The New Testament of our Lord and Saviour Jesus Christ

Ma‸htehˍ 1

1 Li‸ chi lehˬ, Aˍbraˍhanˍ ve awˬ yaˇ leh Daˍviˆ ve awˬ yaˇ 2 Aˍbraˍhanˍ ve awˬ yaˇ lehˬ Iˉcaˆ yoˬ. Iˉcaˆ ve awˬ yaˇ lehˬ Yaˍkoˆ yoˬ. Yaˍkoˆ ve awˬ yaˇ lehˬ, Yuˇda‸ leh yawˇ ve awˬ viˉ awˬ nyi teˇ hpaˍ yoˬ. Yuˇda‸ ve awˬ yaˇ lehˬ, awˬ miˇ ma Taˍmaˍ lo paw la ve Hpaˍrehˆ leh Seˍraˆ yoˬ. Hpaˍrehˆ ve awˬ yaˇ lehˬ Heˍsaˍronˍ yoˬ. Heˍsaˍronˍ ve awˬ yaˇ lehˬ Aˍranˍ yoˬ. Aˍranˍ ve awˬ yaˇ lehˬ Aˍmiˆnaˍdaˆ yoˬ. Aˍmiˆnaˍdaˆ ve awˬ yaˇ lehˬ Naˍsonˍ yoˬ. Naˍsonˍ ve awˬ yaˇ lehˬ Saˍlaˍmonˍ yoˬ. Saˍlaˍmonˍ ve awˬ yaˇ lehˬ, awˬ miˇ ma Raˍhkaˆ lo paw la ve Bawˇzaˆ yoˬ. Bawˇzaˆ ve awˬ yaˇ lehˬ, awˬ miˇ ma Ruˉhtaˆ lo paw la ve Awˇbehˆ yoˬ. Awˇbehˆ ve awˬ yaˇ lehˬ Yeˍsehˇ yoˬ. Yeˍsehˇ ve awˬ yaˇ lehˬ hkunˉ hawˉ hkanˇ Daˍviˆ yoˬ. 6 (6b) Daˍviˆ ve awˬ yaˇ lehˬ, Uˇriˇya‸ ve awˬ miˇ ma hpeh‸ jaw ve yaˇ miˇ teˇ g'aˇ lo paw la ve Sawˉla‸monˍ yoˬ. Sawˉla‸monˍ ve awˬ yaˇ lehˬ Rawˇbaoˍ yoˬ. Rawˇbaoˍ ve awˬ yaˇ lehˬ Aˍbiˉya‸ yoˬ. Aˍbiˉya‸ ve awˬ yaˇ lehˬ Aˍsaˆ yoˬ. Aˍsaˆ ve awˬ yaˇ lehˬ Yawˇsaˍhpaˆ yoˬ. Yawˇsaˍhpaˆ ve awˬ yaˇ lehˬ Yaˍhawˇranˍ yoˬ. Yaˍhawˇranˍ ve awˬ yaˇ lehˬ Awˇsiˆ yoˬ. Awˇsiˆ ve awˬ yaˇ lehˬ Yoˇtanˍ yoˬ. Yoˇtanˍ ve awˬ yaˇ lehˬ Aˍhkaˆ yoˬ, Aˍhkaˆ ve awˬ yaˇ lehˬ Heˍsaˍkiˆ yoˬ. Heˍsaˍkiˆ ve awˬ yaˇ lehˬ Maˍnaˍseˍ yoˬ. Maˍnaˍseˍ ve awˬ yaˇ lehˬ Aˍmonˍ yoˬ. Aˍmonˍ ve awˬ yaˇ lehˬ Yoˇsiˆ yoˬ. Yoˇsiˆ ve awˬ yaˇ lehˬ Baˍbuˍlonˍ mvuhˇ miˬ lo shu yuˬ k'ai ve teˇ co-e htaˇ, Yeˍhkawˇniˆ leh yawˇ ve awˬ viˉ awˬ nyi hui yoˬ. 12 Baˍbuˍlonˍ mvuhˇ miˬ lo shu yawˇ hui hta‸ yuˬ k'ai peuˬ hk'aw‸ nawˉ, Yeˍhkawˇniˆ ve awˬ yaˇ lehˬ Saˍlaˍteˍlaˆ yoˬ. Saˍlaˍteˍlaˆ ve awˬ yaˇ lehˬ Seˍruˇbeˍlaˆ yoˬ. Seˍruˇbeˍlaˆ ve awˬ yaˇ lehˬ Aˍbiˉoˆ yoˬ. Aˍbiˉoˆ ve awˬ yaˇ lehˬ Eˇlaˍkenˍ yoˬ. Eˇlaˍkenˍ ve awˬ yaˇ lehˬ Aˍcawˍ yoˬ. Aˍcawˍ ve awˬ yaˇ lehˬ Saˍdoˆ yoˬ. Saˍdoˆ ve awˬ yaˇ lehˬ Aˍhkeˍ yoˬ. Aˍhkeˍ ve awˬ yaˇ lehˬ Eˇliˍoˆ yoˬ. Eˇliˍoˆ ve awˬ yaˇ lehˬ Eˇlaˍsaˍ yoˬ. Eˇlaˍsaˍ ve awˬ yaˇ lehˬ Maˍhtanˍ yoˬ. Maˍhtanˍ ve awˬ yaˇ lehˬ Yaˍkoˆ yoˬ. Yaˍkoˆ ve awˬ yaˇ lehˬ, Maˍriˆ ve awˬ hpawˇ Yoˇseh‸ yoˬ. Maˍriˆ lehˬ Hkri‸ teh‸ k'oˆ ve Yeˍsuˆ hta‸ paw la piˇ ve yoˬ. 17 Hk'e te leh, Aˍbraˍhanˍ hta‸ tanˬ leh Daˍviˆ ve awˬ co-e hk'a gaˬ, teˇ chi awˇ co-e cawˬ ve yoˬ. Daˍviˆ hta‸ tanˬ leh Baˍbuˍlonˍ mvuhˇ miˬ lo shu yuˬ k'ai ve awˬ co-e hk'a gaˬ, teˇ chi awˇ co-e cawˬ ve yoˬ. Baˍbuˍlonˍ mvuhˇ miˬ lo shu yuˬ k'ai ve hta‸ tanˬ leh Hkri‸ ve awˬ co-e hk'a gaˬ, teˇ chi awˇ co-e cawˬ ve yoˬ. 18 Yeˍsuˆ Hkri‸ paw la ve awˬ lawn lehˬ chi hk'e yoˬ. Yawˇ ve awˬ e Maˍriˆ lehˬ, Yoˇseh‸ hta‸ heuˆ tuˬ ka ti‸ te da‸ peuˬ hk'aw‸ nawˉ, yawˇ huiˉ maˬ maˇ heuˆ da‸ sheˍ htaˇ, da‸ ve kehˬ ve Awˬ ha hpu hta‸ pa taw Maˍriˆ yaˇ hu la ve yoˬ. 19 Yawˇ ve awˬ hpawˇ Yoˇseh‸ lehˬ, hteˇ ve cawˇ ve chaw hpeh‸ leh Maˍriˆ ve mehˆ hpfuhˇ maˇ luˬ piˇ gaˇ ve pa taw, yawˇ hta‸ ta‸ iˉ baˬ taˉ tuˬ dawˇ taˍ ve yoˬ. 20 Yawˇ chi hk'e dawˇ nyi chehˇ ve teˇ yanˇ, zuh‸ maˆ mawˬ ve awˬ hk'aw lo Jawˇ mawˇ G'uiˬ sha ve mvuhˇ naw ma tcuh yaˇ teˇ g'aˇ tawˆ la leh k'oˆ ve, Daˍviˆ ve yaˇ Yoˇseh‸-oˬ, nawˬ ve awˬ miˇ ma Maˍriˆ hta‸ heuˆ tuˬ taˇ dawˇ haˍ. Awˬ lawn k'o, yawˇ yaˇ hu ve lehˬ, da‸ ve kehˬ ve Awˬ ha hpu hta‸ pa taw yoˬ. 21 Yawˇ yaˇ paˍ teˇ g'aˇ paw la tuˬ leh, nawˬ yawˇ hta‸ Yeˍsuˆ teh‸ g'a meh piˇ tuˬ yoˬ. Awˬ lawn k'o, yawˇ ve chaw ceuˬ hta‸ yawˇ hui ve venˇ baˆ awˬ hk'aw lo yawˇ htaiˍ hk'aw‸ piˇ tuˬ yoˬ teh‸, mvuhˇ naw ma tcuh yaˇ k'oˆ piˇ ve yoˬ. 22 Chi hk'a peu-eˬ hpeh‸ la ve lehˬ, Jawˇ mawˇ G'uiˬ sha yawˇ ve tcuh kaˍ paˍ teˇ g'aˇ hta‸ cuˇ leh k'oˆ taˍ ve tawˇ hkawˇ biˇ la tuˬ awˬ pon hpeh‸ la ve yoˬ. 23 Yawˇ k'oˆ ve, Nyi loˬ. Yaˇ miˇ haˉ teˇ g'aˇ yaˇ hu la leh yaˇ paˍ teˇ g'aˇ paw la tuˬ yoˬ. Yaˇ paˍ oˇ ve hta‸ Eˇmaˍno-eˍlaˆ meh piˇ tuˬ yoˬ. teh‸ k'oˆ taˍ ve yoˬ. (Eˇmaˍno-eˍlaˆ k'oˆ ve tcuhˉ kuiˬ lehˬ, G'uiˬ sha ngaˬ hui geh chehˇ ve yoˬ teh‸ k'oˆ ve yoˬ.) 24 Yoˇseh‸ zuh‸ nawˇ la htaˇ, Jawˇ mawˇ G'uiˬ sha ve mvuhˇ naw ma tcuh yaˇ yawˇ hta‸ k'oˆ piˇ ve hk'a shuˍ shuˍ te leh, yawˇ ve awˬ miˇ ma hta‸ heuˆ ve yoˬ. 25 Ya‸ hk'aˇ, yaˇ paˍ maˇ paw la sheˍ ve ceh ceh yawˇ geh maˇ zuh‸. Yaˇ paˍ oˇ ve paw la leh yawˇ hta‸ Yeˍsuˆ teh‸ meh piˇ ve yoˬ.

Ma‸htehˍ 2

1 Hkunˉ hawˉ hkanˇ Heˍroˆ ve awˬ co-e htaˇ, Yuˇda‸ mvuhˇ miˬ Behˍ lehˍhehnˍ venˇ awˬ hk'aw lo Yeˍsuˆ paw la ve yoˬ. Oˇ htaˇ, cuˇ yiˍ cawˬ paˍ teˇ hpaˍ mvuhˇ nyi tawˆ hpawˇ lo tu la leh, Yeˍruˆsaˍlehnˍ venˇ lo gaˬ la ve yoˬ. 2 Yawˇ hui k'oˆ ve, Paw la peuˬ ve Yuˇda‸ hkunˉ hawˉ hkanˇ hk'aˬ lo le. Awˬ lawn k'o, mvuhˇ nyi tawˆ hpawˇ lo yawˇ ve meu‸ keu shiˍ hta‸ ngaˬ hui g'a mawˬ leh, yawˇ hta‸ oˉ k'oˍ pui tuˬ ngaˬ hui laˬ ve yoˬ teh‸ k'oˆ piˇ ve yoˬ. 3 Hkunˉ hawˉ hkanˇ Heˍroˆ tawˇ chi hta‸ g'a kaˇ htaˇ, yawˇ ka‸ Yeˍruˆsaˍlehnˍ venˇ yaˇ hk'a peuˍeˬ ka‸ dawˇ haˍ jaˇ ve yoˬ. 4 Yuˇda‸ chaw ceuˬ awˬ hk'aw lo paw hkuˇ lonˉ leh li‸ bvuh‸ paˍ hui hk'a peu-eˬ hta‸ jawˇ mawˇ Heˍroˆ kuˬ hpawnˬ peuˬ leh, Hkri‸ hk'aˬ lo paw la tuˬ le teh‸, yawˇ yawˇ hui hta‸ na nyi ve yoˬ. 5 Yawˇ hui yawˇ hta‸ k'oˆ piˇ ve, Yuˇda‸ mvuhˇ miˬ Behˍlehˍhehnˍ venˇ awˬ hk'aw lo paw la tuˬ yoˬ. Awˬ lawn k'o, G'uiˬ sha ve tcuh kaˍ paˍ teˇ g'aˇ bvuh‸ taˍ ve hk'e, 6 Yuˇda‸ mvuhˇ miˬ Behˍlehˍhehnˍ venˇ-oˬ, Yuˇda‸ jawˇ mawˇ hui ve venˇ teˇ hpaˍ awˬ hk'aw lo, nawˬ lehˬ shu a‸ kehˉ awˬ me‸ awˬ hponˇ i ve maˇ heˆ. Awˬ lawn k'o, ngaˬ ve chaw ceuˬ hpeh‸ ve Iˉsaˍreˍlaˆ chaw hta‸ sheh k'ai tuˬ ve Jawˇ mawˇ teˇ g'aˇ lehˬ, nawˬ awˬ hk'aw lo tawˆ la tuˬ yoˬ, teh‸ bvuh‸ taˍ ve yoˬ. 7 Oˇ htaˇ, jawˇ mawˇ Heˍroˆ lehˬ cuˇ yiˍ cawˬ paˍ hui hta‸ ta‸ iˉ kuˬ yuˬ leh, meu‸ keu shiˍ tawˆ la ve awˬ yanˇ hta‸ hk'a deh‸ na nyi ve yoˬ. 8 Hk'e te leh, jawˇ mawˇ Heˍroˆ yawˇ hui hta‸ k'oˆ piˇ ve, Nawˬ hui k'ai leh yaˇ paˍ ehˉ oˇ ve hta‸ hk'a deh‸ ca nyi-o. Yawˇ hta‸ mawˬ peuˬ hk'aw‸ nawˉ, ngaˬ htawˇ yawˇ hta‸ oˉ k'oˍ g'a pui tuˬ, ngaˬ hta‸ k'aw‸ hto laˇ-oˆ teh‸ k'oˆ piˇ leh, yawˇ hui hta‸ Behˍlehˍhehnˍ venˇ lo k'ai tcuh ve yoˬ. 9 Hkunˉ hawˉ hkanˇ ve tawˇ hkawˇ hta‸ yawˇ hui g'a kaˇ peuˬ leh, yawˇ hui tawˆ k'ai ve yoˬ. Mvuhˇ nyi tawˆ hpawˇ lo yawˇ hui g'a mawˬ ve meu‸ keu shiˍ lehˬ, yawˇ hui awˬ g'uˇ suhˍ k'ai leh, yaˇ paˍ ehˉ chehˇ taˍ kuiˬ awˬ hk'oˆ lo gaˬ htaˇ, jehˇ taˍ ve yoˬ. 10 Meu‸ keu shiˍ oˇ ve hta‸ g'a mawˬ ve teˇ yanˇ, yawˇ hui maˇ maˇ ha lehˬ jaˇ ve yoˬ. 11 Yehˬ hk'aw lo‸-e htaˇ, awˬ e Maˍriˆ geh yaˇ paˍ ehˉ hta‸ g'a mawˬ leh, yawˇ hui boˆ sheˬ leh yaˇ paˍ ehˉ hta‸ oˉ k'oˍ pui ve yoˬ. Yawˇ hui yuˬ laˬ taˍ ve mawˇ jeˬ hta‸ hpeu‸ tawˆ leh, shi, lawˇbanˍ, leh muˇraˍ, la‸ shawnˍ chi teˇ hpaˍ yawˇ hta‸ tanˇ piˇ ve yoˬ. 12 Jawˇ mawˇ Heˍroˆ geh maˇ g'a k'aw‸ k'o‸-e tuˬ, zuh‸ maˆ ve awˬ hk'aw lo G'uiˬ sha yawˇ hui hta‸ maˍ piˇ ve pa taw, yawˇ hui lehˬ yawˇ hui ve mvuhˇ miˬ lo awˬ kaˍ awˬ nu ya‸ k'aw teˇ caˆ hta‸ k'aw‸ k'o‸-e ve yoˬ. 13 Yawˇ hui k'o‸-e peuˬ hk'aw‸ nawˉ, zuh‸ maˆ ve awˬ hk'aw lo Yoˇseh‸ lehˬ, Jawˇ mawˇ G'uiˬ sha ve mvuhˇ naw ma tcuh yaˇ teˇ g'aˇ hta‸ g'a mawˬ ve yoˬ. Mvuhˇ naw ma tcuh yaˇ Yoˇseh‸ hta‸ k'oˆ piˇ ve, Tu loˬ. Yaˇ ehˉ leh yawˇ ve awˬ e hta‸ shiˍ veu leh Eˇjiˇtu‸ mvuhˇ miˬ lo hpaw-e loˬ. Ngaˬ nawˬ hta‸ k'aw‸ k'oˆ laˇ htaˇ hk'a gaˬ oˇ kaˬ lo chehˇ taˍ-o‸. Awˬ lawn k'o, yaˇ ehˉ hta‸ tiˇ pehˍ tuˬ jawˇ mawˇ Heˍroˆ ca tuˬ yoˬ teh‸ k'oˆ piˇ ve yoˬ. 14 Oˇ htaˇ Yoˇseh‸ tu leh, yaˇ ehˉ leh yawˇ ve awˬ e hta‸ tanˇ hkuinˇ htaˇ shiˍ veu leh Eˇjiˇtu‸ mvuhˇ miˬ lo k'ai ve yoˬ. 15 Jawˇ mawˇ Heˍroˆ suh htaˇ hk'a gaˬ yawˇ hui oˇ kaˬ lo chehˇ taˍ ve yoˬ. Awˬ lawn chi lehˬ, Jawˇ mawˇ G'uiˬ sha yawˇ ve tcuh kaˍ paˍ teˇ g'aˇ hta‸ cuˇ leh, Eˇjiˇtu‸ mvuhˇ miˬ awˬ hk'aw lo tawˆ la tuˬ ngaˬ ve yaˇ paˍ hta‸ ngaˬ kuˬ yuˬ peuˬ teh‸, yawˇ k'oˆ taˍ ve tawˇ teˇ hkawˇ biˇ la tuˬ awˬ pon hpeh‸ la ve yoˬ. 16 Oˇ htaˇ jawˇ mawˇ Heˍroˆ lehˬ, cuˇ yiˍ cawˬ paˍ hui yawˇ hta‸ heˍ laˇ ve teh‸ g'a shiˍ ve teˇ yanˇ, yawˇ nyi ma zuhˆ jaˇ ve yoˬ. Cuˇ yiˍ cawˬ paˍ hui hta‸ hk'a deh‸ na nyi peuˬ ve awˬ yanˇ hta‸ yawˇ shawˍ nyi leh, Behˍlehˍhehnˍ venˇ awˬ hk'aw lo leh awˬ paˇ awˬ kui lo hk'a chehˇ ve a sha‸ nyiˇ hk'aw‸ te leh awˬ hawˉ ve hawˉ hk'aˆ paˍ ehˉ hk'a peu-eˬ hta‸ ca tiˇ pehˍ tcuh ve yoˬ. 17 Oˇ htaˇ, tcuh kaˍ paˍ Yeˍraˍmiˆ k'oˆ taˍ ve tawˇ chi teˇ hkawˇ biˇ la ve yoˬ. 18 Raˍmaˆ awˬ hk'aw lo, paˆ hawˬ kehˇ hawˬ ve awˬ hkawˇ leh dawˇ haˍ gaˇ haˍ jaˇ ve awˬ hkawˇ hta‸ g'a kaˇ ve yoˬ. Raˍhkeˍlaˆ lehˬ yawˇ ve yaˇ teˇ hpaˍ hta‸ pa taw hawˬ chehˇ leh, yawˇ yaˇ maˇ k'aw‸ cawˬ ve pa taw, shu yawˇ hta‸ nyi ma sha la tuˬ te maˇ g'a, teh‸ k'oˆ taˍ ve yoˬ. 19 Jawˇ mawˇ Heˍroˆ suh peuˬ hk'aw‸ nawˉ, Yoˇseh‸ Eˇjiˇtu‸ mvuhˇ miˬ hk'aw chehˇ htaˇ, yawˇ zuh‸ maˆ ve awˬ hk'aw lo Jawˇ mawˇ G'uiˬ sha ve mvuhˇ naw ma tcuh yaˇ teˇ g'aˇ hta‸ g'a mawˬ ve yoˬ. Mvuhˇ naw ma tcuh yaˇ Yoˇseh‸ hta‸ k'oˆ piˇ ve, 20 Tu loˬ. Yaˇ ehˉ leh yawˇ ve awˬ e hta‸ shiˍ veu leh Iˉsaˍreˍlaˆ mvuhˇ miˬ lo k'o‸-e loˬ. Awˬ lawn k'o, yaˇ ehˉ hta‸ tiˇ pehˍ tuˬ ca ve chaw hui suh peuˬ teh‸ k'oˆ piˇ ve yoˬ. 21 Oˇ htaˇ yawˇ tu leh, yaˇ ehˉ leh yawˇ ve awˬ e hta‸ shiˍ veu leh, Iˉsaˍreˍlaˆ mvuhˇ miˬ lo k'aw‸ k'o‸-e ve yoˬ. 22 Ya‸ hk'aˇ, Aˍhkeˍlaˆ lehˬ yawˇ awˬ pa jawˇ mawˇ Heˍroˆ ve aˉ yaˇ hta‸ k'aw‸ yuˬ leh Yuˇda‸ mvuhˇ miˬ hta‸ uˉ peunˍ chehˇ ve awˬ lawn Yoˇseh‸ g'a kaˇ htaˇ, yawˇ kawˆ leh oˇ kaˬ lo k'o‸-e maˇ haˆ. Zuh‸ maˆ ve awˬ hk'aw lo G'uiˬ sha yawˇ hta‸ k'aw‸ maˍ piˇ leh, Gaˍliˍlehˇ mvuhˇ miˬ lo yawˇ k'ai leh, Naˍzaˍrehˆ meh ve venˇ awˬ hk'aw lo ca chehˇ ve yoˬ. 23 Hk'e te leh, Hkri‸ hta‸ Naˍzaˍrehˆ chaw k'oˆ tuˬ yoˬ teh‸, G'uiˬ sha ve tcuh kaˍ paˍ hui k'oˆ taˍ ve tawˇ teˇ hkawˇ biˇ la ve yoˬ.

Ma‸htehˍ 3

1 Awˬ yanˇ oˇ ve awˬ hk'aw lo, baˆtiˆsaˬ piˇ paˍ Yoˇhanˬ tawˆ la leh k'oˆ ve, 2 Mvuhˇ naw ma mvuhˇ miˬ gaˬ la paˇ neˇ ve pa taw, venˇ baˆ hta‸ dawˇ hpfuhˆ loˬ teh‸, Yuˇda‸ mvuhˇ miˬ heh puiˉ hk'aw lo yawˇ bon maˍ piˇ chehˇ ve yoˬ. 3 Tcuh kaˍ paˍ Iˉsaˍyaˆ k'oˆ taˍ ve lehˬ, Heh puiˉ hk'aw lo chaw teˇ g'aˇ kuˬ leh k'oˆ ve, Jawˇ mawˇ G'uiˬ sha ve ya‸ k'aw hta‸ gu taˍ loˬ. Yawˇ ve ya‸ k'aw teˇ hpaˍ hta‸ hteˇ lehˍ te-o, teh‸ k'oˆ taˍ ve tawˇ chi teˇ hkawˇ lehˬ, Yoˇhanˬ awˬ lawn hta‸ k'oˆ ve yoˬ. 4 Yoˇhanˬ lehˬ, kaˍlaˍoˆ awˬ mvuh te taˍ ve veu‸ k'aˇ hta‸ veu‸ deh leh, yawˇ ve caw‸ cehˍ nyi lo shaˍ guiˬ haˍ pi caˆ tsuh‸ taˍ ve yoˬ. Yawˇ ve caˇ tuˬ lehˬ, paˉ ce‸ leh heh puiˉ hk'aw ve pehˇ g'uiˬ yoˬ. 5 Oˇ htaˇ, Yeˍruˆsaˍlehnˍ venˇ yaˇ, Yuˇda‸ mvuhˇ miˬ yaˇ hk'a peu-eˬ leh, Yawˇdanˍ g'uiˬ ma awˬ paˇ awˬ kui hk'a chehˇ ve chaw hk'a peu-eˬ yawˇ geh k'ai ve yoˬ. 6 Yawˇ hui a shu yawˇ ve venˇ baˆ hta‸ k'aoˍ maˍ piˇ leh, Yoˇhanˬ yawˇ hui hta‸ Yawˇdanˍ g'uiˬ ma awˬ hk'aw lo baˆtiˆsaˬ piˇ ve yoˬ. 7 Baˆtiˆsaˬ hkanˍ tuˬ Hpaˍriˍsehˇ leh Saˍduˆkehˇ chaw hui maˇ maˇ yawˇ geh laˬ ve hta‸ Yoˇhanˬ g'a mawˬ htaˇ, yawˇ yawˇ hui hta‸ k'oˆ piˇ ve, Vuiˬ haiˬ awˬ yaˇ teˇ hpaˍ-oˬ, gaˬ la tuˬ ve nyi ma zuhˆ ve hta‸ g'a ponˬ tuˬ, a shu nawˬ hui hta‸ hto laˇ ve le. 8 Venˇ baˆ dawˇ hpfuhˆ ve hta‸ keunˍ da‸ ve awˬ shiˍ naw‸ la-o. 9 Aˍbraˍhanˍ lehˬ ngaˬ hui ve awˬ pa hpeh‸ ve yoˬ teh‸ nawˬ hui a shu yawˇ ve nyi ma hk'aw taˇ ca dawˇ, taˇ ca k'oˆ. Awˬ lawn k'o, G'uiˬ sha lehˬ haˉ pui shiˍ chi teˇ hpaˍ awˬ hk'aw lo Aˍbraˍhanˍ ve awˬ yaˇ awˬ duˬ teˇ hpaˍ hta‸ te tawˆ la hpeh‸ ve yoˬ teh‸, ngaˬ nawˬ hui hta‸ k'oˆ laˇ ve yoˬ. 10 Chi beu‸ ka‸, suhˆ cehˬ awˬ hkuiˉ puiˍ lo ceˉ ceˇ teh taˍ peuˬ. Hk'e te leh, da‸ ve awˬ shiˍ maˇ naw‸ ve awˬ cehˬ teˇ cehˬ le le hta‸ htu baˬ leh aˬ miˍ awˬ hk'aw lo baˬ keu ve yoˬ. 11 Nawˬ hui venˇ baˆ hta‸ dawˇ hpfuhˆ ve awˬ pon, ngaˬ nawˬ hui hta‸ iˉ kaˆ awˬ hk'aw lo baˆtiˆsaˬ piˇ ve yoˬ. Ya‸ hk'aˇ, ngaˬ awˬ hk'aw‸ nawˉ laˬ tuˬ ve chaw teˇ g'aˇ lehˬ, ngaˬ a‸ kehˉ kanˇ paˆ uiˍ ve yoˬ. Yawˇ ve hkuiˉ nuˆ hta‸ yuˬ shi tuˬ ve ceh ka‸ ngaˬ maˇ keunˍ. Chaw oˇ ve lehˬ, da‸ ve kehˬ ve Awˬ ha hpu awˬ hk'aw lo maˇ k'oˆ, aˬ miˍ awˬ hk'aw lo maˇ k'oˆ, nawˬ hui hta‸ baˆtiˆsaˬ piˇ tuˬ yoˬ. 12 Yawˇ ve la‸ sheh awˬ hk'aw lo caˬ hpeuˇ tuˬ vawˆ taˍ ve yoˬ. Yawˇ ve caˬ jaw‸ kuiˬ hta‸ kehˬ lehˍ shiˆ baˬ peuˬ hk'aw‸ nawˉ, caˬ shiˍ hta‸ caˬ ciˇ yehˬ awˬ hk'aw lo shaw pfuhˇ keu tuˬ yoˬ. Ya‸ hk'aˇ, caˬ cuˉ hta‸ maˇ suh puiˉ ve aˬ miˍ awˬ hk'aw lo tuˉ baˬ tuˬ yoˬ teh‸, Yoˇhanˬ k'oˆ ve yoˬ. 13 Oˇ htaˇ, Yeˍsuˆ lehˬ baˆtiˆsaˬ hkanˍ yuˬ tuˬ, Gaˍliˍlehˇ mvuhˇ miˬ hk'aw tawˆ la leh, Yawˇdanˍ g'uiˬ ma lo Yoˇhanˬ geh laˬ ve yoˬ. 14 Yoˇhanˬ yawˇ hta‸ tawˍ taˍ leh k'oˆ ve, Ngaˬ lehˬ nawˬ geh baˆtiˆsaˬ hkanˍ yuˬ cawˇ ve yoˬ. Nawˬ ngaˬ geh laˬ ve laˇ teh‸ k'oˆ piˇ ve yoˬ. 15 Yeˍsuˆ yawˇ hta‸ k'aw‸ k'oˆ piˆ ve, Chi beu‸ a ciˉ te laˇ-oˆ. Awˬ lawn k'o, hteˇ ve cawˇ ve awˬ liˇ hk'a peu-eˬ biˇ la tuˬ ngaˬ hui te cawˇ ve yoˬ teh‸ k'oˆ piˇ ve yoˬ. Oˇ htaˇ Yoˇhanˬ yawˇ hta‸ baˆtiˆsaˬ piˇ ve yoˬ. 16 Yeˍsuˆ baˆtiˆsaˬ hkanˍ yuˬ peuˬ leh iˉ kaˆ awˬ hk'aw lo teˇ cawˬ haˉ tawˆ la htaˇ, mvuhˇ naw ma hpaw taˍ ve yoˬ. Oˇ htaˇ, G'uiˬ sha ve Awˬ ha hpu lehˬ, aˉ pui k'aˍ hk'e ya‸ la leh yawˇ awˬ hk'oˆ lo mui la ve hta‸ Yeˍsuˆ g'a mawˬ ve yoˬ. 17 Mvuhˇ naw ma hk'oˆ lo awˬ hkawˇ bvuhˬ la leh k'oˆ ve, Chaw chi lehˬ, ngaˬ ha‸ jaˇ ve Yaˇ hpu yoˬ. Yawˇ hta‸ ngaˬ nyi hk'aˇ suh jaˇ ve yoˬ teh‸ k'oˆ ve yoˬ.

Ma‸htehˍ 4

1 Oˇ htaˇ, neˇ haiˬ beˬ ve lawˇ ve hta‸ Yeˍsuˆ g'a hkanˍ tuˬ, Awˬ ha hpu yawˇ hta‸ heh puiˉ hk'aw lo shiˍ k'ai ve yoˬ. 2 Yeˍsuˆ lehˬ, awˇ chi nyi awˇ chi haˉ caˇ tuˬ maˇ caˇ leh chehˇ peuˬ heh‸, awˍ meu‸ la ve yoˬ. 3 Oˇ htaˇ beˬ shehˍ hpaˇ yawˇ geh laˬ leh k'oˆ ve, Nawˬ G'uiˬ sha ve Yaˇ hpu hpeh‸ ve k'o, haˉ pui shiˍ chi teˇ hpaˍ hta‸ hkaoˍ monˇ hpeh‸ la tuˬ tawˇ piˇ-oˆ teh‸, Yeˍsuˆ hta‸ k'oˆ piˇ ve yoˬ. 4 Yeˍsuˆ k'aw‸ k'oˆ piˇ ve, Li‸ hpu hk'aw chi hk'e bvuh‸ taˍ ve, Chaw yaˇ lehˬ hkaoˍ monˇ hta‸ pa taw ceh tiˉ g'a te‸ ve maˇ heˆ. G'uiˬ sha ve maw‸ k'aw hk'aw lo tawˆ la ve tawˇ teˇ hkawˇ le le hta‸ pa taw g'a te‸ ve yoˬ, teh‸ k'oˆ ve yoˬ. 5 Oˇ htaˇ neˇ haiˬ lehˬ, Yeˍsuˆ hta‸ da‸ kehˬ ve venˇ lo shiˍ k'ai leh, bon yehˬ lonˉ ve awˬ hk'oˇ meuˇ lo yawˇ hta‸ teh taˍ leh k'oˆ piˇ ve, 6 Nawˬ G'uiˬ sha ve Yaˇ hpu hpeh‸ ve k'o, pawˆ ce hk'a. Awˬ lawn k'o, Li‸ hpu hk'aw chi hk'e bvuh‸ taˍ ve, Nawˬ hta‸ ha‸ shaˉ tuˬ, nawˬ awˬ pon yawˇ ve mvuhˇ naw ma tcuh yaˇ teˇ hpaˍ hta‸ yawˇ maˍ piˇ taˍ ve yoˬ. Nawˬ ve hkui sheh haˉ pui shiˍ hta‸ maˇ g'a heuˆ tuˬ, yawˇ hui ve la‸ sheh nawˬ hta‸ chiˇ taˆ tuˬ yoˬ, teh‸ k'oˆ piˇ ve yoˬ. 7 Yeˍsuˆ yawˇ hta‸ k'aw‸ k'oˆ piˇ ve, Li‸ hpu hk'aw teˇ kaˬ bvuh‸ taˍ sheˍ ve lehˬ, Nawˬ ve Jawˇ mawˇ G'uiˬ sha hta‸ nawˬ maˇ g'a beˬ maˇ g'a lawˇ teh‸ k'aw‸ k'oˆ piˇ ve yoˬ. 8 Teˇ pawˆ neˇ haiˬ yawˇ hta‸ mvuh jaˇ ve hk'aw teˇ shiˍ awˬ hk'oˆ lo shiˍ k'ai ve yoˬ. Miˬ guiˬ hk'oˆ hk'a cawˬ ve mvuhˇ miˬ hk'a peu-eˬ leh mvuhˇ miˬ hk'a peu-eˬ ve awˬ me‸ awˬ hponˇ yawˇ hta‸ maw piˇ leh k'oˆ ve, 9 Nawˬ ngaˬ hta‸ hkui tcuhˉ teh leh oˉ k'oˍ pui laˇ ve k'o, chi hk'a peu-eˬ ngaˬ nawˬ hta‸ pe‸ laˇ tuˬ yoˬ teh‸ k'oˆ piˇ ve yoˬ. 10 Oˇ htaˇ Yeˍsuˆ yawˇ hta‸ k'aw‸ k'oˆ piˇ ve, Saˍtanˍ-oˬ, k'ai loˬ. Awˬ lawn k'o, Nawˬ ve Jawˇ mawˇ G'uiˬ sha hta‸ ceh tiˉ nawˬ oˉ k'oˍ g'a pui leh, yawˇ ve kanˉ hta‸ ceh tiˉ nawˬ g'a te ve yoˬ, teh‸ li‸ hpu hk'aw bvuh‸ taˍ ve yoˬ. 11 Oˇ htaˇ neˇ haiˬ yawˇ geh tawˆ k'ai leh, mvuhˇ naw ma tcuh yaˇ teˇ hpaˍ laˬ leh yawˇ hta‸ caˍ piˇ taw piˇ ve yoˬ. 12 Yoˇhanˬ hta‸ shu hpeh yuˬ ve awˬ lawn Yeˍsuˆ g'a kaˇ htaˇ, yawˇ Gaˍliˍlehˇ mvuhˇ miˬ lo k'ai ve yoˬ. 13 Yawˇ Naˍzaˍrehˆ venˇ hk'aw tawˆ k'ai leh, Zaˍbuˆlonˍ leh Naˍtaˍliˆ mvuhˇ miˬ awˬ kaˍ lo, g'uiˬ po paˇ cawˬ ve Kaˍpeˍneˍonˍ venˇ hk'aw gaˬ leh oˇ kaˬ lo chehˇ taˍ ve yoˬ. 14 Chi lehˬ, tcuh kaˍ paˍ Iˉsaˍyaˆ k'oˆ taˍ ve tawˇ chi teˇ hkawˇ hta‸ biˇ la piˇ ve yoˬ. 15 Zaˍbuˆlonˍ mvuhˇ miˬ leh Naˍtaˍliˆ mvuhˇ miˬ g'uiˬ po paˇ lo k'ai ve ya‸ k'aw, Yawˇdanˍ g'uiˬ ma coˇ paˉ, buiˇ shaˆ aˉ naˆ chaw hui chehˇ kuiˬ, Gaˍliˍlehˇ mvuhˇ miˬ-oˬ, 16 naˆ ho‸ ve awˬ hk'aw lo chehˇ ve chaw hui lehˬ, uiˍ jaˇ ba jaˇ ve awˬ g'euˆ hta‸ g'a mawˬ peuˬ. Suh ve mvuhˇ miˬ leh suh ve aˉ g'uiˬ ha awˬ hk'aw lo chehˇ ve chaw teˇ hpaˍ awˬ pon awˬ g'euˆ ba tawˆ la peuˬ, teh‸ k'oˆ taˍ ve yoˬ. 17 Oˇ ve teˇ yanˇ ka‸ te leh, Yeˍsuˆ bon tanˬ maˍ leh k'oˆ ve, Mvuhˇ naw ma mvuhˇ miˬ gaˬ la paˇ neˇ ve pa taw, venˇ baˆ hta‸ dawˇ hpfuhˆ loˬ teh‸ maˍ piˇ ve yoˬ. 18 Gaˍliˍlehˇ g'uiˬ po paˇ lo Yeˍsuˆ k'ai chehˇ htaˇ, Peˍtruˆ teh‸ k'oˆ ve Siˉmonˍ leh yawˇ ve awˬ nyi paˍ Anˍdrehˍ yawˇ huiˉ maˬ awˬ viˉ awˬ nyi nyiˇ g'aˇ, g'uiˬ po awˬ hk'aw lo geu‸ hpehˇ chehˇ ve hta‸ Yeˍsuˆ yawˇ g'a mawˬ ve yoˬ. Awˬ lawn k'o, yawˇ huiˉ maˬ lehˬ ngaˇ ca paˍ hpeh‸ ve yoˬ. 19 Oˇ htaˇ Yeˍsuˆ k'oˆ ve, Ngaˬ hk'aˇ suh laˬ-o‸. Ngaˬ nawˬ huiˉ maˬ hta‸ chaw ca shehˍ hpaˇ te tcuh laˇ tuˬ yoˬ teh‸, yawˇ huiˉ maˬ hta‸ k'oˆ piˇ ve yoˬ. 20 Yawˇ huiˉ maˬ teˇ cawˬ haˉ geu‸ hta‸ teh taˉ leh yawˇ awˬ hk'aˇ suh k'ai ve yoˬ. 21 Yeˍsuˆ awˬ g'uˇ suhˍ k'aw‸ k'ai htaˇ, awˬ kaˍ awˬ nu awˬ viˉ awˬ nyi nyiˇ g'aˇ, Zeˍbeˍdehˇ ve awˬ yaˇ Yaˍkoˆ leh yawˇ ve awˬ nyi paˍ Yoˇhanˬ lehˬ, awˬ pa Zeˍbeˍdehˇ geh haw lo‸ k'oˍ hk'aw yawˇ hui ve geu‸ gu tawˉ chehˇ ve hta‸ Yeˍsuˆ g'a mawˬ leh, yawˇ huiˉ maˬ hta‸ kuˬ yuˬ ve yoˬ. 22 Yawˇ huiˉ maˬ htawˇ, teˇ cawˬ haˉ haw lo‸ k'oˍ leh yawˇ huiˉ maˬ ve awˬ pa hta‸ teh taˉ leh yawˇ awˬ hk'aˇ suh k'ai ve yoˬ. 23 Oˇ htaˇ Yeˍsuˆ lehˬ, Gaˍliˍlehˇ mvuhˇ miˬ teˇ kaˬ le le lo k'ai leh yawˇ hui ve bon yehˬ teˇ hpaˍ awˬ hk'aw lo maˍ piˇ leh, G'uiˬ sha ve mvuhˇ miˬ hta‸ caˉ da‸ ve ha lehˬ ve bon hkawˇ htawˇ, teˇ kaˬ le le lo ca maˍ piˇ ve yoˬ. Chaw oˇ ve teˇ hpaˍ awˬ hk'aw lo cawˬ ve a naˍ teˇ ceuˬ le le leh naˬ ve gawˬ ve teˇ ceuˬ le le hta‸ yawˇ gu na-e piˇ ve yoˬ. 24 Hk'e te leh, yawˇ ve awˬ lawn Suˇriˆ mvuhˇ miˬ teˇ kaˬ le le lo bvuhˬ k'ai ve yoˬ. Yawˇ hui lehˬ, a naˍ laiˉ ceuˬ naˬ chehˇ gawˬ chehˇ ve chaw, neˇ geh ve chaw, paw‸ hpeuˆ ve chaw, hkui sheh la‸ sheh suh ve chaw, chaw naˬ hk'a peu-eˬ hta‸ yawˇ geh yuˬ laˬ leh yawˇ yawˇ hui hta‸ gu na-e piˇ ve yoˬ. 25 Hk'e te leh Gaˍliˍlehˇ mvuhˇ miˬ, Deˍkaˍpawˇliˆ mvuhˇ miˬ, Yeˍruˆsaˍlehnˍ venˇ, Yuˇda‸ mvuhˇ miˬ leh, Yawˇdanˍ g'uiˬ ma coˇ paˉ lo laˬ ve chaw awˬ moˍ lonˉ teˇ hpaˍ yawˇ awˬ hk'aˇ suh k'ai ve yoˬ.

Ma‸htehˍ 5

1 Chaw awˬ moˍ lonˉ teˇ hpaˍ hta‸ Yeˍsuˆ g'a mawˬ htaˇ, hk'aw pui hk'oˆ lo yawˇ taˆ-e ve yoˬ. Yawˇ mui taˍ htaˇ, yawˇ ve awˬ la‸ g'awˇ teˇ hpaˍ yawˇ geh laˬ ve yoˬ. 2 Oˇ htaˇ yawˇ maw‸ k'aw ngaˉ leh awˬ la‸ g'awˇ hui hta‸ maˍ piˇ leh k'oˆ ve, 3 Nyi ma hk'aw haˍ ve g'awˇ ve chaw hui awˬ bon uiˍ ve yoˬ. Awˬ lawn k'o, mvuhˇ naw ma mvuhˇ miˬ lehˬ, yawˇ hui ve mvuhˇ miˬ hpeh‸ ve yoˬ. 4 Dawˇ haˍ gaˇ haˍ ve chaw hui awˬ bon uiˍ ve yoˬ. Awˬ lawn k'o, yawˇ hui hta‸ nyi ma sha la piˇ tuˬ yoˬ. 5 Nyi ma nuˇ nuˇ nehˬ nehˬ cawˬ ve chaw hui awˬ bon uiˍ ve yoˬ. Awˬ lawn k'o, miˬ guiˬ lehˬ yawˇ hui g'a tuˬ ve awˬ shinˉ hpeh‸ ve yoˬ. 6 Hteˇ ve cawˇ ve hta‸ meu‸ ve kaˆ ve chaw hui awˬ bon uiˍ ve yoˬ. Awˬ lawn k'o, yawˇ hui g'a caˇ bvuhˆ dawˬ bvuhˆ tuˬ yoˬ. 7 Ha k'aˉ puiˉ ve chaw hui awˬ bon uiˍ ve yoˬ. Awˬ lawn k'o, yawˇ hui hta‸ shu k'aw‸ ha k'aˉ piˇ tuˬ yoˬ. 8 Nyi ma hk'aw hpu ve kehˬ ve chaw hui awˬ bon uiˍ ve yoˬ. Awˬ lawn k'o, yawˇ hui G'uiˬ sha hta‸ g'a mawˬ tuˬ yoˬ. 9 Cawˇ da‸ hui da‸ tuˬ te ve chaw hui awˬ bon uiˍ ve yoˬ. Awˬ lawn k'o, yawˇ hui hta‸ G'uiˬ sha ve awˬ yaˇ teh‸ shu k'oˆ tuˬ yoˬ. 10 Hteˇ lehˍ cawˇ lehˍ te ve pa taw fawˉ ve mehˍ ve hta‸ g'a hkanˍ ve chaw hui awˬ bon uiˍ ve yoˬ. Awˬ lawn k'o, mvuhˇ naw ma mvuhˇ miˬ lehˬ, yawˇ hui ve mvuhˇ miˬ hpeh‸ ve yoˬ. 11 Ngaˬ hta‸ pa taw shu nawˬ hui hta‸ hk'a mvuhˇ hk'a na k'oˆ ve, fawˉ mehˍ ve, heˍ leh nawˬ hui awˬ lawn haiˬ ve teˇ ceuˬ le le hta‸ k'oˆ ve teˇ yanˇ, nawˬ hui awˬ bon uiˍ ve yoˬ. 12 Ha lehˬ ve hk'a biˇ cawˬ piˇ-oˆ. Awˬ lawn k'o, mvuhˇ naw ma hk'oˆ lo nawˬ hui ve la‸ shawnˍ uiˍ jaˇ ve yoˬ. Nawˬ hui awˬ g'uˇ suhˍ tawˆ la peuˬ ve G'uiˬ sha ve tcuh kaˍ paˍ hui hta‸ htawˇ shu oˇ hk'e te fawˉ mehˍ jaw ve yoˬ. 13 Nawˬ hui lehˬ miˬ guiˬ ve aˉ leh‸ hpeh‸ ve yoˬ. Aˉ leh‸ lehˬ mehˬ ve pehˆ k'ai peuˬ ve k'o, hk'aˬ hk'e te k'aw‸ mehˬ la hpeh‸ tuˬ le. Aˉ leh‸ oˇ ve awˬ bon maˇ k'aw‸ cawˬ ve pa taw, shu yuˬ baˬ leh, chaw yaˇ naˆ toˇ ve ceh tiˉ yoˬ. 14 Nawˬ hui lehˬ miˬ guiˬ ve awˬ g'euˆ hpeh‸ ve yoˬ. Hk'aw pui hk'oˆ lo cawˬ ve venˇ hta‸ faˉ taˍ maˇ g'a. 15 Chi hk'oˆ ka‸, kawˆ faiˇ tuˉ leh hk'awˍ lawˇ tcuhˍ mvuh‸ taˍ ve teˇ ceuˬ chaw teˇ g'aˇ ka‸ maˇ te jaw. Ya‸ hk'aˇ, yehˬ yaˇ k'a yaˇ hk'a peu-eˬ awˬ g'euˆ hta‸ g'a mawˬ tuˬ, mvuh kuiˬ lo taˍ ve yoˬ. 16 Oˇ ve hk'a shuˍ shuˍ, nawˬ hui htawˇ awˬ g'euˆ ba piˇ-oˆ. Oˇ hk'e te ve k'o, nawˬ hui ve da‸ ve kanˉ hta‸ shu g'a mawˬ htaˇ, mvuhˇ naw ma hk'oˆ chehˇ ve naw hui ve Awˬ pa hta‸ chiˇ uiˍ chiˇ mvuh piˇ tuˬ yoˬ. 17 Awˬ liˇ tawˇ hkawˇ leh G'uiˬ sha ve tcuh kaˍ paˍ hui ve tawˇ hkawˇ hta‸ te luˬ tuˬ ngaˬ laˬ ve teh‸ taˇ dawˇ. Te luˬ tuˬ ngaˬ laˬ ve maˇ heˆ. Te biˇ la tuˬ ngaˬ laˬ ve yoˬ. 18 Ngaˬ nawˬ hui hta‸ awˬ tehˬ awˬ na k'oˆ laˇ ve, miˬ guiˬ mvuhˇ naw ma maˇ luˬ sheˍ ve ceh ceh, hk'a peu-eˬ biˇ la htaˇ hk'a gaˬ awˬ liˇ tawˇ hkawˇ awˬ hk'aw lo li‸ mehˆ ehˉ maˇ k'oˆ, awˬ maiˉ ehˉ maˇ k'oˆ, teˇ maˬ ka‸ maˇ luˬ maˇ mehˉ taˬ. 19 Hk'e te leh, hk'aˬ ve chaw teˇ g'aˇ maˇ k'oˆ, awˬ liˇ tawˇ hkawˇ chi teˇ hpaˍ awˬ hk'aw lo i jaˇ ve teˇ maˬ maˬ hta‸ yawˇ awˬ to ka‸ maˇ te leh, shu ka‸ maˇ te tuˬ maˍ piˇ ve chaw lehˬ, mvuhˇ naw ma hk'oˆ lo shu a‸ kehˉ i ve chaw hpeh‸ tuˬ yoˬ. Ya‸ hk'aˇ, hk'aˬ ve chaw teˇ g'aˇ maˇ k'oˆ, yawˇ awˬ to ka‸ te leh, shu ka‸ te tuˬ maˍ piˇ ve chaw lehˬ, mvuhˇ naw ma hk'oˆ lo uiˍ ve chaw hpeh‸ tuˬ yoˬ. 20 Awˬ lawn k'o, li‸ bvuh‸ paˍ leh Hpaˍriˍsehˇ hui a‸ kehˉ nawˬ hui hteˇ ve cawˇ ve teˇ ceuˬ maˇ cawˬ leuˉ ve k'o, nawˬ hui mvuhˇ naw ma mvuhˇ miˬ hk'aw lo maˇ g'a lo‸-e taˬ teh‸, ngaˬ nawˬ hui hta‸ k'oˆ laˇ ve yoˬ. 21 Aˬ sho-eˬ ve chaw hui hta‸ k'oˆ piˇ ve tawˇ hkawˇ nawˬ hui g'a kaˇ peuˬ. Shu hta‸ nawˬ maˇ g'a tiˇ pehˍ. Shu hta‸ tiˇ pehˍ ve chaw lehˬ, suhˉ jehˬ ve hta‸ g'a hkanˍ ve yoˬ. 22 Ya‸ hk'aˇ, ngaˬ nawˬ hui hta‸ k'oˆ laˇ ve, awˬ viˉ awˬ nyi hta‸ nyi ma zuhˆ ve chaw lehˬ, suhˉ jehˬ ve hta‸ g'a hkanˍ ve yoˬ. Yawˇ ve awˬ viˉ awˬ nyi hta‸ maˇ shawˍ maˇ caˆ k'oˆ ve chaw lehˬ, jehˬ shehˍ hpaˇ awˬ moˍ mehˆ g'uˇ suhˍ lo suhˉ jehˬ ve hta‸ g'a hkanˍ ve yoˬ. Awˬ viˉ awˬ nyi hta‸ hkeu ve chaw lehˬ, moˬ naˆ ho‸ aˬ miˍ hk'aw g'a hkanˍ ve yoˬ. 23 Hk'e te leh, nawˬ ve tanˇ tuˬ hta‸ tanˇ kuiˬ lo yuˬ laˬ htaˇ, nawˬ ve awˬ viˉ awˬ nyi nawˬ awˬ hk'oˆ venˇ baˆ teˇ ceuˬ ceuˬ taˍ ve hta‸ nawˬ dawˇ nawˇ ve k'o, 24 tanˇ kuiˬ awˬ g'uˇ suhˍ lo tanˇ tuˬ hta‸ teh taˉ leh k'o‸-e sheˍ. Awˬ viˉ awˬ nyi hta‸ nawˬ k'aw‸ cawˇ da‸ taˉ peuˬ heh‸, k'aw‸ laˬ leh tanˇ tuˬ hta‸ yuˬ tanˇ loˬ. 25 Nawˬ hta‸ tawˇ te ve chaw geh teˇ geh shaˉ nanˉ lo k'ai chehˇ htaˇ, nawˬ huiˉ maˬ k'aw‸ cawˇ da‸ tuˬ haˆ haˆ te loˬ. Hk'e maˇ heˆ k'o, yawˇ lehˬ suhˉ taˆ shehˍ hpaˇ la‸ hk'aw lo nawˬ hta‸ chiˇ a‸ piˇ tuˬ yoˬ. Suhˉ taˆ shehˍ hpaˇ htawˇ nawˬ hta‸ htawnˍ awˬ hoˉ la‸ hk'aw lo k'aw‸ chiˇ a‸ piˇ leh, nawˬ hta‸ htawnˍ hk'aw keu laˇ tuˬ yoˬ. 26 Ngaˬ nawˬ hta‸ awˬ tehˬ awˬ na k'oˆ laˇ ve, peh‸ shanˍ awˬ leh teˇ peh‸ hk'a gaˬ maˇ shaiˍ peuˬ ve ceh ceh, htawnˍ hk'aw lo nawˬ maˇ g'a tawˆ k'ai taˬ. 27 Nawˬ haˉ chawˇ haˉ paˆ maˇ g'a te teh‸ k'oˆ taˍ ve tawˇ hkawˇ hta‸ nawˬ hui g'a kaˇ peuˬ. 28 Ya‸ hk'aˇ, ngaˬ nawˬ hui hta‸ k'oˆ laˇ ve, yaˇ miˇ hta‸ nyi leh peh‸ ve tzuhˆ ve nyi ma cawˬ ve chaw teˇ g'aˇ le le lehˬ, a shu yawˇ ve nyi ma awˬ hk'aw lo yaˇ miˇ oˇ ve hta‸ haˉ chawˇ haˉ paˆ te peuˬ. 29 Hk'e te leh, nawˬ la‸ sha paˉ ve mehˆ shiˍ nawˬ hta‸ te ya‸ piˇ lawˬ ve k'o, mehˆ shiˍ oˇ ve hta‸ k'ehˉ baˬ sheˍ. Awˬ to hk'a peu-eˬ moˬ naˆ ho‸ awˬ hk'aw lo g'a hkanˍ ve a‸ kehˉ, awˬ hk'eun teˇ maˬ luˬ k'ai ve lehˬ da‸ leuˉ ve yoˬ. 30 Oˇ ve hk'a shuˍ shuˍ, la‸ sha paˉ ve la‸ sheh htawˇ nawˬ hta‸ te ya‸ piˇ lawˬ ve k'o, la‸ sheh oˇ ve hta‸ tawˆ baˬ-o‸. Awˬ to teˇ to hk'a peu-eˬ moˬ naˆ ho‸ awˬ hk'aw lo g'a hkanˍ ve a‸ kehˉ, awˬ hk'eun teˇ maˬ luˬ k'ai ve lehˬ da‸ leuˉ ve yoˬ. 31 A shu yawˇ ve awˬ miˇ ma hta‸ baˬ ve k'o, baˬ da‸ ve li‸ teˇ k'oˆ yawˇ hta‸ g'a piˇ tuˬ yoˬ teh‸ k'oˆ taˍ ve tawˇ chi teˇ hkawˇ hta‸ ka‸ nawˬ hui g'a kaˇ peuˬ. 32 Ya‸ hk'aˇ, ngaˬ nawˬ hui hta‸ k'oˆ laˇ ve, haˉ chawˇ haˉ paˆ te ve maˇ heˆ k'o, awˬ kaˍ awˬ nu awˬ lawn hta‸ pa taw a shu yawˇ ve awˬ miˇ ma hta‸ baˬ ve k'o, yawˇ lehˬ yawˇ ve awˬ miˇ ma hta‸ haˉ chawˇ haˉ paˆ te tcuh ve yoˬ. Shu baˬ taˍ ve yaˇ miˇ hta‸ ca heuˆ ve chaw htawˇ haˉ chawˇ haˉ paˆ te ve yoˬ. 33 Maˇ heˆ heˆ ve hta‸ nawˬ maˇ g'a hkanˍ. Nawˬ hkanˍ taˍ ve hk'e Jawˇ mawˇ G'uiˬ sha mehˆ g'uˇ suhˍ g'a te ve yoˬ teh‸, aˬ sho-eˬ ve chaw hui hta‸ k'oˆ piˇ taˍ ve tawˇ chi teˇ hkawˇ hta‸ ka‸ nawˬ hui g'a kaˇ peuˬ. 34 Ya‸ hk'aˇ ngaˬ nawˬ hui hta‸ k'oˆ laˇ ve, a ciˉ ka‸ taˇ hkanˍ. Mvuhˇ naw ma hta‸ cuˇ leh taˇ hkanˍ. Awˬ lawn k'o, mvuhˇ naw ma lehˬ G'uiˬ sha ve k'aw jaw hpeh‸ ve yoˬ. 35 Miˬ guiˬ hta‸ cuˇ leh taˇ hkanˍ. Awˬ lawn k'o, miˬ guiˬ lehˬ G'uiˬ sha ve hkui sheh taˍ kuiˬ hpeh‸ ve yoˬ. Yeˍruˆsaˍlehnˍ venˇ hta‸ cuˇ leh taˇ hkanˍ. Awˬ lawn k'o, venˇ oˇ ve lehˬ Hkunˉ hawˉ hkanˇ lonˉ ve venˇ hpeh‸ ve yoˬ. 36 Nawˬ ve oˉ k'oˍ hta‸ cuˇ leh taˇ hkanˍ. Awˬ lawn k'o, nawˬ lehˬ uˉ hkeh mvuh teˇ mvuh hpu la tuˬ maˇ k'oˆ, naˆ la tuˬ maˇ k'oˆ te maˇ g'a. 37 Nawˬ ve tawˇ hkawˇ lehˬ, yoˬ k'o yoˬ, maˇ heˆ k'o maˇ heˆ teh‸ ceh tiˉ k'oˆ loˬ. Chi a‸ kehˉ leuˉ leh k'oˆ ve tawˇ hkawˇ teˇ hpaˍ lehˬ, haiˬ ve awˬ hk'aw lo tawˆ la ve tawˇ hkawˇ hpeh‸ ve yoˬ. 38 Shu nawˬ ve mehˆ shiˍ teˇ shiˍ hta‸ te luˬ laˇ ve k'o, yawˇ ve mehˆ shiˍ teˇ shiˍ hta‸ k'aw‸ te luˬ piˇ leh, shu nawˬ ve ciˬ teˇ maˬ hta‸ te hk'eh‸ laˇ ve k'o, yawˇ ve ciˬ teˇ maˬ hta‸ k'aw‸ te hk'eh‸ piˇ-oˆ teh‸ k'oˆ taˍ ve awˬ liˇ tawˇ hkawˇ hta‸ nawˬ hui g'a kaˇ peuˬ. 39 Ya‸ hk'aˇ, ngaˬ nawˬ hui hta‸ k'oˆ laˇ ve, nawˬ hta‸ te ya‸ laˇ ve chaw hta‸ taˇ k'aw‸ te hk'aw‸ piˇ. Nawˬ ve la‸ sha paˉ mehˆ hpfuhˇ diˬ hta‸ shu hta laˇ ve k'o, la‸ mehˍ paˉ k'aw‸ hpfuhˆ hk'o piˇ sheˍ. 40 Shu nawˬ hta‸ tawˇ te leh aˉ po‸ yuˬ gaˇ ve k'o, aˉ po‸ lonˉ ka‸ yawˇ hta‸ k'aw‸ piˇ sheˍ. 41 Shu nawˬ hta‸ nyiˉ leh ya‸ k'aw teˇ laˆ k'ai tcuh laˇ ve k'o, yawˇ geh nyiˇ laˆ k'ai-o 42 Lawˬ ve chaw hta‸ piˇ-oˆ. Chiˇ gaˇ ngaˍ gaˇ ve chaw hta‸ htawˇ, taˇ hpfuhˆ k'ai. 43 A shu yawˇ awˬ paˇ awˬ kui chehˇ ve chaw hta‸ ha‸ leh, a shu yawˇ ve canˇ paˍ hta‸ canˇ-oˆ teh‸ k'oˆ taˍ ve awˬ liˇ tawˇ hkawˇ hta‸ nawˬ hui g'a kaˇ peuˬ. 44 Ya‸ hk'aˇ, ngaˬ nawˬ hui hta‸ k'oˆ laˇ ve, nawˬ hui ve canˇ paˍ teˇ hpaˍ hta‸ ha‸ leh, nawˬ hui hta‸ fawˉ mehˍ laˇ ve chaw teˇ hpaˍ awˬ pon bon lawˬ piˇ-oˆ. 45 Nawˬ hui chi hk'e te ve k'o, nawˬ hui lehˬ mvuhˇ naw ma hk'oˆ chehˇ ve nawˬ hui Awˬ pa ve yaˇ hpeh‸ ve yoˬ. Aw lawn k'o, chaw haiˬ leh chaw da‸ awˬ hk'oˆ hta‸ yawˇ ve mvuhˇ nyi hta‸ yawˇ tawˆ la piˇ ve yoˬ. Hteˇ ve chaw leh maˇ hteˇ ve chaw awˬ hk'oˆ hta‸ yawˇ mvuhˇ yeˬ laˬ piˇ lawˬ ve yoˬ. 46 Nawˬ hui hta‸ ha‸ ve chaw hui hta‸ ceh k'aw‸ ha‸ ve k'o, aˬ hto‸ ma awˬ bon cawˬ le. Awˬ hkawnˍ shaw paˍ hui ka‸ chi hk'e te chehˇ ve maˇ heˆ laˇ. 47 Nawˬ awˬ viˉ awˬ nyi hta‸ ceh awˬ chawˇ te leh na‸ uˉ te da‸ ve k'o, shu te ve a‸ kehˉ nawˬ aˬ hto‸ ma te leuˉ ve le. Buiˇ shaˆ aˉ naˆ chaw hui ka‸ chi hk'e te ve maˇ heˆ laˇ. 48 Hk'e te leh, mvuhˇ naw ma hk'oˆ chehˇ ve nawˬ ve Awˬ pa biˇ ve hk'a shuˍshuˍ nawˬ hui htawˇ biˇ la piˇ-oˆ.

Ma‸htehˍ 6

1 Shu g'a mawˬ tuˬ awˬ pon chaw yaˇ mehˆ g'uˇ suhˍ nawˬ da‸ ve kanˉ maˇ g'a te tuˬ shaˍ ti‸ te-o. Maˇ heˆ k'o, mvuhˇ naw ma hk'oˆ chehˇ ve Awˬ pa geh nawˬ awˬ bon maˇ g'a. 2 Hk'e te leh, nawˬ shu hta‸ ha k'aˉ leh tanˇ piˇ ve teˇ yanˇ, heˍ puiˉ ve chaw hui hk'e taˇ te. Yawˇ hui lehˬ, shu chiˇ uiˍ chiˇ mvuh laˇ tuˬ, bon yehˬ hk'aw maˇ k'oˆ, ya‸ k'aw k'aˉ lo maˇ k'oˆ, behˬ heh ma meuˆ tcuh ve yoˬ. Ngaˬ nawˬ hui hta‸ awˬ tehˬ awˬ na k'oˆ laˇ ve, chaw oˇ ve teˇ hpaˍ lehˬ a shu yawˇ ve awˬ bon hta‸ g'a peuˬ. 3 Ya‸ hk'aˇ, nawˬ shu hta‸ ha k'aˉ leh tanˇ piˇ ve teˇ yanˇ, shu maˇ g'a mawˬ tuˬ, nawˬ la‸ sha paˉ te ve kanˉ la‸ mehˍ paˉ hta‸ taˇ shiˍ piˇ 4 Shu maˇ mawˬ kuiˬ lo mawˬ puiˉ ve nawˬ ve Awˬ pa lehˬ, nawˬ hta‸ awˬ bon pe‸ laˇ tuˬ yoˬ. 5 Nawˬ bon lawˬ ve teˇ yanˇ, heˍ puiˉ ve chaw hui hk'e taˇ te. Awˬ lawn k'o, yawˇ hui lehˬ shu g'a mawˬ tuˬ, bon yehˬ hk'aw maˇ k'oˆ, ya‸ k'aw ceh lo maˇ k'oˆ, huˉ taˍ leh bon lawˬ gaˇ puiˉ ve yoˬ. Ngaˬ nawˬ hui hta‸ awˬ tehˬ awˬ na k'oˆ laˇ ve, chaw oˇ ve teˇ hpaˍ lehˬ, a shu yawˇ ve awˬ bon hta‸ g'a peuˬ. 6 Nawˬ bon lawˬ ve teˇ yanˇ, nawˬ ve bawehˇ awˬ hk'aw lo lo‸-e leh yehˬ miˉ hta‸ hoˆ peuˬ htaˇ heh‸, baˬ kuiˬ lo chehˇ ve nawˬ ve Awˬ pa hta‸ lawˬ-o‸. Baˬ kuiˬ lo mawˬ puiˉ ve nawˬ ve Awˬ pa lehˬ nawˬ hta‸ awˬ bon pe‸ laˇ tuˬ yoˬ. 7 Nawˬ hui bon lawˬ ve teˇ yanˇ, buiˇ shaˆ aˉ naˆ chaw hk'e taˇ te. Yawˇ hui lehˬ, awˬ bon maˇ cawˬ ve tawˇ hta‸ teˇ pawˆ peuˬ teˇ pawˆ k'oˆ ve yoˬ. Yawˇ hui tawˇ maˇ maˇ yaw ve pa taw yawˇ hui bon lawˬ ve hk'e biˇ la tuˬ yoˬ teh‸ dawˇ ve yoˬ. 8 Yawˇ hui hk'e taˇ te. Awˬ lawn k'o, nawˬ hui loˍ ve teˇ hpaˍ hta‸ nawˬ hui maˇ lawˬ sheˍ htaˇ ka‸ nawˬ hui ve Awˬ pa shiˍ taˍ peuˬ. 9 Hk'e te leh, nawˬ hui bon chi hk'e lawˬ-o‸. Mvuhˇ naw ma hk'oˆ chehˇ ve ngaˬ hui ve Awˬ pa-oˬ, nawˬ ve awˬ meh hta‸ yawˆ yan te piˇ lawˬ-o‸. 10 Nawˬ ve mvuhˇ miˬ gaˬ la piˇ-oˆ. Mvuhˇ naw ma hk'oˆ lo nawˬ ve a loˍ biˇ ve hk'e, miˬ guiˬ hk'oˆ hta‸ htawˇ biˇ la piˇ-oˆ. 11 Ya‸ nyi loˍ ve caˇ tuˬ dawˬ tuˬ teˇ hpaˍ, ya‸ nyi ngaˬ hui hta‸ pe‸ laˇ-oˆ. 12 Shu ngaˬ hui hta‸ te ya‸ laˇ ve venˇ baˆ hta‸ ngaˬ hui hpehˇ hk'a peuˬ ve hk'a shuˍ shuˍ, ngaˬ hui ve venˇ baˆ hta‸ htawˇ hpehˇ hk'a laˇ-oˆ. 13 Venˇ baˆ beˬ ve awˬ hk'aˇ suh ngaˬ hui hta‸ taˇ k'ai piˇ. Ya‸ hk'aˇ, haiˬ ve awˬ hk'aw lo ngaˬ hui hta‸ ponˬ laˇ-oˆ. Awˬ lawn k'o, mvuhˇ miˬ, kanˇ paˆ leh awˬ me‸ awˬ hponˇ hk'a peu-eˬ, co co taiˍ taiˍ nawˬ ve yoˬ. A menˬ. 14 Awˬ lawn k'o, nawˬ hui shu ve ya‸ kuiˬ jiˆ kuiˬ hta‸ hpehˇ hk'a k'o, mvuhˇ naw ma hk'oˆ chehˇ ve nawˬ hui ve Awˬ pa lehˬ, nawˬ hui ve ya‸ kuiˬ jiˆ kuiˬ hta‸ htawˇ hpehˇ hk'a laˇ tuˬ yoˬ. 15 Ya‸ hk'aˇ, nawˬ hui lehˬ shu ve ya‸ kuiˬ jiˆ kuiˬ hta‸ maˇ hpehˇ hk'a k'o, nawˬ hui ve Awˬ pa htawˇ, nawˬ hui ve ya‸ kuiˬ jiˆ kuiˬ hta‸ maˇ hpehˇ. 16 Nawˬ hui caˇ tuˬ ce ve teˇ yanˇ, heˍ puiˉ ve chaw hui hk'e mehˆ hpfuhˇ nawˍ tiˆ taˇ te. Chaw oˇ ve teˇ hpaˍ lehˬ, yawˇ hui caˇ tuˬ ce ve hta‸ shu g'a mawˬ g'a shiˍ tuˬ, yawˇ hui mehˆ hpfuhˇ hta‸ nyi maˇ sha tuˬ te taˍ ve yoˬ. Ngaˬ nawˬ hui hta‸ awˬ tehˬ awˬ na k'oˆ laˇ ve, yawˇ hui lehˬ a shu yawˇ ve awˬ bon hta‸ g'a peuˬ. 17 Ya‸ hk'aˇ, nawˬ caˇ tuˬ ce htaˇ, oˉ k'oˍ hta‸ naˍ manˇ shehˍ leh mehˆ hpfuhˇ tsuhˇ-oˆ. 18 Chi hk'e te ve k'o, nawˬ hui caˇ tuˬ ce ve hta‸ shu maˇ mawˬ maˇ shiˍ. Ya‸ hk'aˇ, shu maˇ mawˬ kuiˬ lo chehˇ ve nawˬ ve Awˬ pa mawˬ tuˬ yoˬ. Chi hk'oˆ ka‸, shu maˇ mawˬ kuiˬ lo mawˬ puiˉ ve nawˬ ve Awˬ pa htawˇ, nawˬ hta‸ awˬ bon pe‸ laˇ tuˬ yoˬ. 19 Chi miˬ guiˬ hk'oˆ lo nawˬ hui ve mawˇ jeˬ taˇ shaw hpoˆ taˍ. Miˬ guiˬ hk'oˆ lo shaw hpoˆ ve k'o, yawˇ taˆ puiˉ ve, pfuhˇ caˇ puiˉ ve leh chaw hk'awˇ hk'awˇ yuˬ g'a ve yoˬ. 20 Ya‸ hk'aˇ, mvuhˇ naw ma hk'oˆ lo nawˬ hui ve mawˇ jeˬ shaw hpoˆ taˍ loˬ. Oˇ kaˬ lo yawˇ maˇ taˆ puiˉ, pfuhˇ maˇ caˇ puiˉ leh chaw hk'awˇ hk'awˇ yuˬ maˇ g'a. 21 Awˬ lawn k'o, nawˬ ve mawˇ jeˬ shaw hpoˆ taˍ ve teˇ kaˬ lo nawˬ ve nyi ma htawˇ oˇ kaˬ lo cawˬ tuˬ yoˬ. 22 Mehˆ shiˍ lehˬ, awˬ to ve kawˆ faiˇ yoˬ. Hk'e te leh, mehˆ shiˍ nyi leh shu hta‸ maˇ chaweh piˇ gaˇ ve k'o, awˬ to hk'a peu-eˬ awˬ g'euˆ hk'a deh‸ g'a tuˬ yoˬ. 23 Ya‸ hk'aˇ nawˬ mehˆ shiˍ nyi leh maˇ piˇ gaˇ ve k'o, awˬ to hk'a peu-eˬ naˆ ho‸ k'ai tuˬ yoˬ. Nawˬ ve awˬ g'euˆ lehˬ naˆ ho‸ k'ai ve k'o, naˆ ho‸ ve oˇ ve lehˬ uiˍ jaˇ ve yoˬ. 24 Chaw teˇ g'aˇ ka‸ jawˇ mawˇ nyiˇ g'aˇ ve awˬ ceˬ te maˇ g'a. Awˬ lawn k'o, teˇ g'aˇ hta‸ canˇ k'o, teˇ g'aˇ hta‸ ha‸ tuˬ yoˬ. Teˇ g'aˇ hta‸ yawˆ yan k'o, teˇ g'aˇ hta‸ maˇ shawˍ maˇ caˆ te tuˬ yoˬ. Nawˬ hui lehˬ G'uiˬ sha ve awˬ ceˬ ka‸, hpu shi mawˇ jeˬ ve awˬ ceˬ ka‸, teˇ pawˆ tiˉ teˇ geh te maˇ g'a. 25 Hk'e te leh, ngaˬ nawˬ hui hta‸ k'oˆ laˇ ve, hk'aˬ hk'e te g'a caˇ g'a dawˬ tuˬ, nawˬ hui a sha‸ te‸ ve awˬ pon taˇ dawˇ hkiˉ. Hk'aˬ hk'e te g'a veu‸ g'a deh tuˬ, nawˬ hui awˬ to awˬ pon ka‸ taˇ dawˇ hkiˉ. A sha‸ te‸ ve teˇ ceuˬ lehˬ, caˇ tuˬ a‸ kehˉ awˬ hpfuhˇ hk'aˆ leh, awˬ to htawˇ veu‸ k'aˇ a‸ kehˉ awˬ hpfuhˇ hk'aˆ ve maˇ heˆ laˇ. 26 Mvuhˇ hpe lo poˬ toˇ ve ngaˆ teˇ hpaˍ hta‸ nyi-o. Yawˇ hui lehˬ caˬ maˇ ti, caˬ maˇ g'eu‸ leh caˬ ciˇ yehˬ awˬ hk'aw lo caˬ shiˍ maˇ pfuhˇ keu. Ya‸ hk'aˇ, mvuhˇ naw ma hk'oˆ chehˇ ve nawˬ hui ve Awˬ pa lehˬ, yawˇ hui hta‸ caˍ piˇ taw piˇ chehˇ ve yoˬ. Nawˬ hui lehˬ, ngaˆ oˇ ve teˇ hpaˍ a‸ kehˉ awˬ hpfuhˇ hk'aˆ ve maˇ heˆ laˇ. 27 Dawˇ hkiˉ ve pa taw, a shu yawˇ ve a sha‸ teˇ jaˆ k'aw‸ zuhˬ la tuˬ, nawˬ hui awˬ hk'aw lo hk'aˬ ve teˇ g'aˇ te g'a ve le. 28 Veu‸ k'aˇ awˬ pon nawˬ hui aˬ hto‸ ma te dawˇ hkiˉ ve le. Heh puiˉ hk'aw lo cawˬ ve shiˍ ya‸ veˆ hk'aˬ hk'e te uiˍ la ve hta‸ dawˇ nyi-o. Awˬ cehˬ oˇ ve teˇ hpaˍ lehˬ, kanˉ maˇ te, hkeh ka‸ maˇ g'awˬ. 29 Ya‸ hk'aˇ, awˬ me‸ awˬ hponˇ uiˍ ve jawˇ mawˇ Sawˉla‸monˍ lehˬ, awˬ cehˬ oˇ ve teˇ hpaˍ awˬ hk'aw lo teˇ cehˬ hk'e taw ka‸ maˇ g'a veu‸ maˇ g'a deh jaw teh‸, ngaˬ nawˬ hui hta‸ k'oˆ laˇ ve yoˬ. 30 Hk'a deh‸ maˇ yonˍ ve chaw teˇ hpaˍ-oˬ, ya‸ nyi te‸ chehˇ leh shawˉ pawˍ aˬ miˍ hk'aw baˬ keu tuˬ ve mvuh‸ cehˬ hta‸ G'uiˬ sha chi taw taw feuˉ piˇ deh piˇ ve k'o, oˇ ve a‸ kehˉ leuˉ leh nawˬ hui hta‸ feuˉ laˇ deh laˇ tuˬ maˇ heˆ laˇ. 31 Hk'e te leh, hk'aˬ hk'e g'a caˇ tuˬ, hk'aˬ hk'e g'a dawˬ tuˬ, hk'aˬ hk'e g'a veu‸ g'a deh tuˬ, taˇ dawˇ hkiˉ. 32 Awˬ lawn k'o, buiˇ shaˆ aˉ naˆ chaw hui chi hk'a peu-eˬ hta‸ ca chehˇ ve yoˬ. Chi hk'a peu-eˬ nawˬ hui loˍ ve hta‸ mvuhˇ naw ma hk'oˆ chehˇ ve nawˬ hui ve Awˬ pa shiˍ taˍ ve yoˬ. 33 G'uiˬ sha ve mvuhˇ miˬ leh yawˇ ve hteˇ ve cawˇ ve teˇ ceuˬ hta‸ awˉ lawˉ ca-o. Chi teˇ hpaˍ hk'a peu-eˬ htawˇ yawˇ nawˬ hui hta‸ htehˍ laˇ tuˬ yoˬ. 34 Hk'e te leh, shawˉ pawˍ awˬ pon taˇ dawˇ hkiˉ. Awˬ lawn k'o, shawˉ pawˍ awˬ pon shawˉ pawˍ dawˇ hkiˉ tuˬ cawˬ ve yoˬ. Teˇ nyi pon teˇ nyi dawˇ haˍ tuˬ cawˬ ve lehˬ law‸ chehˇ ve yoˬ.

Ma‸htehˍ 7

1 Shu nawˬ hui hta‸ venˇ baˆ maˇ g'a taˍ tuˬ, nawˬ hui shu hta‸ venˇ baˆ taˇ taˍ. 2 Awˬ lawn k'o, nawˬ hui shu hta‸ venˇ baˆ taˍ ve hk'a shuˍ shuˍ, shu nawˬ hui hta‸ venˇ baˆ k'aw‸ taˍ laˇ tuˬ yoˬ. Nawˬ hui shu hta‸ tsuh piˇ kawˬ piˇ ve hk'a shuˍ shuˍ, shu nawˬ hui hta‸ k'aw‸ tsuh laˇ kawˬ laˇ tuˬ yoˬ. 3 Nawˬ hui a shu yawˇ ve mehˆ shiˍ hk'aw lo cawˬ taˍ ve toˉ la‸ lonˉ hta‸ maˇ dawˇ nyi leh, aˬ hto‸ ma te nawˬ ve awˬ viˉ awˬ nyi ve mehˆ shiˍ hk'aw lo cawˬ taˍve mehˆ puˉ hta‸ nawˬ nyi chehˇ ve le. 4 Nawˬ hui a shu yawˇ ve mehˆ shiˍ hk'aw lo toˉ la‸ lonˉ cawˬ taˍ ve ka‸, aˬ hto‸ ma te nawˬ awˬ viˉ awˬ nyi hta‸, Nawˬ ve mehˆ shiˍ hk'aw lo cawˬ taˍ ve mehˆ puˉ hta‸ ngaˬ yuˬ tawˆ laˇ shaˍ teh‸ ca k'oˆ ve le. 5 Heˍ puiˉ ve chaw hui-oˬ, nawˬ ve mehˆ shiˍ hk'aw lo cawˬ taˍ ve toˉ la‸ lonˉ hta‸ awˉ lawˉ yuˬ tawˆ sheˍ. Awˬ hk'aw‸ nawˉ, nawˬ awˬ viˉ awˬ nyi ve mehˆ shiˍ hk'aw cawˬ taˍ ve mehˆ puˉ hta‸ hk'aˬ hk'e te yuˬ tawˆ tuˬ nawˬ hk'a deh‸ mawˬ hpeh‸ tuˬ yoˬ. 6 Da‸ ve kehˬ ve awˬ ceuˬ hpuiˇ hta‸ taˇ piˇ. Piˉ ko-eˍ shehnˉ teˇ hpaˍ hta‸ va‸ mehˆ g'uˇ suhˍ taˇ ca baˬ teh taˍ. Oˇ hk'e te ve k'o, oˇ ve teˇ hpaˍ hta‸ yawˇ hui naˆ taˍ leh, nawˬ hui hta‸ k'aw‸ hpfuhˆ che‸ tuˬ yoˬ. 7 Lawˬ loˬ. Lawˬ k'o g'a tuˬ yoˬ. Ca loˬ. Ca k'o mawˬ tuˬ yoˬ. Yehˬ miˉ hta‸ htawˆ loˬ. Htawˆ k'o hpaw laˇ tuˬ yoˬ. 8 Awˬ lawn k'o, lawˬ ve chaw teˇ g'aˇ le le lehˬ g'a tuˬ yoˬ. Ca ve chaw htawˇ, mawˬ tuˬ yoˬ. Yehˬ miˉ hta‸ htawˆ ve chaw awˬ pon htawˇ, yehˬ miˉ hpaw laˇ tuˬ yoˬ. 9 Nawˬ hui awˬ hk'aw lo a shu teˇ g'aˇ maˇ k'oˆ, yawˇ ve yaˇ paˍ caˇ tuˬ lawˬ ve k'o, haˉ pui shiˍ yuˬ piˇ tuˬ laˇ. 10 Ngaˇ lawˬ ve k'o, vuiˬ hta‸ yuˬ piˇ tuˬ laˇ. 11 Nawˬ hui lehˬ, chaw haiˬ hpeh‸ ve ka‸ a shu yawˇ ve yaˇ hta‸ da‸ ve mawˇ piˇ hkawˇ shiˍ ve k'o, chi a‸ kehˉ leuˉ leh, mvuhˇ naw ma hk'oˆ chehˇ ve nawˬ hui ve Awˬ pa geh hk'a lawˬ ve chaw teˇ hpaˍ hta‸ da‸ ve awˬ ceuˬ teˇ hpaˍ yawˇ piˇ tuˬ yoˬ maˇ heˆ laˇ. 12 Hk'e te leh, shu nawˬ hui hta‸ te laˇ piˇ lawˬ gaˇ ve hk'e, nawˬ hui shu hta‸ oˇ hk'e te piˇ-oˆ. Awˬ lawn k'o, tawˇ chi teˇ hkawˇ lehˬ, awˬ liˇ tawˇ hkawˇ li‸ leh G'uiˬ sha ve tcuh kaˍ paˍ li‸ awˬ hk'aw lo awˬ hk'aˇ lonˉ hpeh‸ ve yoˬ. 13 Maˇ k'oˍ ve yehˬ miˉ hpe‸ hta‸ lo‸-e loˬ. Awˬ lawn k'o, luˬ kuiˬ lo k'ai ve ya‸ k'aw lehˬ k'ehˬ jaˇ leh, yehˬ miˉ hpe‸ ka‸ k'oˍ jaˇ ve yoˬ. Oˇ kaˬ lo lo‸-e ve chaw ka‸ maˇ jaˇ ve yoˬ. 14 Ya‸ hk'aˇ, a sha‸ te‸ kuiˬ lo lo‸-e ve yehˬ miˉ hpe‸ lehˬ, maˇ k'oˍ leh, ya‸ k'aw ka‸ haˍ jaˇ ve yoˬ. Ca mawˬ leh lo‸-e ve chaw a ciˉ ceh tiˉ cawˬ ve yoˬ. 15 Maˇ heˆ heˆ ve tcuh kaˍ paˍ teˇ hpaˍ hta‸ shaˍ ti‸ te-o. Awˬ hk'aw hpawˇ yawˇ hui haiˬ jaˇ ve veˬ hpeh‸ ve ka‸, yawˬ awˬ guiˬ k'uˉ hta‸ deh leh nawˬ hui geh laˬ ve yoˬ. 16 Yawˇ hui ve awˬ shiˍ hta‸ nyi k'o, yawˇ hui ve nyi ma hta‸ g'a shiˍ tuˬ yoˬ. Aˉ chuˇ cehˬ lo a pehˉ meuˇ shiˍ hta‸ g'a shaˉ jaw laˇ. Aˉ chuˇ buiˇ lo maˉ nawˆ shiˍ hta‸ g'a shaˉ jaw laˇ. 17 Da‸ ve awˬ cehˬ lehˬ, da‸ ve aw shiˍ naw‸ ve yoˬ. Maˇ da‸ ve awˬ cehˬ lehˬ, maˇ da‸ ve awˬ shiˍ naw‸ ve yoˬ. 18 Da‸ ve awˬ cehˬ lehˬ, maˇ da‸ ve awˬ shiˍ maˇ naw‸ puiˉ. Chi hk'a shuˍ shuˍ maˇ da‸ ve awˬ cehˬ lehˬ, da‸ve awˬ shiˍ maˇ naw‸ puiˉ. 19 Da‸ ve awˬ shiˍ maˇ naw‸ ve awˬ cehˬ teˇ cehˬ le le hta‸ htu baˬ leh aˬ miˍ hk'aw baˬ keu ve yoˬ. 20 Hk'e te leh chaw oˇ ve teˇ hpaˍ ve awˬ shiˍ hta‸ nyi k'o, yawˇ hui ve nyi ma hta‸ g'a shiˍ tuˬ yoˬ. 21 Ngaˬ hta‸ Jawˇ mawˇ-oˬ, Jawˇ mawˇ-oˬ teh‸ hk'a k'oˆ laˇ ve chaw teˇ g'a le le lehˬ, mvuhˇ naw ma mvuhˇ miˬ awˬ hk'aw lo g'a lo‸-e tuˬ ve maˇ heˆ. Mvuhˇ naw ma hk'oˆ lo chehˇ ve ngaˬ Awˬ pa ve a loˍ hta‸ te ve chaw ceh tiˉ g'a lo‸-e tuˬ yoˬ. 22 Oˇ ve teˇ nyi gaˬ k'o, Jawˇ mawˇ-oˬ, Jawˇ mawˇ-oˬ, ngaˬ hui lehˬ nawˬ ve awˬ meh awˬ hk'aw lo bon maˍ ve maˇ heˆ laˇ. Nawˬ ve awˬ meh awˬ hk'aw lo neˇ haiˬ teˇ hpaˍ hta‸ g'a‸ k'oˬ leh, kanˇ paˆ uiˍ jaˇ ve laiˉ ceuˬ te peuˬ ve maˇ heˆ laˇ teh‸, chaw maˇ maˇ ngaˬ hta‸ k'oˆ laˇ tuˬ yoˬ. 23 Yawˇ hui oˇ hk'e k'oˆ laˇ ve teˇ yanˇ, Nawˬ hui hta‸ ngaˬ a ciˉ ka‸ maˇ shiˍ. Haiˬ ve hta‸ te ve chaw hui-oˬ, ngaˬ geh tawˆ k'ai loˬ teh‸, ngaˬ yawˇ hui hta‸ hteˇ lehˍ k'oˆ piˇ tuˬ yoˬ. 24 Ngaˬ maˍ piˇ ve tawˇ hkawˇ hta‸ hk'a kaˇ leh na yuˬ ve chaw teˇ g'aˇ le le lehˬ, haˉ pui hk'oˆ lo yehˬ te ve cuˇ yiˍ cawˬ paˍ hta‸ shuˍ ve yoˬ. 25 Mvuhˇ yeˬ laˬ leh iˉ kaˆ uiˍ taˆ la ve, mvuhˇ haw meuˆ leh yehˬ oˇ ve hta‸ htinˍ ve htawˇ, haˉ pui hk'oˆ lo te taˍ ve pa taw, yehˬ oˇ ve maˇ paiˍ. 26 Ngaˬ maˍ piˇ ve tawˇ hkawˇ hta‸ kaˇ leh maˇ na yuˬ ve chaw lehˬ, shehˇ shiˍ hk'oˆ yehˬ te ve cuˇ yiˍ maˇ cawˬ ve chaw hta‸ shuˍ ve yoˬ. 27 Mvuhˇ yeˬ laˬ leh iˉ kaˆ uiˍ taˆ la ve, mvuhˇ haw meuˆ leh yehˬ oˇ ve hta‸ htinˍ ve teˇ yanˇ, yehˬ oˇ ve paiˍ ve yoˬ. Paiˍ ve oˇ ve lehˬ jaˇ ve yoˬ teh‸, Yeˍsuˆ k'oˆ ve yoˬ. 28 Yeˍsuˆ bon maˍ peuˬ ve teˇ yanˇ, yawˇ maˍ ve tawˇ hkawˇ teˇ hpaˍ hta‸ chaw awˬ moˍ lonˉ anˇ jaˇ ve yoˬ. 29 Awˬ lawn k'o, yawˇ hui ve li‸ bvuh‸ paˍ hui hk'e yawˇ maˍ ve maˇ heˆ. Kanˇ paˆ cawˬ paˍ hk'e yawˇ maˍ piˇ ve yoˬ.

Ma‸htehˍ 8

1 Yeˍsuˆ hk'aw pui hk'oˆ lo ya‸ la htaˇ, chaw awˬ moˍ lonˉ teˇ hpaˍ yawˇ awˬ hk'aˇ suh k'ai ve yoˬ. 2 Oˇ htaˇ, hkiˬ tu‸ paˍ teˇ g'aˇ laˬ leh yawˇ hta‸ oˉ k'oˍ pui leh k'oˆ ve, Jawˇ mawˇ-oˬ, nawˬ te gaˇ ve k'o, ngaˬ hta‸ da‸ la kehˬ la tuˬ nawˬ te hpeh‸ ve yoˬ teh‸ k'oˆ piˇ ve yoˬ. 3 Yeˍsuˆ la‸ sheh che leh yawˇ hta‸ htawˇ leh k'oˆ ve, Ngaˬ te gaˇ ve yoˬ. Da‸ la kehˬ la-o teh‸ k'oˆ piˇ ve yoˬ. Teˇ cawˬ haˉ hkiˬ tu‸ a naˍ mehˉ k'ai leh, yawˇ da‸ la kehˬ la ve yoˬ. 4 Yeˍsuˆ yawˇ hta‸ k'oˆ piˇ ve, Awˬ lawn chi chaw teˇ g'aˇ hta‸ ka‸ taˇ hto piˇ. Ya‸ hk'aˇ, k'ai leh paw hkuˇ hta‸ nawˬ awˬ to ca maw piˇ-oˆ. Shu mehˆ g'uˇ suhˍ shaˉ hkiˆ hpeh‸ tuˬ, Moˉseˍ awˬ liˇ teh taˍ ve hk'e tanˇ tuˬ ca tanˇ piˇ-oˆ teh‸ k'oˆ piˇ ve yoˬ. 5 Yeˍsuˆ Kaˍpeˍneˍonˍ venˇ hk'aw lo‸-e htaˇ ma‸ poˍ teˇ g'aˇ yawˇ geh laˬ leh, yawˇ hta‸ lawˬ hkawˉ leh k'oˆ ve, 6 Jawˇ mawˇ-oˬ, ngaˬ ve awˬ ceˬ hkui sheh la‸ sheh suh leh aˉ hk'aw lo zuh‸ chehˇ taˍ ve yoˬ. Yawˇ g'a tu‸ g'a hkanˍ jaˇ ve yoˬ teh‸ k'oˆ piˇ ve yoˬ. 7 Yeˍsuˆ yawˇ hta‸ k'oˆ piˇ ve, Ngaˬ laˬ leh yawˇ hta‸ gu na-e piˇ tuˬ yoˬ teh‸ k'oˆ ve yoˬ. 8 Oˇ htaˇ, ma‸ poˍ yawˇ hta‸ k'aw‸ k'oˆ piˇ ve, Jawˇ mawˇ-oˬ, ngaˬ ve yehˬ hk'aw nawˬ lo‸ la ve hta‸ ngaˬ maˇ keunˍ. Ya‸ hk'aˇ, nawˬ tawˇ teˇ peu-eˍ ceh tiˉ yaw ve ka‸, ngaˬ ve awˬ ceˬ na-e la tuˬ yoˬ. 9 Awˬ lawn k'o, ngaˬ lehˬ shu ve kanˇ paˆ awˬ hawˉ lo chehˇ leh, ngaˬ awˬ hawˉ lo ka‸ ma‸ yaˇ teˇ hpaˍ cawˬ ve yoˬ. Teˇ g'aˇ hta‸, K'ai-o teh‸ k'oˆ piˇ ve k'o, yawˇ k'ai ve yoˬ. Teˇ g'aˇ hta‸, Laˬ-o‸ teh‸ k'oˆ piˇ ve k'o, yawˇ laˬ ve yoˬ. Ngaˬ ve awˬ ceˬ paˍ hta‸ htawˇ, Chi hta‸ te-o teh‸ k'oˆ piˇ ve k'o, yawˇ te ve yoˬ teh‸, ma‸ poˍ k'aw‸ k'oˆ piˇ ve yoˬ. 10 Tawˇ chi hta‸ Yeˍsuˆ g'a kaˇ htaˇ yawˇ anˇ leh, yawˇ awˬ hk'aˇ suh k'ai ve chaw teˇ hpaˍ hta‸ yawˇ k'oˆ piˇ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, Iˉsaˍ-reˍlaˆ chaw awˬ hk'aw lo ka‸ chi taw taw yonˍ ve hta‸ ngaˬ maˇ g'a mawˬ jaw sheˍ. 11 Ngaˬ nawˬ hui hta‸ k'oˆ laˇ ve, mvuhˇ nyi tawˆ hpawˇ mvuhˇ nyi k'ehˬ hpawˇ chehˇ ve chaw maˇ maˇ laˬ leh, mvuhˇ naw ma mvuhˇ miˬ awˬ hk'aw lo Aˍbraˍhanˍ, Iˉcaˆ, Yaˍkoˆ hui geh hk'a geh g'a mui caˇ tuˬ yoˬ. 12 Ya‸ hk'aˇ, mvuhˇ miˬ yaˇ teˇ hpaˍ lehˬ, awˬ baˬ hpawˇ naˆ ho‸ kuiˬ lo yuˬ baˬ ve hta‸ g'a hkanˍ tuˬ yoˬ. Oˇ kaˬ lo hk'a chehˇ ve chaw hui hawˬ leh ciˬ geu‸ tuˬ yoˬ teh‸, Yeˍsuˆ k'oˆ piˇ ve yoˬ. 13 Yeˍsuˆ ma‸ poˍ hta‸ k'oˆ piˇ ve, Nawˬ k'o‸-e loˬ. Nawˬ yonˍ ve hk'e nawˬ awˬ pon hpeh‸ la piˇ-oˆ teh‸ k'oˆ piˇ ve yoˬ. Oˇ teˇ hkui awˬ hk'aw lo awˬ ceˬ oˇ ve na-e la ve yoˬ. 14 Yeˍsuˆ lehˬ Peˍtruˆ ve yehˬ hk'aw lo‸-e htaˇ, Peˍtruˆ awˬ miˇ ma ve awˬ e kaˆ naˬ leh zuh‸ chehˇ ve hta‸ g'a mawˬ ve yoˬ. 15 Yawˇ ve la‸ sheh hta‸ Yeˍsuˆ htawˇ leh, kaˆ naˬ ve na-e la ve yoˬ. Oˇ htaˇ yawˇ tu leh Yeˍsuˆ hta‸ te caˍ te taw piˇ ve yoˬ. 16 Mehˆ muiˉ naˆ la htaˇ, neˇ geh ve chaw maˇ maˇ hta‸ shu Yeˍsuˆ geh shiˍ laˬ leh, yawˇ tawˇ teˇ peu-eˬ ceh tiˉ yaw leh neˇ teˇ hpaˍ hta‸ g'a‸ k'oˬ ve yoˬ. Chaw naˬ hk'a peu-eˬ hta‸ ka‸ yawˇ gu na-e piˇ ve yoˬ. 17 Yawˇ chi hk'e te ve lehˬ, Yawˇ awˬ to ngaˬ hui ve g'aˇ nuˇ shaˉ nuˇ ve teˇ hpaˍ hta‸ yuˬ taˆ leh, ngaˬ hui ve naˬ ve gawˬ ve teˇ hpaˍ hta‸ yuˬ pfuhˇ ve yoˬ teh‸, tcuh kaˍ paˍ Iˉsaˍyaˆ k'oˆ taˍ ve hk'e biˇ la tuˬ te ve yoˬ. 18 Chaw awˬ moˍ lonˉ teˇ hpaˍ yawˇ hta‸ hk'a caw zuhˇ chehˇ taˍ ve hta‸ Yeˍsuˆ g'a mawˬ hta,ˇ G'uiˬ po coˇ paˉ lo hkanˍ k'ai-a veuˬ teh‸, yawˇ k'oˆ piˇ ve yoˬ. 19 Oˇ htaˇ li‸ bvuh‸ paˍ teˇ g'aˇ yawˇ geh laˬ leh k'oˆ ve, Saˍ la‸-oˬ, nawˬ hk'aˬ lo k'ai ve maˇ k'oˆ, nawˬ hk'aˇ suh ngaˬ k'ai tuˬ yoˬ teh‸ k'oˆ piˇ ve yoˬ. 20 Yeˍsuˆ yawˇ hta‸ k'oˆ ve, Heh hpuiˇ teˇ hpaˍ lehˬ, awˬ k'oˍ cawˬ ve yoˬ. Mvuhˇ hpe lo poˬ ve ngaˆ teˇ hpaˍ htawˇ, zuh‸ kuiˬ cawˬ ve yoˬ. Ya‸ hk'aˇ, chaw yaˇ ve Yaˇ hpu lehˬ, oˉ k'oˍ taˍ kuiˬ ka‸ maˇ cawˬ teh‸ k'oˆ piˇ ve yoˬ. 21 Awˬ kaˍ awˬ nu awˬ la‸ g'awˇ teˇ g'aˇ yawˇ hta‸ k'oˆ piˇ ve, Jawˇ mawˇ-oˬ, ngaˬ ve awˬ pa hta‸ awˉ lawˉ ca tuˍ piˇ tuˬ a hkaw-anˬ a ciˉ pe‸ laˇ sheˍ teh‸ k'oˆ ve yoˬ. 22 Yeˍsuˆ yawˇ hta‸ k'aw‸ k'oˆ piˇ ve, Ngaˬ hk'aˇ suh laˬ-o‸. Chaw suh teˇ hpaˍ lehˬ, yawˇ hui hk'aˇ yawˇ hui chaw suh hta‸ tuˍ piˇ lawˬ-o‸ teh‸ k'oˆ ve yoˬ. 23 Yawˇ haw lo‸ k'oˍ hk'aw lo‸-e leh, yawˇ ve awˬ la‸ g'awˇ teˇ hpaˍ htawˇ yawˇ geh teˇ geh ciˇ k'ai ve yoˬ. 24 Oˇ htaˇ, g'uiˬ po awˬ hk'aw lo mvuhˇ haw lonˉ meuˆ la ve pa taw, g'uiˬ baˇ teˇ hpaˍ haw lo‸ k'oˍ hta‸ hk'a beh hk'a beh k'ai chehˇ htawˇ, Yeˍsuˆ lehˬ zuh‸ muiˉ k'a chehˇ ve yoˬ. 25 Awˬ la‸ g'awˇ teˇ hpaˍ yawˇ hta‸ ca nawˍ piˇ leh k'oˆ ve, Jawˇ mawˇ-oˬ, ngaˬ hui hta‸ htaiˍ hk'aw‸ laˇ-oˆ. Ngaˬ hui g'a luˬ la yoˬ teh‸ k'oˆ piˇ ve yoˬ. 26 Yawˇ lehˬ yawˇ hui hta‸ k'oˆ piˇ ve, Hk'a deh‸ maˇ yonˍ ve chaw teˇ hpaˍ-oˬ, nawˬ hui aˬ hto‸ ma te kawˆ ve le teh‸ k'oˆ ve yoˬ. Oˇ htaˇ yawˇ tu la leh, mvuhˇ haw leh g'uiˬ po hta‸ deˇ piˇ htaˇ, ta‸ iˉ gawˬ lehˍ hpeh‸ sheˬ ve yoˬ. 27 Chaw oˇ ve teˇ hpaˍ anˇ jaˇ leh k'oˆ ve, Chaw chi lehˬ, hk'aˬ hk'e ve chaw le. Mvuhˇ haw leh g'uiˬ po ka‸ yawˇ ve hkawˇ hta‸ na yuˬ ve law teh‸ k'oˆ da‸ ve yoˬ. 28 G'uiˬ po coˇ paˉ Gaˍdaˍraˆ mvuhˇ miˬ lo gaˬ htaˇ, chaw tuˍ hpfuh lo tawˆ la ve neˇ geh ve chaw nyiˇ g'aˇ yawˇ hta‸ ca ha‸ la ve yoˬ. Yawˇ huiˉ maˬ caˬ jaˇ ve pa taw, ya‸ k'aw oˇ ve hta‸ chaw teˇ g'aˇ ka‸ k'ai maˇ hpeh‸. 29 Yawˇ huiˉ maˬ g'aˇ hte‸ kuˬ leh k'oˆ ve, G'uiˬ sha ve Yaˇ hpu-oˬ, nawˬ ngaˬ huiˉ maˬ hta‸ hk'aˬ hk'e caˉ da‸ le. Awˬ yanˇ maˇ gaˬ sheˍ ka‸ ngaˬ huiˉ maˬ hta‸ fawˉ mehˍ laˇ tuˬ nawˬ laˬ ve laˇ teh‸ k'oˆ ve yoˬ. 30 Oˇ teˇ hkui yawˇ hui hta‸ hk'a cawˇ cawˇ vuiˇ ve teˇ kaˬ lo va‸ teˇ moˍ lonˉ k'aˆ caˇ chehˇ ve yoˬ. 31 Hk'e te leh, neˇ teˇ hpaˍ yawˇ hta‸ lawˬ hkawˉ leh k'oˆ ve, Nawˬ ngaˬ hui hta‸ g'a‸ k'oˬ laˇ ve k'o, va‸ moˍ lonˉ oˇ ve awˬ hk'aw lo ngaˬ hui hta‸ lo‸-e tcuh laˇ-oˆ teh‸ k'oˆ piˇ ve yoˬ. 32 Oˇ htaˇ yawˇ yawˇ hui hta‸, K'ai loˬ teh‸ k'oˆ piˇ ve yoˬ. Yawˇ hui tawˆ-e leh, va‸ awˬ moˍ lonˉ hk'aw lo‸-e ve teˇ yanˇ, va‸ oˇ ve teˇ moˍ hk'a peu-eˬ miˬ haˍ kuiˬ lo g'aˇ hte‸ g'uiˇ ya‸-e leh, g'uiˬ po hk'aw lo lo‸-e leh k'a suh peuˬ sheˬ ve yoˬ. 33 Va‸ hawˉ paˍ teˇ hpaˍ hpaw-e leh venˇ hk'aw lo‸-e ve yoˬ. Hk'a hpeh‸ la ve awˬ lawn hk'a peu-eˬ leh, neˇ geh ve chaw nyiˇ g'aˇ awˬ lawn yawˇ hui k'aoˍ maˍ piˇ ve yoˬ. 34 Venˇ yaˇ hk'a peu-eˬ Yeˍsuˆ hta‸ hpuˇ da‸ tuˬ tawˆ la ve yoˬ. Yawˇ hta‸ g'a mawˬ htaˇ, yawˇ hui ve mvuhˇ miˬ hk'aw lo tawˆ k'ai tuˬ yawˇ hui yawˇ hta‸ lawˬ hkawˉ ve yoˬ.

Ma‸htehˍ 9

1 Yeˍsuˆ haw lo‸ k'oˍ k'aw‸ ciˇ k'aw‸ la leh, yawˇ ve venˇ lo gaˬ la ve yoˬ. 2 Oˇ htaˇ, zuh‸ kuiˬ hk'oˆ zuh‸ chehˇ ve hkui sheh la‸ sheh suh ve chaw teˇ g'aˇ hta‸ shu yawˇ geh taˆ laˬ ve yoˬ. Yawˇ hui yonˍ ve nyi ma hta‸ Yeˍsuˆ g'a mawˬ htaˇ, hkui sheh la‸ sheh suh ve chaw hta‸ k'oˆ piˇ ve, Yaˇ paˍ-oˬ, ha lehˬ chehˇ-oˆ. Nawˬ ve venˇ baˆ hpehˇ hk'a peuˬ teh‸ k'oˆ piˇ ve yoˬ. 3 Li‸ bvuh‸ paˍ teˇ hpaˍ hpaˍ lehˬ, Chi hpaˇ G'uiˬ sha hta‸ maˇ shawˍ maˇ caˆ k'oˆ ve yoˬ teh‸, a shu yawˇ ve nyi ma hk'aw dawˇ chehˇ ve yoˬ. 4 Yawˇ hui hk'aˬ hk'e dawˇ chehˇ ve hta‸ Yeˍsuˆ shiˍ leh k'oˆ piˇ ve, Aˬ hto‸ ma te nawˬ hui ve nyi ma hk'aw lo maˇ da‸ ve hta‸ dawˇ chehˇ ve le. 5 Awˬ lawn k'o, tawˇ hk'aˬ ve teˇ hkawˇ a ciˉ k'oˆ piˇ sha le. Nawˬ ve venˇ baˆ hpehˇ hk'a peuˬ teh‸ k'oˆ piˇ ve sha laˇ. Maˇ heˆ k'o, Tu leh ya‸ k'aw toˇ k'ai loˬ teh‸ k'oˆ piˇ ve sha laˇ. 6 Ya‸ hk'aˇ chaw yaˇ ve Yaˇ hpu lehˬ miˬ guiˬ hk'oˆ lo venˇ baˆ hpehˇ hk'a tuˬ kanˇ paˆ cawˬ ve hta‸ nawˬ hui g'a shiˍ tuˬ teh‸ k'oˆ peuˬ leh, hkui sheh la‸ sheh suh ve chaw hta‸ k'aw‸ k'oˆ piˇ ve, Tu-o. Nawˬ ve zuh‸ kuiˬ hta‸ taˆ leh nawˬ ve aˉ hk'aw lo k'o‸-e loˬ teh‸ k'oˆ piˇ ve yoˬ. 7 Oˇ htaˇ yawˇ tu leh yawˇ ve aˉ hk'aw lo k'o‸-e ve yoˬ. 8 Oˇ ve hta‸ chaw awˬ moˍ lonˉ teˇ hpaˍ g'a mawˬ htaˇ, yawˇ hui kawˆ leh, chaw yaˇ hui hta‸ chi hk'e ve kanˇ paˆ piˇ shehˍ hpaˇ G'uiˬ sha hta‸ chiˇ uiˍ chiˇ mvuh piˇ ve yoˬ. 9 Yeˍsuˆ tu leh awˬ g'uˇ suhˍ k'ai chehˇ htaˇ, awˬ hkawnˍ shaw kuiˬ yehˬ awˬ hk'aw lo mui chehˇ ve Ma‸htehˍ meh ve chaw teˇ g'aˇ hta‸ yawˇ g'a mawˬ ve yoˬ. Ngaˬ hk'aˇ suh laˬ-o‸ teh‸, yawˇ hta‸ k'oˆ piˇ htaˇ, yawˇ tu leh Yeˍsuˆ hk'aˇ suh k'ai ve yoˬ. 10 Oˇ ve hk'aw‸ nawˉ, yehˬ awˬ hk'aw lo Yeˍsuˆ hpui lawˇ paˇ mui caˇ chehˇ ve teˇ yanˇ, awˬ hkawnˍ shaw paˍ leh venˇ baˆ yaˇ hui maˇ maˇ laˬ leh, Yeˍsuˆ leh yawˇ ve awˬ la‸ g'awˇ hui geh teˇ geh mui caˇ ve yoˬ. 11 Hpaˍriˍsehˇ hui oˇ ve hta‸ g'a mawˬ htaˇ, Yeˍsuˆ ve awˬ la‸ g'awˇ hui hta‸ k'oˆ piˇ ve, Nawˬ hui ve saˍ la‸ lehˬ, aˬ hto‸ ma pa taw awˬ hkawnˍ shaw paˍ leh venˇ baˆ yaˇ hui geh hk'a geh caˇ ve le teh‸ na nyi ve yoˬ. 12 Tawˇ oˇ ve hta‸ Yeˍsuˆ g'a kaˇ htaˇ yawˇ k'aw‸ k'oˆ piˇ ve, Chehˇ sha ve chaw hui naˆ tsuhˇ shehˍ hpaˇ hta‸ maˇ loˍ. Naˬ ve chaw hui ceh tiˉ loˍ ve yoˬ. 13 Ngaˬ lehˬ tanˇ tuˬ teˇ ceuˬ hta‸ heuˆ gaˇ ve maˇ heˆ, ha k'aˉ ve teˇ ceuˬ hta‸ heuˆ gaˇ ve yoˬ teh‸ k'oˆ ve tawˇ hkawˇ hta‸ nawˬ hui shiˍ tuˬ ca henˇ-oˆ. Awˬ lawn k'o, hteˇ ve cawˇ ve chaw hui hta‸ kuˬ yuˬ tuˬ ngaˬ laˬ ve maˇ heˆ. Venˇ baˆ yaˇ hui hta‸ kuˬ yuˬ tuˬ ngaˬ laˬ ve yoˬ teh‸ k'oˆ piˇ ve yoˬ. 14 Oˇ htaˇ, Yoˇhanˬ ve awˬ la‸ g'awˇ teˇ hpaˍ Yeˍsuˆ geh laˬ leh k'oˆ ve, Ngaˬ hui leh Hpaˍriˍsehˇ teˇ hpaˍ caˇ tuˬ ce chehˇ ve ka‸, aˬ hto‸ ma pa taw nawˬ ve awˬ la‸ g'awˇ teˇ hpaˍ caˇ tuˬ maˇ ce ve le teh‸ na nyi ve yoˬ. 15 Yeˍsuˆ yawˇ hui hta‸ k'oˆ piˇ ve, Awˬ miˇ ma heuˆ shehˍ hpaˇ lehˬ, hkehˉ caˇ la ve chaw hui geh chehˇ htaˇ, yawˇ hui dawˇ haˍ chehˇ tuˬ laˇ. Ya‸ hk'aˇ, awˬ miˇ ma heuˆ shehˍ hpaˇ hta‸ yawˇ hui geh yuˬ hpaˆ ve awˬ nyi gaˬ la tuˬ yoˬ. Oˇ htaˇ yawˇ hui caˇ tuˬ ce tuˬ yoˬ. 16 Veu‸ k'aˇ awˬ piˍ hta‸ hpa awˬ suhˉ a shu ka‸ maˇ nehˉ jaw. Oˇ hk'e nehˉ ve k'o, nehˉ taˍ ve hpa lehˬ veu‸ k'aˇ awˬ piˍ hta‸ g'awˬ leh leuˉ leh k'aw‸ tzuh‸ jaˇ tuˬ yoˬ. 17 Chi hk'a shuˍ shuˍ, shaˍ guiˬ htuˉ pui awˬ piˍ awˬ hk'aw lo a pehˉ meuˇ g'uiˬ awˬ suhˉ a shu ka‸ maˇ keu jaw. Oˇ hk'e keu ve k'o, shaˍ guiˬ htuˉ pui pe‸ hkoˇ ve pa taw, a pehˉ meuˇ g'uiˬ sheˆ leh, shaˍ guiˬ htuˉ pui htawˇ luˬ k'ai ve yoˬ. Ya‸ hk'aˇ, a pehˉ meuˇ g'uiˬ awˬ suhˉ hta‸ shaˍ guiˬ htuˉ pui awˬ suhˉ awˬ hk'aw lo keu ve k'o, nyiˇ ceuˬ ceuˬ maˇ luˬ k'ai teh‸ k'oˆ piˇ ve yoˬ. 18 Awˬ lawn chi teˇ hpaˍ yawˇ yawˇ hui hta‸ k'oˆ piˇ chehˇ htaˇ, bon yehˬ awˬ hoˉ teˇ g'aˇ yawˇ geh laˬ leh yawˇ hta‸ oˉ k'oˍ pui leh k'oˆ ve, Chi teˇ hkui ngaˬ ve yaˇ miˇ suh peuˬ. Ya‸ hk'aˇ, nawˬ laˬ leh yawˇ awˬ hk'oˆ hta‸ la‸ sheh taˍ piˇ la. Yawˇ k'aw‸ te‸ la tuˬ yoˬ teh‸ k'oˆ piˇ ve yoˬ. 19 Hk'e te leh Yeˍsuˆ tu leh, yawˇ ve awˬ la‸ g'awˇ hui geh chaw oˇ ve awˬ hk'aˇ suh k'ai ve yoˬ. 20 Oˇ htaˇ, teˇ chi nyiˇ hk'aw‸ hk'a gaˬ awˬ suhˍ ya‸ leh naˬ ve yaˇ miˇ teˇ g'aˇ Yeˍsuˆ awˬ hk'aw‸ nawˉ hpawˇ lo laˬ leh yawˇ ve aˉ po‸ awˬ caˍ hta‸ htawˇ ve yoˬ. 21 Awˬ lawn k'o, Yawˇ ve aˉ po‸ hta‸ ceh ngaˬ g'a htawˇ ve k'o, ngaˬ na-e la tuˬ yoˬ teh‸, yawˇ nyi ma hk'aw dawˇ ve yoˬ. 22 Yeˍsuˆ hpfuhˆ nyi leh yawˇ hta‸ mawˬ htaˇ, Yaˇ miˇ-oˬ, ha lehˬ chehˇ-oˆ. Nawˬ yonˍ ve teˇ ceuˬ lehˬ, nawˬ hta‸ na-e la piˇ peuˬ teh‸ k'oˆ piˇ ve yoˬ. Oˇ teˇ hkui yaˇ miˇ oˇ ve na-e la ve yoˬ. 23 Bon yehˬ awˬ hoˉ ve aˉ hk'aw lo Yeˍsuˆ gaˬ la htaˇ, lehˉ lu meuˆ ve chaw hui leh chaw awˬ moˍ lonˉ duiˆ-ehˍ shaˇ-ehˍ te chehˇ ve hta‸ yawˇ g'a mawˬ ve yoˬ. 24 Oˇ htaˇ yawˇ yawˇ hui hta‸ k'oˆ piˇ ve, Tawˆ k'ai loˬ. Yaˇ miˇ ehˉ chi suh ve maˇ heˆ, yawˇ zuh‸ muiˉ k'a chehˇ ve yoˬ teh‸ k'oˆ piˇ ve teˇ yanˇ, yawˇ hui yawˇ hta‸ g'uiˬ ve yoˬ. 25 Yawˇ chaw awˬ moˍ lonˉ hta‸ tawˆ k'ai tcuh peuˬ hk'aw‸ nawˉ, yawˇ lo‸-e leh yaˇ miˇ ehˉ ve la‸ sheh hta‸ yuˬ hk'a leh, yaˇ miˇ ehˉ tu la ve yoˬ. 26 Hk'e te leh awˬ lawn chi, mvuhˇ miˬ oˇ ve awˬ hk'aw teˇ kaˬ le le lo bvuhˬ k'ai ve yoˬ. 27 Yeˍsuˆ tu leh awˬ g'uˇ suhˍ k'ai chehˇ htaˇ, mehˆ cuˉ paˍ nyiˇ g'aˇ yawˇ awˬ hk'aˇ suh g'a‸ leh, Daˍviˆ ve Yaˇ hpu -oˬ, ngaˬ huiˉ maˬ hta‸ ha k'aˉ laˇ-oˆ teh‸ kuˬ tcuhˉ taˍ ve yoˬ. 28 Yawˇ yehˬ hk'aw lo‸-e htaˇ, mehˆ cuˉ paˍ oˇ ve nyiˇ g'aˇ yawˇ geh laˬ ve yoˬ. Yeˍsuˆ yawˇ huiˉ maˬ hta‸ k'oˆ piˇ ve, Chi hta‸ ngaˬ te puiˉ ve teh‸ nawˬ huiˉ maˬ yonˍ ve laˇ teh‸ na nyi htaˇ, Yonˍ ve yoˬ, Jawˇ mawˇ-oˬ teh‸, yawˇ huiˉ maˬ yawˇ hta‸ k'aw‸ k'oˆ piˇ ve yoˬ. 29 Oˇ htaˇ, yawˇ huiˉ maˬ ve mehˆ shiˍ hta‸ yawˇ htawˇ leh, Nawˬ huiˉ maˬ yonˍ ve hk'e nawˬ huiˉ maˬ awˬ pon hpeh‸ la piˇ-oˆ teh‸ k'oˆ piˇ ve yoˬ. 30 Oˇ htaˇ, yawˇ huiˉ maˬ mehˆ k'aw‸ mawˬ la ve yoˬ. Chaw teˇ g'aˇ ka‸ maˇ g'a shiˍ tuˬ shaˍ ti‸ taˍ-o‸ teh‸, Yeˍsuˆ yawˇ huiˉ maˬ hta‸ hk'a deh‸ maˍ piˇ ve yoˬ. 31 Ya‸ hk'aˇ, yawˇ huiˉ maˬ tawˆ k'ai leh, yawˇ huiˉ maˬ hta‸ pa taw mvuhˇ miˬ oˇ ve awˬ hk'aw teˇ kaˬ le le lo Yeˍsuˆ ve awˬ lawn bvuhˬ k'ai ve yoˬ. 32 Yawˇ huiˉ maˬ tawˆ k'ai chehˇ htaˇ, neˇ geh ve chaw k'aˍ teˇ g'aˇ hta‸ shu Yeˍsuˆ geh shiˍ veu laˇ ve yoˬ. 33 Neˇ hta‸ g'a‸ k'oˬ peuˬ hk'aw‸ nawˉ, chaw k'aˍ oˇ ve tawˇ yaw la ve yoˬ. Chaw awˬ moˍ lonˉ teˇ hpaˍ anˇ leh, Iˉsaˍreˍlaˆ chaw hui awˬ hk'aw lo chi hk'e ve teˇ pawˆ ka‸ maˇ mawˬ jaw teh‸ yawˇ hui k'oˆ ve yoˬ. 34 Ya‸ hk'aˇ, Hpaˍriˍsehˇ hui k'oˆ ve, Yawˇ neˇ jawˇ mawˇ hta‸ g'aˇ va leh neˇ teˇ hpaˍ hta‸ g'a‸ k'oˬ ve yoˬ teh‸ k'oˆ ve yoˬ. 35 Oˇ htaˇ, venˇ hk'aˆ teˇ kaˬ le le lo Yeˍsuˆ k'ai leh, yawˇ hui ve bon yehˬ teˇ hpaˍ awˬ hk'aw lo maˍ piˇ leh G'uiˬ sha ve mvuhˇ miˬ hta‸ caˉ da‸ ve ha lehˬ ve bon hkawˇ maˍ piˇ ve yoˬ. A naˍ teˇ ceuˬ le le leh naˬ ve gawˬ ve teˇ ceuˬ le le hta‸ htawˇ yawˇ gu na-e piˇ ve yoˬ. 36 Chaw awˬ moˍ lonˉ teˇ hpaˍ hta‸ g'a mawˬ htaˇ, yawˇ yawˇ hui hta‸ ha k'aˉ ve yoˬ. Awˬ lawn k'o, yawˇ hui lehˬ yawˬ hawˉ paˍ maˇ cawˬ ve yawˬ hk'e nyi ma sho‸ sha‸ jaˇ leh awˬ g'aˇ nuˇ jaˇ chehˇ ve yoˬ. 37 Oˇ htaˇ, yawˇ ve awˬ la‸ g'awˇ hui hta‸ yawˇ k'oˆ piˇ ve, Caˬ g'eu‸ tuˬ cawˬ maˇ jaˇ ve ka‸, g'eu‸ shehˍ hpaˇ hui a ciˉ ceh tiˉ cawˬ ve yoˬ. 38 Hk'e te leh, yawˇ ve caˬ g'eu‸ kuiˬ lo caˬ g'eu‸ shehˍ hpaˇ hui hta‸ peu laˇ tuˬ, Awˬ shehˍ hpaˇ hta‸ bon lawˬ-o‸ teh‸ k'oˆ ve yoˬ.

Ma‸htehˍ 10

1 Oˇ htaˇ, yawˇ ve awˬ la‸ g'awˇ teˇ chi nyiˇ g'aˇ hta‸ yawˇ kuˬ yuˬ leh, neˇ cha‸ chiˆ teˇ hpaˍ hta‸ g'a‸ k'oˬ tuˬ maˇ k'oˆ, a naˍ teˇ ceuˬ le le leh naˬ ve gawˬ ve teˇ ceuˬ le le hta‸ gu na-e piˇ tuˬ maˇ k'oˆ, yawˇ hui hta‸ kanˇ paˆ piˇ ve yoˬ. 2 Tcuh yaˇ teˇ chi nyiˇ g'aˇ ve awˬ meh lehˬ chi teˇ hpaˍ yoˬ. Awˉ lawˉ teˇ g'aˇ, Peˍtruˆ teh‸ k'oˆ ve Siˉmonˍ leh yawˇ ve awˬ nyi paˍ Anˍdrehˍ, Zeˍbeˍdehˇ ve awˬ yaˇ paˍ Yaˍkoˆ leh Yaˍkoˆ ve awˬ nyi paˍ Yoˇhanˬ, 3 Hpiˇliˇpuˆ leh Baˍhtawˇlaˍmehˇ, Htoˉma‸ leh awˬ hkawnˍ shaw paˍ Ma‸htehˍ, Aˍlaˍhpehˇ ve awˬ yaˇ paˍ Yaˍkoˆ leh Htaˍdehˇ, 4 Hkaˍnaˍniˆ awˬ moˍ hta‸ caˉ da‸ ve chaw Siˉmonˍ leh, Yeˍsuˆ hta‸ chiˇ a‸ piˇ shehˍ hpaˇ Yuˇda‸ Iˉsaˍkaˍriˍoˆ hui yoˬ. 5 Tcuh yaˇ oˇ ve teˇ chi nyiˇ g'aˇ hta‸ Yeˍsuˆ k'ai tcuh leh, yawˇ hui hta‸ chi hk'e tawˇ piˇ ve, Buiˇ shaˆ aˉ naˆ chaw hui ve chehˇ kuiˬ lo taˇ k'ai. Saˍmaˍriˆ venˇ teˇ hpaˍ awˬ hk'aw lo htawˇ taˇ lo‸-e. 6 Iˉsaˍreˍlaˆ teˇ yehˬ awˬ hk'aw lo mehˉ k'ai peuˬ ve yawˬ teˇ hpaˍ geh k'ai-o. 7 Nawˬ hui k'ai chehˇ ve teˇ yanˇ, Mvuhˇ naw ma mvuhˇ miˬ gaˬ la paˇ neˇ peuˬ teh‸, bon maˍ piˇ-oˆ. 8 Naˬ ve chaw hui hta‸ gu na-e piˇ-oˆ. Suh ve chaw hui hta‸ k'aw‸ te‸ tu la piˇ-oˆ. Hkiˬ tu‸ keuˆ ve chaw hui hta‸ da‸ la kehˬ la piˇ-oˆ. Neˇ teˇ hpaˍ hta‸ g'a‸ k'oˬ-o‸. Nawˬ hui hk'e leˇ g'a ve hk'a shuˍ shuˍ, shu hta‸ hk'e leˇ k'aw‸ piˇ-oˆ. 9 Nawˬ hui ve haˍ pi caˆ awˬ hk'aw lo, hpu, shi, peh‸ shanˍ teˇ hpaˍ hta‸ taˇ doˆ veu. 10 Ya‸ k'aw k'aˉ awˬ pon miˉ chaw leh aˉ po‸ nyiˇ hk'oˆ hta‸ ka‸, hkuiˉ nuˆ leh juˇ fuiˍ hta‸ ka‸, taˇ yuˬ k'ai. Awˬ lawn k'o, kanˉ te ve chaw lehˬ, caˇ tuˬ dawˬ tuˬ hta‸ g'a cawˇ ve yoˬ. 11 Hk'aˬ ve teˇ venˇ hk'aˬ ve teˇ hk'aˆ awˬ hk'aw lo nawˬ hui lo‸-e ve maˇ k'oˆ, A shu keunˍ ve le teh‸ na nyi leh, hk'aˆ oˇ ve awˬ hk'aw lo nawˬ hui tawˆ k'ai htaˇ hk'a gaˬ oˇ kaˬ lo chehˇ taˍ-o‸. 12 Yehˬ hk'aw lo‸-e htaˇ bon na‸ piˇ-oˆ. 13 Yehˬ oˇ ve keunˍ ve k'o, nawˬ hui ve dawˇ sha gaˇ sha ve awˬ ceuˬ oˇ kaˬ lo cawˬ piˇ-oˆ. Ya‸ hk'aˇ maˇ keunˍ ve k'o, nawˬ hui ve dawˇ sha gaˇ sha ve awˬ ceuˬ nawˬ hui geh k'aw‸ la tuˬ yoˬ. 14 Chaw teˇ g'aˇ g'aˇ nawˬ hui hta‸ maˇ ha‸ yuˬ leh nawˬ hui ve tawˇ hkawˇ hta‸ maˇ na ve k'o, yehˬ oˇ ve awˬ hk'aw maˇ k'oˆ, venˇ oˇ ve awˬ hk'aw maˇ k'oˆ, nawˬ hui tawˆ k'ai htaˇ, hkui taw k'aw hta‸ ngawˉ taˍ ve je‸ meu-e hta‸ hpi baˬ taˉ-oˆ. 15 Ngaˬ nawˬ hui hta‸ awˬ tehˬ awˬ na k'oˆ laˇ ve, suhˉ jehˬ ve awˬ nyi htaˇ, venˇ oˇ ve lehˬ Sawˉdonˍ leh Gawˇmawˇra‸ mvuhˇ miˬ a‸ kehˉ g'a hkanˍ tuˬ yoˬ. 16 Nawˬ hui yawˬ hk'e hpeh‸ leh, veˬ awˬ moˍ awˬ hk'aw lo ngaˬ nawˬ hui hta‸ k'ai tcuh ve yoˬ. Hk'e te leh, vuiˬ hk'a shuˍ shuˍ, cuˇ yiˍ cawˬ leh, aˉ pui k'aˍ hk'a shuˍ shuˍ, shu hta‸ maˇ ya‸ puiˉ ve chaw hpeh‸ piˇ-oˆ. 17 Chaw yaˇ teˇ hpaˍ hta‸ shaˍ ti‸ te-o. Awˬ lawn k'o, yawˇ hui lehˬ, jehˬ shehˍ hpaˇ awˬ moˍ mehˆ g'uˇ suhˍ nawˬ hui hta‸ chiˇ a‸ piˇ leh, yawˇ hui ve bon yehˬ teˇ hpaˍ awˬ hk'aw lo nawˬ hui hta‸ jaw‸ tuˬ yoˬ. 18 Ngaˬ hta‸ pa taw, nawˬ hui hta‸ mvuhˇ miˬ jawˇ mawˇ lonˉ leh hkunˉ hawˉ hkanˇ teˇ hpaˍ mehˆ g'uˇ suhˍ shu yuˬ k'ai tuˬ yoˬ. Yawˇ hui mehˆ g'uˆ suhˍ leh buiˇ shaˆ aˉ naˆ chaw hui mehˆ g'uˇ suhˍ nawˬ hui shaˉ hkiˆ hpeh‸ tuˬ yoˬ. 19 Shu nawˬ hui hta‸ chiˇ a‸ piˇ ve teˇ yanˇ, nawˬ hui hk'aˬ hk'e g'a k'oˆ g'a yaw tuˬ taˇ dawˇ hkiˉ. Awˬ yanˇ oˇ ve awˬ hk'aw lo hk'aˬ hk'e g'a k'oˆ tuˬ ve hta‸ nawˬ hui shiˍ tuˬ yoˬ. 20 Awˬ lawn k'o, tawˇ yaw shehˍ hpaˇ lehˬ nawˬ hui maˇ heˆ. Nawˬ hui Awˬ pa ve Awˬ ha hpu lehˬ, nawˬ hui awˬ hk'aw lo tawˇ yaw tuˬ yoˬ. 21 Awˬ viˉ awˬ nyi teˇ g'aˇ leh teˇ g'aˇ suh tuˬ chiˇ a‸ da‸ tuˬ yoˬ. Awˬ pa htawˇ, a shu yawˇ ve yaˇ hta‸ chiˇ a‸ tuˬ yoˬ. Yaˇ paˍ yaˇ miˇ teˇ hpaˍ htawˇ, a shu yawˇ ve awˬ pa awˬ e hta‸ hpfuhˆ leh tiˇ pehˍ tcuh tuˬ yoˬ. 22 Ngaˬ ve awˬ meh hta‸ pa taw, chaw hk'a peu-eˬ nawˬ hui hta‸ canˇ tuˬ yoˬ. Ya‸ hk'aˇ, awˬ leh hk'a gaˬ yeˬ chehˇ ve chaw lehˬ, htaiˍ hk'aw‸ ve hta‸ g'a tuˬ yoˬ. 23 Venˇ teˇ venˇ awˬ hk'aw lo shu nawˬ hui hta‸ fawˉ mehˍ ve k'o, awˬ kaˍ awˬ nu teˇ venˇ lo hpaw-e loˬ. Ngaˬ nawˬ hui hta‸ awˬ tehˬ awˬ na k'oˆ laˇ ve, Iˉsaˍreˍlaˆ venˇ teˇ hpaˍ lo nawˬ hui ca toˇ maˇ zuhˇ sheˍ htaˇ ka‸, chaw yaˇ ve Yaˇ hpu gaˬ la tuˬ yoˬ. 24 Awˬ la‸ g'awˇ lehˬ, yawˇ ve saˍ la‸ a‸ kehˉ uiˍ ve maˇ heˆ. Awˬ ceˬ htawˇ, yawˇ ve awˬ shehˍ hpaˇ a‸ kehˉ uiˍ ve maˇ heˆ. 25 Awˬ la‸ g'awˇ lehˬ, yawˇ ve saˍ la‸ hk'a shuˍ shuˍ hpeh‸ leh, awˬ ceˬ htawˇ yawˇ ve awˬ shehˍ hpaˇ hk'a shuˍ shuˍ hpeh‸ ve k'o, law‸ ve yoˬ. Yawˇ hui lehˬ, yehˬ shehˍ hpaˇ hta‸ Beˍsaˍbuˇlaˆ teh‸ k'oˆ ve k'o, yawˇ ve yehˬ yaˇ k'a yaˇ hui hta‸ chi a‸ kehˉ leuˉ leh k'oˆ tuˬ yoˬ, maˇ heˆ laˇ. 26 Hk'e te leh, yawˇ hui hta‸ taˇ kawˆ. Awˬ lawn k'o, hk'a beh taˍ ve awˬ ceuˬ hk'a peu-eˬ maˇ hpeu‸ tawˆ la tuˬ ve teˇ ceuˬ ka‸ maˇ cawˬ. Hk'a faˉ taˍ ve awˬ ceuˬ hk'a peu-eˬ htawˇ, maˇ shiˍ la tuˬ ve teˇ ceuˬ ka‸ maˇ cawˬ. 27 Ngaˬ nawˬ hui hta‸ naˆ ho‸ k'uiˬ lo hto laˇ ve awˬ ceuˬ teˇ hpaˍ, awˬ g'euˆ ba kuiˬ lo k'aw‸ hto piˇ-oˆ. Nawˬ hui hta‸ a yehˉ yehˉ hto laˇ ve awˬ ceuˬ teˇ hpaˍ, yehˬ awˬ hk'oˆ lo taˆ-e leh kuˬ maˍ piˇ-oˆ. 28 Awˬ to hta‸ tiˇ pehˍ g'a ve htawˇ, co ha hta‸ tiˇ pehˍ maˇ g'a ve pa taw, chaw yaˇ hui hta‸ taˇ kawˆ. Ya‸ hk'aˇ, co ha hta‸ ka‸ awˬ to hta‸ ka‸ moˬ naˆ ho‸ awˬ hk'aw lo te luˬ g'a shehˍ hpaˇ hta‸ kawˆ loˬ. 29 Jaˍ meuˇ nyiˇ hkeh hta‸ peh‸ shanˍ teˇ peh‸ hawˇ ve maˇ heˆ laˇ. Nawˬ hui ve Awˬ pa a loˍ maˇ cawˬ k'o, teˇ hkeh ka‸ miˬ guiˬ hk'oˆ lo maˇ ce. 30 Nawˬ hui ve uˉ hkeh mvuh hk'a peu-eˬ hta‸ htawˇ g'aw nyi taˍ peuˬ. 31 Hk'e te leh, taˇ kawˆ. Jaˍ meuˇ teˇ hpaˍ a‸ kehˉ nawˬ hui awˬ hpfuhˇ hk'aˆ jaˇ ve yoˬ. 32 Hk'aˬ ve chaw teˇ g'aˇ maˇ k'oˆ, chaw yaˇ mehˆ g'uˇ suhˍ ngaˬ hta‸ hkanˍ yuˬ ve k'o, mvuhˇ naw ma hk'oˆ lo chehˇ ve ngaˬ ve Awˬ pa mehˆ g'uˇ suhˍ ngaˬ htawˇ yawˇ hta‸ hkanˍ yuˬ tuˬ yoˬ. 33 Hk'aˬ ve chaw teˇ g'aˇ maˇ k'oˆ, chaw yaˇ mehˆ g'uˇ suhˍ ngaˬ hta‸ chiˇ baˬ ve k'o, mvuhˇ naw ma hk'oˆ lo chehˇ ve ngaˬ ve Awˬ pa mehˆ g'uˇ suhˍ ngaˬ htawˇ yawˇ hta‸ chiˇ baˬ tuˬ yoˬ. 34 Miˬ guiˬ hk'oˆ lo cawˇ da‸ hui da‸ te tuˬ awˬ pon ngaˬ laˬ ve teh‸ taˇ dawˇ. Cawˇ da‸ hui da‸ te tuˬ awˬ pon ngaˬ laˬ ve maˇ heˆ. Aˉ htaw hta‸ ngaˬ yuˬ laˬ ve yoˬ. 35 Awˬ lawn k'o, yaˇ paˍ leh yawˇ ve awˬ pa, yaˇ miˇ leh yawˇ ve awˬ e, awˬ hkuiˇ ma leh yawˇ ve awˬ pi, teˇ g'aˇ leh teˇ g'aˇ maˇ cawˇ maˇ hawˍ da‸ tuˬ ngaˬ laˬ ve yoˬ. 36 A shu yawˇ ve canˇ paˍ lehˬ, a shu yawˇ ve yehˬ yaˇ k'a yaˇ teˇ hpaˍ hpeh‸ tuˬ yoˬ. 37 Ngaˬ hta‸ ha‸ ve a‸ kehˉ awˬ pa awˬ e hta‸ ha‸ ve chaw teˇ g'aˇ lehˬ, ngaˬ hta‸ maˇ keunˍ. Ngaˬ hta‸ ha‸ ve a‸ kehˉ yaˇ paˍ yaˇ miˇ hta‸ ha‸ ve chaw teˇ g'aˇ lehˬ, ngaˬ hta‸ maˇ keunˍ. 38 A shu yawˇ ve la‸ ka hta‸ taˆ leh ngaˬ hk'aˇ suh maˇ laˬ ve chaw teˇ g'aˇ lehˬ, ngaˬ hta‸ maˇ keunˍ. 39 A shu yawˇ ve a sha‸ hta‸ g'a ve chaw teˇ g'aˇ lehˬ, a sha‸ shonˇ tuˬ yoˬ. Ngaˬ awˬ pon a shu yawˇ ve a sha‸ hta‸ shonˇ ve chaw teˇ g'aˇ lehˬ, a sha‸ hta‸ k'aw‸ g'a tuˬ yoˬ. 40 Nawˬ hui hta‸ ha‸ yuˬ ve chaw lehˬ, ngaˬ hta‸ ha‸ yuˬ ve yoˬ. Peuˬ leh, ngaˬ hta‸ ha‸ yuˬ ve chaw lehˬ, ngaˬ hta‸ peu laˇ shehˍ hpaˇ hta‸ ha‸ yuˬ ve yoˬ. 41 Chaw teˇ g'aˇ G'uiˬ sha ve tcuh kaˍ paˍ hpeh‸ ve hta‸ pa taw, shu yawˇ hta‸ ha‸ yuˬ ve k'o, ha‸ yuˬ shehˍ hpaˇ htawˇ tcuh kaˍ paˍ hk'a shuˍ shuˍ awˬ bon g'a tuˬ yoˬ. Chaw teˇ g'aˇ hteˇ ve cawˇ ve chaw hpeh‸ ve hta‸ pa taw shu yawˇ hta‸ ha‸ yuˬ ve k'o, ha‸ yuˬ shehˍ hpaˇ hteˇ ve cawˇ ve chaw teˇ g'aˇ hk'a shuˍ shuˍ awˬ bon g'a tuˬ yoˬ. 42 I ve chaw chi teˇ hpaˍ lehˬ, awˬ la‸ g'awˇ hpeh‸ ve hta‸ pa taw, hk'aˬ ve chaw teˇ g'aˇ htawˇ maˇ k'oˆ, yawˇ hui teˇ g'aˇ g'aˇ hta‸ iˉ kaˆ gawˬ teˇ kawˆ taw piˇ ve k'o, taw piˇ shehˍ hpaˇ lehˬ, awˬ bon a ciˉ ka‸ maˇ mehˉ taˬ teh‸ ngaˬ nawˬ hui hta‸ awˬ tehˬ awˬ na k'oˆ laˇ ve yoˬ teh‸, Yeˍsuˆ k'oˆ ve.

Ma‸htehˍ 11

1 Yeˍsuˆ lehˬ yawˇ ve awˬ la‸ g'awˇ teˇ chi nyiˇ g'aˇ hta‸ maˍ piˇ peuˬ hk'aw‸ nawˉ, venˇ hk'aˆ teˇ hpaˍ awˬ hk'aw lo ca maˍ piˇ tuˬ leh bon maˍ tuˬ, yawˇ htawˇ oˇ kaˬ lo tawˆ k'ai ve yoˬ. 2 Yoˇhanˬ lehˬ htawnˍ hk'aw chehˇ ve teˇ yanˇ, Hkri‸ te ve kanˉ teˇ hpaˍ awˬ lawn hta‸ g'a kaˇ ve yoˬ. Yawˇ ve awˬ la‸ g'awˇ teˇ hpaˍ hta‸ k'ai tcuh leh, 3 Nawˬ lehˬ, laˬ tuˬ ve chaw teˇ g'aˇ yoˬ laˇ. Maˇ heˆ k'o, awˬ kaˍ awˬ nu teˇ g'aˇ hta‸ ngaˬ hui g'a dawˇ law tuˬ sheˍ laˇ teh‸, yawˇ hta‸ na nyi tcuh ve yoˬ. 4 Yeˍsuˆ yawˇ hui hta‸ k'aw‸ k'oˆ piˇ ve, Nawˬ hui hk'a g'a kaˇ hk'a g'a mawˬ ve teˇ hpaˍ Yoˇhanˬ hta‸ ca hto piˇ-oˆ. 5 Mehˆ cuˉ ve chaw hui mehˆ mawˬ la ve, hkui luˬ ve chaw hui ya‸ k'aw juˇ k'ai ve, hkiˬ tu‸ keuˆ ve chaw hui da‸ la kehˬ la ve, naˍ paw pawˇ ve chaw hui naˍ paw kaˇ la ve, suh ve chaw hui k'aw‸ te‸ tu la ve leh, haˍ ve g'awˇ ve chaw hui htawˇ ha lehˬ ve bon hkawˇ hta‸ g'a kaˇ ve yoˬ. 6 Ngaˬ hta‸ nyi ma maˇ luˬ ve chaw lehˬ, awˬ bon uiˍ ve yoˬ teh‸ k'oˆ piˇ ve yoˬ. 7 Yoˇhanˬ ve awˬ la‸ g'awˇ teˇ hpaˍ k'o‸-e chehˇ htaˇ, Yeˍsuˆ lehˬ Yoˇhanˬ ve awˬ lawn chaw awˬ moˍ lonˉ teˇ hpaˍ hta‸ k'oˆ piˇ ve, Nawˬ hui aˬ hto‸ ma hta‸ ca nyi tuˬ heh puiˉ hk'aw lo k'ai ve le. Mvuhˇ haw meuˆ leh hiˆ hiˆ naˇ naˇ te chehˇ ve lo cehˬ hta‸ laˇ. 8 Maˇ heˆ k'o, aˬ hto‸ ma hta‸ ca nyi tuˬ k'ai ve le. Nuˇ lehˍ ve veu‸ k'aˇ veu‸ deh ve chaw hta‸ laˇ. Nuˇ lehˍ ve veu‸ k'aˇ veu‸ deh ve chaw hui lehˬ, hkunˉ hawˉ hkanˇ ve hawˉ yehˬ awˬ hk'aw lo chehˇ ve yoˬ. 9 Maˇ heˆ k'o, aˬ hto‸ ma hta‸ ca nyi tuˬ k'ai ve le. G'uiˬ sha ve tcuh kaˍ paˍ hta‸ laˇ. Yoˬ, G'uiˬ sha ve tcuh kaˍ paˍ hta‸ ca nyi ve yoˬ. Yawˇ lehˬ, G'uiˬ sha ve tcuh kaˍ paˍ teˇ hpaˍ a‸ kehˉ uiˍ ve chaw teˇ g'aˇ hpeh‸ ve yoˬ teh‸, ngaˬ nawˬ hui hta‸ k'oˆ laˇ ve yoˬ. 10 Nyi loˬ. Nawˬ awˬ g'uˇ suhˍ lo nawˬ ve ya‸ k'aw hta‸ gu tuˬ ngaˬ ve tcuh yaˇ hta‸ nawˬ mehˆ g'uˇ suhˍ lo ngaˬ k'ai tcuh ve yoˬ, teh‸ bvuh‸ taˍ ve lehˬ, yawˇ hta‸ k'oˆ ve yoˬ. 11 Ngaˬ nawˬ hui hta‸ awˬ tehˬ awˬ na k'oˆ laˇ ve, yaˇ miˇ geh hk'a paw la ve chaw hui awˬ hk'aw lo, baˆtiˆsaˬ piˇ paˍ Yoˇhanˬ a‸ kehˉ uiˍ ve chaw teˇ g'aˇ ka‸ maˇ tawˆ la jaw. Ya‸ hk'aˇ, mvuhˇ naw ma mvuhˇ miˬ awˬ hk'aw lo shu a‸ kehˉ i ve chaw teˇ g'aˇ lehˬ, yawˇ a‸ kehˉ uiˍ sheˍ ve yoˬ. 12 Baˆtiˆsaˬ piˇ paˍ Yoˇhanˬ kanˉ te ve awˬ nyi teˇ hpaˍ hta‸ tanˬ leh ya‸ nyi hk'a gaˬ, mvuhˇ naw ma ve mvuhˇ miˬ lehˬ hiˉ yuˬ ve hta‸ g'a hkanˍ ve yoˬ. Hiˉ yuˬ ve chaw teˇ hpaˍ lehˬ, g'aˇ hte‸ buiˆ da‸ leh lo‸-e chehˇ ve yoˬ. 13 Awˬ lawn k'o, G'uiˬ sha ve tcuh kaˍ paˍ hk'a peu-eˬ leh awˬ liˇ tawˇ hkawˇ li‸ lehˬ, Yoˇhanˬ ve awˬ co-e hk'a gaˬ hto piˇ maˍ piˇ ve yoˬ. 14 Nawˬ hui na yuˬ gaˇ ve k'o, chaw chi lehˬ laˬ tuˬ ve Eˇliˇya‸ hpeh‸ ve yoˬ. 15 Kaˇ tuˬ naˍ paw cawˬ ve chaw hk'a deh‸ na-o. 16 Chaw chi teˇ co-e hta‸ aˬ hto‸ ma yuˬ leh g'a tehˆ maˍ tuˬ le. 17 Chaw chi teˇ co-e lehˬ, Nawˬ hui awˬ pon ngaˬ hui nawˍ meuˆ htawˇ nawˬ hui k'aˍ maˇ hk'eˆ. Ngaˬ hui paˆ hawˬ ve htawˇ nawˬ hui maˇ dawˇ haˍ, teh‸ tcuh hk'aw mui taˍ leh awˬ chawˇ chawˇ hta‸ kuˬ leh k'oˆ chehˇ ve yaˇ ehˉ teˇ hpaˍ hta‸ shuˍ ve yoˬ. 18 Awˬ lawn k'o, Yoˇhanˬ laˬ leh, maˇ caˇ maˇ dawˬ ve pa taw, Yawˇ lehˬ neˇ geh ve chaw yoˬ teh‸ shu k'oˆ ve yoˬ. 19 Chaw yaˇ ve Yaˇ hpu laˬ leh caˇ ve dawˬ ve pa taw, Chaw chi lehˬ, caˇ leuˉ dawˬ leuˉ ve chaw, a pehˉ meuˇ g'uiˬ dawˬ ponˬ dawˬ leuˉ ve chaw, awˬ hkawnˍ shaw paˍ leh venˇ baˆ yaˇ hui hta‸ awˬ chawˇ te ve chaw yoˬ teh‸ shu k'aw‸ k'oˆ ve yoˬ. Ya‸ hk'aˇ, cuˇ yiˍ maˍ yiˍ teˇ ceuˬ lehˬ, yawˇ te ve kanˉ teˇ hpaˍ awˬ hk'aw lo, hteˇ ve cawˇ ve hta‸ shu g'a shiˍ ve yoˬ teh‸, Yeˍsuˆ k'oˆ ve yoˬ. 20 Oˇ htaˇ, yawˇ kanˉ uiˍ ve maˇ maˇ te maˍ piˇ peuˬ ve venˇ teˇ hpaˍ lehˬ, yawˇ hui ve venˇ baˆ hta‸ maˇ dawˇ hpfuhˆ ve pa taw, Yeˍsuˆ yawˇ hui hta‸ deˇ maˍ leh k'oˆ ve, 21 Hkawˇraˍsenˍ venˇ -oˬ, nawˬ g'a dawˇ haˍ jaˇ tuˬ yoˬ. Behˇsehˇdaˆ venˇ -oˬ, nawˬ htawˇ g'a dawˇ haˍ jaˇ tuˬ yoˬ. Awˬ lawn k'o, nawˬ hui awˬ hk'aw lo te peuˬ ve kanˉ uiˍ ve teˇ hpaˍ lehˬ, Tuˇruˆ venˇ leh Siˉdonˍ venˇ awˬ hk'aw lo te ve hk'e k'o, yawˇ hui lehˬ aˬ sho-eˬ htaˇ ka‸ meh htuˉ pui hpa hta‸ veu‸ deh leh hk'aw‸ laˉ hkaˆ pfuhˍ ve awˬ hk'aw lo venˇ baˆ hta‸ dawˇ hpfuhˆ tuˬ yoˬ. 22 Ngaˬ nawˬ hui hta‸ k'oˆ laˇ ve, suhˉ jehˬ ve awˬ nyi htaˇ, nawˬ hui lehˬ Tuˇruˆ venˇ leh Siˉdonˍ venˇ a‸ kehˉ g'a hkanˍ tuˬ yoˬ. 23 Kaˍpeˍneˍonˍ venˇ-oˬ, nawˬ lehˬ mvuhˇ naw ma lo hk'a gaˬ chiˇ taˆ-e ve hta‸ g'a hkanˍ tuˬ teh‸ dawˇ ve laˇ. Nawˬ lehˬ, suh mvuhˇ miˬ hk'a gaˬ g'a ya‸-e tuˬ yoˬ. Awˬ lawn k'o, nawˬ awˬ hk'aw lo te peuˬ ve kanˉ uiˍ ve teˇ hpaˍ Sawˉdonˍ venˇ awˬ hk'aw lo te ve hk'e k'o, venˇ oˇ ve lehˬ ya‸ nyi hk'a gaˬ cawˬ tuˬ sheˍ ve yoˬ. 24 Ngaˬ nawˬ hui hta‸ k'oˆ laˇ ve, suhˉ jehˬ ve awˬ nyi htaˇ, nawˬ hui lehˬ Sawˉdonˍ mvuhˇ miˬ a‸ kehˉ g'a hkanˍ tuˬ yoˬ teh‸ k'oˆ ve yoˬ. 25 Oˇ ve teˇ yanˇ Yeˍsuˆ k'oˆ ve, Mvuhˇ naw ma miˬ naˆ ma hta‸ uˉ peunˍ shehˍ hpaˇ A pa-oˬ, cuˇ yiˍ maˍ yiˍ cawˬ ve chaw leh shiˍ puiˉ ve chaw hui hta‸ awˬ lawn chi teˇ hpaˍ nawˬ faˉ taˍ leh, yaˇ ehˉ teˇ hpaˍ hta‸ hpeu‸ maˍ piˇ ve pa taw, ngaˬ nawˬ hta‸ chiˇ mvuh ve yoˬ. 26 A pa-oˬ, chi lehˬ nawˬ a loˍ cawˇ ve yoˬ. 27 Ngaˬ ve Awˬ pa lehˬ, awˬ ceuˬ hk'a peu-eˬ ngaˬ hta‸ chiˇ a‸ laˇ peuˬ. Awˬ pa maˇ heˆ k'o, Yaˇ hpu hta‸ teˇ g'aˇ ka‸ maˇ shiˍ. Yaˇ hpu leh Yaˇ hpu hpeu‸ maˍ piˇ gaˇ ve chaw maˇ heˆ k'o, Awˬ pa hta‸ teˇ g'aˇ ka‸ maˇ shiˍ. 28 Kanˉ te heuˬ leh mawˇ pfuhˇ hawˇ ve chaw hk'a peu-eˬ ngaˬ geh laˬ-o‸. Ngaˬ nawˬ hui hta‸ g'aˇ jehˇ piˇ tuˬ yoˬ. 29 Ngaˬ ve taˆ tuˬ hta‸ taˆ leh ngaˬ geh henˇ yuˬ-o‸. Awˬ lawn k'o, ngaˬ lehˬ nyi ma nuˇ nuˇ nehˬ nehˬ cawˬ leh, nawˬ hui ve nyi ma htawˇ g'aˇ g'a jehˇ tuˬ yoˬ. 30 Awˬ lawn k'o, ngaˬ ve taˆ tuˬ taˆ sha leh, ngaˬ ve mawˇ htawˇ lawˬ ve yoˬ teh‸ k'oˆ ve yoˬ.

Ma‸htehˍ 12

1 Oˇ ve teˇ yanˇ, Yeˍsuˆ lehˬ shinˉ nyi htaˇ heh hk'aw hpanˍ k'ai ve yoˬ. Yawˇ ve awˬ la‸ g'awˇ teˇ hpaˍ awˍ meu‸ leh caˬ nu chehˆ caˇ ve yoˬ. 2 Hpaˍriˍsehˇ teˇ hpaˍ mawˬ leh, Nyi-o, shinˉ nyi awˬ hk'aw lo te maˇ keunˍ te maˇ cawˇ ve awˬ ceuˬ hta‸ nawˬ ve awˬ la‸ g'awˇ teˇ hpaˍ te chehˇ ve law teh‸, yawˇ hui yawˇ hta‸ k'oˆ piˇ ve yoˬ. 3 Yeˍsuˆ yawˇ hui hta‸ k'aw‸ k'oˆ piˇ ve, Daˍviˆ leh yawˇ ve awˬ chawˇ teˇ hpaˍ awˍ meu‸ ve teˇ yanˇ, yawˇ hui hk'aˬ hk'e te ve awˬ lawn hta‸ nawˬ hui maˇ g'aw jaw leh laˇ. 4 Yawˇ lehˬ G'uiˬ sha ve yehˬ awˬ hk'aw lo lo‸-e leh, yawˇ awˬ to ka‸ yawˇ ve awˬ chawˇ teˇ hpaˍ ka‸ caˇ maˇ keunˍ caˇ maˇ cawˇ ve, paw hkuˇ teˇ hpaˍ ceh tiˉ caˇ keunˍ caˇ cawˇ ve tanˇ taˍ ve hkaoˍ monˇ hta‸ caˇ ve maˇ heˆ laˇ. 5 Peuˬ leh, shinˉ nyi htaˇ bon yehˬ lonˉ awˬ hk'aw lo paw hkuˇ teˇ hpaˍ shinˉ nyi ve awˬ liˇ hta‸ te ya‸ ve htawˇ, yawˇ hui venˇ baˆ maˇ cawˬ ve awˬ lawn hta‸ awˬ liˇ tawˇ hkawˇ awˬ hk'aw lo nawˬ hui maˇ g'aw jaw laˇ. 6 Ngaˬ nawˬ hui hta‸ k'oˆ laˇ ve, bon yehˬ lonˉ a‸ kehˉ uiˍ ve teˇ g'aˇ choˬ kaˬ chehˇ taˍ ve yoˬ. 7 Tanˇ tuˬ hta‸ ngaˬ heuˆ gaˇ ve maˇ heˆ. Ha k'aˉ ve teˇ ceuˬ hta‸ ngaˬ heuˆ gaˇ ve yoˬ teh‸ k'oˆ taˍ ve tawˇ hkawˇ hta‸ nawˬ hui shiˍ ve hk'e k'o, venˇ baˆ maˇ cawˬ ve chaw hta‸ nawˬ hui venˇ baˆ taˍ tuˬ maˇ heˆ. 8 Awˬ lawn k'o, chaw yaˇ ve Yaˇ hpu lehˬ, shinˉ nyi ve awˬ jawˇ mawˇ hpeh‸ ve yoˬ teh‸ k'oˆ piˇ ve yoˬ. 9 Yawˇ oˇ kaˬ lo tawˆ k'ai leh yawˇ hui ve bon yehˬ awˬ hk'aw lo lo‸-e ve yoˬ. 10 Oˇ kaˬ lo la‸ sheh teˇ paˉ suh ve chaw teˇ g'aˇ cawˬ ve yoˬ. Yawˇ hui Yeˍsuˆ hta‸ venˇ baˆ taˍ tuˬ, Shinˉ nyi awˬ hk'aw lo shu hta‸ gu na-e piˇ cawˇ laˇ teh‸, yawˇ hui yawˇ hta‸ na nyi ve yoˬ. 11 Yawˇ yawˇ hui hta‸ k'aw‸ k'oˆ piˇ ve. Nawˬ hui awˬ hk'aw lo chaw teˇ g'aˇ g'aˇ yawˬ teˇ hkeh tiˉ cawˬ leh, shinˉ nyi htaˇ yawˬ oˇ ve teˇ hkeh miˬ k'oˍ hk'aw ce lo‸-e ve k'o, maˇ yuˬ tawˆ ve chaw teˇ g'aˇ g'aˇ cawˬ laˇ. 12 Chaw yaˇ lehˬ, yawˬ a‸ kehˉ hk'aˬ ma awˬ hpfuhˇ hk'aˆ ve le. Hk'e te leh, shinˉ nyi htaˇ da‸ ve awˬ ceuˬ hta‸ te cawˇ ve yoˬ teh‸, yawˇ k'oˆ piˇ ve yoˬ. 13 Oˇ htaˇ, chaw oˇ ve hta‸, Nawˬ ve la‸ sheh che hk'a teh‸, yawˇ k'oˆ piˇ ve yoˬ. Chaw oˇ ve la‸ sheh che ve teˇ yanˇ k'aw‸ da‸ la leh, awˬ nu ve teˇ paˉ hk'a shuˍ shuˍ hpeh‸ la ve yoˬ. 14 Oˇ htaˇ, Hpaˍriˍsehˇ teˇ hpaˍ tawˆ k'ai leh, Yeˍsuˆ hta‸ hk'aˬ hk'e te leh g'a tiˇ pehˍ tuˬ jehˬ da‸ ve yoˬ. 15 Awˬ lawn chi hta‸ Yeˍsuˆ g'a shiˍ htaˇ, yawˇ oˇ kaˬ lo tawˆ k'ai ve yoˬ. Chaw maˇ maˇ yawˇ awˬ hk'aˇ suh k'ai leh, yawˇ hui hk'a peu-eˬ hta‸ yawˇ gu na-e piˇ ve yoˬ. 16 Yawˇ ve awˬ lawn shu hta‸ maˇ g'a k'aoˍ piˇ tuˬ, yawˇ hui hta‸ yawˇ tawˇ hk'a deh‸ piˇ taˍ ve yoˬ. 17 Awˬ lawn chi lehˬ, tcuh kaˍ paˍ Iˉsaˍyaˆ k'oˆ taˍ ve tawˇ teˇ hkawˇ biˇ la tuˬ awˬ pon yoˬ. Yawˇ k'oˆ taˍ ve tawˇ hkawˇ lehˬ, 18 Ngaˬ leuˆ yuˬ taˍ ve ngaˬ ve awˬ ceˬ teˇ g'aˇ hta‸ nyi-o. Yawˇ hta‸ ngaˬ nyi hk'aˇ suh leh ha‸ jaˇ ve yoˬ. Ngaˬ ve Awˬ ha hpu yawˇ awˬ hk'oˆ hta‸ ngaˬ chehˇ piˇ leh, suhˉ jehˬ ve awˬ lawn buiˇ shaˆ aˉ naˆ chaw hui hta‸ yawˇ k'aoˍ maˍ piˇ tuˬ yoˬ. 19 Tawˇ g'awˬ da‸ ve maˇ k'oˆ, kuˬ ve maˇ k'oˆ, yawˇ maˇ te. Ya‸ k'aw k'aˉ lo yawˇ ve awˬ hkawˇ hta‸ chaw teˇ g'aˇ ka‸ maˇ g'a kaˇ 20 Suhˉ jehˬ ve awˬ liˇ hta‸ g'aˇ kuiˬ lo yawˇ maˇ gaˬ tcuh sheˍ ve ceh ceh, hteh k'aˉ taˍ ve lo cehˬ hta‸ yawˇ maˇ te cheˆ. Kawˆ faiˇ awˬ caˆ mvuhˇ hk'awˇ du du te to‸ chehˇ ve hta‸ yawˇ maˇ shiˉ. 21 Yawˇ ve awˬ meh awˬ hk'aw lo buiˇ shaˆ aˉ naˆ chaw hui dawˇ law tuˬ yoˬ, teh‸ k'oˆ taˍ ve yoˬ. 22 Oˇ htaˇ neˇ geh taˍ ve, mehˆ cuˉ leh k'aˍ ve chaw teˇ g'aˇ hta‸ shu yawˇ geh yuˬ laˬ ve yoˬ. Yawˇ chaw k'aˍ oˇ ve hta‸ gu na-e piˇ ve pa taw, chaw k'aˍ oˇ ve tawˇ yaw g'a la leh, mehˆ mawˬ la ve yoˬ. 23 Oˇ htaˇ chaw awˬ moˍ lonˉ teˇ hpaˍ anˇ jaˇ leh, Chi lehˬ Daˍviˆ ve Yaˇ hpu leh naˍ leˇ teh‸ k'oˆ da‸ ve yoˬ. 24 Hpaˍriˍsehˇ teˇ hpaˍ g'a kaˇ htaˇ, Chaw chi lehˬ, neˇ jawˇ mawˇ Beˍsaˍbuˇlaˆ hta‸ g'aˇ va ve awˬ hk'aw lo ceh tiˉ neˇ teˇ hpaˍ hta‸ g'a‸ k'oˬ ve yoˬ teh‸ k'oˆ ve yoˬ. 25 Yawˇ hui dawˇ chehˇ ve hta‸ yawˇ shiˍ ve pa taw, yawˇ hui hta‸ k'oˆ piˇ ve, Maˇ cawˇ maˇ hawˍ da‸ ve mvuhˇ miˬ teˇ peˆ le le luˬ k'ai sheˆ k'ai tuˬ yoˬ. Maˇ cawˇ maˇ hawˍ da‸ ve venˇ maˇ k'oˆ, yehˬ maˇ k'oˆ, yeˬ chehˇ hpeh‸ tuˬ ve maˇ heˆ. 26 Saˍtanˍ lehˬ, Saˍtanˍ hta‸ g'a‸ k'oˬ ve k'o, yawˇ awˬ to hta‸ hpaˆ da‸ tuˬ te ve yoˬ. Hk'e te leh, yawˇ ve mvuhˇ miˬ hk'aˬ hk'e te yeˬ hpeh‸ tuˬ le. 27 Ngaˬ lehˬ Beˍsaˍbuˇlaˆ hta‸ g'aˇ va leh neˇ teˇ hpaˍ hta‸ g'a‸ k'oˬ ve hk'e k'o, nawˬ hui ve yaˇ paˍ teˇ hpaˍ lehˬ, a shu hta‸ g'aˇ va leh g'a‸ k'oˬ ve le. Hk'e te leh, yawˇ hui lehˬ nawˬ hui ve suhˉ jehˬ shehˍ hpaˇ hpeh‸ tuˬ yoˬ. 28 Ya‸ hk'aˇ, ngaˬ lehˬ G'uiˬ sha ve Awˬ ha hpu hta‸ g'aˇ va leh neˇ teˇ hpaˍ hta‸ g'a‸ k'oˬ ve k'o, G'uiˬ sha ve mvuhˇ miˬ nawˬ hui geh gaˬ la peuˬ. 29 Awˬ g'aˇ uiˍ ve chaw teˇ g'aˇ hta‸ awˉ lawˉ maˇ hpeh tiˍ taˍ ve k'o, yawˇ ve aˉ hk'aw lo lo‸-e leh yawˇ ve mawˇ jeˬ hta‸ a shu hiˉ yuˬ g'a tuˬ le. Awˬ g'aˇ uiˍ ve chaw hta‸ hpeh tiˍ taˍ peuˬ htaˇ heh‸, yawˇ ve aˉ hk'aw lo lo‸-e leh mawˇ jeˬ hta‸ hiˉ yuˬ g'a tuˬ yoˬ. 30 Ngaˬ hpawˇ maˇ chehˇ ve chaw lehˬ, ngaˬ ve canˇ paˍ hpawˇ chehˇ ve yoˬ. Ngaˬ geh teˇ geh maˇ g'awˆ hpoˆ ve chaw lehˬ, g'awˆ baˬ ve chaw hpeh‸ ve yoˬ. 31 Hk'e te leh, ngaˬ nawˬ hui hta‸ k'oˆ laˇ ve, chaw yaˇ hui te ve venˇ baˆ teˇ ceuˬ le le leh maˇ shawˍ maˇ caˆ k'oˆ ve teˇ ceuˬ le le hta‸ hpehˇ piˇ tuˬ yoˬ. Ya‸ hk'aˇ, Awˬ ha hpu hta‸ maˇ shawˍ maˇ caˆ k'oˆ ve teˇ ceuˬ hta‸ hpehˇ piˇ tuˬ maˇ heˆ. 32 Chaw yaˇ ve Yaˇ hpu hta‸ yaw ya‸ ve chaw hk'aˬ ve teˇ g'aˇ maˇ k'oˆ, yawˇ ve venˇ baˆ hta‸ hpehˇ piˇ hpeh‸ ve yoˬ. Ya‸ hk'aˇ, da‸ ve kehˬ ve Awˬ ha hpu hta‸ yaw ya‸ ve chaw hk'aˬ ve teˇ g'aˇ maˇ k'oˆ, chi teˇ ca‸ na‸ ka‸, awˬ hk'aw‸ nawˉ teˇ ca‸ na‸ ka‸, yawˇ ve venˇ baˆ hta‸ hpehˇ piˇ maˇ hpeh‸. 33 Awˬ cehˬ da‸ ve k'o, awˬ shiˍ htawˇ da‸ ve yoˬ teh‸ k'oˆ loˬ. Maˇ heˆ k'o, awˬ cehˬ maˇ da‸ ve k'o, awˬ shiˍ htawˇ maˇ da‸ ve teh‸ k'oˆ loˬ. Awˬ lawn k'o, awˬ shiˍ hta‸ pa taw awˬ cehˬ hta‸ shiˍ hpeh‸ ve yoˬ. 34 Vuiˬ haiˬ awˬ ceuˬ teˇ hpaˍ-oˬ, nawˬ hui chaw haiˬ hpeh‸ ve pa taw da‸ ve tawˇ hk'aˬ hk'e te yaw hpeh‸ le. Awˬ lawn k'o, nyi ma awˬ hk'aw lo hk'a biˇ cawˬ ve hk'e, maw‸ k'aw yaw tawˆ la ve yoˬ. 35 Da‸ ve chaw lehˬ, a shu yawˇ da‸ ve awˬ ceuˬ doˆ taˍ kuiˬ awˬ hk'aw lo da‸ ve awˬ ceuˬ hta‸ yuˬ tawˆ la ve yoˬ. Haiˬ ve chaw lehˬ, a shu yawˇ haiˬ ve awˬ ceuˬ doˆ taˍ kuiˬ awˬ hk'aw lo haiˬ ve awˬ ceuˬ hta‸ yuˬ tawˆ la ve yoˬ. 36 Ngaˬ nawˬ hui hta‸ k'oˆ laˇ ve, suhˉ jehˬ ve awˬ nyi htaˇ chaw yaˇ lehˬ, awˬ bon maˇ cawˬ ve tawˇ hk'a yaw ve teˇ hpaˍ awˬ lawn g'a k'aw‸ k'aoˍ maˍ piˇ tuˬ yoˬ. 37 Awˬ lawn k'o, nawˬ ve tawˇ hkawˇ hta‸ pa taw, nawˬ venˇ baˆ taˍ ve hta‸ g'a ponˬ tuˬ yoˬ. Peuˬ leh, nawˬ ve tawˇ hkawˇ hta‸ pa taw, nawˬ ciˍ yanˍ ve hta‸ g'a hkanˍ tuˬ yoˬ. 38 Oˇ htaˇ, li‸ bvuh‸ paˍ leh Hpaˍriˍsehˇ teˇ hpaˍ hpaˍ lehˬ, Saˍ la‸-oˬ, nawˬ te maˍ laˇ ve awˬ heˆ teˇ ceuˬ ceuˬ hta‸ ngaˬ hui mawˬ gaˇ ve yoˬ teh‸ yawˇ hta‸ k'oˆ piˇ ve yoˬ. 39 Yawˇ yawˇ hui hta‸ k'aw‸ k'oˆ piˇ ve, Haiˬ leh te ya‸ puiˉ ve chaw chi teˇ co lehˬ, awˬ heˆ hta‸ lawˬ ve yoˬ. Tcuh kaˍ paˍ Yoˇnaˆ ve awˬ heˆ maˇ heˆ k'o, awˬ kaˍ awˬ nu awˬ heˆ teˇ ceuˬ ka‸ chaw chi teˇ co hta‸ maˇ maˍ piˇ. 40 Yoˇnaˆ lehˬ, ngaˇ lonˉ g'oˇ peˬ awˬ hk'aw lo shehˆ nyi shehˆ haˉ g'a chehˇ ve hk'a shuˍ shuˍ, chaw yaˇ ve Yaˇ hpu htawˇ miˬ k'oˍ hk'aw lo shehˆ nyi shehˆ haˉ g'a chehˇ tuˬ yoˬ. 41 Suhˉ jehˬ ve awˬ nyi htaˇ, Niˇnaˍveˍ venˇ yaˇ hui lehˬ, chaw chi teˇ co geh teˇ geh tu la leh, chaw chi teˇ co hta‸ suhˉ taˆ tuˬ yoˬ. Awˬ lawn k'o, Yoˇnaˆ bon maˍ ve hta‸ pa taw yawˇ hui a shu yawˇ ve venˇ baˆ hta‸ dawˇ hpfuhˆ ve yo‸. Nyi loˬ, choˬ kaˬ lo Yoˇnaˆ a‸ kehˉ uiˍ ve teˇ g'aˇ chehˇ taˍ ve yo‸. 42 Suhˉ jehˬ ve awˬ nyi htaˇ, awˬ hawˉ hpawˇ mvuhˇ miˬ ve nanˇ hawˉ hkanˇ ma htawˇ, chaw chi teˇ co geh teˇ geh tu la leh, chaw chi teˇ co hta‸ suhˉ taˆ tuˬ yoˬ. Awˬ lawn k'o, yawˇ lehˬ Sawˉla‸monˍ ve cuˇ yiˍ tawˇ hkawˇ hta‸ na tuˬ, miˬ guiˬ awˬ leh meuˇ teˇ kaˬ lo tu leh laˬ ve yoˬ. Nyi loˬ, choˬ kaˬ lo Sawˉla‸monˍ a‸ kehˉ uiˍ ve teˇ g'aˇ chehˇ taˍ ve yoˬ. 43 Neˇ cha‸ chiˆ teˇ hkeh lehˬ, chaw teˇ g'aˇ awˬ hk'aw lo tawˆ k'ai peuˬ hk'aw‸ nawˉ, goˇ choˆ ve chehˇ kuiˬ teˇ hpaˍ awˬ hk'aw lo ca toˇ nyi leh, g'aˇ jehˇ kuiˬ hta‸ ca ve htawˇ, maˇ mawˬ. 44 Oˇ htaˇ yawˇ lehˬ, Ngaˬ tawˆ la ve ngaˬ ve yehˬ lo k'aw‸ k'o‸-e shaˍ teh‸ k'oˆ leh, yawˇ k'aw‸ gaˬ la ve teˇ yanˇ, yehˬ oˇ ve lehˬ k'awˇ lehˍ kehˬ lehˍ hk'a deh‸ gu shiˆ taˍ ve hta‸ yawˇ g'a mawˬ ve yoˬ. 45 Oˇ htaˇ, yawˇ k'ai leh yawˇ a‸ kehˉ haiˬ ve awˬ kaˍ awˬ nu neˇ suhˍ hkeh hta‸ kuˬ veu laˇ peuˬ hk'aw‸ nawˉ, yawˇ hui lo‸-e leh oˇ kaˬ lo chehˇ ve yoˬ. Hk'e te leh, chaw oˇ ve awˬ hk'aw‸ nawˉ hpeh‸ la ve lehˬ, awˉ lawˉ htaˇ hpeh‸ ve a‸ kehˉ leuˉ leh haiˬ ve yoˬ. Haiˬ ve chaw chi teˇ co htawˇ, oˇ ve hk'a shuˍ shuˍ hpeh‸ la tuˬ yoˬ teh‸, Yeˍsuˆ k'oˆ ve yoˬ. 46 Chaw awˬ moˍ lonˉ hta‸ yawˇ maˍ piˇ chehˇ htaˇ, yawˇ ve awˬ e leh awˬ nyi paˍ teˇ hpaˍ lehˬ, yawˇ hta‸ na‸ uˉ te da‸ gaˇ leh, awˬ baˬ hpawˇ lo huˉ taˍ ve yoˬ. 47 Hk'e te leh, chaw teˇ g'aˇ yawˇ hta‸ k'oˆ piˇ ve, Nawˬ ve awˬ e leh nawˬ ve awˬ nyi paˍ teˇ hpaˍ nawˬ hta‸ na‸ uˉ te da‸ gaˇ leh, awˬ baˬ hpawˇ lo huˉ taˍ ve yoˬ. 48 Yawˇ hta‸ tawˇ yaw laˇ ve chaw teˇ g'aˇ hta‸ yawˇ k'aw‸ k'oˆ piˇ ve, Ngaˬ ve awˬ e leh ngaˬ ve awˬ nyi paˍ teˇ hpaˍ a shu le teh‸ na nyi ve yoˬ. 49 Oˇ htaˇ, yawˇ ve awˬ la‸ g'awˇ teˇ hpaˍ hta‸ yawˇ beˆ leh k'oˆ ve, Ngaˬ ve awˬ e leh ngaˬ ve awˬ nyi paˍ teˇ hpaˍ hta‸ nyi loˬ. 50 Awˬ lawn k'o, mvuhˇ naw ma hk'oˆ chehˇ ve ngaˬ Awˬ pa ve a loˍ hta‸ hk'a te ve chaw hui lehˬ, ngaˬ ve awˬ nyi paˍ, ngaˬ ve awˬ nyi ma leh ngaˬ ve awˬ e hpeh‸ ve yoˬ teh‸ k'oˆ piˇ ve yoˬ.

Ma‸htehˍ 13

1 Oˇ ve teˇ nyi Yeˍsuˆ yehˬ oˇ ve awˬ hk'aw lo tawˆ k'ai leh g'uiˬ po paˇ lo ca mui taˍ ve yoˬ. 2 Chaw awˬ moˍ lonˉ teˇ hpaˍ yawˇ geh hpawnˬ la ve pa taw, yawˇ haw lo‸ k'oˍ hk'aw lo‸-e leh mui taˍ ve yoˬ. Chaw awˬ moˍ lonˉ hk'a peu-eˬ lehˬ, g'uiˬ pfuhˍ paˇ lo huˉ taˍ ve yoˬ. 3 Oˇ htaˇ, yawˇ tawˇ pa haˉ te leh, awˬ lawn laiˉ ceuˬ yawˇ hui hta‸ maˍ piˇ leh k'oˆ ve, Awˬ yawˇ sheˍ paˍ teˇ g'aˇ awˬ yawˇ ca sheˍ ve yoˬ. 4 Yawˇ sheˍ ve teˇ yanˇ, awˬ yawˇ teˇ hpaˍ hpaˍ ya‸ k'aw hpuiˇ lo ce leh, ngaˆ teˇ hpaˍ laˬ leh g'awˆ caˇ sheˬ ve yoˬ. 5 Awˬ yawˇ teˇ hpaˍ hpaˍ miˬ shaˍ paˇ kuiˬ haˉ pui de lo ce leh, miˬ shaˍ maˇ naˉ ve pa taw, teˇ cawˬ haˉ yeˬ la ve yoˬ. 6 Awˬ yeˬ oˇ ve teˇ hpaˍ awˬ geu maˇ naw‸ ve pa taw, mvuhˇ nyi tawˆ la htaˇ haw jaˇ chiˆ jaˇ leh, nawˍ k'ai goˇ k'ai ve yoˬ. 7 Awˬ yawˇ teˇ hpaˍ hpaˍ aˉ chuˇ de lo ce leh, aˉ chuˇ buiˇ teˇ hpaˍ uiˍ la leh awˬ yeˬ teˇ hpaˍ hta‸ hoˆ sheˬ ve yoˬ. 8 Awˬ yawˇ teˇ hpaˍ hpaˍ miˬ hkuiˇ da‸ kuiˬ lo ce leh awˬ shiˍ naw‸ la ve yoˬ. Teˇ hpaˍ hpaˍ teˇ ha pun, teˇ hpaˍ hpaˍ hkaw‸ chi pun leh, teˇ hpaˍ hpaˍ shehˆ chi pun naw‸ la ve yoˬ. 9 Naˍ paw cawˬ ve chaw hk'a deh‸ na-o teh‸ k'oˆ ve yoˬ. 10 Oˇ htaˇ awˬ la‸ g'awˇ teˇ hpaˍ yawˇ geh laˬ leh k'oˆ ve, Aˬ hto‸ ma pa taw chaw chi teˇ hpaˍ hta‸ nawˬ tawˇ pa haˉ te maˍ piˇ ve le teh‸ na nyi ve yoˬ. 11 Yawˇ yawˇ hui hta‸ k'aw‸ k'oˆ piˇ ve, Mvuhˇ naw ma mvuhˇ miˬ awˬ lawn faˉ taˍ ve awˬ ceuˬ teˇ hpaˍ hta‸ nawˬ hui shiˍ tuˬ a hkaw-anˬ cawˬ ve yoˬ. Ya‸ hk'aˇ, yawˇ hui lehˬ shiˍ tuˬ a hkaw-anˬ maˇ cawˬ. 12 Awˬ lawn k'o, cawˬ ve chaw hta‸ k'aw‸ htehˍ piˇ tuˬ leh yawˇ maˇ maˇ cawˬ la tuˬ yoˬ. Ya‸ hk'aˇ, maˇ cawˬ ve chaw geh yawˇ hk'a cawˬ ve teˇ hpaˍ hta‸ k'aw‸ yuˬ tawˆ sheˬ tuˬ yoˬ. 13 Hk'e te leh, yawˇ hui nyi ve ka‸ nyi maˇ mawˬ, kaˇ ve ka‸ na maˇ g'a ve awˬ hk'oˆ, maˇ shiˍ ve pa taw ngaˬ yawˇ hui hta‸ tawˇ pa haˉ te maˍ piˇ ve yoˬ. 14 Tcuh kaˍ paˍ Iˉsaˍyaˆ k'oˆ taˍ ve tawˇ hkawˇ yawˇ hui awˬ hk'aw lo biˇ la ve yoˬ. Yawˇ k'oˆ ve, Nawˬ hui g'a kaˇ ve htawˇ na maˇ g'a. Nawˬ hui g'a mawˬ ve htawˇ maˇ shiˍ. 15 Awˬ lawn k'o, yawˇ hui mehˆ shiˍ maˇ g'a mawˬ tuˬ, naˍ paw maˇ g'a kaˇ tuˬ, nyi ma hk'aw lo maˇ g'a shiˍ tuˬ, nyi ma maˇ k'aw‸ pa leh ngaˬ yawˇ hui hta‸ maˇ g'a gu na-e tuˬ, chaw chi teˇ ceuˬ ve nyi ma heh leh, yawˇ hui ve naˍ paw maˇ na gaˇ leh yawˇ hui ve mehˆ shiˍ me‸ taˍ ve yoˬ, teh‸ k'oˆ taˍ ve yoˬ. 16 Ya‸ hk'aˇ, nawˬ hui ve mehˆ shiˍ g'a mawˬ leh nawˬ hui ve naˍ paw g'a kaˇ ve pa taw, awˬ bon uiˍ ve yoˬ. 17 Ngaˬ nawˬ hui hta‸ awˬ tehˬ awˬ na k'oˆ laˇ ve, nawˬ hui g'a mawˬ ve teˇ hpaˍ hta‸ G'uiˬ sha ve tcuh kaˍ paˍ leh hteˇ ve cawˇ ve chaw laiˉ g'aˇ mawˬ gaˇ ve htawˇ, maˇ g'a mawˬ. Nawˬ hui g'a kaˇ ve teˇ hpaˍ hta‸ yawˇ hui kaˇ gaˇ ve htawˇ maˇ g'a kaˇ. 18 Awˬ yawˇ sheˍ paˍ ve awˬ lawn tawˇ pa haˉ te maˍ ve tcuhˉ kuiˬ hta‸ na sheˍ. 19 Chaw teˇ g'aˇ mvuhˇ naw ma mvuhˇ miˬ awˬ lawn g'a kaˇ leh na maˇ g'a ve k'o, haiˬ ve awˬ shehˍ hpaˇ laˬ leh, yawˇ ve nyi ma awˬ hk'aw lo sheˍ taˍ ve awˬ yawˇ hta‸ yuˬ tawˆ ve yoˬ. Chi lehˬ, ya‸ k'aw hpuiˇ lo sheˍ ve awˬ yawˇ hta‸ k'oˆ ve yoˬ. 20 Haˉ pui de lo sheˍ ve awˬ yawˇ awˬ lawn lehˬ, bon hkawˇ hta‸ g'a kaˇ leh teˇ cawˬ haˉ ha lehˬ ha k'a ha‸ yuˬ ve chaw hta‸ k'oˆ ve yoˬ. 21 Ya‸ hk'aˇ, bon hkawˇ oˇ ve hta‸ pa taw tu‸ ve hkanˍ ve leh fawˉ ve mehˍ ve gaˬ la ve teˇ yanˇ, yawˇ awˬ hk'aw lo awˬ geu maˇ naw‸ leh teˇ hkui ceh tiˉ hkanˍ g'a ve pa taw, yawˇ luˬ k'ai ve yoˬ. 22 Aˉ chuˇ de lo sheˍ ve awˬ yawˇ awˬ lawn lehˬ, bon hkawˇ oˇ ve hta‸ g'a kaˇ ve htawˇ, chi miˬ guiˬ ve dawˇ haˍ tuˬ teˇ hpaˍ leh, hpu shi mawˇ jeˬ hta‸ ha lehˬ ve teˇ hpaˍ lehˬ, bon hkawˇ hta‸ hoˆ taˍ ve pa taw, awˬ shiˍ naw‸ la maˇ hpeh‸ ve hta‸ k'oˆ ve yoˬ. 23 Miˬ hkuiˇ da‸ kuiˬ lo sheˍ ve awˬ yawˇ awˬ lawn lehˬ, bon hkawˇ oˇ ve hta‸ kaˇ leh na g'a ve chaw hta‸ k'oˆ ve yoˬ. Yawˇ hui teˇ hpaˍ hpaˍ teˇ ha pun, teˇ hpaˍ hpaˍ hkaw‸ chi pun leh teˇ hpaˍ hpaˍ shehˆ chi pun awˬ shiˍ naw‸ maˇ la ve yoˬ teh‸ k'oˆ piˇ ve yoˬ. 24 Yawˇ yawˇ hui hta‸ awˬ kaˍ awˬ nu tawˇ pa haˉ k'aw‸ te maˍ piˇ leh k'oˆ ve, Mvuhˇ naw ma mvuhˇ miˬ lehˬ, yawˇ ve heh hk'aw lo da‸ ve awˬ yawˇ sheˍ ve chaw teˇ g'aˇ hta‸ shuˍ ve yoˬ. 25 Chaw yaˇ hui zuh‸ muiˉ k'a chehˇ ve teˇ yanˇ, yawˇ ve canˇ paˍ laˬ leh, caˬ sheˍ taˍ kuiˬ lo veˬ k'awˍ yawˇ sheˍ keu taˉ leh k'o‸-e ve yoˬ. 26 Awˬ yeˬ yeˬ la leh awˬ shiˍ awˬ nu tawˆ la ve teˇ yanˇ, veˬ k'awˍ htawˇ hk'a tawˍ lehˆ tawˆ la ve hta‸ g'a mawˬ ve yoˬ. 27 Oˇ htaˇ, yehˬ shehˍ hpaˇ ve awˬ ceˬ teˇ hpaˍ yawˇ geh laˬ leh k'oˆ ve, Jawˇ mawˇ-oˬ, nawˬ ve heh hk'aw lo da‸ ve awˬ yawˇ hta‸ nawˬ sheˍ ve maˇ heˆ laˇ. Aˬ hto‸ ma pa taw veˬ k'awˍ cawˬ la ve le teh‸ na nyi ve yoˬ. 28 Yehˬ shehˍ hpaˇ lehˬ, Canˇ paˍ teˇ g'aˇ g'aˇ chi ve hta‸ te ve yoˬ teh‸, yawˇ hui hta‸ k'oˆ piˇ ve yoˬ. Awˬ ceˬ teˇ hpaˍ lehˬ, Veˬ k'awˍ cehˬ oˇ ve teˇ hpaˍ hta‸ ngaˬ hui ca g'awˬ baˬ tuˬ nawˬ nyi ma cawˇ laˇ teh‸ na nyi ve yoˬ. 29 Yawˇ k'aw‸ k'oˆ ve, Maˇ heˆ, nawˬ hui veˬ k'awˍ cehˬ hta‸ g'awˬ baˬ ve k'o, caˬ cehˬ teˇ hpaˍ hta‸ htawˇ ga g'awˬ baˬ puiˉ-aˆ. 30 Caˬ g'euˬ ve awˬ yanˇ hk'a gaˬ nyiˇ ceuˬ ceuˬ teˇ geh uiˍ la piˇ sheˍ. Caˬ g'eu‸ ve awˬ yanˇ gaˬ k'o, veˬ k'awˍ hta‸ awˉ lawˉ g'eu‸ leh aˬ miˍ tuˉ baˬ tuˬ, awˬ k'a‸ awˬ k'a‸ te tsuh‸ taˍ-o‸. Caˬ shiˍ hta‸ ngaˬ ve caˬ ciˇ yehˬ awˬ hk'aw lo shaw keu taˍ-o teh‸ caˬ g'eu‸ shehˍ hpaˇ hui hta‸ ngaˬ k'oˆ piˇ tuˬ yoˬ teh‸, yehˬ shehˍ hpaˇ k'oˆ ve yoˬ. 31 Yawˇ yawˇ hui hta‸ awˬ kaˍ awˬ nu tawˇ pa haˉ k'aw‸ te maˍ piˇ leh k'oˆ ve, Mvuhˇ naw ma mvuhˇ miˬ lehˬ, chaw teˇ g'aˇ yawˇ ve heh awˬ hk'aw lo sheˍ taˍ ve g'awˇ caˉ yawˇ hta‸ shuˍ ve yoˬ. 32 Awˬ yawˇ oˇ ve lehˬ, awˬ yawˇ hk'a peu-eˬ a‸ kehˉ i jaˇ ve htawˇ, uiˍ la ve teˇ yanˇ g'awˇ hpa‸ mvuhˬ naweh hk'a peu-eˬ a‸ kehˉ uiˍ la leh awˬ cehˬ lonˉ hpeh‸ la ve yoˬ. Hk'e te leh, mvuhˇ hpe lo poˬ ve ngaˆ teˇ hpaˍ laˬ leh awˬ k'aˉ teˇ hpaˍ awˬ hk'oˆ g'aˇ jehˇ ve yoˬ teh‸ k'oˆ ve yoˬ. 33 Yawˇ yawˇ hui hta‸ awˬ kaˍ awˬ nu tawˇ pa haˉ k'aw‸ te maˍ piˇ leh k'oˆ ve, Mvuhˇ naw ma mvuhˇ miˬ lehˬ, diˇ hta‸ shuˍ ve yoˬ. Yaˇ miˇ teˇ g'aˇ diˇ hta‸ yuˬ leh hkaoˍ monˇ meu-e shehˆ hk'awˍ lawˇ awˬ hk'aw lo keu ve teˇ yanˇ, hk'a peu-eˬ hta‸ ciˇ la piˇ lawˬ ve yoˬ teh‸ k'oˆ ve yoˬ. 34 Awˬ lawn chi hk'a peu-eˬ hta‸ Yeˍsuˆ tawˇ pa haˉ te leh chaw awˬ moˍ lonˉ teˇ hpaˍ hta‸ maˍ piˇ ve yoˬ. Tawˇ pa haˉ maˇ te k'o, yawˇ yawˇ hui hta‸ maˇ maˍ piˇ. 35 Yawˇ chi hk'e te maˍ ve lehˬ, G'uiˬ sha ve tcuh kaˍ paˍ k'oˆ taˍ ve tawˇ hkawˇ hta‸ biˇ la tuˬ te ve yoˬ. Tawˇ hkawˇ oˇ ve lehˬ, Ngaˬ ve maw‸ k'aw ngaˉ leh tawˇ pa haˉ teˇ hpaˍ te maˍ piˇ tuˬ yoˬ. Miˬ guiˬ te hpanˍ htaˇ ka‸ faˉ taˍ ve awˬ ceuˬ hta‸ ngaˬ hpeu‸ maˍ piˇ tuˬ yoˬ, teh‸ k'oˆ taˍ ve yoˬ. 36 Oˇ htaˇ, yawˇ chaw awˬ moˍ lonˉ teˇ hpaˍ hta‸ hpaˆ da‸ leh yehˬ hk'aw lo‸-e ve yoˬ. Yawˇ ve awˬ la‸ g'awˇ teˇ hpaˍ yawˇ geh laˬ leh, Heh hk'aw sheˍ ve veˬ k'awˍ yawˇ tawˇ pa haˉ awˬ lawn tcuhˉ kuiˬ ngaˬ hui hta‸ a ciˉ k'aoˍ maˍ laˇ-oˆ teh‸ k'oˆ ve yoˬ. 37 Yawˇ k'aw‸ k'oˆ ve, Da‸ ve awˬ yawˇ hta‸ sheˍ paˍ lehˬ, chaw yaˇ ve Yaˇ hpu yoˬ. 38 Heh lehˬ, miˬ guiˬ chi hta‸ k'oˆ ve yoˬ. Da‸ ve awˬ yawˇ lehˬ, mvuhˇ naw ma mvuhˇ miˬ yaˇ teˇ hpaˍ hta‸ k'oˆ ve yoˬ. Veˬ k'awˍ yawˇ lehˬ, haiˬ ve awˬ shehˍ hpaˇ ve awˬ yaˇ teˇ hpaˍ hta‸ k'oˆ ve yoˬ. 39 Awˬ yawˇ oˇ ve hta‸ sheˍ ve canˇ paˍ lehˬ neˇ haiˬ yoˬ. Caˬ g'eu‸ ve awˬ yanˇ lehˬ, miˬ guiˬ chi leh ve awˬ yanˇ hta‸ k'oˆ ve yoˬ. Caˬ g'eu‸ shehˍ hpaˇ teˇ hpaˍ lehˬ, mvuhˇ naw ma tcuh yaˇ teˇ hpaˍ yoˬ. 40 Veˬ k'awˍ hta‸ g'eu‸ leh aˬ miˍ tuˉ baˬ ve hk'a shuˍ shuˍ, miˬ guiˬ chi leh ve awˬ yanˇ htaˇ chi hk'e hpehˬ tuˬ yoˬ. 41 Chaw yaˇ ve Yaˇ hpu lehˬ, yawˇ ve mvuhˇ naw ma tcuh yaˇ hui hta‸ peu laˇ leh, shu hta‸ te ya‸ tcuh ve chaw leh haiˬ ve hta‸ te ve chaw hk'a peu-eˬ hta‸ yawˇ ve mvuhˇ miˬ awˬ hk'aw lo yawˇ hui yuˬ tawˆ peuˬ hk'aw nawˉ, 42 aˬ miˍ buiˬ hpfuh awˬ hk'aw lo baˬ keu tuˬ yoˬ. Oˇ kaˬ lo yawˇ hui hawˬ leh ciˬ geu‸ tuˬ yoˬ. 43 Oˇ htaˇ hteˇ ve cawˇ ve chaw hui lehˬ, yawˇ hui Awˬ pa ve mvuhˇ miˬ awˬ hk'aw lo, mvuhˇ nyi hk'a shuˍ shuˍ awˬ g'euˆ ba tuˬ yoˬ. Naˍ paw cawˬ ve chaw hk'a deh‸ na-o. 44 Mvuhˇ naw ma mvuhˇ miˬ lehˬ, ti mi hk'aw faˉ taˍ ve awˬ hpfuhˇ hk'aˆ jaˇ ve mawˇ hta‸ shuˍ ve yoˬ. Mawˇ oˇ ve hta‸ mawˬ ve chaw lehˬ, k'aw‸ gu faˉ taˍ leh, ha lehˬ jaˇ ve awˬ hk'aw lo k'o‸-e leh, yawˇ hk'a cawˬ ve hk'a peu-eˬ hta‸ hawˇ baˬ peuˬ hk'aw‸ nawˉ, ti mi oˇ ve hta‸ vuiˬ yuˬ ve yoˬ. 45 Chi hk'oˆ ka‸, mvuhˇ naw ma mvuhˇ miˬ lehˬ, da‸ jaˇ ve piˉ ko-eˍ shehnˉ hta‸ ca ve tanˇ kaˬ paˍ hta‸ shuˍ ve yoˬ. 46 Yawˇ lehˬ, awˬ hpfuhˇ hk'aˆ jaˇ ve piˉ ko-eˍ shehnˉ teˇ shiˍ hta‸ g'a mawˬ ve teˇ yanˇ, yawˇ k'o‸-e leh yawˇ hk'a cawˬ ve hk'a peu-eˬ hta‸ hawˇ baˬ peuˬ hk'aw‸ nawˉ, shehnˉ oˇ ve hta‸ vuiˬ yuˬ ve yoˬ. 47 Chi hk'oˆ ka‸, mvuhˇ naw ma mvuhˇ miˬ lehˬ, laˇ tsuhˇ g'uiˬ awˬ hk'aw lo hpehˇ keu leh ngaˇ teˇ ceuˬ le le hta‸ hoˆ leh g'awˬ yuˬ ve geu‸ hta‸ shuˍ ve yoˬ. 48 Ngaˇ hk'a biˇ cawˬ ve teˇ yanˇ, ngaˇ ca paˍ teˇ hpaˍ geu‸ hta‸ g'uiˬ pfuhˍ lo g'awˬ yuˬ peuˬ hk'aw‸ nawˉ, mui taˍ leh da‸ ve ngaˇ teˇ hpaˍ hta‸ hk'awˍ lawˇ awˬ hk'aw lo leuˆ keu leh, maˇ da‸ ve ngaˇ teˇ hpaˍ hta‸ yuˬ baˬ ve yoˬ. 49 Miˬ guiˬ leh ve teˇ yanˇ, chi hk'a shuˍ shuˍ hpeh‸ la tuˬ yoˬ. Mvuhˇ naw ma tcuh yaˇ teˇ hpaˍ tawˆ la leh, hteˇ ve cawˇ ve chaw hui leh haiˬ ve chaw hui hta‸ pehˬ da‸ peuˬ hk'aw‸ nawˉ, 50 haiˬ ve chaw hui hta‸ aˬ miˍ buiˬ hpfuh awˬ hk'aw lo baˬ keu tuˬ yoˬ. Oˇ kaˬ lo yawˇ hui hawˬ leh ciˬ geu‸ tuˬ yoˬ. 51 Awˬ lawn chi hk'a peu-eˬ hta‸ nawˬ hui na g'a peuˬ laˇ teh‸ na nyi htaˇ, Na g'a peuˬ teh‸, yawˇ hui yawˇ hta‸ k'aw‸ k'oˆ piˇ ve yoˬ. 52 Yawˇ k'aw‸ k'oˆ ve, Hk'e te leh, mvuhˇ naw ma mvuhˇ miˬ awˬ lawn henˇ yuˬ peuˬ ve li‸ bvuh‸ paˍ teˇ g'aˇ le le lehˬ, yehˬ shehˍ hpaˇ teˇ g'aˇ a shu yawˇ ve mawˇ keu taˍ kuiˬ awˬ hk'aw lo, mawˇ awˬ piˍ awˬ suhˉ yuˬ tawˆ ve hta‸ shuˍ ve yoˬ teh‸, yawˇ hui hta‸ k'oˆ piˇ ve yoˬ. 53 Tawˇ pa haˉ oˇ ve teˇ hpaˍ hta‸ Yeˍsuˆ te maˍ piˇ peuˬ hk'aw‸ nawˉ, yawˇ oˇ kaˬ lo tawˆ k'ai ve yoˬ. 54 Yawˇ ve mvuhˇ miˬ lo yawˇ k'aw‸ gaˬ la leh, yawˇ hui ve bon yehˬ awˬ hk'aw lo yawˇ hui hta‸ maˍ piˇ ve yoˬ. Hk'e te leh yawˇ hui anˇ leh k'oˆ ve, Chaw chi hpaˇ lehˬ, chi hk'e ve cuˇ yiˍ leh kanˇ paˆ hta‸ hk'aˬ lo g'a ve le. 55 Yawˇ lehˬ, la‸ shaˉ maˉ ve yaˇ paˍ maˇ heˆ laˇ. Yawˇ ve awˬ e lehˬ Maˍriˆ meh ve maˇ heˆ laˇ. Yawˇ ve awˬ nyi paˍ teˇ hpaˍ lehˬ, Yaˍkoˆ, Yoˇseh‸, Siˉmonˍ leh Yuˇda‸ hui maˇ heˆ laˇ. 56 Yawˇ ve awˬ nyi ma hk'a peu-eˬ htawˇ ngaˬ hui geh chehˇ taˍ ve maˇ heˆ laˇ. Hk'e te leh chaw chi hpaˇ lehˬ, chi hk'e ve awˬ ceuˬ teˇ hpaˍ hta‸ hk'aˬ lo g'a ve le teh‸ k'oˆ leh, yawˇ hui yawˇ hta‸ nyi ma luˬ ve yoˬ. 57 Yeˍsuˆ yawˇ hui hta‸ k'oˆ piˇ ve, G'uiˬ sha ve tcuh kaˍ paˍ teˇ g'aˇ lehˬ, awˬ me‸ awˬ hponˇ cawˬ ve yoˬ. Ya‸ hk'aˇ, a shu yawˇ ve mvuhˇ miˬ leh a shu yawˇ ve yehˬ awˬ hk'aw lo awˬ me‸ awˬ hponˇ maˇ cawˬ teh‸ k'oˆ ve yoˬ. 58 Yawˇ hui maˇ yonˍ ve pa taw, oˇ kaˬ lo yawˇ kanˉ uiˍ ve hta‸ a ciˉ ceh tiˉ te ve yoˬ.

