མ༌ཤི༌ཀ༌, མཐའ༌མེད༌པའེ༌ བཀའ༌།
1 འཇིག༌རྟེན༌ ཆགས༌སི༌ སང༌ སྔོན༌ལ༌ འི༌ བཀའ༌བོ༌ ཡོད༌པིན༌། ཏེ༌ བཀའ༌བོ༌ དཀོན༌མཆོག༌ ཉམ༌པོ༌ ཞུགས༌ཏེ༌ ཡོད༌པིན༌། ཡང༌ ཏེན༌ན༌ བཀའ༌བོ༌ ནི༌ དཀོན༌མཆོག༌ ཁོང༌རང༌ ཡིན༌པིན༌། 2 ཁོང༌ མགོ༌ མ༌ནེ༌ ཕར༌ལ༌ དཀོན༌མཆོག༌ ཉམ༌པོ༌ ཞུགས༌ཏེ༌ ཡོད༌པིན༌། 3 ཁོང༌ རྒྱུད༌ཏེ༌ དཀོན༌མཆོག༌གི༌ བཅི༌ཚང༌མ༌ བཅོའ༌ བཛདས༌། ཁོང༌ མེད༌པའ༌ བཅི༌ཞིག༌གའང༌ བཅོའ༌ མ༌བཛད༌། 4 ཁོང༌ ནི༌ སྲོག༌ ཚང༌མ༌ བྱུང༌སའེ༌ ནས༌ས༌བོ༌ ཡིན༌ནོག༌། ཡང༌ ཁོང༌ ནི༌ མི༌རིགས༌སི༌ ཕིའ༌ འོད༌ ཡིན༌ནོག༌ 5 ཀ༌བོ༌ མུན༌གྲིག༌གི༌ ནང༌ང༌ བར༌ར༌ནོག༌ ཡང༌ མུན༌གྲིག༌གི༌ ཏེ༌ འོད༌པོ༌ མ༌ནེ༌ བསད༌ མི༌ཐུབ༌། 6 དཀོན༌མཆོག༌གི༌ ཀལ༌ལ༌ བཛད༌ཁན༌ནི༌ མི༌བོའ༌, ཡོ༌ཧཱ༌ནན༌ ཁྲུས༌སལ༌ཁན༌ ཟེར༌རད༌པིན༌། 7 ཁོང༌ རྒྱུད༌ཏེ༌ མི༌གུན༌ནི༌ ཏེ༌ འོད༌པོའེ༌ཀ༌ དད༌པ༌ ཁྱོང༌ཅེས༌སི༌ ཕིའ༌ ཁོང༌ ཏེ༌ འོད༌དི༌ སྐོར༌ལ༌ སྤང༌པོ༌ བཏང༌ཅེས༌ལ༌ སྐྱོདས༌། 8 ཡོ༌ཧཱ༌ནན༌ ཁྲུས༌སལ༌ཁན༌ ཁོང༌རང༌ ཏེ༌ འོད༌པོ༌ མན༌པིན༌, ཡིན༌ནའང༌ ཁོང༌ ཏེ༌ འོད༌བོའེ༌ སྐོར༌ལ༌ སྤང༌པོ༌ སལ༌ལ༌ སྐྱོདས༌། 9 ཏེ༌ འོད༌བོ༌ ནི༌ འཇིག༌རྟེན༌ལ༌ སྐྱོད༌ཏེ༌ མི༌ཚང༌མ༌ལ༌ དངས༌ སལ༌ཁན༌ནི༌ བདེན༌བའེ༌ འོད༌བོ༌ ཡིན༌། 10 ཁོང༌ འི༌ འཇིག༌རྟེན༌ནི༌ ནང༌ང༌ ཡོད༌པིན༌། འཇིག༌རྟེན༌བོ༌ ཁོང༌ རྒྱུད༌ཏེ༌ བཛད༌ཏེ༌ ཡིན༌ནའང༌, འཇིག༌རྟེན༌པ༌གུན༌ནི༌ ཁོང༌ ངོ༌ མ༌ཤེས༌། 11 ཁོང༌ ཁོང༌རང༌ངི༌ ཡུལ༌ལ༌ སྐྱོདས༌, ཡིན༌ནའང༌ ཁོང༌རང༌ངི༌ མི༌གུན༌ནི༌ ཁོང༌ང༌ དགའ༌སུས༌ མ༌ཞུས༌། 12 ཁོང༌ང༌ དགའ༌སུས༌ ཞུས༌ཁན༌ ཡང༌ དད༌པ༌ བཅོས༌ཁན༌ནི༌ མི༌གུན༌ལ༌ ཁོང༌ངི༌, དཀོན༌མཆོག༌གི༌ ཕྲུ༌གུ༌གུན༌ རྒྱུར༌ཅེས༌སི༌ འོས༌པ༌ བཛདས༌། 13 ཏེ༌ མི༌གུན༌ རྒྱུད༌འཛིན༌ཞིག༌གི༌ ནང༌ང༌ ཡ༌ མི༌ ཐབ༌ལྡིང༌ ནང༌བཞིན༌ ཡ༌ མག༌པ༌ ཞིག༌གི༌ འདོད༌པ༌ ནང༌བཞིན༌ མན༌པ༌, དཀོན༌མཆོག༌གི༌ ཐུགས༌གོངས༌སི༌ ཞས༌ཏེ༌ དཀོན༌མཆོག༌གི༌ ཕྲུ༌གུ༌ རྒྱུར༌ར༌ནོག༌། 14 ཏེ༌ བཀའ༌བོ༌ སྐུ༌ལུས༌ལ༌ རྒྱུར༌ར༌ བཛདས༌ ཡང༌ ང༌ཞའ༌གུན༌ནི༌ ཕྲོའ༌ ཞུགས༌ས༌ བཛདས༌། ང༌ཞའ༌གུན༌ནི༌ ཁོང༌ངི༌ ཟིར༌རྗིད༌པོ༌ མཇལ༌། ཏེ༌ ཟིར༌རྗིད༌བོ༌ ཡབ༌བི༌ སྲས༌ གཅིག༌པོ༌, ཐུགས༌རྗེ༌ དང༌ བདེན༌བའེ༌ གང༌ཁན༌བོ༌ ཡིན༌། 15 ཡོ༌ཧཱ༌ནན༌ ཁྲུས༌སལ༌ཁན༌ནི༌ ཀུ༌ཅོ༌ བཏང༌ཡིན༌ ཁོང༌ངི༌ སྐོར༌ལ༌ སྤང༌པོ༌ སལས༌, "ཁོང༌ ནི༌ ངའེ༌ ཟེར༌ཁན༌ ཏེན༌ན༌བོ༌ ཡིན༌, 'ངའེ༌ སྟིང༌ནེ༌ སྐྱོད༌ཅེས༌ཅན༌བོ༌ ངའེ༌ སང༌ ཀྲག༌པོ༌ ཞུགས༌ཏེ༌ ཡིན༌ བཅིའ༌ཟེར༌ན༌ ཁོང༌ ངའེ༌ སང༌ སྔོན༌ལ༌ ཞུགས༌ཏེ༌ ཡོད༌པིན༌'" མོལས༌། 16 ཁོང༌ ནི༌ ཐུགས༌རྗེ༌ གངས༌ཏེ༌ ཡོད༌ཅེས༌པོའེ༌ ང༌དང༌གུན༌ལ༌ བྱིན༌ལབས༌ གཅིག༌གི༌ སྟིང༌ནེ༌ གཅིག༌ ཐོབ༌, 17 ལུང༌སྟོན༌པ༌ མོ༌ཟེས༌ རྒྱུད༌ཏེ༌ དཀོན༌མཆོག༌གི༌ བཀའ༌ཁྲིམས༌གུན༌ ང༌དང༌གུན༌ལ༌ སལ༌ལ༌ བཛད༌ཏེ༌ ཡིན༌པིན༌, ཡང༌ ཐུགས༌རྗེ༌ དང༌ བདེན༌བའེ༌ ལམ༌ ང༌དང༌གུན༌ལ༌ ཡེ༌ཤུ༌ མ༌ཤི༌ཀ༌ རྒྱུད༌ཏེ༌ སལ༌ལ༌ བཛད༌ཏེ༌ ཡིན༌། 18 དཀོན༌མཆོག༌ ནི༌ སུའང༌ མ༌ནེ༌ མ༌མཇལ༌ཀྱག༌། ཡིན༌ནའང༌ ཡབ༌ དཀོན༌མཆོག༌གི༌ སྙིང༌ནེ༌ གཅེས༌པ༌ བཅོའ༌ བཛད༌ཁན༌ནི༌ ཁོང༌རང༌ དཀོན༌མཆོག༌, སྲས༌ གཅིག༌པོའེ༌ ང༌དང༌ང༌ ཡབ༌ མངོན༌ ཅུག༌ག༌ བཛདས༌།
ཡོ༌ཧཱ༌ནན༌ ཁྲུས༌སལ༌ཁན༌ནི༌ སྤང༌པོ༌།
19 ཡེ༌རུ༌ཤ༌ལེམ༌མི༌ རྒྱལ༌སའི༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པའེ༌ དབང༌ སྲུལ༌ཁན༌གུན༌ནི༌ བླ༌མ༌གུན༌ དང༌ ལེ༌ཝི༌པ༌གུན༌ ཡོ༌ཧཱ༌ནན༌ ཁྲུས༌སལ༌ཁན༌ནི༌ཀ༌ ཉེ༌རང༌ སུ༌ ཡིན༌ ཟེར༌ཏེ༌ འདྲིའ༌ལ༌ ལམ༌ཅུགས༌། 20 ཡོ༌ཧཱ༌ནན༌ནི༌ སྤང༌པོ༌ བཏང༌ཡིན༌ འི༌ ལན༌བོ༌ ཁོང༌གུན༌ལ༌ སལ༌པོ༌ དང༌ དྲང༌པོ༌ ཉམ༌པོ༌ སལས༌, "ང༌ ནི༌ དཀོན༌མཆོག༌གི༌ འདམ༌མ༌ བཛད༌ཁན༌ནི༌ མ༌ཤི༌ཀ༌ མན༌།" 21 ཏེ༌ནེ༌ ཁོང༌གུན༌ནི༌, "ཉེ༌རང༌ སུ༌ ཞུགས༌ཏེ༌ ཡིན༌། ཉེ༌རང༌ ལུང༌སྟོན༌པ༌ ཨེ༌ལི༌ཡཱ༌ ཡིན༌ན༌?" ཞུས༌། ཡོ༌ཧཱ༌ནན༌ནི༌, "ང༌ ཏེ༌བོའང༌ མན༌" མོལས༌། "ཏེ༌ནེ༌ ཉེ༌རང༌ དཀོན༌མཆོག༌གི༌ ཀལ༌ལ༌ བཛད༌ཅེས༌སི༌ ཁ༌ཆད༌ བཅོའ༌ བཛད༌ཁན༌ནི༌ ལུང༌སྟོན༌པ༌བོ༌ ཡིན༌ན༌?།" ཁོང༌ངི༌, "མན༌" མོལས༌། 22 སྟིང༌ཇུག༌ག༌ ཏེ༌ མི༌གུན༌ནི༌ ཁོང༌ང༌ འདྲིས༌, "ཏེ༌ནེ༌ ཉེ༌རང༌ ཡིན༌བོ༌ སུ༌ ཡིན༌། ཤོད༌དའང༌ བཅིའ༌ཟེར༌ན༌ ང༌ཞའ༌, ང༌ཞའ༌ ཀལ༌ཁན༌གུན༌ལ༌ ལན༌ བཏང༌དགོས༌སད༌། ཉེ༌རང༌ངི༌ རང༌ངི༌ སྐོར༌ལ༌ བཅི༌ མོལ༌ལད༌?།" 23 ཡོ༌ཧཱ༌ནན༌ནི༌ ལུང༌སྟོན༌པ༌ ཡེ༌ཤ༌ཡཱའེ༌ མོལ༌ཁན༌ ནང༌བཞིན༌ལ༌ ལན༌ སལས༌, "རི༌སྟོང༌ངི༌ ནང༌ནེ༌ སྐད༌ བཏང༌ཁན༌བོ༌ ང༌རང༌ ཡིན༌། 'གཙོ༌བོ༌ ཕེབས༌ཅེས༌ལ༌ མི༌གུན༌ གྲལ༌གྲིག༌ བཅོས༌ཤིག༌།'" 24 ཏེ༌ནེ༌ ཕ༌རུ༌ཤི༌པ༌གུན༌ནི༌ ཡོ༌ཧཱ༌ནན༌ནི༌ཀ༌ ཀལ༌ཏེ༌ ཡིན༌ཁན༌གུན༌ནི༌, 25 ཡོ༌ཧཱ༌ནན༌ལ༌ འདྲིས༌, "གལ༌ཏེས༌ ཉེ༌རང༌ མ༌ཤི༌ཀ༌ ཡ༌ ལུང༌སྟོན༌པ༌ ཨེ༌ལི༌ཡཱ༌ ཡ༌ ཏེ༌ ལུང༌སྟོན༌པའང༌ མན༌ན༌, ཏེ༌ནེ༌ ཉེ༌རང༌ངི༌ ཁྲུས༌ བཅིའ༌ སལ༌ཏེ༌ ཡིན༌?།" 26 ཡོ༌ཧཱ༌ནན༌ནི༌ ཁོང༌གུན༌ལ༌ ལན༌ སལས༌, "ངའེ༌ མི༌གུན༌ལ༌ ཆུ༌ ཉམ༌པོ༌ ཁྲུས༌ བཏང༌ངད༌། ཡིན༌ནའང༌ ཁྱོ༌ཞའ༌གུན༌ནི༌ ཕྲོའ༌ ཁྱོ༌ཞའེ༌ མ༌ཤེས༌ཁན༌ནི༌ ཏེ༌ མི༌བོ༌ ཞུགས༌ཏེ༌ ཡོད༌། 27 ཁོང༌ ངའེ༌ སྟིང༌ནེ༌ སྐྱོད༌ཡིན༌། ང༌ ཁོང༌ངི༌ ཞབས༌ལྷམ༌ ཕུད༌ཅེས༌སི༌ འོས༌པ༌ མེད༌།" 28 འི༌ ཚང༌མ༌ ཡོ༌ཧཱ༌ནན༌ནི༌ མི༌གུན༌ལ༌ ཁྲུས༌སལ༌སའེ༌ ཡོར༌དཱན༌ གཙངས༌པོའེ༌ ཤར༌ ཆོགས༌ལ༌ ཡོད༌ཁན༌ནི༌ བེད༌ཐཱ༌ནི༌ གྲོང༌ཁྱེར༌ལ༌ བྱུང༌།
ཡེ༌ཤུ༌ དཀོན༌མཆོག༌གི༌ ལུག༌གུ༌།
29 ཐོ༌རེ༌ ཟུག༌པོ༌ ཡོ༌ཧཱ༌ནན༌ ཁྲུས༌སལ༌ཁན༌ནི༌ ཡེ༌ཤུ༌ ཁོང༌རང༌ ཆོགས༌ལ༌ སྐྱོད༌ད༌ལ༌ གཟིགས༌ཏེ༌ མི༌གུན༌ལ༌ མོལས༌, "ལྟོས༌ཤིག༌ ཁོང༌ ནི༌ དཀོན༌མཆོག༌གི༌ ལུག༌གུ༌ ཡིན༌ནོག༌, ཀ༌བོའེ༌ འཇིག༌རྟེན༌པ༌གུན༌ནི༌ སྡིག༌པ༌ ཚང༌མ༌ མེད༌ཁན༌ བཅོའ༌ བཛད༌ཡིན༌། 30 ཁོང༌ ཏེན༌ན༌བོ༌ ཞུགས༌ཏེ༌ ཡིན༌, ཀ༌བོའེ༌ སྐོར༌ལ༌ ངའེ༌ ཟེར༌རད༌པིན༌། ངའེ༌ སྟིང༌ནེ༌ སྐྱོད༌ཅེས༌ཅན༌བོ༌ ངའེ༌ སང༌ ཀྲག༌པོ༌ ཞུགས༌ཏེ༌ ཡིན༌ བཅིའ༌ཟེར༌ན༌ ཁོང༌ ངའེ༌ སང༌ སྔོན༌ལ༌ ཞུགས༌ཏེ༌ ཡོད༌པིན༌། 31 སྔོན༌ལ༌ ངེའང༌ ཁོང༌ དཀོན༌མཆོག༌གི༌ འདམ༌མ༌ བཛད༌ཁན༌ནི༌ མ༌ཤི༌ཀ༌ ཡིན༌ཁན༌བོ༌ ངོ༌ མ༌ཤེས༌། ཡིན༌ནའང༌ ཁོང༌ ཨིས༌ར༌ཨེལ༌པ༌གུན༌ལ༌ མངོན༌ ཅུག༌ཅེས༌སི༌ ཕིའ༌, ཆུ༌ ཉམ༌པོ༌ ཁྲུས༌ བཏང༌ཅེས༌ལ༌ ང༌ འི༌ འཇིག༌རྟེན༌ལ༌ ཡོངས༌པིན༌།" 32 ཏེ༌ནེ༌ ཡོ༌ཧཱ༌ནན༌ནི༌ འི༌ སྤང༌པོ༌བོ༌ སལས༌, "ངའེ༌ དཀོན༌མཆོག༌གི༌ དམ༌པའེ༌ ཐུགས༌ཉིད༌ ཕུར༌གོན༌ ཞིག༌གི༌ ཚུལ༌ལ༌ ནམ༌མཁའ༌ནེ༌ འབབས༌ཏེ༌ ཁོང༌ངི༌ཀ༌ ཞུགས༌ས༌ལ༌ ཐོང༌། 33 གོ༌མ༌ ངའེ༌ ཁོང༌ སུ༌ ཡིན༌ཁན༌བོ༌ ངོ༌ཤེས༌ས༌ མེད༌པིན༌, ཡིན༌ནའང༌ ང༌ ཆུ༌ ཉམ༌པོ༌ ཁྲུས༌ བཏང༌ང༌ལ༌ ཀལ༌ལ༌ བཛད༌ཁན༌བོའེ༌ མོལས༌, 'ཁྱོ༌རང༌ངི༌ ཐུགས༌ཉིད༌ འབབས༌ཏེ༌ ཞུག༌ས༌ལ༌ ཐོང༌ཁན༌ནི༌ མི༌བོ༌ ནི༌ དམ༌པའེ༌ ཐུགས༌ཉིད༌ ཉམ༌པོ༌ ཁྲུས༌སལ༌ལ༌ བཛད༌ཅེས༌ཅན༌བོ༌ ཡིན༌།' 34 ཏ༌ ངའེ༌ ཁོང༌ མཇལ༌, ཡང༌ ངའེ༌ ཁོང༌ དཀོན༌མཆོག༌གི༌ སྲས༌ ཡིན༌ཁན༌བོའེ༌ སྤང༌པོ༌ བཏང༌ངད༌།"
གཙོ༌བོ༌ ཡེ༌ཤུའི༌ གོ༌མའེ༌ སློབ༌ཕྲུག༌།
35 ཐོ༌རེ༌ ཟུག༌པོ༌ ཡོ༌ཧཱ༌ནན༌ ཡང༌ལན༌གཅིག༌ ཁོང༌རང༌ངི༌ སློབ༌ཕྲུག༌ གཉིས༌ ཉམ༌པོ༌ ཏེན༌ན༌ ནས༌སའེ༌ཀ༌ ཡོད༌པིན༌། 36 ཁོང༌ངི༌ ཡེ༌ཤུ༌ ཏེ༌ཀ༌ནེ༌ སྐྱོད༌ད༌ལ༌ གཟིགས༌ཏེ༌, "ལྟོས༌ཤིག༌ ཁོང༌ དཀོན༌མཆོག༌གི༌ ལུག༌གུ༌ ཡིན༌ནོག༌" མོལས༌ 37 ཡང༌ ཏེ༌ སློབ༌ཕྲུག༌གུན༌ནི༌ ཡོ༌ཧཱ༌ནན༌ནི༌ ཏེ༌ཟུག༌ མོལ༌ཡིན༌ ཚོར༌ར༌དང༌, ཁོང༌ གཉིས༌ཀ༌ ཡེ༌ཤུའི༌ སྟིང༌རང༌ནེ༌ སོང༌། 38 ཡེ༌ཤུའི༌ རྒྱབ༌ ལོགས༌ཏེ༌ ཁོང༌གུན༌ སྟིང༌རང༌ནེ༌ བྲངས༌ཏེ༌ ཡོང༌ང༌ གཟིགས༌པ༌ ཁོང༌གུན༌ལ༌ འདྲིའ༌ བཛདས༌, "ཁྱོ༌ཞའེ༌ བཅི༌ ཙལ༌ལད༌?།" ཁོང༌གུན༌ནི༌, "རབ༌བི༌ ༼ཡང༌ན༌ སློབ༌དཔོན༌ལེ༌༽ ཉེ༌རང༌ ཀ༌རུ༌ ཞུགས༌སད༌" ཞུས༌། 39 ཡེ༌ཤུའི༌ ཁོང༌གུན༌ལ༌ ལན༌ སལས༌, "ང༌ ཉམ༌པོ༌ ཡོངས༌ཏེ༌ ལྟོས༌ཤིག༌།" ཏེ༌ནེ༌ ཁོང༌ གཉིས༌ཀ༌ ཡེ༌ཤུ༌ ཉམ༌པོ༌ སོང༌ཏེ༌ ཁོང༌ ཞུགས༌སི༌ ནས༌ས༌བོ༌ ཐོང༌། ཏེ༌ ཟ༌ནེ༌ ཕི༌ཏོག༌གི༌ ཆུ༌ཚོད༌ བཞི༌པ༌ ཟོད༌ སོང༌པ༌ ཏེ༌ ཚན༌བོ༌ ཁོང༌གུན༌ ཡེ༌ཤུ༌ ཉམ༌པོ༌ འདུགས༌། 40 ཤི༌མོན༌ པི༌ཏྲར༌རི༌ ནོ༌ ཨེན༌ཌ༌རིའུ༌ ཟེར༌ཁན༌བོ༌ ཏེ༌ སློབ༌ཕྲུག༌ གཉིས༌སི༌ ནང༌ནེ༌ གཅིག༌པོ༌ ཡིན༌ནོག༌, ཀ༌བོའེ༌ ཡོ༌ཧཱ༌ནན༌ནི༌ མོལ༌ཁན༌གུན༌ ཚོར༌ཏེ༌, ཡེ༌ཤུའི༌ རྒྱབ༌ནེ༌ བྲངས༌། 41 སྔོན༌ལ༌ ཨེན༌ཌ༌རིའུ༌འི༌ རང༌ངི༌ ཨ༌ཅོ༌ ཤི༌མོན༌ པི༌ཏྲར༌ ཙལ༌ཏེ༌ ཁོའ༌ ཟེརས༌, "ང༌ཞའ༌ དཀོན༌མཆོག༌གི༌ འདམ༌མ༌ བཛད༌ཁན༌ནི༌ མ༌ཤི༌ཀ༌ ༼ཡང༌ན༌ སྐོའ༌ བཛད༌ཁན༌བོ༌༽ མཇལ༌།" 42 ཨེན༌ཌ༌རིའུ༌འི༌ ཤི༌མོན༌ ཁྲིད༌ཏེ༌ ཡེ༌ཤུའི༌ དུན༌ལ༌ ཁྱེརས༌། ཡེ༌ཤུའི༌ ཁོའ༌ གཟིགས༌ཏེ༌ མོལས༌, "ཁྱོ༌རང༌ ཡོ༌ཧཱ༌ནན༌ནི༌ བུ༌ཚ༌ ཤི༌མོན༌ མན༌ན༌?། ཏ༌ནེ༌ཕར༌ལ༌ ཁྱོ༌རང༌ངི༌ མིང༌ང༌ ཀྱེ༌ཕས༌ ༼ཡང༌ན༌ པི༌ཏྲར༌༽ ཟེར༌ཡིན༌།
ཕི༌ལིབ༌ དང༌ ན༌ཐའ༌ནི༌ཨེལ༌ འདམ༌མ༌ བཛདས༌།
43 ཐོ༌རེ༌ ཟུག༌པོ༌ ཡེ༌ཤུ༌ གཱ༌ལིལ༌ལིའི༌ ཡུལ༌ལ༌ སྐྱོད༌ཅེས༌ ཐག༌བཅད༌ད༌ བཛདས༌། ཁོང༌ངི༌ ཕི༌ལིབ༌ ཐོབ༌ཏེ༌ ཁོའ༌, "ངའེ༌ སྟིང༌རང༌ནེ༌ ཡོང༌" མོལས༌། 44 ཕི༌ལིབ༌ ནི༌ ཨེན༌ཌ༌རིའུ༌ དང༌ པི༌ཏྲར༌རི༌ ཡུལ༌ བེད༌སེ༌དཱའེ༌ གྲོང༌ཁྱེར༌པ༌ ཡིན༌པིན༌། 45 ཕི༌ལིབ༌ ན༌ཐའ༌ནི༌ཨེལ༌ལ༌ ཐུག༌ག༌དང༌, "ང༌ཞའ༌ མོ༌ཟེས༌ དང༌ དཀོན༌མཆོག༌གི༌ ལུང༌སྟོན༌པ༌གུན༌ནི༌ བྲིའ༌ བཛད༌ཁན༌ནི༌ ཏེ༌ མི༌བོ༌ མཇལ༌། ཁོང༌ ནི༌ ཡོ༌སེབ༌བི༌ སྲས༌ ན༌ཙ༌རེད༌པ༌ ཡེ༌ཤུ༌ ཡིན༌ནོག༌" ཟེརས༌། 46 ན༌ཐན༌ནི༌ཨེལ༌ལི༌ ཁོའ༌ ཟེརས༌, "ན༌ཙ༌རེད༌ནེ༌ མི༌ བཟང༌པོ༌ ཞིག༌ བྱུང༌ སྲིད༌ད༌ནོག༌ག༌?།" ཕི༌ལིབ༌བི༌ ཁོའ༌, "ཡོང༌ རང༌ངི༌ མིག༌ནེ༌ ལྟོས༌" ཟེརས༌། 47 ཏེ༌ནེ༌ ཡེ༌ཤུའི༌ ན༌ཐན༌ནི༌ཨེལ༌ ཡོང༌ང༌ གཟིགས༌ཏེ༌ ཁོང༌ངི༌ སྐོར༌ལ༌, "ལྟོས༌ཤིག༌ འི༌ མི༌བོ༌ ནི༌ བདེན༌བའེ༌ ཨིས༌ར༌ཨེལ༌པ༌ ཡིན༌ནོག༌, ཀ༌བོའེ༌ ནང༌ང༌ ཅའང༌ སྐྱོན༌ མེད༌" མོལས༌། 48 ན༌ཐའ༌ནི༌ཨེལ༌ལི༌ ཡེ༌ཤུའ༌, "ཉེ༌རང༌ངི༌ ང༌ ཀ༌ཟུག༌གི༌ ཁྱེན༌ནད༌" ཞུས༌། ཡེ༌ཤུའི༌ ཁོའ༌, "ཕི༌ལིབ༌བི༌ འབོད༌དི༌ སང༌ སྔོན༌ལ༌ ངའེ༌ ཁྱོ༌རང༌ ཕིག༌ ཁ༌ཟས༌སི༌ ལྕང༌མའེ༌ གཡོག༌ག༌ འདུགས༌ཏེ༌ ཐོང༌" མོལས༌། 49 ན༌ཐའ༌ནི༌ཨེལ༌ལི༌, "སློབ༌དཔོན༌ལེ༌, ཉེ༌རང༌ དཀོན༌མཆོག༌གི༌ སྲས༌ དང༌ ཁོང༌ངི༌ ཨིས༌ར༌ཨེལ༌ལི༌ ཕིའ༌ སྐོའ༌ བཛད༌ཁན༌ནི༌ རྒྱལ༌པོ༌ ཡིན༌ནོག༌" ཞུས༌། 50 ཡེ༌ཤུའི༌ ན༌ཐན༌ནི༌ཨེལ༌ལ༌, "ངའེ༌ ཁྱོ༌རང༌ ཕིག༌ ཁ༌ཟས༌སི༌ ལྕང༌མའེ༌ གཡོག༌ག༌ འདུགས༌ཏེ༌ ཐོང ཟེར༌པ༌ ཁྱོ༌རང༌ངི༌ དད༌པ༌ བཅོས༌ཏེ༌ ཡིན༌ན༌?། ཁྱོ༌རང༌ངི༌ འི༌ སང༌ ཧ༌ལས༌ཤེས༌སི༌ ལས༌ ཆེའ༌ ཐོང༌ཡིན༌" མོལས༌། 51 ཡེ༌ཤུའི༌ ན༌ཐན༌ནི༌ཨེལ༌ལ༌, "ངའེ༌ ཁྱོ༌རང༌ང༌ བདེན༌བ༌ ཟེར༌རད༌, ཁྱོ༌རང༌ངི༌ ནམ༌མཁའ༌ ཕེས༌ཏེ༌ ཡང༌ དཀོན༌མཆོག༌གི༌ ཕོ༌ཉ༌གུན༌ ང༌ མི༌རིགས༌སི༌བུའི༌ཀ༌ ཛགས༌ཡིན༌ ཡང༌ འབབས༌ཡིན༌ ཐོང༌ཡིན༌" མོལས༌།
ཡེ༌ཤུའི༌ ཆུ༌ ཨང༌གུར༌རི༌ ཆང༌ང༌ རྒྱུར༌ ཅུག༌ག༌ བཛདས༌།
1 ཞག༌ གཉིས༌སི༌ སྟིང༌ནེ༌, གཱ༌ལིལ༌ལིའི༌ ཡུལ༌ལི༌ ཀ༌ནཱའེ༌ གྲོང༌ཁྱེར༌རི༌ ནང༌ང༌ བག༌སྟོན༌ ཞིག༌ ཡོད༌པིན༌, ཡང༌ ཡེ༌ཤུའི༌ ཨ༌མ༌ལེ༌ ཏེ༌རུ༌ སོང༌། 2 ཡེ༌ཤུ༌ དང༌ ཁོང༌ངི༌ སློབ༌ཕྲུག༌གུན༌ནའང༌ ཏེ༌ བག༌སྟོན༌ལ༌ འབོད༌ཏེ༌ ཡོད༌པིན༌། 3 ཏེ༌ནེ༌ ཏེ༌རུ༌ བག༌སྟོན༌ནི༌ གྲོན༌ནི༌ དུས༌ལ༌ རྒུན༌ཆང༌ ཚར༌ར༌ཅིག༌, ཡེ༌ཤུའི༌ ཨ༌མའེ༌ ཡེ༌ཤུའ༌, "ཁོང༌གུན༌ལ༌ རྒུན༌ཆང༌ ཚར༌ཏེ༌ མི༌འདུག༌" ཞུས༌། 4 ཡེ༌ཤུའི༌ ཨ༌མའ༌, "གཅེས༌པའེ༌ བུ༌མོ༌, ང༌ འི༌ ནང༌ང༌ བཅིའ༌ སྲེའད༌། ཏ༌རུང༌ ངའེ༌ དུས༌ མ༌སླེབ༌བ༌ ཡིན༌" མོལས༌། 5 ཨ༌མའེ༌ གཡོག༌པོ༌གུན༌ལ༌, "ཁོང༌ངི༌ བཅི༌ མོལ༌ནའང༌ ཏེ༌གུན༌ བཅོས༌ཤིག༌" ཟེརས༌། 6 ཏེན༌ན༌ དུན༌ལ༌ ཡ༌ཧུ༌དཱ༌པ༌གུན༌ནི༌ ལུག༌སྲོལ༌ ནང༌བཞིན༌ རྩང༌ར༌ བཅོ༌ཅེས༌སི༌ ཕིའ༌ ཆུའི༌ ཛ༌མ༌ དྲུག༌ ཡོད༌པིན༌། འི༌ ཛ༌མ༌ རེ༌རེ༌ ནང༌ང༌ ཧ༌ལམ༌ ཆུ༌ ལི༌ཊར༌ བརྒྱད༌བཅུ༌ནེ༌ བརྒྱ༌ དང༌ ཉི༌ཤུ༌ ཟམ༌ ཆུད༌དད༌པིན༌། 7 ཡེ༌ཤུའི༌ ཏེ༌ གཡོག༌པོ༌གུན༌ལ༌, "ཏེ༌ ཛ༌མ༌གུན༌ནི༌ ནང༌ང༌ ཆུ༌ སྐོང༌ཤིག༌" མོལས༌། གཡོག༌པོ༌གུན༌ནི༌ ཁོང༌ངི༌ མོལ༌ཁན༌ ནང༌བཞིན༌ ཛ༌མ༌གུན༌ ཁ༌ ཙོག༌པ༌ གང༌ཅུགས༌ཏེ༌ ཆུ༌ སྐངས༌། 8 ཏེ༌ སྟིང༌ནེ༌ ཡེ༌ཤུའི༌ གཡོག༌པོ༌གུན༌ལ༌, "ཏ༌ ཛ༌མའེ༌ ནང༌ནེ༌ ཆུ༌ ཅུས༌ཏེ༌, ལྡིངས༌དཔོན༌ལ༌ ཁྱེར༌ཤིག༌" མོལས༌ ཡང༌ ཁོང༌གུན༌ནི༌ ཡེ༌ཤུའི༌ མོལ༌ཁན༌བོ༌ བཅོས༌། 9 ལྡིངས༌སྤོན༌བོའེ༌ རྒུན༌ཆང༌ རྒྱུར༌ཁན༌ནི༌ ཏེ༌ ཆུ༌བོ༌ མྱངས༌། ཁོའ༌ འི༌ རྒུན༌ཆང༌བོ༌ ཀ༌ནེ༌ ཁྱོངས༌ ཏེ༌བོ༌ རྒྱུས༌ མེད༌པིན༌, ཡིན༌ནའང༌ ཆུ༌ ཁྱོང༌ཁན༌ནི༌ གཡོག༌པོ༌གུན༌ལ༌ རྒྱུས༌ ཡོད༌པིན༌། ཏེ༌ནེ༌ ཏེ༌ ལྡིངས༌སྤོན༌བོའེ༌ མག༌པའ༌ འབོད༌ཏེ༌ ཟེརས༌། 10 "ཚང༌མའེ༌ གྲོན༌པོ༌གུན༌ལ༌ ཆང༌ ཞིམ༌པོ༌བོ༌ སྔོན༌ལ༌ བཏངས༌ཏེ༌ གྲོན༌པོ༌གུན༌ ར༌རོས༌ས༌དང༌ འདོད༌མེད༌དི༌ ཆང༌ ཁྱོང༌ཅེན༌, ཡིན༌ནའང༌ ཁྱོ༌རང༌ངི༌ ཚང༌མའེ༌ སང༌ ཆང༌ ཞིམ༌པོ༌བོ༌ དག༌ས༌ ཚག༌པ༌ བོར༌ཏེ༌ རག༌" ཟེརས༌། 11 འི༌བོ༌ ཡེ༌ཤུའི༌ ཧ༌ལས༌ཤེས༌སི༌ བཛད༌པའེ༌ སྟགས༌ དང༌པོ༌བོ༌ རང༌ ཡིན༌པིན༌, ཀ༌བོ༌ ཁོང༌ངི༌ གཱ༌ལིལ༌ལི༌ ཡུལ༌ལི༌ ཀ༌ནཱའེ༌ གྲོང༌ཁྱེར༌ལ༌ སྟན༌ན༌ བཛད༌ཏེ༌ ཁོང༌རང༌ངི༌ ཟིར༌རྗིད༌ མངོན༌ ཅུག༌ག༌ བཛདས༌, ཡང༌ ཁོང༌ངི༌ སློབ༌ཕྲུག༌གུན༌ནི༌ ཁོང༌ངི༌ཀ༌ དད༌པ༌ བཅོས༌། 12 ཏེ༌ སྟིང༌ནེ༌ ཡེ༌ཤུ༌, ཁོང༌ངི༌ ཨ༌མ༌, ནོ༌ དང༌ སློབ༌ཕྲུག༌གུན༌ ཀ༌ཕར༌ན༌ཧུམ༌ གྲོང༌ཁྱེར༌ལ༌ སྐྱོདས༌, ཏེ༌རུ༌ ཞག༌ ཁ༌ཅིག༌ ཞུགས༌།
མཆོད༌ཁང༌ རྩང༌མ༌ བཛདས༌།
13 ཡ༌ཧུ༌དཱ༌པའེ༌ པེ༌སག༌གི༌ དུས༌ཆེན༌ ཉེ༌མོ༌ སླེབ༌བ༌དང༌, ཡེ༌ཤུ༌ ཡེ༌རུ༌ཤ༌ལེམ༌མ༌ སྐྱོདས༌། 14 ཁོང༌ངི༌ ཏེ༌རུ༌ མཆོད༌ཁང༌ངི༌ གྱང༌སྐོར༌རི༌ ནང༌ང༌ གླང༌ཏོ༌, ལུག༌, དང༌ ཕུར༌གོན༌ གུན༌ ཙོང༌ཁན༌ ཡང༌ པེ༌ནེ༌ རྡེབ༌ཁན༌ གུན༌ ཁོང༌རང༌ངི༌ ཅོག༌ཙེ༌ དུན༌ལ༌ འདུག༌ཏེ༌ ཡོད༌ད༌ གཟིགས༌། 15 ཡེ༌ཤུའི༌ ཐག༌པ༌ ཞིག༌ག༌ རྟལ༌ལྕག༌ བཛད༌ཏེ༌, མཆོད༌ཁང༌ངི༌ གྱང༌སྐོར༌རི༌ ནང༌ང༌ ཡོད༌ཁན༌ནི༌ ལུག༌, གླང༌ཏོ༌ དང༌ ཕུར༌གོན༌ ཚང༌མ༌ ཕི༌ལོག༌ག༌ ཕིང༌ང༌ བཛདས༌། ཡང༌ པེ༌ནེ༌ རྡེབ༌ཁན༌གུན༌ནི༌ ལྕགས༌སི༌ པེ༌ནེ༌གུན༌ ཁྲེས༌སྟོར༌ བཛད༌ཏེ༌ ཅོག༌ཙེ༌གུན༌ ལོག༌ག༌ བཛདས༌། 16 ཡང༌ ཕུར༌གོན༌ བཙོང༌ཁན༌གུན༌ལ༌, "འི༌ ཚང༌མ༌ ཕིངས༌ཏེ༌ ཁྱེར༌, ངའེ༌ ཡབ༌བི༌ ཞུག༌ས༌བོ༌ ཚོང༌ས༌ མ༌བཅོ༌ཤིག༌" མོལས༌། 17 ཏེ༌ནེ༌ ཡེ༌ཤུའི༌ སློབ༌ཕྲུག༌གུན༌ལ༌ དམ༌པའེ༌ གསུང༌རབས༌སི༌ ནང༌ང༌ བྲིས༌ཏེ༌ ཡོད༌ཁན༌བོ༌ ཡིད༌ཏུ༌ ཡོངས༌, 'ངའེ༌ སེམས༌སི༌ ནང༌ང༌ ཉེ༌རང༌ངི༌ མཆོད༌ཁང༌ དམ༌པའེ༌ ཕིའ༌ གཅེས༌པ༌བོ༌ ནི༌, ངའེ༌ སྙིང༌ངི༌ ནང༌ང༌ མེ༌ དང༌ ཙོགས༌ལ༌ བར༌རད༌'། 18 ཡ༌ཧུ༌དཱ༌པའེ༌ སྤོན༌བོ༌གུན༌ནི༌ ཡེ༌ཤུའ༌, "འི༌གུན༌ བཅོ༌ཅེས༌སི༌ ཕིའ༌ དབང༌ ཡོད༌ཁན༌བོ༌ སྟན༌ཅེས༌ལ༌ ཉེ༌རང༌ངི༌ བཅི༌ ཧ༌ལས༌ཤེས༌སི༌ བཛད༌པ༌ ཞིག༌ སྟན༌ཡིན༌" ཟེརས༌། 19 ཡེ༌ཤུའི༌ ཏེ༌ མི༌གུན༌ལ༌ ལན༌ སལ༌ཡིན༌, "འི༌ མཆོད༌ཁང༌བོ༌ ཤིགས༌དོང༌, ཏེ༌ནེ༌ ངའེ༌ ཞག༌ གསུམ༌མི༌ ནང༌ང༌ ཡང༌སྐྱར༌ ལང༌ཡིན༌" མོལས༌། 20 ཏེ༌གུན༌ནི༌ ཁོང༌ང༌ འདྲིས༌, "འི༌ མཆོད༌ཁང༌བོ༌ རྩིག༌ག༌ལ༌ ལོ༌ བཞི༌བཅུ༌ ཞ༌རུག༌ གོར༌ཏེ༌ ཡིན༌པིན༌། ཁོ༌རང༌ངི༌ བཅི༌ འི༌བོ༌ ཞག༌ གསུམ༌མི༌ ནང༌ང༌ ཞང༌ཡིན༌ན༌?།" 21 ཡིན༌ནའང༌ ཀ༌ མཆོད༌ཁང༌བོའེ༌ སྐོར༌ལ༌ ཡེ༌ཤུའི༌ མོལས༌ ཏེ༌བོ༌ ནི༌ ཁོང༌རང༌ངི༌ སྐུ༌གཟུགས༌སི༌ སྐོར༌ལ༌ ཡིན༌པིན༌། 22 ཁོང༌ ཤི༌ཁན༌གུན༌ནི༌ ཕྲོ༌ནེ༌ གསོན༌ཏེའ༌ ཞངས༌ཏེ༌ སྟིང༌ནེ༌ ཁོང༌ངི༌ སློབ༌ཕྲུག༌གུན༌ལ༌ ཁོང༌ངི༌ འི༌ ཞལ༌ཏ༌ མོལ༌ཁན༌གུན༌ ཡིད༌ཏུ༌ ཡོངས༌། ཏེ༌ནེ༌ ཁོང༌གུན༌ལ༌ དམ༌པའེ༌ གསུང༌རབས༌ དང༌ ཡེ༌ཤུའི༌ མོལ༌ཁན༌ནི༌ ཞལ༌ཏ༌གུན༌ནི༌ཀ༌ ཡིད༌ཆེས༌། 23 ཡེ༌ཤུ༌ པེ༌སག༌གི༌ དུས༌ཆེན༌ལ༌ ཡེ༌རུ༌ཤ༌ལེམ༌མ༌ ཞུགས༌ཏེ༌ ཡོད༌ ཟ༌ནེ༌, ཏེ༌རུ༌ མི༌ མང༌པོའེ༌ ཁོང༌ངི༌ ཧ༌ལས༌ཤེས༌སི༌ བཛད༌པ༌གུན༌ ཐོང༌ཏེ༌, ཁོང༌ངི༌ཀ༌ དད༌པ༌ བཅོས༌། 24 ཡིན༌ནའང༌ ཡེ༌ཤུའ༌ ཏེ༌ མི༌གུན༌ནི༌ཀ༌ ལོ༌མ༌ཁྱེལ༌ བཅིའ༌ཞུ༌ན༌ ཁོང༌ངི༌ མི༌ཚང༌མའེ༌ སྙིང༌གུན༌ ཁྱེན༌ནད༌པིན༌། 25 ཁོང༌ང༌ སུ༌ཞིག༌གིའང༌ མི༌གུན༌ ཀ༌ཟུག༌ཤིག༌ ཡིན༌ཁན༌བོའེ༌ སྐོར༌ལ༌ ཞུ༌དགོས༌ མེད༌པིན༌ བཅིའ༌ཞུ༌ན༌ ཁོང༌ངི༌ མི༌ཚང༌མའེ༌ སྙིང༌ངི༌ ནང༌ང༌ ཡོད༌ཁན༌བོ༌ ཁྱེན༌ནད༌པིན༌།
གཙོ༌བོ༌ ཡེ༌ཤུ༌ དང༌ ནི༌ཀོ༌དེ༌མས༌།
1 ཏ༌ ནི༌ཀོ༌དེ༌མས༌ ཟེར༌ཁན༌ནི༌ ཕ༌རུ༌ཤི༌པ༌ མི༌ཞིག༌ ཡོད༌པིན༌། ཁོ༌ ཡ༌ཧུ༌དཱ༌པ༌ དབང༌སྲུལ༌པའེ༌ ཚོགས༌འདུའི༌ འཐུས༌མི༌ ཞིག༌ ཡིན༌པིན༌། 2 ཞག༌ཤིག༌ ཚན༌ལ༌ ཁོ༌ ཡེ༌ཤུ༌ མཇལ༌ལ༌ ཡོངས༌ཏེ༌, "སློབ༌དཔོན༌ལེ༌, ཉེ༌རང༌ དཀོན༌མཆོག༌གི༌ ཆོགས༌ནེ༌ ཕེབས༌ཁན༌ནི༌ སློབ༌དཔོན༌ ཞུགས༌ཏེ༌ ཡིན༌ཁན༌བོ༌ ང༌ཞའ༌ རྒྱུས༌ཡོད༌ བཅིའ༌ཞུ༌ན༌ ཀ༌ ཧ༌ལས༌ཤེས༌སི༌ ཕྱག༌ལས༌གུན༌ ཉེ༌རང༌ངི༌ སྟན༌ན༌ བཛད༌དད༌། སུ༌ ཞིག༌གའང༌ སྟན༌ མི༌ཉན༌ ནམ༌ ཚག༌པ༌ དཀོན༌མཆོག༌ ཁོང༌ ཉམ༌པོ༌ མི༌ཞུགས༌" ཞུས༌། 3 ཡེ༌ཤུའི༌ ཁོའ༌ ལན༌ སལ༌ཡིན༌, "ངའེ༌ ཁྱོ༌རང༌ང༌ བདེན༌བ༌ ཟེར༌རད༌, ནམ༌ཚག༌པ༌ སུ༌ཞིག༌ ཡང༌སྐྱར༌ མི༌སྐྱེ༌, དཀོན༌མཆོག༌གི༌ རྒྱལ༌སྲིད༌དི༌ ནང༌ང༌ མ༌ནེ༌ ཆ༌ མི༌ཉན༌" མོལས༌། 4 ནི༌ཀོ༌དེ༌མས༌སི༌, "མི༌ ལྡན༌ཁན༌ ཞིག༌ ཡང༌སྐྱར༌ ཀ༌ཟུག༌གི༌ སྐྱེའ༌ནོག༌། ཁོ༌ རང༌ངི༌ ཨ༌མའེ༌ ཅང༌ཁོག༌གི༌ ནང༌ང༌ ཞུགས༌ཏེ༌ ཡང༌སྐྱར༌ ལན༌ གཉིས༌པ༌ སྐྱེ༌ མི༌ཐུབ༌" ཞུས༌། 5 ཡེ༌ཤུའི༌ ལན༌ སལས༌, "ངའེ༌ ཁྱོ༌ཞའ༌ བདེན༌བ༌ བདེན༌བ༌ ཟེར༌རད༌, ནམ༌ཚུག༌པ༌ མི༌ཞིག༌ ཆུ༌ དང༌ ཐུགས༌ཉིད༌ནེ༌ སྐྱེ༌ མི༌སྐྱེ༌ ཏེ༌གུན༌ དཀོན༌མཆོག༌གི༌ རྒྱལ༌སྲིད༌དི༌ ནང༌ང༌ ཞུགས༌ མི༌ཉན༌། 6 མི༌ཞིག༌ གཟུགས༌པོའེ༌ ཐོག༌ག༌ ཕ༌མ༌ནེ༌ སྐྱེའ༌ནོག༌། ཡིན༌ནའང༌ ཐུགས༌ཉིད༌དི༌ ཐོགས༌ནེ༌ སྐྱེས༌ཁན༌གུན༌ ནི༌ དམ༌པའེ༌ ཐུགས༌ཉིད༌ནེ༌ སྐྱེའ༌ནོག༌། 7 ངའེ༌ 'ཁྱོ༌རང༌ང༌ ཡང༌སྐྱར༌ སྐྱེ༌དགོས༌' ཟེར༌ཁན༌བོའ༌ ཧ༌མ༌ལས༌ཤིག༌། 8 ལུངས༌པོ༌ ཀ༌རུ༌ ཐད༌ནའང༌ ཏེན༌ན༌ ཆོགས༌ལ༌ རྒྱུག༌ག༌ནོག༌། ཁྱོ༌ཞའ༌གུན༌ལ༌ ཏེ༌བོའེ༌ སྐད༌ ཚོར༌ར༌ནོག༌, ཡིན༌ནའང༌ ཏེ༌བོ༌ ཀ༌ནེ༌ ཡོང༌ངད༌ ཡང༌ ཀ༌རུ༌ ཆའད༌ རྒྱུས༌ ཆའ༌ མན༌ནོག༌། ཐུགས༌ཉིད༌ནེ༌ སྐྱེས༌ཁན༌ནི༌ མི༌ཚང༌མའེ༌ ནས༌ལུགས༌ ཏེན༌ན༌དང༌ ཙོགས༌ ཡིན༌ནོག༌།" 9 ཏེ༌ནེ༌ ནི༌ཀོ༌དེ༌མས༌སི༌, "འི༌བོ༌ ཀ༌ཟུག༌ག༌ ཉན༌ཡིན༌" ཞུས༌། 10 ཏེ༌བོའེ༌ ལན༌ལ༌ ཡེ༌ཤུའི༌, "ཁྱོ༌རང༌ ཨིས༌ར༌ཨེལ༌ལི༌ སློབ༌དཔོན༌ མཁས༌པ༌ ཞིག༌ ཡིན༌ཡིན༌ ཞིག༌གའང༌ ཁྱོ༌རང༌ང༌ ཧ༌གོའ༌ མེད༌ད༌?། 11 ངའེ༌ ཁྱོ༌རང༌ང༌ བདེན༌བ༌ བདེན༌བ༌ ཟེར༌རད༌, ང༌ཞའེ༌ ཤེས༌ཁན༌གུན༌ ཟེར༌རད༌ ཡང༌ ཀ༌བོ༌ ཐོང༌ཏེ༌ ཡིན༌ ཏེན༌ན༌བོའེ༌ སྤང༌པོ༌ བཏང༌ངད༌། ཏེ༌ནེའང༌ ཁྱོ༌ཞའ༌གུན༌ནི༌ ང༌ཞའེ༌ སྤང༌པོ༌གུན༌ལ༌ བདེན༌ཤེས༌ས༌ མི༌འདུག༌། 12 ངའེ༌ ཁྱོ༌རང༌གུན༌ལ༌ འཇིག༌རྟེན༌ནི༌ སྐོར༌རི༌ སྤེ༌ར༌ ཟེར༌པིན༌ ཡིན༌ནའང༌ ཏེ༌བོའ༌ ཁྱོ༌རང༌གུན༌ བདེན༌ མ༌ཆེས༌། ཏ༌ གལ༌ཏེས༌ ངའེ༌ ནམ༌མཁའེ༌ སྐོར༌ལ༌ སྤེ༌ར༌ ཟེར༌ན༌, ཏེ༌ནེ༌ ཁྱོ༌རང༌ང༌ ཀ༌ཟུག༌ག༌ བདེན༌ཤེས༌ཡིན༌། 13 ནམ༌མཁའ༌ནེ༌ ཡོངས༌ཏེ༌ ཡིན༌ཁན༌ མི༌རིགས༌སི༌བུ༌ མན༌པ༌ སུ༌ ཞིག༌གའང༌ ནམ༌མཁའ༌ མ༌སོང༌ཀྱག༌། 14 -15 ཀ༌ཟུག༌གི༌ རི༌སྟོང༌ངི༌ ནང༌ང༌ ལུང༌སྟོན༌པ༌ མོ༌ཟེས༌སི༌ མི༌གུན༌ སྐྱོབ༌ཅེས༌སི༌ ཕིའ༌ ར༌གན༌ནི༌ རུལ༌ ཞིག༌ བེར༌གའེ༌ཀ༌ སྟགས༌, ཏེན༌ན༌དང༌ ཙོགས༌ལ༌ མི༌རིགས༌སི༌བུའི༌ཀ༌ དད༌པ༌ ཁྱོང༌ཁན༌གུན༌ལ༌ མཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཕིའ༌ ཁོའང༌ སྟག༌དགོས༌ཡིན༌། 16 དཀོན༌མཆོག༌གི༌ འཇིག༌རྟེན༌པའེ༌ མི༌གུན༌ལ༌ འི༌ཟམ༌ བྱམས༌པ༌ བཛདས༌། ཁོང༌ངི༌ ཁོང༌རང༌ངི༌ སྲས༌ གཅིག༌གཅིག༌པོའང༌ ཁོང༌གུན༌ནི༌ ཕིའ༌ སལ༌ལ༌ བཛདས༌། སུ༌ཞིག༌གི༌ ཁོང༌ངི༌ སྲས༌སི༌ཀ༌ དད༌པ༌ ཁྱོང༌ན༌ ཏེ༌གུན༌ལ༌ ཤི༌ཅེས༌ མེད༌པ༌ མཐའ༌མེད༌པའེ༌ མི༌ཚེ༌ ཐོབ༌ཡིན༌། 17 དཀོན༌མཆོག༌གི༌ རང༌ངི༌ སྲས༌ འཇིག༌རྟེན༌པ༌གུན༌ལ ཆད༌པ༌ བཅད༌ཅེས༌ལ༌ མན༌པ༌, ཁོང༌ རྒྱུད༌ཏེ༌ ཐར༌པ༌ ཐོབ༌ཅེས༌སི༌ ཕིའ༌ འཇིག༌རྟེན༌ནི༌ ནང༌ང༌ ཀལ༌ལ༌ བཛདས༌། 18 སུ༌ཞིག༌གི༌ དཀོན༌མཆོག༌གི༌ སྲས༌སི༌ཀ༌ དད༌པ༌ བཅོ༌ན༌ ཏེ༌གུན༌ ཉལ༌བའེ༌ ནང༌ང༌ མ༌ནེ༌ ཕང༌ང༌ མི༌བཛད༌། ཡིན༌ནའང༌ སུ༌ཞིག༌གི༌ དད༌པ༌ མི༌བཅོ༌, ཏེ༌གུན༌ལ༌ དཀོན༌མཆོག༌གི༌ སྐྱོན༌ ཀལ༌ ཚར༌ཏེ༌ ཡིན༌ བཅིའ༌ཟེར༌ན༌ ཏེ༌གུན༌ནི༌ དཀོན༌མཆོག༌གི༌ སྲས༌ གཅིག༌པོའེ༌ཀ༌ དད༌པ༌ མ༌བཅོས༌། 19 དཀོན༌མཆོག༌གི༌ ཆད༌པ༌ སལ༌ཅེས༌སི༌ ཏོན༌བོ༌ འི༌བོ༌ ཡིན༌པིན༌, དཀོན༌མཆོག༌གི༌ འོད༌ འཇིག༌རྟེན༌ནི༌ ནང༌ང༌ སྐྱོད༌ ཚར༌ཏེེ༌ ཡིན༌། ཡིན༌ནའང༌ མི༌གུན༌ འོད༌དི༌ སང༌ མུན༌གྲིག༌པོའ༌ ཐད༌ བཅིའ༌ཟེར༌ན༌ ཏེ༌གུན༌ནི༌ ལས༌གུན༌ ངན༌པ༌ ཡོད༌ཏེ༌ ཡིན༌པིན༌། 20 ལས༌ ངན༌པ༌ བཅོ༌ཁན༌ ཚང༌མའེ༌ འོད༌ལ༌ ནཕ༌རད༌ བཅོའ༌ནོག༌། ཁོང༌གུན༌ནི༌ ལས༌ ངན༌གུན༌ གཞན༌མ༌གུན༌ལ༌ མངོན༌ཡིན༌ སམ༌ཏེ༌ འོད༌དི༌ ནང༌ང ཡོང༌ང༌ མན༌ནོག༌། 21 ཡིན༌ནའང༌ སུ༌ཞིག༌གི༌ མི༌ཚེ༌བོ༌ དྲང༌པོའེ༌ ཐོག༌ནེ༌ ཕུད༌དད༌, ཏེ༌གུན༌ནི༌ དཀོན༌མཆོག༌ ཐུགས༌ཐད༌ད༌ བཛད༌ཁན༌ནི༌ ལས༌ བཅོ༌ཡིན༌ ཡོད༌ཁན༌བོ༌ གཞན༌མ༌གུན༌ནི༌ ཐོང༌ཅེས༌སི༌ ཕིའ༌ འོད༌དི༌ ནང༌ང༌ ཡོང༌ང༌ནོག༌།
གཙོ༌བོ༌ ཡེ༌ཤུ༌ དང༌ ཡོ༌ཧཱ༌ནན༌ ཁྲུས༌སལ༌ཁན༌ནི༌ སྐོར༌།
22 འི༌བོའེ༌ སྟིང༌ནེ༌ ཡེ༌ཤུ༌ དང༌ ཁོང༌ངི༌ སློབ༌ཕྲུག༌གུན༌ ཡ༌ཧུ༌དཱ༌ ཡུལ༌ལ༌ སྐྱོདས༌, ཡང༌ ཁོང༌གུན༌ ཏེ༌རུ༌ དུས༌བན༌ཤིག༌ ཞུགས༌ཏེ༌ མི༌གུན༌ལ༌ ཁྲུས༌སལ༌ལ༌ བཛདས༌། 23 ཡོ༌ཧཱ༌ནན༌ནིའང༌ ཨེ༌ནོན༌ ཀ༌བོ༌ ཤ༌ལིམ༌ གྲོང༌ཁྱེར༌ དང༌ ཉེ༌མོའ༌ ཡོད༌ ཏེ༌རུ༌ ཁྲུས༌སལ༌ལད༌པིན༌ བཅིའ༌ཟེར༌ན༌ ཏེ༌རུ༌ ཆུ༌ མང༌པོ༌ ཡོད༌པིན༌, ཡང༌ མི༌མངས༌གུན༌ ཁྲུས༌ ལེན༌ན༌ལ༌ ཡོང༌ཡིན༌ འདུག༌གད༌པིན༌། 24 ༼འི༌ ཚང༌མ༌ ཡོ༌ཧཱ༌ནན༌ བཙོན༌ལ༌ ཀག༌གི༌ སང༌ སྔོན༌ལ༌ བྱུངས༌༽ 25 ཡོ༌ཧཱ༌ནན༌ནི༌ སློབ༌ཕྲུག༌གུན༌ དང༌ ཡ༌ཧུ༌དཱ༌པ༌ སྤོན༌བོ༌ ཞིག༌གི༌ ནང༌ང༌ ཆུ༌ ཉམ༌པོ༌ རྩང༌ར༌ བཅོ༌ཅེས༌སི༌ ལུག༌སྲོལ༌ལི༌ སྐོར༌ལ༌ ཟེར༌ཟེར༌ སོང། 26 ཏེན༌ན༌བོའེ༌ཕིའ༌ ཡོ༌ཧཱ༌ནན༌ནི༌ སློབ༌ཕྲུག༌གུན༌ ཁོང༌ངི༌ དུན༌ལ༌ ཡོངས༌ཏེ༌ ཡེ༌ཤུའི༌ སྐོར༌ལ༌ ཤདས༌, "སློབ༌དཔོན༌ལེ༌, ཡོར༌དཱན༌ནི༌ གཙངས༌པོའེ༌ ཕར༌ཀ༌ ཉེ༌རང༌ ཉམ༌པོ༌ ཡོད༌ཁན༌ནི༌ མི༌ ཀ༌བོའེ༌ ཕིའ༌ ཉེ༌རང༌ངི༌ སྤང༌པོ༌ སལ༌ལད༌པིན༌། ཁོང༌ངིའང༌ ཁྲུས༌སལ༌འདུག༌ ཡང༌ མི༌ཚང༌མ༌ ཁོང༌ངི༌ཀ༌ ཆ༌རུག༌།" 27 ལན༌ལ༌ ཡོ༌ཧཱ༌ནན༌ནི༌ མོལས༌, "ནམ༌ཚག༌པ༌ དཀོན༌མཆོག༌གི༌ ནམ༌མཁའ༌ནེ༌ གོངས༌པ༌ མི༌སལ༌, སུ༌ཞིག༌གའང༌ ཅའང༌ ཐོབ༌ མི༌ཐུབ༌། 28 ཁྱོ༌ཞའ༌རང༌གུན༌ ངའེ༌ སྔོན༌ལ༌, ང༌ དཀོན༌མཆོག༌གི༌ འདམ༌མ༌ བཛདས༌ཁན༌ནི༌ ཏེ༌ མ༌ཤི༌ཀ༌བོ༌ མན༌ ཟེར༌ཁན༌བོའེ༌ སྤང༌པོ༌ ཡིན༌ནོག༌། ཡིན༌ནའང༌ ང༌ ཁོང༌ངི༌ སང༌ སྔོན༌ལ༌ ཀལ༌ལ༌ བཛད༌ཏེ༌ ཡིན༌པིན༌། 29 བག༌མ༌ ནི༌ མག༌པའེ༌ ཕིའ༌ ཡིན༌ནོག༌། ཡིན༌ནའང༌ མག༌པའེ༌ མཛ༌འོ༌ ཀ༌བོ༌ དུས༌རྒྱུན༌ མག༌པའེ༌ ཞབས༌སྟོག༌སི༌ ཕིའ༌ འདུག༌གད༌, ཁོ༌ སྲུངས༌ཏེ༌ མག༌པ༌ ཡོང༌ཅེས༌སི༌ སྐད༌ལ༌ ཉན༌ན༌ནོག༌། སྐད༌པོ༌ ཚོར༌ར༌དང༌ ཐད༌པོ༌ ཆའ༌ནོག༌། འིན༌ན༌ ཙོགས༌ལ༌ ངའེ༌ སྙིང༌བོའང༌ འི༌ གནས༌ཚུལ༌བོ༌ ཚོར༌ཏེ༌ ཐད༌པོའེ༌ གང༌། 30 ཏེ༌ མི༌བོ༌ ཏར༌དགོས༌ས༌ནོག༌ ཡང༌ ང༌ འབབ༌ དགོས༌ས༌ནོག༌།" 31 "ནམ༌མཁའ༌ནེ༌ སྐྱོད༌ཁན༌བོ༌ ཚང༌མའེ༌ སང༌ འཇིགས༌པོ༌ ཡིན༌ནོག༌། ང༌དང༌གུན༌ ནི༌ འཇིག༌རྟེན༌པ༌ ཡིན༌པ༌ འཇིག༌རྟེན༌པའེ༌ ཚུལ༌ལ༌ སྤེ༌ར༌ བཏང༌ང༌ནོག༌། ཡིན༌ནའང༌ ནམ༌མཁའ༌ནེ༌ སྐྱོད༌ཁན༌བོ༌ ཚང༌མའེ༌ སང༌ ཐོ༌ཤོག༌པོ༌ ཡིན༌ནོག༌། 32 ཁོང༌ངི༌ དཀོན༌མཆོག༌ནེ༌ ཚོར༌ཁན༌ ཡང༌ གཟིགས༌ཁན༌གུན༌ནི༌ སྤང༌པོ༌ སལ༌ལ༌ནོག༌, ཡིན༌ནའང༌ སུ༌ཞིག༌གའང༌ ཁོང༌ངི༌ སྤང༌པོའེ༌ཀ༌ ཡིད༌ཆེས༌ མ༌བཅོས༌། 33 ཁོང༌ངི༌ ལོན༌ནི༌ཀ༌ ཡིད༌ཆེས༌ བཅོ༌ཁན༌གུན༌ནི༌ གཙོ༌བོ༌ དཀོན༌མཆོག༌གི༌ དྲང༌པོ༌ མོལ༌ཁན༌བོའེ༌ སྤང༌པོ༌ བཏངས༌ཏེ༌ ཡིན༌ནོག༌། 34 དཀོན༌མཆོག༌གི༌ ཀལ༌ལ༌ བཛད༌ཁན༌བོའེ༌ དཀོན༌མཆོག༌གི༌ སྤེ༌ར༌ མོལ༌ལ༌ནོག༌ བཅིའ༌ཟེར༌ན༌ དཀོན༌མཆོག༌གི༌ ཁོང༌ང༌ དམ༌པའེ༌ ཐུགས༌ཉིད༌ བཏབ༌ མ༌བཏབ༌བ༌ སལ༌ལ༌ བཛད༌འདུག༌། 35 ཡབ༌ དཀོན༌མཆོག༌གི༌ སྲས༌ལ༌ བྱམས༌པ༌ བཛད༌པ༌ ཁོང༌ངི༌ བཅི༌ཚང༌མ༌ སྲས༌སི༌ ཕྱག༌ག༌ སྟད༌ད༌ བཛདས༌། 36 སུ༌ཞིག༌གི༌ སྲས༌སི༌ཀ༌ དད༌པ༌ ཁྱོང༌ན༌ ཏེ༌གུན༌ལ༌ མཐའ༌མེད༌པའེ༌ མི༌ཚེ༌བོ༌ ཐོབ༌ ཚར༌ཏེ༌ ཡིན༌ནོག༌། ཡིན༌ནའང༌ སྲས༌སི༌ ལོན༌ལ༌ ཡིད༌ཆེས༌ མ༌བཅོ༌ཁན༌གུན༌ལ༌ ཏེ༌ མི༌ཚེ༌བོ༌ མ༌ནེ༌ མི༌ཐོབ༌, ཡང༌ དཀོན༌མཆོག༌གི༌ ཐུགས༌སྲོ༌ ཁོང༌གུན༌ནི༌ཀ༌ ལུས༌ཡིན༌།"
གཙོ༌བོ༌ ཡེ༌ཤུ༌ དང༌ ས༌མར༌རི༌ཡཱ༌མ༌ བུ༌མོ༌།
