahe lhonpoi. Ama dongun, upa hita chu achung thu aman kisei nante,” ati lhone. 22 Judaho aginjeh lhona anule apan hiche hi asei lhon ahi; ajeh chu Jesu hi Messiah ahi tia phongdoh pen pen Houthua kikhopna ina kona pamse ding tia Judahon dettah a kilolna aneisau ahi. 23 Hichejeh a chu anu le apan, “Upa hita chu ama dongun,” ati lhon ahi. 24 Anivei nan amahon masanga mitchopa chu akouvun ajah a, “Pathen choi-atnan adih seiyin, hichepa vang hi michonse ahi, keihon kahei,” atiuve. 25 Ama adonbut’in, “Michonse ahi ahilou kahepoi; masang chun kamit achon tun kho kamui, tibou kahei,” ati. 26 Amahon ajah a, “Aman i-nalom? Namit te ni iti ahasah ham?” atiuleh; 27 Aman amaho adonbut’in, “Nakiseipeh tauva na-ngaipouvin, i-bol’a najah nom kit’u ham? Ama seijuiya napan nom’uvem?” ati. 28 Hichun ama ahouseuvin, “Nang chu ama seijui nahi Chula em, keiho Mose seijui kahiya chu. 29 Pathenin Mose henga thu asei kihea, hichepa hoilam kon ahibon kahepha lou,’ atiuve. 30 Mipa chun adonbut’in ajahuva, “Aman kamit te ni geiya hasah taa, hoilam kon ahi nahet louvu chu datmo aum lheh-e! 31 Pathenin michonse ho thu angaipon, amavang khattouvin houguttah a Pathen lungdei abol leh athu a-ngaipehjie, ti ihesoh keiyui. 32 Semtil’a pat koiman mi mitchoa peng mit ahasah-w, ti akija khapoi. 33 Hichepa hi Pathenna kon ahilouleh imacha bol theiponte,’ ati. 34 Amahon adonbut’un, “Napum changa chonsea peng nangin keiho neihil’um?” atiuvin, anoddoh tauve.

Lhagaova mitcho

35 Hichepa chu anodoh-u ahen Jesun akimupi kit phat’in, “Nangman Mihem Chapa chu natahsanem?” ati. 36 Aman adonbut’in, “Pakai, katahsan thei ding ama chu koiham?” atileh; 37 Jesun ajah a, “Ama chu namutan, najah a thu seiya hi Ama ahi,” atipeh-e. 38 Aman adonbut’in, “Pakai katahsane,” atin; a-angsunga aboh khup’in chibai aboh tai. 39 Chuin Jesu, “Khomu louhon kho amu a, khomu ho mit chotna dinga vannoiya thutana hung kahi,” ati. 40 Asei hi avel’a um Pharisee hon ajauvin, “Keiho mitcho kahilouvu hinai?” atiuleh; 41 Jesun ajah-uva, “mitcho hileu chun chonsetna nanei lou diu ahi, tun vang, ‘Kho kamui,’ natijeh-un nachonsetnau aum cheh-e,” ati.

John 10

Kelngoi hong thulem

1 “Kichentah a kaseipeh nahiuve, kot’a lut louva mundanga kal’a kelngoi hong sunga lut mi chu gucha le michom ahi. 2 Kot’a lut’a vang chu kelngoiho chingpa ahi. 3 Kotngahpan ama chu kot ahonpeh jin, akelngoite chu amin cheh a akouteng kelngoiten a-ogin aheuvin, abonchan apuidoh jin ahi. 4 Aboncha ahoidoh soh teng ama alamkaiyin, a-ogin ahet jeh-uvin kelngoiten anung ajuiyui. 5 Midang nung vang ajui louhel diu ahi, a-ogin ahet loujehuva akoma kona jamming jo diu ahibouve,” ati. 6 Jesun hiche thulem hi miho aseipeh-in, ahinla ipi aseipeh-u chu amahon ahepouve.

Jesu kelngoi chingpa

7 Jesun asei kit’in, “Kichentah a kaseipeh nahiuve, Keima kelngoite hongkot kahi. 8 Keima masanga hung jouse chu gucha le michom jeng ahiuvin, kelngoiten jong athuu a-ngaipouve. 9 Keima kot chu kahi; Keiya hung lut chu huhhinga uma, lut le pot lea neh thei ham hing akimu ding ahi. 10 Gucha chu agu ding le athat ding chule asumang ding tilouvin ahung ngaipoi; Kei vang hinna aneiyuva, bukim keiya aneina diuva hung kahibouve. 11 Keima kelngoi chingpha chu kahin, kelngoi chingpha chun kelngoite din ahinkho aphal ngam’e. 12 Thalah mi, kelngoi chingpa hilou, aneipa jong hilou mi nei chingpa chun ngei hung amu teng kelngoite dalhan ajamjitai; chutah l engeiyun kelngoi akimat’in athechehjitan ahi. 13 Thalah ahijeh chun kelngoite ding ima agel khoh poi. 14 Keima kelngoi chingpha chu kahin, kakelngoite kahen, amahon jong eiheuve. 15 hitobanga chu Pan keima eihet’a, kenjong Pa kahet ahin, chule kelngoite dinga chu kahinkho kaphal jeng ahi. 16 Hiche hong sunga pang lou kelngoi dang kanei nalaiye; hicheng jong chu kahin puilut tei ding, amahon kaogin ahet’uva, kelngoi honkhat aching khat hidoh ding ahi. 17 “Kahinkho hi kalah kit theina dinga kaphal doh jeng jehin Pan keima eingailui. 18 Khattouvin eilahpeh thei ahipon, kachamtah a kaphaldoh ahibouve. Phaldoh a chule kilah kit theina thu kaneiyin, hiche thupeh hi ka-Paa kona kalah ahi,” ati. 19 Jesun thu chucheng aseijeh chun Judaho abung bungin akikhen lo kit tauve. 20 alah-uva mi tampin, “hichepa hi thlhavop l emi-ngol ahibouve! I-bol’a asei na-ngaiyu ham?” atiuve.

Judahon Jesu asandau

21 Adangsen, “Aseiho hi thilhavop thusei ahipoi; thilhan mitcho ho mit ahasah ngaiyem?” atuve.22 Phalbi ahitan, Jerusalema Houin thenso kut phat ahung lhungtai; 22 Jesu chu Houina Solomon hongcha chun avah lei. 24 Hichun Judahon ahin umkimvel’un ajah a, “Itih chan lung gima neilha got’u ham? Messiah nahileh phongtah-in neiseipeh-un,” atiuve. 25 Jesun amaho chu adonbut’in “Nakiseipeh tauva neitahsan pove; ka-Pa min a thil kabol ho hin Kei koi kahi ahettohsah ahin, 26 nang ho kakelngoi lah a nahiloujeh-un natahsanpouve. 27 Kakelngoiten ka-ogin ajauvin, Kenjong amaho kahen, amahon eijuiyui 28 Ken amaho tonsot hina kapen, a-iti a mang thah lou diu, ka-khut’a kona koiman jong eilahpeh theilou ding ahi. 29 hicheho eipe ka-Pa chu ima jouse sanga chung nung jo ahin, Pa khut’a kona koiman alahmang thei louhel ding ahi, 30 kapa le Kei khat kahi lhone,” ati. 31 Chutah chun Judahon Jesu se na ding song akilo kittauve. 32 Jesun amaho chu adonbut’in, “Pa thusah a konin natohpha tampi kavetsah tauvin, hiche kabol ho hoipen jeh a chu songa sedinga neigot’u ham?” atileh; 33 Juda hon adonbut’in, “Thilpha boljeh a seding kagot’u ahipon, mihem hiya Pathen nakihisah a Pathen nataitom jeh a kasegot’u ahibouve,” atiuve. 34 Jesun amaho adonbut’in, “Nadan lekhabu’va, “Nang ho pathente nehiuve kati ahi,’ tia kisun lou ham? 35 Pathen thu lhunna mai maiho bon Pathente akitiu jouthei lou ahin, 36 pan athensoa vannoiya ahinsol Keiman, ‘Pathen kataitoma naseiyu ham? 37 Keiman ka-Pa na katoh lou leh neitahsanda jengun; 38 katoh vang leh Keima neitahsan hih jongleu chun Keisunga Pa apansat’a chule Keima Pa sunga kapansat hi nahet chet vang nadiuvin, na kitong chengse beh hi tansan’uvin,” ati. 39 Hichun amahon mat din ago kit’un, Ama la akhut’uva konin atoldoh tai. 40 Jesu Jordan luigal lam, amasa Johnin mi baptize abolna muna chun achen, hia chun agathamtai. 41 Mi tampi ahenga ahungun, “Johnin melchihna ima abol hih nan, ahin hichepa chung thudol’a John thusei jouse vang adih soh keiye,” atiuve. 42 Chukoma chun mi tampin Jesu atahsantauve.

John 11

Lazarus thi

1 Mary le asopinu Martha chenna Bethany khoa amin Lazarus atiu chu adammoi. 2 Anapa chu, Pakai thao nua asama akeng thehgim nu, Mary sopipa Lazarus ahi. 3 Asopi numei ten in ahenga mi asol lhonin, “Pakai, ven nalungset nagolpa asammoi,” agatisah lhone. 4 Jesun hichu ajah phat’in, “Hiche nat hi thina ding ahipoi, Pathen Chapa choisanga aumnadinga Pathen loupina ding ahi bouve,” ati. 5 Jesun Martha le asopinu chule Lazarus chu alungset lheh-e. 6 Lazarus dammo thu ajah vangin aumnaa chun ni ni anichonbe nalaiyin; 7 chujouvin aseijuite jah a, “Judea gama gachekit tauhite,” ati. 8 Seijuiten ajah a, “Rabbi, tutah a Judah on songa sedia nahol’uva, hikoma chu nagache kit ding ham?” atiuve. 9 Jesun adonbut’in, “Nikho khat sunga nidan som le ni um hilou ham? Sun laiya vah le mi chun vannoiya khovah amujeh-in akisunpoi; 10 jan laiya vah le mi vang amasanga khovah aum loujeh-in akisuijie,” ati. 11 Hicheng hi aseiyin, hiche jouchun ajah-uva, “Igolpau Lazarus chu a-ihmutai, ahin ama sukhanga che ding kahi,” ati. 12 Seijuiten ajah a, “Pakai aihmuttah le damtante,” atiuve. 13 Jesun la athitai tia aseina ahin, amahon angaiya ihmut aseinan agel’uve. 14 Hichun Jesun ajahuva aseichanin, “Lazarus, chu athia ahitai; 15 natahsan theina diuva chukoma ka-umlou chu nang ho din kakipah-e, ahenga gacheu hite,” ati. 16 Apengkop ahi, tia Thomas kitipan aseijui chanpi ho jah a, “Eiho jong amatoh i-thi than a diuva gacheu hite,” ati.

Jesu thokitna le hina

17 Jesu ahung leh Lazarus lhana alupsah nau chu ni li alhingtai ti aphotoh tai. 18 Bethany chu Jerusalem komcha, kilometer thum tobang ahi. 19 Asopipa lhon chung change lhamon dingin Juda hotampi Martha le Mary henga ahungui. 20 Jesu hung ajah phat’in Martha chu alamdot din achen, Mary vang in’a atouve. 21 Marthan Jesu jah a, “Pakai, nangma hikoma um hile chun kasopipa thi lou dinga, 22 tujengin jong ipi hileh Pathen henga nathum chan Pathenin peteiyin nete ti kahei,” ati. 23 Jesun ajah a, “Nasopipa thoudoh kit ding ahi,” ati. 24 Marthan ajah a, “Achai nikhoa thokitnaa athodoh ding chu kahenai,” ati. 25 Jesun ajah a, “Keima thokit na le hinna kahin, keima eitahsana chu thijongle hing ding ahi; 26 chule mihing eitahsan chan a-itih a thilou hel ding ahitai; hiche hi natahsan em?” ati. 27 Amanun, “Henge Pakai, Nangma Pathen Chapa Messiah, vannoiya hunga chu nahi katahsane,” ati.

Jesu akap’e

28 Marthan hiche asei jou hin achen asopinu Mary guhthimin akouvin, “Houhil chu hikoma aumin nakouve,” agate. 29 Maryn ajah phat’in akipatdoh loiyin Jesu henga ahungtai. 30 Jesu chu khosung hung lut loulai, Marthan aga lamdotna muna chu um nalai ahi. 31 In’a Mary umpia lhamon Judah on ama kinloitah a achedoh chu amu’vin, lhanphunga gakap ding hinte, tin ajuitauve. 32 Mary chu Jesu umna ahung lhuna Ama amu phat’in akengbul’a aboh khup’in ajah’a, “Pakai, nangma hikoma umle chun kasopipa thi lou didnga!” ati. 33 Jesun Mary lunghem amun, ahin lhonpi Juda ho ma alunghem cheh-u leh, adip alai adap jengin ahimsan, 34 “Hoiya navuiyum?” atileh; amahon, “Pakai, hungin hungven,” atiuve. 35 Jesu akaptai. 36 Hichun Juda hon, “Ven, iti alungset hitam!” atiuve. 37 Alah-uva phabep’in vang, “Mitchopa mitt e nibon hasah thei hichenpan ama hi athida sah thei lou ham?” atiuvin ahi.

Jesun Lazarus ahindohsah

38 Jesu adip adap kit jengin, lhanpunga ahung le lhan chu songko ham khat ahin, akot chu song khat’in akisinge. 39 Jesun, “Song khu tangdoh-un,” atileh; Mithipa sopinu Marthan ajah a, “Pakai, ni li alhingtan uitante,” ati. 40 Jesun ajah a, “Natahsan le Pathen loupina namuding ahi, tia kaseipehsa hilou ham?” ati. 41 Hijeh chun song chu atangdoh tauve. Hichun avan dah-in, “Panangin kataona nasanjeh-in kathangvah-e. 42 Kenvang kataona nangai jinge, ti kahenai, ahin hiche kavel’a ding mipi hin Nangma sol kahi atahsan theina diuva amaho khohsahna akasei ahi,” ati. 43 Hiche hi aseiyin hatah-in asamin, “Vo lazarus, hungdoh-in,” ati. 44 Hichun mithipa chu akhut akeng kitoma, amai ultheh pon, a kijel pumin ahungdoh tai. Jesun ajah-uva, “Lhamun lang chesah-un,” ati.

Jesu thana ding agonu

45 mary henga hung Juda ho tampin Jesu thilbol chu amu’vin Ama atahsanlo tauve. 46 alah-uva kimkhat vang acheuvin Jesu thilbol chu Pharisee hojeh a agaseitauve. 47 Hijeh chun Thempu pipu ho le Pharisee hon Houvaipoloi kikhopna khat asomun, “Hichepa hin melchihna tampi abol’e, ipi i-bol diu ham? 48 Hitin ama khu amoh lhaleu hen mi jousen tahsanin tin, Rome mite hungkona imunpiu le ijat’u asumang diu ahi,” tin aseiyui. 49 Alah-uva chuche kuma Thempu chungnunga pang Caiaphas kiti pan ajah-uva, “Imacha nahepouve; 50 vaipi amanthah louna dinga khat thi chu nang ho dinga thilphajo ahi, tijong nagel hih hel’uve,” ati. 51 hiche hi ama chama asei ahipon, chuche kuma Thempu chungnunga pang ahijeh a vaipi khel’a jesu thi ding thu gaomasa ahi; 52 vaipi keo ding jong hilouva akithechehsa Pathen chate pum khat’a akhop tupna ding jong ahiye. 53 Hiche nikhoa pat chun Jesu tha nadin Judate akiloltauve. 54 Hijeh chun Jesu jong Juda ho lah a lhangphongin avahle tapon, chua konin gamthip lam naiya gambih sunga Ephriam kiti khopia chun achen, hikoma chun seijuite toh aum jing tauve. 55 Juda ho kalchuh kut anai phat’in agam gama konin mi tampi kalchuh kut masanga kisutheng din Jerusalema achetauvui. 56 amahon Jesu ahol’un, Houina adinguvin amaho akihouvun, “Ipi nagel’um? Ama chu Kut a hung lha louhel ding ham?” akitiuve. 57 Thempu pipu ho le Pharisee hon Amachu amat theina diuva, aumna hepen penin ajah-uva seipeh dinga thu apeh-u ahitai.

John 12

Bethany khoa Jesu thao anu

1 Kalchuh kut ding nigupp aum nalaiyin Jesun thinaa kona akaithou Lazarus chenna kho Bethanya chun Jesu ahungtai. 2 Hikoma chun Jesu din anneh asemun, Martha ajen leuvin apangin, ankong umho lah a Lazarus jong apange. 3 Maryn halpi beihel nard a kisem thao namtui man tamtah kilogram keh ahin domin Jesu kengphang tenia anun asamin akengphang teni atheh ngim’e; thao namtui gimnam chun insung achansoh jengin ahi. 4 Jesu seijuiho lah akhat, ama matsah a pang dingpa Judas Iscariot chun, 5 “I-bol’a hiche thao namtui hi denarii jathun man’a kijoh a vaichate kipelou ham?” ati. 6 Hiche asei hi vaichate khohsahna asei ahipon, sumdip ma avop le asunga kikoi chu akiguhji jeh ahi. 7 Jesun, “Hiche nu hi limsah dauvin, kakivui nikhoa din amanun kikoi nante; 8 ijeh-inem itile vaichate chu nang ho toh umkhom jing ahin, Keivang a-itih a nang ho toh umkhom lou ding kahi,” ati.

Lazarus tha dia agot’u

9 Juda ho tampin chukoma Jesu um aheuvin, Jesu keoseh hilouvin thinaa kona athodoh Lazarus jong vetnomin ahunguve. 10 thempu pipu ho chu Lazarus jong tha din akilol tauve, 11 ajeh chu Lazarus jeh a Juda ho tampin alamkaiteu adalhah-uva Jesu atansanlo’u ahi.

Loupi tah a Jesu Jerusalem khopia alut

12 Ajing nikhon Kut’a dia hung mi tamtah-in Jesu Jerusalema hung aajauvin, 13 Iusuna akidop’un alamto din achauvin; “Huhhing hen! Pakai min a hungpa Israel lengpa chu anun nome,” tin asam sam jenguve. 14 Jesun sa-ngan khat amun achunga atouvin, Pathen lekhabua kisun, 15 “Kicha hih-in Zion chanu, Ven, nalengpa sa-ngan nou chunga touvin ahunge,” kitibangin abol’in ahi. 16 Hiche hi amasan aseijuiten ahepouvin, Jesu choi-at’a aum phat chun Ama thudol’a kisunsa hi chengse abol’u ageldoh tauve. 17 Jesun lhana kona Lazarus akouva thina kona athodoh pet’a aumpi mipi chu athu hettohsah-in apangtauvin ahi. 18 Hiche melchihna abol ajah jeh-uva jong chu mipin aga lamtou ahi. 19 Pharisee ho khat le khat akihouvun, “Veuvin ima nalo thei louvu ahitai! atiuve.

Greek mihon Jesu amunom

20 Kut laia Pathen hou dinga Jerusalema hung lah a chun Greek mi phabep jong apangui; 21 amaho hi Galilee gama Bethsaida khoa hungkon Philip henga acheuvin adongun, “Pu, keihon Jesu kamu nom’ui,” atiuve. 22 Philip achen Andrew jah a aseiyin, Andrew le Philip ahung lhonin Jesu jah a asei lhontai. 23 Jesun amani adonbut’in, “Mihem Chapa choi-at’a aumna ding nidan ahung lhungtai. 24 Kichentah a kaseipeh nahiuve, chang hum khat tol’a alhah a athi lou le chang khat chun aum jingin, athivangleh tampi ahinsep doh jin ahi. 25 Ahinkho it chan chun asumang lon, hiche vannoiya ahinkho hotbol vang chun tonsot’a hinkho anei ding ahi. 26 Kakin bolnom chun eijui hen, Keima umnaa chu kalhacha jong um ding ahi; koi hile Keima kinbol’a pang chu Pan apachat ding ahi.

Mihem Chapa kidom sangtei ding

27 “Tun kalung agimtai. Ipi kasei ding ham? Pa, hiche nidan akon hin neihuhdoh-in ong? Ahin la hiche ding hi hiche nidan a hung lut kahi. 28 Pa, naming, choianin,” ati. Hichun vana kona ogin khat’in, “Kachoi-an’e, kachoi-at kit ding ahi,” ahinti. 29 Akimvel’a ding mipin hichu ajauvin, “Van aginge” atiuve. Adang hon, “Vantil’in aki houpi ahibouve,” atiuvin ahi. 30 Jesun adonbut’in, “hiche ogin hi Keima ding ahipon, nang ho ding joh a hung ging ahi. 31 Hiche vannoi hi tua athu kitan ahitan, vannoiya vaihompa chu tua kidelmang ding ahitai. 32 Leiset’a eikitah sang teng mitin kahenga kaloikhom ding ahi,” ati. 33 Jesun hiche hi itobanga athi ding dol aseina ahi. 34 Hijeh chun mipin adonbut’un, ‘Keihon la Messiah chu tonsot’a um jing ahi, ti danthua kisei kajauvin, i-atileh nangin Mihem Chapa chu kikhaisang ding ahi nati ham? Hiche Mihem Chapa chu koiba ham?” atiuleh; 35 Jesun ajah-uva, “Phat chom khat nalah-uva khovah um nalai ding ahi, muthimin najin den louna diuvin, khovah umpet’in vah leuvin; muthima vah le min che na ding akihetpoi. 36 Khovah nanei pet’un khovah chate nahi theina diuvin, khovah chu tahsan’un,” ati.

Judaten Jesu atahsanlou

Jesun hicheng hi aseiyin apotdohin amahoa konin akiseldoh tai. 37 amasang tah-uva melchihna chujat abol vangin atahsan deh pouve; 38 hiche hi Isaiah themgao seisa: “Pakai keiho thujah tahsan’a koi hiya, Koipen henga Pakai ban thahat kiphongdoh em?” ati chu guilhun na dinga chute ahi. 39 Hijeh chun amahon atahsan theipouve; ajeh chu Isaiah themgaovin asei kitnaa chun; 40 “Pathenin amit’u asuchon, Alungthimu amohsah tai; amu’uva alungthima ahetkhen diu, Hung kile kit’uva kadamsah ding ahi,” ati. 41 Isaiah chun hiche asei hi Jesu loupina amujeh a Ama thu dol’a asei ahi. 42 Achuti vangin vaipoloi lah a jong mi tampin Jesu atahsantauve; amabou Pharisee hon Houthua kikhopna in’a eikaidoh khauvinte, tin atahsanu chu aphongdoh 43 Ijeh-inem itile amahon Pathen pachat sangin mihem choi-at addeijo’uve.

Jesu thuseiya thu kitan

44 Jesun hatah-in asamin, “Keima eitahsana chun Keibou eitahsan ahipon, Eihinsolpa geiya atahsantha ahi; 45 Keima eimua chun Eihinsolpa jong amu ahi. 46 Keima khovah kahin, eitahsana chu muthima aumden louna dinga vannoiya hung kahi. 47 Mi khattouvin kaseiho hi ja naa anit lou jongleh achung thu katanpoi; ajeh chu vannoi thutana hung kahipon vannoi huhhinga hungjoh kahibouve. 48 Koi hile eidei louva kaseiho jong sang lou chun athutan ding anei nai; kasei hi phat kichai nikhoa athutana pang ding ahi! 49 Ijeh0inem itile Keiman kachama kasei ahipon, Eihinsol’a Pa ama tah-in ipi iti kasei ding ham ti thu eipeh ahibouve. 50 Ama thupeh chu tonsot hinna ahi kahei. Hijeh a chu kasei hi Pan eiseipeh banga kasei ahi,” ati.

John 13

1 Kalchuh kut masangin Jesun vannoia kona Pa henga ache na ding phat ahung lhun ahen, vannoiya um amite chu alungset’in akhon ni geiyin angailui. 2 Jan an aneh laitah-un Diabol chun Simon chapa Iscariot Judas lungthima Jesu matsahna ding akhumtan, 3 Jesun ijakai Pan akhut’a apehdoh a, Pathena kona hung ahiya Pathen henga kilekit ding ahi ahen; 4 ajan ankonga konin akipatdoh-in, aponsil len ahoh lhan tinot ponin kong akigahtai. 5 Chuin kisilna konga twi alheiyin, seijuite keng asilpeh-in, konga akivei tinot pon chun atheh pantai. 6 Simon Peter kom ahin phai. Peter chun ajah a, “Pakai, nangin kakeng neisilpeh ding ong?” atileh; 7 Jesun adonbut’in, “Tupet tah-in kabol hi ipi ahi nahepoi, ajo teng henan nate, “a ti. 8 Peterin ajah, “Nangin a-itih a jong kakeng nasil louhel ding ahi,” ati. Jesun adonbut’in, “Nangma kasil louleh Keiya nangin chan naneipoi,” atipeh-e. 9 Simon Peterin ajah a, “Pakai, kakeng te ni keo hilouvin kakhut te ni le kalu jong’e,” ati. 10 Jesun ajah a, “Akisil’a chu akeng tilou adang angaipoi, ajeh chu apumpin a-ngim nai; nang ho nangim nauve, nabonchau vang ahi poi,” ati. 11 Ijeh-inem itile aman apedoh dingpa chu ahetsa ahin, hijeh a chu, “Nabonchauvin vang na-ngimpouve,” ati ahi. 12 Jesun akengu asil jou phat’in aponsil len akilah-in, atou kit’in chuin ajah-uva, “Ipi kabolpeh-u nahet nah um? 13 Nang hon, ‘Houhil,’ le ‘Pakai,’ neitiuvin, naseiyu hi apha lheh-e, ajeh chu kahinai. 14 Achutile Keima ‘Pakai’ le ‘Houhil’ pan bon nakengu kasilpeh leh nang ho khat’in khat keng nakisilpeh to diu ahi. 15 Ijeh-inem itile Ken nang ho kabol banga nang hon jong nabolna dinguva kalampat peh nahiuve. 16 Kichen tah a kaseipeh nahiuve, soh chu apu sangin achungnungjo pon, asol’a sangin solchah achungnungjo poi. 17 hiche hi nahetdoh-uva natoh molsou leh anun nom anhiuve. 18 Nabonchauva thudol’a kasei ahipoi; Keiman kalhendohsa chu kahenai; ahinla Pathen lekhabun, ‘Kachanlhah ne pan kachunga akengto alamtai,’ ati chu guilhung jo hen,” ati. 19 Ahung guilhun teng leh Kei hi Ama chu kahi nahet’uva natahsan theina diuva ahung lhun masang tupet pet’a kaseipeh nahiuve. 20 Kichentah a kaseipeh nahiuve, kamisol sanga chun Keima eisan ahin, Keima eisanga chun Eihinsol pa asan ahi,” ati.

Min ajohdoh ding Jesun asei masah

21 Hicheng h aseiyin Jesu along agim behseh-in ahettohsahin, “Kichentah a akseipeh nahiuve, nalah-uva khat eipehdoh a pang dingahi,” ati. 22 Seijuite chu khat le khat akivetouvin, koipen asei ham ti adetmo lheh jengui. 23 Aseijuiho lah a Jesun a-ngailutpa chu Jesu jetlama atouve. 24 Simon Peterin ama chu koipen aseina ham aseipeh diuva adoh din agah khasuh-e. 25 Ama jong Jesu chunga aki ngai bang bangin akinung ngaiyin ajah-a, “Pakai kon namatsah ding ham?” ati. 26 Jesun adonbut’in, “hiche changlhah hi lhenga kadekot’a kapeh penpa chu ahi,” atin; chang lhah hal asekot’in, a;alahdoh phat chun Simon chapa Judas Iscariot apetai. 27 Hiche aneh neh chun asunga Satan alut’in, Jesun jong ajah a, “Nabol ding chu ipiham bol loiyin,” ati. 28 I-bol’a Jesun amapa jah a hiche hi aseiham ti ankonga touho khat chan jong ahepoi. 29 Kim khat’in Judas chun sumdip avop jeh a Jesun kut’a manchah ding khat tou choa asol ham, ahiloule vaicha genthei thil pea asol danin agel’uve. 30 Judas chun changlhah hal akilah-in apotdoh paitan, ahinla jan ahi.

Thupeh thah

31 Judas chedoh phat’in Jesun, “Tun Mihem Chapa choi-at’in aumtan, Ama jeh-in Pathen jong choi-at’in aume. 32 Ama jeh a Pathen choi-at’a aumleh, Pathenin jong Ama achoi-at ding, apettah a choi-at ding ahi. 33 Chate, phat chomcha bou kaumpi ding nahitauve, nang hon neihol diu, ahinla Juda ho jah a, ‘Kei che naa nang ho nahung thei lou diu,’ kati banga, tupet tah ajong kaseipeh nahiuve. 34 Nang ho khat le khat naki-ngailutto na diuva thupeh thah kapeh nahiuve, khat le khat naki-ngailutto chehna diuva Keiman nang ho kangailut nahiuve. 35 Khat le khat naki-ngailutto cheh-u leh kaseijui nahiu mijousen ahet ding ahi,” ati.

Peterin aseilep ding Jesu asei masah

36 Simon Peterin ajah a”Pakai hoiya nache ding ham?” atileh; Jesun adonbut’in, “Hoiya che jong leng tun nangin neijui theipon nate, khonung teng neijui nan nate,” ati. 37 Jesun adonbut’in, “keijlal’a nahinkho naphal ngam ong? Kichentah a kaseipeh nahi, thumvei neiseilep masanga ah khong lou ding ahi,” ati.

John 14

Jesu Pathen heng jotna lampi

1 “Nang ho lungkham hih-un, Pathen tahsanun, keijong neitahsanun. 2 Ka-Pa in’a chena mun tampi a-ong’e, umlou hileh seipeh pouvinge. 3 Nang ho ding mun kagon jouteng hung kit ing ting keima umna naum thei diuva kahenga dinga kahung pui ding nahiuve. 4 Nang hon kachena didng lampi nahenauve,” ati. 5 thomas chun ajah a, “Pakai, nache na ding bon kihe louva alampi iti kahet diu ham?” ati. 6 Jesun ajah a, “Keima hi Lampi le Atah chunle Hinna chu kahi, Keiya kona chelou chu koima Pa kom alhung theipoi. 7 Keima neihe leu chun ka-Pa jong nahet diu ahin, tukal’in vang Ama chu namutauvin hejong nahetauve,” ati. 8 Philip’in ajah a, “Pakai, Pa chu neimusah-un, chutileh kalungnau chim ding ahi,” ati. 9 Jesun ajah a, “Vo Philip, hitih chan nang ho ki-umpia neihet loulai ham? Keima eimua chun Pa chu amu ahitai; iti nangin, ‘Pa neimusah-un, nati ham? 10 Keima Pa sunga ka-uma, kei sunga Pa aum hi natahsan lou ham? Ken najah-uva kasei hi kachamtah a kasei ahipoi, kasunga cheng pa chun atoh ding dol kin abol ahibouve. 11 Keima Pa sunga ka-uma Pa kei sunga aum hi tahsan’un; ahilou jongleh na kitong chengse jeh beh hin tahsan’un. 12 Kichentah a kaseipeh nahiuve, Keima eitahsan chun katoh chengse hi atoj thei ding, Pa henga kache ding jeh hin eitahsana chun hisanga lenjo jong abol thei ding ahi; 13 Pa chu Chapa jal’a choi-at’a aum theina dinga kamin a nathum chan’u chu kabolpeh ding nahiuve. 14 Ipi hijongle Keima min a nathum chan’u kabolpeh ding nahiuve.

Lhagao Theng kiteppeh

15 “Nei-ngailut’u leh kathupeh chengse nanit diu, 16 Keiman Pa henga kathuma Aman naumpi jing diu Kithopi khat nahinpeh diu ahi, 17 hichu kicheh tah lhagao, vannoiyin sang thei lou, mu jong mukha lou ahi. Nang hon ama naheuvin, aman na umpiuvin nasunguva acheng’e. 18 “Nang ho dalhan chaga bangin koi pouvinge, nahenguva kahung kit didng ahi. 19 Chom khat jouteng vannoiyin eimu diu ahinai. Ajeh chu Keima kahingin nang jong nahin diu ahiye. 20 Hiche nikhoa chu Keima Pa sungankachen chule nang ho Kei sunga nachen’uva, nang ho sunga Kei kachen nahetdoh diu ahi. 21 Kathupeh chengse neiya nit’a chun eingailut ahi, eingailua chu ka-Pa ngailut’a chenga Kenjong ama ka-ngailut’a ahenga kakiphondoh didng ahi,” ati. 22 Iscariot hilou Judas chun ajah a, “Pakai, iti keiho henga nakiphon’a vannoi mite henga nakiphondoh lou ding ham?” atileh; 23 Jesun adonbut’in ajah a, “Mi eingailua chun kathusei anit ding, ka-pan ama angailut’a ahenga kahunguva kachenpi dingu ahi. 24 Eingailu lou vangin kathuseiho anitpon; nathujah-u hi Keikeo thu ahipon, Eihinsol’a Pa thu ahibouve. 25 “Nalah-uva ka-umpet’a hi cheng hi kaseipeh nahiuve; 26 amavang Pan keima mina ahinsol got Kithopi lhagao Theng chun kaseipeh chengseu hi aboncha nageldoh kitna diuva ijakai nahilsoh kei dingu ahinai. 27 keima chamna mong kapehuva, chamna kadalhah peh nahiuve; kapeh-uhi vannoi mi peh tobang ahipoi; nalungu donsah hih-un, kijong kicha dauvin. 28 Dalha jong leng nahenguva kahung kit ding ahi,’ tia najah-uva kaseipeh chu najatauve. Pa chu Keisanga chung nung jo ahijeh-in, neingailut mongu leh Pahenga kache hi nakipa thanoppi diu ahi. 29 Hichengse hi ahung guilhun teng natahsan theina diuva aso masanga tua kasiepeh masah dem nahiuive. 30 Najah-uva tampi sei taponge, ajeh chu vannoi vaihompa ahunge; ahinla aman kachunga ima tha aneipoi; 31 hijongleh Keiman Pa ka-ngailut jeh a eithupeh chan kabolji hi vannoiyin ahet tei ding ahi.

John 15

Jesu lengpigui tahbeh ahi

1 “Keima lengpigui tahbeh kahin, ka-Pa aleilhou ahi. 2 Aman Keiya keh abah galou chengse vang chu ahaga chehna din amal ngimjin ahi. 3 Najha-uva kathusei chengse jeh a nang ho a-ngimsa nahitauve. 4 Kasunga cheng jingun, keijong nasunguva cheng jing inge. Lengpibah achanga aga thei lou banga, keisunga nachen louvu leh nang ho jong napun thei lou diu ahi. 5 Keima lengpigui kahin, nang ho abahho nahiuve. Ama sunga kacheng banga keisunga cheng mi chu apung lheh jie; ajeh chu kei louvin nang hon ima nabol theipouve. 6 Mi keisunga cheng lou chu thingbah kiheh lhaa kipaidoh agopji bangin akipaidohji; abah gopsa chengse chu akichom khomjin meiya akileh lut’in akavamjitai. 7 Keisunga nachen’uva, kasei chengse hi nasunguva achenleh nagot chan thumun kibolpeh ding nahiuve. 8 Kaseijui kicheh nahiuva hapun’a napun’u leh ka-Pa choiat’a umah ahi. 9 Ka-Pan eingailut banga kenjong ka-ngailut nahiuve; ka-ngailut sunga cheng jingun. 10 Ka-pa thupeh chengse kanit’a a-ngailut’a kachen jing bang hin kathupeh chengse nit leu chun ka-ngait’a nachen diu ahi. 11 Nanguva kakipana achen jinga apilhinsetna dia hiche hi najah-uva kasei ahi. 12 Kathupeh chu ken ka-ngailut banguva nang ho khat le khat naki-ngailutto cheh diu hi ahi. 13 Agol apaite dinga ahinkho phaldoh sanga lenjo ngailutna koiman aneipoi. 14 thu kapeh cheng seu hi nabol’u leh kagol kapai nahiuve. 15 Soh kati louding nahitauve, ijeh-inem itile soh chun apu thilbol ahepoi, gol le paite katijoh ding nahiuve, ajeh chu Paa kona kajah chengse ijakai kahetsah soh keiyu ahi. 16 Nang hon neilhenu ahipon, nacheuva napunbe na diu leh, apungdoh chengse alhou theiya kamin’a nathum chan’u Pan napeh theina diuva keiman kalhen’a kapansah nahibouvui. 17 Nang ho khat le khat naki-ngailutto chehna diuva thu hicheng hi kapeh nahiuve.

Vannoi mite hot

18 “Vannoiyin nahot’u leh, nang ho nahot masanguva Keima eihot masahsau ahi heuvin, 19 vannoiya hileu chun vannoiyin amite alungset dingdol ahin, Keiman kalhendohsa, vannoiya nahilou phat’uva vannoiyin nahot’u ahiye. 20 Najahuva, ‘Soh apu sangin achungnungjopoi,’ kati chu geldoh jingun. Mihon Kei eibolset’u leh nang ho jong nabolset tei diu ahi, kathu nit leu nang ho thujong anit diu ahi. 21 Eihonsol Pa ahet loujeh-uva Keima min jal’a hicheng hi nachunguva abol diu ahi. 22 Hunga ajah-uva kaseipeh lou hileh themmona aneilou diu ahin, tunvang achonset’u paomea akilepna diu aumtapoi. 23 Keima eihoa chun ka Pa jong ahoi. 24 Alah-uva koima bol khah lou thil kabol lou hileh themmona anei lou diu ahin, tunvang kanatoh chengse amu nasauva Kei le ka-Pa eihot thau ahitai. 25 Ahinla adanthu bu’uva, ‘Ajeh beiyin eiho’uva,’ tia kisun chu guilhung tei ding ahi. 26 “Paa hung kon Lhagao theng, Keiman Paa kona kahinsol ding Kithopi chu ahung teng leh kachung chang thudol ahettohsah ding, 27 akipat til’a pat neikivop piu ahijeh a nang ho jong kathu hettohsah a napan diu ahi.

John 16

1 “Nakipal lhuh louna diuva hicheng hi kaseipeh nahiuve. 2 Houthua kakhopna in’a nakaidoh diu, nathat’uva pangpa chu Pathen natong’a aki-ngaito phat hung lhung ding ahi. 3 Pa le Kei eihet loujeh-uva amahon hicheng hi ahinbol diu ahi. 4 Hicheng so na ding phat hi ahung lhun teng athudol’u kahilchah masahsau nageldoh theina diuva najah-uva thil hi chenghi kaseipeh nahiuve.

Lhagao Theng natoh

“Kaumpi jing jeh-uva atil’a thil hicheng hi kanaseipeh lou nahiuve. 5 Tua vang Eihinsolpa henga che ding kahitan, koiiman, ‘Hoiya che didng nahim?’ tia dong’a jong naumpouve; 6 amavang hicheng kaseipeh jeh-uva hi lunghem gam nahitauve. 7 Koi hileh atah kaseipeh nahiuve; nang ho phat chomna dia Keima che mang ding kahi; kache louva ahileh Kithopi chu nahenguva hung lou ding, kachea ama chu kahinsolpeh ding nahiuve. 8 Kithopi chu ahung teng vannoi mite hi chonset thudol, adih thudol chule thutan thudol ahettohsah ding; 9 chonset thudol chu keima eitahsan lou thu’u ahin, 10 adih thudol ahileh Pa henga kachea nang hon neimu lou diu thu ahin, 11 thutah thudol chu hiche vannoi vaihompa thu kitan hi ahi. 12 Najah-uva sei ding tampi kaneiyin, ahinla nang hon tuta din nadol joupouve; 13 ahin atahbeh lhagao chu ahung teng, ama cham chama thu seilouva, ajah cha cha asei ding, kitahna lampi jenga napui hoiyuva, ahung lhung ding thil ho geiya naseipeh diu ahi. 14 Aman Keiya chu alah a nahenguva aphondoh ding jeh chun Keima eichoi-at ding ahi. 15 Pa nei changse chu Keiya jong ahijeh a Keiya chu alah a nahenguva aphondoh ding ahi kati ahiye.

Gimna chu kipana soh ding

16 “Chom khat jou teng neimu lou diu ahin, chom khat jou teng vang le neimu kit diu ahinai,” ati. 17 Aseijuite lah a mi phebep, khat le khat akihouvun, “Aman, ‘Chom khat jou teng vang le neimu kit diu ahinai, ijeh-inem itile keima Pa henga che ding kahi,’ ati hi ipi aseina ham?” akitiuve. 18 Hijeh chun amahon, “Aman, ‘Chom khat jou,’ ati hi ipi aseina ham? Ipi aseina ham ihepouve,” akitiuve. 19 Adoh nomu hi Jesun ajah-uva, “Nang ho le nang ho ipi kidongto nahiuva, ‘Chom khat jou teng neimu lou diu ahin, chom khat jou teng vang le neimu kit diu ahinai,’ kati chu 20 Kichentah a kaseipeh nahiuve, nang ho nakauva namao diu, vannoi mite vang kipah diu ahi; lunghem jong leu chun nalunghem chu kipana soh ding ahinai. 21 Numei naosoh ding khu aso phat alhin teng athoh gim lheh jin, nao aso lhah teng vang leh vannoiya mihem khat penlhah jeh a kipa jal’in athot gimna chengse chu asumiljitai. 22 Tun nang ho jong nalunghem’un, ahinla keiman kahung vilkit diu ahinai, chutengle nalungthimu kipah a, nakipanau chu koiman nalahpeh thei lou diu ahi. 23 Hiche nikhoa chu nang hon ima neidoh lou dingu ahitai. Kichentah a kaseipeh nahiuve, ipi hijongle keima min pan’a Pa henga nathum chan’u napeh diu ahi. 24 Tugeiyin kaminin ima nathum hih laiyui; nakipanau achamkimsohna din thumun namu diu ahi.

Keiman vannoi kajoutai

25 “Najah-uva hicheng hi alem’a kasei ahin, Pa thudol chu alem hilouva kichentah a kaseipehna diu phat khat hung lhung ding ahi. 26 Nang ho thalhengin Pa henga taopeh nauvinge kati ahipoi, hiche nikhoa chu Kei min pan’a natao diu ahi; 27 ijeh-inem itile Keima neideiyuva Pathena hungkon kahi natahsan jeh-un Pa amatahin nadeiyu ahi. 28 Keima Paa hung kon vannoiya hung lut kahin, vannoi kadalhan a Pa henga che kit ding kahi,” ati. 29 Chutah-in aseijuiten, “Vent un nangman alem’a thu seilouvin phongtah-in naseidoh tai. 30 Tun kahetauve Nangin ijakai nahen, koiman ima nadoh ding angaipoi, hichea hin Pathena hungkon nahi katahsantauve,” atiuve. 31 Jesun amaho chu adonbut’in, “Tubep’a natahsan’um 32 Ven, nang ho nakithecheh-uva, na-inlam cheh nakijot’uva kachangseh a neidalhahna diu phat chu hung lhung ahitai; hijongleh Pa chun ei umpi jing jeh-in kachangseh kahi dehpoi. 33 Keima sunga nachen’uva chamna nanei theina diuva hicheng hi najah-uva kasei ahi; vannoiyah gim genthei nathohui; amavang hangtah-in pangun Keiman vannoi kajoutai,” ati.

John 17

Jesu aseijuite dia atao

1 Jesun hicheng hi aseijouvin akhodah-in vanlam aven, “Pa, phat chu ahung lhungtai; Chapan nachoi-at theina din na Chapa choi-anin; 2 Ama napeh chengse chu tonsot hinna apeh theina dia Nangin Ama chu tahsan hing mihem jouse chunga thu neina napeh ahi. 3 Pathen tah khatseh Nang le nahinsol Jesu Christa ahet diu hitonsot hinna ahi. 4 Leiset chunga toh ding neipeh chengse kachoisoh-in Nangma kachoian tai. 5 Pa, tun Nangin vannoi umdoh masanga ineisa Nangma loupina mong mongin neichoianin. 6 “Vannoiya kona neipeh miho henga naming kaphongdohtai. Nangman neipeh amaho hi nang mi ahiuvin, amahon nathu anit tauve. 7 Tunvang, Nangman neipeh thil chengse hi Nanga hungkon ahi ahetauve; 8 ijeh-inem itile neithupeh chengse amaho kapen, amahon hicheng chu akisanun, Nanga hungkon kahi kichen tah-in aheuvin, Nangmannei sol ahi atahsantauve. 9 “Nangman neipeh ho hi namite ahijeh-uva amaho dia tao kahin, vannoi dinga tao kahipoi; 10 Keiya chengse Nanga ahin, Nanga chengse jong Keiya ahi; hijeh chun hiteho jal hin choi-at’in ka-ume. 11 Keima nahenga hunga vannoiya umlou ding kahitan, amaho vang vannoiya um nala ahiuve. Pa Theng, eini tobanga amaho pumkhat ahi theina diuvin neipeh naming chun amaho hi hongin. 12 Amaho ka-umpilaiyin neipeh naminin amaho kahongin, ka-ngah tup’in, Pathen lekhabu thu gui lhunna dia amang thah dia pengpa tilou, alah-uva khatcha amangthah poi. 13 Tua vang nahenga hung ding kahitan, asunguva kakipana anei chamkim soh theina diuva leiset’a hicheng hi kasei ahiye. 14 Amaho hi nathu kapeh leh vannoiyin ahotauve; ajeh chu Keima vannoiya kahilou banga amaho jong vannoiya ahitapouve. 15 Amaho hi vannoiya kona nalahdohna dia tao kahipoi. Agiloupaa konin hongbit’in katijoh ahibouve. 16 Keima vannoiya kahi lou banga amaho jong vannoiya ahi pouve. 17 Atah chun amaho hi suthengin; nathu hi atah chu ahi. 18 Nangin vannoiya neisol banga amaho hi vannoiya kasol ahin; 19 amaho jong atah a chu akiphal theng theina diuva amaho jal’a keijong kiphal theng kahi. 20 “Hite ho keo dia tao kahipoi, amaho thuseiya kona eitahsan ho didnga jong, 21 Pa, nang Kei sunga nachen’a, Nang sunga keima kachen banga amaho jong eini sunga achen’uva, vnnoiyin nang sol kahi atahsan theina din abonchauvin pumkhat hileu kati ahi. 22 Eini pumkhat ihi banga amaho jong pumkhat ahina diuvin Nang man neipeh loupina chu aamaho kapetai; 23 Nangin nei-ngailut banga amaho ka-ngailut jeh a Keima neisol hi vannoiyin ahetdoh a, chu le chamkimdel’a amaho pumkhat ahi theina dinga asunguva kachen’a Keima sunga Nang cheng nahi. 24 “Pa, vannoi kisemdoh masanga jong nei-ngailut jeh a neipehsa hiche kaloupina chu Nangin neipeh mite hin amu theina diuvin Kei umnaa chun amahojong umleu kaseiye. 25 Vo Pa dih tah, vannoiyin nahet lou vangin Keiman Nang kahen, Nang sol kahi hite ho hinahetauve. 26 Nangin nei-ngailutna hiche ngailut chu asunguva achen’a, Keijong asunguva kachen theina din amaho hi naming kahetsah tan, kahetsah jing ding ahi” ati.

John 18

Jesu ajohdoh chule min amat

1 Hicheng hi asei jouvin Jesu aseijuite toh alhondoh-in, Kidron hohlam gal’a honk hat um na-a chun Ama le aseijuite aluttauve. 2 Hia chu Jesun aseijuite akikhoppi jing ahijeh-in amun chu ama mat sah a pang Judas jong chun ahei. 3 Hijeh chun Judas chun Thempu pipu ho le Pharisee hoa kona hung sepia loi khat le Houin ngah sepia ho chu ahinpuiyin, thaomei le mei sel den, manchah choiyin hikoma chun ahungtai. 4 Jesun achunga hung lhung ijakai ahesoh keiyin ahung potdoh-in ajah-uva, “Koi nahol’u ham?” atileh; 5 Amahon adonbut’un, “Nazareth Jesu chu,” atiuve, Ama ajah-uva, “Kei ama kahi,” ati. Ama matsah a pang Judas chu amaho toh dingkhom ahi. 6 Jesun ajah-uva, “Kei Ama kahi,” atitah chun amaho anung chon’un tol’a alhu mat jengui. 7 Jesun adong kit’in, “Koiba nahol’u ham?” atileh; amahon, “Nazareth Jesu chu,” atiuve. ahileh hite ho hi lhadoh jengtau,” atin; 9 hiche thu asei chu, “Nangman neipeh chengse lah a khat cha kamansahpoi,” kiti chu guilhunma dinga asei ahi. 10 Simon Peterin chemjam khat anei chu asatdoh-in Thempu chung nung sohpa asat jeng leh abilkol jetlam asat lhai; sohpa min chu Malchus ahi. 11 Jesun Peter jah a, “chemjam chu apaiya khum jengin, Pan eipeh khon chu kadontei ding hilou ham?” ati.

Thempulen ang’a Jesu akailut’u

12 Sepai loi le alamkaipau, Judate Houin ngah sepai hon Jesu chu aman’un, akan’uvin, 13 chuche kuma thempu chungnunga pang Caiaphas nupapa Annas henga akai lut masauve. 14 Mipi dinga mikhat thi aphajoi, tia Judate thumop chu hiche Caiaphas hi ahiye.

Peterin Jesu aseilep

15 Simon Peter le seijui dang khat’in Jesu ajuiye. Hiche seijui dang kitipa hi Thempu chungnungpa hetsa mi ahin, Jesu toh kilhonin thempu chungnung inpi tolsunga aluttai. 16 Pater vang chu lotpi polama adding dentai. Hijeh chun seijui dang Thempu chung nung hetsapa chu ahung potdohin, kotphunga ding nu-ngah nu jah aaseilep Peter chu ahinpui luttai. 17 Kotphunga ding nu-ngah nun Peter jah a, “Nang hi hiche mipa seijui khat nahilou haimo?” atileh; aman, “Kahipo,” ati. 18 Adap jeh a hikoma chu soh ho le Houin ngah sepai hon song meihol akitiuva din mun’a mei a oiyu ahin; Peter jong alah-uva dinga mei oiya kisanglum ahiye.

Thempulenin thu tampi Jesu adoh

19 Thempu chungnungin Jesu chu aseijuite thudol le athuhil umchan adodngtai. 20 Jesun adonbut’in, “Keiman vannoi jah aphongtah-in kaseiyin; Judate kikhop khomna jose Houthua kikhopna in le Houin a kahil jingin, guhthimin imacha kasei khapoi. 21 I-bol’a nei doh ham? Ajeh-uva kasei ja ho chu dodngin, ven, ipi kasei ahenauve,” ati. 22 Jesun hiche asei hin akoma ding Houin ngah sepai loi lah a khat’in a-ngeiphe abengin. “Thempu chungnung hitia chu kidonbut ngaiyem?” ati. 23 Jesun adonbut’in, “Kasei khel leh adih lou chu photchetna vetsahin; adih kasei leh i-bola neidenham?” ati. 24 Annas chun Jesu akikan pumin Caiaphas henga asoltai.

Peterin Jesu aseilep kit

25 Simon peter chu adingin mei a-oiyin ahi. Mihon ajah a, “Nang jong hichepa seijui khat nahilou haimo?” atiuleh; aman aseilep’in; “Kahipoi,” ati. 26 Thempu chungnung soh Peterin abilkol asat lhah pehpa inkote khat’in, “Hon sunga ama hitoh kamu tha nahilou haimo?” atileh; 27 Peterin aseilep kit’in, hichepet tah chun ah akhongtai.

Pilate ang’a Jesu

28 Mihon Jesu chu Caiaphas in’a konin gamvaipopa inpi lama akaitauve; jingpi matah ahi nalaiyin, miho chu akisuh boh dauva kal chuh kut an aneh theina diuvin gamvaipo inpia chun alutpouve. 29 Hijeh chun amaho toh kimuto din Pilate apotdoh-in, “Hichepa hi ipi thua nahehset’u ham?” atileh; 30 amahon adonbut’un, “Thilse abol lou hileh nahenga kahin kailut lou diu ahi,” atiuve. 31 Hichun Pilate’n ajah-uva, “Kipuiyun lang nang ho danthu dungjuiyin athu kitantau,” ati. Judah on ajah a, “Mi tha theina ding eikiphal peh pouve,” atiuve. 32 Jesun iti thia athi ding asei chu guilhunna dinga hiche hi soh ahi. 33 Pilate chu gamvaipo inpi lama akile kit’in, Jesu chu akou lut’in, “Nangma Judate lengpa nahim?” tin adonge. 34 Jesun adonbut’in “Nangman hiche hi nachama naseiha, mikhat touvin kachung thu naseipeh khah ham?” atileh; 35 Pilate’n adonbut’in, “Kei ho Judate mi kahibeh ong? Na nam mite leh Thempu pipu hon kahenga nahin kailut’uva chu, ipiba nabol ham?” ati. 36 Jesun adonbut’in, “Keima lenggam chu hiche vannoiya kon ahipoi, kalenggam vannoiya kon hileh Judate henga eikipehdoh louna dia eivengtup’a pang hon asat diu ahi; tunla Keima lenggam chu hichea kona kisemdoh ahipoi,” ati. 37 Pilate’n ajah a, “Achutile leng nahi ong?” atileh; Jesun adonbut’in “Nangin, Leng nahi,’ neiti. Atah chu kahettohsah theina dinga Keima hung penga hiche vannoiya hi hung kahi; koi hileh atah a kon tapouvin Keima ogin angai cheh-e,” ati. 38 Pilate’in ajah a, “Atah chu ipi ham?” ati.

Jesu tha dia thu alhuhsah

Pilate’in hiche hi aseiyin Juda hohenga agapotdoh kit’in ajah-uva, “Ama hi themmosahna ding achunga imacha kakholdohpoi; 39 chujongle kalchuh kut nikhoa mi khat kalhadoh peh tei diu chonna dank hat naneiyun; hijeh chun Judate lengpa hi lhadoh pen leng nadeiyum?” ati. 40 Chutah chun alesap kit-un, “hichepa hilouvin Barabbas joh bouve!” atiuve. Barabbas chu gucha michom ahiye.

John 19

1 Chujouvin Pilate chun Jesu amanin ajeptai. 2 Sepai hon ling lukhuh apheh-un alua akhuh peh-un, ponsandup asilpeh-ui. 3 Ahenga ahungun, “Judate lengpa hingsot’in,” atiuvin, Ama chu adengtauve. 4 Pilate chu agapotdoh kit’in ajah-uva, “Ven, themmosahna theiima achunga kamudoh lou nahetna diuva nahenguva kahin puidoh kit ahi,” ati. 5 Hiti hin Jesu chu linglukhuh khuh le ponsandup pumin ahung potdoh-e. Pilate’n ajah-uva, “Ven, Mihem hi,” ati. 6 Thempu pipu hole Houin ngah sepai hon amudoh tah-un, “Thingpel’a khenbeh-in, thingpel’a khenbeh-in,” tin asamtauve. Pilate’n ajah-uva, “Nang hon kaiyun lang khanbeh tauvin; kenvang Ama themmona imacha kamudohpoi,” ati. 7 Juda hon adonbut’in, “Keihon Dan khat kaneiyun, hiche dungjuiya hi ama Pathen chapa akihidsah jeh a thi dinga kilom ahi,” atiuve. 8 Hiche thu hiPilate’n ajahdoh phat’in akicha cheh kit’in, 9 gamvaipo inpia alut’in Jesu jah a, “Nangma hoiya hungkon nahim?” atileh; Jesun la adonbutpoi. 10 Pilate chun ajah a, “Neidonbut lou ding ong? Nangma lhadohna ding tha kaneiya, thingpel’a khetbehna ding jong tha kanei hi nahet lou ham?” ati. 11 Jesun adonbut’in, “Chunga kona kipe lou hile chun nangin kachunga thu nanei nanei louhel ding ahi; hijeh chun nakoma eipehdohpa themmona achungnungjoi,” ati. 12 Hichejeh tah chun Pilate’n Ama lhadohna ding aholtai; ahinla Judah on, “Hichepa nalahdoh leh Caesar jol nahilou chu Caesar douna thusei ahi,” tin asamtauve. 13 thu hicheng hi ajah phat’in Pilate chun Jesu chu polama ahinpuidoh-in, Hebrew paova, Gabbatha’ kiti song lhongnal laiya kido thutan touna muna atoutai. 14 Hichu kalchuh kut dia kigot ni sunkim don nidan som le ni lem ahitai. Pilate chun Judate jah a, “Ven, nalengpau hi,” ati. 15 Chutah chun amahon, “Thah’in, thingpel’a khenbeh-in!” tin asamtauve. Pilate’n ajah-uva, “Nalengpau thingpel’a kakhetbeh ding ong atileh; thempu pipu hon adonbut’un, “Caesar tilou keihon leng dang kaneipouve,” atiuve. 16 Chuphat’in aman Jesu thingpel’a khetbeh din amaho apedoh tai.

Jesu thingpel’a akhetbeh-u

Amahon Jesu chu akaiyun, 17 aman athingpel akiput’in, Hebrew paova, ‘Golgotha’ kiti, ‘ Lugumun’ kiti lai jonin apotdohtan ahi. 18 Hikoma chun Jesu thingpel’a akhenbeh-un, midang ni jong asih langto gel’ah akhaiyun Jesu alai lhai. 19 Pilate’in amain chan ajih-in thingpel chunga atah-in, “Nazareth Jesu, Judate lengpa,” tin asune. 20 Jesu thingpel’a akhetbeh nau mun chu khopi nai ahijeh-in, amin chan Hebrew pao le Latin pao chule Greek paova kijih chu Juda ho tampin asimsoh keiyui. 21 Hichea hin Judate Thempu pipu hon Pilate jah a, ‘Ama hi, ‘Judate lengpa,’ tin sutdan lang, aman, ‘Keima Judate lengpa kahi,’ tin aseiye, tin sunjon,” atiuve. 22 Pilate’in adonbut’in, “Kasutsa chu kasutsa ahitai,” ati. 23 Sepaihon Jesu chu thingpel’a akhetbeh jou phat’un aponsil chu alauvin, sepai khat cheh din hal li asouvin akihomtauve. Asangkhol chol chu akilah-u leh khui lou ahin, alua pat ato geiya kikhong lhung kei ahi. 24 Hijeh chun amaho khat le khat akihouvun, Pathen lekhabua, “Kaponsil chengse akihomun, Kasangkhol chol chang ding vang vetnan vang asantauve,” kiti chu gullhunna din, “Hiche hi bot-eh poute, koipen chang ding ham, vang santhou hite,” akitiuve. Sepai hon hitia chu abol’u ahiye. 25 Jesu thingpel phung koma chun Jesu nu le anu sopinu, Clopas jinu Mary chule Magdala Mary adding jingui. 26 Jesun anu le anu koma dinga ngailut seijui chu amun, anu jah a, chun, “Numei, nachapa chu kivet’in, ati. 27 Seijuipa jah ajong chun, “Nanu chu kivet’in,” atileh; hichea pat chun seijuipan amanu chu a-in’a chenpi din apuitai.

Jesu thi

28 Hiche jou hin Jesun ijakai akibulhitsoh tai, ti ahen, Pathen lekhabu thu guilhunna din, “Kadang achah-e,” ati. 29 Hikoma chu theitwi thuh bel khat’a kitung ahin, twichoppon theitwi thuh dimset’in achopsah-un hyssop molleh a atahuvin, akamtoh agah sutouve. 30 Jesun thietwi thuh chu achop’in, “Ijakai akibulhuttai,” atin; akaikun alhagao alhadohtai.

Jesu nah tenga asut’u

31 kigot ni ahitan, Choldo ni ma chu ni loupe ni ahi ding jeh-in, Choldo nia thingpel chunga thilong aumden louna din, thingpel’a kikhenbeh ho chu akengu heboh a along lah alhahna dingin Judah on Pilate henga athumtauve. 32 Hijehchun sepaiho ahungun Jesu toh kikhetbeh that e ni amasapa le khatjopa kengho chu aheh bongtauve. 33 Jesu ahinphah phat’un athisa ahitah chu amu’uvin, akeng te ni aheh bong tapouve, 34 sepai lah akhat vangin anah tenga agahsut leh thisan le twisih ahung longdoh pai jenge. 35 Nang hon jong natahsan theina diuva athilsoh hi amupa tah-in ahettohsah ahin, ahettohsah hi tahbeh ahin, asei hi atahmong ahi, ti ahechen khat aumnai. 36 “Agu khat cha kiheh bong lou ding,” tia kisei Pathen lekhabu thu guilhunna dinga thil hicheng hi soh ahi. 37 Pathen lekhabu mun kha man, “Asut pau chu avet diu ahi,” ati.

Jesu avuiyu

38 Hicheng nung hin Judate gin jeh a guhthima Jesu seijuiya anapang, Arimathea khoa Joseph chun Jesu long chu lah lhahna din Pilate henga agathum leh aman aphelpeh tan, hijeh chun ahungin along chu alalhan apoddohtai. 39 Amasa janlaiya ahenga hungsa Nicodemus jong ahungin myrrh le aloes kihal thao kilogram som thum ahinchoiyin ahi. 40 Jesu long adomlha lhonin, Judate thivui ngaidol’in, gim namtui anun lhonin, tupat ponnemin atom lhontai. 41 Jesu thingpel’a akhetbeh nauva chun honk hat aumin, hon sunga chun lhan kisemthah koimacha kivuina khah louhel khat aume. 42 Juda ho kigot nima ahileh, lhan chu anailam jeh-in Jesu chu chukoma avuitauve.

John 20

Jesu thodoh kit

1 Choldo jou ni masa ni jingkah kho athim nalaiyin, Magdala Mary chu lhanphunga ahung leh song chu tahdohsan ana-ume. 2 Amanu jong Simon Peter le Jesun a-ngailut seijui henga ahung lhaijel’in ajah lhona, “Pakai chu lhana konin apomangun hoilam alhut’u hitam akahettapouve,” ati. 3 Hijeh chun Peter le seijui dangpa chu apotdoh lhonin lhan lama ahunglhone. 4 ani lhona hung lhai khom ahi lhon vangin seijuidangpan Peter adalhan lhanphung ahung lhung masai. 5 Akuna lhansung agah vet leh tupat ponnem tol’a um chu amun, asung vang alutpoi. 6 Simon Peter jong ahunjuipeh-in ahungin, lhan sunga alut’in ahileh tupat ponnem tol’a um bou amun, 7 alu tomna pon chu tupat ponnem toh umkhom lou, kijel’a atumbeh a aum amui. 8 Hichun lhanphung lhung masa seijui dangpa jong lhan sunga alut leh amu chenin atahsantai. 9 Ijeh-inem itile Pathen lekhabua thinaa kona thoudoh kit ding ahi, kiti chu ahetkhen loulaiyu ahi. 10 Seijuite ni a-in lama akile kit lhontai.

Jesu Magdala Mary henga akilah

11 Mary chu lhanpama adingin akap kap’e. Akapuma lhansung kuna agah vet leh, 12 Jesu long ajam nauva alulama khat akeng lama khat ponbang sil cheh Vantil ni atou lhon agah mui. 13 amanin ajah a, “Numei, i-bol’a kap nahim?” ati lhon leh; aman ajah lhona, “Amahon ka-Pakai apomangun, hoiya akoiyu kahetapoi,” ati. 14 Hichun aseiyin, agah kihei leh, Jwsu adin amun Jesu ahilam ahepoi. 15 Jesun ajah a, “Numei i-bol’a kap, nahim? Koi nahol ham?” atileh amanun honlei ngahpa chu ahisah-in, ajah a, “Pu, nangin napoh mang ahileh, ken kipoh tnege, hoiya nalupsah ham neihil’in” ati. 16 Jesun amanu jah a, “Mary!” atileh; amanu akihei loiyin Hebrew paova houhil tin an, “Robboni!” ati. 17 Jesun amanu jah a, “Neituh chah hih-in, ka-Pa henga kakaltou hih laiye; ahin kasopite henga chen lang ajah-uva, “keima ka-Pa, nang ho pa chule ka-Pathen, nang ho Pathen henga kakaltouve, tin aseiye gatin,” ati. 18 Magdala Mary chu achen seijuite henga chun, “Pakai chu kamutai,” atin chuleh thil dang amanu jah a aseiho jong chu agaseiye.

Jesu aseijuite henga akilah

19 Choldo jou nimasa ni, nilhah lamin Judate gin jeh a seijuite umna in kotpi chengse kikha khumsoh ahin, ahinla Jesu ahungin alah-uva adingin, ajah-uva, “nalahuva cham leng hen,” ati. 20 Hiche asei jou chun seijuite chu akhut te ni le anah avetsah-e. Seijuiten Pakai amu phat’un akipah lheh jengui. 21 Jesun ajah-uva aseikit’in, “Nalahuva cham leng hen,” atin; Pan keima eisol banga nang ho kasol nahiuve,” ati. 22 Hichu aseiyin amaho ahu alha khumin ajah-uva, “Lhagao kisan’un. 23 Nang hon michonset ho na-ngaidamu leh ngai dam chang diu, themmo nachansahu leh themmo chang ding ahiuve,” ati.

Jesu chule Thomas

24 Jesu hung kilah pet chun som le ni lah a khat, Thomas pengkop kitipa chu anaumpoi. 25 Seijui dang hon ajah a, “Keihon Pakai kamutauve,” atiuleh; aman ajah-uva, “Akhut phang te nia thingkil maha chengse kamua, thingkil maha ho chu kakhutjunga kakhoiya, anah kakhut tah a katham lousen tahsan ponge,” ati. 26 Niget jouvin aseijuite chu insunga aumun, Thomas jong alah-uva apange. Kot jouse akikha vang chun Jesu ahungin alah-uva adingin, “Nalah-uva cham leng hen,” ati. 27 Abanin Thomas jah a, “Nakhutjungin hikom hi khoiyin, kakhut te ni hi ven, nakhut hin lhangin kanah thamin, tahsan lel ding ahipoi, tahsan jengin, ati. 28 Thomas chun adonbut’in ajah a, “Ka-Pakai le ka-Pathen!” ati. 29 Jesun ajah a, “Neimu jeh a natahsan hiyah ong? Mu louva tahsan ho chu anun nom’ui,” ati.

Lekhabu kisutlo

30 hiche lekhabua kisun lou Jesun asiejuite mitmua melchihna abol tampi aum nalaiye; 31 akisun cheng jong hi Jesu chu Messiah, Pathen Chapa ahi, ti natahsan’uva hiche natahsan jeh-uva chu hinna nanei theina diuva kisun ahibouve.

John 21

Jesu seijui sagi henga akilah

1 hicheng nug hin Jesu amatah Tiberias dillena seijuite henga akilah kit’in, hiti hin akilahin ahi. 2 Amaho chu Simon Peter, pengkoppa kiti Thomas, Galilee gam Cana khoa Nathaniel, Zebedee chapa te ni chule aseijuite lah amidang ni jong ahiuve. 3 Simon Peterin ajah-uva, “Keima nga manin kiche tange,” ati. Adang hon ajah a, “Keiho jong nang to kilhon cheh tah tau hen,” atiuve. Hijeh chun apotdoh-un kong sunga alut’un, ahivangin hiche jan chun imacha amanpouve. 4 Khovah lhah lhah in Jesu vaokama adingin, seijuiten Ama ahilam ahepouve. 5 Jesun ajah-uva, “Gollhang, nga matsa nanei louvu ham?” atileh; amahon adonbut’un, “Aumpoi,” atiuve. 6 Aman ajah-uva, “Kongsih jetlama chun len sep leu chun namat diu ahi,” ati. Hijeh chun aseu leh nga atam mat behseh phat’un len chu akaijou tapouve. 7 Chuphat’in Jesun angailut seijui chun Peter jah a, “Pakai chu ahibouve,” ati. Simon Peterin Pakai ahibouve, ti ajah phat’in, dsagoh keova um ahijeh-in sangkhol aki-ah loiyin dil’a achom lhan, 8 seijui dang ho vang chu konga ahung kitol’un, tola kona gamla lou, tong ja ni tobang bou kilat ahiuvin, nga dim set len chu ahinkaipeh-ui. 9 Tolgo ahung geiphat’un, song meihol meiya kitih a nga kigou leh changlhah amu’uve. 10 Jesun ajah-uva, “Tutah a namat’u nga chu phabep hinchoiyun,” ati. 11 Simon Peter chu konga akaldoh-in nga len jeng dimset len chu tolgoa akaidoh leh, nga ja khat le som nga le thum ahin, achuti tam lheh vangin len chu a-ehpoi. 12 Jesun ajah-uva, “Hungun jing an hungneuvin,” ati. Pakai ahi ahetjeh-un seijuiho khat chan jong, “koi nahim?” tin adong ngampouve. 13 Jesu ahungin changlhah chu alan amaho apen, nga jong chuo bangman abol’e. 14 Hiche hi Jesu thinaa kona athodoh nunga seijuite henga akilah athumveina ahi.

Jesu chule Peter

15 Jingan aneh jouvun Jesun Simon Peter jah a, “John chapa Simon, hiche ho sanga hi nei-ngailut joh hinam?” atileh; aman ajah a, “Kakelngoite vah-in,” ati. 16 Ani vainan ajah a, “John chapa Simon, nei-ngailut’em?” ati kit leh; aman ajah a, “Heng’e, Pakai kalungset nangman nahenai,” ati. Aman ajah a, “Kakelngoite chingphan,” ati. 17 Athum veinan ajah a, “John chapa Simon, nei lungset’em?” atileh; thumvei jen chutia ajah a, “Neilungset’em? Atijeh chun Peter along gimtan, ajah a, “Pakai nangman ijakai nahenai; nang kalungset hi nahejinge,” ati. Jesun ajah a, “Kakelngoite vahin, 18 Kichentah a kaseipeh nahi, naneo laiyin nakong nakigah jin nadeina lam lama nachen, na-upat teng vang leh nakhut te ni najah a midangin nakong nagah peh ding, nadeilou lam lama napui ding ahi,” ati. 19 Hiche asei hi itobang dol’a iti thia Pathen achoi-at ding ham atina ahi. Hiche asei jou hin ajah a, “Neijuiyin,” ati.

Jesu le angailut seijui

20 Peter akihei leh Jesun angailut seijui chun ahinjui amui; hiche seijui hi ahi Jan anneh laiya Jesu ap’a ki-nung ngaiya, “Pakai, napedoh ding chu koiham?” tia donga chu. 21 Ama hi Peterin amudoh phat’in Jesu jah a, “Pakai, ama khu iti ding ham?” atileh; 22 Jesun ajah a, “Ama khu kahung kahsen umsah nom leng nang dia ipitiam? Nangin neijui thimin,” ati. 23 Hijeh chun athu hi sopite lah a akithangin hiche seijui chu thi lou ding in akiseiye. Jesun ama chu thi lou ding ahi, tia asei ahipon, “Ama khu kahung kahsen umsah nom leng nang dia ipi iti-am?” atijoh ahibouve. 24 Hichengse hettohsah a panga sundoh hi hiche seijui chu ahin, ama hettohsah hi atahbeh ahi keihon kaheuve. 25 Jesu thilbol adang dang tampi aum nalaiyin, khat khat’in kisun soh keileh, keima ngaiton sut ding chengse chu vannoi leiset jengin jong adolponte kati.

Solchah 1

Jesun Lhagao theng ateppeh

1 Vo Theophilus, thu masa chu Jesu thilbol le thuhil aboncha akipattil’a pat 2 alhensa Solchahho, Lhagao Theng jal’a thu apeh a, Ama laltouva aum ni gei thu ahin; 3 gim hesoh athoh jou kal nisom li sungin ahing monge ti hetchetna tampi toh thon Solchahho henga akilah jin, Pathen lenggam thudol aseijie. 4 Amaho toh aumkhompet’un ahilchah-in ajah-uva, “Jerusalema kon in potdoh louvin kasei najahsau Pa thutep chu ngah jo’uvin; 5 ijeh-inem itile Johnin twiya baptize achansah vangin nangho vang ni phabep jouleh Lhagao Thenga baptize nachan diu ahi,” ati.

Jesu van’a akaltou

6 Seijuiho akikhop khomsoh phat’un ajah a, “Pakai, tua hi Israel Lenggam nasemphat peh ding hi tam?” tia adoh-u leh; 7 Jesun ajahuva, “pan achamtah a atha neina’a gotsa akoi phat nikho chu nang ho het ding dol ahipoi; 8 hintin Lhagao Theng nachunguva ahung lhun teng thahat naneiyuva, Jerusalem le Judea gamsungsea jong Samaria le leiset kol kimvel geiya Keima het tohsah a napan dinguahi,” ati. 9 Hicheng hi aseiya amahon avet pettah-un lah touvin aumtan, amit mu’va konin meilhang khat’in atolmangtai. 10 Jesu hitia akitol manga amahon van lam avet vet pettahuvin ven, ponbangleh sil mi ni akom’uvah ahung ding lhonin, 11 amani chun, “Galilee gam miho, ibol’a dinga van lam navet vet’u ham? Hiche Jesu nakom’uva kona van’a kilatou hi, van lama akaltou namu bang banguva hung kit ding ahi,” ati lhone.

Judas khel seijui khat kilhenbe

12 Seijuiho chu Jerusalem komcha kilometer khat bang gamla Olive lhang kitia konin Jerusalem lama ahung kilekit tauve. 13 Seijuite chu Peter le John, Jacob le Andrew, Philip le Thomas, Barthomew le Matthew, Alphaeus chapa Jacob le gam ngailu Simon chule Jacob chapa Judas hicheng hi ahiuvin, ahung lhun’uvin aum nau indan chungnunga akaltoutauve. 14 Abonchauvin numeiho le Jesu nu Mary toh Jesu sopi pasal ho pumin akiloiyun ataojom jing uve. 15 Hitia aum laiyu hin sopite lah aPeter akipatdoh-in, (mipi akikhom jat chu ja khat le somni jen ahiuve) 16 “Sopite ho, Jesu manho hinlamkaiyah Judas thudol Lhagao Thengin David kam’a asei masah Pathen lekhabua thu chu guilhung tei ding ahin; 17 ijeh-inem itile Judas chu eiho lah a khat’a kisim’a, hiche lhacha mun jong chang ahi. 18 “Judas hin akhan gitlou man sum chun leimun khat achon, ahnla atumpi ahung pomin jalah tah a apoh jal’iin, asung alai jouse aleng cheh tai. 19 Athu hi Jerusalema cheng jouse het’in aumdoh tan, hijeh chun amaho paovin hiche leimun chu, ‘Thisan leimun’ tin an Akeldama asah tauve. 20 “Chujongle Labua chun: ‘Ama mun chu ong hen lang Koiman loda hen,’ akitin; Amavang: ‘Atohmun chu midang khat chang jo hen,’ akiti. 21 Hijeh chun eiho lah a Pakai Jesu avaikon availhun laiya eiho toh umkhom jing ho lah a mi, 22 John phat laiya pat i-lah-uva kona Jesu lahtouva aum ni geiya thudol hethemkhat chun athodoh thu hi eiho toh hettohsah a pangkhom ding ahi,” ati. 23 Chuphat’in mi ni, Justus tia kikouji Barabbas kiti Joseph le Matthias chu atungdoh tauve. 24 Chutah-in ataovun, “Pakai, nangman mitin lungthim nahesoh keiye, hiche te ni kah a hin lhengdoh tan, 25 koipen hin, ama mun kijot’a che mang Judas panna lhacha mun le Solchah mun hi lo le natim?” atiuve. 26 Chuin amani ding hin vang asan’u leh, vang kisep chu Matthias chunga achun, hijeh chun ama hi Solchah som le khat chutoh akisimthatai.

Solchah 2

Lhagao Theng hung kum lhah

1 Pentecost lhin nin abonchauvin mun khat’a aum’uve. 2 Chuin phulou helouvin van lama konin hui hattah gin bangin ahung gingin atou nau in chu apumin adimsoh jenge. 3 Hichun meikou bangin lei tampi ahung kilah-in achung chehuva aki-ngan aumden leh, 4 abonchauvin Lhagao Theng adimsoh keiyun lhagavin seidoh theina apeh bang cheh-in paochom paochomin thu aseipantauve. 5 Hichea chu vannoi chitin namtin’a kona hung khom Juda mi houva gunchu ho Jerusalema aum laiyu ahin, 6 hiche o chu ahung gin phat’in ahon ajang ahung lhai khom cheh-u leh ama ama pao cheh a athuseiyi akihettoh jengu chu adatmo lhah jengui. 7 Mihon datmo le kidang asauvin, “Ven, hechea thusei ho hi Galilee gam mi jeng hilou ham? 9 Eiho Parthia, Media, Elam gam mi, Mesopotamia gama cheng, Judea gam le Cappadocia gama cheng, Pontus le Asia gama kon, 10 Phrygia le Pamphylia, Egypt le Cyrene naiya Libya lhanga cheng, abang jong Rome a kona hung kholjin 11 Juda mik le Juda kisosah ihiuvin, Crete le Arabia hung kon jong auminm Pathen natoh nasatah aseiyu khu ipao chom cheh-in ikijah theiyui,” tiuve. 12 Abonchauvin datmo le lung kichi-ah tah-in khat le khat aki houvun, “Hiche hi ipi tin a hin tem?” atiuvie. 13 Midang hon vang ajontaiyun, “Hiche ho hi lengpitwi kham hiuva hi!” tin aseiyui.

Pentecost nia Peter thusei

14 Peter chu som le khat chutoh adding khomin, going tah-in japi lam ngan thu asetai; “Vo Juda miho le Jerusalema cheng te, nabonchauvin hiche hi heuvin lang kasei chengse hi lung nachangin ngaiyun. 15 Na-ngaito banguva hiche miho hi lengpitwi kham ahipouve, ajeh chu tu hi jingkah nidan ko bou ahinalaiye; 16 amavang hiche hi Joel Themgaova kona kiseia: 17 ‘Pathenin “Ni nunung lam teng hiti ding ahi,” atin; Tahsa mihem pumpi chunga ka-lhagao kabuh lhah a, Nachapateu le nachanu teuvin gaothu asei diu; Nakhangdong teuvin Themgao thilmu tampi amu’va, Na-upateuvin mang tampi anei diua hi 18 Chule kasoh pasal ho le numei ho chunga jong Hiche nikho laiya chu kalhagao ka buh lhah ding ahin, Hijeh a chu amahon gaothu asei diu ahi. 19 Chunglam van’a thil kidang dang kabol’a, Noileiset chunga melchihna tampi kabol ding; Thisanm meikou muthim lhang khalkiheh ding. 20 Nisa hung thim ding, Lha thisan banga san ding; Pakai nikho nasatah le kiphondohna ding Hung lhun masanga chute ding ahi. 21 Chuteng koi hileh Pakai minphah chan Huhhinga um ding ahiye,” tia’asei chu ahitai. 22 “Israel mite, hiche thu ho hi ngaiyun! Nang hon nahet banguvin, Nazareth khoa Jesu kit mipa chu Pathenin aphatsah photchetna nalah tau-uva thil kidang ho le datmo tin cheng chule melchihna tampi abolsah ahi. 23 Pathen in ahet masah a aontohsa dungjuija hiche Jesu pehdoh a aum chun nang hon Dan neiloute khut’a thingpel’a na khehbeh-un nathat tauve; 24 Ama chu thinan ahenhoi ahi loujeh-in, thi genthei nana hen chu Pathenin asut lhan, akai thoutai. 25 Ajeh chu David-in jong ama thudol asei chun: ‘Keiman kamasanga Pakai kamu jing in, Suh lingjou kahilouna din kajetlama apang jinge; 26 Hijeh chun kalungthim akipah-in, Kaleiyin thanop thu aseyie; Katahsaphe jeng jong hi Kinem’a um jing dina ahi; 27 Nangin ka-lhagao jong noimigama dalhapon natin, Namithengpa jong mon mangsah pon nate. 28 Hinna lampi chengse neihetsah tan Namaiya kipana lhingset’a neipeh ding ahi,’ ti. 29 “Sopite ho olmo louhel’in iphung bupiu David thudol hi najah-uva ka sei nga’e; ama athin avuiyuvin, avuikhuh chu tuni geiyin ilah-uva aum jing nalaiye. 30 Thengao ahijeh-in Pathenin achilhah lah a khat alaltouna atousah dia akihahselna chu ahe jingin, 31 ahet masah jeh chun Christa thodoh kit ding hi asei masan: ‘Ama chu noimigama akidalha denpon, Atahsaphen jong mon mangna amupoi,’ ati. 32 Hiche Jesu hi Pahtenin akaithoutai, keiho chengse hi hettohsah kahiuve. 33 Ama chu Pahten jetlama choisangin aumtan, Paa kona thutep Lhagao Then galah chu ahin bung lhan, nagn hon namu’va najah-u hi ahi. 34 Ijehinem itile David chu Van’a akalpon, hitjoh hin aseiye: ‘Pakai chun ka-Pakai jah a, Kajetlama tou jingin 35 Keiman namelmate chengse Nakengot chotpha kaneisah masangsen,’ ati. 36 “Hijeh chun Israel insung miten kihet cheh hen, nang hon thingpel’a nakhetbeh-u hiche Jesu hi Pathenin Pakai le Messiag a sem ahitai,” ati. 37 Asei ngai chengse chu alungu hem’a kidot abang jengin, Peter le Solchah dang ho jah a, “Ipi kabol diu hitam sopite?” atiuve. 38 Peter in ajah-uva, “Nachonset lung heiyun lang, khat cheh-in na chonset’u ngaidamna ding in Jesu Christa mininbaptize chang cheh-uvin, chuteng Lhagao Theng Pathen thilpeh hi nachan diu ahi; 39 ijeh-inem itile thutep chu nang ho le nachateiu chule gamla tah a um Pakai i-Pathenuvin akouh0o jouse dinga ahi,” tai. 40 Peterin Thudang tamtah-in jong ahettohsah-in tilkhouto thon ajah-uva, “Hiche khang gilouva kon hin kihuhhingun,” ati. 41 Hijeh chun asei jop chengse chu baptize achangunm hiche nikho chun mi sang thum jenin abetauve. 42 Amaho chu solchah ho thuhil’in jong, antheng jongin jong chule taovin jong gunchutah-in apangdet jing tauve.

Jesu tahsan ho hinkhom

43 Thil kidang le melchihna tampi Solchah hoa kona kiboldoh phat’in amitakip chunga kichatna achutai. 44 Atahsan ho abonchauvin thukhatseh kisauvin, ijakai neilhangin aneikhomun, 45 aneiyu athilkeo chengseu ajoh-un, a-ngaichat dungjui cheh-in akihom jiuve; 46 niseh le lung khatseh pun Houin a gunchu tah-in akikhom jiuvin, in tin’a changlhah helbal’in akikhomun, lung lhaisel le kipah tah-in an anekhom jiuvin; 47 Pathen avah choiyun mipi pumpi seiphat achangui. Hichun Pakaiyin niseh leh huhhinga umdoh ho chu aloi lah-uva abejing jin ahi.

Solchah 3

Houin kelkot’a Peterin elbai aboldam

1 Peter le John chu tao phat nilhah lam nidan thumin Houin a achetou lhone. 2 Chuin Houin kaiya cheho henga khutdoa thil thum dinga ahinpoh-uva ‘Kotkhah hoi’ kiti Houin kelkot bul’a kiseh leh kitousahji, anusunga kona elbaiya pengpa chu aumin, 3 amahin Peter le John Houin a lut kigo amun, i-khat khat apehna lhon din thil athume. 4 Peterin John toh ama chu avechang mel’in “Keini lam hinven,” ati. 5 Hijeh chun aman i-khat khat mu ding kinemin amani phatah-in avei. 6 Hichun Peterin, “keiman dangka le sana kaneipon, kanei hiche hi napenge, Nazareth Jesu Christa minin lam jot tan!” ati. 7 Hiti chun akhut jetlamin atuh-in akaithou leh, apettah chun akenghang te ni le akhochang dung jouse ahatdohin, 8 ama akichomin adding jangin lam ajot’in, amanitoh Houin a alut’in, avah len, akichom chomin Pathen avahchoi choi jenge. 9 Mipin jong ama ava le lea Pathen avah choi choi jeng chu amu cheh-uvin, 10 Houin ‘Kotkhah hoi’ kiti laiya kitousahjia khutdo pa chu ahi ahet doh phat’uvin hichepa chunga chu ipi thilsoh hitam, tin lung dongin akicha gamtauve.

Solomon hongchaa Peter thusei

11 Elbai kidamsah pan Peter le John akolchah jing phat’in mipin adat mouvin, Solomon hongcha kiti laiya chun ahenguva ahung lhai khom’uve. 12 Peterin amu phat’in mipi agah houvin, “Israel mite, ibol’a hiche thilsoh hi nadatmouva, keini thahat le houdih jeh a ama hi lam kajotsah thei lhona nagel’uva, neivet vet jengu ham? 13 Nang hon napehdoh-uva Pilate’n lhadoh dinga thu atan jouva jong a-angsung laitah a napaisau, alhacha Jesu chu i-pu i-pateu Pathen, Abraham Pathen, Isaac Pathen, chule Jacob Pathenin achoi-at ahin, 14 nang hon Atheng le Adihpa chu napaiyun tolthatpa joh chu nalhadoh peh diuvin nathum’ui; 15 hinna Bulpi chu nathat’uvin, ahinla Pathenin Ama chu thinaa konin akaithou kittai, keihohi ahetoh kahiuve. 16 Ama min a tahsan vanga hiche namu’va nahetsahpau hi ama tahsanna chun ama hi adamthengsah hel jenga, hiche ama min’a chu nabonchau angsunga kidinsah ahitai. 17 “Tun sopite, nang hon jong navaipoteu banga hetoh louva nabol’u ahi kahenai; 18 chujongle Pathenin a-Messiah chun gim hesoh athoh ding thu Themgao jouse kamsunga ‘anaphondoh masah chu hitia hi guilhung ahitai. 19 Hichejeh chun chonset lung heiyun lang nachonset chengseu suhmanga aumna din hung kile kit’un, 20 chutileh Pakai angsunga konin lhagao haldoh kitna thei umdoh-intin, Aman nang ho dia lhendohsa akoi messiah Jesu chu ahinsol thei ding ahi. 21 Hiche Jesu chu Pathenin akhang khanga a-Themgao theng ho jouse kama ahinsei jing banga thil ijakai akiledohsah kit phat kah a van’a lahtouva umtei ding ahi. 22 Mose’n jong, ‘Pakai na Pathen’uvin keibanga hi nasopiteu laha kona Themgao khat natundoh peh diu ahi; ipi hileh aman nasei peh chanu aboncha na-ngaisoh kei diu ahi. 23 Koi hileh hiche Themgaopa thusei ngailou chu mipilah a kona kisumang ding ahi,’ ati. 24 Samuel a pat ama nunga thusei Themgao chengsen jong tu hiche nikho ho didng hi anaphon masah sau ahitai. 25 Nang ho hiche Themgao ho leh, Pathenin napu napauteu apeh a Abraham jah a, ‘Nangma chilhah vanga vannoi phungtin phatthei chang diu ahi,’ tia ateppeh hiche Kitepna chate chu nahiuve. 26 Pathenin amasaa nang ho dia alhachapa chu akaithouva, nagit louna chengseuva kona leheisoh keiya phatthei naboh diuvin nahenguva ahinsoltai,” ati.