Ma‸htehˍ 14

1 Oˇ ve teˇ yanˇ jawˇ mawˇ Heˍroˆ lehˬ, Yeˍsuˆ ve awˬ lawn bvuhˬ k'ai chehˇ ve hta‸ g'a kaˇ leh, 2 yawˇ ve awˬ ceˬ teˇ hpaˍ hta‸ k'oˆ piˇ ve, Chi hpaˇ lehˬ, baˆtiˆsaˬ piˇ paˍ Yoˇhanˬ yoˬ. Yawˇ suh kuiˬ lo k'aw‸ te‸ tu la ve pa taw, yawˇ awˬ hk'aw lo kanˉ uiˍ ve chi teˇ hpaˍ hta‸ te tawˆ la ve yoˬ teh‸ k'oˆ ve yoˬ. 3 Jawˇ mawˇ Heˍroˆ lehˬ, yawˇ ve awˬ nyi paˍ Hpiˇliˇpuˆ ve awˬ miˇ ma Heˍroˍdiˆ awˬ lawn hta‸ pa taw, Yoˇhanˬ hta‸ hpeh yuˬ leh htawnˍ hk'aw keu taˍ ve yoˬ. 4 Awˬ lawn k'o Yoˇhanˬ lehˬ, Yaˇ miˇ oˇ ve hta‸ nawˬ heuˆ maˇ cawˇ teh‸ yawˇ hta‸ k'oˆ piˇ ve pa taw yoˬ. 5 Jawˇ mawˇ Heˍroˆ lehˬ, Yoˇhanˬ hta‸ tiˇ pehˍ gaˇ ve htawˇ, mvuhˇ miˬ yaˇ hui hta‸ yawˇ kawˆ ve yoˬ. Awˬ lawn k'o, Yoˇhanˬ lehˬ G'uiˬ sha ve tcuh kaˍ paˍ yoˬ teh‸ mvuhˇ miˬ yaˇ hui shawˍ taˍ ve yoˬ. 6 Jawˇ mawˇ Heˍroˆ paw ve hta‸ dawˇ nawˇ tuˬ pawehˇ te ve awˬ nyi k'aw‸ gaˬ la leh, Heˍroˍdiˆ ve awˬ yaˇ miˇ chaw chi ma ve mehˆ g'uˇ suhˍ pawehˇ te maˍ piˇ htaˇ, Heˍroˆ nyi ma cawˇ jaˇ ve yoˬ. 7 Hk'e te leh, yaˇ miˇ oˇ ve hk'a lawˬ ve teˇ hpaˍ yawˇ hta‸ piˇ tuˬ yoˬ teh‸, jawˇ mawˇ Heˍroˆ ka ti‸ te leh hkanˍ taˍ ve yoˬ. 8 Yaˇ miˇ oˇ ve lehˬ, awˬ e maˍ piˇ taˍ ve hk'e, Baˆtiˆsaˬ piˇ paˍ Yoˇhanˬ ve oˉ k'oˍ hta‸ hkehˇ pe le awˬ hk'aw keu leh pe‸ laˇ-oˆ teh‸ k'oˆ ve yoˬ. 9 Hkunˉ hawˉ hkanˇ lehˬ dawˇ haˍ ve htawˇ, yawˇ hkanˍ taˍ peuˬ ve tawˇ hkawˇ leh, yawˇ geh mui caˇ chehˇ ve chaw hui hta‸ pa taw, yaˇ miˇ oˇ ve lawˬ ve hk'e piˇ tuˬ yawˇ tawˇ piˇ ve yoˬ. 10 Oˇ htaˇ, yawˇ chaw hta‸ hpehˇ peu leh, htawnˍ awˬ hk'aw lo Yoˇhanˬ ve oˉ k'oˍ hta‸ ca tawˆ tcuh ve yoˬ. 11 Oˉ k'oˍ hta‸ hkehˇ pe le awˬ hk'aw keu veu laˇ leh, yaˇ miˇ oˇ ve hta‸ piˇ peuˬ hk'aw‸ nawˉ, yawˇ htawˇ yawˇ ve awˬ e hta‸ ca yuˬ piˇ ve yoˬ. 12 Oˇ htaˇ, Yoˇhanˬ ve awˬ la‸ g'awˇ teˇ hpaˍ laˬ leh yawˇ ve awˬ to hta‸ tuˍ piˇ peuˬ hk'aw‸ nawˉ, yawˇ hui Yeˍsuˆ hta‸ ca hto piˇ ve yoˬ. 13 Awˬ lawn chi hta‸ Yeˍsuˆ g'a kaˇ htaˇ, yawˇ haw lo‸ k'oˍ ciˇ leh oˇ kaˬ lo tawˆ-e leh, chaw gawˬ kuiˬ teˇ kaˬ lo k'ai ve yoˬ. Chaw awˬ moˍ lonˉ teˇ hpaˍ g'a kaˇ htaˇ, venˇ teˇ hpaˍ awˬ hk'aw lo tawˆ k'ai leh, miˬ chaˇ hk'oˆ ya‸ k'aw juˇ k'ai leh yawˇ awˬ hk'aˇ suh k'ai ve yoˬ. 14 Yawˇ haw lo‸ k'oˍ hk'aw tawˆ k'ai htaˇ, chaw awˬ moˍ lonˉ hta‸ yawˇ g'a mawˬ ve yoˬ. Yawˇ yawˇ hui hta‸ ha k'aˉ leh, yawˇ hui awˬ hk'aw lo naˬ ve gawˬ ve chaw teˇ hpaˍ hta‸ gu na-e piˇ ve yoˬ. 15 Mvuhˇ hpeu‸ la htaˇ, awˬ la‸ g'awˇ teˇ hpaˍ yawˇ geh laˬ leh k'oˆ ve, Choˬ kaˬ lehˬ heh puiˉ hk'aw hpeh‸ leh, mvuhˇ ka‸ hpeu‸ la yoˬ. Chaw awˬ moˍ lonˉ chi teˇ hpaˍ hk'aˆ hk'aw lo k'ai leh caˇ tuˬ ca vuiˬ caˇ-e tuˬ yawˇ hui hta‸ hpehˇ piˇ-oˆ teh‸ k'oˆ piˇ ve yoˬ. 16 Yeˍsuˆ lehˬ, Yawˇ hui k'ai tuˬ maˇ loˍ. Nawˬ hui yawˇ hui hta‸ caˍ piˇ-oˆ teh‸ k'oˆ piˇ ve yoˬ. 17 Yawˇ hui k'aw‸ k'oˆ ve, Ngaˬ hui lehˬ, hkaoˍ monˇ ngaˇ diˬ leh ngaˇ nyiˇ hkeh ceh tiˉ cawˬ ve yoˬ teh‸ yawˇ hta‸ k'oˆ piˇ ve yoˬ. 18 Oˇ ve teˇ hpaˍ hta‸ ngaˬ geh yuˬ veu laˇ-oˆ teh‸ Yeˍsuˆ k'oˆ piˇ ve yoˬ. 19 Oˇ htaˇ chaw awˬ moˍ lonˉ teˇ hpaˍ hta‸, Mvuh‸ awˬ hk'oˆ mui-o teh‸ yawˇ k'oˆ piˇ ve yoˬ. Hkaoˍ monˇ oˇ ve ngaˇ diˬ leh ngaˇ oˇ ve nyiˇ hkeh hta‸ yawˇ yuˬ peuˬ hk'aw‸ nawˉ, mvuhˇ naw ma lo chiˇ nyi leh bon hta‸ chiˇ mvuh ve yoˬ. Oˇ htaˇ, yawˇ hkaoˍ monˇ hta‸ hk'eh‸ leh awˬ la‸ g'awˇ hui hta‸ piˇ peuˬ hk'aw‸ nawˉ, awˬ la‸ g'awˇ teˇ hpaˍ htawˇ chaw awˬ moˍ lonˉ teˇ hpaˍ hta‸ pehˬ piˇ ve yoˬ. 20 Oˇ htaˇ, chaw hk'a peu-eˬ hk'a bvuhˆ g'a caˇ ve yoˬ. Caˇ leuˉ ve teˇ hpaˍ hta‸ k'aw‸ g'awˆ ve teˇ yanˇ, teˇ chi nyiˇ hk'awˍ lawˇ hk'a biˇ g'a ve yoˬ. 21 Caˇ ve chaw teˇ hpaˍ lehˬ, yaˇ miˇ leh yaˇ ehˉ hta‸ maˇ shawˍ k'o, hawˉ hk'aˆ chaw mawˇ tiˉ aˬ laˬ hk'e ngaˇ hinˉ g'aˇ cawˬ ve yoˬ. 22 Oˇ ve hk'aw‸ nawˉ Yeˍsuˆ lehˬ, chaw awˬ moˍ lonˉ teˇ hpaˍ hta‸ hpehˇ piˇ chehˇ htaˇ, awˬ la‸ g'awˇ teˇ hpaˍ hta‸ haw lo‸ k'oˍ ciˇ leh, yawˇ awˬ g'uˇ suhˍ g'uiˬ pfuhˍ coˇ paˉ lo k'ai tcuh ve yoˬ. 23 Yawˇ chaw awˬ moˍ lonˉ teˇ hpaˍ hta‸ hpehˇ piˇ peuˬ hk'aw‸ nawˉ, bon ca lawˬ tuˬ yawˇ teˇ g'aˇ tiˉ hk'aw pui hk'oˆ lo taˆ-e ve yoˬ. Mehˆ muiˉ naˆ la htaˇ, yawˇ teˇ g'aˇ tiˉ oˇ kaˬ lo chehˇ taˍ ve yoˬ. 24 Haw lo‸ k'oˍ oˇ ve lehˬ, g'uiˬ po awˬ k'aw ji lo gaˬ htaˇ, mvuhˇ haw hpawˇ maˇ cawˇ ve pa taw, g'uiˬ baˇ teˇ hpaˍ haw lo‸ k'oˍ hta‸ htinˍ jaˇ ve yoˬ. 25 Tanˇ hkuinˇ shehˆ naˍ riˍ ponˬ peuˬ hk'aw‸ nawˉ, Yeˍsuˆ g'uiˬ po hk'oˆ ya‸ k'aw juˇ leh yawˇ hui geh laˬ ve yoˬ. 26 G'uiˬ po hk'oˆ lo yawˇ ya‸ k'aw juˇ laˬ ve hta‸ awˬ la‸ g'awˇ hui g'a mawˬ htaˇ, yawˇ hui kawˆ jaˇ leh, Chaw ha ku yoˬ teh‸ k'oˆ ve yoˬ. 27 Yawˇ hui kawˆ ve pa taw g'aˇ hte‸ kuˬ ve yoˬ. Teˇ cawˬ haˉ Yeˍsuˆ yawˇ hui hta‸ k'oˆ piˇ ve, Nyi ma ha‸ hanˉ te-o. Taˇ kawˆ, ngaˬ yoˬ teh‸ k'oˆ piˇ ve yoˬ. 28 Peˍtruˆ yawˇ hta‸ k'oˆ piˇ ve, Jawˇ mawˇ-oˬ, nawˬ yoˬ k'o, iˉ kaˆ awˬ hk'oˆ ngaˬ hta‸ nawˬ geh laˬ tcuh laˇ-oˆ teh‸ k'oˆ piˇ htaˇ, Laˬ-o‸ teh‸ yawˇ k'aw‸ k'oˆ piˇ ve yoˬ. 29 Hk'e te leh Peˍtruˆ haw lo‸ k'oˍ hk'aw tawˆ-e leh, iˉ kaˆ hk'oˆ ya‸ k'aw juˇ leh Yeˍsuˆ geh k'ai ve yoˬ. 30 Ya‸ hk'aˇ, mvuhˇ haw hehnˇ jaˇ ve hta‸ yawˇ mawˬ htaˇ, kawˆ jaˇ ve yoˬ. Yawˇ iˉ kaˆ awˬ hk'aw lo tuˍ lo‸-e chehˇ ve teˇ yanˇ, Jawˇ mawˇ-oˬ, htaiˍ hk'aw‸ laˇ-oˆ teh‸ kuˬ ve yoˬ. 31 Teˇ cawˬ haˉ Yeˍsuˆ yawˇ ve la‸ sheh che leh, yawˇ hta‸ g'awˬ tawˆ leh k'oˆ piˇ ve, Hk'a deh‸ maˇ yonˍ ve chaw-oˬ, nawˬ aˬ hto‸ ma te htawˇ dawˇ nawˬ dawˇ te ve le teh‸ yawˇ hta‸ k'oˆ piˇ ve yoˬ. 32 Yawˇ huiˉ maˬ haw lo‸ k'oˍ hk'aw lo‸-e ve teˇ yanˇ, mvuhˇ haw htawˇ dehˬ sheˬ ve yoˬ. 33 Haw lo‸ k'oˍ hk'aw chehˇ ve chaw teˇ hpaˍ yawˇ hta‸ oˉ k'oˍ pui leh, Nawˬ lehˬ awˬ tehˬ awˬ na G'uiˬ sha ve Yaˇ hpu yoˬ teh‸ k'oˆ ve yoˬ. 34 G'uiˬ po coˇ paˉ lo yawˇ hui hkanˍ k'ai leh Geˍneˍsaˍrehˆ mvuhˇ miˬ lo gaˬ ve yoˬ. 35 Oˇ kaˬ lo chehˇ ve chaw teˇ hpaˍ lehˬ, Yeˍsuˆ yoˬ teh‸ g'a shiˍ ve teˇ yanˇ, mvuhˇ miˬ oˇ ve awˬ hk'aw teˇ kaˬ le le lo chaw hta‸ k'ai tcuh leh, naˬ ve gawˬ ve chaw hk'a peu-eˬ hta‸ Yeˍsuˆ geh yuˬ laˬ ve yoˬ. 36 Yawˇ ve aˉ po‸ awˬ caˍ hta‸ ceh g'a htawˇ tuˬ yawˇ hta‸ lawˬ hkawˉ ve yoˬ. Hk'a htawˇ ve chaw teˇ hpaˍ htawˇ na-e la ve yoˬ.

Ma‸htehˍ 15

1 Oˇ htaˇ, Hpaˍriˍsehˇ hui leh li‸ bvuh‸ paˍ teˇ hpaˍ Yeˍruˆsaˍlehnˍ venˇ lo tu leh, Yeˍsuˆ geh laˬ leh k'oˆ ve, 2 Nawˬ ve awˬ la‸ g'awˇ teˇ hpaˍ lehˬ, aˬ hto‸ ma pa taw chaw mawˇ hui piˇ taˍ ve awˬ liˇ teˇ hpaˍ hta‸ te ya‸ ve le. Awˬ lawn k'o, yawˇ hui la‸ sheh maˇ tsuhˇ leh caˇ tuˬ caˇ ve yoˬ teh‸ k'oˆ ve yoˬ. 3 Yeˍsuˆ yawˇ hui hta‸ k'aw‸ k'oˆ piˇ ve, Nawˬ hui lehˬ, aˬ hto‸ ma te nawˬ hui ve awˬ liˇ hta‸ pa taw G'uiˬ sha piˇ taˍ ve tawˇ hkawˇ hta‸ te ya‸ ve le. 4 Awˬ lawn k'o G'uiˬ sha k'oˆ ve, Nawˬ ve awˬ pa awˬ e hta‸ yawˆ yawˆ yan yan te-o. Peuˬ leh, A shu yawˇ ve awˬ pa awˬ e hta‸ hk'a mvuhˇ hk'a na k'oˆ ve chaw teˇ g'aˇ lehˬ, awˬ tehˬ awˬ na g'a suh ve yoˬ teh‸ k'oˆ taˍ ve yoˬ. 5 Ya‸ hk'aˇ nawˬ hui lehˬ, Hk'aˬ ve chaw teˇ g'aˇ maˇ k'oˆ, a shu yawˇ ve awˬ pa awˬ e hta‸, Ngaˬ geh hk'a cawˬ ve nawˬ hui g'a cawˇ ve mawˇ teˇ hpaˍ, G'uiˬ sha hta‸ tanˇ peuˬ teh‸ k'oˆ leh, a shu yawˇ ve awˬ pa awˬ e hta‸ yawˆ yan tuˬ maˇ loˍ teh‸ nawˬ hui k'oˆ ve yoˬ. 6 Hk'e te leh, nawˬ hui ve awˬ liˇ hta‸ pa taw, G'uiˬ sha piˇ taˍ ve tawˇ hkawˇ hta‸ nawˬ hui te pehˆ ve yoˬ. 7 Chaw heˍ paˍ teˇ hpaˍ-oˬ, nawˬ hui awˬ lawn Iˉsaˍyaˆ k'oˆ taˍ ve tawˇ hkawˇ lehˬ cawˇ jaˇ ve yoˬ. Yawˇ k'oˆ ve, 8 Chaw chi teˇ ceuˬ lehˬ, yawˇ hui ve maw‸ k'aw ngaˬ hta‸ yawˆ yan ve htawˇ, yawˇ hui ve nyi ma lehˬ ngaˬ hta‸ vuiˇ da‸ jaˇ ve yoˬ. 9 Chaw yaˇ hui teh taˍ ve awˬ liˇ awˬ hk'aˇ teˇ hpaˍ hta‸ maˍ piˇ ve pa taw, yawˇ hui ngaˬ hta‸ oˉ k'oˍ pui ve lehˬ, tcuhˉ kuiˬ te‸ chiˉ maˇ cawˬ, teh‸ k'oˆ ve yoˬ. 10 Oˇ htaˇ, yawˇ chaw awˬ moˍ lonˉ hta‸ yawˇ geh kuˬ yuˬ leh k'oˆ piˇ ve, Hk'a deh‸ na leh shiˍ-o‸. 11 Maw‸ k'aw hk'aw lo‸-e ve awˬ ceuˬ lehˬ, chaw yaˇ hta‸ cha‸ chiˆ tuˬ maˇ te. Ya‸ hk'aˇ maw‸ k'aw hk'aw tawˆ la ve awˬ ceuˬ lehˬ, chaw yaˇ hta‸ cha‸ chiˆ tuˬ te ve yoˬ teh‸ k'oˆ ve yoˬ. 12 Oˇ htaˇ yawˇ ve awˬ la‸ g'awˇ teˇ hpaˍ yawˇ geh laˬ leh, Tawˇ chi teˇ hkawˇ hta‸ Hpaˍriˍsehˇ hui g'a kaˇ htaˇ, yawˇ hui nyi ma zuhˆ ve hta‸ nawˬ shiˍ-aw laˇ teh‸, yawˇ hta‸ k'oˆ piˇ ve yoˬ. 13 Yawˇ k'aw‸ k'oˆ ve, Mvuhˇ naw ma hk'oˆ chehˇ ve ngaˬ ve Awˬ pa maˇ ti taˍ ve awˬ cehˬ teˇ cehˬ le le hta‸ g'awˬ baˬ tuˬ yoˬ. 14 Chaw oˇ ve teˇ hpaˍ chehˇ taˍ piˇ sheˍ. Yawˇ hui mehˆ cuˉ ve ka‸, ya‸ k'aw maˍ piˇ paˍ te ve yoˬ. Mehˆ cuˉ ve chaw lehˬ, mehˆ cuˉ ve chaw hta‸ ya‸ k'aw maˍ piˇ ve k'o, yawˇ huiˉ maˬ nyiˇ g'aˇ g'aˇ miˬ k'oˍ hk'aw ce lo‸-e tuˬ yoˬ teh‸ k'oˆ ve yoˬ. 15 Oˇ htaˇ Peˍtruˆ lehˬ, Tawˇ pa haˉ chi ve tcuhˉ kuiˬ ngaˬ hui hta‸ k'aoˍ maˍ laˇ-oˆ teh‸ yawˇ hta‸ k'oˆ piˇ ve yoˬ. 16 Yeˍsuˆ k'aw‸ k'oˆ piˇ ve, Chi beu‸ hk'a gaˬ nawˬ hui htawˇ na maˇ g'a sheˍ leh laˇ. 17 Maw‸ k'aw hk'aw lo‸-e ve awˬ ceuˬ hk'a peu-eˬ lehˬ, g'oˇ peˬ awˬ hk'aw gaˬ leh, aˉ k'a‸ yiˬ kuiˬ lo baˬ taˉ ve hta‸ nawˬ hui maˇ shiˍ laˇ. 18 Ya‸ hk'aˇ, maw‸ k'aw awˬ hk'aw lo tawˆ la ve awˬ ceuˬ lehˬ, nyi ma hk'aw lo tawˆ la ve yoˬ. Chi teˇ hpaˍ lehˬ, chaw yaˇ hta‸ cha‸ chiˆ tuˬ te ve yoˬ. 19 Awˬ lawn k'o, haiˬ ve hta‸ dawˇ ve, chaw hta‸ tiˇ pehˍ ve, haˉ chawˇ haˉ paˆ te ve, guiˇ ya‸ ve, shu mawˇ hk'awˇ ve, maˇ heˆ heˆ ve shaˉ hkiˆ hkanˍ ve leh, maˇ shawˍ maˇ caˆ k'oˆ ve, chi teˇ hpaˍ lehˬ nyi ma hk'aw lo tawˆ la ve yoˬ. 20 Chi teˇ hpaˍ lehˬ, chaw hta‸ cha‸ chiˆ tuˬ te ve yoˬ. Ya‸ hk'aˇ, la‸ sheh maˇ tsuhˇ leh caˇ tuˬ caˇ ve lehˬ, chaw hta‸ cha‸ chiˆ tuˬ te ve maˇ heˆ teh‸ k'oˆ ve yoˬ. 21 Yeˍsuˆ oˇ kaˬ tawˆ k'ai leh, Tuˇruˆ leh Siˉdonˍ mvuhˇ miˬ hpawˇ lo k'ai ve yoˬ. 22 Oˇ htaˇ, Hkaˍnanˍ mvuhˇ miˬ hk'aw chehˇ ve yaˇ miˇ teˇ g'aˇ lehˬ, mvuhˇ miˬ oˇ ve teˇ tawn awˬ hk'aw lo tawˆ la leh, Daˍviˆ ve Yaˇ hpu Jawˇ mawˇ-oˬ, ngaˬ hta‸ ha k'aˉ laˇ-oˆ. Ngaˬ ve yaˇ miˇ neˇ geh leh g'a tu‸ g'a hkanˍ jaˇ ve yoˬ teh‸, g'aˇ hte‸ kuˬ ve yoˬ. 23 Ya‸ hk'aˇ, Yeˍsuˆ tawˇ teˇ peu-eˍ ka‸ maˇ k'aw‸ yaw piˇ. Yawˇ ve awˬ la‸ g'awˇ teˇ hpaˍ yawˇ geh laˬ leh k'oˆ ve, Yaˇ miˇ chi ngaˬ hui awˬ hk'aˇ suh g'a‸ laˬ leh kuˬ chehˇ ve pa taw, yawˇ hta‸ k'o‸-e tcuh-o teh‸ lawˬ hkawˉ ve yoˬ. 24 Yeˍsuˆ k'oˆ ve, Iˉsaˍreˍlaˆ teˇ yehˬ awˬ hk'aw lo mehˉ k'ai peuˬ ve yawˬ teˇ hpaˍ geh laˬ tuˬ awˬ pon ceh G'uiˬ sha ngaˬ hta‸ peu laˇ ve yoˬ teh‸ k'aw‸ k'oˆ piˇ ve yoˬ. 25 Yaˇ miˇ oˇ ve laˬ leh yawˇ hta‸ oˉ k'oˍ pui leh, Jawˇ mawˇ-oˬ, ngaˬ hta‸ ga laˇ-oˆ teh‸ k'oˆ ve yoˬ. 26 Yeˍsuˆ k'oˆ ve, Yaˇ ehˉ teˇ hpaˍ ve caˇ tuˬ hta‸ yuˬ leh hpuiˇ teˇ hpaˍ hta‸ caˍ piˇ maˇ cawˇ teh‸ k'aw‸ k'oˆ piˇ ve yoˬ. 27 Yaˇ miˇ k'aw‸ k'oˆ ve, Jawˇ mawˇ-oˬ, nawˬ k'oˆ ve lehˬ cawˇ ve yoˬ. Ya‸ hk'aˇ, hpuiˇ teˇ hpaˍ lehˬ, awˬ shehˍ hpaˇ ve hpui lawˇ hawˉ sheˆ taˍ ve caˇ tuˬ teˇ hpaˍ hta‸ g'awˆ caˇ ve yoˬ teh‸ k'oˆ ve yoˬ. 28 Oˇ htaˇ Yeˍsuˆ lehˬ, Yaˇ miˇ-oˬ, nawˬ yonˍ ve lehˬ uiˍ jaˇ ve yoˬ. Nawˬ heuˆ gaˇ ve hk'e nawˬ awˬ pon hpeh‸ la piˇ-oˆ teh‸ k'oˆ ve yoˬ. Oˇ teˇ hkui yawˇ ve yaˇ miˇ na-e la ve yoˬ. 29 Yeˍsuˆ oˇ kaˬ lo tawˆ k'ai leh Gaˍliˍlehˇ g'uiˬ po paˇ lo k'ai ve yoˬ. Oˇ htaˇ, yawˇ hk'aw hk'oˆ lo taˆ-e leh mui taˍ ve yoˬ. 30 Chaw awˬ moˍ lonˉ teˇ hpaˍ yawˇ geh laˬ leh, hkui luˬ la‸ luˬ ve chaw, mehˆ cuˉ ve chaw, k'aˍ ve chaw leh awˬ kaˍ awˬ nu chaw naˬ laiˉ g'aˇ hta‸ htawˇ yawˇ hui shiˍ veu taˆ veu laˇ leh, yawˇ hkui paˇ lo teh taˍ ve yoˬ. Oˇ htaˇ, yawˇ yawˇ hui hta‸ gu na-e piˇ ve yoˬ. 31 Hk'e te leh, chaw k'aˍ teˇ hpaˍ tawˇ yaw g'a la ve, hkui luˬ la‸ luˬ ve chaw teˇ hpaˍ k'aw‸ da‸ la leh ya‸ k'aw juˇ g'a la ve, mehˆ cuˉ ve chaw hui mehˆ mawˬ la ve, chi teˇ hpaˍ hta‸ chaw awˬ moˍ lonˉ g'a mawˬ ve teˇ yanˇ, yawˇ hui anˇ jaˇ leh Iˉsaˍreˍlaˆ ve G'uiˬ sha hta‸ chiˇ uiˍ chiˇ mvuh piˇ ve yoˬ. 32 Oˇ htaˇ, Yeˍsuˆ yawˇ ve awˬ la‸ g'awˇ hui hta‸ yawˇ geh kuˬ yuˬ leh k'oˆ piˇ ve, Chaw awˬ moˍ lonˉ chi hta‸ ngaˬ ha k'aˉ ve yoˬ. Awˬ lawn k'o, yawˇ hui ngaˬ geh chehˇ ve shehˆ nyi gaˬ peuˬ leh, caˇ tuˬ te‸ chiˉ maˇ cawˬ. Yawˇ hui awˍ meu‸ jehˇ chehˇ ve teˇ yanˇ, ngaˬ yawˇ hui hta‸ maˇ k'o‸-e tcuh gaˇ. K'o‸-e tcuh ve k'o, ya‸ k'aw k'aˉ lo yawˇ hui g'aˇ nuˇ jaˇ tuˬ yoˬ teh‸ k'oˆ ve yoˬ. 33 Awˬ la‸ g'awˇ teˇ hpaˍ lehˬ, Chaw chi ma ve hk'a bvuhˆ g'a caˇ tuˬ ve, choˬ kaˬ heh puiˉ hk'aw lo hkaoˍ monˇ hk'aˬ lo ca g'a tuˬ le teh‸, yawˇ hta‸ k'oˆ piˇ ve yoˬ. 34 Yeˍsuˆ lehˬ, Nawˬ hui geh hkaoˍ monˇ hk'aˬ nyiˇ diˬ cawˬ le teh‸, yawˇ hui hta‸ na nyi htaˇ, Hkaoˍ monˇ suhˍ diˬ leh ngaˇ ehˉ a ciˉ cawˬ ve yoˬ teh‸, yawˇ hui k'aw‸ k'oˆ piˇ ve yoˬ. 35 Oˇ htaˇ, chaw awˬ moˍ lonˉ miˬ chaˇ hk'oˆ mui tuˬ yawˇ tawˇ piˇ ve yoˬ. 36 Hkaoˍ monˇ oˇ ve suhˍ diˬ leh ngaˇ teˇ hpaˍ htaˬ yawˇ yuˬ leh, bon hta‸ chiˇ mvuh peuˬ hk'aw‸ nawˉ hk'eh‸ ve yoˬ. Peuˬ leh awˬ la‸ g'awˇ teˇ hpaˍ hta‸ piˇ leh, yawˇ hui htawˇ chaw awˬ moˍ lonˉ teˇ hpaˍ hta‸ pehˬ piˇ ve yoˬ. 37 Yawˇ hui hk'a peu-eˬ hk'a bvuhˆ caˇ peuˬ hk'aw‸ nawˉ, caˇ leuˉ ve teˇ hpaˍ hta‸ k'aw‸ g'awˆ ve teˇ yanˇ, suhˍ hk'awˍ lawˇ hk'a biˇ g'a ve yoˬ. 38 Caˇ ve chaw teˇ hpaˍ lehˬ, yaˇ miˇ leh yaˇ ehˉ teˇ hpaˍ hta‸ maˇ shawˍ k'o, hawˉ hk'aˆ chaw mawˇ tiˉ awˇ hinˉ g'aˇ cawˬ ve yoˬ. 39 Oˇ htaˇ chaw awˬ moˍ lonˉ oˇ ve teˇ hpaˍ hta‸ k'o‸-e tcuh peuˬ hk'aw‸ nawˉ, yawˇ haw lo‸ k'oˍ ciˇ leh Maˍgaˍdanˍ mvuhˇ miˬ lo k'ai ve yoˬ.

Ma‸htehˍ 16

1 Oˇ htaˇ, Hpaˍriˍsehˇ hui leh Saˍduˆkehˇ hui laˬ leh, yawˇ hta‸ lawˇ nyi leh k'oˆ ve, Mvuhˇ naw ma ve awˬ heˆ a ciˉ te maˍ laˇ-oˆ teh‸ lawˬ ve yoˬ. 2 Yeˍsuˆ k'oˆ ve, Nawˬ hui lehˬ mvuhˇ hpeu‸ la htaˇ, Mvuhˇ naw ma nyiˉ lehˍ cawˬ ve k'o, mvuhˇ da‸ tuˬ yoˬ teh‸ k'oˆ ve yoˬ. 3 Peuˬ leh mvuhˇ shawˉ htaˇ, Mvuhˇ naw ma nyiˉ lehˍ cawˬ leh moˬ hoˆ taˍ ve k'o, ya‸ nyi mvuhˇ haw mvuhˇ yeˬ laˬ tuˬ yoˬ teh‸ nawˬ hui k'oˆ ve yoˬ. Nawˬ hui lehˬ, mvuhˇ naw ma hta‸ nyi leh shiˍ puiˉ ve htawˇ, awˬ co-e awˬ yanˇ ve awˬ heˆ teˇ hpaˍ hta‸ nawˬ hui fuiˍ da‸ maˇ g'a. 4 Haiˬ leh te ya‸ puiˉ ve chaw teˇ co-e lehˬ, awˬ heˆ hta‸ lawˬ ve yoˬ. Ya‸ hk'aˇ Yoˇnaˆ ve awˬ heˆ maˇ heˆ k'o, awˬ kaˍ awˬ nu awˬ heˆ teˇ ceuˬ ka‸ yawˇ hui hta‸ maˇ maˍ piˇ teh‸ k'oˆ leh, yawˇ yawˇ hui hta‸ hpaˆ da‸ taˉ leh tawˆ k'ai ve yoˬ. 5 Awˬ la‸ g'awˇ teˇ hpaˍ g'uiˬ po coˇ paˉ lo gaˬ ve teˇ yanˇ, hkaoˍ monˇ yuˬ k'ai tuˬ yawˇ hui leunˇ taˉ ve yoˬ. 6 Yeˍsuˆ k'oˆ ve, Hpaˍriˍsehˇ leh Saˍduˆkehˇ hui ve diˇ hta‸ shaˍ ti‸ te leh jaw k'ai-o teh‸, yawˇ hui hta‸ k'oˆ piˇ ve yoˬ. 7 Yawˇ hui lehˬ, Ngaˬ hui hkaoˍ monˇ maˇ yuˬ laˬ ve pa taw chi hk'e k'oˆ ve yoˬ teh‸, teˇ g'aˇ leh teˇ g'aˇ k'oˆ da‸ ve yoˬ. 8 Yeˍsuˆ awˬ lawn oˇ ve hta‸ shiˍ leh k'oˆ ve, Hk'a deh‸ maˇ yonˍ ve chaw teˇ hpaˍ-oˬ, nawˬ hui hkaoˍ monˇ maˇ yuˬ laˬ ve awˬ lawn hta‸ aˬ hto‸ ma pa taw nawˬ hui teˇ g'aˇ leh teˇ g'aˇ k'oˆ da‸ ve le. 9 Chi beu‸ hk'a gaˬ nawˬ hui maˇ dawˇ gaˬ sheˍ leh laˇ. Hkaoˍ monˇ ngaˇ diˬ hta‸ chaw ngaˇ hinˉ g'aˇ caˇ peuˬ hk'aw‸ nawˉ, nawˬ hui awˬ leuˉ hk'aˬ nyiˇ hk'awˍ lawˇ k'aw‸ g'awˆ g'a ve hta‸ maˇ dawˇ nawˇ leh laˇ. 10 Peuˬ leh hkaoˍ monˇ suhˍ diˬ hta‸ chaw awˇ hinˉ g'aˇ caˇ peu hk'aw‸ nawˉ, nawˬ hui awˬ leuˉ hk'aˬ nyiˇ hk'awˍ lawˇ k'aw‸ g'awˆ g'a ve hta‸ maˇ dawˇ nawˇ leh laˇ. 11 Ngaˬ hkaoˍ monˇ awˬ lawn nawˬ hui hta‸ k'oˆ laˇ ve maˇ heˆ teh‸, aˬ hto‸ ma pa taw nawˬ hui maˇ dawˇ gaˬ ve le. Hpaˍriˍsehˇ leh Saˍduˆkehˇ hui ve diˇ hta‸ jaw k'ai-o teh‸ yawˇ k'oˆ ve yoˬ. 12 Oˇ htaˇ, hkaoˍ monˇ hk'aw keu ve diˇ hta‸ jaw k'ai-o teh‸ yawˇ k'oˆ ve maˇ heˆ. Hpaˍriˍsehˇ leh Saˍduˆkehˇ hui maˍ piˇ ve tawˇ hkawˇ hta‸ jaw k'ai-o teh‸ yawˇ k'oˆ ve hta‸ yawˇ hui shiˍ la ve yoˬ. 13 Yeˍsuˆ lehˬ, Hpiˇliˇpuˆ Kehˉsaˍriˆ mvuhˇ miˬ hpawˇ lo gaˬ ve teˇ yanˇ, yawˇ ve awˬ la‸ g'awˇ hui hta‸ na nyi ve, Chaw yaˇ ve Yaˇ hpu hta‸ a shu hpeh‸ ve teh‸ shu k'oˆ ve le. 14 Yawˇ hui lehˬ, Chaw teˇ hpaˍ hpaˍ nawˬ hta‸ baˆtiˆsaˬ piˇ paˍ Yoˇhanˬ yoˬ teh‸ k'oˆ ve, teˇ hpaˍ hpaˍ Eˇliˇya‸ yoˬ teh‸ k'oˆ ve, teˇ hpaˍ hpaˍ lehˬ, Yeˍraˍmiˆ, maˇ heˆ k'o G'uiˬ sha ve tcuh kaˍ paˍ teˇ g'aˇ g'aˇ hpeh‸ ve yoˬ teh‸, yawˇ hui k'oˆ ve yoˬ. 15 Yeˍsuˆ yawˇ hui hta‸ k'aw‸ k'oˆ piˇ ve, Nawˬ hui teˇ hpaˍ ngaˬ hta‸ a shu hpeh‸ ve teh‸ k'oˆ ve le. 16 Siˉmonˍ Peˍtruˆ k'aw‸ k'oˆ ve, Nawˬ lehˬ Hkri‸ teh‸ k'oˆ ve, te‸ chehˇ ve G'uiˬ sha ve Yaˇ hpu hpeh‸ ve yoˬ. 17 Yeˍsuˆ yawˇ hta‸ k'aw‸ k'oˆ piˇ ve, Yoˇnaˆ ve yaˇ paˍ Siˉmonˍ-oˬ, nawˬ lehˬ awˬ bon uiˍ ve yoˬ. Awˬ lawn k'o, chaw yaˇ nawˬ hta‸ awˬ lawn chi hpeu‸ maˍ laˇ ve maˇ heˆ. Mvuhˇ naw ma hk'oˆ chehˇ ve ngaˬ ve Awˬ pa nawˬ hta‸ hpeu‸ maˍ laˇ ve yoˬ. 18 Peuˬ leh ngaˬ nawˬ hta‸ k'oˆ laˇ ve, nawˬ lehˬ Peˍtruˆ yoˬ. Haˉ pui chi awˬ hk'oˆ lo ngaˬ ve awˬ moˍ hta‸ ngaˬ te tuˬ yoˬ. Suh mvuhˇ miˬ ve yehˬ miˉ lehˬ, awˬ moˍ chi hta‸ maˇ g'aˇ. 19 Mvuhˇ naw ma mvuhˇ miˬ ve shawˇ teˇ hpaˍ ngaˬ nawˬ hta‸ pe‸ laˇ tuˬ yoˬ. Miˬ guiˬ hk'oˆ lo nawˬ hk'a hpeh taˍ ve teˇ hpaˍ hta‸ mvuhˇ naw ma hk'oˆ lo htawˇ hpeh taˍ tuˬ yoˬ. Miˬ guiˬ hk'oˆ lo nawˬ hk'a hpui hk'a ve teˇ hpaˍ hta‸ mvuhˇ naw ma hk'oˆ lo htawˇ hpui hk'a tuˬ yoˬ teh‸ k'oˆ piˇ ve yoˬ. 20 Oˇ htaˇ, yawˇ Hkri‸ hpeh‸ ve awˬ lawn chaw teˇ g'aˇ hta‸ ka‸ maˇ g'a hto piˇ tuˬ, awˬ la‸ g'awˇ hui hta‸ yawˇ tawˇ hehnˇ chaweh piˇ taˍ ve yoˬ. 21 Oˇ ve teˇ yanˇ hta‸ tanˬ leh, Yeˍsuˆ lehˬ Yeˍruˆsaˍlehnˍ venˇ lo g'a k'ai leh, awˬ hoˉ chaw mawˇ teˇ hpaˍ, paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ ve la‸ sheh awˬ hk'aw lo laiˉ ceuˬ hta‸ g'a tu‸ g'a hkanˍ tuˬ ve awˬ lawn maˇ k'oˆ, yawˇ g'a suh leh, shehˆ nyi teˇ nyi gaˬ k'o g'a k'aw‸ te‸ tu la tuˬ ve awˬ lawn maˇ k'oˆ, yawˇ ve awˬ la‸ g'awˇ hui hta‸ k'aoˍ maˍ piˇ ve yoˬ. 22 Peˍtruˆ yawˇ hta‸ shiˍ veu leh, Jawˇ mawˇ-oˬ, chi hk'e g'a hpeh‸ tuˬ maˇ heˆ. Chi hk'e ve teˇ ceuˬ nawˬ hta‸ a ciˉ ka‸ maˇ g'a heuˆ teh‸ k'oˆ leh yawˇ hta‸ deˇ ve yoˬ. 23 Yeˍsuˆ hpfuhˆ nyi leh Peˍtruˆ hta‸ k'oˆ piˇ ve, Saˍtanˍ-oˬ, ngaˬ awˬ hk'aw‸ nawˉ hpawˇ lo jiˆ k'ai-o. Nawˬ lehˬ ngaˬ awˬ pon hkui htiˇ poˬ kuiˬ hpeh‸ ve yoˬ. Awˬ lawn k'o, nawˬ ve dawˇ hk'aˇ lehˬ, G'uiˬ sha ve dawˇ hk'aˇ maˇ heˆ, chaw yaˇ ve dawˇ hk'aˇ hpeh‸ ve yoˬ. 24 Oˇ htaˇ, Yeˍsuˆ yawˇ ve awˬ la‸ g'awˇ hui hta‸ k'oˆ piˇ ve, Chaw teˇ g'aˇ g'aˇ ngaˬ hk'aˇ suh laˬ gaˇ ve k'o, a shu yawˇ ve a loˍ hta‸ baˬ taˉ leh, a shu yawˇ ve la‸ ka hta‸ taˆ leh ngaˬ hk'aˇ suh laˬ-o‸. 25 Awˬ lawn k'o, hk'aˬ ve chaw teˇ g'aˇ maˇ k'oˆ, a shu yawˇ ve a sha‸ hta‸ ponˬ piˇ gaˇ ve k'o, yawˇ ve a sha‸ shonˇ tuˬ yoˬ. Hk'aˬ ve chaw teˇ g'aˇ maˇ k'oˆ, ngaˬ awˬ pon a sha‸ shonˇ ve k'o, yawˇ ve a sha‸ hta‸ k'aw‸ g'a tuˬ yoˬ. 26 Awˬ lawn k'o, chaw teˇ g'aˇ g'aˇ miˬ guiˬ hk'a peu-eˬ hta‸ g'a ve htawˇ, yawˇ ve a sha‸ shonˇ k'ai ve k'o, yawˇ awˬ pon aˬ hto‸ ma awˬ bon cawˬ tuˬ le. Chaw teˇ g'aˇ lehˬ, a shu yawˇ ve a sha‸ awˬ pon aˬ hto‸ ma teˇ ceuˬ hta‸ yuˬ leh pa g'a tuˬ le. 27 Awˬ lawn k'o, chaw yaˇ ve Yaˇ hpu lehˬ, yawˇ Awˬ pa ve awˬ me‸ awˬ hponˇ awˬ hk'aw lo yawˇ ve mvuhˇ naw ma tcuh yaˇ hui geh teˇ geh laˬ tuˬ yoˬ. Oˇ htaˇ, a shu yawˇ te taˍ ve hk'e, chaw teˇ g'aˇ le le hta‸ yawˇ piˇ tuˬ yoˬ. 28 Ngaˬ nawˬ hui hta‸ awˬ tehˬ awˬ na k'oˆ laˇ ve, choˬ kaˬ lo huˉ chehˇ ve chaw teˇ hpaˍ hpaˍ lehˬ, chaw yaˇ ve Yaˇ hpu chi yawˇ ve mvuhˇ miˬ awˬ hk'aw lo laˬ ve hta‸ maˇ g'a mawˬ sheˍ ve ceh ceh, maˇ g'a suh teh‸ k'oˆ ve yoˬ.

Ma‸htehˍ 17

1 Hkaw‸ nyi ponˬ peuˬ hk'aw‸ nawˉ, Yeˍsuˆ lehˬ Peˍtruˆ, Yaˍkoˆ leh Yaˍkoˆ ve awˬ nyi paˍ Yoˇhanˬ hta‸ ceh shiˍ veu leh, mvuh ve hk'aw teˇ shiˍ awˬ hk'oˆ lo yawˇ hui taˆ-e ve yoˬ. 2 Oˇ htaˇ, yawˇ hui mehˆ g'uˇ suhˍ yawˇ ve awˬ ho‸ awˬ han pa ve yoˬ. Yawˇ ve mehˆ hpfuhˇ lehˬ, mvuhˇ nyi hk'a shuˍ shuˍ awˬ g'euˆ ba leh, yawˇ ve veu‸ k'aˇ htawˇ awˬ g'euˆ hk'a shuˍ shuˍ hpu la ve yoˬ. 3 Moˉseˍ leh Eˇliˇya‸ htawˇ yawˇ hui mehˆ g'uˇ suhˍ tawˆ la leh Yeˍsuˆ geh na‸ uˉ te da‸ chehˇ ve yoˬ. 4 Oˇ htaˇ Peˍtruˆ lehˬ, Jawˇ mawˇ-oˬ, ngaˬ hui choˬ kaˬ chehˇ ve lehˬ da‸ ve yoˬ. Nawˬ nyi ma cawˇ ve k'o, choˬ kaˬ lo ngaˬ aˉ po k'o shehˆ shiˍ te tuˬ yoˬ. Nawˬ awˬ pon teˇ shiˍ, Moˉseˍ awˬ pon teˇ shiˍ leh Eˇliˇya‸ awˬ pon teˇ shiˍ te tuˬ yoˬ teh‸, Yeˍsuˆ hta‸ k'oˆ piˇ ve yoˬ. 5 Yawˇ tawˇ yaw chehˇ ve teˇ yanˇ, awˬ g'euˆ ba ve moˬ yawˇ hui hta‸ hoˆ taˍ ve yoˬ. Moˬ oˇ ve awˬ hk'aw lo awˬ hkawˇ chi hk'e bvuhˬ la ve, Chaw chi lehˬ, ngaˬ ha‸ jaˇ ve ngaˬ ve Yaˇ hpu hpeh‸ leh, yawˇ hta‸ ngaˬ nyi hk'aˇ suh jaˇ ve yoˬ. Yawˇ ve tawˇ hkawˇ hta‸ na yuˬ-o‸ teh‸ k'oˆ ve yoˬ. 6 Awˬ la‸ g'awˇ teˇ hpaˍ chi hta‸ g'a kaˇ htaˇ, yawˇ hui kawˆ jaˇ leh mehˆ hpfuhˇ miˬ chaˇ hk'oˆ boˆ taˍ ve yoˬ. 7 Oˇ htaˇ Yeˍsuˆ laˬ leh yawˇ hui hta‸ htawˇ leh, Tu-o, taˇ kawˆ teh‸ k'oˆ piˇ ve yoˬ. 8 Yawˇ hui k'aw‸ chiˇ nyi ve teˇ yanˇ, awˬ kaˍ awˬ nu chaw teˇ g'aˇ hta‸ ka‸ maˇ mawˬ. Yeˍsuˆ teˇ g'aˇ hta‸ ceh tiˉ g'a mawˬ ve yoˬ. 9 Hk'aw oˇ ve teˇ shiˍ lo yawˇ hui k'aw‸ ya‸ la chehˇ ve teˇ yanˇ Yeˍsuˆ k'oˆ ve, Chaw yaˇ ve Yaˇ hpu lehˬ, suh kuiˬ lo maˇ k'aw‸ te‸ tu la sheˍ ve ceh ceh, nawˬ hui g'a mawˬ peuˬ ve awˬ lawn chi, chaw teˇ g'aˇ hta‸ ka‸ taˇ hto piˇ teh‸, yawˇ hui hta‸ tawˇ piˇ ve yoˬ. 10 Oˇ htaˇ yawˇ ve awˬ la‸ g'awˇ teˇ hpaˍ lehˬ, Hk'e te k'o, Eˇliˇya‸ awˉ lawˉ g'a laˬ tuˬ yoˬ. teh‸ aˬ hto‸ ma pa taw li‸ bvuh‸ paˍ teˇ hpaˍ k'oˆ taˍ ve le teh‸, yawˇ hta‸ na nyi ve teˇ yanˇ, 11 yawˇ k'aw‸ k'oˆ piˇ ve, Eˇliˇya‸ awˬ tehˬ awˬ na laˬ leh, hk'a peu-eˬ hta‸ k'aw‸ gu te tuˬ yoˬ. 12 Ya‸ hk'aˇ, ngaˬ nawˬ hui hta‸ k'oˆ laˇ ve, Eˇliˇya‸ gaˬ la peuˬ leh, yawˇ hui yawˇ hta‸ maˇ shiˍ ve pa taw, te gaˇ ve hk'e yawˇ hta‸ te piˇ ve yoˬ. Oˇ ve hk'a shuˍ shuˍ chaw yaˇ ve Yaˇ hpu htawˇ yawˇ hui ve la‸ sheh awˬ hk'aw lo g'a hkanˍ tuˬ yoˬ teh‸ k'oˆ ve yoˬ. 13 Oˇ htaˇ, baˆtiˆsaˬ piˇ paˍ Yoˇhanˬ awˬ lawn yawˇ k'oˆ chehˇ ve hta‸ awˬ la‸ g'awˇ hui g'a shiˍ ve yoˬ. 14 Chaw awˬ moˍ lonˉ geh yawˇ hui gaˬ la ve teˇ yanˇ, chaw teˇ g'aˇ yawˇ geh laˬ leh, yawˇ mehˆ g'uˇ suhˍ hkui tcuhˉ teh leh k'oˆ ve, 15 Jawˇ mawˇ-oˬ, ngaˬ yaˇ paˍ hta‸ ha k'aˉ laˇ-oˆ. Yawˇ paw‸ hpeuˆ leh g'a hkanˍ jaˇ ve yoˬ. Awˬ lawn k'o, yawˇ aˬ miˍ awˬ hk'aw lo teˇ hkui teˇ hkui paˍ lo‸-e leh, iˉ kaˆ awˬ hk'aw lo htawˇ teˇ hkui teˇ hkui paˍ lo‸-e ve yoˬ. 16 Nawˬ ve awˬ la‸ g'awˇ teˇ hpaˍ geh ngaˬ yawˇ hta‸ shiˍ veu laˇ htawˇ, yawˇ hui yawˇ hta‸ gu na-e piˇ maˇ g'a teh‸ yawˇ k'oˆ ve yoˬ. 17 Yeˍsuˆ k'aw‸ k'oˆ ve, Yonˍ ve maˇ cawˬ leh nyi ma hpfuhˆ puiˉ ve chaw chi teˇ co-e-oˬ, ngaˬ nawˬ hui geh hk'aˬ maw g'a chehˇ tuˬ sheˍ le. Nawˬ hui hta‸ hk'aˬ maw g'a yeunˇ hkanˍ tuˬ sheˍ le. Yawˇ hta‸ ngaˬ geh yuˬ laˬ-o‸ teh‸ k'oˆ piˇ ve yoˬ. 18 Oˇ htaˇ Yeˍsuˆ neˇ oˇ ve hta‸ deˇ leh, neˇ oˇ ve yaˇ paˍ awˬ hk'aw lo tawˆ k'ai ve yoˬ. Oˇ ve teˇ hkui yaˇ paˍ oˇ ve na-e la ve yoˬ. 19 Oˇ htaˇ, Yeˍsuˆ teˇ g'aˇ ceh tiˉ chehˇ htaˇ, awˬ la‸ g'awˇ teˇ hpaˍ yawˇ geh laˬ leh, Neˇ oˇ ve hta‸ aˬ hto‸ ma pa taw ngaˬ hui g'a‸ k'oˬ maˇ g'a ve le teh‸ na nyi ve yoˬ. 20 Yawˇ k'aw‸ k'oˆ ve, Nawˬ hui hk'a deh‸ maˇ yonˍ ve pa taw yoˬ. Ngaˬ nawˬ hui hta‸ awˬ tehˬ awˬ na k'oˆ laˇ ve, nawˬ hui yonˍ ve teˇ ceuˬ g'awˇ caˉ yawˇ hk'e hui cawˬ ve k'o, hk'aw chi teˇ shiˍ hta‸, Oˇ kaˬ lo jiˆ k'ai-o teh‸ k'oˆ piˇ ve teˇ yanˇ, jiˆ k'ai tuˬ yoˬ. Nawˬ hui te maˇ g'a ve teˇ ceuˬ ka‸ maˇ cawˬ teh‸, yawˇ hui hta‸ k'oˆ piˇ ve yoˬ. 21 Bon lawˬ ve leh caˇ tuˬ ce ve ceh tiˉ chi teˇ ceuˬ hta‸ tawˆ k'ai piˇ lawˬ g'a ve yoˬ. (Li‸ hpu teˇ hpaˍ awˬ hk'aw lo ka nanˉ ehˉ chi teˇ maˬ cawˬ ve yoˬ.) 22 Gaˍliˍlehˇ mvuhˇ miˬ awˬ hk'aw lo yawˇ hui teˇ geh chehˇ ve teˇ yanˇ Yeˍsuˆ k'oˆ ve, Chaw yaˇ ve Yaˇ hpu lehˬ, chaw yaˇ hui ve la‸ sheh awˬ hk'aw lo chiˇ a‸ ve hta‸ g'a hkanˍ ve awˬ yanˇ neˇ la peuˬ. 23 Yawˇ hui yawˇ hta‸ tiˇ pehˍ leh shehˆ nyi teˇ nyi awˬ hk'aw lo yawˇ k'aw‸ te‸ tu la tuˬ yoˬ teh‸ k'oˆ ve teˇ yanˇ, awˬ la‸ g'awˇ hui dawˇ haˍ jaˇ ve yoˬ. 24 Yawˇ hui Kaˍpeˍneˍonˍ venˇ lo k'aw‸ gaˬ la ve teˇ yanˇ, bon yehˬ lonˉ awˬ pon a moˇ shaw shehˍ hpaˇ teˇ hpaˍ Peˍtruˆ geh k'ai leh, Nawˬ ve saˍ la‸ lehˬ, a moˇ maˇ keu leh laˇ teh‸ na nyi ve yoˬ. 25 Keu ve yoˬ teh‸ k'aw‸ k'oˆ piˇ ve yoˬ. Peˍtruˆ yehˬ hk'aw lo‸-e ve teˇ yanˇ, Yeˍsuˆ tawˇ awˉ lawˉ yaw leh k'oˆ ve, Siˉmonˍ-oˬ, nawˬ hk'aˬ hk'e dawˇ ve le. Chi miˬ guiˬ ve hkunˉ hawˉ hkanˇ teˇ hpaˍ lehˬ, a shu geh a moˇ shaw ve le. A shu yawˇ ve yaˇ geh laˇ. Maˇ heˆ k'o, shu geh shaw ve laˇ teh‸ na nyi ve yoˬ. 26 Shu geh shaw ve yoˬ teh‸ Peˍtruˆ k'aw‸ k'oˆ ve teˇ yanˇ Yeˍsuˆ lehˬ, Hk'e te k'o, yawˇ hui ve yaˇ teˇ hpaˍ g'a ponˬ ve yoˬ. 27 Ya‸ hk'aˇ, ngaˬ hui hta‸ pa taw shu maˇ g'a dawˇ ya‸ tuˬ, g'uiˬ po lo k'ai leh biˉ teˇ maˬ hta‸ ca baˬ keu-o. Awˉ lawˉ g'a ve ngaˇ hta‸ yuˬ leh maw‸ k'aw ngaˉ hk'a nyi. Oˇ htaˇ, hpu teˇ hteh‸ hta‸ nawˬ g'a mawˬ tuˬ yoˬ. Hpu oˇ ve hta‸ yuˬ leh, ngaˬ awˬ pon leh nawˬ awˬ pon yawˇ hui hta‸ ca piˇ-oˆ teh‸, Peˍtruˆ hta‸ k'oˆ piˇ ve yoˬ.

Ma‸htehˍ 18

1 Oˇ ve teˇ hkui awˬ hk'aw lo, awˬ la‸ g'awˇ teˇ hpaˍ Yeˍsuˆ geh laˬ leh k'oˆ ve, Mvuhˇ naw ma mvuhˇ miˬ awˬ hk'aw lo hk'aˬ ve teˇ g'aˇ shu a‸ kehˉ uiˍ ve le teh‸ na nyi ve yoˬ. 2 Oˇ htaˇ yawˇ yaˇ ehˉ teˇ g'aˇ hta‸ kuˬ yuˬ leh, yaˇ ehˉ oˇ ve yawˇ hui awˬ k'aw ji lo taˍ leh k'oˆ ve, 3 Ngaˬ nawˬ hui hta‸ awˬ tehˬ awˬ na k'oˆ laˇ ve, nawˬ hui nyi ma maˇ pa leh yaˇ ehˉ hk'e maˇ hpeh‸ la ve k'o, mvuhˇ naw ma mvuhˇ miˬ awˬ hk'aw lo nawˬ hui maˇ g'a lo‸-e taˬ. 4 A shu teˇ g'aˇ maˇ k'oˆ, yaˇ ehˉ chi hk'a shuˍ shuˍ nyi ma nehˬ lehˍ taˍ ve chaw lehˬ, mvuhˇ naw ma mvuhˇ miˬ awˬ hk'aw lo shu a‸ kehˉ uiˍ ve chaw teˇ g'aˇ hpeh‸ ve yoˬ. 5 Yaˇ ehˉ chi hk'e ve teˇ g'aˇ hta‸ ngaˬ ve awˬ meh awˬ hk'aw lo ha‸ yuˬ ve chaw hk'aˬ ve teˇ g'aˇ maˇ k'oˆ, ngaˬ hta‸ ha‸ yuˬ ve yoˬ. 6 Ya‸ hk'aˇ, ngaˬ hta‸ yonˍ ve yaˇ ehˉ teˇ g'aˇ hta‸ ya‸ k'ai tuˬ te ve chaw hk'aˬ ve teˇ g'aˇ maˇ k'oˆ, yawˇ ve k'awˍ peˍ hta‸ haˉ pui mawˍ lonˉ hpeh k'u leh naˉ jaˇ ve laˇ tsuhˇ g'uiˬ awˬ hk'aw lo yawˇ hta‸ ce peu ve k'o, yawˇ awˬ pon da‸ leuˉ ve yoˬ. 7 Shu ya‸ k'ai tuˬ te ve pa taw, miˬ guiˬ yaˇ hui g'a dawˇ haˍ jaˇ tuˬ yoˬ. Awˬ lawn k'o, shu ya‸ k'ai tuˬ te ve teˇ ceuˬ lehˬ cawˬ tuˬ yoˬ. Ya‸ hk'aˇ, shu ya‸ k'ai tuˬ te shehˍ hpaˇ lehˬ, g'a dawˇ haˍ jaˇ tuˬ yoˬ. 8 Nawˬ ve la‸ sheh teˇ paˉ maˇ k'oˆ, nawˬ ve hkui sheh teˇ paˉ maˇ k'oˆ, nawˬ hta‸ te ya‸ piˇ lawˬ ve k'o, tawˆ baˬ-o‸. Hkui sheh la‸ sheh nyiˇ paˉ paˉ cawˬ leh co co taiˍ taiˍ to‸ chehˇ ve aˬ miˍ awˬ hk'aw lo g'a hkanˍ ve a‸ kehˉ, hkui sheh la‸ sheh hk'a peu-eˬ maˇ cawˬ leh a sha‸ te‸ ve awˬ hk'aw lo g'a lo‸-e ve lehˬ, nawˬ awˬ pon da‸ leuˉ ve yoˬ. 9 Nawˬ ve mehˆ shiˍ teˇ paˉ nawˬ hta‸ te ya‸ piˇ lawˬ ve k'o, mehˆ shiˍ oˇ ve hta‸ k'ehˉ baˬ sheˍ. Mehˆ shiˍ nyiˇ paˉ paˉ cawˬ leh aˬ miˍ to‸ chehˇ ve moˬ naˆ ho‸ awˬ hk'aw lo g'a hkanˍ ve a‸ kehˉ, mehˆ shiˍ teˇ paˉ tiˉ cawˬ leh a sha‸ te‸ ve awˬ hk'aw lo g'a lo‸-e ve lehˬ, nawˬ awˬ pon da‸ leuˉ ve yoˬ. 10 Nawˬ hui lehˬ, yaˇ ehˉ chi teˇ hpaˍ awˬ hk'aw lo teˇ g'aˇ g'aˇ hta‸ maˇ shawˍ maˇ caˆ maˇ g'a te tuˬ, shaˍ ti‸ te-o. Awˬ lawn k'o, ngaˬ nawˬ hui hta‸ k'oˆ laˇ ve, mvuhˇ naw ma hk'oˆ lo yawˇ hui ve mvuhˇ naw ma tcuh yaˇ teˇ hpaˍ lehˬ, mvuhˇ naw ma hk'oˆ chehˇ ve ngaˬ Awˬ pa ve mehˆ hpfuhˇ hta‸ nyi tcuhˉ taˍ ve yoˬ. 12 Nawˬ hui hk'aˬ hk'e dawˇ le. Chaw teˇ g'aˇ g'aˇ, yawˬ teˇ ha hkeh cawˬ ve awˬ hk'aw lo teˇ hkeh mehˉ k'ai ve k'o, k'awˇ chi k'awˇ hkeh hta‸ hk'aw hk'oˆ lo teh taˉ leh mehˉ k'ai ve teˇ hkeh hta‸ yawˇ ca nyi tuˬ yoˬ maˇ heˆ laˇ. 13 Ngaˬ nawˬ hui hta‸ awˬ tehˬ awˬ na k'oˆ laˇ ve, yawˬ oˇ ve hta‸ k'aw‸ mawˬ ve k'o, maˇ mehˉ ve yawˬ k'awˇ chi k'awˇ hkeh hta‸ ha lehˬ ve a‸ kehˉ, oˇ ve teˇ hkeh hta‸ leuˉ leh ha lehˬ tuˬ yoˬ. 14 Chi hk'a shuˍ shuˍ, yaˇ ehˉ chi teˇ hpaˍ teˇ g'aˇ g'aˇ luˬ k'ai tuˬ ve hta‸ mvuhˇ naw ma hk'oˆ chehˇ ve ngaˬ Awˬ pa nyi ma maˇ cawˇ ve yoˬ. 15 Nawˬ ve awˬ viˉ awˬ nyi teˇ g'aˇ g'aˇ nawˬ hta‸ te ya‸ laˇ ve k'o, yawˇ geh k'ai leh nawˬ huiˉ maˬ ceh tiˉ chehˇ htaˇ, yawˇ ve ya‸ kuiˬ hta‸ k'aw‸ maˍ piˇ-oˆ. Yawˇ nawˬ ve hkawˇ hta‸ na ve k'o, nawˬ awˬ viˉ awˬ nyi hta‸ nawˬ k'aw‸ g'a peuˬ. 16 Ya‸ hk'aˇ nawˬ ve hkawˇ hta‸ yawˇ maˇ na ve k'o, shaˉ hkiˆ hkanˍ paˍ nyiˇ g'aˇ, maˇ heˆ k'o shehˆ g'aˇ, tawˇ teˇ hkawˇ le le hta‸ shaˉ hkiˆ hk'a deh‸ hkanˍ hpeh‸ tuˬ, nawˬ geh chaw teˇ g'aˇ, maˇ heˆ k'o nyiˇ g'aˇ hta‸ shiˍ k'ai-o. 17 Yawˇ hui ve hkawˇ hta‸ yawˇ maˇ na ve k'o, Hkri‸ yaˇ awˬ moˍ hta‸ hto piˇ-oˆ. Hkri‸ yaˇ awˬ moˍ ve hkawˇ hta‸ htawˇ maˇ na ve k'o, buiˇ shaˆ aˉ naˆ chaw leh awˬ hkawnˍ shaw paˍ hk'e yawˇ hta‸ shawˍ taˍ-o‸. 18 Ngaˬ nawˬ hui hta‸ awˬ tehˬ awˬ na k'oˆ laˇ ve, miˬ guiˬ hk'oˆ lo nawˬ hui hk'a hpeh taˍ ve teˇ hpaˍ hta‸ mvuhˇ naw ma hk'oˆ lo htawˇ hpeh taˍ tuˬ yoˬ. Miˬ guiˬ hk'oˆ lo nawˬ hui hk'a hpui hk'a ve teˇ hpaˍ hta‸ mvuhˇ naw ma hk'oˆ lo htawˇ hpui hk'a tuˬ yoˬ. 19 Peuˬ leh ngaˬ nawˬ hui hta‸ k'aw‸ k'oˆ laˇ ve, miˬ guiˬ hk'oˆ lo nawˬ hui awˬ hk'aw lo chaw nyiˇ g'aˇ nyi ma hawˍ da‸ leh teˇ ceuˬ ceuˬ lawˬ ve k'o, mvuhˇ naw ma hk'oˆ chehˇ ve ngaˬ ve Awˬ pa lehˬ, yawˇ huiˉ maˬ lawˬ ve hk'e te piˇ tuˬ yoˬ. 20 Awˬ lawn k'o, chaw nyiˇ g'aˇ shehˆ g'aˇ ngaˬ ve awˬ meh hta‸ cuˇ leh hpawnˬ da‸ ve k'o, oˇ kaˬ yawˇ hui awˬ k'aw ji lo ngaˬ chehˇ tuˬ yoˬ teh‸ k'oˆ ve yoˬ. 21 Oˇ htaˇ Peˍtruˆ yawˇ geh laˬ leh, Jawˇ mawˇ-oˬ, ngaˬ ve awˬ viˉ awˬ nyi ngaˬ hta‸ teˇ pawˆ peuˬ teˇ pawˆ te ya‸ laˇ ve k'o, hk'aˬ nyiˇ pawˆ hk'a gaˬ yawˇ ve venˇ baˆ hta‸ ngaˬ g'a hpehˇ piˇ tuˬ le. Suhˍ pawˆ hk'a gaˬ laˇ teh‸ na nyi ve yoˬ. 22 Yeˍsuˆ yawˇ hta‸ k'aw‸ k'oˆ piˇ ve, Suhˍ pawˆ hk'a gaˬ ceh tiˉ maˇ heˆ. Suhˍ pawˆ suhˍ chi pawˆ hk'a gaˬ g'a hpehˇ piˇ ve yoˬ teh‸ ngaˬ nawˬ hta‸ k'oˆ laˇ ve yoˬ. 23 Hk'e te leh mvuhˇ naw ma mvuhˇ miˬ lehˬ, yawˇ ve awˬ ceˬ teˇ hpaˍ geh hpu caˇ lanˇ teˇ hpaˍ hta‸ gu gaˇ ve hkunˉ hawˉ hkanˇ teˇ g'aˇ hta‸ shuˍ ve yoˬ. 24 Yawˇ caˇ lanˇ tanˬ gu chehˇ ve teˇ yanˇ, teˇ chi lanˬ hteh‸ jeˬ cha taˍ ve chaw teˇ g'aˇ hta‸ shu yawˇ geh shiˍ veu laˇ ve yoˬ. 25 Chaw oˇ ve lehˬ, k'aw‸ shaiˍ piˇ tuˬ maˇ cawˬ ve pa taw, yawˇ ve awˬ shehˍ hpaˇ k'oˆ ve, Yawˇ awˬ to ka‸, yawˇ miˇ yawˇ yaˇ ka‸, yawˇ hk'a cawˬ ve mawˇ hk'a peu-eˬ hta‸ ka‸ hawˇ baˬ sheˬ leh shaiˍ piˇ lawˬ-o‸ teh‸ tawˇ piˇ ve yoˬ. 26 Hk'e te leh awˬ ceˬ oˇ ve yawˇ mehˆ g'uˇ suhˍ hkui tcuhˉ teh leh k'oˆ ve, Jawˇ mawˇ-oˬ, ngaˬ hta‸ a ciˉ yeunˇ hkanˍ laˇ sheˍ. Ngaˬ hk'a peu-eˬ hta‸ k'aw‸ shaiˍ tuˬ yoˬ teh‸ yawˇ hta‸ lawˬ hkawˉ ve yoˬ. 27 Hk'e te leh awˬ ceˬ ve awˬ shehˍ hpaˇ lehˬ, yawˇ hta‸ ha k'aˉ ve pa taw, yawˇ hta‸ hpehˇ piˇ leh yawˇ ve jeˬ hta‸ htawˇ ponˬ piˇ ve yoˬ. 28 Oˇ htaˇ awˬ ceˬ oˇ ve tawˆ k'ai leh, yawˇ hta‸ jeˬ teˇ ha hteh‸ cha taˍ ve awˬ kaˍ awˬ nu awˬ ceˬ teˇ g'aˇ hta‸ g'a mawˬ htaˇ, yawˇ hta‸ yuˬ leh k'awˍ peˍ nyiˉ leh, Ngaˬ ve jeˬ hta‸ shaiˍ laˇ-oˆ teh‸ k'oˆ piˇ ve yoˬ. 29 Hk'e te leh awˬ kaˍ awˬ nu awˬ ceˬ oˇ ve teˇ g'aˇ lehˬ, hkui tcuhˉ teh leh k'oˆ ve, Ngaˬ hta‸ a ciˉ yeunˇ hkanˍ laˇ sheˍ. Ngaˬ nawˬ hta‸ k'aw‸ shaiˍ laˇ tuˬ yoˬ teh‸ yawˇ hta‸ lawˬ hkawˉ ve yoˬ. 30 Ya‸ hk'aˇ, yawˇ maˇ na leh, jeˬ k'aw‸ shaiˍ laˇ htaˇ hk'a gaˬ awˬ ceˬ oˇ ve hta‸ htawnˍ hk'aw lo ca keu taˍ ve yoˬ. 31 Yawˇ chi hk'e te ve hta‸ awˬ kaˍ awˬ nu awˬ ceˬ teˇ hpaˍ g'a mawˬ htaˇ, yawˇ hui dawˇ haˍ jaˇ leh, awˬ lawn hk'a peu-eˬ yawˇ hui ve awˬ shehˍ hpaˇ hta‸ ca hto piˇ ve yoˬ. 32 Oˇ htaˇ, yawˇ ve awˬ shehˍ hpaˇ yawˇ hta‸ kuˬ leh k'oˆ piˇ ve, Haiˬ ve awˬ ceˬ-oˬ, nawˬ ngaˬ hta‸ lawˬ hkawˉ ve pa taw nawˬ ve jeˬ hk'a peu-eˬ hta‸ ngaˬ ponˬ piˇ ve yoˬ. 33 Ngaˬ nawˬ hta‸ ha k'aˉ ve hk'a shuˍ shuˍ nawˬ htawˇ awˬ kaˍ awˬ nu awˬ ceˬ hta‸ ha k'aˉ cawˇ ve yoˬ maˇ heˆ laˇ teh‸ k'oˆ piˇ ve yoˬ. 34 Peuˬ leh yawˇ ve awˬ shehˍ hpaˇ nyi ma zuhˆ leh, yawˇ jeˬ hk'a peu-eˬ k'aw‸ shaiˍ peuˬ htaˇ hk'a gaˬ htawnˍ awˬ hoˉ teˇ hpaˍ ve la‸ sheh awˬ hk'aw lo yawˇ hta‸ chiˇ a‸ piˇ ve yoˬ. 35 Nawˬ hui teˇ g'aˇ le le htawˇ, a shu yawˇ ve awˬ viˉ awˬ nyi te ya‸ laˇ ve teˇ hpaˍ hta‸ nyi ma awˬ tawˬ hk'a gaˬ maˇ hpehˇ piˇ ve k'o, mvuhˇ naw ma hk'oˆ chehˇ ve ngaˬ ve Awˬ pa htawˇ nawˬ hui hta‸ chi hk'e te laˇ tuˬ yoˬ teh‸, Yeˍsuˆ yawˇ hui hta‸ k'oˆ piˇ ve yoˬ.

Ma‸htehˍ 19

1 Tawˇ chi teˇ hpaˍ hta‸ Yeˍsuˆ maˍ piˇ peuˬ hk'aw‸ nawˉ, yawˇ Gaˍliˍlehˇ mvuhˇ miˬ awˬ hk'aw tawˆ k'ai leh, Yawˇdanˍ g'uiˬ ma coˇ paˉ lo cawˬ ve Yuˇda‸ mvuhˇ miˬ teˇ tawn lo gaˬ ve yoˬ. 2 Chaw awˬ moˍ lonˉ teˇ hpaˍ yawˇ awˬ hk'aˇ suh k'ai leh, oˇ kaˬ lo yawˇ yawˇ hui hta‸ gu na-e piˇ ve yoˬ. 3 Oˇ htaˇ, yawˇ hta‸ lawˇ nyi tuˬ Hpaˍ riˍsehˇ teˇ hpaˍ yawˇ geh laˬ leh, Hk'aˬ hk'e ve awˬ lawn teˇ ceuˬ hta‸ pa taw maˇ k'oˆ, a shu yawˇ ve awˬ miˇ ma hta‸ baˬ hpeh‸-aw laˇ teh‸ na nyi ve yoˬ. 4 Yawˇ k'aw‸ k'oˆ ve. Te hpanˍ shehˍ hpaˇ lehˬ, awˬ hkuiˉ puiˍ htaˇ ka‸ hawˉ hk'aˆ leh yaˇ miˇ hta‸ te hpanˍ taˍ peuˬ leh k'oˆ ve, 5 Chi hta‸ pa taw hawˉ hk'aˆ lehˬ, yawˇ ve awˬ pa awˬ e hta‸ hpaˆ da‸ taˉ leh yawˇ ve awˬ miˇ ma hta‸ caˉ da‸ leh, yawˇ huiˉ maˬ teˇ suhˍ teˇ shaˍ tiˉ hpeh‸ la tuˬ yoˬ teh‸ bvuh‸ taˍ ve tawˇ hkawˇ hta‸ nawˬ hui maˇ g'aw jaw laˇ. 6 Chi hta‸ pa taw, yawˇ huiˉ maˬ nyiˇ g'aˇ hpeh‸ ve maˇ heˆ, teˇ g'aˇ tiˉ hpeh‸ la peuˬ. Hk'e te leh, G'uiˬ sha caˉ da‸ piˇ taˍ ve hta‸ chaw yaˇ maˇ g'a yuˬ hpaˆ da‸ piˇ teh‸ k'oˆ piˇ ve yoˬ. 7 Yawˇ hui k'aw‸ k'oˆ ve, Hk'e te k'o, hpaˆ da‸ ve li‸ piˇ peuˬ htaˇ heh‸, awˬ miˇ ma hta‸ baˬ-o‸ teh‸, aˬ hto‸ ma pa taw Moˉseˍ tawˇ piˇ taˍ ve le teh‸, yawˇ hta‸ k'aw‸ na nyi ve yoˬ. 8 Yawˇ k'aw‸ k'oˆ ve, Nawˬ hui nyi ma heh ve pa taw, a shu yawˇ ve awˬ miˇ ma hta‸ baˬ tuˬ Moˉseˍ a hkaw-anˬ piˇ ve yoˬ. Ya‸ hk'aˇ, awˬ hkuiˉ puiˍ htaˇ lehˬ chi hk'e maˇ heˆ. 9 Ngaˬ nawˬ hui hta‸ k'oˆ laˇ ve, haˉ chawˇ haˉ paˆ te ve teˇ ceuˬ maˇ heˆ k'o, a shu yawˇ awˬ miˇ ma hta‸ baˬ leh awˬ kaˍ awˬ nu yaˇ miˇ hta‸ ca heuˆ ve chaw hk'aˬ ve teˇ g'aˇ maˇ k'oˆ, haˉ chawˇ haˉ paˆ te ve yoˬ teh‸, yawˇ hui hta‸ k'oˆ piˇ ve yoˬ. 10 Awˬ la‸ g'awˇ teˇ hpaˍ lehˬ, Awˬ hpawˇ awˬ miˇ heuˆ ve teˇ ceuˬ chi hk'e hpeh‸ ve k'o, maˇ heuˆ ve lehˬ da‸ leuˉ ve yoˬ teh‸ k'oˆ ve yoˬ. 11 Oˇ htaˇ yawˇ yawˇ hui hta‸ k'oˆ piˇ ve, Tawˇ chi teˇ hkawˇ hta‸ chaw hk'a peu-eˬ hkanˍ yuˬ maˇ hpeh‸. Hkanˍ yuˬ tuˬ awˬ bon g'a taˍ ve chaw teˇ hpaˍ ceh tiˉ hkanˍ yuˬ hpeh‸ ve yoˬ. 12 Awˬ lawn k'o, chaw teˇ hpaˍ hpaˍ lehˬ, paw la htaˇ ka‸ awˬ tawnˇ hpeh‸ taˍ ve yoˬ. Chaw teˇ hpaˍ hpaˍ lehˬ, awˬ tawnˇ hpeh‸ la tuˬ shu yawˇ hui hta‸ te piˇ taˍ ve yoˬ. Chaw teˇ hpaˍ hpaˍ lehˬ, mvuhˇ naw ma mvuhˇ miˬ aw pon a shu yawˇ ve awˬ to hta‸ chaw awˬ tawnˇ hpeh‸ la piˇ ve yoˬ. Chi hta‸ hkanˍ yuˬ hpeh‸ ve chaw lehˬ, hkanˍ yuˬ-o‸ teh‸ k'oˆ ve yoˬ. 13 Oˇ htaˇ, yaˇ ehˉ teˇ hpaˍ awˬ hk'oˆ hta‸ Yeˍsuˆ la‸ sheh taˍ leh bon lawˬ piˇ tuˬ, yaˇ ehˉ teˇ hpaˍ hta‸ shu yawˇ geh shiˍ laˬ ve yoˬ. Awˬ la‸ g'awˇ teˇ hpaˍ lehˬ, shiˍ laˬ ve chaw teˇ hpaˍ hta‸ deˇ ve yoˬ. 14 Ya‸ hk'aˇ Yeˍsuˆ k'oˆ ve, Yaˇ ehˉ teˇ hpaˍ hta‸ ngaˬ geh laˬ piˇ-oˆ. Yawˇ hui hta‸ taˇ tawˍ taˍ. Awˬ lawn k'o mvuhˇ naw ma mvuhˇ miˬ lehˬ, chaw oˇ hk'e ve mvuhˇ miˬ hpeh‸ ve yoˬ teh‸ k'oˆ piˇ ve yoˬ. 15 Yaˇ ehˉ teˇ hpaˍ awˬ hk'oˆ hta‸ la‸ sheh taˍ peuˬ hk'aw‸ nawˉ, yawˇ oˇ kaˬ lo tawˆ k'ai ve yoˬ. 16 Oˇ htaˇ, chaw teˇ g'aˇ yawˇ geh laˬ leh k'oˆ ve, Saˍ la‸-oˬ, co ti‸ ha ti‸ g'a tuˬ, ngaˬ da‸ ve kanˉ hk'aˬ ve teˇ maˬ hta‸ g'a te tuˬ le teh‸ na nyi ve yoˬ. 17 Yawˇ k'aw‸ k'oˆ ve, Aˬ hto‸ ma pa taw nawˬ ngaˬ hta‸ da‸ ve awˬ lawn na nyi laˇ ve le. Da‸ ve awˬ shehˍ hpaˇ teˇ g'aˇ tiˉ cawˬ ve yoˬ. A sha‸ te‸ kuiˬ lo nawˬ lo‸-e gaˇ ve k'o, awˬ liˇ tawˇ hkawˇ teˇ hpaˍ hta‸ na yuˬ leh te-o teh‸, yawˇ hta‸ k'oˆ piˇ ve yoˬ. 18 Hk'aˬ ve teˇ maˬ le teh‸ yawˇ na nyi htaˇ, Yeˍsuˆ k'aw‸ k'oˆ ve, Chaw hta‸ taˇ tiˇ pehˍ, haˉ chawˇ haˉ paˆ taˇ te, shu ve mawˇ hta‸ taˇ hk'awˇ, shu hta‸ maˇ heˆ heˆ ve shaˉ hkiˆ taˇ hkanˍ, 19 nawˬ ve awˬ pa aw e hta‸ yawˆ yawˆ yan yan te-o, nawˬ awˬ to hta‸ ha‸ ve hk'e nawˬ awˬ paˇ awˬ kui chehˇ ve chaw hta‸ ha‸-o‸ teh‸ k'oˆ piˇ ve yoˬ. 20 Chaw haˉ paˍ oˇ ve lehˬ, Chi hk'a peu-eˬ hta‸ ngaˬ na yuˬ leh te peuˬ. Ngaˬ aˬ hto‸ ma teˇ ceuˬ hta‸ loˍ sheˍ le teh‸, k'aw‸ k'oˆ piˇ ve yoˬ. 21 Yeˍsuˆ yawˇ hta‸ k'aw‸ k'oˆ piˇ ve, Nawˬ biˇ la gaˇ ve k'o, nawˬ k'o‸-e leh, nawˬ ve mawˇ jeˬ hta‸ hawˇ baˬ leh haˍ yaˇ g'awˇ yaˇ hta‸ pehˬ piˇ-oˆ. Mvuhˇ naw ma hk'oˆ lo awˬ hpfuhˇ hk'aˆ ve mawˇ nawˬ cawˬ taˍ tuˬ yoˬ. Peuˬ leh nawˬ k'aw‸ laˬ leh ngaˬ hk'aˇ suh laˬ-o‸ teh‸ k'oˆ piˇ ve yoˬ. 22 Chaw haˉ paˍ lehˬ, tawˇ hkawˇ chi hta‸ g'a kaˇ htaˇ, yawˇ dawˇ haˍ jaˇ leh k'o‸-e ve yoˬ. Awˬ lawn k'o, yawˇ mawˇ jeˬ cawˬ maˇ jaˇ ve yoˬ. 23 Yeˍsuˆ yawˇ ve awˬ la‸ g'awˇ hui hta‸ k'oˆ piˇ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, paw sha ve chaw lehˬ, mvuhˇ naw ma mvuhˇ miˬ awˬ hk'aw lo lo‸-e tuˬ haˍ jaˇ ve yoˬ. 24 Ngaˬ nawˬ hui hta‸ teˇ pawˆ k'aw‸ k'oˆ laˇ ve, kaˍ laˍ oˆ teˇ hkeh g'o‸ naˍ hk'awˇ awˬ hk'aw lo‸-e tuˬ ve lehˬ, paw sha ve chaw teˇ g'aˇ G'uiˬ sha ve mvuhˇ miˬ awˬ hk'aw lo lo‸-e tuˬ ve a‸ kehˉ sha ve yoˬ teh‸ k'oˆ ve yoˬ. 25 Awˬ la‸ g'awˇ teˇ hpaˍ tawˇ oˇ ve hta‸ g'a kaˇ htaˇ, yawˇ hui anˇ jaˇ leh, Hk'e te k'o, htaiˍ hk'aw‸ ve hta‸ a shu g'a hpeh‸ tuˬ le teh‸ k'oˆ ve yoˬ. 26 Yeˍsuˆ yawˇ hui hta‸ nyi leh, Chaw yaˇ lehˬ chi hta‸ te maˇ g'a. Ya‸ hk'aˇ, G'uiˬ sha lehˬ hk'a peu-eˬ hta‸ te g'a ve yoˬ teh‸ k'oˆ piˇ ve yoˬ. 27 Oˇ htaˇ Peˍtruˆ k'oˆ ve, Ngaˬ hui lehˬ hk'a peu-eˬ hta‸ baˬ taˉ leh nawˬ awˬ hk'aˇ suh laˬ peuˬ. Hk'e te leh, ngaˬ hui aˬ hto‸ ma g'a tuˬ ve le. 28 Yeˍsuˆ yawˇ hui hta‸ k'oˆ piˇ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, miˬ guiˬ awˬ suhˉ k'aw‸ gu te ve awˬ yanˇ awˬ hk'aw lo chaw yaˇ ve Yaˇ hpu lehˬ, yawˇ ve awˬ me‸ awˬ hponˇ cawˬ ve k'aw jawˇ awˬ hk'oˆ mui ve teˇ yanˇ, nawˬ hui ngaˬ awˬ hk'aˇ suh laˬ ve chaw teˇ hpaˍ htawˇ, k'aw jaw teˇ chi nyiˇ maˬ awˬ hk'oˆ mui leh, Iˉsaˍreˍlaˆ chaw teˇ chi nyiˇ ceuˬ hta‸ suhˉ g'a jehˬ tuˬ yoˬ. 29 Ngaˬ ve awˬ meh hta‸ pa taw, a shu yawˇ ve yehˬ, a shu yawˇ ve awˬ viˉ awˬ nyi, a shu yawˇ ve awˬ pa awˬ e, a shu yawˇ ve awˬ yaˇ awˬ duˬ leh a shu yawˇ ve ti mi hta‸ baˬ taˉ ve chaw teˇ g'aˇ le le, oˇ ve a‸ kehˉ teˇ ha pun k'aw‸ g'a leh, co ti‸ ha ti‸ awˬ shinˉ hta‸ htawˇ g'a tuˬ yoˬ. 30 Ya‸ hk'aˇ, shu awˬ g'uˇ suhˍ chehˇ ve chaw maˇ maˇ, shu awˬ hk'aw‸ nawˉ g'a k'aw‸ chehˇ tuˬ yoˬ. Shu awˬ hk'aw‸ nawˉ chehˇ ve chaw maˇ maˇ, shu awˬ g'uˇ suhˍ g'a k'aw‸ chehˇ tuˬ yoˬ.

Ma‸htehˍ 20

1 Awˬ lawn k'o, mvuhˇ naw ma mvuhˇ miˬ lehˬ, yawˇ ve a pehˉ meuˇ hko awˬ hk'aw lo kanˉ te tuˬ ve chaw hui hta‸ ca tuˬ, mvuhˇ shawˉ teˇ na‸ tawˆ k'ai ve yehˬ shehˍ hpaˇ teˇ g'aˇ hta‸ shuˍ ve yoˬ. 2 Yawˇ lehˬ, teˇ nyi teˇ hteh‸ piˇ tuˬ yoˬ teh‸, kanˉ te paˍ teˇ hpaˍ geh jehˬ da‸ peuˬ hk'aw‸ nawˉ, yawˇ ve a pehˉ meuˇ hko awˬ hk'aw lo yawˇ hui hta‸ k'ai tcuh ve yoˬ. 3 Mvuhˇ shawˉ aˬ laˬ hk'e k'awˇ naˍ riˍ htaˇ yawˇ k'aw‸ tawˆ k'ai leh, tcuh hk'aw lo kanˉ maˇ cawˬ leh hk'e leˇ chehˇ taˍ ve awˬ kaˍ awˬ nu chaw teˇ hpaˍ hta‸ yawˇ g'a mawˬ htaˇ, 4 Nawˬ hui htawˇ ngaˬ ve a pehˉ meuˇ hko awˬ hk'aw lo k'ai-o. Keunˍ da‸ ve hk'e ngaˬ nawˬ hui hta‸ pe‸ laˇ tuˬ yoˬ teh‸, yawˇ hui hta‸ k'oˆ piˇ leh, yawˇ hui htawˇ k'ai ve yoˬ. 5 Peuˬ leh, mvuhˇ law‸ k'aw tcuhˆ teˇ yanˇ leh mvuhˇ hpeu‸ hpawˇ shehˆ naˍ riˍ hk'e teˇ yanˇ, yawˇ teˇ pawˆ k'aw‸ k'ai leh oˇ ve hk'a shuˍ shuˍ te ve yoˬ. 6 Mvuhˇ hpeu‸ aˬ laˬ hk'e ngaˇ naˍ riˍ teˇ yanˇ yawˇ k'aw‸ tawˆ k'ai leh, awˬ kaˍ awˬ nu chaw teˇ hpaˍ oˇ kaˬ lo huˉ chehˇ ve hta‸ g'a mawˬ htaˇ, Nawˬ hui aˬ hto‸ ma pa taw choˬ kaˬ lo teˇ nyi tanˇ vanˇ hk'e leˇ chehˇ taˍ ve le teh‸ yawˇ hui hta‸ na nyi ve yoˬ. 7 Chaw teˇ g'aˇ ka‸ ngaˬ hui hta‸ maˇ ca la ve hta‸ pa taw yoˬ teh‸, yawˇ hui yawˇ hta‸ k'aw‸ k'oˆ piˇ htaˇ, Nawˬ hui htawˇ ngaˬ ve a pehˉ meuˇ hko awˬ hk'aw lo k'ai-o teh‸, yawˇ yawˇ hui hta‸ k'oˆ piˇ ve yoˬ. 8 Mvuhˇ hpeu‸ la htaˇ, hko awˬ shehˍ hpaˇ lehˬ, Kanˉ te shehˍ hpaˇ hui hta‸ kuˬ hk'aw‸ leh, awˬ hk'aw‸ nawˉ leh leh ca te ve chaw hui hta‸ tanˬ leh, awˉ lawˉ peuˇ ca te ve chaw hui hk'a gaˬ awˬ hpfuhˇ piˇ-oˆ teh‸ yawˇ ve mawˇ ha‸ shaˉ shehˍ hpaˇ hta‸ k'oˆ piˇ ve yoˬ. 9 Oˇ htaˇ, mvuhˇ hpeu‸ aˬ laˬ hk'e ngaˇ naˍ riˍ htaˇ kanˉ ca te ve chaw teˇ hpaˍ laˬ leh, teˇ g'aˇ le le teˇ hteh‸ g'a ve yoˬ. 10 Awˉ lawˉ peuˇ ca te ve chaw teˇ hpaˍ laˬ ve teˇ yanˇ, yawˇ hui shu a‸ kehˉ leuˉ leh g'a tuˬ yoˬ teh‸ dawˇ taˍ ve ka‸, yawˇ hui htawˇ teˇ g'aˇ teˇ hteh‸ ceh tiˉ g'a ve yoˬ. 11 Yawˇ hui hpu g'a ve teˇ yanˇ, yehˬ shehˍ hpaˇ hta‸ ca beu leh yawˇ hta‸ k'oˆ piˇ ve, 12 Awˬ hk'aw‸ nawˉ leh leh ca te la ve chaw teˇ hpaˍ lehˬ, teˇ naˍ riˍ tiˉ g'a te ve htawˇ, ngaˬ hui teˇ nyi tanˇ vanˇ kanˉ te hkeu‸ leh mvuhˇ cha chiˆ ve hta‸ g'a hkanˍ ve chaw hui hk'a shuˍ shuˍ, nawˬ yawˇ hui hta‸ shawˍ piˇ ve law teh‸ k'oˆ piˇ ve yoˬ. 13 Yawˇ hui awˬ hk'aw lo teˇ g'aˇ hta‸ yawˇ k'oˆ piˇ ve, Awˬ chawˇ-oˬ, ngaˬ nawˬ hta‸ maˇ cawˇ ve awˬ ceuˬ te laˇ ve maˇ heˆ. Teˇ hteh‸ piˇ tuˬ yoˬ teh‸ nawˬ geh ngaˬ jehˬ da‸ taˍ peuˬ maˇ heˆ laˇ. 14 Nawˬ ve hpu hta‸ yuˬ leh k'ai-o. Awˬ hk'aw‸ nawˉ leh leh te ve chaw hta‸ nawˬ hk'a shuˍ shuˍ ngaˬ piˇ gaˇ ve yoˬ. 15 Ngaˬ ve mawˇ hta‸ ngaˬ te gaˇ ve hk'e te maˇ cawˇ leh laˇ. Ngaˬ shu hta‸ ha k'aˉ leh piˇ ve pa taw nawˬ nyi ma naˬ leh laˇ teh‸, k'aw‸ k'oˆ piˇ ve yoˬ. 16 Oˇ ve hk'a shuˍ shuˍ, shu awˬ hk'aw‸ nawˉ chehˇ ve chaw lehˬ, shu awˬ g'u suhˍ g'a k'aw‸ chehˇ tuˬ yoˬ. Shu awˬ g'uˇ suhˍ chehˇ ve chaw lehˬ, shu awˬ hk'aw‸ nawˉ g'a k'aw‸ chehˇ tuˬ yoˬ teh‸, Yeˍsuˆ k'oˆ ve yoˬ. 17 Peuˬ leh Yeˍsuˆ Yeˍruˆsaˍlehnˍ venˇ lo k'ai chehˇ htaˇ, awˬ la‸ g'awˇ teˇ chi nyiˇ g'aˇ hta‸ tiˉ kuˬ veu leh, ya‸ k'aw k'aˉ lo yawˇ yawˇ hui hta‸ k'oˆ piˇ ve, 18 Ngaˬ hui Yeˍruˆsaˍlehnˍ venˇ lo k'ai chehˇ ve yoˬ. Chaw yaˇ ve Yaˇ hpu lehˬ, paw hkuˇ lonˉ hui leh li‸ bvuh‸ paˍ hui ve la‸ sheh awˬ hk'aw lo chiˇ a‸ ve hta‸ g'a hkanˍ leh, yawˇ g'a suh tuˬ ve yawˇ hui yawˇ hta‸ suhˉ taˆ tuˬ yoˬ. 19 Maˇ shawˍ maˇ caˆ te ve, jaw‸ ve, la‸ ka hk'oˆ lo hta‸ pehˍ ve, chi teˇ hpaˍ hta‸ g'a hkanˍ tuˬ, buiˇ shaˆ aˉ naˆ chaw hui ve la‸ sheh awˬ hk'aw lo yawˇ hta‸ chiˇ a‸ piˇ tuˬ yoˬ. Peuˬ leh, shehˆ nyi teˇ nyi gaˬ k'o, yawˇ k'aw‸ te‸ tu la tuˬ yoˬ teh‸ k'oˆ ve yoˬ. 20 Oˇ htaˇ, Zeˍbeˍdehˇ ve yaˇ paˍ hui ve awˬ e leh yawˇ ve yaˇ paˍ nyiˇ g'aˇ Yeˍsuˆ geh laˬ leh, awˬ e yawˇ hta‸ oˉ k'oˍ pui leh teˇ ceuˬ lawˬ ve yoˬ. 21 Nawˬ aˬ hto‸ ma heuˆ gaˇ ve le teh‸, Yeˍsuˆ na nyi htaˇ, yaˇ miˇ oˇ ve lehˬ, Nawˬ ve mvuhˇ miˬ awˬ hk'aw lo ngaˬ ve yaˇ paˍ chi nyiˇ g'aˇ hta‸ nawˬ ve la‸ sha paˉ teˇ g'aˇ, la‸ mehˍ paˉ teˇ g'aˇ a ciˉ mui piˇ lawˬ-o‸ teh‸ k'oˆ ve yoˬ. 22 Yeˍsuˆ k'oˆ ve, Nawˬ hui aˬ hto‸ ma hta‸ lawˬ ve nawˬ hui maˇ shiˍ. Ngaˬ g'a dawˬ tuˬ ve kawˆ hta‸ nawˬ hui dawˬ hpeh‸-aw laˇ teh‸ na nyi htaˇ, Dawˬ hpeh‸-aw teh‸ yawˇ hui k'aw‸ k'oˆ piˇ ve yoˬ. 23 Ngaˬ ve kawˆ hta‸ nawˬ hui g'a dawˬ tuˬ yoˬ. Ya‸ hk'aˇ, ngaˬ ve la‸ sha paˉ la‸ mehˍ paˉ g'a mui tuˬ ngaˬ pe‸ laˇ maˇ hpeh‸. Ngaˬ ve Awˬ pa gu taˍ ve chaw hui ceh tiˉ g'a mui tuˬ yoˬ teh‸, yawˇ hui hta‸ k'oˆ piˇ ve yoˬ, 24 Awˬ lawn chi hta‸ awˬ kaˍ awˬ nu tcuh yaˇ teˇ chi g'aˇ g'a kaˇ htaˇ, awˬ viˉ awˬ nyi oˇ ve nyiˇ g'aˇ hta‸ yawˇ hui nyi ma zuhˆ ve yoˬ. 25 Yeˍsuˆ yawˇ hui hta‸ kuˬ yuˬ leh k'oˆ piˇ ve, Buiˇ shaˆ aˉ naˆ chaw hui ve jawˇ mawˇ teˇ hpaˍ lehˬ, yawˇ hui awˬ hk'oˆ uˉ peunˍ leh, yawˇ hui ve chaw uiˍ teˇ hpaˍ lehˬ, yawˇ hui hta‸ nyiˉ te ve hta‸ nawˬ hui shiˍ ve yoˬ. 26 Ya‸ hk'aˇ, nawˬ hui awˬ hk'aw lo chi hk'e maˇ g'a te. Nawˬ hui awˬ hk'aw lo chaw uiˍ hpeh‸ gaˇ ve chaw hk'aˬ ve teˇ g'aˇ maˇ k'oˆ, yawˇ nawˬ hui ve awˬ ceˬ g'a te ve yoˬ. 27 Nawˬ hui awˬ hk'aw lo awˬ hoˉ te gaˇ ve chaw hk'aˬ ve te g'aˇ maˇ k'oˆ, chaw yaˇ ve Yaˇ hpu hk'a shuˍ shuˍ, nawˬ hui awˬ pon yawˇ lehˬ vuiˬ taˍ ve awˬ ceˬ g'a hpeh‸ ve yoˬ. 28 Awˬ lawn k'o, chaw yaˇ ve Yaˇ hpu lehˬ, shu yawˇ awˬ pon kanˉ te tuˬ laˬ ve maˇ heˆ. Yawˇ shu awˬ pon kanˉ te tuˬ laˬ leh, chaw maˇ maˇ hta‸ htaiˍ hk'aw‸ piˇ tuˬ yawˇ ve a sha‸ piˇ tuˬ awˬ pon laˬ ve yoˬ teh‸ k'oˆ ve yoˬ. 29 Yeˍriˆhkoˇ venˇ awˬ hk'aw lo yawˇ hui tawˆ k'ai chehˇ htaˇ, chaw awˬ moˍ lonˉ yawˇ awˬ hk'aˇ suh k'ai ve yoˬ. 30 Oˇ htaˇ ya‸ k'aw paˇ lo mui chehˇ ve mehˆ cuˉ paˍ nyiˇ g'aˇ lehˬ, Yeˍsuˆ yawˇ huiˉ maˬ awˬ paˇ lo k'ai chehˇ ve awˬ lawn hta‸ yawˇ huiˉ maˬ g'a kaˇ htaˇ, Daˍviˆ ve Yaˇ hpu Jawˇ mawˇ-oˬ, ngaˬ huiˉ maˬ hta‸ ha k'aˉ laˇ-oˆ teh‸ kuˬ ve yoˬ. 31 Chaw awˬ moˍ lonˉ yawˇ huiˉ maˬ hta‸, Ta‸ iˉ chehˇ-oˆ teh‸ deˇ piˇ ve htawˇ, yawˇ huiˉ maˬ lehˬ, Daˍviˆ ve Yaˇ hpu Jawˇ mawˇ-oˬ, ngaˬ huiˉ maˬ hta‸ ha k'aˉ laˇ-oˆ teh‸, leuˉ leh k'aw‸ kuˬ ve yoˬ. 32 Oˇ htaˇ, Yeˍsuˆ huˉ taˍ leh yawˇ huiˉ maˬ hta‸ kuˬ leh, Nawˬ huiˉ maˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸ na nyi ve yoˬ. 33 Yawˇ huiˉ maˬ lehˬ, Jawˇ mawˇ-oˬ, ngaˬ huiˉ maˬ ve mehˆ shiˍ hta‸ hpaw laˇ-oˆ teh‸ yawˇ hta‸ k'oˆ piˇ ve yoˬ. 34 Oˇ htaˇ, Yeˍsuˆ yawˇ huiˉ maˬ hta‸ ha k'aˉ leh, yawˇ huiˉ maˬ ve mehˆ shiˍ hta‸ htawˇ ve yoˬ. Teˇ cawˬ haˉ yawˇ huiˉ maˬ mehˆ mawˬ la leh yawˇ awˬ hk'aˇ suh k'ai ve yoˬ.

Ma‸htehˍ 21

1 Yawˇ hui Yeˍruˆsaˍlehnˍ venˇ awˬ paˇ lo gaˬ la leh, Shaˍlonˍ hk'aw hta‸ neˇ ve Behˆhpaˍgeˍ hk'aˆ lo gaˬ la ve teˇ yanˇ, Yeˍsuˆ lehˬ awˬ la‸ g'awˇ nyiˇ g'aˇ hta‸ k'ai tcuh leh k'oˆ ve, 2 Nawˬ huiˉ maˬ awˬ g'uˇ suhˍ cawˬ ve hk'aˆ hk'aw lo k'ai-o. Oˇ kaˬ lo hpeh taˍ ve piˉ laˬ awˬ ma peuˍ leh awˬ yehˇ hta‸ teˇ cawˬ haˉ g'a mawˬ tuˬ yoˬ. Hpui leh ngaˬ geh sheh veu laˇ-oˆ. 3 Chaw teˇ g'aˇ g'aˇ nawˬ huiˉ maˬ hta‸ teˇ ceuˬ ceuˬ k'oˆ ve k'o, Jawˇ mawˇ loˍ ve yoˬ teh‸ k'aw‸ k'oˆ piˇ-oˆ. Yawˇ teˇ cawˬ haˉ pe‸ laˇ tuˬ yoˬ teh‸ k'oˆ piˇ ve yoˬ. 4 Awˬ lawn chi ve lehˬ, G'uiˬ sha ve tcuh kaˍ paˍ k'oˆ taˍ ve tawˇ hkawˇ hta‸ biˇ la tuˬ awˬ pon hpeh‸ ve yoˬ. Yawˇ k'oˆ ve, 5 Ziˉonˍ ve yaˇ miˇ hta‸ chi hk'e hto piˇ-oˆ. Nyi loˬ, nawˬ ve hkunˉ hawˉ hkanˇ lehˬ, nyi ma nuˇ nehˬ ve awˬ hk'aw lo piˉ laˬ awˬ ma peuˍ leh awˬ yehˇ hta‸ ciˇ leh nawˬ geh laˬ ve yoˬ, teh‸ k'oˆ taˍ ve yoˬ. 6 Awˬ la‸ g'awˇ oˇ ve nyiˇ g'aˇ k'ai leh, Yeˍsuˆ yawˇ huiˉ maˬ hta‸ tcuh ve hk'e te ve yoˬ. 7 Yawˇ huiˉ maˬ lehˬ, piˉ laˬ awˬ ma peuˍ leh awˬ yehˇ hta‸ sheh veu laˇ leh, piˉ laˬ oˇ ve nyiˇ hkeh awˬ hk'oˆ hta‸ yawˇ hui ve veu‸ k'aˇ hk'awˇ piˇ peuˬ hk'aw‸ nawˉ, Yeˍsuˆ taˆ ciˇ ve yoˬ. 8 Chaw awˬ moˍ lonˉ awˬ hk'aw lo, chaw maˇ-awˍ ve a shu yawˇ ve veu‸ k'aˇ hta‸ ya‸ k'aw hpuiˇ lo hk'awˇ piˇ leh, teˇ hpaˍ hpaˍ suhˆ hpa‸ chaw leh ya‸ k'aw hpuiˇ lo hk'awˇ piˇ ve yoˬ. 9 Yawˇ awˬ g'uˇ suhˍ leh awˬ hk'aw‸ nawˉ k'ai ve chaw awˬ moˍ lonˉ teˇ hpaˍ kuˬ leh, Daˍviˆ ve Yaˇ hpu hta‸ Hoˍsaˍnaˍ hpeh‸ piˇ-oˆ. Jawˇ mawˇ G'uiˬ sha ve awˬ meh awˬ hawˉ lo laˬ ve chaw lehˬ, awˬ bon uiˍ piˇ-oˆ. Mvuhˇ naw ma lo htawˇ, Hoˍsaˍnaˍ hpeh‸ piˇ-oˆ teh‸ k'oˆ ve yoˬ. 10 Yawˇ Yeˍruˆsaˍlehnˍ venˇ hk'aw lo‸-e ve teˇ yanˇ, venˇ yaˇ hk'a peu-eˬ duiˆ-ehˍ shaˇ-ehˍ te leh, Chi hpaˇ lehˬ a shu le teh‸ na nyi ve yoˬ. 11 Chi hpaˇ lehˬ, Gaˍliˍlehˇ mvuhˇ miˬ Naˍzaˍrehˆ venˇ yaˇ, G'uiˬ sha ve tcuh kaˍ paˍ Yeˍsuˆ yoˬ teh‸, chaw awˬ moˍ lonˉ teˇ hpaˍ k'oˆ ve yoˬ. 12 Oˇ htaˇ Yeˍsuˆ bon yehˬ lonˉ awˬ hk'aw lo‸-e leh, bon yehˬ lonˉ awˬ hk'aw lo mawˇ vuiˬ mawˇ hawˇ ve chaw hk'a pue-eˬ hta‸ g'a‸ k'oˬ leh, hpu pa shehˍ hpaˇ hui ve hpui lawˇ teˇ hpaˍ hta‸ maˇ k'oˆ, aˉ pui k'aˍ hawˇ shehˍ hpaˇ hui ve mui hk'awˇ teˇ hpaˍ hta‸ maˇ k'oˆ, yawˇ hpfuhˆ baˬ ve yoˬ. 13 Ngaˬ ve yehˬ hta‸ bon lawˬ kuiˬ yehˬ g'a k'oˆ tuˬ yoˬ teh‸ bvuh‸ taˍ ve htawˇ, nawˬ hui lehˬ, yehˬ chi hta‸ chaw hk'awˇ chehˇ kuiˬ hpeh‸ la piˇ peuˬ teh‸, yawˇ yawˇ hui hta‸ k'oˆ piˇ ve yoˬ. 14 Mehˆ cuˉ paˍ hui leh hkui luˬ paˍ hui, bon yehˬ lonˉ hk'aw yawˇ geh laˬ leh, yawˇ yawˇ hui hta‸ gu na-e piˇ ve yoˬ. 15 Paw hkuˇ lonˉ hui leh li‸ bvuh‸ paˍ teˇ hpaˍ lehˬ, yawˇ te ve anˇ tuˬ teˇ hpaˍ hta‸ maˇ k'oˆ, bon yehˬ lonˉ awˬ hk'aw lo yaˇ ehˉ teˇ hpaˍ lehˬ, Daˍviˆ ve Yaˇ hpu hta‸ Hoˍsaˍnaˍ hpeh‸ piˇ-oˆ teh‸ kuˬ chehˇ ve hta‸ maˇ k'oˆ, yawˇ hui g'a mawˬ ve teˇ yanˇ, nyi ma zuhˆ jaˇ ve yoˬ. 16 Chaw chi teˇ hpaˍ hk'aˬ hk'e k'oˆ chehˇ ve hta‸ nawˬ kaˇ-aw laˇ teh‸ yawˇ hta‸ na nyi htaˇ, Yeˍsuˆ lehˬ, Ngaˬ kaˇ ve yoˬ. Yaˇ ehˉ teˇ hpaˍ leh cuˉ dawˬ ve yaˇ ehˉ teˇ hpaˍ ve maw‸ k'aw awˬ hk'aw lo da‸ jaˇ biˇ jaˇ ve chiˇ mvuh hkawˇ nawˬ keu piˇ taˍ peuˬ, teh‸ bvuh‸ taˍ ve hta‸ nawˬ hui teˇ pawˆ ka‸ maˇ g'aw jaw laˇ teh‸, yawˇ yawˇ hui hta‸ k'oˆ piˇ ve yoˬ. 17 Yawˇ yawˇ hui hta‸ hpaˆ da‸ taˉ leh, venˇ awˬ hk'aw lo tawˆ k'ai leh Beˍtaˍniˆ hk'aˆ hk'aw lo ca haˉ ve yoˬ. 18 Mvuhˇ htiˇ la leh venˇ hk'aw k'aw‸ k'o‸-e htaˇ, yawˇ awˍ meu‸ ve yoˬ. 19 Ya‸ k'aw paˇ lo cawˬ ve maˉ nawˆ cehˬ teˇ cehˬ hta‸ g'a mawˬ leh, yawˇ ca nyi htaˇ awˬ hpa‸ hta‸ ceh tiˉ g'a mawˬ ve yoˬ. Oˇ htaˇ Yeˍsuˆ lehˬ, Ya‸ nyi hk'aw‸ nawˉ k'o, nawˬ awˬ shiˍ teˇ pawˆ ka‸ taˇ k'aw‸ naw‸ teh‸, maˉ nawˆ cehˬ hta‸ yawˇ k'oˆ piˇ ve teˇ yanˇ, maˉ nawˆ cehˬ oˇ ve teˇ cawˬ haˉ nawˍ k'ai goˇ k'ai ve yoˬ. 20 Awˬ la‸ g'awˇ teˇ hpaˍ oˇ ve hta‸ g'a mawˬ htaˇ anˇ leh, Maˉ nawˆ cehˬ chi, aˬ hto‸ ma te teˇ cawˬ haˉ nawˍ k'ai goˇ k'ai ve le teh‸ k'oˆ ve yoˬ. 21 Yeˍsuˆ lehˬ, Ngaˬ nawˬ hui hta‸ awˬ tehˬ awˬ na k'oˆ laˇ ve, nawˬ hui yonˍ leh nyi ma htawˇ dawˇ nawˬ dawˇ maˇ te ve k'o, maˉ nawˆ cehˬ chi hta‸ ngaˬ te piˇ ve hk'e nawˬ hui te hpeh‸ ve awˬ hk'oˆ ka‸, hk'aw chi teˇ shiˍ hta‸, Jiˆ tawˆ-e leh laˇ tsuhˇ g'uiˬ hk'aw lo ca ce lo‸-e loˬ teh‸ k'oˆ piˇ ve k'o, oˇ hk'e hpeh‸ la tuˬ yoˬ. 22 Nawˬ hui yonˍ ve awˬ hk'aw lo bon lawˬ ve k'o, nawˬ hui hk'a lawˬ ve hk'a peu-eˬ hta‸ g'a tuˬ yoˬ teh‸ yawˇ hui hta‸ k'oˆ piˇ ve yoˬ. 23 Bon yehˬ lonˉ awˬ hk'aw lo yawˇ lo‸-e leh maˍ piˇ chehˇ ve teˇ yanˇ, paw hkuˇ lonˉ teˇ hpaˍ leh mvuhˇ miˬ yaˇ hui ve awˬ hoˉ chaw mawˇ teˇ hpaˍ yawˇ geh laˬ leh, Nawˬ hk'aˬ hk'e ve kanˇ paˆ g'a leh chi teˇ hpaˍ hta‸ te ve le. Kanˇ paˆ chi a shu nawˬ hta‸ pe‸ laˇ ve le teh‸ na nyi ve yoˬ. 24 Yeˍsuˆ k'aw‸ k'oˆ piˇ ve, Ngaˬ htawˇ nawˬ hui hta‸ tawˇ teˇ hkawˇ na nyi shaˍ. Nawˬ hui yaw hk'aw‸ laˇ ve k'o, ngaˬ hk'aˬ hk'e ve kanˇ paˆ g'a leh chi teˇ hpaˍ hta‸ te ve awˬ lawn nawˬ hui hta‸ hto laˇ tuˬ yoˬ. 25 Yoˇhanˬ yawˇ baˆtiˆsaˬ piˇ ve teˇ ceuˬ lehˬ, hk'aˬ lo g'a ve le. Mvuhˇ naw ma lo laˇ, chaw yaˇ hui geh lo laˇ teh‸, yawˇ hui hta‸ na nyi ve yoˬ. Yawˇ hui teˇ g'aˇ leh teˇ g'aˇ jehˬ da‸ leh k'oˆ ve, Mvuhˇ naw ma lo g'a ve teh‸ ngaˬ hui k'oˆ ve k'o, Hk'e te leh nawˬ hui aˬ hto‸ ma te yawˇ hta‸ maˇ yonˍ ve le teh‸, yawˇ ngaˬ hui hta‸ k'aw‸ k'oˆ laˇ tuˬ yoˬ. 26 Chaw yaˇ hui geh g'a ve teh‸ k'oˆ ve k'o, chaw chi ma ve hta‸ ngaˬ hui kawˆ tuˬ cawˬ ve yoˬ. Awˬ lawn k'o Yoˇhanˬ lehˬ, G'uiˬ sha ve tcuh kaˍ paˍ hpeh‸ ve hta‸ chaw hk'a peu-eˬ shawˍ taˍ ve yoˬ teh‸, yawˇ hui k'oˆ da‸ ve yoˬ, 27 Hk'e te leh, Ngaˬ hui maˇ shiˍ teh‸ yawˇ hui Yeˍsuˆ hta‸ k'aw‸ k'oˆ piˇ ve yoˬ. Yeˍsuˆ k'oˆ ve, Chi hk'a shuˍ shuˍ, ngaˬ hk'aˬ hk'e ve kanˇ paˆ g'a leh chi teˇ hpaˍ hta‸ te ve, ngaˬ nawˬ hui hta‸ maˇ hto laˇ. 28 Ya‸ hk'aˇ nawˬ hui hk'aˬ hk'e dawˇ ve le. Chaw teˇ g'aˇ, yawˇ yaˇ paˍ nyiˇ g'aˇ cawˬ ve yoˬ. Awˬ viˉ paˍ teˇ g'aˇ geh yawˇ k'ai leh, Yaˇ paˍoˬ, ya‸ nyi a pehˉ meuˇ hko awˬ hk'aw lo nawˬ kanˉ ca te-o teh‸ k'oˆ piˇ htaˇ, 29 Ngaˬ maˇ k'ai teh‸ yawˇ k'aw‸ k'oˆ piˇ ve yoˬ. Ya‸ hk'aˇ, awˬ hk'aw‸ nawˉ yawˇ k'aw‸ dawˇ hpfuhˆ leh k'ai ve yoˬ. 30 Peuˬ leh, awˬ nyi paˍ teˇ g'aˇ geh awˬ pa k'aw‸ k'ai leh, oˇ ve hk'a shuˍ shuˍ k'oˆ piˇ ve yoˬ. Awˬ nyi paˍ lehˬ, Ngaˬ pa-oˬ, ngaˬ k'ai tuˬ yoˬ teh‸ k'oˆ ve htawˇ, yawˇ maˇ k'ai. 31 Yaˇ paˍ oˇ ve nyiˇ g'aˇ awˬ hk'aw lo, hk'aˬ ve teˇ g'aˇ awˬ pa ve a loˍ hta‸ te ve le teh‸ na nyi htaˇ, Awˬ viˉ paˍ teˇ g'aˇ yoˬ teh‸, yawˇ hui k'aw‸ k'oˆ piˇ ve yoˬ. Yeˍsuˆ lehˬ, Ngaˬ nawˬ hui hta‸ awˬ tehˬ awˬ na k'oˆ laˇ ve, awˬ hkawnˍ shaw paˍ hui leh meh maˬ lanˉ teˇ hpaˍ, nawˬ hui awˬ g'uˇ suhˍ G'uiˬ sha ve mvuhˇ miˬ awˬ hk'aw lo lo‸-e ve yoˬ. 32 Awˬ lawn k'o, Yoˇhanˬ lehˬ hteˇ ve cawˇ ve ya‸ k'aw hta‸ toˇ leh nawˬ hui geh lo laˬ ve htawˇ, nawˬ hui yawˇ hta‸ maˇ yonˍ. Ya‸ hk'aˇ, awˬ hkawnˍ shaw paˍ hui leh meh maˬ lanˉ hui yawˇ hta‸ yonˍ ve yoˬ. Nawˬ hui chi hta‸ g'a mawˬ ve htawˇ, venˇ baˆ hta‸ ka‸ maˇ dawˇ hpfuhˆ, yawˇ hta‸ ka‸ maˇ yonˍ. 33 Awˬ kaˍ awˬ nu tawˇ pa haˉ hta‸ na sheˍ. Yehˬ shehˍ hpaˇ teˇ g'aˇ lehˬ, a pehˉ meuˇ hko te leh ti taˍ peuˬ hk'aw‸ nawˉ, hk'a deh‸ ko taˍ leh, a pehˉ meuˇ shiˍ nyiˉ kuiˬ duˇ taˍ ve yoˬ. Shaw kuiˬ yehˬ mvuh ve hta‸ htawˇ te taˍ leh, hko te paˍ teˇ hpaˍ hta‸ ngaˍ piˇ taˉ leh, awˬ kaˍ awˬ nu mvuhˇ miˬ lo yawˇ k'ai ve yoˬ. 34 Awˬ shiˍ meh ve awˬ yanˇ gaˬ la paˇ neˇ htaˇ, awˬ shiˍ hta‸ g'a tuˬ hko te paˍ hui geh yawˇ ve awˬ ceˬ teˇ hpaˍ hta‸ k'ai tcuh ve yoˬ. 35 Ya‸ hk'aˇ, hko te paˍ teˇ hpaˍ lehˬ, yawˇ ve awˬ ceˬ teˇ hpaˍ hta‸ yuˬ leh, teˇ g'aˇ hta‸ dawˆ ve, teˇ g'aˇ hta‸ tiˇ pehˍ leh, teˇ g'aˇ hta‸ haˉ pui baˬ ve yoˬ. 36 Awˬ hk'aw‸ nawˉ teˇ pawˆ lehˬ, awˉ lawˉ teˇ pawˆ a‸ kehˉ awˬ ceˬ maˇ chaweh hta‸ yawˇ k'aw‸ k'ai tcuh ve htawˇ, hko te paˍ hui lehˬ, awˉ lawˉ htaˇ hk'a shuˍ shuˍ yawˇ hui hta‸ ka‸ te piˇ ve yoˬ. 37 Awˬ leh meuˇ teˇ pawˆ, Ngaˬ ve yaˇ paˍ hta‸ yawˇ hui yawˆ yan tuˬ yoˬ teh‸ yawˇ k'oˆ leh, yawˇ ve yaˇ paˍ hta‸ yawˇ hui geh k'ai tcuh ve yoˬ. 38 Ya‸ hk'aˇ, hko te paˍ teˇ hpaˍ lehˬ, yaˇ paˍ oˇ ve hta‸ g'a mawˬ htaˇ, Chaw chi lehˬ, awˬ shinˉ g'a shehˍ hpaˇ hpeh‸ ve yoˬ. Laˬ-o‸, yawˇ hta‸ tiˇ pehˍ leh yawˇ ve awˬ shinˉ hta‸ ngaˬ hui yuˬ-a veuˬ teh‸, teˇ g'aˇ leh teˇ g'aˇ k'oˆ da‸ ve yoˬ. 39 Oˇ htaˇ yawˇ hui yawˇ hta‸ yuˬ leh, hko awˬ baˬ hpawˇ lo chiˇ baˬ leh tiˇ pehˍ ve yoˬ. 40 Hk'e te leh hko awˬ shehˍ hpaˇ gaˬ la ve teˇ yanˇ, hko te paˍ teˇ hpaˍ hta‸ yawˇ hk'aˬ hk'e te piˇ tuˬ le teh‸, Yeˍsuˆ yawˇ hui hta‸ na nyi ve yoˬ. 41 Yawˇ hui yawˇ hta‸ k'aw‸ k'oˆ piˇ ve, Haiˬ ve chaw oˇ ve teˇ hpaˍ hta‸ yawˇ g'aˇ hte‸ te luˬ te sheˆ piˇ leh, awˬ shiˍ meh la htaˇ yawˇ hta‸ awˬ shiˍ k'aw‸ piˇ tuˬ ve awˬ kaˍ awˬ nu hko te paˍ hui hta‸ k'aw‸ ngaˍ piˇ tuˬ yoˬ. 42 Yeˍsuˆ yawˇ hui hta‸ k'oˆ piˇ ve, Yehˬ kawˍ shehˍ hpaˇ hui baˬ taˍ ve haˉ pui shiˍ lehˬ, awˬ hkuiˉ puiˍ awˬ ceˍ k'aweh‸ lo kawˍ taˍ ve haˉ pui shiˍ hpeh‸ la peuˬ. Chi lehˬ Jawˇ mawˇ G'uiˬ sha te taˍ ve kanˉ hpeh‸ leh, ngaˬ hui mehˆ g'uˇ suhˍ anˇ tu hpeh‸ ve yoˬ, teh‸ Li‸ hpu awˬ hk'aw lo nawˬ hui teˇ pawˆ ka‸ maˇ g'aw jaw laˇ, 43 Hk'e te leh ngaˬ nawˬ hui hta‸ k'oˆ laˇ ve, G'uiˬ sha ve mvuhˇ miˬ hta‸ nawˬ hui geh yuˬ tawˆ leh, mvuhˇ miˬ oˇ ve hta‸ caˉ da‸ ve awˬ shiˍ naw‸ la puiˉ ve chaw ceuˬ hta‸ k'aw‸ piˇ tuˬ yoˬ. 44 Haˉ pui oˇ ve awˬ hk'oˆ paiˍ ve chaw lehˬ, hteh k'ai tuˬ yoˬ. Chaw hk'aˬ ve teˇ g'aˇ awˬ hk'oˆ hta‸ maˇ k'oˆ, haˉ pui oˇ ve ce teˍ ve k'o, chaw oˇ ve meu-e tuˬ yoˬ teh‸ k'oˆ ve yoˬ. 45 Yawˇ k'oˆ ve tawˇ pa haˉ teˇ hpaˍ hta‸ paw hkuˇ lonˉ hui leh Hpaˍriˍsehˇ hui g'a kaˇ htaˇ, yawˇ yawˇ hui awˬ lawn k'oˆ chehˇ ve hta‸ yawˇ hui g'a shiˍ ve yoˬ. 46 Yawˇ hui yawˇ hta‸ hpeh yuˬ gaˇ ve htawˇ, chaw awˬ moˍ lonˉ hta‸ kawˆ ve yoˬ. Awˬ lawn k'o, Yeˍsuˆ lehˬ G'uiˬ sha ve tcuh kaˍ paˍ hpeh‸ ve hta‸ chaw chi ma ve shawˍ taˍ ve pa taw yoˬ.

Ma‸htehˍ 22

1 Peuˬ leh, Yeˍsuˆ tawˇ pa haˉ teˇ pawˆ k'aw‸ te leh yawˇ hui hta‸ k'oˆ piˇ ve, 2 Mvuhˇ naw ma mvuhˇ miˬ lehˬ, yawˇ ve yaˇ paˍ awˬ pon hkehˉ caˇ tuˬ gu taˍ ve hkunˉ hawˉ hkanˇ teˇ g'aˇ hta‸ shuˍ ve yoˬ. 3 Hkehˉ caˇ la tuˬ kuˬ taˍ peuˬ ve chaw teˇ hpaˍ hta‸, Laˬ-o‸ teh‸ ca k'oˆ piˇ tuˬ, yawˇ ve awˬ ceˬ teˇ hpaˍ hta‸ yawˇ k'ai tcuh ve htawˇ, chaw oˇ ve teˇ hpaˍ maˇ laˬ. 4 Teˇ pawˆ awˬ kaˍ awˬ nu awˬ ceˬ teˇ hpaˍ hta‸ yawˇ k'aw‸ k'ai tcuh leh, Caˇ tuˬ dawˬ tuˬ hta‸ ngaˬ hk'a deh‸ gu taˍ peuˬ. Ngaˬ ve nuˇ leh chu ve ceˇ caˬ teˇ hpaˍ hta‸ tiˇ pehˍ peuˬ leh, hk'a peu-eˬ hk'a deh‸ gu taˍ peuˬ. Hkehˉ caˇ la-o teh‸, kuˬ taˍ peuˬ ve chaw teˇ hpaˍ hta‸ ca hto piˇ-oˆ teh‸, yawˇ k'oˆ piˇ ve yoˬ. 5 Ya‸ hk'aˇ, awˬ lawn oˇ ve hta‸ yawˇ hui te‸ chiˉ maˇ dawˇ leh, teˇ g'aˇ heh hk'aw k'ai leh, teˇ g'aˇ tanˇ kaˬ ca te k'ai ve yoˬ. 6 Awˬ kaˍ awˬ nu teˇ hpaˍ lehˬ, yawˇ ve awˬ ceˬ teˇ hpaˍ hta‸ hpeh yuˬ leh, yawˇ hui hta‸ maˇ shawˍ maˇ caˆ te leh tiˇ pehˍ sheˬ ve yoˬ. 7 Hkunˉ hawˉ hkanˇ nyi ma zuhˆ jaˇ leh, yawˇ ve ma‸ yaˇ teˇ hpaˍ hta‸ hpehˇ k'ai ve yoˬ. Shu hta‸ tiˇ pehˍ ve chaw hui hta‸ yawˇ te luˬ leh, yawˇ hui ve venˇ hta‸ htawˇ aˬ miˍ tuˉ baˬ ve yoˬ. 8 Oˇ htaˇ, yawˇ ve awˬ ceˬ teˇ hpaˍ hta‸ yawˇ k'oˆ piˇ ve, Hkehˉ caˇ tuˬ ve hta‸ ngaˬ hk'a deh‸ gu taˍ peuˬ. Ya‸ hk'aˇ, kuˬ taˍ peuˬ ve chaw teˇ hpaˍ lehˬ laˬ maˇ keunˍ. 9 Hk'e te leh, ya‸ k'aw lonˉ ceh da‸ kuiˬ teˇ hpaˍ lo k'ai leh, hk'a mawˬ ve chaw teˇ hpaˍ hta‸ hkehˉ caˇ kuiˬ lo kuˬ veu laˇ-oˆ teh‸ k'oˆ piˇ ve yoˬ. 10 Hk'e te leh, awˬ ceˬ oˇ ve teˇ hpaˍ ya‸ k'aw lonˉ teˇ hpaˍ lo k'ai leh, hk'a mawˬ ve chaw hk'a peu-eˬ, maˇ da‸ ve chaw maˇ k'oˆ, da‸ ve chaw maˇ k'oˆ, kuˬ hpawnˬ leh, hkehˉ caˇ kuiˬ lo chaw hk'a biˇ cawˬ ve yoˬ. 11 Hkehˉ caˇ la ve chaw teˇ hpaˍ hta‸ hkunˉ hawˉ hkanˇ ca lo‸ nyi la ve teˇ yanˇ, hkehˉ caˇ ve veu‸ k'aˇ maˇ veu‸ ve chaw teˇ g'aˇ hta‸ yawˇ g'a mawˬ ve yoˬ. 12 Hk'e te leh yawˇ k'oˆ piˇ ve, Awˬ chawˇ-oˬ, hkehˉ caˇ ve veu‸ k'aˇ hta‸ maˇ veu‸ leh, hk'aˬ hk'e te leh nawˬ choˬ kaˬ lo‸ la ve le teh‸ na nyi htaˇ, chaw oˇ ve lehˬ, te‸ chiˉ k'aw‸ k'oˆ maˇ g'a. 13 Oˇ htaˇ, awˬ ceˬ teˇ hpaˍ hta‸ hkunˉ hawˉ hkanˇ k'oˆ piˇ ve, Yawˇ ve hkui sheh la‸ sheh hta‸ hpeh tsuh‸ leh, awˬ baˬ hpawˇ naˆ ho‸ kuiˬ lo baˬ keu-o. Oˇ kaˬ lo hk'a chehˇ ve chaw hui hawˬ leh ciˬ geu‸ tuˬ yoˬ teh‸ k'oˆ piˇ ve yoˬ. 14 Awˬ lawn k'o, kuˬ yuˬ ve chaw maˇ maˇ cawˬ ve htawˇ, leuˆ yuˬ ve chaw a ciˉ ceh tiˉ cawˬ ve yoˬ teh‸ Yeˍsuˆ k'oˆ ve yoˬ. 15 Oˇ htaˇ, Hpaˍriˍsehˇ teˇ hpaˍ tawˆ k'ai leh, Yeˍsuˆ tawˇ yaw ve awˬ hk'aw lo hk'aˬ hk'e te leh yawˇ hta‸ tawˇ yaw ya‸ piˇ lawˬ tuˬ, yawˇ hui jehˬ da‸ ve yoˬ. 16 Hk'e te leh, yawˇ hui ve awˬ la‸ g'awˇ teˇ hpaˍ leh Heˍroˆ chaw teˇ hpaˍ hta‸ Yeˍsuˆ geh k'ai tcuh ve yoˬ. Yawˇ hui k'ai leh k'oˆ ve, Saˍ la‸-oˬ, nawˬ lehˬ hteˇ ve cawˇ ve chaw hpeh‸ leh, G'uiˬ sha ve ya‸ k'aw hta‸ hteˇ lehˍ maˍ piˇ ve yoˬ. Nawˬ chaw teˇ g'aˇ hta‸ ka‸ maˇ kawˆ leh, shu ve mehˆ hpfuhˇ hta‸ maˇ nyi ve teh‸ ngaˬ hui shiˍ ve yoˬ. 17 Hk'e te leh, nawˬ hk'aˬ hk'e dawˇ taˍ ve ngaˬ hui hta‸ a ciˉ hto laˇ-oˆ. Jawˇ mawˇ Kehˉsaˍ hta‸ a moˇ keu piˇ cawˇ laˇ, maˇ keu piˇ cawˇ laˇ teh‸ na nyi ve yoˬ. 18 Yawˇ hui nyi ma k'aw‸ ve hta‸ Yeˍsuˆ g'a shiˍ leh, Chaw heˍ paˍ teˇ hpaˍ-oˬ, nawˬ hui aˬ hto‸ ma te ngaˬ hta‸ lawˇ nyi ve le. 19 A moˇ hpu teˇ hteh‸ ngaˬ hta‸ maˍ laˇ-oˆ teh‸ k'oˆ leh, yawˇ hui yawˇ hta‸ hpu teˇ hteh‸ yuˬ maˍ piˇ ve yoˬ. 20 Yeˍsuˆ yawˇ hui hta‸ k'oˆ piˇ ve, A shu ve awˬ han, a shu ve awˬ meh cawˬ le teh‸ na nyi htaˇ, Jawˇ mawˇ Kehˉsaˍ ve yoˬ teh‸ yawˇ hui k'aw‸ k'oˆ piˇ ve yoˬ. 21 Oˇ htaˇ Yeˍsuˆ yawˇ hui hta‸ k'aw‸ k'oˆ piˇ ve, Hk'e te leh, jawˇ mawˇ Kehˉsaˍ ve mawˇ jawˇ mawˇ Kehˉsaˍ hta‸ piˇ-oˆ. G'uiˬ sha ve mawˇ G'uiˬ sha hta‸ piˇ-oˆ. 22 Tawˇ oˇ ve hta‸ yawˇ hui g'a kaˇ htaˇ, anˇ leh yawˇ hui tawˆ k'ai ve yoˬ. 23 K'aw‸ te‸ tu la ve maˇ cawˬ teh‸ k'oˆ ve Saˍduˆkehˇ chaw teˇ hpaˍ, oˇ ve teˇ nyi yawˇ geh laˬ leh k'oˆ ve, 24 Saˍ la‸-oˬ, Moˉseˍ k'oˆ ve, Chaw teˇ g'aˇ yaˇ maˇ cawˬ leh suh ve k'o, awˬ nyi paˍ lehˬ yawˇ ve awˬ miˇ ma hta‸ k'aw‸ heuˆ leh, awˬ viˉ paˍ awˬ pon awˬ ceuˬ awˬ hk'aˇ g'a cawˬ piˇ ve yoˬ teh‸ k'oˆ taˍ ve yoˬ. 25 Ponˬ laˬ htaˇ ngaˬ hui geh awˬ viˉ awˬ nyi suhˍ g'aˇ cawˬ ve yoˬ. Awˉ lawˉ teˇ g'aˇ lehˬ, awˬ miˇ ma hta‸ heuˆ leh, yaˇ maˇ cawˬ sheˍ htaˇ suh leh, awˬ nyi paˍ hta‸ yawˇ ve awˬ miˇ ma teh taˉ piˇ ve yoˬ. 26 Chi hk'a shuˍ shuˍ, nyiˇ g'aˇ teˇ g'aˇ, shehˆ g'aˇ teˇ g'aˇ, leh suhˍ g'aˇ teˇ g'aˇ hk'a gaˬ, chi hk'e teh taˉ piˇ ve yoˬ. 27 Yawˇ hui hk'a peu-eˬ suh peuˬ hk'aw‸ nawˉ, yaˇ miˇ oˇ ve htawˇ suh ve yoˬ. 28 Hk'e te leh, k'aw‸ te‸ tu la ve teˇ yanˇ, chaw oˇ ve suhˍ g'aˇ awˬ hk'aw lo, yaˇ miˇ oˇ ve hk'aˬ ve teˇ g'aˇ ve awˬ miˇ ma hpeh‸ tuˬ ve le. Awˬ lawn k'o, yawˇ hui hk'a peu-eˬ yawˇ hta‸ heuˆ peuˬ ve yoˬ teh‸ na nyi ve yoˬ. 29 Yeˍsuˆ yawˇ hui hta‸ k'aw‸ k'oˆ piˇ ve, Li‸ hpu hta‸ ka‸, G'uiˬ sha ve kanˇ paˆ hta‸ ka‸ nawˬ hui maˇ shiˍ ve pa taw nawˬ hui dawˇ ya‸ ve yoˬ. 30 Awˬ lawn k'o, k'aw‸ te‸ tu la ve teˇ yanˇ, awˬ hpawˇ awˬ miˇ heuˆ da‸ ve maˇ k'oˆ, ka piˇ ve maˇ k'oˆ, maˇ te. Mvuhˇ naw ma hk'oˆ chehˇ ve mvuhˇ naw ma tcuh yaˇ hui hk'e hpeh‸ tuˬ yoˬ. 31 Suh ve chaw hui k'aw‸ te‸ tu la ve teˇ ceuˬ awˬ lawn, G'uiˬ sha nawˬ hui hta‸ k'oˆ piˇ taˍ ve hta‸ nawˬ hui maˇ g'aw jaw laˇ. 32 Ngaˬ lehˬ Aˍbraˍhanˍ ve G'uiˬ sha, Iˉcaˆ ve G'uiˬ sha leh Yaˍkoˆ ve G'uiˬ sha hpeh‸ ve yoˬ teh‸ yawˇ k'oˆ taˍ ve yoˬ. Yawˇ lehˬ, suh ve chaw hui ve G'uiˬ sha hpeh‸ ve maˇ heˆ. Te‸ chehˇ ve chaw hui ve G'uiˬ sha hpeh‸ ve yoˬ teh‸, Yeˍsuˆ yawˇ hui hta‸ k'oˆ piˇ ve yoˬ. 33 Tawˇ oˇ ve hta‸ chaw awˬ moˍ lonˉ g'a kaˇ htaˇ, yawˇ maˍ piˇ ve hta‸ yawˇ hui anˇ ve yoˬ. 34 Saˍduˆkehˇ hui Yeˍsuˆ hta‸ tawˇ k'aw‸ yaw hk'aw‸ maˇ g'a ve awˬ lawn Hpaˍriˍsehˇ teˇ hpaˍ g'a kaˇ htaˇ, yawˇ hui teˇ geh hpawnˬ la ve yoˬ. 35 Yawˇ hui awˬ hk'aw lo awˬ liˇ tawˇ hkawˇ shiˍ paˍ teˇ g'aˇ, Yeˍsuˆ hta‸ lawˇ nyi tuˬ chi hk'e k'oˆ piˇ ve, 36 Saˍ la‸-oˬ, awˬ liˇ tawˇ hkawˇ awˬ hk'aw lo piˇ taˍ ve tawˇ hk'aˬ ve teˇ hkawˇ hk'a peu-eˬ a‸ kehˉ uiˍ ve le teh‸, yawˇ hta‸ na nyi ve yoˬ. 37 Yeˍsuˆ yawˇ hta‸ k'oˆ piˇ ve, Nawˬ ve nyi ma hk'a peu-eˬ, nawˬ ve co ha hk'a peu-eˬ leh nawˬ ve dawˇ hk'aˇ hk'a peu-eˬ nawˬ ve Jawˇ mawˇ G'uiˬ sha hta‸ g'a ha‸ ve yoˬ. 38 Piˇ taˍ ve tawˇ chi teˇ hkawˇ lehˬ, hk'a peu-eˬ a‸ kehˉ uiˍ leh awˉ lawˉ peuˇ ve teˇ hkawˇ hpeh‸ ve yoˬ. 39 Nyiˇ hkawˇ teˇ hkawˇ htawˇ, awˉ lawˉ teˇ hkawˇ hta‸ shuˍ da‸ ve yoˬ. Nawˬ awˬ to hta‸ ha‸ ve hk'e, nawˬ awˬ paˇ awˬ kui chehˇ ve chaw hta‸ g'a ha‸ ve yoˬ. 40 Awˬ liˇ tawˇ hkawˇ hk'a peu-eˬ leh G'uiˬ sha ve tcuh kaˍ paˍ hui ve tawˇ hkawˇ hk'a peu-eˬ, piˇ taˍ ve tawˇ chi nyiˇ hkawˇ hta‸ tcuhˉ naw‸ taˍ ve yoˬ teh‸, k'aw‸ k'oˆ piˇ ve yoˬ. 41 Hpaˍriˍsehˇ hui hpawnˬ da‸ chehˇ htaˇ, Yeˍsuˆ yawˇ hui hta‸ tawˇ teˇ hkawˇ na nyi ve, 42 Hkri‸ ve awˬ lawn hta‸ nawˬ hui hk'aˬ hk'e dawˇ ve le. Yawˇ a shu ve yaˇ hpu hpeh‸ ve le teh‸ na nyi ve yoˬ. Yawˇ lehˬ Daˍviˆ ve yaˇ hpu hpeh‸ ve yoˬ teh‸, yawˇ hui yawˇ hta‸ k'aw‸ k'oˆ piˇ ve yoˬ. 43 Yawˇ k'aw‸ k'oˆ ve, Hk'e te leh, Awˬ ha hpu Daˍviˆ hta‸ dawˇ pawnˍ piˇ ve awˬ hk'aw lo, aˬ hto‸ ma pa taw yawˇ hta‸ Jawˇ mawˇ teh‸ k'oˆ ve le. 44 Awˬ lawn k'o Daˍviˆ k'oˆ ve, Jawˇ mawˇ G'uiˬ sha lehˬ ngaˬ ve Jawˇ mawˇ hta‸ k'oˆ piˇ ve, Nawˬ ve canˇ paˍ teˇ hpaˍ hta‸ nawˬ ve hkui sheh awˬ hawˉ lo ngaˬ taˍ htaˇ hk'a gaˬ ngaˬ ve la‸ sha paˉ lo mui chehˇ-oˆ, teh‸ k'oˆ taˍ ve yoˬ. 45 Daˍviˆ yawˇ hta‸ Jawˇ mawˇ teh‸ k'oˆ ve k'o, yawˇ lehˬ hk'aˬ hk'e te leh Daˍviˆ ve yaˇ hpu hpeh‸ tuˬ ve le teh‸, yawˇ hui hta‸ na nyi ve yoˬ. 46 Chaw teˇ g'aˇ ka‸ yawˇ hta‸ tawˇ teˇ peu-eˍ ka‸ k'aw‸ yaw hk'aw‸ maˇ hpeh‸ leh, oˇ ve teˇ nyi hta‸ tanˬ leh, yawˇ hta‸ tawˇ teˇ peu-eˍ ka‸ shu k'aw‸ na nyi maˇ haˆ ve yoˬ.

Ma‸htehˍ 23

1 Oˇ htaˇ Yeˍsuˆ lehˬ, chaw awˬ moˍ lonˉ teˇ hpaˍ leh yawˇ ve awˬ la‸ g'awˇ hui hta‸ k'oˆ piˇ ve, 2 Li‸ bvuh‸ paˍ hui leh Hpaˍriˍsehˇ hui lehˬ, Moˉseˍ ve mui kuiˬ lo mui ve yoˬ. 3 Hk'e te leh yawˇ hui lehˬ, nawˬ hui hta‸ hk'a k'oˆ laˇ ve teˇ hpaˍ hta‸ na yuˬ leh te-o. Ya‸ hk'aˇ, yawˇ hui te ve hk'e taˇ te. Awˬ lawn k'o, yawˇ hui k'oˆ ve hk'e yawˇ hui maˇ te. 4 Hawˇ jaˇ ve mawˇ hta‸ yawˇ hui tsuh‸ taˍ leh, chaw yaˇ hui ve la‸ hpeh k'aˉ hk'oˆ lo taˍ piˇ ve yoˬ. Ya‸ hk'aˇ yawˇ hui lehˬ, gu jiˆ pfuhˍ piˇ tuˬ a shu yawˇ ve la‸ naw meuˇ ceh ka‸ maˇ htawˇ. 5 Yawˇ hui hk'a te ve kanˉ hk'a peu-eˬ lehˬ, chaw yaˇ hui g'a mawˬ tuˬ ceh te ve yoˬ. Li‸ hpu awˬ tawn ehˉ doˆ pfuhˇ kuiˬ hta‸ yawˇ hui uiˍ chaweh te leh, aˉ po‸ awˬ caˍ zuhˬ chaweh te ve yoˬ. 6 Yawˇ hui lehˬ, hti caˇ hti dawˬ kuiˬ lo awˬ me‸ awˬ hponˇ cawˬ ve mui kuiˬ hta‸ maˇ k'oˇ, bon yehˬ awˬ hk'aw lo awˬ me‸ awˬ hponˇ cawˬ ve mui hk'awˇ hta‸ maˇ k'oˆ, yawˇ hui heuˆ gaˇ ve yoˬ. 7 Tcuh hk'aw lo shu yawˇ hui hta‸ yawˆ yan laˇ ve hta‸ maˇ k'oˆ, shu yawˇ hui hta‸ saˍ la‸ teh‸ k'oˆ laˇ ve hta‸ maˇ k'oˆ, yawˇ hui heuˆ gaˇ ve yoˬ. 8 Shu nawˬ hui hta‸ saˍ la‸ teh‸ taˇ k'oˆ tcuh. Awˬ lawn k'o, nawˬ hui saˍ la‸ teˇ g'aˇ tiˉ cawˬ leh, nawˬ hui hk'a peu-eˬ awˬ viˉ awˬ nyi hpeh‸ ve yoˬ. 9 Miˬ guiˬ hk'oˆ lo teˇ g'aˇ hta‸ ka‸ awˬ pa teh‸ taˇ k'oˆ. Awˬ lawn k'o, mvuhˇ naw ma hk'oˆ chehˇ ve nawˬ hui Awˬ pa teˇ g'aˇ tiˉ cawˬ ve yoˬ. 10 Shu nawˬ hui hta‸ sheh k'ai shehˍ hpaˇ teh‸ taˇ k'oˆ tcuh. Awˬ lawn k'o, Hkri‸ teˇ g'aˇ ceh tiˉ nawˬ hui ve sheh k'ai shehˍ hpaˇ hpeh‸ ve yoˬ. 11 Nawˬ hui awˬ hk'aw lo shu a‸ kehˉ uiˍ ve teˇ g'aˇ lehˬ, nawˬ hui ve awˬ ceˬ g'a te ve yoˬ. 12 A shu yawˇ awˬ to hta‸ taˍ uiˍ ve chaw hk'aˬ ve teˇ g'aˇ maˇ k'oˆ, taˍ i ve hta‸ g'a hkanˍ tuˬ yoˬ. A shu yawˇ awˬ to hta‸ taˍ i ve chaw hk'aˬ ve teˇ g'aˇ maˇ k'oˆ, taˍ uiˍ ve hta‸ g'a hkanˍ tuˬ yoˬ. 13 Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Awˬ lawn k'o, chaw yaˇ teˇ hpaˍ mvuhˇ naw ma mvuhˇ miˬ awˬ hk'aw lo maˇ g'a lo‸-e tuˬ, nawˬ hui yehˬ miˉ hta‸ hoˆ tiˍ taˍ ve yoˬ. Nawˬ hui maˇ lo‸-e ve awˬ hk'oˆ, lo‸-e gaˇ ve chaw hui hta‸ htawˇ nawˬ hui tawˍ taˍ ve yoˬ. 14 Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Awˬ lawn k'o, mehˇ chawˇ ma ve yehˬ hta‸ nawˬ hui hiˉ yuˬ leh, nawˬ hui ve venˇ baˆ maˇ g'a tawˆ la tuˬ maw chaweh bon lawˬ ve yoˬ. Hk'e te leh, shu a‸ kehˉ leuˉ leh uiˍ jaˇ ve ciˍ yanˍ ve hta‸ nawˬ hui g'a hkanˍ tuˬ yoˬ. 15 Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Awˬ lawn k'o, chaw teˇ g'aˇ nawˬ hui ve awˬ la‸ g'awˇ hpeh‸ la tuˬ, miˬ guiˬ hk'oˆ leh laˇ tsuhˇ g'uiˬ hk'oˆ nawˬ hui teˇ kaˬ peuˬ teˇ kaˬ lo k'ai ve yoˬ. Chaw teˇ g'aˇ nawˬ hui ve awˬ la‸ g'awˇ hpeh‸ la ve teˇ yanˇ, nawˬ hui a‸ kehˉ nyiˇ pun yawˇ hta‸ moˬ naˆ ho‸ ve awˬ yaˇ hpeh‸ piˇ lawˬ ve yoˬ. 16 Ya‸ k'aw maˍ shehˍ hpaˇ mehˆ cuˉ paˍ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Nawˬ hui k'oˆ ve, Chaw teˇ g'aˇ g'aˇ bon yehˬ lonˉ hta‸ cuˇ leh hkanˍ ve k'o, yawˇ hkanˍ ve hk'e maˇ te htawˇ te‸ chiˉ maˇ heˆ. Ya‸ hk'aˇ, bon yehˬ lonˉ ve shi hta‸ cuˇ leh hkanˍ ve k'o, yawˇ hkanˍ taˍ ve hk'e g'a te ve yoˬ teh‸ nawˬ hui k'oˆ ve yoˬ. 17 Mehˆ cuˉ ve chaw luˬ paˍ teˇ hpaˍ-oˬ, hk'aˬ ve teˇ ceuˬ uiˍ ve le. Shi uiˍ ve laˇ, maˇ heˆ k'o shi hta‸ da‸ piˇ kehˬ piˇ lawˬ ve bon yehˬ lonˉ uiˍ ve laˇ. 18 Nawˬ hui k'oˆ ve, Chaw teˇ g'aˇ g'aˇ tanˇ kuiˬ hta‸ cuˇ leh hkanˍ ve k'o, yawˇ hkanˍ ve hk'e maˇ te htawˇ te‸ chiˉ maˇ heˆ. Ya‸ hk'aˇ, tanˇ kuiˬ awˬ hk'oˆ lo cawˬ ve tanˇ tuˬ hta‸ cuˇ leh hkanˍ ve k'o, yawˇ hkanˍ taˍ ve hk'e g'a te ve yoˬ teh‸ nawˬ hui k'oˆ ve yoˬ. 19 Mehˆ cuˉ paˍ teˇ hpaˍ-oˬ, hk'aˬ ve teˇ ceuˬ uiˍ ve le. Tanˇ tuˬ uiˍ ve laˇ, maˇ heˆ k'o, tanˇ tuˬ hta‸ da‸ piˇ kehˬ piˇ lawˬ ve tanˇ kuiˬ uiˍ ve laˇ. 20 Hk'e te leh tanˇ kuiˬ hta‸ cuˇ leh hkanˍ ve chaw lehˬ, tanˇ kuiˬ hta‸ ka‸, oˇ ve awˬ hk'oˆ hk'a cawˬ ve hk'a peu-eˬ hta‸ ka‸ cuˇ leh hkanˍ ve yoˬ. 21 Bon yehˬ lonˉ hta‸ cuˇ leh hkanˍ ve chaw lehˬ, bon yehˬ lonˉ hta‸ ka‸, oˇ ve awˬ hk'aw lo chehˇ shehˍ hpaˇ hta‸ ka‸ cuˇ leh hkanˍ ve yo‸. 22 Mvuhˇ naw ma hta‸ cuˇ leh hkanˍ ve chaw lehˬ, G'uiˬ sha ve k'aw jaw hta‸ ka‸, oˇ ve awˬ hk'oˆ mui shehˍ hpaˇ hta‸ ka‸ cuˇ leh hkanˍ ve yoˬ. 23 Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Awˬ lawn k'o, nawˬ hui lehˬ i hkinˇ, hawˉ loˍ leh g'aˆ shaweh teˇ hpaˍ hta‸ teˇ chi pun teˇ pun yuˬ leh tanˇ piˇ ve htawˇ, awˬ liˇ tawˇ hkawˇ awˬ hk'aw lo leuˉ leh uiˍ ve teˇ hpaˍ, hteˇ lehˍ cawˇ lehˍ te ve, ha k'aˉ ve leh yonˍ ve, chi teˇ hpaˍ hta‸ naw hui maˇ te. Chi teˇ hpaˍ hta‸ nawˬ hui te cawˇ ve awˬ hk'oˆ, awˬ kaˍ awˬ nu ve teˇ hpaˍ hta‸ ka‸ nawˬ hui maˇ teh taˉ cawˇ ve yoˬ. 24 Ya‸ k'aw maˍ shehˍ hpaˇ mehˆ cuˉ paˍ teˇ hpaˍ-oˬ, nawˬ hui lehˬ puiˉ suhˆ naˆ teˇ hpaˍ hta‸ che baˬ leh, kaˍ laˍ oˆ hta‸ hehˆ dawˬ ve yoˬ. 25 Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Awˬ lawn k'o, nawˬ hui lehˬ hkehˇ leh kawˆ teˇ hpaˍ awˬ baˬ hpawˇ lo tsuhˇ kehˬ ve htawˇ, awˬ hk'aw hpawˇ lehˬ hiˉ yuˬ lu yuˬ ve teˇ ceuˬ leh te ponˬ te leuˉ ve teˇ ceuˬ hk'a biˇ cawˬ ve yoˬ. 26 Mehˆ cuˉ ve Hpaˍriˍsehˇ-oˬ, hkehˇ leh kawˆ teˇ hpaˍ awˬ baˬ hpawˇ lo da‸ kehˬ la tuˬ, awˬ hk'aw hpawˇ lo awˉ lawˉ tsuhˇ kehˬ-o‸. 27 Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Awˬ lawn k'o, nawˬ hui lehˬ, hpuˉ lehˍ shehˍ taˍ ve chaw tuˍ hpfuh hta‸ shuˍ ve yoˬ. Tuˍ hpfuh oˇ ve awˬ baˬ hpawˇ lo nyi sha ve htawˇ, awˬ hk'aw hpawˇ lo chaw awˬ mu‸ ku leh cha‸ chiˆ ve teˇ ceuˬ le le hk'a biˇ cawˬ ve yoˬ. 28 Chi hk'a shuˍ shuˍ, nawˬ hui lehˬ awˬ hta‸ hpawˇ chaw yaˇ mehˆ g'uˇ suhˍ lo hteˇ ve cawˇ ve chaw hpeh‸ ve hta‸ shuˍ ve yoˬ. Ya‸ hk'aˇ, awˬ hk'aw hpawˇ lo heˍ ve leh haiˬ ve awˬ ceuˬ hk'a biˇ cawˬ ve yoˬ. 29 Li‸ bvuh‸ paˍ leh Hpaˍriˍsehˇ, chaw heˍ paˍ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Awˬ lawn k'o, nawˬ hui lehˬ G'uiˬ sha ve tcuh kaˍ paˍ hui ve tuˍ hpfuh teˇ hpaˍ hta‸ gu te leh, hteˇ ve cawˇ ve chaw hui ve kawˍ taˍ ve tuˍ hpfuh teˇ hpaˍ hta‸ nyi sha tuˬ te ve yoˬ. 30 Ngaˬ hui lehˬ, awˬ puˍ awˬ pi co-e htaˇ g'a chehˇ ve hk'e k'o, yawˇ hui geh teˇ geh G'uiˬ sha ve tcuh kaˍ paˍ hui hta‸ ngaˬ hui tiˇ pehˍ tuˬ maˇ heˆ teh‸ nawˬ hui k'oˆ ve yoˬ. 31 Chi hk'e k'oˆ ve lehˬ, G'uiˬ sha ve tcuh kaˍ paˍ hui hta‸ tiˇ pehˍ shehˍ hpaˇ hui ve awˬ yaˇ awˬ duˬ hpeh‸ ve yoˬ teh‸, nawˬ hui a shu yawˇ awˬ to awˬ lawn shaˉ hkiˆ hkanˍ ve yoˬ. 32 Nawˬ hui awˬ puˍ awˬ pi te ve hta‸ biˇ la tuˬ te-o. 33 Vuiˬ haiˬ awˬ yaˇ teˇ hpaˍ-oˬ, suhˉ taˆ ve teˇ yanˇ, nawˬ hui moˬ naˆ ho‸ awˬ hk'aw lo g'a geh tuˬ ve hta‸ hk'aˬ hk'e te ponˬ hpeh‸ tuˬ le. 34 Chi hta‸ pa taw, ngaˬ lehˬ tcuh kaˍ paˍ, cuˇ yiˍ cawˬ paˍ leh li‸ bvuh‸ paˍ teˇ hpaˍ hta‸ nawˬ hui geh lo peu laˇ tuˬ yoˬ. Nawˬ hui lehˬ, teˇ hpaˍ hpaˍ hta‸ tiˇ pehˍ leh, la‸ ka hk'oˆ lo hta‸ pehˍ tuˬ yoˬ. Teˇ hpaˍ hpaˍ hta‸ nawˬ hui ve bon yehˬ awˬ hk'aw lo jaw‸ leh, teˇ venˇ peuˬ teˇ venˇ lo nawˬ hui k'ai leh fawˉ mehˍ tuˬ yoˬ. 35 Hk'e te leh, hteˇ ve cawˇ ve Aˍbeˍlaˆ ve awˬ suhˍ hta‸ te leh, bon yehˬ lonˉ leh tanˇ kuiˬ awˬ kaˍ lo nawˬ hui tiˇ pehˍ ve Baˍraˍhkiˆ yaˇ paˍ Zaˍhkaˍriˆ ve awˬ suhˍ hk'a gaˬ, miˬ guiˬ hk'oˆ lo hk'a sheˆ peuˬ ve hteˇ ve cawˇ ve chaw teˇ hpaˍ ve awˬ suhˍ hk'a peu-eˬ nawˬ hui awˬ hk'oˆ gaˬ la tuˬ yoˬ. 36 Ngaˬ nawˬ hui hta‸ awˬ tehˬ awˬ na k'oˆ laˇ ve, chi teˇ hpaˍ hk'a peu-eˬ chaw chi teˇ co awˬ hk'oˆ gaˬ la tuˬ yoˬ. 37 Yeˍruˆsaˍlehnˍ venˇ-oˬ, Yeˍruˆsaˍlehnˍ venˇ-oˬ, hk'aˬ htaˆ ka‸ G'uiˬ sha ve tcuh kaˍ paˍ teˇ hpaˍ hta‸ nawˬ tiˇ pehˍ leh, nawˬ geh peu laˇ ve chaw teˇ hpaˍ hta‸ haˉ pui baˬ pehˍ ve yoˬ. G'aˆ ma peuˍ lehˬ, yawˇ ve awˬ yehˇ teˇ hpaˍ hta‸ toˍ la‸ k'uˉ awˬ hawˉ lo hpoˆ chehˇ piˇ lawˬ ve hk'e, nawˬ ve awˬ yaˇ awˬ duˬ teˇ hpaˍ hta‸ ngaˬ awˬ hawˉ lo hk'aˬ nyiˇ pawˆ hpoˆ chehˇ piˇ lawˬ gaˇ ve htawˇ, nawˬ maˇ te. 38 Nyi loˬ, nawˬ hui ve chehˇ kuiˬ lehˬ, gawˬ cu gawˬ pehˆ te teh taˉ tuˬ yoˬ. 39 Awˬ lawn k'o, ngaˬ nawˬ hui hta‸ k'oˆ laˇ ve, Jawˇ mawˇ G'uiˬ sha ve awˬ meh awˬ hawˉ lo laˬ ve chaw teˇ g'aˇ awˬ bon uiˍ piˇ-oˆ teh‸, nawˬ hui maˇ k'oˆ ve ceh ceh, nawˬ hui ngaˬ hta‸ maˇ g'a k'aw‸ mawˬ teh‸ k'oˆ ve yoˬ.

Ma‸htehˍ 24

1 Yeˍsuˆ bon yehˬ lonˉ awˬ hk'aw lo tawˆ k'ai ve teˇ yanˇ, bon yehˬ lonˉ hta‸ caˉ da‸ ve yehˬ teˇ hpaˍ yawˇ hta‸ beˆ maˍ piˇ tuˬ, yawˇ ve awˬ la‸ g'awˇ teˇ hpaˍ yawˇ geh laˬ ve yoˬ. 2 Yeˍsuˆ yawˇ hui hta‸ k'oˆ piˇ ve, Chi hk'a peu-eˬ hta‸ nawˬ hui mawˬ ve maˇ heˆ laˇ. Ngaˬ nawˬ hui hta‸ awˬ tehˬ awˬ na k'oˆ laˇ ve, yehˬ chi teˇ hpaˍ haˉ pui teˇ shiˍ awˬ hk'oˆ teˇ shiˍ maˇ cawˬ htaˇ hk'a gaˬ shu te luˬ tuˬ yoˬ. 3 Oˇ htaˇ, yawˇ Shaˍlonˍ hk'aw hk'oˆ lo mui chehˇ ve teˇ yanˇ, awˬ la‸ g'awˇ teˇ hpaˍ ceh tiˉ yawˇ geh laˬ leh, Awˬ ceuˬ oˇ ve teˇ hpaˍ hk'aˬ htaˆ hpeh‸ la tuˬ le. Nawˬ k'aw‸ ya‸ la tuˬ ve leh, miˬ guiˬ chi awˬ yanˇ leh tuˬ ve awˬ heˆ hk'aˬ hk'e hpehˬ tawˆ la tuˬ ve le. Ngaˬ hui hta‸ a ciˉ hto laˇ-oˆ teh‸ k'oˆ piˇ ve yoˬ. 4 Yeˍsuˆ yawˇ hui hta‸ k'aw‸ k'oˆ piˇ ve, Chaw teˇ g'aˇ ka‸ nawˬ hui hta‸ maˇ g'a heˍ yuˬ beˬ yuˬ tuˬ, shaˍ ti‸ taˍ-o‸. 5 Awˬ lawn k'o, chaw maˇ maˇ ngaˬ ve awˬ meh hta‸ pfuhˇ laˬ leh, Ngaˬ lehˬ Hkri‸ yoˬ teh‸ k'oˆ leh, chaw maˇ maˇ hta‸ heˍ yuˬ beˬ yuˬ tuˬ yoˬ. 6 Ma‸ bawˆ ve leh bawˆ da‸-a teh‸ te chehˇ ve awˬ lawn hta‸ nawˬ hui g'a kaˇ tuˬ yoˬ. Ya‸ hk'aˇ, nawˬ hui maˇ g'a kawˆ cheˇ tuˬ shaˍ ti‸ taˍ-o‸. Awˬ lawn k'o, awˬ ceuˬ chi teˇ hpaˍ hpeh‸ la ve htawˇ, awˬ leh meuˇ maˇ gaˬ sheˍ. 7 Chaw teˇ ceuˬ leh teˇ ceuˬ, mvuhˇ miˬ teˇ peˆ leh teˇ peˆ ya‸ da‸ jiˆ da‸ tuˬ yoˬ. Meu‸ ve kaˆ ve leh miˬ hiˆ ve teˇ hpaˍ teˇ kaˬ peuˬ teˇ kaˬ lo hpeh‸ la tuˬ yoˬ. 8 Chi hk'a peu-eˬ lehˬ, tu‸ ve hkanˍ ve awˬ hkuiˉ puiˍ ceh tiˉ hpeh‸ sheˍ ve yoˬ. 9 Oˇ htaˇ, fawˉ mehˍ ve hta‸ g'a hkanˍ tuˬ, shu nawˬ hui hta‸ chiˇ a‸ piˇ leh, nawˬ hui hta‸ tiˇ pehˍ tuˬ yoˬ. Ngaˬ ve awˬ meh hta‸ pa taw chaw ceuˬ hk'a peu-eˬ nawˬ hui hta‸ canˇ tuˬ yoˬ. 10 Oˇ htaˇ, chaw maˇ maˇ hkui htiˇ poˬ paiˍ tuˬ yoˬ. Yawˇ hui teˇ g'aˇ leh teˇ g'aˇ chiˇ a‸ da‸ leh, teˇ g'aˇ leh teˇ g'aˇ canˇ da‸ tuˬ yoˬ. 11 Maˇ heˆ heˆ ve tcuh kaˍ paˍ teˇ hpaˍ htawˇ maˇ maˇ tawˆ la leh, chaw maˇ maˇ hta‸ heˍ yuˬ beˬ yuˬ tuˬ yoˬ. 12 Haiˬ ve awˬ ceuˬ cawˬ maˇ la ve pa taw, chaw maˇ maˇ ha‸ pehnˇ ve teˇ ceuˬ i k'ai yawnˇ k'ai tuˬ yoˬ. 13 Ya‸ hk'aˇ, awˬ leh hk'a gaˬ yeˬ chehˇ ve chaw lehˬ, htaiˍ hk'aw‸ ve hta‸ g'a tuˬ yoˬ. 14 Chaw ceuˬ hk'a peu-eˬ awˬ pon shaˉ hkiˆ hpeh‸ tuˬ, G'uiˬ sha ve mvuhˇ miˬ hta‸ caˉ da‸ ve ha lehˬ ve bon hkawˇ chi, miˬ guiˬ hk'oˆ teˇ kaˬ le le lo ca maˍ piˇ tuˬ yoˬ. Oˇ ve hk'aw‸ nawˉ, awˬ leh meuˇ gaˬ la tuˬ yoˬ. 15 Hk'e te leh, tcuh kaˍ paˍ Daˍyeˍlaˆ k'oˆ taˍ ve hk'e, te luˬ te sheˆ puiˉ ve cha‸ chiˆ ve awˬ ceuˬ lehˬ, da‸ kehˬ ve chehˇ kuiˬ awˬ hk'aw lo huˉ chehˇ ve hta‸ nawˬ hui g'a mawˬ ve teˇ yanˇ, (li‸ chi hta‸ g'aw ve chaw lehˬ shiˍ-o‸.) 16 oˇ htaˇ, Yuˇda‸ mvuhˇ miˬ awˬ hk'aw lo chehˇ ve chaw hui hk'aw hk'oˆ lawˬ hk'oˆ lo hpaw-e loˬ. 17 Yehˬ awˬ hk'oˆ lo chehˇ ve chaw a shu yawˇ ve yehˬ awˬ hk'aw lo mawˇ ca yuˬ tuˬ, taˇ k'aw‸ ya‸-e. 18 Heh hk'aw chehˇ ve chaw htawˇ, a shu yawˇ ve veu‸ k'aˇ ca k'aw‸ yuˬ tuˬ taˇ k'o‸-e. 19 Awˬ yanˇ oˇ ve awˬ hk'aw lo, yaˇ hu ma leh cuˉ dawˬ ve yaˇ ehˉ cawˬ ve chaw hui lehˬ, g'a dawˇ haˍ jaˇ tuˬ yoˬ. 20 Nawˬ hui g'a hpaw-e ve awˬ yanˇ lehˬ, mvuhˇ kaˆ yanˇ maˇ k'oˆ, shinˉ nyi htaˇ maˇ k'oˆ, maˇ g'a cawˇ tuˬ bon lawˬ-o‸. 21 Awˬ lawn k'o, miˬ guiˬ hta‸ te hpanˍ ve teˇ nyi hta‸ tanˬ leh ya‸ nyi hk'a gaˬ maˇ hpeh‸ la jaw sheˍ leh, awˬ hk'aw‸ nawˉ ka‸ maˇ k'aw‸ hpeh‸ la tuˬ ve tu‸ jaˇ hkanˍ jaˇ ve teˇ ceuˬ lehˬ, oˇ htaˇ hpeh‸ la tuˬ yoˬ. 22 Awˬ yanˇ oˇ ve maˇ ngeh piˇ lawˬ ve k'o, chaw teˇ g'aˇ ka‸ ponˬ maˇ hpeh‸. Ya‸ hk'aˇ, leuˆ yuˬ taˍ ve chaw teˇ hpaˍ hta‸ pa taw, awˬ yanˇ oˇ ve hta‸ ngeh piˇ lawˬ tuˬ yoˬ. 23 Oˇ htaˇ, chaw teˇ g'aˇ g'aˇ lehˬ, Nyi-o, Hkri‸ choˬ kaˬ lo chehˇ taˍ ve yoˬ, oˇ kaˬ lo chehˇ taˍ ve yoˬ teh‸ nawˬ hui hta‸ k'oˆ laˇ ve k'o taˇ yonˍ. 24 Awˬ lawn k'o, maˇ heˆ heˆ ve Hkri‸ leh maˇ heˆ heˆ ve tcuh kaˍ paˍ teˇ hpaˍ tawˆ la tuˬ yoˬ. Yawˇ hui lehˬ, hpeh‸ ve k'o leuˆ yuˬ taˍ ve chaw teˇ hpaˍ hta‸ htawˇ heˍ yuˬ beˬ yuˬ g'a tuˬ, uiˍ ve anˇ tuˬ leh awˬ heˆ teˇ hpaˍ hta‸ te maˍ piˇ tuˬ yoˬ. 25 Nyi loˬ, maˇ hpeh‸ la sheˍ htaˇ ka‸, ngaˬ nawˬ hui hta‸ k'oˆ taˉ laˇ ve yoˬ. 26 Hk'e te leh yawˇ hui lehˬ, Nyi loˬ, yawˇ heh puiˉ hk'aw lo chehˇ taˍ ve yoˬ teh‸ k'oˆ ve ka‸ taˇ k'ai. Bawehˇ awˬ hk'aw lo yawˇ chehˇ taˍ ve yoˬ teh‸ k'oˆ ve ka‸ taˇ yonˍ. 27 Awˬ lawn k'o, mvuhˇ tiˉ po-e‸ lehˬ mvuhˇ nyi tawˆ hpawˇ lo ba la leh mvuhˇ nyi k'ehˬ hpawˇ lo gaˬ ve hk'e, chaw yaˇ ve Yaˇ hpu k'aw‸ ya‸ la tuˬ ve lehˬ, chi hk'a shuˍ shuˍ hpeh‸ tuˬ yoˬ. 28 Suh taˍ ve awˬ to hk'a cawˬ kuiˬ lo, naˬ beuˬ ngaˆ teˇ hpaˍ hpawnˬ la tuˬ yoˬ. 29 Tu‸ ve hkanˍ ve awˬ yanˇ oˇ ve peuˬ hk'aw‸ nawˉ, teˇ cawˬ haˉ mvuhˇ nyi naˆ ho‸ k'ai leh, ha pa htawˇ awˬ g'euˆ maˇ k'aw‸ ba. Meu‸ keu shiˍ teˇ hpaˍ mvuhˇ naw ma lo ce la leh, mvuhˇ naw ma ve kanˇ paˆ teˇ hpaˍ htawˇ hiˆ hiˆ naˇ naˇ k'ai tuˬ yoˬ. 30 Oˇ htaˇ, chaw yaˇ ve Yaˇ hpu ve awˬ heˆ lehˬ, mvuhˇ naw ma lo tawˆ la tuˬ yoˬ. Miˬ guiˬ hk'oˆ lo chaw ceuˬ hk'a peu-eˬ paˆ hawˬ leh, chaw yaˇ ve Yaˇ hpu lehˬ, uiˍ ve awˬ me‸ awˬ hponˇ leh kanˇ paˆ cawˬ ve awˬ hk'aw lo, mvuhˇ naw ma ve moˬ hta‸ ciˇ ya‸ la ve hta‸ yawˇ hui g'a mawˬ tuˬ yoˬ. 31 Peuˬ leh, behˬ heh ma awˬ hkawˇ bvuhˬ chaweh meuˆ leh, yawˇ yawˇ ve mvuhˇ naw ma tcuh yaˇ teˇ hpaˍ hta‸ k'ai tcuh tuˬ yoˬ. Yawˇ hui lehˬ, mvuhˇ awˇ ceˍ miˬ awˍ hpawˇ lo yawˇ leuˆ yuˬ taˍ ve chaw hui hta‸ hpawnˬ da‸ piˇ tuˬ yoˬ. 32 Maˉ nawˆ cehˬ hta‸ tehˆ maˍ ve tawˇ pa haˉ chi hta‸ henˇ yuˬ-o‸. Awˬ tuˍ tuˍ la leh, awˬ caˍ caˍ la ve teˇ yanˇ, mvuhˇ cha hkui yanˇ gaˬ la paˇ neˇ peuˬ ve hta‸ nawˬ hui shiˍ ve yoˬ. 33 Chi hk'a shuˍ shuˍ, awˬ ceuˬ chi hk'a peu-eˬ hpeh‸ la chehˇ ve hta‸ nawˬ hui g'a mawˬ ve teˇ yanˇ, yawˇ lehˬ yehˬ miˉ hpe‸ awˬ paˇ lo gaˬ la peuˬ ve hta‸ nawˬ hui shiˍ-o‸. 34 Ngaˬ nawˬ hui hta‸ awˬ tehˬ awˬ na k'oˆ laˇ ve, chi teˇ co maˇ ponˬ k'ai sheˍ htaˇ, awˬ ceuˬ chi hk'a peu-eˬ hpeh‸ la tuˬ yoˬ. 35 Mvuhˇ naw ma leh miˬ naˆ ma mehˉ k'ai tuˬ yoˬ. Ya‸ hk'aˇ, ngaˬ ve tawˇ hkawˇ lehˬ maˇ mehˉ k'ai taˬ. 36 Awˬ nyi awˬ haˉ oˇ ve hta‸ chaw teˇ g'aˇ ka‸ maˇ shiˍ. Mvuhˇ naw ma tcuh yaˇ hui ka‸, Yaˇ hpu ka‸ maˇ shiˍ. Awˬ pa teˇ g'aˇ tiˉ shiˍ ve yoˬ. 37 Chaw yaˇ ve Yaˇ hpu k'aw‸ ya‸ la tuˬ ve lehˬ, Noˉa‸ ve awˬ co-e htaˇ hk'a shuˍ shuˍ hpeh‸ tuˬ yoˬ. 38 Awˬ lawn k'o, Noˉa‸ haw lo‸ k'oˍ hk'aw lo‸-e ve teˇ nyi hk'a gaˬ, iˉ kaˆ maˇ htonˍ sheˍ ve awˬ yanˇ awˬ hk'aw lo, yawˇ hui lehˬ caˇ ve dawˬ ve, awˬ hpawˇ awˬ miˇ heuˆ da‸ leh ka piˇ ve, chi hk'e te chehˇ ve yoˬ. 39 Iˉ kaˆ htonˍ la leh yawˇ hui hta‸ poˬ chiˇ veu htaˇ hk'a gaˬ yawˇ hui maˇ shiˍ ve hk'e, chaw yaˇ ve Yaˇ hpu k'aw‸ ya‸ la ve teˇ yanˇ, chi hk'a shuˍ shuˍ hpeh‸ tuˬ yoˬ. 40 Oˇ htaˇ, chaw nyiˇ g'aˇ heh hk'aw lo teˇ geh chehˇ taˍ ve teˇ yanˇ, teˇ g'aˇ hta‸ shiˍ veu leh teˇ g'aˇ hta‸ teh taˉ tuˬ yoˬ. 41 Yaˇ miˇ nyiˇ g'aˇ teˇ geh haˉ pui mawˍ geuˆ chehˇ ve teˇ yanˇ, teˇ g'aˇ hta‸ shiˍ veu leh teˇ g'aˇ hta‸ teh taˉ tuˬ yoˬ. 42 Hk'e te leh, nawˬ ve Awˬ jawˇ mawˇ hk'aˬ ve teˇ nyi k'aw‸ gaˬ la tuˬ ve hta‸ nawˬ hui maˇ shiˍ ve pa taw shaw taˍ-o‸. 43 Yehˬ shehˍ hpaˇ lehˬ, chaw hk'awˇ laˬ tuˬ ve awˬ yanˇ hta‸ shiˍ taˍ ve hk'e k'o, yawˇ ve yehˬ awˬ hk'aw lo chaw hk'awˇ maˇ g'a lo‸ la tuˬ yawˇ shaw taˍ tuˬ yoˬ teh‸ nawˬ hui shiˍ-o‸. 44 Hk'e te leh, nawˬ hui htawˇ hk'a deh‸ gu taˍ hehnˇ taˍ-o‸. Awˬ lawn k'o, naw hui maˇ dawˇ maˇ gaˇ ve awˬ yanˇ awˬ hk'aw lo, chaw yaˇ ve Yaˇ hpu k'aw‸ ya‸ la tuˬ yoˬ. 45 Ka ti‸ yeˬ leh cuˇ yiˍ cawˬ ve awˬ ceˬ teˇ g'aˇ lehˬ, a shu le. Awˬ shehˍ hpaˇ ve yehˬ yaˇ k'a yaˇ teˇ hpaˍ hta‸ awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ awˬ pon, yawˇ ve awˬ shehˍ hpaˇ lehˬ awˬ ceˬ oˇ ve hta‸ awˬ hoˉ te tcuh ve yoˬ. 46 Awˬ ceˬ teˇ g'aˇ chi hk'e te chehˇ ve hta‸ yawˇ ve awˬ shehˍ hpaˇ k'aw‸ gaˬ la leh g'a mawˬ ve k'o, awˬ ceˬ oˇ ve lehˬ awˬ bon uiˍ ve yoˬ. 47 Ngaˬ nawˬ hui hta‸ awˬ tehˬ awˬ na k'oˆ laˇ ve, awˬ shehˍ hpaˇ lehˬ, yawˇ ve mawˇ jeˬ hk'a peu-eˬ awˬ hk'oˆ awˬ ceˬ oˇ ve hta‸ awˬ hoˉ te tcuh tuˬ yoˬ. 48 Ya‸ hk'aˇ, haiˬ ve awˬ ceˬ lehˬ, Ngaˬ ve awˬ jawˇ mawˇ haˆ haˆ maˇ k'aw‸ la taˬ teh‸ yawˇ ve nyi ma hk'aw dawˇ leh, 49 awˬ kaˍ awˬ nu awˬ ceˬ teˇ hpaˍ hta‸ dawˆ leh, tzuhˬ dawˬ bvuhˆ ve chaw hui geh caˇ chehˇ dawˬ chehˇ ve k'o, 50 awˬ ceˬ oˇ ve maˇ dawˇ maˇ gaˇ ve awˬ nyi, maˇ shiˍ ve awˬ yanˇ awˬ hk'aw lo, yawˇ ve awˬ shehˍ hpaˇ k'aw‸ gaˬ la leh, 51 yawˇ hta‸ hehnˇ chaweh ciˍ yanˍ piˇ leh chaw heˍ paˍ teˇ hpaˍ geh chehˇ piˇ lawˬ tuˬ yoˬ. Oˇ kaˬ lo hk'a chehˇ ve chaw hui hawˬ leh ciˬ geu‸ tuˬ yoˬ.