1 ཡེ༌ཤུའི༌ ཁྲུས༌སལ༌ཏེ༌ ཡོ༌ཧཱ༌ནན༌ནི༌ སང༌ མང༌ང༌ སློབ༌ཕྲུག༌ རྒྱུར༌ཏེ༌ འདུག༌ ཟེར༌ཏེ༌ ཕ༌རུ༌ཤི༌པ༌གུན༌ལ༌ ཚོར༌། 2 ༼དངོས༌པོ༌བོ༌ ཡེ༌ཤུའི༌ མན༌པ༌ ཁོང༌ངི༌ སློབ༌ཕྲུག༌གུན༌ནི༌ ཁྲུས༌སལ༌ལད༌པིན༌༽ 3 ཏེ༌བོ༌ ཡེ༌ཤུའ༌ ཐུགས༌རྒྱུས༌ སྐྱོད༌ད༌དང༌ ཁོང༌ ཡ༌ཧུ༌དཱའེ༌ ཡུལ༌ལ༌ མ༌ཞུགས༌ས༌ ལོགས༌ཏེ༌ གཱ༌ལིལ༌ལིའི༌ ཡུལ༌ལ༌ སྐྱོདས༌། 4 ཡེ༌ཤུ༌ ས༌མར༌རི༌ཡཱའེ༌ ཡུལ༌ རྒྱུད༌ཏེ༌ སྐྱོད༌དགོས༌པ༌ 5 ཁོང༌ ས༌མར༌རི༌ཡཱ༌ ཡུལ༌ལི༌ སི༌ཀར༌ ཟེར༌སེ༌ གྲོང༌ཁྱེར༌ལ༌, དུས༌ མང༌པོའེ༌ སྔོན༌ལ༌ ཡ༌ཀོབ༌བི༌ རང༌ངི༌ བུ༌ཚ༌ ཡོ༌སེབ༌བ༌ བཏངས༌ཁན༌ནི༌ ས༌ཀྱད༌དི༌ ཉེ༌མོའ༌ སླེབ༌། 6 ཏེ༌ཀ༌ ཡ༌ཀོབ༌བི༌ ཆུ༌དོང༌ ཞིག༌ ཡོད༌པིན༌། ཡེ༌ཤུ༌ ཐག༌རིང༌ནེ༌ ཞབ༌གྲུལ༌ལ༌ སྐྱོད༌པ༌ ཐུགས༌ངལ༌ཏེ༌ ཏེ༌ ཆུ༌དོང༌ངི༌ དུན༌ལ༌ ཞུགས༌། ཉིང༌གུང༌ ཟོད༌ཅིག༌ག༌, 7 ཏེ༌རུ༌ ས༌མར༌རི༌ཡཱ༌མ༌ བུ༌མོ༌ཞིག༌ ཆུ༌ ཕིང༌ང༌ལ༌ ཡོངས༌, ཡང༌ ཡེ༌ཤུའི༌ ཏེ༌ བུ༌མོ༌བོའ༌, "ང༌ ཆུ༌ ཙ༌པིག༌ ཐུང༌ཅེས༌ལ༌ སལ༌" ཞུས༌། 8 ༼བཅིའ༌ཞུ༌ན༌ ཁོང༌ངི༌ སློབ༌ཕྲུག༌གུན༌ ཁྲོམས༌ལ༌ ཟའ༌ཅེས༌ ཉོའ༌ལ༌ སོང༌ཏེ༌ མེད༌པིན༌།༽ 9 ས༌མར༌རི༌ཡཱ༌མ༌ བུ༌མོ༌བོའེ༌ ཡེ༌ཤུའ༌, "ཉེ༌རང༌ ཡ༌ཧུ༌དཱ༌པ༌ ཞིག༌ ང༌ ནི༌ ས༌མར༌རི༌ཡཱ༌མ༌, ཉེ༌རང༌ངི༌ ང༌ ཆུ༌ ཐུང༌ཅིས༌ལ༌ བཏོང༌ ཀ༌ཟུག༌གི༌ མོལ༌ཏེ༌ ཡིན༌" ཞུས༌ ༼བཅིའ༌ཟེར༌ན༌ ཡ༌ཧུ༌དཱ༌པ༌གུན༌ནི༌ ས༌མར༌རི༌ཡཱ༌པ༌གུན༌ དང༌ བྲེལ༌ བཅོའ༌ མེད༌པིན༌།༽ 10 ཡེ༌ཤུའི༌ ཏེ༌ བུ༌མོ༌བོའ༌, "གལ༌ཏེས༌ ཁྱོ༌རང༌ངི༌ དཀོན༌མཆོག༌གི༌ སྐྱེས༌བོ༌ དང༌ ཁྱོ༌རང༌ང༌ ཆུ༌ བཏོང༌ ཟེར༌ཁན༌བོ༌ སུ༌ ཡིན༌ ཤེས༌པིན༌ན༌ ཁྱོ༌རང༌ངི༌ ཁོའ༌ ཏོང༌ ཟེར༌ཏེ༌ ཡོད༌འགྲོ༌ ཡང༌ ཁོའེ༌ ཁྱོ༌རང༌ང༌ གསོན༌པོའེ༌ ཆུ༌ བཏངས༌ཏེ༌ ཡོད༌འགྲོ༌" མོལས༌། 11 ཏེ༌ བུ༌མོ༌བོའེ༌ ཞུས༌, "སྤོན༌བོ༌ལེ༌ ཉེ༌རང༌ངི༌ ལག༌ག༌ ཆུ༌ ཅུ༌ཅེས༌ལ༌ ནོད༌ ཅའང༌ མི༌འདུག༌, ཡང༌ འི༌ ཆུ༌དོང༌བོ༌ མ༌ ཀོང༌དྲོ༌ འདུག༌། ཏེ༌ནེ༌ ཉེ༌རང༌ང༌ གསོན༌པོའེ༌ ཆུ༌བོ༌ ཀ༌ནེ༌ ཐོབ༌ཡིན༌། 12 ཉེ༌རང༌ བཅི༌ ང༌ཞའ༌གུན༌ལ༌ འི༌ ཆུ༌དོང༌ སལ༌ཁན༌ ང༌ཞའེ༌ ཕ༌མེས༌པོ༌ ཡ༌ཀོབ༌བི༌ སང༌ འཇིགས༌ས༌ཞིག༌ ཡིན༌ན༌?། ཁོང༌ དང༌ ཁོང༌ངི༌ ཕོར༌རྒྱུད༌ དང༌ ཁོང༌ངི༌ སེམ༌ཅན༌ གུན༌ནིའང༌ འིན༌ན༌ ཆུ༌དོང༌བོའེ༌ ཆུ༌ ཐུངས༌ཏེ༌ ཡིན༌པིན༌། 13 ཡེ༌ཤུའི༌ ལན༌ སལ༌ཡིན༌, "འི༌ ཆུ༌དོང༌ནེ༌ ཆུ༌ ཐུང༌ཁན༌གུན༌ ཡང༌སྐྱར༌ སྐོམས༌ཡིན༌ 14 ཡིན༌ནའང༌ ངའེ༌ བཏང༌ཁན༌ནི༌ ཆུ༌ ཐུང༌ཁན༌གུན༌ ཡང༌ མ༌ནེ༌ མི༌སྐོམས༌། ཀ༌ ཆུ༌བོ༌ ངའེ༌ བཏང༌ཡིན༌, ཏེ༌བོ༌ ཁོའེ༌ ནང༌ང༌ མཐའ༌མེད༌པའེ༌ མི༌ཚེའེ༌ བཏང༌ཁན༌ནི༌ ཆུ༌མིག༌ག༌ རྒྱུར༌ཡིན༌" མོལས༌། 15 བུ༌མོ༌བོའེ༌, "གཙོ༌བོ༌ ཡང༌ མ༌ནེ༌ མི༌སྐོམ༌ཅེས༌ དང༌ འི༌ཀ༌ ཆུ༌ ནེན༌ན༌ལ༌ ཡོང༌ མི༌དགོས༌ཤེས༌སི༌ ཕིའ༌ ཏེ༌ ཆུ༌བོ༌ ང༌ སལ༌ལ༌ བཛད༌" ཞུས༌། 16 ཡེ༌ཤུའི༌ བུ༌མོ༌བོའ༌, "སོང༌ཏེ༌ རང༌ངི༌ མག༌པ༌ འི༌ཀ༌ ཁྲིད༌ཏེ༌ ཁྱོང༌" མོལས༌། 17 བུ༌མོ༌བོའེ༌ ལན༌ལ༌, "ང༌ མག༌པ༌ མེད༌" ཞུས༌། ཡེ༌ཤུའི༌ ཁོའ༌ མོལས༌, "ཁྱོ༌རང༌ངི༌ ང༌ མག༌པ༌ མེད༌ ཟེར༌ཁན༌བོ༌ དྲང༌པོ༌ ཟེརས༌། 18 བདེན༌བ༌བོའ༌ ཁྱོ༌རང༌ང༌ མག༌པ༌ ལྔ༌ ཡོད༌པིན༌, དག༌ས༌ ཉམ༌པོ༌ ཡོད༌ཁན༌བོ༌ ཁྱོ༌རང༌ངི༌ མག༌པ༌ མན༌། ཁྱོ༌རང༌ངི༌ ཟེར༌ཁན༌བོ༌ བདེན༌བ༌ ཡིན༌" མོལས༌། 19 བུ༌མོ༌བོའེ༌ ཟེརས༌, "གཙོ༌བོ༌ ཉེ༌རང༌ ལུང༌སྟོན༌པ༌ ཞིག༌ ཞུགས༌ཏེ༌ ཡིན༌ཅེས༌ འདུག༌། 20 ང༌ཞའེ༌ ཕ༌མེས༌པོ༌གུན༌ནི༌ འི༌ རི༌བོའི༌ཀ༌ དཀོན༌མཆོག༌ག༌ བཅོལ༌ལད༌པིན༌ ཡིན༌ནའང༌ ཁྱོ༌ཞའ༌ ཡ༌ཧུ༌དཱ༌པ༌གུན༌ནི༌ ཟེར༌འདུག༌, 'ང༌དང༌གུན༌ནི༌ དཀོན༌མཆོག༌ག༌ ཡེ༌རུ༌ཤ༌ལེམ༌མི༌ ནང༌ང༌ བཅོལ༌གོས༌།'" 21 ཏེ༌ནེ༌ ཡེ༌ཤུའི༌ བུ༌མོའ༌ མོལས༌, "ངའེ༌ ཟེར༌ཅེས༌ཅན༌བོའ༌ བདེན༌ཤེས༌, ཏེ༌དུས༌པོ༌ སླེབ༌ཅེས༌ཡོད༌, ནམ༌ ཁྱོ༌ཞའ༌གུན༌ནི༌ རང༌ངི༌ ཡབ༌ དཀོན༌མཆོག༌ག༌ འི༌ རི༌བོའི༌ཀ༌ ཡ༌ ཡེ༌རུ༌ཤ༌ལེམ༌མི༌ ནང༌ང༌ བཅོལ༌ མི༌བཅོལ༌། 22 ཁྱོ༌ཞའ༌ ས༌མར༌རི༌ཡཱ༌པ༌གུན༌ནི༌ བཅོལ༌ཁན༌བོ༌ ཤེས༌ས༌ མི༌འདུག༌, ང༌ཞའ༌གུན༌ནི༌ བཅོལ༌ཁན༌བོ༌ ཤེས༌སད༌ བཅིའ༌ཟེར༌ན༌ སྡིག༌པ༌ནེ༌ ཐར༌ཅེས༌པོ༌ ནི༌ ཡ༌ཧུ༌དཱ༌པ༌གུན༌ རྒྱུད༌ཏེ༌ ཡོངས༌ཏེ༌ ཡིན༌ནོག༌། 23 ཡིན༌ནའང༌ ཏ༌ ཏེ༌དུས༌པོ༌ སླེབ༌ཡིན༌, མ༌ཚད༌ སླེབ༌ ཚར༌ཏེ༌ ཡིན༌, ནམ༌ བདེན༌བའེ༌ བཅོལ༌ཁན༌གུན༌ནི༌ ནམ༌མཁའེ༌ ཡབ༌བ༌ ཐུགས༌ཉིད༌ དང༌ བདེན༌བའེ༌ ནང༌ང༌ བཅོལ༌ཡིན༌, བཅིའ༌ཟེར༌ན༌ འི༌ཙོགས༌སི༌ བཅོལ༌ཁན༌གུན༌ ཡབ༌བི༌ ཙལ༌ལ༌ བཛད༌འདུག༌། 24 དཀོན༌མཆོག༌ ནི༌ ཐུགས༌ཉིད༌ ཡིན༌ནོག༌, ཁོང༌ང༌ བཅོལ༌ཁན༌བོའེ༌ ཁོང༌ང༌ ཐུགས༌ཉིད༌ དང༌ བདེན༌བའེ༌ ཐོག༌ནེ༌ བཅོལ༌དགོས༌།" 25 བུ༌མོ༌བོའེ༌, "མ༌ཤི༌ཀ༌ ༼དཀོན༌མཆོག༌གི༌ སྐོའ༌ བཛད༌ཁན༌བོ༌༽ ཕེབ༌ཤེས༌ཅན༌བོ༌ ང༌ རྒྱུས༌ཡོད༌, ཁོང༌ སྐྱོད༌ད༌དང༌ ང༌ཞའ༌ བཅི༌ཚང༌མ༌ ཧ༌གོ༌ ཅུག༌ག༌ བཛད༌ཡིན༌" ཞུས༌། 26 ཏེ༌བོ༌ གསན༌ཏེ༌ ཡེ༌ཤུའི༌ བུ༌མོ༌བོའ༌, "ཁྱོ༌རང༌ ཉམ༌པོ༌ སྤེ༌ར༌ བཏང༌ཁན༌ ངའ༌ ཏེན༌ན༌བོ༌ ཡིན༌" མོལས༌།
སློབ༌ཕྲུག༌གུན༌ ལོགས༌ཏེ༌ སྐྱོདས༌།
27 ཡེ༌ཤུའི༌ ཏེ༌བོ༌ མོལ༌ཡིན༌ ཡོད༌ ཟ༌ནེ༌ ཁོང༌ངི༌ སློབ༌ཕྲུག༌གུན༌ ལོགས༌ཏེ༌ སླེབ༌, ཡང༌ ཡེ༌ཤུའི༌ བུ༌མོ༌ ཞིག༌ དང༌ ཞལ༌ལྟའ༌ སལ༌ཡིན༌ ཐོང༌པ༌ ཧ༌ལས༌། ཡིན༌ནའང༌ སུ༌ཞིག༌གིའང༌ ཡེ༌ཤུའ༌, "ཉེ༌རང༌ང༌ བཅི༌ དགོས༌སད༌ ཡ༌ བཅི༌ཕིའ༌ ཉེ༌རང༌ངི༌ ཏེ༌ བུ༌མོ༌བོའ༌ ཞལ༌ལྟའ༌ སལ༌ལད༌" ཟེར༌ཏེ༌ འདྲི༌ཅིས༌ལ༌ ཧམ༌པ༌ མ༌ཡོངས༌། 28 བུ༌མོ༌བོའེ༌ རང༌ངི༌ ཆུ༌ཁར༌བོ༌ ཏེ༌ནེ༌ཀ༌ བོར༌ཏེ༌ ཁོ༌རང༌ངི༌ གྲོང༌ཁྱེར༌ལ༌ བང༌ བཏངས༌ཏེ༌ སོང༌ ཡང༌ མི༌གུན༌ལ༌། 29 "ཡོང༌ཤིག༌, དག༌ས༌ ཚག༌པ༌ ངའེ༌ བཅོས༌ཁན༌ ཚང༌མའེ༌ སྐོར༌ལ༌ ཤད༌ཁན༌ནི༌ མི༌བོའ༌ ཐུག༌ག༌ལ༌ ཡོང༌ཤིག༌། བཅི༌ ཁོང༌ དཀོན༌མཆོག༌གི༌ འདམ༌མ༌ བཛད༌ཁན༌ནི༌ མ༌ཤི༌ཀ༌ ཡིན༌སྲིད༌ཅེས༌ ཡིན༌ནོག༌ག༌?" ཟེརས༌། 30 མི༌གུན༌ གྲོང༌ཁྱེར༌ནེ༌ བིང༌ཏེ༌ ཡེ༌ཤུ༌ ཡོད༌ས༌ ཆོགས༌ལ༌ ཡོངས༌། 31 ཏེ༌ དུས༌ལ༌ ཡེ༌ཤུའི༌ སློབ༌ཕྲུག༌གུན༌ནི༌ ཁོང༌ང༌, "སློབ༌དཔོན༌ལེ༌, དོན༌ཏང༌ ཞིག༌ དོན༌" ཞུས༌། 32 ཡིན༌ནའང༌ ཡེ༌ཤུའི༌ ཁོང༌གུན༌ལ༌, "ང༌ ཟའ༌ཅེས༌ཤིག༌ ཡོད༌, ཁྱོ༌ཞའ༌ ཏེ༌བོའེ༌ སྐོར༌ལ༌ ཅའང༌ རྒྱུས༌མེད༌" མོལས༌། 33 ཏེ༌བོ༌ ཚོར༌ར༌དང༌ སློབ༌ཕྲུག༌གུན༌ནི༌ ཁོང༌རང༌ གཅིག༌ དང༌ གཅིག༌ག༌, "བཅི༌ སུ༌ཞིག༌གི༌ ང༌དང༌ངི༌ སང༌ སྔོན༌ལ༌ ཁོང༌ང༌ དོན༌ཏང༌ ཁྱོངས༌པིན༌ན༌ ཧེ༌?" ཟེརས༌། 34 ཡེ༌ཤུའི༌ མོལས༌, "ངའེ༌ ཟའ༌ཅེས༌པོ༌ ནི༌ ང༌ ཀལ༌ལ༌ བཛད༌ཁན༌ནི༌ དཀོན༌མཆོག༌གི༌ ཐུགས༌ཐད༌གུན༌ བཅོ༌ཅེས༌ དང༌ ཁོང༌ངི༌ ཕྱག༌ལས༌ གུན༌ འདྲན༌དྲ༌ འགྲུབ༌ཅུག༌ཅེས༌བོ༌ ཡིན༌། 35 ཁྱོ༌ཞའེ༌ ཟེར༌ར༌ མེད༌ད༌ 'སྟོན༌ཐོག༌ སྨིན༌ཅེས༌ལ༌ ལྯ༌བ༌ བཞི༌ ལུས༌ཏེ༌ ཡིན༌ནོག༌'?། ངའེ༌ ཁྱོ༌ཞའ༌གུན༌ལ༌ ཟེར༌རད༌, རང༌རང༌ངི༌ མིག༌ ཕྱེས༌ཏེ༌ ཞིང༌གུན༌ལ༌ ལྟོས༌ཤིག༌, ཏེ༌ སྟོན༌ཐོག༌གུན༌ ཚོས༌ཏེ༌ རྔབ༌ས༌ རན༌ཚར༌ཏེ༌ འདུག༌། 36 ས༌བོན༌ བཏབ༌ཁན༌ དང༌ རྔབ༌ས༌ བཏང༌ཁན༌ གཉིས༌ཀོའེ༌ ཉམ༌པོ༌ སྐྱིད༌པོ༌ བཅོ༌ཐུབ༌ཅེས༌སི༌ ཕིའ༌ རྔབ༌ས༌ བཏང༌ཁན༌གུན༌ལ༌ རང༌རང༌ངི༌ གླ༌ཆ༌ ཐོབ༌ཡིན༌ མཐའ༌མེད༌པའེ༌ མི༌ཚེ༌ སྟོན༌ཐོག༌ རྔ༌རུག༌། 37 འི༌ སྤེ༌ར༌ ཟེར༌ལོ༌བོ༌ བདེན༌བ༌ ཡིན༌ནོག༌, 'གཅིག༌གི༌ བཏབ༌ཡིན༌ གཞན༌ཞིག༌གི༌ རྔ༌ཡིན༌།' 38 ངའེ༌ ཁྱོ༌ཞའ༌གུན༌ ཁྱོ༌ཞའེ༌ མ༌བཏབ༌ཁན༌ནི༌ སྟོན༌ཐོག༌པོ༌ རྔའ༌ལ༌ ཀལ༌པིན༌། གཞན༌མ༌གུན༌ནི༌ བརྩོན༌འགྲུས༌ དང༌ ལས༌ བཅོས༌ ཡང༌ ཁྱོ༌ཞའ༌གུན༌ནི༌ ཁོང༌ངི༌ བརྩོན༌འགྲུས༌སི༌ བྲས༌བུ༌གུན༌ རྔས༌།
ས༌མར༌རི༌ཡཱ༌པ༌གུན༌ནི༌ དད༌པ༌ ཁྱོངས༌།
39 ས༌མར༌རི༌ཡཱ༌པ༌ མི༌ མང༌པོ༌ ཞིག༌གི༌ ཡེ༌ཤུའི༌ཀ༌ དད༌པ༌ ཁྱོངས༌ བཅིའ༌ཟེར༌ན༌ ཏེ༌ བུ༌མོ༌བོའེ༌ ཡེ༌ཤུའི༌ ཁོའེ༌ བཅོས༌ཁན༌ ཚང༌མའེ༌ སྐོར༌གུན༌ ཤད༌ཁན༌བོའེ༌ སྤང༌པོ༌ བཏངས༌། 40 ཏེ༌ནེ༌ ས༌མར༌རི༌ཡཱ༌པ༌གུན༌ ཡེ༌ཤུ༌ ཡོད༌ས༌ ཡོངས༌ཏེ༌ འཇུ༌ ཞུ༌ ཁོང༌གུན༌ ཉམ༌པོ༌ ཞུགས༌ས༌ བཛད༌ ཟེར༌ཏེ༌ ཞུ༌བ༌ ཕུལ༌པ༌ ཁོང༌ ཞག༌མ༌ གཉིས༌ ཏེ༌རུ༌ ཞུགས༌། 41 ཁོང༌ངི༌ སླབ༌བྱའ༌གུན༌ ཚོར༌ཏེ༌ གཞན༌ཡང༌ མི༌ མང༌པོ༌ ཞིག༌གིའང༌ དད༌པ༌ ཁྱོངས༌། 42 མི༌གུན༌ནི༌ ཏེ༌ བུ༌མོ༌བོའ༌, "ཏ༌ ང༌ཞའ༌གུན༌ནི༌ ཁྱོ༌རང༌ངི༌ ཟེར༌ཁན༌ནི༌ སྤེ༌ར༌ ཚོར༌ཅེས༌ གཅིག༌པོ༌ མན༌པ༌, ང༌ཞའ༌ རང༌ངི༌ རྣམ༌ཆོག༌ནེ༌ ཁོང༌ངི༌ མོལ༌ཁན༌གུན༌ ཚོར༌ཅེས༌ དང༌ བདེན༌བ༌ འི༌ མི༌བོ༌ འཇིག༌རྟེན༌པ༌གུན༌ནི༌ སྐྱབ༌མགོན༌ ཡིན༌ཁན༌བོ༌ ཤེས༌ཏེ༌ དད༌པ༌ ཁྱོངས༌ཏེ༌ ཡིན༌" ཟེརས༌།
ཡེ༌ཤུའི༌ བློན༌པོ༌ ཞིག༌གི༌ བུ༌ཚ༌ ཕན༌ཅུག༌ག༌ བཛདས༌།
43 ཞག༌ གཉིས༌སི༌ སྟིང༌ནེ༌ ཡེ༌ཤུ༌ ཡང༌ གཱ༌ལིལ༌ལིའི༌ ཡུལ༌ ཆོགས༌ལ༌ ལོགས༌ཏེ༌ སྐྱོདས༌། 44 ༼ཡེ༌ཤུའི༌ སྔོན༌ལ༌ མོལ༌ཏེ༌ ཡིན༌པིན༌ ལུང༌སྟོན༌པ༌ སུ༌ ཞིག༌གའང༌ རང༌ཡུལ༌ལ༌ རྩི༌བ༌ མ༌ནེ༌ མི༌ཐོབ༌༽ 45 ཏེ༌ནེ༌ ཁོང༌ གཱ༌ལིལ༌ལིའ༌ སླེབ༌བ༌དང༌, གཱ༌ལིལ༌ལི༌པ༌གུན༌ནི༌ ཁོང༌ང༌ དགའ༌སུས༌ ཞུས༌ བཅིའ༌ཟེར༌ན༌ ཁོང༌གུན༌ པེ༌སག༌གི༌ དུས༌ཆེན༌ ཟ༌ནེ༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌པིན༌ ཡང༌ ཡེ༌ཤུའི༌ བཛད༌ཁན༌ ཚང༌མ༌ ཁོང༌གུན༌ནི༌ ཐོང༌། 46 ཡེ༌ཤུ༌ ལན༌ གཉིས༌པ༌ གཱ༌ལིལ༌ལིའི༌ ཡུལ༌ ཀ༌ནཱ༌ ཟེར༌སའེ༌ གྲོང༌ཁྱེར༌ལ༌ སྐྱོདས༌, ཀ༌རུ༌ ཁོང༌ངི༌ ཆུ༌ རྒུན༌ཆང༌ང༌ རྒྱུར༌ ཅུག༌ག༌ བཛད༌ཏེ༌ ཡིན༌པིན༌། ཡང༌ ཏེ༌ཀ༌ནེ༌ ཉེ༌མོའ༌ ཀ༌ཕར༌ན༌ཧུམ༌མི༌ ནང༌ང༌ བློན༌པོ༌ཞིག༌གི༌ བུ༌ཚའ༌ ཟུ༌མོ༌ ཡོངས༌ཏེ༌ ཡོད༌པིན༌། 47 ཏེ༌ བློན༌པོའ༌ ཡེ༌ཤུ༌ ཡ༌ཧུ༌དཱ༌ནེ༌ གཱ༌ལིལ༌ལིའ༌ ལོགས༌ཏེ༌ སྐྱོད༌ཏོག༌ ཟེར༌ཏེ༌ ཚོར༌པ༌ ཁོ༌ ཡེ༌ཤུ༌ ཡོད༌ས༌ སོང༌ ཡང༌ འཇུ༌འཇུ༌ སྐྱོད༌ཏེ༌ ཁོའེ༌ བུ༌ཚ༌ ཤི༌ཀིས༌ ཡོད༌ཁན༌བོ༌ ཕན༌ཅུག༌ག༌ བཛད༌ ཟེར༌ཏེ༌ ཞུ༌བ༌ ཕུལས༌། 48 ཡེ༌ཤུའི༌ བློན༌པོ༌བོའ༌, "ཁྱོ༌ཞའ༌གུན༌ནི༌ ཧ༌ལས༌ཤེས༌སི༌ ལས༌ ཐོངས༌ཏེ༌ མ༌ནེ༌ དད༌པ༌ མི༌བཅོ༌" མོལས༌། 49 བློན༌པོ༌བོའེ༌, "གཙོ༌བོ༌ ངའེ༌ བུ༌ཚ༌བོ༌ ཤིའི༌ སང༌ སྔོན༌ལ༌ སྐྱོད༌ད༌ བཛད༌དའང༌ ཧེ༌" ཞུས༌། 50 ཡེ༌ཤུའི༌ ཁོའ༌, "ཏ༌ སོང༌ ཁྱོ༌རང༌ངི༌ བུ༌ཚ༌ རྒྱལ༌ཏེ༌ གསོན༌ཏེའ༌ ལུས༌ཡིན༌" མོལས༌། ཁོའེ༌ ཡེ༌ཤུའི༌ མོལ༌ཁན༌བོའ༌ བདེན༌ཤེས༌ ཡང༌ ཏེ༌ཀ༌ནེ༌ ལོགས༌ཏེ༌ སོང། 51 ཁོ༌ ལམ༌བར༌ལ༌ ཡོད༌ཡིན༌ནའང༌, ཁོའེ༌ གཡོག༌པོ༌གུན༌ ཁོའ༌ ཐུག༌ག༌ ཡོངས༌ཏེ༌, ཁོའེ༌ བུ༌ཚ༌ ཟུ༌མོ༌ ཡོངས༌ཁན༌བོ༌ རྒྱལ༌ཏེ༌ ཁམ༌བཟང༌ འདུག༌ ཟེར༌ཏེ༌ ཞུས༌། 52 བློན༌པོ༌བོའེ༌ ཁོའེ༌ བུ༌ཚ༌བོ༌ ཙམ༌ཟོད༌ཤིག༌ག༌, རྒྱལ༌ལ༌ སོང༌ ཟེར༌ཏེ༌ འདྲིས༌པ༌ ཏེ༌གུན༌ནི༌, "ཕྲུ༌གུའི༌ ཚད༌པོ༌ ནི༌ འདང༌ ཉིང༌གུང༌ངི༌ ཆུ༌ཚོད༌ དང༌པོ༌ ཟོད༌ཅིག༌ག༌ མེད༌ཁན༌ སོང༌" ཞུས༌། 53 ཏེ༌ནེ༌ ཨ༌བ༌བོའ༌ ཡིད༌ཏུ༌ ཡོངས༌, ཏེ༌བོ༌ ནི༌ ཏེན༌ན༌ དུས༌པོ༌ ཡིན༌པིན༌, ནམ༌ ཡེ༌ཤུའི༌ ཁོའ༌, "ཁྱོ༌རང༌ངི༌ བུ༌ཚ༌ རྒྱལ༌ཏེ༌ གསོན༌ཏེའ༌ ལུས༌ཡིན༌" མོལས༌, ཏེ༌བོའེ༌ ཞས༌ཏེ༌ ཁོ༌ དང༌ ཁོའེ༌ ནང༌ཚང༌ གང༌པོའེ༌ ཡེ༌ཤུའི༌ཀ༌ དད༌པ༌ ཁྱོངས༌། 54 འི༌བོ༌ ཡ༌ཧུ༌དཱ༌ནེ༌ གཱ༌ལིལ༌ལིའི༌ ནང༌ང༌ སྐྱོད༌ཏེ༌ ཡེ༌ཤུའི༌ ཧ༌ལས༌ཤེས༌སི༌ བཛད༌པ༌ གཉིས༌པ༌བོ༌ བཛད༌ཏེ༌ ཡིན༌པིན༌།
བེད༌སེ༌དཱའི༌ རྫིང༌ངི༌ཀ༌ ནད༌པ༌ རྒྱལ༌ཅུག༌ག༌ བཛདས༌།
1 ཏེ༌ སྟིང༌ནེ༌ ཡེ༌ཤུ༌ ཡ༌ཧུ༌དཱ༌པ༌གུན༌ནི༌ དུས༌ཆེན༌ ཞིག༌ག༌ ཡེ༌རུ༌ཤ༌ལེམ༌མི༌ རྒྱལ༌ས༌ སྐྱོདས༌། 2 ཡེ༌རུ༌ཤ༌ལེམ༌མི༌ ནང༌ང༌ ལུག༌གི༌ རྒྱས༌སྒོ༌ དང༌ ཉེ༌མོའ༌, ཨེབ༌རི༌པའེ༌ སྐད༌ལ༌ བེད༌སེ༌དཱ༌ ཟེར༌ཁན༌ནི༌ རྫིང༌ཞིག༌ ཡོད༌པིན༌, ཀ༌བོའེ༌ ཐའ༌ཐོ༌ ཐ༌མའ༌ གཡབས༌ ལྔའ༌ ཡོད༌པིན༌། 3 ཏེ༌ གཡབས༌གུན༌ནི༌ཀ༌ ནད༌པ༌ ཁོངས༌ཁན༌, ཞ༌ར༌ དང༌ ཞ༌བོ༌ མང༌པོ༌ ཞིག༌ འདུགས༌ཏེ༌ ཡོད༌པིན༌། 4 5 ཏེ༌ཀ༌ ཏེ༌ཟུག༌ མི༌ ཞིག༌གའང༌ ཡོད༌པིན༌, ཀ༌བོ༌ ལོ༌ གསུམ༌བཅུ༌ སོ༌བརྒྱད༌ནེ༌ ཕར༌ལ༌ ཁོངས༌ཏེ༌ ཡོད༌པིན༌། 6 ཡེ༌ཤུའི༌ ཏེ༌ ནད༌པ༌བོའ༌ གཟིགས༌ ཡང༌ ཁོ༌ ལོ༌ མང༌པོ༌ ཞིག༌ནེ༌ ཕར༌ལ༌ ཁོངས༌ཏེ༌ ཡོད༌ཁན༌བོ༌ རྒྱུས༌སྐྱོད༌པ༌ ཁོང༌ངི༌ ཏེ༌ མི༌བོའ༌ འདྲིའ༌ བཛདས༌, "ཁྱོ༌རང༌ འི༌ ཟུ༌མོ༌བོ༌ནེ༌ ཕན༌ན༌ ཐད༌ད༌ རག༌ག༌?།" 7 ཏེ༌ མི༌ ཁོངས༌ཁན༌བོའི༌, "གཙོ༌བོ༌, འི༌ ཆུ༌བོ༌ སྲུག༌ ཟ༌ནེ༌ ང༌ འི༌ རྫིང༌བོའེ༌ ནང༌ང༌ ལེན༌ཏེ༌ ཅུག༌ཅེས༌སི༌ རོགས༌ བཅོ༌ཁན༌ སུའང༌ མེད༌, མ༌ཚད༌ ང༌ ཏེ༌བོའེ༌ དུན༌ལ༌ སླེབ༌བི༌ སང༌ སྔོན༌ལ༌ ཡང༌སུ༌ཞིག༌ ཏེ༌ ནང༌ང༌ ཞུགས༌ ཚར༌འདུག༌" ཞུས༌། 8 ཡེ༌ཤུའི༌ ཁོའ༌, "ལོངས༌ ཡང༌ རང༌ངི༌ མལ༌ཙ༌ ཁུར༌ཏེ༌ སོང༌" མོལས༌། 9 ཁོ༌ ཏེན༌ན༌མལ༌ལ༌ ཁྲངས༌པོ༌ སོང༌ཏེ༌, རང༌ངི༌ མལ༌ཙ༌ ཁུར༌ཏེ༌ གྲུལས༌ ཡང༌ འི༌བོ༌ ཤབ༌བད༌དི༌ ངལ༌ཚོའེ༌ ཞག༌ག༌ བྱུང༌ཏེ༌ ཡིན༌པིན༌། 10 ཏེན༌ན༌བོའེ༌ཕིའ༌ ཡ༌ཧུ༌དཱ༌པའེ༌ དའུ༌སྐྱོང༌གུན༌ནི༌ ཡེ༌ཤུའི༌ རྒྱལ༌ཅུག༌ག༌ བཛད༌ཁན༌ནི༌ མི༌བོའ༌, "དི༌རིང༌ ཤབ༌བད༌དི༌ ངལ༌ཚོའེ༌ ཞག༌ག༌ ཁྱོ༌རང༌ངི༌ མལ༌ཙ༌ ཁུར༌ཏེ༌ ལས༌ བཅོས༌པ༌ ང༌དང༌ངི༌ ཆོས༌ ཁྲིམས༌ དང༌ གལ༌ཏེ༌ ཡིན༌ནོག༌" ཟེརས༌། 11 ཁོའེ༌ ཏེ༌གུན༌ལ༌ ལན༌ བཏང༌ཡིན༌, "ང༌ ཕན༌ཅུག༌ག༌ བཛད༌ཁན༌ནི༌ མི༌བོའེ༌ མོལ༌ལ༌རག༌ རང༌ངི༌ མལ༌ཙ༌ ཁུར༌ཏེ༌ གྲུལ༌" ཟེརས༌། 12 ཁོང༌གུན༌ནི༌ ཁོའ༌ འདྲིས༌, "ཁྱོ༌རང༌ང༌ རང༌ངི༌ མལ༌ཙ༌ ཁུར༌ཏེ༌ གྲུལ༌ ཟེར༌ཁན༌བོ༌ སུ༌ ཡིན༌ནོག༌?།" 13 ནད༌པ༌བོའ༌ ཁོ༌ ཕན༌ཅུག༌ཁན༌བོ༌ སུ༌ ཡིན༌ རྒྱུས༌ མེད༌པིན༌ བཅིའ༌ཞུ༌ན༌ ཡེ༌ཤུ༌ ཏེ༌རུ༌ མི༌ཚོགས༌སི༌ ནང༌ང༌ སྟོར༌ སོང༌། 14 སྟིང༌ནེ༌ ཡེ༌ཤུའི༌ ཁོ༌ ཡ༌ཧུ༌དཱ༌པའེ༌ མཆོད༌ཁང༌ ཆེན༌མོའེ༌ ནང༌ང༌ ཁོ༌ གཟིགས༌ཏེ༌, "ལྟོས༌ ཏ༌ ཁྱོ༌རང༌ རྒྱལ༌ཏེ༌ ཡིན༌ནོག༌། སྡིག༌པ༌ནེ༌ ཐག༌རིང༌ང༌ འདུག༌, མ༌འདུག༌ན༌ ཁྱོ༌རང༌ང༌ འི༌ སང༌ ཐུའ༌ སྡུག༌སྔལ༌ ཕོག༌ཡིན༌" མོལས༌། 15 ཏེ༌ནེ༌ ཁོ༌ ཡ༌ཧུ༌དཱ༌པའེ༌ དའུ༌སྐྱོང༌གུན༌ནི༌ཀ༌ སོང༌ཏེ༌, "ང༌ ཕན༌ཅུག༌ག༌ བཛདས༌ཁན༌བོ༌ ནི༌ ཡེ༌ཤུ༌ ཡིན༌ནོག༌" ཟེརས༌།
དཀོན༌མཆོག༌གི༌ སྲས༌ རྒྱུད༌ཏེ༌ མཐའ༌མེད༌པའེ༌ མི༌ཚེ༌ ཐོབ༌ཅེས༌།
16 ཡེ༌ཤུའི༌ འིན༌ན༌ ཙོགས༌སི༌ ཧ༌ལས༌ཤེས༌སི༌ བཛད༌པ༌གུན༌ ཤབ༌བད༌དི༌ ངལ༌ཚོའེ༌ ཞག༌གའང༌ བཛད༌ པ༌སང༌, ཡ༌ཧུ༌དཱ༌པའེ༌ དའུ༌སྐྱོང༌གུན༌ནི༌ ཁོང༌ང༌ རྒྱབ༌གལ༌ བཅོས༌ཏེ༌ ཉད༌ ཀལ༌ལད༌པིན༌། 17 ཡིན༌ནའང༌ ཡེ༌ཤུའི༌ ཏེ༌ མི༌གུན༌ལ༌, "ངའེ༌ ཡབ༌ དཀོན༌མཆོག༌གི༌ དུས༌རྒྱུན༌ ཕྱག༌ལས༌ བཛད༌ཡིན༌ ཞུགས༌ པ༌སང༌, ངེའང༌ བཅོའད༌" མོལས༌། 18 ཡ༌ཧུ༌དཱ༌པ༌གུན༌ནི༌ ཁོང༌ བསད༌ཅེས༌སི༌ ཐབས༌ སྔོན༌ནི༌ སང༌ མང༌ང༌ སྲན༌ཏེ༌ བཅོས༌, བཅིའ༌ཟེར༌ན༌ ཡེ༌ཤུའི༌ ཡ༌ཧུ༌དཱ༌པོའེ༌ ཤབ༌བད༌དི༌ ཞག༌གི༌ ཁྲིམས༌གུན༌ ཅག༌ཅེས༌, མ༌ཚད༌ ཁོའེ༌ དཀོན༌མཆོག༌ག༌ ཁོ༌རང༌ངི༌ ཡབ༌ ཟེར༌ཡིན༌ ཁོ༌རང༌ དཀོན༌མཆོག༌ དང༌ འདྲན༌དྲ༌ ཚོར༌འདུག༌ ཟེར༌རད༌པིན༌། 19 ཡེ༌ཤུའི༌ ཏེ༌གུན༌ལ༌ ལན༌ སལས༌, "ངའེ༌ ཁྱོ༌ཞའ༌ བདེན༌བ༌ ཟེར༌རད༌, སྲས༌ ཁོ༌རང༌ གཅིག༌པོའ༌ ཅའང༌ བཅོ༌ཉན༌ན༌ མན༌ནོག༌། སྲས༌སི༌ བཅི༌ ཡབ༌ དཀོན༌མཆོག༌གི༌ བཛད༌ད༌ ཐོང༌ཁན༌བོ༌ མ༌ནེ༌ བཅོའ༌ མན༌ནོག༌ བཅིའ༌ཟེར༌ན༌ ཡབ༌བི༌ བཅི༌ བཅོའ༌ བཛད༌ནའང༌ སྲས༌སིའང༌ བཅོའ༌ནོག༌། 20 ཡབ༌བི༌ སྲས༌ལ༌ བྱམས༌པ༌ བཛད༌ཅེས༌བོའེ༌ ཁོང༌ངི༌ ཕྱག༌ལས༌ ཚང༌མ༌ སྲས༌ལ༌ སྟན༌ན༌ བཛད༌ད༌ནོག༌། ཡབ༌བི༌ འི༌ མི༌ རྒྱལ༌ཅུག༌ཅེས༌སི༌ སང༌ ཕྱག༌ལས༌ འཇིགས༌པོ༌གུན༌ སྲས༌ལ༌ བཅོ༌ཅེས༌ལ༌ སྟན༌ན༌ བཛད༌ཡིན༌, ཏེ༌ནེ༌ ཁྱོ༌ཞའ༌གུན༌ མང༌ང༌ ཧ༌ལས༌ཡིན༌། 21 སྤེར༌ན༌ ཀ༌ཟུག༌ ཡབ༌བི༌ ཤི༌ཁན༌གུན༌ གསོན༌ཏེའ༌ ལང༌ང༌ བཛད༌ཏེ༌ སྲོག༌ སལ༌ལད༌, ཏེན༌ན༌དང༌ ཙོགས༌ལ༌ སྲས༌སིའང༌ ཁོ༌རང༌ ཐད༌ཁན༌གུན༌ལ༌ མི༌ཚེ༌ བཏང༌ཡིན༌། 22 ཡབ༌བི༌ སུ༌ཞིག༌གའང༌ ཤགས༌ མ༌ བཛད༌ད༌, ཤགས༌ བཅད༌ཅེས༌སི༌ དབང༌ ཚང༌མ༌ སྲས༌ལ༌ སལ༌ལ༌ བཛད༌ཏེ༌ ཡིན༌། 23 ཀ༌ཟུག༌གི༌ ཡབ༌བ༌ མི༌ཚང༌མའེ༌ རྩི༌བ༌ བཅོའད༌ ཏེན༌ན༌དང༌ ཙོགས༌ལ༌ མི༌ཚང༌མའེ༌ སྲས༌ལའང༌ རྩི༌བ༌ བཏང༌ཅེས༌སི༌ ཕིའ༌ དཀོན༌མཆོག༌གི༌ ཏེ༌གུན༌ བཅོའ༌ བཛདས༌། སུ༌ཞིག༌གི༌ སྲས༌ལ༌ རྩི༌བ༌ བཅོའ༌མེད༌ ཏེ༌གུན༌ནི༌ སྲས༌ ཀལ༌ལ༌ བཛད༌ཁན༌ནི༌ ཡབ༌བའང༌ རྩི༌བ༌ བཅོའ༌ མན༌ནོག༌། 24 ངའེ༌ ཁྱོ༌ཞའ༌ བདེན༌བ༌ ཟེར༌རད༌, སུ༌ཞིག༌གི༌ ངའེ༌ སྤེ༌ར༌གུན༌ལ༌ ཉན༌ཏེ༌ ང༌ ཀལ༌ཁན༌ནི༌ དཀོན༌མཆོག༌གི༌ཀ༌ དད༌པ༌ ཁྱོང༌ན༌ ཁོང༌གུན༌ལ༌ མཐའ༌མེད༌པའེ༌ མི༌ཚེ༌ ཡོད༌, མ༌ཚད༌ ཁོང༌གུན༌ནི༌ སྡིག༌པ༌གུན༌ལ༌ ཆད༌པའང༌ མི༌ཕོག༌། ཏེ༌ མི༌གུན༌ མཐའ༌མེད༌པའེ༌ ཤི༌ཅེས༌ནེ༌ ཐར༌ཏེ༌ མཐའ༌མེད༌པའེ༌ མི༌ཚེ༌ ནང༌ང༌ སླེབ༌ཏེ༌ ཡིན༌ནོག༌།" 25 ངའེ༌ ཁྱོ༌ཞའ༌ བདེན༌བ༌ ཟེར༌རད༌, ཏ༌ ཏེ༌དུས༌པོ༌ སླེབ༌ཅེས༌ ཡོད༌ མ༌ཚད༌ སླེབ༌ ཚར༌ཏེ༌ ཡིན༌། ནམ༌ སེམས༌ཉིད༌དི༌ ཐོག༌ནེ༌ ཤི༌ཁན༌གུན༌ནི༌ དཀོན༌མཆོག༌གི༌ སྲས༌སི༌ སྐད༌ ཚོར༌ཏེ༌ ཡིད༌ཆེས༌ བཅོ༌ཡིན༌ ཏེ༌གུན༌ གསོན༌ཏེའ༌ ལུས༌ཡིན༌། 26 ཀ༌ཟུག༌གི༌ ཡབ༌བ༌ སྲོག༌ སལ༌ཅེས༌སི༌ དབང༌ ཡོད༌, ཏེན༌ན༌དང༌ ཙོགས༌ལ༌ ཁོང༌ངི༌ སྲས༌ལའང༌ སྲོག༌ བཏང༌ཅེས༌སི༌ དབང༌བོ༌ སལ༌ལ༌ བཛད༌ཏེ༌ ཡིན༌། 27 ཁོ༌ ནི༌ མི༌རིགས༌སི༌བུ༌ ཡིན༌ པ༌སང༌, ཡབ༌བི༌ ཁོའ༌ ཤགས༌ བཅད༌ཅེས༌སི༌ དབང༌ སྟད༌ད༌ བཛད༌ཏེ༌ ཡིན༌། 28 ངའེ༌ ཟེར༌ཁན༌བོའ༌ ཧ༌མ༌ལས༌ཤིག༌། ཏ༌ ཏེ༌དུས༌པོ༌ སླེབ༌ཅེས༌ ཡོད༌, ནམ༌ ཤི༌ཁན༌ ཚང༌མའེ༌ སྤུར༌ཁང༌ངི༌ ནང༌ང༌ ངའེ༌ སྐད༌པོ༌ ཚོར༌ཏེ༌ 29 སྤུར༌ཁང༌གུན༌ནེ༌ བིང༌ཏེ༌ ཡོང༌ཡིན༌། ལས༌ བཟང༌པོ༌ བཅོ༌ཁན༌གུན༌ གསོན༌ཏེའ༌ ལངས༌ཏེ༌ དུས༌རྒྱུན༌ དཀོན༌མཆོག༌ ཉམ༌པོ༌ འདུག༌ཡིན༌, ཡང༌ ལས༌ ངན༌པ༌ བཅོ༌ཁན༌གུན༌ ཆད༌པའེ༌ ཕིའ༌ གསོན༌ཏེའ༌ ལང༌ཡིན༌། 30 ངའ༌ ང༌རང༌ དང༌ རང༌ང༌ ཅའང༌ བཅོ༌ མི༌ཉན༌, དཀོན༌མཆོག༌གི༌ མོལ༌ཁན༌ ནང༌བཞིན༌ལ༌ ཤགས༌ བཏང༌ངད༌ ཡང༌ ངའེ༌ ཤགས༌གུན༌ནི༌ དྲང༌པོ༌ ཡིན༌ བཅིའ༌ཟེར༌ན༌ ངའེ༌ ང༌རང༌ ཐད༌ཁན༌ ནང༌བཞིན༌ མན༌པ༌, ཡབ༌བི༌ ཐུགས༌ཐད༌ ནང༌བཞིན༌ བཅོའད༌, ཀ༌བོའེ༌ ང༌ ཀལ༌ལ༌ བཛདས༌།"
གཙོ༌བོ༌ ཡེ༌ཤུའི༌ སྐོར༌ལ༌ སྤང༌པོ༌།
31 ཡེ༌ཤུའི༌ ཏ༌རུང༌ངའང༌ མོལས༌, "གལ༌ཏེས༌ ངའེ༌ ང༌རང༌ངི༌ སྤང༌པོ༌ རང༌ངི༌ བཏང༌ངད༌ན༌ ངའེ༌ སྤང༌པོ༌བོའ༌ གཞན༌མ༌གུན༌ བདེན༌ མི༌ཆེས༌། 32 ཡིན༌ནའང༌ ཡང༌གཅིག༌གི༌ ངའེ༌ སྐོར༌ལ༌ སྤང༌པོ༌ སལ༌ལད༌། ཡང༌ ངའེ༌ སྐོར༌ལ༌ ཁོང༌ངི༌ སྤང༌པོ༌ དྲང༌པོ༌ ཡིན༌ཁན༌བོ༌ ང༌ རྒྱུས༌ཡོད༌། 33 ཁྱོ༌ཞའ༌གུན༌ནི༌ ཡོ༌ཧཱ༌ནན༌ནི༌ཀ༌ མི༌གུན༌ བཀལས༌པ༌, ཁོང༌ངི༌ ངའེ༌ སྐོར༌ལ༌ བདེན༌བའེ༌ སྤང༌པོ༌ བཏངས༌། 34 ང༌ མི༌གུན༌ནི༌ སྤང༌པོའ༌ རག༌ལས༌ཏེ༌ མེད༌, ཡིན༌ནའང༌ ཁྱོ༌ཞའ༌གུན༌ལ༌ ཐར༌པ༌ ཐོབ༌ཅེས༌སི༌ ཕིའ༌ ཡོ༌ཧཱ༌ནན༌ནི༌ སྤང༌པོའེ༌ སྐོར༌ལ༌ ཤད༌དད༌། 35 ཡོ༌ཧཱ༌ནན༌ནི༌ སྤང༌པོ༌ ནི༌ འོད༌ ཙོགས༌ཤིག༌ ཡིན༌པིན༌, ཀ༌བོ༌ བར༌ཡིན༌ དང༌ འོད༌ བཏང༌ངད༌། ཡང༌ ཁྱོ༌ཞའ༌གུན༌ སྐབས༌ སྟོགས༌ཤིག༌གི༌ ཕིའ༌ ཏེ༌ འོད༌པོའེ༌ དངས༌སི༌ ནང༌ང༌ འདུགས༌ཏེ༌ ཐད༌པོ༌ བཅོས༌ཏེ༌ ཡིན༌པིན༌། 36 ངའེ༌ ལག༌ག༌ ཡོ༌ཧཱ༌ནན༌ནི༌ སྤང༌པོའེ༌ སང༌ ཆེན༌མོ༌ སྤང༌པོ༌ ཞིག༌ ཡོད༌, ཀ༌ ལས༌པོ༌ འགྲུབ༌ཅུག༌ཅེས༌ལ༌ ཡབ༌ དཀོན༌མཆོག༌གི༌ ངའ༌ སྟད༌ད༌ བཛདས༌། ངའེ༌ ཏེ༌གུན༌ བཅོ༌ཡིན༌ ཡོད༌ ཡང༌ ཏེན༌ན༌གུན༌ ང༌ ཡབ༌བི༌ ཀལ༌ལ༌ བཛད༌ཁན༌བོའེ༌ སྤང༌པོ༌ ཡིན༌། 37 ང༌ ཀལ༌ལ༌ བཛད༌ཁན༌ནི༌ ཡབ༌བའི༌ ངའེ༌ སྐོར༌ལ༌ སྤང༌པོ༌ སལ༌ཏེ༌ ཡིན༌། ཁྱོ༌ཞའ༌གུན༌ནི༌ ཁོང༌ངི༌ གསུང༌སྐད༌ མ༌ནེ༌ མ༌ཚོར༌ར ཡ༌ ཁོང༌ངི༌ ཡིབས༌སའང༌ མ༌ནེ༌ མ༌མཇལ༌ལ༌ ཡིན༌ནོག༌། 38 ཁོང༌ངི༌ ལོན༌ ཡ༌ བཀའ༌ གུན༌ ཁྱོ༌ཞའ༌གུན༌ནི༌ སྙིང༌ངི༌ ནང༌ང༌ ལུས༌ས༌ མི༌འདུག༌, བཅིའ༌ཟེར༌ན༌ ཁྱོ༌ཞའ༌གུན༌ནི༌ ང༌ དཀོན༌མཆོག༌གི༌ ཀལ༌ལ༌ བཛད༌ཁན༌བོའེ༌ཀ༌ བདེན༌ མ༌ཆེས༌།" 39 "ཁྱོ༌ཞའ༌གུན༌ནི༌ གསུང༌རབས༌ལ༌ མ༌ ཞིབ༌སལ༌ ཉམ༌པོ༌ སློབ༌བྱོང༌ བཅོ༌རུག༌, བཅིའ༌ཟེར༌ན༌ ཁྱོ༌ཞའ༌གུན༌ནི༌ དམ༌པའེ༌ གསུང༌རབས༌གུན༌ རྒྱུད༌ཏེ༌ མཐའ༌མེད༌པའེ༌ མི༌ཚེ༌ ཐོབ༌བ༌ནོག༌ སམ༌འདུག༌། འིན༌ན༌ གསུང༌རབས༌པོའེ༌ ངའེ༌ སྐོར༌ལ༌ སྤང༌པོ༌ བཏང༌ང༌ནོག༌། 40 ཏེ༌ནེའང༌ ཁྱོ༌ཞའ༌གུན༌ ངའེ༌ཀ༌ ཡིད༌ཆེས༌ བཅོས༌ཏེ༌ མཐའ༌མེད༌པའེ༌ མི༌ཚེ༌ ཐོབ༌ཅེས༌ལ༌ ཐད༌ད༌ མི༌འདུག༌།" 41 "ང༌ ནི༌ མི༌གུན༌ནི༌ སྟོད༌པ༌ བཏང༌ཅེས༌པོའ༌ ཐད༌ད༌མེད༌, 42 བཅིའ༌ཟེར༌ན༌ ཁྱོ༌ཞའ༌གུན༌ནི༌ སེམས༌སི༌ ནང༌ང༌ དཀོན༌མཆོག༌གི༌ ཕིའ༌ བྱམས༌པ༌ མེད༌ཁན༌བོ༌ ང༌ རྒྱུས༌ཡོད༌། 43 ང༌ ནི༌ ང༌རང༌ངི༌ ཡབ༌བི༌ དབང༌ངི༌ ནང༌ང༌ ཡོངས༌ཏེ༌ ཡིན༌ནའང༌ ཁྱོ༌ཞའ༌གུན༌ནི༌ ང༌ དགའ༌སུས༌ མ༌བཅོས༌། གལ༌ཏེས༌ སུ༌ཞིག༌ ཁོ༌རང༌ངི༌ དབང༌ངི༌ ནང༌ང༌ ཡོངས༌ཏེ༌ ཡིན༌པིན༌ན༌ ཁྱོ༌ཞའ༌གུན༌ནི༌ དགའ༌སུས༌ ཞུས༌ཏེ༌ ཡོད༌འགྲོ༌། 44 ཁྱོ༌ཞའ༌གུན༌ གཅིག༌ དང༌ གཅིག༌ནེ༌ སྟོད༌པ༌ ཐོབ༌ཅེས༌ལ༌ ཐད༌འདུག༌, ཡིན༌ནའང༌ བདེན༌བ༌ དཀོན༌མཆོག༌ གཅིག༌གཅིག༌པོའེ༌ སྟོད༌པ༌ ཐོབ༌ཅེས༌སི༌ ལས༌གུན༌ བཅོ༌ཅེས༌སི༌ བརྩོན༌འགྲུས༌ བཅོའ༌ མི༌འདུག༌། ཏེ༌ནེ༌ ཁྱོ༌ཞའ༌གུན༌ནི༌ ཀ༌ཟུག༌ག༌ ངའེ༌ཀ༌ དད༌པ༌ ཁྱོང༌ཡིན༌།" 45 "ཁྱོ༌ཞའེ༌ འི༌བོ༌ མ༌སམས༌ཤིག༌ ཡབ༌བི༌ སྐུན༌དུན༌ལ༌ ཁྱོ༌ཞའ༌གུན༌ལ༌ ངའེ༌ སྐྱོན༌ གལ༌ཡིན༌། ཁྱོ༌ཞའ༌གུན༌ལ༌ སྐྱོན༌ གལ༌ཁན༌བོ༌ ཁྱོ༌ཞའ༌ རང༌ངི༌ རེ༌བ༌ བོར༌ཁན༌ནི༌ ལུང༌སྟོན༌པ༌ མོ༌ཟེས༌ ཡིན༌ནོག༌། 46 གལ༌ཏེས༌ ཁྱོ༌ཞའ༌གུན༌ནི༌ མོ༌ཟེས༌སི༌ཀ༌ བདེན༌ཤེས༌ཏེ༌ ཡོད༌པིན༌ན༌, ངའེ༌ཀའང༌ བདེན༌ཤེས༌ཏེ༌ ཡོད༌འགྲོ༌བ༌ བཅིའ༌ཟེར༌ན༌ ཁོང༌ངི༌ ངའེ༌ སྐོར༌ལ༌ བྲིའ༌ བཛད༌ཏེ༌ ཡིན༌པིན༌། 47 ཁྱོ༌ཞའ༌གུན༌ནི༌ མོ༌ཟེས༌སི༌ བྲིའ༌ བཛད༌ཁན༌བོའ༌ ཡིད༌ མ༌ཆེས༌ པ༌སང༌, ངའེ༌ ཟེར༌ཁན༌གུན༌ལ༌ ཀ༌ཟུག༌གི༌ བདེན༌ཤེས༌ཡིན༌།"
གཙོ༌བོ༌ ཡེ༌ཤུའི༌ མི༌ སྟོང༌ལྔ༌ གྲངས༌ཤུག༌ག༌ བཛདས༌།
1 དུས༌བན༌ཤིག༌གི༌ སྟིང༌ནེ༌ ཡེ༌ཤུ༌ གྲུ༌ཟིང༌ངི ནང༌ང༌ ཞོན༌ན༌ བཛད༌ཏེ༌, གཱ༌ལིལ༌ལིའི༌ མཚོའི༌ ཕར༌ཀའ༌ ༼ཀ༌བོའ༌ ཏི༌བེ༌རི༌ཡཱས༌སི༌ མཚོའང༌ ཟེར༌རད༌༽ སྐྱོད༌། 2 མི༌ཚོགས༌ ཆེན༌མོ༌ཞིག༌ ཁོང༌ང༌ བྲངས༌ཏེ༌ ཡོངས༌ བཅིའ༌ཟེར༌ན༌ ཁོང༌གུན༌ནི༌ ཡེ༌ཤུའི༌ ནད༌པ༌གུན༌ ཕན༌ཅུག༌ག༌ བཛད༌ཁན༌ནི༌ བཛད༌པ༌གུན ཐོང༌ཏེ༌ ཡིན༌པིན༌། 3 ཡེ༌ཤུ༌ རིའ༌ ཛགས༌ཏེ༌ སྐྱོདས༌ ཡང༌ རང༌ངི༌ སློབ༌ཕྲུག༌གུན༌ ཉམ༌པོ༌ སའེ༌ཀ༌ ཞུགས༌། 4 ཏ༌ ཡ༌ཧུ༌དཱ༌པའེ༌ པེ༌སག༌གི༌ དུས༌ཆེན༌ ཉེ༌མོ༌ ཡོད༌པིན༌། 5 ཡེ༌ཤུའི༌ དབུ༌ སྟགས༌པ༌ མི༌ཚོགས༌ ཆེན༌མོ༌ཞིག༌ ཁོང༌ ཆོགས༌ལ༌ ཡོང༌ཡིན༌ གཟིགས༌ ཡང༌ ཁོང༌ངི༌ ཕི༌ལིབ༌བ༌, "ང༌དང༌གུན༌ནི༌ འི༌ མི༌ཚང༌མའེ༌ ཕིའ༌ ཟའ༌ཅེས༌སི༌ ཏ༌གི༌ ཀ༌ནེ༌ ཉོས༌ཏེ༌ ཁྱོང༌ཡིན༌" མོལས༌། 6 ཡེ༌ཤུའི༌ ཁོའ༌ ཚོད༌ ལྟ༌ཅེས༌སི༌ ཕིའ༌ ཏེ༌བོ༌ འདྲིའ༌ བཛད༌ཏེ༌ ཡིན༌པིན༌, བཅིའ༌ཟེར༌ན༌ ཁོང༌ངི༌ བཛད༌ཅེས༌བོ༌ ཁོང༌ང༌ ཐུགས༌རྒྱུས༌ ཡོད༌པིན༌། 7 ཕི༌ལིབ༌བི༌ ཁོང༌ང༌, "གལ༌ཏེས༌ ཞག༌མ༌ གཉིབ༌རྒྱའི༌ གླ༌ཆའེ༌ པེ༌ནེ༌བོའ༌ ཏ༌གི༌ ཉོ༌ནའང༌ འི༌ མི༌ཚང༌མ༌ལ༌ ཁམ༌བུ༌ རེ༌རེ༌ ཏ༌གིའང༌ མི༌ལྡང༌" ཞུས༌། 8 ཡེ༌ཤུའི༌ ཡང༌ སློབ༌ཕྲུག༌ གཅིག༌ ཤི༌མོན༌ པི༌ཏྲར༌རི༌ ནོ༌ ཨེན༌ཌ༌རིའུ༌འི༌ ཁོང༌ང༌། 9 "འི༌ཀ༌ ཕྲུ༌གུ༌ ཞིག༌གི༌ ལག༌ག༌ ནས༌སའེ༌ ཏ༌གི༌ ལྔ༌ དང༌ ཉ༌ ཆུང༌ངུན༌ གཉིས༌ འདུག༌, ཡིན༌ནའང༌ ཏེ༌བོའེ༌ འི༌ཟམ༌ ཤིག༌གི༌ མིའ༌ བཅི༌ བཅོ༌ཡིན༌" ཞུས༌། 10 ཡེ༌ཤུའི༌, "མི༌གུན༌ སའེ༌ཀ༌ འདུག༌ཅུག༌" མོལས༌། ཏེ༌རུ༌ སྤང༌ སྔོན༌པོ༌ མང༌པོ༌ ཡོད༌པ༌ མི༌ཚང༌མ༌ སའེ༌ཀ༌ འདུགས༌། ཏེ༌ཕྲོའ༌ བུ༌ཚའ༌ ལྡན༌ཁན༌ གཅིག༌པོ༌ རྩིས༌པ༌ སྟོང༌ ལྔ༌ ཟམ༌ཞིག༌ ཡོད༌པིན༌། 11 ཡེ༌ཤུའི༌ ཏེ༌ དོན༌ཀྱིར༌གུན༌ ཕྱག༌ག༌ ནམས༌ཏེ༌ དཀོན༌མཆོག༌ག༌ ཐུགས༌རྗེ༌ཆེ༌ ཕུལས༌ ཡང༌ འདུགས༌ཏེ༌ ཡོད༌ཁན༌ ཚང༌མ༌ལ༌ རང༌རང༌ངི༌ དགོས༌སྡོམ༌ ནང༌བཞིན༌ བགོས༌ཏེ༌ བཏང༌ང༌ སལས༌, ཏེན༌ན༌དང༌ ཙོགས༌ལ༌ ཉའང༌ སལས༌། 12 མི༌ཚང༌མ༌ ཟོས༌ཏེ༌ ཚིམས༌ས༌དང༌ ཡེ༌ཤུའི༌ རང༌ངི༌ སློབ༌ཕྲུག༌གུན༌ལ༌, "ཙ༌པིག༌ ཞིག༌གའང༌ གོད༌ལ༌ མི༌ཆའ༌ཅེས༌སི༌ ཕིའ༌ ལག༌མ༌གུན༌ འདུས༌ཏེ༌ ཁྱོང༌" མོལས༌། 13 ཏེ༌ནེ༌ ཁོང༌གུན༌ནི༌ ནས༌སའེ༌ ཏ༌གི༌ ལྔའེ༌ ཀ༌ནེ༌ ཟོས༌ཏེ༌ ལྷག༌མ༌ ལུས༌གུན༌ནི༌ ཏ༌གི༌གུན༌ དུས༌པ༌ ཙེ༌པོ༌ བཅུ༌གཉིས༌ གང༌། 14 མི༌གུན༌ནི༌ ཁོང༌ངི༌ ཧ༌ལས༌ཤེས༌སི༌ བཛད༌པ༌བོ༌ ཐོང༌ང༌དང༌, "བདེན༌བ༌ འིན༌ན༌བོ༌ ཏེ༌ ལུང༌སྟོན༌པ༌བོ༌ ཡིན༌ནོག༌, ཀ༌བོ༌ འི༌ འཇིག༌རྟེན༌ནི༌ཀ༌ ཀལ༌ཅེས༌སི༌ ཕིའ༌ དཀོན༌མཆོག༌གི༌ ཁ༌ཆད༌ བཛད༌ཏེ༌ ཡོད༌པིན༌" ཟེརས༌། 15 མི༌གུན༌ནི༌ ཁོང༌ ཟུམས༌ཏེ༌ དབང༌ ཉམ༌པོ༌ ཁོང༌གུན༌ནི༌ རྒྱལ༌པོའ༌ སྐོ༌ཅེས༌སི༌ གྲབས༌ བཅོས༌ཁན༌བོ༌ ཡེ༌ཤུའི༌ ཁྱེན༌པ༌ ཚང༌མ༌ དང༌ བེ༌ཏེ༌ ཁོང༌རང༌ གཅིག༌པོ༌ རིའ༌ ཕེབས༌།
གཙོ༌བོ༌ ཡེ༌ཤུ༌ ཆུའི༌ཀ༌ གྲུལ༌ལ༌ བཛདས༌།
