1 ऒरे नू कत्था रहचा, अरा आ कत्था धर्मेस गने रहचा, अरा आ कत्था धर्मेस रहचस। 2 आस ऒरे तिम धर्मेस गने रहचस। 3 उर्मी आलॊ आसी तिम गढ़रा, अरा गढ़्रका ती ओन्टा हूँ आसी बिगर मल्ला गढ़्रका। 4 अरा गढ़्रका ओर्मा तंग्है उज्जनन आसी ती ख़क्खिया, अरा आसी उज्जना ओर्मर गे बिल्ली चिच्चा। 5 अरा आ बिल्ली ऊख़ा नू बिल्ची, अरा ऊख़ा अदिन तेभ'आ पुल्ली। 6 धर्मेस ती तइय्का ओर्तोस रहचस, आस यॊहन नूड़रत'उस। 7 आस आ बिल्ली ही पत्त नू गोवाह चि'आ गे ओन्टा गोवाह लेक्खा बरचस, औंगे ओर्मर आस ती पत्त'आ ओंगोर नेकअन। 8 आस गा तान आ बिल्ली मल रहचस, लिकिन आस आ बिल्ली ही पत्त नू गोवाह चि'आ गे लेका बरचस। 9 एकास मानी बिल्ली र'अदस, आस ओर्मर गे बिल्ली चि'अदस, आस अक्कु ख़ॆख़ेल नू बर'आ लगियस। 10 आस ख़ॆख़ेल नू रहचस। अरा ख़ॆख़ेल आस तिम गढ़रा, अन्नु हूँ ख़ॆख़ेल आसिन मल चिन्हचा। 11 आस तंग्है आलर गुसन बरचस, अन्नु हूँ तंग्है आलर आसिन मल इंझ्रर। 12 लिकिन जेतेक आलर आसिन इंझ्रर अरा आसी नू पत्ताचर, अबड़ा ओर्मर गे आस धर्मेसी ख़द्द मना गे अदिया चिच्चस। 13 आर अयंग-बंग ती, महले मॆद ही मने ती, महले मॆत-मुक्का ही मने ती धर्मेसी ख़द्दर मल मंजर, लिकिन धर्मेस तंग्है मने ती आरिन तंग्है ख़द्दर कमचस। 14 अक्कु आ कत्था आल मंजस ती मया दरा मानिम ती निंद्रका ती नम्है मझी नू उज्जियस। अरा नाम आसी महबन ईरकत, आद धर्मे बंगासी ओर्त लेका ख़द्दासी महबा ही जोक्खा महबा दिम रहचा। 15 यॊहनस आसी पत्त नू गोवाह चिच्चस अरा चिच्चियारस ती बाचस, “नॆख'आ पत्त नू ऎन बाचकन, आस ईसिम हिकदस, आस एंग्है ख़ॊख़ा बरदस, लिकिन एंग्है ती कोहँस र'अदस, एन्देरगेका आस एंग्है ती मुन्द दिम रहचस।” 16 अरा आसी मया ही निंद्रका ती नाम ओर्मत आसीस ही मइय्याँ आसीस ख़क्खकादत। 17 एन्देरगेका धर्मेसी पॆसका मूसस ती चीतारा, लिकिन मया अरा मानिम येसु मसीस ती बरचा। 18 धर्मेसिन इकला हूँ नॆ हूँ मल ईरकानर। धर्मे बंगासी जिया हेद्दे र'ऊ आसी ओर्त लेका ख़द्दस धर्मेस, धर्मेसिन नमा गे दहदर नंजकादस। 19 येरुसलॆम ता यहूदीर नैगारिन अरा लेवी गोतोर ता आलारिन “नीन एका ओर्तय?” एन्ने मेना गे यॊहनस गुसन तइय्यर। 20 आ बारी यॊहनस एन्ने गोवाह चिच्चस, अरा मल नुड्रस ती आस मानिम गने तेंगरस, “ऎन मसीस मलदन।” 21 ख़ने आर आसिन मेंजर, “होले नीन एका ओर्तय? नीन धर्मेसी कत्था तिंगू एलियस हिकदय का?” यॊहनस बाचस, “ऎन एलियस मलदन।” अरा आर अउरिम मेंजर, “नीन बर'ऊ र'अदस आ धर्मेसी कत्था तिंगू हिकदय का?” आस बाचस, “मला।” 22 ख़ने आर बाचर, “होले नीन एका ओर्तय? नॆ एमन तइय्कानर आरिन एन्देर तेंगोम? निंग्है पत्त नू एन्देर ब'अदय?” 23 यॊहनस आरिन धर्मेसी कत्था तिंगू यसायासी बाचका कत्थन आनाकिर्ताचस, “ऎन उर्बस गे डहरेन चत्र'आ एन्ने टोड़ंग नू चिच्चियारना सड़ा हिकदन।” 24 फेन तइय्का रहचका जोक्क फरिसीर यॊहनसिन मेंजर, 25 “नीन मसीस मलदय, महले एलियस मलदय, महले बर'ऊ र'अदस आ धर्मेसी कत्था तिंगू मलदय होले, नीन एन्देरगे आलारिन नॊड़रत'अदय?” 26 ख़ने यॊहनस आनाकिर्ताचस, “ऎन गा अम्मु ती नॊड़रत'अदन, लिकिन निम्है मझी नू इसन ओर्तोस र'अदस, आसिन नीम बलदर। 27 आस एंग्है ख़ॊख़ा बर'ऊ र'अदस, लिकिन ऎन आसी खरपन इँचना ही हूँ जॊगे मलदन।” 28 इबड़ा ओर्मा कत्था यरदन ख़ाड़ ही पुरुब तरा बेतानिया पद्दा नू मंजा, असन दिम यॊहनस आलारिन नॊड़रत'आ लगियस। 29 दोसर उल्ला यॊहनस येसुसिन तंग्है तरा बरना ईरयस ती बाचस, “ऎरा, ईस धर्मेसी भेंडो ख़द्दो, ईस दिम सौंसार ही पापन ओथ्र'ओस। 30 ईस आसिम हिकदस, ईसी पत्त नुम ऎन निमन बाचका रहचकन का, ‘आस एंग्है ख़ॊख़ा बरदस, लिकिन एंग्है ती कोहँस र'अदस, एन्देरगेका आस एंग्है ती मुन्द तिम रहचस।’ 31 ऎन आसिन बल्ला लिक्कन, लिकिन आस इस्राऎल आलर गे दहदर मना गे दिम ऎन अम्मु ती नॊड़रत'आ गे बरचकन।” 32 फेन यॊहनस गोवाह चिच्चस, “ऎन नेम्हा बॊलतन मेर्ख़ा ती पेरवाँ लेक्खा एत्तना अरा आस मइय्याँ ओक्कना ईरकादन। 33 ऎन हूँ आसिन बल्ला लिक्कन। लिकिन एंगन नॆ अम्मु ती नॊड़रत'आ गे तइय्यस, आसिम एंगन बाचस ‘नीन नॆख'आ मइय्याँ नेम्हा बॊलतन एत्तना अरा ओक्कनन ऎरोय, आसिम नेम्हा बॊलतस ती नॊड़रत'ओस।’ 34 इदन ऎन ईरकन, अरा गोवाह चि'अदन का ईस दिम धर्मेसी ख़द्दस।” 35 दोसर उल्ला अउरिम यॊहनस तंग्है चेलर ती इरबर गने असानिम रहचस। 36 अरा यॊहनस येसुसिन काना ईरियस ती बाचस, “ऎरा, ईस धर्मेसी भेंडो ख़द्दो।” 37 अबड़ा ऎंड़ चेलर आसी कत्थन मेंजर ती येसुस गने चॊंख़्रर। 38 येसुस किर्रिईरियस ती आरिन तंग्है गने चॊंख़्रनन ईरियस ती आरिन बाचस, “नीम एन्द्रन बेद्ददर?” आर आसिन बाचर, “अना रब्बी! नीन एसन र'अदय? (‘रब्बी’ ही मने ‘गुरु’।)” 39 येसुस आरिन बाचस, “बरा, ख़ने नीम ऎरोर।” ई बेड़ा मलागूटी पुतबारी चार बजे रहचा। आस एसन र'अदस अदिन आर केरर ती ईरियर, अरा अउला आर आसी गने रहचर। 40 यॊहनसी कत्थन मेंजर ती येसुस गने चॊंख़्रका आर ती ओर्तोस सिमॊन पतरसी भइय्योस अन्द्रेयस रहचस। 41 अन्द्रेयस मुन्द तंग्है भइय्योस सिमॊनस गने भेंट मंजस ती बाचस, “ऎम मसीसिन ख़क्खकादम। (मसीसिन ‘ख़्रिसतोस’ एन्ने हूँ ब'अनर।)” 42 अरा आस सिमॊनसिन येसुस गुसन होच्चस। येसुस आसिन ईरियस ती बाचस, “नीन यॊहनसी तंग्दय सिमॊन हिकदय। नीन ‘कॆफास’ बार'ओय। (कॆफासिन ‘पतरस’ एन्ने हूँ ब'अनर।)” 43 दोसर उल्ला येसुस गलिलेया जिला काला गे बिद्दियस। अरा आस फिलिप्पोसिन ख़क्खियस ती आसिन बाचस, “एंग्है गने चॊंख़्र'आ।” 44 फिलिप्पोस गा अन्द्रेयस अरा पतरसी नगरे बॆतसैदा ता रहचस। 45 फिलिप्पोस नतनऎलसिन ख़क्खियस ती बाचस, “नॆख'आ पत्त नू मूसस नॆग नू लिखचकादस अरा धर्मेसी कत्था तिंगुर हूँ लिखचकानर, आसिन ऎम ईरकम। आस यॊसॆफसी तंग्दस नासरेत पद्दा ता येसुस दिम हिकदस।” 46 लिकिन नतनऎलस फिलिप्पोसिन बाचस, “नासरेत हिके का! नासरेत ती एकअम बॆस बर'आ ऊंगी का?” फिलिप्पोस बाचस, “बरा ती ऎरा।” 47 येसुस नतनऎलसिन तंग्है तरा बरनन ईरियस ती आसी पत्त नू बाचस, “ऎरा, ईस ओन्टा मानिम इस्राऎल आलस, ईसी नू कुटमुटरना मलकी।” 48 नतनऎलस येसुसिन बाचस, “नीन एंगन एकासे अख़दय?” येसुस आनाकिर्ताचस, “फिलिप्पोस निंगन मॆख़ना ती मुन्द अंजीर मन्न मूली नू रहचकय ख़ने, निंगन ईरकाचकन।” 49 नतनऎलस आसिन आनाकिर्ताचस, “अना गुरु! नीन धर्मेसी ख़द्दय! नीन इस्राऎल ही बॆलय!” 50 येसुस आसिन आनाकिर्ताचस, “ऎन निंगन बाचकन, ‘ऎन निंगन अंजीर मन्न मूली नू ईरकन’ ख़ने नीन एंगन पत्त'अदय का? नीन इदिन ती हूँ कोहाँ कोहाँ नलखन ऎरोय।” 51 येसुस एन्ने हूँ बाचस, “ऎन निमन मानिमन ब'अदन, नीम मेर्ख़न तिसगरका अरा धर्मेसी पैकारिन मेर्ख़ा अरा ख़ॆख़ेल ही मझी नू अड़ार लेक्खा मनवा ख़द्दन एंगा मइय्याँ अरगनन अरा एत्तनन ऎरोर।”
1 अक्कुन तिसर उल्ला गलिलेया जिला ही काना नामे पद्दा नू बेंजा रहचा। येसुसी तंग्यो असन रहचा। 2 येसुस अरा आसी चेलर हूँ आ बेंजा नू एड़रका रहचर। 3 अंगुर रासी मुंज्रा ख़ने, येसुसी तंग्यो आसिन बाचा, “ईर ही गुसन अंगुर रासी मुंज्रा।” 4 ख़ने येसुस अदिन बाचस, “अनय आली! इदिन एंगन एन्देरगे तेंगालदी? अक्कुन एंग्है बेड़ा अरगी अंड़सा।” 5 आसी तंग्यो जॊंख़ारिन बाचा, “आस निमन एन्देर नना आनोस, अदिन ननके।” 6 असन यहूदीर ही चाल लेक्खा सुध मना गे पखना ही छै गोटंग अम्मु उइय्ना कुंड़ा गुट्ठी उइय्का रहचा। उर्मी कुंड़ा नू पछत्तर ती ओन सौ पन्द्रा लिटर अम्मु सम'आ लगिया। 7 येसुस आ जॊंख़ारिन बाचस, “कुंड़ा गुट्ठी नू अम्मु नीदा चि'आ।” अन्नेम जॊंख़र अबड़ा नू छलछलरना निंदर चिच्चर। 8 फेन येसुस आरिन बाचस, “अक्कु कटिक ओथ्र'आ ती मदी ही मुद्धस गुसन हो'आ।” आर अन्नेम अदन होच्चर। 9 मदी ही मुद्धस अंगुर रासी मंज ख़च्चकी रहचा आ अम्मन उंडी ईरियस। आस बल्ला लगियस का आ अंगुर रासी एसले बरचा, लिकिन एका जॊंख़र अम्मु ओथ्रका रहचर आर इदन अक्खर। मदी ही मुद्धस बेंजा जॊंख़ासिन मीख़ियस, 10 अरा आसिन बाचस, “ओर्मर मुन्द बने अंगुर रासिन चि'अनर, अरा ओंडका ती उड़चका ख़ॊख़ा सिठारका अंगुर रासिन चि'अनर। लिकिन नीन अक्कुन गूटी बने अंगुर रासिन उइय्कादय।” 11 ईद दिम येसुस नंजका पहिल अजगुत नलख ही चिन्हा हवे। इदन आस गलिलेया जिला ही काना पद्दा नू नंजस। ई लेक्खा आस तंग्है महबन ऎदस। अरा आसी चेलर आसी नू पत्ताचर। 12 इदही ख़ॊख़ा येसुस तंग्यो अरा तंग्है भईर अरा तंग्है चेलर गने कफरनहूम नगरे केरस, अरा असन आर जोक्क उल्ला रहचर। 13 यहूदीर ही कट्टना ही परब हेद्दे अंड़सिया ख़ने, येसुस येरुसलॆम केरस। 14 अरा आस धर्मेसी मन्दिर ही चाली नू दाँड़े गुट्ठी गे अड्डो, भेंडो, अरा पेरवाँ गुट्ठिन बीसू आलारिन अरा रोमी राजी ता ढिबन धर्मेसी मन्दिर ही ढिबा नू बदलना आलारिन उक्का ईरियस। 15 ख़ने आस ऎप ही कोर्रा कमचस ती भेंडो अरा अड्डो गुट्ठी गने उर्मिन धर्मेसी मन्दिर ही चाली ती बहरी ओथ्रस चिच्चस। अरा रोमी राजी ही ढिबन धर्मेसी मन्दिर ही ढिबा नू बदलना आलर ही ढिबा गुट्ठिन छिरयाचस चिच्चस, अरा आर ही कंडो गुट्ठिन बिड़दाचस चिच्चस। 16 अरा पेरवाँ गुट्ठी बीसुरिन बाचस, “इबड़न इसले हो'आ, एम्बासी एड़पन ख़ीन्दू-पिटू अड्डा अमा कम'आ।” 17 ख़ने आर ही चेलर गे “निंग्है एड़पा ही पत्त ता एंग्है चोन्हा एंगा नू चिच्ची बेसे ऊली” एन्ने नेम्हा पुथी नू लिख्रका कत्था सुरता बरचा। 18 ख़ने यहूदी मुद्धर येसुसिन मेंजर, “इबड़ा कत्थन नीन नना गे निंगा एन्देर अदिया र'ई? निंगा इदगे धर्मेस ती अदिया र'ई होले, इदन पुरुब नना गे एमा ओन्टा अजगुत नलख ही चिन्हा ऎद'आ।” 19 येसुस आनाकिर्ताचस, “ई धर्मेसी मन्दिर आबोन धंस'आ चि'आ, ऎन इदन तीन उल्ला नू कम'ओन चि'ओन।” 20 ख़ने आर बाचर, “एन्द्रा! ई धर्मेसी मन्दिर गा छियालिस बछर नू कम्मरा, नीन इदन तीन उल्ला नू कम'ओय का?” 21 लिकिन येसुस गा तंग्है मॆद मन्दिर ही पत्त नू ब'आलियस। 22 येसुसी ई बाचका कत्था येसुस केचका ती उज्जा चॊचका ख़ॊख़ा आसी चेलर गे सुरता बरचा। अरा आर नेम्हा पुथिन अरा येसुसी बाचका कत्थन पत्ताचर। 23 येसुस कट्टना परब बारी येरुसलॆम नू रहचस ख़ने, ढ़ॆर आलर आसी ती मंजका अजगुत नलख ही चिन्हा गुट्ठिन ईरियर ती आसी नू पत्ताचर। 24 लिकिन येसुस आरिन मल पत्ताचस, एन्देरगेका आस उर्मी आलारिन अक्खस। 25 आस गे चाड़ मल रहचा का नीकईम आसिन आलर ही पत्त नू तेंगोर, एन्देरगेका आस तानिम अक्खस का आलर ही जिया नू एन्देर र'ई।
1 फरिसीर ती निकोदॆमोस नामे ओन्टा आलस रहचस। आस ओन्टा मुध यहूदीर ही मुद्धस रहचस। 2 आस उन्दुल माख़ा येसुस गुसन बरचस ती बाचस, “अना गुरु, ऎम अख़दम का नीन धर्मेस तरती बरचका ओन्टा गुरु हिकदय। एन्देरगेका नीन नन्दय आ अजगुत नलख ही चिन्हा गुट्ठिन नॆ हूँ नना पोल्लोस, एका गूटी धर्मेस आस गने मल र'अदस।” 3 येसुस आसिन आनाकिर्ताचस, “ऎन निंगन मानिमन ब'अदन, नीकईम अउरिम मल कुन्द्रदस, आस धर्मेस तंग्है उज्जना नू राजी नन्नन अनुभव मल ननोस।” 4 निकोदॆमोस बाचस, “एन्द्रा! ओर्तोस पच्का केरका ती आस एकासे अउर कुन्द्र'आ ओंग्दस? आस अयंग ही कोख नू अउरिम कोरदस ती कुन्द्र'आ ओंग्दस का?” 5 येसुस आनाकिर्ताचस, “ऎन निंगन मानिमन ब'अदन, नीकईम अम्मु अरा बॊलतस ती मल कुन्द्रदस, आस धर्मेस तंग्है उज्जना नू राजी नन्नन अनुभव मल ननोस। 6 कया कया ही उज्जनन लेका कुन्द्रत'आ ऊंगी, लिकिन नेम्हा बॊलतस बॊलता ही उज्जनन कुन्द्रत'अदस। 7 निमा अउरिम कुन्द्रना चाड़ र'ई, एन्ने ऎन बाचकन। नीन अदही पत्त नू अमा अकबकरा। 8 ताका एका तरा बिद्दी अत्रम तागर'ई। अरा नीन अदही सड़न मेन्दय, लिकिन एका तरती बर'ई अरा एका तरा क'ई अदिन बलदय। औंगे नेम्हा बॊलतस ती कुन्द्रका ओर्मर ही कुन्द्रना एन्नेम र'ई।” 9 ख़ने निकोदॆमोस मेंजस, “ईद एकासे मना उंगी?” 10 येसुस आसिन बाचस, “नीन इस्राऎल नू ओन्टा मुध गुरु र'अदय, अन्नु हूँ इबड़ा कत्थन नीन मल बुझ्रदय का? 11 ऎन निंगन मानिमन ब'अदन, ऎम अख़दम अदिनिम ब'अदम, अरा ईरकादम अदही पत्त नू गोवाह चि'अदम, लिकिन नीम एम्है गोवाह आबोन मल इंझ्रदर। 12 ऎन निमन ख़ॆख़ेल ता कत्थन तिंकन अदिन नीम मल पत्त'अदर, लिकिन ऎन निमन मेर्ख़न ता कत्थन तेंगोन होले, नीम एकासे पत्त'ओर? 13 मेर्ख़ा ती इत्तका मनवा ख़द्दस एंगन अम्बरकी नॆ हूँ मेर्ख़ा नू मल अरगनर। 14 अरा एकासे मूसस टोड़ंग नू नेर्रेन खुटा नू टंगचस, आ लेक्खम मनवा ख़द्दन ऎन हूँ मइय्याँ अरगतारना ही चाड़ र'ई। 15 औंगे नॆ मनवा ख़द्दन एंगा नू पत्त'अनर, आर ओर्मर जनमजुग उज्जनन ख़क्खोर। 16 धर्मेस गा ख़ॆख़लन एन्ने कोड़हे चोन्हा नंजस का आस तंग्है ओर्त लेका ख़द्दासिन चिच्चस। औंगे एकार आस नू पत्त'अनर आर मल नठार'ओर, लिकिन जनमजुग ही उज्जनन ख़क्खोर। 17 धर्मेस तंग्दासिन ख़ॆख़ेल नू ख़ॆख़लन नेंवई नना गे मल तइय्यस, लिकिन आस ती ख़ॆख़लन नाड़ा गे तइय्यस। 18 नॆ धर्मेसी ख़द्दस नू पत्त'अदस, आस गे दंडे ही नेंवई मल मनी। लिकिन नॆ आस नू मल पत्त'अदस, आस गे दंडे ही नेंवई मंज ख़च्चकी र'ई, एन्देरगेका आस धर्मेसी ओर्त लेका ख़द्दासी नामे नू मल पत्त'अदस। 19 आर गे दंडे ही नेंवई ही चड्डे ईद दिम का, बिल्ली ख़ॆख़ेल नू बरचा, लिकिन आलर बिल्ली ती कोड़हे ऊख़न पत्तारर, एन्देरगेका आर ही नलख गुट्ठी मलदौ रहचा। 20 मलदौ नलख ननू ओर्मर बिल्लिन ख़ाँड़नर, अरा बिल्ली नू मल बरनर, एन्देरगेका तम्है मलदौ नलख गुट्ठी दहदर मनो अदगे एल्चनर। 21 लिकिन नॆ मानी गने उज्जनर, आर बिल्ली हेद्दे बरनर, अत्रु ईद दहदर मनी का आर ही नलख धर्मेस ती मंजकी र'ई।” 22 इदही ख़ॊख़ा येसुस अरा आसी चेलर यूदेया चकभार नू बरचर। असन आस जोक्क उल्ला आर गने रहचस, अरा आलारिन नॊड़रत'आ लगियस। 23 यॊहनस हूँ सलेम ही हेद्दे ऐनॊन ख़ाड़ नू नॊड़रत'आ लगियस, एन्देरगेका असन बग्गे अम्मु रहचा, अरा आलर नॊड़र'आ गे बरतेम र'आ लगियर। 24 (ईद यॊहनसिन जेहेल नू सजना ती मुन्द मंजकीचा।) 25 यॊहनसी चेलर अरा ओन्टा यहूदी ही मझी नू चाल ही सुध मन्ना ही पत्त नू आनानखरना मंजा। 26 अरा यॊहनसी चेलर यॊहनस गुसन बरचर ती बाचर, “अना गुरु, एका ओर्तोसिन नीन यरदन ख़ाड़ ही पुरुब तरा भेंट मंजकय, अरा आसी पत्त नू नीन गोवाह चिच्चकय, आस हूँ आलारिन नॊड़रत'अदस, अरा ओर्मा आलर आस गुसन कानर।” 27 यॊहनस आनाकिर्ताचस, “नॆ हूँ एन्द्रन हूँ मल ख़क्खनर, एका गूटी धर्मेस मेर्ख़ा ती अदिन मल चि'अदस। 28 ‘ऎन ‘मसीस’ मलदन, लिकिन आस गे डहरेन चत्र'आ गे तइरका आलन हिकदन’ एन्ने ऎन बाचका रहचकन, अदगे नीम दिम एंगा गे गोवाह र'अदर। 29 बेंजा पेल्लो बेंजा जॊंख़सी दिम हवे। लिकिन बेंजा जॊंख़ासी संगेस गा आसी हेद्दे इज्जदस ती आसी कत्थन मेन्दस। आस बेंजा जॊंख़ासी कत्थन मेन्दस ती नगदे रिझ्रदस। एंग्है रिझ एन्ने दिम हवे। आद अक्कु पुरचा। 30 अरा चाड़ र'ई का आस कोहाँ मन्नुम काना र'ई, अरा ऎन सन्नी मन्नुम ती काना र'ई।” 31 मइय्याँ ती बर'उस ओर्मर ती कोहँस दिम र'अस। अरा ख़ॆख़ेल ती बर'उस ख़ॆख़ेलतस हिकदस। आस ख़ॆख़ेल ता कत्था गुट्ठिन कछनख्रदस। लिकिन मेर्ख़ा ती बर'उस ओर्मर ती कोहँस दिम र'अस। 32 आस एन्द्रन ईरकादस अरा मेंजकादस अदही पत्त नू गोवाह चि'अदस। लिकिन आसी गोवाह आबोन नॆ हूँ मल पत्त'अनर। 33 नॆ आसी गोवाह आबोन पत्त'अदस, आस धर्मेस मानिम जॊगे र'अदस एन्ने ऎदस। 34 नॆकन धर्मेस तइय्कादस, आस धर्मेसी कत्था गुट्ठिन ब'अदस, एन्देरगेका धर्मेस आस गे नेम्हा बॊलतासिन बिगर नपदस जोक्खदस ती चि'अदस। 35 बंगस तंग्दासिन चोन्हा नन्दस, अरा उर्मिन आसी ख़ेक्खा नू सोंपचकादस। 36 नॆ धर्मेसी ख़द्दस नू पत्त'अदस, आस गे जनमजुग उज्जना र'ई। लिकिन नॆ धर्मेसी ख़द्दासिन मल मन्दस, आस आ उज्जनन मल ख़क्खोस, एन्देरगेका धर्मेसी खींस आसी मइय्याँ र'ई।