Solchah 4

Hou vaipoloi ang’a Peter le John

1 Peter le Johnin mipi jah a thu asei nalai lhonin, Thempu ho le Houin ngah sepai lamkaipa chule Sadducee hon ahindel vuh-un, 2 mipi thu ahilnalhona Jesu jal’a thinaa kona thokitna aseiphong lhon chu athi mah ten jengun, 3 amani chu aman’uvin nilhah ahipai phat’in ajinga din mihenna in’a akhumtauve. 4 Ahinla athusei lhon jaa mi tampin atahsanin, amijat jong sang nga jen alhingtauve. 5 Ajing nikhon avaipoteu le upaho chengse le Danthu themho Jerusalema akikhomun, 6 (Thempu chungnung insung lhah jeng, Thempu chungnung Annas le Caiaphas toh John le Alexander ahiuve,) 7 amani chu alailunguvah adinsah-un, “Ipi tha neina neiya, kei min pan’a hiche hi nabol lhon ham?” tin adongui. 8 Chutah chun Peter Lhagao Theng adimset’in ajah-uva, “Japi vaipote leh upate ho, 9 tunia elbaipa thilpha kibolpeh chung chang a eikidong lhona, ama iti kihuhdoh ham, kiti ahileh, 10 Israel mipi leh nang ho nabonchauvin kihet chehun, Nazareth Jesu Christa, nang hon thingpel’a nakhetbeh-uva, Pathenin thinaa kona akaithou kitpa min kipana, hichepa jeh a chu ama damthenga na angsunguva ding’ah ahi. 11 Hiche hi, ‘Insa hon napaiyu Song, ‘Inning khomdet pen’a pang,’ kiti chu ahitai. 12 Chule koima dang’ah ‘huhhingna ‘aumpoi; ‘ijeh-inem iti le vannoiya mihem lah a huhhinga i-umna diuva kipea min dang him him aumpoi,” ati. 13 Mihon Peter le John hanje chu amu’uvin, lekha them lou, mimol ahi lhon aheuvin adatmo lheh jengui; amavang Jesu toh kiloisa ahi lhon ahenauve. 14 Aboldam lhonpa ma amani toh adin khom jing amu’u leh asuhsetna din imacha abol theipouve. 15 Chuin amani chu akouvun Hou vaipoloi kikhopnaa kona potdoh din asol’uvin, amaho achangin akihou khomun, 16 “hiche mi te ni hi iba ilo diu ham? Ijeh-inem itile ama ni jeh a melchihna dsoh hi la Jerusalema cheng jouse het’a kiphongdoh ahitan, eihon jong iseilep thie pouvin, 17 hijongleh athu mipi lah a akithejeh be louna dingin, miho koimacha jah a hiche min’a hi thu asei kit lhon louna din gihsal’u hite,” akitiuve. 18 Chuin amani akouvun Jesu min’a thu aseiphong thei lhon lou ding, mijong ahil thei lhon louhelna din akhah chah tauve. 19 Ahinla Peter le Johnin amaho adonbut lhonin ajah-uva, “Pathen thu sanga nang ho thu ngaijoh Pathen mitmua din jom, nang hon ngaitouvin; 20 keinin vang kamusa le kajahs alhon chu kaseida thei lhon louhel ding ahi,” ati lhone. 21 Thilsoh chung chang jeh a mihon Pathen avahchoi cheh-u leh, mipijeh chun talen peh na thieya thepmona imala amudoh pouvin, hijongleh amani chu nasatah-in agihsal kit leuvun alhadoh tauve. 22 Achunga damsah theina thil kidang kibolpehpa ma chu akum som li val ahitai.

Jesu tansanho ahanna diuva ataovu

23 Alhadoh phat’un Peter le John jong aloite henga ahung lhonin Thempu pipu ho le upahon ajah lhona agih nau thu chu asei peh lhontai. 24 Amahon ajah phat’un lung khat tah-in ogin khat’in Pathen akouvun, “Vo Pakai, van le leiset, Twikhanglen chule asunga um jouse Sempa nangma nahi, 25 Lhagao Thenga kona kapuluiyu nalhacha David kama ‘Ibol’a chiding namdangte lung hanguva, Mipin pannabei thil angaitou ham? 26 Leiset lengte akigol’un, avaipoteu jong akikhomun Pakai le a-Messiah dou din agouve,’ tia kiseisa chu 27 atahbehin hiche khopi sunga hin thao nanusa nalhacha theng Jesu dou din, Herod le Pilate, chiding namdang toh chule Israel mipi geiyin akikhomun, 28 bo dinga nakhut tah a nagontohsa le nalungthima na-ngaito chengse chu bol ding agatauve. 29 Chule tun Pakai, ami gihsal nau hi vetan, chujongle nalhachate hin hangtah a nathu asei ngamna diuvin lung ngamna pen, 30 nalhacha Theng Jesu min’a dammo veiset akiboldama, melchihna tampi akiboldoh a chule thil kidang dang akisodohna din nakhut hin lhangin,” atiuve. 31 Hitia chu ataovu leh aum nau mun chu ahung kilingin, amaho abonchauvin Lhagao Theng achangun lung ngamtah-in Pathen thu aseitauve.

Thil jouse neilhanga aneiyu

32 Atahsan loise chu lung khat she le hinkho khat’in aumun, koiman anei athilkeo chu amaa tuma sei louvin, abonchan akikop cheh-uve. 33 Thahat nasatah kengin Solchah hon Pakai Jesu thokit thu ahettohsah-un, achunguva phat theina lentah-in aume. 34 Ijeh-inem itile alah-uva khat cha jong alhasam aumpouve, lou le in neihon jong ajoh-un aman jouse chu ahin choi khom’uvin 35 Solchah ho kengbul’a akoiyun, mihon angaichat bep cheh-in ahoppeh jiuvin ahi. 36 Mi tilkouva pang ahi, tia Solchah hon Barnabas asah-u, Cyprus aping Levi mi Joseph chun 37 lou ching khat aneiyin agajoh-in sum chu ahinchouyin Solchah ho kengbul’a akoiye.

Solchah 5

Ananias le Sapphira

1 Amin Ananias kiti pasal khat hin ajinu Sapphira jong anomin anei thil khat ajoh-in, 2 ajinu het’in thilman akeh khat akikoiyin, akeh khat chu ahinchoiyin Solchah ho kengbul’a akoiye. 3 Hichun Peterin, “Ananias, ibol’a nalung sung Satan nalo dimsah a Lhagao Theng najoulhep’a, gam man akeh khat chu nakoiden hitam? 4 Najoh masanga nanga ahibanga najoh nunga jong nanga chu nathu thu hilou ham? Ibol’a hitobang thil hi nalungthima navop ham? Mihem hilouva!” ati. 5 Ananias chun thu hicheng hi ajah jah chun alhun athitai; hichea hin ajapha jouse chunga kichatna lentah ahung lhungtan ahi. 6 Gol-lhang ho adding doh-un along chu atom’uvin chule apodoh-un agavuitauve. 7 Nidan thum don nungin thilsoh umchan hepha louvin ajinu ahung lut’e. 8 Peterin amanu anahouvin, “Seitemin, hijat man a bou hi gam chu najoh lhon ham?” ati leh; amanun, “Henge, hijat ahinai,” ati. 9 Chuphat’in Peter ajah a, “Ibol’a nangnin Pakai Lhagao patep dia nagot lhon ham? Ven, najipa vuiho kotpi phung ahung geitauve, nang jong napohdoh pai diu ahtai,” ati. 10 Amanu jong alhu paiyin Peter kengbul’a athidentai. Gollhang ho ahung lut’u leh amanu athisan ahung toh-un, along chu apodoh-uvin ajipa koma agavuitauve. 11 Chutah chun Houbung pumpi le athilsoh ho japha chan chunga kichatna lentah ahung lhungtai.

Melchihna le thil kidang tampi abol’u

12 Mipi lah a melchihna le thil kidang tampi Solchah hon akhut tah-uvin aboldoh doh jengun, chujongle lungkhat tah-in Solomon hongchaa chun aum cheh-ui. 13 Midang koiman amaho jop dinga ngap chatapon, ahinla mipin aseipha jing nauvin, 14 hijeh chun mipilah a Pakai tahsan tahbeh ho pasal’in jong numeiyin jong abejingun, 15 Peter ahungle tengleh alebeh achunguva achuh khahna din, dammo veise jouse khosung lamlen dunga ahinpohdoh-un khunpeh chung le pheh dunga alupsah-ui. 16 Jerusalem kimvel khopi dunga mipi ahung kikhom’un, dammo veise jouse le lhagaoboh vop ho ahinpuiyun, abonchan aboldamsoh keiyui.

Solchah ho min abol gantheiyu

17 Thempu chungnung chu chu pet’a Sadducee loi lah a aloite chengse chutoh akipatdoh-in, athang tom behseh jengun, 18 Solchah ho chunga khut alhauvin, aman’un, lhangpi kihenna in’a akhumtauve. 19 Ahinla hiche jan chun Pakaiya kon Vantil khat’in songkul kotkhah aongin amaho apuidoh-in ajah-uva, 20 “Cheuvin Houin a ga dingun lang hiche Hinna thudol hi abonchan gaseipeh tauvin,” ati. 21 Hiche ajah phat’un khovah lhah-in Houin a alutuvin thu agahiltauve. Thempu chungnung chunla aloi te chengse toh ahungin Israel chate Hou vaipoloi upa changse toh Houthua kikhopna abol’un, amihenho’u gakailut dingin songkul’a mi asol’ui. 22 Vaihom asol ho’u ahungu leh Solchah ho chu songkul sunga agamu tapouvin, ahung kile kit’uvin athudol aphongun, 23 “Songkul kaga lhun’un kotheh chengse phatechan akiheh-in songkul ngah ho jong kotpi phung dunga adding cheh-un, kot kahondoh phat’un la asunga koima kamupouve’” atiuve. 24 Athuseiyu hi Houin ngah sepai vaipopa le Thempu pipu loiyin ajah phat’un Solchah ho chu iti hiuva hichea hi ipi hungsoh hitam, tin alunggel’u abeihel tai. 25 Hichepet hin mikhat ahenguva ahungin, “ven, songkul’a namihen ho’u khu, Houin a adingun mipi thu ahil’uve,” ati. 26 Chuphat’in Houin ngah sepai vaipopa le vaipoloi chengse akon’un amaho agakailut’uvin, mipi akichauvin songa ase louna diuvin pumhat’in vang abolpouve. 27 Solchah ho ahinkailut phat’un Hou vaipoloi kikhopna adinsah-un, Thempu chungnungin amaho adongin, 28 “Hiche min pan’a mi nahil louhelna diuva hachang khama nakikhamu ahin, ahinla ven, hiche nathuhil’u hi Jerusalem nadipsoh hel’in, hiche mipa thisan phu hi keiho chunga lhut khum din neigouve!” atiuve. 29 Ahivangin Peter le Solchah hon adonbut’un, “Mihemho thu hilouva Pathen thu joh a kanun tei tei diu ahi. 30 Ipu ipateu Pathenin thinga nakhai sanguva nathasau Jesu chu akaithouvin, 31 Israelte achonset chengseu ngaidama aumna dia chonset lung heina apehna din ama chu Pathenin ama jetlama vaipo le huhhingpan achoisangtai. 32 Hiche thu ho ahetoh a chu Pathenin athua nung ho apeh Lhagao Theng le keiho kahiuve,” atiuve. 33 Ajapha chan alung hang beseh jengun Solchah ho chu thadoh jengdia akiloltauve. 34 Hichun Hou vaipoloi lah a Pharisee mi, amin Gamaliel kiti, Danthu hilthem, mi jousen ajasohkei, ama chu adingdoh-in Solchah ho chu phat chom khat polama soldoh dingin aseiyin, 35 chuin Hou vaipoloi jah a, “Hiche miho chunga hi ipi bol ding natiu ham kichih theiyun. 36 Ijeh-inem itile tu masngin jong Theudas kiti mi khat anaumin, ama le ama i-khat hidainnin akiseiyin, pasal phabep jen, ja li bangin ajop’uvin, ahinla ama atha phat’un anungjui chengse akithe chehsoh-in, imacha lou asoh tai. 37 Hiche nung hin leiset mi kisim laiyin Galilee mi Judas ahung kipan kit’in, mipi phabep geiyin akijuisah-e; ama jong hi amang thah tah, anungjui chengse jong akithecheh tauve. 38 Hijeh a chu tu hiche thua jong kaseipeh nahiuve, hiche mihoa kon hin kikangseuvin lang don dauvin, ijeh-inem itile hiche jong hi mihema kon le lunggel chule natoh ahile kisumang thou ding ahi; 39 Pathena hungkon ahivangleh nasuh mang joulou diu ahi, ajo leh Pathen kidoupi nahilo diu ahi,” ati. Gamaliel thun anungun, 40 Solchah ho chu akou lut’uvin, avoh juvun Jesu min’a thu asei louhelna diuvin hatah-in agihsal’un alhadoh tauve. 41 Solchah ho chu Hou vaipoloi kikhopna maiya konin achedohun, chuche Min jal’a hesoh genthei thoh a kiloma akibol’u chu akipah lheh jengui. 42 Niseh-in Houin le a-in tin’uva tang louhel’in thu ahil’un, chule Jesu chu Messiah ahi Kipana Thupha asiphong jingui.

Solchah 6

Mi sagi kipansah

1 Hiche lai chun seijuih mijat apunbe cheh cheh phat’un niseh a thil kihopnaa ameithaiho’u anah sah peh pouve, tin Greek pao tho Juda-numeiho chu Hebrew mite chunga aphun’un, akah-uva kinahna asodoh tai. 2 Chuphat’in som le ni chun seijui jouse akoukhom’un, “Keihon Pathen thu seiphong kangah-uva dokhanga ankong sem’a kapan diu adihpoi; 3 hijeh chun sopite, hiche kin’a kapansah diuvin, nalah-uva konin Lhagao le chihna dim mia nahettohsau sagi lhengdohuvin; 4 chuteng keiho tah vang taona le hill hang kin’a kipumpeh jo’uvinge,” atiuve. 5 Athu chu mipi maiya lung lhai aumin, hijeh chun tahsan le Lhagao Thenga dim Stephan toh, Philip le Prochorus, Nicanor le Timon, Parmenas le juda houva kilalut chiding namdang mi Antioch khoa hung Nicolaus alhengdoh-un, 6 amaho chu Solchah ho angsunga adinsah-u leh, Solchah hon ataopeh-uvin achunguva khut a-ngamtauve. 7 Hichun Pathen thu achaljah tan, jerusalema seijuiho mijat hapunin apungin, Thempu ho lah a tamtah jong tahsan thun anung tauve.

Stephan amat’u

8 Stephen chu lungset le thahat adamtan, mipi lah a melchihna le thil kidang lentah tah aboldoh tai. 9 Hichun akiminvo na banga chamlhat miho Houthua kikhopna in kitia konin mi phabep, Cyrene gama, Alexandria, Cilicia le Asia a hung kon ho akipatdoh-un Stephen chu akinelpiu leh, 10 aman chihna le Lhagao thu asei chu anel thei tapouve. 11 Chuphat’in amahonmi phabep, “Amah in Mose le Pathen taitomna thu asei kajauve,” tia sei dingin atlseuvin ahi. 12 Hiti chun mipi le upa ho, Danthu themho aban tilset’uvin, amaho achunga achu’vin, aman’un Hou vaipoloi kikhop naa akailut’un, 13 jouthua hettohsah-uvin, amahon, “Hichepa hin Muntheng le Danthu douna thu tang louhel’in asei sei jengin, 14 Nazareth Jesun hiche mun hi asuhmanga Mose’n eipeh-u chondan ho hi akheldoh ding ahi,’ tia asei jong kajauve,” atiuvin ahi. 15 Hichun Hou vaipoloi kikhopnaa tou chengsen Stephen chu avesoh keiyun ahileh amai chu Vantil maiso bangin amu’uve.

Solchah 7

Stephan akihonna thu asei

1 Thempu chungnungin, “Hichengse hi hiti mong ham?” atileh; 2 Stephenin adonbut’in, “Ngaiyuvin sopite le pate ho: Penna bulpipa Abraham chu Haran aching dia ache masang, Mesopotamia gama achen laiyin loupina Pathen ahenga ahung kilah-in 3 ama jah a, ‘Nagam leiset le naphung mite dalhan potdoh-in lang keiman kavetsah ding gam jonin chetan,’ ati. 4 Hijeh chun ama Chaldea gama konin achen Haran a achengtai. Apa thi nungin tua nachen nau hiche gamsunga hin akichon lutsah-in, 5 ahinla agam leiset halsi khat, kengpeh thol jeng cha jong ama din apepoi; cha anei lou vangin, agam chu ama le anunga achilhahpa apeh din thu anatep’e. 6 Pathenin hiti hin achilhah te chu mi gama gapem’uva, mihon sohna atohsah diu, genthei hesoh a abol diuvin aseiye. 7 Pathenin aseiyin, ‘Amahon sohna agatoh peh-u nam mite chu thu katan khuma, chujou teng Abraham chilhahte hung kitoldoh-uva hiche lai mun’a Keima kinbol’a eihou diu ahi,’ ati ahi. 8 Chuin Abraham chu cheptan ding kitepna thupeh apen, hijeh chun Isaac ahingin niget nin chep atanpeh-in, Isaac-in Jacob, Jacob’in penna pate somle ni ahingin chep atanpeh-e. 9 “Penna pate chu Joseph chunga athang thip’un Egypt gama ajoh mangun, ahile Pathenin aumpi jingin, 10 ahesoh genthei tin tanga konin ahinhuhdoh pehin, Egypt lengpa Pharaohang’a lungset le chihna apen, hijeh chun lengpan Egypt gam pumpi le ama insung pumpia vaipon asemtai. 11 Hichun Egypt gam punpi le Canaan gam pumpia nahiuve kel alhan, gentheina lentah ahung, lhungin, i-puteuvin neh le chah akimu joutapouve. 12 Hichea hin Jacob’in Egypt gama anneh aume, ti ajah phat’in i-puteu chu khatvei chan nan agah solpai jenge. 13 anivei chan na Joseph-in asopite akihetdohsah tan, Jacob insung chu Pharaoh geiyin ahetai. 14 Chuphat’in Joseph-in jong apa Jacob le a-inkote mihem som sagi le nga jen chu gakou din mi asol’in, 15 Jacob jong Egypt’a ahung suh tai. Hichun ama ahin i-puteu ahin athitauvin, 16 alongu chu Shechema alepoh-uvin, Shechem muna Abrahamin Hamor chatea kona dang kaa achohsa lhan’a chun avuitauve. 17 “Pathenin Abraham koma akihahsel’a a thupeh phat chu ahung lhinpai ding phat’in, Egypt gama mipi apungtel tul jengun, 18 Joseph hephalou leng chom khat hung letdoh geiyin apunguve. 19 Lengchompa hin ijat miteu heltah-in dohan abol’in, i-pu i-pateu chu achasen jouseu ahing aum louna din acham louvun polama apaidoh sah jenge. 20 Hiche lai tah hin Mose apengin Pathen din it aum lheh jenge; lha thum sungin apa insunga avah-un, 21 ama jong apaidoh phat’uvin Pharaoh chanun akilah-in achapa vah-in ahin kivahdoh tai. 22 Mose chu Egypt mite chihna jouse ahil’un, athusei jouse le antohna chan a pheltah ahiye. 23 “Mose chu kum som li alhin phat’in asopi Israel chate gavil ding alungthima aumdoh tai. 24 Mi khat hi adih loutah a kibol amun, ama chu akithopin aphu lahnan Egypt mipa chu athattai. 25 Mose gel’a chu Pathenin ama khut mangchaa ama hochu huhhingna apeh got ahi asopiten kihetnah tau atileh, amahon ahepouve. 26 ajingin ahenguva ahung kit leh mi ni akina lhonin, aman akah lhona chamna thu aseiyin, ‘Mi te ni, sopi cha hlhona ibol’a khat’in khat adih louva kibol nahi lhon ham?’ ati. 27 Ahinla a-inhengpa adih louva bolpa joh chun Mose chu asondoh-in, ‘Keiho chunga vaipo le thutana kon natun beh am? 28 Janhia Egypt mipa natha banga chu tha ding neigot ham?’ ati. 29 Hiche athusei jeh hin Mose ajamin Midian gama agapemin, hikoma chun chapa ni agahinge. 30 “Kum som li lhinin Sinai mol gamthip laiya Vantil khat hamboh lah meikongin Mose henga ahung kileh-e. 31 Hiche thil amu hi Mose’n adatmon, ga ve chen dia anailut leh Pakai o ahung gingin, 32 ‘Keima napu napate Pathen, Abraham le Isaac chule Jacob Pathen kahi,’ ati. 33 ‘Nakeng te nia konin nakengchot te ni sut lhan, ijeh-inem itile nadinna chu muntheng ahi. 34 Egypt gama kamite kibolsetna kaven kamu chentai, chule apen gin’u kajan apuidoh diuva hung kumlha kahi; hijeh chun tun hungin Egypt’a kasol ding nahi,’ ati. 35 “Hiche Mose amahon apaidal’uva, ‘Vaipo le thutan a kon na tun beh am?’ atipau, hichepa tah hi Pathenin hamboh lah a ahenga hung kilah Vantil ban thahat’a ama ho vaipo le huhdoh din asoltai. 36 Amahin Israelte ahinpuidoh chun Egypt gama jong Twikhanglen san mun le gamthip noiya kum som li sungin thil kidang dang le melchihna tampi anabol’e. 37 Hiche Mose hi ahiye Israel chate jah a, ‘Pathenin nasopiteu lah a kei tobang Themgao khat natundoh peh diu ahi,’ tia sei chu. 38 Gamthip laiya Houbunga anapanga, i-pu i-pateu toh pang khoma Sinai mol’a Vantil toh kihouva, eiho pehson dia hinna Thupeh lapa chu ama hi ahin, 39 i-pu ipateu ama noiya alut nom pouvin, asondoh-un alungthimun pouvin, asondoh-un alungthimun Egypt lam angai cha jingun, 40 Aaron jah a, ‘Kamasanguva lamkai din Pathen lim tobang ho neisempeh-un, ajeh chu Egypt’a kona eihin puidoh pau hiche Mose chu achunga ipi soh hitam kahetapouve,’ atiuvin ahi. 41 Hiti chun amahon hiche lai hin bongnou lim asemun, hiche lai hin bongnou lim asemun, hiche koma hin kilhaina abol’uvin, akhut’a asemsau thi ho ja nan golnop abol’uve. 42 Hijeh chun Pathenin akihei mang khumin van’a ahsite hou din amaho chu apehd0h-in, Themgao ho lekhabua kisun bangin: ‘Vo Israel insung mi, kum som li sung gamthip laiya Sa thao le kilhainaa neihou louvu hilou ham? 43 Moloch houna ponbuh po leuvin, Rephan ahsi pathen limsemthu napo leuvin Hiche nasemsau thil ho hi houdin nago meu! Hijeh a chu Babylon kal’a katolmang diu nahiuve,’ akiti. 44 I-pu i-pateuvin gamthip laiya, Alim kigon namu bang bangin ponbuh san,’ tia Mose jah a thusei Pathenin avetsah hettosah na Houbuh chu neiyun, 45 hiche hi i-pu i-pateuvin alason’un, Joshua lamkainaa Pathenin i-pu i-pateu masanga chiding namdangte anodoh a amahon gam alo lai geiyun ahinpo lut’uvin, David nikho lai geiyin aume; 46 David chu Pathen angsunga lungset achanjeh-in Jacob Pathen Inmun amudoh din athume. 47 Ahinla in chu Solomonin asahpeh bouve. 48 Ahinvangin Chungnungpen chu khut’a kisa in’a achengpoi, hichea hin Themgaopan: 49 ‘Pakaiyin, “van kalaltouna ahin, Leiset kakengto ngapna ahi; Nangin itobang in neisah peh ding ham? Kacholdo mun ding hoikom ham? 50 Ijakai Keiman kakhut tah a Kasemsa hilou ham?” tin aseiye,’ ati. 51 “Milou chalet, lungthim le nabeng te nia cheptanlou ho tobang, napu napateu bangin nang hon Lhagao Theng nadoudal jing jengui. 52 Napu napateuvin Themgao koipen bolset louva akoiyum? Alhacha Theng hung masanga anaseiphong masa chengse athat’uvin, nang hon tuna ma najoh doh-un nathattauve, 53 chule Vantiltea kona Danthu kilahsaon nang ho nahiuvin, nit la nanit pouve,” ati.

Stephen songa aselih-u

54 Asei chengse ngaiho chu alungthimu atongkhan athimah cheh-un Stephen chu ha agoikhum cheh-uve, 55 Stephen vang chu Lhagao Thengin adim pai jengin, van lah agah vet leh Pathen loupina le Pathen jetlam a Jesu adin amun; 56 “Ven, van akihon’a Mihem Chapa chu Pathen jetlama ding kamui!” ati. 57 Chutah chun amahon hahohin ahoh-uvin anabeng akisip cheh un, ahonjangin adel lut’uvin, 58 khopi polama aleh doh-un songin aseptauve. Ahetoh a pang hon Saul kiti gol-lhang khat kengbul’a aponsil’u akoiyuve. 59 Mihon Stephen songa asepet’u chun aman ahin samin, “Pakai Jesu, ka-lhagao lan!” tin aseiye. 60 Hichun aboh khup’in going tah-in asamin, “Pakai, hiche chonsetna hi amaho chunga simdan!” ati. Hiche hi aseiyin akijamdap deltai.

Solchah 8

Saul’in Stephen athau hi aphat sah-e.

Saul’in Houbung abolgim

1 Hiche nikho hin Jerusalema Houbung chunga hesoh gentheina lentah achutan, Solchah ho tilou adangse Judea gam le Samariagama ajamchehsoh heltauve. 2 Hougut mi phabep’in Stephen chu avuiyun, hakan akauve. 3 Saul vang chun Houbung suhmangna din in tin’a alut’in numei pasal aman’in ajendoh doh jengin songkul’a akhum thu thui.

Samaria khopia Kipana Thupha Kiseiphong

4 Mi ajamcheh ho chu avah leuvin Kipana Thupha thu aseiphongin apangjo tauve. 5 Philip jong Samaria khopia achesuh-in miho jah a Messiah chu aseiphongtai. 6 Mipi hon asei chengse ajah uva melchihna abol ho amu phat’un lung khat tah-in Philip thuseiho chu lung lut cheh-in angaiyui. 7 Ajeh chu mi tamtah a konin lhagaoboh ho hapenin apengun ahung potdoh doh jengun, ;angthi ho le elbai ho geiya damdoh dodh jeng ahiuvin, 8 khopi sunga chun kipana tampi asohdoh tai. 9 Khopi sunga hin amin Simon kiti mitphel doithem khat aumin, Samaria jat mite chu mitpheldoi avetsah a ama le ama i-khat hiya kiseilen lheh ahin, 10 ama hi aneova pat alen geiyin lung lut tah-in athu angaiyun, “hichepa hi pathen tha hat chungnung kiti chu ahi,” atiuve. 11 phat sottah amitpheldoi chu amaho kidang tah a avetsah jingjeh-in lung khat tah-in angai nasauve. 12 Ahin Philip’in Pathen Lenggam le jesu Christa mina Kipana Thupha aseiphong tahsan chengse chu numei jong pasal jong baptize achansahtai. 13 Simon amatah jengin jong atahsanin, baptize achan jouvin Philip toh akiloiyin, melchihna le tha neina nasatah tah a thil kidang abol ho amu leh adatmo lheh jengin ahi. 14 Jerusalema um solchah hon Samaria khopin jong Pathen thu akisantauve, ti ajah phat’un ahenguva Peter le John asolpeh-un, 15 amani ahung suh lhonin amaho chu Lhagao theng achan theina diuvin ataopeh lhone; 16 ajeh chu Pakai Jesu min’a baptize chang bep ahinalaiyun, alah-uva khat beh jong Lhagao Theng chang loulai ahi. 17 Chunin Peter le Johnin achunguva khut a-ngap lhon leh Lhagao Theng achang tauve. 18 Solchah te ni khut ngap’a kona Lhgao Theng kipeh chu Simonin amun amani chu sumapen, 19“Ken jong koi hileh achunga khut ka-ngap chan Lhagao Theng achanna din hiche tha neina hi neipe lhonun,” ati. 20 Ahinla Peterin ajah a, “Nasumle nangma manthan, Pathen thilpeh suma chohjou dol’in nagel’in ahi! 21 Pathen maiya nalungthimput adih loujeh-in hiche thua hin namu jong aumpon, chan jong naneipoi. 22 Hijeh chun hiche nathilse gel’a kon hin lung heiyin, nalungthima hitobang nagel hi angaidam theina din Pakai henga taovin. 23 ijeh-inem itile cheikha khaveng vung banga kha adih louva kihen nahi kamui,” ati. 24 Simonin adonbut’in, “Nasei chengse hi khatcha kachunga achuh louna din nangmin Pakai henga kei khel’in neitaopeh lhonin,” ati. 25 Peter le Johnin Pakai thu ahettosah lhona aseisoh phat lhonin Jerusalema ahung kile kit lhonin, Samaria miho kho tamtah a Kipana Thupha asei phong peh lhone.

Philip le Ethipia mi nukisopa

26 Pakaiya kon Vantil khat’in Philip jah a thu aseiyin, “Kipatdoh-in lang Jerusalema kona Gaza jotna lamlena khun lhanglama chesuh temin,” ati; alam len chu donlouva kikoithip ahitai. 27 Philip jong akipat’in acheleh ven, Ethiopia mi nukiso, Ethiopia lengnu Candace Semangpa, agou chengse chunga vaihom, Jerusalema Pathen hou dia ‘hung, 28 akile kit lamin akangtalai chunga atounaa Isaiah Themgao lekhabua asim’e. 29 Hichun Lhagaovin Philip jah a, “Chen lang hiche kangtalai khu lhonpin,” ati. 30 Hijeh chun Philip alhailut jeng leh Isaiah themgao lekhabu asimgin ajan, hichun, “Nasim chu nahet hinai?’ atileh; 31 aman, “Hoiya, mikhattouvin eihilchet lou leh iti kahet ding ham?” atin, Philip chu hung ‘kaldoh a amatoh toukhom din agah kouve. 32 Aman Pathen lekhabu asimna laimun chu hiche hi ahi: “Ama chu tha dinga kikai kelngoi bang le Kelngao nou amulvoupa ang’a paopoh lou bangin kam cheng khat jong keh louvin aum’e. 33 Kineosahnaa thu adih-in atanpeh pouvin, Ama khaggui hi kon asei ding hitam?Ajeh chu leiset’a kona ahinkho kiladoh ahitai,” kiti lai ahi. 34 Nukisopan Philip agah houvin, “Neihil chen temin, Themgaopan ama chung chang thua ha, midang khattou thua hiche hi asei ham?” ati. 35 Chutah-in Philip apaodoh-in Pathen lekhabua panin Jesua Kipana Thupha aseipeh tai. 36 Lampia ahung kijot jot lhon leh twi veina khat’a ahung lhonin, nukisopan agah houvin, “Ven twihi, baptize kachanmona ding ipi um am?” atileh; 37 Philip’in ajah a, “Nalungthim pumpia natahsan leh baptize chang theiyin nate,” ati. Aman, “jesu Christa chu Pathen Chapa ahi, ti katahsan nai,” ati. 38 Chuin nukisopan kangtalai chu angah din aseiyin, anilhonin akumlha lhonin twi lah a chun Philip le nukisopa alut lhonin, Philip’in nukisopa chu baptize achansah tai. 39 Twi lah a kona ahungkaldoh phat lhonin Pakaiya kon Lhagaovin Philip chu alhoh mangin nukisopan amukit tapon, ahivangin ache na lampia kipah tah-in achepaitai. 40 Ahinla Philip chu Azotus khopia akimudoh-in, chule aman Caesatea alhun kahsen achepeh-in Kipana Thupha asei phongpeh-e.

Solchah 9

Paul hinkho kikhel

1 Saul Chula Pakai seijuite gihsal le that din ahai let lut nalaiyin, Thempu chung nung heng a achen, 2 chuche lampia kai jouse chu koi koi hijongleh numei pasal amudoh chan kan’a Jerusalema ahinkai lut theina din Damascus khopia Houthua kikhopna in dudnga peh din lekha agathume. 3 Acheleh Damascus khopi ahin phah ding konin phot lot louvin van’a konin vah khat’in akimvel asalvah soh jengtai. 4 Hichun ama tol’a akileh lhan, ogin khat’in ajah a, “Saul, Saul, ibol’a nangin neibol set set ham?” ati. 5 Ahinla aman, “Vo Pakai nang koi nahim?” atileh; Aman, “Keima nabolset jing Jesu chu kahi; 6 hijongleh kipatdoh-in lang khopi sunga khun lut’in, chuteng ipi nabol ding kiseipeh nan nate,” ati. 7 Alhonpi miho chu paopoh uhsa beihel’in adding thip chet’un, ogin chu aja nauvin koima amupouve. 8 Saul chu tol’a konin ahung ding doh-in amit te ni ahasah vangin imacha amutapon, hijeh chun mihon akhut’in akaiyun Damascus khosunga apuilut tauve. 9 Nithum sungin khomu louvin aumtan, nelou donlouvin aumtai. 10 Damascus khopia hin amin Ananias kiti seijui khat aumin, Themgao thilmua mu aneinaa Pakaiyin ajah a, “Ananias,” atileh; aman, “Ven Pakai ka-um’e,” ati. 11 Hichun Pakaiyin ajah a, “Kipat’in lang, ‘Lamjangpet kiti khosung lamlen khu jonin, Judas in’a tarsua a lungkon Sual kitipa chu gaholin; ven, ama ataopet ahin, 12 aman Themgao thilmua mu aneina Ananias kiti mikhat hunga kho amukit theina dia achunga khut a-ngap ding amui’,’ ati. 13 Ahinla Ananias chun adonbut’in, “Pakai, hiche mipa thudol itobang tah aJerusalema name thengte ijat’a abolset hitam, ti mi tamtah a kona kijataa; 14 chule hichea nangma min pan’a tao jouse jong matna ding Thempu pipu hoa kona thu neina anei ahi,” ati. 15 Ahivangin Pakaiyin ajah a, “Chen, ama hi namdangte le leng ho, chule Israel chate angsunga kamin po le dia manchah a kalhen ahi; 16 ijeh-inem itile Keima min jal’a ijatvei hesoh genthei athoh ding jong kavetsah ding ahi,” ati. 17 Ananias chu achen insunga alut’in Saul chunga khut a-ngamin, Sopi Saul, Pakai, Lampia nahenga hung kilah Jesu chunk ho namukit theiya Lhagao Theng nadimsetna dinga eihinsol ahi,” ati. 18 Apettah chun amit te nia konin nga lip tobang ahung lup lhan ahileh kho amukittan, chuin akipatdoh-in baptize achangin, 19 an aneh le atha akilt kittai.

Damascus khopia Saul’in Thupha aseiphong

Saul chu nikho phabep Damascus khopia seijuite toh aumkhomin, 20 apet pet chun Houthua kikhopna in dung jousea Jesu kiti hichepa chu Pathen Chapa ahi, tin asamle tai. 21 Ahin asei japha chanin adatmo lheh jengun, “Jerusalema hiche min’a tao jouse subei hei hoi chu hichepa hi hilou hiya, chule amaho chu kanchom’a thempu pipuho henga akailut theina dinga hung hilou ham?” atiuve. 22 Ahinla Saul chu asei ahattou tel tul tan, Jesu chu Messiah ahimongtai, tin Damascus khopia Juda ho chu anelkhupsoh keiye.

Judatea kona Saul jamdoh

23 Nikho sot thimpi nungin Saul that din Juda ho akihousom’un, 24 athilgonu hi Saul’in ahedohtai. Saul thana din khopi dongkot jouse asun ajanin a-ngah-un, 25 ahivangin janin aseijuiten pollanga akhumun kulpi pang’a akhai lhatauve.

Jerusalem khopia Saul

26 Jerusalema ahung phat’in seijuite toh kiloikhom ding agon, ahinla amahon Saul chu seijui khat hi dia atahsan lou jeh-un akichauve. 27 Hichun Barnabas-in Paul solchah ho henga apuiyin, ajahuva itobanga lampia chu Pakaiamu’a, Pakaiyin ajah a thu aseiya, chule Damascus khopia chu aman itobang tah a hangsan’a Jesu min’a thu asei ahilchentai. 28 Hichejeh chun Saul jong amahotoh Jerusalema alut le apot len, hangsan tah-in Pakai minin thu asei len, 29 Greek chon’a chon Juda ho akihoupin akinel pin, hi jeh chun tha din agot lotauve. 30 Ahinla sopiten ahetdoh phat’un Saul chu Caesarea ahinpuisuh-un Tarsus lama asolmang tauve. 31 Judea le Galilee chule Samaria gam pumpi Houbunga vang chamna alengtan, akiphut det cheh cheh-in, Pakai gingin aumin, Lhagao Thengin lhamonin, panpin amija apungtel tul’e.

Aeneas kitipa kiboldam

32 Peter chu gamtin’a ava le naa Lydda a mithengte heng geiyin ahungtai. 33 Hichea chun Aeneas kiti mi khat amudoh-in, ama chu langthia kum get jen jalkhun’a kijam ahi. 34 Amapa jah a hin Peterin, “Aeneas Jesu christen nadamsah ahitai, kipatdoh-in lang nalupna kigot’in,” atileh; ama akipatdoh pai jenge. 35 Hichu Lydda le Sharon a cheng jousen amu’vin Pakai lama akiheisoh tauve.

Dorcas kichohing kit

36 Joppaa chun seijui numei amin Dorcas ahi tia Tabitha kiti, thipha bol le thilpeh a thalhingtah khat aum’e. 37 hiche lai hin amanu anan athitai; mihon asil jou phat’uvin indan chungnunga alupsahui. 38 Lydda hi Joppa komcha ahijeh-in seijuihon Peter Joppa aum ahet phat’uvin mi ni asol’un, “Lungset’in kinomsot louhel’in kahenguva hung jengin,” tin aga ngehsah-uve. 39 Hijeh chun Peter jong akipatdoh paiyin amanitoh akilhonin, ahung lhun phat’in mihon indan chungnunga chun apuitouvun, meithai jouse athinu kim’vela adingun akap-un, Dorcas-in ahin laiya akhuipeh-u sangkhol ho le sangkhollen ho chu Peter avet sah-uve. 40 Ahin Peterin amaho chu abonchauvin polama anodoh-in aboh khup’in ataovin, chuin along lam ngan akiheiyin, “Tabitha thouvin,” ati. Chutah-in amanun amit te ni ahasah leh Peter amun, athoudoh tai. 41 Chuin Peterin akhut apen akaidingin, mithengte le meithaiho chu akouvin amanu chu ahingin amaho apetei. 42 Athu hi Joppa gam pumpia akihesoh tan, mi tampin Pakai atahsanlo tauve. 43 Peter chu Joppa khoa savun sempa Simon in’a nikho tamtah anichonge.

Solchah 10

Peter le Cornelius

1 Caesarea chun amin Cornelius kiti, Italy sepailoi atiu sepai jalamkai khat aumin, 2 ama hi hougut tah, ama le a-insung mi aboncha Pathen gingte, miho thilpeh a hongphal tah, chule Pathena tao jing ahi. 3 Amahin nikhat nilhah lam nidan thum donin Themgao thilmua mu aneinaa hunga ajah a, “Cornelius,” ahinti kichentah-in amui. 4 Cornelius-in kicha tha-in mit lha louhel’in Vantil chu aven, “Ipi ham Pakai?” tia ahouleh, aman ajah a, “Nataona ho leh mi nakhotona ho chu het jing din Pathen angsunga alhung toutai. 5 Chule tun Joppaa mi sol’in lang Peter kiti Simon chu gapuisah tan; 6 ama chu Twikhanglen panga cheng, savun sem Simon in’a alhunge,” ati. 7 Ajah a thusei Vantil chu apotdoh phat’in Cornelius-in insung lhacha mi nil eh hougut tah, ama vengtup’a pang sepai ho lah a khat akouvin 8 thilsoh ijakai ahilchensoh phat’in amaho chu Joppaa asoltai. 9 Ajing nikhoa amahon Joppa khopi ahinphah ding kon’un sun nidan som le ni donin Peter chu inchunga tao dingin akaldohtai. 10 Peter agilkel’a an aneh nom phat’in, neh ding agotpeh-u leh agaochangin, 11 van kihonga thil phenghep hopkhat aning lia kikhit’a leiset’a hung kikhai lha amun, 12 asunga chun leiset’a ganhing namkim, avah le akithol tho chule chunga leng adimset’uve. 13 Hichun ahenga o-khat ahung gingin, “Peter, kipat’in that’in lang nen,” ati. 14 Ahinla Peterin, “Hithei hih hel’in te Pakai, keiman itih-in jong thilbol le atheng lou ho kane ngaipoi,” ati. 15 Ahinvangin o-gin chun anivei nan ajah a, “Pathenin asuh thengsa chu bohsah hih-in,” ati. 16 Hitobang hin thumvei akibol’in chuin thil chu van lama akitol toutai. 17 Peter agaochan’a thil amuchu ipi tin a hintem tia aki-ngaito pet tah-in ven, Cornelius misol ho chun Simon in ahol’un kelkot maiya adingun 18 ahinkouvun, Peter kiti Simon chu chukoma alhun alhun lou adongui. 19 Peterin agaochan thudol agel pettah hin Lhagaovin ajah a, “Ven, mi thumin naholui; 20 dingdoh-in kumlhan lang lung sa-ih louhe’lin amaho khutoh kilhonin, ajeh chu keiman kahinsol ahiuve,” ati. 21 Chuphat’in Peter chu miho henga ahung kumsuh-in, “Ven, nahol’u chu keima kahi, nahung lo nau jeh ipiba ham?” ati. 22 Amahon, “Sepai jalamkai Cornelius, midih le Pathen ging, Juda vaipi seiphat mi chun nangma a-in’a kousah a nathusei ngai dia Vantil Thengin ahil ahi,” atiuve. 23 Hichun Peterin amaho akoulut’in alhunsah tai. Ajing nikhon Peter akipatdoh-in amaho chutoh akilhonin Joppa khoa sopite phabep’in jong aki-lhonpeuve. 24 Ajingin amaho Caesarea khopi alhungun, Cornelius chun aphunggol ho le agol apai ngaitah tah ho akoukhomin ana ngah jinge. 25 Peter ahung lut phat’in Cornelius chun analamdot paiyin, akengphang bul’ah aboh khup’in chibai aboh tai. 26 Ahinla Petein ama chu akaiding loiyin, “Dingdoh-in keijong mihem kahibouve,” ati. 27 Hitia akihoupi pum hin insunga alut leh mi tampi kikhom agatoh-in, 28 hijeh chun aman ajah-uvah, “Juda min jatchom mi kiloipia ahenga kholai leh hi Dan toh akitolou nang hon jong nahecheh-ui; ahinla Pathenin mihem koima aboh le atheng lou kiti louna din eivetsah tai; 29 hijeh a chu eihung kisol’a lung sa-ih louhel’a hung kahi. Hichejeh a chu kadoh nahi, ipi thua neihung kou sahba ham?” ati. 30 Cornelius chun adonbut’in, “Tu phat gei hin ni li alhingtan, nilhah lam nidan thum don’a kainsunga katao pet’in ven, kama sanga ponbang leh sil mi khat ana dingin, 31 ‘Cornelius, nataona akisangin, mi thil napeh chengse chu Pathen angsunga akigeldoh jinge. 32 Joppaa mi sol’in lang Peter kiti Simon chu gakousah tan; ama chu Twikhanglen panga cheng savun sem Simon in’a lhung ahi,’ ati. 33 Hijeh a chu nakou ding kahinsol pai jengle, hitia nahung jeng hi apha lheh-e. Tua keiho chengse hi Pathen mitmua kikhoma, Pakaiyin ipi naseisah ding ham ngai dia um kahiuve,” ati.

Cornelius insunga Peter thusei

34 Peter apaodoh-in, “Tahbehin Pathenin mi le mi kah a lang kaina aneipoi, ti kahedoh tai; 35 chitin namtin lah a koi hileh Ama ginga adih bol jouse chu ama dia santhei ahicheh-e, 36 Aman mi jouse Pakai, Jesu Christaa chun Israel chate henga dingin chamna Kipana Thupha thu chu ahinthot’in, 37 Johnin baptize chandol lhang asap jouvin Galilee gama pat Judea gam pumpia athu athangsoh tai, ti naheuve; 38 Nazareth Jesu chu Pathenin Lhagao Theng le thahat abuh lhah khumin, Pathenin akivopi jeh-in Ama achelen Diabol bol gentheiya aumte adamsah-in napha atong lei. 39 Judea gamsung le Jerusalema thil hichengse abol hetoh a pang keiho kahiuve; ama chu thinga akhaiyun athat tauve. 40 Ahinla Pathenin Ama chu nithum lhin nin thinaa konin akaithouvin, akiphondohsah chu 41 japi heng ahilou vangin Pathenin hettohsah a pang dia alhentum keiho heng ahin; hiti chun thinaa kona athodoh nungin Amatoh kanekhom kadon khom’uve; 42 chule mipi henga Ama hi Pathenin mihing le mithi thutan dinga atun ahitai ti kasap leuva kahettohsah diuvin eithu lhah-uve. 43 Themgao jousen Ama thudol ahttohsah-u ahin, koi hileh Ama tahsan jouse chu Ama min jal’a chonset ngaidamna amu ding aseiyui,” ati.

Chidang namdang hon Lhagao Theng akisanu

44 Peterin hiche hi asei nalaiyin thu ngaiho jouse chunga Lhagao Theng achutai. 45 Chidang namdang ho chung geiya Lhagao Theng kipe akibuh khum jeng chu Peter toh hung lhon cheptan mi atahsan loiyin adatmo lheh jenguve. 46 Ijeh-inem itile paochom chom thoa Pathen avahchoiyu chu ajah-u ahi. Chutah chun Peterin adonbut’in, 47 “Eiho chan banga Lhagao Theng changtaa hite ho Baptize channa ding twi kham theididng koiham?” 48 Hiti chun amaho chu Jesu Christa min a baptize chang din aseitai. Amahon Peter chu niphabep beh nichong dingin alhoutauve.

Solchah 11

Jerusalem Houbunga Peter thulhut

1 solchah ho le Judea gamsunga sopiten chiding namdangten jong Pathen thu akisanu hi ajatauve. 2 Peter Jerusalema agalhun touleh cheptan loiyin ama ana oimouvin, 3 “Ibol’a cheptan lou miho henga chea an nehkhompi nahim?” atiuve. 4 Hichun Peter akipanin aban chan ajah-uvah aseipeh-in, 5 “Joppa khopia katao leh gao kachangin, Thengao thilmua mu kanei na-a thilpheng hep hop khat van’a kona aninglia hung kikhai lhaa, keima komcha hung ki-nga kamun, 6 phatecha kavet chenset leh neh thei ganhing nam kim, chunga leng vachate kamui. 7 Hichun ogin khat hin kajah a, ‘Peter, kipat’in that’in lang nen, ati kajai. 8 Ahinla keiman, ‘Hithei hih hel’inte Pakai, thilboh le atheng lou imacha kakamsunga lut kha louhel ahi,’ kati. 9 Ahivangin ogin chun van’a konin nivei chan nan eihindohbut’in, ‘Pathenin asuh thengsa chu bohsa hih-in, eiti. 10 Hitobang hin thumvei ahung kibol’in van’a akitol toutai. 11 Hichun ven, hichepet tah ahi Caesarea kona kahenga hung kisol mi thum chu kalhunna in maiya ana ding tauve. 12 Lhagaovin ma lung sa-ih louhel’a amaho chutoh lhona kache din eiseipeh-e. Hicheng sopi gup ho jong hin eilhonpuiuvin, mipa insunga chun kaluttauve. 13 Mipa chun kajah-uva a-in a Vantil ding amun, ‘Joppa mi sol’in lang Peter kiti Simon chu gakousahtan, 14 aman nang le na-insung pumpi huhhinga naum na diu Thupha naseipeh dingu ahi,’ ati thu aseitai. 15 Ajahuva thusei kagah kipat panbep leh abul’a eiho chunga achuh bang chun amaho chunga jong Lhagao Theng achutai. 16 Hichun kenjong Pakaiyin, ‘Johnin twiya baptize achansah ahin, nang ho vang Lhagao Thenga baptize nachansah diu ahi,’ ati chu kageldoh-e. 17 Chutia Pathenin Pakai Jesu christa itahsanuva eipeh-u thilpeh tobang chu amaho jong apeh leh, kei koi kahiya Pathen kakham thei ding ham?” ati. 18 Amahon hiche hi ajah phat’un aneldauvin, Pathen avahchoiyun, “Ahile Pathenin chiding namdang te jong hinna dia lung heina apeh ahita ong!” atiuve.

Antioch khopia Houbung

19 Thoh hahsa asoa Stephen kitha lo jeh a jamcheh chengse chu Phoenicia le Cyprus chule Antioch geiyin acheuvin, koima dang jah a seilouvin Judate henga Thu chu aseileuve. 20 Ahin alah-uva phabep Cyprus le Cyrene miho, Antioch ahung lhun phat’un Greek miho toh akihouvun Pakai Jesu aseiphongtauve. 21 Amaho chu Pakaiyin aban thahat’in ahu jingun, hijeh chun Pakaiya atahsan mitamtah akihei luttauve. 22 Hiche thu hi Jerusalema Houbungin ajatan, hijeh chun Barnabas chu Antioch geiyin asol’un, 23 ama ahungleh Pathenin alungset nau amun akipah lheh jengin, ama ho chu Pakaiya lunggil tah a um chah jing din atilkhouvin ahi; 24 ajeh ch Barnabs hi mipha le Lhagao Theng dimset chule tahsan det mi ahi. Mi tampi Pakaiya alutbe tauve. 25 Barnabas chu Saul hol din Tarsus a achen, 26 Saul amudoh phat’in Antioch a ahinpuiye. Kum khat lhingset amanin miho chu Houbunga akikhoppi ji lhonin, mi tampi ahil lhonin, hiche Antioch khoa hi seijuite chu ‘Chritian’ ahinsah masah pen’u ahi. 27 Hiche lai hin Themgao phabep Jerusalema konin Antioch a achesuh-ui; 28 chuin alah-uva amin Agabus kitipa chu akipatdoh-in Lhagao thahat’in vannoi pumpia kel lhah ding asei masan, hiche hi Claudius nikho laiyin aguilhunge. 29 Hijeh chun seijuite chu ajikham cheh a thil tokhoma Judea gama sopite thot dingin akiloltauve; 30 adongkhom’un Barnabas le Saul khut’ah Houbung upate agah thot’ui.

Solchah 12

Jacob athau Peter songkul’a akhumu

1 Hiche lai hin Herod lengpan Houbung mi konkhat chunga ban-gol khautah-inna atongin abolsetai. 2 John upa Jacob chu chemjamin athattai. 3 Amitha hin Juda miho along lhaisah amun, Peter jong amatbe kit’e, aphat hi cholsolou changlhah kut lai ahiye. 4 Peter amat chun songkul’a akhumin, mi li lia kiloi sepaiho chun kilhauva a-nga diduvin apedoh-in, kalchuh ku tkichai tang mipi ang’a puidoh dingin agoi. 5 Hiti hin songkul’a akhumtan, ahinla Houbungin ama din lung luttah-in Pathen henga ataopeh-uve.

Songkul’a kona Peter kilhadoh

6 Herod-in Peter chu puidoh dinga agotin jan chun Peter, a-ngah sepaite kah a a-ihmun, thih khao nin akihenin, kotpi bul’a jong a-ngah a pang sepaiho adding jingui. 7 Hichun ven, Pakaiya kon Vantil khat ahung kilah-in, akikhumna bom sung avahcahnsel’e; Vantil chun Peter pang abengin asukhangin, “kipatdoh loiyin!” ati. Chutah chun akhut te nia akihenna thih khao te ni chu akilhamtai. 8 Chuin Vantil chun ajah a, “Nakong kigahin nakengchot te ni kise loiyin,” ati. Aman chutin aboltai. Chuin ajaha, “Naponin kihiutup loiyin neihin juiyin,” ati. 9 Peter apotdoh-in ama chu ajuitai; hichea chun Vantil thilbol chu atahbeh a soh-in agelpon, gaochanga mu aneiyin agelbouve. 10 Vantil le Peter chun kotngah masa le ani na akhel lhon leh khopi sung lutna thih kotkha apha lhonin, kotkhah chu ama ni dingin acham tah-in akihong jengin, apotdoh lhonin khosung lamlen khat ajui lhonleh Vantil chung Peter adalhapaitai. 11 hichun Peter akhangdoh lap’in “Tua vang Pakaiyin avantil ahinsol’a Herod ban thahat le Judate kinepna chengsea eihuhdoh ahitai, ti kahedoh tai,” ati. 12 Ahetdoh phat hin Peter chu aminchom Mark kiti John nu Mary in’a ahungleh mi tampi kikhomin anataovui. 13 Aman kot pi nung chu akiu leh donbut din amin Rhoda kiti lhacha numei khat ahunge, 14 ahin Peter ogin ahi ahetdoh phat’in akipah behseh jengin kot honta louvin alhai lut’in kot po lama Peter din thu chu agaseiphong jo tai. 15 Ahinla mihon amanu jah a, “A-gol’a nahi,” atiuve. Amanun atah mong ahi thu asei tei tei vangin, amahon, “A-Vantil hiya chu,” atibep’ui. 16 Ahinla Peterin kot akiu kiu jeng phat’in agah hon’u leh ama amu cheh-un kidang asalheh jenguve. 17 Hichun Peterin athip behna diuvin khut ajap’in, Pakaiyin itobanga kidangtah a songkul’a kona ahin puidoh ham, ti thu aseiyin, “Hicheng thusoh hi Jacob le sopite gaseipeh tauvin,” atin, apotdoh-in munchoma achetai. 18 Khovah vah-in Peter chung change thusoh jeh chun sepaiho lah a boina lentah asodoh tai. 19 Herod chun Peter ahol’a amudoh jou lou phat’in a-ngah a pang ho thu atantai. Amavang chu Judea gama konin Caesarea achesuh-in chukoma aumdentai.

Heroh thi

20 herod chu Tyre le Sidon mite chunga along hang lheh jenge; hijeh chun agam miho loikhat ahungun, lengpa Semanga pang Blastus chu athu nun’un cham lensah din athum’ui; ijeh-inem itileh agam miteu chun Herod lengpa gama neh le chah akilah-u ahiye. 21 Akitepniuvin Herod chun lengpon chol akisil’in, laltouna atouvin, ajah-uva thu aseiye. 22 Hichun mipin asam’un, “Mihem ogin ahibouve,” atiuve. 23 Aman loupina chu Pathen pelouva aumjeh-in hiche pettah chun Pakaiya kon Vantil khat’in adengin, lungin anen athitai. 24 Pathen thu vang achal jal’in akhatou cheh tai. 25 Barnabas le Saul vang chu kin achaisoh lhon phat’in aminchom Mark kiti John chu ahinpui lhonin Jerusalema konin ahungkile kit lhontai.

Solchah 13

Barnabas le Saul athensouva asol’u

1 Antioch khoa Houbunga chun Themgao le mihilphabep aumun; amahon chu Barnabas, Nigerkiti Simeon, Cyrene gam mi Lucius, gambih vaipo Herod toh seilet tha Manaen chule Saul ahiuve. 2 Amaho chu Pakai kinbol’a an a-ngol laitah-un Lhagao thengin, “Kakouna natong din Barnabas le Saul neipedoh-uvin,” ati. 3 Hijeh chun an ngol’a atao jouvun achung lhona thenso khut ngap abol’un asoldoh tauve.

Cyprus gama solchah te ni thuseiphong

4 Lhagao Theng sol’a konin Barnabas le Saul chu Seleucia ajonsuh lhonin, chua pat’in Cyprus lama akitol lhontai. 5 Salamis kho alhun phat lhonin Judate Houthua kikhopna in hoa Pathen thu aseiphong lhonin, akithopi lhon ding John jong ahiuve. 6 Twikol gamsung achotsoh-uva Paphos kho ahung gei phat’in Juda mi Temgao lhem, mitpheldoi them Bar-Jesu kitipa chu amudoh tauve; 7 ama hi twikol gamvaipopa, Sergius Paulus, milung chingtah chutoh kihe ahin, gamvaipopan Pathen thu asei lhon ngai dingin Barnabas le Saul chu akouve. 8 Hichea chun mitpheldoi thempa Greek paova amin Elymas jong atipau chun amani thusei adoudal len gamvaipopan atahsan louna ding aboltai. 9 Chuin Paul kitipa Saul chu Lhagao Theng adimset’in amapa chu ave changel’in, 10 “Vo thilpha jouse doudal, lhep lhahna le nambolna dimset, Diabol son, Pakai lampi dih heikonle ding nabol hi natat lou lai ding ham? 11 Tun ven, Pakaiyin nachunga khut alhatai, phat chom khat sunga nisa vah him him namu loudidng ahi,” atileh; apettah chun meijing le muthimin ahintomin, kho amulou jeh chun akhut’a kaile ding mi aholtai. 12 Hichun Gamvaipopan thilsoh chu amun Pakai thudol kihilna kidang asan atahsantai.

Pisidia gam Antioch khoa Barnabas le Paul

13 Paul le aloite ni chu Paphos a konin akitol’un Pamphylia gama perga kho alhungun, Johnin amani dalhan Jerusalema ahung kile kittai. 14 Paul le Barnabas vang achepai lhonin Pisidia gama Antioch kho alhung lhonin Choldo nikhon Houthua kikhopna in’a alut’in atou lhontai. 15 Danthubu le Themgao lekhabu akisim chaiyin Houthua kikhopna in vaihonpan miho asol’in ajah lhona, “sopite ni mipi tilkhouna ding thu nanei lhon leh sei lhonin,” agatisah-e. 16 Hijeh chun Paul adingdoh-in khut ajah-in aseiyin: “Israel mite le Pathen gingte jousen ngaiyun. 17 Hiche Isreal mite Pathen chun i-pu i-pateu analhengdoh-in, Egypt gama apemlaiyun achoi len lheh jengin, aban thahat panin ahinpuidohtai. 18 Kum som li tobang sungin pa naovah bangin gamthip noiya akhan chah-u aven, 19 chuin Canaan gamsunga mihem nam sagi asuhmang phat’in agam’u chu agoulo diuvin apen, 20 kum ja li le som nga geiyin achenguve. Hiche nung chun Samuel Themgao nikho lai geiyin amaho chu Thutan vaibol ho apen ahi. 21 Chuin amahon leng athum’u leh Pathenin Benjamin phunga Kish chapa Saul chu kum som li geiyin akoipeh-e. 22 Pathenin Saul chu apaidoh nungin aleng thudol’a hin Keiman kalung dei tah David, Jesse chapa kamudoh tai, aman kalungdei chan abol ding ahi,’ tin hettohsahnan aseitai. 23 David chilhah a kon hin thutep dungjuiyin Pathenin Huhhingpa Jesu chu ahinlhut tan ahi. 24 Jesu kiphondoh masang hin Johnin lungheiya baptize chan ding thu Israel mipi henga aseiphonge. 25 John chun atoh achaisoh ding konin, ‘Nang hon kei hi koiya neigel’um? Keima Ama chukahipoi; amavang ven, kanunga khat ahunge, kei hi Ama kengchot khao te ni sut lham dia jong kilom kahipoi,’ ati. 26 “Abraham chilhah sopite le nalah-uva Pathen ging miho, hiche Huhhingna thu hi eiho henga hung kithot ahitai. 27 Ijeh-inem itile Jerusalema ilengteu le avaipouteuvin Ama chu anahedoh pouvin, Choldo niseh le kisimji Themgao thuseiho hcu guilhunsah nan hekhen louvin Ama chu themmo achan’un, 28 athina thei lom themmona amudoh jou lou geiyun jong Pilate henga atha na din a-ngeh-uve; 29 achung chang thudol kisei jouse asuh bulhingsoh phat’un thing chunga akikhainaa konin adom lhauvin avuitauve. 30 Ahinla Pathenin Ama chu thinaa konin akaithouvin, 31 nikho phabep pi sungin Galiee gama pat Jerusalem lama alhonpi miho henga akilah jin, amaho chu tua hi mipi henga hettohsah a pang ahiuve. 32 Chule pu le pate henga hungsoh dinga kiteppeh thutep chu keihon kipah tah a kaseiphongu ahi, 33 hiche chu Pathenin achateu eiho henga aguilhunsah nan Jesu chu akaithouvin, athudol hi labu ninaa akisunin: ‘Nangma kachapa, Tunia kahin nahi,’ akiti. 34 Mon mangna mu louhel dinga Pathenin thinaa kona akaithou thudol chu hiti jong hin aseiye: ‘Keiman David kipe thonlou le atheng Phattheina kapeh ding nahiuve,’ akiti. 35 Aman labu munchom khat’a jong aseiyin: ‘Nalhentum lhachapa chu Nangin mon mang dia naphaldoh lou idndg ahi,’ akiti. 36 David vang chun ama khang laiyin Pathen toh akivuithan, mon mangna amutan, 37 Pathenin akai thou kitpan van gmin mangna amupoi. 38 Hijeh a chu hiche hi nahet cheh diu ahi sopite, Jesu jal’a chonset jouse ngaidamna thudodl nahenguva kaseiphongu ahin, Mose Danthua kona them nachan jou louna jouseuva chu 39 koi hile atahsan chan them chang’ah ahi. 40 Hijeh chun Themgaoho thusei nachunguva ahung chuh louna din ching theiyun: 41 ‘Veuvin nahsahmo ho, Kidang sauvin lang mangthah-un; Ajeh chu nanikho laiyun thil Hitobang thil hi min seipeh jong leu chun natahsan lou hel diu ahi,’ tia asei chu,” ati. 42 Akikhendoh phat’un mihon Choldo nikit jongleh ajah-uva hiche ho aseipeh kit diuvin a-ngeh-uve. 43 Houthua kikhopna in’a akikhendoh dodh-uvin Juda mi tampi le Juda houva kilalut ah hougut tampin Paul le Barnabas nung ajuiyun, amanin amaho chu Pathen lungset naa umdet jing din atilkhou lhone. 44 Choldo nikit’in akhothing hel tobangin Pakai thu kisei ngai didngin akikhomtauve. 45 Mipi kihonlel lul’a akikhop jengu chu Juda hon amudoh phat’un athangseuvin, Paul thuseichu ataitom’un anel kale tauve. 46 Ahinla Paul le Barnabas hangtah-in thu asei lhonin, “Pathen thu hi amasaa nang ho seipeh lou khoh ahin, nang hon napai manguva tonsot hinna chang dia kilom nakisah louvu leh, ven chiding namdangte henga kihei tauvinge. 47 Ijeh-inem itile Pakaiyin keiho hitia hi eiseipeh-u ahi: ‘Keiman nang hi chidnag nam dang salvah dia katun’a, Vannoi pumpia sochatna lampi dia katun nahi,’ tia asei ahi,” ati. 48 Chidang namdang hon hicheng hi ajah phat’un akipah-un Pakai thu kisei chu achoi-an’un tonsot hinna chang dia kigosadema um hon atahsan tauve. 49 Chuin Pakai thu hiche gamkol sungsea chun achalsoh tai. 50 Amavang Juda mihon hougut numei lal ho le khopi sunga lamkaiho atilseuvin, Paul le Barnabas abolset sah-uvin agamkol sunguva konin adeldohsah tauve. 51 Amanin amaho dounan akeng phanga leivui athin lhah khum lhonin Iconium lama ache lhontai. 52 Seijui ho vang chu kipana le Lhagao thengin adimsetu’ve.

Solchah 14

Iconium koa Paul le Barnabas

1 Iconium khoa Juda ho Houthua kikhopna in’a alut khom lhonin, hitima chun thu asei lhon le Judate le Greek mi tampin atahsan tauve. 2 Hichun Juda mi atahsang lou hon sopite dounan chiding namdang ho atilseuvin adsulung hangtauve. 3 Ahivangin ama ni sotpi anichong lhonin, alungsetna thu hettohsah a amani khut’a melchihna thil kidang tampi bolsah Pakaiya hangtah-in thu asei jom jing lhone. 4 Hichun khopi sung miho chu kehni akisouvin, abang Juda miho langa apangun, abang solchah te ni lama apangui. 5 Ahinla chiding namdang ho le Juda mi phabep’in alamkaiteu toh kithon amani chu nahsahmoa bol’a songa seding agouvin ahile, 6 amanin ahetdoh lhon phat’in Lycania khopi Lystra le Derbe chule akimvel gamsunga ajamlut lhontai; 7 hikom dunga jong chun Kipana Thupha aseiphong lhone.

Lystra khoa Paul songa aseu

8 Lystra khoa chun apen’a pat kengbai, itih a jong lamjot louhel, akeng chasah thei lou hel pasal khat atouvin ahi. 9 Amahin Paul thusei angaiyin, Paul’in avechangmel’in ahileh damsah theina kham tahsan anei chu amun, 10 oging tah in, “nakeng te nin ding jangin,” ati. Mipa chu ahung kichomdoh jengin avah le paitai. 11 Mipin Paul thilbol chu amu phat’uvin Lycaonia paovin oging tah-in, “Eiho lah a Pathen ho chu mihem lim’a hung kumlha ahitauve!” tin asamtauve. 12 Barnabas chu Zeus asah-un, Paul chu thusei lamkai ahijeh-in Hermes asah-uve. 13 Chule khopi maiya ahouin kisa Zeus doi Thempupan bongchal ho ahinkaiyin pahvui ho jong ahinchoiyin dongkot phunga mipi chutoh amani hounaa kilhaina gan tha din agouve. 14 Ahinla solchah te ni Barnabas le Paul’in ajahdoh lhon phat’in aponsil abottel jeng lhonin mipi lah a alhai lut lhonin apengjah lhontan, 15 “Miho, idia hiti ho hi nabol’u ham? Keini jong nang ho banga mihem kahi lhonin, hitobang pannabei thil hoa kona hi van le leiset chule Twikhanglen le asunga um jouse Sempa, Pathen hing jing henga nakiheina diuva Kipana Thupha kaseipeh lhon nahibouvui. 16 Aman khang masa laiyin chitin namtin hi Ama dei cheh a chon din alhan, 17 ahivangin Ama ipi ahichu hettohsahna beiyin akoidehpoi, ajeh chu thilpha aboljin, van’a konin gotwi napeuvin, muchi chivo gaphat, kumkihei chin nakoipeh-un, neh le chah napeuvin, nalungthimu kipa le thanopna adim jinge,” ati lhone. 18 Hicheng hi asei lhonin amani houna dinga gan athagot’u chu asutang nah nah lhone. 19 Hichea chun Antioch le Iconiuma kona hung Juda mihon mipi chu athu anun’un Paul chu songin asesah-un, athi ahitai, tin khopi polama akaidohtauve. 20 Ahinla akoma seijuite adin pet’uvin Paul athoudoh-in khopi sunga aluttai; ajing nikhon Barnabas toh Derbe lama ache lhontan ahi, 21 Hiche khopia chu Kipana Thupha aseiphong lhona, seijuitampi asemdoh jou lhonin Lystra le Iconium chule Antioch lama ahung kile kit lhonin, 22 genthei hesoh tampi thoh a Pathen lenggama ilut mong diu ahi tin tahsana pang det jing dingin seijuiho atilkhou lhon in alungu asuhal lhon’e. 23 Houbung jousea Houbung upa alhenpeh lhonin, an ngol’in ataovun, atahsanpau Pakaiyah upa ho chu apedoh doh jenguve.

Paul le Barnabas Syria Antioch a ahung kilekit

24 Paul le Barnabas-in Pisidia ajotpa lhoin Pamphylia alhung lhonin, 25 Perga thu aseiphong jou lhonin Attalia achesuh lhontai. 26 Chua konin kongin akitol lhonin, ahintoh chaisoh lhon hiche natoh tong dinga Pathen lungsetnaa akipehdohna lhon khopi, Antioch jonin ache lhontai. 27 Ahung lhun lhon phat’in Houbung mi abonchan akhom lhonin, Pathenin amani amanchah a atoh jouse aseidoh lhonin, chiding namdangte dia tahsan lam kihon thu asei lhon’e. 28 Antioch khoa seijuite toh sotpi aumkhomna lhon chu phat chomcha ahipoi.

Solchah 15

1 Judea gama konin mi phabep ahungun sopite chu, “Mose Danthu dungjuiya chepnatan louvu leh huhhingin umthei pouvin nate,” tin ahiltauve. 2 Hiche thudol’a chun Paul le Barnabas toh akihanel lheh jengun akinahso phat’un athu ngaito khom din Paul le Barnabas to midang phabep toh Jerusalema chea Solchah ho le upaho toh kihoutoh din alhengdoh tauve. 3 Houbung sol’a konin amaho acheuvin Phoenicia le Samaria ajot pepeh-un, chidnag namdang ho Pathena akiheilut thu aseipeh-u le sopite cheng akipah lheh-ui. 4 Jerusalem alhun phat’un Houbung miho le Solchah ho chule Houbung upahon analamtouvin, ama hon ajah-uva Pathenin amaho amanchah a na atoh chengse aseiyuve. 5 Hichea hin atahsansa ahivanga Pharisee loi hinalai mi phabep akipatdoh-un, “Amaho chu chep tanpeh a Mose Danthu anit tei diu ahi,” tin asei yui. 6 Solchah ho le Houbung upaho hiche thu ngaito ding hin akikhom tauve. 7 Tamtah a kholtohna anei nungun Peter akipatdoh-in ajahuva, “Sopite, masang chun nang ho lah a kona keima kama hi chiding namdangten Kipana Thupha ajah-uva atahsanna diuva keima Pathenin eilhendoh chu naheuve, 8 chule mei lungthim hesoh Pathenin ahenguva ahettohsah-in, eiho eipeh bangun amaho jong Lhagao Theng apei; 9 ei ho le amaho kah a dat neichom louvin tahsanin alungthimu asuthengtai. 10 Chuti ahileh ibol’a tua ipu ipateu leh eihon jong ipoh jou louvu namkoljon chu seijuite lengkouva naseuva Pathen napatep’u ham? 11 Keihon vang Pakai Jesu lungset vanga tahsan jal’a huhhinga eiho i-um diu banga amaho jong chute dinga katahsanu ahi,” ati. 12 Akikhom mipi chu athip chet jengun, Barnabas le Paul’in Pahtenin amani amanchah achidang namdangte lah a melchihna ho le thil kidang aboldoh ho asei lhon chu angaisoh keiyuve. 13 Amanin thu asei chai lhonin Jacob’in adonbut’in, “Sopite kasei ngai ta diuvin! 14 Simonin chiding namdangte Pathenin avil’a alah-uva kona ama min’a ding mi alhendoh thu aseitai. 15 Hiche hi Themgaoho thusei toh akitoh soh keiyin hitin akisune: 16 ‘Hiche nung hileh Keima hung kile kit’ing ting, Alhusa David houbuh chu kasah phat’a; A-in gem jouse kasah phat ding, Katundoh kit ding ahi; 17 Chutia chu mihem amoh chengsen Pakai ahol theiyuva, Kamin a kikou chiding namdang jousen jong ahol thei ding, atin, 18 khanglui laiya pat hicheng thil ho hetsah Pakaiyin aseiye,’ kiti ahi. 19 Hijeh chun chidang namdang ho lah a kona Pathen lama hung kiheiho lah a kona Pathen lama hung kiheiho chu bolgenthei dau hite, tin ka-ngaitoi; 20 amavang amaho chu lekha thot’u hitin, doi houna thil thenglou neh, jon thanghoi, alol kimeh a kithatsa le thisan neh a kona kitim them din hil’u hite; 21 ijeh-inem itile khanglui laiya pat Mose’in khop jouseah athusei ding anei jingin, Choldo nikho seh leh ama thudol Houthua kikhopna in jouse akisim jenge;” ati.

Houbung thalheng ho lekha thot

22 Solchah ho leh Houbung upaho chule Houbung pumpi lung gel’in alah-uva kona mi lhendoh a Paul le Barnabas toh Antioch khoa sol din pha asauvin, Barsabbas kiti Judas le Silas, sopiten ajabol cheh te ni chu alhengun, 23 aban’a kisei bang hin asun’un amani khut’a athot tauve; “Solchah ho leh Houbung upa, sopite chengsen, Antioch leh Syria chule Cilicia gama um chidang namdang ho lah a sopite chengse kasalam’ui. 24 Keiho lah a konin mi koi koiham kei ho thupeh louhel’in ahungun thu tampin nahung sulung jingun lung ling laovin nakoiyui, ti kajauve; 25 hijeh chun keihon lung khat tah-in mi lhendoh a amaho chu nahenguva i-ngailut tah-u Barnabas le Paul toh hinsol tha ding pha kasauve, 26 amaho hi i-Pakaiyu Jesu Christa min’a ahinkho phal ngam cheh ahiuve. 27 Hijeh a chu Judas le Silas kahinsol’u ahin, amanin jong hiti amaho hi thuchangin seipeh nauvinte. 28 Ijeh-inem itile Lhagao Thengin jong keihon jong akhoh cheh ho tilou pohgih hahsa dang na chunguva koi lou ding pha kasauvin, 29 limsemthu houna doisa, hicheng hi neh dauvin, jon thanhoiya konin kikangse leu chun pha ding hi, damsel’uvin,” atiuve. 30 Amaho chu alhah doh phat’un Antioch khoa achesuhuvin, mipi akhop khomsoh phat’uvin lekha thot chu apetauve. 31 Miho chun asimu leh tikhouna thuho chu akipapi lheh jenguve. 32 Judas le Silas hi anilhona Themgao gel ahilhonjeh-in sopite chu thu tampin atikhou lhonin ahatsah cheh lheh lhon’e. 33 Chukoma chom khat set aum jou lhonin ahinsol ho henga dingin sopiten amani chu lung mongin alhadoh tauve. 34 Silas vang chu anichon ding joh aphat jeh-in aum den tai. 35 Paul le Barnabas chu Antioch khoa mi tamtah toh aum khom lhonin, Pakai thu ahil chenin aseiphong lhon’e.

Paul le Barnabas kikhen

36 Phat chom khat nungin Paul chun Barnabas jah a, “Hungin Pakai thu i-naseiphongna khopi jousea chekit hitin sopite chu itobanga iti nauvem gave hite,” ati. 37 Hichun Barnabas-in Mark kitipa John chu amani toh kilhona pui din angaitoi. 38 Ahinla Paul’in Pamphylia amani dalhaa na tohkhompi nom lou mi chutoh kilhon khom lou ding thilpha pen ahisah e. 39 Hijeh chun Paul le Barnabas akihanel ten lhon phat’in akikhenlo lhonin, Barnabas chun Mark akipuiyin Cyprus lam jonin kongin akitol’in, 40 Paul’in vang Silas akilhenin, sopiten jong Pakai lungsetnan alhadoh-un, ama jong akipatdohtai. 41 Paul chun Syria le Cilicia ajotpeh-in Houbung jouse atilkhoupeh-in ahi.

Solchah 16

Timothyn Paul le Silas akilhonpi

1 Paul chu Derbe kho le Lystra khoa ahunge. Ven, Lystra khoa chun apa Greek mi, atahsan Juda numei khat cha amin Timothy kit seijui khat aumin, 2 ama hi Lystra kho le Iconium khoa sopite jousen aseipha lheh jengui. 3 Paul’in Timothy hi kilhonpi ding adeijeh-in, chute dunga um Judah on apa Greek mi ahi ahetjeh-uvin apuiyin chep atanpeh e. 4 Hichun amahon khopi jouse achonsoh keiyun, Jerusalema Solchah ho le upaho kilolna chengse chu nit din miho apeleuvin ahi. 5 Hijeh chun Houbung ho chu tahsan lama ahat cheh cheh jengun, niseh-in amijat apun be be jenguve.

Paul’in gaochannaa Macedonia mi khat amu

6 Amahon Asia gamsunga thu asei diu Lhagao Thengin akham jeh-in Phrygia le Galatia gamkol sungse ajotsoh keiyun, 7 Mysia gam gal ahung gei phat’uvin Bithynia lut ding akigot’u leh Jesu Lhagaovin aphalpeh pouve; 8 hijeh chunMysia gam ajot paiyun Troas a achesuh tauve. 9 Hiche jan chun Paul agaochan naa mu aneiyin, Macedonia mi khat hi ahungna dingin ataovin, “Macedonia hung galkaiyin neihung kithopiuvin,” ati. 10 Paul’in gaochan naa mu anei jou jou hin Pathenin Kipana Thupha chu miho hil dinga eikouvu ahi, tin kagel’uvin Macedonia gama chelut ding kasompaitauve.

Christa dia Lydia hinkho kikhel

11 Troas a pat kakitol’uvin paljangin Samothrace kajon’un, ajing nikhon Neapolis kalhunguve; 12 hichea kon chun Macedonia gam kolsunga khopi minthang pen, Rome mite tolpi Philippi kalhung tauve. Hiche khopia hin nikho phabeppi kanichongui. 13 Choldo nikhon taona mun khat aume, ti kaginchat nau khopi dongkot polam vadung panga chun kacheuvin, katouvun numei hung kikhomho jah a thu kaseitauve. 14 Kathuseiyu ngaiya numei khat chu amin Lydia ahin, Thytira khopia hung kon, ponsandup joh a pang, Pathen hou khat ahi, Paul thuseiho lung luttah a angaina din Pakaiyin along kot ahonpeh tai. 15 Amanu hi-ainsung mite to baptize achan phat’in, “Pakai tahsan tah beh a neigel’u leh ka-in’a hung lhunguvin,” tin eijol’uvin, eithu nun tauvin ahi.

Philippi khoa Paul le Silas songkul lut

16 Taona muna chu kacheu le khonung thusoh ding seiya apute dinga phatchomna lentah mupeh lhagaoboh vop soh nu-ngah khat hin eitoh khauvin ahi. 17 Hiche nu hin Paul le keiho nung ajuiyin, “Hiche miho hi Pathen chungnung pen lhachate ahiuvin, huhhingna lampi nahung hil’u ahi,” tin asam sam jenge. 18 Hitobang hin nikho tampi sungin abol jinge. Paul’in athei chimjeh phat’in akiheiyin lhagao jah achun, “Hiche nua koon chun hung potdoh jengin, tia Jesu Christa min a kasol nahi,” atileh; hichepet tah chun lhagao chu apotdoh tai. 19 Aputeu akinepnau phatchom na aneidiu sum mu na ding abeitai, ti amudoh phat’un Paul le Silas chu aman’uvin kailhang mun’a vaipoho ang sunga akailutauve; 20 hitia hi thutan vaihomho heng alhut phat’un, “Hiche mi te ni hi Juda mi ahi lhonin, i-kho sungu asuboi lheh jeng lhontai. 21 Ama nin Rome mi eiho dinga jop thei lou le lah thei lou chondan sodoh dingin ago lhon’e,” atiuve. 22 Mipin ma amani anokhum jeng phat’uvin, vaipoten aponsil lhon ahoh lhauvin mol’a voh din thupeh aneitauve. 23 Mol’a tamtah vei avoh jouvun songkul’a akhum’uvin, songkul ngahpa chun kitup keiya a-nga din ahilchah tauve. 24 Hitobanga hil chahna aneijeh-uvin songkul ngahpan songkul sung nung lama akoiyin, akhochong lhon’a bul atuh-in ahi. 25 Jan khangkim donin Paul le Silas Pathen henga atao lhona la asah lhon le sohchang dang hon angaiyuve; 26 hichun photlot louvin lingnasa tah ahung kihot’in ahile songkul bul ahot kangsoh tan, apettah chun kotpi jouse akihong don tan, akihen nau bul jouse geiyin akilhamsohtai. 27 Songkul ngahpa ahung kin khah le kotkhah jouse kihongsa um chu amun, sohchang jouse jamdoh hitante, tin ama kithah din achemjam asatdoh jenge. 28 Hichun Paul’in going tah-in asamin, “Kithat didng kigo hih hel’in keiho ka-umsoh keinauve,” ati. 29 Chuphat’in aman meivah athum loiyin alhai lut’in, kichaa kithing thingin Paul le Silas angsunga alhu jengin, 30 chuin amani chu ahinpuidoh-in, “Put e ni, huhhinga ka-umna dinga kabol khoh pen ding ipi ham?” atileh; 31 Amanin, “Pakai Jesu tahsan le chun nang le na-insung mi huhhinga naum diu ahi,” ati. 32 Hiti hin ama le a-insunga um chengse jah a Pakai thu aseipeh lhontai. 33 Hiche nidanle le hin janlaiyin songkul ngahpan amani chu apuiyin, avoh nau maha jouse asop theng peh-in, a-insung mite le ama baptize achangtai. 34 Chujouvin amani chu ain’a ahinpuitouvin a-angsung lhona ankong aluipeh-in, Pathen atahsan jeh chun a-insung mite jouse to kipah thanom khom-uve. 35 Khovah phat’in vaipoten mi man sole ho asol’uvin, “Mi te ni chu lhadoh tauvin,” agatisah-ui. 36 Hichun songkul ngahpan athu sei chengsu hi Paul jah a aseiyin, “Vaipoten nangni lhadohna thu sei din mi ahinsoltai; hijeh chun tun hungdoh lhonin lang lung mongin ch lhontan,” ati. 37 Ahi vangin Paul’in miho jah achun, “Rome mi kihiya themmona beiya amahon japi maiya eivouva songkul’a eikhum’uva, tua guh thim’a iti tilhadoh diu ham? Hitheiponte, amahon eihung puidoh-u hem,” ati. 38 Mi man sole hon athu hi vaipote heng alhut’u le, Rome mi ahi ti ajah phat’un akicha cheh kit’un, 39 hijeh chun aheng lhona kiphat lam thu ahung seiyun, apuidohuvin khopia kona potdoh dingin ajoltauve. 40 Hiti chun amani songkul’a apotdoh-in Lydia avepa lhonin sopite to akimuto’uvin, atil khou lhonin apotdoh lhontai.

Solchah 17

Thessalonica thunoh boina

1 Amphipolis le Apollonia jotpaiya Thessalonica khoa ahung lhon leh hia chun Juda ho Houthua kikhopna in khat aum’e. 2 Achonna ngai banga Paul chu ahenguva alut’in, Choldo nikho thum sungin Pathen lekhabua konin mipichu akinelpi jin, 3 Messiah chun gin genthei athoh tei ding le thinaa kona atodoh tei ding thu ahilchenin phot chena aseipeh-in, “Nahenguva kaphondoh hiche Jesu hi Messiah chu ahitai,” ati. 4 Hichun alah-uva mi phabep’in dih asauvin paul le Silas ajop’un, Pathen ging Greek mi tampin chule numei lal ho lah a jop’a jong atamuve. 5 Chutah chun Juda miho athangseuvin, khopi sung lamlen dunga pananbei mithase phabep akhomun, khopi sunga boina lentah asosah-uvin, Jason in abulu’vin, Paul le Silas ahol’un mipi lah a kaidoh din ago’uve. 6 Amani amu lou phat’un Jason le sopite phabep pi khopi sung vaipote angsunga akailut’un, “Hiche ho hi vannoi akhup athal’a leh ho chu ahiuvin, hikom ahinphah-u ahitai, 7 Jason hin amaho alhunsah-in, ‘Jesu kiti leng chom khat aum’e,’ tin Caeasar thupeh chengse kal lhahnan abonchan na atongui,” tin asam’uve. 8 Hicheng hi ajah phat’un mipi le khopi sung vaipote jong anoh lheh jenguvin, 9 hijehchun Jason le midang hoa kilhadoh man alauvin amani chu alhadoh tauve.

Solchah ho Berea kho alhun

10 Sopiten kinloi tah-in ajan janin Paul le Silas chu Berea khoa asoltauve; alhun lhon phat’in Juda ho Houthua kikhopna in’a alut lhon’e. 11 Berea khoa Juda miho chu Thessalonica khoa ho sangin along lenjo’uvin, lung opkai louhel’in thu asangun, athilsoh ho chu chute mong nam tin niseh le Pathen lekha to avetoh jiuve. 12 Hichea hin mi tampin atahsan lo tauvin, Greek mi numei lel ho le pasal ho jong atahan atam’uve. 13 Thessalonica khoa Juda mihon Barea khoa jong Paul’in Pathen thu asei phong ahet phat’un chukoma jong mipi ahung tiles kit tauve. 14 chuphat’in sopiten Paul chu Twikhanglen pamlama asol pai jengun, Silas le Timothy vang chua aumden lhon’e. 15 Paul gathah hon Ahen khopi geiyin apuiyun, Paul’in Silas le Timothy chu ahenga hung loi ding adeina thupeh kengin ama ho ahung kile kittauve.

Athen khopia Paul

16 Paul’in Athen khopia Silas le Timothy a-nga pet’in khopi sunga limsemthudoi dimset’a kikoi amudoh-in alunng nalheh jenge. 17 Hijeh chun Houthua kikhopna in’a miho le Pathen ging ho toh akinel’in, kailhangdunga jong niseh leh ato phah chant oh akinel nel ji’e. 18 Hichea hin Epicurea loi le Stoic loi chihgut mihon Paul akinelpiuvin, alah-uva mi kon khat’in, “Hiche kamtam belbulpa hin ipi asei ding hi-nga na?” atiuvin, adang hon ma, “Gamdang miho hou, doi le kao asei ahitoh-e,” atiuve. Hiche hi ama Jesu le athodoh kit thu aseiphongjeh ahi. 19 Mihon Paul chu aman’un Areopagus molvum kikhopnaa apuiyun, “Hiche nasei thuhil thah hi kahetbe thei diu ham? 20 Ajeh chu kajah-uva nasei abang bang hi alamdang lheh jengin, hijeh a chu hiche ho hi ipi kiseina mong ham ti kahet chet nom’u ahi,” atiuve. 21 Athens kho mite le akhosunga cheng gamdang mi abonchauva ima dang gel louva thuthah thah seina le ngai naa phat amanjiu ahi. 22 Hichun Paul Areopagus lai lunga adingin miho adonbut’in, “Athen kho mite, ima lam jousea nang ho hi hougut tah nahiu kamui. 23 Ijeh-inem itile nahou mun chengu kavet le naa ‘Hetphah lou Pathen ding,’ tia kijih maicham khat kamu doh-e. Hiche nang hon het louva nahouvu hi keiman nahenguva kahung seiphong ahi. 24 Vannoi leiset le asunga um thil jouse sem Pathen, van le leiset Pakai chu mihem dem thu doiphung dunga apansapoi; 25 thil ngaichat nei banga mihem khutsoh a jen lun glhai thei jong ahipoi; Amatah-in mi jouse ahinsah, ahaitheisah a chule thil ijakai apeh joh ahibouve. 26 Aman mihem khat’a kona leiset chunga chang ding chitin namtin hijat asemdoh a, gamgi asekhenpeh cheh a aphat teppeh a achensah ahi; 27 amahon Pathen chu kinemtah a hol’uva amaikhah thei na diuva ahol ahin, ahinla Ama chu eiho koimacha dia jong gamla lou ahiye; 28 ijeh-inem itile: ‘Eiho Ama jal’a hinga, Chatloh, chule Amaa ihiuve,’tin nalah-uva chiguh sun hon aseiyui; ‘Tahbeh-in eiho ama chilhah ahiuve,’ tin aseinauve. 29 Eiho jong Pathen chilhah ihijeh-uva chu mihem lunggel le khut them man chah a sana ham, dangka ham, song ham a limsemthu tobang chu Pathen hinte tia igel lou diu ahi. 30 Het loulai khang chu Pathenin avet thim ahin, tun vang mutin’a mi jouse lung aheina diuvin thu apei, 31 ipijeh-inem itileh aman amilhendohpa amanchah a thudih a vannoi leiset hi thu atanna dinga nikho khat atepsa ahitan, hiche hi tahsan din amilhendohpa chu thinaa konin akaithoutai,” ati. 32 Thinaa kona thodoh kit thu ajah phat’un, mi phabep’in anuisat uvin, adang hon vang, “Hiche nasei hi ka-ngaikit nom’ui,” atiuve. 33 Hichun Paul alailunguva konin apotdohtai. 34 Mi phabep’in vang akilhonpiuvin atahsan tauve, alahuva hin Areopagus a kikhomji lah a mi Dionysius le Demaris kiti numei khat le adang ho jong ahiuve.