16 མུན༌ཅུ༌ རུབ༌བ༌ དང༌ ཁོང༌ངི༌ སློབ༌ཕྲུག༌གུན༌ ཐུར༌ལ༌ འབབས༌ཏེ༌ མཚོའི༌ ཐ༌མའ༌ སྐྱོདས༌། 17 ཡང༌ གྲུ༌ཟིང༌ང༌ ཞོན༌ཏེ༌, མཚོའི༌ ཕར༌ཀའ༌ ཀ༌ཕར༌ན༌ཧུམ༌མི༌ གྲོང༌ཁྱེར༌ལ༌ ལོགས༌ཏེ༌ སྐྱོདས༌། ཏ༌ མུན༌ཅུ༌ རུབས༌ཏེ༌ ཡོད༌པིན༌ ཡང༌ ཡེ༌ཤུ༌ ཁོང༌གུན༌ ཉམ༌པོ༌ མ༌སྐྱོད༌ད༌ ཡིན༌པིན༌། 18 ཧུན༌མེད༌ལ༌ རྒྱ༌ཚོའི༌ ནང༌ང༌ ལུང༌རག༌ ཀྲག༌པོ༌ ཞིག༌ ཡོངས༌ཏེ༌ ཆུལ༌བག༌ ཀྲག༌པོ༌ ལངས༌། 19 སློབ༌ཕྲུག༌གུན༌ནི༌ གྲུ༌ཟིང༌བོ༌ མཚོའི༌ ཐ༌མ༌ནེ༌ ཀི༌ལོ༌མི༌ཀྲར༌ ལྔ༌ ཡ༌ དྲུག༌ ཟམ༌ཞིག༌ ཐག༌རིང༌ང༌ སླེབས༌ཏེ༌ ཡོད༌ ཟ༌ནེ༌ ཁོང༌གུན༌ནི༌ ཡེ༌ཤུ༌ གྲུ༌ཟིང༌ ཆོགས༌ལ༌ ཆུའི༌ཀ༌ ཞབ༌གྲུལ༌ལ༌ ཕེབས༌ས༌ ཐོང༌ཏེ༌ མ༌ སྲན༌ཏེ༌ འཇིགས༌། 20 ཡིན༌ནའང༌ ཡེ༌ཤུའི༌ ཁོང༌གུན༌ལ༌, "འཇིགས༌ མ༌འཇིགས༌ ང༌ ཡིན༌" མོལས༌། 21 ཏེ༌ནེ༌ ཁོང༌གུན༌ནི༌ ཡེ༌ཤུ༌ ཏེ༌ གྲུ༌ཟིང༌ངི༌ ནང༌ང༌ སྐྱོད༌ཅུགས༌། ཏེ༌ནེ༌ ཁོང༌གུན༌ནི༌ གྲུ༌ཟིང༌བོ༌ ཏེན༌ན༌མལ༌ལ༌ འ༌ངོ༌ལྡོའི༌ ཕར༌ཀ༌ སླེབ༌ ཀ༌རུ༌ ཁོང༌ སྐྱོད༌ཅེས༌ ཡིན༌པིན༌། 22 སྟིང༌མ༌ ཞག༌པོ༌ མཚོའི༌ ཕར༌ཀ༌ འདུགས༌ཏེ༌ ཡོད༌ཁན༌ནི༌ མི༌ཚོགས༌པོའ༌ ཏེ༌རུ༌ གྲུ༌ཟིང༌ གཅིག༌གཅིག༌ མ༌ནེ༌ མེད༌ཁན༌ ཡང༌ ཡེ༌ཤུ༌ རང༌ངི༌ སློབ༌ཕྲུག༌གུན༌ ཉམ༌པོ༌ ཏེ༌ གྲུ༌ཟིང༌ངི༌ ནང༌ང མ༌སྐྱོད༌ཁན༌བོ༌ རྒྱུས༌ སོང༌། 23 ཏེ༌ནེ༌ ཏི༌བེ༌རི༌ཡཱས༌སི༌ གྲོང༌ཁྱེར༌ནེ༌ གཞན༌ གྲུ༌ཟིང༌ རིག༌ སླེབས༌ཏེ༌ ཏེ༌ མཚོའི༌ ཐ༌མའ༌ འདུགས༌, ཀ༌རུ༌ གཙོ༌བོའེ༌ དོན༌ཀྱིར༌རི༌ ཕིའ༌ ཐུགས༌རྗེ༌ཆེ༌ ཕུལ༌ཏེ༌ ཡང༌ མི༌ཚོགས༌གུན༌ནི༌ ཟོས༌ཏེ༌ ཡིན༌པིན༌། 24 མི༌ཚོགས༌གུན༌ནི༌ ཡེ༌ཤུ༌ ཡ༌ ཁོང༌ངི༌ སློབ༌ཕྲུག༌གུན༌ ཏེ༌ཀ༌ མེད༌ཁན༌བོ༌ ཧ༌གོའ༌ཅིག༌, ཏེ༌ མི༌ཚོགས༌པོ༌ གྲུ༌ཟིང༌གུན༌ནི༌ ནང༌ང༌ ཞོན༌ཏེ༌, ཀ༌ཕར༌ན༌ཧུམ༌མི༌ གྲོང༌ཁྱེར༌ལ༌ ཡེ༌ཤུ༌ ཙལ༌ལ༌ སོང༌།
སྐྱབ༌མགོན༌ ཡེ༌ཤུ༌ ནི༌ མི༌ཚེའེ༌ དོན༌ཀྱིར༌།
25 ཏེ༌ནེ༌ མཚོའི༌ ཕར༌ཀ༌ ཀ༌ཕར༌ན༌ཧུམ༌མི༌ གྲོང༌ཁྱེར༌རི༌ ནང༌ང༌ ཁོང༌གུན༌ལ༌ ཡེ༌ཤུ༌ མཇལ༌ལ༌ དང༌, "སློབ༌དཔོན༌ལེ༌, ཉེ༌རང༌ འི༌ཀ༌ ནམ༌ ཕེབས༌པིན༌" ཞུས༌། 26 ཡེ༌ཤུའི༌ ཏེ༌ མི༌གུན༌ལ༌ ལན༌ལ༌ མོལས༌, "ངའེ༌ ཁྱོ༌ཞའ༌ བདེན༌བ༌ ཟེར༌རད༌, ཁྱོ༌ཞའ༌གུན༌ནི༌ ང༌ ངའེ༌ ཧ༌ལས༌ཤེས༌སི༌ བཛད༌པ༌གུན༌ ཐོང༌ཅེས༌བོའེ༌ ཙལ༌ཏེ༌ མན༌ ཡིན༌ནའང༌ ཏ༌གི༌ ཟོས༌ཏེ༌ ཚིམས༌ པ༌སང༌ ཙལ༌ཏེ༌ ཡིན༌། 27 རུལ༌ཅེས༌ཅན༌ནི༌ ཟའ༌ཅེས༌གུན༌ མན༌པ༌, མཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཟའ༌ཅེས༌གུན༌ ཙལ༌ཅེས༌ལ༌ བརྩོན༌འགྲུས༌ བཅོ༌ཤིག༌, ཡང༌ ཏེ༌བོ༌ མི༌རིགས༌སི༌བུའི༌ ཁྱོ༌ཞའ༌གུན༌ལ༌ བཏང༌ཡིན༌ བཅིའ༌ཟེར༌ན༌ ཁོའ༌ ཡབ༌ དཀོན༌མཆོག༌གི༌ ཏེ༌ དབང༌ཆ༌བོ༌ སལ༌ལ༌ བཛད༌ཏེ༌ ཡིན༌།" 28 ཏེ༌ མི༌གུན༌ནི༌ ཡེ༌ཤུའ༌, "དཀོན༌མཆོག༌གི༌ ཕྱག༌ལས༌ ང༌ཞའེ༌ བཅི༌རིག༌ བཅོ༌དགོས༌" ཞུས༌། 29 ཡེ༌ཤུའི༌ ཏེ༌གུན༌ལ༌ མོལས༌, "དཀོན༌མཆོག༌གི༌ ཕྱག༌ལས༌བོ༌ ནི༌ འི༌བོ༌ ཡིན༌། ཁོང༌ངི༌ ཀལ༌ལ༌ བཛད༌ཁན༌བོའེ༌ཀ༌ དད༌པ༌ བཅོས༌ཤིག༌། 30 ཏེ༌ནེ༌ ཏེ༌གུན༌ནི༌ ཡེ༌ཤུའ༌ ཞུས༌, "ང༌ཞའེ༌ ཉེ༌རང༌ངི༌ཀ༌ དད༌པ༌ ཁྱོང༌ཅེས༌སི༌ ཕིའ༌ ཉེ༌རང༌ངི༌ ང༌ཞའ༌ བཅི༌ ཧ༌ལས༌ཤེས༌སི༌ བཛད༌པ༌ རིག༌ སྟན༌ན༌ བཛད༌ཡིན༌། 31 སྤེར༌ན༌ ང༌ཞའེ༌ ཕ༌མེས༌པོ༌གུན༌ནི༌ རི༌སྟོང༌ངི༌ ནང༌ང༌ ཟའ༌ཅེས༌ མན༌ན༌ ཟེར༌ཁན༌བོ ཟོས༌ ཀ༌ཟུག༌ བྲིའ༌ བཛད༌ཁན༌ ནང༌བཞིན༌ དཀོན༌མཆོག༌གི༌ ཁོང༌གུན༌ལ༌ ནམ༌མཁའ༌ནེ༌ ཟའ༌ཅེས༌ལ༌ ཏ༌གི༌ སལས༌།" 32 ཡེ༌ཤུའི༌ ཏེ༌གུན༌ལ༌ མོལས༌, "ངའེ༌ ཁྱོ༌ཞའ༌ བདེན༌བ༌ ཟེར༌རད༌, ཏེ༌ ཏ༌གི༌གུན༌ ནམ༌མཁའ༌ནེ༌ ཁྱོ༌ཞའེ༌ ཕ༌མེས༌པོ༌གུན༌ལ༌ ལུང༌སྟོན༌པ༌ མོ༌ཟེས༌སི༌ སལ༌ཏེ༌ མན༌པིན༌, ཡིན༌ནའང༌ ངའེ༌ ཡབ༌བི༌, ཁོང༌ངི༌ ནམ༌མཁའ༌ནེ༌ བདེན༌བའེ༌ ཏ༌གི༌བོ༌ སལ༌ལ༌ བཛད༌ད༌ནོག༌། 33 དཀོན༌མཆོག༌གི༌ བདེན༌བའེ༌ ཏ༌གི༌ ནི༌ ནམ༌མཁའ༌ནེ༌ ཡོངས༌ཏེ༌ འཇིག༌རྟེན༌ནི༌ མི༌གུན༌ལ༌ མི༌ཚེ༌ སོ༌མ༌ ཞིག༌ སལ༌ཁན༌བོ༌ ཡིན༌།" 34 ཏེ༌ནེ༌ ཏེ༌གུན༌ནི༌, "གཙོ༌བོ༌, ཏ༌ནེ༌ཕར༌ལ༌ འི༌ ཏ༌གི༌བོ༌ ང༌ཞའ༌གུན༌ལ༌ སལ༌ལ༌ བཛད༌" ཞུས༌། 35 ཡེ༌ཤུའི༌ ཁོང༌གུན༌ལ༌ མོལས༌, "མི༌ཚེ༌ ཏ༌གི༌ ནི༌ ང༌ ཡིན༌། སུ༌ཞིག༌ ངའེ༌ཀ༌ ཡོང༌ན༌, མ༌ནེ༌ མི༌སྟོགས༌ ཡང༌ སུ༌ཞིག༌གི༌ ངའེ༌ཀ༌ དད༌པ༌ བཅོ༌ན༌ མ༌ནེ༌ མི༌སྐོམས༌། 36 ཡིན༌ནའང༌ ངའེ༌ ཁྱོ༌ཞའ༌གུན༌ལ༌ ཟེར༌ཁན༌ ཙོགས༌ལ༌ ཁྱོ༌ཞའ༌གུན༌ནི༌ ངའེ༌ ལས༌གུན༌ ཐོང༌ཏེའང༌ དད༌པ༌ མ༌བཅོས༌། 37 ཡབ༌བི༌ ང༌ སལ༌ལ༌ བཛད༌ཁན༌ནི༌ མི༌གུན༌ ང༌ ཡོད༌ས༌ ཡོང༌ཡིན༌, ཡང༌ ངའེ༌ཀ༌ ཡོང༌ཁན༌ནི༌ མི༌གུན༌ ངའེ༌ མ༌ནེ༌ མི༌ཕང༌། 38 ང༌རང༌ངི༌ སམ༌བ༌གུན༌ མན༌པ༌ ང༌ ཀལ༌ལ༌ བཛད༌ཁན༌ནི༌ ཡབ༌ དཀོན༌མཆོག༌གི༌ ཐུགས༌གོངས༌གུན༌ འགྲུབ༌ཅུག༌ཅེས༌སི༌ ཕིའ༌ ང༌ ནམ༌མཁའ༌ནེ༌ འབབས༌ཏེ༌ ཡོངས༌པིན༌། 39 ང༌ ཀལ༌ལ༌ བཛད༌ཁན༌ནི༌ ཡབ༌བི༌ ཐུགས༌གོངས༌ ནི༌, ངའེ༌ དཀོན༌མཆོག༌གི༌ ངའ༌ སལ༌ལ༌ བཛད༌ཁན༌ནི༌ མི༌གུན༌ནི༌ ནང༌ནེ༌ གཅིག༌གའང༌ སྟོར༌ མ༌ཅུག༌ག༌ མཐའ༌མའེ༌ ཞག༌ག༌ ཏེ༌ མི༌གུན༌ གསོན༌ཏེའ༌ ལང༌ཅུག༌ཅེས༌བོ༌ ཡིན༌། 40 འོ༌ན༌ ངའེ༌ ཡབ༌བི༌ ཐུགས༌ཐད༌ ནི༌, སུ༌ཞིག༌གི༌ ང༌ སྲས༌ ཐོང༌ཏེ༌ དད༌པ༌ བཅོ༌ན༌ ཏེ༌གུན༌ལ༌ མཐའ༌མེད༌པའེ༌ མི༌ཚེ༌ ཐོབ༌ཅེས༌ ཡང༌ ངའེ༌ ཏེ༌གུན༌ལ༌ མཐའ༌མའེ༌ ཞག༌ག༌ གསོན༌ཏེའ༌ ལང༌ཅེས༌བོ༌ ཡིན༌།" 41 "ང༌ ནི༌ ནམ༌མཁའ༌ནེ༌ འབབ༌ཁན༌ནི༌ ཏེན༌ན༌ ཏ༌གི༌བོ༌ ཡིན༌།" ཏེ༌བོ༌ མོལ༌ཅེས༌པོའེ༌ ཡ༌ཧུ༌དཱ༌པའེ༌ སྤོན༌བོ༌གུན༌ནི༌ ཁོང༌ང༌ བུག༌ཅེས༌ གོ༌ཟུགས༌། 42 ཏེ༌གུན༌ནི༌ ཟེརས༌, "ཁོ༌ བཅི༌ ཡོ༌སེབ༌བི༌ བུ༌ཚ༌ ཡེ༌ཤུ༌ མན༌ནོག༌ག༌, ཀ༌བོའེ༌ ཕ༌མ༌གུན༌ ང༌དང༌གུན༌ནི༌ ཤེས༌སད༌?། ཏ༌ ཁོའེ༌ ང༌ ནམ༌མཁའ༌ནེ༌ འབབས༌ཏེ༌ ཡིན༌ ཟེར༌ཏེ༌ ཀ༌ཟུག༌ག༌ ཟེར༌ར༌ནོག༌།" 43 ཡེ༌ཤུའི༌ ཁོང༌གུན༌ལ༌, "ངའེ༌ ཟེར༌ཁན༌གུན༌ནི༌ སྐོར༌ལ༌ ཁྱོ༌ཞའ༌གུན༌ནི༌ བར༌ཅེས༌གུན༌ ཕོང༌ཤིག༌། 44 སུ༌ཞིག༌གའང༌ ངའེ༌ སློབ༌ཕྲུག༌ རྒྱུར༌ མི༌ཉན༌ ནམ༌ཚུག༌པ༌ ང༌ ཀལ༌ཁན༌ནི༌ ཡབ༌བི༌ ཏེ༌ མི༌བོ༌ དད༌པའེ༌ ནང༌ང༌ ཁྱོང༌ང༌ མི༌བཛད༌, ཡང༌ ངའེ༌ ཁོ༌ མཐའ༌མའེ༌ ཞག༌ག༌ གསོན༌ཏེའ༌ ལང༌ཡིན༌། 45 དམ༌པའེ༌ གསུང༌རབས༌སི༌ ནང༌ང༌ བྲིའ༌ བཛད༌ཏེ༌ འདུག༌, 'དཀོན༌མཆོག༌གི༌ མི༌ཚང༌མ༌ལ༌ སླབ༌བྱ༌ སལ༌ཡིན༌།' ཡབ༌བི༌ བཀའ༌ ཉན༌ཏེ༌ ཁོང༌ངི༌ ཀ༌ནེ༌ སློབ༌ཁན༌གུན༌ནི༌ ངའེ༌ཀ༌ དད༌པ༌ ཁྱོང༌ཡིན༌། 46 དཀོན༌མཆོག༌གི༌ ཆོགས༌ནེ༌ ཡོང༌ཁན༌བོའེ༌ མན༌པ༌ སུ༌ཞིག༌གིའང༌ ཡབ༌ མ༌མཇལ༌, ཁོ༌ གཅིག༌པོའེ༌ ཡབ༌ མཇལ༌ཏེ༌ ཡིན༌། 47 ངའེ༌ ཁྱོ༌ཞའ༌ བདེན༌བ༌ ཟེར༌རད༌, ངའེ༌ཀ༌ དད༌པ༌ ཁྱོང༌ཁན༌གུན༌ལ༌ མཐའ༌མེད༌པའེ༌ མི༌ཚེ༌བོ༌ ཐོབ༌ཏེ༌ ཡིན༌། 48 ང༌ ནི༌ མཐའ༌མེད༌པའེ༌ མི༌ཚེ༌ ཏ༌གི༌བོ༌ ཡིན༌། 49 ཁྱོ༌ཞའེ༌ ཕ༌མེས༌པོ༌གུན༌ནི༌ རི༌སྟོང༌ངི༌ ནང༌ང༌ མན༌ན༌ ཟེར༌ཁན༌ནི༌ ཏ༌གི༌བོ༌ ཟོས༌ ཡིན༌ནའང༌ ཤི༌། 50 ཏ༌ སུ༌ཞིག༌གི༌ ནམ༌མཁའ༌ནེ༌ འབབས༌ཏེ༌ ཡིན༌ཁན༌ནི༌ མི༌ཚེའེ༌ ཏ༌གི༌བོ༌ ཟའ༌ན༌ མ༌ནེ༌ མི༌ཤི༌། 51 འོ༌ན༌ ང༌ ནམ༌མཁའ༌ནེ༌ འབབས༌ཁན༌ནི༌ ཏེ༌ མི༌ཚེའེ༌ ཏ༌གི༌བོ༌ ཡིན༌། གལ༌ཏེས༌ སུ༌ཞིག༌གི༌ འི༌ ཏ༌གི༌བོ༌ནེ༌ ཟའ༌ན༌, ཏེ༌ མི༌བོ༌ མཐའ༌མེད༌པ༌ གསོན༌ཏེའ༌ ལུས༌ཡིན༌། འི༌ ཏ༌གི༌བོ༌ ངའེ༌ ཤ༌བོ༌ ཡིན༌, ཀ༌བོ༌ ངའེ༌ འཇིག༌རྟེན༌པ༌གུན༌ལ༌ མཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཕིའ༌ ཆོད༌པའེ༌ ཚུལ༌ལ༌ བཏང༌ཡིན༌། 52 ཡ༌ཧུ༌དཱ༌པ༌གུན༌ནི༌ ནང༌ང༌ ཛིང༌མོ༌ གོ༌ཟུག༌ ཡང༌ ཁོང༌གུན༌ནི༌ ཟེརས༌, "འི༌ མི༌བོའེ༌ ཀ༌ཟུག༌གི༌ ང༌དང༌གུན༌ལ༌ ཁོའེ༌ ཤ༌ ཟའ༌ བཏང༌ང༌ནོག༌?།" 53 ཡེ༌ཤུའི༌ ཁོང༌གུན༌ལ༌ མོལས༌, "ངའེ༌ ཁྱོ༌ཞའ༌ བདེན༌བ༌ ཟེར༌རད༌, ནམ༌ཚག༌པ༌ ཁྱོ༌ཞའ༌གུན༌ནི༌ མི༌རིགས༌སི༌བུའི༌ ཤ༌བོ༌ མི༌ཟའ༌, ཡང༌ ཁོའེ༌ ཁྲག༌བོ༌ མི༌ཐུང༌ ཁྱོ༌ཞའ༌གུན༌ནི༌ ནང༌ང༌ བདེན༌བའེ༌ མི༌ཚེ༌ མེད༌། 54 སུ༌ཞིག༌གི༌ ངའེ༌ ཤ༌བོ༌ ཟའད༌ ཡང༌ ངའེ༌ ཁྲག༌བོ༌ ཐུང༌ངད༌ ཏེ༌ མི༌གུན༌ལ༌ མཐའ༌མེད༌པའེ༌ མི༌ཚེ༌ ཡོད༌། མཐའ༌མའེ༌ ཞག༌ག༌ ངའེ༌ ཁོང༌གུན༌ གསོན༌ཏེའ༌ ལང༌ཡིན༌, 55 བཅིའ༌ཟེར༌ན༌ ངའེ༌ ཤ༌ དང༌ ཁྲག༌པོ༌ བདེན༌བའེ༌ ཟའ༌ཅེས༌ དང༌ ཐུང༌ཅེས༌ གུན༌ ཡིན༌། 56 ཡང༌ སུ༌ཞིག༌གི༌ ངའེ༌ ཤ༌བོ༌ ཟའད༌ ཡང༌ ངའེ༌ ཁྲག༌བོ༌ ཐུང༌ངད༌, ཏེ༌ མི༌གུན༌ ངའེ༌ ནང༌ང༌ ཡང༌ ང༌ ཁོང༌གུན༌ནི༌ ནང༌ང༌ ནས༌ཏེ༌ ཡོད༌། 57 ང༌ ཀལ༌ལ༌ བཛད༌ཁན༌ནི༌ གསོན༌ཏེ༌ ཡབ༌བི༌ ཞས༌ཏེ༌ ང༌ གསོན༌ཏེའ༌ ལུས༌སད༌, ཏེན༌ན༌དང༌ ཙོག༌ལ༌ སུ༌ཞིག༌གི༌ ང༌ནེ༌ ཟའ༌ན༌ ངའེ༌ ཞས༌ཏེ༌ ཏེ༌ མི༌བོ༌ གསོན༌ཏེའ༌ ལུས༌ཡིན༌། 58 ང༌ ནམ༌མཁའ༌ནེ༌ འབབས༌ཁན༌ནི༌ བདེན༌བའེ༌ ཏ༌གི༌བོ༌ ཡིན༌། ཁྱོ༌ཞའེ༌ ཕ༌མེས༌པོ༌གུན༌ནི༌ མན༌ན༌ ཟེར༌ཁན༌ནི༌ ཏ༌གི༌བོ༌ ཟོས༌ཏེའང༌ ཁོང༌གུན༌ ཤི༌, ཡིན༌ནའང༌ འི༌ ཏ༌གི༌ ཟའ༌ཁན༌གུན༌ མཐའ༌མེད༌པ༌ གསོན༌ཏེའ༌ ལུས༌ཡིན༌།" 59 ཡེ༌ཤུའི༌ ཀ༌ཕར༌ན༌ཧུམ༌མི༌ གྲོང༌ཁྱེར༌རི༌ འདུ༌ཁང༌ངི༌ ནང༌ང༌ སླབ༌བྱའ༌ སལ༌ ཟ༌ནེ༌ ཁོང༌ངི༌ ཏེ༌གུན༌ མོལས༌།
སློབ༌ཕྲུག༌ མང༌པོའེ༌ སྐྱབ༌མགོན༌ ཡེ༌ཤུ༌ སྤངས༌།
60 ཡེ༌ཤུའི༌ ཞལ༌ཏ༌གུན༌ ཚོར༌ཏེ༌ ཁོང༌ངི༌ སློབ༌ཕྲུག༌ མང༌པོའེ༌, "ཁོང༌ངི༌ སླབ༌བྱའ༌གུན༌ མ༌ སྐྱོང༌པོ༌ འདུག༌ སུའི༌ འི༌བོའ༌ ཉན༌ཏེ༌ གྲུལ༌ཐུབ༌ཡིན༌" ཟེརས༌། 61 སློབ༌ཕྲུག༌གུན༌ནི༌ ནང༌ང༌ འི༌ སྤེ༌ར༌བོའེ༌ཀ༌ ཟེར༌ཟེར༌ ཆ༌ཁན༌གུན༌ ཡེ༌ཤུའི༌ ཁྱེན༌ན༌ བཛད༌ པ༌སང༌, ཁོང༌ངི༌ སློབ༌ཕྲུག༌གུན༌ལ༌ མོལས༌, "ངའེ༌ སྤེ༌ར༌ ཟེར༌ཁན༌གུན༌ལ༌ ཁྱོ༌ཞའ༌ མ༌ཐད༌ད༌?། 62 གལ༌ཏེས༌ ཁྱོ༌ཞའ༌གུན༌ནི༌ མི༌རིགས༌སི༌བུ༌ ནམ༌མཁའ༌ སྟག༌ག༌ལ༌ ཐོང༌ན༌ ཀ༌རུ༌ ཁོ༌ སྔོན༌ལ༌ ཡོད༌པིན༌, ཏེ༌ནེ༌ ཁྱོ༌ཞའེ༌ སེམས༌ རྒྱུར༌ཡིན༌ན༌?། 63 དཀོན༌མཆོག༌གི༌ ཐུགས༌ཉིད༌དི༌ མཐའ༌མེད༌པའེ༌ མི༌ཚེ༌ སལ༌ལ༌ནོག༌། མི༌ བརྩོན༌འགྲུས༌ བཅོས༌ཏེ༌ ཕན༌ཐོགས༌ ཐོབ༌ཅེས༌ མེད༌ཀྱག༌། ངའེ༌ ཁྱོ༌ཞའ༌གུན༌ལ༌ ཟེར༌ཁན༌ནི༌ སྤེ༌ར༌གུན༌ དཀོན༌མཆོག༌གི༌ ཐུགས༌ཉིད༌ནེ༌ ཡིན༌ ཡང༌ མཐའ༌མེད༌པའེ༌ མི༌ཚེ༌ བཏང༌ང༌ནོག༌། 64 ཏེ༌ནེའང༌ ཁྱོ༌ཞའ༌གུན༌ནི༌ ཕྲོ༌ནེ༌ ཁ༌ཅིག༌གི༌ ངའེ༌ཀ༌ དད༌པ༌ མ༌ཁྱོངས༌།" ༼ཡེ༌ཤུའ༌ སྔོན༌ལ༌ སུའི༌ ཁོང༌ངི༌ཀ༌ དད༌པ༌ མི༌ཁྱོང༌ ཡང༌ སུའི༌ ཁོང༌ང༌ ངོ༌ལོག༌ བཅོ༌ཅེས༌བོ༌ ཐུགས༌རྒྱུས༌ ཡོད༌པིན༌།༽ 65 ཏེ༌ནེ༌ ཡེ༌ཤུའི༌ མོལས༌, "ཏེན༌ན༌བོའེ༌ ཕིའ༌ ངའེ༌ ཁྱོ༌ཞའ༌གུན༌ལ༌ འི༌བོ༌ ཟེར༌ཏེ༌ ཡིན༌པིན༌། སུ༌ཞིག༌གིའང༌ ངའེ༌ཀ༌ དད༌པ༌ ཁྱོང༌ མི༌ཉན༌ ནམ༌ཚུག༌པ༌ ངའེ༌ ཡབ༌བི༌ ཏེ༌ མི༌བོ༌ ང༌ མི༌སལ༌། 66 ཏེ༌བོ༌ ཚོར༌ར༌དང༌ ཁོང༌ངི༌ སློབ༌ཕྲུག༌ མང༌པོའེ༌ ཁོང༌ ཕངས༌ཏེ༌ ཁོང༌ངི༌ སྟིང༌རང༌ནེ༌ མ༌བྲངས༌། 67 ཏེ༌ནེ༌ ཡེ༌ཤུའི༌ ཏེ༌ སློབ༌ཕྲུག༌ བཅུ༌གཉིས༌པོའ༌, "ཁྱོ༌ཞའ༌གུན༌ནའང༌ ང༌ ཕངས༌ཏེ༌ ཆའ༌ ཐད༌ད༌རག༌ག༌?" མོལས༌། 68 ཤི༌མོན༌ པི༌ཏྲར༌རི༌, "གཙོ༌བོ༌ལེ༌, ང༌ཞའ༌ སུའི༌ཀ༌ ཆའ༌, མཐའ༌མེད༌པའེ༌ མི༌ཚེ༌ ཞལ༌ཏ༌བོ༌ ཉེ༌རང༌ གཅིག༌པོའེ༌ཀ༌ འདུག༌། 69 ང༌ཞའེ༌ ཉེ༌རང༌ངི༌ཀ༌ དད༌པ༌ བཅོའད༌ ཡང༌ ཉེ༌རང༌ ནི༌ དཀོན༌མཆོག༌གི༌ ཆོགས༌ནེ༌ སྐྱོད༌ཁན༌ནི༌ དམ༌པའེ༌ སྲས༌ ཡིན༌ཁན༌བོ༌ ང༌ཞའ༌ རྒྱུས༌ཡོད༌" ཟེརས༌། 70 ཡེ༌ཤུའི༌ ལན༌ལ༌, "ཁྱོ༌ཞའ༌ བཅུ༌གཉིས༌པོ༌ ངའེ༌ ང༌རང༌ངི༌ སློབ༌ཕྲུག༌ག༌ མ༌འདམས༌ས༌?། ཡིན༌ནའང༌ ཁྱོ༌ཞའེ༌ ཕྲོ༌ནེ༌ གཅིག༌གཅིག༌གི༌ཀ༌ རྡུད༌གུན༌ནི༌ མགོ༌བའེ༌ དབང༌ བཅོ༌འདུག༌" མོལས༌། 71 ༼ཁོང༌ངི༌ ཤི༌མོན༌ ཀར༌ཡོད༌པའེ༌ བུ༌ཚ༌ ཡུ༌དཱའེ༌ སྐོར༌ལ༌ མོལ༌ཏེ༌ ཡིན༌པིན༌, ཀ༌བོ༌ ཏེ༌ བཅུ༌གཉིས༌སི༌ ཕྲོའ༌ ཡོད༌པིན༌ ཞིག༌གའང༌ སྟིང༌ནེ༌ ཁོའེ༌ ཡེ༌ཤུའ༌ ངོ༌ལོག༌ བཅོས༌།༽
ཡེ༌ཤུའེ༌ ནོ༌གུན༌ནི༌ ཁོང༌ངི༌ཀ༌ དད༌པ༌ མ༌བཅོས༌།
1 ཏེ༌ སྟིང༌ནེ༌ ཡེ༌ཤུ༌ གཱ༌ལིལ༌ལིའི༌ ཡུལ༌ མང༌པོའེ༌ ནང༌ང༌ སྐྱོདས༌། ཁོང༌ ཡ༌ཧུ༌དཱའེ༌ ཡུལ༌ནེ༌ ཐག༌རིང༌ང༌ ཞུགས༌ཉིན༌ ཡོད༌པིན༌, བཅིའ༌ཞུ༌ན༌ ཏེ༌རུ༌ ཡ༌ཧུ༌དཱ༌པའེ༌ དའུ༌སྐྱོང༌གུན༌ནི༌ ཁོང༌ བསད༌ཅེས༌སི༌ ཐབས༌ ཙལ༌ལད༌པིན༌། 2 ཡ༌ཧུ༌དཱ༌པ༌གུན༌ནི༌ ཀུར༌རི༌ ནང༌ང༌ འདུག༌ཅེས༌སི༌ དུས༌ཆེན༌ ཉེ༌མོ༌ ཡོད༌པིན༌། 3 ཡེ༌ཤུའི༌ ནོ༌གུན༌ནི༌ ཡེ༌ཤུའ༌, "འི༌ནེ༌ བིང༌ཏེ༌ ཡ༌ཧུ༌དཱའེ༌ ཡུལ༌ལི༌ ནང༌ངའང༌ སྐྱོད༌ ཀ༌རུ༌ གཞན༌ཡང༌ སློབ༌ཕྲུག༌གུན༌ནིའང༌ ཉེ༌རང༌ངི༌ བཛད༌ཁན༌ནི༌ ཧ༌ལས༌ཤེས༌སི༌ བཛད༌པ༌གུན༌ ཐོང༌ ཉན༌ཡིན༌། 4 མིང༌ཅན༌ རྒྱུར༌ཅེས༌སི༌ འདོད༌པ༌ ཡོད༌ཁན༌གུན༌ནི༌ ཡིབས༌ཏེ༌ ལས༌ བཅོའ༌ མན༌ནོག༌། ཉེ༌རང༌ངི༌ འི༌ཟུག༌ བཛད༌པ༌གུན༌ བཛད༌ཡིན༌ ཞིག༌དང༌ འཇིག༌རྟེན༌ གང༌པོའ༌ བཅིའ༌ མངོན༌ཅུག༌ག༌ བཛད༌ད༌ མེད༌" ཞུས༌། 5 ཁོང༌གུན༌ནི༌ ཁོང༌ང༌ ཚིགས༌ བཏངས༌ཏེ༌ ཡིན༌པིན༌, བཅིའ༌ཟེར༌ན༌ ཁོང༌ངི༌ ནོ༌གུན༌ནིའང༌ ཁོང༌ངི༌ཀ༌ དད༌པ༌ མ༌ཁྱོང༌ང༌ ཡིན༌པིན༌། 6 ཡེ༌ཤུའི༌ ཁོང༌གུན༌ལ༌, "ཁྱོ༌ཞའ༌གུན༌ ཡེ༌རུ༌ཤ༌ལེམ༌མི༌ ནང༌ང༌ ནམ༌ ཆ༌ནའང༌ གྲིག༌ག༌ནོག༌། ཡིན༌ནའང༌ ངའེ༌ དུས༌ཚོད༌ ཏ༌རུང༌ མ༌སླེབ༌བ༌ ཡིན༌། 7 ཁྱོ༌ཞའ༌གུན༌ལ༌ འཇིག༌རྟེན༌ནི༌ དད༌པ༌ མེད༌ཁན༌ནི༌ མི༌གུན༌ནི༌ ནཕ༌རད༌ མི༌བཅོ༌, ཡིན༌ནའང༌ ངའ༌ ནཕ༌རད༌ བཅོའ༌ནོག༌ བཅིའ༌ཟེར༌ན༌ ངའེ༌ ཁོང༌གུན༌ནི༌ ལས༌ ངན༌པ༌གུན༌ནི༌ སྐོར༌ལ༌ སྤང༌པོ༌ བཏང༌ངད༌། 8 ཁྱོ༌ཞའ༌གུན༌ དུས༌ཆེན༌ལ༌ སོང༌ཤིག༌, ང༌ མི༌ཆ༌ བཅིའ༌ཟེར༌ན༌ ངའེ༌ དུས༌ ཏ༌རུང༌ མ༌སླེབ༌བ༌ཡིན༌།" 9 ཏེ༌བོ༌ མོལ༌ཏེ༌ ཡེ༌ཤུ༌ གཱ༌ལིལ༌ལིའི༌ ཡུལ༌ལ༌ ཞུགས༌ས༌ བཛདས༌། 10 ཡིན༌ནའང༌ ཁོང༌ངི༌ ནོ༌གུན༌ དུས༌ཆེན༌ལ༌ སོང༌ཏེ༌ སྟིང༌ནེ༌, ཤེས༌ མ༌ཤུག༌ག༌ ཡིབས༌ཏེ༌ ཁོང༌ངའང༌ དུས༌ཆེན༌ལ༌ སྐྱོདས༌། 11 ཏེ༌རུ༌ ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ དུས༌ཆེན༌ནི༌ དུས༌ལ༌, "ཁོ༌ ཀ༌ནེ༌ འདུག༌" ཟེར༌ཡིན༌ ཙལ༌ལད༌པིན༌། 12 ཏེ༌རུ༌ མི༌ཚོགས༌སི༌ ནང༌ང༌ ཁོང༌ངི༌ སྐོར༌ལ༌ འཕྲོས༌པ༌ ལངས༌ཏེ༌ ཁ༌ཅིག༌གི༌, "ཁོང༌ བཟང༌པོ༌ ཡིན༌ནོག༌" ཡང༌ ཁ༌ཅིག༌གི༌, "ཁོའེ༌ མི༌གུན༌ལ༌ མགོབ༌སྐོར༌ཏེ༌ ཡིན༌ནོག༌" ཟེརས༌། 13 ཡ༌ཧུ༌དཱ༌པ༌ དའུ༌སྐྱོང༌གུན༌ལ༌ འཇིགས༌ པ༌སང༌, མི༌གུན༌ ཚང༌མའེ༌ དུན༌ལ༌ ཁོང༌ངི༌ སྐོར༌ལ༌ ཅའང༌ ཟེར༌ར༌ མེད༌པིན༌།
ཡེ༌ཤུའི༌ མཆོད༌ཁང༌ངི༌ ནང༌ང༌ སླབ༌བྱ༌ སལས༌།
14 ཏེ༌ནེ༌ དུས༌ཆེན༌ནི༌ དུས༌ ཕེད༌པོ༌ བུད༌ད༌དང༌, ཡེ༌ཤུ༌ ཡ༌ཧུ༌དཱ༌པའེ༌ མཆོད༌ཁང༌ང༌ སྐྱོད༌ཏེ༌ སླབ༌བྱ༌ སལ༌ཅེས༌ གོ༌ཟུག༌ བཛདས༌། 15 ཡ༌ཧུ༌དཱ༌པའེ༌ དའུ༌སྐྱོང༌གུན༌ ཧ༌ལས༌ཏེ༌, "འི༌ མི༌བོ༌ མ༌ནེ༌ མ༌སིལ༌ལ༌ འི༌ཟམ༌ ཡོན༌ཏན༌ཅན༌ཞིག༌ ཀ༌ཟུག༌ག༌ རྒྱུར༌ཏེ༌ ཡིན༌ནོག༌" ཟེརས༌། 16 ཡེ༌ཤུའི༌ ལན༌ལ༌, "ངའེ༌ སླབ༌བྱ༌གུན༌ ང༌རང༌ངི༌ མན༌, ང༌ ཀལ༌ལ༌ བཛད༌ཁན༌ནི༌ དཀོན༌མཆོག༌གི༌ ཆོགས༌ནེ༌ ཡིན༌། 17 གལ༌ཏེས༌ མི༌ཞིག༌ དཀོན༌མཆོག༌གི༌ ཐུགས༌གོངས༌ ནང༌བཞིན༌ གྲུལ༌ལ༌ ཐད༌ཁན༌གུན༌ལ༌ ཧ༌གོའ༌ནོག༌, འི༌ སླབ༌བྱ༌གུན༌ དཀོན༌མཆོག༌གི༌ ཆོགས༌ནེ༌ ཡིན༌ནོག༌ག༌ ཡ༌ ངའེ༌ ཆོགས༌ནེ༌། 18 སུ༌ཞིག༌གི༌ རང༌ངི༌ དབང༌ངི༌ ནང༌ང༌ ཟེར༌རད༌ན༌ ཁོའེ༌ རང༌སྟོད༌ ཙལ༌ཏེ༌ ཡིན༌ནོག༌། ཡིན༌ནའང༌ སུ༌ཞིག༌གི༌ རང༌ ཀལ༌ལ༌ བཛད༌ཁན༌བོའ༌ རྩི༌བ༌ བཅོའད༌ན༌ ཏེ༌ མི༌བོའེ༌ ཟུན༌ མ༌བཏང༌ང༌ དྲང༌པོ༌ ཟེར༌ར༌ནོག༌། 19 ཁྱོ༌ཞའེ༌ ཕ༌མེས༌པོ༌གུན༌ལ༌ ལུང༌སྟོན༌པ༌ མོ༌ཟེས༌སི༌ ཆོས༌སི༌ བཀའ༌ཁྲིམས༌ སལ༌ཏེ༌ མན༌པིན༌ན༌?། ཡིན༌ནའང༌ ཁྱོ༌ཞའ༌ སུ༌ཞིག༌གིའང༌ ཏེ༌བོའ༌ ཁའ༌ མ༌ཉནས༌། ཁྱོ༌ཞའ༌གུན༌ནི༌ བཅིའ༌ ང༌ བསད༌ཅེས༌སི༌ བརྩོན༌འགྲུས༌ བཅོའད༌?" མོལས༌། 20 མི༌ཚོགས༌སི༌ ལན༌ལ༌, "ཁྱོ༌རང༌ངི༌ ནང༌ང༌ གོང༌པོ༌ ཞུགས༌ཏེ༌ ཡོད༌ཏིག༌འདུག༌། སུའི༌ ཁོ༌རང༌ བསད༌ཅེས༌ བཅོ༌རུག༌" ཟེརས༌། 21 ཡེ༌ཤུའི༌ ལན༌ སལ༌ཏེ༌, "ངའེ༌ ཤབ༌བད༌དི༌ ངལ༌ཚོའེ༌ ཞག༌ག༌ ཧ༌ལས༌ཤེས༌ བཛད༌པ༌ ཞིག༌ བཅོས༌པ༌ ཁྱོ༌ཞའ༌གུན༌ ཧ༌ལས༌། 22 ཡིན༌ནའང༌ ལུང༌སྟོན༌པ༌ མོ༌ཟེས༌སི༌ སལ༌ཁན༌ ནང༌བཞིན༌ ༼དངོས༌པོའ༌ ཁྱོ༌ཞའེ༌ ཕ༌མེས༌པོ༌གུན༌ནི༌ ལུང༌སྟོན༌པ༌ མོ༌ཟེས༌སི༌ སང༌ སྔོན༌ལ༌ ཏེ༌ ཚིར༌བོ༌ གོ༌ཟུགས༌ཏེ༌ ཡོད༌པིན༌།༽ ཁྱོ༌ཞའ༌གུན༌ནི༌ ཤབ༌བད༌དི༌ ངལ༌ཚོའེ༌ ཞག༌ག༌ རང༌རང༌ངི༌ བུ༌ཚ༌གུན༌ལ༌ སུན༌ནད༌ བཅོ༌རུག༌། 23 ཏ༌ ཁྱོ༌ཞའ༌གུན༌ནི༌ ལུང༌སྟོན༌པ༌ མོ༌ཟེས༌སི༌ ཆོས༌སི༌ བཀའ༌ཁྲིམས༌པོ༌ ཅག༌ མི༌ཅག༌ཅེས༌སི༌ ཕིའ༌, གལ༌ཏེས༌ ཤབ༌བད༌དི༌ ཞག༌ག༌ ཁྱོ༌ཞའ༌གུན༌ནི༌ རང༌རང༌ངི༌ བུ༌ཚའ༌ སུན༌ནད༌ བཅོ༌ཅུག༌ ཉན༌ནད༌ན༌, ཏེ༌ནེ༌ ཤབ༌བད༌དི༌ ངལ༌ཚོའེ༌ ཞག༌ག༌ ངའེ༌ མི༌ཞིག༌ ནད༌ནེ༌ ཕན༌ཅུག༌ན༌ ཁྱོ༌ཞའ༌གུན༌ལ༌ ངའེ༌ཀ༌ བཅིའ༌ སྲོ༌ ཡོང༌ང༌རག༌། 24 མིའི༌ ཚུལ༌ལ༌ ཐག༌མ༌བཅད༌ད༌ དཀོན༌མཆོག༌གི༌ ཚུལ༌ལ༌ དྲང༌པོའེ༌ ཐག༌བཅད༌ བཅོ༌ཤིག༌" མོལས༌།
གཙོ༌བོ༌ ཡེ༌ཤུ༌ དཀོན༌མཆོག༌གི༌ སྐོའ༌ བཛད༌ཁན༌ནི༌ མ༌ཤི༌ཀ༌ ཡིན༌ནོག༌ག༌?།
25 ཡེ༌རུ༌ཤ༌ལེམ༌པ༌ ཁ༌ཅིག༌གི༌ གཅིག༌ དང༌ གཅིག༌གི༌ ནང༌ང༌ འདྲི༌ཅེས༌ གོ༌ཟུག༌, "ཁོང༌གུན༌ནི༌ བསད༌ཅེས༌སི༌ བརྩོན༌འགྲུས༌ བཅོ༌ཁན༌ནི༌ མི༌བོ༌ འིན༌ན༌བོ༌ མན༌ནོག༌ག༌?། 26 ལྟོས༌ཤིག༌གང༌ ཁོའེ༌ ང༌དང༌ ཚང༌མའེ༌ དུན༌ལ༌ སྔོན༌ཏེ༌ སླབ༌བྱ༌ བཏང༌ང༌ལ༌, ཡང༌ དའུ༌སྐྱོང༌གུན༌ནི ཁོང༌ངི༌ རྒྱབ༌གལ༌ལ༌ ཅའང༌ ཟེར༌ར༌ མི༌འདུག༌། བཅི༌ འི༌ མི༌བོ༌ མ༌ཤི༌ཀ༌ ཡིན༌ནོག༌ ཟེར༌ཏེ༌ ཁོང༌གུན༌ནི༌ ཐག༌བཅད༌ས༌ ཧེ༌?། 27 ང༌ཞའ༌ འི༌ མི༌བོ༌ ཀ༌ནེ༌ ཡོངས༌ཏེ༌ ཡིན༌ རྒྱུས༌ཡོད༌, ཡིན༌ནའང༌ མ༌ཤི༌ཀ༌ མངོན༌ན༌དང༌ ཁོང༌ ཀ༌ནེ༌ སྐྱོད༌ཏེ༌ ཡིན༌ཁན༌བོ སུའང༌ རྒྱུས༌ མི༌ཆ༌།" 28 ཡེ༌ཤུའི༌ མཆོད༌ཁང༌ངི༌ ནང༌ང༌ སླབ༌བྱ༌ སལ༌ ཟ༌ནེ༌ ཤེད༌དང༌ མོལས༌, "ཁྱོ༌ཞའ༌གུན༌ནི༌ བདེན༌བ༌ ང༌ ཤེས༌སད༌ད༌? ཡང༌ ང༌ ཀ༌ནེ༌ ཡོངས༌ བདེན༌བ༌ རྒྱུས༌ཡོད༌ད༌?། ང༌ ང༌རང༌ངི༌ དབང༌ངི༌ཀ༌ འི༌རུ༌ མ༌ཡོངས༌པིན༌ ཡིན༌ནའང༌ ང༌ ཀལ༌ལ༌ བཛད༌ཁན༌ནི༌ དཀོན༌མཆོག༌ ནི༌ དྲང༌པོ༌ ཞུགས༌ཏེ༌ ཡིན༌, ཁྱོ༌ཞའ༌གུན༌ནི༌ ཁོང༌ ཤེས༌ས༌ མན༌ནོག༌། 29 ཡིན༌ནའང༌ ངའེ༌ ཁོང༌ ཤེས༌སད༌ བཅིའ༌ཟེར༌ན༌ ང༌ ཁོང༌ངི༌ ཆོགས༌ནེ༌ ཡོངས༌ཏེ༌ ཡིན༌ ཡང༌ ཁོང༌ངི༌ ཀལ༌ལ༌ བཛད༌ཏེ༌ ཡིན༌།" 30 ཏེ༌བོ༌ ཚོར༌ར༌དང༌ དའུ༌སྐྱོང༌གུན༌ནི༌ ཁོང༌ ཟུམ༌ཅེས༌སི༌ བརྩོན༌འགྲུས༌ བཅོས༌། ཡིན༌ནའང༌ སུ༌ཞིག༌གིའང༌ ཁོང༌ང༌ ལག༌པ༌ ཐུག༌ མ༌ཉན༌ བཅིའ༌ཟེར༌ན༌ ཏ༌རུང༌ ཁོང༌ ཟུམ༌ཅེས༌སི༌ དུས༌པོ༌ མ༌སླེབ༌བ༌ ཡིན༌པིན༌། 31 ཡིན༌ནའང༌ མི༌ཚོགས༌སི༌ ཕྲོ༌ནེ༌ མང༌པོའེ༌ ཁོང༌ངི༌ཀ༌ དད༌པ༌ ཁྱོངས༌ཏེ༌, "ཅི༌ མ༌ཤི༌ཀ༌ སྐྱོད༌ད༌དང༌ འི༌ མི༌བོའེ༌ སང༌ མང༌ང༌ ཧ༌ལས༌ཤེས༌སི༌ བཛད༌པ༌གུན༌ སྟན༌ཡིན༌ན༌ཧེ༌?" ཟེརས༌། 32 མི༌ཚོགས༌སི༌ ཡེ༌ཤུའི༌ སྐོར༌ལ༌ ཏེ༌ཟུག༌ ཤབ༌ཤུབ༌ བཏང༌ཅེས༌པོ༌ ཕ༌རུ༌ཤི༌པ༌གུན༌ནི༌ ཚོར༌ར༌དང༌, ཁོང༌གུན༌ དང༌ བླ༌མ༌ དའུ༌སྐྱོང༌གུན༌ནི༌ མཆོད༌ཁང༌ངི༌ མག༌མི༌གུན༌ ཁོང༌ ཟུམས༌ཏེ༌ ཁྱོང༌ཅེས༌ལ༌ ཀལས༌། 33 ཡེ༌ཤུའི༌ མི༌གུན༌ལ༌, "དུས༌ ཉུ༌ངུན༌ ཞིག༌གི༌ ཕིའ༌ ང༌ ཁྱོ༌ཞའ༌གུན༌ ཉམ༌པོ༌ ཡོད༌། ཏེ༌ སྟིང༌ནེ༌ ང༌ ཀལ༌ལ༌ བཛད༌ཁན༌ནི༌ཀ༌ ལོགས༌ཏེ༌ ཆའད༌། 34 ཁྱོ༌ཞའ༌གུན༌ནི༌ ང༌ ཙལ༌ཡིན༌ ཡིན༌ནའང༌ ང༌ མི༌ཐོབ༌། ང༌ ཡོད༌ས༌ ཁྱོ༌ཞའ༌ ཡོང༌ མི༌ཉན༌" མོལས༌། 35 ཡ༌ཧུ༌དཱ༌པའེ༌ དའུ༌སྐྱོང༌གུན༌ནི༌ ཁོང༌རང༌ གཅིག༌ དང༌ གཅིག༌ག༌ ཟེརས༌, "ང༌དང༌གུན༌ནི༌ ཙལ༌ མི༌ཉན༌ཅེས༌ འི༌ མི༌བོ༌ ཀ༌རུ༌ ཆེན༌ ཟེར༌ཏེ༌ ཡིན༌ནོག༌། བཅི༌ ཁོ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཐེ༌ཡན༌ཏེ༌ ཡོད༌ཁན༌ནི༌ ང༌དང༌ངི༌ མི༌གུན༌ ཡོད༌ས༌ སོང༌ཏེ༌ ཡ༌ཧུ༌དཱ༌པ༌ མན༌ཁན༌གུན༌ལ༌ སླབ༌བྱ༌ བཏང༌ཡིན༌ སམ༌ཏེ༌ ཡིན༌ནོག༌ག༌?། 36 ཁོའེ༌ 'ཁྱོ༌ཞའ༌གུན༌ནི༌ ང༌ ཙལ༌ཡིན༌ ཡིན༌ནའང༌ ང༌ མི༌ཐོབ༌, ཀ༌རུ༌ ང༌ འདུག༌ཡིན༌ ཏེ༌རུ༌ ཁྱོ༌ཞའ༌ ཡོང༌ མི༌ཉན༌'' ཟེར༌ཅེས༌སི༌ ཏོན༌བོ༌ བཅི༌ ཡིན༌པིན༌ ཧེ༌?།" 37 དུས༌ཆེན༌ནི༌ སྟིང༌ཇུག༌གི༌ ཞག༌ རྩད༌ཅན༌ནི༌ དུས༌ལ༌ ཡེ༌ཤུའེ༌ ཞངས༌ཏེ༌ ཀུ༌ཅོ༌ སལ༌ཡིན༌ མོལས༌, "གལ༌ཏེས༌ སུ༌ཞིག༌ སྐོམས༌སད༌ན༌ ངའེ༌ཀ༌ ཡོངས༌ཏེ༌ ཐུང༌ཤིག༌། 38 སུ༌ཞིག༌གི༌ ངའེ༌ཀ༌ དད༌པ༌ བཅོའད༌ ཏེ༌གུན༌ ཡོང༌ཤིག༌ ཡང༌ ངའེ༌ ཀ༌ནེ༌ ཐུང༌ཤིག༌ ཀ༌ཟུག༌ དམ༌པའེ༌ གསུང༌རབས༌སི༌ ནང༌ང༌ བྲིའ༌ བཛད༌ཁན༌ ནང༌བཞིན༌ལ༌ 'དད༌པ༌ བཅོ༌ཁན༌ནི༌ སེམས༌སི༌ ནང༌ང༌ སྲོག༌ བཏང༌ཅེས༌སི༌ ཆུའི༌ གཙངས༌པོ༌ རྒྱུག༌ཡིན༌'།" 39 ༼འི༌ སྲོག༌ བཏང༌ཁན༌ནི༌ ཆུ༌བོའེ༌ ཏོན༌བོ༌ ནི༌ དམ༌པའེ༌ ཐུགས༌ཉིད༌ ཡིན༌, ཀ༌བོ༌ ཁོང༌ངི༌ཀ༌ དད༌པ༌ ཁྱོང༌ཁན༌གུན༌ལ༌ སྟིང༌ནེ༌ ཐོབ༌ཅེས༌ ཡིན༌པིན༌, ཡིན༌ནའང༌ ཏེ༌ དུས༌ ཙུག༌པ༌ དམ༌པའེ༌ ཐུགས༌ཉིད༌ མ༌འབབས༌ས༌ ཡིན༌པིན༌, བཅིའ༌ཟེར༌ན༌ ཡེ༌ཤུ༌ ཏ༌རུང༌ ཁོང༌རང༌ངི༌ ཟིར༌རྗིད༌དི༌ ནམ༌མཁའེ༌ ནང༌ང༌ ལོགས༌ཏེ༌ མ༌སྐྱོད༌ད༌ ཡིན༌པིན༌།༽ 40 ཏེ༌ སྤེ༌ར༌གུན༌ ཚོར༌ཏེ༌ སྟིང༌ནེ༌ མི༌ ཁ༌ཅིག༌གི༌ ཟེརས༌, "ཏན༌ཏན༌ འི༌ མི༌བོ༌ དཀོན༌མཆོག༌གི༌ ལུང༌སྟོན༌པ༌ སྐྱོད༌ཅེས༌ཅན༌བོ༌ ཡིན༌ནོག༌ ཀ༌བོའ༌ ང༌དང༌གུན༌ སྲུངས༌ཏེ༌ ཡོད༌པིན༌།" 41 ཁ༌ཅིག༌གི༌, "ཁོང༌ མ༌ཤི༌ཀ༌ ཡིན༌ནོག༌" གཞན༌ ཁ༌ཅིག༌གི༌, "མ༌ཤི༌ཀ༌ གཱ༌ལིལ༌ལིའི༌ ཡུལ༌ནེ༌ ཀ༌ཟུག༌ག༌ ཡོང༌ ཉན༌ཡིན༌? མ༌ནེ༌ མི༌ཉན༌། 42 དམ༌པའེ༌ གསུང༌རབས༌སི༌ ནང༌ང༌ བྲིའ༌ བཛད༌ཏེ༌ མི༌འདུག༌ག༌?། མ༌ཤི༌ཀ༌ རྒྱལ༌པོ༌ དཱ༌བིད༌དི༌ ཡུལ༌ བེད༌ལེ༌ཧེམ༌མི༌ གྲོང༌ཁྱེར༌ ཡང༌ རྒྱལ༌པོ༌ དཱ༌བིད༌དི༌ ཕོར༌རྒྱུད༌ནེ༌ བིང༌ཡིན༌" ཟེརས༌། 43 ཏེ༌བོའེ༌ ཞས༌ཏེ༌ མི༌ཚོགས༌སི༌ ནང༌ང༌ ཡེ༌ཤུའི༌ སྐོར༌ལ༌ མི༌ཐུན༌ཅེས༌ མང༌པོ༌ བིང༌། 44 ཡང༌ ཁ༌ཅིག༌གི༌ ཁོང༌ ཟུམ༌ཅེས༌སི༌ འདོད༌པ༌ བོར༌རད༌པིན༌, ཡིན༌ནའང༌ སུ༌ཞིག༌གིའང༌ ཁོང༌ངི༌ཀ༌ ལག༌པ༌ ཐུག༌ མ༌ཉན༌།
ཡ༌ཧུ༌དཱ༌པའེ༌ དའུ༌སྐྱོང༌ ཁ༌ཅིག༌གི༌ ཡེ༌ཤུའི༌ཀ༌ དད༌པ༌ ཁྱོངས༌།
45 ཏེ༌ནེ༌ མཆོད༌ཁང༌ སྲུང༌ཁན༌ནི༌ མག༌མི༌, ཕ༌རུ༌ཤི༌པ༌ དང༌ བླ༌མ༌ དའུ༌སྐྱོང༌ གུན༌ནི༌ཀ༌ ལོགས༌ཏེ༌ སླེབ༌བ༌དང༌, ཁོང༌གུན༌ནི༌ མག༌མི༌གུན༌ལ༌ འདྲིས༌, "ཁྱོ༌ཞའ༌གུན༌ནི༌ ཁོ༌ ཟུམས༌ཏེ༌ བཅིའ༌ མ༌ཁྱོངས༌པིན༌?།" 46 ཏེ༌ མག༌མི༌གུན༌ནི༌ ལན༌ལ༌, "འི༌ཙོགས༌སི༌ སླབ༌བྱ༌ སལ༌ཁན༌ ཞིག༌ མ༌ནེ༌ མ༌ཚོར༌" ཟེརས༌། 47 ཏེ༌ནེ༌ ཕ༌རུ༌ཤི༌པ༌གུན༌ནི༌ ཁོང༌གུན༌ལ༌, "ཏ༌ ཁྱོ༌རང༌གུན༌ནའང༌ ཁོའེ༌ མགོབ༌སྐོར༌རི༌ ནང༌ང༌ སོང༌ཏེ༌ ཡིན༌ན༌?། 48 དའུ༌སྐྱོང༌ དང༌ ཕ༌རུ༌ཤི༌པ༌གུན༌ནི༌ ཕྲོ༌ནེ༌ སུ༌ཞིག༌གི༌ ཁོའེ༌ཀ༌ དད༌པ༌ བཅོས༌ས༌?། 49 མ༌བཅོས༌། ཡིན༌ནའང༌ བཀའ༌ཁྲིམས༌སི༌ སྐོར༌ལ༌ ཅའང༌ རྒྱུས༌མེད༌ཁན༌ནི༌ འི༌ མི༌ཚོགས༌བོའེ༌ འི༌ མི༌བོའེ༌ཀ༌ དད༌པ༌ བཅོས༌། ཁོང༌གུན༌ལ༌ ངན༌ ཕོག༌ཏེ༌ ཡིན༌ནོག༌" ཟེརས༌། 50 ཁོང༌གུན༌ནི༌ ཕྲོ༌པ༌ ཕ༌རུ༌ཤི༌པ༌ ནི༌ཀོ༌དེ༌མས༌ ཟེར༌ཁན༌ ཞིག༌ ཀ༌བོ༌ སྔོན༌ལའང༌ ཡེ༌ཤུའ༌ འདྲི༌བ༌ འདྲིའ༌ལ༌ སོང༌ཏེ༌ ཡིན༌པིན༌, ཁོང༌གུན༌ལ༌ འདྲིས༌། 51 ང༌དང༌ངི༌ བཀའ༌ཁྲིམས༌སི༌ ནང༌བཞིན༌ ནམ༌ ཚག༌པ༌ མི༌ཞིག༌ག༌ གོ༌མ༌ ཁོའེ༌ ལས༌གུན༌ནི༌ སྐོར༌ལ༌ ཉན༌ཏེ༌ མ༌ནེ༌ ཁོའ༌ ཐག༌བཅད༌ བཏང༌ མི༌ཉན༌ ཟེར༌ཏེ༌ མི༌འདུག༌ག༌?། 52 ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ ནི༌ཀོ༌དེ༌མས༌ལ༌, "ཅི༌ ཁྱོ༌རང༌ངའང༌ གཱ༌ལིལ༌ལི༌པ༌ ཡིན༌ན༌?། དམ༌པའེ༌ གསུང༌རབས༌སི༌ ནང༌ང༌ ཙལ༌ན༌ ཁྱོ༌རང༌ང༌ གཱ༌ལིལ༌ལིའི༌ནེ༌ ལུང༌སྟོན༌པ༌ ཞིག༌ བྱུང༌ཁན༌བོ༌ མ༌ནེ༌ མི༌ཐོབ༌" ཟེརས༌། 53 ༼དེ༌ནེ༌ ཏེ༌གུན༌ ལངས༌ཏེ༌ རང༌རང༌ངི༌ ཁམ༌པ༌ སོང།
བུ༌མོ༌ཞིག༌ ལོག༌གཡེམ༌ བཅོ༌ཡིན༌ཞིག༌ ཟུམས༌།
1 ཏེ༌ སྟིང༌ནེ༌ ཡེ༌ཤུ༌ ཨོ༌ལིཝ༌ཝི༌ རིའི༌ཀ༌ སྐྱོདས༌། 2 ནམ༌ ལང༌ས༌དང༌ ཁོང༌ ལོགས༌ཏེ༌ ཡ༌ཧུ༌དཱ༌པའེ༌ མཆོད༌ཁང༌ ཆེན༌མོའ༌ སྐྱོདས༌། མི༌ཚང༌མ༌ ཁོང༌ ཡོད༌ས༌ འཛོམས༌། ཡེ༌ཤུ༌ མི༌ ཚོགས༌ལ༌ སླབ༌བྱ༌ སལ༌ཅེས༌ལ༌ སའེ༌ཀ༌ ཞུགས༌། 3 ཏེན༌ན༌ ཟ༌ནེ༌ ཆོས༌ཁྲིམས༌ལ༌ མཁས༌པ༌ དང༌ ཕ༌རུ༌ཤི༌པ༌གུན༌ནི༌ བུ༌མོ༌ཞིག༌ ཁོང༌ངི༌ དུན༌ལ༌ ཁྱོངས༌, ཀ༌བོ༌ ཁོ༌རང༌ངི༌ གཞི༌སྨད༌ མན༌པ༌ ཡང༌ མི༌ཞིག༌ ཉམ༌པོ༌ ལུས༌བྲེལ༌ བཅོ༌ཡིན༌ ཟུམས༌ཏེ༌ ཡིན༌པིན༌། ཏེ༌གུན༌ནི༌ ཏེ༌ བུ༌མོ༌བོ༌ མི༌ཚང༌མའེ༌ སྐྱིལ༌ལ༌ ལངས༌ཏེ༌ བོརས༌། 4 ཡང༌ ཡེ༌ཤུའ༌ ཞུས༌, "སློབ༌དཔོན༌ལེ༌, འི༌ བུ༌མོ༌བོ༌ ལོག༌གཡེམ༌ བཅོ༌ཡིན༌ དང༌ ཟུམས༌ཏེ༌ ཡིན༌། 5 ལུང༌སྟོན༌པ༌ མོ༌ཟེས༌སི༌ ཆོས༌ཁྲིམས༌ ནང༌བཞིན༌ལ༌, འི༌ཙོགས༌སི༌ བུ༌མོའ༌ རྡོ༌ རྒྱབས༌ཏེ༌ བསད༌ཅེས༌ལ༌ ང༌ཞའ༌ བཀའ༌ ཡོད༌, ཡིན༌ནའང༌ ཉེ༌རང༌ངི༌ བཅི༌ མོལ༌ལད༌?" ཞུས༌། 6 ཏེ༌གུན༌ནི༌ ཡེ༌ཤུའི༌ འི༌ བཀའ༌ཁྲིམས༌སི༌ རྒྱབ༌གལ༌ལ༌ ཟེར༌ན༌, ཉད༌གལ༌ ཀལ༌ཅེས༌སི༌ སྐབས༌ ཐོབ༌ཡིན༌ སམས༌ཏེ༌ འི༌ འདྲི༌བ༌བོ༌ འདྲིས༌། ཡིན༌ནའང༌ ཡེ༌ཤུའི༌ དབུ༌ སྒུས༌ཏེ༌ སའེ༌ཀ༌ བྲི༌ཅེས༌ གོ༌ཟུག༌ བཛདས༌། 7 ཏེ༌ མི༌གུན༌ནི༌ ཡང༌ དང༌ ཡང༌ ཁོང༌ང༌ འདྲི༌ཡིན༌ འདུགས༌པ༌ ཁོང༌ངི༌ དབུ༌ སྟགས༌ཏེ༌ ཁོང༌གུན༌ལ༌ མོལས༌, "ཁྱོ༌ཞའེ༌ ཕྲོ༌ནེ༌ དག༌ས༌ ཚག༌པ༌ སྡིག༌པ༌ མ༌ནེ༌ མ༌བཅོའ༌ ཡོད༌ཁན༌བོའ༌ གོ༌མ༌ འི༌ བུ༌མོ༌བོའ༌ རྡོའ༌ རྒྱབ༌ཅུགས༌" མོལས༌། 8 ཏེ༌ནེ༌ ཡང༌ ཁོང༌ངི༌ དབུ༌ སྒུས༌ཏེ༌ སའེ༌ཀ༌ བྲིའ༌ བཛདས༌། 9 ཏེ༌བོ༌ ཚོར༌ར༌དང༌, ཏེ༌རུ༌ ཡོད༌ཁན༌གུན༌ རེ༌རེ༌ བཅོས༌ཏེ༌ ཏེ༌ཀ༌ནེ༌ སོང༌, གོ༌མ༌ རྒད༌པོ༌གུན༌ ཏེ༌ཏེ༌ཚུག༌པ༌, ནམ༌ ལངས༌ཏེ༌ ཡོད༌ཁན༌ནི༌ བུ༌མོ༌ ཡོད༌ས༌ ཡེ༌ཤུ༌ གཅིག༌པོ༌ མ༌ནེ༌ མ༌ལུས༌། 10 ཡེ༌ཤུ༌ ཞངས༌ཏེ༌ ཁོའ༌, "བུ༌མོ༌, ཁོང༌ ཚང༌མ༌ ཀ༌རུ༌ སོང༌། སུ༌ ཞིག༌གིའང༌ ཁྱོ༌རང༌ང༌ ཤི༌ཅེས༌སི༌ ཁྲིམས༌ མ༌བཅད༌ས༌?" མོལས༌། 11 ཏེ༌ བུ༌མོ༌བོའེ༌, "གཙོ༌བོ༌ལེ༌, སུ༌ཞིག༌གིའང༌ ཅའང༌ མ༌བཅོས༌" ཞུས༌། ཏེ༌ནེ༌ ཡེ༌ཤུའི༌, "ངེའང༌ སྐྱོན༌ མི༌ཀལ༌། སོང༌, ཏ༌ནེ༌ཕར༌ལ༌ སྡིག༌པ༌ མ༌བཅོ༌" མོལས༌།༽