1 - 3 येसुस यॊहनस ती बग्गे आलारिन चेला कमदस अरा नॊड़रत'अदस, एन्ने फरिसीर मेंजर, अदन येसुस अक्खस। ख़ने आस यूदेया जिला आबोन अम्बियस ती गलिलेया जिला किर्रिम बिच्चियस। (येसुस तान मला, लिकिन आसी चेलर नॊड़रत'आ लगियर।) 4 आस गे समारिया राजी नू मन्नुम काना रहचा। 5 ख़ने आस समारिया राजी ता सुख़ार नामे पद्दा नू बरचस। ई पद्दा याकॊबस तंग्दस यॊसॆफस गे चिच्का ख़ल्ल गुसन रहचा। 6 आ ख़ल्ल नू याकॊबसी तूसा रहचा। येसुस डहरे इक्कियस ती ख़ड़दिकाचस, औंगे असन उक्कियस। ईद मलागूटी लोहाड़ी ही बेड़ा बारा बजे रहचा। 7 - 8 येसुसी चेलर ओन्ना-मॊख़ना ख़ॆन्दा गे पद्दा नू केरका रहचर। आ बारी ओन्टा समारिया ता आली अम्मु ओन्द्र'आ बरचा। येसुस अदिन बाचस, “एंगा अम्मु ओना गे चि'ई।” 9 समारिया ता आली आसिन बाचा, “एन्द्रा! नीन यहूदी आलय, अरा ऎन गा समारिया ता आली। एकासे नीन एंग्है गुसते ओना गे अम्मु ने'अदय?” (एन्देरगेका यहूदीर समारिया ता आलर गने मल ओक्कनर इज्जनर।) 10 येसुस अदिन आनाकिर्ताचस, “धर्मेसी चि'अना इनामन अरा नॆ निंगन ‘एंगा ओना गे अम्मु चि'ई’ एन्ने ब'अदस, अदिन नीन अक्का होले, नीनिम एंग्है गुसते अम्मु ने'ओय दने। अरा ऎन निंगा गे उज्जना चि'ऊ अम्मन चिच्का र'ओन दने।” 11 ख़ने आ आली आसिन बाचा, “अना उर्बायो, निंग्है गुसन अम्मु नीदा गे एन्द्रा हूँ मल्ला, अरा तूसा हूँ ख़ोड़ख़ा र'ई, होले उज्जना चि'ऊ अम्मु नीन एसले ख़क्खोय? 12 नीन एम्है पूरखस याकॊबस ती हूँ कोहँस हिकदय का? आस एमा गे ई तूसन चिच्कादस। आस तान अरा तंग्है ख़द्दर अरा ऒय ऎड़ा गुट्ठी इय्या ती ओन्डर।” 13 येसुस बाचस, “नॆ ई अम्मन ओन्दस आस फेन ओनक'आ सार'ओस। 14 लिकिन नॆ एंग्है चि'अना अम्मन ओन्दस आस फेन इकला हूँ ओनक'आ मल सार'ओस। एका अम्मन आस गे ऎन चि'अदन, आद आस नू ओन्टा पझरा फुटना ती जनमजुग उज्जनन चि'ओ।” 15 आ आली आसिन बाचा, “उर्बायो, आ अम्मन एंगा चि'आ का, ऎन ओनक'आ मल सार'ओन, अरा इसन एंगा अम्मु ओन्द्र'आ बर'आ गे मल लग्गो।” 16 येसुस अदिन बाचस, “कलय, निंग्आलासिन इसन मॆख़य ओन्द्र'अय।” 17 आ आली आनाकिर्ताचा, “एंग्हा मॆतस मलकस।” येसुस अदिन बाचस, “ठउकम ब'अदी, बिगर मॆत ही र'अदी। 18 निंगा गा पाँच गोटंग मॆतर रहचर, लिकिन अक्कुन नीन नॆख'आ गने उज्जालदिन आस हूँ निंग्है मॆतस मलदस। नीन एन्द्रन बाचकय आद मानिम हवे।” 19 आ आली बाचा, “उर्बायो! अक्कु ऎन अख़दन का नीन ओन्टा धर्मेसी कत्था तिंगू हिकदय। 20 एम्है पूरखर गा ई परता नू धर्मेसी महबा नंजर, अरा नीम यहूदीर ब'अदर का, धर्मेसी महबा नन्ना अड्डा येरुसलॆम नगरे लेका र'ई।” 21 येसुस अदिन बाचस, “अनय आली! एंग्है कत्थन पत्त'अय, बेड़ा बर'आली, आ बारी नीम धर्मे बंगासिन ई परता नू हूँ मला महले येरुसलॆम नगरे नू हूँ मल महबा ननोर। 22 नीम समारिया ता आलर मानिम नू बलदर, नॆकन महबा नन्दर, अरा ऎम यहूदीर अख़दम, नॆकन महबा नन्दम, एन्देरगेका नाड़रना यहूदीर ती बर'ई। 23 लिकिन बेड़ा बर'आली, अरा अक्कुन बरचकी र'ई। मानी ती महबा ननू आलर, आ बारी तम्है बॊलता गने अरा मानी जिया ती धर्मे बंगासिन महबा ननोर। धर्मे बंगस एन्नेम महबा ननुरिन बेद्ददस। 24 धर्मेस बॊलतस हिकदस, औंगे नॆ आसी महबा नन्नर, आर गे तम्है बॊलता गने अरा मानी जिया ती आसी महबा नन्ना र'ई।” 25 आ आली येसुसिन बाचा, “ऎन अख़दन का ‘ख़्रिसतोस’ एन्ने बारना ‘मसीस’ बर'आ लगदस। आस बरदस ख़ने, एमन उर्मी कत्थन फरीफरी तेंगोस चि'ओस।” 26 येसुस अदिन बाचस, “निंग्है गने कछनख्र'ऊ ऎन दिम आस हिकदन।” 27 आ बारिम आसी चेलर किर्रियर बरचर अरा आसिन ओन्टा आली गने कछनख्रनन ईरियर ती अनचकरर। अन्नु हूँ नॆ हूँ मल मेंजर का नीन एन्देर बेद्ददय? महले नीन ई आली गने एन्देरगे कछनख्रदय? 28 आ आली अम्मु कट्टुन अम्बिया ती पद्दा नू केरा ती आलारिन बाचा, 29 “बरा, एंग्है नंजका उर्मी कत्थन एंगा तिंका ओर्त आलासिन ऎरा! आस मसीस र'ओस दने का?” 30 ख़ने आर पद्दा ती उरखर ती येसुस गुसन बर'आ हेलरर। 31 इदही मझी नू चेलर आसिन मेनालियर, “गुरु, ओंदा कटइकेम मॊख़ा।” 32 लिकिन येसुस आरिन बाचस, “एंग्है गुसन मॊख़ा गे ओन्ना-मॊख़ना र'ई, अदही पत्त नू नीम बलदर।” 33 ख़ने चेलर ताम तामिम कछनख्र'आ हेलरर, “ईस गे नीकईम इन्द्रिइम ओन्ना-मॊख़ना चिच्का र'ओर दने का?” 34 ख़ने येसुस बाचस, “नॆ एंगन तइय्कादस आसी मने लेक्खा नन्ना, अरा आसी नलखन मुंजना ईदिम एंग्है ओन्ना-मॊख़ना हवे। 35 नीम ब'आ ओंग्दर का, अक्कु ख़ॊया गे चार महिना गूटी र'ई। लिकिन ऎन निमन ब'अदन, ख़न्नन चलख़ा ती ख़ल्ल गुट्ठिन ऎरा, अक्कुन अबड़ा ख़ॊया गे पंज ख़च्चकी र'ई। 36 एकासे ख़ुयू आलस तंग्है भूतिन ख़क्खदस ती खेतिन सकल'अदस, अन्नेम धर्मेसी नलख ननुस जनमजुग उज्जना गे आलारिन सकल'अदस। औंगे चाँख़'उस अरा ख़ुयुस संगे मेस्र'ओर ती खुसमार'ओर। 37 इसन ई ब'अना ठौका जोक्खा उक्की, ‘ओर्त आलस चाँख़दस अरा नन्ना आलस ख़ोयदस।’ 38 एका अइय्या नीम मल चाँख़कर, अइय्या ऎन निमन ख़ॊया गे तइय्कन। नन्नर अइय्या तम्है नलखन नंज ख़च्चिकाचर, अरा आर ही अर्जाचका ख़ंजपन नीम ख़ोय'ओर।” 39 एंग्है नंजका उर्मी कत्थन आस एंगा तिंग्गियस, एन्ने आ आली चिच्का गोवाह ती, आ पद्दा ता बग्गे समारिया ता आलर येसुसिन पत्ताचर। 40 समारिया ता आलर आसी गुसन बरचर ख़ने, आर आसिन तम्है गुसन र'आ गे गोहरारर। ख़ने आस असन ऎंड़ उल्ला रहचस। 41 ढ़ॆर बग्गे आलर आसी कत्थन मेंजर ती आसिन पत्ताचर। 42 अरा आर आ आलिन बाचर, “ऎम आसिन पत्ताचकम, निंग्है बाचका ती लेका मला, अक्कुन ऎमिम मेंजकम अरा अक्कम होच्चकम मानिम नू ईसिम गोट्टा ख़ॆख़ेल ही नाड़ुस हिकदस।” 43 ऎंड़ उल्ला ख़ॊख़ा येसुस असले गलिलेया केरस। 44 (येसुस तानिम बाचकाचस का धर्मेसी कत्था तिंगुस तंग्है पद्दा नू मान मरजात मल ख़क्खदस।) 45 आस गलिलेया नू बरचस ख़ने, गलिलेया ता आलर आसिन परघाचर। एन्देरगेका आर कट्टना परब नू येरुसलॆम नू रहचकाचर, अरा येसुस अइय्या नंजका उर्मिन ईरका रहचर। 46 फेन ओंग्होल येसुस गलिलेया ही काना पद्दा केरस, एसन आस अम्मन अंगुर रासी कमचका रहचस। असन बॆलासी ओन्टा मुध आलस रहचस, आसी तंग्दस कफरनहूम नगरे नू बेमार खत्रकाचस। 47 येसुस यूदेया ती गलिलेया बरचकादस एन्ने आस मेंजस ख़ने, आसी गुसन केरस ती गोहरारस का नीन बर'अरकी एंग्दासिन कोड़े नना, आस खे'आ बिद्दियस। 48 ख़ने येसुस आसिन बाचस, “नीम गा चिन्हा अरा अजगुत नलख गुट्ठिन बिगर ईरका इक्ला हूँ मल पत्त'ओर।” 49 ख़ने आ बॆलासी मुध आलस येसुसिन बाचस, “उर्बायो, एंग्दासी खे'अना ती मुन्द बरा।” 50 येसुस आसिन बाचस, “कला, निंग्दस उज्जोस।” आ आलस येसुसी कत्थन पत्ताचस ती किर्रिम बिच्चियस। 51 आस डहरेनुम रहचस ख़नेम, आसी जॊंख़र आसिन भेंट मंजर ती बाचर, “निंग्दस कोड़े र'अदस।” 52 आस आरिन मेंजस, “आस एकाबारी कोड़े मना हेलरस।” आर बाचर, “चेरो लोहाड़ी ओन बजे आसी नड़ी तम्मिया केरा।” 53 ख़ने तम्बस अक्खस का आ बारिम येसुस आसिन बाचकाचस, “निंग्है ख़द्दस उज्जोस।” अरा आस अरा आसी उर्मी एड़पातर येसुसिन पत्ताचस। 54 ईद येसुस यूदेया ती गलिलेया बरचका ख़ॊख़ा आस नंजका दोसर अजगुत नलख ही चिन्हा रहचा।
1 इबड़ा ही ख़ॊख़ा येसुस यहूदीर ही ओन्टा परब नू येरुसलॆम केरस। 2 येरुसलॆम नू भेन्ड़ो बकड़े गुसन ओन्टा पोखारी रहचा, अदिन इब्रानी भखा नू “बॆतसता” ब'अनर। अदही ओनबेंड़र'आ पाँच गोटा झला रहचा। 3 इबड़ा नू ढ़ॆर बग्गे रोगियर अन्धहा, लेंगड़ा, ख़ेड्डे-खेक्खा ख़इका आलर बिड़िरका रहचर। अरा अम्मु ही नुक्रनन पाब ऎरा लगियर। 4 एन्देरगेका बेड़ा बेड़ा नू उर्बासी पैकस पोखारी नू एत्ता लगियस ती अम्मुन नुक'आ लगियस, अम्मु नुक्रना गनेम नॆ मुन्द आ पोखारी नू एत्ता लगियस, आस इन्द्रिइम रोगे र'ओस होले हूँ कोड़े मना लगियर। 5 असन ओन्टा आलस बिड़िरका रहचस। आस अड़तिस बछर ती बेमार रहचस। 6 येसुस आसिन बिड़िरका ईरियस, अरा नगदे उल्ला ती एन्ने बिड़िरका दसन अक्खस ती, आसिन मेंजस, “नीन कोड़े मना बेद्ददय का?” 7 रोगे आलस बाचस, “उर्बायो, अम्मु नुक्र'ओ ख़ने, एंगन पोखारी नू एत्त'आ गे नॆ हूँ मल्कर। एंग्है अंड़सना ती मुन्द दिम नन्नर एत्तनर कानर।” 8 ख़ने येसुस आसिन बाचस, “चो'आ, अरा निंग्है पिटरिन चॊद'आ ती ऎका।” 9 आ बारिम आ आलस कोड़े मंजस केरस, अरा तंग्है पिटरिन होच्चस ती कुद्दा नुंगा हेलरस। लिकिन ईद मंजका उल्ला ख़न्न ऎख़ना उल्ला रहचा। 10 औंगे कोड़े मंजका आलासिन यहूदी मुद्धर बाचर, “इन्ना ख़न्न ऎख़्रना उल्ला, औंगे नॆग ही लेक्खा निंगा पिटरिन चॊदना ती काना ठौका मल्ली।” 11 लिकिन आस आरिन बाचस, “नॆ एंगन कोड़े नंजस आस बाचस, ‘निंग्है पिटरिन चॊद'आ ती ऎका।’ ” 12 ख़ने आर आसिन मेंजर, “ ‘निंग्है पिटरिन चॊद'आ ती ऎका’ एन्ने निंगन बाचस, आस नॆ हिके?” 13 कोड़े मंजका आलस बल्ला लगियस का आस नॆ हिकदस। एन्देरगेका असला आलर ही गोंहड़ा ही मारे येसुस असले गुच्छरका केरकाचस। 14 ख़ॊख़ा येसुस आ आलासिन धर्मेसी मन्दिर नू ख़क्खियस ती आसिन बाचस, “ऎरा, नीन कोड़े मंजकादय, अउरिम पाप अमके नना। महले इन्द्रिइम कोड़हे खिलपत निंगा मना ओंगी।” 15 आ आलस केरस ती यहूदी मुद्धारिन तिंगियस का एंगन कोड़े नंजस आस येसुस हिकदस। 16 इबड़ा नलख गुट्ठिन येसुस ख़न्न ऎख़्रना उल्ला नू नंजका ती, यहूदी मुद्धर आसिन डाहा हेलरर। 17 लिकिन येसुस आरिन बाचस, “एम्बस इन्ना गूटी बिगर ख़न्न ऎख़्रका ती नलख नना लगदस, अरा ऎन हूँ नलख नना लगदन।” 18 औंगे यहूदीर आसिन पिटा गे अउर कोड़हे बेद्दा लगियर का आस ख़न्न ऎख़ना उल्ला ही नॆगन लेका मल चाड़ा लगियस, लिकिन धर्मेसिन तंग्है बंगस ब'आलियस ती तंगन धर्मेसी जोक्खा ननालियस। 19 औंगे येसुस आरिन इदन फरीफरी तिंगियस, “ऎन निमन मानिम ब'अदन, ऎन धर्मेसी ख़द्दन एंग्है मने लेक्खा एन्द्रा हूँ नना पोलदन। एन्द्रन एम्बासी नन्नन ऎन ऎरदन अदिन लेका ऎन नन्दन। एन्द्रन एन्द्रन एम्बस नन्दस अदिन ऎन हूँ अन्नेम नन्दन। 20 एम्बस गा एंगन चोन्हा नन्दस, अरा आस एन्देर एन्देर नन्दस अबड़ा उर्मिन एंगा ऎद्ददस। आस इबड़ा ती अउर कोहाँ नलख गुट्ठिन हूँ एंगा ऎद'ओस। होले नीम अनचकर'ओर। 21 एकन्ने एम्बस केचका आलारिन चॊद्दस ती आर गे उज्जना चि'अदस, अन्नेम ऎन हूँ नॆकन ऎन बेद्ददन आर गे उज्जना चि'अदन। 22 एम्बस नॆकन हूँ नेंवई मल नन्दस, लिकिन नेंवई नन्ना ही उर्मी अदियन एंगा सोंपचकादस। 23 औंगे ओर्मा आलर एकासे धर्मे बंगासिन मईन नन्नर, अन्नेम धर्मेसी ख़द्दस एंगन हूँ मईन नना गे एन्ने नंजस। नॆ एंगन मईन मल नन्दस, आस एंगन तइय्का धर्मे बंगासिन हूँ मईन मल नन्दस। 24 ऎन निमन मानिम ब'अदन, नॆ एंग्है कत्थन मेन्नर ती एंगन तइय्का धर्मेसिन पत्त'अनर, आर जनमजुग उज्जनन ख़क्खकानर। आर गे दंडे ही पॆसका इकला हूँ मल मनो। आर खे'अना ती कट्टियर अरा उज्जना नू कोरच ख़च्चकानर। 25 ऎन निमन मानिम ब'अदन, बेड़ा बर'आ लगी, अरा आद अक्कुन बरचकी र'ई। आ बेड़ा नू बॊलता नू केचका आलर ऎन धर्मेसी ख़द्दन ही सड़न मेनोर। अरा अदन नॆ मेनोर आर उज्जोर। 26 धर्मे बंगस गे उज्जनन चि'अना सवंग र'ई, अरा आस आ उज्जना चि'अना सवंगन आसी ख़द्दन एंगा चिच्कादस। 27 अरा आस एंगा आलारिन नेंवई नना गे अदिया हूँ चिच्कादस, एन्देरगेका ऎन मनवा ख़द्दन हिकदन। 28 इदही पत्त नू अमा हैकटर'आ, एन्देरगेका बेड़ा बर'आ लगी, केचका ओर्मा आलर एंग्है सड़न मेनोर। 29 अरा आर उज्जा चो'ओर। दौ नलख नंजका आलर जनमजुग उज्जनन ख़क्खा गे उज्जा चो'ओर, अरा मलदौ नलख नंजका आलर दंडे ख़क्खा गे उज्जा चो'ओर। 30 ऎन एंग्है मने लेक्खा एन्देर हूँ नना पोलदन। धर्मे बंगस ब'अना लेक्खम दिम ऎन नेंवई नन्दन। अरा एंग्है नेंवई नन्ना उजगो र'ई, एन्देरगेका ऎन एंगा पत्तार'आ गे मला, एंगन तइय्का एम्बासिन पत्तार'आ गे बेद्ददन। 31 ऎन ऎनिम एंग्है पत्त नू गोवाह चि'अदन होले, एंग्है गोवाह ही मोल मल मनी। 32 एंग्है पत्त नू गोवाह चि'उस अउर ओर्तस र'अदस। अरा ऎन अख़दन का एंग्है पत्त ता आसी गोवाह ठउकम र'ई। 33 नीम यॊहन नूड़रत'उस गुसन मेना गे आलारिन तइय्कर, अरा आस एंग्है पत्त नू चिच्का गोवाह मानी हवे। 34 - 35 यॊहनस गा लघरना अरा बिलचना कन्डेल लेक्खा रहचस, अरा नीम जोक्क उल्ला आसी बिल्ली नू रिरयार'आ बेद्दा लिक्कर। एंगा आलासी गोवाह ही चाड़ मल मनी। लिकिन नीम नाड़र'आ गे दिम ऎन इबड़ा कत्थन तेंगदन। 36 एंगा यॊहनसी गोवाह ती कोहाँ गोवाह एंग्है सिखाब'अना अरा एंग्है हैकट नलख हवे। धर्मे बंगस इबड़ा नलखन नन्ना ती मुंजा गे एंगा चिच्चस, अरा अबड़ा पुरुब नन्ती का आस एंगन तइय्कादस। 37 एंगन तइय्का धर्मे बंबस हूँ तानिम एंग्है पत्त नू गोवाह चिच्कादस। नीम इकला हूँ आसी सड़न मल मेंजकादर महले आसी मुहिन मल ईरकादर। 38 अरा नीम आसी कत्थन निम्है जिया नू मल उइय्दर, एन्देरगेका आस निम्है गुसन तइय्का एंगन मल पत्त'अदर। 39 नीम नेम्हा पुथी ही कत्था गुट्ठिन चिहुंक ती पढ़'आ, एन्देरगेका अबड़ा नू ती जनमजुग उज्जनन ख़क्खोर एन्ने सोचदर। अबड़ा दिम एंग्है पत्त नू गोवाह चि'ई। 40 अन्नु हूँ आ उज्जनन ख़क्खा गे नीम एंग्है गुसन मल बरदर। 41 ऎन आलर ती बरना ओहमन मल बेद्ददन। 42 एन्देरगेका ऎन निम्है पत्त नू अख़दन का निम्है नू धर्मेसी चोन्हा मल र'ई। 43 ऎन एम्बासी नामे ती बरचकादन, लिकिन नीम एंगन मल इंझ्रदर। नन्नस ओर्तस तंग्है नामे ती बरदस होले, आसिन नीम इंझर'ओर। 44 नीम गा निम्है नू ओर्त ओर्तोस ती ओहमन ख़क्खा गे बेद्ददर। लिकिन नीम ओर्त लेका धर्मेस ती बरना ओहमन ख़क्खा गे मल बेद्ददर। होले नीम एकासे पत्त'आ ओंगोर? 45 धर्मे बंगस गुसन ऎन निमन बदी ननोन एन्ने अमके सोच'आ। नीम असरा ननू मूसस दिम निमन बदी ननोस। 46 नीम मूसासिन मानिम नू पत्त'अदर होले, नीम एंगन हूँ पत्त'ओर दने, एन्देरगेका आस एंग्है पत्त नू लिखचकादस। 47 लिकिन नीम आस एन्देर लिखचकादस अदिन मल पत्त'अदर होले, ऎन एन्देर ब'अदन अदिन एकासे पत्त'ओर?”