Solchah 18

Corinth khopia Paul

1 Hiche jou vin Paul’in Athens dalhan Corinth ajontai. 2 Hichea hin Claudius lengpan Judate aboncha Rome a kona potdoh dia thu apeh jeh a Italy gama kona ajinu Priscilla toh hung lhungtil, Pontus gama peng Juda mi amin Aquila kiti chu akimupin, aheng lhona achen, 3 pon in sem ahicheh jeh-uvinm akiveinau akitha khat ahijeh chun akom lhona apansan na atongkhom’uve. 4 Choldo niseh leh Houthua kikhopna in’a Juda ho l eGreek mite chu thu aseitohpi jin jol lut tei din agoji’e. 5 Macedonia gama kona Silas le Timothy ahung lhun phat’in, Paul chu thu seiphongin bou apangin, Juda ho henga Jesu chu Messiah ahidol ahettohsah-e. 6 Ahinla amahon adoudal’un, ataitomuleh, Paul’in aponsil ho athingin ajah-uva, “Manthaina naneiyu leh nang hon ma nakipoh diu ahi! Keiman themmona kaneipoi! Tua kalvang chiding namdang te henga kachei!” ati. 7 Hiti chun chua konin achen Pathen ngaisah tah mi amin Titus Justus kitipa in’a aluttai; ama in chu Houthua kikhopna in bantah ma ahi. 8 Houthua kikhopna in vaipo Crispus chun a-insung mi chengse toh Pakai atahsanin, chule athu ja Corinth mi tampin jong atahsanun baptize achangtauve. 9 Jan’a Paul’in Themgao thilmua mu aneinaa Pakaiyin, “kichat dan, umthim louhel’in seijom jingin; 10 ajeh chu Keiman ka-umpi jingin, koiman suhset dia nanokhum lou ding ahi; ijeh-inem iti le hiche khopi sung jenga jong mihem tampi kaneiye,” ati. 11 Hijeh chun Paul kum khat le lhagup alah-uva apansan Pathen thu ahil hil jenge. 12 Achaia gam gamvaipoa Gallio apan laiyin Juda ho apangkhomun Paul aman’uvin thutannaa ahinkailut’un, 13 “Hichepa hin chonna dan nagilouva Pathen hou din miho ajol lha lhai,” atiuve. 14 Hichea hi Paul pao akigot leh Gallio chun Juda ho jah a, “Vo Juda ho, namiheh nau hi suhkhelna ham khan gitlouna ham thu hileh kangaipeh ding nahiuvin, 15 nang ho Danthua le min ho thudol vang nang hon kivet tup tauvin, hiche hoa hin keima thutanin pang ponge,” ati. 16 Hiti hin thutanaa konin aban nodohtai. 17 Amahon Houthua kikhopna in vaipo Sothenes chu aman’un thutanna in mai laitah a avoh jeng vangun, Gallio chun donin aseppoi.

Paul Antioch khoa ahung kile kit

18 Paul chu nisot tah sopite toh aumkhomin, chuin amaho chutoh akilhan, Priscilla le Aquila toh lhonin Syria lam ajontai. Cenchreas khoa kitepna anei jeh-in sam akivoi. 19 Ephesus kho ahung lhun’un Paul’in amani dalhan, Houthua kikhopna in’a alut’in Juda ho toh thu asuitoh-ui. 20 Amahon nichong sot jep dia alho vangun anompon, 21 amaho toh akilhan, “Pathen lungdei ahileh nahenguva hung kit nange” atin, Ephesus khoa konin apotdohtai. 22 Paul Caesarea khopia akumlhan, Jerusalema achetouvin Houbung miho salam agabol’in, Antioch lama achesuh paitai. 23 Chukoma chomkhat aum nungin akipatdoh-in Galitia le Phrygia gamkol muntin akhol len, seijuite aphutdet len ahi.

Ephesus khopia Apollos thu lhangsap

24 Juda mi Alexandria peng, amin Apollos kiti khat Ephesus khopia ahungin, amahi thusei them le Pathen lekhabua themtah jong ahi. 25 Apollos chu Pakai lampi kihil themsa, Lhagaova gunchu tah ahin, Jesu thudol aseiyin kitoh chet’in ahilnan, ahivangin John baptize chandol chubou anahei. 26 Ama hi akipat’in Houthua kikhopna in’a hakattah-in thu aseiye; ahinla Prisilla le Aquilan athusei ajah lhon phat’in apui lhonin Pathen lampi chu kichentah-in ahilchen lhone. 27 Apollos chu Achaiiiia gama ache nom phat’in sopiten atilkhou’un seijuiten anasan theina diuvin phatseina lekha jong asutpeh-ui. Ahung lhunin lungset vanga atahsante chengse hatah-in akithopi; 28 ijeh-inem itile Jesu chu Messiah ahidol Pathen lekhabua konin phot chetna tampin Juda ho chu japi maiya anel khuptai.

Solchah 19

Ephesus khopia Paul

1 Apollos Corinth khopia aumpet’in Paul chun sahgam lam alhahpeh-in Ephesus khopia ahungle hikoma chun seijui phabep amun, 2 hiche ho jah achun “Natahsan’uva chu Lhagao Theng nachanu hinam?” atileh; amahon ajah a, “Lhagao Theng aum’e, tobon kija kha loulaiya,” atiuve. 3 Chuphat’in Paul’in, “Ipipen tah a ba baptize chang nahiuvem?” atileh; amahon, “John baptize chansah bangin,” atiuve. 4 Hichun Paul’in, “John chun lung heina dinga baptize achansah a, anunga hung dingpa, Jesu chu atahsan theina diuva miho aseipeh ahibouve,’ ati. 5 Hichu ajah phat’un amaho Pakai Jesu minin baptize achangun, 6 Paul’in achunguva akhut te ni a-ngap le Lhagao Theng achunguva ahung chun, amahon paochom chom thon gaothu aseitauve. 7 Abon’un mi som le ni tobang bep ahiuve. 8 paul chu Houthua kikhopna in’ah alut’in, kicha louhel’in lha thum sungin miho chu Pathen leng gam thu asuitohpin, jollut tei din agoi. 9 Ahinla mi phabep alouchal’a atahsan louvu toh chule mipi maiya chuche Lampi chu aseiset phat’uvin Paul’in amaho chu adalhan, seijuite apuidoh-in, niseh le Tyrannus kihilna in’a akihoulimpiji’e. 10 Kum ni sunga hitia hi abol lehAsia gama cheng, Juda ho le Greek mite geiyin Pakai thu ajasoh tauve.

Sceva chapate

11 Pathenin thil kidang seithei louhel hel Paul khut’in aboltan, 12 Paul ultheh pon le a-op tomna pon ho san achoiyun ana damlouho henga apoh lut’u leh anat nauvin alhauvin lhagaoboh jo jong apotdohjitai. 13 Hichun Juda mi vahvei doithemnaa kivah loiyin jong lhagaoboh vopte chunga Pakai Jesu min apan’un, “Paul’in aseiphongle Jesu jal’a kahahsel nahiuve,” atitauve. 14 Hitia bol ho chu Juda mi thempu pipu Sceva chapate ahiuve. 15 Ahinla lhagaoboh chun adanbut’in ajah-uva, “ken Jesu kahen Paul jong kahenai; nang ho koi nahiuvam?” ati. 16 Chuin lhagaoboh voppa chu achomin achunguva achuh jengle mi ni athajo paiyin, abonchauva athajosoh phat’in in’a kon chun sagoh keo le mapun ajamdoh tauve. 17 Athusoh hi Ephesus khopia cheng Juda mi jouse le Greek mi jousen ahesoh tauvin, akicha lheh jenguve; hijeh chun Pakai Jesu min aloupi cheh tai. 18 Atahnsan ho jong ahungun japi maiya atahsanu chu aphongdoh-un athilbol’u aseidoh tauve. 19 Mitpheldoi them tampin alekha jouseu ahinpo khom’un mitin mitmun ahalvam’uve; ahalvam sangsom nga alhinge. 20 Hiti hin Pakai thu hahattah-in akhang touvin ajousohtai.

Ephesus khopia thunoh baotam

21 Thilsoh hicheng kichai nung hin Paul’in alungthimin Macedonia le Achaia gam chotsoh a Jerusalema chepai ding. “Hiche kichai soh teng Rome kagamutei ding ahi.” Ati. 22 Ahivangin alhacha Timothy le Erastus Macedonia gama, asol’in, ama Asia gama chom khat aum nalaiye. 23 Hiche lai hin chuche Lampi thudol’a boina chu thuneo them ahitapoi. 24 Ijeh-inem itile dang ka kheng them Demetrius kiti mi khat hin Artemis doilim houna inlim dangkaa asemdoh a, dangka kheng themho dia kiveina asohdoh chu thil neocha ahipoi. 25 Hiche miho hi le asumkol veinau kibahpi chengse akoukhomin, “Mihem ho, hiche akiveinauva kona haodoh ihiunahecheh-ui. 26 Ephesus khopi sung goh hilouvin Asia gam pumpi chansah pai ding ahitan, hiche Paul hin mihem khut’a kisemthu ho hi Pathen ahipoi, tia mi aloi loiya tamtah ajol lhah a aheimang gam ahitai, ti mujong namu’uvin he jong naheuve. 27 Hichea hi ikiveinau manlou asoding kichat aumgoh hilouvin ipathen len nu Artemis houin geiya nahsahmoa hung kibol’a, Asia gam pumpi le vannoi pumpin ahou cheh Pathen len nu geiya suhjuma hung umtah bah ding ahi,” ati. 28 Mihon hichu ajah tah-un along hang lheh jengun, “Ephesus mite Artemis alen’e,” tin asam cheh-ui. 29 Hiti chun akhothingiin alingsoh jengun, mihon Paul toh hung jinkhom Massssedonia gam mi Gaius le Aristarchus chu aman’un japi lemkhomna in’a alhoh lut jengui. 30 Paul chu japi lailunga agalutnom vangin seijuiten aphal pouve; 31 Asia gam vaipo aloite phabep man japi lenkhomna in’a ahunglut louhelna din mi ahinsol’un ahung kham’ui. 32 Akikhom chengse chun ipi jeh a kikhom ahiu ahetchet loujeh-un aboi lhehjengun, abang in thu khat asamun, kimkhat man thuchom khat asam’ui. 33 Mipi phabep’in vang Judah on japi maiya ahinsot lut’u Alexander chu a ngoh-un, hijeh chun Alexanderin japi maiya akihonna seidin khut ajep’e. 34 Ahin mihon ma chu Juda mi ahi ahetdoh phat’un, “Ephesus mite Artemis alen’e!” tin o-khat tah-in nidan ni jen asam sam jengui. 35 Hichun khopi sung lekha sunpan mipi aphoh thip’in, “Ephesus kho mite, Ephesus khopia hi Artemis len nu le van’a kona hung lenglha song theng kikoi ahi kon ahetmoa nabol’u ham? 36 Hiche thil ho hi seitoh ahilou het’a thip beh a na-um’uva kholtoh louva jong chu namoh bol lou diu ahi. 37 Hichea nahinkai lut jengu miho jong hi houin choma la ahipouvin, Pathen nu taitoma jong ahipouve. 38 Hichejeh chun Demetrius le atoh khompi khut them hon mi khattou chunga lung lhai louna aneiyule kihehna in honsa ahin, thutan vaihom ho jong aum nauve, akiheh nom nom gakiheh tauhen. 39 Hiche kalval’a thudang nahol’u aum vangleh angaiyin khoppilen teng seitoh ding ahibouve. 40 Ajeh chu tuni boina thua hi mipi tilsea eiki-ngoh diu tijat kichentah a seithei ding jong i-umpouvin ahi,” ati. 41 Hiche hi aseiyin khoppi chu alhadohtai.

Solchah 20

Macedonia le Greek gama Paul kholjin

1 Khopi boina athip phat’in Paul’in seijuite akoukhomin, amaho atilkhou nungin akilhahpin Macedonia gam jonin akipatdohtai. 2 Macedonia gamkol sungse se achotsoh a tilkhouna nasatah anei jouvin Greek gama ahung lhungtai. 3 Hiche gama chun lhathum achamin, Syria gam jon’a achegot leh Judah on achanlhih jeh-un, Macedonia gam jot lhungkei kit din akigotai. 4 Hichun Beroea khoa Pyrrhus chapa Sopater chun alhonpin, Thessalonica khoa Aristarchus le Secundus, Derbe khoa Gaius le Timothy, Asia gam mi tychicus le Trophimus jong ahiuve. 5 Amaho hi anacheuvin troas khoa eina ngah-ui; 6 keiho vang cholsolou changlhah kut jouvin phillippi khopia konin kongin kakitol’un ni-nga lhin nin Troas khoa ahengu kalhungun, hikoma chun ni sagi kanichongui.

Paul’in Troas khopi avil chaina

7 Choldo nikho jou ni masa nia changlhah nekhom din kakikhop’u le Paul’in ajing nikhoa che ding agot jeh-in jan khangkim geiyin miho thu ahil hil jenge. 8 Chungnung indan kakikhop nauva chun meivah tampi akivah-e. 9 Hichea chu gollhang amin Eutychus kiti khat bangkot geiya tou ahin, Paul’in thu aseisot jeh chun golhangpa hi aihmut asoh behseh jengin, anaihmu lhutan, chungnung indan thumnaa konin alha mangin ahileh athisan agaphongdoh-ui. 10 Hichun Paul akumlhan golhangpa akoichah denin, “Tija hih-un, ajeh chu asunga ahinkho aum nalaiye,” ati. 11 paul akaltouvin changlhah ahehbal bal’in, anen, jingkah khovah lhah geiyin miho to akihoulimin, chuin apotdohtai. 12 Mihon gollhangpa chu ahingin akipuiyun seithei louhel’in along mongui.

Paul Troas apat Miletus gei konga akitol

13 Keihon kong lam kajon’un, Paul chu kong sunga lalut din Assos lama kakitol’ui; ijeh-inem itile aman hiche geiya chu kenglama che ding agot ahiye. 14 Paul’in Assos mun’a eikimupi phat’un konga kalalut’uvin Mitylene lang kajontauve. 15 Chua konin konga kakitol’un ajing nikhon Chios gal kalhungui; athai nin Samos kalhungun, athai nin Miletus kalhung tauve. 16 Ijeh-inem itile Paul’in ahithei leh Pentecost nikhoa Jerusalema lhun tei ding agot jeh-in, Asia gama umsot louna din konga kitol’a Ephesus khopi chu palam ajotpa ding agot ahitai.

Paul’in Ephesus upaho akihoupi

17 Paul’in Miletus khoa konin Houbung upaho kou din Ephesus khoa mi asol’e. 18 UPaho ahenga ahung phat’in Paul chun ajah-uvah, “Asia gam kahin chotlut’a pat hitih chan’a hi itobang nang ho toh kalhat khom umchan naheuvin, 19 Juda hon eichan lhih jinguva thoh hesoh tampi kachunga alhunvangin nun nemtah le mit lhi pumin Pakai kin kabol jing jin; 20 itobang tah a in beihel’a thil phachom ding chu japi lah hihen intin hijongle nang ho kahilji hitam! 21 Juda ho hihen Greek mite hijongle kibang cheh-in Pathen lama lung aheiyuva i-Pakaiyu Jesu Christa atahsanna diuvin kahetsahji’e. 22 Chule tan ven, Lhagaova kigahna jeh-in Jerusalem lam kajonin, chukoma kahcunga ipi ahung lhun ding kahepoi; 23 khopi jousea kanchalna le hesoh gentheinan ei-nga jing bou Lhagao thengin eihetsah ahi. 24 Ahivangin Pathen lungset Kipana Thupha hettohsah ding Pakai Jesua kalah katoh ding kin hi kamolso poule kahinkho jeng jong hi imacha man din ka-it chapoi. 25 Nalah-uva chelae Pathen langgam seiphongle kahin, ahinla ven, nang hon kamai namukit louhel diu tan kahetai. 26 Hijeh a chu tunia kichentah a kaseipeh nahiuve, amangthah um jongleur chun mi kapopoi; 27 ijeh-inem itile nahenguva Pathen lungdei apumpia hetsah lou in mang kaneipoi. 28 Kichih thieyun lang nachin diuva Lhagao Thengin napeh-u kelngaohon chunga jong ching theiyun, Pathenin athisana achohsa a-Hobung chu ching them’uvin. 29 Kache nungle ngei giloutah tah nalah-uva hung lut’a kelngoihon hi adep louhel dingkahetai; 30 nang ho lah akona jongmi hung kipat’uva thu akaleh akalouva seiya seijuite phabep geiya apui manguva akijuisah diu ahi. 31 Hijeh chun kiging phauvin, kum thum sunga tang louhel’a sun le jan’a mit lhi puma nachang cheh-uva katilkhou jing chu geldoh jingun. 32 Chule tua hi nang ho khantousah thei le suh thengsa ho lah a gou chankhomsah thei Pathen le alungset thua nang ho kakhum lut nahitauve. 33 Koima dangka sana, nihchen ponsil kadeipoi. 34 Kei le kaloi ho ngaichat chan hiche kakhut te ni hin abol bulhit jing nang ho tah-in nahet’u ahi. 35 Pakai Jesu amatah-in,’Lah sangin peh nopnajo ahi,’ ati chu geldoh jinga na hatoh a alhasam chatmo ho kithopi theina dia thil ijakai najui diuvin kavetsahsoh tauve,” ati. 36 Paul’in thu hicheng aseiyin dilsun abonchauvin ataopitai. 37 Chutah-in abonchauvin akap-un, Paul akoiyun achop’uve; 38 ajahuva, amai amukit lou diu aseijeh tah jong chun na asa behseh jengun ahi. Chuin kong mun geiyin ahung thah-ui.

Solchah 21

Paul’in Jerusalem ajot

1 Upaho toh kakilhauvin jangkeiyin kongin kakitol’un Cos kalhungui; ajingin Rhodes kalhungun, chua konin Patera kalhunguve; 2 chuin Phoenica jotpa ding kong khat kamu’vin, kong chun katouvun kakitoltauve. 3 Cyprus twikol akimu phah phat’in veilam ngan kapel’un Syria lam jonin kakitol paiyun, konga thil solhah ding aumjeh-in Tyre khopia ka-ki-ngauve. 4 Seijuiho kaholdohun hikoma chun ni sagi kanichongui; Lhagaova konin amaho hin Paul Jerusalema ache ding ajadauve. 5 Nikho chujat kanichon jouvun kakipatdoh-uvin kholjin ban kamasot tauve; hichea hin seijuite chu ajite achateu pumin khopi kulpamgeiyin eihung thah-un, Twikhanglen pamchin’a dilsun kataovun, khat kaht’in kakilhauvin, 6 keiho kong sunga kakaldoh-un, amaho inlama akiletauve. 7 Twichung kholjin chainan Tyre a konin Ptolemais gei kaki tol’un, hikoma chun sopite salam kabol’un akom’uvah nikhat kanichongui. 8 Ajing nikhon kakipatdoh-un Caeasarea kalhungun, sagi lah a Philip Evangelist pu in’a kalut’uvin amatoh ka-um khom’uve. 9 Philip hin cha nu jinei loulai cheh li aneiyin, amaho hi gaothuseiyin apangui. 10 Nikho phabeppi chukoma ka-um laiyu hin Judea gama konin amin Agabus kiti Themgao khat ahungsuh-in, 11 kahengu ahinjonin Paul konggah chu alan akhut te ni le akeng te ni akikanin, “Lhagao Thengin hitia hi, Jerusalema Juda mihon hiche konggah neipa akan’uva chiding namdang ho khut’a apehdoh diu ahi,’ tin aseiye,” ati. 12 Hichu kajah phat’un keiho le chukoma um mihon Paul chu Jerusalema chetou lou din kaholtauve. 13 Ahinla Paul’in adonbut’in, “Ibol nahiuva kap’a kalung nasuhdoiyu ham? Ajeh chu kanchal ding keo hilouva Jerusalema Pakai Jesu min’a thi dinga kogosadema um kahi,” ati. 14 kathu nun joulou phat’un kahaiyun, “Pakai lunggot got himai hen,” katitauve. 15 Nikho phabep jouvin kakigouvin Jerusalema kachetouvun, 16 Caesarea konin seijui phabep’in eilhonpiuvin, amaho hin kalhunna dingpau, Cyprus twikol’a mi Mnason kitipa in’a chun eipuilut’uve.

Paul’in Jacob akimupi

17 Jerusalem kalhun’u le sopiten kipah tah-in eina sangui. 18 Ajingnikhon keiho toh lhonin Paul chu Jacob kimupin achen, upaho chengse jong akimkeiyui. 19 Amaho asalam soh phat’in Paul’in alhacha natohnaa kona chiding namdangte lah a Pathen thilbol chengse chu abonchan aseitai. 20 Amahon hichu ajah phat’un Pathen avahchoiyuvin ajah a, “Sopi, atahsan te lah a Juda mi sang ijat pang tam ti namui, abonchauva Danthua tom ngaitah ahiuvin, 21 nang hin chiding nam dan glah a cheng Juda mihon Moses Danthu apaiyuva, achateu chep tandaa chule puchon pachon adonda diuvin ahil’in asei lei tin min aseipeh-uve. 22 Ipi iti ding hitam? Nahunghi la ajah tei diu ahitan; 23 Hichea hin i-khat seipeh unge hichu bol’in; kitepna neisa mi li kaneiyun, 24 amaho hi puiyin lang acholamu topeh-in, nangma jeng jong amaho hitoh kisuthengin, chutile sam akivo thei diu ahin, chuteng nangma nasa tah-a chondan nit mi nahi, nachung change thu kithang jou ahidol mitinin ahet soh diu ahi. 25 Atahsan chiding namdang ho thudol vang hi limsemthu houna doithil neh lou ding, thisan neh lou ding, alol kimeh a kithatsa neh lou ding le jonthanhoi bol lou ding thua lekha ithotsu ahitai,” atiuve. 26 Chuphat’in Paul’in miho chu apuiyin, ajing nikhoa amatoh kisuh thengna kin abolsoh phat’uvin itih tah le kisuh thengna nikho kichaiya chule amaho mi khat khat dia chu kilhaina gantha itih a kibol ding ham, ti hetsah din Houin agalut’e.

Houin sunga Paul amat’u

27 Nisagi alhin ding konchan Asia gama hungkon Juda mihon Houin sunga Paul amudoh-un, japi atilseuvin achunga khut alhauvin aman’un, 28 “Israel mite, neipanhu’uvin, muntin’a mipi le Danthu chule hiche mun douna thu hil lepa ama hi ahi; hiche keo chu hilouvin Houin sunga Greek miho ahinpuilut’in hiche Muntheng phung ho asubohtai,” tin asamtauve. 29 Miho chun Paul le Ephesus gam mi Trouphimus khopi sunga akiloile amujeh-uva Houin sunga jong apuilut tei dia agin mou ahi. 30 Chutah chun khopumpi akithingun, mipi alhaikhom loiyun Paul chu aman’uvin Houina konin akaidoh-un, kotpi chengse akhah paitauve. 31 Mihon Paul tha dia agot lai tah-un Jerusalem kho pumpi boi thu hi sepai vaipipo kam ahung lhungin, 32 aman jong apettah chun sepai jalamkaiho le sepaihon apuiyin aselsuh jengu leh, mihon sepai vaippipo le sepaiho amuphat’un Paul avohda tauve. 33 Hichun sepai vaipipon anailut’in Paul amanin, thih khao nia kan din aseiyin, chuin, koihiya ipi asuhset ham ti akholtoh-e. 34 Ahin mipi lah a abangin thuchom asamun, phabep khat man thuchom beh asamui; hitia chu aboi behseh jeh-u chun ipi mong iti ham ti ahetdoh thei lou phat’in Paul chu kulpi sunga kailut din aseijotai. 35 Japi aphut deng dung phat’un kalbileiya alempet’in jong Paul chu sepaihon adop thobouvui; 36 ajeh chu mipin ahinjuipeh-un, “Sumangun!” tin asam jengui.

Paul’in akihouna thu a sei

37 Paul kulpi sunga akailut kon’un aman sepai vaipopa jah a, “Nahenga thu them khat sei theiying em?” ati leh; aman, “Greek pao nahet’em? 38 Nang hi Egypt mi, tu masang jep’a mihem sang li jen gamthip laiya loidoh a jelen gal bolsah chu nahilou ham?” ati. 39 Hichun Paul’in, “Keima Cilicia gam Tarsus khoa cheng Juda mikahin, khopi mai maiya mi kahipoi; nahenga kataove mipi jah a thu neiseisah-in,” ati. 40 Sepai vaipipon aphalpeh phat’in Paul kalbileiya adingin mipi akhutjap leh, athip chet phat’uvin Paul’in Hebrew paovin thu aseiyin:

Solchah 22

1 “Sopite le pate ho tua na angsunguva kakihonna thu kasei ding hi nei ngaipeh-uvi,” ati. 2 Paul’in a jah-uva Hebrew paova thu asei ajah phat’un ahathip chehuvin, hichun aman: 3 “Kei hi Cilicia gam Tarsus khopia cheng Juda mi kahin, hiche khopia Gamaliel khonung juiya, ipu apateu Dan dungjuiya kikheltah a them, tunia nang ho banga hi Pathen dinga tom ngaitah kahi; 4 hiche Lampi juiho chu thina geiyin kabolsen, numei pasal’in kakanin songkul’a din kapedoh doh jin, 5 athu hi Thempu chungnung le upa chengse ahetoh ahiuve; amahoa kona hi Damascus khoa um sopite gamat’a kanchal jenga Jerusalema hinpuiya talen matsahna ding lekha kipoh-in kachei.

Paul’in ahinkho kikhel asei

6 “Ddamascus kho kom kageiyin, sunkim don hin phulou helouvin van’a konin vah nasatah ahung vahin kakimvel asalvah soh jenge, 7 keila tola kalhutan, kajah a, “Saul, Saul, ibol’a neibolset set ham?” ti ogin khat kajai. 8 Kenjong kadonbut’in, ‘Koi nahim Pakai?’ katile, aman kajah a, ‘Nabolset set Nazareth Jesu chu kahi,’ ati. 9 Kalhonpi hon vah chu amu’vin kahenga thuseipa ogin vang chu ajapouve. 10 Hichun keiman, ‘Ipi kabol ding hitam Pakai?’ katile, Pakai chun kajah a, ‘Kipatdoh-in lang Damascus khopi sunga lut’in, hikoma chu natoh dia kigo chengse aboncha nakiseipeh ding ahi,’ ati. 11 Vah loupe behseh jeh-in kho kamutapon, kalhonpi hon khut’in eikaiyun Damascus khosung kaluttai. 12 “Damascus khoa chun Juda mihon aseiphat cheh-u, Danthu dudngjuiya Pathen ngaisah tah, Ananias kiti mi khat aumin, 13 ama hi kahenga ahungin kakoma adingin kajah a, ‘Sopi Saul, kho mutan,’ eitileh, hichepettah chun kamit akikeovin ama kamutai. 14 Chuin aman, ‘Ipu ipateu Pathen chun alunggot he ding le Adihpa mua akamsoh ogin ja dinga nalhen doh ahitai; 15 ijeh-inem itile nang man nahin mu le najahsah chu Ama dinga mitin henga nahettohsah ding ahi. 16 Hijeh chun tua ibol’a kho ngai ngai nahim? Kipatdoh-in baptize changing lang, nachonset soplhahna din Ama minin taovin,’ eiti.

Chidang namdang lah a thusei dia Paull kikou

17 “Jerusalema kakile kit phatin Houina katao le Themgao thilmun mu kaneiyin, 18 hichea chun Pakaiyin kajah a, ‘Kinloi tah-in Jerusalema konin potdoh loiyin, ajeh chu mihon Kei chung chang thudol nahettohsah hi asan lou diu ahi,’ ati. 19 Kenjong, ‘Pakai, amaho tah-in nangma tahsan ho Houthua kikhopna intin’a kalut’a kamatjia chule kavohji chu aheuve; 20 chule nathu hettohsah Stephen thisan kiso jong chun akoma kadidngin pha kasan, athat ho ponsil jouse kachoipeh ahi,’ kati. 21 Hichun Aman kajah a, ‘Chen, ijeh-inem itile gamla tah a chiding namdang ho henga kasol ding nahi,’ eititai,” ati.

Paul chule Rome sepai vaipopa

22 Thu hicheng asei athip nauvin, chutah-in a-o khoset’in lhang asam’un, “Hitobang mi chu leiset’a konin sumang jengin, ama chu ahing dia kilom ahipoi!” atiuve. 23 Chutitah chun kho asam’un aponsil’u aleh-un, van lama leivui akitunsah jengun ahile, 24 sepai vaipi pon Paul chu kulpi sunga kailut’a, ama douna chutobang tah akho asap jengu chu phot chetna dinga jep din asol’e. 25 Sepaihon savun khaova akan phat’un Paul’in akoma ding sepai jalamkaipa jah a, “Themmosahna bon um loulaiya Rome mi jep ding chu nang dia dan ngai hinam?” ati. 26 Sepai jalamkaipan hichu ajah phat’in sepai vaipipo henga achen a jah a, “Ipi bol kigo nahim? Ajeh chu hichepa khu Rome mi hibouva khu men!” agate. 27 Hijeh chun sepai vaipipo chu ahungin ajah a, “Rome mi nahi mong-em neiseipeh-in?” atileh; aman, “Kahinai,” ati. 28 Hichun sepai vaipipo adonbut’in, “Ken Rome mi hina hi sumtamtah a kichoa,” atileh; Paul’in, Keivang pen’a hisa kahitai,” ati. 29 Apettah chun achung thu kholchil kigo ho chu ahaiyun alhamkangun, sepai vaipipopa jong Paul Rome mi khat ahi ahetdoh a chule ama anakan jeng chu akichatai.

Houvaipoloi kikhopnaa Paul

30 Ajing nikhon sepai vaipipon ipijeh pen’a Judah on Paul aheh-u chu hetdohna din Paul akanna alhamin, Thempu pipu ho le Houvaipoloi chengse kikhomsoh din aseiyin, chuin Paul chu ahinpuidoh-in a-angsunguva adinsah-e.

Solchah 23

1 Paul’in Houvaipoloi chu avechangmel’in, “Tuni geiya hi Pathen angsunga lung sa-ihna beihel’a hing jing kahi,” ati. 2 Chutah chun Thempu pipu Ananias chun Paul koma dingho chu akam behpeh din asol’e. 3 Chuphat’in Paul’in jong ajah a, “Vo bang kiloibang, Pathenin nang nadenjoh ding ahi! Dan toh kikal’a keima deng dia mi nasol ham?” ati. 4 Akoma ding hon, “Nangin Pathen Thempu chungnung chutia nahouset jeng ong?” atiuleh; 5 Paul’in, “Ama Thempu chung nung ahilam kahetlou ahi sopite, ajeh chu, ‘Namite chunga vaipo chunga thuse nasei lou ding ahi,’ tinakisun nai,” ati. 6 Paul’in miho chu akehkhat Sadducee ahiuva akeh khat Pharisee ahiu ahetdoh phat’in, Houvaipoloi kikhopnaa chun ahinsamin, “Sopite, keima Pharisee chapa Pharisee kahin, mi thi thokit kinepna thu dol’a kathu kibol’a ahi,’ ati. 7 Paul’in chutia aseiphat’in Pharisee ho le Sadducee ho kah a kinel khenlotauve. 8 Ijeh-inem itile Sadducee loiyin mi thi thokit hihen Vantil hileh chule lhagao geiya aumsah louvu ahin, Pharisee loiyin vang aboncha aumsah-u ahinai. 9 Hiti tah chun apoh veng vung jengun, Pharisee loi lah a Danthem ho phabep adingdoh-uvin mipi anellun, “Keihon hichepa chunga thildih lou ima kamupouve, lhagao ahim Vantil ahim khattouvin ajah a thu asei hi hih ding ham?” atiuve. 10 Akihanelten phat’un sepai vaipipon Paul chu abotel diu ham ti akichan, sepaiho chu chesuh a alah uva kona pumhat’a Paul chu gakaidoh a kulpi sunga lhoh lut jeng din aseipeh-e. 11 Ajing nilhah-in Paul koma Pakai adingin, “Lung ngamin, Jerusalema kathu nahettohsah banga Rome khopia jong nahettohsah tei ding ahi,” tin aseiye.

Paul tha dia agot’u

12 Khovah lhah-in Judaten thilgon aneiyun Paul atha masangseuva anneh twidon abol louhel diuvin akihahsel’un akihan lho cheh tauve. 13 Hitia mi philna thil gong ho chu mi som li val ahiuve. 14 Amaho hi Thempu pipuho le upaho henga acheuvin, “keihon Paul katha masangseuva neh le chah bol louhel dia khoh tah a kihahsel’a kihan lho kahitauve. 15 Hijeh chun tun nang hon Houvaipoloi toh kithoa Paul thudol kholchil’a bol dingveh kisauvin, sepai vaipipon nahenguva ahin puina din gahetsah-un; hikom ahinphah kah a that dia kigosadem’a um kahitauve,” agatiuvin ahi. 16 Ahinla anachan lhih-u thilgon hi Paul sopinu chapan ajadoh-in, hijeh chun achen kulpi sunga alut’in Paul jah a agaseitai. 17 Chuphat’in Paul chun sepai jalamkaiho khat akouvin, “Hiche gollhangpa hi sepai ding khat aneiye,” ati. 18 Hijeh chun aman agollhangpa chu apuiyin sepai vaipipo heng alhut’in, “Sohchang Paul khun eikouvin hiche gollhangpa hin nakoma seiding khat aneijeh a nahenga eihin puisah ahi,” ati. 19 Sepai vaipipon ama chu akhut’in atuh-in munchoma apuidoh-in guh thim chan adongin, “Kakoma sei ding ipi naneiyem?” atile, 20 aman, “Jing teng Houvaipoloi kikhopnaa achung chang thudol kichen cheh a kholtoh idng banga Paul hi napuisuhna didnga nahenga ngeh ding tin Juda ho akiloltauve. 21 Hijeh chun athu’u lahpeh hih-in, ajeh chu mi som li valjen Paul atha masangseuva um’uva nangma thupeh ngah maiya um nahitauve,” ati. 22 Chuphat’in sepai vaipipon gollhangpa chu alhadoh-in, “Hiche neihung seipeh hi koimacha naseipeh louhel ding ahi,” tin agah chah tai.

Gamvaipo Felix henga Paul akisol

23 Sepai vaipipon sepai jalamkai ni akouvin, “Tujan nidan koa Caesarea che din sepai ja ni le sakol sepai som sagi toh, teng choi sepai ja nit oh gonsan koi lhonin; 24 chule gamvaipo Felix henga bitkeiya pui lhungna din Paul touna ding sakol ho jong ngaitopeh lhonin,” atin; 25 hiti chun athu dol hi lekha ajih-in: 26 “Lal chungnungpen gamvaipo Felix, Claudius-in salam kahinboh-e. 27 Hichepa hi Juda hon aman’un, atha ding kon’uvin sepai ho toh kakon’un, Rome mi ahi kahetjeh-in kagahuhdohtai. 28 Ahehnau ajeh kahet nompeh-in ama hi Houvaipoloi kikhopnaa kapuisuh leh, 29 thina thei le kanchahna thei ima abolset jeh a aheh nau kamupon, amaho Danthu dol’a aheh-u ahitohe. 30 Ama hi tha dia agot’uva achan lhih-u eikiseipeh phat’a khongai louhel’a nahenga kahinsol pai jenga, aheh ho jong nangma maiya aheh nau asei diuva kahil ahitai,” ati. 31 Sepaihon akiseipeh bangun ajan janin Paul chu apuiyun Antipatris alhut tauve. 32 Ajing nikhon sakol sepai chengse chutoh kilhon pai din adalhah thauvin, sepai dangse vang kulpi lama ahung kilekit tauve. 33 Caesarea ahung lhun phat’un lekha thot chu gamvaipo apeuvin, Paul jong akoma adinsahui. 34 Gamvaipon lekha thot chu asim jou phat’in hoigam poh mi ha ti adoh a Cilicia gam mi ahi ahetdoh phat chun 35 “Naheh ho ahung lhung teng nathu ngai nange,” atin, Herod inpi thutanna in’a kaiya hentup din aseipeh tai.

Solchah 24

Paul aheh nau thu

1 Ni nga jouvin thempu chung nung Ananias le upa phabep chule thusuitoh them Tertullus kitipa toh ahungsuh-un, Paul aheh nau thudol chu gamvaipo henga aseiyuve; 2 chuin agah kouphat’un Tertullus chun aheh nau thu aseipanin: “Lal chungnungpen, nangma jeh’in cham le lung ol’in ka-um’un, chule navaihom them jal’in jong hiche nam mi ding hin phatna tampi akisemdoh-e; 3 Ima lam jouse le muntin’a thilbol ho hi keihon kipah tah-in kasangui-pu Felix! 4 Hijongleh tampi seiya nangma phat suhmang din kadeipon, kathuu paltan’a kaseiyu hi lungset’a nei ngaipeh diuva kataotho ahi. 5 Ijeh-inem itile hichepa hi mi sunoh phah tah, vannoi gamtin’a Juda ho chohsea pang, Nazareth chon’a chonho lamkai pipu ahi ti keihon kamandoh-un, 6 houin geiya suh boh ding agot’jeh a kahin mat’u ahi; keiho Dan dungjuiya athu katan nomu ahin, 7 ahinla sepai lamkai Lysias hunga thahat san’a ka khut’uva kona ahung lhoh mang ahi; 8 aheh ho ma aanga ding din thu apen, nangman dongtoh le chun kahehnau hi adih adih lou abonchan hesoh keinan naete,” ati. 9 Juda ho jong chun ahunan asei chengse chu adih cheh-in aseiyui.

Felix ang’a Paul kihonna thusei

10 Gamvaipon thusei didnga akhasuh pha’in Paul’in adonbut’in: “Kum sotpi hiche nam mite chunga thutan vaihom nahi kahen, kipah tah-in keima kihonna thu seiyinge; 11 nangman nakhol chet thei ahi, keima Jerusalema Pathen hou dinga kache na hi nisom le ni aval hih laiye; 12 Houin sung hihen Houthua kikhopna in hijongle, kholai dung jeng cha jong mikhattou kakinahpi ham ahiloule jap katilset ham hijongle hiche ho hin eimandoh pouve; 13 tua eihehna jengu jong hi aphot chetna kichentah-in seithei pouvinte. 14 Ahin nahenga kaphondoh nom chu hiche ahi, amahon houdan loitum asah-u Lampi dungjuiya kapu kapateu Pathen houva, Dan thu le themgao lekhabua kisun jouse katahsan’a, 15 amahon jong dih asah cheh, midih hihen midih lou hileh mi thi thokitna aum’e, ti katahsan ahi; 16 hitia chu Pathen lam hihen mihem thudol hijongleh lung theng lung navah a um jing dinga kihabol kahi. 17 Kum phabeppi nungin kanam mite din thilpeh le thilto kahinpon kahung leh, 18 hiche kinbol’a Houin a kakisuh theng pet’a eihung mudoh-u ahin, hichea chu mipi kikhom jong aumpon, japi noh phahna jong aumpoi. 19 Asia gama hung kon Juda mi phabep vang aum’un, amaho chun hehna ding eineiyu leh hikoma nangma angsunga hung ding dol ahiuve. 20 Ahilouva Houvaipoloi kikhopna kadinpet’a chu ipi suh khel toh khel kachunga amudoh-um hiche ho hin seileu hiding ahi; 21 a-angsunguva kadinpet’a othong leuva kasei thil khatseh, “Tunia hi na-angsunguva mi thi thokit thudol’a kachung thu kikhol’ah ahi,’ kati chubou ahiye,” ati. 22 Ahin Felix chun hiche Lampi thudol chu ahetchetsa ahijeh-in thutan ding avochonin, “Sepai vaipipo Lysias ahung tengleh nathuu ngaito chen nange,” atitai. 23 Felix in sepai jalamkaipa chu Paul songkul’a ahen din aseipeh-in, amavang achamlhatdom theiya, agol apaiho jong ajenle nomchan alutsdah din ahil’e.

Mihenna in’a Paul ahen’u

24 Nikho ijat ham nungin Felix chu ajinu, Juda numei Drusilla toh ahungin Paul agakousah-in Christa Jesua tahsan thudol aseisah-in angaiye. 25 Paul’in thutandih le kitim them chule khonunga thupi tanna thudol adsei phat’in Felix atija jah tan, “Tun chetan, phat kanei kom khat leh hinkousah kit nange,’ ati. 26 Chujongle Paul chun sumguh apeh din agel’in phiveng vungin akousah-in akihoupi piji’e. 27 Ahinla kum ni jen alhin chun Porcius Festus chun Felix ahinkhel’in, Felix chun Juda ho dei abolnom jeh-in Paul songkul’a kihen nalaiyin adalhai.

Solchah 25

Caesar henga Paul’in achung thu alhut 1 Hiche gamkaiya ahung lhun kal nithum jouvin Festus chu Caesarea konin Jerusalema achetouve. 2 Jerusalema chun Thempu pipu ho le Juda lamkaihon ahenga Paul hehsetna thu anaseiyui; Festus chu a-ngeh-un, 3 ahinpui jeng khat leh lampia chanlhih a Paul chu thadohna didn, Jerusalema ahinpui dingin athum’uve. 4 Festusin adonbut’in, “paul Caesarea akikoiyin chule keimatah jong chu koma che ding kahi; 5 hijeh chun keito lhonin nalah-uva athu neidom chengse cheu hitin, hichepa hin suh khel tohkhel anei leh amahon aheh nom nomin heh-u hen” ati. 6 Festus chu alah-uva niget ham nisom ham anichongin Caesarea achesuh-in; ajing nikhon thutanna mun’a atouvin Paul gapui din aseiye. 7 paul ahung lhun phat’in, Jerusalema kona hungsuh Juda ho akimvel’a adingun, phot chetna apeh thei louhel hel’u thuse tamtah-in ahehseuvin ahi. 8 Hichun Paul’in akihonan thuaseiyin, “juda Danthu douna hihen Houin douna hileh, chuleh Caesar douna hijongleh keiman imacha suhset tohset kaneipoi,” ati. 9 Hichea hin Festus-in Juda ho lung lhaina abolnom jeh-in paul adonbut’in ajah a, “Jeruaselema chetouva keima angsunga hiche thudol ho hi nachung kikhol ding nadeiyem?” atileh; 10 paul’in, “Keima kathu kitanna ding sol Caesar thutanna mun’a ding kahi; Juda ho chunga bol khel ahi. 11 Keima bol khel nei kahiya, thina thei lom suh khel toh khel kanei leh thi ding kadapoi; amavang eihehna chengseu hi ima ahilouleh koiman amaho khut’a eipehdoh theiponte, Caesar henga kathu kalhuttai,” ati. 12 Festus chu avaibolpi chengse toh akihoutoh phat’in adonbut’in, “nangin Caesar henga nathu anlhutsa ahitan, Caesar henga nache ding ahi,” ati.

Agrippa le Bernice anga Paul

13 nikho phabep jouvin lengpa Agrippa le Bernice chu Festus vailhun din Caesarea ahung lhontai. 14 Caesarea sotpi anichon lailhonin Festus chun lengpa koma Paul thu chu apodoh-in, “Felix dalhah soh chang kihen khat aumin, 15 Jerusalema ka-umpet chun Thempu pipu ho le Juda ho upaten achung thu eihetsah-un, chule ama mochansah a athu tan din a-ngeh-ui. 16 Ahivangin akihehpa le aheh ho kimaitoa akinel’uva aheh apauvin akihonna thu asei masanga koi hileh moh pehdoh jeng chu Rome mite chondan ngai ahilou kaseipehin kanadonbut’e. 17 Hijeh chun abonchauva ahung kikhopsoh phat’un geisang louhel’in ajing nikhoma man thutanna amun’a katou mun kakijot’in mipa chu hinpuidoh din kaseitai. 18 Ahinla aheh a pang ho adindoh-uva athudol aseiyu chun ahehpauvin kagel bangin ima thilse abolpoi; 19 akinel nau chu amaho houthudol le Paul’in ahinga asei mithisa Jesu kiti khat thudol mai mai ahibouve. 20 Atanna je kahetvah loujeh-in ahehnau thuho jeh a hi Jerusalema chea kholchil ding adeiyem adei hih-em ti Paul kadonge. 21 Hichea chun Paul’in Kumpipa henga thu chaina a-nga dingin kihenan in’a koi din a-ngeh-in, hijeh chun Caesar henga kasol thei kah a koi dingin kaseitai,” ati. 22 Hichun Agrippan Festus jah a, “Hichepa thu chu keima tahin jong ngai leng kadeiye,” atileh, aman, “Jing tng jana veh ta chun,” atipeh-e. 23 Ajing nikhon Agrippa le Bernice loupe tah a sepai vaipo ho le khopi sunga japi lamkai ho toh thu ngaina inpia ahung lut phat’uvin Festus thusah-in paul ahinpui lut tauve. 24 Chutah-in Festus chun aseiyin, “lengpa Agrippa chule keiho toh umkhom chengse, veuvin hichepa hi Juda mi jousen, Jerusalema ahin, hikoma ho ahiuvin, ama ahinga hoisot louhel ding dol’a asap sap jenguva kahenga angeh-u ahiye. 25 Ahinla keiman amah in thina thei lom thilse aboldoh kamupoi, aman ma Kumpipa henga thu alhut tahjeh-in sol dinga thu kalhuhsah ahitai. 26 Hichea hi achung chang thudol’a Kumpipa henga sutding ima kichentah-in kahe theipon, hijeh a chu na-angsunguva kahinpuidoh ahi! Athu doh toh nunga sut idng kati ahiye. 27 Ijeh-inem itile akihehna thudol kichen a sun louva sohchang gahsol jeng chu kitoh din kagelpoi,” ati.

Solchah 26

Agrippa angsung Paul’in kihonna thu asei

1 Agrippan Paul jah a, “Nakihonan thusei theiyin nate,” ati. Chutah-in paul chun akhut ajah-in anoiya banghin akihonna thu aseiye: 2 “Lengpa Agrippa, Judahon eiheh na jouseu thua tunia nangma angsunga kakihonna thu sei dia ka-um hi lungnom kakisa lheh jenge; 3 ajeh chu Judate puchon pachon Dan jouse le akinel nohna nangin nahe themsoh keiyin, hijeh chun lung nengtah-in kasei nei ngaipeh-in tia tao kahi. 4 “Keima kaneocha lhah kanam mite lah a Jerusalema kachen a kanun kakhan aboncha Juda miten ahetsoh keiyu ahi; 5 amahon asei nom’uva ahileh phat sotpi sunga eihetsau ahijeh chun kahoudanuva chon kakhelpen tah a Pharisee mi kahin, 6 chule tua hi kapu kapateu henga pathen tepsa kinepna thudol’a kathu khol dinga hikoma ding kahiye. 7 Hiche kinepna thudol’a hi kaphungbul piu som le nijenin gunchu tah a sun le jan a Pathen ahouvu anahi. Vo lengpa hiche kinepna thudol’a hi Juda mi hon eiheh-u ahbouve. 8 Juda mi nang hon Pathenin mi thisa athodoh kit thudol hi natahsan ding hahsa nasah-u ham? 9 “keijengin jong kajo chan’a bol’a Nazareth Jesu min douna thil ijakai bol ding kagotsa ahi. 10 Hitobang hin Jerusalem khosunga kabol’in Thempu pipu hoa konin thu neina kalan, minthengte tampi songkul’a kakhumin, chule athau jong chun pha kasai. 11 phat atamjon Houthua akikhopnau in tin’a talen kamatsah-in, atahsanu ataitom teina diuvin ka-engbol’in, achunguva kalung hangten tun jengin gamdang miho khopi dung geiyin kagabol sen ahi.

Paul’in ahinkho kikhel avelsei kit

12 “Hitobanga amaho bol genthei ding chun Thempu pipu hoa kona thu neina kengin Damascus khopi jonin kachen, 13 vo lengpa, sumkim dontah-in lampia nisa sanga vahjo van’a konin vahkhat kamun, vah chun keima kimvel chengse le ka lhonpi ho chengse asalvah soh keiye; 14 hichun tol’a kalhunsoh phat’uvin Hebrew paovin kajah a, “Saul, saul, ibol’a neibolset set ham? Nang dia thihtul monghem lho chu bongchal’in apu mol-hem anungsai beh ahi,’ eiti. 15 Hichun keiman, ‘Pakaiyin, ‘Nabolset set Jesu chu kahi. 16 Hijongle thouvin nakengin pansan dingin, nahenga kahung kilahna jeh chu nangma kalhachaa pansah din gle nathilmu chengse le nahinmu kit ding chengse hettohsah a pansah dinga hung kilah kahi, 17 kasolna mi Israeltea kon le chiding namdang hoa kona khovah a ahung kiheidoh theiyuva Satan tha neinaa kona Pathen henga ahung kihei theina diu chule Keima eitahsan jal’uva chonset ngaidamna amutheiyuva, lhat thengsa ho lah a goulo chan anei theina diuva amit’u hasah dinga ahenguva kasol ding nahi,’ eiti.

Paul’in aumchan Juda mi le namdang ho aseipeh

19 “Hijeh chun volengpa Agrippa, van’a kona themgao thilmu kamu chu athua nu glouvin kaumpoi; 20 amasan Damascus khopia umho henga kaseiyin, Jerusalem le Judea gam pumpia jong, chiding namdang holah geiyin lung heiya Pathen lama akiheiyuva chule along heiyu toh kiloma natohpha atohna diuvin kaseipeh soh keiye. 21 Hichejeh a hi Judah on Houin sunga eimat’uva tha dinga eigot’u ahi. 22 Ahivangin tuni chan geiyin pathenin eikithopin, hkoma kadingin milen mineo hengah hettohsahna thu hi kaseiye; kasei hi Themgaoho le Mose’n hung guilhung dinga anaseisau chu ahin, 23 Christan hesoh genthei athoh tei ding, thinaa kona thoudoh maspen’a panga, Juda mi le chiding namdang ho henga khovah thuaphondoh dingahi,” ati.

Agrippan atahsan tei dia Paul taona

24 Paul’in hitia kihonna thu asei chun Festus-on othongin akouvin, “Vo Paul a-ngol nahitai; nalekhathem sang chun na-ngolsahjoh ahitai,” ati. 25 Ahivangin Paul chun, “Vo lalchungnung Festus, a-ngol’a kahipon, kicheh tah athu dih kaseijoh ahibouve. 26 Ijeh-inem itile leng Agrippan hiche hi ahet ahijeh a ajah angamtah a kasei ahiye; ajeh pentah chu athil hi ningkoiya kibol ahiloujeh-in ama hetlou um louhel din katahsan’e. 27 Lengpa Agrippa, Themgao ho natahsan em? Natah san kahei,” ati. 28 Hichun Agrippan Paul jah a, “Hiche chomkah cha sunga hin Christian hisah neigoi!” ati. 29 Hijongle Paul’in, “Phat chom hen sao leh tunia karhusei ngai chengse hi thihkhaova kakihenna ho tilouvin keima tobang hisoh keiyu leh tin Pathen henga kathum’e,” atitai. 30 Hichun lengpa le gamvaipo Bernice chule atoukhompi chengse akipatdoh-in 31 adalhah phat’un khat le khat akihou lhiuvin, “Hichepa hin thina thei lom hihen songkul’a henna thei lom hijongleh ima abol set atohset aumpoi,” akitiuve. 32 Hichea hin Agrippan Festus jah a, “Hichepa hin Kumpipa henga thu alhut lou hileh lhadoh thei ahitai,” ati.

Solchah 27

Rome khopi jon’a paul konga akitol

1 konga kitol’a Italy gam kajot diu akichet phat’in Kumpipa sepai lhentum lah a sepai jalamkai Julius kitipa khut’a paul le sohchang dang ho apedoh tauve. 2 Adramyttium a chun Asia gam kongkai mun jouse jotpa ding kong khat’a kalut’un, Macedonia gam Thessalonica khoa hung kon Aristarchus chutoh kilhonin kakitol’uve; 3 ajing nikhon Sidon kaimun kalungun, Julius chun Paul along set’in agol apai ho henga che angaichat chan apeh diuvin asol’e. 4 Chua konin keiho lam ngaa hui anun Jeh-in Cyprus twikol lesun sun’ah kakitol’uvin, 5 Cilicia le Pamphylia Twikhanglen thuh lai kagal kaiyun Lycia gama Myra kho kalhungtauve. 6 Hikoma hin sepai jalamkaipan Italy jon ding Alexandria kong khat aga mudoh-in hia chun eikhumtauve. 7 Nikho sotpi sungin olcha chan kakitol’un hahsa tah-in Cnidus kho kalhungvin, huiyin kajotna lam’uva chetheiya eilha lou phat’uvin Cretetwikol lesun sun’ah kakitol’un Salmone jon kajot’un, 8 twi pamchim chin kalhah peh-uvin, nah nah-in Lasea khopia kona gamla behseh lou kongkai munhoi kiti khat kalhungtauve. 9 Phat sottah kanichon nungun Thoidamna anngol phat jong akichaitan, konga kitol’a kholjin banjop dingla kachat aumtah jeh-in Paul’in miho athumop’in, 10 ajahuvah, “Miho, konga akitol’u hi toset ito tei didu thil le lo mai hilouva ihinkho diuva jong manthahna um ding kichat tijat aum’e ti kamui,’ ati. 11 Ahinla sepai jalamkai chun Paul thusei sangin kong lamkai pa le kong neipa thujoh alajoi. 12 Kongkai mun chu phalbi sunga umna dia aphat loujeh-in, mi atamjon Twikhanglena kitoldoh a ahithei chan a Phoenix lhun tei ding asom’ui; Phoenix chu Crete gama kongkai mun khat ahin, lhanglam lhum le sahlam-lhum angat ahi, hichea chu phalbi sunga cham ding atiu ahiye.

Twikhanglen chunga huise

13 Lhanglam hui olcha cha ahung nun phat’in mihon along ngaito bang molso thei din agel’un, kong khaopi alhauvin Crete twikol pamchin chin’ah atoltauve. 14 Ahivangin chom khat jouvin sahlam-niso hui kiti hui hattah twikol gam lama konin ahung nungsuh paiyin, 15 hui chun kong ahinsem khath phat’in anang joutapon, kamoh lhau le ei-lhoh lhoh jeng tauve. 16 Hichun Cauda kiti twikol neocha khat lesun sun’a ka lhaiyun nah changsal’in kong inneiya kong neochu kahendet nah nah-ui. 17 Kongneo chu kong innei kimvel’a chun akanbeh-un ahunan amangun, Libya twipam chin nel lah a kilenglut khante, ti gin nan pondal kipeina chu aloi lhauvin hui amoh lhohsah sah tauve. 18 Hui tahtah chun eisuh gim behseh phat’un ajing nikhon kong sunga thil le lo apai pan tauve. 19 Nithum nin kong manchah ho geiyin akhut’a uvin apai kit tauvin ahi. 20 Nikho tamtah sunga nisa mel le ahsite mel kimudoh louhel’a hui hattah tang louhel’a anun nun jeng phat’in kasochatna diuva kinepna jouse abeitai. 21 Phat sottah miho nelou chalouva aum nungun Paul alah-uva adingin, “Vo miho, nang hon kathusei na-ngaiyuva Crete a kona ihung kitoldoh lou diu, hitobang settona le manthahna hi itokhah lou diu dol ahi. 22 Hijongle tua jong nahenguva katao ahi, hang tah-in pang un! Ijeh-inem itile nalah-uva komacha athi amang na-um lou diu, kong innei vang mang ding ahi; 23 ajeh chu Amaa kahia alhachaa kapan Pathena kon Vantil khat tujan chun kahenga ahung kilah-in 24 “Vo Paul, kicha hih-in, Kumpipa ang’a nadin tei tei ding ahi chule ven nalhonpi chengse hi Pathenin nang napeh ahitai,’ eiti. 25 Hijeh chun hangtahin pangun miho, ajeh chu eikiseipeh bang banga chu hung guilhing tei dinga Pathen katahsan in ahi. 26 Amavang twikol gam sung khat A igalkai tei diu ahi,” ati. 27 Kakisuhtol kakitoutol’uva jan som le li lhin jan Adria Twikhanglen kagalkaiyun jankhangkim in kongtol hon gam leiset kinaiyah hitam ti agingmouve. 28 Hijeh chun thilgih khat khaovin akan’un twite na dia ale lut’u leh twi chu lam som ni thuh ate doh ui; phabep acheuva atekit’u leh lam some le lam nga atedoh-uvin ahi. 29 Song lah a kilenglut khante ti ginmo nan kong tom lam’ah konghenna khao li aleh lhauvin khovah loi nadin ataovui. 30 Kongtol ho chu jamdoh ding akigo’uvin, kong mai lama chu kong henna khao sep lha ding veh kisan twi lah a kongneo chu akhai lhauvin lungthim aboltauve. 31 Paul’in sepa jalamkai pa le sepaite jah-a, “Hiche kongtol ho hi kong sunga aumden louvu leh nang ho sohcha jou pouvin n ate,” atitai. 32 Hijeh chun sepai hon kongneo kikhaina khao ho chu asat tanpeh-un akitolmangsah tauve. 33 Khovah niso ding phat’in Paul’in an ne din asol’in abonchauva jah a, “Sei ding get ding helouhel’a nelou cha lou, tep lou don louva na-um kal’u tuni nisom le ni li alhingtai; 34 hijeh a chu anne dinga ka-ngeh nahiuve, nakihinso theina diuva natha nei dom nadiu vin, ajeh chu nalu chunguva samjang khat jeng cha jong mangthah louhel ding ahi,” ati. 35 Hitia asei jou hin changlhah chu alan mi jouse angsunga Pathen athangvah jouvin aheh bal’in anepantai. 36 Hichun miho ahung lung ngam tauvin amahon jong an anepantauve. 37 Kong sunga um chu mihing jani le som sagi leh gup kahiuve. 38 Mi jousen an anehva phat’un kong chu ajankhai domna din kong sunga suhlou chang chu Twikhanglen a aleh lut tauvin ahi.

Kongke

39 Khovah phat’in kongtol hon gam leiset chu ahetapouvin, ahin twilen pang ningkoi khat amu’vin, ahithei leh hikoma chu kong tol lut’a galkai din akihousomtauve. 40 Hijeh chun konghenna khao chengse alha lhauvin Twikhanglena aleh lut’uvin, chule kongkhe kanna khao asut lhauve; chutengleh huiyin aputlut theina diuvin ponjal atungdoh-un twiningkoi lam chu ajontauve. 41 Ahinla kong chu twikinong ni kisuhtonaa alut khan kong mong chu nel lei lah a akiphut lutdentan, achalbe thei tapoi, chuma leh twikinong chun hanuh a anuh jeh-in anung lama ahal hal’in aleng lhan akeh pan tai. 42 Sohchang ho chu akijap galkaiyuva ajamdoh thei louna diu tin sepaihon abonchauva tha ding thilgon aneitauve. 34 Ahivangin sepai jalamkai chun Paul ahuhdoh nom jeh-in athilgon u chu asutangin, twijap thei chan jap galkaiya tolgo anakai masa din aseiyin, 44 adang amohse chu khunpeh le konghalse pouva kitol galkai din aseiye. Hitia chu aboncha tolgo geiya kishinso na um ahi.

Solchah 28

Malta twikol gama Paul

1 Kakihonso phat’uvin twikolgam chu Malta akiti ti kahedoh tauve. 2 Koitoh kisamkai khah loulai agam mihon datmo tah-in eikhoto’uvin, go juh jeh a adap phat chun mei eitipeh-un eilamdot chehui. 3 Paul’in thingkang lom khat achomdah-in meiya atileh, meisa hul chun gulse khat ahungdoh-in akhut achun akikhaiden jenge. 4 Koitoh kisamkai khah lou agam mihon paul khut’a gul kikhai chu amudoh phat’un khat le khat akihou lhiuvin, “hichepa vang hi tolthat mong mong ahin, Twikhanglen setto naa ahindoh jeng vanga thudih chun ahing hoi lou dingsam ahiye,” akitiuve. 5 Ahinla Paul’in gulse chu meilhum sunga athing lhan a-ima aloudeh poi. 6 Agam mihon vang hung pom ding ham ahi loule phulou helouvin lhua thi didng ham, tin a-ngah jingui; sotpi chutia angauva imacha atilou phat’in along gel akhel’uvin Paul chu Pathen khat danin aseitauve. 7 Hiche kona gamla behseh lou mun khat’a hin twikol haosapu amin Publius kitipan loumin aneiyin, amahin thanom tah-in eisangun nithum sungin eivah gunset’uve. 8 Publisu pa chu khosih le eithit veiya dammoa lum ahin, Paul’in agaven, achunga khut angamin ataopeh-in aboldamtai. 9 Hitabong thilsoh aumdoh phat hin twikol gamsunga cheng ana damlou neichanin ahinpuiyun abonchan adamsoh keiyuve. 10 Agam mihon keiho jabolnan thilpeh tampi eipeuvin, konga kitol kagot phat’un kangaichat ding dol jouseu kong sunga eihung thah peh-uve.

Paul Rome khopi alhun

11 Lha thum jouvin Alexandria hung kon kong, ‘Pathen cha pengkop,’ tia kiminvo, phalbi sungsea chukom twikol gama nichong denpaa chun kakitol kit tauve. 12 Syracuse kaimun’a kaki-ngauvin nithum kanichonguve. 13 Chua konin kakitol velkil leuvin Rhegium kalhungun, nikhat jouvin lhanglam hui ahung nungin, ni ni lhin hin Puteoli kalhungu. 14 Puteolia chun sopite phabep kamudoh-un, akom’uva ni sagi nichong din eikouvui. Hitia chu Rome hung lhung kahiuve. 15 Rome a um sopiten kathuu ajah phat’un Appius kailhang le Jinlhun in thum geiyin keiho lamto din ahungun, amaho amu phat hin Paul’in Pathen athangvah-in along ngamtan ahi. 16 Rome kalhun phat’un Paul chu a-ngah a pang sepai chutoh ama changseh a cheng din phalna aneipeh tauvin ahi.

Rome khopia Paul’in Pathen Thupha aseiphong

17 Nithum jouvin Paul’in khosunga Judate lamkaiho akoukhomin, ahung kikhopsoh phat’un ajahuvah, “Sopiho, i-nam miteu douna hihen ipu ipateu chondan douna hijongle imacha kabolset aum lou vangin Jerusalema pat Rome mite khut’a sohchanga eihung kipedoh ahitai. 18 Kachung thu akhol chil’u chun thina thei lom ima kabolset aumdoh loujeh-in eina lhadoh nom tauve. 19 Ahina Juda mihon aneljeh-un, ka-nam mite douna imacha sei ding kanei lou vangin Kumpipa henga kacham louvinthu kalhuttai. 20 Hichejeh tah a hi nang ho toh kimutoa kihoulimpi dia kakou nahiuve; ijeh-inem itile Israel kinepna ijeh a keima hiche thih khaova hi kihen’ah kahibouve,” ati. 21 Hichun amahon ajah a, “Keihon jong Judea gama kona nathudol lekha thot la kimu louva, hikoma sopite khatcha beh-in jong nagit louna thudol thulhut’a le houlima jong umlouva, 22 hi jongle la nalung ngaito mong mong nanga konin kajahbe nom nauve; ajeh chu hiche Houbih vang hi muntin gamtin’a seiset’in aumtin ahi ti kei hon jong kanaheuve,” atiuvin ahi. 23 Nikho khat ateppeh –un, apansatna ina’a chun mi tampi ahung kikhom’uve; Paul’in amaho chu jingkah a pat nilhah geiyin Mose Danthu le Themgaoho lekhabua konin hilchetna abol’in, Pathen Lenggam thudol ahettohsa-in, Jesu chu tahsansah tei din ajoltai. 24 Paul thuseiho chu abangin atahsan lou vangun abang vang anomtauve. 25 Amaho chu akihoutoh thei loud phat’uvin Paul’in anoiya thu khat hi asei jou phat’in apotdoh tauve; athusei chu: “Lhagao Thengin Isaiah Themgao kamin napu napateu henga phatah-in anaseiyin, 26 hitin: “Hiche mite henga hin chen lang gaseiyin, ‘Ja vang najah tei diu ahin nehetkhen thei lou diu, Mujong namu tei diu navet chen thei lou diu ahi. 27 Ijeh-inem itile hiche mite hi alungthimu amoh-in, Anabenguvin thu angaichimtan, Chutilou hileh amit’uva avet chet theiyuva Alungthim’uva ahetkhen them diu, Kadamsahna dia kahenga hung kilekit diu ahi,’ ati bang chun; 28 hichu kihet cheh-un, hiche Pathen mihuhhingna thu hi chiding namdangte henga kithot ahitan, amahon angai tei diu ahi,” ati. 29 (Paul’in hicheng asei jou hin Judah on ada lhauvin hanel’in akineltauve.) 30 Hikoma chun Paul’in inman akipeh-in kum ni sung in achengin, ahenga hung jouse lamdot’in 31 Pathen Lenggam thu aseiphongin, koima asunoh beihel’in phongtah in Pakai Jesu thudol ahil lhang lei.

Romans 1

Romans 2

Romans 3

Romans 4

Romans 5

Romans 6

Romans 7

Romans 8

Romans 9

Romans 10

Romans 11

Romans 12

Romans 13

Romans 14

Romans 15

Romans 16

1 Corinth 1

1 Pathen lungdeiya Christa Jesu solchah dinga kikou Paul le sopi Sosthenes-in, 2 Corinth khoa Pathen Houbung, Christa Jesua kisuthenga, atheng dinga kikou ho le muntin’a um miho, amaho le eiho dinga i-Pakaiyu Jesu Christa min’a kikou chengse henga, 3 i-Pau Pathen le i-Pakaiyu Jesu Christaa konin lungsetna le chamna nahenguva hung lhung hen!

Lhagao thilpeh thangvahna

4 Christa Jesu ti nakigop jeh-uva nachunguva kipe Pathen lungsetna jeh chun nang ho jel’in phat jousen ka-Pathen kathangvah jing’e, 5 ajeh chu, Amato nakigop’u hin ima jousea, thuseina hihen hetna hijongle nahaosah-u ahitan, 6 nang hoa hi Christa thudol hettohsahna phudet’a aum banga, 7 i-Pakaiyu Jesu Christa hung kiphondoh ding na-ang nauva Lhagao thilpeh chan khel nanei louna diu ahi. 8 Aman nang ho akhon ni, i-Pakaiyu Jesu Christa nikho geiya natuh chah jinguva monabeiya nakoi diu ahi. 9 Achapa Jesu Christa, i-Pakaiyu vanga kiloikhomnaa nakoulut’u Pathen chu kitah tah ahiye.

Houbung sunga loitum kisoa kikhentel

10 Sopite, nabonchauva nakinopto cheh-uva, nasei jouseu akitha khat’a, lunggel le ngaito kitha khat nahina diuva i-Pakaiyu Jesu Christa min jal’a ka-ngeh nahiuve. 11 Ijeh-inem itile kasopite, nalah-uva kinah baotam alen chu Chloe insung miten kajah a kichentah-in eiseipeh tauve. 12 Kasei chu hiche ahi, nang ho amitakip, “Keivang Paul loi kahi, keima Apollos loi kahin, keima Peter loi kahi, chule keima Christa loi kahi” natiuve. 13 Christa chu kihomtel hitam? Paul la nang ho din thingpel’a akikhet beh pon, ole Paul min’a baptize chang ngap nahiuvem? 14 Cripus le Gaius tilou nang ho khat beh baptize kachansah loujeh-un kakipah-e, 15 hiche hi koima kei min’a baptize changa nakisei thei louna diu ahiye. 16 Stephanas insungmite vang baptize kachan sah nan, hiche kalval vang midang koima baptize kachansah kahepoi. 17 Christan baptize kachansah dinga eisol ahipon, Kipana Thupha sei phong dingjoh a eisol ahibouve, Christa thingpel thu chu ahomkeo ahilouna dinga chihna thujong kasei lou ahi.

Christa chu Pathen hatna le chihna

18 Thingpel thu hi amangthah ho dia ngol kai tah ahin, huhhinga um eiho din vang Pathen thahatna ahi. 19 Ijeh-inem itile Pathen lekhabua kisun chun, “Keiman miching ho chihna kasuh manga, het themna neiho hetna moh kahisah ding ahi,” ati. 20 Miching hoiya uma, lekhathem hoilam ham? Tukhang minel them hoiyaba um ham? Pathenin hiche vannoi chihna hi ngolna ahisah lou ham? 21 Ijeh-inem itile Pathen chihnaa hin hiche chihna vannoiyin mangcha Pathen ahetdoh thei lou phat’in, ngol kai thua kigel hiche thu kisei phong tahsan ho joh huhhing ding hi pha asai. 22 Judaten melchihna a-ngeh-uvin, Greek mihon chihna ahol’ui, 23 Keihon vang thingpel’a kikhenbeh Christa chu kaseiphongu ahi; hiche hi Judate din kipalna ahin, chidnag namdang ho dia ngolna ahi; 24 ahinla Juda mi hihen Greek mihijong le akikoute dinga Christa chu Pathen thahat le Pathen chihna ahiye. 25 Ajeh chu Pathen dia ngol kei chu mihem chihna sangin achingjon, Pathen dia hatmona chu mihem hatna sang in ahatjo nalaiye. 26 Sopite nakikou dol’u chu vetem’un, tahsaphe dol’a chingtah jong nahipouvin, thahat tahbeh jong nahipouve; phunglun laiya mi jong nahideh pouvin ahi; 27 amavang Pathenin vannoiya mimol ho hi miching ho jumso dia alhendoh a, vannoiya mihatmo ho hi mihat ho jumso dinga Pathenin alhendoh ahiuve. 28 Pathenin vannoiya mi lhasamho le nahsahmoa kikoi ho alhen’a, aumsa thil ho imacha lou sosahna dinga aumlouhel thil ho geiya aumsah ahi. 29 Hitia hi Pathen angsunga mihing khat cha kiletsah thei louhel ding ahiuve. 30 Pathen vanga nang ho hi Christa to hingkhom nahiuvin Christa chu Pathena kon eiho chihna, them chamna, kisuh thengna le lhatdamna ahin, 31 Pathen lekhabua, “Akisonga chu Pakai vangin kisong hen,” tia kisun banga um ahi.

1 Corinth 2

Thingpel’a kikhenbeh Christa seiphong

1 Sopite, nahenguva Pathen thuguh phongjal dia kahung chun kamthem le chihna manga hung kahipoi. 2 Ijeh-inem itile nang ho lah a thingpel’a akhetbeh pau Jesu Christa tilou ima dang helou hel dinga kihan lho kahitai. 3 Keima nahenguva lhasam tah le kichatah chule kihot hot’a hung kahin, 4 kathusei le kathuseiphong chu chihna thugil tah akisei ahipon, lhagao le athahat phondohna joh ahibouve; 5 hiche hin natahsan’u chu mihem chihna vang hilouva Pathen thahat vanga ahijoh photchetna ahiye.

Pathen lhagao thuphondoh

6 Apilhingsa ho henga vang chihna thun jong kaseiji nauvin, amavang hiche leiset chihna le amang thah ding leiset vaipote chihna jong ahipoi; 7 amavang leiset um masanga Pathenin iloupina diuva gotsa akoi, kiselguh, Pathen chihna thuguh joh chu kaseijiu ahibouve. 8 Hichu hiche leiset vaipote khat chan jong ahepouve, ajeh chu heule loupina Pakai chu thingpel’a akhetbeh louhel diu ahi. 9 Ahinla Pathen lekhabua kisun: “Mit mukhah lou, naa jah khah lou, Mihem lungthima jong lutkha loulai, Pathenin ama ngailuho dinga agonsa chu,” tia kisei bang chun, 10 lhagao amangchan Pathenin eiho henga aphongdoh tai; ajeh chu Lhagaovin thil ijakai akholchil jin, Pathen selguh ho geiyin ahildohjie. 11 Ama sunga cheng mihem, lhagao tilou mihem umdol thil ho chu koipen ham ahea? Hitobang chun Pathen umdol thil ho chu Pathen Lhagao tilou koiman ahepoi. 12 Pathena kona manbei thilpeh eipeh ho’u ihet theina diuva vannoi leiset lhagao ikisanu ahipon, Pathen Lhagao joh ahibouve. 13 Hiti ho chun hilson chihna thu hoa seilouva, lhagaova kihilna dungjuiya Lhagao neiho henga Lhagao thudih kahilchet’uva kaseijoh-u ahi. 14 Tahsa lam mihemin vang Pathen Lhagao thil ho chu akisanjipoi; ajeh chu ama din hichu ngolna ahin, Lhagao dol’a phot chet ding ahijehin hejong ahe theipoi. 15 Lhagaova hingmi vangin ijakai aphochen theiyin, midangin vang ama chung thudol atan theipoi. 16 “Ajeh chu koiham Pakai lungthim hea, Ama hil thei ding mi chu?” akiti. Eihon vang Christa lungthim ineiyui.

1 Corinth 3

Pathen dia tohkhompi

1 Sopite, Lhagao chenna miho henga bangin keiman nang ho henga thu kasei theipon, tahsaphe mihem, Christa sunga cheng naosen henga sei banga kasi ahibouve. 2 Keiman noitwiya kavah-uva anham kapeh loulai nahive, ajeh chu nahe theihih laiyuve. Tujengin jongnahe thei hih laiyui, 3 ijeh-inem itile tahsaphe mihem nahi nalaiyuve. Nalah-uva kithangsetto le, khat le khat kinah kiphun aum laisea chu tahsa mihem hiya mihem chon chon’a chon nahiu hilou ham? 4 khat’in, “Keima Paul loukahi,” atia; adang khatman, “Keima Apollos loi kahi,” ati laisea chu namihem chon’u hilou ham? 5 Ahimonga Apollos chu ipi hiya, Paul chu ipi ham? Amani hi lhacha natong, amani jal’a natahsan’u ahin, koijoh ahilhona Pakai thilpeh nei cheh ahilhon’e. 6 Keiman kaphu ahin, ahin Apollos-in twi achap’a, Pathenin akhansah ahi. 7 Hichejeh chun aphutpa jong ima ahidehpoi; akhansah Pathen bou thupi ahi. 8 Aphutpa le atwichappa akibang lhonin, atohgim dungjui cheh a tohman asancheh lhon ding ahinai. 9 Keini Pathento tongkhom kahi lhonin, nang ho Pathen loulai, Pathen insah nahiuve. 10 Eikipe Pathen lungsetna dungjuiya, insa themtah banga abul kaphu ahitan, midangin achunga asahjom ahi. Asachanin iti asah kivet them hen. 11 Abul kiphutsa Jesu Christa tilou koiman abul dang phutdoh theiponte. 12 Koi ahin hiche abul kiphut chunga chun san an ashen, dangkan ashen, dong mantamin, ashen lang, thingin ashen, hampa ham changpol hamin sajong le, 13 min atoh cheh chu hung kiphongdoh cheh a, min atoh cheh chu meiya kipatep ding ahiye. 14 Mi khat natoh a-insah chu adin jou nah leh tohman asan ding; 15 mikhattou anatoh meiyin akahvam vangle tohman asan lou ding ama tah vang huhhing chang ding, mei pi pal galkaipa tobang hiding ahi. 16 Pathen Houin nahiuva nasunguva Pathen Lhagao achen chu nahet louvu ham? 17 Khattouvin hiche Pathen Houin chu asuhmang le Pathenin ama asuhmang ding ahi; ijeh-inem itile Pathen Houin chu atheng ahin, nang ho a-Houin chu anahiuve. 18 Koima ama kilhen lha hih hen; nalah-uva khattou tulai khanga dia chinga kigel aumle, achihna din ngoljo hen. 19 Ijeh-inem inem itile hiche vannoi chihna hi Pathen koma ngolna ahibouve; ajeh chu Pathen lekhabua akisunin: “Aman miching ho chu Ajonchih nauva amudohji,” akitin; 20 Chule avel’in: “Pakaiyin miching ho lung gel jouse Aboncha pannabei ahi ahenai,” akiti. 21 Hijeh chun koima mihemin kisonda hen; ajeh chu ijakai aboncha nang hoa jeng ahin, 22 Paul hihen Apollos hile, Cephas ahin, vannoi ahin, hinna hihen thina hijongle, tupet le khonung geiya aboncha nang hoa ahibouve. 23 Nang ho Christa mi nahiuvin, Christa chu Pathen’a ahi.

1 Corinth 4

Solchahho Pathen natoh

1 Keiho hi Christa lhacha, Pathen thuguh chingin min eingaitou hen. 2 Hichea neiching ding kihol’a chu tahsan um hiding ahi. 3 Keidin vang nang hon kachung thu nakhol diu hihen mihem thutan nikhoa kikhol ding hijongle, thu neochan bou kagel’e; keiman bon kachung thu kakikholsampoi. 4 Keiman kiphat lamna ding kahepon, hijongle themmona beihel kahi tina ahidehpoi, hichea kahcung thu khol chil’a pang Pakai ahi. 5 Hiti ahijeh a chu aphet tep phat, Pakai hung kahsen nang hon koima thu tandauvin, aman muthima kisel thiljouse khovah a a phondoh a, mihem lungthim ngaoto chengse jong aphondoh ding ahinai. Chutah le amitakip’in Pathena kona achan ding lom pachatna akisan cheh ding ahi. 6 Sopite, hichengse hi nang ho khohsah jal’a kei le Apollos pan’a nang ho kheldoh goa, Pathen lekhabua “Akisun kalval’in akichon ngaipoi,” ti hi keinia kona nakihil’uva, chule mikhat sonnaa mi khat chun midang khat anahsahmo louna dinga kasei ahi. 7 Ajeh chu koiham nang nachom khen a? Mia nalah lou ipi naneiyem? Nalah ahile ibol’a alallou banga hoithoa kiletsah nahim? 8 Tun nalung nau achimset’in, nahulhingsoh tauve; keiho beiya leng chang gam nahitauvin, keiho to leng ichan khom theina diuvin leng chang tahbah hileu chun kati tave! 9 Ipijeh- inem itile vannoi le Vantilte chule mihemte vetchan bep dia amangthah dia umsa mihem ho banga Pathenin keiho Solchahho hi anukhah pen’a eikoidan’uvin kagel’e. 10 Christa khohsah jeh a keiho a-ngol kahiuvin, Christa sunga cheng nang ho vang nachingui; kei ho kadoiyun, nang ho nahat’uve; nang ho gin le jabol nahiuvin, keiho mi not thap’in ka-um’ui! 11 Tugeiyin jong gilkel dangchah kathoh-un, nihchen ponsil bei, mi khut thah lhauna, chenna intum neilou kahiuve; 12 kakhut nin chol le nangin na katong gim’un, eihousete phat thei kaboh-un, min eibol genthei tengu kathoh ham ham’un, 13 min kallah a eihou tengule lungdamsel’iin kahouvun vannoi kithenhonna bang in ka-umdoh tauvin, tugeiyin mitin kilepnan ka-umdoh tauve. 14 Nang ho jumsona ding hilouva kasha tah kachate banga nang ho hilchahna joh ahicheng hi kahindut ahibouve. 15 Christa dinga nail’uva sangsom neijeng jong leu chun patampi naneipouve; ajeh chu Kipana Thupha jeh a Christa Jesu dinga kahinsa nahitauve. 16 Hichejeh a chu ka-ngeh nahiuve, keima umchan jom hiuvin. 17 Hiche dinga hi Timothy nahenguva kahinsol ahi, ama hi Pakaiya tahsan um kasahtah kachapa ahin, aman muntin le Houbung jousea kahilleji, Christa Jesu hinkhoa kachon namlhah aboncha nageldohsah diu ahi. 18 Nahenguva kei hi hung lou dia gel’a nalah-uva kiletsah hoitho mi na-um’uvin, 19 Pakai lungdei ahile keila nahenguva hungvah jel didng kahi; chutengle hiche mi kiletsah ho thusei mai hilouva atha neina geiyuva kahetdoh idndg ahi, 20 ajeh chu Pathen lenggam chu thuhomkeo ahipon, tha neina ahi. 21 I-ham naseiyu? Mol choiya nahenguva kahung ding ha, ngailut neiya lhagaova lungnemtah a kahungjoh ding ham?

1 Corinth 5

Chonchatvai jeh a thutanna

1 Nalah-uva jon thanhoi um kichentah-in akijan, hitobang jon thanhoi hi chiding namdangte lah jenga jong umji lou ahi; hichea hinmi khat’in apa ji jin aneiye. 2 Hitobang thilbol natongpa chu nalah-uva kona paidoh ahitheina dinga lunggimpijo talouva ibol’a kiletsah hoithojo nahiuvem? 3 Tahsaa ka-um lou vangin lhagaovin nalah-uva kalhan, nalah-uva lha mong bangin hitobang thilbolpa chung thu chu katan chaiyin, 4 i-Pakaiyu Jesu minin nang ho to kalungthimin ikihou khom’un, i-Pakaiyu Jesu thahat’in 5 Pakai nikho ni le alhagao huhhinga aumtheina din hitobang mi hi atahsa suhmangna dia Satan henga napehdoh diu ahi. 6 Nakiletsah-u hi aphapoi. Chol themchan changlhah lhon pumpi achansohji nahet louvu ham? 7 Cholsolou nahijeh-un, changlhah lhon thah nahitheina diuvin chollui chu then ngimsel’uvin. Ijeh-inem itile i-kalchuh kut’uva din Christa kelngoi tha’n akithattai. 8 Hichejeh chun chollui le gitlouna le thilse bolna chol mang louvin, cholsoloi, thenna le thutah changlhah joh-in kut bol’u hite. 9 Kalekha thotnaa chun jon thanhoi bol ho to nakivop khom louna diuvin kahinsuntai; 10 hiche vannoiya jonthanhoi bol ho le neipap kilose ho chule misumang ho le doihouho kati ahipoi, achutilou le vannoiya kona napotdoh diu ngai ding ahi. 11 Tua nakivoppi lou diuva kasut ho chu sopia kisimsa khattouvin jongthanhoi, neipap kiloset abol’a, doi ahouva, Pathen ataitoma, ju akham’a chule mi anambol le, hitobang mi chu kiloikhohmpi louding kati ahi. 12 Polam miho thutan ding ka-ilouna ham? Asunga umho thubou natan jiu hilou ham? 13 Polam mite thu Pathenin tannante. Pathen lekhabua kisei bangin, thilse bolpa vang nalah-uva konin paidoh jengun!

1 Corinth 6

Pathen tahsanlouho henga kihehlou ding

1 Nang ho koi nahiuva khat’in achom khat chunga thu aneitengle mitheng ho angsunga kiheh ding go louva mithenglou chiding namdang ho henga heh ding nangap chat jeng jiu ham? 2 Mithengten vannoi thu geiya atan diu jong helou lai nahiuvem? Chutia vannoi thubon natan diu ahile thu neocha tan dia kilommo nahiuvem? 3 Leiset hinkho thu titah louva Vantilte thu geiya itan diu nahet louvu ham? 4 Chutia leiset hinkho thudol’a thu tanding nei nahiule Houbung sunga pamse miho chu thutan dia natousah jengu leh iti am? 5 Najachatna diuva hiche hi kaseikhum nahiuve. Nalah-uva sopicha kah a thu chai thei miching khatbeh umlou hitam? 6 Chutia chu sopi khat chun sopi khat aheh a atahsanlou ho ang’a kiheh jenglhon ham? 7 Hitia khat le khat nakihehtosau sauvu hin apumthon nahiu aphongtai; dih hih jongle nathoh gimjoh-u phalou ham? Kitoh lou hijongle nakido jenguva phalou ham? 8 Hichea hi nangho adih louva kibolgim’a kitoh louva kichom gam, sopite geiya chutibol nahiuve. 9 Midih louvin Pathen lenggam alo lou diu ahi nahet lou laiyu ham? Lhep chatvaiyin um hih-un; jonthanhoi bol ho, doi houho, mito jong ho, pasal le pasal, numei le numei jongho, 10 gucha ho, neipap kilose ho, jukham ho, mihanse ho, michomhat ho khat chan jong Pathen lenggam alo louhel diu ahi. 11 Nang ho abang bang hitobang chu nahiuvin, hijongle Pakai Jesu Christa min le i-Pathen’u lhagaova kisop ngim’a kithensoa them kichansah nahitauve.

Natibah chengsen Pathen choianin

12 Keidin thil ijakai bolngai ahin, ahinla abonchan thilpha asohdoh deh poi. Keidia thil ijakai bolngai ahivangin imacha noiya lut pong’e. 13 Khattouvin an hi oisunga lut, oisung hi ankholna ahi tinte; ahinla Pathenin agoma asuh bei ding ahi. Mihem tahsa hi jonthanhoi bolna ding ahipon, Pakai ding joh ahi, chule Pakaiyin jong tahsaa ding agelnai. 14 Thinaa kona Pakai kaithou Pathen chun eiho jong athahat pan’a eikaithou diu ahi. 15 Natahsau chu Christa tibah khat ahi naheuve. Hichea hi Christa tibah chu kalah manga noti tibah a kasemdoh ding ham? Hithei naisai ponte! 16 Notinu toh kijopmatpa chu amanu to tikhat ahilhon helou lai nahiuvem? Ajeh chu Pathen lekhabun kichentah-in, “Amani chu tikhat hilhon ding ahi,” tin aseiye. 17 Hichea hin Pakai to kijopmatpa jong chu Amato Lhagao khat ahilhontai. 18 Jonthanhoiya konin jam’un; mihemin chonsetna abol adang jouse chu atahsa polam ahin, jonthanhoi bolpa vang chu ama tahsa chunga chonse ahi. 19 Natahsau hi Pathena kona naneiyu nasunguva cheng Lhagao Theng Houin ahi, chule nang ho hi nang hoa nahilou lam helou nahiuvem? 20 Nang ho man kipea chohsa nahitauvin, hijeh chun natahsauvin Pathen choianuvin.