སྐྱབ༌མགོན༌ ཡེ༌ཤུ༌ ནི༌ འཇིག༌རྟེན༌ནི༌ འོད༌ ཡིན༌།
12 ཡེ༌ཤུའི༌ ཏེ༌ མི༌གུན༌ལ༌ སླབ༌བྱ༌ སལ༌ཡིན༌, "ང༌ ནི༌ འཇིག༌རྟེན༌པ༌གུན༌ནི༌ ཕིའ༌ འོད༌ ཡིན༌། སུ༌ཞིག༌ ངའེ༌ སྟིང༌རང༌ང༌ གྲུལ༌ན༌, ཁོ༌ མུན༌གྲིག༌གི༌ ལམ༌མི༌ཀ༌ མ༌ནེ༌ མི༌གྲུལ༌, མ༌ཚད༌ མཐའ༌མེད༌པའེ༌ མི༌ཚེའེ༌ འོད༌ ཐོབ༌ཡིན༌" མོལས༌། 13 ཏེ༌བོ༌ ཚོར༌ར༌དང༌ ཕ༌རུ༌ཤི༌པ༌གུན༌ནི༌ ཡེ༌ཤུའ༌, "ཁྱོ༌རང༌ངི༌ རང༌ངི༌ ཕིའ༌ སྤང༌པོ༌ བཏང༌པ༌ བཀའ༌ཁྲིམས༌ ནང༌བཞིན༌ ཁྱོ༌རང༌ངི༌ སྤང༌པོ༌བོ༌ ཏོན༌མེད༌ ཐེའ༌ནོག༌" ཟེརས༌། 14 ཡེ༌ཤུའི༌ ཁོང༌གུན༌ལ༌ ལན༌ སལ༌ཡིན༌ མོལས༌, "ངའེ༌ ང༌རང༌ངི༌ སྐོར༌ལ༌ སྤང༌པོ༌ བཏང༌ངད༌ནའང༌ ངའེ༌ སྤང༌པོ༌བོ༌ ཏོན༌མེད༌ མན༌ བཅིའ༌ཟེར༌ན༌ ང༌ ཀ༌ནེ༌ ཡོངས༌ཏེ༌ ཡིན༌, ཡང༌ ཀ༌རུ༌ ཆ༌ཅེས༌ ཡིན༌ ང༌ རྒྱུས༌ཡོད༌། ཡིན༌ནའང༌ ཁྱོ༌ཞའ༌གུན༌ལ༌ ངའེ༌ སྐོར༌ལ༌ འི༌གུན༌ རྒྱུས༌མེད༌། 15 ཁྱོ༌ཞའ༌གུན༌ནི༌ མིའི༌ ཚུལ༌ལ༌ ཤགས༌ བཅད༌འདུག༌, ཡིན༌ནའང༌ ངའེ༌ སུའང༌ ཤགས༌ བཅད༌ད༌མེད༌། 16 ཏ༌ གལ༌ཏེས༌ ཤགས༌ ཀད༌ བཅོ༌ན༌ ཏེ༌ནེ༌ ངའེ༌ ཐག༌བཅད༌པོ༌ དྲང༌པོ༌ ཡོང༌ཡིན༌ བཅིའ༌ཟེར༌ན༌ ཐག༌བཅད༌ ཟ༌ནེ༌ ང༌ གཅིག༌པོ༌ མེད༌, ང༌ ཀལ༌ལ༌ བཛད༌ཁན༌ནི༌ ཡབ༌ ང༌ ཉམ༌པོ༌ ཡོད༌། 17 ཁྱོ༌ཞའེ༌ བཀའ༌ཁྲིམས༌སི༌ ནང༌ང༌ བྲིའ༌ བཛད༌ཏེ༌ འདུག༌ 'མི༌ གཉིས༌སི༌ སྤང༌པོ༌བོ༌ བདེན༌བ༌ ཐེན༌' 18 ངའེ༌ ང༌རང༌ངི༌ སྐོར༌ལ༌ སྤང༌པོ༌ བཏང༌ངད༌ ཡང༌ ངའེ༌ སྤང༌པོ༌ གཉིས༌པ༌ ནི༌ ཡབ༌ ཡིན༌, ཀ༌བོའེ༌ ང༌ ཀལ༌ལ༌ བཛདས༌།" 19 ཏེ༌ནེ༌ ཏེ༌ ཕ༌རུ༌ཤི༌པ༌གུན༌ནི༌ ཡེ༌ཤུའ༌, "ཁྱོ༌རང༌ངི༌ ཡབ༌ ཀ༌རེ༌?" ཟེར༌ཏེ༌ འདྲིས༌། ལན༌ལ༌ ཡེ༌ཤུའི༌, "ཁྱོ༌ཞའ༌གུན༌ནི༌ ང༌ མ༌ཤེས༌ ཡ༌ ངའེ༌ ཡབ༌བའང༌། གལ༌ཏེས༌ ཁྱོ༌ཞའ༌གུན༌ནི༌ ང༌ ཤེས༌པིན༌ན༌ ངའེ༌ ཡབ༌བའང༌ ཤེས༌ཏེ༌ ཡོད༌འགྲོ༌" མོལས༌། 20 ཁོང༌ངི༌ འི༌ ཞལ༌ཏ༌གུན༌ མཆོད༌ཁང༌ངི༌ ནང༌ང༌ སླབ༌བྱ༌ སལ༌དུས༌ ཞལ༌དེབ༌ ཕུལ༌སའེ༌ ནས༌སའེ༌ཀ༌ མོལ༌ལ༌ བཛདས༌། ཡིན༌ནའང༌ སུ༌ ཞིག༌གིའང༌ ཁོང༌ ཟུམ༌ཅེས༌ མ༌བཅོས༌ བཅིའ༌ཟེར༌ན༌ ཏ༌རུང༌ ཁོང༌ ཟུམ༌ཅེས༌སི༌ དུས༌པོ༌ མ༌སླེབ༌བ༌ ཡིན༌པིན༌། 21 ཡེ༌ཤུའི༌ ཡང༌ ལན༌གཅིག༌ ཡ༌ཧུ༌དཱ༌པའེ༌ དའུ༌སྐྱོང༌གུན༌ལ༌, "ང༌ ཆའད༌ ཡང༌ ཁྱོ༌ཞའ༌གུན༌ནི༌ ང༌ ཙལ༌ཡིན༌། དཀོན༌མཆོག༌གི༌ ཆོགས༌ནེ༌ ཁྱོ༌ཞའེ༌ སྡིག༌པ༌གུན༌ལ༌ ཤགས༌པ༌ མ༌ཐོབ༌བ༌ ཁྱོ༌ཞའ༌ ཤི༌ཡིན༌། ཀ༌རུ༌ ང༌ ཆའད༌ ཁྱོ༌ཞའ༌གུན༌ ཏེ༌རུ༌ ཡོང༌ མི༌ཉན༌" མོལས༌། 22 ཡ༌ཧུ༌དཱ༌པ༌ སྤོན༌བོ༌གུན༌ནི༌ གཅིག༌ དང༌ གཅིག༌ག༌ ཟེརས༌, "ཁོའེ༌ བཅི༌ ཁོ༌རང༌ དང༌ ཁོ༌རང༌ བསད༌ཡིན༌ ཟེར༌ཏེ༌ ཡིན༌ནོག༌ག༌?། ཁོའེ༌ ཀ༌རུ༌ ང༌ ཆའད༌ ཁྱོ༌ཞའ༌ ཡོང༌ མི༌ཉན༌ ཟེར༌ཁན༌ནི ཏོན༌བོ བཅི༌ ཡིན༌ནོག༌?།" 23 ཡེ༌ཤུའི༌ ཏེ༌ མི༌གུན༌ལ༌ ཏ༌རུང༌ངའང༌ མོལས༌, "ཁྱོ༌ཞའ༌གུན༌ གཡོག༌ནེ༌ ཡིན༌ནོག༌, ཡང༌ ང༌ སྟག༌ནེ༌ ཡིན༌། ཁྱོ༌ཞའ༌གུན༌ འི༌ འཇིག༌རྟེན༌ནེ༌ ཡིན༌ནོག༌, ང༌ འི༌ འཇིག༌རྟེན༌ནེ༌ མན༌། 24 ངའེ༌ ཁྱོ༌ཞའ༌གུན༌ལ༌ ཟེར༌ཏེ༌ ཡིན༌, 'དཀོན༌མཆོག༌གི༌ ཆོགས༌ནེ༌ ཁྱོ༌ཞའེ༌ སྡིག༌པ༌གུན༌ལ༌ ཤགས༌པ༌ མ༌ཐོབ༌བ༌ ཤི༌ཡིན༌། གལ༌ཏེས༌ ཁྱོ༌ཞའེ༌ ང༌ ཏེན༌ན༌བོ༌ ཡིན༌ ཟེར༌ཁན༌བོ༌ བདེན༌ མ༌ཆེས༌ན༌ ཁྱོ༌ཞའ༌གུན༌ལ༌ ཏན༌ཏན༌ ཤགས༌པ༌ མ༌ཐོབ༌བ༌ ཤི༌ཡིན༌།" 25 ཏེ༌གུན༌ནི༌ འདྲིས༌, "ཁྱོ༌རང༌ སུ༌ ཡིན༌?།" ལན༌ལ༌ ཡེ༌ཤུའི༌ མོལས༌, "ང༌ ཏེན༌ན༌བོ༌ ཡིན༌ ཀ༌ཟུག༌ མགོ༌ མ༌ནེ༌ ཕར༌ལ༌ ངའེ༌ ཁྱོ༌ཞའ༌གུན༌ལ༌ ཟེར༌རད༌པིན༌། 26 ཁྱོ༌ཞའ༌གུན༌ནི༌ སྐོར༌ལ༌ ང༌ ཟེར༌རྒྱུ༌ དང༌ ཤགས༌ བཅོ༌རྒྱུ༌ མང༌པོ༌ ཡོད༌། ཡིན༌ནའང༌ ངའེ༌ མི༌བཅོ༌ བཅིའ༌ཟེར༌ན༌ ངའེ༌ ང༌ ཀལ༌ལ༌ བཛད༌ཁན༌ནི༌ ཀ༌ནེ༌ བཅི༌ཤིག༌ ཚོར༌རད༌, ཏེན༌ན༌བོ༌ འཇིག༌རྟེན༌པ༌གུན༌ལ༌ ཤད༌དད༌ ཡང༌ ཁོང༌ ནི༌ བཅི༌ས༌ཐོག༌ནེ༌ དྲང༌པོ༌ ཞིག༌ ཞུགས༌ཏེ༌ ཡིན༌།" 27 ཁོང༌ངི༌ དཀོན༌མཆོག༌ ཡབ༌བི༌ སྐོར༌ལ༌ མོལ༌ཁན༌བོ༌ དའུ༌སྐྱོང༌གུན༌ནི༌ ཧ༌ མ༌གོ༌། 28 ཏེ༌བོའེ༌ཕིའ༌ ཡེ༌ཤུའི༌ མོལས༌, "ཁྱོ༌ཞའེ༌ མི༌རིགས༌སི༌བུ༌ རྐྱང༌ཤིང༌ངི༌ཀ༌ སྟག༌ ཟ༌ནེ༌, ཁྱོ༌ཞའ༌གུན༌ལ༌ ང༌ ཏེན༌ན༌ ཡིན༌ཁན༌བོ༌ རྒྱུས༌ཆེན༌། ངའེ༌ ང༌རང༌ངི༌ ཆོགས༌ནེ༌ ཅའང༌ བཅོའ༌མེད༌, ཡིན༌ནའང༌ ཡབ༌བི༌ ང༌ སླབ༌བ༌ བཛད༌ཁན༌བོ༌ ཟེར༌རད༌། 29 ཡང༌ ང༌ ཀལ༌ལ༌ བཛད༌ཁན༌བོ༌ ང༌ ཉམ༌པོ༌ ཡོད༌། ཁོང༌ངི༌ ང༌ གཅིག༌པོ༌ ཕངས༌ཏེ༌ བོར༌ར༌ མ༌བཛདས༌ བཅིའ༌ཞུ༌ན༌ ངའེ༌ དུས༌རྒྱུན༌ ཁོང༌ ཐུགས༌ཐད༌ཁན༌བོ༌ བཅོའད༌།" 30 ཡེ༌ཤུའི༌ འི༌ ཞལ༌ཏ༌གུན༌ མོལ༌ཡིན༌ ཡོད༌ ཟ༌ནེ༌ མི༌ མང༌པོའེ༌ ཁོང༌ངི༌ཀ༌ དད༌པ༌ ཁྱོངས༌།
ཨབ༌ར༌ཧམ༌ ཡ༌ རྡུད༌གུན༌ནི༌ མགོ༌བའེ༌ ཕོར༌རྒྱུད༌།
31 ཡེ༌ཤུའི༌ ཁོང༌ངི༌ཀ༌ དད༌པ༌ ཁྱོང༌ཁན༌ནི༌ ཡ༌ཧུ༌དཱ༌པ༌གུན༌ལ༌ མོལས༌, "གལ༌ཏེས༌ ཁྱོ༌ཞའེ༌ ངའེ༌ སླབ༌བྱ༌གུན༌ནི༌ཀ༌ བདེན༌བའ༌ དད༌པ༌ བཅོས༌ཏེ༌ ལག༌ལེན༌ བཅོ༌ན༌, ཁྱོ༌ཞའ༌ ངའེ༌ བདེན༌བའེ༌ སློབ༌ཕྲུག༌གུན༌ ཡིན༌། 32 ཏེ༌ནེ༌ ཁྱོ༌ཞའ༌ དཀོན༌མཆོག༌གི༌ བདེན༌བ༌བོ༌ ཧ༌གོ༌ ཐུབ༌ཡིན༌ ཡང༌ ཏེ༌ བདེན༌བ༌བོའེ༌ ཁྱོ༌ཞའ༌ རང༌དབང༌ བཏང༌ཡིན༌།" 33 ཏེ༌ མི༌གུན༌ནི༌ ཁོང༌ང༌ ཞུས༌, "ང༌ཞའ༌ ཨབ༌ར༌ཧམ༌མི༌ ཕོར༌རྒྱུད༌ ཡིན༌ ཡང༌ མ༌ནེ༌ ཚེ༌གཡོག༌ག༌ མ༌ལུས༌ས༌ ཡིན༌པིན༌། ཉེ༌རང༌ངི༌ ང༌ཞའ༌ རང༌དབང༌ ཐོབ༌ཡིན༌ ཟེར༌ཅེས༌སི༌ ཏོན༌བོ༌ བཅི༌ ཡིན༌།" 34 ཡེ༌ཤུའི༌ ཏེ༌གུན༌ལ༌, "ངའེ༌ ཁྱོ༌ཞའ༌ བདེན༌བ༌ ཟེར༌རད༌, སུ༌ཞིག༌གི༌ སྡིག༌པ༌ བཅོའད༌ན༌ ཁོ༌ སྡིག༌པའེ༌ ཚེ༌གཡོག༌ ཡིན༌ནོག༌། 35 ཡང༌ ཚེ༌གཡོག༌ སྤོན༌བོའེ༌ ནང༌མི༌ མ༌ནེ༌ མི༌རྒྱུར༌། ཡིན༌ནའང༌ སྲས༌ དུས༌རྒྱུན༌ ནང༌མི༌ ཉམ༌པོ༌ འདུག༌ག༌ནོག༌། 36 སོང༌པ༌སང༌ གལ༌ཏེས༌ དཀོན༌མཆོག༌གི༌ སྲས༌སི༌ ཁྱོ༌ཞའ༌གུན༌ལ༌ སྡིག༌པ༌ནེ༌ རང༌དབང༌ བཏང༌ན༌ ཁྱོ༌ཞའ༌གུན༌ལ༌ བདེན༌བའ༌ རང༌དབང༌ ཐོབ༌ཡིན༌། 37 ཁྱོ༌ཞའ༌ ཨབ༌ར༌ཧམ༌མི༌ ཕོར༌རྒྱུད༌ ཡིན༌ཁན༌བོ༌ ངའེ༌ ཤེས༌སད༌། ཏེ༌ནེའང༌ ཁྱོ༌ཞའེ༌ ང༌ བསད༌ཅེས༌ བཅོ༌རུག༌ བཅིའ༌ཟེར༌ན༌ ཁྱོ༌ཞའ༌གུན༌ནི༌ སེམས༌སི༌ ནང༌ང༌ ངའེ༌ སླབ༌བྱའེ༌ ཕིའ༌ ནས༌ས༌ མེད༌ཏེ༌ ཡིན༌ནོག༌། 38 ཡབ༌བའི༌ དུན༌ལ༌ ཡོད༌ ཟ༌ནེ༌ ཐོང༌ཁན༌བོ༌ ངའེ༌ ཁྱོ༌ཞའ༌ ཤད༌དད༌, ཡིན༌ནའང༌ ཁྱོ༌ཞའ༌གུན༌ནི༌ ཁྱོ༌ཞའེ༌ ཨ༌བ༌ནེ༌ ཚོར༌ཁན༌བོ༌ བཅོའ༌ནོག༌།" 39 ཁོང༌གུན༌ནི༌ ལན༌ བཏངས༌, "ང༌ཞའེ༌ ཨ༌བ༌ ཨབ༌ར༌ཧམ༌ ཡིན༌།" ཡེ༌ཤུའི༌ ཁོང༌གུན༌ལ མོལས༌, "གལ༌ཏེས༌ ཁྱོ༌ཞའ༌གུན༌ ཨབ༌ར༌ཧམ༌མི༌ ཕོར༌རྒྱུད༌ ཡིན༌པིན༌ན༌ ཁྱོ༌ཞེའང༌ ཨབ༌ར༌ཧམ༌ ཙོགས༌སི༌ ལས༌གུན༌ བཅོའད༌འགྲོ༌། 40 ངའེ༌ ཁྱོ༌ཞའ༌གུན༌ལ༌ དཀོན༌མཆོག༌ནེ༌ ཚོར༌ཁན༌ནི༌ ཏེ༌ དྲང༌པོའེ༌ སྤེ༌ར༌གུན༌ ཤད༌ པ༌སང༌, ཁྱོ༌ཞའེ༌ ང༌ བསད༌ཅེས༌སི༌ བརྩོན༌འགྲུས༌ བཅོ༌རུག༌, ཨབ༌ར༌ཧམ༌མི༌ ཏེ༌ཟུག༌ མ༌ནེ༌ མ༌བཛདས༌། 41 ཁྱོ༌ཞའ༌གུན༌ནི༌ ཏེན༌ན༌བོ༌ བཅོའ༌ནོག༌ ཀ༌ཟུག༌ ཁྱོ༌ཞའེ༌ ཨ༌བའེ༌ བཅོའད༌།" ཏེ༌གུན༌ནི༌ ཡེ༌ཤུའ༌, "ང༌ཞའ༌གུན༌ ན༌ལུ༌ མན༌། དཀོན༌མཆོག༌ ཁོང༌རང༌ ཙ༌ ང༌ཞའེ༌ ཡབ༌ ཡིན༌" ཟེརས༌། 42 ཡེ༌ཤུའི༌ ཏེ༌ མི༌གུན༌ལ༌, "གལ༌ཏེས༌ ཁྱོ༌ཞའ༌གུན༌ནི༌ ཡབ༌ དཀོན༌མཆོག༌ ཡིན༌པིན༌ན༌ ཁྱོ༌ཞའེ༌ ང༌ བྱམས༌པ༌ བཅོའད༌འགྲོ༌ བཅིའ༌ཟེར༌ན༌ ང༌ དཀོན༌མཆོག༌ནེ༌ ཡོངས༌ཏེ༌ དག༌ས༌ འི༌ཀ༌ ཡོད༌། ང༌ ང༌རང༌ འི༌ཀ༌ ཡོངས༌ཏེ༌ མན༌, དཀོན༌མཆོག༌གི༌ ང༌ ཀལ༌ལ༌ བཛད༌ཏེ༌ ཡིན༌། 43 ཁྱོ༌ཞའེ༌ ངའེ༌ སྤེ༌ར༌གུན༌ ཧ༌ མ༌དགོའ༌ ཡིན༌ནོག༌ བཅིའ༌ཟེར༌ན༌ ཁྱོ༌ཞའ༌ ངའེ༌ སླབ༌བྱ༌གུན༌ལ༌ དད༌པ༌ བཅོའ༌ལ༌ ཐད༌ད༌ མན༌ནོག༌། 44 ཁྱོ༌ཞའ༌གུན༌ནི༌ ཨ༌བ༌ ནི༌ རྡུད༌གུན༌ནི༌ གོ༌བ༌ ཡིན༌ནོག༌ ཡང༌ ཁྱོ༌ཞའ༌ རང༌ངི༌ ཨ༌བའེ༌ འདོད༌པ༌ ནང༌བཞིན༌ གྲུལ༌ལ༌ ཐད༌ད༌ནོག༌། ཁོ༌ འཇིག༌རྟེན༌ ཆགས༌པ༌ནེ༌ ཕར༌ལ༌ མི༌བསད༌ ཞིག༌ ཡིན༌, ཡང༌ དཀོན༌མཆོག༌གི༌ བདེན༌བའེ༌ སླབ༌བྱ༌གུན༌ལ༌ ནཕ༌རད༌ བཅོའ༌ནོག༌, ཁོའེ༌ ནང༌ང༌ དྲང༌པོ༌ ཅའང༌ མེད༌ཏེ༌ ཡིན༌ནོག༌། ཁོའེ༌ ཟུན༌ བཏང༌ ཟ༌ནེ༌ ཁོ༌རང༌ངི༌ སྐད༌ བཏང༌ང༌ནོག༌ བཅིའ༌ཟེར༌ན༌ ཁོ༌ ཟུན༌ཇན༌ ཡང༌ ཟུན༌གུན༌ནི༌ ཨ༌བ༌ ཡིན༌ནོག༌། 45 ཡིན༌ནའང༌ ངའེ༌ དཀོན༌མཆོག༌གི༌ བདེན༌བའེ༌ སླབ༌བྱ༌ ཤད༌ཅེས༌པོའེ༌ ཁྱོ༌ཞའ༌གུན༌ནི༌ ངའེ༌ཀ༌ བདེན༌ཤེས༌ས༌ མན༌ནོག༌། 46 ཁྱོ༌ཞའེ༌ ཕྲོ༌ནེ༌ སུ༌ཞིག༌ ཡོད༌ད༌, ཀ༌བོའེ༌ ང༌ སྡིག༌ཅན༌ ཡིན༌ནོག༌ ཟེར༌ཏེ༌ སྟན༌ཡིན༌?། གལ༌ཏེས༌ དཀོན༌མཆོག༌གི༌ བདེན༌བའེ༌ སླབ༌བྱ༌ ངའེ༌ ཁྱོ༌ཞའ༌ ཤད༌དད༌ན༌ ཏེ༌ནེ༌ ཁྱོ༌ཞའ༌གུན༌ནི༌ ངའེ༌ཀ༌ བདེན༌ བཅིའ༌ ཆེས༌ས༌མེད༌?། 47 དཀོན༌མཆོག༌གི༌ ཡིན༌ཁན༌གུན༌ནི༌ ཁོང༌ངི༌ མོལ༌ཁན༌ ཚང༌མ༌ ཉན༌ན༌ནོག༌, ཡིན༌ནའང༌ ཁྱོ༌ཞའེ༌ མི༌ཉན༌ཅེས༌སི༌ རྒྱུམ༌ཚན༌བོ༌ ནི༌ ཁྱོ༌ཞའ༌གུན༌ དཀོན༌མཆོག༌གི༌ མན༌ནོག༌" མོལས༌།
གཙོ༌བོ༌ ཡེ༌ཤུ༌ ཨབ༌ར༌ཧམ༌མི༌ སང༌ མང༌ང༌ འཇིགས༌པོ༌ ཡིན༌།
48 ཡ༌ཧུ༌དཱ༌པ༌གུན༌ནི༌ ལན༌ལ༌, "ང༌ཞའེ༌ ཁྱོ༌རང༌ རིགས༌ངན༌ ས༌མར༌རི༌ཡཱ༌པ༌ ཡང༌ གོང༌ཞུགས༌ ཡིན༌ ཟེར༌ཁན༌པོ༌ བདེན༌བ༌ མན༌ནོག༌ག༌?། 49 ཡེ༌ཤུའི༌ མོལས༌, "ངའེ༌ ནང༌ང༌ གོང༌པོ༌ ཞུགས༌ཏེ༌ མེད༌། ངའེ༌ ང༌རང༌ངི༌ ཡབ༌བ༌ རྩི༌བ༌ བཅོའད༌, ཡིན༌ནའང༌ ཁྱོ༌ཞའ༌གུན༌ནི༌ ང༌ རྩིས༌མེད༌ བཅོ༌རུག༌། 50 ངའེ༌ ང༌རང༌ངི༌ ཕིའ༌ མི༌གུན༌ནི༌ ཀ༌ནེ༌ རྩི༌བ༌ ཙལ༌ལ༌ མེད༌། འོ༌ན༌ ངའེ༌ ཕིའ༌ རྩི༌བ༌ ཙལ༌ལ༌ བཛད༌ཁན༌ ཞིག༌ ཡོད༌ ཡང༌ ཁོང༌ ནི༌ ཐག༌བཅད༌ བཛད༌ཁན༌ ཞུགས༌ཏེ༌ ཡིན༌། 51 ངའེ༌ ཁྱོ༌ཞའ༌ བདེན༌བ༌ ཟེར༌རད༌, གལ༌ཏེས༌ ངའེ༌ ཟེར༌ཁན༌གུན༌ནི༌ཀ༌ ལག༌ལེན༌ བཅོ༌ན༌ ཏེ༌གུན༌ མ༌ནེ༌ མི༌ཤི༌།" 52 ཏེ༌ མི༌གུན༌ནི༌ ཁོང༌ང༌ ཟེརས༌, "ཏ༌ ང༌ཞའ༌ ཧ༌གོ༌ ཁྱོ༌རང༌ངི༌ ནང༌ང༌ གོང༌པོ༌ ཞུགས༌ཏེ༌ ཡོད༌ཏེ༌ ཡིན༌ནོག༌། ཨབ༌ར༌ཧམ༌ གྲོངས༌ ཡང༌ ཏེན༌ན༌ ཙོགས༌ལ༌ གཞན༌ ལུང༌སྟོན༌པ༌གུན༌ནའང༌, ཡིན༌ནའང༌ ཁྱོ༌རང༌ངི༌ ཟེར༌ར༌ནོག༌ 'གལ༌ཏེས༌ ཁྱོ༌རང༌ངི༌ ཟེར༌ཁན༌གུན༌ནི༌ཀ༌ ལག༌ལེན༌ བཅོ༌ན༌ ཏེ༌ མི༌གུན༌ མ༌ནེ༌ མི༌ཤི༌།' 53 ཁྱོ༌རང༌ བཅི༌ ང༌ཞའེ༌ ཕ༌མེས༌པོ༌ ཨབ༌ར༌ཧམ༌མི༌ སང༌ འཇིགས༌པོ༌ ཡིན༌ན༌?། ཁོང༌ གྲོངས༌ ཡང༌ ལུང༌སྟོན༌པ༌གུན༌ནའང༌, ཁྱོ༌རང༌ རང༌དང༌རང༌ སུ༌ ཡིན༌ སམ༌མ༌རག༌" ཟེརས༌། 54 ཡེ༌ཤུའི༌ མོལས༌, "གལ༌ཏེས༌ ངའེ༌ ང༌རང༌ང༌ རང༌སྟོད༌ བཏང༌ན༌ ཏེ༌ སྟོད༌པ༌བོ༌ ཏོན༌མེད༌ ཡིན༌ནོག༌། ངའེ༌ ཡབ༌ ཀ༌བོའ༌ ཁྱོ༌ཞའ༌གུན༌ནི༌ ཁྱོ༌ཞའེ༌ དཀོན༌མཆོག༌ ཞུའད༌, ཁོང༌ ནི༌ ཏེན༌ན༌བོ༌ ཡིན༌ ཀ༌བོའེ༌ ངའ༌ སྤལ༌ སལ༌ལད༌། 55 ཁྱོ༌ཞའེ༌ ཁོང༌ ཤེས༌ས༌ མན༌ནོག༌ ཡིན༌ནའང༌ ངའེ༌ ཁོང༌ ཤེས༌སད༌། ཏ༌ གལ༌ཏེས༌ ངའེ༌ ཤེས༌ས༌མེད༌ ཟེར༌ན༌ ཁྱོ༌ཞའ༌གུན༌ དང༌ ཙོགས༌ལ༌ ཟུན༌ཇན༌ རྒྱུར༌ཡིན༌ ཡིན༌ནའང༌ ངའེ༌ ཁོང༌ ཤེས༌སད༌ ཡང༌ ཁོང༌ངི༌ བཀའེ༌ཀ༌ ལག༌ལེན༌ བཅོའད༌། 56 ཁྱོ༌ཞའེ༌ ཕ༌མེས༌པོ༌ ཨབ༌ར༌ཧམ༌མི༌ ངའེ༌ དུས༌བོ༌ ཐོང༌ཅེས༌སི༌ སྐོར༌ལ༌ སམ༌ ཟ༌ནེ༌ ཁོང༌ མ༌སྲན༌ཏེ༌ ཐད༌། ཁོང༌ངི༌ ཏེ༌དུས༌པོ༌ ཐོང༌ ཡང༌ མ༌ ཐད༌པོ༌ སོང།" 57 ཡ༌ཧུ༌དཱ༌པ༌གུན༌ནི༌ ཡེ༌ཤུའ༌ ཟེརས༌, "ཁྱོ༌རང༌ངི༌ ལོ༌ ཏ༌རུང༌ ལྔ༌བཅུའང༌ མ༌སོང༌ ཀ༌ཟུག༌གི༌ ཟེར༌རད༌ 'ཁྱོ༌རང༌ངི༌ ཨབ༌ར༌ཧམ༌ མཇལ༌།'" 58 ཡེ༌ཤུའི༌ ཁོང༌གུན༌ལ༌, "ངའེ༌ ཁྱོ༌ཞའ༌ བདེན༌བ༌ ཟེར༌རད༌, ང༌ ནི༌ ཨབ༌ར༌ཧམ༌ མ༌སྐྱེས༌སི༌ སང༌ སྔོན༌ལ༌ ཡོད༌པིན༌'>" མོལས༌། 59 ཏེ༌བོ༌ ཚོར༌ར༌དང༌ ཡ༌ཧུ༌དཱ༌པ༌གུན༌ནི༌ ཁོང༌ བསད༌ཅེས༌སི༌ ཕིའ༌ རྡོའ༌ ཁུརས༌། ཡེ༌ཤུ༌ ཁོང༌གུན༌ནི༌ ཕྲོ༌ནེ༌ ཡིབས༌ཏེ༌ མཆོད༌ཁང༌ནེ༌ ཕི༌ལོག༌ག༌ བིངས༌ཏེ༌ སྐྱོདས༌།
ཡེ༌ཤུའི༌ ཞ༌ར༌ ཞིག༌ ཕན༌ཅུག༌ག༌ བཛདས༌།
1 ཡེ༌ཤུ༌ ལམ༌ནེ༌ སྐྱོད༌ ཟ༌ནེ༌ ཁོང༌ངི༌ སྐྱེས༌པ༌ནེ༌ ཕར༌ལ༌ ཞ༌ར༌ ཡོད༌ཁན༌ནི༌ མི༌ ཞིག༌ གཟིགས༌། 2 ཁོང༌ངི༌ སློབ༌ཕྲུག༌གུན༌ནི༌ ཁོང༌ང༌, "སློབ༌དཔོན༌ལེ༌, སུའི༌ སྡིག༌པའེ༌ ཞས༌ཏེ༌ ཁོ༌ ཞ༌ར༌ སྐྱེས༌ཏེ༌ ཡིན༌ནོག༌, ཁོ༌རང༌ངི༌ ཡ༌ ཁོའེ༌ ཕ༌མ༌གུན༌ནི༌?" ཞུས༌། 3 ཡེ༌ཤུའི༌ ཁོང༌གུན༌ལ༌ མོལས༌, "ཁོ༌རང༌ ཡ༌ ཁོའེ༌ ཕ༌མ༌གུན༌ནི༌ སྡིག༌པའེ༌ ཞས༌ཏེ༌ མན༌པ༌, དཀོན༌མཆོག༌གི༌ ཧ༌ལས༌ཤེས༌སི༌ ཕྱག༌ལས༌གུན༌ ཁོའེ༌ མི༌ཚེ༌ ནང༌ང༌ མངོན༌ཅུག༌ག༌ བཛད༌ཅེས༌སི༌ ཕིའ༌ འི༌ མི༌བོ༌ ཞ༌ར༌ སྐྱེས༌ཏེ༌ ཡིན༌ནོག༌། 4 ཉི༌མའེ༌ འོད༌བོ༌ ཡོད༌ ཟ༌ནེ༌ ང༌དང༌གུན༌ནི༌ ང༌ ཀལ༌ལ༌ བཛད༌ཁན༌ནི༌ ལས༌གུན༌ བཅོ༌དགོས༌། ཚན༌ནི༌ མུན༌གྲིག༌གའང༌ སླེབ༌ཡིན༌ ནམ༌ སུ༌ཞིག༌གི༌ ལས༌ བཅོ༌ མི༌ཉན༌། 5 ནམ༌ཚག༌པ༌ ང༌ འཇིགས༌རྟེན༌ནི༌ ནང༌ང༌ ཡོད༌ ང༌ འཇིག༌རྟེན༌པ༌ མི༌གུན༌ནི༌ ཕིའ༌ འོད༌ ཡིན༌།" 6 ཏེ༌ཟུག༌ མོལ༌ཏེ༌ ཡེ༌ཤུའི༌ སའེ༌ཀ༌ ཐུ༌ ཕང༌ང༌ བཛདས༌, ཡང༌ ཏེ༌བོའ༌ ཀ༌ལག༌ བཅོའ༌ བཛད༌ཏེ༌ ཏེ༌ མི༌བོའེ༌ མིག༌ག༌ སྐུའ༌ བཛདས༌། 7 ཡང༌ ཁོའ༌, "སོང༌ཏེ༌ ཁྱོ༌རང༌ངི༌ མིག༌པོ༌ ཤི༌ལོ༌ཨམ༌མི༌ རྫིང༌ངི༌ ནང༌ང༌ ཁྲུས༌" མོལས༌ ༼ཤི༌ལོ༌ཨམ༌མི༌ ཏོན༌བོ༌ ཀལ༌ཅེས༌ལ༌ ཟེར༌ར༌ནོག༌།༽ ཏེ༌ནེ༌ ཏེ༌ མི༌བོ༌ སོང༌ཏེ༌ ཁོ༌རང༌ངི༌ མིག༌པོ༌ ཏེ༌ རྗིང༌བོའེ༌ ནང༌ང༌ ཁྲུས༌ ཡང༌ མིག༌ནེ༌ ཐོང༌ཡིན༌ ཁོ༌རང༌ངི༌ ཁང༌པ༌ ལོགས༌ཏེ༌ ཡོངས༌། 8 ཞ༌ར༌བོའེ༌ ཁྱིམ༌མཚེས༌གུན༌ དང༌ སྔོན༌ལ༌ ཁོ༌ ཞ༌ར༌ ལྩང༌ཁན༌ ཡོད༌ད༌ ཐོང༌ཁན༌གུན༌ནི༌ གཅིག༌ དང༌ གཅིག༌ག༌ འདྲིས༌, "ཁོ༌ ལམ༌མི༌ མཐའ༌མ༌ འདུགས༌ཏེ༌ ལྩང༌ཁན༌ནི༌ ཏེན༌ན༌ མི༌བོ༌ མན༌ནོག༌ག༌?།" 9 ཁ༌ཅིག༌གི༌, "ཏེན༌ན༌བོ༌ ཡིན༌ནོག༌" ཡང༌ གཞན༌ ཁ༌ཅིག༌གི༌, "མན༌ནོག༌, ཁོ༌ ཏེ༌ མི༌བོ༌ ཙོགས༌ཤིག༌ ཐོང༌འདུག༌" ཟེརས༌། ཡིན༌ནའང༌ ཏེ༌ མི༌བོའེ༌ ཨུ༌ཚུགས༌ བཏང༌ཡིན༌, "ང༌ ཏེན༌ན༌ ཞ༌ར༌བོ༌ ཡིན༌" ཟེརས༌། 10 ཏེ༌ མི༌གུན༌ནི༌ འདྲིས༌, "ཏེ༌ནེ༌ ཁྱོ༌རང༌ངི༌ མིག༌པོ༌ ཀ༌ཟུག༌གི༌ ཕན༌?།" 11 ཁོའེ༌ ལན༌ལ༌, "ཡེ༌ཤུ༌ ཟེར༌ཁན༌ནི༌ མི༌བོའེ༌ ངའེ༌ མིག༌གི༌ཀ༌ ཀ༌ལག༌ཞིག༌ སྐུའ༌ བཛད༌ཏེ༌ ཁྱོ༌རང༌ སོང༌ཏེ༌ ཤི༌ལོ༌ཨམ༌ རྫིང༌ངི༌ ནང༌ང༌ རང༌ངི༌ མིག༌པོ༌ ཁྲུས༌ མོལ༌པ༌ ང༌ སོང༌ཏེ༌ ངའེ༌ མིག༌པོ༌ ཏེ༌ རྫིང༌བོའེ༌ ནང༌ང༌ ཁྲུའ༌དང༌ ངའ༌ མིག༌ནེ༌ ཐོང༌" ཟེརས༌། 12 ཏེ༌ མི༌གུན༌ནི༌ འདྲིས༌, "ཏེ༌ མི༌བོ༌ ཀ༌ནེ༌ འདུག༌?།" ཁོའེ༌, "ང༌ རྒྱུས༌མེད༌" ཟེརས༌།
ཕ༌རུ༌ཤི༌པ༌གུན༌ནི༌ རྩར༌ཅོད༌ བཏངས༌།
13 ཏེ༌ནེ༌ ཏེ༌གུན༌ནི༌ སྐྱེས༌པ༌ནེ༌ ཕར༌ལ༌ ཞ༌ར༌ ཡོད༌ཁན༌ནི༌ མི༌བོ༌ ཕ༌རུ༌ཤི༌པ༌གུན༌ནི༌ཀ༌ ཁྲིད༌ཏེ༌ ཁྱོངས༌། 14 ཡེ༌ཤུའི༌ ཀ༌ལག༌ བཅོའ༌ བཛད༌ཏེ༌ ཞ༌ར༌བོའེ༌ མིག༌ ཕན༌ཅུག༌ག༌ བཛད༌ཁན༌ནི༌ ཞག༌པོ༌ ཤབ༌བད༌དི༌ ངལ༌ཚོའེ༌ ཞག༌ ཡིན༌པིན༌། 15 ཏེན༌ན༌བོའེ༌ཕིའ༌ ཕ༌རུ༌ཤི༌པ༌གུན༌ནིའང༌ ཏེ༌ མི༌བོའ༌ འདྲིས༌, "ཁྱོ༌རང༌ངི༌ མིག༌ནེ༌ ཀ༌ཟུག༌ག༌ ཐོང།" ཁོའེ༌ ལན༌ལ༌, "ཡེ༌ཤུའི༌ ངའེ༌ མིག༌གི༌ཀ༌ ཀ༌ལག༌ སྐུའ༌ བཛདས༌ ཡང༌ ངའེ༌ ཁྲུས༌ཏེ༌ སྟིང༌ནེ༌ ང༌ མིག༌ནེ༌ ཐོང༌" ཟེརས༌། 16 ཕ༌རུ༌ཤི༌པ༌གུན༌ནི༌ ཕྲོ༌ནེ༌ ཁ༌ཅིག༌གི༌ ཟེརས༌, "ཡེ༌ཤུ༌ ཟེར༌ཁན༌ནི༌ ཏེ༌ མི༌བོ༌ ནི༌ དཀོན༌མཆོག༌གི༌ ཆོགས༌ནེ༌ མན༌ནོག༌ བཅིའ༌ཟེར༌ན༌ ཁོའེ༌ ཤབ༌བད༌དི༌ བཀའ༌ཁྲིམས༌གུན༌ སྲུང༌ང༌ མི༌འདུག༌།" ཁ༌ཅིག༌གི༌, "སྡིག༌ཅན༌ ཞིག༌ག༌ འི༌ཙོགས༌སི༌ ཧ༌ལས༌ཤེས༌སི༌ བཛད༌པ༌ ཀ༌ཟུག༌གི༌ སྟན༌ ཉན༌ཡིན༌?" ཟེརས༌། ཏེ༌བོའེ༌ཕིའ༌ ཁོང༌གུན༌ནི༌ ནང༌ང༌ ཁག༌ བུད༌། 17 སྟིང༌ཇུག༌ག༌ ཏེ༌ མི༌གུན༌ནི༌ ཏེ༌ ཞ༌ར༌བོའ༌ ཡང༌ འདྲིས༌, "ཁྱོ༌རང༌ངི༌ མིག༌ ཕན༌ཅུག༌ཁན༌ནི༌ མི༌བོའེ༌ སྐོར༌ལ༌ ཁྱོ༌རང༌ངི༌ བཅི༌ སམ༌བ༌ ཡིན༌།" ཁོའེ༌ ལན༌ལ༌, "ཏན༌ཏན༌ ཁོང༌ ལུང༌སྟོན༌པ༌ ཞིག༌ ཡིན༌ནོག༌" ཟེརས༌། 18 ཡ༌ཧུ༌དཱ༌པ༌ དའུ༌སྐྱོང༌གུན༌ལ༌ འི༌ མི༌བོ༌ ཞ༌ར༌ ཡོད༌ཁན༌ ཡང༌ དག༌ས༌ ཐོང༌ ཟེར༌ཁན༌བོ༌ ཏ༌རུང༌ངའང༌ བདེན༌ མ༌ཆེས༌པ༌ ཁོའེ༌ ཕ༌མ༌གུན༌ལ༌ འབོད༌ཏེ༌ ཁྱོངས༌། 19 ཁོང༌གུན༌ནི༌ ཁོའེ༌ ཕ༌མ༌གུན༌ལ༌ འདྲིས༌, "འི༌བོ༌ ཁྱོ༌ཞའེ༌ བུ༌ཚ༌ ཡིན༌ན༌? བཅི༌ ཁོ༌ ཞ༌ར༌ སྐྱེས༌ས༌? ཏེ༌ནེ༌ ཁོའ༌ དག༌ས༌ ཀ༌ཟུག༌ག༌ ཐོང༌ཏེ༌ ཡིན༌ནོག༌?།" 20 ཕ༌མ༌གུན༌ནི༌ ལན༌ལ༌, "ཁོ༌ བདེན༌བ༌ ང༌ཞའེ༌ བུ༌ཚ༌ ཡིན༌ ཡང༌ ཁོ༌ སྐེ༌ ཟ༌ནེ༌ ཞ༌ར༌ ཡོད༌པིན༌། 21 ཡིན༌ནའང༌ དག༌ས༌ ཁོའ༌ ཀ༌ཟུག༌གི༌ ཐོང༌ ཡང༌ སུའི༌ ཁོའེ༌ མིག༌ ཕན༌ཅུགས༌ ང༌ཞའ༌ ཅའང༌ རྒྱུས༌ མེད༌, ཁོ༌རང༌ང འདྲིའ༌ བཛད༌། ཁོ༌ ཁོ༌རང༌ ལྡན༌ཁན༌ ཞིག༌ ཡིན༌པ༌ ཁོའེ༌ ཁོ༌རང༌ངི༌ ཕིའ༌ ཟེར༌ ཉན༌ན༌ནོག༌" ཟེརས༌། 22 ཁོའེ༌ ཕ༌མ༌གུན༌ནི༌ འི༌ཟུག༌ ཟེརས༌ བཅིའ༌ཟེར༌ན༌ ཁོང༌གུན༌ ཡ༌ཧུ༌དཱ༌པ༌ དའུ༌སྐྱོང༌གུན༌ལ༌ འཇིགས༌སད༌པིན༌། ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ སུ༌ཞིག༌གི༌ ཡེ༌ཤུའ༌ དཀོན༌མཆོག༌གི༌ འདམ༌མ༌ བཛད༌ཁན༌ནི༌ མ༌ཤི༌ཀ༌ ཡིན༌ནོག༌ ཟེར༌ཏེ༌ ཁས༌ལེན༌ བཅོ༌ན༌, ཏེ༌གུན༌ འདུ༌ཁང༌ངི༌ ཆོས༌ཚོགས༌སི༌ ཕྲོ༌ནེ༌ ཕིངས༌ བཏང༌ཡིན༌ ཟེར༌ཏེ༌ ཐག༌བཅད༌ཏེ༌ ཡིན༌པིན༌། 23 ཏེན༌ན༌བོའེ༌ཕིའ༌ ཁོའེ༌ ཕ༌མ༌གུན༌ནི༌, "ཁོ༌ ཁོ༌རང༌ ལྡན༌ཁན༌ ཞིག༌ ཡིན༌ནོག༌ ཁོ༌རང༌ང འདྲིའ༌ བཛད༌" ཟེརས༌། 24 ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ སྔོན༌ལ༌ ཞ༌ར༌ ཡོད༌ཁན༌ནི༌ མི༌བོའ༌ ལན༌ གཉིས༌པ༌ འབོད༌ཏེ༌ ཁྱོངས༌, ཡང༌ ཁོའ༌ ཟེརས༌, "ཁྱོ༌རང༌ང༌ དཀོན༌མཆོག༌གི༌ ནའ༌ ཀལ༌ལད༌ དྲང༌པོ༌ ཟེར༌། ང༌ཞའ༌ རྒྱུས༌ཡོད༌ ཏེ༌ མི༌བོ༌ སྡིག༌ཅན༌ཞིག༌ ཡིན༌ནོག༌།" 25 ཁོའེ༌ ལན༌ལ༌, "ཁོང༌ སྡིག༌ཅན༌ ཡིན༌ན༌ མན༌ ང༌ རྒྱུས༌མེད༌, ཡིན༌ནའང༌ སྤེ༌ར༌ གཅིག༌ ང༌ ཏན༌ཏན༌ ཤེས༌སད༌ ང༌ སྔོན༌ལ༌ ཞ༌ར༌ ཡིན༌པིན༌ དག༌ས༌ ང༌ ཐོང༌ངད༌" ཟེརས༌། 26 ཁོང༌གུན༌ནི༌ ཏེ༌ མི༌བོའ༌ ཡང༌སྐྱར༌ འདྲིས༌, "ཁོའེ༌ ཁྱོ༌རང༌ང༌ བཅི༌ བཅོས༌?། ཁྱོ༌རང༌ངི༌ མིག༌པོ༌ ཁོའེ༌ ཀ༌ཟུག༌ག༌ ཕན༌ཅུགས༌?།" 27 ཁོའེ༌ ལན༌ལ༌, "ངའེ༌ ཁྱོ༌ཞའ༌གུན༌ལ༌ སྔོན༌ལའང༌ ཟེར༌ཏེ༌ ཡིན༌པིན༌, ཡིན༌ནའང༌ ཁྱོ༌ཞའ༌གུན༌ནི༌ ཉན༌ན༌ མི༌འདུག༌། ཏ༌ ཏེན༌ན༌ སྤེ༌ར༌བོ༌ ཡང༌ ལྡབས༌ཏེ༌ ཉན༌ཉིན༌ རག༌ག༌?། བཅི༌ ཁྱོ༌ཞའ༌གུན༌ནའང༌ ཁོང༌ངི༌ སློབ༌ཕྲུག༌ རྒྱུར༌ཉིན༌ རག༌ག༌?" ཟེརས༌། 28 ཏེ༌ནེ༌ ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ ཁོ༌ ཁྲེལ༌བ༌ བཅོ༌ཡིན༌, "ཁྱོ༌རང༌ ཁོའེ༌ སློབ༌ཕྲུག༌ ཡིན༌ནོག༌། ང༌ཞའ༌ ནི༌ ལུང༌སྟོན༌པ༌ མོ༌ཟེས༌སི༌ སློབ༌ཕྲུག༌ ཡིན༌། 29 དཀོན༌མཆོག༌གི༌ ལུང༌སྟོན༌པ༌ མོ༌ཟེས༌ དང༌ ཞལ༌ཏ༌ སལ༌ཏེ༌ ཡིན༌ཁན༌བོ༌ ང༌ཞའ༌ ཤེས༌སད༌, ཡིན༌ནའང༌ འི༌ མི༌བོ༌ ཀ༌ནེ༌ ཡོངས༌ཏེ༌ ཡིན༌ ང༌ཞའ༌ ཅའང༌ རྒྱུས༌མེད༌" ཟེརས༌། 30 ཏེ༌ མི༌བོའེ༌ ལན༌ལ༌, "འི༌བོ༌ མ༌ ཡམ༌ཚན༌ རག༌། ཁྱོ༌ཞའ༌གུན༌ལ༌ ཁོང༌ ཀ༌ནེ༌ ཡོངས༌ཏེ༌ ཡིན༌ ཤེས༌ས༌ མེ༌རག༌, ཡིན༌ནའང༌ ཁོང༌ངི༌ ངའེ༌ མིག༌ ཕན༌ཅུག༌ག༌ བཛདས༌། 31 འི༌བོ༌ ཚང༌མའེ༌ ཤེས༌ས༌ནོག༌, དཀོན༌མཆོག༌གི༌ སྡིག༌ཅན༌གུན༌ལ༌ གསན༌ན༌ མན༌ནོག༌, ཡིན༌ནའང༌ དཀོན༌མཆོག༌གི༌ ཐུགས༌གོངས༌ ནང༌བཞིན༌ གྲུལ༌ཏེ༌ ཁོང༌ ཐུགས༌ཐད༌ ཅུགས༌ཁན༌གུན༌ལ༌ གསན༌ན༌ནོག༌། 32 སྐྱེས༌པ༌ནེ༌ ཕར༌ལ༌ ཞ༌ར༌ ཡིན༌ཁན༌ ཞིག༌ ཕན༌ཅུགས༌ས༌ བཛད༌ཁན༌ནི༌ སྐོར༌ལ༌ སུ༌ ཞིག༌གིའང༌ དག༌ས༌ ཙུག༌པ༌ ཚོར༌ཏེ༌ མ༌ནེ༌ མེད༌འགྲོ༌། 33 གལ༌ཏེས༌ འི༌ མི༌བོ༌ དཀོན༌མཆོག༌གི༌ ཆོགས༌ནེ༌ མན༌པིན༌ན༌ ཁོའ༌ ཅའང༌ བཅོ༌ཉན༌ཏེ༌ མེད༌འགྲོ༌" ཟེརས༌། 34 ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ ཟེརས༌, "ཁྱོ༌རང༌ སྐྱེས༌པ༌ནེ༌ ཕར༌ལ༌ སྡིག༌པའེ༌ གངས༌ཏེ༌ ཡོད༌། ང༌ཞའ༌གུན༌ལ༌ སླབ༌ཅེས༌སི༌ ཧམ༌པ༌ ཀ༌ཟུག༌གི༌ ཡོངས༌།" ཏེ༌ནེ༌ ཏེ༌གུན༌ནི༌ འི༌ མི༌བོ༌ འདུ༌ཁང༌ངི༌ ཆོས༌ཚོགས༌སི༌ ཕྲོ༌ནེ༌ ཕིངས༌ བཏངས༌།
སེམ༌ཉིད༌དི༌ ཐོག༌ནེ༌ ཞ༌ར༌།
35 ཡ༌ཧུ༌དཱ༌པའེ༌ འདུ༌ཁང༌ནེ༌ ཕི༌ལོག༌ག༌ ཕིངས༌བཏང༌ཁན༌ནི༌ མི༌བོའེ༌ སྐོར༌ལ༌ ཡེ༌ཤུའི༌ སནས༌། ཏེ༌ མི༌བོ༌ ཐོབ༌བ༌ཅིག༌ ཁོའ༌ འདྲིའ༌ བཛདས༌, "ཁྱོ༌རང༌ངི༌ མི༌རིགས༌སི༌བུའི༌ཀ༌ དད༌པ༌ བཅོའད༌ད༌?།" 36 ཁོའེ༌, "སྤོན༌བོ༌ལེ༌, ཁོང༌ སུ༌ ཡིན༌ནོག༌? འཇུ༌འཇུ༌ ངའ༌ ཤད༌ད༌ བཛད༌དའང༌། ངའེ༌ ཁོང༌ངི༌ཀ༌ ཡིད༌ཆེས༌ བཅོ༌ཉིན༌རག༌" ཞུས༌། 37 ཡེ༌ཤུའི༌ ཁོའ༌, "ཁྱོ༌རང༌ངི༌ ཁོ༌ ཐོངས༌ཏེ༌ ཡིན༌། ཁོའེ༌ དག༌ས༌ ཁྱོ༌རང༌ ཉམ༌པོ༌ སྤེ༌ར༌ བཏང༌འདུག༌" མོལས༌། 38 ཏེ༌ནེ༌ མི༌བོའེ༌ ཞུས༌, "ཀྱེ༌ གཙོ༌བོ༌། ངའེ༌ ཉེ༌རང༌ངི༌ཀ༌ དད༌པ༌ བཅོའད༌" ཡང༌ ཁོའེ༌ ཡེ༌ཤུའ༌ ཕྱག༌ཕུལས༌། 39 ཡེ༌ཤུའི༌ མོལས༌, "ཞ༌ར༌གུན༌ལ༌ ཐོང༌ཅུག༌ཅེས༌ ཡང༌ ཐོང༌ངད༌ སམ༌ཁན༌གུན༌ལ༌ ཐུགས༌ཉིད༌དི༌ ཐོགས༌ནེ༌ ཞ༌ར༌ ཡིན༌ཁན༌ སྟན༌ཏེ༌ འི༌ འཇིག༌རྟེན༌པ༌གུན༌ལ༌ ཤགས༌ བཅོ༌ཅེས༌སི༌ ཕིའ༌ ངའ༌ ཡོངས༌ཏེ༌ ཡིན༌།" 40 ཁོང༌ ཉམ༌པོ༌ ཡོད༌ཁན༌ནི༌ ཕ༌རུ༌ཤི༌པ༌ ཁ༌ཅིག༌གི༌ ཏེ༌བོ༌ ཚོར༌ཏེ༌ ཞུས༌, "ཅི༌, ང༌ཞའ༌གུན༌ནའང༌ ཞ༌ར༌ ཡིན༌ནོག༌ག༌?།" 41 ཡེ༌ཤུའི༌ མོལས༌, "གལ༌ཏེས༌ ཁྱོ༌ཞའ༌གུན༌ ཞ༌ར༌ ཡིན༌པིན༌ན༌ ཁྱོ༌ཞའ༌གུན༌ནི༌ ནང༌ང༌ སྐྱོན༌ ཐོང༌ཏེ༌ མེད༌འགྲོ༌། ཡིན༌ནའང༌ དག༌ས༌ ཁྱོ༌ཞའེ༌ ང༌ཞའ༌ མིག༌ནེ༌ ཐོང༌ངད༌ ཟེར༌པ༌ ཁྱོ༌ཞའེ༌ ནང༌ང༌ སྐྱོན༌གུན༌ ལུས༌ཏེ༌ ཡིན༌ནོག༌།"
སྐྱབ༌མགོན༌ ཡེ༌ཤུ༌ ནི༌ ལུག༌རྫི༌ བཟང༌པོ༌།
1 ཡེ༌ཤུའི༌ ཏ༌རུང༌ངའང༌ མོལས༌, "ངའེ༌ ཁྱོ༌ཞའ༌ བདེན༌བ༌ ཟེར༌རད༌, ལུག༌རའེ༌ ནང༌ང༌ སྒོ༌ནེ༌ མ༌ཡོང༌ང༌ གྱང༌ངི༌ ཀ༌ནེ༌ ཛགས༌ཏེ༌ ཡོང༌ཁན༌གུན༌ནི༌ རྐུན༌མ༌ དང༌ ཇག༌པ༌ གུན༌ ཡིན༌ནོག༌། 2 སྒོ༌ནེ༌ ཡོང༌ཁན༌ནི༌ མི༌བོ༌ ཏེ༌ ལུག༌གུན༌ནི༌ ལུག༌རྫི༌ ཡིན༌ནོག༌། 3 སྒོ༌སྲུང༌པའེ༌ ལུག༌རྫིའ༌ སྒོ༌ ཕེའ༌ནོག༌ ཡང༌ ལུག༌གུན༌ནི༌ ལུག༌རྫིའི༌ སྐད༌ ཚོར༌ཏེ༌ ངོ༌ཤེས༌ས༌ནོག༌། ལུག༌རྫིའི༌ ཁོ༌རང༌ངི༌ ལུག༌གུན༌ལ༌ རང༌རང༌ངི༌ མིང༌ འབོད༌ཡིན༌ ཏེ༌གུན༌ ཕི༌ལོག༌ག༌ ཁྲིད༌ཏེ༌ ཁྱེར༌ར༌ནོག༌། 4 ཁོའེ༌ རང༌ངི༌ ལུག༌ ཚང༌མ༌ ཕི༌ལོག༌ག༌ ཕིང༌ ཚར༌ར༌དང༌, ཁོ༌རང༌ ལུག༌གུན༌ནི༌ སང༌ སྔོན༌ལ༌ གྲུལ༌ཡིན༌ ཡང༌ ལུག༌གུན༌ ཁོའེ༌ སྟིང༌རང༌ནེ༌ ཡོང༌ཡིན༌ བཅིའ༌ཟེར༌ན༌ ཁོང༌གུན༌ནི༌ ཁོའེ༌ སྐད༌ ངོ༌ཤེས༌ས༌ནོག༌། 5 ཡིན༌ནའང༌ ཏེ༌ ལུག༌གུན༌ མི༌ཤེས༌ཁན༌ནི༌ མི༌ཞིག༌གི༌ རྒྱབ༌ནེ༌ མ༌ནེ༌ མི༌ཆ༌, མ༌ཚད༌ ཏེ༌ མི༌བོ༌ནེ༌ ཐག༌རིང༌ང༌ ཤོར༌ཏེ༌ ཆེན༌ བཅིའ༌ཟེར༌ན༌ ཁོང༌གུན༌ལ༌ མི༌ མ༌ཤེས༌ཁན༌ ཞིག༌གི༌ སྐད༌ ངོ༌ཤེས༌ས༌ མན༌ནོག༌།" 6 ཡེ༌ཤུའི༌ ཡ༌ཧུ༌དཱ༌པ༌ དའུ༌སྐྱོང༌གུན༌ལ༌ འི༌ སྤེ༌བོ༌ སལ༌ལ༌ བཛདས༌, ཡིན༌ནའང༌ ཁོང༌གུན༌ལ༌ ཁོང༌རང༌གུན༌ནི༌ སྐོར༌ལ༌ མོལ༌ཁན༌བོ༌ ཧ༌མ༌གོ༌། 7 ཏེན༌ན༌བོའེ༌ཕིའ༌ ཡེ༌ཤུའི༌ ཡང༌སྐྱར༌ ཏེ༌གུན༌ལ༌ མོལས༌, "ངའེ༌ ཁྱོ༌ཞའ༌ བདེན༌བ༌ ཟེར༌རད༌, ལུག༌རའེ༌ སྒོ༌བོ༌ ནི༌ ང༌རང༌ ཡིན༌། 8 ངའེ༌ སང༌ སྔོན༌ལ༌ ཡོངས༌ཁན༌ ཚང༌མ༌ ནི༌ རྐུན༌མ༌ དང༌ ཇག༌པ༌ གུན༌ ཡིན༌པིན༌, ཡིན༌ནའང༌ ངའེ༌ ལུག༌གུན༌ནི༌ ཏེ༌གུན༌ནི༌ ཟེར༌ཁན༌ལ༌ མ༌ཉནས༌། 9 སྒོ༌ ནི༌ ང༌ ཡིན༌, སུ༌ཞིག༌ ང༌ རྒྱུད༌ཏེ༌ ལུག༌རའེ༌ ནང༌ཀུག༌ག༌ ཞུགས༌ན༌, ཏེ༌གུན༌ལ༌ ཐར༌པ༌ ཐོབ༌ཡིན༌། ཏེ༌གུན༌ ཅའང༌ འཇིགས༌པ༌ མེད༌པ༌ ནང༌ང༌ ཡོང༌ཡིན༌, ཕི༌ལོག༌ག༌ ཆེན༌ ཡང༌ རྩཱ༌ཁའ༌ རྒྱལ༌ལ༌ ཐོབ༌ཡིན༌། 10 རྐུན༌མ༌ ནི༌ ངའེ༌ ལུག༌གུན༌ རྐུ༌ཅེས༌, བསད༌ཅེས༌ དང༌ མེད༌ཁན༌ བཅོ༌ཅེས༌སི༌ ཕིའ༌ ཡོང༌ང༌ནོག༌། ཡིན༌ནའང༌ ང༌ ནི༌ ཏེ༌གུན༌ལ༌ མཐའ༌མེད༌པའེ༌ མི༌ཚེ༌ དང༌ ཏེ༌བོ༌ ཆ༌ཚང༌ ཐོབ༌ཅེས༌སི༌ ཕིའ༌ འི༌ འཇིག༌རྟེན༌ནི༌ ནང༌ང༌ ཡོངས༌པིན༌། 11 ལུག༌རྫི༌ བཟང༌པོ༌བོ༌ ནི༌ ང༌རང༌ ཡིན༌ ཡང༌ ཁོའེ༌ ཁོ༌རང༌ངི༌ ལུག༌གུན༌ནི༌ ཕིའ༌ སྲོག༌ བཏང༌ང༌ནོག༌། 12 གླ༌པ༌ ཞིག༌ ལུག༌གུན༌ནི༌ དག༌པོ༌ མན༌པ༌, ཤང༌ཀུ༌ ཡོང༌ང༌ ཐོང༌ང༌དང༌ ཁོ༌ ཏེ༌ ལུག༌གུན༌ ཕངས༌ཏེ༌ ཤོར༌ར༌ནོག༌། ཏེ༌ནེ༌ ཤང༌ཀུ༌ ཡོངས༌ཏེ༌ ལུག༌གུན༌ ཐ༌ཡན༌ ཅུགས༌ཏེ༌ བསད༌ཡིན༌། 13 ཁོ༌ ཤོར༌ཏེ༌ ཆའ༌ནོག༌ བཅིའ༌ཟེར༌ན༌ ཁོ༌ གླ༌པ༌ ཞིག༌ ཡིན༌ནོག༌ ཡང༌ ལུག༌གུན༌ལ༌ བཅི༌ཆ༌ནའང༌ ཚེར༌ཁ༌ མ༌ནེ༌ མེད༌ཀྱག༌། 14 ང༌རང༌ གཅིག༌པོ༌ ལུག༌རྫི༌ བཟང༌པོ༌ ཡིན༌། ངའེ༌ ང༌རང༌ངི༌ ལུག༌གུན༌ རྒྱལ༌ལ༌ བཅོས༌ཏེ༌ ཤེས༌སད༌ ཡང༌ ཁོང༌གུན༌ནི༌ ང༌ རྒྱལ༌ལ༌ བཅོས༌ཏེ༌ ཤེས༌ས༌ནོག༌། 15 ཏེན༌ན༌དང༌ ཙོགས༌ལ༌ ཀ༌ཟུག༌ ཡབ༌བི༌ ང༌ ཤེས༌སད༌, ངེའང༌ ཡབ༌ ཤེས༌སད༌། ཡང༌ ངའེ༌ ལུག༌གུན༌ནི༌ ཕིའ༌ ང༌རང༌ངི༌ སྲོག༌ བཏང༌ཡིན༌། 16 ང༌ འི༌ ལུག༌ ཏུམ༌བུའེ༌ ཕྲོའ༌ མེད༌ཁན༌ནི༌ ཡང༌ ལུག༌ རིག༌གའང༌ ཡོད༌། ང༌ ཏེ༌གུན༌ནའང༌ ང༌རང༌ངི༌ ལུག༌ ཏུམ༌བུའེ༌ ནང༌ང༌ ཁྱོང༌ དགོས༌ཅེས༌ཡོད༌། ཏེ༌གུན༌ནིའང༌ ངའེ༌ སྐད༌ལ༌ ཉན༌ཡིན༌, ཏེ༌ནེ༌ ཏེ༌གུན༌ ལུག༌ ཏུམ༌བུའེ༌ གཅིག༌ རྒྱུར༌ཡིན ཡང༌ ཁོང༌གུན༌ལ༌ ལུག༌རྫི༌ གཅིག༌ ཡོང༌ཡིན༌། 17 ངའེ༌ ཡབ༌བི༌ ང༌ བྱམས༌པ༌ བཛད༌ཅེས༌སི༌ རྒྱུམ༌ཚན༌ ནི༌ ང༌རང༌ངི༌ སྲོག༌པོ༌ བཏང༌ཏེ༌ སྟིང༌ནེ༌ ཡང༌ ཏེ༌བོ༌ ལོགས༌ཏེ༌ ནེན༌ཅེས༌བོ༌ ཡིན༌། 18 སུ༌ཞིག༌གའང༌ ངའེ༌ སྲོག༌ ངའེ༌ ཀ༌ནེ༌ ལེན༌ མི༌ཉན༌, ང༌ ང༌རང༌ ཐད༌ཏེ༌ ང༌རི༌ སྲོག༌པོ༌ བཏང༌ངད༌། ང༌ འི༌བོ༌ བཏང༌ཅེས༌སི༌ དབང༌ ཡོད༌ ཡང༌ ལོགས༌ཏེ༌ ལེན༌ཅེས༌སི༌ དབང༌ངའང༌ ཡོད༌ བཅིའ༌ཟེར༌ན༌ འི༌ ཚང༌མ༌ བཅོ༌ཅེས༌སི༌ ཕིའ༌ ཡབ༌ དཀོན༌མཆོག༌གི༌ ང༌ བཀའ༌ སལ༌ལ༌ བཛད༌ཏེ༌ ཡོད༌།" 19 ཏེ༌ ཞལ༌ཏ༌གུན༌ནི༌ ཞས༌ཏེ༌ ཡ༌ཧུ༌དཱ༌པའེ༌ དའུ༌སྐྱོང༌གུན༌ནི༌ ནང༌ང༌ ཁག༌ བུད༌། 20 ཏེ༌ ཕྲོ༌ནེ༌ མང༌པོའེ༌, "ཁོའ༌ གོང༌པོ༌ ཞུགས༌ཏེ༌ སྙོས༌ཏེ༌ ཡིན༌ནོག༌། ཁོའ༌ བཅིའ༌ ཉན༌ནད༌?།" 21 ཡིན༌ནའང༌ གཞན༌ ཁ༌ཅིག༌གི༌, "འི༌ སྤེ༌ར༌གུན༌ནི༌ གོང༌ཞུགས༌ ཤིག༌གི༌ མན༌ནོག༌། གོང༌པོའེ༌ ཞ༌ར༌ ཞིག༌ག༌ མིག༌ནེ༌ ཐོང༌ཅུག༌ ཉན༌ན༌ནོག༌ག༌? མ༌ནེ༌ ཉན༌ན༌ མན༌ནོག༌" ཟེརས༌།