1 इबड़ा ही ख़ॊख़ा येसुस गलिलेया समुदर आ फड़ा केरस, अदिन तिबेरया समुदर हूँ ब'अनर। 2 ओन्टा कोहाँ गोंहड़ा आसी ख़ॊख़ा कालिया, एन्देरगेका आस रोगियारिन कोड़े नंजस ती अजगुत नलख ही चिन्हा ऎदकाचस, अदिन आर ईरका रहचर। 3 ख़ने येसुस परता मइय्याँ अरगियस ती तंग्है चेलर गने उक्कियस केरस। 4 यहूदीर ही कट्टना परब हेद्दे अंड़सकी रहचा। 5 येसुस मॆन ईरियस ती तंग्है गुसन जतरा लेक्खा आलारिन बरना ईरियस ती फिलिप्पोसिन बाचस, “ईरिन ओन्त'आ मॊख़त'आ गे एस्तेक असमा ख़ॆन्दा ओंगोत?” 6 आस गा फिलिप्पोसिन बिढ़'आ गे एन्ने बाचस, एन्देरगेका तान एन्देर नना कादन अदिन अक्खस। 7 फिलिप्पोस आसिन आनाकिर्ताचस, “आठ महिना नलख ही भूती ती असमा ख़ॆन्दोम होले हूँ इवंदा आलर गे कटी कटी हूँ मल मनो।” 8 आसी चेलर ती ओर्तोस, सिमॊन पतरसी भइय्योस अन्द्रेयस आसिन बाचस, 9 “इसन ओन्टे सन्नी ख़द्दस र'अस, आसी गुसन पाँच गोटंग बजरा ही असमा अरा दुई गोटंग इंजो र'ई। लिकिन इवंदा जतरा आलर गे आद एवंदा मनो?” 10 येसुस आरिन बाचस, “आलारिन ओक्त'आ चि'आ।” असन नगदे लट्टी रहचा, अइय्या आलर उक्कियर केरर। मॆतर लेका पाँच हजार केम रहचर। 11 ख़ने येसुस असमन होच्चस, अरा धर्मेसिन धन्यवाद नंजस, अरा असन उक्का आलर गे ख़ट्टियस, अरा अन्नेम इंजोन हूँ ख़ट्टियस। अरा आर ओर्मर एवंदा चाड़ रहचा अवंदा मोक्खर। 12 आर उड़चर केरर ख़ने, आस चेलारिन बाचस, “बछ्रका कुटकन सकल'आ का ओन्टा हूँ अम्बो नठार'आ।” 13 ख़ने आर मोक्का ती एंगेरका पाँच गोटा बजरा ही असमा ही कुटकन ख़ॊंड़चर, ख़ने बारा गोटंग डउड़ा निंदिया। 14 येसुसी ई अजगुत नलख ही चिन्हन ईरियर ख़ने, आर ब'आ हेलरर, “मानिम ईस ख़ॆख़ेल नू बर'ऊ रहचस आ धर्मेसी कत्था तिंगुस हिकदस।” 15 ख़ने येसुस अक्खस का ईर बड़पेलहा ती तंगन आर ही बॆल कम'आ गे सपड़ारका र'अनर। ख़ने आस ओर्तेलेका परता नू गुच्छरस केरस। 16 पुत्तिया ख़ने येसुसी चेलर परता ती इत्तियर ती समुदर ही पिंडी नू केरर। 17 अक्कुन ऊंख़िया केरा, अन्नु हूँ येसुस आर ही गुसन मल बरचका रहचस। आर ओन्टा डोंगा नू अरगियर ती कफरनहूम नगरे तरा काला गे समुदरन कट्टा हेलरर। 18 ई बेड़ा नू समुदर हलकार'आ हेलरा, एन्देरगेका ताका जॊर ती तागर'आ लगिया। 19 आर तीन चार कोंस चलनुम केरर ख़ने, आर येसुसिन समुदर नू ईकनुम डोंगा गुसन बरनन ईरियर, अरा इल्चियर केरर। 20 लिकिन येसुस आरिन बाचस, “अमा एल्चा, ऎन हिकदन।” 21 ख़ने आर आसिन डोंगा नू अरग'आ बेद्दा लगियर, अरा लॆम एक्सन काला लगियर असन धरी नू डोंगा अंड़सिया केरा। 22 दोसर उल्ला नॆ समुदर आ फड़ा रहचर, आर अक्खर का असन ओन्टे लेका डोंगा रहचा, अरा येसुस आ डोंगा नू मल अरगकाचस, आसी चेलर ताम लेका किर्रिम बिच्चकाचर। 23 फेन तिबेरया ती जोक्को डोंगा गुट्ठी, उर्बस धन्यवाद नंजस ती असमन आलर गे ख़ट्टका अड्डा हेद्दे बरचकी रहचा। 24 ख़ने आ आलर ईरियर का इसन येसुस हूँ मलकस अरा आसी चेलर हूँ मलकर ख़ने, आर डोंगा गुट्ठी नू अरगियर ती येसुसिन बिदनुम कफरनहूम तरा केरर। 25 अबड़र समुदर ही आ फड़ा येसुसिन ख़क्खियर ती आसिन मेंजर, “अना गुरु! नीन इसन एकाबारी बरचकय?” 26 येसुस आनाकिर्ताचस, “ऎन निमन मानिम ब'अदन, नीम अजगुत नलख ही चिन्हन ईरका ती मला, लिकिन नीम उड़ुच लिंघ'आ असमा मोक्का चड्डे नीम एंगन बेद्ददर। 27 नठारना ओन्ना-मॊख़ना गे अमा अर्ज'आ। लिकिन जनमजुग उज्जनन चि'ऊ ओन्ना-मॊख़ना गे अर्ज'आ। ई ओन्ना-मॊख़नन मनवा ख़द्दन ऎन चि'ओन, एन्देरगेका धर्मे बंगस एन्ने नन्ना ही अदियन एंगा चिच्कादस।” 28 अबड़र आसिन बाचर, “एन्देर एन्देर ऎम नना गे धर्मेस बेद्ददस?” 29 येसुस आनाकिर्ताचस, “ई ओन्टा नलखन दिम नीम नना गे धर्मेस बेद्ददस का, नॆकन आस तइय्कादस आसिन पत्त'आ।” 30 ख़ने आ आलर आसिन मेंजर, “होले नीन एमा एका अजगुत नलख ही चिन्हन ऎद'ओय का अदिन ऎम ऎरोम ती निंगन पत्त'आ ओंग्दम? नीन एन्देर ननोय? 31 नम्है पूरखर टोड़ंग नू मन्ना मोक्काचर। नेम्हा पुथी नू एन्ने लिख्रकी र'ई, ‘आस मॊख़ा गे मेर्ख़ा ती आर गे असमा चिच्चस’” 32 ख़ने येसुस आरिन बाचस, “ऎन निमन मानिम ब'अदन, मूसस निमा मेर्ख़ा ती असमा मल चिच्काचस। एम्बस दिम निमा मेर्ख़ा ती मानिम असमन चि'अदस। 33 एन्देरगेका धर्मेसी असमा ईद हवे का, एकास मेर्ख़ा ती इत्तियस ती ख़ॆख़ेल ता आलर गे उज्जना चि'अदस।” 34 ख़ने अबड़र येसुसिन बाचर, “अना उर्बायो, उर्मी उल्ला ई असमन एमा चि'आ।” 35 येसुस आरिन बाचस, “ऎन दिम उज्जना चि'ऊ असमा हिकदन। नॆ एंग्है गुसन बरदस आस इकला हूँ कीड़ा मल सार'ओस, अरा नॆ एंगन पत्त'अदस आस इकला हूँ ओनक'आ मल सार'ओर। 36 ऎन निमन मुन्द तिंकादन का नीम एंगन ईरकादर, अन्नु हूँ एंगन मल पत्त'अदर। 37 बंगस नॆकन एंगा चि'अदस, अबड़र ओर्मर एंग्है गुसन बर'ओर, अरा नॆ एंग्है गुसन बरदस आसिन इकला हूँ ऎन मल दुस'ओन। 38 एन्देरगेका ऎन एंग्है मनेन नना गे मला, लिकिन एंगन तइय्का धर्मेसी मनेन नना गे मेर्ख़ा ती इत्तकादन। 39 अरा एंगन तइय्का धर्मेसी मने ईद र'ई का, एवंदा आलारिन आस एंगा चिच्चकादस, आरिन ती नॆकन हूँ मल एबस'ओन, लिकिन छेद्दे उल्ला नू आरिन उज्जा चॊद'ओन। 40 अरा एम्बासी मने ईद र'ई का, नॆ नॆ आसी ख़द्दन एंगन ईरका ती एंगा नू पत्त'अदर, आर गे जनमजुग उज्जना ख़क्ख्र'ओ, अरा छेद्दे उल्ला नू आरिन उज्जा चॊद'ओन।” 41 फेन यहूदीर आसी मइय्याँ कुड़कुड़र'आ हेलरर। एन्देरगेका येसुस “ऎन दिम मेर्ख़ा ती इत्तका असमा हिकदन” एन्ने बाचस। 42 अरा आर ब'आ लगियर, “ईस गा येसुस, यॊसॆफसी तंग्दस, ईसी तंग्यो तम्बन नाम अख़दत, होले अक्कु ईस एकासे ब'अदस, ‘ऎन मेर्ख़ा ती इत्तका हिकदन?’ ” 43 येसुस आरिन आनाकिर्ताचस, “नीम निम्है नू अमा कुड़कुड़र'आ। 44 एंगन तइय्का बंगस ओर्तोसिन एंग्है गुसन मल नतगदस होले, नॆ हूँ एंग्है गुसन बर'आ पोल्लनर, अरा ऎन छेद्दे उल्ला नू आरिन उज्जा चॊद'ओन। 45 धर्मेसी कत्था तिंगुर ती नेम्हा पुथी नू लिख्रकी र'ई, ‘आर ओर्मर धर्मेस ती सिखाबाचका र'ओर।’ अन्नेम नॆ बंगासिन मेंजका ती आस ती सिख्रर, आर ओर्मर एंग्है गुसन बर'ओर। 46 नॆ धर्मेस तरती बरचकादस, आसिन अम्बरकी नॆ हूँ बंगासिन मल ईरका र'अनर। 47 ऎन निमन मानिम ब'अदन, नॆ पत्त'अदस आस गे जनमजुग उज्जना र'ई। 48 ऎन दिम उज्जना चि'ऊ असमा हिकदन। 49 निम्है पूरखर टोडंग नू मन्ना मोक्खर, अन्नु हूँ आर केच्चर केरर। 50 ईद मेर्ख़ा ती इत्तका असमा हवे। एकास इदन मॊख़दस, आस इकला हूँ मल खे'अदस। 51 मेर्ख़ा ती इत्तका उज्जना चि'ऊ असमा ऎन हिकदन। नेकईम ई असमन मॊख़दस होले, आस उर्मी उल्ला उज्जोस। अरा ई असमा एंग्है अहड़ा हवे। इदन ऎन ख़ॆख़ेल ता आलर ही उज्जना गे चि'ओन।” 52 तहाँ यहूदीर ताम तामिम अरबानख्र'आ हेलरर, “ई आलस तंग्है अहड़न एकासे नमा मॊख़ा गे चि'आ ओंग्दस।” 53 ख़ने येसुस आरिन बाचस, “ऎन निमन मानिम ब'अदन, नीम ऎन मनवा ख़द्दासी अहड़न मल मॊख़दर अरा एंग्है ख़ॆंसन मल ओन्दर होले, निम्है नू मानिम उज्जना मल र'ओ। 54 नॆ एंग्है अहड़न मॊख़दस, अरा एंग्है ख़ॆंसन ओन्दस, आस गे जनमजुग उज्जना र'ई, अरा छेद्दे उल्ला आसिन फेन उज्जा चॊद'ओन। 55 एन्देरगेका एंग्है अहड़ा अरा एंग्है ख़ॆंस मानी ओन्ना-मॊख़ना हवे। 56 नॆ एंग्है अहड़न मॊख़दस अरा एंग्है ख़ॆंसन ओन्दस, आस एंग्है नू र'अदस अरा ऎन आस नू र'अदन। 57 उज्जना चि'ऊ बंगस एंगन तइय्कादस, अरा बंगासी चड्डे दिम ऎन उज्जदन। अन्नेम नॆ एंगन मॊख़दस, आस गे एंग्है ती उज्जना ख़क्ख्र'ओ। 58 ईदिम मेर्ख़ा ती इत्तका असमा हवे। ईद आ असमा लेक्खा मल्ली, एकदन निम्है पूरखर मोक्काचर। आर गा केच्चर केरर, लिकिन नॆ ई असमन मॊख़ोस, आस जनमजुग उज्जोस।” 59 इबड़ा कत्थन कफरनहूम नू येसुस गोड़हा एड़पा नू सिखाब'आ लगियस ख़ने बाचस। 60 इदन मेंजर ती आसी बग्गे चेलर बाचर, “ई सिखाब'अना बुझुर'आ गे नगदे मसकिल र'ई, एकासे ओर्तस इदन इंझ्र'आ ओंग्दस?” 61 येसुस तंग्है चेलर इदही पत्त नू कुड़कुड़र'आ लगनर एन्ने अक्खस ती आरिन बाचस, “नीम ई कत्था ती भेंवार'आ लगदर का? 62 मनवा ख़द्दन ऎन मुन्द रहचकन आ अड्डा नू होतारनन नीम ऎरोर होले, एकासे र'ओ! 63 नेम्हा बॊलतस दिम उज्जनन चि'अदस, आल सवंग ती ईद मना पुल्ली, एका कत्था गुट्ठी निमन तिंकन अबड़ा उज्जना चि'ऊ बॊलतस ती हवे। 64 अन्नु हूँ निम्है नू जोक्कोर मल पत्त'अनर।” (येसुस गा ऒर तिम अक्खस का अबड़र ती नॆ नॆ तंगन मल पत्ताचर अरा नॆ तंग्है बिड़दो पपहर गे संगे चि'ओस।) 65 फेन येसुस बाचस, “इदगेम ऎन निमन बाचकन का, बंगस ओर्तोसिन एंग्है गुसन बर'आ गे मल चि'अदस होले, नॆ हूँ एंग्है गुसन बर'आ पोल्लनर।” 66 इदही ख़ॊख़ा येसुसी बग्गे चेलर पछली किर्रियर अरा आसी गने चॊंख़्रनन अम्बियर। 67 औंगे येसुस अबड़ा बरियो चेलर ती मेंजस, “नीम हूँ अम्बा बेद्ददर का?” 68 सिमॊन पतरस आसिन आनाकिर्ताचस, “उर्बायो, ऎम नॆख'आ गुसन क'ओम? निंग्है गुसन गा जनमजुग उज्जना ही कत्था गुट्ठी र'ई। 69 ऎम पत्त'अदम अरा अख़दम का नीन धर्मेसी नेम्हा आलय।” 70 फेन येसुस आरिन बाचस, “ऎन नीम बरियोरिन चज्जिकन, अन्नु हूँ निम्है ती ओर्तोस मलदौ आलस हिकदस।” 71 आस सिमॊन इसकारियॊतसी तंग्दस यूदसी पत्त नू एन्ने बाचस। आस अबड़ा बरियोर ती ओर्तोस रहचस, अन्नु हूँ आस दिम येसुसी बिड़दो नू पपहर गे संगे चिच्चस।
Aa 1 इबड़ा ही ख़ॊख़ा येसुस गलिलेया नू धर्मेसी कत्था तेंगा कुद्दा हेलरस। आस यूदेया नू तेंगा कुद्दा मल बेद्दा लगियस, एन्देरगेका यहूदी मुद्धर आसिन पिटा गे बेद्दा लगियर। 2 अक्कु यहूदीर ही कुमबा परब हेद्दे अंड़सकी रहचा। 3 औंगे येसुसी भईर आसिन बाचर, ई अड्डन अम्बा ती यूदेया कला, होले नीन ननू निंग्है अजगुत नलखन असन निंग्है चेलर ऎरा ओंगोर। 4 ओर्तोस कोहाँ आल मना बेद्ददस होले, आस नूख़्रना ती नलख मल ननोस। नीन एन्ने नलख गुट्ठिन नना लगदय होले, सौंसे ख़ॆख़ेल निंग्है पत्त नू अख़'आ नेकअन। 5 येसुसी भईर हूँ गा आसी मइय्याँ मल पत्ताचर। 6 ख़ने येसुस आरिन बाचस, “अक्कुन गूटी एंगा गे ठौका बेड़ा मल अंड़सकी र'ई, लिकिन उर्मी बेड़ा गा निमा ठौका र'ई। 7 ई सौंसार ही आलर निमन हींड़'आ पोलनर, लिकिन आर एंगन हींड़नर, एन्देरगेका ऎन आरिन तेंगदन का आर मलदौ नलख गुट्ठी नन्नर। 8 नीम ई परब नू कला। ऎन अक्कु ई परब नू मल कादन, एन्देरगेका अक्कुन गूटी एंगा गे ठौका बेड़ा मल अंड़सकी र'ई।” 9 येसुस इबड़ा कत्थन बाचस ती आस गलिलेया नू रहे केरस। 10 लिकिन आसी भईर परब नू केरका ख़ॊख़ा येसुस हूँ केरस, लिकिन हरकटनुम मला नूख़ुर नुख़ुरनुम केरस। 11 आ परब नू यहूदी मुद्धर आसिन बेद्दा लगियर अरा “आ आलस एसन?” एन्ने मेना लगियर। 12 अरा गोंहड़ा नू आलर ढ़ॆर कत्था आसी पत्त नू तम्है नू कले कले कछनख्र'आ लगियर। जोक्क आलर ब'आ लगियर, “आस दौ आलस”, लिकिन नन्नर ब'आ लगियर “मला, आस आलारिन भेंवाब'अदस।” 13 अन्नु हूँ यहूदी मुद्धर ही इलिच्क'आ ती नॆ हूँ आसी पत्त नू हरकट मल ब'आ लगियर। 14 लिकिन परब ही मझी बेड़ा नू येसुस धर्मेसी मन्दिर ही चाली नू केरस ती सिखाब'आ हेलरस। 15 ख़ने यहूदीर हैकट मंजर ती ब'आ हेलरर, “ईस गे बिगर सिखिरकम इवंदा लूर एकासे बरचा?” 16 ख़ने येसुस आरिन आनाकिर्ताचस “एंग्है सिखाब'अना एंग्है मल्ली, ईद एंगन तइय्का धर्मेस ती बर'ई। 17 नेकईम धर्मेसी मनेन नना बेद्ददस होले, आस ई सिखाब'अना ही पत्त नू अख़'ओस का ईद धर्मेस तरती र'ई का महले ऎन एंग्है ती ब'अदन। 18 नॆ तंग्है तरती ब'अदस आस तंगा गे मईन बेद्ददस। लिकिन नॆ तंग्है तइय्युस गे मईन बेद्ददस, आस मानिम जॊगे आलस र'अस, अरा आस नू फंगटिया कत्था मलकी। 19 मूसस निमा गे नॆग चिच्चस, अन्नु हूँ निम्है नू नॆ हूँ नॆग लेक्खा मल ऎकदर। होले एन्देरगे एंगन पिटा बेद्ददर?” 20 ख़ने ख़ॊंड़रका आलर आसिन बाचर, “नीन नाद रस्का आल हिकदय, ऎम निंगन पिटा मल बेद्ददम।” 21 येसुस आरिन बाचस, “ऎन ओन्टा अजगुत नलख ख़न्न ऎख़्रना उल्ला नू नंजकन, आद ती नीम हैकट मन्दर। 22 मूसस निमन खतना नना गे पॆसका चिच्का ती नीम ख़न्न ऎख़्रना उल्ला नू हूँ ख़द्दासिन खतना नन्दर। लिकिन मानिम नू खतना ही पॆसकन मूसस मल चिच्चस, ईद पुरखा बंगर ती बर'आ लगी। 23 मूसासी नॆगन मल चाड़ा गे नीम ख़न्न ऎख़्रना उल्ला नू हूँ ख़द्दासिन खतना नन्दर होले, ऎन ओर्तो आलासिन उर्मी मॆदन ख़न्न ऎख़्रना उल्ला नू कोड़े नंजकन ख़ने, नीम एंग्है गने एन्देरगे खींस मन्दर? 24 मुंही ऎरा ती नेंवई अमा नना, लिकिन ठौका ठौका नेंवई नना।” 25 तहाँ येरुसलॆम नू र'ऊ जोक्का आलर ब'आ लगियर, “ई आलस आसिम मलदस का नॆकन आर पिटा गे बेद्दा लगनर। 26 ऎरा! ईस गा हरकट कछनख्रदस, अरा आर ईसिन एन्देर हूँ मलम ब'अनर, एन्देर मानिम नू नम्है मुद्धर सोचनर का ईसिम मसीस? 27 लिकिन नाम ईसिन अख़दत का ईस एस्तस। एकाबारी मसीस बर'ओस, आ बारी नॆ हूँ बल्लोर आस एस्तस।” 28 ख़ने येसुस धर्मेसी मन्दिर नू सिखाब'अनुम रहचस ती जॊर ती बाचस, “हाँ, एंगन नीम अख़दर अरा इदिन हूँ अख़दर ऎन एस्तन। लिकिन ऎन एंग्है मने ती मल बरचकन, एंग्है तइय्युस मानिम र'अस, आसिन नीम बलदर। 29 लिकिन ऎन आसिन अख़दन, एन्देरगेका ऎन आसी गुस्ते बरचकादन, अरा आसिम एंगन तइय्यस।” 30 तहाँ जोक्क आलर येसुसिन हें'आ बेद्द लगियर, लिकिन नॆ हूँ आसिन धर'आ गे मुन्द मल बरचर, एन्देरगेका अक्कुन गूटी आसी ठौका बेड़ा मल अंड़सकीचा। 31 लिकिन ख़ॊंड़रका आलर ती बग्गेर आसिन पत्ताचर। अरा अबड़र बाचर, “मसीस बरदस ख़ने, आस ई आलस नंजका ती कोड़हे अजगुत नलख ननोस का?” 32 फरिसीर असन ख़ॊंड़रका आलर आसी पत्त नू इबड़ा कत्थन टुरुफुसरनन मेंजर। ख़ने मुध नैगर अरा फरिसीर जोक्क धर्मेसी मन्दिर ख़ापू सैनारिन आसिन हें'आ गे तइय्यर। 33 येसुस बाचस, “ऎन जोक्क उल्ला लेका निम्है गने र'ओन, फेन एंग्है तइय्युस गुसन किर्रिम बि'ओन। 34 नीम एंगन बेद्दोर, लिकिन मल ख़क्खोर, अरा ऎन एसन र'अदन असन नीम बर'आ पोल्लोर।” 35 ख़ने यहूदी मुद्धर ताम तामिम बाचर, “ईस एक्सन क'ओस, ख़ने नाम ईसिन बेद्दा पोल्लोत? ईस नन्ना राजी गुट्ठी नू युनानीर मझी नू उज्जू नम्है आलर गुसन क'ओस ती युनानीरिन सिखाब'ओस का? 36 ‘नीम एंगन बेद्दोर, लिकिन मल ख़क्खोर, अरा ऎन एसन र'अदन असन नीम बर'आ पोल्लोर’ एन्ने ईस गा ब'अदस। इदही माने एन्देर?” 37 परब ही छेद्दे उल्ला मुध उल्ला नू येसुस इज्जस ती जॊरसरिया बाचस, “नीकईम ओनक'आ सार'आ लगदर होले, एंग्है गुसन बरा ती ओना। 38 नेम्हा पुथी ब'अना लेक्खा एंग्है मइय्याँ पत्त'उसी जिया ती उज्जना चि'ऊ अम्मु ख़ाड़ लेक्खा बाह'ओ उरखो।” 39 तंग्है मइय्याँ पत्त'ऊ आलर ख़ॊख़ा ख़क्खना नेम्हा बॊलतासी पत्त नू गा येसुस एन्ने बाचस। अक्कु गूटी नेम्हा बॊलतस मल चीरकी रहचस, ईगेका येसुस अक्कु गूटी तंग्है महबा नू मल चॊदकाचस। 40 ख़ने इबड़ा कत्थन मेंजका ती गोंहड़ा ती जोक्कोर बाचर, “मानिम नू ई आलस बरना धर्मेसी कत्था तिंगुस हिकदस।” 41 अरा नन्नर बाचर, “ईस मसीस हिकदस।” लिकिन अउर जोक्कोर बाचर, “मसीस गलिलेया ती मल बर'ओस। 42 नेम्हा पुथी एन्ने ब'ई, ‘मसीस दाऊद बॆलासी खुटी ती बर'ओस, अरा दाऊद रहचका बॆतलहेम पद्दा ती बर'ओस।’” 43 ख़ने येसुसी चड्डे गोंहड़ा केरेंग कोटेंग मंजा। 44 जोक्कोर आसिन हें'आ बेद्दा लगियर, लिकिन नॆ हूँ आसिन धर'आ गे मुन्द मल बरचर। 45 तहाँ धर्मेसी मन्दिर ख़ापू सैनर मुध नैगर अरा फरिसीर गुसन बरचर ख़ने, आर आरिन मेंजर, “नीम येसुसिन एन्देरगे मल ओन्द्रकर।” 46 धर्मेसी मन्दिर ख़ापू सैनर आनाकिर्ताचर, “नॆ हूँ ई आलस लेक्खा एन्ने कछनख्रकन ऎम इकला हूँ मल मेंजकम!” 47 ख़ने फरिसीर आरिन बाचर, “नीम हूँ ठगरकर केरकर का? 48 एकअम अक्स'उर महले फरिसीर आसिन पत्ताचका र'अनर का? 49 लिकिन इबड़ा आलर गा नॆगन बलनर अरा सरपारका आलर।” 50 निकोदॆमोस नॆ मुन्द माख़ा बारी येसुस गुसन भेंट मंजचकाचस, अरा आर ही मधेतस रहचस। आस आरिन बाचस, 51 नम्है नॆग ओर्तोसिन आस ती बेगर मेंजका ती अरा आस एन्देर नंजकादस एन्ने बेगर अक्का ती आसिन नेंवई मल ननी। 52 ख़ने आर आसिन आनाकिर्ताचर, “नीन हूँ गलिलेया ता आलय का? नेम्हा पुथिन पढ़'अरकी ऎरा, ख़ने अख़'ओय क'ओय का गलिलेया ती धर्मेसी कत्था तिंगुस मल बरदस।” 53 तहाँ ओर्मर तम्है तम्है एड़पा केरर।