Ma‸htehˍ 25

1 Peuˬ leh, mvuhˇ naw ma mvuhˇ miˬ lehˬ, a shu yawˇ ve kawˆ faiˇ hta‸ yuˬ leh awˬ miˇ ma heuˆ shehˍ hpaˇ hta‸ ca ha‸ yuˬ ve yaˇ miˇ haˉ teˇ chi g'aˇ hta‸ shuˍ ve yoˬ. 2 Yawˇ hui awˬ hk'aw lo ngaˇ g'aˇ lehˬ cuˇ yiˍ maˇ cawˬ leh, ngaˇ g'aˇ lehˬ cuˇ yiˍ cawˬ ve yoˬ. 3 Awˬ lawn k'o, cuˇ yiˍ maˇ cawˬ ve teˇ hpaˍ lehˬ, a shu yawˇ ve kawˆ faiˇ hta‸ yuˬ k'ai htaˇ, naˍ manˇ maˇ yuˬ k'ai. 4 Ya‸ hk'aˇ, cuˇ yiˍ cawˬ ve teˇ hpaˍ lehˬ, a shu yawˇ ve kawˆ faiˇ geh teˇ geh naˍ manˇ kaw hta‸ htawˇ yuˬ k'ai ve yoˬ. 5 Awˬ miˇ ma heuˆ shehˍ hpaˇ haˆ haˆ maˇ laˬ ve pa taw, yawˇ hui hk'a peu-eˬ zuh‸ muiˉ jo leh, zuh‸ muiˉ k'a sheˬ ve yoˬ. 6 Shehˍ k'aw hkui htaˇ gaˬ leh, Nyi loˬ, awˬ miˇ ma heuˆ shehˍ hpaˇ laˬ peuˬ. Yawˇ hta‸ ca ha‸ yuˬ loˬ teh‸, shu kuˬ hk'a laˇ ve yoˬ. 7 Oˇ htaˇ, yaˇ miˇ haˉ oˇ ve teˇ hpaˍ tu la leh, a shu yawˇ ve kawˆ faiˇ hta‸ gu tuˉ ve yoˬ. 8 Cuˇ yiˍ maˇ cawˬ ve ngaˇ g'aˇ lehˬ, Ngaˬ hui ve kawˆ faiˇ suh la paˇ neˇ ve pa taw, nawˬ hui ve naˍ manˇ a ciˉ pe‸ laˇ-oˆ teh‸, cuˇ yiˍ cawˬ ve ngaˇ g'aˇ hta‸ k'oˆ piˇ ve yoˬ. 9 Ya‸ hk'aˇ, cuˇ yiˍ cawˬ ve teˇ hpaˍ lehˬ, Ngaˬ hui awˬ pon leh nawˬ hui awˬ pon naˍ manˇ maˇ law‸ hehˉ. Naˍ manˇ hawˇ shehˍ hpaˇ geh k'ai leh, nawˬ hui awˬ pon ca vuiˬ-o‸ teh‸ k'aw‸ k'oˆ piˇ ve yoˬ. 10 Yawˇ hui ca vuiˬ chehˇ ve teˇ yanˇ, awˬ miˇ ma heuˆ shehˍ hpaˇ laˬ leh, gu taˍ hehnˇ taˍ ve chaw teˇ hpaˍ hkehˉ caˇ kuiˬ lo yawˇ geh teˇ geh lo‸-e peuˬ hk'aw‸ nawˉ, yehˬ miˉ hoˆ taˍ ve yoˬ. 11 Awˬ hk'aw‸ nawˉ, yaˇ miˇ haˉ oˇ ve ngaˇ g'aˇ k'aw‸ la leh, Jawˇ mawˇ-oˬ, Jawˇ mawˇ-oˬ, ngaˬ hui hta‸ yehˬ miˉ a ciˉ hpaw laˇ-oˆ teh‸ k'oˆ ve yoˬ. 12 Ya‸ hk'aˇ yawˇ lehˬ, Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ nawˬ hui hta‸ maˇ shiˍ teh‸, k'aw‸ k'oˆ piˇ ve yoˬ. 13 Hk'e te leh, awˬ nyi hta‸ maˇ k'oˆ, awˬ yanˇ hta‸ maˇ k'oˆ, nawˬ hui maˇ shiˍ ve pa taw hk'a deh‸ shaw taˍ-o‸. 14 Awˬ lawn k'o, awˬ yanˇ oˇ ve lehˬ, chaw teˇ g'aˇ awˬ kaˍ awˬ nu mvuhˇ miˬ lo k'ai-a teh‸ te ve teˇ yanˇ, yawˇ ve awˬ ceˬ teˇ hpaˍ hta‸ kuˬ leh, yawˇ ve mawˇ jeˬ yawˇ hui hta‸ chiˇ a‸ piˇ taˉ ve hta‸ shuˍ tuˬ yoˬ. 15 Yawˇ hui puiˉ ve hpeh‸ ve hta‸ yawˇ nyi leh, teˇ g'aˇ hta‸ hpu ngaˇ hinˉ, teˇ g'aˇ hta‸ nyiˇ hinˉ leh teˇ g'aˇ hta‸ teˇ hinˉ piˇ taˉ leh tawˆ k'ai ve yoˬ. 16 Oˇ htaˇ, hpu ngaˇ hinˉ g'a ve teˇ g'aˇ lehˬ, teˇ cawˬ haˉ k'ai leh ca kaˬ ve pa taw, awˬ yawˬ ngaˇ hinˉ k'aw‸ g'a ve yoˬ. 17 Oˇ ve hk'a shuˍ shuˍ, hpu nyiˇ hinˉ g'a ve chaw teˇ g'aˇ htawˇ, awˬ yawˬ nyiˇ hinˉ k'aw‸ g'a ve yoˬ. 18 Ya‸ hk'aˇ, hpu teˇ hinˉ g'a ve chaw teˇ g'aˇ lehˬ, yawˇ ve awˬ shehˍ hpaˇ ve hpu hta‸ yuˬ leh miˬ k'oˍ ca duˇ faˉ taˍ ve yoˬ. 19 Awˬ yanˇ maw peuˬ hk'aw‸ nawˉ, awˬ ceˬ oˇ ve teˇ hpaˍ ve awˍ shehˍ hpaˇ k'aw‸ la leh, yawˇ yawˇ hui geh hpu caˇ lanˇ shawˍ nyi ve yoˬ. 20 Hpu ngaˇ hinˉ g'a taˍ ve awˬ ceˬ teˇ g'aˇ laˬ leh, awˬ yawˬ ngaˇ hinˉ hteh‸ ka‸ yuˬ veu laˇ leh k'oˆ ve, Jawˇ mawˇ-oˬ, nawˬ ngaˬ hta‸ hpu ngaˇ hinˉ pe‸ taˉ laˇ ve yoˬ. Nyi-o, awˬ yawˬ ngaˇ hinˉ hteh‸ ngaˬ k'aw‸ g'a peuˬ teh‸ k'oˆ ve yoˬ. 21 Yawˇ ve awˬ shehˍ hpaˇ lehˬ, Da‸ ve yoˬ. Na yuˬ puiˉ leh da‸ ve awˬ ceˬ-oˬ, i ve teˇ ceuˬ awˬ hk'aw lo nawˬ na yuˬ puiˉ ve pa taw, maˇ ve awˬ hk'oˆ ngaˬ nawˬ hta‸ teh taˍ tuˬ yoˬ. Nawˬ ve awˬ shehˍ hpaˇ ha lehˬ ve hk'e, nawˬ htawˇ ha lehˬ chehˇ-oˆ teh‸, yawˇ hta‸ k'oˆ piˇ ve yoˬ. 22 Hpu nyiˇ hinˉ g'a taˍ ve awˬ ceˬ teˇ g'aˇ htawˇ laˬ leh, Jawˇ mawˇ-oˬ, nawˬ ngaˬ hta‸ hpu nyiˇ hinˉ pe‸ taˉ laˇ ve yoˬ. Nyi-o, awˬ yawˬ nyiˇ hinˉ hteh‸ ngaˬ k'aw‸ g'a peuˬ teh‸ k'oˆ ve yoˬ. 23 Yawˇ ve awˬ shehˍ hpaˇ lehˬ, Da‸ ve yoˬ. Na yuˬ puiˉ leh da‸ ve awˬ ceˬ-oˬ, i ve teˇ ceuˬ awˬ hk'aw lo nawˬ na yuˬ puiˉ ve pa taw, maˇ ve awˬ hk'oˆ ngaˬ nawˬ hta‸ teh taˍ tuˬ yoˬ. Nawˬ ve awˬ shehˍ hpaˇ ha lehˬ ve hk'e, nawˬ htawˇ ha lehˬ chehˇ-oˆ teh‸, yawˇ hta‸ k'oˆ piˇ ve yoˬ. 24 Hpu teˇ hinˉ g'a taˍ ve awˬ ceˬ teˇ g'aˇ htawˇ laˬ leh, Jawˇ mawˇ-oˬ, nawˬ lehˬ te haˍ ve chaw teˇ g'aˇ hpeh‸ ve hta‸ ngaˬ shiˍ ve yoˬ. Nawˬ maˇ sheˍ kuiˬ lo nawˬ g'eu‸ yuˬ leh, nawˬ maˇ hpeuˇ baˬ kuiˬ lo nawˬ shaw hpoˆ ve hta‸ ngaˬ shiˍ ve yoˬ. 25 Hk'e te leh ngaˬ kawˆ ve pa taw, nawˬ ve hpu hta‸ miˬ k'oˍ hk'aw duˇ faˉ taˍ ve yoˬ. Nyi-o, nawˬ ve mawˇ nawˬ hta‸ k'aw‸ pe‸ laˇ ve yoˬ teh‸ k'oˆ piˇ ve yoˬ. 26 Awˬ shehˍ hpaˇ k'aw‸ k'oˆ ve, Haiˬ ve leh bawˬ ve awˬ ceˬ-oˬ, maˇ sheˍ kuiˬ lo ngaˬ g'eu‸ yuˬ leh, maˇ hpeuˇ baˬ kuiˬ lo ngaˬ shaw hpoˆ ve hta‸ nawˬ shiˍ ve k'o, 27 hpu chi ve hta‸ yuˬ leh hpu chiˇ piˇ shehˍ hpaˇ hui hta‸ chiˇ piˇ cawˇ ve yoˬ. Oˇ hk'e te ve k'o, ngaˬ k'aw‸ la ve teˇ yanˇ ngaˬ ve hpu chi ve leh awˬ yawˬ hta‸ ngaˬ k'aw‸ g'a tuˬ yoˬ. 28 Hk'e te leh, hpu teˇ hinˉ hta‸ yawˇ geh yuˬ hk'aw‸ leh, hpu teˇ meunˍ cawˬ ve chaw teˇ g'aˇ hta‸ piˇ-oˆ. 29 Awˬ lawn k'o, cawˬ ve chaw teˇ g'aˇ le le hta‸ k'aw‸ htehˍ piˇ leh, yawˇ maˇ maˇ cawˬ tuˬ yoˬ. Ya‸ hk'aˇ, maˇ cawˬ ve chaw geh, yawˇ hk'a cawˬ ve hta‸ ka‸ k'aw‸ yuˬ tawˆ sheˬ tuˬ yoˬ. 30 Awˬ bon maˇ cawˬ ve awˬ ceˬ teˇ g'aˇ hta‸ awˬ baˬ hpawˇ naˆ ho‸ kuiˬ lo baˬ keu-o. Oˇ kaˬ lo hk'a chehˇ ve chaw hui hawˬ leh ciˬ geu‸ tuˬ yoˬ teh‸, awˬ shehˍ hpaˇ k'oˆ ve yoˬ. 31 Chaw yaˇ ve Yaˇ hpu lehˬ, yawˇ ve awˬ me‸ awˬ hponˇ awˬ hk'aw lo laˬ leh, mvuhˇ naw ma tcuh yaˇ hk'a peu-eˬ yawˇ geh laˬ ve teˇ yanˇ, yawˇ ve awˬ me‸ awˬ hponˇ cawˬ ve k'aw jaw awˬ hk'oˆ yawˇ mui tuˬ yoˬ. 32 Oˇ htaˇ, chaw ceuˬ hk'a peu-eˬ yawˇ mehˆ g'uˇ suhˍ hpawnˬ la leh, yawˬ hawˉ paˍ, yawˬ leh aˉ che‸ hta‸ pehˬ da‸ ve hk'e, yawˇ yawˇ hui hta‸ pehˬ da‸ tuˬ yoˬ. 33 Yawˬ teˇ hpaˍ hta‸ yawˇ ve la‸ sha paˉ taˍ leh, aˉ che‸ teˇ hpaˍ hta‸ la‸ mehˍ paˉ taˍ tuˬ yoˬ. 34 Oˇ htaˇ, la‸ sha paˉ chehˇ ve chaw hui hta‸ Hkunˉ hawˉ hkanˇ chi hk'e k'oˆ piˇ tuˬ yoˬ. Ngaˬ Awˬ pa geh awˬ bon g'a ve chaw teˇ hpaˍ-oˬ, laˬ-o‸. Miˬ guiˬ te hpanˍ htaˇ ka‸ nawˬ hui awˬ pon gu taˍ ve mvuhˇ miˬ awˬ hk'aw lo laˬ chehˇ la-o. 35 Awˬ lawn k'o, ngaˬ awˍ meu‸ ve teˇ yanˇ, nawˬ hui ngaˬ hta‸ awˍ caˍ laˇ ve yoˬ. Ngaˬ iˉ kaˆ shiˉ ve teˇ yanˇ, nawˬ hui ngaˬ hta‸ iˉ kaˆ taw laˇ ve yoˬ. Ngaˬ hkehˉ chaw hpeh‸ ve teˇ yanˇ, nawˬ hui ngaˬ hta‸ ha‸ yuˬ laˇ ve yoˬ. 36 Ngaˬ veu‸ k'aˇ maˇ cawˬ ve teˇ yanˇ, nawˬ hui ngaˬ hta‸ veu‸ k'aˇ feuˉ laˇ ve yoˬ, Ngaˬ chehˇ haˍ ve teˇ yanˇ, nawˬ hui ngaˬ hta‸ nyi laˇ ga laˇ ve yoˬ. Ngaˬ htawnˍ hk'aw chehˇ ve teˇ yanˇ, nawˬ hui ngaˬ hta‸ ca nyi la ve yoˬ teh‸ yawˇ k'oˆ piˇ tuˬ yoˬ. 37 Oˇ htaˇ, hteˇ ve cawˇ ve chaw hui yawˇ hta‸ chi hk'e k'aw‸ k'oˆ piˇ tuˬ yoˬ. Jawˇ mawˇ-oˬ, nawˬ awˍ meu‸ ve hta‸ ngaˬ hui g'a mawˬ leh awˍ caˍ laˇ ve hk'aˬ htaˆ le. Nawˬ iˉ kaˆ shiˉ ve hta‸ ngaˬ hui g'a mawˬ leh iˉ kaˆ taw laˇ ve hk'aˬ htaˆ le. 38 Nawˬ hkehˉ chaw hpeh‸ ve hta‸ ngaˬ hui g'a mawˬ leh ha‸ yuˬ laˇ ve hk'aˬ htaˆ le. Veu‸ k'aˇ maˇ cawˬ leh veu‸ k'aˇ feuˉ laˇ ve hk'aˬ htaˆ le. 39 Nawˬ chehˇ haˍ ve maˇ k'oˆ, htawnˍ hk'aw chehˇ ve maˇ k'oˆ, ngaˬ hui g'a mawˬ leh nawˬ hta‸ ca nyi la ve hk'aˬ htaˆ le teh‸ k'aw‸ k'oˆ piˇ tuˬ yoˬ. 40 Oˇ htaˇ, Hkunˉ hawˉ hkanˇ lehˬ, Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ awˬ viˉ awˬ nyi chi teˇ hpaˍ awˬ hk'aw lo i jaˇ ve chaw teˇ g'aˇ hta‸ nawˬ hui te piˇ ve pa taw, ngaˬ hta‸ te laˇ ve yoˬ teh‸, yawˇ hui hta‸ k'aw‸ k'oˆ piˇ tuˬ yoˬ. 41 Oˇ htaˇ, la‸ mehˍ paˉ chehˇ ve chaw hui hta‸ yawˇ chi hk'e k'oˆ piˇ tuˬ yoˬ. Hkeu ve hta‸ g'a hkanˍ ve chaw hui-oˬ, ngaˬ hta‸ hpaˆ da‸ leh, neˇ haiˬ leh yawˇ ve tcuh yaˇ hui awˬ pon gu taˍ ve co co taiˍ taiˍ to‸ chehˇ ve aˬ miˍ awˬ hk'aw lo lo‸-e loˬ. 42 Awˬ lawn k'o, ngaˬ awˍ meu‸ ve teˇ yanˇ nawˬ hui ngaˬ hta‸ maˇ caˍ laˇ. Ngaˬ iˉ kaˆ shiˉ ve teˇ yanˇ, nawˬ hui ngaˬ hta‸ iˉ kaˆ maˇ taw laˇ. 43 Ngaˬ hkehˉ chaw hpeh‸ ve teˇ yanˇ, nawˬ hui ngaˬ hta‸ maˇ ha‸ yuˬ laˇ. Ngaˬ veu‸ k'aˇ maˇ cawˬ ve teˇ yanˇ, nawˬ hui ngaˬ hta‸ veu‸ k'aˇ maˇ feuˉ laˇ. Ngaˬ chehˇ haˍ ve teˇ yanˇ maˇ k'oˆ, htawnˍ hk'aw chehˇ ve teˇ yanˇ maˇ k'oˆ, nawˬ hui ngaˬ hta‸ maˇ ca nyi la teh‸ k'oˆ piˇ tuˬ yoˬ. 44 Oˇ htaˇ yawˇ hui lehˬ, Jawˇ mawˇ-oˬ, nawˬ awˍ meu‸ ve, iˉ kaˆ shiˉ ve, hkehˉ chaw hpeh‸ ve, veu‸ k'aˇ maˇ cawˬ ve, chehˇ haˍ ve, htawnˍ hk'aw chehˇ ve hta‸ ngaˬ hui g'a mawˬ leh, nawˬ hta‸ maˇ ga laˇ ve hk'aˬ htaˆ le teh‸, yawˇ hta‸ k'aw‸ k'oˆ piˇ tuˬ yoˬ. 45 Oˇ htaˇ yawˇ lehˬ, Ngaˬ nawˬ hui hta‸ awˬ tehˬ awˬ na k'oˆ laˇ ve, chaw chi teˇ hpaˍ awˬ hk'aw lo i jaˇ ve chaw teˇ g'aˇ hta‸ nawˬ hui maˇ te piˇ ve pa taw, ngaˬ hta‸ nawˬ hui maˇ te laˇ ve yoˬ teh‸, yawˇ hui hta‸ k'aw‸ k'oˆ piˇ tuˬ yoˬ. 46 Yawˇ hui lehˬ, co co taiˍ taiˍ ciˍ yanˍ ve awˬ hk'aw lo lo‸-e tuˬ yoˬ. Ya‸ hk'aˇ, hteˇ ve cawˇ ve chaw hui lehˬ, co co taiˍ taiˍ te‸ ve awˬ hk'aw lo lo‸-e tuˬ yoˬ teh‸, Yeˍsuˆ k'oˆ piˇ ve yoˬ.

Ma‸htehˍ 26

1 Awˬ lawn oˇ ve hk'a peu-eˬ hta‸ Yeˍsuˆ k'oˆ peuˬ hk'aw‸ nawˉ, yawˇ ve awˬ la‸ g'awˇ hui hta‸ yawˇ k'oˆ piˇ ve, 2 Nyiˇ nyi peuˬ k'o, Paˍsaˍhkaˍ pawehˇ gaˬ la tuˬ ve hta‸ nawˬ hui shiˍ ve yoˬ. Chaw yaˇ ve Yaˇ hpu hta‸ la‸ ka hk'oˆ lo hta‸ peh tuˬ, shu chiˇ a‸ piˇ ve hta‸ yawˇ g'a hkanˍ tuˬ yoˬ teh‸ k'oˆ ve yoˬ. 3 Oˇ htaˇ, paw hkuˇ lonˉ hui leh Yuˇda‸ chaw teˇ hpaˍ awˬ hk'aw lo awˬ hoˉ chaw mawˇ hui lehˬ, Kaˍyaˍhpaˆ meh ve paw hkuˇ lonˉ ve shaˉ nanˉ lo hpawnˬ da‸ leh, 4 hk'aˬ hk'e te leh heˍ ve awˬ hk'aw lo Yeˍsuˆ hta‸ hpeh yuˬ leh tiˇ pehˍ tuˬ yawˇ hui jehˬ da‸ ve yoˬ. 5 Ya‸ hk'aˇ yawˇ hui lehˬ, Chaw chi ma ve duiˆ-ehˍ shaˇ-ehˍ maˇ g'a hpeh‸ la tuˬ, pawehˇ te ve awˬ yanˇ awˬ hk'aw lo taˇ te teh‸ k'oˆ da‸ ve yoˬ. 6 Yeˍsuˆ lehˬ Beˍtaˍniˆ hk'aˆ hk'aw hkiˬ tu‸ paˍ Siˉmonˍ ve aˉ hk'aw lo chehˇ taˍ htaˇ, 7 yaˇ miˇ teˇ g'aˇ yawˇ geh laˬ ve yoˬ. Yawˇ lehˬ, awˬ hpfuhˇ hk'aˆ jaˇ ve naˍ manˇ hawnˉ keu taˍ ve hpuˉ-ehˍ ve haˉ pui kaw teˇ maˬ yuˬ laˬ leh, hpui lawˇ paˇ lo Yeˍsuˆ mui caˇ chehˇ htaˇ, yawˇ ve oˉ k'oˍ hta‸ naˍ manˇ hawnˉ ngeuˍ pfuhˍ piˇ ve yoˬ. 8 Yawˇ chi hk'e te ve hta‸ awˬ la‸ g'awˇ hui g'a mawˬ htaˇ, yawˇ hui nyi ma zuhˆ leh k'oˆ ve, Aˬ hto‸ ma te awˬ bon maˇ cawˬ ve awˬ hk'aw lo chi hta‸ yehˇ baˬ ve le. 9 Naˍ manˇ hawnˉ chi ve hta‸ awˬ hpfuhˇ maˇ chaweh hawˇ leh haˍ yaˇ g'awˇ yaˇ hui hta‸ pehˬ piˇ hpeh‸ ve yoˬ teh‸ k'oˆ ve yoˬ. 10 Ya‸ hk'aˇ, Yeˍsuˆ chi hta‸ shiˍ leh yawˇ hui hta‸ k'oˆ piˇ ve, Yaˇ miˇ chi hta‸ aˬ hto‸ ma te sho‸ sha‸ piˇ ve le. Yawˇ ngaˬ hta‸ da‸ ve teˇ ceuˬ te laˇ peuˬ. 11 Haˍ ve g'awˇ ve chaw teˇ hpaˍ nawˬ hui geh hk'aˬ htaˆ ka‸ chehˇ taˍ ve yoˬ. Ya‸ hk'aˇ, ngaˬ nawˬ hui geh hk'aˬ htaˆ ka‸ chehˇ tuˬ ve maˇ heˆ. 12 Naˍ manˇ hawnˉ chi ngaˬ awˬ to hta‸ ngeuˍ pfuhˍ laˇ ve lehˬ, ngaˬ awˬ to hta‸ tuˍ laˇ tuˬ ve awˬ pon yawˇ gu taˍ ve yoˬ. 13 Ngaˬ nawˬ hui hta‸ awˬ tehˬ awˬ na k'oˆ laˇ ve, ha lehˬ ve bon hkawˇ chi, miˬ guiˬ teˇ kaˬ le le lo ca maˍ piˇ ve teˇ yanˇ, yaˇ miˇ chi hta‸ dawˇ nawˇ tuˬ awˬ pon yawˇ te taˍ ve kanˉ chi hta‸ k'aoˍ maˍ piˇ tuˬ yoˬ teh‸ k'oˆ ve yoˬ. 14 Oˇ htaˇ, awˬ la‸ g'awˇ teˇ chi nyiˇ g'aˇ awˬ hk'aw lo, Yuˇda‸ Iˉsaˍkaˍriˍoˆ meh ve teˇ g'aˇ paw hkuˇ lonˉ hui geh k'ai leh, 15 Nawˬ hui ve la‸ sheh awˬ hk'aw lo ngaˬ yawˇ hta‸ chiˇ a‸ laˇ ve k'o, ngaˬ hta‸ hk'aˬ ma pe‸ laˇ tuˬ le teh‸ k'oˆ ve yoˬ. Hk'e te leh, yawˇ hui yawˇ hta‸ hpu shehˆ chi hteh‸ piˇ ve yoˬ. 16 Oˇ teˇ hkui hta‸ tanˬ leh, Yeˍsuˆ hta‸ chiˇ a‸ piˇ tuˬ, da‸ ve awˬ yanˇ hta‸ Yuˇda‸ ca chehˇ ve yoˬ. 17 Hkaoˍ monˇ awˬ hk'aw lo diˇ maˇ keu ve pawehˇ awˉ lawˉ teˇ nyi htaˇ, awˬ la‸ g'awˇ teˇ hpaˍ Yeˍsuˆ geh laˬ leh k'oˆ ve, Paˍsaˍhkaˍ pawehˇ caˇ tuˬ, nawˬ awˬ pon hk'aˬ lo teˇ kaˬ gu tcuh laˇ gaˇ ve le teh‸ na nyi ve yoˬ. 18 Yawˇ lehˬ, Venˇ awˬ hk'aw lo chaw oˇ ve hpaˇ geh k'ai leh, Saˍ la‸ k'oˆ laˇ ve, Ngaˬ ve awˬ yanˇ neˇ la peuˬ. Nawˬ ve yehˬ awˬ hk'aw lo ngaˬ ve awˬ la‸ g'awˇ hui geh teˇ geh Paˍsaˍhkaˍ pawehˇ hta‸ ngaˬ caˇ tuˬ yoˬ ceˇ teh‸ yawˇ hta‸ k'oˆ piˇ-oˆ. 19 Oˇ htaˇ, Yeˍsuˆ tcuh ve hk'e awˬ la‸ g'awˇ teˇ hpaˍ te leh, Paˍsaˍhkaˍ pawehˇ caˇ tuˬ awˬ pon ca gu ve yoˬ. 20 Mehˆ muiˉ naˆ la htaˇ, awˬ la‸ g'awˇ teˇ chi nyiˇ g'aˇ geh hpui lawˇ paˇ lo yawˇ mui caˇ ve yoˬ. 21 Yawˇ hui caˇ chehˇ htaˇ yawˇ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, nawˬ hui awˬ hk'aw lo teˇ g'aˇ ngaˬ hta‸ chiˇ a‸ tuˬ yoˬ. 22 Yawˇ hui dawˇ haˍ jaˇ leh, Jawˇ mawˇ-oˬ, ngaˬ laˇ teh‸ teˇ g'aˇ peuˬ teˇ g'aˇ yawˇ hta‸ na nyi ve yoˬ. 23 Yawˇ k'aw‸ k'oˆ ve, Ngaˬ geh teˇ hkehˇ tiˉ hkaˆ caˇ ve chaw teˇ g'aˇ lehˬ, ngaˬ hta‸ chiˇ a‸ tuˬ yoˬ. 24 Chaw yaˇ ve Yaˇ hpu lehˬ, yawˇ ve awˬ lawn bvuh‸ taˍ ve hk'e yawˇ g'a k'o‸-e tuˬ yoˬ. Ya‸ hk'aˇ, chaw yaˇ ve Yaˇ hpu hta‸ chiˇ a‸ ve chaw teˇ g'aˇ lehˬ, g'a dawˇ haˍ jaˇ tuˬ yoˬ. Chaw oˇ ve maˇ paw la ve hk'e k'o, yawˇ awˬ pon da‸ leuˉ ve yoˬ teh‸ k'oˆ ve yoˬ. 25 Yawˇ hta‸ chiˇ a‸ shehˍ hpaˇ Yuˇda‸ lehˬ, Jawˇ mawˇ-oˬ, ngaˬ laˇ teh‸ na nyi htaˇ, Yoˬ, nawˬ k'oˆ ve hk'e yoˬ teh‸, Yeˍsuˆ yawˇ hta‸ k'aw‸ k'oˆ piˇ ve yoˬ. 26 Yawˇ hui caˇ chehˇ htaˇ, Yeˍsuˆ hkaoˍ monˇ hta‸ yuˬ leh bon hta‸ chiˇ mvuh ve yoˬ. Peuˬ leh yawˇ hkaoˍ monˇ hta‸ hk'eh‸ leh, awˬ la‸ g'awˇ hui hta‸ yawˇ piˇ leh k'oˆ ve, Yuˬ leh caˇ-oˆ. Chi lehˬ ngaˬ ve awˬ to yoˬ teh‸ k'oˆ piˇ ve yoˬ. 27 Kawˆ hta‸ htawˇ yawˇ yuˬ leh bon hta‸ chiˇ mvuh peuˬ hk'aw‸ nawˉ yawˇ hui hta‸ piˇ leh k'oˆ ve, Nawˬ hui hk'a peu-eˬ chi hta‸ dawˬ-o‸. 28 Awˬ lawn k'o, chi lehˬ ka ti‸ shaˉ caˆ hta‸ caˉ da‸ ve ngaˬ ve awˬ suhˍ yoˬ. Venˇ baˆ hpehˇ hk'a tuˬ, chaw maˇ maˇ awˬ pon ngaˬ ve awˬ suhˍ hta‸ ngeuˍ pfuhˍ ve yoˬ. 29 Nawˬ hui hta‸ ngaˬ k'oˆ laˇ ve, ngaˬ Awˬ pa ve mvuhˇ miˬ awˬ hk'aw lo nawˬ hui geh teˇ geh a pehˉ meuˇ g'uiˬ awˬ suhˉ hta‸ ngaˬ g'a dawˬ tuˬ ve awˬ nyi hk'a gaˬ, ngaˬ a pehˉ meuˇ g'uiˬ hta‸ maˇ k'aw‸ dawˬ teh‸, yawˇ hui hta‸ k'oˆ piˇ ve yoˬ. 30 Peuˬ leh yawˇ hui k'a muiˬ hkawˇ k'a peuˬ hk'aw‸ nawˉ, yawˇ hui tawˆ-e leh Shaˍlonˍ hk'aw lo k'ai ve yoˬ. 31 Oˇ htaˇ Yeˍsuˆ yawˇ hui hta‸ k'oˆ piˇ ve, Ya‸ puiˉ nawˬ hui hk'a peu-eˬ ngaˬ hta‸ pa taw nyi ma luˬ tuˬ yoˬ. Awˬ lawn k'o, Yawˬ hawˉ paˍ hta‸ ngaˬ dawˆ pehˍ leh, yawˬ teˇ hpaˍ hpaˆ da‸ leh teˇ kaˬ teˇ hkeh hpaw k'ai tuˬ yoˬ teh‸, Li‸ hpu hk'aw bvuh‸ taˍ ve yoˬ. 32 Ya‸ hk'aˇ ngaˬ k'aw‸ te‸ tu la peuˬ hk'aw‸ nawˉ, nawˬ hui g'uˇ suhˍ Gaˍliˍlehˇ mvuhˇ miˬ lo ngaˬ k'ai tuˬ yoˬ teh‸ k'oˆ ve yoˬ. 33 Peˍtruˆ k'oˆ ve, Nawˬ hta‸ pa taw shu hk'a peu-eˬ nyi ma luˬ htawˇ, ngaˬ lehˬ hk'aˬ htaˆ ka‸ nyi ma maˇ luˬ teh‸, yawˇ hta‸ k'oˆ piˇ ve yoˬ. 34 Yeˍsuˆ yawˇ hta‸ k'oˆ piˇ ve, Ngaˬ nawˬ hta‸ awˬ tehˬ awˬ na k'oˆ laˇ ve, ya‸ puiˉ g'aˆ hpfuh maˇ bvuhˬ sheˍ htaˇ, nawˬ ngaˬ hta‸ shehˆ pawˆ hk'a gaˬ chiˇ baˬ tuˬ yoˬ. 35 Peˍtruˆ lehˬ, Nawˬ geh teˇ geh ngaˬ g'a suh ve htawˇ, nawˬ hta‸ ngaˬ maˇ chiˇ baˬ taˬ teh‸ yawˇ hta‸ k'oˆ piˇ ve yoˬ. Awˬ la‸ g'awˇ hk'a peu-eˬ htawˇ oˇ hk'e k'oˆ ve yoˬ. 36 Oˇ htaˇ Yeˍsuˆ lehˬ, yawˇ hui geh teˇ geh k'ai leh, Geˍseˍmaˍniˆ meh ve teˇ kaˬ lo gaˬ ve yoˬ. Yawˇ k'oˆ ve, Ngaˬ awˬ g'uˇ suhˍ lo bon ca lawˬ htaˇ, nawˬ hui choˬ kaˬ lo mui taˍ-o‸ teh‸, awˬ la‸ g'awˇ hui hta‸ k'oˆ piˇ ve yoˬ. 37 Peuˬ leh, Peˍtruˆ leh Zeˍbeˍdehˇ ve awˬ yaˇ paˍ nyiˇ g'aˇ hta‸ yawˇ shiˍ veu ve yoˬ. Oˇ htaˇ, yawˇ nyi ma dawˇ haˍ jaˇ, sho‸ sha‸ jaˇ la leh, 38 yawˇ hui hta‸ k'oˆ piˇ ve, Ngaˬ nyi ma dawˇ haˍ jaˇ ve suh la yoˬ. Choˬ kaˬ lo chehˇ taˍ leh ngaˬ geh teˇ geh shaw taˍ-o‸. 39 Peuˬ leh, yawˇ awˬ g'uˇ suhˍ a ciˉ k'ai leh, yawˇ mehˆ hpfuhˇ miˬ chaˇ hk'oˆ boˆ sheˬ leh k'oˆ ve, Ngaˬ pa-oˬ, kawˆ chi hta‸ ngaˬ ponˬ k'ai hpeh‸ ve k'o, ponˬ k'ai tcuh laˇ-oˆ. Ya‸ hk'aˇ, ngaˬ a loˍ cawˇ ve hk'e taˇ hpeh‸ piˇ. Nawˬ a loˍ cawˇ ve hk'e hpeh‸ piˇ-oˆ teh‸ bon lawˬ ve yoˬ. 40 Awˬ la‸ g'awˇ hui geh yawˇ k'aw‸ la leh, yawˇ hui zuh‸ muiˉ k'a chehˇ ve hta‸ g'a mawˬ htaˇ, Peˍtruˆ hta‸ k'oˆ piˇ ve, Teˇ naˍ riˍ ceh ka‸ nawˬ hui ngaˬ geh shaw taˍ maˇ hpeh‸ laˇ. 41 Nawˬ hui beˬ ve lawˇ ve awˬ hk'aˇ suh maˇ g'a k'ai tuˬ bon lawˬ leh shaw taˍ-o‸. Ngaˬ hui te gaˇ ve nyi ma cawˬ htawˇ, awˬ suhˍ awˬ shaˍ lehˬ, awˬ g'aˇ nuˇ ve yoˬ teh‸ k'oˆ ve yoˬ. 42 Yawˇ teˇ pawˆ k'aw‸ k'ai leh, Ngaˬ Pa-oˬ, kawˆ chi hta‸ ngaˬ maˇ dawˬ leh ponˬ maˇ hpeh‸ ve k'o, nawˬ a loˍ cawˇ ve hk'e hpeh‸ la piˇ-oˆ teh‸, bon k'aw‸ lawˬ ve yoˬ. 43 Yawˇ teˇ pawˆ k'aw‸ k'aw‸ la htaˇ, yawˇ hui zuh‸ muiˉ geu‸ jaˇ ve pa taw zuh‸ muiˉ k'a chehˇ ve hta‸ yawˇ g'a mawˬ ve yoˬ. 44 Peuˬ leh, yawˇ yawˇ hui hta‸ teh taˉ leh teˇ pawˆ k'aw‸ k'ai ve yoˬ. Awˬ g'uˇ suhˍ htaˇ yawˇ lawˬ ve hk'a shuˍ shuˍ, shehˆ pawˆ teˇ pawˆ bon k'aw‸ lawˬ ve yoˬ. 45 Oˇ htaˇ, awˬ la‸ g'awˇ hui geh yawˇ k'aw‸ la leh k'oˆ piˇ ve, Nawˬ hui zuh‸ muiˉ k'a leh g'aˇ jehˇ chehˇ sheˍ laˇ. Nyi loˬ, chaw yaˇ ve Yaˇ hpu lehˬ, chaw haiˬ hui ve la‸ hk'aw lo chiˇ a‸ ve hta‸ g'a hkanˍ ve awˬ yanˇ gaˬ la peuˬ. 46 Tu, k'ai-a veuˬ. Nyi loˬ, ngaˬ hta‸ chiˇ a‸ shehˍ hpaˇ awˬ paˇ lo gaˬ la peuˬ teh‸ k'oˆ ve yoˬ. 47 Yawˇ tawˇ yaw chehˇ htaˇ, tcuh yaˇ teˇ chi nyiˇ g'aˇ awˬ hk'aw lo Yuˇda‸ meh ve teˇ g'aˇ laˬ leh, aˉ htaw pfuhˇ leh suhˆ taˬ taˆ ve chaw awˬ moˍ lonˉ htawˇ yawˇ geh teˇ geh laˬ ve yoˬ. Chaw awˬ moˍ lonˉ oˇ ve lehˬ, paw hkuˇ lonˉ hui leh Yuˇda‸ chaw hui ve awˬ hoˉ chaw mawˇ teˇ hpaˍ tcuh peu laˇ ve chaw hpeh‸ ve yoˬ. 48 Yawˇ hta‸ chiˇ a‸ piˇ shehˍ hpaˇ teˇ g'aˇ lehˬ, yawˇ hui hta‸ awˬ heˆ chi hk'e te tuˬ k'oˆ piˇ taˍ ve, Ngaˬ boˆ nu ve chaw teˇ g'aˇ lehˬ yawˇ yoˬ. Yawˇ hta‸ yuˬ tiˍ taˍ-o‸. 49 Oˇ htaˇ yawˇ Yeˍsuˆ geh teˇ cawˬ haˉ k'ai leh, Jawˇ mawˇ-oˬ, awˬ bon uiˍ piˇ-oˆ teh‸ k'oˆ leh, yawˇ hta‸ boˆ nu ve yoˬ. 50 Yeˍsuˆ lehˬ, Awˬ chawˇ-oˬ, nawˬ dawˇ taˍ leh laˬ ve hk'e te-o teh‸, yawˇ hta‸ k'oˆ piˇ ve yoˬ. Oˇ htaˇ, yawˇ hui Yeˍsuˆ hta‸ vawˆ leh yuˬ tiˍ taˍ ve yoˬ. 51 Yeˍsuˆ geh chehˇ ve chaw hui awˬ hk'aw lo teˇ g'aˇ lehˬ, yawˇ ve aˉ htaw g'awˬ tawˆ leh paw hkuˇ lonˉ vuiˬ taˍ ve awˬ ceˬ hta‸ chaw leh, naˍ paw cheˆ ve yoˬ. 52 Oˇ htaˇ Yeˍsuˆ yawˇ hta‸ k'oˆ piˇ ve, Nawˬ ve aˉ htaw hta‸ awˬ hpui awˬ hk'aw lo k'aw‸ hk'aw‸ keu-o. Awˬ lawn k'o, aˉ htaw hk'a yehˇ ve chaw hk'a peu-eˬ lehˬ, aˉ htaw hta‸ pa taw luˬ k'ai tuˬ yoˬ. 53 Mvuhˇ naw ma tcuh yaˇ teˇ chi nyiˇ moˍ awˬ hk'oˆ ka‸ ngaˬ geh peu laˇ tuˬ, chi beu‸ ngaˬ Awˬ pa geh lawˬ maˇ g'a teh‸ nawˬ dawˇ ve laˇ. 54 Ya‸ hk'aˇ ngaˬ oˇ hk'e lawˬ ve k'o, chi hk'e g'a hpeh‸ la tuˬ yoˬ teh‸ bvuh‸ taˍ ve Li‸ hpu teˇ hpaˍ hk'aˬ hk'e te biˇ la tuˬ le teh‸ k'oˆ ve yoˬ. 55 Awˬ yanˇ oˇ ve awˬ hk'aw lo Yeˍsuˆ chaw awˬ moˍ lonˉ teˇ hpaˍ hta‸ k'oˆ piˇ ve, Nawˬ hui lehˬ, chaw hk'awˇ hta‸ ca hpeh yuˬ ve hk'e aˉ htaw leh suhˆ taˬ teˇ hpaˍ yuˬ veu laˇ leh, ngaˬ hta‸ ca hpeh la ve laˇ. Teˇ nyi le le bon yehˬ lonˉ awˬ hkaw lo ngaˬ mui taˍ leh maˍ piˇ chehˇ ve htawˇ, nawˬ hui ngaˬ hta‸ maˇ hpeh yuˬ. 56 Ya‸ hk'aˇ chi hk'e hpeh‸ la ve hk'a peu-eˬ lehˬ, G'uiˬ sha ve tcuh kaˍ paˍ hui ve li‸ teˇ hpaˍ hta‸ biˇ la tuˬ awˬ pon yoˬ teh‸ k'oˆ ve yoˬ. Oˇ htaˇ, awˬ la‸ g'awˇ hk'a peu-eˬ yawˇ hta‸ baˬ taˉ leh hpaw-e ve yoˬ. 57 Yeˍsuˆ hta‸ hpeh yuˬ ve chaw teˇ hpaˍ lehˬ, li‸ bvuh‸ paˍ hui leh awˬ hoˉ chaw mawˇ teˇ hpaˍ hpawnˬ da‸ kuiˬ lo, paw hkuˇ lonˉ Kaˍyaˍhpaˆ geh yawˇ hta‸ yuˬ k'ai ve yoˬ. 58 Peˍtruˆ lehˬ, paw hkuˇ lonˉ ve shaˉ nanˉ awˬ paˇ lo ko taˍ kuiˬ teˇ kaˬ hk'a gaˬ Yeˍsuˆ awˬ hk'aˇ suh a ciˉ vuiˇ kuiˬ lo k'ai leh, awˬ lawn chi awˬ leh meuˇ hk'a gaˬ g'a shiˍ g'a mawˬ tuˬ, yawˇ lo‸-e leh shaw shehˍ hpaˇ teˇ hpaˍ geh mui taˍ ve yoˬ. 59 Paw hkuˇ lonˉ teˇ hpaˍ leh jehˬ da‸ shehˍ hpaˇ awˬ moˍ hk'a peu-eˬ lehˬ, Yeˍsuˆ hta‸ g'a tiˇ pehˍ tuˬ, yawˇ awˬ lawn maˇ heˆ heˆ ve shaˉ hkiˆ hkanˍ shehˍ hpaˇ teˇ hpaˍ hta‸ yawˇ hui ca ve yoˬ. 60 Maˇ heˆ heˆ ve shaˉ hkiˆ hkanˍ shehˍ hpaˇ maˇ maˇ tu la leh awˬ g'uˇ suhˍ lo laˬ ve htawˇ, jehˬ shehˍ hpaˇ hui shaˉ hkiˆ ca maˇ mawˬ. Awˬ leh meuˇ gaˬ htaˇ, maˇ heˆ heˆ ve shaˉ hkiˆ hkanˍ shehˍ hpaˇ nyiˇ g'aˇ awˬ g'uˇ suhˍ lo laˬ leh k'oˆ ve, 61 Chi hpaˇ yawˇ k'oˆ ve, G'uiˬ sha ve bon yehˬ lonˉ hta‸ ngaˬ te luˬ leh, shehˆ nyi awˬ hk'aw lo k'aw‸ te g'a ve yoˬ ceˇ teh‸, yawˇ huiˉ maˬ shaˉ hkiˆ hkanˍ ve yoˬ. 62 Oˇ htaˇ paw hkuˇ lonˉ tu la leh, Nawˬ te‸ chiˉ ka‸ maˇ yaw hk'aw‸ ve laˇ. Chaw chi teˇ hpaˍ nawˬ awˬ lawn aˬ hto‸ ma shaˉ hkiˆ hkanˍ ve le teh‸ yawˇ hta‸ k'oˆ piˇ ve yoˬ. 63 Ya‸ hk'aˇ, Yeˍsuˆ ta‸ iˉ chehˇ taˍ ve yoˬ. Paw hkuˇ lonˉ yawˇ hta‸ k'aw‸ k'oˆ piˇ ve, G'uiˬ sha ve Yaˇ hpu Hkri‸ teh‸ k'oˆ ve teˇ g'aˇ lehˬ, nawˬ yoˬ laˇ. Ngaˬ hui hta‸ hto laˇ tuˬ, te‸ chehˇ ve G'uiˬ sha mehˆ g'uˇ suhˍ ngaˬ nawˬ hta‸ hkanˍ tcuh laˇ ve yoˬ teh‸ k'oˆ ve yoˬ. 64 Yeˍsuˆ k'aw‸ k'oˆ ve, Yoˬ, nawˬ k'oˆ ve hk'e yoˬ. Chi hk'oˆ ka‸ ngaˬ nawˬ hui hta‸ k'oˆ laˇ ve, chi hk'aw‸ nawˉ k'o chaw yaˇ ve Yaˇ hpu lehˬ, Kanˇ paˆ awˬ shehˍ hpaˇ ve la‸ sha paˉ lo mui leh, mvuhˇ naw ma ve moˬ hta‸ ciˇ ya‸ la ve hta‸ nawˬ hui g'a mawˬ tuˬ yoˬ teh‸, yawˇ hta‸ k'oˆ piˇ ve yoˬ. 65 Oˇ htaˇ paw hkuˇ lonˉ yawˇ ve veu‸ k'aˇ hta‸ tzuh‸ suhˍ leh k'oˆ ve, Yawˇ lehˬ G'uiˬ sha hta‸ maˇ shawˍ maˇ caˆ k'oˆ peuˬ. Ngaˬ hui aˬ hto‸ ma shaˉ hkiˆ k'aw‸ loˍ sheˍ le.Yawˇ G'uiˬ sha hta‸ maˇ shawˍ maˇ caˆ k'oˆ ve hta‸ chi beu‸ nawˬ hui g'a kaˇ peuˬ. 66 Nawˬ hui hk'aˬ hk'e dawˇ le teh‸ na nyi htaˇ, Yawˇ lehˬ suh keunˍ ve yoˬ teh‸ yawˇ hui k'aw‸ k'oˆ piˇ ve yoˬ. 67 Oˇ htaˇ, yawˇ ve mehˆ hpfuhˇ hta‸ yawˇ hui ciˉ g'uiˇ hpe‸ pfuhˍ leh yawˇ hta‸ chu-iˬ ve yoˬ. 68 Teˇ hpaˍ hpaˍ yawˇ hta‸ hta leh k'oˆ ve, Hkri‸-oˬ, nawˬ hta‸ a shu dawˆ laˇ ve le. G'uiˬ sha ve tcuh kaˍ paˍ hk'e te leh ngaˬ hui hta‸ hto laˇ-oˆ teh‸ k'oˆ ve yoˬ. 69 Oˇ htaˇ Peˍtruˆ lehˬ, shaˉ nanˉ awˬ paˇ lo ko taˍ kuiˬ awˬhk'aw hpawˇ lo mui chehˇ ve yoˬ. Awˬ ceˬ ma teˇ g'aˇ yawˇ geh laˬ leh, Nawˬ htawˇ Gaˍliˍlehˇ chaw Yeˍsuˆ geh chehˇ ve yoˬ teh‸ k'oˆ ve yoˬ. 70 Ya‸ hk'aˇ yawˇ hui hk'a peu-eˬ mehˆ g'uˇ suhˍ Peˍtruˆ g'awˬ hk'aˆ leh, Nawˬ k'oˆ ve hta‸ ngaˬ maˇ shiˍ teh‸ k'oˆ ve yoˬ. 71 Peuˬ leh, Peˍtruˆ ko taˍ kuiˬ yehˬ miˉ awˬ baˬ lo tawˆ k'ai htaˇ, awˬ kaˍ awˬ nu awˬ ceˬ ma teˇ g'aˇ yawˇ hta‸ mawˬ leh, Chi hpaˇ lehˬ, Naˍzaˍrehˆ chaw Yeˍsuˆ geh chehˇ ve yoˬ teh‸, oˇ kaˬ lo chehˇ taˍ ve chaw hui hta‸ k'oˆ piˇ ve yoˬ. 72 Yawˇ teˇ pawˆ k'aw‸ g'awˬ hk'aˆ leh, Chaw oˇ ve hta‸ ngaˬ maˇ shiˍ teh‸ k'oˆ leh hkanˍ ve yoˬ. 73 Awˬ hk'aw‸ nawˉ maˇ maw maw gaˬ leh, oˇ kaˬ lo huˉ chehˇ ve chaw teˇ hpaˍ Peˍtruˆ geh laˬ leh, Nawˬ htawˇ awˬ tehˬ awˬ na yawˇ hui awˬ hk'aw lo ve chaw teˇ g'aˇ hpeh‸ ve yoˬ. Awˬ lawn k'o, nawˬ tawˇ yaw ve hkawˇ hta‸ na ve ceh ka‸, ngaˬ hui shiˍ ve yoˬ teh‸, yawˇ hta‸ k'oˆ piˇ ve yoˬ. 74 Oˇ htaˇ yawˇ awˬ to hta‸ yawˇ hkeu leh, Chaw oˇ ve hta‸ ngaˬ maˇ shiˍ teh‸ k'oˆ leh hkanˍ ve yoˬ. Teˇ cawˬ haˉ g'aˆ hpfuh bvuhˬ la ve yoˬ. 75 G'aˆ hpfuh maˇ bvuhˬ sheˍ htaˇ nawˬ ngaˬ hta‸ shehˆ pawˆ hk'a gaˬ chiˇ baˬ tuˬ yoˬ teh‸, Yeˍsuˆ k'oˆ piˇ taˍ ve hta‸ Peˍtruˆ dawˇ nawˇ la ve yoˬ. Oˇ htaˇ, yawˇ tawˆ k'ai leh g'aˇ hte‸ hawˬ ve yoˬ.

Ma‸htehˍ 27

1 Mvuhˇ htiˇ la ve teˇ yanˇ, paw hkuˇ lonˉ hui leh Yuˇda‸ chaw hui ve awˬ hoˉ chaw mawˇ hui hk'a peu-eˬ, Yeˍsuˆ hta‸ tiˇ pehˍ tuˬ jehˬ da‸ ve yoˬ. 2 Peuˬ leh, yawˇ hui yawˇ hta‸ hpeh peuˬ hk'aw‸ nawˉ sheh veu leh, mvuhˇ miˬ jawˇ mawˇ lonˉ Piˉla‸ ve la‸ hk'aw lo yawˇ hta‸ chiˇ a‸ piˇ ve yoˬ. 3 Oˇ htaˇ yawˇ hta‸ chiˇ a‸ shehˍ hpaˇ Yuˇda‸ teˇ g'aˇ lehˬ, Yeˍsuˆ hta‸ tiˇ pehˍ tuˬ shu suhˉ taˆ ve hta‸ g'a mawˬ htaˇ, yawˇ k'aw‸ dawˇ hpfuhˆ leh, hpu oˇ ve shehˆ chi hteh‸ hta‸ paw hkuˇ lonˉ teˇ hpaˍ leh awˬ hoˉ chaw mawˇ teˇ hpaˍ geh k'aw‸ yuˬ laˬ leh k'oˆ ve, 4 Venˇ baˆ maˇ cawˬ ve chaw hta‸ ngaˬ chiˇ a‸ piˇ peuˬ ve pa taw, ngaˬ venˇ baˆ te peuˬ teh‸ k'oˆ ve yoˬ. Yawˇ hui k'aw‸ k'oˆ ve, Chi ve ngaˬ hui hta‸ hk'aˬ hk'e caˉ da‸ le. Nawˬ ve kanˉ hta‸ nawˬ hk'aˇ nawˬ nyi-o teh‸ k'oˆ piˇ ve yoˬ. 5 Hpu oˇ ve hta‸ bon yehˬ lonˉ awˬ hk'aw lo baˬ keu taˉ peuˬ hk'aw‸ nawˉ yawˇ tawˆ k'ai leh, yawˇ hk'aˇ yawˇ k'awˍ peˍ ca nyiˉ pehˍ ve yoˬ. 6 Paw hkuˇ lonˉ teˇ hpaˍ hpu oˇ ve hta‸ yuˬ leh, Hpu chi lehˬ, awˬ suhˍ ve awˬ hpfuhˇ hpeh‸ ve pa taw, hpu tanˇ geh hkaw‸ da‸ maˇ cawˇ teh‸ k'oˆ ve yoˬ. 7 Hk'e te leh, yawˇ hui jehˬ da‸ peuˬ hk'aw‸ nawˉ, hkehˉ chaw teˇ hpaˍ hta‸ tuˍ piˇ tuˬ, hpu oˇ ve hta‸ yuˬ leh mu‸ hk'u te shehˍ hpaˇ ve miˬ guiˬ teˇ peˆ hta‸ vuiˬ taˍ ve yoˬ. 8 Hk'e te leh, ya‸ nyi hk'a gaˬ miˬ guiˬ oˇ ve teˇ peˆ hta‸ Awˬ suhˍ miˬ guiˬ teh‸ k'oˆ ve yoˬ. 9 Oˇ htaˇ, tcuh kaˍ paˍ Yeˍraˍmiˆ k'oˆ taˍ ve hk'e biˇ la ve yoˬ. Yawˇ k'oˆ ve, Iˉsaˍreˍlaˆ chaw teˇ hpaˍ hpaˍ awˬ hpfuhˇ k'oˆ cheˆ taˍ ve, chaw teˇ g'aˇ ve awˬ hpfuhˇ hpu shehˆ chi hta‸ yuˬ leh, 10 Jawˇ mawˇ G'uiˬ sha ngaˬ hta‸ tawˇ piˇ taˍ laˇ ve hk'e, mu‸ hk'u te shehˍ hpaˇ ve miˬ guiˬ teˇ peˆ hta‸ yawˇ hui vuiˬ ve yoˬ. 11 Yeˍsuˆ lehˬ, mvuhˇ miˬ jawˇ mawˇ lonˉ mehˆ g'uˇ suhˍ huˉ chehˇ htaˇ, mvuhˇ miˬ jawˇ mawˇ lonˉ k'oˆ ve, Nawˬ lehˬ Yuˇda‸ chaw hui ve Hkunˉ hawˉ hkanˇ yoˬ laˇ teh‸ na nyi ve yoˬ. Yoˬ, nawˬ k'oˆ ve hk'e yoˬ teh‸, Yeˍsuˆ yawˇ hta‸ k'aw‸ k'oˆ piˇ ve yoˬ. 12 Paw hkuˇ lonˉ leh awˬ hoˉ chaw mawˇ teˇ hpaˍ yawˇ awˬ hk'oˆ hta‸ venˇ baˆ taˍ ve teˇ yanˇ, yawˇ te‸ chiˉ ka‸ maˇ k'aw‸ k'oˆ. 13 Oˇ htaˇ, jawˇ mawˇ Piˉla‸ lehˬ, Nawˬ awˬ lawn yawˇ hui shaˉ hkiˆ hk'aˬ hk'e hkanˍ chehˇ ve hta‸ nawˬ maˇ kaˇ laˇ teh‸, yawˇ hta‸ k'oˆ piˇ ve yoˬ. 14 Ya‸ hk'aˇ, yawˇ lehˬ tawˇ teˇ peu-eˍ ka‸ maˇ yaw hk'aw‸ ve pa taw, mvuhˇ miˬ jawˇ mawˇ lonˉ anˇ jaˇ ve yoˬ. 15 Pawehˇ oˇ ve hta‸ te ve teˇ yanˇ, htawnˍ hk'aw chehˇ ve chaw teˇ hpaˍ awˬ hk'aw lo, chaw chi ma ve nyi ma cawˇ ve chaw teˇ g'aˇ hta‸ mvuhˇ miˬ jawˇ mawˇ lonˉ hpehˇ piˇ ve awˬ liˇ cawˬ ve yoˬ. 16 Oˇ htaˇ, htawnˍ hk'aw chehˇ ve chaw teˇ hpaˍ awˬ hk'aw lo, awˬ meh bvuhˬ ve Baˍraˍbaˆ meh ve chaw teˇ g'aˇ cawˬ ve yoˬ. 17 Hk'e te leh, yawˇ hui hpawnˬ da‸ chehˇ htaˇ, jawˇ mawˇ Piˉla‸ k'oˆ ve, Nawˬ hui awˬ pon a shu hta‸ hpehˇ tcuh gaˇ le. Baˍraˍbaˆ hta‸ laˇ, maˇ heˆ k'o Hkri‸ teh‸ k'oˆ ve Yeˍsuˆ hta‸ laˇ teh‸, yawˇ hui hta‸ na nyi ve yoˬ. 18 Awˬ lawn k'o, yawˇ hui Yeˍsuˆ hta‸ hkawehˉ ve nyi ma cawˬ ve pa taw yawˇ hta‸ chiˇ a‸ laˇ ve hta‸ jawˇ mawˇ Piˉla‸ shiˍ ve yoˬ. 19 Peuˬ leh, suhˉ jehˬ kuiˬ k'aw jaw hk'oˆ lo yawˇ mui chehˇ htaˇ, yawˇ ve awˬ miˇ ma yawˇ hta‸ tawˇ chi hk'e shanˍ piˇ ve, Hteˇ ve cawˇ ve chaw chi teˇ g'aˇ hta‸ te‸ chiˉ taˇ te. Awˬ lawn k'o, ya‸ nyi yawˇ hta‸ pa taw ngaˬ zuh‸ maˆ ve awˬ hk'aw lo g'a tu‸ hkanˍ jaˇ peuˬ teh‸, tawˇ shanˍ feu piˇ ve yoˬ. 20 Baˍraˍbaˆ hta‸ lawˬ yuˬ leh Yeˍsuˆ hta‸ tiˇ pehˍ tuˬ, paw hkuˇ lonˉ hui leh awˬ hoˉ chaw mawˇ teˇ hpaˍ lehˬ, chaw chi ma ve hta‸ awˬ g'aˇ g'aˇ hte‸ piˇ ve yoˬ. 21 Mvuhˇ miˬ jawˇ mawˇ lonˉ lehˬ, Chaw chi nyiˇ g'aˇ awˬ hk'aw lo nawˬ hui awˬ pon hk'aˬ ve teˇ g'aˇ hta‸ hpehˇ tcuh gaˇ le teh‸, yawˇ hui hta‸ k'aw‸ na nyi htaˇ, Baˍraˍbaˆ hta‸ yoˬ teh‸ yawˇ hui k'aw‸ k'oˆ piˇ ve yoˬ. 22 Jawˇ mawˇ Piˉla‸ lehˬ, Hk'e te k'o, Hkri‸ teh‸ k'oˆ ve Yeˍsuˆ hta‸ ngaˬ hk'aˬ hk'e g'a te tuˬ le teh‸, yawˇ hui hta‸ na nyi htaˇ, Yawˇ hta‸ la‸ ka hk'oˆ lo hta‸ pehˍ loˬ teh‸ yawˇ hui hk'a peu-eˬ k'oˆ ve yoˬ. 23 Yawˇ k'aw‸ k'oˆ ve, Aˬ hto‸ ma pa taw le. Yawˇ haiˬ ve aˬ hto‸ ma teˇ ceuˬ hta‸ te ve le teh‸ na nyi htaˇ, Yawˇ hta‸ la‸ ka hk'oˆ lo hta‸ pehˍ loˬ teh‸, yawˇ hui leuˉ leh g'aˇ hte‸ k'aw‸ kuˬ ve yoˬ. 24 Jawˇ mawˇ Piˉla‸ lehˬ, yawˇ te‸ chiˉ te maˇ g'a ve awˬ hk'oˆ ka‸, shu duiˆ-ehˍ shaˇ-ehˍ te tawˆ la ve hta‸ g'a mawˬ htaˇ, yawˇ iˉ kaˆ yuˬ leh chaw awˬ moˍ lonˉ mehˆ g'uˇ suhˍ la‸ sheh tsuhˇ leh k'oˆ ve, Chaw chi teˇ g'aˇ ve awˬ suhˍ ngaˬ awˬ hk'oˆ hta‸ taˇ gaˬ la piˇ. Nawˬ hui hk'aˇ nawˬ hui te-o teh‸ k'oˆ piˇ ve yoˬ. 25 Chaw hk'a peu-eˬ k'aw‸ k'oˆ ve, Yawˇ ve awˬ suhˍ ngaˬ hui leh ngaˬ hui ve awˬ yaˇ awˬ duˬ teˇ hpaˍ awˬ hk'oˆ hta‸ gaˬ la piˇ-oˆ teh‸ k'oˆ ve yoˬ. 26 Oˇ htaˇ jawˇ mawˇ Piˉla‸ lehˬ, yawˇ hui awˬ pon Baˍraˍbaˆ hta‸ hpehˇ piˇ leh, Yeˍsuˆ hta‸ jaw‸ peuˬ hk'aw‸ nawˉ la‸ ka hk'oˆ lo hta‸ pehˍ tuˬ chiˇ a‸ piˇ ve yoˬ. 27 Oˇ htaˇ mvuhˇ miˬ jawˇ mawˇ lonˉ ve ma‸ yaˇ teˇ hpaˍ lehˬ, Yeˍsuˆ hta‸ hawˉ yehˬ awˬ hk'aw lo shiˍ k'ai leh, ma‸ yaˇ teˇ ta‸ hk'a peu-eˬ hta‸ Yeˍsuˆ geh hpawnˬ la piˇ ve yoˬ. 28 Yawˇ hui yawˇ ve aˉ po‸ hta‸ k'ehˆ baˬ leh, nyiˉ-ehˍ ve aˉ po‸ zuhˬ ma yawˇ hta‸ deh piˇ ve yoˬ. 29 Aˉ chuˇ te hta‸ yuˬ leh shi uˉ tcuhˍ hk'e te g'a‸ leh, yawˇ ve oˉ k'oˍ hta‸ hk'awˆ piˇ ve yoˬ. Yawˇ la‸ sha paˉ ve la‸ sheh hk'aw lo, lo taˬ teˇ taˬ vawˆ taˍ tcuh leh, yawˇ mehˆ g'uˇ suhˍ hkui tcuhˉ teh leh k'oˆ ve, Yuˇda‸ ve hkunˉ hawˉ hkanˇ-oˬ, nawˬ awˬ bon uiˍ piˇ-oˆ teh‸, yawˇ hta‸ maˇ shawˍ maˇ caˆ te leh k'oˆ guiˇ ve yoˬ. 30 Yawˇ hta‸ ciˉ g'uiˇ hpe‸ pfuhˍ leh, lo taˬ oˇ ve hta‸ yawˇ hui k'aw‸ yuˬ leh yawˇ ve oˉ k'oˍ hta‸ dawˆ ve yoˬ. 31 Yawˇ hta‸ maˇ shawˍ maˇ caˆ te peuˬ hk'aw‸ nawˉ, aˉ po‸ zuhˬ ma hta‸ yawˇ hui k'ehˆ baˬ leh, yawˇ ve veu‸ k'aˇ hta‸ k'aw‸ feuˉ piˇ ve yoˬ. Oˇ htaˇ, la‸ ka hk'oˆ lo hta‸ pehˍ tuˬ yawˇ hta‸ sheh k'ai ve yoˬ. 32 Yawˇ hui tawˆ k'ai chehˇ htaˇ, Siˉ monˍ meh ve Kuˇreˍneˍ venˇ yaˇ teˇ g'aˇ hta‸ mawˬ ve yoˬ. Yawˇ hui yawˇ hta‸ nyiˉ leh Yeˍsuˆ ve la‸ ka hta‸ taˆ tcuh ve yoˬ. 33 Gawˇlaˍgawˇtaˆ meh ve chehˇ kuiˬ lo yawˇ hui gaˬ la ve yoˬ. Awˬ meh oˇ ve tcuhˉ kuiˬ lehˬ, oˉ koˆ teh‸ k'oˆ ve yoˬ. 34 Hk'aˇ ve naˆ tsuhˇ hkaw‸ taˍ ve a pehˉ meuˇ g'uiˬ yawˇ hui yawˇ hta‸ taw piˇ ve htawˇ, yawˇ leh‸ nyi sheˬ leh maˇ dawˬ. 35 Yawˇ hui yawˇ hta‸ la‸ ka hk'oˆ lo hta‸ keu peuˬ htaˇ, yawˇ hui kuˇ da‸ leh yawˇ ve veu‸ k'aˇ teˇ hpaˍ hta‸ pehˬ yuˬ ve yoˬ. 36 Hk'e te leh, yawˇ hui oˇ kaˬ lo mui leh yawˇ hta‸ shaw taˍ ve yoˬ. 37 Chaw chi lehˬ, Yuˇda‸ chaw hui ve Hkunˉ hawˉ hkanˇ Yeˍsuˆ yoˬ teh‸, yawˇ hta‸ venˇ baˆ taˍ ve li‸ yawˇ hui bvuh‸ leh, yawˇ ve oˉ k'oˍ awˬ hk'oˆ lo nehˉ taˍ ve yoˬ. 38 Oˇ htaˇ, yawˇ geh teˇ geh chaw hk'awˇ nyiˇ g'aˇ hta‸ htawˇ, la‸ sha paˉ teˇ g'aˇ, la‸ mehˍ paˉ teˇ g'aˇ, la‸ ka hk'oˆ lo hta‸ keu taˍ ve yoˬ. 39 K'ai chehˇ laˬ chehˇ ve chaw teˇ hpaˍ lehˬ, yawˇ hta‸ maˇ shawˍ maˇ caˆ k'oˆ leh, a shu yawˇ ve oˉ k'oˍ hiˆ leh k'oˆ ve, 40 Bon yehˬ lonˉ hta‸ te luˬ leh shehˆ nyi awˬ hk'aw lo k'aw‸ te g'a ve chaw-oˬ, nawˬ awˬ to hta‸ ponˬ piˇ-oˆ. Nawˬ G'uiˬ sha ve Yaˇ hpu yoˬ k'o, la‸ ka hk'oˆ lo ya‸ la-o teh‸ k'oˆ piˇ ve yoˬ. 41 Paw hkuˇ lonˉ hui lehˬ, li‸ bvuh‸ paˍ leh awˬ hoˉ chaw mawˇ teˇ hpaˍ geh teˇ geh chi hk'a shuˍ shuˍ yawˇ hta‸ k'oˆ guiˇ g'uiˬ guiˇ ve yoˬ. 42 Yawˇ hui k'oˆ ve, Shu hta‸ yawˇ htaiˍ hk'aw‸ g'a ve yoˬ. Yawˇ awˬ to hta‸ yawˇ htaiˍ hk'aw‸ maˇ g'a. Yawˇ lehˬ Iˉsaˍreˍlaˆ ve Hkunˉ hawˉ hkanˇ yoˬ. Hk'e te leh, yawˇ la‸ ka hk'oˆ lo ya‸ la piˇ sheˍ. Oˇ htaˇ heh‸, ngaˬ hui yawˇ hta‸ yonˍ tuˬ yoˬ. 43 Yawˇ lehˬ G'uiˬ sha hta‸ cuˇ ve yoˬ. Ngaˬ lehˬ G'ui sha ve Yaˇ hpu yoˬ teh‸ yawˇ k'oˆ taˍ peuˬ. Hk'e te leh G'uiˬ sha yawˇ hta‸ nyi ma cawˇ k'o, G'uiˬ sha yawˇ hta‸ ponˬ piˇ lawˬ-o‸ teh‸, yawˇ hui k'oˆ ve yoˬ. 44 Yawˇ geh teˇ geh la‸ ka hk'oˆ lo hta‸ keu taˍ ve chaw hk'awˇ nyiˇ g'aˇ htawˇ, oˇ ve hk'a shuˍ shuˍ yawˇ hta‸ maˇ shawˍ maˇ caˆ k'oˆ ve yoˬ. 45 Mvuhˇ law‸ k'aw tcuhˆ htaˇ ka‸ tanˬ leh mvuhˇ hpeu‸ hpawˇ shehˆ naˍ riˍ hk'a gaˬ, miˬ guiˬ hk'a peu-eˬ naˆ ho‸ lehˍ hpeh‸ sheˬ ve yoˬ. 46 Mvuhˇ hpeu‸ hpawˇ shehˆ naˍ riˍ hk'e gaˬ htaˇ, Yeˍsuˆ awˬ hkawˇ bvuhˬ chaweh te leh, Eˇliˆ, Eˇliˆ, laˍmaˍ saˍbaˆtaˍniˍ teh‸ kuˬ ve yoˬ. Tcuhˉ kuiˬ lehˬ, Ngaˬ ve G'uiˬ sha-oˬ, ngaˬ ve G'uiˬ sha-oˬ, aˬ hto‸ ma te nawˬ ngaˬ hta‸ baˬ taˉ laˇ ve le teh‸ k'oˆ ve yoˬ. 47 Oˇ kaˬ lo huˉ chehˇ ve chaw teˇ hpaˍ hpaˍ tawˇ oˇ ve hta‸ g'a kaˇ htaˇ, Chi hpaˇ lehˬ, Eˇliˇya‸ hta‸ kuˬ ve teh‸ k'oˆ ve yoˬ. 48 Yawˇ hui awˬ hk'aw lo chaw teˇ g'aˇ teˇ cawˬ haˉ g'uiˇ k'ai leh, laˇ tsuhˇ g'uiˬ mvuhˬ teˇ maˬ hta‸ yuˬ leh, ci ve awˬ g'uiˬ awˬ hk'aw lo tuˍ peuˬ hk'aw‸ nawˉ, lo taˬ hta‸ choˆ leh, yawˇ hta‸ taw piˇ ve yoˬ. 49 Ya‸ hk'aˇ, awˬ kaˍ awˬ nu chaw teˇ hpaˍ k'oˆ ve, Taˇ te sheˍ. Eˇliˇya‸ yawˇ htaˬ ca htaiˍ hk'aw‸ la tuˬ leh naˍ, nyi taˍ shaˍ teh‸ k'oˆ ve yoˬ. 50 Yeˍsuˆ awˬ hkawˇ bvuhˬ chaweh teˇ pawˆ k'aw‸ kuˬ leh shaˉ cheˆ ve yoˬ. 51 Oˇ htaˇ bon yehˬ lonˉ ve hpaˬ kaˍ lehˬ, awˬ na te leh awˬ hawˉ lo hk'a gaˬ nyiˇ hkoˇ tzuh‸ sheˬ ve yoˬ. Miˬ hiˆ leh, haˉ pui teˇ hpaˍ htawˇ hkoˇ sheˬ ve yoˬ. 52 Tuˍ hpfuh teˇ hpaˍ hpaw sheˬ leh, suh taˍ peuˬ ve Hkri‸ yaˇ laiˉ g'aˇ awˬ to k'aw‸ te‸ tu la ve yoˬ. 53 Yeˍsuˆ k'aw‸ te‸ tu la peuˬ hk'aw‸ nawˉ, yawˇ hui tuˍ hpfuh hk'aw lo tawˆ la leh, da‸ kehˬ ve venˇ hk'aw lo‸-e leh, chaw laiˉ g'aˇ yawˇ hui hta‸ g'a mawˬ ve yoˬ. 54 Ma‸ poˍ leh yawˇ geh Yeˍsuˆ hta‸ shaw chehˇ ve ma‸ yaˇ teˇ hpaˍ lehˬ, miˬ hiˆ ve leh hk'a hpeh‸ la ve awˬ ceuˬ teˇ hpaˍ hta‸ g'a mawˬ htaˇ, yawˇ hui kawˆ jaˇ leh, Chi hpaˇ lehˬ, awˬ tehˬ awˬ na G'uiˬ sha ve yaˇ hpu teˇ g'aˇ hpeh‸ ve yoˬ teh‸ k'oˆ ve yoˬ. 55 Oˇ kaˬ a ciˉ vuiˇ kuiˬ lo yaˇ miˇ laiˉ g'aˇ htawˇ chehˇ leh nyi taˍ ve yoˬ. Yawˇ hui lehˬ, Yeˍsuˆ Gaˍliˍlehˇ mvuhˇ miˬ awˬ hk'aw lo tawˆ la htaˇ, yawˇ awˬ hk'aˇ suh k'ai leh yawˇ hta‸ te caˍ te taw piˇ ve yaˇ miˇ teˇ hpaˍ yoˬ. 56 Yawˇ hui awˬ hk'aw lo, Maˍriˆ Maˍgaˍdaˍlaˆ, Yaˍkoˆ leh Yoˇseh‸ ve awˬ e Maˍriˆ leh, Zeˍbeˍdehˇ ve awˬ yaˇ paˍ hui ve awˬ e, chi teˇ hpaˍ chehˇ taˍ ve yoˬ. 57 Mvuhˇ hpeu‸ la htaˇ, Aˍriˆma‸htehˍ venˇ yaˇ Yoˇseh‸ meh ve paw sha paˍ teˇ g'aˇ laˬ ve yoˬ. Yawˇ lehˬ, Yeˍsuˆ ve awˬ la‸ g'awˇ hpeh‸ ve yoˬ. 58 Yawˇ jawˇ mawˇ Piˉla‸ geh k'ai leh, Yeˍsuˆ ve awˬ to hta‸ lawˬ ve yoˬ. Oˇ htaˇ, yawˇ hta‸ piˇ tuˬ jawˇ mawˇ Piˉla‸ tawˇ piˇ ve yoˬ. 59 Hk'e te leh Yoˇseh‸ lehˬ, Yeˍsuˆ ve awˬ to hta‸ yuˬ k'ai peuˬ hk'aw‸ nawˉ, da‸ kehˬ ve hpa hpu yuˬ htiˆ sheˬ leh, haˉ pui htawˆ taˍ ve, 60 yawˇ ve tuˍ hpfuh awˬ suhˉ awˬ hk'aw lo keu taˍ ve yoˬ. Tuˍ hpfuh awˬ hk'oˇ meuˇ lo uiˍ jaˇ ve haˉ pui teˇ shiˍ hta‸ hpfuhˆ tsuhˇ taˉ leh k'o‸-e ve yoˬ. 61 Oˇ kaˬ lo Maˍriˆ Maˍgaˍdaˍlaˆ leh awˬ kaˍ awˬ nu Maˍriˆ teˇ g'aˇ, tuˍ hpfuh awˬ g'uˇ suhˍ maˇ vuiˇ maˇ neˇ kuiˬ lo mui chehˇ taˍ ve yoˬ. 62 Pawehˇ te tuˬ gu ve awˬ nyi peuˬ leh, awˬ hk'aw‸ nawˉ teˇ nyi htaˇ, paw hkuˇ lonˉ hui leh Hpaˍriˍsehˇ teˇ hpaˍ jawˇ mawˇ Piˉla‸ geh hpawnˬ k'ai leh k'oˆ ve, 63 Jawˇ mawˇ-oˬ, heˍ puiˉ ve chaw chi teˇ g'aˇ lehˬ, yawˇ te‸ chehˇ htaˇ, Shehˆ nyi peuˬ k'o ngaˬ k'aw‸ te‸ tu la tuˬ yoˬ teh‸, yawˇ k'oˆ taˍ ve hta‸ ngaˬ hui dawˇ nawˇ ve yoˬ. 64 Hk'e te leh, yawˇ ve awˬ la‸ g'awˇ teˇ hpaˍ yawˇ hta‸ ca hk'awˇ yuˬ leh, Yawˇ suh kuiˬ lo k'aw‸ te‸ tu la peuˬ teh‸, chaw chi ma ve hta‸ maˇ g'a ca k'oˆ piˇ tuˬ, shehˆ nyi hk'a gaˬ tuˍ hpfuh oˇ ve hta‸ hk'a deh‸ shaw taˍ tuˬ tawˇ piˇ-oˆ. Maˇ heˆ k'o, awˉ lawˉ heˍ ve a‸ kehˉ awˬ hk'aw‸ nawˉ heˍ ve lehˬ, leuˉ leh jaˇ tuˬ yoˬ teh‸ k'oˆ ve yoˬ. 65 Jawˇ mawˇ Piˉla‸ lehˬ, Nawˬ hui geh shaw shehˍ hpaˇ teˇ hpaˍ cawˬ ve yoˬ. K'ai leh nawˬ hui te g'a ve hk'e, hk'a deh‸ te leh shaw tcuh-o teh‸, yawˇ hui hta‸ k'aw‸ k'oˆ piˇ ve yoˬ. 66 Hk'e te leh yawˇ hui k'ai leh, tuˍ hpfuh hta‸ shu hpaw maˇ g'a tuˬ haˉ pui shiˍ hta‸ yinˉ tcuhˉ sheˬ leh, shaw shehˍ hpaˇ hui hta‸ shaw tcuh taˍ ve yoˬ.

Ma‸htehˍ 28

1 Shinˉ nyi teˇ nyi peuˬ leh, suhˍ nyi awˬ hk'aw lo awˉ lawˉ teˇ nyi mvuhˇ htiˇ la paˇ neˇ htaˇ, Maˍriˆ Maˍgaˍdaˍlaˆ leh awˬ kaˍ awˬ nu Maˍriˆ teˇ g'aˇ, yawˇ huiˉ maˬ tuˍ hpfuh hta‸ ca nyi ve yoˬ. 2 Oˇ htaˇ miˬ hiˆ jaˇ ve yoˬ. Awˬ lawn k'o, Jawˇ mawˇ G'uiˬ sha ve mvuhˇ naw ma tcuh yaˇ teˇ g'aˇ lehˬ, mvuhˇ naw ma lo ya‸ la leh haˉ pui shiˍ hta‸ hpfuhˆ baˬ sheˬ leh, haˉ pui shiˍ oˇ ve awˬ hk'oˆ lo yawˇ mui taˍ ve yoˬ. 3 Yawˇ ve awˬ ho‸ awˬ han lehˬ, mvuhˇ tiˉ po-e‸ hk'e hpeh‸ leh, yawˇ ve veu‸ k'aˇ htawˇ vaˇ meu-e hk'a shuˍ shuˍ hpu ve yoˬ. 4 Shaw shehˍ hpaˇ hui yawˇ hta‸ kawˆ jaˇ ve pa taw cheˇ jaˇ leh, chaw suh hk'e hpeh‸ la ve yoˬ. 5 Mvuhˇ naw ma tcuh yaˇ lehˬ, yaˇ miˇ oˇ ve nyiˇ g'aˇ hta‸ k'oˆ piˇ ve, Taˇ kawˆ. La‸ ka hk'oˆ lo hta‸ pehˍ ve Yeˍsuˆ hta‸ nawˬ huiˉ maˬ ca nyi la ve ngaˬ shiˍ ve yoˬ. 6 Yawˇ choˬ kaˬ maˇ chehˇ. Awˬ lawn k'o, yawˇ k'oˆ taˍ ve hk'e k'aw‸ te‸ tu la peuˬ. Yawˇ hta‸ teh taˍ kuiˬ lo ca nyi la-o. 7 Haˆ haˆ k'o‸-e leh, suh kuiˬ lo yawˇ k'aw‸ te‸ tu la peuˬ teh‸, yawˇ ve awˬ la‸ g'awˇ hui hta‸ ca hto piˇ-oˆ. Nawˬ hui g'uˇ suhˍ Gaˍliˍlehˇ mvuhˇ miˬ lo yawˇ k'ai peuˬ. Oˇ kaˬ lo nawˬ hui yawˇ hta‸ g'a mawˬ tuˬ yoˬ teh‸ hto piˇ sheˍ. Nyi loˬ, ngaˬ nawˬ huiˉ maˬ hta‸ hto laˇ ve yoˬ teh‸ k'oˆ piˇ ve yoˬ. 8 Oˇ htaˇ yawˇ huiˉ maˬ kawˆ ka‸ kawˆ, ha lehˬ ka‸ ha lehˬ jaˇ ve awˬ hk'aw lo teˇ cawˬ haˉ tuˍ hpfuh lo tu leh, awˬ la‸ g'awˇ hui hta‸ hto piˇ tuˬ g'uiˇ k'o‸-e ve yoˬ. 9 Oˇ htaˇ, Yeˍsuˆ yawˇ huiˉ maˬ hta‸ ca ha‸ la leh, Awˬ bon uiˍ piˇ-oˆ teh‸ k'oˆ piˇ ve yoˬ. Yawˇ huiˉ maˬ yawˇ ve hkui sheh hta‸ ca vawˆ taˍ leh yawˇ hta‸ oˉ k'oˍ pui ve yoˬ. 10 Oˇ htaˇ, Yeˍsuˆ yawˇ huiˉ maˬ hta‸ k'oˆ piˇ ve, Taˇ kawˆ. Ngaˬ ve awˬ viˉ awˬ nyi teˇ hpaˍ hta‸ Gaˍliˍlehˇ mvuhˇ miˬ lo k'ai tuˬ ca hto piˇ-oˆ. Oˇ kaˬ lo yawˇ hui ngaˬ hta‸ g'a mawˬ tuˬ yoˬ teh‸ k'oˆ piˇ ve yoˬ. 11 Yawˇ huiˉ maˬ k'ai chehˇ htaˇ, shaw shehˍ hpaˇ teˇ hpaˍ hpaˍ venˇ awˬ hk'aw lo‸-e leh, hk'a hpeh‸ la ve awˬ lawn hk'a peu-eˬ paw hkuˇ lonˉ teˇ hpaˍ hta‸ hto piˇ ve yoˬ. 12 Paw hkuˇ lonˉ hui lehˬ, awˬ hoˉ chaw mawˇ hui geh hpawnˬ da‸ leh jehˬ da‸ peuˬ hk'aw‸ nawˉ, ma‸ yaˇ teˇ hpaˍ hta‸ yawˇ hui hpu maˇ maˇ piˇ leh k'oˆ piˇ ve, 13 Tanˇ hkuinˇ htaˇ ngaˬ hui zuh‸ chehˇ ve teˇ yanˇ, yawˇ ve awˬ la‸ g'awˇ teˇ hpaˍ yawˇ hta‸ ca hk'awˇ yuˬ la ve yoˬ teh‸ nawˬ hui shu hta‸ chi hk'e k'oˆ piˇ-oˆ. 14 Awˬ lawn chi hta‸ mvuhˇ miˬ jawˇ mawˇ lonˉ g'a kaˇ ve k'o, nawˬ hui hta‸ yawˇ te‸ chiˉ maˇ g'a te tuˬ, ngaˬ hui yawˇ hta‸ beˬ tuˬ yoˬ teh‸ k'oˆ ve yoˬ. 15 Hk'e te leh yawˇ hui hpu oˇ ve hta‸ yuˬ leh, shu yawˇ hui hta‸ maˍ piˇ taˍ ve hk'e te ve yoˬ. Tawˇ hkawˇ oˇ ve lehˬ, Yuˇda‸ chaw hui awˬ hk'aw lo ya‸ nyi hk'a gaˬ bvuhˬ k'ai chehˇ ve yoˬ. 16 Awˬ la‸ g'awˇ oˇ ve teˇ chi teˇ g'aˇ lehˬ, Gaˍliˍlehˇ mvuhˇ miˬ awˬ hk'aw lo Yeˍsuˆ k'oˆ piˇ taˍ ve hk'aw teˇ shiˍ lo k'ai ve yoˬ. 17 Yawˇ hui yawˇ hta‸ g'a mawˬ leh oˉ k'oˍ pui ve yoˬ. Ya‸ hk'aˇ, teˇ hpaˍ hpaˍ hk'a deh‸ maˇ yonˍ. 18 Yeˍsuˆ yawˇ hui geh jiˆ laˬ leh k'oˆ piˇ ve, Mvuhˇ naw ma hk'oˆ leh miˬ guiˬ hk'oˆ ve kanˇ paˆ hk'a peu-eˬ ngaˬ hta‸ pe‸ laˇ peuˬ. 19 Hk'e te leh nawˬ hui k'ai leh, chaw ceuˬ hk'a peu-eˬ ngaˬ ve awˬ la‸ g'awˇ hpeh‸ la tuˬ ca te-o. Awˬ pa, Yaˇ hpu leh da‸ ve kehˬ ve Awˬ ha hpu awˬ meh awˬ hawˉ lo yawˇ hui hta‸ baˆtiˆsaˬ piˇ-oˆ. 20 Ngaˬ nawˬ hui hta‸ piˇ taˍ ve tawˇ hkawˇ hk'a peu-eˬ na yuˬ leh te tuˬ, yawˇ hui hta‸ maˍ piˇ-oˆ. Miˬ guiˬ chi awˬ yanˇ leh htaˇ hk'a gaˬ, ngaˬ nawˬ hui geh hk'aˬ htaˆ ka‸ chehˇ tuˬ yoˬ teh‸, yawˇ hui hta‸ k'oˆ piˇ ve yoˬ.

Maˍkuˆ 1

1 G'uiˬ sha ve Yaˇ hpu Yeˍsuˆ Hkri‸ ve ha lehˬ ve bon hkawˇ awˬ hkuiˉ puiˍ lehˬ chi hk'e yoˬ. 2 G'uiˬ sha ve tcuh kaˍ paˍ Iˉsaˍyaˆ ve li‸ awˬ hk'aw lo bvuh‸ taˍ ve hk'e, Nyi loˬ, nawˬ awˬ g'uˇ suhˍ nawˬ ve ya‸ k'aw hta‸ gu taˍ laˇ tuˬ, ngaˬ ve tcuh yaˇ hta‸ ngaˬ peu k'ai ve yoˬ. 3 Jawˇ mawˇ G'uiˬ sha ve ya‸ k'aw hta‸ gu taˍ loˬ. Yawˇ ve ya‸ k'aw teˇ hpaˍ hta‸ hteˇ lehˍ te-o teh‸, heh puiˉ hk'aw lo chaw teˇ g'aˇ kuˬ ve yoˬ. 4 Yoˇhanˬ heh puiˉ hk'aw lo tawˆ la leh baˆtiˆsaˬ piˇ ve yoˬ. Venˇ baˆ hpehˇ hk'a g'a tuˬ, venˇ baˆ dawˇ hpfuhˆ ve hta‸ caˉ da‸ ve baˆtiˆsaˬ teˇ ceuˬ hta‸ yawˇ maˍ piˇ ve yoˬ. 5 Yuˇda‸ mvuhˇ miˬ chaw hk'a peu-eˬ leh Yeˍruˆsaˍlehnˍ venˇ yaˇ hk'a peu-eˬ Yoˇhanˬ geh k'ai ve yoˬ. A shu yawˇ ve venˇ baˆ hta‸ k'aoˍ maˍ piˇ leh, Yoˇhanˬ yawˇ hui hta‸ Yawˇdanˍ g'uiˬ ma awˬ hk'aw lo baˆtiˆsaˬ piˇ ve yoˬ. 6 Yoˇhanˬ lehˬ, kaˍ laˍ oˆ awˬ mvuh te taˍ ve veu‸ k'aˇ hta‸ veu‸ deh leh, caw‸ cehˍ nyi lo shaˍ guiˬ haˍ pi caˆ tsuh‸ taˍ ve yoˬ. Paˉ ce‸ leh heh puiˉ hk'aw ve pehˇ g'uiˬ hta‸ yawˇ caˇ ve yoˬ. 7 Yawˇ bon maˍ leh k'oˆ ve, Ngaˬ awˬ hk'aw‸ nawˉ laˬ tuˬ ve teˇ g'aˇ lehˬ, ngaˬ a‸ kehˉ kanˇ paˆ uiˍ ve yoˬ. Ngaˬ k'aw‸ lehˍ te leh yawˇ ve hkuiˉ nuˆ caˆ hta‸ hpui tuˬ ve ceh ka‸ maˇ keunˍ. 8 Ngaˬ lehˬ nawˬ hui hta‸ iˉ kaˆ awˬ hk'aw lo baˆtiˆsaˬ piˇ ve yoˬ. Ya‸ hk'aˇ yawˇ lehˬ, nawˬ hui hta‸ da‸ ve kehˬ ve Awˬ ha hpu awˬ hk'aw lo baˆtiˆsaˬ piˇ tuˬ yoˬ teh‸ maˍ piˇ ve yoˬ. 9 Awˬ yanˇ oˇ ve awˬ hk'aw lo, Gaˍliˍlehˇ mvuhˇ miˬ Naˍzaˍrehˆ venˇ hk'aw lo Yeˍsuˆ tawˆ la leh, Yawˇdanˍ g'uiˬ ma awˬ hk'aw lo Yoˇhanˬ yawˇ hta‸ baˆtiˆsaˬ piˇ ve yoˬ. 10 Yeˍsuˆ iˉ kaˆ awˬ hk'aw lo teˇ cawˬ haˉ tawˆ la htaˇ, mvuhˇ naw ma hpaw leh Awˬ ha hpu lehˬ aˉ pui k'aˍ hk'e yawˇ awˬ hk'oˆ ya‸ la ve hta‸ Yeˍsuˆ g'a mawˬ ve yoˬ. 11 Nawˬ lehˬ ngaˬ ha‸ jaˇ ve ngaˬ ve Yaˇ hpu yoˬ. Nawˬ hta‸ ngaˬ nyi hk'aˇ suh jaˇ ve yoˬ teh‸, mvuhˇ naw ma lo awˬ hkawˇ tawˆ la ve yoˬ. 12 Teˇ cawˬ haˉ Awˬ ha hpu yawˇ hta‸ heh puiˉ hk'aw lo g'a‸ peu ve yoˬ. 13 Yawˇ heh puiˉ hk'aw lo awˇ chi nyi chehˇ leh, Saˍtanˍ yawˇ hta‸ beˬ ve lawˇ ve yoˬ. Yawˇ haiˬ ve to nuˇ to shaˆ teˇ hpaˍ geh chehˇ leh, mvuhˇ naw ma tcuh yaˇ teˇ hpaˍ yawˇ loˍ ve hta‸ ga piˇ ve yoˬ. 14 Yoˇhanˬ hta‸ shu hpeh yuˬ peuˬ hk'aw‸ nawˉ, Yeˍsuˆ Gaˍliˍlehˇ mvuhˇ miˬ lo laˬ ve yoˬ. 15 G'uiˬ sha ve ha lehˬ ve bon hkawˇ hta‸ Yeˍsuˆ maˍ piˇ leh k'oˆ ve, Awˬ yanˇ biˇ la peuˬ. G'uiˬ sha ve mvuhˇ miˬ gaˬ la paˇ neˇ peu. Venˇ baˆ hta‸ dawˇ hpfuhˆ leh ha lehˬ ve bon hkawˇ hta‸ yonˍ loˬ teh‸ maˍ piˇ ve yoˬ. 16 Gaˍliˍlehˇ g'uiˬ po paˇ lo Yeˍsuˆ k'ai chehˇ htaˇ, Siˉmonˍ leh yawˇ ve awˬ nyi paˍ Anˍdrehˍ g'uiˬ po awˬ hk'aw lo geu‸ hpehˇ chehˇ ve hta‸ g'a mawˬ ve yoˬ. Awˬ lawn k'o, yawˇ huiˉ maˬ lehˬ ngaˇ ca paˍ hpeh‸ ve yoˬ. 17 Yeˍsuˆ k'oˆ ve, Ngaˬ hk'aˇ suh laˬ-o‸. Ngaˬ nawˬ hui hta‸ chaw ca shehˍ hpaˇ te tcuh laˇ tuˬ yoˬ teh‸, yawˇ huiˉ maˬ hta‸ k'oˆ piˇ ve yoˬ. 18 Yawˇ huiˉ maˬ teˇ cawˬ haˉ geu‸ hta‸ teh taˉ leh yawˇ awˬ hk'aˇ suh k'ai ve yoˬ. 19 Yeˍsuˆ awˬ g'uˇ suhˍ a ciˉ k'aw‸ k'ai htaˇ, Zeˍbeˍdehˇ ve awˬ yaˇ paˍ Yaˍkoˆ leh yawˇ ve awˬ nyi paˍ Yoˇhanˬ, haw lo‸ k'oˍ hk'aw geu‸ gu tawˉ chehˇ ve hta‸ g'a mawˬ ve yoˬ. 20 Teˇ cawˬ haˉ Yeˍsuˆ yawˇ huiˉ maˬ hta‸ kuˬ yuˬ ve yoˬ. G'aˇ ga caˇ paˍ hui geh awˬ pa Zeˍbeˍdehˇ hta‸ haw lo‸ k'oˍ hk'aw lo teh taˉ peuˬ leh, yawˇ huiˉ maˬ yawˇ awˬ hk'aˇ suh k'ai ve yoˬ. 21 Yawˇ hui Kaˍpeˍneˍonˍ venˇ hk'aw lo‸-e ve yoˬ. Shinˉ nyi htaˇ teˇ cawˬ haˉ yawˇ bon yehˬ lo taˆ-e leh maˍ piˇ ve yoˬ. 22 Yawˇ maˍ piˇ ve hta‸ yawˇ hui anˇ jaˇ ve yoˬ. Awˬ lawn k'o, li‸ bvuh‸ paˍ hui maˍ piˇ ve hk'e yawˇ maˍ ve maˇ heˆ. Yawˇ kanˇ paˆ cawˬ ve awˬ hk'aw lo maˍ piˇ ve yoˬ. 23 Oˇ teˇ hkui yawˇ hui ve bon yehˬ awˬ hk'aw lo neˇ cha‸ chiˆ geh ve chaw teˇ g'aˇ cawˬ ve yoˬ. 24 Yawˇ kuˬ leh k'oˆ ve, Naˍzaˍrehˆ chaw Yeˍsuˆ-oˬ, nawˬ ngaˬ hui hta‸ hk'aˬ hk'e caˉ da‸ le. Ngaˬ hui hta‸ te luˬ laˇ tuˬ nawˬ laˬ ve laˇ. Nawˬ hta‸ ngaˬ shiˍ taˍ ve yoˬ. Nawˬ lehˬ, G'uiˬ sha ve da‸ kehˬ ve chaw hpeh‸ ve yoˬ teh‸ k'oˆ ve yoˬ. 25 Oˇ htaˇ Yeˍsuˆ yawˇ hta‸ deˇ leh k'oˆ ve, Ta‸ iˉ chehˇ-oˆ. Yawˇ awˬ hk'aw lo tawˆ k'ai-o teh‸, yawˇ hta‸ k'oˆ piˇ ve yoˬ. 26 Neˇ cha‸ chiˆ lehˬ, chaw oˇ ve hta‸ g'aˇ hte‸ hpeˆ dawˇ tcuh leh, awˬ hkawˇ bvuhˬ chaweh kuˬ leh yawˇ awˬ hk'aw lo tawˆ k'ai ve yoˬ. 27 Chaw hk'a peu-eˬ anˇ leh k'oˆ ve, Chi ve lehˬ, hk'aˬ hk'e le. Maˍ piˇ ve chi lehˬ, awˬ suhˉ teˇ ceuˬ law leˇ. Neˇ cha‸ chiˆ teˇ hpaˍ hta‸ ka‸ kanˇ paˆ awˬ hk'aw lo yawˇ tawˇ piˇ leh yawˇ hui na yuˬ ve yoˬ teh‸, yawˇ hui teˇ g'aˇ leh teˇ g'aˇ k'oˆ da‸ ve yoˬ. 28 Yawˇ ve awˬ lawn teˇ cawˬ haˉ Gaˍliˍ lehˇ mvuhˇ miˬ teˇ kaˬ le le lo bvuhˬ k'ai ve yoˬ. 29 Teˇ cawˬ haˉ yawˇ hui bon yehˬ awˬ hk'aw lo tawˆ k'ai leh, Yaˍkoˆ leh Yoˇhanˬ geh Siˉmonˍ leh Anˍdrehˍ hui ve yehˬ hk'aw lo‸-e ve yoˬ. 30 Siˉmonˍ awˬ miˇ ma ve awˬ e kaˆ naˬ leh zuh‸ chehˇ ve yoˬ. Yawˇ awˬ lawn Yeˍsuˆ hta‸ yawˇ hui teˇ cawˬ haˉ hto piˇ ve yoˬ. 31 Yeˍsuˆ laˬ leh, yaˇ miˇ oˇ ve la‸ sheh hta‸ vawˆ leh tu la piˇ lawˬ ve yoˬ. Yawˇ ve kaˆ naˬ ve na-e la leh, yawˇ yawˇ hui hta‸ te caˍ te taw piˇ ve yoˬ. 32 Mvuhˇ nyi k'ehˬ peuˬ leh mehˆ muiˉ naˆ la paˇ neˇ htaˇ, naˬ ve gawˬ ve chaw hk'a peu-eˬ leh, neˇ geh ve chaw teˇ hpaˍ hta‸ Yeˍsuˆ geh shiˍ veu laˇ ve yoˬ. 33 Venˇ yaˇ hk'a peu-eˬ yehˬ miˉ hpe‸ awˬ paˇ lo hpawnˬ chehˇ taˍ ve yoˬ. 34 A naˍ laiˉ ceuˬ te naˬ chehˇ ve chaw maˇ maˇ hta‸ yawˇ gu na-e piˇ leh, neˇ teˇ hpaˍ hta‸ htawˇ g'a‸ k'oˬ piˇ ve yoˬ. Neˇ teˇ hpaˍ yawˇ hta‸ shiˍ ve pa taw Yeˍsuˆ yawˇ hui hta‸ tawˇ maˇ yaw tcuh. 35 Mvuhˇ shawˉ teˇ na‸, mvuhˇ maˇ htiˇ sheˍ htaˇ, Yeˍsuˆ tu leh heh puiˉ hk'aw lo k'ai leh, oˇ kaˬ lo bon lawˬ chehˇ ve yoˬ. 36 Siˉmonˍ leh yawˇ geh chehˇ ve awˬ chawˇ teˇ hpaˍ Yeˍsuˆ hta‸ g'a‸ ca ve yoˬ. 37 Yawˇ hui Yeˍsuˆ hta‸ mawˬ htaˇ, Chaw hk'a peu-eˬ nawˬ hta‸ ca chehˇ ve yoˬ teh‸ yawˇ hta‸ hto piˇ ve yoˬ. 38 Yeˍsuˆ yawˇ hui hta‸ k'oˆ piˇ ve, Awˬ paˇ awˬ kui lo cawˬ ve venˇ hk'aˆ teˇ hpaˍ hta‸ htawˇ ngaˬ bon g'a maˍ piˇ tuˬ awˬ g'uˇ suhˍ k'ai-a veuˬ. Awˬ lawn k'o, chi hk'e te tuˬ ngaˬ laˬ ve yoˬ teh‸, yawˇ k'aw‸ k'oˆ piˇ ve yoˬ. 39 Gaˍliˍlehˇ mvuhˇ miˬ teˇ kaˬ le le yawˇ hui ve bon yehˬ teˇ hpaˍ awˬ hk'aw lo yawˇ bon ca maˍ piˇ leh, neˇ teˇ hpaˍ hta‸ g'a‸ k'oˬ ve yoˬ. 40 Hkiˬ tu‸ paˍ teˇ g'aˇ yawˇ geh laˬ leh hkui tcuhˉ teh leh k'oˆ ve, Nawˬ te gaˇ ve k'o, ngaˬ hta‸ da‸ la kehˬ la tuˬ nawˬ te hpeh‸ ve yoˬ teh‸, Yeˍsuˆ hta‸ lawˬ hkawˉ ve yoˬ. 41 Yeˍsuˆ yawˇ hta‸ ha k'aˉ ve pa taw, la‸ sheh che leh yawˇ hta‸ htawˇ leh k'oˆ ve, Ngaˬ te gaˇ ve yoˬ. Da‸ la kehˬ la-o teh‸ k'oˆ piˇ ve yoˬ. 42 Teˇ cawˬ haˉ hkiˬ tu‸ a naˍ mehˉ k'ai leh yawˇ da‸ la kehˬ la ve yoˬ. 43 Yeˍsuˆ yawˇ hta‸ tawˇ hehnˇ chaweh k'oˆ piˇ ve, 44 Awˬ lawn chi chaw teˇ g'aˇ hta‸ ka‸ taˇ ca hto piˇ. Nawˬ k'ai leh paw hkuˇ hta‸ nawˬ awˬ to ca maw piˇ-oˆ. Shu mehˆ g'uˇ suhˍ shaˉ hkiˆ hpeh‸ tuˬ, nawˬ da‸ la kehˬ la peuˬ ve awˬ pon Moˉseˍ awˬ liˇ teh taˍ ve hk'e, tanˇ tuˬ ca tanˇ piˇ-oˆ teh‸, Yeˍsuˆ k'oˆ piˇ leh teˇ cawˬ haˉ yawˇ hta‸ k'o‸-e tcuh ve yoˬ. 45 Ya‸ hk'aˇ, yawˇ tawˆ k'ai leh awˬ lawn oˇ ve hta‸ g'aˇ hte‸ ca k'aoˍ piˇ leh, teˇ kaˬ le le awˬ hkawˇ bvuhˬ k'ai piˇ lawˬ ve yoˬ. Chi hta‸ pa taw Yeˍsuˆ lehˬ venˇ teˇ hpaˍ hk'aw hk'a tawˍ lehˆ k'aw‸ lo‸-e maˇ hpeh‸ leh, heh puiˉ hk'aw lo chehˇ taˍ ve yoˬ. Hk'aˬ hpawˇ chi hpawˇ lo chehˇ ve chaw hui yawˇ geh laˬ ve yoˬ.

Maˍkuˆ 2

1 Oˇ ve hk'aw‸ nawˉ maˇ maw maw, Yeˍsuˆ Kaˍpeˍneˍonˍ venˇ awˬ hk'aw lo teˇ pawˆ k'aw‸ lo‸-e leh, yehˬ teˇ yehˬ awˬ hk'aw lo yawˇ chehˇ taˍ ve awˬ lawn hta‸ shu g'a kaˇ ve yoˬ. 2 Chaw hpawnˬ la maˇ jaˇ ve pa taw yehˬ hk'aw chehˇ kuiˬ maˇ cawˬ leh, yehˬ miˉ awˬ paˇ lo ka‸ chehˇ kuiˬ maˇ cawˬ. Yeˍsuˆ yawˇ hui hta‸ bon hkawˇ maˍ piˇ chehˇ htaˇ, 3 hkui sheh la‸ sheh suh ve chaw teˇ g'aˇ hta‸ chaw awˇ g'aˇ taˆ veu laˇ leh yawˇ geh laˬ ve yoˬ. 4 Chaw chehˇ maˇ ve hta‸ pa taw, Yeˍsuˆ geh yawˇ hui lo‸-e maˇ gaˬ leh, Yeˍsuˆ chehˇ taˍ ve awˬ hk'oˆ lo beh taˍ ve hta‸ yawˇ hui hpaˆ pawnˍ ve yoˬ. Peuˬ leh hpaˆ pawnˍ taˍ kuiˬ lo, hkui sheh la‸ sheh suh ve chaw zuh‸ taˍ ve zuh‸ hpui hta‸ yawˇ hui hpehˇ ya‸-e ve yoˬ. 5 Yeˍsuˆ lehˬ yawˇ hui yonˍ ve nyi ma hta‸ g'a mawˬ htaˇ, hkui sheh la‸ sheh suh ve chaw hta‸, Yaˇ paˍ-oˬ, nawˬ ve venˇ baˆ hpehˇ hk'a peuˬ teh‸ k'oˆ piˇ ve yoˬ. 6 Li‸ bvuh‸ paˍ teˇ hpaˍ hpaˍ oˇ kaˬ lo mui chehˇ leh, a shu yawˇ ve nyi ma hk'aw lo chi hk'e dawˇ chehˇ ve, 7 Chi hpaˇ lehˬ, aˬ hto‸ ma te chi hk'e k'oˆ ve le. Yawˇ G'uiˬ sha hta‸ maˇ shawˍ maˇ caˆ k'oˆ ve yoˬ. G'uiˬ sha teˇ g'aˇ maˇ heˆ k'o, venˇ baˆ hta‸ a shu hpehˇ hk'a hpeh‸ tuˬ le. 8 Yawˇ hui chi hk'e dawˇ chehˇ ve hta‸ Yeˍsuˆ yawˇ ve nyi ma hk'aw lo teˇ cawˬ haˉ shiˍ leh, yawˇ hui hta‸ k'oˆ piˇ ve, Nawˬ hui nyi ma hk'aw aˬ hto‸ ma te chi hk'e dawˇ chehˇ ve le. 9 Hkui sheh la‸ sheh suh ve chaw teˇ g'aˇ hta‸ tawˇ hk'aˬ ve teˇ hkawˇ a ciˉ k'oˆ piˇ sha le. Nawˬ ve venˇ baˆ hpehˇ hk'a peuˬ teh‸ k'oˆ piˇ ve sha laˇ. Maˇ heˆ k'o, Tu leh nawˬ ve zuh‸ hpui hta‸ taˆ leh juˇ k'ai-o teh‸ k'oˆ piˇ ve sha laˇ. 10 Chaw yaˇ ve Yaˇ hpu lehˬ, miˬ guiˬ hk'oˆ lo venˇ baˆ hpehˇ hk'a tuˬ kanˇ paˆ cawˬ ve hta‸ nawˬ hui g'a shiˍ tuˬ teh‸ k'oˆ peuˬ leh, hkui sheh la‸ sheh suh ve chaw hta‸ k'aw‸ k'oˆ piˇ ve, 11 Ngaˬ nawˬ hta‸ k'oˆ laˇ ve, tu loˬ. Nawˬ ve zuh‸ hpui hta‸ taˆ leh nawˬ ve aˉ hk'aw lo k'o‸-e loˬ teh‸, yawˇ hta‸ k'oˆ piˇ ve yoˬ. 12 Oˇ htaˇ yawˇ teˇ cawˬ haˉ tu leh, zuh‸ hpui hta‸ taˆ veu leh chaw chi ma ve mehˆ g'uˇ suhˍ yawˇ tawˆ k'ai ve yoˬ. Hk'e te leh, chaw chi ma ve anˇ leh G'uiˬ sha hta‸ chiˇ uiˍ chiˇ mvuh piˇ leh, Ngaˬ hui teˇ pawˆ ka‸ chi hk'e ve hta‸ maˇ mawˬ jaw teh‸ k'oˆ ve yoˬ. 13 Oˇ ve awˬ hk'aw‸ nawˉ, Yeˍsuˆ g'uiˬ po paˇ lo teˇ pawˆ k'aw‸ k'ai htaˇ, chaw awˬ moˍ loˉ yawˇ geh laˬ leh, yawˇ yawˇ hui hta‸ maˍ piˇ ve yoˬ. 14 Yawˇ awˬ g'uˇ suhˍ k'aw‸ k'ai chehˇ htaˇ, awˬ hkawnˍ shaw kuiˬ yehˬ awˬ hk'aw lo Aˍlaˍhpehˇ ve yaˇ paˍ Leˍviˆ mui chehˇ ve hta‸ yawˇ g'a mawˬ ve yoˬ. Ngaˬ hk'aˇ suh laˬ-o‸ teh‸, Yeˍsuˆ yawˇ hta‸ k'oˆ piˇ htaˇ, yawˇ tu leh Yeˍsuˆ awˬ hk'aˇ suh k'ai ve yoˬ. 15 Awˬ hk'aw‸ nawˉ, Leˍviˆ aˉ hk'aw lo Yeˍsuˆ leh yawˇ ve awˬ la‸ g'awˇ hui hpui lawˇ paˇ lo mui caˇ chehˇ htaˇ, awˬ hkawnˍ shaw paˍ leh venˇ baˆ yaˇ hui maˇ maˇ htawˇ yawˇ hui geh mui caˇ chehˇ ve yoˬ. Awˬ lawn k'o, yawˇ hui maˇ maˇ Yeˍsuˆ awˬ hk'aˇ suh k'ai ve yoˬ. 16 Awˬ hkawnˍ shaw paˍ leh venˇ baˆ yaˇ teˇ hpaˍ geh yawˇ awˍ caˇ chehˇ ve hta‸, Hpaˍriˍsehˇ hui ve li‸ bvuh‸ paˍ teˇ hpaˍ g'a mawˬ htaˇ, yawˇ ve awˬ la‸ g'awˇ hui hta‸ k'oˆ piˇ ve, Chi hpaˇ lehˬ, aˬ hto‸ ma pa taw awˬ hkawnˍ shaw paˍ leh venˇ baˆ yaˇ hui geh hk'a geh caˇ ve le teh‸, na nyi ve yoˬ. 17 Tawˇ oˇ ve hta‸ Yeˍsuˆ g'a kaˇ htaˇ, yawˇ yawˇ hui hta‸ k'aw‸ k'oˆ piˇ ve, Chehˇ sha ve chaw hui naˆ tsuhˇ shehˍ hpaˇ hta‸ maˇ loˍ. Naˬ ve chaw hui ceh tiˉ loˍ ve yoˬ. Hteˇ ve cawˇ ve chaw hui hta‸ kuˬ yuˬ tuˬ ngaˬ laˬ ve maˇ heˆ. Venˇ baˆ yaˇ hui hta‸ kuˬ yuˬ tuˬ ngaˬ laˬ ve yoˬ teh‸ k'oˆ piˇ ve yoˬ. 18 Awˬ yanˇ oˇ ve awˬ hk'aw lo, Yoˇhanˬ ve awˬ la‸ g'awˇ hui leh Hpaˍriˍsehˇ hui caˇ tuˬ ce chehˇ ve yoˬ. Hk'e te leh, shu Yeˍsuˆ geh laˬ leh k'oˆ ve, Yoˇhanˬ ve awˬ la‸ g'awˇ hui leh Hpaˍriˍsehˇ hui ve awˬ la‸ g'awˇ hui caˇ tuˬ ce chehˇ ve ka‸, aˬ hto‸ ma pa taw nawˬ ve awˬ la‸ g'awˇ teˇ hpaˍ caˇ tuˬ maˇ ce ve le teh‸ na nyi ve yoˬ. 19 Yeˍsuˆ yawˇ hui hta‸ k'aw‸ k'oˆ piˇ ve, Awˬ miˇ ma heuˆ shehˍ hpaˇ hkehˉ caˇ la ve chaw hui geh chehˇ htaˇ, yawˇ hui caˇ tuˬ ce tuˬ leh laˇ. Yawˇ yawˇ hui geh chehˇ ve ceh ceh, yawˇ hui caˇ tuˬ ce maˇ hpeh‸. 20 Ya‸ hk'aˇ, awˬ miˇ ma heuˆ shehˍ hpaˇ hta‸ hkehˉ caˇ la ve chaw teˇ hpaˍ geh yuˬ hpaˆ piˇ ve awˬ nyi gaˬ la tuˬ yoˬ. Oˇ ve teˇ nyi gaˬ k'o, yawˇ hui caˇ tuˬ ce tuˬ yoˬ. 21 Veu‸ k'aˇ awˬ piˍ hta‸ hpa awˬ suhˉ a shu ka‸ maˇ nehˉ jaw. Oˇ hk'e nehˉ ve k'o, hpa awˬ suhˉ lehˬ awˬ piˍ hta‸ g'awˬ leh, leuˉ leh k'aw‸ tzuh‸ jaˇ tuˬ yoˬ. 22 Chi hk'oˆ ka‸, shaˍ guiˬ htuˉ pui awˬ piˍ awˬ hk'aw lo a pehˉ meuˇ g'uiˬ awˬ suhˉ a shu ka‸ maˇ keu jaw. Oˇ hk'e keu ve k'o, a pehˉ meuˇ g'uiˬ awˬ suhˉ lehˬ, shaˍ guiˬ htuˉ pui hta‸ te hkoˇ ve pa taw, a pehˉ meuˇ g'uiˬ sheˆ leh, shaˍ guiˬ htuˉ pui htawˇ luˬ k'ai ve yoˬ. A pehˉ meuˇ g'uiˬ awˬ suhˉ hta‸ shaˍ guiˬ htuˉ pui awˬ suhˉ awˬ hk'aw lo g'a keu ve yoˬ teh‸ Yeˍsuˆ k'oˆ piˇ ve yoˬ. 23 Shinˉ nyi teˇ nyi awˬ hk'aw lo, Yeˍsuˆ heh hk'aw hpanˍ k'ai chehˇ htaˇ, yawˇ ve awˬ la‸ g'awˇ hui caˬ nu hta‸ chehˆ yuˬ leh k'ai chehˇ ve yoˬ. 24 Hpaˍriˍsehˇ teˇ hpaˍ yawˇ hta‸ k'oˆ piˇ ve, Nyi-o, shinˉ nyi htaˇ te maˇ keunˍ te maˇ cawˇ ve hta‸ yawˇ hui aˬ hto‸ ma pa taw te ve le teh‸ k'oˆ ve yoˬ. 25 Yeˍsuˆ yawˇ hui hta‸ k'aw‸ k'oˆ piˇ ve, Daˍviˆ leh yawˇ ve awˬ chawˇ teˇ hpaˍ awˍ meu‸ leh caˇ tuˬ maˇ cawˬ ve teˇ yanˇ, yawˇ hui hk'aˬ hk'e te ve awˬ lawn hta‸ nawˬ hui teˇ pawˆ ka‸ maˇ g'a g'aw jaw leh laˇ. 26 Aˍbiˍaˍtaˍ paw hkuˇ lonˉ te chehˇ htaˇ, G'uiˬ sha ve yehˬ awˬ hk'aw lo Daˍviˆ lo‸-e leh, paw hkuˇ teˇ hpaˍ maˇ heˆ k'o teˇ g'aˇ ka‸ caˇ maˇ keunˍ caˇ maˇ cawˇ ve, tanˇ taˍ ve hkaoˍ monˇ hta‸ caˇ leh, awˬ chawˇ teˇ hpaˍ hta‸ ka‸ pehˬ caˍ piˇ ve maˇ heˆ leh laˇ teh‸ k'oˆ piˇ ve yoˬ. 27 Peuˬ leh yawˇ k'aw‸ k'oˆ ve, Shinˉ nyi lehˬ chaw yaˇ awˬ pon te taˍ ve yoˬ. 28 Chaw yaˇ lehˬ, shinˉ nyi awˬ pon te taˍ ve maˇ heˆ. Hk'e te leh, chaw yaˇ ve Yaˇ hpu lehˬ, shinˉ nyi ve awˬ jawˇ mawˇ htawˇ hpeh‸ ve yoˬ teh‸, yawˇ hui hta‸ k'oˆ piˇ ve yoˬ.

Maˍkuˆ 3

1 Yawˇ bon yehˬ hk'aw k'aw‸ lo‸-e htaˇ, oˇ kaˬ lo la‸ sheh teˇ paˉ suh ve chaw teˇ g'aˇ chehˇ taˍ ve yoˬ. 2 Yeˍsuˆ hta‸ venˇ baˆ taˍ g'a tuˬ, shinˉ nyi htaˇ chaw naˬ oˇ ve hta‸ yawˇ gu na-e piˇ tuˬ leh naˍ, yawˇ hui yawˇ hta‸ hk'a deh‸ nyi taˍ ve yoˬ. 3 Yawˇ lehˬ, la‸ sheh teˇ paˉ suh ve chaw hta‸, Nawˬ tu leh awˬ k'aw ji ca huˉ la-o teh‸ k'oˆ piˇ ve yoˬ. 4 Peuˬ leh yawˇ yawˇ hui hta‸ k'oˆ piˇ ve, Shin nyi htaˇ da‸ tuˬ te cawˇ laˇ, maˇ heˆ k'o luˬ tuˬ te cawˇ laˇ. Shu ve a sha‸ hta‸ ponˬ piˇ cawˇ laˇ, maˇ heˆ k'o tiˇ pehˍ cawˇ laˇ teh‸ na nyi ve yoˬ. Ya‸ hk'aˇ, yawˇ hui ta‸ iˉ gawˬ lehˍ chehˇ taˍ ve yoˬ. 5 Yeˍsuˆ nyi ma zuhˆ leh yawˇ hui hta‸ hk'a caw zuhˇ nyi ve yoˬ. Yawˇ hui nyi ma heh ve pa taw yawˇ dawˇ haˍ leh, chaw oˇ ve hta‸, Nawˬ ve la‸ sheh che-o teh‸ k'oˆ piˇ ve yoˬ. Oˇ htaˇ, yawˇ la‸ sheh che leh na-e la ve yoˬ. 6 Hk'e te leh, Hpaˍriˍsehˇ hui tawˆ k'ai leh, Yeˍsuˆ hta‸ hk'aˬ hk'e te leh g'a tiˇ pehˍ tuˬ, teˇ cawˬ haˉ Heˍroˆ ve chaw teˇ hpaˍ geh ca jehˬ da‸ ve yoˬ. 7 Yeˍsuˆ yawˇ ve awˬ la‸ g'awˇ hui geh g'uiˬ po hpawˇ lo k'aw‸ k'ai leh, Gaˍliˍlehˇ mvuhˇ miˬ hk'aw chehˇ ve chaw awˬ moˍ lonˉ yawˇ awˬ hk'aˇ suh g'a‸ ve yoˬ. 8 Chi hk'oˆ ka‸, Yuˇda‸ mvuhˇ miˬ, Yeˍruˆsaˍlehnˍ venˇ, Iˇduˇmehˇ mvuhˇ miˬ, Yawˇdanˍ g'uiˬ ma coˇ paˉ leh, Tuˇruˆ venˇ leh Siˉdonˍ venˇ lo chehˇ ve chaw hui lehˬ, yawˇ te ve kanˉ teˇ hpaˍ awˬ lawn g'a kaˇ ve pa taw, awˬ moˍ lonˉ te leh yawˇ geh laˬ ve yoˬ. 9 Chaw awˬ moˍ lonˉ yawˇ hta‸ maˇ g'a buiˆ tuˬ, Haw lo‸ k'oˍ ehˉ teˇ maˬ hta‸ gu taˍ-o‸ teh‸, awˬ la‸ g'awˇ hui hta‸ yawˇ k'oˆ piˇ ve yoˬ. 10 Awˬ lawn k'o, chaw naˬ maˇ maˇ hta‸ yawˇ gu na-e piˇ ve pa taw, naˬ ve gawˬ ve chaw hui hk'a peu-eˬ yawˇ hta‸ g'a htawˇ tuˬ, yawˇ geh g'aˇ hte‸ buiˆ lo‸ la chehˇ ve yoˬ. 11 Neˇ cha‸ chiˆ teˇ hpaˍ htawˇ, yawˇ hta‸ g'a mawˬ ve teˇ yanˇ, yawˇ mehˆ g'uˇ suhˍ boˆ sheˬ leh, Nawˬ lehˬ G'uiˬ sha ve Yaˇ hpu yoˬ teh‸ kuˬ ve yoˬ. 12 Yawˇ ve awˬ lawn shu hta‸ maˇ g'a shiˍ piˇ tuˬ, Yeˍsuˆ yawˇ hui hta‸ tawˇ hehnˇ chaweh piˇ ve yoˬ. 13 Peuˬ hk'aw‸ nawˉ, Yeˍsuˆ hk'aw pui hk'oˆ lo taˆ-e ve yoˬ. Yawˇ nyi ma cawˇ ve chaw teˇ hpaˍ hta‸ kuˬ yuˬ leh, yawˇ hui yawˇ geh k'ai ve yoˬ. 14 Yawˇ hui awˬ hk'aw lo, yawˇ geh chehˇ tcuh tuˬ, yawˇ hui hta‸ ha lehˬ ve bon hkawˇ ca maˍ tcuh tuˬ, 15 neˇ teˇ hpaˍ hta‸ g'a‸ k'oˬ hpeh‸ ve kanˇ paˆ piˇ tuˬ, Yeˍsuˆ chaw teˇ chi nyiˇ g'aˇ hta‸ leuˆ yuˬ ve yoˬ. 16 Chaw oˇ ve teˇ hpaˍ lehˬ, awˬ meh awˬ suhˉ Peˍtruˆ teh‸ k'oˆ ve Siˉmonˍ, 17 Zeˍbeˍdehˇ ve awˬ yaˇ paˍ Yaˍkoˆ, Yaˍkoˆ ve awˬ nyi paˍYoˇhanˬ, (yawˇ huiˉ maˬ hta‸ awˬ meh awˬ suhˉ Bawˇneˍgehˆ meh piˇ ve, tcuhˉ kuiˬ lehˬ, mvuhˇ tawˍ yaˇ teh‸ k'oˆ gaˇ ve yoˬ), 18 Anˍdrehˍ, Hpiˇliˇpuˆ, Baˍhtawˇlaˬmehˇ, Ma‸htehˍ, Htoˉma‸, Aˍlaˍhpehˇ ve awˬ yaˇ paˍ Yaˍkoˆ, Htaˍdehˇ, Hkaˍnaˍniˆ awˬ moˍ hta‸ caˉ da‸ ve chaw Siˉmonˍ leh, 19 Yeˍsuˆ hta‸ chiˇ a‸ piˇ shehˍ hpaˇ Yuˇda‸ Iˉsaˍkaˍriˍoˆ hui yoˬ. 20 Oˇ htaˇ, yawˇ yehˬ hk'aw lo‸-e ve yoˬ. Chaw awˬ moˍ lonˉ teˇ pawˆ k'aw‸ hpawnˬ la ve pa taw, yawˇ hui awˍ ka‸ caˇ maˇ tanˇ ve yoˬ. 21 Awˬ lawn oˇ ve hta‸ yawˇ ve awˬ ceuˬ awˬ hk'aˇ teˇ hpaˍ g'a kaˇ htaˇ, Yawˇ g'uˇ k'ai peuˬ teh‸ yawˇ hui k'oˆ leh, yawˇ hta‸ ca hpeh k'ai ve yoˬ. 22 Yeˍruˆsaˍlehnˍ venˇ lo ya‸ la ve li‸ bvuh‸ paˍ teˇ hpaˍ k'oˆ ve, Yawˇ lehˬ Beˍsaˍbuˇlaˆ geh taˍ ve chaw hpeh‸ ve yoˬ. Neˇ jawˇ mawˇ hta‸ g'aˇ va leh neˇ teˇ hpaˍ hta‸ yawˇ g'a‸ k'oˬ ve yoˬ teh‸ yawˇ hui k'oˆ ve yoˬ. 23 Yawˇ yawˇ hui hta‸ kuˬ leh, tawˇ pa haˉ te maˍ leh k'oˆ ve, Saˍtanˍ lehˬ Saˍtanˍ hta‸ hk'aˬ hk'e te g'a‸ k'oˬ hpeh‸ tuˬ le. 24 Mvuhˇ miˬ teˇ peˆ, yawˇ hk'aˇ yawˇ maˇ cawˇ maˇ hawˍ da‸ ve k'o, mvuhˇ miˬ oˇ ve yeˬ maˇ hpeh‸. 25 Yehˬ teˇ yehˬ htawˇ, yawˇ hk'aˇ yawˇ maˇ cawˇ maˇ hawˍ da‸ ve k'o, yehˬ oˇ ve yeˬ maˇ hpeh‸. 26 Saˍtanˍ yawˇ awˬ to hta‸ yawˇ k'aw‸ hpfuhˆ leh hpaˆ da‸ ve k'o, yawˇ htawˇ yeˬ maˇ hpeh‸. Yawˇ luˬ k'ai sheˆ k'ai tu yoˬ. 27 Awˬ g'aˇ uiˍ ve chaw hta‸ awˉ lawˉ maˇ hpeh tiˍ taˍ k'o, a shu htawˇ yawˇ ve yehˬ awˬ hk'aw lo‸-e leh yawˇ ve mawˇ jeˬ hta‸ hiˉ yuˬ maˇ hpeh‸. Awˬ g'aˇ uiˍ ve chaw hta‸ hpeh tiˍ taˍ peuˬ htaˇ heh‸, yawˇ ve aˉ hk'aw lo lo‸-e leh mawˇ jeˬ hta‸ hiˉ yuˬ g'a tuˬ yoˬ. 28 Ngaˬ nawˬ hui hta‸ awˬ tehˬ awˬ na k'oˆ laˇ ve, chaw yaˇ hui te ve venˇ baˆ hk'a peu-eˬ leh G'uiˬ sha hta‸ maˇ shawˍ maˇ caˆ hk'a k'oˆ hk'a yaw ve hk'a peu-eˬ hta‸ hpehˇ piˇ tuˬ yoˬ. 29 Ya‸ hk'aˇ, da‸ ve kehˬ ve Awˬ ha hpu hta‸ maˇ shawˍ maˇ caˆ k'oˆ ve chaw hk'aˬ ve teˇ g'aˇ hta‸ maˇ k'oˆ, hk'aˬ htaˆ ka‸ venˇ baˆ maˇ hpehˇ piˇ taˬ. Yawˇ co co taiˍ taiˍ venˇ baˆ cawˬ taˍ ve chaw hpeh‸ ve yoˬ teh‸ Yeˍsuˆ k'oˆ piˇ ve yoˬ. 30 Yawˇ neˇ cha‸ chiˆ cawˬ ve teh‸ yawˇ hui k'oˆ ve pa taw, Yeˍsuˆ chi hk'e k'oˆ ve yoˬ. 31 Oˇ htaˇ, Yeˍsuˆ ve awˬ e leh awˬ nyi paˍ teˇ hpaˍ laˬ ve yoˬ. Yawˇ hui awˬ baˬ hpawˇ huˉ taˍ leh Yeˍsuˆ hta‸ ca ku‸ tcuh ve yoˬ. 32 Chaw awˬ moˍ lonˉ yawˇ hta‸ hk'a caw zuhˇ mui chehˇ ve yoˬ. Yawˇ hui yawˇ hta‸ k'oˆ piˇ ve, Nawˬ ve awˬ e leh nawˬ ve awˬ nyi paˍ teˇ hpaˍ nawˬ hta‸ ca leh awˬ baˬ hpawˇ lo chehˇ taˍ ve yoˬ teh‸ k'oˆ piˇ ve yoˬ. 33 Yeˍsuˆ k'aw‸ k'oˆ ve, Ngaˬ ve awˬ e leh ngaˬ ve awˬ nyi paˍ teˇ hpaˍ a shu le teh‸ na nyi ve yoˬ. 34 Hk'a caw zuhˇ mui chehˇ ve chaw hui hta‸ yawˇ caw nyi leh k'oˆ ve, Ngaˬ ve awˬ e leh ngaˬ ve awˬ nyi paˍ teˇ hpaˍ hta‸ nyi loˬ. 35 G'uiˬ sha ve a loˍ hta‸ hk'a te ve chaw lehˬ, ngaˬ ve awˬ nyi paˍ awˬ nyi ma leh ngaˬ ve awˬ e hpeh‸ ve yoˬ teh‸, Yeˍsuˆ k'oˆ piˇ ve yoˬ.

Maˍkuˆ 4

1 Teˇ pawˆ g'uiˬ po paˇ lo Yeˍsuˆ k'aw‸ maˍ piˇ chehˇ htaˇ, chaw awˬ moˍ lonˉ yawˇ geh hpawnˬ la ve pa taw, g'uiˬ po hk'aw cawˬ ve haw lo‸ k'oˍ hk'aw yawˇ ca lo‸ mui ve yoˬ. Chaw awˬ moˍ lonˉ hk'a peu-eˬ lehˬ, g'uiˬ pfuhˍ paˇ lo chehˇ taˍ ve yoˬ. 2 Oˇ htaˇ, yawˇ tawˇ pa haˉ te leh, awˬ lawn laiˉ ceuˬ maˍ piˇ ve yoˬ. Yawˇ maˍ piˇ ve awˬ hk'aw lo chi hk'e k'oˆ ve, 3 Na sheˍ. Awˬ yawˇ sheˍ paˍ teˇ g'aˇ awˬ yawˇ ca sheˍ ve yoˬ. 4 Yawˇ sheˍ ve teˇ yanˇ, awˬ yawˇ teˇ hpaˍ hpaˍ ya‸ k'aw hpuiˇ lo ce leh, ngaˆ teˇ hpaˍ g'awˆ caˇ sheˬ ve yoˬ. 5 Awˬ yawˇ teˇ hpaˍ hpaˍ miˬ shaˍ paˇ kuiˬ haˉ pui de lo ce leh, miˬ shaˍ maˇ naˉ ve pa taw, teˇ cawˬ haˉ yeˬ la ve yoˬ. 6 Ya‸ hk'aˇ, awˬ yeˬ oˇ ve awˬ geu maˇ naw‸ ve pa taw, mvuhˇ nyi tawˆ la htaˇ, haw jaˇ chiˆ jaˇ leh nawˍ k'ai goˇ k'ai ve yoˬ. 7 Awˬ yawˇ teˇ hpaˍ hpaˍ aˉ chuˇ de lo ce ve yoˬ. Aˉ chuˇ buiˇ uiˍ la leh awˬ yeˬ hta‸ hoˆ ve pa taw, awˬ shiˍ maˇ naw‸. 8 Peuˬ leh awˬ yawˇ teˇ hpaˍ hpaˍ miˬ hkuiˇ da‸ kuiˬ lo ce ve yoˬ. Awˬ yeˬ yeˬ la uiˍ la leh, awˬ shiˍ maˇ maˇ naw‸ la ve yoˬ. Awˬ shiˍ shehˆ chi pun, hkaw‸ chi pun leh teˇ ha pun naw‸ maˇ la ve yoˬ. 9 Kaˇ tuˬ naˍ paw cawˬ ve chaw hui hk'a deh‸ na-o teh‸ yawˇ k'oˆ ve yoˬ. 10 Awˬ hk'aw‸ nawˉ shu maˇ chehˇ ve teˇ yanˇ, yawˇ awˬ hk'aˇ suh k'ai ve chaw leh tcuh yaˇ teˇ chi nyiˇ g'aˇ, yawˇ hta‸ tawˇ pa haˉ teˇ hpaˍ awˬ lawn ca na nyi la ve yoˬ. 11 Yeˍsuˆ yawˇ hui hta‸ k'oˆ piˇ ve, G'uiˬ sha ve mvuhˇ miˬ awˬ lawn faˉ taˍ ve awˬ ceuˬ teˇ hpaˍ hta‸ nawˬ hui shiˍ hpeh‸ ve yoˬ. Ya‸ hk'aˇ, awˬ baˬ hpawˇ chehˇ ve chaw hui hta‸ lehˬ, hk'a peu-eˬ tawˇ pa haˉ tiˉ g'a te maˍ piˇ ve yoˬ. 12 Aˬ hto‸ ma pa taw le teh‸ k'oˆ k'o, Yawˇ hui nyi ve ka‸ nyi maˇ mawˬ. Yawˇ hui kaˇ ve ka‸ na maˇ g'a. Chi hk'e maˇ heˆ k'o, yawˇ hui k'aw‸ hpfuhˆ k'aw‸ la leh yawˇ hui ve venˇ baˆ hpehˇ hk'a tuˬ yoˬ teh‸ k'oˆ ve yoˬ. 13 Yeˍsuˆ yawˇ hui hta‸ k'aw‸ k'oˆ piˇ ve, Tawˇ pa haˉ chi ve hta‸ nawˬ hui na maˇ g'a leh laˇ. Na maˇ g'a ve k'o, tawˇ pa haˉ hk'a peu-eˬ hta‸ hk'aˬ hk'e te na g'a tuˬ le. 14 Awˬ yawˇ sheˍ paˍ lehˬ, bon hkawˇ hta‸ sheˍ ve yoˬ. 15 Ya‸ k'aw hpuiˇ lo bon hkawˇ sheˍ ve awˬ lawn lehˬ, bon hkawˇ hta‸ kaˇ htaˇ teˇ cawˬ haˉ Saˍtanˍ laˬ leh, yawˇ hui awˬ hk'aw lo sheˍ taˍ ve bon hkawˇ hta‸ yuˬ tawˆ ve hta‸ k'oˆ ve yoˬ. 16 Haˉ pui de lo sheˍ ve awˬ lawn lehˬ, bon hkawˇ hta‸ g'a kaˇ leh, teˇ cawˬ haˉ ha lehˬ ha k'a ha‸ yuˬ ve hta‸ k'oˆ ve yoˬ. 17 Ya‸ hk'aˇ, yawˇ hui awˬ geu maˇ naw‸ ve hta‸ pa taw, teˇ tcuhˉ teˇ jaw ceh tiˉ te‸ ve yoˬ. Awˬ hk'aw‸ nawˉ bon hkawˇ hta‸ pa taw dawˇ haˍ gaˇ haˍ leh fawˉ ve mehˍ ve hta‸ g'a hpuˇ da‸ htaˇ, teˇ cawˬ haˉ yawˇ hui luˬ k'ai ve yoˬ. 18 Aˉ chuˇ de lo sheˍ ve awˬ lawn lehˬ, yawˇ hui bon hkawˇ hta‸ kaˇ ve htawˇ, 19 chi miˬ guiˬ dawˇ haˍ tuˬ teˇ hpaˍ, hpu shi mawˇ jeˬ hta‸ ha lehˬ ve teˇ hpaˍ leh, awˬ kaˍ awˬ nu awˬ ceuˬ teˇ hpaˍ hta‸ sheˉ lai ve teˇ hpaˍ lehˬ, bon hkawˇ hta‸ hoˆ taˍ ve pa taw, awˬ shiˍ naw‸ la maˇ hpeh‸ ve hta‸ k'oˆ ve yoˬ. 20 Miˬ hkuiˇ da‸ kuiˬ lo sheˍ ve awˬ lawn lehˬ, bon hkawˇ hta‸ kaˇ leh ha‸ yuˬ ve pa taw, awˬ shiˍ shehˆ chi pun, hkaw‸ chi pun, teˇ ha pun naw‸ la ve chaw hta‸ k'oˆ ve yoˬ teh‸ k'oˆ piˇ ve yoˬ. 21 Peuˬ leh Yeˍsuˆ yawˇ hui hta‸ k'oˆ piˇ ve, Kawˆ faiˇ tuˉ leh hk'awˍ lawˇ tcuhˍ mvuh‸ taˍ tuˬ laˇ. Maˇ heˆ k'o, ku-iˍ hawˉ teh taˍ tuˬ laˇ. Kawˆ faiˇ taˍ kuiˬ awˬ hk'oˆ lo teh taˍ tuˬ maˇ heˆ laˇ. 22 Awˬ lawn k'o, hk'a faˉ taˍ ve awˬ ceuˬ teˇ hpaˍ hk'a tawˍ lehˆ tawˆ la tuˬ yoˬ. Shu hta‸ maˇ shiˍ tcuh ve awˬ ceuˬ teˇ hpaˍ htawˇ, awˬ g'euˆ ba kuiˬ lo tawˆ la tuˬ yoˬ. 23 Kaˇ tuˬ naˍ paw cawˬ ve chaw a shu htawˇ maˇ k'oˆ, hk'a deh‸ na-o. 24 Peuˬ leh, yawˇ yawˇ hui hta‸ k'oˆ piˇ ve, Nawˬ hui hk'a g'a kaˇ ve teˇ hpaˍ hta‸ shaˍ ti‸ taˍ-o‸. Nawˬ hui kawˬ piˇ ve hk'a shuˍ shuˍ, shu nawˬ hui hta‸ k'aw‸ kawˬ laˇ tuˬ ve awˬ hk'oˆ, awˬ leuˉ ka‸ k'aw‸ htehˍ laˇ tuˬ yoˬ. 25 Awˬ lawn k'o, cawˬ ve chaw hta‸ k'aw‸ htehˍ piˇ tuˬ yoˬ. Maˇ cawˬ ve chaw geh, yawˇ hk'a cawˬ ve teˇ hpaˍ hta‸ k'aw‸ yuˬ tawˆ sheˬ tuˬ yoˬ teh‸ k'oˆ piˇ ve yoˬ. 26 Yeˍsuˆ teˇ pawˆ k'aw‸ k'oˆ ve, G'uiˬ sha ve mvuhˇ miˬ lehˬ, chaw teˇ g'aˇ heh hk'aw lo awˬ yawˇ sheˍ ve hta‸ shuˍ ve yoˬ. 27 Yawˇ mvuhˇ hpeu‸ zuh‸ leh mvuhˇ shawˉ tu la ve yoˬ. Awˬ yawˇ oˇ ve hk'aˬ hk'e te yeˬ la uiˍ la ve hta‸ yawˇ maˇ shiˍ. 28 Miˬ guiˬ yawˇ hk'aˇ yawˇ awˬ shiˍ naw‸ la piˇ ve yoˬ. Awˉ lawˉ awˬ yeˬ yeˬ la leh, awˬ hk'aw‸ nawˉ awˬ nu, awˬ hk'aw‸ nawˉ awˬ nu awˬ hk'aw lo awˬ shiˍ naw‸ la maˬ la ve yoˬ. 29 Meh la leh g'eu‸ ve awˬ yanˇ gaˬ la ve pa taw, awˬ shehˍ hpaˇ teˇ cawˬ haˉ law‸ k'awˉ yuˬ leh g'eu‸ ve yoˬ teh‸ Yeˍsuˆ k'oˆ ve yoˬ. 30 Peuˬ leh yawˇ k'oˆ ve, G'uiˬ sha ve mvuhˇ miˬ hta‸ aˬ hto‸ ma yuˬ leh tehˆ da‸ nyi tuˬ le. Tawˇ pa haˉ hk'aˬ ve teˇ ceuˬ yehˇ leh tehˆ maˍ tuˬ le. 31 G'uiˬ sha ve mvuhˇ miˬ lehˬ, g'awˇ caˉ yawˇ hta‸ shuˍ ve yoˬ. Awˬ yawˇ oˇ ve hta‸ heh hk'aw lo sheˍ ve teˇ yanˇ, miˬ guiˬ hk'oˆ hk'a cawˬ ve awˬ yawˇ hk'a peu-eˬ a‸ kehˉ i ve htawˇ, 32 sheˍ peuˬ hk'aw‸ nawˉ awˬ yeˬ yeˬ la uiˍ la leh, g'awˇ hpa‸ mvuhˬ naweh hk'a peu-eˬ a‸ kehˉ uiˍ ve yoˬ. Awˬ k'aˉ teˇ hpaˍ uiˍ la leh, mvuhˇ hpe lo poˬ ve ngaˆ teˇ hpaˍ aˉ g'uiˬ ha baˬ kuiˬ lo g'aˇ jehˇ hpeh‸ ve yoˬ teh‸ Yeˍsuˆ k'oˆ ve yoˬ. 33 Yawˇ hui na g'a puiˉ ve hk'e ceh, chi hk'e ve tawˇ pa haˉ maˇ maˇ Yeˍsuˆ yawˇ hui hta‸ bon hkawˇ maˍ piˇ ve yoˬ. 34 Tawˇ pa haˉ maˇ yehˇ k'o, yawˇ yawˇ hui hta‸ maˇ maˍ piˇ. Ya‸ hk'aˇ, yawˇ ve awˬ la‸ g'awˇ hui ceh tiˉ chehˇ ve teˇ yanˇ, yawˇ yawˇ hui hta‸ awˬ lawn chi teˇ hpaˍ hk'a peu-eˬ hk'a deh‸ k'aoˍ maˍ piˇ ve yoˬ. 35 Oˇ teˇ nyi mvuhˇ hpeu‸ la htaˇ, Coˇ paˉ hpawˇ lo hkanˍ k'ai-a veuˬ teh‸, Yeˍsuˆ yawˇ hui hta‸ k'oˆ piˇ ve yoˬ. 36 Hk'e te leh chaw awˬ moˍ lonˉ hta‸ yawˇ hui hpaˆ da‸ taˉ leh, Yeˍsuˆ chehˇ taˍ ve hk'e haw lo‸ k'oˍ hk'aw yawˇ hui yawˇ hta‸ shiˍ k'ai ve yoˬ. Awˬ kaˍ awˬ nu haw lo‸ k'oˍ teˇ hpaˍ ka‸ yawˇ hui geh k'ai ve yoˬ. 37 Oˇ htaˇ, mvuhˇ haw lonˉ meuˆ la leh, g'uiˬ baˇ teˇ hpaˍ haw lo‸ k'oˍ hta‸ htinˍ lo‸ la ve pa taw, haw lo‸ k'oˍ awˬ hk'aw lo iˉ kaˆ biˇ la chehˇ ve yoˬ. 38 Yeˍsuˆ lehˬ haw lo‸ k'oˍ awˬ mehˍ hpawˇ lo uˉ gehˇ tcuhˉ leh, zuh‸ muiˉ k'a chehˇ ve yoˬ. Hk'e te leh, awˬ la‸ g'awˇ teˇ hpaˍ yawˇ hta‸ ca nawˍ piˇ leh, Saˍ la‸-oˬ, ngaˬ hui luˬ k'ai tuˬ ve hta‸ nawˬ a ciˉ ka‸ maˇ dawˇ nyi leh laˇ teh‸ k'oˆ piˇ ve yoˬ. 39 Yeˍsuˆ tu la leh mvuhˇ haw hta‸ deˇ piˇ leh, g'uiˬ po hta‸, Ta‸ iˉ gawˬ lehˍ chehˇ-oˆ teh‸ k'oˆ piˇ ve yoˬ. Mvuhˇ haw dehˬ k'ai leh, ta‸ iˉ gawˬ lehˍ chehˇ sheˬ ve yoˬ. 40 Oˇ htaˇ Yeˍsuˆ k'oˆ ve, Nawˬ hui aˬ hto‸ ma pa taw kawˆ ve le. Nawˬ hui yonˍ ve nyi ma maˇ cawˬ leh laˇ teh‸, yawˇ hui hta‸ na nyi ve yoˬ. 41 Yawˇ hui kawˆ jaˇ leh, teˇ g'aˇ leh teˇ g'aˇ k'oˆ da‸ ve, Chi hpaˇ a shu le. Mvuhˇ haw leh g'uiˬ po yawˇ ve hkawˇ hta‸ na yuˬ ve law teh‸ k'oˆ da‸ ve yoˬ.

Maˍkuˆ 5

1 Hk'e te leh, g'uiˬ po coˇ paˉ, Gaˍdaˍ raˆ mvuhˇ miˬ lo yawˇ hui gaˬ ve yoˬ. 2 Yeˍsuˆ haw lo‸ k'oˍ awˬ hk'aw lo tawˆ la htaˇ, neˇ cha‸ chiˆ geh ve chaw teˇ g'aˇ lehˬ, teˇ cawˬ haˉ chaw tuˍ hpfuh lo tawˆ la leh yawˇ hta‸ ca ha‸ la ve yoˬ. 3 Chaw oˇ ve lehˬ, chaw tuˍ hpfuh teˇ hpaˍ cawˬ kuiˬ lo tiˉ chehˇ taˍ ve yoˬ. Chaw teˇ g'aˇ ka‸ yawˇ hta‸ hpeh tiˍ taˍ maˇ g'a. Sho caˆ yuˬ leh hpeh tiˍ taˍ ve ka‸ maˇ g'a. 4 Awˬ lawn k'o, laiˉ pawˆ shu yawˇ hta‸ sho kawˬ sho caˆ yuˬ hpeh tiˍ taˍ htawˇ, yawˇ sho caˆ hta‸ g'awˬ cheˆ leh, sho kawˬ hta‸ awˉ hteh ve yoˬ. Chaw teˇ g'aˇ ka‸ yawˇ hta‸ meuˇ la tuˬ te maˇ g'a. 5 Tuˍ hpfuh teˇ hpaˍ lo maˇ k'oˆ, hk'aw pui hk'oˆ lo maˇ k'oˆ, mvuhˇ law‸ k'aw mvuhˇ hpeu‸ hk'aˬ htaˆ ka‸ yawˇ kuˬ chehˇ ve yoˬ. Yawˇ awˬ to hta‸ ka‸, haˉ pui shiˍ yuˬ leh gui htu-iˍ chehˇ ve yoˬ. 6 Yeˍsuˆ vuiˇ kuiˬ lo laˬ chehˇ ve hta‸ chaw oˇ ve g'a mawˬ htaˇ, yawˇ geh g'uiˇ laˬ leh yawˇ hta‸ oˉ k'oˍ pui ve yoˬ. 7 Yawˇ awˬ hkawˇ bvuhˬ chaweh kuˬ leh k'oˆ ve, Mvuh jaˇ ve G'uiˬ sha ve Yaˇ hpu Yeˍsuˆ-oˬ, nawˬ ngaˬ hta‸ hk'aˬ hk'e caˉ da‸ le. Nawˬ ngaˬ hta‸ maˇ g'a fawˉ mehˍ tuˬ, G'uiˬ sha mehˆ g'uˇ suhˍ ngaˬ nawˬ hta‸ lawˬ hkawˉ ve yoˬ teh‸ k'oˆ piˇ ve yoˬ. 8 Awˬ lawn k'o, Neˇ cha‸ chiˆ-oˬ, yawˇ awˬ hk'aw lo tawˆ k'ai-o teh‸, Yeˍsuˆ yawˇ hta‸ k'oˆ piˇ ve hta‸ pa taw yoˬ. 9 Nawˬ aˬ hto‸ ma meh le teh‸, Yeˍsuˆ yawˇ hta‸ na nyi htaˇ, Ngaˬ hui maˇ jaˇ ve pa taw, ngaˬ ve awˬ meh lehˬ Leˍjonˍ yoˬ teh‸, yawˇ Yeˍsuˆ hta‸ k'aw‸ k'oˆ piˇ ve yoˬ. 10 Mvuhˇ miˬ oˇ ve awˬ hk'aw lo yawˇ hui hta‸ maˇ g'a g'a‸ tawˆ tuˬ, yawˇ Yeˍsuˆ hta‸ g'aˇ hte‸ lawˬ hkawˉ ve yoˬ. 11 Hk'aw oˇ ve awˬ ba‸ le lo, va‸ moˍ lonˉ k'aˆ caˇ chehˇ ve yoˬ. 12 Hk'e te leh, neˇ teˇ hpaˍ yawˇ hta‸ lawˬ hkawˉ ve, Va‸ oˇ ve teˇ hpaˍ awˬ hk'aw lo ngaˬ hui g'a lo‸-e tuˬ, ngaˬ hui hta‸ k'ai tcuh laˇ-oˆ teh‸ k'oˆ piˇ ve yoˬ. 13 Oˇ htaˇ, Yeˍsuˆ yawˇ hui hta‸ k'ai tcuh ve yoˬ. Neˇ cha‸ chiˆ teˇ hpaˍ tawˆ k'ai leh va‸ oˇ ve teˇ hpaˍ awˬ hk'aw lo lo‸-e ve yoˬ. Va‸ awˬ moˍ lonˉ lehˬ, miˬ haˍ kuiˬ lo g'aˇ hte‸ g'uiˇ ya‸-e leh, g'uiˬ po hk'aw lo lo‸-e leh k'a suh peuˬ sheˬ ve yoˬ. Va‸ oˇ ve teˇ hpaˍ, aˬ laˬ hk'e nyiˇ hinˉ hkeh cawˬ ve yoˬ. 14 Va‸ hawˉ paˍ teˇ hpaˍ g'uiˇ k'o‸-e leh, awˬ lawn oˇ ve hta‸ venˇ hk'aˆ teˇ hpaˍ awˬ hk'aw lo ca hto piˇ ve yoˬ. Hk'e te leh, hk'aˬ hk'e hpeh‸ la ve awˬ lawn hta‸ g'a shiˍ tuˬ, chaw teˇ hpaˍ ca nyi la ve yoˬ. 15 Yawˇ hui Yeˍsuˆ geh gaˬ la htaˇ, neˇ cha‸ chiˆ Leˍjonˍ geh ve chaw teˇ g'aˇ veu‸ k'aˇ veu‸ deh leh mui chehˇ ve hta‸ yawˇ hui g'a mawˬ ve yoˬ. Yawˇ ve nyi ma awˉ lawˉ htaˇ hk'a shuˍ shuˍ k'aw‸ da‸ la ve hta‸ htawˇ yawˇ hui g'a mawˬ leh kawˆ jaˇ ve yoˬ. 16 G'a mawˬ taˍ ve chaw teˇ hpaˍ lehˬ, neˇ geh ve chaw awˬ lawn leh va‸ teˇ hpaˍ hk'aˬ hk'e hpeh‸ la ve awˬ lawn, ca nyi la ve chaw hui hta‸ k'aoˍ maˍ piˇ ve yoˬ. 17 Hk'e te leh, yawˇ hui ve mvuhˇ miˬ teˇ tawn awˬ hk'aw lo tawˆ k'ai tuˬ, yawˇ hui Yeˍsuˆ hta‸ lawˬ hkawˉ ve yoˬ. 18 Yeˍsuˆ haw lo‸ k'oˍ awˬ hk'aw lo lo‸-e ve teˇ yanˇ, neˇ cha‸ chiˆ geh jaw ve chaw chi teˇ g'aˇ lehˬ, yawˇ geh chehˇ tuˬ lawˬ hkawˉ ve yoˬ. 19 Yeˍsuˆ yawˇ hta‸ maˇ chehˇ tcuh. Ya‸ hk'aˇ yawˇ hta‸ k'oˆ piˇ ve, Nawˬ aˉ hk'aw k'o‸-e leh, Jawˇ mawˇ G'ui sha nawˬ hta‸ hk'aˬ ma ga laˇ leh ha k'aˉ laˇ ve awˬ lawn, nawˬ ve awˬ ceuˬ awˬ hk'aˇ teˇ hpaˍ hta‸ ca k'aoˍ maˍ piˇ-oˆ teh‸ k'oˆ piˇ ve yoˬ. 20 Hk'e te leh yawˇ tawˆ k'ai leh, Yeˍsuˆ yawˇ hta‸ hk'aˬ ma ga laˇ peuˬ ve awˬ lawn, Deˍkaˍpawˇliˆ mvuhˇ miˬ awˬ hk'aw lo yawˇ g'aˇ hte‸ ca k'aoˍ maˍ piˇ ve pa taw, chaw hk'a peu-eˬ anˇ jaˇ ve yoˬ. 21 Yeˍsuˆ haw lo‸ k'oˍ ciˇ leh g'uiˬ po coˇ paˉ lo k'aw‸ hkanˍ k'ai ve yoˬ. Yawˇ g'uiˬ po paˇ chehˇ taˍ htaˇ, chaw awˬ moˍ lonˉ yawˇ geh hpawnˬ la ve yoˬ. 22 Oˇ htaˇ, Yaˍiˉruˆ meh ve bon yehˬ awˬ hoˉ te ve teˇ g'aˇ laˬ leh Yeˍsuˆ hta‸ mawˬ htaˇ, yawˇ ve hkui paˇ lo boˆ sheˬ ve yoˬ. 23 Yawˇ Yeˍsuˆ hta‸ k'oˆ piˇ ve, Ngaˬ ve yaˇ miˇ ehˉ suh la paˇ neˇ ve yoˬ. Yawˇ na-e la leh a sha‸ g'a te‸ tuˬ, nawˬ laˬ leh yawˇ awˬ hk'oˆ hta‸ la‸ sheh a ciˉ ca taˍ piˇ la-o teh‸, g'aˇ hte‸ lawˬ hkawˉ ve yoˬ. 24 Hk'e te leh, yawˇ Yaˍiˉruˆ geh k'ai ve yoˬ. Chaw awˬ moˍ lonˉ yawˇ hk'aˇ suh k'ai leh, yawˇ hta‸ buiˆ heuˆ ca‸ heuˆ chehˇ ve yoˬ. 25 Teˇ chi nyiˇ hk'aw‸ hk'a gaˬ awˬ suhˍ ya‸ la chehˇ ve yaˇ miˇ teˇ g'aˇ cawˬ ve yoˬ. 26 Naˆ tsuhˇ shehˍ hpaˇ laiˉ g'aˇ ve la‸ sheh awˬ hk'aw lo yawˇ laiˉ ceuˬ g'a hkanˍ jaˇ peuˬ. Yawˇ hk'a cawˬ ve hk'a peu-eˬ hta‸ yehˇ peuˬ htawˇ, yawˇ a ciˉ ka‸ maˇ na-e la ve awˬ hk'oˆ, a naˍ oˇ ve shaˬ te shaˬ k'aw‸ jaˇ la ve yoˬ. 27 Yawˇ Yeˍsuˆ awˬ lawn g'a kaˇ jaw ve yoˬ. Hk'e te leh, chaw awˬ moˍ lonˉ awˬ hk'aw lo yawˇ Yeˍsuˆ awˬ hk'aw‸ nawˉ hpawˇ lo laˬ leh, yawˇ ve veu‸ k'aˇ hta‸ ca htawˇ ve yoˬ. 28 Awˬ lawn k'o, Yawˇ ve veu‸ k'aˇ hta‸ ceh ngaˬ g'a htawˇ ve k'o, ngaˬ na-e la tuˬ yoˬ teh‸ yawˇ k'oˆ ve yoˬ. 29 Oˇ htaˇ, yawˇ awˬ suhˍ ya‸ la ve teˇ cawˬ haˉ cheh sheˬ leh, yawˇ na-e la peuˬ ve hta‸ yawˇ awˬ to shiˍ ve yoˬ. 30 Yeˍsuˆ yawˇ ve awˬ to awˬ hk'aw lo kanˇ paˆ tawˆ k'ai ve hta‸ teˇ cawˬ haˉ g'a shiˍ ve pa taw, chaw awˬ moˍ lonˉ hta‸ yawˇ hpfuhˆ nyi leh, Ngaˬ ve veu‸ k'aˇ hta‸ a shu htawˇ ve le teh‸ na nyi ve yoˬ. 31 Yawˇ ve awˬ la‸ g'awˇ teˇ hpaˍ lehˬ, Chaw awˬ moˍ lonˉ nawˬ hta‸ buiˆ heuˆ ca‸ heuˆ chehˇ ve hta‸ nawˬ mawˬ chehˇ ve ka‸, Ngaˬ hta‸ a shu htawˇ ve le teh‸ na nyi ve laˇ teh‸, Yeˍsuˆ hta‸ k'aw‸ k'oˆ piˇ ve yoˬ. 32 Yawˇ hta‸ htawˇ laˇ ve chaw hta‸ g'a mawˬ tuˬ Yeˍsuˆ hk'a caw zuhˇ nyi chehˇ ve yoˬ. 33 Yaˇ miˇ oˇ ve lehˬ, yawˇ awˬ hk'aw lo hk'aˬ hk'e hpeh‸ la ve awˬ lawn hta‸ shiˍ ve pa taw, yawˇ kawˆ cheˇ chehˇ ve yoˬ. Yawˇ Yeˍsuˆ geh laˬ leh yawˇ mehˆ g'uˇ suhˍ boˆ sheˬ leh, awˬ lawn hk'a peu-eˬ yawˇ hta‸ hteˇ lehˍ hto piˇ ve yoˬ. 34 Yeˍsuˆ yawˇ hta‸ k'oˆ piˇ ve, Yaˇ miˇ-oˬ, nawˬ yonˍ ve teˇ ceuˬ lehˬ, nawˬ hta‸ na-e la piˇ peuˬ. Dawˇ sha ve awˬ hk'aw lo k'o‸-e loˬ. Nawˬ hta‸ chehˇ sha la piˇ peuˬ teh‸ k'oˆ piˇ ve yoˬ. 35 Yawˇ oˇ hk'e k'oˆ chehˇ htaˇ, bon yehˬ awˬ hoˉ teˇ g'aˇ ve yehˬ lo laˬ ve chaw teˇ hpaˍ k'oˆ ve, Nawˬ ve yaˇ miˇ suh peuˬ. Aˬ hto‸ ma te Saˍ la‸ hta‸ k'aw‸ sho‸ sha‸ piˇ ve le. 36 Tawˇ hkawˇ oˇ ve hta‸ Yeˍsuˆ maˇ na leh, bon yehˬ awˬ hoˉ teˇ g'aˇ hta‸, Taˇ dawˇ haˍ. Yonˍ ve tiˇ te-o teh‸ k'oˆ piˇ ve yoˬ. 37 Peˍtruˆ, Yaˍkoˆ leh Yaˍkoˆ ve awˬ nyi paˍ Yoˇhanˬ, yawˇ hui shehˆ g'aˇ maˇ heˆ k'o, awˬ kaˍ awˬ nu chaw teˇ g'aˇ hta‸ ka‸ yawˇ awˬ hk'aˇ suh maˇ laˬ tcuh. 38 Yawˇ bon yehˬ awˬ hoˉ teˇ g'aˇ ve yehˬ lo gaˬ la htaˇ, shu duiˆ-ehˍ shaˇ-ehˍ te leh, g'aˇ hte‸ hawˬ leh paˆ hawˬ chehˇ ve hta‸ yawˇ g'a mawˬ ve yoˬ. 39 Yeˍsuˆ aˉ hk'aw lo‸-e leh, Nawˬ hui aˬ hto‸ ma te duiˆ-ehˍ shaˇ-ehˍ te leh hawˬ chehˇ ve le. Yaˇ ehˉ chi suh ve maˇ heˆ. Yawˇ zuh‸ muiˉ k'a chehˇ ve yoˬ teh‸ yawˇ hui hta‸ k'oˆ piˇ ve yoˬ. 40 Oˇ htaˇ, yawˇ hui Yeˍsuˆ hta‸ hpawnˬ g'uiˬ ve yoˬ. Yeˍsuˆ yawˇ hui hk'a peu-eˬ hta‸ g'a‸ tawˆ sheˬ leh, yaˇ ehˉ ve awˬ pa awˬ e leh yawˇ geh laˬ ve chaw teˇ hpaˍ hta‸ shiˍ veu leh, yaˇ ehˉ teh taˍ kuiˬ lo lo‸-e ve yoˬ. 41 Oˇ htaˇ, Yeˍsuˆ yaˇ miˇ ehˉ ve la‸ sheh hta‸ vawˆ leh k'oˆ ve, Taˍliˇtaˍkuˇmiˆ. Tawˇ oˇ ve tcuhˉ kui lehˬ, Yaˇ miˇ-oˬ, ngaˬ nawˬ hta‸ k'oˆ laˇ ve, tu la-o teh‸ k'oˆ ve yoˬ. 42 Oˇ htaˇ, yaˇ miˇ ehˉ oˇ ve teˇ cawˬ haˉ tu la leh, ya‸ k'aw toˇ k'ai ve yoˬ. Awˬ lawn k'o, yawˇ a sha‸ teˇ chi nyiˇ hk'aw‸ gaˬ peuˬ. Chaw oˇ ve teˇ hpaˍ dawˇ maˇ tawˆ leh anˇ jaˇ ve yoˬ. 43 Awˬ lawn oˇ ve hta‸ shu teˇ g'aˇ ka‸ maˇ g'a shiˍ tuˬ, Yeˍsuˆ yawˇ hui hta‸ g'aˇ hte‸ tawˇ piˇ peuˬ leh, Yaˇ miˇ ehˉ hta‸ caˇ tuˬ caˍ piˇ-oˆ teh‸, yawˇ hui hta‸ k'oˆ piˇ ve yoˬ.

Maˍkuˆ 6

1 Yeˍsuˆ oˇ kaˬ lo tawˆ k'ai leh yawˇ ve mvuhˇ miˬ lo k'aw‸ gaˬ la ve yoˬ. Yawˇ ve awˬ la‸ g'awˇ teˇ hpaˍ ka‸ yawˇ awˬ hk'aˇ suh k'ai ve yoˬ. 2 Shinˉ nyi gaˬ leh bon yehˬ awˬ hk'aw lo yawˇ maˍ piˇ ve yoˬ. G'a kaˇ ve chaw laiˉ g'aˇ anˇ jaˇ leh k'oˆ ve, Chaw chi hpaˇ lehˬ, chi hk'e ve awˬ ceuˬ teˇ hpaˍ hta‸ hk'aˬ lo g'a ve le. Yawˇ g'a ve cuˇ yiˍ lehˬ, hk'aˬ hk'e ve cuˇ yiˍ le. Chi taw taw kanˇ paˆ uiˍ ve kanˉ yawˇ la‸ hk'aw hk'aˬ hk'e te hpeh‸ la ve le. 3 Yawˇ lehˬ, Maˍriˆ ve yaˇ paˍ la‸ shaˉ maˉ hpeh‸ ve maˇ heˆ laˇ. Yaˍkoˆ, Yoˇseˍ, Yuˇda‸, Siˉmonˍ hui ve awˬ viˉ paˍ maˇ heˆ laˇ. Yawˇ awˬ nyi ma teˇ hpaˍ ka‸, ngaˬ hui geh chehˇ ve maˇ heˆ laˇ teh‸ k'oˆ leh, yawˇ hui yawˇ hta‸ nyi ma luˬ ve yoˬ. 4 Yeˍsuˆ yawˇ hui hta‸ k'oˆ piˇ ve, G'uiˬ sha ve tcuh kaˍ paˍ teˇ g'aˇ lehˬ, awˬ me‸ awˬ hponˇ cawˬ ve yoˬ. Ya‸ hk'aˇ, a shu yawˇ ve mvuhˇ miˬ, a shu yawˇ ve awˬ viˉ awˬ nyi leh, a shu yawˇ ve yehˬ awˬ hk'aw lo lehˬ, awˬ me‸ awˬ hponˇ maˇ cawˬ teh‸ k'oˆ ve yoˬ. 5 Chehˇ haˍ ve chaw teˇ hpaˍ hpaˍ awˬ hk'oˆ la‸ sheh taˍ leh gu na-e piˇ ve ceh tiˉ maˇ heˆ k'o, oˇ kaˬ lo kanˇ paˆ uiˍ ve kanˉ awˬ kaˍ awˬ nu ve hta‸ yawˇ te maˇ hpeh‸. 6 Yawˇ hui maˇ yonˍ puiˉ ve pa taw, yawˇ anˇ jaˇ ve yoˬ. Oˇ ve hk'aw‸ nawˉ, yawˇ teˇ hk'aˆ peuˬ teˇ hk'aˆ lo hk'a zuhˇ k'ai leh bon maˍ piˇ ve yoˬ. 7 Oˇ htaˇ, tcuh yaˇ teˇ chi nyiˇ g'aˇ hta‸ yawˇ kuˬ yuˬ leh, nyiˇ g'aˇ teˇ kaˬ nyiˇ g'aˇ teˇ kaˬ k'ai tcuh ve yoˬ. Neˇ cha‸ chiˆ teˇ hpaˍ hta‸ g'aˇ tuˬ, yawˇ hui hta‸ kanˇ paˆ piˇ ve yoˬ. 8 Juˇ fuiˍ teˇ taˬ maˇ heˆ k'o, ya‸ k'aw k'aˉ awˬ pon awˬ kaˍ awˬ nu te‸ chiˉ taˇ yuˬ k'ai. Miˉ chaw ka‸, hkaoˍ monˇ ka‸ taˇ pfuhˇ k'ai. Haˍ pi caˆ hk'aw lo hpu taˇ doˆ pfuhˇ k'ai. 9 Hkuiˉ nuˆ tcuhˉ leh, aˉ po‸ teˇ hk'oˆ ceh tiˉ deh k'ai-o teh‸, Yeˍsuˆ yawˇ hui hta‸ tawˇ piˇ ve yoˬ. 10 Yeˍsuˆ yawˇ hui hta‸ k'aw‸ k'oˆ piˇ ve, Hk'aˬ ve teˇ kaˬ maˇ k'oˆ, shu ve yehˬ hk'aw nawˬ hui lo‸-e ve teˇ yanˇ, hk'aˆ oˇ ve awˬ hk'aw lo maˇ tawˆ k'ai sheˍ ve ceh ceh, oˇ ve teˇ yehˬ awˬ hk'aw lo ceh tiˉ chehˇ taˍ-o‸. 11 Hk'aˬ ve teˇ kaˬ lo maˇ k'oˆ, nawˬ hui hta‸ maˇ ha‸ yuˬ leh nawˬ hui ve tawˇ hkawˇ hta‸ maˇ na ve k'o, oˇ kaˬ lo nawˬ hui tawˆ k'ai htaˇ, yawˇ hui hta‸ shaˉ hkiˆ te maˍ piˇ tuˬ, hkui taw k'aw hta‸ ngawˉ taˍ ve je‸ meu-e hta‸ hpi baˬ taˉ-oˆ teh‸, yawˇ hui hta‸ k'oˆ piˇ ve yoˬ. 12 Hk'e te leh yawˇ hui tawˆ k'ai leh, Chaw yaˇ hui lehˬ a shu yawˇ ve venˇ baˆ hta‸ dawˇ hpfuhˆ cawˇ ve yoˬ teh‸ bon maˍ piˇ ve yoˬ. 13 Yawˇ hui neˇ maˇ maˇ hta‸ g'a‸ k'oˬ leh, naˬ ve gawˬ ve chaw maˇ maˇ hta‸ naˍ manˇ shehˍ leh gu na-e piˇ ve yoˬ. 14 Oˇ htaˇ Yeˍsuˆ awˬ lawn bvuhˬ k'ai jaˇ ve pa taw, hkunˉ hawˉ hkanˇ Heˍroˆ g'a kaˇ ve yoˬ. Chaw teˇ hpaˍ hpaˍ k'oˆ ve, Baˆtiˆsaˬ piˇ paˍ Yoˇhanˬ suh kuiˬ lo k'aw‸ te‸ la peuˬ. Chi hta‸ pa taw, kanˇ paˆ uiˍ ve kanˉ chi teˇ hpaˍ hta‸ yawˇ te hpeh‸ ve yoˬ. 15 Chaw teˇ hpaˍ hpaˍ k'oˆ ve, Yawˇ lehˬ Eˇliˇya‸ yoˬ. Awˬ kaˍ awˬ nu teˇ hpaˍ k'oˆ ve, Yawˇ lehˬ aˬ sho-eˬ htaˇ G'uiˬ sha ve tcuh kaˍ paˍ teˇ hpaˍ hta‸ shuˍ ve tcuh kaˍ paˍ teˇ g'aˇ hpeh‸ ve yoˬ. 16 Jawˇ mawˇ Heˍroˆ g'a kaˇ leh, Chaw chi lehˬ, ngaˬ oˉ k'oˍ tawˆ peuˬ ve Yoˇhanˬ yoˬ. Yawˇ suh kuiˬ lo k'aw‸ te‸ tu la peuˬ teh‸ k'oˆ ve yoˬ. 17 Awˬ lawn chi lehˬ chi hk'e yoˬ. Jawˇ mawˇ Heˍroˆ ve awˬ nyi paˍ Hpiˇliˇpuˆ ve awˬ miˇ ma Heˍroˍdiˆ hta‸ jawˇ mawˇ Heˍroˆ heuˆ ve yoˬ. Yaˇ miˇ oˇ ve hta‸ pa taw, yawˇ chaw hta‸ hpehˇ leh Yoˇhanˬ hta‸ hpeh yuˬ leh htawnˍ hk'aw keu taˍ ve yoˬ. 18 Aˬ hto‸ ma hta‸ pa taw le teh‸ k'oˆ k'o, Nawˬ awˬ nyi paˍ ve awˬ miˇ ma hta‸ nawˬ heuˆ maˇ cawˇ teh‸, Yoˇhanˬ jawˇ mawˇ Heˍroˆ hta‸ k'oˆ piˇ ve hta‸ pa taw yoˬ. 19 Chi hta‸ pa taw, Heˍroˍdiˆ Yoˇhanˬ hta‸ canˇ jaˇ leh tiˇ pehˍ gaˇ ve yoˬ. Ya‸ hk'aˇ, tiˇ pehˍ maˇ hpeh‸ sheˍ. 20 Awˬ lawn k'o, Yoˇhanˬ lehˬ hteˇ ve cawˇ ve da‸ ve kehˬ ve chaw hpeh‸ ve hta‸ jawˇ mawˇ Heˍroˆ shiˍ ve pa taw, yawˇ hta‸ kawˆ leh hk'a deh‸ ha‸ shaˉ taˍ ve yoˬ. Yoˇhanˬ maˍ piˇ ve tawˇ hkawˇ hta‸ jawˇ mawˇ Heˍroˆ g'a kaˇ htaˇ, yawˇ nyi ma sho‸ sha‸ chehˇ ve htawˇ, ha lehˬ ha k'a na gaˇ ve yoˬ. 21 Jawˇ mawˇ Heˍroˆ paw ve hta‸ dawˇ nawˇ tuˬ pawehˇ te ve awˬ nyi k'aw‸ gaˬ la leh, yawˇ lehˬ yawˇ awˬ hawˉ ve jawˇ mawˇ teˇ hpaˍ, ma‸ poˍ teˇ hpaˍ leh Gaˍliˍlehˇ mvuhˇ miˬ awˬ hk'aw ve awˬ hoˉ awˬ naˬ teˇ hpaˍ hta‸ kuˬ leh hti caˇ hti dawˬ ve yoˬ. 22 Awˬ yanˇ cawˇ ve pa taw, Heˍroˍdiˆ ve awˬ yaˇ miˇ lo‸-e leh pawehˇ te maˍ piˇ htaˇ, jawˇ mawˇ Heˍroˆ leh yawˇ geh mui caˇ chehˇ ve chaw teˇ hpaˍ nyi ma cawˇ jaˇ ve yoˬ. Hk'e te leh hkunˉ hawˉ hkanˇ Heˍroˆ yaˇ miˇ hta‸ k'oˆ piˇ ve, Nawˬ heuˆ gaˇ ve hk'e lawˬ-o‸. Ngaˬ nawˬ hta‸ pe‸ laˇ tuˬ yoˬ teh‸ k'oˆ ve yoˬ. 23 Chi hk'oˆ ka‸ yawˇ hkanˍ leh yaˇ miˇ hta‸ k'oˆ piˇ ve, Nawˬ hk'a lawˬ ve teˇ hpaˍ, ngaˬ ve mvuhˇ miˬ teˇ hkoˇ hk'a gaˬ ngaˬ pe‸ laˇ tuˬ yoˬ teh‸ k'oˆ ve yoˬ. 24 Oˇ htaˇ, yaˇ miˇ oˇ ve tawˆ k'ai leh, Ngaˬ aˬ hto‸ ma hta‸ g'a lawˬ tuˬ le teh‸, yawˇ ve awˬ e hta‸ na nyi ve yoˬ. Awˬ e lehˬ, Baˆtiˆsaˬ piˇ paˍ Yoˇhanˬ ve oˉ k'oˍ hta‸ lawˬ yuˬ-o‸ teh‸ k'aw‸ k'oˆ piˇ ve yoˬ. 25 Hk'e te leh, teˇ cawˬ haˉ yaˇ miˇ oˇ ve hkunˉ hawˉ hkanˇ geh haˆ haˆ k'aw‸ lo‸-e leh k'oˆ ve, Baˆtiˆsaˬ piˇ paˍ Yoˇhanˬ ve oˉ k'oˍ hta‸ hkehˇ pe le awˬ hk'aw keu leh ngaˬ hta‸ haˆ haˆ pe‸ laˇ tuˬ heuˆ gaˇ ve yoˬ teh‸ lawˬ ve yoˬ. 26 Hkunˉ hawˉ hkanˇ lehˬ, dawˇ haˍ jaˇ ve htawˇ, yawˇ hkanˍ taˍ peuˬ ve hta‸ pa taw leh yawˇ geh mui caˇ chehˇ ve chaw teˇ hpaˍ hta‸ pa taw, yawˇ k'oˆ taˍ ve tawˇ hkawˇ hta‸ maˇ te luˬ gaˇ. 27 Oˇ htaˇ hkunˉ hawˉ hkanˇ lehˬ, shaw shehˍ hpaˇ teˇ g'aˇ hta‸, Yoˇhanˬ ve oˉ k'oˍ ca tawˆ veu laˇ-oˆ teh‸ k'oˆ leh, teˇ cawˬ haˉ k'ai tcuh ve yoˬ. Yawˇ k'ai leh, htawnˍ hk'aw lo Yoˇhanˬ ve oˉ k'oˍ hta‸ tawˆ ve yoˬ. 28 Oˉ k'oˍ oˇ ve hkehˇ pe le hk'aw keu veu laˇ leh yaˇ miˇ hta‸ piˇ ve yoˬ. Hk'e te leh awˬ yaˇ miˇ htawˇ, awˬ e hta‸ piˇ ve yoˬ. 29 Yoˇhanˬ ve awˬ la‸ g'awˇ teˇ hpaˍ lehˬ, awˬ lawn oˇ ve hta‸ g'a kaˇ htaˇ, yawˇ hui laˬ leh yawˇ ve awˬ to hta‸ yuˬ leh, tuˍ hpfuh hk'aw lo ca tuˍ ve yoˬ. 30 Oˇ htaˇ, tcuh yaˇ teˇ hpaˍ Yeˍsuˆ geh hpawnˬ la leh, yawˇ hui hk'a te hk'a maˍ ve awˬ lawn hk'a peu-eˬ yawˇ hta‸ k'aw‸ k'aoˍ piˇ ve yoˬ. 31 Oˇ htaˇ Yeˍsuˆ lehˬ, Nawˬ hui teˇ hpaˍ laˬ-o‸. Heh puiˉ hk'aw chaw gawˬ kuiˬ lo g'aˇ a ciˉ ca jehˇ sheˍ teh‸, yawˇ hui hta‸ k'oˆ piˇ ve yoˬ. Awˬ lawn k'o, chaw maˇ maˇ yiˬ yiˬ laˬ laˬ te chehˇ ve hta‸ pa taw, yawˇ hui awˍ ka‸ caˇ maˇ tanˇ ve yoˬ. 32 Hk'e te leh, yawˇ hui haw lo‸ k'oˍ ciˇ leh heh puiˉ hk'aw chaw gawˬ kuiˬ teˇ kaˬ lo k'ai ve yoˬ. 33 Yawˇ hui tawˆ k'ai ve hta‸ chaw maˇ maˇ g'a mawˬ g'a shiˍ ve yoˬ. Hk'e te leh, hk'aˬ venˇ chi venˇ lo chehˇ ve chaw hui g'uiˬ po jaˇ lo g'uiˇ k'ai leh, awˬ g'uˇ suhˍ gaˬ ve yoˬ. 34 Yeˍsuˆ haw lo‸ k'oˍ hk'aw tawˆ k'ai htaˇ, chaw awˬ moˍ lonˉ hta‸ g'a mawˬ ve yoˬ. Yawˇ hui lehˬ, yawˬ hawˉ paˍ maˇ cawˬ ve yawˬ teˇ hpaˍ hta‸ shuˍ ve pa taw, yawˇ yawˇ hui hta‸ ha k'aˉ leh awˬ lawn laiˉ ceuˬ maˍ piˇ ve yoˬ. 35 Mvuhˇ hpeu‸ la htaˇ, yawˇ ve awˬ la‸ g'awˇ teˇ hpaˍ yawˇ geh laˬ leh k'oˆ ve, Choˬ kaˬ lehˬ heh puiˉ hk'aw hpeh‸ leh, mvuhˇ ka‸ hpeu‸ la yoˬ. 36 Chaw chi teˇ hpaˍ lehˬ, awˬ paˇ awˬ kui cawˬ ve hk'aˆ hk'aw pa hk'aw lo k'ai leh caˇ tuˬ ca vuiˬ caˇ-e tuˬ, yawˇ hui hta‸ hpehˇ piˇ-oˆ teh‸ k'oˆ piˇ ve yoˬ. 37 Ya‸ hk'aˇ yawˇ lehˬ, Nawˬ hui teˇ hpaˍ yawˇ hui hta‸ caˍ piˇ-oˆ teh‸, yawˇ hui hta‸ k'aw‸ k'oˆ piˇ htaˇ, awˬ la‸ g'awˇ hui lehˬ, Ngaˬ hui hkaoˍ monˇ nyiˇ ha hteh‸ hpfuhˇ ca vuiˬ leh, yawˇ hui hta‸ g'a caˍ piˇ tuˬ laˇ teh‸ k'aw‸ k'oˆ piˇ ve yoˬ. 38 Yeˍsuˆ k'oˆ ve, Nawˬ hui geh hkaoˍ monˇ hk'aˬ nyiˇ diˬ cawˬ le. A ciˉ ca nyi sheˍ teh‸ k'oˆ piˇ htaˇ, yawˇ hui ca nyi peuˬ leh, Hkaoˍ monˇ ngaˇ diˬ leh ngaˇ nyi hkeh cawˬ ve yoˬ teh‸ k'aw‸ k'oˆ piˇ ve yoˬ. 39 Oˇ htaˇ Yeˍsuˆ lehˬ, Mvuh‸ nawˉ lehˍ ve awˬ hk'oˆ chaw chi ma ve hta‸ awˬ moˍ awˬ moˍ te mui tcuh-o teh‸ yawˇ hui hta‸ k'oˆ piˇ ve yoˬ. 40 Yawˇ hui lehˬ, teˇ ha g'aˇ teˇ moˍ, ngaˇ chi g'aˇ teˇ moˍ, chi hk'e awˬ moˍ awˍ moˍ te mui ve yoˬ. 41 Yeˍsuˆ hkaoˍ monˇ oˇ ve ngaˇ diˬ leh ngaˇ oˇ ve nyiˇ hkeh hta‸ yuˬ peuˬ hk'aw‸ nawˉ, mvuhˇ naw ma lo chiˇ nyi leh bon hta‸ chiˇ mvuh ve yoˬ. Hkaoˍ monˇ oˇ ve hta‸ yawˇ hk'eh‸ peuˬ leh, chaw chi ma ve mehˆ g'u suhˍ lo ca chiˇ teh piˇ tuˬ, awˬ la‸ g'awˇ hui hta‸ piˇ ve yoˬ. Ngaˇ oˇ ve nyiˇ hkeh hta‸ htawˇ, chaw hk'a peu-eˬ hta‸ pehˬ piˇ ve yoˬ. 42 Oˇ htaˇ, chaw hk'a peu-eˬ hk'a bvuhˆ g'a caˇ ve yoˬ. 43 Chi hk'oˆ ka‸, caˇ leuˉ ve hkaoˍ monˇ awˬ hk'eh‸ leh ngaˇ shaˍ awˬ peˆ teˇ hpaˍ hta‸ k'aw‸ g'awˆ ve teˇ yanˇ, teˇ chi nyiˇ hk'awˍ lawˇ hk'a biˇ g'a ve yoˬ. 44 Hkaoˍ monˇ hta‸ caˇ ve chaw hui, hawˉ hk'aˆ chaw mawˇ tiˉ ngaˇ hinˉ g'aˇ cawˬ ve yoˬ. 45 Chaw awˬ moˍ lonˉ hta‸ Yeˍsuˆ hpehˇ piˇ chehˇ htaˇ, yawˇ ve awˬ la‸ g'awˇ teˇ hpaˍ hta‸ haw lo‸ k'oˍ hk'aw teˇ cawˬ haˉ lo‸-e tcuh leh, g'uiˬ po coˇ paˉ Behˇsehˇdaˆ venˇ lo yawˇ hui hta‸ awˉ lawˉ hkanˍ k'ai tcuh ve yoˬ. 46 Yawˇ chaw awˬ moˍ lonˉ hta‸ hpaˆ da‸ peuˬ hk'aw‸ nawˉ, bon ca lawˬ tuˬ yawˇ hk'aw pui hk'oˆ lo taˆ-e ve yoˬ. 47 Mehˆ muiˉ naˆ la htaˇ haw lo‸ k'oˍ lehˬ, g'uiˬ po awˬ k'aw ji lo gaˬ peuˬ. Yeˍsuˆ lehˬ, g'uiˬ pfuhˍ paˇ lo yawˇ teˇ g'aˇ tiˉ chehˇ taˉ ve yoˬ. 48 Mvuhˇ haw hpawˇ maˇ cawˇ ve pa taw, awˬ la‸ g'awˇ teˇ hpaˍ haw lo‸ k'oˍ g'awˆ heuˬ jaˇ ve hta‸ yawˇ g'a mawˬ htaˇ, tanˇ hkuiˇ shehˆ naˍ riˍ ponˬ peuˬ hk'aw‸ nawˉ, Yeˍsuˆ g'uiˬ po hk'oˆ ya‸ k'aw juˇ k'ai leh, yawˇ hui hta‸ ponˬ k'ai-a teh‸ te ve yoˬ. 49 Yawˇ g'uiˬ po hk'oˆ ya‸ k'aw juˇ k'ai chehˇ ve hta‸ yawˇ hui g'a mawˬ htaˇ, chaw ha ku yoˬ teh‸ dawˇ leh, g'aˇ hte‸ kuˬ ve yoˬ. 50 Awˬ lawn k'o, yawˇ hui hk'a peu-eˬ yawˇ hta‸ g'a mawˬ leh kawˆ jaˇ ve yoˬ. Teˇ cawˬ haˉ yawˇ yawˇ hui hta‸ tawˇ yaw leh, Nyi ma ha‸ hanˉ te-o. Taˇ kawˆ, ngaˬ yoˬ teh‸ k'oˆ piˇ ve yoˬ. 51 Oˇ htaˇ haw lo‸ k'oˍ hk'aw yawˇ yawˇ hui geh lo‸-e leh, mvuhˇ haw dehˬ sheˬ leh, yawˇ hui anˇ jaˇ tehˬ tehˬ ve yoˬ. 52 Awˬ lawn k'o, hkaoˍ monˇ hta‸ anˇ tuˬ te maˍ ve awˬ lawn yawˇ hui maˇ dawˇ shiˍ maˇ dawˇ pawnˍ. Yawˇ hui nyi ma ka‸ heh chehˇ sheˍ ve yoˬ. 53 Yawˇ hui g'uiˬ po coˇ paˉ lo hkanˍ k'ai leh, Geˍneˍsaˍrehˆ mvuhˇ miˬ lo gaˬ htaˇ, haw lo‸ k'oˍ hta‸ g'uiˬ pfuhˍ lo hpeh taˍ ve yoˬ. 54 Haw lo‸ k'oˍ awˬ hk'aw lo yawˇ hui tawˆ-e leh, chaw teˇ hpaˍ teˇ cawˬ haˉ yawˇ hta‸ shiˍ ve yoˬ. 55 Mvuhˇ miˬ oˇ ve awˬ hk'aw lo chaw oˇ ve teˇ hpaˍ teˇ kaˬ le le lo g'uiˇ k'ai leh, Yeˍsuˆ hk'aˬ lo chehˇ ve hta‸ g'a kaˇ k'o, chaw naˬ chaw gawˬ teˇ hpaˍ hta‸ zuh‸ hpui hk'oˆ taˆ veu leh, oˇ kaˬ lo k'ai ve yoˬ. 56 Yawˇ hk'a lo‸-e kuiˬ teˇ kaˬ le le, hk'aˆ hk'aw maˇ k'oˆ, venˇ hk'aw maˇ k'oˆ, pa hk'aw maˇ k'oˆ, tcuh awˬ paˇ chaw hpawnˬ da‸ kuiˬ lo chaw naˬ teˇ hpaˍ hta‸ shu ca yuˬ teh taˍ ve yoˬ. Yawˇ ve aˉ po‸ awˬ caˍ hta‸ ceh g'a htawˇ tuˬ, yawˇ hta‸ lawˬ hkawˉ leh, hk'a htawˇ ve chaw teˇ hpaˍ na-e la ve yoˬ.

Maˍkuˆ 7

1 Oˇ htaˇ, Hpaˍriˍsehˇ teˇ hpaˍ leh Yeˍruˆsaˍlehnˍ venˇ lo laˬ ve li‸ bvuh‸ paˍ teˇ hpaˍ Yeˍsuˆ geh hpawnˬ la ve yoˬ. 2 Yawˇ ve awˬ la‸ g'awˇ teˇ hpaˍ la‸ sheh maˇ kehˬ leh awˬ caˇ chehˇ ve hta‸ yawˇ hui g'a mawˬ ve yoˬ. La‸ sheh maˇ kehˬ teh‸ k'oˆ ve lehˬ, awˬ liˇ cawˬ ve hk'e la‸ sheh maˇ tsuhˇ ve hta‸ k'oˆ ve yoˬ. 3 Awˬ lawn k'o, Hpaˍriˍsehˇ hui leh Yuˇda‸ chaw hk'a peu-eˬ, chaw mawˇ hui piˇ taˍ ve awˬ liˇ teˇ hpaˍ hta‸ te leh, la‸ sheh maˇ tsuhˇ k'o, caˇ tuˬ maˇ caˇ. 4 Tcuh ca huˉ k'aw‸ la htaˇ ka‸, yawˇ hui iˉ kaˆ maˇ hehˉ k'o, caˇ tuˬ maˇ caˇ. Chi hk'oˆ ka‸, kawˆ, hkehˇ, kuiˇ mu‸ hk'u teˇ hpaˍ hta‸ tsuhˇ ve awˬ liˇ leh awˬ kaˍ awˬ nu awˬ liˇ laiˉ ceuˬ hta‸ yawˇ hui yehˇ chehˇ te chehˇ ve yoˬ. 5 Oˇ htaˇ, Hpaˍriˍsehˇ hui leh li‸ bvuh‸ paˍ teˇ hpaˍ Yeˍsuˆ hta‸ na nyi ve, Nawˬ ve awˬ la‸ g'awˇ teˇ hpaˍ lehˬ, chaw mawˇ hui awˬ liˇ piˇ taˍ ve hk'e aˬ hto‸ ma pa taw maˇ te le. La‸ sheh maˇ kehˬ leh aˬ hto‸ ma te caˇ tuˬ caˇ ve le. 6 Yeˍsuˆ k'aw‸ k'oˆ piˇ ve, Chaw heˍ paˍ teˇ hpaˍ-oˬ, nawˬ hui awˬ lawn Iˉsaˍyaˆ k'oˆ taˍ ve tawˇ hkawˇ lehˬ cawˇ jaˇ ve yoˬ. Yawˇ bvuh‸ taˍ ve, Chaw chi teˇ ceuˬ lehˬ, yawˇ hui ve maw‸ k'aw ngaˬ hta‸ yawˆ yan ve htawˇ yawˇ hui ve nyi ma lehˬ ngaˬ hta‸ vuiˇ da‸ jaˇ ve yoˬ. 7 Chaw yaˇ hui teh taˍ ve awˬ liˇ awˬ hk'aˇ teˇ hpaˍ hta‸ maˍ piˇ ve pa taw, yawˇ hui ngaˬ hta‸ oˉ k'oˍ pui ve lehˬ, tcuhˉ kuiˬ te‸ chiˉ maˇ cawˬ, teh‸ bvuh‸ taˍ ve yoˬ. 8 G'uiˬ sha piˇ taˍ ve tawˇ hkawˇ teˇ hpaˍ hta‸ nawˬ hui baˬ taˉ leh, chaw yaˇ hui ve awˬ liˇ teˇ hpaˍ hta‸ nawˬ hui vawˆ taˍ ve yoˬ. 9 Yeˍsuˆ yawˇ hui hta‸ k'aw‸ k'oˆ piˇ ve, Nawˬ hui ve awˬ liˇ teˇ hpaˍ hta‸ te g'a tuˬ, G'uiˬ sha piˇ taˍ ve tawˇ hkawˇ teˇ hpaˍ hta‸ nawˬ hui baˬ taˉ puiˉ ve law. 10 Awˬ lawn k'o Moˉseˍ k'oˆ ve, Nawˬ ve awˬ pa awˬ e hta‸ yawˆ yawˆ yan yan te-o. Peuˬ leh, A shu yawˇ ve awˬ pa awˬ e hta‸ hk'a mvuhˇ hk'a na k'oˆ ve chaw teˇ g'aˇ lehˬ, awˬ tehˬ awˬ na g'a suh ve yoˬ teh‸ k'oˆ taˍ ve yoˬ. 11 Ya‸ hk'aˇ nawˬ hui lehˬ, Chaw teˇ g'aˇ g'aˇ yawˇ ve awˬ pa awˬ e hta‸, Ngaˬ geh hk'a cawˬ ve nawˬ hui g'a cawˇ ve mawˇ teˇ hpaˍ G'uiˬ sha hta‸ ngaˬ chiˇ a‸ piˇ peuˬ ve Kawˍbanˍ hpeh‸ ve yoˬ teh‸ yawˇ k'oˆ ve k'o, 12 yawˇ ve awˬ pa awˬ e hta‸ nawˬ hui a ciˉ ka‸ maˇ k'aw‸ ga piˇ tcuh. 13 Teˇ caˉ peuˬ teˇ caˉ chaw yaˇ geh g'a ve awˬ liˇ teˇ hpaˍ hta‸ nawˬ hui ha‸ yuˬ leh G'uiˬ sha ve tawˇ hkawˇ hta‸ te pehˆ piˇ ve yoˬ. Oˇ hk'e ve awˬ liˇ laiˉ ceuˬ hta‸ nawˬ hui te ve yoˬ teh‸ k'oˆ piˇ ve yoˬ. 14 Oˇ htaˇ, chaw awˬ moˍ lonˉ hta‸ yawˇ geh k'aw‸ kuˬ yuˬ leh k'oˆ ve, Nawˬ hui hk'a peu-eˬ ngaˬ ve tawˇ hta‸ na leh shiˍ-o‸. 15 Awˬ baˬ hpawˇ ve awˬ ceuˬ lehˬ, chaw yaˇ awˬ hk'aw lo lo‸-e leh cha‸ chiˆ tuˬ te maˇ g'a. Ya‸ hk'aˇ, chaw yaˇ awˬ hk'aw lo tawˆ la ve awˬ ceuˬ lehˬ, chaw yaˇ hta‸ cha‸ chiˆ tuˬ te ve yoˬ teh‸ yawˇ k'oˆ ve yoˬ. 17 Chaw awˬ moˍ lonˉ hta‸ yawˇ hpaˆ da‸ leh yehˬ hk'aw lo‸-e htaˇ, tawˇ pa haˉ oˇ ve awˬ lawn yawˇ ve awˬ la‸ g'awˇ teˇ hpaˍ yawˇ hta‸ na nyi ve yoˬ. 18 Yeˍsuˆ yawˇ hui hta‸ k'aw‸ k'oˆ piˇ ve, Nawˬ hui htawˇ na maˇ g'a leh laˇ. Chaw teˇ g'aˇ awˬ hk'aw lo, awˬ baˬ hpawˇ te leh awˬ hk'aw hpawˇ hk'a lo‸-e ve teˇ ceuˬ le le yawˇ hta‸ cha‸ chiˆ tuˬ te maˇ g'a. 19 Awˬ lawn k'o, yawˇ ve nyi ma hk'aw lo maˇ lo‸-e. Yawˇ ve g'oˇ peˬ awˬ hk'aw lo‸-e leh, aˉ k'a‸ yiˬ kuiˬ lo baˬ taˉ ve yoˬ teh‸, yawˇ k'oˆ piˇ ve yoˬ. (Yawˇ chi hk'e k'oˆ ve lehˬ, caˇ tuˬ dawˬ tuˬ hk'a peu-eˬ da‸ ve kehˬ ve yoˬ teh‸ k'oˆ gaˇ ve yoˬ.) 20 Peuˬ leh yawˇ k'aw‸ k'oˆ ve, Chaw teˇ g'aˇ awˬ hk'aw lo tawˆ la ve awˬ ceuˬ lehˬ, yawˇ hta‸ cha‸ chiˆ tuˬ te ve yoˬ. 21 Awˬ lawn k'o, chaw yaˇ nyi ma hk'aw lo tawˆ la ve teˇ hpaˍ lehˬ, haiˬ ve hta‸ dawˇ ve, guiˇ ya‸ ve, shu mawˇ hk'awˇ ve, chaw hta‸ tiˇ pehˍ ve, haˉ chawˇ haˉ paˆ te ve, 22 shu mawˇ shu jeˬ hta‸ sheˉ lai ve, awˬ haiˬ te ve, shu hta‸ heˍ ve, te ponˬ te leuˉ ve, hkawehˉ ve, maˇ shawˍ maˇ caˆ k'oˆ ve, nyi ma uiˍ ve mvuh ve, maˇ dawˇ nyi puiˉ ve, chi teˇ hpaˍ yoˬ. 23 Haiˬ ve chi hk'a peu-eˬ lehˬ, awˬ hk'aw hpawˇ tawˆ la leh, chaw yaˇ hta‸ cha‸ chiˆ tuˬ te ve yoˬ teh‸ yawˇ k'oˆ ve yoˬ. 24 Oˇ htaˇ, yawˇ oˇ kaˬ lo tawˆ k'ai leh, Tuˇruˆ leh Siˉdonˍ mvuhˇ miˬ hpawˇ lo k'ai ve yoˬ. Yawˇ yehˬ teˇ yehˬ hk'aw lo‸-e leh, chaw teˇ g'aˇ hta‸ ka‸ maˇ shiˍ tcuh piˇ gaˇ htawˇ, yawˇ ca va‸ taˍ maˇ g'a. 25 Awˬ lawn k'o, neˇ cha‸ chiˆ geh taˍ ve yaˇ miˇ ehˉ teˇ g'aˇ ve awˬ e lehˬ, teˇ cawˬ haˉ Yeˍsuˆ awˬ lawn g'a kaˇ leh, yawˇ yawˇ geh laˬ leh yawˇ ve hkui paˇ lo boˆ taˍ ve yoˬ. 26 Yawˇ ve yaˇ miˇ awˬ hk'aw lo neˇ hta‸ g'a‸ tawˆ tuˬ yawˇ Yeˍsuˆ hta‸ lawˬ hkawˉ ve yoˬ. Yaˇ miˇ oˇ ve lehˬ, Suˇriˇhpiˇniˆ mvuhˇ miˬ hk'aw chehˇ ve Heˍlaˍsaˆ ma hpeh‸ ve yoˬ. 27 Yeˍsuˆ lehˬ, Yaˇ ehˉ teˇ hpaˍ hta‸ awˉ lawˉ hk'a bvuhˆ g'a caˍ piˇ sheˍ. Yaˇ ehˉ teˇ hpaˍ ve caˇ tuˬ hta‸ yuˬ leh hpuiˇ teˇ hpaˍ hta‸ caˍ piˇ maˇ cawˇ teh‸ yawˇ hta‸ k'oˆ piˇ ve yoˬ. 28 Yaˇ miˇ k'aw‸ k'oˆ ve, Jawˇ mawˇ-oˬ, nawˬ k'oˆ ve lehˬ cawˇ ve yoˬ. Ya‸ hk'aˇ, hpuiˇ teˇ hpaˍ lehˬ, yaˇ ehˉ teˇ hpaˍ caˇ sheˆ dawˬ sheˆ taˍ ve hta‸ hpui lawˇ awˬ hawˉ lo g'awˆ caˇ ve yoˬ teh‸ k'aw‸ k'oˆ piˇ ve yoˬ. 29 Yeˍsuˆ lehˬ, Nawˬ chi hk'e k'oˆ ve pa taw, k'o‸-e loˬ. Nawˬ ve yaˇ miˇ awˬ hk'aw lo neˇ tawˆ k'ai peuˬ teh‸, yawˇ hta‸ k'oˆ piˇ ve yoˬ. 30 Yaˇ miˇ oˇ ve yawˇ aˉ hk'aw lo k'aw‸ gaˬ htaˇ, yawˇ ve yaˇ miˇ ehˉ zuh‸ hpui hk'aw zuh‸ taˍ ve hta‸ ka‸, neˇ tawˆ k'ai peuˬ ve hta‸ ka‸ yawˇ g'a mawˬ ve yoˬ. 31 Oˇ ve awˬ hk'aw‸ nawˉ, Yeˍsuˆ Tuˇruˆ mvuhˇ miˬ hk'aw k'aw‸ tawˆ k'ai ve yoˬ. Yawˇ Siˉdonˍ mvuhˇ miˬ lo te leh Deˍkaˍpawˇliˆ mvuhˇ miˬ awˬ k'aw ji lo hpanˍ k'ai leh, Gaˍliˍlehˇ g'uiˬ po lo gaˬ la ve yoˬ. 32 Oˇ htaˇ, naˍ paw pawˇ leh tawˇ hk'a deh‸ yaw maˇ g'a ve chaw teˇ g'aˇ hta‸ shu Yeˍsuˆ geh shiˍ veu laˇ leh, yawˇ awˬ hk'oˆ la‸ sheh taˍ tuˬ yawˇ hui yawˇ hta‸ lawˬ ve yoˬ. 33 Hk'e te leh, chaw awˬ moˍ lonˉ hk'aw Yeˍsuˆ yawˇ hta‸ shiˍ tawˆ-e leh, baˬ kuiˬ lo k'ai ve yoˬ. Chaw oˇ ve naˍ paw hk'aw lo yawˇ ve la‸ naw juˆ keu leh, ciˉ g'uiˇ hpe‸ sheˬ leh yawˇ ve ha tehˍ hta‸ htawˇ ve yoˬ. 34 Oˇ htaˇ, Yeˍsuˆ mvuhˇ naw ma lo chiˇ nyi peuˬ leh hk'anˇ leh, Eˇhpaˍtaˍ teh‸ k'oˆ ve yoˬ. Tcuhˉ kuiˬ lehˬ, hpaw piˇ-oˆ teh‸ k'oˆ gaˇ ve yoˬ. 35 Hk'e te leh, chaw oˇ ve naˍ paw kaˇ la leh, ha tehˍ awˬ kuˇ caˆ nuˇ k'ai leh tawˇ hk'a deh‸ k'aw‸ yaw g'a ve yoˬ. 36 Awˬ lawn chi chaw teˇ g'aˇ hta‸ ka‸ maˇ g'a hto piˇ tuˬ, Yeˍsuˆ yawˇ hui hta‸ tawˇ piˇ ve yoˬ. Ya‸ hk'aˇ, yawˇ yawˇ hui hta‸ shaˬ tawˍ taˍ ve k'o, yawˇ hui shaˬ leuˉ leh shu hta‸ k'aoˍ maˍ piˇ ve yoˬ. 37 Yawˇ hui maˇ maˇ anˇ jaˇ leh k'oˆ ve, Yawˇ hk'a peu-eˬ hta‸ da‸ lehˍ te peuˬ. Naˍ paw pawˇ ve chaw hui kaˇ la tuˬ yawˇ te leh, k'aˍ ve chaw hui tawˇ yaw puiˉ tuˬ ka‸ te ve yoˬ teh‸, yawˇ hui k'oˆ ve yoˬ.