ཡ༌ཧུ༌དཱ༌པ༌གུན༌ནི༌ གཙོ༌བོ༌ ཡེ༌ཤུའི༌ཀ༌ དད༌པ༌ མ༌ཁྱོངས༌།
22 ཏེ༌ནེ༌ ཡེ༌རུ༌ཤ༌ལེམ༌མི༌ ནང༌ང༌ ཁོང༌གུན༌ནི༌ ཕ༌མེས༌པོ༌གུན༌ནི༌ མཆོད༌ཁང༌ངི༌ མག༌ལྡན༌ བོར༌ཁན༌ནི༌ དུས༌ཆེན༌ནི༌ ཞག༌ རྩི༌ཅེས༌སི༌ དུས༌ སླེབ༌, ཡང༌ འི༌བོ༌ དགུན༌ དུས༌ ཡིན༌པིན༌། 23 ཡེ༌ཤུའི༌ མཆོད༌ཁང༌ངི༌ ནང༌ང༌ སོ༌ལོ༌མོན༌ནི༌ གཡབས༌ ཟེར༌ཁན༌ནི༌ཀ༌ ཞབ༌གྲུལ༌ བཛད༌དད༌པིན༌། 24 ཡ༌ཧུ༌དཱ༌པ༌གུན༌ནི༌ ཁོང༌ང༌ འཁོར༌ཏེ༌, "ནམ༌ཚག༌པ༌ ང༌ཞའ༌གུན༌ ཐེ༌ཚོམས༌སི༌ ནང༌ང༌ བོར༌རད༌། ཁྱོ༌རང༌ དཀོན༌མཆོག༌གི༌ འདམ༌མ༌ བཛད༌ཁན༌ནི༌ མ༌ཤི༌ཀ༌བོ༌ ཡིན༌ན༌? ང༌ཞའ༌ སལ༌པོ༌ ཤོད༌དང༌" ཞུས༌། 25 ཡེ༌ཤུའི༌ ཏེ༌གུན༌ནི༌ ལན༌ལ༌, "ངའེ༌ ཁྱོ༌ཞའ༌གུན༌ལ༌ ཤད༌ ཚར༌ཏེ༌ ཡིན༌ ཡིན༌ནའང༌ ཁྱོ༌ཞའེ༌ བདེན༌ཤེས༌ས༌ མི༌འདུག༌། ངའེ༌ རང༌ངི༌ ཡབ༌བི༌ དབང༌ངི༌ ནང༌ང༌ བཅོ༌ཁན༌ནི༌ ཧ༌ལས༌ཤེས༌སི༌ ལས༌གུན༌ནི༌ ངའེ༌ ཕིའ༌ སྤང༌པོ༌ བཏང༌ང༌ནོག༌། 26 ཡིན༌ནའང༌ ཁྱོ༌ཞའ༌གུན༌ ངའེ༌ཀ༌ བདེན༌ཤེས༌ས༌ མི༌འདུག༌ བཅིའ༌ཟེར༌ན༌ ཁྱོ༌ཞའ༌ ངའེ༌ ལུག༌ མན༌ནོག༌། 27 ངའེ༌ ལུག༌གུན༌ནི༌ ངའེ༌ སྐད༌པོ༌ ཉན༌ནད༌ ཡང༌ ང༌ ཁོང༌གུན༌ ཤེས༌སད༌། ཁོང༌གུན༌ ངའེ༌ རྒྱབ༌ནེ༌ ཡོང༌ངད༌། 28 ངའེ༌ ཁོང༌གུན༌ལ༌ མཐའ༌མེད༌པའེ༌ མི༌ཚེ༌ བཏང༌ཡིན༌ ཡང༌ ཁོང༌གུན༌ ཉལ༌བའེ༌ ནང༌ང༌ མ༌ནེ༌ མི༌ཕང༌། སུ༌ཞིག༌གིའང༌ ཁོང༌གུན༌ ངའེ༌ ལག༌ནེ༌ ཀོགས༌ཏེ༌ ཁྱེར༌ མི༌ཉན༌། 29 འི༌ ལུག༌གུན༌ ངའེ༌ ལག༌ག༌ སྟད༌ད༌ བཛད༌ཁན༌ནི༌ ངའེ༌ ཡབ༌ ཚང༌མའེ༌ སང༌ ཆེ༌ཤོག༌བོ༌ ཞུགས༌ཏེ༌ ཡིན༌། སུ༌ ཞིག༌གིའང༌ ངའེ༌ ཡབ༌བི༌ ལག༌ནེ༌ ཁོང༌གུན༌ ཀོགས༌ཏེ༌ ཁྱེར༌ མི༌ཉན༌། 30 ང༌ དང༌ ཡབ༌ གཉིས༌ཀོ༌ གཅིག༌ ཡིན༌" མོལས༌། 31 ཡང༌སྐྱར༌ ཡ༌ཧུ༌དཱ༌པ༌གུན༌ནི༌ ཁོང༌ང༌ རྡོ༌ རྒྱབས༌ཏེ༌ བསད༌ཅེས༌སི༌ ཕིའ༌ རྡོའ༌ ཁུརས༌། 32 ཡིན༌ནའང༌ ཡེ༌ཤུའི༌ ཏེ༌ མི༌གུན༌ལ༌, "ངའེ༌ རང༌ངི༌ ཡབ༌བི༌ ཆོགས༌ནེ༌ ཧ༌ལས༌ཤེས༌སི༌ ལས༌ མང༌པོ༌ སྟན༌པིན༌, ཏེ༌གུན༌ནི༌ ནང༌ནེ༌ ཀ༌ ལས༌པོའེ༌ ཕིའ༌ ང༌ རྡོ༌ རྒྱབས༌ཏེ༌ བསད༌ཅེས༌ བཅོའད༌?" མོལས༌། 33 ཡ༌ཧུ༌དཱ༌པ༌གུན༌ནི༌ ཁོང༌ང༌ ལན༌ལ༌, "ང༌ཞའེ༌ ཁྱོ༌རང༌ངི༌ ཧ༌ལས༌སེས༌སི༌ ལས༌གུན༌ནི༌ ཕིའ༌ མན༌པ༌, ཁྱོ༌རང༌ མི༌ ཡིན༌ཡིན༌ནའང༌ རང༌དང༌རང༌ དཀོན༌མཆོག༌ ཡིན༌ ཟེར༌ཡིན༌ དཀོན༌མཆོག༌ག༌ དད༌ལོག༌ ཞུས༌ཁན༌བོའེ༌ ཕིའ༌ རྡོ༌ རྒྱབས༌ཏེ༌ བསད༌དད༌" ཟེརས༌། 34 ཡེ༌ཤུའི༌ ཏེ༌ མི༌གུན༌ལ༌, "ཁྱོ༌ཞའ༌གུན༌ནི༌ བཀའ༌ཁྲིམས༌སི༌ སྤེ༌ཆའེ༌ ནང༌ང༌ དཀོན༌མཆོག༌གི༌ འི༌ཟུག༌ མོལ༌ལ༌ བཛད༌ཏེ༌ མི༌འདུག༌ག༌?, 'ངའེ༌ ཟེར༌རད༌ ཁྱོ༌ཞའ༌གུན༌ དཀོན༌མཆོག༌གུན༌ ཡིན༌།' 35 གལ༌ཏེས༌ དཀོན༌མཆོག༌གི༌ བཀའ༌ ཐོབ༌ཁན༌ནི༌ མི༌གུན༌ལ༌ དཀོན༌མཆོག༌གུན༌ མོལ༌ལད༌ན༌, ༼ཡང༌ དམ༌པའེ༌ གསུང༌རབས༌ མ༌ནེ༌ རྒྱུར༌ མི༌ཉན༌ཅེས༌བོ༌ ཁྱོ༌ཞའ༌ རྒྱུས༌ཡིན༌ནོག༌༽ 36 ཏེ༌ནེ༌ བཅིའ༌ ངའེ༌ 'ང༌ དཀོན༌མཆོག༌གི༌ བུ༌ཚ༌ ཡིན༌' ཟེར༌ཁན༌བོའ༌ དཀོན༌མཆོག༌གི༌ དད༌ལོག༌ ཞུས༌ཏེ༌ ཡིན༌ནོག༌ ཟེར༌རད༌?། ཀ༌བོའ༌ ཡབ༌བི༌ ཁོང༌ངི༌ ཕྱག༌ལས༌ བཅོ༌ཅེས༌ལ༌ སྐོའ༌ བཛད༌ཏེ༌ འི༌ འཇིག༌རྟེན༌ནི༌ ནང༌ང༌ ཀལ༌ལ༌ བཛདས༌། 37 གལ༌ཏེས༌ ངའེ༌ ང༌རང༌ངི༌ ཡབ༌བི༌ ལས༌བོ༌ མ༌བཅོ༌ན༌ ཏེ༌ནེ༌ ངའེ༌ཀ༌ ཡིད༌ མ༌ཆེས༌ཤིག༌། 38 གལ༌ཏེས༌ ངའེ༌ ཏེ༌གུན༌ བཅོས༌ཏེ༌ ཁྱོ༌ཞའེ༌ ངའེ༌ཀ༌ ཡིད༌ མ༌ཆེས༌ནའང༌ ཏེ༌ ཧ༌ལས༌ཤེས༌སི༌ བཛད༌པ༌གུན༌ནི༌ཀ༌ཏ༌ ཡིད༌ཆེས༌ བཅོས༌སའང༌, ཀ༌བོའེ༌ ངའེ༌ ཡབ༌ ངའེ༌ ནང༌ང༌ ཡང༌ ང༌ ཡབ༌བི༌ ནང༌ང༌ ཡིན༌ཁན༌བོ༌ ཁྱོ༌ཞའ༌ རྒྱུས༌སོང༌ཏེ༌ ཧ༌གོ༌ ཐུབ༌ཡིན༌།" 39 ཏེ༌ མི༌གུན༌ནི༌ ཁོང༌ ཡང༌ ཟུམ༌ཅེས༌ བཅོས༌, ཡིན༌ནའང༌ ཁོང༌ ཏེ༌གུན༌ནི༌ ལག༌ནེ༌ ཤོར༌ཉན༌། 40 ཏེ༌ སྟིང༌ནེ༌ ཡེ༌ཤུ༌ ཡང༌ ཡོར༌དཱན༌ནི༌ གཙངས༌པོའེ༌ ཕར༌ཁའ༌ ཏེ༌ ནས༌ས༌བོའེ༌ཀ༌ ལོགས༌ཏེ༌ སྐྱོདས༌, ཀ༌རུ༌ ཡོ༌ཧཱ༌ནན༌ནི༌ གོ༌མའེ༌ ཞག༌གུན༌ལ༌ ཁྲུས༌ བཏང༌ངད༌པིན༌ ཡང༌ ཏེ༌རུ༌ ཞུགས༌། 41 མི༌ མང༌པོ༌ ཞིག༌ ཁོང༌ ཡོད༌ས༌ ཡོངས༌ཏེ༌ གཅིག༌ དང༌ གཅིག༌ག༌ ཟེརས༌, "ཡོ༌ཧཱ༌ནན༌ནི༌ ཧ༌ལས༌སི༌ བཛད༌པ༌ མ༌ནེ༌ མ༌སྟནས༌, ཡིན༌ནའང༌ ཁོང༌ངི༌ འི༌ མི༌བོའེ༌ སྐོར༌ལ༌ མོལ༌ཁན༌ ཚང༌མ༌ དྲང༌པོ༌ ཡིན༌ནོག༌།" 42 ཡང༌ ཏེ༌རུ༌ མི༌ མང༌པོ༌ ཞིག༌གི༌ ཁོང༌ངི༌ཀ༌ དད༌པ༌ ཁྱོངས༌།
ལ༌ཟར༌རས༌ གསོན༌ཏེའ༌ ལང༌ང༌ བཛདས༌།
1 ཏ༌ ལ༌ཟར༌རས༌ ཟེར༌ཁན༌ནི༌ མི༌ཞིག༌ག༌ ཟུ༌མོ༌ ཡོངས༌ཏེ༌ ཡོད༌པིན༌། ཁོ༌ དང༌ ཁོའེ༌ ཨ༌ཅེ༌ གཉིས༌ཀོ༌ མིར༌ཡམ༌ དང༌ མར༌ཐཱ༌ གུན༌ བེད༌ཐཱ༌ནི༌ གྲོང༌ཁྱེར༌ནེ༌ ཡིན༌པིན༌། 2 མིར༌ཡམ༌ ཏེན༌ན༌ བུ༌མོ༌བོ༌ ཡིན༌ནོག༌, ཀ༌བོའེ༌ སྟིང༌ནེ༌ གཙོ༌བོ༌ ཡེ༌ཤུའི༌ ཞབས༌ལ༌ ཨ༌ཏིར༌ ལུགས༌ཏེ༌ ཁོ༌རང༌ངི༌ སྲ༌ ཉམ༌པོ༌ ཕིས༌། ཁོའེ༌ མིང༌བོ༌ ཆུ༌ངུན༌ ལ༌ཟར༌རས༌ལ༌ ཟུ༌མོ༌ ཡོད༌པིན༌། 3 ཏེ༌བོའེ༌ཕིའ༌ སྲིང༌མོ༌ གཉིས༌ཀོའེ༌ ཡེ༌ཤུའ༌, "གཙོ༌བོ༌ལེ༌, ཉེ༌རང༌ངི༌ བྱམས༌པ༌ བཛད༌ཁན༌ནི༌ ལ༌ཟར༌རས༌ལ༌ ཟུ༌མོ༌ སྲན༌ཏེ༌ འདུག༌" ཞུས༌ཏེ༌ ཞུ༌ལོན༌ ཀལས༌། 4 གཙོ༌བོ༌ ཡེ༌ཤུའི༌ ཏེ༌བོ༌ གསན༌ན༌དང༌ མོལས༌, "འི༌ ཟུ༌མོ༌བོ༌ ཤི༌ཅེས༌སི༌ ཟུ༌མོ༌ མན༌ནོག༌། འི༌བོ༌ དཀོན༌མཆོག༌གི༌ སྤལ༌ལི༌ ཕིའ༌ ཡིན༌ནོག༌, ཀ༌བོ༌ རྒྱུད༌ཏེ༌ ཁོང༌ངི༌ སྲས༌ལའང༌ སྤལ༌ ཐོབ༌ཡིན༌།" 5 ཡེ༌ཤུའི༌ མར༌ཐཱ༌, ཁོའེ༌ ནོ༌མོ༌ དང༌ ལ༌ཟར༌རས༌ལ༌ བྱམས༌པ༌ བཛད༌དད༌པིན༌། 6 ལ༌ཟར༌རས༌ལ༌ ཟུ༌མོ༌ ཡོད༌ཁན༌ནི༌ གནས༌ཚུལ༌ གསན༌ཏེའང༌ ཁོང༌ མ༌སྐྱོད༌ད༌, ཏེན༌ན༌རུ༌ ཡང༌ ཞག༌མ༌ གཉིས༌ ཞུགས༌། 7 ཏེ༌ སྟིང༌ནེ༌ ཁོང༌ངི༌ སློབ༌ཕྲུག༌གུན༌ལ༌, "ང༌དང༌གུན༌ ལོགས༌ཏེ༌ ཡ༌ཧུ༌དཱ༌ ཆེན༌" མོལས༌། 8 ཡིན༌ནའང༌ སློབ༌ཕྲུག༌གུན༌ནི༌, "སློབ༌དཔོན༌ལེ༌, ཞག༌ ཁ༌ཅིག༌གི༌ སྔོན༌ལ༌ ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ ཉེ༌རང༌ རྡོ༌ རྒྱབས༌ཏེ༌ བསད༌ཅེས༌ བཅོས༌, ཏེ༌ནེའང༌ ཉེ༌རང༌ ཏེ༌རུ༌ སྐྱོད༌དད༌ད༌?" ཞུས༌། 9 གཙོ༌བོ༌ ཡེ༌ཤུའི༌ ལན༌ལ༌, "ཉི༌མའེ༌ ཆུ༌ཚོད༌ བཅུ༌གཉིས༌པོ༌ འོད༌ མེད༌ཀྱག༌ག༌?། ཉི༌མའེ༌ འོད༌དི༌ ནང༌ང༌ གྲུལ༌ཁན༌ནི༌ མི༌གུན༌ རྡོའེ༌ཀ༌ གག༌ རྒྱབས༌ཏེ༌ འགྱེལ༌ལ༌ མན༌ནོག༌ བཅིའ༌ཟེར༌ན༌ འཇིག༌རྟེན༌ནི༌ ནང༌ང༌ ཡོད༌ཁན༌ནི༌ འོད༌དི༌ ཁོང༌ང༌ ཐོང༌ ཐུབ༌བ༌ནོག༌། 10 ཡིན༌ནའང༌ ཚན༌ནི༌ མུན༌གྲིག༌གི༌ ནང༌ང༌ གྲུལ༌ ཟ༌ནེ༌ ཁོ༌ གག༌ རྒྱབས༌ཏེ༌ འགྱེལ༌ལ༌ནོག༌ བཅིའ༌ཟེར༌ན༌ ཁོའ༌ ཐོང༌ཅེས༌སི༌ ཕིའ༌ འོད༌ མེད༌པ༌ ཡིན༌ནོག༌།" 11 འི༌ ཞལ༌ཏ༌གུན༌ནི༌ སྟིང༌ནེ༌, གཙོ༌བོ༌ ཡེ༌ཤུའི༌ རང༌ངི༌ སློབ༌ཕྲུག༌གུན༌ལ༌ མོལས༌, "ང༌དང༌གུན༌ནི༌ མཛ༌འོ༌ ལ༌ཟར༌རས༌ ཉིད༌ལ༌ སོང༌དོག༌, ཡིན༌ནའང༌ ང༌ ཏེ༌རུ༌ ཁོའ༌ ཉིད༌ཚད༌ད༌ལ༌ ཆའད༌།" 12 ཁོང༌ངི༌ སློབ༌ཕྲུག༌གུན༌ནི༌ ཡེ༌ཤུའ༌, "གཙོ༌བོ༌ལེ༌, གལ༌ཏེས༌ ཁོ༌ ཉིད༌ལ༌ སོང༌ཏེ༌ ཡོད༌ན༌ ཁོའེ༌ ཟུ༌མོ༌ནེ༌ ཁོ༌ ཕན༌ན༌ནོག༌" ཞུས༌། 13 ཡེ༌ཤུའི༌ ཁོ༌ ཤི༌ཁན༌ནི༌ སྐོར༌ལ༌ མོལ༌ཏེ༌ ཡིན༌པིན༌, ཡིན༌ནའང༌ ཁོང༌ངི༌ སློབ༌ཕྲུག༌གུན༌ནི༌ ཁོ༌ བདེན༌བའ༌ ཉིད༌ལ༌ སོང༌ཏེ༌ ཡིན༌ཀྱག༌ སམ༌། 14 གཙོ༌བོ༌ ཡེ༌ཤུའི༌ ཁོང༌གུན༌ལ༌ སལ༌པོ༌ དང༌ ཤད༌ད༌ བཛདས༌, "ལ༌ཟར༌རས༌ ཤི༌ཏེ༌ ཡིན༌ནོག༌, 15 ཡིན༌ནའང༌ ཁྱོ༌ཞའ༌གུན༌ལ༌ ངའེ༌ཀ༌ དད༌པ༌ བཅོ༌ཅེས༌སི༌ ཕིའ༌ ཁོ༌ ཤི༌ ཟ༌ནེ༌ ང༌ ཁོ༌ ཉམ༌པོ༌ ཏེ༌རུ༌ མེད༌པ༌ མ༌ ཐད༌པོ༌ རག༌། ཏ༌ ང༌དང༌གུན༌ ཁོ༌ ཡོད༌ས༌ ཆེན༌།" 16 སློབ༌ཕྲུག༌གུན༌ནི༌ ཕྲོ༌ནེ༌ ཐོ༌མཱས༌སི༌ ༼ཀ༌བོའ༌ ཚག༌ཕྲུག༌འང༌ ཟེར༌རད༌པིན༌༽ གཞན༌མ༌ སློབ༌ཕྲུག༌གུན༌ལ༌, "ཡོང༌ཤིག༌ ང༌དང༌གུན༌ནའང༌, ང༌དང༌ངི༌ སློབ༌དཔོན༌ལེ༌ ཉམ༌པོ༌ ཤིའ༌ལ༌ ཆེན༌" ཟེརས༌།
མཐའ༌མེད༌པའེ༌ མི༌ཚེ༌ སྐྱབ༌མགོན༌ ཡེ༌ཤུ༌ནེ༌ ཐོབ༌ཡིན༌།
17 གཙོ༌བོ༌ ཡེ༌ཤུ༌ དང༌ ཁོང༌ངི༌ སློབ༌ཕྲུག༌གུན༌ བེད༌ཐཱ༌ནི༌ གྲོང༌ཁྱེར༌རི༌ ཉེ༌མོའ༌ སླེབ༌བ༌དང༌, ལ༌ཟར༌རས༌ ཤི༌ཏེ༌ སྤུར༌ཁང༌ངི༌ ནང༌ང༌ བོར༌ཏེ༌ ཞག༌ བཞི༌ སོང༌ཏེ༌ ཡིན༌ཁན༌བོ༌ ཡེ༌ཤུའ༌ རྒྱུས༌ སྐྱོད༌། 18 བེད༌ཐཱ༌ནི༌ གྲོང༌ཁྱེར༌བོ༌ ནི༌ ཡེ༌རུ༌ཤ༌ལེམ༌ནེ༌ ཀི༌ལོ༌མི༌ཀྲར༌ གསུམ༌མི༌ ཐག༌རིང༌ང༌ ཡོད༌ཏེ༌ ཡིན༌པིན༌། 19 ཡང༌ ཡ༌ཧུ༌དཱ༌པ༌ མང༌པོ༌ ཞིག༌ མར༌ཐཱ༌ དང༌ མིར༌ཡམ༌ གཉིས༌ཀོའེ༌ མིང༌བོ༌ ཤི༌ཁན༌བོའེ༌ ཕིའ༌ གསེམ༌སོ༌ བཏང༌ཅེས༌ལ༌ ཡོངས༌ཏེ༌ ཡོད༌པིན༌། 20 མར༌ཐཱའེ༌ ཡེ༌ཤུ༌ སྐྱོད༌འདུག༌ ཟེར༌ཏེ༌ ཚོར༌ར༌དང༌ ཁོ༌ ཡེ༌ཤུ༌ མཇལ༌ལ༌ལ༌ ཕི༌ལོག༌ག༌ སོང༌, ཡིན༌ནའང༌ མིར༌ཡམ༌ ནང༌ང༌ འདུགས༌། 21 མར༌ཐཱའེ༌ ཡེ༌ཤུའ༌, "གཙོ༌བོ༌ལེ༌, གལ༌ཏེས༌ ཉེ༌རང༌ འི༌ཀ༌ ཡོད༌པིན༌ན༌ ངའེ༌ ནོ༌ མ༌ཤིའ༌ ཡོད༌འགྲོ༌། 22 ཏེ༌ནེའང༌ ང༌ རྒྱུས༌ཡོད༌, ཉེ༌རང༌ངི༌ བཅི༌ཞིག༌ དཀོན༌མཆོག༌ག༌ ཞུ༌ནའང༌ ཁོང༌ངི༌ སལ༌ལ༌ བཛད༌ད༌ནོག༌" ཞུས༌། 23 ཡེ༌ཤུའི༌ ཁོའ༌, "ཁྱོ༌རང༌ངི༌ ནོ༌ ཡང༌སྐྱར༌ གསོན༌ཏེའ༌ ལང༌ཡིན༌" མོལས༌། 24 མར༌ཐཱའེ༌ ལན༌ལ༌, "ང༌ རྒྱུས༌ཡོད༌ལེ༌, མཐའ༌མའེ༌ ཞག༌ག༌ ཤི༌ཁན༌གུན༌ གསོན༌ཏེའ༌ ལང༌ངི༌ དུས༌ལ༌, ཁོའང༌ གསོན༌ཏེའ༌ ལང༌ཡིན༌" ཞུས༌། 25 གཙོ༌བོ༌ ཡེ༌ཤུའི༌ ཁོའ༌ མོལས༌, "ང༌ ནི༌ ཤི༌ཁན༌གུན༌ གསོན༌ཏེའ༌ ལངས༌ཁན༌ དང༌ མཐའ༌མེད༌པོའེ༌ མི༌ཚེ༌ བཏང༌ཁན༌བོ༌ ཡིན༌། སུ༌ཞིག༌གི༌ ངའེ༌ཀ༌ དད༌པ༌ བཅོ༌ན༌ ཤི༌ཏེའང༌ གསོན༌ཏེའ༌ ལུས༌ཡིན༌, 26 ཡང༌ གསོན༌ཏེའ༌ ཡོད༌ཁན༌གུན༌ནི༌ ངའེ༌ཀ༌ དད༌པ༌ བཅོའད༌ན༌ མ༌ནེ༌ མི༌ཤི༌། ཁྱོ༌རང༌ངི༌ ཏེ༌བོའེ༌ཀ༌ ཡིད༌ཆེས༌ བཅོའད༌ད༌?།" 27 མར༌ཐཱའེ༌, "འོ༌ན༌ གཙོ༌བོ༌ལེ༌, ངའེ༌ དད༌པ༌ བཅོའད༌, ཉེ༌རང༌ དཀོན༌མཆོག༌གི༌ འདམ༌མ༌ བཛད༌ཁན༌ནི༌, འི༌ འཇིག༌རྟེན༌ལ༌ སྐྱོད༌ཅེས༌ཅན༌ནི༌ མ༌ཤི༌ཀ༌ དཀོན༌མཆོག༌གི༌ སྲས༌ ཞུགས༌ཏེ༌ ཡིན༌ནོག༌" ཟེརས༌། 28 ཏེ༌བོ༌ ཟེར༌ཏེ༌ སྟིང༌ནེ༌ ཁོ༌ ལོགས༌ཏེ༌ སོང༌, ཡང༌ མིར༌ཡམ༌ སོ༌སོའ༌ འབོད༌ཏེ༌, "སློབ༌དཔོན༌ནི༌ འི༌ཀ༌ སྐྱོད༌ཏེ༌ འདུག༌། ཁྱོ༌རང༌ང༌ འབོད༌ད༌ བཛད༌འདུག༌" ཟེརས༌། 29 མིར༌ཡམ༌མི༌ ཏེ༌བོ༌ ཚོར༌ར༌དང༌, ཀོའག༌ ལངས༌ ཡང༌ རྒྱུགས༌ཏེ༌ ཡེ༌ཤུ༌ མཇལ༌ལ༌ སོང། 30 ཡེ༌ཤུ༌ ཏ༌རུང༌ གྲོང༌ཁྱེར༌རི༌ ནང༌ང༌ མ༌སླེབ༌བ༌ ཏེན༌ན༌ ནས༌ས༌བོའེ༌ཀ༌ ཞུགས༌ཏེ༌ ཡོད༌པིན༌ ཀ༌རུ༌, མར༌ཐཱ༌ ཁོང༌ང༌ མཇལ༌ལ༌ ཡོངས༌། 31 ཁང༌པའེ༌ ནང༌ང༌ མིར༌ཡམ༌མ༌ གསེམ༌སོ༌ བཏང༌ང༌ འདུགས༌ཏེ༌ ཡོད༌ཁན༌གུན༌ནི༌ མིར༌ཡམ༌ ཀོའག༌ ལངས༌ཏེ༌ ཕི༌ལོག༌ག༌ ཆའ༌ ཐོངས༌པ༌, ཁོང༌གུན༌ནའང༌ ཉམ༌པོ༌ ལངས༌ཏེ༌ ཁོའེ༌ སྟིང༌རང༌ནེ༌ སོང༌། བཅིའ༌ཟེར༌ན༌ ཏེ༌གུན༌ནི༌ མིར༌ཡམ༌ སྤུར༌ཁང༌ང༌ ངུའ༌ལ༌ སོང༌ཏེ༌ ཡིན༌ནོག༌ སམ༌། 32 མིར༌ཡམ༌ གཙོ༌བོ༌ ཡེ༌ཤུ༌ ཞུགས༌ཏེ༌ ཡོད༌ས༌ སླེབ༌བ༌དང༌, ཡེ༌ཤུའ༌ ཐོང༌ཏེ༌ ཁོང༌ངི༌ ཞབས༌སི༌ དུན༌ལ༌ འགྱེལ༌ ཡང༌ ཞུས༌, "གཙོ༌བོ༌ལེ༌, གལ༌ཏེས༌ ཉེ༌རང༌ འི༌རུ༌ ཞུགས༌ཏེ༌ ཡོད༌པིན༌ན༌ ངའེ༌ ནོ༌བོ༌ མ༌ཤིའ༌ ཡོད༌འགྲོ༌བ༌" ཞུས༌། 33 གཙོ༌བོ༌ ཡེ༌ཤུའི༌ མིར༌ཡམ༌ དང༌ ཁོ༌ ཉམ༌པོ༌ ཡོད༌ཁན༌ནི༌ ཡ༌ཧུ༌དཱ༌པ༌ མི༌གུན༌ ངུའ༌ གཟིགས༌ཏེ༌ ཐུགས༌སྐྱོ༌མོ༌ སྐྱོདས༌ 34 ཡང༌ ཁོང༌གུན༌ལ༌, "ལ༌ཟར༌རས༌ ཀ༌རུ༌ བོར༌ཏེ༌ ཡོད༌" མོལས༌། ཏེ༌ མི༌གུན༌ནི༌, "གཙོ༌བོ༌ལེ༌, ང༌ཞའ༌ ཉམ༌པོ༌ སྐྱོད༌ཏེ༌ ཉེ༌རང༌ རང༌ངི༌ གཟིགས༌" ཞུས༌། 35 ཡེ༌ཤུ༌ ཤུམ༌ས༌ བཛདས༌། 36 ཏེ༌ནེ༌ ཡ༌ཧུ༌དཱ༌པ༌གུན༌ནི༌, "ལྟོས༌ཤིག༌, ཁོང༌ངི༌ ཁོའ༌ ཙམ༌ཞིག༌ གཅེས༌པ༌ བཅོའ༌ བཛད༌འདུག༌" ཟེརས༌། 37 ཡིན༌ནའང༌ ཏེ༌ ཕྲོ༌ནེ༌ ཁ༌ཅིག༌གི༌ ཟེརས༌, "ཁོང༌ངི༌ ཞ༌རའ༌ མིག༌ནེ༌ ཐོང༌ ཅུག༌གད༌ན༌ ལ༌ཟར༌རས༌ ཤི༌ཅེས༌ནེ༌ སྐྱོབ༌ མི༌ཉན༌ན༌?།"
སྐྱབ༌མགོན༌ ཡེ༌ཤུའི༌ ལ༌ཟར༌རས༌ གསོན༌ཏེའ༌ ལང༌ང༌ བཛདས༌།
38 གཙོ༌བོ༌ ཡེ༌ཤུ༌ མ༌ ཐུགས༌ཚེར༌ ཆེན༌མོ༌ ཉམ༌པོ༌ སྤུར༌ཁང༌ང༌ སྐྱོདས༌, ཏེ༌བོ༌ ཁའི༌ཀ༌ ཕོ༌ལོང༌ ཆེན༌མོ༌ཞིག༌ ཀབས༌ཁན༌ནི༌ བྲག༌ཕུག༌ ཞིག༌ ཡོད༌པིན༌། 39 ཡེ༌ཤུའི༌, "ཕོ༌ལོང༌བོ༌ འ༌ངོའ༌ རིལ༌" མོལས༌། ཤི༌ཁན༌ནི༌ སྲིང༌མོ༌ མར༌ཐཱའེ༌ ཡེ༌ཤུའ༌ ཞུས༌, "གཙོ༌བོ༌ལེ༌, ཁོའེ༌ སྤུར༌བོ༌ ཏེ༌ནང༌ང༌ བོར༌ཏེ༌ ཞག༌པོ༌ བཞི༌ སོང༌, ད༌རང༌ དྲི༌མ༌ ཡོང༌ངད༌འགྲོ༌།" 40 གཙོ༌བོ༌ ཡེ༌ཤུའི༌, "ངའེ༌ ཟེར༌ར༌ མེ༌རག༌ག༌? གལ༌ཏེས༌ དད༌པ༌ ཡོད༌ན༌ དཀོན༌མཆོག༌གི༌ སྤལ༌ ཁྱོ༌རང༌ང༌ ཐོང༌ཡིན༌" མོལས༌། 41 ཏེ༌ནེ༌ ཏེ༌ མི༌གུན༌ནི༌ ཕོ༌ལོང༌བོ༌ ཐ༌མ༌ རིལས༌ ཡང༌ ཡེ༌ཤུའི༌ ནམ༌མཁའ༌ གཟིགས༌ཏེ༌ མོལས༌, "ཀྱེ༌ ངའེ༌ ཡབ༌, ངའེ༌ ཉེ༌རང༌ང༌ ཐུགས༌རྗེ༌ཆེ༌ ཞུའད༌ བཅིའ༌ཟེར༌ན༌ ཉེ༌རང༌ངི༌ ངའ༌ གསན༌ན༌ བཛདས༌། 42 ཉེ༌རང༌ངི༌ དུས༌རྒྱུན༌ ངའེ༌ ཞུ༌བ༌གུན༌ལ༌ གསན༌ཁན༌བོ༌ ང༌ རྒྱུས༌ཡོད༌། ཡིན༌ནའང༌ ངའ༌ འཁོར༌ཏེ༌ ཡོད༌ཁན༌ནི༌ མི༌གུན༌ནིའང༌ ཉེ༌རང༌ངི༌ ངའ༌ ཀལ༌ལ༌ བཛད༌ཁན༌བོ༌ དད༌པ༌ བཅོ༌ཅེས༌སི༌ ཕིའ༌, ངའེ༌ འིན༌ན༌བོ༌ ཟེར༌རད༌།" 43 ཏེ༌བོ༌ མོལ༌ཏེ༌ སྟིང༌ནེ༌ ཡེ༌ཤུའི༌ མ༌ ཤེད༌དང༌ མོལས༌, "ལ༌ཟར༌རས༌ ཕི༌ལོག༌ག༌ བིང༌ཏེ༌ ཡོང༌།" 44 ཡང༌ ཏེ༌ ཤི༌ཁན༌ནི༌ མི༌བོ༌ བིང༌ཏེ༌ ཡོངས༌། ཁོའེ༌ རྐང༌ལག༌ ཚང༌མ༌ རོ༌རས༌ ཉམ༌པོ༌ སྲིལ༌ཏེ༌ ཡང༌ ལྡོང༌བོའ༌ རས༌ཤིག༌ སྐོན༌ཏེ༌ ཡོད༌པིན༌། ཡེ༌ཤུའི༌ ཏེ༌ མི༌གུན༌ལ༌, "སྲིལ༌ཁན༌བོ༌ བཀྲོལ༌ཏེ༌ ཁོ༌ ཆ༌ཅུག༌" མོལས༌།
སྐྱབ༌མགོན༌ ཡེ༌ཤུ༌ བསད༌ཅེས༌སི༌ གྲབས༌ བཅོས༌།
45 མིར༌ཡམ༌མ༌ ཐུག༌ག༌ ཡོངས༌ཏེ༌ ཡོད༌ཁན༌ནི༌ ཡ༌ཧུ༌དཱ༌པ༌ མང༌པོའེ༌ གཙོ༌བོ༌ ཡེ༌ཤུའི༌ ཏེ༌ ཧ༌ལས༌ཤེས༌སི༌ བཛད༌པ༌ ཐོང༌ཏེ༌ ཁོང༌ངི༌ཀ༌ དད༌པ༌ ཁྱོངས༌། 46 ཡིན༌ནའང༌ ཏེ༌ ཕྲོ༌ནེ༌ ཁ༌ཅིག༌ ཕ༌རུ༌ཤི༌པ༌གུན༌ནི༌ཀ༌ སོང༌ཏེ༌ ཡེ༌ཤུའི༌ བཛད༌ཁན༌བོ༌ ཁོང༌གུན༌ལ༌ ཤདས༌། 47 ཏེ༌ནེ༌ བླ༌མ༌ དའུ༌སྐྱོང༌ དང༌ ཕ༌རུ༌ཤི༌པ༌ གུན༌ནི༌ ཡ༌ཧུ༌དཱ༌པའེ༌ ཚོགས༌འདུའི༌ འཐུས༌མི༌གུན༌ འཛོམ༌ཅེས༌ལ༌ བོདས༌། ཡང༌ གྲབས༌ བཅོས༌, "ང༌དང༌གུན༌ནི༌ བཅི༌ བཅོ༌ཡིན༌། འི༌ མི༌བོའེ༌ ཧ༌ལས༌ཤེས༌སི༌ ལྟས༌ མིན༌འདྲ༌ མིན༌འདྲ༌ སྟན༌ཡིན༌ ཆ༌རུག༌། 48 གལ༌ཏེས༌ ང༌དང༌གུན༌ནི༌ ཁོ༌ འིན༌ན༌ ཟུག༌ག༌ ཕུད༌བཏང༌ན༌ མི༌ཚང༌མའེ༌ ཁོའི༌ཀ༌ དད༌པ༌ ཁྱོང༌ཡིན༌། ཏེ༌ནེ༌ རོམ༌པ༌ མག༌མི༌གུན༌ ཡོངས༌ཏེ༌ ང༌དང༌ངི༌ མཆོད༌ཁང༌ ཤིགས༌ཏེ༌ ང༌དང༌ངི༌ མིར༌རྒྱུད༌པོ༌ མེད༌ཁན༌ བཅོའ༌ནོག༌" ཟེརས༌། 49 ཏེ༌ ཕྲོ༌ནེ༌ ཏེན༌ན༌ ལོའ༌ བླ༌མ༌ ཆེན༌མོ༌ ཀ༌ཡ༌ཕཱས༌ ཟེར༌ཁན༌ནི༌ ཟེརས༌, "ཁྱོ༌ཞའ༌གུན༌ལ༌ ཅའང༌ ཤེས༌ས༌ མི༌འདུག༌། 50 ཁྱོ༌ཞའ༌གུན༌ལ༌ ཧ༌གོ༌དགོས༌ ཁྱོ༌ཞའེ༌ ཕིའ༌ མིར༌རྒྱུད༌ གང༌པོ༌ སྟོར༌རི༌ སང༌ མི༌ཚང༌མའེ༌ ཏོན༌ལ༌ གཅིག༌ ཤི༌ན༌ མི༌རྒྱལ༌ལ༌?" 51 འི༌ སྤེ༌ར༌གུན༌ ཁོའེ༌ རང༌ངི༌ ཆོགས༌ནེ༌ མ༌ཟེར༌ར༌ ཏེ༌ ལོའི༌ བླ༌མ༌ ཆེན༌མོ༌ ཡིན༌ཅེས༌བོའེ༌ ཁོའེ༌ ཡེ༌ཤུའི༌ ཡ༌ཧུ༌དཱ༌པ༌ མིར༌རྒྱུད༌ ཚང༌མའེ༌ ཏོན༌ལ༌ རང༌ངི༌ སྲོག༌ བཏང༌ཅེས༌བོ༌ ལུང༌སྟན༌ཏེ༌ ཡིན༌པིན༌། 52 ཡང༌ ཡ༌ཧུ༌དཱ༌པའེ༌ མིར༌རྒྱུད༌ གཅིག༌པོའེ༌ ཕིའ༌ མན༌པ༌, ཁྲེས༌སྟོར༌ སོང༌ཁན༌ནི༌ དཀོན༌མཆོག༌གི༌ མི༌གུན༌ ཀུགས༌ཏེ༌ མིར༌རྒྱུད༌ གཅིག༌ རྒྱུར༌ ཅུག༌ཅེས༌སི༌ ཕིའང།" 53 ཏེན༌ན༌ ཞག༌ནེ༌ ཕར༌ལ༌ ཁོང༌གུན༌ནི༌ སྐྱབ༌མགོན༌ ཡེ༌ཤུ༌ བསད༌ཅེས༌སི༌ ཐབས༌ ཙལས༌། 54 ཏེ༌བོའེ༌ཕིའ༌ གཙོ༌བོ༌ ཡེ༌ཤུ༌ སླབ༌བྱའ༌ སལ༌ལ༌ལ༌ ཡ༌ཧུ༌དཱ༌པ༌ མི༌ ཚོགས༌སི༌ ཕྲོའ༌ སྐྱོད༌ད༌ མ༌ བཛདས༌, ཡང༌ རི༌སྟོང༌ དང༌ ཉེ༌མོའི༌ ཡུལ༌ ཨེཕ༌ར༌ཡིམ༌ ཟེར༌སེ༌ གྲོང༌ཁྱེར༌ལ༌ སྐྱོད༌ཏེ༌ ཏེ༌རུ༌ རང༌ངི༌ སློབ༌ཕྲུག༌གུན༌ ཉམ༌པོ༌ ཞུགས༌། 55 ཡ༌ཧུ༌དཱ༌པའེ༌ པེ༌སག༌གི༌ དུས༌ཆེན༌ ཉེ༌མོ༌ སླེབ༌བ༌དང༌, ཡུལ༌ ཆོགས༌ ཚང༌མ༌ནེ༌ མི༌ མང༌པོ༌ རྩང༌རའེ༌ ཚིར༌གུན༌ འདྲན༌དྲ༌ བཅོ༌ཅེས༌ལ༌ ཡེ༌རུ༌ཤ༌ལེམ༌མི༌ རྒྱལ༌ས༌ ཡོངས༌། 56 ཏེ༌ མི༌གུན༌ནི༌ ཡེ༌ཤུ༌ ཙལ༌ལད༌པིན༌, ཡང༌ མཆོད༌ཁང༌ངི༌ ནང༌ང༌ འཛོམ༌མ༌ དང༌ གཅིག༌ དང༌ གཅིག༌ག༌, "ཅི༌ སམ༌མ༌རག༌, ཁོ༌ དུས༌ཆེན༌ལ༌ འི༌རུ༌ མི༌ཡོང༌ང༌?" ཟེར༌ཡིན༌ འདྲིས༌།" 57 ཏེན༌ན༌ དུས༌ལ༌ བླ༌མ༌ དའུ༌སྐྱོང༌ དང༌ ཕ༌རུ༌ཤི༌པ༌གུན༌ནི༌ གལ༌ཏེས༌ སུ༌ཞིག༌ག༌ ཡེ༌ཤུ༌ འདུག༌ ཟེར༌ཏེ༌ རྒྱུས༌ཆ༌ན༌ ལོན༌ ཁྱོང༌ གོས༌ ཟེར༌ཏེ༌ བཀའ༌ བཏངས༌, བཅིའ༌ཟེར༌ན༌ ཁོང༌གུན༌ནི༌ ཡེ༌ཤུ༌ ཟུམ༌ཅེས༌ ཡིན༌པིན༌།
ཡེ༌ཤུའི༌ ཞབས༌སི༌ཀ༌ ཨ༌ཏིར༌ ལུག༌ཁན༌ནི༌ སྐོར༌།
1 པེ༌སག༌གི༌ དུས༌ཆེན༌ནི༌ སང༌ ཞག༌ དྲུག༌གི༌ སྔོན༌ལ༌, གཙོ༌བོ༌ ཡེ༌ཤུ༌ གསོན༌ཏེའ༌ ལང༌ང༌ བཛད༌ཁན༌ནི༌ ལ༌ཟར༌རས༌སི༌ ཡུལ༌ བེད༌ཐཱ༌ནི༌ གྲོང༌ཁྱེར༌ལ༌ སྐྱོད༌། 2 ཏེ༌རུ༌ གཙོ༌བོ༌ ཡེ༌ཤུའི༌ ཕིའ༌ གོང༌ཟན༌ནི༌ གྲལ༌ བཅོས༌ཏེ༌ མར༌ཐཱའེ༌ ཞབས༌སྟོག༌ ཞུའད༌པིན༌, ཡེ༌ཤུ༌ ཉམ༌པོ༌ དོན༌ཏང༌ དོན༌ན༌ལ༌ ཞུགས༌ཏེ༌ ཡོད༌ཁན༌གུན༌ནི༌ ཕྲོའ༌ ལ༌ཟར༌རས༌སའང༌ ཡོད༌པིན༌། 3 ཏེ༌ ཟ༌ནེ༌ མིར༌ཡམ༌མི༌ མ༌ རིན༌ཅན༌ ཨ༌ཏིར༌ ལི༌ཊར༌ ཕེད༌ ཟམ༌ཞིག༌ ཡེ༌ཤུའི༌ ཞབས༌སི༌ཀ༌ ལུགས༌ཏེ༌ རང༌ངི༌ སྲ༌ ཉམ༌པོ༌ ཕིས༌པ༌ ཁང༌པ༌ གང༌པོ༌ ཨ༌ཏིར༌རི༌ དྲི༌ཞིམ༌མི༌ གང༌། 4 ཡིན༌ནའང༌ ཁོང༌ངི༌ སློབ༌ཕྲུག༌གུན༌ནི༌ ཕྲོ༌ནེ༌ ཡུ༌དཱ༌ ཀར༌ཡོད༌པའེ༌ ༼ཀ༌བོའེ༌ སྟིང༌ནེ༌ ཡེ༌ཤུའ༌ ངོ༌ལོག༌ བཅོས༌༽ མིར༌ཡམ༌མ༌ ཟེརས༌། 5 "བཅིའ༌ འི༌ ཨ༌ཏིར༌བོ༌ བཙོངས༌ཏེ༌ པེ༌ནེ༌བོ༌ ཉལ༌བ༌ཅན༌གུན༌ལ༌ བཏང༌ང༌ མེད༌?། འི༌བོའ༌ ལོ༌གཅིག༌གི༌ གླ༌ཆ༌ ཟམ༌ཤིག༌གི༌ པེ༌ནེ༌ རི༌ཅེས༌ འདུག༌།" 6 ཁོའ༌ ཉལ༌བ༌ཅན༌གུན༌ནི༌ ཕིའ༌ ཚེར༌ཁ༌ ཡོད༌ཏེ༌ མན༌པ༌ ཁོ༌རང༌ རྐུན༌མ༌ ཡིན༌ པ༌སང༌ འི༌ སྤེ༌ར༌བོ༌ ཟེར༌ཏེ༌ ཡིན༌པིན༌། ཁོའེ༌ ལག༌ག༌ ཡེ༌ཤུ༌ དང༌ ཁོང༌ངི༌ སློབ༌ཕྲུག༌གུན༌ནི༌ པེ༌ནེ༌ ཁོ༌མགས༌བོ༌ བོར༌རད༌པིན༌ ཡང༌ ཁོའེ༌ ཏེ༌ནང༌ནེ༌ རྐུའད༌པིན༌། 7 ཡེ༌ཤུའི༌ མོལས༌, "མིར༌ཡམ༌མ༌ ཚེར༌ མ༌ཅུག༌། ཁོའེ༌ འི༌བོ༌ བཅོས༌ཏེ༌ ངའེ༌ གཟུགས༌པོ༌བོ༌ སྤུར༌ཁང༌ང༌ ཁྱེར༌ཅེས༌སི༌ ཕིའ༌ གྲལ༌གྲིག༌ བཅོས༌ཏེ༌ ཡིན༌། 8 ཉལ༌བ༌ཅན༌གུན༌ དུས༌རྒྱུན༌ ཁྱོ༌ཞའ༌ ཉམ༌པོ༌ ལུས༌ཡིན༌, ཡིན༌ནའང༌ ང༌ དུས༌རྒྱུན༌ ཁྱོ༌ཞའ༌གུན༌ ཉམ༌པོ༌ མི༌ལུས༌།" 9 ཏེན༌ན༌ དུས༌ལ༌ ཡ༌ཧུ༌དཱ༌པའེ༌ མི༌མངས༌ལ༌ ཡེ༌ཤུ༌ བེད༌ཐཱ༌ནི༌ གྲོང༌ཁྱེར༌རི༌ ནང༌ང༌ ཞུགས༌ཏེ༌ ཡོད༌ཁན༌བོ༌ རྒྱུས༌ སོང༌པ༌ ཁོང༌གུན༌ནའང༌ ཏེ༌རུ༌ སླེབ༌། ཁོང༌གུན༌ལ༌ ཡེ༌ཤུ༌ གཅིག༌པོ༌ མན༌པ༌, ཡེ༌ཤུའི༌ གསོན༌ཏེའ༌ ལང༌ང༌ བཛད༌ཁན༌ནི༌ ལ༌ཟར༌རས༌ལའང༌ ལྟའ༌ཉིན༌ ཡོད༌པིན༌། 10 ཏེ༌ནེ༌ བླ༌མ༌ དའུ༌སྐྱོང༌གུན༌ནི༌ ལ༌ཟར༌རས༌སའང༌ བསད༌ཅེས༌སི༌ ཇུས༌ངན༌ ལྡིངས༌། 11 བཅིའ༌ཟེར༌ན༌ ལ༌ཟར༌རས༌ལ༌ བྱུང༌ཁན༌བོའེ༌ ཡ༌ཧུ༌དཱ༌པ༌ མང༌པོ༌ ཞིག༌གི༌ ཁོང༌གུན༌ ཕངས༌ཏེ༌ ཡེ༌ཤུའི༌ཀ༌ དད༌པ༌ ཁྱོང༌ངད༌པིན༌།
གཙོ༌བོ༌ ཡེ༌ཤུའ༌ རྒྱལ༌པོའེ༌ ཚུལ༌ལ༌ དགའ༌སུས༌ ཞུས༌།
12 སྟིང༌མ༌ ཞག༌པོ༌ དུས༌ཆེན༌ལ༌ ཡོངས༌ཁན༌ནི༌ མི༌མངས༌སི༌ གཙོ༌བོ༌ ཡེ༌ཤུ༌ ཡེ༌རུ༌ཤ༌ལེམ༌མི༌ ནང༌ང༌ སྐྱོད༌འདུག༌ ཟེར༌ཏེ༌ ཚོར༌པ༌, 13 ཏེ༌ མི༌གུན༌ནི༌ ཁོ༌པེ༌ ལྕང༌མ༌ ཙོགས༌སི༌ ཡལ༌ག༌གུན༌ ཁུར༌ཏེ༌ ཁོང༌ང༌ དགའ༌སུས༌ ཞུའ༌ལ༌ བིང༌ཏེ༌ ཀུ༌ཅོ༌ བཏང༌ཡིན༌ ཟེརས༌, "སྟོད༌པ༌ ཕུལ༌ཤིག༌། དཀོན༌མཆོག༌གི༌ དབང༌ངི༌ ནང༌ང༌ སྐྱོད༌ཁན༌བོའ༌ བཀྲའ༌ཤིས༌། ཨིས༌ར༌ཨེལ༌ལི༌ རྒྱལ༌པོའ༌ བཀྲའ༌ཤིས༌།" 14 ཡེ༌ཤུའི༌ ཙལ༌ལ༌ བཛད༌པ༌ བོང༌སར༌ ཞིག༌ ཐོབ༌། ཡང༌ ལུང༌སྟན༌གུན༌ འདྲན༌དྲ༌ འགྲུབ༌ཅེས༌སི༌ ཕིའ༌ ཁོང༌ ཏེ༌ཀ༌ ཆིབས༌ས༌ བཛདས༌, 15 "ཡེ༌རུ༌ཤ༌ལེམ༌པ༌གུན༌ ཏ༌ མ༌འཇིགས༌ཤིག༌། ལྟོས༌ཤིག༌ ཁྱོ༌ཞའེ༌ རྒྱལ༌པོ༌, བོང༌སར༌རི༌ཀ༌ ཆིབས༌ཏེ༌ སྐྱོད༌ད༌ལ༌།" 16 ཏེ༌དུས༌ལ༌ སློབ༌ཕྲུག༌གུན༌ལ༌ ཁོང༌ངི༌ བཛད༌ཁན༌གུན༌ ཅའང༌ ཧ༌མ༌གོ༌, ཡིན༌ནའང༌ ཡེ༌ཤུ༌ གྲོངས༌ཏེ༌ སྐུ༌ གསོན༌ཏེའ༌ ཞངས༌ཏེ༌ སྟིང༌ནེ༌, ཁོང༌གུན༌ལ༌ འི༌ བྱུང༌ཁན༌ ཚང༌མ༌ ཡིད༌ཏུ༌ ཡོངས༌། ཡང༌ དམ༌པའེ༌ གསུང༌རབས༌སི༌ ནང༌ང༌ ཁོང༌ངི༌ སྐོར༌ལ༌ འི༌ ཚང༌མ༌ སྔོན༌ལ༌ ལུང༌སྟན༌ སལ༌ཏེ༌ ཡོད༌ཁན༌བོ༌ ཧ༌གོ༌། 17 ཡེ༌ཤུའི༌ ལ༌ཟར༌རས༌ལ༌ སྤུར༌ཁང༌ནེ༌ འབོད༌ད༌ བཛད༌ཏེ༌ ཤི༌ཁན༌གུན༌ནི༌ ཕྲོ༌ནེ༌ གསོན༌ཏེའ༌ ལང༌ང༌ བཛད༌ ཟ༌ནེ༌ ཏེ༌རུ༌ ཡོད༌ཁན༌ནི༌ མི༌ཚོགས༌བོའེ༌ ཏེ༌ གནས༌ཚུལ༌བོ༌ ཀ༌ནེ༌ ཀ༌རུ༌ ཁྱབ༌ཤུག༌གད༌པིན༌། 18 མི༌ མང༌པོ༌ ཞིག༌ ཡེ༌ཤུའི༌ ཧ༌ལས༌ཤེས༌སི༌ བཛད༌པ༌གུན༌ནི༌ སྐོར༌ ཚོར༌ཏེ༌ ཡེ༌རུ༌ཤ༌ལེམ༌ནེ༌ ཁོང༌ང༌ ཐུག༌ག༌ལ༌ ཡོངས༌། 19 ཕ༌རུ༌ཤི༌པ༌གུན༌ནི༌ གཅིག༌ དང༌ གཅིག༌ག༌ ཟེརས༌, "ང༌དང༌གུན༌ནི༌ བཅོས༌ཁན༌གུན༌ ཕན༌མི༌ཐོགས༌ ཡིན༌ཁན༌བོ༌ སོལ༌པོ༌ ཐོང༌འདུག༌། ལྟོས༌སའང༌ མི༌ཚོགས༌ ཚང༌མ༌ ནི༌ ཁོའེ༌ སྟིང༌རང༌ནེ༌ ཆའ༌ལ༌།"
གཙོ༌བོ༌ ཡེ༌ཤུའི༌ ཁོང༌རང༌ གྲོང༌ཤེས༌སི༌ སྐོར༌ལ༌ ལུང༌སྟན༌ བཛདས༌།
20 ཏ༌ དུས༌ཆེན༌ལ༌ ཡོང༌ཁན༌གུན༌ནི༌ ཕྲོའ༌ ཡ༌ཧུ༌དཱ༌པ༌ མན༌ཁན༌ ཁ༌ཅིག༌གའང༌ དཀོན༌མཆོག༌ག༌ བཅོལ༌ལ༌ ཡོངས༌ཏེ༌ ཡོད༌པིན༌། 21 གཱ༌ལིལ༌ལིའི༌ ཡུལ༌ལི༌ བེད༌སེ༌དཱ༌པ༌ ཡིན༌ཁན༌གུན༌, ཕི༌ལིབ༌བི༌ཀ༌ ཡོངས༌ཏེ༌ ཁོའ༌ ཞུ༌བ༌ ཕུལས༌, "སྤོན༌བོ༌ལེ༌, ང༌ཞའ༌གུན༌ལ༌ ཡེ༌ཤུ༌ མཇལ༌ ཉིན༌རག༌།" 22 ཕི༌ལིབ༌བི༌ ཨེན༌ཌ༌རིའུ༌ ཤད༌ད༌ལ༌ སོང༌, ཡང༌ ཁོང༌ གཉིས༌ཀོ༌ ཡེ༌ཤུའ༌ ཤད༌ད༌ལ༌ སོང། 23 ཡེ༌ཤུའི༌ ཁོང༌གུན༌ལ༌ མོལས༌, "མི༌རིགས༌སི༌བུའ༌ དཀོན༌མཆོག༌གི༌ ཆོགས༌ནེ༌ སྤལ༌ ཆེན༌མོ༌ ཐོབ༌ཅེས༌སི༌ དུས༌ སླེབ༌ ཚར༌། 24 ངའེ༌ ཁྱོ༌ཞའ༌ བདེན༌བ༌ ཟེར༌རད༌, ནམ༌ཚག༌པ༌ གྲོའེ༌ ས༌བོན༌ སའེ༌ ནང༌ང༌ སུབས༌ཏེ༌ ཤི༌ མི༌ཤི༌ ཏེ༌བོ༌ གྲོ༌ གཅིག༌ག༌ ལུས༌ས༌ནོག༌, ཡིན༌ནའང༌ ཤི༌ཏེ༌ སྟིང༌ནེ༌ སྨིན༌ཏེ༌ ཏེ༌བོའ༌ བྲས༌བུ༌ མང༌པོ༌ ཆགས༌ས༌ནོག༌། 25 ངའེ༌ སང༌ མང༌ང༌ རང༌ངི༌ སྲོག༌པོའ༌ ཡ༌ཤ༌ བཅོ༌ཁན༌གུན༌ནི༌ ཏེ༌བོ༌ སྐྱལ༌ཡིན༌, ཡིན༌ནའང༌ འི༌ འཇིག༌རྟེན༌ནི༌ ནང༌ང༌ རང༌ངི༌ སྲོག༌གི༌ སང༌ མང༌ང༌ ངའ༌ ཡ༌ཤ༌ བཅོ༌ཁན༌གུན༌ནི༌ ཁོང༌ངི༌ སྲོག༌པོ༌ མཐའ༌མེད༌པའེ༌ མི༌ཚེའེ༌ ཕིའ༌ སྐྱོབས༌ཏེ༌ བོར༌ཡིན༌། 26 སུ༌ཞིག༌གི༌ ངའ༌ ཞབས༌སྟོག༌ ཞུའ༌ ཐད༌ན༌, ངའེ༌ རྒྱབ༌ནེ༌ བྲང༌གོས༌, ཀ༌རུ༌ ང༌ ཡོད༌ ངའེ༌ གཡོག༌པོའང༌ ཉམ༌པོ༌ འདུག༌ཡིན༌། ངའ༌ ཞབས༌སྟོག༌ ཞུ༌ཁན༌གུན༌ལ༌ ངའེ༌ ནམ༌མཁའ༌ ཞུགས༌ཁན༌ནི༌ ཡབ༌བིའང༌ རྩི༌བ༌ བཛད༌ཡིན༌།" 27 ཁོང༌ངི༌, "ཏ༌ ངའེ༌ སེམས༌ལ༌ མ༌སྲན༌ཏེ༌ ཚེར༌ཁ༌ རག༌། ཏེ༌ནེ༌ བཅི༌ ངའེ༌ འི༌བོ༌ ཟེར༌ར༌?, 'ཀྱེ༌ ངའེ༌ ཡབ༌, ཏ༌ ང༌ འི༌ སྡུག༌སྔལ༌ལི༌ དུས༌པོ༌ནེ༌ སྐྱོབ༌བ༌ བཛད༌' མ༌ནེ༌ མི༌ཟེར༌ བཅིའ༌ཟེར༌ན༌ ང༌ འིན༌ན༌ རྒྱུམ༌ཚན༌བོའེ༌ ཕིའ༌ ཡོངས༌ཏེ༌ ཡིན༌། 28 ཀྱེ༌ ཡབ༌, ཉེ༌རང༌ངི༌ ཚན༌ལ༌ སྤལ༌ ཐོབ༌ ཅུག༌ག༌ བཛད༌" ཞུས༌། ཏེ༌ནེ༌ ནམ༌མཁའ༌ནེ༌, "ངའེ༌ སྤལ༌ བཏངས༌ཏེ༌ ཡིན༌། ཏ༌རུང༌ངའང༌ སྤལ༌ བཏང༌ཡིན༌" མོལ༌ཏེ༌ གསུང༌སྐད༌ ཅིག༌ ཚོར༌། 29 ཏེ༌རུ༌ ཡོད༌ཁན༌ མི༌ཚོགས༌ གསུང༌སྐད༌ ཚོར༌ཁན༌གུན༌ནི༌ འབྲུག༌ལྡིར༌ར༌ རག༌ ཟེརས༌, ཡང༌ ཁ༌ཅིག༌གི༌, "ཕོ༌ཉ༌ ཞིག༌གི༌ ཁོང༌ང༌ ཞལ༌ཏ༌ སལ༌ཏེ༌ ཡིན༌ནོག༌" ཟེརས༌། 30 ཡེ༌ཤུའི༌ མོལས༌, "འི༌ གསུངས༌སྐད༌པོ༌ ཁྱོ༌ཞའ༌གུན༌ནི༌ ཕན༌ཐོགས༌སི༌ ཕིའ༌ ཡིན༌, ངའེ༌ ཕིའ༌ མན༌། 31 ཏ༌ འི༌ འཇིག༌རྟེན༌པ༌གུན༌ལ༌ ཁྲིམས༌ བཅད༌ཅེས༌སི༌ དུས༌ སླེབས༌ཏེ༌ ཡིན༌། འི༌ འཇིག༌རྟེན༌ནི༌ དད༌པ༌ མེད༌ཁན༌གུན༌ནི༌ དབང༌སྲུལ༌པ༌ ཤེ༌ཏན༌, ཕི༌ལོག༌ག༌ ཕིང༌ཡིན༌། 32 ཡང༌ ང༌ ཀྱེན༌ལ༌ སྟག༌ ཟ༌ནེ༌ ངའེ༌ མི༌ཚང༌མའེ༌ སེམས༌གུན༌ ང༌རང༌ ཆོགས༌ལ༌ ཁྱོང༌ཡིན༌།" 33 ཡེ༌ཤུའི༌ ཏེ༌ཟུག༌ མོལ༌ཏེ༌ ཁོང༌ ཀ༌ཟུག༌ ལུགས༌ཤིག༌ག༌ གྲོང༌ཅེས༌བོ༌ མངོན༌ ཅུག༌ག༌ བཛདས༌། 34 མི༌ཚོགས༌སི༌, "ང༌ཞའེ༌ དཀོན༌མཆོག༌གི༌ བཀའ༌ཁྲིམས༌སི༌ ནང༌ནེ༌ དཀོན༌མཆོག༌གི༌ འདམ༌མ༌ བཛད༌ཁན༌ནི༌ མ༌ཤི༌ཀ༌ དུས༌རྒྱུན༌ ཞུགས༌ཡིན༌ ཟེར༌ཏེ༌ ཚོར༌། ཏེ༌ནེ༌ ཉེ༌རང༌ངི༌ ཀ༌ཟུག༌ག༌ མོལ༌ལད༌, 'མི༌རིགས༌སི༌བུ༌ ཀྱེན༌ལ༌ སྟག༌དགོས༌?' འི༌ མི༌རིགས༌སི༌བུ༌ སུ༌ ཡིན༌ནོག༌?" ཞུས༌། 35 ཡེ༌ཤུའི༌ ཁོང༌རང༌ངི༌ སྐོར༌ལ༌ སྤེ༌ སལ༌ཡིན༌ཞིག༌ མོལས༌, "ངའེ༌ འོད༌པོ༌ ཁྱོ༌ཞའ༌གུན༌ ཉམ༌པོ༌ དུས༌ ཉུ༌ངུན༌ ཞིག༌གི༌ ཕིའ༌ ལུས༌ཡིན༌། མུན༌གྲིག༌གི༌ ཁྱོ༌ཞའ༌གུན༌ནི༌ཀ༌ དབང༌ མི༌སྲུལ༌ཅེས༌སི༌ ཕིའ༌ ཏེ༌ འོད༌ ཡོད༌ཡོད༌བོ༌ ཏེ༌ནང༌ང༌ གྲུལ༌ཤིག༌། མུན༌གྲིག༌གི༌ ནང༌ང༌ གྲུལ༌ཁན༌གུན༌ལ༌ ཀ༌རུ༌ ཆ༌ཅེན༌ ཅའང༌ རྒྱུས༌ མེད༌ཀྱག༌། 36 ཁྱོ༌ཞའ༌གུན༌ ཉམ༌པོ༌ འོད༌ ཡོད༌དི༌ དུས༌ལ༌ ཁྱོ༌ཞའ༌གུན༌ ཏེ༌ འོད༌དི༌ ཕོར༌རྒྱུད༌ལ༌ རྒྱུར༌ཅེས༌སི༌ ཕིའ༌ ཏེ༌ འོད༌པོའེ༌ཀ༌ དད༌པ༌ ཁྱོང༌དགོས༌།" ཏེ༌བོ༌ མོལ༌ཏེ༌ སྟིང༌ནེ༌ ཡེ༌ཤུ༌ ཏེ༌ཀ༌ནེ༌ བིངས༌ཏེ༌ སྐྱོདས༌ ཡང༌ ཏེ༌ མི༌ཚོགས༌སི༌ མིག༌ནེ༌ སྟོར༌།
ཡ༌ཧུ༌དཱ༌པ༌གུན༌ནི༌ ཏ༌རུང༌ངའང༌ དད༌པ༌ མ༌ཁྱོངས༌།