1 येसुस गा जैतून मन्न परता केरस। 2 अरा पैरी बारी आस धर्मेसी मन्दिर चाली नू अउरिम बरचस। ख़ने ओर्मा आलर आसी गुसन बरचर, अरा आस उक्कियस ती आरिन सिखाब'आ हेलरस। 3 आ बारी यहूदी नॆग सिखाब'उर अरा फरिसीर नन्ना आलस गुसन काना पाप नू धर्रका ओन्टा मुक्कन अइय्या ओन्द्रर। अरा अदिन गोंहड़ा ही मुन्दहारे इजताचर। 4 अरा येसुसिन बाचर, “अना गुरु, ई आली नन्ना आलस गुसन काना पाप नन्नुम धर्रकी र'ई। 5 नॆग नू मूसस नमन पॆसकादस, एन्ने मुक्कारिन पखना ती लोड़ग'आ पिटा। अक्कु नीन एन्देर ब'अदय, ऎम एन्देर ननोम?” 6 अबड़र आसिन बिढ़'आ गे एन्ने मेना लगियर का आसी मइय्याँ इन्द्रिइम बदी नना गे अड्डा ख़क्खोर। लिकिन येसुस ख़ॊलख़रस ती अंगली ती ख़ॆख़ेल नू लिख'आ हेलरस। 7 अरा आर आसिन मेन्ना बारी रहचर ख़ने, आस चॊचस ती बाचस, “निम्है नू नॆ पाप मल्ला नंजका आर मुन्द लोड़ग'आ।” 8 अरा अउरिम आस ख़ॊलख़रस ती ख़ॆख़ेल नू लिख'आ लगियस। 9 आर आसी ब'अनन मेंजर ती कोहाँ ती सन्नी ओर्त ओर्त गुच्छरर केरर। येसुस लेका असन रहचस, अरा आ मुक्का मझी नू इज्जकी रहचा। 10 तहाँ येसुस चॊचस ती अदिन मेंजस, “अनय आली, अबड़र एंहों? नॆ हूँ निंगन दंडे ही नेंवई मल नंजर का?” 11 आद बाचा, “उर्बायो, नॆ हूँ मला।” तहाँ येसुस अदिन बाचस, “ऎन हूँ दंडे ही नेंवई मल नन्दन, कलय, अरा अक्कु ती पाप नन्नन अम्बय चि'ई।” 12 तहाँ येसुस अउरिम आलर गने कछनख्र'आ हेलरस, अरा बाचस, “ऎन ख़ॆख़ेल ही बिल्ली हिकदन। एकास एंग्है गने चॊंख़्रदस आस इकला हूँ ऊख़ा नू मल र'ओर, लिकिन आस उज्जना चि'ऊ बिल्लिन ख़क्खोस।” 13 ख़ने फरिसीर आसिन बाचर, “नीनिम निंग्है पत्त नू गोवाह चि'अदय, होले निंग्है गोवाह आबोन ऎम मल इंझ्र'आ ओंग्दम।” 14 ख़ने येसुस आरिन बाचस, “ऎन ऎनिम एंग्है पत्त नू गोवाह चिच्चकन, अन्नु हूँ एंग्है गोवाह मानिम र'ई, एन्देरगेका ऎन एस्ते बरचकन अरा एसन कादन ऎन अदिन अख़दन। लिकिन नीम बलदर का ऎन एस्ते बरचकन महले एसन कादन। 15 नीम आलर नन्ना लेक्खा नेंवई नन्दर, लिकिन ऎन गा नॆख'आनिम नेंवई मल नन्दन। 16 लिकिन ऎन नेंवई ननोन होले, एंग्है नेंवई ठउकम र'ई, एन्देरगेका ऎन ओर्तेलेका ती नेंवई मल नन्दन, एंगन तइय्का एम्बस हूँ एंग्है गने र'अस। 17 निम्है नॆग नू हूँ लिख्रकी र'ई ‘दुई आलर ही गोवाह ओन्टेम उक्की होले, आद मानिम र'ई।’ 18 ओन्टा गा ऎन एंग्है पत्त नू गोवाह चि'अदन, अरा दोसर गा एंगन तइय्का एम्बस एंग्है पत्त नू गोवाह चि'अदस।” 19 तहाँ आर येसुसिन मेंजर, “एसन र'अस निम्बस?” ख़ने आस बाचस, “नीम ऎन नॆ हिकदन महले एम्बस नॆ हिकदस अदिन बलदर। लिकिन नीम एंगन अक्कर होले, एम्बासिन हूँ अख़'ओर दने।” 20 येसुस धर्मेसी मन्दिर नू सिखाब'अना बारी भंडार एड़पा गुसन इज्जस ती इबड़ा कत्थन बाचस। लिकिन नॆ हूँ आसिन मल हॆंचर, एन्देरगेका अक्कु गूटी आसी ठौका बेड़ा मल अंड़सकी रहचा। 21 फेन येसुस अउरिम आरिन बाचस, “ऎन कादन अरा नीम एंगन बेद्दोर, अन्नु हूँ निम्है पाप गुट्ठी नू खे'ओर। एक्सन ऎन कादन असन नीम बर'आ पोल्लोर।” 22 औंगे यहूदी मुद्धर मेंजर, “ईस तान तंगन पिटोस का? औंगेम ‘एक्सन ऎन कादन असन नीम बर'आ पोल्लोर’ एन्ने ब'अदस का?” 23 येसुस अउरिम आरिन बाचस, “नीम किय्यातर, ऎन गा मइय्याँ ता हिकदन। नीम ई ख़ॆख़ेल ही हिकदर, ऎन गा ई ख़ॆख़ेल ही मलदन। 24 औंगे नीम निम्है पाप गुट्ठी नू खे'ओर एन्ने ऎन बाचकन। नॆ बर'ऊ र'अस आस ऎनिम हिकदन एन्ने नीम मल पत्त'ओर होले, नीम निम्है पाप गुट्ठी नू खे'ओर।” 25 ख़ने आर आसिन मेंजर, “नीन एका ओर्तय?” येसुस बाचस, “अदन दिम ऎन ऒरे तिम निमा गे तिंगनुम तिंगनुम बरचकन। 26 ऎन निम्है पत्त नू तेंगा गे अरा नेंवई नना गे ढ़ॆर कत्था र'ई। एंगन तइय्युस मानिम र'अदस, आस गुसते ऎन एन्द्रन मेंजकन अबड़ा कत्थन लेका ख़ॆख़ेल नू तेंगदन।” 27 तम्है बंगासी पत्त नू दिम आस तेंगा लगदस, एन्ने आर मल बुझ्रर। 28 ख़ने येसुस आरिन बाचस, “एकाबारी नीम मनवा ख़द्द एंगन मइय्याँ अरगत'ओर, आ बारी अख़'ओर का ऎन आसिम हिकदन नॆ बर'ऊ रहचस। अरा ऎन ऎनिम एन्देर हूँ मल नन्दन, लिकिन एन्द्रन एम्बस एंगन सिखाबाचस, अदन दिम ऎन निमन ब'अदन एन्ने हूँ अख़'ओर। 29 नॆ एंगन तइय्यस आस एंग्है गने र'अस। आस एंगन ओर्तेलेका मल्ला अम्बिका, एन्देरगेका एकदा आसिन खुसमारत'ई अदिनिम ऎन उर्मी उल्ला नन्दन।” 30 आस इबड़ा कत्था ही पत्त नू ब'आ लगियस ख़ने, ढ़ॆर बग्गे आलर आसिन पत्ताचर। 31 तहाँ येसुस तंगन पत्ताचका अबड़ा यहूदीरिन बाचस, “नीम एंग्है कत्था नू बन्चका र'ओर होले, नीम मानिम नू एंग्है चेला मनोर। 32 अरा नीम मानिमन अख़'ओर, अरा मानिम आबो निमन छछिन्द ननो।” 33 ख़ने आर आसिन बाचर, “ऎम अब्राहमसी बनस ता हिकदम, ऎम इकला हूँ नॆख'आ हूँ बिट्ठी ननू जॊंख़ मल रहचकम। अन्ने होले ऎम छछिन्द मनोम एन्ने नीन एकासे ब'आ ओंग्दय?” 34 ख़ने येसुस आरिन बाचस, “ऎन निमन मानिमन ब'अदन, नॆ पाप नन्नर आर पाप ही जॊंख़ र'अनर। 35 ओर्त बिट्ठी ननू जॊंख़स गे ओन्टा एड़पा नू उर्मी उल्ला अड्डा मल र'ओ, लिकिन ख़द्दस गा उर्मी उल्ला आ एड़पा ता दिम र'अदस। 36 औंगे ऎन ख़द्दन निमन छछिन्द नन्दन होले, नीम मानिम नू छछिन्द मनोर। 37 ऎन अख़दन का नीम अब्राहमसी बनस हिकदर, अन्नु हूँ नीम एंगन पिटा गे बेद्ददर, एन्देरगेका नीम एंग्है सिखाब'अनन मल इंझ्रदर। 38 ऎन एम्बस गुसन रहचकन ख़ने, एन्दरन ऎन ईरकादन, अबड़न ऎन निमा तेंगदन। नीम निम्बस ती एन्दरन मेंजकादर अदिन नन्दर।” 39 ख़ने आर बाचर, “अब्राहमस दिम एम्बस।” येसुस गा आरिन बाचस, “नीम मानिम नू अब्राहमसी ख़द्दर र'अदर होले, अब्राहमस एन्देर एन्देर नलख नंजस आ नलख गुट्ठिन ननोर दने। 40 लिकिन नीम गा एंगन पिटा बेद्ददर, इगेका ऎन धर्मेस ती मेंजका मानिमन निमन तिंकादन। अब्राहमस इकला हूँ एन्ने नलख मल नंजस। 41 नीम निम्है निम्बस नंजका नलखन दिम नना लगदर।” ख़ने आर येसुसिन बाचर, “ऎम नन्ना आली गुसन काना ही पाप ती कुन्द्रका ख़द्दम मलदम। एम्है ओर्तेलेका एम्बस र'अस आस धर्मेस।” 42 ख़ने येसुस आरिन बाचस, “मानिम नू धर्मेस निम्है बंगस रहचस होले, नीम एंगन हूँ चोन्हा ननोर दने, एन्देरगेका ऎन धर्मेस ती बरचका र'अदन, अरा अक्कु इसन र'अदन। ऎन एंग्है मने ती मल बरचकादन, धर्मेस दिम एंगन तइय्कादस। 43 ऎन एन्देर ब'अदन अदिन नीम एन्देरगे बुझुर'आ पोलदर? ईद ई चड्डे का एंग्है सिखाब'अनन नीम मल इंझ्रदर। 44 नीम निम्है बंगस सैतान ही र'अदर। अरा निम्है बंगासी मने गुट्ठिन पूरा नना बेद्ददर। आस गा ऒरे तिम पिटू रहचस। आस नू मानी मलकी, औंगे मानी आस नू इज्जकी र'आ पोल्ला। आस ठक'ओ बारी आसी मानी सुबहा आबोन ऎद्ददस, एन्देरगेका आस ठकवा हवदस, अरा ठकना गुट्ठी ही बंगस हवदस। 45 औंगे ऎन मानिमन ब'अना चड्डे, नीम एंगन मल पत्त'अदर। 46 ऎन पाप नंजकन एन्ने एंग्है मइय्याँ बदी नन्ना ती अदन पुरुब नना नीम ओंग्दर का? ऎन मानिम तेंगदन होले, नीम एन्देरगे एंगन मल पत्त'अदर? 47 एकास धर्मेसी आलस र'अदस, आस धर्मेसी कत्थन मेन्दस। नीम इदगे मल मेन्दर का नीम धर्मेसी आलर मलदर।” 48 तहाँ यहूदीर बाचर, “ऎम एन्देर ब'अदम आद मानिम हिके, नीन समारिया ता आलय हिकदय, अरा नीन नाद ती रस्का आलय हिकदय।” 49 ख़ने येसुस बाचस, “ऎन नाद ती रस्का आलन मलदन। ऎन एम्बासिन मईन नन्दन, लिकिन नीम एंगन हींड़दर। 50 ऎन एंगा गे मईन मल बेद्ददन, लिकिन एंगा गे अदन बिद्दू ओर्तोस र'अस, आसिम नेंवई ननू र'अदस। 51 ऎन निमन मानिम ब'अदन, नेकईम एंग्है कत्थन पॆस्रदस होले, आस इकला हूँ मल खे'ओस।” 52 ख़ने यहूदीर आसिन बाचर, “ऎम अक्कुन अक्कम का नीन नाद ती रस्का आलय हिकदय। अब्राहमस केच्चस अरा धर्मेसी कत्था तिंगुर हूँ केच्चर। लिकिन नीन ब'अदय का ‘नेकईम एंग्है कत्थन पॆस्रदस होले, आस इकला हूँ मल खे'ओस।’ 53 नीन एम्है बंगस अब्राहमस ती कोहँस हिकदय का? आस केच्चस, अन्नेम धर्मेसी कत्था तिंगुर हूँ केच्चर। नीन निंगन नॆ सोचदय?” 54 येसुस आनाकिर्ताचस, “ऎन ऎनिम एंगन मईन ननोन होले, एंग्है मईन एन्देर हूँ मल्ली। लिकिन एंगन मईन ननुस एम्बस हिकदस, अरा नीम ब'अदर आस निम्है धर्मेस। 55 अरा नीम आसिन मानिम नू बलकर, लिकिन ऎन आसिन अख़दन। अन्नु हूँ ऎन आसिन बलदन ब'ओन होले, ऎन हूँ निम्है लेक्खा ठकवा मनोन। लिकिन ऎन आसिन अख़दन, अरा आसी कत्थन पॆस्रदन। 56 निम्है बंगस अब्राहमस एंग्है उल्लन ऎरा ओंगोन ब'अरकी नगदे खुसमारस, अरा आस अदन ईरियस ती रिझ्रस।” 57 ख़ने यहूदीर आसिन बाचर, “अक्कुन गा निंग्है पचास बछर हूँ अरगी मना, अन्नु हूँ नीन अब्राहमसिन ईरकादय का!” 58 येसुस बाचस, “ऎन निमन मानिम ब'अदन, अब्राहमस कुन्द्रस ती मुन्द तिम ऎन र'अदन।” 59 इदन मेंजर ती आर आसिन लोड़ग'आ गे पखना गुट्ठी पेत्तर। लिकिन येसुस नूख़्रस ती धर्मेसी मन्दिर ती गुच्छरस केरस।
1 फेन येसुस कालो बारी ओन्टा आलासिन ईरियस, आस कुन्द्रका तिम अन्धहा रहचस। 2 अरा आसी चेलर येसुसिन मेंजर, “अना गुरु, नॆ नंजका पाप ती ईस अन्धहा कुन्द्रस, ईसी पाप ती का महले ईसी अयंग-बंग ही पाप ती का?” 3 येसुस आरिन बाचस, “ईद ईसी पाप महले ईसी अयंग-बंग ही पाप ही चड्डे मला, लिकिन धर्मेसी नलख गुट्ठी ईस नू दहदर मना गे ईद मंजा। 4 उल्ला उल्लम बारिम नाम एंग्है तइय्युसी नलखन नन्ना र'ई। माख़ा बर'आ लगी, आ बारी नॆ हूँ एन्देर हूँ नना पोल्लोर। 5 ऎन ख़ॆख़ेल नू र'अना बारी ऎन ख़ॆख़ेल ही आलर गे बिल्ली र'अदन।” 6 इबड़न बाचस ती येसुस ख़ॆख़ेल नू तुप्पियस ती तुप्पलख़ो ती ख़ज्जो सनचस, अरा आ ख़ज्जोन आसी ख़न्न नू टुड़ियस। 7 अरा आसिन बाचस, “कला ती सिलॊवम पोखारी नू नॊंढ़रके।” (“सिलॊवम” ही माने तइय्का हवे।) आस अन्नेम केरस ती नॊंढ़रस अरा ईरनुम ती एड़पा किर्रियस। 8 ख़ने अरबर-परबर अरा अबड़ा आलर नॆ मुन्द आसी तेम्बनन ईरका रहचर, आर बाचर, “ईस आसिम मलदस का नॆ ओक्करकी तेम्बा लगियस?” 9 जोक्कोर ब'आ लगियर, “ईस आसिम हिकदस।” लिकिन नन्नर ब'आ लगियर, “मला, ईस आस लेक्खम ऎथ्रदस।” लिकिन आस गा बाचस, “ऎनिम आ आलस हिकदन।” 10 ख़ने आर मेंजर, “होले निंग्है ख़न्न एकासे चलख़रा?” 11 आस बाचस, “येसु एन्ने आर ती बारना ओन्टा आलस ख़ज्जो सनचस ती एंग्है ख़न्न नू टुड़ियस ती एंगन बाचस, ‘कला ती सिलॊवम पोखारी नू नॊंढ़रके।’ ख़ने ऎन केरकन ती नॊंढ़रकन अरा ऎरा हेलरकन।” 12 आर आसिन मेंजर, “आ आलस एक्सन र'अस?” आस बाचस, “ऎन बलदन।” 13 तहाँ आर अन्धहा रहचका आ आलासिन फरिसीर गुसन ओन्द्रर। 14 एन्देरगेका इकला येसुस ख़ज्जो सनचस ती आ आलासी ख़न्नन कोड़े नंजस, आ उल्ला ख़न्न ऎख़ना उल्ला रहचा। 15 ख़ने फरिसीर हूँ आ आलासिन मेंजर का आस एकासे ऎरा उंगियस। ख़ने आस आरिन बाचस, “आस एंग्है ख़न्न नू ख़ज्जो टुड़ियस, ऎन नॊंढ़रकन अरा अक्कुन ऎरा ओंग्दन।” 16 तहाँ फरिसीर ती जोक्कोर बाचर, “ईस धर्मेस तरती मलकस, एन्देरगेका ईस ख़न्न एख़ना उल्ला ही नॆगन मल मनदस।” लिकिन नन्नर बाचर, “ओर्त पपहा आलस एकासे एन्ने लेक्खा अजगुत नलख ही चिन्हन नना ओंग्दस?” ख़ने आर तम्है नू ख़ाड़रर केरर। 17 औंगे अबड़र आ आलासिन अउरिम मेंजर, “आस निंग्है ख़न्नन चलख़स ती आसी पत्त नू नीन एन्देर ब'अदय?” ख़ने आस बाचस, “आस ओन्टा धर्मेसी कत्था तिंगुस।” 18 अन्नु हूँ यहूदी मुद्धर पत्त'आ पोल्ला लगियर का आस अन्धहा रहचस अरा अक्कु ऎरा ओंग्दस। औंगे आर आसी तंग्यो तम्बन मीख़ियर। 19 अरा आर आरिन मेंजर, “ईस निंग्दस का? नॆकन नीम ब'अदर का अन्धहा कुन्द्रका रहचस? होले अक्कु ईस एकासे ऎरा ओंग्दस?” 20 आसी तंग्यो तम्बा बाचर, “ऎम अख़दम का ईस एंग्दस अरा अन्धहा कुन्द्रका रहचस। 21 लिकिन अक्कु ईस एकासे ऎरा ओंग्दस, अरा नॆ ईसी ख़न्नन कोड़े नंजा अदिन ऎम बलदम। आस चेटगर र'अस, आसिनिम मेना, आस तंग्है पत्त नू तेंगोस।” 22 आसी तंग्यो तम्बा यहूदी मुद्धारिन इल्चका ती एन्ने बाचर, ईगेका यहूदी मुद्धर ताम मुन्द तिम सलहा नंजका रहचर का नीकईम येसुसिन मसी ब'ओर होले, आरिन गोड़हा एड़पा ती ओथ्र'ओम चि'ओम। 23 औंगे आसी तंग्यो तम्बा बाचर, “आस चेटगर र'अस आसिनिम मेना।” 24 फेन आर अन्धहा रहचस आसिन दोसर खेप हूँ मीख़ियर ती बाचर, “धर्मेसी मुन्दहारे किरिया मॊख़ा का नीन मानिम ब'अदय। ऎम अख़दम का आस पपहा आलस।” 25 ख़ने आस बाचस, “आस पपहा र'अस का मला, ऎन बलदन। ऎन ओन्टे लेका कत्थन अख़दन ऎन अन्धहा रहचकन अरा अक्कु ऎरा लगदन।” 26 ख़ने आर आसिन मेंजर, “आस निंगा गे एन्देर नंजस? आस एकासे निंग्है ख़न्नन कोड़े नंजस?” 27 आस आरिन बाचस, “ऎन निमन मुन्द तिम तिंका रहचकन, नीम मल मेंजकर। अक्कु नीम फेन एन्देरगे मेना बेद्ददर? नीम आसी चेला मना बेद्ददर का?” 28 ख़ने आर आसिन हींड़चर ती बाचर, “नीनिम आसी चेलय, ऎम गा मूसासी चेलम। 29 ऎम अख़दम का धर्मेस मूसस गने कछनख्रस, लिकिन आ आलासी पत्त नू ऎम अख़'आ हूँ बलदम का आस एस्ते बरचस।” 30 आस आरिन बाचस, “निम्है ई कत्था गा हैकट कत्था हवे। आस एंग्है ख़न्नन कोड़े नंजस, अन्नु हूँ नीम इदिन हूँ बलदर आस एस्तेक बरचस। 31 ऎम अख़दम का धर्मेस पपहा आलर हीन मल मेन्दस। अरा आस तंग्है भगतर हीन अरा आसी मने लेक्खा नलख ननुर हीन मेन्दस। 32 ख़ॆख़ॆल ही ऒर ती नॆ हूँ इकला हूँ एन्ने मल्ला मेन्द्रका का नेकइम कुन्द्रका ती अन्धहा आलासिन कोड़े नंजस। 33 आस धर्मेस तरती मल र'अना होले, आस एन्ने एन्देर हूँ नना पोल्लोस दने।” 34 अरा आर आसिन बाचर, “नीन गा कुन्द्रका तिम पपहा र'अदय। नीन एमन सिखाब'आ गे चिहुट नन्दय का?” अरा आर आसिन गोड़हा एड़पा ती ओथ्रर चिच्चर। 35 यहूदी मुद्धर आसिन गोड़हा एड़पा ती ओथ्रर चिच्चर एन्ने येसुस मेंजस। अरा येसुस आसिन ख़क्खियस ख़ने, आसिन बाचस, “नीन मनवा ख़द्दस मइय्याँ पत्त'अदय का?” 36 आस मेंजस, “उर्बायो, एंगन तेंगा का आस नॆ तंग्है? ख़ने आसी मइय्याँ ऎन पत्त'आ ओंग्दन।” 37 येसुस आसिन बाचस, “नीन आसिन ईरका र'अदय, अरा नॆ निंग्है गने कछनख्र'आ लगदस आसिम आस हिकदस।” 38 ख़ने आस “उर्बायो! ऎन पत्त'अदन।” एन्ने बाचस ती आसिन ऒड़ लग्गियस। 39 तहाँ येसुस बाचस, “नेंवई गे ऎन ख़ॆख़ेल नू बरचकन। ख़ने नॆ अन्धहा र'अनर आर ऎरोर, अरा नॆ तमन ऎम ऎरदम एन्ने सोचनर, आर अन्धहा बार'ओर।” 40 जोक्क फरिसीर आसी गने रहचर, आर इदन मेंजर ती बाचर, “ऎम हूँ अन्धहा र'अदम का?” 41 येसुस आरिन बाचस, “नीम अन्धहा रहचकर होले, नीम पाप ही बदी नू मल र'ओर दने। लिकिन नीम ब'अदर का ‘ऎम ऎरा ओंग्दम,’ औंगे निम्है पाप ही बदी निम्है मइय्याँ र'ई।”