Maˍkuˆ 8

1 Awˬ yanˇ oˇ ve awˬ hk'aw lo, chaw awˬ moˍ uiˍ jaˇ ve k'aw‸ hpawnˬ la leh, yawˇ hui geh caˇ tuˬ maˇ cawˬ. Hk'e te leh Yeˍsuˆ yawˇ ve awˬ la‸ g'awˇ hui hta‸ kuˬ hpawnˬ leh k'oˆ piˇ ve, 2 Chaw awˬ moˍ lonˉ chi hta‸ ngaˬ ha k'aˉ ve yoˬ. Awˬ lawn k'o, yawˇ hui ngaˬ geh chehˇ ve shehˆ nyi gaˬ peuˬ leh, caˇ tuˬ te‸ chiˉ maˇ cawˬ. 3 Yawˇ hui awˍ meu‸ jehˇ chehˇ leh ngaˬ yawˇ hui hta‸ k'o‸-e tcuh ve k'o, ya‸ k'aw k'aˉ lo g'aˇ nuˇ jaˇ tuˬ yoˬ. Yawˇ hui teˇ hpaˍ hpaˍ vuiˇ kuiˬ lo laˬ ve yoˬ teh‸, yawˇ hui hta‸ k'oˆ piˇ ve yoˬ. 4 Yawˇ ve awˬ la‸ g'awˇ teˇ hpaˍ lehˬ, Choˬ kaˬ heh puiˉ hk'aw lo chaw chi ma ve hta‸ hk'a bvuhˆ g'a caˍ piˇ tuˬ hkaoˍ monˇ hk'aˬ lo ca g'a tuˬ ve le teh‸, yawˇ hta‸ k'aw‸ k'oˆ piˇ ve yoˬ. 5 Nawˬ hui geh hkaoˍ monˉ hk'aˬ nyiˇ diˬ cawˬ le teh‸ Yeˍsuˆ yawˇ hui hta‸ na nyi htaˇ, Hkaoˍ monˇ suhˍ diˬ cawˬ ve yoˬ teh‸, yawˇ hui k'aw‸ k'oˆ piˇ ve yoˬ. 6 Oˇ htaˇ, chaw awˬ moˍ lonˉ miˬ chaˇ hk'oˆ mui tuˬ yawˇ tawˇ piˇ ve yoˬ. Yawˇ hkaoˍ monˇ oˇ ve suhˍ diˬ hta‸ yuˬ leh bon hta‸ chiˇ mvuh peuˬ hk'aw‸ nawˉ hk'eh‸ ve yoˬ. Peuˬ leh, hkaoˍ monˇ oˇ ve chaw awˬ moˍ lonˉ mehˆ g'uˇ suhˍ ca chiˇ teh piˇ tuˬ, yawˇ ve awˬ la‸ g'awˇ teˇ hpaˍ hta‸ yawˇ piˇ leh, yawˇ hui htawˇ chaw awˬ moˍ lonˉ mehˆ g'uˇ suhˍ ca chiˇ teh piˇ ve yoˬ. 7 Yawˇ hui geh ngaˇ ehˉ ka‸ a ciˉ cawˬ ve yoˬ. Awˬ bon hta‸ chiˇ mvuh peuˬ hk'aw‸ nawˉ, Shu mehˆ g'uˇ suhˍ ca chiˇ teh piˇ-oˆ teh‸, Yeˍsuˆ k'oˆ piˇ ve yoˬ. 8 Yawˇ hui hk'a bvuhˆ caˇ peuˬ hk'aw‸ nawˉ, caˇ leuˉ ve teˇ hpaˍ hta‸ yawˇ hui k'aw‸ g'awˆ ve teˇ yanˇ, suhˍ hk'awˍ lawˇ hk'a biˇ g'a ve yoˬ. 9 Caˇ ve chaw aˬ laˬ hk'e awˇ hinˉ g'aˇ cawˬ ve yoˬ. Peuˬ leh, yawˇ yawˇ hui hta‸ k'o‸-e tcuh ve yoˬ. 10 Teˇ cawˬ haˉ yawˇ ve awˬ la‸ g'awˇ hui geh haw lo‸ k'oˍ hk'aw lo‸-e leh, Daˍlaˍmaˍnuˆ mvuhˇ miˬ lo ciˇ k'ai ve yoˬ. 11 Oˇ htaˇ, Hpaˍriˍsehˇ teˇ hpaˍ laˬ leh, Yeˍsuˆ hta‸ tawˇ g'awˬ da‸ ve yoˬ. Yawˇ hta‸ lawˇ nyi tuˬ, mvuhˇ naw ma ve awˬ heˆ yawˇ geh lawˬ ve yoˬ. 12 Yawˇ ve nyi ma hk'aw hk'anˇ leh k'oˆ ve, Chaw chi teˇ co lehˬ, aˬ hto‸ ma pa taw awˬ heˆ hta‸ lawˬ ve le. Ngaˬ nawˬ hui hta‸ awˬ tehˬ awˬ na k'oˆ laˇ ve, chaw chi teˇ co hta‸ awˬ heˆ teˇ ceuˬ ka‸ maˇ maˍ piˇ teh‸ k'oˆ ve yoˬ. 13 Oˇ htaˇ, Yeˍsuˆ yawˇ hui hta‸ hpaˆ da‸ taˉ leh, haw lo‸ k'oˍ awˬ hk'aw lo k'aw‸ lo‸-e leh g'uiˬ po coˇ paˉ lo ciˇ k'ai ve yoˬ. 14 Awˬ la‸ g'awˇ teˇ hpaˍ hkaoˍ monˇ yuˬ k'ai tuˬ leunˇ taˉ leh, haw lo‸ k'oˍ awˬ hk'aw yawˇ hui hkaoˍ monˇ teˇ diˬ tiˉ cawˬ ve yoˬ. 15 Yeˍsuˆ yawˇ hui hta‸ shaˍ ti‸ piˇ leh k'oˆ ve, Hpaˍriˍsehˇ ve diˇ leh jawˇ mawˇ Heˍroˆ ve diˇ hta‸ shaˍ ti‸ te leh jaw k'ai-o teh‸ k'oˆ piˇ ve yoˬ. 16 Yawˇ hui lehˬ, Ngaˬ hui hkaoˍ monˇ maˇ cawˬ ve pa taw chi hk'e k'oˆ ve yoˬ teh‸, teˇ g'aˇ leh teˇ g'aˇ k'oˆ da‸ ve yoˬ. 17 Yeˍsuˆ awˬ lawn oˇ ve hta‸ shiˍ leh yawˇ hui hta‸ k'oˆ piˇ ve, Nawˬ hui hkaoˍ monˇ maˇ yuˬ laˬ ve awˬ lawn hta‸ aˬ hto‸ ma pa taw k'oˆ da‸ ve le. Chi beu‸ hk'a gaˬ nawˬ hui maˇ dawˇ gaˬ maˇ dawˇ shiˍ sheˍ leh laˇ. Nawˬ hui nyi ma heh chehˇ sheˍ leh laˇ. 18 Nawˬ hui mehˆ shiˍ cawˬ ka‸ maˇ mawˬ leh laˇ. Naˍ paw cawˬ ka‸ maˇ kaˇ leh laˇ. Nawˬ hui maˇ dawˇ nawˇ leh laˇ. 19 Ngaˬ hkaoˍ monˇ ngaˇ diˬ hta‸ hk'eh‸ leh, chaw ngaˇ hinˉ g'aˇ hta‸ caˍ piˇ peuˬ hk'aw‸ nawˉ, nawˬ hui awˬ leuˉ hk'aˬ nyiˇ hk'awˍ lawˇ k'aw‸ g'awˆ g'a ve le teh‸ na nyi htaˇ, Teˇ chi nyiˇ hk'awˍ lawˇ g'a ve yoˬ teh‸, yawˇ hui yawˇ hta‸ k'aw‸ k'oˆ piˇ ve yoˬ. 20 Ngaˬ hkaoˍ monˇ suhˍ diˬ hta‸ yuˬ leh, chaw awˇ hinˉ g'aˇ hta‸ caˍ piˇ peuˬ hk'aw‸ nawˉ, nawˬ hui awˬ leuˉ hk'aˬ nyiˇ hk'awˍ lawˇ k'aw‸ g'awˆ g'a ve le teh‸ k'aw‸ na nyi htaˇ, suhˍ hk'awˍ lawˇ g'a ve yoˬ teh‸, yawˇ hui yawˇ hta‸ k'aw‸ k'oˆ piˇ ve yoˬ. 21 Peuˬ leh yawˇ yawˇ hui hta‸, Chi beu‸ ka‸ nawˬ hui maˇ dawˇ shiˍ sheˍ leh laˇ teh‸ k'oˆ piˇ ve yoˬ. 22 Oˇ ve hk'aw‸ nawˉ, yawˇ hui Behˇsehˇdaˆ venˇ lo gaˬ ve yoˬ. Chaw teˇ hpaˍ mehˆ cuˉ paˍ teˇ g'aˇ hta‸ yawˇ geh shiˍ laˬ leh, yawˇ hta‸ htawˇ tuˬ Yeˍsuˆ hta‸ lawˬ hkawˉ ve yoˬ. 23 Yawˇ mehˆ cuˉ paˍ ve la‸ sheh hta‸ g'awˬ leh hk'aˆ awˬ baˬ lo sheh tawˆ-e ve yoˬ. Yawˇ ve mehˆ shiˍ hta‸ ciˉ g'uiˇ hpe‸ keu piˇ peuˬ hk'aw‸ nawˉ, yawˇ awˬ hk'oˆ la‸ sheh taˍ leh, Nawˬ teˇ ceuˬ ceuˬ mawˬ laˇ teh‸ yawˇ hta‸ na nyi ve yoˬ. 24 Chaw oˇ ve chiˇ nyi leh, Ngaˬ chaw teˇ hpaˍ htaˬ mawˬ ve yoˬ. Yawˇ hui lehˬ suhˆ cehˬ hta‸ shuˍ ve ka‸, ya‸ k'aw juˇ k'ai chehˇ ve yoˬ teh‸ k'oˆ ve yoˬ. 25 Yawˇ ve mehˆ shiˍ hta‸ Yeˍsuˆ la‸ sheh teˇ pawˆ k'aw‸ htawˇ ve yoˬ. Chaw oˇ ve lehˬ teˇ pawˆ hk'a deh‸ k'aw‸ nyi htaˇ, mehˆ shiˍ da‸ la leh hk'a peu-eˬ hta‸ hk'a deh‸ kehˬ lehˍ mawˬ ve yoˬ. 26 Oˇ htaˇ Yeˍsuˆ yawˇ hta‸, Hk'aˆ chi awˬ hk'aw lo taˇ lo‸-e teh‸ k'oˆ piˇ leh, yawˇ ve aˉ hk'aw lo k'o‸-e tcuh ve yoˬ. 27 Yeˍsuˆ leh yawˇ ve awˬ la‸ g'awˇ teˇ hpaˍ Hpiˇliˇpuˆ Kehˉsaˍriˆ mvuhˇ miˬ awˬ hk'aw lo cawˬ ve hk'aˆ teˇ hpaˍ lo k'ai ve yoˬ. Ya‸ k'aw k'aˉ lo k'ai chehˇ htaˇ, yawˇ ve awˬ la‸ g'awˇ teˇ hpaˍ hta‸ yawˇ na nyi ve, Shu ngaˬ hta‸ a shu hpeh‸ ve teh‸ k'oˆ ve le. 28 Awˬ la‸ g'awˇ teˇ hpaˍ k'aw‸ k'oˆ ve, Chaw teˇ hpaˍ hpaˍ nawˬ hta‸ baˆtiˆsaˬ piˇ paˍ Yoˇhanˬ yoˬ teh‸ k'oˆ ve, teˇ hpaˍ hpaˍ Eˇliˇya‸ yoˬ teh‸ k'oˆ ve, peuˬ leh teˇ hpaˍ hpaˍ G'uiˬ sha ve tcuh kaˍ paˍ teˇ g'aˇ g'aˇ hpeh‸ ve yoˬ teh‸, nawˬ hta‸ k'oˆ ve yoˬ. 29 Oˇ htaˇ Yeˍsuˆ lehˬ, Nawˬ hui teˇ hpaˍ ngaˬ hta‸ a shu hpeh‸ ve teh‸ k'oˆ ve le teh‸ yawˇ hui hta‸ na nyi ve teˇ yanˇ, Nawˬ lehˬ Hkri‸ yoˬ teh‸, Peˍtruˆ k'aw‸ k'oˆ piˇ ve yoˬ. 30 Yawˇ awˬ lawn chaw teˇ g'aˇ hta‸ ka‸ maˇ g'a hto piˇ tuˬ, Yeˍsuˆ yawˇ hui hta‸ tawˇ hehnˇ chaweh piˇ taˍ ve yoˬ. 31 Oˇ htaˇ chaw yaˇ ve Yaˇ hpu lehˬ, laiˉ ceuˬ hta‸ g'a tu‸ g'a hkanˍ tuˬ ve awˬ lawn yawˇ yawˇ hui hta‸ maˍ piˇ ve yoˬ. Awˬ hoˉ chaw mawˇ teˇ hpaˍ, paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ yawˇ hta‸ chiˇ baˬ leh tiˇ pehˍ tuˬ ve awˬ lawn maˇ k'oˆ, shehˆ nyi teˇ nyi gaˬ k'o yawˇ k'aw‸ te‸ tu la tuˬ ve awˬ lawn maˇ k'oˆ, yawˇ hui hta‸ maˍ piˇ ve yoˬ. 32 Awˬ lawn chi yawˇ hk'a tawˍ lehˆ k'oˆ maˍ piˇ ve yoˬ. Hk'e te leh, Peˍtruˆ yawˇ hta‸ shiˍ veu leh deˇ ve yoˬ. 33 Yeˍsuˆ hpfuhˆ nyi leh yawˇ ve awˬ la‸ g'awˇ hui hta‸ mawˬ htaˇ Peˍtruˆ hta‸ k'oˆ piˇ ve, Saˍtanˍ -oˬ, ngaˬ awˬ hk'aw‸ nawˉ hpawˇ lo jiˆ k'ai-o. Awˬ lawn k'o, nawˬ ve dawˇ hk'aˇ lehˬ, G'uiˬ sha ve dawˇ hk'aˇ maˇ heˆ. Chaw yaˇ ve dawˇ hk'aˇ hpeh‸ ve yoˬ teh‸ k'oˆ leh yawˇ hta‸ deˇ ve yoˬ. 34 Oˇ htaˇ, chaw awˬ moˍ lonˉ leh yawˇ ve awˬ la‸ g'awˇ hui hta‸ yawˇ kuˬ yuˬ leh k'oˆ piˇ ve, Chaw teˇ g'aˇ g'aˇ ngaˬ hk'aˇ suh laˬ gaˇ ve k'o, a shu yawˇ ve a loˍ hta‸ baˬ taˉ leh, a shu yawˇ ve la‸ ka hta‸ taˆ leh ngaˬ hk'aˇ suh laˬ-o‸. 35 Awˬ lawn k'o, hk'aˬ ve chaw teˇ g'aˇ maˇ k'oˆ, a shu yawˇ ve a sha‸ hta‸ ponˬ piˇ gaˇ ve k'o, yawˇ ve a sha‸ shonˇ tuˬ yoˬ. Ya‸ hk'aˇ, hk'aˬ ve chaw teˇ g'aˇ maˇ k'oˆ, ngaˬ awˬ pon leh ha lehˬ ve bon hkawˇ awˬ pon yawˇ ve a sha‸ shonˇ ve k'o, yawˇ ve a sha‸ hta‸ ponˬ piˇ tuˬ yoˬ. 36 Chaw teˇ g'aˇ g'aˇ miˬ guiˬ hk'a peu-eˬ hta‸ g'a htawˇ, yawˇ ve a sha‸ shonˇ k'ai ve k'o, aˬ hto‸ ma awˬ bon cawˬ le. 37 Chaw teˇ g'aˇ g'aˇ, a shu yawˇ ve a sha‸ awˬ pon aˬ hto‸ ma teˇ ceuˬ hta‸ yuˬ leh pa g'a tuˬ le. 38 Awˬ lawn k'o, chaw hk'aˬ ve teˇ g'aˇ maˇ k'oˆ, te ya‸ puiˉ leh venˇ baˆ te puiˉ ve chaw chi teˇ co awˬ hk'aw lo ngaˬ hta‸ leh ngaˬ ve tawˇ hkawˇ hta‸ ya‸ taw ve k'o, chaw yaˇ ve Yaˇ hpu lehˬ, yawˇ Awˬ pa ve awˬ me‸ awˬ hponˇ awˬ hk'aw lo da‸ ve kehˬ ve mvuhˇ naw ma tcuh yaˇ hui geh teˇ geh laˬ ve teˇ yanˇ, chaw oˇ ve hta‸ ngaˬ ya‸ taw tuˬ yoˬ.

Maˍkuˆ 9

1 Ngaˬ nawˬ hui hta‸ awˬ tehˬ awˬ na k'oˆ laˇ ve, choˬ kaˬ lo huˉ chehˇ ve chaw teˇ hpaˍ hpaˍ lehˬ, G'uiˬ sha ve mvuhˇ miˬ kanˇ paˆ awˬ hk'aw lo laˬ ve hta‸ maˇ g'a mawˬ sheˍ ve ceh ceh, maˇ g'a suh teh‸, yawˇ yawˇ hui hta‸ k'oˆ piˇ ve yoˬ. 2 Hkaw‸ nyi pon peuˬ hk'aw‸ nawˉ, Yeˍsuˆ lehˬ Peˍtruˆ, Yaˍk'oˆ leh Yoˇhanˬ hta‸ ceh shiˍ veu leh mvuh ve hk'aw teˇ shiˍ awˬ hk'oˆ lo yawˇ hui taˆ-e ve yoˬ. Oˇ htaˇ, yawˇ hui mehˆ g'uˇ suhˍ yawˇ ve awˬ ho‸ awˬ han pa leh, 3 yawˇ ve veu‸ k'aˇ awˬ g'euˆ ba la leh hpu da‸ jaˇ ve yoˬ. Miˬ guiˬ hk'oˆ mawˇ tsuhˇ paˍ hk'aˬ ve teˇ g'aˇ maˇ k'oˆ, oˇ hk'e taw taw tsuhˇ hpu maˇ g'a. 4 Moˉseˍ leh Eˇliˇya‸ htawˇ yawˇ hui mehˆ g'uˇ suhˍ tawˆ la leh Yeˍsuˆ geh na‸ uˉ te da‸ chehˇ ve yoˬ. 5 Oˇ htaˇ Peˍtruˆ lehˬ, Jawˇ mawˇ-oˬ, ngaˬ hui choˬ kaˬ chehˇ ve lehˬ da‸ ve yoˬ. Ngaˬ hui aˉ po k'o shehˆ shiˍ te tuˬ yoˬ. Nawˬ awˬ pon teˇ shiˍ, Moˉseˍ awˬ pon teˇ shiˍ leh Eˇliˇya‸ awˬ pon teˇ shiˍ te tuˬ yoˬ teh‸, Yeˍsuˆ hta‸ k'oˆ piˇ ve yoˬ. 6 Awˬ lawn k'o, yawˇ hui kawˆ jaˇ ve pa taw, yawˇ hk'aˬ hk'e g'a k'oˆ tuˬ ve hta‸ maˇ shiˍ. 7 Oˇ htaˇ, moˬ yawˇ hui hta‸ hoˆ taˍ beh taˍ leh, Chaw chi lehˬ, ngaˬ ha‸ jaˇ ve Yaˇ hpu yoˬ. Yawˇ ve tawˇ hkawˇ hta‸ na-o teh‸, moˬ oˇ ve awˬ hk'aw lo awˬ hkawˇ bvuhˬ la ve yoˬ. 8 Yawˇ hui teˇ cawˬ haˉ caw nyi ve teˇ yanˇ, awˬ kaˍ awˬ nu chaw teˇ g'aˇ hta‸ ka‸ maˇ k'aw‸ mawˬ. Yeˍsuˆ ceh tiˉ yawˇ hui geh chehˇ taˍ ve hta‸ g'a mawˬ ve yoˬ. 9 Hk'aw oˇ ve teˇ shiˍ lo yawˇ hui k'aw‸ ya‸ la chehˇ ve teˇ yanˇ, chaw yaˇ ve Yaˇ hpu lehˬ suh kuiˬ lo maˇ k'aw‸ te‸ tu la sheˍ ve ceh ceh, yawˇ hui g'a mawˬ ve teˇ hpaˍ chaw teˇ g'aˇ hta‸ ka‸ maˇ g'a hto piˇ tuˬ, yawˇ yawˇ hui hta‸ tawˇ piˇ taˍ ve yoˬ. 10 Yawˇ hui lehˬ, tawˇ hkawˇ oˇ ve hta‸ tawnˇ taˍ leh, Suh kuiˬ lo k'aw‸ te‸ tu la ve taˇ ceuˬ aˬ hto‸ ma hta‸ k'oˆ ve le teh‸, teˇ g'aˇ leh teˇ g'aˇ na nyi da‸ ve yoˬ. 11 Oˇ htaˇ yawˇ hui lehˬ, Eˇliˇya‸ awˉ lawˉ g'a laˬ tuˬ yoˬ teh‸, aˬ hto‸ ma pa taw li‸ bvuh‸ paˍ teˇ hpaˍ k'oˆ ve le teh‸, yawˇ hta‸ na nyi ve yoˬ. 12 Yawˇ k'aw‸ k'oˆ piˇ ve, Eˇliˇya‸ awˬ tehˬ awˬ na laˬ leh, hk'a peu-eˬ hta‸ k'aw‸ gu te ve yoˬ. Chaw yaˇ ve Yaˇ hpu lehˬ, laiˉ ceuˬ hta‸ g'a tu‸ g'a hkanˍ leh chiˇ baˬ ve hta‸ g'a hkanˍ tuˬ yoˬ teh‸, aˬ hto‸ ma pa taw bvuh‸ taˍ ve le teh‸ na nyi ve yoˬ. 13 Ya‸ hk'aˇ, ngaˬ nawˬ hui hta‸ k'oˆ laˇ ve, Eˇliˇya‸ gaˬ la peuˬ leh, yawˇ ve awˬ lawn bvuh‸ taˍ ve hk'a shuˍ shuˍ, yawˇ hui yawˇ hta‸ te gaˇ ve hk'e te piˇ peuˬ teh‸ Yeˍsuˆ k'oˆ ve yoˬ. 14 Yawˇ hui lehˬ, awˬ la‸ g'awˇ hui geh k'aw‸ gaˬ la htaˇ, chaw awˬ moˍ lonˉ awˬ la‸ g'awˇ hui hta‸ hk'a caw zuhˇ chehˇ taˍ leh, li‸ bvuh‸ paˍ teˇ hpaˍ yawˇ hui geh tawˇ g'awˬ da‸ chehˇ ve hta‸ g'a mawˬ ve yoˬ. 15 Chaw awˬ moˍ lonˉ hk'a peu-eˬ teˇ cawˬ haˉ Yeˍsuˆ hta‸ g'a mawˬ htaˇ anˇ jaˇ leh, yawˇ geh g'uiˇ k'ai leh yawˇ hta‸ ha‸ yuˬ ve yoˬ. 16 Oˇ htaˇ Yeˍsuˆ lehˬ, Nawˬ hui yawˇ hui geh aˬ hto‸ ma awˬ lawn tawˇ g'awˬ da‸ chehˇ ve le teh‸ na nyi htaˇ, 17 chaw awˬ moˍ lonˉ awˬ hk'aw lo chaw teˇ g'aˇ yawˇ hta‸ k'oˆ piˇ ve, Saˍ la‸-oˬ, ngaˬ ve yaˇ paˍ hta‸ nawˬ geh shiˍ veu laˇ ve yoˬ. Yawˇ lehˬ, k'aˍ ve neˇ geh taˍ ve yoˬ. 18 Neˇ yawˇ hta‸ yuˬ tiˍ ve teˇ yanˇ, yawˇ hk'aˬ lo chehˇ ve maˇ k'oˆ, neˇ yawˇ hta‸ ca‸ baˬ ve yoˬ. Oˇ htaˇ, maw‸ k'aw hk'aw awˬ fuˇ tawˆ la leh, ciˬ geu‸ leh awˬ to heh kuˉ lehˍ k'ai ve yoˬ. Neˇ hta‸ g'a‸ k'oˬ tuˬ nawˬ ve awˬ la‸ g'awˇ hui hta‸ ngaˬ k'oˆ piˇ ve htawˇ, yawˇ hui te maˇ g'a teh‸ yawˇ k'oˆ piˇ ve yoˬ. 19 Yeˍsuˆ k'aw‸ k'oˆ ve, Yonˍ ve maˇ cawˬ ve chaw chi teˇ co-e-oˬ, ngaˬ nawˬ hui geh hk'aˬ maw g'a chehˇ tuˬ sheˍ le. Ngaˬ nawˬ hui hta‸ hk'aˬ maw g'a yeunˇ hkanˍ tuˬ sheˍ le. Yawˇ hta‸ ngaˬ geh yuˬ laˬ-o‸ teh‸ k'oˆ piˇ ve yoˬ. 20 Oˇ htaˇ yawˇ hui lehˬ, yaˇ paˍ hta‸ yawˇ geh yuˬ laˬ ve yoˬ. Neˇ oˇ ve Yeˍsuˆ hta‸ g'a mawˬ htaˇ, yaˇ paˍ hta‸ yawˇ paw‸ hpeuˆ piˇ lawˬ leh, yaˇ paˍ oˇ ve miˬ chaˇ hk'oˆ paiˍ ve yoˬ. Yawˇ lehˬ, maw‸ k'aw hk'aw awˬ fuˇ tawˆ la leh hpeˆ dawˇ chehˇ ve yoˬ. 21 Yeˍsuˆ lehˬ, Yawˇ chi hk'e hpeh‸ la ve hk'aˬ maw gaˬ peuˬ le teh‸, awˬ pa hta‸ na nyi ve teˇ yanˇ, awˬ pa k'oˆ ve, Yawˇ i htaˇ ka‸ chi hk'e hpeh‸ taˍ ve yoˬ. 22 Yawˇ hta‸ te luˬ tuˬ, aˬ miˍ awˬ hk'aw lo maˇ k'oˆ, iˉ kaˆ awˬ hk'aw lo maˇ k'oˆ, laiˉ pawˆ neˇ yawˇ hta‸ ca‸ keu piˇ ve yoˬ. Ya‸ hk'aˇ, nawˬ teˇ ceuˬ ceuˬ te hpeh‸ ve k'o, ngaˬ hui hta‸ ha k'aˉ leh ga laˇ-oˆ teh‸ k'oˆ ve yoˬ. 23 Yeˍsuˆ k'oˆ ve, Te hpeh‸ ve k'o teh‸ nawˬ k'oˆ ve laˇ. Yonˍ ve chaw hui awˬ pon awˬ ceuˬ hk'a peu-eˬ hpeh‸ la g'a ve yoˬ teh‸, yawˇ hta‸ k'oˆ piˇ ve yoˬ. 24 Oˇ htaˇ yaˇ paˍ ehˉ ve awˬ pa teˇ cawˬ haˉ kuˬ leh, Ngaˬ yonˍ ve yoˬ. Ngaˬ yonˍ maˇ biˇ ve awˬ ceuˬ hta‸ a ciˉ ga laˇ-oˆ teh‸ k'oˆ piˇ ve yoˬ. 25 Chaw awˬ moˍ lonˉ yawˇ geh g'uiˇ laˬ chehˇ ve hta‸ Yeˍsuˆ g'a mawˬ htaˇ, neˇ cha‸ chiˆ oˇ ve hta‸ deˇ leh, K'aˍ leh naˍ paw pawˇ ve neˇ-oˬ, yawˇ awˬ hk'aw lo tawˆ k'ai leh awˬ hk'aw‸ nawˉ teˇ pawˆ ka‸ yawˇ awˬ hk'aw lo taˇ k'aw‸ lo‸-e teh‸ ngaˬ nawˬ hta‸ tawˇ piˇ ve yoˬ teh‸ k'oˆ piˇ ve yoˬ. 26 Oˇ htaˇ, neˇ oˇ ve bvuhˬ chaweh kuˬ leh yaˇ paˍ oˇ ve hta‸ g'aˇ hte‸ paw‸ hpeuˆ tcuh peuˬ hk'aw‸ nawˉ tawˆ k'ai ve yoˬ. Yaˇ paˍ ehˉ oˇ ve chaw suh hk'e hpeh‸ ve pa taw, Yawˇ suh peuˬ teh‸, chaw laiˉ g'aˇ k'oˆ ve yoˬ. 27 Ya‸ hk'aˇ, Yeˍsuˆ yawˇ ve la‸ sheh hta‸ vawˆ leh, yawˇ hta‸ g'awˬ tu piˇ leh yawˇ tu la ve yoˬ. 28 Yeˍsuˆ aˉ hk'aw lo‸-e peuˬ hk'aw‸ nawˉ, yawˇ ve awˬ la‸ g'awˇ teˇ hpaˍ ta‸ iˉ gawˬ lehˍ ve awˬ hk'aw lo, Neˇ oˇ ve hta‸ aˬ hto‸ ma pa taw ngaˬ hui g'a‸ k'oˬ maˇ g'a ve le teh‸, yawˇ hta‸ na nyi ve yoˬ. 29 Yeˍsuˆ lehˬ, Bon lawˬ ve teˇ ceuˬ maˇ heˆ k'o, neˇ chi teˇ ceuˬ hta‸ g'a‸ k'oˬ maˇ g'a teh‸, yawˇ hui hta‸ k'oˆ piˇ ve yoˬ. 30 Yawˇ hui oˇ kaˬ lo tawˆ k'ai leh Gaˍliˍlehˇ mvuhˇ miˬ hta‸ hpanˍ k'ai ve yoˬ. Yawˇ hui k'ai ve awˬ lawn chaw teˇ g'aˇ hta‸ ka‸ yawˇ maˇ shiˍ piˇ gaˇ ve yoˬ. 31 Awˬ lawn k'o, yawˇ yawˇ ve awˬ la‸ g'awˇ hui hta‸ maˍ piˇ leh k'oˆ ve, Chaw yaˇ ve Yaˇ hpu lehˬ, chaw yaˇ hui ve la‸ sheh awˬ hk'aw lo chiˇ a‸ ve hta‸ g'a hkanˍ leh, yawˇ hui yawˇ hta‸ tiˇ pehˍ tuˬ yoˬ. Tiˇ pehˍ peuˬ hk'aw‸ nawˉ, shehˆ nyi gaˬ k'o yawˇ k'aw‸ te‸ tu la tuˬ yoˬ teh‸, yawˇ hui hta‸ k'oˆ piˇ ve yoˬ. 32 Tawˇ hkawˇ oˇ ve hta‸ yawˇ hui na maˇ g'a htawˇ, yawˇ hta‸ k'aw‸ na nyi maˇ haˆ. 33 Oˇ ve hk'aw‸ nawˉ yawˇ hui Kaˍpeˍ neˍonˍ venˇ lo gaˬ ve yoˬ. Yawˇ yehˬ hk'aw lo chehˇ taˍ ve teˇ yanˇ, Ya‸ k'aw k'aˉ lo nawˬ hui aˬ hto‸ ma awˬ lawn jehˬ da‸ ve le teh‸, yawˇ yawˇ hui hta‸ na nyi ve yoˬ. 34 Ya‸ hk'aˇ, yawˇ hui ta‸ iˉ chehˇ taˍ ve yoˬ. Awˬ lawn k'o, hk'aˬ ve teˇ g'aˇ shu a‸ kehˉ uiˍ ve le teh‸ ya‸ k'aw k'aˉ lo yawˇ hui teˇ g'aˇ leh teˇ g'aˇ jehˬ da‸ ve yoˬ. 35 Oˇ htaˇ yawˇ mui taˍ leh, tcuh yaˇ teˇ chi nyiˇ g'aˇ hta‸ kuˬ yuˬ leh, Shu a‸ kehˉ uiˍ gaˇ ve chaw teˇ g'aˇ lehˬ, hk'a peu-eˬ a‸ kehˉ i ve chaw g'a hpeh‸ leh, hk'a peu-eˬ ve awˬ ceˬ g'a hpeh‸ ve yoˬ teh‸, yawˇ yawˇ hui hta‸ k'oˆ piˇ ve yoˬ. 36 Peuˬ leh, yaˇ ehˉ teˇ g'aˇ hta‸ yawˇ yuˬ leh yawˇ hui awˬ k'aw ji lo taˍ ve yoˬ. Yaˇ ehˉ hta‸ yawˇ chiˇ taˆ taˍ leh, yawˇ hui hta‸ k'oˆ piˇ ve, 37 Yaˇ ehˉ chi hk'e ve teˇ g'aˇ hta‸ ngaˬ ve awˬ meh awˬ hk'aw lo ha‸ yuˬ ve chaw hk'aˬ ve teˇ g'aˇ maˇ k'oˆ, ngaˬ hta‸ ha‸ yuˬ ve yoˬ. Ngaˬ hta‸ ha‸ yuˬ ve chaw lehˬ, ngaˬ hta‸ ceh tiˉ ha‸ yuˬ ve maˇ heˆ. Ngaˬ hta‸ peu laˇ shehˍ hpaˇ hta‸ yawˇ ha‸ yuˬ ve yoˬ teh‸ k'oˆ ve yoˬ. 38 Oˇ htaˇ Yoˇhanˬ k'oˆ ve, Saˍ la‸-oˬ, chaw teˇ g'aˇ nawˬ ve awˬ meh hta‸ cuˇ leh neˇ teˇ hpaˍ hta‸ g'a‸ k'oˬ chehˇ ve hta‸ ngaˬ hui g'a mawˬ ve yoˬ. Yawˇ ngaˬ hui geh teˇ geh laˬ ve chaw maˇ heˆ ve pa taw, ngaˬ hui yawˇ hta‸ tawˍ taˍ ve yoˬ teh‸, Yeˍsuˆ hta‸ k'oˆ piˇ ve yoˬ. 39 Yeˍsuˆ k'aw‸ k'oˆ ve, Yawˇ hta‸ taˇ tawˍ taˍ. Awˬ lawn k'o, ngaˬ ve awˬ meh hta‸ cuˇ leh anˇ tuˬ te ve chaw hk'aˬ ve teˇ g'aˇ maˇ k'oˆ, ngaˬ hta‸ haˆ haˆ k'aw‸ hk'aiˉ g'a tuˬ ve maˇ heˆ. 40 Ngaˬ hui ve canˇ paˍ hpawˇ maˇ chehˇ ve chaw teˇ g'aˇ lehˬ, ngaˬ hui hpawˇ chehˇ ve chaw hpeh‸ ve yoˬ. 41 Awˬ lawn k'o, Hkri‸ ve awˬ meh hta‸ nawˬ hui pfuhˇ taˍ ve pa taw, hk'aˬ ve chaw teˇ g'aˇ htawˇ maˇ k'oˆ, nawˬ hui hta‸ iˉ kaˆ teˇ kawˆ taw laˇ ve k'o, yawˇ ve awˬ bon a ciˉ ka‸ maˇ mehˉ taˬ teh‸, ngaˬ nawˬ hui hta‸ awˬ tehˬ awˬ na k'oˆ laˇ ve yoˬ. 42 Ngaˬ hta‸ yonˍ ve yaˇ ehˉ teˇ g'aˇ hta‸ ya‸ k'ai tuˬ te ve chaw hk'aˬ ve teˇ g'aˇ maˇ k'oˆ, yawˇ ve k'awˍ peˍ hta‸ haˉ pui mawˍ lonˉ hpeh k'u leh laˇ tsuhˇ g'uiˬ awˬ hk'aw lo ce peu ve k'o, yawˇ awˬ pon da‸ leuˉ ve yoˬ. 43 Nawˬ ve la‸ sheh teˇ paˉ nawˬ hta‸ te ya‸ piˇ lawˬ ve k'o, tawˆ baˬ-o‸. La‸ sheh nyiˇ paˉ paˉ cawˬ leh, moˬ naˆ ho‸ lo maˇ suh puiˉ ve aˬ miˍ to‸ chehˇ ve awˬ hk'aw lo g'a hkanˍ ve a‸ kehˉ, la‸ luˬ leh a sha‸ te‸ ve awˬ hk'aw lo g'a lo‸-e ve lehˬ, nawˬ awˬ pon da‸ leuˉ ve yoˬ. 45 Nawˬ ve hkui sheh teˇ paˉ nawˬ hta‸ te ya‸ piˇ lawˬ ve k'o, tawˆ baˬ-o‸. Hkui sheh nyiˇ paˉ paˉ cawˬ leh moˬ naˆ ho‸ awˬ hk'aw lo baˬ keu ve hta‸ g'a hkanˍ ve a‸ kehˉ, hkui luˬ leh a sha‸ te‸ ve awˬ hk'aw lo g'a lo‸-e ve lehˬ, nawˬ awˬ pon da‸ leuˉ ve yoˬ. 47 Nawˬ ve mehˆ shiˍ teˇ paˉ nawˬ hta‸ te ya‸ piˇ lawˬ ve k'o, k'ehˉ baˬ-o‸. Mehˆ shiˍ nyiˇ paˉ paˉ cawˬ leh, awˬ pfuhˇ ma maˇ suh puiˉ, aˬ miˍ ka‸ maˇ suh puiˉ ve moˬ naˆ ho‸ awˬ hk'aw lo baˬ keu ve hta‸ g'a hkanˍ ve a‸ kehˉ, 48 mehˆ shiˍ teˇ paˉ tiˉ cawˬ leh G'uiˬ sha ve mvuhˇ miˬ awˬ hk'aw lo g'a lo‸-e ve lehˬ, nawˬ awˬ pon da‸ leuˉ ve yoˬ. 49 Awˬ lawn k'o, aˉ leh‸ yuˬ leh tanˇ tuˬ hta‸ pfuhˍ piˇ ve hk'e, aˬ miˍ pfuhˍ piˇ ve teˇ ceuˬ hta‸ chaw hk'a peu-eˬ g'a hkanˍ tuˬ yoˬ. 50 Aˉ leh‸ lehˬ da‸ ve yoˬ. Ya‸ hk'aˇ, mehˬ ve pehˆ k'ai peuˬ ve k'o, hk'aˬ hk'e te k'aw‸ mehˬ la tuˬ le. Nawˬ hui awˬ hk'aw lo aˉ leh‸ cawˬ piˇ leh, teˇ g'aˇ leh teˇ g'aˇ cawˇ da‸ hui da‸ cawˬ piˇ-oˆ teh‸ k'oˆ piˇ ve yoˬ.

Maˍkuˆ 10

1 Yawˇ oˇ kaˬ lo tawˆ k'ai leh, Yawˇdanˍ g'uiˬ ma coˇ paˉ lo cawˬ ve Yuˇda‸ mvuhˇ miˬ teˇ tawn lo k'ai leh, chaw awˬ moˍ lonˉ teˇ hpaˍ yawˇ geh k'aw‸ hpawnˬ la ve yoˬ. Yawˇ awˬ liˇ cawˬ taˍ ve hk'e, yawˇ yawˇ hui hta‸ maˍ piˇ ve yoˬ. 2 Oˇ htaˇ yawˇ hta‸ lawˇ nyi tuˬ, Hpaˍriˍ sehˇ teˇ hpaˍ yawˇ geh laˬ leh, Awˬ hpawˇ teˇ g'aˇ lehˬ, a shu yawˇ ve awˬ miˇ ma hta‸ baˬ hpeh‸-aw laˇ teh‸, yawˇ hta‸ na nyi ve yoˬ. 3 Yawˇ k'aw‸ k'oˆ ve, Moˉseˍ nawˬ hui hta‸ tawˇ hk'aˬ hk'e piˇ taˍ ve le teh‸, yawˇ hui hta‸ na nyi htaˇ, 4 Baˬ da‸ ve li‸ teˇ k'oˆ bvuh‸ piˇ peuˬ k'o, awˬ miˇ ma hta‸ baˬ hpeh‸-aw teh‸ Moˉseˍ tawˇ piˇ ve yoˬ teh‸, yawˇ hui k'aw‸ k'oˆ piˇ ve yoˬ. 5 Yeˍsuˆ k'aw‸ k'oˆ ve, Nawˬ hui nyi ma heh ve pa taw Moˉseˍ nawˬ hui hta‸ tawˇ chi hk'e piˇ ve yoˬ. 6 Ya‸ hk'aˇ, hk'a peu-eˬ hta‸ awˬ hkuiˉ puiˍ te hpanˍ htaˇ ka‸, G'uiˬ sha lehˬ hawˉ hk'aˆ leh yaˇ miˇ hta‸ te hpanˍ taˍ ve yoˬ. 7 Chi hta‸ pa taw hawˉ hk'aˆ lehˬ, yawˇ ve awˬ pa awˬ e hta‸ hpaˆ da‸ taˉ leh, 8 yawˇ huiˉ maˬ teˇ suhˍ teˇ shaˍ tiˉ hpeh‸ la tuˬ yoˬ. Chi hta‸ pa taw, yawˇ huiˉ maˬ nyiˇ g'aˇ hpeh‸ ve maˇ heˆ, teˇ g'aˇ tiˉ hpeh‸ la peuˬ. 9 Hk'e te leh, G'uiˬ sha caˉ da‸ piˇ taˍ ve hta‸ chaw yaˇ maˇ g'a yuˬ hpaˆ da‸ piˇ teh‸ k'oˆ piˇ ve yoˬ. 10 Yehˬ awˬ hk'aw lo chehˇ taˍ ve teˇ yanˇ, awˬ la‸ g'awˇ teˇ hpaˍ lehˬ, awˬ lawn oˇ ve yawˇ hta‸ k'aw‸ na nyi ve yoˬ. 11 Oˇ htaˇ yawˇ k'oˆ ve, A shu yawˇ ve awˬ miˇ ma hta‸ baˬ leh awˬ kaˍ awˬ nu yaˇ miˇ hta‸ ca heuˆ ve chaw hk'aˬ ve teˇ g'aˇ maˇ k'oˆ, haˉ chawˇ haˉ paˆ te ve pa taw, yawˇ ve awˬ miˇ ma hta‸ ya‸ ve yoˬ. 12 Yaˇ miˇ htawˇ, a shu yawˇ ve awˬ hpawˇ hta‸ baˬ leh awˬ kaˍ awˬ nu hawˉ hk'aˆ hta‸ ca heuˆ ve k'o, haˉ chawˇ haˉ paˆ te ve yoˬ teh‸, yawˇ hui hta‸ k'oˆ piˇ ve yoˬ. 13 Oˇ htaˇ yaˇ ehˉ teˇ hpaˍ hta‸ Yeˍsuˆ htawˇ piˇ tuˬ, yaˇ ehˉ teˇ hpaˍ hta‸ shu yawˇ geh shiˍ laˬ ve teˇ yanˇ, awˬ la‸ g'awˇ teˇ hpaˍ lehˬ, shiˍ laˬ ve chaw teˇ hpaˍ hta‸ deˇ ve yoˬ. 14 Yeˍsuˆ oˇ ve hta‸ g'a mawˬ htaˇ nyi ma zuhˆ leh, Yaˇ ehˉ teˇ hpaˍ hta‸ ngaˬ geh laˬ piˇ-oˆ. Yawˇ hui hta‸ taˇ tawˍ taˍ. Awˬ lawn k'o, G'uiˬ sha ve mvuhˇ miˬ lehˬ, chaw oˇ hk'e ve mvuhˇ miˬ hpeh‸ ve yoˬ. 15 Ngaˬ nawˬ hui hta‸ awˬ tehˬ awˬ na k'oˆ laˇ ve, yaˇ ehˉ hk'a shuˍ shuˍ G'uiˬ sha ve mvuhˇ miˬ hta‸ maˇ ha‸ yuˬ ve chaw hk'aˬ ve teˇ g'aˇ maˇ k'oˆ, G'uiˬ sha ve mvuhˇ miˬ awˬ hk'aw lo maˇ g'a lo‸-e taˬ teh‸, yawˇ hui hta‸ k'oˆ piˇ ve yoˬ. 16 Oˇ htaˇ, yaˇ ehˉ teˇ hpaˍ hta‸ yawˇ chiˇ taˆ taˍ leh, yawˇ hui awˬ hk'oˆ la‸ sheh taˍ leh bon na‸ piˇ ve yoˬ. 17 Yawˇ ya‸ k'aw k'ai chehˇ htaˇ, chaw teˇ g'aˇ yawˇ geh g'uiˇ laˬ leh yawˇ mehˆ g'uˇ suhˍ hkui tcuhˉ teh leh, Da‸ ve Saˍ la‸-oˬ, co ti‸ ha ti‸ g'a tuˬ ngaˬ hk'aˬ hk'e g'a te tuˬ le teh‸, yawˇ hta‸ na nyi ve yoˬ. 18 Yeˍsuˆ k'aw‸ k'oˆ ve, Aˬ hto‸ ma pa taw nawˬ ngaˬ hta‸ da‸ ve teh‸ k'oˆ ve le. G'uiˬ sha maˇ heˆ k'o, da‸ ve teˇ g'aˇ ka‸ maˇ cawˬ. 19 Awˬ liˇ tawˇ hkawˇ teˇ hpaˍ hta‸ nawˬ shiˍ ve yoˬ. Chaw hta‸ taˇ tiˇ pehˍ, haˉ chawˇ haˉ paˆ taˇ te, shu ve mawˇ hta‸ taˇ hk'awˇ, shu hta‸ maˇ heˆ heˆ ve shaˉ hkiˆ taˇ hkanˍ, shu ve mawˇ hta‸ taˇ heˍ yuˬ, nawˬ ve awˬ pa awˬ e hta‸ yawˆ yawˆ yan yan te-o teh‸, yawˇ hta‸ k'oˆ piˇ ve yoˬ. 20 Chaw oˇ ve lehˬ, Saˍ la‸-oˬ, ngaˬ yaˇ nehˬ hpeh‸ ve teˇ yanˇ htaˇ ka‸ tanˬ leh chi hk'a peu-eˬ hta‸ ngaˬ na yuˬ leh te peuˬ teh‸ Yeˍsuˆ hta‸ k'aw‸ k'oˆ piˇ ve yoˬ. 21 Yeˍsuˆ yawˇ hta‸ nyi leh yawˇ hta‸ ha‸ leh, Nawˬ teˇ ceuˬ loˍ sheˍ ve yoˬ. Nawˬ k'o‸-e leh hk'a cawˬ ve mawˇ jeˬ hta‸ hawˇ baˬ leh haˍ yaˇ g'awˇ yaˇ teˇ hpaˍ hta‸ pehˬ piˇ-oˆ. Mvuhˇ naw ma hk'oˆ lo awˬ hpfuhˇ hk'aˆ ve mawˇ nawˬ cawˬ taˍ tuˬ yoˬ. Peuˬ leh, nawˬ k'aw‸ laˬ leh ngaˬ hk'aˇ suh laˬ-o‸ teh‸ yawˇ hta‸ k'oˆ piˇ ve yoˬ. 22 Tawˇ hkawˇ chi ve hta‸ yawˇ g'a kaˇ htaˇ, mehˆ hpfuhˇ nawˍ lehˍ te leh, dawˇ haˍ jaˇ leh k'o‸-e ve yoˬ. Awˬ lawn k'o, yawˇ mawˇ jeˬ cawˬ maˇ jaˇ ve yoˬ. 23 Yeˍsuˆ lehˬ, yawˇ ve awˬ la‸ g'awˇ hui hta‸ caw nyi leh k'oˆ ve, Paw sha ve chaw hui lehˬ, G'uiˬ sha ve mvuhˇ miˬ awˬ hk'aw lo lo‸-e tuˬ hk'aˬ ma haˍ jaˇ ve le. 24 Awˬ la‸ g'awˇ teˇ hpaˍ lehˬ, yawˇ k'oˆ ve tawˇ hkawˇ hta‸ g'a kaˇ htaˇ anˇ jaˇ ve yoˬ. Teˇ pawˆ Yeˍsuˆ yawˇ hui hta‸ k'oˆ piˇ ve, Ngaˬ yaˇ teˇ hpaˍ-oˬ, G'uiˬ sha ve mvuhˇ miˬ awˬ hk'aw lo lo‸-e tuˬ hk'aˬ ma haˍ jaˇ ve le. 25 Kaˍ laˍ oˆ teˇ hkeh g'o‸ naˍ hk'awˇ awˬ hk'aw lo‸-e tuˬ ve lehˬ, paw sha ve chaw teˇ g'aˇ G'uiˬ sha ve mvuhˇ miˬ awˬ hk'aw lo lo‸-e tuˬ ve a‸ kehˉ sha ve yoˬ teh‸ k'oˆ piˇ ve yoˬ. 26 Yawˇ hui leuˉ leh anˇ jaˇ leh, Hk'e te k'o, htaiˍ hk'aw‸ ve hta‸ a shu g'a hpeh‸ tuˬ le teh‸ yawˇ hta‸ k'oˆ piˇ ve yoˬ. 27 Yeˍsuˆ yawˇ hui hta‸ nyi leh, Chaw yaˇ lehˬ chi hta‸ te maˇ g'a. Ya‸ hk'aˇ, G'uiˬ sha te maˇ g'a ve maˇ heˆ. Awˬ lawn k'o, G'uiˬ sha lehˬ hk'a peu-eˬ hta‸ te g'a ve yoˬ teh‸, yawˇ hui hta‸ k'oˆ piˇ ve yoˬ. 28 Oˇ htaˇ Peˍtruˆ k'oˆ ve, Ngaˬ hui lehˬ hk'a peu-eˬ hta‸ baˬ taˉ leh nawˬ awˬ hk'aˇ suh laˬ peuˬ teh‸ yawˇ hta‸ k'oˆ piˇ ve yoˬ. 29 Yeˍsuˆ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ awˬ pon leh ha lehˬ ve bon hkawˇ awˬ pon, a shu yawˇ ve yehˬ, a shu yawˇ ve awˬ viˉ awˬ nyi, a shu yawˇ ve awˬ pa awˬ e, a shu yawˇ ve awˬ yaˇ awˬ duˬ leh a shu yawˇ ve ti mi teˇ hpaˍ hta‸ baˬ taˉ ve chaw hk'aˬ ve teˇ g'aˇ maˇ k'oˆ, 30 chi teˇ ca‸ na‸ awˬ hk'aw lo yehˬ, awˬ viˉ awˬ nyi, awˬ e, awˬ yaˇ awˬ duˬ leh ti mi teˇ hpaˍ hta‸ teˇ ha pun g'a ve yoˬ. Chi teˇ hpaˍ geh teˇ geh tu‸ ve hkanˍ ve hta‸ htawˇ g'a ve yoˬ. Awˬ hk'aw‸ nawˉ teˇ ca‸ na‸ awˬ hk'aw lo co ti‸ ha ti‸ hta‸ htawˇ g'a ve yoˬ. 31 Ya‸ hk'aˇ, shu awˬ g'uˇ suhˍ chehˇ ve chaw maˇ maˇ, shu awˬ hk'aw‸ nawˉ g'a k'aw‸ chehˇ tuˬ yoˬ. Shu awˬ hk'aw‸ nawˉ chehˇ ve chaw maˇ maˇ, shu awˬ g'uˇ suhˍ g'a k'aw‸ chehˇ tuˬ yoˬ teh‸ k'oˆ piˇ ve yoˬ. 32 Oˇ ve awˬ hk'aw‸ nawˉ, yawˇ hui Yeˍruˆsaˍlehnˍ venˇ lo k'ai chehˇ htaˇ, ya‸ k'aw k'aˉ lo Yeˍsuˆ lehˬ yawˇ hui awˬ g'uˇ suhˍ k'ai ve yoˬ. Yawˇ hui anˇ jaˇ leh, yawˇ hui awˬ hk'aˇ suh k'ai ve chaw teˇ hpaˍ htawˇ kawˆ ve yoˬ. Oˇ htaˇ tcuh yaˇ teˇ chi nyiˇ g'aˇ hta‸ yawˇ k'aw‸ kuˬ yuˬ leh, yawˇ hk'aˬ hk'e g'a hkanˍ tuˬ ve awˬ lawn teˇ hpaˍ yawˇ hui hta‸ hto piˇ ve, 33 Ngaˬ hui Yeˍruˆsaˍlehnˍ venˇ lo k'ai chehˇ ve yoˬ. Chaw yaˇ ve Yaˇ hpu lehˬ, paw hkuˇ lonˉ hui leh li‸ bvuh‸ paˍ hui ve la‸ sheh awˬ hk'aw lo chiˇ a‸ ve hta‸ g'a hkanˍ tuˬ yoˬ. Yawˇ g'a suh tuˬ ve yawˇ hui yawˇ hta‸ suhˉ taˆ leh, buiˇ shaˆ aˉ naˆ chaw hui ve la‸ sheh awˬ hk'aw lo chiˇ a‸ piˇ tuˬ yoˬ. 34 Yawˇ hui yawˇ hta‸ maˇ shawˍ maˇ caˆ te leh, ciˉ g'uiˇ hpe‸ pfuhˍ leh, yawˇ hta‸ jaw‸ peuˬ hk'aw‸ nawˉ yawˇ hta‸ tiˇ pehˍ tuˬ yoˬ. Peuˬ leh shehˆ nyi teˇ nyi gaˬ k'o, yawˇ k'aw‸ te‸ tu la tuˬ yoˬ teh‸ k'oˆ ve yoˬ. 35 Oˇ htaˇ, Zeˍbeˍdehˇ ve awˬ yaˇ paˍ Yaˍkoˆ leh Yoˇhanˬ yawˇ geh laˬ leh, Saˍ la‸-oˬ, ngaˬ huiˉ maˬ lawˬ ve hk'e nawˬ te laˇ tuˬ ngaˬ huiˉ maˬ heuˆ gaˇ ve yoˬ teh‸ yawˇ hta‸ k'oˆ piˇ ve yoˬ. 36 Yawˇ lehˬ, Nawˬ huiˉ maˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸, yawˇ huiˉ maˬ hta‸ k'oˆ piˇ ve yoˬ. 37 Yawˇ huiˉ maˬ lehˬ, Nawˬ awˬ me‸ awˬ hponˇ g'a htaˇ, nawˬ la‸ sha paˉ teˇ g'aˇ, la‸ mehˍ paˉ teˇ g'aˇ, ngaˬ huiˉ maˬ hta‸ mui tcuh laˇ-oˆ teh‸, yawˇ hta‸ k'oˆ piˇ ve yoˬ. 38 Yeˍsuˆ k'oˆ ve, Nawˬ huiˉ maˬ aˬ hto‸ ma hta‸ lawˬ ve, nawˬ huiˉ maˬ maˇ shiˍ. Ngaˬ dawˬ ve kawˆ hta‸ nawˬ huiˉ maˬ dawˬ hpeh‸-aw laˇ. Ngaˬ hkanˍ ve baˆtiˆsaˬ hta‸ nawˬ huiˉ maˬ hkanˍ hpeh‸-aw laˇ teh‸, yawˇ huiˉ maˬ hta‸ k'oˆ piˇ ve yoˬ. 39 Hkanˍ hpeh‸ ve yoˬ teh‸, yawˇ huiˉ maˬ k'aw‸ k'oˆ piˇ ve teˇ yanˇ, Yeˍsuˆ k'aw‸ k'oˆ ve, Ngaˬ dawˬ ve kawˆ hta‸ nawˬ huiˉ maˬ g'a dawˬ tuˬ yoˬ. Ngaˬ hkanˍ ve baˆtiˆsaˬ hta‸ nawˬ huiˉ maˬ g'a hkanˍ tuˬ yoˬ. 40 Ya‸ hk'aˇ, ngaˬ ve la‸ sha paˉ la‸ mehˍ paˉ g'a mui tuˬ, ngaˬ pe‸ laˇ maˇ hpeh‸. Yawˇ hui awˬ pon gu taˍ piˇ ve chaw teˇ hpaˍ ceh tiˉ oˇ kaˬ lo g'a mui ve yoˬ teh‸, yawˇ huiˉ maˬ hta‸ k'oˆ piˇ ve yoˬ. 41 Awˬ lawn chi hta‸ awˬ kaˍ awˬ nu tcuh yaˇ teˇ chi g'aˇ g'a kaˇ htaˇ, Yaˍkoˆ leh Yoˇhanˬ hta‸ yawˇ hui nyi ma zuhˆ ve yoˬ. 42 Oˇ htaˇ, Yeˍsuˆ yawˇ hui hta‸ kuˬ yuˬ leh k'oˆ piˇ ve, Buiˇ shaˆ aˉ naˆ chaw hui awˬ hk'oˆ hta‸ jawˇ mawˇ te tuˬ aˉ yaˇ g'a ve chaw teˇ hpaˍ lehˬ, yawˇ hui hta‸ uˉ peunˍ leh, yawˇ hui ve chaw uiˍ teˇ hpaˍ lehˬ, yawˇ hui hta‸ nyiˉ te ve hta‸ nawˬ hui shiˍ ve yoˬ. 43 Ya‸ hk'aˇ, nawˬ hui awˬ hk'aw lo chi hk'e maˇ g'a te. Nawˬ hui awˬ hk'aw lo chaw uiˍ hpeh‸ gaˇ ve chaw hk'aˬ ve teˇ g'aˇ maˇ k'oˆ, yawˇ nawˬ hui ve awˬ ceˬ g'a te ve yoˬ. 44 Nawˬ hui awˬ hk'aw lo awˬ hoˉ te gaˇ ve chaw hk'aˬ ve teˇ g'aˇ maˇ k'oˆ, hk'a peu-eˬ awˬ pon yawˇ lehˬ vuiˬ taˍ ve awˬ ceˬ g'a hpeh‸ ve yoˬ. 45 Awˬ lawn k'o, chaw yaˇ ve Yaˇ hpu lehˬ, shu yawˇ awˬ pon kanˉ te tuˬ laˬ ve maˇ heˆ. Yawˇ shu awˬ pon kanˉ te tuˬ laˬ leh, chaw maˇ maˇ hta‸ htaiˍ hk'aw‸ tuˬ, yawˇ ve a sha‸ piˇ tuˬ awˬ pon laˬ ve yoˬ teh‸ k'oˆ ve yoˬ. 46 Oˇ htaˇ, yawˇ hui Yeˍriˆhkoˇ venˇ lo gaˬ la ve yoˬ. Yeˍsuˆ lehˬ, yawˇ ve awˬ la‸ g'awˇ hui leh chaw awˬ moˍ lonˉ geh Yeˍriˆhkoˇ venˇ awˬ hk'aw lo tawˆ k'ai chehˇ ve teˇ yanˇ, Tiˆmehˇ ve yaˇ paˍ Baˍtiˆmehˇ meh ve mehˆ cuˉ ve lawˬ leh‸ paˍ teˇ g'aˇ ya‸ k'aw paˇ lo mui chehˇ ve yoˬ. 47 Naˍzaˍrehˆ chaw Yeˍsuˆ yoˬ teh‸, yawˇ g'a kaˇ htaˇ yawˇ k'oˆ ve, Daˍviˆ ve Yaˇ hpu Yeˍsuˆ-oˬ, ngaˬ hta‸ ha k'aˉ laˇ-oˆ teh‸ kuˬ ve yoˬ. 48 Chaw laiˉ g'aˇ lehˬ, Ta‸ iˉ chehˇ-oˆ teh‸ yawˇ hta‸ deˇ piˇ ve htawˇ, yawˇ lehˬ, Daˍviˆ ve Yaˇ hpu-oˬ, ngaˬ hta‸ ha k'aˉ laˇ-oˆ teh‸, leuˉ leh g'aˇ hte‸ k'aw‸ kuˬ ve yoˬ. 49 Yeˍsuˆ huˉ taˍ leh, Yawˇ hta‸ kuˬ laˬ-o‸ teh‸ k'oˆ piˇ ve yoˬ. Yawˇ hui mehˆ cuˉ paˍ oˇ ve hta‸ kuˬ leh, Ha lehˬ chehˇ-oˆ. Tu loˬ. Yawˇ nawˬ hta‸ kuˬ chehˇ ve yoˬ teh‸ k'oˆ piˇ ve yoˬ. 50 Chaw oˇ ve lehˬ, yawˇ ve aˉ po‸ zuhˬ ma hta‸ k'ehˆ teh taˉ leh, pawˆ tu leh Yeˍsuˆ geh laˬ ve yoˬ. 51 Oˇ htaˇ, Yeˍsuˆ yawˇ hta‸ k'oˆ piˇ ve, Nawˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸ na nyi htaˇ, Jawˇ mawˇ-oˬ, ngaˬ mehˆ mawˬ la tuˬ nawˬ hta‸ te tcuh laˇ gaˇ ve yoˬ teh‸, yawˇ hta‸ k'aw‸ k'oˆ piˇ ve yoˬ. 52 Yeˍsuˆ lehˬ, K'ai loˬ. Nawˬ yonˍ ve teˇ ceuˬ lehˬ nawˬ hta‸ na-e la piˇ peuˬ teh‸, yawˇ hta‸ k'oˆ piˇ ve yoˬ. Chaw oˇ ve teˇ cawˬ haˉ mehˆ mawˬ la leh Yeˍsuˆ awˬ hk'aˇ suh k'ai ve yoˬ.

Maˍkuˆ 11

1 Yawˇ hui lehˬ, Yeˍruˆsaˍlehnˍ venˇ awˬ paˇ lo, Shaˍlonˍ hk'aw hta‸ neˇ ve Behˆhpaˍgeˍ hk'aˆ leh Beˍtaˍniˆ hk'aˆ lo gaˬ la ve teˇ yanˇ, yawˇ ve awˬ la‸ g'awˇ nyiˇ g'aˇ hta‸ k'ai tcuh leh k'oˆ ve, 2 Nawˬ huiˉ maˬ awˬ g'uˇ suhˍ lo cawˬ ve hk'aˆ hk'aw lo k'ai-o. Oˇ kaˬ lo lo‸-e ve teˇ yanˇ, chaw teˇ g'aˇ ka‸ maˇ ciˇ jaw sheˍ ve piˉ laˬ ehˉ hpeh taˍ ve hta‸ nawˬ huiˉ maˬ teˇ cawˬ haˉ g'a mawˬ tuˬ yoˬ. 3 Hpui leh sheh veu laˇ-oˆ. Nawˬ huiˉ maˬ aˬ hto‸ ma pa taw chi hk'e te ve le teh‸ chaw teˇ g'aˇ g'aˇ na nyi laˇ ve k'o, Jawˇ mawˇ loˍ leh yawˇ teˇ cawˬ haˉ k'aw‸ hk'aw‸ veu laˇ tuˬ yoˬ teh‸ k'oˆ piˇ-oˆ teh‸, yawˇ huiˉ maˬ hta‸ k'oˆ piˇ ve yoˬ. 4 Yawˇ huiˉ maˬ k'ai leh, yehˬ miˉ awˬ baˬ ya‸ k'aw hpuiˇ lo piˉ laˍ ehˉ hpeh taˍ ve hta‸ g'a mawˬ htaˇ, piˉ laˍ ehˉ oˇ ve hta‸ hpui ve yoˬ. 5 Oˇ kaˬ lo huˉ chehˇ ve chaw teˇ hpaˍ hpaˍ lehˬ, Nawˬ huiˉ maˬ aˬ hto‸ ma pa taw piˉ laˍ ehˉ hta‸ hpui ve le teh‸ yawˇ huiˉ maˬ hta‸ k'oˆ piˇ ve yoˬ. 6 Yeˍsuˆ yawˇ huiˉ maˬ hta‸ k'oˆ piˇ taˍ ve hk'e yawˇ huiˉ maˬ k'aw‸ k'oˆ piˇ ve teˇ yanˇ, yawˇ hui a hkaw-anˬ piˇ ve yoˬ. 7 Oˇ htaˇ yawˇ huiˉ maˬ piˉ laˬ ehˉ oˇ ve hta‸ Yeˍsuˆ geh sheh veu laˇ leh, piˉ laˍ ehˉ awˬ hk'oˆ hta‸ yawˇ hui ve veu‸ k'aˇ hk'awˇ piˇ peuˬ hk'aw‸ nawˉ Yeˍsuˆ taˆ ciˇ ve yoˬ. 8 Chaw maˇ maˇ a shu yawˇ ve veu‸ k'aˇ hta‸ ya‸ k'aw hpuiˇ lo hk'awˇ piˇ leh, teˇ hpaˍ hpaˍ heh jaˇ lo suhˆ hpa‸ chaw leh ya‸ k'aw hpuiˇ lo hk'awˇ piˇ ve yoˬ. 9 Yawˇ awˬ g'uˇ suhˍ leh awˬ hk'aw‸ nawˉ k'ai ve chaw teˇ hpaˍ kuˬ leh k'oˆ ve, Hoˍsaˍnaˍ, Jawˇ mawˇ G'uiˬ sha ve awˬ meh awˬ hawˉ lo laˬ ve chaw lehˬ, awˬ bon uiˍ piˇ-oˆ. 10 Laˬ chehˇ ve ngaˬ hui ve awˬ pa Daˍviˆ ve mvuhˇ miˬ lehˬ, awˬ bon uiˍ piˇ-oˆ. Mvuhˇ naw ma lo htawˇ Hoˍsaˍnaˍ hpeh‸ piˇ-oˆ teh‸, yawˇ hui k'oˆ ve yoˬ. 11 Oˇ htaˇ, yawˇ Yeˍruˆsaˍlehnˍ venˇ awˬ hk'aw lo lo‸-e leh bon yehˬ lonˉ awˬ hk'aw lo k'ai ve yoˬ. Teˇ ceuˬ le le hta‸ yawˇ caw nyi peuˬ hk'aw‸ nawˉ, mvuhˇ hpeu‸ la ve pa taw tcuh yaˇ teˇ chi nyiˇ g'aˇ yawˇ geh teˇ geh Beˍtaˍniˆ hk'aˆ lo k'ai ve yoˬ. 12 Mvuhˇ htiˇ la leh, Beˍtaˍniˆ hk'aˆ hk'aw lo yawˇ hui tawˆ la ve teˇ yanˇ, yawˇ awˍ meu‸ ve yoˬ. 13 Hk'e te leh yawˇ vuiˇ kuiˬ lo chehˇ htaˇ ka‸ awˬ hpa‸ cawˬ ve maˉ nawˆ cehˬ teˇ cehˬ hta‸ g'a mawˬ leh, awˬ cehˬ oˇ ve awˬ shiˍ naw‸ leh naˍ maˇ naw‸ leh naˍ, g'a mawˬ tuˬ yawˇ ca nyi ve yoˬ. Awˬ paˇ lo yawˇ gaˬ ve teˇ yanˇ, awˬ shiˍ naw‸ ve awˬ yanˇ maˇ heˆ ve pa taw, awˬ hpa‸ hta‸ ceh tiˉ yawˇ g'a mawˬ ve yoˬ. 14 Oˇ htaˇ Yeˍsuˆ lehˬ, Ya‸ nyi hk'aw‸ nawˉ k'o, nawˬ ve awˬ shiˍ hta‸ a shu ka‸ taˇ g'a caˇ piˇ teh‸, maˉ nawˆ cehˬ hta‸ k'oˆ piˇ ve yoˬ. Yawˇ oˇ hk'e k'oˆ ve hta‸ yawˇ ve awˬ la‸ g'awˇ teˇ hpaˍ g'a kaˇ ve yoˬ. 15 Oˇ htaˇ yawˇ hui Yeˍruˆsaˍlehnˍ venˇ lo gaˬ ve yoˬ. Yawˇ bon yehˬ lonˉ awˬ hk'aw lo‸-e leh, bon yehˬ lonˉ awˬ hk'aw lo mawˇ vuiˬ mawˇ hawˇ ve chaw teˇ hpaˍ hta‸ g'a‸ k'oˬ leh, hpu pa shehˍ hpaˇ hui ve hpui lawˇ teˇ hpaˍ hta‸ maˇ k'oˆ, aˉ pui k'aˍ hawˇ shehˍ hpaˇ hui ve mui hk'awˇ teˇ hpaˍ hta‸ maˇ k'oˆ, yawˇ hpfuhˆ baˬ ve yoˬ. 16 Mawˇ teˇ ceuˬ ceuˬ yuˬ leh bon yehˬ lonˉ oˇ ve hta‸ hpanˍ k'ai tuˬ, chaw teˇ g'aˇ hta‸ ka‸ yawˇ a hkaw-anˬ maˇ piˇ. 17 Yawˇ yawˇ hui hta‸ maˍ piˇ ve, Ngaˬ ve yehˬ hta‸ chaw teˇ ceuˬ le le awˬ pon bon lawˬ kuiˬ yehˬ g'a k'oˆ tuˬ yoˬ teh‸ bvuh‸ taˍ ve htawˇ, nawˬ hui lehˬ, yehˬ chi hta‸ chaw hk'awˇ chehˇ kuiˬ hpeh‸ la piˇ peuˬ teh‸ k'oˆ ve yoˬ. 18 Paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ tawˇ hkawˇ oˇ ve hta‸ g'a kaˇ htaˇ, yawˇ hta‸ tiˇ pehˍ tuˬ awˬ hk'aˇ ca ve yoˬ. Awˬ lawn k'o, chaw hk'a peu-eˬ yawˇ maˍ piˇ ve hta‸ anˇ jaˇ ve pa taw, paw hkuˇ lonˉ hui leh li‸ bvuh‸ paˍ teˇ hpaˍ yawˇ hta‸ kawˆ ve yoˬ. 19 Mvuhˇ hpeu‸ la ve teˇ yanˇ yawˇ hui venˇ awˬ baˬ lo tawˆ k'ai ve yoˬ. 20 Awˬ hk'aw‸ nawˉ teˇ shawˉ yawˇ hui ya‸ k'aw oˇ ve hta‸ k'aw‸ k'ai htaˇ, maˉ nawˆ cehˬ oˇ ve lehˬ, awˬ geu hk'a gaˬ nawˍ k'ai goˇ k'ai ve hta‸ yawˇ hui g'a mawˬ ve yoˬ. 21 Oˇ htaˇ Peˍtruˆ dawˇ nawˇ la leh, Jawˇ mawˇ-oˬ, nyi sheˍ. Nawˬ hkeu piˇ taˉ ve maˉ nawˆ cehˬ lehˬ, nawˍ k'ai goˇ k'ai peuˬ law leˇ teh‸, yawˇ hta‸ k'oˆ piˇ ve yoˬ. 22 Yeˍsuˆ yawˇ hui hta‸ k'aw‸ k'oˆ piˇ ve, G'uiˬ sha hta‸ yonˍ loˬ. 23 Ngaˬ nawˬ hui hta‸ awˬ teh‸ awˬ na k'oˆ laˇ ve, chaw hk'aˬ ve teˇ g'aˇ maˇ k'oˆ, yawˇ k'oˆ ve hk'e hpeh‸ la tuˬ yoˬ teh‸ yonˍ leh, nyi ma htawˇ dawˇ nawˬ dawˇ maˇ te ve k'o, hk'aw chi teˇ shiˍ hta‸, Jiˆ tawˆ-e leh laˇ tsuhˇ g'uiˬ awˬ hk'aw lo ca ce lo‸-e loˬ teh‸ k'oˆ ve teˇ yanˇ, yawˇ awˬ pon hpeh‸ la tuˬ yoˬ. 24 Hk'e te leh, ngaˬ nawˬ hui hta‸ k'oˆ laˇ ve, nawˬ hui bon lawˬ ve awˬ hk'aw lo hk'a lawˬ ve hk'a peu-eˬ hta‸ g'a tuˬ yoˬ teh‸ yonˍ loˬ. Oˇ hk'e yonˍ ve k'o, nawˬ hui g'a tuˬ yoˬ. 25 Nawˬ hui huˉ taˍ leh bon lawˬ chehˇ ve teˇ yanˇ, chaw teˇ g'aˇ g'aˇ awˬ hk'oˆ hta‸ nawˬ venˇ baˆ taˍ ve k'o, venˇ baˆ oˇ ve hta‸ hpehˇ hk'a-o. Oˇ hk'e te ve k'o, mvuhˇ naw ma hk'oˆ chehˇ ve nawˬ hui ve Awˬ pa lehˬ, nawˬ hui ve venˇ baˆ hta‸ htawˇ hpehˇ hk'a laˇ tuˬ yoˬ teh‸ k'oˆ ve yoˬ. 26 Li‸ hpu teˇ hpaˍ awˬ hk'aw lo ka nanˉ ehˉ chi teˇ maˬ cawˬ ve yoˬ. Nawˬ hui lehˬ shu ve venˇ baˆ hta‸ maˇ hpehˇ piˇ ve k'o, mvuhˇ naw ma hk'oˆ chehˇ ve nawˬ hui ve Awˬ pa htawˇ nawˬ hui ve venˇ baˆ hta‸ maˇ hpehˇ laˇ. 27 Yawˇ hui Yeˍruˆsaˍlehnˍ venˇ lo teˇ pawˆ k'aw‸ gaˬ la ve yoˬ. Yawˇ bon yehˬ lonˉ awˬ hk'aw lo toˇ k'ai chehˇ ve teˇ yanˇ, paw hkuˇ lonˉ teˇ hpaˍ, li‸ bvuh‸ paˍ teˇ hpaˍ leh awˬ hoˉ chaw mawˇ teˇ hpaˍ yawˇ geh laˬ leh k'oˆ ve, 28 Nawˬ hk'aˬ hk'e ve kanˇ paˆ g'a leh chi teˇ hpaˍ hta‸ te ve le. Kanˇ paˆ chi a shu nawˬ hta‸ pe‸ laˇ ve le teh‸ yawˇ hta‸ na nyi ve yoˬ. 29 Yeˍsuˆ k'aw‸ k'oˆ piˇ ve, Ngaˬ htawˇ nawˬ hui hta‸ tawˇ teˇ hkawˇ na nyi shaˍ. Nawˬ hui yaw hk'aw‸ laˇ ve k'o, ngaˬ hk'aˬ hk'e ve kanˇ paˆ g'a leh chi teˇ hpaˍ hta‸ te ve awˬ lawn nawˬ hui hta‸ hto laˇ tuˬ yoˬ. 30 Yoˇhanˬ yawˇ baˆtiˆsaˬ piˇ ve teˇ ceuˬ lehˬ, mvuhˇ naw ma lo g'a ve laˇ, maˇ heˆ k'o chaw yaˇ hui geh lo g'a ve laˇ. Ngaˬ hta‸ k'aw‸ hto laˇ-oˆ teh‸, yawˇ hui hta‸ k'oˆ piˇ ve yoˬ. 31 Yawˇ hui teˇ g'aˇ leh teˇ g'aˇ jehˬ da‸ leh k'oˆ ve, Mvuhˇ naw ma lo g'a ve teh‸ ngaˬ hui k'oˆ ve k'o, Hk'e te leh, nawˬ hui aˬ hto‸ ma te yawˇ hta‸ maˇ yonˍ ve le teh‸, yawˇ ngaˬ hui hta‸ k'aw‸ k'oˆ laˇ tuˬ yoˬ. 32 Ya‸ hk'aˇ, chaw yaˇ hui geh g'a ve teh‸ k'oˆ ve k'o, maˇ hpeh‸ teh‸ yawˇ hui k'oˆ da‸ ve yoˬ. Awˬ lawn k'o, Yoˇhanˬ lehˬ G'uiˬ sha ve tcuh kaˍ paˍ hpeh‸ ve yoˬ teh‸, chaw hk'a peu-eˬ shawˍ taˍ ve pa taw, chaw chi ma ve hta‸ yawˇ hui kawˆ ve yoˬ. 33 Hk'e te leh, Ngaˬ hui maˇ shiˍ teh‸, yawˇ hui Yeˍsuˆ hta‸ k'aw‸ k'oˆ piˇ ve yoˬ. Yeˍsuˆ htawˇ, Chi hk'a shuˍ shuˍ ngaˬ hk'aˬ hk'e ve kanˇ paˆ g'a leh chi teˇ hpaˍ hta‸ te ve, ngaˬ nawˬ hui hta‸ maˇ hto laˇ teh‸, yawˇ hui hta‸ k'aw‸ k'oˆ piˇ ve yoˬ.

Maˍkuˆ 12

1 Oˇ htaˇ, yawˇ yawˇ hui hta‸ tawˇ pa haˉ teˇ hpaˍ te maˍ piˇ leh k'oˆ ve, Chaw teˇ g'aˇ lehˬ, a pehˉ meuˇ hko te leh ti taˍ peuˬ hk'aw‸ nawˉ, hk'a caw zuhˇ ko taˍ leh, a pehˉ meuˇ shiˍ nyiˉ kuiˬ duˇ taˍ ve yoˬ. Shaw kuiˬ yehˬ mvuh ve hta‸ htawˇ te leh, hko te paˍ teˇ hpaˍ hta‸ ngaˍ piˇ taˉ leh, awˬ kaˍ awˬ nu mvuhˇ miˬ lo yawˇ k'ai ve yoˬ. 2 Awˬ yanˇ gaˬ la ve teˇ yanˇ, hko oˇ ve awˬ hk'aw lo a pehˉ meuˇ shiˍ teˇ hpaˍ hta‸ g'a tuˬ, hko te paˍ teˇ hpaˍ geh awˬ ceˬ teˇ g'aˇ hta‸ yawˇ k'ai tcuh ve yoˬ. 3 Yawˇ hui yawˇ hta‸ yuˬ tiˍ taˍ leh dawˆ peuˬ hk'aw‸ nawˉ, awˬ k'awˇ lehˍ k'o‸-e peu ve yoˬ. 4 Awˬ hk'aw‸ nawˉ teˇ pawˆ, awˬ kaˍ awˬ nu awˬ ceˬ teˇ g'aˇ hta‸ yawˇ yawˇ hui geh k'ai tcuh ve yoˬ. Yawˇ hui yawˇ ve oˉ k'oˍ hta‸ dawˆ hk'aw sheˬ leh, hk'a mvuhˇ hk'a na te piˇ ve yoˬ. 5 Peuˬ leh, yawˇ awˬ kaˍ awˬ nu awˬ ceˬ teˇ g'aˇ hta‸ k'aw‸ k'ai tcuh ve teˇ yanˇ, yawˇ hui yawˇ hta‸ tiˇ pehˍ ve yoˬ. Awˬ kaˍ awˬ nu awˬ ceˬ laiˉ g'aˇ hta‸ yawˇ k'aw‸ k'ai tcuh ve htawˇ, teˇ hpaˍ hpaˍ hta‸ yawˇ hui dawˆ leh, teˇ hpaˍ hpaˍ hta‸ yawˇ hui tiˇ pehˍ ve yoˬ. 6 Yawˇ ha‸ jaˇ ve yaˇ paˍ ceh tiˉ yawˇ geh cawˬ taˉ ve yoˬ. Ngaˬ ve yaˇ paˍ hta‸ yawˇ hui yawˆ yan tuˬ yoˬ teh‸ yawˇ k'oˆ leh, awˬ leh meuˇ teˇ pawˆ yawˇ ve yaˇ paˍ hta‸ yawˇ hui geh k'ai tcuh ve yoˬ. 7 Ya‸ hk'aˇ, hko te paˍ teˇ hpaˍ k'oˆ ve, Chaw chi lehˬ, awˬ shinˉ g'a shehˍ hpaˇ hpeh‸ ve yoˬ. Laˬ-o‸, yawˇ hta‸ tiˇ pehˍ-a veuˬ. Oˇ hk'e te ve k'o, yawˇ ve awˬ shinˉ hta‸ ngaˬ hui g'a tuˬ yoˬ teh‸, teˇ g'aˇ leh teˇ g'aˇ k'oˆ da‸ ve yoˬ. 8 Oˇ htaˇ, yawˇ hui yawˇ hta‸ yuˬ leh tiˇ pehˍ peuˬ hk'aw‸ nawˉ hko awˬ baˬ hpawˇ lo chiˇ baˬ ve yoˬ. 9 Hk'e te leh, hko awˬ shehˍ hpaˇ hk'aˬ hk'e te piˇ tuˬ le. Yawˇ laˬ leh hko te paˍ teˇ hpaˍ hta‸ tiˇ pehˍ peuˬ hk'aw‸ nawˉ, hko oˇ ve awˬ kaˍ awˬ nu chaw teˇ hpaˍ hta‸ k'aw‸ ngaˍ piˇ tuˬ yoˬ. 10 Yehˬ kawˍ shehˍ hpaˇ hui baˬ taˍ ve haˉ pui shiˍ lehˬ, awˬ hkuiˉ puiˍ awˬ ceˍ k'aweh‸ lo kawˍ taˍ ve haˉ pui shiˍ hpeh‸ la peuˬ. 11 Chi lehˬ, Jawˇ mawˇ G'uiˬ sha te ve kanˉ hpeh‸ leh, ngaˬ hui mehˆ g'uˇ suhˍ anˇ tuˬ hpeh‸ ve yoˬ, teh‸ Li‸ hpu awˬ hk'aw lo nawˬ hui maˇ g'aw jaw laˇ teh‸ k'oˆ piˇ ve yoˬ. 12 Yawˇ hui yawˇ hta‸ hpeh yuˬ gaˇ ve yoˬ. Awˬ lawn k'o, tawˇ pa haˉ chi yawˇ yawˇ hui awˬ lawn k'oˆ chehˇ ve hta‸ yawˇ hui shiˍ ve yoˬ. Ya‸ hk'aˇ, chaw awˬ moˍ lonˉ hta‸ kawˆ ve pa taw, yawˇ hui yawˇ hta‸ hpaˆ da‸ taˉ leh tawˆ k'ai ve yoˬ. 13 Yeˍsuˆ tawˇ yaw ve awˬ hk'aw lo, hk'aˬ hk'e te leh yawˇ hta‸ tawˇ yaw ya‸ piˇ lawˬ tuˬ, yawˇ hui lehˬ Hpaˍriˍsehˇ teˇ hpaˍ hpaˍ leh Heˍroˆ chaw teˇ hpaˍ hpaˍ hta‸ yawˇ geh k'ai tcuh ve yoˬ. 14 Oˇ htaˇ yawˇ hui laˬ leh k'oˆ ve, Saˍ la‸-oˬ, nawˬ lehˬ hteˇ ve cawˇ ve chaw hpeh‸ leh, chaw teˇ g'aˇ hta‸ ka‸ nawˬ maˇ kawˆ ve hta‸ ngaˬ hui shiˍ ve yoˬ. Chaw yaˇ ve mehˆ hpfuhˇ hta‸ nawˬ maˇ nyi leh G'uiˬ sha ve ya‸ k'aw hta‸ hteˇ lehˍ maˍ piˇ ve yoˬ. Jawˇ mawˇ Kehˉsaˍ hta‸ a moˇ keu piˇ cawˇ laˇ, maˇ keu piˇ cawˇ laˇ. 15 Ngaˬ hui g'a keu piˇ tuˬ laˇ, maˇ g'a keu piˇ tuˬ laˇ teh‸, yawˇ hta‸ na nyi ve yoˬ. Yawˇ lehˬ, yawˇ hui heˍ puiˉ ve chaw hpeh‸ ve teh‸ shiˍ leh, Nawˬ hui aˬ hto‸ ma te ngaˬ hta‸ lawˇ nyi ve le. Ngaˬ g'a nyi tuˬ, hpu teˇ hteh‸ ngaˬ geh yuˬ laˬ-o‸ teh‸, yawˇ hui hta‸ k'oˆ piˇ ve yoˬ. 16 Hk'e te leh, yawˇ hui yuˬ laˬ ve yoˬ. Yawˇ yawˇ hui hta‸ k'oˆ piˇ ve, A shu ve awˬ han, a shu ve awˬ meh cawˬ le teh‸ na nyi htaˇ, Jawˇ mawˇ Kehˉsaˍ ve yoˬ teh‸, yawˇ hui k'aw‸ k'oˆ piˇ ve yoˬ. 17 Yeˍsuˆ yawˇ hui hta‸ k'aw‸ k'oˆ piˇ ve, Jawˇ mawˇ Kehˉsaˍ ve mawˇ jawˇ mawˇ Kehˉsaˍ hta‸ piˇ-oˆ. G'uiˬ sha ve mawˇ G'uiˬ sha hta‸ piˇ-oˆ teh‸ k'oˆ htaˇ, yawˇ hui yawˇ hta‸ anˇ jaˇ ve yoˬ. 18 Oˇ ve hk'aw‸ nawˉ, k'aw‸ te‸ tu la ve maˇ cawˬ teh‸ k'oˆ ve Saˍduˆkehˇ chaw teˇ hpaˍ yawˇ geh laˬ leh k'oˆ ve, 19 Saˍ la‸-oˬ, Moˉseˍ ngaˬ hui awˬ pon chi hk'e bvuh‸ taˍ ve, Chaw teˇ g'aˇ ve awˬ viˉ paˍ yaˇ maˇ cawˬ leh suh ve k'o, awˬ nyi paˍ teˇ g'aˇ lehˬ yawˇ ve awˬ miˇ ma hta‸ k'aw‸ heuˆ leh awˬ viˉ paˍ awˬ pon awˬ ceuˬ awˬ hk'aˇ g'a cawˬ piˇ ve yoˬ teh‸ bvuh‸ taˍ ve yoˬ. 20 Ponˬ laˬ htaˇ, awˬ viˉ awˬ nyi suhˍ g'aˇ cawˬ ve yoˬ. Awˉ lawˉ teˇ g'aˇ lehˬ, awˬ miˇ ma hta‸ heuˆ leh, yaˇ maˇ cawˬ sheˍ htaˇ suh ve yoˬ. 21 Nyi g'aˇ teˇ g'aˇ htawˇ, yaˇ miˇ oˇ ve hta‸ heuˆ leh, yaˇ maˇ cawˬ sheˍ htaˇ suh ve yoˬ. Shehˆ g'aˇ teˇ g'aˇ htawˇ oˇ ve hk'a shuˍ shuˍ yoˬ. 22 Chi hk'a shuˍ shuˍ awˬ viˉ awˬ nyi suhˍ g'aˇ hk'a gaˬ yaˇ maˇ cawˬ taˉ ve yoˬ. Yawˇ hui hk'a peu-eˬ suh peuˬ hk'aw‸ nawˉ, yaˇ miˇ oˇ ve htawˇ suh ve yoˬ. 23 K'aw‸ te‸ tu la ve teˇ yanˇ, yaˇ miˇ oˇ ve hk'aˬ ve teˇ g'aˇ ve awˬ miˇ ma hpehˬ tuˬ le. Awˬ lawn k'o, yawˇ hui suhˍ g'aˇ yaˇ miˇ oˇ ve hta‸ heuˆ peuˬ ve yoˬ teh‸ na nyi ve yoˬ. 24 Yeˍsuˆ yawˇ hui hta‸ k'aw‸ k'oˆ piˇ ve, Li‸ hpu hta‸ ka‸, G'uiˬ sha ve kanˇ paˆ hta‸ ka‸ nawˬ hui maˇ shiˍ ve pa taw, nawˬ hui dawˇ ya‸ ve maˇ heˆ laˇ. 25 Awˬ lawn k'o, suh ve chaw hui k'aw‸ te‸ tu la ve teˇ yanˇ, awˬ hpawˇ awˬ miˇ heuˆ da‸ ve maˇ k'oˆ, ka piˇ ve maˇ k'oˆ, maˇ te. Mvuhˇ naw ma hk'oˆ chehˇ ve mvuhˇ naw ma tcuh yaˇ hui hk'e hpeh‸ tuˬ yoˬ. 26 Suh ve chaw hui k'aw‸ te‸ tu la ve awˬ lawn G'uiˬ sha Moˉseˍ hta‸ k'oˆ piˇ taˍ ve hk'e, Moˉseˍ bvuh‸ taˍ ve li‸ awˬ hk'aw lo nawˬ hui maˇ g'aw jaw laˇ. Aˉ chuˇ buiˇ awˬ lawn bvuh‸ taˍ ve teˇ tawn awˬ hk'aw lo, Ngaˬ lehˬ Aˍbraˍhanˍ ve G'uiˬ sha, Iˉcaˆ ve G'uiˬ sha leh Yaˍkoˆ ve G'uiˬ sha hpeh‸ ve yoˬ teh‸, G'uiˬ sha yawˇ hta‸ k'oˆ piˇ ve yoˬ. 27 Yawˇ lehˬ, suh ve chaw hui ve G'uiˬ sha hpeh‸ ve maˇ heˆ. Te‸ chehˇ ve chaw hui ve G'uiˬ sha hpeh‸ ve yoˬ. Nawˬ hui dawˇ ya‸ jaˇ ve yoˬ teh‸ k'oˆ piˇ ve yoˬ. 28 Oˇ htaˇ, li‸ bvuh‸ paˍ teˇ g'aˇ laˬ leh yawˇ hui tawˇ g'awˬ da‸ chehˇ ve hta‸ g'a kaˇ htaˇ, Yeˍsuˆ yawˇ hui hta‸ hk'a deh‸ k'aw‸ yaw hk'aw‸ piˇ ve hta‸ g'a shiˍ leh, Awˬ liˇ tawˇ hkawˇ hk'a peu-eˬ awˬ hk'aw lo hk'aˬ ve teˇ hkawˇ uiˍ leuˉ ve le teh‸ yawˇ hta‸ na nyi ve yoˬ. 29 Yeˍsuˆ yawˇ hta‸ k'oˆ piˇ ve, Uiˍ leuˉ ve teˇ maˬ lehˬ, Iˉsaˍreˍlaˆ chaw teˇ hpaˍ-oˬ, na sheˍ. Ngaˬ hui ve Jawˇ mawˇ G'uiˬ sha lehˬ, yawˇ teˇ g'aˇ ceh tiˉ Jawˇ mawˇ hpeh‸ ve yoˬ. 30 Nawˬ ve nyi ma hk'a peu-eˬ, nawˬ ve co ha hk'a peu-eˬ, nawˬ ve dawˇ hk'aˇ hk'a peu-eˬ leh nawˬ ve awˬ g'aˇ awˬ shaˉ hk'a peu-eˬ nawˬ ve Jawˇ mawˇ G'uiˬ sha hta‸ g'a ha‸ ve yoˬ. 31 Nyiˇ hkawˇ teˇ hkawˇ lehˬ, Nawˬ awˬ to hta‸ ha‸ ve hk'e, nawˬ awˬ paˇ awˬ kui chehˇ ve chaw hta‸ g'a ha‸ ve yoˬ. Awˬ liˇ tawˇ hkawˇ chi nyiˇ hkawˇ a‸ kehˉ uiˍ ve maˇ cawˬ teh‸ k'oˆ ve yoˬ. 32 Li‸ bvuh‸ paˍ oˇ ve k'aw‸ k'oˆ ve, Cawˇ ve yoˬ, Saˍ la‸-oˬ. G'uiˬ sha teˇ g'aˇ tiˉ cawˬ leh, yawˇ maˇ heˆ k'o awˬ kaˍ awˬ nu G'uiˬ sha maˇ cawˬ ve teh‸ nawˬ k'oˆ ve lehˬ hteˇ jaˇ ve yoˬ. 33 Chi hk'oˆ ka‸, nyi ma hk'a peu-eˬ, cuˇ yiˍ maˍ yiˍ hk'a peu-eˬ, awˬ g'aˇ awˬ shaˉ hk'a peu-eˬ yawˇ hta‸ ha‸ leh, a shu yawˇ awˬ to hta‸ ha‸ ve hk'e awˬ paˇ awˬ kui chehˇ ve chaw hta‸ ha‸ ve lehˬ, aˬ miˍ tuˉ tanˇ ve hk'a peu-eˬ leh tanˇ tuˬ hk'a peu-eˬ a‸ kehˉ uiˍ ve yoˬ teh‸, yawˇ hta‸ k'oˆ piˇ ve yoˬ. 34 Yawˇ hk'a deh‸ dawˇ nyi leh yaw hk'aw‸ ve hta‸ Yeˍsuˆ g'a mawˬ htaˇ, Nawˬ lehˬ G'uiˬ sha ve mvuhˇ miˬ hta‸ maˇ vuiˇ da‸ teh‸ yawˇ hta‸ k'oˆ piˇ ve yoˬ. Oˇ ve hk'aw‸ nawˉ chaw teˇ g'aˇ ka‸ yawˇ hta‸ k'aw‸ na nyi maˇ haˆ ve yoˬ. 35 Yeˍsuˆ bon yehˬ lonˉ awˬ hk'aw lo maˍ piˇ chehˇ htaˇ, yawˇ teˇ pawˇ k'aw‸ k'oˆ ve, Hkri‸ lehˬ Daˍviˆ ve Yaˇ hpu yoˬ teh‸, aˬ hto‸ ma te li‸ bvuh‸ paˍ teˇ hpaˍ k'oˆ ve le. 36 Da‸ ve kehˬ ve Awˬ ha hpu Daˍviˆ hta‸ dawˇ pawnˍ piˇ ve awˬ hk'aw lo yawˇ k'oˆ ve, Jawˇ mawˇ G'uiˬ sha lehˬ ngaˬ ve Jawˇ mawˇ hta‸ k'oˆ piˇ ve, Nawˬ ve canˇ paˍ teˇ hpaˍ hta‸ nawˬ ve hkui sheh awˬ hawˉ lo ngaˬ taˍ htaˇ hk'a gaˬ ngaˬ ve la‸ sha paˉ lo mui chehˇ-oˆ, teh‸ k'oˆ taˍ ve yoˬ. 37 Daˍviˆ awˬ to yawˇ hta‸ Jawˇ mawˇ teh‸ k'oˆ ve k'o, hk'aˬ hk'e te leh yawˇ ve yaˇ hpu hpeh‸ tuˬ ve le teh‸ na nyi ve yoˬ. Chaw awˬ moˍ lonˉ oˇ ve lehˬ, yawˇ ve tawˇ hkawˇ hta‸ ha lehˬ ha k'a na yuˬ ve yoˬ. 38 Yawˇ maˍ piˇ chehˇ ve awˬ hk'aw lo yawˇ teˇ pawˆ k'aw‸ k'oˆ ve, Li‸ bvuh‸ paˍ teˇ hpaˍ hta‸ shaˍ ti‸ te-o. Yawˇ hui lehˬ, aˉ po‸ zuhˬ ve hta‸ deh leh ca te toˇ gaˇ ve yoˬ. Tcuh hk'aw lo shu yawˇ hui hta‸ yawˆ yan laˇ ve hta‸ maˇ k'oˆ, 39 bon yehˬ awˬ hk'aw lo awˬ me‸ awˬ hponˇ cawˬ ve mui hk'awˇ hta‸ maˇ k'oˆ, hti caˇ hti dawˬ kuiˬ lo awˬ me‸ awˬ hponˇ cawˬ ve mui kuiˬ hta‸ maˇ k'oˆ, yawˇ hui heuˆ gaˇ ve yoˬ. 40 Yawˇ hui lehˬ, mehˇ chawˇ ma ve yehˬ hta‸ hiˉ yuˬ leh, venˇ baˆ maˇ g'a tawˆ la tuˬ maw chaweh bon lawˬ ve yoˬ. Shu a‸ kehˉ leuˉ leh uiˍ jaˇ ve ciˍ yanˍ ve hta‸ yawˇ hui g'a hkanˍ tuˬ yoˬ teh‸ k'oˆ ve yoˬ. 41 Oˇ htaˇ, hpu tanˇ keu kuiˬ awˬ g'uˇ suhˍ teˇ hpawˇ lo yawˇ mui chehˇ leh, chaw chi ma ve hpu tanˇ keu kuiˬ lo hpu keu ve hta‸ nyi chehˇ ve yoˬ. Paw sha ve chaw laiˉ g'aˇ hpu maˇmaˇ keu ve yoˬ. 42 Oˇ htaˇ haˍ g'awˇ ve mehˇ chawˇ ma teˇ g'aˇ laˬ leh, kuiˇ peh‸ shanˍ ehˉ nyiˇ maˬ keu ve yoˬ. Peh‸ shanˍ ehˉ oˇ ve nyiˇ maˬ lehˬ, teˇ peh‸ hpfuhˇ ceh tiˉ cawˬ ve yoˬ. 43 Yeˍsuˆ yawˇ ve awˬ la‸ g'awˇ hui hta‸ kuˬ yuˬ leh yawˇ hui hta‸ k'oˆ piˇ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, hpu tanˇ keu kuiˬ lo keu ve chaw hk'a peu-eˬ a‸ kehˉ haˍ g'awˇ ve mehˇ chawˇ ma chi teˇ g'aˇ lehˬ leuˉ leh keu maˇ ve yoˬ. 44 Awˬ lawn k'o, yawˇ hui cawˬ maˇ jaˇ ve awˬ hk'aw lo yuˬ tawˆ leh keu ve yoˬ. Ya‸ hk'aˇ, yaˇ miˇ chi teˇ g'aˇ lehˬ, haˍ g'awˇ jaˇ ve awˬ hk'aw lo, yawˇ ve a sha‸ hu tuˬ hk'a cawˬ ve hk'a peu-eˬ hta‸ yuˬ tawˆ leh keu ve yoˬ teh‸ k'oˆ ve yoˬ.

Maˍkuˆ 13

1 Yeˍsuˆ bon yehˬ lonˉ awˬ hk'aw lo tawˆ k'ai ve teˇ yanˇ, yawˇ ve awˬ la‸ g'awˇ teˇ g'aˇ yawˇ hta‸ k'oˆ piˇ ve, Saˍ la‸-oˬ, nyi sheˍ. Hk'aˬ ma da‸ jaˇ ve haˉ pui teˇ hpaˍ leh, hk'aˬ ma da‸ jaˇ ve yehˬ teˇ hpaˍ cawˬ ve le. 2 Yeˍsuˆ yawˇ hta‸ k'aw‸ k'oˆ piˇ ve, Uiˍ jaˇ ve yehˬ chi teˇ hpaˍ hta‸ nawˬ mawˬ laˇ. Choˬ kaˬ lo haˉ pui teˇ shiˍ awˬ hk'oˆ teˇ shiˍ maˇ cawˬ htaˇ hk'a gaˬ shu te luˬ tuˬ yoˬ teh‸ k'oˆ ve yoˬ. 3 Yeˍsuˆ lehˬ, bon yehˬ lonˉ awˬ g'uˇ suhˍ teˇ hpawˇ, Shaˍlonˍ hk'aw hk'oˆ lo mui chehˇ htaˇ, Peˍtruˆ, Yaˍkoˆ, Yoˇhanˬ leh Anˍdrehˍ hui laˬ leh, 4 Awˬ ceuˬ oˇ ve teˇ hpaˍ hk'aˬ htaˆ hpeh‸ la tuˬ le. Chi hk'a peu-eˬ hpeh‸ la paˇ neˇ ve teˇ yanˇ awˬ heˆ hk'aˬ hk'e hpeh‸ tawˆ la tuˬ ve le teh‸, yawˇ hta‸ a yehˉ na nyi ve yoˬ. 5 Yeˍsuˆ yawˇ hui hta‸ k'aw‸ k'oˆ piˇ ve, Chaw teˇ g'aˇ ka‸ nawˬ hui hta‸ maˇ g'a heˍ yuˬ beˬ yuˬ tuˬ shaˍ ti‸ taˍ-o‸. 6 Chaw maˇ maˇ ngaˬ ve awˬ meh hta‸ pfuhˇ laˬ leh, Ngaˬ lehˬ yawˇ yoˬ teh‸ k'oˆ leh, chaw maˇ maˇ hta‸ heˍ yuˬ beˬ yuˬ tuˬ yoˬ. 7 Ma‸ bawˆ ve leh bawˆ da‸-a teh‸ te chehˇ ve awˬ lawn hta‸ nawˬ hui g'a kaˇ ve teˇ yanˇ, nawˬ hui kawˆ cheˇ ve nyi ma taˇ cawˬ piˇ. Awˬ ceuˬ chi teˇ hpaˍ g'a hpeh‸ la tuˬ yoˬ. Ya‸ hk'aˇ, awˬ leh meuˇ maˇ gaˬ sheˍ. 8 Chaw teˇ ceuˬ leh teˇ ceuˬ, mvuhˇ miˬ teˇ peˆ leh teˇ peˆ ya‸ da‸ jiˆ da‸ tuˬ yoˬ. Chehˇ kuiˬ teˇ kaˬ peuˬ teˇ kaˬ awˬ hk'aw lo miˬ hiˆ la tuˬ yoˬ. Meu‸ ve kaˆ ve htawˇ cawˬ la tuˬ yoˬ. Awˬ ceuˬ chi teˇ hpaˍ lehˬ, tu‸ ve hkanˍ ve awˬ hkuiˉ puiˍ ceh tiˉ hpeh‸ sheˍ ve yoˬ. 9 Nawˬ hui a shu yawˇ awˬ to hta‸ shaˍ ti‸ te-o. Awˬ lawn k'o, jehˬ shehˍ hpaˇ awˬ moˍ teˇ hpaˍ ve la‸ sheh awˬ hk'aw lo shu nawˬ hui hta‸ chiˇ a‸ piˇ tuˬ yoˬ. Bon yehˬ teˇ hpaˍ awˬ hk'aw lo shu nawˬ hui hta‸ jaw‸ tuˬ yoˬ. Ngaˬ htaˬ pa taw nawˬ hui mvuhˇ miˬ jawˇ mawˇ lonˉ leh hkunˉ hawˉ hkanˇ teˇ hpaˍ mehˆ g'uˇ suhˍ g'a huˉ taˍ leh, yawˇ hui mehˆ g'uˇ suhˍ shaˉ hkiˆ g'a hkanˍ tuˬ yoˬ. 10 Ha lehˬ ve bon hkawˇ chi, chaw ceuˬ hk'a peu-eˬ hta‸ awˉ lawˉ g'a maˍ piˇ tuˬ yoˬ. 11 Nawˬ hui hta‸ suhˉ jehˬ laˇ tuˬ shu nawˬ hui hta‸ chiˇ a‸ piˇ ve teˇ yanˇ, tawˇ hk'aˬ hk'e g'a yaw tuˬ ve hta‸ taˇ dawˇ hkiˉ. Awˬ yanˇ oˇ ve awˬ hk'aw lo nawˬ hui hta‸ tawˇ yaw tcuh laˇ ve hk'e ceh tiˉ yaw-o. Awˬ lawn k'o, tawˇ yaw shehˍ hpaˇ lehˬ, nawˬ hui maˇ heˆ, daˬ ve kehˬ ve Awˬ ha hpu yoˬ. 12 Oˇ htaˇ, awˬ viˉ awˬ nyi teˇ g'aˇ leh teˇ g'aˇ suh tuˬ chiˇ a‸ da‸ tuˬ yoˬ. Awˬ pa htawˇ, a shu yawˇ ve yaˇ hta‸ chiˇ a‸ tuˬ yoˬ. Yaˇ paˍ yaˇ miˇ teˇ hpaˍ htawˇ, a shu yawˇ ve awˬ pa awˬ e hta‸ hpfuhˆ leh tiˇ pehˍ tcuh tuˬ yoˬ. 13 Ngaˬ ve awˬ meh hta‸ pa taw chaw hk'a peu-eˬ nawˬ hui hta‸ canˇ tuˬ yoˬ. Ya‸ hk'aˇ, awˬ leh hk'a gaˬ yeˬ chehˇ ve chaw lehˬ, htaiˍ hk'aw‸ ve hta‸ g'a tuˬ yoˬ. 14 Te luˬ te sheˆ puiˉ ve cha‸ chiˆ ve awˬ ceuˬ lehˬ, maˇ chehˇ cawˇ ve chehˇ kuiˬ lo chehˇ ve hta‸ nawˬ hui g'a mawˬ ve teˇ yanˇ, (li‸ chi hta‸ g'aw ve chaw lehˬ shiˍ-o‸,) oˇ htaˇ Yuˇda‸ mvuhˇ miˬ awˬ hk'aw lo chehˇ ve chaw hui hk'aw hk'oˆ lawˬ hk'oˆ lo hpaw-e loˬ. Yehˬ awˬ hk'oˆ lo chehˇ ve chaw taˇ k'aw‸ ya‸-e. 15 Chi hk'oˆ ka‸, mawˇ teˇ ceuˬ ceuˬ ca yuˬ tuˬ, yehˬ awˬ hk'aw lo taˇ lo‸-e. 16 Heh hk'aw chehˇ ve chaw htawˇ, a shu yawˇ ve veu‸ k'aˇ ca k'aw‸ yuˬ tuˬ, taˇ k'o‸-e. 17 Awˬ yanˇ oˇ ve awˬ hk'aw lo yaˇ hu ma leh cuˉ dawˬ ve yaˇ ehˉ cawˬ ve chaw hui lehˬ, g'a dawˇ haˍ jaˇ tuˬ yoˬ. 18 Awˬ yanˇ oˇ ve lehˬ, mvuhˇ kaˆ yanˇ maˇ g'a cawˇ tuˬ bon lawˬ-o‸. 19 Awˬ lawn k'o, miˬ guiˬ hta‸ G'uiˬ sha te hpanˍ ve teˇ nyi hta‸ tanˬ leh ya‸ nyi hk'a gaˬ maˇ hpeh‸ la jaw sheˍ leh, awˬ hk'aw‸ nawˉ ka‸ maˇ k'aw‸ hpeh‸ la tuˬ ve tu‸ jaˇ hkanˍ jaˇ ve teˇ ceuˬ lehˬ, awˬ nyi awˬ haˉ oˇ ve teˇ hpaˍ awˬ hk'aw lo hpeh‸ la tuˬ yoˬ. 20 Awˬ yanˇ oˇ ve hta‸ Jawˇ mawˇ G'uiˬ sha maˇ ngeh piˇ lawˬ ve k'o, chaw teˇ g'aˇ ka‸ ponˬ maˇ hpeh‸. Ya‸ hk'aˇ, yawˇ leuˆ yuˬ taˍ ve chaw hui hta‸ pa taw, awˬ yanˇ oˇ ve hta‸ yawˇ ngeh piˇ lawˬ tuˬ yoˬ. 21 Oˇ htaˇ, chaw teˇ g'aˇ g'aˇ lehˬ, Nyi-o, Hkri‸ choˬ kaˬ lo chehˇ taˍ ve yoˬ, oˇ kaˬ lo chehˇ taˍ ve yoˬ teh‸ nawˬ hui hta‸ k'oˆ laˇ ve k'o, taˇ yonˍ. 22 Awˬ lawn k'o, maˇ heˆ heˆ ve Hkri‸ leh maˇ heˆ heˆ ve tcuh kaˍ paˍ teˇ hpaˍ tawˆ la tuˬ yoˬ. Yawˇ hui lehˬ, hpeh‸ ve k'o leuˆ yuˬ taˍ ve chaw teˇ hpaˍ hta‸ heˍ yuˬ beˬ yuˬ g'a tuˬ, anˇ tuˬ leh awˬ heˆ teˇ hpaˍ hta‸ te maˍ piˇ tuˬ yoˬ. 23 Nawˬ hui shaˍ ti‸ te-o. Maˇ hpeh‸ la sheˍ htaˇ ka‸ teˇ ceuˬ le le ngaˬ nawˬ hui hta‸ k'oˆ taˉ laˇ ve yoˬ. 24 Tu‸ ve hkanˍ ve awˬ yanˇ oˇ ve peuˬ hk'aw‸ nawˉ, awˬ nyi awˬ haˉ oˇ ve teˇ hpaˍ awˬ hk'aw lo, mvuhˇ nyi naˆ ho‸ k'ai leh, ha pa htawˇ awˬ g'euˆ maˇ k'aw‸ ba. 25 Meu‸ keu shiˍ teˇ hpaˍ mvuhˇ naw ma lo ce la leh, mvuhˇ naw ma lo cawˬ ve kanˇ paˆ teˇ hpaˍ htawˇ hiˆ hiˆ naˇ naˇ k'ai tuˬ yoˬ. 26 Oˇ htaˇ, chaw yaˇ ve Yaˇ hpu lehˬ, awˬ me‸ awˬ hponˇ leh uiˍ jaˇ ve kanˇ paˆ cawˬ ve awˬ hk'aw lo moˬ ciˇ leh ya‸ la ve hta‸ yawˇ hui g'a mawˬ tuˬ yoˬ. 27 Oˇ htaˇ mvuhˇ awˇ ceˍ miˬ awˍ hpawˇ lo, miˬ guiˬ awˬ leh teˇ kaˬ te leh mvuhˇ naw ma awˬ leh teˇ kaˬ hk'a gaˬ, mvuhˇ naw ma tcuh yaˇ teˇ hpaˍ hta‸ yawˇ k'ai tcuh leh, yawˇ leuˆ yuˬ taˍ ve chaw hui hta‸ hpawnˬ da‸ piˇ lawˬ tuˬ yoˬ. 28 Maˉ nawˆ cehˬ hta‸ tehˆ maˍ ve tawˇ pa haˉ chi hta‸ henˇ yuˬ-o‸. Awˬ tuˍ tuˍ la leh awˬ caˍ caˍ la ve teˇ yanˇ, mvuhˇ cha hkui yanˇ gaˬ la paˇ neˇ peuˬ ve hta‸ nawˬ hui shiˍ ve yoˬ. 29 Chi hk'a shuˍ shuˍ, awˬ ceuˬ chi teˇ hpaˍ hpeh‸ la chehˇ ve hta‸ nawˬ hui g'a mawˬ ve teˇ yanˇ, yawˇ lehˬ yehˬ miˉ hpe‸ awˬ paˇ lo gaˬ la peuˬ ve hta‸ nawˬ hui shiˍ-o‸. 30 Ngaˬ nawˬ hui hta‸ awˬ tehˬ awˬ na k'oˆ laˇ ve, chi teˇ co maˇ ponˬ k'ai sheˍ htaˇ ka‸, awˬ ceuˬ chi hk'a peu-eˬ hpeh‸ la tuˬ yoˬ. 31 Mvuhˇ naw ma leh miˬ naˆ ma mehˉ k'ai tuˬ yoˬ. Ya‸ hk'aˇ, ngaˬ ve tawˇ hkawˇ lehˬ, maˇ mehˉ k'ai taˬ. 32 Awˬ nyi awˬ haˉ oˇ ve hta‸ chaw teˇ g'aˇ ka‸ maˇ shiˍ. Mvuhˇ naw ma tcuh yaˇ hui ka‸, Yaˇ hpu ka‸ maˇ shiˍ. Awˬ pa teˇ g'aˇ tiˉ shiˍ ve yoˬ. 33 Awˬ yanˇ oˇ ve hk'aˬ htaˆ gaˬ la tuˬ ve hta‸ nawˬ hui maˇ shiˍ ve pa taw, shaˍ ti‸ te leh shaw taˍ-o‸. 34 Awˬ yanˇ oˇ ve lehˬ, chaw teˇ g'aˇ awˬ kaˍ awˬ nu mvuhˇ miˬ lo k'ai ve hta‸ shuˍ ve yoˬ. Yawˇ ve yehˬ hk'aw tawˆ k'ai htaˇ, yawˇ ve awˬ ceˬ teˇ g'aˇ peuˬ teˇ g'aˇ hta‸ a shu yawˇ ve kanˉ chiˇ a‸ piˇ taˉ leh, yehˬ miˉ shaw shehˍ hpaˇ hta‸ htawˇ hk'a deh‸ shaw taˍ tuˬ tawˇ piˇ taˉ ve yoˬ. 35 Hk'e te leh, yehˬ shehˍ hpaˇ k'aw‸ gaˬ la tuˬ ve lehˬ, mvuhˇ hpeu‸ htaˇ leh naˍ, shehˍ k'aw hkui htaˇ leh naˍ, g'aˆ hpfuh bvuhˬ htaˇ leh naˍ, mvuhˇ shawˉ htaˇ leh naˍ, hk'aˬ htaˆ k'aw‸ gaˬ la tuˬ ve hta‸ nawˬ hui maˇ shiˍ ve pa taw, shaw taˍ-o‸. 36 Hk'e maˇ heˆ k'o, yawˇ teˇ cawˬ haˉ k'aw‸ gaˬ la leh, nawˬ hui zuh‸ muiˉ k'a chehˇ ve hta‸ yawˇ g'a mawˬ tuˬ yoˬ. 37 Nawˬ hui hta‸ ngaˬ k'oˆ laˇ ve hk'e, chaw hk'a peu-eˬ hta‸ ngaˬ k'oˆ piˇ ve, shaw taˍ-o‸ teh‸, yawˇ hui hta‸ k'oˆ piˇ ve yoˬ.

Maˍkuˆ 14

1 Nyiˇ nyi peuˬ k'o, Paˍsaˍhkaˍ pawehˇ leh Hkaoˍ monˇ awˬ hk'aw lo diˇ maˇ keu ve pawehˇ te ve awˬ yanˇ gaˬ la tuˬ yoˬ. Oˇ htaˇ, paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ lehˬ, hk'aˬ hk'e te leh heˍ ve awˬ hk'aw lo yawˇ hta‸ hpeh yuˬ leh tiˇ pehˍ tuˬ ca ve yoˬ. 2 Awˬ lawn k'o, yawˇ hui lehˬ, Chaw chi ma ve duiˆ-ehˍ shaˇ-ehˍ maˇ g'a hpeh‸ la tuˬ, pawehˇ te ve awˬ yanˇ awˬ hk'aw lo taˇ te teh‸ k'oˆ da‸ ve yoˬ. 3 Yeˍsuˆ lehˬ Beˍtaˍniˆ hk'aˆ hk'aw hkiˬ tu‸ paˍ Siˉmonˍ ve aˉ hk'aw hpui lawˇ paˇ lo mui caˇ chehˇ htaˇ, yaˇ miˇ teˇ g'aˇ lo‸ la ve yoˬ. Yawˇ lehˬ, awˬ hpfuhˇ hk'aˆ jaˇ ve naˍ manˇ hawnˉ keu taˍ ve hpuˉ-ehˍ ve haˉ pui kaw teˇ maˬ yuˬ laˬ leh, kaw oˇ ve hta‸ dawˆ hkoˇ sheˬ leh Yeˍsuˆ ve oˉ k'oˍ hta‸ naˍ manˇ hawnˉ oˇ ve ngeuˍ pfuhˍ piˇ ve yoˬ. 4 Teˇ hpaˍ hpaˍ nyi ma zuhˆ leh k'oˆ ve, Aˬ hto‸ ma te awˬ bon maˇ cawˬ ve awˬ hk'aw lo naˍ manˇ hawnˉ chi hta‸ yehˇ baˬ ve le. 5 Naˍ manˇ hawnˉ chi ve hta‸ shehˆ ha hteh‸ hpaˆ hawˇ leh, haˍ yaˇ g'awˇ yaˇ hui hta‸ pehˬ piˇ cawˇ ve yoˬ teh‸, teˇ g'aˇ leh teˇ g'aˇ k'oˆ da‸ ve yoˬ. Peuˬ leh, yaˇ miˇ oˇ ve hta‸ yawˇ hui deˇ ve yoˬ. 6 Ya‸ hk'aˇ Yeˍsuˆ k'oˆ ve, Yaˇ miˇ chi hta‸ taˇ deˇ. Nawˬ hui aˬ hto‸ ma te yawˇ hta‸ sho‸ sha‸ piˇ ve le. Yawˇ ngaˬ hta‸ da‸ ve teˇ ceuˬ te laˇ peuˬ. 7 Haˍ ve g'awˇ ve chaw teˇ hpaˍ nawˬ hui geh hk'aˬ htaˆ ka‸ chehˇ taˍ ve yoˬ. Nawˬ hui te gaˇ ve k'o, hk'aˬ ve teˇ yanˇ maˇ k'oˆ, yawˇ hui hta‸ da‸ ve awˬ ceuˬ te piˇ hpeh‸ ve yoˬ. Ya‸ hk'aˇ, ngaˬ nawˬ hui geh hk'aˬ htaˆ ka‸ chehˇ tuˬ ve maˇ heˆ. 8 Yaˇ miˇ chi lehˬ, te puiˉ te hpeh‸ ve hk'e te peuˬ. Ngaˬ awˬ to hta‸ tuˍ tuˬ awˬ pon, awˬ g'uˇ suhˍ htaˇ ka‸ yawˇ naˍ manˇ hawnˉ pfuhˍ laˇ ve yoˬ. 9 Ngaˬ nawˬ hui hta‸ awˬ tehˬ awˬ na k'oˆ laˇ ve, ha lehˬ ve bon hkawˇ miˬ guiˬ teˇ kaˬ le le lo ca maˍ piˇ ve teˇ yanˇ, yaˇ miˇ chi hta‸ dawˇ nawˇ tuˬ awˬ pon yawˇ te taˍ ve kanˉ chi hta‸ k'aoˍ maˍ piˇ tuˬ yoˬ teh‸ k'oˆ ve yoˬ. 10 Oˇ htaˇ, awˬ la‸ g'awˇ teˇ chi nyiˇ g'aˇ awˬ hk'aw lo Yuˇda‸ Iˉsaˍkaˍriˍoˆ lehˬ, Yeˍsuˆ hta‸ paw hkuˇ lonˉ hui ve la‸ sheh awˬ hk'aw lo chiˇ a‸ piˇ tuˬ yawˇ hui geh k'ai ve yoˬ. 11 Yawˇ hui tawˇ oˇ ve hta‸ g'a kaˇ ve teˇ yanˇ ha lehˬ jaˇ leh, yawˇ hta‸ hpu piˇ tuˬ ka ti‸ te taˍ ve yoˬ. Hk'e te leh yawˇ hta‸ chiˇ a‸ piˇ tuˬ, da‸ ve awˬ yanˇ hta‸ Yuˇda‸ ca chehˇ ve yoˬ. 12 Hkaoˍ monˇ awˬ hk'aw lo diˇ maˇ keu ve pawehˇ awˉ lawˉ teˇ nyi htaˇ, paˍsaˍhkaˍ yawˬ ehˉ hta‸ tiˇ tanˇ ve teˇ nyi awˬ hk'aw lo, yawˇ ve awˬ la‸ g'awˇ teˇ hpaˍ yawˇ geh laˬ leh k'oˆ ve, Paˍsaˍhkaˍ pawehˇ caˇ tuˬ, nawˬ awˬ pon hk'aˬ lo teˇ kaˬ ngaˬ hui hta‸ ca gu tcuh laˇ gaˇ ve le teh‸ na nyi ve yoˬ. 13 Oˇ htaˇ, yawˇ yawˇ ve awˬ la‸ g'awˇ nyiˇ g'aˇ hta‸ k'ai tcuh leh k'oˆ piˇ ve, Venˇ awˬ hk'aw lo k'ai-o. Iˉ kaˆ mu‸ hk'u taˆ ve chaw teˇ g'aˇ hta‸ nawˬ huiˉ maˬ g'a hpuˇ da‸ tuˬ yoˬ. 14 Yawˇ awˬ hk'aˇ suh k'ai leh, yawˇ hk'aˬ lo lo‸-e ve maˇ k'oˆ, yehˬ shehˍ hpaˇ hta‸ chi hk'e k'oˆ piˇ-oˆ. Saˍ la‸ k'oˆ laˇ ve, Ngaˬ leh ngaˬ ve awˬ la‸ g'awˇ hui geh teˇ geh Paˍsaˍhkaˍ pawehˇ caˇ tuˬ, ngaˬ awˬ pon teh taˍ ve hkehˉ chaw bawehˇ hk'aˬ lo le. 15 Oˇ htaˇ, chehˇ kuiˬ hk'a deh‸ gu taˍ peuˬ ve, awˬ hta‸ teˇ htai‸ bawehˇ uiˍ ve teˇ bawehˇ yawˇ nawˬ huiˉ maˬ hta‸ maˍ laˇ tuˬ yoˬ. Oˇ kaˬ lo ngaˬ hui awˬ pon gu taˍ-o‸ teh‸ k'oˆ piˇ ve yoˬ. 16 Awˬ la‸ g'awˇ oˇ ve nyiˇ g'aˇ tawˆ k'ai leh, venˇ awˬ hk'aw lo lo‸-e ve teˇ yanˇ, yawˇ k'oˆ laˇ ve hk'e g'a mawˬ leh, Paˍsaˍhkaˍ pawehˇ caˇ tuˬ awˬ pon gu taˍ ve yoˬ. 17 Mehˆ muiˉ naˆ la htaˇ, awˬ la‸ g'awˇ teˇ chi nyiˇ g'aˇ geh yawˇ laˬ ve yoˬ. 18 Yawˇ hui awˍ mui caˇ chehˇ htaˇ Yeˍsuˆ lehˬ, Ngaˬ nawˬ hui hta‸ awˬ tehˬ awˬ na k'oˆ laˇ ve, nawˬ hui awˬ hk'aw lo ngaˬ geh teˇ geh hkaˆ caˇ ve chaw teˇ g'aˇ lehˬ, ngaˬ hta‸ chiˇ a‸ tuˬ yoˬ teh‸ k'oˆ ve yoˬ. 19 Yawˇ hui dawˇ haˍ leh, Ngaˬ laˇ teh‸ teˇ g'aˇ peuˬ teˇ g'aˇ yawˇ hta‸ na nyi ve yoˬ. 20 Peuˬ leh yawˇ k'oˆ ve, Teˇ chi nyiˇ g'aˇ awˬ hk'aw lo ngaˬ geh teˇ hkehˇ tiˉ hkaˆ caˇ ve chaw teˇ g'aˇ yoˬ. 21 Chaw yaˇ ve Yaˇ hpu lehˬ, yawˇ ve awˬ lawn bvuh‸ taˍ ve hk'e, yawˇ g'a k'o‸-e tuˬ yoˬ. Ya‸ hk'aˇ, chaw yaˇ ve Yaˇ hpu hta‸ chiˇ a‸ ve chaw teˇ g'aˇ lehˬ g'a dawˇ haˍ jaˇ tuˬ yoˬ. Chaw oˇ ve maˇ paw la ve hk'e k'o, yawˇ awˬ pon da‸ leuˉ ve yoˬ teh‸, yawˇ hui hta‸ k'oˆ piˇ ve yoˬ. 22 Yawˇ hui caˇ chehˇ htaˇ, yawˇ hkaoˍ monˇ hta‸ yuˬ leh bon hta‸ chiˇ mvuh ve yoˬ. Peuˬ leh yawˇ hkaoˍ monˇ hta‸ hk'eh‸ leh awˬ la‸ g'awˇ hui hta‸ piˇ leh k'oˆ ve, Yuˬ-o‸. Chi lehˬ ngaˬ ve awˬ to yoˬ teh‸ k'oˆ piˇ ve yoˬ. 23 Kawˆ hta‸ htawˇ yawˇ yuˬ leh, bon hta‸ chiˇ mvuh peuˬ hk'aw‸ nawˉ yawˇ hui hta‸ piˇ leh, yawˇ hui hk'a peu-eˬ kawˆ oˇ ve hta‸ dawˬ ve yoˬ. 24 Peuˬ leh yawˇ k'aw‸ k'oˆ ve, Chi lehˬ ka ti‸ shaˉ caˆ hta‸ caˉ da‸ ve ngaˬ ve awˬ suhˍ yoˬ. Awˬ suhˍ chi lehˬ, chaw maˇ maˇ ve awˬ pon ngeuˍ pfuhˍ ve yoˬ. 25 Ngaˬ nawˬ hui hta‸ awˬ tehˬ awˬ na k'oˆ laˇ ve, G'uiˬ sha ve mvuhˇ miˬ awˬ hk'aw lo a pehˉ meuˇ g'uiˬ awˬ suhˉ hta‸ g'a dawˬ tuˬ ve awˬ nyi hk'a gaˬ, ngaˬ a pehˉ meuˇ g'uiˬ hta‸ maˇ k'aw‸ dawˬ teh‸ yawˇ hui hta‸ k'oˆ piˇ ve yoˬ. 26 Peuˬ leh, yawˇ hui k'a muiˬ hkawˇ k'a peuˬ hk'aw‸ nawˉ yawˇ hui tawˆ-e leh Shaˍlonˍ hk'aw lo k'ai ve yoˬ. 27 Oˇ htaˇ Yeˍsuˆ yawˇ hui hta‸ k'aw‸ k'oˆ piˇ ve, Nawˬ hui hk'a peu-eˬ nyi ma luˬ tuˬ yoˬ. Awˬ lawn k'o, Yawˬ hawˉ paˍ hta‸ ngaˬ dawˆ pehˍ leh, yawˬ teˇ hpaˍ hpaˆ da‸ leh teˇ kaˬ teˇ hkeh hpaw k'ai tuˬ yoˬ teh‸, Li‸ hpu hk'aw bvuh‸ taˍ ve yoˬ. 28 Ya‸ hk'aˇ, ngaˬ k'aw‸ te‸ tu la peuˬ hk'aw‸ nawˉ nawˬ hui g'uˇ suhˍ Gaˍliˍlehˇ mvuhˇ miˬ lo ngaˬ k'ai tuˬ yoˬ teh‸ k'oˆ ve yoˬ. 29 Oˇ htaˇ Peˍtruˆ k'oˆ ve, Shu hk'a peu-eˬ nyi ma luˬ htawˇ ngaˬ lehˬ nyi ma maˇ luˬ teh‸ yawˇ hta‸ k'oˆ piˇ ve yoˬ. 30 Yeˍsuˆ lehˬ, Ngaˬ nawˬ hta‸ awˬ tehˬ awˬ na k'oˆ laˇ ve, ya‸ puiˉ g'aˆ hpfuh nyiˇ pawˆ maˇ bvuhˬ sheˍ htaˇ, nawˬ ngaˬ hta‸ shehˆ pawˆ hk'a gaˬ chiˇ baˬ tuˬ yoˬ teh‸ yawˇ hta‸ k'oˆ piˇ ve yoˬ. 31 Peˍtruˆ lehˬ, Nawˬ geh teˇ geh ngaˬ g'a suh ve htawˇ, nawˬ hta‸ ngaˬ maˇ chiˇ baˬ taˬ teh‸, yawˇ hta‸ hehnˇ chaweh k'oˆ piˇ ve yoˬ. Yawˇ hui hk'a peu-eˬ htawˇ oˇ hk'e k'oˆ ve yoˬ. 32 Oˇ htaˇ Geˍseˍmaˍniˆ meh ve teˇ kaˬ lo yawˇ hui gaˬ leh, Ngaˬ bon ca lawˬ chehˇ htaˇ nawˬ hui choˬ kaˬ lo mui taˍ-o‸ teh‸, yawˇ ve awˬ la‸ g'awˇ teˇ hpaˍ hta‸ yawˇ k'oˆ piˇ ve yoˬ. 33 Peuˬ leh, Peˍtruˆ, Yaˍkoˆ, Yoˇhanˬ hui hta‸ yawˇ geh teˇ geh shiˍ veu ve yoˬ. Oˇ htaˇ yawˇ nyi ma awˬ hk'aw lo anˇ jaˇ, sho‸ sha‸ jaˇ la leh, 34 yawˇ hui hta‸ k'oˆ piˇ ve, Ngaˬ nyi ma dawˇ haˍ jaˇ ve suh la yoˬ. Choˬ kaˬ lo chehˇ taˍ leh shaw taˍ-o‸ teh‸ k'oˆ piˇ ve yoˬ. 35 Peuˬ leh, yawˇ awˬ g'uˇ suhˍ a ciˉ k'ai peuˬ hk'aw‸ nawˉ, yawˇ miˬ chaˇ hk'oˆ boˆ sheˍ leh, awˬ yanˇ chi ve yawˇ hta‸ ponˬ k'ai g'a k'o, ponˬ k'ai laˇ tuˬ bon lawˬ ve yoˬ. 36 Aˍbaˆ A pa-oˬ, nawˬ hk'a peu-eˬ ve hta‸ te hpeh‸ ve yoˬ. Kawˆ chi ve ngaˬ hta‸ ponˬ k'ai tcuh laˇ-oˆ. Ya‸ hk'aˇ, ngaˬ a loˍ cawˇ ve hk'e taˇ hpeh‸ piˇ. Nawˬ a loˍ cawˇ ve hk'e hpeh‸ piˇ-oˆ teh‸ lawˬ ve yoˬ. 37 Yawˇ k'aw‸ gaˬ la htaˇ, yawˇ hui zuh‸ muiˉ k'a chehˇ ve hta‸ g'a mawˬ leh Peˍtruˆ hta‸ k'oˆ piˇ ve, Siˉmonˍ-oˬ, nawˬ zuh‸ muiˉ k'a chehˇ ve laˇ. Teˇ naˍ riˍ ceh ka‸ nawˬ shaw taˍ maˇ hpeh‸ laˇ. 38 Nawˬ hui beˬ ve lawˇ ve awˬ hk'aˇ suh maˇ g'a k'ai tuˬ bon lawˬ leh shaw taˍ-o‸. Nawˬ hui te gaˇ ve nyi ma cawˬ htawˇ, awˬ suhˍ awˬ shaˍ lehˬ awˬ g'aˇ nuˇ ve yoˬ teh‸ k'oˆ ve yoˬ. 39 Peuˬ leh, yawˇ teˇ pawˆ k'aw‸ k'ai leh, awˬ g'uˇ suhˍ htaˇ lawˬ ve hk'a shuˍ shuˍ bon k'aw‸ lawˬ ve yoˬ. 40 Yawˇ teˇ pawˆ k'aw‸ k'aw‸ la htaˇ, yawˇ hui zuh‸ muiˉ geu‸ jaˇ ve pa taw zuh‸ muiˉ k'a chehˇ ve hta‸ yawˇ g'a mawˬ ve yoˬ. Yawˇ hta‸ hk'aˬ hk'e k'aw‸ k'oˆ piˇ tuˬ yawˇ hui maˇ shiˍ. 41 Shehˆ pawˆ teˇ pawˆ yawˇ k'aw‸ la leh k'oˆ piˇ ve, Nawˬ hui zuh‸ muiˉ k'a leh g'aˇ jehˇ chehˇ sheˍ laˇ. Pehˇ-o, chaw yaˇ ve Yaˇ hpu lehˬ venˇ baˆ yaˇ hui ve la‸ hk'aw lo chiˇ a‸ ve hta‸ g'a hkanˍ ve awˬ yanˇ gaˬ la peuˬ. 42 Tu, k'ai-a veuˬ. Nyi loˬ, ngaˬ hta‸ chiˇ a‸ shehˍ hpaˇ awˬ paˇ lo gaˬ la peuˬ teh‸ k'oˆ ve yoˬ. 43 Yawˇ tawˇ yaw chehˇ htaˇ, tcuh yaˇ teˇ chi nyiˇ g'aˇ awˬ hk'aw lo Yuˇda‸ meh ve teˇ g'aˇ laˬ leh, aˉ htaw pfuhˇ leh suhˆ taˬ taˆ ve chaw awˬ moˍ lonˉ htawˇ yawˇ geh laˬ ve yoˬ. Chaw awˬ moˍ lonˉ oˇ ve lehˬ, paw hkuˇ lonˉ hui, li‸ bvuh‸ paˍ hui leh awˬ hoˉ chaw mawˇ teˇ hpaˍ tcuh peu laˇ ve chaw hpeh‸ ve yoˬ. 44 Yawˇ hta‸ chiˇ a‸ piˇ shehˍ hpaˇ teˇ g'aˇ lehˬ, yawˇ hui hta‸ awˬ heˆ chi hk'e te tuˬ k'oˆ piˇ taˍ ve, Ngaˬ boˆ nu ve chaw teˇ g'aˇ lehˬ yawˇ yoˬ. Yawˇ hta‸ yuˬ tiˍ taˍ leh hk'a deh‸ yuˬ k'ai-o teh‸ k'oˆ piˇ ve yoˬ. 45 Yawˇ gaˬ la htaˇ Yeˍsuˆ geh teˇ cawˬ haˉ k'ai leh, Jawˇ mawˇ-oˬ, teh‸ k'oˆ leh yawˇ hta‸ boˆ nu ve yoˬ. 46 Oˇ htaˇ yawˇ hui Yeˍsuˆ hta‸ vawˆ leh yuˬ tiˍ taˍ ve yoˬ. 47 Awˬ paˇ lo huˉ taˍ ve chaw hui awˬ hk'aw lo teˇ g'aˇ lehˬ, yawˇ ve aˉ htaw g'awˬ tawˆ leh, paw hkuˇ lonˉ vuiˬ taˍ ve awˬ ceˬ hta‸ chaw leh naˍ paw cheˆ ve yoˬ. 48 Yeˍsuˆ yawˇ hui hta‸ k'oˆ piˇ ve, Nawˬ hui lehˬ, chaw hk'awˇ hta‸ ca hpeh yuˬ ve hk'e, aˉ htaw leh suhˆ taˬ teˇ hpaˍ yuˬ veu laˇ leh ngaˬ hta‸ ca hpeh la ve leˇ. 49 Teˇ nyi le le bon yehˬ lonˉ awˬ hk'aw lo ngaˬ nawˬ hui geh chehˇ leh maˍ piˇ chehˇ ve htawˇ, nawˬ hui ngaˬ hta‸ maˇ hpeh yuˬ. Ya‸ hk'aˇ, chi hk'e hpeh‸ la ve lehˬ, Li‸ hpu hk'aw bvuh‸ taˍ ve hk'e biˇ la tuˬ awˬ pon yoˬ teh‸ k'oˆ ve yoˬ. 50 Oˇ htaˇ, yawˇ ve awˬ la‸ g'awˇ hk'a peu-eˬ yawˇ hta‸ baˬ taˉ leh hpaw-e ve yoˬ. 51 Chaw haˉ paˍ teˇ g'aˇ lehˬ, pi‸ hpa teˇ hk'oˆ ceh tiˉ yawˇ awˬ to hta‸ hawˆ taˍ leh Yeˍsuˆ awˬ hk'aˇ suh k'ai ve yoˬ. Chaw oˇ ve teˇ hpaˍ yawˇ hta‸ hpeh yuˬ ve teˇ yanˇ, 52 pi‸ hpa oˇ ve hta‸ yawˇ k'ehˆ baˬ taˉ leh awˬ k'u nyi te hpaw-e ve yoˬ. 53 Oˇ htaˇ yawˇ hui lehˬ, Yeˍsuˆ hta‸ paw hkuˇ lonˉ geh yuˬ k'ai ve yoˬ. Paw hkuˇ lonˉ teˇ hpaˍ, awˬ hoˉ chaw mawˇ teˇ hpaˍ leh li‸ bvuh‸ paˍ teˇ hpaˍ hk'a peu-eˬ oˇ kaˬ lo hpawnˬ la ve yoˬ. 54 Peˍtruˆ lehˬ, paw hkuˇ lonˉ ve shaˉ nanˉ awˬ paˇ lo ko taˍ kuiˬ awˬ hk'aw hpawˇ hk'a gaˬ Yeˍsuˆ awˬ hk'aˇ suh a ciˉ vuiˇ kuiˬ lo k'ai leh, shaw shehˍ hpaˇ teˇ hpaˍ geh mui leh, aˬ miˍ lehˬ chehˇ ve yoˬ. 55 Paw hkuˇ lonˉ teˇ hpaˍ leh jehˬ da‸ shehˍ hpaˇ awˬ moˍ hk'a peu-eˬ lehˬ, Yeˍsuˆ hta‸ g'a tiˇ pehˍ tuˬ, shaˉ hkiˆ hkanˍ shehˍ hpaˇ teˇ hpaˍ hta‸ ca ve htawˇ, shaˉ hkiˆ ca maˇ mawˬ. 56 Awˬ lawn k'o, chaw maˇ maˇ yawˇ awˬ lawn maˇ heˆ heˆ ve shaˉ hkiˆ hkanˍ ve htawˇ, yawˇ hui shaˉ hkiˆ hkanˍ ve maˇ hawˍ da‸. 57 Oˇ htaˇ chaw teˇ hpaˍ hpaˍ tu la leh, yawˇ awˬ lawn maˇ heˆ heˆ ve shaˉ hkiˆ hkanˍ leh k'oˆ ve, 58 La‸ sheh te taˍ ve bon yehˬ lonˉ chi hta‸ ngaˬ te luˬ leh, la‸ sheh maˇ te ve awˬ kaˍ awˬ nu bon yehˬ lonˉ hta‸ shehˆ nyi awˬ hk'aw lo ceh tiˉ ngaˬ k'aw‸ te tuˬ yoˬ teh‸ yawˇ k'oˆ ve hta‸ ngaˬ hui g'a kaˇ peuˬ teh‸ yawˇ hui k'oˆ ve yoˬ. 59 Yawˇ hui chi hk'e shaˉ hkiˆ hkanˍ ve htawˇ, maˇ hawˍ da‸. 60 Oˇ htaˇ, paw hkuˇ lonˉ tu leh awˬ k'aw ji lo huˉ taˍ leh, Nawˬ te‸ chiˉ ka‸ maˇ yaw hk'aw‸ ve laˇ. Chaw chi teˇ hpaˍ nawˬ awˬ lawn aˬ hto‸ ma shaˉ hkiˆ hkanˍ ve le teh‸, Yeˍsuˆ hta‸ na nyi ve yoˬ. 61 Ya‸ hk'aˇ, Yeˍsuˆ ta‸ iˉ chehˇ taˍ leh te‸ chiˉ maˇ yaw hk'aw‸ ve yoˬ. Paw hkuˇ lonˉ teˇ pawˆ k'aw‸ k'oˆ piˇ ve, Nawˬ lehˬ Awˬ bon uiˍ shehˍ hpaˇ G'uiˬ sha ve Yaˇ hpu Hkri‸ teh‸ k'oˆ ve teˇ g'aˇ yoˬ laˇ teh‸ yawˇ hta‸ na nyi ve yoˬ. 62 Yeˍsuˆ k'aw‸ k'oˆ ve, Yoˬ, ngaˬ yoˬ. Chi hk'oˆ ka‸, chaw yaˇ ve Yaˇ hpu lehˬ, Kanˇ paˆ awˬ shehˍ hpaˇ ve la‸ sha paˉ lo mui leh, mvuhˇ naw ma ve moˬ hta‸ ciˇ ya‸ la ve hta‸ nawˬ hui g'a mawˬ tuˬ yoˬ teh‸ k'oˆ ve yoˬ. 63 Oˇ htaˇ paw hkuˇ lonˉ lehˬ, yawˇ hk'aˇ yawˇ, yawˇ ve veu‸ k'aˇ hta‸ tzuh‸ suhˍ leh k'oˆ ve, Ngaˬ hui aˬ hto‸ ma shaˉ hkiˆ k'aw‸ loˍ sheˍ le. 64 Yawˇ lehˬ G'uiˬ sha hta‸ maˇ shawˍ maˇ caˆ k'oˆ ve hta‸ nawˬ hui g'a kaˇ peuˬ. Nawˬ hui hk'aˬ hk'e dawˇ le teh‸ na nyi htaˇ, Yawˇ lehˬ suh keunˍ ve yoˬ teh‸, yawˇ hui hk'a peu-eˬ Yeˍsuˆ hta‸ suhˉ taˆ ve yoˬ. 65 Oˇ htaˇ, chaw teˇ hpaˍ hpaˍ yawˇ hta‸ ciˉ g'uiˇ hpe‸ pfuhˍ ve, yawˇ ve mehˆ hpfuhˇ hta‸ beh taˍ leh yawˇ hta‸ chu-iˬ leh k'oˆ ve, G'uiˬ sha ve tcuh kaˍ paˍ hk'e te leh ngaˬ hui hta‸ hto laˇ-oˆ teh‸, yawˇ hta‸ k'oˆ piˇ ve yoˬ. Shaw shehˍ hpaˇ teˇ hpaˍ htawˇ yawˇ hta‸ dawˆ leh yuˬ k'ai ve yoˬ. 66 Peˍtruˆ lehˬ, awˬ hawˉ lo ko taˍ kuiˬ awˬ hk'aw hpawˇ lo chehˇ taˍ ve teˇ yanˇ, paw hkuˇ lonˉ ve awˬ ceˬ ma teˇ g'aˇ laˬ leh, 67 Peˍtruˆ aˬ miˍ lehˬ chehˇ ve hta‸ g'a mawˬ ve teˇ yanˇ, yawˇ hta‸ hk'a deh‸ nyi leh, Nawˬ htawˇ Naˍzaˍrehˆ chaw Yeˍsuˆ geh chehˇ ve yoˬ teh‸ k'oˆ piˇ ve yoˬ. 68 Ya‸ hk'aˇ, Peˍtruˆ g'awˬ hk'aˆ leh, Nawˬ k'oˆ ve hta‸ ngaˬ maˇ shiˍ, na ka‸ na maˇ g'a teh‸ k'oˆ ve yoˬ. Peuˬ leh, ko taˍ kuiˬ yehˬ miˉ awˬ baˬ lo yawˇ tawˆ k'ai ve yoˬ. 69 Awˬ ceˬ ma oˇ ve teˇ pawˆ yawˇ hta‸ k'aw‸ mawˬ htaˇ, awˬ paˇ lo huˉ chehˇ ve chaw teˇ hpaˍ hta‸, Chaw chi teˇ g'aˇ lehˬ, yawˇ hui awˬ hk'aw lo chehˇ ve chaw teˇ g'aˇ hpeh‸ ve yoˬ teh‸ k'oˆ piˇ ve yoˬ. 70 Ya‸ hk'aˇ yawˇ teˇ pawˆ k'aw‸ g'awˬ hk'aˆ ve yoˬ. Awˬ hk'aw‸ nawˉ maˇ maw maw gaˬ leh awˬ paˇ lo huˉ chehˇ ve chaw teˇ hpaˍ k'oˆ ve, Nawˬ lehˬ awˬ tehˬ awˬ na yawˇ hui awˬ hk'aw lo chehˇ ve chaw teˇ g'aˇ hpeh‸ ve yoˬ. Awˬ lawn k'o, nawˬ Gaˍliˍlehˇ chaw hpeh‸ ve yoˬ teh‸, Peˍtruˆ hta‸ k'oˆ piˇ ve yoˬ. 71 Oˇ htaˇ yawˇ hk'aˇ yawˇ, yawˇ awˬ to hta‸ hkeu leh, Nawˬ hui k'oˆ ve teˇ g'aˇ hta‸ ngaˬ maˇ shiˍ teh‸ k'oˆ leh hkanˍ ve yoˬ. 72 Teˇ cawˬ haˉ g'aˆ hpfuh nyiˇ pawˆ teˇ pawˆ bvuhˬ la ve yoˬ. G'aˆ hpfuh nyiˇ pawˆ maˇ bvuhˬ sheˍ htaˇ nawˬ ngaˬ hta‸ shehˆ pawˆ hk'a gaˬ chiˇ baˬ tuˬ yoˬ teh‸, Yeˍsuˆ yawˇ hta‸ k'oˆ piˇ taˍ ve hta‸ Peˍtruˆ dawˇ nawˇ la ve yoˬ. Yawˇ oˇ ve hta‸ k'aw‸ dawˇ nyi ve teˇ yanˇ hawˬ ve yoˬ.

Maˍkuˆ 15

1 Mvuhˇ htiˇ la ve teˇ yanˇ, teˇ cawˬ haˉ paw hkuˇ lonˉ hui lehˬ, awˬ hoˉ chaw mawˇ teˇ hpaˍ, li‸ bvuh‸ paˍ teˇ hpaˍ leh jehˬ shehˍ hpaˇ awˬ moˍ hk'a peu-eˬ geh jehˬ da‸ ve yoˬ. Yawˇ hui Yeˍsuˆ hta‸ hpeh peuˬ hk'aw‸ nawˉ sheh veu leh, jawˇ mawˇ Piˉla‸ ve la‸ hk'aw lo yawˇ hta‸ chiˇ a‸ piˇ ve yoˬ. 2 Oˇ htaˇ jawˇ mawˇ Piˉla‸ k'oˆ ve, Nawˬ lehˬ Yuˇda‸ chaw hui ve Hkunˉ hawˉ hkanˇ yoˬ laˇ teh‸, yawˇ hta‸ na nyi ve yoˬ. Yoˬ, nawˬ k'oˆ ve hk'e yoˬ teh‸, Yeˍsuˆ yawˇ hta‸ k'aw‸ k'oˆ piˇ ve yoˬ. 3 Paw hkuˇ lonˉ teˇ hpaˍ lehˬ, yawˇ awˬ hk'oˆ hta‸ venˇ baˆ maˇ maˇ taˍ ve yoˬ. 4 Hk'e te leh, jawˇ mawˇ Piˉla‸ k'oˆ ve, Nawˬ te‸ chiˉ ka‸ maˇ k'aw‸ k'oˆ ve laˇ. Yawˇ hui nawˬ awˬ hk'oˆ hta‸ venˇ baˆ hk'aˬ ma taˍ ve hta‸ nyi sheˍ teh‸ k'oˆ piˇ ve yoˬ. 5 Ya‸ hk'aˇ, Yeˍsuˆ tawˇ teˇ peu-eˍ ka‸ maˇ yaw hk'aw‸ ve pa taw jawˇ mawˇ Piˉla‸ anˇ ve yoˬ. 6 Pawehˇ oˇ ve hta‸ te ve teˇ yanˇ, htawnˍ hk'aw chehˇ ve chaw teˇ hpaˍ awˬ hk'aw lo, mvuhˇ miˬ yaˇ hui lawˬ ve teˇ g'aˇ hta‸ jawˇ mawˇ Piˉla‸ hpehˇ piˇ ve awˬ liˇ cawˬ ve yoˬ. 7 Oˇ htaˇ, mvuhˇ miˬ hta‸ hpfuhˆ k'ai leh chaw hta‸ tiˇ pehˍ ve Baˍraˍbaˆ meh ve chaw teˇ g'aˇ cawˬ ve yoˬ. Yawˇ lehˬ, hpfuhˆ k'ai ve awˬ chawˇ teˇ hpaˍ geh teˇ geh htawnˍ hk'aw hpeh keu taˍ ve yoˬ. 8 Oˇ htaˇ, chaw awˬ moˍ lonˉ jawˇ mawˇ Piˉla‸ geh k'ai leh awˬ liˇ cawˬ ve hk'e te laˇ tuˬ yawˇ hui lawˬ ve yoˬ. 9 Jawˇ mawˇ Piˉla‸ lehˬ, Nawˬ hui awˬ pon Yuˇda‸ chaw hui ve Hkunˉ hawˉ hkanˇ hta‸ hpehˇ laˇ tcuh gaˇ ve laˇ teh‸, yawˇ hui hta‸ na nyi ve yoˬ. 10 Awˬ lawn k'o, paw hkuˇ lonˉ teˇ hpaˍ Yeˍsuˆ hta‸ hkawehˉ ve nyi ma cawˬ ve pa taw, yawˇ hta‸ chiˇ a‸ laˇ ve hta‸ jawˇ mawˇ Piˉla‸ shiˍ ve yoˬ. 11 Ya‸ hk'aˇ, Yeˍsuˆ hta‸ maˇ hpehˇ leh Baˍraˍbaˆ hta‸ hpehˇ laˇ tuˬ, paw hkuˇ lonˉ teˇ hpaˍ lehˬ chaw awˬ moˍ lonˉ hta‸ ca juˆ piˇ ve yoˬ. 12 Jawˇ mawˇ Piˉla‸ lehˬ, Hk'e te k'o, Yuˇda‸ chaw hui ve Hkunˉ hawˉ hkanˇ teh‸ nawˬ hui k'oˆ ve teˇ g'aˇ hta‸ ngaˬ hk'aˬ hk'e g'a te tuˬ le teh‸ yawˇ hui hta‸ k'aw‸ na nyi htaˇ, 13 Yawˇ hta‸ la‸ ka hk'oˆ lo hta‸ pehˍ loˬ teh‸, yawˇ hui g'aˇ hte‸ k'aw‸ kuˬ ve yoˬ. 14 Jawˇ mawˇ Piˉla‸ yawˇ hui hta‸ k'oˆ piˇ ve, Aˬ hto‸ ma pa taw le. Yawˇ haiˬ ve aˬ hto‸ ma teˇ ceuˬ hta‸ te ve le teh‸ na nyi htaˇ, Yawˇ hta‸ la‸ ka hk'oˆ lo hta‸ pehˍ loˬ teh‸, yawˇ hui leuˉ leh g'aˇ hte‸ k'aw‸ kuˬ ve yoˬ. 15 Hk'e te leh jawˇ mawˇ Piˉla‸ lehˬ, chaw awˬ moˍ lonˉ nyi ma cawˇ tuˬ te gaˇ ve pa taw, yawˇ hui awˬ pon Baˍraˍbaˆ hta‸ hpehˇ piˇ leh, Yeˍsuˆ hta‸ jaw‸ peuˬ hk'aw‸ nawˉ, la‸ ka hk'oˆ lo hta‸ pehˍ tuˬ chiˇ a‸ piˇ ve yoˬ. 16 Oˇ htaˇ, ma‸ yaˇ teˇ hpaˍ lehˬ mvuhˇ miˬ jawˇ mawˇ lonˉ ve hawˉ yehˬ hta‸ caˉ da‸ ve ko taˍ kuiˬ awˬ hk'aw lo Yeˍsuˆ hta‸ shiˍ k'ai leh, ma‸ yaˇ teˇ ta‸ hk'a peu-eˬ hta‸ kuˬ hpawnˬ ve yoˬ. 17 Yawˇ hui lehˬ, hpa nyi naˆ meuˉ lehˍ ve aˉ po‸ zuhˬ ma yawˇ hta‸ deh piˇ ve yoˬ. Aˉ chuˇ te hta‸ htawˇ yuˬ leh, shi uˉ tcuhˍ hk'e te g'a‸ leh yawˇ hta‸ hk'awˆ piˇ ve yoˬ. 18 Yuˇda‸ ve hkunˉ hawˉ hkanˇ-oˬ, nawˬ awˬ bon uiˍ piˇ-oˆ teh‸, yawˇ hui yawˆ yan ve hk'e te leh yawˇ hta‸ k'oˆ guiˇ ve yoˬ. 19 Peuˬ leh, yawˇ hui lo taˬ hta‸ yuˬ leh yawˇ ve oˉ k'oˍ hta‸ dawˆ ve yoˬ. Yawˇ hta‸ ciˉ g'uiˇ hpe‸ pfuhˍ leh, hkui tcuhˉ teh leh yawˇ hta‸ oˉ k'oˍ pui ve yoˬ. 20 Yawˇ hta‸ maˇ shawˍ maˇ caˆ te peuˬ hk'aw‸ nawˉ, nyi naˆ meuˉ lehˍ ve aˉ po‸ zuhˬ ma hta‸ yawˇ hui k'ehˆ baˬ leh yawˇ ve veu‸ k'aˇ hta‸ k'aw‸ feuˉ piˇ ve yoˬ. Oˇ htaˇ la‸ ka hk'oˆ lo hta‸ pehˍ tuˬ, yawˇ hui yawˇ hta‸ sheh tawˆ-e ve yoˬ. 21 Aˍleˍsaˍduˆ leh Ruˇhpuˆ awˬ pa, Siˉmonˍ meh ve Kuˇreˍneˍ venˇ yaˇ teˇ g'aˇ, heh hk'aw k'ai k'aw‸ la ve hta‸ yawˇ hui g'a mawˬ leh, yawˇ hta‸ nyiˉ leh Yeˍsuˆ ve la‸ ka hta‸ taˆ tcuh ve yoˬ. 22 Gawˇlaˍgawˇtaˆ meh ve chehˇ kuiˬ lo yawˇ hui Yeˍsuˆ hta‸ yuˬ k'ai ve yoˬ. Awˬ meh oˇ ve tcuhˉ kuiˬ lehˬ, oˉ koˆ teh‸ k'oˆ ve yoˬ. 23 Muˇraˍ hkaw‸ taˍ ve a pehˉ meuˇ g'uiˬ yawˇ hui yawˇ hta‸ taw piˇ ve htawˇ, yawˇ maˇ dawˬ. 24 Yawˇ hui yawˇ hta‸ la‸ ka hk'oˆ lo hta‸ keu peuˬ hk'aw‸ nawˉ, yawˇ hui lehˬ veu‸ k'aˇ hk'aˬ ve teˇ hk'oˆ hta‸ a shu g'a cawˇ leh naˍ teh‸, yawˇ hui kuˇ da‸ leh yawˇ ve veu‸ k'aˇ hta‸ pehˬ da‸ ve yoˬ. 25 Yawˇ hui yawˇ hta‸ la‸ ka hk'oˆ lo hta‸ keu taˍ ve lehˬ, mvuhˇ shawˉ k'awˇ naˍ riˍ teˇ yanˇ yoˬ. 26 Yuˇda‸ chaw hui ve Hkunˉ hawˉ hkanˇ yoˬ teh‸ yawˇ hta‸ venˇ baˆ taˍ ve li‸ yawˇ hui bvuh‸ nehˉ taˍ ve yoˬ. 27 Peuˬ leh yawˇ geh teˇ geh chaw hk'awˇ nyiˇ g'aˇ hta‸ htawˇ, la‸ sha paˉ teˇ g'aˇ, la‸ mehˍ paˉ teˇ g'aˇ, la‸ ka hk'oˆ lo hta‸ keu taˍ ve yoˬ. 28 Li‸ hpu teˇ hpaˍ hpaˍ awˬ hk'aw lo ka nanˉ ehˉ chi teˇ maˬ cawˬ ve yoˬ. Haiˬ ve chaw teˇ hpaˍ geh teˇ geh yawˇ hta‸ shawˍ taˍ ve yoˬ teh‸ k'oˆ taˍ ve Li‸ hpu tawˇ hkawˇ biˇ la ve yoˬ. 29 K'ai k'ai laˬ laˬ ve chaw teˇ hpaˍ lehˬ, yawˇ hta‸ maˇ shawˍ maˇ caˆ k'oˆ leh, a shu yawˇ ve oˉ k'oˍ hiˆ leh k'oˆ ve, Eˇ, bon yehˬ lonˉ hta‸ te luˬ leh shehˆ nyi awˬ hk'aw lo k'aw‸ te g'a ve chaw-oˬ, 30 nawˬ awˬ to hta‸ ponˬ piˇ leh la‸ ka hk'oˆ lo ya‸ la-o teh‸ k'oˆ piˇ ve yoˬ. 31 Paw hkuˇ lonˉ hui htawˇ, li‸ bvuh‸ paˍ hui geh teˇ geh chi hka shuˍ shuˍ yawˇ hta‸ k'oˆ guiˇ g'uiˬ guiˇ leh k'oˆ ve, Shu hta‸ yawˇ htaiˍ hk'aw‸ g'a ve yoˬ. Yawˇ awˬ to hta‸ yawˇ htaiˍ hk'aw‸ maˇ g'a. 32 Ngaˬ hui g'a mawˬ leh g'a yonˍ tuˬ, Hkri‸ teh‸ k'oˆ ve Iˉsaˍreˍlaˆ ve Hkunˉ hawˉ hkanˇ hta‸ la‸ ka hk'oˆ lo ya‸ la piˇ-oˆ teh‸, teˇ g'aˇ leh teˇ g'aˇ k'oˆ da‸ ve yoˬ. Yawˇ geh teˇ geh la‸ ka hk'oˆ lo hta‸ keu taˍ ve nyiˇ g'aˇ htawˇ, yawˇ hta‸ maˇ shawˍ maˇ caˆ k'oˆ ve yoˬ. 33 Mvuhˇ law‸ k'aw tcuhˆ htaˇ ka‸ tanˬ leh mvuhˇ hpeu‸ hpawˇ shehˆ naˍ riˍ hk'a gaˬ, miˬ guiˬ hk'a peu-eˬ naˆ ho‸ lehˍ hpeh‸ sheˬ ve yoˬ. 34 Mvuhˇ hpeu‸ hpawˇ shehˆ naˍ riˍ gaˬ ve teˇ yanˇ, Yeˍsuˆ awˬ hkawˇ bvuhˬ chaweh te leh, Eˇliˆ, Eˇliˆ, laˍmaˍsaˍbaˆtaˍniˍ teh‸ kuˬ ve yoˬ. Tcuhˉ kuiˬ lehˬ, Ngaˬ ve G'uiˬ sha-oˬ, ngaˬ ve G'uiˬ sha-oˬ, aˬ hto‸ ma te nawˬ ngaˬ hta‸ baˬ taˉ laˇ ve le teh‸ k'oˆ ve yoˬ. 35 Awˬ paˇ lo huˉ chehˇ ve chaw teˇ hpaˍ hpaˍ tawˇ oˇ ve hta‸ g'a kaˇ htaˇ, Nyi loˬ, yawˇ Eˇliˇya‸ hta‸ kuˬ ve yoˬ teh‸ k'oˆ ve yoˬ. 36 Oˇ htaˇ, chaw teˇ g'aˇ g'uiˇ k'ai leh, laˇ tsuhˇ g'uiˬ mvuhˬ teˇ maˬ hta‸ yuˬ leh ci ve awˬ g'uiˬ awˬ hk'aw lo tuˍ peuˬ hk'aw‸ nawˉ, lo taˬ hta‸ choˆ leh yawˇ hta‸ taw piˇ ve yoˬ. Chaw oˇ ve teˇ g'aˇ k'oˆ ve, Law taˍ sheˍ. Eˇliˇya‸ yawˇ hta‸ ca yuˬ ya‸ la tuˬ leh naˍ, ngaˬ hui nyi taˍ shaˍ teh‸ k'oˆ ve yoˬ. 37 Yeˍsuˆ awˬ hkawˇ bvuhˬ chaweh kuˬ leh, shaˉ cheˆ ve yoˬ. 38 Oˇ htaˇ, bon yehˬ lonˉ ve hpaˬ kaˍ lehˬ, awˬ na te leh awˬ hawˉ lo hk'a gaˬ nyiˇ hkoˇ tzuh‸ sheˍ ve yoˬ. 39 Yawˇ chi hk'e shaˉ cheˆ ve hta‸ yawˇ mehˆ g'uˇ suhˍ huˉ chehˇ ve ma‸ poˍ teˇ g'aˇ g'a mawˬ htaˇ, Chaw chi lehˬ awˬ tehˬ awˬ na G'uiˬ sha ve yaˇ hpu teˇ g'aˇ hpeh‸ ve yoˬ teh‸ k'oˆ ve yoˬ. 40 Oˇ kaˬ a ciˉ vuiˇ kuiˬ lo yaˇ miˇ teˇ hpaˍ htawˇ chehˇ leh nyi taˍ ve yoˬ. Yawˇ hui awˬ hk'aw lo, Maˍriˆ Maˍgaˍdaˍlaˆ, a sha‸ i ve Yaˍkoˆ teˇ g'aˇ leh Yoˇseˍ ve awˬ e Maˍriˆ leh, Saˍloˍmenˍ hui chehˇ taˍ ve yoˬ. 41 Yawˇ hui lehˬ, Yeˍsuˆ Gaˍliˍlehˇ mvuhˇ miˬ awˬ hk'aw lo chehˇ htaˇ, yawˇ awˬ hk'aˇ suh k'ai leh yawˇ hta‸ te caˍ te taw piˇ ve yaˇ miˇ teˇ hpaˍ yoˬ. Yeˍruˆsaˍlehnˍ venˇ lo yawˇ geh teˇ geh taˆ la ve yaˇ miˇ laiˉ g'aˇ htawˇ oˇ kaˬ lo chehˇ leh nyi taˍ ve yoˬ. 42 Shinˉ nyi maˇ gaˬ sheˍ awˬ g'uˇ suhˍ teˇ nyi mvuhˇ hpeu‸ la htaˇ, gu ve awˬ nyi hpeh‸ ve pa taw, 43 awˬ me‸ awˬ hponˇ cawˬ ve jehˬ da‸ shehˍ hpaˇ, Aˍriˆma‸htehˍ venˇ yaˇ Yoˇseh‸ meh ve teˇ g'aˇ laˬ ve yoˬ. Yawˇ lehˬ, G'uiˬ sha ve mvuhˇ miˬ hta‸ dawˇ law chehˇ ve chaw teˇ g'aˇ hpeh‸ ve yoˬ. Yawˇ nyi ma ha‸ hanˉ te leh, jawˇ mawˇ Piˉla‸ geh k'ai leh Yeˍsuˆ ve awˬ to hta‸ lawˬ yuˬ ve yoˬ. 44 Awˬ yanˇ chi maw ceh tiˉ ka‸ suh peuˬ ve pa taw, jawˇ mawˇ Piˉla‸ anˇ leh ma‸ poˍ hta‸ kuˬ yuˬ leh, Yawˇ suh peuˬ tehˬ ve yoˬ laˇ teh‸ na nyi ve yoˬ. 45 Yeˍsuˆ suh peuˬ ve awˬ lawn ma‸ poˍ hto piˇ leh yawˇ g'a shiˍ htaˇ, Yeˍsuˆ ve awˬ to Yoˇseh‸ hta‸ piˇ ve yoˬ. 46 Hk'e te leh, Yoˇseh‸ hpa hpu hta‸ vuiˬ yuˬ leh, Yeˍsuˆ ve awˬ to hta‸ yuˬ ya‸ peuˬ hk'aw‸ nawˉ, hpa hpu yuˬ hawˆ htiˆ sheˬ leh, haˉ pui htawˆ taˍ ve tuˍ hpfuh awˬ hk'aw lo keu taˍ ve yoˬ. Tuˍ hpfuh awˬ hk'oˇ meuˇ lo haˉ pui hpfuhˆ tsuhˇ taˉ ve yoˬ. 47 Maˍriˆ Maˍgaˍdaˍlaˆ leh Yoˇseˍ ve awˬ e Maˍriˆ lehˬ, yawˇ hta‸ teh taˍ kuiˬ hta‸ g'a mawˬ ve yoˬ.

Maˍkuˆ 16

1 Shinˉ nyi peuˬ ve teˇ yanˇ, Maˍriˆ Maˍgaˍdaˍlaˆ,Yaˍkoˆ ve awˬ e Maˍriˆ leh Saˍloˍmenˍ hui lehˬ, Yeˍsuˆ ve awˬ to hta‸ ca pfuhˍ piˇ tuˬ sha hawnˉ vuiˬ ve yoˬ. 2 Teˇ shinˉ awˬ hk'aw lo awˉ lawˉ teˇ nyi mvuhˇ shawˉ teˇ na‸ mvuhˇ nyi tawˆ la ve teˇ yanˇ, yawˇ hui tuˍ hpfuh lo k'ai ve yoˬ. 3 Oˇ htaˇ yawˇ hui lehˬ, Tuˍ hpfuh awˬ hk'oˇ meuˇ hta‸ tsuhˇ taˍ ve haˉ pui hta‸ ngaˬ hui awˬ pon a shu hpfuhˆ baˬ laˇ tuˬ le teh‸, teˇ g'aˇ leh teˇ g'aˇ k'oˆ da‸ ve yoˬ. 4 Yawˇ hui chiˇ nyi ve teˇ yanˇ, haˉ pui oˇ ve hpfuhˆ baˬ taˍ ve hta‸ g'a mawˬ ve yoˬ. Haˉ pui oˇ ve lehˬ uiˍ jaˇ ve yoˬ. 5 Tuˍ hpfuh awˬ hk'aw lo yawˇ hui lo‸-e ve teˇ yanˇ, hpuˉ lehˍ ve aˇ po‸ zuhˬ ma veu‸ taˍ ve chaw haˉ paˍ teˇ g'aˇ la‸ sha paˉ lo mui chehˇ ve hta‸ g'a mawˬ leh yawˇ hui kawˆ jaˇ ve yoˬ. 6 Yawˇ yawˇ hui hta‸ k'oˆ piˇ ve, Taˇ kawˆ. La‸ ka hk'oˆ lo hta‸ pehˍ ve Naˬzaˍrehˆ chaw Yeˍsuˆ hta‸ nawˬ hui ca ve yoˬ. Yawˇ k'aw‸ te‸ tu la peuˬ. Yawˇ choˬ kaˬ maˇ chehˇ. Yawˇ hta‸ teh taˍ kuiˬ lo ca nyi la-o. 7 Ya‸ hk'aˇ nawˬ hui k'ai leh, yawˇ ve awˬ la‸ g'awˇ teˇ hpaˍ leh Peˍtruˆ hta‸ chi hk'e hto piˇ-oˆ. Nawˬ hui g'uˇ suhˍ Gaˍliˍlehˇ mvuhˇ miˬ lo yawˇ k'ai tuˬ yoˬ. Yawˇ nawˬ hui hta‸ k'oˆ taˉ laˇ ve hk'e, oˇ kaˬ lo nawˬ hui yawˇ hta‸ g'a mawˬ tuˬ yoˬ teh‸, yawˇ hui hta‸ k'oˆ piˇ ve yoˬ. 8 Yaˇ miˇ oˇ ve teˇ hpaˍ lehˬ, tuˍ hpfuh hk'aw lo tawˆ k'ai leh, kawˆ cheˇ leh anˇ jaˇ ve awˬ hk'aw lo yawˇ hui g'uiˇ k'o‸-e ve yoˬ. Yawˇ hui kawˆ jaˇ ve pa taw, teˇ g'aˇ hta‸ ka‸ maˇ hto piˇ. 9 Teˇ shinˉ awˬ hk'aw lo awˉ lawˉ teˇ nyi mvuhˇ shawˉ teˇ na‸ yawˇ k'aw‸ te‸ tu la peuˬ hk'aw‸ nawˉ yawˇ awˬ to Maˍriˆ Maˍgaˍdaˍlaˆ hta‸ awˉ lawˉ maw piˇ ve yoˬ. Yaˇ miˇ oˇ ve lehˬ, ponˬ laˬ htaˇ neˇ suhˍ hkeh geh taˍ ve hta‸ Yeˍsuˆ g'a‸ k'oˬ piˇ jaw ve yaˇ miˇ teˇ g'aˇ hpeh‸ ve yoˬ. 10 Yeˍsuˆ geh chehˇ jaw ve chaw teˇ hpaˍ dawˇ haˍ g'aˇ haˍ leh hawˬ chehˇ ve teˇ yanˇ, Maˍriˆ k'ai leh yawˇ hui hta‸ hto piˇ ve yoˬ. 11 Yeˍsuˆ te‸ chehˇ leh Maˍriˆ yawˇ hta‸ g'a mawˬ ve awˬ lawn yawˇ hui g'a kaˇ htaˇ, maˇ yonˍ. 12 Oˇ ve awˬ hk'aw‸ nawˉ, yawˇ hui awˬ hk'aw lo chaw nyiˇ g'aˇ hk'aˆ hk'aw lo k'aw‸ k'o‸-e chehˇ htaˇ, yawˇ awˬ ho‸ awˬ han peun da‸ ve awˬ hk'aw lo yawˇ awˬ to yawˇ huiˉ maˬ hta‸ maw piˇ ve yoˬ. 13 Yawˇ huiˉ maˬ k'aw‸ laˬ leh, chehˇ taˉ ve chaw teˇ hpaˍ hta‸ hto piˇ ve htawˇ yawˇ hui maˇ yonˍ. 14 Oˇ ve awˬ hk'aw‸ nawˉ, tcuh yaˇ teˇ chi teˇ g'aˇ awˍ mui caˇ chehˇ ve teˇ yanˇ, yawˇ awˬ to yawˇ hui hta‸ maw piˇ ve yoˬ. Yawˇ hui maˇ yonˍ puiˉ ve leh nyi ma ka‸ heh ve hta‸ pa taw, yawˇ yawˇ hui hta‸ deˇ piˇ ve yoˬ. Awˬ lawn k'o, yawˇ k'aw‸ te‸ tu la peuˬ hk'aw‸ nawˉ, yawˇ hta‸ g'a mawˬ ve chaw teˇ hpaˍ ve hkawˇ hta‸ yawˇ hui maˇ yonˍ ve pa taw yoˬ. 15 Peuˬ leh, yawˇ yawˇ hui hta‸ k'oˆ piˇ ve, Miˬ guiˬ hk'oˆ teˇ kaˬ le le lo k'ai leh chaw hk'a peu-eˬ hta‸ ha lehˬ ve bon hkawˇ ca maˍ piˇ-oˆ. 16 Yonˍ leh baˆtiˆsaˬ hkanˍ yuˬ ve chaw lehˬ, htaiˍ hk'aw‸ ve hta‸ g'a tuˬ yoˬ. Maˇ yonˍ ve chaw lehˬ, ciˍ yanˍ ve hta‸ g'a hkanˍ tuˬ yoˬ. 17 Yonˍ ve chaw teˇ hpaˍ awˬ hk'aw lo awˬ heˆ chi teˇ hpaˍ hta‸ g'a mawˬ tuˬ yoˬ. Ngaˬ ve awˬ meh hta‸ cuˇ leh, neˇ teˇ hpaˍ hta‸ yawˇ hui g'a‸ k'oˬ tuˬ yoˬ. Yawˇ hui tawˇ laiˉ ceuˬ yaw chiˇ mvuh tuˬ yoˬ. 18 Yawˇ hui lehˬ, vuiˬ teˇ hpaˍ hta‸ yuˬ hpeh‸ tuˬ yoˬ. Awˬ taw‸ ma hta‸ dawˬ ve ka‸, yawˇ hui te‸ chiˉ maˇ hpeh‸. Chaw naˬ teˇ hpaˍ awˬ hk'oˆ hta‸ yawˇ hui la‸ sheh taˍ leh chaw oˇ ve teˇ hpaˍ na-e la tuˬ yoˬ teh‸, Yeˍsuˆ k'oˆ piˇ ve yoˬ. 19 Hk'e te leh, Jawˇ mawˇ Yeˍsuˆ yawˇ hui hta‸ oˇ hk'e k'oˆ piˇ peuˬ hk'aw‸ nawˉ, G'uiˬ sha yawˇ hta‸ mvuhˇ naw ma hk'oˆ lo chiˇ taˆ-e leh, G'uiˬ sha ve la‸ sha paˉ lo yawˇ mui taˍ ve yoˬ. 20 Awˬ la‸ g'awˇ teˇ hpaˍ htawˇ tawˆ k'ai leh teˇ kaˬ le le lo bon hkawˇ ca maˍ piˇ ve yoˬ. Jawˇ mawˇ G'uiˬ sha lehˬ yawˇ hui geh kanˉ te leh awˬ heˆ teˇ hpaˍ te tawˆ la ve awˬ hk'aw lo, bon hkawˇ oˇ ve hta‸ yeˬ la piˇ lawˬ ve yoˬ.

Luˉka‸ 1

1 Awˬ me‸ awˬ hponˇ uiˍ ve Htawˇhpiˇ luˆ-oˬ, ngaˬ hui awˬ hk'aw lo hpeh‸ la peuˬ ve awˬ lawn teˇ hpaˍ hta‸ chaw laiˉ g'aˇ puiˉ ve hpeh‸ ve hk'e, awˬ lawn teˇ ceuˬ peuˬ teˇ ceuˬ awˬ hk'aˇ hteˇ lehˍ bvuh‸ taˍ peuˬ. 2 Hk'a hpeh‸ la peuˬ ve teˇ hpaˍ hta‸ awˬ hkuiˉ puiˍ htaˇ ka‸ g'a mawˬ taˍ leh, bon hkawˇ g'a maˍ ve chaw teˇ hpaˍ ngaˬ hui hta‸ hto laˇ peuˬ ve hk'e yawˇ hui bvuh‸ taˍ ve yoˬ. 3 Ngaˬ htawˇ, awˬ hkuiˉ puiˍ htaˇ ka‸ yawˇ hui bvuh‸ taˍ ve teˇ hpaˍ hta‸ hk'a deh‸ shawˍ nyi tehˆ nyi taˍ peuˬ. 4 Hk'e te leh, nawˬ g'a henˇ taˍ peuˬ ve teˇ hpaˍ lehˬ, awˬ tehˬ awˬ na cawˇ ve yoˬ teh‸ nawˬ g'a shiˍ tuˬ, awˬ lawn chi teˇ hpaˍ teˇ ceuˬ peuˬ teˇ ceuˬ awˬ hk'aˇ hteˇ lehˍ nawˬ hta‸ li‸ bvuh‸ laˇ cawˇ ve yoˬ teh‸ ngaˬ dawˇ taˍ ve yoˬ. 5 Yuˇda‸ mvuhˇ miˬ hta‸ hkunˉ hawˉ hkanˇ Heˍroˆ uˉ peunˍ chehˇ ve teˇ yanˇ, Aˍbiˉya‸ awˬ moˍ awˬ hk'aw lo Zaˍhkaˍriˆ meh ve paw hkuˇ teˇ g'aˇ cawˬ ve yoˬ. Yawˇ ve awˬ miˇ ma lehˬ Aˍronˍ ve awˬ ceuˬ awˬ hk'aˇ hpeh‸ leh, yawˇ ve awˬ meh Eˇliˇsaˍbehˆ yoˬ. 6 Yawˇ huiˉ maˬ lehˬ, Jawˇ mawˇ G'uiˬ sha ve awˬ liˇ tawˇ hkawˇ leh piˇ taˍ ve awˬ liˇ awˬ hk'aˇ hk'a peu-eˬ awˬ hk'aˇ suh te leh ya‸ kuiˬ maˇ cawˬ. G'uiˬ sha mehˆ g'uˇ suhˍ yawˇ huiˉ maˬ nyiˇ g'aˇ g'aˇ hteˇ ve cawˇ ve chaw hpeh‸ ve yoˬ. 7 Yawˇ huiˉ maˬ yaˇ maˇ cawˬ. Awˬ lawn k'o, Eˇliˇsaˍbehˆ lehˬ chaw meh ma hpeh‸ leh, yawˇ huiˉ maˬ nyiˇ g'aˇ g'aˇ mawˇ la peuˬ. 8 Zaˍhkaˍriˆ ve awˬ moˍ kanˉ te ve awˬ yanˇ gaˬ leh, G'uiˬ sha mehˆ g'uˇ suhˍ yawˇ paw hkuˇ ve kanˉ hta‸ te chehˇ htaˇ, 9 Jawˇ mawˇ G'uiˬ sha ve bon yehˬ lonˉ awˬ hk'aw lo lo‸-e leh sha hawnˉ ve hta‸ tuˉ tanˇ tuˬ, paw hkuˇ awˬ liˇ cawˬ taˍ ve hk'e, yawˇ hui kuˇ da‸ leh yawˇ hta‸ cawˇ ve yoˬ. 10 Sha hawnˉ ve hta‸ tuˉ tanˇ ve awˬ yanˇ awˬ hk'aw lo, chaw awˬ moˍ lonˉ hk'a peu-eˬ lehˬ, awˬ baˬ hpawˇ lo bon lawˬ chehˇ ve yoˬ. 11 Oˇ htaˇ, Jawˇ mawˇ G'uiˬ sha ve mvuhˇ naw ma tcuh yaˇ teˇ g'aˇ yawˇ mehˆ g'uˇ suhˍ tawˆ la leh, sha hawnˉ ve tuˉ tanˇ kuiˬ la‸ sha paˉ lo huˉ chehˇ taˍ ve yoˬ. 12 Zaˍhkaˍriˆ yawˇ hta‸ g'a mawˬ ve teˇ yanˇ, nyi ma sho‸ sha‸ leh kawˆ ve yoˬ. 13 Ya‸ hk'aˇ, mvuhˇ naw ma tcuh yaˇ yawˇ hta‸ k'oˆ piˇ ve, Zaˍhkaˍriˆ-oˬ, taˇ kawˆ. Awˬ lawn k'o, nawˬ bon lawˬ ve hkawˇ hta‸ G'uiˬ sha kaˇ peuˬ. Nawˬ ve awˬ miˇ ma Eˇliˇsaˍbehˆ lehˬ, nawˬ awˬ pon yaˇ paˍ paw la piˇ tuˬ yoˬ. Yaˇ paˍ oˇ ve hta‸ Yoˇhanˬ teh‸ nawˬ g'a meh piˇ tuˬ yoˬ. 14 Nawˬ lehˬ ha lehˬ tuˬ maˇ maˇ cawˬ tuˬ yoˬ. Yaˇ paˍ oˇ ve paw la ve pa taw, chaw laiˉ g'aˇ htawˇ ha lehˬ jaˇ tuˬ yoˬ. 15 Awˬ lawn k'o, yawˇ lehˬ Jawˇ mawˇ G'uiˬ sha mehˆ g'uˇ suhˍ chaw uiˍ chaw mvuh hpeh‸ tuˬ yoˬ. A pehˉ meuˇ g'uiˬ leh bvuhˆ puiˉ ve awˬ ceuˬ hta‸ yawˇ a ciˉ ka‸ dawˬ tuˬ maˇ heˆ. Yawˇ paw la htaˇ ka‸ da‸ ve kehˬ ve Awˬ ha hpu hk'a biˇ cawˬ tuˬ yoˬ. 16 Iˉsaˍreˍlaˆ chaw maˇ maˇ hta‸ yawˇ hui ve Jawˇ mawˇ G'uiˬ sha geh lo k'aw‸ hpfuhˆ k'aw‸ la tuˬ ve yawˇ te tuˬ yoˬ. 17 Awˬ pa teˇ hpaˍ leh awˬ yaˇ teˇ hpaˍ cawˇ da‸ tuˬ maˇ k'oˆ, maˇ na yuˬ puiˉ ve chaw teˇ hpaˍ hteˇ ve cawˇ ve chaw hui ve cuˇ yiˍ awˬ hk'aˇ suh k'ai tuˬ maˇ k'oˆ, Jawˇ mawˇ G'uiˬ sha awˬ pon gu taˍ ve chaw ceuˬ teˇ ceuˬ hpeh‸ la tuˬ yawˇ hui hta‸ hk'a deh‸ gu piˇ tuˬ maˇ k'oˆ, yawˇ lehˬ Eˇliˇya‸ ve nyi ma leh kanˇ paˆ cawˬ ve awˬ hk'aw lo, G'uiˬ sha mehˆ g'uˇ suhˍ k'ai tuˬ yoˬ teh‸ mvuhˇ maw ma tcuh yaˇ yawˇ hta‸ k'oˆ piˇ ve yoˬ. 18 Oˇ htaˇ Zaˍhkaˍriˆ lehˬ, Chi hk'e hpeh‸ la tuˬ ve hta‸ ngaˬ hk'aˬ hk'e te shiˍ tuˬ le. Ngaˬ lehˬ mawˇ la peuˬ. Ngaˬ awˬ miˇ ma htawˇ mawˇ la peuˬ teh‸, mvuhˇ naw ma tcuh yaˇ hta‸ k'oˆ piˇ ve yoˬ. 19 Mvuhˇ naw ma tcuh yaˇ k'aw‸ k'oˆ ve, Ngaˬ lehˬ G'uiˬ sha mehˆ g'uˇ suhˍ huˉ taˍ ve Gaˍbeˍlaˆ yoˬ. Nawˬ hta‸ tawˇ yaw laˇ leh, ha lehˬ ve tawˇ hkawˇ chi hto laˇ tuˬ, yawˇ ngaˬ hta‸ peu laˇ ve yoˬ. 20 Ngaˬ ve tawˇ hkawˇ hta‸ maˇ yonˍ ve pa taw, awˬ lawn chi teˇ hpaˍ hpeh‸ la ve teˇ nyi hk'a gaˬ nawˬ tawˇ yaw maˇ g'a leh chaw k'aˍ g'a hpeh‸ tuˬ yoˬ. Ngaˬ ve tawˇ hkawˇ lehˬ, awˬ yanˇ cawˇ ve teˇ yanˇ biˇ la tuˬ yoˬ teh‸, yawˇ hta‸ k'oˆ piˇ ve yoˬ. 21 Chaw chi ma ve lehˬ, Zaˍhkaˍriˆ hta‸ law chehˇ ve yoˬ. Bon yehˬ lonˉ awˬ hk'aw lo yawˇ maw chaweh chehˇ taˍ ve hta‸ yawˇ hui anˇ ve yoˬ. 22 Yawˇ tawˆ la ve teˇ yanˇ, yawˇ yawˇ hui hta‸ tawˇ yaw maˇ g'a leh, bon yehˬ lonˉ awˬ hk'aw lo hpeu‸ maˍ piˇ ve teˇ ceuˬ ceuˬ hta‸ yawˇ g'a mawˬ peuˬ teh‸, yawˇ hui shiˍ ve yoˬ. Yawˇ k'aˍ chehˇ leh, la‸ sheh awˬ heˆ ceh tiˉ te maˍ piˇ ve yoˬ. 23 Yawˇ kanˉ te ve awˬ nyi awˬ haˉ peuˬ ve teˇ yanˇ, yawˇ ve aˉ hk'aw lo k'aw‸ k'o‸-e ve yoˬ. 24 Oˇ ve hk'aw‸ nawˉ, yawˇ ve awˬ miˇ ma Eˇliˇsaˍbehˆ yaˇ hu la leh, ha pa ngaˇ maˬ hk'a gaˬ va‸ chehˇ taˍ ve yoˬ. 25 Yawˇ k'oˆ ve, Jawˇ mawˇ G'uiˬ sha lehˬ, ngaˬ hta‸ nyi laˇ ve awˬ nyi teˇ hpaˍ awˬ hk'aw lo, chaw yaˇ hui mehˆ g'uˇ suhˍ shu hk'aiˉ leh venˇ baˆ taˍ ve hta‸ yuˬ baˬ laˇ tuˬ, yawˇ ngaˬ awˬ pon chi hk'e te laˇ peuˬ teh‸ k'oˆ ve yoˬ. 26 Ha pa hkaw‸ maˬ gaˬ htaˇ, Gaˍliˍlehˇ mvuhˇ miˬ Naˍzaˍrehˆ venˇ hk'aw chehˇ ve yaˇ miˇ teˇ g'aˇ geh, G'uiˬ sha lehˬ mvuhˇ naw ma tcuh yaˇ Gaˍbeˍlaˆ hta‸ k'ai tcuh ve yoˬ. 27 Yaˇ miˇ oˇ ve lehˬ, Daˍviˆ ve awˬ ceuˬ awˬ hk'aˇ Yoˇseh‸ meh ve teˇ g'aˇ hta‸ heuˆ da‸ tuˬ ka ti‸ te taˍ ve yaˇ miˇ haˉ hpeh‸ ve yoˬ. Yaˇ miˇ haˉ oˇ ve lehˬ, Maˍriˆ meh ve yoˬ. 28 Mvuhˇ naw ma tcuh yaˇ oˇ ve Maˍriˆ geh gaˬ la htaˇ, Awˬ bon g'a maˇ ve yaˇ miˇ -oˬ, awˬ bon uiˍ piˇ-oˆ. Jawˇ mawˇ G'uiˬ sha nawˬ geh chehˇ ve yoˬ teh‸, yawˇ hta‸ k'oˆ piˇ ve yoˬ. 29 Maˍriˆ lehˬ, tawˇ hkawˇ oˇ ve hta‸ pa taw nyi ma sho‸ sha‸ jaˇ leh, na‸ laˇ ve tawˇ hkawˇ chi hk'aˬ hk'e k'oˆ gaˇ ve leh naˍ teh‸, yawˇ dawˇ nyi chehˇ ve yoˬ. 30 Oˇ htaˇ mvuhˇ naw ma tcuh yaˇ k'oˆ ve, Maˍriˆ-oˬ, taˇ kawˆ. Awˬ lawn k'o, G'uiˬ sha nawˬ hta‸ nyi ma cawˇ ve yoˬ. 31 Nawˬ yaˇ hu la leh, yaˇ paˍ paw la tuˬ yoˬ. Yawˇ hta‸ Yeˍsuˆ teh‸ nawˬ g'a meh piˇ tuˬ yoˬ. 32 Yaˇ paˍ oˇ ve lehˬ, chaw uiˍ chaw mvuh hpeh‸ leh, uiˍ jaˇ mvuh jaˇ ve Awˬ shehˍ hpaˇ ve Yaˇ hpu hpeh‸ ve yoˬ teh‸ shu k'oˆ tuˬ yoˬ. Jawˇ mawˇ G'uiˬ sha lehˬ, yaˇ paˍ oˇ ve hta‸ yawˇ awˬ pa Daˍviˆ ve k'aw jaw piˇ tuˬ yoˬ. 33 Yawˇ lehˬ, Yaˍkoˆ ve yehˬ awˬ hk'oˆ hta‸ co co taiˍ taiˍ uˉ peunˍ tuˬ yoˬ. Yawˇ hkunˉ hawˉ hkanˇ te ve teˇ ceuˬ lehˬ, awˬ leh meuˇ maˇ cawˬ, teh‸ Maˍriˆ hta‸ k'oˆ piˇ ve yoˬ. 34 Oˇ htaˇ Maˍriˆ lehˬ, Ngaˬ awˬ hpawˇ maˇ cawˬ. Hk'aˬ hk'e te chi hk'e hpeh‸ la tuˬ le teh‸, mvuhˇ naw ma tcuh yaˇ hta‸ k'aw‸ k'oˆ piˇ ve yoˬ. 35 Mvuhˇ naw ma tcuh yaˇ k'aw‸ k'oˆ ve, Da‸ ve kehˬ ve Awˬ ha hpu nawˬ awˬ hk'oˆ ya‸ la leh, uiˍ jaˇ mvuh jaˇ ve Awˬ shehˍ hpaˇ ve kanˇ paˆ nawˬ hta‸ beh taˍ tuˬ yoˬ. Chi hta‸ pa taw, paw la tuˬ ve yaˇ lehˬ, G'uiˬ sha ve Yaˇ hpu hpeh‸ leh, da‸ kehˬ shehˍ hpaˇ teh‸ shu k'oˆ tuˬ yoˬ. 36 Chaw meh ma teh‸ k'oˆ ve nawˬ ve awˬ ceuˬ awˬ hk'aˇ Eˇliˇsaˍbehˆ htawˇ, yawˇ mawˇ la peuˬ ve ka‸, yaˇ paˍ hta‸ hu chehˇ ve ha pa hkaw‸ maˬ gaˬ peuˬ. 37 Awˬ lawn k'o, G'uiˬ sha maˇ te puiˉ ve teˇ ceuˬ ka‸ maˇ cawˬ teh‸ yawˇ hta‸ k'oˆ piˇ ve yoˬ. 38 Maˍriˆ k'aw‸ k'oˆ ve, Ngaˬ lehˬ Jawˇ mawˇ G'uiˬ sha ve awˬ ceˬ ma yoˬ. Nawˬ k'oˆ ve hk'e ngaˬ awˬ hk'aw lo hpeh‸ la piˇ-oˆ teh‸ k'oˆ piˇ ve yoˬ. Oˇ htaˇ, mvuhˇ naw ma tcuh yaˇ tawˆ k'ai ve yoˬ. 39 Awˬ nyi awˬ haˉ oˇ ve teˇ hpaˍ awˬ hk'aw lo, Maˍriˆ tu leh Yuˇda‸ mvuhˇ miˬ hk'aw hk'oˆ lawˬ hk'oˆ lo cawˬ ve venˇ teˇ venˇ lo haˆ haˆ k'ai ve yoˬ. 40 Yawˇ Zaˍhkaˍriˆ ve yehˬ hk'aw lo lo‸-e leh, Eˇliˇsaˍbehˆ hta‸ na‸ piˇ ve yoˬ. 41 Maˍriˆ na‸ piˇ ve hkawˇ hta‸ Eˇliˇsaˍbehˆ g'a kaˇ htaˇ, yawˇ ve g'oˇ peˬ awˬ hk'aw lo yaˇ ehˉ lehˬ, hiˆ hiˆ naˇ naˇ te ve yoˬ. Eˇliˇsaˍbehˆ awˬ hk'aw lo da‸ ve kehˬ ve Awˬ ha hpu biˇ la leh, 42 yawˇ awˬ hkawˇ bvuhˬ chaweh kuˬ leh k'oˆ ve, Yaˇ miˇ teˇ hpaˍ awˬ hk'aw lo nawˬ lehˬ awˬ bon uiˍ ve yoˬ. Nawˬ ve g'oˇ peˬ hk'aw ve yaˇ ehˉ htawˇ awˬ bon uiˍ ve yoˬ. 43 Ngaˬ ve Jawˇ mawˇ ve awˬ e ngaˬ geh laˬ ve awˬ bon hta‸ ngaˬ aˬ hto‸ ma pa taw g'a ve le. 44 Awˬ lawn k'o, nawˬ na‸ laˇ ve tawˇ hkawˇ hta‸ ngaˬ g'a kaˇ htaˇ, ngaˬ ve g'oˇ peˬ hk'aw ve yaˇ ehˉ lehˬ, ha lehˬ leh hiˆ hiˆ naˇ naˇ te ve yoˬ. 45 Yonˍ ve yaˇ miˇ lehˬ, awˬ bon uiˍ ve yoˬ. Awˬ lawn k'o, yaˇ miˇ oˇ ve hta‸ Jawˇ mawˇ G'uiˬ sha k'oˆ piˇ taˍ ve tawˇ hkawˇ teˇ hpaˍ biˇ la tuˬ yoˬ teh‸ k'oˆ ve yoˬ. 46 Oˇ htaˇ Maˍriˆ k'oˆ ve, Ngaˬ ve nyi ma lehˬ, Jawˇ mawˇ G'uiˬ sha hta‸ chiˇ uiˍ chiˇ mvuh ve yoˬ. 47 Ngaˬ ve co ha htawˇ, ngaˬ ve Htaiˍ hk'aw‸ shehˍ hpaˇ G'uiˬ sha awˬ hk'aw lo ha lehˬ jaˇ ve yoˬ. 48 Awˬ lawn k'o, awˬ me‸ awˬ hponˇ maˇ cawˬ ve yawˇ ve awˬ ceˬ ma hta‸ yawˇ nyi laˇ peuˬ. Ya‸ nyi hk'aw‸ nawˉ k'o, chaw teˇ co peuˬ teˇ co ngaˬ hta‸ awˬ bon uiˍ ve yaˇ miˇ teh‸ k'oˆ tuˬ yoˬ. 49 Kanˇ paˆ uiˍ shehˍ hpaˇ lehˬ, ngaˬ hta‸ uiˍ jaˇ ve teˇ ceuˬ te laˇ peuˬ. Yawˇ lehˬ da‸ kehˬ ve yoˬ. 50 Yawˇ hta‸ yawˆ yan ve chaw hui awˬ hk'oˆ hta‸ yawˇ ha k'aˉ ve teˇ ceuˬ teˇ co peuˬ teˇ co cawˬ ve yoˬ. 51 Yawˇ ve la‸ sheh lehˬ, kanˇ paˆ uiˍ ve hta‸ te taˍ peuˬ. A shu yawˇ ve dawˇ hk'aˇ awˬ hk'aw lo nyi ma uiˍ ve mvuh ve chaw teˇ hpaˍ hta‸ yawˇ hpaˆ da‸ piˇ lawˬ peuˬ. 52 Jawˇ mawˇ teˇ hpaˍ hta‸ a shu yawˇ ve k'aw jaw hk'oˆ lo yawˇ yuˬ ce piˇ leh, awˬ me‸ awˬ hponˇ maˇ cawˬ ve chaw hui hta‸ yawˇ chiˇ taˆ piˇ peuˬ. 53 Meu‸ ve kaˆ ve chaw teˇ hpaˍ hta‸ yawˇ da‸ ve awˬ ceuˬ hk'a bvuhˆ caˍ piˇ leh, paw sha ve chaw teˇ hpaˍ hta‸ awˬ to k'awˇ lehˍ hpehˇ peu piˇ ve yoˬ. 54 Ngaˬ hui ve awˬ puˍ awˬ pi hui hta‸ yawˇ k'oˆ piˇ taˍ ve hk'e. 55 Aˍbraˍhanˍ leh yawˇ ve awˬ yaˇ awˬ duˬ teˇ hpaˍ hta‸ co co taiˍ taiˍ ha k'aˉ ve teˇ ceuˬ dawˇ nawˇ tuˬ awˬ pon, G'uiˬ sha yawˇ ve awˬ ceˬ Iˉsaˍreˍlaˆ hta‸ ga piˇ peuˬ. 56 Maˍriˆ lehˬ, Eˇliˇsaˍbehˆ geh shehˆ ha pa chehˇ taˉ peuˬ hk'aw‸ nawˉ, yawˇ ve aˉ hk'aw lo k'aw‸ k'o‸-e ve yoˬ. 57 Eˇliˇsaˍbehˆ yaˇ paw ve awˬ yanˇ gaˬ la leh yaˇ paˍ paw la ve yoˬ. 58 Jawˇ mawˇ G'uiˬ sha lehˬ, uiˍ jaˇ ve awˬ bon yawˇ hta‸ te piˇ ve awˬ lawn, awˬ paˇ awˬ kui lo chehˇ ve chaw teˇ hpaˍ leh awˬ ceuˬ awˬ hk'aˇ teˇ hpaˍ g'a kaˇ ve teˇ yanˇ, yawˇ geh hk'a geh ha lehˬ ve yoˬ. 59 Hiˉ nyi teˇ nyi gaˬ htaˇ, yaˇ ehˉ hta‸ awˬ guiˬ meuˇ shoˍ piˇ tuˬ yawˇ hui laˬ ve yoˬ. Yawˇ awˬ pa ve awˬ meh hk'a shuˍ shuˍ yawˇ hta‸ Zaˍhkaˍriˆ meh piˇ-a teh‸ te ve teˇ yanˇ, 60 awˬ e k'oˆ ve, Maˇ heˆ. Yawˇ hta‸ Yoˇhanˬ g'a meh piˇ ve yoˬ teh‸ k'oˆ ve yoˬ. 61 Yawˇ hui lehˬ, Nawˬ ve awˬ ceuˬ awˬ hk'aˇ awˬ hk'aw lo chi hk'e meh ve chaw teˇ g'aˇ ka‸ maˇ cawˬ teh‸, yawˇ hta‸ k'oˆ piˇ ve yoˬ. 62 Oˇ htaˇ, yaˇ ehˉ oˇ ve hta‸ hk'aˬ hk'e meh piˇ tcuh gaˇ leh naˍ teh‸, awˬ pa hta‸ yawˇ hui awˬ heˆ te leh na nyi ve yoˬ. 63 Yawˇ lehˬ, bvuh‸ tuˬ ve awˬ baˉ hta‸ lawˬ leh, Yawˇ ve awˬ meh Yoˇhanˬ yoˬ teh‸, bvuh‸ maˍ piˇ ve teˇ yanˇ, yawˇ hui hk'a peu-eˬ anˇ jaˇ ve yoˬ. 64 Oˇ ve teˇ hkui awˬ hk'aw lo yawˇ ve maw‸ k'aw ngaˉ leh ha tehˍ htawˇ nuˇ la ve yoˬ. Hk'e te leh, yawˇ tawˇ yaw leh G'uiˬ sha hta‸ chiˇ mvuh ve yoˬ. 65 Oˇ htaˇ, yawˇ hui awˬ paˇ awˬ kui lo chehˇ ve chaw hk'a peu-eˬ kawˆ ve yoˬ. Awˬ lawn oˇ ve teˇ hpaˍ Yuˇda‸ mvuhˇ miˬ hk'aw hk'oˆ lawˬ hk'oˆ teˇ kaˬ le le lo bvuhˬ k'ai ve yoˬ. 66 Hk'a g'a kaˇ ve chaw hk'a peu-eˬ a shu yawˇ ve nyi ma hk'aw tawnˇ taˍ leh, Yaˇ ehˉ chi lehˬ, hk'aˬ hk'e ve chaw hpeh‸ la tuˬ leh naˍ teh‸ k'oˆ da‸ ve yoˬ. Awˬ lawn k'o, Jawˇ mawˇ G'uiˬ sha ve kanˇ paˆ yawˇ geh cawˬ ve yoˬ. 67 Oˇ htaˇ, yawˇ awˬ pa Zaˍhkaˍriˆ lehˬ, da‸ ve kehˬ ve Awˬ ha hpu biˇ la leh, G'uiˬ sha ve tawˇ hkawˇ yaw leh k'oˆ ve, 68 Iˉsaˍreˍlaˆ ve Jawˇ mawˇ G'uiˬ sha hta‸ chiˇ mvuh-o. Awˬ lawn k'o, yawˇ ve chaw ceuˬ hta‸ yawˇ ca nyi la leh htaiˍ hk'aw‸ piˇ peuˬ. 69 Yawˇ ve awˬ ceˬ Daˍviˆ ve yehˬ awˬ hk'aw lo yawˇ ngaˬ hui awˬ pon kanˇ paˆ uiˍ jaˇ ve Htaiˍ hk'aw‸ paˍ hta‸ tawˆ la piˇ peuˬ. 70 Yawˇ chi hk'e te ve lehˬ, aˬ sho-eˬ htaˇ ka‸ yawˇ ve da‸ kehˬ ve tcuh kaˍ paˍ teˇ hpaˍ hta‸ cuˇ leh k'oˆ taˍ ve hk'e te ve yoˬ. 71 Yawˇ ngaˬ hui awˬ pon Htaiˍ hk'aw‸ paˍ hta‸ tawˆ la piˇ ve lehˬ, ngaˬ hui ve canˇ paˍ teˇ hpaˍ leh ngaˬ hui hta‸ nyi bawˬ ve chaw teˇ hpaˍ ve la‸ sheh awˬ hk'aw lo ngaˬ hui hta‸ htaiˍ hk'aw‸ laˇ tuˬ awˬ pon yoˬ. 72 Yawˇ chi hk'e te ve teˇ yanˇ, ngaˬ hui ve awˬ puˬ awˬ pi teˇ hpaˍ hta‸ ha k'aˉ ve teˇ ceuˬ te piˇ leh, yawˇ ve da‸ kehˬ ve ka ti‸ shaˉ caˆ hta‸ dawˇ nawˇ tuˬ awˬ pon te ve yoˬ. 73 Ka ti‸ shaˉ caˆ oˇ ve lehˬ, ngaˬ hui ve awˬ puˍ lonˉ Aˍbraˍhanˍ hta‸ yawˇ hkanˍ taˍ ve ka ti‸ shaˉ caˆ hpeh‸ ve yoˬ. 74 Ka ti‸ shaˉ caˆ chi hta‸ pa taw, ngaˬ hui ve canˇ paˍ ve la‸ sheh awˬ hk'aw lo g'a ponˬ peuˬ hk'aw‸ nawˉ, 75 ngaˬ hui ve a sha‸ leh htaˇ hk'a gaˬ, da‸ ve kehˬ ve leh hteˇ ve cawˇ ve awˬ hk'aw lo, kawˆ ve nyi ma maˇ cawˬ leh yawˇ mehˆ g'uˇ suhˍ yawˇ awˬ pon kanˉ te hpeh‸ ve yoˬ. 76 Yaˇ ehˉ-oˬ, nawˬ lehˬ uiˍ jaˇ mvuh jaˇ ve Awˬ shehˍ hpaˇ ve tcuh kaˍ paˍ hpeh‸ ve yoˬ teh‸ shu k'oˆ tuˬ yoˬ. 77 Awˬ lawn k'o, ngaˬ hui ve G'uiˬ sha ha k'aˉ puiˉ jaˇ ve hta‸ pa taw, venˇ baˆ teˇ hpaˍ hta‸ hpehˇ hk'a ve awˬ hk'aw lo htaiˍ hk'aw‸ ve awˬ lawn yawˇ ve chaw ceuˬ hta‸ shiˍ piˇ tuˬ, nawˬ lehˬ Jawˇ mawˇ G'uiˬ sha awˬ g'uˇ suhˍ lo g'a k'ai leh, yawˇ ve ya‸ k'aw hta‸ g'a gu taˍ piˇ tuˬ yoˬ. 78 Mvuhˇ naw ma ve awˬ g'euˆ ngaˬ hui awˬ hk'oˆ hta‸ ba la htaˇ, 79 naˆ ho‸ ve leh suh ve aˉ g'uiˬ ha awˬ hk'aw lo chehˇ ve chaw hui awˬ hk'oˆ hta‸ awˬ g'euˆ ba piˇ leh, dawˇ sha gaˇ sha ve ya‸ k'aw awˬ hk'aw lo ngaˬ hui hta‸ sheh maˍ laˇ tuˬ yoˬ. teh‸ Zaˍhkaˍriˆ k'oˆ ve yoˬ. 80 Yaˇ ehˉ oˇ ve uiˍ la leh, co ha hpawˇ htawˇ awˬ g'aˇ uiˍ la ve yoˬ. Iˉsaˍreˍlaˆ chaw hui mehˆ g'uˇ suhˍ yawˇ tawˆ la ve teˇ nyi hk'a gaˬ, heh puiˉ hk'aw lo ceh tiˉ chehˇ taˍ ve yoˬ.