37 གཙོ༌བོ༌ ཡེ༌ཤུའི༌ ཏེ༌ཟུག༌ ཧ༌ལས༌ཤེས༌སི༌ བཛད༌པ༌གུན༌ སྟན༌ཏེའང༌ མི༌ མང༌ཆེའ༌ ཁོང༌ངི༌ཀ༌ དད༌པ༌ མ༌ཁྱོངས༌། 38 འི༌བོ༌ ལུང༌སྟོན༌པ༌ ཡེ༌ཤ༌ཡཱ༌ མོལ༌ཁན༌བོ༌ འདྲན༌དྲ༌ བྱུང༌ཏེ༌ ཡིན༌, "དཀོན༌མཆོག༌གི༌ སྟོབས༌ཅན༌ ཕྱག༌ལས༌པོ༌ མངོན༌ཅུགས༌ཏེའང༌, ཀྱེ༌ གཙོ༌བོ༌, ང༌དང༌ངི༌ ལོན༌བོའ༌ སུའི༌ ཡིད༌ཆེས༌།" 39 འི༌ རྒྱུམ༌ཚན༌བོའེ༌ ཕིའ༌ ཏེ༌གུན༌ནི༌ དད༌པ༌ མ༌ཁྱོངས༌ བཅིའ༌ཟེར༌ན༌ ལུང༌སྟོན༌པ༌ ཡེ༌ཤ༌ཡཱའེ༌ དམ༌པའེ༌ གསུང༌རབས༌སི༌ ཡང༌ ནས༌ས༌ ཞིག༌གི༌ཀ༌ མོལ༌ཏེ༌ ཡིན༌ནོག༌, 40 "ཁོང༌ངི༌ ཏེ༌གུན༌ནི༌ མིག༌གུན༌ ཞ༌ར༌ དང༌ ཁོང༌གུན༌ནི༌ སྙིང༌གུན༌ སྐྱོང༌པོ༌ བཅོའ༌ བཛདས༌། ཏེ༌བོའེ༌ཕིའ༌ ཁོང༌གུན༌ནི༌ མིག༌ནེ༌ མི༌ཐོང༌ ཡང༌ སྙིང༌གུན༌ལ༌ ཧ༌གོ༌ མི༌ཐུབ༌། ཏེ༌ མ༌ནེ༌ ཁོང༌གུན༌ནི༌ འགྱོད༌པ༌ བཅོས༌ཏེ༌ ངའེ༌ ཁོང༌གུན༌ལ༌ ཕན༌ཅུགས༌ཏེ༌ ཡོད༌འགྲོ༌།" 41 ལུང༌སྟོན༌པ༌ ཡེ༌ཤ༌ཡཱའེ༌ ཡེ༌ཤུའི༌ སྤལ༌བོ༌ མཇལ༌པ༌ ཡེ༌ཤུའི༌ སྐོར༌ལ༌ ཏེ༌གུན༌ མོལ༌ཏེ༌ ཡིན༌པིན༌། 42 ཏེ༌ དུས༌ལ༌ མི༌ མང༌པོ༌ ཞིག༌གི༌ ཀ༌བོའེ༌ ཕྲོའ༌ ཡ༌ཧུ༌དཱ༌པ༌པོའེ༌ དའུ༌སྐྱོང༌ ཁ༌ཅིག༌གའང༌ ཡོད༌པིན༌, ཡེ༌ཤུའི༌ ནང༌ང༌ དད༌པ༌ ཁྱོང༌ཏེའང༌ རང༌ངི༌ དད༌པ༌བོ༌ མངོན༌ མ༌ཅུགས༌ བཅིའ༌ཟེར༌ན༌ ཕ༌རུ༌ཤི༌པ༌གུན༌ནི༌ ཁོང༌གུན༌ འདུ༌ཁང༌ངི༌ ཆོས༌ཚོགས༌སི༌ ཕྲོ༌ནེ༌ ཕིངས༌ བཏང༌ང༌ནོག༌ སམ༌ཏེ༌ འཇིགས༌སད༌པིན༌། 43 ཏེ༌ མི༌གུན༌ནི༌ དཀོན༌མཆོག༌གི༌ སྟོད༌པའེ༌ སང༌ མི༌ ཆོགས༌སི༌ སྟོད༌པ༌པོ༌ རིན༌ཆེའ༌ ཚོར༌རད༌པིན༌། 44 ཏེ༌ནེ༌ ཡེ༌ཤུའི༌ སྐད༌ ཆེན༌མོ༌ དང༌ མོལས༌, "ང༌ དད༌པ༌ བཅོ༌ཁན༌གུན༌ནི༌ ང༌ གཅིག༌པོ༌ མན༌པ༌ ང༌ ཀལ༌ལ༌ བཛད༌ཁན༌བོའང༌ དད༌པ༌ བཅོའ༌ནོག༌། 45 ཡང༌ ང༌ ཐོང༌ཁན༌གུན༌ནི༌ ང༌ ཀལ༌ལ༌ བཛད༌ཁན༌ནི༌ ཡབ༌ མཇལ༌ཁན༌ དང༌ ཙོགས༌ ཡིན༌། 46 ངའེ༌ཀ༌ དད༌པ༌ ཁྱོང༌ཁན༌གུན༌ མུན༌གྲིག༌གི༌ ནང༌ང༌ མི༌ལུས༌ཤེས༌སི༌ ཕིའ༌ ང༌ འཇིག༌རྟེན༌ནི༌ ནང༌ང༌ འོད༌དི༌ ཚུལ༌ལ༌ ཡོངས༌ཏེ༌ ཡིན༌།" 47 གལ༌ཏེས༌ སུ༌ཞིག༌གི༌ ངའེ༌ སྤེ༌ར༌གུན༌ལ༌ ཉན༌ཏེ༌ ཏེ༌གུན༌ནི༌ཀ༌ ལག༌ལེན༌ མ༌བཅོ༌ན༌, ངའེ༌ ཏེ༌གུན༌ནི༌ཀ༌ སྐྱོན༌ མི༌ཀལ༌ བཅིའ༌ཟེར༌ན༌ ང༌ འཇིག༌རྟེན༌པ༌གུན༌ལ༌ སྐྱོན༌ ཀལ༌ལ༌ མན༌པ༌ ཐར༌པ༌ ཏང༌ང༌ ཡོངས༌ཏེ༌ ཡིན༌། 48 སུ༌ཞིག༌གི༌ ང༌ ཕངས༌ཏེ༌ ཡང༌ ངའེ༌ སྤེ༌ར༌གུན༌ལ༌ ཉན༌ན༌ མེད༌ན༌, ཏེ༌གུན༌ནི༌ ཕིའ༌ ངའེ༌ ཟེར༌ཁན༌ནི༌ ཏེན༌ན༌ སྤེ༌ར༌གུན༌ནི༌ མཐའ༌མའེ༌ ཞག༌ག༌ ཁོང༌གུན༌ལ༌ ཤགས༌ བཅད༌ཡིན༌། 49 ངའེ༌ ང༌རང༌ངི༌ ཆོགས༌ནེ༌ ཅའང༌ ཟེར༌ར༌མེད༌། ཡིན༌ནའང༌ ང༌ ཀལ༌ལ༌ བཛད༌ཁན༌ནི༌ ནམ༌མཁའ༌ ཞུགས༌ཁན༌ནི༌ ཡབ༌བི༌ ང༌ བཅི༌ ཟེར༌ཅེས༌ དང༌ ཀ༌ཟུག༌གི༌ ཟེར༌ཅེས༌སི༌ བཀའ༌ སལ༌ལ༌ བཛད༌ཏེ༌ ཡིན༌། 50 ང༌ འི༌བོ༌ ཤེས༌སད༌, ཁོང༌ངི༌ བཀའེ༌ མཐའ༌མེད༌པའེ༌ མི༌ཚེའེ༌ ནང༌ང༌ ཁྲིད༌ད༌ནོག༌། ཏེན༌ན༌བོའེ༌ཕིའ༌ ངའེ༌ བཅི༌ ཟེར༌རད༌ ཏེ༌བོ༌ ནི༌ ངའེ༌ ཡབ༌བི༌ ངའ༌ ཟེར༌ཅེས༌སི༌ ཕིའ༌ བཀའ༌ སལ༌ཏེ༌ ཡིན༌།
གཙོ༌བོ༌ ཡེ༌ཤུའི༌ སློབ༌ཕྲུག༌གུན༌ནི༌ རྐང༌པ༌ ཁྲུའ༌ བཛདས༌།
1 པེ༌སག༌གི༌ དུས༌ཆེན༌ནི༌ སང༌ སྔོན༌ལ༌, ཡེ༌ཤུའ༌ འི༌ འཇིག༌རྟེན༌བོ༌ ཕངས༌ཏེ༌ ཁོང༌རང༌ངི༌ ཡབ༌བི༌ཀ༌ སྐྱོད༌ཅེས༌སི༌ དུས༌ སླེབས༌ཏེ༌ ཡིན༌ཁན༌བོ༌ ཐུགས༌རྒྱུས༌ ཡོད༌པིན༌། ཁོང༌ངི༌ འི༌ འཇིག༌རྟེན༌ནི༌ ནང༌ང༌ ཁོང༌རང༌ངི༌ མི༌གུན༌ལ༌ བྱམས༌པ༌ བཛདས༌, ཏ༌ ཁོང༌ངི༌ ཏེ༌གུན༌ལ༌ ཙམ༌ཞིག༌གི༌ བྱམས༌པ༌ བཛད༌ཁན༌བོ༌ སྟན༌ན༌ བཛདས༌། 2 ཁོང༌གུན༌ ཕི༌ཏོག༌གི༌ དོན༌ཏང༌ དོན༌ཡིན༌ ཡོད༌པིན༌། ཤེ༌ཏན༌ནི༌ ཤི༌མོན༌ནི༌ བུ༌ཚ༌ ཡུ༌དཱ༌ ཀར༌ཡོད༌པའེ༌ སྙིང༌ངི༌ ནང༌ང༌ ཡེ༌ཤུའ༌ ངོ༌ལོག༌ བཅོ༌ཅུག༌ཅེས༌སི༌ སམ༌བ༌ སྐྱེ༌ཅུགས༌ ཚར༌ཏེ༌ ཡིན༌པིན༌། 3 ཡེ༌ཤུའ༌ ཡབ༌བི༌ བཅི༌ཚང༌མ༌ ཁོང༌ངི༌ ཕྱག༌ག༌ སྟད༌ད༌ བཛད༌ཏེ༌ ཡིན༌ཁན༌ དང༌ ཁོང༌ དཀོན༌མཆོག༌གི༌ ཆོགས༌ནེ༌ སྐྱོད༌ཏེ༌ ཡིན༌ཁན༌, ཡང༌ དཀོན༌མཆོག༌གི༌ སྐུན༌དུན༌ལ༌ ལོགས༌ཏེ༌ སྐྱོད༌ཅེས༌བོ༌ ཁྱེན༌ན༌ བཛད༌དད༌པིན༌། 4 ཏེ༌ནེ༌ ཁོང༌ ཅོག༌ཙེ༌ ཀ༌ནེ༌ ཞངས༌ ཡང༌ རང༌ངི༌ ཁ༌ཐོག༌གི༌ ནམ༌བཟའ༌ ཕུད༌ད༌ བཛདས༌ཏེ༌ ལག༌ཕིས༌ ཆེན༌མོ༌ཞིག༌ ཁོང༌རང༌ངི༌ སྐྱེད༌པ༌ སྲིལ༌ལ༌ བཛདས༌། 5 ཏེ༌ སྟིང༌ནེ༌ ཁོང༌ངི༌ ཅི༌ལིམ༌ཅིའི༌ ནང༌ང༌ ཆུ༌ ལུགས༌ཏེ༌ ཁོང༌རང༌ངི༌ སློབ༌ཕྲུག༌གུན༌ནི༌ རྐང༌པ༌ ཁྲུ༌ཅེས༌ གོ༌ཟུག༌ བཛདས༌, ཡང༌ སྐྱེད༌པ༌ སྲིལ༌ལ༌ བཛད༌ཁན༌ནི༌ ལག༌ཕིས༌ ཆེན༌མོ༌ ཉམ༌པོ༌ ཕིའ༌ བཛདས༌། 6 ཏེ༌ནེ༌ ཁོང༌ ཤི༌མོན༌ པི༌ཏྲར༌རི༌ དུན༌ལ༌ སླེབ༌པ༌དང༌, པི༌ཏྲར༌རི༌ ཞུས༌, "གཙོ༌བོ༌ ཉེ༌རང༌ངི༌ ངའེ༌ རྐང༌པ༌ ཁྲུའ༌ བཛད༌དད༌ད༌?།" 7 ཡེ༌ཤུའི༌ ཁོའ༌ ལན༌ སལས༌, "ངའེ༌ བཅོ༌ཁན༌བོ༌ དག༌ས༌ ཁྱོ༌རང༌ང༌ ཧ༌མི༌གོ༌, ཡིན༌ནའང༌ སྟིང༌ནེ༌ ཧ༌གོ༌ཡིན༌།" 8 པི༌ཏྲར༌རི༌, "མན༌, ཉེ༌རང༌ངི༌ ངའེ༌ རྐང༌པ༌ ཏ༌ མ༌ནེ༌ ཁྲུ༌ མ༌བཛད༌" ཞུས༌། ཡེ༌ཤུའི༌ ཁོའ༌, "གལ༌ཏེས༌ ངའེ༌ ཁྱོ༌རང༌ངི༌ རྐང༌པ༌ མ༌ཁྲུ༌ན༌ ཏེ༌ནེ༌ ཁྱོ༌རང༌ ངའེ༌ སློབ༌ཕྲུག༌ མན༌" མོལས༌། 9 ཤི༌མོན༌ པི༌ཏྲར༌རི༌, "གཙོ༌བོ༌ ཏེ༌ཟུག༌ཀད༌ ཡིན༌ན༌ ངའེ༌ རྐང༌པ༌ མ༌ཚད༌, ལག༌ དང༌ གོའང༌ ཁྲུའ༌ བཛད༌" ཞུས༌། 10 ཡེ༌ཤུའི༌ ཁོའ༌ ལན༌ལ༌, "ཆུའ༌ ཞུགས༌ཁན༌ནི༌ མིའི༌ རྐང༌པ༌ ཙ༌ མན༌ནེ༌ ཁྲུ༌དགོས༌ མེད༌ཏེ༌ ཡིན༌ནོག༌, ཁོའེ༌ ཟུགས༌པོ༌ གང༌པོ༌ ལག༌མོ༌ ཡོད༌ཏེ༌ ཡིན༌ནོག༌། གཅིག༌གཅིག༌ མ༌སྟོགས༌ ཁྱོ༌ཞའ༌ ཚང༌མ༌ རྩང༌མ༌ ཡིན༌།" 11 ཡེ༌ཤུའ༌ ངོ༌ལོག༌ བཅོ༌ཁན༌བོ༌ ཐུགས༌རྒྱུས༌ ཡོད༌ པ༌སང༌ 'གཅིག༌གཅིག༌ མ༌སྟོགས༌ ཁྱོ༌ཞའ༌ ཚང༌མ༌ རྩང༌མ༌ ཡིན༌' མོལས༌། 12 ཡེ༌ཤུའི༌ སློབ༌ཕྲུག༌གུན༌ནི༌ རྐང༌པ༌ ཁྲུ༌ ཚར༌ར༌དང༌ རང༌ངི༌ ནམ༌བཟའ༌ ནམས༌ཏེ༌ ཁོང༌རང༌ངི༌ ནས༌སའེ༌ཀ༌ ཞུགས༌, ཡང༌ ཁོང༌ངི༌ སློབ༌ཕྲུག༌གུན༌ལ༌ འདྲི༌ བཛདས༌, "ངའེ༌ ཁྱོ༌ཞའ༌གུན༌ལ༌ བཅི༌ བཅོས༌ ཏེ༌བོའེ༌ ཏོན༌བོ༌ ཧ༌གོའ༌?། 13 ཁྱོ༌ཞའ༌གུན༌ནི༌ ང༌ སློབ༌དཔོན༌ དང༌ གཙོ༌བོ༌ ཟེར༌ར༌ནོག༌། ཁྱོ༌ཞའེ༌ ཏེ༌ཟུག༌ ཟེར༌ཅེས༌པོ༌ འོས༌པ༌ ཡིན༌ནོག༌ བཅིའ༌ཟེར༌ན༌ ང༌ བདེན༌བ༌ ཁྱོ༌ཞའེ༌ གཙོ༌བོ༌ དང༌ སློབ༌དཔོན༌ ཡིན༌། 14 ཏ༌ ང༌ ཁྱོ༌ཞའ༌གུན༌ནི༌ སློབ༌དཔོན༌ དང༌ གཙོ༌བོ༌ ཡིན༌ཡིན༌ ཞིག༌ ཁྱོ༌ཞའེ༌ རྐང༌པ༌ ཁྲུའད༌ན༌, ཁྱོ༌ཞའ༌གུན༌ནིའང༌ གཅིག༌ དང༌ གཅིག༌གི༌ རྐང༌པ༌ ཁྲུ༌དགོས༌། 15 ངའེ༌ བཅོས༌ཁན༌གུན༌ ཁྱོ༌ཞེའང༌ བཅོ༌ཅེས༌སི༌ ཕིའ༌ ཁྱོ༌ཞའ༌གུན༌ལ༌ ངའེ༌ སྤེ༌ ཞིག༌ སྟན༌ཏེ༌ ཡིན༌། 16 ངའེ༌ ཁྱོ༌ཞའ༌ བདེན༌བ༌ ཟེར༌རད༌, ཞབ༌ཤི༌ སུ༌ ཞིག༌གའང༌ རང༌ངི༌ སྤོན༌བོའེ༌ སང༌ ཆེན༌མོ༌ མི༌རྒྱུར༌, ཡང༌ ལོན༌ ཁྱོང༌ཁན༌བོ༌ ལོན༌ ཀལ༌ཁན༌བོའེ༌ སང༌ ཆེན༌མོ༌ མི༌ཆའ༌། 17 ཏ༌ ཁྱོ༌ཞའ༌གུན༌ལ༌ འི༌ སྤེ༌ར༌གུན༌ ཧ༌གོ༌ཏེ༌ ཡིན༌ནོག༌། འི༌ སྤེ༌ར༌གུན༌ནི༌ཀ༌ ལག༌ལེན༌ བཅོ༌ན༌ མ༌ བྱིན༌ལབས༌ ཐོབ༌ཡིན༌།"
གཙོ༌བོ༌ ཡེ༌ཤུའི༌ ཁོང༌ང༌ ངོ༌ལོག༌ བཅོ༌ཁན༌ནི༌ སྐོར༌ལ༌ ལུང༌སྟན༌ སལས༌།
18 ཡེ༌ཤུའི༌ མོལས༌, "ངའེ༌ ཁྱོ༌ཞའ༌ ཚང༌མའེ༌ སྐོར༌ལ༌ ཟེར༌ར༌མེད༌། ངའེ༌ འདམས༌ཁན༌གུན༌ ང༌ རྒྱུས༌ཡོད༌། ཡིན༌ནའང༌ དམ༌པའེ༌ གསུང༌རབས༌སི༌ འི༌ ལུང༌སྟན༌པོ༌ འདྲན༌དྲ༌ འགྲུབ༌དགོས༌། ང༌ ཉམ༌པོ༌ ཟའ༌ཁན༌བོའེ༌ ངའ༌ ངོ༌ལོག༌ བཅོ༌ཡིན༌། 19 འི༌གུན༌ བྱུང༌ ཟ༌ནེ༌ ང༌ མ༌ཤི༌ཀ༌ ཡིན༌ཁན༌བོ༌ དད༌པ༌ བཅོ༌ཅེས༌སི༌ ཕིའ༌ ངའེ༌ དག༌ས༌ ཁྱོ༌ཞའ༌གུན༌ལ༌ འི༌བོ༌ བྱུང༌ངི༌ སང༌ སྔོན༌ལ༌ ཟེར༌རད༌། 20 ངའེ༌ ཁྱོ༌ཞའ༌ བདེན༌བ༌ ཟེར༌རད༌, སུ༌ཞིག༌གི༌ ངའེ༌ ཀལ༌ཁན༌བོའ༌ དགའ༌སུས༌ ཞུ༌ཡིན༌ ཁོའེ༌ ངའ༌ དགའ༌སུས༌ ཞུ༌ཏེ༌ ཡིན༌, ཡང༌ སུ༌ཞིག༌གི༌ ང༌ དགའ༌སུས༌ ཞུ༌ཡིན༌ ཁོའེ༌ ང༌ ཀལ༌ལ༌ བཛད༌ཁན༌བོའ༌ དགའ༌སུས༌ ཞུ༌ཏེ༌ ཡིན༌།" 21 ཏེ༌ཟུག༌ མོལ༌ཏེ༌ སྟིང༌ནེ༌ ཡེ༌ཤུ༌ མ༌ ཐུགས༌སྐྱོ༌མོ༌ སྐྱོདས༌, ཡང༌ མོལ༌ལ༌ བཛདས༌, "ངའེ༌ ཁྱོ༌ཞའ༌ བདེན༌བ༌ ཟེར༌རད༌, ཁྱོ༌ཞའ༌གུན༌ནི༌ ཕྲོ༌ནེ༌ གཅིག༌ གཅིག༌གི༌ ངའ༌ ངོ༌ལོག༌ བཅོ༌ཡིན༌།" 22 ཏེ༌བོ༌ ཚོར༌ར༌དང༌ སློབ༌ཕྲུག༌གུན༌ནི༌ ཁོང༌རང༌ གཅིག༌ དང༌ གཅིག༌ག༌ ལྟས༌ བཅིའ༌ཟེར༌ན༌ ཁོང༌ངི༌ སུའི༌ སྐོར༌ལ༌ མོལ༌ཏེ༌ ཡིན༌ སུའང༌ རྒྱུས༌ མེད༌པིན༌། 23 ཡེ༌ཤུའི༌ གཅེས༌པ༌ བཛད༌ཁན༌ནི༌ སློབ༌ཕྲུག༌པོ༌ ཁོང༌ངི༌ དུན༌ལ༌ འདུགས༌ཏེ༌ ཡོད༌པིན༌། 24 ཤི༌མོན༌ པི༌ཏྲར༌རི༌ མགོ༌ ཡུག༌ཡིན༌ཞིག༌ ཏེ༌ སློབ༌ཕྲུག༌པོའ༌, "ཡེ༌ཤུའ༌ སུའི༌ སྐོར༌ལ༌ མོལ༌ཏེ༌ ཡིན༌ ཟེར༌ཏེ༌ འདྲིས༌སའང༌" ཟེརས༌། 25 ཏེ༌ སློབ༌ཕྲུག༌པོ༌ ཡེ༌ཤུའི༌ ཆོགས༌ལ༌ གུས༌ཏེ༌ ཞུས༌, "གཙོ༌བོ༌ ཏེ༌ མི༌བོ༌ སུ༌ ཡིན༌ནོག༌?།" 26 ཡེ༌ཤུའི༌ ལན༌ལ༌, "ངའེ༌ ཁམ༌བུ༌ སྤགས༌ཏེ༌ བཏང༌ཁན༌བོ༌ ཡིན༌" མོལས༌། ཏེ༌ནེ༌ ཡེ༌ཤུའི༌ ཤི༌མོན༌ ཀར༌ཡོད༌པའེ༌ བུ༌ཚ༌ ཡུ༌དཱའ༌ ཁམ༌བུ༌ ཞིག༌ སྤགས༌ཏེ༌ སལས༌། 27 ཏེ༌ ཁམ༌བུ༌བོ༌ ཅབ༌ ཟའ༌དང༌ ཁོའེ༌ ནང༌ང༌ ཤེ༌ཏན༌ ཞུགས༌། ཁོའ༌ ཡེ༌ཤུའི༌, "ཁྱོ༌རང༌ངི༌ བཅི༌ཞིག༌ བཅོ༌ཅེས༌ ཡིན༌ནའང༌ གྱོགས༌པ༌ བཅོས༌" མོལས༌། 28 ཡིན༌ནའང༌ ཅོག༌ཙེ༌ དུན༌ལ༌ ཡོད༌ཁན༌གུན༌ལ༌ ཡེ༌ཤུའི༌ ཁོའ༌ ཏེ༌ཟུག༌ བཅིའ༌ མོལ༌ཏེ༌ ཡིན༌ ཅའང༌ ཧ༌མ༌གོ༌། 29 ཡུ༌དཱའ༌ པེ༌ནེ༌ ཁག༌ཁུར༌པ༌ ཡིན༌པ༌, ཁ༌ཅིག༌གི༌ ཡེ༌ཤུའི༌ ཁོའ༌ དུས༌ཆེན༌ནི༌ ཕིའ༌ དགོས༌སྡོམ༌གུན༌ ཉོ༌ཅེས༌ ཡ༌ ཉལ༌བ༌ཅན༌ གུན༌ལ༌ པེ༌ནེ༌ བཏང༌ཅེས༌སི༌ ཕིའ༌ མོལ༌ཏེ༌ ཡིན༌འགྲོ༌ སམ༌། 30 ཡུ༌དཱའེ༌ ཏེ༌ ཏ༌གི༌ ཁམ༌བུ༌བོ༌ ཟོས༌ཏེ༌ ཁོ༌ ཕི༌ལོག༌ག༌ བིང༌ཏེ༌ སོང༌, ཏེ༌ཟ༌ནེ༌ ཚན༌ སོང༌ཏེ༌ ཡོད༌པིན༌།
ཡེ༌ཤུའི༌ པི༌ཏྲར༌རི༌ ཁོང༌ མི༌ཤེས༌ཟུན༌ བཏངས༌ཅེས༌སི༌ སྐོར༌ལ༌ ལུང༌སྟན༌ན༌ བཛདས༌།
31 ཏེ༌ནེ༌ ཡུ༌དཱ༌ སོང༌ ཚར༌ར༌དང༌ ཡེ༌ཤུའི༌, "ཏ༌ མི༌རིགས༌སི༌བུའ༌ སྤལ༌ ཐོབ༌ཀི༌ཡོད༌། ཁོ༌ རྒྱུད༌ཏེ༌ དཀོན༌མཆོག༌གའང༌ སྤལ༌ ཐོབ༌ཡིན༌། 32 གལ༌ཏེས༌ སྲས༌ རྒྱུད༌ཏེ༌ དཀོན༌མཆོག༌ག༌ སྤལ༌ ཐོབ༌བད༌ན༌, དཀོན༌མཆོག༌གི༌ ཁོང༌རང༌ངི༌ ནང༌ང༌ སྲས༌ལའང༌ སྤལ༌ གྱོགས༌པ༌ སལ༌ལ༌ བཛད༌ཡིན༌། 33 ངའེ༌ ཕྲུ༌གུ༌གུན༌, དུས༌ ཉུ༌ངུན༌ ཞིག༌གི༌ ཕིའ༌ ང༌ ཁྱོ༌ཞའ༌གུན༌ ཉམ༌པོ༌ ལུས༌ཡིན༌། ཁྱོ༌ཞའེ༌ ང༌ ཙལ༌ཡིན༌ ཀ༌ཟུག༌ ངའེ༌ ཡ༌ཧུ༌དཱ༌པ༌གུན༌ལ༌ ཟེར༌ཏེ༌ ཡིན༌། དག༌ས༌ ཁྱོ༌ཞའ༌གུན༌ལའང༌ ཟེར༌རད༌, ཀ༌རུ༌ ང༌ ཆའད༌ ཁྱོ༌ཞའ༌གུན༌ ཏེ༌རུ༌ ཡོང༌ མི༌ཉན༌། 34 ངའེ༌ ཁྱོ༌ཞའ༌གུན༌ལ༌ བཀའ༌ སོ༌མ༌ ཞིག༌ བཏང༌ངད༌། གཅིག༌ དང༌ གཅིག༌ག༌ བྱམས༌པ༌ བཅོས༌། ངའེ༌ ཁྱོ༌ཞའ༌གུན༌ ཉམ༌པོ༌ བྱམས༌པ༌ བཅོའ༌ ཙོགས༌ལ༌ ཁྱོ༌ཞའ༌གུན༌ནིའང༌ གཅིག༌ དང༌ གཅིག༌ག༌ བྱམས༌པ༌ བཅོ༌དགོས༌། 35 གལ༌ཏེས༌ ཁྱོ༌ཞའེ༌ འི༌ཙོགས༌ བཅོ༌ན༌, ཏེ༌ནེ༌ མི༌ཚང༌མ༌ལ༌ ཁྱོ༌ཞའ༌གུན༌ ངའེ༌ སློབ༌ཕྲུག༌ ཡིན༌ཁན༌བོ༌ ཧ༌གོ༌ཡིན༌།" 36 ཏེ༌ནེ༌ ཤི༌མོན༌ པི༌ཏྲར༌རི༌ ཡེ༌ཤུའ༌, "གཙོ༌བོ༌ ཉེ༌རང༌ ཀ༌རུ༌ སྐྱོད༌ཅེས༌ ཡིན༌" ཞུས༌། ཡེ༌ཤུའི༌ ལན༌ལ༌, "དག༌ས༌ ང༌ ཀ༌རུ༌ ཆའད༌ ཁྱོ༌རང༌ ཡོང༌ མི༌ཉན༌, ཡིན༌ནའང༌ སྟིང༌ནེ༌ ཁྱོ༌རང༌ ངའ༌ བྲངས༌ཏེ༌ ཡོང༌ཡིན༌" མོལས༌། 37 པི༌ཏྲར༌རི༌ འདྲིས༌, "ཀྱེ༌ གཙོ༌བོ༌ ང༌ ཉེ༌རང༌ ཉམ༌པོ༌ དག༌ས༌ བཅིའ༌ ཡོང༌ མི༌ཉན༌། ཉེ༌རང༌ངི༌ ཕིའ༌ ངའེ༌ སྲོག༌གའང༌ བཏང༌ཡིན༌" ཟེརས༌། 38 ཡེ༌ཤུའི༌ ལན༌ལ༌, "བདེན༌བ༌ ཁྱོ༌རང༌ངི༌ ངའེ༌ ཏོན༌ལ༌ རང༌ངི༌ སྲོག༌པོ༌ བཏང༌ཡིན༌ན༌?། ངའེ༌ ཁྱོ༌རང༌ང༌ བདེན༌བ༌ ཟེར༌རད༌, དི༌རིང༌ བྱའ༌པོའེ༌ སྐད༌ བཏང༌ངི༌ སང༌ སྔོན༌ལ༌ ཁྱོ༌རང༌ངི༌ ལན༌ གསུམ༌ ང༌ ངོ༌ མི༌ཤེས༌ཟུན༌ བཏང༌ཡིན༌" མོལས༌།
གཙོ༌བོ༌ ཡེ༌ཤུའི༌ རང༌ངི༌ སློབ༌ཕྲུག༌གུན༌ལ༌ སེམས༌སོ༌ སལས༌།
1 གཙོ༌བོ༌ ཡེ༌ཤུའི༌ ཁོང༌རང༌ངི༌ སློབ༌ཕྲུག༌གུན༌ལ༌ མོལས༌, "ཁྱོ༌ཞའ༌གུན༌ནི༌ སེམས༌ཚེར༌ མ༌བཅོ༌ཤིག༌། དཀོན༌མཆོག༌གི༌ཀ༌ ཡིད༌ཆེས༌ བཅོ༌ཤིག༌ ཡང༌ ངའེ༌ཀའང༌ ཡིད༌ཆེས༌ བཅོ༌ཤིག༌། 2 ངའེ༌ ཡབ༌བི༌ ཁང༌པའེ༌ ནང༌ང༌ ནས༌ས༌ མང༌པོ༌ ཡོད༌། གལ༌ཏེས༌ ཏེ༌བོ༌ མེད༌པིན༌ན༌ ངའེ༌ བཅིའ༌ ཟེར༌ཡིན༌ ང༌ ཁྱོ༌ཞའ༌གུན༌ནི༌ ཕིའ༌ ཏེ༌རུ༌ ནས༌ས༌ གྲལ༌གྲིག༌ བཅོའ༌ ཆའད༌། 3 གལ༌ཏེས༌ ང༌ སོང༌ཏེ༌ ནས༌ས༌ གྲལ༌གྲིག༌ བཅོ༌ན༌, ང༌ ལོགས༌ཏེ༌ ཡོངས༌ཏེ༌ ཁྱོ༌ཞའ༌གུན༌ ང༌རང༌ ཉམ༌པོ༌ ཁྲིད༌ཏེ༌ ཁྱེར༌ཡིན༌། ང༌ ཀ༌རུ༌ ཡོད༌ནའང༌ ཁྱོ༌ཞའ༌གུན༌ནའང༌ ཏེ༌རུ༌ ང༌ ཉམ༌པོ༌ འདུག༌ཅེས༌སི༌ ཕིའ༌ ངའེ༌ ཏེ༌གུན༌ བཅོ༌ཡིན༌། 4 ཁྱོ༌ཞའ༌གུན༌ལ༌ ང༌ ཆ༌ཅེས༌སི༌ ནས༌སའེ༌ ལམ༌བོ༌ རྒྱུས༌ཡོད༌།"
ཡེ༌ཤུ༌ ནི༌ ཡབ༌བི༌ཀ༌ ཆ༌ཅེས༌སི༌ ལམ༌བོ༌ ཡིན༌།
5 ཐོ༌མཱས༌སི༌ ཡེ༌ཤུའ༌ ཞུས༌, "ཀྱེ༌ གཙོ༌བོ༌, ང༌ཞའ༌ ཉེ༌རང༌ ཀ༌རུ༌ སྐྱོད༌ད༌ བཛད༌ཅེས༌བོ༌ རྒྱུས༌མེད༌པ༌ ང༌ཞའ༌ ཀ༌ཟུག༌གི༌ ཏེ༌ ལམ༌བོ༌ ཤེས༌ཡིན༌།" 6 ཡེ༌ཤུའི༌ ལན༌ལ༌, "ང༌རང༌ ནི༌ ཏེ༌ ལམ༌བོ༌ དང༌ བདེན༌བ༌བོ༌ དང༌ སྲོག༌བོ༌ ཡིན༌། ང༌ གཅིག༌པོ༌ རྒྱུད༌ཏེ༌ མ༌ནེ༌ སུ༌ཞིག༌གའང༌ ཡབ༌བི༌ སྐུན༌དུན༌ལ༌ མི༌ བསླེབ༌། 7 གལ༌ཏེས༌ ཁྱོ༌ཞའ༌གུན༌ནི༌ བདེན༌བ༌ ང༌ སུ༌ ཡིན༌ཁན༌བོ༌ ཤེས༌ཏེ༌ ཡིན༌པིན༌ན༌, ཁྱོ༌ཞའ༌གུན༌ནི༌ ངའེ༌ ཡབ༌བའང༌ ཤེས༌ཏེ༌ ཡོད༌འགྲོ༌། ཏ༌ནེ༌ཕར༌ལ༌ ཁྱོ༌ཞའེ༌ ཁོང༌ ཤེས༌ཡིན༌ ཡང༌ ཁྱོ༌ཞའ༌གུན༌ནི༌ ཁོང༌ མཇལ༌ཏེ༌ ཡིན༌།" 8 ཏེ༌ནེ༌ ཕི༌ལིབ༌བི༌, "ཀྱེ༌ གཙོ༌བོ༌ ང༌ཞའ༌ ཡབ༌ དཀོན༌མཆོག༌གི༌ མཇལ༌ཅུག༌ག༌ བཛད༌དའང༌, ཡང༌ ཏེ༌བོ༌ ང༌ཞའེ༌ ཕིའ༌ ཚམ༌ ཐད༌ཐད༌ ཡིན༌། 9 ཡེ༌ཤུའི༌ ཕི༌ལིབ༌བ༌ མོལས༌, "ང༌ ཁྱོ༌ཞའ༌ ཉམ༌པོ༌ འི༌ཟམ༌ དུས༌ མང༌པོ༌ འདུགས༌ཏེའང༌ ཁྱོ༌རང༌ང༌ ཏ༌རོང༌ངའང༌ ང༌ མ༌ཤེས༌ས༌?། ང༌ ཐོང༌ཁན༌གུན༌ནི༌ ཡབ༌བའང༌ མཇལ༌ཏེ༌ ཡིན༌། ཏེ༌ནེ༌ ཁྱོ༌རང༌ངི༌ ཀ༌ཟུག༌ག༌ ཟེར༌རད༌ ང༌ཞའ༌ ཡབ༌ མཇལ༌ཅུག༌ ཟེར༌ཏེ༌?། 10 ཁྱོ༌རང༌ང༌ ང༌ ཡབ༌བི༌ ནང༌ང༌ ཡང༌ ཡབ༌ ངའེ༌ ནང༌ང༌ ཡོད༌ཁན༌བོ༌ བདེན༌ཤེས༌ས༌ མེ༌རག༌ག༌?། ངའེ༌ བཅི༌ སྤེ༌ར༌ ཞིག༌ ཁྱོ༌ཞའ༌གུན༌ལ༌ ཟེར༌རད༌ ཏེ༌གུན༌ ང༌རང༌ གཅིག༌པོའེ༌ ཆོགས༌ནེ༌ མན༌པ༌ ངའེ༌ ཡབ༌བི༌ ཡིན༌, ཀ༌བོ༌ ངའེ༌ ནང༌ང༌ ཞུགས༌ཏེ༌ ཁོང༌རང༌ངི༌ ཕྱག༌ལས༌ བཛད༌དད༌། 11 ཏ༌ ངའེ༌ ང༌ ཡབ༌བི༌ ནང༌ང༌ ཡང༌ ཡབ༌ ངའེ༌ ནང༌ང༌ ཡིན༌ ཟེར༌ཁན༌བོའ༌ བདེན༌ཤེས༌ཤིག༌། འི༌བོའ༌ བདེན༌ མ༌ཤེས༌ནའང༌ ངའེ༌ སྐོར༌ལ༌ སྤང༌པོ༌ བཏང༌ཁན༌ནི༌ ཧ༌ལས༌ཤེས༌སི༌ ལས༌གུན༌ ཐོང༌ཏེ༌ བདེན༌ཤེས༌ཤིག༌། 12 ངའེ༌ ཁྱོ༌ཞའ༌ བདེན༌བ༌ ཟེར༌རད༌, ངའེ༌ཀ༌ དད༌པ༌ བཅོ༌ཁན༌གུན༌ནི༌ ཏེན༌ན༌ ལས༌པོ༌ བཅོ༌ཡིན༌, ཀ༌བོ༌ ངའེ༌ བཅོའད༌པིན༌, མ༌ཚད༌ ཏེ༌གུན༌ནི༌ འི༌ སང༌ ཀྲག༌ག༌ ལས༌ བཅོ༌ཡིན༌ བཅིའ༌ཟེར༌ན༌ ང༌ ནི༌ ཡབ༌བི༌ཀ༌ ཆའད༌། 13 ཡབ༌བི༌ སྤལ༌བོ༌ སྲས༌ རྒྱུད༌ཏེ༌ མངོན༌ཅེས༌སི༌ ཕིའ༌ ཁྱོ༌ཞའ༌གུན༌ནི༌ བཅི༌ཞིག༌ ངའེ༌ མིང༌ ཁུར༌ཏེ༌ ཞུ༌ནའང༌ ངའེ༌ ཁྱོ༌ཞའ༌ བཏང༌ཡིན༌། 14 ཁྱོ༌ཞའེ༌ ངའེ༌ མིང༌ ཁུར༌ཏེ༌ ང༌ བཅི༌ཞིག༌ བཅོ༌ཅེས༌ལ༌ ཞུ༌བ༌ ཕུལ༌ནའང༌ གྲིག༌། ངའེ༌ བདེན༌བ༌ བཅོ༌ཡིན༌།"
ཡེ༌ཤུའི༌ དམ༌པའེ༌ ཐུགས༌ཉིད༌ སལ༌ཅེས༌སི༌ ཞལ༌ཆད༌།
15 ཡེ༌ཤུའི༌ མོལས༌, "གལ༌ཏེས༌ ཁྱོ༌ཞའ༌གུན༌ནི༌ ང༌ བྱམས༌པ༌ བཅོའད༌ན༌ ངའེ༌ བཀའ༌གུན༌ སྲུང༌, 16 ངའེ༌ ཡབ༌བ༌ ཞུ༌བ༌ ཕུལ༌ཅེས༌བོའེ༌ ཁོང༌ངི༌ ཁྱོ༌ཞའ༌གུན༌ལ༌ གཞན༌ རོགས༌ བཛད༌ཁན༌ ཞིག༌ ཀལ༌ལ༌ བཛད༌ཡིན༌, ཀ༌བོ༌ དུས༌རྒྱུན༌ ཁྱོ༌ཞའ༌ ཉམ༌པོ༌ ཞུགས༌ཡིན༌། 17 ཁོང༌ ནི༌ མི༌གུན༌ དྲང༌པོའེ༌ ཆོགས༌ལ༌ ཁྲིད༌ཁན༌ དམ༌པའེ༌ ཐུགས༌ཉིད༌བོ༌ ཡིན༌། འཇིག༌རྟེན༌ནི༌ དད༌པ༌ མེད༌ཁན༌ནི༌ མི༌གུན༌ནི༌ ཁོང༌ངི༌ ནང༌ང༌ དད༌པ༌ མི༌བཅོ༌ བཅིའ༌ཟེར༌ན༌ ཁོང༌གུན༌ནི༌ ཁོང༌ མཇལ༌ལ༌ མན༌ནོག༌ ཡང༌ ཤེས༌སའང༌ མན༌ནོག༌། ཡིན༌ནའང༌ ཁྱོ༌ཞའ༌གུན༌ནི༌ ཁོང༌ ཤེས༌ས༌ནོག༌ བཅིའ༌ཟེར༌ན༌ ཁོང༌ ཁྱོ༌ཞའ༌ ཉམ༌པོ༌ ཞུག༌ས༌ནོག༌ ཡང༌ ཁྱོ༌ཞའ༌གུན༌ནི༌ ནང༌ང༌ ནས༌ཡིན༌། 18 ངའེ༌ ཁྱོ༌ཞའ༌ དཱོ༌ཙེའེ༌ ཙོགས༌ལ༌ ཕངས༌ཏེ༌ མི༌བོར༌། ང༌ ཁྱོ༌ཞའ༌གུན༌ ཡོད༌ས༌ ཡོང༌ཡིན༌། 19 ཙ༌པིག༌ ཤིག༌ནེ༌ འི༌ འཇིག༌རྟེན༌ནི༌ དད༌པ༌ མེད༌ཁན༌གུན༌ནི༌ ང༌ མི༌ཐོང༌, ཡིན༌ནའང༌ ཁྱོ༌ཞའ༌གུན༌ནི༌ ང༌ ཐོང༌ཡིན༌། ང༌ གསོན༌པོ༌ ཡིན༌ཅེས༌པོའེ༌ ཁྱོ༌ཞའ༌གུན༌ནའང༌ གསོན༌ཏེའ༌ ལུས༌ཡིན༌། 20 ང༌ གསོན༌ཏེའ༌ ལང༌ངི༌ ཞག༌ག༌, ང༌ ཡབ༌བི༌ ནང༌ང༌ ཡང༌ ཁྱོ༌ཞའ༌གུན༌ ངའེ༌ ནང༌ང༌ ཡང༌ ང༌ ཁྱོ༌ཞའེ༌ ནང༌ང༌ ཡིན༌ཁན༌བོ༌ ཁྱོ༌ཞའ༌ ཧ༌གོ༌ཡིན༌། 21 ངའེ༌ བཀའ༌གུན༌ ཉན༌ཏེ༌ སྲུང༌ཁན༌གུན༌ ནི༌ ངའ༌ བྱམས༌པ༌ བཅོ༌ཁན༌གུན༌ ཡིན༌། ངའ༌ གཅེས༌པ༌ བཅོ༌ཁན༌གུན༌ལ༌ ངའེ༌ ཡབ༌བིའང༌ གཅེས༌པ༌ བཅོའ༌ བཛད༌ཡིན༌། ཡང༌ ངེའང༌ ཏེ༌ མི༌གུན༌ལ༌ བྱམས༌པ༌ བཅོས༌ཏེ༌, ང༌རང༌ ཁོང༌གུན༌ལ༌ མངོན༌ ཅུག༌ཡིན༌།" 22 ཏེ༌ནེ༌ ཡུ༌དཱའེ༌ ༼ཀར༌ཡོད༌པ༌ མན༌ཁན༌བོའེ༌༽ ཞུས༌, "ཀྱེ༌ གཙོ༌བོ༌, ཉེ༌རང༌ ང༌ཞའ༌གུན༌ལ༌ མངོན༌ ཅུག༌ཅེས༌ ཡང༌ འཇིག༌རྟེན༌ནི༌ དད༌པ༌ མེད༌ཁན༌གུན༌ལ༌ མངོན༌ མི༌ཅུག༌ཅེས༌བོ༌ བཅི༌ཕིའ༌ ཡིན༌?།" 23 ཡེ༌ཤུའི༌ ལན༌ལ༌, "གལ༌ཏེས༌ མི༌ ཞིག༌གི༌ ང༌ བྱམས༌པ༌ བཅོའད༌ན༌ ཏེ༌ མི༌བོའེ༌ ངའེ༌ སླབ༌བྱ༌གུན༌ནི༌ཀ༌ ལག༌ལེན༌ བཅོ༌ཡིན༌། ངའེ༌ ཡབ༌བི༌ ཁོའ༌ བྱམས༌པ༌ བཛད༌ཡིན༌ ཡང༌ ང༌ཞའ༌ གཉིས༌ཀོ༌ ཁོའི༌ཀ༌ ཡོངས༌ཏེ༌ ཁོ༌ ཉམ༌པོ༌ འདུག༌ཡིན༌། 24 མི༌ ཞིག༌གི༌ ང༌ བྱམས༌པ༌ བཅོའ༌མེད༌ན༌ ཁོའེ༌ ངའེ༌ སླབ༌བྱ༌གུན༌ སྲུང༌ང༌ མན༌ནོག༌། ཁྱོ༌ཞའ༌གུན༌ནི༌ ཚོར༌ཁན༌ནི༌ འི༌ ལོན༌བོ༌ ང༌རང༌ངི༌ མན༌པ༌, ང༌ ཀལ༌ལ༌ བཛད༌ཁན༌ནི༌ ངའེ༌ ཡབ༌བི༌ ཡིན༌། 25 འི༌ སླབ༌བྱ༌ ཚང༌མ༌ ང༌ ཁྱོ༌ཞའ༌གུན༌ ཉམ༌པོ༌ ཡོད༌ ཟ༌ནེ༌ ཟེར༌པིན༌། 26 ཡིན༌ནའང༌ ཏེ༌ རོགས༌ བཛད༌ཁན༌ ནི༌ དམ༌པའེ༌ ཐུགས༌ཉིད༌ ཀ༌བོ༌ ཡབ༌བི༌ ངའེ༌ ཚབས༌ལ༌ ཀལ༌ལ༌ བཛད༌ཡིན༌། ཁོང༌ངི༌ ཁྱོ༌ཞའ༌གུན༌ལ༌ བཅི༌ཚང༌མ༌ སླབ༌བ༌ བཛད༌ཏེ༌ ངའེ༌ ཤད༌ཁན༌ ཚང༌མ༌ ཁྱོ༌ཞའ༌གུན༌ལ༌ ཡིད༌ཏུ༌ སྐུལ༌ཡིན༌། 27 ཁྱོ༌ཞའ༌གུན༌ནི༌ ལག༌ག༌ ཞི༌བདེ༌བོ༌ བོར༌རད༌། ངའེ༌ ཞི༌བདེ༌བོ༌ ཁྱོ༌ཞའ༌ བཏང༌ངད༌, ཀ༌བོ༌ འཇིག༌རྟེན༌པའེ༌ ཞི༌བདེ༌ ཙོགས༌ཤིག༌ མན༌། ཁྱོ༌ཞའ༌གུན༌ནི༌ སེམས༌ལ༌ སེམས༌ཚེར༌ ཡོང༌ མ༌ཅུག༌ ཡང༌ འཇིགས༌ མ༌འཇིགས༌ཤིག༌། 28 ཁྱོ༌ཞའ༌གུན༌ནི༌ ང༌ ཆའད༌, ཡང༌ ཁྱོ༌ཞའ༌གུན༌ནི༌ཀ༌ ཡང༌ ལོགས༌ཏེ༌ ཡོང༌ཡིན༌ ཟེར༌ཡིན༌ ཚོར༌ཏེ༌ ཡིན༌ནོག༌། གལ༌ཏེས༌ ཁྱོ༌ཞའེ༌ ང༌ བྱམས༌པ༌ བཅོའད༌པིན༌ན༌ ཁྱོ༌ཞའེ༌ ང༌ ཡབ༌བི༌ཀ༌ ཆ༌ཅེས༌བོ༌ ཤེས༌ཏེ༌ ཐད༌པོ༌ ཡོད༌འགྲོ༌ བཅིའ༌ཟེར༌ན༌ ཡབ༌ ངའེ༌ སང༌ ཆེའ༌ ཡིན༌། 29 ཏེ༌བོ༌ བྱུང༌ང༌ཅིག༌ ཁྱོ༌ཞའེ༌ ངའེ༌ཀ༌ དད༌པ༌ ཁྱོང༌ཅེས༌སི༌ ཕིའ༌ འི༌ ཚང༌མ༌ བྱུང༌ངི༌ སང༌ སྔོན༌ལ༌ ངའེ༌ ཁྱོ༌ཞའ༌གུན༌ལ༌ ཤད༌ཏེ༌ ཡིན༌། 30 ང༌ ཁྱོ༌ཞའ༌གུན༌ དང༌ སྤེ༌ར༌ བཏང༌ཅེས༌ལ༌ དུས༌ མང༌པོ༌ ཞིག༌ མེད༌ བཅིའ༌ཟེར༌ན༌ འཇིག༌རྟེན༌པ༌ དད༌པ༌ མེད༌ཁན༌གུན༌ནི༌ དབང༌སྲུལ༌པ༌པོ༌ ཡོང༌འདུག༌, ཁོའ༌ ངའེ༌ཀ༌ ཅའང༌ དབང༌ མེད༌། 31 ཡིན༌ནའང༌ ངའེ༌ ཡབ༌བ༌ བྱམས༌པ༌ བཅོ༌ཅེས༌ དང༌ ཁོང༌ངི༌ ང༌ བཀའ༌ སལ༌ལ༌ བཛད༌ཁན༌གུན༌ འདྲན༌དྲ༌ བཅོ༌ཅེས༌བོ༌ འཇིག༌རྟེན༌པ༌གུན༌ལ༌ རྒྱུས༌ ཡོང༌དགོས༌། ཏ༌ ལོང༌ཤིག༌ ང༌དང༌གུན༌ འི༌ཀ༌ནེ༌ ཆེན༌" མོལས༌།
རྒུན༌ནི༌ ལྕང༌མ༌ དང༌ ཡལ༌ག༌།
1 ཡེ༌ཤུའི༌ མོལས༌, "ང༌ ནི༌ བདེན༌བའེ༌ རྒུན༌ནི༌ ལྕང༌མ༌ དང༌ ངའེ༌ ཡབ༌ རྒུན༌ནི༌ ཚས༌ཁན༌བོ༌ ཡིན༌། 2 བྲས༌བུ༌ མ༌ཆགས༌ཁན༌ནི༌ ཡལ༌ག༌གུན༌ ངའེ༌ ཀ༌ནེ༌ བཅད༌ཏེ༌ ཕང༌ང༌ བཛད༌འདུག༌, ཡང༌ བྲས༌བུ༌ ཆགས༌ཁན༌ནི༌ ཡལ༌ག༌གུན༌ལ༌ མང༌ང༌ ཆགས༌ཤེས༌སི༌ ཕིའ༌ གོར༌ར༌ བཛད༌འདུག༌། 3 ངའེ༌ ཁྱོ༌ཞའ༌ ཤད༌ཁན༌ནི༌ སླབ༌བྱ༌གུན༌ནི༌ ཁྱོ༌ཞའ༌གུན༌ རྩང༌མ༌ བཅོ༌ ཚར༌ཏེ༌ ཡིན༌། 4 ངའེ༌ ནང༌ང༌ འདུག༌ཤིག༌ ཡང༌ ངའང༌ ཁྱོ༌ཞའེ༌ ནང༌ང༌ འདུག༌ཡིན༌། ཡལ༌ག༌ གཅིག༌པོའ༌ བྲས༌བུ༌ ཆགས༌ ཉན༌ན༌ མན༌ནོག༌ ཏེ༌བོ༌ རྒུན༌ནི༌ ལྕང༌མ༌ དང༌ ཐུད༌ཏེ༌ ལུས༌དགོས༌། ཏེན༌ན༌ ཙོགས༌ལ༌ གལ༌ཏེས༌ ཁྱོ༌ཞའ༌ ངའེ༌ ནང༌ང༌ མ༌འདུག༌ན༌ ཁྱོ༌ཞའ༌གུན༌ནའང༌ བྲས༌བུ༌ མི༌ ཆགས༌། 5 ང༌ ནི༌ རྒུན༌ནི༌ ལྕང༌མ༌ ཡང༌ ཁྱོ༌ཞའ༌གུན༌ ངའེ༌ ཡལ༌ག༌ ཡིན༌། སུ༌ཞིག༌ ངའེ༌ ནང༌ང༌ ཡང༌ ང༌ ཁོའེ༌ ནང༌ང༌ འདུག༌ན༌ ཏེ༌གུན༌ལ༌ བྲས༌བུ༌ མང༌པོ༌ ཆགས༌ཡིན༌, ང༌ དང༌ བེ༌ཏེ༌ ཁྱོ༌ཞའ༌གུན༌ལ༌ ཅའང༌ བཅོ༌ མི༌ཉན༌། 6 ངའེ༌ ནང༌ང༌ མ༌འདུག༌ཁན༌གུན༌ ཐག༌རིང༌ང༌ ཕངས༌ཏེ༌ སྐམས༌ཁན༌ནི༌ ཡལ༌ག༌ དང༌ ཙོགས༌ ཡིན༌, ཏེ༌ ཡལ༌ག༌གུན༌ འདུས༌ཏེ༌ མེ༌ ནང༌ང༌ ཕངས༌ཏེ༌ སྲག༌ཡིན༌། 7 ཏ༌ གལ༌ཏེས༌ ཁྱོ༌ཞའ༌ ངའེ༌ ནང༌ང༌ འདུགས༌ཏེ༌ ངའེ༌ སླབ༌བྱ༌གུན༌ ཁྱོ༌ཞའེ༌ སེམས༌སི༌ ནང༌ང༌ ལུས༌ན༌, འདོད༌པ༌ བཅོས༌ཏེ༌ བཅི༌ཞིག༌ བཏོང༌ ཟེར༌ནའང༌ ཁྱོ༌ཞའ༌ སལ༌ཡིན༌། 8 ཁྱོ༌ཞའ༌ བྲས༌བུ༌ མང༌པོ༌ ཆགས༌ ཟ༌ནེ༌ ངའེ༌ བདེན༌བའེ༌ སློབ༌ཕྲུག༌ ཡིན༌ཁན༌བོ༌ སྟན༌ན༌ནོག༌། ཏེ༌བོའེ༌ ངའེ༌ ཡབ༌བ༌ སྤལ༌ མ༌ ཆེན༌མོ༌ ཁྱོང༌ཡིན༌། 9 ཡབ༌བི༌ ང༌ བྱམས༌པ༌ བཛད༌ད༌ ཙོགས༌ལ༌ ངེའང༌ ཁྱོ༌ཞའ༌ བྱམས༌པ༌ བཅོས༌པིན༌། ཏ༌ ངའེ༌ བྱམས༌པའེ༌ ནང༌ང༌ སྟན༌པོ༌ འདུག༌ཤིག༌། 10 གལ༌ཏེས༌ ཁྱོ༌ཞའེ༌ ངའེ༌ བཀའ༌གུན༌ལ༌ ཁའ༌ ཉན༌ན༌ ཁྱོ༌ཞའ༌གུན༌ ངའེ༌ བྱམས༌པའེ༌ ནང༌ང༌ ལུས༌ཡིན༌ ཀ༌ཟུག༌གི༌ ངའེ༌ ང༌རང༌ངི༌ ཡབ༌བི༌ བཀའ༌གུན༌ལ༌ ཁའ༌ ཉན༌ཏེ༌ ཁོང༌ངི༌ བྱམས༌པའེ༌ ནང༌ང༌ འདུག༌གད༌། 11 ངའེ༌ ཐད༌པོ༌ ཁྱོ༌ཞའེ༌ ནང༌ང༌ ལུས༌ཤེས༌ ཡང༌ ཁྱོ༌ཞའ༌གུན༌ལ༌ ཐད༌པོ༌ གང༌པོ༌ ཐོབ༌ཅེས༌སི༌ ཕིའ༌ ངའེ༌ འི༌ སྤེ༌ར༌གུན༌ ཁྱོ༌ཞའ༌ ཟེར༌ཏེ༌ ཡིན༌། 12 ཀ༌ཟུག༌ ངའེ༌ ཁྱོ༌ཞའ༌གུན༌ལ༌ བྱམས༌པ༌ བཅོས༌ ཏེན༌ན༌དང༌ ཙོག༌ལ༌ ཁྱོ༌ཞེའང༌ གཅིག༌ དང༌ གཅིག༌ག༌ བྱམས༌པ༌ བཅོ༌དགོས༌ཤེས༌བོ༌ ངའེ༌ བཀའ༌ ཡིན༌། 13 རང༌ངི༌ མཛ༌འོ༌གུན༌ནི༌ ཕིའ༌ རང༌ངི༌ སྲོག༌པོ༌ བཏང༌ཅེས༌སི༌ སང༌ ཆེན༌མོ༌ ཡ༌ཤ༌ ཞིག༌ མེད༌། 14 ངའེ༌ བཀའ༌གུན༌ སྲུང༌ན༌ ཁྱོ༌ཞའ༌གུན༌ ངའེ༌ མཛ༌འོ༌ ཡིན༌། 15 ཏ༌ནེ༌ཕར༌ལ༌ ངའེ༌ ཁྱོ༌ཞའ༌ གཡོག༌པོ༌ མི༌ཟེར༌ བཅིའ༌ཟེར༌ན༌ གཡོག༌པོའ༌ སྤོན༌བོའེ༌ ལས༌སི༌ སྐོར༌ལ༌ རྒྱུས༌ ཡོང༌ང༌ མན༌ནོག༌། ཡིན༌ནའང༌ ཁྱོ༌ཞའ༌གུན༌ལ༌ ངའེ༌ མཛ༌འོ༌ ཟེར༌རད༌ བཅིའ༌ཟེར༌ན༌ ངའེ༌, ཡབ༌ནེ༌ ཚོར༌ཁན༌ ཚང༌མ༌ ཁྱོ༌ཞའ༌ ཤད༌ཏེ༌ ཡིན༌། 16 ཁྱོ༌ཞའེ༌ ང༌ འདམས༌ཏེ༌ མན༌, ངའེ༌ ཁྱོ༌ཞའ༌གུན༌ འདམས༌ཏེ༌ ཡིན༌། ཡང༌ སོང༌ཏེ༌ དུས༌རྒྱུན༌ ལུས༌ཤེས༌སི༌ བྲས༌བུ༌ ཆག༌ཤེས༌ལ༌ ཁྱོ༌ཞའ༌གུན༌ སྐོས༌ཏེ༌ ཡིན༌། ཏེ༌ནེ༌ ངའེ༌ མིང༌ངི༌ ནང༌ང༌ ཁྱོ༌ཞའེ༌ ངའེ༌ ཡབ༌བ༌ བཅི༌ཞིག༌ ཞུ༌ནའང༌ སལ༌ལ༌ བཛད༌ཡིན༌། 17 ངའེ༌ ཁྱོ༌ཞའ༌ འི༌ བཀའ༌བོ༌ བཏང༌ངད༌ ཁྱོ༌ཞའ༌གུན༌ནི༌ གཅིག༌ དང༌ གཅིག༌ག༌ བྱམས༌པ༌ བཅོས༌།"
འཇིག༌རྟེན༌པ༌གུན༌ནི༌ ཡེ༌ཤུའི༌ སློབ༌ཕྲུག༌གུན༌ལ༌ ནཕ༌རད༌ བཅོས༌།
18 ཡེ༌ཤུའི༌ མོལས༌, "གལ༌ཏེས༌ འཇིག༌རྟེན༌ནི༌ དད༌པ༌ མེད༌ཁན༌ནི༌ མི༌གུན༌ནི༌ ཁྱོ༌ཞའ༌ ནཕ༌རད༌ བཅོ༌ན༌, འི༌གུན༌ནི༌ སྔོན༌ལ༌ ངའང༌ ནཕ༌རད༌ བཅོས༌ཏེ༌ ཡིན༌ཁན༌བོ༌ ཡིད༌ཏུ༌ བཅོ༌ཤིག༌། 19 གལ༌ཏེས༌ ཁྱོ༌ཞའ༌ དད༌པ༌ མེད༌ཁན༌གུན༌ནི༌ ཕྲོ༌ནེ༌ ཡིན༌པིན༌ན༌, ཏེ༌གུན༌ནི༌ ཁོ༌རང༌ངི༌ ཕྲུ༌གུ༌གུན༌ ཙོགས༌ལ༌ གཅེས༌པ༌ བཅོས༌ཏེ༌ ཡོད༌འགྲོ༌། ཡིན༌ནའང༌ ཁྱོ༌ཞའ༌གུན༌ དད༌པ༌ མེད༌ཁན༌ འཇིག༌རྟེན༌པ༌གུན༌ནི༌ མན༌ནོག༌། ངའེ༌ འཇིག༌རྟེན༌པའེ༌ ཕྲོ༌ནེ༌ ཁྱོ༌ཞའ༌གུན༌ འདམས༌ པ༌སང༌, དད༌པ༌ མེད༌ཁན༌གུན༌ནི༌ ཁྱོ༌ཞའ༌ ནཕ༌རད༌ བཅོའ༌ནོག༌། 20 ངའེ༌ ཁྱོ༌ཞའ༌གུན༌ལ༌ འི༌ སྤེ༌ར༌ ཟེར༌ཁན༌བོ༌ ཡིད༌ཏུའ༌ བོར༌ཤིག༌, 'གཡོག༌པོ༌ ཞིག༌ རང༌ངི༌ སྤོན༌བོའེ༌ སང༌ ཆེའ༌ མན༌ནོག༌།' ཏ༌ གལ༌ཏེས༌ དད༌པ༌ མེད༌ཁན༌གུན༌ནི༌ ང༌ ནགས༌ དང༌ བར༌དོ༌ སྟན༌ཏེ༌ ཡིན༌ན༌ ཏེ༌ནེ༌ ཏེ༌གུན༌ནི༌ ཁྱོ༌ཞའང༌ ནགས༌ དང༌ བར༌དོ༌ སྟན༌ཡིན༌། གལ༌ཏེས༌ ཁོང༌གུན༌ནི༌ ངའེ༌ སླབ༌བྱ༌གུན༌ནི༌ཀ༌ ལག༌ལེན༌ བཅོས༌པིན༌ན༌ ཏེ༌ནེ༌ ཁྱོ༌ཞའེ༌ སླབ༌བྱ༌གུན༌ནི༌ཀའང༌ ལག༌ལེན༌ བཅོ༌ཡིན༌། 21 ཁྱོ༌ཞའེ༌ ངའེ༌ མིང༌ ཁུར༌ཅེས༌བོའེ༌ འི༌གུན༌ནི༌ ཁྱོ༌ཞའ༌གུན༌ལ༌ ཏེ༌ཟུག༌ ལས༌ངན༌ བཅོ༌ཡིན༌ བཅིའ༌ཟེར༌ན༌ ཁོང༌གུན༌ལ༌ ང༌ ཀལ༌ལ༌ བཛད༌ཁན༌བོ༌ ཤེས༌ས༌ མན༌ནོག༌། 22 ཏ༌ གལ༌ཏེས༌ ང༌ ཡོངས༌ཏེ༌ ཁོང༌གུན༌ལ༌ ངའེ༌ ཡབ༌བི༌ ལོན༌གུན༌ མ༌ཤད༌པིན༌ན༌ ཁོང༌གུན༌ལ༌ ཁོང༌རང༌གུན༌ནི༌ སྡིག༌པའེ༌ ཕིའ༌ སྐྱོན༌གུན༌ མ༌ཕོག༌ག༌ ཡོད༌འགྲོ༌། ཡིན༌ནའང༌ ཏ༌ ཁོང༌གུན༌ནི༌ ཁོང༌རང༌ སྡིག༌པ༌ནེ༌ སྐྱོབ༌ཅེས༌སི༌ ཕིའ༌ ཅའང༌ སྐྱོན༌ བཅོ༌ མི༌ཉན༌། 23 ངའ༌ ནཕ༌རད༌ བཅོ༌ཁན༌གུན༌ནི༌ ངའེ༌ ཡབ༌བའང༌ ནཕ༌རད༌ བཅོའ༌ནོག༌། 24 གལ༌ཏེས༌ ངའེ༌ ཏེ༌གུན༌ནི༌ ཕྲོའ༌ གཞན༌ སུ༌ཞིག༌གི༌ མ༌བཅོས༌ཁན༌ནི༌ ཏེ༌ ཧ༌ལས༌ཅེས༌སི༌ ལས༌གུན༌ མ༌བཅོས༌པིན༌ན༌, ཁོང༌གུན༌ལ༌ ཁོང༌རང༌གུན༌ནི༌ སྡིག༌པའེ༌ སྐྱོན༌གུན༌ མ༌ ཕོག༌ག༌ ཡོད༌འགྲོ༌། ཡིན༌ནའང༌ ཁོང༌གུན༌ནི༌ ངའེ༌ ཧ༌ལས༌སི༌ ལས༌གུན༌ ཐོང༌ཏེའང༌ ང༌ དང༌ ངའེ༌ ཡབ༌ གཉིས༌ཀོའ༌ ནཕ༌རད༌ བཅོ༌འདུག༌། 25 ཁོང༌གུན༌ནི༌ བཀའ༌ཁྲིམས༌སི༌ ནང༌ང༌ བྲིས༌ཏེ༌ ཡོད༌ཁན༌, 'ཁོང༌གུན༌ནི༌ ངའ༌ ཏོན༌ཏག༌ མེད༌པ༌ ནཕ༌རད༌ བཅོས༌' ཏེ༌བོ༌ འདྲན༌དྲ༌ འགྲུབ༌འདུག༌། 26 ཡིན༌ནའང༌ ངའེ༌ རོགས༌ བཛད༌ཁན༌བོ༌ ཁྱོ༌ཞའ༌གུན༌ལ༌ ཀལ༌ཡིན༌། ཁོང༌ ནི༌ དཀོན༌མཆོག༌གི༌ དྲང༌པོ༌གུན༌ སླབ༌བ༌ བཛད༌ཁན༌ནི༌ དམ༌པའེ༌ ཐུགས༌ཉིད༌ ཡིན༌། ཁོང༌ ཡབ༌བི༌ ཆོགས༌ནེ༌ ཁྱོ༌ཞའ༌གུན༌ནི༌ཀ༌ སྐྱོད༌ཡིན༌ ཡང༌ ངའེ༌ སྐོར༌ལ༌ སྤང༌པོ༌ སལ༌ཡིན༌། 27 ཁྱོ༌ཞའ༌གུན༌ནིའང༌ ངའེ༌ སྐོར༌ལ༌ སྤང༌པོ༌ བཏང༌དགོས༌ བཅིའ༌ཟེར༌ན༌ ཁྱོ༌ཞའ༌གུན༌ མགོ༌ མ༌ནེ༌ ཕར༌ལ༌ ང༌ ཉམ༌པོ༌ ཡོད༌ཏེ༌ ཡིན༌ནོག༌།