1 येसुस बाचस, “ऎन निमन मानिम ब'अदन, नॆ भेंडो गुदड़ी नू बली तरती मल कोरदस, लिकिन नन्ना तरती कोरदस, आस ख़लबस मलता बच्चुस हिकदस। 2 लिकिन नॆ बली ती कोरदस आस भेंडो ही महरस हिकदस। 3 आस गे बली ख़ापुस बलिन तिसगदस चि'अदस। अरा आसी भेंडो आसी सड़न मिनी। अरा आस तंग्है भेंडोन नामे पिंजदस ती मॆख़दस, अरा अबड़न बहरी कड़हाब'अदस। 4 आस तंग्है उर्मी भेंडोन बहरी ओन्द्रदस ख़ने, आस अबड़ा ही मुन्द मुन्द ऎकदस, अरा अबड़ा आसी ख़ॊख़ा गुड़ियार'ई, एन्देरगेका अबड़ा आसी सड़न ओर्ख'ई। 5 लिकिन अबड़ा नन्नस गने इकला हूँ मल गुड़ियार'ओ। आस ती गेच्छा बोंगो, ईगेका अबड़ा नन्नासी सड़न बल्ली।” 6 येसुस आलारिन ई ख़ीरिन तिंगियस, लिकिन आर मल बुझ्रर का आस आर गने एन्देर कत्थन कछनख्रस। 7 औंगे येसुस अउरिम बाचस, “ऎन निमन मानिमन ब'अदन, ऎन भेंडो गे बली हिकदन। 8 एंग्है ती मुन्द बरचकाचर, आर ओर्मर ख़लबर दरा बच्चुर र'अनर, लिकिन भेंडो आरहिन मल मेंजा। 9 ऎन दिम बली हिकदन। नॆ एंग्है नू मनरकी कोरदस, आस नाड़र'ओस। अरा आस भितरी बहरी कोर'ओस उरखोस अरा आस बने ओन्ना-मॊख़ना ख़क्खोस। 10 ख़लबस गा ख़ड़'आ पिटा अरा नठाब'आ गे बरदस। लिकिन ऎन आर उज्जनन ख़क्खा गे अरा आ उज्जनन अख लगय ख़क्खा गे बरचकन। 11 ऎन दिम बॆस महरा हिकदन। बॆस महरस तंग्है भेंडो गे तंग्है जियन चि'अदस। 12 बनियहार आलस गा भेंडो गुट्ठी ही उर्बस मलदस। अरा आस भुसुड़ बरनन एरदस ख़ने, आस भेंडो गुट्ठिन अम्बदस ती बोंगदस कादस। ख़ने भुसुड़ अबड़न बच्ची हुं'ई, अरा भिड़क'ई चि'ई। 13 आस बनियहार आलस र'अना ती अरा भेंडो ही पत्त नू फिकिर मल र'अना ती बोंगदस कादस। 14 - 15 ऎन दिम बॆस महरा हिकदन। एकासे बंगस एंगन अख़दस अरा ऎन बंगासिन अख़दन, अन्नेम ऎन एंग्है भेंडोन अख़दन अरा एंग्है भेंडो एंगन अख़'ई। ऎन भेंडो गुट्ठी गे एंग्है जियन चि'अदन। 16 एंग्है अउर हूँ भेंडो र'ई, अबड़ा ई गुहड़ी ता मल्ली। अबड़न हूँ एंगा ओन्द्रना चाड़ र'ई। अबड़ा एंग्है सड़न मेनो। ख़ने ओन्टे गुहड़ी मनो अरा ओन्टे महरस मनोस। 17 बंगस इदगे एंगन चोन्हा नन्दस का ऎन एंग्है जियन चि'अदन का ऎन अदिन फिन हो'आ ओंग्दन। 18 अदिन नॆ हूँ एंग्है गुसते मल हो'अदस। ऎन अदिन एंग्है मने तिम चि'अदन। एंगा अदिन चि'आ गे हूँ अदिया र'ई, अरा अदिन फिन हो'आ गे हूँ अदिया र'ई। एम्बस एंगन पॆसका लेक्खा ऎन एन्नेम नन्दन।” 19 येसुसी इबड़ा कत्था चड्डे यहूदीर नू फिन ख़ाड़रना मंजा। 20 आर ती नगदे आलर ब'आ लगियर, “आस नू नाद रस्सकी र'ई। आस बयहस, आसी कत्थन नीम एन्देरगे मेन्दर?” 21 जोक्क आलर ब'आ लगियर, “इबड़ा कत्था नाद रस्सका आलासी मल्ली। नाद अन्धहा आलारिन कोड़े नना उंगी का?” 22 येरुसलॆम नू बेंजना परब मना लगिया। ईद पइय्याँ उल्ला रहचा। 23 अरा येसुस धर्मेसी मन्दिर नू सालोमॊनसी परछी पिंडा ब'अनर अइय्या कुद्दा लगियस। 24 तहाँ यहूदीर आसी ओनबेंड़र'आ ख़ॊंड़रर ती मेंजर, “नीन ऎ उल्ला गूटी एमन ओदहा नू उइय्योय? नीन मसी हिकदय होले, एमन फरी तेंगा चि'आ।” 25 ख़ने येसुस आरिन बाचस, “ऎन निमन तिंकन, लिकिन नीम मल पत्त'अदर। एका नलखन ऎन एम्बस ही नामे ती नन्दन, आदिम एंग्है पत्त नू गोवाह चि'ई। 26 लिकिन नीम मल पत्त'अदर, एन्देरगेका नीम एंग्है भेंडो मलदर? 27 एंग्है भेंडो एंग्है सड़न मिनी। ऎन अबड़न अख़दन, अरा अबड़ा एंग्है गने गुड़ियार'ई। 28 अरा अबड़ा गे ऎन जनमजुग उज्जनन चि'अदन। अरा इकला हूँ अबड़ा मल नठार'ओ, अरा अबड़न नॆ हूँ एंग्है ख़ेक्खा ती बच्चा पोल्लोर। 29 एम्बस नॆ इबड़न एंगा चिच्चकादस, आस ओर्मर ती कोहाँ र'अस। अरा अबड़न नॆ हूँ एम्बासी ख़ेक्खा ती बच्चा पोलदस। 30 ऎन दरा बंगस ओन्टे दिम हिकदम।” 31 फेनिम यहूदीर येसुसिन लोड़ग'आ पिटा गे पखना पेत्तर। 32 लिकिन येसुस आरिन बाचस, “ऎन एम्बस तरती कैनो गोटंग कोड़हे अजगुत नलख गुट्ठिन निमा गे ऎदकन। अबड़ा ती एका नलख गे नीम एंगन लोड़ग'आ बेद्ददर?” 33 ख़ने यहूदीर आसिन बाचर, “ऎम निंगन निंग्है इन्द्रिइम अजगुत नलख गे लोड़ग'आ पिटा मल बेद्ददम। नीन धर्मेसी निंदा नन्दय, नीन गा आलय हिकदय, अन्नु हूँ निंगन धर्मे ब'अदय, अदगे ऎम निंगन लोड़ग'आ पिटा बेद्ददम।” 34 येसुस आरिन बाचस, “निम्है नॆग नू लिख्रकी र'ई, ‘ऎन बाचकन, नीम देंवता गुट्ठी हिकदर।’ 35 नॆख'आ गुसन धर्मेसी कत्था अंड़सिया, आस आरिन ‘देंवता गुट्ठी’ बाचस। नेम्हा पुथी ता कत्था अयन्दहा मल मना ऊंगी। 36 एंग्है पत्त नू ईद का, एंगन बंगस चज्जियस ती एंगन ख़ॆख़ेल नू तइय्यस। होले ऎन धर्मेसी ख़द्दन हिकदन बाचका ती नीम एकासे एंगन ब'आ ओंग्दर का ऎन धर्मेसिन निंदा नन्दन? 37 एम्बस नन्दस आ नलखन ऎन मल नन्दन होले, एंगन अमा पत्त'आ। 38 लिकिन ऎन अदन नन्दन होले, नीम एंगन मल पत्त'अदर होले हूँ अजगुत नलखन पत्त'आ। ख़ने नीम अख़'ओर अरा बुझुर'ओर का बंगस एंग्है नू र'अस अरा ऎन बंगस नू र'अदन।” 39 औंगे अउरिम आर आसिन धर'आ गे बिद्दियर, लिकिन आस आर ही ख़ेक्खा ती बुचड़ारस केरस। 40 तहाँ आस यॊहनस मुन्द नॊड़रत'आ लगियस असन यरदन ख़ाड़ ही आ पक्खे किर्रिम बिच्चियस, अरा असन रहचस। 41 अरा बग्गे आलर आसी गुसन बरचर अरा ताम तम्है नू ब'आलियर, “यॊहनस इन्द्रिइम हूँ अजगुत नलख मल नंजस, अन्नु हूँ यॊहनस ईसी पत्त नू एन्देर बाचस अबड़ा उर्मी मानिम हवे।” 42 अरा अइय्या बग्गे आलर आसिन पत्ताचर।
1 - 2 लाजरस नामे ओन्टा आलस बेमार रहचस। आस तंग्है बहिनर मरियम अरा मारथा गने बेतानिया पद्दा नू रहचस। ई मरियम दिम रहचा नॆ ख़ॊख़ा उर्बासी मइय्याँ महमहरना इसुंगन नलबिया अरा आसी ख़ेड्डेन तंग्है चुट्टी ती चींचया। 3 औंगे अबड़ा दुयो बहिनर येसुसिन कत्था तइय्यर, “उर्बायो, नीन नॆकन चोन्हा नन्दय आस बेमार र'अस।” 4 येसुस इदन मेंजस ख़ने बाचस, “ई बेमार पिटा गे मला, लिकिन धर्मेसी महबा गे बरचकी र'ई। इत्रु ती धर्मेसी ख़द्दासी महबा मनो।” 5 येसुस मारथा अरा अदही बहिन अरा लाजरसिन चोन्हा नंजस। 6 अन्नु हूँ आस लाजरस बेमार र'अस एन्ने मेंजस ख़ने, आस एसन रहचस असन दुई उल्ला अउर रहचस। 7 फेन इदही ख़ॊख़ा आस तंग्है चेलारिन बाचस, “बरा, नाम अउरिम यूदेया किर्रोत क'ओत।” 8 लिकिन चेलर बाचर, “अना गुरु, अक्कु जोक्क उल्ला ही मुन्द दिम यूदेया ता यहूदीर निंगन लोड़ग'आ पिटा बेद्दा लगियर, अन्नु हूँ नीन अइय्यम अउरिम कादय का?” 9 येसुस बाचस, “उल्ला ही बारा घंटा मनी। एकअम ओर्तस उल्ला बारी ऎकोस होले, मल मूड़दस, एन्देरगेका ई ख़ॆख़ेल ता बिल्लिन ऎरदस। 10 लिकिन आस माख़ा नू ऎकदस होले, मूड़दस, एन्देरगेका अइय्या उल्ला बारी बेसे बिल्ली मल र'ई।” 11 आस एन्ने बाचस अदही ख़ॊख़ा आस आरिन अउरिम बाचस, “नम्है संगेस लाजरस ख़न्द्रकादस, आसिन ऎन ख़न्द्रना ती एज'आ कालदन।” 12 औंगे चेलर आसिन बाचर, “अना उर्बायो, आस ख़न्द्र'आ लगदस होले, उजगारोस क'ओस।” 13 येसुस गा आसी केचका ही पत्त नू बाचकाचस, लिकिन आसी चेलर गा ख़न्न ऎख़्रना गे ख़न्द्रना ही पत्त नू ब'अदस एन्ने बुझ्रर। 14 औंगे येसुस आरिन फरीफरी तिंगियस का “लाजरस केच्चस केरस। 15 अरा ऎन निम्है चड्डे खुसमारदन का ऎन असन मल रहचकन, एकत्रु नीम अउर कोड़हे पत्त'आ ओंगोर। बरा, नाम आसी गुसन क'ओत।” 16 ख़ने तॊमस नॆकन दिदुमोस हूँ ब'अनर, आस तंग्है संगे चेलारिन बाचस, “गुचा, आस गने नाम हूँ खे'आ गे क'ओत।” 17 असन अंड़सका ख़ॊख़ा येसुस अक्खस का लाजरसिन मसड़ा नू मंडका चार उल्ला मंजा केरा। 18 बेतानिया येरुसलॆम ती ऎंड़ कोंस केम गेच्छा नू रहचा। 19 भईसी खे'अना ही जिया सालत'आ गे बग्गे यहूदीर मारथा अरा मरियम गुसन बरचका रहचर। 20 मारथा येसुसी बरना ही हलन मेंजा ख़ने, आसिन भेंट मना केरा, लिकिन मरियम एड़पा नू रहचा। 21 मारथा येसुसिन बाचा, “उर्बायो, नीन इसन रहचका होले, एंग्है भईस मल खे'ओस दने। 22 लिकिन अक्कुन हूँ ऎन अख़दन का नीन धर्मेस ती इन्द्रिइम हूँ ने'ओय अदिन धर्मेस निंगा चि'ओस।” 23 येसुस अदिन बाचस, “निंग्है भईस अउर उज्जा चो'ओस।” 24 मारथा आसिन बाचा, “ऎन अख़दन का छेद्दे उल्ला उज्जा चो'अना ही बेड़ा नू आस हूँ उज्जा चो'ओस।” 25 येसुस अदिन बाचस, “ऎनिम आलारिन उज्जा चॊदत'अदन अरा आर गे जनमजुग उज्जनन चि'अदन। नॆ एंग्है मइय्याँ पत्त'अदस आस खे'ओस क'ओस अन्नु हूँ उज्जोस। 26 अरा नॆ उज्जा लगदस अरा एंग्है मइय्याँ पत्त'अदस, आस हुल्लो गूटी मल खे'ओस। मारथा, नीन इदिन पत्त'अदी का?” 27 आद बाचा, “हाँ उर्बायो, ऎन पत्ताचकादन का नीन धर्मेसी ख़द्दय मसी हिकदय, नॆ ई ख़ॆख़ेल नू बर'ऊ रहचस।” 28 एन्ने बाचा ती आद किर्रिम बिच्चिया, अरा तंग्है बहिन मरियम आबोन कले कले मीख़िया ती बाचा, “गुरुस इसन र'अस, अरा निंगन मॆख़दस।” 29 मरियम इदिन मेंजा ती लॆम चॊचा ती येसुस गुसन काला लगिया। 30 येसुस अक्कु गूटी पद्दा नू मल कोरचकाचस। मारथा आसिन एसन भेंट मंजा आ अड्डा नुम रहचस। 31 जिया सालत'आ गे बरचका यहूदीर मरियम गने एड़पा नू रहचर। आर अदिन लॆम चॊचा ती बहरी काना ईरियर ख़ने, मसड़ा नू चींख़ा काला लगी बाचर ती अदही ख़ॊख़ा ख़ॊख़ा केरर। 32 लिकिन मरियम येसुस रहचस असन अंड़सिया अरा आसिन ईरिया ख़ने, आद आसी ख़ेडमूली खत्तरा ती बाचा, “उर्बायो, नीन इसन रहचका होले, एंग्है भईस मल खे'ओस दने।” 33 येसुस मरियमन अरा अदही गने बरचका यहूदीरिन हूँ चींख़ना ईरियस ख़ने, जिया नू हेंदवारस अरा अकबकरस ती 34 आरिन मेंजस, “आसिन नीम एक्सन मंडका र'अदर?” अबड़र आसिन बाचर, “गुचा ती ऎरा उर्बायो।” 35 येसुस ख़ंजलख़ो चुरख़स। 36 ख़ने यहूदीर बाचर, “ऎरा, आस आसिन ऎ कोड़हे चोन्हा नंजस।” 37 लिकिन अबड़र ती जोक्कोर बाचर, “ईस अन्धहा आलासिन कोड़े नंजस। ईस लाजरसिन खे'अना ती बछाब'अरकी उइय्या गे पोल्लस का?” 38 येसुस जिया ती अउरिम कोड़हे हेंदवारस अरा मसड़ा गुसन बरचस। आद ओन्टा ख़ोल रहचा, अरा अइय्या ओन्टा पखनन उर्दका रहचा। 39 येसुस बाचस, “पखनन गुछाब'आ।” केचकासी बहिन मारथा बाचा, “उर्बायो, अक्कु गा आद ती बसनाफूटचा मनो, एन्देरगेका आसी केचका चार उल्ला मंजा केरा।” 40 येसुस अदिन बाचस, “ऎन निंगन नीन पत्त'ओय होले धर्मेसी महबन ऎरोय एन्ने मल बाचका रहचकन का?” 41 ख़ने आर पखनन टाँड़चर। फिन येसुस मइय्याँ मॆन ईरियस ती बाचस, “अना बंगायो, ऎन निंगन धन्यवाद नन्दन का एंग्हैन नीन मेंजका र'अदय। 42 अरा ऎन अख़'आ लिक्कन, नीन सदौ एंग्हैन मेन्दय। लिकिन इसन ओनबेंड़र'आ इज्जका आलर ही चड्डे ऎन एन्ने बाचकन का आर पत्त'आ ओंगोर का नीन एंगन तइय्कादय।” 43 येसुस एन्ने बाचस ती जॊरसरिया चिच्चियारस, “अना लाजरस, उरखा बरा।” 44 आ केचका आलस कफन किचरी ती ख़ेक्खा ख़ेड्डे पोजरका रांगे बहरी उरखस, अरा आसी मुंही नन्ना किचरी ती मुढ़चका रहचा। अरा येसुस आरिन बाचस, “ईसी हॆंरका गुट्ठिन कोल्ला अरा ईसिन काला चि'आ।” 45 मरियम गने भेंट मना गे बरचका बग्गे यहूदीर येसुसी ई नलख नंजकन ईरियर ती आसी मइय्याँ पत्ताचर। 46 लिकिन अबड़र ती जोक्कोर फरिसीर गुसन केरर ती येसुसी नंजका नलखन तिंगियर। 47 ख़ने मुध नैगर अरा फरिसीर यहूदीर ही कोहाँ सभा आबोन मीख़ियर ती बाचर, “नाम एन्देर ननोत? ई आलस गा कोड़हे अजगुत नलख ही चिन्हन ऎद्ददस। 48 ईसिन एन्नेम नाम अम्बोत चि'ओत होले, ओर्मा आलर आसिन पत्त'ओर। फिन रोमी आलर बर'ओर ती नम्है धर्मेसी मन्दिरन अरा नम्है राजिन नठाब'ओर।” 49 ख़ने अबड़र ती ओर्तोस आ चाँन ता कोहाँ नैगस कैफस आरिन बाचस, “नीम एन्द्रन हूँ बलदर। 50 अरा नीम मल बुझुरदर का नम्है गोट्टा राजी नठारना काना ती, नम्है आलर गे ओर्तोस खे'अना काना बने र'ई।” 51 ई कत्थन आस तंग्है ती मल्ला बाचका, लिकिन आस आ चाँन ता कोहाँ नैगस र'अना ती धर्मेसी कत्थन मुन्द तिंगियस का, येसुस यहूदी राजी गे खे'आ कादस। 52 अरा आ राजी गे लेका मला, छितिर बितिर मंजका धर्मेसी आलारिन हूँ ख़ॊंड़'अरकी ओन्टम मना गे हूँ खे'आ कादस। 53 ख़ने अउला तिम आर येसुसिन पिटना ही चिताबुता नना हेलरर। 54 औंगे येसुस आ बेड़ा ती हरकट ती यहूदीर मझी नू मल कुद्दियस। लिकिन आस असते उरखस ती टोडंग ही हेद्दे ता चकभार नू एफ्राईम नामे ओन्टा पद्दा नू केरस, अरा तंग्है चेलर गने अइय्यम रहचस। 55 अक्कु यहूदीर ही कट्टना परब हेद्दे अंड़सकी रहचा। ख़ने पद्दा तरती ढ़ॆर आलर तमन चाल ही सुध मना गे कट्टना परब ही मुन्द तिम येरुसलॆम केरर। 56 ख़ने आर येसुसिन बेद्दा कुद्दा लगियर, अरा धर्मेसी मन्दिर नू बखड़े नू इज्जर ती ओर्त ओर्त नू कछनख्र'आ लगियर, “नीम एन्देर सोचदर, ई परब गे आस बर'ओस का?” 57 लिकिन मुध नैगर अरा फरिसीर पॆसका चिच्का रहचर का निकईम येसुस एसन र'अस एन्ने अख़दस होले, आस आर गे तेंग्ना दिम र'ई। ख़ने आर आसिन हें'आ ओंगोर।
1 कट्टना परब ही छै उल्ला मुन्द येसुस बेतानिया बरचस। असन दिम येसुस केचका ती उज्जताचका लाजरस रहचस। 2 अइय्या येसुसिन मईन नना गे आर आस गे मदी चिच्चर। मारथा ओन्ना-मॊख़ना ख़ट्टा लगिया। अरा येसुस गने ओन्ना आलर नू लाजरस हूँ ओर्तोस रहचस। 3 फेन मरियम अधा लिटर नगदे दाम ही जटामासी ही अर्रगा गमगमरना इसुंगन ओन्द्रा ती येसुसी ख़ेड्डे नू ख़स्सिया, अरा आसी ख़ेड्डेन तंग्है चुट्टी ती चींचया। अरा इसुंग ही महकारना गोट्टा एड़पा नू निंदिया केरा। 4 लिकिन येसुसी ओन्टा चेलस यूदस इसकारियॊत नॆ येसुसिन धरत'आ गे पपहर गे संगे चि'ऊ रहचस, आस बाचस, 5 “ई इसुंग ही दाम ओर्तोसी ओन बछर ही कमाब'अना ही भुती मनी, इदन बीसरकी कीड़र गे चि'आ ओंगो दने।” 6 आस गे कीड़र ही तिहा रहचा अदगे मल बाचस, लिकिन आस ख़लबस रहचस, अरा आसी गुसन आर ही थोलको र'आ लगिया। अरा अइय्या ती एन्द्रा उइय्या लगियर अदिन कभो कभो तंगा गे ओथ्र'आ हो'आ लगियस। 7 ख़ने येसुस बाचस, “अदिन अम्बा चि'आ, अमा थोकबोकामब'आ, आद अदिन एंग्है माड़ना उल्ला गे उइय्की रहचा। 8 कीड़र गा निम्है गने सगर घड़ी र'अनर, लिकिन ऎन निम्है गने सगरो मल र'ओन।” 9 ढ़ॆर बग्गे यहूदी आलर मेंजर का येसुस बेतानिया नू र'अस। आर असन येसुसिन लेका ऎरा मल बरचर, लिकिन येसुस केचका ती उज्जताचका लाजरसिन हूँ ऎरा बरचर। 10 औंगे मुध नैगर लाजरसिन हूँ पिटा गे चिताबुता नंजर। 11 एन्देरगेका आसी चड्डे नगदे यहूदी आलर आरिन अम्बा लगियर ती येसुसिन पत्त'आ लगियर। 12 नन्ना उल्ला कट्टना परब गे बरचका कोहाँ आल गोंहड़ा मेंजा का येसुस येरुसलॆम बर'आ लगदस। 13 औंगे आर कीन्दा डहुड़ा ओन्द्रर ती सड़क नू आसिन भेंट मना गे उरखर, अरा चिच्चियारनुम ब'आ हेलरर, “धर्मेसी महबा मनन! धर्मेस ईसिन बरकत नन्दस, नॆ उर्बासी आकुस गने बरदस! धर्मेस इस्राऎल ही बॆलासिन बरकत नन्दस!” 14 येसुस ओन्टा गदही ख़द्द ख़क्खियस ती आस अइय्या उक्कियस। एकासे का नेम्हा पुथी ब'ई, 15 “येरुसलॆम ता आलारो, अमा एल्चा! ऎरा, निम्है बॆलस गदही ख़द्द नू उक्कियस ती बर'आ लगदस।” 16 येसुसी चेलर मुन्द इबड़न मल बुझ्र'आ लगियर। लिकिन येसुस महबा नू होतारना ही ख़ॊख़ा, आर सुरता नंजर का इबड़ा आसी पत्त नू धर्मेसी कत्था तिंगुर ती लिख्रकी रहचा, अरा इबड़न आलर आसी गने एन्नेम नंजका रहचर। 17 येसुस लाजरसिन मसड़ा ती मीख़ियस ती केचका ती उज्जताचका बारी, आसी गने एका आल गोंहड़ा रहचा, आर इदही गोवाह नन्नर गे चि'आ लगियर। 18 बग्गे आलर आस ई लेक्खा ओन्टा अजगुत नलख नंजका रहचस एन्ने मेंजर ती, आसिन भेंट नना गे केरर। 19 ख़ने फरिसीर ताम तामिम कछनक्खरर, “नीम ऎरा, नम्है ती एन्देर हूँ मना पुल्ली, ऎरा! गोट्टा ख़ॆख़ेल आसी ख़ॊख़ा कालाली।” 20 परब गे येरुसलॆम नू महबा नना बरचका आलर ती जोक्क आलर युनानी आलर हूँ रहचर। 21 अबड़र गलिलेया ही बॆतसैदा ता फिलिप्पोस गुसन बरचर ती बाचर, “उर्बायो, ऎम येसुसिन भेंट मना बेद्ददम।” 22 फिलिप्पोस बरचस ती अन्द्रेयसिन तिंगियस। अरा अन्द्रेयस अरा फिलिप्पोस केरर ती येसुसिन तिंगियर। 23 येसुस बाचस, “मनवा ख़द्दासी महबा मन्ना ही बेड़ा अंड़सकी र'ई। 24 ऎन निमन मानिम ब'अदन, गहूँ ही दना ख़ज्ज नू खत्रना ती अरगी खे'अना गूटी ओन्टे गुना र'ई, लिकिन खि'ई क'ई होले, नगदे ख़ंजपा चि'ई। 25 एकास तंग्है उज्जनन तंगा गे उज्जा बेद्ददस, आस धर्मेस गने जनमजुग उज्जनन एबस'ओस। लिकिन एकास ई ख़ॆख़ेल नू तंग्है उज्जनन दुस'ओस, आस अदिन ख़ापोस अरा जनमजुग उज्जनन ख़क्खोस। 26 नॆ एंगन सुस्र'आ बेद्ददस आस एंग्है गने चॊंख़्रदस नेकअन, अरा एसन ऎन र'ओन असन एंग्है जॊंख़स हूँ र'ओस। नॆ एंगन सुस्र'अदस, आसिन एम्बस मईन ननोस। 27 अक्कुन एंग्है जिया उकुल बुकुल मंजकी र'ई। ऎन एन्देर ब'ओन? बंगायो, ई सस्ती ही बेड़ा ती एंगन बछाब'आ ब'ओन का? मला, ऎन इदगेम ई बेड़ा गूटी बरचकादन। 28 अना बंगायो, निंग्है नामे गे महबन ओन्द्र'आ।” ख़ने मेर्ख़ा ती ओन्टा सड़ा मेन्दरा, “ऎन गा एंग्है नामे गे महबन ओन्द्रका र'अदन अरा फेनिम अदगे महबन ओन्द्र'ओन।” 29 ख़ने असन इज्जका आलर इदिन मेंजर ती बाचर बदाली मुर्रिया। नन्नर बाचर एकअम मेर्ख़ा पैकस आसी गने कछनख्रस। 30 ख़ने येसुस आरिन बाचस, “आ सड़ा निमा दौ गे रहचा, एंगा गे मला। 31 अक्कु दिम ई ख़ॆख़ेल ता नेंवई मन्ना ही बेड़ा हवे। अरा अक्कु दिम ई ख़ॆख़ेल ही अक्स'ऊ सैतान बहरी हेबड़तार'ओ। 32 अरा ऎन ख़ॆख़ेल ती मइय्याँ चॊदतार'ओन ख़ने, ओर्मा आलारिन एंग्है गुसन नतगोन।” 33 एका लेक्खा खे'अना आस गे मनो अदिन ऎद'आ गे दिम इदन आस बाचस। 34 तहाँ असन ख़ॊंड़रका आलर आसिन बाचर, “ऎम नॆग ती मेंजकादम का मसीस सगरो उज्जोस। अन्ने र'ई होले नीन एकासे ब'आ ओंग्दय का ‘मनवा ख़द्दासिन मइय्याँ चॊदतारना ही चाड़ र'ई?’ ई मनवा ख़द्दस एका ओर्तस?” 35 ख़ने येसुस आरिन बाचस, “बिल्ली अक्कुन निम्है गने जुक्किम बेड़ा गे र'ओ। ऊख़ा निमन कुलना ती मुन्द, बिल्ली निम्है गने र'अना बारिम नीम अइय्या नू ऎका। ऊख़ा नू ईकू आलस तान एसन कादस अदिन बलदस। 36 बिल्ली निम्है गने र'अना बारिम, नीम आ बिल्लिन पत्त'आ, होले नीम बिल्ली ही ख़द्दर मना ओंगोर।” येसुस इबड़न बाचस ती किर्रिम बिच्चियस, अरा आस मल ऎथ्रस। 37 येसुस आलर ही मुन्दहारे कोड़हे बग्गे अजगुत नलख ही चिन्हा नंजका ती हूँ आर आसिन मल पत्ताचर। 38 धर्मेसी कत्था तिंगू यसायास ती बाचका कत्था पूरा नना गे दिम ईद मंजा। “अना उर्बायो, एम्है कत्थन नॆ पत्ताचका र'अनर। अरा नॆख'आ गे उर्बासी कोड़हे सवंग दहदर मंजा?” 39 ई चड्डे दिम आर पत्त'आ पोल्लर, एन्देरगेका यसायास एन्ने हूँ बाचका र'अस। 40 “धर्मेस आर ही ख़न्नन कना, अरा आर ही जियन बेड़हा नंजका र'अस। एन्ने अम्बो मना का आर ख़न्न ती ऎरोर, अरा जिया ती बुझुर'ओर, अरा आर एंग्है गुसन किर्रोर बर'ओर, अरा ऎन आरिन कोड़े ननोन।” 41 यसायास येसुसी महबन ईरका चड्डे आसी पत्त नू तिंगियस ख़ने, इबड़ा कत्थन बाचस। 42 अन्नु हूँ यहूदी मुद्धर ती ढ़ॆर आलर येसुस मइय्याँ पत्ताचर। लिकिन फरिसीर चड्डे आर आसी मइय्याँ ता तंग्है पत्त'अनन मल तेंगरर। आर इदगे इल्चियर का आर आरिन गोड़हा एड़पा ती ओथ्र'ओर चि'ओर दने। 43 आर गा धर्मेस ती बरना ओहमा ती आलर ती बरना ओहमन कोड़हे पत्तर'आ लगियर। 44 तहाँ येसुस चिच्चियारस ती बाचस, “नॆ एंग्है मइय्याँ पत्त'अदस, आस एंग्है मइय्याँ लेका मला, एंगन तइय्युस मइय्याँ हूँ पत्त'अदस। 45 अरा नॆ एंगन ऎरदस आस एंग्है तइय्युसिन ऎरदस। 46 ऎन ख़ॆख़ेल नू बिल्ली लेक्खा बरचका र'अदन। औंगे नॆ एंगन पत्त'ओस आस ऊख़ा नू मल र'ओस। 47 नेकईम एंग्है कत्था गुट्ठिन मेन्दस ती अबड़न मल मनदस होले, आसिन ऎन नेंवई मल नन्दन, एन्देरगेका ऎन ख़ॆख़ेलन नेंवई नना गे मला, लिकिन अदिन नाड़ा गे बरचका र'अदन। 48 नॆ एंगन ख़ाँड़ना ती एंग्है कत्था गुट्ठिन मल इंझ्रदस, आस गे ओन्टा नेंवई ननुस र'अस। ऎन बाचका ई कत्था दिम छेद्दे उल्ला नू आसिन नेंवई ननो। 49 एन्देरगेका ऎन एंग्है तरती मल कछनख्रदन। लिकिन एंगन तइय्का बंगस दिम एंगन पॆसस, एन्देर एन्देर ब'अना र'ई अरा अदन एकासे नन्ना र'ई। 50 अरा ऎन अख़दन का आसी पॆसका जनमजुग उज्जना गे कड़हाब'ई। औंगे बंगस एंगन ब'आ गे आनदस, अदन दिम ऎन ब'अदन।”