1 Corinth 7

Kichen thua thukhoh ho

1 Lekha nahinsut thudol’uva hin, pasal’in numei amai louhel ding thilpha ahi; 2 Jonthanhoi atamtai, pasal’in numei, numeiyin jong pasal ji kinei cheh hen, 3 pasal’in numei chu achan ding lom pehen lang, hitobangma chun numeiyin jong ajipa pehen lung nachim lhonhen. 4 Numeiyin ama tahsa chunga tha aneipon, pasal’in aneijoi; chutobangma chun pasal’in jong ama tahsa chunga tha aneipon, numeiyin bou aneiye. 5 Phat chom khat taonaa nakipeh theina diuva nakidondauva nahung kivop khom kit loi diu nakinopto gel’u tilouvin khat le khat don louvin kikoi hihun, chutile kitimlel jeh a Satanin nalhep lhah lo diu ahi. 6 Hiche hi phatsah thua kasei ahin, thupeh dungjui ahipoi. 7 Mihem jouse keima tobang hicheh le kadeiyin, ahinla min Pathen Lhagao thilpeh ama chan anei cheh-ui, khat’in hitobang, achom khatman khutobang aneiye. 8 Jinei louho le meithaiho kasei ahi, amaho chu kei bangin umleu aphai; 9 amavang akitimjou lou diu le ji aneijoh diu ahi, moh huh sangin jinei aphajoi. 10 Jineisa ho chu thu kapeh nahiuve, (Keima hijo louva Pakaiahi) numeiyin ajipa ajamsan louhel ding ahi, 11 ajamsan tah bah jongle jinei louva um ding, ahiloule ajipa to kihoucham kit lhon hen, chule pasal’in numei ada louhel ding ahi. 12 Adang ho henga, Pakai hilouva, keisei ahi, sopi khatouvin a tahsan lou numei jia aneiya, numei chu amatoh chen khom jing ding anop le, ajipan da hih hen; 13 chule numei khattouvin jong atahsan lou pasal jia aneiya, pasal chu amato chenkhom jing ding anop le, aman pasal chu da hih hen. 14 Atahsan lou pasal chu numeinu to ahinkhom jeh a akithenso ahitan, atahsan lou numei jong chu sopipa t0 ahinkhom jeh a kithenso ma ahitai, chutilou hile nachateu chuboh diu ahin, tua vang akithenso ahitai. 15 Ijemtia atahsan loupan adalhah vangle dalha jeng hen, hitobang thua hin sopipa hihen sopinu hijongle akikan lou ahitai, ahinla Pathenin kichamdel dia eikouvu ahi. 16 Hijeh a chu ipi nahet em numei, pasal nahoidohsah ding hinam? Chule pasal’in ipinahet em, numei nahoidohsah ding hinam?

Pakai pehdol hinkho

17 Mitakip Pakaiyin chan ahoppeh dungjui le mitakip Pathenin akoudoh hungjui banga achonlou khoh ahi, hiti dinga chu Houbung jousea chondan kasem ahitai. 18 Cheptansa kikou koiham? Selmang dahen. Cheptan louva kikou koiham? Cheptan din gotda hen. 19 Cheptan jong ima ahipon, cheptan lou jong imachom ahidehpoi, Pathen thupeh nit bou thu ahi. 20 Mitakip akikou pet’a bang cheh-in um cheh hen. 21 Nakikouva chu soh nahim? Ima gel khoh dan, amavang nachamlhatdoh thei le hichu mangcha jon. 22 Ijeh-inem itile soh ahipet’a Pakai dia kikou chu Pakaiya chamlhat ahin, hitobangma chun chamlhat ahipet’a kikou chu Christa soh ahi. 23 Man pea kichosa nahitauve, mihem soh-in pangkit hih-uvin. 24 Sopite, amitakip akikoupet tobang cheh-in hiti chun Pathen angsunga um cheh hen.

Jinei loule meithaiho

25 Nu-ngah ho thudol vang Pakaiya konin thupeh kaneipoi, hijong le Pakai hepina jal’a tahsan tah a keiman kagel khat kasei ahi. 26 Pha kasha chu ahile tulai hesoh gentheina jal hin mihem ama aum bang banga aum jeng ding pha kasai. 27 Numeito kisomlhopsa nahim? Onthol ding gotdan; numeiya kona ongdoh nahim, numei holdan, 28 Jinei jongle chun achonsea vang nahipoi, nu-ngah jeng jong ajineiya chu chonsea ahipoi. Amavang jinei hon tahsa genthei hesoh athoh diu ahin, hichu kapeldohsah nom nahiuve. 29 Ahinla hiche hi kaseipeh nahiuve sopite, phat anaitai, tukal’in jineisa chengse jong jinei lou bangin, 30 akapte chu kap lou bangin, akipahte kipah lou bangin, thil kichohten jong imacha nei lou bangin, 31 vannoiya natong thilbol’an jong imacha bol louhel bangin um hen; ijeh-inem itile hiche vannoi hi alim-agong akitolmang jing’e. 32 Lungkham louva naum diu kadeiye. Jinei loupan Pakai jeng agel’in Pakai lung lhai ding bou agel’e. 33 Jineisan vang vannoi thil ho agel’in, ajinu lung lhai ding agel’in; 34 hijeh chun akikhenna aum’e. Numei jineilou nu-ngah chun Pakai kinbol ding jeng agel jin, tahsa le Lhagaova kithenso ding adeiye; ahin jineisa numeiyin vang vannoi thil ho jeng angaiton ajipa along lhaina ding angaitoi. 35 Hicheng hi nang ho khichahna ding hilouva naphat chomna diu le khen beihel’a Pakaiya kitup keicha naum jing theina diuva kasei peh nahiuve. 36 Koiham khat’in kitimatpi lou dia akiloipi agolnu akivoppidol kitoh lou asah a, akitimlel behseh a, ikhat aso tei ding le, kicheng lhon hen, alungdeiyin bol jeng hen, chonsea ahipoi. 37 Amavang koi hile along sunga dettah a dinga, kitim lelna neilou, alunggul se thununtheiya, alunggil’a pangdet’a agolnu kitimatpi louva koijou chu thilpha bola hi; 38 hiti hin agolnukichenpi pa jong thilpha bol ahinan, ahivangin akichenpi loupan thilpha cheh abol ahiye. 39 Ajipa ahin laisea numei chu akihen ahin, ajipa thi teng vangle a-ongthol ahitan, Pakai lungdei adei dei to kicheng thei ahitai. 40 Ahinla keima ngaiton vang achuti moh um jeng thei le nomsa jonte, ajeh chu keijong Pathen Lhagao change kigel kahi.

1 Corinth 8

Doi houna neh le chah

1 Doihouna kinei neh le chah thudol’a vang, ijakai hetna inei bukimsoh-un ihesoh keiyui. Hetna vang hin mi kiletsah hoithona apensah jin, ngailut nan vang mi akhantousah ji’e. 2 Mi khattou i-them khat hea akigel le ama chun ahet ding dol jeng jong akihet lou lai ahibouve. 3 Amavang koi tobang khat’in Pathen angailut le ama chu Pathen hetmi ahitai. 4 Doi houna kinei neh le chah thudol’a vang vannoiya limsemthu doi hi ima ahipon, chule Pathen khatseh tilou adang aumlou jong i-hesoh keiyui. 5 Ijeh-inem itile vanlaijol le leiset chunga Pathen kisah ho um’u hen lang, hiti chun pathen tampi le Pakai tamtah hijong leu, 6 eiho din vang thil jouse konna le eiho geiya Amaa ihiu Pa Pathen khatseh le thil jouse amavanga um eiho jong Amavanga hing Pakai khatseh Jesu Christa bou ahi. 7 Ahinla mi jousen hiche hetna hi aneipon, abang khat’in doihou lai umchan tugeiya achinjeh-un aneh achah-u chu doihouna kinei mongin agel’un, alung gelnau tha alhemjeh-in hichea hin akisuhboh lo jitauve. 8 Ahin anneh chun Pathen kom einaisah chom diu jong ahipon, ne hih jongleu hen kemchom lou nejongleu hen phatchompi deh lou ihiuve. 9 Hijongle hiche natha neinau hi alhasamte dia kipal lhuhna ahilouna din ching theiyun. 10 Ijeh-inem itile hetna neisa nangin doihouna ankong naum chu lhahsamna neimin namudoh le, lhasam tah ahivanga alung gel’a doihouna an neh ding katilkhou lou ding ham? 11 Hijeh a chu hiche sopi hetnaa lhasam, ajal’a Christa thipeh mi chu nang hetnan asuhmang ahitai. 12 Hitobang hin sopite dounan chonseuvin lang along gel’u hat lou chu suhnat peh leu chun Christa douna chonse nahiuve. 13 Hijeh chun kasopi kipal lhuh louna din, neh le chah a kasopi akipal lhuh ding le a-itih chan geiyin sa asan neh dange.

1 Corinth 9

Solchah khat tha neina jat

1 Chamlhat kahilou ham? Solchah kahilou ham? I-Pakaiyu Jesu mu lou kahim? Nang ho hi Pakai dia katohga nahilouvu ham? 2 Midang din solchah hi hih jong leng nang ho din kahi; ajeh chu solchah kahina mohor chu Pakai hinkhoa nang ho hinna hi ahi. 3 Hiche hi einelkal ho henga kakihonna ahi. 4 Nehna dingle donna dia thunei mo kahiuvem? 5 Solchah dang ho le Pakai sopite chule Cephas banga atahsan numei jia kipuile dia thanei lou kahiuvem? 6 Ahiloule kei le Barnabas hin natong louva kivahna thei tha kanei lhon lou ham? 7 Ama sum kisan’a sepai natong koiham? Lengpilei bol’a aga nelou koiham? Ahiloule kelngoi hon ching’a panga kelngoi noitwi nelou koiham? 8 Hicheng hi mihem ngaidol’a kasei hilou ham? Ahiloule hicheng hi Danthun jong aseihilou ham? 9 Ijeh-inem itile Mose Danthua chun, “Bongchal chang chilpet muh nakan lou ding ahi,” tin akisun’e. Pathenin bongchal ho akhohsah mong ham? 10 Hichengpi keiho khohsahna asei hilou ham? Ajeh chu keiho jal’a kisun ahi; ajeh pen tah chu loukaiyan kinepna neiya akaitei ding, chang chil’an jong chan akisan ding kinem’a achil ding ahi. 11 Keiin nang ho dia Lhagao muchi kitupeh a, nang hoa kon’a leiset thil kakisan lhon didng chu keini dia thupi tah ham? 12 Midang hon nachunguva thu anei theile keihon kahanei cheh joh lou diu ham? Ahivangin keihon hiche thuneina chu kamangpouve; Christa thudol Kipana Thupha imachaa kasuhmo louna diuvin ijakaiya kathoh ham ham jo’uve. 13 Houin lhacha kinbol hon Houin’a kona neh le chah akijon’uva, chule maicham phunga lhachasen jong maicham’a kitoh thil hoa chan aneijiu khu helou nahiuvem? 14 Hitobanga chu Kipana Thupha lhangsam hon jong Kipana Thuphaa kona kivah hingna anei diuva Pakaiyin thu alhuhsah ahi. 15 Ahinla ken hiche ho hi khat cha jong kamangchapoi. Hichengse chu hitia chu kachan theina dia jong kahinsut ahipoi; ajeh chu kakisonna hi khattouvin ahomkeo asosah sangin thileng keidin aphajoi. 16 Kipana Thupha seiphongle jong leng keidia kisonna ahidehpoi, kabollou khoh eikisekhum ahibouve; ajeh chu Kipana Thupha seiphong louva um hileng keidia iti khoh a khoh ding hitam! 17 Ijeh-inem itile keima lungchama bol’a kahile tohman kasan ding hitin, ahinla kachama tong kahiloujeh-in katoh ding lom kin eikisekhumjo ahi. 18 Ahile katohman chu ipiba ham? Kipana Thupha chu manbeiya seiphonga aum theina ding le hiche Kipana Thuphaa keiman katha neina kachan lom chu lhingset’a kangeh louna ding ahi. 19 Keima mi jousea kona chamlhat kahitah vangin mi tamcheh kalah lut theina din kei le kei mitin soha kisemdoh kahin, 20 Judate lah lut theina din Judate lah a Juda mi umin ka-umin, Danthu noiya um miho kalah thei nan, Danthu noiya ka-um lou vangin Danthu noiya umte bangin ka-umjie; 21 Danneiloute kaloilut theina din Dan nei loute henga Dan neiloute henga Danneilou bangin ka-umjin, amavang Christa Danthua um kahin, Pathen Dan mang lou kahipoi; 22 mi lhasamte kalah lut theina din alhasamte henga alhasam bangin ka-umjin ahi; hitia hi mi phabep kahuhhing theina dia mitin henga ijakai kahiji ahi. 23 Aboncha hi Kipana Thupha khohsah jal’a kabol’a, hichea chu chan kaneidoh theina ding ahi. 24 Lhaitet golseh mun’a khu mi jouse alhai cheh vanga mi khat’in bou hatman asanji nahet louvu ham? Hitia chu nasan theina diuvin lhaiyun. 25 Golseh bol jousen ijakaiya atibah chengseu atimhat jiuvin, hiche ho hin kem mangthei lallukhuh san na dia abol’u ahin, eihoa vang kem thei lou ahi. 26 Hitia chu lhaiya kahin, abidoi kicheh neilou kahipon, onghom lai khuttum’a sua jong kahipoi. 27 Midang henga thu kiseiphonglea ajo le kei ma lah louva ka-um louna dia katahasa hi kachup’a thua kanunsah ahi.

1 Corinth 10

Semthu doilim houjeh a gihsalna

1 Sopite ima hetoh louva naum diu kadeipoi, ajeh chu ipuipateu chu abonchauva meilhang noiya kijot’a, Twikhanglen pal galkai ahiuvin, 2 chule abonchauvin Mose nungjui ahiu hetnan meilhang lah le Twikhanglena baptize achangui; 3 abonchan Lhagao an thakhat anekhom’un, 4 abonchauvin lhagao twi thakhat adonkhom’ui; ajeh chu anung jui jing Lhagao songpia kon in twi adon’un, hiche Songpi hi Christa chu ana hi. 5 Ahinla alah-uva mi kon khat chunga Pathen alung lhai loujeh-in gamthip laiya alhukamtauve. 6 Amahon alung gul banguva thilse ilung gul louna diuva thilsoh hichengse hi eiho hilchahna soh ahitai. 7 Pathen lekhabua, “Mipi chu anne ding le twidon din atouvun ahinla lam din akipatdoh kittauve,” tia kisun bang chun alah-uva kon khat bangin limsemthu doi houdauvin. 8 Alah-uva mi phabep’in jonthan hoi apat jeh-uva nikhat sungseh a mihem sang som ni le sang thumin athi lo jeh-in jonthanhoi bol poute. 9 Alah-uva mi konkhat’in Pakai apatep jeh-uva gulsen achuh lihgam jeh-in eihon patep pou hite. 10 Alahuva abang bang akiphin jeh-uva misumang Vantil’in asuh mangjehin kiphin hih-vin. 11 Achunguva thilsoh hichengse hi vetkah dinga soh ahin, chule khang nu nunga mi eiho pho tangna dinga kisundoh ahiye. 12 Hichejeh chun koi hile adinga kigel’an alhuh louna din ching thei hen. 13 Mihem doulel lhepna na chunguva achukhapoi, Pathen tahsan umtah ahin, Nathan adoujou kalval’in lhepna anchunguva chuh sah ponte, chule lhepna chuto kilhon’a nathoh jouvuva nahoidohna diu lampi nasempeh diu ahi. 14 Hichejeh chun ka-ngai tahte, doihou jamsan’un. 15 Lung khomto mi nahijeh-uva kasei ahi, nang hon kigel toh-uvin. 16 Phatthei channa khon’a phattheiboh i-ngeh tengu, hiche hi Christa thisan donkhomna hilou ham? Chu le changlhah ihebaljiu khu Christa tahsa changkhomji ihilouvu ham? 17 Hichea hin changlhah pheng khatseh ahin, eiho tampi jong hi tahsa khatseh ihiuve; ijeh-inem itile ibonchauva changlhah pheng khat changkhom ihiuve. 18 Tahsa dol’a Israel khu veuvin; maicham thilto neho khu maicham thil changkhom cheh hilou ham? 19 Ipi kaseiyem? Doi houna kinei neh le chah chu ikhat ahi katia; ahiloule limsemthu doi khu ikhat ahi katim? 20 Katipoi, chidang namdangten kithoina aneiyu chu thilhaho apeh-u ahin, Pathen apeh-u ahipoi, hijeh a chu thilhaho to chan naneikhom diu kadeilou ahiye. 21 Nang hon Pakai khon le thilhaho khon’a nadonkop thei lou diu, Pakai dokhang le thilhaho dokhanga ankong na-umkhom thei lou diu ahi. 22 Ahiloule Pakai chu thangset sahna dia iphin lung hang diu ham? Ama sangin la ihatjo pouvin!

Ijakai Pathen loupina din bol’un

23 “Ijakai bolngai ahi,” akitin, ahinla aboncha khantouna ahidehpoi. 24 Koiman ama changseh phatna ding hol louvin midang phatna ding holjo hen. 25 Kailhang sajohna mun’a thil kijoh ipi hile hetchetna dia dongtoh le louvin nejengun. 26 “Ijeh-inem itile leiset le asunga um jouse hi Pakaiya ahi,” tin akiseiye. 27 Pathen tahsanlou min an nea nakouva nache nom’u le na-angsunguva aluichan chu hetchetna dongtoh le louvin nejenguvin. 28 Amavang, “Hiche hi doiphunga kithoina sa ahi,” atile, naseipeh pau jeh le lung gel’a hetchetna aumtah jeh-in neh dauvin, 29 nang lung gel’a hetchetna mai kasei ahi pon, khatpa joh a chu kasei ahi. “Iti keima chamlhatna chu mi dang lung gel maiyin atuh oh thei ding ham? 30 Keiman lunglhaisel’a kisanga, thangvah puma kasan chu kon eitaitompeh ding ham?” tin nate. 31 Hichea hinneuvin don jong leu chun nabol jouseu Pathen loupina din bol’uvin. 32 Judate hihen Greek miho hile chule Pathen Houbungmite dia kipal lhuh nan um dauvin lang, 33 keiman kachangseh a phatchomna ding hol louva, ijakaiya mitin lunglhaina kahol’a huhhinga aum theina diu kabol bangin bol’uvin.

1 Corinth 11

1 Keiman Christa umchan ka-jop bang hin keima umchan jom-uvin.

Houkhomnaa numei ponlu khuh

2 Keima neigeldoh jinguva nang ho kapeh kihilna chengse natuh chah jing jeh-uvin nang ho kaseiphai. 3 Hichea hin Christa mitin luchang ahiya, pasal numei luchang chule Christa luchang Pathen ahidol hinahet diu kadeiye. 4 Pasal koi hile lukhuh khuh puma taova ha, ahiloule gaothuseiya ham chun aluchang Christa i-asah lou ahin; 5 numei koi hile lukhuh louva taova ha, ahiloule gaothuseya ham jong chun aluchang ajipa i-asah lou ahi, ama nu chu alikiveltol nu tobangma ahibouve. 6 Numeiyin lukhuh akhuh lou ngal ding le asam kivotol hen, sam kivotol chu numei dinga jachatna ahile lukhuh akhuh a pha jeng ahi. 7 Pasal vangin Pathen lim le loupina aput jeh a lukhuh akhuh lou ding ahi; numeiyin pasal thupi na aphondoh ahi. 8 Ijeh-inem itile Pasal hi numeiya kondoh ahipon, numeijoh pasal’a kondoh ahibouve. 9 Chule numei khohsahnaa pasal kisem ahipon, pasal khohsahna joh numei kisem ahi. 10 Hijeh a chu Vantilte jal’a numeiyin ajipa noiya ahichu aluchanga achin ding ahi. 11 Ahinla Pakaiya hinkhoa hin pasal beiya numei ima ahipon, numei beiyin jong pasal ima ahipoi. 12 Ajeh chu pasal’a numei akondoh banga Pasal jong numeiya peng ahi, ahinla thil ijakai Pathena kon cheh ahiye. 13 Nang hon geltoh-uvin, numei lukhuh khuh louva Pathen henga ataoji chu kilom nam? 14 Pasal dia sam hoisao hi ama dinga nahsahmona ahi, thil umdol mongin jong nahil louvu hiya, 15 numei dia samsao hi thupina ahi umchanin nahil louvu ham? Ipijeh-inem itile samsao chu akhujol dinga kipe ahi. 16 Ahinla koitobang anel’a aumle, hiche thudol’a hin eihon chonna lhongpi mong ineipouvin, Pathen Houbungten jong aneipoi.

Pakai anjonna chonhoilou pho na

17 Hiche hilchahna kapeh diuva hin kaseipha pouve, ajeh chu phat jep jepna dia kikhom hilouvin setna cheh joh dia kikhom nahiuve. 18 Amasa penin nang ho Houbunga nahung kikhopji tengle loitum tuma nakikhenjiu thu kajan, tahjong katahsan thim thim’e. 19 Nalahuva lah thei tah miho ahung kiphondoh a hetdoh a aum theina diuva nasunguva lung gel ngaito chom jong um ding mong ahinai. 20 Ahinla mun khat’a nahung kikhop khom tengule Pakai jan anjon nehna dingdol ahipoi, 21 ajeh chu amitakip’in ama jan an cheh akineh masah jin, abang khat’in kel athoh jin, adang khatma akham avan aum’e. 22 Nehna ding donna ding in neilou nahiuvem? O-le Pathen Houbung chu nahsahmoa bol’a aneiloute jachatsah nahiuvem? Ipi kaseipeh diu ham? Kaseiphat diu ham? Hiche thua vang pahcha pouving’e.

Pakai anjon kiphudoh

23 Pakaiya kona kalah nang ho kapehson’u thuhil chu hiche ahi, Pakai Jesu apehdoh jan chun, aman changlhah alan, 24 phatthei aboh jouvin aheh bal bal’in, “Hiche hi nang ho khel’a pang katahsan chu ahi, neihet jingna diuvin bol’un,” ati. 25 Hitobangma chun jan anneh jouvin khon chu alan, “Hiche khon hi kathisan’a kitepna thah ahi, nadon chan’uva keima neigeldoh jing na diuvin bol’un,” ati. 26 Ijeh-inem itile hiche changlhah naneh-uva hiche khon’a nadon laiseuva ahung kit kahsea Pakai thina chu naphondoh jingu ahi.

Anea lom louvin Pakai anjon aneh

27 Hijeh chun koi hile alam louva changlhah chu nea ha, ahiloule Pakai khon’a kona don hamchu Pakai tahsa le thisan douna chonsea kisim ding ahi. 28 Mihem amacheh kikhol chil hen lang akikhol dungjuiyin changlhah chu nehen, khon’a konin jong don hen. 29 Ijeh-inem itile Pakai tahsa chu ipi kiseina ahi helouva nea don’a chun, aneh a adon’a kona achung thu akitan ahi. 30 Hichejeh a chu nalah-uva mi tamtah chatmoa na-chea ahin, aihmu mil’a jong atam lheh tai. 31 Eiho kikhol chil masa leu hen thutanna ichuh khah lou diu ahi; 32 hijongle vannoi to ithuu akitan tha louna din Pakaiyin eikholchil’uvin eigah chah tauve. 33 Hijeh chun kasopite, anedinga nahung kikhop tengule khat le khat ki-ngah khom’uvin. 34 Nahung kikhop tengule thutannanachuh louna diuvin, koihile agilkel’a chun a-in’a hin kineh hen. Thudang dang ho thudol vang kahung tengle sutoh nang ‘e.

1 Corinth 12

Lhagao Thilpeh ho

1 Sopite, Lhagao thilpehdol helouva na-um diu kanompoi. 2 Chidang namdang nahi laiyuva chu limsemthu doi paomo ho noiya kun’a, hiche ho chun napui mangjiu naheuve. 3 Hijeh a chu kahetsah nahiuve, Pathen Lhagao puihoi mi koiman, “Jesu gaosap chang hen,” atipon, chule Lhagao Thenga konlouvin koiman, “Pakai Jesu,” ati thei poi. 4 Lhagao thilpeh tampi aumnan, ahinla apea Lhagao khat bou ahi; 5 chule lhacha natoh tampi aumvangin Pakai khatseh bou ahiye; 6 chuma le natoh gotchom chom aumin, ahinla Pathen khatseh bou ahin, aman thil hichengsea chu na atohji ahibouve. 7 Amitakip hi japi phat touna dia Lhagao kiphondoh na hetna thilpeh khat cheh kipea ahi. 8 Ijeh-inem itile hiche Lhagaova kona chu mi khat chihna thu kipea, michom khat chu hiche lhagaoma maa kona chu hettheina thu kipea, 9 chom khat jong hiche Lhagaova kona hi tahsan kipea, hiche Lhagaova kon kit’a hi midang khat damsah theina Lhagao thilpeh kipea, 10 midangkhat chu thil kidang bol theina kipea, adang khatma gaothu seitheina kipea, mikhatma chu Lhagao le Lhagao dat khen themna kipea, khat jong paotin tang hetna kipea, khatma paotin tang ledoh jouna kipea ahin, 11 ahinla hichengse bol’a chu hiche Lhagao khatseh chu ahin, aman angaito le adei dungjuiya amichan cheh a ahoppeh ahi.

Tibah aboncha tahsa pumkhat

12 Tahsa pumkhat sunga tibah tampi aumin, tahsa tibah tampi ahivangin tipum khat bou ahi, Christa jong chuti ahiye. 13 Ajeh chu eiho Juda mi hiu hen Greek mi hijongleu hen, soh hiu hen chamlhat hijongleu hen, Lhagao khat’a dia ibonchauva tahsa khat’a baptize changkhom, Lhagao khat’a dia ibonchauva donkhom ihiuve. 14 Ijeh-inem itile tahsa hi tibah khatseh ahipon, tampi ahibouve. 15 Kengphang hin, “Khut kahiloujeh-in keima tipuma kahipoi,” tile hiche vanga chu tipuma hida deh lou ding ahi. 16 Chule bilkol hin, “Mit kahiloujeh-in keima tipuma kahipoi,” tile hiche vanga chu tipuma hida deh lou ding ahi. 17 Tahsa pumpi hi mit hita le hoiya khojahna um ding ham? Apumpin khojahna hita le hoiya gimnam jahna um ding ham? 18 Tua vang Pathenin tibah ho hi khat khat’a tahsa puma adeina laimun cheh a aphulut ahi. 19 Aboncha hi tibah khat seh hita le tipum hoiya umtan tem? 20 Tua vang tibah atam vangin tipum khat bou ahi. 21 Mit hin khut jah’a, “Nangma ka-ngai chatna aumpoi,” ti theilou, chukit le luchang hin kengphang te nijah a, “Nang ni ka-ngai chapoi, “ti thei lou ahi. 22 Chuti titah sanga tahsa pumpia um tibah hatmoa kigel chengse hi akhohjo a pang cheh ahiuve. 23 Eihon jong nahsah louva kigel tibah ho chu ikhohsah jo’uvin, itibah hoimoa um lai jouse jong ijemhoijo jiuvin, 24 hiche kijepna ho chu itibahhoi ho hin angai chapoi. Ahinla Pathenin tahsa pum hi asuton, alhasam tibah ho chu akhohsah cheh joi, 25 hitia chu tahsa pum sunga kikhenna aumdaa, hisanga chu tibah ho khat le khat akigel khoh to cheh na diu ahijoi. 26 Hijeh a chu tibah khat’in athohgim le tibah jousen athoh gimpia, tibah khat seiphat achan le tibah dang jouse jong kipah khom ihiuve. 27 Nang ho Christa tipum nahiuvin, khat cheh chu atibah nahiuve. 28 Pathenin Houbung sunga hi amasatah a Solchah ho, aninaa themgao ho, thum channaa mihil ho, chuban’a bolmo kidang bol ho, abankit’a damtheina lhagao thilpeh chang ho, thilphachom bol ho, vaipo them ho, paochom chom tho thei ho atun ahi. 29 Aboncha Solchah hiuvam? Abonchauva themgao hiuvam? Abonchauva mihil hiuvam? Abonchauva bolmo kidang bol thei hiuvem? 30 Abonchauva damsah theina Lhagao thilpeh neila hilouva ong? Aboncha pao chom thoa hi-ngal louva ong? Aboncha pao ledoh theila hilouva ong? 31 Amavang Lhagao thilpeh lencheh ho hadel’un. Lampi phachehjo kavetsah diu ahinalaiye.

1 Corinth 13

Ngailut

1 Keiman mihempao jouse le Vantilte pao tho thei jong leng, ngailut kanei loule sum-eng dah kivonging le khutbeh kibeng ging bep kahi. 2 Keiman gaothu sei dohna kaneiya thil imguh jouse jong seidoh a hetna jouse kanei thei, mol tolmang helna thei tahsan geiya kanei thei ahin, ngailut kanei loule imacha kahipoi. 3 Vaicha gentheite vahna kanei jouse kato thei, katahsa geiya meiya govam jeng dia kaphal ngam thei ahinan, ngailut ka nei loule phatchomna kaneideh poi. 4 Ngailut nan athoh hat jingin, hejong ahepin, athangsepon, akithang-at pon, akiletsahpoi; 5 alam louvin achonpon, ama chang phat chomna aholpon, alung hang baipon, thil phalou jat amelchihpoi; 6 thildih louva akipahji pon, thudih akipapijie; 7 imajousea athoh hat’in, imajousea atahsanin, ima jousea akinemin, ijakaiya athoh tun tun’e. 8 Ngailutnan beitih neiponte. Gaothu seidoh um jongle beiding, paochom chom tho um jongle hai ding, hetna um jongle bei ding ahi. 9 Ijeh-inem itile ihetnau le gaothu iseidoh nau hi bukim lou ahi; 10 abulhing chamkim ahung tengle akimlou chengse bei ding ahi. 11 Kachapan laiyin chapang thuseiyin kaseiyin, chapang lung gel’in kagel’in, chapang thil ngaiton ka-ngaitoi; pasal lhing kahiphat’in vang chapan lai thil jouse kapaitai. 12 Ajeh chu eihon tugeiya phatvetsunga lim kichen louva imu’u ahin, ajo tah le kimaitoa imudiu ahi; tu chan geiya kahet kimlou ahin, ajo tah le eihet kimsoh banga kahet kimsoh ding ahi. 13 Tun tahsan, kinep, ngailut hicheng thum hi um jing ahin, hicheng lah a ngailut athupipen’e.

1 Corinth 14

Paochom tho le gaothusei

1 Ngailutna del jingun, Lhagaothilpeh ho tup’un lang, ahideh-in Pathen thu seidohna ding hatup’uvin. 2 Paochom thoa thusei chun mihemte koma sei ahipon, Pathen henga asei ahi, ajeh chu koiman ahetpeh poi, aman Lhagaova thuguh asei ahibouve. 3 Pathen thu seidoh vang chun mihemte koma khantouna ding le tilkhouna chule lungmonna sei ahi. 4 Paochom thoa vang ama khantouna ding bou akisei ahin, Pathen thu seidohpa vang chun Houbung akhantousah-e. 5 Paochom thoa thu nasei cheh diu kadeiyin, ahinla Pathen thu naseidoh diu kadei cheh-e, Houbungin akisan’a khantouna anei theina dia aledoh aum loule paochom thoa thusei sangin Pathen thu seidohpa chu gamchengin aphachomjoi. 6 Tun sopite, nahenguva hunging paochom thon thuseiying, thu phondoh ham, hetna ham, gaothu seidohna ham ahiloule hilchetna ham mangin seipeh dau leng ipi naphatchompi diu ham? 7 Hitobang chun hinna bei thil ging thei, kuli ahim, selangdah ham akimut teng agin akicheh loule ipi kitho ahi kon iti ahetdoh ding ham? 8 Ijeh-inem itile sumkon mutgin akichet loule koi galkon dia kigo thei ding ham? 9 Hitobanga chu paochom thoa thu nasei tengu nasei cheng akicheh loule ipi naseiyu kon iti ahetdoh ding ham? Hui lhoh mang ding bep’a aseiyu ahibouve. 10 Vannoiya hin aging thei ogin atam lheh jengin, khat cha jong ajeh bei aumpoi. 11 Keiman hiche ogin chu ipi kiseina ham he hih leng aseipa dia keima pao helou kahitan, amachu kei dinga pao helou ahitai. 12 Hitobang hin nang hon jong aban’a Lhagao thilpeh hol nahiuvin, hichea chun lolhin chehna din Houbung khantouna ding ho hahol’uvin. 13 Paochom thoa thusei chun ipi kisei ham aledoh theina din tao hen. 14 Ajeh chu keima paochom thon tao leng kalhagao vang atao nan, kalung gil’a van aga aumpoi. 15 Ahile iti dingba ham? Lhagaova katao tengle lung gil’a katao tei ding, Lhagaova la kasha teng lung gil’a jong kasah tei ding ahi. 16 Nangin phattheiboh ngeh nan Lhagaovin tao le chun kikhopna mun’a um milham chun ipi naseila helouva nang thangvahnaa chu, “Amen,” iti ati thei ding ham? 17 Nangin phatah-in thangvahna sei jong le chun khatpa chun akhantoupi lou ahi. 18 Nang ho sei sanga paochom thoa thu kaseitamjoh jeh-in Pathen kathangvah-e. 19 Ahivangin Houbung sunga paochom thoa thu cheng asang sang kasei sangin mihil chah na dia kalunggil’a thu cheng nga seh sei kadeijoi. 20 Sopite, lung gel’in chapang hih-un, nunsetna lama chapangun lang, lung gel’in vang pilhinguvin. 21 Pathen lekhabua Danthu kisun: “‘Paochomhel tho ho, Michom beh ho kamsunga Keiman hiche mite henga thu kasei ding, Hijongle amahon kasei ngaipouvinte,’ tin Pakaiyin aseiye,” akiti. 22 Hichejeh a chu paochom tho hi tahsan loulai ho dinga melchihna ahin, atahsansa ho ding ahipoi; Pathen thuseidoh vang hi atahsansa ho ding ahin, atahsan loulai ho ding ahipoi. 23 Houbung pumpi kikhom hen lang amitakip’in paochom thoa thu aseipet’in milhamho ham atahsan lou lai hoham hung lut jengle, a-ngolgam dol’a namudoh lou diu ham? 24 Amavang mi jousen Pathen thu aseidoh pet’in atahsan loulai ham milham khat hung lutkha ta le, ajah chengsen asosol’a aboncha chu a-oimoa pang ding, 25 alungthim selguh jouse kiphongjal’a, chutah le amai tol’a asuh lut jenga Pathen chibai aboh ding, “Tahbeh mongin nalah-uva Pathen aum’e” tia aphonjal ding ahi.

Thil ijakai kitoh chet’a bol

26 Ipi iti dingba ham sopite? Nakikhop khom tengu amitakip, la sah dingnei jong, thuhil ding nei jong, thuphon ding nei jong, paochom tho ding nei jong, ledoh ding neiyan jong, aboncha chun khantousahna jeng hihen. 27 Koiham khat paochom thoa thuseiya na-umu le, mi ni ham, atam penin thum geiyin, khat khat’in kilhau hen chule mi khat’in akisei chu ledoh hen. 28 Pao ledoh ding aum lou vang le Houbung kikhopna ama chu umthim hen, ama changseh le Pathen henga seijo hen. 29 Gaothu seidoh ho jong chu mi ni ham thum ham geiya aseiyuva, adang hon aseiyu ageltoh diu ahi. 30 Amavang mi atou thim khattou henga thu ahung kiphondoh le amasapa chu thip hen. 31 Ijeh-inem itile mi jouse akitilkhouva aboncha alung mon theina diuva nabonchauva khat khat’a gao thu naseidoh theiyu ahi. 32 Themgao ho gaotheina chuThemgao ho thu noiya um ding ahi; 33 ajeh chu Pathen hi lungnoh phahna ding hilouva chamnajo ahibouve. Mithengte Houbung jousea chonna bangin, 34 Houbung kikhopna numeiho umthim beh-u hen, ajeh chu amaho hi thuseina kipelou ahiuve; chusangin Danthun asei bangin thua nungjo diu ahi. 35 I-khat khat hetnom aneiyu jongle a-in’uva ajiteu akidoh diu ahi, ajeh chu numei dia Houbung kikhopna thusei chu jachat um ahi. 36 O-le Pathen thu hi nang hoa kona hungjah doh pan ha, ahiloule nang ho komseh a bou hung lhung ham? 37 Khattou Themgaova kigel’a Lhagao thilpeh changa kibol aumle nahenguva kalekhasut hi Pathen thupeh ahi kihet them hen. 38 Koitobang khat’in anahsah loule ama nahsah louva kikoi ding ahi. 39 Hijeh chun kasopite, gaothu seidoh ding gut’un lang, chule paochom thoa thusei ding jong khamhih-un; 40 amavang ijakai hoitah le kitup keiyin kibol cheh hen.

1 Corinth 15

Thina kona Christa thokit

1 Sopite, nahenguva kaseiphong Kipana Thupha, nakisan’uva pansatna naneiyu chu kahetsahnom nahiuve; 2 nahenguva kathusei phonga chu napandet jingu le hiche vanga chu huhhinga um ding nahiuve, achutiloule mohseh a natahsan’u ahibouve. 3 Ajeh chu amasapen’a nang ho kapeh, kathulah chu ahile Pathen lekhabua kisei dungjuiyin eiho chonset chengse khel’in Christa athin, 4 ama chu avuiyun, chuin Pathen lekhabua kiseibangin nithum nin kaithouvin aumtai; 5 hichun Cephas henga akilah-in, chujouvin som le ni henga, 6 hiche ban hin sopite mi ja nga valjen henga khatvei lah-in akilah-in, alah-uva atamjo tugeiyin ahing nalaiyun, phabep vang athitauve; 7 abanin Jacob henga akilah-in, chule solchah jouse henga jong akilah-e; 8 Akhon nan aphat louva peng tobang kei henga jong ahung kilah-in ahi. 9 Keima Solchah ho lah a alhumpen kahin, Pathen Houbung kabolset jeh chun Solchah tiding jong kakilompoi; 10 hijongle Pathen lungset jal’a keima hiche hi hikha kahibouve, chule alungsetna hi kei dia ima pang lou ahipoi, amaho chengse sangin kaha toh gim cheh jon, keivang kahipoi, eiumpia Pathen lungsetna joh chu ahibouve. 11 Hijeh chun amaho hiu hen kei hileng hitia hi kaseiphonuva, nang hon chutima chun natahsantauve.

Mithiho thokit thudol

12 Christa thinaa kona kaithouva aumdol kiseiphong lea, itia nalahuva koi koihamin mithiho thokitna umlouva aseiyu ham? 13 Mithi thokitna aum loule Christa jong kaithouva umlou hinte; 14 chutia Christa kaithouva aum lou mong le kathuseiphongu jong moh ahin, natahsanu jong pannabei, 15 mithiho kaithouva aum loule Pathenin Christa akaithou lou ahin, akaithouva akiseijeh a Pathen douna hettosaha pang Pathen dia jouthua hettohsah a pang mia eikimandoh diu ahi. 16 Ijeh-inem itile mithiho kaithouva aum loule Christa jong kaithouva umlou ahin, 17 chutia Christa kaithouva aum loule natahsan’u jong phachom lou, tugeiya nachonset chengseuva um jing nalai nahiuve. 18 Chule Christa hinkhoa ihmu milsa chengse jong amangthah gam ahitai. 19 Chutia Christa to hingkhom dia ikinepnau hi tu hinkho sung mai maiya ding ahile, mi jouse lah a eiho hi voujang natna theipen ihiu diu ahi. 20 Tun vang Christa thina konin kaithouvin aumin, a-ihmu milsa ho thokit tei ding photchehnan apangtai. 21 Mihem khat jeh a thina aumdoh bangin, mihem khatjeh-in thina kona thokitna aumdoh tan, 22 Adam sunga pen jeh-in mi jousen athilon, hitobanga chu Christa sunga um jeh a mi jouse kicho hing ding ahiuve. 23 Hiche hi amichang cheh ama phat phat’a kilhah tho ding ahi; Christa hung teng amite hintin, 24 achaina hipaiya, Christan vaihom na jouse le tha neina jouse chule thahat tin cheng asuhmangsoh teng Lenggam chu Pa Pathen apeh ding ahi. 25 Ijeh-inem itile Pathenin agalte jouse ajoa akengto noiya alutsah masangsea Christan lengvai apoh tei ding ahi. 26 Suhmang ding gal nukhah pen chu thina ahi; 27 ajeh chu Pathen lekhabun, “Aman ijakai akengto noiya akoisohtai,” ati. Ijakai athu noiya kikoisoh lah a hi ijakai athu noiya koisohpa tah vang chu kisimtha lou ahi akichen’e. 28 Pathenin ijakai Christa thu noiya alutsah soh teng, Pathen chu abonchakei chunga ahitheina dinga, thil ijakai aboncha anoiya lutsahpa noiya chu Chapa jeng jong lut ding ahi. 29 Mithi ho dia baptize chanpeh ho, ahile ititauvintem? Chutia mithi ho kaithouva aum loule ibol’a amaho dia baptize chang hiuvam? 30 Chule keihon jong ibol’a nidan telchan’a kichat tijat kathoh jingu ham? 31 Sopite, i-Pakaiyu Christa Jesu hinkhoa kanei, nang hoa um kakisonna pan’a niseh a thijing kahi. 32 Mihem hina maiya Ephesus khoa gamsaho to kisat kahile kei dinga ipi phachom ham? Mithi ho kaithouva um lou mong ahile: “Neu hitin dontah tau hene, Jingteng eiho kithita ding’an,” kiti bang chun boltah tau hen. 33 Ima kipui chatvaisah hih-un: “Kivoppi phalouva Minunphat asusei,” akiti. 34 Lung dihtah pu’uvin chule chonset dauvin, ajeh chu abang bang Pathen hetna neilou na-um’ui; najahchat diuva kasei ahi.

Tahsa thokit thudol

35 Mi abang khat’in, mithi ho kaithouva iti uma, chule itobang tahsavou pua kikaithou diu ham?” tinte. 36 Lungthimbei! Nangin muchi natu chu athi loule akehdoh ngaipoi. 37 Nangin natu chu khonunga hung khangdoh aphung lhingset chu ahipon, suhlou chang hihen muchi dang hijongle muchi chang mai mai natulut hibouve; 38 Pathenin adei banga tahsa asempeh a amuchi jat dungjui cheh a tahsa apeh ahibouve. 39 Tahsaphea hing jouse tahsaphe jong akibangpoi; mihem’a achomin, gancha tahsaphe achomin, vachate tahsaphe achomin, nga hoa achom’e. 40 Van tahsa ho aumin, leiset tahsa ho jong aum’e; ahinla van’a ho loupina achomin, leiset’a hoa jong achomin ahi, 41 Nisa loupina achomin, lha loupina achomin, ahsite loupina jong achome. Ahsi khat loupina jong ahsi dang khat sangin achomin ahi. 42 Athi ho thokit jong hitobang chu hi ding ahi. Mon mang theiya kivuilut ahin, mong mang thei louva kikaithou ding ahi; 43 jum le ja thoha kivuilut ahin, loupina kikaithou ding ahi; longdamsa kivuilut ahin, thahat tah a kikai thou ding ahi; 44 tahsavou pua kivuilut ahin, lhagao tahsavou pua kikaithou ding ahi. 45 Chule Pathen lekhabua hitobang hin, “Mihem masa Adam chu tahsa hing khat ahidoh-in, Adam ninapa vang lhagao chohing ahi,” akiti. 46 Amasa chu lhagao vou ahipon, tahsavou joh ahin, aban’a chu lhagaovou ahi. 47 Mihem masa chu leiset leivuiya kon ahin, Mihem ninapa vang van’a kon ahi. 48 Leivuiya chengse chu leivuiya konpa tobang ahiuvin, van’a chengse jong chu van’a konpa tobang ahiuve; 49 leivuiya konpa lim ilo banguva van’a konpa lim jong ilo cheh diu ahi. 50 Hiche hi kasei ahi sopite, tahsaphe le thisanin Pathen Lenggam alo theipon, mon mang theiyin jong monmang theilou alo thei poi. 51 Ven, thuguh kaseipeh-ui, ibonchauva i-na ihmut milsoh lou diu, ibonchauva 52 sumkon gin nukhah pen’a chu mitphet kah, hai khat sunga ikikheldoh soh diu ahi; ijeh-inem itile sumkon hung ging ding chule mithi ho mon mang thei lou dia kikai thoudiu, eiho jong ikikhelsoh kei diu ahi. 53 Ajeh chu mon mang thei hin mon mang lou akivon’a, thi thei hin thi thei lou chu akivon ding ahi. 54 Hitia chu mon mang thei hin mon mang thei lou chu akivon’a, thi thei hin thi thei lou chu akivon teng le Pathen lekhabua kisun thu cheng; “Jo nan thina aval lhumtai, 55 Vo thina, najo na hoiba ham? Vo thina, hoiba ham namidena?” kiti chu guilhung ding ahi. 56 Thina midena chu chonset ahin, chonset thahatna Danthu ahi. 57 I-Pakaiyu Jesu Christa jal’a jo na eipeuva Pathen chu thangvah-in um hen! 58 Hichejeh chun kasopi deitahte, dettah-in suhlong hoi hilouvin pangun, Pakai hinkhoa natoh jouseu chu pannabei ahilou nahetjehuvin, phat jousen Pakai kinbol nan thalhing jing jenguvin.

1 Corinth 16

Judea gam mithengte dia thilto

1 Mithengte dia sumto khom thudol vang chu Galatia gama Houbung ho kathu lhah banga nang hon jong nabol diu ahitai. 2 Kahung teng sumdon khom bol louna din Choldo jou nikhat ni le nang ho amichang cheh-in atojou kham dungyin sepkhen hen khol hen. 3 Kahung teng kilom nasahpen pen’u chu lekha sutpeh ing ting nathilto’u chutoh Jerusalem solnang’e. 4 Keima tah chea aphat jongle keima eikilhonpi nauvinte.

Kholjinna dia Paul thilgon phabep

5 Macedonia gam kachotsoh teng nahenguva hung nang’e, ajeh chu Macedonia gam chonle dinga kigo kahi; 6 kache na chan’a neithah le theina diuva ijem itile nahenguva phat chom khat ka-uma, phalbi sungsea bon kachamden thei ahi. 7 Ijeh-inem itile tuchunga hi palama jotpa ding kadeipon, Pakai phatsah ahile phat chom khatpi nakom’uva nichonding kakinem’e. 8 Ephesus khoa Pentecost geiyin nichong ing’e; 9 ajeh chu keima din natoh machalna din kot lentah-in akihongin, eidouva jong atam lheh jeng’e. 10 Timothy nahenguva ahungle nalah-uva kiphalam louhel’a alhah theina din vephauvin; ajeh chu keibanga ama jong Pakai natong ahi; 11 hijeh chun koiman nahsah mon bolda hen. Kaheng ahung lhun theina din lung mongin hinthah leuvin, ajeh chu kei le sopiten ama ka-anga jingo ahiye. 12 Sopi Apollos thudol vang, sopite to lhon’a nahenguva ahungna dia katem jing ahinan, tupettah a ding vang anompoi, akimandom teng hung nante.

Achaina ngehna le salam

13 Kigingphan, tahsan’a pang det’un, pasal umchan thon, hat’uvin. 14 Nabol jouse ngailut neiya kibol hihen. 15 Sopite, nang ho kangeh nahiuve. Stephanas insung mite hi Achaia gamsunga Pathen tahsan ga masa ahiuva, achamtah-uva mithengte kinbolna kipeh-u naheuvin, 16 nang hon jong hitobang miho le atohgimpi chengseu umchan najop theiyu ahi. 17 Stephanas le Fortunatus chule Achaicus te ho hilama ahungu kakipah lheh-e; ajeh chu amahon nalhin lelna jouseu abulhit’un, 18 ahungu hin kei le nang ho lhagao akidosah lheh jeng’e. Hijeh chun hitobang ho hi hethem’uvin. 19 Asia gama Houbung jousen nasalam’ui. Pakaiya hinkhompi Aquila le Prescilla, chule a-in lhona kikhom Houbung miten hatah-in nasalam’ui. 20 Sopite chengsen nasalam’uve. Kisopi chop thengin khat le khat kisalamto cheh-duvin. 21 Hiche salamna hi keima Paul khut tah a hung kon ahi. 22 Koi hile Pakai ngailu lou chu gaosap chang hen! Maranatha. 23 Pakai Jesu milungset nan umpiuvin. 24 Christa Jesu hinkhoa ka-ngailutnan nabonchauvin umpiuvin.

2 Corinth 1

Salam thu

1 Pathen lungdeiya Jesu Christa Solchah Paul le sopi Timothyn Corinth khoa Pathen Houbung le Achaia gamsung pumpia mitheng jouse henga, 2 i-Pau Pathen le Pakai Jesu Christaa konin lungset le chamna hung lhung hen.

Genthei thoh nunga Paul’in Pathen athangvah

3 Pakai Jesu Christa Pa Pathen, hepina chengse Pa le lungmon konna Pathen chu phattheiboh chang hen. 4 Aman genthei hesoh kathotna chan’uva eilha mon’uvin, keihon jong Pathen’a kamu’u hiche lungmonna chun genthei hesoh toh kha jouse kalhamsah theiyui; 5 Christa thoh gentheina twikhanglen tobang chun keiho jong eichup jengu leh, Christa jal’a kakisun’u lungmon nan jong eichup diu ahi. 6 Keiho genthei hesoh thoh a eikilhau le, hichu nang ho lhamonna ding le huhing nachanna diu ahi; keiho eikilhamon’u l ekeiho thoh hesoh tobang nathoh nauva lung nengtah a nathoh jeh-uva Pathenin nalhamonsah theina diu ahiye. 7 Chule hesoh gentheinaa chan naneiyu l elungmonnaa jong chan nanei diu kaheuvin nang ho dinga kakinep nau adet jinge. 8 Sopite, Asia gam’a kachunguva hesoh gentheina hung chu hi helouva naum diu kanompoi; kathauvin ajo kalval’a genthei hesohna nasa tah-in eidelpha jeng phat’un hing din jong kakihol tapouve. 9 Keihon kachunguva hi thina dinga thu kitan ngap’a kagel leuvu ahitan, amale keiho le keiho kisong louva mithi ho kaithou Pathen’a kakisonna joh diuva chute ahibouve. 10 Pathen chun hitobang, thina khoh tah a kona chu eina huhdoh-u ahin, ei huhdoh kit diu ahinai, tukal’a jong eihuhdoh diuva kakinep nau hi, 11 nang hon taonaa neihu diu ahin, chutia chu mi tamtah-in eitaopeh nau donbutna eikipeu phattheina chengse jal’a chu mi tampin thangvahna anei diu ahi.

Paul kholjin kivoh chon

12 Kakison nau chu hiche hi ahi: vannoiya kachon namlhah-u le nang ho kabolnau hi tahsaphe chihnaa kabol’u ahipon, lung thengsel le lung navahpel’a Pathen lungset jal’a bol kahiu kahet themnau lung gil hi hettohsah a pang ahi. 13 Ijeh-inem itile keihon nasim thei diu le nahet diu tilou ima kasunpouve, nahet khongsoh diuva kakinepna chu, 14 keihon jeng jong neihet phol phah vangun, keihon nang ho kakisonpi banguva hi Pakai Jesu Nikho ni vang le neikisonpi dingu ahi. 15 Hiche ginchatna jal’a hi lungsetna avel vel’a nanei theina diuva nang ho henga hung masah ding kanatup ahin, 16 Judea gam’a neihung thah theina diuva nang ho hinhopaa Macedonia gam jot ding, chule Macedonia gama kona hinhopa kit ding kagot ahi. 17 Hiche bol kagot’a doi beiya lung linglao beh kahim? O-le tahsaphe lunggel’a, “Heng’e, heng’e,” moh tia, “Ahipoi, ahipoi,” moh ti ding kagot beh ham? 18 Pathen tahsan umtah ahin, nahenguva kathuseiyu chu, “Ahinai, ahipoi,” moh ti thei ahipoi. 19 Ajeh chu kei le Silvanus chule Timothy, keiho seiphong jal’a nasunguva cheng Pathen Chapa Jesu “Ahinai, ahipoi,” moh ti ding ahi pon, ama sunga chu, “Kanom nai,” tina umdoh jeng ahi. 20 Ijeh-inem itile Pathen thutep chengse chu amasunga hi, “Ahinai,” kitia; hichejeh tah a chu Ama jal le eiho jeh a choi-at ahichehna dia Pathen henga, “Amen,” kitiji ahi. 21 Christa hinkhoa dia keiho le nang ho gom’a eisudet’uva thao einu’va chu Pathen ahin, 22 Aman eiho mohor einamkhum’uva, lhagaova khamgahna chu i-lungthim sunguva eipeh-u ahi. 23 Nang ho kakhohsah jeh a tugeiya Corinth a kahung lou hi kahinkhoa ahetoh Pathen pan’a ka kou ahi. 24 Natahsan thu’uva kipuchansah kahipouve, nakipana diuva natoh khonpiujoh kahiuve, ajeh chu tahsanin nadingdet nauve.

2 Corinth 2

1 Lung phatmo sah dia nahenguva hung kit lou dinga kei le kei kiphatsah kahitai; 2 ajeh chu nasulung hangu leng, hiche kalung phatmo sah ho tilou chu konba eikipasah tan tem? 3 Hijeh a chu kahung teng le eikipasah dinghon eilung phat mosah louna diuva hiche hikahinsut ahi, ipijeh-inem itile kei kipana chu nang ho nabonchauva nakipa nauva kaginchat tahbeh ahiye. 4 Nang ho lung phatmosahna ding hilouva thalhingset’a nang ho dia ngailutna kanei hinahetdoh theina diuva, lung hesoh genthei tampi, lungkham chule mit lhi long longa hiche hi kahinsut ahibouve.

Doumah bolpa ngaidamna

5 Koiham khat’in lung phatmona aboldoh le kaima eilung phatmosah ahipoi, nabonchauva nabol khoh behseh louna diuva miphabep nalung himosah-u ahibouve. 6 Hitobang thua hi japin ama a-oimo chu phaset ahin, 7 nang hon ama chu lung gim behseh a, alhah lhop pailouna dinga na-ngaidam’uva natil khoujoh diu ahi. 8 Ama dia ngailutna nakicheh sah diuva ka-ngeh nahiuve. 9 Nangho imalam jousea thua nungte nahiu photchetnaa akipatepnau chu hetdohna dinga hiche hi kahinsut ahinai. 10 Nang hon mi khattou na-ngaidamu le kenjong ama chu ka-ngaidam thouve, hitia chu khattou ka-ngaidam le Christa angsunga nang ho jal’a kabol ahin, 11 Satanin eijotho louna diu ahi, ajeh chu eihon ama dohna lungthim ihaiyu ahipoi.

Troas a Paul lunggim

12 Christa Kipana Thupha seiphong dia Troas a kahung chun Pakai dinga katohna dingkot lent ah-in akihonge; 13 ahivangin kasopi Titus kamudoh loujeh-in kalungthim akicholdo theipon, hijeh chun miho kalhadoh-in Macedonia lama kahungtai.

Christa jal’a galjo

14 Christa hinkhoa galjonaa eikijotkhompi jinguva, keiho mangchaa Christa hetdohna le phondohna chu muntin’a gim namtui banga either chansoh-uva Pathen chu thangvahin um jing hen. 15 Pathen koma kei ho hi Christa dinga huhinga umsate heng le amangthah ding ho heng geiya jong gim namtui kahiuvin, 16 athi dingin thipo kanam’un, ahin gdin jong gim namtui kanamuva. Hicheng dinga chu akhomto soh thei koiham? 17 Keiho vang Pathen thu kiveina mang miho tobang kahipouve, lung thengseljoa Pathena kona Pathen angsunga Christa to hingkhoma thusei kahi bouvui.

2 Corinth 3

Kitepna Thah lhachaho

1 Keiho le keiho kiseipha pan kit kahiuvem? O-le konkhat banga nahenguva ding hihen nang hoa kon hijongle seiphatna lekha thot neilou khoh mi kahibeh-um? 2 Nang ho hikeiho dinga lekha thot, ka lunggil’uva kisun’a, mitinin asim’a ahet nahiuve; 3 keiho lhacha kapan’uva nang ho hiChrista lekha thot kichentah nahiuvin, songpheng chunga lekha twiya kisun ahipon, mihem tahsa lung chang’a Pathen hing lhagaova kisunjo ahi. 4 Hiche kisonna hi Christa jal’a Pathen henga kaneiyu ahi. 5 Keihoa kona bulhing dinga seithei, keiho chamin ima kahipouvin, kabulhin nau hi Pathena konjo ahin, 6 Aman keiho hi jih tho Danthu hilou Lhagaova kitepna Thah kinbol lhacha theiya eisem’u ahi; ajeh chu jih tho Danthu chun thina asodoh-in, Lhagaovin vang mi ahinsoi. 7 Thi lo na ding bep’a akin kibol songpheng chunga kijih tho Danthu jeng bon chubanga aloupia, amaivah loupina chu amolsuh suh ahi vanga, Israel chaten Mose mai avet chang ngam louvu le, 8Lhagaova dinga lhacha kinbolna chu ijat’a loupe da ding ham? 9 Themmo chan na dinga lhacha kinbolna bon aloupi le them channa dinga lhacha kinbolna loupina chun tamtah a akhokheljoh ding ahi. 10 Hichejeh a chu loupe tah akigel chu hiche hin aloupina adeh lhah phat’in aloupi thei tapoi. 11 Ijeh-inem itile aloupina molsuh suh bon athupi le tonsot’a loupe den jing jeng ding chu gamchenga thupijo ahi. 12 Hiche kinepna hi kanei jehuva hijat vei hi phongtah a hakatji kahiuve. 13 Amaivah molmang hel Israel chaten amu louna diuva ponlu kikhuhji Mose tobang kahipouve. 14 Ama ho chu alunggel’u atah jo cheh tai. Tuni chan geiyin Kitepna Lui asim tengulehiche ponlukhuh chu kihohdoh louvin aumden jing nalaiye; ijeh-inem itile Christa to hinkhom tengle bou kihohdohji ahi. 15 Tuni geiya hiche Mose Danthu chu asim tengu le alungthimu pon lukhuh kikhujol banga kikhu khumji ahi. 16 “Aman Pakai heng ajot lut teng ponlukhuh chu ahohdohji,” akiti. 17 Ahin Pakai chu Lhagao ahin, Pakai Lhagao umna chan acham-lhat aum’e. 18 Keiho maikhu lou chengse, phatvet’a kive banga Pakai loupina kimusah ho hi Pakai kisah Lhagao chun loupina khat’a kona loupina cheh lim khat’a eikheldoh-u ahitai.

2 Corinth 4

Leibel’a Lhagao gou kikhol

1 Lungset vanga hiche lhacha kinbolna kanei khah jeh-uvin keiho kalhadah hih hel’ui; 2 jachatna thilguh chengse kapai lhauvin, doha lungthima chon lou, Pathen thu seilep louvin Pathen maiya mitin vetchah dingin phongtah-in thudihin kachon’uvin, keiho le keiho kiseiphatna kabol’uve. 3 Ijentia ka Thupha seiphongu jong hi akikhu mang akisel ahijongle amangthah dia bou kikhu mang hiding ahin, 4 amaho chu hiche vannoi pathenin Pathen lim mong monga hung um Christa loupina Kipana Thupha khovah amu thei louna diuva atahsan lou nau lungmit asuhchot peh ahi. 5 Ijeh-inem itile keiho le keiho kiseiphongle kahipouvin, Jesu Christa chu Pakai ahije kaseijuva, chule Jesu jal’a keihojoh hi lhachaa pang kahidolu kaseiyu ahi. 6 Ajeh chu, “Muthim lah a konin kho hungvah hen,” tia Pathen ma ma chun Christa meiya Pathen loupije hetna khovah chu keiho lungthim ahinsalvah sah ahitai. 7 Keihon hiche leibel’a gou kachin’u hi thaneina chungnungpen chu keihoa kon hilouva Pathena hungkon ahije photchetna ahi. 8 Hoima lam jousea eikineh chintouvin, ahivangin eikisu ngem deh pouve; lung dongin ka-um’uvin, ahinla kalung lhadeh pouve; 9 eikinojam leuvin, ahivangin donlouvin ka-umdeh hih-ui; eikijep lhu-vin, ahinla eikisumang deh pouve; 10 Katahsauva hi Jesu hinna akiphondoh theina dingin katahsauva hin Jesu thin achu kapole jingui. 11 Thitheina katahsauva hi Jesu hinna akiphondoh theina din, kahin vangun Jesu jel’in athi dingin eikipedoh jinguve. 12 Hichejeh a chu keiho sunga thinan na atoh jinga, nang ho sunga hinna um’ah ahi. 13 Pathen lekhabun, “Katahsan jeh a thu kasei ahi,” ati bang chun, keihon jong tahsanna Lhagao chu kaneiyuva, hijeh a chu keihon katahsan’uva thu kaseiyu ahi; 14 ajeh chu Pakai Jesu kaithoupa chun Keiho jong Jesu to eikaithou thauva nang ho to eihin dinkhomsah diu kaheuve. 15 Lungsetna ahapunbe cheh a mihon Pathen loupina athangvahbe chehna diuva ijakai aboncha nang ho jal’a ahisoh keiye.

Tahsan’a hing

16 Hichejeh chun kalung lhapouve, kamihem tahsau po nung hi akem jing vangin, kasung lam’u hi ani nin athah cheh cheh jeng’e. 17 Ijeh-inem itile hiche jangkhai cha phat chom khat kathoh gim nai hin hachunga chungnungjoa tonsot’a ding loupina eisemdoh peh diu ahi; 18 ajeh chu mithei thil kakat pouvin muthei lou thiljoh kakatjo’uve; ijeh-inem itile muthei thil chu phat chom khat’a ding ahin, muthei lou thil chu tonsot’a ding ahiye.

2 Corinth 5

1 Ajeh chu hiche ponin tobang kaleiset in’u hikiphe lha jongle khut’a sah lou Pathen’a kon tonsot in van’a kaneiyu kahenauve. 2 Hiche ponin sunga kap le penga ka-umu hi khut’a sah lou van in’a chen kal ngah lel kahiuve; 3 hichea chu kachen tengu le sagoh keova eiki-imsah lou diu ahitai. 4 Ijeh-inem itile hiche ponin a kachen laiyuva hi pohgih hahsa pao kap a peng kahiuvin, hichu katahsan in hi paidoh jeng ding deina ahipon, van in’a chenjoh a hin nan thina aval lhum ding deina ahijoi. 5 Hiche dinga chu Pathenin eigontoh-uva khamgahna Lhagao geiya eipeh-u ahiye. 6 Hichejeh a chu lung ngam’a um kahiuvin, chule hiche tahsaa kachen laiseuva hi Pakaiya kon’a gamla tah a kihindal kahi kaheuve. 7 Ajeh chu tahsan’a khosa kahiuvin, mitvet maiya kahipouvin ahi. 8 Kalung ngamlo nau chu hiche tahsa in’a kachenu hi dalhaa Pakai in’a chen ding gam chenga deijo kahi tauve. 9 Hijeh a chu hikom in’a cheng ung, chukom in’a chensa jong leuveng Ama lung lhaisah dingbou katuppi pen’u ahi. 10 Ijeh-inem itile mitinin tahsaa athilbol pha le se tohman akisan chehna dinguva ibonchauva Christa thutanna masanga ikilah cheh diu ahinalaiye.

Kihouchamna kinbol

11 Pakai ginje kahetjeh-uva miho katemu’va thunun kagot’u ahin, Pathen dia vang hetsa kahiuvin, chule nang hon nalunggil’uva neihet diu kakinem’e. 12 Nahenguva hung kiseipha ki tkahipouve, mihem lungthim lam velouva maivet’a ki song ho chu nadeh jouna diuva kei ho neikisonpi theina diuva phat kapehjoh-u nahiuve. 13 Ajeh chu kangol’ule Pathen ding ahin, kachihule nang ho ding ahi. 14 Christa ngailutnan eituh khom jeng jeh-uva japi khel’a khat athitah jeh a, japi thisoh dol’a ki-ngaito ahin, 15 hijeh a chu ahing ho chu amahoding mai maiya hing hilouva, amaho dia thia thoudoh kitpa dinga chu ahin theina diuva amaho khel’a Ama chu thia ahitai. 16 Hichejeh chun tukal’a lhah koima tahsa dol’in kahetapouve; Christa jong tahsa dol’a kanahet nau um jongle tukal’in vang chutin hetapou vinge. 17 Hijeh a chu koi hi le Christa to hingkhom chu thilsem thah soh ahitan, atil’a kisem masa chengse kitolmang ahitai, ven thil thah asohtai. 18 Hiti ijakai hi Christa jal’a keiho le ama kihouchamna boldoh a, chule hiche kihouchamna dinga lhacha kin eibolsah-uva, Pathena hungkon jeng ahi. 19 Ijeh-inem itile Pathenin Christa hinkho sunga chu vannoi le ama kihoutohna asem’a, asuh khelna chengseu asimpeh daa, chule hiche kihouchamna thu chu keiho sunga eikhumpeh-u ahi. 20 Hijeh a chu keiho Christa dinga palai kahiuvin, Pathenin eimanchah-uva a-ngeh ahin, keihon Christa jal’a kathum nahiuve, pathen to kicham’un. 21 Chonset helouhelpa chu, Ama hinkhoa Pathen dihna ichan theina diuvin eiho khel’in, Pathenin chonsen asemtai.

2 Corinth 6

1 Amato tongkhom kahijeh-uva Pathen lungsetna namu’ chu mohseh nahisah louna diuva katem nahiuve; 2 ajeh chu Pathen lekha bun: “Lah phat chan nataona kasangin, Huhhing nikhon nangma kahui,” ati. Ven tu hi lah phat mong ahin, ven tu hi huhhing nikho ati. 3 Lhacha kinbolna hi nolnabei ahina dinga koima masanga kipal lhuhna dingkikoi lou ahi. 4 Ahin Pathen lhacha kinbol kahinauva keiho le keiho ijakaiya kipah chaa, lung dehat tah a hesoh genthei jou se le thoh hahsa, tosetna tin cheng, 5 eikivohna jouseu, songkul lutna ho gei, japi eikitilset pehna jouseu hi le, choldo lou, ihmu lou le nelou chalou kahiuvin; 6 lung thengsel le hetna, thoh hatna, khotona, Lhagao Theng vangin ngailutna giltah-in kaneiyun, 7 thudih le pethen tha hat’in kapngun, dihna galvonin kamangun, jel le vei kahongui; 8 jabolna hihen jumso na hijongle, seiphatna ahiya seisetna ahiya, thudih kaseiyu jongle jouseiyin eiki bol’uve; 9 suhmilsa kabah vangun kihedoh thouvui; athisa kabah vangun, ven kahing jinguve; eikibolgeh lheh kabangun, eikithat paipouve; 10 lunghem tah eikibahsah vangun kakipah jingui; vaicha lheh kabangun ahila mi tamtah kahaosah tauve;imacha neilou kabanguvin ahinla ijakai kanei kimsoh nauve. 11 Vo Corinth mite kalungthimu lentah a kihonga, nahenguva kambem bema thu kaseiyu ahi. 12 Nasunguva lungnoh phahna ima kibol lou ahin, nang ho kilhaset sum’a kisunoh phah lou nahiuve. 13 Chate henga thusei banga kasei ahi, keiho bol lethuh nan nalungu hong len’uvin.

Pathen hing Houin theng nahiuve

14 Atahsan lou ho to namkoljon khat pokhom hih-un, ajeh chu adih le dan dih lou ipia kikop theiya, o-le khovah-in muthim to ipi aneikhom beh am? 15 Christa le thilha ipia kihou theiya, 0-le atahsan le atahsan lou ipi chan kihom theibeh am? 16 Pathen Houin le doilim sem thu ipia kihoutoh theiyem? Ijeh-inem itile eiho Pathen hing Houin ihiuve. Ajeh chu Pathenin hitin aseiyin: “Keima alah-uva kachen’a ka lhat le ding, A-Pathenu kahiya, amaho kamite hidiu ahi. 17 Hijeh chun miho lah a konin hung potdoh-un, Amaho chu dalhauvin,” tin Pakaiyin aseiye. “Thilboh chu tongkha hih-uvin, Keiman kalamto ding nahiuve. 18 Keima na-Pau hing ting, Nang ho kachate nahi diu ahi,” tin Hatchungnung Pakaiyin aseiye.

2 Corinth 7

1 Ngaitahte, thutep hicheng hi ineijeh-un tahsa le Lhagao suboh thei jousea konin kisuthengu hitin, Pathen ging’a then chamkimsoh a hin ding ngaitou hite.

Corinth Houngbung lungheijeh a Paul kipa

2 Nalung neihonpeh-un, koima adih louvin kabol pouvin, koima kasuse pouvin, koima kichungtoh lapnan kabol pouve. 3 Nang ho mosona dinga kasei ahipoi, ithiu le thisap ding ihin’ule hingsap dia kalunga kavop jingo thu kasei ahitai. 4 Nahenguva ngamtah tah a kasei ahin, kisonpitah tah ajong avumval’in kakipah lheh jeng’e. 5 Macedonia kahungu chun tahsaa choldona neilou kahiuvin, muntin, a gentheina jeng ahin, polama mito kinahna jeng lung sunga kichatna jeng ahi. 6 Ahivangin lung lhadaisa ho tilkhou kit thei Pathenin titus hung lhun chu tilkhou nan eineiyui. 7 Ahung mai mai jeh hilouva, nang hoa kona lungmon thu ahin lhut, itobanga neimu nom’uva, neigimpi dol’u chule neihuh nom dol thuu aseijeh ahiye. Hiti chun eikihapasah cheh jeng’e. 8 Lekha kahin thot chun nalunghemsah jengu jongle kakisih dehpoi; hiche lekha thot chun phat chom khat’a ding hijongle nalunghemsahu kahetdoh a chu nommo kasha ding sol ahitan, 9 tun vang kakipah tai; amavang nalunghemu kakipapi ahipon, nalunghemu chun lungheina asosah jeh ahi; Pethen deilama lunghemna chu natoh-u ahitan, kei ho jeh a manthahna ima naneipouve. 10 Pathen deiya lunghem chun lungheina asojin huhhinga nasodoh jin ahi; leiset thudol’a lung gim nan vang thina asodohji ahibouve. 11 Pathen deiya lunghem nan itobang tah a nachunguva na atoh ham ven, lunghanna, kichatna, nagichatna, tom ngaina, thu adih lama kitan ding deina asosah tai. Hiche thu dol’a chun themmonabei nahiu akichetsahtan ahi. 12 Hijeh chun lekha chu kahin thot jeng vangun, adih lou bolpa le adih bolpa jeh a kahin thot ahipoi, Pathen maiya keiho dinga itobang gunchu nahiu phondohna dingjoh kati ahibouve. 13 Hichejeh a chu eikitilkhou chom’uva ahi. Keiho cheng kitilkhouna chungvuma Titus lhagao nakidosah jehuva akipa jeh chun keiho jong kakipah chom lheh jenguvin ahi. 14 Ama koma chu nang ho kakisonpiuva ahile nang hon neijumso dauvin, ajeh chu nahenguva thutah jeng kaseiyu ahin, hiche Titus henga kakison nau chu atahje kiphonchen ahitai. 15 Itobangtah a thua nung dia kigosadema um nahiule kithing thinga gingkhen cha ama nalamtou ageldoh chanin nakhoto nau akhang khang jeng’e. 16 Nachunguva ijakaiya kakisonpi thei jeh-uvin kakipah lheh jengin ahi.

2 Corinth 8

Christian thilpeh

1 Sopite, Mecedonia Houbung ho kipe Pathen lungsetna hi nahet diu kadeiye; 2 ajeh chu gim genthei nasatah thoh a patepna atokhah vangun hitobang lah a hin akipanau achung chonjo nalaiyin, avaichat lheh vangun teptena val’in hongphal tah-in thil apejengui. 3 Hetoh a kasei ahi athauvin ajochan, akalval geiyin jong apeuvin, achamtah-uvin 4 mithengte dia lungsetna lhacha kinbolnaa chu pankhah tei deinan kahenguva a-ngeh-uve. 5 Hiche hi kaginchat kalval’u ahitan, amasan amaho tah Pakaiya akiphaldohuvin, chuin Pathen di bangin keiho henga akipedoh jengui. 6 Hijeh a chu hiche lungsetna kin anabol pansa Titus chun nang ho lah ajong abol molsoh dinga katilkhou jingo ahi. 7 Keihon katildoh-uva ijakaiya nahaodoh-uva tahsan, thusei, hetna lengailutna tilkhouna tin chenga nabulhin banguvin, hiche lungset thilpeh a jong hin bulhingsoh-uvin. 8 Chondan dungjuiya kasei ahipoi, na-ngailut nau atahbeh ahidol kholdoh teina di amidnag ho mi kithopinaa athanop dol’u kasei ahibouve. 9 I-Pakaiyu Jesu Christa lungstna chu naheuve; haotah ahin, avaichatna chu nang hon nahaolo nadiuvin nang hojal’in amatah vai chan ahung umdoh tai. 10 Hiche thua hin kagel seipehung’e: ningkum chun nang ho mi kithopi nom le akithopi masapen nahiuve. 11 Tua hi natoh patsau chu nachaisoh ngal diu ahi. Nang ho mi kithopi tha nom nahiuvin, hijeh chun nathauvin ajochanin bulhitsoh jenguvin. 12 Mihem khat’in kithopina thilpeh apeh nomten le Pathenin apeh ding jet mong teptena aneipon, apeh ding jat bep chu asanpeh ahibouve. 13 Midang ho pohgih ngai janga nang ho pohgih punsah dingngaito kahipoi. Chamgol’a tetph chet ding ahijoi. 14 Tulai nang ho neival chu amaho lhahsam hunan kimangle nang ho nalhahsam tengu amaho neival’a kidit thei ding, hitia chu chamgaol’a kisutoh dingahi. 15 Pathen lekhabun: “Atam kilopan jong aval’in akilah dehpon, Lhomcha kilodoh pan jong lhasam chomin akilah dehpoi,” ati bang chu hi ding ahi. 16 Titus lungthim sunga nang ho khoto theina tilkhouna chutobang khumpeh Pathen chu thangvah-in um hen! 17 Nahenguva hung dinga ka-ngeh-u le nom’a ahitan, hiche jong hi achamtah a nahenguva hung dia kigosademsa anahitai. 18 Houbung tin’a Kipana Thupha asei phong jeh a minthangtah sopi khat jong titus ti kahinsol thauve. 19 Chutijeng goh ahipon, Pakai ama tah loupina dinga hiche thilpeh lakhom ding le keihon jong kakithopi nom’u vetsahna ding monga kalhonpi le diuva Houbung hon alhendohdau ahiye. 20 Hongphal tah a kitohdoh hiche thilpeh kabol lenauva hi koiman eidem louna diuva chingthei tah a thilbol kahiuve. 21 Thilpha bol katup’u hi Pakai mitmu maiya hilouva mihem mitmua jong ahi. 22 Keihon mun tamtah a aguncheje kaphottohsau isopiu khat jong amani to kahinsol thauve, nachunguva ginchatna lentah aneijeh a tujenga jong kitlkhoujah jeng’ah ahitai. 23 Titus vang hi nang ho dinga kapankhompi le katoh khompi ahin, isopite niu hi Houbung ho solchah, Christa loupina ahilhon’e. 24 Nang hokakisonpiu adih dol Houbungho maiya phot chet ahina din amani hi na-ngailut nau kichentah-in chansah-uvin.

2 Corinth 9

Mithengte dia thilto

1 Mithengte kinbol thudol vang hinahenguva lekha hinsut ding valjo din bon kagel’e. 2 Ajeh chu mi nakithopi nomjeu kahenai; hijeh a chu kisongtah a Macedonia mite henga jong ningkum’a apat nang ho Achaia miten thil ijakai gonsadema nakoiyu thu kasiepeh ahi. Natom nagi vauvin amaho geiya atildoh ahiye. 3 Nachunguva kakison nau chu thu hom keo ahilouna dinga sopi cheng hi kahinsol ahi; kasei jing bangin nepeh diu gonsademin um’uvin. 4 Macedonia miho to hung lhonin lang kigo louva na-um’u hung toh kha leu, nang ho jum ding katipon, chubanga kipaopi chu kajachat lo diu ahi. 5 Hichejeh a chu nakitepnau thilpeh chu gonsa koi dinga hiche sopite hi nahenguva hung masa ahiuve; thilpeh ding chu gonsan ana umle lhan lhaisel’a napeh-u kichen ding, cham louva kila hilou ding ahi. 6 Hiche thua hin alhom tun alhon at ding atam tuna tam at ding ahi. 7 Kisih pum le peh lou khoh man hilouvin mitinin along dei bang cheh a apeh ding ahi; ijeh-inem itile lung lhaisel’a pea chu Pathenin angailui. 8 Imalam joousea ijakaiya bulhingsoh nahiuva, ntoh theina diuva Pathenin lungsetma lhingset, aval hel’a jong napeh theiyu ahi. 9 Pathen lekhabua kisun: “Aman atheijal’in vaichate atoi. Ama dihna chu tonsot’a um jing ahi,” ati bangin. 10 Muchi tupa muchi pea, anne dingpa changlhah pea Pathenin muchi napeuvin tin, akhandohsah ding, anthem chan nau ga chu apunsah ding ahinai. 11 Keiho jal’a nathipeh chengseu jeh a chu mi tampin Pathen athangvah theina ding le phat tin’a hongphal tah a napeh jingna diuva Pathenin hahaova nahaosah diu ahi. 12 Ipijeh-inem itile hiche lhacha kinbolna hin minthangte ngaichat atokeo jong ahipon, mi tamtah a kona Pathen thangvahna avum val’a umdoh lo ahitai. 13 Hiche lhacha kinboln ale Christa jal’a Kipana Thupha tahsan thua nanun’u to chule ipi hile nanei chasun’u ama ho le midang ho geiya nakihoppi jeng jeh-uvin Pathen achoi-an tauve. 14 Pathenin nachunguva lungsetna nasatah aneijeh chun amahon jong lung gilten’a nataopeh diu ahi. 15 Athilpeh sei thei louhel jeh hin Pathen thangvah-in um hen!

2 Corinth 10

Antoh chunga Paul kihonna

1 Hiche hi keima Paul, kimaitoa kimu teng moh nem nem a, naum lou nauva hakat’a kithangpan, Christa nun nem le khoto na pan’a katem nahiuve. 2 Tahsaphe ngaichat kihol le dol’a eiseiho’u henga hakattah a thusei ding dol’a kagel hikahung teng kamanchah louna dinga nahenguva katao tho ahi. 3 Tahsaphe vou pua vah le vang kahi nauvin, amavang tasaphe dinga galsat kahipouve. 4 Ijeh-inem itile kagal manchah ho’u hi tahsa gal manchah maimai ahipon Pathen dinga thilbol theitah kulpi suhset theina manchah ahibouve. Jouthua kinelna joouse kadeh lhauvin, 5 Pathen hetdohna douna dinga insang bang kitouson son ho geiyin kaloi lhu’uvin lung gel ngaito nei jouse gal-hingin kaman’uvin Christa thun kanunsah-uve. 6 Nang ho thua nanun bulhinset tengule thua nung lou jouse talen pe dinga kidgosadem kahitauve. 7 Maikoh a thlho veuvin. Khattou Christa mia akigel le, amatah chun hiche hi gel kit hen, ama Christa mi ahibangin keiho jong kahiuve. 8 Nang ho suhmangna ding hilouva, nang ho sahdohna dinga Pakaiyin eipeh katha nein au hi kisonpi val jep jong leng kakisih deh poi. 9 Lekha thot hoa chun nang ho kichatsah go mai mai hidang’e. 10 Khatouvin, “Paul lekha thot ho hi anasa theiyin ahuham theiye, ahungtengle la tahsa kamsel dol, athusei pannabei ahibouve,” tinte. 11 Hitobang gelpa chun hiche hi kihet hen: lekha thot ho’a nakibol nau banga chu nalah-uva aki-um teng jongle nakibol diu ahithouve. 12 Amavang mi amachang kichoi sang ho to kibangin kakisei nom hih-un, tejong kakite nagp cha pouve; amaho le amaho akitekah tengule hetna beiya ngol’a ahitauve. 13 Keiho vang eiteppeh nau gamgi kalval’in kisongpou ving’e, hiche gamgi chu Pathenin eitedoh peh-u ahin, gamgi chun nang ho jong nahop’u ahi. 14 Koima cha hung masanga nahenguva Christa jal’a Kipana Thupha hinpo lu tkeiho kahiuvin, nakithang at piu jong leng gamgi kakhokal ddeh pouvin ahi. 15 Hijeh chun eikitep nau gamgi kal, midang toh na chunga kithang-at kahipouvin, kagamgi kol sunguva natahsan’u akhan jinga keiho tohna jong akikeh len chehna dinga kinemjo kahibouvui 16 Chutile nang ho kalpeh gamdanga jong Kipana Thupha kaseiphong theiyuva, midang gamsungatohna chunga kithang-at pi louva ka-um jingdiu ahi. 17 Pathen lekhabun, “Koi hile akisonga chu Pakaiya kisong hen,” ati. 18 Amale ama kiseipha chu imacha ahipon, Pakai seiphat chubou thu ahi.

2 Corinth 11

Paul chule Solchah lhemho

1 Ka-ngol hoi thim jeng jongle neingai them diu kadeiye; amavang nei ngai themsau jong ahinai. 2 Pathen tom ngaina pan’a nang ho dia tom ngai kahi, jipa khatseh Christa tokicheng dinga nu-ngah khat banga kitepna kabolpi kaholsa nahitauve. 3 Hichea hin gul’in lepthol dohaa Eve lhep lhah bang chun Christa dinga nalungput dih nau lenathen nau chu asuhchat vai ding kati ajai. 4 Mi khattou hunga keiho seiphong khah lou Jesu chom khat hung seiphong ham, nachan khah ngai louvu lhagao chang ham, ahiloule nasan khah louvu Kipana Thupha kisan ham aum le phaten ngai them’uvin. 5 Hiche solchah chungnung ho sanga noinung deh-in kakigelpoi. 6 Thuseiyin lhachom jong leng, hetnan kalhachompoi; hiche hi ima lam jouse ahithei lam cheh a kaseipeh sa nahiuve. 7 Choisanga naum theina diuva kakisuh nem’a lo beiya Pathen’a kon Kipana Thupha kaseipeh-u chu achonsea kahim? 8 Nang ho kinbolna dinga Houbung dang ho kachom’a na katohpeh nahibouvui. 9 Nalah-uva ka-um laiyin jong kalhahsamna jousea koima din tolou khoh kahipoi; ajeh chu Macedonia gama kona sopite ahungu chun kangaichat jose lhingkeiyin ahipouve, imalam jousea nang ho tolou khoh louva kihongdoh jing kahin, kakihondoh jing ding ahi. 10 Christa thutah kasunga achenjeh-in Achaia gamkol sungsea hiche kakisonna hi imachan eikhatan louhel ding ahi. 11 Ipijeh ham? Nang ho ka-ngailut lou jeh ham? Pathenin ahenai! 12 Keiho toh banga tonga kiseiya kisonna neiya kiseiho akison lo nau abei theina dinga ipi hile kabol banga hi kaboljom jing ding ahi. 13 Ijeh-inem itile amaho chu solchah lhem, lhep lhahna natong, Christa solchah banga kilep ahibouvui. 14 Datmo ding ahipoi, ajeh chu Satan bon Vantil vah tah limin akilep jin ahi. 15 Alhacha ho chu thildih kinbol lhacha bangin kilep jengu jongle datmo behseh lou ding ahi, ajeh chu atoh dungjui cheh-uva achaina amu diu ahinai.

Solchah hijal’a Paul thohna

16 Kaseikit ahi, koiman lungthimbeiyin eigelda hen; eigel’a aum jongle them kha tbeh kisonna kanei theina din hiti chun neila jenguvin. 17 Kasei vang hi Pakaiyin eiseisah ahipoi, hiche kisonna thudol’a hi mi-ngol thusei katho ahitai. 18 Mitamtah bon tahsanphe dol’a akison’u le keijong kisonga kahi. 19 Nang ho miching nahijeh-uva mi-ngol ho nangai them’u ahi. 20 Ajeh chu min soh a nahen’u ham, nathin lhah-u ham, natuh chah-u ham, nakhai sangu ham, na-ngeiphe abeh-u ham geiyin nathoh ham ham’uve. 21 Jahchasa saa kasei ahi, keiho kadoi lheh jenguve; mi-ngol thusei katho ahi, ahanga aumle keijong kahang’e. 22 Hebrew hiuvam? Keijong kahi! Abraham chilhah hiuvam? Keijong kahi. 23 Christa lhacha hiuvam? Mi-ngol thusei jeng inge, kei kahahi cheh-e! Hatah-in katong gim jon, songkul kalut tam jon, teptena kal val’in eikijep tam jon, atamjon kathideh chet chet’in, 24 nga vei jen Judah on som li vei jepna din khatvei lhan eijep’uvin, 25 thumvei Rome mihon mol’in eijep’un, khatvei songin eikisep’in, thumvei kongke katoh khan, Twikhanglen lailunga jan khat le sun khat kachamin, 26 Kakholjinna tamtah a gin’a gin ding jeng, twilet ding, gucha ho, keima mite, chiding namdang ho, khopi sung setto ding, gamthip laiya setto ding, Twikhanglen’a setto ding, sopi lhem ho gingin kamah thah-e. 27 Chol le nangin katongin, ihmu louvin ka-umin, gilkel dang chah kathoh-in, nelou chalouvin ka-um lhoiyin, ponsil lhasamin dap kathoh lhoiyin, 28 thil dang dang kiseita hih jongle niseh-in Houbung ho kalung gimpina hin eidelpha jing’e. 29 Alhasam koi kahu lou um a? Akisep lhu koi lalung natpi lou um am? 30 Kithang-at mon gding hijongle kalhahsamna hoa hibou kithang-at din gkahibep’e. 31 Tonsot’a vahchoi jing ding Pakai Jesu Pa Pathen chun jousei kahilou ahenai. 32 Damascus a Aretas noiya gamvaipo pan keima matna din Damascus khopi kulpi kot a-ngah jinge. 33 Ahinla bangkot’a chun bom khat’in eikhai lhauvin ama khut’a konin kajamdohtai.

2 Corinth 12

Themgao thilmu le Thuphon

1 Phachom hih jongle kakison tei ding angaiye, amavang Pakaiya kon Themgao thilmua kimu ho thuphon ho bou seiying’e. 2 Keiman Christa to hingkhom mi khat kahen, kum somle li ahitai ama chu can thum channa geiyin lah touvin anaumin, tahsa puma ha, tahsa pum hilou ham kahepoi, Pathenin ahenai. 3 Ken hiche mihempa chu kahen, tahsaphe pum ha, tahsaphe pum hilou ham vang kahepoi, Pathenin ahenai, 4 ama chu Paradise mun’a akilhoh toutan, hikoma chun tho thei louhel thucheng, mihem kama seidoh thei louhel agajai. 5 Hitobang mi hibou kison ping ting, kei le kei vang kalhahsamna ho tilou ima kisonpi pong’e. 6 Kithang-at nom leng, adih kasei idng jeh-in ngol hoi kahilou ding ahi; hijongle min eimua kathusei ajah to kitoh lou, achungnungjoa kachunga lung gel anei lou na dingin kithang-at pong’e. 7 Kahenga kiphongdoh thil loupe behseh jeh a kakichoi-at val louhel na dingin katahsaa hin eidot ding satan sole lhinghem khat eikipen, kakichoi-at louna dia eichum dingin aum’e. 8 Hiche hi eilah mangpehna din Pakai henga thumvei kataotai. 9 Ahivangin aman kajah a, “Kalungset hi nang dia lhinset ahi, ajeh chu lhahsamnaa thahat suh chamkima umjo ahi,” ati. Hijeh a chu Christa thahat keiya achen jing theina dinga kalhahsamnaa jongkipah thou a kisong sing kahi. 11 Hichejeh a chu lhahsamna tin cheng, bolsetna, hesoh gentheina, bol gentheinaho, chule doubolna ho geiya christa jal’a lunglhaisel’a kasanjoh ahitai; ajeh chu kahatmo kom le kahatjo jin ahi.