1 "ཁྱོ༌རང༌གུན༌ནི༌ ངའེ༌ཀ༌ དད༌པ༌ ཡོད༌ཁན༌བོ༌ སྐྱལ༌ མི༌སྐྱལ༌ཅེས༌སི༌ ཕིའ༌ ངའེ༌ འི༌ སྤེ༌ར༌ ཚང༌མ༌ ཁྱོ༌ཞའ༌གུན༌ལ༌ ཤད༌ཏེ༌ ཡིན༌། 2 ཏེ༌གུན༌ནི༌ ཁྱོ༌ཞའ༌ འདུ༌ཁང༌ངི༌ ཆོས༌ཚོགས༌སི༌ ཕྲོ༌ནེ༌ ཕིངས༌ བཏང༌ཡིན༌། ཏེ༌ཟུག༌ དུས༌སང༌ སླེབ༌ཡིན༌ ནམ༌ ཁྱོ༌ཞའ༌ བསད༌ཁན༌གུན༌ནི༌ སམ༌ཡིན༌ ཁོང༌གུན༌ནི༌ དཀོན༌མཆོག༌ག༌ ཞབས༌སྟོག༌ ཞུས༌ཏེ༌ ཡིན༌། 3 ཏེ༌གུན༌ནི༌ ཏེ༌ཙོགས༌སི༌ ལས༌གུན༌ བཅོ༌ཡིན༌ བཅིའ༌ཟེར༌ན༌ ཁོང༌གུན༌ནི༌ ཡབ༌ མ༌ཤེས༌ ཡ༌ ངའང༌། 4 ཏེ༌ དུས༌པོ༌ སླེབ༌བ༌ཅིག༌, ངའེ༌ སྔོན༌ལ༌ སྤང༌ ཕུད༌ཁན༌བོ༌ ཁྱོ༌ཞའ༌གུན༌ནི༌ ཡིད༌ཏུ༌ ཡོང༌ཅེས༌སི༌ ཕིའ༌ ངའེ༌ འི༌ སྤེ༌ར༌གུན༌ ཁྱོ༌ཞའ༌གུན༌ལ༌ ཤད༌ཏེ༌ ཡིན༌། སྔོན༌ལ༌ ངའེ༌ ཁྱོ༌ཞའ༌གུན༌ལ༌ མ༌ཟེར༌པིན༌ བཅིའ༌ཟེར༌ན༌ ང༌ ཁྱོ༌ཞའ༌གུན༌ ཉམ༌པོ༌ ཡོད༌པིན༌།"
དམ༌པའེ༌ ཐུགས༌ཉིད༌དི༌ ཕྱག༌ལས༌།
5 ཡེ༌ཤུའི༌ ཏ༌རུང༌ངའང༌ མོལས༌, "ཏ༌ ང༌ ང༌རང༌ ཀལ༌ལ༌ བཛད༌ཁན༌ནི༌ ཡབ༌བའི༌ སྐུན༌དུན༌ལ༌ ལོགས༌ཏེ༌ ཆའད༌། ཡིན༌ནའང༌ ཁྱོ༌ཞའེ༌ ཕྲོ༌ནེ༌ སུ༌ ཞིག༌གིའང༌ ང༌ ཀ༌རུ༌ ཆད༌ ཟེར༌ཏེ༌ འདྲིའ༌ མི༌འདུག༌, 6 བཅིའ༌ཟེར༌ན༌ ངའེ༌ འི༌ ཚང༌མ༌ ཤདས༌པ༌ ཁྱོ༌ཞའ༌གུན༌ལ༌ ཚེར༌ཁའ༌ ཆེན༌མོ༌ ཡོངས༌ཏེ༌ ཡིན༌ནོག༌། 7 ཡིན༌ནའང༌ ངའེ༌ ཁྱོ༌ཞའ༌ བདེན༌བ༌ ཟེར༌རད༌, ང༌ འི༌ནེ༌ ཆའ༌ཅེས༌པོ༌ ཁྱོ༌ཞའེ༌ ཕིའ༌ ཕན༌ཐོགས༌ཅན༌ ཡིན༌, བཅིའ༌ཟེར༌ན༌ ནམ༌ཚུག༌པ༌ ང༌ མི༌ཆའ༌ ཏེ༌ རོགས༌ བཛད༌ཁན༌བོ༌ ཁྱོ༌ཞའེ༌ཀ༌ མི༌སྐྱོད༌, ཡིན༌ནའང༌ གལ༌ཏེས༌ ང༌ ཆ༌ན༌ ངའེ༌ ཁོང༌ ཁྱོ༌ཞའེ༌ཀ༌ ཀལ༌ཡིན༌། 8 ཏ༌ ཏེ༌ རོགས༌ བཛད༌ཁན༌བོ༌ སྐྱོད༌ད༌དང༌, ཁོང༌ངི༌ དད༌པ༌ མེད༌ཁན༌ འཇིག༌རྟེན༌པ༌གུན༌ནི༌ སྡིག༌པ༌ དང༌ བདེན༌བའེ༌ དྲང༌པོ༌ དང༌ དཀོན༌མཆོག༌གི༌ ཡོང༌ཅེས༌ཅན༌ནི༌ ཐག༌བཅད༌ གུན༌ནི༌ སྐོར༌ལ༌ ནོར༌ཁན༌བོ༌ སྟན༌ན༌ བཛད༌ཡིན༌། 9 འཇིག༌རྟེན༌པའེ༌ སྡིག༌པ༌ ནི༌ ཁོང༌གུན༌ནི༌ ངའེ༌ཀ༌ དད༌པ༌ མི༌བཅོ༌ཅེས༌བོ༌ ཡིན༌། 10 བདེན༌བའེ༌ དྲང༌པོ༌བོ༌ ནི༌ ང༌ གཅིག༌པོ༌ རྒྱུད༌ཏེ༌ ཐོབ༌བ༌ནོག༌ བཅིའ༌ཟེར༌ན༌ ང༌ ང༌རང༌ངི༌ ཡབ༌ ཞུགས༌ཏེ༌ ཡོད༌ས༌ ལོགས༌ཏེ༌ ཆའད༌ ཡང༌ ཁྱོ༌ཞའ༌གུན༌ནི༌ ང༌ མི༌ཐོང༌། 11 དཀོན༌མཆོག༌གི༌ ཐག༌བཅད༌བོ༌ ནི༌ ཡོང༌ཡིན༌ བཅིའ༌ཟེར༌ན༌ དཀོན༌མཆོག༌གི༌ འཇིག༌རྟེན༌པ༌ དད༌པ༌ མེད༌ཁན༌གུན༌ནི༌ དབང༌སྲུལ༌པ༌བོའ༌ ཁྲིམས༌ བཅད༌ད༌ བཛད༌ ཚར༌ཏེ༌ ཡིན༌།" 12 "ཏ༌རུང༌ ང༌ ཤད༌རྒྱུ༌ མ༌ མང༌པོ༌ ཡོད༌, ཡིན༌ནའང༌ ཁྱོ༌ཞའ༌གུན༌ལ༌ དག༌ས༌ ཁུར༌ མི༌ཐུབ༌བོག༌། 13 དཀོན༌མཆོག༌གི༌ དྲང༌པོ༌གུན༌ སླབ༌བ༌ བཛད༌ཁན༌ནི༌ དམ༌པའེ༌ ཐུགས༌ཉིད༌ སྐྱོད༌ད༌དང༌, ཁོང༌ངི༌ ཁྱོ༌ཞའ༌གུན༌ལ༌ དཀོན༌མཆོག༌གི༌ བདེན༌བའེ༌ ལམ༌ སྟན༌ན༌ བཛད༌ད༌ནོག༌། ཁོང༌ངི༌ ཁོང༌རང༌ངི༌ ཆོགས༌ནེ༌ མ༌མོལ༌ལ༌ ངའེ༌ ཡབ༌ནེ༌ ཚོར༌ཁན༌ གཅིག༌པོ༌ མོལ༌ལ༌ནོག༌། ཡང༌ ཁྱོ༌ཞའ༌གུན༌ལ༌ ཡོང༌ཅེས༌ཅན༌ནི༌ དུས༌སི༌ སྐོར༌ལ༌ ཤད༌ད༌ བཛད༌ཡིན༌། 14 ཁོང༌ངི༌ ངའ༌ སྤལ༌ ཁྱོང༌ཡིན༌ བཅིའ༌ཟེར༌ན༌ ཁོང༌ངི༌ ཁྱོ༌ཞའ༌གུན༌ལ༌ ངའེ༌ ཁོང༌ང༌ ཤོད༌ ཟེར༌ཁན༌གུན༌ ཤད༌ད༌ བཛད༌ཡིན༌། 15 ཡབ༌བི༌ ཡིན༌ཁན༌ ཚང༌མ༌ ངའེ༌ ཡིན༌། ཏེན༌ན༌བོའེ༌ཕིའ༌ ངའེ༌ ཟེར༌རད༌ དམ༌པའེ༌ ཐུགས༌ཉིད༌དི༌ ངའེ༌ ཁའ༌ནེ༌ ཚོར༌ཁན༌ ཚང༌མ༌ ཁྱོ༌ཞའ༌གུན༌ལ༌ ཤད༌ད༌ བཛད༌ད༌ནོག༌།
སློབ༌ཕྲུག༌གུན༌ནི༌ ཚེར༌ཁའ༌བོ༌ ཐད༌པོའ༌ རྒྱུར༌ཡིན༌།
16 ཡེ༌ཤུའི༌ མོལས༌, "ཙ༌པིག༌ ཤིག༌གི༌ སྟིང༌ནེ༌ ཁྱོ༌ཞའེ༌ ང༌ མི༌ཐོང༌ ཡིན༌ནའང༌ ཏེ༌ སྟིང༌ནེ༌ ཙ༌པིག༌ ཤིག༌ནེ༌ ཁྱོ༌ཞའེ༌ ང༌ ཡང༌ ཐོང༌ཡིན༌།" 17 ཁོང༌ངི༌ སློབ༌ཕྲུག༌ ཁ༌ཅིག༌གི༌ ཁོང༌རང༌ གཅིག༌ དང༌ གཅིག༌ག༌ ཟེརས༌, "ཁོང༌ངི༌ 'ཙ༌པིག༌ ཤིག༌ནེ༌ ཁྱོ༌ཞའེ༌ ང༌ མི༌ཐོང༌ ཡིན༌ནའང༌ ཏེ༌ སྟིང༌ནེ༌ ཙ༌པིག༌ ཤིག༌ནེ༌ ཁྱོ༌ཞའེ༌ ང༌ ཡང༌ ཐོང༌ཡིན༌' ཡང༌ 'བཅིའ༌ཟེར༌ན༌ ང༌ ཡབ༌བི༌ཀ༌ ཆའད༌' མོལ༌ཁན༌གུན༌ནི༌ ཏོན༌བོ༌ བཅི༌ ཡིན༌ནོག༌?།" 18 ཁོང༌གུན༌ནི༌ གཅིག༌ དང༌ གཅིག༌ག༌ འདྲི༌ཡིན༌ འདུགས༌, "'ཙ༌པིག༌ ཤིག༌གི༌' ཏོན༌ཏག༌པོ༌ བཅི༌ ཡིན༌ནོག༌?། ཁོང༌ངི༌ མོལ༌ཁན༌བོ༌ ང༌དང༌གུན༌ནི༌ ཧ༌གོའ༌ མེ༌རག༌།" 19 ཡེ༌ཤུའི༌ ཁོང༌གུན༌ནི༌ ཁོང༌ང༌ ཏེ༌བོའེ༌ སྐོར༌ལ༌ འདྲི༌ཅེས༌སི༌ འདོད༌པ༌ ཡོད༌ཁན༌བོ༌ ཁྱེན༌པ༌ ཁོང༌ངི༌ སློབ༌ཕྲུག༌གུན༌ལ༌, "ཁྱོ༌ཞའ༌གུན༌ནི༌ གཅིག༌ དང༌ གཅིག༌ག༌, 'ཙ༌པིག༌ ཤིག༌ནེ༌ ཁྱོ༌ཞའེ༌ ང༌ མི༌ཐོང༌ ཡིན༌ནའང༌ ཏེ༌ སྟིང༌ནེ༌ ཙ༌པིག༌ ཤིག༌གི༌ ཡང༌ ཐོང༌ཡིན༌' ཟེར༌ཁན༌ནི༌ ངའེ༌ སྤེ༌རའེ༌ ཏོན༌བོ༌ འདྲིའད༌?། 20 ངའེ༌ ཁྱོ༌ཞའ༌ བདེན༌བ༌ ཟེར༌རད༌, འཇིག༌རྟེན༌པའེ༌ དད༌པ༌ མེད༌ཁན༌གུན༌ནི༌ དགའ༌མོ༌ བཅོ༌ ཟ༌ནེ༌ ཁྱོ༌ཞའ༌གུན༌ ངུ༌ཡིན༌ དང༌ ཚེར༌ཁའ༌ བཅོ༌ཡིན༌། ཁྱོ༌ཞའ༌གུན༌ལ༌ ཚེར༌ཁའ༌ ཡོང༌ཡིན༌ ཡིན༌ནའང༌ ཁྱོ༌ཞའེ༌ ཚེར༌ཁ༌གུན༌ ཐད༌པོའེ༌ ནང༌ང༌ རྒྱུར༌ཡིན༌། 21 བུ༌མོ༌ ཞིག༌ག༌ ཕྲུ༌གུ༌ ཇོར༌ ཟ༌ནེ༌ ཟུ༌མོ༌ སྲན༌ཏེ༌ ཡོང༌ང༌ནོག༌ བཅིའ༌ཟེར༌ན༌ ཁོའེ༌ དུས༌བོ༌ སླེབ༌ཏེ༌ ཡིན༌ནོག༌, ཡིན༌ནའང༌ ཕྲུ༌གུ༌ ཇོར༌ ཚར༌ར༌དང༌, ཁོའ༌ ཟུ༌མོ༌བོ༌ བརྗེད༌ཡིན༌ བཅིའ༌ཟེར༌ན༌ འི༌ འཇིག༌རྟེན༌ནི༌ ནང༌ང༌ ཕྲུ༌གུ༌ སྐྱེས༌ཁན༌བོའི༌ཀ༌ ཁོའེ༌ ཐད༌པོ༌ ཆའ༌ནོག༌། 22 ཏེན༌ན༌ ཙོགས༌ ཁྱོ༌ཞའ༌གུན༌ལའང༌ ཆེན༌། དག༌ས༌ ཁྱོ༌ཞའ༌གུན༌ལ༌ ཚེར༌ཁ༌ ཡོང༌ཡིན༌, ཡིན༌ནའང༌ ང༌ ཁྱོ༌ཞའ༌ ཡང༌ ཐུགས༌པ༌ ཁྱོ༌ཞའ༌གུན༌ལ༌ ཐད༌པོ༌ ཡོང༌ཡིན༌། ཁྱོ༌ཞའ༌གུན༌ནེ༌ ཏེ༌ དགའ༌མོ༌བོ༌ སུའིང༌ ཀོགས༌ཏེ༌ ཁྱེར༌ མི༌ཉན༌། 23 ཏེ༌ དུས༌ལ༌ ཁྱོ༌ཞའ༌, ང༌ བཅི༌ཞིག༌གའང༌ འདྲི༌དགོས༌སི༌ དགོས༌སྡོམ༌ མི༌ཡོང༌། ངའེ༌ ཁྱོ༌ཞའ༌ བདེན༌བ༌ ཟེར༌རད༌, གལ༌ཏེས༌ ཁྱོ༌ཞའ༌གུན༌ནི༌ ངའེ༌ མིང༌ངི༌ ནང༌ང༌ ངའེ༌ ཡབ༌བ༌ བཅི༌ཏོང༌ ཟེར༌ནའང༌ ཁྱོ༌ཞའ༌གུན༌ལ༌ སལ༌ཡིན༌། 24 ཁྱོ༌ཞའེ༌ དག༌ས༌ ཚག༌པ༌ ངའེ༌ མིང༌ངི༌ ནང༌ང༌ ངའེ༌ ཡབ༌བ༌ བཅི༌ཞིག༌གི༌ ཕིའང༌ མ༌ཞུས༌། གལ༌ཏེས༌ ཞུ༌ན༌ ཁྱོ༌ཞའ༌གུན༌ལ༌ ངའེ༌ ཡབ༌བི༌ ཀ༌ནེ༌ ཐོབས༌ཏེ༌ ཐད༌པོ༌ མང༌པོ༌ ཡོང༌ཡིན༌།" 25 "དག༌ས༌ ངའེ༌ འི༌ སྤེ༌ར༌གུན༌ སྤེ༌ རྒྱུད༌ཏེ༌ ཤད༌ཏེ༌ ཡིན༌། ཏ༌ དུས༌པོ༌ སླེབ༌ཡིན༌, ནམ༌ ངའེ༌ རང༌ངི༌ ཡབ༌བི༌ སྐོར༌ལ༌ ཁྱོ༌ཞའ༌གུན༌ལ༌ སྤེ༌ རྒྱུད༌ཏེ༌ མན༌པ༌ ཚིགས༌ སལ༌པོ༌ ཉམ༌པོ༌ ཤད༌ཡིན༌། 26 ཏེ༌ ཞག༌ག༌ ཁྱོ༌ཞའེ༌ ངའེ༌ མིང༌ངི༌ ནང༌ང༌ ཞུ༌བ༌ ཕུལ༌ཡིན༌། ངའེ༌ ཟེར༌ར༌མེད༌ ངའེ༌ ཁྱོ༌ཞའ༌གུན༌ནི༌ ཚབས༌ལ༌ ཡབ༌བ༌ ཞུ༌བ༌ ཕུལ༌ཡིན༌། 27 མན༌, ཁྱོ༌ཞའ༌གུན༌ནི༌ ངའ༌ བྱམས༌པ༌ བཅོ༌ཅེས༌ ཡང༌ ང༌ ཡབ༌བི༌ ཆོགས༌ནེ༌ ཡོང༌ཁན༌བོའ༌ དད༌པ༌ ཡོད༌ཅེས༌པོའེ༌ ཡབ༌ ཁོང༌རང༌ངི༌ ཁྱོ༌ཞའ༌གུན༌ལ༌ བྱམས༌པ༌ བཛད༌འདུག༌། 28 ང༌ ཡབ༌བི༌ ཆོགས༌ནེ༌ འཇིག༌རྟེན༌ནི༌ ནང༌ང༌ ཡོངས༌ཏེ༌ ཡིན༌, ཏ༌ ང༌ འཇིག༌རྟེན༌ བོར༌ཏེ༌ ཡབ༌བི༌ སྐུན༌དུན༌ལ༌ ལོགས༌ཏེ༌ ཆའད༌།" 29 ཏེ༌ནེ༌ ཡེ༌ཤུའི༌ སློབ༌ཕྲུག༌གུན༌ནི༌ ཞུས༌, "ཏ༌ ཉེ༌རང༌ངི༌ ང༌ཞའ༌གུན༌ལ༌ སྤེ༌ རྒྱུད༌ཏེ༌ མ༌མོལ༌ལ༌, ཞལ༌ཏ༌ སལ༌པོ༌ སལ༌པོ༌ མོལ༌ལ༌ བཛད༌འདུག༌། 30 ཏ༌ ང༌ཞའ༌གུན༌ལ༌ ཧ༌གོ༌ ཉེ༌རང༌ང༌ བཅི༌ཚང༌མ༌ ཁྱེན༌ན༌ནོག༌, ཉེ༌རང༌ང༌ སུ༌ ཞིག༌གིའང༌ འདྲི༌བ༌ བཅོ༌ཅེས༌སི༌ དགོས༌སྡོམ༌ མི༌འདུག༌ བཅིའ༌ཟེར༌ན༌ ཏེ༌གུན༌ནི༌ བཅི༌ སམ༌མད༌ ཉེ༌རང༌ངི༌ ཁྱེན༌འདུག༌ ཡང༌ ཉེ༌རང༌ དཀོན༌མཆོག༌གི༌ ཆོགས༌ནེ༌ སྐྱོད༌ཏེ༌ ཡིན༌ཁན༌བོའ༌ ང༌ཞའེ༌ དད༌པ༌ བཅོའད༌།" 31 ཡེ༌ཤུའི༌ ཁོང༌གུན༌ལ༌ མོལས༌, "ཏ༌ ཁྱོ༌ཞའ༌གུན༌ནི༌ བདེན༌བ༌ ཡིད༌ཆེས༌ བཅོའད༌ད༌?། 32 ཡིན༌ནའང༌ ཏེ༌ དུས༌པོ༌ སླེབ༌ཡིན༌ ཡང༌ སླེབ༌བའང༌ ཚར༌ཏེ༌ ཡིན༌ ཁྱོ༌ཞའ༌ ཚང༌མ༌ ཡན༌ཏེ༌ ང༌ གཅིག༌པོ༌ ཕངས༌ཏེ༌ རང༌རང༌ངི༌ ཁང༌པ༌ ཆོགས༌ལ༌ ཤོར༌ཡིན༌། ཏེ༌ནེའང༌ ང༌ གཅིག༌པོ༌ མན༌ བཅིའ༌ཟེར༌ན༌ ངའེ༌ ཡབ༌ ང༌ ཉམ༌པོ༌ ཞུགས༌ཏེ༌ ཡོད༌། 33 ངའེ༌ ནང༌ང༌ ཁྱོ༌ཞའ༌གུན༌ལ༌ ཞི༌བདེ༌ ཐོབ༌ཅེས༌སི༌ ཕིའ༌ ངའེ༌ འི༌ སྤེ༌ར༌གུན༌ ཟེར༌ཏེ༌ ཡིན༌། འི༌ འཇིག༌རྟེན༌ནི༌ ནང༌ང༌ ཁྱོ༌ཞའ༌གུན༌ལ༌ སྡུག༌སྔལ༌ ཐོང༌ཡིན༌, ཡིན༌ནའང༌ སྤོས༌པ༌ བོར༌ཤིག༌ བཅིའ༌ཟེར༌ན༌ ངའ༌ འཇིག༌རྟེན༌ནི༌ ནང༌ང༌ ཡོད༌ཁན༌ནི༌ ངན༌པ༌གུན༌ནི༌ཀ༌ རྒྱལ༌ ཐོབ༌ཏེ༌ ཡིན༌།"
གཙོ༌བོ༌ ཡེ༌ཤུའི༌ ཁོང༌རང༌ངི༌ ཕིའ༌ སྨོས༌ལམ༌ ཞུས༌།
1 ཡེ༌ཤུའི༌ འི༌གུན༌ མོལ༌ ཚར༌ར༌ཅིག༌ ནམ༌མཁའ༌ གཟིགས༌ཏེ༌ སྨོས༌ལམ༌ ཞུས༌, "ཀྱེ༌ ཡབ༌ལེ༌, ཏ༌ དུས༌ སླེབ༌ཚར༌, ཉེ༌རང༌ངི༌ སྲས༌སི༌ ཉེ༌རང༌ང༌ སྤལ༌བོ༌ བཏང༌ཅེས༌སི༌ ཕིའ༌ ཏ༌ ཉེ༌རང༌ངི༌ སྲས༌ལ༌ སྤལ༌ སལ༌ལ༌ བཛད༌། 2 ངའེ༌ ལག༌ག༌ སལ༌ཏེ༌ ཡིན༌ཁན༌ ཚང༌མ༌ལ༌ མཐའ༌མེད༌པའེ༌ མི༌ཚེ༌ བཏང༌ ཐུབ༌ཅེས༌སི༌ ཕིའ༌ ཉེ༌རང༌ངི༌ ངའ༌ མི༌ཚང༌མའེ༌ཀ༌ དབང༌ སལ༌ཏེ༌ ཡིན༌། 3 ཁོང༌གུན༌ནི༌ ཉེ༌རང༌ གཅིག༌པོ༌ བདེན༌བའེ༌ དཀོན༌མཆོག༌ ཡིན༌ཁན༌ ཡང༌ ཉེ༌རང༌ངི༌ ཀལ༌ལ༌ བཛད༌ཁན༌ནི༌ ཡེ༌ཤུ༌ མ༌ཤི༌ཀའང༌ ངོ༌ ཤེས༌ཤེས༌བོ༌ ནི༌ མཐའ༌མེད༌པའེ༌ མི༌ཚེ༌ ཡིན༌། 4 ཉེ༌རང༌ངི༌ ང༌ སྟད༌ད༌ བཛད༌ཁན༌ནི༌ ལས༌གུན༌ འགྲུབ༌ ཅུགས༌ཏེ༌, འཇིག༌རྟེན༌ནི༌ མི༌གུན༌ལ༌ ཉེ༌རང༌ངི༌ ཟིར༌རྗིད༌བོ༌ མངོན༌ ཅུགས༌ཏེ༌ ཡིན༌། 5 ཏ༌ ཀྱེ༌ ཡབ༌ལེ༌, ང༌ ཉེ༌རང༌ངི༌ དུན༌ལ༌ ཏེ༌ སྤལ༌པོ༌ སལ༌ལ༌ བཛད༌, ཀ༌བོ༌ འཇིག༌རྟེན༌ ཆགས༌སི༌ སང༌ སྔོན༌ལ༌ ངའ༌ ཉེ༌རང༌ ཉམ༌པོ༌ ཡོད༌པིན༌།"
གཙོ༌བོ༌ ཡེ༌ཤུའི༌ ཁོང༌རང༌ངི༌ སློབ༌ཕྲུག༌གུན༌ནི༌ ཕིའ༌ སྨོས༌ལམ༌ ཞུས༌།
6 ཡེ༌ཤུའི༌ ཏ༌རུང༌ངའང༌ སྨོས༌ལམ༌ ཞུ༌ཡིན༌, "ངའེ༌ ཉེ༌རང༌ངི༌ འཇིག༌རྟེན༌པ༌གུན༌ནི༌ ཕྲོ༌ནེ༌ འདམ༌མ༌ བཛད༌ཏེ༌ ང༌ སལ༌ཁན༌གུན༌ལ༌ ཉེ༌རང༌ མངོན༌ཅུགས༌པིན༌། ཁོང༌གུན༌ ཉེེ༌རང༌ངི༌ ཡིན༌པིན༌ ཡང༌ ཏེ༌གུན༌ ཉེ༌རང༌ངི༌ ང༌ སལ༌ཏེ༌ ཡིན༌། ཁོང༌གུན༌ནི༌ ཉེེ༌རང༌ངི༌ བཀའ༌ ཁའ༌ ཉན༌ཏེ༌ ཡིན༌ནོག༌། 7 ཏ༌ ཁོང༌གུན༌ལ༌ ཉེ༌རང༌ངི༌ ངའ༌ སལ༌ཁན༌ ཚང༌མ༌ ཉེ༌རང༌ངི༌ ཆོགས༌ནེ༌ ཡིན༌ཁན༌བོ༌ ཧ༌གོ༌ཏེ༌ ཡིན༌། 8 བཅིའ༌ཟེར༌ན༌ ཉེ༌རང༌ངི༌ ང༌ སལ༌ཁན༌ནི༌ བཀའ༌བོ༌ ངའེ༌ ཁོང༌གུན༌ལ༌ བཏངས༌པིན༌ ཡང༌ ཁོང༌གུན༌ནི༌ ཐད༌པོ༌ ཉམ༌པོ༌ དད༌པ༌ བཅོས༌། ང༌ ཉེེ༌རང༌ངི༌ ཆོགས༌ནེ༌ ཡོངས༌ཏེ༌ ཡིན༌ཁན༌བོ༌ ཁོང༌གུན༌ལ༌ ཏན༌ཏན༌ ཧ༌གོ༌ཏེ༌ ཡིན༌ནོག༌, ཡང༌ ཁོང༌གུན༌ནི༌ ང༌ ཉེ༌རང༌ངི༌ ཀལ༌ལ༌ བཛད༌ཁན༌བོ༌ ཡིད༌ཆེས༌ བཅོའ༌ནོག༌།" 9 "ངའེ༌ ཁོང༌གུན༌ནི༌ ཕིའ༌ སྨོས༌ལམ༌ ཞུའད༌། ངའེ༌ འཇིག༌རྟེན༌པ༌གུན༌ནི༌ མན༌པ༌ ཉེ༌རང༌ངི༌ ང༌ སལ༌ལ༌ བཛད༌ཁན༌གུན༌ནི༌ ཕིའ༌ སྨོས༌ལམ༌ ཞུའད༌ བཅིའ༌ཟེར༌ན༌ ཁོང༌གུན༌ ཉེ༌རང༌ངི༌ ཡིན༌ནོག༌། 10 ངའེ༌ ཡིན༌ཁན༌ ཚང༌མ༌ ཉེ༌རང༌ངི༌ ཡིན༌ ཡང༌ ཉེ༌རང༌ངི༌ ཡིན༌ཁན༌གུན༌ ངའེ༌ ཡིན༌། ངའ༌ ཏེ༌གུན༌ རྒྱུད༌ཏེ༌ སྤལ༌ ཐོབས༌ཏེ༌ ཡིན༌། 11 ཏ༌ ང༌ འི༌ འཇིག༌རྟེན༌ནི༌ ནང༌ང༌ དུས༌ མང༌པོ༌ ཞིག༌ མི༌ལུས༌, ཁོང༌གུན༌ ཏ༌རུང༌ འཇིག༌རྟེན༌ནི༌ ནང༌ང༌ ལུས༌ཡིན༌། ང༌ ཉེ༌རང༌ངི༌ཀ༌ ཡོང༌ངད༌། ཀྱེ༌ ཡབ༌ དམ༌པ༌ལེ༌ ཀ༌ཟུག༌ ངའ༌ ཉེ༌རང༌ ཉམ༌པོ༌ གཅིག༌ ཡིན༌ ཏེན༌ན༌ ཙོགས༌ལ༌ ཁོང༌གུན༌ནའང༌ གཅིག༌ རྒྱུར༌ཅེས༌སི༌ ཕིའ༌ ཉེ༌རང༌ངི༌ ངའ༌ སལ༌ལ༌ བཛད༌ཁན༌ནི༌ དབང༌བོའེ༌ ནང༌ང༌ ཁོང༌གུན༌ སྐྱོབས༌ཏེ༌ བོར༌ར༌ བཛད༌། 12 ང༌ ཁོང༌གུན༌ ཉམ༌པོ༌ ཡོད༌ ཟ༌ནེ༌ ངའེ༌ ཁོང༌གུན༌ ཉེ༌རང༌ངི༌ སལ༌ལ༌ བཛད༌ཁན༌ནི༌ དབང༌བོ༌ རྒྱུད༌ཏེ༌ སྐྱོབས༌ཏེ༌ བོར༌པིན༌། ཏེ༌གུན༌ནི༌ ཕྲོ༌ནེ༌ སུ༌ཞིག༌གའང༌ ལམ༌ སྟོར༌ཏེ༌ མ༌སོང, གཅིག༌གཅིག༌ མ༌སྟོགས༌ ཀ༌བོ༌ ཉལ༌བའེ༌ ནང༌ང༌ ཆེན, ཀ༌ཟུག༌གི༌ དམ༌པའེ༌ གསུང༌རབས༌སི༌ ནང༌ང༌ ལུང༌སྟན༌ན༌ བཛད༌ཏེ༌ ཡིན༌ནོག༌། 13 ཏ༌ ང༌ ཉེ༌རང༌ངི༌ཀ༌ ཡོང༌ངད༌, ཡིན༌ནའང༌ ང༌ འི༌ འཇིག༌རྟེན༌ནི༌ ནང༌ང༌ ཡོད༌ ཟ༌ནེ༌ ཁོང༌གུན༌ལ༌ ངའེ༌ ཐད༌པོ༌ གང༌པོ༌ ཐོབ༌ཅེས༌སི༌ ཕིའ༌, ངའེ༌ འི༌ སྤེ༌ར༌གུན༌ ཟེར༌རད༌། 14 ངའེ༌ འི༌ མི༌གུན༌ལ༌ ཉེ༌རང༌ངི༌ བཀའ༌གུན༌ བཏངས༌པིན༌, ཡང༌ འཇིག༌རྟེན༌པ༌གུན༌ནི༌ ཁོང༌གུན༌ལ༌ ནཕ༌རད༌ བཅོས༌, བཅིའ༌ཟེར༌ན༌ ངའེ༌ སློབ༌ཕྲུག༌གུན༌ འི༌ འཇིག༌རྟེན༌ནེ༌ མན༌ ཀ༌ཟུག༌གི༌ ང༌ འཇིག༌རྟེན༌ནེ༌ མན༌། 15 ངའེ༌ སྨོས༌ལམ༌བོ༌ ཉེ༌རང༌ང༌ ཁོང༌གུན༌ འི༌ འཇིག༌རྟེན༌ནེ༌ ཐེན༌ཅེས༌སི༌ ཕིའ༌ ཞུའ༌མེད༌, ཡིན༌ནའང༌ ཁོང༌གུན༌ ཤེ༌ཏན༌ནེ༌ སྐྱོབས༌ཏེ༌ བོར༌ར༌ བཛད༌ཅེས༌སི༌ ཕིའ༌ ཞུའད༌། 16 ངའེ༌ སློབ༌ཕྲུག༌གུན༌ འི༌ འཇིག༌རྟེན༌ནེ༌ མན༌ ཀ༌ཟུག༌གི༌ ང༌ འི༌ འཇིག༌རྟེན༌ནེ༌ མན༌། 17 ཉེ༌རང༌ངི༌ བདེན༌བ༌ རྒྱུད༌ཏེ༌ ཏེ༌གུན༌ལ༌ རྩང༌མ༌ བཅོའ༌ བཛདས༌། ཉེ༌རང༌ངི༌ བཀའ༌ བདེན༌བ༌ ཡིན༌ནོག༌། 18 ཀ༌ཟུག༌ ཉེ༌རང༌ངི༌ ང༌ འི༌ འཇིག༌རྟེན༌ནི༌ ནང༌ང༌ ཀལ༌ལ༌ བཛདས༌, ཏེན༌ན༌དང༌ ཙོགས༌ལ༌ ངེའང༌ ཁོང༌གུན༌ འཇིག༌རྟེན༌ནི༌ ནང༌ང༌ ཀལ༌ལད༌། 19 ཉེ༌རང༌ངི༌ བདེན༌བ༌ རྒྱུད༌ཏེ༌ ཏེ༌གུན༌ནའང༌ རྩང༌མ༌ བཅོའ༌ བཛད༌ཅེས༌སི༌ ཕིའ༌ ངའེ༌ ང༌རང༌ ཆོད༌པ༌ དམ༌པ༌ ཞིག༌ ཙོགས༌ལ༌ བཏང༌ངད༌།"
ཡེ༌ཤུའི༌ དད༌པའེ༌ ནང༌ང༌ ཡོང༌ཅེས༌ཅན༌གུན༌ནི༌ ཕིའ༌ སྨོས༌ལམ༌ ཞུས༌།
20 ཡེ༌ཤུའི༌ མོལས༌, "ངའེ༌ སྨོས༌ལམ༌བོ༌ ཁོང༌གུན༌ གཅིག༌པོ༌ མན༌པ༌, ཁོང༌གུན༌ནི༌ ལོན༌ རྒྱུད༌ཏེ༌ ངའེ༌ཀ༌ དད༌པ༌ ཁྱོང༌ཁན༌གུན༌ནི༌ ཕིའང༌ ཡིན༌། 21 ངའེ༌ ཁོང༌ ཚང༌མ༌ གཅིག༌ རྒྱུར༌ཅེས༌སི༌ ཕིའ༌ སྨོས༌ལམ༌ ཕུལ༌ལད༌། ཀྱེ༌ ཡབ༌, ཀ༌ཟུག༌གི༌ ང༌ ཉེ༌རང༌ངི༌ ནང༌ང༌ ཡང༌ ཉེ༌རང༌ ངའེ༌ ནང༌ང༌ ཞུགས༌ཏེ༌ ཡིན༌, ཉེ༌རང༌ངི༌ ང༌ ཀལ༌ལ༌ བཛད༌ཁན༌བོའེ༌ཀ༌ འཇིག༌རྟེན༌ནི༌ མི༌གུན༌ནི༌ དད༌པ༌ ཁྱོང༌ཅེས༌སི༌ ཕིའ༌ ཁོང༌གུན༌ནའང༌ ང༌དང༌ གཉིས༌ཀོའེ༌ ནང༌ང༌ འདུག༌ ཅུག༌ག༌ བཛད༌།" 22 "ཀ༌ཟུག༌ ང༌དང༌ གཉིས༌ཀོ༌ གཅིག༌ ཡིན༌ ཏེན༌ན༌ ཙོག༌ལ༌ ཁོང༌གུན༌ གཅིག༌ རྒྱུར༌ཅེས༌སི༌ ཕིའ༌ ངའེ༌ ཉེ༌རང༌ངི༌ ངའ༌ སལ༌ཁན༌ནི༌ སྤལ༌བོ༌ ཁོང༌གུན༌ལ༌ བཏངས༌པིན༌། 23 ང༌ ཁོང༌གུན༌ནི༌ ནང༌ང༌ ཡང༌ ཉེ༌རང༌ ངའེ༌ ནང༌ང༌ ཡོད༌། ཁོང༌གུན༌ བཅི༌ས༌ཐོག༌ནེ༌ གཅིག༌གྲིལ༌ རྒྱུར༌ ཅུག༌ག༌ བཛད༌, ཀ༌བོའེ༌ འཇིག༌རྟེན༌པ༌གུན༌ལ༌ འི༌གུན༌ ཧ༌གོ༌ ཐུབ༌ཡིན༌, ཉེ༌རང༌ངི༌ ང༌ ཀལ༌ལ༌ བཛདས༌ ཡང༌ དད༌པ༌ཅན༌གུན༌ལ༌ བྱམས༌པ༌ བཛདས༌ ཀ༌ཟུག༌གི༌ ཉེ༌རང༌ངི༌ ངའ༌ བྱམས༌པ༌ བཛད༌དད༌། 24 ཀྱེ༌ ཡབ༌ལེ༌, ཉེ༌རང༌ངི༌ ང༌ སལ༌ཁན༌གུན༌ ནམ༌མཁའེ༌ ནང༌ང༌ ངའ༌ ཉམ༌པོ༌ ཡོང༌ ཅུག༌ག༌ བཛད༌ཅེས༌ལ༌ ངའེ༌ འདོད༌པ༌ བཅོའད༌, ཀ༌རུ༌ ང༌ འདུག༌ཡིན༌། ཏེ༌ནེ༌ ཁོང༌གུན༌ནི༌ ཉེ༌རང༌ངི༌ ང༌ སལ༌ལ༌ བཛད༌ཁན༌ནི༌ སྤལ༌བོ༌ ཐོང༌ཐུབ༌ཡིན༌ བཅིའ༌ཞུ༌ན༌ ཉེ༌རང༌ངི༌ འཇིག༌རྟེན༌ མ༌ཆགས༌སི༌ སང༌ སྔོན༌ལ༌ ང༌ བྱམས༌པ༌ བཛད༌དད༌པིན༌། 25 ཀྱེ༌ ཡབ༌, དྲང༌པོ༌ལེ༌, འཇིག༌རྟེན༌པ༌གུན༌ནི༌ ཉེ༌རང༌ མ༌ཤེས༌ནའང༌, ངའེ༌ ཉེ༌རང༌ ཤེས༌སད༌། ཡང༌ ངའེ༌ སློབ༌ཕྲུག༌གུན༌ནིའང༌ ཉེ༌རང༌ངི༌ ང༌ ཀལ༌ལ༌ བཛད༌ཏེ༌ ཡིན༌ཁན༌བོ༌ ཧ༌གོ༌ཏེ༌ ཡིན༌ནོག༌། 26 ངའེ༌ ཁོང༌གུན༌ལ༌ ཉེ༌རང༌ ངོ༌ཤེས༌ ཤུགས༌པིན༌, སྟིང༌ཞིན༌ལའང༌ ཏེ༌ཙོགས༌ བཅོ༌ཡིན༌། ཏེ༌ནེ༌ ཉེ༌རང༌ངི༌ ངའེ༌ ཕིའ༌ བྱམས༌པ༌ ཡོད༌ཁན༌བོ༌ ཁོང༌གུན༌ནི༌ ནང༌ང༌ ཡང༌ ངའང༌ ཁོང༌གུན༌ནི༌ ནང༌ང༌ ལུས༌ཡིན༌།"
གཙོ༌བོ༌ ཡེ༌ཤུ༌ ཟུམས༌།
1 གཙོ༌བོ༌ ཡེ༌ཤུ༌ སྨོས༌ལམ༌ ཞུ༌ ཚར༌ར༌དང༌ རང༌ངི༌ སློབ༌ཕྲུག༌གུན༌ ཉམ༌པོ༌ ཡེ༌རུ༌ཤ༌ལེམ༌མི༌ རྒྱལ༌ས༌ནེ༌ ཕི༌ལོག༌ག༌ སྐྱོདས༌, ཡང༌ ཁོང༌གུན༌ ཀིད༌རོན༌ནི༌ ལུང༌པའེ༌ འ༌ངོ༌ ཆོགས༌ལ༌ ཡོད༌ཁན༌ནི༌ ཨོ༌ལིཝ༌ཝི༌ ཚས༌སི༌ ནང༌ང༌ སྐྱོདས༌། 2 ཁོང༌ང༌ ངོ༌ལོག༌ བཅོ༌ཁན༌ནི༌ ཡུ༌དཱའ༌ ཏེ༌ ནས༌ས༌བོ༌ རྒྱུས༌ཡོད༌པིན༌ བཅིའ༌ཟེར༌ན༌ ཡེ༌ཤུ༌ ལན༌ མང༌པོ༌ རང༌ངི༌ སློབ༌ཕྲུག༌གུན༌ ཉམ༌པོ༌ ཏེ༌རུ༌ སྐྱོད༌ད༌ བཛད༌དད༌པིན༌། 3 ཏེ༌ནེ༌ ཡུ༌དཱ༌ ཏེ༌ ཚས༌སི༌ ནང༌ང༌ སླེབ༌། ཁོའེ༌ རོམ༌པའེ༌ མག༌མི༌ ཁ༌ཅིག༌ ཡང༌ ཕ༌རུ༌ཤི༌པ༌ དང༌ བླ༌མ༌ དའུ༌སྐྱོང༌ གུན༌ནི༌ ཆོགས༌ནེ༌ ཀལ༌ཁན༌ནི༌ ཆོས༌ཁང༌ངི༌ མག༌མི༌གུན༌ ཁྲིད༌ཏེ༌ ཁྱོངས༌། ཏེ༌གུན༌ནི༌ འོད༌དི༌ ཕིའ༌ མེ༌ཏོ༌, ལལ༌ཊེན༌ དང༌ ཚོན༌ཆ༌ གུན༌ ཁུར༌ཏེ༌ ཡོད༌པིན༌། 4 ཡེ༌ཤུའ༌ ཁོང༌ ཉམ༌པོ༌ བྱུང༌ཅེས༌ ཚང༌མ༌ རྒྱལ༌ལ༌ བཅོས༌ཏེ༌ ཁྱེན༌ནད༌པིན༌, ཏེན༌ན༌བོའེ༌ཕིའ༌ ཁོང༌ ཕི༌ལོག༌ག༌ སྐྱོད༌ཏེ༌ ཏེ༌གུན༌ལ༌ འདྲིའ༌ བཛདས༌, "ཁྱོ༌ཞའེ༌ སུ༌ ཙལ༌ལད༌?།" 5 ཁོང༌གུན༌ནི༌, "ང༌ཞའེ༌ ན༌ཙ༌རེད༌པ༌ ཡེ༌ཤུ༌ ཙལ༌ལད༌" ཞུས༌། ཡེ༌ཤུའི༌ ཁོང༌གུན༌ལ༌, "ཏེ༌བོ༌ ང༌ ཡིན༌" མོལས༌། ༼ཁོང༌ང༌ ངོ༌ལོག༌ བཅོ༌ཁན༌ནི༌ ཡུ༌དཱའང༌ ཏེ༌གུན༌ ཉམ༌པོ༌ ཡོད༌པིན༌༽ 6 ཡེ༌ཤུའི༌ ཏེ༌བོ༌ ནི༌ "ང༌ ཡིན༌" མོལ༌ལ༌དང༌ ཏེ༌གུན༌ ཧ༌ལས༌ཏེ༌ རྒྱབ༌ལོག༌ག༌ སོང༌པ༌ སའེ༌ཀ༌ འགྱེལ༌། 7 ཡེ༌ཤུའི༌ ཡང༌ ལྡབས༌ཏེ༌, "ཁྱོ༌ཞའེ༌ སུ༌ ཙལ༌ལད༌?" མོལས༌། ཏེ༌གུན༌ནི༌, "ན༌ཙ༌རེད༌པ༌ ཡེ༌ཤུ༌" ཞུས༌། 8 ཡེ༌ཤུའི༌ ཏེ༌གུན༌ལ༌, "ངའེ༌ ཁྱོ༌ཞའ༌ ཟེར༌པིན༌ ང༌རང༌ ཡིན༌། གལ༌ཏེས༌ ཁྱོ༌ཞའ༌གུན༌ནི༌ ང༌ ཙལ༌ལད༌ན༌ ངའེ༌ སློབ༌ཕྲུག༌གུན༌ ཆ༌ཅུག༌" མོལས༌། 9 ཏེ༌ཟུག༌ མོལ༌ཅེས༌སི༌ ཏོན༌བོ༌ ནི༌ ཁོང༌ངི༌ "ཉེ༌རང༌ངི༌ ང༌ སལ༌ཁན༌ནི༌ ཕྲོ༌ནེ༌ གཅིག༌གའང༌ མི༌སྐྱལ༌" མོལ༌ཁན༌བོ༌ འདྲན༌དྲ༌ འགྲུབ༌ཅེས༌བོ༌ ཡིན༌པིན༌། 10 ཤི༌མོན༌ པི༌ཏྲར༌རི༌ ཁོའེ༌ ལག༌ག༌ རལ༌གྲི༌ ཡོད༌ཁན༌བོ༌ ཕིངས༌ཏེ༌ བླ༌མ༌ ཆེན༌མོའེ༌ གཡོག༌པོ༌ ཞིག༌གི༌ རྣམ༌ཆོག༌ གཡས༌པ༌བོ༌ བཅད༌བཏངས༌ ༼ཏེ༌ གཡོག༌པོའེ༌ མིང༌བོ༌ མལ༌ཁུས༌ ཡིན༌པིན༌༽། 11 ཡེ༌ཤུའི༌ པི༌ཏྲར༌ལ༌ བཀའ༌ སལ༌ཏེ༌, "རལ༌གྲི༌བོ༌ ཤུབས༌སི༌ ནང༌ང༌ གྱོང༌། ཅི༌ སམ༌མ༌རག༌? ཡབ༌བི༌ ངའ༌ སལ༌ཁན༌ནི༌ སྡུག༌སྔལ༌ལི༌ དོན༌སྐྱོག༌པོ༌ ངའེ༌ མི༌ཐུང༌ང༌?" མོལས༌།
གཙོ༌བོ༌ ཡེ༌ཤུ༌ བླ༌མ༌ ཆེན༌མོའེ༌ཀ༌ ཁྱེརས༌།
12 ཏེ༌ནེ༌ རོམ༌པའེ༌ མག༌མི༌, ཁོང༌གུན༌ནི༌ མག༌སྤོན༌ དང༌ ཡ༌ཧུ༌དཱ༌པའེ༌ མག༌མི༌གུན༌ནི༌ ཡེ༌ཤུ༌ ཟུམས༌ ཡང༌ ཁོང༌ངི༌ ཕྱག༌གུན༌ སྡམས༌ཏེ༌ 13 ཨན༌ནཱས༌ ཡོད༌ས༌ ཁྱེརས༌, ཀ༌བོ༌ ཀ༌ཡ༌ཕཱས༌སི༌ ན༌མའེ༌ ཨ༌བ༌ ཡིན༌པིན༌, ཡང༌ ཀ༌ཡ༌ཕཱས༌ ཏེ༌ ལོའི༌ བླ༌མ༌ ཆེན༌མོ༌ ཡིན༌པིན༌། 14 ༼འིན༌ན༌ ཀ༌ཡ༌ཕཱས༌སི༌ "མི༌རིགས༌ གང༌པོ༌ ཤི༌ སང༌ ཏེ༌ ཏོན༌ལ༌ མི༌ གཅིག༌ ཤི༌ན༌ མི༌རྒྱལ༌ལ༌?" ཟེར༌ཏེ༌ ཡ༌ཧུ༌དཱ༌པའེ༌ དའུ༌སྐྱོང༌གུན༌ལ༌ ཁ༌ད༌ བཏངས༌ཏེ༌ ཡིན༌པིན༌༽
པི༌ཏྲར༌རི༌ གཙོ༌བོ༌ ཡེ༌ཤུ༌ མི༌ཤེས༌ ཟུན༌ བཏངས༌།
15 ཤི༌མོན༌ པི༌ཏྲར༌ དང༌ གཞན༌ སློབ༌ཕྲུག༌ གཅིག༌ ཡེ༌ཤུའི༌ རྒྱབ༌རྒྱབ༌ནེ༌ སོང༌། གཞན༌ སློབ༌ཕྲུག༌པོ༌ བླ༌མ༌ ཆེན༌མོའེ༌ ངོ༌ཤེས༌ ཡིན༌པ༌ ཁོ༌ ཡེ༌ཤུ༌ ཉམ༌པོ༌ བླ༌མ༌ ཆེན༌མོའེ༌ ཕོ༌གྲང༌ངི༌ ཀྱང༌རའི༌ ནང༌ང༌ ཡོང༌ ཅུགས༌། 16 ཡིན༌ནའང༌ པི༌ཏྲར༌ རྒྱས༌སྒོའི༌ ཕི༌ལོག༌ག༌ ལུས༌། བླ༌མ༌ ཆེན༌མོའེ༌ ངོ༌ཤེས༌ཁན༌ནི༌ སློབ༌ཕྲུག༌པོ༌ ལོགས༌ཏེ༌ ཡོངས༌ཏེ༌ སྒོ༌ སྲུང༌མ༌བོའ༌ སྤེ༌ར༌ བཏངས༌ ཡང༌ པི༌ཏྲར༌རང༌ ནང༌ཀུག༌ག༌ ཁྲིད༌ཏེ༌ ཁྱེརས༌། 17 ཏེ༌ སྒོ༌ སྲུང༌མ༌བོའེ༌ པི༌ཏྲར༌ལ༌ འདྲིས༌, "ཁྱོ༌རང༌ངའང༌ ཁོང༌ངི༌ སློབ༌ཕྲུག༌ གཅིག༌ མན༌ན༌?།" པི༌ཏྲར༌རི༌, "ང༌ མན༌" ཟེརས༌། 18 གྲང༌མོའི༌ ཞས༌ཏེ༌ ཏེ༌རུ༌ ཡོད༌ཁན༌ནི༌ གཡོག༌པོ༌ དང༌ མག༌མི༌གུན༌ནི༌ གྱང༌སྐོར༌རི༌ ནང༌ང༌ མེ༌ བཏངས༌ཏེ༌ ཚང༌མ༌ ཀྱིར༌འཁོར༌ཏེ༌ མེའ༌ སྲོའད༌པིན༌, པི༌ཏྲར༌རིའང༌ ཏེ༌གུན༌ནི༌ ཕྲོའ༌ མེའ༌ སྲོའད༌པིན༌།
བླ༌མ༌ ཆེན༌མོའེ༌ ཡེ༌ཤུའ༌ འདྲི༌བ༌ འདྲིས༌།
19 ཏེ༌ རིངས༌ལ༌ བླ༌མ༌ ཆེན༌མོའེ༌ ཡེ༌ཤུའ༌ ཁོང༌ངི༌ སློབ༌ཕྲུག༌ དང༌ སླབ༌བྱ༌ གུན༌ནི༌ སྐོར༌ལ༌ འདྲིས༌། 20 ཡེ༌ཤུའི༌ ལན༌ལ༌, "ངའེ༌ ཡིབས༌ཏེ༌ མན༌པ༌ མི༌ཚང༌མའེ༌ དུན༌ལ༌ ཤད༌པིན༌། ངའེ༌ ཡ༌ཧུ༌དཱ༌པ༌ ཚང༌མ༌ འཛོམ༌སའེ༌ འདུ༌ཁང༌གུན༌ དང༌ མཆོད༌ཁང༌ངི༌ ནང༌ང༌ དུས༌རྒྱུན༌ སླབ༌བྱ༌ བཏང༌ངད༌པིན༌། ངའེ༌ སང༌ཝའེ༌ ནང༌ང༌ བཅི༌ཞིག༌གའང༌ མ༌ཟེར༌པིན༌། 21 ཉེ༌རང༌ངི༌ ང༌ བཅིའ༌ འདྲི༌འད༌། ངའེ༌ སླབ༌བྱ༌ ཚོར༌ཁན༌གུན༌ལ༌ འདྲིས༌། ངའེ༌ ཟེར༌ཁན༌གུན༌ ཁོང༌གུན༌ལ༌ ཏན༌ཏན༌ རྒྱུས༌ ཡིན༌ནོག༌" མོལས༌། 22 ཡེ༌ཤུའི༌ ཏེ༌ཟུག༌ མོལ༌ལ༌ཅིག༌, མག༌མི༌གུན༌ནི༌ ཕྲོ༌ནེ༌ ཡེ༌ཤུའེ༌ དུན༌ལ༌ འདུགས༌ཏེ༌ ཡོད༌ཁན༌ གཅིག༌གི༌ ཁོང༌ང༌ འགྲམ༌ལྕགས༌ བཏངས༌ཏེ༌, "བླ༌མ༌ ཆེན༌མོའ༌ འི༌ཙོགས༌ལ༌ ལན༌ བཏང༌ང༌ནོག༌ག༌?" ཟེརས༌། 23 ཡེ༌ཤུའི༌ ཁོའ༌, "གལ༌ཏེས༌ ངའེ༌ བཙོག༌པོ༌ ཞིག༌ ཟེར༌ཏེ༌ ཡོད༌ན༌ ཏེ༌བོ༌ སྟན༌ཏེ༌ བཏོང༌། ཡིན༌ནའང༌ བདེན༌བ༌ ཟེར༌ཏེ༌ ཡིན༌ན༌ ཏོན༌མེད༌ལ༌ ང༌ བཅིའ༌ རྡུང༌ངད༌" མོལས༌། 24 ཏེ༌ནེ༌ ཨན༌ནཱས༌སི༌ ཡེ༌ཤུའི༌ ཕྱག༌གུན༌ བཅིངས༌ བཅིངས༌པོའེ༌ཀ༌ ཁོང༌ བླ༌མ༌ ཆེན༌མོ༌ ཀ༌ཡ༌ཕཱས༌སི༌ཀ༌ ཀལས༌།
པི༌ཏྲར༌རི༌ ཡང༌ གཙོ༌བོ༌ ཡེ༌ཤུ༌ ངོ༌ མི༌ཤེས༌ཟུན༌ བཏངས༌།
25 ཤི༌མོན༌ པི༌ཏྲར༌ མེའ༌ སྲོའིན༌ ཡོད༌ ཟ༌ནེ༌ གཅིག༌གཅིག༌གི༌ ཁོང༌ང༌ འདྲིས༌, "ཁྱོ༌རང༌ངའང༌ ཁོང༌ངི༌ སློབ༌ཕྲུག༌གུན༌ནི༌ ཕྲོ༌ནེ༌ གཅིག༌ མན༌ན༌?།" པི༌ཏྲར༌རི༌ ཟུན༌ བཏངས༌ཏེ༌, "ང༌ མན༌" ཟེརས༌། 26 བླ༌མ༌ ཆེན༌མོའེ༌ གཡོག༌པོ༌གུན༌ནི༌ ཕྲོ༌ནེ༌ གཅིག༌ པི༌ཏྲར༌རི༌ རལ༌གྲི༌ ཉམ༌པོ༌ རྣམ༌ཆོག༌ བཅད༌ཁན༌ནི༌ མི༌བོའེ༌ གཉེན༌ ཡིན༌པིན༌, ཏེ༌ གཡོག༌པོའེ༌ པི༌ཏྲར༌ལ༌ ཟེརས༌, "ངའེ༌ ཁྱོ༌རང༌ ཁོ༌ ཉམ༌པོ༌ ཏེ༌ ཚས༌སི༌ ནང༌ང༌ ཐོང༌ཏེ༌ མན༌པིན༌ན༌?།" 27 པི༌ཏྲར༌རི༌ ཡང༌ ལན༌ གཅིག༌ ངོ༌ མི༌ཤེས༌ཟུན༌ བཏངས༌། ཏེན༌ན༌མལ༌ལ༌ བྱ༌པོའེ༌ བྱ༌སྐད༌ བཏངས༌།
ཡེ༌ཤུའ༌ པི༌ལ༌ཏུའི༌ དུན༌ལ༌ ཁྲིམས༌ཅདས༌།
28 ཏེ༌ ཡ༌ཧུ༌དཱ༌པའེ༌ དའུ༌སྐྱོང༌གུན༌ནི༌ ང༌མོ༌ ཟང༌ཟིང༌ནེ༌ ཡེ༌ཤུ༌ ཀ༌ཡ༌ཕཱས༌སི༌ ཀ༌ནེ༌ རོམ༌པའེ༌ ཀའ༌ལོན༌ནི༌ མཁར༌ལ ཁྱེརས༌། ཁོང༌གུན༌ ཚི༌ཏུ༌ སོང༌ཏེ༌ པེ༌སག༌གི༌ དོན༌ཏང༌ ཟའ༌མི༌ཉན༌ སམ༌ཏེ༌ འཇིགས༌པ༌ མཁར༌རི༌ ནང༌ཀུག༌ག༌ མ༌སོང༌། 29 ཏེ༌བོའེ༌ཕིའ༌ པི༌ལ༌ཏུ༌ ཏེ༌གུན༌ནི༌ དུན༌ལ༌ ཕི༌ལོག༌ག༌ བིངས༌ཏེ༌ ཡོངས༌ ཡང༌ ཟེརས༌, "འི༌ མི༌བོའེ༌ཀ༌ ཁྱོ༌ཞའ༌གུན༌ནི༌ བཅི༌ ཉད༌ ཀལ༌ལད༌?།" 30 ཏེ༌གུན༌ནི༌ ཟེརས༌, "གལ༌ཏེས༌ ཁོ༌ ཁྲིམས༌ཅག༌ཁན༌ཞིག༌ མན༌པིན༌ན༌ ང༌ཞའེ༌ ཉེ༌རང༌ངི༌ ལག༌ག༌ ཁྱོངས༌ཏེ༌ མེད༌འགྲོ༌།" 31 ཏེ༌ནེ༌ པི༌ལ༌ཏུའི༌ ཟེརས༌, "ཁྱོ༌ཞའེ༌ ཁྱེར༌ཏེ༌ ཁྱོ༌ཞའ༌རང༌ངི༌ བཀའ༌ཁྲིམས༌ ནང༌བཞིན༌ལ༌ ཁོའི༌ཀ༌ ཤགས༌ བཅོས༌ཤིག༌།" ཡ༌ཧུ༌དཱ༌པའེ༌ དའུ༌སྐྱོང༌གུན༌ནི༌, "ང༌ཞའ༌ སུ༌ཞིག༌གའང༌ བསད༌ཅེས༌སི༌ དབང༌ མེད༌" ཞུས༌། 32 ༼ཡེ༌ཤུའི༌ ཁོང༌ ཀ༌ ལུགས༌ལ༌ གྲོང༌དགོས༌ཡིན༌ མོལ༌ཁན༌བོ༌ འདྲན༌དྲ༌ འགྲུབ༌ཅེས༌ལ༌ འི༌གུན༌ སོང༌༽ 33 ཏེ༌ནེ༌ པི༌ལ༌ཏུ༌ མཁར༌རི༌ ནང༌ཀུག༌ག༌ སོང༌ ཡང༌ ཡེ༌ཤུ༌ འབོད༌ཏེ༌ ཁྱོང༌ཅུགས༌ཏེ༌ ཟེརས༌, "ཅི༌ ཁྱོ༌རང༌ ཡ༌ཧུ༌དཱ༌པའེ༌ རྒྱལ༌པོ༌ ཡིན༌ན༌?།" 34 ཡེ༌ཤུའི༌ ཁོའ༌ ལན༌ལ༌, "འི༌ སྤེ༌ར༌བོ༌ ཉེ༌རང༌ངི༌ རང༌ངི༌ ཆོགས༌ནེ༌ ཟེར༌ཏེ༌ ཡིན༌ན༌ ཡ༌ གཞན༌མ༌གུན༌ནི༌ ངའེ༌ སྐོར༌ལ༌ ཤད༌ད༌རག༌?" མོལས༌། 35 པི༌ལ༌ཏུའི༌, "ཅི༌ ང༌ ཡ༌ཧུ༌དཱ༌པ༌ ཡིན༌ནོག༌ག༌?། ཁྱོ༌རང༌ངི༌ མིར༌རྒྱུད༌གུན༌ དང༌ བླ༌མ༌ དའུ༌སྐྱོང༌གུན༌ནི༌ ཁྱོ༌རང༌ ངའེ༌ ལག༌ག༌ སྟདས༌། ཁྱོ༌རང༌ངི༌ བཅི༌ བཅོས༌པིན༌?" ཟེརས༌། 36 ཡེ༌ཤུའི༌ ལན༌ལ༌, "ངའེ༌ རྒྱལ༌སྲིད༌པོ༌ ནི༌ འི༌ འཇིག༌རྟེན༌ནི༌ རྒྱལ༌སྲིད༌ མན༌། གལ༌ཏེས༌ ཡིན༌པིན༌ན༌ ཏེ༌ནེ༌ ངའེ༌ གཡོག༌པོ༌གུན༌ནི༌ མག༌ བཏངས༌ཏེ༌ ང༌ ཡ༌ཧུ༌དཱ༌པ༌གུན༌ནི༌ ལག༌ག༌ ཟུམ༌ཅུགས༌ཏེ༌ མེད༌འགྲོ༌, ཡིན༌ནའང༌ ངའེ༌ རྒྱལ༌སྲིད༌པོ༌ ནི༌ འི༌ འཇིག༌རྟེན༌ནེ༌ མན༌" མོལས༌། 37 པི༌ལ༌ཏུའི༌ ཟེརས༌, "ཏེ༌ནེ༌ ཁྱོ༌རང༌ རྒྱལ༌པོ༌ ཡིན༌ན༌?།" ཡེ༌ཤུའི༌ ཁོའ༌, "ཉེ༌རང༌ངི༌ ཟེར༌ཁན༌བོ༌ དྲང༌པོ༌ ཡིན༌ནོག༌, ང༌ རྒྱལ༌པོ༌ ཡིན༌། བདེན༌བ༌, ང༌ ཏེ༌བོའེ༌ཕིའ༌ སྐྱེས༌ཏེ༌ ཡིན༌ ཡང༌ དཀོན༌མཆོག༌གི༌ བདེན༌བའེ༌ ལམ༌མི༌ སྤང༌པོ༌ བཏང༌ཅེས༌སི༌ ཕིའ༌ འི༌ འཇིག༌རྟེན༌ནི༌ ནང༌ང༌ ཡོངས༌ཏེ༌ ཡིན༌། བདེན༌བའེ༌ སྐོར༌ལ༌ ཧ༌གོ༌ཁན༌ནི༌ མི༌ཚང༌མའེ༌ ངའེ༌ སྤེ༌ར༌གུན༌ལ༌ ཉན༌ན༌ནོག༌" མོལས༌། 38 པི༌ལ༌ཏུའི༌ འདྲིས༌, "བདེན༌བ༌བོ༌ བཅི༌ ཡིན༌ནོག༌།" ཏེན༌ན༌བོ༌ ཟེར༌ཏེ༌ ཁོ༌ ཡང༌ ཕི༌ལོག༌ག༌ ཡ༌ཧུ༌དཱ༌པའེ༌ དའུ༌སྐྱོང༌གུན༌ནི༌ཀ༌ སོང༌ཏེ༌, "ང༌ འི༌ མི༌བོའེ༌ ནང༌ང༌ སྐྱོན༌ ཀལ༌ཅེས༌སི༌ ཕིའ༌ ཅའང༌ སྐྱོན༌ ཐོབ༌བ༌ མི༌འདུག༌། 39 ཡིན༌ནའང༌ ཁྱོ༌ཞའེ༌ ལུག༌སྲོལ༌ ནང༌བཞིན༌, ངའེ༌ པེ༌སག༌གི༌ དུས༌ལ༌ ཁྱོ༌ཞའ༌གུན༌ནི༌ ཕིའ༌ བཙོན༌པ༌ཞིག༌ ཕུད༌དད༌། ཡ༌ཧུ༌དཱ༌པའེ༌ རྒྱལ༌པོ༌བོ༌ ཕུད༌བཏང༌ན༌ ཐད༌ཅེས༌ རག༌ག༌?" ཟེརས༌། 40 ཏེ༌ མི༌གུན༌ནི༌ ཀུ༌ཅོ༌ བཏང༌ཡིན༌, "མན༌ ཁོ༌ མ༌ཕུད༌། ང༌ཞའེ༌ ཕིའ༌ བཱ༌ར༌བཱས༌ ཕུད༌དོང༌" ཟེརས༌ ༼བཱ༌ར༌བཱས༌ རོམ༌མི༌ དབང༌སྲུལ༌པ༌ ངོ༌ལོག༌ བཅོ༌ཁན༌ ཞིག༌ ཡིན༌པིན༌༽།
ཡེ༌ཤུའ༌ སྲོག༌གི༌ ཆད༌པ༌ བཏངས༌།