1 कट्टना परब ही मुन्द येसुस अक्खस का ई ख़ॆख़लन अम्बना ती तम्बस गुसन तंग्है काना बेड़ा अंड़सिया। आस तंग्है आलर नॆ ई ख़ॆख़ेल नू रहचर, आरिन सगरो चोन्हा नंजका रहचस, अरा आरिन मुंजा गूटी चोन्हा नंजस। 2 येसुस अरा आसी चेलर पुतबारी ता मंडी ओना उक्का रहचर। नाद सिमॊनसी तंग्दस यूदस इसकारियॊतसी जिया नू येसुसिन धरत'आ गे पपहर गे संगे चि'आ गे मतिन सज्ज ख़च्चकी रहचा। 3 येसुस अक्खस का बंगस उर्मी ही मइय्याँ तंगा गे आकुस चिच्का रहचस, अरा तान धर्मेस गुसते बरचकाचस, अरा धर्मेस गुसन किर्रा लगदन। 4 येसुस ओन्ना पाँती ती चॊचस, अरा तंग्है थालर आबोन इच्चियस ती संफी ती तंग्है कड़मन हॆंचस। 5 फिन थरा नू अम्मु एल्खस ती तंग्है चेलर ही ख़ेड्डेन नॊड़ा हेलरस, अरा कड़मा नू हॆंरका संफी ती चींचा हेलरस। 6 फिन आस सिमॊन पतरस गुसन बरचस ख़ने, पतरस आसिन बाचस, “उर्बायो! नीन एंग्है ख़ेड्डेन नॊड़ा कालदय का?” 7 येसुस आनाकिर्ताचस, “ऎन एन्देर नना लगदन अदिन नीन अक्कुन मल बुझुरदय, लिकिन ख़ॊख़ा बुझुर'ओय।” 8 पतरस बाचस, “मला, नीन एंग्है ख़ेड्डेन इकला हूँ मल नॊड़ना र'ई।” ख़ने येसुस बाचस, “ऎन निंग्है ख़ेड्डेन मल नॊड़ोन होले, नीन एंग्है आलर ती ओर्त मलदय।” 9 ख़ने सिमॊन पतरस आसिन बाचस, “अना उर्बायो, होले एंग्है ख़ेड्डे लेका मला ख़ेक्खा अरा कुक्कन हूँ नॊड़ा।” 10 येसुस बाचस, “ओर्तोस एमच्का ख़ॊख़ा, आसी गोट्टा मॆद सफा र'ई, आस ख़ेड्डेन लेका नॊड़ा गे चाड़ र'ई। नीम सफा र'अदर, लिकिन निम्है ती ओर्मर मला।” 11 एन्देरगेका येसुस अक्खस का नॆ तंग्है बिड़दो मनोस, औंगे आस बाचस, “निम्है ती ओर्मर सफा मलकर।” 12 आस आर ही ख़ेड्डेन नूड़ियस मुंजियस ती तंग्है थालर आबोन अत्तियस। फेन तंग्है अड्डा नू उक्कियस अरा आरिन मेंजस, “नीम बुझुरदर का ऎन निम्है गने एन्देर नंजकादन? 13 नीम एंगन ‘गुरु’ अरा ‘उर्बय’ एन्ने मॆख़दर, अरा एन्ने निम्है मॆख़ना ठउकम हिके, एन्देरगेका ऎन आसिम हिकदन। 14 ऎन निम्है उर्बय अरा गुरु हिकदन, अन्नु हूँ ऎन निम्है ख़ेड्डेन नूड़कन, नीम हूँ अन्ने ओर्त ओर्तोसी ख़ेड्डेन नॊड़के। 15 एन्देरगेका ऎन निमा नमुना ऎदकन। एकासे ऎन निम्है गने नंजकन, अन्नेम नीम हूँ ननके। 16 ऎन निमन मानिम ब'अदन, जॊंख़स तंग्है उर्बस ती कोहँस मलदस, अरा तइरकस आसिन तइय्युस ती कोहाँ मलदस। 17 अक्कुन नीम इबड़ा कत्थन अख़दर, अरा इबड़न नीम नन्दर होले, धर्मेस निमन बरकत ननोस। 18 ऎन नीम ओर्मर ही पत्त नू मल ब'अदन। ऎन अख़दन का ऎन नॆकन नॆकन चज्जिकादन। लिकिन ईद इदगे मनी का नेम्हा पुथी नू लिख्रका कत्था मन्ना र'ई, ‘एकास एंग्हा गने मोक्खस आस दिम एंग्है बिड़दो मंजकादस।’ 19 ऎन अक्कु आद मन्ना ती मुन्द तेंगदन, औंगे एकाबारी आद मनी आ बारी नीम पत्त'ओर का ऎन आसीम हिकदन। 20 ऎन निमन मानिम ब'अदन, ऎन तइय्का नॆक'अनिम नॆ इंझ्रदस, आस एंगन हूँ इंझ्रदस। अरा नॆ एंगन इंझ्रदस, आस एंगन नॆ तइय्कादस आसिन हूँ इंझ्रदस।” 21 इबड़न बाचस ती येसुस जिया नू उकुल बुकुल मंजस ती हरकट ती बाचस, ऎन निमन मानिम ब'अदन, “निम्है ती ओर्तोस एंगन धरत'आ गे संगे चि'ओस।” 22 चेलर पयपयारर केरर ती आस नॆख'आ पत्त नू ब'अदस बाचर ती ताम तामिम ऎरा नख्र'आ हेलरर। 23 चेलर ती ओर्तोस, नॆकन येसुस चोन्हा नंजस, आस येसुसी धरी नू उक्का रहचस। 24 सिमॊन पतरस आसिन मिटकाचस ती येसुस नॆख'आ पत्त नू बाचस एन्ने येसुसिन मेना गे बाचस। 25 ख़ने आस होबोर मंजस ती येसुसिन मेंजस, “उर्बायो, आस एका ओर्तस?” 26 ख़ने येसुस बाचस, “नॆकन ऎन असमा कुटकन थरा नू ओत्तोन ती चि'ओन, आसिम हिकदस।” अरा आस असमा कुटकन होच्चस ती उत्तियस ती सिमॊनसी तंग्दस यूदस इसकारियॊतस गे चिच्चस। 27 अरा यूदस असमा कुटकन इंझ्रना गनेम सैतान यूदस नू समसारा केरा। फिन येसुस आसिन बाचस, “निंगा एन्देर नन्ना र'ई अदिन चाँड़हे नना।” 28 ओना उक्का आलर नॆ हूँ मल बुझ्रर का येसुस आसिन एन्ने एन्देरगे बाचस। 29 यूदस ढिबा ही थोलकोन उइय्या लगियस, ख़ने जोक्कोर सोच्चर का परब नू चाड़ मनो अबड़न ख़ेन्दा गे महले कीड़र गे इन्द्रिइम चि'आ गे येसुस आसिन बाचस। 30 असमा कुटकन इंझ्रस ती आ बारिम यूदस बहरी किर्रिम बिच्चियस। आ बारी माख़ा रहचा। 31 यूदस केरका ख़ॊख़ा येसुस बाचस, “अक्कु मनवा ख़द्दन एंगा महबा दहदर मनी, अरा एंग्है ती धर्मेसी महबा दहदर मनी। 32 अरा एंग्है ती धर्मेसी महबा दहदर मनी होले, धर्मेस हूँ मनवा ख़द्दन एंगा महबन तंग्है ती दहदर ननोस, अरा लॆम अदन ननोस। 33 खद्दारो! जोक्क घड़ी लेका निम्है गने र'ओन। अरा नीम एंगन बेद्दोर, अरा ऎन एकासे यहूदी मुद्धारिन बाचकन अन्नेम अक्कुन ऎन निमन ब'अदन का ऎन एक्सन कादन असन नीम काला पोल्दर। 34 ऎन निमा गे ओन्टा पुना पॆसका चि'अदन, नीम ओर्त ओर्त गने चोन्हा नना। एकासे ऎन निमन चोन्हा नंजकन, अन्नेम नीम हूँ ओर्त ओर्त गने चोन्हा नन्ना र'ई। 35 नीम एन्ने ओर्त ओर्त गने चोन्हा ननोर होले, ओर्मा आलर अख़'ओर का नीम एंग्है चेलर हिकदर।” 36 सिमॊन पतरस येसुसिन मेंजस, “उर्बायो, नीन एक्सन कालदय?” येसुस बाचस, “एक्सन ऎन कालदन असन नीन अक्कुन एंग्है गने चॊंख़्र'आ पोलदय, लिकिन ख़ॊख़ा नीन एंग्है गने चॊंख़्र'ओय।” 37 पतरस आसिन मेंजस, “उर्बायो, एन्देरगे अक्कुन ऎन निंग्है गने चॊंख़्र'आ पोलदन? ऎन गा निंगा गे एंग्है जियन हूँ चि'ओन।” 38 येसुस आसिन बाचस, “नीन एंगा गे निंग्है जियन हूँ चि'ओय का? निंगन ऎन मानिम ब'अदन, ख़ॆर चींख़ना ती मुन्द तीन हॆल नीन एंगन बलदन ब'ओय।”
1 येसुस तंग्है चेलारिन बाचस, “निम्है जिया उकुल बुकुल अम्बो मना। धर्मेस मइय्याँ पत्त'आ, एंग्है मइय्याँ हूँ पत्त'आ। 2 एम्बासी एड़पा नू ढ़ॆर बग्गे र'आ गे अड्डा र'ई, अन्ने मल रहचका होले, ऎन निमन बाचका र'ओन दने। ऎन असन निमा गे ओन्टा अड्डा सपड़'आ कालदन। 3 ऎन असन कालरकी निमा गे ओन्टा अड्डा सपड़ारका ख़ॊख़ा, अउरिम बर'ओम ती नीम एंग्है गने र'आ गे निमन हो'ओन क'ओन। ख़ने ऎन एसन र'ओन असन नीम हूँ र'ओर। 4 ऎन एसन कालदन आ अड्डा काना ही डहरेन नीम अख़दर।” 5 तॊमस येसुसिन बाचस, “उर्बायो, नीन एसन कालदय ऎम बल्दम। होले अदही डहरेन ऎम एकासे अख़'ओम?” 6 येसुस आसिन बाचस, “डहरे अरा मानिम अरा उज्जना ऎनिम हिकदन। एंग्है त्रु बिगर नॆ हूँ बंगस गुसन काला पोलनर। 7 नीम एंगन मानिम नू अक्का होले, एम्बासिन हूँ अख़'ओर दने। अरा अक्कु ती नीम आसिन अख़दर, अरा आसिन ईरका हूँ र'अदर।” 8 फिलिप्पोस आसिन बाचस, “उर्बायो, बंगासिन एमन ऎद'आ, ईदिम एमा जबर हवे।” 9 येसुस आसिन बाचस, “फिलिप्पोस, ऎन एन्ने उल्ला गूटी निम्है गने रहचकन, अन्नु हूँ अक्कु गूटी नीन एंगन बलकय का? नॆ एंगन ईरकादस, आस बंगासिन हूँ ईरकादस। होले नीन एन्देरगे ब'अदय, ‘बंगासिन एमन ऎद'आ’? 10 एन्देर नीन मल पत्त'अदय का ऎन बंगस नू र'अदन अरा बंगस एंग्है नू र'अस? ऎन एकदन निमन ब'अदन आद एंग्है मल्ली, अबड़ा एम्बासी कत्था हवे। आस एंग्है नू र'अस ती आसिम तंग्है नलखन नन्दस। 11 ऎन बंगस नू र'अदन, अरा बंगस एंग्है नू र'अदस, एन्ने ऎन ब'अदन ख़ने, नीम अदिन पत्त'आ, मला होले ऎन नंजका अजगुत नलख चड्डे अदिन पत्त'आ। 12 ऎन निमन मानिमन ब'अदन, नॆ एंग्है मइय्याँ पत्त'अदस, आस ऎन एका नलख गुट्ठिन नंजकादन अबड़न तान हूँ ननोस। अरा ऎन बंगस गुसन कालदन ई चड्डे आस अबड़ा ती हूँ कोहाँ नलख गुट्ठिन ननोस। 13 अरा नीम एंग्है नामे ती इन्द्रिइम ने'अदर, अदिन ऎन निमा गे ननोन। ख़ने बंगासी महबा ऎन ख़द्दस ती दहदर मनो। 14 नीम एंग्है ती एंग्है नामे ती इन्द्रिइम ने'अदर होले, अदिन ऎन निमा ननोन। 15 नीम एंगन चोन्हा नन्दर होले, नीम एंग्है पॆसका गुट्ठिन मन'ओर। 16 अरा ऎन बंगस गुस्ते ने'ओन, अरा आस निमा अउर ओन्टा सालत'उसिन चि'ओस। आस सगरो निम्है गने र'ओस। 17 आस दिम उर्मी मानिमन दहदर ननू नेम्हा बॊलतस हिकदस। आसिन ई ख़ॆख़ेल ता आलर मल इंझर'ओर, एन्देरगेका आर आसिन मल ऎरनर महले आसिन बलनर। लिकिन नीम आसिन अख़दर, एन्देरगेका आस निम्है गने उज्जदस अरा निम्है नू र'ओस। 18 ऎन निमन टुरा गुट्ठी लेक्खा मल अम्बोन, ऎन निम्है गुसन किर्र'ओन बर'ओन। 19 जोक्क घड़ी ख़ॊख़ा ख़ॆख़ेल एंगन ऎरा दिम पोल्लो। लिकिन नीम गा एंगन ऎरोर, ईगेका ऎन उज्जालदन, नीम हूँ उज्जोर। 20 इकला ऎन उज्जा चो'ओन, आ उल्लम नीम अख़'ओर का ऎन एम्बस नू र'अदन, अरा नीम एंग्है र'अदर, अरा ऎन निम्है नू र'अदन। 21 नॆ एंग्है पॆसका गुट्ठिन इंझ्रदस, अरा अबड़न मनदस, आस दिम एंगन चोन्हा ननू र'अदस। नॆ एंगन चोन्हा नन्दस आसिन एम्बस चोन्हा ननोस। अरा ऎन आसिन चोन्हा ननोन ती एंगन आस गे दहदर ननोन।” 22 फिन यूदस नॆ यूदस इसकारियॊतस मलदस, आस येसुसिन बाचस, “उर्बायो, एन्देरगे नीन निंगन ख़ॆख़ेल ता आलर गे दहदर मल नन्ना ती एमा गे लेकम दहदर नना बेद्ददय?” 23 येसुस आसिन किर्त'अर बाचस, “नीकईम एंगन चोन्हा नन्दस होले, आस एंग्है सिखाब'अनन मनदस। अरा एम्बस आसिन चोन्हा ननोस, अरा ऎम आसी गुसन बर'ओम, अरा आस गने उज्जोम। 24 अरा नॆ एंगन चोन्हा मल नन्दस, आस एंग्है सिखाब'अनन मल मन'ओस। अरा एका कत्था गुट्ठिन नीम मेन्दर, अबड़ा एंग्है कत्था मल्ली, अबड़ा एंगन तइय्का बंगासी हवे। 25 ऎन निम्है नू र'अना बारी इबड़ा उर्मी कत्थन ऎन निमा गे तिंका र'अदन। 26 लिकिन सालत'उस, नेम्हा बॊलतस नॆकन बंगस एंग्है नामे ती तइय्योस, आस निमन उर्मी कत्थन सिखाब'ओस अरा एंग्है आनका उर्मी कत्थन निमन सुरता नन्त'ओस। 27 ऎन निमा गे कोड़े चि'अरकी कादन, एंग्है कोड़ेन चि'अदन। ख़ॆख़ेल चि'अना कोड़े लेक्खा ऎन मल चि'अदन। औंगे नीम अमके उकुल बुकुल मना, अरा नीम अमके एल्चा। 28 ऎन निमन एन्ने ब'अना मेंजकर, ‘ऎन कालदन, अरा निम्है गुसन फेन बर'ओन।’ नीम एंगन चोन्हा नन्दर होले, नीम रिझ्र'ओर दने का ऎन बंगस गुसन किर्रदन कादन, एन्देरगेका बंगस एंगन ती कोहाँ र'अस। 29 अरा अक्कुन ऎन इदही मन्ना ती मुन्दिम निमन तिंकादन। एकत्रु आद मनो बारी नीम एंगन पत्त'ओर। 30 ऎन निम्है गने अउर घड़ी मल कछनख्र'ओन, ईगेका ई ख़ॆख़ेल ता अक्स'उस बर'आ लगदस। आस गे एंग्है मइय्याँ अदिया मल्ला। 31 अन्नु हूँ ख़ॆख़ेल अख़ना र'ई का ऎन बंगासिन चोन्हा नन्दन, अरा एकन्ने बंगस एंगन पॆसस, अन्नेम ऎन नन्दन। गुचा, नाम इसलेक क'ओत।”
1 येसुस तंग्है चेलारिन बाचस, “ऎन मानिम अंगुर ख़ोप्पा हिकदन, अरा एम्बस बटकी उर्बस। 2 एका लड़ंग एंग्है नू र'ई अरा मल ख़ंज'ई अदिन आस तारदस, अरा एकाबड़ा ख़ंज'ई अबड़न छटदस का बग्गे ख़ंज'ओ। 3 नीम गा ऎन निमन बाचका कत्था गुट्ठी ती मुन्द दिम छटका अरा सफा मंजकादर। 4 नीम एंग्है नू बन्चका र'आ, अरा ऎन निम्है नू बन्चका र'ओन। एकन्ने लड़ंग अंगुर ख़ोप्पा नू मल बन्चकी र'ओ ती, आद तंग्है ती ख़ंजपा चि'आ पुल्ली। अन्नेम नीम हूँ एंग्है नू मल बन्चका र'ओर होले, ख़ंजपा चि'आ पोल्लोर। 5 ऎनिम अंगुर ख़ोप्पा हिकदन, नीम गा लड़ंग गुट्ठी हिकदर। एकास एंग्है नू बन्चका र'अस अरा ऎन आस नू बन्चका र'अदन होले, आस नगदे ख़ंजपा चि'ओस, एन्देरगेका एंगन अम्बरकी नीम एन्देर हूँ नना पोल्लोर। 6 नीकईम एंग्है नू मल बन्चका र'ओस होले, आस खंडरकी हेबड़्रका ख़ैका लड़ंग बेसे र'अस। एन्ने लेक्खा लड़ंग गुट्ठिन आलर ख़ोजनर ती चिच्ची नू झपाब'अनर ती बस्सनर चि'अनर। 7 नीम एंग्है नू बन्चका र'अदर अरा एंग्है कत्था गुट्ठी निम्है नू बन्चकी र'ई होले, इन्द्रिइम हूँ निम्है मने मनो अदिन ने'आ, आद निमा गे चितार'ओ। 8 नीम कोड़हे ख़ंजपा चि'अदर ती एंग्है चेलर एन्ने ऎद'आ। इत्रुतिम एंग्है बंगस महबा ख़क्खोस। 9 एकन्ने बंगस एंगन चोन्हा नंजकादस, अन्नेम ऎन हूँ निमन चोन्हा नंजकादन। एंग्है चोन्हा नू बन्चका र'आ। 10 ऎन एम्बासी पॆसका गुट्ठिन मनचका ती आसी चोन्हा नू बन्चका र'अदन। अन्ने नीम एंग्है पॆसका गुट्ठिन मनदर होले, एंग्है चोन्हा नू बन्चका र'ओर। 11 ऎन इबड़ा कत्थन इदगे तिंका र'अदन का एंग्है रिझ्रना निम्है नू बन्चका र'ओ, अरा निम्है रिझ्रना नीदो कालो। 12 एंग्है पॆसका ईद का एकन्ने ऎन निमन चोन्हा नंजकन अन्नेम नीम ओर्त ओर्त गने चोन्हा नना। 13 नीकईम तंग्है संगेर गे खे'अना ती कोहाँ चोन्हा नॆख'आ हूँ मल्ला। 14 ऎन एन्देर एन्देर पॆसकन अदिन नीम नन्दर होले, नीम एंग्है संगेर र'अदर। 15 निमन अक्कुन ती ऎन जॊंख़र मल ब'ओन, एन्देरगेका जॊंख़स बलदस का आसी उर्बस एन्देर ननालदस। लिकिन निमन ऎन संगेर बाचकादन, एन्देरगेका ऎन एम्बस ती मेंजका उर्मी कत्थन निमन मेन्ताचका र'अदन। 16 नीम एंगन मल चज्जकर, लिकिन ऎन निमन चज्जिकादन, अरा नीम कालरकी ख़जपा चि'आ गे अरा निम्है ख़ंजपा बन्चका र'आ गे निमन ओक्ताचकादन। होले नीम एंग्है नामे ती बंगस गुस्ते इन्द्रिइम हूँ ने'ओर, अदन आस निमा गे चि'ओस। 17 नीम ओर्त ओर्त गने चोन्हा नना, ईदिम एंग्है पॆसका हवे। 18 ख़ॆख़ेल निमन हींड़'ई होले, नीम अख़'आ का अदिन ती मुन्द आद एंगन हींड़चा। 19 नीम ख़ॆख़ेल ता रहचकर होले, आद निमन तंग्है ब'अरकी निम्है गने चोन्हा नंजकी र'ओ दने। लिकिन नीम ख़ॆख़ेल ता मलदर, एन्देरगेका ऎन निमन ख़ॆख़लन अम्बा ती बर'आ गे चज्जिका र'अदन, ख़ने ख़ॆख़ेल निमन हींड़'ई। 20 एका कत्थन ऎन निमन तिंकन अदिन सुरता नना। जॊंख़स तंग्है उर्बस ती कोहँस मलदस। आर एंगन सताबाचर होले, निमन हूँ सताब'ओर। अरा आर एंग्है कत्थन पॆस्रर होले, निम्है कत्थन हूँ पॆस्र'ओर। 21 नीम एंग्है र'अना चड्डे आर निमा गे इबड़ा ओर्मन ननोर, एन्देरगेका आर नॆ एंगन तइय्यस आसिन बलनर। 22 ऎन मल बरचका अरा आरिन धर्मेसी कत्थन मल तिंका रहचकन होले, पाप ही बदी आर ही मइय्याँ मल लग्गो दने। लिकिन आर गे अक्कु तम्है पाप गे एन्देर नंगु हूँ तेंगा पोल्लोर। 23 नॆ एंगन हींड़दस, आस एंग्है बंगासिन हूँ हींड़दस। 24 एका अजगुत नलख गुट्ठिन नॆ हूँ मल नंजका रहचर आ अजगुत नलख गुट्ठिन आर ही मझी नू ऎन मल नंजका रहचकन होले, आर ही मइय्याँ पाप ही बदी मल लग्गो दने। लिकिन अक्कु गा आर ऎन एन्देर नंजकन अबड़ा ओर्मन ईरियर, अन्नु हूँ आर एंग्है गने अरा एम्बस गने हींड़का र'अनर। 25 ईद इदगे मंजा का ‘आर अयन्ध'आ एंग्है गने हींड़चर’ एन्ने कत्था आर ही नॆग नू लिख्रकी र'ई, आद मंज ख़च्चो। 26 सालत'उस निम्है गुसन बर'ओस। आसिन ऎन बंगस तरती निम्है गुसन तइय्योन। आस बंगस गुस्ते बरदस अरा मानिमन दहदर ननू नेम्हा बॊलतस हिकदस। एकाबारी आस बर'ओस, आ बारी एंग्है पत्त नू गोवाह चि'ओस। 27 अरा नीम हूँ एंग्है पत्त नू गोवाह चि'अना र'ई, एन्देरगेका ऒड़ तिम नीम एंग्है गने रहचकादर।