Corinth Houbung dia Paul lunggim

11 Ngol’a kanahitai; ahinla neiseiphat jeh-uva nang honneichuti chonsah-u ahi; ajeh chu imacha hi lou beh hijong leng chuche solchah minthanga kiseiho sanga chu noinungjo lou kahi. 12 Solchah khat kahina dol chu thoh hat to thoa nalah-uva melchihna ho, bolmo kidang kibol ho, chule thil kidang kibol hoa chu kichensah ahitai. 13 Ipipen tah a Houbung dang ho sanga kabolset chom’uvem, nahenguva kithopina ding ngeh louhel’a kakoiyu tilouva? Hiche kitoh louva kabol jeh vang chun neingai dam’uvin. 14 Ven, nahenguva hung ding kakigotna hiche hi thumveina ahitai; ahinla nang ho pohgih hahsa p edinga kigo kahipoi, ajehchu nanei nangau hol le kahipon, nang ho bou kakhohsah ahi. Chaten nu lepa dinga sum khol ngai ahipon, nu le pan bou chate sum akhol peh ding dol ahi. 15 Keivang chu nang ho dinga kimang jouhel ding kahiye. Keiman kangailut behseh jeh-uva lhasamjoa neingailut diu ham? 16 Nangho phgihsah lou kahidol’in kigel le, lungthim doha thuh tah a nan gho kamatdol’in nasei kit’ui. 17 Nahenguva kahinsol miho khattouva chu lungthim doha kabolnau umkham? 18 Titus chu kahinsol tha ahi; Titus chun nalung thim bol khattouvu ham? Ama le kei Lhagao khat’a kilhon khom kahilon louham? Keng kho khat lha khom kahi louvu ham? 19 Hichan’a hi nahenguva keiho kithen hon beh kahiuvem? Pathen maikoh a Christa kisonpia kaseiyu ahibouve; ngaitah te, aboncha hi nang ho sahdohna dingahi. 20 Ahinla kahung tengle kadei banga nachon louvu hung tohkha get ing ting, nang hon jong nadei banguva neimu lou diu ham, ti kakiphalam lheh jeng’e. Nalah-uva kinah, kithangset, lunghan, kitumsah, kiseiset, kihoulhih, hamhoitho, kitomona um thei ahi. 21 Chutile kahung kit teng ka-Pathenin nang ho maiya eideh lhan tin, masanga then louna lam, jonthanhoi pan’a huh le lop pan, lung kisih louho jeh a chu kaka lo ding ham tin kati ajai.

2 Corinth 13

Gihsal chaina le lemna

1 Hiche hi nahenguva kahung thumveina ahi. Pathen lekhabun, “Ahetoh mi ni ham thum h am jeh a bou thu tan dinga kikoi ding ahi,” ati. 2 Ani veina nalah-uva kaum chun masanga chonse ho hihen koi hi le kagihsal cheh ahin, tua nang hoa kona kagamlat vangin kagih nahiuve; ajeh chu kahung kit le kakhen louhel dingnahiuvin ahi. 3 Christan kei eimanchah monga thusei kahi photchetna nadei chan namudiu ahinai, nang ho dia ama chu lhasam deh ahipon, thahat tah ahibouve. 4 Ajeh chu lhasam tah banga thingpel’a akhetbeh vangun Pathen thahat nan ahinsah tai. Ijeh-inem itile kei Amato kahinkhom diu ainai. 5 Tahsan’a um mong nahi nah um nang ho kipatep’un, nang ho kikhol chil’uvin; nasunguva Christa Jesu cheng chu nakihetdoh louvu ham? 6 Keiho kathon louvu hi nahet diu kakinem’e. 7 Nang hon thilse nabol louna diuvin Pathen henga kataopeh jingui; keiho lolhin phondohna ding mai hilouvin, keiho lolhing lel dol’in umu jong leng nang hon thilpha nabol theina diu ahi. 8 Ijeh-inem iitle keihon thutah dou nan ima kabol thei pouvin, thutah chubou kabol’u ahiye. 9 Nang ho naat’uva keiho kalhahsam tengule kakipah jiuve; nang ho nachamkimsohna diuvin jong kataopeh ji nalaiyui. 10 Suhphatna ding hilouva sahdohna dinga Pakaiyin eipeh thaneina, hiche katha neina hi kahung tengle khoh veng vunga kamanchah louna dinga gal’a kona hiche lekha hi kahinsut ahi. 11 Tua lhah sopite, kipah tah nom’un, chamkimsoh keiyun, lungmongun, lung khat hiuvin, kcihamdel’un, chutile ngailut le chamna Pathenin naumpi jing diu ahi. 12 Thengsel’in khat le khat kibengchopto cheh-un, Mithengten nasalamui. 13 Pakai Jesu Christa lungset, Pathen ngailut, chule lhagao theng kithopinan nabonchauvin umpi jing hen!

Galatia 1

Salam

1 Mihema konle mihem vanga hilou, Jesu Christa jeh le athilah akona Jesu kaithouva Pa Pathen jal’a solchah keima Paul 2 le ka-umpi sopite chengsen Galatia gam Houbung ho henga, 3 i-Pau Pathen le Pakai Jesu Christaa konin lungset le chamna hung lhung hen, 4 i-Pau Pathen lungdeiya hiche khang gilouva eiho huhdoh din Jesu Christa chu eiho chonset jal’in Ama akitoh doh jengin ahi; 5 i-Pau Pathen chu tonsot geiyin loupina chang jing hen: Amen.

Kipana Thupha dang aumpoi

6 Christa lungset jal’a nakoupauva kona tukah seha thupha chom khat’a nakihei jengu chu kadatmolheh-e; 7 Thupha dang chula aum sampon; mi phabeh vang aum’un, amaho hin nang ho suh ling laova Christa Kipana Thupha chu akaleh ahei ding agot’u ahibouve. 8 Hichea hin keiho hiuving lang van’a Vantil khat hijeng jongle nakiseipehsau Thupha tilou thupha chom seiphong aumle ama chu gaosap chang hen. 9 Kasei masah sau banga tua jong kaseikit ahi, “Natahsansau hilouva thupha chom dang khattouvin nahung seipeh khah-u le ama chu gaosap chang jeng hen.” 10 Tua hi mihemte lung lhaisah goa kahi, Pathen lung lhaisah go kahim? O-le mihemte lungdei hol mong kahim? Mihemte lungdei holna lai kahile Christa soh kahilou ding ahi.

Paul solchah a apanlona

11 Sopite, keiman kaseiphongle Kipana Thupha chu mihema kon ahilouje kahilchen nahiuve. 12 Mi hema kona kalah jong ahipon, koi man eihil jong ahipoi; Jesu Christa hung kiphondoh a konjoh ahibouve. 13 Malai Juda hou gut kahilaiye kachon nam lhah najauvin, Pathen Houbung chu tepte na kalval’a bolsea suhmang ding go kahin, 14 chu jongle kapu kapateu Houdan thua katom panjeh-in Juda hou thudol’a kakhang golpi tamtah kakho khelsoh keiye. 15 Ahinla ka-nu oisunga ka-um laiya pat eisepkhensa Pathen chun alungset jeh-in eikouvin, 16 chidang namdangte henga Achapa kaseiphong theina din kahenga aphongdoh tan, hichea hin katoh ding dol tahsaphe le thisan pu mihem kadongpai jengpoi, 17 kei sanga solchah hi masa Jerusalema umhohenga jong kachedehpoi, Arabia gama kaga chen, chuin Damascus khoa kahung kilekit bouve. 18 Kumthum nungin Cephas henga imahetoh din Jerusalema kaga chetouvin, amato nisom le ninga ka-um’e; 19 hichepet chun Pakai sopipa Jacob tilou solchah dang kamupoi. 20 Nahenguva lekha kahinsut hi, ven Pathen maikoh a jou kaseipoi. 21 Hiche nung chun Syria le Cilicia gamkol sunga kahungtai. 22 Hiche geiya hi Judea gama Christa Houbungte mitmua het lou lai kahi, 23 “Masanga suhmang dia eigopau chun tun khatvei suhmang ding agot tahsan chu kipah tah-in asei phonglei,” tibou ajah-u ahin, 24 chu le keima jeh a Pathen avahchoi choi jengu ahi.

Galatia 2

Solchah danghon Paul solchah dia asan’u

1 Kum som le li jouvin Titus kapui lhonin Barnabas to Jerusalema kaga chetou kitlhon’e. 2 Hichea chu Pathen thuphondoh jal’a chetou kahin miho jah a chun chidang namdang ho lah a Kipana Thupha kaseiphong thudol kahil chenin, lamkai dom dom ho vang chu atumbeh in kaseipeh-in, katoh masah le tulai katoh ho manlou aso lou nading ka-ngaitoi. 3 Chukoma ka-umpi Titus chu Greek mi ahivangin cheptansah tei ding agopouve. 4 Athudol hi alhema sopia kisemthu, Jesu Christa to ineikhomu jalena sumang dia mi ve-lhi dinga ilah-uva hunglut khaa, eiho sohchansah ding go ho hinpoh lut ahibouve. 5 Kipana Thupha tah ahidol hi nang ho chunga aum jingna din nidan khat jeng jong amaho noiya hi kikhumlut kha lou kahiuve. 6 Lamkai dom doma kiseihoa konin jong, ipi kihisah-u jongle ka-i aloudeh poi, Pathenin mihem maijan avepoi, ginle ja umdol’a kiseiho chun ima eibolpeh chompouve. 7 Chuti tah sangin cheptan ho henga Kipana Thupha seiphong dinga Peter kinganse banga chidang namdangte lah a Kipana Thupha seiphong dinga eikinganse amu’uve. 8 Ijeh-inem itile cheptan ho dinga Peter solchah a akisemdoh banga chidang namdang ho dinga keima solchah a eikisemdoh ahi. 9 Lungsetna eikipe aheuvin, Cephas le Jacob chule Johnin kapan khom’uva, kei le Branabas chidang namdang lah a chule amaho cheptan ho lah a natong dingin khut jetlamin eina sanguve. 10 Kageldoh jing ding adeiyu chule ken jong katoh nom jeh a hatah akagel jing vaicha gentheite ahiuve.

Antioch khoa Paul in Peter apho

11 Antioch khoa Cephas ahung chun kichentah a themmona anei jeh-in amaichangtah a kaphoh jenge. 12 Ajeh chu Jacob henga kona miphabeh hung masangin chidang namdangte to an anekhomin, amaho hung phat’in cheptan ho akichat jeh-in aki- nung khinin akitumsah tai. 13 Judate mi adang hon jong ama ajop thol’un, aphat lhem nauva chun Barnabas geiyin apui manglo tauve. 14 Ahinla Kipana Thupha kitah dungjuiya achon louvu kamudoh phat’in japi maikoh tah a Cephas kasosal’in, “Judate chilhah apeng nangbon Judate chondan banga um lou ibol’a chidang namdang te chu Juda te chondan thosah ham gao nahim?” kati.

Juda hihen Namdang hile tahsan jal’a huhhinga um

15 Eiho pendol’a Juda mi ihiuvin, chidang namdang chonse hoa kon ihipouve. 16 Ahinla Jeu Christa tahsan tilouva Danthu dungjuiya natoh vanga mihem them achanlouje iheuve; hijeh a chu eihon Danthu dungjuiya natoh vang hilouva Christa tahsan jal’a them ichan theina diuva Jesu Christa chu itahsanu ahi; Ijeh-inem itile tahsa a mihing koima Danthu dungjuiya natoh vanga them chang lou ding ahi. 17 Themchan teina dia kihabolnaa jong Christa sunga chonse ihiu akimudoh le Christa chu chonset lhacha ham? Ahinai saipoi. 18 Ajeh chu ken kaphetsa kasah phat kit le kasuh khel photchetna jo ahibouve. 19 Ijeh-inem itile Pathen lama kahin theina dinga Danthu jeh a Danthua thisa kahitai. Christa to kikhetbeh tha kahitan, 20 Keima chu hinga ahipon, Christa joh keisunga hing ahibouve, tua tahsaphea kahin hi keima eingailua keijal’a kipedohjeng Pathen Chapa tahsan jeh a hing kahiye. 21 Pathen lungset hi moh kahisah poi, ajeh chu Danthu jal’a them kichang hile Christa thi chu pannabeiahi.

Galatia 3

Danthu natahsan ham?

1 Vo khopolou Galatia miho Jesu Christa thingpel’a kikhetbeh dol namitmu changtah-uva kichentah a kisundoh taa, kon najol lhah-u ham? 2 ‘Lhagao nakisanu chu Danthu dungjuiya natoh vang ha tahsan thu najah-uva kon ham?’ nanghoa konin kahet nom’e. 3 Iti chuti lungthimbei nahiuvem? Lhagao thua kipan’uva tua tahsaphea chaidoh ding nagot’u ham? 4 Hi chengpi hi mohjen seh a thoh gim nahiuvem? Tah ahile mohjen seh ahi-ngut’e. 5 Lhagao napeuva, nalahuva thil kidang ho boljipa chun Danthu dungjuiya na natoh jeh-uva abol ha, tahsan thu najah-uva kona abol ham? 6 Hichea hin, Abraham in Pathen atahsan in hichu ama din themchansah nan akisikpehtai,” tin akiseiye. 7 Chuti ahijeh chun mi atahsan chengse chu Abraham chatea kisimjoh ahidol nahet diu ahi. 8 Pathen lekhabun tahsan jal’a chidang namdangte themchan ding ahet masah dol chu Pathenin Abraham jah a Kipana Thupha anaseiphong masan “Nang jal’a chidang namdang jouse jong vangboh chang diu ahi,” anati. 9 Hijeh a chu tahsan nei chengse chu tahsan neipa Abraham vangbohchang khom ahiuve. 10 “Koi hile Danthubua kisun chengse nitjom jing lou chu gaosap chang ahi, “tia akisut jeh-in, Danthu dungjuiya natong chengse chu gaosap chang ahiuve. 11 Ijeh-inem itile Danthu dungjuiya chonjeh a koima Pathen anga them chang lou hel ding ahi; ajeh chu, “Tahsan jal’a them changpa bou hing ding ahi,” akiti. 12 Achujongle Danthu chu tahsan’a tobang ahipoi, “Danthu ho nitpa chun Danthu ho hinna anei ding ahi,” kiti ahibouve. 13 Danthua kisun chu, “Thinga kikhai sang tapou chu gaosap chang ahi,” kiti ahijeh-in, Christa chu eiho jal’in gaosap achangin, Danthu gaosapnaa koin eihung lhatdamtauve. 14 Hiche hi Abraham vang kiboh chu Jesu Christa jal’a chidang namdangte jong achan theiya tahsan vanga tepsa Lhagao chu ikisan theina diu ahi.

Danthu chule Thutep

15 Sopite, mihem ngaidol’a kasei ahi, mihem ngaidol mongin jong suhdetsa kitepna chu koiman isah louvin abolpon, koijong akoibe ngaipoi. 16 Thutep chengse chu Abraham le achilhah kipea ahi. Mi tampi kiseina banga, “Chule nachihlhah ho din,” kiti louvin, khatseh seina bangin, “Chule nachilhahpa din,” akitin, Ama chu Christa ahi. 17 Hiche hi kisei ahi: Pathenin asuhdet’a aphondohsa kitepna chu kum ja li le somthum nunga umdoh Danthun thutep chu man mo asosah a ason amang thei ahipoi. 18 Goulo ding chu Danthu jal’a ahile thutep jal’a hilou ahin, ahinla Pathenin thutepsa jeh a Abraham apeh ahibouve. 19 Danthu hi ipi ding ba ham? Suhkhel phondohna dia kikoibe, thutep kipe chilhahpa hung kah a ding ahin, Vantilte kimanga palaipa khut’a kitungdoh ahi. 20 Khatseh dinga thupo le ngailou ahin, Pathen chu khat ahi.

Danthu umdohna jeh

21 Achutile Danthu hi Pathen thutep to kikal ham? Ahinai saipoi; micho hing theina thaneiya Danthu kipe hile hiche Danthua chu them chan na um ding ahi. 22 Ahinla Jesu Christa tahsan jal’a atahsan chengse thutep chu akipeh theina diuva Pathen lekhabua thun ijakai chon set noiya akhumchah ahitai. 23 Tahsan thu hung lhun kah, ahung lhung ding tahsan kiphondoh kah a chu Danthu noiya ki hen kikhakhum ihiuve. 24 Hitia chu tahsan vanga them ichan theina diuva Danthun eina kaihoiyuva Christa henga eipui naiyu ahi. 25 Tahsan thu hung lhun kalvang eikaihoi nau noiya chu ihitapouve. 26 Ijeh-inem itile Jesu Christa tahsan jal’a Pathen chate nahiu ahitai. 27 Ajeh chu Christa sunggil’a baptize changsa nang hon Christa chu nakivon’u ahi. 28 Hiche a hin Juda mi le Greek mi kidatna, soh le chamlhat kikhena, pasal le numei kibahlouna aum tapoi, ajeh chu Christa sung gil’a nabonchauva pumkhat nahiu ahitai. 29 Hitia chu Christa mi nahijeh-un, Abraham chilhah nahiuvin, thutep goulo jong chu nang hon chan ding ahitai.

Galatia 4

1 Goulo dingpa chu thil ijakai neipa ahivangin aneo laisen soh to imachom ahipoi kati ahi. 2 Apan atep phat lhin kahsen akaihoi ho le in-ngah ho thu noiya bou aume. 3 Hitobanga chu eiho jong ipilhin masanguva vannoi leiset lekhajembul noiya soh chang inahiuve. 4 Ahinla phat alhinset phat’in Pathenin a-Chapa ahinsol lhan, Danthu dungjuiyin numei sunga ahungpengin, 5 Danthu noiya umho lhatdoh a eiho chalam thu ihina diuvin ahung’e. 6 Chate nahiu kichetna dinga Pathenin a-Chapa Lhagao chu i-lung sunguva ahinlha lut’a, “Abba hepa,” tia ikoujiu ahi. 7 Hiti ahijeh chun soh nahitapon, chapa nahitan, chapa nahijeh chun Pathen jal’a gouloa pang ding jong nahitai.

Paul’in Galatia mite akhohsah

8 Pathen nahet masnguvin aumdol monga Pathen hilou ho lhachan napangui; 9 tun vang Pathen nahetauvin, lamkhat’a Pathen het jong nahituvin, i-atile sonlel um lhasam tah Danthu lekha jembul lam’a kihei kit’a, abul lama sohna toh nom kit nahiuvem? 10 Nang hon nikho phabep le lha phabep chule kum kiheichin ho pou nanit jiuve. 11 Nang ho dinga katoh gimna jouse moh nahisah diu kati ajai. 12 Sopite, keitobang hiuvin, keijong nang ho tobanga um kahi; nang hon adih louvin neibol pouve. 13 Katahsa dammo jeh a Kipana Thupha kahung seipeh masah lo’u nahetsau ahi; 14 katahsa veiset chu nang ho dinga patepna ahijeng vangin thei le hot’in neibol pouvin, Pathen Vantil bang tah le Jesu Christa bang tah-in neisang jo’uve. 15 Chubanga nakipa nau hoilamba hitam? Hithei le namit chang te ni geiya kaldoh a neipeh nom leu jengu kichentah a kahettoh jing ahi! 16 Thutah kaseipeh jeh-uva nagal’u kahi ngap hitam? 17 Miho chun thilpha dinga natom ngaipiu ahipoi, pamse dinga bou nadeiyu ahin, hiti ho dinga chu natompanpi bol’u ahibouve. 18 Keiman ka-umpi pet maiya hilouvin thil ijakaiya thilpha ding jenga tompan ding aphai. 19 Kachate, nasunguva Christa lim le mel akigondohsoh masangsea numei naoso nat thoh banga kathohgimpi kit nahiuve. 20 Tugeiya na kom’uva um’a ka-oso chombeh a hou ding kadei lheh jeng ahi, ajeh chu nachung thu’u kalung agim’e.

Hagar le Sarah tekaha kihilna

21 Vo Danthu noiya um nom ho na seipeh-un, Danthu najah khah louvu ham? 22 “Abrahamin chapa ni aneiyin, khat sohnu sunga peng ahin, khat jalen nu sunga peng ahi,” tin akisun’e. 23 Sohnu sunga peng vang chu tahsaphe pen ngaidol’a peng ahin, jalen nu sunga peng vang thutep guiya peng ahi. 24 Hiche hi tekah a kihilna thei ahi; Numei te ni hi kitepna ni vetsahna ahin, khat nu hi Sinai molsanga hung kon ahin, hiche nu chate chu soh natong ding ahiuve, hiche nu chu Hagar ahi. 25 Hagar hi Arabia gama Sinai molsang lim’a um ahin, tuali Jerusalem vetsah apang, achate to soh chang ahitauve. 26 Jalen nu vang chu chunga Jerusalem lim’a um ahin, ama chu inu’u ahiye. 27 Ijeh-inem itile “Vo ching-a cha neilou nu kipah-in, Naoso nat thoh khalou nu kipa othongin kho samin; Ijeh-inem itile jipa luppi sangin, Don lou dailouva kikoinu chate atamjoi,” tin akisun’e. 28 Sopite, nang ho jong Isaac banga thutep chate nahiuve. 29 Chulaiya tahsaphe dol’a pengpan Lhagao lama pengpa asumang got banga tua jong chuti ahi. 30 Ahinla hichea hi Pathen lekhabun ipi aseiyem? “Sohnu chu achapato kaidoh than, ajeh chu sohnu chapan jalen nu chapa to gou lokhom theiponte,” ati. 31 Sopite, hichea hin eiho sohnu chate ihi pouvin jalen nua joh ihibouvui.

Galatia 5

Nacham lhat tuhchah jingun

1 Jalenna inei theina diuva Christan eilhatdoh-u ahitai. Hijeh chun dingdet jingun, soh namkol jona chun kihen oh kit tahih-un. 2 Ven, nahenguva thusei hi keima Paul kahi, nanghon chaptan thu najop’u le Christan imacha naphat chomsah lou diu ahi. 3 Cheptan thu jop chengse kahettohsah nahiuve, hitobang mi chun Danthua kisei chengse atohdoh ding abat nalaiye. 4 Danthu juiya themchan go ho chu Christaa kona kisat lhaa, lungsetnaa pul lha nahitauve. 5 Keiho vang Lhagao chun tahsan jal’a them chang dia kinem’a ei ngasah-u ahi. 6 Ijeh-inem itile Jesu Christa to hinkhomnaa hin chaptan le tan lou imachom ahipoi, ngailutnaa tong hat jing tahsan thupi ahi. 7 Nalhai toh lheh meu! Thutah na-ngai nauva koiham nasu tanguvah? 8 Hiche kijol lhahna hi nakoupauva kon ahipoi. 9 Chol themchan changlhah lhon pumpi achansohji ahi. 10 Pakaito hinkhomnaa imachan nasuhmo lou diuva nang ho hi kason lheh jeng nahiuvin, koi hijong le akhohpoi, nasumo pen penu chu athu kitantei ding ahi. 11 Sopite, keiman chaptan thu kaseiphong lai hile ibol’a eikibolse se ding ham? Kaseiphong tahbah hile Thingpel thudol hi kipal lhuhna hilou ding ahi. 12 Nang ho suling lao ho chu amaho kisumangsih seh leu kadei lheh-e. 13 Sopite, nang ho jalen dia kikou nahiuvin, hiche jalenna hi tahsaphe lama jaothauna mai din mang hih-un, khat le khat ngailut’a kijento nan mang jo’uvin. 14 Ijeh-inem itile Danthu jouse jong hi thugol khat, “Nangma naki-ngailut bangin naheng nakom ngailun,” kitia hi bukimsoh ahibouve. 15 Amavang khat le khat kiketto sao sao le kibahgamto sao sao nahi khah-u jong le nakisuhmang hel louna diuvin ching theiyun.

Lhagao ga le thasa natoh phabep

16 Kenvang, “Lhagaovin chon’un chutile tahsaphe lunggul chu namolso lou diu ahi,” kati ahi. 17 Ajeh chu tahsaphe lunggul chu Lhagao lama to kidouva, Lhagao lama chu tahsa phea to kidou ahin, nang hon nabolnom nom nabol louna diuva hicheng chu kidouto ahiuve. 18 Hichea hi nang ho Lhagaovin napuiyu le Danthu noiya um nahipouve, 19 tahsaphe lam natoh chengse chu kichentah a: jonthanhoi, thenlou, huh, 20 limsemthu doi hou, doichoi, kidou, kinah, thangthip, lunghan, kiloset, loitumsem, kilangkhen, 21 sumsel, jukham, eltol hitobang ho hi ahi. Kahilchah masah banguva kahilchah nahiuve, hitobanga chon ho chun Pathen lenggam alo lou dingu ahi. 22 Lhagao ga vang chu ngailut, kipa, cham, thothat, mi khoto, phat, kitahna, 23 nunnem, kitimthem hiti ho hi ahi. Hitobang ho doudal ding Danthu aumpoi. 24 Christa Jesu to hinkhom chengsen tahsaphe chu alunggul le angaichat chengse pum a thingpel’a akhetbeh-u ahitai. 25 Eiho Lhagaova hing ihiule Lhagaovin chon’u hite. 26 Ikiletsah louhel diu, khat le khat kiphin lunghang ahiloule khat le khat kithang settoa ium louhel diu ahi.

Galatia 6

Khat le khat pohgih kipohhu

1 Sopite, mi khattou suhkhel nei, athemmona kimandoh aum jongle Lhagao mi nang hon Lhagaova nunnema nasemphat diu dol ahi; kivephan. 2 Khat le khat pohgih kipoh hun, chuti chun Christa Danthu nit chamkimsoh-un. 3 Khattou ikhat khat’a kigel’a, atahbeh a la imacha hilou chu ama le ama jeng jong kijoulhep ahibouve. 4 Min ama ama natoh cheh kikholtoh hen, anatoh chu aphatnah le midang titah louva ama le ama jeng jong kipah chaa kichoi an thei ahi. 5 Ajeh chu mitinin ama ama pohgih cheh akipoh ding ahibouve. 6 Thua kihil’a mi chun ahilpa chu thilpha chengse chankhompi hen. 7 Nang ho kilhem chavai hih-un, Pathen chu nelpeh dan ahipoi; ajeh chu mihemin atu tu a-at ding ahi. 8 Ijeh-ienm itile tahsa dol’a tupan tahsaphea kona kemmang theiga alo ding, Lhagao dol’a tupan jong Lhagaova tonsot hina aloding ahi. 9 Thilpha bolna lama chimtih neipouhite, i-lhah dah louvu le aphatcha tohga ilo diu ahi. 10 Hijeh chun hungun aphat gomkom inei dungjuiyun mitin chunga thilpha bol’u hitin, ahideh-in eima insung mi atahsan ho chunga habol deh-u hite.

Achaina gihsalna le temna

11 Veuvin, keima kakhut tah-in nahenguva lekha jemkhou tah-in kahin sun’e. 12 Tahsa vet-hoisah ding go chengsen chaptan sah ding nagot hamu chu imacha ding ahi pon, Christa thingpel jal’a thoh hesohna apeldohna diuva abol’u ahibouve. 13 Cheptan mong hon jong Danthu anit pouve, chep natansah nom nau chu tahsaa hiche melchihna naneisah jeh-uva chu hoithonom ahiuve. 14 Kenvang I-Pakaiyu Jesu Christa thingpel ti lou thildang ima song hih inge; ajeh chu hichea chu vannoi kei dinga, keima vannoi dinga kikhetbeh kahitai. 15 Ajeh chu cheptan le tan louvin koima ima asochompoi, thilsem thah hiding bou chu khoh ahi 16 Hiche Dan mang jouse, Pathen Israelte chunga chamna le hepina um hen. 17 Tukal vang koiman eisulunggim ta hih hen, ajeh chu kati chunga hi Jesu melchihna polea kahitai. 18 I-Pakaiyu Jesu Christa lungset chun na-lhagaovu umpi hen, sopite: Amen.

Ephesus 1

Salam

1 Pathen lungdeiya Jesu Christa solchoh Paul’in Ephesus khoa cheng tahsan’a Jesu Christa to hingkhom mithengte henga; 2 I-Pau Pathen le Pakai Jesu Christaa kon lungsetna nahenguva um hen!

Christa Lhagao vangbohna phabep

3 I-Pakaiyu Jesu Christa Pa le Pathen jal’a van muntin’a Lhagao vangbohna tin chenga vang eibohPau chau thangvah-in um jing hen; 4 Pathenin ngailutna jal’a Ama mitmua athengle nolnabei ihina diuva, Christa sunggil’a eiho hi vannoi kisemdoh masanga eina lhendohsau ahin; 5 Aman adeile atup duing juiya Jesu Christa vanga a-lamthu chapate ihi theina diuva Ama dinga eina chom khendoh-u ahi. 6 Hiche angailut tah achapa jal’a manbeiya eipeh-u thilpeh loupi chu i-vahchoi diu adoi ahi. 7 Christa thisanjal’a i-chonsetnau ki-ngai-dam’a lhatdam chang i-hitauve; alungset bulhing dungjuiya 8 ichunguva abuh lhah a, chihna le hetkhenna jal’a 9 Ama lungdeiya thil kiselguh chu eihetsah-uva, Christa sunggil’a athilgon masah dungjuiy 10 Leiset khang lhin’a phat ahung lhun teng Christa hong sunga chu thil i-jakai, vanmun jousea hihen leiset chunga hi jongle Ama sunga chu gopkhomsoh ding, 11 Ama hong sunga chu Pathenin keiho Judate eina lhendoh-uva eina gonsau ahin, agonsa dungjuiya thil ijakai hin na atoh cheh a, Ama ngaito le dei dungjuiya um jing ahi. 12 Christa hongsunga dia kinem jing keihon Ama loupina chu kavah choina diuva chuti ahi. 13 Ama jal’a chidang namdang nang hon jong huh hing nachan nau Kipana Thupha, thudih chu najah-uva, Ama vanga na tahsan’uva, tepsa Lhagao Thenga mohor kinamsa nahitauve. 14 Pathen vahchoina ding le amiten jalen i-muna dinguva, Lhagao Theng chu eiho goulo ding khamgahna ahi tai

Paul taona

15 Hichejeh hin Pakai Jesu natahsanu le mithengte chengse na ngailutnau kajah a pat, 16 kataochanin tang louhel’in nang ho ding kathang vah jinge. 17 Hichu I-Pakaiyu Jesu Christa dinga Pathen, loupina Pa chun chihna leh Ama hetna phondohna thei Lhagao napeh theiyuva, 18 nakou nau kinepna hi nahet theina diuva nalungthim mit’u ahasah theiya, mithengte dinga goulo anei loupina thalhinje, 19 atahsan ei ho sunga natong athahat natsatje so-phah hoi ahi lou het theina ding ahi. Hiche athahat thilbol theina kidangtah hi 20 amanchah a Christa-a thiho lah a akaithouva, van gamsunga ajetlama atou sah ahi. 21 Hikoma chu Aman vaipo thunei jouse chung, thahat le piputna jouse chunga loupipen minchang ahitai. 22 Pathenin thil ijakai Christa kengto noiya akoi soh a, Houbung dinga Ama chu ijakiya ima jouse luchang ahisah ahitai. 23 Houbung chu Christa tahsa ahin, tahsa chu aluchang to akijop teng thil ijakai subukimpa chu bulhingset ding ahi tai

Ephesus 2

Thinaa kona hinna

1 Masanga chu nasuh khel nau le nachonset nauva thisa nahiuve; 2 hiche laiya chu hiche vannoi leiset khang um chan dungjuiya na chonuva, vanlai jol’a thunei vaipo ho nung juiya, tulai Pathen ngaisah loute lah a natong lhagao thusah a chon’a nahiuve. 3 Phat khat laiya Juda mi keiho jong hitobang chu kahiuvin, katahsapheu ngaichat lamjenga chon, tahsaphe lunggul le lungtup a chon kahiuvin, midang banga keiho jong lunghanna chate kanahiuve. 4 Ahinla Pathen he-pina bulhingset, ami-ngailut ning lhing sel’in eingailuvin, 5 suh khelna-a ithi laitah-un Christa to eicho hing khomtauve, lugnset vanga huhhingchang nahiuve. 6 Amato ei kaithou thauva, vangam, Jesu Christa hongsunga eitou sah-u ahi tai. 7 Hichu ahung lhung ding khanga Jesu Christa sunggil’a eikhoto nau lungsetna letset jeng chu eivetsah theina diu ahiye. 8 Ijeh-inem itile tahsan jal’a lungset man’a huh hing chang nahiuvin, hichehi nang hoa kona hilouva Pathen thilpeh ahibouve. 9 Natoh vanga ahilou jehhin kisonna thei jong ahi poi. 10 Eiho Pathen semsa ihiuvin, Pathenin ichonna diuva ana gon masah chengsea chu ichon theina diuva natoh pha chengse tong dia Jesu Christa sunggil’a kisemdoh ihiuve

Christa sunga pumkhat

11 Tahsa phea chidang namdang nahilaiyu, tahsa khut’a cheptan mihon cheptan lou nahi sah laiyu khang chu geldoh-uvin; 12 hiche laiya chu Christa to kimat lou, Israel lhangpi kiloikhomnaa pang lou, thutep jal’a kimu kitepnaa pangkhalou, hiche leiset’a hi kinepna bei le Pathen helouva um nahiuve. 13 Tua vang Jesu Christa sunga na umtah jeh-un masanga na gamlat vangun Christa thisan jal’a ngai dam nahitauve 14 Christa chu eiho kichamna ahi. Aman kikhena bang lai chu aphe lhan, kidouna chu atahsa phen asumangin, Judate le chidang namdang te pumkhat asotai. 15 Aman namnia kona Amato hingkhom dinga mithah khat asemdoha chamna asemdoh na dinga Danthu chu athupeh chengse le adan jouse toh asuhmangtha ahi tai. 16 Thingpel’a athi chun Christan kidouna chu atahsa tah-in asumangin, jat ni chu asuchamin, Pathen henga tahsa pumkhatseh asemdoh tai. 17 Hiti chun ahungin Pathen to kigamlat namdang nang ho heng le Pathen to kinai Judate henga hiche chamna Kipana Thupha hi ahung seiphong tai. 18 Hijeh a chu Christa jal’a chidang namdang le Judaten iloi niuva Lhagao khat’a Pa henga lut theina ineiyu ahi je. 19 Hichejeh chun nang ho maljin le khopem nahi tapouvin, Pathen mithengte chan khompi le a-insung mite nahitauve. 20 Jesu Christa chu inning song khomdet ahin, sholchahho le Themgao ho songset chunga nang ho kisadoh nahiuve. 21 Christa chun in kisa chengse chu aloikhomsoh keiya, Pakai Houin theng hi dinga akhantousah ahi; 22 Ama sunga chu nang ho jong adang chegse to kisakhom Pathenin Lhagaova chenna anei theina dia kisa doh nahiuve

Ephesus 3

Chidang namdangte dia Paul natoh

1 Hichejeh a chu chiding namdang nang ho jal’a soh changa kihen keima Paul, 2 Pathen lungset vanga nang ho dinga hiche kinbolna eikipeh hi najahsau ahi tan, 3 thil kiselguh kahenga kiphongdoh a kihetsah dungjuija paltan’a kahinsutsa jong ahitai; 4 simpou pou leu chun Christa selguh thil kahet themdol hetauvin nate. 5 Tulaiya Lhagaovin Christa solchah theng ho le Themgao ho henga aphondoh bang hin khang masa laiyin mihem chate akihetsahpoi. 6 Athuguh chu Jesu Christa jal’a Kipana Thupha hung lhun hin chidang namdang ten jong Judate to gou lokhomna le tahsan khat hikhomna chule thutep chankhomna aneitauve 7 Athilbol thei thahat le Pathen lungset manbeiya thilpeh eikipe dungjuiya hiche Kipana Thupha lhachaa eikipansah ahitai. 8 Mitheng te jouse lah a alhumpen kahi vangin Christa haoje akhona bei Kipana Thupha hi chidang namdangte henga seiphongna ding lungsetna hi eikipei; 9 hichu thil ijakai sempa Pathenin ama sunga tonsot’a akoi thilgon kiselguh chu mitin kamusah a, 10 tulaiya Houbung jeh a Pathen chihna jat chom chom ahidol hi vanlaijol’a vaihom thuneite hetsahna ding ahi. 11 Hiche hi i-Pakaiyu Jesu Christa chunga kimolso tonsot’a gonsa thilgon dungjuiya um ahiye. 12 Ama itahsan jal’u le Amato ihinkhom jeh-uva lung ngamna le hanna neiya ahenga lut ngam ihitauve. 13 Hichejeh chun nang ho jeh a hesoh genthei kathoh hi lung thoi hih-un, hiche hi naloupinau joh ahibouve

Christa ngailutna het ding

14 Hichejeh a chu dilsua Pa henga taoji ka hin, 15 hiche Pa vanga hi vanmun jouse le leiset chunga phungtinin kiminvo na aneiyu ahi; 16 Aman aloupi haoje akhonna beiya kona thahat le thilboltheina a-Lhagao vanga nami-sung nunguva dia napeh theiyuva, 17 tahsan jal’a Christa chu na lungthim sunguva achen theiya, 18 hitia chu mithengte chengse to Christa ngailutna jaoje le saoje, chule asanje le athuhje het khen jouna na nei theiyuva, 19 hetna jouse khokhelsoh hel Christa ngailutna nahet theiyuva, ijakai chamkimsoh hel Pathen chamkimna nabulhin thei na dingu ahije 20 I-sunguva natong jing athahat dungjuija ithum sangule igel sanguva thil ijakai thahat tah a bolthei Pa, 21 Ama henga chun Houbung sung le Jesu Christa hongsunga akhang khangin tonsot geiyin loupina um jing tahen: Ame

Ephesus 4

Tahsa pumkhat

1 akai dia sohchang keiman na kikounau to kitoh a chon dia ka-ngeh nahiuve; 2 phat jousen nunnem in, chonnem jingun, thohhat to thon, ngailutnan khat le khat kingai themun; 3 Lhagaova pumkhat hina chu tuhchah jing din kihabol’un, cham nan kikan khom jingun, 4 nakikounau kinepna khatseh ahibangin tipum khat, Lhagao khat ahi; 5 Pakai khat, tahsankhat, baptize channa khat, 6 mi jouse Pa, ijakai chunga um, ijakaiya natong, ijakai ya umsoh Pathen khatseh ahi 7 Christa thilpeh tepte na dan dungjuija eiho mi khat cheh hi lungsetna thilpeh khat cheh eipeh-u ahi. 8 Hijeh chun Pathen lekhabua: “Ama chung sanga akaltou chun Gal-hing kiman tampi akaitouvin; Mihemte jong thilpeh Tampi apei,’ ati 9 “Ama akaltouvin,” kiti hi, ‘Leiset noinung geiya akumlhai,’ tilou adang ipi kiseina ham? 10Akum lhapa chu ijaki asuh bulhitsohna dinga vanmun jouse chungvum’a kaltoupa ma ma chu ahi. 11 Chule Aman miho thil apehho chu: abang sohchah hi na, abang Themgao hi na, abang evangelist hi na, abang Pastor hi na le mihil hi na ahin, 12 ama ho hin mithengte chu lhacha natohna lam le Christa tahsa sahdohna ding lama agontoh-uva, 13 eiho chengse hi tahsan’a pumkhat ihikahseu le Pathen Chapa ihet kahseu, mi kikhan lhit ihiuva chule Christa pilhin dung chan iphah kah seuva abol diu ahi. 14 Hichu ei ho chapang banga mi suhmangna dinga doha thuh a kipodoh ho le mihem lungthim gilouva kon kihilna lhem ho chu kipui chatvaisah a hui nung jousen amut ling le alhoh mang theibep tobang ihilouna diu ahi. 15 Chuti sanga aluchang hiya Christa chu thil ijakaiya ikhantouna diu va ngailut neiya thuttah isei jing diu ahi; 16 Amaa kona tahsa pumpi hi kitoh chet’a kisuto khoma kisolmat cheh, tahsa pumpi hi tibah dang chengse hin atuhmat soh keiya, atoh ding dol cheh abol’uva ngailutnaa asahdoh a akhantousah-u ahi je

Christa sunga hinkhothah

17 Pakai pan’a hiche hi seiya kahettohsah nahiuve: chidang namdang ten lung chatvai aput’uva achon bangun chon hih-un; 18 amaho kho pholouhel le alungtah behseh jeh-uva ahetnau lung thimsoh a Pathen hin naa chu kipaidoh ahitauvin, 19 jumle ja helouva um’uva acham cham’uva huh lam le thil theng lou tinchang to chule lop lam bolna dinga kipedoh ahitauve 20 Nang ho vang Christa chu hitobanga hi kihil nahipouve; 21 Jesu laigil’a cheng thutah banga Ama chu najah-uva chule Amaa kihila nahiule 22 nang hon masang chonna dol’a chon, joulhep ding ngaichatna lunggul’a ha set cheh cheh milui chu napai lhah-uva, 23 nalungthimu Lhagaova kisemthah a, 24 chule thutah dungjuiya adih le athenga Pathen lim banga kisemdoh mithah chu nakivon diu ahi

Hinkho thah a hin dol

25 Hijeh chun jou pailhan, nangho khat cheh chu aheng akomto thutah jengin kihou hen; ijeh-inem itile eiho khat cheh hi tibah khat ihi bouvui. 26 Lung hangkha tajong leu chun chonse hih-un; nalung han u chu nisan lhumkhum hih hel hen 27 Chule agilou pa chu mun ot hih hel’uvin. 28 Gucha chu gucha kit ta hih hen, chusangin alhasam ato theina din akhut tah-in napha tong gim hen. 29 Nakam’uva konin thuse khat cha potda hen, amavang ajah ho lung lhaina din khantou theina dinga akhoh dungjuija thupha potjo hen. 30 Lhatdoh nikhoa dinga mohor nakinam nau Pathen Lhagao Theng chu lung phatmosah hih-un. 31 Thukha jouse leh lungsat, lunghan, kinah, kitaitom, chule gitlounajouse nang hoa konin pai mangun. 32 Nang ho khat le khat kihepito cheh-un, lung nemun, Pathenin Christa sunggil’a na-ngaidam bangun ki-ngaidam’uvin

Ephesus 5

Khovah chatea hindol

1 Hichejeh chun Pathen sahtah chate nahijeh-un Amato bah ding ngaitouvin. 2 Christan eiho eingailut’uva eiho jal’a Pathen henga maicham thilpeh gimnamtui banga Ama akipehdoh jeng bang chun ngailutnan chon’uvin. 3 Mithengte umdol’in jong thule then louna jouse chule papset thudol nalah-uva kiphapoh hih hel hen; 4 chule jamo le thumotsei, tothanghoi hicheng jong chu umda hen lang, chusangin thangvahna thu kiseijo hen. 5 Ijeh-inem itile nang hon hiche hi nahetdiu ahi, koi hile jonthanhoi bol, thilthengloubol, chule papsea le doilim semthu houva chun Christa le Pathen lenggam sunga mun aneipoi 6 Koima thu homkeovin kilhep lhahsah dauvin, hiche ho jeh taha chu thua nung lou chate chunga Pathen lunghan hung chuji ahi. 7 Hiteho chutoh imacha kikop hih-un. 8 Nangho muthima na umsa nahiuvin, tua vang Pakai hongsunga khovah changkha nahitauvin, hijeh chun khovah chate bangin chon’un. 9 Ijeh-inem itileh khovah ga chu phatna jouse le adih chule thutah ahin, 10 Pakai lung lhaina ding chu pho toh-uvin; 11 muthima um tohga beiho chuto imacha kikop hih hel’un, amaho chu sosal’un phohsal jou’uvin. 12 Ijeh-inem itile amaho guthim natohho chu seidoh ding jongjachat umleo ahi. 13 Ajeh chu ijakai hi isosal’a iphonjal teng le khovah chun aphong doh jitai. 14 Ijeh-inem itile ijakai phong doh a chu khovah ahi. Hichejehchun: ‘Vo ihmumil khangin, Athi lah a konin thoudoh-in: Chuteng Christan nasalvah ding ahi,’ tin akiseiye 15 Hijeh chun iti nachon’um ching theiyun, lungthimbei ho banga um louvin, michingho bangin um’un; 16 phat hi kitup keiyin mangun, ajeh chu tulai nikho hi apha tapoi. 17 Hijeh chun lungthimbeiyin umdauvin, Pakai lungdei ipiham het ding ngaitouvin. 18 Lengpituiyin kham hih-un, hichea chun manthahna aum’e; chusangin Lhagaovin dimsetjo’uvin; 19 tumging to thon Lhagao lan khat le khat kihou limun, tumging tumin kitohdel’in Pakaiya nalunggil’in la sauvin. 20 Imatih chanin ima lam jouse a dingin i-Pakaiyu Jesu Christa minin Pa Pathen thangvah jingun; 21 Christa ja nan khat thun khat nung uvin

Pasal ho le ajiteu

22 Numeiho Pakai thua nung bangin napasal teu thun nungun; 23 ajehchu Christa chu atahsa Houbung huhhinga le aluchang ahi banga, pasal chu numei luchang ahi. 24 Houbung Christa thua anun banga numei ho jong ima lam jousea apasal teu thua nung diu ahi. 25 Pasal ho, Christan Houbung angailut’a, adinga Amatah akipeh doh jeng bangin najiteu ngailu’vin. 26 Christan angailut Houbung chu twiya asilngim’a thua asuh thengna dinga abol ahi, 27 hichu Houbung hi Ama angsunga loupitah leh thengsel, nolnabei le avonkom beihela adinsahna ding ahi. 28 Hijeh a chu pasal hon ajiteu chu ama ho tahsa banga angailut diu ahi. Ajinu ngailupa chu ama kingailua ahiye. 29 Ajeh chu koiman imatih chanin atahsa ahokhahpoi, Christan Houbung abolna bangin, avah khangin ahebolji bouve. 30 Eiho hiChrista tahsa tibah ihiuve. 31 “Hichejeh a hi mihemin anu apa lhakanga ajinu akolchahjoh ding chule amani tikhat hilhon dinga hi,” akiti. 32 Hiche thu hi giltah ahin, keiman Christa le Houbung thudol’a bou ka sei ahiye. 33 Ahinla nang ho amichang cheh a ding jong ahin, hijeh chun mi ama aki-ngailut bangin ajinu ngailu chehhen, chule numeiyin jong ajipa jabolcheh hen

Ephesus 6

Chate le nu le pa

1 Chate Pakai jal’in nanu napa thun nungun, hichu adih ahi. 2 “Nanu napa jabol’in,” kiti hi thutep lah a thupeh masapen ahin, 3 “Naphat theiya leiset chunga nahinkho sotna dingin,” jong akati. 4 Pate ho, nachateu sulung hang hin-un, Pakai deiya gahchah le tilkhouna lamjoh a seiletsah jo’uvin

Sohho le Pakaite

5 Sohho, Christa thua nanun banguvin, kichat le kihot pumpum in lung jangkeiyin tahsa lama napakaiteu thua nungun; 6 mihem vethoiding maiya hilouvin, hinkhopumpin Christa soh hiuvin, Pathen lungdei chu tonguvin; 7 mihema hilouvin Pakai lama lunggel’a soh natong hiuvin; 8 ajeh chu soh hihen chamlhat hile thilpha bol chanin Pakaiya kona kipaman asancheh diu naheuve. 9 Pakaiya pang ho, sohho chu tobangma chun bol’un, hutum gihsal bol dauvin, ajeh chu ama ho le nang ho nagom’u va Pakai chu van’a aumin, Aman koima dat le langkaina aneilou na heuve

Agilou douna galvon

10 Achaina keiyin Pakaiya pansan athahhat athilbol thei nan kitilkhouvun. 11 Diabol lungthim gilou chengse masanga napan jouna din Pathen galvon lhingkeiyin kivon’un; 12 Ijeh-inem itile eiho thisan le tahsaphe to kibon ihipouvin, van mun tin’a lhagao gilou engse ho, hiche vannoi muthimvaipo ho, thu neiho, vaihom ho to kidou ihiubouvui. 13 Hijeh chun nikho phalou nia nadin jouva, akhonna geiya dingdet’a nanan jouna diuvin Pathen galvon lhingkeiyin pan’uvin. 14 Hijeh chun thutah chu konggah bang in kigah un, adih chu ompho bangin panin dingun; 15 cham na Kipana Thupha chu kengchot kisesa bangin gotsan kikoiyun, 16 hicheng chunga chun agiloupa thalpi meikong tobang chu nasuhmit jouna diuvin tahsan chu lum bangin kidal nan neiyun; 17 chu le huhhingna chu thih-lukhuh bangin kikhuh-un, Lhagaova kon Pathen Thu chu chemjam bangin mangun; 18 hiche na ding hin Lhagao mang chan ijakaiyin phat jousen tao jing un lang, chujongle tantih neilouvin phat jousen kiging jingun, mithengte din jong taopeh jinguvin; 19 chule keima din jong Kipana Thupha thugil hi paodoh a thu ka sei teng kichentah a het theiya kaseidoh theina dingin neitaokop jingun, 20 hiche dinga hi thihkhaova kihen’a leng palai kahin, hiche laitah a hi kasei dingdol lom hangtah a kaseina ding ahi

Achaina

21 Pakai hinkhoa lhacha tahsan um sopi deitah Tychicus-in keima umchan ipi kabol nahetnom chengseu nahetsah nauvinte. 22 Keiho thudol nahet nom chengseu hetsah ding le nalungthim til khou ding ngaitoa ama hi nahenguva kahinsol ahi. 23 Pa Pathen le Pakai Jesu Christaa konin ngailut le tahsan chule chamna sopite henga um jing hen. 24 I-Pakaiyu Jesu Christa ngailut ho chengse chu kemthei louvin lungset nan umpi jingu hen

Philippi 1

Salam thu

1 Jesu Christa soh te ni Paul le Timothyn Philippi khoa um Jesu Christa tahsan mithengte le Houbung lamkai chengse, lhacha chengse henga: 2 i-Pau Pathen le Pakai Jesu Christa konin lungset le chamna nachunguva um hen.

Philippi khomite dia Paul taona

3 Nang ho kageldoh phat le ima tih chanin ka- Pathen kathangvah jinge; 4 Phat jousen thangvah to thon nang ho chengse dingin katao jing jengin, 5 Akipat nia pat tuni geiya Kipana Thupha kinbol thudol’a neikithopi jeh- un hitia chu kabol ahi. 6 Hichea hin nang ho sunga thilpha bolpa chun Jesu Christa nikho geiya amolso tei ding dettahin katahsan’e. 7 Nabonchauva thudol’a hitia lung kagel hi adih-e; ajeh chu kalungthim’a kavop jing nahiuve. Nanghon eikipe lungsetna thudol’a kabulput kahen lhahna hihen lang Kipana Thupha lama kihonna thusei le phudetna ding dol hijongle neichankhompi cheh-u ahiye. 8 Nabonchauva lung gil’a ka-ngailut nau kisei hi Jesu Christa lainatpina ka-ngaiyu eihettohpia Pathen ahijenge. 9 Hiche kataona lopen chu: ngailut naneiyu chu agil cheh cheh a, hetna gelkhenna aletsetna ding kati ahi. 10 Chutile nanghon thilpha datchilje nahet-uva, Christa nikho ni le thengsel le nolnabei nahi diu, 11 Jesu Christa vanga Pathen loupina le vahchoina dinga thildih ga chu nadim dingu ahi.

Keidin hin chu Christa ahi

12 Sopite, keima chung chang thusoh hi Kipana Thupha machal na joh ahidan nahet diu kadeiye. 13 Hichejeh hin kabulput kahen lhah hi Christa seijui kahijeh ahi Pretorian sepai ho le midang jouse henga aphongdoh tai. 14 Chu le kabulput henlhah hi sopite atamjon amun, hanlo na cheh-in aneiyun, gin bei hel’a thusei ding angamlotauve. 15 Atahbeh-in mi abangin thangset sum le kinahna bep’in Christa aseiphong leuvin, phabep’in vang thilpha deina aseiphongu ahinai. 16 Kon khat’ in jong Kipana Thupha panhuna thusei kahi ahetjeh uva ngailutna aneiyu ahi. 17 Kon khatsen vang kabulput henlhah na hi genthei kathoh be cheh ding dei naa lung theng louva Christa asei phongu ahibouve. 18 Ipijeh mong ham? Phat lhemna hihen atahbeh hijongle, ipi lam ahiya Christa chu kiseiphong thou ahin, hijeh chun kakipah-e, chule kakipa jing ding ahi; 19 Ijeh-inam itile nang ho tao kop jing jeh le Jesu Christaa kona Lhagao panpina jeh a hiche hi huhhinga kahung umna ding ahi kahei. 20 Kadei gilpen le kakinepna chu katoh dingdol kin pel louva kabol jing theiya, a-itih phat hihen tutah jeng hijongle hakattah a kapan ngam’a hinna hihen thina hijongle katahsa pumpia hi Christa choi-at nading hi ahipen’e. 21 Ijeh-inem itile keima din hin chu Christa ahin, thi chu hamphatna ahi. 22 Ahinla tahsaphea hin hi tohga pha sona joh ahile, hoijoh lhen kah ding kahepoi. 23 Ni kaha lhenjoh ding helouva moh lunggim kahi, kitel doh a Christa to umkhom ding kadei lheh jenge, hichu kei dinga gam chenga phajo ding ahi. 24 Ahin la tahsaphea kahin nah lai ding hi nang ho dia khoh jo nalai ahi. 25 Hijeh chun um nalai ing ting nabonchauva ka- umpia kipana le tahsan dol’a nakhan tou be na diuva kakithopi ding hi kaginchat’a kahet ahi. 26 Hichu nahenguva kahung kit teng keima jeh a Jesu Christa to nahinkhom nauva kisonna nanei be chehna dingu ahi. 27 Keima na henguva hung ing, hung mun, muhih jong leng, Kipana Thupha tahsan lam’a lung khat tah a napan khom’uva, Lhagao khat’a na din khom jing u kajah theina din nanun nakhan, nakhosah dol’u chu Christa Kipana Thupha to kitoh pou pou hen; 28 Nakidoupi-teu masanga kicha louhel’a napan’u chun amaho dinga manthahna ahi-dol aphotchetsah a, nangho dia huhingna ahije amusahding, hiche hi Pathena hungkon ahin, 29 Christa jal’a Ama tahsan mai hilouva Ama ding jong nathohgimpi diuva chan kipe nahiuve; 30 Hijeh a chu masanga thohgim’a gal kisat chu namu’ vin, tun jong najauvin ahi.

Philippi 2

Christa kineosah le choisanga aum

1 Christa to hinkhomnaa hi kitil khounaa, um dia, haldoh theina ngailut a um dia, Lhagaova kiloi khomna a um dia, dipdam le kilai natpina a um ding le, 2 Kakipana hi suchamkimun, lungthim kitha khat-in, ngailutna chu neicheh- in, thu khat kisauvin, lung khat hiuvin; 3 Moh hamhoitho le kiletsah man’a imacha bol louvin, lung nem heo chan khat’in khat chu ama sanga phajoa gel cheh hiuvin. 4 Koiman ama changseh ding mai gel louvin midang ding jong gelkhoh cheh hiuvin. 5 Jesu Christa sunga cheng lungput chu nang ho sung gil a jong cheng ding ahi. 6 Aman Pathen lim le mel aput jing jeng vangin, Pumhat’a Pathen to kibah ding agel naisaipoi; 7 Ama chamtah-in keohel’in akilhan, Soh lim le mel akivon jon, Mihem khat bangin mihem mel’in ahung kilah-in, 8 Thina chan geiyin achamtah-in akineosah-in, Thingpel’a thina chan geiyin thun anunge. 9 Hijeh a chu Pathenin Ama chu munsangpen chungvuma akhansanga, Min jouse sanga minthangpen apeh ahin; 10 Hijeh a chu van le leiset chule leiset noiya cheng jousen Dilsua Jesu min’a chibai aboh diu; 11 Chule lei jousen Pa Pathen loupina dinga Jesu Christa chu,’Pakai’ tia aphondoh cheh diu ahi.

Vah tampi banga vannoiya vah ding

12 Hiti ahijeh chun kadeitahte, sei na-ngai jing banguvin keima umpet maiya hilouvin, tu ka-umlou pet jengin jong kicha cheh-in ki thing thingin huhhing nachan nau molsona dingin na tongun. 13 Ijeh inem itile alungnachim ding deichat-na le toh nomna dinga nasunguva natong chu Pathen ma ma ahibouve. 14 Ima jouse phunchel louhle le kinel baotam louhel’in bol’un; 15 chutia chu hiche khang lamvai le vah koiho lah a hi nolnabei le themmona neilou, themmona bei Pathen chate nahiuva, vannoiya nisa banga navah theina diuvin, 16 Amaho chu hinna thu seipeh-un; chutile Christa Nikho teng kison-naa kanei theiya, kagimna le kacholna chengse hi moh ahilouje kichen ding ahi. 17 Natahsan jal’uva Pathena thilpeh le natohnaa hin kahinna thisan hi kisung lhahel jongle kakipah-in nabonchauva chunga kakitai piuve. 18 Hiti chun kipah-un lang keijong neikipa piu-vin.

Timothy le Epaphroditus

19 Nachung chang thuu kajah teng kitilkhouna kanei theina dinga nahenguva Timothy hinsol vah ding Pakai Jesu jal’in kakinem lheh jenge. 20 Nachung chang thuu lung thengsel’a gel khoh a ama tobang midang kaneipoi. 21 Ajeh chu mi- dang hon amaho ding jeng bou aki-hol’uvin, Jesu Christa thudol’a imacha agelkhoh pouve. 22 Timothy vang aphat chomje naheuve, ajeh chu chapan apa akithopi banga Ki-pana Thupha thua hi soh na tong banga keima eitoh hu ahiye. 23 Hijeh chun keima umchan ding dol akihet phat phat le ama hi hinsol ding kinem jing kahi. 24 Keima tah jong kahung loi ding hi Pakaiya konin kagingcha lheh jenge. 25 Ka-ngailutna kinbol dia na-solchah-u, kaseipai chanpi le toh khompi, sopi Epaphroditus hi na-henguva hinsol loi ding khoh kasa-tai; 26 ama dammo thu najah-u chu nommo asa lheh jengin, hijeh chun nabonchauvin namu nom lheh jenguve. 27 Ijeh-inem itile anan athideh chet jenge, ahivangin Pathenin akhoton, amaseh hilouvin keijeng jong lunggimna sangson kanei louna din eikhotoi. 28 Ama namu tengu nakipa kit theiyuva kalunggimna jong alhom dom theina dinga ama hi kahinsol loi jeng ahi. 29 Hichejeh chun Pakai jal’in Kipana tincheng to thon anasangun lang, hitobang mi hi jabol’uvin; 30 ijeh-inem itile aman keima neijen nauva abang khai jouse bulhitna din ahinkho geiyin atohdoh jengin, Christa ding natohnaa athilo deh chet jenge.

Philippi 3

Adih tahbeh

1 Kasopite, tukalse vang Pakai chunga kipah jingun. Nang ho dia aphat chomjeh-in kasutsa velsut kit ding kachimdehpoi. 2 Uichate chu kivet phat’un, thilse bol ho chu kivet phat’un lang cheptan lou khohsah ho chu kivetphet’uvin. 3 Ijeh-inem itile Pathen Lhagaova Pathen chibai boh a Christa Jesu jal’a kisonna nei, tahsaphea kisong lou eiho hi cheptan dihtah ihiuve. 4 Tahsaphea cheptan kisonpi ding hijongle kiphat lamna kaneipoi. Khattouvin tahsaphea cheptan chu akisonpi dingle ken kakheljoi. 5 Niget nia chep kitan, Israel chilhah, Benjamin phung Hebrew chilhah Hebrew mi, Danthu dungjuiya Pharisee kahin, 6 tompan jeh a Houbung bolsea pang, them channa dia Danthu lamdol’a nolnabei kahi. 7 Ahinla hitobang phatchomna kanei hi aboncha Christa jal’a pannabei thil’a kagel ahitai. 8 Ka-Pakai Jesu Christa hetna hin akhokhelsoh hel phat’in thildang jouse hi manthahna, imacha hilouva ka-ngaito ahin, Ama jal’a thil ijakai hi kapaidoh a, Christa chu kaphatchompi theina dinga adang hi eh tobanga kagela 9 Ama sunggil’a keima kakimudoh a, themchanna chu Danthu vanga kanei hilouva, tahsan jal’a Pathena hungkon them channa, hiche themchanna chu Christa tahsan vanga kanei theiya, 10 Ama le athokit thahatna kahet’a athohgimna chu kathoh khompia, athina banga chu kathi nom ahin, 11 kajo pou le thinaa kona jong katho doh ding ahi.

Abidol lam mano ding

12 Keiman kalahsa ahiloule chamkimsaa jong kahipoi; Christa Jesun keima eimat khah banga ken jong mat khah tei ding kagot joh ahibouve. 13 Sopite, keiman mankha taa keiya hisah mongin kagelpoi, kagel khat vang hi achesa thil jouse chu kasumil jin, masang lama thil ho kadeljoi; 14 Jesu Christa jal’a chunga Pathen kouna dungjuiya hatman sanna dia abidoi mun chu hadel’a del kahi. 15 Hijeh chun eiho apilhingsa sen hitobang hin lung gel’u hitin, ijemtia khattouvin thilchom agel jongle hijong chu Pathenin nahenguva phongdoh nante. 16 Hijongle eihon iphah sau chan geihin chon’u hite. 17 Sopite, nabonchauvin keima umchan jom’uvin. Navetkah diuva chon keiho umchan jop ho vechen’uvin. 18 Ijeh-inem itile mitampi achon nau hi najah-uva tamtah vei kaseisa ahitan, tua jong kap puma kasei ahi, amaho hi Christa Thingpel douva ahiuve. 19 Hijeh chun akikhon nau chu manthahna ahin, a-pathenu chu agilpiu ahi; akithang at nau chu jumna ahin, leiset thil ho jeng bou agel’uve. 20 Eiho vang igammi hinau chu van chunga hung kipan ahin, hichea kona chu Huhhingpa Pakai Jesu Christa hung ding kinemtah a i-ngau ahi; 21 Aman athilbol thei thahatna chu thil ijakai hi anoiya akoisoh a, eiho tahsa manmo hi Ama tahsa loupi tah lim’a akhel doh ding ahi.

Philippi 4

Tilkhouna

1 Hichejeh chun kasopi ngaitah le deitah te, kakipana le kalal lukhuh ho, hibang tah hin ngaitahte Pakai hinkhon dingdet jinguvin. 2 Euodia le Syntyche chu Pakai jal’a kihoutoh dinga deichom tah a ka-ngeh ahi lhon’e. 3 Ahi, kanamkoljon put khompi ginchat umtah nang jong ka-ngeh nahi, hiche numei ho hi kithopin, ajeh chu amaho ahiuvin, Clement ahin, adang dang katoh khompi chengsen Kipana Thupha thudol’a hatah a eitoh khompiu ahin, hinna lekhabu sunga hicheng min hi aumtai. 4 Pakai chunga kipah jingun, tikit leuvinge kipah-un. 5 Nachon nem’u chu mihem jouse het hihen. Pakai ahung naiye. 6 Imacha lungkhamna nei hih hel’un, ahin ima lam jousea taona le thumna mangin thangvah to thon nathum jouseu Pathen hetsah-uvin. 7 Chuteng hetna jouse kho-khelsoh Pathena hungkon cham nan Christa Jesu to nahinkhom nauva nalung thim’u le nalunggel jouseu ahonbit ding ahi. 8 Sopite, tukalsen vang ipi hile thutah dia kilompen, ja-thei doltah, adih dia ginchat pen, thengpen dia kilom, santhei doltah, thucheng ngei pen, ipi hile phatna dia lom auma pachat na thei aumle, hiti ho hi gel them’uvin. 9 Chule keiya kona nakihil’uva nalahsau, najahsau chule namusau chengse chu nang hon jong bol’uvin, chuteng cham konna Pathenin naumpi jing diu ahi.

Philippi mite thilpeh ho thangvah

10 Hitih nunga kaphatna ding nahin thah bol kit leuvu hi Pakai chunga hapan kakipah lheh jenge; nagot jingsau vang ahinan, phat kitup kom namu loujeh-u ahi. 11 Kalhahsam man a kasei ahipoi, ajeh chu keima hi kahi bang bep’a lung lhaiya umje kihil themsa kahintai. 12 Vaicha tah a umje kahen, neng jeng junga umje jong ka hei; ima jouse le ijakaiya oivaset a umje le gilkel tah a umje, ning lhingset le vaicha tah a umje thuguh kihil them kahitai. 13 Eihatsahpa Christa vanga ijakai bol thei kahi. 14 Ahinla kagenthei pet tah a neikithopiu hi nabolpha lheh-ui. 15 Kipana Thupha kipat til, Macedonia kadalhah chun nang ho tilou Houbung koimacha peh le lah thudol’a eikithopi aum louje Philippi mi nang hon nahet’u ahi. 16 AjehchuThessalonica khoa ka-umpet jeng jong chun ka-ngaichat hunnan avel vel’in neihin thot’uve. 17 Thilpeh chu kadei man ahipoi, nangho dinga aga apun ding joh chu kadei joh ahibouve. 18 Ijakai neipeh nau lekha hiche hi ahin, kaning lhingin, nang hoa kona santhei doltah, kikilhaina tobang thilpeh gimnamtui, Pathen lungdei lamtah kamun, kanei bulhingsettai. 19 Nang ho jong ka-Pathenin ahao dungjuiyin loupinan Jesu Christa hinkhon na-ngaichat chan’u subulhit nante. 20 I-Pau Pathen chu tonsot, tonsot geiyin loupi jing jeng hen: Amen.

Achaina lemna phabep

21 Christa Jesu hinkhoa hing mitheng josue salam’uvin, Kaumpi sopiten nasalam’uve. 22 Mitheng jouse ahideh chun Caesar insung miten nasalam’ui. 23 Pakai Jesu Christa lungsetnan nalhagaovu umpi jing hen.

Colossae 1

Salam

1 Pathen lungdeiya Jesu Christa solchah a pang Paul le sopi Timothyn 2 Colossae khoa um Christa sunggil’a mithengte le tahsan um ho, i-Pau Pathena konin lungset le chamna na chunguva um jing hen.

Colossae Christian ho dia Paul taona

3 Keiho phat jousen nang ho din kataovun, i-Pakaiyu Jesu Christa Pa Pathen kathangvah jingui. 4 Ajeh chu Jesu Christa hinkhoa natahsanu le mitheng jouse na-ngailut’u ka jauvin, 5 nang ho dinga kinepna chu van’a kholsa ahitai, hichu Kipana Thupha thutah thudol’a chun najatauvin, 6 hiche nahenguva ahung lhun a pat nalah-uva aumdol bangin vannoi pumpia aga pung lheh jengin, najah niuva pat Pathen lungsetna chu thutah-in amachal jingin ahi. 7 Hitia hi nang hon kangailut tah-u le sohna katoh khompiu Ephras a kona nahetdoh-u ahin, ama hi Christa dinga keiho cheng thalhenga tahsan umtah le lhachaa pang ahin, 8 ama hin lhagao vin napeh-u ngailutna naneiyu chu eiseipeh-u ahi. 9 Hijeh a chu hiche kajah niuva pat chihna tincheng le Lhagao jal’a Ama lungdei lam hetna le datkhen dol nadimsetna diuvin nang ho din taopeh le thumpeh na tang louhel kahiuve; 10 hichu imalam jousea Pakai lung lhaina to kitoh a nachon theiyuva, thilphalam natohana jouse a naga theiyuva, Pathen hetna lama jong nakhan touvuva, 11 aman athahatna loupi tah a kona thil ijakai thoh hat tah a na thoh theina diuva kidang tah a nahatsah-uva kipah tah a 12 nang ho chengse khovah laiya leng amithengte to lengkhom dinga lomtah a gongtoh Pa chu nathangvah theina diu ahi. 13 Aman muthim khojin tha neinaa kona eihuhdoh-uva, a-Chapa deitah lenggam sunga eipuilut’u ahitai. 14 Achapa jal’a chu lhatdohna le chonset ngaidamna ineiyu ahi.

Christa amatah chule anatoh

15 Chapa chu mu theilou Pathen limpu ahin, thilsem jouse sanga masajo ahi; 16 ijeh-inem itile ama jal’a thil ijakai, van a hihen leiset chunga hijongle, muthei le mumo ho, laltouna ho le loinehna gam ho gei, vaihom thu neina ahin, thil ijakai hi Ama jalle Ama dinga kisem ahi; 17 chule Ama chu thil jouse masanga anaum jing ahin, thil ijakai hi Amato akijopmat teng ding det ahiuve. 18 Ama chu atahsa Houbung luchang, abul ahin, ima lam jousea amasat jingna din athiho lah a jong athoudoh masapen’e. 19 Ijehinem itile Chapa sunga hi Patheinin chamkimkeiya chenpha adei ahi; 20 ajeh chu Ama jal’a thil ijakai aboncha ahenga suhchamsoh a, Ama vangle a-Thingpel thisan jal’a leiset chunga um jouse le vanlaijol’a um jouse kah a chamna asem ahitai. 21 Masang laiya thilse nabol’uva lunggel’a nadou laiyun Pathena kona pamse nahiuvin, 22 tua vang Ama angsunga nolna beihel le boh beh lou, athenga dinsah dinga tahsaphe pua athina tahsa jal’a chu nakicham piu ahitan; 23 tahsan’a nadindet jinguva, dettah le longlouva, najahsau Kipana Thupha kinepnaa chu long louhel’a napandet jing dingu ahi. Hiche Kipana Thupha chu vannoi thilsem jouse henga kiseiphongsoh ahitan, keima Paul jong hiche lhachaa chu pang ka hi.

Houbung dia Paul natoh

24 Tun nang ho dinga hesoh genthei kathoh jouse hi kakipapi. Ajeh chu katahsaphea thohna hin atahsaa kisim Houbung thalhenga Christa gimgentheina bangkhai jouse asuh bulhit ahi. 25 Hiche dinga chu Pathen gouching kahiya, na henguva Pathen thu lhingkeiya seiphong dinga eiki-ngense dungjuiya keima lhachaa pang kahi; 26 hiche thuguh hi tonsot tonsot, akhang khanga ki-im ahin, tua vang amithengte henga kiphongdoh ahi tai. 27 Pathenin hiche thuguh thalhinje le loupije itobang lom ahi chu namtin henga hilchet ding adeitan, hiche kinepna loupipen nasunguva Christa achen hi ahi. 28 Amabou hi kaphonjal’uva mitin kathumop’uva, chihna top’a mijouse kahilchah-u ahi; ajeh chu amitakip hi Christa dinga pilhingsaa kadinsah nom’u ahi. 29 Hiche nadinga hi Aman kasunga eikhumpeh thahat tah a natong jing ahatna chu mangchaa kiseh tah a tonggim ka hi.

Colossae 2

1 Nang ho ding le Laodicea khoa um ho ding chule tahsaphea kamai mukha lou hel ho ding geiya itobang tah a kihabol kahije hi nahetdiu kadeiye. 2 Hichu alung thimu akilhep bi theiya, ngailtunaa akikankhom’uva, hetkhenna lhingset, neng jeng junga aneiyuva, Pathen selguh Christa chu ahetdohna diu ahi. 3 Ama sunga chun chihna le hetna gou jouse akisel’e. 4 Hiche hi koiman seithem’a nanel lhah louna diuva kasei ahi. 5 Tahsa hin nalahuva lha hih jong leng lhagaovin nang ho to kalhahkhomin, kigah chah tah a napan det jeu le Christa natahsanjeu kipah-in kaseijinge.

Christa sunga hinkho lhingset

6 Jesu Christa chu Pakai dinga nakisan’u ahitah jeh-in, Amato hingkhom’un; 7 Ama sunga jung khouvin, kisadoh-un, nakihil banguvin tahsan nan kiphutdet’un, thangvah nan bulhingset’uvin. 8 Koiman chihgut lekha themna le mihemte pehson doha lhep lhahna thei moh thu homkeiuva gal-hing banga nakai mang louna diuvin ching theiyun, hichu vannoi leiset chondan dungjui bou ahin, Christa-a tobang ahipoi. 9 Ajeh chu Christa sung, atahsa sunga chu Pathen, a-Pathen hina chamkimsoh a pansa ahin, 10 vaipoh thu neina jouse luchang Christa to na hinkhom tengu le nang ho jong chamkimji nahiuve; 11 Ama sunga chu nang ho khut’a kitan hilou, cheptan nahiuvin, tahsaphe pu tahsa chu ponse selhah banga napaiyuva, Christa dinga chep kitan nahiutauve. 12 Ijeh-inem itile baptize nachan’uva chu amato kivuitha nahitauvin, Pathenin Ama chu thinaa athodoh kit, hiche thokitna chu tahsan jal’a amato thoukhom kit nahiutauve. 13 Nang ho chonset’a thisa, natahsapheu jong cheptan lou nahiuvin, Pathenin Christa to nachohing khom’uva ichonsetna jouseu angaidamsoh ahitai. 14 Eidou dal’uva pang khut’a kisun kihilna lhongpi Danthu chu Christan anoi manga, hichu asumangsoh-in Thingpel’a akhetbeh tai. 15 Christan vaipoh thu neina jouse ahoh lhasoh-in, atahsa chun abonchan ajousoh-in, kichentah-in aphongjal’e. 16 Chuti ahijeh-in koiman anneh thu, donthei thu, kut thudol, lhathah nit dol ham le Choldo Nikho thudol hamin nachung thuu khol da hen: 17 hichengse chu ahung lhung ding thil ho lim’a um ahin atahsa tahbeh chu Christaa umjo ahibouve. 18 Themgao thilmu bang mukisaa, ale lama kichonnemsah, Vantilte ho pou chibai boh nom mi koimacha nasan diu kipaman chu lahmangsah hih hel’un, hitobang miho hi mihem lunggel lam jeng agel jeh-uvin huilhoh mang theibep ahiuve. 19 Amaho chu atahsa pumpi Pathen thilgon banga akhantouna dinga tuhgom’a kilmatsoh guchin thagui chengse kigopsohna aluchang chutoh kimat lou ahitauve.

Christa to hinkhothah

20 Vannoi leiset bulpi lhagao hoa kona ontholna dia Christa to thikhom nahitah-u le ibol’a leiset kihilna lhongpia pansat’a hing ding goa nahiuvem? 21 “Tham hih, tep hih, tongkha hih,” kiti ho chu. 22 Hicheng hin akimanchah teng mangthahji thilho aseidoh ahin, aboncha hi mihem thupeh le thuhil jeng ahibouve. 23 Hiche ho hin ki engbol’a hougutna le kichon nemsah chule tahsa tibah engtim’a kitimna jal’in chihna gong apun, ahinla tibah ho kitiman dinga imacha phachom louhel ahibouvui.

Colossae 3

1 Nang ho Christa to kaithou tha nahitah-u le chunglam Pathen jet lama Christa kitousahna mun’a thil ho jeng bou hol’un. 2 Leiset chunga thil ho hilouvin chung lam thil ho jeng gel’uvin. 3 Ijeh-inem itile nang ho athisa nahitauvin nahinnau chu Pathen sunggil’a Christa to kiseltha ahitai. 4 Nahin nau Christa ahung kilah teng, nang ho jong Amato loupi tah a nakilah khom diu ahi.

Hinkholui chule hinkhothah

5 Hijeh chun leiset chunga natibah chengseuva natong jonthanhoi, thenlou, huh, lungtup gilou, milim hou tobang papset hicheng hi that gam’uvin. 6 Hicheng jeh hin thua nung lou chate chunga Pathen lunghan achujin ahi. 7 Masanga nang ho jong hichenga hi ana chon’a ana hing nahiuve. 8 Tun vang lungsat, lunghan, mitthip, taitom, nakamsunguva kona thujahmo sei jouse hi aboncha napai mangsoh diu ahij. 9 Khat le khat thujouvin kihou hih-un; ijeh inem itile mihem lui chu achonna jouse pum’a ponse lelhah banga nale lhahsau ahitai. 10 Ama limtobanga Sempa chu kichentah a na hetna diuva tang louhel’a semthah jing jeng limthah chu nakivon joh-u ahi. 11 Hichea hin Greek hihen Juda hile, cheptan le cheptan lou, koito kisamkai khah lou le khosuh khotou helou, soh, chamlhat aum thei poi Christa chu imajouse hisoh a, ijakaiya umsoh ahitai. 12 Hijeh chun Pathen lhentum mitheng, angailute nahijeh-un lainatna, khotona, kineosah nunmen, thohhat hicheng chu kivonjou’vin. 13 Khat le khat kidemdaito cheh-un, khat’in khat chunga kiphinna anei jongle kingaidamto jengun; Christan nang ho na-ngaidam bangun nang ho ki-ngaidam’uvin. 14 Hicheng jouse chunga hin kikankhomna chamkimpen ngailutna neiyun. 15 Christaa hungkon cham nan nalung sunguva vai homhen, hiche dinga chu tipumkhat’a kikou nahiuve. Chule thangvah jinguvin, 16 Christa thu nasunguva dimset’in cheng jing hen, chihna tin chengin kihilto kithumop to’uvin, tum ging to thon, houlan, thangvah to thon Lhagao lan nalung sunguva Pathen din sauvin. 17 Chule ijakai nabol jouse thu lam ahin natoh lam ahin abonchan Pakai Jesu minin bol’uvin, Ama jal’in Pa Pathen thangvah jingun.

Hinkho thah le ule nao kinbol ding

18 Numeiho Pakai dia lomtah-in pasalte thun nunguvin. 19 Pasal hon numeite chu ngailuvin, nunbol dauvin. 20 Chate, imalam jousea nu le pa te thun nunguvin, ajeh chu hiche hi Pakai lung lhaina ahi. 21Pate, nachateu alungbei lo louna diuvin sulung hang hih-un. 22 Sohte, mihem mitvet maiya hilouvin, Pakai gin nan lung jangkeiyin imalam jousea tahsa lamdo’a pakaite thun nunguvin. 23 Ipi hile nabolchan’u chu mihemte dia hilouvin Pakai dinga bol bangin lung thim pumpin bol’uvin. 24 Ijeh-inem itile Pakai koma kona goulo ding kipaman nasan diu naheuve. Sohna natoh nau chu Pakai Christa ahi. 25 Ajeh chu thildih lou bol’an a thildih lou bol man asan ding ahin, hichea hin maipha vetna aumpoi.

Colossae 4

1 Pakaite, yan’a Pakai khat naneiyu heuvin lang sohte chu dih kei le jangkeiyin bol’uvin.

Tilkhouna

2 Tao nan phangdet jingun, hichea chun kiging jinguvin thangvah to thou’uvin. 3 Pathenin keiho dinga thu seiphongna ding kot ahondoh a, songkul’a eikihenlo na Christa thuguh seiphong theina dingin keiho din jong neitaokop jinguvin. 4 Chutile kasei ding dol chu kichentah a kasei thei ding ahi. 5 Polam miho koma chihna mangchan chon’un, phat chu kitup keiyin mang chauvin. 6 Nathuseiyu chu phat jousen onemheo le kitoh chet, thanop um jing hen, chule thu nadong jouseu kitoh chet’a donbut din kigosadem hiuvin.

Achaina salam phabep

7 Pakai dinga tahsan um lhacha le soh, sopi deitah Tychicus hin kachung chang thu nahetnom chan naseipeh nauvinte. 8 Ama hin kaumchan thuu nahetsah-uva nalung thimu atilkou ding deinaa nahenguva ama kahinsol ahi. 9 Amato lhonin tahsan umle dei umtah sopi Onesimus, naloipau hin hikoma thilsoh nahetnom chan nahil nauvinte. 10 Kasoh chanpi Aristarchus-in nasalam’ui, Barnabas inkopa Markin jong, ama thudol hi thupeh namusau ahitan, nahenguva ahung jeng khat le ana lamtouvin. 11 Justus Jesun jong nasalam’uve; chepten holah akona Pathen lenggam thudol’a kanatoh khompi hicheng hi bou ahiuvin, amaho hi kalungmonpi lheh jengin ahi. 12 Nang ho lah a mi khat Epaphras Jesus Christa soh, ama jong chun nasalam’ui; ama hi Pathen lungdei pumpia bulhingset’a nanun theina diuva nang ho dinga gunchu tah a tao jinga, nadindetna diuva thum jing ahi. 13 Ijeh-inem itile amahin nang ho ding le Laodicea a um ho chule Hierapolis a um ho dinga hatah a athohgima na atoh hi keima mongin kahettohsah ahiye. 14 Ngailuttah louthem Luke le Demas-in jong nasalam’ui. 15 Laodicea um sopite Nympha chule a insunga kikhom Houbung chu salam’uvin. 16 Hiche lekha hi nahenguva akisimjou teng Laodicea Houbung henga jong akisimdohna din ngaitouvin, chutobangman Laodicea kona lekha thot jong nang hon nasim’uvin. 17 Chule Archipus jah a, “Pakai vanga nangman lhacha panmun namu chu namolso theina dingin chingtheiyin,” tin hil’uvin. 18 Hiche salam thu hi keima Paul khut’a hungkon mong ahi. Kabulput hi geldoh jinguvin. Lungset nan umpi jingun.

1 Thessalonica 1

Salam

1 Paul le Silvanus chule Timothyn Pa Pathen le Jesu Christa to hingkhom Thessalonica khoa Houbung mite chunga lungset le chamna hung lhung hen.

Thessalonica mite tahsan le hinkho

2 Keihon phat jousen nang ho din Pathen kathangvah jingun, katao nauva tang louhel’in nang ho kamin phah jinguve. 3 Itobang tah a natahsan’u natoh a napoh doh theiyuva, ngailut jal’a iti natoh hat’uva, chule i-Pakaiyu Jesu Christa jal’a nakinep nauvin itobanga nathoh hatsah-u chu i-Pau Pathen angsunga kageldoh jinguve. 4 Pathen ngailut sopi deitah le alhentum nahiu kaheuve. 5 Ijeh-inem itile nahenguva Kipana Thupha kahung lhut’a chu thuhomkeova ahipon, thahat le Lhagao Theng vanga ahin, kaseiyu chu chamkimsoh ahi; nang hojal’a hiche hin keiho itobang kahiu ahetsah chu nang hon naheuve. 6 Ajeh chu thu kisei chun gim genthei tamtah nahin pohlut peh vangun Lhagao Theng jal’in kipah tah-in nasangun, keiho le Pakai umchan banga umtei ding nago ham’uve. 7 Hijeh chun Macedonia le Achaia gam’a tahsan mite vetkah ding doltah-in naumdoh tauvin ahi. 8 Ijeh-inem itile nang hoa konin Macedonia le Achia gamsunga Pakai thu akiphonjal keovin akingapon, Pathen lam’a natahsan detjeu chu gamtin’a akithangsoh tan, hijeh chun keiho sei sei angaipoi. 9 Nang ho kahung vil’uva, nang hon neisan jeu, doilim semthu nahou nauva kona itobang Pathen lama nakiheiyuva, Pathen hing jing dihtah hou dia hungkihei nahiu mi tamtah-in jong aseiyuve. 10 Chule ahung lhung tei ding lunghannaa kona eihuhdoh-uva Jesu thinaa kona kaithouva umpa, Achapa van’a kona hung dingpa na-nga jeu chu aseiyu ahi.

1 Thessalonica 2

Thessalonica khoa Paul natoh

1 Sopite, nangho kahung vil’u chu mohjenseh ahilou nahenauve. 2 Nahetsau bang chun Philipi khoa hesoh genthei tah le jachat umleuva eikibol vangun ka-Pathen’uva kitilkhouna neiyin, Pathen a hungkon Kipana Thupha chu adouvah atam lheh jeng vangin nahenguva seidin kapangui. 3 Ijeh-inem itile ka-ngeh nau hi pannabei ahipon, athenglou jong ahipon, lheplhah na jong ahipoi. 4 Chuti malah Pathenin Kipana Thupha thua nganse lom eisah-uva eiphasah jeh-uva kaseiyu ahin, mihem lung lhaisah ding golouva, kalungthimu patep tohsa Pathen joh kalung lhaigot’u ahibouve. 5 Imatih chan’a pachat lhem thu mang lou kahiuvin, nahetsa bangun papset khu nan jong ima kamangji pouve. Pathen ahetoh a pang ahi. 6 Nang hoa hihen midanga kon hijongle mihema kona pachat kahol pouve. 7 Christa solchah kahi jeh-un pohgih hahsa pohsah jeng theiyu jong leng; ahinla minu them tah-in achate akhoukhah them bangin nang ho din nun nem tah kahiuve. 8 Ka-ngailut nau agil behseh jeh-in Pathen Kipana Thupha kachanpi nom keova ahitanpon, kahinkho geiyuva kahop nomi ahitai; ajeh chu nang ho ka ngai lu lheh jenguve. 9 Hijeh chun sopite, itobang tah a nang ho koima cha dinga pohgih kahilouna diuva chol le nang, a sun le jan’a na katoh-uva, nang ho Pathen Kipana Thupha seipeh ding kagot’u chu geldoh jingun. 10 Atahsan mi nang ho henga kachon nau athenje adihje chule nolnabei ahije ahetoh-a nang ho le Pathen nahiuve. 11 Pan achate abolna banga nang ho khat cheh kabol’u chu nang hon naheuve. 12 Katilkhouvun, kalhamon’un, aloupina le alenggam chan khompi dinga nakoupau Pathen lungdei dol’a nahin theina diuvin khat cheh-in kahettosah-uve. 13 Chujongle atahbeh monga Pathen thu ahijeh chun kathuseiyu chu mihem thu banga gel louva Pathen thua najah jeh-uvin Pathen kathangvah jing jengui; hiche thu chun atahsan nang ho lah a na atong jinge. 14 Ijeh-inem itile sopite, Jesu Christa to hingkhom Judea gama Pathen Houbung mite umchan jom nahitauve, ajeh chu ama hon Juda mite khut’a athoh banguva nanghon jong nagam miteuva kona nathoh gim’u ahitai. 15 Judamiten Pakai Jesu le Themgao ho athat’un, keiho einodoh jengun, achunguva Pathen alung lhai nai saipon, chu le mitin doumah chang ahiuve. 16 Chidang namdangte huhhinga aum theina diuvva thu kaseipeh diu geiyin eisutang go’uve; hichu achonset nau pilhin molsona ahitai. Hijeh chun akhon nan Pathen lung hanna achunguva achutan ahi.

Paul’in Houbung avil nomkit

17 Sopite, chomkhat ikikhen kangu hi, lungthim mit’a milmo nahivangun, ka-ngai lut’un namaiyu mukal ka-ngah lel lheh-uve. 18 Hijeh chun nahenguva hung din kakigouvin, ahideh chun keima Paul’in jong hung ding kagot loi ahitan, Satanin eisumo jiuve. 19 I-Pakaiyu Jesu ahung kit teng le a-angsunga keiho kinepna, kipana, kichoi-atna lallukhuh ding nang ho nahilouvuham? 20 Ijeh-inem itile nang ho hi keiho loupina le kipana nahiuve.