Luˉka‸ 2

1 Awˬ nyi awˬ haˉ oˇ ve teˇ hpaˍ awˬ hk'aw lo, miˬ guiˬ yaˇ hk'a peu-eˬ hta‸ awˬ meh yuˬ tuˬ jawˇ mawˇ Kehˉsaˍ Awˇguˇtuˆ tawˇ piˇ ve yoˬ. 2 Chi teˇ pawˆ awˬ meh yuˬ ve lehˬ, Suˇriˆ mvuhˇ miˬ awˬ hk'aw lo Kuˇreˍniˆ jawˇ mawˇ lonˉ te chehˇ ve teˇ yanˇ, awˬ meh yuˬ ve awˉ lawˉ peuˇ teˇ pawˆ hpeh‸ ve yoˬ. 3 Oˇ htaˇ, chaw hk'a peu-eˬ awˬ meh keu tuˬ awˬ pon, teˇ g'aˇ le le a shu yawˇ ve venˇ lo k'ai ve yoˬ. 4 Yoˇseh‸ htawˇ, Daˍviˆ ve awˬ ceuˬ awˬ hk'aˇ hpeh‸ ve pa taw, yawˇ heuˆ taˍ ve yaˇ miˇ Maˍriˆ geh hk'a geh awˬ meh ca keu tuˬ, 5 Gaˍliˍlehˇ mvuhˇ miˬ Naˍzaˍrehˆ venˇ lo tu leh, Yuˇda‸ mvuhˇ miˬ Behˍlehˍhehnˍ teh‸ k'oˆ ve Daˍviˆ ve venˇ lo k'ai ve yoˬ. Oˇ htaˇ, Maˍriˆ yaˇ hu taˍ ve yoˬ. 6 Yawˇ huiˉ maˬ oˇ kaˬ lo chehˇ taˍ ve teˇ yanˇ, yaˇ paw ve awˬ yanˇ gaˬ la ve yoˬ. 7 Maˍriˆ lehˬ, yaˇ paˍ awˉ lawˉ teˇ g'aˇ paw la leh, pehˉ keu htiˆ peuˬ hk'aw‸ nawˉ, nuˇ lo‸ k'oˍ hk'aw yawˇ hta‸ iˉ taˍ ve yoˬ. Awˬ lawn k'o, hkehˉ chaw yehˬ awˬ hk'aw lo yawˇ hui awˬ pon chehˇ kuiˬ maˇ cawˬ. 8 Mvuhˇ miˬ oˇ ve awˬ hk'aw lo yawˬ hawˉ shehˍ hpaˇ teˇ hpaˍ lehˬ, heh hk'aw lo mvuhˇ hpeu‸ htaˇ yawˇ hui ve yawˬ moˍ hta‸ shaw chehˇ ve yoˬ. 9 Oˇ htaˇ, Jawˇ mawˇ G'uiˬ sha ve mvuhˇ naw ma tcuh yaˇ teˇ g'aˇ tawˆ la leh, yawˇ hui awˬ paˇ lo huˉ taˍ ve yoˬ. Jawˇ mawˇ G'uiˬ sha ve awˬ me‸ awˬ hponˇ yawˇ hui hta‸ hk'a caw zuhˇ ba tawˆ la leh, yawˇ hui kawˆ jaˇ ve yoˬ. 10 Mvuhˇ naw ma tcuh yaˇ yawˇ hui hta‸ k'oˆ piˇ ve, Taˇ kawˆ. Awˬ lawn k'o, chaw hk'a peu-eˬ awˬ pon ha lehˬ tuˬ uiˍ jaˇ ve tawˇ hkawˇ nawˬ hui hta‸ hto laˇ tuˬ ngaˬ laˬ ve yoˬ. 11 Ya‸ nyi Daˍviˆ ve venˇ awˬ hk'aw lo nawˬ hui awˬ pon Htaiˍ hk'aw‸ paˍ paw la peuˬ. 12 Yawˇ lehˬ Jawˇ mawˇ Hkri‸ yoˬ. Nawˬ hui awˬ pon awˬ heˆ chi hk'e cawˬ tuˬ yoˬ. Yaˇ ehˉ hta‸ pehˉ kuiˬ htiˆ sheˬ leh, nuˇ lo‸ k'oˍ hk'aw iˉ taˍ ve hta‸ nawˬ hui g'a mawˬ tuˬ yoˬ teh‸, yawˇ hui hta‸ k'oˆ piˇ ve yoˬ. 13 Mvuhˇ naw ma tcuh yaˇ oˇ ve teˇ g'aˇ geh mvuhˇ naw ma tcuh yaˇ awˬ moˍ lonˉ teˇ cawˬ haˉ tawˆ la ve yoˬ. Yawˇ hui G'uiˬ sha hta‸ chiˇ mvuh leh k'oˆ ve, 14 Mvuh jaˇ kuiˬ lo chehˇ ve G'uiˬ sha hta‸ awˬ me‸ awˬ hponˇ cawˬ piˇ-oˆ. Miˬ guiˬ hk'oˆ lo htawˇ, yawˇ nyi ma cawˇ ve chaw hui awˬ hk'aw lo dawˇ sha gaˇ sha tuˬ cawˬ piˇ-oˆ, teh‸ k'oˆ ve yoˬ. 15 Mvuhˇ naw ma tcuh yaˇ teˇ hpaˍ mvuhˇ naw ma hk'oˆ lo k'aw‸ taˆ k'o‸-e peuˬ hk'aw‸ nawˉ, yawˬ hawˉ shehˍ hpaˇ teˇ hpaˍ k'oˆ ve, Behˍlehˍhehnˍ venˇ lo ngaˬ hui k'ai leh, hpeh‸ la peuˬ ve awˬ lawn chi Jawˇ mawˇ G'uiˬ sha ngaˬ hui hta‸ hto laˇ ve hk'e ca nyi-a veuˬ teh‸, teˇ g'aˇ leh teˇ g'aˇ k'oˆ da‸ ve yoˬ. 16 Hk'e te leh yawˇ hui haˆ haˆ k'ai leh, Maˍriˆ leh Yoˇseh‸ hta‸ ka‸, nuˇ lo‸ k'oˍ hk'aw iˉ taˍ ve yaˇ ehˉ hta‸ ka‸ g'a mawˬ ve yoˬ. 17 G'a mawˬ peuˬ hk'aw‸ nawˉ, yaˇ ehˉ oˇ ve awˬ lawn mvuhˇ naw ma tcuh yaˇ teˇ hpaˍ yawˇ hui hta‸ hto piˇ ve hk'e, yawˇ hui shu hta‸ k'aw‸ hto piˇ ve yoˬ. 18 Hk'a g'a kaˇ ve chaw hk'a peu-eˬ lehˬ, yawˬ hawˉ paˍ hui hto piˇ ve teˇ hpaˍ hta‸ anˇ ve yoˬ. 19 Maˍriˆ lehˬ, awˬ lawn chi hk'a peu-eˬ hta‸ tawnˇ taˍ leh, yawˇ ve nyi ma hk'aw dawˇ nyi chehˇ ve yoˬ. 20 Yawˬ hawˉ paˍ teˇ hpaˍ lehˬ, yawˇ hui hta‸ k'oˆ piˇ taˍ ve hk'a shuˍ shuˍ, hk'a peu-eˬ hta‸ g'a kaˇ g'a mawˬ ve pa taw, G'uiˬ sha hta‸ chiˇ uiˍ chiˇ mvuh leh k'o‸-e ve yoˬ. 21 Hiˉ nyi gaˬ leh yaˇ ehˉ hta‸ awˬ guiˬ meuˇ shoˍ piˇ ve teˇ yanˇ, yawˇ hta‸ Yeˍsuˆ teh‸ meh piˇ ve yoˬ. Awˬ meh chi lehˬ, awˬ e g'oˇ peˬ hk'aw maˇ hu sheˍ htaˇ ka‸ mvuhˇ naw ma tcuh yaˇ meh piˇ taˍ ve yoˬ. 22 Moˉseˍ awˬ liˇ tawˇ hkawˇ piˇ taˍ ve hk'e, yawˇ hui awˬ pon da‸ tuˬ kehˬ tuˬ te ve awˬ nyi biˇ la ve teˇ yanˇ, 23 Yaˇ kaoˬ hawˉ hk'aˆ hk'a paw la ve teˇ g'aˇ le le lehˬ, Jawˇ mawˇ G'uiˬ sha awˬ pon g'a fuiˍ teh taˍ ve yoˬ teh‸, yawˇ ve awˬ liˇ tawˇ hkawˇ awˬ hk'aw lo bvuh‸ taˍ ve hk'a shuˍ shuˍ, yaˇ ehˉ oˇ ve Jawˇ mawˇ G'uiˬ sha hta‸ chiˇ a‸ piˇ tuˬ awˬ pon maˇ k'oˆ, 24 aˉ pui k'aˍ teˇ ceh, maˇ heˆ k'o guˇ ehˉ nyiˇ hkeh hta‸ tanˇ piˇ tuˬ Jawˇ mawˇ G'uiˬ sha ve awˬ liˇ tawˇ hkawˇ awˬ hk'aw lo k'oˆ taˍ ve hk'e g'a tanˇ piˇ tuˬ awˬ pon maˇ k'oˆ, yawˇ huiˉ maˬ yaˇ ehˉ hta‸ Yeˍruˆsaˍlehnˍ venˇ lo yuˬ k'ai ve yoˬ. 25 Oˇ htaˇ, Suˉmonˍ meh ve chaw teˇ g'aˇ Yeˍruˆsaˍlehnˍ venˇ hk'aw lo chehˇ ve yoˬ. Yawˇ lehˬ, hteˇ ve cawˇ ve chaw hpeh‸ leh, G'uiˬ sha hta‸ yawˆ yan ve chaw teˇ g'aˇ hpeh‸ ve yoˬ. Iˉsaˍreˍlaˆ chaw hui dawˇ sha gaˇ sha ve hta‸ g'a tuˬ yawˇ dawˇ law tcuhˉ taˍ leh, da‸ ve kehˬ ve Awˬ ha hpu yawˇ awˬ hk'aw lo chehˇ taˍ ve yoˬ. 26 Yawˇ lehˬ, Jawˇ mawˇ G'uiˬ sha ve Hkri‸ hta‸ maˇ g'a mawˬ sheˍ ve ceh ceh maˇ g'a suh teh‸, da‸ ve kehˬ ve Awˬ ha hpu yawˇ hta‸ hpeu‸ maˍ piˇ taˍ ve yoˬ. 27 Oˇ htaˇ, Awˬ ha hpu yawˇ hta‸ dawˇ pawnˍ piˇ ve hta‸ pa taw, yawˇ bon yehˬ lonˉ awˬ hk'aw lo k'ai ve yoˬ. Awˬ pa awˬ e lehˬ, awˬ liˇ tawˇ hkawˇ cawˬ taˍ ve hk'e yaˇ paˍ ehˉ Yeˍsuˆ hta‸ te piˇ tuˬ, yawˇ hta‸ bon yehˬ lonˉ awˬ hk'aw lo yuˬ k'ai ve teˇ yanˇ, 28 Suˉmonˍ lehˬ, yawˇ ve la‸ sheh hk'aw lo yaˇ ehˉ hta‸ chiˇ taˆ taˍ leh, G'uiˬ sha hta‸ chiˇ mvuh leh k'oˆ ve, 29 Hk'a peu-eˬ awˬ hk'oˆ uiˍ ve Jawˇ mawˇ-oˬ, nawˬ ve tawˇ hkawˇ cawˬ taˍ ve hk'e, nawˬ ve awˬ ceˬ dawˇ sha ve awˬ hk'aw lo g'a k'o‸-e tuˬ, chi beu‸ a hkaw-anˬ a ciˉ pe‸ laˇ-oˆ. 30 Awˬ lawn k'o, nawˬ ve htaiˍ hk'aw‸ ve teˇ ceuˬ hta‸ ngaˬ ve mehˆ shiˍ g'a mawˬ peuˬ. 31 Chaw ceuˬ hk'a peu-eˬ mehˆ g'uˇ suhˍ lo htaiˍ hk'aw‸ ve oˇ ve hta‸ nawˬ gu taˍ ve yoˬ. 32 Htaiˍ hk'aw‸ ve oˇ ve lehˬ, buiˇ shaˆ aˉ naˆ chaw hui hta‸ ba piˇ tuˬ ve awˬ g'euˆ hpeh‸ leh, nawˬ ve chaw ceuˬ Iˉsaˍreˍlaˆ chaw hui awˬ pon awˬ me‸ awˬ hponˇ hpeh‸ ve yoˬ, teh‸ k'oˆ ve yoˬ. 33 Yaˇ ehˉ awˬ lawn yawˇ oˇ hk'e k'oˆ ve hta‸ awˬ pa awˬ e anˇ ve yoˬ. 34 Suˉmonˍ lehˬ, yawˇ hui hta‸ bon na‸ piˇ leh, awˬ e Maˍriˆ hta‸ k'oˆ piˇ ve, Yaˇ ehˉ chi hta‸ pa taw, Iˉsaˍreˍlaˆ chaw laiˉ g'aˇ paiˍ leh laiˉ g'aˇ tu la tuˬ yoˬ. Yawˇ lehˬ, shu maˇ shawˍ maˇ caˆ k'oˆ tuˬ ve awˬ heˆ hpeh‸ tuˬ yoˬ. 35 Chi hk'oˆ ka‸, chaw laiˉ g'aˇ nyi ma hk'aw dawˇ taˍ ve teˇ hpaˍ hta‸ yawˇ hpeu‸ tawˆ la piˇ tuˬ yoˬ. Aˉ htaw lehˬ, nawˬ ve nyi ma hta‸ juˆ pawnˍ laˇ ve hk'e ˬ nawˬ g'a dawˇ haˍ jaˇ tuˬ yoˬ teh‸ k'oˆ piˇ ve yoˬ. 36 Aˍsaˍ ve awˬ ceuˬ awˬ hk'aˇ, Hpaˍnoˍ eˍlaˆ ve awˬ yaˇ miˇ Aˍnaˆ meh ve tcuh kaˍ ma teˇ g'aˇ cawˬ ve yoˬ. Yawˇ lehˬ mawˇ jaˇ peuˬ. Yawˇ awˬ hpawˇ heuˆ peuˬ hk'aw‸ nawˉ, awˬ hpawˇ geh suhˍ hk'aw‸ ceh tiˉ g'a chehˇ leh, 37 hiˉ chi awˇ hk'aw‸ hk'a gaˬ mehˇ chawˇ ma hpeh‸ chehˇ ve yoˬ. Yawˇ lehˬ, bon yehˬ lonˉ awˬ hk'aw lo ceh tiˉ chehˇ taˍ leh, tanˇ hkuinˇ tanˇ vanˇ caˇ tuˬ ce leh bon lawˬ ve awˬ hk'aw lo G'uiˬ sha hta‸ oˉ k'oˍ pui chehˇ ve yoˬ. 38 Awˬ yanˇ oˇ ve awˬ hk'aw lo yawˇ laˬ leh G'uiˬ sha hta‸ chiˇ mvuh ve yoˬ. Peuˬ leh, Yeˍruˆsaˍlehnˍ venˇ hta‸ htaiˍ hk'aw‸ ve te ceuˬ hta‸ dawˇ law chehˇ ve chaw hk'a peu-eˬ hta‸ yaˇ ehˉ oˇ ve awˬ lawn yawˇ k'aoˍ maˍ piˇ ve yoˬ. 39 Awˬ pa awˬ e lehˬ, Jawˇ mawˇ G'uiˬ sha ve awˬ liˇ tawˇ hkawˇ cawˬ taˍ ve hk'a shuˍ shuˍ hk'a peu-eˬ hta‸ te peuˬ hk'aw‸ nawˉ, yawˇ huiˉ maˬ ve chehˇ kuiˬ Gaˍliˍlehˇ mvuhˇ miˬ Naˍzaˍrehˆ venˇ lo k'aw‸ k'o‸-e ve yoˬ. 40 Yaˇ ehˉ oˇ ve uiˍ la leh, awˬ g'aˇ awˇ shaˉ uiˍ la ve yoˬ. Cuˇ yiˍ maˍ yiˍ hk'a biˇ cawˬ la leh, G'uiˬ sha ve awˬ bon yawˇ awˬ hk'oˆ lo cawˬ ve yoˬ. 41 Paˍsaˍhkaˍ pawehˇ te ve awˬ yanˇ gaˬ htaˇ, yawˇ ve awˬ pa awˬ e lehˬ, teˇ hk'aw‸ le le Yeˍruˆsaˍlehnˍ venˇ lo k'ai ve yoˬ. 42 Yawˇ a sha‸ teˇ chi nyiˇ hk'aw‸ gaˬ ve teˇ yanˇ, yawˇ hui awˬ liˇ cawˬ ve hk'e, Yeˍruˆsaˍlehnˍ venˇ lo taˆ-e ve yoˬ. 43 Pawehˇ te ve awˬ nyi awˬ haˉ teˇ hpaˍ peuˬ leh, yawˇ hui k'o‸-e htaˇ, yaˇ paˍ ehˉ Yeˍsuˆ lehˬ Yeˍruˆsaˍlehnˍ venˇ hk'aw lo chehˇ taˉ ve yoˬ. Ya‸ hk'aˇ, awˬ pa awˬ e maˇ shiˍ. 44 Awˬ moˍ lonˉ awˬ hk'aw lo awˬ chawˇ teˇ hpaˍ geh yawˇ k'o‸-e peuˬ hehˉ teh‸ dawˇ leh, yawˇ huiˉ maˬ teˇ nyi ya‸ k'aw k'o‸-e ve yoˬ. Oˇ htaˇ, awˬ ceuˬ awˬ hk'aˇ leh awˬ chawˇ teˇ hpaˍ geh yawˇ hta‸ ca nyi ve yoˬ. 45 Maˇ mawˬ ve teˇ yanˇ, yawˇ huiˉ maˬ Yeˍruˆsaˍlehnˍ venˇ lo k'aw‸ k'ai leh yawˇ hta‸ ca ve yoˬ. 46 Shehˆ nyi gaˬ ve teˇ yanˇ, yaˇ ehˉ hta‸ bon yehˬ lonˉ awˬ hk'aw lo g'a mawˬ ve yoˬ. Yawˇ lehˬ, saˍ la‸ teˇ hpaˍ awˬ k'aw ji lo mui taˍ leh, yawˇ hui ve tawˇ hkawˇ hta‸ na leh yawˇ hui hta‸ na nyi chehˇ ve yoˬ. 47 Yawˇ ve tawˇ hkawˇ hta‸ g'a kaˇ ve chaw hk'a peu-eˬ lehˬ, yawˇ dawˇ shiˍ puiˉ ve hta‸ maˇ k'oˆ, yawˇ yaw hk'aw‸ ve teˇ hpaˍ hta‸ maˇ k'oˆ, anˇ ve yoˬ. 48 Yawˇ huiˉ maˬ yawˇ hta‸ g'a mawˬ htaˇ anˇ jaˇ leh, yawˇ ve awˬ e yawˇ hta‸ k'oˆ piˇ ve, Yaˇ paˍ-oˬ, aˬ hto‸ ma te nawˬ ngaˬ huiˉ maˬ hta‸ chi hk'e te laˇ ve le. Nawˬ pa ngaˬ huiˉ maˬ dawˇ haˍ jaˇ ve awˬ hk'aw lo nawˬ hta‸ ca chehˇ ve yoˬ teh‸ k'oˆ piˇ ve yoˬ. 49 Yawˇ k'aw‸ k'oˆ ve, Aˬ hto‸ ma pa taw nawˬ huiˉ maˬ ngaˬ hta‸ ca ve le. Ngaˬ Awˬ pa ve yehˬ hk'aw lo ngaˬ g'a chehˇ ve hta‸ nawˬ huiˉ maˬ maˇ shiˍ laˇ teh‸, yawˇ huiˉ maˬ hta‸ k'oˆ piˇ ve yoˬ. 50 Ya‸ hk'aˇ, yawˇ k'oˆ ve tawˇ hkawˇ hta‸ yawˇ huiˉ maˬ na maˇ g'a. 51 Yawˇ lehˬ, yawˇ huiˉ maˬ geh Naˍzaˍ rehˆ venˇ lo k'o‸-e leh, yawˇ huiˉ maˬ ve tawˇ hkawˇ hta‸ hk'a deh‸ na yuˬ chehˇ ve yoˬ. Yawˇ ve awˬ e lehˬ, awˬ ceuˬ oˇ ve hk'a peu-eˬ hta‸ nyi ma hk'aw lo tawnˇ taˍ ve yoˬ. 52 Yeˍsuˆ lehˬ, cuˇ yiˍ maˍ yiˍ maˇ k'oˆ, awˬ to maˇ k'oˆ, uiˍ la leh, G'uiˬ sha ka‸ chaw yaˇ ka‸ yawˇ hta‸ nyi ma cawˇ ve yoˬ.

Luˉka‸ 3

1 Kehˉsaˍ Tiˍbeˍriˆ uˉ peunˍ ve teˇ chi ngaˇ hk'aw‸ gaˬ htaˇ, Yuˇda‸ mvuhˇ miˬ awˬ hk'aw lo Poˍtiˆ Piˉla‸ jawˇ mawˇ lonˉ te chehˇ ve, Gaˍliˍlehˇ mvuhˇ miˬ awˬ hk'aw lo Heˍroˆ jawˇ mawˇ te chehˇ ve, Iˉtuˆrehˇ leh Taˍraˍhkawˇniˆ mvuhˇ miˬ awˬ hk'aw lo Heˍroˆ ve awˬ nyi paˍ Hpiˇliˇpuˆ jawˇ mawˇ te chehˇ ve, Aˍbiˇleˍ mvuhˇ miˬ awˬ hk'aw lo Luˇsaˍniˆ jawˇ mawˇ te chehˇ ve leh, 2 Aˍnaˆ leh Kaˍyaˍhpaˆ paw hkuˇ lonˉ te chehˇ ve yoˬ. Oˇ htaˇ, heh puiˉ hk'aw lo chehˇ taˍ ve Zaˍhkaˍriˆ ve yaˇ paˍ Yoˇhanˬ geh G'uiˬ sha ve tawˇ hkawˇ gaˬ la ve yoˬ. 3 Yawˇ lehˬ Yawˇdanˍ g'uiˬ ma awˬ paˇ awˬ kui teˇ kaˬ le le lo k'ai leh, venˇ baˆ hpehˇ hk'a g'a tuˬ, venˇ baˆ dawˇ hpfuhˆ ve hta‸ caˉ da‸ ve baˆtiˆsaˬ awˬ lawn hta‸ maˍ piˇ ve yoˬ. 4 Tcuh kaˍ paˍ Iˉsaˍyaˆ ve li‸ awˬ hk'aw lo bvuh‸ taˍ ve hk'e, Heh puiˉ hk'aw lo chaw teˇ g'aˇ kuˬ leh k'oˆ ve, Jawˇ mawˇ G'uiˬ sha ve ya‸ k'aw hta‸ gu taˍ loˬ. Yawˇ ve ya‸ k'aw teˇ hpaˍ hta‸ hteˇ lehˍ te-o. 5 Lawˬ hk'o‸ teˇ maˬ le le hta‸ g'a biˇ la piˇ leh, hk'aw uiˍ ve i ve teˇ shiˍ le le hta‸ g'a nehˬ la piˇ tuˬ yoˬ. K'aw‸ ve ya‸ k'aw teˇ hpaˍ hta‸ g'a hteˇ la piˇ leh, mvuh mvuh nehˬ nehˬ cawˬ ve ya‸ k'aw teˇ hpaˍ hta‸ tawˍ lehˍ leˆ lehˍ g'a k'aw‸ gu piˇ tuˬ yoˬ. 6 Chaw hk'a peu-eˬ lehˬ, G'uiˬ sha ve htaiˍ hk'aw‸ ve hta‸ g'a mawˬ tuˬ yoˬ, teh‸ bvuh‸ taˍ ve yoˬ. 7 Hk'e te leh, yawˇ la‸ hk'aw lo baˆtiˆsaˬ hkanˍ tuˬ laˬ ve chaw awˬ moˍ lonˉ hta‸ Yoˇhanˬ k'oˆ piˇ ve, Vuiˬ haiˬ awˬ yaˇ teˇ hpaˍ-oˬ, gaˬ la tuˬ ve nyi ma zuhˆ ve hta‸ g'a ponˬ tuˬ, a shu nawˬ hui hta‸ hto laˇ ve le. 8 Venˇ baˆ dawˇ hpfuhˆ ve hta‸ keunˍ da‸ ve awˬ shiˍ naw‸ la-o. Aˍbraˍhanˍ lehˬ ngaˬ hui ve awˬ pa hpeh‸ ve yoˬ teh‸, nawˬ hui a shu yawˇ ve nyi ma hk'aw taˇ ca dawˇ. Awˬ lawn k'o, G'uiˬ sha lehˬ haˉ pui shiˍ chi teˇ hpaˍ awˬ hk'aw lo Aˍbraˍhanˍ ve awˬ yaˇ awˬ duˬ teˇ hpaˍ hta‸ te tawˆ la hpeh‸ ve yoˬ teh‸, ngaˬ nawˬ hui hta‸ k'oˆ laˇ ve yoˬ. 9 Chi beu‸ ka‸, suhˆ cehˬ awˬ hkuiˉ puiˍ lo ceˉ ceˇ teh taˍ peuˬ. Hk'e te leh, da‸ ve awˬ shiˍ maˇ naw‸ ve awˬ cehˬ teˇ cehˬ le le hta‸ htu baˬ leh, aˬ miˍ awˬ hk'aw lo baˬ keu ve yoˬ teh‸ k'oˆ ve yoˬ. 10 Oˇ htaˇ, chaw awˬ moˍ lonˉ k'oˆ ve, Hk'e te k'o, ngaˬ hui hk'aˬ hk'e g'a te tuˬ le teh‸ yawˇ hta‸ na nyi ve yoˬ. 11 Yawˇ yawˇ hui hta‸ k'aw‸ k'oˆ piˇ ve, Aˉ po‸ nyiˇ hk'oˆ cawˬ ve chaw lehˬ, aˉ po‸ maˇ cawˬ ve chaw hta‸ pehˬ piˇ-oˆ. Caˇ tuˬ cawˬ ve chaw htawˇ, oˇ ve hk'a shuˍ shuˍ te-o teh‸ k'oˆ ve yoˬ. 12 Awˬ hkawnˍ shaw paˍ teˇ hpaˍ htawˇ baˆtiˆsaˬ hkanˍ yuˬ tuˬ yawˇ geh laˬ leh, Saˍ la‸-oˬ, ngaˬ hui hk'aˬ hk'e g'a te tuˬ le teh‸ yawˇ hta‸ na nyi ve yoˬ. 13 Nawˬ hui awˬ hkawnˍ shaw keunˍ ve awˬ hk'oˆ awˬ leuˉ taˇ ca shaw teh‸, yawˇ yawˇ hui hta‸ k'oˆ piˇ ve yoˬ. 14 Ma‸ yaˇ teˇ hpaˍ htawˇ, Ngaˬ hui lehˬ, hk'aˬ hk'e g'a te tuˬ le teh‸ yawˇ hta‸ na nyi ve teˇ yanˇ, A shu ve mawˇ hta‸ ka‸ taˇ ca hiˉ yuˬ. Shu hta‸ maˇ heˆ heˆ ve ca k'oˆ leh heˍ caˇ ve teˇ ceuˬ ka‸ taˇ te. Nawˬ hui g'a ve ha pa hpfuhˇ hta‸ nyi hk'aˇ suh chehˇ-oˆ teh‸, yawˇ yawˇ hui hta‸ k'aw‸ k'oˆ piˇ ve yoˬ. 15 Chaw hk'a peu-eˬ dawˇ law chehˇ ve awˬ hk'aw lo, Yoˇhanˬ lehˬ Hkri‸ yoˬ leh naˍ, maˇ heˆ leh naˍ, yawˇ hui a shu yawˇ ve nyi ma hk'aw dawˇ nyi chehˇ ve teˇ yanˇ, 16 yawˇ hui hk'a peu-eˬ hta‸ Yoˇhanˬ k'oˆ piˇ ve, Ngaˬ lehˬ nawˬ hui hta‸ iˉ kaˆ awˬ hk'aw lo baˆtiˆsaˬ pe‸ laˇ ve yoˬ. Ya‸ hk'aˇ, ngaˬ a‸ kehˉ kanˇ paˆ uiˍ ve teˇ g'aˇ laˬ chehˇ ve yoˬ. Yawˇ ve hkuiˉ nuˆ caˆ hta‸ hpui tuˬ ve ceh ka‸ ngaˬ te maˇ keunˍ. Yawˇ lehˬ, da‸ ve kehˬ ve Awˬ ha hpu awˬ hk'aw lo maˇ k'oˆ, aˬ miˍ awˬ hk'aw lo maˇ k'oˆ, nawˬ hui hta‸ baˆtiˆsaˬ pe‸ laˇ tuˬ yoˬ. 17 Yawˇ ve la‸ sheh awˬ hk'aw lo caˬ hpeuˇ tuˬ vawˆ taˍ ve yoˬ. Yawˇ ve caˬ jaw‸ kuiˬ hta‸ kehˬ lehˍ shiˆ baˬ peuˬ hk'aw‸ nawˉ, caˬ shiˍ hta‸ caˬ ciˇ yehˬ awˬ hk'aw lo shaw pfuhˇ keu tuˬ yoˬ. Ya‸ hk'aˇ, caˬ cuˉ hta‸ lehˬ maˇ suh puiˉ ve aˬ miˍ awˬ hk'aw lo tuˉ baˬ tuˬ yoˬ teh‸, Yoˇhanˬ k'oˆ ve yoˬ. 18 Chi hk'oˆ ka‸, yawˇ lehˬ awˬ kaˍ awˬ nu laiˉ ceuˬ k'oˆ ve awˬ hk'aw lo, chaw chi ma ve hta‸ awˬ g'aˇ piˇ leh ha lehˬ ve bon hkawˇ maˍ piˇ ve yoˬ. 19 Ya‸ hk'aˇ, jawˇ mawˇ Heˍroˆ lehˬ, yawˇ awˬ nyi paˍ ve awˬ miˇ ma Heˍroˍdiˆ hta‸ heuˆ ve awˬ lawn maˇ k'oˆ, yawˇ te ve awˬ haiˬ hk'a peu-eˬ aw lawn maˇ k'oˆ, Yoˇhanˬ yawˇ hta‸ deˇ maˍ piˇ ve pa taw, 20 yawˇ Yoˇhanˬ hta‸ htawnˍ hk'aw yuˬ keu ve yoˬ. Heˍroˆ lehˬ, ponˬ laˬ htaˇ yawˇ te ya‸ ve hk'a peu-eˬ awˬ hk'oˆ, awˬ haiˬ chi teˇ ceuˬ hta‸ ka‸ yawˇ k'aw‸ te ve yoˬ. 21 Chaw hk'a peu-eˬ baˆtiˆsaˬ hkanˍ yuˬ peuˬ hk'aw‸ nawˉ, Yeˍsuˆ htawˇ baˆtiˆsaˬ hkanˍ yuˬ leh bon lawˬ chehˇ ve teˇ yanˇ, 22 mvuhˇ naw ma hpaw la leh, da‸ ve kehˬ ve Awˬ ha hpu lehˬ, awˬ ho‸ awˬ han aˉ pui k'aˍ awˬ to hk'e yawˇ awˬ hk'oˆ ya‸ la ve yoˬ. Mvuhˇ naw ma hk'oˆ lo awˬ hkawˇ bvuhˬ la leh k'oˆ ve, Nawˬ lehˬ ngaˬ ha‸ jaˇ ve Yaˇ hpu yoˬ. Nawˬ hta‸ ngaˬ nyi hk'aˇ suh jaˇ ve yoˬ teh‸ k'oˆ ve yoˬ. 23 Yeˍsuˆ lehˬ kanˉ tanˬ te ve teˇ yanˇ, a sha‸ shehˆ chi hk'aw‸ hk'e gaˬ ve yoˬ. Yawˇ ve awˬ pa lehˬ, Yoˇseh‸ yoˬ teh‸ chaw yaˇ hui dawˇ taˍ ve yoˬ. Yoˇseh‸ ve awˬ pa lehˬ Eˇliˆ yoˬ. 24 Eˇliˆ ve awˬ pa lehˬ Maˍsaˆ yoˬ. Maˍsaˆ ve awˬ pa lehˬ Leˍviˆ yoˬ. Leˍviˆ ve awˬ pa lehˬ Meˍlaˍhkiˆ yoˬ. Meˍlaˍhkiˆ ve awˬ pa lehˬ Yaˍnaˆ yoˬ. Yaˍnaˆ ve awˬ pa lehˬ Yoˇseh‸ yoˬ. 25 Yoˇseh‸ ve awˬ pa lehˬ Maˍtaˍhtiˆ yoˬ. Maˍtaˍhtiˆ ve awˬ pa lehˬ Aˍmoˆ yoˬ. Aˍmoˆ ve awˬ pa lehˬ Naˍhonˍ yoˬ. Naˍhonˍ ve awˬ pa lehˬ Eˇsaˍliˆ yoˬ. Eˇsaˍliˆ ve awˬ pa lehˬ Naˍgehˇ yoˬ. 26 Naˍgehˇ ve awˬ pa lehˬ Maˍaˆ yoˬ. Maˍaˆ ve awˬ pa lehˬ Maˍtaˍhtiˆ yoˬ. Maˍtaˍhtiˆ ve awˬ pa lehˬ Seˍmiˆ yoˬ. Seˍmiˆ ve awˬ pa lehˬ Yoˇseh‸ yoˬ. Yoˇseh‸ ve awˬ pa lehˬ Yuˇda‸ yoˬ. 27 Yuˇda‸ ve awˬ pa lehˬ Yoˇhaˍnaˆ yoˬ. Yoˇhaˍnaˆ ve awˬ pa lehˬ Reˍsaˆ yoˬ. Reˍsaˆ ve awˬ pa lehˬ Seˍruˇbeˍlaˆ yoˬ. Seˍruˇbeˍlaˆ ve awˬ pa lehˬ Saˍlaˍteˍlaˆ yoˬ. 28 Saˍlaˍteˍlaˆ ve awˬ pa lehˬ Neˍriˆ yoˬ. Neˍriˆ ve awˬ pa lehˬ Meˍlaˍhkiˆ yoˬ. Meˍlaˍhkiˆ ve awˬ pa lehˬ Aˇdiˆ yoˬ. Aˇdiˆ ve awˬ pa lehˬ Kawˇsanˍ yoˬ. Kawˇsanˍ ve awˬ pa lehˬ Eˇlaˍmawˇdaˆ yoˬ. Eˇlaˍmawˇdaˆ ve awˬ pa lehˬ Eˇraˆ yoˬ. Eˇraˆ ve awˬ pa lehˬ Yoˇseˍ yoˬ. 29 Yoˇseˍ ve awˬ pa lehˬ Eˇleˍsaˍ yoˬ. Eˇleˍsaˍ ve awˬ pa lehˬ Yoˇrenˍ yoˬ. Yoˇrenˍ ve awˬ pa lehˬ Maˍsaˆ yoˬ. Maˍsaˆ ve awˬ pa lehˬ Leˍviˆ yoˬ. 30 Leˍviˆ ve awˬ pa lehˬ Suˉmonˍ yoˬ. Suˉmonˍ ve awˬ pa lehˬ Yuˇda‸ yoˬ. Yuˇda‸ ve awˬ pa lehˬ Yoˇseh‸ yoˬ. Yoˇseh‸ ve awˬ pa lehˬ Yoˇnanˍ yoˬ. Yoˇnanˍ ve awˬ pa lehˬ Eˇlaˍkenˍ yoˬ. 31 Eˇlaˍkenˍ ve awˬ pa lehˬ Meˍleˍ yoˬ. Meˍleˍ ve aw pa lehˬ Mehˇnaˍ yoˬ. Mehˇnaˍ ve awˬ pa lehˬ Maˍtaˍhtaˆ yoˬ. Maˍtaˍhtaˆ ve awˬ pa lehˬ Naˍtanˍ yoˬ. Naˍtanˍ ve awˬ pa lehˬ Daˍviˆ yoˬ. 32 Daˍviˆ ve awˬ pa lehˬ Yeˍsehˇ yoˬ. Yeˍsehˇ ve awˬ pa lehˬ Awˇbehˆ yoˬ. Awˇbehˆ ve awˬ pa lehˬ Bawˇzaˆ yoˬ. Bawˇzaˆ ve awˬ pa lehˬ Saˍlaˍmonˍ yoˬ. Saˍlaˍmonˍ ve awˬ pa lehˬ Naˍsonˍ yoˬ. 33 Naˍsonˍ ve awˬ pa lehˬ Aˍmiˆnaˍdaˆ yoˬ. Aˍmiˆnaˍdaˆ ve awˬ pa lehˬ Aˍranˍ yoˬ. Aˍranˍ ve awˬ pa lehˬ, Heˍsaˍronˍ yoˬ. Heˍsaˍronˍ ve awˬ pa lehˬ Hpaˍrehˆ yoˬ. Hpaˍrehˆ ve awˬ pa lehˬ Yuˇda‸ yoˬ. 34 Yuˇda‸ ve awˬ pa lehˬ Yaˍkoˆ yoˬ. Yaˍkoˆ ve awˬ pa lehˬ Iˉcaˆ yoˬ. Iˉcaˆ ve awˬ pa lehˬ Aˍbraˍhanˍ yoˬ. Aˍbraˍhanˍ ve awˬ pa lehˬ Teˍraˆ yoˬ. 35 Teˍraˆ ve awˬ pa lehˬ Naˍhkawˍ yoˬ. Naˍhkawˍ ve awˬ pa lehˬ Seˍroˆ yoˬ. Seˍroˆ ve awˬ pa lehˬ Raˍgawˇ yoˬ. Raˍgawˇ ve awˬ pa lehˬ Hpaˍlehˆ yoˬ. Hpaˍlehˆ ve awˬ pa lehˬ Heˍbaˆ yoˬ. Heˍbaˆ ve awˬ pa lehˬ Saˍlaˆ yoˬ. 36 Saˍlaˆ ve awˬ pa lehˬ Kaˍiˇnanˍ yoˬ. Kaˍiˇnanˍ ve awˬ pa lehˬ Aˍhpaˍyaˆ yoˬ. Aˍhpaˍyaˆ ve awˬ pa lehˬ Seˍmaˆ yoˬ. Seˍmaˆ ve awˬ pa lehˬ Noˉa‸ yoˬ. Noˉa‸ ve awˬ pa lehˬ Laˍmehˆ yoˬ. 37 Laˍmehˆ ve awˬ pa lehˬ Maˍtuˍsaˍlaˆ yoˬ. Maˍtuˍsaˍlaˆ ve awˬ pa lehˬ Eˇnawˆ yoˬ. Eˇnawˆ ve awˬ pa lehˬ Yaˍrehˆ yoˬ. Yaˍrehˆ ve awˬ pa lehˬ Maˍhaˍleˍlaˆ yoˬ. 38 Maˍhaˍleˍlaˆ ve awˬ pa lehˬ Kaˍiˇnanˍ yoˬ. Kaˍiˇnanˍ ve awˬ pa lehˬ Eˇnoˆ yoˬ. Eˇnoˆ ve awˬ pa lehˬ Seˍtaˆ yoˬ. Seˍtaˆ ve awˬ pa lehˬ Aˍdanˍ yoˬ. Aˍdanˍ ve awˬ pa lehˬ G'uiˬ sha yoˬ.

Luˉka‸ 4

1 Yeˍsuˆ lehˬ, da‸ ve kehˬ ve Awˬ ha hpu hk'a biˇ cawˬ leh, Yawˇdanˍ g'uiˬ ma lo tu leh k'o‸-e ve teˇ yanˇ, Awˬ ha hpu yawˇ hta‸ heh puiˉ hk'aw lo awˇ chi nyi hk'a gaˬ shiˍ toˇ leh, neˇ haiˬ beˬ ve lawˇ ve hta‸ yawˇ g'a hkanˍ ve yoˬ. 2 Awˬ nyi awˬ haˉ oˇ ve teˇ hpaˍ awˬ hk'aw lo yawˇ te‸ chiˉ maˇ caˇ leh, awˬ nyi awˬ haˉ oˇ ve teˇ hpaˍ peuˬ hk'aw‸ nawˉ, yawˇ awˍ meu‸ la ve yoˬ. 3 Oˇ htaˇ neˇ haiˬ k'oˆ piˇ ve, Nawˬ G'uiˬ sha ve Yaˇ hpu hpeh‸ ve k'o, haˉ pui shiˍ chi hta‸ hkaoˍ monˇ hpeh‸ la tuˬ tawˇ piˇ-oˆ teh‸, yawˇ hta‸ k'oˆ piˇ ve yoˬ. 4 Yeˍsuˆ k'aw‸ k'oˆ piˇ ve, Li‸ hpu hk'aw chi hk'e bvuh‸ taˍ ve, Chaw yaˇ lehˬ hkaoˍ monˇ hta‸ pa taw ceh tiˉ g'a te‸ ve maˇ heˆ teh‸ k'oˆ piˇ ve yoˬ. 5 Teˇ pawˆ neˇ haiˬ lehˬ yawˇ hta‸ shiˍ taˆ-e leh, miˬ guiˬ hk'oˆ hk'a cawˬ ve mvuhˇ miˬ hk'a peu-eˬ hta‸ teˇ hkui tiˉ awˬ hk'aw lo maw piˇ leh k'oˆ ve, 6 Kanˇ paˆ chi hk'a peu-eˬ leh mvuhˇ miˬ teˇ hpaˍ ve awˬ me‸ awˬ hponˇ ngaˬ nawˬ hta‸ pe‸ laˇ tuˬ yoˬ. Chi teˇ hpaˍ ngaˬ hta‸ chiˇ a‸ laˇ peuˬ ve pa taw, ngaˬ piˇ gaˇ ve chaw hta‸ ngaˬ piˇ hpeh‸ ve yoˬ. 7 Hk'e te leh, nawˬ ngaˬ hta‸ oˉ k'oˍ pui laˇ ve k'o, chi hk'a peu-eˬ nawˬ ve mawˇ hpeh‸ tuˬ yoˬ teh‸ yawˇ hta‸ k'oˆ piˇ ve yoˬ. 8 Oˇ htaˇ Yeˍsuˆ yawˇ hta‸ k'aw‸ k'oˆ piˇ ve Li‸ hpu hk'aw chi hk'e bvuh‸ taˍ ve, Nawˬ ve jawˇ mawˇ G'uiˬ sha hta‸ nawˬ oˉ k'oˍ g'a pui leh, yawˇ ve kanˉ hta‸ ceh tiˉ nawˬ g'a te ve yoˬ, teh‸ k'oˆ piˇ ve yoˬ. 9 Teˇ pawˆ neˇ haiˬ lehˬ, yawˇ hta‸ Yeˍruˆsaˍlehnˍ venˇ lo shiˍ k'ai leh, bon yehˬ lonˉ ve awˬ hk'oˇ meuˇ lo yawˇ hta‸ teh taˍ leh k'oˆ piˇ ve, Nawˬ G'uiˬ sha ve Yaˇ hpu hpeh‸ ve k'o, pawˆ ce hk'a. 10 Awˬ lawn k'o, Li‸ hpu hk'aw chi hk'e bvuh‸ taˍ ve, Nawˬ hta‸ ha‸ shaˉ tuˬ, nawˬ awˬ pon yawˇ ve mvuhˇ naw ma tcuh yaˇ teˇ hpaˍ hta‸ yawˇ maˍ piˇ taˍ ve yoˬ. 11 Nawˬ ve hkui sheh haˉ pui shiˍ hta‸ maˇ g'a heuˆ tuˬ, yawˇ hui ve la‸ sheh nawˬ hta‸ chiˇ taˆ tuˬ yoˬ. teh‸ k'oˆ piˇ ve yoˬ, 12 Yeˍsuˆ k'aw‸ k'oˆ piˇ ve, Li‸ hpu hk'aw chi hk'e bvuh‸ taˍ ve, Nawˬ ve Jawˇ mawˇ G'uiˬ sha hta‸ nawˬ maˇ g'a beˬ maˇ g'a lawˇ teh‸ yawˇ hta‸ k'oˆ piˇ ve yoˬ. 13 Neˇ haiˬ lehˬ, yawˇ hta‸ teˇ ceuˬ le le beˬ peuˬ hk'aw‸ nawˉ, yawˇ geh tawˆ k'ai leh, teˇ tcuhˉ teˇ yanˇ hpaˆ da‸ chehˇ taˍ ve yoˬ. 14 Yeˍsuˆ lehˬ, Awˬ ha hpu ve kanˇ paˆ awˬ hk'aw lo Gaˍliˍlehˇ mvuhˇ miˬ lo k'aw‸ k'o‸-e leh, awˬ paˇ awˬ kui ve mvuhˇ miˬ awˬ hk'aw lo teˇ kaˬ le le yawˇ ve awˬ lawn bvuhˬ k'ai ve yoˬ. 15 Yawˇ hui ve bon yehˬ teˇ hpaˍ awˬ hk'aw lo yawˇ maˍ piˇ leh, chaw hk'a peu-eˬ yawˇ hta‸ chiˇ uiˍ chiˇ mvuh piˇ ve yoˬ. 16 Yawˇ uiˍ la kuiˬ Naˍzaˍrehˆ venˇ lo k'aw‸ gaˬ la leh, yawˇ awˬ liˇ cawˬ taˍ ve hk'e shinˉ nyi htaˇ bon yehˬ taˆ-e ve yoˬ. Li‸ hpu hta‸ g'aw tuˬ yawˇ tu ve yoˬ. 17 Oˇ htaˇ, shu yawˇ hta‸ tcuh kaˍ paˍ Iˉsaˍyaˆ ve li‸ piˇ leh, li‸ oˇ ve hta‸ yawˇ hpeu‸ ve teˇ yanˇ, chi hk'e bvuh‸ taˍ ve teˇ kaˬ hta‸ ca mawˬ ve yoˬ. 18 Jawˇ mawˇ G'uiˬ sha ve Awˬ ha hpu ngaˬ awˬ hk'oˆ cawˬ taˍ ve yoˬ. Awˬ lawn k'o, haˍ ve g'awˇ ve chaw hui hta‸ ha lehˬ ve bon hkawˇ maˍ piˇ tuˬ yawˇ ngaˬ hta‸ naˍ manˇ shehˍ laˇ peuˬ. Yawˇ ngaˬ hta‸ peu laˇ ve lehˬ, hpeh taˍ ve chaw teˇ hpaˍ hta‸ hpehˇ piˇ tuˬ ve awˬ lawn maˇ k'oˆ, mehˆ cuˉ ve chaw teˇ hpaˍ mehˆ k'aw‸ mawˬ la tuˬ ve awˬ lawn maˇ k'oˆ, maˍ piˇ hto piˇ tuˬ awˬ pon ngaˬ hta‸ peu laˇ ve yoˬ. Chi hk'oˆ ka‸, fawˉ mehˍ ve hta‸ g'a hkanˍ ve chaw teˇ hpaˍ hta‸ ponˬ piˇ tuˬ maˇ k'oˆ, 19 Jawˇ mawˇ G'uiˬ sha awˬ bon te piˇ tuˬ ve awˬ hk'aw‸ teˇ hk'aw‸ awˬ lawn maˍ piˇ hto piˇ tuˬ maˇ k'oˆ, ngaˬ hta‸ peu laˇ peuˬ, teh‸ k'oˆ ve yoˬ. 20 Li‸ oˇ ve hta‸ yawˇ lo‸ leh bon yehˬ ha‸ shaˉ shehˍ hpaˇ hta‸ k'aw‸ piˇ peuˬ hk'aw‸ nawˉ, yawˇ mui taˍ ve yoˬ. Bon yehˬ hk'aw chehˇ ve chaw hk'a peu-eˬ yawˇ hta‸ hk'a deh‸ nyi chehˇ htaˇ, 21 yawˇ yawˇ hui hta‸ tanˬ maˍ leh k'oˆ ve, Nawˬ hui g'a kaˇ ve Li‸ hpu tawˇ hkawˇ chi lehˬ, ya‸ nyi nawˬ hui mehˆ g'uˇ suhˍ biˇ la peuˬ teh‸ k'oˆ piˇ ve yoˬ. 22 Chaw hk'a peu-eˬ yawˇ hta‸ chiˇ mvuh leh, yawˇ ve maw‸ k'aw hk'aw tawˆ la ve na sha jaˇ ve tawˇ hkawˇ teˇ hpaˍ hta‸ anˇ leh, Chaw chi lehˬ, Yoˇseh‸ ve yaˇ paˍ maˇ heˆ laˇ teh‸, yawˇ hui k'oˆ da‸ ve yoˬ. 23 Yeˍsuˆ yawˇ hui hta‸ k'oˆ piˇ ve, Nawˬ hui lehˬ, tawˇ pa haˉ yehˇ leh, Naˆ tsuhˇ shehˍ hpaˇ-oˬ, a shu yawˇ ve a naˍ hta‸ gu na-e loˬ, Ngaˬ hui g'a kaˇ ve hk'e, Kaˍpeˍneˍonˍ venˇ awˬ hk'aw lo nawˬ te ve kanˉ teˇ hpaˍ hta‸ a shu yawˇ ve chehˇ kuiˬ awˬ hk'aw lo htawˇ te-o teh‸, nawˬ hui ngaˬ hta‸ k'oˆ laˇ tuˬ ve hta‸ ngaˬ shiˍ ve yoˬ. 24 Ngaˬ nawˬ hui hta‸ awˬ tehˬ awˬ na k'oˆ laˇ ve, G'uiˬ sha ve tcuh kaˍ paˍ hk'aˬ ve teˇ g'aˇ maˇ k'oˆ, a shu yawˇ ve chehˇ kuiˬ awˬ hk'aw lo awˬ me‸ awˬ hponˇ maˇ cawˬ. 25 Ngaˬ nawˬ hui hta‸ hteˇ lehˍ k'oˆ laˇ ve, Eˇliˇya‸ ve awˬ co-e htaˇ, shehˆ hk'aw‸ leh ha pa hkaw‸ maˬ hk'a gaˬ mvuhˇ yeˬ maˇ laˬ leh, mvuhˇ miˬ hk'a peu-eˬ meu‸ lonˉ kaˆ lonˉ cawˬ la ve teˇ yanˇ, Iˉsaˍreˍlaˆ chaw ceuˬ awˬ hk'aw lo mehˇ chawˇ ma cawˬ maˇ ve yoˬ. 26 Ya‸ hk'aˇ, G'uiˬ sha Eˇliˇya‸ hta‸ yawˇ hui teˇ g'aˇ geh ka‸ maˇ k'ai tcuh. Siˉdonˍ mvuhˇ miˬ Saˍraˍtaˆ venˇ hk'aw chehˇ ve mehˇ chawˇ ma teˇ g'aˇ geh ceh tiˉ yawˇ hta‸ k'ai tcuh ve yoˬ. 27 Tcuh kaˍ paˍ Eˇliˇshehˇ ve awˬ co-e htaˇ htawˇ, Iˉsaˍreˍlaˆ chaw ceuˬ awˬ hkaw lo hkiˬ tu‸ keuˆ ve chaw cawˬ maˇ ve yoˬ. Ya‸ hk'aˇ, yawˇ hui awˬ hk'aw lo teˇ g'aˇ hta‸ ka‸ da‸ la kehˬ la piˇ ve maˇ cawˬ. Suˇriˆ chaw Neˍmanˍ teˇ g'aˇ hta‸ ceh tiˉ da‸ la kehˬ la piˇ ve yoˬ teh‸ k'oˆ piˇ ve yoˬ. 28 Bon yehˬ hk'aw chehˇ ve chaw teˇ hpaˍ tawˇ hkawˇ oˇ ve hta‸ g'a kaˇ htaˇ, yawˇ hui hk'a peu-eˬ nyi ma zuhˆ jaˇ ve yoˬ. 29 Yawˇ hui tu la leh venˇ awˬ baˬ lo Yeˍsuˆ hta‸ g'a‸ tawˆ leh, yawˇ hui ve venˇ te taˍ ve hk'aw teˇ shiˍ awˬ hk'oˇ meuˇ lo ca‸ ce piˇ tuˬ yawˇ hta‸ shiˍ k'ai ve yoˬ. 30 Yawˇ lehˬ, yawˇ hui awˬ k'aw ji lo hpanˍ k'ai leh, oˇ kaˬ lo tawˆ k'ai ve yoˬ. 31 Oˇ htaˇ, Gaˍliˍlehˇ mvuhˇ miˬ Kaˍpeˍ neˍonˍ venˇ lo yawˇ ya‸ la leh, shinˉ nyi htaˇ yawˇ yawˇ hui hta‸ maˍ piˇ ve yoˬ. 32 Yawˇ maˍ piˇ ve hta‸ yawˇ hui anˇ jaˇ ve yoˬ. Awˬ lawn k'o, yawˇ kanˇ paˆ cawˬ ve awˬ hk'aw lo maˍ piˇ ve hta‸ pa taw yoˬ. 33 Bon yehˬ oˇ ve awˬ hk'aw lo neˇ cha‸ chiˆ geh ve chaw teˇ g'aˇ cawˬ ve yoˬ. Yawˇ awˬ hkawˇ bvuhˬ chaweh kuˬ leh k'oˆ ve, 34 Aˇ yoˇ, Naˍzaˍrehˆ chaw Yeˍsuˆ-oˬ, nawˬ ngaˬ hui hta‸ hk'aˬ hk'e caˉ da‸ le. Ngaˬ hui hta‸ te luˬ laˇ tuˬ nawˬ laˬ ve laˇ. Nawˬ hta‸ ngaˬ shiˍ taˍ ve yoˬ. Nawˬ lehˬ G'uiˬ sha ve da‸ kehˬ ve chaw hpeh‸ ve yoˬ teh‸ yawˇ k'oˆ ve yoˬ. 35 Oˇ htaˇ, Yeˍsuˆ yawˇ hta‸ deˇ leh k'oˆ ve, Ta‸ iˉ chehˇ-oˆ. Yawˇ awˬ hk'aw lo tawˆ k'ai-o teh‸ k'oˆ piˇ ve teˇ yanˇ, neˇ oˇ ve lehˬ, chaw oˇ ve teˇ g'aˇ hta‸ yawˇ hui awˬ k'aw ji lo ca‸ baˬ sheˬ leh, yawˇ hta‸ naˬ tuˬ te‸ chiˉ maˇ te leh tawˆ k'ai ve yoˬ. 36 Yawˇ hui hk'a peu-eˬ anˇ jaˇ leh, teˇ g'aˇ leh teˇ g'aˇ k'oˆ da‸ ve, Tawˇ hkawˇ chi hk'aˬ hk'e ve tawˇ hkawˇ le. Awˬ me‸ awˬ hponˇ leh kanˇ paˆ awˬ hk'aw lo neˇ cha‸ chiˆ teˇ hpaˍ hta‸ yawˇ tawˇ piˇ leh, yawˇ hui tawˆ k'ai ve yoˬ teh‸ k'oˆ ve yoˬ. 37 Mvuhˇ miˬ oˇ ve awˬ paˇ awˬ kui teˇ kaˬ le le lo yawˇ ve awˬ lawn bvuhˬ k'ai ve yoˬ. 38 Bon yehˬ awˬ hk'aw lo yawˇ tawˆ k'ai leh, Siˉmonˍ ve yehˬ hk'aw lo‸-e ve yoˬ. Siˉmonˍ awˬ miˇ ma ve awˬ e kaˆ naˬ jaˇ leh, yawˇ awˬ pon yawˇ hui Yeˍsuˆ hta‸ lawˬ hkawˉ ve yoˬ. 39 Yaˇ miˇ oˇ ve awˬ paˇ lo Yeˍsuˆ huˉ taˍ leh, kaˆ naˬ ve oˇ ve hta‸ yawˇ deˇ ve teˇ yanˇ, kaˆ naˬ ve oˇ ve na-e la ve yoˬ. Yaˇ miˇ oˇ ve teˇ cawˬ haˉ tu la leh yawˇ hui hta‸ te caˍ te taw piˇ ve yoˬ. 40 Mvuhˇ nyi k'ehˬ ve teˇ yanˇ, a naˍ laiˉ ceuˬ naˬ chehˇ ve chaw naˬ teˇ hpaˍ hta‸ hk'a shiˍ veu laˇ ve chaw hk'a peu-eˬ lehˬ, chaw naˬ oˇ ve teˇ hpaˍ hta‸ Yeˍsuˆ geh shiˍ k'ai ve yoˬ. Yawˇ lehˬ, yawˇ hui teˇ g'aˇ le le awˬ hk'oˆ hta‸ la‸ sheh taˍ leh yawˇ hui hta‸ gu na-e piˇ ve yoˬ. 41 Neˇ teˇ hpaˍ htawˇ, Nawˬ lehˬ G'uiˬ sha ve Yaˇ hpu yoˬ teh‸ kuˬ leh, chaw laiˉ g'aˇ awˬ hk'aw lo tawˆ k'ai ve yoˬ. Yawˇ Hkri‸ hpeh‸ ve hta‸ yawˇ hui shiˍ ve pa taw, yawˇ yawˇ hui hta‸ deˇ leh tawˇ maˇ yaw tcuh. 42 Mvuhˇ htiˇ la ve teˇ yanˇ, yawˇ oˇ kaˬ lo tawˆ k'ai leh heh puiˉ hk'aw lo k'ai ve yoˬ. Chaw awˬ moˍ lonˉ teˇ hpaˍ yawˇ hta‸ ca leh yawˇ geh gaˬ la ve teˇ yanˇ, yawˇ hui hta‸ maˇ g'a hpaˆ k'ai tuˬ yawˇ hui yawˇ hta‸ tawˍ taˍ ve yoˬ. 43 Ya‸ hk'aˇ yawˇ k'aw‸ k'oˆ ve, G'uiˬ sha ve mvuhˇ miˬ awˬ lawn ha lehˬ ve bon hkawˇ hta‸ awˬ kaˍ awˬ nu venˇ hk'aˆ teˇ hpaˍ awˬ hk'aw lo htawˇ ngaˬ g'a ca maˍ piˇ tuˬ yoˬ. Awˬ lawn k'o, chi hk'e te tuˬ awˬ pon G'uiˬ sha ngaˬ hta‸ peu laˇ ve yoˬ teh‸, yawˇ hui hta‸ k'oˆ piˇ ve yoˬ. 44 Oˇ htaˇ, Yuˇda‸ mvuhˇ miˬ lo cawˬ ve bon yehˬ teˇ hpaˍ awˬ hk'aw lo yawˇ bon ca maˍ piˇ ve yoˬ.

Luˉka‸ 5

1 Teˇ pawˆ htaˇ, chaw awˬ moˍ lonˉ lehˬ, G'uiˬ sha ve tawˇ hkawˇ hta‸ na tuˬ Yeˍsuˆ geh buiˆ lo‸ la chehˇ ve yoˬ. Yawˇ lehˬ, Geˍneˍsaˍrehˆ g'uiˬ po 2 g'uiˬ pfuhˍ paˇ lo haw lo‸ k'oˍ nyiˇ maˬ deh taˍ ve hta‸ yawˇ g'a mawˬ ve yoˬ. Ngaˇ ca paˍ teˇ hpaˍ lehˬ, haw lo‸ k'oˍ hk'aw tawˆ k'ai peuˬ leh, yawˇ hui ve geu‸ teˇ hpaˍ hta‸ tsuhˇ baˬ chehˇ ve yoˬ. 3 Siˉmonˍ ve haw lo‸ k'oˍ teˇ maˬ hk'aw yawˇ lo‸-e leh, iˉ kaˆ hk'aw a ciˉ jiˆ k'ai tuˬ Siˉmonˍ hta‸ lawˬ ve yoˬ. Oˇ htaˇ, yawˇ haw lo‸ k'oˍ hk'aw mui taˍ leh, chaw awˬ moˍ lonˉ hta‸ maˍ piˇ ve yoˬ. 4 Yawˇ maˍ piˇ ve hpehˇ peuˬ hk'aw‸ nawˉ, Siˉmonˍ hta‸ k'oˆ piˇ ve, Iˉ kaˆ naˉ kuiˬ lo jiˆ k'ai leh, ngaˇ g'a tuˬ nawˬ hui ve geu‸ teˇ hpaˍ hta‸ hpehˇ-oˆ teh‸ k'oˆ piˇ ve yoˬ. 5 Siˉmonˍ k'aw‸ k'oˆ ve, Jawˇ mawˇ-oˬ, ngaˬ hui aˬ miˍ haˉ teˇ haˉ mvuhˇ hk'a htiˇ g'aˇ hte‸ te ve htawˇ, teˇ hkeh ka‸ maˇ g'a. Ya‸ hk'aˇ, nawˬ ve tawˇ hkawˇ hta‸ pa taw, geu‸ teˇ hpaˍ hta‸ ngaˬ hpehˇ tuˬ yoˬ teh‸ k'oˆ piˇ ve yoˬ. 6 Yawˇ hui oˇ hk'e te ve teˇ yanˇ, ngaˇ geh maˇ jaˇ ve pa taw, yawˇ hui ve geu‸ teˇ hpaˍ tzuh‸ paˇ neˇ ve yoˬ. 7 Oˇ htaˇ, awˬ kaˍ awˬ nu haw lo‸ k'oˍ hk'aw chehˇ ve awˬ chawˇ teˇ hpaˍ laˬ ga laˇ tuˬ yawˇ hui la‸ mehˆ muiˬ piˇ ve yoˬ. Awˬ chawˇ teˇ hpaˍ laˬ leh, haw lo‸ k'oˍ oˇ ve nyiˇ maˬ awˬ hk'aw lo ngaˇ yuˬ keu ve teˇ yanˇ, ngaˇ hk'a biˇ cawˬ ve pa taw, haw lo‸ k'oˍ oˇ ve nyiˇ maˬ aˬ laˬ hk'e iˉ kaˆ tuˍ sheˬ ve yoˬ. 8 Siˉmonˍ Peˍtruˆ oˇ ve hta‸ g'a mawˬ ve teˇ yanˇ, Yeˍsuˆ hkui paˇ lo yawˇ boˆ sheˬ leh, Jawˇ mawˇ-oˬ, ngaˬ geh lo tawˆ k'ai-o. Awˬ lawn k'o, ngaˬ lehˬ venˇ baˆ uiˍ ve chaw hpeh‸ ve yoˬ teh‸ k'oˆ piˇ ve yoˬ. 9 Yawˇ hui ngaˇ g'a maˇ jaˇ ve hta‸ pa taw, Siˉmonˍ leh yawˇ geh chehˇ ve chaw hk'a peu-eˬ anˇ jaˇ ve yoˬ. 10 Siˉmonˍ geh teˇ geh kanˉ te ve yawˇ ve awˬ chawˇ, Zeˍbeˍdehˇ ve awˬ yaˇ paˍ Yaˍkoˆ leh Yoˇhanˬ htawˇ, anˇ jaˇ ve yoˬ. Oˇ htaˇ, Yeˍsuˆ Siˉmonˍ hta‸ k'oˆ piˇ ve, Taˇ kawˆ. Ya‸ nyi hk'aw‸ nawˉ k'o, nawˬ lehˬ chaw ca shehˍ hpaˇ hpeh‸ tuˬ yoˬ teh‸ k'oˆ ve yoˬ. 11 Yawˇ hui teˇ hpaˍ lehˬ, g'uiˬ pfuhˍ paˇ lo haw lo‸ k'oˍ teˇ hpaˍ hta‸ deh piˇ peuˬ hk'aw‸ nawˉ, hk'a peu-eˬ hta‸ baˬ taˉ leh Yeˍsuˆ awˬ hk'aˇ suh k'ai ve yoˬ. 12 Teˇ pawˆ htaˇ, yawˇ venˇ teˇ venˇ awˬ hk'aw lo chehˇ taˍ ve teˇ yanˇ, awˬ to teˇ to hk'a peu-eˬ hkiˬ tu‸ keuˆ ve chaw teˇ g'aˇ cawˬ ve yoˬ. Yawˇ Yeˍsuˆ hta‸ mawˬ ve teˇ yanˇ, mehˆ hpfuhˇ miˬ chaˇ hk'oˆ boˆ sheˬ leh, Jawˇ mawˇ-oˬ, nawˬ te gaˇ ve k'o, ngaˬ hta‸ da‸ la kehˬ la tuˬ nawˬ te hpeh‸ ve yoˬ teh‸ k'oˆ leh lawˬ hkawˉ ve yoˬ. 13 Yeˍsuˆ la‸ sheh che leh yawˇ hta‸ htawˇ leh k'oˆ ve, Ngaˬ te gaˇ ve yoˬ. Da‸ la kehˬ la-o teh‸ k'oˆ piˇ ve yoˬ. Teˇ cawˬ haˉ yawˇ awˬ hk'aw lo hkiˬ tu‸ a naˍ mehˉ k'ai ve yoˬ. 14 Chaw teˇ g'aˇ hta‸ ka‸ maˇ g'a hto piˇ tuˬ Yeˍsuˆ yawˇ hta‸ tawˇ piˇ ve yoˬ. Chi hk'oˆ ka‸ Yeˍsuˆ k'aw‸ k'oˆ ve, Nawˬ k'ai leh paw hkuˇ hta‸ nawˬ awˬ to ca maw piˇ-oˆ Shu mehˆ g'uˇ suhˍ shaˉ hkiˆ hpeh‸ tuˬ, nawˬ da‸ la kehˬ la peuˬ ve awˬ pon Moˉseˍ awˬ liˇ teh taˍ ve hk'e, tanˇ tuˬ ca tanˇ piˇ-oˆ teh‸ yawˇ hta‸ k'oˆ piˇ ve yoˬ. 15 Ya‸ hk'aˇ, yawˇ ve awˬ lawn leuˉ leh teˇ kaˬ le le lo bvuhˬ k'ai ve pa taw, chaw awˬ moˍ lonˉ teˇ hpaˍ lehˬ, yawˇ ve hkawˇ hta‸ na tuˬ maˇ k'oˆ, yawˇ hui ve naˬ ve gawˬ ve teˇ hpaˍ hta‸ gu na-e laˇ tuˬ maˇ k'oˆ, hpawnˬ la ve yoˬ. 16 Ya‸ hk'aˇ Yeˍsuˆ lehˬ, yawˇ teˇ g'aˇ tiˉ heh puiˉ hk'aw lo k'ai leh bon ca lawˬ ve yoˬ. 17 Teˇ nyi htaˇ, yawˇ maˍ piˇ chehˇ ve teˇ yanˇ, Yeˍruˆsaˍlehnˍ venˇ lo leh Gaˍliˍlehˇ mvuhˇ miˬ, Yuˇda‸ mvuhˇ miˬ awˬ hk'aw cawˬ ve hk'aˆ teˇ hk'aˆ le le lo chehˇ ve Hpaˍriˍsehˇ leh awˬ liˇ tawˇ hkawˇ maˍ ve saˍ la‸ teˇ hpaˍ gaˬ la leh mui taˍ ve yoˬ. Naˬ ve chaw hui hta‸ gu na-e piˇ tuˬ Jawˇ mawˇ G'uiˬ sha ve kanˇ paˆ yawˇ geh cawˬ ve yoˬ. 18 Oˇ htaˇ chaw teˇ hpaˍ lehˬ, ku-iˍ hk'oˆ zuh‸ chehˇ ve hkui sheh la‸ sheh suh ve chaw teˇ g'aˇ hta‸ taˆ veu laˇ ve yoˬ. Yawˇ hta‸ yuˬ lo‸-e leh Yeˍsuˆ mehˆ g'uˇ suhˍ taˍ tuˬ yawˇ hui ca ve yoˬ. 19 Chaw awˬ moˍ lonˉ chehˇ taˍ ve pa taw, yawˇ hta‸ yuˬ lo‸-e tuˬ yawˇ hui ya‸ k'aw ca maˇ mawˬ ve teˇ yanˇ, yehˬ awˬ hk'oˆ lo yawˇ hui taˆ-e leh, beh taˍ ve hta‸ hpaˆ pawnˍ peuˬ hk'aw‸ nawˉ, chaw naˬ oˇ ve leh yawˇ zuh‸ taˍ ve ku-iˍ hta‸ chaw chi ma ve awˬ k'aw ji lo Yeˍsuˆ mehˆ g'uˇ suhˍ hpehˇ ya‸-e ve yoˬ. 20 Yeˍsuˆ lehˬ, yawˇ hui yonˍ ve nyi ma hta‸ g'a mawˬ htaˇ, Awˬ chawˇ-oˬ, nawˬ ve venˇ baˆ hpehˇ hk'a peuˬ teh‸ k'oˆ piˇ ve yoˬ. 21 Oˇ htaˇ, li‸ bvuh‸ paˍ teˇ hpaˍ leh Hpaˍriˍsehˇ teˇ hpaˍ k'oˆ ve, G'uiˬ sha hta‸ maˇ shawˍ maˇ caˆ k'oˆ ve chaw chi teˇ g'aˇ lehˬ, hk'aˬ hk'e ve chaw le. G'uiˬ sha teˇ g'aˇ maˇ heˆ k'o, venˇ baˆ hta‸ a shu hpehˇ hk'a hpeh‸ tuˬ le teh‸, yawˇ hui dawˇ chehˇ ve yoˬ. 22 Yawˇ hui chi hk'e dawˇ chehˇ ve hta‸ Yeˍsuˆ shiˍ leh yawˇ hui hta‸ k'oˆ piˇ ve, Nawˬ hui nyi ma hk'aw aˬ hto‸ ma te chi hk'e dawˇ chehˇ ve le. 23 Tawˇ hk'aˬ ve teˇ hkawˇ a ciˉ k'oˆ piˇ sha le. Nawˬ ve venˇ baˆ hpehˇ hk'a peuˬ teh‸ k'oˆ piˇ ve sha laˇ. Maˇ heˆ k'o, Tu leh ya‸ k'aw toˇ k'ai loˬ teh‸ k'oˆ piˇ ve sha laˇ. 24 Ya‸ hk'aˇ, chaw yaˇ ve Yaˇ hpu lehˬ, miˬ guiˬ hk'oˆ lo venˇ baˆ hpehˇ hk'a tu kanˇ paˆ cawˬ ve hta‸ nawˬ hui g'a shiˍ tuˬ teh‸ k'oˆ peuˬ leh, hkui sheh la‸ sheh suh ve chaw hta‸ k'aw‸ k'oˆ piˇ ve, Ngaˬ nawˬ hta‸ k'oˆ laˇ ve, tu-o. Nawˬ ve ku-iˍ hta‸ taˆ leh nawˬ ve aˉ hk'aw lo k'o‸-e loˬ teh‸, yawˇ hta‸ k'oˆ piˇ ve yoˬ. 25 Teˇ cawˬ haˉ yawˇ hui mehˆ g'uˇ suhˍ yawˇ tu leh, yawˇ ve zuh‸ kuiˬ hta‸ taˆ peuˬ hk'aw‸ nawˉ, G'uiˬ sha hta‸ chiˇ uiˍ chiˇ mvuh ve awˬ hk'aw lo yawˇ ve aˉ hk'aw lo k'o‸-e ve yoˬ. 26 Chaw hk'a peu-eˬ anˇ jaˇ leh G'uiˬ sha hta‸ chiˇ uiˍ chiˇ mvuh piˇ ve yoˬ. Yawˇ hui kawˆ jaˇ ve awˬ hk'aw lo, Ngaˬ hui maˇ dawˇ nyi jaw ve awˬ ceuˬ teˇ hpaˍ hta‸ ya‸ nyi g'a mawˬ peuˬ teh‸ k'oˆ ve yoˬ. 27 Oˇ ve awˬ hk'aw‸ nawˉ Yeˍsuˆ tawˆ k'ai leh, Leˍviˆ meh ve awˬ hkawnˍ shaw paˍ teˇ g'aˇ awˬ hkawnˍ shaw kuiˬ yehˬ awˬ hk'aw lo mui chehˇ ve hta‸ g'a mawˬ htaˇ, Ngaˬ hk'aˇ suh laˬ-o‸ teh‸, yawˇ hta‸ k'oˆ piˇ ve yoˬ. 28 Yawˇ lehˬ, hk'a cawˬ ve hk'a peu-eˬ hta‸ baˬ taˉ leh, tu leh Yeˍsuˆ awˬ hk'aˇ suh k'ai ve yoˬ. 29 Oˇ htaˇ, Leˍviˆ lehˬ yawˇ ve aˉ hk'aw lo Yeˍsuˆ awˬ pon hti caˇ hti dawˬ ve pawehˇ lonˉ te ve yoˬ. Awˬ hkawnˍ shaw paˍ teˇ hpaˍ leh awˬ kaˍ awˬ nu chaw maˇ maˇ, yawˇ hui geh teˇ geh hpui lawˇ paˇ lo mui caˇ chehˇ ve yoˬ. 30 Hpaˍriˍsehˇ teˇ hpaˍ leh yawˇ hui ve li‸ bvuh‸ paˍ teˇ hpaˍ lehˬ, Yeˍsuˆ ve awˬ la‸ g'awˇ hui hta‸ ca beu ca hk'aiˉ leh k'oˆ ve, Naw hui aˬ hto‸ ma pa taw awˬ hkawnˍ shaw paˍ leh venˇ baˆ yaˇ hui geh hk'a geh hti caˇ hti dawˬ ve le teh‸ na nyi ve yoˬ. 31 Yeˍsuˆ yawˇ hui hta‸ k'aw‸ k'oˆ piˇ ve, Chehˇ sha ve chaw hui naˆ tsuhˇ shehˍ hpaˇ hta‸ maˇ loˍ. Naˬ ve chaw hui ceh tiˉ loˍ ve yoˬ. 32 Hteˇ ve cawˇ ve chaw hui hta‸ kuˬ yuˬ tuˬ ngaˬ laˬ ve maˇ heˆ. Venˇ baˆ yaˇ teˇ hpaˍ, a shu yawˇ ve venˇ baˆ hta‸ dawˇ hpfuhˆ tuˬ awˬ pon kuˬ yuˬ tuˬ ngaˬ laˬ ve yoˬ teh‸ k'oˆ piˇ ve yoˬ. 33 Oˇ htaˇ, yawˇ hui yawˇ hta‸ k'aw‸ k'oˆ piˇ ve, Yoˇhanˬ ve awˬ la‸ g'awˇ teˇ hpaˍ lehˬ, teˇ hkui teˇ hkui caˇ tuˬ ce leh bon lawˬ ve yoˬ. Hpaˍriˍsehˇ ve awˬ la‸ g'awˇ teˇ hpaˍ htawˇ oˇ hk'e te chehˇ ve yoˬ. Ya‸ hk'aˇ, nawˬ ve awˬ la‸ g'awˇ teˇ hpaˍ lehˬ, caˇ chehˇ dawˬ chehˇ ve yoˬ. 34 Yeˍsuˆ yawˇ hui hta‸ k'aw‸ k'oˆ piˇ ve, Awˬ miˇ ma heuˆ shehˍ hpaˇ lehˬ, hkehˉ caˇ la ve chaw hui geh chehˇ htaˇ, nawˬ hui yawˇ hui hta‸ caˇ tuˬ ce piˇ lawˬ g'a tuˬ leh laˇ. 35 Ya‸ hk'aˇ, awˬ miˇ ma heuˆ shehˍ hpaˇ hta‸ hkehˉ caˇ la ve chaw teˇ hpaˍ geh yuˬ hpaˆ piˇ ve awˬ nyi gaˬ la tuˬ yoˬ. Awˬ yanˇ oˇ ve awˬ hk'aw lo yawˇ hui caˇ tuˬ ce tuˬ yoˬ teh‸, yawˇ hui hta‸ k'oˆ piˇ ve yoˬ. 36 Chi hk'oˆ ka‸, yawˇ yawˇ hui hta‸ tawˇ pa haˉ te maˍ leh k'oˆ piˇ ve, Veu‸ k'aˇ awˬ suhˉ teˇ hk'oˆ awˬ hk'aw lo teˇ peˆ tzuh‸ sheˬ leh, veu‸ k'aˇ awˬ piˍ hta‸ a shu ka‸ maˇ nehˉ jaw. Oˇ hk'e nehˉ ve k'o, veu‸ k'aˇ awˬ suhˉ hta‸ tzuh‸ ve awˬ hk'oˆ ka‸, veu‸ k'aˇ awˬ suhˉ ve hpa peˆ lehˬ, veu‸ k'aˇ awˬ piˍ hta‸ maˇ hawˍ da‸. 37 Chi hk'oˆ ka‸, shaˍ guiˬ htuˉ pui awˬ piˍ awˬ hk'aw lo a pehˉ meuˇ g'uiˬ awˬ suhˉ a shu ka‸ maˇ keu jaw. Oˇ hk'e keu ve k'o, a pehˉ meuˇ g'uiˬ awˬ suhˉ lehˬ, shaˍ guiˬ htuˉ pui hta‸ te hkoˇ ve pa taw, a pehˉ meuˇ g'uiˬ sheˆ leh, shaˍ guiˬ htuˉ pui htawˇ luˬ k'ai ve yoˬ. 38 A pehˉ meuˇ g'uiˬ awˬ suhˉ hta‸ shaˍ guiˬ htuˉ pui awˬ suhˉ awˬ hk'aw lo g'a keu ve yoˬ. 39 A pehˉ meuˇ g'uiˬ awˬ piˍ hta‸ dawˬ peuˬ ve chaw hk'aˬ ve teˇ g'aˇ maˇ k'oˆ, awˬ suhˉ hta‸ maˇ dawˬ gaˇ. Awˬ lawn k'o, Awˬ piˍ lehˬ da‸ ve yoˬ. teh‸ yawˇ k'oˆ ve yoˬ.

Luˉka‸ 6

1 Shinˉ nyi teˇ nyi awˬ hk'aw lo, Yeˍsuˆ heh hk'aw hpanˍ k'ai chehˇ htaˇ, yawˇ ve awˬ la‸ g'awˇ hui caˬ nu hta‸ chehˆ leh, yawˇ hui ve la‸ sheh ye‸ leh caˇ ve yoˬ. 2 Hpaˍriˍsehˇ teˇ hpaˍ hpaˍ k'oˆ ve, Shinˉ nyi htaˇ te maˇ keunˍ te maˇ cawˇ ve hta‸ nawˬ hui aˬ hto‸ ma pa taw te ve le teh‸ k'oˆ ve yoˬ. 3 Yeˍsuˆ yawˇ hui hta‸ k'aw‸ k'oˆ piˇ ve, Daˍviˆ leh yawˇ ve awˬ chawˇ teˇ hpaˍ awˍ meu‸ ve teˇ yanˇ, 4 G'uiˬ sha ve yehˬ awˬ hk'aw lo lo‸-e leh, paw hkuˇ teˇ hpaˍ maˇ heˆ k'o teˇ g'aˇ ka‸ caˇ maˇ keunˍ caˇ maˇ cawˇ ve, tanˇ taˍ ve hkaoˍ monˇ hta‸ yuˬ caˇ leh, yawˇ ve awˬ chawˇ teˇ hpaˍ hta‸ htawˇ caˍ piˇ ve awˬ lawn hta‸ nawˬ hui maˇ g'aw jaw leh laˇ teh‸ k'oˆ piˇ ve yoˬ. 5 Peuˬ leh yawˇ k'aw‸ k'oˆ ve, Chaw yaˇ ve Yaˇ hpu lehˬ, shinˉ nyi ve awˬ jawˇ mawˇ hpeh‸ ve yoˬ teh‸ yawˇ hui hta‸ k'oˆ piˇ ve yoˬ. 6 Awˬ kaˍ awˬ nu shinˉ nyi teˇ nyi k'aw‸ gaˬ leh, bon yehˬ awˬ hk'aw lo Yeˍsuˆ lo‸-e leh maˍ piˇ chehˇ htaˇ, oˇ kaˬ lo la‸ sha paˉ la‸ sheh suh ve chaw teˇ g'aˇ chehˇ taˍ ve yoˬ. 7 Yeˍsuˆ hta‸ venˇ baˆ taˍ g'a tuˬ, shinˉ nyi htaˇ chaw naˬ oˇ ve hta‸ yawˇ gu na-e piˇ tuˬ leh naˍ teh‸, li‸ bvuh‸ paˍ leh Hpaˍriˍsehˇ teˇ hpaˍ yawˇ hta‸ hk'a deh‸ nyi taˍ ve yoˬ. 8 Yeˍsuˆ lehˬ, yawˇ hui dawˇ ve hta‸ shiˍ leh, la‸ sheh teˇ paˉ suh ve chaw hta‸, Nawˬ tu leh awˬ k'aw ji lo ca huˉ la-o teh‸ k'oˆ piˇ htaˇ, yawˇ tu leh huˉ taˍ ve yoˬ. 9 Yeˍsuˆ yawˇ hui hta‸ k'oˆ piˇ ve, Ngaˬ nawˬ hui hta‸ na nyi shaˍ. Shinˉ nyi htaˇ da‸ tuˬ te cawˇ laˇ, maˇ heˆ k'o luˬ tuˬ te cawˇ laˇ. Shu ve a sha‸ hta‸ ponˬ piˇ cawˇ laˇ, maˇ heˆ k'o te luˬ cawˇ laˇ teh‸ na nyi ve yoˬ. 10 Yawˇ hui hk'a peu-eˬ hta‸ yawˇ hk'a caw zuhˇ nyi leh, chaw oˇ ve hta‸, Nawˬ ve la‸ sheh che-o teh‸ k'oˆ piˇ ve yoˬ. Oˇ htaˇ, chaw oˇ ve la‸ sheh che leh na-e la ve yoˬ. 11 Yawˇ hui nyi ma zuhˆ jaˇ leh, Yeˍsuˆ hta‸ hk'aˬ hk'e g'a te tuˬ teˇ g'aˇ leh teˇ g'aˇ jehˬ da‸ ve yoˬ. 12 Awˬ nyi awˬ haˉ oˇ ve teˇ hpaˍ awˬ hk'aw lo, yawˇ bon lawˬ tuˬ hk'aw pui hk'oˆ lo taˆ-e leh, oˇ ve teˇ haˉ mvuhˇ hk'a htiˇ G'uiˬ sha geh bon lawˬ chehˇ ve yoˬ. 13 Mvuhˇ htiˇ la ve teˇ yanˇ, yawˇ ve awˬ la‸ g'awˇ teˇ hpaˍ hta‸ yawˇ kuˬ yuˬ leh, yawˇ hui awˬ hk'aw lo chaw teˇ chi nyiˇ g'aˇ hta‸ leuˆ yuˬ ve yoˬ. Yawˇ hui teˇ hpaˍ hta‸ tcuh yaˇ teh‸ yawˇ meh piˇ ve yoˬ. 14 Chaw oˇ ve teˇ hpaˍ lehˬ, Peˍtruˆ teh‸ yawˇ meh piˇ ve Siˉmonˍ leh yawˇ ve awˬ nyi paˍ Anˍdrehˍ, Yaˍkoˆ leh Yoˇhanˬ, Hpiˇliˇpuˆ leh Baˍhtawˇlaˍmehˇ, 15 Ma‸htehˍ leh Htoˉma‸, Aˍlaˍhpehˇ ve awˬ yaˇ paˍ Yaˍkoˆ leh Seˍluˆ teh‸ k'oˆ ve Siˉmonˍ, 16 Yaˍkoˆ ve awˬ yaˇ paˍ Yuˇda‸ leh, Yeˍsuˆ hta‸ chiˇ a‸ piˇ shehˍ hpaˇ Yuˇda‸ Iˉsaˍkaˍriˍoˆ hui yoˬ. 17 Peuˬ leh, yawˇ yawˇ hui geh teˇ geh ya‸ la leh, miˬ tawˬ kuiˬ lo huˉ chehˇ ve yoˬ. Yawˇ ve awˬ la‸ g'awˇ awˬ moˍ lonˉ maˇ k'oˆ, Yuˇda‸ mvuhˇ miˬ teˇ kaˬ le le, Yeˍruˆsaˍlehnˍ venˇ leh laˇ tsuhˇ g'uiˬ pfuhˍ paˇ Tuˇruˆ leh Siˉdonˍ mvuhˇ miˬ lo chehˇ ve chaw awˬ moˍ lonˉ maˇ k'oˆ, yawˇ ve tawˇ hkawˇ hta‸ na tuˬ leh, yawˇ hui ve naˬ ve gawˬ ve teˇ hpaˍ hta‸ yawˇ gu na-e laˇ tuˬ, yawˇ geh hpawnˬ chehˇ taˍ ve yoˬ. 18 Neˇ cha‸ chiˆ fawˉ mehˍ chehˇ ve chaw teˇ hpaˍ hta‸ htawˇ yawˇ gu na-e piˇ ve yoˬ. 19 Chaw awˬ moˍ lonˉ hk'a peu-eˬ yawˇ hta‸ g'a htawˇ tuˬ te ve yoˬ. Awˬ lawn k'o, yawˇ awˬ hk'aw lo kanˇ paˆ tawˆ la leh, yawˇ hui hk'a peu-eˬ hta‸ gu na-e piˇ ve yoˬ. 20 Oˇ htaˇ, yawˇ ve awˬ la‸ g'awˇ teˇ hpaˍ hta‸ yawˇ chiˇ nyi leh k'oˆ piˇ ve, Nawˬ hui haˍ ve g'awˇ ve chaw hui awˬ bon uiˍ ve yoˬ. Awˬ lawn k'o, G'uiˬ sha ve mvuhˇ miˬ lehˬ nawˬ hui ve mvuhˇ miˬ hpeh‸ ve yoˬ. 21 Chi beu‸ nawˬ hui meu‸ chehˇ kaˆ chehˇ ve chaw hui awˬ bon uiˍ ve yoˬ. Awˬ lawn k'o, nawˬ hui g'a caˇ bvuhˆ dawˬ bvuhˆ tuˬ yoˬ. Chi beu‸ nawˬ hui hawˬ chehˇ ve chaw hui awˬ bon uiˍ ve yoˬ. Awˬ lawn k'o, nawˬ hui g'a g'uiˬ tuˬ yoˬ. 22 Chaw yaˇ ve Yaˇ hpu hta‸ pa taw shu nawˬ hui hta‸ canˇ laˇ ve, shawˍ baˬ laˇ ve, hk'a mvuhˇ hk'a na k'oˆ laˇ ve leh, nawˬ hui ve awˬ meh hta‸ te luˬ laˇ ve k'o, nawˬ hui awˬ bon uiˍ ve yoˬ. 23 Awˬ nyi oˇ ve awˬ hk'aw lo ha lehˬ leh pawˆ chehˇ-oˆ. Awˬ lawn k'o, mvuhˇ naw ma hk'oˆ lo nawˬ hui ve la‸ shawnˍ uiˍ jaˇ ve yoˬ. Yawˇ hui ve awˬ puˍ awˬ pi teˇ hpaˍ lehˬ, G'uiˬ sha ve tcuh kaˍ paˍ teˇ hpaˍ hta‸ oˇ hk'e te ve yoˬ. 24 Ya‸ hk'aˇ nawˬ hui paw sha ve chaw teˇ hpaˍ lehˬ, g'a dawˇ haˍ jaˇ tuˬ yoˬ. Awˬ lawn k'o, nawˬ hui lehˬ a shu yawˇ dawˇ sha ve teˇ ceuˬ hta‸ g'a peuˬ. 25 Chi beu‸ nawˬ hui g'a caˇ bvuhˆ dawˬ bvuhˆ chehˇ ve chaw hui g'a dawˇ haˍ jaˇ tuˬ yoˬ. Awˬ lawn k'o, nawˬ hui g'a meu‸ g'a kaˆ tuˬ yoˬ. Chi beu‸ nawˬ hui g'uiˬ chehˇ ve chaw hui g'a dawˬ haˍ jaˇ tuˬ yoˬ. Awˬ lawn k'o, nawˬ hui g'a dawˇ haˍ gaˇ haˍ leh g'a hawˬ tuˬ yoˬ. 26 Chaw hk'a peu-eˬ nawˬ hui hta‸ chiˇ mvuh laˇ ve teˇ yanˇ, nawˬ hui g'a dawˇ haˍ jaˇ tuˬ yoˬ. Awˬ lawn k'o, yawˇ hui ve awˬ puˍ awˬ pi teˇ hpaˍ htawˇ, maˇ heˆ heˆ ve tcuh kaˍ paˍ teˇ hpaˍ hta‸ oˇ hk'e chiˇ mvuh jaw ve yoˬ. 27 Nawˬ hui hk'a g'a kaˇ ve chaw teˇ hpaˍ hta‸ ngaˬ k'oˆ laˇ ve, nawˬ hui ve canˇ paˍ teˇ hpaˍ hta‸ ha‸-o‸. Nawˬ hui hta‸ nyi bawˬ ve chaw hui hta‸ da‸ ve teˇ ceuˬ te piˇ-oˆ. 28 Nawˬ hui hta‸ hkeu laˇ ve chaw teˇ hpaˍ hta‸ bon na‸ piˇ-oˆ. Nawˬ hui hta‸ hk'a mvuhˇ hk'a na te laˇ ve chaw teˇ hpaˍ awˬ pon bon lawˬ-o‸. 29 Nawˬ ve mehˆ hpfuhˇ diˬ teˇ paˉ hta‸ hta laˇ ve chaw hta‸ teˇ paˉ k'aw‸ hpfuhˆ hk'o piˇ sheˍ. Nawˬ ve aˉ po‸ zuhˬ ma hta‸ yuˬ gaˇ ve chaw hta‸ nawˬ ve aˉ po‸ hta‸ htawˇ yuˬ tuˬ taˇ tawˍ taˍ. 30 Nawˬ geh hk'a lawˬ ve chaw teˇ g'aˇ le le hta‸ piˇ-oˆ. Nawˬ ve mawˇ hta‸ yuˬ ve chaw geh taˇ k'aw‸ lawˬ hk'aw‸. 31 Shu nawˬ hui hta‸ te laˇ piˇ lawˬ gaˇ ve hk'e, nawˬ hui shu hta‸ oˇ hk'e te piˇ-oˆ. 32 Nawˬ hui hta‸ ha‸ ve chaw hui hta‸ ceh k'aw‸ ha‸ ve k'o, nawˬ hui awˬ pon aˬ hto‸ ma awˬ bon cawˬ le. Venˇ baˆ yaˇ teˇ hpaˍ htawˇ, yawˇ hui hta‸ ha‸ ve chaw hui hta‸ yawˇ hui k'aw‸ ha‸ ve yoˬ. 33 Nawˬ hui hta‸ da‸ ve awˬ ceuˬ te laˇ ve chaw hui hta‸ ceh da‸ ve k'aw‸ te piˇ ve k'o, nawˬ hui awˬ pon aˬ hto‸ ma awˬ bon cawˬ le. Venˇ baˆ yaˇ teˇ hpaˍ htawˇ chi hk'a shuˍ shuˍ te ve yoˬ. 34 Nawˬ hui k'aw‸ g'a tuˬ yoˬ teh‸ dawˇ law taˍ ve chaw hui hta‸ ceh chiˇ piˇ ngaˍ piˇ ve k'o, nawˬ hui awˬ pon aˬ hto‸ ma awˬ bon cawˬ le. Venˇ baˆ yaˇ hui htawˇ, yawˇ hui chiˇ piˇ ngaˍ piˇ taˍ ve hk'e k'aw‸ g'a tuˬ, awˬ kaˍ awˬ nu venˇ baˆ yaˇ hui hta‸ chiˇ piˇ ngaˍ piˇ ve yoˬ. 35 Nawˬ hui lehˬ, nawˬ hui ve canˇ paˍ teˇ hpaˍ hta‸ ha‸ leh da‸ ve awˬ ceuˬ te piˇ-oˆ. K'aw‸ g'a tuˬ ve hta‸ maˇ dawˇ law ve awˬ hk'aw lo shu hta‸ chiˇ piˇ ngaˍ piˇ-oˆ. Oˇ hk'e te ve k'o, nawˬ ve la‸ shawnˍ uiˍ jaˇ leh, uiˍ jaˇ mvuh jaˇ ve Awˬ shehˍ hpaˇ ve awˬ yaˇ teˇ hpaˍ nawˬ hui hpeh‸ tuˬ yoˬ. Awˬ lawn k'o, yawˇ lehˬ awˬ bon hta‸ maˇ shiˍ puiˉ ve chaw leh haiˬ ve chaw hui hta‸ awˬ bon te piˇ puiˉ ve yoˬ. 36 Nawˬ hui ve Awˬ pa ha k'aˉ puiˉ ve hk'a shuˍ shuˍ nawˬ hui htawˇ ha k'aˉ puiˉ ve chaw hpeh‸ piˇ-oˆ. 37 Nawˬ hui shu hta‸ venˇ baˆ taˇ taˍ. Oˇ hk'e maˇ taˍ ve k'o, nawˬ hui hta‸ htawˇ shu venˇ baˆ maˇ taˍ. Shu hta‸ suhˉ taˇ taˆ. Oˇ hk'e maˇ taˆ ve k'o, nawˬ hui hta‸ htawˇ shu suhˉ maˇ taˆ. Shu ve venˇ baˆ hta‸ hpehˇ piˇ-oˆ. Oˇ hk'e te ve k'o, nawˬ hui ve venˇ baˆ hta‸ ka‸ shu hpehˇ laˇ tuˬ yoˬ. 38 Shu hta‸ piˇ-oˆ. Oˇ hk'e piˇ ve k'o, nawˬ hui hta‸ ka‸ shu k'aw‸ pe‸ laˇ tuˬ yoˬ. Yawˇ hui pe‸ laˇ ve teˇ yanˇ htaˇ, kawˬ tuˬ uiˍ ve hta‸ k'aw‸ kawˬ laˇ ve awˬ hk'oˆ ka‸, biˇ sheˆ htaˇ hk'a gaˬ nyiˉ keu hiˆ keu leh nawˬ hui ve taˉ poˆ hk'aw keu laˇ tuˬ yoˬ. Awˬ lawn k'o, nawˬ hui shu hta‸ kawˬ piˇ ve hk'e shu nawˬ hui hta‸ k'aw‸ kawˬ laˇ tuˬ yoˬ teh‸ k'oˆ ve yoˬ. 39 Chi hk'oˆ ka‸, yawˇ yawˇ hui hta‸ tawˇ pa haˉ k'oˆ piˇ ve, Mehˆ cuˉ ve chaw lehˬ, mehˆ cuˉ ve chaw hta‸ ya‸ k'aw maˍ piˇ hpeh‸-aw laˇ. Yawˇ huiˉ maˬ nyiˇ g'aˇ g'aˇ miˬ k'oˍ hk'aw ce lo‸-e tuˬ maˇ heˆ laˇ. 40 Awˬ la‸ g'awˇ lehˬ, yawˇ ve saˍ la‸ a‸ kehˉ uiˍ ve maˇ heˆ, Hk'a biˇ biˇ henˇ yuˬ peuˬ ve chaw teˇ g'aˇ le le lehˬ, a shu yawˇ ve saˍ la‸ hk'a shuˍ shuˍ hpeh‸ tuˬ yoˬ. 41 Nawˬ hui a shu yawˇ ve mehˆ shiˍ hk'aw lo cawˬ taˍ ve toˉ la‸ lonˉ hta‸ maˇ dawˇ nyi leh, aˬ hto‸ ma te nawˬ ve awˬ viˉ awˬ nyi ve mehˆ shiˍ hk'aw lo cawˬ taˍ ve mehˆ puˉ hta‸ nyi chehˇ ve le. 42 Nawˬ hui a shu yawˇ ve mehˆ shiˍ hk'aw lo cawˬ taˍ ve toˉ la‸ lonˉ hta‸ maˇ mawˬ leh, Awˬ viˉ awˬ nyi-oˬ, nawˬ ve mehˆ shiˍ hk'aw lo cawˬ taˍ ve mehˆ puˉ hta‸ ngaˬ yuˬ tawˆ laˇ shaˍ teh‸, aˬ hto‸ ma te nawˬ ve awˬ viˉ awˬ nyi hta‸ ca k'oˆ ve le. Heˍ puiˉ ve chaw hui-oˬ, nawˬ ve mehˆ shiˍ hk'aw lo cawˬ taˍ ve toˉ la‸ lonˉ hta‸ awˉ lawˉ yuˬ tawˆ sheˍ. Awˬ hk'aw‸ nawˉ, nawˬ awˬ viˉ awˬ nyi ve mehˆ shiˍ hk'aw cawˬ taˍ ve mehˆ puˉ hta‸ hk'aˬ hk'e te yuˬ tawˆ tuˬ nawˬ hk'a deh‸ mawˬ hpeh‸ tuˬ yoˬ. 43 Da‸ ve awˬ cehˬ lehˬ, maˇ da‸ ve awˬ shiˍ naw‸ ve teˇ cehˬ ka‸ maˇ cawˬ. Maˇ da‸ ve awˬ cehˬ lehˬ, da‸ ve awˬ shiˍ naw‸ ve teˇ cehˬ ka‸ maˇ cawˬ. 44 Awˬ lawn k'o, awˬ shiˍ hta‸ nyi leh, awˬ cehˬ teˇ cehˬ le le hta‸ g'a shiˍ ve yoˬ. Aˉ chuˇ cehˬ lo maˉ nawˆ shiˍ maˇ shaˉ jaw. Aˉ chuˇ buiˇ lo a pehˉ meuˇ shiˍ maˇ shaˉ jaw. 45 Da‸ ve chaw lehˬ, a shu yawˇ nyi ma hk'aw da‸ ve awˬ ceuˬ doˆ taˍ kuiˬ lo, da‸ ve awˬ ceuˬ hta‸ yuˬ tawˆ la ve yoˬ. Haiˬ ve chaw lehˬ, a shu yawˇ haiˬ ve awˬ ceuˬ doˆ taˍ kuiˬ awˬ hk'aw lo, haiˬ ve awˬ ceuˬ hta‸ yuˬ tawˆ la ve yoˬ. Awˬ lawn k'o, nyi ma awˬ hk'aw lo hk'a biˇ cawˬ ve hk'e yawˇ ve maw‸ k'aw yaw tawˆ la ve yoˬ. 46 Ngaˬ k'oˆ taˍ ve hk'e nawˬ hui maˇ te leh, aˬ hto‸ ma te ngaˬ hta‸ Jawˇ mawˇ-oˬ, Jawˇ mawˇ-oˬ teh‸ k'oˆ ve le. 47 Ngaˬ geh laˬ leh ngaˬ ve tawˇ hkawˇ hta‸ kaˇ leh na yuˬ ve chaw teˇ g'aˇ le le lehˬ, hk'aˬ hk'e ve chaw teˇ g'aˇ hta‸ shuˍ ve ngaˬ nawˬ hui hta‸ maˍ laˇ shaˍ. 48 Yehˬ kawˍ ve teˇ yanˇ, naˉ chaweh duˇ leh, haˉ pui awˬ hk'oˆ awˬ hkuiˉ puiˍ teh taˍ ve chaw teˇ g'aˇ hta‸ yawˇ shuˍ ve yoˬ. Iˉ kaˆ uiˍ taˆ la leh, iˉ kaˆ g'uiˬ dawˇ yehˬ oˇ ve hta‸ htinˍ ve htawˇ, yeˬ chaweh kawˍ taˍ ve pa taw, hiˆ hiˆ naˇ naˇ maˇ te. 49 Ya‸ hk'aˇ, tawˇ hkawˇ hta‸ g'a kaˇ leh maˇ na yuˬ ve chaw lehˬ, awˬ hkuiˉ puiˍ maˇ kawˍ leh miˬ chaˇ hk'oˆ ceh yehˬ kawˍ ve chaw teˇ g'aˇ hta‸ shuˍ ve yoˬ. Iˉ kaˆ g'uiˬ dawˇ yehˬ oˇ ve hta‸ htinˍ ve teˇ yanˇ, teˇ cawˬ haˉ paiˍ leh, yehˬ oˇ ve luˬ k'ai ve lehˬ jaˇ ve yoˬ teh‸ maˍ piˇ ve yoˬ.

Luˉka‸ 7

1 Yeˍsuˆ lehˬ, chaw chi ma ve hta‸ tawˇ hkawˇ oˇ ve hk'a peu-eˬ maˍ piˇ peuˬ hk'aw‸ nawˉ, Kaˍpeˍneˍonˍ venˇ hk'aw lo k'ai ve yoˬ. 2 Oˇ htaˇ ma‸ poˍ teˇ g'aˇ, yawˇ ha‸ ve awˬ ceˬ teˇ g'aˇ naˬ leh suh la paˇ neˇ ve yoˬ. 3 Ma‸ poˍ oˇ ve lehˬ, Yeˍsuˆ awˬ lawn g'a kaˇ htaˇ, yawˇ ve awˬ ceˬ hta‸ gu na-e laˇ tuˬ, Yuˇda‸ chaw hui ve awˬ hoˉ chaw mawˇ teˇ hpaˍ hta‸ k'ai tcuh leh Yeˍsuˆ hta‸ ca lawˬ hkawˉ tcuh ve yoˬ. 4 Yawˇ hui Yeˍsuˆ geh gaˬ la htaˇ, yawˇ hui yawˇ hta‸ g'aˇ hte‸ lawˬ hkawˉ leh k'oˆ ve, Nawˬ lehˬ yawˇ hta‸ chi hk'e te piˇ tuˬ yawˇ keunˍ ve chaw teˇ g'aˇ hpeh‸ ve yoˬ. 5 Awˬ lawn k'o, yawˇ ngaˬ hui ve chaw ceuˬ hta‸ ha‸ leh, ngaˬ hui awˬ pon bon yehˬ te laˇ peuˬ teh‸ k'oˆ piˇ ve yoˬ. 6 Hk'e te leh, Yeˍsuˆ yawˇ hui geh k'ai ve yoˬ. Ma‸ poˍ ve yehˬ hta‸ maˇ vuiˇ maˇ neˇ kuiˬ lo gaˬ ve teˇ yanˇ, ma‸ poˍ lehˬ yawˇ ve awˬ chawˇ teˇ hpaˍ hta‸ k'ai tcuh leh, Jawˇ mawˇ-oˬ, nawˬ awˬ to hkeu‸ tuˬ taˇ te. Awˬ lawn k'o, ngaˬ ve yehˬ hk'aw nawˬ lo‸ la ve hta‸ ngaˬ maˇ keunˍ. 7 Chi hta‸ pa taw, ngaˬ lehˬ nawˬ geh lo laˬ maˇ keunˍ teh‸ dawˇ ve yoˬ. Ya‸ hk'aˇ nawˬ tawˇ teˇ peu-eˍ ceh yaw ve ka‸, ngaˬ ve awˬ ceˬ na-e la tuˬ yoˬ. 8 Awˬ lawn k'o, ngaˬ lehˬ shu ve kanˇ paˆ awˬ hawˉ lo chehˇ leh, ngaˬ awˬ hawˉ lo ka‸ ma‸ yaˇ teˇ hpaˍ cawˬ ve yoˬ. Teˇ g'aˇ hta‸, K'ai-o teh‸ k'oˆ piˇ ve k'o, yawˇ k'ai ve yoˬ. Teˇ g'aˇ hta‸, Laˬ-o‸ teh‸ k'oˆ piˇ ve k'o, yawˇ laˬ ve yoˬ. Ngaˬ ve awˬ ceˬ paˍ hta‸ htawˇ, Chi hta‸ te-o teh‸ k'oˆ piˇ ve k'o, yawˇ te ve yoˬ teh‸ k'oˆ piˇ tcuh ve yoˬ. 9 Tawˇ chi hta‸ Yeˍsuˆ g'a kaˇ htaˇ yawˇ anˇ leh, yawˇ awˬ hk'aˇ suh k'ai ve chaw awˬ moˍ lonˉ hta‸ hpfuhˆ nyi leh, Ngaˬ nawˬ hui hta‸ k'oˆ laˇ ve, Iˉsaˍreˍlaˆ chaw awˬ hk'aw lo ka‸ chi taw taw yonˍ ve hta‸ ngaˬ maˇ g'a mawˬ jaw sheˍ teh‸ k'oˆ ve yoˬ. 10 K'ai tcuh ve chaw teˇ hpaˍ yehˬ lo k'aw‸ gaˬ la ve teˇ yanˇ, awˬ ceˬ oˇ ve na-e la peuˬ ve hta‸ yawˇ hui g'a mawˬ ve yoˬ. 11 Oˇ ve awˬ hk'aw‸ nawˉ maˇ maw maw, Naˍiˉnaˆ meh ve venˇ lo yawˇ k'ai leh, yawˇ ve awˬ la‸ g'awˇ teˇ hpaˍ leh chaw awˬ moˍ lonˉ htawˇ yawˇ geh teˇ geh k'ai ve yoˬ. 12 Venˇ taˍ meu‸ hpe‸ awˬ paˇ lo yawˇ gaˬ la ve teˇ yanˇ, suh taˍ ve chaw teˇ g'aˇ hta‸ ca tuˍ tuˬ, shu taˆ tawˆ la chehˇ ve yoˬ. Suh taˍ ve chaw chi teˇ g'aˇ ve awˬ e lehˬ, mehˇ chawˇ ma hpeh‸ leh, yaˇ paˍ chi teˇ g'aˇ tiˉ cawˬ ve yoˬ. Mehˇ chawˇ ma oˇ ve geh teˇ geh venˇ yaˇ teˇ hpaˍ htawˇ awˬ moˍ lonˉ te laˬ chehˇ ve yoˬ. 13 Jawˇ mawˇ Yeˍsuˆ lehˬ, yaˇ miˇ oˇ ve hta‸ g'a mawˬ ve teˇ yanˇ, yawˇ hta‸ ha k'aˉ jaˇ leh, Taˇ hawˬ teh‸ k'oˆ piˇ ve yoˬ. 14 Yeˍsuˆ lehˬ awˬ paˇ lo k'ai leh, taˆ tuˬ hta‸ htawˇ leh, chaw taˆ shehˍ hpaˇ teˇ hpaˍ huˉ sheˬ ve yoˬ. Yeˍsuˆ k'oˆ ve, Chaw haˉ paˍ-oˬ, ngaˬ nawˬ hta‸ k'oˆ laˇ ve, tu-o teh‸ k'oˆ piˇ ve yoˬ. 15 Oˇ htaˇ, suh taˍ ve chaw tu mui leh tawˇ yaw ve yoˬ. Yeˍsuˆ lehˬ, awˬ e ve la‸ sheh awˬ hk'aw lo yawˇ hta‸ a‸ piˇ ve yoˬ. 16 Chaw hk'a peu-eˬ kawˆ jaˇ leh, G'uiˬ sha hta‸ chiˇ uiˍ chiˇ mvuh leh k'oˆ ve, G'uiˬ sha ve tcuh kaˍ paˍ lonˉ ngaˬ hui geh tawˆ la peuˬ. G'uiˬ sha lehˬ, yawˇ ve chaw teˇ hpaˍ hta‸ ca nyi la peuˬ teh‸ yawˇ hui k'oˆ ve yoˬ. 17 Yeˍsuˆ te ve awˬ lawn chi Yuˇda‸ mvuhˇ miˬ hk'a peu-eˬ leh, awˬ paˇ awˬ kui teˇ kaˬ le le lo bvuhˬ k'ai ve yoˬ. 18 Oˇ htaˇ Yoˇhanˬ ve awˬ la‸ g'awˇ teˇ hpaˍ lehˬ, awˬ lawn oˇ ve hk'a peu-eˬ Yoˇhanˬ hta‸ ca hto piˇ ve yoˬ. 19 Yoˇhanˬ lehˬ, yawˇ ve awˬ la‸ g'awˇ nyiˇ g'aˇ hta‸ kuˬ yuˬ leh, Jawˇ mawˇ Yeˍsuˆ geh k'ai tcuh leh, Nawˬ lehˬ laˬ tuˬ ve chaw teˇ g'aˇ yoˬ laˇ. Maˇ heˆ k'o, awˬ kaˍ awˬ nu teˇ g'aˇ hta‸ ngaˬ hui g'a dawˇ law tuˬ sheˍ laˇ teh‸, yawˇ hta‸ ca na nyi tcuh ve yoˬ. 20 Chaw oˇ ve nyiˇ g'aˇ Yeˍsuˆ geh gaˬ la ve teˇ yanˇ, Nawˬ lehˬ laˬ tuˬ ve chaw teˇ g'aˇ yoˬ laˇ. Maˇ heˆ k'o, awˬ kaˍ awˬ nu teˇ g'aˇ hta‸ ngaˬ hui g'a dawˇ law tuˬ sheˍ laˇ teh‸, nawˬ hta‸ na nyi tuˬ baˆtiˆsaˬ piˇ paˍ Yoˇhanˬ lehˬ, ngaˬ huiˉ maˬ hta‸ nawˬ geh lo laˬ tcuh laˇ ve yoˬ teh‸ k'oˆ piˇ ve yoˬ. 21 Awˬ yanˇ oˇ ve awˬ hk'aw lo yawˇ lehˬ, chaw maˇ maˇ ve a naˍ leh naˬ ve gawˬ ve teˇ hpaˍ hta‸ gu na-e piˇ leh, haiˬ ve neˇ teˇ hpaˍ hta‸ g'a‸ k'oˬ piˇ ve yoˬ. Mehˆ cuˉ ve chaw maˇ maˇ hta‸ htawˇ, mehˆ mawˬ la piˇ ve yoˬ. 22 Oˇ htaˇ, yawˇ yawˇ huiˉ maˬ hta‸ k'aw‸ k'oˆ piˇ ve, Nawˬ huiˉ maˬ hk'a g'a kaˇ hk'a g'a mawˬ ve teˇ hpaˍ Yoˇhanˬ hta‸ ca hto piˇ-oˆ. Mehˆ cuˉ ve chaw hui mehˆ mawˬ la ve, hkui luˬ ve chaw hui ya‸ k'aw juˇ k'ai ve, hkiˬ tu‸ keuˆ ve chaw hui da‸ la kehˬ la ve, naˍ paw pawˇ ve chaw hui naˍ paw kaˇ la ve, suh ve chaw hui k'aw‸ te‸ tu la ve leh, haˍ ve g'awˇ ve chaw hui htawˇ, ha lehˬ ve bon hkawˇ hta‸ g'a kaˇ ve yoˬ. 23 Ngaˬ hta‸ nyi ma maˇ luˬ ve chaw lehˬ, awˬ bon uiˍ ve yoˬ teh‸ k'oˆ piˇ ve yoˬ. 24 Yoˇhanˬ tcuh peu laˇ ve chaw nyiˇ g'aˇ k'o‸-e peuˬ hk'aw‸ nawˉ, Yeˍsuˆ lehˬ Yoˇhanˬ ve awˬ lawn chaw awˬ moˍ lonˉ teˇ hpaˍ hta‸ k'oˆ piˇ ve, Nawˬ hui aˬ hto‸ ma hta‸ ca nyi tuˬ heh puiˉ hk'aw lo k'ai ve le. Mvuhˇ haw meuˆ leh hiˆ hiˆ naˇ naˇ te chehˇ ve lo cehˬ hta‸ laˇ. 25 Maˇ heˆ k'o, aˬ hto‸ ma hta‸ ca nyi tuˬ k'ai ve le. Nuˇ lehˍ ve veu‸ k'aˇ veu‸ deh ve chaw hta‸ laˇ. Veu‸ da‸ k'aˇ da‸ leh caˇ da‸ dawˬ da‸ ve chaw hui lehˬ, hkunˉ hawˉ hkanˇ ve hawˉ yehˬ awˬ hk'aw lo chehˇ ve yoˬ. 26 Maˇ heˆ k'o, aˬ hto‸ ma hta‸ ca nyi tuˬ k'ai ve le. G'uiˬ sha ve tcuh kaˍ paˍ hta‸ laˇ. Yoˬ, G'uiˬ sha ve tcuh kaˍ paˍ hta‸ ca nyi ve yoˬ. Yawˇ lehˬ, G'uiˬ sha ve tcuh kaˍ paˍ a‸ kehˉ uiˍ ve teˇ g'aˇ hpeh‸ ve yoˬ teh‸ ngaˬ nawˬ hui hta‸ k'oˆ laˇ ve yoˬ. 27 Nyi loˬ. Nawˬ awˬ g'uˇ suhˍ lo nawˬ ve ya‸ k'aw hta‸ gu tuˬ, ngaˬ ve tcuh yaˇ hta‸ nawˬ mehˆ g'uˇ suhˍ lo ngaˬ k'ai tcuh ve yoˬ. teh‸ bvuh‸ taˍ ve lehˬ, yawˇ hta‸ k'oˆ ve yoˬ, 28 Ngaˬ nawˬ hui hta‸ k'oˆ laˇ ve, yaˇ miˇ geh hk'a paw la ve chaw hui awˬ hk'aw lo, Yoˇhanˬ a‸ kehˉ uiˍ ve chaw teˇ g'aˇ ka‸ maˇ cawˬ. Ya‸ hk'aˇ, G'uiˬ sha ve mvuhˇ miˬ awˬ hk'aw lo shu a‸ kehˉ i ve chaw teˇ g'aˇ lehˬ, yawˇ a‸ kehˉ uiˍ sheˍ ve yoˬ. 29 (Awˬ hkawnˍ shaw paˍ leh chaw hk'a peu-eˬ g'a kaˇ htaˇ, G'uiˬ sha te ve lehˬ, hteˇ jaˇ cawˇ jaˇ teh‸ k'oˆ ve yoˬ. Yawˇ hui lehˬ Yoˇhanˬ ve baˆtiˆsaˬ hta‸ hkanˍ yuˬ peuˬ ve chaw hpeh‸ ve yoˬ. 30 Ya‸ hk'aˇ, Hpaˍriˍsehˇ teˇ hpaˍ leh awˬ liˇ tawˇ hkawˇ shiˍ paˍ teˇ hpaˍ lehˬ, G'uiˬ sha yawˇ hui awˬ pon gu taˍ ve teˇ ceuˬ hta‸ baˬ taˉ ve yoˬ. Yawˇ hui lehˬ, Yoˇhanˬ geh baˆtiˆsaˬ maˇ hkanˍ yuˬ.) 31 Hk'e te leh, chaw chi teˇ co-e hta‸ aˬ hto‸ ma yuˬ leh g'a tehˆ maˍ tuˬ le. Yawˇ hui aˬ hto‸ ma hta‸ shuˍ da‸ ve le. 32 Chaw chi teˇ co-e lehˬ, Nawˬ hui awˬ pon ngaˬ hui nawˍ meuˆ htawˇ, nawˬ hui k'aˍ maˇ hk'eˆ. Ngaˬ hui paˆ hawˬ ve htawˇ, nawˬ hui maˇ dawˇ haˍ, teh‸ tcuh hk'aw mui taˍ leh teˇ g'aˇ leh teˇ g'aˇ kuˬ da‸ chehˇ ve yaˇ ehˉ teˇ hpaˍ hta‸ shuˍ ve yoˬ. 33 Awˬ lawn k'o, baˆtiˆsaˬ piˇ paˍ Yoˇhanˬ laˬ leh hkaoˍ monˇ maˇ caˇ leh a pehˉ meuˇ g'uiˬ maˇ dawˬ ve pa taw, Yawˇ lehˬ neˇ geh ve chaw yoˬ teh‸ nawˬ hui k'oˆ ve yoˬ. 34 Chaw yaˇ ve Yaˇ hpu laˬ leh caˇ ve dawˬ ve pa taw, Chaw chi lehˬ, caˇ leuˉ dawˬ leuˉ ve chaw, a pehˉ meuˇ g'uiˬ dawˬ ponˬ dawˬ leuˉ ve chaw, awˬ hkawnˍ shaw paˍ leh venˇ baˆ yaˇ hui hta‸ awˬ chawˇ teˇ ve chaw yoˬ teh‸, nawˬ hui k'aw‸ k'oˆ ve yoˬ. 35 Ya‸ hk'aˇ cuˇ yiˍ maˍ yiˍ teˇ ceuˬ lehˬ, hteˇ ve cawˇ ve yoˬ teh‸ yawˇ ve awˬ yaˇ awˬ duˬ hk'a peu-eˬ hta‸ pa taw shu g'a shiˍ ve yoˬ teh‸, Yeˍsuˆ k'oˆ piˇ ve yoˬ. 36 Hpaˍriˍsehˇ teˇ g'aˇ lehˬ, yawˇ geh awˍ caˇ tuˬ Yeˍsuˆ hta‸ kuˬ ve yoˬ. Hk'e te leh, Hpaˍriˍsehˇ oˇ ve aˉ hk'aw lo yawˇ lo‸-e leh mui caˇ ve yoˬ. 37 Hpaˍriˍsehˇ ve aˉ hk'aw lo Yeˍsuˆ mui caˇ chehˇ ve hta‸ venˇ oˇ ve awˬ hk'aw lo chehˇ ve haiˬ ve yaˇ miˇ teˇ g'aˇ g'a shiˍ ve teˇ yanˇ, naˍ manˇ hawnˉ keu taˍ ve hpuˉ-ehˍ ve haˉ pui kaw teˇ maˬ yuˬ laˬ leh, 38 Yeˍsuˆ awˬ hk'aw‸ nawˉ hpawˇ hkui sheh paˇ lo huˉ taˍ leh hawˬ chehˇ ve yoˬ. Yawˇ ve mehˆ g'uiˬ Yeˍsuˆ ve hkui sheh hta‸ jaˆ pfuhˍ leh, yawˇ ve uˉ hkeh mvuh yuˬ shiˆ ve yoˬ. Peuˬ leh, Yeˍsuˆ ve hkui sheh hta‸ boˆ nu leh, naˍ manˇ hawnˉ shehˍ piˇ ve yoˬ. 39 Yeˍsuˆ hta‸ kuˬ ve Hpaˍriˍsehˇ teˇ g'aˇ chi hta‸ g'a mawˬ ve teˇ yanˇ, yawˇ ve nyi ma hk'aw dawˇ ve, Chaw chi lehˬ, G'uiˬ sha ve tcuh kaˍ paˍ hpeh‸ ve k'o, yawˇ hta‸ htawˇ chehˇ ve yaˇ miˇ chi a shu hpeh‸ ve leh, hk'aˬ hk'e ve yaˇ miˇ hpeh‸ ve hta‸ yawˇ shiˍ tuˬ yoˬ. Awˬ lawn k'o, yaˇ miˇ chi lehˬ haiˬ ve yaˇ miˇ hpeh‸ ve yoˬ teh‸ yawˇ dawˇ ve yoˬ. 40 Yeˍsuˆ k'aw‸ k'oˆ ve, Siˉmonˍ-oˬ, ngaˬ nawˬ hta‸ k'oˆ laˇ tuˬ teˇ ceuˬ cawˬ ve yoˬ teh‸ yawˇ hta‸ k'oˆ piˇ htaˇ, Saˍ la‸-oˬ, k'oˆ laˇ-oˆ teh‸, Siˉmonˍ k'aw‸ k'oˆ piˇ ve yoˬ. 41 Yeˍsuˆ k'oˆ ve, Hpu chiˇ piˇ shehˍ hpaˇ teˇ g'aˇ geh jeˬ pfuhˇ paˍ nyiˇ g'aˇ cawˬ ve yoˬ. Teˇ g'aˇ jeˬ ngaˇ ha hteh‸ cawˬ leh teˇ g'aˇ jeˬ ngaˇ chi hteh‸ cawˬ ve yoˬ. 42 Yawˇ huiˉ maˬ lehˬ, jeˬ k'aw‸ shaiˍ tuˬ maˇ cawˬ ve pa taw, hpu chiˇ piˇ shehˍ hpaˇ lehˬ, yawˇ huiˉ maˬ nyiˇ g'aˇ g'aˇ ve jeˬ hta‸ ponˬ piˇ ve yoˬ. Hk'e te leh, yawˇ huiˉ maˬ awˬ hk'aw lo hk'aˬ ve teˇ g'aˇ yawˇ hta‸ leuˉ leh ha‸ tuˬ ve le teh‸ na nyi ve yoˬ. 43 Siˉmonˍ k'aw‸ k'oˆ ve, Ngaˬ dawˇ ve, jeˬ cawˬ maˇ ve hta‸ g'a ponˬ ve chaw teˇ g'aˇ lehˬ, yawˇ hta‸ leuˉ leh ha‸ tuˬ yoˬ teh‸ k'oˆ piˇ ve teˇ yanˇ, Nawˬ dawˇ taˍ ve hk'e cawˇ ve yoˬ teh‸, Yeˍsuˆ yawˇ hta‸ k'aw‸ k'oˆ piˇ ve yoˬ. 44 Oˇ htaˇ, yaˇ miˇ oˇ ve hta‸ yawˇ hpfuhˆ nyi leh Siˉmonˍ hta‸ k'oˆ piˇ ve, Yaˇ miˇ chi hta‸ nawˬ mawˬ laˇ. Nawˬ ve aˉ hk'aw lo ngaˬ lo‸ la htaˇ, ngaˬ hkui sheh tsuhˇ tuˬ nawˬ iˉ kaˆ maˇ pe‸ laˇ. Ya‸ hk'aˇ yaˇ miˇ chi lehˬ, yawˇ ve mehˆ g'uiˬ ngaˬ ve hkui sheh hta‸ jaˆ pfuhˍ leh, yawˇ ve uˉ hkeh mvuh yuˬ shiˆ laˇ peuˬ. 45 Nawˬ ngaˬ hta‸ maˇ boˆ nu. Ya‸ hk'aˇ yawˇ lehˬ, ngaˬ lo‸ la ve teˇ hkui te leh, ngaˬ ve hkui sheh hta‸ hk'aˬ htaˆ ka‸ boˆ nu tcuhˉ taˍ ve yoˬ. 46 Nawˬ ngaˬ ve oˉ k'oˍ hta‸ naˍ manˇ maˇ shehˍ laˇ. Ya‸ hk'aˇ yawˇ lehˬ, ngaˬ ve hkui sheh hta‸ naˍ manˇ shehˍ laˇ peuˬ. 47 Chi hta‸ pa taw ngaˬ nawˬ hta‸ k'oˆ laˇ ve, yawˇ lehˬ venˇ baˆ maˇ jaˇ ve hta‸ g'a ponˬ leh, ha‸ maˇ ve yoˬ. Venˇ baˆ a ciˉ ceh tiˉ cawˬ leh g'a ponˬ ve chaw lehˬ, a ciˉ ceh tiˉ ha‸ ve yoˬ teh‸ k'oˆ piˇ ve yoˬ. 48 Yaˇ miˇ oˇ ve hta‸ htawˇ, Nawˬ ve venˇ baˆ teˇ hpaˍ hta‸ hpehˇ hk'a laˇ peuˬ teh‸ k'oˆ piˇ ve yoˬ. 49 Yawˇ geh teˇ geh mui caˇ chehˇ ve chaw teˇ hpaˍ lehˬ, Venˇ baˆ hta‸ ka‸ hpehˇ hk'a g'a ve chaw chi lehˬ, a shu le teh‸, teˇ g'aˇ leh teˇ g'aˇ k'oˆ da‸ ve yoˬ. 50 Yeˍsuˆ yaˇ miˇ hta‸ k'oˆ piˇ ve, Nawˬ yonˍ ve teˇ ceuˬ lehˬ, nawˬ hta‸ htaiˍ hk'aw‸ laˇ peuˬ. Dawˇ sha gaˇ sha ve awˬ hk'aw lo k'o‸-e loˬ.

Luˉka‸ 8

1 Oˇ ve awˬ hk'aw‸ nawˉ maˇ maw maw, Yeˍsuˆ lehˬ teˇ venˇ peuˬ teˇ venˇ, teˇ hk'aˆ peuˬ teˇ hk'aˆ lo k'ai leh, G'uiˬ sha ve mvuhˇ miˬ awˬ lawn ha lehˬ ve bon hkawˇ hto piˇ maˍ piˇ ve yoˬ. 2 Tcuh yaˇ teˇ chi nyiˇ g'aˇ ka‸ yawˇ geh k'ai ve yoˬ. Haiˬ ve neˇ hta‸ Yeˍsuˆ g'a‸ k'oˬ peuˬ leh naˬ ve gawˬ ve teˇ hpaˍ hta‸ yawˇ gu na-e piˇ peuˬ ve yaˇ miˇ teˇ hpaˍ hpaˍ htawˇ yawˇ geh k'ai ve yoˬ. Yawˇ hui teˇ hpaˍ lehˬ, neˇ suhˍ hkeh tawˆ k'ai peuˬ ve Maˍgaˍdaˍlaˆ teh‸ k'oˆ ve Maˍriˆ, 3 Heˍroˆ ve mawˇ ha‸ shaˉ shehˍ hpaˇ Hkuˇsaˆ ve awˬ miˇ ma Yoˇhaˍnaˆ, Suˇsaˍnaˆ hui leh, awˬ kaˍ awˬ nu yaˇ miˇ laiˉ g'aˇ, a shu yawˇ ve mawˇ jeˬ hta‸ yehˇ leh yawˇ hui hta‸ te caˍ te taw piˇ ve yoˬ. 4 Chaw awˬ moˍ lonˉ hpawnˬ la leh, teˇ venˇ le le lo chehˇ ve chaw hui yawˇ geh gaˬ la htaˇ, yawˇ yawˇ hui hta‸ tawˇ pa haˉ te maˍ piˇ ve, 5 Awˬ yawˇ sheˍ paˍ teˇ g'aˇ awˬ yawˇ ca sheˍ ve yoˬ. Yawˇ sheˍ ve teˇ yanˇ, awˬ yawˇ teˇ hpaˍ hpaˍ ya‸ k'aw hpuiˇ lo ce leh, shu naˆ toˇ leh, mvuhˇ hpe lo poˬ ve ngaˆ teˇ hpaˍ g'awˆ caˇ sheˬ ve yoˬ. 6 Awˬ yawˇ teˇ hpaˍ hpaˍ haˉ pui awˬ hk'oˆ ce leh yeˬ la ve teˇ yanˇ, miˬ shaˍ goˇ ve pa taw nawˍ k'ai goˇ k'ai ve yoˬ. 7 Awˬ yawˇ teˇ hpaˍ hpaˍ aˉ chuˇ de lo ce leh, aˉ chuˇ buiˇ geh yeˬ la ve pa taw, aˉ chuˇ buiˇ lehˬ awˬ yeˬ oˇ ve hta‸ hoˆ sheˬ ve yoˬ. 8 Awˬ yawˇ teˇ hpaˍ hpaˍ miˬ hkuiˇ da‸ kuiˬ lo ce leh awˬ yeˬ yeˬ la uiˍ la ve teˇ yanˇ, awˬ shiˍ teˇ ha pun naw‸ maˇ la ve yoˬ. Yawˇ chi hk'e k'oˆ peuˬ hk'aw‸ nawˉ, Kaˇ tuˬ naˍ paw cawˬ ve chaw hui hk'a deh‸ na-o teh‸ yawˇ k'oˆ ve yoˬ. 9 Oˇ htaˇ, yawˇ ve awˬ la‸ g'awˇ teˇ hpaˍ lehˬ, Tawˇ pa haˉ chi aˬ hto‸ ma tcuhˉ kuiˬ le teh‸, yawˇ hta‸ na nyi htaˇ, yawˇ k'oˆ ve, 10 G'uiˬ sha ve mvuhˇ miˬ awˬ lawn faˉ taˍ ve awˬ ceuˬ teˇ hpaˍ hta‸ nawˬ hui shiˍ tuˬ a hkaw-anˬ cawˬ ve yoˬ. Ya‸ hk'aˇ, awˬ kaˍ awˬ nu chaw teˇ hpaˍ lehˬ, nyi ve ka‸ nyi maˇ mawˬ leh, kaˇ ve ka‸ na maˇ g'a tuˬ yawˇ hui hta‸ tawˇ pa haˉ ceh tiˉ g'a te maˍ piˇ ve yoˬ. 11 Tawˇ pa haˉ ve tcuhˉ kuiˬ lehˬ chi hk'e yoˬ. Awˬ yawˇ lehˬ, G'uiˬ sha ve bon hkawˇ hpeh‸ ve yoˬ. 12 Ya‸ k'aw hpuiˇ lo ve chaw teh‸ k'oˆ ve teˇ hpaˍ lehˬ, bon hkawˇ oˇ ve hta‸ g'a kaˇ peuˬ hk'aw‸ nawˉ, hk'aˬ hk'e te leh yawˇ hui maˇ g'a yonˍ leh, htaiˍ hk'aw‸ ve hta‸ maˇ g'a tuˬ, neˇ haiˬ laˬ leh yawˇ hui ve nyi ma awˬ hk'aw lo bon hkawˇ oˇ ve hta‸ yuˬ tawˆ ve yoˬ. 13 Haˉ pui hk'oˆ ve chaw teh‸ k'oˆ ve teˇ hpaˍ lehˬ, bon hkawˇ oˇ ve hta‸ g'a kaˇ htaˇ, ha lehˬ ha k'a ha‸ yuˬ ve chaw teˇ hpaˍ hta‸ k'oˆ ve yoˬ. Ya‸ hk'aˇ, yawˇ hui awˬ geu maˇ naw‸ ve hta‸ pa taw, teˇ tcuhˉ teˇ jaw ceh yonˍ leh, beˬ ve lawˇ ve hta‸ g'a hpuˇ da‸ ve teˇ yanˇ k'aw‸ luˬ k'ai ve yoˬ. 14 Aˉ chuˇ de lo ce ve teˇ hpaˍ lehˬ, yawˇ hui bon hkawˇ hta‸ g'a kaˇ ve chaw teˇ hpaˍ hpeh‸ ve yoˬ. Ya‸ hk'aˇ, yawˇ hui miˬ guiˬ hk'oˆ lo a sha‸ te‸ chehˇ ve teˇ yanˇ, dawˇ haˍ gaˇ haˍ ve teˇ hpaˍ, paw sha ve teˇ hpaˍ leh ha lehˬ tuˬ ve awˬ ceuˬ teˇ hpaˍ yawˇ hui hta‸ hoˆ taˍ leh, awˬ shiˍ maˬ la meh la maˇ g'a. 15 Miˬ hkuiˇ da‸ kuiˬ lo ce ve teˇ hpaˍ lehˬ, hteˇ ve leh da‸ ve nyi ma awˬ hk'aw lo g'a kaˇ ve chaw teˇ hpaˍ hta‸ k'oˆ ve yoˬ. Yawˇ hui lehˬ, bon hkawˇ oˇ ve hta‸ vawˆ yeˬ taˍ leh, yeunˇ hkanˍ ve awˬ hk'aw lo awˬ shiˍ naw‸ la ve yoˬ. 16 Kawˆ faiˇ tuˉ leh mu‸ hk'u tcuhˍ mvuh‸ taˍ ve maˇ k'oˆ, ku-iˍ hawˉ teh taˍ ve maˇ k'oˆ, chaw teˇ g'aˇ ka‸ maˇ te jaw. Hk'a lo‸ la ve chaw teˇ hpaˍ awˬ g'euˆ hta‸ mawˬ hpeh‸ tuˬ, kawˆ faiˇ taˍ kuiˬ awˬ hk'oˆ lo teh taˍ ve yoˬ. 17 Awˬ lawn k'o, hk'a faˉ taˍ ve awˬ ceuˬ teˇ hpaˍ hk'a tawˍ lehˆ tawˆ la tuˬ yoˬ. Shu hta‸ maˇ shiˍ tcuh ve awˬ ceuˬ teˇ hpaˍ htawˇ shu shiˍ la leh, awˬ g'euˆ ba kuiˬ lo tawˆ la tuˬ yoˬ. 18 Hk'e te leh, nawˬ hui hk'a g'a kaˇ ve teˇ hpaˍ hta‸ shaˍ ti‸ taˍ-o‸. Awˬ lawn k'o, cawˬ ve chaw hta‸ k'aw‸ htehˍ piˇ tuˬ yoˬ. Maˇ cawˬ ve chaw geh, yawˇ cawˬ ve teh‸ dawˇ taˍ ve teˇ hpaˍ hta‸ ka‸ k'aw‸ yuˬ tawˆ sheˬ tuˬ yoˬ teh‸ k'oˆ ve yoˬ. 19 Oˇ htaˇ, yawˇ ve awˬ e leh awˬ nyi paˍ teˇ hpaˍ yawˇ geh laˬ ve yoˬ. Ya‸ hk'aˇ chaw awˬ moˍ lonˉ hpawnˬ chehˇ taˍ ve pa taw, yawˇ geh lo‸-e maˇ hpeh‸. 20 Chaw teˇ hpaˍ yawˇ hta‸ k'oˆ piˇ ve, Nawˬ ve awˬ e leh nawˬ ve awˬ nyi paˍ teˇ hpaˍ nawˬ hta‸ mawˬ gaˇ leh, awˬ baˬ hpawˇ lo huˉ chehˇ taˍ ve yoˬ teh‸ k'oˆ ve yoˬ. 21 Yawˇ yawˇ hui hta‸ k'aw‸ k'oˆ piˇ ve, G'uiˬ sha ve tawˇ hkawˇ hta‸ kaˇ leh na yuˬ ve chaw teˇ hpaˍ lehˬ, ngaˬ ve awˬ e leh ngaˬ ve awˬ nyi paˍ teˇ hpaˍ hpeh‸ ve yoˬ. 22 Teˇ nyi htaˇ Yeˍsuˆ lehˬ, yawˇ ve awˬ la‸ g'awˇ hui geh haw lo‸ k'oˍ hk'aw lo‸-e leh, Ngaˬ hui g'uiˬ po coˇ paˉ hpawˇ lo hkanˍ k'ai-a veuˬ teh‸ yawˇ yawˇ hui hta‸ k'oˆ piˇ leh, yawˇ hui hkanˍ k'ai ve yoˬ. 23 Yawˇ hui hkanˍ k'ai chehˇ ve teˇ yanˇ, Yeˍsuˆ zuh‸ muiˉ k'a sheˬ ve yoˬ. Oˇ htaˇ, g'uiˬ po hta‸ mvuhˇ haw lonˉ meuˆ la leh, haw lo‸ k'oˍ hk'aw iˉ kaˆ biˇ la chehˇ ve pa taw, yawˇ hui g'a luˬ la paˇ neˇ ve yoˬ. 24 Awˬ la‸ g'awˇ teˇ hpaˍ yawˇ hta‸ ca nawˍ piˇ leh, Jawˇ mawˇ-oˬ, Jawˇ mawˇ-oˬ, ngaˬ hui g'a luˬ la yoˬ teh‸ k'oˆ piˇ ve yoˬ. Oˇ htaˇ, yawˇ nawˇ la leh, mvuhˇ haw leh g'uiˬ baˇ teˇ hpaˍ hta‸ deˇ piˇ htaˇ, mvuhˇ haw leh g'uiˬ baˇ teˇ hpaˍ dehˬ sheˬ leh ta‸ iˉ gawˬ lehˍ hpeh‸ sheˬ ve yoˬ. 25 Oˇ htaˇ Yeˍsuˆ k'oˆ ve, Nawˬ hui yonˍ ve nyi ma hk'aˬ lo cawˬ le teh‸, yawˇ hui hta‸ na nyi ve yoˬ. Yawˇ hui kawˆ jaˇ anˇ jaˇ leh, teˇ g'aˇ leh teˇ g'aˇ k'oˆ da‸ ve, Chi hpaˇ a shu le. Mvuhˇ haw leh iˉ kaˆ ka‸ yawˇ tawˇ piˇ ve hkawˇ hta‸ na yuˬ ve law teh‸ k'oˆ ve yoˬ. 26 Oˇ htaˇ yawˇ hui lehˬ, Gaˍliˍlehˇ mvuhˇ miˬ hta‸ tawˍ da‸ taˍ ve Geˍraˍtaˆ mvuhˇ miˬ lo gaˬ ve yoˬ. 27 Yawˇ miˬ guiˬ hk'oˆ lo gaˬ la ve teˇ yanˇ, venˇ oˇ ve awˬ hk'aw lo neˇ geh ve chaw teˇ g'aˇ yawˇ hta‸ ca ha‸ la ve yoˬ. Chaw oˇ ve lehˬ, awˬ yanˇ maw chaweh ve awˬ hk'aw lo veu‸ k'aˇ maˇ veu‸ leh, yehˬ awˬ hk'aw lo ka‸ maˇ chehˇ. Chaw tuˍ hpfuh teˇ hpaˍ cawˬ kuiˬ lo tiˉ chehˇ taˍ ve yoˬ. 28 Chaw oˇ ve Yeˍsuˆ hta‸ g'a mawˬ htaˇ kuˬ leh, yawˇ mehˆ g'uˇ suhˍ boˆ sheˬ leh, Mvuh jaˇ ve G'uiˬ sha ve Yaˇ hpu Yeˍsuˆ-oˬ, nawˬ ngaˬ hta‸ hk'aˬ hk'e caˉ da‸ le. Nawˬ ngaˬ hta‸ maˇ g'a fawˉ mehˍ tuˬ ngaˬ nawˬ hta‸ lawˬ hkawˉ ve yoˬ teh‸, awˬ hkawˇ bvuhˬ chaweh kuˬ leh k'oˆ piˇ ve yoˬ. 29 Awˬ lawn k'o, yawˇ awˬ hk'aw lo tawˆ k'ai tuˬ, neˇ cha‸ chiˆ oˇ ve hta‸ Yeˍsuˆ tawˇ piˇ taˍ ve yoˬ. Ponˬ laˬ htaˇ neˇ oˇ ve lehˬ, yawˇ hta‸ laiˉ pawˆ yuˬ tiˍ taˍ ve pa taw, shu yawˇ hta‸ hk'a deh‸ yuˬ haw taˍ leh, sho caˆ leh sho kawˬ hta‸ yuˬ hpeh tiˍ taˍ ve htawˇ, hpeh taˍ ve oˇ ve teˇ hpaˍ hta‸ yawˇ g'awˬ cheˆ leh, neˇ oˇ ve yawˇ hta‸ heh puiˉ hk'aw lo g'a‸ k'ai ve yoˬ. 30 Nawˬ aˬ hto‸ ma meh le teh‸ Yeˍsuˆ yawˇ hta‸ na nyi htaˇ, Ngaˬ ve awˬ meh lehˬ Leˍjonˍ yoˬ teh‸, yawˇ k'aw‸ k'oˆ piˇ ve yoˬ. Awˬ lawn k'o, yawˇ awˬ hk'aw lo neˇ maˇ maˇ chehˇ ve yoˬ. 31 Naˉ jaˇ ve teˇ kaˬ lo lo‸-e loˬ teh‸ Yeˍsuˆ yawˇ hui hta‸ tawˇ maˇ g'a piˇ tuˬ, neˇ oˇ ve teˇ hpaˍ Yeˍsuˆ hta‸ lawˬ hkawˉ ve yoˬ. 32 Hk'aw oˇ ve awˬ hk'oˆ lo va‸ awˬ moˍ lonˉ k'aˆ caˇ chehˇ ve yoˬ. Va‸ oˇ ve teˇ hpaˍ awˬ hk'aw lo yawˇ hui g'a geh tuˬ, yawˇ hta‸ lawˬ hkawˉ htaˇ, yawˇ yawˇ hui hta‸ a hkaw-anˬ piˇ ve yoˬ. 33 Hk'e te leh, neˇ teˇ hpaˍ chaw oˇ ve awˬ hk'aw lo tawˆ-e leh, va‸ teˇ hpaˍ awˬ hk'aw lo lo‸-e ve yoˬ. Oˇ htaˇ, va‸ awˬ moˍ lonˉ lehˬ, miˬ haˍ kuiˬ lo g'aˇ hte‸ g'uiˇ ya‸-e leh, g'uiˬ po hk'aw lo lo‸-e leh k'a suh peuˬ sheˬ ve yoˬ. 34 Va‸ hawˉ paˍ teˇ hpaˍ chi hk'e hpeh‸ la ve hta‸ g'a mawˬ htaˇ, yawˇ hui g'uiˇ k'o‸-e leh, awˬ lawn oˇ ve hta‸ venˇ hk'aˆ teˇ hpaˍ awˬ hk'aw lo ca hto piˇ ve yoˬ. 35 Hk'e te leh, hk'aˬ hk'e hpeh‸ la ve awˬ lawn hta‸ g'a shiˍ tuˬ, chaw teˇ hpaˍ ca nyi ve yoˬ. Yawˇ hui Yeˍsuˆ geh gaˬ la htaˇ, neˇ teˇ hpaˍ tawˆ k'ai peuˬ ve chaw teˇ g'aˇ lehˬ, veu‸ k'aˇ veu‸ deh leh, nyi ma awˉ lawˉ htaˇ hk'a shuˍ shuˍ k'aw‸ da‸ la leh Yeˍsuˆ hkui paˇ lo mui chehˇ ve hta‸ g'a mawˬ ve teˇ yanˇ, yawˇ hui kawˆ jaˇ ve yoˬ. 36 G'a mawˬ taˍ ve chaw teˇ hpaˍ lehˬ, neˇ geh ve chaw oˇ ve teˇ g'aˇ hk'aˬ hk'e te k'aw‸ na-e la ve awˬ lawn yawˇ hui hta‸ hto piˇ ve yoˬ. 37 Oˇ htaˇ, Geˍraˍtaˆ mvuhˇ miˬ teˇ tawn awˬ hk'aw lo hk'a chehˇ ve chaw hk'a peu-eˬ maˇ maˇ kawˆ jaˇ ve pa taw, Yeˍsuˆ yawˇ hui geh lo tawˆ k'ai tuˬ yawˇ hta‸ lawˬ hkawˉ ve yoˬ. Hk'e te leh, Yeˍsuˆ haw lo‸ k'oˍ hk'aw lo‸-e leh k'o‸-e ve yoˬ. 38 Neˇ teˇ hpaˍ tawˆ k'ai peuˬ ve chaw lehˬ, yawˇ geh teˇ geh chehˇ tuˬ Yeˍsuˆ hta‸ lawˬ hkawˉ ve yoˬ. Ya‸ hk'aˇ Yeˍsuˆ k'oˆ piˇ ve, 39 Nawˬ ve aˉ hk'aw lo k'o‸-e leh, G'uiˬ sha nawˬ hta‸ hk'aˬ ma ga laˇ peuˬ ve awˬ lawn ca hto piˇ-oˆ teh‸ k'oˆ leh, yawˇ hta‸ k'o‸-e tcuh ve yoˬ. Hk'e te leh yawˇ tawˆ k'ai leh, Yeˍsuˆ yawˇ hta‸ hk'aˬ ma ga laˇ peuˬ ve awˬ lawn oˇ ve teˇ venˇ hk'a peu-eˬ awˬ hk'aw lo ca hto piˇ ve yoˬ. 40 Yeˍsuˆ k'aw‸ gaˬ la ve teˇ yanˇ, chaw awˬ moˍ lonˉ yawˇ hta‸ dawˇ law chehˇ ve pa taw, ha lehˬ ha k'a yawˇ hta‸ ha‸ yuˬ ve yoˬ. 41 Oˇ htaˇ, Yaˍiˉruˆ meh ve bon yehˬ awˬ hoˉ teˇ g'aˇ laˬ ve yoˬ. Yawˇ lehˬ, Yeˍsuˆ hkui paˇ lo boˆ sheˬ leh, yawˇ ve aˉ hk'aw lo laˬ tuˬ, Yeˍsuˆ hta‸ g'aˇ hte‸ lawˬ hkawˉ ve yoˬ. 42 Awˬ lawn k'o, a sha‸ teˇ chi nyiˇ hk'aw‸ hk'e gaˬ ve yawˇ ve yaˇ miˇ tiˍ suh la paˇ neˇ ve yoˬ. Yeˍsuˆ k'ai chehˇ ve teˇ yanˇ chaw awˬ moˍ lonˉ yawˇ hta‸ buiˆ heuˆ ca‸ heuˆ chehˇ ve yoˬ. 43 Oˇ htaˇ, teˇ chi nyiˇ hk'aw‸ hk'a gaˬ awˬ suhˍ ya‸ la leh naˬ chehˇ ve yaˇ miˇ teˇ g'aˇ cawˬ ve yoˬ. Chaw teˇ g'aˇ ka‸ yawˇ hta‸ gu na-e piˇ maˇ g'a. 44 Yawˇ lehˬ Yeˍsuˆ awˬ hk'aw‸ nawˉ hpawˇ lo laˬ leh, yawˇ ve aˉ po‸ awˬ caˍ hta‸ htawˇ ve teˇ yanˇ, yawˇ awˬ suhˍ ya‸ la ve teˇ cawˬ haˉ cheh sheˬ ve yoˬ. 45 Yeˍsuˆ lehˬ, Ngaˬ hta‸ a shu htawˇ ve le teh‸ na nyi ve yoˬ. Chaw chi ma ve lehˬ, Teˇ g'aˇ ka‸ maˇ htawˇ teh‸ g'awˬ chehˇ ve teˇ yanˇ, Peˍtruˆ k'oˆ ve, Jawˇ mawˇ-oˬ, chaw awˬ moˍ lonˉ nawˬ hta‸ buiˆ heuˆ ca‸ heuˆ chehˇ leh cehˍ cehˍ nuˆ nuˆ te chehˇ ve maˇ heˆ laˇ teh‸ k'oˆ piˇ ve yoˬ. 46 Yeˍsuˆ lehˬ, Chaw teˇ g'aˇ g'aˇ ngaˬ hta‸ htawˇ ve yoˬ. Awˬ lawn k'o, ngaˬ awˬ hk'aw lo kanˇ paˆ tawˆ k'ai peuˬ ve hta‸ ngaˬ shiˍ ve yoˬ teh‸ k'oˆ ve yoˬ. 47 Yaˇ miˇ oˇ ve lehˬ, va‸ taˍ maˇ hpeh‸ ve hta‸ shiˍ ve teˇ yanˇ, cheˇ ve awˬ hk'aw lo Yeˍsuˆ mehˆ g'uˇ suhˍ boˆ sheˬ leh, aˬ hto‸ ma pa taw yawˇ hta‸ htawˇ ve maˇ k'oˆ, oˇ teˇ hkui awˬ hk'aw lo yawˇ hk'aˬ hk'e te na-e la ve awˬ lawn maˇ k'oˆ, chaw chi ma ve mehˆ g'uˇ suhˍ yawˇ hta‸ k'oˆ piˇ ve yoˬ. 48 Yeˍsuˆ lehˬ, Yaˇ miˇ-oˬ, nawˬ yonˍ ve teˇ ceuˬ lehˬ nawˬ hta‸ na-e la piˇ peuˬ. Dawˇ sha ve awˬ hk'aw lo k'o‸-e loˬ teh‸, yawˇ hta‸ k'oˆ piˇ ve yoˬ. 49 Yawˇ oˇ hk'e k'oˆ chehˇ htaˇ, bon yehˬ awˬ hoˉ teˇ g'aˇ ve yehˬ lo laˬ ve chaw teˇ g'aˇ k'oˆ ve, Nawˬ ve yaˇ miˇ suh peuˬ. Saˍ la‸ hta‸ taˇ k'aw‸ sho‸ sha‸ piˇ loˬ teh‸ k'oˆ piˇ ve yoˬ. 50 Tawˇ hkawˇ oˇ ve hta‸ Yeˍsuˆ g'a kaˇ htaˇ, bon yehˬ awˬ hoˉ teˇ g'aˇ hta‸, Taˇ kawˆ. Yonˍ ve tiˉ te-o. Yawˇ na-e la tuˬ yoˬ teh‸ k'oˆ piˇ ve yoˬ. 51 Yehˬ lo yawˇ gaˬ la ve teˇ yanˇ, Peˍtruˆ, Yoˇhanˬ, Yaˍkoˆ leh, yaˇ miˇ ve awˬ pa awˬ e hta‸ maˇ heˆ k'o, yawˇ geh teˇ geh yehˬ hk'aw lo teˇ g'aˇ hta‸ ka‸ maˇ lo‸-e tcuh. 52 Yaˇ miˇ hta‸ pa taw chaw hk'a peu-eˬ hawˬ leh paˆ hawˬ chehˇ ve yoˬ. Yeˍsuˆ lehˬ, Taˇ hawˬ. Yawˇ suh ve maˇ heˆ. Zuh‸ muiˉ k'a chehˇ ve yoˬ teh‸ k'oˆ ve yoˬ. 53 Yaˇ miˇ oˇ ve suh peuˬ ve hta‸ yawˇ hui shiˍ ve pa taw, yawˇ hui hta‸ g'uiˬ ve yoˬ. 54 Yaˇ miˇ ehˉ ve la‸ sheh hta‸ yawˇ vawˆ leh, Yaˇ miˇ ehˉ-oˬ, tu la-o teh‸ kuˬ leh k'oˆ piˇ ve yoˬ. 55 Oˇ htaˇ, yawˇ ve co ha k'aw‸ la leh, teˇ cawˬ haˉ yawˇ tu la ve yoˬ. Yawˇ hta‸ caˇ tuˬ caˍ piˇ-oˆ teh‸, Yeˍsuˆ k'oˆ piˇ ve yoˬ. 56 Yaˇ ehˉ ve awˬ pa awˬ e lehˬ, anˇ jaˇ ve yoˬ. Hpeh‸ la ve awˬ lawn chi, chaw teˇ g'aˇ hta‸ ka‸ maˇ g'a hto piˇ tuˬ, yawˇ yawˇ huiˉ maˬ hta‸ tawˇ piˇ taˍ ve yoˬ.

Luˉka‸ 9

1 Oˇ ve hk'aw‸ nawˉ, tcuh yaˇ teˇ chi nyiˇ g'aˇ hta‸ yawˇ kuˬ yuˬ leh, neˇ hk'a peu-eˬ hta‸ g'aˇ tuˬ maˇ k'oˆ, naˬ ve gawˬ ve teˇ hpaˍ hta‸ gu na-e piˇ tuˬ maˇ k'oˆ, yawˇ hui hta‸ kanˇ paˆ piˇ ve yoˬ. 2 G'uiˬ sha ve mvuhˇ miˬ awˬ lawn maˍ piˇ tuˬ maˇ k'oˆ, chaw naˬ hta‸ gu na-e piˇ tuˬ maˇ k'oˆ, yawˇ yawˇ hui hta‸ k'ai tcuh ve yoˬ. 3 Yawˇ k'oˆ ve, Ya‸ k'aw k'aˉ awˬ pon te‸ chiˉ taˇ yuˬ k'ai. Juˇ fuiˍ, miˉ chaw, hkaoˍ monˇ leh hpu taˇ yuˬ k'ai. 4 Yehˬ hk'aˬ ve teˇ yehˬ awˬ hk'aw lo nawˬ hui lo‸-e ve maˇ k'oˆ, venˇ oˇ ve awˬ hk'aw lo maˇ tawˆ k'ai sheˍ ve ceh ceh, yehˬ oˇ ve awˬ hk'aw lo chehˇ taˍ-o‸. 5 Venˇ oˇ ve awˬ hk'aw lo nawˬ hui tawˆ k'ai ve teˇ yanˇ, nawˬ hui hta‸ maˇ ha‸ yuˬ ve chaw hui ve awˬ lawn shu hta‸ shaˉ hkiˆ te maˍ piˇ tuˬ, hkui taw k'aw hta‸ ngawˉ taˍ ve je‸ meu-e hta‸ hpi baˬ taˉ-oˆ teh‸ k'oˆ piˇ ve yoˬ. 6 Hk'e te leh yawˇ hui tawˆ k'ai leh, teˇ hk'aˆ peuˬ teˇ hk'aˆ lo ha lehˬ ve bon hkawˇ ca maˍ piˇ leh, teˇ kaˬ le le lo chaw naˬ teˇ hpaˍ hta‸ gu na-e piˇ ve yoˬ. 7 Chi hk'e hpeh‸ la ve awˬ lawn hk'a peu-eˬ hta‸ jawˇ mawˇ Heˍroˆ g'a kaˇ htaˇ, yawˇ a ciˉ ka‸ dawˇ maˇ tawˆ ve yoˬ. Awˬ lawn k'o, chaw teˇ hpaˍ hpaˍ lehˬ, Yoˇhanˬ suh kuiˬ lo k'aw‸ te‸ tu la peuˬ teh‸ k'oˆ ve yoˬ. 8 Teˇ hpaˍ hpaˍ lehˬ, Eˇliˇya‸ tawˆ la peuˬ teh‸ k'oˆ ve yoˬ. Awˬ kaˍ awˬ nu teˇ hpaˍ hpaˍ lehˬ, Aˬ sho-eˬ htaˇ ve G'uiˬ sha ve tcuh kaˍ paˍ teˇ g'aˇ g'aˇ k'aw‸ te‸ la peuˬ teh‸ k'oˆ ve yoˬ. 9 Heˍroˆ k'oˆ ve, Yoˇhanˬ hta‸ ngaˬ oˉ k'oˍ tawˆ peuˬ. Chi taw taw te chehˇ ve awˬ lawn hta‸ ngaˬ g'a kaˇ ve chaw chi teˇ g'aˇ lehˬ, a shu leh naˍ teh‸ k'oˆ leh, Yeˍsuˆ hta‸ g'a mawˬ tuˬ ca ve yoˬ. 10 Oˇ htaˇ, tcuh yaˇ hui k'aw‸ gaˬ la leh, yawˇ hui hk'a te taˍ ve teˇ hpaˍ awˬ lawn Yeˍsuˆ hta‸ k'aoˍ maˍ piˇ ve yoˬ. Yawˇ lehˬ, yawˇ hui hta‸ ceh tiˉ ta‸ iˉ kuˬ yuˬ leh, Behˇsehˇdaˆ teh‸ k'oˆ ve venˇ lo k'ai ve yoˬ. 11 Chaw awˬ moˍ lonˉ teˇ hpaˍ g'a shiˍ htaˇ, yawˇ awˬ hk'aˇ suh k'ai ve yoˬ. Yawˇ yawˇ hui hta‸ ha‸ yuˬ leh, G'uiˬ sha ve mvuhˇ miˬ awˬ lawn maˍ piˇ leh, gu na-e piˇ tuˬ loˍ ve chaw teˇ hpaˍ hta‸ yawˇ gu na-e piˇ ve yoˬ. 12 Mvuhˇ hpeu‸ la htaˇ tcuh yaˇ teˇ chi nyiˇ g'aˇ yawˇ geh laˬ leh k'oˆ ve, Chaw awˬ moˍ lonˉ chi lehˬ, awˬ paˇ awˬ kui lo cawˬ ve hk'aˆ hk'aw pa hk'aw lo ca haˉ leh, caˇ tuˬ dawˬ tuˬ ca vuiˬ caˇ-e tuˬ, yawˇ hui hta‸ hpehˇ piˇ-oˆ. Awˬ lawn k'o, choˬ kaˬ lehˬ heh puiˉ hk'aw hpeh‸ ve yoˬ teh‸ yawˇ hta‸ k'oˆ piˇ ve yoˬ. 13 Ya‸ hk'aˇ yawˇ lehˬ, Nawˬ hui teˇ hpaˍ yawˇ hui hta‸ caˍ piˇ-oˆ teh‸, yawˇ hui hta‸ k'aw‸ k'oˆ piˇ ve yoˬ. Yawˇ hui k'aw‸ k'oˆ ve, Chaw chi ma ve awˬ pon ngaˬ hui caˇ tuˬ dawˬ tuˬ maˇ ca vuiˬ ve k'o, ngaˬ hui geh hkaoˍ monˇ ngaˇ diˬ leh ngaˇ nyiˇ hkeh ceh tiˉ cawˬ ve yoˬ teh‸ k'oˆ piˇ ve yoˬ. 14 (Awˬ lawn k'o, hawˉ hk'aˆ ceh tiˉ ngaˇ hinˉ g'aˇ hk'e cawˬ ve yoˬ.) Oˇ htaˇ Yeˍsuˆ lehˬ, Chaw chi teˇ hpaˍ hta‸, teˇ moˍ ve ngaˇ chi g'aˇ hk'e, awˬ moˍ awˬ moˍ te mui tcuh-o teh‸, yawˇ yawˇ ve awˬ la‸ g'awˇ hui hta‸ k'oˆ piˇ ve yoˬ. 15 Yawˇ hui htawˇ oˇ hk'e te leh, chaw hk'a peu-eˬ hta‸ mui tcuh ve yoˬ. 16 Yeˍsuˆ lehˬ hkaoˍ monˇ oˇ ve ngaˇ diˬ leh ngaˇ oˇ ve nyiˇ hkeh hta‸ yuˬ peuˬ hk'aw‸ nawˉ, mvuhˇ naw ma lo chiˇ nyi leh bon hta‸ chiˇ mvuh ve yoˬ. Oˇ ve teˇ hpaˍ hta‸ yawˇ hk'eh‸ sheˬ leh, chaw chi ma ve mehˆ g'uˇ suhˍ ca teh piˇ tuˬ, awˬ la‸ g'awˇ teˇ hpaˍ hta‸ piˇ ve yoˬ. 17 Oˇ htaˇ, chaw hk'a peu-eˬ hk'a bvuhˆ g'a caˇ ve yoˬ. Yawˇ hui caˇ leuˉ ve teˇ hpaˍ hta‸ k'aw‸ g'awˆ ve teˇ yanˇ, teˇ chi nyiˇ hk'awˍ lawˇ g'a ve yoˬ. 18 Teˇ pawˆ htaˇ, Yeˍsuˆ teˇ g'aˇ tiˉ bon lawˬ chehˇ ve teˇ yanˇ, awˬ la‸ g'awˇ teˇ hpaˍ htawˇ yawˇ geh chehˇ taˍ ve yoˬ. Oˇ htaˇ, yawˇ yawˇ hui hta‸ na nyi ve, Chaw chi ma ve ngaˬ hta‸ a shu hpeh‸ ve teh‸ k'oˆ ve le. 19 Yawˇ hui k'aw‸ k'oˆ ve, Chaw teˇ hpaˍ hpaˍ nawˬ hta‸ baˆtiˆsaˬ piˇ paˍ Yoˇhanˬ yoˬ teh‸ k'oˆ ve, teˇ hpaˍ hpaˍ Eˇliˇya‸ yoˬ teh‸ k'oˆ ve, peuˬ leh teˇ hpaˍ hpaˍ aˬ sho-eˬ htaˇ ve G'uiˬ sha ve tcuh kaˍ paˍ teˇ g'aˇ g'aˇ k'aw‸ te‸ tu la ve teh‸ nawˬ hta‸ k'oˆ ve yoˬ. 20 Oˇ htaˇ Yeˍsuˆ lehˬ, Nawˬ hui teˇ hpaˍ ngaˬ hta‸ a shu hpeh‸ ve teh‸ k'oˆ ve le teh‸, yawˇ hui hta‸ na nyi ve teˇ yanˇ, Nawˬ lehˬ G'uiˬ sha ve Hkri‸ hpeh‸ ve yoˬ teh‸ Peˍtruˆ k'aw‸ k'oˆ piˇ ve yoˬ. 21 Awˬ lawn chi chaw teˇ g'aˇ hta‸ ka‸ maˇ g'a hto piˇ tuˬ, yawˇ yawˇ hui hta‸ k'oˆ piˇ leh, tawˇ hehnˇ chaweh piˇ taˍ ve yoˬ. 22 Peuˬ leh yawˇ k'oˆ ve, Chaw yaˇ ve Yaˇ hpu lehˬ, laiˉ ceuˬ g'a tu‸ g'a hkanˍ tuˬ yoˬ. Awˬ hoˉ chaw mawˇ teˇ hpaˍ, paw hkuˇ lonˉ teˇ hpaˍ leh, li‸ bvuh‸ paˍ teˇ hpaˍ yawˇ hta‸ chiˇ baˬ leh tiˇ pehˍ tuˬ yoˬ. Shehˆ nyi teˇ nyi gaˬ k'o, yawˇ k'aw‸ te‸ tu la tuˬ yoˬ teh‸ k'oˆ piˇ ve yoˬ. 23 Chi hk'oˆ ka‸, yawˇ hui hk'a peu-eˬ hta‸ yawˇ k'oˆ piˇ ve, Chaw teˇ g'aˇ g'aˇ ngaˬ hk'aˇ suh laˬ gaˇ ve k'o, a shu yawˇ ve a loˍ hta‸ baˬ taˉ leh, teˇ nyi le le a shu yawˇ ve la‸ ka hta‸ taˆ leh ngaˬ hk'aˇ suh laˬ-o‸. 24 Awˬ lawn k'o, hk'aˬ ve chaw teˇ g'aˇ maˇ k'oˆ, a shu yawˇ ve a sha‸ hta‸ ponˬ piˇ gaˇ ve k'o, yawˇ ve a sha‸ shonˇ tuˬ yoˬ. Ya‸ hk'aˇ, hk'aˬ ve chaw teˇ g'aˇ maˇ k'oˆ, ngaˬ awˬ pon a sha‸ shonˇ ve k'o, yawˇ ve a sha‸ hta‸ ponˬ piˇ tuˬ yoˬ. 25 Chaw teˇ g'aˇ g'aˇ miˬ guiˬ hk'a peu-eˬ hta‸ g'a htawˇ, yawˇ ve a sha‸ luˬ k'ai shonˇ k'ai ve k'o, aˬ hto‸ ma awˬ bon cawˬ le. 26 Awˬ lawn k'o, chaw hk'aˬ ve teˇ g'aˇ maˇ k'oˆ, ngaˬ hta‸ leh ngaˬ ve tawˇ hkawˇ hta‸ ya‸ taw ve k'o, chaw yaˇ ve Yaˇ hpu lehˬ yawˇ ve awˬ me‸ awˬ hponˇ, Awˬ pa ve awˬ me‸ awˬ hponˇ leh da‸ kehˬ ve mvuhˇ naw ma tcuh yaˇ hui ve awˬ me‸ awˬ hponˇ awˬ hk'aw lo laˬ ve teˇ yanˇ, chaw oˇ ve hta‸ ya‸ taw tuˬ yoˬ. 27 Ngaˬ nawˬ hui hta‸ awˬ tehˬ awˬ na k'oˆ laˇ ve, choˬ kaˬ lo huˉ chehˇ ve chaw teˇ hpaˍ hpaˍ lehˬ, G'uiˬ sha ve mvuhˇ miˬ hta‸ maˇ g'a mawˬ sheˍ ve ceh ceh, maˇ g'a suh teh‸ yawˇ k'oˆ piˇ ve yoˬ. 28 Yeˍsuˆ oˇ hk'e k'oˆ peuˬ hk'aw‸ nawˉ, hiˉ nyi hk'e gaˬ la leh, yawˇ lehˬ Peˍtruˆ, Yoˇhanˬ leh Yaˍkoˆ hui hta‸ shiˍ veu leh bon lawˬ tuˬ hk'aw pui hk'oˆ lo taˆ-e ve yoˬ. 29 Yawˇ bon lawˬ chehˇ ve teˇ yanˇ, yawˇ ve mehˆ hpfuhˇ awˬ ho‸ awˬ han pa leh, yawˇ ve veu‸ k'aˇ htawˇ, hpu jaˇ leh awˬ g'euˆ ba jaˇ ve yoˬ. 30 Oˇ htaˇ, Moˉseˍ leh Eˇliˇya‸ lehˬ, awˬ me‸ awˬ hponˇ awˬ hk'aw lo tawˆ la leh, 31 Yeˍruˆsaˍlehnˍ venˇ awˬ hk'aw lo Yeˍsuˆ yawˇ g'a suh tuˬ ve awˬ lawn yawˇ geh na‸ uˉ te da‸ ve yoˬ. 32 Peˍtruˆ leh yawˇ ve awˬ chawˇ nyiˇ g'aˇ zuh‸ muiˉ geu‸ jaˇ leh zuh‸ muiˉ jo ve yoˬ. Ya‸ hk'aˇ, yawˇ hui hk'a deh‸ k'aw‸ nawˇ la leh, Yeˍsuˆ ve awˬ me‸ awˬ hponˇ leh, yawˇ geh huˉ taˍ ve chaw nyiˇ g'aˇ hta‸ g'a mawˬ ve yoˬ. 33 Chaw oˇ ve nyiˇ g'aˇ Yeˍsuˆ hta‸ hpaˆ da‸ k'ai chehˇ ve teˇ yanˇ, Peˍtruˆ yawˇ hta‸ k'oˆ piˇ ve, Jawˇ mawˇ-oˬ, ngaˬ hui choˬ kaˬ chehˇ ve lehˬ, da‸ ve yoˬ. Ngaˬ hui aˉ po k'o shehˆ shiˍ te tuˬ yoˬ. Nawˬ awˬ pon teˇ shiˍ, Moˉseˍ awˬ pon teˇ shiˍ leh Eˇliˇya‸ awˬ pon teˇ shiˍ te tuˬ yoˬ teh‸, maˇ nawˇ maˇ hteh hpeh‸ ve awˬ hk'aw lo k'oˆ ve yoˬ. 34 Yawˇ chi hk'e k'oˆ chehˇ ve teˇ yanˇ, moˬ yawˇ hui hta‸ hoˆ taˍ beh taˍ ve yoˬ. Moˬ yawˇ hui hta‸ hoˆ taˍ ve teˇ yanˇ, yawˇ hui kawˆ jaˇ ve yoˬ. 35 Moˬ oˇ ve awˬ hk'aw lo awˬ hkawˇ bvuhˬ la leh k'oˆ ve, Chaw chi lehˬ, ngaˬ leuˆ yuˬ taˍ ve ngaˬ ve Yaˇ hpu hpeh‸ ve yoˬ. Yawˇ ve tawˇ hkawˇ hta‸ na yuˬ-o‸ teh‸ k'oˆ ve yoˬ. 36 Awˬ hkawˇ oˇ ve bvuhˬ la ve teˇ yanˇ, Yeˍsuˆ teˇ g'aˇ tiˉ chehˇ taˍ ve hta‸ yawˇ hui g'a mawˬ ve yoˬ. yawˇ hui ta‸ iˉ chehˇ taˍ leh, yawˇ hui g'a mawˬ ve teˇ hpaˍ awˬ lawn, awˬ nyi awˬ haˉ oˇ ve teˇ hpaˍ awˬ hk'aw lo chaw teˇ g'aˇ hta‸ ka‸ yawˇ hui maˇ hto piˇ. 37 Awˬ hk'aw‸ nawˉ teˇ nyi yawˇ hui hk'aw pui hk'oˆ lo ya‸ la htaˇ, chaw awˬ moˍ lonˉ yawˇ hta‸ ca ha‸ la ve yoˬ. 38 Oˇ htaˇ, chaw awˬ moˍ lonˉ awˬ hk'aw lo chehˇ ve chaw teˇ g'aˇ kuˬ leh k'oˆ ve, Saˍ la‸-oˬ, ngaˬ ve yaˇ paˍ hta‸ nyi laˇ tuˬ, ngaˬ nawˬ hta‸ lawˬ hkawˉ ve yoˬ. Awˬ lawn k'o, yawˇ lehˬ ngaˬ ve yaˇ tiˍ hpeh‸ ve yoˬ. 39 Yawˇ neˇ geh leh, neˇ yawˇ hta‸ yuˬ tiˍ taˍ ve teˇ yanˇ, yawˇ teˇ cawˬ haˉ kuˬ leh, paw‸ hpeuˆ leh awˬ fuˇ tawˆ la ve yoˬ. Yaˇ ehˉ naˬ jaˇ htaˇ hk'a gaˬ g'aˇ hte‸ fawˉ mehˍ piˇ peuˬ htaˇ heh‸ tawˆ k'ai ve yoˬ. 40 Neˇ oˇ ve hta‸ g'a‸ k'oˬ tuˬ nawˬ ve awˬ la‸ g'awˇ hui hta‸ ngaˬ lawˬ hkawˉ ve htawˇ, yawˇ hui te maˇ g'a teh‸ yawˇ k'oˆ ve yoˬ. 41 Yeˍsuˆ k'aw‸ k'oˆ ve, Yonˍ ve maˇ cawˬ leh nyi ma hpfuhˆ puiˉ ve chaw chi teˇ co-e-oˬ, ngaˬ nawˬ hui geh hk'aˬ maw g'a chehˇ leh g'a yeunˇ hkanˍ tuˬ sheˍ le. Nawˬ ve yaˇ paˍ hta‸ choˬ kaˬ yuˬ laˬ-o‸ teh‸ k'oˆ piˇ ve yoˬ. 42 Yaˇ paˍ oˇ ve laˬ chehˇ ve teˇ yanˇ ka‸, neˇ yawˇ hta‸ ca‸ baˬ leh paw‸ hpeuˆ piˇ lawˬ ve yoˬ. Yeˍsuˆ lehˬ, neˇ cha‸ chiˆ oˇ ve hta‸ deˇ leh, yaˇ ehˉ hta‸ gu na-e piˇ peuˬ hk'aw‸ nawˉ, awˬ pa hta‸ k'aw‸ chiˇ a‸ piˇ ve yoˬ. 43 Oˇ htaˇ chaw hk'a peu-eˬ lehˬ, G'uiˬ sha ve uiˍ jaˇ mvuh jaˇ ve kanˇ paˆ hta‸ g'a mawˬ leh anˇ ve yoˬ. 44 Yawˇ hk'a te ve kanˉ teˇ hpaˍ hta‸ chaw hk'a peu-eˬ anˇ chehˇ ve teˇ yanˇ, yawˇ ve awˬ la‸ g'awˇ teˇ hpaˍ hta‸ yawˇ k'oˆ piˇ ve, Tawˇ hkawˇ chi teˇ hpaˍ hta‸ hk'a deh‸ na leh tawnˇ taˍ-o‸. Chaw yaˇ ve Yaˇ hpu lehˬ, chaw yaˇ hui ve la‸ sheh awˬ hk'aw lo chiˇ a‸ ve hta‸ g'a hkanˍ ve awˬ yanˇ neˇ la peuˬ teh‸ k'oˆ ve yoˬ. 45 Tawˇ hkawˇ oˇ ve hta‸ yawˇ hui na maˇ g'a. Yawˇ hui na maˇ g'a tuˬ faˉ taˍ ve yoˬ. Ya‸ hk'aˇ awˬ lawn oˇ ve hta‸ yawˇ hui na nyi maˇ haˆ. 46 Oˇ htaˇ, yawˇ hui awˬ hk'aw lo hk'aˬ ve teˇ g'aˇ shu a‸ kehˉ uiˍ ve le teh‸, teˇ g'aˇ leh teˬ g'aˇ tawˇ g'awˬ da‸ ve yoˬ. 47 Yeˍsuˆ lehˬ, yawˇ hui ve nyi ma hk'aw dawˇ taˍ ve teˇ hpaˍ hta‸ shiˍ ve teˇ yanˇ, yaˇ ehˉ teˇ g'aˇ hta‸ yawˇ yuˬ leh, yawˇ awˬ paˇ lo huˉ tcuh taˍ peuˬ hk'aw‸ nawˉ yawˇ hui hta‸ k'oˆ piˇ ve, 48 Yaˇ ehˉ chi hta‸ ngaˬ ve awˬ meh awˬ hk'aw lo ha‸ yuˬ ve chaw hk'aˬ ve teˇ g'aˇ maˇ k'oˆ, ngaˬ hta‸ ha‸ yuˬ ve yoˬ. Ngaˬ hta‸ ha‸ yuˬ ve chaw lehˬ ngaˬ hta‸ peu laˇ shehˍ hpaˇ hta‸ ha‸ yuˬ ve yoˬ. Awˬ lawn k'o, nawˬ hui awˬ hk'aw lo shu a‸ kehˉ i ve chaw teˇ g'aˇ lehˬ, shu a‸ kehˉ uiˍ ve chaw teˇ g'aˇ hpeh‸ ve yoˬ teh‸ k'oˆ ve yoˬ. 49 Oˇ htaˇ Yoˇhanˬ k'aw‸ k'oˆ ve, Jawˇ mawˇ-oˬ, chaw teˇ g'aˇ nawˬ ve awˬ meh hta‸ cuˇ leh neˇ teˇ hpaˍ hta‸ g'a‸ k'oˬ chehˇ ve hta‸ ngaˬ hui g'a mawˬ ve yoˬ. Yawˇ ngaˬ hui geh teˇ geh laˬ ve chaw maˇ heˆ ve pa taw, ngaˬ hui yawˇ hta‸ tawˍ taˍ ve yoˬ teh‸ k'oˆ piˇ ve yoˬ. 50 Yeˍsuˆ k'aw‸ k'oˆ ve, Yawˇ hta‸ taˇ tawˍ taˍ. Nawˬ hui ve canˇ paˍ hpawˇ maˇ chehˇ ve chaw teˇ g'aˇ lehˬ, nawˬ hui hpawˇ chehˇ ve chaw hpeh‸ ve yoˬ teh‸ yawˇ hta‸ k'oˆ piˇ ve yoˬ. 51 Mvuhˇ naw ma lo yawˇ hta‸ chiˇ taˆ-e ve awˬ nyi awˬ haˉ neˇ la ve teˇ yanˇ, Yeˍruˆsaˍlehnˍ venˇ lo k'ai tuˬ yawˇ dawˇ cheˆ taˍ leh k'ai ve yoˬ. 52 Yawˇ awˬ g'uˇ suhˍ tcuh yaˇ teˇ hpaˍ hta‸ k'ai tcuh leh, yawˇ awˬ pon gu taˍ tuˬ, Saˍmaˍriˆ chaw hui ve hk'aˆ teˇ hk'aˆ awˬ hk'aw lo yawˇ hui lo‸-e ve yoˬ. 53 Yawˇ Yeˍruˆsaˍlehnˍ venˇ lo k'ai chehˇ ve hta‸ pa taw, chaw oˇ ve teˇ hpaˍ yawˇ hta‸ maˇ ha‸ yuˬ. 54 Yawˇ ve awˬ la‸ g'awˇ Yaˍkoˆ leh Yoˇhanˬ chi hta‸ g'a mawˬ ve teˇ yanˇ, Jawˇ mawˇ-oˬ, mvuhˇ naw ma lo aˬ miˍ ce la leh yawˇ hui hta‸ to‸ baˬ tuˬ, nawˬ ngaˬ huiˉ maˬ hta‸ te tcuh laˇ gaˇ leh laˇ teh‸ k'oˆ piˇ ve yoˬ. 55 Yeˍsuˆ k'aw‸ hpfuhˆ nyi leh yawˇ huiˉ maˬ hta‸ deˇ ve yoˬ. 56 Peuˬ leh yawˇ hui awˬ kaˍ awˬ nu teˇ hk'aˆ lo k'ai ve yoˬ. 57 Yawˇ hui ya‸ k'aw k'aˉ lo k'ai chehˇ htaˇ, chaw teˇ g'aˇ lehˬ, Nawˬ hk'aˬ lo k'ai ve maˇ k'oˆ, nawˬ hk'aˇ suh ngaˬ k'ai tuˬ yoˬ teh‸ yawˇ hta‸ k'oˆ piˇ ve yoˬ. 58 Yeˍsuˆ k'oˆ ve, Heh hpuiˇ teˇ hpaˍ lehˬ, awˬ k'oˍ cawˬ ve yoˬ. Mvuhˇ hpe lo poˬ ve ngaˆ teˇ hpaˍ htawˇ, zuh‸ kuiˬ cawˬ ve yoˬ. Ya‸ hk'aˇ, chaw yaˇ ve Yaˇ hpu lehˬ, oˉ k'oˍ taˍ kuiˬ ka‸ maˇ cawˬ teh‸ yawˇ hta‸ k'oˆ piˇ ve yoˬ. 59 Awˬ kaˍ awˬ nu chaw teˇ g'aˇ hta‸, Ngaˬ hk'aˇ suh laˬ-o‸ teh‸ yawˇ k'oˆ piˇ ve teˇ yanˇ, chaw oˇ ve lehˬ, Ngaˬ ve awˬ pa hta‸ awˉ lawˉ ca tuˍ piˇ tuˬ a hkaw-anˬ a ciˉ pe‸ laˇ sheˍ teh‸ k'oˆ piˇ ve yoˬ. 60 Yeˍsuˆ k'aw‸ k'oˆ ve, Chaw suh teˇ hpaˍ lehˬ, yawˇ hui hk'aˇ yawˇ hui chaw suh hta‸ tuˍ piˇ lawˬ-o‸. Ya‸ hk'aˇ nawˬ awˍ hk'e k'ai leh, G'uiˬ sha ve mvuhˇ miˬ awˬ lawn ca maˍ piˇ-oˆ teh‸, yawˇ hta‸ k'oˆ piˇ ve yoˬ. 61 Awˬ kaˍ awˬ nu chaw teˇ g'aˇ lehˬ, Jawˇ mawˇ-oˬ, nawˬ hk'aˇ suh ngaˬ k'ai tuˬ yoˬ. Ya‸ hk'aˇ, awˉ lawˉ htaˇ ngaˬ yehˬ hk'aw ve chaw teˇ hpaˍ hta‸ ca hto piˇ taˉ tuˬ a hkaw-anˬ a ciˉ pe‸ laˇ sheˍ teh‸ k'oˆ ve yoˬ. 62 Yeˍsuˆ k'oˆ ve, Laˇ hpuiˇ tuˇ hta‸ vawˆ taˍ leh hk'aw‸ nawˉ hpfuhˆ nyi ve chaw lehˬ, G'uiˬ sha ve mvuhˇ miˬ hta‸ maˇ keunˍ teh‸ yawˇ hta‸ k'oˆ piˇ ve yoˬ.