1 ऎन इबड़ा कत्थन निमन इदगे तिंका र'अदन का नीम निम्है पत्त'अनन अम्बोर अम्बा। 2 आलर निमन आर ही गोड़हा एड़पा गुट्ठी ती ओथ्र'ओर चि'ओर। मानिम नू ओन्टा बेड़ा बर'आ लगी, नॆ निमन पिटोर आर सोच'ओर का आर इदन नन्ना ती धर्मेसी सुसर नन्नर। 3 आर इबड़न इदगे ननोर, एन्देरगेका आर बंगासिन हूँ बलनर अरा एंगन हूँ बलनर। 4 ऎन अक्कु इबड़ा कत्थन निमन तिंकादन, औंगे बेड़ा अंड़सो ख़ने, नीम सुरता ननोर का ऎन इबड़ा कत्थन तिंकन। ऎन इबड़ा कत्थन निमन मुन्द मल बाचकन, एन्देरगेका ऎन निम्है संगे रहचकन। 5 अक्कु ऎन एंग्है तइय्युस गुसन किर्रा कालदन। अन्नु हूँ निम्है ती ओर्त हूँ एंगन अक्कुन मल मेन्दर का ‘नीन एक्सन कादय?’ 6 इबड़ा कत्थन ऎन निमन तिंकादन, औंगे निम्है जिया दुक्खे ती निंदिया केरा। 7 लिकिन ऎन निमन मानिम कत्थन तेंगदन, निम्है दौ गे दिम ऎन निमन ती कादन, एन्देरगेका ऎन मल क'ओन होले, सालत'उस मल बर'ओस। लिकिन ऎन क'ओन होले ऎन आसिन निम्है गुसन तइय्योन। 8 अरा सालत'उस बरदस ख़ने, आस ख़ॆख़लन पाप ही पत्त नू अरा उजगो र'अना ही पत्त नू अरा नेंवई ही पत्त नू तेंगोस, अरा ऎद'ओस का आर इबड़ा पत्त नू एकासे ठउकम मल बुझ्रकर। 9 आर एंगन मल पत्त'अना ती पाप ही पत्त नू आस तेंगोस। 10 अरा ऎन बंगस गुसन काना ती नीम एंगन अउर मल ऎरोर ई चड्डे उजगो र'अना ही पत्त नू आस तेंगोस। 11 अरा ई ख़ॆख़ेल ही उर्बस नेंवई मंज ख़च्चिका ती नेंवई ही पत्त नू आस तेंगोस। 12 ऎन निमन तेंगा गे ढ़ॆर कत्था र'ई, लिकिन नीम अक्कु अदन सह'आ पोल्लोर। 13 लिकिन मानिमन दहदर ननू नेम्हा बॊलतस बरदस ख़ने, आस निमन उर्मी मानिमन दहदर ननोस। आस गा तंग्है ती मल ब'ओस, लिकिन एकदन आस मेनोस अदिन दिम ब'ओस, अरा आस बरना कत्थन निमन तेंगोस चि'ओस। 14 आस एंगा गे महबन ओन्द्र'ओस, एन्देरगेका आस एंग्है ती ख़क्खदस ती अदिन निमन तेंगोस। 15 बंगासी उर्मी एंग्है दिम हवे। ख़नेम ऎन बाचकन का आस एंग्है ती ख़क्खदस ती अदिन निमन तेंगोस। 16 एगघड़ी ख़ॊख़ा नीम एंगन मल ऎरोर, अरा एगघड़ी ख़ॊख़ा नीम एंगन अउर ऎरोर।” 17 ख़ने आसी चेलर जोक्कोर ओर्त ओर्त कछनख्र'आ लगियर, “ ‘एगघड़ी ख़ॊख़ा नीम एंगन मल ऎरोर, अरा एगघड़ी ख़ॊख़ा नीम एंगन अउर ऎरोर’ अरा ‘ऎन बंगस गुसन कादन’ एन्ने ईस नमन ब'अदस, इदही एन्देर मने हिके?” 18 आर अउरिम मेना लगियर, “ ‘एगघड़ी’ एन्ने ब'अदस, इदही मने एन्देर मनी? आस एन्देर ब'अदस अदिन नाम मल बुझुर'आ लगदत।” 19 येसुस अक्खस का आर इदही पत्त नू तंगन मेना बेद्दनर। ख़ने आस आरिन बाचस, “‘एगघड़ी ख़ॊख़ा नीम एंगन मल ऎरोर, अरा एगघड़ी ख़ॊख़ा नीम एंगन अउर ऎरोर’ एन्ने ऎन बाचकन, इदही मने एन्देर एन्ने नीम ओर्त ओर्त नू मेना लगदर का? 20 ऎन निमन मानिम ब'अदन, नीम चींख़ोर ओलख़ोर अरा खोबरार'ओर, लिकिन ख़ॆख़ेल रिझ्र'ओ। नीम दुक्खे मनोर, लिकिन निम्है दुक्खे रिझ मनो। 21 ईद एन्ने लेक्खा र'ई का ओर्त आली गे तंग्है नेब्बना बेड़ा अंड़सी ख़ने, आद गे सस्ती मनी। लिकिन छुटा मंजका ख़ॊख़ा आद आ सस्तिन मॊध्र'ई क'ई, अरा अदगे रिझ मनी, एन्देरगेका आद ख़ॆख़ेल नू ओर्त ख़द्द ओन्द्रकी र'ई। 22 ई लेक्खम नीम हूँ अक्कु सस्ती सारदर, लिकिन ऎन निमन फेन ऎरोन, ख़ने नीम रिझ्र'ओर। निमन ती निम्है रिझ्रनन नॆ हूँ पोल्लोर बच्चा। 23 अरा आउला नीम एंगन एन्द्रन हूँ मेना गे चाड़ मल र'ओ। ऎन निमन मानिम ब'अदन, एंग्है नामे ती नीम एन्द्र'आनिम बंगस गुस्ते ने'ओर, अदिन आस निमा गे चि'ओस। 24 नीम अक्कुन गूटी एंग्है नामे ती एन्द्रन हूँ मल नॆचका र'अदर। ने'आ, होले नीम ख़क्खोर का निम्है रिझ्रना नीदो क'ओ। 25 ऎन निमन इबड़ा कत्थन ख़ीरी गुट्ठी ती कछनख्रकादन। लिकिन बेड़ा बर'आ लगी, आ बारी ऎन ख़ीरी गुट्ठी ती मल कछनख्र'ओन। लिकिन ऎन निमन बंगासी पत्त नू फरीफरी तेंगोन। 26 आ उल्ला नू नीम एंग्है नामे नू बंगासिन ने'ओर। औंगे ऎन निमा गे बंगस गुसन ने'आ गे चाड़ मल र'ओ। 27 एन्देरगेका बंगस तानिम निमन चोन्हा नन्दस। आस निमन चोन्हा नन्दस, एन्देरगेका नीम एंगन चोन्हा नंजकर, अरा पत्ताचकर का ऎन धर्मेस गुस्ते बरचका र'अदन। 28 ऎन बंगस तरती उरखकन ती ख़ॆख़ेल नू बरचकन, अरा अक्कुन ऎन ख़ॆख़लन अम्बदन ती बंगस गुसन किर्रा कालदन।” 29 तहाँ येसुसी चेलर आसिन बाचर, “अक्कुन गा नीन फरीफरी कछनख्रदय, ख़ीरी गुट्ठी ती मल कछनख्रदय। 30 अक्कु ऎम अख़दम का नीन उर्मिन अख़दय, नॆ हूँ निंगन मेना गे चाड़ मल्ला। इत्रु ती ऎम पत्त'अदम का नीन धर्मेस ती उरखकय बरचकादय।” 31 ख़ने येसुस बाचस, “अक्कु गा नीम पत्त'अदर, आद दौ हिके। 32 ऎरा, बेड़ा बर'आ लगी, अरा अंड़सा ख़च्चकी र'ई। आ बारी नीम छितिर बितिर मनोर ती तंग्है तंग्है एड़पा बोंगोर। अरा एंगन ओर्तेलेका अम्बोर चि'ओर। अन्नु हूँ ऎन ओर्तेलेका मलदन, एन्देरगेका बंगस एंग्है गने र'अस। 33 ऎन इबड़ा कत्थन निमन तिंकादन का नीम एंग्हा नू कोड़े ख़क्खा ओंग्दर। ई ख़ॆख़ेल नू निमा खिलपत मनो, लिकिन डिढ मना, ऎन ख़ॆख़लन जितिचका र'अदन।”
1 इबड़ा कत्थन येसुस बाचस मुंजियस ती आस मेर्ख़ा तरा मॆन ईरियस ती गोहरारस, “अना एंग्है बंगायो, बेड़ा अंड़सकी र'ई, निंग्दस एंग्है महबन नीन आलर गे दहदर नना, का ऎन आलर गे निंग्है महबन ऎद'आ ओंग्दन। 2 नीन ओर्मा आलर मइय्याँ एंगा गे अदिया चिच्चकादय, नीन एंगा चिच्का ओर्मर गे ऎन जनमजुग ही उज्जना चि'आ गे दिम नीन इदन नंजकय। 3 ओन्टेम मानिम धर्मे निंगन अरा नीन तइय्का येसु मसीसिन अख़ना ती दिम आर जनमजुग उज्जनन ख़क्खोर। 4 नीन एंगा नना गे चिच्का नलखन नंजकन मुंजकन ती, ऎन इय्या ख़ॆख़ेल नू निंग्है महबन दहदर नंजकन। 5 अरा अना एंग्है बंगायो, ख़ॆख़ेल ही मन्ना ती मुन्द निंग्है गने एंगा गे रहचका महबा ती अक्कु निंग्है मुन्दहारे एंगन महबा नना। 6 एका आलारिन नीन ख़ॆख़ेल ती एंगा चिच्कय, आर गे ऎन निंगन दहदर नंजकन। आर निंग्है दिम रहचर, आरिन नीन एंगा चिच्कय, अरा आर निंग्है कत्थन मनचर। 7 नीन एंगा चिच्का उर्मिद निंग्है तिम बर'ई, एन्ने आर अक्कु अख़नर। 8 एन्देरगेका नीन एंगा चिच्का कत्था गुट्ठिन ऎन आर गे चिच्कन, अरा आर अबड़न इंझ्रर। अरा ऎन निंग्है गुस्ते बरचकादन, एन्ने मानिम ती अक्खर ती नीनिम एंगन तइय्कय, एन्ने पत्त'अनर। 9 ऎन आर गे गोहरारदन। ऎन ख़ॆख़ेल गे मल गोहरारदन। नीन एंगा चिच्का ईर गे दिम गोहरारदन, एन्देरगेका आर निंग्है हिकनर। 10 अरा एंग्है र'ई आद उर्मी निंग्है हवे, अरा एन्द्रा निंग्है र'ई अबड़ा एंग्है हवे। अरा अत्रु तिम एंग्है महबा दहदर मंजकी र'ई। 11 अक्कु ती ऎन ख़ॆख़ेल नू मल र'ओन, लिकिन ईर ख़ॆख़ेल नू र'अनर, अरा ऎन निंग्है गुसन बरदन। अना नेम्हा बंगायो, नीन एंग्है चिच्का निंग्है नामे ही सवंग ती नीन आरिन ख़ापा, का ईर नम्है लेक्खा ओन्टेम र'ओर। 12 ऎन आर गने रहचकन ख़ने, नीन एंगा चिच्का निंग्है नामे ही सवंग ती ऎन आरिन ख़ापकन अरा बछाबाचकन। आर ही मधे ती नठारना गे ठनचकासिन अम्बर ओर्त हूँ मल्ला नठारका। इदगेका नेम्हा पुथी ता लिख्रका कत्था मनन नेकअन। 13 अक्कु ऎन निंग्है गुसन बरदन, अरा ऎन ख़ॆख़ेल नू र'अना बारिम इबड़ा कत्थन ब'अदन, औंगे आर एंग्है रिझ्रना ती नीदा ओंग्नर। 14 ऎन आर गे निंग्है कत्थन चिच्कादन। अरा ख़ॆख़ेल आरिन कैर नंजा, एन्देरगेका ऎन एकासे ख़ॆख़ेल ही मलदन, अन्नेम आर हूँ ख़ॆख़ेल ही मलनर। 15 ऎन आरिन ख़ॆख़ेल ती हो'आ कला गे मल गोहरारदन, लिकिन आरिन मलदौ नाद ती ख़ापा गे गोहरारदन। 16 एकासे ऎन ख़ॆख़ेल ही मलदन, अन्नेम आर हूँ ख़ॆख़ेल ही मलनर। 17 नीन आरिन निंग्है मानी ती निमा गे नेम्हा कम'आ, निंग्है कत्था दिम मानिम हवे। 18 एकन्ने नीन एंगन ख़ॆख़ेल नू तइय्कय, अन्नेम ऎन आरिन ख़ॆख़ेल नू तइय्कादन। 19 अरा ऎन आर ही चड्डे एंगन नेम्हा दाँड़े बेसे निमा गे चि'अदन, का आर हूँ निंग्है मानी ती नेम्हा मना ओंग्नर। 20 ऎन इबड़ा चेलर गे लेका मल गोहरारदन, लिकिन ईर तेंगना कत्था ती नॆ एंगन पत्त'ओर, आर गे हूँ गोहरारदन। 21 अना बंगायो, एकन्ने नीन एंग्है नू र'अदय, अरा ऎन निंग्है नू र'अदन, अन्नेम आर हूँ नम्है नू ओंटम मना गे गोहरारदन। होले नीन एंगन तइय्कय, एन्ने ख़ॆख़ेल पत्त'आ ओंगो। 22 अरा एकन्ने नाम ओंटम र'अदत अन्नेम आर हूँ ओंटम मना गे नीन एंगा चिच्का महबन ऎन आर गे चिच्कन। 23 ऎन आर ही नू र'अदन, अरा नीन एंग्है नू र'अदय, होले आर ओंटम र'अना नू पखड़ मन्नर नेकअन। औंगे नीनिम एंगन तइय्कादय, अरा एकासे नीन एंगन चोन्हा नन्दय, अन्नेम आरिन हूँ चोन्हा नन्दय, एन्ने ख़ॆख़ेल अक्ख ख़च्चो। 24 अना बंगायो, ख़ॆख़ेल ही कम्रना ती मुन्द नीन एंगन चोन्हा नंजका ती नीन एंगा चिच्का एंग्है महबन ईर ऎरा बेद्दनर। औंगे नीन एंगा चिच्का आलर ऎन एक्सन र'अदन असन आर हूँ र'आ गे बेद्ददन। 25 अना उजगो बंगायो, ख़ॆख़ेल निंगन बल्ली, लिकिन ऎन निंगन अक्कन। अरा नीन एंगन तइय्कय एन्ने ईर हूँ अक्खर केरर। 26 अरा ऎन निंगन आर गे दहदर नंजकन, अरा अउर हूँ निंगन दहदर ननोन। नीन एंग्है मइय्याँ रहचका चोन्हा ईर ही मइय्याँ हूँ र'आ गे, अरा ऎन आर नू र'आ गे हूँ ऎन इदन ननोन।”
1 येसुस गोहरारनन नंजस मुंजियस ख़ने, आस तंग्है चेलर गने किद्रॊन ढाबन कट्टियस ती आ पक्खे केरस। असन ओन्टा जैतून मन्न ही बटकी रहचा। अइय्या आस तंग्है चेलर गने केरस। 2 येसुसिन धरत'आ गे पपहर गे संगे चि'ऊ यूदस हूँ आ अड्डन अख़'आलियस, एन्देरगेका येसुस घड़ी घड़ी तंग्है चेलर गने अइय्या काला लगियस। 3 ख़ने यूदस ओन्टा रोमी सैनर ही फउद अरा मुध नैगर अरा फरिसीर तरती तइय्का धर्मेसी मन्दिर ख़ापू सैनर गने आ बटकी नू बरचस। आर होरा, कन्डेल अरा लड़ई ही कमहड़ गुट्ठिन ओन्द्रर ती बरचर। 4 येसुस तंग्है मइय्याँ मन्ना उर्मी कत्थन अक्खस ती बहरी केरस ती आरिन मेंजस, “नीम नॆकन बेद्ददर?” 5 आर आनाकिर्ताचर, “नासरेत ता येसुसिन बेद्ददम।” येसुस बाचस, “आस ऎनिम हिकदन।” (येसुसिन धरत'आ गे पपहर गे संगे चि'ऊ यूदस हूँ आर ही गने इज्जका रहचस।) 6 “आस ऎनिम हिकदन” एन्ने येसुस बाचस ख़ने, आर पछली किर्रियर ती ख़ॆख़ेल नू खत्रर केरर। 7 ख़ने येसुस अउरिम आरिन मेंजस, “नीम नॆकन बेद्ददर?” आर बाचर, “नासरेत ता येसुसिन बेद्ददम।” 8 येसुस आनाकिर्ताचस, “ऎन गा निमन बाचकन ‘आस ऎनिम हिकदन’, लिकिन नीम एंगन बेद्ददर होले, इबड़ारिन काला चि'आ।” 9 “नीन एंगा चिच्का अबड़र ती ओर्तारिन हूँ मल एब्सकन” एन्ने येसुस बाचका कत्था मना गे ईद एन्ने मंजा। 10 सिमॊन पतरस गुसन ओन्टा तलवार रहचा, अदिन आस नतकियस ओथ्रस अरा कोहाँ नैगासी ओर्त जॊंख़ासिन खोत्तस। ख़ने आसी तीना ख़ेबदा खंड़रा। आ जॊंख़ासी नामे मलख़ोस रहचा। 11 ख़ने येसुस पतरसिन बाचस, “निंग्है तलवारन खाप नू उइय्या। एम्बस एंगा चिच्का सस्ती ही डुबहा ती एंगा ओन्ना दिम र'ई।” 12 फेन सैनर अरा आर ही सैनर ही मुद्धस अरा धर्मेसी मन्दिर ख़ापू सैनर येसुसिन धरचर ती हॆंचर। 13 अरा आसिन मुन्द हन्नास गुसन होच्चर, आस आ चाँन ता कोहाँ नैगस कैफसी तंग ससिरस रहचस। 14 ई कैफस दिम यहूदी मुद्धर गे सलहा चिच्का रहचस का, “ओर्त आलस उर्मी आलर गे खे'अना दौ हवे।” 15 सिमॊन पतरस अरा अउर ओर्तो चेलस येसुसी ख़ॊख़ा ख़ॊख़ा केरर। ई चेलस कोहाँ नैगासी चिन्हार आलस रहचस, ख़ने येसुस गने कोहाँ नैगासी चाली गूटी केरस। 16 लिकिन पतरस बहरी बली गुसन इज्जका रहचस। ख़ने नन्ना चेलस नॆ कोहाँ नैगासी चिन्हार रहचस, आस बहरी बरचस ती बली ख़ापू आली गने बाचस ती पतरसिन भितरी होच्चस। 17 ख़ने बली ख़ापू रहचा आद पतरसिन मेंजा, “नीन हूँ ई आलासी चेलर ती ओर्त मलदय का?” पतरस बाचस, “मला, ऎन मलदन।” 18 आद पइय्याँ उल्ला रहचा, ख़ने जॊंख़र अरा धर्मेसी मन्दिर ख़ापू सैनर चिच्ची ओद्दर ती ओनबेंड़र'आ इज्जर ती अख़र'आ लगियर। अरा पतरस हूँ आर ही गने इज्जस ती अख़र'आ लगियस। 19 फिन कोहाँ नैगस येसुस ती आसी चेलर ही अरा आसी सिखाब'अना ही पत्त नू मेंजस। 20 येसुस आनाकिर्ताचस, “ऎन एन्देर सिखाबाचकन अदन ओर्मर अख़नर। ऎन उर्मी यहूदीर ख़ॊंड़रना गोड़हा एड़पा गुट्ठी नू अरा येरुसलॆम मन्दिर नू घड़ी घड़ी सिखाबाचकादन, अरा नुड़'अरकी एन्द्रन हूँ मल बाचकन। 21 ख़ने नीन एंगन एन्देरगे मेन्दय? एंग्है सिखाब'अनन नॆ मेंजका र'अनर आर गुसन मेना। ऎन एन्देर बाचकन अदिन आर अख़नर।” 22 येसुस एन्ने बाचस ख़ने, धर्मेसी मन्दिर ख़ापू सैनर ती ओर्तोस असन हेद्दे इज्जका रहचस, आस येसुसिन चटकाचस अरा बाचस, “कोहाँ नैगासिन एन्नेम आनाकिर्त'अना का?” 23 येसुस आसिन आनाकिर्ताचस, “ऎन इन्द्रिइम बिड़दो बाचकन होले, अदिन तेंगा का एन्देर बिड़दो बाचकन। लिकिन ऎन मानिमन बाचकन होले, एन्देरगे एंगन ल'अदय?” 24 फिन हन्नास येसुसिन हॆंरका रांगे कोहाँ नैगस कैफस गुसन तइय्यस। 25 सिमॊन पतरस असन इज्जस ती अख़र'आ लगियस ख़ने, आर आसिन बाचर, “नीन हूँ गा आसी चेलर ती ओर्तोस मलदय का?” आस नटचस ती बाचस, “ऎन आसी चेलन मलदन।” 26 कोहाँ नैगासी जॊंख़र ती ओर्तोस, नॆख'आ ख़ेबदन पतरस खंडका रहचस, आसी पाहीयस रहचस। आ जॊंख़स पतरसिन बाचस, “नीन गा येसुस गने जैतून बटकी नू रहचकय, अदन ऎन ईरकन।” 27 ख़ने पतरस अउर हूँ अदिन नटचस। अरा आ बारिम ख़ॆर चींख़िया। 28 फिन आर कैफस गुस्ते येसुसिन रोमी राजी ख़ापुसी गढ़िया नू होच्चर। आ बारी बिज्जना बेड़ा रहचा। आर गढ़िया भितरी इदगे मल केरर का आर सोतरा मल मनोर अरा कट्टना परब ही ओन्ना-मॊख़नन मॊख़ा ओंगोर। 29 खने पिलातुस बहरी आर गुसन बरचस ती मेंजस, “नीम ई आलासी बिड़दो नू एन्देर दोस नन्दर?” 30 ख़ने आर आनाकिर्ताचर, “ईस गुन्हा नंजका आलस मल रहचका होले, निंग्है गुसन ईसिन मल ओन्द्र'ओम दने।” 31 ख़ने पिलातुस आरिन बाचस, “नीम ईसिन हो'आ अरा निम्है नॆग लेक्खा नीमिम नेंवई नना।” यहूदीर बाचर, “एमा नॆख'आ हूँ जिया पिटना ही अदिया मल्ला।” 32 (येसुस तंग्है खे'अना ही पत्त नू मुन्द तिंका रहचस का ऎन एकन्ने खे'ओन, आद मना गे इबड़ा एन्ने मंजा।) 33 ख़ने पिलातुस गढ़िया भितरी केरस अरा येसुसिन मीख़ियस ती आसिन मेंजस, “नीन यहूदीर ही बॆलय का?” 34 येसुस मेंजस, “नीन ई कत्थन निंग्है ती मेन्दय का, महले नन्नर एंग्है पत्त नू निंग्है गुसन तिंगियर का?” 35 पिलातुस किर्त'अर बाचस, “ऎन यहूदी मलदन। निंग्है आलर दिम अरा आर ही मुध नैगर निंगन एंग्है ख़ेक्खा नू सोंपचका र'अनर। नीन एन्देर नंजकय?” 36 येसुस आनाकिर्ताचस, “एंग्है राजी ई ख़ॆख़ेल ता मल्ली। एंग्है राजी ई ख़ॆख़ेल ता रहचका होले, एंग्है जॊंख़र लड़'ओर दने, का ऎन यहूदीर ही ख़ेक्खा नू मल चीतार'ओन दने। लिकिन एंग्है राजी ई ख़ॆख़ेल ता मल्ली।” 37 ख़ने पिलातुस बाचस, “होले नीन बॆलय का?” येसुस आनाकिर्ताचस, “नीन ब'अदय का ऎन बॆलन। मानिमन आलर गे तेंगा गे ऎन कुन्द्रकन अरा ख़ॆख़ेल नू बरचकन, एका ओर्तस मानिम गे र'अदस, आस एंग्है मेन्दस।” 38 पिलातुस आसिन बाचस, “मानिम एन्देर हवे?” आस एन्ने बाचस ती अउर हूँ बहरी यहूदीर गुसन केरस ती आरिन बाचस, “ऎन गा आसी मइय्याँ एन्देर हूँ बदी मल ख़क्खदन। 39 लिकिन ऎन निमा गे कट्टना परब नू ओर्त गुड़रकासिन अम्बना ही चाल र'ई। एन्देर नीम बेद्ददर का ‘यहूदीर ही बॆलासिन’ निमा गे अम्बोन?” 40 ख़ने आर चिच्चियार'आ हेलरर अरा बाचर, “ईसिन मला, बरब्बसिन अम्बा चि'आ।” (बरब्बस गा हुलहुली नंजका आलस रहचस।)