1 Thessalonica 3

1 Hichejeh chun kathoh jou loutah phat’un Athen khoa kachunga eidalhah diu pha kasauvin, 2 Christa Kipana Thupha jal’a Pathen kinbolnaa tohkhompi isopiu Timothy chu nang ho dinkhompi ding le natahsan thudol’uva natil khou diuvin kahinsol’uve, 3 chutile hiche thoh gim gentheinaa hin koiman nasuh lung ling lao lou diu ahi. Hiche hesoh genthei hi ithoh tei diu ahi nahenauve. 4 Ijeh-inem itile nakom’uva ka-um laiyuva hiche hesoh genthei kathoh diu hi kaseipeh masah dem nahitauvin, hitia chu hung lhung ahi naheuve. 5 Hijeh a chu lhepna chun lhem lha taleu chun katohna jouseu moh ahikhah ding hi kathoh jou lou phat’a natahsan’u hechen dinga nahenguva Timothy kahinsol jeng ahi. 6 Tun vang nakom’uva kona kahenguva Timothy ahung lhungin, natahsan’u le na-ngailut nau kipana thupha, phatjousea phatah-a neigeldoh jinguva keihon kamu nombang uva neimu nom’u thu ahin lhuttai. 7 Hichejeh chun sopite, hesoh genthei nan eichup jeng vangun natasan’u chun kakitilkhou lheh jengui. 8 Ajeh chu nang ho Pakai dia nadindet jeh-un tun keiho din jong hinlo aumtai. 9 Nang ho jeh le nachung chang thu’va i-Pathennu angsung kipana le thanopna hijatpi kaneiyu hitoh kitoh chet’in Pathen chu iti kathangvah tadiuvem? 10 Namaiyu kamu’uva natahsan’u lhahsam kabulhit theina diuvin sunle janin giltah-in katao jing jenguve. 11 I-Pau Pathen le i-Pakaiyu Jesun nahenguva kalampiu hinlhungjang hen. 12 Nang ho khat le khat ki-ngailutna le mitin na-ngailut nau chu Pakaiyin khantousah jing hen, nang ho ka-ngailut nau to bahsah hen. 13 Hiti chun nalungthimu phudet hen lang, i-Pakaiyu Jesu amithengte jouse to lhon’a ahung kit tengle i-Pau Pathen angsunga nolnabeiyin nakoiyuhen.

1 Thessalonica 4

Pathen lungdei hinkho

1 Sopite, tukalse vang Pathen lungdeilama iti chon ding dol keihoa kona nalahsau banga nachon theijuva, hitia chu nabol be chehna diuva Pakai Jesu jal’a kathumu’va ka-ngeh nahiuve. 2 Ijeh-inem itile Pakai Jesu vanga itobang thupeh kapeh-u nang hon nahenauve. 3 Pathenin nanghoa kona adei chu then ahin, hijeh a chu jonthanhoiya kona nakitim diu ahi. 4 Nang ho amitakip chun atibah cheh chu itobanga kitim thema, theng le jabol’a umsah ding nahet diu dol ahi. 5 Pathen helou chidang namdangte banga huh napat lou diu ahi. 6 hiche thudol’a hin koimachan asopi dohan bolda hen, masanga kaseipeh-uva chule kahttosahsau bang chun hitobanga chonho chunga hi Pakaiyin phu alah tei ding ahi. 7 Ijeh-inem itile Pathenin athenglou dia eikouvu ahipon, atheng dia eikoujoh-u ahibouve. 8 Hijeh a chu hiche jop lou chun mihem ajop lou ahipon, a-Lhagao Theng napepau Pathenjoh ajop lou ahibouve. 9 Kisopi, ngailut thudol’a hin nahenguva hinsut khoh angaipoi, ajeh chu khat le khat ki-ngailutje Pathena kona kihilsate nahitauve. 10 Chujongle Macedonia gam pumpia sopite abonchauva hitia chu nabolsau jong ahitai. Nahabol be chehna diuva ka-ngeh-u ahi, sopite. 11 Kangkhen cha umje kihil’un, nakin cheh kibol’in, kahilsau bangin nakhut cheh-in na ki tohgim’uvin. 12 Chuti bol leu chun polam mite sei phat nachan’uva, lhahsamna nanei lou diu ahi.

Pakai Jesu hungkit ding

13 Sopite, kinepna bei miho banga naum louna diuvin a-ihmumilte thudol helouva naum diu kanompouve. 14 Ijeh-inem itile Jesu athia athodoh kit itahsan jeh-un, Jesu tahsan’a ihmumilte chu Pathen in Amato ahinpui kit ding jong itahsan’ui. 15 Hiche hi Pakai thusah akona kaseipeh nahiuve, ipijeh-inem itile Pakai hungkit ni geiya eiho ahinga kidalha chengse hi itinama jong le a-ihmumilte sanga masajo lou ding ihiuve. 16 Ijeh-inem itile Pakai ama tah ogin to, Vantil pipu ogin to chule Pathen sumkon gin to kithoa van’a kona hung kumlha ding, chu tengle Christa jal’a thisa chengse thoudoh masa diu ahi. 17 Chujoutah le eiho ahing nalai amoh chengse hi amaho chutoh vanlaijol’a Pakai lamto dinga meilom’a ikitoltou dingu ahi; hitia chu imatih chan’a Pakai to iumkhom jing diu ahitai. 18 Hiti ahijeh chun hiti thu ho hin nang ho khat le khat kitilkhou jingun,

1 Thessalonica 5

Pakai hungkit ding kigingun

1 Sopite, aphat le achang thudol hi nahenguva hinsut angaipoi, 2 ajeh chu janlaiya gucha ahung banga Pakai nikho chu ahung lhun ding nang hon kichentah a nahetsau ahi. 3 Mihon, ‘Chamle lungmon aum’e,” atilai tah-u le numei naoso nat banga photlot louva manthahna chu achunguva hung chuphung jeng ding, koimacha hoidoh louhel diu ahi. 4 Sopite, nang ho vang muthima um nahitapouvin hiche nikho chun gucha banga nahinlap den lou diu ahi. 5 Ajeh chu nang ho nabonchauva khovah le sunlai chate nahiuve. Eiho hi janlai muthim lah a um ihipouve; 6 hijeh chun midang ho banga ihmu louvin, lung limgeh chan kihong jingu hite. 7 Ijeh-inem itile a-ihmua jong janin bou a-ihmun jukham ho jong janin bou akham’ui, 8 eiho vang sunlaiya limgeh ihiuvin, tahsan le ngailut ompho bangin kivon’u hitin, huhhing dia kinepna chu thih lukhuh bangin kikhuh-u hite. 9 Ajeh chu eiho hi Pathenin lungsat khum dinga ei lhenu ahipon, i-Pakaiyu Jesu Christa jal’a huhhing chang ding joh a eikouvu ahibouve. 10 Eiho hah jingu hen ihmu jongleu hen Amato ihinkhom jingna diuva Ama eiho khel’a thia ahitai. 11 Nang hon nabol ngai banguvin khat le khat hiti hin kitilkhou to’uvin kihuto’uvin.

Tilkhou le salam chaina phabep

12 Sopite, ka-ngeh nahiuve, Pakai jal’a nalh-uva mi phabep kikoiya, nalamkai diu le nahilchah diuva natong ho chu ja lomtah-in ja’uvin. 13 Anatoh nau jal chun ngailut nan hajan jabol’uvin. Nasunguva kichamdel’un. 14 Sopite, thase ho phohsal’un, lung lhachom tilkhouvun, alhasam kithopiuvin, mi jouse dia thoh hat dinga ka-ngeh-u ahi. 15 Chingtheiyun, koiman setna chu setna thuh louvin, chusangin phat jousen khat le khat din jong chule mi jouse din jong thilpha bol ding go jinguvin. 16 Ki pah jingun, 17 tang louvin taovin, 18 imalam jousea thangvah jingun; ijeh-inem itile hiche hi Jesu Christa jal’a nang ho dia Pathen lungdei lam ahi. 19 Lhagao chu pheltan dauvin, 20 gao thusei jong nahsah modauvin; 21 amavang ima jouse patep soh keiyun apha chu kolchah jingun; 22 thilse tapou peldoh soh keiyuvin. 23 Chamna bulpi Pathenin nang ho nasuthengsoh keiyu hen; i-Pakaiyu Jesu Christa hungkit teng nolnabei nahina diuvin nalhagao, nahinkhou, natahsau bitkeiyin koi hen. 24 Nakoupau tahsan umtah ahin, nabolpeh tei diu ahi. 25 Sopite, keiho din jong neitaopeh-uvin. 26 Kibengchop thengin sopite jouse salam’un. 27 Hiche lekha hi sopite jouse henga nasimna diuva Pakai thahat’a kathugah nahiuve. 28 I-Pakaiyu Jesu Christa milungset nan umpiuvin.

2 Thessalonica 1

Salam

1 Paul le Silvanus chule Timothyn i-pau Pathen le Pakai Jesu Christa jal’in Thessalonica khoa Houbung henga: 2 Pa Pathen le Pakai Jesu Christa konin chamna le lungsetna nachunguva um hen.

Christa hungkit teng thutanna

3 Sopite, natahsanu seithei louhel’a akhantou jeh le nabonchauva khat le khat ki-ngailutna apunjal jeh-in keihon tang louhel’a nang ho dia Pathen thangvah vah jeng ding hi akitoh lheh-e. 4 Nang hon thohgim le bolsetna hichengpi douva hi natahsan jom jeh-un Pathen Hou bung dang ho henga nang ho kaki thang-at pi lheh jengui. 5 Hicheng nathoh jeh-uva hi nathoh lo na pen’u Pathen lenggam dinga lah thei lom nahi diu, hichun Pathen thutan dihje photchetna aphondoh ding ahi. 6 Pathen dihtah chun nabol gen theiteu chu kitoh chet’a thohgimna apeh ding ahi; 7 hiche hi van’a kona Pakai Jesu A-Vantil thanei tah te to ahung kiphondoh teng Pathenin nang ho hi nathoh gimna jouseuva kona keiho puma eilhadoh diu, 8 meikou deuje ju apat’a Pathen heloute le i-Pakaiyu Jesu Kipana Thupha jop lou jouse chunga phu alah ding ahi. 9 Amaho talen mat ding chu tonsot’a thoh ding man thahna, Pakai angsung le aloupina thanei tah akona tolmang hel ding ahiuve. 10 Hiche hi amithengtea kona loupina le atahsan jousea kona jabolna kisan dinga Pakai ahung nikho le chuti ding ahin, keiho hettohsah tahsan nahijeh-un atahsan lah a nang ho jong napangui. 11 Hichea hin i-Pathen’uvin akouna to kitoh a nasan’uva, thilpha ding nadei jouseu le tahsan vanga natoh chu athahat’a amolso soh keina din tang louhel’in nang ho kataopeh jingui. 12 Hitobanga chu i-Pathenu le Pakai Jesu Christa lungsetna dungjuiya nang ho jal’a i-Pakaiyu Jesu min choi-at’a auma, nang ho Amasunga naum diu deina ahi.

2 Thessalonica 2

Danbei mihem

1 Sopite, i-Pakaiyu Jesu Christa hungkit ding thudol le amato ikikhop khom diu thudol’a hi kangeh-u nahiuve. 2 Lhang kisam khat tou hihen, Lhagaova kon hihen, thu kithanga kon hihen, keiho lekha thot’a kondol’a kisei hijongle, Pakai nikho chu hung lhungsa dol’in gel’un lang lung ngaito kisuh noh phahsah le lung linglaovin um hih hel’uvin. 3 Imacha lamin jong koima kilhep lhahsah dauvin; ajeh chu Pathen doumah bolna hung lhung masa ding, mangthah dia peng dan bei agiloupa hung kiphongdoh ding ahina laiye; 4 amahin dou apat’a, Pathen min pu jouse le houdia kibol thil jouse chunga kichoi sanga, hitia chu acham cham’a Pahen houin geiya jong touphaa aneiya, hung kipathensah ding ahi. 5 Hiti jouse hi kaumpi laiyuva kaseipehsau chu nageldoh louvu ham? 6 Akitep phat tah a ahung kiphon dohna dinga tua ipin atuh kih ahi naheuve. 7 Ijeh-inem itile Danbei chun guh thimin na atong jinge; alailunga kona akilah mang kaha dinga bou atuhkih a chu ahen-oh ahibouve. 8 Danbeipa ahung chu kiphon doh tah le Pakai Jesu ahungkitna dinga hung kilah paiya akamsunga kikhong doh huiya athaa, asuh mang ding ahi. 9 Danbeipa hung chu Satan thahatna to hung kilhon ding, thaneina tin cheng le melchihna ho chule jouva bolmo kidang tampi bol theina to hung kilhon diu ahi. 10 Huhhing a aum na diuva adih ngailutna akisan loujeh-uva manthahna lut dia umsa ho chu melse tah a alhep chatvai diu ahi. 11 Hijeh a chu Pathenin achunguva joulhepna alhunsah ahin, hichea kon hin amahon thujou atahsan’un, 12 thutah tahsan louva thujouva nomsa chengse chu athuu kitan cheh ding ahi.

Huhhinga umdia lhendoh

13 Pakai dia sah tah sopite, ima-tih chan’a nang ho dinga Pathen thangvah hi kabol diu lomtah kin ahi; ijeh-inem itile thutah tahsan jeha Lhagao Theng jal’a Pathenin nang ho hi huhhing chang masa loi dia nalhendoh-u ahitai. 14 I-Pakaiyu Jesu Christa loupina nachan theina diuva Aman nang ho hi, keihon Kipana Thupha kaseipeh-uva kona nakouvu ahi. 15 Hijeh chun sopite, kathuseiyuva kon hihen lang lekha thot’a kisun hijongle, ka hilsau chengsea chun dingdet jingun. 16 I-Pakaiyu Jesu Christa Amatah le i-Pau Pathen, tonsot lungmonna le lungsettah a ngailut kinepna eipepau chun 17 imalam jousea natoh pha le thupha seinaa nalungthimu tilkou hen lang phutdet jing hen.

2 Thessalonica 3

Keiho neitaopeh-un

1 Sopite, tukalse vang nang ho lah a banga Pakai thu hi gangtah a seiphonga choi-at’a aum na din keiho dingin neitaokop jingun. 2 chujongle mihon atahsansoh loulai jeh-un mihem gilou le engse hoa kona kahoidoh theina diuvin jong neitaokop jinguvin. 3 Pakai chu tahsan umtah ahin, aman naphut det’un tin agiloupa konin nachingtup jing nauvinte. 4 Pakai jal’a nang ho kaginchat jeh-uva natoh ngai bang natoh jingna diuva thu kapeh na hiuve. 5 Nalungthimu chu Pathen ngailutna le Christa thohhatna lama Pakaiyin kaihoi hen.

Natohna dia bat nei

6 Sopite, sopi koi hile akahleh akalouva chon, keiho hilchahna to kitoh a chon lou mi jouse chu nakiloikhompi louna diuva Pakai Jesu Christa min pan’a thu kapeh nahiuve. 7 Nakom’uva tong louva ka-umlouvu, keiho umchan itobanga najop’u nang hon na heuve. 8 Koima an manbeiyin kanepouvin, nang ho koimacha pohgih kahi khah louna diuvin gim genthei hahsa thoh-in sun le janin na katongu’ve. 9 Thuneina kaneilou jeh-u ahipoi, keiho umchan najom theina diuva nang ho vetsahna monga kabol’u ahibouve. 10 Ijeh-inem itile i-umkhom pet’uva koi hile natong nom lou chu anjong nehsah lou dia nang ho thu kapehsau ahitai. 11 Ahinla nalahuva kon khat akaleh akalouva chon, natong louva mi sinmo le bep thu kajauve. 12 Hitobang miho hin thip beh cha na akitoh-uva an akineh diuva Pakai Jesu Christa min pan’a thu kapeh-uva katilkhouvu ahi. 13 Sopite, nang ho vang thilpha bol nan chimtih neilou jen’un. 14 Hiche lekha thot’a keiho thu ngailou chu nang hon melchih-un lang, ajachatna din kivoppi dauvin. 15 Hijongle melma banga bol louvin sopi bangin hilchahjo’uvin.

Taokhum kha na

16 Chamna bulpi Pakaiyin imalam jouse le ijakaiya chamna napeu hen. Pakaiyin nabonchauvin umpiu hen. 17 Hiche salam hi keima Paul khut’a hungkon, lekha thot jousea melchihna a hitia kasutji ahi. 18 I-Pakai Jesu Christa lungset nan nabonchauvin umpiuvin.

1 Timothy 1

Salam

1 I-kinep nau Jesu Christa le Eihuhhinguva Pathen thusah a Jesu Christa Solchah Paul’in 2 tahsan jal’a cha dihtah Timothy henga: i-Pakaiyu Jesu Christa le Pa Pathen’a konin lungset le hepi chule chamna hunglhung hen.

Thuhil lhemho doudalna, hilchahna

3 Mi abang bangin thuhil dih lou ahil louna diuva phoh tang dia Macedonia lam kajot kon’a ka-ngeh bangin Ephesus umdenin, 4 amahon semthu thusim ho pou le akhonna bei khanggui thusim aseiho’u chun miho lung lutsah hih-in, hiche ho hin tahsan vanga ki mu Pathen gou-thilho sangin kinel baotam na jeng bou asosah-e. 5 Ahinla hiche thupeh kipeh lo na lungthim theng tah le ngailut lunggel chule tahsan kicheh tah a hung kon ngailutna khantousah ding thu ahibouve. 6 Mi kimkhat hichenga kon hin akihei mangun avah koi leuvin mohkihoulim nan akimang gamtauve. 7 Akison nau jong kicheh lou, thusei jong kichen lou, hejong hekhen louvin Danthu hil’in apan nom’ui. 8 Danthu hi adoltah a mangpa dia thilpha ahi i-heuve. 9 Ijeh-inem itile hitin akimui, Danthu hi midih pa ding ahipon, Dan sukeh ho le hutuh lel ho, Pathen heloute le chonse ho, atheng lou ho le aboh ho, pa that ho le nu that ho, mihem that ho, 10 mito jonpan ho, ki-ngai-jong ho, mihem gumang ho, joubol ho, jouva kihahsel ho chule ipi hijongle adang adih lama kihilna to kikal jouse bol ho ding ahibouve. 11 Kihilna dih chu keima eikivopsah kipa umtah Pathen loupina Kipana Thupha dungjuija kihilna chu ahi.

Paul’in Pathen hepi athangvah

12 Keima tahsan theiya eigel’a lhacha eipansah, thahat eipea i-Pakai Jesu chunga kakipah lhehjenge. 13 Masang chun ataitom le abolse chule pumhat jengin kana pangin, ahinla hiti ho chu atahsan lou kahijeh a hetoh louva kabol ahijeh-in Patehnin eihepin, 14 Jesu Christa jal’in i-Pakaiyu milungset chu tahsan le ngailut pumin keidin alet lha jengin ahi. 15 Chonsete huhhing dinga Jesu Christa vannoiya ahung hi tahsan dinga lhingset thu ahi; choset ho lah a keima akhoh pen kahin, 16 Ama hintahsan’a tonsot hinna nei ding ho vetkah a pang dia Jesu Christan thoh hatna chengse chu amasapen’a kei chunga photchetna abol nom jeh a hita chu eihepi lheh jeng ahi. 17 Tonsot Lengpa, thi-tih neilou, mutheilo Pathen khatseh chu jabolna le loupina tonsot tonsto’in chang jing hen: Amen. 18 Sepai phatah banga hichenga chu gal nasat theina ding, masanga nachung chang thua kisei masa ho dungjuiya napan theina dia hiche thupeh hi kapeh nahi chapa Timothy. 19 Tahsan le hetkhenna pha nei jingin, mi bangin hiche hi anahsah loujeh-un tahsan asuhmang lo tauve. 20 Ama ho lah a hin Hymnenaeus le Alexander jong apangin, ama ni hi Pathen ataitom lhon louna dia hilchah ding in Satan koma kapeh doh tai.

1 Timothy 2

Taona thudo’a hilchahna

1 Amasapen’a ka-ngeh nahiuve, thumna le taona, midang taopehna chule thangvahna ho mijouse dinga, 2 leng ho le thunei vaihomte din neiyun, chuti le Pathen ging le gun che na puma chamdel le lung mongtah a hinkho iman thei diu ahi. 3 Hichu eihuhinguva Pathen mitmua santhei thilpha ahi. 4 Pathen chun mihem josue huhhinga aum’a thutah het theiya ahung um diu hi adeiye. 5 Pathen khatseh ahin, Pathen le mihemte kah a palai jong khat bou ahi- Mihem Jesu Christa chu, 6 Ama chamtah-in mi jouse lhatdoh nan a hung kipen, hettohsahna chu aphat cha um doh ahi. 7 Hiche dinga hi aseiphong dingle solchah dia eikipansah ahi tah kasei ahin, jou kaseipoi, thutah le tahsan thua chiding namdangte hil’a pang kahi. 8 Hichejeh chun muntin’a pasal hon lung hang lou hel le kinel baotam louhel’a khut theng dom’a atao diu kadeiye. 9 Hitobangma chun numeiho jong nihchen ponsil dol’in gingkhen le chinghtei tah-in amaho tah kivon’u hen; sampheh hoi le sana ham, twikohchang ham, ponsil hoi ham, thil mantam pen ham a kijem louvin 10 Pathen ginje phong doh thei numei umdol’in thilpha bol’in kijemjou’u hen. 11 Numei chu imalam jousea thua nungkhen chan thip beh chan kihiljou’u hen. 12 Mihil dingle pasal chuang tha nei din numei kangensepoi, chusangin umthim ngit nget jou’u hen. 13 Ijeh-inem itile Adam kisem masa chujouva Evi ahi. 14 Adam chu lhep lhah a um ahipon, numei nu joh lhep lhah a um’a, themmochangkha ahibouve. 15 Ahinla lung lim-geh leh kisuthenga, tahsan le ngailut neiya aum jom jing le numei chu acha neinaa jong kihinso jing ding ahi.

1 Timothy 3

Houbung lamkai gunchena

1 ‘Koi hile Houbung lakai nom chun natohpha adeichat ahi,’ ti hi tahsan theidol thu ahi. 2 Ahinla Houbung lamkai ding chu nolnabei, numeikhatseh jia nei, kitimthei, lung limtah, kitup tah, jin dotthem, mihil them, 3 ju nelou, mideng lou, nun nema doubol lou, sum ngailu lou, 4 a-insung phatea kipoh tupthei, ja umtah a achate athua nunsah thei mi hiding ahi. 5 Ama insung bon poh tupje helouvan Pathen Houbung iti apoh tup thei ding ham? 6 Ama chu tahsan thah hilou ding ahi, ajo le kiletsah jeh a Diabol themmo chan naa ama jong chuh lo ding ahi. 7 Seiset achan a Diabol thanga a-o khah lou na dinga polam mite sephat jong hi ding ahi.

Houbung lhachaho thepna phabep

8 Houbung lhacha ding jong migin ja um ma, kamtam lou, ju lop lou, alam louva sum veikan lou, 9 lung ngaito thengsel’a tahsan thua thilguh hetna nei mi hi diu ahi. 10 Amaho kipatep masau hen, nolnabei ahiule lhachaa pang diu ahi. 11 Ajiteu jong hitobanga chu migin ja um, jouva mi hehse lou, kitimthei, ijakaiya tahsan um mi hi diu ahi. 12 Lhacha ho chu numei khatseh jia nei hi cheh-u hen, achateu le a-insunga kitup’a po-them cheh hiu hen. 13 Ijeh-inem itile phatah a lhacha kinbol mihon din mun pha akisemdoh-un, Christa Jesu sunga um tahsan thudol’a hangtah-in apang ngam’ui.

I-houvu thuguh

14 Hunga nangma mu loi ding kinem’a hiche lekha hi kasut ahi. 15 Ijemtia kahung gei khat le thutah bul le khompi- Pathen insunga chu iti chon ding nahetna dia kahinsut ahi. 16 Pathen hou thuguh kiphongdoh aletdol chu hiche ahi: “Ama tahsaphen akiphongdoh-in, Lhagaovin them achangtan; Vantilte mit mun aum doh-in, Chitin namtin lah a seiphongin aumin, Vannoija min atahsan tan, Loupin lah touvin aum tai.”

1 Timothy 4

Pathen tahsan dailhah ding kisei masah

1 Ni nu nung lam le mi abang bang tahsan naa dailhauva jousei lhagao ho le thilha ho thuhil’a ahung lung lut diu thu, lhagaovin kichentah-in aseiye. 2 Hitobang phat lhem na ho hi alunggel’u kisou tahsa mijou hoa hung kon ahi. 3 Ama ho hin jinei ding akham’un, atahsan hon thutah hetna jeh a thangvah puma akisan diuva Pathenin asemsa neh thei dolchu neh ding ajadauve. 4 Ijeh-inem itile Pathen thilsem chengse aphasoh keiye, thangvah pum’a ikisan le imacha pai ding aumpoi. 5 Ajeh chu Pathen thu le taonaa kisuthengsoh ahitai.

Jesu Christa lhacha pha

6 Nangin nahinjuipeh thuhil pha le naki khou khahna tahsan thu ho chu sopite pe le chun Jesu Christa lhacha phatah nahi ding ahi. 7 Amavang thilboh, numei tehse ho loulimna ho chu pai mangin; natahsa tah-in hou ngaisahna lam’a kichuh themjon. 8 Ijeh-inem itile tahsa lama kichuna jong them khat thil phachom ahinan, Pathen houlam’a kichuhna hi tu hinkho ding hinhen, kho nung hinkho dinga hijongle aphat chom na thutep umsa ahi. 9 Hiche thu hi tahsan um, imalam jousea san dinga kilom tah ahi. 10 Hing jing Pathen, mitin huhhingpu, ahideh a atahsante huhhingpa chunga ikinep jeh-un itong gim’un ikiseh lheh jengui. 11 Thu hicheng hi pen lang, hil’in. 12 nachapan jeh chun koiman noise bol da hen, hisang chun thulam, chonchan lam, ngailutna le tahsa lam chule themna lam in atahsante vetsui theiyin umjon. 13 Kahung kahsen Pathen lekhabu simna lam le mi tilkhou lam, chule mihil lamin anaponthon. 14 Themgao hon thu aseiyuva upa hon nachunga thenso khut angap’uva nakipe Lhagao thilpeh nachan khahchu nahsah mon boldan. 15 Mijouse anga nakhantou akiphondoh theina din hichengse hi bol’in hiche hoa hin lung lut’in. 16 Nachung chang ahin, nathuhil ahin, kiging phan, hichenga chun pansan, ajeh chu hiti hinbol le chun nangma tah le nathuja ho nahuhdoh ding ahije.

1 Timothy 5

Midang bolpeh ding kinho

1 Upa chu phohsal hih-in, napa tobangin tilkhou thon; khangdong ho chu sopi bol’in, 2 nupi ho nubol’in, nu-ngah ho nanaote bangin thengsel’in i-lam jousea kaihoiyin. 3 Meithai tahbeh ho chu meithai jabol dol’in jabol’in. 4 Meithai chun tu le cha anei le amaho hin amasan a-insunguva Pathen hou ngaisahna kichuh-u hen, ahinvah dohho lungset thuh kihil masau hen; ijeh-inem itile hiche hi Pathen maiya santheidol tah ahi. 5 Meithai kicheh tah achanga um vang chu Pathena kinem’a sun le jan’a thumna le tao naa kipe jing jeng ahi. 6 Tahsa nop sahnaa kimang nu vang chu ahing laiya thisa ahi. 7 Amaho chu seiset achan louna diuvin thupeh hicheng hi pen. 8 Hichea hin koi hile amite ding ngaito lou, ahideh a a-insung mite ding ngaito lou chun tahsan ataitom ahitan, atahsan loupa sanga khohjo ahitai. 9 Kum somgup noiya mi hilou chu meithaiya sut thei ahi, pasal khatseh jia nei mi, 10 thilpha bolnaa seiphat chang, khou khahje themsa, jindot them, mithengte keng silpehsa, genthei hesoh kithopia imalam jouse a thilpha bolna kipum peh mi hi ding ahi. 11 Khangdong meithai ho vang pansah dan, ijeh-inem itile jinei ding adeichat tengu le Christa deimo lamtah-in aum doh jiuvin, 12 atahsan masah apailhah jeh-un themmo achanlo jiuve. 13 Chuche tilouvin jong thaset apan’un muntin’a akholai lengun, thaset keoseh hilouvin amuh them kamjauvun, sei ding lomlou thupou aseiyui. 14 Hijehchun khangdong nalai ho chun ji aneiyuva cha ahindiu, insung akiphouva melma chu thilse bolna phat adei banga apeh louhel diu kadeijoi. 15 Mikonkhat jong Satan nung juiyin akihei mang tavue. 16 Atahsan numei khattouvin meithai ho anei khah le hiche ho chu kithopi hen; chutile meithai tahbeh ho chu Houbungin akithopi thei ding ahi. 17 Upa lamkai pha, thu seiphong le thuhil lama hapan’a pang ho chu tohman ajat ni chan amu diu lom tah ahi. 18 Ijeh-inem itile Pathen lekhabun, “Bongchal chang chilpet amuh som hih-in,” atin, chule “Natong’an tohman asan lomtah ahi,” ati. 19 Ahetoh mi ni le thum alhin loule upa khat kihehna chu la hih-in. 20 Midangin kichatnaa anei theina din achonse ho chu japi masanga solsal’in. 21 Pathen le Jesu Christa chule lhentum Vantilte angsunga giltah a kahil chah nahi, thupeh hicheng hi mangin lang phochen louvin thu tandan, chule lang neiyin jong ima bol hih-in. 22 Kintheng tong ding ahi tin koima chung a thenso-khut ngamloi hihin, midang ho chonsetnaa jong pandan, thenna din nangle nang kiging jingin. 23 Nagilpi nat jeh le nadammo veiset jing jeh chun twisih keo jeng don louvin lengpitwi them khat mangin. 24 Mihem phabeppi hi achonset nau kilang tah ahin, hichun thutan na mun alhut loi jengin, phabepse chonsetna vang, khonung teng akiphongjibouve. 25 Hitobang hin natoh pha jong kilang tah ahin, kilangdoh lou aum jongle kisel thei ahideh poi.

1 Timothy 6

1 Pathen min le kihilna hi taitoma aum louna din namkoljon po nalai soh chengsen leiset’a a pakai teu chu gin le jabol lomtah a anei diu ahi. 2 Atahsansa pakaiya neikha hon jong sopi ahi tah man’a nahsah moa abol lou diu ahi; chusangin hajen cheh jou’u hen, ijeh-inem itile atohgau akisan nau miho chu tahsan nei le ngailutna neimi ahitauve.

Kihilna lhem le hao dih

Hicheng hi hil’in lang tikkhouvin. 3 Mi khattouvin thuhil chom dang ahil’a, i-Pakaiyu Jesu Christa thudih chengse le hou ngaisahna thuhil’a lung lut lou aum le, 4 ama kichoisang bou, imacha la helou, kinel kalna ding thu hol le ding hivei aveiyin, hichea chun kithangset, kitaitom, phaloutah a, kiginmo asohjin, 5 kinah nah jeng leh manthahna hi thutah hepha talou mihem ho lunggel’a hung kon ahin, Pathen hou thu jeng jong sumkol veina nei ding ago’uve. 6 Ahinla lung lhaisel’a Pathen houlam’a gunchu hi, phatchomna lentah ahi. 7 Ijeh-inem itile leiset chunga imacha i-hin polut pouvin, imacha i-pohdohthei lou diu ahi. 8 Hijeh a chu neh le chah nihchen ponsil ineiyu le eiho dia lhingset ahije. 9 Hao lunggul ho chu mihemte suhgamna le manthah naa lhah mangsah hel thei ngolna tin cheng le kisuh khahna thei lung guljouse a lhah lut theina lhepna thangkol’a a-oh jiuvin ahi. 10 Ajeh chu sum ngailuthi setna jouse bulpi ahin, sum mu ding ngaitona kiha bolna lam’a mi kimkhat tahsan’a konin akihei mangun, amaho le amaho thoh natna tampin akisuh khah lojiuve.

Tahsa tah a tilkhouna

11 Vo Pathen mi, nangman hechengse hi jamsanin; adih, Pathen houlam, tahsan, ngailut, thoh hat, nunem hicheng joh chu hol jingin. 12 Ahetoh mi tampi angsunga phondoh phatah naphondohna dinga nakikouna bangin kipaman tonsot hinna san nadin tahsa kilhai tetna lam’a hatah-in pangin. 13 Thil ijakai hinsah Pathen le Pontius Pilate angsunga phondoh phatah neiya, hettohsahna bol, Jesu Christa jal’a hiche thu hi kapeh nahi, 14 nangman i-Pakaiyu Jesu Christa hung kilah kit kahsen thupeh hi boh beh louhel le seiset na beihel’in ching jingin. 15 Nun nom jing, thanei khatseh, leng jouse leng le pakai jouse Pakaiyin achamtah a phat ahin phon doh ding ahi, 16 ama bou thi-tih nei lou, ngailut thei hoi hilou, khovah a cheng, ama chu koiman mu khah lou, mihemin mu jong mu thei lou ahin, ama jenga chun jabolna le thahatna tonsot geiyin um jing hen, Amen. 17 Tu hinkhoa vannoi leiset thil’a, hao ho chu ahoitho louna diuvin hilchah-in, kichetna bei gouva ki-ngai louva, imanchah diuva thil jouse eipe jinguva Pathen joh a ki-ngaiyu hen: 18 thilpha aboluva, napha tohna a atha lhin theiyuva, ahongphal’uva, mito chan kikop theiya aum’uva, 19 khonung hinkho dinga bul phatah gou akikhol’uva, hinkho tahbeh chu atuh chah jingna diuvin til khouvin. 20 Vo Timothy, nangma na kichinsah chengse chu hongtup’in; lam dih lou tah a hetna dol’a kisei, Pathen suhmilna le kinel baotamna chu peldoh jon. 21 Mi phabep’in hiche chihna chu aneidol’in aseiyun, tahsan lam’a abidoiyu asuh khel lo tauve. Lungsetnan umpiuvin.

2 Timothy 1

Salam

1 Christa Jesu sunga hina thutep dungjuiya, Pathen lungdeiya, solchah Paul’in, 2 Cha deitah Timothy henga: Pa Pathen le i-Pakaiyu Jesu Christaa konin lungsetna le hepina chule chamna nachunga um hen.

Thangvahna le tilkhouna

3 Lung ngaito thengsel’a pu le patea pat kahou Pathen chung nunga kipa thanop na kaneiyin, sun le jan’a thumna kanei chanin tang louhel’in nangma kageldoh jing jenge. 4 Namit lhi lon kageldoh jing jeh-in kakipa chamkim theina din nangma mu kal ka-ngah lel lheh-e. 5 Masanga napi Loisi le nanu Eunice sunga chenga tahsanna kicheh tah nasunga cheng chu kageldoh-in, hichu nasunga achen jing ding kaging chai. 6 Hijeh a chu nachunga thenso- khut ka-ngap jeh a Pathen thilpeh nachan chu meibanga na konsah kitna dinga kahin geldoh sah kit nahi. 7 Ijeh-inem itile meidoi-na dinga Pathenin Lhagao eipeh-u ahipon, thahatna le ngailutna chule kitim theina ding joh ahibouve. 8 Hichejeh chun i-Pakaiyu thudol hettohsahnaa jong meidoi hih-in, ama jal’a sohchang kei chung thua jong jahcha hih-in, chusangin Pathen songin Kipana Thupha thudol’a hahsa thoh jon. 9 Pathenin eiho na-tohho vang hilouva ama thilgon dungjui le alungset jal’a kouna thengsel’a eikouvuva, eihuhhingu ahibouve, hiche lungsetna chu vannoi khang kipat masanga Jesu Christa sunggil’a eina pehsau ahin, 10 tua hi eihuhhinguva Christa Jesu hung kilah a kona hung kiphongdoh ahitai; aman thina chu asubeiyin, Kipana Thupha jal’in hinna le thi-mo na chu khovah a aphongdohtai. 11 Hiche Kipana Thupha hi sei-phong ding le Solchah ding chule mihil dinga eikipansah ahi. 12 Hijeh a chu hichengpi hi kathoh gim ahin, ahivangin kajachatpi poi; Ijeh-inem itile katahsanpa chu kahetna, hiche nikho geiya chu chin dinga eikivop-sah jong hi ahonbit ding kasong lheh-e. 13 Keiya kona najahsa thuhil kicheh-a nanei, vettoh a juithei chengse chu Christa Jesu sunga cheng tahsa le ngailut nan tuh jingin. 14 Nakivopsah thilpha chu eiho sunga cheng Lhagao Theng panin ngah phan. 15 Phygelus le Hermogenes pumin Asia gamsunga mi jousen ei-nung ngatsoh hel’u hi nangman nahetsa ahitai. 16 Pakaiyin Onesiphorus insung mite chu hepi hen; aman kabulput hi jachat pi louhel’in kalung asuhal mat chet jengin ahi. 17 Rome khoa ahungin jong eihung hol hol jengin, eimudoh teiye. 18 Pakaiyin hiche Nikho chule Pakaiya konin hepina musah tei hen, Ephesus khoa lhacha kin abol chengse chu nangin phatah-in nahei.

2 Timothy 2

Jesu Christa dia sepai pha

1 Kachapa nangma vang Christa Jesu sunga um lungset nan pan-san, hat jingin, thaphan. 2 Ahetoh tamtah a kona kasei najahsa chengse chu tahsan um mihemho pe-sonin, chutile amahon midang ho ahil thei diu ahi. 3 Christa Jesu sepai phatah bangin genthei hahsa hi thoh gim-pin. 4 Sepai koima apansahpa lung-dei bolnom chun hinkhosunga ding lung gelnan akisumo ngaipoi. 5 Gol-seh bol min jong Dan dungjuiya abol loule koiman jo na lallukhuh asang theipoi. 6 Loubol’a pang na-tong gim mi chun agam ga-a chan anei masah pen ding ahi. 7 Kasei hi ipi ahi nagel toh ding ahi, ajeh chu Pakaiyin hetkhen na napeh ding ahinai. 8 Kipana Thupha kaseiphong dungjuiya David guiya peng, thinaa kona thoudoh Jesu Christa chu geldoh-in; 9 Hiche Kipana Thupha jeh a chu akhang gilou banga thih khaova kihen kahin, ahivang in Pathen thu chu akihen tang dehpoi. 10 Hijeh a chu lhen chomten Christa Jesu sunga kisel sochatna le tonsot loupina aneidoh theina diuva amaho dinga hichengpi kathohgim ahi. 11 Hiche thu hi tahsan umtah ahi: “Amato ithikhom’u le amato ihinkhom diu, 12 Ithoh lhumkeiyu le amato lengvai ipoh khomdiu, 13 Eiho tahsan bei hijongleu hen, Ama tahsan umtah ahi; Ajeh chu ama le ama akiseilep ngaipoi.”

Seiphat chang natong

14 Hiti ho hi miho geldohsah jingin lang, thu homkeova akinel baotam louna diuvin Pathen ang-sunga hilchah-in, hiche ho hin ima aphat chomsah pon, aja ho akhup athal’in achuh lo ji bouve. 15 Kipatep them changsa banga Pathen koma, din jouna din nang le nang kiha-bol’in, kijumso na beihel natong mi hinadin thutah chu jangkeiyin mangchan. 16 Houthu seisetna moh thuhom keova kihoulimna ho chu peldoh-in, ajeh chu hiche hoa tha-nom ho chu Houthu ngaisahmo na lam’a haltou cheh cheh jo ahiuvin, 17 chule athuseiyu jong chun masemon machal banga aneh chal tel tul diu ahi; hiche ho lah achun Hymenaeus le Philetus jong apang lhone’e. 18 Amaho hin thutah aho-khel’uvin, thokitna chu akichaisan aseiyun, mi phabep tahsan alehei-peh tauve. 19 Ahinla Pathen khom-phu chu dettah-in ading nai, “Pakaiyin amaa chengse ahe nai,” tin mohor akinam khumin; chujong le, “Pakai min minphah chan chu adihlouva konin kikhin mang hen,” akiti. 20 In lentah sunga khun sana le dangka bel jeng aumpon, thingbel le leibei ho jong aum’e; amaho chu abang sahlut dol aumin, abang sahlut lou dol aum’e. 21 Seisa thilse chengsea kona kithensodoh mi chu sahlut dol tah, akisuthengsa, Pakai dinga natong thei, thilpha bol dinga kigosadem ahitai. 22 Khangdonglai lunggul chengsea konin jamin, lung thengsel’a Pakai min pan ho chutoh adih tahsan, ngailut chule chamna holjon. 23 Ngolkai le lungthimbei ho kinelna chu peldoh-in, hichea chun kinahna asohdohji nahei. 24 Pakai soh natong chun doubol angai ahipon, chusanga mi jouse khoto them, mi-hil them, lungde-hat hiya, 25 lungnemtah a adouho chu apuijang joh ding ahi. Ijem itile Pathenin amaho chu thutah ahin hetdohna dinga lungheina phat apeh theiya, 26 Dia-bol’in amat’a alungdei lamtah a ahinga ahen nau thangkol’a kona hung toldoh thei diu ahi.

2 Timothy 3

Ninu nung nikhoa Mihem umchan ding

1 Ninu nung lam le phat hahsa tah ahung lhun ding hi hen. 2 Ijeh-inem itile mihemten ama chang cheh ki-ngailutna, sum homthona, nom ham hoitho, kichoisang, Pathen taitom, nuthu pathu ngailou lam’a lung lut’uva, phatna ngaisah lou le aboha um gam’uva, 3 khotona bei, hepina neilou, jouthua hehse hat, ti kitim lou, tuhngoi mo, phatna hotbol, 4 lepche, dingchanglou, kiletsah, Pathen ngaisah sanga tahsa nopsahna ngaisahho hidiu ahi. 5 Hou-ngaisah lim’a um’uva, hou-ngaisah-na tha neije la janom lou, hite hoa kon jong chun kihei mangin. 6 Ama-ho lah a kimkhat doha lungthimin mi intin’a alut jiuvin, chonset poh-gih jeh a lung ngaichatna tampin apui lon le numei ho chu gal-hing kiman bangin aman jiuvin, 7 hito-bang numeiho chula akihil jing vangun thutah hetnaa chu hung lut thei louhel ahiuve. 8 Jannes le Jambres chun Mose adoudal ihon banga hite ho jong hin thutah chu adoudal’uva, lungput sesa, tahsan thudol’a lolhing lel mi ahitauve. 9 Ahinla amaho sao tah chejou deh lou diu ahi, akisei te ni chunga thilsoh banga chu angolnau mitin koma kichenset’a kilangdoh ding ahi.

Paul’in Timothy athu lhah chaina

10 Nangin najuipehsa chu keima mihil chonchan, lungtup, tahsan thoh hat, ngailut, lungde-hat, 11 bolsetna chengse le gim hesoh ho chu ahin, Antioch le Iconium chule Lystra khosung dunga chu itobang tah a bolsetna kidang dang kachung-a hung lhung hitam, hichengsea kon jong chun Pakaiyin eihuhdoh soh keiye. 12 Chule koi koi ahin Christa Jesu sunga Hou-ngaisah-a hinnom jousen bolsetna athoh tei ding ahi. 13 Migilou ho le kilep them mihem ho chu phamo cheh cheh diu, midang alhep lhah banguva amaho min alhep lhah diu ahi. 14 Nang vang dettah a natahsan, nakihilsa chengsea chun ding det jingin, na-hil’a pang ho chu koi ahiu nahe nai. 15 Christa Jesu sunga tahsanna jal’a huhhingna napui-lut thei chih-na napethei Pathen lekhabu chu nachapan laiya pat nahetsa ahitai. 16 Pathenin hu alhakhum Pathen lekhabu chengse chu kihilna ding, kipho na ding, kipuijang na ding le adih lam’a kichuhna dinga pha-tah ahi. 17 Chutile Pathen mi chu kitoh chet’a um theiya natoh pha chengse tohna kigosadem’a um ding ahi.

2 Timothy 4

1 Pathen le mitin ahing athi thutan ding Christa Jesu maiya, chule ahung kilah kit ding le Alenggam pan’a guntah a kahilchah nahi, 2 thu chu seiphong len, aphat hihen aphat lou hijongle, lung nengtah-in miho chu hilto gomin athemmo nau hetsah-in, sosal’in, tilkhouvin. 3 Ijeh-inem itile mihon thuhilpha kicheh chu ngai thei louva, abilkol’u thahtun tun’a ama ama lung ngai-chat dungjuiya mihil akikhop khom diu phat hung lhung ding ahi. 4 Chule amahon thutah akona abil-kol ahei manguva, semthu thusim lam’a hung lung lutjo diu ahi. 5 Nang vang imalam jousea lung limgeh chan umin, hahsa thoh gimin, Evangelist na tongin, nalhacha na-toh chu bulhit molson. 6 Ije-inem itile keima hi eiki-katdoh ahitan, kapotdohna ding phat ahung lhungtai. 7 Golseh phatah kaseh joutan, kilhai tetna ka chaiyin, tahsan kamolsotai. 8 Tukal se-a vang keima dinga themchan na lallukhuh chu koisa ahitai, dih tah a thutan Pakaiyin hiche Nikho chu le eipeh ding ahi, kei keo hilouva ama hungkit ding ngailu jouse jong ahiuve.

Tahsa tah a hilchahna

9 Kahenga hungvah na din hung kihabol’in; 10 ajeh chu Demas chun tulai vannoi hi angailut jeh-in eidalhan, Thessalonica a achetai; Crescens chu Galatia lama achen, Titus ma Dalmatia lama achei; 11 Luke changseh-in eiumpi. Mark hinpuiyin lang hung lhonin, ajeh chu ama chu kei dinga lhacha kinbolnaa phachom tah ahi. 12 Tychicus vang Ephesus lama kasoltai. 13 Nahung teng Troas khoa Carpus khut’a kadalhah kasangkhol len le lekhabu ho, ahidehchun savun lekhabu ho chu hinpon. 14 Sumsan kheng Alexander chun giloutah-in eibol’in, Pakaiyin athilbol dungyuiyin lethuh nante. 15 Ama chunga hin nang jong hung kigingphan, ajeh chu aman ithusei hou’u hi hatah-in adoudal’e. 16 Kakihonna thu kasei masah pen chun koima chan eihupon, abonchan eidalhasoh hel’uve; hichu amaho themmon kisimpeh da hen. 17 Ahivangin keima jal’a thu kiseiphong chu lhingset’a akiphondoh a chidang namdangten ajahsoh keina diuvin Pakaiyin eidinpin tha eipen, chule Phaisameigeo kamsunga konin eihuhdohtai. 18 Pakaiyin thilse bol jousea konin eihuhdoh intin, van chunga A-lenggam sunga din eihuhhing nante. Loupina chu tonsot tonsot geiyin amaa hijing hen: Amen.

Salam chaina

19 Prisca le Aguila chule Onesiphorus insung mite chu salamin. 20 Erastus chu Corinth a aumdentai. Trophimus adammon Miletus a kadalhatai. 21 Phalbi masanga hung tei din hung kihabol’in. Eubulus, Pudens, Linus, Caludia le sopi jousen nahin salam’ui. 22 Pakaiyin na-lhagao umpin, Lungsetnan naumpi jingu hen.

Titus 1

Salam

1 Pathen soh natong, Jesu Christa Solchah a pang Paul’in Pathen lhenchomte tansan dungjui le hou ngaisahna dungjuiya thutah ahetnau to kitoh, 2 tonsot hinna dia kinepna, vannoi, khang kipat masang a pat jou seithei lou Pathen thutepsa, 3 ama dei phat cha athu hung kiphongdoh a, eihuhhingpau Pathen thupeh dungjuiya keima eiki-nganse chu: 4 kikop khom cheh tahsan dungjuiya chatah tah Titus henga: Pa Pathen le eihuhhingpau Christa Jesua konin lungsetna le chamna nachunga um hen.

Crete mun’a Titus natoh

5 Thil kibol bulhing lou chengse naboltup soh a chule khopi jousea upa ho napansah na dinga Crete a kadalhah nahi. 6 Pansah ding chu koi hile nolnabei, numei khatseh jia nei, achate jong tahsan neisa, seiset chang lou, vah thai lou, thua nung khen hidiu ahi. 7 Ijeh-inem itile Houbung lamkai chu Pathen gouching ahijeh a nolna bei, kicham sah lou, lungsabai lou, ju nelou, mideng lou, alam louva kilose lou mi hiding, 8 chusanga jindot them, thilpha dei, lung limgeh, midih, hougut mi, kitim them mi hiding ahi. 9 Thuhil kicheh mangchaa tilkhouna abol theiya chule adouho nelkelna chu alekhup theina dinga kihilna dunguiya ginchat umtah thu chu tuhchah mi hiding ahi. 10 Thua nung lou atam lheh jengun thu motsei seiya milhen chavai adim’ui, amaho chu cheptan ho lah a atamdeh-ui. 11 Amaho hi akam’u suhbing loiding ahi, ajeh chu alam louva phatchom ding holnan hil louhel ding thu ahil’un, miphabeh insung asucheh gamtauve. 12 Amahon laha khat athemgao ho’u khat’in: “Crete miho chu mijou jeng, Gamsa gilou tah, thase neh hatte ahi,” ati. 13 Hiche hettohsah hi a dih monge. Hijeh chun amaho tahsan kicheh mi ahina diuvin hatah-in phohsal’in. 14 Thutah pai manga. Juda miho thusim semthu le mihemte thupeh hoa chun lung lut dau hen. 15 Milung theng ho dia ijakai athengin, akisubohsa ho le atahsan lou ho din imacha athengpoi, alungthimu le alung ngaito nau bohsoh ahitai. 16 Pathen hedanin aphongdoh nauvin, atoh nauvin la ataitom’uve; amaho hi hot umtah le thu ngailou ahiuvin, natohpha ijat hile tongdia kiloma ahitapouve.

Titus 2

Thuhil kicheh

1 Nangin vang thuhil kicheh to kitoh chubou nasei ding ahi. 2 Upa ho chu lung neng tah, ima khohsah nei, lung limgeh, tahsan neiya kitimthem, ngailut nei, thohhat hiu hen. 3 Nupite jong chu jathei dol’a gingkhen cha hiu hen, jousei hat hilouva, jua kitimo hel hul’a sohchang bang lou diu thilpha hil’in pangjo’u hen, 4 nutil khangdong ho chi ajiteu le achateu ngailutje kisinsah-u hen lang, 5 Lung khaikhi them, atheng, insung minu pha, mipha, ajipate chengu thu noiya kunjel u hen lang, Pathen thu chu taitomin umsah dau hen. 6 Hitobang ma chun khangdong ho jong lung khaikhi them dia natilkhou ding ahi. 7 Nangman tah jeng jong imalam jousea vetkah theiya thilpha nabol ding, namihilnaa nakitahje, ja naum je, 8 nathusei kichehje chu kimusah-in, chutile eidouteu chu kijumsoa ichunguva thuse seiding aneilou diu ahi. 9 Soh ho chu ijakaiya apakaiteu thu noiya nungjel thei, nelkel louhel’a lung lhaisahjo hiuhen. 10 Ima guh a kiseldoh louvin ijakaiya tahsan thei mong ahi nau thilpha chu vetsahjo’u hen; chutile imalam jousea eihuhhinguva Pathen thuhil chu ajep hoi thei diu ahi. 11 Ijeh-inem itile mihem jouse huhhingna dinga Pathen milungset chu hung kilang doh ahitai. 12 Hichun hou-ngaisah louna le vannoi leiset ngaichat jouse pai manga, lung limgeh le adih chule Hou-ngaisah tah a tulai khanga hi ihin theina diuva eihilchah-u ahi. 13 Chule thanop umtah kinepna, Pathen nasatah le eihuhinguva Jesu Christa loupi tah hung kilah ding kat jinga ium diu ahi. 14 Christa chun gitlouna chengsea kona eisuh thenguva, tom ngaitah a thilpha bol ami lhentum tea eisemdohna diuva eiho khel’a ama kipedoh jenga eilhatdoh-u ahitai. 15 Hicheng se hi nasei ding, thu neina lhingset’a natilkhouva nahilchah ding ahin, koima chan nahsah mon nabolda hen.

Titus 3

Christian chondan

1 Amaho chu vaipo ho le thunei ho thu noiya um ding, sei ngaiya thilpha jouse boldinga kigosadema um ding geldohsah jingin. 2 Koima taitom louhel le koima kinahpi lou, chon nem’a, mijouse chunga nun nem dingin jong hilphan. 3 Ijeh-inem itile eiho jong masanga chu lungthimbei le seingailou, gamvasoh a lung gul le nopsahna ding tampi noiya sohbanga kihen, thilsea um, kithangset toa hing, hotna dim’a khat le khat i-nahiuve. 4 Ahivangin eihuhhinguva Pathen phatna le mihem ahepina ahung kilahdoh phat’in, 5 eihon adih a thil inabol’uva inatoh jeh-u hilouva, amihepi jal’a eihuhhinguva Penthahna twiya asil’a, Lhagao Thenga asemthah a, 6 hiche Lhagao Theng chu eihuhhingpau jesu Christa jal’a ichunguva leiset’a abuh lhah ahitai. 7 Hitia chu amilungset vanga them ichan theijuva, tonsot hinna kineppi dungjuiya goulo chu ichan theina diu ahi. 8 Hiche thu hi tahsan umtah ahin, nangman hiti thudol’a hin Pathen tahsante chu thilpha bolna lam jenga dettah a dindet theina diuva lung nagelsah ding kadeiye. Hiche ho hi mihemte dinga pha, thil phachomtah ahi. 9 Amavang ngol-hoi thudol le khanggui thusim kinel baotam, Danthu dol’a kinah hichenga kon chun kihei mangin, ajeh chu hiche ho hi phatchomna bei manthahna ahibouve. 10 Loitum sem mi chu khat vei nahilchah kal’in donda tan, 11 ajehchu hitobang mi chu lungthim sesa chonse ahin, acham chama them mo kichan ahi.

Tahsa tah a hilchahna

12 Nahenga Artemas hihen Tychicus hile kahinsol teng Nicopolis khoa kahenga hungding hung kihabol’in, ajeh chu hikoma hi phalbi sungsea cham dinga kagel lhuh ahitai. 13 Danthu them Zenas le Apollos chun ima lhahsamna anei lhon louna din hinsoldoh loi dingin lungthim giltah-in kithopin. 14 Imiteu jong chu angaichat’u kintoh din napha tohna dingin phat manchahje kichuh-u hen, tohga beiyin mohumdau hen. 15 Kaumpi chengsen nasalam’ui. Tahsan jal’a igolteu chu salamin. Lungset nan nabonchauvin umpihen.

Philemon 1

Salam

1 Chrita Jesu Jal’a sohchang Paul le sopi Timothyn, ingailut tah-u le itoh khompiu Philemon, 2 isopi nuu Apphia, i-sepai pankhom piu Archippus le na-insunga kikhomji Houbung henga, 3 i-Pau Pathen le Pakai Jesu Christaa konin lungsetna le chamna nachunguva um hen.

Philemon lungsetna le tahsan

4 Katao chanin phat jousen nangma kageldoh jingin ka-Pathen kathang vah jinge; 5 ajeh chu Pakai Jesu lam le mithengte chunga ngai lutna le thasan nanei thu kajai; 6 natahsan jeh a kikhop khomna hin Christa jal’a ei ho sunga um thilpha jouse hi hetchetna aumdoh teina dinga kataoji ahi. 7 Na-ngailut thu dol’a hin hapan kakipah-in kakitil khou lhehjenge, ipijeh-inem itile nangma jeh-in mithengte lunggil jeng jong akisuhal lheh jengin ahi sopi.

Onesimus dia Paul taona

8 Christa jal’in angaidol’a nangma thupeh jeng ding ngam jongleng, 9 ngailutna jeh a ka-ngeh tho joh ahi; hiche hi palaiya pang tu jenga jong Christa Jesu jal’a sohchang Paul kahi. 10 Kasoh chan naa kahinsa, kachapa Onesimus dinga kangeh ahi. 11 Phat khat’a chu nang dinga amahi phachom lou ahin, tua vang nang le kei dinga pha chomtah ahitai. 12 Ama hi nahenga kahinsol’in, hichepa hi kakhotona lung laigil’a hung ahi. 13 Kipana Thupha jal’a kasoh chan na muna hi nangma khel’a lhacha kinbol’a eipanpeh dinga kakihen den nom lheh jeng ahin, 14 ahinla nangma lung hilounaa ima nacham louvin kabolsah nompoi, chutia chu nathilpha bol chu chamlouva hilouva, nachamtah a naboljoh ding aphai. 15 Ama hi tonsot geiya nanei theina dinga chomkhat dia nakoidoh jong hithei ahi; 16 soh maimai ahitapon, keidin soh sanga chung nung jo sopi deitah ahin, nang din vang Pakai jal le tahsa jal’a hahi deh ahiye. 17 Hitia chu nangin kei hi chan khopia neigel le kei khel’in ama hi analemin. 18 Aman na chunga suh khel anei ham, bat anei ham ahijongle, hijong chu kei chunga del din sim jengin. 19 Keima Paul’in kakhut tah a kasut ahi, keiman le peh kit nange; nangma tah-in kei neibat chu nasahna dinga kasei ahipoi. 20 Hiti chu ahi sopi, Pakai jal’in nangin keima neilung lhaisah jon, Christa jal chun kalung laigil suhal jingin. 21 Nasei ngai jing jeh a kahinsut ahin, Kasei kalval’a jong nabol ding kahei. 22 Chule kalhunna ding indan eina gonpeh-in, ajeh chu nataonau jeh a nang hodia eikipehdoh tei ding kakinem lheh jenge.

Salam chaina

23 Christa Jesu jeh a kasoh chanpi Epaphras-in nahinsalam’e; 24 katoh khompi cheng Mark, Aristarchus, Demas chule Luke hite hon jong nasalam’ui. 25 Pakai Jesu Christa milungset nan nalhagaovu umpihen.

Hebrew 1

Pathenin achapan thu aseitai

1 Masang laiyin a Pathenin phattamtah vei lamchom chomin ipu ipateu henga Themgao ho kamin thu anasei jin, 2 ninunung phat hin Chapan eiho henga thu ahinseitan, Chapa hi ijakai goulo dinga atun ahin, ama jeh a vannoi jong asemdoh ahi. 3 chapa chun Pathen loupi vah le alim tahbeh chu apodoh-in, thanei tah athu chenga thil ijakai hi atuh chah jing ahin, chonset’a kona suh thengna abol jou phat’in lal loupi chungnung pen jet lama atouvin, 4 Vantilte sanga gamchenga minphajo gou alojeh-in, amaho sangin achungnungjotai.

Chapa Vantilte sanga chungnungjo

5 Pathenin Vantilte koipen jah a itih a chu: "Nangma kachapa nahin, Tunia kahin nahi, " ati khah em? Chujongle: "Keima apa kahi ding, Ama kachapa hiding ahi, " atim? 6 chukit le ijakai sanga masapeh achapa vannoi leiset’a ahinpui ding chun aseiyin: "Pathen Vantil jousen Ama chu chibei boh cheh-u hen, " ati. 7 Chul vantilte chung thudol’a aseiyin: "Aman a-Vantilte chu hui asosah-in, Alhachate chu meikong asosah-e, " ati. 8 Chapa thudol’a vang: "Vo Pathen nalaltouna chu tonsot tonsot geiya um jing ahin, Kitahna tenggol chu Nalenggam tenggol ahi. 9 Nangin adih na-ngailun, Dan dih lou nahot bol’e; Hijeh a chu Pathen, na-Pathenin thao nanua, Naloite jouse sanga nachoi sanga olive thao nanu ahi, " atibouve. 10 Chule: Vo Pakai, nangman semtil’in Leiset bulpi naphutdoh-in, Chule van ho jong hi nakhutsem ahi. 11 Hiche ho hi mangthah diu ahin, Nang vang um jing ding nahi; abonchauva ponsil banga chulsoh diu ahi. 12 Aboncha hi ponlhe banga najeldoh a Ponsil banga nakheldoh ding ahi. Nang vang nabang nahi jingin, Nakum jong beitih um lou ding ahi. 13 Hichea hi Vantilte koipen jah a: "Keiman namelmate nakengchotpha kaneisah masangsen Kajet lam’a tou jingin, " ati beh em? 14 Vantilte chu abonchauva lhacha kinbol lhagao, huhhingna goulo ding ho jenle dinga hinkisol hilou hiuvem?

Hebrew 2

Hibang tah a nasa huhhingna

1 Hichejeh tah a hi ithujah chengseu hi lung nachang cheh a i-ngai diu, achutiloule ikimoh tolmang diu ahi. 2 Ijeh-inem itile Vantilte seidoh thu bon chubanga adet’a, asu-khel ho le angailou hon kitoh chet’a talen akisan’u le, 3 hitobang huhhingna nasatah hi nahsah mo leu hen iti isochat diu ham? Athu hi akipatnaa Pakai tah-in aseidoh a, ajahon eiho henga aphotchetsah-u ahin, 4 Pathenin jong melchihna tampi le thil kidang tampi, bolmo kidang tampi to thoa adei dungjuiya Lhagao Theng ahoppeh a ahettoh sahpi ahi.

Huhhingna po doh masapen

5 Iseiyu vannoi leiset ahung um doh got jong chun Vantilte noiya akoipoi. 6 Chusangin mun khat’a akihettohsah bangin aseiyin: "Mihem hi ipi hiya ama ding hibanga nagelpeh a, Mihem Chapa chu koiham hibanga navil jing? 7 Phat chom khat din Vantilte sangin noi nungjon nakoiyin, Leng bangin loupina le janna najemin, 8 Thil ijakai akengto noiya nakoisoh tai, " ati. Hichea ijakai aboncha anoiya akoina a hin imacha ama noiya lut lou aumpoi. Ahivangin tun thil ijakai hi anoiya lutsoh hel imudoh hih laiyui. 9 Imuu chu phat chom khat dia Vantilte sanga noi nungjoa akoi Jesu chu ahin, Pathen lungset jal’a mi jouse dinga thina atepkhah tei ding jeh-in thina geiyin athohin, hijeh chun loupina le jabolna lallukhuh-in akijemtai. 10 ijeh-inem itile ama vanga thil ijakai umsah-a, ama jal’a ijakai hinsah pan chapa tamtah loupinaa apui lut ding jeh a amaho huhhingna phutdohpa chun gim genthei athoh a asuh cham ding chu kitoh ahi. 11 Aje chu asuthengpau le asuh theng ho chu agom’uva Pa khatseh akon ahiuve. Hijeh a chu aman jachatna beihel’a amaho chu sopite ahisah a 12 asei chu: "Keiman kasopite lah a namin seiphong leng ting, Houbung ja lah a namin kavahchoi ding ahi, " atin. 13 Chukit le: "Keiman achunga katahsan kakoi ding, " ati. Chujongle: "Ven, Pathenin eipeh chapangte le keima hi, " atikit’e. 14 ajeh chu chapangte hi thisan le tahsaphe kikop ahiuvin, aman jong amaho tobangin alim’u ahung louvin hitia chu thina jal’a thina chunga thunei vaipo, hiche Diabol chu suhmang ding agot ahi; 15 chule thina kichat jeh a hinkhoa soh a kihen chengse chu lhadoh ding agot ahi. 16 ama chun vantilte ding akhohsahjo pon, Abraham chilhahte ahujotai. 17 Mipi chonsetna chengse akichulnam theina dinga, Pathen henga tahsan umtah le mihepi Thempu chungnunga apan theina dinga sopite lim le mel bang banga aumdoh ding hi kilomtah ahi. 18 Hichea hi ama tah-in gim genthei ahoth a lhep patep’a aumjehchun, lhep patep’a umho chu akithopi theitai.

Hebrew 3

Mose sangin Jesu achungnungjoi

1 Chuti ahijeh chun van kouna changkha sopi thengte, i-hou thu’uva solchah le Thempu chungnung Jesu chu gelkhoh-uvin, 2 Pathen insung pumpia Mose akitah banga ama jong apansahpa dinga kitah tah ahi. 3 Ijeh-inem itile in sanga, in sadohpa jabolna achanjoh banga Mose sanga Jesu chu gamchenga loupijo dia kilom ahitai. 4 Ajeh chu in jouse hi asadoh khat um cheh ahin, ahinla thil ijakai hi Pathenin asadoh-e. 5 Khonung thusoh ding kisei ding ho hettohsahnaa Mose chu Pathen insung pumpia tahsan umtah lhachan anapange. 6 Christa vang chu Pathen insunga Chapa thunei pen ahin, eihon i-hakat nau le ikison nau chule kinepna hi ituh chah jingu le ama insung ihidiu ahibouve. P athen mite dia choldo mun 7 Chuti ahijeh chun Lhagao Thengin aseiyin: "Tunia a-ogin najah-u le 8 Doumah bol nikhoa bang chun Nalung tahsah hih-un, Gamthip laiya kipatep nikhoa bangin: 9 Napu napa teuvin eipatep’un eideh-uve, Kanatoh kathilbol amu’uvin 10 Kum som li sungin. Hijeh a chu hiche khang mite chunga lung hanga, ‘Amaho hi lungthim chavai mong ahiuvin, Hijeh chun kalampi jouse ahepouve,’ kati ahi. 11 Hia chun kalunghan jeh a kihahsel’a: ‘Amaho kacholdoh mun’a lut louhel diu ahi,’ kati aihye. 12 Sopite, Pathen hing jinga kona pul lhahna dia nalah-uva mi koi hile tahsan louva lungthim gilou pu aum louna din ching theiyun. 13 Nalah-uva chonset lhep lhah a lungtah cheh cheh aum louna din, "Tuni’ kiti aum laisen nangho khat le khat kitilkhouto jingun. 14 Ijeh-inem itile abul’a pat’a i-hung kison nau chu akhon nigeiya ituh chah jing pouvu le eiho hi Christa to chan kikop ihitauve. 15 Hichea hin akiseiyin: "Tunia a-ogin najah-u le Doumah bol nikhoa bang chun nalung tahsah hih-un, " akiti. 16 Ja taa doumah bol’a chu koi koi ham? Egypt’a kona Mose vanga hung potdoh chengse hilou ham? 17 Kum som li sunga koi chunga lung hang ham? Chonsea gamthip laiya along lumden ho chung hilou ham? 18 Amaho acholdo mun’a lut louhel dinga ahahsel khum ho chu hiche thu ngailou ho chu hilou ham? 19 Hiti hin atahsan loujeh-uva alut thei louvu imutauve.

Hebrew 4

1 Hijeh chun kichau hite, achutiloule acholdo mun’a lut theina ding thutep um jeng jongle nalahuva khattou athon’a um khante. 2 Ijeh-inem itile eiho jah banga ama hon jong Kipana Thupha ajah-u ahinan, ahivangin athu jah-u chun amaho aphat chomsah poi, ajehchu ajahon tahsan’a asanlouvu ahi. 3 Atahsan eiho vang hi choldo mun’a chu lut ihiuve, hitia aseibang chun: "Kalunghan jeh-in kakihahsel’in, ‘Amaho kacholdo mun’a lut louhel diu ahi,’ kati, " akiti. Leiset bulpi khom kiphu til’a pat natoh thilsem chu akichaisa ahitah vangin. 4 Chuma le mun khat’a Ni sagi ni thudol aseiyin: "Chuin Nisagi lhin nin anatoh chengsea konin Pathen akicholdoi, " ati. 5 Chukit le hichea hin: "Amaho kacholdo mun’a lut louhel diu ahi, " ati. 6 Kipana Thupha ja masahon thu angai lou jeh-uva alut lou vangun, hichea lut ding chu mi aum jing nalaiyin, 7 chuin "Tuni" kiti nikho dang khat atep kit’in, athu hi khonungin David kama aseiyin, akisei masa bang chun. "Tunia a-ogin najah-u le Nalung tahsah hih-un, " ati. 8 Ijeh-inem itile Joshuan amaho chu acholdosah hita le, aman kho nunga nikho dang khat um kit ding thu hi aseilou ding ahitai. 9 Hijeh chun Pathen mite din Choldona khat aum nalaiye. 10 Ipijeh-inem itile Pathen jeng jong anatoh na akona acholdo banga Pathen choldo mun’a lut pa chu anatoh akona kicholdo ahitai. 11 Thu ngailouna jeh a lut louho umchan jop’a alut lou ium louna diuvin, chua lut’a choldo cheh din kihabol’u hite. 12 ijeh-inem itile Pathen thu hi hing jing le na tong hat jing, hemto chemjam sanga jong hemjo, hinna Lhagao gu kisuhtona le lhin, hicheng geiya sukhen theihel’a sun thei, lunggel le lungthim ngaito hetoh paijen jeng thei ahi. 13 Pathen maiya kilang lou thilsem aumpon, ichung thu i-lhutna ding pau mitmua chu thil ijakai hi asagoh keova kijam cheh ahibouve.

Jesu thempulen chungnung

14 Van mun jouse jotpaiya Thempulen, Pathen Chapa Jesu ineijeh-un iphondoh-u tahsan chu tuhdet jing u hite. 15 Ijeh-inem itile ihatmo lhahsam nauva eihu theilou Thempu chungnung nei ihipouvin, eiho banga imalam jousea lhep patepna tohsa, ahivanga chonsetna bei thempu chungnung ineiyui. 16 Hijeh chun panpi i-ngai kom’u le alungset vanga hepina le panpina ikilah theina diuvin hangtah-in lungset laltouna chu nailut’u hite.

Hebrew 5

1 Thempu chungnung jouse hi chonset jal’a thilto ho le kilheina gan tha ho Pathen koma tohdoh dinga, mihem ho thalhenga mihem te lha a kiladoh a kipansah ji ahi. 2 Amatah jeng jong lhahsam nan aumkimvel soh jeh chun imaheloute le lamvaite lung de-hattah a abol thei ahinai, 3 ajeh chu mipi dinga kilhaina abol lou akhoh banga amatah jeng dinga jong achonset nau jeh a abol lou khoh ahi. 4 Chule Aaron bang chun Pathenin akouna jeh tilouvin koiman hiche jabolna kintheng hi acham chamin akilah theipoi. 5 Hitobang chun Christa jengin jong Thempu chungnung hi-na ding hi achamtah a kichoi-at nan aneipon amavang ajah a seipeh pan: "Nangma kachapa nahin, Tunia kahin nahi, " ati. 6 Hitobangma hin mun khat’a jong aseiyin: "Melchizedek themput dungjuiya Nangma tonsot’a dia thempu nahi, " ati. 7 Tahsaphe pua aum lai nikhon thinaa kona ahuhhing theipa henga Jesu chu o-thong leu le mit-lhi pumin thumna le taona neiya, Pathena akipeh thengjeh-in ataona aki-ngaipehin ahi. 8 Chapatah ahijeng vangin thoh hesoh thoh-in thua nunje akihil them’e. 9 Ama achamkimsoh phat’in ama thua nungte jouse din tonsot sochatna bulpin apangin, 10 Pathenin Melchizedek themput dungjuiyin Thempu chungnung asahtai.

Tahsan’a lhahdah louna dia hilchahna

11 Hiche thudol’a hin sei ding tampi kaneiyun, ahinla nakolseh tah jeh-un ahilchet ahahsai. 12 Hitih chanpi hi mihil thei nahi diu ahitan, chutitah sangin khattouvin Pathen thubul kipatna lhongpi ho hil leu chun na-ngaikit nalaiyui, anham hilou bongnoitwi ngai nalaiyin naum’uve. 13 Ijeh-inem itile bongnoitwiya kivah nalai chu chapang ahijeh-in adih thudol’a hetna ima aneipoi. 14 Anham vang chu mi kikhan lhitsa ho ding ahin, amaho chu ahet thei nau mangchaa ase apha datkhenje themsa ho chu ahiuve.

Hebrew 6

1 Chuti ahijeh chun Christa thu bul kipatna lam chu dalhau hitin, philhinna ding lamjoh del’u hite; natoh thisa hoa kona lunghei ding bul phut kit louvin, Pathen tahsan thupou, 2 batize thua kihilna pou, thenso-khut ngap ham, thinaa kona thokit thu ham, chule tonsot’a dia thutan thupou velsei daute. 3 Hiche jong chu Pathenin pha asah le ibol diu ahinai. 4 Ijeh-inem itile khatvei khovah changsa ho, van’a kon thilpeh chu atep khah-uva, Lhagao Theng changkhasa, 5 chule Pathen thu phat dan tep khaa, khang hung lhung dinga thaneina hesa ahiuvin, 6 amaho hi alhuh tah-u le, amaho tumtah a Pathen Chapa chu Thingpel’a khen beh kit’a lhang phong tah a taitoma aumsah-u ahitan, lungheina dinga semphat kit thei hoi ahitapouve. 7 Ajeh chu Pathen kona phattheiboh achan jeh a leiset’in achunga ju-lha jing jeng gotwi adon’a, aphatchomna diuva lou kibolpeh ho dinga anche louhing ahinsep dohji ahin, 8 amavang ling phung ho le simbiling ho asepdoh le pannabei ahitan, gaosap anaiyin, achaina govam ding ahi. 9 Deitahte, hitia kasei vangun thilpha cheh le huhhingna nanei jeh-un nachung thu’va kagin chat nau aum nai. 10 Ajeh chu mithengte kin nabolsau chu nabol jingu ahin, Ama min ngailutna naphondoh-u ahitah jeh-in, hiche natoh nau asuhmil ding chu Pathen adih lou ahipoi. 11 Akhonna geiya kinepna chu lhingkeiya akihetdoh kahsea natompan ngai banguva nang ho khat cheh hi napan diu kadei lheh jengui. 12 Chutile nathaset lou diu, tahsan le thoh hat jal’a thutep gou lo chang ho umchan jom nahidiu ahiye.

Pathen thutep thonlou

13 Pathenin Abraham thu atep chun ama sanga len jodang aum loujeh-in ama changseh akihahsel’in 14 Keiman phatthei kaboh tei tei ding, punjong kapunsah ding nahi, " ati. 15 Abrahamin thoh hattahin thutepga akimutai. 16 Chujongle mihemten amaho sanga chungnung jo chu kihahselna aneijiu ahin, chule thu kichetna dinga kihahsel na chun akah-uva kibaona jouse asuh chaiji ahi. 17 Thutep goulo ding ho henga chu alung ngaito chu khelkit louhel ding ahidol kichentah a avetsah nom jeh a Pathenin kihahselna chu palai banga anei ahi. 18 Hitia chu hiche thilbol nia kona hi Pathen kikheltih neilou le itih a jou thei lou ahi hea, hite ni jeh a ama koma kisel eiho hin imasanguva kikoi kinepna chu tuh chah dinga nasa tah a kitilkhou ihiuve. 19 Hiche kinepna chu hinkho dia thihhat aiya ineiyu ahin, kichentah le dettah pondal sung lam geiya lut pai ahi. 20 Hikoma chu Melchizedek themput dungjuiya tonsot’a dia thempu chungnunga pang Jesu chu eiho thalhenga analut masa ahitai.

Hebrew 7

Melchizedek themput dol’a themputna

1 Hiche Melchizedek Salem leng pa hi Chungnungpen Pathen thempu ahin, Abrahamin lengho agatha ahung kilekit lam chun Melchizedek-in agalamton phatthei aboh-e. 2 Ama chu Abrahamin athil chomdoh jousea konin som a khat apen, amasaa Mechizedek hi ‘Kalengpa dih’ tina ahin, chujongle ‘Salem lengpa’ jong hin chamna lengpa kiti ahi. 3 Ama hi nubei pabei, khanggui thusim neilou, hinnikho kipatna le kichaina bei, Pathen Chapa tobang ahin, a-itih a thempua pang jing jeng ahi. 4 Lung gel’in ngaitouvin, ipului bulpiu Abrahamin athilchom hopsom a hop khat apehpa chu itobanga len hitam! 5 Abraham chilhah ahicheh vangun Levi chilhah thempu mun chang ho chun Danthu dungjuiya asopiteu hijongle miholah akon hopsom’a khat lahna ding thu aneiyu ahi. 6 Ahile Levite khangguiya kimatna bon neilou Melchizedek chun Abrahama konin hopsoma hop khat alan, chule thutep kisanpa chu phatthei aboh jenge. 7 Chule mineojon asanga lenjoa kona phatthei boh khat akilah uvin, khatjoh a vang hin akilahpa chu hing jing ahidol hettohsahna aum’e. 9 Chujongle Abraham jeh chun, hopsom’a hop khat kilahpa Levi jeng jong chun hopsom’a hopkhat apei tia sethei ai. 10 Ajehchu Melchizedek chun Abraham agalamto pet’a hi Levi chu apu Abraham taiguiya um nalai ahi. 11 Mipi dia Danthu kipeh lo na Levite themput dol’a chu chamkimsohna umthei hile Aaron themput dol’a kisei louva Melchizedek thempu chom dang khat umdoh khoh ngai ding ham? 12 Hiche achung chang thudol akikhel le Danthu jong kikhel teiji ahi. 13 Hiche achung chang thudol kiseipa hi phung chom’a kon ahin, hiche phunga kon hin koimacha maicham phunga lhachan apang kha hih laiye. 14 Akichen veng tai, ajeh chu i-Pakaiyu chu Judah phunga hung kon ahin, hiche phunga themput dol hi Mosen ima aseipoi. 15 Melchizedek tobanga chu thempu chom dangkhat akitundoh phat hin athu hi gamchengin akichen kit tai. 16 Ama themputna hi tahsaphe Danthu thupeh dungjui ahipon, mantih neilou hinkho khat tha neinaa konjoh ahibouve. 17 Ijeh-inem itile hettohsah nan: Melchizedek themput dol’a Nangma tonsot dia thempu nahi,” akiti. 18 Chujongle thupeh masa chu alhah sam jeh le aphatchom loujeh-in akinoi mangtai. 19 Ijeh-inem itile Danthun imacha achamkimsah lou phat’in, kinepna pha cheh khat ahung kipolut tan, hiche kinepna jeh hin Pathen kom anailut’uve. 20 Hiche hi kihahselna beiya ahipoi, adang ho vang chu kihahselna beiya thempua pang anahiuvin, 21 Ama vang hi ajah a kihahsel na to lhon’a kiseipeh-a “Pakai akihahseltai, Lung akhel kit lou ding ahi; ‘Nangma tonsot’a dia thempu nahi,’ tin,” ati. 22 Hiche dungjui hin Jesu chu Kitepna phajo phutdet’in apangtai. 23 Chule masanga chu thi nan asuhmoa aumden jing thei loujeh-uva mi tampi thempua anapang ahiuve. 24 Hichepa vang hi tonsot’a um jing jeng ahijeh-in themputna chu adang khat’a kichon thei ahipoi. 25 Ama hi hing jing ahijeh-in ama jal’a Pathen henga hung lut jouse chu amaho thalhenga taopeh a, abonchauva ahuhhing chamkimsoh thei ahi. 26 Chuti ahijeh chun chutobang thempu chungnun, athen a theng lepthol bei, boh beh lou le chonsete lah a kona kikhenhel, van mun ho jouse sanga chungnung joa kitung doh chu eiho dinga kilom mong ahi. 27 Thempu dang ho banga aman niseh le amasaa ama chonset then sona ding chule miho chonset then sona dinga kilhaina gantha atolou akhoh poi, ajeh chu amatah kilhai na gantha dia akitodoh jeh chun khat veiyin asubulhittai. 28 Danthun lhahsamna nei mihemte thempun anapansah jin, amavang Danthu nunga hung umdoh kihahselna tun vang tonsot’a dia chamkimsoh Chapa chu apansah tai.

Hebrew 8

Aphajo kitepna thah thempu

1 Akisei thulu chang pen chu: eihon hitobang thempu chung nung hi ineiyun, ama chu Van’a Chungnung pen Lalatouna jet lam’a atouve, 2 chukoma mihem tundoh hilouva Pakai tundoh ponbuh tahbeh, muntheng chungnung sunga achamtah a kin theng bol’a pang ahi. 3 Thempu chungnung jouse thilto hinchoi ding le kilhaina gantha toh dinga kitung ahin, hiche Thempu chungnung jong hin todoh thil khat aneitei ding ahi. 4 Ama hi leiset chunga um hile Thempu jong hilou ding ahi, ajeh chu Danthu dungjuiya Thempuho lah athilto hinchoi ding aumnauve. 5 Mose’n ponbuh ason ding kon’a akihilchahnaa, "Ajeh chu ven, molsang chunga nakivetsah lim dungjui banga ijakai nabol ding ahi, " ati banga chu leiset’a thempu ho hin van chunga thil um lim le ale thoa kintheng bol ‘u ahibouve. 6 Tun vang Jesu chu kintheng bolna pha chungnung achangtai; ajeh chu hiche hi ama palainaa kisemdoh kitepna pha cheh le thutep pha jo chunga kiphutdoh ahi. 7 Kitepna masa chu nolnabei hile ni lhinna pamun ding kihol khoh ponte. 8 Ahinla Pathenin miho chunga nolna amujeh-in aseiyin: "Ven, keiman Israel insung chung, Judah insung chunga Kitepna thah khat kasemdohna ding Nikho ho ahung lhunge’ tin Pakaiyin aseiye. 9 Hiche kitepna chu Apu apateu kakhuttah a katuh a Egypt gam’a kona kahin puidoh nikhoa Amaho to kasemdoh tobang chu hilou ding ahi. Ajeh chu amaho kakitepnaa aum jing pouvin, Kenjong amaho kadonlou ahi, tin Pakaiyin aseiye. 10 Nikho hijat nunga keiman Israel insung kakiteppiding Kitepna chu hiche hi ding ahi, tin Pakaiyin aseiye: Alunggil’uva Kadanthu ho peng ting, Hiche ho chu alungthim’uva kasut’a, Amaho dia a-Pathenu kahi ding, amaho kamite hidiu ahi. 11 Koi hile tolsung khat’a achenpi le Koi ahiya asopi jah a, ‘Pakai hen, tia Ahil lou diu ahitai. Ajeh chu aneopen’a alenpan geiya Abonchauva eihetsoh diu ahitai. 12 Ijeh-inem itile asuh khel nauva jong kahepia, achonset nau jong kageldoh kit lou ding ahitai. 13 Hichea ‘Athah’ kiti hin amasa chu aluisah tan, ipi hile luiya, tehse chu abei ding kon ahitai.

Hebrew 9

Leiset le van’a muntheng te ni

1 Kitepna masa jong chun kintheng bolna Danthu le leiset’a muntheng ananeiye. 2 Ijeh-inem itile houbuh akisondoh teng indan masapen’a chu thaomei khom le do khang chule Pathen um hetna changlhah to aumin, hilai chu "Muntheng" akiti. 3 Hiche ban’a Houbuh pondal dan ni na chu "Muntheng chung nung" akitin, 4 asunga chu gimnamtui halna sana maicham le kitepna thingkong-sana kitomkhum chu um ahin, kitepna thingkong sunga chu manna umna sana bel le Aaron tenggol pahmum chule kitepna songpheng ni chu um ahi. 5 Achunga chu Cherubim loupitah ni uma, alhaving hoa chonset ngaidam kinbolna mun chu ale lhon ahin, hiti ho hi achen achaiya tua seijou ahipoi. 6 Hitobang hin akisemin, hiche houbuh dan masa sunga chun lhacha kinbol molsoh dingin thempuho alut jing jiuve. 7 Asung nung dan nina avang chun kumkhat sungin thempu chungnung changseh khat vei bou, thisan choilou hilouva, amatah le mipin hettoh louva achonset na ho’u thenso dinga galutji ahi. 8 Lhagao Thengin kichentah a asei chu ahile, Houbuh dan masa adin laisea muntheng’a lutna lampi chu kilangdoh lou ding ahi. 9 Hiche hi tulai phat sunga thilsoh ding tekahna ahin, thil to kilhaina gantha kichoijia kitoh ho hin kilhaina neiho het khenna lunghtim umdol bangin asuchamsoh theipoi. 10 Neh le don chule twiya kisil theng thudol jatchom chom thubou ahin, kisemthah phat hung lhun kah a tahsaphe danthu jeng ahibouve. 11 Ahinla Chrita chun khut’a kisem jong hilou, hiche thilsem lah a pang lou, Houbuh lenjo le chamkimjo ding jal’in thilpha hung lhung ho thempu chungnungin ahung pangin, 12 kelchal ho le bongnou ho thisan vanga hilouvin, amatah thisan jal’in munthenga chun khat veiseh alut’in tonsot lhatdamna aphutdohtai. 13 Ijeh-inem itile kelchal ho le bongchal hi thisan, chule kella ho pumgo vutvam kithekhum chun tahsaphe bohna neiho chu asuh theng le, 14 tonsot Lhagao jal’a ama chamtah a nolnabeiya Pathen henga kilhaina gantha dinga kikat doh jeng Christa thisan chun Pathen hing jing lhacha kinbol dinga, athisa natoh chengsea kona, eihet khen nau lungthim ho hi gamchenga asuh thengjoh ding ahi. 15 Hichejeh a chu Christa chu Kitepna Thah palaiya pang ahin, Kitepna masa chung changa suh khelna neiho lhatdoh dinga athina jeh a akikouho tonsot goulo ding thutep chu akisan thei diu ahitai. 16 Ajeh chu Kitepna aum teng kitepna sempa thina phot chetna boltei ngai ahi. 17 Ijeh-inem itile Kitepna chun kitepna sempa hinlaisen ima thu aneipon, athi nungle bou kiphutdetji ahi. 18 Hijeh a chu kitepna masa jong thisan beiya kiphutdet lou ahi. 19 Hichejeh chun Mose’n jong Danthu dungjuiya thupeh chengse mipi aseipeh soh phat’in, kella ho thisan le twito, ponsandup le hyssop alan lekhabu le mipi abonchauvin athe khumin, 20 "Hiche hi Pathenin nang ho nathupehsau Kitepna jal’a thisan chu ahi, " ati. 21 Hitobanga chun houbuh le kintheng bolnaa kimang manchah jouse chu thisan athekhumtai. 22 Danthu dungjuiya ijakai chu thisan’a suhthengsoh hel ahimaiyin, hijeh chun thisan solouvin ngaidamna aumdoh poi.

Christa kilhaina gan akithan chonset asuhbei

23 Hitobanga hi van mun hoa thil ho lim vetsahnaa um thil ho jong suh theng tei ding ahin, ahin van thil tah tah ho dia kilhaina gantha phajo cheh ngai ahi. 24 Atah beh lim tobang khut’a kisa mun theng phunga Christa lut ahipon, amatah van’a lut’a tua hi eiho tha lhenga Pathen angsunga kilah jing dia um ahi. 25 Thempu chungnungin ama thisan hilou choiya kumseh a muntheng phung alut banga Christa amatah kikatdoh dinga lut matchet ji ahipoi. 26 Chuti hile vannoi bulkiphua pat aman hesoh genthei athoh matchet ding ahin, tun vannoi khag kichai kon hin chonset suhmangna din amatah kilhaina gantha din khatvei bou ahung kilahtai. 27 Mihemte dia khatvei thia chujou teng thutanna lut ding hi gotsa ahi, 28 hitobanga chu Christa jong mi tamtah chonset suhmangna dinga khatvei kitohdoh ahitan, chonset thua hilouva kinemtah a ama galdot jing ho huhhingna pe dia aniveina hung ding ahi.