Luˉka‸ 10

1 Oˇ ve hk'aw‸ nawˉ Jawˇ mawˇ Yeˍsuˆ lehˬ, awˬ kaˍ awˬ nu awˬ la‸ g'awˇ suhˍ chi g'aˇ hta‸ leuˆ yuˬ leh, yawˇ awˬ to k'ai tuˬ ve venˇ hk'aˆ teˇ kaˬ le le lo nyiˇ g'aˇ teˇ kaˬ nyiˇ g'aˇ teˇ kaˬ yawˇ awˬ g'uˇ suhˍ k'ai tcuh ve yoˬ. 2 Yawˇ yawˇ hui hta‸ k'oˆ piˇ ve, Caˬ g'eu‸ tuˬ cawˬ maˇ jaˇ ve ka‸, caˬ g'eu‸ shehˍ hpaˇ hui a ciˉ ceh tiˉ cawˬ ve yoˬ. Hk'e te leh, yawˇ ve caˬ g'eu‸ kuiˬ lo caˬ g'eu‸ shehˍ hpaˇ peu laˇ tuˬ, Awˬ shehˍ hpaˇ geh bon lawˬ-o‸. 3 Nawˬ hui k'ai loˬ. Nawˬ hui yawˬ ehˉ hk'e hpeh‸ leh, veˬ awˬ moˍ awˬ hk'aw lo ngaˬ nawˬ hui hta‸ k'ai tcuh ve yoˬ. 4 Hpu guˉ pi, miˉ chaw leh hkuiˉ nuˆ teˇ hpaˍ hta‸ taˇ pfuhˇ k'ai. Ya‸ k'aw k'aˉ lo k'ai chehˇ htaˇ, shu hta‸ hpuˇ da‸ ve teˇ yanˇ tawˇ taˇ yaw. 5 Yehˬ hk'aˬ ve teˇ yehˬ awˬ hk'aw lo maˇ k'oˆ, nawˬ hui lo‸-e ve teˇ yanˇ, Yehˬ chi awˬ hk'aw lo dawˇ sha gaˇ sha ve teˇ ceuˬ cawˬ piˇ-oˆ teh‸ awˉ lawˉ k'oˆ piˇ-oˆ. 6 Yehˬ oˇ ve awˬ hk'aw lo dawˇ sha gaˇ sha ve yaˇ teˇ g'aˇ g'aˇ cawˬ ve k'o, nawˬ ve dawˇ sha gaˇ sha ve teˇ ceuˬ yawˇ awˬ hk'oˆ gaˬ tuˬ yoˬ. Maˇ cawˬ ve k'o, nawˬ hui geh k'aw‸ k'aw‸ la tuˬ yoˬ. 7 Yehˬ oˇ ve awˬ hk'aw lo ceh tiˉ chehˇ taˍ leh, yawˇ hui te caˍ te taw laˇ ve caˇ tuˬ dawˬ tuˬ hta‸ caˇ-oˆ. Awˬ lawn k'o, kanˉ te shehˍ hpaˇ lehˬ, awˬ hpfuhˇ g'a cawˇ ve yoˬ. Teˇ yehˬ peuˬ teˇ yehˬ lo taˇ jiˆ k'ai. 8 Venˇ hk'aˬ ve teˇ venˇ awˬ hk'aw lo nawˬ hui lo‸-e ve maˇ k'oˆ, yawˇ hui nawˬ hui hta‸ ha‸ yuˬ laˇ ve k'o, nawˬ hui mehˆ g'uˇ suhˍ hk'a teh laˇ ve caˇ tuˬ hta‸ caˇ-oˆ. 9 Oˇ kaˬ lo naˬ ve gawˬ ve chaw teˇ hpaˍ hta‸ gu na-e piˇ-oˆ. G'uiˬ sha ve mvuhˇ miˬ lehˬ, nawˬ hui geh gaˬ la paˇ neˇ peuˬ teh‸, yawˇ hui hta‸ k'oˆ piˇ-oˆ. 10 Venˇ hk'aˬ ve teˇ venˇ awˬ hk'aw lo nawˬ hui lo‸-e ve maˇ k'oˆ, yawˇ hui nawˬ hui hta‸ maˇ ha‸ yuˬ laˇ ve k'o, venˇ oˇ ve ya‸ k'aw hpuiˇ lo huˉ taˍ leh chi hk'e k'oˆ piˇ-oˆ. 11 Ngaˬ hui ve hkui taw k'aw hta‸ ngawˉ taˍ ve, nawˬ hui ve venˇ awˬ hk'aw ve je‸ meu-e ka‸ nawˬ hui awˬ hk'oˆ hta‸ gaˬ la tuˬ, ngaˬ hui shiˆ baˬ taˉ ve yoˬ. Ya‸ hk'aˇ, G'uiˬ sha ve mvuhˇ miˬ nawˬ hui awˬ paˇ lo gaˬ la peuˬ ve hta‸ shiˍ-o‸ teh‸ yawˇ hui hta‸ k'oˆ piˇ-oˆ. 12 Ngaˬ nawˬ hui hta‸ k'oˆ laˇ ve, suhˉ jehˬ ve awˬ nyi awˬ hk'aw lo, venˇ oˇ ve teˇ venˇ lehˬ, Sawˉdonˍ venˇ a‸ kehˉ g'a hkanˍ tuˬ yoˬ. 13 Hkawˇraˍsenˍ venˇ-oˬ, nawˬ g'a dawˇ haˍ jaˇ tuˬ yoˬ. Behˇsehˇdaˆ venˇ-oˬ, nawˬ htawˇ g'a dawˇ haˍ jaˇ tuˬ yoˬ. Awˬ lawn k'o, nawˬ hui awˬ hk'aw lo te peuˬ ve kanˉ uiˍ ve teˇ hpaˍ lehˬ, Tuˇruˆ venˇ leh Siˉdonˍ venˇ awˬ hk'aw lo te ve hk'e k'o, yawˇ hui lehˬ aˬ sho-eˬ htaˇ ka‸ meh htuˉ pui hpa hta‸ veu‸ deh leh, hk'aw‸ laˉ hk'aw mui taˍ leh venˇ baˆ hta‸ dawˇ hpfuhˆ tuˬ yoˬ. 14 Suhˉ jehˬ ve teˇ yanˇ, nawˬ hui lehˬ Tuˇruˆ venˇ leh Siˉdonˍ venˇ a‸ kehˉ g'a hkanˍ tuˬ yoˬ. 15 Kaˍpeˍneˍonˍ venˇ-oˬ, nawˬ lehˬ mvuhˇ naw ma lo hk'a gaˬ chiˇ taˆ-e ve hta‸ g'a hkanˍ tuˬ teh‸ dawˇ ve laˇ. Nawˬ lehˬ, suh mvuhˇ miˬ hk'a gaˬ ya‸-e tuˬ yoˬ. 16 Nawˬ hui ve tawˇ hkawˇ hta‸ na yuˬ ve chaw lehˬ, ngaˬ ve tawˇ hkawˇ hta‸ na yuˬ ve yoˬ. Nawˬ hui hta‸ chiˇ baˬ ve chaw lehˬ, ngaˬ hta‸ chiˇ baˬ ve yoˬ. Ngaˬ hta‸ chiˇ baˬ ve chaw lehˬ, ngaˬ hta‸ peu laˇ shehˍ hpaˇ hta‸ chiˇ baˬ ve yoˬ teh‸ k'oˆ piˇ ve yoˬ. 17 Awˬ la‸ g'awˇ oˇ ve suhˍ chi g'aˇ ha lehˬ ha k'a k'aw‸ gaˬ la leh, Jawˇ mawˇ-oˬ, nawˬ ve awˬ meh hta‸ cuˇ ve awˬ hk'aw lo neˇ teˇ hpaˍ hta‸ ka‸ ngaˬ hui g'aˇ ve yoˬ teh‸ k'oˆ piˇ ve yoˬ. 18 Yeˍsuˆ k'aw‸ k'oˆ ve, Saˍtanˍ lehˬ mvuhˇ tiˉ po-e‸ hk'a shuˍ shuˍ mvuhˇ naw ma lo ce la ve hta‸ ngaˬ g'a mawˬ ve yoˬ. 19 Nawˬ hui lehˬ, vuiˬ leh aˉ ci ku taw‸ ma teˇ hpaˍ hta‸ naˆ tiˍ taˍ g'a tuˬ leh, canˇ paˍ ve kanˇ paˆ hk'a peu-eˬ hta‸ g'aˇ tuˬ, ngaˬ nawˬ hui hta‸ kanˇ paˆ piˇ taˍ ve yoˬ. Aˬ hto‸ ma teˇ ceuˬ maˇ k'oˆ, nawˬ hui hta‸ naˬ tuˬ te maˇ g'a. 20 Ya‸ hk'aˇ, neˇ teˇ hpaˍ hta‸ nawˬ hui g'aˇ ve pa taw taˇ ha lehˬ. Mvuhˇ naw ma hk'oˆ lo nawˬ hui ve awˬ meh bvuh‸ taˍ ve hta‸ ha lehˬ chehˇ-oˆ teh‸, yawˇ yawˇ hui hta‸ k'oˆ piˇ ve yoˬ. 21 Oˇ ve teˇ yanˇ Yeˍsuˆ lehˬ, da‸ ve kehˬ ve Awˬ ha hpu awˬ hk'aw lo ha lehˬ leh k'oˆ ve, Mvuhˇ naw ma leh miˬ naˆ ma hta‸ uˉ peunˍ shehˍ hpaˇ A pa-oˬ, cuˇ yiˍ cawˬ ve chaw leh shiˍ puiˉ ve chaw hui lehˬ, awˬ lawn chi teˇ hpaˍ hta‸ yawˇ hui maˇ g'a shiˍ tuˬ nawˬ faˉ taˍ leh, yaˇ ehˉ teˇ hpaˍ hta‸ nawˬ hpeu‸ maˍ piˇ ve pa taw, ngaˬ nawˬ hta‸ chiˇ mvuh ve yoˬ. A pa-oˬ, chi hk'e te tuˬ nawˬ nyi ma cawˇ ve yoˬ. 22 Ngaˬ ve Awˬ pa lehˬ, awˬ ceuˬ hk'a peu-eˬ ngaˬ hta‸ chiˇ a‸ laˇ peuˬ. Awˬ pa maˇ heˆ k'o, Yaˇ hpu a shu leh naˍ teh‸, teˇ g'aˇ ka‸ maˇ shiˍ. Yaˇ hpu leh Yaˇ hpu hpeu‸ maˍ piˇ gaˇ ve chaw maˇ heˆ k'o, Awˬ pa a shu leh naˍ teh‸, teˇ g'aˇ ka‸ maˇ shiˍ teh‸ k'oˆ ve yoˬ. 23 Oˇ htaˇ, awˬ la‸ g'awˇ hui hpawˇ lo yawˇ hpfuhˆ nyi leh, yawˇ hui hta‸ ceh tiˉ k'oˆ piˇ ve, Chi teˇ hpaˍ hta‸ nawˬ hui g'a mawˬ ve pa taw, nawˬ hui ve mehˆ shiˍ lehˬ awˬ bon uiˍ ve yoˬ. 24 Awˬ lawn k'o, ngaˬ nawˬ hui hta‸ k'oˆ laˇ ve, nawˬ hui g'a mawˬ ve teˇ hpaˍ hta‸ G'uiˬ sha ve tcuh kaˍ paˍ laiˉ g'aˇ leh hkunˉ hawˉ hkanˇ laiˉ g'aˇ mawˬ gaˇ ve htawˇ, maˇ g'a mawˬ. Nawˬ hui g'a kaˇ ve teˇ hpaˍ hta‸ yawˇ hui kaˇ gaˇ ve htawˇ maˇ g'a kaˇ teh‸ k'oˆ piˇ ve yoˬ. 25 Oˇ htaˇ, awˬ liˇ tawˇ hkawˇ shiˍ paˍ teˇ g'aˇ yawˇ hta‸ lawˇ nyi tuˬ tu la leh, Saˍ la‸-oˬ, co ti‸ ha ti‸ g'a tuˬ ngaˬ hk'aˬ hk'e g'a te tuˬ le teh‸ na nyi ve yoˬ. 26 Yeˍsuˆ k'aw‸ k'oˆ piˇ ve, Awˬ liˇ tawˇ hkawˇ awˬ hk'aw lo hk'aˬ hk'e bvuh‸ taˍ ve le. Nawˬ g'aw ve hk'aˬ hk'e g'a shiˍ le teh‸ yawˇ hta‸ na nyi ve yoˬ. 27 Yawˇ k'aw‸ k'oˆ ve, Nawˬ ve nyi ma hk'a peu-eˬ, nawˬ ve co ha hk'a peu-eˬ, nawˬ ve awˬ g'aˇ awˬ shaˉ hk'a peu-eˬ leh nawˬ ve dawˇ hk'aˇ hk'a peu-eˬ nawˬ ve Jawˇ mawˇ G'uiˬ sha hta‸ g'a ha‸ ve yoˬ. Nawˬ awˬ to hta‸ ha‸ ve hk'e, nawˬ awˬ paˇ awˬ kui chehˇ ve chaw hta‸ g'a ha‸ ve yoˬ teh‸ k'oˆ piˇ ve yoˬ. 28 Yeˍsuˆ k'aw‸ k'oˆ ve, Nawˬ yaw hk'aw‸ laˇ ve lehˬ cawˇ ve yoˬ. Nawˬ oˇ hk'e te-o. Oˇ hk'e te ve k'o, nawˬ co ha g'a te‸ tuˬ yoˬ teh‸ yawˇ hta‸ k'oˆ piˇ ve yoˬ. 29 Ya‸ hk'aˇ, chaw oˇ ve lehˬ yawˇ awˬ to hta‸ hteˇ ve cawˇ ve chaw hpeh‸ ve teh‸ shawˍ taˍ gaˇ leh, Ngaˬ awˬ paˇ awˬ kui chehˇ ve chaw a shu le teh‸ Yeˍsuˆ hta‸ na nyi ve yoˬ. 30 Yeˍsuˆ k'aw‸ k'oˆ ve, Chaw teˇ g'aˇ Yeˍruˆsaˍlehnˍ venˇ lo tu leh Yeˍriˆhkoˇ venˇ lo ya‸-e ve teˇ yanˇ, chaw hk'awˇ teˇ hpaˍ hta‸ g'a hpuˇ ve yoˬ. Chaw hk'awˇ oˇ ve teˇ hpaˍ lehˬ, yawˇ ve veu‸ k'aˇ hta‸ k'ehˆ baˬ leh, yawˇ hta‸ g'aˇ hte‸ dawˆ peuˬ hk'aw‸ nawˉ, yawˇ suh paˇ neˇ ve teˇ yanˇ yawˇ hta‸ baˬ taˉ leh k'ai ve yoˬ. 31 Oˇ htaˇ, paw hkuˇ teˇ g'aˇ ya‸ k'aw oˇ ve teˇ caˆ hta‸ k'ai cawˇ leh chaw oˇ ve hta‸ g'a mawˬ ve teˇ yanˇ, ya‸ k'aw jaˇ lo yawˇ jaw k'ai ve yoˬ. 32 Oˇ ve hk'a shuˍ shuˍ, Leˍviˆ chaw teˇ g'aˇ htawˇ oˇ kaˬ lo gaˬ la leh chaw oˇ ve hta‸ g'a mawˬ ve teˇ yanˇ, ya‸ k'aw jaˇ lo jaw k'ai ve yoˬ. 33 Ya‸ hk'aˇ, Saˍmaˍriˆ chaw teˇ g'aˇ ya‸ k'aw oˇ ve teˇ caˆ hta‸ k'ai ve teˇ yanˇ, chaw oˇ ve geh gaˬ leh, yawˇ hta‸ g'a mawˬ htaˇ ha k'aˉ jaˇ ve yoˬ. 34 Yawˇ geh k'ai leh, yawˇ ve naˬ kuiˬ awˬ hk'aw teˇ hpaˍ hta‸ naˍ manˇ leh a pehˉ meuˇ g'uiˬ keu leh peh piˇ ve yoˬ. Oˇ ve hk'aw‸ nawˉ Saˍmaˍriˆ chaw lehˬ, yawˇ ve piˉ laˬ awˬ hk'oˆ chaw naˬ oˇ ve hta‸ chiˇ taˍ peuˬ leh, hkehˉ chaw yehˬ teˇ yehˬ lo yuˬ k'ai leh yawˇ hta‸ ha‸ shaˉ piˇ ve yoˬ. 35 Shawˉ pawˍ teˇ nyi hk'e htaˇ yawˇ hpu nyiˇ hteh‸ yuˬ tawˆ leh, yehˬ shehˍ hpaˇ hta‸ piˇ leh k'oˆ piˇ ve, Chaw chi hta‸ hk'a deh‸ ha‸ shaˉ-oˆ. Chi awˬ hk'oˆ nawˬ hk'a peuˬ ve teˇ hpaˍ ngaˬ k'aw‸ la htaˇ nawˬ hta‸ k'aw‸ shaiˍ laˇ tuˬ yoˬ teh‸ k'oˆ piˇ taˉ ve yoˬ. 36 Hk'e te leh, nawˬ hk'aˬ hk'e dawˇ ve le. Chaw chi shehˆ g'aˇ awˬ hk'aw lo, chaw hk'awˇ hta‸ g'a hpuˇ ve teˇ g'aˇ hta‸ awˬ paˇ awˬ kui chehˇ ve chaw hpeh‸ ve hk'aˬ ve teˇ g'aˇ le teh‸, Yeˍsuˆ yawˇ hta‸ na nyi ve yoˬ. 37 Yawˇ k'aw‸ k'oˆ ve, Yawˇ hta‸ ha k'aˉ piˇ ve chaw teˇ g'aˇ yoˬ teh‸, yaw hk'aw‸ piˇ ve teˇ yanˇ, Nawˬ htawˇ k'ai leh oˇ hk'e ca te-o teh‸, Yeˍsuˆ yawˇ hta‸ k'aw‸ k'oˆ piˇ ve yoˬ. 38 Yawˇ hui ya‸ k'aw k'ai ve teˇ yanˇ, hk'aˆ teˇ hk'aˆ awˬ hk'aw lo yawˇ lo‸-e leh, Maˍhtaˆ meh ve yaˇ miˇ teˇ g'aˇ yawˇ ve aˉ hk'aw lo yawˇ hta‸ ha‸ yuˬ ve yoˬ. 39 Yaˇ miˇ oˇ ve lehˬ, Maˍriˆ meh ve awˬ nyi ma teˇ g'aˇ cawˬ ve yoˬ. Maˍriˆ lehˬ, Jawˇ mawˇ Yeˍsuˆ ve hkui paˇ lo mui taˍ leh yawˇ ve tawˇ hkawˇ hta‸ na chehˇ ve yoˬ. 40 Maˍhtaˆ lehˬ, te caˍ te taw ve kanˉ maˇ jaˇ leh, nyi ma sho‸ sha‸ ve yoˬ. Yawˇ Yeˍsuˆ geh k'ai leh, Jawˇ mawˇ-oˬ, ngaˬ awˬ nyi ma lehˬ, te caˍ te taw piˇ ve kanˉ te tuˬ ngaˬ hta‸ ceh tiˉ teh taˍ laˇ ve hta‸ nawˬ te‸ chiˉ maˇ dawˇ leh laˇ. Ngaˬ hta‸ ga laˇ tuˬ yawˇ hta‸ hto piˇ-oˆ teh‸ k'oˆ piˇ ve yoˬ. 41 Jawˇ mawˇ Yeˍsuˆ k'aw‸ k'oˆ ve, Maˍhtaˆ-oˬ, Maˍhtaˆ-oˬ, nawˬ lehˬ laiˉ ceuˬ hta‸ dawˇ haˍ dawˇ hkiˉ chehˇ ve yoˬ. 42 Ya‸ hk'aˇ, teˇ ceuˬ hta‸ ceh tiˉ loˍ ve yoˬ. Maˍriˆ lehˬ, da‸ ve oˇ ve teˇ ceuˬ hta‸ leuˆ yuˬ peuˬ. Oˇ ve teˇ ceuˬ yawˇ geh shu hiˉ yuˬ maˇ g'a teh‸ yawˇ hta‸ k'oˆ piˇ ve yoˬ.

Luˉka‸ 11

1 Teˇ pawˆ htaˇ yawˇ lehˬ, teˇ kaˬ lo bon lawˬ chehˇ ve yoˬ. Yawˇ bon lawˬ peuˬ hk'aw‸ nawˉ yawˇ ve awˬ la‸ g'awˇ teˇ g'aˇ k'oˆ ve, Jawˇ mawˇ-oˬ, Yoˇhanˬ lehˬ yawˇ ve awˬ la‸ g'awˇ teˇ hpaˍ hta‸ bon lawˬ ve awˬ hk'aˇ maˍ piˇ ve hk'e, ngaˬ hui hta‸ htawˇ maˍ laˇ-oˆ teh‸, yawˇ hta‸ k'oˆ piˇ ve yoˬ. 2 Oˇ htaˇ yawˇ k'oˆ ve, Nawˬ hui bon lawˬ ve teˇ yanˇ chi hk'e k'oˆ lawˬ-o‸. Awˬ pa-oˬ, nawˬ ve awˬ meh hta‸ yawˆ yan te piˇ lawˬ-o‸. Nawˬ ve mvuhˇ miˬ gaˬ la piˇ-oˆ. 3 Ngaˬ hui loˍ ve caˇ tuˬ dawˬ tuˬ teˇ hpaˍ teˇ nyi le le ngaˬ hui hta‸ pe‸ laˇ-oˆ. 4 Ngaˬ hui ve venˇ baˆ hta‸ hpehˇ hk'a laˇ-oˆ. Awˬ lawn k'o, ngaˬ hui hta‸ te ya‸ laˇ ve chaw hk'a peu-eˬ ve venˇ baˆ hta‸ ngaˬ hui hpehˇ hk'a ve yoˬ. Venˇ baˆ beˬ ve awˬ hk'aˇ suh ngaˬ hui hta‸ taˇ k'ai tcuh laˇ teh‸, yawˇ hui hta‸ maˍ piˇ ve yoˬ. 5 Teˇ pawˆ yawˇ k'aw‸ k'oˆ ve, Nawˬ hui awˬ hk'aw lo chaw teˇ g'aˇ yawˇ awˬ chawˇ cawˬ leh, shehˍ k'aw hkui teˇ yanˇ yawˇ geh k'ai leh, Awˬ chawˇ-oˬ, ngaˬ hta‸ hkaoˍ monˇ shehˆ diˬ a ciˉ chiˇ laˇ sheˍ. 6 Awˬ lawn k'o, ngaˬ ve awˬ chawˇ teˇ g'aˇ toˇ ve yiˬ ve awˬ hk'aw lo ngaˬ geh gaˬ la leh, yawˇ hta‸ caˍ piˇ tuˬ te‸ chiˉ maˇ cawˬ teh‸ k'oˆ ve teˇ yanˇ, 7 yehˬ hk'aw chehˇ ve awˬ chawˇ teˇ g'aˇ k'aw‸ k'oˆ ve, Ngaˬ hta‸ taˇ sho‸ sha‸ laˇ. Yehˬ miˉ hoˆ taˍ peuˬ. Ngaˬ ve yaˇ ehˉ teˇ hpaˍ ngaˬ geh teˇ geh zuh‸ hpui hk'aw lo zuh‸ taˍ peuˬ. Nawˬ hta‸ pe‸ laˇ tuˬ ngaˬ tu maˇ hpeh‸-o teh‸ k'oˆ piˇ tuˬ yoˬ. 8 Ngaˬ nawˬ hui hta‸ k'oˆ laˇ ve, yawˇ lehˬ awˬ chawˇ hpeh‸ ve htawˇ, yawˇ tu ka‸ maˇ tu, piˇ ka‸ maˇ piˇ. Ya‸ hk'aˇ, chaw oˇ ve g'aˇ hte‸ lawˬ tcuhˉ taˍ ve pa taw yawˇ tu leh, chaw oˇ ve hk'a loˍ ve teˇ hpaˍ hta‸ yawˇ piˇ tuˬ yoˬ. 9 Teˇ pawˆ ngaˬ nawˬ hui hta‸ k'oˆ laˇ ve, lawˬ loˬ. Lawˬ k'o g'a tuˬ yoˬ. Ca loˬ. Ca k'o mawˬ tuˬ yoˬ. Yehˬ miˉ hta‸ htawˆ loˬ. Htawˆ k'o hpaw laˇ tuˬ yoˬ. 10 Awˬ lawn k'o, lawˬ ve chaw teˇ g'aˇ le le g'a tuˬ yoˬ. Ca ve chaw htawˇ mawˬ tuˬ yoˬ. Yehˬ miˉ hta‸ htawˆ ve chaw awˬ pon htawˇ yehˬ miˉ hpaw laˇ tuˬ yoˬ. 11 Nawˬ hui awˬ hk'aw lo awˬ pa hpeh‸ ve chaw hk'aˬ ve teˇ g'aˇ maˇ k'oˆ, a shu yawˇ ve yaˇ paˍ ngaˇ lawˬ ve k'o, ngaˇ awˬ tan vuiˬ hta‸ yuˬ piˇ tuˬ laˇ. 12 G'aˆ u lawˬ ve k'o, aˉ ci ku taw‸ ma hta‸ yuˬ piˇ tuˬ laˇ. 13 Hk'e te leh, nawˬ hui chaw haiˬ hpeh‸ ve ka‸, a shu yawˇ ve yaˇ teˇ hpaˍ hta‸ da‸ ve mawˇ piˇ hkawˇ shiˍ ve k'o, chi a‸ kehˉ leuˉ leh mvuhˇ naw ma hk'oˆ chehˇ ve nawˬ hui ve Awˬ pa geh hk'a lawˬ ve chaw teˇ hpaˍ hta‸ da‸ ve kehˬ ve Awˬ ha hpu yawˇ piˇ tuˬ maˇ heˆ laˇ teh‸, yawˇ hui hta‸ k'oˆ piˇ ve yoˬ. 14 Teˇ pawˆ htaˇ, k'aˍ ve neˇ teˇ hkeh hta‸ Yeˍsuˆ g'a‸ k'oˬ leh, neˇ tawˆ k'ai peuˬ hk'aw‸ nawˉ, k'aˍ ve chaw oˇ ve tawˇ yaw la ve pa taw, chaw chi ma ve anˇ ve yoˬ. 15 Ya‸ hk'aˇ, yawˇ hui teˇ hpaˍ hpaˍ k'oˆ ve, Yawˇ lehˬ, neˇ jawˇ mawˇ Beˍsaˍbuˇlaˆ hta‸ g'aˇ va leh neˇ teˇ hpaˍ hta‸ g'a‸ k'oˬ ve yoˬ teh‸ k'oˆ ve yoˬ. 16 Awˬ kaˍ awˬ nu chaw teˇ hpaˍ yawˇ hta‸ lawˇ nyi ve awˬ hk'aw lo mvuhˇ naw ma ve awˬ heˆ hta‸ lawˬ ve yoˬ. 17 Yawˇ hui oˇ hk'e dawˇ chehˇ ve hta‸ yawˇ shiˍ ve pa taw, yawˇ hui hta‸ k'oˆ piˇ ve, Maˇ cawˇ maˇ hawˍ da‸ ve mvuhˇ miˬ teˇ peˆ le le luˬ k'ai sheˆ k'ai leh, yehˬ teˇ yehˬ hta‸ teˇ yehˬ paˆ teˍ tuˬ yoˬ. 18 Ngaˬ lehˬ, Beˍsaˍbuˇlaˆ hta‸ g'aˇ va leh neˇ teˇ hpaˍ hta‸ g'a‸ k'oˬ ve yoˬ teh‸ nawˬ hui k'oˆ ve yoˬ. Ya‸ hk'aˇ, Saˍtanˍ yawˇ hk'aˇ yawˇ maˇ cawˇ maˇ hawˍ da‸ ve k'o, yawˇ ve mvuhˇ miˬ hk'aˬ hk'e te yeˬ hpeh‸ tuˬ le. 19 Ngaˬ lehˬ Beˍsaˍbuˇlaˆ hta‸ g'aˇ va leh neˇ teˇ hpaˍ hta‸ g'a‸ k'oˬ ve hk'e k'o, nawˬ hui ve yaˇ paˍ teˇ hpaˍ lehˬ, a shu hta‸ g'aˇ va leh g'a‸ k'oˬ ve le. Hk'e te leh, yawˇ hui lehˬ nawˬ hui ve suhˉ jehˬ shehˍ hpaˇ hpeh‸ tuˬ yoˬ. 20 Ya‸ hk'aˇ ngaˬ lehˬ, G'uiˬ sha ve kanˇ paˆ hta‸ g'aˇ va leh neˇ teˇ hpaˍ hta‸ g'a‸ k'oˬ ve k'o, G'uiˬ sha ve mvuhˇ miˬ nawˬ hui geh gaˬ la peuˬ. 21 Awˬ g'aˇ uiˍ ve chaw teˇ g'aˇ lehˬ, la‸ caˉ hk'a biˇ cawˬ leh yawˇ ve yehˬ hta‸ shaw taˍ ve teˇ yanˇ, yawˇ ve mawˇ jeˬ hta‸ shu hk'awˇ maˇ hpeh‸. 22 Ya‸ hk'aˇ, yawˇ a‸ kehˉ awˬ g'aˇ uiˍ ve chaw teˇ g'aˇ laˬ leh yawˇ hta‸ g'aˇ ve teˇ yanˇ, yawˇ g'aˇ va taˍ ve la‸ caˉ teˇ hpaˍ hta‸ lu yuˬ peuˬ hk'aw‸ nawˉ, yawˇ ve mawˇ jeˬ teˇ hpaˍ hta‸ ka‸ yuˬ sheˬ leh pehˬ da‸ ve yoˬ. 23 Ngaˬ hpawˇ maˇ chehˇ ve chaw lehˬ ngaˬ ve canˇ paˍ hpawˇ chehˇ ve yoˬ. Ngaˬ geh teˇ geh maˇ g'awˆ hpoˆ ve chaw lehˬ, g'awˆ baˬ ve chaw hpeh‸ ve yoˬ. 24 Neˇ cha‸ chiˆ teˇ hkeh lehˬ, chaw teˇ g'aˇ awˬ hk'aw lo tawˆ k'ai peuˬ hk'aw‸ nawˉ, goˇ choˆ ve chehˇ kuiˬ awˬ hk'aw lo ca toˇ nyi leh, g'aˇ jehˇ kuiˬ hta‸ ca ve yoˬ. Yawˇ ca maˇ mawˬ ve teˇ yanˇ, Ngaˬ tawˆ la ve ngaˬ ve yehˬ lo k'aw‸ k'o‸-e shaˍ teh‸ k'oˆ ve yoˬ. 25 Yawˇ k'aw‸ gaˬ la ve teˇ yanˇ, yehˬ oˇ ve lehˬ kehˬ lehˍ hk'a deh‸ gu shiˆ taˍ ve hta‸ yawˇ g'a mawˬ ve yoˬ. 26 Oˇ htaˇ yawˇ k'ai leh, yawˇ a‸ kehˉ haiˬ ve awˬ kaˍ awˬ nu neˇ suhˍ hkeh hta‸ kuˬ veu laˇ peuˬ hk'aw‸ nawˉ, yawˇ hui lo‸-e leh oˇ kaˬ lo chehˇ ve yoˬ. Hk'e te leh, chaw oˇ ve teˇ g'aˇ awˬ hk'aw‸ nawˉ hpeh‸ la ve lehˬ, awˉ lawˉ htaˇ hpeh‸ ve a‸ kehˉ leuˉ leh haiˬ ve yoˬ teh‸ Yeˍsuˆ k'oˆ ve yoˬ. 27 Yawˇ oˇ hk'e k'oˆ chehˇ ve teˇ yanˇ, chaw awˬ moˍ lonˉ awˬ hk'aw lo yaˇ miˇ teˇ g'aˇ awˬ hkawˇ bvuhˬ chaweh kuˬ leh k'oˆ ve, Nawˬ hta‸ hu ve g'oˇ peˬ leh nawˬ g'a dawˬ ve cuˉ lehˬ awˬ bon uiˍ ve yoˬ teh‸, yawˇ hta‸ k'oˆ piˇ ve yoˬ. 28 Yeˍsuˆ k'aw‸ k'oˆ ve, Awˬ tehˬ awˬ na awˬ bon uiˍ ve chaw teˇ hpaˍ lehˬ, G'uiˬ sha ve tawˇ hkawˇ hta‸ na yuˬ leh te k'ai ve chaw hui yoˬ teh‸ k'oˆ piˇ ve yoˬ. 29 Chaw awˬ moˍ lonˉ teˇ hpaˍ shaˬ te shaˬ maˇ la ve teˇ yanˇ yawˇ k'oˆ ve, Chaw chi teˇ co lehˬ, haiˬ ve chaw teˇ co hpeh‸ ve yoˬ. Yawˇ hui awˬ heˆ hta‸ lawˬ ve yoˬ. Ya‸ hk'aˇ, Yoˇnaˆ ve awˬ heˆ maˇ heˆ k'o, awˬ kaˍ awˬ nu awˬ heˆ teˇ ceuˬ ka‸ yawˇ hui hta‸ maˇ maˍ piˇ. 30 Yoˇnaˆ lehˬ, Niˇnaˍveˍ venˇ yaˇ hui awˬ pon awˬ heˆ hpeh‸ ve hk'e, chaw yaˇ ve Yaˇ hpu htawˇ chaw chi teˇ co awˬ pon awˬ heˆ hpeh‸ tuˬ yoˬ. 31 Suhˉ jehˬ ve awˬ nyi htaˇ, awˬ hawˉ hpawˇ mvuhˇ miˬ ve nanˇ hawˉ hkanˇ ma lehˬ chaw chi teˇ co geh teˇ geh tu la leh, yawˇ hui hta‸ suhˉ taˆ tuˬ yoˬ. Awˬ lawn k'o, yawˇ lehˬ Sawˉla‸monˍ ve cuˇ yiˍ tawˇ hkawˇ hta‸ na tuˬ, miˬ guiˬ awˬ leh meuˇ teˇ kaˬ lo tu leh laˬ ve yoˬ. Nyi loˬ, choˬ kaˬ lo Sawˉla‸monˍ a‸ kehˉ uiˍ ve teˇ g'aˇ chehˇ taˍ ve yoˬ. 32 Suhˉ jehˬ ve awˬ nyi htaˇ, Niˇnaˍveˍ venˇ yaˇ hui htawˇ chaw chi teˇ co geh teˇ geh tu la leh, yawˇ hui hta‸ suhˉ taˆ tuˬ yoˬ. Awˬ lawn k'o, Yoˇnaˆ bon maˍ ve hta‸ pa taw, Niˇnaˍveˍ venˇ yaˇ hui a shu yawˇ ve venˇ baˆ hta‸ dawˇ hpfuhˆ ve yoˬ. Nyi loˬ, choˬ kaˬ lo Yoˇnaˆ a‸ kehˉ uiˍ ve teˇ g'aˇ chehˇ taˍ ve yoˬ. 33 Kawˆ faiˇ tuˉ leh baˬ kuiˬ lo taˍ ve maˇ k'oˆ, hk'awˍ lawˇ tcuhˍ mvuh‸ taˍ ve maˇ k'oˆ, chaw teˇ g'aˇ ka‸ maˇ te jaw. Ya‸ hk'aˇ, lo‸ la ve chaw hui awˬ g'euˆ hta‸ g'a mawˬ tuˬ, kawˆ faiˇ taˍ kuiˬ lo taˍ ve yoˬ. 34 Nawˬ ve mehˆ shiˍ lehˬ, awˬ to ve kawˆ faiˇ yoˬ. Nawˬ ve mehˆ shiˍ da‸ ve k'o, nawˬ ve awˬ to hk'a peu-eˬ awˬ g'euˆ hk'a biˇ cawˬ tuˬ yoˬ. Nawˬ ve mehˆ shiˍ maˇ da‸ ve k'o, nawˬ ve awˬ to hk'a peu-eˬ naˆ ho‸ ve hk'a biˇ cawˬ tuˬ yoˬ. 35 Hk'e te leh nawˬ awˬ hk'aw lo cawˬ ve awˬ g'euˆ lehˬ, naˆ ho‸ ve maˇ g'a hpeh‸ tuˬ shaˍ ti‸ te-o. 36 Nawˬ awˬ to awˬ hk'aw lo naˆ ho‸ ve teˇ kaˬ ka‸ maˇ cawˬ leh, awˬ to hk'a peu-eˬ awˬ g'euˆ hk'a biˇ cawˬ ve k'o, kawˆ faiˇ awˬ g'euˆ nawˬ hta‸ ba laˇ ve hk'e, nawˬ awˬ to hk'a peu-eˬ awˬ g'euˆ ba lehˍ cawˬ tuˬ yoˬ teh‸ yawˇ k'oˆ piˇ ve yoˬ. 37 Yeˍsuˆ chi hk'e k'oˆ chehˇ ve teˇ yanˇ, Hpaˍriˍsehˇ teˇ g'aˇ yawˇ geh awˍ caˇ la tuˬ yawˇ hta‸ kuˬ ve yoˬ. Oˇ htaˇ yawˇ lo‸-e leh, hpui lawˇ paˇ lo mui taˍ ve yoˬ. 38 Awˍ maˇ caˇ sheˍ htaˇ, yawˇ iˉ kaˆ maˇ tsuhˇ ve hta‸ Hpaˍriˍsehˇ oˇ ve g'a mawˬ leh anˇ ve yoˬ. 39 Jawˇ mawˇ Yeˍsuˆ yawˇ hta‸ k'oˆ piˇ ve, Nawˬ hui Hpaˍriˍsehˇ teˇ hpaˍ lehˬ, hkehˇ leh kawˆ hta‸ awˬ hta‸ hpawˇ lo tsuhˇ kehˬ ve yoˬ. Ya‸ hk'aˇ nawˬ hui awˬ hk'aw lo hiˉ yuˬ lu yuˬ ve teˇ ceuˬ leh haiˬ ve teˇ ceuˬ hk'a biˇ cawˬ ve yoˬ. 40 Chaw luˬ teˇ hpaˍ-oˬ, awˬ hta‸ hpawˇ lo te hpanˍ shehˍ hpaˇ lehˬ, awˬ hk'aw hpawˇ lo htawˇ te hpanˍ ve maˇ heˆ laˇ. 41 Ya‸ hk'aˇ, awˬ hk'aw hpawˇ lo cawˬ ve awˬ ceuˬ teˇ hpaˍ shu hta‸ ha k'aˉ leh tanˇ piˇ-oˆ. Oˇ hk'e te ve k'o, awˬ ceuˬ hk'a peu-eˬ nawˬ hui awˬ pon da‸ kehˬ tuˬ yoˬ. 42 Hpaˍriˍsehˇ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Awˬ lawn k'o, nawˬ hui lehˬ i hkinˇ, mvuhˇ shaweh leh g'awˇ hpa‸ mvuhˬ naweh teˇ ceuˬ le le hta‸ teˇ chi pun teˇ pun tanˇ ve yoˬ. Hteˇ ve cawˇ ve hta‸ te ve teˇ ceuˬ leh G'uiˬ sha hta‸ ha‸ ve teˇ ceuˬ hta‸ nawˬ hui teh taˉ ve yoˬ. Chi teˇ hpaˍ hta‸ nawˬ hui te cawˇ ve awˬ hk'oˆ awˬ kaˍ awˬ nu ve teˇ hpaˍ hta‸ ka‸ nawˬ hui maˇ teh taˉ cawˇ ve yoˬ. 43 Hpaˍriˍsehˇ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Bon yehˬ awˬ hk'aw lo awˬ me‸ awˬ hponˇ cawˬ ve mui kuiˬ hta‸ maˇ k'oˆ, tcuh hk'aw lo shu nawˬ hui hta‸ yawˆ yan laˇ ve hta‸ maˇ k'oˆ, nawˬ hui heuˆ gaˇ jaˇ ve yoˬ. 44 Nawˬ hui g'a dawˇ haˍ jaˇ tuˬ yoˬ. Awˬ lawn k'o, nawˬ hui lehˬ shu maˇ mawˬ ve tuˍ hpfuh teˇ hpaˍ hta‸ shuˍ ve yoˬ. Tuˍ hpfuh oˇ ve teˇ hpaˍ awˬ hk'oˆ hta‸ k'ai ve chaw teˇ hpaˍ lehˬ, tuˍ hpfuh hpeh‸ ve hta‸ yawˇ hui maˇ shiˍ teh‸ k'oˆ piˇ ve yoˬ. 45 Oˇ htaˇ, awˬ liˇ tawˇ hkawˇ shiˍ paˍ teˇ g'aˇ k'aw‸ k'oˆ ve, Saˍ la‸-oˬ, nawˬ chi hk'e k'oˆ ve lehˬ, ngaˬ hui hta‸ htawˇ hk'a mvuhˇ hk'a na k'oˆ laˇ ve yoˬ teh‸ yawˇ hta‸ k'oˆ piˇ ve yoˬ. 46 Yeˍsuˆ k'aw‸ k'oˆ ve, Nawˬ hui awˬ liˇ tawˇ hkawˇ shiˍ paˍ teˇ hpaˍ htawˇ g'a dawˇ haˍ jaˇ tuˬ yoˬ. Awˬ lawn k'o, nawˬ hui lehˬ pfuhˇ haˍ jaˇ ve mawˇ teˇ hpaˍ shu hta‸ pfuhˍ piˇ ve yoˬ. Nawˬ hui lehˬ, a shu yawˇ ve la‸ naw meuˇ ceh ka‸ mawˇ oˇ ve teˇ hpaˍ hta‸ maˇ htawˇ. 47 Nawˬ hui g'a dawˇ haˍ jaˇ tuˬ yoˬ. Awˬ lawn k'o, nawˬ hui lehˬ nawˬ hui ve awˬ puˍ awˬ pi hui tiˇ pehˍ ve G'uiˬ sha ve tcuh kaˍ paˍ hui ve tuˍ hpfuh teˇ hpaˍ hta‸ kawˍ ve yoˬ. 48 Hk'e te leh, nawˬ hui ve awˬ puˍ awˬ pi hui te ve kanˉ hta‸ nawˬ hui shaˉ hkiˆ hkanˍ leh nyi ma cawˇ ve yoˬ. Awˬ lawn k'o, yawˇ hui lehˬ G'uiˬ sha ve tcuh kaˍ paˍ hui hta‸ tiˇ pehˍ leh, nawˬ hui lehˬ tuˍ hpfuh oˇ ve teˇ hpaˍ hta‸ kawˍ ve yoˬ. 49 Chi hta‸ pa taw G'uiˬ sha ve cuˇ yiˍ maˍ yiˍ tawˇ hkawˇ chi hk'e k'oˆ taˍ ve, Ngaˬ lehˬ yawˇ hui geh tcuh kaˍ paˍ teˇ hpaˍ leh tcuh yaˇ teˇ hpaˍ hta‸ k'ai tcuh tuˬ yoˬ. Tcuh kaˍ paˍ leh tcuh yaˇ teˇ hpaˍ hpaˍ hta‸ yawˇ hui tiˇ pehˍ leh fawˉ mehˍ tuˬ yoˬ. 50 Hk'e te leh, Aˍbeˍlaˆ ve awˬ suhˍ hta‸ te leh, tanˇ kuiˬ leh bon yehˬ awˬ kaˍ lo tiˇ pehˍ ve Zaˍhkaˍriˆ ve awˬ suhˍ hk'a gaˬ, miˬ guiˬ te hpanˍ htaˇ ka‸ te leh, sheˆ peuˬ ve G'uiˬ sha ve tcuh kaˍ paˍ hk'a peu-eˬ ve awˬ suhˍ chaw chi teˇ co awˬ hk'oˆ hta‸ gaˬ la tuˬ yoˬ. 51 Ngaˬ nawˬ hui hta‸ k'oˆ laˇ ve, awˬ suhˍ oˇ ve chaw chi teˇ co awˬ hk'oˆ hta‸ awˬ tehˬ awˬ na gaˬ la tuˬ yoˬ. 52 Awˬ liˇ tawˇ hkawˇ shiˍ paˍ teˇ hpaˍ-oˬ, nawˬ hui g'a dawˇ haˍ jaˇ tuˬ yoˬ. Awˬ lawn k'o, cuˇ yiˍ maˍ yiˍ ve shawˇ hta‸ nawˬ hui yuˬ taˍ peuˬ. Nawˬ hui a shu yawˇ awˬ to maˇ lo‸-e ve awˬ hk'oˆ, lo‸-e gaˇ ve chaw teˇ hpaˍ hta‸ nawˬ hui tawˍ taˍ ve yoˬ teh‸ k'oˆ piˇ ve yoˬ. 53 Yawˇ oˇ kaˬ lo tawˆ k'ai ve teˇ yanˇ, li‸ bvuh‸ paˍ leh Hpaˍriˍsehˇ teˇ hpaˍ lehˬ, yawˇ tawˇ yaw ya‸ ve hta‸ ca g'a tuˬ, 54 yawˇ hta‸ g'aˇ hte‸ na nyi leh, awˬ lawn laiˉ ceuˬ yawˇ hta‸ k'oˆ tcuh ve awˬ hk'aw lo jaˆ nyi taˍ ve yoˬ.

Luˉka‸ 12

1 Oˇ htaˇ, teˇ g'aˇ leh teˇ g'aˇ naˆ da‸ htaˇ hk'a gaˬ chaw awˬ hinˉ awˬ meunˍ hpawnˬ la ve teˇ yanˇ, awˉ lawˉ yawˇ ve awˬ la‸ g'awˇ teˇ hpaˍ hta‸ yawˇ k'oˆ piˇ ve, Hpaˍriˍsehˇ ve diˇ hta‸ shaˍ ti‸ te leh jaw k'ai-o. Diˇ teh‸ k'oˆ ve lehˬ, heˍ puiˉ ve teˇ ceuˬ hta‸ k'oˆ gaˇ ve yoˬ. 2 Hk'a beh taˍ ve awˬ ceuˬ hk'a peu-eˬ maˇ hpeu‸ tawˆ la tuˬ ve teˇ ceuˬ ka‸ maˇ cawˬ. Hk'a faˉ taˍ ve awˬ ceuˬ hk'a peu-eˬ htawˇ, maˇ shiˍ la tuˬ ve teˇ ceuˬ ka‸ maˇ cawˬ. 3 Naˆ ho‸ kuiˬ awˬ hk'aw lo nawˬ hui hk'a k'oˆ ve teˇ hpaˍ awˬ g'euˆ ba kuiˬ lo shu g'a kaˇ tuˬ yoˬ. Bawehˇ awˬ hk'aw lo nawˬ hui a yehˉ yehˉ hk'a yaw ve teˇ hpaˍ yehˬ awˬ hk'oˆ lo shu k'aw‸ kuˬ maˍ piˇ tuˬ yoˬ. 4 Ngaˬ ve awˬ chawˇ teˇ hpaˍ-oˬ, ngaˬ nawˬ hui hta‸ k'oˆ laˇ ve, awˬ to hta‸ tiˇ pehˍ g'a leh, awˬ hk'aw‸ nawˉ te‸ chiˉ k'aw‸ te maˇ g'a ve chaw teˇ hpaˍ hta‸ taˇ kawˆ. 5 Ya‸ hk'aˇ, nawˬ hui a shu hta‸ g'a kawˆ tuˬ ve ngaˬ nawˬ hui hta‸ hto laˇ shaˍ. Awˬ to hta‸ tiˇ pehˍ peuˬ hk'aw‸ nawˉ moˬ naˆ ho‸ awˬ hk'aw lo baˬ keu tuˬ kanˇ paˆ cawˬ shehˍ hpaˇ hta‸ kawˆ-oˆ. Ngaˬ nawˬ hui hta‸ awˬ tehˬ awˬ na k'oˆ laˇ ve, yawˇ hta‸ kawˆ-oˆ. 6 Jaˍ meuˇ ngaˇ hkeh hta‸ peh‸ shanˍ nyiˇ peh‸ hawˇ ve maˇ heˆ laˇ. Jaˍ meuˇ oˇ ve teˇ hpaˍ awˬ hk'aw lo, teˇ hkeh hta‸ ka‸ G'uiˬ sha maˇ leunˇ. 7 Nawˬ hui ve uˉ hkeh mvuh hk'a peu-eˬ hta‸ htawˇ g'aw nyi taˍ peuˬ. Hk'e te leh, taˇ kawˆ. Jaˍ meuˇ maˇ jaˇ ve a‸ kehˉ nawˬ hui awˬ hpfuhˇ hk'aˆ jaˇ ve yoˬ. 8 Ngaˬ nawˬ hui hta‸ k'oˆ laˇ ve, hk'aˬ ve chaw teˇ g'aˇ maˇ k'oˆ, chaw yaˇ mehˆ g'uˇ suhˍ ngaˬ hta‸ hkanˍ yuˬ ve k'o, G'uiˬ sha ve mvuhˇ naw ma tcuh yaˇ teˇ hpaˍ mehˆ g'uˇ suhˍ chaw yaˇ ve Yaˇ hpu htawˇ yawˇ hta‸ hkanˍ yuˬ tuˬ yoˬ. 9 Chaw yaˇ mehˆ g'uˇ suhˍ ngaˬ hta‸ chiˇ baˬ ve chaw lehˬ, G'uiˬ sha ve mvuhˇ naw ma tcuh yaˇ teˇ hpaˍ mehˆ g'uˇ suhˍ chaw yaˇ ve Yaˇ hpu htawˇ yawˇ hta‸ chiˇ baˬ tuˬ yoˬ. 10 Chaw yaˇ ve Yaˇ hpu hta‸ yaw ya‸ ve chaw hk'aˬ ve teˇ g'aˇ maˇ k'oˆ, yawˇ ve venˇ baˆ hta‸ hpehˇ piˇ tuˬ yoˬ. Ya‸ hk'aˇ, da‸ ve kehˬ ve Awˬ ha hpu hta‸ maˇ shawˍ maˇ caˆ k'oˆ ve chaw teˇ hpaˍ ve venˇ baˆ hta‸ hpehˇ piˇ tuˬ maˇ heˆ. 11 Shu nawˬ hui hta‸ bon yehˬ awˬ hk'aw lo maˇ k'oˆ, jawˇ mawˇ teˇ hpaˍ leh kanˇ paˆ uiˍ shehˍ hpaˇ teˇ hpaˍ mehˆ g'uˇ suhˍ maˇ k'oˆ, yuˬ k'ai ve teˇ yanˇ, nawˬ hui hk'aˬ hk'e g'a yaw hk'aw‸ tuˬ, hk'aˬ hk'e g'a k'oˆ tuˬ taˇ dawˇ hkiˉ. 12 Awˬ lawn k'o, awˬ yanˇ oˇ ve awˬ hk'aw lo nawˬ hui hk'aˬ hk'e g'a k'oˆ tuˬ, da‸ ve kehˬ ve Awˬ ha hpu nawˬ hui hta‸ maˍ laˇ tuˬ yoˬ teh‸ k'oˆ piˇ ve yoˬ. 13 Oˇ htaˇ, chaw awˬ moˍ lonˉ awˬ hk'aw lo chaw teˇ g'aˇ k'oˆ ve, Saˍ la‸-oˬ, ngaˬ awˬ viˉ paˍ ngaˬ hta‸ awˬ shinˉ pehˬ laˇ tuˬ yawˇ hta‸ a ciˉ k'oˆ piˇ-oˆ teh‸ Yeˍsuˆ hta‸ k'oˆ piˇ ve yoˬ. 14 Ya‸ hk'aˇ Yeˍsuˆ k'aw‸ k'oˆ ve, Awˬ chawˇ-oˬ, nawˬ huiˉ maˬ awˬ hk'oˆ hta‸ suhˉ jehˬ shehˍ hpaˇ leh awˬ shinˉ pehˬ shehˍ hpaˇ te tuˬ, a shu ngaˬ hta‸ teh taˍ laˇ ve le teh‸ yawˇ hta‸ k'oˆ piˇ ve yoˬ. 15 Yawˇ yawˇ hui hta‸ k'oˆ piˇ ve, Shu mawˇ shu jeˬ hta‸ sheˉ lai ve nyi ma a ciˉ ka‸ taˇ cawˬ piˇ. Awˬ lawn k'o, mawˇ jeˬ maˇ maˇ cawˬ ve pa taw chaw yaˇ a sha‸ g'a te‸ ve maˇ heˆ teh‸ k'oˆ ve yoˬ. 16 Oˇ htaˇ, yawˇ yawˇ hui hta‸ tawˇ pa haˉ te maˍ piˇ leh k'oˆ ve, Paw sha paˍ teˇ g'aˇ yawˇ ve miˬ guiˬ da‸ leh, awˬ shiˍ g'a maˇ jaˇ ve yoˬ. 17 Paw sha paˍ oˇ ve yawˇ ve nyi ma hk'aw chi hk'e dawˇ ve, Ngaˬ hk'aˬ hk'e g'a te tuˬ le. Ngaˬ ve awˬ shiˍ awˬ nu teˇ hpaˍ hta‸ keu taˍ kuiˬ maˇ k'aw‸ cawˬ. 18 Peuˬ leh yawˇ dawˇ ve, Ngaˬ chi hk'e te tuˬ yoˬ. Ngaˬ ve caˬ ciˇ yehˬ teˇ hpaˍ hta‸ hpaˆ baˬ leh, leuˉ leh uiˍ ve teˇ hpaˍ hta‸ k'aw‸ te tuˬ yoˬ. Oˇ ve teˇ hpaˍ awˬ hk'aw lo ngaˬ ve caˬ shiˍ leh mawˇ jeˬ hk'a peu-eˬ hta‸ keu taˍ tuˬ yoˬ. 19 Oˇ htaˇ ngaˬ ve nyi ma hta‸ chi hk'e k'oˆ piˇ tuˬ yoˬ. Nyi ma-oˬ, nawˬ lehˬ laiˉ hk'aw‸ awˬ pon mawˇ jeˬ teˇ hpaˍ hk'a deh‸ shaw hpoˆ taˍ peuˬ. G'aˇ jehˇ-oˆ. Hk'a deh‸ caˇ chehˇ dawˬ chehˇ leh ha lehˬ chehˇ-oˆ teh‸ k'oˆ tuˬ yoˬ. 20 Ya‸ hk'aˇ G'uiˬ sha k'oˆ ve, Chaw luˬ paˍ-oˬ, ya‸ puiˉ ka‸ nawˬ ve co ha hta‸ yuˬ hk'aw‸ tuˬ yoˬ. Hk'e te leh, nawˬ shaw hpoˆ taˍ ve mawˇ teˇ hpaˍ a shu ve mawˇ hpeh‸ tuˬ le teh‸ yawˇ hta‸ k'oˆ piˇ ve yoˬ. 21 A shu yawˇ awˬ to awˬ pon mawˇ jeˬ hta‸ shaw hpoˆ leh, G'uiˬ sha hpawˇ lo haˍ g'awˇ ve chaw lehˬ, oˇ ve hk'a shuˍ shuˍ hpeh‸ ve yoˬ teh‸, yawˇ hui hta‸ k'oˆ piˇ ve yoˬ. 22 Peuˬ leh, yawˇ ve awˬ la‸ g'awˇ hui hta‸ k'oˆ piˇ ve, Hk'e te leh, ngaˬ nawˬ hui hta‸ k'oˆ laˇ ve, hk'aˬ hk'e te g'a caˇ g'a dawˬ tuˬ, nawˬ hui a sha‸ te‸ ve awˬ pon taˇ dawˇ hkiˉ. Hk'aˬ hk'e te g'a veu‸ g'a deh tuˬ, nawˬ hui awˬ to awˬ pon ka‸ taˇ dawˇ hkiˉ. 23 A sha‸ te‸ ve teˇ ceuˬ lehˬ, caˇ tuˬ a‸ kehˉ awˬ hpfuhˇ hk'aˆ leh, awˬ to htawˇ veu‸ k'aˇ a‸ kehˉ awˬ hpfuhˇ hk'aˆ ve yoˬ. 24 Aˉ naˆ k'aˍ teˇ hpaˍ hta‸ dawˇ nyi-o. Yawˇ hui lehˬ, caˬ maˇ ti, maˇ g'eu‸. Caˬ ciˇ yehˬ maˇ k'oˆ, mawˇ jeˬ shaw hpoˆ kuiˬ yehˬ maˇ k'oˆ, maˇ cawˬ. Ya‸ hk'aˇ, G'uiˬ sha yawˇ hui hta‸ caˍ piˇ taw piˇ ve yoˬ. Nawˬ hui lehˬ, ngaˆ oˇ ve teˇ hpaˍ a‸ kehˉ awˬ hpfuhˇ hk'aˬ ma hk'aˆ ve le. 25 Nawˬ hui awˬ hk'aw lo hk'aˬ ve chaw teˇ g'aˇ maˇ k'oˆ, dawˇ hkiˉ ve pa taw a shu yawˇ ve a sha‸ teˇ jaˆ k'aw‸ zuhˬ la tuˬ, a shu te g'a le. 26 Hk'e te leh, i jaˇ ve awˬ ceuˬ hta‸ ceh ka‸ nawˬ hui te maˇ g'a ve k'o, awˬ kaˍ awˬ nu awˬ ceuˬ teˇ hpaˍ hta‸ aˬ hto‸ ma te nawˬ hui dawˇ hkiˉ ve le. 27 Shiˍ ya‸ veˆ hk'aˬ hk'e te uiˍ la ve hta‸ dawˇ nyi-o. Awˬ cehˬ oˇ ve teˇ hpaˍ lehˬ, kanˉ maˇ te, hkeh ka‸ maˇ g'awˬ. Ya‸ hk'aˇ, awˬ me‸ awˬ hponˇ uiˍ ve jawˇ mawˇ Sawˉla‸monˍ lehˬ, awˬ cehˬ oˇ ve teˇ hpaˍ awˬ hk'aw lo teˇ cehˬ hk'e taw ka‸ maˇ g'a veu‸ maˇ g'a deh jaw teh‸ ngaˬ nawˬ hui hta‸ k'oˆ laˇ ve yoˬ. 28 Hk'a deh‸ maˇ yonˍ ve chaw teˇ hpaˍ-oˬ, ya‸ nyi te‸ chehˇ leh shawˉ pawˍ aˬ miˍ hk'aw baˬ keu tuˬ ve mvuh‸ cehˬ hta‸ G'uiˬ sha chi hk'e feuˉ piˇ deh piˇ ve k'o, oˇ ve a‸ kehˉ leuˉ leh nawˬ hui hta‸ feuˉ laˇ deh laˇ tuˬ maˇ heˆ laˇ. 29 Nawˬ hui hk'aˬ hk'e te g'a caˇ g'a dawˬ tuˬ taˇ ca. Dawˇ hkiˉ ve nyi ma ka‸ taˇ cawˬ piˇ. 30 Awˬ lawn k'o, miˬ guiˬ chaw ceuˬ hk'a peu-eˬ lehˬ, awˬ ceuˬ chi teˇ hpaˍ hta‸ ca chehˇ ve yoˬ. Awˬ ceuˬ chi teˇ hpaˍ nawˬ hui loˍ ve hta‸ nawˬ hui ve Awˬ pa shiˍ taˍ ve yoˬ. 31 Nawˬ hui lehˬ yawˇ ve mvuhˇ miˬ hta‸ ca-o. Awˬ ceuˬ chi teˇ hpaˍ htawˇ yawˇ nawˬ hui hta‸ htehˍ laˇ tuˬ yoˬ. 32 I ve yawˬ teˇ moˍ-oˬ, taˇ kawˆ. Nawˬ hui ve Awˬ pa lehˬ, nawˬ hui hta‸ mvuhˇ miˬ oˇ ve pe‸ laˇ tuˬ nyi ma cawˇ ve yoˬ. 33 Nawˬ hui ve mawˇ jeˬ hta‸ hawˇ baˬ leh, shu hta‸ ha k'aˉ leh tanˇ piˇ-oˆ. Maˇ piˍ puiˉ ve hpu guˉ pi teˇ hpaˍ hta‸ nawˬ hui awˬ pon te-o. Chaw hk'awˇ hk'awˇ yuˬ maˇ g'a ve, pfuhˇ maˇ caˇ puiˉ ve, mvuhˇ naw ma hk'oˆ lo maˇ peuˬ maˇ leh puiˉ ve mawˇ jeˬ hta‸ shaw hpoˆ taˍ-o‸. 34 Awˬ lawn k'o, nawˬ hui ve mawˇ jeˬ shaw hpoˆ taˍ ve teˇ kaˬ lo nawˬ hui ve nyi ma htawˇ oˇ kaˬ lo cawˬ tuˬ yoˬ. 35 Nawˬ hui ve caw‸ cehˍ nyi hta‸ haˍ pi caˆ tsuh‸ leh, kawˆ faiˇ teˇ hpaˍ hta‸ tuˉ taˍ-o‸. 36 A shu yawˇ ve awˬ shehˍ hpaˇ hkehˉ caˇ kuiˬ lo k'ai k'aw‸ la leh, yehˬ miˉ hta‸ htawˆ ve teˇ yanˇ, yawˇ hta‸ teˇ cawˬ haˉ hpaw piˇ tuˬ law chehˇ ve chaw teˇ hpaˍ hk'a shuˍ shuˍ nawˬ hui htawˇ oˇ hk'e te chehˇ-oˆ. 37 Awˬ shehˍ hpaˇ k'aw‸ gaˬ la ve teˇ yanˇ, shaw chehˇ ve awˬ ceˬ teˇ hpaˍ lehˬ, awˬ bon uiˍ ve yoˬ. Ngaˬ nawˬ hui hta‸ awˬ tehˬ awˬ na k'oˆ laˇ ve, awˬ shehˍ hpaˇ lehˬ yawˇ haˍ pi tsuh‸ leh, awˬ ceˬ teˇ hpaˍ hta‸ hpui lawˇ paˇ lo mui tcuh sheˬ leh, yawˇ awˬ to yawˇ hui hta‸ te caˍ te taw piˇ tuˬ yoˬ. 38 Shehˍ k'aw hkui maˇ gaˬ sheˍ htaˇ leh naˍ, maˇ heˆ k'o shehˍ k'aw hkui ponˬ peuˬ hk'aw‸ nawˉ leh naˍ, awˬ shehˍ hpaˇ k'aw‸ gaˬ la leh, awˬ ceˬ teˇ hpaˍ chi hk'e shaw chehˇ ve hta‸ g'a mawˬ ve k'o, yawˇ hui awˬ bon uiˍ ve yoˬ. 39 Yehˬ shehˍ hpaˇ lehˬ, chaw hk'awˇ laˬ tuˬ ve awˬ yanˇ hta‸ shiˍ taˍ ve hk'e k'o, yawˇ ve yehˬ awˬ hk'aw lo chaw hk'awˇ maˇ g'a lo‸ la tuˬ yawˇ hk'a deh‸ shaw taˍ tuˬ yoˬ teh‸ nawˬ hui shiˍ-o‸. 40 Nawˬ hui htawˇ hk'a deh‸ hehnˇ taˍ-o‸. Awˬ lawn k'o, nawˬ hui maˇ dawˇ maˇ gaˇ ve awˬ yanˇ awˬ hk'aw lo chaw yaˇ ve Yaˇ hpu k'aw‸ ya‸ la tuˬ yoˬ teh‸, Yeˍsuˆ yawˇ hui hta‸ k'oˆ piˇ ve yoˬ. 41 Oˇ htaˇ Peˍtruˆ k'oˆ ve, Jawˇ mawˇ-oˬ, tawˇ pa haˉ chi ngaˬ hui hta‸ ceh tiˉ k'oˆ laˇ ve laˇ, maˇ heˆ k'o chaw hk'a peu-eˬ hta‸ k'oˆ piˇ ve laˇ teh‸ na nyi ve yoˬ. 42 Jawˇ mawˇ Yeˍsuˆ k'aw‸ k'oˆ ve, Ka ti‸ yeˬ leh cuˇ yiˍ cawˬ ve mawˇ ha‸ shaˉ shehˍ hpaˇ teˇ g'aˇ lehˬ, a shu le. Awˬ shehˍ hpaˇ ve awˬ ceˬ teˇ hpaˍ hta‸ awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ, yawˇ ve awˬ shehˍ hpaˇ lehˬ yawˇ hta‸ awˬ hoˉ teh taˍ tuˬ yoˬ maˇ heˆ laˇ. 43 Yawˇ ve awˬ shehˍ hpaˇ k'aw‸ gaˬ la htaˇ, awˬ ceˬ teˇ g'aˇ chi hk'e te chehˇ ve hta‸ yawˇ g'a mawˬ ve k'o, awˬ ceˬ oˇ ve lehˬ awˬ bon uiˍ ve yoˬ. 44 Ngaˬ nawˬ hui hta‸ awˬ tehˬ awˬ na k'oˆ laˇ ve, awˬ shehˍ hpaˇ lehˬ, yawˇ ve mawˇ jeˬ hk'a peu-eˬ awˬ hk'oˆ awˬ ceˬ oˇ ve hta‸ awˬ hoˉ te tcuh tuˬ yoˬ. 45 Ya‸ hk'aˇ awˬ ceˬ oˇ ve lehˬ, Ngaˬ ve awˬ jawˇ mawˇ haˆ haˆ maˇ k'aw‸ la taˬ teh‸ yawˇ ve nyi ma hk'aw dawˇ leh, awˬ ceˬ paˍ awˬ ceˬ ma teˇ hpaˍ hta‸ dawˆ leh, caˇ chehˇ dawˬ chehˇ leh tzuhˬ dawˬ bvuhˆ ve k'o, 46 awˬ ceˬ oˇ ve maˇ dawˇ maˇ gaˇ ve awˬ nyi, maˇ shiˍ ve awˬ yanˇ awˬ hk'aw lo yawˇ ve awˬ shehˍ hpaˇ k'aw‸ gaˬ la leh, yawˇ hta‸ hehnˇ chaweh ciˍ yanˍ leh, ka ti‸ maˇ yeˬ ve chaw teˇ hpaˍ geh chehˇ piˇ lawˬ tuˬ yoˬ. 47 A shu yawˇ ve awˬ shehˍ hpaˇ ve a loˍ hta‸ shiˍ taˍ ve ka‸, maˇ gu maˇ hehnˇ taˍ leh, awˬ shehˍ hpaˇ ve a loˍ hta‸ maˇ te ve awˬ ceˬ teˇ g'aˇ lehˬ, laiˉ hk'e jaw‸ ve hta‸ g'a hkanˍ tuˬ yoˬ. 48 Maˇ shiˍ ve awˬ hk'aw lo, jaw‸ keunˍ jaw‸ cawˇ ve teˇ ceuˬ hta‸ te ya‸ ve awˬ ceˬ teˇ g'aˇ lehˬ, a ciˉ ceh tiˉ jaw‸ ve hta‸ g'a hkanˍ tuˬ yoˬ. Maˇ chaweh g'a ve chaw teˇ g'aˇ le le lehˬ, maˇ chaweh g'a k'aw‸ shaiˍ tuˬ yoˬ. Maˇ chaweh a‸ piˇ taˍ ve hta‸ g'a ha‸ yuˬ taˍ ve chaw teˇ g'aˇ geh leuˉ leh k'aw‸ lawˬ hk'aw‸ tuˬ yoˬ. 49 Miˬ guiˬ hk'oˆ lo aˬ miˍ baˬ keu tuˬ ngaˬ laˬ ve yoˬ. Aˬ miˍ oˇ ve chi beu‸ ka‸ to‸ chehˇ tuˬ ve hta‸ ngaˬ heuˆ gaˇ ve yoˬ. 50 Ya‸ hk'aˇ, ngaˬ g'a hkanˍ tuˬ ve baˆtiˆsaˬ teˇ maˬ cawˬ ve yoˬ. Oˇ ve hta‸ ngaˬ maˇ hkanˍ sheˍ ve ceh ceh, nyiˉ tiˍ taˍ ve hta‸ ngaˬ hk'aˬ ma g'a hkanˍ ve le. 51 Miˬ guiˬ hk'oˆ lo shu cawˇ da‸ hui da‸ tuˬ awˬ pon ngaˬ laˬ ve teh‸ nawˬ hui dawˇ ve laˇ. Oˇ hk'e te tuˬ awˬ pon ngaˬ laˬ ve maˇ heˆ. Shu hpaˆ da‸ guiˇ da‸ tuˬ awˬ pon laˬ ve yoˬ teh‸, ngaˬ nawˬ hui hta‸ k'oˆ laˇ ve yoˬ. 52 Awˬ lawn k'o, chi beu‸ hta‸ tanˬ leh, yehˬ teˇ yehˬ tiˉ awˬ hk'aw lo chehˇ ve chaw ngaˇ g'aˇ lehˬ, hpaˆ da‸ leh nyiˇ g'aˇ teˇ moˍ, shehˆ g'aˇ teˇ moˍ hpeh‸ k'ai tuˬ yoˬ. 53 Awˬ pa leh awˬ yaˇ paˍ, awˬ e leh awˬ yaˇ miˇ awˬ pi leh awˬ hkuiˇ ma, teˇ g'aˇ leh teˇ g'aˇ hpaˆ da‸ k'ai tuˬ yoˬ teh‸ k'oˆ ve yoˬ. 54 Chaw awˬ moˍ lonˉ hta‸ htawˇ yawˇ k'oˆ piˇ ve, Mvuhˇ nyi k'ehˬ hpawˇ lo moˬ tawˆ la ve hta‸ nawˬ hui g'a mawˬ ve teˇ yanˇ, Mvuhˇ yeˬ laˬ tuˬ yoˬ teh‸, teˇ cawˬ haˉ nawˬ hui k'oˆ ve yoˬ. K'oˆ ve hk'a shuˍ shuˍ hpeh‸ la ve yoˬ. 55 Awˬ hawˉ hpawˇ ve mvuhˇ haw meuˆ laˬ ve hta‸ nawˬ hui g'a mawˬ ve teˇ yanˇ, Haw jaˇ chiˆ jaˇ tuˬ yoˬ teh‸ nawˬ hui k'oˆ ve yoˬ. K'oˆ ve hk'a shuˍ shuˍ hpeh‸ la ve yoˬ. 56 Heˍ puiˉ ve chaw teˇ hpaˍ-oˬ, miˬ guiˬ leh mvuhˇ naw ma hta‸ nyi leh fuiˍ da‸ pehˬ da‸ tuˬ nawˬ hui shiˍ ve yoˬ. Ya‸ hk'aˇ, chi beu‸ ve awˬ yanˇ hta‸ aˬ hto‸ ma te nawˬ hui fuiˍ da‸ pehˬ da‸ maˇ g'a ve le. 57 Aˬ hto‸ ma te nawˬ hui hk'aˇ nawˬ hui hteˇ ve cawˇ ve teˇ ceuˬ hta‸ fuiˍ da‸ pehˬ da‸ maˇ g'a ve le. 58 Nawˬ hta‸ tawˇ te ve chaw geh teˇ geh jawˇ mawˇ geh k'ai chehˇ ve teˇ yanˇ, ya‸ k'aw k'aˉ lo k'ai chehˇ htaˇ, yawˇ hta‸ cawˇ da‸ tuˬ g'aˇ hte‸ te-o. Hk'e maˇ heˆ k'o, yawˇ lehˬ suhˉ jehˬ shehˍ hpaˇ geh nawˬ hta‸ g'awˬ k'ai leh, suhˉ jehˬ shehˍ hpaˇ htawˇ htawnˍ awˬ hoˉ ve la‸ sheh awˬ hk'aw lo nawˬ hta‸ chiˇ a‸ piˇ tuˬ yoˬ. Htawnˍ awˬ hoˉ lehˬ, nawˬ hta‸ htawnˍ hk'aw keu laˇ tuˬ yoˬ. 59 Ngaˬ nawˬ hta‸ k'oˆ laˇ ve, peh‸ shanˍ awˬ leh teˇ peh‸ hk'a gaˬ maˇ shaiˍ peuˬ ve ceh ceh, htawnˍ hk'aw lo nawˬ maˇ g'a tawˆ k'ai taˬ teh‸ Yeˍsuˆ k'oˆ ve yoˬ.

Luˉka‸ 13

1 Awˬ yanˇ oˇ ve awˬ hk'aw lo chaw teˇ hpaˍ hpaˍ laˬ leh, jawˇ mawˇ Piˉla‸ lehˬ, Gaˍliˍlehˇ chaw teˇ hpaˍ hpaˍ ve awˬ suhˍ leh yawˇ hui tanˇ chehˇ ve ceˇ caˬ awˬ suhˍ hta‸ hkaw‸ da‸ ve awˬ lawn Yeˍsuˆ hta‸ hto piˇ ve yoˬ. 2 Yeˍsuˆ k'aw‸ k'oˆ ve, Gaˍliˍlehˇ chaw oˇ ve teˇ hpaˍ lehˬ, chi hk'e g'a hkanˍ ve pa taw, Gaˍliˍlehˇ chaw hk'a peu-eˬ a‸ kehˉ yawˇ hui venˇ baˆ uiˍ ve teh‸ nawˬ hui dawˇ ve laˇ. 3 Ngaˬ nawˬ hui hta‸ k'oˆ laˇ ve, yawˇ hui leuˉ leh venˇ baˆ uiˍ ve maˇ heˆ. Nawˬ hui lehˬ, venˇ baˆ hta‸ maˇ dawˇ hpfuhˆ k'o, nawˬ hui hk'a peu-eˬ htawˇ yawˇ hui hk'a shuˍ shuˍ luˬ k'ai sheˆ k'ai tuˬ yoˬ. 4 Chi hk'oˆ ka‸, Siˉlonˍ hk'aˆ hk'aw mvuh ve yehˬ teˇ yehˬ paiˍ leh, teˍ pehˍ ve chaw teˇ chi hiˉ g'aˇ lehˬ, Yeˍruˆsaˍlehnˍ venˇ hk'aw lo chehˇ ve chaw hk'a peu-eˬ a‸ kehˉ yawˇ hui te ya‸ ve teh‸ nawˬ hui dawˇ ve laˇ. 5 Ngaˬ nawˬ hui hta‸ k'oˆ laˇ ve, yawˇ hui leuˉ leh te ya‸ ve maˇ heˆ. Nawˬ hui lehˬ, venˇ baˆ hta‸ maˇ dawˇ hpfuhˆ ve k'o, nawˬ hui hk'a peu-eˬ htawˇ yawˇ hui hk'a shuˍ shuˍ luˬ k'ai sheˆ k'ai tuˬ yoˬ teh‸, yawˇ hui hta‸ k'oˆ piˇ ve yoˬ. 6 Oˇ htaˇ yawˇ tawˇ pa haˉ te maˍ leh k'oˆ ve, Chaw teˇ g'aˇ lehˬ, yawˇ ve a pehˉ meuˇ hko awˬ hk'aw lo ti taˍ ve maˉ nawˆ cehˬ teˇ cehˬ cawˬ ve yoˬ. Maˉ nawˆ cehˬ oˇ ve hta‸ yawˇ awˬ shiˍ ca nyi la ve htawˇ maˇ mawˬ. 7 Hk'e te leh, hko ha‸ shaˉ shehˍ hpaˇ hta‸ yawˇ k'oˆ piˇ ve, Shehˆ hk'aw‸ hk'a gaˬ maˉ nawˆ cehˬ chi hta‸ ngaˬ awˬ shiˍ ca nyi la ve htawˇ maˇ mawˬ. Awˬ cehˬ chi hta‸ htu baˬ loˬ. Aˬ hto‸ ma te miˬ guiˬ hta‸ chehˇ kuiˬ hk'e leˇ te peuˬ piˇ ve le teh‸ k'oˆ piˇ ve yoˬ. 8 Hko ha‸ shaˉ shehˍ hpaˇ k'aw‸ k'oˆ ve, Jawˇ mawˇ-oˬ, chi teˇ hk'aw‸ teh taˍ piˇ sheˍ. Awˬ hkuiˉ puiˍ lo ngaˬ hk'a caw zuhˇ duˇ sheˬ leh, hkuiˇ keu piˇ shaˍ. 9 Awˬ hk'aw‸ nawˉ awˬ shiˍ naw‸ la ve k'o, da‸ ve yoˬ. Ya‸ hk'aˇ, awˬ shiˍ maˇ naw‸ la ve k'o, nawˬ htu baˬ hpeh‸ ve yoˬ teh‸, yawˇ hta‸ k'oˆ piˇ ve yoˬ. 10 Shinˉ nyi teˇ nyi htaˇ bon yehˬ teˇ yehˬ awˬ hk'aw lo yawˇ maˍ piˇ chehˇ ve yoˬ. 11 Oˇ htaˇ, teˇ chi hiˉ hk'aw‸ hk'a gaˬ neˇ geh leh naˬ chehˇ ve yaˇ miˇ teˇ g'aˇ oˇ kaˬ lo chehˇ taˍ ve yoˬ. Yawˇ lehˬ, caw‸ k'aw‸ lehˍ hpeh‸ leh, yawˇ hk'aˇ yawˇ a ciˉ ka‸ hteˇ lehˍ te maˇ g'a. 12 Yeˍsuˆ lehˬ, yaˇ miˇ oˇ ve hta‸ g'a mawˬ htaˇ yawˇ hta‸ kuˬ yuˬ leh, Yaˇ miˇ-oˬ, nawˬ ve a naˍ hta‸ nawˬ g'a ponˬ peuˬ teh‸ yawˇ hta‸ k'oˆ piˇ ve yoˬ. 13 Yaˇ miˇ oˇ ve awˬ hk'oˆ hta‸ yawˇ ve la‸ sheh taˍ piˇ leh, teˇ cawˬ haˉ yaˇ miˇ oˇ ve lehˬ caw‸ hteˇ lehˍ te leh, G'uiˬ sha hta‸ chiˇ uiˍ chiˇ mvuh ve yoˬ. 14 Shinˉ nyi awˬ hk'aw lo chaw naˬ hta‸ Yeˍsuˆ gu na-e piˇ ve pa taw, bon yehˬ awˬ hoˉ nyi ma zuhˆ leh, chaw chi ma ve hta‸ k'oˆ piˇ ve, Kanˉ te cawˇ ve awˬ nyi hkaw‸ nyi cawˬ ve yoˬ. Nawˬ hui ve a naˍ na-e la tuˬ, awˬ nyi oˇ ve teˇ hpaˍ awˬ hk'aw lo laˬ-o‸. Shinˉ nyi teˇ nyi htaˇ taˇ laˬ teh‸, yawˇ hui hta‸ k'oˆ piˇ ve yoˬ. 15 Oˇ htaˇ Jawˇ mawˇ Yeˍsuˆ yawˇ hta‸ k'aw‸ k'oˆ piˇ ve, Heˍ puiˉ ve chaw teˇ hpaˍ-oˬ, nawˬ hui teˇ g'aˇ le le shinˉ nyi htaˇ a shu yawˇ ve nuˇ leh piˉ laˬ hta‸ hpui leh, hkawˆ hk'aw sheh tawˆ-e leh iˉ kaˆ ca taw piˇ ve maˇ heˆ laˇ. 16 Aˍbraˍhanˍ ve yaˇ miˇ chi hta‸ teˇ chi hiˉ hk'aw‸ hk'a gaˬ Saˍtanˍ hpeh tiˍ taˍ ve yoˬ. Hpeh taˍ ve chi hta‸ shinˉ nyi teˇ nyi awˬ hk'aw lo hpui hpehˇ piˇ ve maˇ cawˇ laˇ teh‸ k'oˆ piˇ ve yoˬ. 17 Yawˇ chi hk'e k'oˆ ve teˇ yanˇ yawˇ ve canˇ paˍ hk'a peu-eˬ ya‸ taw ve yoˬ. Chaw awˬ moˍ lonˉ hk'a peu-eˬ lehˬ, yawˇ te ve awˬ me‸ awˬ hponˇ hk'a biˇ cawˬ ve kanˉ hk'a peu-eˬ hta‸ ha lehˬ jaˇ ve yoˬ. 18 Hk'e te leh yawˇ k'oˆ ve, G'uiˬ sha ve mvuhˇ miˬ lehˬ, aˬ hto‸ ma hta‸ shuˍ ve le. Ngaˬ aˬ hto‸ ma hta‸ yuˬ leh g'a tehˆ da‸ nyi tuˬ ve le. 19 G'uiˬ sha ve mvuhˇ miˬ lehˬ, chaw teˇ g'aˇ yawˇ ve hko awˬ hk'aw lo sheˍ taˍ ve g'awˇ caˉ yawˇ hta‸ shuˍ ve yoˬ. Awˬ yawˇ oˇ ve lehˬ, yeˬ la uiˍ la leh, awˬ cehˬ lonˉ hpeh‸ la ve yoˬ. Mvuhˇ hpe lo poˬ ve ngaˆ teˇ hpaˍ lehˬ, awˬ k'aˉ teˇ hpaˍ awˬ hk'oˆ g'aˇ jehˇ ve yoˬ teh‸ k'oˆ ve yoˬ. 20 Yawˇ teˇ pawˆ k'aw‸ k'oˆ ve, G'uiˬ sha ve mvuhˇ miˬ hta‸ ngaˬ aˬ hto‸ ma yuˬ leh g'a tehˆ da‸ nyi tuˬ ve le. 21 G'uiˬ sha ve mvuhˇ miˬ lehˬ, diˇ hta‸ shuˍ ve yoˬ. Yaˇ miˇ teˇ g'aˇ diˇ hta‸ yuˬ leh hkaoˍ monˇ meu-e shehˆ hk'awˍ lawˇ awˬ hk'aw lo keu ve teˇ yanˇ hk'a peu-eˬ hta‸ ciˇ la piˇ lawˬ ve yoˬ teh‸ k'oˆ ve yoˬ. 22 Oˇ ve hk'aw‸ nawˉ Yeˍsuˆ lehˬ, Yeˍruˆsaˍlehnˍ venˇ lo k'ai ve yoˬ. Yawˇ k'ai ve teˇ yanˇ, ya‸ k'aw k'aˉ lo cawˬ ve venˇ hk'aˆ teˇ hpaˍ awˬ hk'aw lo maˍ piˇ k'ai ve yoˬ. 23 Oˇ htaˇ, chaw teˇ g'aˇ k'oˆ ve, Jawˇ mawˇ-oˬ, htaiˍ hk'aw‸ ve hta‸ g'a ve chaw lehˬ, a ciˉ ceh tiˉ cawˬ ve laˇ teh‸ yawˇ hta‸ na nyi htaˇ, Yeˍsuˆ yawˇ hui hta‸ k'aw‸ k'oˆ piˇ ve, 24 Maˇ k'oˍ ve yehˬ miˉ hpe‸ awˬ hk'aw lo g'a lo‸-e tuˬ g'aˇ hte‸ te-o. Ngaˬ nawˬ hui hta‸ k'oˆ laˇ ve, chaw maˇ maˇ lo‸-e tuˬ te ve htawˇ, lo‸-e maˇ hpeh‸. 25 Yehˬ shehˍ hpaˇ tu leh yehˬ miˉ hta‸ hoˆ taˍ peuˬ hk'aw‸ nawˉ, nawˬ hui awˬ baˬ hpawˇ lo huˉ taˍ leh, yehˬ miˉ hta‸ htawˆ tuˬ yoˬ. Jawˇ mawˇ-oˬ, ngaˬ hui hta‸ yehˬ miˉ a ciˉ hpaw laˇ-oˆ teh‸ k'oˆ ve teˇ yanˇ, yehˬ shehˍ hpaˇ lehˬ, Nawˬ hui hk'aˬ lo laˬ ve hta‸ ngaˬ maˇ shiˍ teh‸, nawˬ hui hta‸ k'aw‸ k'oˆ laˇ tuˬ yoˬ. 26 Oˇ htaˇ nawˬ hui chi hk'e k'aw‸ k'oˆ tuˬ yoˬ. Ngaˬ hui lehˬ nawˬ geh teˇ geh g'a caˇ g'a dawˬ peuˬ. Ngaˬ hui ve venˇ hk'aw cawˬ ve ya‸ k'aw teˇ hpaˍ lo htawˇ nawˬ maˍ laˇ peuˬ teh‸ k'oˆ tuˬ yoˬ. 27 Yehˬ shehˍ hpaˇ chi hk'e k'aw‸ k'oˆ laˇ tuˬ yoˬ. Nawˬ hui hk'aˬ lo laˬ ve hta‸ ngaˬ maˇ shiˍ teh‸ ngaˬ nawˬ hui hta‸ k'oˆ laˇ ve yoˬ. Haiˬ ve hta‸ te ve chaw hk'a peu-eˬ-oˬ, ngaˬ geh tawˆ k'ai-o teh‸ yawˇ k'oˆ laˇ tuˬ yoˬ. 28 Aˍbraˍhanˍ, Iˉcaˆ, Yaˍkoˆ leh G'uiˬ sha ve tcuh kaˍ paˍ hk'a peu-eˬ G'uiˬ sha ve mvuhˇ miˬ awˬ hk'aw lo chehˇ taˍ ve hta‸ nawˬ hui g'a mawˬ leh, nawˬ hui awˬ to awˬ baˬ hpawˇ lo g'a‸ tawˆ ve hta‸ g'a hkanˍ ve teˇ yanˇ, nawˬ hui hawˬ leh ciˬ geu‸ tuˬ yoˬ. 29 Oˇ htaˇ mvuhˇ nyi tawˆ mvuhˇ nyi k'ehˬ, awˬ hawˉ awˬ na lo chehˇ ve chaw hui laˬ leh, G'uiˬ sha ve mvuhˇ miˬ awˬ hk'aw lo g'a mui caˇ tuˬ yoˬ. 30 Shu awˬ hk'aw‸ nawˉ chehˇ ve chaw teˇ hpaˍ hpaˍ lehˬ, shu awˬ g'uˇ suhˍ chehˇ tuˬ yoˬ. Shu awˬ g'uˇ suhˍ chehˇ ve chaw teˇ hpaˍ hpaˍ lehˬ, shu awˬ hk'aw‸ nawˉ chehˇ tuˬ yoˬ teh‸ k'oˆ piˇ ve yoˬ. 31 Awˬ yanˇ oˇ ve awˬ hk'aw, Hpaˍriˍsehˇ teˇ hpaˍ hpaˍ laˬ leh, Choˬ kaˬ lo tawˆ k'ai-o. Jawˇ mawˇ Heˍroˆ nawˬ hta‸ tiˇ pehˍ gaˇ ve yoˬ teh‸ yawˇ hta‸ k'oˆ piˇ ve yoˬ. 32 Yeˍsuˆ yawˇ hui hta‸ k'aw‸ k'oˆ piˇ ve, Nawˬ hui k'ai leh heh hpuiˇ oˇ ve hta‸ chi hk'e k'oˆ piˇ-oˆ. Ya‸ nyi leh shawˉ pawˍ neˇ teˇ hpaˍ hta‸ ngaˬ g'a‸ k'oˬ leh chaw naˬ teˇ hpaˍ hta‸ gu na-e piˇ tuˬ yoˬ. Shehˆ nyi teˇ nyi gaˬ k'o, ngaˬ ve kanˉ biˇ la tuˬ yoˬ teh‸ ca k'oˆ piˇ-oˆ. 33 Ya‸ hk'aˇ ya‸ nyi, shawˉ pawˍ leh hpa‸ nyi ngaˬ g'a k'ai tuˬ sheˍ ve yoˬ. Awˬ lawn k'o, Yeˍruˆsaˍlehnˍ venˇ awˬ hk'aw lo maˇ heˆ k'o, G'uiˬ sha ve tcuh kaˍ paˍ maˇ g'a luˬ maˇ g'a sheˆ. 34 Yeˍruˆsaˍlehnˍ venˇ-oˬ, Yeˍruˆsaˍlehnˍ venˇ-oˬ, nawˬ lehˬ G'uiˬ sha ve tcuh kaˍ paˍ teˇ hpaˍ hta‸ hk'aˬ htaˆ ka‸ tiˇ pehˍ leh, nawˬ geh peu laˇ ve chaw teˇ hpaˍ hta‸ hk'aˬ htaˆ ka‸ haˉ pui baˬ pehˍ ve yoˬ. G'aˆ ma peuˍ lehˬ, yawˇ ve awˬ yehˇ teˇ hpaˍ hta‸ toˍ la‸ k'uˉ awˬ hawˉ lo hpoˆ chehˇ piˇ lawˬ ve hk'e, nawˬ ve awˬ yaˇ awˬ duˬ teˇ hpaˍ hta‸ ngaˬ awˬ hawˉ lo hk'aˬ nyiˇ pawˆ hpoˆ chehˇ piˇ lawˬ gaˇ ve htawˇ, nawˬ maˇ te. 35 Nyi loˬ, nawˬ hui ve yehˬ lehˬ, gawˬ cu gawˬ pehˆ hpeh‸ la tuˬ yoˬ. Ngaˬ nawˬ hui hta‸ k'oˆ laˇ ve, Jawˇ mawˇ G'uiˬ sha ve awˬ meh awˬ hawˉ lo laˬ ve chaw teˇ g'aˇ hta‸ awˬ bon uiˍ piˇ-oˆ teh‸, nawˬ hui maˇ k'oˆ ve ceh ceh, nawˬ hui ngaˬ hta‸ maˇ g'a k'aw‸ mawˬ teh‸ k'oˆ ve yoˬ.

Luˉka‸ 14

1 Shinˉ nyi teˇ nyi htaˇ Yeˍsuˆ lehˬ, Hpaˍriˍsehˇ awˬ moˍ awˬ hk'aw lo awˬ hoˉ teˇ g'aˇ ve yehˬ lo awˍ caˇ tuˬ lo‸-e peuˬ hk'aw‸ nawˉ, yawˇ hui yawˇ hta‸ jaˆ nyi chehˇ ve yoˬ. 2 Oˇ htaˇ, g'oˇ peˬ hk'aw iˉ kaˆ cawˬ leh hpo‸ naˬ ve chaw teˇ g'aˇ yawˇ g'uˇ suhˍ lo chehˇ taˍ ve yoˬ. 3 Yeˍsuˆ k'oˆ ve, Shinˉ nyi awˬ hk'aw lo chaw naˬ hta‸ gu na-e piˇ cawˇ laˇ, maˇ cawˇ laˇ teh‸, awˬ liˇ tawˇ hkawˇ shiˍ paˍ leh Hpaˍriˍsehˇ teˇ hpaˍ hta‸ na nyi ve yoˬ. 4 Ya‸ hk'aˇ, yawˇ hui ta‸ iˉ chehˇ taˍ ve yoˬ. Oˇ htaˇ, chaw oˇ ve hta‸ yawˇ yuˬ taˍ leh gu na-e piˇ peuˬ hk'aw‸ nawˉ, yawˇ hta‸ hpehˇ piˇ ve yoˬ. 5 Yawˇ yawˇ hui hta‸ k'oˆ piˇ ve, Nawˬ hui awˬ hk'aw lo chaw teˇ g'aˇ g'aˇ a shu yawˇ ve yaˇ paˍ maˇ k'oˆ, nuˇ maˇ k'oˆ, shinˉ nyi htaˇ nanˬ bawˍ awˬ hk'aw lo ce lo‸-e ve k'o, teˇ cawˬ haˉ maˇ g'awˬ tawˆ piˇ ve a shu teˇ g'aˇ cawˬ le teh‸ k'oˆ piˇ ve yoˬ. 6 Yawˇ hui lehˬ, tawˇ chi hta‸ te‸ chiˉ k'aw‸ yaw hk'aw‸ maˇ g'a. 7 Kuˬ taˍ ve chaw teˇ hpaˍ lehˬ, awˬ me‸ awˬ hponˇ cawˬ ve mui kuiˬ hta‸ leuˆ yuˬ chehˇ ve hta‸ yawˇ g'a mawˬ ve teˇ yanˇ, yawˇ yawˇ hui hta‸ tawˇ pa haˉ te maˍ leh k'oˆ piˇ ve, 8 Chaw teˇ g'aˇ g'aˇ nawˬ hta‸ hkehˉ caˇ kuiˬ lo kuˬ ve teˇ yanˇ, awˬ me‸ awˬ hponˇ cawˬ ve mui kuiˬ hta‸ taˇ mui. Awˬ lawn k'o, nawˬ a‸ kehˉ awˬ me‸ awˬ hponˇ cawˬ ve chaw hta‸ htawˇ yawˇ kuˬ taˍ ve k'o, 9 nawˬ hui nyiˇ g'aˇ g'aˇ hta‸ kuˬ shehˍ hpaˇ laˬ leh, Nawˬ ve mui kuiˬ chaw chi teˇ g'aˇ hta‸ piˇ-oˆ teh‸, yawˇ nawˬ hta‸ k'oˆ laˇ tuˬ yoˬ. Oˇ htaˇ nawˬ lehˬ, ya‸ taw ve awˬ hk'aw lo shu a‸ kehˉ awˬ me‸ awˬ hponˇ maˇ cawˬ ve mui kuiˬ hta‸ g'a k'aw‸ mui tuˬ yoˬ. 10 Chaw teˇ g'aˇ g'aˇ nawˬ hta‸ kuˬ ve teˇ yanˇ, shu a‸ kehˉ awˬ me‸ awˬ hponˇ maˇ cawˬ ve mui kuiˬ hta‸ mui-o. Oˇ hk'e te ve k'o, nawˬ hta‸ kuˬ shehˍ hpaˇ laˬ leh, Awˬ chawˇ-oˬ, chi a‸ kehˉ awˬ me‸ awˬ hponˇ cawˬ ve mui kuiˬ hta‸ ca mui-o teh‸ nawˬ hta‸ k'oˆ laˇ tuˬ yoˬ. Oˇ htaˇ, nawˬ geh teˇ geh mui chehˇ ve chaw hk'a peu-eˬ mehˆ g'uˇ suhˍ nawˬ awˬ me‸ awˬ hponˇ g'a tuˬ yoˬ. 11 Awˬ lawn k'o, a shu yawˇ awˬ to hta‸ taˍ uiˍ ve chaw hk'aˬ ve teˇ g'aˇ maˇ k'oˆ, taˍ i ve hta‸ g'a hkanˍ tuˬ yoˬ. A shu yawˇ awˬ to hta‸ taˍ i ve chaw hk'aˬ ve teˇ g'aˇ maˇ k'oˆ, taˍ uiˍ ve hta‸ g'a hkanˍ tuˬ yoˬ teh‸ k'oˆ ve yoˬ. 12 Yawˇ hta‸ kuˬ ve chaw teˇ g'aˇ hta‸ htawˇ yawˇ k'oˆ piˇ ve, Mvuhˇ shawˉ awˍ caˇ tuˬ maˇ k'oˆ, mvuhˇ hpeu‸ awˍ caˇ tuˬ maˇ k'oˆ, nawˬ shu hta‸ kuˬ ve teˇ yanˇ, nawˬ ve awˬ chawˇ awˬ paˆ teˇ hpaˍ, awˬ viˉ awˬ nyi teˇ hpaˍ, awˬ ceuˬ awˬ hk'aˇ teˇ hpaˍ leh, awˬ paˇ awˬ kui lo chehˇ ve paw sha ve chaw teˇ hpaˍ hta‸ taˇ kuˬ. Oˇ hk'e ve chaw hta‸ kuˬ ve k'o, yawˇ hui htawˇ nawˬ hta‸ k'aw‸ kuˬ leh awˬ bon k'aw‸ te hk'aw‸ laˇ tuˬ yoˬ. 13 Ya‸ hk'aˇ, nawˬ hti caˇ hti dawˬ tuˬ shu hta‸ kuˬ ve teˇ yanˇ, haˍ ve g'awˇ ve chaw, hkui luˬ la‸ luˬ ve chaw leh, mehˆ cuˉ ve chaw teˇ hpaˍ hta‸ kuˬ-o‸. 14 Chi hk'e te ve k'o, nawˬ awˬ bon uiˍ tuˬ yoˬ. Awˬ lawn k'o, yawˇ hui nawˬ hta‸ awˬ bon k'aw‸ te hk'aw‸ laˇ maˇ g'a. Hteˇ ve cawˇ ve chaw teˇ hpaˍ k'aw‸ te‸ tu la ve awˬ yanˇ gaˬ k'o, G'uiˬ sha nawˬ hta‸ awˬ bon k'aw‸ te hk'aw‸ laˇ tuˬ yoˬ teh‸, Yeˍsuˆ k'oˆ piˇ ve yoˬ. 15 Yawˇ geh teˇ geh mui caˇ ve chaw teˇ g'aˇ lehˬ, tawˇ oˇ ve hta‸ g'a kaˇ htaˇ, G'uiˬ sha ve mvuhˇ miˬ awˬ hk'aw lo g'a caˇ g'a dawˬ ve chaw teˇ g'aˇ lehˬ, awˬ bon uiˍ ve yoˬ teh‸ Yeˍsuˆ hta‸ k'oˆ piˇ ve yoˬ. 16 Yeˍsuˆ k'aw‸ k'oˆ ve, Chaw teˇ g'aˇ lehˬ, hti caˇ hti dawˬ lonˉ te tuˬ, chaw maˇ maˇ hta‸ kuˬ taˍ ve yoˬ. 17 Hti caˇ hti dawˬ ve awˬ yanˇ gaˬ la htaˇ, Laˬ-o‸, hk'a peu-eˬ gu taˍ peuˬ teh‸ kuˬ taˍ ve chaw teˇ hpaˍ hta‸ ca k'oˆ piˇ tuˬ, yawˇ ve awˬ ceˬ hta‸ k'ai tcuh ve yoˬ. 18 Yawˇ hui hk'a peu-eˬ nyi ma teˇ shiˍ tiˉ taˍ leh, maˇ g'a k'ai tuˬ lawˬ hkawˉ leh ca awˉ ve yoˬ. Awˉ lawˉ teˇ g'aˇ k'oˆ ve, Ngaˬ ti mi teˇ peˆ vuiˬ taˍ leh g'a ca nyi ve pa taw, ngaˬ hta‸ a ciˉ hpehˇ laˇ-oˆ teh‸, yawˇ hta‸ lawˬ hkawˉ ve yoˬ. 19 Awˬ kaˍ awˬ nu teˇ g'aˇ k'oˆ ve, Ngaˬ nuˇ ngaˇ ceh hta‸ vuiˬ taˍ leh g'a ca te nyi ve pa taw, ngaˬ hta‸ a ciˉ hpehˇ laˇ-oˆ teh‸, yawˇ hta‸ lawˬ hkawˉ ve yoˬ. 20 Awˬ kaˍ awˬ nu teˇ g'aˇ k'oˆ ve, Ngaˬ awˬ miˇ ma heuˆ peuˬ leh, laˬ maˇ hpeh‸ teh‸ k'oˆ piˇ ve yoˬ. 21 Hk'e te leh awˬ ceˬ k'aw‸ la leh, yawˇ ve awˬ jawˇ mawˇ hta‸ awˬ lawn oˇ ve teˇ hpaˍ hto piˇ ve yoˬ. Oˇ htaˇ yehˬ shehˍ hpaˇ nyi ma zuhˆ jaˇ leh yawˇ ve awˬ ceˬ hta‸ k'oˆ piˇ ve, Venˇ hk'aw ya‸ k'aw lonˉ ya‸ k'aw ehˉ teˇ hpaˍ lo haˆ haˆ k'ai leh, haˍ ve g'awˇ ve chaw, la‸ luˬ ve chaw, mehˆ cuˉ ve chaw leh hkui luˬ ve chaw teˇ hpaˍ hta‸ ca kuˬ veu laˇ-oˆ teh‸ k'oˆ piˇ ve yoˬ. 22 Oˇ ve hk'aw‸ nawˉ awˬ ceˬ k'aw‸ k'oˆ ve, Jawˇ mawˇ-oˬ, nawˬ k'oˆ laˇ ve hk'e te taˍ peuˬ. Ya‸ hk'aˇ, chehˇ kuiˬ cawˬ sheˍ teh‸ k'oˆ piˇ ve yoˬ. 23 Awˬ jawˇ mawˇ k'aw‸ k'oˆ ve, Venˇ awˬ baˬ lo ya‸ k'aw lonˉ leh ti mi hk'aw k'ai ve ya‸ k'aw ehˉ teˇ hpaˍ lo k'ai leh, ngaˬ ve yehˬ hk'aw chaw biˇ la tuˬ, laˬ htaˇ hk'a gaˬ kuˬ veu laˇ-oˆ. 24 Awˬ lawn k'o, ngaˬ nawˬ hui hta‸ k'oˆ laˇ ve, awˉ lawˉ htaˇ kuˬ taˍ ve chaw teˇ hpaˍ teˇ g'aˇ ka‸ ngaˬ ve caˇ tuˬ hta‸ maˇ g'a leh‸ nyi teh‸, awˬ ceˬ hta‸ k'oˆ piˇ ve yoˬ. 25 Oˇ htaˇ, chaw awˬ moˍ lonˉ teˇ hpaˍ yawˇ geh k'ai chehˇ ve teˇ yanˇ, yawˇ hpfuhˆ nyi leh yawˇ hui hta‸ k'oˆ piˇ ve, 26 Ngaˬ awˬ hk'aˇ suh laˬ ve chaw hk'aˬ ve teˇ g'aˇ maˇ k'oˆ, a shu yawˇ ve awˬ pa awˬ e, awˬ miˇ awˬ yaˇ, awˇ viˉ awˬ nyi teˇ hpaˍ hta‸ maˇ k'oˆ, a shu yawˇ ve a sha‸ hta‸ maˇ k'oˆ, maˇ canˇ ve k'o, ngaˬ ve awˬ la‸ g'awˇ te maˇ hpeh‸ taˬ. 27 Chaw hk'aˬ ve teˇ g'aˇ maˇ k'oˆ, a shu yawˇ ve la‸ ka hta‸ taˆ leh ngaˬ hk'aˇ suh maˇ laˬ ve k'o, ngaˬ ve awˬ la‸ g'awˇ te maˇ hpeh‸ taˬ. 28 Awˬ lawn k'o, nawˬ hui awˬ hk'aw lo chaw teˇ g'aˇ g'aˇ, mvuh ve yehˬ lonˉ hta‸ te gaˇ ve k'o, yehˬ oˇ ve hta‸ te peuˬ tuˬ yawˇ hpu law‸ leh naˍ, maˇ law‸ leh naˍ, hk'aˬ ma peuˬ tuˬ ve hta‸ mui taˍ leh awˉ lawˉ maˇ shawˍ nyi ve chaw teˇ g'aˇ g'aˇ cawˬ laˇ. 29 Chi hk'e maˇ shawˍ nyi ve k'o, yehˬ awˬ hkuiˉ puiˍ hta‸ yawˇ kawˍ taˍ peuˬ hk'aw‸ nawˉ, peuˬ htaˇ hk'a gaˬ te maˇ g'a ve k'o, hk'a g'a mawˬ ve chaw teˇ hpaˍ yawˇ hta‸ k'oˆ guiˇ g'uiˬ guiˇ leh chi hk'e k'oˆ tuˬ yoˬ. 30 Chi hpaˇ lehˬ, yehˬ awˬ hkuiˉ puiˍ tanˬ te sheˬ leh, peuˬ htaˇ hk'a gaˬ te maˇ g'a law teh‸ k'oˆ tuˬ yoˬ. 31 Maˇ heˆ k'o, hkunˉ hawˉ hkanˇ teˇ g'aˇ lehˬ, awˬ kaˍ awˬ nu hkunˉ hawˉ hkanˇ teˇ g'aˇ hta‸ bawˆ da‸-a teh‸ te ve teˇ yanˇ, shu ve ma‸ yaˇ nyiˇ meunˍ laˬ ve hta‸ yawˇ ve ma‸ yaˇ teˇ meunˍ bawˆ g'aˇ tuˬ naˍ, maˇ g'aˇ tuˬ naˍ, mui taˍ leh awˉ lawˉ hk'a deh‸ maˇ dawˇ nyi ve hkunˉ hawˉ hkanˇ teˇ g'aˇ g'aˇ cawˬ laˇ. 32 Maˇ g'aˇ ve hta‸ shiˍ k'o, awˬ kaˍ awˬ nu hkunˉ hawˉ hkanˇ teˇ g'aˇ vuiˇ kuiˬ lo laˬ chehˇ htaˇ ka‸ yawˇ ve awˬ tan te shehˍ hpaˇ teˇ hpaˍ hta‸ k'ai tcuh leh, k'aw‸ cawˇ da‸ hui da‸ tuˬ yawˇ lawˬ hkawˉ tuˬ yoˬ. 33 Chi hk'a shuˍ shuˍ, nawˬ hui awˬ hk'aw lo hk'aˬ ve chaw teˇ g'aˇ maˇ k'oˆ, yawˇ hk'a cawˬ ve hk'a peu-eˬ hta‸ maˇ baˬ taˉ ve k'o, ngaˬ ve awˬ la‸ g'awˇ te maˇ hpeh‸ taˍ. 34 Aˉ leh‸ lehˬ, da‸ ve yoˬ. Ya‸ hk'aˇ, mehˬ ve pehˆ k'ai peuˬ ve k'o, hk'aˬ hk'e te k'aw‸ mehˬ la tuˬ le. 35 Aˉ leh‸ oˇ ve lehˬ, miˬ guiˬ awˬ pon maˇ k'oˆ, miˬ hkuiˇ te tuˬ awˬ pon maˇ k'oˆ, awˬ bon maˇ cawˬ leh, aˉ k'a‸ paˉ lo shu yuˬ baˬ sheˬ ve yoˬ. Kaˇ tuˬ naˍ paw cawˬ ve chaw na-o teh‸ k'oˆ piˇ ve yoˬ.

Luˉka‸ 15

1 Awˬ hkawnˍ shaw paˍ hui leh venˇ baˆ yaˇ hui hk'a peu-eˬ, Yeˍsuˆ ve tawˇ hta‸ na tuˬ yawˇ awˬ paˇ lo jiˆ laˬ ve yoˬ. 2 Hpaˍriˍsehˇ hui leh li‸ bvuh‸ paˍ hui k'oˆ ve, Chi hpaˇ lehˬ, venˇ baˆ yaˇ hui hta‸ ha‸ yuˬ leh yawˇ hui geh teˇ geh hti caˇ hti dawˬ ve law teh‸, yawˇ hui ca beu ca hk'aiˉ leh k'oˆ ve yoˬ. 3 Oˇ htaˇ yawˇ hui hta‸ Yeˍsuˆ tawˇ pa haˉ chi maˍ piˇ leh k'oˆ ve, 4 Nawˬ hui awˬ hk'aw lo chaw teˇ g'aˇ yawˬ teˇ ha hkeh cawˬ leh teˇ hkeh mehˉ k'ai ve k'o, k'awˇ chi k'awˇ hkeh hta‸ heh puiˉ hk'aw lo teh taˉ leh, mehˉ k'ai ve yawˬ ehˉ hta‸ mawˬ htaˇ hk'a gaˬ maˇ ca nyi ve chaw teˇ g'aˇ g'aˇ cawˬ laˇ. 5 Yawˬ oˇ ve hta‸ yawˇ k'aw‸ mawˬ htaˇ, ha lehˬ ha k'a la‸ hpeh k'aˉ hk'oˆ chiˇ taˆ ve yoˬ. 6 Yawˇ ve aˉ hk'aw lo gaˬ la htaˇ, yawˇ ve awˬ chawˇ teˇ hpaˍ leh awˬ paˇ awˬ kui lo chehˇ ve chaw teˇ hpaˍ hta‸ kuˬ leh, Ngaˬ geh ga ha lehˬ la-o. Ngaˬ ve mehˉ k'ai ve yawˬ hta‸ k'aw‸ ca mawˬ peuˬ teh‸ yawˇ k'oˆ tuˬ yoˬ. 7 Oˇ ve hk'a shuˍ shuˍ, venˇ baˆ hta‸ dawˇ hpfuhˆ tuˬ maˇ loˍ ve hteˇ ve cawˇ ve chaw k'awˇ chi k'awˇ g'aˇ hta‸ pa taw, mvuhˇ naw ma hk'oˆ lo ha lehˬ tuˬ cawˬ ve a‸ kehˉ, venˇ baˆ yaˇ teˇ g'aˇ, venˇ baˆ hta‸ dawˇ hpfuhˆ ve pa taw, mvuhˇ naw ma hk'oˆ lo ha lehˬ tuˬ leuˉ leh cawˬ maˇ ve yoˬ teh‸, ngaˬ nawˬ hui hta‸ k'oˆ laˇ ve yoˬ. 8 Teˇ lawn lehˬ, yaˇ miˇ teˇ g'aˇ hpu teˇ chi hteh‸ cawˬ leh, teˇ hteh‸ mehˉ k'ai ve k'o, aˬ miˍ tuˉ leh yehˬ hta‸ shiˆ leh mawˬ htaˇ hk'a gaˬ maˇ ca nyi ve chaw teˇ g'aˇ g'aˇ cawˬ laˇ. 9 Hpu oˇ ve hta‸ k'aw‸ mawˬ htaˇ, yawˇ ve awˬ chawˇ teˇ hpaˍ leh awˬ paˇ awˬ kui lo chehˇ ve chaw teˇ hpaˍ hta‸ kuˬ leh, Ngaˬ geh ga ha lehˬ la-o. Mehˉ k'ai ve hpu hta‸ ngaˬ k'aw‸ ca mawˬ peuˬ teh‸ k'oˆ tuˬ yoˬ. 10 Oˇ ve hk'a shuˍ shuˍ, venˇ baˆ yaˇ teˇ g'aˇ, venˇ baˆ hta‸ dawˇ hpfuhˆ ve hta‸ pa taw, G'uiˬ sha ve mvuhˇ naw ma tcuh yaˇ teˇ hpaˍ mehˆ g'uˇ suhˍ ha lehˬ tuˬ cawˬ ve yoˬ teh‸, ngaˬ nawˬ hui hta‸ k'oˆ laˇ ve yoˬ. 11 Yeˍsuˆ teˇ pawˆ k'aw‸ k'oˆ ve, Chaw teˇ g'aˇ, yawˇ yaˇ paˍ nyiˇ g'aˇ cawˬ ve yoˬ. 12 Awˬ nyi paˍ teˇ g'aˇ lehˬ, yawˇ awˬ pa hta‸ k'oˆ piˇ ve, Ngaˬ pa-oˬ, ngaˬ g'a cawˇ ve awˬ shinˉ pehˬ laˇ-oˆ teh‸ lawˬ htaˇ, awˬ pa yawˇ huiˉ maˬ hta‸ awˬ shinˉ pehˬ piˇ ve yoˬ. 13 Awˬ hk'aw‸ nawˉ maˇ maw maw, awˬ nyi paˍ teˇ g'aˇ lehˬ, yawˇ ve mawˇ jeˬ hk'a peu-eˬ hta‸ shaw yuˬ veu leh, vuiˇ ve mvuhˇ miˬ lo k'ai ve yoˬ. Oˇ kaˬ lo yawˇ miˬ guiˬ ha lehˬ tuˬ te ponˬ te leuˉ leh, hpu shi mawˇ jeˬ hta‸ yehˇ baˬ caˇ baˬ peuˬ sheˬ ve yoˬ. 14 Yawˇ hk'a cawˬ ve hk'a peu-eˬ hta‸ yehˇ baˬ peuˬ hk'aw‸ nawˉ, mvuhˇ miˬ oˇ ve awˬ hk'aw lo meu‸ lonˉ kaˆ lonˉ gaˬ la leh, yawˇ g'a haˍ g'a g'awˇ jaˇ ve yoˬ. 15 Hk'e te leh, mvuhˇ miˬ oˇ ve awˬ hk'aw lo chehˇ ve chaw teˇ g'aˇ hta‸ yawˇ ca peun chehˇ taˍ ve yoˬ. Yawˇ yawˇ hta‸ heh hk'aw lo va‸ ca hawˉ caˍ tcuh ve yoˬ. 16 Va‸ caˇ ve nawˆ shiˍ teˇ hpaˍ hta‸ yawˇ hk'a bvuhˆ caˇ gaˇ htawˇ, shu teˇ g'aˇ ka‸ yawˇ hta‸ caˇ tuˬ maˇ caˍ piˇ. 17 Yawˇ k'aw‸ shiˍ k'aw‸ nawˇ la leh, Ngaˬ pa geh chehˇ ve g'aˇ hpfuhˇ caˇ shehˍ hpaˇ teˇ hpaˍ caˇ maˇ peuˬ dawˬ maˇ peuˬ ve ka‸, ngaˬ choˬ kaˬ lo meu‸ jehˇ kaˆ jehˇ leh suh tuˬ yoˬ. 18 Ngaˬ tu leh ngaˬ pa geh k'o‸-e leh, Ngaˬ pa-oˬ, ngaˬ lehˬ G'uiˬ sha hta‸ ka‸ nawˬ hta‸ ka‸ te ya‸ peuˬ. 19 Ya‸ nyi hk'aw‸ nawˉ, nawˬ ve yaˇ teh‸ k'oˆ laˇ ve hta‸ ngaˬ maˇ keunˍ. Nawˬ ve g'aˇ hpfuhˇ caˇ shehˍ hpaˇ teˇ g'aˇ hk'e ngaˬ hta‸ shawˍ taˍ laˇ-oˆ k'oˆ piˇ tuˬ yoˬ teh‸ yawˇ k'oˆ ve yoˬ. 20 Yawˇ tu leh awˬ pa geh k'o‸-e ve yoˬ. Yawˇ vuiˇ kuiˬ lo k'aw‸ la chehˇ ve hta‸ awˬ pa g'a mawˬ htaˇ, yawˇ hta‸ ha k'aˉ leh, yawˇ geh g'uiˇ k'ai ve yoˬ. Awˬ yaˇ paˍ ve k'awˍ peˍ hta‸ yawˇ k'uˉ taˍ leh boˆ nu ve yoˬ. 21 Oˇ htaˇ awˬ yaˇ paˍ yawˇ hta‸ k'oˆ piˇ ve, Ngaˬ pa-oˬ, ngaˬ lehˬ G'uiˬ sha hta‸ ka‸ nawˬ hta‸ ka‸ te ya‸ peuˬ. Ya‸ nyi hk'aw‸ nawˉ, nawˬ ve yaˇ teh‸ k'oˆ laˇ ve hta‸ ngaˬ maˇ keunˍ. 22 Awˬ ceˬ teˇ hpaˍ hta‸ awˬ pa k'oˆ piˇ ve, Da‸ jaˇ ve aˉ po‸ lonˉ hta‸ haˆ haˆ yuˬ veu laˇ leh yawˇ hta‸ deh piˇ-oˆ. Yawˇ ve la‸ naw hta‸ la‸ peˍ tcuhˉ piˇ-oˆ. Hkui sheh hta‸ hkuiˉ nuˆ tcuhˉ piˇ-oˆ. 23 Caˍ chu taˍ ve nuˇ ehˉ hta‸ sheh veu laˇ leh tiˇ pehˍ-o‸. Ngaˬ hui hti caˇ hti dawˬ leh ha lehˬ ha k'a te-a veuˬ. 24 Awˬ lawn k'o, ngaˬ yaˇ paˍ chi lehˬ awˉ lawˉ htaˇ suh peuˬ htawˇ, chi beu‸ k'aw‸ te‸ la peuˬ. Mehˉ k'ai peuˬ ve htawˇ, chi beu‸ k'aw‸ mawˬ peuˬ teh‸ k'oˆ leh, yawˇ hui ha lehˬ ha k'a tanˬ te k'ai ve yoˬ. 25 Awˬ viˉ paˍ teˇ g'aˇ lehˬ, heh hk'aw chehˇ taˍ ve yoˬ. Yawˇ k'aw‸ la leh, yehˬ awˬ paˇ lo gaˬ la htaˇ, nawˍ meuˆ leh k'aˍ hk'eˆ ve awˬ hkawˇ hta‸ g'a kaˇ ve yoˬ. 26 Yawˇ awˬ ceˬ teˇ g'aˇ hta‸ kuˬ leh, Aˬ hto‸ ma te chehˇ ve le teh‸ na nyi ve yoˬ. 27 Awˬ ceˬ paˍ k'oˆ ve, Nawˬ nyi paˍ k'aw‸ k'aw‸ la peuˬ. Yawˇ naˬ ve gawˬ ve luˬ ve sheˆ ve hta‸ g'a ponˬ leh, awˬ pa yawˇ hta‸ g'a k'aw‸ ha‸ yuˬ ve pa taw, caˍ chu taˍ ve nuˇ ehˉ hta‸ tiˇ peuˬ teh‸ k'aw‸ k'oˆ piˇ ve yoˬ. 28 Awˬ viˉ paˍ teˇ g'aˇ nyi ma zuhˆ jaˇ leh, yehˬ hk'aw maˇ lo‸-e. Hk'e te leh, awˬ pa tawˆ la leh yawˇ hta‸ ca lawˬ hkawˉ ve yoˬ. 29 Yawˇ awˬ pa hta‸ k'aw‸ k'oˆ piˇ ve, Nyi-o, ngaˬ lehˬ nawˬ ve awˬ ceˬ tiˉ te chehˇ ve awˬ hk'aw‸ awˬ yanˇ chi maw maw gaˬ peuˬ. Nawˬ ve tawˇ teˇ hkawˇ hta‸ ka‸ ngaˬ maˇ ponˬ leuˉ jaw. Ya‸ hk'aˇ, ngaˬ ve awˬ chawˇ teˇ hpaˍ geh ha lehˬ ha k'a te tuˬ, aˉ che‸ ehˉ teˇ hkeh ceh ka‸ nawˬ teˇ pawˆ htawˇ ngaˬ hta‸ maˇ pe‸ laˇ jaw. 30 Ya‸ hk'aˇ, meh maˬ lanˉ hui geh awˬ chawˇ te leh, nawˬ ve hpu shi mawˇ jeˬ hta‸ yehˇ baˬ caˇ baˬ peuˬ ve, nawˬ ve yaˇ paˍ chi teˇ g'aˇ k'aw‸ la leh, caˍ chu taˍ ve nuˇ ehˉ yawˇ awˬ pon nawˬ tiˇ peuˬ law leˇ teh‸, awˬ pa hta‸ k'aw‸ k'oˆ piˇ ve yoˬ. 31 Awˬ pa k'aw‸ k'oˆ ve, Ngaˬ yaˇ paˍ-oˬ, nawˬ lehˬ ngaˬ geh hk'aˬ htaˆ ka‸ chehˇ ve yoˬ. 32 Ngaˬ hk'a cawˬ taˍ ve mawˇ jeˬ hk'a peu-eˬ nawˬ ve deˇ deˇ yoˬ. Nawˬ nyi paˍ lehˬ, awˉ lawˉ htaˇ suh peuˬ htawˇ chi beu‸ k'aw‸ te‸ la peuˬ. Awˉ lawˉ htaˇ mehˉ k'ai peuˬ htawˇ, chi beu‸ k'aw‸ mawˬ peuˬ. Chi hta‸ pa taw, ha lehˬ ha k'a te piˇ cawˇ tehˬ ve yoˬ teh‸, awˬ pa yawˇ hta‸ k'aw‸ k'oˆ piˇ ve yoˬ.

Luˉka‸ 16

1 Awˬ la‸ g'awˇ teˇ hpaˍ hta‸ htawˇ yawˇ k'oˆ piˇ ve, Paw sha ve chaw teˇ g'aˇ lehˬ, mawˇ ha‸ shaˉ shehˍ hpaˇ teˇ g'aˇ cawˬ ve yoˬ. Mawˇ ha‸ shaˉ shehˍ hpaˇ oˇ ve teˇ g'aˇ lehˬ, yawˇ ve awˬ shehˍ hpaˇ ve mawˇ jeˬ hta‸ yehˇ baˬ chehˇ ve awˬ lawn, awˬ shehˍ hpaˇ hta‸ shu ca hto piˇ ve yoˬ. 2 Awˬ shehˍ hpaˇ yawˇ hta‸ kuˬ leh, Nawˬ ve awˬ lawn ngaˬ g'a kaˇ ve, nawˬ hk'aˬ hk'e te ve le. Nawˬ mawˇ ha‸ shaˉ ve caˇ lanˇ ngaˬ hta‸ pe‸ laˇ-oˆ. Ya‸ nyi hk'aw‸ nawˉ mawˇ ha‸ shaˉ ve kanˉ hta‸ nawˬ maˇ g'a k'aw‸ te teh‸, yawˇ hta‸ k'oˆ piˇ ve yoˬ. 3 Oˇ htaˇ, mawˇ ha‸ shaˉ shehˍ hpaˇ yawˇ ve nyi ma hk'aw dawˇ ve, Ngaˬ hk'aˬ hk'e g'a te tuˬ le. Ngaˬ ve awˬ shehˍ hpaˇ lehˬ, ngaˬ hta‸ mawˇ ha‸ shaˉ ve kanˉ awˬ hk'aw lo yuˬ tawˆ laˇ tuˬ yoˬ. Miˬ guiˬ ca duˇ tuˬ ngaˬ te maˇ g'a. Shu geh lawˬ caˇ tuˬ ka‸ ngaˬ ya‸ taw ve yoˬ. 4 Mawˇ ha‸ shaˉ ve kanˉ awˬ hk'aw lo ngaˬ tawˆ-e peuˬ hk'aw‸ nawˉ, shu lehˬ a shu yawˇ ve yehˬ hk'aw ngaˬ hta‸ ha‸ yuˬ laˇ tuˬ ngaˬ hk'aˬ hk'e g'a te tuˬ ve hta‸ ngaˬ shiˍ peuˬ teh‸ yawˇ dawˇ ve yoˬ. 5 Yawˇ ve awˬ shehˍ hpaˇ geh jeˬ cha taˍ ve chaw teˇ g'aˇ peuˬ teˇ g'aˇ hta‸ yawˇ kuˬ leh, awˉ lawˉ teˇ g'aˇ hta‸ k'oˆ piˇ ve, Ngaˬ ve awˬ shehˍ hpaˇ geh nawˬ jeˬ hk'aˬ ma cha taˍ ve le teh‸ na nyi ve yoˬ. 6 Naˍ manˇ teˇ ha punˇ cha taˍ ve yoˬ teh‸ yawˇ k'aw‸ k'oˆ piˇ ve yoˬ. Oˇ htaˇ mawˇ ha‸ shaˉ shehˍ hpaˇ k'oˆ ve, Nawˬ ve caˇ lanˇ hta‸ yuˬ leh haˆ mui taˍ leh, ngaˇ chi punˇ bvuh‸ keu-o teh‸, yawˇ hta‸ k'oˆ piˇ ve yoˬ. 7 Oˇ ve awˬ hk'aw‸ nawˉ awˬ kaˍ awˬ nu teˇ g'aˇ hta‸ yawˇ k'oˆ piˇ ve, Nawˬ jeˬ hk'aˬ ma cha taˍ ve le teh‸ na nyi htaˇ, Caˬ shiˍ teˇ ha taˆ cha taˍ ve yoˬ teh‸, yawˇ k'aw‸ k'oˆ piˇ ve yoˬ. Oˇ htaˇ mawˇ ha‸ shaˉ shehˍ hpaˇ k'oˆ ve, Nawˬ ve caˇ lanˇ hta‸ yuˬ leh, hiˉ chi taˆ bvuh‸ keu-o teh‸, yawˇ hta‸ k'oˆ piˇ ve yoˬ. 8 Maˇ hteˇ maˇ cawˇ ve mawˇ ha‸ shaˉ shehˍ hpaˇ oˇ ve lehˬ, cuˇ yiˍ yehˇ puiˉ ve pa taw, awˬ shehˍ hpaˇ yawˇ hta‸ chiˇ mvuh ve yoˬ. Awˬ lawn k'o, chi miˬ guiˬ yaˇ teˇ hpaˍ lehˬ, a shu yawˇ ve teˇ co awˬ hk'aw lo, awˬ g'euˆ yaˇ teˇ hpaˍ a‸ kehˉ cuˇ yiˍ yehˇ puiˉ ve yoˬ. 9 Hk'e te leh, ngaˬ nawˬ hui hta‸ k'oˆ laˇ ve, hpu shi mawˇ jeˬ teˇ ceuˬ lehˬ, maˇ hteˇ maˇ cawˇ ve ka‸ awˬ chawˇ g'a tuˬ oˇ ve hta‸ yehˇ-oˆ. Hpu shi mawˇ jeˬ oˇ ve peuˬ k'ai peuˬ hk'aw‸ nawˉ, co co taiˍ taiˍ ve chehˇ kuiˬ awˬ hk'aw lo yawˇ hui nawˬ hta‸ ha‸ yuˬ laˇ tuˬ yoˬ. 10 I ve kanˉ awˬ hk'aw lo ka ti‸ yeˬ ve chaw lehˬ, uiˍ ve kanˉ awˬ hk'aw lo htawˇ ka ti‸ yeˬ tuˬ yoˬ. I ve kanˉ awˬ hk'aw lo maˇ hteˇ maˇ cawˇ ve hta‸ te ve chaw lehˬ, uiˍ ve kanˉ awˬ hk'aw lo htawˇ maˇ hteˇ maˇ cawˇ ve hta‸ te tuˬ yoˬ. 11 Hk'e te leh, hpu shi mawˇ jeˬ lehˬ maˇ hteˇ maˇ cawˇ ve ka‸, oˇ ve hta‸ yehˇ ve teˇ yanˇ, nawˬ hui ka ti‸ maˇ yeˬ ve k'o, hteˇ ve cawˇ ve mawˇ jeˬ teˇ ceuˬ a shu nawˬ hui hta‸ chiˇ a‸ laˇ tuˬ le. 12 Nawˬ hui lehˬ shu ve mawˇ jeˬ hta‸ yehˇ ve awˬ hk'aw lo ka ti‸ maˇ yeˬ ve k'o, nawˬ hui ve mawˇ jeˬ a shu nawˬ hui hta‸ chiˇ a‸ laˇ tuˬ le. 13 Awˬ ceˬ hk'aˬ ve teˇ g'aˇ maˇ k'oˆ, awˬ jawˇ mawˇ nyiˇ g'aˇ ve awˬ ceˬ te maˇ g'a. Awˬ lawn k'o, teˇ g'aˇ hta‸ canˇ k'o teˇ g'aˇ hta‸ ha‸ tuˬ yoˬ. Teˇ g'aˇ hta‸ yawˆ yan k'o teˇ g'aˇ hta‸ maˇ shawˍ maˇ caˆ te tuˬ yoˬ. Nawˬ hui lehˬ, G'uiˬ sha ve awˬ ceˬ ka‸, hpu shi mawˇ jeˬ ve awˬ ceˬ ka‸, teˇ pawˆ tiˉ te maˇ g'a taˬ teh‸ k'oˆ ve yoˬ. 14 Hpaˍriˍsehˇ teˇ hpaˍ lehˬ, yawˇ hui hpu hta‸ sheˉ lai ve chaw hpeh‸ leh, tawˇ hkawˇ oˇ ve hk'a peu-eˬ hta‸ yawˇ hui g'a kaˇ ve teˇ yanˇ, yawˇ hui yawˇ hta‸ k'oˆ guiˇ g'uiˬ guiˇ ve yoˬ. 15 Yeˍsuˆ yawˇ hui hta‸ k'oˆ piˇ ve, Nawˬ hui lehˬ, chaw yaˇ mehˆ g'uˇ suhˍ a shu yawˇ awˬ to hteˇ ve cawˇ ve hk'e te htawˇ, G'uiˬ sha lehˬ nawˬ hui ve nyi ma hta‸ shiˍ ve yoˬ. Awˬ lawn k'o, chaw yaˇ taˍ uiˍ ve awˬ ceuˬ lehˬ, G'uiˬ sha mehˆ g'uˇ suhˍ cha‸ chiˆ ve awˬ ceuˬ hpeh‸ ve yoˬ. 16 Awˬ liˇ tawˇ hkawˇ leh G'uiˬ sha ve tcuh kaˍ paˍ teˇ hpaˍ ve tawˇ hkawˇ lehˬ, Yoˇhanˬ ve awˬ co-e maˇ gaˬ sheˍ htaˇ ve awˬ pon hpeh‸ ve yoˬ. Oˇ ve awˬ hk'aw‸ nawˉ, G'uiˬ sha ve mvuhˇ miˬ awˬ lawn ha lehˬ ve bon hkawˇ maˍ piˇ leh, chaw hk'a peu-eˬ mvuhˇ miˬ oˇ ve awˬ hk'aw lo buiˆ da‸ leh lo‸-e ve yoˬ. 17 Miˬ guiˬ mvuhˇ naw ma luˬ k'ai haˍ ve a‸ kehˉ, awˬ liˇ tawˇ hkawˇ li‸ awˬ hk'aw lo awˬ maiˉ ehˉ teˇ maˬ luˬ k'ai tuˬ haˍ ve yoˬ. 18 A shu yawˇ ve awˬ miˇ ma hta‸ baˬ taˉ leh awˬ kaˍ awˬ nu yaˇ miˇ hta‸ heuˆ ve chaw hk'a peu-eˬ lehˬ, haˉ chawˇ haˉ paˆ te ve yoˬ. Awˬ hpawˇ baˬ taˉ peuˬ ve yaˇ miˇ hta‸ ca heuˆ ve chaw htawˇ haˉ chawˇ haˉ paˆ te ve yoˬ. 19 Teˇ pawˆ htaˇ, paw sha paˍ teˇ g'aˇ lehˬ, hpa nyi naˆ meuˉ lehˍ ve leh da‸ jaˇ ve hpa hpu hta‸ veu‸ deh leh, teˇ nyi le le ha lehˬ ha k'a hti caˇ hti dawˬ chehˇ ve yoˬ. 20 Yawˇ ve yehˬ g'uˇ suhˍ lo cawˬ ve yehˬ miˉ hpe‸ awˬ paˇ lo, awˬ to hk'a peu-eˬ pawˆ lawˆ k'uˉ hk'a biˇ cawˬ ve Laˍzaˍruˆ meh ve lawˬ leh‸ paˍ teˇ g'aˇ hta‸ shu ca taˆ teh taˍ ve yoˬ. 21 Yawˇ lehˬ, paw sha paˍ ve hpui lawˇ awˬ hawˉ lo caˇ sheˆ dawˇ sheˆ taˍ ve hta‸ caˇ gaˇ ve yoˬ. Hpuiˇ teˇ hpaˍ laˬ leh yawˇ ve pawˆ lawˆ k'uˉ teˇ hpaˍ hta‸ shaw leh‸ ve yoˬ. 22 Teˇ nyi htaˇ, haˍ yaˇ g'awˇ yaˇ oˇ ve suh leh, mvuhˇ naw ma tcuh yaˇ teˇ hpaˍ yawˇ hta‸ Aˍbraˍhanˍ ve nyi ma pui lo shiˍ teh taˍ piˇ ve yoˬ. Paw sha paˍ htawˇ suh leh, shu yawˇ hta‸ ca taˆ tuˍ ve yoˬ. 23 Suh mvuhˇ miˬ awˬ hk'aw lo hehnˇ jaˇ ve tu‸ ve hkanˍ ve hta‸ yawˇ g'a hkanˍ leh, yawˇ chiˇ nyi ve teˇ yanˇ, vuiˇ kuiˬ lo Aˍbraˍhanˍ hta‸ maˇ k'oˆ, Aˍbraˍhanˍ ve nyi ma pui lo Laˍzaˍruˆ hta‸ maˇ k'oˆ, yawˇ g'a mawˬ ve yoˬ. 24 Oˇ htaˇ yawˇ g'aˇ hte‸ kuˬ leh k'oˆ ve, Awˬ pa Aˍbraˍhanˍ-oˬ, ngaˬ hta‸ ha k'aˉ laˇ-oˆ. Ngaˬ lehˬ aˬ miˍ chi awˬ hk'aw lo g'a tu‸ g'a hkanˍ jaˇ ve pa taw, Laˍzaˍruˆ yawˇ ve la‸ naw meuˇ iˉ kaˆ hk'aw tuˍ leh, ngaˬ ve ha tehˍ gawˬ la piˇ tuˬ, yawˇ hta‸ ngaˬ geh peu laˇ-oˆ teh‸ k'oˆ ve yoˬ. 25 Ya‸ hk'aˇ Aˍbraˍhanˍ k'aw‸ k'oˆ ve, Yaˇ paˍ-oˬ, nawˬ te‸ chehˇ ve teˇ yanˇ, da‸ ve awˬ ceuˬ teˇ hpaˍ hta‸ nawˬ g'a leh, Laˍzaˍruˆ maˇ da‸ ve awˬ ceuˬ teˇ hpaˍ hta‸ g'a ve hta‸ dawˇ nawˇ loˬ. Chi beu‸ lehˬ, choˬ kaˬ lo yawˇ dawˇ sha gaˇ sha ve awˬ hk'aw g'a chehˇ leh, nawˬ lehˬ tu‸ ve hkanˍ ve awˬ hk'aw lo g'a chehˇ ve yoˬ. 26 Chi hk'oˆ ka‸, ngaˬ hui leh nawˬ hui awˬ kaˍ lo naˉ jaˇ ve awˬ hk'o‸ lonˉ cawˬ ve yoˬ. Chi hta‸ pa taw, choˬ kaˬ te leh nawˬ hui chehˇ kuiˬ lo shu k'ai gaˇ ka‸ k'ai maˇ hpeh‸. Nawˬ hui ve chehˇ kuiˬ lo te leh ngaˬ hui ve chehˇ kuiˬ lo shu laˬ gaˇ ka‸ laˬ maˇ hpeh‸ teh‸ k'aw‸ k'oˆ piˇ ve yoˬ. 27 Paw sha paˍ k'aw‸ k'oˆ ve, Awˬ pa-oˬ, hk'e te k'o, ngaˬ nawˬ hta‸ chi hk'e lawˬ hkawˉ ve yoˬ. 28 Ngaˬ ve awˬ nyi paˍ ngaˇ g'aˇ cawˬ sheˍ ve pa taw, yawˇ hui lehˬ choˬ kaˬ tu‸ ve hkanˍ ve chehˇ kuiˬ lo maˇ g'a gaˬ la tuˬ, Laˍzaˍruˆ hta‸ ngaˬ pa ve yehˬ lo k'ai tcuh leh, yawˇ hui hta‸ g'aˇ hte‸ maˍ piˇ tcuh-o teh‸ k'oˆ piˇ ve yoˬ. 29 Aˍbraˍhanˍ k'aw‸ k'oˆ ve, Yawˇ hui geh Moˉseˍ leh G'uiˬ sha ve tcuh kaˍ paˍ hui ve tawˇ hkawˇ cawˬ taˍ ve yoˬ. Tawˇ hkawˇ oˇ ve hta‸ yawˇ hui na piˇ-oˆ teh‸ k'oˆ piˇ ve yoˬ. 30 Paw sha paˍ k'aw‸ k'oˆ ve, Awˬ pa Aˍbraˍhanˍ-oˬ, chi hk'e maˇ heˆ. Suh kuiˬ lo k'aw‸ te‸ tu la ve teˇ g'aˇ yawˇ hui geh k'ai ve k'o, yawˇ hui venˇ baˆ hta‸ dawˇ hpfuhˆ tuˬ yoˬ teh‸ k'oˆ ve yoˬ. 31 Aˍbraˍhanˍ k'aw‸ k'oˆ ve, Moˉseˍ leh G'uiˬ sha ve tcuh kaˍ paˍ hui ve tawˇ hkawˇ hta‸ yawˇ hui maˇ na ve k'o, suh kuiˬ lo chaw teˇ g'aˇ k'aw‸ te‸ tu la ve htawˇ yawˇ hui yonˍ tuˬ maˇ heˆ teh‸, yawˇ hta‸ k'aw‸ k'oˆ piˇ ve yoˬ.

Luˉka‸ 17

1 Yawˇ ve awˬ la‸ g'awˇ teˇ hpaˍ hta‸ yawˇ teˇ pawˆ k'aw‸ k'oˆ piˇ ve, Shu ya‸ k'ai tuˬ te ve teˇ ceuˬ lehˬ, cawˬ tuˬ yoˬ. Ya‸ hk'aˇ shu ya‸ k'ai tuˬ te piˇ ve chaw lehˬ g'a dawˇ haˍ jaˇ tuˬ yoˬ. 2 Chaw oˇ ve lehˬ, yaˇ ehˉ chi teˇ hpaˍ awˬ hk'aw lo teˇ g'aˇ g'aˇ hta‸ ya‸ k'ai tuˬ te ve a‸ kehˉ, yawˇ ve k'awˍ peˍ hta‸ haˉ pui mawˍ hpeh k'u leh, laˇ tsuhˇ g'uiˬ awˬ hk'aw lo ce peu ve k'o, yawˇ awˬ pon da‸ leuˉ ve yoˬ. 3 Nawˬ hui a shu yawˇ awˬ to shaˍ ti‸ te-o. Nawˬ ve awˬ viˉ awˬ nyi nawˬ hta‸ te ya‸ laˇ ve k'o, yawˇ hta‸ maˍ piˇ-oˆ. Yawˇ venˇ baˆ hta‸ dawˇ hpfuhˆ ve k'o, yawˇ ve venˇ baˆ hta‸ hpehˇ piˇ-oˆ. 4 Teˇ nyi tiˉ awˬ hk'aw lo yawˇ nawˬ hta‸ suhˍ pawˆ hk'a gaˬ te ya‸ laˇ leh, suhˍ pawˆ hk'a gaˬ nawˬ geh k'aw‸ laˬ leh, Ngaˬ ve venˇ baˆ hta‸ ngaˬ dawˇ hpfuhˆ ve yoˬ teh‸ k'oˆ laˇ ve k'o, yawˇ ve venˇ baˆ hta‸ nawˬ g'a hpehˇ piˇ ve yoˬ teh‸ k'oˆ piˇ ve yoˬ. 5 Oˇ htaˇ tcuh yaˇ teˇ hpaˍ lehˬ, Ngaˬ hui yonˍ ve teˇ ceuˬ maˇ la tuˬ a ciˉ te laˇ-oˆ teh‸, Jawˇ mawˇ Yeˍsuˆ hta‸ lawˬ ve yoˬ. 6 Jawˇ mawˇ Yeˍsuˆ k'aw‸ k'oˆ ve, Nawˬ hui yonˍ ve teˇ ceuˬ g'awˇ caˉ yawˇ hk'e hui cawˬ ve k'o, naˬ hawˉ cehˬ chi hta‸, Nawˬ ve awˬ geu ka‸ teˇ pawˆ tiˉ g'awˬ tawˆ leh laˇ tsuhˇ g'uiˬ awˬ hk'aw lo ca tcuhˉ naw‸ chehˇ-oˆ teh‸ k'oˆ piˇ ve k'o, nawˬ hui ve tawˇ hkawˇ hta‸ na yuˬ tuˬ yoˬ. 7 Nawˬ ve awˬ ceˬ teˇ g'aˇ ti mi mehˇ kuiˬ lo maˇ k'oˆ, yawˬ hawˉ kuiˬ lo maˇ k'oˆ, k'aw‸ la ve teˇ yanˇ, Haˆ mui leh caˇ la-o teh‸, yawˇ hta‸ k'oˆ piˇ tuˬ ve, nawˬ hui awˬ hk'aw lo teˇ g'aˇ g'aˇ cawˬ laˇ. 8 Ya‸ hk'aˇ awˬ ceˬ oˇ ve hta‸, Ngaˬ awˬ pon caˇ tuˬ gu loˬ. Ngaˬ caˇ peuˬ htaˇ hk'a gaˬ nawˬ haˍ pi tsuh‸ taˍ leh, ngaˬ hta‸ te caˍ te taw laˇ-oˆ. Ngaˬ caˇ peuˬ hk'aw‸ nawˉ nawˬ g'a caˇ tuˬ yoˬ teh‸ k'oˆ piˇ tuˬ yoˬ maˇ heˆ laˇ. 9 Awˬ ceˬ oˇ ve lehˬ, awˬ shehˍ hpaˇ k'oˆ ve hk'e te ve pa taw, awˬ shehˍ hpaˇ yawˇ hta‸ chiˇ mvuh piˇ tuˬ laˇ. 10 Oˇ ve hk'a shuˍ shuˍ nawˬ hui htawˇ, nawˬ hui hta‸ hk'a k'oˆ laˇ ve awˬ ceuˬ hk'a peu-eˬ hta‸ te peuˬ hk'aw‸ nawˉ chi hk'e k'oˆ loˬ. Ngaˬ hui lehˬ maˇ keunˍ ve awˬ ceˬ teˇ hpaˍ hpeh‸ ve yoˬ. Ngaˬ hui g'a te cawˇ ve kanˉ hta‸ ceh ngaˬ hui te peuˬ ve yoˬ. 11 Yawˇ Yeˍruˆsaˍlehnˍ venˇ lo k'ai chehˇ ve teˇ yanˇ, Saˍmaˍriˆ mvuhˇ miˬ leh Gaˍliˍ lehˇ mvuhˇ miˬ awˬ tcuhˉ kaˍ lo hpanˍ k'ai ve yoˬ. 12 Hk'aˆ teˇ hk'aˆ awˬ hk'aw lo yawˇ lo‸-e ve teˇ yanˇ, hkiˬ tu‸ paˍ teˇ chi g'aˇ vuiˇ kuiˬ lo chehˇ taˍ leh yawˇ hta‸ ha‸ yuˬ ve yoˬ. 13 Yawˇ hui bvuhˬ chaweh kuˬ leh, Jawˇ mawˇ Yeˍsuˆ-oˬ, ngaˬ hui hta‸ ha k'aˉ laˇ-oˆ teh‸ k'oˆ ve yoˬ. 14 Yeˍsuˆ yawˇ hui hta‸ mawˬ ve teˇ yanˇ yawˇ k'oˆ ve, K'ai leh, paw hkuˇ teˇ hpaˍ hta‸ nawˬ hui ve awˬ to ca maw piˇ-oˆ teh‸ k'oˆ piˇ ve yoˬ. Hk'e te leh, yawˇ hui k'ai chehˇ ve teˇ yanˇ, da‸ la kehˬ la ve yoˬ. 15 Yawˇ hui awˬ hk'aw lo chaw teˇ g'aˇ lehˬ, yawˇ awˬ to na-e la ve hta‸ g'a shiˍ ve teˇ yanˇ, yawˇ k'aw‸ la leh, awˬ hkawˇ bvuhˬ chaweh kuˬ leh G'uiˬ sha hta‸ chiˇ uiˍ chiˇ mvuh ve yoˬ. 16 Yeˍsuˆ ve hkui paˇ lo yawˇ mehˆ hpfuhˇ miˬ chaˇ hk'oˆ boˆ taˍ leh, yawˇ ve bon hta‸ chiˇ mvuh ve yoˬ. Chaw oˇ ve teˇ g'aˇ lehˬ Saˍmaˍriˆ chaw hpeh‸ ve yoˬ. 17 Oˇ htaˇ Yeˍsuˆ k'oˆ ve, Na-e la ve chaw lehˬ, teˇ chi g'aˇ yoˬ maˇ heˆ leh laˇ. K'awˇ g'aˇ hk'aˬ lo k'ai le. 18 Buiˇ shaˆ aˉ naˆ chaw chi teˇ g'aˇ maˇ heˆ k'o, G'uiˬ sha hta‸ chiˇ uiˍ chiˇ mvuh piˇ tuˬ k'aw‸ la ve chaw teˇ g'aˇ ka‸ maˇ cawˬ laˇ teh‸, k'oˆ peuˬ hk'aw‸ nawˉ yawˇ hta‸ k'oˆ piˇ ve, 19 Tu leh k'o‸-e loˬ. Nawˬ yonˍ ve teˇ ceuˬ lehˬ, nawˬ hta‸ na-e la piˇ peuˬ teh‸ Yeˍsuˆ k'oˆ ve yoˬ. 20 G'uiˬ sha ve mvuhˇ miˬ hk'aˬ htaˆ gaˬ la tuˬ ve awˬ lawn Hpaˍriˍsehˇ teˇ hpaˍ na nyi ve teˇ yanˇ, Yeˍsuˆ k'aw‸ k'oˆ ve, G'uiˬ sha ve mvuhˇ miˬ gaˬ la ve lehˬ, mehˆ shiˍ nyi leh mawˬ ve teˇ ceuˬ maˇ heˆ. 21 Nyi loˬ, choˬ kaˬ cawˬ ve yoˬ, oˇ kaˬ cawˬ ve yoˬ teh‸ shu k'oˆ tuˬ maˇ heˆ. Awˬ lawn k'o, G'uiˬ sha ve mvuhˇ miˬ lehˬ, nawˬ hui awˬ hk'aw lo cawˬ taˍve yoˬ teh‸, yawˇ hui hta‸ k'oˆ piˇ ve yoˬ. 22 Awˬ la‸ g'awˇ teˇ hpaˍ hta‸ yawˇ k'aw‸ k'oˆ piˇ ve, Chaw yaˇ ve Yaˇ hpu ve awˬ nyi hta‸ nawˬ hui mawˬ gaˇ ve awˬ yanˇ gaˬ la tuˬ yoˬ. Ya‸ hk'aˇ, nawˬ hui g'a mawˬ tuˬ maˇ heˆ. 23 Choˬ kaˬ nyi-o, oˇ kaˬ nyi-o teh‸ shu nawˬ hui hta‸ k'oˆ laˇ tuˬ yoˬ. Ya‸ hk'aˇ taˇ k'ai, yawˇ hui awˬ hk'aˇ suh taˇ g'a‸. 24 Awˬ lawn k'o, mvuhˇ tiˉ po-e‸ lehˬ, mvuhˇ naw ma teˇ ceˍ lo ba la leh teˇ ceˍ lo ba gaˬ ve hk'e, chaw yaˇ ve Yaˇ hpu lehˬ, yawˇ ya‸ la ve awˬ nyi awˬ hk'aw lo oˇ hk'e hpeh‸ tuˬ yoˬ. 25 Ya‸ hk'aˇ, oˇ hk'e maˇ hpeh‸ la sheˍ htaˇ yawˇ lehˬ, tu‸ ve hkanˍ ve laiˉ ceuˬ hta‸ ka‸, chaw chi teˇ co chiˇ baˬ ve hta‸ ka‸ g'a hkanˍ tuˬ yoˬ. 26 Noˉa‸ ve awˬ co-e htaˇ hpeh‸ la ve hk'a shuˍ shuˍ, chaw yaˇ ve Yaˇ hpu ve awˬ co-e awˬ hk'aw lo htawˇ hpeh‸ la tuˬ yoˬ. 27 Noˉa‸ haw lo‸ k'oˍ hk'aw lo‸-e ve teˇ nyi hk'a gaˬ, yawˇ hui caˇ chehˇ dawˬ chehˇ leh, awˬ hpawˇ awˬ miˇ heuˆ da‸ leh ka piˇ chehˇ ve yoˬ. Oˇ ve hk'aw‸ nawˉ iˉ kaˆ htonˍ la leh, chaw hk'a peu-eˬ luˬ k'ai sheˆ k'ai ve yoˬ. 28 Lawˇtaˍ ve awˬ co-e htaˇ htawˇ oˇ ve hk'a shuˍ shuˍ hpeh‸ ve yoˬ. Yawˇ hui caˇ chehˇ dawˬ chehˇ ve, mawˇ vuiˬ mawˇ hawˇ chehˇ ve, mawˇ ti chehˇ leh, yehˬ te chehˇ ve yoˬ. 29 Ya‸ hk'aˇ, Lawˇtaˍ lehˬ Sawˉdonˍ venˇ hk'aw tawˆ k'ai ve teˇ nyi htaˇ, mvuhˇ naw ma lo aˬ miˍ leh ma‸ shiˉ mvuhˇ yeˬ hk'a shuˍ ce la leh, yawˇ hui hk'a peu-eˬ hta‸ te luˬ ve yoˬ. 30 Chaw yaˇ ve Yaˇ hpu tawˆ la ve teˇ nyi htaˇ, oˇ ve hk'a shuˍ shuˍ hpeh‸ la tuˬ yoˬ. 31 Oˇ ve teˇ nyi awˬ hk'aw lo, yehˬ awˬ hk'oˆ lo chehˇ ve chaw a shu yawˇ ve yehˬ awˬ hk'aw lo ve mawˇ cawˬ ve k'o, mawˇ oˇ ve hta‸ ca yuˬ tuˬ taˇ k'aw‸ ya‸-e. Oˇ ve hk'a shuˍ shuˍ heh hk'aw chehˇ ve chaw htawˇ, taˇ k'o‸-e. 32 Lawˇtaˍ ve awˬ miˇ ma hta‸ dawˇ nawˇ loˬ. 33 A shu yawˇ ve a sha‸ ponˬ tuˬ ca ve chaw hk'aˬ ve teˇ g'aˇ maˇ k'oˆ, yawˇ a sha‸ shonˇ tuˬ yoˬ. A sha‸ shonˇ ve chaw hk'aˬ ve teˇ g'aˇ maˇ k'oˆ, yawˇ ve a sha‸ g'a ponˬ tuˬ yoˬ. 34 Ngaˬ nawˬ hui hta‸ k'oˆ laˇ ve, oˇ ve teˇ haˉ awˬ hk'aw lo hawˉ hk'aˆ nyiˇ g'aˇ lehˬ, zuh‸ hpui teˇ maˬ tiˉ awˬ hk'aw lo zuh‸ chehˇ ve teˇ yanˇ, teˇ g'aˇ hta‸ shiˍ veu leh, teˇ g'aˇ hta‸ teh taˉ tuˬ yoˬ. 35 Yaˇ miˇ nyiˇ g'aˇ teˇ geh haˉ pui maw geuˆ chehˇ ve teˇ yanˇ, teˇ g'aˇ hta‸ shiˍ veu leh, teˇ g'aˇ hta‸ teh taˉ tuˬ yoˬ teh‸ k'oˆ ve yoˬ. 37 Oˇ htaˇ, awˬ la‸ g'awˇ teˇ hpaˍ lehˬ, Jawˇ mawˇ-oˬ, hk'aˬ lo hpeh‸ la tuˬ le teh‸ yawˇ hta‸ na nyi ve teˇ yanˇ, Suh ve awˬ to cawˬ kuiˬ lo naˬ beuˬ ngaˆ teˇ hpaˍ hpawnˬ chehˇ tuˬ yoˬ teh‸, yawˇ yawˇ hui hta‸ k'aw‸ k'oˆ piˇ ve yoˬ.

Luˉka‸ 18

1 Yawˇ hui nyi ma maˇ luˬ leh hk'aˬ htaˆ ka‸ bon g'a lawˬ tuˬ, yawˇ yawˇ hui hta‸ tawˇ pa haˉ te maˍ piˇ leh k'oˆ ve, 2 Venˇ teˇ venˇ awˬ hk'aw lo suhˉ jehˬ shehˍ hpaˇ teˇ g'aˇ cawˬ ve yoˬ. Yawˇ lehˬ G'uiˬ sha hta‸ ka‸ maˇ kawˆ, chaw yaˇ hta ka‸ maˇ yawˆ maˇ yan ve chaw hpeh‸ ve yoˬ. 3 Venˇ oˇ ve awˬ hk'aw lo mehˇ chawˇ ma teˇ g'aˇ cawˬ ve yoˬ. Yawˇ lehˬ suhˉ jehˬ shehˍ hpaˇ oˇ ve teˇ g'aˇ geh teˇ hkui teˇ hkui k'ai leh, Ngaˬ ve canˇ paˍ ngaˬ hta‸ ya‸ laˇ ve hta‸ hteˇ ve cawˇ ve awˬ hk'aw lo ngaˬ awˬ pon a ciˉ te laˇ-oˆ teh‸, k'oˆ piˇ tcuhˉ taˍ ve yoˬ. 4 Teˇ tcuhˉ teˇ yanˇ awˬ hk'aw lo suhˉ jehˬ shehˍ hpaˇ oˇ ve te‸ chiˉ maˇ te piˇ. Ya‸ hk'aˇ, awˬ hk'aw‸ nawˉ yawˇ nyi ma hk'aw dawˇ ve, Ngaˬ lehˬ G'uiˬ sha hta‸ ka‸ maˇ kawˆ, chaw yaˇ hta‸ ka‸ maˇ yawˆ maˇ yan ve chaw hpeh‸ ve htawˇ, 5 mehˇ chawˇ ma chi ngaˬ hta‸ sho‸ sha‸ laˇ ve pa taw, hteˇ ve cawˇ ve awˬ hk'aw lo ngaˬ yawˇ awˬ pon te piˇ tuˬ yoˬ. Hk'e maˇ heˆ k'o, yawˇ hk'aˬ htaˆ ka‸ laˬ leh, hpeh‸ haˍ hkanˍ haˍ jaˇ htaˇ hk'a gaˬ te laˇ tuˬ yoˬ teh‸ dawˇ ve yoˬ. 6 Jawˇ mawˇ Yeˍsuˆ k'aw‸ k'oˆ ve, Maˇ hteˇ maˇ cawˇ ve suhˉ jehˬ shehˍ hpaˇ lehˬ, yawˇ ve nyi ma hk'aw dawˇ ve hta‸ dawˇ nyi-o. 7 G'uiˬ sha leuˆ yuˬ taˍ ve chaw teˇ hpaˍ lehˬ, tanˇ hkuinˇ tanˇ vanˇ yawˇ hta‸ lawˬ hkawˉ ve k'o, G'uiˬ sha lehˬ hteˇ ve cawˇ ve awˬ hk'aw lo yawˇ hui awˬ pon maˇ te piˇ tuˬ leh laˇ. Yawˇ maw chaweh law chehˇ tuˬ leh laˇ. 8 Ngaˬ nawˬ hui hta‸ k'oˆ laˇ ve, hteˇ ve cawˇ ve teˇ ceuˬ yawˇ yawˇ hui awˬ pon haˆ haˆ te piˇ tuˬ yoˬ. Ya‸ hk'aˇ, chaw yaˇ ve Yaˇ hpu k'aw‸ gaˬ la ve teˇ yanˇ, miˬ guiˬ hk'oˆ lo yonˍ ve teˇ ceuˬ cawˬ chehˇ ve hta‸ g'a mawˬ tuˬ laˇ teh‸ k'oˆ piˇ ve yoˬ. 9 A shu yawˇ awˬ to hta‸ hteˇ ve cawˇ ve teh‸ shawˍ taˍ leh, shu hta‸ te‸ chiˉ maˇ shawˍ ve chaw teˇ hpaˍ hpaˍ hta‸ yawˇ tawˇ pa haˉ chi maˍ piˇ leh k'oˆ ve, 10 Chaw nyiˇ g'aˇ bon lawˬ tuˬ, bon yehˬ lonˉ lo taˆ-e ve yoˬ. Teˇ g'aˇ Hpaˍriˍsehˇ hpeh‸ leh, teˇ g'aˇ awˬ hkawnˍ shaw paˍ hpeh‸ ve yoˬ. 11 Hpaˍriˍsehˇ teˇ g'aˇ huˉ taˍ leh, G'uiˬ sha-oˬ, ngaˬ lehˬ awˬ kaˍ awˬ nu chaw hta‸ maˇ shuˍ ve pa taw, nawˬ ve awˬ bon hta‸ chiˇ mvuh ve yoˬ. Yawˇ hui lehˬ, hiˉ yuˬ lu yuˬ ve chaw, maˇ hteˇ maˇ cawˇ ve chaw, haˉ chawˇ haˉ paˆ te ve chaw hpeh‸ ve yoˬ. Chi hk'oˆ, ngaˬ lehˬ awˬ hkawnˍ shaw paˍ chi teˇ g'aˇ hta‸ ka‸ maˇ shuˍ ve pa taw htawˇ nawˬ hta‸ chiˇ mvuh ve yoˬ. 12 Teˇ shinˉ awˬ hk'aw lo nyiˇ nyi ngaˬ caˇ tuˬ ce ve yoˬ. Ngaˬ g'a ve hk'a peu-eˬ awˬ hk'aw lo teˇ chi pun teˇ pun tanˇ ve yoˬ teh‸, yawˇ awˬ to hta‸ yawˇ k'oˆ leh bon lawˬ ve yoˬ. 13 Ya‸ hk'aˇ, awˬ hkawnˍ shaw paˍ teˇ g'aˇ lehˬ, vuiˇ kuiˬ lo huˉ taˍ leh, mvuhˇ naw ma lo chiˇ nyi maˇ hpeh‸. Dawˇ haˍ jaˇ ve awˬ hk'aw lo yawˇ ve nyi ma pui hta‸ hta leh, G'uiˬ sha-oˬ, ngaˬ venˇ baˆ uiˍ jaˇ ve hta‸ a ciˉ ha k'aˉ laˇ-oˆ teh‸ lawˬ hkawˉ ve yoˬ. 14 Hk'e te leh ngaˬ nawˬ hui hta‸ k'oˆ laˇ ve, awˬ hkawnˍ shaw paˍ lehˬ, hteˇ ve cawˇ ve chaw hpeh‸ la leh, yawˇ ve yehˬ lo k'o‸-e ve yoˬ. Hpaˍriˍsehˇ lehˬ, hteˇ ve cawˇ ve chaw maˇ hpeh‸ la. Awˬ lawn k'o, a shu yawˇ awˬ to hta‸ taˍ uiˍ ve chaw teˇ g'aˇ le le lehˬ, taˍ i ve hta‸ g'a hkanˍ tuˬ yoˬ. A shu yawˇ awˬ to hta‸ taˍ i ve chaw lehˬ, taˍ uiˍ ve hta‸ g'a hkanˍ tuˬ yoˬ. 15 Oˇ htaˇ, yaˇ ehˉ teˇ hpaˍ hta‸ Yeˍsuˆ htawˇ piˇ tuˬ, yaˇ ehˉ teˇ hpaˍ hta‸ shu yawˇ geh shiˍ laˬ ve yoˬ. Awˬ la‸ g'awˇ teˇ hpaˍ oˇ ve hta‸ g'a mawˬ htaˇ, shiˍ laˬ ve chaw teˇ hpaˍ hta‸ deˇ ve yoˬ. 16 Ya‸ hk'aˇ Yeˍsuˆ lehˬ, yaˇ ehˉ teˇ hpaˍ hta‸ kuˬ leh k'oˆ ve, Yaˇ ehˉ teˇ hpaˍ hta‸ ngaˬ geh laˬ piˇ-oˆ. Yawˇ hui hta‸ taˇ tawˍ taˍ. Awˬ lawn k'o, G'uiˬ sha ve mvuhˇ miˬ lehˬ, chaw oˇ hk'e ve mvuhˇ miˬ hpeh‸ ve yoˬ. 17 Ngaˬ nawˬ hui hta‸ awˬ tehˬ awˬ na k'oˆ laˇ ve, yaˇ ehˉ hk'a shuˍ shuˍ G'uiˬ sha ve mvuhˇ miˬ hta‸ maˇ ha‸ yuˬ ve chaw hk'aˬ ve teˇ g'aˇ maˇ k'oˆ, yawˇ ve mvuhˇ miˬ awˬ hk'aw lo maˇ g'a lo‸-e taˬ teh‸ k'oˆ ve yoˬ. 18 Jawˇ mawˇ teˇ g'aˇ yawˇ hta‸ na nyi ve, Da‸ ve Saˍ la‸-oˬ, co ti‸ ha ti‸ g'a tuˬ ngaˬ hk'aˬ hk'e g'a te tuˬ le teh‸ k'oˆ ve yoˬ. 19 Yeˍsuˆ k'aw‸ k'oˆ ve, Aˬ hto‸ ma pa taw nawˬ ngaˬ hta‸ da‸ ve teh‸ k'oˆ ve le. G'uiˬ sha maˇ heˆ k'o, da‸ ve teˇ g'aˇ ka‸ maˇ cawˬ. 20 Awˬ liˇ tawˇ hkawˇ teˇ hpaˍ hta‸ nawˬ shiˍ ve yoˬ. Haˉ chawˇ haˉ paˆ taˇ te, chaw hta‸ taˇ tiˇ pehˍ, shu ve mawˇ hta‸ taˇ hk'awˇ, shu hta‸ maˇ heˆ heˆ ve shaˉ hkiˆ taˇ hkanˍ, nawˬ ve awˬ pa awˬ e hta‸ yawˆ yawˆ yan yan te-o teh‸ yawˇ hta‸ k'oˆ piˇ ve yoˬ. 21 Chaw oˇ ve lehˬ, Ngaˬ yaˇ nehˬ hpeh‸ htaˇ ka‸ chi hk'a peu-eˬ hta‸ ngaˬ na yuˬ leh te peuˬ teh‸ k'aw‸ k'oˆ ve yoˬ. 22 Yeˍsuˆ tawˇ oˇ ve hta‸ g'a kaˇ ve teˇ yanˇ, Nawˬ teˇ ceuˬ loˍ sheˍ ve yoˬ. Nawˬ hk'a cawˬ ve mawˇ jeˬ hta‸ hawˇ baˬ leh, haˍ yaˇ g'awˇ yaˇ teˇ hpaˍ hta‸ pehˬ piˇ-oˆ. Mvuhˇ naw ma hk'oˆ lo awˬ hpfuhˇ hk'aˆ ve mawˇ nawˬ cawˬ taˍ tuˬ yoˬ. Peuˬ leh, nawˬ k'aw‸ laˬ leh ngaˬ hk'aˇ suh laˬ-o‸ teh‸, yawˇ hta‸ k'oˆ piˇ ve yoˬ. 23 Chaw oˇ ve lehˬ, tawˇ hkawˇ chi hta‸ g'a kaˇ htaˇ, yawˇ dawˇ haˍ jaˇ ve yoˬ. Awˬ lawn k'o, yawˇ paw sha jaˇ ve chaw teˇ g'aˇ hpeh‸ ve yoˬ. 24 Yeˍsuˆ oˇ ve hta‸ g'a mawˬ htaˇ yawˇ k'oˆ ve, Paw sha ve chaw hui lehˬ, G'uiˬ sha ve mvuhˇ miˬ awˬ hk'aw lo lo‸-e tuˬ hk'aˬ ma haˍ jaˇ ve le. 25 Kaˍ laˍ oˆ teˇ hkeh g'o‸ naˍ hk'awˇ awˬ hk'aw lo‸-e tuˬ ve lehˬ, paw sha ve chaw teˇ g'aˇ G'uiˬ sha ve mvuhˇ miˬ awˬ hk'aw lo lo‸-e tuˬ ve a‸ kehˉ sha ve yoˬ teh‸ k'oˆ piˇ ve yoˬ. 26 G'a kaˇ ve chaw hui lehˬ, Hk'e te k'o, htaiˍ hk'aw‸ ve hta‸ a shu g'a hpeh‸ tuˬ le teh‸ k'oˆ ve yoˬ. 27 Yawˇ k'aw‸ k'oˆ ve, Chaw yaˇ te maˇ g'a ve teˇ hpaˍ hta‸ G'uiˬ sha te g'a ve yoˬ teh‸ k'oˆ piˇ ve yoˬ. 28 Oˇ htaˇ Peˍtruˆ k'oˆ ve, Ngaˬ hui lehˬ hk'a peu-eˬ hta‸ baˬ taˉ leh nawˬ awˬ hk'aˇ suh laˬ peuˬ teh‸ k'oˆ piˇ ve yoˬ. 29 Yeˍsuˆ k'aw‸ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, G'uiˬ sha ve mvuhˇ miˬ awˬ pon, a shu yawˇ ve yehˬ, a shu yawˇ ve awˬ miˇ ma, a shu yawˇ ve awˬ viˉ awˬ nyi, a shu yawˇ ve awˬ pa awˬ e leh, a shu yawˇ ve awˬ yaˇ awˬ duˬ teˇ hpaˍ hta‸ baˬ taˉ ve chaw hk'aˬ ve teˇ g'aˇ maˇ k'oˆ, 30 chi teˇ ca‸ na‸ awˬ hk'aw lo oˇ ve a‸ kehˉ leuˉ leh g'a tuˬ ve awˬ hk'oˆ ka‸, awˬ hk'aw‸ nawˉ teˇ ca‸ na‸ awˬ hk'aw lo co ti‸ ha ti‸ hta‸ htawˇ g'a tuˬ yoˬ teh‸ k'oˆ ve yoˬ. 31 Oˇ htaˇ Yeˍsuˆ lehˬ, tcuh yaˇ teˇ chi nyiˇ g'aˇ hta‸ kuˬ leh k'oˆ piˇ ve, Ngaˬ hui Yeˍruˆsaˍlehnˍ venˇ lo k'ai chehˇ ve yoˬ. Chaw yaˇ ve Yaˇ hpu awˬ lawn G'uiˬ sha ve tcuh kaˍ paˍ hui hk'a bvuh‸ taˍ ve hk'a peu-eˬ g'a biˇ la tuˬ yoˬ. 32 Awˬ lawn k'o, buiˇ shaˆ aˉ naˆ chaw hui ve la‸ hk'aw lo yawˇ hta‸ chiˇ a‸ piˇ leh, k'oˆ guiˇ g'uiˬ guiˇ ve, maˇ shawˍ maˇ caˆ te ve leh, ciˉ g'uiˇ hpe‸ pfuhˍ ve hta‸ yawˇ g'a hkanˍ tuˬ yoˬ. 33 Yawˇ hui yawˇ hta‸ jaw‸ peuˬ hk'aw‸ nawˉ, tiˇ pehˍ tuˬ yoˬ. Peuˬ leh shehˆ nyi teˇ nyi gaˬ k'o, yawˇ k'aw‸ te‸ tu la tuˬ yoˬ teh‸, yawˇ hui hta‸ k'oˆ piˇ ve yoˬ. 34 Ya‸ hk'aˇ, awˬ lawn chi teˇ hpaˍ hta‸ yawˇ hui a ciˉ ka‸ maˇ shiˍ. Yawˇ hui hta‸ k'oˆ piˇ ve tawˇ hkawˇ chi teˇ hpaˍ lehˬ, yawˇ hui mehˆ g'uˇ suhˍ faˉ taˍ ve hk'e hpeh‸ leh, yawˇ k'oˆ ve hta‸ yawˇ hui na maˇ g'a. 35 Yawˇ lehˬ Yeˍriˆhkoˇ venˇ awˬ paˇ lo gaˬ la ve teˇ yanˇ, mehˆ cuˉ paˍ teˇ g'aˇ ya‸ k'aw paˇ lo mui leh lawˬ caˇ chehˇ ve yoˬ. 36 Mehˆ cuˉ paˍ oˇ ve lehˬ, chaw awˬ moˍ lonˉ k'ai k'ai laˬ laˬ te chehˇ ve hta‸ g'a kaˇ htaˇ, Chi aˬ hto‸ ma te ve le teh‸ yawˇ na nyi ve yoˬ. 37 Naˍzaˍrehˆ chaw Yeˍsuˆ laˬ chehˇ ve yoˬ teh‸, yawˇ hui yawˇ hta‸ k'oˆ piˇ ve yoˬ. 38 Oˇ htaˇ yawˇ k'oˆ ve, Daˍviˆ ve Yaˇ hpu Yeˍsuˆ-oˬ, ngaˬ hta‸ ha k'aˉ laˇ-oˆ teh‸ kuˬ ve yoˬ. 39 Awˬ g'uˇ suhˍ k'ai chehˇ ve chaw teˇ hpaˍ lehˬ, Ta‸ iˉ chehˇ-oˆ teh‸ yawˇ hta‸ deˇ piˇ ve htawˇ yawˇ lehˬ, Daˍviˆ ve Yaˇ hpu-oˬ, ngaˬ hta‸ ha k'aˉ laˇ-oˆ teh‸, leuˉ leh g'aˇ hte‸ k'aw‸ kuˬ ve yoˬ. 40 Yeˍsuˆ huˉ taˍ leh, Yawˇ hta‸ ngaˬ geh shiˍ veu laˇ-oˆ teh‸ k'oˆ piˇ ve yoˬ. Mehˆ cuˉ paˍ yawˇ awˬ paˇ lo gaˬ la ve teˇ yanˇ Yeˍsuˆ k'oˆ ve, 41 Nawˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸ na nyi htaˇ, Jawˇ mawˇ-oˬ, ngaˬ mehˆ mawˬ la tuˬ nawˬ hta‸ te tcuh laˇ gaˇ ve yoˬ teh‸ yawˇ k'oˆ piˇ ve yoˬ. 42 Yeˍsuˆ k'aw‸ k'oˆ ve, Mehˆ mawˬ la piˇ-oˆ. Nawˬ yonˍ ve teˇ ceuˬ lehˬ, nawˬ hta‸ na-e la piˇ peuˬ teh‸, yawˇ hta‸ k'oˆ piˇ ve yoˬ. 43 Chaw oˇ ve lehˬ, teˇ cawˬ haˉ mehˆ mawˬ la leh, G'uiˬ sha hta‸ chiˇ uiˬ chiˇ mvuh leh Yeˍsuˆ hk'aˇ suh k'ai ve yoˬ. Chaw hk'a peu-eˬ oˇ ve hta‸ g'a mawˬ ve teˇ yanˇ G'uiˬ sha ve bon hta‸ chiˇ mvuh ve yoˬ.

Luˉka‸ 19

1 Oˇ htaˇ, Yeˍsuˆ lehˬ, Yeˍriˆhkoˇ venˇ hk'aw lo‸-e leh hpanˍ k'ai chehˇ ve yoˬ. 2 Oˇ kaˬ lo Saˍkehˇ meh ve chaw teˇ g'aˇ cawˬ ve yoˬ. Yawˇ lehˬ, awˬ hkawnˍ shaw paˍ awˬ hoˉ teˇ g'aˇ hpeh‸ leh paw sha jaˇ ve chaw teˇ g'aˇ hpeh‸ ve yoˬ. 3 Yeˍsuˆ a shu leh naˍ teh‸ yawˇ mawˬ gaˇ leh ca nyi ve htawˇ, chaw awˬ moˍ lonˉ chehˇ taˍ leh, yawˇ maˇ mvuh ve pa taw maˇ g'a mawˬ. 4 Hk'e te leh, Yeˍsuˆ hta‸ g'a mawˬ tuˬ yawˇ awˬ g'uˇ suhˍ lo g'uiˇ k'ai leh, Yeˍsuˆ laˬ tuˬ ve ya‸ k'aw paˇ lo cawˬ ve hpaˉ leuˍ cehˬ teˇ cehˬ hta‸ taˆ-e ve yoˬ. 5 Yeˍsuˆ oˇ kaˬ lo gaˬ la htaˇ yawˇ hta‸ chiˇ nyi leh k'oˆ ve, Saˍkehˇ-oˬ, haˆ haˆ ya‸ la-o. Ya‸ nyi ngaˬ nawˬ ve aˉ hk'aw lo g'a haˉ la tuˬ yoˬ teh‸, yawˇ hta‸ k'oˆ piˇ ve yoˬ. 6 Oˇ htaˇ, Saˍkehˇ haˆ haˆ ya‸ la leh, ha lehˬ ha k'a yawˇ hta‸ ha‸ yuˬ ve yoˬ. 7 Chaw hk'a peu-eˬ ve hta‸ g'a mawˬ ve teˇ yanˇ, Yawˇ lehˬ venˇ baˆ yaˇ teˇ g'aˇ geh ca haˉ ve law teh‸ k'oˆ leh, ca beu ca hk'aiˉ ve yoˬ. 8 Saˍkehˇ huˉ taˍ leh k'oˆ ve, Jawˇ mawˇ-oˬ, ngaˬ ve mawˇ jeˬ teˇ hkoˇ hk'a gaˬ haˍ yaˇ g'awˇ yaˇ hui hta‸ pehˬ piˇ tuˬ yoˬ. Chaw teˇ g'aˇ g'aˇ ve mawˇ jeˬ hta‸ ngaˬ heˍ caˇ taˍ peuˬ ve k'o, awˇ pun ngaˬ k'aw‸ piˇ tuˬ yoˬ. teh‸, Jawˇ mawˇ Yeˍsuˆ hta‸ k'oˆ piˇ ve yoˬ. 9 Yeˍsuˆ k'aw‸ k'oˆ piˇ ve, Yehˬ chi teˇ yehˬ awˬ hk'aw lo ya‸ nyi htaiˍ hk'aw‸ ve teˇ ceuˬ gaˬ la peuˬ. Awˬ lawn k'o, yawˇ htawˇ Aˍbraˍhanˍ ve yaˇ teˇ g'aˇ hpeh‸ ve yoˬ. 10 Chaw yaˇ ve Yaˇ hpu lehˬ, mehˉ k'ai ve chaw hui hta‸ ca leh htaiˍ hk'aw‸ yuˬ tuˬ laˬ ve yoˬ teh‸ Saˍkehˇ hta‸ k'oˆ piˇ ve yoˬ. 11 Tawˇ hkawˇ oˇ ve teˇ hpaˍ hta‸ yawˇ hui na chehˇ ve teˇ yanˇ, Yeˍsuˆ lehˬ yawˇ hui hta‸ tawˇ pa haˉ k'aw‸ te maˍ piˇ ve yoˬ. Awˬ lawn k'o, yawˇ Yeˍruˆsaˍlehnˍ venˇ awˬ paˇ lo gaˬ la leh, G'uiˬ sha ve mvuhˇ miˬ teˇ cawˬ haˉ tawˆ la tuˬ yoˬ teh‸ yawˇ hui dawˇ ve hta‸ pa taw yoˬ. 12 Hk'e te leh yawˇ k'oˆ ve, Awˬ me‸ awˬ hponˇ cawˬ ve chaw teˇ g'aˇ lehˬ, hkunˉ hawˉ hkanˇ ve aˉ yaˇ hta‸ ca yuˬ leh k'aw‸ la tuˬ, vuiˇ ve mvuhˇ miˬ lo yawˇ k'ai ve yoˬ. 13 Yawˇ maˇ k'ai sheˍ awˬ g'uˇ suhˍ yawˇ ve awˬ ceˬ teˇ chi g'aˇ hta‸ kuˬ yuˬ leh, yawˇ hui hta‸ hpu teˇ g'aˇ teˇ cawehˬ piˇ leh, Ngaˬ k'aw‸ gaˬ la htaˇ hk'a gaˬ hpu chi hta‸ yuˬ leh ca kaˬ-o‸ teh‸, yawˇ hui hta‸ k'oˆ piˇ taˉ ve yoˬ. 14 Ya‸ hk'aˇ, yawˇ ve mvuhˇ miˬ yaˇ teˇ hpaˍ lehˬ yawˇ hta‸ canˇ leh, yawˇ hui ve awˬ tan te shehˍ hpaˇ teˇ hpaˍ hta‸ yawˇ awˬ hk'aˇ suh k'ai tcuh leh, Yawˇ ngaˬ hui awˬ hk'oˆ hta‸ uˉ peunˍ tuˬ ngaˬ hui maˇ heuˆ gaˇ teh‸ ca k'oˆ piˇ tcuh ve yoˬ. 15 Yawˇ lehˬ hkunˉ hawˉ hkanˇ ve aˉ yaˇ hta‸ g'a peuˬ leh k'aw‸ la ve teˇ yanˇ, hpu piˇ taˉ ve awˬ ceˬ teˇ hpaˍ ca kaˬ ve awˬ hk'aw lo awˬ yawˬ hk'aˬ ma g'a ve hta‸ g'a shiˍ tuˬ, Yawˇ hui hta‸ ca kuˬ-o‸ teh‸, yawˇ tawˇ piˇ ve yoˬ. 16 Awˉ lawˉ teˇ g'aˇ yawˇ geh laˬ leh, Jawˇ mawˇ-oˬ, nawˬ ve hpu teˇ cawehˬ hta‸ ngaˬ ca kaˬ leh, teˇ chi cawehˬ k'aw‸ g'a ve yoˬ teh‸ k'oˆ piˇ ve yoˬ. 17 Awˬ jawˇ mawˇ k'aw‸ k'oˆ ve, Da‸ ve awˬ ceˬ-oˬ, nawˬ te ve lehˬ da‸ ve yoˬ. I ve teˇ ceuˬ awˬ hk'aw lo nawˬ na yuˬ puiˉ ve pa taw, venˇ teˇ chi venˇ hta‸ uˉ peunˍ-o‸ teh‸ yawˇ hta‸ k'oˆ piˇ ve yoˬ. 18 Nyiˇ g'aˇ teˇ g'aˇ laˬ leh, Jawˇ mawˇ-oˬ, nawˬ ve hpu teˇ cawehˬ hta‸ ngaˬ ca kaˬ leh, ngaˇ cawehˬ k'aw‸ g'a ve yoˬ teh‸ k'oˆ piˇ ve yoˬ. 19 Awˬ jawˇ mawˇ k'aw‸ k'oˆ ve, Venˇ ngaˇ venˇ hta‸ nawˬ uˉ peunˍ-o‸ teh‸ yawˇ hta‸ k'oˆ piˇ ve yoˬ. 20 Teˇ g'aˇ laˬ leh k'oˆ ve, Jawˇ mawˇ-oˬ, cho-e‸, nawˬ ve hpu teˇ cawehˬ hta‸ hpaˉ ce‸ awˬ hk'aw lo ngaˬ htiˆ teh taˍ ve yoˬ. 21 Nawˬ lehˬ te hehnˇ jaˇ ve chaw teˇ g'aˇ hpeh‸ ve pa taw, ngaˬ nawˬ hta‸ kawˆ ve yoˬ. Nawˬ maˇ teh taˍ kuiˬ lo nawˬ g'awˆ yuˬ leh, nawˬ maˇ sheˍ kuiˬ lo nawˬ g'eu‸ yuˬ ve yoˬ teh‸ k'oˆ piˇ ve yoˬ. 22 Oˇ htaˇ awˬ jawˇ mawˇ k'aw‸ k'oˆ piˇ ve, Haiˬ ve awˬ ceˬ-oˬ, nawˬ k'oˆ taˍ ve tawˇ hkawˇ hta‸ ngaˬ yuˬ leh nawˬ hta‸ suhˉ taˆ laˇ tuˬ yoˬ. Ngaˬ lehˬ te hehnˇ jaˇ ve chaw hpeh‸ leh, ngaˬ maˇ teh taˍ kuiˬ lo g'awˆ yuˬ leh, maˇ sheˍ kuiˬ lo g'eu‸ yuˬ ve hta‸ nawˬ shiˍ ve k'o, 23 ngaˬ ve hpu chi hta‸ yuˬ leh hpu chiˇ piˇ shehˍ hpaˇ teˇ hpaˍ hta‸ aˬ hto‸ ma te maˇ piˇ le. Oˇ hk'e te ve k'o, ngaˬ k'aw‸ la ve teˇ yanˇ, ngaˬ ve hpu chi hta‸ ka‸ awˬ yawˬ hta‸ ka‸ g'a tuˬ yoˬ teh‸ k'oˆ piˇ ve yoˬ. 24 Awˬ paˇ lo huˉ taˍ ve chaw teˇ hpaˍ hta‸ yawˇ k'oˆ piˇ ve, Hpu oˇ ve teˇ cawehˬ hta‸ yawˇ geh yuˬ hk'aw‸ leh, hpu teˇ chi cawehˬ cawˬ ve chaw hta‸ piˇ-oˆ teh‸ k'oˆ piˇ ve yoˬ. 25 Chaw oˇ ve teˇ hpaˍ lehˬ, Jawˇ mawˇ-oˬ, yawˇ hpu teˇ chi cawehˬ cawˬ peuˬ teh‸ yawˇ hta‸ k'oˆ piˇ ve yoˬ. 26 Ngaˬ nawˬ hui hta‸ k'oˆ laˇ ve, cawˬ ve chaw teˇ g'aˇ le le hta‸ k'aw‸ htehˍ piˇ tuˬ yoˬ. Maˇ cawˬ chaw geh, yawˇ hk'a cawˬ ve hta‸ ka‸ k'aw‸ yuˬ tawˆ sheˬ tuˬ yoˬ. 27 Chi hk'oˆ ka‸, ngaˬ yawˇ hui awˬ hk'oˆ hta‸ uˉ peunˍ tuˬ maˇ heuˆ gaˇ ve ngaˬ ve canˇ paˍ teˇ hpaˍ hta‸ choˬ kaˬ lo yuˬ laˬ leh, ngaˬ mehˆ g'uˇ suhˍ tiˇ pehˍ loˬ teh‸ k'oˆ piˇ tuˬ yoˬ. 28 Yawˇ oˇ hk'e k'oˆ peuˬ hk'aw‸ nawˉ yawˇ awˬ g'uˇ suhˍ k'ai leh, Yeˍruˆsaˍlehnˍ venˇ lo taˆ-e ve yoˬ. 29 Yawˇ lehˬ Shaˍlonˍ hk'aw hta‸ neˇ ve, Behˆhpaˍgeˍ hk'aˆ leh Beˍtaˍniˆ hk'aˆ lo gaˬ la ve teˇ yanˇ, awˬ la‸ g'awˇ nyiˇ g'aˇ hta‸ k'ai tcuh leh k'oˆ ve, 30 Nawˬ huiˉ maˬ awˬ g'uˇ suhˍ cawˬ ve hk'aˆ hk'aw lo k'ai-o. Oˇ kaˬ lo lo‸-e ve teˇ yanˇ, chaw teˇ g'aˇ ka‸ maˇ ciˇ jaw sheˍ ve piˉ laˬ ehˉ hpeh taˍ ve hta‸ nawˬ huiˉ maˬ g'a mawˬ tuˬ yoˬ. Hpui leh sheh veu laˇ-oˆ. 31 Nawˬ huiˉ maˬ aˬ hto‸ ma pa taw hpui ve le teh‸ chaw teˇ g'aˇ g'aˇ na nyi laˇ ve k'o, Jawˇ mawˇ loˍ ve yoˬ teh‸ k'aw‸ k'oˆ piˇ-oˆ teh‸, yawˇ huiˉ maˬ hta‸ k'oˆ piˇ ve yoˬ. 32 K'ai tcuh ve chaw nyiˇ g'aˇ k'ai leh gaˬ ve teˇ yanˇ, yawˇ k'oˆ laˇ ve hk'e g'a mawˬ ve yoˬ. 33 Piˉ laˬ ehˉ hta‸ yawˇ huiˉ ma hpui chehˇ ve teˇ yanˇ, awˬ shehˍ hpaˇ teˇ hpaˍ lehˬ, Aˬ hto‸ ma hta‸ pa taw piˉ laˬ ehˉ hta‸ hpui ve le teh‸, yawˇ huiˉ maˬ hta‸ k'oˆ piˇ ve yoˬ. 34 Jawˇ mawˇ loˍ ve yoˬ teh‸ yawˇ huiˉ maˬ k'aw‸ k'oˆ piˇ ve yoˬ. 35 Oˇ htaˇ, yawˇ huiˉ maˬ piˉ laˬ ehˉ oˇ ve hta‸ Yeˍsuˆ geh sheh veu laˇ leh, piˉ laˬ ehˉ awˬ hk'oˆ hta‸ yawˇ hui ve veu‸ k'aˇ hk'awˇ piˉ peuˬ hk'aw‸ nawˉ, Yeˍsuˆ hta‸ ciˇ tcuh ve yoˬ. 36 Yawˇ ciˇ k'ai chehˇ ve teˇ yanˇ, yawˇ hui lehˬ a shu yawˇ ve veu‸ k'aˇ hta‸ ya‸ k'aw hpuiˇ lo hk'awˇ piˇ ve yoˬ. 37 Venˇ awˬ paˇ lo yawˇ gaˬ la leh, Shaˍlonˍ hk'aw gaˬ ya‸ teˇ kaˬ lo gaˬ ve teˇ yanˇ, awˬ la‸ g'awˇ awˬ moˍ lonˉ hk'a peu-eˬ lehˬ, yawˇ hui g'a mawˬ jaw peuˬ ve kanˇ paˆ uiˍ ve kanˉ hk'a peu-eˬ hta‸ pa taw, ha lehˬ ha k'a awˬ hkawˇ bvuhˬ chaweh te leh G'uiˬ sha hta‸ chiˇ mvuh ve yoˬ. 38 Yawˇ hui k'oˆ ve, Jawˇ mawˇ G'uiˬ sha ve awˬ meh awˬ hawˉ lo laˬ ve Hkunˉ hawˉ hkanˇ lehˬ, awˬ bon uiˍ piˇ-oˆ. Mvuhˇ naw ma hk'oˆ lo dawˇ sha gaˇ sha tuˬ cawˬ piˇ-oˇ. Mvuh jaˇ kuiˬ lo awˬ me‸ awˬ hponˇ cawˬ piˇ-oˆ teh‸ k'oˆ ve yoˬ. 39 Chaw awˬ moˍ lonˉ oˇ ve awˬ hk'aw lo chehˇ ve Hpaˍriˍsehˇ teˇ hpaˍ hpaˍ lehˬ, Saˍ la‸-oˬ, nawˬ ve awˬ la‸ g'awˇ teˇ hpaˍ hta‸ deˇ piˇ-oˆ teh‸ yawˇ hta‸ k'oˆ piˇ ve yoˬ. 40 Oˇ htaˇ yawˇ k'aw‸ k'oˆ ve, Ngaˬ nawˬ hui hta‸ k'oˆ laˇ ve, chaw chi teˇ hpaˍ ta‸ iˉ chehˇ ve k'o, haˉ pui shiˍ teˇ hpaˍ kuˬ tuˬ yoˬ teh‸ k'oˆ piˇ ve yoˬ. 41 Venˇ awˬ paˇ lo yawˇ gaˬ la htaˇ, venˇ hta‸ g'a mawˬ leh, yawˇ hawˬ leh k'oˆ ve, 42 Yeˍruˆsaˍlehnˍ venˇ-oˬ, hk'aˬ hk'e te leh nawˬ gawˬ lehˍ g'a chehˇ tuˬ ya‸ nyi ka‸ nawˬ shiˍ ve hk'e k'o da‸ jaˇ ve yoˬ. Ya‸ hk'aˇ, chi beu‸ lehˬ gawˬ lehˍ g'a chehˇ tuˬ ve teˇ ceuˬ nawˬ mehˆ g'uˇ suhˍ faˉ taˍ ve yoˬ. 43 Awˬ lawn k'o, G'uiˬ sha nawˬ hta‸ ca nyi ca ha‸ shaˉ la ve awˬ yanˇ hta‸ nawˬ maˇ shiˍ ve pa taw, nawˬ ve canˇ paˍ teˇ hpaˍ lehˬ, nawˬ hta‸ hk'a caw zuhˇ lo ta‸ duˇ taˍ leh, nawˬ hta‸ teˇ hpawˇ le le hoˆ taˍ tuˬ ve awˬ nyi awˬ haˉ gaˬ la tuˬ yoˬ. 44 Oˇ htaˇ, nawˬ leh nawˬ awˬ hk'aw lo chehˇ ve nawˬ ve awˬ yaˇ awˬ duˬ teˇ hpaˍ hta‸ shu miˬ chaˇ hk'oˆ lo chiˇ baˬ laˇ tuˬ yoˬ. Nawˬ awˬ hk'aw lo haˉ pui teˇ shiˍ awˬ hk'oˆ teˇ shiˍ maˇ cawˬ htaˇ hk'a gaˬ yawˇ hui te luˬ taˉ laˇ tuˬ yoˬ teh‸ k'oˆ ve yoˬ. 45 Oˇ htaˇ, yawˇ bon yehˬ lonˉ awˬ hk'aw lo lo‸-e leh, mawˇ hawˇ ve chaw teˇ hpaˍ hta‸ g'a‸ k'oˬ ve yoˬ. 46 Ngaˬ ve yehˬ hta‸ bon lawˬ kuiˬ yehˬ g'a hpeh‸ tuˬ yoˬ teh‸ bvuh‸ taˍ ve htawˇ, nawˬ hui lehˬ yehˬ chi hta‸ chaw hk'awˇ chehˇ kuiˬ hpeh‸ la piˇ peuˬ teh‸, yawˇ hui hta‸ k'oˆ piˇ ve yoˬ. 47 Yawˇ lehˬ teˇ nyi le le bon yehˬ lonˉ awˬ hk'aw lo maˍ piˇ chehˇ ve yoˬ. Paw hkuˇ lonˉ teˇ hpaˍ, li‸ bvuh‸ paˍ teˇ hpaˍ leh Yuˇda‸ chaw hui ve awˬ hoˉ awˬ naˬ teˇ hpaˍ yawˇ hta‸ tiˇ pehˍ tuˬ ca ve yoˬ. 48 Ya‸ hk'aˇ, hk'aˬ hk'e g'a te tuˬ ve hta‸ yawˇ hui ca maˇ mawˬ. Awˬ lawn k'o, chaw hk'a peu-eˬ yawˇ maˍ piˇ ve tawˇ hkawˇ hta‸ hk'a deh‸ na chehˇ ve pa taw yoˬ.