1 फेन पिलातुस येसुसिन हो'अरकी कोर्रा लौताचस। 2 अरा सैनर अच्चोन बिन्डो लेक्खा मोड़चर ती आसी कुक्कु नू अत्ताचर अरा आसिन भेटांगो ऎख़र'आ किचरी अत्ताचर। 3 अरा आसी गुसन बर'आ लगियर ती ब'आ लगियर, “अना यहूदीर ही बॆलायो जोहार!” अरा आसिन थपड़'आ लगियर। 4 पिलातुस अउरिम गढ़िया ती बहरी बरचस ती आरिन बाचस, “ऎरा, ऎन आसिन निम्है गुसन ओन्द्रदन का, नीम अख़'ओर का ऎन आसी मइय्याँ एन्देर बदी हूँ मल ख़क्खकन।” 5 ख़ने येसुस अच्चो ही मुकुट अरा भेटांगो ऎख़र'आ किचरिन अत्तियस ती बहरी बरचस। अरा पिलातुस बाचस, “ऎरा, ईस आ आलस!” 6 मुध नैगर अरा धर्मेसी मन्दिर ख़ापू सैनर आसिन ईरियर ख़ने, आर चिच्चियारनुम बाचर, “ईसिन क्रुस नू ठोक'आ, ईसिन क्रुस नू ठोक'आ।” ख़ने पिलातुस आरिन बाचस, “नीमिम ईसिन हो'आ ती क्रुस नू ठोक'आ। लिकिन ऎन गा ईसी मइय्याँ एन्द्रा हूँ बदी मल ख़क्खदन।” 7 ख़ने यहूदीर आसिन आनाकिर्ताचर, “एमा गे नॆग र'ई, अरा आ नॆग ही लेक्खा ईस पिटना जॊगे र'अस, एन्देरगेका ईस तंगन धर्मेसी ख़द्दस ब'अदस।” 8 पिलातुस इदिन मेंजस ख़ने, अउर कोड़हे इल्चियस केरस। 9 अरा आस येसुसिन होच्चस ती अउरिम गढ़िया भितरी कोरचस ती येसुसिन मेंजस, “नीन एस्तेक बरचका र'अदय?” लिकिन येसुस एन्देर हूँ मल आनाकिर्ताचस। 10 ख़ने पिलातुस आसिन बाचस, “एन्देरगे नीन एंग्है गने मल कछनख्रदय? नीन बलदय का एंगा निंगन अम्बा गे हूँ अरा क्रुस नू ठोक'आ गे हूँ अदिया र'ई?” 11 येसुस आनाकिर्ताचस, “निंगा गे धर्मेस ती अदिया मल चीरका होले, निंगा एंग्है नू एन्द्रा हूँ अदिया मल र'ओ दने। औंगे नॆ एंगन निंग्है ख़ेक्खा नू सोंपचस, आस कोड़हे पाप ही बदी नू र'अदस।” 12 आ घड़ी ती पिलातुस येसुसिन अम्बा गे बिद्दियस। लिकिन यहूदीर चिच्चियार चिच्चियार बाचर, “नीन ईसिन अम्बोय होले, नीन कैसरसी संगीस मलदय, नॆ तंगन बॆल ब'अदस, आस कैसरसी बिड़दो नू चो'अदस।” 13 पिलातुस इबड़ा कत्थन मेंजस ख़ने, येसुसिन बहरी ओन्द्रस ती आस नेंवई नन्ना गदिया नू उक्कियस। आद पखना ती कमचका चौरा नू रहचा, ई चौरा इब्रानी भखा नू “गब्बता” बार'ई। 14 ई उल्ला कट्टना परब ही हप्ता ही सराजमा नन्ना ही उल्ला रहचा। अरा ईद मलागूटी लोहाड़ी बारा बजे रहचा। पिलातुस यहूदीरिन बाचस, “ऎरा, इसन निम्है बॆलस!” 15 लिकिन आर गा चिच्चियारर, “ईसिन पिटा चि'आ! ईसिन पिटा चि'आ! ईसिन क्रुस नू ठोक'आ।” पिलातुस आरिन मेंजस, “ऎन निम्है बॆलासिन क्रुस नू ठोक'ओन का?” ख़ने मुध नैगर आनाकिर्ताचर, “कैसरसिन अम्बरकी एमा गे नन्ना बॆलस नॆ हूँ मलकर।” 16 ख़ने पिलातुस येसुसिन क्रुस नू ठोक'आ गे आर गे सोंपचस। ख़ने आर येसुसिन होच्चर। 17 अरा येसुस तंग्है क्रुसन तानिम चेड्डस ती “खपरोही अड्डा” बारना अड्डा केरस। अदिन इब्रानी भखा नू “गोलगोता” ब'अनर। 18 असन आर येसुसिन क्रुस नू ठोकचर। आस गने अउर ऎंड़ आलारिन क्रुस नू ठोकचर, ओर्तोसिन ओन पक्खा नू अरा ओर्तोसिन ओन पक्खा नू अरा येसुसिन गा मझी नू ठोकचर। 19 अरा पिलातुस ओन्टा दोस चिठी लिखताचस ती क्रुस नू लगाबाताचस। अरा अइय्या एन्ने लिख्रकी रहचा का, “नासरेत ता येसुस यहूदीर ही बॆलस।” 20 ई दोस चिठी इब्रानी, लतीन अरा युनानी भखा नू लिख्रकी रहचा। अरा येसुसिन क्रुस नू ठोकचका अड्डा नगरे ती हेद्देम रहचा, औंगे बग्गे यहूदीर ई चिठिन पढ़चर। 21 औंगे यहूदी मुध नैगर पिलातुसिन बाचर, “‘यहूदीर ही बॆलस’ एन्ने अमा लिख'आ, लिकिन ‘ईस तंगन यहूदीर ही बॆलस बाचका रहचस’ एन्ने लिख'आ।” 22 लिकिन पिलातुस आनाकिर्ताचस, “ऎन एन्देर लिखचकन अदिन लिखिच ख़च्चिकन।” 23 सैनर येसुसिन क्रुस नू ठोकचका ख़ॊख़ा, आर आसी किचरी गुट्ठिन ओर्त ओर्त गे ओन फड़ा नंजर ती चार फड़ा नंजर। अरा आर आसी थालरन हूँ होच्चर। लिकिन आद बेगर उज्जका किय्या ती मइय्याँ गूटी इस्सका रहचा। 24 ख़ने आर ताम ताम कछनख्रर, “नाम इदिन अम्बोत चर्रा, लिकिन चिठी टिड़'ओत ती ऎरोत का ईद नॆका ख़क्ख्र'ओ।” ईद इदगे मंजा का नेम्हा पुथी नू लिख्रकी र'ई आद मनी नेकअन, “आर एंग्है किचरी गुट्ठिन तमा नू ख़ट्टरर अरा एंग्है किचरी गे चिठी टिड्डर।” औंगे सैनर इबड़न नंजर। 25 येसुसी क्रुस ही हेद्दे येसुसी तंग्यो, अरा आसी तंग्यो ही तंग्ड़ी, अरा क्लॊपासी तंग्आली मरियम, अरा मगदला पद्दा ता मरियम इज्जका रहचर। 26 येसुस तंग्योन अरा आस चोन्हा नंजका चेलासिन हेद्दे इज्जका ईरियस ख़ने, आस तंग्योन बाचस, “अनय आली ऎरय, ईस निंग्दस।” 27 फेन आस आ चेलासिन बाचस, “ऎरा, ईद निंग्यो।” अरा आ बारिम आ चेलस अदिन तंग्है जिम्मा होच्चस। 28 इदही ख़ॊख़ा येसुस अक्खस का आस तंग्है उर्मी नलखन नंज ख़च्चियस। औंगे नेम्हा पुथी ता लिख्रका मना गे आस बाचस, “ऎन ओनक'आ र'अदन।” 29 असन तिस्सा अंगुर रासी ती निंदका संजगी उइय्का रहचा। अइय्या आर तूलिन बोथचर ती हुस्सॊप ख़ोप्पा ही डंडा नू पुज्जियर ती आसी बई नू चबाबाचर। 30 येसुस तिस्सा अंगुर रासिन ख़क्खियस ख़ने, आस बाचस, “ईद पूरचकी र'ई।” अरा तंग्है कुक्कन तुरऊ नंजस ती तंग्है जियन बिच्छरस। 31 ई उल्ला सराजमा नन्ना उल्ला रहचा, अरा ननउल्ला मुध ख़न्न ऎख़्रना उल्ला रहचा। यहूदीर मल बेद्दा लगियर का ख़न्न ऎख़्रना उल्ला नू मॆद गुट्ठी क्रुस नू र'ओ। औंगे आर पिलातुस गुसन नॆचर का “अबड़र ही ख़ेड्डे गुट्ठिन एस्त'आ चि'आ अरा आर ही मॆद गुट्ठिन एत्त'आ चि'आ।” 32 औंगे सैनर बरचर ती येसुस गने क्रुस नू ठोकचका पहिल आलासी ख़ेड्डे गुट्ठिन एस्सर, अरा नन्नासिन ख़ेड्डे गुट्ठिन एस्सर। 33 लिकिन आर येसुस गुसन बरचर ती ईरियर ख़ने, आस केचका रहचस। ख़ने आर आसी ख़ेड्डे गुट्ठिन मल एस्सर। 34 लिकिन सैनर ती ओर्तोस आसी पंजरन बरछी ती जोबचस, ख़ने लॆम ख़ॆंस अरा अम्मु उरखा। 35 (एकास इदन ईरियस आस गोवाह चि'अदस, अरा आसी गोवाह मानिम र'ई। आस अख़दस का आस मानिम ब'अदस। नीम हूँ पत्त'आ गे दिम आस इदन गोवाह चि'अदस।) 36 “आसी ख़ॊचोल ओन्टा हूँ मल एस्तार'ओ।” एन्ने नेम्हा पुथी नू लिख्रका कत्था मना गे इबड़ा मंजा। 37 अउर हूँ, “नॆकन आर बरछी ती जोबचर आसिन आर थिथवाँ ऎरोर” एन्ने नेम्हा पुथी नू अउर नन्ना अड्डा नू लिख्रकी र'ई। 38 इबड़ा ही ख़ॊख़ा अरिमतिया पद्दा ता यॊसॆफस येसुसी मॆदन हो'आ गे पिलातुस गुसन नॆचस। आस येसुसी चेला रहचस। यहूदीर ही इल्चका ती आस तंगन आसी चेलस एन्ने दहदर मल नंजकाचस। पिलातुस मॆदन हो'आ चिच्चस ख़ने, आस बरचस ती येसुसी मॆदन होच्चस केरस। 39 निकोदॆमोस हूँ आस गने केरस। ईस गा मुन्द ओंग्होल माख़ा बारी येसुस गुसन भेंट नना गे केरका रहचस। ईस मलागूटी पैंतीस किलो मेसाबाचका गन्धरस अरा मुरभा ओन्द्रस बरचस। 40 आर इरबारिम येसुसी मॆदन एत्ताचर, अरा यहूदीर ही माड़ना ही चाल ही लेक्खा महकारना रासी गने दिगहा कफन किचरी ती आसी मॆदन पुज्जियर। 41 येसुसिन क्रुस नू ठोकचका अड्डा हेद्दे ओन्टा बगिचा रहचा। अरा आ बगिचा नू ओन्टा पुना मसड़ा रहचा, अइय्या इकला हूँ नॆकन हूँ मल उइय्का रहचा। 42 अरा आर येसुसी मॆदन अइय्यम उइय्यर, एन्देरगेका ईद यहूदीर ही ख़न्न ऎख़्रना उल्ला ही सराजमा ही उल्ला रहचा अरा आ मसड़ा हूँ हेद्देम रहचा।
1 हप्ता ही पहिल उल्ला मगदला पद्दा ता मरियम पह पहरना बेड़ा नू ऊख़ुर ऊख़ुर नुम मसड़ा गुसन बरचा। अरा मसड़न उर्दका पखनन मसड़ा ही बली ती टाँड़रका ईरिया। 2 ख़ने आद बुंगनुम सिमॊन पतरस अरा नन्ना चेलस गुसन बरचा, नॆकन येसुस चोन्हा नना लगियस। अरा आरिन बाचा, “आर उर्बासी मॆदन मसड़ा ती ओथ्रर ती होच्चर केरर, अरा एक्सन उइय्का र'अनर ऎम बलदम।” 3 ख़ने पतरस अरा नन्ना चेलस मसड़ा तरा केरर। 4 आर इरबर संगे संगेम बोंगर, लिकिन नन्ना चेलस पतरस ती चाँड़ेम बोंगस ती मसड़ा गुसन मुन्द अंड़सियस। 5 अरा आस ख़ोलख़रस ती ईरियस ख़ने, कफन किचरी गुट्ठिन ख़ोप्रका ईरियस, लिकिन भितरी मल केरस। 6 फेन सिमॊन पतरस आसी ख़ॊख़ा ख़ॊख़ा अंड़सियस, अरा मसड़ा नू भितरी केरस अरा आस कफन किचरी गुट्ठिन ख़ोप्रका ईरियस। 7 अरा येसुसी कुक्कु नू हॆंचका कफन किचरी पट्टी गने मलकी, लिकिन नन्ना अड्डा सथियाचका अरा भिन्गे उइय्का रहचा। 8 फेन मसड़ा नू मुन्द अंड़सका नन्ना चेलस हूँ भितरी कोरचस। आस ईरियस ती पत्ताचस। 9 एन्देरगेका “येसुस केचका ती उज्जा चो'अना दिम र'ई” एन्ने नेम्हा पुथी नू लिख्रका कत्थन आर अक्कु गूटी मल बुझ्रका रहचर। 10 इदही ख़ॊख़ा चेलर तम्है एड़पा किर्रियर केरर। 11 मरियम गा मसड़ा ही बहरी इज्जा ती चींख़ा लगिया। अरा आद चींख़नुम चींख़नुम मसड़ा नू ख़ोलख़रा ती ईरिया। 12 अरा असन येसुसी मॆदन उइय्का अड्डा नू पंडरु किचरी अत्तका ऎंड़ मेर्ख़ा पैकारिन ओर्तोसिन कुक्कु तरा ओर्तोसिन ख़ेड्डे तरा उक्का ईरिया। 13 अरा मेर्ख़ा पैकर अदिन मेंजर, “अनय आली! नीन एन्देरगे चींख़ा लगदी?” आद बाचा, “आर एंग्है उर्बासिन होच्चर केरर, अरा एक्सन उइय्का र'अनर ऎन बलदन।” 14 आद एन्ने बाचा ती मुहरारा ख़ने, आद येसुसिन असानिम इज्जका ईरिया, लिकिन आद येसुसिन चिन्ह'आ पोल्ला। 15 ख़ने येसुस अदिन बाचस, “अनय आली, नीन एन्देरगे चींख़ालदी? नॆकन बेद्दालदी?” मरियम आसिन बटकी ख़पुस बाचा ती आसिन बाचा, “उर्बायो, नीन आसिन होच्चकादय होले, तेंगा एक्सन उइय्कादय, अरा ऎन आसिन हो'ओन।” 16 येसुस अदिन बाचस, “मरियम!” आद पछली किर्रिया ती इब्रानी भखा नू बाचा, “रब्बुनी।” रब्बुनी मने गुरु हवे। 17 येसुस अदिन बाचस, “एंगन अमय ऎसड़'अय, ऎन अक्कु गूटी बंगस गुसन मइय्याँ मल अरगकन। लिकिन कलय ती एंग्है भइय्योरिन तेंगय, ऎन एंग्है बंगस निम्है बंगस अरा एंग्है धर्मेस निम्है धर्मेस गुसन मइय्याँ अरगदन कालदन।” 18 मगदला पद्दा ता मरियम ई कत्थन केरा ती चेलारिन तिंगिया का, “ऎन उर्बासिन ईरकन!” अरा येसुस एन्द्रन आद गने बाचका रहचस, अदिन आद आरिन तिंगिया। 19 अउलम हप्ता ही पहिल उल्ला बीड़ी पुतबारी, चेलर ख़ॊंड़रका रहचर। अरा यहूदी मुद्धर ही इल्चिक'आ ती आर बलिन मुच्चरर ती भितरी रहचर। येसुस बरचस ती आर ही मझी नू इज्जस, अरा चेलारिन बाचस, “निमा कोड़े मनन!” 20 अरा आस इदन बाचस ती तंग्है ख़ेक्खन अरा पंजरन आर गे ऎदस। ख़ने उर्बासिन ईरियर ती चेलर रिझ्र'आ हेलरर। 21 फिन येसुस अउरिम आरिन बाचस, “निमा कोड़े मनन। एकन्ने बंगस एंगन तइय्कादस अन्नेम ऎन हूँ निमन तइय्दन।” 22 अरा एन्ने बाचस ती आस आर ही मइय्याँ ऊरचस ती बाचस, “नेम्हा बॊलतासिन इंझ्र'आ। 23 नीम नेख'अम ही पाप गुट्ठिन अम्बदर होले, अबड़ा आर गे अम्बतार'ओ। नीम आर ही पाप गुट्ठिन मल अम्बदर होले, अबड़ा आर गे मल अम्बतार'ओ।” 24 एकाबारी येसुस बरचस, अबड़ा बारो चेलर ती ओर्तोस दिदुमोस बारना तॊमस चेलर गने मल रहचस। 25 ख़ने नन्ना चेलर आसिन ब'आ लगियर, “ऎम उर्बासिन ईरकादम।” लिकिन आस बाचस, “एका गूटी ऎन आसी ख़ेक्खा गुट्ठी नू काँटी ही भोंकन मल ऎरोन, अरा काँटी ही भोंका नू एंग्है अंगठिन मल सज'ओन, अरा आसी पंजर नू एंग्है ख़ेक्खन मल सज'ओन, आ गूटी मल पत्त'ओन।” 26 आठ उल्ला ख़ॊख़ा येसुसी चेलर फेन आ एड़पा नू ख़ॊंड़रका रहचर, अरा तॊमस हूँ आर ही संगे रहचस। बली मुच्चका रहचा, अन्नु हूँ येसुस भितरी बरचस ती मझी नू इज्जस अरा बाचस, “निमा कोड़े मनन!” 27 तहाँ आस तॊमासिन बाचस, “निंग्है अंगठिन इसन सज'आ, अरा एंग्है ख़ेक्खा गुट्ठिन ऎरा, अरा निंग्है ख़ेक्खन एंग्है पंजर नू सज'आ। अरा मल पत्त'ऊ अमा मना, लिकिन पत्त'ऊ मना।” 28 ख़ने तॊमस आसिन बाचस, “अना एंग्है उर्बायो! अना एंग्है धर्मे!” 29 तहाँ येसुस आसिन बाचस, “नीन एंगन ईरकादय, औंगे नीन एंगन पत्ताचकय। एंगन बिगर ईरका ती नॆ एंगन पत्त'अनर आरिन धर्मेस बरकत ननोस।” 30 येसुस तंग्है चेलर ही मुन्दहारे अउरिम नगदे अजगुत नलख नंजस, अबड़ा ई पुथी नू मल लिख्रकी र'ई। 31 लिकिन येसुस दिम मसीस, अरा धर्मेसी ख़द्दस एन्ने नीम पत्त'आ गे अरा पत्ताचका ती आसी नामे ती नीम उज्जनन ख़क्खा गे दिम इबड़ा लिख्रकी र'ई।
1 इदही ख़ॊख़ा अउरिम येसुस तंगन तंग्है चेलारिन तिबेरया समुदर पिंडी नू ऎथ्रस। आद एन्ने मंजा। 2 सिमॊन पतरस अरा दिदुमोस बारना तॊमस अरा गलिलेया जिला ही काना पद्दा ता नतनऎलस अरा जेबदयुसी दुयो तंग्दा बगर अरा येसुसी अउर ऎंड़ चेलर अइय्या जुमुरका रहचर। 3 सिमॊन पतरस बाचस, “ऎन इंजो ल'आ कादन।” अबड़ा ओर्मर आसिन बाचर, “ऎम हूँ निंग्है गने क'ओम।” ख़ने आर उरखर ती डोंगा नू अरगियर, लिकिन अउला ता माख़ा आर एन्द्रा हूँ मल ख़क्खियर। 4 पह पहर'आ लगिया आ बारी येसुस पिंडी नू बरचस ती इज्जस। लिकिन चेलर आसिन आस येसुस हिकदस ब'अरकी चिन्ह'आ पोल्लर। 5 ख़ने येसुस आरिन बाचस, “अना ख़द्दारो, नीम जोक्केम इंजो लौचर का?” आर आनाकिर्ताचर, “मला।” 6 ख़ने आस बाचस, “डोंगा ही तीना पक्खे जल्ली हेबड़ा, होले निमा गे इंजो ख़क्ख्र'ओ।” ख़ने आर अन्नेम जल्ली हिबड़ियर, अरा इंजो ही बग्गे बझरका ती जल्लिन डोंगा नू नतगा पोल्लर। 7 ख़ने नॆकन येसुस चोन्हा नना लगियस आ चेलस पतरसिन बाचस, “ईस गा उर्बस हिकदस!” ईस गा उर्बस एन्ने आसी ब'अनन सिमॊन पतरस मेंजस ख़ने, आस बहरी ता किचरी मल अत्तका चड्डे थालरन पोज्जरस। तहाँ अम्मु नू डेघचस अरा पिंडी तरा ऒगालियस। 8 नन्ना चेलर पिंडी ती कोड़हे गेच्छा मला, दुई सौ हाँथ केम नू रहचर, ख़ने इंजो ती निंदका जल्लिन नतकनुम डोंगा नू बरचर। 9 आर डोंगा ती पिंडी नू इत्तियर ख़ने, कुइला पखना ही न्युर नू इंजो कुट्टका र'अनन अरा असन असमन उइय्का ईरियर। 10 येसुस आरिन बाचस, “नीम अक्कुन लौचका इंजो ती जोक्क ओन्द्र'आ।” 11 सिमॊन पतरस डोंगा नू अरगियस ती जल्लिन पिंडी नू नतकियस ओन्द्रस। अइय्या ओन सौ तिरपन गोट कोहाँ इंजो रहचा। अरा एन्ने ई बग्गे इंजो गुट्ठी र'अना ती हूँ जल्ली मल चर्रा। 12 येसुस आरिन बाचस, “बरा, मॊख़ा” लिकिन चेला मधेर ती “नीन नॆ तंग्है?” एन्ने मेना गे नॆका हूँ डिढ मल मंजा। एन्देरगेका आर अक्खर का आस उर्बस हिकदस। 13 येसुस बरचस ती असमन होच्चस ती आर गे चिच्चस, अरा इंजोन हूँ अन्नेम चिच्चस। 14 येसुस केचका ती उज्जा चॊचस ती तंग्है चेलर गे ऎथ्रना, ईद तिसर खेप हवे। 15 आर मोक्का ख़ॊख़ा येसुस सिमॊन पतरसिन मेंजस, “अना सिमॊन, यॊहनसी ख़द्दायो! नीन ईरहिन्ती एंगन कोड़हे चोन्हा नन्दय का?” आस बाचस, “हाँ उर्बायो! ऎन निंगन चोन्हा नन्दन नीन अख़दय।” आस पतरसिन बाचस, “एंग्है भेंडो ख़द्द गुट्ठिन ओन्त'आ।” 16 येसुस आसिन दोसर हॆल अउरिम मेंजस, “अना सिमॊन, यॊहनसी ख़द्दायो! नीन एंगन चोन्हा नन्दय का?” आस बाचस, “हाँ उर्बायो! ऎन निंगन चोन्हा नन्दन नीन अख़दय।” आस पतरसिन बाचस, “एंग्है भेंडो गुट्ठिन ख़ापा।” 17 येसुस आसिन तिसर हॆल मेंजस, “अना सिमॊन, यॊहनसी ख़द्दायो! नीन एंगन चोन्हा नन्दय का?” तिसर हॆल हूँ “नीन एंगन चोन्हा नन्दय का?” एन्ने येसुस मेंजका ती पतरस दुक्खे मंजस। आस येसुसिन बाचस, “अना उर्बायो! नीन गा उर्मिन अख़दय। नीन इदन हूँ अख़दय का निंगन ऎन चोन्हा नन्दन।” येसुस आसिन बाचस, “नीन एंग्है भेंडो गुट्ठिन ओन्त'आ। 18 ऎन निंगन मानिम ब'अदन, नीन निंग्है जॊंख़ परिया नू नीनिम अत्ता लिक्कय, अरा एक्सन काला तुक्का लगिया असन काला लिक्कय। लिकिन नीन पच्चोय ख़ने, नीन निंग्है ख़ेक्खा गुट्ठिन लमाब'ओय अरा नन्नस निंगन अत्त'ओस, अरा एक्सन नीन काला मल बेद्ददय असन आस निंगन हो'ओस।” 19 पतरस एका लेक्खा खे'अनन ख़क्खोस ती धर्मेसिन महबा ननोस, एन्ने ऎद'आ गे दिम इदन येसुस तिंगियस। फेन येसुस आसिन बाचस, “नीन एंग्हा ख़ॊख़ा गुड़ियार'आ।” 20 पतरस किर्रे ईरियस ती नॆकन येसुस चोन्हा ननालियस आ चेलासिन ख़ॊख़ा बरना इरियस। ई चेलस दिम माख़ा ही खुड़ती ओनो बारी येसुसी एंवख़ नू ठेकारस ती मेंजस, “अना उर्बायो, निंग्है बिड़दो नू पपहर गे संगे चि'उस एका ओर्तस?” 21 पतरस आसिन ईरियस ख़ने, येसुसिन मेंजस, “अना उर्बायो! ईसी पत्त नू एन्देर हिके?” 22 ख़ने येसुस आसिन बाचस, “ऎन आसिन एंग्है किर्रना गूटी आस उज्जा गे ऎन बेद्ददन होले, इत्रु निंगा एन्देर? नीन एंग्है ख़ॊख़ा गुड़ियार'आ।” 23 औंगे ई कत्था पत्त'उर ही नू बींड़रा केरा का आ चेलस मल खे'ओस। लिकिन येसुस एन्ने मल बाचका रहचस का, आस मल खे'ओस। आस एन्ने लेका बाचस, “ऎन आसिन एंग्है किर्रना गूटी आस उज्जा गे ऎन बेद्ददन होले, इत्रु निंगा एन्देर?” 24 आ चेलस दिम इबड़ा कत्था ही पत्त नू गोवाह चि'अरकी इबड़ा कत्थन लिखचस। ऎम अख़दम का आसी गोवाह मानिम र'ई। 25 येसुस अउर हूँ कोड़हे नलख नंजस। ऎन सोचदन का, अबड़न उर्मिन ओन्टे ओन्टे लिखना होले, लिखचका पुथी गोट्टा ख़ॆख़ेल नू मल सम'ओ दने।