Hebrew 10

1 Danthu chu thilpha hung um ding ho ale mai mai, alim tahbeh jeng jong ahiloujeh-in, kumseh a kilhaina gantha chu avel vel’a alha vangun kilhaina bol ho dingin imacha asubulhit joupoi; 2 asuh bulhit hihen, khatvei seh kisuh thenga chu kilhaina bol ho het khenna lungthim sunga chonsetna ho chu chin jingna um lou hel hile ibol’a tang louva ahinchoi jing diu ham? 3 Chuti tah sangin hiche ho chun kumseh-in chonsetna ageldohsah jotai; 4 ajeh chu bongchal ho le kelchal ho thisana konin chonset ngaidamna aumpoi. 5 Hijeh chun leiset’a ahung chun Christan aseiyin’ "Kilhaina gantha le thilto nadeipon, Keidin tahsapum joh neigonpeh tai; Ganpumgo thilto ho le chonset thensona thilto hoa jong Nalung lhaideh poi. 7 Hichun keiman kaseiyin: "Vo Pathen ven, Lekhabu sunga kachung thu jempia kisun bangin Nangma lungdei bol dingin kahunge’ kati, " tin aseiye. 8 Masanga chu Danthu dung juiya kitohji hijongle, aman aseiyin "Nangma kilhaina gantha ho le thilto ho, ganpumgo thilto ho le chonset thensona thilto ho chunga nakipah pon, lung jong nalung lhaipoi, " atin; 9 chujouvin aseipaiyin, "Ven, nalungdei lam bol din, hikoma ka-ume, " ati. Hiti hin ani channa chu tundohna din amasa chu asumangtai. 10 Hiche Pathen lungdeiya chu Jesu Christa tahsapum, a-itih a dinga khat vei akitodoh jeng jeh chun eiho eisutheng tauve. 11 Thempu jouse chu niseh a ding jinga kilhaina gantha thilto chu ato jing vangun hiche ho chun chonsetna ala mang thei dehpoi. 12 Jesu Christan vang chonset thensona din, a-itih a dinga khatvei, kilhaina thilto chu atoh-in, Pathen jel lam’a atoutai. 13 Chukelsen vang amelmate chu akeng chotpha akoipeh ding angah jinge. 14 Ijeh-inem itile Aman thilto khatseh a asuh theng ho chu tonsot’a dingin achamkimsah soh tai. 15 Lhagao Thengin jong eihettohsah nauve; ijeh-inem itile hiche jou hin aseiyin. 16 "Ni nu nung teng le keiman amaho to Kakitepna ding chu hiche ahi, ati Pakaiyin; ‘Alungthim’uva Kadanthu ho kakhumpeh ding, Hiche ho chu alung gil’uva kasut ding ahin, 17 chule achonset jouseu le Danthu asuh keh nau jouse Kageldoh kit louhel ding ahitai, " ati. 18 Chonsetna ho jal’a ngaidam umnaa chun chonset jeh a thilto ding angaitapoi.

Pathen naiyu hite

19 Sopite, Jesu thisan jal’in eihon muntheng phung jot’a, sung lhah ngamna ineiyui; 20 ajeh chu aman pondal banga amanchah atahsaphe eiho din lampi thah le ahing jing chu eihondoh peh tauve. 21 Ama Pathen insunga Thempu lenin ahung pangin; 22 hijeh chun lung dih tah le tahsan bulhingset’in chule het khenna lungthima thilse jouse kisop thengsel le tahsa kisil thengin nailut’u hite. 23 Thutep chu tahsan umtah ahijeh-in iphondoh sau kinepna hi dettah-in tuh det jingute. 24 Chule ngailutna le thilpha bolna lam’a khat le khat kisuh lip jing ding phate chan gel’u hite. 25 Mi kon khat’in akikhop nau donda achon nau banga bol louvin, Nikho chu ahung nai dol namu ahitan, hatahin kitilkhou to chehjo’u hite. 26 Ajeh chu thutah hetna kisan nung hin eihon chonset henasan boljom jing leu hen, chonset suh mangna ding kilhaina gantha kikhenlou ahitan, 27 doumah bol jouse bahgam hel ding le kavam hel ding tom ngaina meikong le thutanna ngah a kicha jinga um ding ahitauve. 28 Koi hile Mose Danthu nahsah lou chu mi ni hihen thum hile hettohsah jeh a hepina beihel’a kithat ding ahi. 29 Chuti ahile Pathen Chapa keng chotpha nei, akisuh thengna Kitepna thisan suhboh a chule lungsetna Lhagao daithang ho chun itobang khohjo cheh talen amat diu kilom nasah um? 30 Ijeh-inem itile: "Phulah chu kei kin ahi, Keiman lethut nange, " Chukit le: "Pakaiyin amite chung thu atan ding, " tipa chu koi ahi keihon kaheuve. 31 Pathen hing jing khut te nia chuh khah ding chu kichat umtah ahi. 32 Masanga khovah nachan nung geiyuva jong hesoh genthei hahsa tah thoh a napan laiyu nikho ho geldoh-uvin. 33 Hichea chun genthei thoh pum puma japi vetchah din naum’un, ahinla nang hon jong hitobang thoh ho chu nathoh piu ahiye. 34 Ijeh-inem itile songkul lut ho geiya nathoh piuva, chule apha cheh le a-itih a um jing ding gou nanei nahet jeh-uvin naneiyu kichom jeng jong kipah tah-in nathoh jo’uve. 35 Hiche hin kipaman lentah nasodoh peh jeh-uvin nakison nau chu paimang hih hel’uvin. 36 Ipijeh -inem itile Pathen lungdei bol’a thutep kisan na din thoh hat jing ding angaiye. 37 Ajeh chu: "Chomcha khat jou teng Ahung ding pa chu hunga Geisang lou dig ahi; 38 Tahsan jal’a kei dia midih changa chu hing ding, Anung chon vang achunga kahinkho kapeh lou ding ahi, " ati. 39 Eiho vang manthahna dinga nung chon ho ihipouvin, tahsan jal’a hinkho hoidoh a um ho ihibouvui.

Hebrew 11

Tahsan

1 Tahsan hi kinepna atahbeh a lah a, muthei lou thil ahisa koi ding hi ahi. 2 Hijeh a chu tahsan jal’a upate chu hettohsah a kipansahji ahiuve. 3 Tahsan na jeh a Pathen thusah a vannoi kisem le akilangdoh kha lou thil hoa kona muthei thil hung umdoh dol ihet’u ahi. 4 Tahsan na jeh a Abel’in Cain sanga Pathen henga kilhaina gantha thilto phajo atojeh-in, amidih hi na hettohsahna amun, Pathen jengin jong athilto ho chu ahettohsah tan, chule athi nung geiyin thu asei thei nalaiye. 5 Tahsan na jeh-in Enoch chu thina mulouvin atahsa akheldoh peh-in, Pathenin atasan akheldoh peh jeh-in koiman aholdoh joutapoi; tahsa kheldoh a aum masanga Pathen koma lung lhaina kimu ahi hettohsahna aum’e. 6 Hijeh chun tahsan beiya Pathen lung tohoi ahipoi; ijeh-inem itile Pathen aum je le ama holte chengse tohphat man apeh dol hi ama kom nailutten atahsan tei diu dol ahi. 7 Tahsan na jeh-in Noah chun kho nung thilsoh ding muphah lou thua hilchahna thu angaiyin, ama le a-insung huhhingna din kong innei khat asem’e, hichea hin vannoi themmo achanin, tahsan’a them channa jal’in goulo chu achangtei. 8 Tahsan na jeh-in Abraham chu potdoh a goulo dia akisan ding mun’a lut din akikou chun thun anungin, hoilam jot ding ahet lou vangin apotdoh jenge. 9 Tahsan na jeh-in tepna gamsunga hung kholjin bangin apem len, tepna gam alopi ding Isaac le Jacob chutoh ponbuh sunga acheng leuve. 10 Ajeh chu Abrahamin Pathen gontoh le asah doh bul dettah chu akat jing’e. 11 Tahsan na jeh-in athuteppeh pa chu tahsan umtah ahidol ahetjehin acha nei phat akilet tah vangin Sarah-in naovopna thei tha aneitai. 12 Hiti chun mithikonsa paa kon chun van’a ahsite jat le Twikhanglen kama neldi jat hel simsen lou chilhah apeng doh tai. 13 Amaho chengse hi tahsan ahitauvin, thutep chengse chu akisan man louvu ahitai; ahinla gamla tah a konin amu’uvin alem’un, chule amaho chu leiset chunga kholjin le khopem ahiu aphongdoh tauve. 14 Hichea hitobang thusei ho hin pugam pagam ahol dol’u aphondoh u ahibouve. 15 Amaho ahung kondoh nau gam chu geldoh kit hileu kilekitna ding phat gomkom jong anei diu ahi. 16 Tua la amahon aphajo cheh khat, van gam chu atup’u ahijeh-in, Pathen jeng jong amaho Pathen a kikou ding jahcha lou ahi; ijeh-inem itile aman amaho dinga khopi khat agonpeh ahitai. 17 Tahsan na jeh-in Abrahamin patep’a aum chun thutep changpa tahsan vangin achapa chang khatseh, Isaac chu kilhaina gantha banga todoh jeng din agoi. 18 Ama chule Isaac a kon ahi nachilhah kisim ding ahi, " tia kiseipeh ahin, 19 Pathenin athisa jong akaithou kit thei chu agel jon, tekah a seidin Isaac chu anung chankit nai. 20 Tahsan na jeh-in Isaac chun kho nung teng phatthei chang din Jacob le Esau phatthei aboh-e. 21 Tahsan na jeh-in Jacob-in athi ding konin Joseph chapate ni phatthei aboh gol’in, atenggol chunga aki-ngamin Pathen alhaiye. 22 Tahsan na jeh-in Joseph chun athi ding konin Egypt gama kona Israel chate potdoh ding ageldoh-in, ama gu le chang thudol’a thu apei. 23 Tahsan na jeh-in anu le apan Mose apen nungin lha thum asel lhonin, ama chu naosen mel-hoi tah ahidol amu lhonin, lengpa thu peh jong kicha louvin aum lhon’e. 24 Tahsan na jeh a Mose’n akhan lhit phat’a Pharoah chanu chapa kiti ding da ahi. 25 Chonset’a chomkhat nopsah sangin Pathen mite to gim hesoh thoh khom ding akilhenjoi. 26 Tohman san ding avetjoh jeh chun Egypt gama gou jou se sangin Messiah kihousetna chu thupijon agel’e. 27 Tahsan na jeh-in lengpa lung han ding ging louvin Egypt gamadalhan, mit muthei loupa chu amu bangin abol’e. 28 Tahsan na jeh-in kalchuh kut aphutdoh-in, cha peng masa sumang Vantil chun amahoa asuh khah louna din thisan chu athekhumsah-in ahi. 29 Tahsan na jeh-in Israel chaten Twikhanglen chu tolgo jot’in ajot galkaiyun, Egypt miten chutia bol agot’u le twiyin achup lih gamtauve. 30 Tahsan na jeh a Israelten Jericho khopi ni sagi avel’u le, khopi pal achimtai. 31 Tahsan na jeh a Rahab notinun gam ve-lhi ho lung monga alhunsah jeh chun thu ngailou ho to akisuh mang tha tapoi. 32 Ipi kaseibe ding ham? Gideon, Barak, Samson, Jepthah, David, Samuel chule themgao ho chengse thudol seisoh kei ding phat’in toh ponte. 33 Tahsan na jel’in lenggam tampi ajouvun, adih aphutdet’un, thutep akisan’un, Phaisameigeo kam asingun, 34 meikou laipi aphel mit’uvin, chemjem hem’a konin ahoidoh un, lhahsam na konin ahatdoh-uvin, galmun’a hatah ahiuvin, gamdang sepaite adeljam tauve. 35 Numei hon amithi sa ho’u thoudoh kit akisan’uvin adang ho jong thokitna phajo cheh aneina diuvin huhdoh a aum diu anom pouvin, hesoh genthei thoh-in aumjotaove. 36 Abang bang jong elbol le jepna thoh, bulput le songkul lut’in aum’uve. 37 Amaho chu songin asep’un, thing-at’in a-attan’un, chemjamin athat’uvin, kelngoivun le kelcha vun kisil’in avah leuvin, vaichat le bolset thoh, genthei hesoh bolset’in aum’uve; 38 vannoi leiset hi amaho umna hoi ahitapon, gamthip lai le mol le lhanga avah leuvin, songko dung le leiko dunga akisel’ui. 39 Mi hijat chu tahsan na jeha hettohsah a apan vangun thutep ga chu alopha pouve; 40 eiho beiya achamkimsoh thei louna diuva Pathenin ibonchauva dinga thilphajo cheh khat amu masah ahi.

Hebrew 12

Pakai migahsalna

1 Hettohsahna hijat pin meilhang banga eiumkimvel jehuvin einoh phahsah jouseu le ichunguva kaijing chonsetna hi pailhan, thoh hat tah-in imasanguva kilhai tetna lama hin lhaiyu hite. 2 Tahsan bulpi le kikhomna Jesu lam kat jingute; aman amasanga koisa um kipana jeh chun jum le jachatna nahsah louvin thingpel’a thina geiyin athoh-in Pathen laltouna jet lam’a atoutai. 3 Nahinkhouva nalhah dah-uva nalel louna diuvin, chonseten amadouna a thuse chujatpi aseiyu dou lhumkeipa chu geldoh jingun. 4 Chonset louna lam’a nang ho thisan long leuvin napang hih laiyuve. 5 Tilkhouna dinga nang ho chapate dol’a nakisei nau chu nasuhmil’u ahitai: "Kachapa, Pakaiyin nabolgimna chu isah louvin geldan, Aman naphosal teng jongle lung lhadeh hih-in; 6 Ijeh-inem itile Pakaiyin angailut chu abolgim’a, Chapa dia akisansa chu ajepji ahibouve, " kiti chu. 7 Bolgimna chu thoh tun tun’un, Pathenin chapate banga nasungse nau ahibouve; Pan chapa koipen gahchah louva akoiyem? 8 Chate louvin um leu chun chapa tahbeh hilouva bolamcha nahi diu ahi. 9 Hiche kalval’in jong tahsaphea eigah chah diuvin pate ineiyun amaho chu ijabol lheh-ui; achutile Lhagao ho thudol’a Pa koma chu ihinna diuva i-halut cheh joh lou diu ham? 10 Amaho chun aphasah lam lam’uva ni chom khat kahseh a dinga bou eigah chah jiu ahin, Pathenin vang eiho phatna ding, ama thenna ichan theina diuva eithoh gimsah jiu ahibouve. 11 Gahchah na hi apet tah le lung nopna ahipoi, lhaset nan akigel bouve; ahinla kho nung teng le hita bolgimna thoh ho ding hin them channa din cham nan ahung gadoh jin ahi. 12 Hijeh chun khut ngoi hon domsangun lang, khup ngoi ho jong ding janguvin; 13 Kengbaiya chu chatmoa um louva, adamjohna dingin nalampiu kisem jenguvin.

Pathen lungset donda jeh a gihsalna

14 Mi jouse to kichamna ding le thenna ding hadel’un, hiche tilouva chu koiman Pakai amu louhel ding ahi. 15 Koima Pathen lungsetna changlel aum louna ding le thingkha jung dondoh a tamtah asuhmo banga nasuhboh louna dingin ching theiyun. 16 An neh khat man dinga a-upat kijoh Esau banga alop’a le chonthanghoi bol naum louna diu vin ching theiyuvin. 17 Ijeh-inem itile kho nunga goulo tei ding adei chat vanga lunghei kitna ding mun anei tah lou jeh-in mit lhi puma ahol vangin vangbohna akipeh lou naheuve. 18 Ijeh-inem itile nang ho toh khah thei molvum, meisi pah lah lah lai, muthim lai, thimpi lah, chule khopihui lah a hungvah lut nahipouvin, 19 sumkon gin le thu kisei gin ki thong lah jong ahipoi; hiche japha ho chun ajah-uva thu chu akisei kit louna din ataojo tauve. 20 Ajeh chu, "Molvum dung chu gancha ho jeng jong atongkha chan songa selih ding ahi, " tia thu kisei chu athoh jouhel’u ahi. 21 Chule hiche thil hung kilah chu kichat um behseh jeng ahin, Mose’n jong aseiyin, "Keima kakichan kakihot hot jenge, " ati. 22 Nang ho vang Zion molvum, Pathen hing jing khopi, Van Jerusalem, Vantil asang sang lah hung lhunga, kipah thanom 23 le van’a kisun lutsah apeng masa chengse kikhopna, mi jouse thutan Pathen kom, them changsa ho Lhagao suh chamkimna mun, 24 Jesu palainaa kisemdoh Kitepna Thah a chu hung nahitauvin, hiche thisan kitheikhum na chun Abel thisan sangin thilpha jo cheh sei ding aneiye. 25 Ching theiyun thuseipa chu jopda khauvin nate; ajeh chu leiset’a thuseipa thujop louho bon ahoidoh jou lou le, van’a kona thuseipaa konin kiheimang leu hen ihoidoh louhel diu akichen jenge. 26 Hichea ogin chun leiset seh bou aholingsoh ahin, tun aman athu tep’in aseiye, "Keiman leiset keoseh hilouva Van geiya khatvei seh akaho ling ding ahi, " ati. 27 Hikoma, "Khatvei seh, " kiti hin thilsem jouse kiholingsah a kitolmang ding kichentah-in aseiyin, hitia chu suh ling theilou chengse umden ding ahi. 28 Hichejeh chun suh longhoi hilou Lenggam ikisan jeh-un thangvahna neiyu hitin, ginna le jabolna pumin alungdei lamtah-in Pathen lhachan pangu hite. 29 Ijeh-inem itile i-Pathennu chu mi kavamhel thei meikou tobang ahi.

Hebrew 13

Pathen lungdei tah a natoh

1 Kisopi ngailutna um jing hen. 2 Maljin lhunsah ding hailou jen’un, hitobang hoa hin abangin jong Vantilte geiyin alhunsah tauve. 3 Sohchang kihen ho chu toh kihentha bangin kigel’in lang, tahsaphea um jing nahi heuvin lang genthei hesoh thoh te chu geldoh jinguvin. 4 Kichen hi mi jousen jabol cheh hen, jalkhun jong kisuhboh da hen; jonthanhoi bol le mijito jonga chu Pathenin athu atan ding ahi. 5 Sum ngailut hinkhon kimang hih-un, nanei chengsen lung lhai jo’uvin; ajeh chu aman, "Keiman kadonda louhel ding, dajong kada lhah louhel ding nahi, " ati. 6 Hijeh a chu eihon kisongtah a isei theiyu chu: "Eipanpia chu Pakai ahin kicha ponge, Mihemin i-eilo ding ham?" ti hi ahi. 7 Nalamkaiteu nakom’uva Pathen Thu naseipeh teu chu geldoh-un lang, anun akhan’u phatah-in geldoh-uvin, atahsan’u chu tho’uvin. 8 Jesu Christa chu janhi tuni chule tonsot’in abang ahijinge. 9 Thuhil gotchom chom kilhoh mangsah loujen’un, lung hi lungsetna aphudet aphan, neh le chah a phu ding ahipoi, hiti neh le chah thua chonte chun phat chom nan aneideh pouve. 10 Houbuh a lhacha kintheng bol hon aneh thei lou nau maicham aneiyui. 11 Thempu chungnung hon chonset thensona ding gancha ho thisan chu muntheng chungnunga ahin choilut jiuvin, atahsapum ho vang chu polama agouvamji tauve. 12 Hijeh chun ama thisan’a mipi suh thengna dingin Jesun khopi kelkot polam’a thina athoh tai. 13 Chuti ahijeh-in ngahmun polam, ama henga potdoh-u hitin, ahouset nau chu gathoh hu hite. 14 Ijeh-inem itile hikoma hin eihon khopi det inei pouve, ahung lhung ding khopi joh chu i-hol’u ahibouve. 15 Hijeh chun Jesu jal’in vahchoina ho chu Pathen henga kilhaina bangin bol jingu hite, hiche hi ama min phongdoh ho kamsungsoh aga ahi. 16 Kikhoto them’a chule ima kikop del chu hai hih-un, hitobang hi Pathen lung lhaiselna kilhai na ahi. 17 Nalmakaiteu thun nungun lang athu ngaiyun, nang ho ding thua mopo ahijeh-un, nahinkhou avettup jing jengu ahi; hiti hin bol leu chun kipah diu ahin, achuti loule lungna diu, nang ho dia phachom lou ding ahi. 18 Keiho neitaokop jingun, ima lam jousea hoikom hijongle adih kabol nom jeh-un hetkhanna lungthim phatah neiya kigingcha kahiuve. 19 Nang ho henga dia eikilhadoh vahna dinga neitaopehna diuva atumbeh a kahin ngeh nahiuve.

Taokhum khana le salam

20 Chamna Pathen, tonsot kinepna thisan jal’a kelngoite ching minthang i-Pakaiyu Jesu thinaa kona hinpuidoh kit pan 21 alungdei lam bol dingin thilpha jousen navon kimsoh-u hen; Jesu Christa jal’in amasanga alung lhaina bol din ichunguva bol hen, Christa chu tonsot tonsot geiyin loupi jing hen: Amen. 22 Sopite, kitilkhouna thu hi angaije them dia ka-ngeh nahiuve, ajehchu keiman paltan’a nahenguva kahinsut ahi. 23 Isopiu Timothy alhadoh-u anaheuvin, ahungvah le nang ho vea kahung teng hinpui nange. 24 Nalamkaite jousen le mithengte chengse salam’un; Italy gam miten nasalam’ui. 25 Lungset nan nabonchauvin umpi hen.

Jacob 1

Salam

1 Pathen le Pakai Jesu Christa soh Jacob-in gamtin’a kithecheh phung som le phung ni henga salam.

Tahsan le chihna

2 Kasopite, patepna tin chenga nachuh tengule kipanan geljo’uvin; 3 ajeh chu natahsan’uvin amolso tengle thoh hat asosah chu naheuve. 4 Ima lhahsamna beihel’a apumpia nachamkimsoh theina diuvin, thoh hatna natoh chun tong molso hen. 5 Nalah-uva chihnaa lhasam aum le it louhel le house louva peji Pathen henga thum hen, chutile kipe ding ahi. 6 Amavang athum’an lung opkaina beihel’in tahsanna jal’in bou thum hen, lung opkaina nei vang chu Twikhanglen twi hui mut lonle tobang ahibouve. 7 Hitobang mihem chun Pakaiya kona ima mu ding kiholda hen, 8 lungtho nei pasal, akiheina lam jousea lung det lou ahi.

Vaichat le hao

9 Sopi lhachomin choi-at’a aum chu kithang-atpi hen. 10 Mihaovin jong suhnem’a aum kithang-atpi hen, ajeh chu hao hi hampa banga pulloi ding ahi. 11 Ijeh-inem itile nisa hamvevua ahung sat teng hampa agop jin, pahcha ho apul’in, apahhoi jong amoljitai; hitobanga chu mihao chu akiheina lam jousea molmangji ahitai.

Patepna le lhepna

12 Lhepna thoh ham hampa chu anun nom’e; ijeh-inem itile aman athot doh tengle Pathenin ama ngailute peh dinga athutepsa hinna dinga lallukhuh chu akisan ding ahi. 13 Lhepna toh khapan, "Pathen in eilhem pate’e, " ti da hen; ajeh chu Pathen hi thilsen alhemjou pon, aman jong koima alhem patep poi. 14 Mi ama ama lunggul chun ajol lhah a akaimang jia lhep patep’a umji ahibouve. 15 Hiche lung gul phalou chu naovop banga avop’a, chonset ahindoh a, chonset chu apilhin tengle thina asohdohji ahi. 16 Kasopi deitahte, dohan lha hih-un. 17 Thilpeh pha chengse le thil-hoi chamkim josue chu chunga kon ahin, khovah Pa Pathena hung kumlha ahi, ama chu kikhel lou, ale jeng jong kihei mang lou ahi. 18 Athilsem chengse lah a aga masapen ihi theina diuva aman adei banga thutah a eihin’u ahitai.

Thujah a chule tohdoh

19 Hiche hi heuvin sopi deitahte. Mitin thu ngaiyin jangkhai cheh hen, thuseiyin ngai kham cheh hen, lungsat’in jong ngai kham cheh hen. 20 Ijeh-inem itile mihem lunghan hin Pathen din adih atong doh poi. 21 Hijeh chun thilboh jouse le git louna ho letset thil ho pai lhauvin, nahinkhou huhhung thei lung sunga kiphut lutsa thu chu lung nemin kisanjou’vin. 22 Ama le ama kilhem lhaa, thu chu moh ngai mai mai hilouvin atongjoh hiuvin. 23 Ijeh-inem itile thu chu ngaiya abol’a hilouv mi chu phatvet’a ahinkho umdol kivet mai mai tobang ahin, 24 ama le ama akiven, ache mangjin, apettah chun itobang ahi asumiljitai. 25 Amavang chamkimsohna Danthu chamlhatsah thei chu vechenkeiya hichu bol jinga, aja mai hilouva, sumil lou hel’a natoh a podoh jing jeng, hitobang mi chu athilbolnaa nun nom ding ahi. 26 Mi khattou hougut’a kigel’a, aleituh tang lou, alungthim kilhep lhah a chu ahougut jong chu moh ahi. 27 Chagate le meithaiho agenthei hesoh nau vil’a, vannoi leiset’a kona boh beh louhel’a ama le ama kihongdoh jing thei mi chu Pa Pathen dinga hougut theng le boh beh lou ahi.

Jacob 2

Langnei jeh’a gihsalna

1 Kasopite, loupi tah i-Pakaiyu Jesu Christa tahsan mi nahijeh un langnei, sihnei nabol lou diu ahi. 2 Ijeh-inem itile nakikhop nauva chun ponhoi lul tah sil’a sana khutjem kibu pasal khattou hung lut hen, chule ponse dildel kisil vaicha khutdo khat jong hung lut le, 3 nang hon ponsil lul kisilpa veuvin lang ajah a, "Nangma hikoma hin phatechan touvin, " tivuin; chule khutdo pa jah a, Nangma dingto, " ahiloule, "Hikoma kakeng khop dop a khun touvo, " tileu chun; 4 nalah-uva dat neiya thu gilou lamtah a vaihom nahilou diu ham? 5 Kasopi deitahte, ngaiyuvin. Vannoi leiset’a vaichate hi Pathenin tahsanna hao ding le ama ngailute dinga athutepna goulo ding lenggam chu chang dia alhendoh hilou ham? 6 Ahinla nang hon vaichate chu nahsah mon naboltauve. Thu tanna phunga nakailut’uva, nabol gentheiyu chu mihao ho hilou ham? 7 Nakikounau Min phatah taitoma jong amaho hilou ham? 8 Amavang Pathen lekhabua leng Danthu dungjuiya, "Nangma nakingailut bangin naheng nakom ngailun, " kit banga bulhit na hiule, nabol pha jengui. 9 Dat naneiyu vangle chonset bol nahiuvin, Danthu sukeh dol’a themmo chang nahiutauve. 10 Koi hile Danthu apumpia nitsoh a kigel, ahivanga khatseh sukhel’a chu aboncha chunga themmo chang ahi. 11 Ijeh-inem itile, "Jonthanhoi bol hih-in, " tipa chun, "Tol that hih-in, " jong ati ahi. Jonthanhoi bolda jong le chun tol natha le Danthu sukeh nahitai. 12 Mihem jalensah ji Danthu a athu kitan ding miho bangin hiti chun thu seiyun, hitobang chun na tongun. 13 Ijeh-inem itile hepina neilou chu thutanna a hepina beihel’a kibol ding ahi, hepi nan vang thutanna ajoji mong ahi.

Tahsan le natohho

14 Kasopite, khattou tahsan neiyin kisei hen, natoh la nei hih le ipi phachom em? Hitobanga tahsanna chun ama ahuhhing thei lou ding hilou ham? 15 Sopi pasal ham sopi numei ham khat chu ponbei le nikho khat an neh ding lhasamin um hen, 16 nalah-uva khat chun, "Chamdel’in kile kit’in, lumsan lang vasettan, " ti hen, tahsa ngaichat thil ima pelouvin um le hichu ipi phachom em? 17 Hitobang hin natoh beiyin tahsan chu achangseh a athisa ahi. 18 Hichea jong hin khattouvin, "Nangman tahsan naneiyin, keiman vang natoh kaneiye, " tinte. Natoh bei natahsan chu neivetsah temin, kenjong tahsan jal’a kanatoh chu vetsah inge. 19 Nangman Pathen khatseh ahidol natsahsan ahi ong? Aphai tahsanin; ahinla thilha hon jong atansan’uva kihot hot jeng ahiuve. 20 Vo, pannabei mihem, natoh bei tahsan phatchom lou hi nahet nom mong em? 21 Ipuluiyu Abraham in achapa Isacc maicham chunga atodoh jeng jeh a hiche natoh chu them achanlo hilou ham? 22 Ajeh chu atahsan le athilbol chengsen na atoh khoma, tahsan chu natoh-in asuh chamkim joh ahi; 23 chule hichea hi Pathen lekhabu thusei; "Abraham in Pathen atahsanin, hichu ama din themchan nan akisimpeh tai, " kiti hi agui lhunge, chujongle ama chu Pathen jol kisah ahitai. 24 Hichea kon hin tahsan keoseh jal hilouva, toh molso jeh a mihem them kichansah dol namutauve. 25 Hitobang chun Rahab notinun lamthamho alhunsah a lamchom’a asolmang, hiche natoh jeh a chu them kichansah hilou ham? 26 Hiti hin Lhagao bei tahsa athisa ahibangin, natoh bei tahsan jong athisa ma ahibouve.

Jacob 3

Thuseiya lei

1 Kasopite, nang ho tampi mihil’in pan dauvin, ajeh chu mihil ho hi ichung thuu khoh cheh a akitan ding naheuve. 2 Ajeh chu eihon kisuhmona tampi itoh khajiuve. Thusei naa kipal lou mi chu pasal lolhingtah, atahsa geiya apumpia tuh tang thei ahiye. 3 Ithu’va anun theina din sakolte khu akamsunguva kamdal ivopeh-u le atahsa pumpia igot gotna kihei ahiuve. 4 Ven, kong innei ho khu, lentah ahiuvin, hui hattah-in atol ahivangin, ahehna neocha khat’a aheh pan adeina lam’a aheile ahibouve. 5 Hitobanga chu Lei jong hi tibah neocha ahivangin thil lentah a kichoisang ji ahi. Ven, gamkang iten len jongle meisi hal khat’in iti akahvamji hitam! 6 Lei hi meikou, adih lou dimset, vannoi leiset ahi; Lei hi itibah lahuva anakiphut lut ahin, tahsa pumpi hi asuhboh jia, khang lhum keiya, mei banga akah velkol’a hiche meikou hi Damun’a hung kon ahi. 7 Ganhing namkim, vacha namkim, tol’a kithol ho, twiya cheng ho ahiuvin vah-ngoi thei ahin, mihemin avah ngoi jiuve. 8 Leivang hi mihemte koiman avah ngoi joupoi, um thim thei lou thilse, thina gu dimset ahi. 9 Eihon hiche lei hi Pakai le Pathen thangvah nan jong imangun, chule Patheinin ama lim tobanga asem mihemte gaosap nan jong imang jiuve. 10 Thangvahna le gaosapna hiche kamsung khat’a hi hung kondoh khomji ahi. Kasopite, hiche ho ahitiji hi adol ahipoi. 11 Twisam phung khatseh kosunga kona twi lhum le twikha putkhomji mong em? 12 Kasopite, theichang phunga olive ga theiya, lengpiguiya theichang ga theiyem? Chitwiyin jong twitheng asemdoh theipoi.

Chunga kon chihna

13 Nalah-uva aching le hetna nei koi ham? Ama chun chihnaa hungkon nunnem nan a nun akhan le anatoh phan vetsah hen. 14 Amavang nalungthimu’va kithangset kilungdou, kichang chuna aumle nakichoiat lou diu thutah douna jong thujo nasei lou diu ahi. 15 Hitobang chihna chu chunga hungkon ahipon, leiset’a kon, Lhagao thudol hilou, thilhaa kon ahibouve. 16 Ajeh chu kithangset le kichang chuna umna chan’a kinahna le khansetna jong um tei ahi. 17 Chunga kona hung chihna vang chu amasan athengin, chuin kichamdel, kitohdel, nun nemheo, thu nungjel, hepina dimset’a ngailutna gadohji, phat lhemna le lang neina beihel ahi. 18 Chule themchanna ga chu chambolte dinga chamnaa kitu ahi.

Jacob 4

Vannoi to kihouthei

1 Nalah-uva gal kisat le kinah ho hi hoiya hungkon ham? Natibah dunguva kona nomsahna ding ngaichatna ho kisattoa hungkon hilou ham? 2 Nahagut lheh-un, neila nanei pouvin; thangset sumin tol na that jiuvin, ahinla nanei theideh pouve; hijeh chun nakinauvin, nakisat’uve. Nanei lounau hi Pathen henga nathum loujeh-u ahibouve. 3 Nathum vangun namu theipouve, ajeh chu natahsa nopsahna ding jenga nagot’uva nathum dol’u aphat loujeh ahi. 4 Jonthanhoi bol ho! Vannoi to kihouthei hi Pathen to kigalna ahi nahet louvu ham? Hijeh a chu koihile vannoi to kijol’a chu Pathen douva ama le ama kisemdoh ahi tai. 5 O-le Pathen lekhabua kisei, "Aman i-sunguva achensah Lhagao hi thengse ten’a ahol jing ahi, " kiti hi mohseh a nagel’u ham? 6 Ahin lungsetna apeh hi alenjjo cheh-in hijeh chun: "Pathenin kiletsahte chu adoudal’in, Anun nem ho chu lungsetna apejie, " ati. 7 Hijeh chun Pathen koma kipe lut’un, Diabol chu kidinte piuvin, chutile ama nakom’uva konin jamtante. 8 Pathen kom nailut’un, chutile ama nakom’u hung nailut ding ahi. Nakhut’u suthengun, chonseho; nalungthim suthengun, lungthoneiho! 9 Kisih-un, lunghem’un chule kap’un; nanuiyu chu ka-na chule nakipau chu lungkhamna soh hen! 10 Pakai mitmun kisunem’un, chutile aman nachoisang diu ahi.

Sopi chung thu tan

11 Kasopite, khat le khat kisei seto hih-un; koi hile asopi seisea ham, ahiloule asopi thu tan’a ham chun Danthu aseiset’a chule Danthu chunga thu atan ahi. Nangin Danthu chung thu natan vang le anit’a hilouva athu tanjoh nahibouve. 12 Danthu pea le thutan khatseh bou ahin, ama hin ahuhhing theiya, suh jong asuh mang thei ahi; naheng nakom chung thu tan’a pang nang koi nahim?

Kiletsah lou na dia hilchahna

13 Tun ngaitem’un, nang ho kimkhatsen, "Tuni ham jing ham le eiho khopi khatpen a cheu hitin kum khat gatham’u hitin, gakiveiyu hitin, sum veikan’u hite, " tin naseiyui. 14 Jing teng nahinkhou itobanga aum ding bon helou hel’uva. Ajeh chu nang ho hi twimei chomcha khat hung kilahjia mangkit loiji tobang bou nahiuve. 15 Hisanga chu, "Pakai lungdei ahia ihin nah-u le hiche hihen khuche hile bol’u hite, " natijoh diu ahi. 16 Tunla nang ho nahamhoitho na jouseu pi chu nakithang-at pi lheh-ui; hitobang kithang-atna ho hi phalou ahi. 17 Hichejeh chun thilpha bolje he naa bol lou mi chu achonse ahi.

Jacob 5

Mihao gihsalna

1 Tun mihao hon ngaiyuvin, nachunguva hesoh genthei hung lhung ding ho jeh hin kap’un lang maovun. 2 Nanei jouseu amon mang tan, naponsil jouseu lungin anetai. 3 Nasana nadangkau thih-eh souvin anehengsoh tan, hiche thih-eh chu nang ho douna hettohsah a panga, meikah machal banga natahsau jong aneh gam ding ahi. Nang hon la ni nu nunga din gou nakhol’uvin ne! 4 Ven, nalou laiyuva chang-at sum thalah ho doha nabol’uva tohman napeh louvu chun kho asamin, hiche chang-at ho khosap ogin chu Hatchungnung Pakai nabeng’a aluttai. 5 Nang ho leiset chunga nomsa le ninglhingin nachengun, kilhaina gantha nikhoa tha ding bangin nakivah thao cheh’uve. 6 Nang hon midihpa chu themmo nachan’un, nathat tauve. Aman la nadou thuh pouve.

Thohhat le taona

7 Sopite, Pakai hungkit kahsen thoh hat’uvin. Ven, loubol min ga pha manlu tah asodohna dingin leiset chun twilha masa le lha nukhah chu thoh hattah-in angah ngah jeng jie. 8 Nangho jong thoh hat jingun; Pakai hungkitna ding anai tah jeh hin, nalungthimu phutdet’uvin. 9 Sopite, nathuu kitan louna din khat le khat kiphun hih-un, ven Thutanpa chu kotphunga adingtai. 10 Sopite, Pakai min’a thuseiya pang Themgao ho hesoh genthei le thot hatna jouse chu vettoh a jui din kilah-uvin. 11 Ven, eiho athoh lhumkei ho chu nun nom ihiu ahi. Nang hon Job thohhat najauvin, achaina Pakaiyin ipi abolpeh jong naheuve; ajeh chu Pakai hi hepina le khotona dimset ahi. 12 Kasopite, ima jousea akhohpen chu: kihahsel hih-un, vanpan in jong kihahsel hih-un, leiset panin jong kihahsel dauvin, ipi pi hi jongle panin kihahsel hih-un; thutanna noiya nachuh khah louna diuvin "Henge" natiu le tijengun, "Ahipoi, " natiu jongle tijengun. 13 Nalah-uva hesoh genthei thoh um am? Ama chu taohen. Kipah thanom’a um am? Vahchoi la sahen. 14 Nalah-uva adammo um am? Ama chun Houbung upate kouhen, amahon ama chu Pakai minin thao nu’hen, taopeh-u hen. 15 Chutile tahsan jal’a taona chun adammopa chu ahuhdoh a, Pakaiyin ama akaithou ding, chonsetna abol khah jongle hichu ngaidam chang ding ahi. 16 Hijeh chun nadam theina dingun khat’in khat koma nachonset phongun lang, khat le khat kitaopeh to’uvin. Midihmi tao peh na chu nasatah a natong thei ahi. 17 Elijah chu eiho pendol banga mihem ma ahivangin, gojuh louna dinga lung luttah a atao le, kum thum le lhagup sungin leiset chunga go ajupoi. 18 Chuin ataokit le Vanin gotwi ahinpen leiset’in anche louhing ahinsepdoh tai. 19 Kasopite, nalah-uva thutah a kona lamvai aum a, ama chu khat touvin ahinlepui kit le, 20 hitobang chonse khat alamvainaa kona hinlepui kit a chu lamvaipa lhagao chu thinaa kona ahuhdoh a chule chonset tampi jong akhupeh ding ahi, hethem’uvin.

1 Peter 1

Salam

1 Jesu Christa Solchah Peterin Pontus, Galatia, Cappadocia, Asia chule Bithynia gama kithecheh lhenchom sohchang ho, 2 Pa Pathenin ahet masah dungjuiya Lhagaova kisuthengsa, thua nung dinga Jesu Christa thisan kithekhum ho henga lungset le chamna nachunguva pung jal hen.

Hingjing kinepna

3 I-Pakaiyu Jesu Christa Pa, ahepina bulhin dungjuiya thina a kona Jesu Christa thodoh jal’a hing jing kinepnaa eihing thah kit’uva Pathen chu nun nom hen; 4 kemthei lou le boh beh lou chule 5 nang ho jong tahsan jal’a phat chaina teng phondoh dia gotsa kikoi huhhing na chu chang dia Pathen thahatnaa nakihongbit’u ahi. 6 Hichea hin phat chomkhat din patepna lamchom choma lung hem tah a nathoh tei diu hi jong le, hatah-in kipah tahnom’un; 7 hichun meiya patep nung jenga jong mangthei nalai sana sanga munlujo natahsan’u aphot chensah a, Jesu Christa hung kiphondoh teng vahchoina le loupina chule jabolna namupeh diu ahi, 8 Ama chu mu louva ngailua, tuchan geiya jong mu louhel’a tahsan’a seithei louhel’a hapa kipah a loupina dimset nahiuve; 9 ajeh chu natahsan lou na pen’u nahinkhou huhhingna nakimu’u ahitai. 10 Nang ho kipe ding lungsetna thudol gaothu anaseidoh Themgao hon hiche huhhingna thudol hi gunchutah a ahol’uva akholtohsau ahitai. 11 Koipen tah-in itobang dol’a itih phat laiya, asunguva cheng Christa Lhagaova kona, Christa thohgim ding le nunga aloupina ding ho chu ahettohsah masah a aphondoh ahidol, amahon akholtoh-u ahi. 12 Alhacha kinbol ho’u hi achang tum diuva hilouva, nang ho ding ahije ahenguva akiphongdohin, athudol hi tun van’a kona hinkisol Lhagao Theng jal’in Kipana Thupha nahung seipeh ho’uvin nahetsah tauve, hiche ho hi Vantilte jengin jong vetgun atup lheh jengui.

Hinkho thenga hing dia kouna

13 Hijeh chun kong kigah bangin nalungthim gil’in kigingun lungnemin Jesu Christa hung kiphondoh teng nakipe diu lungsetna a chun lhingset’in kinem jingun. 14 Sei ngai chate bangin um’un, masang na-ngol laiyu lunggul’a chonna chu jom hih-uvin, 15 chusangin nakoupau athen bangin nang ho jong nun le khan thengun, 16 ijeh-inem itile, “Keima kathenjeh-in nang ho jong thengun,” tin akisun’e. 17 Mi anatoh dungjui cheh a langneina beihel’a thutanpehji pa chu Pa nasah ngal’u ahile hikoma nakhopem sung seuvin ama chu ging lhumkeiyuvin. 18 Napu napateu hinpehson chonna homkeova kona mangthei sana le dangkaa kilhatdoh nahi louvu naheuve. 19 Nolna beihel le bohbeh louhel kelngoi nou Christa thisan lu tah a kilhatdoh nahibouvui. 20 Ama chu vannoi leiset bul kiphu masanga hetsa ahin, phat kichai kona hi nang ho khohsahna jeh a phondoh ahung um ahibouve. 21 Ama jal’a natahsan’u le nakinep nau chu Pathen koma aum theina dinga Christa thinaa kona kaithouva loupi sah Pathen tahsante nahiu ahitai. 22 Kisopi ngailut thengsel dinga thutah thua nunga nahinkhou nasuh thengu ahitah le khat le khat lungthim giltah-in ki-ngailuvin. 23 Nang ho hi tonsot’a um jing Pathen Thuhing jal’a athi thei hilouva thimo chilhah akona avel’a pengkit nahitauve. 24 Ajeh chu: “Tahsa mihing jouse hampa tobang ahin, Aloupina jouse jong hampa tobang ahi; Hampa agop jin, apah apuljitai; 25 Pakai thu vang tonsot’in aum jingnai,” akiti. Hiche thu hi nahenguva Kipana Thupha kiseiphong chu ahi.

1 Peter 2

Sopi hingjing le namtheng

1 Gitlouna jouse le doha lhep lhahna jouse phat lhemna ho le thangsetna ho chule kiseisetna jouse pai lhauvin, 2 naosen pengthah bangin huhhingna lama khantouna nanei theina diuvin, halpi beihel Lhagao bongnoi chu ngaicha jingun. 3 Ajeh chu nang hon Pakai mi khotona chu natep khahsau ahitai. 4 Chule Pakai, hing jing, Songpi, mihemten apai vanga Pathen dia lhentum manlu tah henga chun hunguvin, 5 nang ho jong song hing jing tobanga Lhagao in khat’a kisadoh a Thempu thengloi hiding, Jesu Christa jal’a Pathen santhei dol’a kilhaina Lhagao thilto toh ding nahiuve. 6 Ijeh-inem itile Pathen lekha bua hitin akisun’e: “Ven, Zion a Songpi katun khu, Inning khompi lhentum manlu tah ahi; Ama tahsan chan chu Jum kimusah louhel ding ahi,” ati. 7 Hijeh chun nang ho atahsante din manlu tah ahin, athasan lou ho din vang: “Insa hon deimoa apaiyu Songpi chu Inning khompipenin apangtai,” akiti. 8 Chule: “Kisuh khahna Song, Kipal lhuhna Songpi asohtai,” akiti. Thu chu angai loujeh-uva kipal lhu ahitauvin, hiti dinga chu umdoh ahitauve. 9 Nangho vang nam lhentum, Lengpa dia thempu, namtheng, Pathen mite nahiuvin, hitia chu muthima kona ama khovah kidangtah a nakoudoh Pau phatna chengse chu naphondoh diu ahi. 10 “Phat khat chun Pathen mite nahipouvin, Tunvang amite nahitauve; Hepina chang lou nahiuvin, Tun vang hepina nachangtauve,” akiti.

Pathen lhachate hinin hingun

11 Deitahte, kholjin le sohchang bangin Lhagao to kigalto jing tahsepha lunggul jousea kona kihei mang dinga ka-ngeh nahiuve. 12 Chidang namdang ten nang ho thilse bol’a naseina jenguva jong nanun nakhanu chu phatsah-uvin, chutile natohphatna jouseu amu’va, athudol akikhol toh nikho le Pathen avahchoi diu ahi. 13 Pakai jal’in mihem phudoh thuneina jousea nungun; lengpa chu aboncha chunga vaipo ahin, 14 gamvaipo ho chu thilse bolte talen matsah ding le thilpha bol ho seipha dinga Pakai sol ahiuve. 15 Ijeh-inem itile thilpha kiboldoh chengsea lungthim beiho ngolna kasanmo hel’a lha ding hi Pathen lungdei lam ahi. 16 Jalente bang hiuvin, amavang jelenna chu gitlou khuna neilouvin, Pathen sohte bangin um’uvin. 17 Mi jouse jabol cheh-un, kisopitna ngailu’uvin, Pathen gingun, lengpa chu jaboluvin.

Christa thohna vetkah ding

18 In mun lhachate ijakaiyin naPakaiteu gingun athu’uvin nunguvin, mipha ho le anun nem ho keo jong hilouvin, milungkhohho thun jong nungun. 19 Ijeh-inem itile mikhattouvin Pathen ahet khen them jeh a athoh ding lom lou gim genthei hesoh athoh le hichu ama dinga vangbohna hijo ahi. 20 Ajeh chu chonsetna jeh-in min deng hen lang thip beh-in thoh thoh jeng leu chun ipi phachom am? Chusangin thilpha bolna chunga hesoh genthei thoh thoh leu chun hichu Pathen dia kipana ahi. 21 Christan nang ho dia hesoh genthei athoh a vetkah ding khat nadalhah peh-uva, nang hon ama khonung najui diu deinaa, hiche dinga chu kikou nahiuve. 22 “Aman chonset abolpon, Akamsunga jong doha lhep lhahna akimudohpoi,” akiti. 23 Houset achanin ahouse thuh pon, athohgim pet’in jong agihsalpoi; dihtah a thutanpa koma akipedohjoi. 24 Aman eiho chonset jouse atahsaphen apon, thingpel chunggeiyin apodoh-in, chonsetna jousea i-thiuva, themchanna a ihin theina diuvin aboltan, ama kijepna mahan eidamsah tauve. 25 Nang ho kelngoite banga vahcheh gam nahitauvin, tua nahinkhou vettuppeh Pa le na chingpau henga hung kilekit nahitauve.

1 Peter 3

Nupa-numeiho le pasal ho

1 Hiche bang chun numei jouse najipateu noiya kunjel’uvin, chutile thu ngailou ho jeng jong chu numeiho khanthem jeh a thu phalouva kihinsojo ding ahi; 2 nagin themjeu le nakhan themu, boh beh louhel chu vetsah-uvin. 3 Sampheh hoi le sana khi-o, leiset ponsil nihchen hoiya, polam thil’a kijem louvin, 4 Pathen angsunga manlu tah, chul thei lou, Lhagaova nunnem le lungnem, lungthimgil’a mihem giltah joh chun kijem’un. 5 Ijeh-inem itile masang laiya numei theng, Pathen’a kinem jing ho jong chu hitia hi anakijem ahiuvin, ajipateu thu thun anung’ui. 6 Sarah jong chu Abraham thun anungin, amapa chu Pakaiti geiyin aseiye; nang hon imacha ginglouhel’a amanu thilpha bol tobang chu nabol’u le achate nahiuve. 7 Hitobangma chun pasal hon jong numei ho chu alhasamjo, bel kehbai tobang ahi heuvin, jabol chansah-un lang, lungsetna hinkho naneikhomu jong ahijeh-in, chenkhompiuvin, chutile nataokhom nau suh noh phah a um lou ding ahi.

Adih jeh a hesoh genthei thoh

8 Achai nan nabonchan lungkhat hiuvin, kilainatto cheh-un, kisopi ngailut’un, kidipdap to’uvin, nun nem’un lang, 9 setna chu setnan thuh dauvin, houset chu house thuh hih-un, chusangin phatthei bohjo’uvin, ajeh chu phatthei boh lo dinga kikou nahibouvui. 10 Ijeh-inem itile: “Hinna ngailut ding deiya, Nikho phaho mu ding nom’an Gitlouna akonin alei tuh tang hen, Akamin jong doha lhep lhahna seida hen. 11 Ama chu agilouva konin kihei mang hen thilpha boljo hen. Chamna hol hen lang hichu jui jing hen. 12 Ajeh chu Pakaiyin midihte ave-lhi jingin, Atao nau angai lhi jing jenge; Thilse bolte Pakaiyin avesal jinge,” ati. 13 Nang ho thilpha bolna dinga tom ngaitah nahiule, kon nabolset diu ham? 14 Ahinla adih jal’in hesoh genthei thoh tahbeh jong leu chun anun nom nahiuve. Amavang hite ho ginna chun kicha loujen’un, lung jong lungkham hih-un. 15 Amavang nalungthim’uva Christa chu Pakai ahina bangin athengin geljingun, nasunguva um kinepna thudol chu adonga aum le kitoh chet’a donbut din phat jousen kigosademin um’uvin. 16 Lungnem le ginggeh chan bol’un, ima datkhenna pha neiyun, chutile Christa jal’a nachonphat nau seise ho chu athuseiyuva kijumso diu ahi. 17 Thilse boljeh a hesoh genthei thoh sanga, Pathen lungdei lam ahile thilpha boljeh a genthei hesoh thoh chu gamchenga phajo ahi. 18 Ajeh chu chonset jeh a nang ho dia Chritan hesoh genthei khatvei thoh a athoh a, midih lou ho dinga midih chun athoh a, nang ho Pathen kom na lhut theina diu abol ahin, tahsaphea thia Lhagaova hing ahitai. 19 Lhagaova chea, Lhagaova songkul lut ho henga thu agahil lhang lea, 20 Noah nikho laiya Pathenin lungde hattah a angauva, Kong innei kisui laisea Pathen thu ngailou lhagao ho chu agahil ahi; twisanglet’a kong sunga sohchaa chu mihem themcha, get seh bou ahiuve. 21 Tua chuche twisanglet lim’a kibol Baptize chan hin tahsaphe nen suhthengna hilouva, lungthim gelkhen themna phaa Pathen henga kitepna kisem’a, thinaa kona Jesu Christa thodoh jal’a nahuhhingu ahitai. 22 Jesu Christa chu van’a akaltouvin Pathen jetlam’a atouvin, Vantil jouse le thuneina, thahatna jouse ama noiya alutsoh tai.

1 Peter 4

Pathen lungsetna gouchingpha

1 Christan tahsphea athohgim bang chun nang ho chutobang din kivon’uvin, ajeh chu tahsaphea thohgima chu chonset’a kona ong doh del ahi. 2 Chuti ahijeh-in tahsaphea nahinna dingu phat um nalai sea jong hin, mihem lunggul lama hilouvin, Pathen lungdei lamjoh-in hungun. 3 Ijeh-inem itile khohsa louhel’a phat sotpi hi chidang namdangten atohnom lam jonthanhoi, huh, jinuh hat, nopsahna, julop, dan neiloule semthu doilim houlam’a kimang nahiuvin, hichu pha set tante. 4 Hichea hi nang hon amaho chonval manthahna chu najop lou phat’uva kidang saa natai pongjiu ahibouve. 5 Mihing le mithi thutan dinga kigosadempa ang’a amahon achung thuu akipeh lut diu ahinai. 6 Hichejeh a chu mithi ho jeng jong tahsaphea ahin laiyun, mihemdol’in athuu kitanta jong le, Pathen lama Lhagaova ahinna diuva Kipana Thupha agaseipeh ahiuve. 7 Thil jouse kichaina ding anai tai. Hijeh chun tao dingin lunglimgeh le kitim themin um jingun. 8 Imajouse chungvuma nang hon khat le khat ki-ngailutna giltah neiyun, ajeh chu ngailut nan chonset tampi jong akhujol theiye. 9 Phunchel louhel’in khat le khat kilhunsah to’uvin. 10 Pathen lungsetna Jatchom chom gouching phatah bangin, amitakip Lhagao thilpeh akisan cheh chu khat le khat kijento nan mang chauvin. 11 Koi hile thuseiyan Pathen thubou seihen; lhacha kinbol’an jong Pathenin apeh thahat dungjuiyin bol hen; chutile ima jousea Jesu Christa jal’a Pathen chu vahchoiya um jing ding ahi, Jesu Christaa loupina le thahat tonsot’a um jing jeng ahi: Amen.

Christian hijeh a hesoh genthei thoh

12 Deitahte, nang ho patepna dia nalah-uva meikou banga hung um chu, thil kidang nachunguva soh bangin datmo hih-uvin. 13 Chusangin ama loupina ahung kiphondoh teng le lhingset’a nakipana diuvin Christa thohgimna chu thoh khompijo’uvin. 14 Nang ho Christa min jal’a houset nachan’u le anun nom nahiuve, ajeh chu loupina le Pathen Lhagao nachunguva hung chua ahitai. 15 Nalah-uva koi hile toltha jeh ham, guhchat jeh ham, mi tohna chunga khut lhah jeh ham jeh-in thohgim da hen. 16 Amavang Christian hijeh a thohgim’a chun jachatnan neida hen, Christian min chun Pathen choi-anjo hen. 17 Ajeh chu thutanna ding phat hung lhunga Pathen insunga kipanding ahitan, eiho chunga akipat masah le, Pathena kon Kipana Thupha ngailoute akichaina ding chu ipi hitan tem? 18 Ajeh chu: “Midih dinga huhinga um ahahsat le Pathen ngaisah loule chonseten hoilam asuh diu hitam?” akiti. 19 Hijeh a chu Pathen lungdeiya hesoh genthei thoh ho chun hitobanga chu thilpha abol jinguva ahinkhou tahsan umtah Asempau khut’a apehdoh diu ahi.

1 Peter 5

Pathen kelngoihon

1 Christa thohgimna hetoh le ahung kiphongdoh ding loupina chankhompi chule na-upat piu khat kahijeh a nalah-uva upate ka-ngeh nahiuve; 2 nalah-uva Pathen kelngoi hon um chu chingphauvin, bol lou phamoa vetup hilouvin, Pathen deidol’in lung chamtah-in boljo’uvin, alam louva phatchom ding deina jong hilouvin, lung guttenin bol’un. 3 Nakichinsah ho chunga kipiput sah louvin, kelngoi honin avetsuiya, ajui thei din umjo’uvin. 4 Ajeh chu kelngoi Chingpipu ahung kilah teng le nang hon chul thei lou loupina lallukhuh chu nasan diu ahi. 5 Hitobang chun khangdong ho jong upate thun nunguvin. Nabonchauvin khat’in khat chunga din kineosahna chu ponsil bangin kivon’un; ijeh-inem itile: “Pathenin mi kiletsahte adoudal’in, Kineosate chu lungsetna apei,” akiti. 6 Hijeh chun Pathen ban-gol kha tah noiya kisunemsoh keiyun, chutile aman aphat cha nachoisang thei diu ahi. 7 Nalungkhamna jouseu Ama chunga sep lhauvin, ajeh chu aman nakhankho diu agel nai. 8 Lung limgeh-un, kigingphauvin. Nakidoupi Diabol chu Phaisameigeo kitumlet lut banga, koi hijongle val lhum jeng dia vah lea ahol ahi. 9 Nadoupau chu tahsan nan kidinte piuvin, vannoiya nasopite jousen jong hitobang hesoh genthei thoh hahsa hi athohsoh keiyu nahetsau ahi. 10 Lungsetna tin cheng kimsoh Pathen, Christa jal’a aloupina dinga tonsot’a dia nakoupauvin, chom khat gim genthei nathoh jou tengu le nasem phat’uva, nasuhdet diu ahi. 11 Ama chu tonsot geiyin tha hatna chang jing hen: Amen.

Salam

12 Kageldol’a tahsan umtah sopi Silvanus kamanchah a hichelekha thot chomcha hi kahinsut’a, Pathen lungsetna atahbeh ahidol hi tilkhouva kahettohsah nahiuve; hichea chun dingdet jingun. 13 Lhenchom nahipiu Babylon gama um nu le kachapa Mark-in nasalam’ui. 14 Ngailut nan kichopto’uvin, khat le khat kisalam’uvin. Christa to hingkhom jouse nachunguva cham leng hen.

2 Peter 1

Salam

1 Jesu Christa soh, solchah a pang Simon Peterin, huhhingpa Jesu Christa le i-Pathen’u dihna jal’a keiho to kibang cheh a tahsanna chang jouse henga: 2 Pathen le i-Pakaiyu Jesu Christa nahet nauva konin lungsetna le chamna nachunguva lhingset’in pungjal hen.

Christian kikou le kilhen lo na

3 Ama loupina le aphatna chankhompi dinga eikoupau ihet jehuva, Pathen ngaisah a hintheina dia, thil ijakai aboncha a Pathen thahatna kona eipeh-u ahitai. 4 Vannoiya umsa tahsa lunggul manthahnaa kona jamdoh a, hichea kona chu Pathen hinna lim chu ichankhompi theina diuva, hiti thudol’a chu thutep chung nung pen manlu tah chu eipeh-u ahi. 5 Hichejeh tah chun najo chanin bol’un lang phatna chu natahsan’u belap sah-un, phatna chu hetna be lap sah un, 6 hetna chu kitim themna belap sah-un, kitim themna chu thoh hatnan belap sah un, thohhat na chu Pathen ngaisah nan belap sah-un; 7 Pathen ngaisahna chu kisopi ngailutnan belapsah un, kisopi ngailut chu ngailut nan belap sah-uvin. 8 Ijeh-inem itile nang hon hicheng hi bulhingset’a naneiyule, hichun i-Pakaiyu Jesu Christa nahet nauva chatmo le ga beiya nakoi louhel diu ahi. 9 Hicheng neilou mi chu mitcho, khomu lou ahin, masang achonsetna chengsea kona kisop thengsa ahichu asumiljitai. 10 Hijeh chun sopite, nakikou nau le nakilhendoh nau chu kichetsahna din kihabol cheh kit’un; chuti bol leu chun itih chan ajong nakipal lhuh lou diu ahi. 11 Hiti dol’a chu i-Pakaiyu le huhhingpa Jesu Christa tonsot lenggam sunga lutna thei lhingset’a nanei diu ahiye. 12 Nang hon nahetsau le naneisau thutah achu dettah a pangdet hita jong leu chun hiti hohi geldohsah jing dinga kagot ahi. 13 Hiche pon-in tobang tahsaphea kahin laisea, hiti thudol hea nang ho geldohsah jinga, mit hah jinga umsah ding hi dih kasai. 14 Ajeh chu i-Pakaiyu Jesu Christan eihetsah dungjuiyin pon-in tobang hiche katahsa hi kadalhah loiding kahetai. 15 Kapotdoh nung teng geiya hiche ho hi nageldoh jing theina diuva kajochan’a na habola kabol ding ahi.

Christa loupina le agaothusei

16 Keihon i-Pakaiyu Jesu Christa le ahung kit ding thu nang ho kahetsah-uva chu semthu thusim pou mangchaa seikahipouvin, alal loupina mittah a mua kaseiyu ahibouve. 17 Ijeh-inem itile aman Pa Pathena kona jabolna le loupina akisan’a, lal loupi chungnungpen a kona ahenga hung ging 0-chun “Nangma kachapa deitah nahin, nachunga ka lung alhai ta-ngeiye,” atipet tah chun 18 ama le keiho molvum theng chunga ka-umkhomuve, hiche ogin chu van’a kona hung ahi kajauve. 19 Hijeh chun Themgao thusei chu ginchatna dettah kaneiyun, nang hon jong khoh sah leu chun aphai, ajeh chu hiche hi munthim laiya khovah lhah geiya kivah tobang le nalungthim sunguva dia Jingvalpa vah tobang ahi. 20 Amasa hiche hi nahet diu ahi, Themgao thusei kisundoh jouse hi koiman achamtah a aledoh a ahilchet theidol ahipoi; 21 ajeh chu gaothusei khat cha beh jong hi mihem lungdeiya hung um doh ahipoi, Lhagao Theng cho-thouva mihemhon Pathena kona aseidohji ahibouve.

2 Peter 2

Themgao lhemho le mihil lhemho

1 Mipi lah a Themgao lhem ho anaum banga chu, nang ho lah a jong mihil lhem ho hung sohdoh diu ahi; amaho hin manthahna thuhil lhem ahinpoh doh-uva, amaho chodoh Pakai jeng jong aseilep diu, man gangtah a achunguva manthahna akilhut khum diu ahi. 2 Tampin ahuh nau nung ajuiyuva, amaho jeh a chu thutah lampi jeng jong taitom’a hung um ding ahi. 3 Jou thua kiloset sumkolveina nahin nei dingu ahi; ahinla masanga pat achung thuu kitansa chu akipel hih laiyin, asumang pau jong alulhu hih laiye. 4 Pathenin Vantil chonse ho jeng jong khen louhel’in Damun’a aleh lut jengin, hikoma chun Thupi tan ngah din muthim lah a thih khaovin ahen’e. 5 Pathen helou leiset, leiset masa, twisang alet khumsah a asuh mang chun khen aneipoi, them channa thuseiphonga pang Noah le adang mihem sagi chubou akhendoh-e. 6 Sodom le Gomorrah khopi te ni chung thu atan jong chun vutvam asosah jengin, Pathen ngaisah lou ding mite chunga thu soh vetkah nan asumangtai. 7 Huh lama kipe, chonseho jal’a hesoh gentheiya um midih Lot chu ahuhdoh-e. 8 Ijeh-inem itile hiche midih chu alah-uva chenga, danbeiya athilbol ho’u ani nia amua, ajah le them changa um ahinkho jeng jong hesoh genthei thoh a um ahitai. 9 Pakaiyin Pathen ngaisahte patep’a aum nauva kona huhdohje ahen, adih lou ho thutan nikhoa talen matsah dinga koije jong ahei; 10 ahideh chun tahsaphe lunggul lam jenga kipea chon ho, Vaipopa nah sah lou ho ahiuve. Amaho hi angol han’un, alung chamin achon’uvin, loupina changsa ho jeng jong taitom ding akicha pouve. 11 Ahinla Vantilte chu amaho sanga thunei le thaneijo ahi vangun, Pakai ang sunga amaho houset’a taitomna ima ahinlhut pouvin ahi. 12 Hiche miho vang hi lungthimbei, gamsa tobang, amangthah dinga mihem ngaiya pang mai mai ahiuvin, hetna beiya taitom ahiuve; hijeh a chu amanthahna diuva mangthah tei diu ahi. 13 Alam louva abol man’u adih lou akisan diu; sun chang laiya aning anop’a chonjeng hi lung nachimna ageluva, boh beh le nolna um ahiuvin, doha nalhep’uva nopsahna dinga nang ho to ankong aumkhomjiu ahi. 14 Amit’u la jongthanhoi na ding adimset’in, chonset bol la atang theipouve; hinkhoa dindetna beiho chu ajol lhauvin, sumselna lam jenga kihil themsa lungthim aneiyun, sapset chang chate ahiuve. 15 Amahon lam jang adalhauvin, lamhilouva akihei mang gam’un, athil dih lou bolnan sum deichaa Besor chapa Balaam lampi joh ajuitauve. 16 Ahinla Balaamin Dan asuh khel jeh chun pho na achangtan, Paomosa-nganin mihem paovin thu aseiyin Themgaopa ngolna chu asutang tai. 17 Amaho hi twi kangsa, twisamphung ho le khopi huiyin alhoh mangji meilhang ho tobang ahiuvin, amaho dinga muthim lhangkhal jing lai chu kikheh khol ahitai. 18 Ajeh chu amahon hamhoi tho nan, manlou pou aseiyun, vahthai ho lah a um, hung jamdoh nah nah ho jong tahsaphe ngaichat, huhna lama ajol lhajiuve. 19 Ajol lhah ho’u chu jalen din atepeh-un, amaho tah jongla kemmang thei soh a kihen joh ahi tauve, ajeh chu galjoupan ajosa chu soh a anei ngai mong ahinai. 20 Ijeh-inem itile i-Pakaiyu le huhhing pa Jesu Christa hetna jal’a vannoi leiset kisuhbohna tin chenga jamdohsa mihem chu, hichenga akihen-oh kit’a hicheng chun ajokit teng le aum chan’u chu amasaa sangin gamchengin akhoh cheh jitai. 21 Hi jeh chun ahet nunguva, amaho kipe, thupeh thenga kona akihei mang sangun, dihna lampi chu ahet’a ahet lou hel’u hile pha jotading ahi. 22 “Uiyin aloh anehkit jin, silngimsa vohcha bonlhoh lah a akibol kitji,” kiti paochamtuh hi amaho chung thua adih lheh jengin ahi.

2 Peter 3

Pakai hung ding tepna

1 Deitahte, hiche hi kalekha thot ni lhin na ahitai, lekha te nia hi, thoh hatna jeh a lung ngaito thengsel nanei theina dinguva geldohsah a kahinsuh thoujiu ahi. 2 Masang laiya Themgao theng ho thuseina le Pakai le huhhingpa thupeh solchahhoa kona najahsau chu geldohsah kitna ding jong ahiye. 3 Amasan hiche hi heuvin, ni nukhah teng mi jontai hatten jontai jeng apat’uva, ama tahsaphe lunggul lam jenga hung chon diu, 4 amahon, “Ahung kitna ding thutep chu hoi lamba hitam? Ajeh chu ipu ipateu la athisoh tan, thilsem jouse hi la semtila’ bep bep’in aum jingin,” atiu diu ahi. 5 Ijeh-inem itile amahon Pathen thusah a kona masang laiya pat van umsa ahile, twi lah a kon, twi jeh a leiset kisemdoh jong hi henasa kihetmo sah ahiuve. 6 Hichejeh a chu chulai vannoi leiset chu twisanglenin achup’a manghel ahitai. 7 Hiche Pathen thu ma maa chu tulaiya van le leiset jong hi Pathen hephalou te chung thu kitan’a kisuhmang nikhoa dinga kikhen’a, meiya halvam dinga kikheh khol ahi. 8 Vo deitahte, Pakai dia nikho khat hi kum sang khat tobang ahin, kum sang khat jong nikho khat tobang ahidol hi sumil loujenun. 9 Mi kon khat’in ngongkaiya agel vangun, thutep dol’a Pakai chu angongkaipoi; koima manthah ding adeilou jeh a abonchauva lung aheisoh manna diuva, nang ho jeh a, kho-ngaisot ahibouve. 10 Ahinla Pakai nikho chu gucha banga hung ding ahin; ahung ni le chun van ho chengse ging lul lul’a, kitolmang hel ding, thilbul chengse meikouva jol mangsoh ding, vannoi lseiset le asunga um na kitong jouse jong kavam soh hel ding ahi. 11 Hitobanga hi thil jouse hung kisumang ding ahitah jeh-in, itobang dol ham’a nakigot diu akhoh tai, nun le khan, thenna lam, Pathen ngaisahna, 12 Pathen hungkitna ding nikho ho ngah jingle sunai jinga naum diu ahi; ahung lhun nikho le van ho chengse meiya kouva vamhel ding, thilbul chengse jong meiyin akah a jolmangsoh ding ahi. 13 Eihon ama thutep, adih jenga umna, vanthah le leiset thah chu i-ngau ahi. 14 Hijeh chun deitahte, hicheng hi kat jinga naum nauva, ama henga nolna beihel le boh beh louva nahung mudoh theina diuvin, chamdel’a um din kihabol’un. 15 Chule sopi deitah-u Paul’in ama kipe chihna dungjuiya nahenguva ahinsutsa bang chun, huhhing channa dia i-Pakaiyu mi kho ngaisotje hi gel’uvin. 16 Alekha thot ho sunga chu hiche thudol ho asei ahin, asunga chun het hahsa tah tah jong aumin, hiche ho hi lungdet lou hon Pathen lekhabu dang abolna bangun ahilkon le jiuvin, amaho manthahna akiboldoh lo jiuve. 17 Hijeh chun deitahte, nang hon vang hemasauvin lang, kiging phauvin, achutilou le Danbeiho manthahna chun nalhoh mang thauva, panmundetsa chu nalhaso khah diu ahi. 18 Chusangin i-Pakaiyu le huhhingpa Jesu Christa lungsetna le hetnan khangtou jingun, Amaa chun loupina tu le tonsot kum khon um jing hen: Amen.

1 John 1

Hinna thu

1 Hiche hi semtil’a umsa, kajahsau, keihon mit’a kamusau, chule khut’a kathamsau chuche hinna thudol chu ahin, 2 hiche hinna chu ahung kilangdoh tan, chuche tonsot hinna, Pa koma um jingsa, keiho henga hung kilangdoh chu vechen’a hettohsah a, nahenguva kaphondoh-u ahi. 3 Keiho to ikiloikhom theina diuva kamusau le kajahsau chu nahenguva kaphondoh-u ahi. Keiho kiloikhomna hi Pa le Achapa Jesu Christa to kiloikhomna ahi. 4 Kakipa nau achamkimsohna dinga hicheng hi kahinsut ahi.

Pathen chu khovah

5 Pathen hi khovah ahiye, ama sunga muthim aum louhel hi keihon amaa kona kajah-uva, nahenguva kaphondoh-u thu kithot chu ahi. 6 Eiho amato kiloikhom’a kiseiya muthim sunga ivale vangule, jousei ihiuvin, thutah dungjuiya na tong lou ihiuve. 7 Ama khovah sunga aum banga, eiho jong khovah sunga ivale vangule, eiho khat le khat kiloikhomna nei ihiuvin, Acha pa Jesu thisanin chonsetna chengsea kona eisop thengsoh-u ahi. 8 Eiho chonset neilouva ikisei vangule, eiho le eiho kilhem lhaa, thutah chu isunguva um lou ahi. 9 Eihon ichonsetna jouseu iphondoh vangule, ichonsetna jouse ngaidam ding le then louna jousea kona eisutheng diuva, ama chu tahsan umtah le dihtah ahi. 10 Eiho chonse louva ikiseiyule, ama chu ijoubol’uva athu eiho sunga umlou ahi.

1 John 2

Eipanpiu Christa

1 Kachate, nachonset louna diu vin hicheng hi nahenguva kahinsun’e. Ahin khattou chonse jeng tajongle, Pahenga eisei champeh diu, dih tah Jesu Christa ineinauve. 2 Aman chu eiho chonset jouse thoina ahi, eiho chang jenga jong hilouva vannoi pumpi ding jong ahi. 3 Athupeh chengse init’u le ama ihetsau ahidol kichen ding ahi. 4 Khattouvin, “Ama kahetai,” atia, athupeh chengse la anit loule mijou ahin, asunga thutah umlou ahibouve. 5 Athu nit’a vang chu, hiche anitna jeh a chu Pathen ngailutnaa kisuchamkimsoh ahitai. Hichea hi ama sunga um ihiu iheuve. 6 Ama sunga um jinga kiseiya chu Christa chonchan banga chontei ding ahi.

Thupeh thah

7 Deitahte, nahenguva thupeh thah kahinsunpoi, semtil’a pat nanei sau thupeh lui chu ahibouve; na jahsau chu hiche thupeh lui thu hi ahi. 8 Muthim beisoh deh deh a, khovah tah beh hung vah pan thudol, nang ho le Christa sunga um thutah thudol thupeh thah jong nahenguva kahinsun nai. 9 Khovah sunga um’a kiseiya, asopi hotbol nalai chu tugeiya muthim sunga um ahibouve. 10 Asopi ngailua vang chu khovah sunga umah ahitan, ama sunga hin kipal lhuhna aumpoi. 11 Asopi hotbol nalai vang chu muthim sunga um, muthim sunga vah le ahin, muthimchun amit te ni achotsah jeh-in, hoilam ajot jong ahepoi. 12 Chate, Ama min jal’a nachonset jouseu ngaidam ahijeh a Nahenguva kahinsut ahi. 13 Pate, semtil’a pat ama chu nahetsau ahijeh a Nahenguva kahinsut ahi. Khangdong ho, agiloupa nanan jou phat’uva Nanghenguva kahinsut ahi. 14 Chapangte, Pa chu nahet phat’uva Nahenguva kahinsutsa ahi. Pate, Ama chu semtil’a pat nahetsau ahijeh a Nahenguva kahinsutsa ahitai. Khangdong ho, nathau aphat’a Nasunguva Pathen thu aum jinga, Agiloupa chu nanan jou phatu’va Nahenguva kahinsutsa ahitai. 15 Vannoi leiset le leiset sunga um thil ho ngailu hih hel’un; koi hile vannoi leiset ngailua chu Pa-ngailutna asunga um lou ahi. 16 Ijeh-inem itile vannoi leiset’a um chengse tahsaphe lung ngaichat le mit te nin jon lunggul’a amu, chule hinkhoa kimoh vahchoi-hiti ho hi Paa hungkon ahipon, vannoi leiset’a konjoh ahibouve. 17 Vannoi leiset le athil ngaichat lunggul abeikon ahitan, Pathen lungdei lam nol’a vang chu tonsot’a um jing ding ahi.

Christa doupa

18 Chapangte, nidan nukhah ahitan, Christa doupa hung ding najah banguvin, tun Christa douho tampi asohdoh tauve; hichea kon hin nidan nukhah ahi ihetauve. 19 Amaho hi ilah-uva kona potdoh ahiuvin, eiho lah a vang apang pouve; eiho lah a pang hileu iumkhom jing diu ahi; ilah-uva apan louvu akiphondoh theina dia potdoh ahitauve. 20 Nang ho vang Athengpa thaonu changkha nahiuvin, hijeh chun ijakai nahesoh keiyui. 21 Thutah nahet loujeh-uva nahenguva kahinsut ahipon, hiche nahet’uva, thujou ho hi thutah akon ahilou nahet jeh-uva kahinsut ahibouve. 22 Jesu chu Christa hisah louva seileppa, jousei ahiloule koi dangba hiding ham? 23 Chapa seilep jousen Pa aneilou ahin, Chapa phongdoh jousen vang Pa anei ahi. 24 Nang hon semtil’a pat najahsau chu nasunguva um jing hen; semtil’a pat najahsau nasunguva aum vang le, nang ho jong Chapa le Pa sunga um jing nahiuve. 25 Amatah-in eitep’u athutep chu tonsot’a hinna hi ahi. 26 Hicheng hi nang ho lhem lhaji ho thudol’a kahinsut ahitai. 27 Nang hon vang ama thaonu chu nakisan’uva, nasunguva aum jeh-in, nahil diu midang koima na-ngaicha pouve; amaa kona naneiyu thaonu chu thutah hiya, jousei ahilou jeh-in, ijakai thudol nahilsoh nauve. Hejih chun aman nahil bangun amasunga um jinguvin. 28 Chule tun chate, ama ahung kilah teng kisonna ineiyuva, ahungkit tengle maimohna ineilouna diuvin, ama sunga um jing jenguvin. 29 Ama chu adihje nahet’ulle, adih bol jouse hi amaa kona pengdoh ahidol jong nahet diu ahi.

1 John 3

Pathen chate

1 Veuvin, Pathen chate i-kisah thei na diuva Pan eipeh-u ngailutna hi iti natsat hitam! Chule hichu hijong ihitauve. Hijeh a hi Vannoiyin eihet louvu ahi, ajeh chu Pathen jong ahepouve. 2 Deitahte, tun eiho Pathen chate i-hitauvin, ahivangin ipi ihung hidiu akichen hih laiye. Ama ahung kilah teng le eiho jong ama to ibah diu vang iheuve, ajeh chu ama ahi na banga imu diu ahi. 3 Ama jal’a hiche kinepna nei chan chu ama atheng banga ama jong kisuhtheng ahi. 4 Koi hile chonset bol’an Danthu to kikal abol ahi, ijeh-inem itile Danthu to kikal chu chonset ahi. 5 Ama sunga chu chonset beihel ahijeh a chonset pomang dinga ama hung kilah ahi naheuve. 6 Koi hile ama sunga um jouse achonsepoi; achonse jousen ama chu mujong amukhah lou, het jong ahet khah louvu ahibouve. 7 Chate, koima kilhep lhahsah hih-un; koi hile thildih bol’a chu Christa adih banga ama jong midih ahi. 8 Chonset bol’a vang chu Diabol’a kon ahi, ajeh chu Diabol chu semtil’a pat hung chonse jing ahi. Hichejeh tah a chu Diabol natoh sumang dinga Pathen Chapa hung kilah ahi. 9 Pathen’a kona pengdoh jousen chonset aboljom jing poi, ajeh chu Pathen muchi chu ama sunga aum jingin ahi. Chujongle Pathen’a kona pengdoh ahi jeh in achonset jing ding chu ahitheipoi. 10 Hichea hin Pathen chate le Diabol chate umdol akichen’e. Thildih bol lou jouse le asopi ngailu lou jouse chu Pathen’a kon ahipoi.

Khat le khat ki-ngailuvin

11 Eiho khat le khat iki-ngailut diu hi najahsau semtil’a pat thu thot chu ahi. 12 Agiloupaa kon, asopi that’a pang Cain to ibah lou diu ahi. Ipijeh pen a aman asopi atha ham? Ajeh chu ama natoh chengse agilou jeng ahia, asopipa a jouse adih jeng ahijeh ahi. 13 Vo sopite, vannoiyin nahot’u le kidang sahih hel’un. 14 Ijeh-inem itile eihon isopiteu ingailut jeh-uva thinaa kona hinna galkai i-hi tauve. Angailu lou vang chu thinaa um jing nalai ahi. 15 Koi hile asopi hotbol tol that ahin tolthat lung sunga tonsot hinna aum lou iheuve. 16 Aman eiho dia ahinkho apeh jeng jeh hin, hichea hin ngailutna ihetauve; hijeh a chu eihon jong sopite dinga hinkho ito doh diu thil khoh tah ahi. 17 Khattou hinkhoa ning lhingin um hen lang chule asopi ngaichat neiya um amu nasan achung changa lainatpi da le, ama sunga chu Pathen ngailut na iti um thei ding ham? 18 Chate, eihon thuhom keo le kamsung jengseh hilouvin, natoh le thutah in ngailu hite.

Pathen ang’a kison

19 Hichea hi eiho thutah apang ihidan’u ihet’uva, ama angsunga ilungthima ikison diu ahi. 20 I-lung thim’un ei-oi mo tengu jongle, Pathen chu eiho lungthim sanga lenjoa ima jouse hesoh ahiye. 21 Deitahte, ilungthim’un ei-oi mo louvu le Pathen henga lung ngamna ineiyun, 22 hijeh chun thum inei tengu jongle athupeh jouse init’uva, a-angsunga alungdei lam jeng ibol jeh-un, amaa konin akisan jiuve. 23 Athupeh chu achapa Jesu Christa min’a itahsan’uva, aman eipeh-u thupeh banga khat le khat ikingailut diu hi ahi. 24 Koi hile athupehho nit’a chu Christa sunga um ahin, Christa jong ama sunga um ahi; hichea hin aman eipeh-u Lhagao jal’in ama isunguva aum i-heuve.

1 John 4

Pathen lhagao chule Christa dou lhagao

1 Deitahte, Lhagao tapou tahsan dauvin, lhagao ho chu Pathen’a kon hinam patep masauvin; ajeh chu vannoi leiset chunga Themgao lhem tampi asohdoh tai. 2 Pathen Lhagao chu hichea hi nahet diu ahi. Jesu Christa tahsaphe pua ahungna phongdoh Lhagao tapou chu Pathen’a kon ahin, 3 hitia Jesu phong doh lou lhagao jouse chu Pathena kon ahipoi, hiche tah chu Christa doupa, ahung ding najahsau chu ahin, tutah a jong hi vangnoiya um-ah ahitai. 4 Chate, nang ho Pathen’a kon nahiuvin, hiche ho chu nanang joutauve; ijeh-inem itile nasunguva umpa chu vannoiya umpa sangin achungnungjoi. 5 Amaho hi vannoi ya kon ahiuvin, hijeh achu vannoi thudol jeng aseiyule, vannoi athua nung ahi. 6 Eiho vang Pathen’a kon aihiuvin, Pathen hepan ithuu angaiye, Pathen helouvan vang ithuu angaipoi. Hichea hi eihon Lhagao tah le lhagao lhem ihetdoh-u ahi.

Pathen chu ngailut

7 Deitahte, eiho khat le khat ki-ngailu hite, ajeh chu ngailut hi Pathen’a kon ahi; hijeh chun ngailut neiya chu Pathen’a kona peng ahin, Pathen ahei. 8 Ngailut neilouvin Pathen ahepoi, ajeh chu Pathen hi ngailut ahi. 9 Chapa jal’a eihon hinna inei theina diuva Pathenin Achapa chang khatseh vannoiya ahinsol, hichea hi eiho sunga Pathen ngailutnachu kiphongdoh ahitai. 10 Hichea hi ngailut um ahi, eihon Pathen ingailut’u ahipon, amajoh-in eingailut’uva, eiho chonset thoina dinga Achapa ahinsol ahibouve. 11 Deitahte, Pathenin eiho chutia eingailut’u le eiho jong khat le khat iki-ngailut diu dol ahi. 12 Koiman imatih-in Pathen amukhapoi, eiho khat le khat iki-ngailut’u le Pathen eiho sunga uma chule amingailut chu eiho sunga chamkimsohji ahi. 13 Pathenin eipeh-u ama Lhagao jal hin eiho ama sunga i-um’uva chule ama eiho sunga aum iheuve. 14 Pan Chapa vannoi huhhing dinga ahinsol hi keihon kamu’uva kahet tohsah-u ahi. 15 Koi hile Jesu chu Pathen Chapa ahi phongdoh chan asunga Pathen um ahin, ama Pathen sunga um ahi. 16 Chule Pathenin eiho sunga ngailutna anei hi eihon iheuvin itahsan’uve. Pathen chu ngailut ahin, ngailut sunga um michu Pathen sunga um ahin, chule ama sunga Pathen um’a ahi. 17 Thupi tan nikhoa lungngamna inei theina diuva hichea hi eiho chunga ngailutna kisuchamkim ahi; ajeh chu hiche vannoiya hi eiho jong ama tobanga um ihiuve. 18 Ngailut sunga kichat aumpoi, ngailut chamkim chun kichat anodohji; kichat hin talen mat ding aneijeh ahin hijeh chun kichajing mi chu ngailut sunga achamkim theipoi. 19 Aman eingailut masah jeh a eihon ingailut’u ahibouve. 20 Khattouvin,” Pathen ka-ngailui,” ti hen, asopi hotbol le, mijou ahi. Ijeh-inem itile amusa asopibon angailut loule, amulou Pathen chu angailut thei lou ding ahi. 21 Koi hijongle Pathen ngailu chun asopi angailut tei ding thupeh Christaa kona ineiyu ahi.

1 John 5

Vannoi jousoh tahsan

1 Koi hileh Jesu hi Christa ahidol tahsan jouse chu Pathen’a kona peng ahi; chule koi hile ahingpa ngailua chun ahinsa acha jong angailui. 2 Eihon Pathen ingailutuva, athupeh chengse init’ule hichea hin Pathen chate ingailut’u iheuve. 3 Ijeh-inem itile athupeh chengse init’u hiche laitah chu Pathen ngailutna ahi, chule athupeh ho chu pohgih hahsa jong ahipoi. 4 Ajeh chu Pathena kona peng jousen vannoi hi anan jou ahitan, hiche vannoi nang joupen tah chu itahsan’u hi ahiye. 5 Jesu chu Pathen Chapa ahina tahsan mi chun vannoi ajo ahitai.

Pathen Chapa thudol hettohsah

6 Twisih le thisan jal’a hungpa chu Jesu Christa ahi, twisih keoseh hilouvin, twisih le thisan jal ahi. Hiche hettosah chu Lhagao ahi, ajeh chu Lhagao hi thutah ahi. 7 Ijeh-inem itile hettohsah thum aumin, 8 Lhagao le twisih chule thisan ahi, hicheng thum hi khat’a longkhom ahi. 9 Eihon mihem hettohsah bon isan’u le Pathena hettohsahna chu achungnungjoi, ajeh chu aman Achapa thudol ahettohsah ahi. 10 Pathen Chapa tahsan chun asunga hettohsahna anei ahin, Pathen tahsan lou vang chun Pathen ajousah ahi; ajeh chu Pathenin Achapa thudol ahettohsah, hiche hettohsahna chu aman atahsan tapoi. 11 Hiche hetohsahna chu Achapa sunga um hinna, hiche tonsot hinna, Pathenin eipeh-u hi ahi. 12 Koihile Chapa neiyan hinna aneitan, Pathen Chapa neilou chun hinna aneipoi.

Tonsot hinna hetna

13 Nang ho Pathen min’a tahsan chengsen tonsot hinna naneiyu nahetna diuva hicheng hi kahinsut ahi. 14 Eihon ipi hijongle ama lungdei lama ithum chan’u aman eingai peh jeh-uva, hiche hi eihon ama koma lung ngamna ineiyu ahi. 15 Ipi hijongle ithum chan’u eingaipeh ihet jeh-uvin, ipi tobang hileh akithum chan chu amaa kona ineisan ihetauve. 16 Khattouvin asopi chu thi lo hel theina chonset ahilou vanga chonset bol amu le taopeh hen lang hinso hen; thi lo hel theina hilouva chonse chubou kisei ahi. Thi lotheina hel’a chonset aumin, hitobang dia chu tao dinga kasei ahipoi. 17 Adih lou jouse chu chonset ahin, ahinla thi lo theina hel lou chonset jong aum’e. 18 Koi hile Pathena kona penga chu achonse jom jing poi, Pathena kona peng chun ama angah jingin, hijeh chun agiloupan atongkhapoi. 19 Eiho Pathena kona ihiuva, vannoi pumpi agiloupa noiya aum iheuve. 20 Pathen Chapa thutah ihet theina diuva thil hetkhen themna lungthim eihungpeh-u chu iheuve; eiho thutah, Achapa Jesu Christa sunga chu um ihiuve. Ama chu Pathen tahbeh le tonsot hinna ahi. 21 Chate doilim semthu hou lah a kihong phauvin.