1 ཏེ༌ནེ༌ ཀའ༌ལོན༌ པི༌ལ༌ཏུའི༌ མག༌མི༌གུན༌ལ༌ ཡེ༌ཤུ༌ ཁྱེར༌ཏེ༌ རྟལ༌ལྕག༌ རྒྱོབ༌ ཟེར༌ཏེ༌ བཀའ༌ བཏངས༌། 2 མག༌མི༌གུན༌ནི༌ ཚེར༌མའེ༌ ཐོར༌ཤོག༌ ཞིག༌ སླས༌ཏེ༌ ཁོང༌ངི༌ དབུའ༌ ཡང༌ གཟུགས༌པོའ༌ རྒྱལ༌པོའེ༌ ནམ༌བཟའ༌ དམར༌པོ༌ ཙོགས༌ ཞིག༌ སྐོནས༌། 3 ཏེ༌ མག༌མི༌གུན༌ ལན༌ མང༌པོ༌ ཁོང༌ངི༌ དུན༌ལ༌ ཡོང༌ཡིན༌, "ཡ༌ཧུ༌དཱ༌པའེ༌ རྒྱལ༌པོ༌ལེ༌ ཉེ༌རང༌ང༌ འཇུ༌ ཞུའད༌" ཟེར༌ཡིན༌ ཙིག༌པ༌ སྲག༌ཡིན༌ འགྲམ༌ལྕགས༌ བཏངས༌། 4 ཀའ༌ལོན༌ པི༌ལ༌ཏུའི༌ ཡང༌ ལན༌གཅིག༌ ཕི༌ལོག༌ག༌ ཡོངས༌ཏེ༌ ཡ༌ཧུ༌དཱ༌པའེ༌ མི༌གུན༌ལ༌ ཟེརས༌, "ལྟོས༌ཤིག༌ ང༌ ཁོང༌ངི༌ ནང༌ང༌ སྐྱོན༌ ཀལ༌ཅེས༌སི༌ རྒྱུམ༌ཚན༌ ཞིག༌ མ༌ཐོབ༌ཁན༌བོ༌ ཁྱོ༌ཞའ༌གུན༌ལ༌ ཧ༌གོ༌ ཅུག༌ཅེས༌སི༌ ཕིའ༌ ངའེ༌ ཁོང༌ ཕི༌ལོག༌ག༌ ཁྱོ༌ཞའེ༌ དུན༌ལ༌ ཁྱོང༌ངད༌། 5 ཏེ༌ནེ༌ ཡེ༌ཤུ༌ ཚེར༌མའེ༌ ཐོར༌ཤོག༌ དང༌ ནམ༌བཟའ༌ དམར༌པོ༌ ནམས༌ཏེ༌ ཕི༌ལོག༌ག༌ སྐྱོད༌ད༌དང༌, ཀའ༌ལོན༌ པི༌ལ༌ཏུའི༌ ཡ༌ཧུ༌དཱ༌པ༌གུན༌ལ༌ ཟེརས༌, "ལྟོས༌ཤིག༌གང༌ འི༌ནེ༌ ཏེ༌ མི༌བོ༌།" 6 བླ༌མ༌ དའུ༌སྐྱོང༌ དང༌ ཁོང༌ངི༌ མག༌མི༌ གུན༌ནི༌ ཁོང༌ ཐོང༌ང༌དང༌ ཀུ༌ཅོ༌ བཏང༌ཡིན༌, "ཁོ༌ རྐྱང༌ཤིང༌ང༌ རྐྱངས༌ཏེ༌ བསོད༌, རྐྱང༌ཤིང༌ང༌ རྐྱངས༌ཏེ༌ བསོད༌" ཟེརས༌། ཏེ༌བོ༌ ཚོར༌ར༌དང༌ ཀའ༌ལོན༌ པི༌ལ༌ཏུའི༌ ཏེ༌གུན༌ལ༌, "ང༌ ནི༌ ཁོ༌ རྐྱང༌ཤིང༌ང༌ རྐྱང༌ཅེས༌སི༌ ཅའང༌ རྒྱུམ༌ཚན༌ ཞིག༌ མ༌ཐོབ༌ ཁྱོ༌ཞའ༌ རང༌ངི༌ ཁྱེར༌ཏེ༌ ཁོ༌ རྐྱང༌ཤིང༌ང༌ རྐྱོང༌ཤིག༌" ཟེརས༌། 7 ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ ཨུ༌ཚུགས༌ བཏང༌ཡིན༌, "ང༌ཞའ༌གུན༌ལ༌ བཀའ༌ཁྲིམས༌ ཤིག༌ ཡོད༌། ཏེ༌ བཀའ༌ཁྲིམས༌ ནང༌བཞིན༌ལ༌ ཁོ༌ ཤི༌དགོས༌ བཅིའ༌ཟེར༌ན༌ ཁོའེ༌ ཁོ༌རང༌ དཀོན༌མཆོག༌གི༌ སྲས༌ ཡིན༌ ཟེར༌འདུག༌" ཟེརས༌། 8 ཏེ༌བོ༌ ཚོར༌ར༌དང༌ ཀའ༌ལོན༌ པི༌ལ༌ཏུ༌ མང༌པོ༌ འཇིགས༌། 9 ལོགས༌ཏེ༌ མཁར༌རི༌ ནང༌ང༌ སོང༌ ཡང༌ ཁོའེ༌ ཡེ༌ཤུའ༌ ཟེརས༌, "ཁྱོ༌རང༌ ཀ༌ནེ༌ ཡིན༌?" ཞུས༌། ཡིན༌ནའང༌ ཡེ༌ཤུའི༌ ཁོའ༌ ཅའང༌ ལན༌ མ༌སལས༌། 10 "ཅི༌ ཁྱོ༌རང༌ངི༌ ང༌ ལན༌ བཏང༌ང༌ མེད༌ད༌?། ང༌ ཁྱོ༌རང༌ ཕུད༌བཏང༌ཅེས༌ ཡ༌ རྐྱང༌ཤིང༌ང༌ རྐྱང༌ཅེས༌སི༌ དབང༌ ཡོད༌ཁན༌བོ༌ ཁྱོ༌རང༌ང༌ རྒྱུས༌མེད༌ད༌?།" 11 ཡེ༌ཤུའི༌ ཁོའ༌ ལན༌ལ༌, "ཁྱོ༌རང༌ང༌ ངའེ༌ཀ༌ འི༌ དབང༌བོ༌ མ༌ནེ༌ མེད༌འགྲོ༌ གལ༌ཏེས༌ ཏེ༌བོ༌ དཀོན༌མཆོག༌གི༌ མ༌སལ༌པིན༌ན༌, ཡིན༌ནའང༌ ང༌ ཁྱོ༌རང༌ངི༌ ལག༌ག༌ སྟད༌ཁན༌ནི༌ མི༌བོའ༌ ཁྱོ༌རང༌ངི༌ སང༌ སྡིག༌པའ༌ ཆེན༌མོའེ༌ སྐྱོན༌ ཕོག༌ཏེ༌ ཡིན༌ནོག༌" མོལས༌། 12 ཏེ༌ སྟིང༌ནེ༌ ཀའ༌ལོན༌ པི༌ལ༌ཏུའི༌ ཡེ༌ཤུ༌ ཕུད༌ཅེས༌སི༌ བརྩོན༌འགྲུས༌ བཅོས༌, ཡིན༌ནའང༌ ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ ཀུ༌ཅོ༌ བཏང༌ཡིན༌, "གལ༌ཏེས༌ ཉེ༌རང༌ངི༌ འི༌ མི༌བོ༌ ཕུད༌ན༌, ཉེ༌རང༌ རོམ༌མི༌ རྒྱལ༌པོའེ༌ མཛ༌འོ༌ མན༌ནོག༌། སུ༌ཞིག༌གི༌ ཁོ༌རང༌ རྒྱལ༌པོ༌ ཡིན༌ ཟེར༌ན༌ ཏེ༌བོ༌ རོམ༌མི༌ རྒྱལ༌པོའེ༌ དགྲ༌འོ༌ ཡིན༌ནོག" ཟེརས༌། 13 འི༌བོ༌ ཚོར༌ར༌དང༌ ཀའ༌ལོན༌ པི༌ལ༌ཏུའི༌ མག༌མི༌གུན༌ལ༌ བཀའ༌ བཏངས༌ཏེ༌, ཡེ༌ཤུ༌ ཕི༌ལོག༌ག༌ ཁྱོངས༌ ཡང༌ ཀའ༌ལོན༌ ཁོ༌རང༌ ཁྲིམས༌དཔོན༌ནི༌ ཁྲིས༌སི༌ཀ༌ འདུགས༌། ཏེ༌ ས༌ཀྱད༌པོའེ༌ མིང༌བོའ༌ རྡོའེ༌ལམ༌ ཟེར༌རད༌ཀྱག༌ ༼ཀ༌བོའ༌ ཨེབ༌རི༌པའེ༌ སྐད༌དི༌ ནང༌ང༌ ག༌བཱ༌ཐཱ༌ ཟེར༌ར༌ནོག༌༽། 14 ཏེ༌ དུས༌བོ༌ པེ༌སག༌ག༌ གྲལ༌ བཅོ༌ཅེས༌སི༌ ཞག༌གི༌ ཉིང༌གུང༌ ཡིན༌པིན༌, ཀའ༌ལོན༌ པི༌ལ༌ཏུའི༌ ཡ༌ཧུ༌དཱ༌པ༌གུན༌ལ༌, "ལྟོས༌ཤིག༌, ཁྱོ༌ཞའེ༌ རྒྱལ༌པོ༌" ཟེརས༌། 15 ཡིན༌ནའང༌ ཏེ༌ ཚང༌མའེ༌ ཀུ༌ཅོ༌ བཏང༌ཡིན༌, "ཁོ༌ ཁྱེར༌, ཁྱེར༌ཏེ༌ ཁོ༌ རྐྱང༌ཤིང༌ང༌ རྐྱོང༌" ཞུས༌། ཀའ༌ལོན༌ པི༌ལ༌ཏུའི༌ ཏེ༌ མི༌གུན༌ལ༌, "ཁྱོ༌ཞའ༌ རང༌ངི༌ རྒྱལ༌པོ༌བོ༌ རྐྱང༌ཤིང༌ང༌ རྐྱང༌ང༌?" ཟེརས༌། ཏེ༌ བླ༌མ༌ དའུ༌སྐྱོང༌གུན༌ནི༌, "ང༌ཞའ༌ རོམ༌མི༌ རྒྱལ༌པོ༌ མན༌པ༌ གཞན༌ རྒྱལ༌པོ༌ སུའང༌ མེད༌" ཟེརས༌། 16 ཏེ༌ནེ༌ ཀའ༌ལོན༌ པི༌ལ༌ཏུའི༌ ཏེ༌ མི༌གུན༌ནི༌ འདོད༌པ༌ ནང༌བཞིན༌ ཡེ༌ཤུ༌ རྐྱང༌ཤིང༌ང༌ རྐྱང༌ཅེས༌སི༌ ཕིའ༌ མག༌མི༌གུན༌ནི༌ ལག༌ག༌ སྟདས༌, ཏེ༌གུན༌ནི༌ ཁོང༌ ཁྲིད༌ཏེ༌ རྐྱང༌ཤིང༌ང༌ རྐྱང༌ཅེས༌ལ༌ ཁྱེརས༌།
གཙོ༌བོ༌ ཡེ༌ཤུ༌ རྐྱང༌ཤིང༌ང༌ རྐྱངས༌།
17 ཡེ༌ཤུའི༌ རང༌ངི༌ རྐྱང༌ཤིང༌ ནམས༌ཏེ༌ ཡེ༌རུ༌ཤ༌ལེམ༌ནེ༌ ཕི༌ལོག༌ག༌ ཐོད༌པའེ༌ རི༌ ༼ཀ༌བོའ༌ ཨེབ༌རི༌པའེ༌ སྐད༌དི༌ ནང༌ང༌ གོལ༌གོ༌ཐཱ༌ ཟེར༌རད༌༽ ཏེ༌རུ༌ སྐྱོདས༌། 18 ཏེ༌རུ༌ ཁོང༌གུན༌ནི༌ ཡེ༌ཤུ༌ དང༌ གཞན༌ མི༌ གཉིས༌སའང༌ ཁོང༌ ཉམ༌པོ༌ རྐྱང༌ཤིང༌ང༌ རྐྱངས༌། ཏེ༌ མི༌ གཉིས༌ཀོ༌ ཡེ༌ཤུའི༌ ལྡ༌ལྡོ༌ གཉིས༌ཀོའ༌ ཡང༌ ཡེ༌ཤུ༌ ཁོང༌ངི༌ ཞུང༌ང༌ བོརས༌། 19 ཀའ༌ལོན༌ པི༌ལ༌ཏུའི༌ མག༌མི༌གུན༌ལ༌ "ཡེ༌ཤུ༌ ན༌ཙ༌རེད༌པ༌ ཡ༌ཧུ༌དཱ༌པའེ༌ རྒྱལ༌པོ༌" བྲིས༌ཁན༌ནི༌ ལག༌ཤིང༌ ཞིག༌ ཡེ༌ཤུའི༌ རྐྱང༌ཤིང༌ངི༌ སྟག༌ག༌ ཏག༌ཅེས༌ལ༌ བཀའ༌ བཏངས༌། 20 ཡེ༌ཤུ༌ རྐྱང༌ཤིང༌ང༌ རྐྱང༌ཁན༌ནི༌ ནས༌ས༌བོ༌ རྒྱལ༌ས༌ དང༌ ཉེ༌མོའ༌ ཡོད༌པ༌ ཡ༌ཧུ༌དཱ༌པ༌ མང༌པོའེ༌ ཏེ༌ བྲིས༌ཁན༌བོ༌ སིལས༌། ཏེ༌ ཡི༌གེ༌བོ༌ ཨེབ༌རི༌པའེ༌, གི༌རིག༌གི༌ དང༌ རོམ༌པའེ༌ སྐད༌ གསུམ༌ཀའེ༌ ནང༌ང༌ བྲིས༌ཏེ༌ ཡོད༌པིན༌། 21 ཏེ༌ནེ༌ ཡ༌ཧུ༌དཱ༌པའེ༌ བླ༌མ༌ དའུ༌སྐྱོང༌གུན༌ནི༌ ཀའ༌ལོན༌ པི༌ལ༌ཏུའི༌ བྲིས༌ཁན༌བོའ༌ རྒྱབ༌གལ༌ བཅོས༌ཏེ༌, "ཡ༌ཧུ༌དཱ༌པའེ༌ རྒྱལ༌པོ༌ མ༌བྲིའ༌ 'ཁོ༌རང༌ངི༌ ང༌ ཡ༌ཧུ༌དཱ༌པའེ༌ རྒྱལ༌པོ༌ ཡིན༌ ཟེར༌རད༌པིན༌' བྲིའ༌ བཛད༌" ཟེར༌ཏེ༌ ཞུ༌བ༌ ཕུལས༌། 22 ཀའ༌ལོན༌ པི༌ལ༌ཏུའི༌ ལན༌ལ༌, "ངའེ༌ བཅི༌ཞིག༌ བྲིས༌ཏེ༌ ཡོད༌ནའང༌ བྲི༌ཚར༌, རྒྱུར༌ར༌ མེད༌" ཟེརས༌། 23 མག༌མི༌གུན༌ནི༌ ཡེ༌ཤུ༌ རྐྱང༌ཤིང༌ང༌ རྐྱང༌ ཚར༌ར༌ཅིག༌, ཚང༌མ༌ལ༌ ཐོབ༌ཅེས༌སི༌ ཕིའ༌, ཁོང༌ངི༌ ནམ༌བཟའ༌བོའ༌ པོ༌བཞི༌ ཕུདས༌། ཡིན༌ནའང༌ ཁོང༌ངི༌ ཚེམ༌པོ༌ མ༌ནེ༌ མེད༌པ༌ གོ༌ནེ༌ ཇུག༌ ཚག༌པ༌ སླས༌ཏེ༌ ཡོད༌ཁན༌ནི༌ ཀ༌མིས༌ ལུས༌ཁན༌བོའ༌ 24 ཟེརས༌, "འི༌བོའ༌ པོ༌ མི༌བུད༌" ཁོང༌རང༌ གཅིག༌ དང༌ གཅིག༌ག༌ ཟེརས༌, "རྒྱན༌ རྒྱབས༌ཏེ༌ འི༌བོའ༌ སུའ༌ ཐོབ༌འདུག༌ ལྟེན༌།" ཏེ༌བོ༌ དམ༌པའེ༌ གསུང༌རབས༌སི༌ ནང༌ང༌ མོལ༌ཁན༌ ནང༌བཞིན༌ འདྲན༌དྲ༌ འགྲུབ༌ཅེས༌སི༌ ཕིའ༌ སོང༌, "ཏེ༌གུན༌ནི༌ ངའེ༌ གོས༌ལག༌གུན༌ བགོས༌ཏེ༌ ངའེ༌ གོས༌བོའ༌ རྒྱན༌ རྒྱབས༌།" 25 ཡེ༌ཤུའི༌ རྐྱང༌ཤིང༌ངི༌ དུན༌ལ༌ ཁོང༌ངི༌ ཨ༌མ༌, ཨ༌མའེ༌ ནོ༌མོ༌, ཀ༌ལོ༌ཕཱས༌ ཟེར༌ཁན༌ནི༌ ན༌མ༌ མིར༌ཡམ༌ དང༌ མག༌དལ༌ལེན༌མ༌ མིར༌ཡམ༌ གུན༌ ལངས༌ཏེ༌ ཡོད༌པིན༌། 26 ཡེ༌ཤུའི༌ རང༌ངི༌ ཡུམ༌ དང༌ ཁོང༌ངི༌ གཅེས༌པ༌ བཅོའ༌ བཛད༌ཁན༌ནི༌ སློབ༌ཕྲུག༌པོ༌ དུན༌ལ༌ ལངས༌ཏེ༌ གཟིགས༌པ༌, ཁོང༌ངི༌ ཨ༌མའ༌ མོལས༌, "གཅེས༌པའེ༌ བུ༌མོ༌, ཏ༌ནེ༌ཕར༌ལ༌ ཁོ༌ ཉེ༌རང༌ངི༌ བུ༌ཚ༌ ཡིན༌" 27 ཡང༌ སློབ༌ཕྲུག༌པོའ༌, "ཏ༌ནེ༌ཕར༌ལ༌ ཁོང༌ ཁྱོ༌རང༌ངི༌ ཨ༌མ༌ ཡིན༌" མོལས༌། ཏེན༌ན༌ ཞག༌གི༌ སྟིང༌ནེ༌ སློབ༌ཕྲུག༌པོའེ༌ ཡེ༌ཤུའི༌ ཨ༌མ༌ ཁོ༌རང༌ངི༌ ཁང༌པ༌ ཁྱེརས༌།
གཙོ༌བོ༌ ཡེ༌ཤུ༌ གྲོངས༌།
28 ཡེ༌ཤུའི༌ ཁོང༌ངི༌ ལས༌ བཅོ༌ཅེས༌ ཚང༌མ༌ འགྲུབ༌ཏེ༌ ཡིན༌ཁན༌བོ༌ ཁྱེན༌པ༌ དམ༌པའེ༌ གསུང༌རབས༌སི༌ ནང༌ང༌ མོལ༌ཁན༌བོ༌ འདྲན༌དྲ༌ འགྲུབ༌ཅེས༌སི༌ ཕིའ༌ ཁོང༌ངི༌, "ང༌ སྐོམ༌ས༌རག༌" མོལས༌། 29 ཏེན༌ན༌ དུན༌ལ༌ ནོད༌ གཅིག༌གི༌ ནང༌ང༌ རྒུན༌ཆང༌ སྐྱུར༌མོ༌ ཞིག༌ ཡོད༌པིན༌, མི༌ ཞིག༌གི༌ རས༌བལ༌ ཞིག༌ ཏེ༌ནང༌ང༌ ཅུགས༌ཏེ༌ ཧི༌སོབ༌བི༌ ལྕང༌མའི༌ བེར༌ག༌ ཞིག༌གི༌ གོའ༌ སྐོན༌ཏེ༌ ཡེ༌ཤུའི༌ ཞལ༌ལི༌ཀ༌ ཕུལས༌། 30 ཡེ༌ཤུའི༌ ཏེ༌བོ༌ ཅབ༌ མྱང༌ང༌ཅིག༌, "ཏ༌ འགྲུབ༌" མོལས༌ ཡང༌ རང༌ངི༌ དབུ༌ གུའ༌ བཛད༌ཏེ༌ ཁོང༌རང༌ངི༌ སེམས༌ཉིད༌བོ༌ དཀོན༌མཆོག༌ག༌ སྟད༌ད༌ བཛདས༌། 31 ཏེ༌ ཞག༌པོ༌ ཤབ༌བད༌དི༌ ཞག༌གི༌ ཕིའ༌ གྲལ༌གྲིག༌ བཅོ༌ཅེས༌ ཡང༌ ཐོ༌རེ༌ ཟུག༌པོ༌ ཁག༌ཅན༌ ཤབ༌བད༌དི༌ ཞག༌ ཡིན༌པིན༌། ཡ༌ཧུ༌དཱ༌པ༌ དའུ༌སྐྱོང༌གུན༌ནི༌ མི༌ ཞིག༌ ཤབ༌བད༌དི༌ ཞག༌ག༌ རྐྱང༌ཤིང༌ངི༌ཀ༌ བོར༌ཅེས༌པོ༌ མ༌ཐད༌, ཏེ༌བོའེ༌ཕིའ༌ ཁོང༌གུན༌ ཀའ༌ལོན༌ པི༌ལ༌ཏུ༌ ཡོད༌ས༌ སོང༌ཏེ༌ གྱོགས༌པ༌ ཤི༌ཅེས༌སི༌ ཕིའ༌ ཏེ༌ མི༌གུན༌ནི༌ རྐང༌པ༌ ཅག༌ཅེས༌ དང༌ རོ༌གུན༌ ཐུར༌ལ༌ ཕབས༌ཏེ༌ ཁྱེར༌ཅེས༌ལ༌ བཀའ༌ སལ༌ ཟེར༌ཏེ༌ ཞུ༌བ༌ ཕུལས༌། 32 ཏེན༌ན༌བོའེ༌ཕིའ༌ མག༌མི༌གུན༌ ཡོངས༌ཏེ༌ ཡེ༌ཤུ༌ ཉམ༌པོ༌ རྐྱང༌ཤིང༌ང༌ རྒྱངས༌ཏེ༌ ཡོད༌ཁན༌གུན༌ནི༌ རྐང༌པ༌བོ༌ ཅགས༌། 33 ཡིན༌ནའང༌ ཡེ༌ཤུའི༌ དུན༌ལ༌ སླེབ༌བ༌དང༌, ཁོང༌ གྲོངས༌ ཚར༌ཏེ༌ ཐོང༌པ༌, ཁོང༌ངི༌ ཞབས༌ མ༌ཅགས༌། 34 ཏེ༌ མག༌མི༌ ཕྲོ༌ནེ༌ གཅིག༌གི༌ རང༌ངི༌ མདུང༌བོ༌ ཡེ༌ཤུའི༌ རྩིབ༌མའེ༌ ཕར༌ལ༌ ཙུག༌པ༌ སྐུ༌ཁྲག༌ དང༌ ཆུ༌ བིང༌། 35 མིག༌ནེ༌ ངོས༌མ༌ འི༌གུན༌ ཐོང༌ཁན༌ནི༌ མི༌བོའེ༌ སྤང༌པོ༌ བཏང༌ངད༌ ཡང༌ ཁོའེ༌ སྤང༌པོ༌བོ༌ བདེན༌བ༌ ཡིན༌། ཁོའེ༌ དྲང༌པོ༌ ཟེར༌ཁན༌བོ༌ ཁོའེ༌ ཤེས༌ས༌ནོག༌། ཡང༌ ཁྱོ༌ཞའ༌གུན༌ནིའང༌ དད༌པ༌ བཅོ༌ཅེས༌སི༌ ཕིའ༌ ཁོའེ༌ སྤང༌པོ༌ བཏང༌ཡིན༌ ཡིན༌། 36 དམ༌པའེ༌ གསུང༌རབས༌སི༌ ནང༌ང༌ "ཁོང༌ངི༌ རུས༌པ༌ གཅིག༌གའང༌ མི༌ཅག༌" བྲིས༌ཏེ༌ ཡོད༌ཁན༌ ཚང༌མ༌ འདྲན༌དྲ༌ འགྲུབ༌ཅེས༌སི༌ ཕིའ༌ འི༌ ཚང༌མ༌ བྱུང༌ཏེ༌ ཡིན༌ནོག༌། 37 དམ༌པའེ༌ གསུང༌རབས༌སི༌ ཡང༌ ནས༌ས༌ ཞིག༌གི༌ ནང༌ང༌ མོལ༌ཏེ༌ འདུག༌, "ཁོང༌གུན༌ནི༌ ཁོང༌ང༌ མདུང༌ ཙུགས༌ཁན༌བོའ༌ ལྟེན༌།"
ཡེ༌ཤུའི༌ སྤུར༌ ཞུས༌།
38 སྟིང༌ནེ༌ ཨ༌རི༌མ༌ཐཱ༌པ༌, ཡོ༌སེབ༌ ཀའ༌ལོན༌ པི༌ལ༌ཏུའི༌ཀ༌ སོང༌ཏེ༌ ཡེ༌ཤུའི༌ སྤུར༌ ཞུ༌ཅེས༌སི༌ གོངས༌པ༌ སལ༌ ཞུས༌། ཡ༌ཧུ༌དཱ༌པ༌ དའུ༌སྐྱོང༌གུན༌ལ༌ འཇིགས༌ པ༌སང༌, ཡོ༌སེབ༌ ཕག༌ནེ༌ ཡེ༌ཤུའི༌ སློབ༌ཕྲུག༌ གཅིག༌ ཡིན༌པིན༌། ཁོང༌ངི༌ ཀའ༌ལོན༌ པི༌ལ༌ཏུའི༌ ཀ༌ནེ༌ གོངས༌པ༌ ཁུར༌ཏེ༌ ཡེ༌ཤུའི༌ སྤུར༌བོ༌ ཞུས༌ཏེ༌ ཁྱེརས༌། 39 སྔོན༌ལ༌ ཚན༌ཞིག༌ག༌ ཡེ༌ཤུ༌ མཇལ༌ལ༌ ཡོངས༌ཁན༌ནི༌ ནི༌ཀོ༌དེ༌མས༌སའང༌ ཁོང༌ ཉམ༌པོ༌ ཡོངས༌། ཁོའེ༌ མིར༌ དང༌ འེལ༌ཝ༌ ཟེར༌ཁན༌ནི༌ དྲི༌ཞིམ༌ མངས༌ཏེའང༌ རིན༌ཅན༌ རིག༌ ཧ༌ལམ༌ ཀྱི༌ལོ༌ གསུམ༌བཅུ༌ སོབ༌བཞི༌ ཁྱོངས༌། 40 ཁོང༌ གཉིས༌ཀོའེ༌ ཡེ༌ཤུའི༌ སྤུར༌བོ༌ ཁྱེར༌ཏེ༌, དྲི༌ཞིམ༌གུན༌ སྐུས༌ཏེ༌ སྐུ༌རས༌ རིན༌ཅན༌ ཞིག༌གི༌ ནང༌ང༌ སྲིལས༌ ཀ༌ཟུག༌ ཡ༌ཧུ༌དཱ༌པ༌གུན༌ནི༌ སྤུར༌ སུབ༌ཅེས༌སི༌ ལུག༌སྲོལ༌ ནང༌བཞིན༌ བཅོའ༌ནོག༌། 41 ཀ༌རུ༌ ཡེ༌ཤུ༌ རྐྱང༌ཤིང༌ང༌ རྐྱངས༌ ཏེ༌དུན༌ལ༌ ཚས༌ཤིག༌ ཡོད༌པིན༌, ཏེ༌ ཚས༌པོའེ༌ ནང༌ང༌ སྔོན༌ལ༌ མ༌ནེ༌ སྤུར༌ མ༌བོར༌ཁན༌ནི༌ སྤུར༌ཁང༌ སོ༌མ༌ ཞིག༌ ཡོད༌པིན༌། 42 སྤུར༌ཁང༌བོ༌ ཉེ༌མོའ༌ ཡོད༌ཅེས༌ ཡང༌ འི༌ ཞག༌པོ༌ ཡ༌ཧུ༌དཱ༌པ༌གུན༌ནི༌ ཁག༌ཅན༌ ཤབ༌བད༌དི༌ གྲལ༌གྲིག༌གི༌ ཞག༌ ཡིན༌ པ༌སང༌, ཁོང༌གུན༌ནི༌ ཡེ༌ཤུའི༌ སྤུར༌ ཏེན༌ན༌ སྤུར༌ཁང༌ངི༌ ནང༌ང༌ བོརས༌།
སྤུར༌ཁང༌ སྟོང༌པ༌།
1 ཟ༌ཉི༌མའེ༌ ཞག༌ག༌ ང༌མོ༌ ཟང༌ཟིང༌ནེ༌ གནམ༌ མ༌ལངས༌ས༌ ཡོད༌ ཟ༌ནེ༌ མིར༌ཡམ༌ མག༌དལ༌ལེན༌མ༌ སྤུར༌ཁང༌ངི༌ཀ༌ སླེབ༌, ཡང༌ ཁོའ༌ སྤུར༌ཁང༌ངི༌ ཁའི༌ ཀ༌ནེ༌ ཕོ༌ལོང༌བོ༌ ཐེན༌ཏེ༌ ཐོང༌། 2 ཁོ༌ རྒྱུག༌ཡིན༌ཞིག༌ ཡེ༌ཤུའི༌ གཅེས༌པ༌ བཛད༌ཁན༌ནི༌ སློབ༌ཕྲུག༌ དང༌ ཤི༌མོན༌ པི༌ཏྲར༌ གཉིས༌ཀོའེ༌ དུན༌ལ༌ ཡོངས༌ཏེ༌ ཁོང༌གུན༌ལ༌ ཟེརས༌, "ཁོང༌གུན༌ནི༌ གཙོ༌བོ༌ སྤུར༌ཁང༌ནེ༌ ཕིངས༌ཏེ༌ ཁྱེར༌ཏེ༌ མི༌འདུག༌ ཡང༌ ཀ༌རུ༌ བོརས༌ ང༌ཞའ༌ ཅའང༌ རྒྱུས༌མེད༌།" 3 ཏེ༌བོ༌ ཅབ༌ ཚོར༌ར༌ཞིག༌ པི༌ཏྲར༌ དང༌ གཞན༌ སློབ༌ཕྲུག༌པོ༌ སྤུར༌ཁང༌ང༌ རྒྱུགས༌ཏེ༌ སོང༌། 4 ཁོང༌ གཉིས༌ཀོ༌ རྒྱུགས༌ཏེ༌ ཆའད༌པིན༌, ཡིན༌ནའང༌ གཞན༌ སློབ༌ཕྲུག༌པོ༌ པི༌ཏྲར༌རི༌ སང༌ སྔོན༌ལ༌ སྤུར༌ཁང༌ང༌ སླེབ༌། 5 ཁོའེ༌ མགོ༌ གུས༌ཏེ༌ ནང༌ཀུག༌ག༌ ལྟས༌ ཏེ༌རུ༌ སྤུར༌རི༌ རས༌གུན༌ བོར༌ཏེ༌ ཐོང༌ ཡིན༌ནའང༌ ནང༌ཀུག༌ག༌ མ༌སོང༌། 6 ཏེ༌ནེ༌ ཤི༌མོན༌ པི༌ཏྲར༌ ཁོའེ༌ རྒྱབ༌ནེ༌ ཏེ༌རུ༌ སླེབ༌པ༌ ཁ༌དྲང༌ང༌ སྤུར༌ཁང༌ངི༌ ནང༌ཀུག༌ག༌ ཞུགས༌ཏེ༌ སོང༌། ཁོའིང༌ ཏེ༌རུ༌ སྤུར༌རི༌ རས༌གུན༌ མན༌པ༌ ཅའང༌ མ༌ཐོང༌། 7 ཡེ༌ཤུའི༌ དབུའི༌ཀ༌ སྲིལ༌ཏེ༌ ཡོད༌ཁན༌ནི༌ སྤུར༌རི༌ རས༌བོ༌ ལྟབས༌ཏེ༌ གཞན༌ རས༌གུན༌ དང༌ སོ༌སོའ༌ བོར༌ཏེ༌ ཐོང༌། 8 ཏེ༌ནེ༌ སྔོན༌ལ༌ སྤུར༌ཁང༌ང༌ སླེབ༌ཁན༌ནི༌ སློབ༌ཕྲུག༌པོའང༌ ནང༌ཀུག༌ག༌ སོང༌, ཏེ༌གུན༌ ཐོང༌ཏེ༌ ཁོའེ༌ ཏེ༌ བུ༌མོའེ༌ ཟེར༌ཁན༌གུན༌ བདེན༌ཤེས༌། 9 ༼ཁོང༌གུན༌ལ༌ ཏ༌རོང༌ངའང༌ དམ༌པའེ༌ གསུང༌རབས༌སི༌ ནང༌ང༌ ཡེ༌ཤུའ༌ ཤི༌ཁན༌གུན༌ནི༌ ཕྲོ༌ནེ༌ སྐུ༌ གསོན༌ཏེའ༌ ཞངས༌ གོ༌ཤེས༌བོ༌ ཁག༌ཅན༌ ཡིན༌ མོལ༌ཁན༌བོ༌ ཧ༌མ༌གོའ༌ ཡིན༌པིན༌༽ 10 ཏེ༌ནེ༌ སློབ༌ཕྲུག༌གུན༌ ཁོང༌རང༌གུན༌ནི༌ ཁང༌པ༌ ལོགས༌ཏེ༌ སོང༌།
གཙོ༌བོ༌ ཡེ༌ཤུ༌ མིར༌ཡམ༌ མག༌དལ༌ལེན༌ལ༌ མཇལ༌།
11 ཡིན༌ནའང༌ མིར༌ཡམ༌ སྤུར༌ཁང༌ངི༌ ཕི༌ལོག༌ག༌ ངུ༌ཡིན༌ ཡོད༌པིན༌། ཁོའེ༌ ངུ༌ཡིན༌ དང༌ མགོ༌ གུས༌ཏེ༌ སྤུར༌ཁང༌ངི༌ ནང༌ཀུག༌ག༌ ལྟས༌། 12 ཁོའ༌ ཏེ༌རུ༌ ནམ༌བཟའ༌ དཀར༌པོ༌ གོན༌ཁན༌ནི༌ ཕོ༌ཉ༌ གཉིས༌ ཡེ༌ཤུའི༌ སྤུར༌ བོར༌སེ༌ཀ༌ གཅིག༌པོ༌ དབུའི༌ ཆོགས༌ལ༌ ཡང༌ གཅིག༌པོ༌ ཞབས༌སི༌ ཆོགས༌ལ༌ འདུགས༌ཏེ༌ མཇལ༌། 13 ཕོ༌ཉ༌གུན༌ནི༌ མིར༌ཡམ༌མ༌, "བུ༌མོ༌ ཁྱོ༌རང༌ བཅིའ༌ ངུའད༌?" མོལ༌།" མིར༌ཡམ༌མི༌ ལན༌ལ༌, "ཁོང༌གུན༌ནི༌ ངའེ༌ གཙོ༌བོ༌ ཁྱེར༌ཏེ༌ མི༌འདུག༌ ཡང༌ ཀ༌རུ༌ བོརས༌ ང༌ ཅའང༌ རྒྱུས༌མེད༌" ཞུས༌། 14 ཏེ༌བོ༌ ཅབ༌ ཟེར༌ཏེ༌ རྒྱབ༌ རྒྱུརས༌པ༌ ཏེ༌རུ༌ ཡེ༌ཤུ༌ ཞངས༌ཏེ༌ མཇལ༌། ཡིན༌ནའང༌ ཁོའ༌ ཡེ༌ཤུ༌ ཡིན༌ཁན༌བོ༌ ངོ༌ མ༌ཤེས༌། 15 ཡེ༌ཤུའི༌ མོལས༌, "བུ༌མོ༌ ཁྱོ༌རང༌ བཅིའ༌ ངུའད༌། ཁྱོ༌རང༌ངི༌ སུ༌ ཙལ༌ལད༌།" མིར༌ཡམ༌མི༌ ཁོང༌ ཚས༌ཁན༌བོ༌ ཡིན༌འགྲོ༌ སམ༌ཏེ༌ ཁོང༌ང༌ ཞུས༌, "ཨ༌ཅོ༌ལེ༌, གལ༌ཏེས༌ ཉེ༌རང༌ངི༌ ཁོང༌ངི༌ སྤུར༌བོ༌ ཁྱེར༌ཏེ༌ ཡིན༌ན༌ ངའ༌ ཤོད༌དང༌ ཀ༌རུ༌ བོར༌ཏེ༌ ཡོད༌, ངའེ༌ ཁོང༌ངི༌ སྤུར༌བོ༌ ཁྱེར༌ཡིན༌བ༌" ཞུས༌། 16 ཡེ༌ཤུའི༌ ཁོའ༌ མོལས༌, "མིར༌ཡམ༌།" ཏེ༌བོ༌ ཚོར༌ར༌དང༌ ལོགས༌ཏེ༌, ཡེ༌ཤུའི༌ ཆོགས༌ལ༌ ལྟས༌ཏེ༌ ཨེབ༌རི༌པའེ༌ སྐད༌དི༌ ནང༌ང༌, "ར༌བོན༌ནི༌" ༼ཡང༌ན༌ སློབ༌དཔོན༌ལེ༌༽ ཞུས༌། 17 ཡེ༌ཤུའི༌ ཁོའ༌, "ང༌ མ༌ཁྲིལ༌ བཅིའ༌ཟེར༌ན༌ ང༌ ཏ༌རུང༌ ང༌རང༌ངི༌ ཡབ༌བི༌ཀ༌ ལོགས༌ཏེ༌ མ༌ཆའ༌ ཡིན༌། ཏེ༌སང༌ སོང༌ཏེ༌ ངའེ༌ སྤུན༌ དང༌ སྤུན༌མོ༌ གུན༌ལ༌, 'ང༌ ནི༌ ངའེ༌ ཡབ༌ དང༌ ཁྱོ༌ཞའ༌གུན༌ནི༌ ཡབ༌ ཡང༌ ངའེ༌ དཀོན༌མཆོག༌ དང༌ ཁྱོ༌ཞའ༌གུན༌ནི༌ དཀོན༌མཆོག༌ ཡོད༌ས༌ ལོགས༌ཏེ༌ ཆའ༌རུག༌' ཟེར༌" མོལས༌། 18 མིར༌ཡམ༌ མག༌དལ༌ལེན༌མ༌ སོང༌ཏེ༌ སློབ༌ཕྲུག༌གུན༌ལ༌, "ང༌ གཙོ༌བོ༌ མཇལ༌" ཟེརས༌ ཡང༌ ཁོའེ༌ ཏེ༌གུན༌ལ༌ ཡེ༌ཤུའི༌ མོལ༌ཁན༌གུན༌ བཤདས༌།
སློབ༌ཕྲུག༌གུན༌ལ༌ གཙོ༌བོ༌ ཡེ༌ཤུ༌ མཇལ༌།
19 ཟའ༌ ཉི༌མའེ༌ ཞག༌གི༌ ཕི༌ཐོག༌, སློབ༌ཕྲུག༌གུན༌ རང༌ངི༌ ནང༌ང༌ འཛོམས༌ཏེ༌ ཡ༌ཧུ༌དཱ༌པའེ༌ དའུ༌སྐྱོང༌གུན༌ལ༌ འཇིགས༌པ༌ སྒོ༌ སྲན༌ཏེ༌ ཅུགས༌ཏེ༌ འདུགས༌ཏེ༌ ཡོད༌པིན༌, ཡེ༌ཤུ༌ སྐྱོད༌ཏེ༌ ཁོང༌གུན༌ནི༌ སྐྱིལ༌ལ༌ ཞངས༌ཏེ༌, "དཀོན༌མཆོག༌གི༌ ཁྱོ༌ཞའ༌གུན༌ལ༌ ཞི༌བདེ༌ སལ༌ཤིག༌" མོལས༌། 20 ཏེ༌བོ༌ མོལ༌ཏེ༌ ཁོང༌ངི༌ རང༌ངི༌ ཕྱག༌ དང༌ རྩིབ༌མ༌བོ༌ ཁོང༌གུན༌ལ༌ སྟན༌ན༌ བཛདས༌། སློབ༌ཕྲུག༌གུན༌ ཁོང༌རང༌ངི༌ གཙོ༌བོ༌ མཇལ༌ཏེ༌ མ༌སྲན༌ཏེ༌ ཐད༌། 21 ཡེ༌ཤུའི༌ ཡང༌ ཁོང༌གུན༌ལ༌, "དཀོན༌མཆོག༌གི༌ ཁྱོ༌ཞའ༌གུན༌ལ༌ ཞི༌བདེ༌ སལ༌ཤིག༌ ཀ༌ཟུག༌ ཡབ༌བི༌ ང༌ ཀལ༌ལ༌ བཛདས༌ ཏེན༌ན༌དང༌ ཙོགས༌ལ༌ ངེའང༌ ཁྱོ༌ཞའ༌གུན༌ ཀལ༌ལད༌" མོལས༌། 22 ཏེ༌ཟུག༌ མོལ༌ཏེ༌ ཁོང༌གུན༌ལ༌ ཕུ༌ བཏབ༌བ༌ བཛད༌ཏེ༌, "དམ༌པའེ༌ ཐུགས༌ཉིད༌ ཐོབ༌ཤིག༌། 23 གལ༌ཏེས༌ ཁྱོ༌ཞའ༌གུན༌ནི༌ སུ༌ཞིག༌གི༌ སྡིག༌པའ༌ ཤགས༌པ༌ བཏང༌ན༌ དཀོན༌མཆོག༌གི༌ ཏེ༌གུན༌ནི༌ སྡིག༌པ༌ ཤགས༌པ༌ སལ༌ཡིན༌, ཡང༌ སུ༌ཞིག༌གི༌ སྡིག༌པ༌ ཤགས༌པ༌ མ༌བཏང༌ན༌ དཀོན༌མཆོག༌གི༌ ཏེ༌གུན༌ནི༌ སྡིག༌པ༌ ཤགས༌པ༌ མི༌སལ༌" མོལས༌།
གཙོ༌བོ༌ ཡེ༌ཤུ༌ ཐོ༌མཱས༌ལ༌ མཇལ༌།
24 སློབ༌ཕྲུག༌ བཅུ༌གཉིས༌སི༌ ཕྲོ༌ནེ༌ གཅིག༌ ཐོ༌མཱས༌ ༼ཀ༌བོའ༌ ཚག༌ཕྲུག༌འང༌ ཟེར༌རད༌པིན༌༽ ཡེ༌ཤུ༌ སྐྱོད༌དི༌ དུས༌ལ༌ གཞན༌ སློབ༌ཕྲུག༌གུན༌ནི༌ ཕྲོའ༌ མེད༌པིན༌། 25 གཞན༌ སློབ༌ཕྲུག༌གུན༌ནི༌ ཁོའ༌, "ང༌ཞའེ༌ གཙོ༌བོ༌ མཇལ༌" ཟེརས༌། ཡིན༌ནའང༌ ཐོ༌མཱས༌སི༌ ཁོང༌གུན༌ལ༌, "ནམ༌ ཚག༌པ༌ ངའེ༌ ཁོང༌ངི༌ ཕྱག༌གི༌ཀ༌ ཟེ༌རུའི༌ མལ༌གུན༌ མི༌ཐོང༌ ཡང༌ ཏེ༌གུན༌ནི༌ ནང༌ང༌ ང༌རི༌ ཛི༌གུ༌, ཡང༌ ང༌རི༌ ལག༌པ༌ ཁོང༌ངི༌ རྩིབ༌མའེ༌ ནང༌ང༌ བཏངས༌ཏེ༌ མ༌ནེ༌ ང༌ བདེན༌ཤེས༌ཤེས༌ མེ༌རག༌" ཟེརས༌། 26 བདུན༌ཞག༌ གཅིག༌གི༌ སྟིང༌ནེ༌ ཡེ༌ཤུའི༌ སློབ༌ཕྲུག༌གུན༌ ཡང༌ ཏེན༌ན༌ ཁང༌པའེ༌ ནང༌ང༌ འཛོམས༌ཏེ༌ ཐོ༌མཱས༌སའང༌ ཁོང༌གུན༌ ཉམ༌པོ༌ ཡོད༌པིན༌། སྒོ༌ སྲན༌ཏེ༌ ཅུགས༌ཏེ༌ ཡོད༌ནའང༌ ཡེ༌ཤུ༌ སྐྱོད༌ཏེ༌ ཁོང༌གུན༌ནི༌ ཕྲོའ༌ ཞངས༌ཏེ༌, "དཀོན༌མཆོག༌གི༌ ཁྱོ༌ཞའ༌གུན༌ལ༌ ཞི༌བདེ༌ སལ༌ཤིག༌" མོལས༌། 27 ཏེ༌ནེ༌ ཁོང༌ངི༌ ཐོ༌མཱས༌ལ༌, "རང༌ངི༌ ཛི༌གུ༌ ངའེ༌ ལག༌པའེ༌ ནང༌ང༌ ཙུག༌ཏེ༌ ལྟོས༌། ཡང༌ རང༌ངི༌ ལག༌པ༌ རྐྱངས༌ཏེ༌ ངའེ༌ རྩིབ༌མའེ༌ རྨ༌ཁའེ༌ ནང༌ང༌ ཅུག༌གའང༌། ཐེ༌ཚོམས༌ ཕོངས༌ཏེ༌ ཡིད༌ཆེས༌ བཅོས༌" མོལས༌། 28 ཏེ༌ནེ༌ ཐོ༌མཱས༌སི༌ ཡེ༌ཤུའ༌, "ངའེ༌ གཙོ༌བོ༌ལེ༌, ཡང༌ ངའེ༌ དཀོན༌མཆོག༌ལེ༌" ཞུས༌། 29 ཡེ༌ཤུའི༌ ཁོའ༌, "ཁྱོ༌རང༌ངི༌ ང༌ ཐོང༌ཅེས༌པོའེ༌ ཞས༌ཏེ༌ དད༌པ༌ བཅོ༌རུག༌། ཡིན༌ནའང༌ ང༌ མ༌ཐོང༌ང༌ དད༌པ༌ བཅོ༌ཁན༌གུན༌ལ༌ དཀོན༌མཆོག༌གི༌ ཆོགས༌ནེ༌ མང༌ང༌ བྱིན༌ལབས༌ ཐོབ༌ཡིན༌" མོལས༌། 30 ཡེ༌ཤུའི༌ རང༌ངི༌ སློབ༌ཕྲུག༌གུན༌ནི༌ མིག༌གི༌ དུན༌ལ༌ ཡང༌ ཧ༌ལས༌ཤེས༌སི༌ བཛད༌པ༌ མང༌པོ༌ བཛདས༌, ཀ༌གུན༌ འི༌ སྡེབ༌བི༌ ནང༌ང༌ བྲིས༌ཏེ༌ མེད༌། 31 ཡིན༌ནའང༌ ཁྱོ༌ཞའ༌གུན༌ནི༌ ཡེ༌ཤུ༌ ཁོང༌རང༌ དཀོན༌མཆོག༌གི༌ འདམ༌མ༌ བཛད༌ཁན༌ནི༌ མ༌ཤི༌ཀ༌ ཡང༌ དཀོན༌མཆོག༌གི༌ སྲས༌ ཡིན༌ཁན༌བོའི༌ཀ༌ དད༌པ༌ བཅོ༌ཅེས༌སི༌ ཕིའ༌ འི༌ ཚང༌མ༌ ངའེ༌ འི༌ སྡེབ༌བི༌ ནང༌ང༌ བྲིས༌ཏེ༌ ཡིན༌། ཡང༌ ཁོང༌ངི༌ཀ༌ དད༌པ༌ བཅོ༌ཅེས༌པོའེ༌ ཁྱོ༌ཞའ༌གུན༌ལ༌ ཁོང༌ངི༌ དབང༌ རྒྱུད༌ཏེ༌ མཐའ༌མེད༌པའེ༌ མི༌ཚེ༌ ཐོབ༌ཡིན༌།
གཙོ༌བོ༌ ཡེ༌ཤུ༌ སློབ༌ཕྲུག༌ བདུན༌ལ༌ མཇལ༌།
1 ཏི༌བེ༌རི༌ཡཱས༌སི༌ མཚོའི༌ མཐའ༌མ༌ ཡང༌ ལན༌ གཅིག༌ ཡེ༌ཤུའི༌ ཁོང༌རང༌ སློབ༌ཕྲུག༌གུན༌ལ༌ མངོན༌ཅུག༌ག༌ བཛདས༌, ཏེ༌བོ༌ འི༌ཟུག༌གི༌ བྱུངས༌། 2 ཤི༌མོན༌ པི༌ཏྲར༌, ཐོ༌མཱས༌ ༼ཀ༌བོའ༌ ཚག༌ཕྲུག༌འང༌ ཟེར༌རད༌པིན༌༽, ན༌ཐའ༌ནི༌ཨེལ༌ གཱ༌ལིལ༌ལིའི༌ ཡུལ༌ ཀ༌ནཱ༌པ༌, ཟེ༌བེད༌དཱེའེ༌ བུ༌ཚ༌ གཉིས༌ཀོ༌ དང༌ ཡང༌ སློབ༌ཕྲུག༌ གཉིས༌སང༌ ཏེ༌རུ༌ འཛོམས༌ཏེ༌ ཡོད༌པིན༌། 3 ཏེན༌ན༌ དུས༌ལ༌ ཤི༌མོན༌ པི༌ཏྲར༌རི༌ ཁོང༌གུན༌ལ༌ ཟེརས༌, "ང༌ ཉ༌ ཟུམ༌མ༌ ཆའད༌།" ཁོང༌གུན༌ནི༌, "ང༌ཞའང༌ ཉམ༌པོ༌ ཆེན༌" ཟེརས༌། ཏེ༌བོ༌ ཟེར༌ཏེ༌ ཁོང༌གུན༌ གྲུ༌ཟིང༌ངི༌ ནང༌ང༌ ཞོན༌ཏེ༌ སོང༌, ཡིན༌ནའང༌ ཏེ༌ ཚན༌ གང༌པོ༌ ཁོང༌གུན༌ལ༌ ཉ༌ གཅིག༌གའང༌ མ༌ཁད༌། 4 ནམ༌ ལངས༌ས༌དང༌ ཡེ༌ཤུ༌ མཚོའི༌ མཐའ༌མ༌ ཞངས༌ཏེ༌ ཡོད༌པིན༌, ཡིན༌ནའང༌ སློབ༌ཕྲུག༌གུན༌ནི༌ ཁོང༌ ཡེ༌ཤུ༌ ཡིན༌ཁན༌བོ༌ ངོ༌ མ༌ཤེས༌། 5 ཡེ༌ཤུའི༌ ཁོང༌གུན༌ལ༌ འབོད༌ད༌ བཛད༌ཏེ༌, "མཛ༌འོ༌གུན༌ ཁྱོ༌ཞའ༌གུན༌ལ༌ ཉ༌ མ༌ཐུབ༌བ༌?" མོལས༌། ཁོང༌གུན༌ནི༌, "མ༌ཐུབ༌" ཞུས༌། 6 ཡེ༌ཤུའི༌ ཁོང༌གུན༌ལ༌, "ཁྱོ༌ཞའ༌གུན༌ནི༌ ཉ༌དོལ༌བོ༌ གྲུ༌ཟིང༌ངི༌ གཡས༌ ཆོགས༌ལ༌ ཕོང༌ཤིག༌, ཏེ༌ནེ༌ ཁྱོ༌ཞའ༌ ཉ༌ ཐུབ༌ཡིན༌" མོལས༌། ཁོང༌གུན༌ནི༌ ཏེན༌ན༌བོ༌ བཅོས༌ ཡང༌ འི༌ཟམ༌ ཉ༌ མ༌མང༌པོ༌ ཁད༌, ཉ༌དོལ༌བོ༌ གྲུ༌ཟིང༌ངི༌ ནང༌ང༌ ཐེན༌ཏེ༌ ཁྱོང༌ མ༌ཉན༌། 7 ཏེ༌ནེ༌ ཡེ༌ཤུའི༌ སློབ༌ཕྲུག༌ གཅེས༌པ༌བོའེ༌ ཤི༌མོན༌ པི༌ཏྲར༌ལ༌ ཟེརས༌, "ཁོང༌ ནི༌ གཙོ༌བོ༌ལེ༌ ཡིན༌ནོག༌།" ཏེ༌བོ༌ ཅབ༌ ཚོར༌ར༌དང༌ ཤི༌མོན༌ པི༌ཏྲར༌རི༌ ཁོ༌རང༌ངི༌ གོས༌ ༼ཀ༌བོ༌ ཁོའེ༌ སྔོན༌ལ༌ ཉ༌ ཟུམ༌ཅེས༌སི༌ ཕིའ༌ ཕུད༌ཏེ༌ ཡོད༌པིན༌༽ གོན༌ཏེ༌ ཆུའི༌ ནང༌ང༌ ལྕེབས༌ ཡང༌ ཡེ༌ཤུ༌ ཞུགས༌ཏེ༌ ཡོད༌ས༌ སོང༌། 8 གཞན༌ སློབ༌ཕྲུག༌གུན༌ པི༌ཏྲར༌རི༌ རྒྱབ༌ནེ༌ གྲུ༌ཟིང༌ངི༌ ནང༌ང༌ ཡོངས༌, ཡང༌ ཁོང༌གུན༌ནི༌ ཉ༌ གང༌ཁན༌ནི༌ ཉ༌དོལ༌བོ༌ དྲུད༌ཏེ༌ ཁྱོངས༌ བཅིའ༌ཟེར༌ན༌ ཁོང༌གུན༌ མཚོའི༌ མཐའ༌མ༌ནེ༌ མ༌ཐག༌རིང༌ང༌ མེད༌པིན༌, ཧ༌ལམ༌ མི༌ཀྲར༌ དགུ༌བཅུ༌ ཀོག༌གཉིས༌ ཞིག༌། 9 ཡང༌ མཐའ༌མ༌ སླེབ༌བ༌དང༌ ཁོང༌གུན༌ནི༌ སོལ༌ལེ༌ མེ༌ཀ༌ ཉ༌ ཡང༌ ཏ༌གི༌ གུན༌ ཐོང༌། 10 ཡེ༌ཤུའི༌ ཁོང༌གུན༌ལ༌, "ཁྱོ༌ཞའ༌གུན༌ནི༌ ཟུམ༌ཁན༌ནི༌ ཉ༌གུན༌ནི༌ ཕྲོ༌ནེ༌ ཁ༌ཅིག༌ འི༌ཀ༌ ཁྱོང༌" མོལས༌། 11 ཤི༌མོན༌ པི༌ཏྲར༌ གྲུ༌ཟིང༌ངི༌ ནང༌ང༌ སོང༌ཏེ༌ ཉ༌དོལ༌བོ༌ ཆུའི༌ མཐའ༌མ༌ ཙུག༌པ༌ དྲུད༌ཏེ༌ ཁྱོངས༌, ཀ༌བོ༌ ཉ༌ ཆེན༌མོ༌ བརྒྱ༌ དང༌ ལྔ༌བཅུ༌ ང༌གསུམ༌མི༌ གངས༌ཏེ༌ ཡོད༌པིན༌, ཉ༌ མང༌པོ༌ ཞིག༌ ཡོད༌ཏེའང༌ ཉ༌དོལ༌བོ༌ མ༌ཆད༌། 12 ཡེ༌ཤུའི༌ ཁོང༌གུན༌ལ༌, "ཡོང༌ཤིག༌ ཆིན༌ནན༌ ཟོ༌ཤིག༌" མོལས༌། སློབ༌ཕྲུག༌གུན༌ནི༌ ཕྲོ༌ནེ༌ སུ༌ཞིག༌གིའང༌ ཁོང༌ང༌ "ཉེ༌རང༌ སུ༌ ཡིན༌" ཞུ༌ཏེ༌ འདྲི༌ཅེས༌སི༌ ཧམ༌པ༌ མ༌ཡོངས༌། ཁོང༌གུན༌ལ༌ ཁོང༌ གཙོ༌བོ༌ ཞུགས༌ཏེ༌ ཡིན༌ཁན༌བོ༌ ཤེས༌ཏེ༌ ཡིན༌པིན༌། 13 ཡེ༌ཤུ༌ སྐྱོད༌ཏེ༌ ཏ༌གི༌ ནམས༌ཏེ༌ ཁོང༌གུན༌ལ༌ སལས༌ ཡང༌ ཉའང༌ ཏེན༌ན༌ ཙོགས༌ བཅོའ༌ བཛདས༌། 14 ཡེ༌ཤུའི༌ ཤི༌ཁན༌གུན༌ནི༌ ཕྲོ༌ནེ༌ སྐུ༌ གསོན༌ཏེའ༌ ཞངས༌ཏེ༌ སྟིང༌ནེ༌ སློབ༌ཕྲུག༌གུན༌ལ༌ ལན༌ གསུམ༌པ༌ མངོན༌ཅུག༌ག༌ བཛད༌ཏེ༌ ཡིན༌པིན༌།
ཡེ༌ཤུ༌ དང༌ ཤི༌མོན༌ པི༌ཏྲར༌།
15 ཡེ༌ཤུ༌ དང༌ ཁོང༌ངི༌ སློབ༌ཕྲུག༌ ཚང༌མ༌ དོན༌ཏང༌ དོན༌ ཚར༌ར༌དང༌, ཡེ༌ཤུའི༌ ཤི༌མོན༌ པི༌ཏྲར༌ལ༌ འདྲིའ༌ བཛདས༌, "ཤི༌མོན༌ ཡོ༌ཧཱ༌ནན༌ནི༌ བུ༌ཚ༌, ཁྱོ༌རང༌ངི༌ ང༌ འི༌གུན༌ནི༌ སང༌ མང༌ང༌ བྱམས༌པ༌ བཅོའ༌དའ༌?།" ཁོའེ༌ ལན༌ལ༌, "འོ༌ན༌ གཙོ༌བོ༌ ཉེ༌རང༌ངི༌ ཁྱེན༌ན༌ནོག༌ ངའེ༌ ཉེ༌རང༌ང༌ བྱམས༌པ༌ བཅོ༌ཁན༌བོ༌" ཞུས༌། ཡེ༌ཤུའི༌ ཁོའ༌, "ངའེ༌ ལུག༌གུན༌ གསོས༌" མོལས༌། 16 ཡེ༌ཤུའི༌ ཡང༌ ཁོའ༌ འདྲིའ༌ བཛདས༌, "ཤི༌མོན༌ ཡོ༌ཧཱ༌ནན༌ནི༌ བུ༌ཚའ༌, བདེན༌བ༌ ཁྱོ༌རང༌ངི༌ ང༌ བྱམས༌པ༌ བཅོའ༌དའ༌?།" ཁོའེ༌ ལན༌ལ༌, "འོ༌ན༌ ཀྱེ༌ གཙོ༌བོ༌ ཉེ༌རང༌ངི༌ ཁྱེན༌ན༌ནོག༌, ངའེ༌ ཉེ༌རང༌ང༌ བྱམས༌པ༌ བཅོ༌ཁན༌བོ༌" ཞུས༌། ཡེ༌ཤུའི༌ ཁོའ༌, "ཏེ༌ནེ༌ ངའེ༌ ལུག༌གུན༌ ཉ༌ར༌ བཅོས༌" མོལས༌། 17 ཁོང༌ངི༌ ལན༌ གསུམ༌པ༌ ཁོའ༌ འདྲིའ༌ བཛདས༌, "ཡོ༌ཧཱ༌ནན༌ནི༌ བུ༌ཚ༌ ཤི༌མོན༌, ཁྱོ༌རང༌ངི༌ ང༌ བྱམས༌པ༌ བཅོའ༌དའ༌?།" པི༌ཏྲར༌རི༌ སེམས༌སི༌ ནང༌ང༌ ཕོག༌ བཅིའ༌ཟེར༌ན༌ ཡེ༌ཤུའི༌ ཁོའ༌ ལན༌ གསུམ༌པ༌ 'ཁྱོ༌རང༌ངི༌ ང༌ བྱམས༌པ༌ བཅོའ༌དའ༌' མོལ༌ཏེ༌ འདྲིའ༌ བཛདས༌, པི༌ཏྲར༌རི༌ ཟེརས༌, "གཙོ༌བོ༌ ཉེ༌རང༌ང༌ བཅི༌ཚང༌མ༌ ཁྱེན༌ན༌ནོག༌, ངའེ༌ ཉེ༌རང༌ང༌ བྱམས༌པ༌ བཅོ༌ཁན༌བོ ཉེ༌རང༌ངི༌ ཁྱེན༌ན༌ནོག༌" ཞུས༌། ཡེ༌ཤུའི༌ ཁོའ༌, "ངའེ༌ ལུག༌གུན༌ གསོས༌" མོལས༌། 18 ཡེ༌ཤུའི༌, "ངའེ༌ ཁྱོ༌རང༌ང༌ བདེན༌བ༌ ཟེར༌རད༌, ཁྱོ༌རང༌ ཁྱོག༌ཏོང༌ ཡོད༌ ཟ༌ནེ༌, ཁྱོ༌རང༌ རང༌ངི༌ གོས༌ལག༌ གོན༌ཏེ༌ ཀ༌རུ༌ ཆེན༌ སམ༌ནའང༌ ཆའད༌པིན༌, ཡིན༌ནའང༌ རྒས༌སད༌དང༌ ཁྱོ༌རང༌ངི༌ ལག༌པ༌ རྐྱང༌ཡིན༌ ཡང༌ གཞན༌མ༌ ཞིག༌གི༌ སྐོན༌ཏེ༌ ཁྱོ༌རང༌ མ༌ཐད༌ཁན༌ནི༌ ས༌ཆ༌གུན༌ལ༌ ཁྲིད༌ཏེ༌ ཁྱེར༌ཡིན༌" མོལས༌། 19 ༼ཡེ༌ཤུའི༌ པི༌ཏྲར༌ ཀ༌ཟུག༌ ཚུལ༌ ཞིག༌ག༌ ཤི༌ཡིན༌ ཡང༌ ཏེ༌བོ༌ རྒྱུད༌ཏེ༌ དཀོན༌མཆོག༌ག༌ སྤལ༌ ཁྱོང༌ཅེས༌བོ༌ སྟན༌ན༌ལ༌ ཏེ༌ཟུག༌ མོལས༌༽ ཏེ༌ནེ༌ ཡེ༌ཤུའི༌ ཁོའ༌, "ངའེ༌ སྟིང༌རང༌ནེ༌ བྲོངས༌" མོལས༌། 20 པི༌ཏྲར༌རི༌ རྒྱབ༌ ལོགས༌ཏེ༌ ལྟས༌པ༌ ཡེ༌ཤུའི༌ སློབ༌ཕྲུག༌ གཅེས༌པ༌བོ༌ རྒྱབ༌ནེ༌ ཡོང༌ངད༌པིན༌, ཁོ༌ ནི༌ ཕི༌ཏོག༌གི༌ དོན༌ཏང༌ངི༌ དུས༌ལ༌ ཡེ༌ཤུའ༌ ཉེས༌ཏེ༌ "ཀྱེ༌ གཙོ༌བོ༌ ཉེ༌རང༌ང༌ ངོ༌ལོག༌ བཅོ༌ཅེས༌ཅན༌བོ༌ སུ༌ ཡིན༌" ཟེར༌ཏེ༌ འདྲིས༌ཁན༌ནི༌ སློབ༌ཕྲུག༌པོ༌ ཡིན༌། 21 པི༌ཏྲར༌རི༌ ཁོ༌ ཐོང༌ཏེ༌ ཡེ༌ཤུའ༌, "ཀྱེ༌ གཙོ༌བོ༌ ཁོའ༌ བཅི༌ ཆེན༌" ཞུས༌། 22 ཡེ༌ཤུའི༌ ལན༌ལ༌, "གལ༌ཏེས༌ ང༌ ཐད༌ན༌ ང༌ ལོགས༌ཏེ༌ ཡོང༌ཡོང༌ ཚག༌པ༌ ཁོ༌ གསོན༌ཏེའ༌ བོར༌ནའང༌ ཁྱོ༌རང༌ང༌ བཅི༌ རག༌?། ཁྱོ༌རང༌ ངའེ༌ སྟིང༌རང༌ནེ༌ བྲང༌དགོས༌" མོལས༌། 23 ཏེ༌བོའེ༌ཕིའ༌ སྤུན༌གུན༌ནི༌ ནང༌ང༌ འི༌ སློབ༌ཕྲུག༌པོ༌ མ༌ནེ༌ མི༌ཤི༌ཅེས༌ ཡིན༌ནོག༌ ཟེར༌ཏེ༌ འུ༌ཡ༌ རྒྱུག༌། ཡིན༌ནའང༌ ཡེ༌ཤུའི༌ མོལ༌ཅེས༌སི༌ ཏོན༌བོ༌ ཁོ༌ མ༌ནེ༌ མི༌ཤི༌ མོལ༌ཏེ༌ མན༌པིན༌, ཁོང༌ངི༌ ཡིན༌ན༌བོ༌ མོལ༌ཏེ༌ ཡིན༌པིན༌, "གལ༌ཏེས༌ ང༌ ཐད༌ན༌ ང༌ ལོགས༌ཏེ༌ ཡོང༌ཡོང༌ ཚག༌པ༌ ཁོ༌ གསོན༌ཏེའ༌ བོར༌ནའང༌ ཁྱོ༌རང༌ང༌ བཅི༌ རག༌?།" 24 ཏེན༌ན༌ སློབ༌ཕྲུག༌པོ༌ ནི༌ འི༌ སྡེབ༌བི༌ ནང༌ང༌ འི༌ ཚང༌མའེ༌ སྐོར༌ལ༌ བྲིས༌ཏེ༌ སྤང༌པོ༌ བཏང༌ཁན༌བོ༌ ཡིན༌, ཡང༌ ང༌ཞའ༌གུན༌ལ༌ ཁོའེ༌ སྤང༌པོ༌གུན༌ བདེན༌བ༌ ཡིན༌ཁན༌བོ༌ རྒྱུས༌ཡོད༌། 25 ཡེ༌ཤུའི༌ གཞན༌ མང༌པོ༌ ཕྱག༌ལས༌སའང༌ བཛད༌ཏེ༌ ཡིན༌ནོག༌། གལ༌ཏེས༌ ཏེ༌ ཚང༌མ༌ སྡེབ༌བི༌ ནང༌ང༌ བྲིས༌ཏེ༌ ཡོད༌པིན༌ན༌, ངའེ༌ སམ༌བའེ༌ ནང༌ང༌ ཏེ༌ སྡེབ༌གུན༌ནི༌ ཕིའ༌ འི༌ འཇིག༌རྟེན༌ གང༌པོའེ༌ ནང༌ང༌ ནས༌ས༌ ཞིག༌ མེད༌འགྲོ༌།