Luˉka‸ 20

1 Teˇ nyi htaˇ, Yeˍsuˆ lehˬ bon yehˬ lonˉ awˬ hk'aw lo chaw chi ma ve hta‸ maˍ piˇ leh ha lehˬ ve bon hkawˇ maˍ piˇ chehˇ ve teˇ yanˇ, paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ awˬ hoˉ chaw mawˇ teˇ hpaˍ geh teˇ geh laˬ leh k'oˆ ve, 2 Nawˬ hk'aˬ hk'e ve kanˇ paˆ g'a leh chi teˇ hpaˍ hta‸ te ve le. Kanˇ paˆ chi a shu nawˬ hta‸ pe‸ laˇ ve le, Ngaˬ hui hta‸ hto laˇ-oˆ teh‸ yawˇ hta‸ k'oˆ piˇ ve yoˬ. 3 Oˇ htaˇ Yeˍsuˆ k'aw‸ k'oˆ ve, Ngaˬ htawˇ nawˬ hui hta‸ tawˇ teˇ hkawˇ na nyi shaˍ. Nawˬ hui yaw hk'aw‸ laˇsheˍ. 4 Yoˇhanˬ yawˇ baˆtiˆsaˬ, piˇ ve teˇ ceuˬ lehˬ mvuhˇ naw ma lo g'a ve laˇ, maˇ heˆ k'o chaw yaˇ hui geh lo g'a ve laˇ teh‸ yawˇ hui hta‸ na nyi ve yoˬ. 5 Yawˇ hui teˇ g'aˇ leh teˇ g'aˇ jehˬ da‸ leh k'oˆ ve, Mvuhˇ naw ma lo g'a ve teh‸ ngaˬ hui k'oˆ ve k'o, Nawˬ hui aˬ hto‸ ma te yawˇ hta‸ maˇ yonˍ ve le teh‸ yawˇ k'aw‸ k'oˆ laˇ tuˬ yoˬ. 6 Chaw yaˇ hui geh g'a ve teh‸ ngaˬ hui k'oˆ ve k'o, chaw chi ma ve ngaˬ hui hta‸ haˉ pui baˬ pehˍ laˇ tuˬ yoˬ. Awˬ lawn k'o, Yoˇhanˬ lehˬ G'uiˬ sha ve tcuh kaˍ paˍ hpeh‸ ve hta‸ yawˇ hui yonˍ ve yoˬ teh‸ k'oˆ da‸ ve yoˬ. 7 Yawˇ hk'aˬ lo g'a ve hta‸ ngaˬ hui maˇ shiˍ teh‸ k'aw‸ k'oˆ piˇ ve yoˬ. 8 Yeˍsuˆ htawˇ, Chi hk'a shuˍ shuˍ ngaˬ hk'aˬ hk'e ve kanˇ paˆ g'a leh chi teˇ hpaˍ hta‸ te ve, ngaˬ nawˬ hui hta‸ maˇ hto laˇ teh‸ yawˇ hui hta‸ k'aw‸ k'oˆ piˇ ve yoˬ. 9 Oˇ htaˇ, chaw chi ma ve hta‸ tawˇ pa haˉ chi maˍ piˇ leh k'oˆ ve, Chaw teˇ g'aˇ lehˬ, a pehˉ meuˇ hko te leh ti taˍ peuˬ hk'aw‸ nawˉ, hko te paˍ teˇ hpaˍ hta‸ ngaˍ piˇ taˉ leh awˬ kaˍ awˬ nu mvuhˇ miˬ lo k'ai leh oˇ kaˬ lo maw chaweh chehˇ taˍ ve yoˬ. 10 Awˬ yanˇ gaˬ la ve teˇ yanˇ, hko oˇ ve awˬ hk'aw lo a pehˉ meuˇ shiˍ teˇ hpaˍ yawˇ hta‸ pe‸ laˇ tuˬ, hko te paˍ teˇ hpaˍ geh awˬ ceˬ teˇ g'aˇ hta‸ yawˇ k'ai tcuh ve yoˬ. Ya‸ hk'aˇ, hko te paˍ teˇ hpaˍ lehˬ, yawˇ hta‸ dawˆ leh, awˬ k'awˇ lehˍ k'o‸-e peu ve yoˬ. 11 Awˬ hk'aw‸ nawˉ teˇ pawˆ, awˬ kaˍ awˬ nu awˬ ceˬ teˇ g'aˇ hta‸ yawˇ yawˇ hui geh k'ai tcuh ve yoˬ. Yawˇ hta‸ htawˇ yawˇ hui dawˆ leh hk'a mvuhˇ hk'a na te piˇ leh, awˬ k'awˇ lehˍ k'o‸-e peu ve yoˬ. 12 Peuˬ leh, awˬ ceˬ shehˆ g'aˇ teˇ g'aˇ hta‸ yawˇ k'aw‸ k'ai tcuh ve yoˬ. Yawˇ hta‸ htawˇ yawˇ hui dawˆ hk'aw sheˬ leh g'a‸ k'oˬ ve yoˬ. 13 Oˇ htaˇ, a pehˉ meuˇ hko awˬ shehˍ hpaˇ k'oˆ ve, Ngaˬ hk'aˬ hk'e g'a te tuˬ le. Ngaˬ ha‸ ve yaˇ paˍ hta‸ ngaˬ k'ai tcuh shaˍ. Yawˇ hui yawˇ hta‸ yawˆ yan tuˬ yoˬ hehˉ teh‸ k'oˆ ve yoˬ. 14 Ya‸ hk'aˇ, hko te paˍ teˇ hpaˍ lehˬ, yaˇ paˍ oˇ ve hta‸ g'a mawˬ htaˇ yawˇ hui teˇ g'aˇ leh teˇ g'aˇ jehˬ da‸ leh k'oˆ ve, Chaw chi lehˬ awˬ shinˉ g'a shehˍ hpaˇ hpeh‸ ve yoˬ. Laˬ-o‸, yawˇ ve awˬ shinˉ hta‸ g'a tuˬ yawˇ hta‸ tiˇ pehˍ-a veuˬ teh‸ k'oˆ da‸ ve yoˬ. 15 Oˇ htaˇ, yawˇ hui yawˇ hta‸ hko awˬ baˬ hpawˇ lo chiˇ baˬ leh tiˇ pehˍ ve yoˬ. Hk'e te leh, hko awˬ shehˍ hpaˇ yawˇ hui hta‸ hk'aˬ hk'e te piˇ tuˬ le. 16 Yawˇ laˬ leh, hko te paˍ teˇ hpaˍ hta‸ tiˇ pehˍ peuˬ hk'aw‸ nawˉ, hko oˇ ve awˬ kaˍ awˬ nu chaw teˇ hpaˍ hta‸ k'aw‸ ngaˍ piˇ tuˬ yoˬ teh‸ Yeˍsuˆ k'oˆ ve yoˬ. Tawˇ chi hta‸ g'a kaˇ ve chaw teˇ hpaˍ lehˬ, Oˇ hk'e maˇ hpeh‸ taˬ teh‸ k'aw‸ k'oˆ piˇ ve yoˬ. 17 Oˇ htaˇ, Yeˍsuˆ yawˇ hui hta‸ nyi leh k'oˆ piˇ ve, Yehˬ kawˍ shehˍ hpaˇ hui baˬ taˍ ve haˉ pui shiˍ lehˬ, awˬ hkuiˉ puiˍ awˬ ceˍ k'aweh‸ lo kawˍ taˍ ve haˉ pui shiˍ hpeh‸ la peuˬ, teh‸ bvuh‸ taˍ ve tawˇ chi teˇ hkawˇ aˬ hto‸ ma k'oˆ gaˇ ve le. 18 Haˉ pui oˇ ve awˬ hk'oˆ paiˍ ve chaw lehˬ, hteh k'ai tuˬ yoˬ. Chaw hk'aˬ ve teˇ g'aˇ awˬ hk'oˆ hta‸ maˇ k'oˆ, haˉ pui oˇ ve ce teˍ ve k'o, chaw oˇ ve meu-e tuˬ yoˬ teh‸ Yeˍsuˆ k'oˆ ve yoˬ. 19 Li‸ bvuh‸ paˍ leh paw hkuˇ lonˉ teˇ hpaˍ lehˬ, tawˇ pa haˉ oˇ ve yawˇ yawˇ hui awˬ lawn k'oˆ chehˇ ve hta‸ shiˍ ve pa taw, awˬ yanˇ oˇ ve awˬ hk'aw lo yawˇ hta‸ hpeh yuˬ tuˬ ca ve yoˬ. Ya‸ hk'aˇ, chaw chi ma ve hta‸ yawˇ hui kawˆ ve yoˬ. 20 Mvuhˇ miˬ jawˇ mawˇ lonˉ ve kanˇ paˆ leh uˉ peunˍ ve hta‸ g'a hkanˍ tuˬ awˬ pon Yeˍsuˆ hta‸ chiˇ a‸ piˇ hpeh‸ tuˬ, yawˇ hui lehˬ jaˆ nyi shehˍ hpaˇ teˇ hpaˍ hta‸ k'ai tcuh ve yoˬ. Jaˆ nyi shehˍ hpaˇ oˇ ve teˇ hpaˍ lehˬ, Yeˍsuˆ tawˇ yaw ya‸ ve hta‸ g'a kaˇ tuˬ, hteˇ ve cawˇ ve chaw hk'e te leh k'ai ve yoˬ. 21 Jaˆ nyi shehˍ hpaˇ oˇ ve teˇ hpaˍ k'oˆ ve, Saˍ la‸-oˬ, nawˬ lehˬ hteˇ lehˍ k'oˆ piˇ maˍ piˇ leh, chaw yaˇ ve mehˆ hpfuhˇ hta‸ maˇ nyi ve awˬ hk'aw lo G'uiˬ sha ve ya‸ k'aw hta‸ hteˇ lehˍ cawˇ lehˍ maˍ piˇ ve hta‸ ngaˬ hui shiˍ ve yoˬ. 22 Ngaˬ hui lehˬ, jawˇ mawˇ Kehˉsaˍ hta‸ a moˇ keu piˇ cawˇ laˇ, maˇ keu piˇ cawˇ laˇ teh‸ yawˇ hta‸ na nyi ve yoˬ. 23 Ya‸ hk'aˇ Yeˍsuˆ lehˬ, yawˇ hui cuˇ yiˍ te leh heˍ ve hta‸ g'a shiˍ leh, yawˇ hui hta‸ k'oˆ piˇ ve, 24 Hpu teˇ hteh‸ ngaˬ hta‸ maˍ laˇ-oˆ. A shu ve awˬ han, a shu ve awˬ meh cawˬ le teh‸ na nyi htaˇ, Jawˇ mawˇ Kehˉsaˍ ve yoˬ teh‸, yawˇ hui k'aw‸ k'oˆ piˇ ve yoˬ. 25 Oˇ htaˇ Yeˍsuˆ k'oˆ ve, Hk'e te leh, jawˇ mawˇ Kehˉsaˍ ve mawˇ jawˇ mawˇ Kehˉsaˍ hta‸ piˇ-oˆ. G'uiˬ sha ve mawˇ G'uiˬ sha hta‸ piˇ-oˆ teh‸ yawˇ hui hta‸ k'aw‸ k'oˆ piˇ ve yoˬ. 26 Chaw chi ma ve mehˆ g'uˇ suhˍ yawˇ k'oˆ piˇ ve tawˇ hkawˇ awˬ hk'aw lo ya‸ kuiˬ hta‸ yawˇ hui ca maˇ mawˬ. Yawˇ yaw hk'aw‸ ve tawˇ hkawˇ hta‸ yawˇ hui anˇ leh ta‸ iˉ chehˇ taˍ ve yoˬ. 27 K'aw‸ te‸ tu la ve maˇ cawˬ teh‸ k'oˆ ve Saˍduˆkehˇ chaw teˇ hpaˍ hpaˍ yawˇ geh laˬ leh k'oˆ ve, 28 Saˍ la‸-oˬ, Moˉseˍ ngaˬ hui awˬ pon chi hk'e bvuh‸ taˍ ve, Chaw teˇ g'aˇ awˬ miˇ ma cawˬ leh, yaˇ maˇ cawˬ sheˍ htaˇ suh ve k'o, yawˇ ve awˬ nyi paˍ lehˬ, awˬ viˉ paˍ ve awˬ miˇ ma hta‸ k'aw‸ heuˆ leh, awˬ viˉ paˍ awˬ pon awˬ ceuˬ awˬ hk'aˇ g'a cawˬ piˇ ve yoˬ teh‸ bvuh‸ taˍ ve yoˬ. 29 Ponˬ laˬ htaˇ, awˬ viˉ awˬ nyi suhˍ g'aˇ cawˬ ve yoˬ. Awˉ lawˉ teˇ g'aˇ lehˬ, awˬ miˇ ma hta‸ heuˆ leh, yaˇ maˇ cawˬ sheˍ htaˇ suh ve yoˬ. 30 Nyiˇ g'aˇ teˇ g'aˇ ka‸, shehˆ g'aˇ teˇ g'aˇ ka‸ yaˇ miˇ oˇ ve hta‸ heuˆ ve yoˬ. 31 Chi hk'a shuˍ shuˍ, awˬ viˉ awˬ nyi suhˍ g'aˇ hk'a gaˬ yaˇ maˇ cawˬ taˉ leh suh ve yoˬ. 32 Awˬ hk'aw‸ nawˉ gaˬ leh, yaˇ miˇ oˇ ve htawˇ suh ve yoˬ. 33 Hk'e te leh, k'aw‸ te‸ tu la ve teˇ yanˇ, yaˇ miˇ oˇ ve hk'aˬ ve teˇ g'aˇ ve awˬ miˇ ma hpeh‸ tuˬ le. Awˬ lawn k'o, yawˇ hui suhˍ g'aˇ yaˇ miˇ oˇ ve hta‸ heuˆ peuˬ ve yoˬ teh‸, yawˇ hta‸ na nyi ve yoˬ. 34 Yeˍsuˆ k'aw‸ k'oˆ ve, Chi miˬ guiˬ hk'oˆ te‸ chehˇ ve teˇ ca‸ na‸ awˬ hk'aw lo, awˬ hpawˇ awˬ miˇ heuˆ da‸ ve maˇ k'oˆ, ka piˇ ve maˇ k'oˆ, te chehˇ ve yoˬ. 35 Ya‸ hk'aˇ, awˬ hk'aw‸ nawˉ teˇ ca‸ na‸ hta‸ ka‸, suh kuiˬ lo k'aw‸ te‸ tu la ve teˇ ceuˬ hta‸ ka‸ g'a keunˍ ve chaw teˇ hpaˍ lehˬ, awˬ miˇ awˬ hpawˇ heuˆ da‸ ve maˇ k'oˆ, ka piˇ ve maˇ k'oˆ, maˇ te. 36 Yawˇ hui lehˬ, awˬ hk'aw‸ nawˉ teˇ pawˆ ka‸ maˇ g'a suh. Awˬ lawn k'o, yawˇ hui lehˬ mvuhˇ naw ma tcuh yaˇ teˇ hpaˍ hk'a shuˍ shuˍ hpeh‸ leh, k'aw‸ te‸ tu la ve chaw teˇ hpaˍ hpeh‸ ve pa taw, G'uiˬ sha ve awˬ yaˇ awˬ duˬ teˇ hpaˍ hpeh‸ ve yoˬ. 37 Suh ve chaw hui k'aw‸ te‸ tu la ve yoˬ teh‸, aˉ chuˇ buiˇ awˬ lawn bvuh‸ taˍ ve teˇ tawn awˬ hk'aw lo Moˉseˍ hpeu‸ maˍ laˇ ve yoˬ. Yawˇ lehˬ Jawˇ mawˇ G'uiˬ sha hta‸, Aˍbraˍhanˍ ve G'uiˬ sha, Iˉcaˆ ve G'uiˬ sha leh Yaˍkoˆ ve G'uiˬ sha hpeh‸ ve yoˬ teh‸ k'oˆ taˍ ve yoˬ. 38 G'uiˬ sha lehˬ suh peuˬ ve chaw hui ve G'uiˬ sha hpeh‸ ve maˇ heˆ. Te‸ chehˇ ve chaw hui ve G'uiˬ sha hpeh‸ ve yoˬ. Yawˇ hta‸ pa taw chaw hk'a peu-eˬ te‸ chehˇ ve yoˬ teh‸, yawˇ hui hta‸ k'oˆ piˇ ve yoˬ. 39 Oˇ htaˇ li‸ bvuh‸ paˍ teˇ hpaˍ hpaˍ lehˬ, Saˍ la‸-oˬ, nawˬ k'oˆ ve lehˬ cawˇ jaˇ ve yoˬ teh‸ k'aw‸ k'oˆ ve yoˬ. 40 Yawˇ hui lehˬ yawˇ hta‸ te‸ chiˉ ka‸ k'aw‸ na nyi maˇ haˆ. 41 Oˇ htaˇ yawˇ yawˇ hui hta‸ k'oˆ piˇ ve, Hkri‸ lehˬ Daˍviˆ ve Yaˇ hpu yoˬ teh‸, aˬ hto‸ ma te shu k'oˆ ve le. 42 Awˬ lawn k'o, Daˍviˆ yawˇ awˬ to k'oˆ ve, Jawˇ mawˇ G'uiˬ sha lehˬ ngaˬ ve Jawˇ mawˇ hta‸ k'oˆ piˇ ve, 43 Nawˬ ve canˇ paˍ teˇ hpaˍ hta‸ nawˬ ve hkui sheh awˬ hawˉ lo ngaˬ taˍ htaˇ hk'a gaˬ ngaˬ ve la‸ sha paˉ lo mui chehˇ-oˆ, teh‸ Chiˇ mvuh ve li‸ awˬ hk'aw lo k'oˆ taˍ ve yoˬ. 44 Hk'e te leh, Daˍviˆ lehˬ yawˇ hta‸ Jawˇ mawˇ teh‸ k'oˆ ve k'o, hk'aˬ hk'e te leh yawˇ ve yaˇ hpu hpeh‸ tuˬ ve le teh‸ na nyi ve yoˬ. 45 Chaw hk'a peu-eˬ na chehˇ ve teˇ yanˇ, yawˇ yawˇ ve awˬ la‸ g'awˇ teˇ hpaˍ hta‸ k'oˆ piˇ ve, 46 Li‸ bvuh‸ paˍ teˇ hpaˍ hta‸ shaˍ ti‸ te-o. Yawˇ hui lehˬ, aˉ po‸ zuhˬ ve hta‸ deh leh ca te toˇ gaˇ ve yoˬ. Tcuh hk'aw lo shu yawˇ hui hta‸ yawˆ yan laˇ ve hta‸ maˇ k'oˆ, bon yehˬ awˬ hk'aw lo awˬ me‸ awˬ hponˇ cawˬ ve mui hk'awˇ hta‸ maˇ k'oˆ, hti caˇ hti dawˬ kuiˬ lo awˬ me‸ awˬ hponˇ cawˬ ve mui kuiˬ hta‸ maˇ k'oˆ, yawˇ hui heuˆ gaˇ ve yoˬ. 47 Yawˇ hui lehˬ, mehˇ chawˇ ma ve yehˬ hta‸ hiˇ yuˬ leh, a shu yawˇ ve venˇ baˆ maˇ g'a tawˆ la tuˬ maw chaweh bon lawˬ ve yoˬ. Shu a‸ kehˉ leuˉ leh uiˍ jaˇ ve ciˍ yanˍ ve hta‸ yawˇ hui g'a hkanˍ tuˬ yoˬ teh‸ k'oˆ ve yoˬ.

Luˉka‸ 21

1 Oˇ htaˇ, Yeˍsuˆ chiˇ nyi leh, hpu tanˇ keu kuiˬ lo paw sha paˍ teˇ hpaˍ hpu keu chehˇ ve hta‸ yawˇ g'a mawˬ ve yoˬ. 2 Haˍ g'awˇ ve mehˇ chawˇ ma teˇ g'aˇ peh‸ shanˍ nyiˇ peh‸ keu ve hta‸ ka‸ yawˇ g'a mawˬ ve yoˬ. 3 Oˇ htaˇ yawˇ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, haˍ g'awˇ ve mehˇ chawˇ ma chi teˇ g'aˇ lehˬ, chaw hk'a peu-eˬ a‸ kehˉ leuˉ leh keu maˇ ve yoˬ. 4 Awˬ lawn k'o, yawˇ hui hk'a peu-eˬ lehˬ cawˬ maˇ jaˇ ve awˬ hk'aw lo yuˬ tawˆ leh keu ve yoˬ. Ya‸ hk'aˇ, yaˇ miˇ chi teˇ g'aˇ lehˬ, haˍ g'awˇ jaˇ ve awˬ hk'aw lo yawˇ a sha‸ hu tuˬ ve hk'a peu-eˬ hta‸ yuˬ tawˆ leh keu ve yoˬ teh‸ k'oˆ ve yoˬ. 5 Bon yehˬ lonˉ awˬ hk'aw lo nyi sha jaˇ ve haˉ pui shiˍ teˇ hpaˍ leh, tanˇ taˍ ve awˬ hpfuhˇ hk'aˆ jaˇ ve mawˇ jeˬ teˇ hpaˍ hk'a deh‸ gu taˍ ve awˬ lawn shu k'oˆ ve teˇ yanˇ Yeˍsuˆ k'oˆ ve, 6 Nawˬ hui g'a mawˬ ve chi teˇ hpaˍ hta‸ shu te luˬ ve awˬ nyi gaˬ la tuˬ yoˬ. Oˇ htaˇ, haˉ pui teˇ shiˍ awˬ hk'oˆ teˇ shiˍ maˇ cawˬ htaˇ hk'a gaˬ luˬ k'ai tuˬ yoˬ teh‸ k'oˆ ve yoˬ. 7 Yawˇ hui k'aw‸ k'oˆ ve, Saˍ la‸-oˬ, hk'e te k'o, awˬ ceuˬ oˇ ve teˇ hpaˍ hk'aˬ htaˆ hpeh‸ la tuˬ le. Hpeh‸ la paˇ neˇ ve teˇ yanˇ, awˬ heˆ hk'aˬ hk'e hpeh‸ tawˆ la tuˬ ve le teh‸ na nyi ve yoˬ. 8 Yeˍsuˆ yawˇ hui hta‸ k'aw‸ k'oˆ piˇ ve, Shu nawˬ hui hta‸ maˇ g'a heˍ yuˬ beˬ yuˬ tuˬ, shaˍ ti‸ taˍ-o‸. Awˬ lawn k'o, chaw maˇ maˇ ngaˬ ve awˬ meh hta‸ pfuhˇ laˬ leh, Ngaˬ lehˬ yawˇ yoˬ. Awˬ yanˇ gaˬ la peuˬ teh‸ k'oˆ tuˬ yoˬ. Yawˇ hui awˬ hk'aˇ suh taˇ k'ai. 9 Nawˬ hui lehˬ, ma‸ bawˆ ve leh mvuhˇ miˬ hta‸ hpfuhˆ k'ai ve awˬ lawn hta‸ g'a kaˇ ve teˇ yanˇ, kawˆ ve cheˇ ve taˇ cawˬ piˇ. Awˬ lawn k'o, awˬ ceuˬ chi teˇ hpaˍ awˉ lawˉ g'a hpeh‸ la tuˬ yoˬ. Ya‸ hk'aˇ, teˇ cawˬ haˉ awˬ leh meuˇ gaˬ la tuˬ ve maˇ heˆ teh‸ k'oˆ ve yoˬ. 10 Chi hk'oˆ ka‸ yawˇ k'aw‸ k'oˆ ve, Chaw teˇ ceuˬ leh teˇ ceuˬ, mvuhˇ miˬ teˇ peˆ leh teˇ peˆ ya‸ da‸ jiˆ da‸ tuˬ yoˬ. 11 Miˬ g'aˇ hte‸ hiˆ ve, chehˇ kuiˬ teˇ kaˬ peuˬ teˇ kaˬ awˬ hk'aw lo meu‸ ve kaˆ ve leh naˬ beuˬ gaˬ la tuˬ yoˬ. Mvuhˇ naw ma hk'oˆ lo kawˆ tuˬ uiˍ jaˇ ve teˇ hpaˍ leh, uiˍ jaˬ ve awˬ heˆ teˇ hpaˍ tawˆ la tuˬ yoˬ. 12 Ya‸ hk'aˇ, chi hk'a peu-eˬ maˇ hpeh‸ la sheˍ awˬ g'uˇ suhˍ, shu nawˬ hui hta‸ hpeh yuˬ leh fawˉ mehˍ laˇ tuˬ yoˬ. Bon yehˬ teˇ hpaˍ awˬ hk'aw lo leh htawnˍ teˇ hpaˍ awˬ hk'aw lo shu nawˬ hui hta‸ chiˇ a‸ tuˬ yoˬ. Ngaˬ ve awˬ meh hta‸ pa taw, hkunˉ hawˉ hkanˇ teˇ hpaˍ leh mvuhˇ miˬ jawˇ mawˇ lonˉ teˇ hpaˍ mehˆ g'uˇ suhˍ shu nawˬ hui hta‸ yuˬ k'ai tuˬ yoˬ. 13 Chi hk'e te ve awˬ hk'aw lo, nawˬ hui shaˉ hkiˆ g'a hkanˍ ve awˬ yanˇ hpeh‸ la tuˬ yoˬ. 14 Hk'e te leh, hk'aˬ hk'e k'aw‸ k'oˆ hk'aw‸ piˇ tuˬ ve, awˉ lawˉ htaˇ ka‸ ngaˬ maˇ dawˇ nyi teh‸, a shu yawˇ ve nyi ma hk'aw lo dawˇ cheˆ taˍ-o‸. 15 Awˬ lawn k'o, nawˬ hui ve canˇ paˍ hk'a peu-eˬ g'awˬ hk'aˆ maˇ g'a leh tawˍ taˍ maˇ g'a ve tawˇ hkawˇ leh cuˇ yiˍ maˍ yiˍ ngaˬ nawˬ hui hta‸ pe‸ laˇ tuˬ yoˬ. 16 Awˬ pa awˬ e, awˬ viˉ awˬ nyi awˬ ceuˬ awˬ hk'aˇ leh awˬ chawˇ awˬ paˆ teˇ hpaˍ nawˬ hui hta‸ chiˇ a‸ piˇ tuˬ yoˬ. Yawˇ hui lehˬ, nawˬ hui teˇ hpaˍ hpaˍ hta‸ tiˇ pehˍ tuˬ yoˬ. 17 Ngaˬ ve awˬ meh hta‸ pa taw chaw hk'a peu-eˬ nawˬ hui hta‸ canˇ tuˬ yoˬ. 18 Ya‸ hk'aˇ, nawˬ hui ve uˉ hkeh mvuh teˇ mvuh ka‸ maˇ g'a luˬ. 19 Nawˬ hui nyi ma yeˬ puiˉ ve hta‸ pa taw, nawˬ hui ve co ha g'a te‸ tuˬ yoˬ. 20 Yeˍruˆsaˍlehnˍ venˇ hta‸ ma‸ moˍ ma‸ cuˇ hk'a caw zuhˇ hoˆ taˍ ve hta‸ nawˬ hui g'a mawˬ ve teˇ yanˇ, venˇ oˇ ve g'a luˬ paˇ neˇ ve hta‸ nawˬ hui shiˍ-o‸. 21 Oˇ htaˇ, Yuˇda‸ mvuhˇ miˬ awˬ hk'aw lo chehˇ ve chaw hui hk'aw hk'oˆ lawˬ hk'oˆ lo hpaw-e loˬ. Venˇ hk'aw lo chehˇ ve chaw hui tawˆ k'ai-o. Venˇ awˬ baˬ lo chehˇ ve chaw hui venˇ hk'aw lo taˇ lo‸-e. 22 Awˬ lawn k'o, Li‸ hpu hk'aw bvuh‸ taˍ ve hk'a peu-eˬ biˇ la tuˬ, awˬ nyi awˬ haˉ oˇ ve teˇ hpaˍ lehˬ, k'aw‸ te hk'aw‸ piˇ tuˬ ve awˬ nyi awˬ haˉ teˇ hpaˍ hpeh‸ ve yoˬ. 23 Awˬ yanˇ oˇ ve awˬ hk'aw lo, yaˇ hu ma leh cuˉ dawˬ ve yaˇ ehˉ cawˬ ve chaw hui lehˬ, g'a dawˇ haˍ jaˇ tuˬ yoˬ. Awˬ lawn k'o, chi miˬ guiˬ hk'oˆ lo dawˇ haˍ tuˬ uiˍ jaˇ ve gaˬ la tuˬ yoˬ. Chaw chi teˇ ceuˬ awˬ hk'oˆ hta‸ nyi ma zuhˆ ve teˇ ceuˬ htawˇ gaˬ la tuˬ yoˬ. 24 Yawˇ hui lehˬ, aˉ htaw chaw pehˍ ve hta‸ g'a hkanˍ tuˬ yoˬ. Shu yawˇ hui hta‸ hpeh yuˬ leh, mvuhˇ miˬ hk'a peu-eˬ awˬ hk'aw lo yawˇ hui hta‸ sheh k'ai tuˬ yoˬ. Buiˇ shaˆ aˉ naˆ chaw hui lehˬ, yawˇ hui ve awˬ yanˇ biˇ la htaˇ hk'a gaˬ Yeˍruˆsaˍlehnˍ venˇ hta‸ naˆ tiˍ taˍ tuˬ yoˬ. 25 Oˇ ve teˇ yanˇ, mvuhˇ nyi, ha pa, meu‸ keu teˇ hpaˍ awˬ hk'aw lo awˬ heˆ teˇ hpaˍ tawˆ la tuˬ yoˬ. Laˇ tsuhˇ g'uiˬ leh g'uiˬ baˇ teˇ hpaˍ awˬ hkawˇ bvuhˬ jaˇ ve pa taw, chaw ceuˬ teˇ hpaˍ anˇ jaˇ leh, dawˇ haˍ gaˇ haˍ jaˇ tuˬ yoˬ. 26 Chaw teˇ hpaˍ lehˬ miˬ guiˬ hk'oˆ lo hpeh‸ la tuˬ ve awˬ ceuˬ teˇ hpaˍ hta‸ dawˇ nyi ve teˇ yanˇ, kawˆ jaˇ ve pa taw, maˇ nawˇ maˇ hteh k'ai tuˬ yoˬ. Awˬ lawn k'o, mvuhˇ naw ma ve kanˇ paˆ teˇ hpaˍ hiˆ hiˆ naˇ naˇ hpeh‸ la tuˬ yoˬ. 27 Oˇ htaˇ, chaw yaˇ ve Yaˇ hpu lehˬ, uiˍ ve awˬ me‸ awˬ hponˇ leh kanˇ paˆ cawˬ ve awˬ hk'aw lo moˬ hta‸ ciˇ ya‸ la ve hta‸ yawˇ hui g'a mawˬ tuˬ yoˬ. 28 Awˬ ceuˬ oˇ ve teˇ hpaˍ tanˬ hpeh‸ la ve teˇ yanˇ, nawˬ hui oˉ k'oˍ chiˇ leh nyi-o. Awˬ lawn k'o, nawˬ hui hta‸ htaiˍ hk'aw‸ laˇ tuˬ ve awˬ yanˇ neˇ la peuˬ teh‸ k'oˆ ve yoˬ. 29 Yawˇ yawˇ hui hta‸ tawˇ pa haˉ te maˍ piˇ leh k'oˆ ve, Maˉ nawˆ cehˬ leh suhˆ cehˬ hk'a peu-eˬ hta‸ nyi-o. 30 Awˬ caˍ caˍ la ve teˇ yanˇ, mvuhˇ cha hkui yanˇ gaˬ la paˇ neˇ peuˬ ve hta‸ nawˬ hui hk'aˇ nawˬ hui mawˬ leh shiˍ ve yoˬ. 31 Chi hk'a shuˍ shuˍ awˬ ceuˬ chi teˇ hpaˍ hpeh‸ la chehˇ ve hta‸ nawˬ hui g'a mawˬ ve teˇ yanˇ, G'uiˬ sha ve mvuhˇ miˬ lehˬ awˬ paˇ lo gaˬ la peuˬ ve hta‸ nawˬ hui shiˍ-o‸. 32 Ngaˬ nawˬ hui hta‸ awˬ tehˬ awˬ na k'oˆ laˇ ve, chi teˇ co maˇ ponˬ k'ai sheˍ htaˇ, awˬ ceuˬ chi hk'a peu-eˬ hpeh‸ la tuˬ yoˬ. 33 Mvuhˇ naw ma leh miˬ naˆ ma mehˉ k'ai tuˬ yoˬ. Ya‸ hk'aˇ, ngaˬ ve tawˇ hkawˇ lehˬ, maˇ mehˉ k'ai taˬ. 34 Nawˬ hui lehˬ, a shu yawˇ awˬ to shaˍ ti‸ te-o. Hk'e maˇ heˆ k'o, caˇ leuˉ dawˬ leuˉ ve, tzuhˬ dawˬ bvuhˆ ve, miˬ guiˬ dawˇ haˍ gaˇ haˍ tuˬ ve teˇ hpaˍ hta‸ pa taw nawˬ hui nyi ma hawˇ buiˬ lehˍ hpeh‸ chehˇ ve teˇ yanˇ, awˬ nyi oˇ ve lehˬ va yaw ve hk'a shuˍ shuˍ teˇ cawˬ haˉ nawˬ hui aw‸ hk'oˆ gaˬ la tuˬ yoˬ. 35 Awˬ lawn k'o, awˬ nyi oˇ ve lehˬ, miˬ guiˬ hk'oˆ chehˇ ve chaw hk'a peu-eˬ awˬ hk'oˆ gaˬ la tuˬ yoˬ. 36 Hk'e te leh, hpeh‸ la tuˬ ve awˬ ceuˬ oˇ ve hk'a peu-eˬ awˬ hk'aw lo nawˬ hui g'a ponˬ leh, chaw yaˇ ve Yaˇ hpu mehˆ g'uˇ suhˍ g'a huˉ chehˇ hpeh‸ tuˬ hk'aˬ htaˆ ka‸ bon lawˬ leh shaw taˍ-o‸ teh‸ k'oˆ ve yoˬ. 37 Yawˇ lehˬ, teˇ nyi le le bon yehˬ lonˉ awˬ hk'aw lo maˍ piˇ leh, teˇ haˉ le le tawˆ k'ai leh Shaˍlonˍ meh ve hk'aw lo ca haˉ-e ve yoˬ. 38 Chaw hk'a peu-eˬ yawˇ maˍ piˇ ve tawˇ hkawˇ hta‸ na tuˬ, mvuhˇ shawˉ teˇ na‸ htaˇ bon yehˬ lonˉ awˬ hk'aw lo yawˇ geh hpawnˬ la ve yoˬ.

Luˉka‸ 22

1 Oˇ htaˇ, Paˍsaˍhkaˍ pawehˇ meh ve, Hkaoˍ monˇ awˬ hk'aw lo diˇ maˇ keu ve pawehˇ gaˬ la paˇ neˇ ve yoˬ. 2 paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ lehˬ, hk'aˬ hk'e te leh yawˇ hta‸ g'a tiˇ pehˍ tuˬ ca ve yoˬ. Awˬ lawn k'o, yawˇ hui lehˬ chaw chi ma ve hta‸ kawˆ ve yoˬ. 3 Oˇ htaˇ, awˬ la‸ g'awˇ teˇ chi nyiˇ g'aˇ awˬ hk'aw lo Iˉsaˍkaˍriˍoˆ meh ve Yuˇda‸ teˇ g'aˇ ve nyi ma awˬ hk'aw lo Saˍtanˍ lo‸-e ve yoˬ. 4 Yawˇ tawˆ k'ai leh, paw hkuˇ lonˉ teˇ hpaˍ leh bon yehˬ lonˉ ve ma‸ poˍ teˇ hpaˍ geh k'ai leh, Yeˍsuˆ hta‸ yawˇ hui ve la‸ sheh awˬ hk'aw lo hk'aˬ hk'e te g'a chiˇ a‸ piˇ tuˬ, yawˇ yawˇ hui geh jehˬ da‸ ve yoˬ. 5 Yawˇ hui ha lehˬ jaˇ leh, yawˇ hta‸ hpu piˇ tuˬ yoˬ teh‸ hkanˍ taˍ ve yoˬ. 6 Yawˇ htawˇ hkanˍ yuˬ leh, chaw awˬ moˍ lonˉ maˇ chehˇ ve teˇ yanˇ Yeˍsuˆ hta‸ yawˇ hui ve la‸ sheh awˬ hk'aw lo chiˇ a‸ piˇ tuˬ, da‸ ve awˬ yanˇ hta‸ yawˇ ca chehˇ ve yoˬ. 7 Paˍsaˍhkaˍ yawˬ ehˉ hta‸ tiˇ pehˍ ve awˬ nyi, Hkaoˍ monˇ awˬ hk'aw lo diˇ maˇ keu ve awˬ nyi teˇ nyi gaˬ la ve yoˬ. 8 Oˇ htaˇ, Yeˍsuˆ lehˬ Peˍtruˆ leh Yoˇhanˬ hta‸ k'ai tcuh leh, Ngaˬ hui Paˍsaˍhkaˍ pawehˇ hta‸ g'a caˇ tuˬ, ngaˬ hui awˬ pon ca gu-o teh‸ k'oˆ piˇ ve yoˬ. 9 Yawˇ huiˉ maˬ lehˬ, Hk'aˬ ve teˇ kaˬ lo nawˬ gu tcuh laˇ gaˇ ve le teh‸ yawˇ hta‸ na nyi ve yoˬ. 10 Yeˍsuˆ k'aw‸ k'oˆ ve, Nawˬ huiˉ maˬ venˇ hk'aw gaˬ ve teˇ yanˇ, iˉ kaˆ mu‸ hk'u taˆ ve chaw teˇ g'aˇ hta‸ g'a hpuˇ da‸ tuˬ yoˬ. Yawˇ awˬ hk'aˇ suh k'ai leh, yawˇ lo‸-e ve yehˬ hk'aw nawˬ huiˉ maˬ lo‸-e peuˬ hk'aw‸ nawˉ, 11 yehˬ shehˍ hpaˇ hta‸ chi hk'e k'oˆ piˇ-oˆ, Saˍ la‸ nawˬ hta‸ k'oˆ laˇ ve, Ngaˬ leh ngaˬ ve awˬ la‸ g'awˇ hui geh teˇ geh Paˍsaˍhkaˍ pawehˇ caˇ tuˬ, hkehˉ chaw bawehˇ hk'aˬ lo le teh‸, yawˇ hta‸ na nyi-o. 12 Oˇ htaˇ, gu taˍ peuˬ ve, awˬ hta‸ teˇ htai‸ bawehˇ uiˍ ve teˇ bawehˇ yawˇ nawˬ huiˉ maˬ hta‸ maˍ laˇ tuˬ yoˬ. Oˇ kaˬ lo gu taˍ-o‸ teh‸, yawˇ huiˉ maˬ hta‸ k'oˆ piˇ ve yoˬ. 13 Yawˇ huiˉ maˬ k'ai ve teˇ yanˇ, Yeˍsuˆ k'oˆ ve hk'e g'a mawˬ leh, Paˍsaˍhkaˍ pawehˇ caˇ tuˬ awˬ pon gu taˍ ve yoˬ. 14 Awˬ yanˇ gaˬ la ve teˇ yanˇ, yawˇ hpui lawˇ paˇ lo mui leh, tcuh yaˇ teˇ hpaˍ htawˇ yawˇ geh teˇ geh mui ve yoˬ. 15 Oˇ htaˇ yawˇ k'oˆ ve, Tu‸ ve hkanˍ ve hta‸ ngaˬ maˇ g'a hkanˍ sheˍ htaˇ, naw hui geh teˇ geh ngaˬ Paˍsaˍhkaˍ pawehˇ chi hta‸ caˇ gaˇ jaˇ ve yoˬ. 16 Awˬ lawn k'o, ngaˬ nawˬ hui hta‸ k'oˆ laˇ ve, G'uiˬ sha ve mvuhˇ miˬ awˬ hk'aw lo pawehˇ chi teˇ maˬ maˇ biˇ la sheˍ ve ceh ceh, pawehˇ chi hta‸ ngaˬ maˇ k'aw‸ caˇ teh‸ yawˇ hui hta‸ k'oˆ piˇ ve yoˬ. 17 Oˇ htaˇ, yawˇ kawˆ hta‸ yuˬ leh bon hta‸ chiˇ mvuh peuˬ hk'aw‸ nawˉ yawˇ k'oˆ ve, Kawˆ chi hta‸ yuˬ leh nawˬ hui pehˬ dawˬ-o‸. 18 Ngaˬ nawˬ hui hta‸ k'oˆ laˇ ve, G'uiˬ sha ve mvuhˇ miˬ maˇ gaˬ la sheˍ ve ceh ceh, ya‸ nyi hk'aw‸ nawˉ k'o, ngaˬ a pehˉ meuˇ g'uiˬ hta‸ maˇ k'aw‸ dawˬ teh‸ k'oˆ ve yoˬ. 19 Hkaoˍ monˇ hta‸ htawˇ yawˇ yuˬ leh bon hta‸ chiˇ mvuh ve yoˬ. Peuˬ leh yawˇ hkaoˍ monˇ hta‸ hk'eh‸ leh, awˬ la‸ g'awˇ hui hta‸ piˇ leh k'oˆ ve, Chi lehˬ, nawˬ hui awˬ pon tanˇ piˇ ve ngaˬ ve awˬ to yoˬ. Ngaˬ hta‸ dawˇ nawˇ tuˬ chi hk'e te-o teh‸ k'oˆ ve yoˬ. 20 Oˇ ve hk'a shuˍ shuˍ mvuhˇ haˉ awˍ caˇ peuˬ hk'aw‸ nawˉ, kawˆ hta‸ htawˇ yawˇ yuˬ leh k'oˆ ve, Kawˆ chi lehˬ, nawˬ hui awˬ pon ngeuˍ pfuhˍ ve, ngaˬ ve awˬ suhˍ awˬ hk'aw lo te taˍ ve ka ti‸ shaˉ caˆ awˬ suhˉ hpeh‸ ve yoˬ. 21 Ya‸ hk'aˇ, ngaˬ hta‸ chiˇ a‸ piˇ tuˬ ve teˇ g'aˇ lehˬ, ngaˬ geh teˇ hkehˇ tiˉ hkaˆ caˇ chehˇ ve yoˬ. 22 Chaw yaˇ ve Yaˇ hpu lehˬ, yawˇ ve awˬ lawn G'uiˬ sha dawˇ cheˆ taˍ ve hk'e yawˇ g'a k'o‸-e tuˬ yoˬ. Ya‸ hk'aˇ, yawˇ hta‸ chiˇ a‸ ve chaw teˇ g'aˇ lehˬ, g'a dawˇ haˍ jaˇ tuˬ yoˬ teh‸ k'oˆ ve yoˬ. 23 Oˇ htaˇ, awˬ la‸ g'awˇ teˇ hpaˍ lehˬ, Ngaˬ hui awˬ hk'aw lo a shu teˇ g'aˇ chi hk'e te tuˬ le teh‸, teˇ g'aˇ leh teˇ g'a na nyi da‸ ve yoˬ. 24 Chi hk'oˆ ka‸, yawˇ hui awˬ hk'aw lo hk'aˬ ve teˇ g'aˇ shu a‸ kehˉ g'a uiˍ tuˬ le teh‸, teˇ g'aˇ leh teˇ g'aˇ g'awˬ da‸ ve yoˬ. 25 Hk'e te leh Yeˍsuˆ k'oˆ ve, Buiˇ shaˆ aˉ naˆ chaw hui ve hkunˉ hawˉ hkanˇ teˇ hpaˍ lehˬ, yawˇ hui awˬ hk'oˆ hta‸ uˉ peunˍ ve yoˬ. Yawˇ hui awˬ hk'oˆ hta‸ kanˇ paˆ cawˬ ve chaw teˇ hpaˍ hta‸ bon shehˍ hpaˇ teh‸ yawˇ hui k'oˆ ve yoˬ. 26 Ya‸ hk'aˇ, nawˬ hui awˬ hk'aw lo chi hk'e maˇ g'a te. Nawˬ hui awˬ hk'aw lo shu a‸ kehˉ uiˍ ve teˇ g'aˇ lehˬ, shu a‸ kehˉ i ve teˇ g'aˇ hk'e te-o, Awˬ hoˉ teˇ g'aˇ htawˇ, awˬ ceˬ teˇ g'aˇ hk'e te-o. 27 Awˬ lawn k'o, hk'aˬ ve teˇ g'aˇ shu a‸ kehˉ uiˍ ve le. Hpui lawˇ lo mui caˇ ve chaw teˇ g'aˇ laˇ. Maˇ heˆ k'o, te caˍ te taw ve chaw teˇ g'aˇ laˇ. Hpui lawˇ lo mui caˇ ve chaw teˇ g'aˇ uiˍ ve yoˬ maˇ heˆ laˇ. Ya‸ hk'aˇ, ngaˬ lehˬ nawˬ hui awˬ hk'aw lo te caˍ te taw shehˍ hpaˇ hk'e hpeh‸ ve yoˬ. 28 Beˬ ve lawˇ ve hta‸ ngaˬ g'a hkanˍ ve teˇ yanˇ, nawˬ hui lehˬ ngaˬ geh hk'a geh hk'aˬ htaˆ ka‸ chehˇ taˍ ve chaw teˇ hpaˍ hpeh‸ ve yoˬ. 29 Ngaˬ ve Awˬ pa ngaˬ hta‸ mvuhˇ miˬ pe‸ laˇ ve hk'e, ngaˬ htawˇ nawˬ hui hta‸ mvuhˇ miˬ pe‸ laˇ ve yoˬ. 30 Hk'e te leh, ngaˬ ve mvuhˇ miˬ awˬ hk'aw lo ngaˬ ve hpui lawˇ lo nawˬ hui g'a caˇ g'a dawˬ tuˬ yoˬ. Nawˬ hui lehˬ, k'aw jaw hk'oˆ mui leh, Iˉsaˍreˍlaˆ chaw teˇ chi nyiˇ ceuˬ hta‸ suhˉ g'a jehˬ tuˬ yoˬ. 31 Siˉmonˍ-oˬ, Siˉmonˍ-oˬ, caˬ shiˍ caˬ hk'a htaˬ hkeunˉ ve hk'e, Saˍtanˍ nawˬ hui hta‸ hkeunˉ tuˬ yawˇ lawˬ g'a ve yoˬ. 32 Ya‸ hk'aˇ, nawˬ yonˍ ve teˇ ceuˬ maˇ g'a luˬ k'ai tuˬ, ngaˬ nawˬ awˬ pon bon lawˬ peuˬ. Nawˬ k'aw‸ hpfuhˆ k'aw‸ la ve teˇ yanˇ, nawˬ ve awˬ viˉ awˬ nyi teˇ hpaˍ hta‸ awˬ g'aˇ piˇ-oˆ teh‸ k'oˆ ve yoˬ. 33 Oˇ htaˇ Siˉmonˍ k'aw‸ k'oˆ ve, Jawˇ mawˇ-oˬ, htawnˍ hk'aw lo maˇ k'oˆ, suh kuiˬ lo maˇ k'oˆ, ngaˬ nawˬ geh hk'a geh k'ai tuˬ gu taˍ peuˬ teh‸, yawˇ hta‸ k'oˆ piˇ ve yoˬ. 34 Yeˍsuˆ k'aw‸ k'oˆ ve, Peˍtruˆ-oˬ, ngaˬ nawˬ hta‸ k'oˆ laˇ ve, ya‸ puiˉ g'aˆ hpfuh maˇ bvuhˬ sheˍ htaˇ, nawˬ ngaˬ hta‸ maˇ shiˍ teh‸ shehˆ pawˆ hk'a gaˬ g'awˬ hk'aˆ tuˬ yoˬ teh‸ k'oˆ ve yoˬ. 35 Peuˬ leh, yawˇ yawˇ hui hta‸ k'oˆ piˇ ve, Ngaˬ nawˬ hui hta‸ k'ai tcuh leh, hpu guˉ pi, miˉ chaw leh hkuiˉ nuˆ maˇ yuˬ k'ai tcuh laˇ ve teˇ yanˇ, nawˬ hui loˍ ve cuˆ ve teˇ ceuˬ ceuˬ cawˬ laˇ teh‸ Yeˍsuˆ na nyi htaˇ, Loˍ ve cuˆ ve teˇ ceuˬ ka‸ maˇ cawˬ teh‸, yawˇ hui k'aw‸ k'oˆ piˇ ve yoˬ. 36 Oˇ htaˇ yawˇ k'aw‸ k'oˆ ve, Ya‸ hk'aˇ chi beu‸ lehˬ, hpu guˉpi cawˬ ve chaw k'o, hpu guˉ pi yuˬ k'ai. Miˉ chaw cawˬ ve chaw k'o, miˉ chaw pfuhˇ k'ai. Aˉ htaw maˇ cawˬ ve chaw k'o, a shu yawˇ ve veu‸ k'aˇ hawˇ leh aˉ htaw ca vuiˬ yuˬ-o‸. 37 Awˬ lawn k'o, ngaˬ nawˬ hui hta‸ k'oˆ laˇ ve, Yawˇ hta‸ chaw haiˬ teˇ hpaˍ geh teˇ geh shu shawˍ keu tuˬ yoˬ teh‸ bvuh‸ taˍ ve tawˇ hkawˇ lehˬ, ngaˬ awˬ hk'aw lo g'a biˇ la ve yoˬ. Awˬ lawn k'o, ngaˬ awˬ lawn bvuh‸ taˍ ve teˇ hpaˍ g'a biˇ la ve yoˬ teh‸ k'oˆ ve yoˬ. 38 Yawˇ hui k'aw‸ k'oˆ ve, Jawˇ mawˇ-oˬ, nyi loˬ, choˬ kaˬ aˉ htaw nyiˇ taˬ cawˬ ve yoˬ teh‸ k'oˆ ve teˇ yanˇ, Hk'e k'o, law‸ peuˬ teh‸, yawˇ yawˇ hui hta‸ k'aw‸ k'oˆ piˇ ve yoˬ. 39 Oˇ ve hk'aw‸ nawˉ yawˇ tawˆ k'ai leh, yawˇ awˬ liˇ cawˬ ve hk'e Shaˍlonˍ hk'aw lo k'ai ve yoˬ. Awˬ la‸ g'awˇ teˇ hpaˍ htawˇ yawˇ awˬ hk'aˇ suh k'ai ve yoˬ. 40 Yawˇ oˇ kaˬ lo gaˬ ve teˇ yanˇ, Beˬ ve lawˇ ve awˬ hk'aˇ suh nawˬ hui maˇ g'a k'ai tuˬ bon lawˬ chehˇ-oˆ teh‸, yawˇ yawˇ hui hta‸ k'oˆ piˇ ve yoˬ. 41 Awˬ la‸ g'awˇ hui chehˇ kuiˬ te leh, haˉ pui teˇ hk'e baˬ gaˬ law‸ hk'e fui yawˇ k'ai peuˬ hk'aw‸ nawˉ, yawˇ hkui tcuhˉ teh leh k'oˆ ve, 42 A pa-oˬ, nawˬ nyi ma cawˇ ve k'o, kawˆ chi hta‸ ngaˬ g'a ponˬ k'ai tuˬ a ciˉ te laˇ-oˆ. Ya‸ hk'aˇ, ngaˬ a loˍ cawˇ ve hk'e taˇ hpeh‸ piˇ. Nawˬ a loˍ cawˇ ve hk'e hpeh‸ piˇ-oˆ teh‸ bon lawˬ ve yoˬ. 43 Oˇ htaˇ, mvuhˇ naw ma tcuh yaˇ teˇ g'aˇ mvuhˇ naw ma lo tawˆ la leh yawˇ hta‸ awˬ g'aˇ piˇ ve yoˬ. 44 Yawˇ nyi ma hk'aw tu‸ jaˇ hkanˍ jaˇ ve pa taw, yawˇ leuˉ leh g'aˇ hte‸ bon lawˬ ve yoˬ. Yawˇ kuiˍ tawˆ la ve lehˬ, awˬ suhˍ diˬ hk'e hpeh‸ leh miˬ chaˇ hk'oˆ ce ve yoˬ. 45 Yawˇ bon lawˬ peuˬ hk'aw‸ nawˉ tu leh, awˬ la‸ g'awˇ teˇ hpaˍ geh k'o‸-e ve teˇ yanˇ, yawˇ hui dawˇ haˍ jaˇ ve awˬ hk'aw lo zuh‸ muiˉ k'a chehˇ ve hta‸ yawˇ g'a mawˬ ve yoˬ. 46 Yawˇ k'oˆ ve, Aˬ hto‸ ma te nawˬ hui zuh‸ muiˉ k'a chehˇ ve le. Tu-o. Beˬ ve lawˇ ve awˬ hk'aˇ suh maˇ g'a k'ai tuˬ bon lawˬ chehˇ-oˆ teh‸, yawˇ hui hta‸ k'oˆ piˇ ve yoˬ. 47 Yawˇ chi hk'e k'oˆ chehˇ ve teˇ yanˇ, tcuh yaˇ teˇ chi nyiˇ g'aˇ awˬ hk'aw lo Yuˇda‸ meh ve teˇ g'aˇ lehˬ, chaw awˬ moˍ lonˉ hta‸ shiˍ veu laˇ leh laˬ ve yoˬ. Yeˍsuˆ hta‸ boˆ nu tuˬ, awˬ paˇ lo yawˇ jiˆ k'ai ve yoˬ. 48 Oˇ htaˇ Yeˍsuˆ k'oˆ ve, Yuˇda‸-oˬ, nawˬ boˆ nu ve hta‸ te leh chaw yaˇ ve Yaˇ hpu hta‸ chiˇ a‸ piˇ ve law leˇ teh‸ yawˇ hta‸ k'oˆ piˇ ve yoˬ. 49 Yeˍsuˆ geh hk'a geh chehˇ ve chaw teˇ hpaˍ lehˬ, hk'aˬ hk'e hpeh‸ la tuˬ ve hta‸ g'a mawˬ ve teˇ yanˇ, Jawˇ mawˇ-oˬ, ngaˬ hui aˉ htaw g'a chaw tuˬ ve laˇ teh‸ k'oˆ piˇ ve yoˬ. 50 Yawˇ hui awˬ hk'aw lo teˇ g'aˇ lehˬ, paw hkuˇ lonˉ vuiˬ taˍ ve awˬ ceˬ hta‸ chaw leh, la‸ sha paˉ ve naˍ paw cheˆ ve yoˬ. 51 Yeˍsuˆ k'oˆ ve, Pehˇ-o, taˇ k'aw‸ te loˬ teh‸ k'oˆ piˇ peuˬ hk'aw‸ nawˉ, awˬ ceˬ oˇ ve teˇ g'aˇ ve naˍ paw hta‸ htawˇ sheˬ leh gu na-e piˇ ve yoˬ. 52 Oˇ htaˇ, Yeˍsuˆ lehˬ yawˇ geh gaˬ la ve paw hkuˇ lonˉ teˇ hpaˍ, bon yehˬ lonˉ ve maˬ poˍ teˇ hpaˍ leh awˬ hoˉ chaw mawˇ teˇ hpaˍ hta‸ k'oˆ piˇ ve, Nawˬ hui lehˬ, chaw hk'awˇ hta‸ ca hpeh yuˬ ve hk'e, aˉ htaw leh suhˆ taˬ teˇ hpaˍ yuˬ veu laˇ leh laˬ ve laˇ. 53 Teˇ nyi le le bon yehˬ lonˉ awˬ hk'aw lo ngaˬ nawˬ hui geh chehˇ ve teˇ yanˇ, nawˬ hui ngaˬ hta‸ maˇ hpeh yuˬ. Ya‸ hk'aˇ, awˬ yanˇ chi ve lehˬ nawˬ hui ve awˬ yanˇ hpeh‸ leh, naˆ ho‸ ve kanˇ paˆ ve awˬ yanˇ hpeh‸ ve yoˬ teh‸ k'oˆ ve yoˬ. 54 Oˇ htaˇ, yawˇ hui yawˇ hta‸ hpeh yuˬ leh, paw hkuˇ lonˉ ve aˉ hk'aw lo sheh k'ai ve yoˬ. Peˍtruˆ lehˬ, awˬ hk'aˇ suh a ciˉ vuiˇ kuiˬ lo g'a‸ k'ai ve yoˬ. 55 Shaˉ nanˉ awˬ paˇ ko taˍ kuiˬ awˬ k'aw ji lo chaw teˇ hpaˍ aˬ miˍ tcuh leh teˇ geh mui lehˬ chehˇ ve teˇ yanˇ, Peˍtruˆ htawˇ yawˇ hui geh ca mui lehˬ ve yoˬ. 56 Yawˇ aˬ miˍ g'euˆ ba kuiˬ lo mui chehˇ ve hta‸ awˬ ceˬ ma teˇ g'aˇ g'a mawˬ htaˇ, yawˇ hta‸ hk'a deh‸ nyi leh, Chi hpaˇ htawˇ yawˇ geh chehˇ ve chaw hpeh‸ ve yoˬ teh‸ k'oˆ ve yoˬ. 57 Ya‸ hk'aˇ Peˍtruˆ g'awˬ hk'aˆ leh, Yaˇ miˇ-oˬ, yawˇ hta‸ ngaˬ maˇ shiˍ teh‸ k'oˆ ve yoˬ. 58 Oˇ ve awˬ hk'aw‸ nawˉ maˇ maw maw, awˬ kaˍ awˬ nu chaw teˇ g'aˇ yawˇ hta‸ mawˬ leh, Nawˬ htawˇ yawˇ hui awˬ hk'aw lo chehˇ ve chaw teˇ g'aˇ hpeh‸ ve yoˬ teh‸ k'oˆ piˇ ve teˇ yanˇ, Peˍtruˆ k'oˆ ve, Chi hpaˇ-oˬ, ngaˬ maˇ heˆ teh‸ k'oˆ ve yoˬ. 59 Teˇ naˍ riˍ hk'e maw peuˬ hk'aw‸ nawˉ, awˬ kaˍ awˬ nu chaw teˇ g'aˇ htawˇ, Chi hpaˇ ka‸ awˬ tehˬ awˬ na yawˇ geh hk'a geh chehˇ ve chaw yoˬ. Awˬ lawn k'o, yawˇ Gaˍliˍlehˇ chaw hpeh‸ ve yoˬ teh‸, g'aˇ hte‸ k'oˆ tcuhˉ taˍ ve yoˬ. 60 Peˍtruˆ k'oˆ ve, Chi hpaˇ-oˬ, nawˬ k'oˆ ve hta‸ ngaˬ maˇ shiˍ teh‸ k'oˆ ve yoˬ. Yawˇ chi hk'e k'oˆ chehˇ ve teˇ yanˇ, teˇ cawˬ haˉ g'aˆ hpfuh bvuhˬ la ve yoˬ. 61 Oˇ htaˇ Jawˇ mawˇ Yeˍsuˆ lehˬ, Peˍtruˆ hta‸ hpfuhˆ nyi ve yoˬ. Ya‸ puiˉ g'aˆ hpfuh maˇ bvuhˬ sheˍ htaˇ, nawˬ ngaˬ hta‸ shehˆ pawˆ hk'a gaˬ chiˇ baˬ tuˬ yoˬ teh‸, Jawˇ mawˇ Yeˍsuˆ k'oˆ piˇ taˍ ve hta‸ Peˍtruˆ dawˇ nawˇ la ve yoˬ. 62 Oˇ htaˇ, yawˇ tawˆ k'ai leh g'aˇ hte‸ hawˬ ve yoˬ. 63 Yeˍsuˆ hta‸ yuˬ taˍ ve chaw teˇ hpaˍ lehˬ, yawˇ hta‸ k'oˆ guiˇ g'uiˬ guiˇ leh dawˆ ve yoˬ. 64 Yawˇ ve mehˆ hpfuhˇ hta‸ beh taˍ peuˬ hk'aw‸ nawˉ, Nawˬ hta‸ a shu dawˆ laˇ ve le. G'uiˬ sha ve tcuh kaˍ paˍ hk'e te leh ngaˬ hui hta‸ hto laˇ-oˆ teh‸, yawˇ hta‸ k'oˆ piˇ ve yoˬ. 65 Yawˇ hui yawˇ hta‸ awˬ kaˍ awˬ nu laiˉ ceuˬ k'oˆ leh maˇ shawˍ maˇ caˆ k'oˆ ve yoˬ. 66 Mvuhˇ htiˇ la ve teˇ yanˇ, Yuˇda‸ chaw hui ve awˬ hoˉ chaw mawˇ hpeh‸ ve paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ hpawnˬ da‸ ve yoˬ. Yawˇ hui yawˇ hta‸ jehˬ shehˍ hpaˇ awˬ moˍ mehˆ g'uˇ suhˍ yuˬ k'ai leh, 67 Nawˬ Hkri‸ hpeh‸ ve k'o, ngaˬ hui hta‸ hto laˇ-oˆ teh‸ k'oˆ ve yoˬ. Yeˍsuˆ k'aw‸ k'oˆ ve, Ngaˬ hto laˇ ve htawˇ, nawˬ hui yonˍ tuˬ ve maˇ heˆ. 68 Ngaˬ nawˬ hui hta‸ teˇ ceuˬ ceuˬ na nyi ve htawˇ, nawˬ hui k'aw‸ k'oˆ laˇ tuˬ ve maˇ heˆ. 69 Ya‸ hk'aˇ, chaw yaˇ ve Yaˇ hpu lehˬ, ya‸ nyi hk'aw‸ nawˉ k'o, G'uiˬ sha ve kanˇ paˆ la‸ sha paˉ lo mui chehˇ tuˬ yoˬ teh‸, yawˇ hui hta‸ k'oˆ piˇ ve yoˬ. 70 Oˇ htaˇ yawˇ hui hk'a peu-eˬ k'oˆ ve, Hk'e te k'o, nawˬ G'uiˬ sha ve Yaˇ hpu hpeh‸ ve leh laˇ teh‸ na nyi ve yoˬ. Yoˬ, nawˬ hui k'oˆ ve hk'e yoˬ teh‸, yawˇ yawˇ hui hta‸ k'aw‸ k'oˆ piˇ ve yoˬ. 71 Oˇ htaˇ yawˇ hui k'oˆ ve, Ngaˬ hui aˬ hto‸ ma shaˉ hkiˆ k'aw‸ loˍ sheˍ ve le. Awˬ lawn k'o, yawˇ k'oˆ ve tawˇ hkawˇ hta‸ ngaˬ hui awˬ to g'a kaˇ peuˬ teh‸ k'oˆ ve yoˬ.

Luˉka‸ 23

1 Oˇ htaˇ, hpawnˬ da‸ ve chaw hk'a peu-eˬ tu la leh, Yeˍsuˆ hta‸ jawˇ mawˇ Piˉla‸ geh sheh k'ai peuˬ hk'aw‸ nawˉ, yawˇ awˬ hk'oˆ venˇ baˆ taˍ leh k'oˆ ve, 2 Chaw chi hpaˇ lehˬ, ngaˬ hui ve chaw ceuˬ hta‸ ya‸k'aw sheh ya‸ laˇ leh, jawˇ mawˇ Kehˉsaˍ hta‸ a moˇ maˇ g'a keu tuˬ tawˍ taˍ laˇ leh, yawˇ awˬ to Hkri‸ k'oˆ ve hkunˉ hawˉ hkanˇ hpeh‸ ve yoˬ teh‸ k'oˆ ve hta‸ ngaˬ hui g'a mawˬ g'a shiˍ ve yoˬ teh‸, yawˇ hui k'oˆ ve yoˬ. 3 Oˇ htaˇ jawˇ mawˇ Piˉla‸ k'oˆ ve, Nawˬ lehˬ Yuˇda‸ chaw hui ve Hkunˉ hawˉ hkanˇ yoˬ laˇ teh‸, Yeˍsuˆ hta‸ na nyi ve yoˬ. Yoˬ, nawˬ k'oˆ ve hk'e yoˬ teh‸, Yeˍsuˆ yawˇ hta‸ k'aw‸ k'oˆ piˇ ve yoˬ. 4 Hk'e te leh jawˇ mawˇ Piˉla‸ k'oˆ ve, Chaw chi hpaˇ awˬ hk'aw lo ya‸ kuiˬ jiˆ kuiˬ hta‸ ngaˬ maˇ mawˬ teh‸, paw hkuˇ lonˉ teˇ hpaˍ leh chaw awˬ moˍ lonˉ hui hta‸ k'oˆ piˇ ve yoˬ. 5 Ya‸ hk'aˇ, yawˇ hui leuˉ leh g'aˇ hte‸ k'aw‸ k'oˆ ve, Chaw chi hpaˇ lehˬ, Gaˍliˍlehˇ mvuhˇ miˬ te leh choˬ kaˬ hk'a gaˬ Yuˇda‸ mvuhˇ miˬ teˇ kaˬ le le lo maˍ piˇ leh, mvuhˇ miˬ yaˇ teˇ hpaˍ tu la tuˬ ca juˆ piˇ ve yoˬ teh‸ k'oˆ ve yoˬ. 6 Tawˇ chi hta‸ jawˇ mawˇ Piˉla‸ g'a kaˇ htaˇ, Yawˇ Gaˍliˍlehˇ chaw yoˬ laˇ teh‸ na nyi ve yoˬ. 7 Yeˍsuˆ lehˬ, jawˇ mawˇ Heˍroˆ uˉ peunˍ ve mvuhˇ miˬ awˬ hk'aw lo chehˇ ve chaw hpeh‸ ve hta‸ jawˇ mawˇ Piˉla‸ g'a shiˍ ve teˇ yanˇ, jawˇ mawˇ Heˍroˆ geh yawˇ hta‸ shiˍ k'ai tcuh ve yoˬ. Awˬ yanˇ oˇ ve awˬ hk'aw lo, jawˇ mawˇ Heˍroˆ lehˬ, Yeˍruˆsaˍlehnˍ venˇ hk'aw lo chehˇ taˍ ve yoˬ. 8 Jawˇ mawˇ Heˍroˆ lehˬ, Yeˍsuˆ hta‸ g'a mawˬ ve teˇ yanˇ ha lehˬ jaˇ ve yoˬ. Awˬ lawn k'o, yawˇ awˬ lawn g'a kaˇ jaw leh, yawˇ te maˍ ve awˬ heˆ teˇ ceuˬ ceuˬ hta‸ g'a mawˬ tuˬ yawˇ dawˇ law chehˇ ve pa taw, Yeˍsuˆ hta‸ mawˬ gaˇ ve maw jaˇ peuˬ. 9 Oˇ htaˇ, yawˇ Yeˍsuˆ hta‸ laiˉ ceuˬ na nyi ve htawˇ, Yeˍsuˆ lehˬ tawˇ teˇ hkawˇ ka‸ maˇ k'aw‸ yaw hk'aw‸ piˇ. 10 Paw hkuˇ lonˉ hui leh li‸ bvuh‸ paˍ teˇ hpaˍ oˇ kaˬ lo huˉ taˍ leh, yawˇ awˬ hk'oˆ hta‸ venˇ baˆ g'aˇ hte‸ taˍ ve yoˬ. 11 Jawˇ mawˇ Heˍroˆ lehˬ, yawˇ ve ma‸ yaˇ hui geh teˇ geh Yeˍsuˆ hta‸ maˇ shawˍ maˇ caˆ te leh, k'oˆ guiˇ g'uiˬ guiˇ ve yoˬ. Peuˬ leh, da‸ jaˇ ve veu‸ k'aˇ yawˇ hta‸ feuˉ piˇ leh, jawˇ mawˇ Piˉla‸ geh k'aw‸ shiˍ k'ai tcuh ve yoˬ. 12 Oˇ ve teˇ nyi awˬ hk'aw lo jawˇ mawˇ Heˍroˆ leh jawˇ mawˇ Piˉla‸ awˬ chawˇ hpeh‸ la ve yoˬ. Awˬ lawn k'o, ponˬ laˬ htaˇ yawˇ huiˉ maˬ canˇ da‸ taˍ ve yoˬ. 13 Oˇ htaˇ jawˇ mawˇ Piˉla‸ lehˬ, paw hkuˇ lonˉ teˇ hpaˍ, awˬ hoˉ chaw mawˇ teˇ hpaˍ leh, chaw chi ma ve hta‸ kuˬ hpawnˬ leh k'oˆ piˇ ve, 14 Chaw chi hpaˇ lehˬ, mvuhˇ miˬ yaˇ hta‸ ya‸ k'aw sheh ya‸ ve chaw hpeh‸ ve teh‸ nawˬ hui k'oˆ leh, yawˇ hta‸ ngaˬ geh sheh veu laˇ ve yoˬ. Nawˬ hui mehˆ g'uˇ suhˍ ngaˬ yawˇ hta‸ na nyi ve htawˇ, nawˬ hui yawˇ awˬ hk'oˆ hta‸ venˇ baˆ taˍ ve hk'e venˇ baˆ teˇ ceuˬ ka‸ ngaˬ maˇ mawˬ. 15 Jawˇ mawˇ Heˍroˆ htawˇ yawˇ awˬ hk'aw lo venˇ baˆ maˇ mawˬ leh, yawˇ hta‸ ngaˬ hui geh k'aw‸ hk'aw‸ peu laˇ ve yoˬ. Nyi loˬ, yawˇ lehˬ suh keunˍ ve venˇ baˆ teˇ ceuˬ ka‸ maˇ te. 16 Hk'e te leh, ngaˬ yawˇ hta‸ jaw‸ sheˬ leh hpehˇ piˇ tuˬ yoˬ teh‸, yawˇ hui hta‸ k'oˆ piˇ ve yoˬ. 18 Yawˇ hui hk'a peu-eˬ k'oˆ ve, Chaw chi hpaˇ hta‸ yuˬ baˬ-o‸. Ngaˬ hui awˬ pon Baˍraˍbaˆ hta‸ hpehˇ laˇ-oˆ teh‸ teˇ geh kuˬ ve yoˬ. 19 Baˍraˍbaˆ lehˬ, venˇ oˇ ve awˬ hk'aw lo chaw hpfuhˆ hpeh‸ leh, shu hta‸ tiˇ pehˍ ve pa taw, htawnˍ hk'aw keu taˍ ve chaw hpeh‸ ve yoˬ. 20 Jawˇ mawˇ Piˉla‸ lehˬ, Yeˍsuˆ hta‸ hpehˇ piˇ gaˇ ve pa taw, yawˇ hui hta‸ teˇ pawˆ k'aw‸ k'oˆ piˇ ve yoˬ. 21 Ya‸ hk'aˇ, yawˇ hui kuˬ leh k'oˆ ve, Yawˇ hta‸ la‸ ka hk'oˆ lo hta‸ pehˍ loˬ, hta‸ pehˍ loˬ. 22 Jawˇ mawˇ Piˉla‸ lehˬ, shehˆ pawˆ teˇ pawˆ k'aw‸ k'oˆ piˇ ve, Aˬ hto‸ ma pa taw le. Yawˇ haiˬ ve aˬ hto‸ ma teˇ ceuˬ hta‸ te ve le. Yawˇ awˬ hk'aw lo suh keunˍ ve venˇ baˆ teˇ ceuˬ hta‸ ka‸ ngaˬ maˇ mawˬ. Hk'e te leh, ngaˬ yawˇ hta‸ jaw‸ sheˬ leh hpehˇ piˇ tuˬ yoˬ teh‸, yawˇ hui hta‸ k'oˆ piˇ ve yoˬ. 23 Yawˇ hui lehˬ, awˬ hkawˇ bvuhˬ chaweh kuˬ leh, yawˇ hta‸ la‸ ka hk'oˆ lo hta‸ pehˍ tuˬ, g'aˇ hte‸ k'oˆ tcuhˉ taˍ leh, yawˇ hui ve hkawˇ g'aˇ sheˬ ve yoˬ. 24 Hk'e te leh jawˇ mawˇ Piˉla‸ lehˬ, yawˇ hui k'oˆ ve hk'e hpeh‸ la tuˬ suhˉ taˆ ve yoˬ. 25 Mvuhˇ miˬ hta‸ hpfuhˆ leh shu hta‸ tiˇ pehˍ ve pa taw, htawnˍ hk'aw lo keu taˍ ve chaw oˇ ve teˇ g'aˇ hta‸, yawˇ hui lawˬ ve hk'e hpehˇ piˇ leh, Yeˍsuˆ hta‸ yawˇ hui te gaˇ ve hk'e te hpeh‸ tuˬ yawˇ hui ve la‸ hk'aw lo chiˇ a‸ piˇ ve yoˬ. 26 Yeˍsuˆ hta‸ yawˇ hui sheh tawˆ-e ve teˇ yanˇ, heh hk'aw k'ai k'aw‸ la ve Kuˇreˍneˍ venˇ yaˇ Siˉmonˍ meh ve teˇ g'aˇ hta‸ yawˇ hui yuˬ tiˍ taˍ leh, la‸ ka hta‸ taˆ tcuh leh Yeˍsuˆ hk'aˇ suh k'ai tcuh ve yoˬ. 27 Chaw awˬ moˍ lonˉ maˇ k'oˆ, yawˇ hta‸ pa taw hawˬ leh paˆ hawˬ ve yaˇ miˇ teˇ hpaˍ htawˇ maˇ k'oˆ, yawˇ awˬ hk'aˇ suh k'ai ve yoˬ. 28 Yeˍsuˆ yawˇ hui hta‸ hpfuhˆ nyi leh k'oˆ ve, Yeˍruˆsaˍlehnˍ venˇ yaˇ miˇ teˇ hpaˍ-oˬ, ngaˬ hta‸ pa taw taˇ hawˬ. Nawˬ hui a shu yawˇ awˬ to awˬ pon leh nawˬ hui ve awˬ yaˇ awˬ duˬ teˇ hpaˍ awˬ pon hawˬ-o‸. 29 Awˬ lawn k'o, Chaw meh ma teˇ hpaˍ lehˬ, awˬ bon uiˍ ve yoˬ. Yaˇ maˇ hu jaw ve g'oˇ peˬ leh yaˇ ehˉ maˇ dawˬ jaw ve cuˉ lehˬ, awˬ bon uiˍ ve yoˬ teh‸ g'a k'oˆ tuˬ ve awˬ nyi awˬ haˉ gaˬ la tuˬ yoˬ. 30 Oˇ htaˇ yawˇ hui lehˬ, hk'aw teˇ hpaˍ hta‸ chi hk'e k'oˆ piˇ tuˬ yoˬ. Ngaˬ hui hta‸ paˆ teˍ laˇ-oˆ. Hk'aw pui ehˉ teˇ hpaˍ hta‸ htawˇ, Ngaˬ hui hta‸ hoˆ tiˍ taˍ laˇ-oˆ teh‸ k'oˆ piˇ tuˬ yoˬ. 31 Yawˇ hui lehˬ, suhˆ awˬ tcuhˇ hta‸ chi hk'e te ve k'o, suhˆ awˬ vi hta‸ hk'aˬ hk'e taw te tuˬ ve le teh‸ k'oˆ ve yoˬ. 32 Oˇ htaˇ yawˇ geh teˇ geh tiˇ pehˍ tuˬ, chaw haiˬ nyiˇ g'aˇ hta‸ htawˇ yawˇ hui sheh tawˆ-e ve yoˬ. 33 Oˉkoˆ meh ve chehˇ kuiˬ lo gaˬ la htaˇ, yawˇ hui lehˬ yawˇ hta‸ la‸ ka hk'oˆ lo hta‸ keu taˍ ve yoˬ. Chaw haiˬ oˇ ve nyiˇ g'aˇ hta‸ ka‸, yawˇ ve la‸ sha paˉ teˇ g'aˇ, la‸ mehˍ paˉ teˇ g'aˇ la‸ ka hk'oˆ lo hta‸ keu taˍ ve yoˬ. 34 Oˇ htaˇ Yeˍsuˆ k'oˆ ve, A pa-oˬ, yawˇ hui ve venˇ baˆ hta‸ hpehˇ hk'a-o. Awˬ lawn k'o, yawˇ hui hk'aˬ hk'e te ve hta‸ yawˇ hui maˇ shiˍ teh‸ k'oˆ ve yoˬ. Oˇ ve awˬ hk'aw‸ nawˉ yawˇ hui kuˇ da‸ leh, yawˇ ve veu‸ k'aˇ teˇ hpaˍ hta‸ pehˬ yuˬ ve yoˬ. 35 Chaw chi ma ve huˉ leh nyi chehˇ ve yoˬ. Jawˇ mawˇ teˇ hpaˍ lehˬ, yawˇ hta‸ k'oˆ guiˇ g'uiˬ guiˇ leh k'oˆ ve, Shu hta‸ yawˇ htaiˍ hk'aw‸ g'a ve yoˬ. Yawˇ lehˬ Hkri‸ teh‸ k'oˆ ve G'uiˬ sha leuˆ yuˬ taˍ ve teˇ g'aˇ hpeh‸ ve k'o, yawˇ awˬ to hta‸ yawˇ htaiˍ hk'aw‸ piˇ lawˬ-o‸ teh‸ k'oˆ ve yoˬ. 36 Ma‸ yaˇ teˇ hpaˍ htawˇ yawˇ awˬ paˇ lo laˬ leh, ci ve awˬ g'uiˬ yawˇ hta‸ taw piˇ leh k'oˆ ve, 37 Nawˬ lehˬ, Yuˇda‸ chaw hui ve hkunˉ hawˉ hkanˇ hpeh‸ ve k'o, nawˬ awˬ to hta‸ nawˬ htaiˍ hk'aw‸-o‸ teh‸, yawˇ hta‸ k'oˆ guiˇ g'uiˬ guiˇ ve yoˬ. 38 Yawˇ awˬ hk'oˆ lo htawˇ, Chaw chi lehˬ, Yuˇda‸ chaw hui ve hkunˉ hawˉ hkanˇ yoˬ teh‸, li‸ bvuh‸ nehˉ taˍ ve yoˬ. 39 Oˇ htaˇ, la‸ ka hk'oˆ lo hta‸ keu taˍ ve chaw haiˬ teˇ g'aˇ k'oˆ ve, Nawˬ lehˬ Hkri‸ maˇ heˆ laˇ. Nawˬ awˬ to hta‸ ka‸, ngaˬ huiˉ maˬ hta‸ ka‸ htaiˍ hk'aw‸ laˇ-oˆ teh‸, Yeˍsuˆ hta‸ maˇ shawˍ maˇ caˆ te leh k'oˆ piˇ ve yoˬ. 40 Awˬ nu ve teˇ g'aˇ k'aw‸ k'oˆ ve, Yawˇ hk'a shuˍ shuˍ suhˉ taˆ ve hta‸ nawˬ htawˇ hkanˍ chehˇ ve awˬ hk'aw lo, G'uiˬ sha hta‸ nawˬ maˇ kawˆ laˇ. 41 Ngaˬ huiˉ maˬ chi hk'e g'a hkanˍ ve lehˬ cawˇ ve yoˬ. Awˬ lawn k'o, ngaˬ huiˉ maˬ te ya‸ ve pa taw, hkanˍ keunˍ hkanˍ cawˇ ve hk'e g'a hkanˍ ve yoˬ. Ya‸ hk'aˇ, chaw chi teˇ g'aˇ lehˬ, te‸ chiˉ ka‸ maˇ te ya‸ teh‸ k'oˆ leh yawˇ ve awˬ chawˇ hta‸ deˇ piˇ ve yoˬ. 42 Peuˬ leh yawˇ k'oˆ ve, Yeˍsuˆ-oˬ, nawˬ hkunˉ hawˉ hkanˇ te laˬ ve teˇ yanˇ, ngaˬ hta‸ dawˇ nawˇ laˇ-oˆ teh‸ k'oˆ piˇ ve yoˬ. 43 Yeˍsuˆ k'oˆ ve, Ngaˬ nawˬ hta‸ awˬ tehˬ awˬ na k'oˆ laˇ ve, ya‸ nyi nawˬ ngaˬ geh teˇ geh Paˍraˍdiˇsuˆ awˬ hk'aw lo g'a chehˇ tuˬ yoˬ teh‸ yawˇ hta‸ k'oˆ piˇ ve yoˬ. 44 Awˬ yanˇ oˇ ve lehˬ, aˬ laˬ hk'e mvuhˇ law‸ k'aw tcuhˆ teˇ yanˇ hpeh‸ ve yoˬ. Mvuhˇ hpeu‸ hpawˇ shehˆ naˍ riˍ hk'a gaˬ, miˬ guiˬ hk'a peu-eˬ naˆ ho‸ hpeh‸ sheˬ leh, mvuhˇ nyi awˬ g'euˆ mehˉ k'ai ve yoˬ. 45 Bon yehˬ lonˉ awˬ hk'aw lo cawˬ ve hpaˬ kaˍ lonˉ lehˬ, nyiˇ hkoˇ tzuh‸ sheˬ ve yoˬ. 46 Oˇ htaˇ Yeˍsuˆ awˬ hkawˇ bvuhˬ chaweh kuˬ leh, A pa-oˬ, ngaˬ ve co ha nawˬ ve la‸ hk'aw lo ngaˬ chiˇ a‸ laˇ ve yoˬ teh‸ k'oˆ ve yoˬ. Yawˇ chi hk'e k'oˆ peuˬ hk'aw‸ nawˉ shaˉ cheˆ ve yoˬ. 47 Chi hk'e hpeh‸ la ve hta‸ ma‸ poˍ teˇ g'aˇ g'a mawˬ htaˇ, Chaw chi lehˬ, awˬ tehˬ awˬ na hteˇ ve cawˇ ve chaw teˇ g'aˇ hpeh‸ ve yoˬ teh‸ k'oˆ leh, G'uiˬ sha hta‸ chiˇ uiˍ chiˇ mvuh piˇ ve yoˬ. 48 Oˇ ve hta‸ hpawnˬ nyi chehˇ ve chaw hk'a peu-eˬ lehˬ, chi hk'e hpeh‸ la ve hta‸ g'a mawˬ htaˇ, yawˇ hui dawˇ haˍ jaˇ ve awˬ hk'aw lo a shu yawˇ ve nyi ma pui hta‸ hta leh k'o‸-e ve yoˬ. 49 Yawˇ hta‸ hk'a shiˍ ve chaw hk'a peu-eˬ maˇ k'oˆ, Gaˍliˍlehˇ mvuhˇ miˬ lo te leh yawˇ awˬ hk'aˇ suh k'ai ve yaˇ miˇ teˇ hpaˍ htawˇ maˇ k'oˆ, a ciˉ vuiˇ kuiˬ lo huˉ taˍ leh chi teˇ hpaˍ hta‸ nyi chehˇ ve yoˬ. 50 Oˇ htaˇ, Yuˇda‸ mvuhˇ miˬ awˬ hk'aw lo cawˬ ve Aˍriˆma‸htehˍ venˇ lo laˬ ve Yoˇseh‸ meh ve chaw teˇ g'aˇ cawˬ ve yoˬ. Yawˇ lehˬ, da‸ ve chaw leh hteˇ ve cawˇ ve chaw hpeh‸ leh, G'uiˬ sha ve mvuhˇ miˬ hta‸ dawˇ law chehˇ ve chaw teˆ g'aˇ hpeh‸ ve yoˬ. 51 Yawˇ lehˬ jehˬ da‸ shehˍ hpaˇ awˬ moˍ awˬ hk'aw lo chehˇ ve htawˇ, yawˇ hui jehˬ cheˆ leh te ve hta‸ yawˇ nyi ma maˇ cawˇ ve yoˬ. 52 Yawˇ jawˇ mawˇ Piˉla‸ geh k'ai leh, Yeˍsuˆ ve awˬ to hta‸ lawˬ yuˬ ve yoˬ. 53 Yeˍsuˆ ve awˬ to hta‸ yawˇ yuˬ ya‸ leh, hpa hpu yuˬ htiˆ sheˬ leh, teˇ g'aˇ ka‸ maˇ tuˍ jaw sheˍ ve, haˉ pui htawˆ taˍ ve tuˍ hpfuh awˬ hk'aw lo keu taˍ ve yoˬ. 54 Awˬ nyi oˇ ve lehˬ, pawehˇ awˬ pon gu ve awˬ nyi hpeh‸ leh, shinˉ nyi gaˬ la paˇ neˇ ve yoˬ. 55 Gaˍliˍlehˇ mvuhˇ miˬ lo te leh Yeˍsuˆ geh hk'a geh laˬ ve yaˇ miˇ teˇ hpaˍ htawˇ awˬ hk'aˇ suh k'ai leh, tuˍ hpfuh hta‸ maˇ k'oˆ, yawˇ ve awˬ to hta‸ hk'aˬ hk'e te teh taˍ ve hta‸ maˇ k'oˆ, yawˇ hui g'a mawˬ ve yoˬ. 56 Oˇ htaˇ yawˇ hui k'o‸-e leh, sha hawnˉ teˇ hpaˍ leh naˍ manˇ hawnˉ teˇ hpaˍ hta‸ gu taˍ ve yoˬ. Awˬ liˇ tawˇ hkawˇ cawˬ taˍ ve hk'e, shinˉ nyi teˇ nyi awˬ hk'aw lo yawˇ hui g'aˇ jehˇ ve yoˬ.

Luˉka‸ 24

1 Teˇ shinˉ awˬ hk'aw lo awˉ lawˉ teˇ nyi mvuhˇ htiˇ la htaˇ, yaˇ miˇ teˇ hpaˍ lehˬ, yawˇ hui gu taˍ ve sha hawnˉ teˇ hpaˍ hta‸ yuˬ leh tuˍ hpfuh lo k'ai ve yoˬ. 2 Yawˇ hui oˇ kaˬ lo gaˬ ve teˇ yanˇ, tuˍ hpfuh hta‸ hoˆ taˍ ve haˉ pui shiˍ hpfuhˆ baˬ taˍ ve hta‸ g'a mawˬ ve yoˬ. 3 Yawˇ hui lo‸-e ve teˇ yanˇ, Jawˇ mawˇ Yeˍsuˆ ve awˬ to hta‸ maˇ mawˬ 4 Awˬ lawn chi hta‸ yawˇ hui dawˇ maˇ tawˆ chehˇ ve teˇ yanˇ, awˬ g'euˆ ba ve veu‸ k'aˇ hta‸ veu‸ deh taˍ ve chaw nyiˇ g'aˇ tawˆ la leh yawˇ hui awˬ paˇ lo huˉ taˍ ve yoˬ. 5 Yaˇ miˇ oˇ ve teˇ hpaˍ kawˆ jaˇ leh miˬ chaˇ hk'oˆ boˆ taˍ ve teˇ yanˇ, chaw oˇ ve nyiˇ g'aˇ k'oˆ ve, Nawˬ hui lehˬ, aˬ hto‸ ma pa taw te‸ chehˇ ve chaw hta‸ suh ve chaw chehˇ kuiˬ lo ca la ve le. 6 Yawˇ choˬ kaˬ maˇ chehˇ. K'aw‸ te‸ tu la peuˬ. Gaˍliˍlehˇ mvuhˇ miˬ awˬ hk'aw lo chehˇ htaˇ yawˇ nawˬ hui hta‸ k'oˆ laˇ ve tawˇ hkawˇ hta‸ dawˇ nawˇ-oˆ. 7 Yawˇ k'oˆ ve, Chaw yaˇ ve Yaˇ hpu lehˬ, venˇ baˆ yaˇ hui ve la‸ hk'aw lo chiˇ a‸ piˇ ve hta‸ g'a hkanˍ leh, la‸ ka hk'oˆ lo hta‸ pehˍ peuˬ hk'aw‸ nawˉ, shehˆ nyi gaˬ k'o, k'aw‸ te‸ tu la tuˬ yoˬ teh‸, nawˬ hui hta‸ k'oˆ laˇ ve yoˬ teh‸, yawˇ hui hta‸ k'oˆ piˇ ve yoˬ. 8 Oˇ htaˇ, Yeˍsuˆ k'oˆ taˍ ve tawˇ hkawˇ hta‸ yawˇ hui k'aw‸ dawˇ nawˇ la ve yoˬ. 9 Yawˇ hui lehˬ, tuˍ hpfuh lo k'aw‸ la peuˬ hk'aw‸ nawˉ, tcuh yaˇ teˇ chi teˇ g'aˇ leh awˬ kaˍ awˬ nu awˬ la‸ g'awˇ hk'a peu-eˬ hta‸ awˬ lawn oˇ ve hk'a peu-eˬ ca hto piˇ ve yoˬ. 10 Awˬ lawn oˇ ve teˇ hpaˍ tcuh yaˇ hui hta‸ ca hto piˇ ve yaˇ miˇ teˇ hpaˍ lehˬ, Maˍriˆ Maˍgaˍdaˍlaˆ, Yoˇhaˍnaˆ, Yaˍkoˆ ve awˬ e Maˍriˆ leh, awˬ kaˍ awˬ nu ve yaˇ miˇ teˇ hpaˍ yoˬ. 11 Yaˇ miˇ teˇ hpaˍ k'oˆ ve tawˇ hkawˇ lehˬ, tcuhˉ kuiˬ maˇ cawˬ ve tawˇ hkawˇ hpeh‸ ve yoˬ teh‸, tcuh yaˇ teˇ hpaˍ dawˇ leh, yawˇ hui hta‸ maˇ yonˍ. 13 Chi hk'oˆ ka‸, oˇ ve teˇ nyi awˬ hk'aw lo awˬ la‸ g'awˇ nyiˇ g'aˇ lehˬ, Yeˍruˆsaˍlehnˍ venˇ hta‸ suhˍ laˆ vuiˇ da‸ ve Eˇmaw‸ hk'aˆ lo k'ai chehˇ ve teˇ yanˇ, 14 hk'a hpeh‸ la ve awˬ lawn hk'a peu-eˬ yawˇ huiˉ maˬ k'aoˍ da‸ chehˇ ve yoˬ. 15 Yawˇ huiˉ maˬ chi hk'e k'aoˍ da‸ jehˬ da‸ chehˇ ve teˇ yanˇ, Yeˍsuˆ awˬ to awˬ paˇ lo laˬ leh, yawˇ huiˉ maˬ geh teˇ geh k'ai ve yoˬ. 16 Ya‸ hk'aˇ, yawˇ hta‸ maˇ g'a shiˍ tuˬ, yawˇ huiˉ maˬ ve mehˆ shiˍ hta‸ koˍ taˍ ve hk'e hpeh‸ piˇ lawˬ ve yoˬ. 17 Oˇ htaˇ Yeˍsuˆ k'oˆ ve, Nawˬ huiˉ maˬ ya‸ k'aw k'ai chehˇ htaˇ, aˬ hto‸ ma awˬ lawn na‸ uˉ te da‸ ve le teh‸ na nyi ve teˇ yanˇ, yawˇ huiˉ maˬ lehˬ mehˆ hpfuhˇ nawˍ lehˍ te leh huˉ taˍ ve yoˬ. 18 Oˇ htaˇ, yawˇ huiˉ maˬ awˬ hk'aw lo Kaˍlawˇhpaˆ meh ve chaw teˇ g'aˇ k'oˆ ve, Yeˍruˆsaˍlehnˍ venˇ awˬ hk'aw lo hkehˉ chaw hpeh‸ leh, chi nyiˇ nyi venˇ oˇ ve awˬ hk'aw lo hpeh‸ la ve awˬ lawn teˇ hpaˍ hta‸ maˇ shiˍ ve chaw nawˬ teˇ g'aˇ tiˉ yoˬ laˇ teh‸, yawˇ hta‸ k'aw‸ k'oˆ piˇ ve yoˬ. 19 Yeˍsuˆ k'aw‸ k'oˆ ve, Aˬ hto‸ ma teˇ hpaˍ awˬ lawn le teh‸ na nyi ve teˇ yanˇ, yawˇ huiˉ maˬ k'aw‸ k'oˆ ve, Naˍzaˍrehˆ chaw Yeˍsuˆ ve awˬ lawn yoˬ. Chaw oˇ ve lehˬ, G'uiˬ sha mehˆ g'uˇ suhˍ leh chaw hk'a peu-eˬ mehˆ g'aˇ suhˍ, yawˇ k'oˆ ve te ve awˬ hk'aw lo kanˇ paˆ uiˍ ve G'uiˬ sha ve tcuh kaˍ paˍ teˇ g'aˇ hpeh‸ ve yoˬ. 20 Paw hkuˇ lonˉ teˇ hpaˍ leh ngaˬ hui ve jawˇ mawˇ teˇ hpaˍ lehˬ, yawˇ g'a suh tuˬ awˬ pon suhˉ taˆ tuˬ chiˇ a‸ piˇ leh, la‸ ka hk'oˆ lo hta‸ pehˍ ve yoˬ. 21 Yawˇ lehˬ, Iˉsaˍreˍlaˆ chaw ceuˬ hta‸ htaiˍ hk'aw‸ shehˍ hpaˇ hpeh‸ ve yoˬ teh‸, ngaˬ hui dawˇ law jaw ve yoˬ. Chi hk'oˆ ka‸, awˬ lawn chi teˇ hpaˍ hpeh‸ la ve lehˬ, ya‸ nyi shehˆ nyi gaˬ peuˬ. 22 Ngaˬ hui ve awˬ moˍ awˬ hk'aw lo yaˇ miˇ teˇ hpaˍ hpaˍ htawˇ anˇ jaˇ ve awˬ lawn teˇ hpaˍ ngaˬ hui hta‸ hto laˇ ve yoˬ. Ya‸ shawˉ teˇ na‸ yawˇ hui tuˍ hpfuh lo k'ai leh, yawˇ ve awˬ to hta‸ maˇ mawˬ. 23 Oˇ htaˇ, yawˇ hui k'aw‸ la leh k'oˆ ve, Awˬ ha awˬ hk'aw lo mvuhˇ naw ma tcuh yaˇ teˇ hpaˍ hta‸ ngaˬ hui g'a mawˬ leh, Yawˇ te‸ chehˇ ve yoˬ teh‸ k'oˆ laˇ ve yoˬ teh‸ yaˇ miˇ teˇ hpaˍ k'oˆ ve yoˬ. 24 Ngaˬ hui ve chaw teˇ hpaˍ hpaˍ lehˬ, tuˍ hpfuh lo k'ai leh, yaˇ miˇ teˇ hpaˍ k'oˆ ve hk'e g'a mawˬ ve yoˬ. Ya‸ hk'aˇ, yawˇ hui yawˇ hta‸ maˇ mawˬ teh‸, yawˇ hta‸ k'oˆ piˇ ve yoˬ. 25 Oˇ htaˇ Yeˍsuˆ k'oˆ ve, G'uiˬ sha ve tcuh kaˍ paˍ hui k'oˆ taˍ ve tawˇ hkawˇ hk'a peu-eˬ hta‸ yonˍ tuˬ, nyi ma hk'aw maˇ dawˇ pawnˍ puiˉ leh cuˇ yiˍ maˇ cawˬ ve chaw hui-oˬ, 26 Hkri‸ lehˬ chi hk'e g'a tu‸ g'a hkanˍ leh, yawˇ ve awˬ me‸ awˬ hponˇ awˬ hk'aw lo g'a lo‸-e ve maˇ heˆ laˇ teh‸, yawˇ huiˉ maˬ hta‸ k'oˆ piˇ ve yoˬ. 27 Oˇ htaˇ, Moˉseˍ leh G'uiˬ sha ve tcuh kaˍ paˍ hk'a peu-eˬ hta‸ tanˬ leh, Li‸ hpu hk'a peu-eˬ awˬ hk'aw lo yawˇ ve awˬ lawn hk'a bvuh‸ taˍ ve teˇ hpaˍ yawˇ yawˇ huiˉ maˬ hta‸ tcuhˉ kuiˬ hpeu‸ maˍ piˇ ve yoˬ. 28 Yawˇ huiˉ maˬ k'ai chehˇ ve hk'aˆ lo gaˬ paˇ neˇ ve teˇ yanˇ Yeˍsuˆ lehˬ, awˬ g'uˇ suhˍ k'ai-a teh‸ te ve yoˬ. 29 Oˇ htaˇ yawˇ huiˉ maˬ k'oˆ ve, Ngaˬ huiˉ maˬ geh haˉ taˉ sheˍ. Mvuhˇ nyi k'ehˬ peuˬ. Mvuhˇ ka‸ hpeu‸ la yoˬ teh‸ k'oˆ leh, yawˇ hta‸ g'aˇ hte‸ lawˬ ve yoˬ. Hk'e te leh, yawˇ huiˉ maˬ geh ca haˉ tuˬ yawˇ lo‸-e ve yoˬ. 30 Yawˇ yawˇ huiˉ maˬ geh hpui lawˇ paˇ lo mui ve teˇ yanˇ, yawˇ hkaoˍ monˇ hta‸ yuˬ leh bon hta‸ chiˇ mvuh peuˬ hk'aw‸ nawˉ, hkaoˍ monˇ hk'eh‸ leh yawˇ huiˉ maˬ hta‸ piˇ ve yoˬ. 31 Oˇ htaˇ, yawˇ huiˉ maˬ mehˆ hpaw la leh, Yeˍsuˆ yoˬ teh‸ g'a shiˍ ve yoˬ. Yeˍsuˆ lehˬ, yawˇ huiˉ maˬ mehˆ g'uˇ suhˍ mehˉ sheˬ ve yoˬ. 32 Yawˇ huiˉ maˬ k'oˆ ve, Ya‸ k'aw k'aˉ lo yawˇ ngaˬ huiˉ maˬ hta‸ tawˇ yaw laˇ leh Li‸ hpu tcuhˉ kuiˬ hpeu‸ maˍ laˇ ve teˇ yanˇ, ngaˬ huiˉ maˬ ve nyi ma hk'aw lo geh jaˇ ve maˇ heˆ laˇ teh‸, teˇ g'aˇ leh teˇ g'aˇ k'oˆ da‸ ve yoˬ. 33 Awˬ yanˇ oˇ ve awˬ hk'aw lo yawˇ huiˉ maˬ teˇ cawˬ haˉ tu leh Yeˍruˆsaˍlehnˍ venˇ lo k'aw‸ k'ai ve yoˬ. Oˇ kaˬ lo gaˬ ve teˇ yanˇ, tcuh yaˇ teˇ chi teˇ g'aˇ leh yawˇ hui geh chehˇ ve chaw teˇ hpaˍ hpawnˬ da‸ chehˇ ve hta‸ g'a mawˬ ve yoˬ. 34 Chaw oˇ ve teˇ hpaˍ yawˇ huiˉ maˬ hta‸ k'oˆ piˇ ve, Jawˇ mawˇ Yeˍsuˆ awˬ tehˬ awˬ na k'aw‸ te‸ tu la peuˬ. Siˉmonˍ hta‸ yawˇ ve awˬ to maw piˇ peuˬ teh‸ k'oˆ ve yoˬ. 35 Oˇ htaˇ yawˇ huiˉ maˬ htawˇ, ya‸ k'aw k'aˉ lo hpeh‸ la ve awˬ lawn teˇ hpaˍ maˇ k'oˆ, hkaoˍ monˇ hk'eh‸ ve teˇ yanˇ yawˇ yoˬ teh‸ shiˍ la ve awˬ lawn maˇ k'oˆ, yawˇ hui hta‸ k'aoˍ maˍ piˇ ve yoˬ. 36 Yawˇ hui chi hk'e k'oˆ da‸ chehˇ ve teˇ yanˇ, Yeˍsuˆ awˬ to yawˇ hui awˬ k'aw ji lo huˉ taˍ leh, Nawˬ hui geh dawˇ sha tuˬ cawˬ piˇ-oˆ teh‸, yawˇ hui hta‸ k'oˆ piˇ ve yoˬ. 37 Ya‸ hk'aˇ yawˇ hui lehˬ, chaw ha ku hta‸ mawˬ ve law teh‸ dawˇ leh, kawˆ jaˇ leh cheˇ lehˍ k'ai ve yoˬ. 38 Yawˇ hui hta‸ k'oˆ piˇ ve, Aˬ hto‸ ma pa taw nawˬ hui nyi ma sho‸ sha‸ ve le. Aˬ hto‸ ma pa taw nawˬ hui ve nyi ma hk'aw lo htawˇ dawˇ nawˬ dawˇ te chehˇ ve le. 39 Awˬ tehˬ awˬ na ngaˬ yoˬ. Ngaˬ ve la‸ sheh hkui sheh hta‸ nyi-o. Ngaˬ hta‸ shoˆ nyi htawˇ nyi-o. Ngaˬ lehˬ, nawˬ hui mawˬ taˍ ve hk'e, awˬ shaˍ leh awˬ mu‸ ku cawˬ ve yoˬ. Chaw ha ku lehˬ, oˇ hk'e cawˬ tuˬ maˇ heˆ teh‸ k'oˆ leh, 40 yawˇ ve la‸ sheh hkui sheh yawˇ hui hta‸ maw piˇ ve yoˬ. 41 Yawˇ hui anˇ leh ha lehˬ jaˇ ve pa taw, hk'a deh‸ maˇ yonˍ sheˍ ve teˇ yanˇ, Nawˬ hui geh caˇ tuˬ teˇ ceuˬ ceuˬ cawˬ laˇ teh‸, yawˇ yawˇ hui hta‸ na nyi ve yoˬ. 42 Ngaˇ pinˍ taˍ ve teˇ tawn yawˇ hui yawˇ hta‸ piˇ ve teˇ yanˇ, 43 Yawˇ yuˬ leh yawˇ hui mehˆ g'uˇ suhˍ caˇ ve yoˬ. 44 Oˇ htaˇ yawˇ k'aw‸ k'oˆ ve, Moˉseˍ ve awˬ liˇ tawˇ hkawˇ li‸ awˬ hk'aw lo maˇ k'oˆ, G'uiˬ sha ve tcuh kaˍ paˍ hui ve li‸ teˇ hpaˍ awˬ hk'aw lo maˇ k'oˆ, chiˇ mvuh ve li‸ teˇ hpaˍ awˬ hk'aw lo htawˇ maˇ k'oˆ, ngaˬ awˬ lawn hk'a bvuh‸ taˍ ve hk'a peu-eˬ g'a biˇ la tuˬ yoˬ teh‸, ngaˬ nawˬ hui geh teˇ geh chehˇ ve teˇ yanˇ, ngaˬ nawˬ hui hta‸ chi hk'e k'oˆ piˇ taˍ ve yoˬ. 45 Oˇ htaˇ, Li‸ hpu ve tcuhˉ kuiˬ hta‸ shiˍ tuˬ, yawˇ yawˇ hui ve nyi ma hta‸ dawˇ pawnˍ piˇ ve yoˬ. 46 Yawˇ k'oˆ ve, Li‸ hpu hk'aw chi hk'e bvuh‸ taˍ ve, Hkri‸ lehˬ g'a hkanˍ suh leh shehˆ nyi gaˬ k'o g'a k'aw‸ te‸ tu la tuˬ yoˬ. 47 Venˇ baˆ dawˇ hpfuhˆ leh venˇ baˆ hpehˇ hk'a tuˬ awˬ lawn, Yeˍruˆsaˍlehnˍ venˇ hta‸ tanˬ leh chaw ceuˬ hk'a peu-eˬ hta‸ yawˇ ve awˬ meh awˬ hawˉ lo g'a maˍ piˇ tuˬ yoˬ teh‸ bvuh‸ taˍ ve yoˬ. 48 Nawˬ hui lehˬ, chi teˇ hpaˍ awˬ lawn shaˉ hkiˆ hkanˍ shehˍ hpaˇ hpeh‸ ve yoˬ. 49 Ngaˬ Awˬ pa piˇ tuˬ yoˬ teh‸ k'oˆ taˍ ve awˬ ceuˬ nawˬ hui geh lo ngaˬ peu laˇ tuˬ yoˬ. Hk'e te leh, mvuhˇ naw ma lo ve kanˇ paˆ hta‸ nawˬ hui maˇ g'a sheˍ ve ceh ceh, venˇ chi awˬ hk'aw lo chehˇ taˍ sheˍ teh‸ yawˇ hui hta‸ k'oˆ piˇ ve yoˬ. 50 Oˇ htaˇ, yawˇ yawˇ hui hta‸ Beˍtaˍniˆ hk'aˆ awˬ paˇ lo hk'a gaˬ shiˍ k'ai peuˬ hk'aw‸ nawˉ, yawˇ la‸ sheh chiˇ leh, yawˇ hui hta‸ bon na‸ piˇ ve yoˬ. 51 Chi hk'e bon na‸ piˇ chehˇ ve teˇ yanˇ, yawˇ yawˇ hui hta‸ hpaˆ da‸ leh mvuhˇ naw ma hk'oˆ lo taˆ k'o‸-e ve yoˬ. 52 Yawˇ hui yawˇ hta‸ oˉ k'oˍ pui taˉ leh, ha lehˬ jaˇ ve awˬ hk'aw lo Yeˍruˆsaˍlehnˍ venˇ lo k'aw‸ k'o‸-e ve yoˬ. 53 Yawˇ hui lehˬ, hk'aˬ htaˆ ka‸ bon yehˬ lonˉ awˬ hk'aw lo chehˇ leh G'uiˬ sha hta‸ chiˇ mvuh chehˇ ve yoˬ.

Yoˇhanˬ 1

1 Awˬ hkuiˉ puiˍ htaˇ ka‸ Tawˇ hkawˇ cawˬ taˍ ve yoˬ. Tawˇ hkawˇ oˇ ve G'uiˬ sha geh chehˇ leh Tawˇ hkawˇ oˇ ve lehˬ, G'uiˬ sha hpeh‸ ve yoˬ. 2 Tawˇ hkawˇ oˇ ve lehˬ, awˬ hkuiˉ puiˍ htaˇ ka‸ G'uiˬ sha geh teˇ geh chehˇ taˍ ve yoˬ. 3 Hk'a peu-eˬ ve hta‸ yawˇ te taˍ ve yoˬ. Hk'a cawˬ taˍ ve hk'a peu-eˬ awˬ hk'aw lo yawˇ maˇ te ve teˇ ceuˬ ka‸ maˇ cawˬ. 4 Yawˇ awˬ hk'aw lo co ha te‸ ve awˬ ceuˬ cawˬ ve yoˬ. Co ha te‸ ve oˇ ve lehˬ, chaw yaˇ ve Awˬ g'euˆ yoˬ. 5 Awˬ g'euˆ oˇ ve lehˬ, naˆ ho‸ ve awˬ hk'aw lo ba la leh, naˆ ho‸ ve lehˬ Awˬ g'euˆ hta‸ maˇ g'aˇ. 6 G'uiˬ sha peu laˇ ve Yoˇhanˬ meh ve chaw teˇ g'aˇ cawˬ ve yoˬ. Yawˇ lehˬ shaˉ hkiˆ hkanˍ tuˬ awˬ pon laˬ ve yoˬ. 7 Yawˇ hta‸ pa taw chaw hk'a peu-eˬ yonˍ la tuˬ, Awˬ g'euˆ oˇ ve awˬ lawn yawˇ shaˉ hkiˆ hkanˍ la ve yoˬ. 8 Yawˇ lehˬ Awˬ g'euˆ hpeh‸ ve maˇ heˆ. Ya‸ hk'aˇ, Awˬ g'euˆ awˬ lawn shaˉ hkiˆ hkanˍ tuˬ yawˇ laˬ ve yoˬ. 9 Awˬ g'euˆ awˬ tehˬ ma lehˬ miˬ guiˬ hk'oˆ lo laˬ leh chaw hk'a peu-eˬ hta‸ awˬ g'euˆ ba piˇ ve yoˬ. 10 Yawˇ lehˬ miˬ guiˬ hta‸ te hpanˍ taˍ leh, miˬ guiˬ hk'oˆ lo chehˇ taˍ htawˇ, miˬ guiˬ yaˇ yawˇ hta‸ maˇ shiˍ. 11 Yawˇ ve chehˇ kuiˬ lo yawˇ laˬ htawˇ, yawˇ ve chaw yawˇ hta‸ maˇ ha‸ yuˬ. 12 Ya‸ hk'aˇ, yawˇ hta‸ hk'a ha‸ yuˬ leh yawˇ ve awˬ meh hta‸ hk'a yonˍ ve chaw hk'a peu-eˬ hta‸ G'uiˬ sha ve awˬ yaˇ hpeh‸ la tuˬ yawˇ a hkaw-anˬ piˇ ve yoˬ. 13 Yawˇ hui G'uiˬ sha ve awˬ yaˇ hpeh‸ la ve lehˬ, awˬ ceuˬ awˬ hk'aˇ hta‸ pa taw maˇ heˆ. Awˬ suhˍ awˬ shaˍ a loˍ hta‸ pa taw maˇ heˆ. Chaw yaˇ ve a loˍ hta‸ pa taw htawˇ maˇ heˆ. G'uiˬ sha hta‸ pa taw yoˬ. 14 Tawˇ hkawˇ oˇ ve lehˬ, awˬ suhˍ awˬ shaˍ pfuhˇ leh ngaˬ hui geh chehˇ la ve yoˬ. Yawˇ ve awˬ me‸ awˬ hponˇ hta‸ ngaˬ hui g'a mawˬ ve yoˬ. Awˬ me‸ awˬ hponˇ oˇ ve lehˬ, Awˬ pa lo laˬ ve Yaˇ hpu tiˍ ve awˬ me‸ awˬ hponˇ hk'a shuˍ shuˍ hpeh‸ ve yoˬ. Yawˇ awˬ hk'aw lo awˬ bon awˬ shinˉ leh hteˇ ve cawˇ ve awˬ ceuˬ hk'a biˇ cawˬ ve yoˬ. 15 (Yoˇhanˬ lehˬ yawˇ awˬ lawn shaˉ hkiˆ hkanˍ ve awˬ hk'aw lo kuˬ leh k'oˆ ve, Ngaˬ awˬ hk'aw‸ nawˉ laˬ tuˬ ve chaw teˇ g'aˇ lehˬ, ngaˬ a‸ kehˉ uiˍ ve yoˬ. Awˬ lawn k'o, ngaˬ maˇ cawˬ sheˍ awˬ g'uˇ suhˍ htaˇ ka‸ yawˇ cawˬ chehˇ taˍ ve yoˬ teh‸ ngaˬ k'oˆ taˍ ve lehˬ, chaw chi teˇ g'aˇ yoˬ teh‸ k'oˆ ve yoˬ.) 16 Ngaˬ hui hk'a peu-eˬ lehˬ, yawˇ biˇ ve teˇ ceuˬ awˬ hk'aw lo, awˬ bon teˇ ceuˬ peuˬ teˇ ceuˬ g'a taˍ ve yoˬ. 17 Awˬ lawn k'o, awˬ liˇ tawˇ hkawˇ lehˬ, Moˉseˍ ve la‸ hk'aw lo pe‸ laˇ taˍ ve yoˬ. Awˬ bon awˬ shinˉ leh hteˇ ve cawˇ ve teˇ ceuˬ lehˬ, Yeˍsuˆ Hkri‸ awˬ hk'aw lo hpeh‸ la ve yoˬ. 18 Chaw teˇ g'aˇ ka‸ G'uiˬ sha hta‸ maˇ mawˬ jaw. Awˬ pa ve nyi ma pui lo chehˇ ve Yaˇ hpu tiˍ lehˬ, Awˬ pa awˬ lawn hk'a tawˍ lehˆ hpeu‸ maˍ laˇ peuˬ. 19 Yuˇda‸ chaw teˇ hpaˍ lehˬ, paw hkuˇ teˇ hpaˍ leh Leˍviˆ chaw teˇ hpaˍ hta‸ Yeˍruˆsaˍlehnˍ venˇ lo tu leh Yoˇhanˬ geh k'ai tcuh ve yoˬ. Yawˇ hui lehˬ, Nawˬ a shu le teh‸ na nyi htaˇ, Yoˇhanˬ chi hk'e shaˉ hkiˆ hkanˍ ve yoˬ. 20 Ngaˬ lehˬ Hkri‸ maˇ heˆ teh‸, hteˇ lehˍ hto piˇ ve yoˬ. Yawˇ maˇ heˍ maˇ faˉ. 21 Oˇ htaˇ yawˇ hui lehˬ, Hk'e te k'o, nawˬ Eˇliˇya‸ leh laˇ teh‸ na nyi ve teˇ yanˇ, Ngaˬ Eˇliˇya‸ maˇ heˆ teh‸ yawˇ k'aw‸ k'oˆ piˇ ve yoˬ. G'uiˬ sha ve tcuh kaˍ paˍ oˇ ve teˇ g'aˇ leh laˇ teh‸ k'aw‸ na nyi ve teˇ yanˇ, Maˇ heˆ teh‸ yawˇ k'aw‸ k'oˆ piˇ ve yoˬ. 22 Hk'e te leh yawˇ hui k'aw‸ k'oˆ ve, Nawˬ a shu le. Ngaˬ hui hta‸ peu laˇ ve chaw teˇ hpaˍ hta‸ ngaˬ hui k'aw‸ hto piˇ hpeh‸ tuˬ, nawˬ awˬ to awˬ lawn nawˬ hk'aˬ hk'e k'oˆ ve le teh‸ na nyi ve yoˬ. 23 Yoˇhanˬ k'aw‸ k'oˆ ve, G'uiˬ sha ve tcuh kaˍ paˍ Iˉsaˍyaˆ k'oˆ taˍ ve hk'e, Jawˇ mawˇ G'uiˬ sha ve ya‸ k'aw hta‸ hteˇ lehˍ te-o teh‸, heh puiˉ hk'aw lo kuˬ chehˇ ve teˇ g'aˇ lehˬ ngaˬ yoˬ teh‸ k'oˆ piˇ ve yoˬ. 24 Chaw oˇ ve teˇ hpaˍ lehˬ, Hpaˍriˍsehˇ hui k'ai tcuh ve chaw teˇ hpaˍ hpeh‸ ve yoˬ. 25 Yawˇ hui k'aw‸ k'oˆ ve, Nawˬ lehˬ Hkri‸ maˇ heˆ, Eˇliˇya‸ ka‸ maˇ heˆ. G'uiˬ sha ve tcuh kaˍ paˍ oˇ ve teˇ g'aˇ ka‸ maˇ heˆ ve k'o, aˬ hto‸ ma te nawˬ shu hta‸ baˆtiˆsaˬ piˇ ve le teh‸ na nyi ve yoˬ. 26 Yoˇhanˬ k'aw‸ k'oˆ ve, Ngaˬ lehˬ shu hta‸ iˉ kaˆ awˬ hk'aw lo baˆtiˆsaˬ piˇ ve yoˬ. Nawˬ hui maˇ shiˍ ve chaw teˇ g'aˇ nawˬ hui awˬ hk'aw lo chehˇ taˍ ve yoˬ. 27 Yawˇ lehˬ, ngaˬ awˬ hk'aw‸ nawˉ laˬ ve chaw teˇ g'aˇ hpeh‸ ve yoˬ. Yawˇ ve hkuiˉ nuˆ caˆ hta‸ hpui tuˬ ve ceh ka‸ ngaˬ maˇ keunˍ teh‸ yawˇ hui hta‸ k'oˆ piˇ ve yoˬ. 28 Yawˇ hui Yoˇhanˬ hta‸ chi hk'e na nyi kuiˬ lehˬ, Yawˇdanˍ g'uiˬ ma coˇ paˉ lo cawˬ ve Beˍtaˍniˆ hk'aˆ hk'aw, Yoˇhanˬ baˆtiˆsaˬ piˇ chehˇ ve teˇ kaˬ yoˬ. 29 Awˬ hk'aw‸ nawˉ teˇ nyi, Yoˇhanˬ lehˬ Yeˍsuˆ yawˇ geh lo laˬ chehˇ ve hta‸ g'a mawˬ ve teˇ yanˇ yawˇ k'oˆ ve, Miˬ guiˬ yaˇ ve venˇ baˆ hta‸ yuˬ baˬ shehˍ hpaˇ, G'uiˬ sha ve Yawˬ ehˉ hta‸ nyi-o. 30 Ngaˬ awˬ hk'aw‸ nawˉ laˬ tuˬ ve chaw teˇ g'aˇ lehˬ, ngaˬ a‸ kehˉ uiˍ ve yoˬ. Awˬ lawn k'o, ngaˬ maˇ cawˬ sheˍ awˬ g'uˇ suhˍ htaˇ ka‸ yawˇ cawˬ chehˇ taˍ ve yoˬ teh‸ ngaˬ k'oˆ taˍ ve lehˬ, chaw chi teˇ g'aˇ hta‸ k'oˆ ve yoˬ. 31 Awˉ lawˉ htaˇ ngaˬ yawˇ hta‸ maˇ shiˍ. Ya‸ hk'aˇ, Iˉsaˍreˍlaˆ chaw hui yawˇ hta‸ hk'a tawˍ lehˆ g'a mawˬ g'a shiˍ tuˬ, ngaˬ laˬ leh shu hta‸ iˉ kaˆ awˬ hk'aw lo baˆtiˆsaˬ piˇ ve yoˬ. 32 Chi hk'oˆ ka‸, Yoˇhanˬ shaˉ hkiˆ hkanˍ leh k'oˆ ve, Awˬ ha hpu lehˬ, aˉ pui k'aˍ hk'e mvuhˇ naw ma lo ya‸ la leh yawˇ awˬ hk'oˆ lo chehˇ taˍ ve hta‸ ngaˬ g'a mawˬ ve yoˬ. 33 Awˉ lawˉ htaˇ ngaˬ yawˇ hta‸ maˇ shi. Ya‸ hk'aˇ, iˉ kaˆ awˬ hk'aw lo shu hta‸ baˆtiˆsaˬ piˇ tuˬ ngaˬ hta‸ tcuh laˇ shehˍ hpaˇ teˇ g'aˇ ngaˬ hta‸ k'oˆ laˇ ve, Yawˇ awˬ hk'oˆ Awˬ ha hpu ya‸ la leh chehˇ taˍ ve teˇ g'aˇ hta‸ nawˬ g'a mawˬ ve k'o, yawˇ lehˬ da‸ ve kehˬ ve Awˬ ha hpu awˬ hk'aw lo shu hta‸ baˆtiˆsaˬ piˇ shehˍ hpaˇ hpeh‸ ve yoˬ teh‸ k'oˆ laˇ ve yoˬ. 34 Ngaˬ g'a mawˬ peuˬ leh, chaw chi teˇ g'aˇ lehˬ G'uiˬ sha ve Yaˇ hpu hpeh‸ ve yoˬ teh‸ ngaˬ shaˉ hkiˆ hkanˍ ve yoˬ teh‸ Yoˇhanˬ k'oˆ ve yoˬ. 35 Awˬ hk'aw‸ nawˉ teˇ nyi Yoˇhanˬ lehˬ, yawˇ ve awˬ la‸ g'awˇ nyiˇ g'aˇ geh k'aw‸ huˉ chehˇ htaˇ, 36 Yeˍsuˆ laˬ chehˇ ve hta‸ yawˇ nyi leh, G'uiˬ sha ve Yawˬ ehˉ hta‸ nyi-o teh‸ k'oˆ piˇ ve yoˬ. 37 Awˬ la‸ g'awˇ oˇ ve nyiˇ g'aˇ lehˬ, yawˇ k'oˆ ve tawˇ hkawˇ hta‸ g'a kaˇ leh, Yeˍsuˆ awˬ hk'aˇ suh k'ai ve yoˬ. 38 Yeˍsuˆ hpfuhˆ nyi leh, yawˇ huiˉ maˬ yawˇ awˬ hk'aˇ suh laˬ chehˇ ve hta‸ g'a mawˬ ve teˇ yanˇ, Nawˬ huiˉ maˬ aˬ hto‸ ma ca ve le teh‸ na nyi ve yoˬ. Yawˇ huiˉ maˬ k'aw‸ k'oˆ ve, Raˍbiˆ-oˬ, nawˬ hk'aˬ lo chehˇ ve le teh‸ yawˇ hta‸ na nyi ve yoˬ. (Raˍbiˆ teh‸ k'oˆ ve lehˬ, saˍ la‸ teh‸ k'oˆ ve yoˬ.) 39 Yeˍsuˆ yawˇ huiˉ maˬ hta‸ k'oˆ piˇ ve, Ca nyi la-o. Hk'e te leh, yawˇ huiˉ maˬ k'ai leh, yawˇ ve chehˇ kuiˬ hta‸ g'a mawˬ ve yoˬ. Oˇ htaˇ, mvuhˇ hpeu‸ hpawˇ awˇ naˍ riˍ hk'e gaˬ peuˬ ve pa taw, oˇ ve teˇ nyi yawˇ huiˉ maˬ yawˇ geh chehˇ taˍ ve yoˬ. 40 Yoˇhanˬ k'oˆ ve tawˇ hkawˇ hta‸ g'a kaˇ leh Yeˍsuˆ awˬ hk'aˇ suh k'ai ve chaw oˇ ve nyiˇ g'aˇ awˬ hk'aw lo, teˇ g'aˇ lehˬ Siˉmonˍ Peˍtruˆ ve awˬ nyi paˍ Anˍdrehˍ yoˬ. 41 Yawˇ lehˬ, awˉ lawˉ htaˇ yawˇ ve awˬ viˉ paˍ Siˉmonˍ hta‸ ca ve yoˬ. Yawˇ hta‸ g'a mawˬ htaˇ, Ngaˬ huiˉ maˬ Meˍsiˉya‸ hta‸ g'a mawˬ peuˬ teh‸ k'oˆ piˇ ve yoˬ. (Meˍsiˉya‸ teh‸ k'oˆ ve lehˬ, Hkri‸ teh‸ k'oˆ ve yoˬ.) 42 Oˇ htaˇ yawˇ lehˬ, yawˇ awˬ viˉ paˍ hta‸ Yeˍsuˆ geh shiˍ k'ai ve yoˬ. Yeˍsuˆ Siˉmonˍ hta‸ nyi leh, Nawˬ lehˬ Yoˇhanˬ ve yaˇ paˍ Siˉmonˍ yoˬ. Nawˬ hta‸ Keˍhpaˆ g'a meh tuˬ yoˬ teh‸ k'oˆ piˇ ve yoˬ. (Keˍhpaˆ teh‸ k'oˆ ve lehˬ, haˉ pui teh‸ k'oˆ ve yoˬ.) 43 Awˬ hk'aw‸ nawˉ teˇ nyi, Yeˍsuˆ Gaˍliˍlehˇ mvuhˇ miˬ lo k'ai tuˬ dawˇ cheˆ taˍ ve yoˬ. Yawˇ lehˬ Hpiˇliˇpuˆ hta‸ hpuˇ da‸ htaˇ, Ngaˬ hk'aˇ suh laˬ-o‸ teh‸, yawˇ hta‸ k'oˆ piˇ ve yoˬ. 44 Hpiˇliˇpuˆ lehˬ, Anˍdrehˍ leh Peˍtruˆ ve chehˇ kuiˬ Behˇsehˇdaˆ venˇ yaˇ hpeh‸ ve yoˬ. 45 Hpiˇliˇpuˆ lehˬ, Naˍtaˍneˍlaˆ hta‸ hpuˇ da‸ htaˇ yawˇ k'oˆ ve, Moˉseˍ bvuh‸ taˍ ve awˬ liˇ tawˇ hkawˇ li‸ awˬ hk'aw lo maˇ k'oˆ, G'uiˬ sha ve tcuh kaˍ paˍ teˇ hpaˍ bvuh‸ taˍ ve li‸ awˬ hk'aw lo maˇ k'oˆ, chaw teˇ g'aˇ awˬ lawn yawˇ hui bvuh‸ taˍ ve hk'e, chaw oˇ ve hta‸ ngaˬ hui g'a mawˬ peuˬ. Yawˇ lehˬ Yoˇseh‸ ve yaˇ, Naˍzaˍrehˆ chaw Yeˍsuˆ yoˬ teh‸, yawˇ hta‸ k'oˆ piˇ ve yoˬ. 46 Naˍtaˍneˍlaˆ k'aw‸ k'oˆ ve, Naˍzaˍrehˆ venˇ hk'aw lo da‸ ve awˬ ceuˬ teˇ ceuˬ ceuˬ tawˆ la hpeh‸ tuˬ laˇ teh‸ na nyi htaˇ, Ca nyi la-o teh‸, Hpiˇliˇpuˆ yawˇ hta‸ k'aw‸ k'oˆ piˇ ve yoˬ. 47 Naˍtaˍneˍlaˆ yawˇ geh laˬ chehˇ ve hta‸ Yeˍsuˆ g'a mawˬ ve teˇ yanˇ, yawˇ ve awˬ lawn yawˇ chi hk'e k'oˆ ve, Yawˇ awˬ hk'aw lo heˍ ve a ciˉ ka‸ maˇ cawˬ ve, Iˉsaˍreˍlaˆ chaw awˬ teh‸ awˬ na ve teˇ g'aˇ hta‸ nyi-o teh‸ k'oˆ ve yoˬ. 48 Naˍtaˍneˍlaˆ lehˬ, Nawˬ ngaˬ hta‸ hk'aˬ hk'e te shiˍ le teh‸ na nyi ve teˇ yanˇ, Yeˍsuˆ k'aw‸ k'oˆ ve, Hpiˇliˇpuˆ nawˬ hta‸ maˇ kuˬ sheˍ htaˇ, maˉ nawˆ cehˬ awˬ hawˉ lo nawˬ chehˇ taˍ ve hta‸ ngaˬ mawˬ ve yoˬ teh‸, yawˇ hta‸ k'oˆ piˇ ve yoˬ. 49 Naˍtaˍneˍlaˆ k'aw‸ k'oˆ ve, Raˍbiˆ-oˬ, nawˬ lehˬ G'uiˬ sha ve Yaˇ hpu hpeh‸ ve yoˬ. Iˉsaˍreˍlaˆ chaw hui ve Hkunˉ hawˉ hkanˇ htawˇ nawˬ hpeh‸ ve yoˬ teh‸, yawˇ hta‸ k'oˆ piˇ ve yoˬ. 50 Yeˍsuˆ k'aw‸ k'oˆ ve, Ngaˬ nawˬ hta‸ maˉ nawˆ cehˬ awˬ hawˉ lo mawˬ ve yoˬ teh‸ k'oˆ laˇ ve pa taw nawˬ yonˍ ve laˇ. Chi a‸ kehˉ uiˍ ve awˬ ceuˬ teˇ hpaˍ hta‸ ka‸ nawˬ g'a mawˬ tuˬ sheˍ teh‸, yawˇ hta‸ k'oˆ piˇ ve yoˬ. 51 Yeˍsuˆ teˇ pawˆ k'aw‸ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, mvuhˇ naw ma hpaw taˍ leh, G'uiˬ sha ve mvuhˇ naw ma tcuh yaˇ teˇ hpaˍ chaw yaˇ ve Yaˇ hpu awˬ hk'oˆ hta‸ taˆ taˆ ya‸ ya‸ te chehˇ ve hta‸ nawˬ hui g'a mawˬ tuˬ yoˬ teh‸, yawˇ hta‸ k'oˆ piˇ ve yoˬ.

Yoˇhanˬ 2

1 Oˇ ve awˬ hk'aw‸ nawˉ, shehˆ nyi teˇ nyi gaˬ htaˇ, Gaˍliˍlehˇ mvuhˇ miˬ Kaˍnaˆ hk'aˆ awˬ hk'aw lo shu hkehˉ caˇ chehˇ leh, Yeˍsuˆ ve awˬ e oˇ kaˬ lo chehˇ taˍ ve yoˬ. 2 Yeˍsuˆ leh yawˇ ve awˬ la‸ g'awˇ teˇ hpaˍ hta‸ htawˇ, hkehˉ caˇ kuiˬ lo laˬ tuˬ shu kuˬ ve yoˬ. 3 A pehˉ meuˇ g'uiˬ peuˬ ve teˇ yanˇ, Yeˍsuˆ ve awˬ e lehˬ, Yawˇ hui a pehˉ meuˇ g'uiˬ maˇ cawˬ-oˬ teh‸ yawˇ hta‸ k'oˆ piˇ ve yoˬ. 4 Yeˍsuˆ k'aw‸ k'oˆ ve, Yaˇ miˇ-oˬ, nawˬ ngaˬ hta‸ hk'aˬ hk'e caˉ da‸ le. Ngaˬ ve awˬ yanˇ maˇ gaˬ sheˍ teh‸ yawˇ hta‸ k'oˆ piˇ ve yoˬ. 5 Yeˍsuˆ ve awˬ e lehˬ, awˬ ceˬ teˇ hpaˍ hta‸ k'oˆ piˇ ve, Yawˇ nawˬ hui hta‸ tcuh laˇ ve hk'e te-o teh‸ k'oˆ ve yoˬ. 6 Yuˇda‸ chaw hui ve awˬ liˇ cawˬ ve hk'e, da‸ piˇ kehˬ piˇ tuˬ ve awˬ pon yehˇ tuˬ, oˇ kaˬ lo haˉ pui iˉ mvuhˇ k'oˍ hkaw‸ shiˍ cawˬ taˍ ve yoˬ. Iˉ mvuhˇ k'oˍ teˇ shiˍ ve hta‸, iˉ kaˆ nyiˇ taˆ shehˆ taˆ hk'e keu daw ve yoˬ. 7 Yeˍsuˆ lehˬ, Iˉ mvuhˇ k'oˍ chi teˇ hpaˍ hta‸ iˉ kaˆ hk'a biˇ hk'o keu-o teh‸, awˬ ceˬ teˇ hpaˍ hta‸ k'oˆ piˇ ve yoˬ. Hk'e te leh, yawˇ hui iˉ kaˆ hk'a biˇ keu ve yoˬ. 8 Oˇ htaˇ Yeˍsuˆ yawˇ hui hta‸ k'oˆ piˇ ve, Chi beu‸ nyiˉ veu leh, hkehˉ caˇ ve awˬ hoˉ hta‸ ca yuˬ piˇ-oˆ teh‸ k'oˆ ve teˇ yanˇ, yawˇ hui ca yuˬ piˇ ve yoˬ. 9 Hkehˉ caˇ ve awˬ hoˉ lehˬ, iˉ kaˆ a pehˉ meuˇ g'uiˬ hpeh‸ la peuˬ ve hta‸ a ciˉ dawˬ nyi ve yoˬ. A pehˉ meuˇ g'uiˬ chi hk'aˬ lo g'a ve leh naˍ yawˇ maˇ shiˍ. (Ya‸ hk'aˇ, iˉ kaˆ hk'o keu ve awˬ ceˬ teˇ hpaˍ lehˬ shiˍ taˍ ve yoˬ.) Oˇ htaˇ hkehˉ caˇ ve awˬ hoˉ lehˬ, awˬ miˇ ma heuˆ shehˍ hpaˇ hta‸ kuˬ yuˬ leh k'oˆ piˇ ve, 10 Chaw teˇ g'aˇ le le lehˬ, da‸ ve a pehˉ meuˇ g'uiˬ hta‸ awˉ lawˉ taw piˇ leh, shu hk'a bvuhˆ dawˬ peuˬ htaˇ heh‸, maˇ da‸ ve a pehˉ meuˇ g'uiˬ taw piˇ ve awˬ liˇ cawˬ ve yoˬ. Ya‸ hk'aˇ nawˬ lehˬ, da‸ ve a pehˉ meuˇ g'uiˬ hta‸ chi beu‸ hk'a gaˬ ha‸ shaˉ taˍ ve law teh‸ k'oˆ ve yoˬ. 11 Yeˍsuˆ lehˬ, awˉ lawˉ peuˇ ve awˬ heˆ chi teˇ maˬ hta‸ Gaˍliˍlehˇ mvuhˇ miˬ Kaˍnaˆ hk'aˆ hk'aw te maˍ piˇ leh, yawˇ ve awˬ me‸ awˬ hponˇ tawˆ la piˇ lawˬ ve yoˬ. Yawˇ ve awˬ la‸ g'awˇ teˇ hpaˍ yawˇ hta‸ yonˍ ve yoˬ. 12 Oˇ ve awˬ hk'aw‸ nawˉ yawˇ lehˬ, yawˇ ve awˬ e, yawˇ ve awˬ nyi paˍ teˇ hpaˍ leh yawˇ ve awˬ la‸ g'awˇ hui geh Kaˍpeˍneˍonˍ venˇ lo ya‸-e ve yoˬ. Yawˇ hui oˇ kaˬ lo hk'a‸ maw maw maˇ chehˇ. 13 Yuˇda‸ chaw hui ve Paˍsaˍhkaˍ pawehˇ te ve awˬ yanˇ gaˬ la paˇ neˇ htaˇ, Yeˍsuˆ lehˬ Yeˍruˆsaˍlehnˍ venˇ lo taˆ-e ve yoˬ. 14 Oˇ htaˇ bon yehˬ lonˉ awˬ hkaw lo, yawˬ, nuˇ, aˉ pui k'aˍ teˇ hpaˍ hawˇ chehˇ ve chaw teˇ hpaˍ hta‸ maˇ k'oˆ, hpu pa shehˍ hpaˇ teˇ hpaˍ oˇ kaˬ lo mui chehˇ ve hta‸ maˇ k'oˆ, yawˇ g'a mawˬ ve yoˬ. 15 Yawˇ lehˬ, aˉ caˆ hkeh hta‸ yuˬ leh jaw‸ tuˬ te peuˬ hk'aw‸ nawˉ, yawˇ hui hk'a peu-eˬ hta‸ maˇ k'oˆ, yawˬ leh nuˇ teˇ hpaˍ hta‸ maˇ k'oˆ, bon yehˬ lonˉ awˬ hk'aw lo g'a‸ tawˆ ve yoˬ. Hpu pa shehˍ hpaˇ teˇ hpaˍ ve hpu hta‸ ngeuˍ baˬ leh, yawˇ hui ve hpui lawˇ teˇ hpaˍ hta‸ hpfuhˆ baˬ ve yoˬ. 16 Aˉ pui k'aˍ hawˇ ve chaw teˇ hpaˍ hta‸ htawˇ, Mawˇ chi teˇ hpaˍ hta‸ yuˬ k'ai-o. Ngaˬ Awˬ pa ve yehˬ hta‸ mawˇ hawˇ mawˇ vuiˬ kuiˬ yehˬ taˇ te teh‸, yawˇ hui hta‸ k'oˆ piˇ ve yoˬ. 17 Nawˬ ve yehˬ awˬ pon ngaˬ nyi ma pfuhˇ jaˇ ve teˇ ceuˬ lehˬ, ngaˬ awˬ hk'aw hk'a biˇ biˇ cawˬ ve yoˬ teh‸ Li‸ hpu hk'aw bvuh‸ taˍ ve hta‸ yawˇ ve awˬ la‸ g'awˇ teˇ hpaˍ dawˇ nawˇ ve yoˬ. 18 Oˇ htaˇ Yuˇda‸ chaw teˇ hpaˍ k'oˆ ve, Nawˬ chi hk'e te ve lehˬ, aˬ hto‸ ma awˬ heˆ teˇ ceuˬ ngaˬ hui hta‸ te maˍ laˇ tuˬ le teh‸, yawˇ hta‸ k'oˆ piˇ ve yoˬ. 19 Yeˍsuˆ k'aw‸ k'oˆ ve, Bon yehˬ lonˉ chi hta‸ te luˬ-o‸. Shehˆ nyi awˬ hk'aw lo ngaˬ k'aw‸ te peuˬ tuˬ yoˬ teh‸, yawˇ hui hta‸ k'oˆ piˇ ve yoˬ. 20 Oˇ htaˇ Yuˇda‸ chaw hui k'oˆ ve, Bon yehˬ lonˉ chi hta‸ awˇ chi hkaw‸ hk'aw‸ g'a te ve yoˬ. Nawˬ lehˬ shehˆ nyi awˬ hk'aw lo ceh tiˉ k'aw‸ te peuˬ tuˬ laˇ teh‸ k'oˆ piˇ ve yoˬ. 21 Ya‸ hk'aˇ Yeˍsuˆ oˇ hk'e k'oˆ ve lehˬ, bon yehˬ lonˉ hpeh‸ ve yawˇ ve awˬ to hta‸ k'oˆ gaˇ ve yoˬ. 22 Hk'e te leh, suh kuiˬ lo yawˇ k'aw‸ te‸ tu la ve teˇ yanˇ, yawˇ ve awˬ la‸ g'awˇ teˇ hpaˍ lehˬ yawˇ k'oˆ taˍ ve tawˇ hkawˇ hta‸ dawˇ nawˇ leh, Li‸ hpu hta‸ maˇ k'oˆ, Yeˍsuˆ k'oˆ taˍ ve tawˇ hkawˇ hta‸ maˇ k'oˆ, yawˇ hui yonˍ ve yoˬ. 23 Paˍsaˍhkaˍ pawehˇ te chehˇ ve awˬ yanˇ awˬ hk'aw lo, yawˇ Yeˍruˆsaˍlehnˍ venˇ hk'aw chehˇ taˍ ve teˇ yanˇ, yawˇ te maˍ ve awˬ heˆ teˇ hpaˍ hta‸ shu g'a mawˬ ve pa taw, chaw maˇ maˇ yawˇ hta‸ yonˍ ve yoˬ. 24 Ya‸ hk'aˇ Yeˍsuˆ lehˬ chaw oˇ ve teˇ hpaˍ hta‸ yawˇ ve awˬ to maˇ a‸ piˇ. Awˬ lawn k'o, chaw hk'a peu-eˬ hta‸ yawˇ shiˍ taˍ ve yoˬ. 25 Chaw yaˇ ve nyi ma awˬ hk'aw lo hk'aˬ hk'e cawˬ ve hta‸ yawˇ shiˍ taˍ ve pa taw, chaw yaˇ ve awˬ lawn chaw teˇ g'aˇ ka‸ shaˉ hkiˆ hkanˍ tuˬ ve hta‸ yawˇ maˇ loˍ.

Yoˇhanˬ 3

1 Oˇ htaˇ, Yuˇda‸ chaw hui awˬ hk'aw lo jawˇ mawˇ te ve, Niˆkawˇdeˍ meh ve Hpaˍriˍsehˇ teˇ g'aˇ cawˬ ve yoˬ. 2 Yawˇ lehˬ, mvuhˇ hpeu‸ haˉ htaˇ Yeˍsuˆ geh laˬ leh k'oˆ ve, Raˍbiˆ-oˬ, nawˬ lehˬ G'uiˬ sha lo laˬ ve saˍ la‸ teˇ g'aˇ hpeh‸ ve hta‸ ngaˬ hui shiˍ ve yoˬ. Awˬ lawn k'o, nawˬ te maˍ ve awˬ heˆ teˇ hpaˍ lehˬ, G'uiˬ sha yawˇ awˬ hk'aw lo chehˇ ve chaw maˇ heˆ k'o, chaw teˇ g'aˇ ka‸ te maˇ g'a teh‸, yawˇ hta‸ k'oˆ piˇ ve yoˬ. 3 Yeˍsuˆ k'aw‸ k'oˆ ve, Ngaˬ nawˬ hta‸ awˬ tehˬ awˬ na k'oˆ laˇ ve, chaw teˇ g'aˇ lehˬ awˬ suhˉ teˇ pawˆ maˇ k'aw‸ paw la ve k'o, G'uiˬ sha ve mvuhˇ miˬ hta‸ maˇ g'a mawˬ teh‸, yawˇ hta‸ k'oˆ piˇ ve yoˬ. 4 Niˆkawˇdeˍ k'aw‸ k'oˆ ve, Mawˇ peuˬ ve chaw teˇ g'aˇ lehˬ, hk'aˬ hk'e te k'aw‸ paw la hpeh‸ tuˬ le. Yawˇ ve awˬ e g'oˇ peˬ hk'aw yawˇ k'aw‸ lo‸-e leh teˇ pawˆ k'aw‸ paw la hpeh‸ tuˬ laˇ teh‸ yawˇ hta‸ na nyi htaˇ, 5 Yeˍsuˆ k'aw‸ k'oˆ ve, Ngaˬ nawˬ hta‸ awˬ tehˬ awˬ na k'oˆ laˇ ve, chaw teˇ g'aˇ lehˬ, iˉ kaˆ leh Awˬ ha hpu awˬ hk'aw lo maˇ paw la ve k'o, G'uiˬ sha ve mvuhˇ miˬ awˬ hk'aw lo maˇ g'a lo‸-e. 6 Awˬ suhˍ awˬ shaˍ lo paw la ve teˇ ceuˬ lehˬ, awˬ suhˍ awˬ shaˍ hpeh‸ ve yoˬ. Awˬ ha hpu lo paw la ve teˇ ceuˬ lehˬ, awˬ ha hpeh‸ ve yoˬ. 7 Nawˬ hui awˬ suhˉ teˇ pawˆ g'a k'aw‸ paw la ve yoˬ teh‸ ngaˬ nawˬ hta‸ k'oˆ laˇ ve hta‸ taˇ anˇ. 8 Mvuhˇ haw lehˬ, hk'aˬ lo meuˆ k'ai gaˇ ve ka‸ meuˆ k'ai leh, awˬ hkawˇ oˇ ve hta‸ nawˬ g'a kaˇ ve yoˬ. Ya‸ hk'aˇ, hk'aˬ lo meuˆ laˬ leh naˍ, hk'aˬ lo meuˆ k'ai tuˬ leh naˍ, nawˬ maˇ shiˍ. Awˬ ha hpu awˬ hk'aw lo paw la ve chaw teˇ g'aˇ le le lehˬ, oˇ ve hk'a shuˍ shuˍ hpeh‸ ve yoˬ teh‸ yawˇ hta‸ k'oˆ piˇ ve yoˬ. 9 Niˆkawˇdeˍ k'aw‸ k'oˆ ve, Chi teˇ hpaˍ hk'aˬ hk'e te hpeh‸ g'a tuˬ le teh‸ yawˇ hta‸ na nyi htaˇ, 10 Yeˍsuˆ k'aw‸ k'oˆ ve, Nawˬ lehˬ Iˉsaˍreˍlaˆ chaw hui awˬ hk'aw lo saˍ la‸ teˇ g'aˇ hpeh‸ ve ka‸, awˬ lawn chi teˇ hpaˍ hta‸ nawˬ maˇ shiˍ laˇ. 11 Ngaˬ nawˬ hta‸ awˬ tehˬ awˬ na k'oˆ laˇ ve, ngaˬ hui shiˍ ve awˬ ceuˬ awˬ lawn hta‸ ngaˬ hui k'oˆ leh, ngaˬ hui mawˬ ve awˬ ceuˬ awˬ lawn hta‸ ngaˬ hui shaˉ hkiˆ hkanˍ ve yoˬ. Ya‸ hk'aˇ, ngaˬ hui shaˉ hkiˆ hkanˍ ve hta‸ nawˬ hui maˇ ha‸ yuˬ. 12 Miˬ guiˬ hta‸ caˉ da‸ ve awˬ ceuˬ teˇ hpaˍ awˬ lawn ngaˬ k'oˆ ve ka‸ nawˬ hui maˇ yonˍ ve k'o, mvuhˇ naw ma hta‸ caˉ da‸ ve awˬ ceuˬ awˬ lawn ngaˬ nawˬ hui hta‸ k'oˆ laˇ ve htawˇ, nawˬ hui hk'aˬ hk'e te yonˍ tuˬ le. 13 Mvuhˇ naw ma lo ya‸ la ve chaw yaˇ ve Yaˇ hpu maˇ heˆ k'o, chaw teˇ g'aˇ ka‸ mvuhˇ naw ma hk'oˆ lo maˇ taˆ-e jaw. 14 Heh puiˉ hk'aw lo Moˉseˍ vuiˬ hta‸ chiˇ taˆ-e ve hk'e, chaw yaˇ ve Yaˇ hpu htawˇ chiˇ taˆ-e ve hta‸ g'a hkanˍ tuˬ yoˬ. 15 Yawˇ hta‸ hk'a yonˍ ve chaw hk'a peu-eˬ co ti‸ ha ti‸ g'a tuˬ, yawˇ chiˇ taˆ-e ve hta‸ g'a hkanˍ tuˬ yoˬ. 16 Awˬ lawn k'o, G'uiˬ sha miˬ guiˬ yaˇ hta‸ ha‸ jaˇ ve pa taw, yawˇ ve Yaˇ hpu tiˍ piˇ laˇ ve yoˬ. Hk'e te leh, Yaˇ hpu hta‸ hk'a yonˍ ve chaw hk'a peu-eˬ maˇ g'a luˬ maˇ g'a sheˆ ve awˬ hk'oˆ ka‸, co ti‸ ha ti‸ hta‸ g'a ve yoˬ. 17 Awˬ lawn k'o, miˬ guiˬ yaˇ hta‸ suhˉ jehˬ tuˬ, G'uiˬ sha yawˇ ve Yaˇ hpu hta‸ miˬ guiˬ hk'oˆ lo peu laˇ ve maˇ heˆ. Ya‸ hk'aˇ, yawˇ hta‸ pa taw miˬ guiˬ yaˇ htaiˍ hk'aw‸ ve hta‸ g'a tuˬ yawˇ peu laˇ ve yoˬ. 18 Yawˇ hta‸ yonˍ ve chaw lehˬ, suhˉ jehˬ ve hta‸ maˇ g'a hkanˍ. Maˇ yonˍ ve chaw lehˬ, G'uiˬ sha ve Yaˇ hpu tiˍ ve awˬ meh hta‸ maˇ yonˍ ve hta‸ pa taw, chi beu‸ ka‸ suhˉ taˆ ve hta‸ g'a hkanˍ peuˬ. 19 Suhˉ taˆ ve chi lehˬ miˬ guiˬ hk'oˆ lo awˬ g'euˆ lo‸ la htawˇ, miˬ guiˬ yaˇ hui awˬ haiˬ hta‸ te ve pa taw, awˬ g'euˆ hta‸ a‸ kehˉ yawˇ hui naˆ ho‸ ve hta‸ ha‸ ve yoˬ. 20 Awˬ lawn k'o, awˬ haiˬ hta‸ te ve chaw lehˬ, awˬ g'euˆ hta‸ nyi bawˬ leh, yawˇ te ve teˇ hpaˍ maˇ g'a tawˆ la tuˬ, awˬ g'euˆ ba kuiˬ lo yawˇ maˇ laˬ. 21 Ya‸ hk'aˇ, hteˇ ve cawˇ ve hta‸ te ve chaw lehˬ, yawˇ te ve teˇ hpaˍ G'uiˬ sha hta‸ cuˇ leh te ve teh‸ tawˆ la tuˬ, awˬ g'euˆ geh yawˇ laˬ ve yoˬ. 22 Oˇ ve awˬ hk'aw‸ nawˉ Yeˍsuˆ leh yawˇ ve awˬ la‸ g'awˇ teˇ hpaˍ Yuˇda‸ mvuhˇ miˬ lo k'ai ve yoˬ. Yawˇ yawˇ hui geh oˇ kaˬ lo chehˇ leh, shu hta‸ baˆtiˆsaˬ piˇ ve yoˬ. 23 Saˍlenˍ venˇ awˬ paˇ neˇ Ehˉnonˍ teh‸ k'oˆ ve teˇ kaˬ lo iˉ kaˆ cawˬ maˇ ve pa taw, Yoˇhanˬ htawˇ oˇ kaˬ lo shu hta‸ baˆtiˆsaˬ piˇ chehˇ ve yoˬ. Chaw teˇ hpaˍ oˇ kaˬ lo k'ai leh baˆtiˆsaˬ hkanˍ yuˬ ve yoˬ. 24 Awˬ lawn k'o, Yoˇhanˬ lehˬ htawnˍ hk'aw lo maˇ g'a geh sheˍ. 25 Oˇ htaˇ, Yoˇhanˬ ve awˬ la‸ g'awˇ teˇ hpaˍ lehˬ, da‸ tuˬ kehˬ tuˬ te ve awˬ liˇ awˬ lawn Yuˇda‸ chaw teˇ g'aˇ geh tawˇ g'awˬ da‸ chehˇ ve yoˬ. 26 Yawˇ hui Yoˇhanˬ geh laˬ leh k'oˆ ve, Raˍbiˆ-oˬ, nawˬ Yawˇdanˍ g'uiˬ ma coˇ paˉ lo chehˇ htaˇ nawˬ geh chehˇ jaw leh, nawˬ yawˇ awˬ lawn shaˉ hkiˆ hkanˍ ve teˇ g'aˇ lehˬ, shu hta‸ baˆtiˆsaˬ piˇ chehˇ leh chaw hk'a peu-eˬ yawˇ geh k'ai chehˇ ve yoˬ teh‸, yawˇ hta‸ k'oˆ piˇ ve yoˬ. 27 Yoˇhanˬ k'aw‸ k'oˆ ve, Mvuhˇ naw ma lo yawˇ hta‸ piˇ ve teˇ ceuˬ maˇ heˆ k'o, chaw yaˇ lehˬ teˇ ceuˬ ka‸ g'a maˇ hpeh‸. 28 Ngaˬ Hkri‸ maˇ heˆ. Ngaˬ lehˬ yawˇ awˬ g'uˇ suhˍ peu laˇ ve chaw teˇ g'aˇ hpeh‸ ve yoˬ teh‸ ngaˬ k'oˆ ve hta‸ nawˬ hui awˬ to ngaˬ awˬ pon shaˉ hkiˆ hkanˍ hpeh‸ ve yoˬ. 29 Awˬ hpawˇ heuˆ tuˬ ve yaˇ miˇ haˉ hta‸ g'a ve teˇ g'aˇ lehˬ, awˬ miˇ ma heuˆ shehˍ hpaˇ hpeh‸ ve yoˬ. Awˬ paˇ lo huˉ taˍ leh awˬ miˇ ma heuˆ shehˍ hpaˇ ve awˬ hkawˇ hta‸ g'a kaˇ ve awˬ chawˇ teˇ g'aˇ lehˬ, awˬ miˇ ma heuˆ shehˍ hpaˇ ve tawˇ hkawˇ hta‸ g'a kaˇ ve pa taw ha lehˬ jaˇ ve yoˬ. Oˇ ve hk'a shuˍ shuˍ, ha lehˬ ve teˇ ceuˬ ngaˬ awˬ hk'aw lo biˇ la peuˬ. 30 Yawˇ lehˬ, g'a uiˍ k'ai mvuh k'ai tuˬ yoˬ. Ya‸ hk'aˇ ngaˬ lehˬ, g'a i k'ai yawnˇ k'ai tuˬ yoˬ teh‸ k'oˆ ve yoˬ. 31 Mvuhˇ naw ma hk'oˆ lo ya‸ la ve teˇ g'aˇ lehˬ, hk'a peu-eˬ awˬ hk'oˆ uiˍ shehˍ hpaˇ hpeh‸ ve yoˬ. Miˬ guiˬ hk'oˆ ve chaw teˇ g'aˇ lehˬ, miˬ guiˬ hta‸ caˉ da‸ leh, miˬ guiˬ ve awˬ lawn ceh k'oˆ ve yoˬ. Mvuhˇ naw ma hk'oˆ lo ya‸ la ve teˇ g'aˇ lehˬ, hk'a peu-eˬ awˬ hk'oˆ uiˍ shehˍ hpaˇ hpeh‸ ve yoˬ. 32 Yawˇ g'a mawˬ g'a kaˇ ve awˬ ceuˬ teˇ hpaˍ awˬ lawn shaˉ hkiˆ hkanˍ ve yoˬ. Ya‸ hk'aˇ, yawˇ shaˉ hkiˆ hkanˍ ve hta‸ chaw teˇ g'aˇ ka‸ maˇ ha‸ yuˬ. 33 Yawˇ shaˉ hkiˆ hkanˍ ve hta‸ ha‸ yuˬ ve chaw teˇ g'aˇ lehˬ, G'uiˬ sha lehˬ hteˇ ve cawˇ ve yoˬ teh‸ yinˉ tcuhˉ taˍ ve yoˬ. 34 G'uiˬ sha peu laˇ ve teˇ g'aˇ lehˬ, G'uiˬ sha ve tawˇ hkawˇ hta‸ yaw ve yoˬ. Awˬ lawn k'o, G'uiˬ sha lehˬ Awˬ ha hpu piˇ ve teˇ yanˇ, maˇ kawˬ maˇ tehˆ nyi leh piˇ ve yoˬ. 35 Awˬ pa lehˬ, Yaˇ hpu hta‸ ha‸ leh, awˬ ceuˬ hk'a peu-eˬ yawˇ la‸ hk'aw lo chiˇ a‸ piˇ peuˬ. 36 Yaˇ hpu hta‸ yonˍ ve chaw lehˬ, co ti‸ ha ti‸ cawˬ ve yoˬ. Yaˇ hpu hta‸ maˇ ha‸ yuˬ ve chaw lehˬ, co ti‸ ha ti‸ hta‸ maˇ g'a mawˬ. Yawˇ awˬ hk'oˆ hta‸ G'uiˬ sha nyi ma zuhˆ ve teˇ ceuˬ cawˬ taˍ ve yoˬ.

Yoˇhanˬ 4

1 Jawˇ mawˇ Yeˍsuˆ shu hta‸ yawˇ ve awˬ la‸ g'awˇ hpeh‸ la piˇ leh baˆtiˆsaˬ piˇ ve lehˬ, Yoˇhanˬ shu hta‸ awˬ la‸ g'awˇ hpeh‸ la piˇ leh baˆtiˆsaˬ piˇ ve a‸ kehˉ maˇ ve hta‸ Hpaˍriˍsehˇ hui g'a kaˇ ve yoˬ. 2 (Ya‸ hk'aˇ, Yeˍsuˆ awˬ to shu hta‸ baˆtiˆsaˬ piˇ ve maˇ heˆ. Yawˇ ve awˬ la‸ g'awˇ hui ceh tiˉ piˇ ve yoˬ.) 3 Hpaˍriˍsehˇ hui g'a kaˇ peuˬ teh‸ Jawˇ mawˇ Yeˍsuˆ g'a shiˍ ve teˇ yanˇ, Yuˇda‸ mvuhˇ miˬ lo yawˇ tawˆ k'ai leh, Gaˍliˍlehˇ mvuhˇ miˬ lo teˇ pawˆ k'aw‸ k'ai ve yoˬ. 4 Yawˇ lehˬ Saˍmaˍriˆ mvuhˇ miˬ hta‸ g'a hpanˍ k'ai cawˇ ve yoˬ. 5 Hk'e te leh, Saˍmaˍriˆ mvuhˇ miˬ awˬ hk'aw lo cawˬ ve Suˇhkaˍ meh ve venˇ teˇ venˇ lo yawˇ gaˬ ve yoˬ. Venˇ oˇ ve lehˬ, Yaˍkoˆ yawˇ ve yaˇ paˍ Yoˇseh‸ hta‸ piˇ taˉ ve miˬ guiˬ teˇ peˆ hta‸ neˇ ve yoˬ. 6 Oˇ kaˬ lo Yaˍkoˆ ve nanˬ bawˍ cawˬ ve yoˬ. Yeˍsuˆ ya‸ k'aw toˇ heuˬ ve pa taw, nanˬ bawˍ awˬ paˇ lo mui taˍ ve yoˬ. Awˬ yanˇ oˇ ve lehˬ, mvuhˇ law‸ k'aw tcuhˆ teˇ yanˇ hpeh‸ ve yoˬ. 7 Saˍmaˍriˆ yaˇ miˇ teˇ g'aˇ iˉ kaˆ ca hk'o la ve yoˬ. Yeˍsuˆ lehˬ, Ngaˬ hta‸ iˉ kaˆ a ciˉ taw laˇ-oˆ teh‸ yawˇ hta‸ k'oˆ piˇ ve yoˬ. 8 Oˇ ve teˇ hkui yawˇ ve awˬ la‸ g'awˇ teˇ hpaˍ lehˬ, venˇ hk'aw lo caˇ tuˬ ca vuiˬ k'ai peuˬ. 9 Saˍmaˍriˆ yaˇ miˇ k'aw‸ k'oˆ ve, Nawˬ Yuˇda‸ chaw hpeh‸ ve ka‸, aˬ hto‸ ma te ngaˬ Saˍmaˍriˆ yaˇ miˇ geh iˉ kaˆ lawˬ dawˬ ve le teh‸ yawˇ hta‸ k'oˆ piˇ ve yoˬ. Awˬ lawn k'o, Yuˇda‸ chaw leh Saˍmaˍriˆ chaw hui awˬ chawˇ maˇ te da‸ ve pa taw chi hk'e k'oˆ ve yoˬ. 10 Yeˍsuˆ k'aw‸ k'oˆ ve, G'uiˬ sha piˇ ve la‸ shawnˍ hta‸ maˇ k'oˆ, Ngaˬ hta‸ iˉ kaˆ a ciˉ taw laˇ-oˆ teh‸ nawˬ hta‸ k'oˆ laˇ ve chaw hta‸ maˇ k'oˆ, nawˬ shiˍ ve hk'e k'o, nawˬ yawˇ geh lawˬ tuˬ yoˬ. Yawˇ htawˇ nawˬ hta‸ co ha te‸ piˇ lawˬ ve iˉ kaˆ taw laˇ tuˬ yoˬ teh‸, yawˇ hta‸ k'oˆ piˇ ve yoˬ. 11 Yaˇ miˇ oˇ ve k'aw‸ k'oˆ ve, Jawˇ mawˇ-oˬ, nawˬ iˉ kaˆ nyiˉ tuˬ te‸ chiˉ ka‸ maˇ cawˬ. Nanˬ bawˍ chi naˉ jaˇ ve yoˬ. Co ha te‸ piˇ lawˬ ve iˉ kaˆ hta‸ nawˬ hk'aˬ lo g'a tuˬ le. 12 Ngaˬ hui ve awˬ pa Yaˍkoˆ lehˬ, nanˬ bawˍ chi ngaˬ hui hta‸ pe‸ laˇ ve yoˬ. Yawˇ awˬ to ka‸, yawˇ ve awˬ yaˇ awˬ duˬ teˇ hpaˍ ka‸, yawˇ ve ceˇ caˬ teˇ hpaˍ ka‸, nanˬ bawˍ chi hta‸ dawˬ ve yoˬ. Nawˬ lehˬ yawˇ a‸ kehˉ uiˍ ve leh laˇ teh‸, yawˇ hta‸ k'oˆ piˇ ve yoˬ. 13 Yeˍsuˆ k'aw‸ k'oˆ ve, Iˉ kaˆ chi hta‸ hk'a dawˬ ve chaw lehˬ, iˉ kaˆ k'aw‸ shiˉ tuˬ yoˬ. 14 Ya‸ hk'aˇ, ngaˬ piˇ ve iˉ kaˆ hta‸ hk'a dawˬ ve chaw lehˬ, hk'aˬ htaˆ ka‸ iˉ kaˆ maˇ k'aw‸ shiˉ. Ngaˬ yawˇ hta‸ piˇ ve iˉ kaˆ lehˬ, yawˇ awˬ hk'aw lo co ti‸ ha ti‸ awˬ pon tawˆ la chehˇ ve g'uiˬ tuˇ hpeh‸ tuˬ yoˬ teh‸, yawˇ hta‸ k'oˆ piˇ ve yoˬ. 15 Yaˇ miˇ k'aw‸ k'oˆ ve, Jawˇ mawˇ-oˬ, ngaˬ iˉ kaˆ maˇ g'a k'aw‸ shiˉ tuˬ leh, choˬ kaˬ lo iˉ kaˆ maˇ g'a k'aw‸ hk'o la tuˬ, iˉ kaˆ oˇ ve teˇ ceuˬ ngaˬ hta‸ a ciˉ pe‸ laˇ-oˆ teh‸, yawˇ hta‸ k'oˆ piˇ ve yoˬ. 16 Yeˍsuˆ lehˬ, Nawˬ ve awˬ hpawˇ hta‸ ca kuˬ leh choˬ kaˬ k'aw‸ laˬ-o‸ teh‸ yawˇ hta‸ k'oˆ piˇ ve teˇ yanˇ, 17 Ngaˬ awˬ hpawˇ maˇ cawˬ teh‸, yaˇ miˇ oˇ ve yawˇ hta‸ k'aw‸ k'oˆ piˇ ve yoˬ. Yeˍsuˆ k'aw‸ k'oˆ ve, Nawˬ awˬ hpawˇ maˇ cawˬ teh‸ nawˬ k'oˆ ve lehˬ cawˇ ve yoˬ. 18 Awˬ lawn k'o, nawˬ awˬ hpawˇ ngaˇ g'aˇ cawˬ jaw peuˬ leh, chi beu‸ nawˬ geh chehˇ taˍ ve teˇ g'aˇ lehˬ nawˬ ve awˬ hpawˇ maˇ heˆ. Nawˬ chi hk'e k'oˆ ve lehˬ, cawˇ jaˇ ve yoˬ teh‸ yawˇ hta‸ k'oˆ piˇ ve yoˬ. 19 Yaˇ miˇ oˇ ve k'aw‸ k'oˆ ve, Jawˇ mawˇ-oˬ, nawˬ lehˬ G'uiˬ sha ve tcuh kaˍ paˍ hpeh‸ ve yoˬ teh‸ ngaˬ shiˍ ve yoˬ. 20 Ngaˬ hui ve awˬ puˍ awˬ pi teˇ hpaˍ lehˬ, hk'aw pui chi awˬ hk'oˆ lo oˉ k'oˍ pui ve yoˬ. Ya‸ hk'aˇ, Yeˍruˆsaˍlehnˍ venˇ awˬ hk'aw lo ceh tiˉ oˉ k'oˍ g'a pui tuˬ nawˬ hui k'oˆ ve yoˬ teh‸ yawˇ hta‸ k'oˆ piˇ ve yoˬ. 21 Yeˍsuˆ k'oˆ ve, Yaˇ miˇ-oˬ, ngaˬ k'oˆ ve tawˇ hkawˇ hta‸ yonˍ-o‸, Hk'aw pui chi teˇ shiˍ awˬ hk'oˆ lo maˇ k'oˆ, Yeˍruˆsaˍlehnˍ venˇ awˬ hk'aw lo htawˇ maˇ k'oˆ, Awˬ pa hta‸ nawˬ hui oˉ k'oˍ maˇ g'a ca k'aw‸ pui tuˬ ve awˬ yanˇ gaˬ la paˇ neˇ ve yoˬ. 22 Nawˬ hui lehˬ, nawˬ hui maˇ shiˍ ve hta‸ oˉ k'oˍ pui ve yoˬ. Ngaˬ hui lehˬ, ngaˬ hui shiˍ taˍ ve hta‸ oˉ k'oˍ pui ve yoˬ. Awˬ lawn k'o, htaiˍ hk'aw‸ ve teˇ ceuˬ lehˬ, Yuˇda‸ chaw hui awˬ hk'aw lo tawˆ la ve yoˬ. 23 Awˬ tehˬ awˬ na oˉ k'oˍ pui ve chaw teˇ hpaˍ lehˬ, nyi ma awˬ hk'aw leh hteˇ ve cawˇ ve awˬ hk'aw lo Awˬ pa hta‸ oˉ k'oˍ g'a pui tuˬ ve awˬ yanˇ gaˬ la chehˇ leh, chi beu‸ ka‸ gaˬ la peuˬ. Awˬ lawn k'o, Awˬ pa lehˬ yawˇ hta‸ oˉ k'oˍ pui tuˬ oˇ hk'e ve chaw teˇ hpaˍ hta‸ heuˆ gaˇ ve yoˬ. 24 G'uiˬ sha lehˬ awˬ ha hpeh‸ ve yoˬ. Yawˇ hta‸ oˉ k'oˍ pui ve chaw hui lehˬ, nyi ma awˬ hk'aw leh hteˇ ve cawˇ ve awˬ hk'aw lo oˉ k'oˍ g'a pui ve yoˬ teh‸ k'oˆ piˇ ve yoˬ. 25 Yaˇ miˇ k'aw‸ k'oˆ ve, Meˍsiˉya‸ laˬ tuˬ ve hta‸ ngaˬ shiˍ ve yoˬ. Yawˇ gaˬ la ve teˇ yanˇ, yawˇ ngaˬ hui hta‸ teˇ ceuˬ le le k'oˆ maˍ laˇ tuˬ yoˬ teh‸, yawˇ hta‸ k'oˆ piˇ ve yoˬ. (Meˍsiˉya‸ teh‸ k'oˆ ve lehˬ, Hkri‸ teh‸ k'oˆ ve yoˬ.) 26 Yeˍsuˆ k'aw‸ k'oˆ ve, Nawˬ hta‸ tawˇ yaw chehˇ ve ngaˬ lehˬ, yawˇ yoˬ teh‸ yaˇ miˇ hta‸ k'oˆ piˇ ve yoˬ. 27 Oˇ ve teˇ hkui yawˇ ve awˬ la‸ g'awˇ teˇ hpaˍ k'aw‸ gaˬ la leh, yaˇ miˇ geh yawˇ tawˇ yaw chehˇ ve hta‸ yawˇ hui anˇ ve yoˬ. Ya‸ hk'aˇ, Nawˬ aˬ hto‸ ma heuˆ gaˇ ve le. Aˬ hto‸ ma te yawˇ geh nawˬ tawˇ yaw chehˇ ve le teh‸, teˇ g'aˇ ka‸ maˇ na nyi. 28 Yaˇ miˇ oˇ ve lehˬ, yawˇ ve iˉ kaˆ mu‸ hk'u hta‸ teh taˉ leh, venˇ awˬ hk'aw lo k'o‸-e leh venˇ yaˇ teˇ hpaˍ hta‸ k'oˆ piˇ ve, 29 Ngaˬ hk'a te jaw ve awˬ lawn hk'a peu-eˬ ngaˬ hta‸ hto laˇ ve chaw teˇ g'aˇ hta‸ ca nyi la-o. Yawˇ lehˬ Hkri‸ hpeh‸ ve leh naˍ teh‸ k'oˆ piˇ ve yoˬ. 30 Yawˇ hui venˇ hk'aw tawˆ k'ai leh Yeˍsuˆ geh laˬ ve yoˬ. 31 Awˬ yanˇ oˇ ve awˬ hk'aw lo awˬ la‸ g'awˇ teˇ hpaˍ k'oˆ ve, Raˍbiˆ-oˬ, caˇ tuˬ a ciˉ caˇ-oˆ teh‸, yawˇ hta‸ lawˬ hkawˉ ve yoˬ. 32 Yawˇ lehˬ, Nawˬ hui maˇ shiˍ ve caˇ tuˬ ngaˬ geh cawˬ ve yoˬ teh‸, yawˇ hui hta‸ k'oˆ piˇ ve yoˬ. 33 Hk'e te leh, awˬ la‸ g'awˇ teˇ hpaˍ k'oˆ ve, Chaw teˇ g'aˇ g'aˇ yawˇ hta‸ caˇ tuˬ laˬ caˍ piˇ leh naˍ teh‸, teˇ g'aˇ leh teˇ g'aˇ na da‸ ve yoˬ. 34 Yeˍsuˆ k'aw‸ k'oˆ ve, Ngaˬ hta‸ peu laˇ shehˍ hpaˇ ve a loˍ hta‸ te leh, yawˇ ve kanˉ hta‸ te peuˬ tuˬ ve lehˬ, ngaˬ ve caˇ tuˬ hpeh‸ ve yoˬ. 35 Ha pa awˍ lehˇ gaˬ k'o, caˬ g'eu‸ ve awˬ yanˇ gaˬ tuˬ yoˬ teh‸ nawˬ hui k'oˆ ve maˇ heˆ laˇ. Ngaˬ nawˬ hui hta‸ k'oˆ laˇ ve, heh teˇ hpaˍ hta‸ chiˇ nyi-o. Chi beuˬ ka‸ caˬ g'eu‸ tuˬ caˬ meh la leh shiˉ-ehˍ hpeh‸ la peuˬ. 36 Caˬ g'eu‸ shehˍ hpaˇ lehˬ, g'aˇ hpfuhˇ g'a leh, co ti‸ ha ti‸ awˬ pon awˬ shiˍ shaw keu ve yoˬ. Hk'e te leh, ti shehˍ hpaˇ leh g'eu‸ shehˍ hpaˇ teˇ geh g'a ha lehˬ tuˬ yoˬ. 37 Teˇ g'aˇ ti leh teˇ g'aˇ g'eu‸ ve yoˬ teh‸ k'oˆ ve tawˇ teˇ hkawˇ lehˬ, chi hta‸ cawˇ da‸ jaˇ ve yoˬ. 38 Nawˬ hui kanˉ maˇ te kuiˬ lo ngaˬ nawˬ hui hta‸ caˬ ca g'eu‸ tcuh ve yoˬ. Shu kanˉ te taˍ leh, yawˇ hui te taˍ ve kanˉ awˬ hk'aw lo nawˬ hui lo‸-e peuˬ teh‸, yawˇ hui hta‸ k'oˆ piˇ ve yoˬ. 39 Venˇ oˇ ve awˬ hk'aw lo chehˇ ve Saˍmaˍriˆ chaw laiˉ g'aˇ Yeˍsuˆ hta‸ yonˍ ve yoˬ. Awˬ lawn k'o, yaˇ miˇ oˇ ve lehˬ, Ngaˬ hk'a te jaw ve awˬ lawn hk'a peu-eˬ yawˇ ngaˬ hta‸ hto laˇ ve yoˬ teh‸, shaˉ hkiˆ hkanˍ ve hta‸ pa taw yoˬ. 40 Hk'e te leh, Saˍmaˍriˆ chaw teˇ hpaˍ yawˇ geh gaˬ la htaˇ, yawˇ hui geh chehˇ tuˬ yawˇ hta‸ lawˬ hkawˉ ve pa taw, yawˇ oˇ kaˬ lo nyiˇ nyi chehˇ ve yoˬ. 41 Yawˇ ve tawˇ hkawˇ hta‸ pa taw awˬ kaˍ awˬ nu chaw laiˉ g'aˇ htawˇ yonˍ ve yoˬ. 42 Yawˇ hui lehˬ yaˇ miˇ oˇ ve hta‸ k'oˆ piˇ ve, Nawˬ ve tawˇ hkawˇ hta‸ pa taw ceh ngaˬ hui yonˍ ve maˇ heˆ. Ngaˬ hui awˬ to yawˇ ve tawˇ hkawˇ hta‸ g'a kaˇ leh, chaw chi lehˬ miˬ guiˬ yaˇ hui ve Htaiˍ hk'aw‸ paˍ awˬ tehˬ awˬ na hpeh‸ ve hta‸ ngaˬ hui shiˍ ve yoˬ teh‸ k'oˆ ve yoˬ. 43 Yeˍsuˆ oˇ kaˬ lo nyiˇ nyi chehˇ peuˬ hk'aw‸ nawˉ, Gaˍliˍlehˇ mvuhˇ miˬ lo k'ai ve yoˬ. 44 Awˬ lawn k'o, G'uiˬ sha ve tcuh kaˍ paˍ lehˬ, a shu yawˇ ve mvuhˇ miˬ awˬ hk'aw lo awˬ me‸ awˬ hponˇ maˇ cawˬ teh‸, Yeˍsuˆ yawˇ awˬ to shaˉ hkiˆ hkanˍ ve yoˬ. 45 Hk'e te leh, yawˇ Gaˍliˍlehˇ mvuhˇ miˬ lo gaˬ ve teˇ yanˇ, Gaˍliˍlehˇ chaw teˇ hpaˍ yawˇ hta‸ ha‸ yuˬ ve yoˬ. Awˬ lawn k'o, chaw oˇ ve teˇ hpaˍ lehˬ, Yeˍruˆsaˍlehnˍ venˇ lo pawehˇ awˬ hk'aw k'ai leh, pawehˇ oˇ ve awˬ hk'aw lo yawˇ hk'a te ve teˇ hpaˍ hta‸ g'a mawˬ peuˬ ve pa taw yoˬ. 46 Hk'e te leh, iˉ kaˆ hta‸ a pehˉ meuˇ g'uiˬ hpeh‸ la piˇ lawˬ ve teˇ kaˬ, Gaˍliˍlehˇ mvuhˇ miˬ Kaˍnaˆ hk'aˆ hk'aw lo yawˇ teˇ pawˆ k'aw‸ gaˬ ve yoˬ. Oˇ htaˇ, Kaˍpeˍneˍonˍ venˇ awˬ hk'aw lo chehˇ ve jawˇ mawˇ teˇ g'aˇ ve yaˇ paˍ naˬ chehˇ ve yoˬ. 47 Yeˍsuˆ lehˬ, Yuˇda‸ mvuhˇ miˬ lo tu leh Gaˍliˍlehˇ mvuhˇ miˬ lo gaˬ la ve awˬ lawn hta‸ jawˇ mawˇ oˇ ve g'a kaˇ htaˇ, yawˇ ve yaˇ paˍ suh la paˇ neˇ ve pa taw, Yeˍsuˆ laˬ leh yawˇ hta‸ gu na-e piˇ tuˬ, yawˇ Yeˍsuˆ hta‸ ca lawˬ hkawˉ ve yoˬ. 48 Hk'e te leh Yeˍsuˆ k'oˆ ve, Nawˬ hui awˬ heˆ leh anˇ tuˬ teˇ hpaˍ hta‸ maˇ g'a mawˬ ve k'o, nawˬ hui te‸ chiˉ maˇ yonˍ teh‸ yawˇ hta‸ k'oˆ piˇ ve yoˬ. 49 Jawˇ mawˇ-oˬ, ngaˬ ve yaˇ maˇ suh sheˍ htaˇ a ciˉ laˬ-o‸ teh‸, jawˇ mawˇ oˇ ve yawˇ hta‸ k'oˆ piˇ ve yoˬ. 50 Yeˍsuˆ k'oˆ ve, K'o‸-e loˬ. Nawˬ ve yaˇ pa na-e la peuˬ teh‸ yawˇ hta‸ k'oˆ piˇ ve yoˬ. Jawˇ mawˇ oˇ ve lehˬ, Yeˍsuˆ k'oˆ piˇ ve tawˇ hkawˇ hta‸ yonˍ leh k'o‸-e ve yoˬ. 51 Yawˇ k'o‸-e chehˇ ve teˇ yanˇ, yawˇ ve awˬ ceˬ teˇ hpaˍ yawˇ hta‸ ca ha‸ la leh, Nawˬ ve yaˇ paˍ na-e la peuˬ teh‸ yawˇ hta‸ hto piˇ ve yoˬ. 52 Hk'e te leh, Yawˇ hk'aˬ ve teˇ yanˇ tanˬ na-e la ve le teh‸ na nyi ve teˇ yanˇ, Aˉ nyi mvuhˇ hpeu‸ hpawˇ teˇ naˍ riˍ htaˇ, yawˇ kaˆ naˬ ve na-e la ve yoˬ teh‸, yawˇ hui yawˇ hta‸ k'oˆ piˇ ve yoˬ. 53 Awˬ yanˇ oˇ ve lehˬ, Nawˬ ve yaˇ paˍ na-e la peuˬ teh‸, Yeˍsuˆ yawˇ hta‸ k'oˆ piˇ ve awˬ yanˇ hta‸ cawˇ ve yoˬ teh‸ awˬ pa shiˍ leh, yawˇ awˬ to ka‸ yehˬ yaˇ k'a yaˇ hk'a peu-eˬ ka‸ Yeˍsuˆ hta‸ yonˍ la ve yoˬ. 54 Awˬ heˆ chi lehˬ, Yeˍsuˆ Yuˇda‸ mvuhˇ miˬ lo tu leh Gaˍliˍlehˇ mvuhˇ miˬ lo gaˬ la peuˬ hk'aw‸ nawˉ, yawˇ te ve awˬ heˆ nyiˇ ceuˬ teˇ ceuˬ hpeh‸ ve yoˬ.

Yoˇhanˬ 5

1 Oˇ ve awˬ hk'aw‸ nawˉ, Yuˇda‸ chaw hui pawehˇ te ve awˬ yanˇ gaˬ la leh, Yeˍsuˆ Yeˍruˆsaˍlehnˍ venˇ lo taˆ-e ve yoˬ. 2 Yeˍruˆsaˍlehnˍ venˇ awˬ hk'aw, yawˬ taˍ meu‸ hpe‸ awˬ paˇ lo, Heˍbrehˇ hkawˇ Beˍteˍsaˍdaˆ teh‸ k'oˆ ve g'uiˬ po teˇ maˬ cawˬ ve yoˬ. G'uiˬ po oˇ ve awˬ jaˇ lo aˉ po k'o ngaˇ maˬ cawˬ ve yoˬ. 3 Aˉ po k'o oˇ ve teˇ hpaˍ awˬ hk'aw lo naˬ ve chaw, mehˆ cuˉ ve chaw, hkui luˬ ve chaw leh hkui sheh la‸ sheh suh ve chaw maˇ maˇ zuh‸ chehˇ taˍ ve yoˬ. 4 Awˬ yanˇ awˬ yanˇ k'o, mvuhˇ naw ma tcuh yaˇ g'uiˬ po awˬ hk'aw lo ya‸ la leh iˉ kaˆ hta‸ hiˆ piˇ ve yoˬ. Iˉ kaˆ hiˆ la ve teˇ yanˇ, awˉ lawˉ peuˇ g'a lo‸-e ve chaw teˇ g'aˇ lehˬ, yawˇ naˬ ve a naˍ hk'aˬ ve teˇ ceuˬ maˇ k'oˆ, na-e la ve yoˬ. 5 Shehˆ chi hiˉ hk'aw‸ hk'a gaˬ naˬ ve chaw teˇ g'aˇ lehˬ, oˇ kaˬ lo chehˇ taˍ ve yoˬ. 6 Yeˍsuˆ lehˬ, chaw oˇ ve hta‸ g'a mawˬ leh, yawˇ naˬ maw jaˇ peuˬ ve hta‸ g'a shiˍ ve teˇ yanˇ, Nawˬ chehˇ sha la gaˇ laˇ teh‸, yawˇ hta‸ na nyi ve yoˬ. 7 Chaw naˬ oˇ ve teˇ g'aˇ k'oˆ ve, Jawˇ mawˇ-oˬ, iˉ kaˆ hiˆ la ve teˇ yanˇ, g'uiˬ po awˬ hk'aw lo ngaˬ hta‸ yuˬ keu laˇ tuˬ ve chaw maˇ cawˬ. Ngaˬ ya‸-e chehˇ ve teˇ yanˇ, awˬ kaˍ awˬ nu chaw teˇ g'aˇ ngaˬ awˬ g'uˇ suhˍ lo‸-e ve yoˬ teh‸, yawˇ hta‸ k'oˆ piˇ ve yoˬ. 8 Yeˍsuˆ k'oˆ ve, Tu loˬ. Nawˬ ve zuh‸ hpui hta‸ yuˬ leh k'ai-o teh‸, yawˇ hta‸ k'oˆ piˇ ve yoˬ. 9 Chaw oˇ ve teˇ g'aˇ lehˬ, teˇ cawˬ haˉ na-e la leh, yawˇ ve zuh‸ hpui hta‸ yuˬ leh k'ai ve yoˬ. 10 Oˇ ve teˇ nyi lehˬ, shinˉ nyi hpeh‸ ve yoˬ. Hk'e te leh, na-e la ve chaw oˇ ve teˇ g'aˇ hta‸ Yuˇda‸ chaw teˇ hpaˍ k'oˆ piˇ ve, Ya‸ nyi lehˬ shinˉ nyi yoˬ. Nawˬ ve zuh‸ hpui hta‸ yuˬ k'ai ve lehˬ maˇ cawˇ teh‸ k'oˆ ve yoˬ. 11 Oˇ htaˇ yawˇ k'oˆ ve, Ngaˬ hta‸ gu na-e laˇ ve chaw teˇ g'aˇ lehˬ, Nawˬ ve zuh‸ hpui hta‸ yuˬ leh k'ai-o teh‸ ngaˬ hta‸ k'oˆ laˇ ve yoˬ teh‸, yawˇ hui hta‸ k'oˆ piˇ ve yoˬ. 12 Yawˇ hui k'aw‸ k'oˆ ve, Nawˬ ve zuh‸ hpui hta‸ yuˬ leh k'ai-o teh‸ k'oˆ laˇ ve chaw a shu le teh‸ yawˇ hta‸ na nyi ve yoˬ. 13 Na-e la ve chaw oˇ ve teˇ g'aˇ lehˬ, yawˇ hta‸ gu na-e laˇ ve chaw teˇ g'aˇ a shu leh naˍ maˇ shiˍ. Awˬ lawn k'o, oˇ kaˬ lo chaw chehˇ maˇ jaˇ ve pa taw, Yeˍsuˆ tawˆ k'ai peuˬ. 14 Oˇ ve awˬ hk'aw‸ nawˉ, bon yehˬ lonˉ awˬ hk'aw lo Yeˍsuˆ yawˇ hta‸ g'a mawˬ htaˇ, Nawˬ chehˇ sha la peuˬ. Chi a‸ kehˉ leuˉ leh tu‸ ve hkanˍ ve hta‸ nawˬ maˇ g'a hkanˍ tuˬ, venˇ baˆ taˇ k'aw‸ te teh‸, yawˇ hta‸ k'oˆ piˇ ve yoˬ. 15 Chaw oˇ ve teˇ g'aˇ k'ai leh, Ngaˬ hta‸ gu na-e laˇ ve chaw teˇ g'aˇ lehˬ Yeˍsuˆ yoˬ teh‸, Yuˇda‸ chaw hui hta‸ ca hto piˇ ve yoˬ. 16 Shinˉ nyi teˇ nyi htaˇ Yeˍsuˆ oˇ hk'e te ve pa taw, Yuˇda‸ chaw teˇ hpaˍ yawˇ hta‸ fawˉ mehˍ ve yoˬ. 17 Oˇ htaˇ Yeˍsuˆ k'oˆ ve, Ngaˬ Awˬ pa lehˬ, chi beu‸ hk'a gaˬ kanˉ te chehˇ ve yoˬ. Ngaˬ htawˇ kanˉ te chehˇ ve yoˬ teh‸, yawˇ hui hta‸ k'aw‸ k'oˆ piˇ ve yoˬ. 18 Hk'e te leh, yawˇ shinˉ nyi hta‸ te luˬ ve awˬ hk'oˆ ka‸ G'uiˬ sha hta‸ yawˇ ve Awˬ pa teh‸ k'oˆ leh, yawˇ awˬ to hta‸ G'uiˬ sha hk'a shuˍ shuˍ taˍ ve pa taw, Yuˇda‸ chaw teˇ hpaˍ yawˇ hta‸ hk'aˬ hk'e te leh g'a tiˇ pehˍ tuˬ leuˉ leh ca ve yoˬ. 19 Yeˍsuˆ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, Yaˇ hpu lehˬ yawˇ hk'aˇ yawˇ a loˍ cawˇ ve hk'e te‸ chiˉ ka‸ te maˇ g'a. Awˬ pa te chehˇ ve hta‸ g'a mawˬ ve hk'e ceh tiˉ yawˇ te ve yoˬ. Awˬ pa hk'a te ve teˇ ceuˬ le le hta‸ Yaˇ hpu htawˇ te ve yoˬ. 20 Awˬ pa lehˬ, Yaˇ hpu hta‸ ha‸ leh, yawˇ awˬ to hk'a te ve hk'a peu-eˬ Yaˇ hpu hta‸ maˍ piˇ ve yoˬ. Nawˬ hui g'a anˇ jaˇ tuˬ, chi teˇ hpaˍ a‸ kehˉ uiˍ ve kanˉ teˇ hpaˍ htawˇ Yaˇ hpu hta‸ yawˇ hpeu‸ maˍ piˇ tuˬ yoˬ. 21 Awˬ lawn k'o, Awˬ pa lehˬ suh taˍ ve chaw teˇ hpaˍ hta‸ k'aw‸ te‸ tu la piˇ lawˬ ve hk'e, Yaˇ hpu htawˇ yawˇ te‸ la piˇ gaˇ ve chaw teˇ hpaˍ hta‸ te‸ la piˇ lawˬ ve yoˬ. 22 Chaw hk'a peu-eˬ Awˬ pa hta‸ yawˆ yan ve hk'e Yaˇ hpu hta‸ htawˇ yawˆ yan tuˬ, Awˬ pa lehˬ chaw teˇ g'aˇ hta‸ ka‸ suhˉ maˇ jehˬ. Suhˉ jehˬ tuˬ hk'a peu-eˬ Yaˇ hpu hta‸ chiˇ a‸ piˇ peuˬ. 23 Yaˇ hpu hta‸ maˇ yawˆ yan ve chaw lehˬ, yawˇ hta‸ peu laˇ shehˍ hpaˇ, Awˬ pa hta‸ htawˇ maˇ yawˆ yan ve yoˬ. 24 Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ ve tawˇ hkawˇ hta‸ na yuˬ leh, ngaˬ hta‸ peu laˇ shehˍ hpaˇ hta‸ yonˍ ve chaw teˇ g'aˇ lehˬ, co ti‸ ha ti‸ cawˬ taˍ peuˬ. Suhˉ jehˬ ve hta‸ yawˇ maˇ g'a hkanˍ. Suh ve awˬ hk'aw lo yawˇ ponˬ tawˆ-e leh, te‸ ve awˬ hk'aw lo g'a lo‸-e peuˬ. 25 Ngaˬ nawˬ hui hta‸ awˬ tehˬ awˬ na k'oˆ laˇ ve, suh taˍ ve chaw teˇ hpaˍ lehˬ, G'uiˬ sha ve Yaˇ hpu ve tawˇ hkawˇ hta‸ g'a kaˇ tuˬ awˬ yanˇ gaˬ la chehˇ leh, chi beu‸ ka‸ gaˬ la peuˬ. G'a kaˇ ve chaw hui htawˇ co ha g'a te‸ tuˬ yoˬ. 26 Awˬ lawn k'o, Awˬ pa awˬ hk'aw lo co ha te‸ ve teˇ ceuˬ cawˬ ve hk'a shuˍ shuˍ, Yaˇ hpu awˬ hk'aw lo htawˇ co ha te‸ ve teˇ ceuˬ cawˬ tuˬ Awˬ pa a hkaw-anˬ piˇ ve yoˬ. 27 Chi hk'oˆ ka‸, yawˇ lehˬ chaw yaˇ ve Yaˇ hpu hpeh‸ ve pa taw, suhˉ jehˬ tuˬ ve kanˇ paˆ htawˇ yawˇ hta‸ piˇ taˍ ve yoˬ. 28 Awˬ lawn chi hta‸ taˇ anˇ. Awˬ lawn k'o, tuˍ hpfuh awˬ hk'aw lo chehˇ ve chaw hk'a peu-eˬ lehˬ, yawˇ ve tawˇ hkawˇ hta‸ g'a kaˇ leh tawˆ la tuˬ ve awˬ yanˇ gaˬ la tuˬ yoˬ. 29 Da‸ ve hta‸ te ve chaw teˇ hpaˍ lehˬ, co ha te‸ ve awˬ pon k'aw‸ te‸ tu la tuˬ yoˬ. Haiˬ ve hta‸ te ve chaw teˇ hpaˍ lehˬ, suhˉ jehˬ tuˬ awˬ pon k'aw‸ te‸ tu la tuˬ yoˬ. 30 Ngaˬ lehˬ, ngaˬ hk'aˇ ngaˬ ngaˬ a loˍ cawˇ ve hk'e te‸ chiˉ ka‸ te maˇ g'a. Ngaˬ g'a kaˇ ve hk'e ceh ngaˬ suhˉ jehˬ ve yoˬ. Ngaˬ suhˉ jehˬ ve lehˬ cawˇ ve yoˬ. Awˬ lawn k'o, ngaˬ ve a loˍ hta‸ ngaˬ maˇ te. Ngaˬ hta‸ peu laˇ shehˍ hpaˇ ve a loˍ hta‸ ceh tiˉ ngaˬ te ve yoˬ. 31 Ngaˬ lehˬ, ngaˬ awˬ to awˬ lawn shaˉ hkiˆ hkanˍ ve k'o, ngaˬ ve shaˉ hkiˆ lehˬ maˇ cawˇ. 32 Ngaˬ ve awˬ lawn hta‸ shaˉ hkiˆ hkanˍ shehˍ hpaˇ awˬ kaˍ awˬ nu chaw teˇ g'aˇ cawˬ ve yoˬ. Yawˇ ngaˬ awˬ lawn shaˉ hkiˆ hkanˍ ve lehˬ, cawˇ ve yoˬ teh‸ ngaˬ shiˍ ve yoˬ. 33 Nawˬ hui lehˬ, Yoˇhanˬ geh shu hta‸ k'ai tcuh leh, hteˇ ve cawˇ ve awˬ lawn hta‸ yawˇ shaˉ hkiˆ hkanˍ taˍ ve yoˬ. 34 Chaw yaˇ lo laˬ ve shaˉ hkiˆ hkanˍ ve hta‸ ngaˬ hkanˍ yuˬ ve maˇ heˆ. Ya‸ hk'aˇ, nawˬ hui htaiˍ hk'aw‸ ve hta‸ g'a tuˬ, ngaˬ chi hk'e k'oˆ laˇ ve yoˬ. 35 Yoˇhanˬ lehˬ, aˬ miˍ to‸ chehˇ leh awˬ g'euˆ ba chehˇ ve kawˆ faiˇ hpeh‸ ve yoˬ. Nawˬ hui lehˬ, yawˇ ve awˬ g'euˆ awˬ hk'aw lo teˇ tcuhˉ teˇ yanˇ ha lehˬ tuˬ nyi ma cawˬ ve yoˬ. 36 Ya‸ hk'aˇ ngaˬ cawˬ taˍ ve shaˉ hkiˆ lehˬ, Yoˇhanˬ shaˉ hkiˆ hkanˍ ve a‸ kehˉ uiˍ ve yoˬ. Awˬ lawn k'o, peuˬ htaˇ hk'a gaˬ te tuˬ Awˬ pa ngaˬ hta‸ te tcuh laˇ ve kanˉ teˇ hpaˍ lehˬ, Awˬ pa ngaˬ hta‸ peu laˇ ve yoˬ teh‸ shaˉ hkiˆ hpeh‸ ve yoˬ. Chi beu‸ ka‸ kanˉ oˇ ve teˇ hpaˍ hta‸ ngaˬ te chehˇ taˍ ve yoˬ. 37 Ngaˬ hta‸ peu laˇ shehˍ hpaˇ Awˬ pa htawˇ, ngaˬ awˬ pon shaˉ hkiˆ hkanˍ ve yoˬ. Nawˬ hui lehˬ, yawˇ tawˇ yaw ve awˬ hkawˇ hta‸ teˇ pawˆ ka‸ maˇ kaˇ jaw. Yawˇ ve awˬ ho‸ awˬ han hta‸ htawˇ nawˬ hui maˇ mawˬ jaw. 38 Yawˇ ve tawˇ hkawˇ htawˇ nawˬ hui awˬ hk'aw lo maˇ cawˬ. Awˬ lawn k'o, yawˇ peu laˇ ve teˇ g'aˇ hta‸ nawˬ hui maˇ yonˍ. 39 Nawˬ hui lehˬ, Li‸ hpu awˬ hk'aw lo co ti‸ ha ti‸ hta‸ g'a tuˬ yoˬ teh‸ dawˇ ve pa taw, Li‸ hpu hta‸ nawˬ hui hk'a deh‸ ca hpeu‸ nyi g'aw nyi ve yoˬ. Li‸ hpu oˇ ve lehˬ, ngaˬ awˬ lawn shaˉ hkiˆ hkanˍ ve yoˬ. 40 Ya‸ hk'aˇ, nawˬ hui co ha te‸ ve hta‸ g'a tuˬ, ngaˬ geh laˬ tuˬ nawˬ hui nyi ma maˇ cawˬ. 41 Chaw yaˇ piˇ ve awˬ me‸ awˬ hponˇ hta‸ ngaˬ maˇ ha‸ yuˬ. 42 G'uiˬ sha ve ha‸ pehnˇ ve nawˬ hui awˬ hk'aw lo maˇ cawˬ ve hta‸ ngaˬ shiˍ ve yoˬ. 43 Ngaˬ lehˬ, ngaˬ Awˬ pa ve awˬ meh awˬ hk'aw lo laˬ ve htawˇ, nawˬ hui ngaˬ hta‸ maˇ ha‸ yuˬ. Awˬ kaˍ awˬ nu chaw teˇ g'aˇ a shu yawˇ ve awˬ meh awˬ hk'aw lo laˬ ve k'o, yawˇ hta‸ nawˬ hui ha‸ yuˬ tuˬ yoˬ. 44 Nawˬ hui teˇ g'aˇ leh teˇ g'aˇ piˇ ve awˬ me‸ awˬ hponˇ hta‸ ha‸ yuˬ leh, teˇ g'aˇ tiˉ hpeh‸ ve G'uiˬ sha piˇ ve awˬ me‸ awˬ hponˇ hta‸ maˇ ca ve nawˬ hui lehˬ, hk'aˬ hk'e te yonˍ hpeh‸ tuˬ le. 45 Awˬ pa mehˆ g'uˇ suhˍ ngaˬ nawˬ hui hta‸ venˇ baˆ taˍ laˇ tuˬ ve teh‸ taˇ dawˇ. Nawˬ hui hta‸ venˇ baˆ taˍ ve chaw teˇ g'aˇ cawˬ ve yoˬ. Yawˇ lehˬ, nawˬ hui g'aˇ va taˍ ve Moˉseˍ hpeh‸ ve yoˬ. 46 Moˉseˍ hta‸ nawˬ hui yonˍ ve hk'e k'o, ngaˬ hta‸ htawˇ nawˬ hui yonˍ tuˬ yoˬ. Awˬ lawn k'o, yawˇ ngaˬ ve awˬ lawn bvuh‸ taˍ ve yoˬ. 47 Yawˇ bvuh‸ taˍ ve li‸ teˇ hpaˍ hta‸ nawˬ hui maˇ yonˍ ve k'o, ngaˬ ve tawˇ hkawˇ hta‸ nawˬ hui hk'aˬ hk'e te yonˍ tuˬ le teh‸, yawˇ hui hta‸ k'oˆ piˇ ve yoˬ.