2 John 1

Salam

1 Upa keiman lhentum Numei lalnu chule achate changse, thutah a ka-ngailut, kei chang hilouva, thutah heho jousen jong angailut ho heng, 2 eiho sunga um jing, tonsot geiya eiumpi jing diu thutah jal’in: 3 Pa, Pathen le Pa Chapa Jesu Christa konin thutah le ngailut jal’a lungsetna le hepina, chamnan eiumpi jing diu ahi.

Thutah le ngailut

4 Nachate konkhatse Paa kona ikisan’u thupeh dungjuiya chon kamun, kakipah lheh jengin ahi. 5 Chule tua hi hung tao kahi-lalnu, nahenga thupeh thah jong hinsun louva, khat le khat iki-ngailutto chehna diuva, semtil’a pat ineisau chu ahibouve. 6 Athupeh chengse dungjuiya ichon theiyu le hichu ngailut ahi. Semtil’a pat thu um najahsau bangin chonleu chun, hichu ngailut ahi. 7 Ajeh chu vannoiya hin doha mi-lhem lha tampi asohdohtai, amaho hin Jesu Christa tahsanphea ahung hi aphongdoh nompouve; doha mi lhemlha, Christa douva chu ama hi ahi. 8 Natohsa chu na-ngah louva tohga lhingset’a nasan na diuvin, nang ho ching theiyun, kivephauin. 9 Koi hile Christa thuhil’a um louva, akalval’a chon’a chun Pathen aneipoi. Thuhil’a um jing vang chun Pa le Chapa anei kop ahitai. 10 Koi hile hiche thuhil keng louva nahenguva hunga chu san dauvin, na-in’uva lhunsah hih-uvin, kam phan jong hou dauvin. 11 Ijeh-inem itile ama kamphaa houva chun ama toh gitlou jouse jong achankhompi ahitai.

Salam chaina

12 Nahenguva hinsut ding tampi kanei vangin, lekhapheng le lekhatwi maiya sut kanompoi, nakipa nau achamkimsohna dinga nahengu hungphah a kimaitoa kamchenga ikihoulim diu kakinem’e. 13 Lhentum nasopi nu chaten nasalam’uve.

3 John 1

Salam

1 Upa keiman thutah beh a kangailut, kadeitah Gaius henga: 2 Ngaitah, nahinkhoa phatthei nachan banga, ima lam jousea naphat theiya, nadam jingna din kataopeh jie. 3 Sopite phabep ahung uva nangma thutah a nachon hetsahjing banga, nathutah dol eihung hetsah-u iti kakipa hitam! 4 Kachate thutah a achon kajah a kakipa sanga chungnungjo kipana kaneipoi.

Gaius Pachat chan

5 Ngaitah, hetphah lou maljin hung hijongleu, sopite nabolna, natohna chu nakitah lheh jenge: 6 amahon jong ngailut nanei chu Houbung angsunga ahettohsah-uvin, Pathen deidol bangin amaho hi ajin nauva anathahson le chun pha lheh inte. 7 Ijeh-inem itile Christa min khohsah jal’a hungpot jeng ahiuvin, chidang namdangtea konin imacha akilah pouve. 8 Thutah a atohnau hi ikithopi theina diuva hite ho tobang hi ilem diu thil khoh tah ahi.

Diotrephes le Demetrius

9 Houbung henga thu them khat kahinsun’in, ahinla alamkaiyuva pang nom Diotrephes chun ei nahsah pouve. 10 Hijeh a chu kahung le athilbol, achonna, eiseiset nauva thu gilou asei jouseu kasosal ding ahi; hicheng abol jong hi achim hih laiyin, sopite chu alhunsah dan lhunsah dia go ho geijin aja da nalaiyin, amaho chu Houbunga konin anodoh jenge.

Demetrius phatseina

11 Ngaitah, ase jom louvin, apha chubou jomin. Thilpha bol’a chu Pathena kon ahin, thilse bol’an vang Pathen amu loulai ahi. 12 Demetrius chu mi jousen aseiphan, thutah-in jong aseiphai; chule keihon jong ama kaseiphauvin, kahettohsah nau thutah ahidol nangin nahenai.

Salam Chaina

13 Nahenga hinsut ding tampi kanei vangin, lekhatwi le lekhamol maiya sut ding kadeipoi. 14 Nangma muloi ding kakinemin, chutengle kimaiton kamchengin kihou nau hi te. 15 Nachunga cham leng hen. Goldei jousen nasalam’ui. Goldeite chu amin cheh-in panin salamin.

Jude 1

Salam

1 Jacob naopa, Jesu Christa soh natong Jude chun, Pa Pathen ngailu jouse le Jesu Christa dinga kikouva kikheh khol ho henga; 2 Hepina le chamna chule ngailutna nachunguva hapunin pung hen.

Mihil lhemho chunga thutanna

3 Deitahte, nahenguva ineikhom cheh-u huhhingna thudol lekha hinsut kagot pettah-in khatvei mi thengte kipedohsa, tahsan thua napot tho diu deina tilkhouna joh a, hinsut ding khoh kasajotai. 4 Ijeh-inem itile eiho lah a hin hitobang thudol’a achung thu tan’a themmo chang dinga koisa Pathen helou mi phabep guh thimin ahung lut’uvin, amaho hin Pathenin eipeh-u lungsetna chu huhna lamin aheidoh-un, chule ipipu le i-Pakaiyu Jesu geiyin aseilep tauve. 5 Khatvei chu nahetsau hitajongle, Pakaiyin mipi chu Egypt’a kona ahuhdoh a, anichan naa atahsan lou jeh-uva asuh mang hel thudol hi nang ho kageldohsah kitnom nahiuve. 6 Atha neinau panmun tuh det louva, apanmun dalhaa Vantilte jeng jong aman, ni loupi chungnung ni le athuu tan dinga tonsot thihkhaova ahen’a, muthim lah a akoi ahi. 7 Hitobanga chu Sodom le Gomorrah chule akimvel dunga khopi ho, alam loutah a huh le jonthanhoi lam a kipeuva, japi hilchahna dinga tonsot meikouva kihalvam’a achung thuu kitan talen kimatsah chu geldohuvin. 8 Hitobang hin hite hon mudih lou anei jeh-un tahsa asuboh-un, Pathen thunei vaipohna asan dauvin, loupina chengse ataitom jiuve. 9 Vantil pipu Michael jengin bon Mose long chung thua Diabol to akinel chun taitoma houset ding, chule achung thu tan ding angam pon, “Pakaiyin nahouse hen,” atijoi. 10 Amaho hin ahettoh lou ataitom jiu ahin, gancha ho banga atichunguva hetna ho hin amaho asuhmang gamjoh ahitai. 11 Achung’u thu akhoh-e! Amaho Cain lampi kijot’a tohman duchatnaa Balaam lampia cheuva, Korah-in doumah abolnaa chu mangthah gam ahitauve. 12 Amaho hi kidei golvah nabolnauva nolna um ahiuvin, kiphalam louhel hel’in akideitouvin, amaho le amaho akive tup’un, twi kotlou meilhang huiyin alhoh lonle, chavang laiya thingga bei, nivei thia ajung geiya kibotdoh tobang ahiuve. 13 Twikhanglen twi kinongsuh kinong tou tobang, achonthang nau twiphon banga hung phondoh bep ahiuvin, muthim lhangkhal kiheh leiloi kikoipeh, ahsi vah thai ho tobang ahiuve. 14 Adam’a pat khang sagi lhinna, Enoch chun hite ho chung chang thudol’a hi gaothu anaseiyin, “Ven Pakai chu amitheng asang sang to hunga, 15 Mitin chunga thutanna abol ding, chule Pathen helouten a-Pathen hetlou jeh-uva athilbol anatoh chengseu le Pathen hephalou chonseten ama douna thuse asei jouseu themmo ahinchan ding ahi,” ati. 16 Amaho hi phunchel le seiset hat, alunggul lam cheh a kihei, akamsunguva ham, hoitho seival val sei, phatchom ding deina mi maiya kamthem le ahiuve.

Gihsalna le tilkhouna

17 Deitahte, nang hon vang tu masanga i-Pakaiyu Jesu Christa solchahten aseisau thu ho chu geldoh jing jengun; 18 ajeh chu amahon naseipeh-un, “phat nu nung lam le Pathen ngaisah lou, alunggul lam jenga chon, mi jontai hatte hung sohdoh diu ahi,” atiuve. 19 Amaho hi loitum sem ho, tahsa hing mai, Lhagao nei lou ahiuve. 20 Deitahte, nang ho vang natahsan’u thengtah chunga chun kisadoh-un lang, Lhagao Thengin tao jingun; 21 Pathen mi-ngailutnaa kihong jinguvin, i-Pakaiyu Jesu Christa hepina jal’a napeh diu tonsot hinna chu kat jinguvin. 22 Kihol lel lung opkaina neiho chu hepiuvin. 23 Abang bang jong meikouva konin loidoh loiyun, huhhinguvin, abang jong kiphalam khen’a nahepi diu ahi; tahsaphe nen be-na ponsil nihchen geiyin theuvin.

Tao khum khana

24 Nakipal lhuh louna diuva nahongbit theiyu, aloupina masanga nolnabei le kipah thanom tah a napuilut theipau, 25 I-Pakaiyu Jesu Christa jal’in, loupina le chungnun na thahat le thuneina jouse, phat um masang le tun, chule tonsot geiyin jong eihuhhingpau Pathen khatseh, amaa hijing jeng hen: Amen.

Henga Thuphon 1

Thu makai le salam

1 Thil hung sohvah ding ho, asohte hetsah dinga Pathenin Jesu Christa apeh a, a-Vantil asol’a asoh John henga ahetsah, Jesu Christa Thuphondoh chu, 2 Johnin amu chengse le Jesu Christa hettohsah thudol to Pathen Thu ahettohsah-e. 3 Hiche Themgao thuseidoh chengse hataha simphonga le ajahho chengse, asunga kisun nit ho chu anun nom’ui; ijeh-inem itile phat ahung naiye. 4 Johnin Asia gamsunga Houbung sagi henga; Lungsetna le cham nan unpiuvin, aum jing, asumsa chule ahung um dingpaa kon, alaltouna maiya lhagao sagi hoa kon, 5 hettohsah tahsan umpen, thinaa kona peng masapen, leiset leng jouse chunga vaihompaa konin. Eingailu’uva athisan jal’a ichonsetna jouseuva kona eisut lham’uva, 6 lenggam khat’a eisem doh-uva a-Pa Pathen kintheng bol dia Thempua eisemdoh pau, Ama chu loupina le vaihomna tonsot tonsot geiyin chang jing hen: Amen. 7 Ven, meilhang lah a ahunge, Mit jousen Ama amusoh keidiu; Ama teng’a sun ho geiyin jong amu diu, Ama jeh a leiset’a phungtin le namtinin Adip alai akidop diu ahi; hihen Amen. 8 Aum jing, aumsa, ahung um ding Hatchungnung Pakai Pahtenin, “Keima Alpha le Omega kahi,” ati.

Johnin Christa amu

9 Keima Jesu jal’a gim hesoh thotna le lenggam jeh le bolsetna jal’a nathoh khompiu, nasopiu John kahin, Jesu hettohsahna jal le Pathen thu jal’a Patmmos kisah twikol’a hi eikikoiya ahi. 10 Pakai nikho nin keima Lhagavin kana umtan, chuin kanung lama konin sumkon gin tobang ogin sangtah khat kajai; 11 hichun, “Nathilmu chu lekhabua sunin lang, Houbung sagi- Ephesus le Smyrna, Pergamum le Thyatira, Sardis le Philadelphia chule Laodicea henga thot’in” eiti. 12 Keijong kahenga thusei ogin chu vedin kakiheiyin, hitia kakiheinaa chun sana thaomei khom sagi kamui; 13 chule khomho lah a chun Mihem Chapa tobang khat, aponsil khophang te nia lenglhaa, a-opkonga sana khaopeh kivei, 14 aluchang le asam kelngaoi mul ban’a bang buhbang tobang, amit te ni meikong tobang hiya 15 akengto te ni chu, meilhum sunga kisoujolsa, sum-eng kinotval tobang ahin, chule a-ogin chu twi tamtah gin tobang ahi. 16 Akhut jet lama ahsi sagi achoiyin, akamsunga kon in hemto chamjam hemtah ahungdoh-in, chule amaivah chu sunlai nisa sat-ham pettah tobang ahi. 17 Ama kamu phat hin akhophang te ni bul’a kalhun, athi tobang in ka-umtai. Hichun aman akhut jet lamin eithamin, “Kicha hih-in, Keima akipatna le akichaina, 18 ahing jingpa, kanathin, ahinla ven, Keima tonsot tonsot’a dingin ka hing jinge; thina le thikhol khul kot-heh kaneiye. 19 Hijeh chun nathilmu chengse, aum ho hi le tu nung teng hung um ding ho hi sunin. 20 Kakhut jet lama ahsi sagi namu ho hi le sana thaomei khom sagi ho thuguh chu; ahsi sagi chu Houbung sagi sole ho ahiuvin, sana thaomei khomsagi chu Houbung sagi chu ahi.

Henga Thuphon 2

Ephesus Houbung henga thu thot

1 “Ephesus Houbung solle henga chun hitin sunin: ‘Akhut jet lama ahsi sagi choiya, sana thaomei khom sagi lah a vah le chun hitin aseiye, 2 “Keiman nanatohjouse le thohgim thohda nathoh jouse kahei; solchah la hilouva solchah kihisah ho jong napatep’in, ajou nau namandoh-in, hiti hin migilou ho chu nathoh nom hih hel’e. 3 Nangman thoh hahsa chu Keim amin jal’in nathoh thoh jengin nalha dah deh sampoi. 4 Ahnla amasa na-ngailutna chu nalha tahjeh-in nachunga demna kaneiye. 5 Hijeh chun hoikoma kisep lhu nahim, geldoh-in, chule lung heiyin lang, natoh masah chengse chu tong kit’in; chutia lung nahei loule nahenga hung ing ting nathaomei khom chu akitunnaa kona kachon mang ding ahi. 6 Hijongle Nicolai mi ho natoh keiman kathet ho chu, nangin jong nathen, phatna hiche vang hi naneiye. 7 Angaina ding na neiyan Houbung ho henga Lhagao thusei hi ngai hen. Galjouva chu Pathen honsunga keh hinthing ga chu neh dia kapeh ding ahi.

Smyrna Houbung thu thot

8 “Smyrna Houbung solle henga chun hitin sunin: ‘Akipatna le akichaina, thia hingkit chun hitin aseiye: 9 “Keiman nathohgim hesoh navaichat kahenai, ahinla nahaove; Juda midan a kiseiyuva hila hi-ngal lou, Satan kikhopna hungkon hon taitomna aneiyujong kahei. 10 Nahin thot gimna ding ho hi kicha hih hel’in. Ven, nang ho patepna dinga nalahuva abang bang Diabol’in songkul’a ahinkhum ding, ahivang nisom bou nathothgim diu ahi. Thina geiyin thot-in tahsanin, Keiman hinna lallukhuh kapeh ding nahi. 11 Angaina ding na neiyan Houbung ho henga Lhagao thusei hi ngai hen. Galjouva chu thi ni nan asuh nat louding ahi.

Pergamum Houbung thu thot

12 “Pergamum Houbung solle henga chun thitin sunin: ‘Hemto chemjam hemtah neipan hitin aseiye: 13 “Keiman nachenna mun, Satan laltouna chu kahei; Kei dinga tahsan um, kadinga hettohsah pha Antipas atha laiyu nikhon jong Keiya um tahsan nadalha pon, kamin natuh det jinge; Antipas chu Satan chenna mun, nang ho lah a athau ah. 14 Ahivang in na chunga demna phabep kanei ye, ajeh chuIsreael chate masanga kipal lhuhna ding koiya, doilim semthu houna sa nehsah a, chule jonthanhoi patsah dinga go Balak hilchah a Balaam thuhil choiya mi phabep naneiye. 15 Hitobang hin nangin jong Nicolai mi ho thuhilchoiya mi phabep naneiye. 16 Hijeh chun lung heiyin, achutiloule nahenga kahungvah jel’a kakamsung chemjam them’a amaho chu kasat gam diu ahi. 17 Angaina ding na thuseina neiyan Houbung hohenga Lhagao thusei hi ngai hen. Galjouva chu selguh manna kapeh ding, chule che songval chunga chu minthan khat kijih ahi, akisanpa tilou koima ding in asimthei lou hel ding ahi.

Thyatira Houbunga thu thot

18 “Thyatira Houbung solle henga chun hitin sunin: ‘Amit te ni meikou pah lah lah tobang, akengto te ni sum-eng kinotval tobang Pathen Chapan hitin aseiye, “Keiman natoh josue le na ngailut je, natahsan le nalhacha natoh, chujongle nathot hatje, natohna jouse amasa natohsanga aphatjoh kahenai. 20 Ahinla nachunga cemna kaneiye, ajeh chu Jezebel kithemgaosah nu chu nacham lhan, aman kasohte jonthanho lam ahil’in, doilim semthu houna sa nehsahdin ajol lhai. 21 Ken amanu chu along heina ding phat kapen, hila aman ajon thanhoinaa konin lung aheidehpoi, 22 Ven, keiman amanu hi jalkhun chng se na kanei ding, hiche jonthanghoi thilbol josue a kona lung ahie louvu le ajonpi chenrsen jong thoh gentei chungnung athoh diu ahi. 23 Thina kaman a achate jouse kathagam ding, chuteng le Houbung jousen lung ngaito chengse le lungthim josue hethei kahi ahet diu, chujong le anatoh dung jui cheh-uva amitakip kalethuh ding nahiuve. 24 Ahila Thyatira a um amoh cheng, hiche thuhil jop lou, Satan thugil kiti helou chengse nachunguva pohgih dang koibe peh pouvinge. 25 Ahin nanei sun’u chu kahung kahsen tuhdet jingun. 26 Chule galjouva, kanatoh ho achaina geiya nit jing chu namtin vaipi chunga thu neina kapeh ding, 27 aman amaho chu kelngaoi chin bang thih tenggol’a achin’a, leibel kivochip banga abol ding, 28 Keman ka-Paa kona kalah thu neina jal’a am chu Jingvalpa kapeh ding ahi. 29 Angaina ding na neiyan Houbung ho henga Lhagao thusei hi ngaihen.

Henga Thuphon 3

Sardis Houbung thu thot

1 “Sardis Houbung solle henga hitin sunin: ‘Pathen Lhagao sagi le ahsi sagi neipan hitin aseiye, “Keiman nanatoh josue kahen, amin’a hinga nahin, athisa nahibouve. 2 Khangin lang hah jing jengin, amoh cheng, athikon ho dindetsah-in; ajeh chu ka-Pathen mitmua nanatoh ho achamkimsoh kamudoh poi. 3 Hichejeh chun atil’a itobanga nakisan’a, iti najah-em geldoh jingin, nit phan, lung heiyin. Hijeh a chu nahajing loule gucha banga kahung ding, itih phat le naheng kahinsuh ding nahet lou ding ahi. 4 Amvang aponsil’u kisuh nen lou mi phabep Sardis a aum’un, amaho hi ponbang vamleh sil’a Keito kilhon le ding ahiuve, ajeh chu amaho chutidia limtah ahiuve. 5 Galjouva chu amaho kivonna ponbang vamleh a kivon ding, chule hinna lekhabua kona Keiman amin kathai mang louding, ka-Pa angsung le a-Vantilte angsunga ama min chu kasei doh ding ahi. 6 Angaina ding na neiyan Houbung ho henga Lhagao thusei hi ngai hen.

Philadelphia Houbung thu thot

7 “Philadelphia Houbung solle henga thitin sunin: ‘Atheng le atahbeh, David kanglongheh neiya, aman ahon le koiman khah thei lou, aman akha le koiman hong thei lou, ama chun hitin aseiye. 8 “Keiman nanatoh jouse kahenai, ven, koman akha thei lou na-angasunga kot honsan kakoiye; tha them khat vang naneiyin, kathu nanit’in, kamin nasei leppoi. 9 Ven, Satan kikhpna pang ho phabep, acham cham’a Juda mi kihisah a, hila hilouhel, jousei ho chu kapehdoh ahin, ven keiman nang ka-ngailut hi ahetdoh theina diuva, na-anga sung, nakhophang bul’a boh khup’a chibai kahung bohsah ding ahiuve. 10 Nangin thoh hat dinga kasei nanit jeh a vannoi leiset pumpi chunga patepna ahung lhun’a, leiset chung cheng jouse akipatep phat teng le ken jong nang kahuhdoh ding nahi. 11 Kahungvah jet ding ahi, nalal lukhuh koman nalahpeh louna din nanei sun tuuhdet jingin. 12 Galjouva chu keiman ka-Pathen Houin khom’a kasem ding, hikoma kona chu potdoh louhel ding ahitan, achunga ka-Pathen min le ka-Pathen khopi Jerusalem thah, van’a ka-Pathen koma kona hung kitol lha, min kasut ding ahi. 13 Angaina ding na neiyan Houbung ho henga Lhagao thusei hi ngaihen.

Laodicea Houbung thu thot

14 “Laodicea Houbung solle henga chun hitin sunin: ‘Amen, Hettohsahpa, Tahsan um, Atahbeh, Pathen thilsem jouse Bulpi chun hitin thu aseiye. 15 “Keiman nanatoh jouse kahen, vot la navot pon, sa la nasapoi. Navot le votngal’in lang, nasat le san gal le chun pha kasai. 16 Hitia hi lumheo bep nahiya, sa la san gal lou, vot la votngal lou nahijeh hin kakamsunga kona kakhondoh ding kon nahitai. 17 Ijeh-inem itil nangin, ‘Kahaove, sum kaneiye, imacha ngaichat kaneipoi,’ natin; nang tah chu adapen le khoto umpen, vaichatah le micho chu le sagohkeio nahilam nakihet poi. 18 Nahaona dia kakoma, kilha thengsel sana kichoh ding le, nakisil’a najamo kimudoh lou na dia nakhu jol ding pon bangle kichoh a, kho namu theina dia mitlou kichoh dinga kathu mop nahi. 19 Keiman kalungset chan kaphosal’a kaoblgimji ahi, hijeh chun tompan in lang lung heiyin. 20 Ven, kotkha bul’a ka dingin kakiu jinge, khattouvin ka-ogin ajah a kot eiho leh, ahenga kahung sung lhah a ama chu an kaneh khompia, aman jong eineh khompi ding ahi. 21 Galjouva chu ken jong kajoa ka-Pa to alaltouna katoukhom banga hi keito kalaltouna toukhomna thei thu kapeh ding ahi. 22 Angaina ding na neiyan Houbung ho henga Lhagao thusei hi ngai hen!” tin aseiye” ati.

Henga Thuphon 4

Van’a Pathen houdol

1 Hicheng jou hin vetan, van’a kot khat honsa um kamun, chule kajah masat pen ogin chu sumkon gin tobang ahin, kahenga thu aseiyin, “Hilama hung kaltouvin, hicheng nunga soh tei ding thil ho chu kavetsah ding nahi,” eiti. 2 Apettah chun Lhagaovin kaumtan, hichun ven, van’a laltouna khat akidon, laltouna chunga chun koiham khat atouve; 3 atoupa chu jasper song le sardis song bangin alange, chule laltouna kimvel’a chun lhagui aumin, emerald song tobangin akimui. 4 Laltouna kimvel’a chun laltouna som ni le li akidon, laltouna ho chunga chun ponbang jeng kisil’a alua sana lal lukhuh jeng kikhuh, upa som ni le li atouvui. 5 Laltouna a kon chun kolphe avah lap lap’in, o-agingin, van akithinge; laltouna maiya chun mei kou jing jeng thaomei sagi aumin, hiche ho chu Pathen Lhagao sagi ho ahiuve. 6 Lalouna maiya chun Crystal song tobang, phatvet banga kimu, Twikhanglen aumin, chule laltouna lailung le akimvel’a chun, anung le amaa amit jeng amit jeng dimset ganhing li aum’ui. 7 Ganhing masapen chu Phaisammeigeo tobang ahin, ganhing ni na chu Bongnou tobang ahin, ganhing thumna chun mihem mai tobang aneiyhin, gang hing li lhinna chu Muvanlai lengpet tobang ahi. 8 Ganhing li ho chun lhaving gup cheh aneiyun, akimvel le anung lam amite jeng ahiuve; chule sun le janin choldo louhel’in la asauvin: “Atheng, Atheng, Atheng, Pakai Pathen Hatchungnung ahin, Aumsa le aum jing chule ahung um ding,” atiuve. 9 Hiche ganhing li ho chun tonsot’a hing jing jeng, Laltouna kitousah Pa chu achoi-at’a, ajabol’uva chule athangvah tengu le, 10 upa som ni le li jong chu laltouna kitousah Pa angsunga chu lhujiuva, tonsot’a hing jing jeng Pa chu chibai abohuva, laltouna maiya chu alal lukhuh-u aselhah-uva, hitia asei yuva: 11 “Ka-Pakaiyu le ka-Pathenu, Nangma bou loupina le jabolna chule tha neina changa lomtah nahi; Ajeh chu nangin thil ijakai nasemin, Nangma deiya kisem doh a um ahiuve,” Atiuvin ahi.

Henga Thuphon 5

Lekhajol le Kelngoinou

1 Laltouna Toupa khut jetlama chun, asung lam apolam, alangtoa kisun, mohor sagi jen jinamkhum, lekhajol khat kamui. 2 Chuin Vantil hattah ogin sang tah a samphong lea, “Hiche lekhajol mohorkinam ho sut lhaa lham jou dinga lom chu koipen ham?” ti khat kamui. 3 Ahinla van’a hihen leiset’a hijongle, leiset noi geiyin lekhabu chu ahongdoh theiya le avetheiya aumtapoi. 4 Hichun lekhabu phong doh thei le avetheiya akimudoh lou phat’in hakan kakaptai. 5 Hichea chun upaho lah akhat’in kajah a, “Kap hih-in, ven, Juda phunga phaisameigeo, David Jung chu hiche lekhabu phongdoh ding le amaohor sagi chu lhamla didnga galjousa ahitai,’ eiti. 6 Hichun ganhing li ho le upahon aumkimve’u laltouna lailunga chun Kelngoinou kithatsa lheh lheh khat ding kamun, ki le mit sagi gi aneiye; chule hiche ho chu leiset chun gpumpia hung kisol lha Pathen Lhagao sagi ho ahiuve. 7 Ama chu ahingin laltouna Toupa khut jetlama konin lekhajol chu alai. 8 Alah phat’in ganhing li ho le upa som ni le li chu kelngoinou angsunga chun abohkhup cheh-uvin amaho khat cheh-in akhut’uva selangdah khat le sana sumlheng dung’ah, mithengte taona chu, gimnamtui bangin akichoi cheh-ui. 9 Amaho hin lathah khat asauvin: “Lekhabu kilah ding le Mohor ho lhamlha hong din nangbou nakilom’e; Ajeh chu nangma kithatsa nahin, Nathisan’a phungtin le paotin tanga kon Mitin mitanga kona Pathen mi hi dinga nachohdohsa ahitan, 10 Nangin amaho chu i-Pathenu dia Thempu Lenggam’a nasemdoh ahitan, Hijeh a chu leiset chunga lengvai aph diu ahi,” atiuve. 11 Hichun kagah vet leh laltouna le ganhing ho chule upaho kemvel’a ding, Vantil tampi ogin kajan, amaho chu ajat sangsom jet tamtah sang jat alhinguve. 12 Amaho hin ogin sangtah-in aseiyun: “Akithatsa Kelngoinou chu Boltheina tha, haona, thahat, Jabolna, loupina chule Vahchoina kisan dinga lomtah ahi,” atiuve. 13 Chuin van, leiset chung, leiset noiya, Twikhanglen sunga, thilsem kiti jousen aseiyu kajah chu: “Laltouna chung Toupa le Kelngoinou, Tonsot tonsot geiyin vahchoina le choi-atna, Lopina le thunei vaipohna chang jing hen,” kiti ahi. 14 Hitah chun ganhing li hon, “Amen,” atiuvin, upa chengsen jong abohkhup’un chibai abohtauve.

Henga Thuphon 6

Mohor ho

1 Keima Kelngoinou chun mohor sagi ho lah a khat alhap lhah a ahondoh kamun, chule ganhing li lah a khat’in ogin sangtah a asap’a, “Hungin,” ati kajai. 2 Hijeh chun vetemin, sakol kang khat kamun, achunga toupan gophel khat achoiyin, ama chu lallukhuh khat apeuvin, galjouva jousoh peh din akondohtai. 3 Mohor ni na alhap’a ahondoh phat’in ganhing ni nan, “Hungin,” ati kajan ahi. 4 Hichun sakol chom, asan khat ahungdoh-in, achunga toupa chun leiset chung chamna alah manga, mihem khat le khat kithatona thu aneina akipen, chemjam lentah khat jong apeuve. 5 Mohor thumna alhap’a ahondoh paht’in, ganhing thum lhin nan, “Hungin,” ati kajai. Hichun vetemin, sakolvom khat kamun, achunga toupan thil tena khat achoiye. 6 Hichun ganhing li ho lah a kona hung ging tobanga kajah ogin khat chun, “Suhlou chang khai khat’in denarii khat amanin, sakolchang khai thumin denarii khat aman’e; hijongle thao le lengpitwi chu suboh hih-in,” ati. 7 Mohor li na alhap’a ahondoh phat’in ganhing li lhin nan, “Hungin” ati kajai. 8 Hichun vetemin, sakol engdang khat kamun, achunga toupa min chu “Thina” ahin, chule thikhol khul’in anung ahinjuipeh-e. Chemjam le gilkel, gamna hise chule leiset gamsaho mangchaa, leiset hop lia hop khat thatgam dinga thahat kipe ahiuve. 9 Mohor nga lhin na alhap’a ahondoh phat’in, maicham phung noiya chun Pathen thujeh le nettoh sahna jal’a kithatsa lhagao ho kamui. 10 Amaho chun going tah-in asamun, “Vo pipu, Atheng le kitah, leiset chung chengte chunga keiho phulaa thutan louva itih chan um ding nahim?” atiuve. 11 Amaho khat cheh chu poncho bangle apeuvin, asohchanpi chengseu le adopiteu, upaho kitha banga kithat ding ho akimsoh kahsea chom khat kho-ngai dingin akiseipeh tauve. 12 Mohor gupna chu alhap’a ahondoh phat’in ling nasatah kihot kamun, nichang khaodippon vom bangin avomtan lhachang pumpi jong thisan bangin asan jenge; 13 van’a ahsite chu huipi hattah-in theichang phung amut’a, apul lhah bangin tol’a apul lhatai. 14 Chule-van chu lekhajol kijel mang bangin amanghel tan, mol le lhang jose, twikol gam jouse pumin aumna mun cheh a koninakichon mangtauve. 15 Hichun leiset leng jouse le milen milalte, sepai lamkai pipu ho, mihao hole thahat ho, soh jouse le chamlhat ho geiyin songko dung le mol dunga songpiho khi kah dunga akiseltauve. 16 Amaho hin mol le lhang chule songpiho jah a, “Nei opkhum” un lang, laltouna Toupa maikoh le Kelngoinou lungsatnaa konin neisel mangun; 17 ajeh chu alungham nau nikho nasatah ahung lhungtan, hichea pang jou dding koi ham?” atiuve.

Henga Thuphon 7

Israel mi 144, 000 mohor kinam khum

1 Hiche nung hin leiset chung le Twikhanglen chunga chule thingphung khat cha chunga jong huianun louhelna dinga, leiset ning lia kon huipi tuh tang din, leiset ning lia Vantil li adin kamui. 2 Chuin Pathen hing jing mohor choiya, niso lama hung kaltou Vantil chom khat kamun, ama chun going tahin asamin, leiset le Twikhanglen suhsetna dinga thu kipe Vantil li ho jah a chun, 3 “Keihon i-Pathenu sohte chalpanga melchihna mohor kanamsoh kahseuvin leiset le Twikhanglen chule thingphung ho hi suse hih-un,” ati. 4 Chuin mohor kinamsa mijat kajah le, Israel phungtin’a kona mohor kinamsa chengse chu sang jakhat le sangsom li le sang li alhing’e. 5 Judah phunga kona mohor kinamsa sangsom le sang ni, Reuben phunga kona sangsom le sangni, Gad phunga kona sangsom le sang ni, 6 Asher phunga kona sangsom le sang ni, Naphtali phunga kona sangsom le sang ni, Manasseh phunga kona sangsom le sang ni, 7 Simeon phunga kona sangsom le sang ni, Issachar phunga kona sangsom le sang ni, 8 Zebulun phunga kona sangsom le sang ni, Joseph phunga kona sangsom le sang ni, Benjamin phunga kona sang som le sang ni.

Namtin Vaipia kon Japi kikhom

9 Hicheng nung hin mipi kihon lel lul jeng, simjou lou, chitin namtin le phung tin’a kon, mitin mitang le paotin paotanga kon, abang jenga kivon’a, akhut’uva lusu na kichoiya, laltouna masanga, kelngoinou angsunga ding kamui. 10 Amahon ogingtah-in asam’un: “Hunhingna chu laltouna Toupa, I-Pathenu le Kelngoinouva ahi,” atiuve. 11 Laltouna le upaho chule ganhing li ho kimvel’a ding jing Vantil jouse, laltouna masanga chun amaiyu tol’a asulut’uvin Pathen alhaiyun, 12 asei cheh-un: “Amen, phattheina le loupina, Chihna, thangvahna jousea, jabolna Thuhatna thu neina jouse tonsot tonsot geiya I-Pathen’uva ahijinge, Amen,” atiiuve. 13 Hichea hin upa ho lah a khat’in eihin houvin kajah a, “Hiche ponabng jenga kivon ho hi koi hiuva, hoiya hungkon hiuvam?” tin eidonge. 14 Kenjong ajah a, “KaPakai nangin nahenai,” kati. Chuin aman kajah a, “Hite ho hi bolgen thei hesoh hahsa hinthoh doh a Kelngoinou thisan’a avon jouseu kisop bang ho vhu ahiuve. 15 Hijeh a chu Pathen laltouna masanga um’iva, asun ajan’a a-Houin sunga lhacha kin abol’u ahi; chule laltouna Toupa khun amaho hi ponbuh kison khum banga alekhu diu ahi. 16 Amahon gilkel dangchah athoh kit louhel diu, nisan jong san gtalou diu, asa jong thoh lou iddng ahiuve. 17 Ijeh-inem itile laltouna lailunga um Kelngoinou khu achinguva pang, hintwi nah dunga apuihoi le ding, Pathenin amit lhi jouseu atheh hulsoh ding ahi,” ati.

Henga Thuphon 8

Mohor Sagina le sana Lhengkong

1 Kelngoinouvin mohor sagi na alhap’a ahondoh phat’in van chunga nidan keh khat set athip chet’e. 2 Hichun Pathen masanga ding jing Vantil sagi chu kamun, amaho chu summon sagi apeuve. 3 Chuin gimnamtui halna sana lhengkong khat choiya, Vantil chom khat ahungin maicham phunga chun adinge. Ama chu, mithengte taona belap peh dinga laltouna mai, maicham phunga chu todoh dingin, gimnamtui tampi apeuve. 4 Hichun Vantil khut’a konin gimnamtui khu chu mithengte taona kilhonin Pathen angsunga akikhotoutai. 5 Chuin Vantil’in gimnamtui halna lhengkong chu alan, maicham phunga mei-al chu aham dimin, leiset chunga athe lhah le, van aginglul lul jengin, ogin akithongin, kol aphen, ling akihottai.

Sumkon ho

6 Sumkon sagi choi Vantil sagi ho chu sumkon mut din akigotauve. 7 Vantil masapenin sumkon amut le, thisan to kihal, gel le meikou ahung umdoh-in, leiset chunga alhai; hichun leiset chung hop thum’a hop khat akavamin, thingphung ho jong hop thum’a hop khat akavamin, chule hampa louhing jouse akavamsoh tai. 8 Vantil ni nan sumkon amut le, meikou alleng lung, molsang lentah tobang khat Twikhanglen lailunga akileh lut jengin, Twikhanglen hop thum’a hop khat thisan asoh-in, 9 Twikhanglen lailunga ganhing hop thum’a hop khat athin, kong ho jong hop thum’a hopkhat asumang tai. 10 Vantil thum nan sumkon amut le, kolphe meivah banga vah leng lung ahsi lentah khat van’a konin ahung lhan, luidung ho hop thum’a hop khat chung le teinah ho chunga achui. 11 Hiche ahsi chu amin Gamsai akisah-e. Chuin twihop thum;a hop khat Gamsai bangin akhatan, hijeh chun mihem tamtah hiche twikhat jeh chun athitai. 12 Vantil li nan sumkon amut le, nisa hop thum’a hop khat, lha hop thum’a hop khat, ahsi ho hop thum’a hop khat akivosen, abonchauva hop thum’a khat athimtan, sunlai jong hop thum’a hopkhat athimtan, janlai jeng jong hop thum’a hop khat athimtai. 13 Hichun kavet le vanlaijol’a leng le lea Muvanlai khat kamun, hichun going tah-in asamin, “Hiche Vantil thum sumkon mut dia kigo ho khun amut tengu le leiset chung chengte dinga, Ohe da na ahi, da na ahi, da na ahi!” ati.

Henga Thuphon 9

1 Chuin Vantil nga na sumkon amut le, van’a kona ahsi khat leiset chunga hung lha kamun, hi che chu akhonbei thamko kot heh apeuve. 2 Aman akhonbei thamko chu ahondoh le, tham ko sunga konin lhumpi kideng khu bangin meikhu ahung kitungdoh leng lung jengin, nisa le vanlaijol atimtai. 3 Chuin meikhu lah a kon chun khaokhopi tamtah leiset chung ahung dimtan, hiche ho chu leiset chunga aipi tha neina tobang apeuve. 4 Hiche ho hi leiset chunga hampa louhing le anche dong chule thingphung khat cha jong asuhset lou didu, achalpanguva pathen mohor kinamkhum lou mihem ho chubou asuhset diuva kiseipeh ahiuve. 5 Hiche ho hi hitobang thu neina kipeuva ahi. Chule hiche ho mihem bolgentheina chu aipin mi ade teng anat tobanga na ding ahi. 6 Hiche nikho lai le hin hiche mihem ho hin thina ahol tho diu, ahivanga amu louhel diu ahi; thi nom ten ten un tin, ahivanga thina chu akom’uva kona jamdoh didng ahi. 7 Hiche khaokhopite limso dol chu galsat dinga kigotohsa, sakolte tobang ahin, aluchunguva sana lallukhuh tobang jeng akhuh-un, amaichangu mihem mai tobang 8 Asam’u numei sam tobnag ahin, ahau chu Phaisameigeo ha tobang ahi. 9 Hiche ho hin thil a kisem ompho tobang cheh ompho aneiyun, alhaving gin’u galmun jon’a lhai sakol tamtah khotogin tobang ahi. 10 Aipi bangin mei aneiyun, eipi bangin jang aneiyui: ameiyuva chu lha nga geiya mihem suhsetna thei tha aneiyu ahi. 11 Hiche ho hin akhonbei thamkoa Vantil chu lengvaipon aneiyun, Hebrew paovin misumang tin an, apollyon ahi. 12 Da na masa akichaitan, ven, hicheng nunga hi da na ni hung nalai dingahiye. 13 Vantil gup nan sumkon amut le, Pathen angsung, sana maicham nin glia selki chengsea konin ogin khat kajan, 14 Vantil gup lhinaa, sumkon choipa jah achun, “Luipi lentah Euphrates dunga kihen Vantil li ho chu lhadoh tan,” ati. 15 Hichun mihem hop thum’a hop kkhat that dinga chuche nidan le nikho, lha le kum’a dia gotsadem’a um Vantil li chu akilhadohtai, 16 chule sakol galmi jat eikiseipeh chu sang ja ni jatni dol’in kajai. 17 Sakolte le achunga touho luchang tobang, akamsunguva konin meikou le meikhu chule kath jeng ahung kikhodoh doh jenge. 18 Meikou le meikhu, kath, gama hicheng thum akamsunguva hungkondoh chun mihem hop thum’a hop khat athat gamtai. 19 Ijeh-inem itile sakolte chu athahat nau akamsungu le ameiyuva um ahin, ameiyu chun gul bangin luchang aneiyin, hiche hoa chu mi abolgim’u ahi. 20 Gamna hichenga kithat lou, mihem amoh chengsen jong akhutsem athilsem’uva konin lung aheideh pouvin, kho muthei lou, kho jathei lou, vah le thei lou, sanaa kisem doilim ho le dangkaa kisem, sum-eng, thing, song pouva kisem doilim ho, chule thilha ho ahouvu jong atangdeh pouve. 21 tol athau, mitpheldoi achoi nau, jonthanhoi abolnau chule aguh chat nauva lung aheidoh pouve.

Henga Thuphon 10

Vantil chule Lekhajol neocha

1 Vantil chom, tha neitah khat, meilom’a kivon’a van’a kona hung kumlha kamun, aluchanga lhagui akiveiyin, amaichang nichang tobang ahin, akeng te ni chu meikou lom kitungdoh tobang ahi; 2 akhut’a lekhajol neocha phoh kehsa khat achoiye. Akeng jetlamin Twikhanglen achotphan, veilamin leiset chung achon’e. 3 Chule Phaisameigeo kitum bangin ogin tah-in kho asamin, hitia kho asap chun van-gin sagi ahung gingtai. 4 Vangin sagin thu asei chun keijong lekhaa sutdoh kagoi; “Van-gin sagi thusei chu melchih thon lang lekha sutdan,” eiti. 5 Hichun Twikhanglen le leiset chung chontoa ding Vantil kamu chun akhut jetlamin van lam asangin, 6 van le asunga um jouse, leiset le asunga um jouse, Twikhanglen le asunga um jouse Sempa, tonsot tonsot’a hing jing jeng Pa min panin akihahsel’in, “Phat sotta lou ding ahi; 7 Vantil sagi lhinna ogin phat, sumkon amut teng le, aman asohte Themgao ho henga aphondoh banga Pathen thilgon kiselguh chu hung guilhung ding ahi,” ati. 8 Chuin van’a kona ogin kaijah chun kahenga thu ahinsei kit leuvin, “Chen lang Twikhanglen le leiset chun chontoa ding Vantil khut’a phoh kehsa um lekhajol khu galan,” eiti. 9 Hijeh chun Vantil henga chun kachen lekhajol neo chu eipeh din kaseiye. Aman kajah a, “Kilah-in lang nen, na-oisunga thuh-in tin, nakamsunga vang khoiju lhum banga lhum ding ahi,” eiti. 10 Ken jong Vantil khut’a kon chun lekha jol chu kalan kaneh jeng le, kakamsunga khoiju lhumin alhumin, ahila kaneh jou chun ka-oisunga athuh cheh chuh jenge. 11 Hichun kajah a, “Nangman mitin mitang, chitin namtin, paotin paotang chule leng ho thudol’a gaothu naseikit ding ahi,” eikiti.

Henga Thuphon 11

Hettohsah

1 Hichun tenggol lheh lheh thil ten a mol-lhon khat eikipen, :Kipatdoh-in lang Pathen Houin le maicham khu tedoh-in, khukoma Pathen houho chengse jong simtoh-in. 2 Amavang Houin polam leitol khu khenni lang tedoh dan, ajeh chu iche lai khu chiding namdangte kipedoh ahitan, amahon khopi theng chu lha som li le lha ni sunga kengto chotpha anei diu ahi. 3 Chule kathu hettohsah te ni chu thu neina kapeh a, ama nin khaodip pon kisil’a, nikho sang khat l eja ni to somgup sunga gaothu asi lhon ding ahi,” ati. 4 Hiche te ni chu leiset Pakai ang’a ding jing Olive thingphung te ni le Thaomei khom te ni chu ahi lhon’e. 5 Hiche te ni hi khattouvin bolset ding agot jousea akamsunglhon’a meikou hung deujah jia, amelmate chu akahvam jengji ahi; amani bolset go jouse chu hitobanga hi kithat tei ding ahijenge. 6 Amani hi gaothu asei lai sungse lhon’a go juh louna dinga vanlaijol geiya khah chah jeng thei tha nei ahi lhon’e. Chu jongle amani hin twiho geiya thisan sosah theina tha anei lhon’e, chule adei phat phat lhon’a leiset’a jong gamna hise alansah nom nom lansah theina tha anei lhon ahi. 7 Hite ni hin hettohsah abolchai lhon teng l eakhonbei thamkoa hung potdoh sahem chun achung lhon’a gal abol’a, ajoa ani lhon’a atha ding ahi. 8 tekah a Sodom le Egypt kisah khopi lentah, a-Pakaiyu Thingpel’a kikhetbeh na khopi sung lamlen a chu along lhon kijam ding ahi. 9 Mitin mitang, phungtin, paotin tang le chitin namtin’a kon miten nithum le akeh geiya along lhon chu avet ve jeng diu ahi; along lhon chu lhan a vui ding nom lou diu ahiye. 10 Leiset chung chengte jouse amani chunga kipah thanomuva, khat le khat deichom thil kithot to ding ahiuve; ijeh-inem itile hiche Themgao te ni hin leiset chung chengte abolgim lheh jeng lhon’e. 11 Ahinla nithum le akeh nungin Pathen’a konin hinna hu ahungin asung lhon’a alut phat’in, amani mupha chan akicha lheh jenguve. 12 Hichun, “Hikoma hung kaltou lhonin,” tia ajah lhon’a thu sei van’a kon ogin nasatah khat aja lhonin, amelmateuvin avet vet pet tah-in van jonin meilom khat’in akitoltou lhontai. 13 Hiche pettah hin ling nasa tah akihot’in, khopi hop som’a hop khat achimtan, ling kihot chunmihem sang sagi athin, athimoh cheng atijat lot’uvin Pathen avahchoilo tauve. 14 Gamna ni na akicahitan, ven, gamna thumna chu hung lhung vahjet ding ahi.

Sumkon sagi lhinna

15 Vantil sagi nan sumkon amut le van’a konin ogin nasatah tah tampin ahinjomin: “Vannoi leiset chunga lengvaipohna chu I-Pakaiyule a-Christa chang ahitan, Aman tonsot tonsot’a lengvai apoh ding ahi,” atiuve. 16 Chutah chun Pathen angsung, laltouna tou, upa som ni le li ho chu bohkhup’in tol’a mai asulut’un Pathen alhaiyun, 17 aseiyuvin: “Vo Pakai Pathen Hachungnung, Aum jingsa le aum jing jeng, Keihon nangma kathangvah-ui; Ajeh chu nangin nathahat chungnung mangchan lengvai napotai. 18 Ipijeh-inem itile namtin vaipi along hangun, Hichun nangma lunghan ahung lhung paiye; Mithi ho thutanpeh phat, Nasoh Themgao ho, naming gangkhen cha um namithengte, Alen hihen aneo hijongle kipaman peh phat, Leiset sumang ho suhmang phat ahungtai,” atiuve. 19 Hichun van’a Pathen Houin akihongin,, chule a-Houin sunga um kitepna thingkong chu akimui; chuin kolaphen, ogin akithongin, van aging lul lul’in, ling akihot’in, gel len nasatah alhai.

Henga Thuphon 12

Numeinu le Dragon

1 Van’a melchihna lentah kha ahung kilah-in, nisaa kijem, akengto te nia lhachang um, aluchunga ahsi som le ni lallukhuh a kikhuh numei khat ahi. 2 hiche nu hi agaiyin, naoso nat thohgimin hapenin apenge. 3 Van’a melchihna achom khat jong ahung kilah-in, vetan, Dragon san, lentah, ameiyin vanlaijol’a ahsite hop thum’a hop khat ajep’in, leiset chunga asep lhai. 4 Chule nao aso lhah lhah le val lhum jeng din Dragon chu numei nu masanga ading jinge. 5 Chuin amanun naosen pasal khat ahingin, naosen hin namtin vaipi chung thih tenggol choiya vai apoh ding ahi. Hichun naosen chu akisalhah peh-in Pathen heng, alaltounana maiya akilhoh toutai. 6 Chuphat’in numei nu chu gamthip lama ajam mangin, hikoma chu nikho sang khat le ja ni to somgup geiya akivahna ding mun Pathenin agonpehsa ahi. 7 Hichun Van’a gal asoh-in, Michael le a-Vantilte chu Dragon to akisat tauve. Dragon le a-Vantilten jong asat thuh-uvin, 8 aivangin Dragon ahatjou tapon, akhon nan van’a amaho ding mun akiholmotai. 9 Chutah chun Dragon len, khangluipeh a gulpi, Diabol le Satan kiti, vannoi pumpi lhemlhapa chu leiset chunga akisonlhan, a-Vantilte jong ama pumin akisot lhah thai. 10 Chuin van’a konin ogin nasatah khat kajan, hichun aseiyin: “Akhon nan i-Pathenu huhhingna le tha neina, Lenggam, chule a-Christa thu neina akiphongtai; Ijeh-inem itile isopiteu hehsepa, I-Pathenu angsunga sun le jan’a amaho hehsepa chu akisonlhatai. 11 Amahon ama chu Kelngoinou thisan jal le Ahettohsah nau thu vanga ajou ahitai; Ajeh chu amaho hinkho geiya Itcha louhel’a thi geiya pang lhumkei ahiuve. 12 Hichejeh hin vanmun jouse le asunga cheng jouse kipah-un, Ohe, leiset le Twikhanglen ada nahiuve, Ajeh hcu lungsat chungnung neiya phat chomcha anei hea Lunghang tah a Diabol nahenguva hung kumsuh ahitai,” ati. 13 Leiset chunga akisot lhah amu phat’in Dragon chun naosen pasal khat hing’a numei chu anung adel le jenge. 14 Chuphat’in numei nu chu gulpi masanga akikhindal’a, kumthum le akeh geiya akivahna ding mun gamthip lama alen mang theina din Muvanlai lentah khat lhaving te ni apeuvin ahi. 15 Ahin gulpin akamsunga twi vadung long bangin alondoh dah-in, numei nu nung adelsah-in, lhoh mangsah din agoi. 16 Ahivangin leiset’in numei chuakithopin, hiti hin leiset’in kam akan, Dragonin akamsunga alondohsah twi chu achopkang hel’e. 17 Chutah-in Dragon chu numei nu chunga along hangtan, hijeh chun Pathen thupeh chengse nit’a, Jesu thu hettohsah nei, amanu chate amoh chengse chutoh kisat din akondohtai. 18 Chuin Twikhanglen neldi chunga agadingtai.

Henga Thuphon 13

Sahem ni

1 Twikhanglen’a kona sahem khat hung kaldoh kamun, ki, som, luchang sagi aneiyin, aki som chunga chun lallukhuh khat cheh aumin, chule aluchang ho chunga taitom min apui. 2 Sahem kamu chu lutnu to abangin, akeng te ni chu savom a tobang, akam chu Phaisameigeo kam tobang ahi. Dragonin sahem chu atha neina le alaltouna chule athu neina nasatah apetai. 3 Aluchang ho khat chu thi thei hel’a kimavo tobang ahin, ahinla akimavona chu damdoh kit’a ahitai. Vannoi pumpin kidang san aveuvin, sahem nung hcu ajuiyui. 4 Athu neina sahem apeh jeh-in mihon Dragon chu ahouvun, sahem jong chu ahouvun, “Hiche sahem ti kibang koi hiya, kon adouva akisatpi thei ding ham?” atiuve. 5 Sahem chu hamhoithona le taitom thuseina kam apeuvin, lha som li le lha ni geiya thilbolna ding thu neina apeuve. 6 Chuin Pathen taitom thu seinan kam akeh pantan, amin le achen mun chule van’a chedng jouse ataitomtai. 7 Mithengte to kisat’a abonchauva ajo na din thilbol theina apeuvin, phung tin le mitin tang, paotin tang le chitin namtin chunga thu neina jong apeutauve. 8 Chutah le leisetchung chedng, leiset bul kiphudoh til’a pat kithatsa Kelngoinou hinna lekhabua amin kisut lou chengsen sahem chu ahou diu ahi. 9 “Angaina ding na neiyan ngai hen! 10 Sohchang ding chu sohchang tei ding, chemjam hema lou ding jong chu chemjam hem’a lou tei ding ahi. Hichea hi mitheng dinga thot hat le tahsan ngai ahi,” ati. 11 Hichun leiset’a kona sahem chomdang khat hung kaltou kamun, hichun kelngoi ki tobang ki ni aneiyin, Dragon thusei bangin aseiye. 12 Hichun sahem masa thu neina lhingset’in aneiyin, sahem masa masanga thil abol’e. Hiche hin sahem kasa, thi thei hel’a kimavoa damdoh kit chu leiset le asunga chengte jouse ahousah tai. 13 Hichun thil bolmo kidang nasatah tah, mihemte mitmu changtah a, van’a kona leiset chunga meikou lenlhahsah geiyin abol theiye. 14 Sahem maiya thil bolmo kidang bol theina kipea chu leiset chung change jouse apui chatvaiya, leiset chung chengte chu chemjam’a kisat khaa, ahivanga hing nalai sahem lim sem ding aseipeh thu asei theiya, 15 sahem lim hou chun thu asei theiya, sahem lim hou lou jouse akitha theina dinga, sahem lim sunga hu khumlut peh theina jong kipea ahitai. 16 Sahem chun mihem jouse, aneo alen, ahao avai, jalen le soh, abonchauvin acham louvin akhut jetlam ham, achalpanguva ham a melchihna abol’e. 17 Hijeh chun chuche sahem melchihna, amin ham ahiloule amin mohor neilou chun imacha cho thei lou, joh jong joh thei lou ahi. 18 Hichea hin chihna angaiye. Lungthim’a hethem’an sahem mohor chu sutoh hen, ijeh-inem itile hiche hi mihem mohor ahin, mohor number chu jagup le gup ahi.

Henga Thuphon 14

Lhatdamsa 144, 000 lahsa

1 Ven, Zion molsang chunga Kelngoinou ding kamun, ama min le a-Pa min achalpanguva kijih cheh mi sang ja khat le sang som li le sang li to adding khom’e. 2 Chuin van’a konin twipi tamtah gin tobang le van-gin nasatah tobang ogin khat kajan, ogin kajah chu selangdah salhon aselangdah cheh asaigin’u to abange. 3 hiche ho hin laltouna mai le ganhing li ho chule upate masang chun lathah khat asauvin, leiset’a kona lhatdamsa mi sang ja khat le sang som li le sang li tilou koima hiche la chu kichuh thei lou ahi. 4 Hiche ho hi numeito kisuboh louhel, suhset lou na-ngah tobang ahiuve. Ache na chan a kelngaoinou nungjui ahiuvin, Pathen ding le Kelngoinou dinga aga masaa pang dinga, mihemete lah a kona kilhatdo ahitauve. 5 Akamsunguva thujou pot lam kihekha louhel, nolnabei ahiuve.

Vantil thum thupoh

6 Vanlaijol’a Vantil chom khat leng le le kamun, ama chun leiset chung cheng chitin namtin, phungtin, pao tin paotang le mitin mitang henga phonjal ding tonsot Kipana Thupha aneiye. 7 Aman ogingtah-in aseiyin, “Pathen gingun lang, alou, aloupina vahchoiyun, ijeh-inem itile aman thu atanna ding phat ahung lhung tai; van le leiset, Twikhanglen le twisamphung jouse Sempa chu chibai boh-uvin,” ati. 8 anina Vantil chom khat man anung juiyin aseiyin, “Ajonthanhoi lunghanna lengpitwi ji chitin namtin jouse donsah nu, Babylon khopi chungnung chu achimtai, achimtai!” ati. 9 Thum lhin na Vantil chonkhat man anung juiyin ogingtah-in aseiyin, “koi hi le sahem alim hijonle houva, achalpang ham, akhut ham a mohor kinam’a chun 10 Pathen lunghanna lengpitwi ju, imacha to hal louhel, gotsa kikoi chu adon khat tei ding, Vantil theng ho mang sang le Kelngoinou angsunga mei kou le kath a hesoh gentheiya kibol ding ahi. 11 Hitobang ho kibolgimna chun tonsot tonsot’a kitung cheng chung jeng ahin, chuche sahem le alim chibai boh ham, ahiloule amin mohor kinam khum ham chu sun le jan’a oltih nei lou ahitauve,” ati. 12 Hichea hin Jesu tahsan’a Pathen thupeh chengse nit, mintheng te din thot hat angaiye. 13 Hichun van’a hungkon ogin khat kajan, “pakai dinga thiho chengse chu tua lhah a anunnom ahitauve, tin sunin; ahiye, Lhaggaovin aseiyin, ‘Amaho chu atohgim nauva kona choldo ahitauvin, atoh phat jouseuvin anungu ajuiye,’ tin,” ati.

Vannoi leiset chang-at’a aki-at

14 Vetan, meibang lhang khat kamun, meilhang chunga chun Mihem Chapa tobang khat atouvin, alua lallulkhuh akhuh-in, akhut’in koite hemtah khat achoiye. 15 Chuin Houin’a kon chun Vantil chom khat ahungdoh-in, meilhang chunga tou pa henga ogingtah-in asamin, “Nakoite panin chang at tan, a-at phat ahung lhungin, leiaet chang akoijoutai,” ati. 16 Hijeh chun meilhang chunga Toupan akoite leiset chunga alamtan, leiset chung-at’in aki-at tai. 17 Van’a Houin sunga kon chun Vantil chomdang khat ahung potdoh-in, aman jong koite hemtah khat aneiye. 18 Chuin meikou chunga thu nei Vantil chom khatma Maicham phunga konin ahung potdoh-in, koite hemtah kichoipa henga chun ogingtah-in asamin, “Nakoite hemtah chu lamin lang leiset’a lengpiga ho khu aminsohtai at khomtan,” ati. 19 Hijeh chun Vantil’in akoite alamin leiset chung lengpiga boh ho chu a-at khom khomin, Pathen lunghan lengpiga hehna lentah khuh sunga chun asep luttai. 20 Khopi polam, lengpiga chilna mun’a chil’u len, lengpiga chilna mun’a konin thisan ahung putdoh-in, sakol kamdalgeiyin achuptan, kilometer jathum geiyin anal’e.

Henga Thuphon 15

Gamna kichaina nei Vantilte

1 Van’a datmo umtah le lentah melchihna khat kamun, gamna kichaina sagi neiya Vantil sagi ahiuvin, hiche hoa hi Pathen lungsat kichai ahitai. 2 Hichun meikou tokihal, phatvet tobang Twikhanglen, sahem le alim, amin mohor kinam nang jou chengse akhut’uva Pathen selangdah choiya, phatvet tobang Twikhanglen panga ding kamui. 3 Amaho hin Pathen lhacha Mose le Kelngoinou la asauvin: “Vo Hatchungnung Pakai Pathen, Nathilbol ho hi anasan akidange; Chitin namtin dinga Lengpa, Nalampi jouse adih-in akitah-e! 4 Vo Pakai, koiham nagging louva Namin vahchoi lou idng chu? Ajeh chu athenga nang bou nahi. Hijeh a chu chitin namtin hunguva Na-angsunga bohkhup’uva chibai naboh diu ahi; Ajeh chu nathilbol dihho akiphongdohtai,” atiuve. 5 Hicheng nung hin van’a hettohsahna Houbuh muntheng kihondoh kamun, 6 muntheng phunga konin gamna sagi neiya Vantil sagi ahungdoh tauve. Amaho chu tupat ponnem, abangleh-in akivon’un, sana pheh-in a-opkongu akiveiyui. 7 Hichun ganhing li ho lah a khat’in Vantil sagi ho chu tonsot tonsot’a hing jing jeng Pathen lungsetna demset cheh, sana lhengkong sagi apei. 8 Chuin Pathen loupina le athu neina jeh-in muntheng chu meikhu adimset jengin, Vantil sagin gamna sagi abulhitsoh masangsen koimacha muntheng phunga chun alut thei tapoi.

Henga Thuphon 16

Pathen lungsatna dim lhengkongho

1 Houin’a kona Vantil sagi ho henga ogingtah a thu kisei kajan, “Cheuvin lang Pathen lungsetna dimset lhengkong sagi chu leiset chung gabung lhauvin,” ati. 2 Hichun Vantil masapen achen leiset chunga alhengkong chu agasun lhan le, sahem melchihna neiya alim hou, mihem ho chunga netna hoisetah, uilut nat alangtai. 3 Vantil ni nan alhengkong chu Twikhanglen chunga asun lhan le, tolthi thisan bangin thisan asoh tan, Twikhanglen sunga um ganhing jouse athisoh tai. 4 Vantil thum nan alhengkong chu luididng jouse le twinah phung jousea asun lhah le, thisan asoh gamtai. 5 Hichun twipi jouse thu nei Vantil chun asei kajan, “Hicheng thu natan naa hin nadih-in nathenge, Aum jing le aumsa Nangma; 6 Mithengte le Themgao ho thisan asouvin, Adoh diuva thisan napeh hi achan diu lom tah ahi,” ati. 7 Chuin maicham phunga kona thu kisi kajan, “Ahinai, Vo hatchungnung Pakai Pathen, Nathutan ho hi akitah-in, adih cheh-e,” ati. 8 Vantil li nan alhengkong chu nichang asun khum le, mihemte chumeisaa ahugot dingin thu akipetai. 9 Mihem ho chu nisa save vun ahulgot gam phat’in, gamna ho chung geiya thu neipa, Pathen min geiyin ataitom’un, Pathen vahchoi din jong lung aheidoh pouve. 10 Vantil nga nan alhengkong chu sahem laltouna chunga asun lhah le, sahem lenggam sung athimsoh-in, anat thoh lel jeh-un, mihon aleiyu apet den’un, 11 anat thohgim jeh-u le ti-na ho jeh chun Van Pathen geiyin ataitom’uvin, anatoh athilbol’uva konin lung aheipouve. 12 Vantil gup nan alhengkong chu luipi len Euphrates a asun lama hung kon leng ho din lampi akihong doh tai. 13 Hichun Dragon kamsung, sahem kamsunga kona hungdoh, ephoh ho tobang lhagaoboh thum kamui. 14 Hiche ho hi thilha lhagao ahiuvin, melchihna aboljiu ahi; hiche ho hi cheuva, Hatchungnung Pathen nikho ni le galsat dinga leiset pumpia leng jouse gapuikhom agot’u ahi. 15 “Ven, gucha bangin kahunge, ponbeiya vah lea, asagohkeo akimudoh louna dinga hah jinga aponsil kivet phat jing mi chu anun nom’e” ati. 16 Chuin amaho chu Hebrew paova, “Armageddon” kiti laiya chun apuikhomsoh tauve. 17 Vantil sagi nin alhengkong chu vanlaijol’a asun lhah jeng le, Houin laltouna phunga konin nasatah-in o ahung gingdoh-in, “Akichaitai,” ati. 18 Chutah chun kol aphen, ogin akithongin, van aging lul lul jengin, leiset chunga mihem kilahdoh a pat jingpi jouse lah a jong um kha lou lai, lingpi nasatah khat ahung kihottai. 19 hichun khopi jouse achomsoh tai. Khopi lentah Babylon chu Pathen angsunga akigeldoh tan, alunghan na lengpiga ju-khon donsah dinga peh din aumtai. 20 Hichun twikol gam jouse jong akihomosoh tai. 21 Chutah-in gel len, khatseh agih dol jong talent khat to kibang hel, van’a konin mihemte chunga ahung lhan, hiche gamna hi anatsat behseh jeh-in mihemten gel lhah gamna jal hin Pathen ataitom tauve.

Henga Thuphon 17

Noti len nu le Sahem

1 Lhengkong sagi choiya Vantil sagi holah a khat ahungin kajah a thu aseiyin, “Hungin, twitampi chunga tou, noti len nu chunga thu kitan vetsah inge; 2 leiset leng hon noti nu toh jonthanhoi na leng piga ju chu leiset’a chengte jouse khamsoh ahitauve,” ati. 3 Hichun aman lhagaovin gamthip eipuitai. Hichea hin achunga taitomna min jeng kikun, alu sagi, akisom nei, sahem danthip khat chunga numei khat touva kamui. 4 Numei nu chun pon sandup le pon santhip asil’in, sana, khisong mantam jeng le twikoh changing akijemin akhut’a chun thet umtah tah thil ho le ajonthanhoi na nen demset sana khon khat achoiye. 5 Achalpanga chun selguh min akisunin, “Babylon len, noti jouse le leiset’a thil thet um jouse konna nu,” akiti. 6 Chule numeinu chun mithengte thisan le Jesu thu hettohsahte thisan adonkhamset kamui. Hiche nu kamu chu kidang kasa behseh jenge. 7 Ahin Vantil chun kajah a, “Ibol’a kidang nasah ham? Khuche numei le apolea, aluchang sagi, aki som nei, sahem thuguh khu keiman seipeh inge. 8 Namu sahem, anu umsa hiya, umtalou khu, akhonbei thamkoa kona hung kaltouva, manthahna vah lut ding ahin, chu teng leiset chung chengte, vannoi bul kiphudoh a pat hinna lekhabua min kisun lou hon, aumsa hiya, umta lou, hung kit ding, sahem chu amu tengu adatmo lheh jeng diu ahi. 9 Hichea hin lungthim le chihna angaiye. Aluchang sagi chu molsang dsagi ahin, hiche ho chunga hi numei ni kitousah ahi. Hiche ho hi leng sagi jong ahiuve. 10 Nga alhutan, khat aumnalaiyin, khat ahung hih laiyin, ahung tang le phat chom khat beh umtei ding ahi. 11 Aumsa hiya, umtalou sahem, sagi lah a khat chu get lhin na ahin, manthahna vah lut ding ahi. 12 Aki som namu ho chu leng som ahiuvin, lengvaipohna anei lou laiyu ahi, nisan kah khat sunga sahem chutoh thakhat tah a, lengte banga, thu neina aneikhom diu ahi. 13 Amaho hi doi kitha khat ahiuvin, athahat athu nei nau sahem chu apetauve. 14 Amaho Kelngoinou to kisat diu, ahivanga Kelngoinouvin amaho ajo ding ahi; ijeh-inem itile am apakaiho Pakai le leng ho Leng ahi; aumpi chengse jong koudodhsa le lhenchom, chule tahsan nei ho ahiuve,” ati. 15 Hichun kajah a, “Noti nu kitousahna twipi namu ho chu mitin mitang, lhangpi kikhom khom, chitin namtin le paotin paotanga mi ahiuve. 16 aki som namu le sahem chun noti nu chu ahot diu, achom keohel’uva, asagoh keova akoiyuva, atahsa geiya aneh chaiyuva, meiya ahalvam diu ahi. 17 Ijeh-inem itile Pathen thusei chengse guilhunsoh masangsea dinga, amaho chu lungdoi kitoh tah a alengvai neinau sahem apehdoh-uva, Pathen lungdoi atohdohna diuva, hi tobang lunggel chu Pathenin alungthim’uva akhumpeh ahi. 18 Chule nangin namu numei nu chu leiset leng ho jouse chunga lengvaipoa pang khopi len chu ahi,” ati.

Henga Thuphon 18

Babylon khopi chim

1 Hicheng nung hin Vantil thu nei tah khat van’a kona hung kumlha kamun, leiset hi aloupi nan asalvahsohjenge. 2 Ama chun going leng lung tah-in asamin aseiye: “Achimtai, achimtai Babylon len, Thilha ten chen nan aneitauve; Lhagaoboh jouse kikholna, Vacha bohjouse le thet um jouse kikholna asohtai. 3 Ajeh chu aman ajonhuhna lengpiga ju chu Chitin namtin jouse adonsah tai; Leiset leng jouse amanu to ajonguvin, Amanu nopsahna val’a konin leiset’a kiveihon ahaolotauve,” ati. 4 Hichun van’a kona thu kisei ogin khat kajan: “Hiche nua kon chun potdoh-un kamite, Ajo le amanu chonsetna ho changkhauvin natin, Ajo le athoh ding gamna ho thoh khauvin nate. 5 Ajeh chu amanu chonsetna ho Van geiyin akikhangdoh tan, Athemmona jouse Pathenin ageldohtai. 6 Amanun napeh bangin pethuh-un, Athilbol achonna dungjuiyin ajat nin lethuh-uvin. Chih tah a ahhalkhomna khon’a chun Ajat nin chih cheh-in halkhompeh-uvin. 7 akiloupisah a kinopsah val bangin Sugentheiyun lang sulung hem’uvin; Aman alungthim sunga ‘Lengnu banga toukahin, Meithai kahipoi, itih chan hijongle Lunghemna muponge,’ atijeh chun 8 Gamna jousen nikhat’in lhunden hen, Thi lunghemna chule kelle chah nan, Amanu meikouvin leolih jeng hen. Ajeh chu achung thu tan Pakai Pathen chu thanei tah ahi,” ati. 9 Amanu to jonga nom sakhom, leiset leng hon agovamna meikhu amudoh tengu le dip le lai akidop’a, amanu akacham diu ahi. 10 Amanu thoh genthei akichat jeh-un, gamla tah a dingun tin: “Ohe, ohe, khopi len, Bebylon khopi dettah, Nidan kha khat sungin nachung thu akitan chaitai!” atidiu ahi. 11 Leiset’a kiveimihon jong koiman athil’u achohpeh lou phat’in amanu chu lhase tah-in akauve. 12 Sana, dangka, song mantam, twikohchang ho, tupat ponnem, ponsandup, lungpon, ponsanthip, thing namtui mantam jouse, saiha le thing mantam a kisem thil ho, sum-eng, thih le songval’a kisem ho, 13 thingthal, eisanga, gimnamtui, thaonamtui, bego, lengpitwi le thao, changbongnal, suhlou chang bong le kelngoi, sakolte le kangtalai jouse, soh ho le mihem dang hinkho geiya chohpeh louva um gam ahitai. 14 “Nalhan angaichat, aga chu Nanga konin apotdoh tai; Na-ning lhin na le nahaona jouse kitolmang ahitan, Kimudoh kit louhel ding ahitai,” atiuve. 15 Amaa kona gaodoh kivei mihon, akhopi thoh genthei hesoh akichat jeh-un, gamla tah a dingin akacham’un, alhaset piuvin 16 aseiyun: “Ohe, ohe khopi len minthang, Tupat ponnem le ponsandup, ponsanthip’a kivon’a, 17 Nidan kah khatseh-in nei chujatpi amangheltai,” atiuve. Chuin kong lamkai jouse le konga kitol miho, kong tol ho le Twikhanglen a kivei miho abonchauvin gamlatah a adingun, 18 amanu kigovamna meikhu aveuvin, going tah-in asam’un, “Hiche khopi lem tobang ipi khopi um didng ham?” atiuve. 19 Chuin aluchunguva leivui akithe khum’un, kap le maovin kho asam’un: “Ohe, ohe khopi len minthang, Twikhanglen’a kitolle kong jouse Ama ninglhing jal’a haodohna Nidan kah khatseh sungin abeitai,” atiuve. 20 Vo van le mithengte, Solchah ho le Themgaoho, amanu cunga hin kipah thanom’un, ajeh chu nang ho din Pathenin amanu chunga thu atantai! 21 Hichun Vantil tha nei tahkhat hin sumhri song tejen songkhat alan, Twikhanglen’a aleh lut’in: “Hitobanga hi khopi len Babylon chu Tolse na kineiya kimudoh ki tlouhel ding ahi. 22 Nasung hi selangdah saiho sangin, Lathem ho lasah gin, theile mut themho mutgin, Nasunga kijakit louhel ding; Khut themna jatchom chom’a them Khut them ho jong kimudoh louhel ding ahi; Sumhei gin jong nasunga kija louhel ding ahitai. 23 Nasunga thaomei vah jong kimukit lou ding, Nasunga jineipa le jinei nu ogin kija louhel ding ahi; Kivei mi nanei ho chu leiset’a lamkai jeng ahiuvin, Mitpheldoi nachoi chun chitin namtin apui chavaitai. 24 Ijeh-inem itile nasunga hin Themgaoho le mithengte, Leiset chunga kithat ho jouse thisan akimudoh tai,” ati.

Henga Thuphon 19

1 Hicheng nung hin van’a kona hung kisei, mipi tamtah ogin tobang khat kajan: “Hallelujah! Huhhingna, loupina, tha neina i-Pathenu achangtai; 2 Ajeh chu Ama thutan jouse akitah-in adih cheh-e; Aman noti len nu chunga thu atanin, Ajonthanhoi jeh a leiset suchavai nu, Akhut’a thi asohte thisan phu Amanu chunga hin alatai,” atiuve. 3 Ani veinan asei kit’un: “Hallelujah ! amanu kigovamna meikhu chu tonsot tonsot’a din akitungdoh tai,” atiuve. 4 Chutah-in upa som ni le li ho, ganhing li ho chun, laltouna kitousah Pathen chub oh khup’in chibai aboh-un: “Amen, Hallelujah ‘!” atiuve.

Kelngoinou moupui golvah

5 Laltounaa konin ogin khat ahung kithongin: “Pathen soh, ama gingkhen, alen aneo nabonchauvin I-Pathenu vahchoi cheh-uvin,” ati. 6 Chuin mihonpi tamtah ogin tobang le twipi tamtah lon gin tobang, van ginthong tobang kajan: “Hallelujah! Hatchungnung Pakai i-Pathenun Lengvai apotai; 7 Kipah thanomin aloupina vahchoiyute; Ajeh chu Kelngoinou jinei golvah phat ahung lhungtan, Ajinu ding jong kigosadem ahitai; 8 Ajinu ding chu tupat ponnem thengsel, vamleuva Kivon dingin apetauve; Hiche tupat ponnem chu minthengte tohphatna ahi,” atiuve. 9 Chuin ogin chun kajah a, “Kelngoinou ji kipui golvah a kikou ho chu anun nom’ui, tin sunin,” eiti. Kajah a aseiyin, “Hicheng hi Pathen thu tahbeh ahi,” ati. 10 Hijeh chun keijong ama chibai boh din akengbul’a kaboh khuptai. Ahinla aman kajah a, “Bol hih-in; keima Jesu thudol hettohsah sopite lah a khat, nasoh natoh khompi khat kahibouve; Pathen bou chibai bohin. Ijeh-inem itile Jesu thudol het tohsah hi gaothu seidohna Lhagao ahi,” ati.

Sakol kang chunga Toupa

11 Hichun van akihondoh kamun, ven, sakol kang khat aumin, achunga Toupa chu tahsan le kitah akitin, tah-inthu atanin, gal abol’e. 12 Amitchang te ni chu meikou pah lah lah ahin, aluchanga lallukhuh tampi akhuh-in, min khat akisunin, Ama tilou koima danginahepoi. 13 Aponsil chu thisan kithekhum ahin, amin chu Pathen Thu akiti. 14 Tupat ponnem thengsel le vamleh kisil’a sakol kangte chunga tou, van’a sepaiten anung ajuiyui. 15 Akamsunga konin chemjam hemtah khat ahung potdoh-in, hichea chu chitin namtin asatgam sing, achunguva thih tenggol’a vai ahom ding, Hatchungnung Pathen lunghanna lengpiga chilna tobanga chu aman jong achil ding ahi. 16 Aponsil chunga akhelbuh laiya, ‘Leng ho Leng le Pakai ho Pakai, tin min khat akisun’e. 17 Hichun nichang chunga ding Vantil kha tkamun, vanlaijol’a leng lea vachate jouse jah a ogingtah-in aseiyin, “Pathen golvah lentah a hung kikhom’uvin; 18 leng ho tahsaphe le sepai lamkai ho tahsanphe, sepaiho tahsaphe, mihem jouse, jalen hihen doh hile, aneo hihen alen hile, atahsaphe hung neuvin,” ati. 19 Chuin sahem le leiset leng ho, asepaiteu hung kikhom’a, sakol chung Toupa le asepaite douna galbol goa kamui. 20 Sahem le sahem masanga datmo kidang melchihna tampi boljia, hotobang melchihna hoa hi sahem mohor kinam khum, alim houho chu pui chavaiji Themgao lhem chu aman’un, anigel lhon in ahing laiyin kath meikou deuje ju lah a a leh lut tauve. 21 Chule amoh chengse chu sakol chunga Toupa kamsunga kona hung potdoh chemjam chun athat gamin, vachate jousen atahsapheu chu achim avan aneuve.

Henga Thuphon 20

1 Akhonbei thamko hehna le thih khao akhut’a choiya Vantil khat van’a kona hung kum lha kamui. 2 Vantil chun khangluiya gulpi, Diabol, Satan Dragon chu aman in kum sang khat din ahentai. 3 Hiti chun akhonbi thamko sunga aleh lut’in, akandenin, kum sang khat kichai kahsea namtin apui chatvai louna din mohor anamkhumtai. Hiche nung hile phat chom khat dinga kilhadoh tei ding ahi. 4 Hichun laltouna phabep le achunga touva, thutan ding kipedoh ho le Jesu thudol hettohsah jeh le Pathen thu jeh a alu kitanho, sahem le alim chibai boh louhel, achalpangu le akhut’uva melchihna moho kinam lou ho lhagao kamun, amaho hi hingdoh a Christa to kum sang khat lengvai apoh khomu ahi. 5 Kum sang khat kichai kahsea vang chu mithi amoh cheng thoudoh lou ding ahiuve. 6 Hiche thodoh masaa pang kha chu anun nomin athenge; thi ni nan achunguva thu anei lou ding, Pathen le Christa Thempua panguva, Ama to kum sang khat lengvai apoh khom diu ahi.

Satan gal lel

7 Kum sang khat alhin teng Satan akihenna a kona kilhadoh a, 8 leiset ning lia cheng chitin namtin Gog le Magog, Twikhanglen neldi jat pi chu gal bolsah dial hem chavaiya puikhom dinga kondoh ding ahi. 9 Amaho chu leiset kho khongin ahung kon’un, mithengte Ngahmun le Pathenin a-it tah khopi chu aumkimvel tauve. Ahinla van’a konin meikou ahung leng lhan amaho chu akavamtai. 10 Chutah chun sahem le themgao lhempa kiselutna kath le meidil sunga chun miho lehm chavai Diabol chu asep lut tauve, hikom a chu amahon sun le jan, tonsot tonsot geiya gim hesoh chungnung athoh diu ahitai.

Laltouna kang phunga thu kitan

11 Hichun laltouna lentah, akang khat le achunga Toupa kamun, amasanga konin van le leiset ajam mangin, van le leiset din mun akihol motai. 12 Chuin laltouna masanga mithi ho alen aneo adinu kamun, chule lekhabu ho akiphongtai; hichea hin lekhabu achom khat, ahinna lekhabu kit chu akiphong doh-e; hiche lekhabu hoa kisun dungjuiyin mitho ho chu anatoh dungjui cheh-in athuu atan tauve. 13 Twikhanglenin asunga um mithi ho ahinleh doh-in, thina le thina gamin jong asung lhona um mithi ho ahinleh doh lhonin, amichang cheh anatohdungjui cheh-uvin athuu atanpeh tauve. 14 Chuin hina le thina gamchu meidil sunga aleh lut tauve, meidil hi thini na ahi. 15 Hinna lekhabu sunga amin kiholdoh louse chu meidil sunga aleh lut lut jenguve.

Henga Thuphon 21

Vanthah le leiset thah

1 Chujouvin Vanthah le leiset thah kamui; ajeh-inem itile van masa le leiset masa chu kitolmang ahitan, Twikhanglen jong aumtapoi. 2 Chuin aji ding pa henga dia kigosadem, jinei din gnu banga jijem, Pathen kom, van’a hung kitol lha khopi theng Jerusalem thah chu kamui. 3 Laltouna a kona ogingtah a thu kisei khat kajan, “Vrn, Pathen chenna in chu mihemte lah ahitai, Pathenin amaho achenpia, amaho amite hidiu, Pathenin amaho achen pia a-Pathenu hiding ahi. 4 Amit’uva kona amit lhi jouseu atheh hul peh ding, thina umta lou ding, lung hem na le ka-na, thohgimna jong umta louhel ding ahi; ajeh chu thil masa chengse kitolmangsoh ahitai,” ati. 5 Laltouna Toupan aseiyin, “Ven ijakai kasemthahsoh ahitai,” ati. Chujongle aseiyin, “Hicheng thu hi tahsan umtah, thutah cheh ahi, sunin,” eti. 6 Chuin kajah a, “Akichaitai, Keima Alpha le Omega, akipatna le akichaina kahi, Adang chah a chu hinna twinah a twi don ding manbeiyin penge. 7 koi hile gal jouva chuthil hichengse hi chang ding, keima a-Pathen kahiya, ama kachapa hi ding ahi. 8 Ahin meidoi ho, tahsan bei ho, thet um ho, tolthat ho, jonthanhoi bol ho, doichoi ho, doilim houho, chule jousei ho jouse kath le meikou dil deuje ju sunga chu um siu ahi; hiche hi thi ni na ahiye,” ati.

Jerusalem thah

9 Gamna nukhah sagi dimset, lhengkong sagi choi, Vantil sagi lah a khat chu ahungin kajah a thu aseiyin, “Hungin, Kelngoinou jinu ding mouthah chu setsah inge,” eiti. 10 Hichun Aman Lhagaovin molsang lentah khat chungvuma eilhoh touvin, Pathen kom van’a kona hung kumlha Jerusalema eilhoh touvin, Pathen kom van’a kona hung kumlha Jerusalem khopi theng chu eivetsah-in, 11 Pathen loupi nan akijemin ahi; avahje dan chu song mantam, jasper song le crystal val vah abange. 12 Apal chu lentah le sangtah ahin, kelkot som le ni ahin, kelkot ho chunga hcun Vantil som le ni aumin, chule kelkot ho chungma chun Israel phung som le ni min akisun’e. 13 Nisdo lama kelkot thum, sah lama kelkot thum, lhanglama kelkot thum, nilhum lama kelkot thum aum’e. 14 Khopi pal chu akhombul som le ni ahin, achunga chun Kelngoinou solchah som le ni min akiun’e. 15 Kahenga thuseiya chun khopi le kelkot ho chule apal te-na didng sana tenglhon khat achoiye. 16 khopi chu aning li kitoh a, adung avai kibang, Aman thil te-na tenglhon’a khopi chu ate le, kilometer sang ni le ja ni to som nga asaovin, adung avai, asandol kibangsoh kei ahi. 17 Chuin apal ate le tong ja khat le tong som li le li alhinge; mihem thil te-na chu Vantil’in jong aman ahi. 18 Pal chu jasper song jenga kigen ahin, khopi jeng jong chu phatvet then’a theng, sana thengseh a kisa ahi. 19 Khopi pal khombul song chu khisong mantam jatchom chom’a kijem ahi; khombul masapen chu jasper, ani na sapphire, athumna chalcedony, li lhina emerald, 20 nga lhinna sardonix, gupna sardis, sagi lhina topaz, som na chrysoprase, som le khatna jacinth, som le ni na amethyst song jeng ahi. 21 kelkot som le ni chu twikoh chang jenga kisem ahi, kelkot khat khat chu twikohchang khat cheh akisem ahi; kho pi sung lamlen chu phatvet banga lim kimudoh thei sana thengsel ahi. 22 Pakai Pathen Hatchungnung le Kelngoinou Houin a apantah jeh in kho pi sunga chun Houin kamupoi. 23 Pathen loupe nan asalvah jinga, Kelngoinou chu thaomei vah a apanjeh-in khopi chun asalvah ding nisa le lha jong angai chapoi. 24 Chitin namtin khopi vah a chu vah leuva, leiset leng jousen jong aloupi nau asunga ahinpoh lut diu ahi; 25 jan jong aumchom tah loujeh chunkelkot ho chu sun laiya jong kikhah chom lou ding ahitai. 26 Mihon chitin namtin loupina le jabolna asunga ahinpoh lut diu ahi. 27 Itina ma jong le aboh jouse le thet umtah thilbol’a, jousei ho, khopi sunga chu lut louhel diu, kelngoinou hinna lekhabu sunga amin kisunsa ho chubou lut diu ahi.

Henga Thuphon 22

1 Vantil chun Pathen le Kelngoinou laltouna a kona hungput, crystal song val’a val, hintwilui dung chu eivetsah-e. 2 Luidung chu khopi lamlen lai lunga alongin apang langto gel’a hinthing akeh-in, lhaseh le aga jin jat chom chom ga somle ni aneiye; chujongle athingna ho chu ahitinnamtin boldamna ahi. 3 Gaosap changsa jouse beisoh ding ahi. Khopi sunga chu Pathen le Kelngoinou laltoina bouuma, asoh ten ama ajenle diu, 4 amahon amai amu’va, achalpanguva ama min um ding ahi. 5 Jan jong umta lou didng, thaomei vah le nisa vah jong angaichat louhel diu ahitai; ijeh-inem itile Pakai Pathenin amaho asalvah jing ding, tonsot tonsot geiya lengvai apoh diu ahitai.

Jesu hungvah ding

6 Vantil chun kajah a aseiyin, “Hicheng thu hi tahsan um le thutah jeng ahi, Themgao ho Lhagao Pakai Pathen chun ahungso loi ding thil asohte vetsah dinga a-Vantil ahinsol ahi. 7 “Ven, kahung loi ding ahi. Hiche lekhabua gao thusei ho nit’a chu anunnom ahi,” ati. 8 Thil hicheng jaa mua chu keima John kahi. Kajah a kamu phat’in thil hicheng eivetsah a Vantil chu chibai boh din akengphang bul’a kaboh khuptai. 9 Ahinla aman kajah a aseiyin, “Bol hih-in, keijong nang le nasopite Themgaoho, chule hiche lekhabua thu ho nit ho lah a nasoh natoh khompi khat kahibouve. Pathen bou chibai boh-in,” eiti. 10 Vantil chun kajah a, “Hiche lekhabua gaothu seidoh hi imchah hih hel’in, ajeh chu phat anaitai. 11 Adih lou chun adih lou bol jing hen, aboh a chun thilboh bol jing hen, midih chun thildih bol jing hen, mintheng chu theng jing hen. 12 “Ven, kahungloi ding ahi, mitin atoh dungjui cheh a peh ding keiya tohman chu kahinpoi. 13 Keima Alpha le Omega, amasa le anukhah, akipatna le akichaina kahi,” ati Jesun. 14 Hinna thingga neh theina le khopi kelkot dunga lut le theina dinga avon’u kisop theng ho chu anun nom’ui. 15 Uicha ho le doichoi ho, jonthanhoi bol ho, tol that ho, doilim semthu hou ho, chule jouva thilbol nom jouse polama um diu ahiye. 16 “Keima Jesun hicheng thu hi Houbunga um nang ho hettohsah dinga ka-Vantil kahinsol ahi; Keima David Jungpi, achilhah, jingvalpa vahtah chu kahi,” ati. 17 Lhagao le Mouvin, “Hungin,” ati. Ajapha chanin, “Hungin,” ti hen. Adangchah chan hungun; angaicha chanin hinna twi chu manbeiyin kilah hen. 18 Hiche lekhabua gao thuseidoh ho japha jouse henga kahettohsah ahi: koi hile hicheng belap a aum le, hiche lekhabua kisei gamna ho chu Pathenin achunga abelap peh ding, 19 hiche gao thusei hoa kona alamanga aum jongle, hiche lekhabua kisei Khopi Theng le hinna thingphunga kona Pathenin achan alahmang ding ahi. 20 Hiche thu hettohsah pan, “Henge, kahungvah ding ahi,” ati. Amen Vo Pakai Jesu hungin! 21 Pakai Jesu milungset’in mitin umpi jing hen!