Yoˇhanˬ 6

1 Oˇ ve awˬ hk'aw‸ nawˉ, Yeˍsuˆ lehˬ, Tiˍbeˍriˆ teh‸ k'oˆ ve Gaˍliˍlehˇ g'uiˬ po coˇ paˉ lo hkanˍ k'ai ve yoˬ. 2 Naˬ ve gawˬ ve chaw teˇ hpaˍ awˬ hk'aw lo yawˇ te ve awˬ heˆ teˇ hpaˍ hta‸ chaw awˬ moˍ lonˉ g'a mawˬ ve pa taw, yawˇ hui yawˇ awˬ hk'aˇ suh k'ai ve yoˬ. 3 Oˇ htaˇ Yeˍsuˆ lehˬ, hk'aw pui hk'oˆ lo taˆ-e leh, oˇ kaˬ lo yawˇ ve awˬ la‸ g'awˇ teˇ hpaˍ geh mui taˍ ve yoˬ. 4 Oˇ htaˇ, Yuˇda‸ chaw hui ve Paˍsaˍhkaˍ pawehˇ te tuˬ awˬ yanˇ gaˬ la paˇ neˇ ve yoˬ. 5 Yeˍsuˆ chiˇ nyi leh, chaw awˬ moˍ lonˉ yawˇ geh laˬ chehˇ ve hta‸ g'a mawˬ ve teˇ yanˇ, yawˇ Hpiˇliˇpuˆ hta‸ k'oˆ piˇ ve, Chaw chi ma ve g'a caˇ tuˬ, ngaˬ hui hkaoˍ monˇ hk'aˬ lo ca vuiˬ tuˬ le teh‸ na nyi ve yoˬ. 6 Yawˇ chi hk'e na nyi ve lehˬ, Hpiˇliˇpuˆ hta‸ lawˇ nyi ve ceh yoˬ. Awˬ lawn k'o, hk'aˬ hk'e te tuˬ ve hta‸ Yeˍsuˆ yawˇ awˬ to shiˍ taˍ ve yoˬ. 7 Hpiˇliˇpuˆ k'aw‸ k'oˆ ve, Chaw chi ma ve hkaoˍ monˇ teˇ g'aˇ teˇ hk'eh‸ g'a caˇ tuˬ, hpu nyiˇ ha hteh‸ hpfuhˇ vuiˬ ve htawˇ maˇ law‸ taˬ teh‸, yawˇ hta‸ k'oˆ piˇ ve yoˬ. 8 Yawˇ ve awˬ la‸ g'awˇ teˇ hpaˍ awˬ hk'aw lo, Siˉmonˍ Peˍtruˆ ve awˬ nyi paˍ Anˍdrehˍ k'oˆ ve, 9 Cho‸ te taˍ ve hkaoˍ monˇ ngaˇ diˬ leh ngaˇ ehˉ nyiˇ hkeh cawˬ ve yaˇ paˍ ehˉ teˇ g'aˇ choˬ kaˬ chehˇ taˍ ve yoˬ. Ya‸ hk'aˇ, chaw chi ma ve awˬ pon chi teˇ hpaˍ ceh tiˉ aˬ hto‸ ma k'oˆ tuˬ cawˬ le teh, Yeˍsuˆ hta‸ k'oˆ piˇ ve yoˬ. 10 Yeˍsuˆ lehˬ, Chaw chi teˇ hpaˍ hta‸ mui tcuh-o teh‸ k'oˆ piˇ ve yoˬ. Oˇ kaˬ lo mvuh‸ de hpeh‸ ve yoˬ. Hk'e te leh, oˇ kaˬ lo mui taˍ ve chaw, hawˉ hk'aˆ ceh tiˉ ngaˇ hinˉ g'aˇ hk'e cawˬ ve yoˬ. 11 Oˇ htaˇ Yeˍsuˆ lehˬ, hkaoˍ monˇ oˇ ve teˇ hpaˍ hta‸ yuˬ leh, bon hta‸ chiˇ mvuh peuˬ hk'aw‸ nawˉ, mui chehˇ ve chaw teˇ hpaˍ hta‸ pehˬ piˇ ve yoˬ. Oˇ ve hk'a shuˍ shuˍ, ngaˇ shaˍ hta‸ htawˇ yawˇ hui caˇ gaˇ ve hk'e pehˬ piˇ ve yoˬ. 12 Yawˇ hui hk'a bvuhˆ g'a caˇ peuˬ hk'aw‸ nawˉ yawˇ k'oˆ ve, Te‸ chiˉ maˇ g'a mehˉ k'ai tuˬ, caˇ leuˉ taˍ ve teˇ hpaˍ hta‸ k'aw‸ g'awˆ-oˆ teh‸, yawˇ ve awˬ la‸ g'awˇ teˇ hpaˍ hta‸ k'oˆ piˇ ve yoˬ. 13 Hk'e te leh, yawˇ hui k'aw‸ g'awˆ ve teˇ yanˇ, cho‸ te taˍ ve hkaoˍ monˇ ngaˇ diˬ hta‸ caˇ leuˉ taˍ ve teˇ hpaˍ, teˇ chi nyiˇ hk'awˍ lawˇ g'a ve yoˬ. 14 Hk'e te leh, yawˇ te ve awˬ heˆ chi hta‸ chaw chi ma ve g'a mawˬ ve teˇ yanˇ, Chaw chi lehˬ, miˬ guiˬ hk'oˆ lo laˬ tuˬ ve G'uiˬ sha ve tcuh kaˍ paˍ awˬ tehˬ awˬ na hpeh‸ ve yoˬ teh‸, yawˇ hui k'oˆ da‸ ve yoˬ. 15 Chaw oˇ ve teˇ hpaˍ lehˬ, yawˇ hta‸ hkunˉ hawˉ hkanˇ nyiˉ te tcuh-a teh‸ dawˇ ve hta‸ Yeˍsuˆ shiˍ ve pa taw, yawˇ teˇ g'aˇ tiˉ hk'aw pui hk'oˆ lo k'aw‸ taˆ-e ve yoˬ. 16 Mvuhˇ hpeu‸ la htaˇ, yawˇ ve awˬ la‸ g'awˇ teˇ hpaˍ g'uiˬ po lo ya‸-e leh, 17 haw lo‸ k'oˍ hk'aw lo‸-e peuˬ hk'aw‸ nawˉ, g'uiˬ po coˇ paˉ Kaˍpeˍneˍonˍ venˇ lo hkanˍ k'ai ve yoˬ. Oˇ teˇ hkui mehˆ muiˉ naˆ jaˇ peuˬ ve ka‸, Yeˍsuˆ yawˇ hui geh maˇ gaˬ la sheˍ. 18 Mvuhˇ haw lonˉ meuˆ jaˇ leh, g'uiˬ baˇ taˆ la ve yoˬ. 19 Yawˇ hui haw lo‸ k'oˍ hta‸ shehˆ laˆ awˇ laˆ hk'e g'awˆ k'ai peuˬ ve teˇ yanˇ, Yeˍsuˆ g'uiˬ po awˬ hk'oˆ lo ya‸ k'aw juˇ leh, haw lo‸ k'oˍ awˬ paˇ lo laˬ chehˇ ve hta‸ yawˇ hui g'a mawˬ htaˇ kawˆ jaˇ ve yoˬ. 20 Yeˍsuˆ lehˬ, Ngaˬ yoˬ, taˇ kawˆ teh‸ yawˇ hui hta‸ k'oˆ piˇ ve yoˬ. 21 Hk'e te leh, yawˇ hui yawˇ hta‸ haw lo‸ k'oˍ awˬ hk'aw lo ha lehˬ ha k'a ha‸ yuˬ leh, haw lo‸ k'oˍ lehˬ yawˇ hui k'ai chehˇ ve teˇ kaˬ lo teˇ cawˬ haˉ gaˬ sheˬ ve yoˬ. 22 Awˬ hk'aw‸ nawˉ teˇ nyi g'uiˬ po coˇ paˉ lo chehˇ taˉ ve chaw awˬ moˍ lonˉ lehˬ, aˉ nyi htaˇ haw lo‸ k'oˍ ehˉ teˇ maˬ ceh tiˉ cawˬ taˍ ve hta‸ maˇ k'oˆ, Yeˍsuˆ lehˬ yawˇ ve awˬ la‸ g'awˇ teˇ hpaˍ geh teˇ geh haw lo‸ k'oˍ oˇ ve awˬ hk'aw lo maˇ lo‸-e leh, yawˇ ve awˬ la‸ g'awˇ teˇ hpaˍ ceh tiˉ k'ai ve hta‸ maˇ k'oˆ, yawˇ hui g'a mawˬ ve yoˬ. 23 Ya‸ hk'aˇ, Tiˍbeˍriˆ venˇ lo laˬ ve haw lo‸ k'oˍ ehˉ teˇ hpaˍ lehˬ, Jawˇ mawˇ Yeˍsuˆ bon hta‸ chiˇ mvuh peuˬ hk'aw‸ nawˉ yawˇ hui hkaoˍ monˇ g'a caˇ ve chehˇ kuiˬ awˬ paˇ lo gaˬ la ve yoˬ. 24 Hk'e te leh, Yeˍsuˆ leh yawˇ ve awˬ la‸ g'awˇ teˇ hpaˍ oˇ kaˬ lo maˇ chehˇ ve hta‸ chaw awˬ moˍ lonˉ g'a shiˍ ve teˇ yanˇ, haw lo‸ k'oˍ oˇ ve teˇ hpaˍ hta‸ yawˇ hui ciˇ leh, Yeˍsuˆ hta‸ ca nyi tuˬ Kaˍpeˍneˍonˍ venˇ lo k'ai ve yoˬ. 25 G'uiˬ po coˇ paˉ lo yawˇ hui Yeˍsuˆ hta‸ g'a mawˬ ve teˇ yanˇ, Raˍbiˆ-oˬ, nawˬ choˬ kaˬ lo hk'aˬ htaˆ laˬ ve le teh‸, yawˇ hui yawˇ hta‸ na nyi ve yoˬ. 26 Yeˍsuˆ k'aw‸ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, awˬ heˆ teˇ hpaˍ hta‸ nawˬ hui g'a mawˬ ve pa taw ngaˬ hta‸ ca ve maˇ heˆ. Hkaoˍ monˇ hk'a bvuhˆ g'a caˇ ve pa taw ceh nawˬ hui ngaˬ hta‸ ca ve yoˬ. 27 Luˬ puiˉ sheˆ puiˉ ve caˇ tuˬ hta‸ g'a tuˬ awˬ pon g'aˇ hte‸ taˇ te. Chaw yaˇ ve Yaˇ hpu nawˬ hui hta‸ pe‸ laˇ tuˬ ve caˇ tuˬ hta‸ g'a tuˬ awˬ pon g'aˇ hte‸ te-o. Caˇ tuˬ oˇ ve lehˬ, co ti‸ ha ti‸ g'a tuˬ awˬ pon yeˬ ve caˇ tuˬ dawˬ tuˬ hpeh‸ ve yoˬ. Awˬ lawn k'o, Awˬ pa G'uiˬ sha lehˬ chaw yaˇ ve Yaˇ hpu hta‸ yinˉ tcuhˉ taˍ peuˬ teh‸, yawˇ hui hta‸ k'oˆ piˇ ve yoˬ. 28 Hk'e te leh, yawˇ hui k'aw‸ k'oˆ ve, G'uiˬ sha ve kanˉ te tuˬ, ngaˬ hui hk'aˬ hk'e g'a te tuˬ le teh‸ yawˇ hta‸ na nyi htaˇ, 29 Yeˍsuˆ k'aw‸ k'oˆ ve, G'uiˬ sha ve kanˉ te ve teˇ ceuˬ lehˬ, yawˇ peu laˇ ve teˇ g'aˇ hta‸ yonˍ ve teˇ ceuˬ hpeh‸ ve yoˬ teh‸, yawˇ hui hta‸ k'aw‸ k'oˆ piˇ ve yoˬ. 30 Hk'e te leh yawˇ hui k'aw‸ k'oˆ ve, Ngaˬ hui g'a mawˬ leh nawˬ hta‸ g'a yonˍ tuˬ, nawˬ aˬ hto‸ ma awˬ heˆ te maˍ laˇ ve le. 31 Nawˬ aˬ hto‸ ma kanˉ te maˍ laˇ ve le. Awˬ puˍ aw‸ pi teˇ hpaˍ g'a caˇ tuˬ awˬ pon, mvuhˇ naw ma ve hkaoˍ monˇ yawˇ yawˇ hui hta‸ piˇ ve yoˬ teh‸ bvuh‸ taˍ ve hk'e, ngaˬ hui ve awˬ puˍ awˬ pi teˇ hpaˍ lehˬ, heh puiˉ hk'aw lo maˍnaˆ shi hta‸ g'a caˇ ve yoˬ teh‸, yawˇ hta‸ k'oˇ piˇ ve yoˬ. 32 Oˇ htaˇ Yeˍsuˆ k'aw‸ k'oˆ ve, Ngaˬ nawˬ hui hta‸ awˬ teh‸ awˬ na k'oˆ laˇ ve, mvuhˇ naw ma ve hkaoˍ monˇ nawˬ hui hta‸ pe‸ laˇ shehˍ hpaˇ lehˬ Moˉseˍ maˇ heˆ. Awˬ tehˬ awˬ na ve mvuhˇ naw ma ve hkaoˍ monˇ nawˬ hui hta‸ pe‸ laˇ shehˍ hpaˇ lehˬ ngaˬ Awˬ pa yoˬ. 33 Awˬ lawn k'o, G'uiˬ sha ve hkaoˍ monˇ lehˬ, mvuhˇ naw ma hk'oˆ lo ya‸ la leh, miˬ guiˬ yaˇ teˇ hpaˍ hta‸ co ha te‸ piˇ lawˬ ve hkaoˍ monˇ hpeh‸ ve yoˬ teh‸, yawˇ hui hta‸ k'oˆ piˇ ve yoˬ. 34 Yawˇ hui k'aw‸ k'oˆ ve, Jawˇ mawˇ-oˬ, hkaoˍ monˇ oˇ ve ngaˬ hui hta‸ hk'aˬ htaˆ ka‸ pe‸ laˇ-oˆ teh‸ yawˇ hta‸ k'oˆ piˇ ve yoˬ. 35 Yeˍsuˆ k'aw‸ k'oˆ ve, Ngaˬ lehˬ co ha te‸ piˇ lawˬ ve hkaoˍ monˇ hpeh‸ ve yoˬ. Ngaˬ geh laˬ ve chaw lehˬ, maˇ k'aw‸ meu‸-o. Ngaˬ hta‸ yonˍ ve chaw lehˬ, iˉ kaˆ teˇ pawˆ ka‸ maˇ k'aw‸ shiˉ-o. 36 Ya‸ hk'aˇ, nawˬ hui ngaˬ hta‸ mawˬ ve htawˇ maˇ yonˍ teh‸ ngaˬ nawˬ hui hta‸ k'oˆ laˇ peuˬ. 37 Awˬ pa ngaˬ hta‸ hk'a pe‸ laˇ ve chaw hui lehˬ, ngaˬ geh laˬ tuˬ yoˬ. Ngaˬ geh laˬ ve chaw hta‸ ngaˬ maˇ chiˇ baˬ. 38 Awˬ lawn k'o, ngaˬ mvuhˇ naw ma hk'oˆ lo ya‸ la ve lehˬ, ngaˬ ve a loˍ hta‸ te tuˬ ya‸ la ve maˇ heˆ. Ngaˬ hta‸ peu laˇ shehˍ hpaˇ ve a loˍ hta‸ te tuˬ awˬ pon ngaˬ ya‸ la ve yoˬ. 39 Ngaˬ hta‸ peu laˇ shehˍ hpaˇ ve a loˍ lehˬ chi hk'e yoˬ. Yawˇ ngaˬ hta‸ hk'a pe‸ laˇ peuˬ ve chaw teˇ hpaˍ teˇ g'aˇ ka‸ maˇ g'a mehˉ k'ai leh, awˬ leh meuˇ ve awˬ nyi awˬ hk'aw lo yawˇ hui hk'a peu-eˬ hta‸ k'aw‸ te‸ tu la piˇ tuˬ yoˬ. 40 Yaˇ hpu hta‸ mawˬ leh yonˍ ve chaw teˇ g'aˇ le le co ti‸ ha ti‸ g'a tuˬ, ngaˬ Awˬ pa a loˍ cawˇ ve yoˬ. Awˬ leh meuˇ ve awˬ nyi awˬ hk'aw lo chaw oˇ ve teˇ hpaˍ hta‸ ngaˬ k'aw‸ te‸ tu la piˇ tuˬ yoˬ teh‸ yawˇ hui hta‸ k'oˆ piˇ ve yoˬ. 41 Ngaˬ lehˬ mvuhˇ naw ma hk'oˆ lo ya‸ la ve hkaoˍ monˇ yoˬ teh‸ yawˇ k'oˆ ve pa taw, Yuˇda‸ chaw teˇ hpaˍ yawˇ hta‸ ca beu ca hk'aiˉ ve yoˬ. 42 Chaw chi lehˬ, Yoˇseh‸ ve yaˇ paˍ Yeˍsuˆ maˇ heˆ laˇ. Yawˇ ve awˬ pa awˬ e hta‸ ngaˬ hui shiˍ taˍ ve maˇ heˆ laˇ. Ngaˬ mvuhˇ naw ma hk'oˆ lo ya‸ la ve yoˬ teh‸, chi beu‸ yawˇ hk'aˬ hk'e te k'oˆ hpeh‸ ve le teh‸, yawˇ hui k'oˆ da‸ ve yoˬ. 43 Oˇ htaˇ Yeˍsuˆ k'oˆ ve, Nawˬ hui ngaˬ hta‸ taˇ beu taˇ hk'aiˉ . 44 Ngaˬ hta‸ peu laˇ shehˍ hpaˇ Awˬ pa lehˬ, shu hta‸ ngaˬ geh lo maˇ g'awˬ veu laˇ ve k'o, chaw teˇ g'aˇ ka‸ ngaˬ geh laˬ maˇ hpeh‸. Ngaˬ geh g'awˬ veu laˇ ve chaw hta‸ awˬ leh meuˇ ve awˬ nyi awˬ hk'aw lo ngaˬ k'aw‸ te‸ tu la piˇ tuˬ yoˬ. 45 G'uiˬ sha ve tcuh kaˍ paˍ teˇ hpaˍ ve li‸ awˬ hk'aw lo, G'uiˬ sha lehˬ yawˇ hui hk'a peu-eˬ hta‸ maˍ piˇ tuˬ yoˬ teh‸ bvuh‸ taˍ ve yoˬ. Awˬ pa geh hk'a g'a kaˇ leh hk'a g'a henˇ peuˬ ve chaw teˇ g'aˇ le le lehˬ, ngaˬ geh laˬ ve yoˬ. 46 Chaw teˇ g'a ka‸ Awˬ pa hta‸ maˇ mawˬ jaw. G'uiˬ sha lo laˬ ve teˇ g'aˇ ceh tiˉ Awˬ pa hta‸ mawˬ jaw ve yoˬ. 47 Ngaˬ nawˬ hui hta‸ awˬ tehˬ awˬ na k'oˆ laˇ ve, yonˍ ve chaw lehˬ, co ti‸ ha ti‸ cawˬ taˍ ve yoˬ. 48 Ngaˬ lehˬ, co ha te‸ piˇ lawˬ ve hkaoˍ monˇ hpeh‸ ve yoˬ. 49 Nawˬ hui ve awˬ puˍ awˬ pi teˇ hpaˍ lehˬ, heh puiˉ hk'aw lo maˍnaˆ shiˍ hta‸ g'a caˇ ve htawˇ, yawˇ hui suh ve yoˬ. 50 Hkaoˍ monˇ chi hta‸ g'a caˇ ve chaw maˇ g'a suh tuˬ, hkaoˍ monˇ chi lehˬ mvuhˇ naw ma hk'oˆ lo ya‸ la ve yoˬ. 51 Ngaˬ lehˬ, mvuhˇ naw ma hk'oˆ lo ya‸ la ve co ha te‸ piˇ lawˬ ve hkaoˍ monˇ hpeh‸ ve yoˬ. Hkaoˍ monˇ chi hta‸ g'a caˇ ve chaw lehˬ, co co taiˍ taiˍ co ha te‸ tuˬ yoˬ. Miˬ guiˬ yaˇ co ha g'a te‸ tuˬ ve awˬ pon, ngaˬ piˇ tuˬ ve hkaoˍ monˇ lehˬ, ngaˬ ve awˬ shaˍ yoˬ teh‸, yawˇ hui hta‸ k'oˆ piˇ ve yoˬ. 52 Hk'e te leh, Yuˇda‸ chaw teˇ hpaˍ k'oˆ ve, Chaw chi lehˬ, yawˇ ve awˬ shaˍ ngaˬ hui hta‸ hk'aˬ hk'e te caˍ laˇ hpeh‸ tuˬ le teh‸, teˇ g'aˇ leh teˇ g'aˇ tawˇ g'awˬ da‸ ve yoˬ. 53 Yeˍsuˆ k'aw‸ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, chaw yaˇ ve Yaˇ hpu ve awˬ shaˍ hta‸ maˇ caˇ leh yawˇ ve awˬ suhˍ hta‸ maˇ dawˬ ve k'o, nawˬ hui awˬ hk'aw lo co ha te‸ ve teˇ ceuˬ maˇ cawˬ. 54 Ngaˬ ve awˬ shaˍ hta‸ caˇ leh ngaˬ ve awˬ suhˍ hta‸ dawˬ ve chaw lehˬ, co ti‸ ha ti‸ cawˬ taˍ ve yoˬ. Awˬ leh meuˇ teˇ nyi awˬ hk'aw lo ngaˬ yawˇ hta‸ k'aw‸ te‸ tu la piˇ tuˬ yoˬ. 55 Awˬ lawn k'o, ngaˬ ve awˬ shaˍ lehˬ, awˬ tehˬ awˬ na caˇ tuˬ hpeh‸ ve yoˬ. Ngaˬ ve awˬ suhˍ htawˇ awˬ tehˬ awˬ na dawˬ tuˬ hpeh‸ ve yoˬ. 56 Ngaˬ ve awˬ shaˍ hta‸ caˇ leh ngaˬ ve awˬ suhˍ hta‸ dawˬ ve chaw lehˬ, ngaˬ awˬ hk'aw lo chehˇ leh, ngaˬ htawˇ yawˇ awˬ hk'aw lo chehˇ ve yoˬ. 57 Te‸ chehˇ ve Awˬ pa ngaˬ hta‸ peu laˇ leh, yawˇ hta‸ pa taw ngaˬ te‸ chehˇ ve hk'e, ngaˬ hta‸ caˇ ve chaw htawˇ, ngaˬ hta‸ pa taw co ha te‸ chehˇ tuˬ yoˬ. 58 Hkaoˍ monˇ chi lehˬ, awˬ puˍ awˬ pi hui g'a caˇ ve hkaoˍ monˇ hk'a shuˍ shuˍ hpeh‸ ve maˇ heˆ. Hkaoˍ monˇ oˇ ve hta‸ yawˇ hui g'a caˇ ve htawˇ suh ve yoˬ. Hkaoˍ monˇ chi lehˬ, mvuhˇ naw ma hk'oˆ lo ya‸ la ve yoˬ. Hkaoˍ monˇ chi hta‸ caˇ ve chaw lehˬ, co co taiˍ taiˍ co ha g'a te‸ tuˬ yoˬ teh‸ yawˇ hui hta‸ k'oˆ piˇ ve yoˬ. 59 Kaˍpeˍneˍonˍ venˇ lo cawˬ ve bon yehˬ awˬ hk'aw lo yawˇ maˍ piˇ chehˇ htaˇ, awˬ lawn chi teˇ hpaˍ hta‸ yawˇ k'oˆ ve yoˬ. 60 Yawˇ ve awˬ la‸ g'awˇ hui tawˇ oˇ ve hta‸ g'a kaˇ ve teˇ yanˇ, yawˇ hui laiˉ g'aˇ k'oˆ ve, Tawˇ chi lehˬ haˍ jaˇ ve yoˬ. A shu na hpeh‸ tuˬ le teh‸ k'oˆ da‸ ve yoˬ. 61 Awˬ lawn chi yawˇ ve awˬ la‸ g'awˇ teˇ hpaˍ ca beu ca hk'aiˉ chehˇ ve hta‸ Yeˍsuˆ yawˇ ve nyi ma awˬ hk'aw lo shiˍ ve teˇ yanˇ yawˇ k'oˆ ve, Tawˇ chi ve hta‸ pa taw nawˬ hui nyi ma luˬ ve leh laˇ. 62 Chaw yaˇ ve Yaˇ hpu lehˬ, awˉ lawˉ chehˇ jaw kuiˬ lo k'aw‸ taˆ k'o‸-e chehˇ ve hta‸ nawˬ hui g'a mawˬ ve k'o, hk'aˬ hk'e dawˇ tuˬ ve le. 63 Co ha te‸ piˇ lawˬ ve teˇ ceuˬ lehˬ, awˬ ha yoˬ. Awˬ shaˍ lehˬ, te‸ chiˉ te maˇ g'a. Ngaˬ nawˬ hui hta‸ k'oˆ laˇ ve tawˇ hkawˇ teˇ hpaˍ lehˬ, awˬ ha hpeh‸ ve yoˬ. Co ha te‸ ve teˇ ceuˬ ka‸ hpeh‸ ve yoˬ. 64 Ya‸ hk'aˇ, nawˬ hui awˬ hk'aw lo chaw teˇ hpaˍ hpaˍ maˇ yonˍ teh‸, yawˇ hui hta‸ k'oˆ piˇ ve yoˬ. Awˬ lawn k'o, maˇ yonˍ ve chaw teˇ hpaˍ a shu hpeh‸ ve hta‸ maˇ k'oˆ, yawˇ hta‸ chiˇ a‸ piˇ tuˬ ve chaw teˇ g'aˇ a shu hpeh‸ ve hta‸ maˇ k'oˆ, awˬ hkuiˉ puiˍ htaˇ ka‸ Yeˍsuˆ shiˍ taˍ ve yoˬ. 65 Yawˇ k'oˆ ve, Hk'e te leh ngaˬ Awˬ pa a hkaw-anˬ maˇ piˇ ve k'o, chaw teˇ g'aˇ ka‸ ngaˬ geh laˬ maˇ hpeh‸ teh‸, ngaˬ nawˬ hui hta‸ k'oˆ laˇ taˍ peuˬ teh‸ k'oˆ ve yoˬ. 66 Oˇ ve awˬ hk'aw‸ nawˉ yawˇ ve awˬ la‸ g'awˇ laiˉ g'aˇ k'aw‸ hpfuhˆ k'o‸-e leh yawˇ geh maˇ k'aw‸ te toˇ ve yoˬ. 67 Nawˬ hui htawˇ k'aw‸ k'o‸-e tuˬ ve laˇ teh‸, tcuh yaˇ teˇ chi nyiˇ g'aˇ hta‸ Yeˍsuˆ na nyi ve yoˬ. 68 Siˉmonˍ Peˍtruˆ k'aw‸ k'oˆ ve, Jawˇ mawˇ-oˬ, ngaˬ hui a shu geh k'ai tuˬ ve le. Nawˬ lehˬ co ti‸ ha ti‸ ve tawˇ hkawˇ cawˬ taˍ ve yoˬ. 69 Nawˬ lehˬ G'uiˬ sha ve da‸ kehˬ shehˍ hpaˇ teˇ g'aˇ hpeh‸ ve hta‸ ngaˬ hui yonˍ taˍ leh shiˍ taˍ peuˬ teh‸ yawˇ hta‸ k'oˆ piˇ ve yoˬ. 70 Yeˍsuˆ k'aw‸ k'oˆ ve, Ngaˬ nawˬ hui teˇ chi nyiˇ g'aˇ hta‸ leuˆ yuˬ taˍ ve maˇ heˆ laˇ. Ya‸ hk'aˇ, nawˬ hui awˬ hk'aw lo teˇ g'aˇ lehˬ, neˇ haiˬ hpeh‸ ve yoˬ teh‸, yawˇ hui hta‸ k'oˆ piˇ ve yoˬ. 71 Yawˇ chi hk'e k'oˆ ve lehˬ, Siˉmonˍ Iˉsaˍkaˍriˍoˆ ve yaˇ Yuˇda‸ hta‸ k'oˆ gaˇ ve yoˬ. Awˬ lawn k'o, yawˇ lehˬ tcuh yaˇ teˇ chi nyiˇ g'aˇ awˬ hk'aw lo chehˇ leh, Yeˍsuˆ hta‸ chiˇ a‸ piˇ tuˬ ve teˇ g'aˇ hpeh‸ ve yoˬ.

Yoˇhanˬ 7

1 Oˇ ve awˬ hk'aw‸ nawˉ Yeˍsuˆ lehˬ, Gaˍliˍlehˇ mvuhˇ miˬ awˬ hk'aw lo teˇ kaˬ peuˬ teˇ kaˬ k'ai ve yoˬ. Yuˇda‸ chaw teˇ hpaˍ yawˇ hta‸ tiˇ pehˍ tuˬ ca chehˇ ve pa taw, Yuˇda‸ mvuhˇ miˬ awˬ hk'aw lo yawˇ maˇ k'ai. 2 Oˇ htaˇ, Yuˇda‸ chaw hui Aˉ po k'o pawehˇ te ve awˬ yanˇ gaˬ la paˇ neˇ ve yoˬ. 3 Yawˇ ve awˬ nyi paˍ teˇ hpaˍ k'oˆ ve, Nawˬ te ve kanˉ teˇ hpaˍ hta‸ nawˬ ve awˬ la‸ g'awˇ hui g'a mawˬ tuˬ, choˬ kaˬ lo tawˆ k'ai leh Yuˇda‸ mvuhˇ miˬ lo k'ai-o. 4 Awˬ lawn k'o, a shu yawˇ ve awˬ meh bvuhˬ k'ai tuˬ heuˆ gaˇ ve chaw teˇ g'aˇ lehˬ, baˬ kuiˬ lo yawˇ te‸ chiˉ maˇ te. Kanˉ chi teˇ hpaˍ hta‸ nawˬ te ve k'o, miˬ guiˬ yaˇ hui hta‸ nawˬ awˬ to hk'a tawˍ lehˆ maˍ piˇ-oˆ teh‸, yawˇ hta‸ k'oˆ piˇ ve yoˬ. 5 Awˬ lawn k'o, yawˇ ve awˬ nyi paˍ teˇ hpaˍ ka‸ yawˇ hta‸ maˇ yonˍ. 6 Hk'e te leh Yeˍsuˆ k'oˆ ve, Ngaˬ ve awˬ yanˇ maˇ gaˬ sheˍ. Ya‸ hk'aˇ, nawˬ hui awˬ pon hk'aˬ htaˆ ka‸ awˬ yanˇ cawˇ ve yoˬ. 7 Miˬ guiˬ yaˇ nawˬ hui hta‸ canˇ maˇ hpeh‸. Ya‸ hk'aˇ ngaˬ hta‸ canˇ ve yoˬ. Awˬ lawn k'o, yawˇ hui te ve kanˉ lehˬ haiˬ ve yoˬ teh‸ ngaˬ shaˉ hkiˆ hkanˍ ve pa taw yoˬ. 8 Pawehˇ oˇ ve awˬ hk'aw lo nawˬ hui k'ai-o. Ngaˬ ve awˬ yanˇ hk'a deh‸ maˇ gaˬ sheˍ ve pa taw, pawehˇ oˇ ve awˬ hk'aw lo ngaˬ maˇ k'ai sheˍ teh‸, yawˇ hui hta‸ k'oˆ piˇ ve yoˬ. 9 Yawˇ oˇ hk'e k'oˆ piˇ peuˬ leh, Gaˍliˍlehˇ mvuhˇ miˬ awˬ hk'aw lo chehˇ taˉ ve yoˬ. 10 Yawˇ ve awˬ nyi paˍ teˇ hpaˍ pawehˇ oˇ ve awˬ hk'aw lo k'ai peuˬ hk'aw‸ nawˉ, yawˇ htawˇ shu hta‸ maˇ mawˬ tcuh leh ta‸ iˉ gawˬ lehˍ k'ai ve yoˬ. 11 Pawehˇ oˇ ve awˬ hk'aw lo Yuˇda‸ chaw teˇ hpaˍ yawˇ hta‸ ca leh, Yawˇ hk'aˬ lo chehˇ le teh‸ na nyi da‸ ve yoˬ. 12 Chaw awˬ moˍ lonˉ awˬ hk'aw lo yawˇ awˬ lawn tawˇ g'awˬ da‸ chehˇ ve yoˬ. Teˇ hpaˍ hpaˍ lehˬ, Yawˇ chaw da‸ hpeh‸ ve yoˬ teh‸ k'oˆ ve yoˬ. Teˇ hpaˍ hpaˍ lehˬ, Yawˇ chaw da‸ hpeh‸ ve maˇ heˆ. Chaw chi ma ve hta‸ ya‸ k'aw sheh ya‸ chehˇ ve chaw hpeh‸ ve yoˬ teh‸ k'oˆ ve yoˬ. 13 Ya‸ hk'aˇ, Yuˇda‸ chaw hui hta‸ kawˆ ve pa taw, chaw teˇ g'aˇ ka‸ yawˇ awˬ lawn hk'a tawˍ lehˆ k'oˆ maˇ haˆ. 14 Pawehˇ oˇ ve te leh awˬ k'aw ji hk'eun la ve teˇ yanˇ, Yeˍsuˆ bon yehˬ lonˉ awˬ hk'aw lo taˆ-e leh maˍ piˇ ve yoˬ. 15 Hk'e te leh Yuˇda‸ chaw teˇ hpaˍ anˇ leh, Chaw chi lehˬ li‸ maˇ henˇ jaw ve ka‸, hk'aˬ hk'e te chi taw taw shiˍ ve le teh‸ k'oˆ da‸ ve yoˬ. 16 Yeˍsuˆ k'aw‸ k'oˆ ve, Ngaˬ maˍ piˇ ve tawˇ hkawˇ lehˬ, ngaˬ ve tawˇ hkawˇ maˇ heˆ. Ngaˬ hta‸ peu laˇ shehˍ hpaˇ ve tawˇ hkawˇ hpeh‸ ve yoˬ. 17 G'uiˬ sha ve a loˍ hta‸ te gaˇ ve chaw lehˬ, ngaˬ maˍ piˇ ve tawˇ hkawˇ chi, G'uiˬ sha lo laˬ ve tawˇ hkawˇ hpeh‸ ve leh naˍ, maˇ heˆ k'o, ngaˬ hk'aˇ ngaˬ k'oˆ ve tawˇ hkawˇ hpeh‸ ve leh naˍ, yawˇ shiˍ tuˬ yoˬ. 18 A shu yawˇ hk'aˇ yawˇ k'oˆ ve chaw lehˬ, a shu yawˇ awˬ pon awˬ me‸ awˇ hponˇ ca ve yoˬ. Ya‸ hk'aˇ, yawˇ hta‸ peu laˇ shehˍ hpaˇ awˬ pon awˬ me‸ awˬ hponˇ ca ve chaw lehˬ, hteˇ ve cawˇ ve chaw hpeh‸ leh, yawˇ awˬ hk'aw lo heˍ ve awˬ ceuˬ maˇ cawˬ. 19 Moˉseˍ lehˬ, nawˬ hui hta‸ awˬ liˇ tawˇ hkawˇ pe‸ laˇ taˍ ve maˇ heˆ laˇ. Ya‸ hk'aˇ, awˬ liˇ tawˇ hkawˇ oˇ ve hta‸ nawˬ hui teˇ g'aˇ ka‸ maˇ na yuˬ. Aˬ hto‸ ma pa taw nawˬ hui ngaˬ hta‸ tiˇ pehˍ tuˬ ca ve le teh‸ yawˇ hui hta‸ k'oˆ piˇ ve yoˬ. 20 Chaw awˬ moˍ lonˉ k'aw‸ k'oˆ ve, Nawˬ lehˬ neˇ geh ve chaw hpeh‸ ve yoˬ. Nawˬ hta‸ tiˇ pehˍ tuˬ a shu ca ve le teh‸ k'oˆ ve yoˬ. 21 Yeˍsuˆ k'aw‸ k'oˇ ve, Ngaˬ kanˉ teˇ maˬ te leh, nawˬ hui hk'a peu-eˬ anˇ ve yoˬ. 22 Moˉseˍ lehˬ, awˬ guiˬ meuˇ shoˍ ve awˬ liˇ nawˬ hui hta‸ pe‸ laˇ taˍ ve yoˬ. (Awˬ tehˬ k'oˆ k'o, Moˉseˍ geh awˉ lawˉ laˬ ve maˇ heˆ. Awˬ puˍ awˬ pi teˇ hpaˍ geh awˉ lawˉ laˬ ve yoˬ.) Shinˉ nyi htaˇ ka‸ nawˬ hui chaw hta‸ awˬ guiˬ meuˇ shoˍ piˇ ve yoˬ. 23 Moˉseˍ ve awˬ liˇ tawˇ hkawˇ hta‸ maˇ g'a te luˬ tuˬ, shinˉ nyi teˇ nyi awˬ hk'aw lo ka‸ chaw yaˇ hta‸ nawˬ hui awˬ guiˬ meuˇ shoˍ piˇ ve law k'o, ngaˬ lehˬ shinˉ nyi teˇ nyi awˬ hk'aw lo chaw teˇ g'aˇ ve awˬ to hk'a peu-eˬ hta‸ gu na-e piˇ ve pa taw, nawˬ hui ngaˬ hta‸ nyi ma zuhˆ ve laˇ. 24 Nawˬ hui g'a mawˬ ve awˬ ceuˬ hta‸ ceh nyi leh suhˉ jehˬ ve taˇ te. Hteˇ ve cawˇ ve awˬ hk'aw lo ceh tiˉ suhˉ jehˬ-o‸ teh‸, yawˇ hui hta‸ k'oˆ piˇ ve yoˬ. 25 Hk'e te leh, Yeˍruˆsaˍlehnˍ venˇ yaˇ teˇ hpaˍ hpaˍ k'oˆ ve, Yawˇ hui tiˇ pehˍ tuˬ ca chehˇ ve lehˬ, chaw chi hpaˇ maˇ heˆ laˇ. 26 Nyi sheˍ. Yawˇ hk'a tawˍ lehˆ maˍ piˇ chehˇ ve ka‸, shu yawˇ hta‸ te‸ chiˉ maˇ k'oˆ. Chaw chi hpaˇ lehˬ, Hkri‸ hpeh‸ ve hta‸ jawˇ mawˇ teˇ hpaˍ awˬ tehˬ awˬ na shiˍ ve leh naˍ. 27 Ya‸ hk'aˇ, chaw chi hpaˇ hk'aˬ lo tawˆ la ve hta‸ ngaˬ hui shiˍ ve yoˬ. Hkri‸ laˬ ve teˇ yanˇ, yawˇ hk'aˬ lo tawˆ la tuˬ ve hta‸ chaw teˇ g'aˇ ka‸ shiˍ tuˬ maˇ heˆ teh‸ yawˇ hui k'oˆ da‸ ve yoˬ. 28 Hk'e te leh, Yeˍsuˆ bon yehˬ lonˉ awˬ hk'aw lo maˍ piˇ chehˇ htaˇ yawˇ kuˬ leh k'oˆ ve, Nawˬ hui ngaˬ hta‸ shiˍ ve yoˬ. Ngaˬ hk'aˬ lo tawˆ la ve hta‸ ka‸ nawˬ hui shiˍ ve yoˬ. Ya‸ hk'aˇ, ngaˬ hk'aˇ ngaˬ laˬ gaˇ leh laˬ ve maˇ heˆ. Ngaˬ hta‸ peu laˇ shehˍ hpaˇ lehˬ, hteˇ ve cawˇ ve yoˬ. Nawˬ hui yawˇ hta‸ maˇ shiˍ. 29 Ngaˬ lehˬ yawˇ hta‸ shiˍ ve yoˬ. Awˬ lawn k'o, ngaˬ yawˇ geh lo laˬ leh, yawˇ ngaˬ hta‸ peu laˇ ve yoˬ teh‸ k'oˆ ve yoˬ. 30 Hk'e te leh, yawˇ hui yawˇ hta‸ hpeh yuˬ tuˬ te ve yoˬ. Ya‸ hk'aˇ, yawˇ ve awˬ yanˇ maˇ gaˬ sheˍ ve pa taw, chaw teˇ g'aˇ ka‸ yawˇ hta‸ maˇ ca hpeh yuˬ. 31 Chaw awˬ moˍ lonˉ awˬ hk'aw lo chaw laiˉ g'aˇ yawˇ hta‸ yonˍ ve yoˬ. Yawˇ hui k'oˆ ve, Hkri‸ laˬ ve teˇ yanˇ, chaw chi teˇ g'aˇ te ve awˬ heˆ teˇ hpaˍ a‸ kehˉ yawˇ te tuˬ laˇ teh‸ k'oˆ da‸ ve yoˬ. 32 Chaw awˬ moˍ lonˉ lehˬ, yawˇ ve awˬ lawn k'oˆ da‸ g'awˬ da‸ chehˇ ve hta‸ Hpaˍriˍsehˇ hui g'a kaˇ htaˇ, paw hkuˇ lonˉ teˇ hpaˍ leh Hpaˍriˍsehˇ teˇ hpaˍ lehˬ, yawˇ hta‸ hpeh yuˬ tuˬ bon yehˬ lonˉ ve ma‸ yaˇ teˇ hpaˍ hta‸ k'ai tcuh ve yoˬ. 33 Hk'e te leh Yeˍsuˆ k'oˆ ve, Ngaˬ nawˬ hui geh teˇ hkui teˇ yanˇ chehˇ peuˬ hk'aw‸ nawˉ, ngaˬ hta‸ peu laˇ shehˍ hpaˇ geh lo k'aw‸ k'o‸-e tuˬ yoˬ. 34 Nawˬ hui ngaˬ hta‸ ca tuˬ yoˬ. Ca ve htawˇ mawˬ tuˬ maˇ heˆ. Ngaˬ ve chehˇ kuiˬ lo nawˬ hui laˬ maˇ hpeh‸ teh‸ yawˇ hui hta‸ k'oˆ piˇ ve yoˬ. 35 Hk'e te leh Yuˇda‸ chaw teˇ hpaˍ k'oˆ da‸ ve, Ngaˬ hui yawˇ hta‸ maˇ g'a mawˬ tuˬ yawˇ hk'aˬ lo k'ai tuˬ ve le. Hpaˆ da‸ leh Heˍlaˍsaˆ chaw hui geh ca chehˇ k'ai peuˬ ve chaw hui ve chehˇ kuiˬ lo k'ai leh, Heˍlaˍsaˆ chaw hui hta‸ yawˇ ca maˍ piˇ tuˬ ve laˇ. 36 Nawˬ hui ngaˬ hta‸ ca tuˬ yoˬ. Ca ve htawˇ mawˬ tuˬ maˇ heˆ. Ngaˬ ve chehˇ kuiˬ lo nawˬ hui laˬ maˇ hpeh‸ teh‸ yawˇ k'oˆ ve tawˇ lehˬ, hk'aˬ hk'e k'oˆ gaˇ ve leh naˍ teh‸, yawˇ hui teˇ g'aˇ leh teˇ g'aˇ k'oˆ da‸ ve yoˬ. 37 Pawehˇ te ve awˬ leh meuˇ teˇ nyi, awˬ nyi uiˍ ve teˇ nyi awˬ hk'aw lo, Yeˍsuˆ huˉ taˍ leh kuˬ ve, Iˉ kaˆ shiˉ ve chaw cawˬ k'o, ngaˬ geh ca dawˬ la-o. 38 Ngaˬ hta‸ yonˍ ve chaw lehˬ, Li‸ hpu awˬ hk'aw lo bvuh‸ taˍ ve hk'e, Yawˇ ve nyi ma awˬ hk'aw lo co ha te‸ piˇ lawˬ ve iˉ kaˆ lawˬ teˇ hpaˍ tawˆ la leh yoˬ ya‸-e tuˬ yoˬ teh‸ k'oˆ ve yoˬ. 39 Yawˇ chi hk'e k'oˆ ve lehˬ, yawˇ hta‸ yonˍ ve chaw hui g'a tuˬ ve Awˬ ha hpu awˬ lawn hta‸ k'oˆ ve yoˬ. Awˬ lawn k'o, Yeˍsuˆ lehˬ awˬ me‸ awˬ hponˇ hta‸ maˇ g'a sheˍ ve pa taw, G'uiˬ sha lehˬ Awˬ ha hpu maˇ pe‸ laˇ sheˍ. 40 Chi hk'e k'oˆ ve hta‸ g'a kaˇ ve teˇ yanˇ, chaw teˇ hpaˍ hpaˍ lehˬ, Chi teˇ g'aˇ awˬ tehˬ awˬ na G'uiˬ sha ve tcuhˍ kaˍ paˍ oˇ ve teˇ g'aˇ hpeh‸ ve yoˬ teh‸ k'oˆ ve yoˬ. 41 Teˇ hpaˍ hpaˍ k'oˆ ve, Chi teˇ g'aˇ lehˬ, Hkri‸ hpeh‸ ve yoˬ. Ya‸ hk'aˇ teˇ hpaˍ hpaˍ k'oˆ ve, Hkri‸ lehˬ Gaˍliˍlehˇ mvuhˇ miˬ awˬ hk'aw lo tawˆ la tuˬ laˇ. 42 Hkri‸ lehˬ Daˍviˆ ve awˬ ceuˬ awˬ hk'aˇ hpeh‸ leh Daˍviˆ ve chehˇ kuiˬ Behˍlehˍhehnˍ hk'aˆ lo tawˆ la tuˬ yoˬ teh‸, Li‸ hpu awˬ hk'aw lo bvuh‸ taˍ ve maˇ heˆ laˇ teh‸ k'oˆ da‸ ve yoˬ. 43 Hk'e te leh, yawˇ ve awˬ lawn hta‸ pa taw chaw chi ma ve nyi ma maˇ hawˍ da‸. 44 Yawˇ hui teˇ hpaˍ hpaˍ yawˇ hta‸ hpeh yuˬ gaˇ ve yoˬ. Ya‸ hk'aˇ, chaw teˇ g'aˇ ka‸ yawˇ hta‸ maˇ ca hpeh yuˬ. 45 Oˇ htaˇ, bon yehˬ lonˉ ve ma‸ yaˇ teˇ hpaˍ lehˬ, paw hkuˇ lonˉ hui leh Hpaˍriˍsehˇ hui geh k'aw‸ la ve yoˬ. Paw hkuˇ lonˉ hui leh Hpaˍriˍsehˇ hui k'oˆ ve, Aˬ hto‸ ma te nawˬ hui yawˇ hta‸ maˇ yuˬ laˬ ve le teh‸ na nyi ve teˇ yanˇ, 46 bon yehˬ lonˉ ve ma‸ yaˇ teˇ hpaˍ k'aw‸ k'oˆ ve, Chaw oˇ ve teˇ g'aˇ maˍ piˇ ve hk'a shuˍ shuˍ chaw teˇ g'aˇ ka‸ maˇ maˍ piˇ jaw teh‸ k'oˇ ve yoˬ. 47 Hpaˍriˍsehˇ hui k'aw‸ k'oˆ ve, Nawˬ hui hta‸ htawˇ yawˇ heˍ g'a peuˬ laˇ. 48 Jawˇ mawˇ teˇ hpaˍ awˬ hk'aw lo maˇ k'oˆ, Hpaˍriˍsehˇ teˇ hpaˍ awˬ hk'aw lo maˇ k'oˆ, yawˇ hta‸ yonˍ ve chaw teˇ g'aˇ g'aˇ cawˬ laˇ. 49 Awˬ liˇ tawˇ hkawˇ hta‸ maˇ shiˍ ve chaw chi teˇ hpaˍ lehˬ, hkeu ve hta‸ g'a hkanˍ ve chaw hpeh‸ ve yoˬ teh‸ yawˇ hui hta‸ k'oˆ piˇ ve yoˬ. 50 Yawˇ hui awˬ hk'aw lo chehˇ ve, awˉ lawˉ htaˇ Yeˍsuˆ geh laˬ jaw ve Niˆkawˇdeˍ teˇ g'aˇ k'oˆ ve, 51 Ngaˬ hui ve awˬ liˇ tawˇ hkawˇ lehˬ, chaw teˇ g'aˇ yawˇ k'oˆ ve tawˇ hkawˇ hta‸ maˇ g'a kaˇ leh yawˇ te ve hta‸ maˇ g'a shiˍ ve ceh ceh, yawˇ hta‸ suhˉ taˆ ve awˬ liˇ cawˬ laˇ teh‸, yawˇ hui hta‸ k'oˆ piˇ ve yoˬ. 52 Yawˇ hui k'aw‸ k'oˆ ve, Nawˬ htawˇ Gaˍliˍlehˇ chaw hpeh‸ ve laˇ. Nawˬ hk'a deh‸ chaˬ nyi sheˍ. Gaˍliˍlehˇ mvuhˇ miˬ awˬ hk'aw lo G'uiˬ sha ve tcuh kaˍ paˍ teˇ g'aˇ ka‸ maˇ tawˆ la ve hta‸ nawˬ g'a mawˬ tuˬ yoˬ teh‸ k'oˆ ve yoˬ. 53 Oˇ htaˇ yawˇ hui lehˬ, a shu yawˇ ve aˉ hk'aw lo k'o‸-e ve yoˬ.

Yoˇhanˬ 8

1 Yeˍsuˆ lehˬ, Shaˍlonˍ hk'aw hk'oˆ lo taˆ-e ve yoˬ. 2 Mvuhˇ shawˉ teˇ na‸ bon yehˬ lonˉ awˬ hk'aw lo yawˇ teˇ pawˆ k'aw‸ k'ai leh, chaw hk'a peu-eˬ yawˇ geh laˬ ve yoˬ. Yawˇ mui taˍ leh yawˇ hui hta‸ maˍ piˇ ve yoˬ. 3 Haˉ chawˇ te chehˇ ve yaˇ miˇ teˇ g'aˇ hta‸ li‸ bvuh‸ paˍ leh Hpaˍriˍsehˇ teˇ hpaˍ yuˬ veu laˇ leh awˬ k'aw ji lo teh taˍ ve yoˬ. 4 Oˇ htaˇ yawˇ hui k'oˆ ve, Saˍ la‸-oˬ, yaˇ miˇ chi teˇ g'aˇ haˉ chawˇ te chehˇ ve teˇ yanˇ, yawˇ hta‸ yuˬ g'a ve yoˬ. 5 Chi hk'e ve chaw hta‸ haˉ pui g'a baˬ pehˍ ve yoˬ teh‸, awˬ liˇ tawˇ hkawˇ awˬ hk'aw lo Moˉseˍ ngaˬ hui hta‸ tawˇ pe‸ laˇ ve yoˬ. Ya‸ hk'aˇ, nawˬ hk'aˬ hk'e k'oˆ tuˬ le teh‸ yawˇ hta‸ k'oˇ piˇ ve yoˬ. 6 Yawˇ hui chi hk'e k'oˆ ve lehˬ, yawˇ hta‸ venˇ baˆ taˍ hpeh‸ tuˬ, yawˇ hta‸ lawˇ nyi ve teˇ ceuˬ yoˬ. Yeˍsuˆ k'aw‸ lehˍ te leh, miˬ chaˇ hk'oˆ lo yawˇ ve la‸ naw bvuh‸ chehˇ ve yoˬ. 7 Ya‸ hk'aˇ, yawˇ hui yawˇ hta‸ na nyi tcuhˉ taˍ ve pa taw, yawˇ hteˇ lehˍ k'aw‸ te leh k'oˆ ve, Nawˬ hui awˬ hk'aw lo venˇ baˆ maˇ cawˬ ve chaw teˇ g'aˇ lehˬ, haˉ pui yuˬ leh yawˇ hta‸ awˉ lawˉ baˬ-o‸ teh‸, yawˇ hui hta‸ k'oˆ piˇ ve yoˬ. 8 Oˇ htaˇ, yawˇ k'aw‸ lehˍ teˇ pawˆ k'aw‸ te leh, miˬ chaˇ hk'oˆ lo la‸ naw k'aw‸ bvuh‸ ve yoˬ. 9 Tawˇ oˇ ve hta‸ yawˇ hui g'a kaˇ htaˇ, shu a‸ kehˉ mawˇ ve chaw teˇ hpaˍ hta‸ tanˬ leh teˇ g'aˇ peuˬ teˇ g'aˇ tawˆ k'ai ve yoˬ. Hk'e te leh, Yeˍsuˆ teˇ g'aˇ tiˉ chehˇ taˍ leh, yaˇ miˇ oˇ ve htawˇ awˬ k'aw ji lo huˉ taˍ sheˍ ve yoˬ. 10 Oˇ htaˇ, Yeˍsuˆ hteˇ lehˍ k'aw‸ te leh k'oˆ ve, Yaˇ miˇ-oˬ, yawˇ hui hk'aˬ lo k'ai peuˬ le. Chaw teˇ g'aˇ ka‸ nawˬ hta‸ maˇ ciˍ yanˍ laˇ leh laˇ teh‸, yawˇ hta‸ k'oˆ piˇ ve yoˬ. 11 Yaˇ miˇ oˇ ve k'aw‸ k'oˆ ve, Jawˇ mawˇ-oˬ, teˇ g'aˇ ka‸ maˇ ciˍ yanˍ laˇ teh‸ k'oˆ piˇ ve yoˬ. Yeˍsuˆ k'oˆ ve, Ngaˬ htawˇ nawˬ hta‸ maˇ ciˍ yanˍ. K'ai loˬ. Venˇ baˆ taˇ k'aw‸ te teh‸ k'oˆ piˇ ve yoˬ. 12 Hk'e te leh, Yeˍsuˆ teˇ pawˆ k'aw‸ k'oˆ ve, Ngaˬ lehˬ miˬ guiˬ ve awˬ g'euˆ hpeh‸ ve yoˬ. Ngaˬ awˬ hk'aˇ suh laˬ ve chaw lehˬ, naˆ ho‸ ve awˬ hk'aw lo maˇ k'aw‸ k'ai. Co ha te‸ piˇ lawˬ ve awˬ g'euˆ hta‸ yawˇ g'a tuˬ yoˬ teh‸, yawˇ hui hta‸ k'oˆ piˇ ve yoˬ. 13 Hpaˍriˍsehˇ teˇ hpaˍ k'aw‸ k'oˆ ve, Nawˬ lehˬ nawˬ awˬ to awˬ lawn shaˉ hkiˆ hkanˍ ve yoˬ. Nawˬ ve shaˉ hkiˆ lehˬ, maˇ cawˇ teh‸, yawˇ hta‸ k'oˆ piˇ ve yoˬ. 14 Yeˍsuˆ k'aw‸ k'oˆ ve, Ngaˬ lehˬ ngaˬ awˬ to awˬ lawn shaˉ hkiˆ hkanˍ ve htawˇ, ngaˬ ve shaˉ hkiˆ lehˬ cawˇ ve yoˬ. Awˬ lawn k'o, ngaˬ hk'aˬ lo laˬ ve leh hk'aˬ lo k'ai tuˬ ve hta‸ ngaˬ shiˍ ve yoˬ. Nawˬ hui lehˬ, ngaˬ hk'aˬ lo laˬ ve leh hk'aˬ lo k'ai tuˬ ve hta‸ maˇ shiˍ. 15 Nawˬ hui lehˬ, awˬ hta‸ hpawˇ ceh nyi leh suhˉ jehˬ ve yoˬ. Ngaˬ lehˬ chaw teˇ g'aˇ hta‸ ka‸ suhˉ maˇ jehˬ. 16 Ya‸ hk'aˇ ngaˬ suhˉ jehˬ ve hk'e k'o, ngaˬ suhˉ jehˬ ve lehˬ cawˇ ve yoˬ. Awˬ lawn k'o, ngaˬ teˇ g'aˇ tiˉ chehˇ ve maˇ heˆ. Ngaˬ hta‸ peu laˇ shehˍ hpaˇ Awˬ pa lehˬ ngaˬ geh chehˇ taˍ ve yoˬ. 17 Shaˉ hkiˆ hkanˍ shehˍ hpaˇ nyiˇ g'aˇ cawˬ ve k'o, shaˉ hkiˆ oˇ ve lehˬ cawˇ ve yoˬ teh‸, nawˬ hui ve awˬ liˇ tawˇ hkawˇ li‸ awˬ hk'aw lo bvuh‸ taˍ ve yoˬ. 18 Ngaˬ lehˬ ngaˬ awˬ to awˬ lawn shaˉ hkiˆ hkanˍ ve yoˬ. Ngaˬ hta‸ peu laˇ shehˍ hpaˇ Awˬ pa htawˇ, ngaˬ awˬ lawn shaˉ hkiˆ hkanˍ ve yoˬ teh‸ k'oˆ piˇ ve yoˬ. 19 Hk'e te leh yawˇ hui k'oˇ ve, Nawˬ Awˬ pa hk'aˬ lo le teh‸ yawˇ hta‸ na nyi ve yoˬ. Yeˍsuˆ k'aw‸ k'oˆ ve, Nawˬ hui lehˬ ngaˬ hta‸ maˇ k'oˆ, ngaˬ ve Awˬ pa hta‸ maˇ k'oˆ, maˇ shiˍ. Nawˬ hui ngaˬ hta‸ shiˍ ve hk'e k'o, ngaˬ ve Awˬ pa hta‸ htawˇ nawˬ hui shiˍ tuˬ yoˬ teh‸ k'oˆ piˇ ve yoˬ. 20 Bon yehˬ lonˉ awˬ hk'aw lo yawˇ maˍ piˇ chehˇ ve teˇ yanˇ, hpu shaw kuiˬ bawehˇ awˬ hk'aw lo tawˇ chi teˇ hpaˍ hta‸ yawˇ k'oˆ ve yoˬ. Yawˇ ve awˬ yanˇ maˇ gaˬ sheˍ ve pa taw, chaw teˇ g'aˇ ka‸ yawˇ hta‸ maˇ hpeh yuˬ. 21 Teˇ pawˆ yawˇ k'aw‸ k'oˆ ve, Ngaˬ k'ai tuˬ yoˬ. Nawˬ hui ngaˬ hta‸ ca tuˬ ve htawˇ, nawˬ hui ve venˇ baˆ awˬ hk'aw lo nawˬ hui g'a suh tuˬ yoˬ. Ngaˬ k'ai kuiˬ lo nawˬ hui laˬ maˇ hpeh‸ teh‸ yawˇ hui hta‸ k'oˆ piˇ ve yoˬ. 22 Hk'e te leh Yuˇda‸ chaw teˇ hpaˍ k'oˆ ve, Ngaˬ k'ai kuiˬ lo nawˬ hui laˬ maˇ hpeh‸ teh‸ yawˇ k'oˆ ve lehˬ, yawˇ awˬ to hta‸ yawˇ hk'aˇ yawˇ tiˇ pehˍ tuˬ laˇ teh‸ k'oˆ da‸ ve yoˬ. 23 Yawˇ k'aw‸ k'oˆ ve, Nawˬ hui lehˬ awˬ hawˉ hpawˇ lo laˬ ve chaw hpeh‸ ve yoˬ. Ngaˬ lehˬ awˬ na hpawˇ lo laˬ ve chaw hpeh‸ ve yoˬ. Nawˬ hui lehˬ, miˬ guiˬ chi hta‸ caˉ da‸ ve yoˬ. Ngaˬ lehˬ, miˬ guiˬ chi hta‸ caˉ da‸ ve maˇ heˆ. 24 Nawˬ hui ve venˇ baˆ awˬ hk'aw lo nawˬ hui g'a suh tuˬ yoˬ teh‸, ngaˬ nawˬ hui hta‸ k'oˆ laˇ peuˬ ve yoˬ. Awˬ lawn k'o, ngaˬ lehˬ oˇ ve teˇ g'aˇ yoˬ teh‸ nawˬ hui maˇ yonˍ ve k'o, nawˬ hui ve venˇ baˆ awˬ hk'aw lo nawˬ hui g'a suh tuˬ yoˬ teh‸, yawˇ hui hta‸ k'oˆ piˇ ve yoˬ. 25 Yawˇ hui yawˇ hta‸ k'aw‸ k'oˆ piˇ ve, Nawˬ a shu le. Yeˍsuˆ k'oˆ ve, Awˉ lawˉ htaˇ ka‸ ngaˬ nawˬ hui hta‸ k'oˆ laˇ chehˇ ve hk'e yoˬ. 26 Nawˬ hui awˬ lawn ngaˬ k'oˆ leh suhˉ jehˬ tuˬ maˇ maˇ cawˬ ve yoˬ. Ya‸ hk'aˇ, ngaˬ hta‸ peu laˇ shehˍ hpaˇ lehˬ, hteˇ jaˇ cawˇ jaˇ leh, yawˇ geh lo ngaˬ g'a kaˇ ve hk'e miˬ guiˬ yaˇ hui hta‸ ngaˬ k'oˆ piˇ ve yoˬ teh‸ yawˇ hui hta‸ k'oˆ piˇ ve yoˬ. 27 Awˬ pa awˬ lawn yawˇ yawˇ hui hta‸ k'oˆ piˇ ve hta‸ yawˇ hui maˇ shiˍ. 28 Hk'e te leh Yeˍsuˆ k'oˆ ve, Chaw yaˇ ve Yaˇ hpu hta‸ nawˬ hui chiˇ taˆ-e peuˬ hk'aw‸ nawˉ, ngaˬ lehˬ yawˇ yoˬ teh‸ nawˬ hui g'a shiˍ tuˬ yoˬ. Chi hk'oˆ ka‸, ngaˬ lehˬ ngaˬ a loˍ hta‸ te‸ chiˉ ka‸ maˇ te. Awˬ pa ngaˬ hta‸ maˍ laˇ ve hk'e ceh ngaˬ k'oˆ ve hta‸ ka‸ nawˬ hui g'a shiˍ tuˬ yoˬ. 29 Ngaˬ hta‸ peu laˇ shehˍ hpaˇ lehˬ, ngaˬ geh teˇ geh chehˇ taˍ ve yoˬ. Ngaˬ teˇ g'aˇ tiˉ g'a chehˇ tuˬ, yawˇ ngaˬ hta‸ maˇ baˬ taˉ laˇ. Awˬ lawn k'o, yawˇ nyi ma cawˇ ve awˬ ceuˬ teˇ hpaˍ hta‸ ngaˬ hk'aˬ htaˆ ka‸ te chehˇ ve yoˬ teh‸ k'oˆ ve yoˬ. 30 Tawˇ oˇ ve teˇ hpaˍ hta‸ yawˇ yaw ve teˇ yanˇ, chaw laiˉ g'aˇ yawˇ hta‸ yonˍ la ve yoˬ. 31 Hk'e te leh, yawˇ hta‸ yonˍ ve Yuˇda‸ chaw teˇ hpaˍ hta‸ Yeˍsuˆ k'oˆ piˇ ve, Ngaˬ ve tawˇ hkawˇ awˬ hk'aw lo nawˬ hui chehˇ yeˬ ve k'o, nawˬ hui ngaˬ ve awˬ la‸ g'awˇ awˬ tehˬ awˬ na hpeh‸ ve yoˬ. 32 Hteˇ ve cawˇ ve awˬ ceuˬ hta‸ nawˬ hui shiˍ tuˬ yoˬ. Hteˇ ve cawˇ ve awˬ ceuˬ oˇ ve lehˬ, nawˬ hui hta‸ hpehˇ laˇ tuˬ yoˬ teh‸ k'oˆ piˇ ve yoˬ. 33 Yawˇ hui k'aw‸ k'oˆ ve, Ngaˬ hui lehˬ Aˍbraˍhanˍ ve awˬ ceuˬ awˬ hk'aˇ hpeh‸ ve yoˬ. Ngaˬ hui lehˬ, shu ve awˬ ceˬ teˇ pawˆ ka‸ maˇ g'a te jaw. Nawˬ hui hta‸ hpehˇ laˇ tuˬ yoˬ teh‸ nawˬ hk'aˬ hk'e k'oˆ hpeh‸ ve le teh‸, yawˇ hta‸ k'oˆ piˇ ve yoˬ. 34 Yeˍsuˆ k'aw‸ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, venˇ baˆ te ve chaw teˇ g'aˇ le le lehˬ, venˇ baˆ ve awˬ ceˬ hpeh‸ ve yoˬ. 35 Awˬ ceˬ lehˬ, aˉ hk'aw lo hk'aˬ htaˆ ka‸ g'a chehˇ ve maˇ heˆ. Yaˇ hpu lehˬ, hk'aˬ htaˆ ka‸ g'a chehˇ ve yoˬ. 36 Yaˇ hpu lehˬ, nawˬ hui hta‸ hpehˇ laˇ ve k'o, nawˬ hui awˬ tehˬ awˬ na g'a ponˬ tuˬ yoˬ. 37 Nawˬ hui lehˬ Aˍbraˍhanˍ ve awˬ ceuˬ awˬ hk'aˇ hpeh‸ ve hta‸ ngaˬ shiˍ ve yoˬ. Ya‸ hk'aˇ, ngaˬ ve tawˇ hkawˇ nawˬ hui awˬ hk'aw lo chehˇ kuiˬ maˇ cawˬ ve pa taw, nawˬ hui ngaˬ hta‸ tiˇ pehˍ tuˬ ca ve yoˬ. 38 Ngaˬ lehˬ, ngaˬ ve Awˬ pa geh lo g'a mawˬ ve awˬ ceuˬ teˇ hpaˍ hta‸ ceh ngaˬ k'oˆ ve yoˬ. Nawˬ hui htawˇ, nawˬ hui ve awˬ pa geh lo g'a kaˇ ve awˬ ceuˬ teˇ hpaˍ hta‸ te ve yoˬ teh‸, yawˇ hui hta‸ k'oˆ piˇ ve yoˬ. 39 Yawˇ hui yawˇ hta‸ k'aw‸ k'oˆ piˇ ve, Aˍbraˍhanˍ lehˬ ngaˬ hui ve awˬ pa hpeh‸ ve yoˬ. Yeˍsuˆ k'aw‸ k'oˆ ve, Nawˬ hui lehˬ, Aˍbraˍhanˍ ve awˬ yaˇ hpeh‸ ve hk'e k'o, Aˍbraˍhanˍ te ve hk'a suhˍ shuˍ nawˬ hui htawˇ te tuˬ yoˬ. 40 Ngaˬ lehˬ G'uiˬ sha geh lo g'a kaˇ ve hteˇ ve cawˇ ve awˬ ceuˬ nawˬ hui hta‸ hto laˇ shehˍ hpaˇ hpeh‸ ve ka‸, nawˬ hui ngaˬ hta‸ tiˇ pehˍ tuˬ ca ve yoˬ. Aˍbraˍhanˍ lehˬ chi hk'e maˇ te. 41 Nawˬ hui lehˬ, nawˬ hui ve awˬ pa te ve hk'a shuˍ shuˍ te ve yoˬ teh‸, yawˇ hui hta‸ k'oˆ piˇ ve yoˬ. Yawˇ hui k'aw‸ k'oˆ ve, Ngaˬ hui lehˬ, haˉ chawˇ yaˇ hpeh‸ ve maˇ heˆ. Ngaˬ hui ve Awˬ pa teˇ g'aˇ tiˉ cawˬ leh, yawˇ lehˬ G'uiˬ sha hpeh‸ ve yoˬ teh‸ yawˇ hta‸ k'oˆ piˇ ve yoˬ. 42 Yeˍsuˆ k'aw‸ k'oˆ ve, G'uiˬ sha lehˬ nawˬ hui ve Awˬ pa hpeh‸ ve hk'e k'o, nawˬ hui ngaˬ hta‸ ha‸ tuˬ yoˬ. Awˬ lawn k'o, ngaˬ lehˬ G'uiˬ sha geh lo tawˆ la leh laˬ ve yoˬ. Ngaˬ hk'aˇ ngaˬ laˬ gaˇ leh laˬ ve maˇ heˆ. Yawˇ ngaˬ hta‸ peu laˇ ve yoˬ. 43 Ngaˬ k'oˆ ve tawˇ hkawˇ hta‸ aˬ hto‸ ma te nawˬ hui na maˇ g'a ve le. Ngaˬ ve tawˇ hkawˇ hta‸ nawˬ hui na yuˬ maˇ hpeh‸ ve pa taw yoˬ. 44 Nawˬ hui lehˬ, nawˬ hui ve awˬ pa neˇ haiˬ geh lo laˬ leh, nawˬ hui ve awˬ pa a loˍ cawˇ ve hk'e te gaˇ ve yoˬ. Yawˇ lehˬ, awˬ hkuiˉ puiˍ htaˇ ka‸ shu hta‸ tiˇ pehˍ shehˍ hpaˇ hpeh‸ ve yoˬ. Yawˇ awˬ hk'aw lo hteˇ ve cawˇ ve a ciˉ ka‸ maˇ cawˬ ve pa taw, hteˇ ve cawˇ ve awˬ hk'aw lo yawˇ chehˇ maˇ g'a. Yawˇ heˍ ve tawˇ hta‸ yaw ve teˇ yanˇ, yawˇ ve nyi ma awˬ hk'aw lo cawˬ ve hk'e yaw ve yoˬ. Awˬ lawn k'o, yawˇ lehˬ heˍ shehˍ hpaˇ hpeh‸ leh, heˍ ve teˇ ceuˬ ve awˬ pa htawˇ hpeh‸ ve yoˬ. 45 Ngaˬ lehˬ, hteˇ ve cawˇ ve tawˇ hta‸ yaw ve pa taw nawˬ hui ngaˬ hta‸ maˇ yonˍ. 46 Ngaˬ venˇ baˆ cawˬ ve teh‸ nawˬ hui awˬ hk'aw lo a shu hpeu‸ maˍ laˇ g'a tuˬ le. Hteˇ ve cawˇ ve tawˇ hkawˇ hta‸ ngaˬ yaw ve k'o, aˬ hto‸ ma te nawˬ hui ngaˬ hta‸ maˇ yonˍ ve le. 47 G'uiˬ sha hta‸ caˉ da‸ ve chaw lehˬ, G'uiˬ sha ve tawˇ hkawˇ hta‸ na ve yoˬ. Nawˬ hui lehˬ, G'uiˬ sha hta‸ maˇ caˉ da‸ ve hta‸ pa taw maˇ na teh‸ yawˇ hui hta‸ k'oˆ piˇ ve yoˬ. 48 Yuˇda‸ chaw teˇ hpaˍ k'aw‸ k'oˆ ve, Nawˬ lehˬ Saˍmaˍriˆ chaw hpeh‸ ve awˬ hk'oˆ ka‸, neˇ geh ve chaw htawˇ hpeh‸ ve yoˬ teh‸ ngaˬ hui k'oˆ ve lehˬ, cawˇ ve yoˬ, maˇ heˆ laˇ teh‸ yawˇ hta‸ k'oˆ piˇ ve yoˬ. 49 Yeˍsuˆ k'aw‸ k'oˆ ve, Ngaˬ neˇ geh ve chaw maˇ heˆ. Ngaˬ lehˬ ngaˬ ve Awˬ pa hta‸ yawˆ yan ve yoˬ. Nawˬ hui lehˬ ngaˬ hta‸ maˇ yawˆ yan. 50 Ya‸ hk'aˇ, ngaˬ lehˬ ngaˬ ve awˬ me‸ awˬ hponˇ hta‸ ca ve maˇ heˆ. Ngaˬ ve awˬ me‸ awˬ hponˇ hta‸ ca shehˍ hpaˇ leh suhˉ jehˬ shehˍ hpaˇ teˇ g'aˇ cawˬ ve yoˬ. 51 Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ ve tawˇ hkawˇ hta‸ na yuˬ leh te k'ai ve chaw lehˬ, hk'aˬ htaˆ ka‸ maˇ g'a suh teh‸ Yeˍsuˆ k'oˆ piˇ ve yoˬ. 52 Yuˇda‸ chaw teˇ hpaˍ k'aw‸ k'oˆ ve, Nawˬ neˇ geh ve chaw hpeh‸ ve hta‸ chi beu‸ ngaˬ hui shiˍ peuˬ. Aˍbraˍhanˍ leh G'uiˬ sha ve tcuh kaˍ paˍ teˇ hpaˍ suh peuˬ. Ngaˬ ve tawˇ hkawˇ hta‸ na yuˬ leh te k'ai ve chaw lehˬ, hk'aˬ htaˆ ka‸ maˇ g'a suh teh‸ nawˬ k'oˆ ve law leˇ. 53 Nawˬ lehˬ ngaˬ hui ve awˬ pa Aˍbraˍhanˍ a‸ kehˉ uiˍ ve leh laˇ. Yawˇ lehˬ suh peuˬ. G'uiˬ sha ve tcuh kaˍ paˍ teˇ hpaˍ htawˇ suh peuˬ. Nawˬ lehˬ a shu hk'e te ve le teh‸ yawˇ hta‸ k'oˆ piˇ ve yoˬ. 54 Yeˍsuˆ k'aw‸ k'oˆ ve, Ngaˬ awˬ me‸ awˬ hponˇ g'a tuˬ ngaˬ te ve k'o, awˬ me‸ awˬ hponˇ oˇ ve hk'e leˇ hpeh‸ ve yoˬ. Ngaˬ hta‸ awˬ me‸ awˬ hponˇ pe‸ laˇ shehˍ hpaˇ lehˬ, ngaˬ ve Awˬ pa yoˬ. Yawˇ lehˬ nawˬ hui ve G'uiˬ sha hpeh‸ ve yoˬ teh‸, nawˬ hui k'oˆ ve yoˬ. 55 Ya‸ hk'aˇ, nawˬ hui yawˇ hta‸ maˇ shiˍ. Ngaˬ lehˬ yawˇ hta‸ shiˍ ve yoˬ. Ngaˬ yawˇ hta‸ maˇ shiˍ teh‸ ngaˬ k'oˆ ve k'o, nawˬ hui hk'a shuˍ shuˍ ngaˬ heˍ ve chaw hpeh‸ tuˬ yoˬ. Ngaˬ yawˇ hta‸ shiˍ leh, yawˇ ve tawˇ hkawˇ hta‸ ka‸ ngaˬ na yuˬ ve yoˬ. 56 Nawˬ hui ve awˬ pa Aˍbraˍhanˍ lehˬ, ngaˬ ve awˬ nyi awˬ haˉ hta‸ g'a mawˬ tuˬ ve hta‸ pa taw ha lehˬ jaˇ ve yoˬ. Yawˇ g'a mawˬ peuˬ leh ha lehˬ ve yoˬ teh‸ k'oˆ ve yoˬ. 57 Yuˇda‸ chaw hui k'aw‸ k'oˆ ve, Nawˬ lehˬ a sha‸ ngaˇ chi hk'aw‸ ka‸ maˇ gaˬ sheˍ. Aˍbraˍhanˍ hta‸ nawˬ mawˬ jaw leh laˇ teh‸ yawˇ hta‸ k'oˆ piˇ ve yoˬ. 58 Yeˍsuˆ k'aw‸ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, Aˍbraˍhanˍ maˇ cawˬ sheˍ htaˇ ka‸ ngaˬ cawˬ taˍ peuˬ teh‸, yawˇ hui hta‸ k'oˆ piˇ ve yoˬ. 59 Hk'e te leh, yawˇ hui lehˬ yawˇ hta‸ baˬ tuˬ ve haˉ pui shiˍ g'awˆ ve yoˬ. Ya‸ hk'aˇ, Yeˍsuˆ va‸ sheˬ leh bon yehˬ lonˉ awˬ hk'aw lo tawˆ k'ai ve yoˬ.

Yoˇhanˬ 9

1 Yeˍsuˆ ya‸ k'aw k'ai chehˇ ve teˇ yanˇ, paw la htaˇ ka‸ mehˆ cuˉ taˍ ve chaw teˇ g'aˇ hta‸ yawˇ g'a mawˬ ve yoˬ. 2 Oˇ htaˇ, yawˇ ve awˬ la‸ g'awˇ teˇ hpaˍ k'oˆ ve, Raˍbiˆ-oˬ. chaw chi teˇ g'aˇ paw la htaˇ ka‸ mehˆ cuˉ taˍ ve lehˬ, a shu ve venˇ baˆ hta‸ pa taw le. Yawˇ ve venˇ baˆ hta‸ pa taw laˇ. Awˬ pa awˬ e ve venˇ baˆ hta‸ pa taw laˇ teh‸, yawˇ hta‸ na nyi ve yoˬ. 3 Yeˍsuˆ k'aw‸ k'oˆ ve, Yawˇ ve venˇ baˆ hta‸ pa taw maˇ heˆ. Awˬ pa awˬ e ve venˇ baˆ hta‸ pa taw ka‸ maˇ heˆ. Yawˇ awˬ hk'aw lo G'uiˬ sha ve kanˉ teˇ hpaˍ hk'a tawˍ lehˆ tawˆ la tuˬ awˬ pon yawˇ chi hk'e hpeh‸ ve yoˬ. 4 Ngaˬ hta‸ peu laˇ shehˍ hpaˇ ve kanˉ hta‸ mvuhˇ law‸ k'aw htaˇ ngaˬ hui g'a te ve yoˬ. Chaw teˇ g'aˇ ka‸ kanˉ te maˇ hpeh‸ ve mvuhˇ hpeu‸ awˬ yanˇ gaˬ la tuˬ yoˬ. 5 Ngaˬ lehˬ miˬ guiˬ hk'oˆ chehˇ sheˍ ve awˬ yanˇ awˬ hk'aw lo, miˬ guiˬ ve awˬ g'euˆ hpeh‸ ve yoˬ teh‸ k'oˆ ve yoˬ. 6 Chi hk'e k'oˆ peuˬ hk'aw‸ nawˉ, miˬ chaˇ hk'oˆ lo yawˇ ciˉ g'uiˇ hpe‸ pfuhˍ leh je‸ nehˆ te sheˬ leh, chaw oˇ ve teˇ g'aˇ ve mehˆ shiˍ hta‸ shehˍ piˇ ve yoˬ. 7 Siˉlonˍ g'uiˬ po lo k'ai leh tsuhˇ baˬ-o‸ teh‸, Yeˍsuˆ yawˇ hta‸ k'oˆ piˇ ve yoˬ. (Siˉlonˍ k'oˆ ve tcuhˉ kuiˬ lehˬ, K'ai tcuh peuˬ teh‸ k'oˆ gaˇ ve yoˬ.) Hk'e te leh yawˇ k'ai leh ca tsuhˇ baˬ ve yoˬ. Oˇ htaˇ, yawˇ mehˆ mawˬ la leh k'aw‸ la ve yoˬ. 8 Hk'e te leh, yawˇ ve yehˬ awˬ paˇ awˬ kui lo chehˇ ve chaw hui leh yawˇ lawˬ leh‸ chehˇ ve hta‸ g'a mawˬ ve chaw hui k'oˆ ve, Chaw chi hpaˇ lehˬ, ponˬ laˬ htaˇ mui taˍ leh lawˬ leh‸ chehˇ ve chaw teˇ g'aˇ maˇ heˆ laˇ teh‸ k'oˆ da‸ ve yoˬ. 9 Teˇ hpaˍ hpaˍ k'oˆ ve, Yawˇ yoˬ. Teˇ hpaˍ hpaˍ k'oˆ ve, Yawˇ maˇ heˆ. Yawˇ hta‸ shuˍ ve chaw teˇ g'aˇ yoˬ teh‸ k'oˆ da‸ ve yoˬ. Yawˇ awˬ to k'oˆ ve, Nawˬ hui k'oˆ da‸ chehˇ ve chaw lehˬ ngaˬ yoˬ teh‸ k'oˆ ve yoˬ. 10 Oˇ htaˇ yawˇ hui k'oˆ ve, Hk'e te k'o, nawˬ ve mehˆ shiˍ hk'aˬ hk'e te mawˬ la ve le teh‸ yawˇ hta‸ na nyi ve yoˬ. 11 Yawˇ k'aw‸ k'oˆ ve, Yeˍsuˆ meh ve chaw teˇ g'aˇ je‸ nehˆ te leh, ngaˬ ve mehˆ shiˍ hta‸ shehˍ laˇ peuˬ hk'aw‸ nawˉ, Siˉlonˍ g'uiˬ po lo k'ai leh tsuhˇ baˬ-o‸ teh‸ ngaˬ hta‸ k'oˆ laˇ ve hk'e, ngaˬ ca tsuhˇ hk'a ve teˇ yanˇ mehˆ mawˬ la ve yoˬ teh‸ k'oˆ piˇ ve yoˬ. 12 Yawˇ hui k'aw‸ k'oˆ ve, Yawˇ hk'aˬ lo k'ai le teh‸ chaw oˇ ve teˇ g'aˇ hta‸ na nyi ve teˇ yanˇ, Ngaˬ maˇ shiˍ teh‸ yawˇ k'aw‸ k'oˆ piˇ ve yoˬ. 13 Chaw oˇ ve teˇ hpaˍ lehˬ, mehˆ cuˉ jaw ve chaw oˇ ve teˇ g'aˇ hta‸ Hpaˍriˍsehˇ teˇ hpaˍ geh shiˍ k'ai ve yoˬ. 14 Yeˍsuˆ je‸ nehˆ te leh yawˇ ve mehˆ shiˍ hta‸ mawˬ la piˇ lawˬ ve teˇ nyi lehˬ, shinˉ nyi hpeh‸ ve yoˬ. 15 Yawˇ ve mehˆ shiˍ hk'aˬ hk'e te mawˬ la ve awˬ lawn Hpaˍriˍsehˇ teˇ hpaˍ yawˇ hta‸ teˇ pawˆ k'aw‸ na nyi ve teˇ yanˇ, yawˇ k'aw‸ k'oˆ ve, Ngaˬ ve mehˆ shiˍ hta‸ yawˇ je‸ nehˆ shehˍ laˇ leh, ngaˬ ca tsuhˇ baˬ ve teˇ yanˇ mehˆ mawˬ la ve yoˬ teh‸, yawˇ hui hta‸ k'oˆ piˇ ve yoˬ. 16 Hk'e te leh, Hpaˍriˍsehˇ teˇ hpaˍ hpaˍ k'oˆ ve, Chaw oˇ ve hpaˇ lehˬ G'uiˬ sha lo laˬ ve maˇ heˆ. Awˬ lawn k'o, shinˉ nyi htaˇ yawˇ maˇ ce maˇ kan teh‸ k'oˆ ve yoˬ. Teˇ hpaˍ hpaˍ k'oˆ ve, Venˇ baˆ yaˇ teˇ g'aˇ lehˬ, chi hk'e ve awˬ heˆ teˇ hpaˍ hta‸ hk'aˬ hk'e te leh te g'a tuˬ le teh‸ k'oˆ da‸ ve yoˬ. Hk'e te leh, yawˇ hui teˇ g'aˇ leh teˇ g'aˇ dawˇ hk'aˇ maˇ hawˍ da‸ ve yoˬ. 17 Mehˆ cuˉ jaw ve chaw hta‸ yawˇ hui teˇ pawˆ k'aw‸ k'oˆ ve, Nawˬ ve mehˆ shiˍ hta‸ mawˬ la piˇ lawˬ ve chaw oˇ ve teˇ g'aˇ awˬ lawn nawˬ hk'aˬ hk'e k'oˆ tuˬ le teh‸ na nyi htaˇ, Yawˇ lehˬ G'uiˬ sha ve tcuh kaˍ paˍ hpeh‸ ve yoˬ teh‸ yawˇ k'aw‸ k'oˆ piˇ ve yoˬ. 18 Yuˇda‸ chaw teˇ hpaˍ lehˬ, mehˆ mawˬ la ve chaw teˇ g'aˇ ve awˬ pa awˬ e hta‸ maˇ kuˬ na sheˍ htaˇ yawˇ lehˬ awˉ lawˉ htaˇ mehˆ cuˉ leh awˬ hk'aw‸ nawˉ mehˆ mawˬ la ve hta‸ yawˇ hui maˇ yonˍ. 19 Yawˇ hui lehˬ, awˬ pa awˬ e hta‸ k'oˆ piˇ ve, Chi hpaˇ lehˬ nawˬ huiˉ maˬ ve yaˇ paˍ yoˬ laˇ. Paw la htaˇ ka‸ mehˆ cuˉ ve teh‸ nawˬ huiˉ maˬ k'oˆ ve lehˬ, chi teˇ g'aˇ yoˬ laˇ. Hk'e te k'o, chi beu‸ hk'aˬ hk'e te leh yawˇ mehˆ mawˬ la ve le teh‸ na nyi ve yoˬ. 20 Yawˇ ve awˬ pa awˬ e k'aw‸ k'oˆ ve, Chi hpaˇ lehˬ, ngaˬ huiˉ maˬ ve yaˇ paˍ hpeh‸ leh, paw la htaˇ ka‸ mehˆ cuˉ paˍ hpeh‸ ve hta‸ ngaˬ huiˉ maˬ shiˍ taˍ ve yoˬ. 21 Ya‸ hk'aˇ, chi beu‸ hk'aˬ hk'e te leh yawˇ mehˆ mawˬ la ve hta‸ ngaˬ huiˉ maˬ maˇ shiˍ. Yawˇ ve mehˆ shiˍ hta‸ a shu mawˬ la piˇ ve hta‸ htawˇ ngaˬ huiˉ maˬ maˇ shiˍ. Yawˇ hta‸ na nyi-o. Yawˇ uiˍ la peuˬ. Yawˇ ve awˬ to awˬ lawn yawˇ k'oˆ laˇ tuˬ yoˬ teh‸ k'oˆ piˇ ve yoˬ. 22 Yawˇ ve awˬ pa awˬ e chi hk'e k'oˆ ve lehˬ, Yuˇda‸ chaw teˇ hpaˍ hta‸ kawˆ ve pa taw k'oˆ ve yoˬ. Awˬ lawn k'o, Yeˍsuˆ lehˬ Hkri‸ hpeh‸ ve yoˬ teh‸ k'oˆ leh hkanˍ yuˬ ve chaw hk'aˬ ve teˇ g'aˇ hta‸ maˇ k'oˆ, yawˇ hui ve awˬ moˍ awˬ hk'aw lo g'a‸ tawˆ tuˬ yoˬ teh‸, Yuˇda‸ chaw teˇ hpaˍ jehˬ cheˆ taˍ peuˬ. 23 Chi hta‸ pa taw, awˬ pa awˬ e k'oˆ ve, Yawˇ uiˍ la peuˬ. Yawˇ hta‸ na nyi-o teh‸ k'oˆ piˇ ve yoˬ. 24 Hk'e te leh yawˇ hui lehˬ, mehˆ cuˉ jaw ve chaw hta‸ teˇ pawˆ k'aw‸ kuˬ veu laˇ leh k'oˆ ve, G'uiˬ sha hta‸ ceh tiˉ chiˇ uiˍ chiˇ mvuh piˇ-oˆ. Chaw oˇ ve lehˬ, venˇ baˆ yaˇ hpeh‸ ve hta‸ ngaˬ hui shiˍ ve yoˬ teh‸, yawˇ hta‸ k'oˆ piˇ ve yoˬ. 25 Oˇ htaˇ yawˇ k'aw‸ k'oˆ ve, Yawˇ venˇ baˆ yaˇ leh naˍ, maˇ heˆ leh naˍ, ngaˬ maˇ shiˍ. Teˇ ceuˬ hta‸ ngaˬ shiˍ ve yoˬ. Awˉ lawˉ htaˇ ngaˬ mehˆ cuˉ ve ka‸, chi beu‸ ngaˬ mehˆ mawˬ la peuˬ teh‸, yawˇ hui hta‸ k'oˆ piˇ ve yoˬ. 26 Yawˇ hui k'aw‸ k'oˆ ve, Yawˇ nawˬ hta‸ hk'aˬ hk'e te laˇ ve le. Nawˬ ve mehˆ shiˍ hta‸ yawˇ hk'aˬ hk'e te mawˬ la piˇ lawˬ ve le teh‸, yawˇ hta‸ na nyi ve yoˬ. 27 Yawˇ k'aw‸ k'oˆ ve, Ya‸ sheh htaˇ ngaˬ nawˬ hui hta‸ k'oˆ laˇ peuˬ ve ka‸ nawˬ hui maˇ na. Aˬ hto‸ ma pa taw nawˬ hui teˇ pawˆ k'aw‸ kaˇ gaˇ sheˍ le. Nawˬ hui htawˇ, yawˇ ve awˬ la‸ g'awˇ hpeh‸ la gaˇ leh laˇ teh‸, yawˇ hui hta‸ k'oˆ piˇ ve yoˬ. 28 Yawˇ hui yawˇ hta‸ hk'a mvuhˇ hk'a na k'oˆ leh, Nawˬ lehˬ yawˇ ve awˬ la‸ g'awˇ hpeh‸ ve yoˬ. Ngaˬ hui lehˬ, Moˉseˍ ve awˬ la‸ g'awˇ hpeh‸ ve yoˬ. 29 G'uiˬ sha lehˬ Moˉseˍ hta‸ tawˇ yaw piˇ taˍ ve hta‸ ngaˬ hui shiˍ ve yoˬ. Ya‸ hk'aˇ, chaw chi hpaˇ hk'aˬ lo laˬ ve hta‸ ngaˬ hui maˇ shiˍ teh‸ k'oˆ ve yoˬ. 30 Yawˇ k'aw‸ k'oˆ ve, Yawˇ ngaˬ ve mehˆ shiˍ hta‸ mawˬ la piˇ lawˬ ve htawˇ, yawˇ hk'aˬ lo laˬ ve hta‸ nawˬ hui maˇ shiˍ ve lehˬ, anˇ tuˬ cawˬ ve yoˬ. 31 G'uiˬ sha lehˬ, venˇ baˆ yaˇ hui ve tawˇ hkawˇ hta‸ maˇ na yuˬ ve hta‸ ngaˬ hui shiˍ ve yoˬ. Ya‸ hk'aˇ, chaw teˇ g'aˇ g'aˇ G'uiˬ sha hta‸ yawˆ yan leh yawˇ ve a loˍ hta‸ te ve k'o, chaw oˇ ve teˇ g'aˇ ve tawˇ hkawˇ hta‸ G'uiˬ shaˬ na yuˬ ve yoˬ. 32 Mvuhˇ kawˍ miˬ ya‸ htaˇ ka‸ tanˬ leh ya‸ nyi hk'a gaˬ, paw la htaˇ ka‸ mehˆ cuˉ taˍ ve chaw hta‸ shu mehˆ k'aw‸ mawˬ la piˇ lawˬ ve, chaw teˇ g'aˇ ka‸ maˇ kaˇ jaw. 33 Chaw oˇ ve lehˬ, G'uiˬ sha lo laˬ ve maˇ heˆ k'o, yawˇ te‸ chiˉ ka‸ te maˇ hpeh‸ teh‸ yawˇ hui hta‸ k'oˆ piˇ ve yoˬ. 34 Yawˇ hui k'aw‸ k'oˆ ve, Nawˬ lehˬ venˇ baˆ hk'a biˇ cawˬ ve awˬ hk'aw lo paw la ve ka‸, nawˬ ngaˬ hui hta‸ maˍ laˇ ve laˇ teh‸ k'oˆ piˇ leh, yawˇ hta‸ g'a‸ tawˆ ve yoˬ. 35 Chaw oˇ ve hta‸ shu g'a‸ tawˆ ve awˬ lawn Yeˍsuˆ g'a kaˇ leh, yawˇ hta‸ ca mawˬ htaˇ, Chaw yaˇ ve Yaˇ hpu hta‸ nawˬ yonˍ ve laˇ teh‸ na nyi ve yoˬ. 36 Jawˇ mawˇ-oˬ, yawˇ hta‸ ngaˬ g'a yonˍ tuˬ, chaw yaˇ ve Yaˇ hpu a shu le teh‸ na nyi ve yoˬ. 37 Yeˍsuˆ k'oˆ ve, Nawˬ yawˇ hta‸ g'a mawˬ peuˬ ve awˬ hk'oˆ, chi beu‸ nawˬ hta‸ tawˇ yaw chehˇ ve lehˬ yawˇ yoˬ teh‸, yawˇ hta‸ k'oˆ piˇ ve yoˬ. 38 Jawˇ mawˇ-oˬ, ngaˬ yonˍ ve yoˬ teh‸ yawˇ k'oˆ leh, Yeˍsuˆ hta‸ oˉ k'oˍ pui ve yoˬ. 39 Oˇ htaˇ Yeˍsuˆ k'oˆ ve, Mehˆ maˇ mawˬ ve chaw hui lehˬ, mehˆ mawˬ la tuˬ maˇ k'oˆ, mehˆ mawˬ ve chaw hui lehˬ, mehˆ cuˉ k'ai tuˬ maˇ k'oˆ, suhˉ jehˬ tuˬ awˬ pon miˬ guiˬ hk'oˆ lo ngaˬ laˬ ve yoˬ teh‸ k'oˆ ve yoˬ. 40 Yawˇ awˬ paˇ lo chehˇ taˍ ve Hpaˍriˍsehˇ teˇ hpaˍ tawˇ oˇ ve hta‸ g'a kaˇ htaˇ, Ngaˬ hui htawˇ mehˆ cuˉ paˍ hpeh‸ ve laˇ teh‸, yawˇ hta‸ na nyi ve yoˬ. 41 Yeˍsuˆ k'aw‸ k'oˆ ve, Nawˬ hui mehˆ cuˉ paˍ hpeh‸ tehˬ ve hk'e k'o, venˇ baˆ maˇ cawˬ. Ya‸ hk'aˇ, Ngaˬ hui mehˆ mawˬ chehˇ ve yoˬ teh‸, chi beu‸ nawˬ hui k'oˆ ve pa taw, nawˬ hui venˇ baˆ cawˬ chehˇ ve yoˬ.

Yoˇhanˬ 10

1 Ngaˬ nawˬ hui hta‸ awˬ tehˬ awˬ na k'oˆ laˇ ve, yawˬ hkawˆ awˬ hk'aw lo lo‸ la htaˇ, yehˬ miˉ hpe‸ lo maˇ lo‸ la leh awˬ kaˍ awˬ nu teˇ hk'aˇ lo ca taˆ lo‸ la ve chaw teˇ g'aˇ lehˬ, chaw hk'awˇ chaw naˆ hpeh‸ ve yoˬ. 2 Ya‸ hk'aˇ, yehˬ miˉ hpe‸ lo lo‸ la ve chaw teˇ g'aˇ lehˬ, yawˬ hawˉ paˍ hpeh‸ ve yoˬ. 3 Yehˬ miˉ shaw shehˍ hpaˇ lehˬ, yawˇ hta‸ yehˬ miˉ hpaw piˇ ve yoˬ. Yawˬ teˇ hpaˍ lehˬ, yawˇ ve tawˇ hkawˇ hta‸ na yuˬ ve yoˬ. Yawˇ lehˬ, yawˇ ve yawˬ teˇ hpaˍ ve awˬ meh hta‸ kuˬ leh, yawˬ oˇ ve teˇ hpaˍ hta‸ yawˇ sheh tawˆ-e ve yoˬ. 4 Yawˇ ve yawˬ hk'a peu-eˬ hta‸ sheh tawˆ-e peuˬ hk'aw‸ nawˉ, yawˬ teˇ hpaˍ awˬ g'uˇ suhˍ lo yawˇ k'ai leh, yawˬ teˇ hpaˍ yawˇ ve tawˇ hkawˇ hta‸ shiˍ ve pa taw, yawˇ awˬ hk'aˇ suh k'ai ve yoˬ. 5 Yawˬ teˇ hpaˍ lehˬ, yawˇ hui maˇ shiˍ da‸ ve chaw hui ve tawˇ hkawˇ hta‸ maˇ shiˍ ve pa taw, chaw oˇ hk'e ve teˇ g'aˇ awˬ hk'aˇ suh yawˇ hui maˇ k'ai ve awˬ hk'oˆ ka‸ hpaw-e ve yoˬ teh‸, yawˇ hui hta‸ k'oˆ piˇ ve yoˬ. 6 Yeˍsuˆ lehˬ, tawˇ pa haˉ chi yawˇ hui hta‸ k'oˆ maˍ piˇ ve yoˬ. Ya‸ hk'aˇ, yawˇ aˬ hto‸ ma awˬ lawn k'oˆ ve hta‸ yawˇ hui maˇ shiˍ. 7 Hk'e te leh, Yeˍsuˆ teˇ pawˆ k'aw‸ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ lehˬ yawˬ teˇ hpaˍ lo‸ la tuˬ ve yehˬ miˉ hpe‸ yoˬ. 8 Ngaˬ maˇ laˬ sheˍ awˬ g'uˇ suhˍ hk'a laˬ peuˬ ve chaw hk'a peu-eˬ lehˬ, chaw hk'awˇ chaw naˆ hpeh‸ ve yoˬ. Yawˬ teˇ hpaˍ lehˬ, yawˇ hui ve tawˇ hkawˇ hta‸ maˇ na. 9 Ngaˬ lehˬ, yehˬ miˉ hpe‸ yoˬ. Ngaˬ awˬ hk'aw lo lo‸ la ve chaw lehˬ, htaiˍ hk'aw‸ ve hta‸ g'a tuˬ yoˬ. Yawˇ lehˬ, tawˆ tawˆ lo‸ lo‸ te leh, k'aˆ caˇ kuiˬ hta‸ g'a mawˬ tuˬ yoˬ. 10 Chaw hk'awˇ lehˬ, hk'awˇ yuˬ tuˬ, tiˇ pehˍ tuˬ leh, te luˬ tuˬ awˬ pon ceh laˬ ve yoˬ. Ngaˬ lehˬ, yawˬ teˇ hpaˍ a sha‸ g'a te‸ tuˬ ve awˬ hk'oˆ ka‸, a sha‸ te‸ ve oˇ ve hta‸ caˉ da‸ ve awˬ ceuˬ hk'a biˇ g'a tuˬ awˬ pon ngaˬ laˬ ve yoˬ. 11 Ngaˬ lehˬ da‸ ve yawˬ hawˉ shehˍ hpaˇ hpeh‸ ve yoˬ. Da‸ ve yawˬ hawˉ shehˍ hpaˇ lehˬ, yawˬ teˇ hpaˍ awˬ pon yawˇ ve a sha‸ hta‸ tanˇ piˇ ve yoˬ. 12 Ya‸ hk'aˇ, g'aˇ hpfuhˇ caˇ shehˍ hpaˇ lehˬ, yawˬ hawˉ shehˍ hpaˇ maˇ heˆ leh, yawˬ teˇ hpaˍ yawˇ ve maˇ heˆ ve pa taw, veˬ laˬ ve hta‸ yawˇ g'a mawˬ ve teˇ yanˇ, yawˬ teˇ hpaˍ hta‸ baˬ taˉ leh hpaw-e ve yoˬ. Veˬ oˇ ve lehˬ, yawˬ teˇ hpaˍ hta‸ che‸ leh hpaˆ da‸ piˇ lawˬ ve yoˬ. 13 Chaw oˇ ve lehˬ, g'aˇ hpfuhˇ caˇ shehˍ hpaˇ ceh hpeh‸ leh, yawˬ teˇ hpaˍ awˬ pon te‸ chiˉ maˇ dawˇ nyi ve pa taw, yawˇ hpaw-e ve yoˬ. 14 Ngaˬ lehˬ da‸ ve yawˬ hawˉ shehˍ hpaˇ yoˬ. Awˬ pa ngaˬ hta‸ shiˍ leh, ngaˬ htawˇ Awˬ pa hta‸ shiˍ ve hk'a shuˍ shuˍ, ngaˬ ve yawˬ teˇ hpaˍ hta‸ ngaˬ shiˍ leh, ngaˬ ve yawˬ teˇ hpaˍ htawˇ ngaˬ hta‸ shiˍ ve yoˬ. 15 Ngaˬ lehˬ yawˬ teˇ hpaˍ awˬ pon ngaˬ ve a sha‸ hta‸ tanˇ ve yoˬ. 16 Yawˬ hkawˆ chi hta‸ maˇ caˉ da‸ ve awˬ kaˍ awˬ nu yawˬ teˇ hpaˍ htawˇ ngaˬ cawˬ sheˍ ve yoˬ. Yawˬ oˇ ve teˇ hpaˍ hta‸ htawˇ ngaˬ g'a ca shiˍ veu laˇ leh, yawˇ hui ngaˬ ve hkawˇ hta‸ na yuˬ tuˬ yoˬ. Oˇ htaˇ, yawˬ moˍ teˇ moˍ tiˉ cawˬ leh, yawˬ hawˉ shehˍ hpaˇ teˇ g'aˇ tiˉ cawˬ tuˬ yoˬ. 17 Ngaˬ ve a sha‸ hta‸ k'aw‸ yuˬ hk'aw‸ g'a tuˬ, a sha‸ tanˇ piˇ ve pa taw Awˬ pa ngaˬ hta‸ ha‸ ve yoˬ. 18 Ngaˬ ve a sha‸ hta‸ chaw teˇ g'aˇ ka‸ maˇ hiˉ yuˬ maˇ lu yuˬ. Ngaˬ hk'aˇ ngaˬ tanˇ piˇ ve yoˬ. Ngaˬ ve a sha‸ hta‸ tanˇ piˇ tuˬ ve kanˇ paˆ leh, k'aw‸ yuˬ hk'aw‸ tuˬ ve kanˇ paˆ ngaˬ geh cawˬ ve yoˬ. Chi hk'e te tuˬ, Awˬ pa ngaˬ hta‸ tawˇ pe‸ laˇ peuˬ teh‸, yawˇ hui hta‸ k'oˆ piˇ ve yoˬ. 19 Tawˇ hkawˇ oˇ ve teˇ hpaˍ hta‸ pa taw Yuˇda‸ chaw teˇ hpaˍ lehˬ, teˇ g'aˇ leh teˇ g'aˇ dawˇ hk'aˇ maˇ k'aw‸ hawˍ da‸ ve yoˬ. 20 Yawˇ hui awˬ hk'aw lo chaw laiˉ g'aˇ k'oˆ ve, Yawˇ lehˬ neˇ geh leh g'uˇ ve yoˬ. Yawˇ ve tawˇ hkawˇ hta‸ aˬ hto‸ ma te nawˬ hui na ve le teh‸ k'oˆ ve yoˬ. 21 Teˇ hpaˍ hpaˍ k'oˆ ve, Yawˇ ve tawˇ hkawˇ lehˬ, neˇ geh ve chaw teˇ g'aˇ ve tawˇ hkawˇ maˇ heˆ. Neˇ lehˬ mehˆ cuˉ ve chaw hta‸ mehˆ mawˬ la piˇ g'a tuˬ laˇ teh‸ k'oˆ ve yoˬ. 22 Oˇ htaˇ, Yeˍruˆsaˍlehnˍ venˇ awˬ hk'aw lo Chiˇ a‸ piˇ ve pawehˇ te chehˇ ve yoˬ. 23 Mvuhˇ kaˆ ve awˬ yanˇ ka‸ hpeh‸ ve yoˬ. Yeˍsuˆ lehˬ bon yehˬ lonˉ awˬ hk'aw lo cawˬ ve Sawˉla‸monˍ ve koˇ caˉ lo te toˇ chehˇ ve yoˬ. 24 Oˇ htaˇ, Yuˇda‸ chaw teˇ hpaˍ yawˇ hta‸ hk'a caw zuhˇ chehˇ taˍ leh k'oˆ ve, Ngaˬ hui htawˇ dawˇ nawˬ dawˇ hpeh‸ tuˬ nawˬ hk'aˬ maw maw te laˇ tuˬ ve le. Nawˬ Hkri‸ hpeh‸ tehˬ ve k'o, ngaˬ hui hta‸ hk'a tawˍ lehˆ hto laˇ-oˆ teh‸, yawˇ hta‸ k'oˆ piˇ ve yoˬ. 25 Yeˍsuˆ k'aw‸ k'oˆ ve, Ngaˬ k'oˆ laˇ peuˬ ve ka‸ nawˬ hui maˇ yonˍ. Ngaˬ Awˬ pa ve awˬ meh awˬ hk'aw lo ngaˬ te ve kanˉ teˇ hpaˍ lehˬ, ngaˬ ve awˬ lawn hta‸ shaˉ hkiˆ hkanˍ ve yoˬ. 26 Ya‸ hk'aˇ, nawˬ hui lehˬ ngaˬ ve yawˬ teˇ hpaˍ maˇ heˆ ve pa taw, nawˬ hui maˇ yonˍ. 27 Ngaˬ ve yawˬ teˇ hpaˍ lehˬ, ngaˬ ve tawˇ hkawˇ hta‸ na yuˬ ve yoˬ. Yawˬ oˇ ve teˇ hpaˍ hta‸ ngaˬ shiˍ leh, yawˇ hui ngaˬ awˬ hk'aˇ suh laˬ ve yoˬ. 28 Ngaˬ yawˇ hui hta‸ co ti‸ ha ti‸ piˇ leh, yawˇ hui hk'aˬ htaˆ ka‸ maˇ g'a luˬ maˇ g'a sheˆ. A shu ka‸ ngaˬ ve la‸ sheh awˬ hk'aw lo yawˇ hui hta‸ lu yuˬ maˇ g'a. 29 Yawˬ oˇ ve teˇ hpaˍ hta‸ ngaˬ ve la‸ sheh awˬ hk'aw lo chiˇ a‸ laˇ shehˍ hpaˇ ngaˬ ve Awˬ pa lehˬ, hk'a peu-eˬ awˬ hk'oˆ uiˍ ve yoˬ. A shu ka‸ Awˬ pa ve la‸ sheh awˬ hk'aw lo yawˬ oˇ ve teˇ hpaˍ hta‸ lu yuˬ maˇ g'a. 30 Awˬ pa ngaˬ huiˉ maˬ teˇ g'aˇ tiˉ hpeh‸ ve yoˬ teh‸, yawˇ yawˇ hui hta‸ k'oˆ piˇ ve yoˬ. 31 Oˇ htaˇ Yuˇda‸ chaw teˇ hpaˍ lehˬ, yawˇ hta‸ baˬ tuˬ ve haˉ pui shiˍ k'aw‸ g'awˆ ve yoˬ. 32 Yeˍsuˆ k'aw‸ k'oˆ ve, Ngaˬ Awˬ pa lo tawˆ la ve da‸ ve kanˉ laiˉ ceuˬ ngaˬ nawˬ hui hta‸ te maˍ laˇ peuˬ. Kanˉ oˇ ve teˇ hpaˍ awˬ hk'aw lo, hk'aˬ ve teˇ ceuˬ hta‸ pa taw nawˬ hui ngaˬ hta‸ haˉ pui baˬ-a teh‸ te ve le teh‸ yawˇ hui hta‸ k'oˆ piˇ ve yoˬ. 33 Yuˇda‸ chaw teˇ hpaˍ k'aw‸ k'oˆ ve, Nawˬ da‸ ve kanˉ te ve pa taw nawˬ hta‸ haˉ pui baˬ-a teh‸ te ve maˇ heˆ. Nawˬ G'uiˬ sha hta‸ maˇ shawˍ maˇ caˆ k'oˆ ve pa taw baˬ-a teh‸ te ve yoˬ. Awˬ lawn k'o, nawˬ chaw yaˇ hpeh‸ ve ka‸, G'uiˬ sha hk'e nawˬ te ve yoˬ teh‸, yawˇ hta‸ k'oˆ piˇ ve yoˬ. 34 Yeˍsuˆ k'aw‸ k'oˆ ve, Nawˬ hui ve awˬ liˇ tawˇ hkawˇ awˬ hk'aw lo chi hk'e bvuh‸ taˍ ve yoˬ. Ngaˬ k'oˆ ve, nawˬ hui lehˬ g'uiˬ sha teˇ hpaˍ hpeh‸ ve yoˬ teh‸, chi hk'e bvuh‸ taˍ ve maˇ heˆ laˇ. 35 G'uiˬ sha lehˬ, yawˇ ve tawˇ hkawˇ hta‸ g'a ve chaw teˇ hpaˍ hta‸ g'uiˬ sha teˇ hpaˍ yoˬ teh‸ k'oˆ ve yoˬ. (Li‸ hpu tawˇ hkawˇ hta‸ te luˬ maˇ hpeh‸.) 36 Hk'e te k'o, Awˬ pa da‸ piˇ kehˬ piˇ leh, chi miˬ guiˬ hk'oˆ lo peu laˇ ve teˇ g'aˇ lehˬ, Ngaˬ G'uiˬ sha ve Yaˇ hpu hpeh‸ ve yoˬ teh‸ ngaˬ k'oˆ ve pa taw, Nawˬ G'uiˬ sha hta‸ maˇ shawˍ maˇ caˆ k'oˆ ve yoˬ teh‸, nawˬ hui k'oˇ ve leh laˇ. 37 Ngaˬ Awˬ pa ve kanˉ teˇ hpaˍ hta‸ ngaˬ maˇ te ve k'o, ngaˬ hta‸ taˇ yonˍ. 38 Ya‸ hk'aˇ ngaˬ te ve k'o, nawˬ hui ngaˬ hta‸ maˇ yonˍ htawˇ, ngaˬ te ve kanˉ teˇ hpaˍ hta‸ yonˍ-o‸. Oˇ hk'e yonˍ ve k'o, Awˬ pa ngaˬ awˬ hk'aw lo chehˇ ve hta‸ ka‸, ngaˬ lehˬ Awˬ pa awˬ hk'aw lo chehˇ ve hta‸ ka‸, nawˬ hui g'a shiˍ g'a mawˬ tuˬ yoˬ teh‸ yawˇ hui hta‸ k'oˆ piˇ ve yoˬ. 39 Oˇ htaˇ, yawˇ hui yawˇ hta‸ k'aw‸ hpeh yuˬ-a teh‸ te ve teˇ yanˇ, yawˇ yawˇ hui ve la‸ hk'aw lo tawˆ k'ai ve yoˬ. 40 Yoˇhanˬ awˉ lawˉ peuˇ baˆtiˆsaˬ piˇ ve teˇ kaˬ, Yawˇdanˍ g'uiˬ ma coˇ paˉ lo yawˇ teˇ pawˆ k'aw‸ k'ai leh, oˇ kaˬ lo chehˇ taˍ ve yoˬ. 41 Chaw laiˉ g'aˇ yawˇ geh lo laˬ ve yoˬ. Yawˇ hui k'oˆ ve, Yoˇhanˬ lehˬ awˬ heˆ te‸ chiˉ maˇ te. Ya‸ hk'aˇ, chaw chi teˇ g'aˇ awˬ lawn Yoˇhanˬ hk'a k'oˆ taˍ ve hk'a peu-eˬ lehˬ, cawˇ tehˬ ve yoˬ teh‸ k'oˆ da‸ ve yoˬ. 42 Oˇ kaˬ lo chaw laiˉ g'aˇ yawˇ hta‸ yonˍ la ve yoˬ.

Yoˇhanˬ 11

1 Maˍriˆ leh yawˇ ve awˬ viˉ ma Maˍhtaˆ hui chehˇ ve Beˍtaˍniˆ hk'aˆ yaˇ Laˍzaˍruˆ meh ve teˇ g'aˇ naˬ chehˇ ve yoˬ. 2 Maˍriˆ oˇ ve teˇ g'aˇ lehˬ, ponˬ laˬ htaˇ Jawˇ mawˇ Yeˍsuˆ hta‸ naˍ manˇ hawnˉ shehˍ piˇ leh, yawˇ ve hkui sheh hta‸ uˉ hkeh mvuh yuˬ shiˆ piˇ ve yaˇ miˇ teˇ g'aˇ yoˬ. Naˬ chehˇ ve Laˍzaˍruˆ lehˬ, yawˇ ve awˬ nyi paˍ hpeh‸ ve yoˬ. 3 Hk'e te leh, awˬ viˉ ma oˇ ve nyiˇ g'aˇ lehˬ, Yeˍsuˆ geh shu hta‸ k'ai tcuh leh, Jawˇ mawˇ-oˬ, nawˬ ha‸ ve chaw teˇ g'aˇ naˬ chehˇ ve yoˬ teh‸ k'oˆ piˇ tcuh ve yoˬ. 4 Tawˇ oˇ ve hta‸ Yeˍsuˆ g'a kaˇ htaˇ yawˇ k'oˆ ve, Naˬ ve oˇ ve lehˬ, suh law‸ law‸ naˬ ve teˇ ceuˬ maˇ heˆ. Naˬ ve oˇ ve hta‸ pa taw G'uiˬ sha ve awˬ me‸ awˬ hponˇ tawˆ la leh, oˇ ve awˬ hk'aw lo G'uiˬ sha ve Yaˇ hpu awˬ me‸ awˬ hponˇ tawˆ la tuˬ awˬ pon yoˬ teh‸ k'oˆ ve yoˬ. 5 Yeˍsuˆ lehˬ, Maˍhtaˆ leh yawˇ ve awˬ nyi ma hta‸ maˇ k'oˆ, Laˍzaˍruˆ hta‸ maˇ k'oˆ, ha‸ ve yoˬ. 6 Hk'e te leh, Laˍzaˍruˆ naˬ ve awˬ lawn hta‸ yawˇ g'a kaˇ htaˇ, Yeˍsuˆ yawˇ chehˇ taˍ ve teˇ kaˬ lo nyiˇ nyi k'aw‸ chehˇ taˍ ve yoˬ. 7 Oˇ ve awˬ hk'aw‸ nawˉ Yeˍsuˆ k'oˆ ve, Ngaˬ hui Yuˇda‸ mvuhˇ miˬ lo teˇ pawˆ k'aw‸ k'ai-a veuˬ teh‸, awˬ la‸ g'awˇ teˇ hpaˍ hta‸ k'oˆ piˇ ve yoˬ. 8 Awˬ la‸ g'awˇ teˇ hpaˍ k'aw‸ k'oˆ ve, Raˍbiˆ-oˬ, chi beu‸ ka‸ Yuˇda‸ chaw teˇ hpaˍ nawˬ hta‸ haˉ pui baˬ-a teh‸ te chehˇ ve ka‸, nawˬ oˇ kaˬ lo teˇ pawˆ k'aw‸ k'ai tuˬ laˇ teh‸, yawˇ hta‸ k'oˆ piˇ ve yoˬ. 9 Yeˍsuˆ k'aw‸ k'oˆ ve, Teˇ nyi awˬ hk'aw lo teˇ chi nyiˇ naˍ riˍ cawˬ ve maˇ heˆ laˇ. Chaw teˇ g'aˇ g'aˇ mvuhˇ law‸ k'aw htaˇ ya‸ k'aw juˇ k'ai ve k'o, chi miˬ guiˬ ve awˬ g'euˆ hta‸ g'a mawˬ ve pa taw, yawˇ hkui htiˇ poˬ paiˍ tuˬ maˇ heˆ. 10 Ya‸ hk'aˇ, chaw teˇ g'aˇ g'aˇ mvuhˇ hpeu‸ htaˇ ya‸ k'aw juˇ k'ai ve k'o, yawˇ awˬ hk'aw lo awˬ g'euˆ maˇ cawˬ ve pa taw, hkui htiˇ poˬ paiˍ ve yoˬ teh‸ k'oˆ ve yoˬ. 11 Yawˇ chi hk'e k'oˆ peuˬ hk'aw‸ nawˉ teˇ pawˆ k'aw‸ k'oˆ ve, Ngaˬ hui ve awˬ chawˇ Laˍzaˍruˆ zuh‸ muiˉ k'a peuˬ. Ya‸ hk'aˇ, yawˇ hta‸ ca nawˍ piˇ tuˬ ngaˬ k'ai shaˍ teh‸, yawˇ hui hta‸ k'oˆ piˇ ve yoˬ. 12 Awˬ la‸ g'awˇ teˇ hpaˍ k'oˆ ve, Jawˇ mawˇ-oˬ, yawˇ zuh‸ muiˉ k'a chehˇ ve k'o, na-e la tuˬ yoˬ teh‸ yawˇ hta‸ k'oˆ piˇ ve yoˬ. 13 Yeˍsuˆ lehˬ, Laˍzaˍruˆ suh peuˬ ve awˬ lawn hta‸ k'oˆ ve htawˇ, Laˍzaˍruˆ zuh‸ muiˉ k'a chehˇ ve hta‸ k'oˆ ve teh‸ yawˇ hui dawˇ ve yoˬ. 14 Hk'e te leh, Yeˍsuˆ yawˇ hui hta‸ hk'a tawˍ lehˆ k'oˆ piˇ ve, Laˍzaˍruˆ suh peuˬ. 15 Nawˬ hui yonˍ hpeh‸ tuˬ ngaˬ oˇ kaˬ lo maˇ chehˇ ve pa taw nawˬ hui awˬ pon ngaˬ ha lehˬ ve yoˬ. Chi beu‸ yawˇ geh k'ai-a veuˬ teh‸ k'oˆ piˇ ve yoˬ. 16 Hk'e te leh, Yaˇ cehˬ k'a teh‸ k'oˆ ve Htoˉma‸ teˇ g'aˇ lehˬ, Yawˇ geh teˇ geh suh tuˬ ngaˬ hui htawˇ k'ai-a veuˬ teh‸, yawˇ ve awˬ chawˇ awˬ la‸ g'awˇ teˇ hpaˍ hta‸ k'oˆ piˇ ve yoˬ. 17 Yeˍsuˆ gaˬ la ve teˇ yanˇ htaˇ, Laˍzaˍruˆ hta‸ tuˍ hpfuh hk'aw lo tuˍ taˍ ve awˇ nyi gaˬ peuˬ ve hta‸ yawˇ g'a shiˍ ve yoˬ. 18 Beˍtaˍniˆ venˇ lehˬ, Yeˍruˆsaˍlehnˍ venˇ hta‸ neˇ ve yoˬ. Aˬ laˬ hk'e nyiˇ laˆ ceh tiˉ vuiˇ da‸ ve yoˬ. 19 Chi hta‸ pa taw, Maˍhtaˆ leh Maˍriˆ geh Yuˇda‸ chaw maˇ maˇ laˬ leh, yawˇ huiˉ maˬ ve awˬ nyi paˍ Laˍzaˍruˆ suh ve pa taw, yawˇ huiˉ maˬ hta‸ dawˇ sha tuˬ te piˇ chehˇ ve yoˬ. 20 Yeˍsuˆ laˬ chehˇ ve awˬ lawn hta‸ Maˍhtaˆ g'a kaˇ htaˇ, yawˇ hta‸ ca ha‸ ve yoˬ. Ya‸ hk'aˇ Maˍriˆ lehˬ, yehˬ hk'aw chehˇ taˍ ve yoˬ. 21 Oˇ htaˇ Maˍhtaˆ k'oˆ ve, Jawˇ mawˇ-oˬ, nawˬ choˬ kaˬ chehˇ taˍ ve hk'e k'o, ngaˬ ve awˬ nyi paˍ suh tuˬ ve maˇ heˆ. 22 Chi beu‸ ka‸ G'uiˬ sha geh nawˬ aˬ hto‸ ma teˇ ceuˬ lawˬ ve maˇ k'oˆ, G'uiˬ sha nawˬ hta‸ pe‸ laˇ tuˬ ve hta‸ ngaˬ shiˍ ve yoˬ teh‸, Yeˍsuˆ hta‸ k'oˆ piˇ ve yoˬ. 23 Yeˍsuˆ k'oˆ ve, Nawˬ ve awˬ nyi paˍ k'aw‸ te‸ tu la tuˬ yoˬ teh‸ yawˇ hta‸ k'oˆ piˇ ve yoˬ. 24 Maˍhtaˆ k'oˆ ve, Awˬ leh meuˇ teˇ nyi, k'aw‸ te‸ tu la ve awˬ yanˇ gaˬ k'o, yawˇ k'aw‸ te‸ tu la tuˬ ve hta‸ ngaˬ shiˍ ve yoˬ teh‸, yawˇ hta‸ k'oˆ piˇ ve yoˬ. 25 Yeˍsuˆ k'aw‸ k'oˆ ve, Ngaˬ lehˬ, k'aw‸ te‸ tu la ve teˇ ceuˬ leh co ha te‸ ve teˇ ceuˬ hpeh‸ ve yoˬ. Ngaˬ hta‸ yonˍ ve chaw lehˬ, suh peuˬ ve htawˇ, yawˇ k'aw‸ te‸ tu la tuˬ yoˬ. 26 A sha‸ te‸ leh ngaˬ hta‸ hk'a yonˍ ve chaw teˇ hpaˍ lehˬ, hk'aˬ htaˆ ka‸ maˇ g'a suh. Tawˇ hkawˇ chi hta‸ nawˬ yonˍ ve laˇ teh‸ yawˇ hta‸ k'oˆ piˇ ve yoˬ. 27 Maˍhtaˆ k'oˆ ve, Yoˬ, Jawˇ mawˇ-oˬ. Nawˬ lehˬ miˬ guiˬ hk'oˆ lo laˬ ve, G'uiˬ sha ve Yaˇ hpu Hkri‸ hpeh‸ ve hta‸ ngaˬ yonˍ ve yoˬ teh‸, yawˇ hta‸ k'oˆ piˇ ve yoˬ. 28 Maˍhtaˆ chi hk'e k'oˆ peuˬ hk'aw‸ nawˉ, yawˇ k'ai leh yawˇ ve awˬ nyi ma Maˍriˆ hta‸ k'oˆ piˇ ve, Saˍ la‸ gaˬ la peuˬ. Yawˇ nawˬ hta‸ kuˬ chehˇ ve yoˬ teh‸, a yehˉ k'oˆ piˇ ve yoˬ. 29 Maˍriˆ tawˇ oˇ ve hta‸ g'a kaˇ htaˇ, yawˇ haˆ tu leh Yeˍsuˆ geh k'ai ve yoˬ. 30 Oˇ htaˇ, Yeˍsuˆ lehˬ hk'aˆ hk'aw lo maˇ lo‸-e sheˍ. Maˍhtaˆ yawˇ hta‸ ca ha‸ ve teˇ kaˬ lo yawˇ chehˇ taˍ sheˍ ve yoˬ. 31 Hk'e te leh, Maˍriˆ geh yehˬ awˬ hk'aw lo chehˇ taˍ leh yawˇ hta‸ dawˇ sha tuˬ te chehˇ ve Yuˇda‸ chaw teˇ hpaˍ lehˬ, Maˍriˆ haˆ tu leh tawˆ k'ai ve hta‸ g'a mawˬ ve teˇ yanˇ, yawˇ tuˍ hpfuh lo ca hawˬ ve hehˉ teh‸ dawˇ leh, yawˇ hui yawˇ awˬ hk'aˇ suh k'ai ve yoˬ. 32 Maˍriˆ lehˬ, Yeˍsuˆ chehˇ taˍ kuiˬ lo gaˬ la leh yawˇ hta‸ mawˬ ve teˇ yanˇ, yawˇ ve hkui paˇ lo boˆ sheˬ leh k'oˆ ve, Jawˇ mawˇ-oˬ, nawˬ choˬ kaˬ chehˇ taˍ ve hk'e k'o, ngaˬ ve awˬ nyi paˍ suh tuˬ ve maˇ heˆ teh‸ yawˇ hta‸ k'oˆ piˇ ve yoˬ. 33 Maˍriˆ leh yawˇ awˬ hk'aˇ suh laˬ chehˇ ve Yuˇda‸ chaw hui hawˬ chehˇ ve hta‸ Yeˍsuˆ g'a mawˬ ve teˇ yanˇ, yawˇ ve nyi ma awˬ hk'aw lo hk'anˇ leh dawˇ haˍ jaˇ ve yoˬ. 34 Nawˬ hui yawˇ hta‸ hk'aˬ lo ca taˍ ve le teh‸, Yeˍsuˆ na nyi ve teˇ yanˇ, Jawˇ mawˇ-oˬ, ca nyi la-o teh‸ yawˇ hui yawˇ hta‸ k'oˆ piˇ ve yoˬ. 35 Yeˍsuˆ lehˬ, mehˆ g'uiˬ ya‸ la ve yoˬ. 36 Hk'e te leh, Yuˇda‸ chaw teˇ hpaˍ k'oˆ ve, Nyi sheˍ. Yawˇ lehˬ, Laˍzaˍruˆ hta‸ ha‸ jaˇ law leˇ teh‸ k'oˇ da‸ ve yoˬ. 37 Teˇ hpaˍ hpaˍ k'oˆ ve, Mehˆ cuˉ paˍ hta‸ mehˆ mawˬ la piˇ lawˬ ve chaw chi teˇ g'aˇ lehˬ, Laˍzaˍruˆ maˇ g'a suh tuˬ te maˇ g'a leh laˇ teh‸ k'oˆ da‸ ve yoˬ. 38 Oˇ htaˇ, Yeˍsuˆ yawˇ ve nyi ma awˬ hk'aw lo teˇ pawˆ k'aw‸ hk'anˇ leh tuˍ hpfuh lo gaˬ ve yoˬ. Tuˍ hpfuh oˇ ve lehˬ, haˉ k'oˍ hpeh‸ leh, awˬ hk'oˇ meuˇ lo haˉ pui shiˍ hoˆ taˍ ve yoˬ. 39 Haˉ pui shiˍ hta‸ hpfuhˆ baˬ-o‸ teh‸ Yeˍsuˆ k'oˆ ve teˇ yanˇ, suh peuˬ ve chaw teˇ g'aˇ ve awˬ viˉ ma Maˍhtaˆ k'oˆ ve, Jawˇ mawˇ-oˬ, yawˇ suh ve chi beu‸ awˇ nyi gaˬ peuˬ ve pa taw, kuiˇ nuˬ la peuˬ teh‸ yawˇ hta‸ k'oˆ piˇ ve yoˬ. 40 Yeˍsuˆ k'aw‸ k'oˆ ve, Nawˬ yonˍ ve k'o, G'uiˬ sha ve awˬ me‸ awˬ hponˇ hta‸ nawˬ g'a mawˬ tuˬ yoˬ teh‸ ngaˬ nawˬ hta‸ k'oˆ laˇ peuˬ maˇ heˆ laˇ teh‸ yawˇ hta‸ k'oˆ piˇ ve yoˬ. 41 Oˇ htaˇ, haˉ pui shiˍ oˇ ve hta‸ yawˇ hui hpfuhˆ baˬ ve yoˬ. Yeˍsuˆ mvuhˇ naw ma lo chiˇ nyi leh k'oˆ ve, A pa-oˬ, nawˬ ngaˬ ve tawˇ hkawˇ hta‸ na yuˬ ve pa taw, ngaˬ nawˬ hta‸ chiˇ mvuh ve yoˬ. 42 Ngaˬ ve tawˇ hkawˇ hta‸ nawˬ hk'aˬ htaˆ ka‸ na yuˬ ve hta‸ ngaˬ shiˍ ve yoˬ. Ya‸ hk'aˇ, nawˬ ngaˬ hta‸ peu laˇ ve yoˬ teh‸, awˬ paˇ lo huˉ chehˇ ve chaw chi teˇ hpaˍ g'a yonˍ tuˬ, yawˇ hui awˬ pon ngaˬ chi hk'e k'oˆ ve yoˬ teh‸ k'oˆ ve yoˬ. 43 Yawˇ chi hk'e k'oˆ peuˬ hk'aw‸ nawˉ, Laˍzaˍruˆ-oˬ, tawˆ la-o teh‸, yawˇ awˬ hkawˇ bvuhˬ chaweh kuˬ ve yoˬ. 44 Oˇ htaˇ, suh peuˬ ve chaw oˇ ve lehˬ, tuˍ hpfuh awˬ hk'aw lo tawˆ la ve yoˬ. Yawˇ ve hkui sheh la‸ sheh hta‸ hpa hawˆ taˍ leh, yawˇ ve mehˆ hpfuhˇ hta‸ hpaˉ ce‸ hpeh tsuh‸ taˍ ve yoˬ. Yeˍsuˆ k'oˆ ve, Yawˇ hta‸ hpui hpehˇ piˇ-oˆ teh‸ yawˇ hui hta‸ k'oˆ piˇ ve yoˬ. 45 Hk'e te leh, Maˍriˆ geh laˬ ve Yuˇda‸ chaw laiˉ g'aˇ lehˬ, Yeˍsuˆ te ve kanˉ hta‸ g'a mawˬ htaˇ, yawˇ hta‸ yonˍ la ve yoˬ. 46 Ya‸ hk'aˇ teˇ hpaˍ hpaˍ lehˬ, Hpaˍriˍsehˇ hui geh k'ai leh, Yeˍsuˆ te ve kanˉ awˬ lawn ca hto piˇ ve yoˬ. 47 Oˇ htaˇ, paw hkuˇ lonˉ teˇ hpaˍ leh Hpaˍriˍsehˇ teˇ hpaˍ lehˬ, jehˬ shehˍ hpaˇ awˬ moˍ hta‸ kuˬ hpawnˬ peuˬ hk'aw‸ nawˉ, Ngaˬ hui hk'aˬ hk'e g'a te tuˬ le. Awˬ lawn k'o, chaw oˇ ve hpaˇ lehˬ, awˬ heˆ laiˉ ceuˬ te chehˇ ve yoˬ. 48 Ngaˬ hui yawˇ hta‸ hk'e leˇ teh taˍ ve k'o, chaw hk'a peu-eˬ yawˇ hta‸ yonˍ tuˬ yoˬ. Roˉma‸ chaw teˇ hpaˍ laˬ leh, ngaˬ hui ve da‸ kehˬ ve chehˇ kuiˬ hta‸ maˇ k'oˆ, ngaˬ hui ve mvuhˇ miˬ hta‸ maˇ k'oˆ, hiˉ yuˬ laˇ tuˬ yoˬ teh‸ k'oˆ ve yoˬ. 49 Ya‸ hk'aˇ, yawˇ hui ve awˬ moˍ awˬ hk'aw lo Kaˍyaˍhpaˆ meh ve chaw teˇ g'aˇ cawˬ ve yoˬ. Yawˇ lehˬ, oˇ ve teˇ hk'aw‸ paw hkuˇ lonˉ te chehˇ ve yoˬ. Yawˇ k'oˆ ve, Nawˬ hui te‸ chiˉ maˇ shiˍ. 50 Chaw teˇ ceuˬ hk'a peu-eˬ maˇ g'a luˬ tuˬ, chaw teˇ g'aˇ lehˬ chaw teˇ ceuˬ awˬ pon suh ve k'o, nawˬ hui awˬ pon leuˉ leh da‸ ve hta‸ nawˬ hui maˇ dawˇ nyi law leˇ teh‸, yawˇ hui hta‸ k'oˆ piˇ ve yoˬ. 51 Tawˇ hkawˇ oˇ ve hta‸ yawˇ hk'aˇ yawˇ dawˇ tawˆ leh yaw ve maˇ heˆ. Oˇ ve teˇ hk'aw‸ awˬ hk'aw lo yawˇ paw hkuˇ lonˉ hpeh‸ ve pa taw, Yeˍsuˆ lehˬ chaw oˇ ve teˇ ceuˬ awˬ pon g'a suh tuˬ yoˬ teh‸ yawˇ k'oˆ ve lehˬ, G'uiˬ sha ve tcuh kaˍ paˍ hk'e te leh tawˇ yaw ve yoˬ. 52 Chaw oˇ ve teˇ ceuˬ tiˉ awˬ pon Yeˍsuˆ g'a suh tuˬ ve maˇ heˆ. Teˇ kaˬ le le lo hpaˆ da‸ chehˇ taˍ ve G'uiˬ sha ve awˬ yaˇ awˬ duˬ hui hta‸ teˇ moˍ tiˉ hpeh‸ la tuˬ awˬ pon htawˇ yawˇ g'a suh tuˬ yoˬ. 53 Oˇ ve teˇ nyi hta‸ tanˬ leh, yawˇ hta‸ g'a tiˇ pehˍ tuˬ yawˇ hui jehˬ da‸ ve yoˬ. 54 Hk'e te leh Yeˍsuˆ lehˬ, Yuˇda‸ chaw teˇ hpaˍ awˬ hk'aw lo hk'a tawˍ lehˆ maˇ k'aw‸ te toˇ. Yawˇ oˇ kaˬ lo tawˆ k'ai leh, heh puiˉ hk'aw hta‸ neˇ ve mvuhˇ miˬ teˇ peˆ awˬ hk'aw lo cawˬ ve Eˇhpaˍrenˍ venˇ lo gaˬ ve yoˬ. Oˇ kaˬ lo yawˇ ve awˬ la‸ g'awˇ hui geh yawˇ chehˇ taˍ ve yoˬ. 55 Yuˇda‸ chaw hui Paˍsaˍhkaˍ pawehˇ gaˬ la paˇ neˇ ve teˇ yanˇ, chaw maˇ maˇ a shu yawˇ awˬ to da‸ la kehˬ la piˇ tuˬ, pawehˇ maˇ gaˬ sheˍ htaˇ ka‸, hk'aw hk'oˆ lawˬ hk'oˆ lo tu leh, Yeˍruˆsaˍlehnˍ venˇ lo k'ai ve yoˬ. 56 Hk'e te leh, yawˇ hui Yeˍsuˆ hta‸ ca chehˇ ve yoˬ. Bon yehˬ lonˉ awˬ hk'aw lo yawˇ hui huˉ chehˇ htaˇ, teˇ g'aˇ leh teˇ g'aˇ k'oˆ da‸ ve, Nawˬ hui hk'aˬ hk'e dawˇ le. Yawˇ lehˬ pawehˇ chi awˬ hk'aw lo maˇ laˬ hehˉ laˇ teh‸ na nyi da‸ ve yoˬ. 57 Oˇ htaˇ paw hkuˇ lonˉ hui leh Hpaˍriˍsehˇ hui lehˬ, chi hk'e tawˇ piˇ taˍ ve, A shu teˇ g'aˇ maˇ k'oˆ, yawˇ hk'aˬ lo chehˇ taˍ ve hta‸ shiˍ ve k'o, yawˇ hta‸ ngaˬ hui hpeh yuˬ tuˬ g'a hto laˇ ve yoˬ teh‸ tawˇ piˇ taˍ ve yoˬ.

Yoˇhanˬ 12

1 Paˍsaˍhkaˍ pawehˇ maˇ gaˬ sheˍ awˬ g'uˇ suhˍ hkaw‸ nyi htaˇ ka‸, Yeˍsuˆ lehˬ Beˍtaˍniˆ hk'aˆ lo gaˬ ve yoˬ. Hk'aˆ oˇ ve lehˬ, suh kuiˬ lo yawˇ k'aw‸ te‸ tu la piˇ ve Laˍzaˍruˆ ve chehˇ kuiˬ hpeh‸ ve yoˬ. 2 Oˇ htaˇ, yawˇ hui lehˬ yawˇ hta‸ mvuhˇ hpeu‸ awˍ teˇ poˬ te caˍ piˇ ve yoˬ. Maˍhtaˆ awˬ keu caˍ piˇ shehˍ ma te leh Laˍzaˍruˆ leh awˬ kaˍ awˬ nu chaw teˇ hpaˍ Yeˍsuˆ geh teˇ geh mui caˇ chehˇ ve yoˬ. 3 Oˇ htaˇ Maˍriˆ lehˬ, awˬ hpfuhˇ hk'aˆ jaˇ ve naˍduˆ teh‸ k'oˆ ve naˍ manˇ hawnˉ teˇ chi law hta‸ yuˬ leh, Yeˍsuˆ ve hkui sheh hta‸ shehˍ piˇ ve yoˬ. Peuˬ leh, Maˍriˆ yawˇ ve uˉ hkeh mvuh yuˬ leh Yeˍsuˆ ve hkui sheh hta‸ shiˆ piˇ ve yoˬ. Naˍ manˇ hawnˉ oˇ ve awˬ shaˉ lehˬ, yehˬ teˇ yehˬ hk'a peu-eˬ hawnˉ heuˍ lehˍ k'ai ve yoˬ. 4 Ya‸ hk'aˇ, yawˇ hta‸ chiˇ a‸ piˇ tuˬ ve, yawˇ ve awˬ la‸ g'awˇ Yuˇda‸ Iˉsaˍkaˍriˍoˆ teˇ g'aˇ k'oˆ ve, 5 Naˍ manˇ hawnˉ chi hta‸ hpu shehˆ ha hteh‸ hawˇ sheˬ leh haˍ yaˇ g'awˇ yaˇ hui hta‸ aˬ hto‸ ma te maˇ pehˬ piˇ ve le teh‸ k'oˆ ve yoˬ. 6 Yawˇ chi hk'e k'oˆ ve lehˬ, haˍ ve g'awˇ ve chaw hui hta‸ dawˇ nyi leh k'oˆ ve maˇ heˆ. Yawˇ lehˬ chaw hk'awˇ hpeh‸ ve pa taw k'oˆ ve yoˬ. Hpu miˉ chaw hta‸ yawˇ ha‸ shaˉ leh, keu taˍ ve hpu hta‸ yawˇ yuˬ jaw ve yoˬ. 7 Yeˍsuˆ k'oˆ ve, Yaˇ miˇ chi hta‸ taˇ deˇ. Ngaˬ hta‸ tuˍ laˇ tuˬ ve awˬ nyi teˇ nyi awˬ pon, naˍ manˇ hawnˉ oˇ ve hta‸ yawˇ ha‸ shaˉ taˍ peuˬ. 8 Haˍ ve g'awˇ ve chaw hui lehˬ, nawˬ hui geh hk'aˬ htaˆ ka‸ chehˇ taˍ ve yoˬ. Ya‸ hk'aˇ, ngaˬ nawˬ hui geh hk'aˬ htaˆ ka‸ chehˇ tuˬ ve maˇ heˆ teh‸ k'oˆ ve yoˬ. 9 Yeˍsuˆ oˇ kaˬ lo chehˇ taˍ ve hta‸ Yuˇda‸ chaw awˬ moˍ lonˉ g'a shiˍ htaˇ, yawˇ hui oˇ kaˬ lo k'ai ve yoˬ. Yeˍsuˆ hta‸ pa taw ceh tiˉ k'ai ve maˇ heˆ. Suh kuiˬ lo yawˇ k'aw‸ te‸ tu la piˇ ve Laˍzaˍruˆ hta‸ htawˇ mawˬ gaˇ leh k'ai ve yoˬ. 10 Oˇ htaˇ, paw hkuˇ lonˉ teˇ hpaˍ lehˬ, Laˍzaˍruˆ hta‸ htawˇ tiˇ pehˍ tuˬ jehˬ da‸ ve yoˬ. 11 Awˬ lawn k'o, Laˍzaˍruˆ hta‸ pa taw Yuˇda‸ chaw laiˉ g'aˇ yawˇ hui ve awˬ moˍ awˬ hk'aw lo tawˆ k'ai chehˇ leh Yeˍsuˆ hta‸ yonˍ la chehˇ ve yoˬ. 12 Awˬ hk'aw‸ nawˉ teˇ nyi Yeˍsuˆ lehˬ, Yeˍruˆsaˍlehnˍ venˇ lo laˬ chehˇ ve hta‸ pawehˇ oˇ ve awˬ hk'aw lo gaˬ la ve chaw awˬ moˍ lonˉ g'a kaˇ ve yoˬ. 13 Yawˇ hui lehˬ, tcuhˉ pui meuˇ awˬ k'aˉ teˇ hpaˍ hta‸ yuˬ leh, yawˇ hta‸ ca ha‸ yuˬ tuˬ tawˆ k'ai ve yoˬ. Yawˇ hui k'oˆ ve, Hoˍsaˍnaˍ, Jawˇ mawˇ G'uiˬ sha ve awˬ meh awˬ hk'aw lo laˬ ve Iˉsaˍreˍlaˆ chaw hui ve Hkunˉ hawˉ hkanˇ hta‸ awˬ bon uiˍ piˇ-oˆ teh‸ kuˬ ve yoˬ. 14 Oˇ htaˇ Yeˍsuˆ lehˬ, piˉ laˬ ehˉ hta‸ mawˬ leh ciˇ ve yoˬ. Li‸ hpu hk'aw bvuh‸ taˍ ve hk'e, 15 Ziˉonˍ ve yaˇ miˇ-oˬ, taˇ kawˆ. Nyi loˬ, nawˬ ve hkunˉ hawˉ hkanˇ lehˬ, piˉ laˬ awˬ yehˇ hta‸ ciˇ leh laˬ chehˇ ve yoˬ, teh‸ bvuh‸ taˍ ve yoˬ. 16 Yawˇ ve awˬ la‸ g'awˇ teˇ hpaˍ awˉ lawˉ htaˇ awˬ lawn oˇ ve teˇ hpaˍ hta‸ maˇ shiˍ. Ya‸ hk'aˇ, Yeˍsuˆ awˬ me‸ awˬ hponˇ hta‸ g'a peuˬ hk'aw‸ nawˉ, yawˇ ve awˬ lawn chi hk'e bvuh‸ taˍ ve teˇ hpaˍ hta‸ maˇ k'oˆ, shu yawˇ hta‸ chi hk'e te piˇ ve hta‸ maˇ k'oˆ, yawˇ hui dawˇ nawˇ la ve yoˬ. 17 Yeˍsuˆ Laˍzaˍruˆ hta‸ tuˍ hpfuh awˬ hk'aw lo kuˬ tawˆ la leh yawˇ hta‸ suh kuiˬ lo k'aw‸ te‸ tu la piˇ ve teˇ yanˇ, Yeˍsuˆ geh chehˇ taˍ ve chaw awˬ moˍ lonˉ lehˬ, awˬ lawn oˇ ve hta‸ shaˉ hkiˆ hkanˍ chehˇ ve yoˬ. 18 Chaw awˬ moˍ lonˉ yawˇ hta‸ ca ha‸ ve lehˬ, yawˇ awˬ heˆ oˇ ve hta‸ te ve awˬ lawn yawˇ hui g'a kaˇ ve pa taw yoˬ. 19 Hk'e te leh, Hpaˍriˍsehˇ teˇ hpaˍ k'oˆ da‸ ve, Nawˬ hui te‸ chiˉ te maˇ g'a. Nyi loˬ, miˬ guiˬ yaˇ hk'a peu-eˬ yawˇ awˬ hk'aˇ suh k'ai peuˬ teh‸, teˇ g'aˇ leh teˇ g'aˇ k'oˆ da‸ ve yoˬ. 20 Pawehˇ oˇ ve awˬ hk'aw oˉ k'oˍ pui la tuˬ awˬ pon laˬ ve chaw teˇ hpaˍ awˬ hk'aw lo Heˍlaˍsaˆ chaw teˇ hpaˍ hpaˍ cawˬ ve yoˬ. 21 Yawˇ hui lehˬ, Gaˍliˍlehˇ mvuhˇ miˬ hk'aw cawˬ ve Behˇsehˇdaˆ venˇ yaˇ Hpiˇliˇpuˆ geh k'ai leh, Saˍ la‸-oˬ, ngaˬ hui Yeˍsuˆ hta‸ mawˬ gaˇ ve yoˬ teh‸, yawˇ hta‸ k'oˆ piˇ ve yoˬ. 22 Hpiˇliˇpuˆ k'ai leh Anˍdrehˍ hta‸ hto piˇ leh, Anˍdrehˍ leh Hpiˇliˇpuˆ yawˇ huiˉ maˬ Yeˍsuˆ hta‸ ca hto piˇ ve yoˬ. 23 Oˇ htaˇ Yeˍsuˆ k'oˆ ve, Chaw yaˇ ve Yaˇ hpu awˬ me‸ awˬ hponˇ g'a tuˬ ve awˬ yanˇ gaˬ la peuˬ. 24 Ngaˬ nawˬ hui hta‸ awˬ tehˬ awˬ na k'oˆ laˇ ve, caˬ yawˇ teˇ shiˍ miˬ guiˬ hk'oˆ lo maˇ ce leh, maˇ luˬ maˇ suh ve k'o, awˬ yawˇ teˇ shiˍ tiˉ cawˬ chehˇ ve yoˬ. Ya‸ hk'aˇ, luˬ k'ai suh k'ai ve k'o, awˬ shiˍ maˇ maˇ naw‸ la ve yoˬ. 25 A shu yawˇ ve a sha‸ hta‸ ha‸ ve chaw lehˬ, a sha‸ g'a shonˇ tuˬ yoˬ. Chi miˬ guiˬ hk'oˆ lo a shu yawˇ ve a sha‸ hta‸ canˇ ve chaw lehˬ, co ti‸ ha ti‸ g'a tuˬ awˬ pon a shu yawˇ ve a sha‸ hta‸ ha‸ shaˉ tuˬ yoˬ. 26 Ngaˬ ve kanˉ hta‸ te ve chaw teˇ g'aˇ lehˬ, ngaˬ awˬ hk'aˇ suh g'a laˬ ve yoˬ. Ngaˬ chehˇ ve teˇ kaˬ lo ngaˬ ve kanˉ hta‸ te ve chaw htawˇ chehˇ tuˬ yoˬ. Ngaˬ ve kanˉ hta‸ te ve chaw teˇ g'aˇ hta‸ Awˬ pa taˍ uiˍ taˍ mvuh piˇ tuˬ yoˬ. 27 Chi beu‸ ngaˬ nyi ma dawˇ haˍ jaˇ ve yoˬ. Ngaˬ hk'aˬ hk'e g'a k'oˆ tuˬ le. A pa-oˬ, awˬ yanˇ chi awˬ hk'aw lo ngaˬ hta‸ htaiˍ hk'aw‸ laˇ-oˆ teh‸ g'a k'oˆ tuˬ laˇ. Maˇ heˆ, awˬ lawn k'o awˬ yanˇ chi awˬ pon ngaˬ gaˬ la peuˬ. 28 A pa-oˬ, nawˬ ve awˬ meh hta‸ awˬ me‸ awˬ hponˇ tawˆ la piˇ-oˆ teh‸ k'oˆ ve yoˬ. Oˇ htaˇ, mvuhˇ naw ma lo awˬ hkawˇ bvuhˬ la leh, Ngaˬ ve awˬ meh hta‸ awˬ me‸ awˬ hponˇ cawˬ piˇ peuˬ. Ngaˬ teˇ pawˆ k'aw‸ cawˬ piˇ tuˬ sheˍ ve yoˬ teh‸ k'oˆ ve yoˬ. 29 Oˇ kaˬ lo huˉ chehˇ ve chaw awˬ moˍ lonˉ lehˬ, awˬ hkawˇ oˇ ve hta‸ g'a kaˇ leh, Mvuhˇ tawˍ tawˍ ve yoˬ teh‸ k'oˆ ve yoˬ. Teˇ hpaˍ hpaˍ lehˬ, Mvuhˇ naw ma tcuh yaˇ yawˇ hta‸ tawˇ yaw piˇ ve yoˬ teh‸ k'oˆ ve yoˬ. 30 Yeˍsuˆ k'aw‸ k'oˆ ve, Bvuhˬ la ve awˬ hkawˇ oˇ ve lehˬ, ngaˬ awˬ pon maˇ heˆ. Nawˬ hui awˬ pon yoˬ. 31 Miˬ guiˬ chi lehˬ, chi beu‸ ka‸ suhˉ jehˬ ve hta‸ g'a hkanˍ ve yoˬ. Miˬ guiˬ chi hta‸ uˉ peunˍ shehˍ hpaˇ hta‸ chi beu‸ ka‸ g'a‸ k'oˬ tuˬ yoˬ. 32 Chi miˬ guiˬ hk'oˆ ngaˬ chiˇ taˆ-e ve hta‸ g'a hkanˍ ve teˇ yanˇ, chaw hk'a peu-eˬ hta‸ ngaˬ geh lo ngaˬ g'awˬ veu laˇ tuˬ yoˬ teh‸ k'oˆ ve yoˬ. 33 Yawˇ chi hk'e k'oˆ ve lehˬ, yawˇ hk'aˬ hk'e g'a te suh tuˬ ve awˬ lawn hta‸ k'oˆ maˍ piˇ ve yoˬ. 34 Chaw awˬ moˍ lonˉ k'aw‸ k'oˆ ve, Hkri‸ lehˬ co co taiˍ taiˍ g'a chehˇ tuˬ yoˬ teh‸, awˬ liˇ tawˇ hkawˇ awˬ hk'aw lo ngaˬ hui g'a shiˍ g'a kaˇ ve yoˬ. Chaw yaˇ ve Yaˇ hpu lehˬ, chiˇ taˆ-e ve hta‸ g'a hkanˍ tuˬ yoˬ teh‸, nawˬ aˬ hto‸ ma te k'oˆ ve le. Chaw yaˇ ve Yaˇ hpu oˇ ve lehˬ, a shu le teh‸, yawˇ hta‸ k'oˆ piˇ ve yoˬ. 35 Yeˍsuˆ k'aw‸ k'oˆ ve, Awˬ g'euˆ lehˬ, nawˬ hui geh teˇ hkui ceh tiˉ cawˬ tuˬ yoˬ. Naˆ ho‸ ve nawˬ hui hta‸ maˇ g'a hoˆ tiˍ taˍ tuˬ, nawˬ geh awˬ g'euˆ cawˬ sheˍ ve teˇ yanˇ, nawˬ hui toˇ k'ai loˬ. Naˆ ho‸ ve awˬ hk'aw lo toˇ k'ai ve chaw lehˬ, yawˇ hk'aˬ lo k'ai ve hta‸ yawˇ maˇ shiˍ. 36 Nawˬ hui geh awˬ g'euˆ cawˬ sheˍ ve teˇ yanˇ, nawˬ hui awˬ g'euˆ ve yaˇ hpeh‸ la tuˬ, awˬ g'euˆ hta‸ yonˍ loˬ teh‸, yawˇ hui hta‸ k'oˆ piˇ ve yoˬ. Tawˇ chi teˇ hpaˍ hta‸ Yeˍsuˆ k'oˆ peuˬ hk'aw‸ nawˉ, yawˇ hui geh lo tawˆ k'ai leh ca va‸ taˍ ve yoˬ. 37 Yawˇ hui mehˆ g'uˇ suhˍ awˬ heˆ chi taw taw yawˇ te taˍ ve htawˇ, yawˇ hui yawˇ hta‸ maˇ yonˍ. 38 Chi hk'e hpeh‸ la ve lehˬ, G'uiˬ sha ve tcuh kaˍ paˍ Iˉsaˍyaˆ k'oˆ taˍ ve tawˇ teˇ hkawˇ biˇ la ve yoˬ. Yawˇ k'oˆ ve, Jawˇ mawˇ G'uiˬ sha-oˬ, ngaˬ hui k'oˆ ve tawˇ hkawˇ hta‸ a shu yonˍ ve le. Jawˇ mawˇ G'uiˬ sha ve kanˇ paˆ a shu hta‸ hpeu‸ maˍ piˇ ve le, teh‸ k'oˆ ve yoˬ. 39 Chi hta‸ pa taw yawˇ hui yonˍ maˇ hpeh‸. Awˬ lawn k'o, Iˉsaˍyaˆ teˇ pawˆ k'aw‸ k'oˆ ve, 40 Yawˇ hui mehˆ shiˍ maˇ g'a mawˬ tuˬ, nyi ma maˇ g'a dawˇ pawnˍ tuˬ leh, nyi ma maˇ k'aw‸ pa leh ngaˬ yawˇ hui hta‸ maˇ g'a gu na-e tuˬ, yawˇ hui ve mehˆ shiˍ hta‸ yawˇ cuˉ piˇ lawˬ leh, yawˇ hui ve nyi ma hta‸ heh piˇ lawˬ peuˬ, teh‸ k'oˇ ve yoˬ. 41 Iˉsaˍyaˆ oˇ hk'e k'oˆ ve lehˬ, Yeˍsuˆ ve awˬ me‸ awˬ hponˇ hta‸ yawˇ g'a mawˬ ve pa taw, yawˇ awˬ lawn hta‸ yawˇ k'oˆ ve yoˬ. 42 Ya‸ hk'aˇ htawˇ, jawˇ mawˇ teˇ hpaˍ awˬ hk'aw lo ka‸, laiˉ g'aˇ yawˇ hta‸ yonˍ ve yoˬ. Yawˇ hui yonˍ ve htawˇ, Hpaˍriˍsehˇ teˇ hpaˍ hta‸ kawˆ ve pa taw, yonˍ ve yoˬ teh‸ yawˇ hui maˇ k'oˆ. Awˬ lawn k'o, Yuˇda‸ chaw hui ve awˬ moˍ awˬ hk'aw lo g'a‸ tawˆ laˇ ve hta‸ yawˇ hui dawˇ haˍ ve yoˬ. 43 Awˬ lawn k'o, G'uiˬ sha geh awˬ me‸ awˬ hponˇ g'a ve a‸ kehˉ, chaw yaˇ hui geh awˬ me‸ awˬ hponˇ g'a tuˬ ve hta‸ yawˇ hui heuˆ gaˇ ve yoˬ. 44 Yeˍsuˆ awˬ hkawˇ bvuhˬ chaweh kuˬ leh k'oˆ ve, Ngaˬ hta‸ yonˍ ve chaw lehˬ, ngaˬ hta‸ yonˍ ve teˇ ceuˬ maˇ heˆ. Ngaˬ hta‸ peu laˇ shehˍ hpaˇ hta‸ yonˍ ve yoˬ. 45 Ngaˬ hta‸ mawˬ ve chaw lehˬ, ngaˬ hta‸ peu laˇ shehˍ hpaˇ hta‸ mawˬ ve yoˬ. 46 Ngaˬ hta‸ hk'a yonˍ ve chaw hk'a peu-eˬ naˆ ho‸ ve awˬ hk'aw lo maˇ g'a chehˇ tuˬ, ngaˬ lehˬ awˬ g'euˆ hpeh‸ leh, miˬ guiˬ hk'oˆ lo ya‸ la ve yoˬ. 47 Ngaˬ ve tawˇ hkawˇ hta‸ kaˇ leh maˇ na yuˬ ve chaw hk'aˬ ve teˇ g'aˇ maˇ k'oˆ, ngaˬ yawˇ hta‸ suhˉ maˇ jehˬ. Awˬ lawn k'o, miˬ guiˬ yaˇ hui hta‸ suhˉ jehˬ tuˬ awˬ pon ngaˬ laˬ ve maˇ heˆ. Miˬ guiˬ yaˇ hui hta‸ htaiˍ hk'aw‸ tuˬ awˬ pon ngaˬ laˬ ve yoˬ. 48 Ngaˬ hta‸ chiˇ baˬ leh ngaˬ ve tawˇ hkawˇ hta‸ maˇ na ve chaw hta‸ suhˉ jehˬ shehˍ hpaˇ cawˬ ve yoˬ. Ngaˬ k'oˆ taˍ ve tawˇ hkawˇ teˇ hpaˍ lehˬ, awˬ leh meuˇ teˇ nyi htaˇ yawˇ hui hta‸ suhˉ jehˬ piˇ tuˬ yoˬ. 49 Ngaˬ lehˬ, ngaˬ hk'aˇ ngaˬ a loˍ cawˇ ve hk'e te‸ chiˉ ka‸ maˇ k'oˆ. Ngaˬ hta‸ peu laˇ shehˍ hpaˇ Awˬ pa lehˬ, ngaˬ hk'aˬ hk'e g'a k'oˆ g'a yaw tuˬ ve, yawˇ ngaˬ hta‸ tawˇ pe‸ taˇ peuˬ. 50 Yawˇ tawˇ pe‸ laˇ ve lehˬ, co ti‸ ha ti‸ hpeh‸ ve yoˬ teh‸ ngaˬ shiˍ ve yoˬ. Hk'e te leh ngaˬ hk'a k'oˆ ve teˇ hpaˍ lehˬ, Awˬ pa ngaˬ hta‸ k'oˆ laˇ ve hk'a shuˍ shuˍ ngaˬ k'oˆ ve yoˬ teh‸ k'oˆ ve yoˬ.

Yoˇhanˬ 13

1 Yeˍsuˆ lehˬ chi miˬ guiˬ hk'oˆ lo tawˆ k'ai leh Awˬ pa geh g'a k'o‸-e tuˬ ve awˬ yanˇ gaˬ la peuˬ ve hta‸ Paˍsaˍhkaˍ pawehˇ maˇ te sheˍ htaˇ ka‸ yawˇ shiˍ taˍ ve yoˬ. Chi miˬ guiˬ hk'oˆ lo chehˇ ve yawˇ ve chaw teˇ hpaˍ hta‸ yawˇ ha‸ chehˇ ve hk'e, awˬ leh hk'a gaˬ yawˇ hui hta‸ yawˇ ha‸ ve yoˬ. 2 Yeˍsuˆ hta‸ chiˇ a‸ piˇ tuˬ, neˇ haiˬ lehˬ Siˉmonˍ ve yaˇ paˍ Yuˇda‸ Iˉsaˍkaˍriˍoˆ ve nyi ma awˬ hk'aw lo dawˇ tawˆ piˇ lawˬ peuˬ. 3 Yeˍsuˆ lehˬ, awˬ ceuˬ hk'a peu-eˬ yawˇ ve la‸ sheh awˬ hk'aw lo Awˬ pa chiˇ a‸ piˇ peuˬ ve hta‸ maˇ k'oˆ, yawˇ G'uiˬ sha lo laˬ leh, G'uiˬ sha geh k'aw‸ k'o‸-e tuˬ ve hta‸ maˇ k'oˆ, yawˇ shiˍ taˍ ve yoˬ. 4 Mvuhˇ hpeu‸ awˍ caˇ chehˇ ve teˇ yanˇ, Yeˍsuˆ tu la leh yawˇ ve aˉ po‸ zuhˬ ma hta‸ k'ehˆ peuˬ hk'aw‸ nawˉ, hpaˉ ce‸ yuˬ leh, yawˇ ve caw‸ cehˍ nyi hta‸ tsuh‸ ve yoˬ. 5 Oˇ htaˇ, hkehˇ lonˉ awˬ hk'aw lo iˉ kaˆ keu leh, awˬ la‸ g'awˇ hui ve hkui sheh hta‸ tsuhˇ piˇ ve yoˬ. Peuˬ leh, yawˇ tsuh‸ taˍ ve hpaˉ ce‸ yuˬ leh shiˆ piˇ ve yoˬ. 6 Yawˇ Siˉmonˍ Peˍtruˆ geh gaˬ la htaˇ, Peˍtruˆ k'oˆ ve, Jawˇ mawˇ-oˬ, nawˬ lehˬ ngaˬ ve hkui sheh hta‸ tsuhˇ tuˬ ve laˇ teh‸, yawˇ hta‸ na nyi ve yoˬ. 7 Yeˍsuˆ k'aw‸ k'oˆ ve, Ngaˬ hk'aˬ hk'e te chehˇ ve hta‸ chi beu‸ nawˬ maˇ shiˍ sheˍ htawˇ, awˬ hk'aw‸ nawˉ nawˬ shiˍ la tuˬ yoˬ teh‸ yawˇ hta‸ k'oˆ piˇ ve yoˬ. 8 Peˍtruˆ k'oˆ ve, Ngaˬ ve hkui sheh hta‸ nawˬ teˇ pawˆ ka‸ maˇ g'a tsuhˇ teh‸ yawˇ hta‸ k'oˆ piˇ ve yoˬ. Yeˍsuˆ k'aw‸ k'oˆ ve, Ngaˬ nawˬ hta‸ maˇ g'a tsuhˇ ve k'o, nawˬ ngaˬ hta‸ maˇ caˉ da‸ teh‸, yawˇ hta‸ k'oˆ piˇ ve yoˬ. 9 Siˉmonˍ Peˍtruˆ k'aw‸ k'oˆ ve, Jawˇ mawˇ-oˬ, ngaˬ ve hkui sheh hta‸ ceh tiˉ maˇ heˆ. La‸ sheh leh oˉ k'oˍ hta‸ htawˇ tsuhˇ laˇ-oˆ teh‸ yawˇ hta‸ k'oˆ piˇ ve yoˬ. 10 Yeˍsuˆ k'aw‸ k'oˆ ve, Iˉ kaˆ hehˉ peuˬ ve chaw lehˬ, awˬ to hk'a peu-eˬ da‸ kehˬ peuˬ ve pa taw, hkui sheh hta‸ ceh tiˉ tsuhˇ tuˬ loˍ ve yoˬ. Nawˬ hui lehˬ da‸ kehˬ peuˬ. Ya‸ hk'aˇ, nawˬ hui hk'a peu-eˬ da‸ kehˬ ve maˇ heˆ teh‸ yawˇ hta‸ k'oˆ piˇ ve yoˬ. 11 Awˬ lawn k'o, yawˇ hta‸ chiˇ a‸ piˇ tuˬ ve chaw teˇ g'aˇ hta‸ yawˇ shiˍ ve yoˬ. Chi hta‸ pa taw, Nawˬ hui hk'a peu-eˬ daˬ kehˬ ve maˇ heˆ teh‸ yawˇ k'oˆ ve yoˬ. 12 Yeˍsuˆ yawˇ hui ve hkui sheh hta‸ tsuhˇ piˇ peuˬ hk'aw‸ nawˉ, yawˇ ve aˉ po‸ zuhˬ ma hta‸ k'aw‸ deh leh mui ve yoˬ. Peuˬ leh yawˇ k'oˆ ve, Ngaˬ nawˬ hui hta‸ hk'aˬ hk'e te laˇ ve hta‸ nawˬ hui shiˍ-aˬ laˇ. 13 Nawˬ hui lehˬ ngaˬ hta‸ Saˍ la‸ ka‸ Jawˇ mawˇ ka‸ k'oˆ chehˇ ve yoˬ. Nawˬ hui k'oˆ ve lehˬ cawˇ ve yoˬ. Awˬ lawn k'o, nawˬ hui k'oˆ ve hk'e ngaˬ lehˬ Saˍ la‸ ka‸ Jawˇ mawˇ ka‸ hpeh‸ ve yoˬ. 14 Hk'e te leh ngaˬ lehˬ, Jawˇ mawˇ ka‸, Saˍ la‸ ka‸ hpeh‸ ve htawˇ, nawˬ hui ve hkui sheh hta‸ tsuhˇ laˇ ve k'o, nawˬ hui htawˇ teˇ g'aˇ leh teˇ g'aˇ ve hkui sheh hta‸ tsuhˇ da‸ cawˇ ve yoˬ. 15 Ngaˬ nawˬ hui hta‸ te laˇ ve hk'a shuˍ shuˍ nawˬ hui htawˇ te tuˬ, ngaˬ nawˬ hui hta‸ henˇ yuˬ jawˬ yuˬ tuˬ te maˍ laˇ peuˬ. 16 Ngaˬ nawˬ hui hta‸ awˬ tehˬ awˬ na k'oˆ laˇ ve awˬ ceˬ lehˬ yawˇ ve awˬ shehˍ hpaˇ a‸ kehˉ uiˍ ve maˇ heˆ. Tcuh yaˇ htawˇ, yawˇ hta‸ tcuh peu shehˍ hpaˇ a‸ kehˉ uiˍ ve maˇ heˆ. 17 Awˬ ceuˬ chi teˇ hpaˍ hta‸ nawˬ hui shiˍ leh, shiˍ ve hk'e te ve k'o, nawˬ hui awˬ bon uiˍ ve yoˬ. 18 Nawˬ hui hk'a peu-eˬ ve awˬ lawn hta‸ ngaˬ k'oˆ ve maˇ heˆ. Ngaˬ leuˆ yuˬ taˍ ve chaw hui hta‸ ngaˬ shiˍ ve yoˬ. Ya‸ hk'aˇ Li‸ hpu hk'aw bvuh‸ taˍ ve hk'e, Ngaˬ ve caˇ tuˬ hta‸ caˇ ve chaw teˇ g'aˇ lehˬ, yawˇ ve hkui mehˍ cu ngaˬ hta‸ hteˆ laˇ ve yoˬ teh‸ k'oˆ taˍ ve tawˇ teˇ hkawˇ g'a biˇ la tuˬ awˬ pon hpeh‸ ve yoˬ. 19 Awˬ ceuˬ chi teˇ hpaˍ hpeh‸ la ve teˇ yanˇ, ngaˬ lehˬ Hkri‸ yoˬ teh‸ nawˬ hui yonˍ tuˬ, maˇ hpeh‸ la sheˍ awˬ g'uˇ suhˍ chi beu‸ ka‸ ngaˬ nawˬ hui hta‸ hto laˇ peuˬ. 20 Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ peu k'ai ve chaw hta‸ ha‸ yuˬ ve teˇ g'aˇ lehˬ, ngaˬ hta‸ ha‸ yuˬ ve yoˬ. Ngaˬ hta‸ ha‸ yuˬ ve chaw lehˬ, ngaˬ hta‸ peu laˇ shehˍ hpaˇ hta‸ ha‸ yuˬ ve yoˬ teh‸, yawˇ hui hta‸ k'oˆ piˇ ve yoˬ. 21 Yeˍsuˆ lehˬ, chi teˇ hpaˍ hta‸ k'oˆ peuˬ hk'aw‸ nawˉ, yawˇ nyi ma hk'aw dawˇ haˍ jaˇ leh, Ngaˬ nawˬ hui hta‸ awˬ tehˬ awˬ na k'oˆ laˇ ve, nawˬ hui awˬ hk'aw lo chaw teˇ g'aˇ ngaˬ hta‸ chiˇ a‸ piˇ tuˬ yoˬ tehˬ, shaˉ hkiˆ hkanˍ leh k'oˆ ve yoˬ. 22 Yawˇ a shu teˇ g'aˇ hta‸ k'oˆ gaˇ leh naˍ teh‸, awˬ la‸ g'awˇ teˇ hpaˍ dawˇ leh, teˇ g'aˇ leh teˇ g'aˇ nyi da‸ ve yoˬ. 23 Yawˇ ve awˬ la‸ g'awˇ teˇ hpaˍ awˬ hk'aw lo Yeˍsuˆ ha‸ ve teˇ g'aˇ leh, Yeˍsuˆ nyi ma pui paˇ lo ngeh mui chehˇ ve yoˬ. 24 Siˉmonˍ Peˍtruˆ lehˬ, Yawˇ a shu hta‸ k'oˆ ve leh naˍ, ngaˬ hui hta‸ hto laˇ-oˆ teh‸ awˬ la‸ g'awˇ oˇ ve teˇ g'aˇ hta‸ awˬ heˆ te maˍ piˇ ve yoˬ. 25 Oˇ htaˇ, awˬ la‸ g'awˇ oˇ ve lehˬ, Yeˍsuˆ ve nyi ma pui awˬ paˇ lo jiˆ k'ai leh, Jawˇ mawˇ-oˬ, a shu le teh‸ yawˇ hta‸ na nyi ve yoˬ. 26 Yeˍsuˆ k'aw‸ k'oˆ ve, Ngaˬ hkaoˍ monˇ teˇ peu-eˍ hta‸ yuˬ leh awˍ chiˇ hk'aw tuˍ sheˬ leh piˇ ve chaw teˇ g'aˇ lehˬ, yawˇ yoˬ teh‸ k'oˆ peuˬ hk'aw‸ nawˉ hkaoˍ monˇ teˇ peu-eˍ hta‸ awˍ chiˇ hk'aw tuˍ sheˬ leh, Siˉmonˍ Iˉsaˍkaˍriˍoˆ ve yaˇ pa Yuˇda‸ hta‸ piˇ ve yoˬ. 27 Yuˇda‸ lehˬ, hkaoˍ monˇ oˇ ve teˇ peu-eˍ hta‸ caˇ peuˬ hk'aw‸ nawˉ, Saˍtanˍ yawˇ awˬ k'aw lo lo‸-e ve yoˬ. Yeˍsuˆ k'oˆ ve, Nawˬ te tuˬ ve kanˉ hta‸ haˆ haˆ ca te-o teh‸ yawˇ hta‸ k'oˆ piˇ ve yoˬ. 28 Aˬ hto‸ ma pa taw Yeˍsuˆ yawˇ hta‸ oˇ hk'e k'oˆ piˇ ve hta‸ hpui lawˇ paˇ lo mui chehˇ ve chaw teˇ g'aˇ ka‸ maˇ shiˍ. 29 Yuˆda‸ lehˬ, hpu miˉ chaw hta‸ ha‸ shaˉ ve chaw hpeh‸ ve pa taw, Yeˍsuˆ yawˇ hta‸, Pawehˇ chi awˬ pon ngaˬ hui loˍ ve teˇ hpaˍ hta‸ ca vuiˬ-o‸ teh‸ k'oˆ piˇ leh naˍ, maˇ heˆ k'o, Haˍ g'awˇ ve chaw hui hta‸ teˇ ceuˬ ceuˬ ca piˇ-oˆ teh‸ k'oˆ piˇ leh naˍ teh‸, yawˇ hui teˇ hpaˍ hpaˍ dawˇ chehˇ ve yoˬ. 30 Yuˇda‸ lehˬ, hkaoˍ monˇ oˇ ve teˇ peu-eˍ hta‸ caˇ peuˬ hk'aw‸ nawˉ teˇ cawˬ haˉ yawˇ tawˆ k'ai ve yoˬ. Awˬ yanˇ oˇ ve lehˬ, tanˇ hkuinˇ htaˇ hpeh‸ ve yoˬ. 31 Yawˇ tawˆ k'ai peuˬ hk'aw‸ nawˉ Yeˍsuˆ k'oˆ ve, Chaw yaˇ ve Yaˇ hpu lehˬ, chi beu‸ awˬ me‸ awˬ hponˇ tawˆ la peuˬ. Yawˇ awˬ hk'aw lo G'uiˬ sha htawˇ awˬ me‸ awˬ hponˇ tawˆ la peuˬ. 32 Yawˇ awˬ hk'aw lo G'uiˬ sah awˬ me‸ awˬ hponˇ tawˆ la ve pa taw, G'uiˬ sha lehˬ yawˇ awˬ to awˬ hk'aw lo Yaˇ hpu hta‸ awˬ me‸ awˬ hponˇ tawˆ la piˇ tuˬ yoˬ. Yawˇ lehˬ, teˇ cawˬ haˉ awˬ me‸ awˬ hponˇ tawˆ la piˇ tuˬ yoˬ. 33 Ha‸ ve yaˇ teˇ hpaˍ-oˬ, ngaˬ nawˬ hui geh teˇ hkui ceh g'a chehˇ tuˬ yoˬ. Nawˬ hui ngaˬ hta‸ ca tuˬ yoˬ. Ngaˬ k'ai kuiˬ lo nawˬ hui laˬ maˇ hpeh‸ teh‸ Yuˇda‸ chaw teˇ hpaˍ hta‸ ngaˬ k'oˆ piˇ ve hk'e, chi beu‸ nawˬ hui hta‸ htawˇ ngaˬ k'oˆ laˇ ve yoˬ. 34 Nawˬ hui teˇ g'aˇ leh teˇ g'aˇ ha‸ da‸-o‸ teh‸, ngaˬ nawˬ hui hta‸ tawˇ awˬ suhˉ teˇ hkawˇ piˇ ve yoˬ. Ngaˬ nawˬ hui hta‸ ha‸ ve hk'e, nawˬ hui htawˇ teˇ g'aˇ leh teˇ g'aˇ ha‸ da‸-o‸, 35 Nawˬ hui teˇ g'aˇ leh teˇ g'aˇ ha‸ da‸ ve k'o, ha‸ da‸ ve oˇ ve hta‸ pa taw nawˬ hui ngaˬ ve awˬ la‸ g'awˇ hpeh‸ ve hta‸ chaw hk'a peu-eˬ g'a shiˍ tuˬ yoˬ teh k'oˆ piˇ ve yoˬ. 36 Siˉmonˍ Peˍtruˆ k'oˆ ve, Jawˇ mawˇ-oˬ, nawˬ hk'aˬ lo k'ai tuˬ le teh‸ yawˇ hta‸ na nyi ve yoˬ. Yeˍsuˆ k'aw‸ k'oˆ ve, Ngaˬ k'ai kuiˬ lo chi beu‸ nawˬ laˬ maˇ hpeh‸. Awˬ hk'aw‸ nawˉ heh‸, ngaˬ awˬ hk'aˇ suh nawˬ laˬ hpeh‸ tuˬ yoˬ teh‸ k'oˆ piˇ ve yoˬ. 37 Peˍtruˆ k'oˆ ve, Jawˇ mawˇ-oˬ, aˬ hto‸ ma pa taw chi beu‸ ngaˬ nawˬ awˬ hk'aˇ suh laˬ maˇ hpeh‸ ve le. Nawˬ awˬ pon ngaˬ ve a sha‸ tanˇ tuˬ yoˬ teh‸ yawˇ hta‸ k'oˆ piˇ ve yoˬ. 38 Yeˍsuˆ k'aw‸ k'oˆ ve, Ngaˬ awˬ pon nawˬ ve a sha‸ tanˇ tuˬ laˇ. Ngaˬ nawˬ hta‸ awˬ tehˬ awˬ na k'oˆ laˇ ve, g'aˆ hpfuh maˇ bvuhˬ sheˍ htaˇ, nawˬ ngaˬ hta‸ shehˆ pawˆ hk'a gaˬ chiˇ baˬ laˇ tuˬ yoˬ teh‸ k'oˆ piˇ ve yoˬ.

Yoˇhanˬ 14

1 Nawˬ hui ve nyi ma taˇ dawˇ haˍ gaˇ haˍ. G'uiˬ sha hta‸ yonˍ-o‸. Ngaˬ hta‸ htawˇ yonˍ-o‸. 2 Ngaˬ Awˬ pa ve yehˬ awˬ hk'aw lo chehˇ kuiˬ cawˬ maˇ ve yoˬ. Chehˇ kuiˬ maˇ cawˬ ve hk'e k'o, maˇ cawˬ teh‸ ngaˬ nawˬ hui hta‸ hto taˍ laˇ tuˬ yoˬ. Ngaˬ k'o‸-e leh, nawˬ hui awˬ pon chehˇ kuiˬ ca gu tuˬ yoˬ. 3 Ngaˬ k'o‸-e leh nawˬ hui awˬ pon chehˇ kuiˬ ca gu taˉ peuˬ k'o, ngaˬ ve chehˇ kui lo nawˬ hui htawˇ g'a chehˇ tuˬ, ngaˬ teˇ pawˆ k'aw‸ laˬ leh nawˬ hui hta‸ shiˍ k'o‸-e tuˬ yoˬ. 4 Ngaˬ k'ai kuiˬ ya‸ k'aw hta‸ nawˬ hui shiˍ ve yoˬ teh‸ k'oˆ piˇ ve yoˬ. 5 Htoˉma‸ k'oˆ ve, Jawˇ mawˇ-oˬ, nawˬ hk'aˬ lo k'ai tuˬ ve hta‸ ngaˬ hui maˇ shiˍ. Ya‸ k'aw hta‸ ngaˬ hui hk'aˬ hk'e te shiˍ tuˬ le teh‸ yawˇ hta‸ k'oˆ piˇ ve yoˬ. 6 Yeˍsuˆ k'oˆ ve, Ngaˬ lehˬ ya‸ k'aw yoˬ. Hteˇ ve cawˇ ve teˇ ceuˬ ka‸, co ha te‸ ve teˇ ceuˬ ka‸ hpeh‸ ve yoˬ. Ngaˬ hta‸ maˇ cuˇ k'o, chaw teˇ g'aˇ ka‸ Awˬ pa geh gaˬ maˇ hpeh‸. 7 Nawˬ hui lehˬ ngaˬ hta‸ shiˍ ve hk'e k'o, ngaˬ Awˬ pa hta‸ htawˇ nawˬ hui shiˍ tuˬ yoˬ. Chi beu‸ hta‸ tanˬ leh nawˬ hui yawˇ hta‸ g'a shiˍ g'a mawˬ peuˬ teh‸, Htoˉma‸ hta‸ k'oˆ piˇ ve yoˬ. 8 Hpiˇliˇpuˆ k'oˆ ve, Jawˇ mawˇ-oˬ, ngaˬ hui hta‸ Awˬ pa a ciˉ maw laˇ-oˆ. Maw laˇ ve k'o, ngaˬ hui nyi hk'aˇ suh tuˬ yoˬ teh‸ yawˇ hta‸ k'oˆ piˇ ve yoˬ. 9 Yeˍsuˆ k'oˆ ve, Hpiˇliˇpuˆ-oˬ, ngaˬ nawˬ hui geh chi maw maw chehˇ peuˬ ve htawˇ, nawˬ ngaˬ hta‸ maˇ shiˍ sheˍ laˇ. Ngaˬ hta‸ mawˬ ve chaw lehˬ, Awˬ pa hta‸ mawˬ peuˬ. Ngaˬ hui hta‸ Awˬ pa a ciˉ maw laˇ-oˆ teh‸, nawˬ aˬ hto‸ ma te k'oˆ ve le. 10 Awˬ pa awˬ hk'aw lo ngaˬ chehˇ ve hta‸ maˇ k'oˆ, ngaˬ awˬ hk'aw lo Awˬ pa chehˇ ve hta‸ maˇ k'oˆ, nawˬ maˇ yonˍ leh laˇ. Ngaˬ nawˬ hui hta‸ k'oˆ laˇ ve tawˇ hkawˇ teˇ hpaˍ lehˬ, ngaˬ hk'aˇ ngaˬ a loˍ cawˇ ve hk'e ngaˬ k'oˆ ve maˇ heˆ. Ngaˬ awˬ hk'aw lo chehˇ taˍ ve Awˬ pa lehˬ, yawˇ ve kanˉ teˇ hpaˍ hta‸ yawˇ te chehˇ ve yoˬ. 11 Ngaˬ lehˬ Awˬ pa awˬ hk'aw lo chehˇ ve hta‸ maˇ k'oˆ, Awˬ pa lehˬ ngaˬ awˬ hk'aw lo chehˇ ve hta‸ maˇ k'oˆ, yonˍ loˬ. Maˇ heˆ k'o, ngaˬ te ve kanˉ teˇ hpaˍ hta‸ pa taw ngaˬ hta‸ yonˍ loˬ. 12 Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ hta‸ yonˍ ve chaw lehˬ ngaˬ te ve kanˉ teˇ hpaˍ hta‸ yawˇ te tuˬ yoˬ. Chi a‸ kehˉ uiˍ ve kanˉ teˇ hpaˍ hta‸ htawˇ yawˇ te tuˬ yoˬ. Awˬ lawn k'o, ngaˬ lehˬ Awˬ pa geh k'o‸-e tuˬ yoˬ. 13 Awˬ pa lehˬ Yaˇ hpu hta‸ pa taw awˬ me‸ awˬ hponˇ g'a tuˬ, ngaˬ ve awˬ meh awˬ hk'aw lo nawˬ hui hk'a lawˬ ve teˇ hpaˍ hta‸ ngaˬ te tuˬ yoˬ. 14 Ngaˬ ve awˬ meh awˬ hk'aw lo nawˬ hui teˇ ceuˬ ceuˬ lawˬ ve k'o, nawˬ hui lawˬ ve hk'e ngaˬ te tuˬ yoˬ. 15 Nawˬ hui ngaˬ hta‸ ha‸ ve k'o, ngaˬ piˇ taˍ ve tawˇ hkawˇ teˇ hpaˍ hta‸ nawˬ hui na yuˬ leh te tuˬ yoˬ. 16 Ngaˬ lehˬ, Awˬ pa hta‸ lawˬ leh, nawˬ hui geh hk'aˬ htaˆ ka‸ chehˇ tuˬ, awˬ kaˍ awˬ nu Ga piˇ shehˍ hpaˇ teˇ g'aˇ yawˇ nawˬ hui hta‸ pe‸ laˇ tuˬ yoˬ. Ga piˇ shehˍ hpaˇ oˇ ve lehˬ, hteˇ ve cawˇ ve Awˬ ha hpu hpeh‸ ve yoˬ. 17 Miˬ guiˬ yaˇ hui lehˬ, yawˇ hta‸ maˇ mawˬ maˇ shiˍ ve pa taw, yawˇ hta‸ ha‸ yuˬ maˇ hpeh‸. Nawˬ hui lehˬ yawˇ hta‸ shiˍ ve yoˬ. Awˬ lawn k'o, yawˇ nawˬ hui geh chehˇ leh, nawˬ hui awˬ hk'aw lo htawˇ yawˇ chehˇ tuˬ yoˬ. 18 Ngaˬ nawˬ hui hta‸ yaˇ cuˬ shi hk'e baˬ taˉ laˇ tuˬ ve maˇ heˆ. Ngaˬ nawˬ hui geh k'aw‸ laˬ tuˬ yoˬ. 19 Teˇ hkui gaˬ k'o, miˬ guiˬ yaˇ teˇ hpaˍ lehˬ ngaˬ hta‸ maˇ g'a k'aw‸ mawˬ. Ya‸ hk'aˇ nawˬ hui lehˬ, ngaˬ hta‸ g'a k'aw‸ mawˬ tuˬ yoˬ. Ngaˬ te‸ ve hta‸ pa taw, nawˬ hui htawˇ g'a te‸ tuˬ yoˬ. 20 Oˇ ve teˇ nyi gaˬ k'o, Awˬ pa awˬ hk'aw lo ngaˬ chehˇ ve hta‸ maˇ k'oˆ, nawˬ hui ngaˬ awˬ hk'aw lo chehˇ ve hta‸ maˇ k'oˆ, ngaˬ nawˬ hui awˬ hk'aw lo chehˇ ve hta‸ maˇ k'oˆ, nawˬ hui g'a shiˍ tuˬ yoˬ. 21 Ngaˬ piˇ taˍ ve tawˇ hkawˇ hta‸ kaˇ leh te ve chaw lehˬ, ngaˬ hta‸ ha‸ ve chaw hpeh‸ ve yoˬ. Ngaˬ hta‸ ha‸ ve chaw teˇ g'aˇ hta‸ ngaˬ Awˬ pa ha‸ tuˬ yoˬ. Ngaˬ htawˇ chaw oˇ ve hta‸ ha‸ leh, ngaˬ ve awˬ to yawˇ hta‸ hk'a tawˍ lehˆ maw piˇ tuˬ yoˬ teh‸ k'oˆ piˇ ve yoˬ. 22 Yuˇda‸ Iˉsaˍkaˍriˍoˆ maˇ heˆ ve, Yuˇda‸ meh ve teˇ g'aˇ k'oˆ ve, Jawˇ mawˇ-oˬ, nawˬ ve awˬ to ngaˬ hui hta‸ maw laˇ leh miˬ guiˬ yaˇ hui hta‸ maˇ maw piˇ ve, aˬ hto‸ ma pa taw le teh‸ na nyi ve yoˬ. 23 Yeˍsuˆ k'aw‸ k'oˆ ve, Ngaˬ hta‸ ha‸ ve chaw lehˬ, ngaˬ ve tawˇ hkawˇ hta‸ na yuˬ leh te tuˬ yoˬ. Ngaˬ Awˬ pa yawˇ hta‸ ha‸ tuˬ yoˬ. Ngaˬ huiˉ maˬ yawˇ geh lo laˬ leh yawˇ geh chehˇ tuˬ yoˬ. 24 Ngaˬ hta‸ maˇ ha‸ ve chaw lehˬ, ngaˬ ve tawˇ hkawˇ hta‸ maˇ na yuˬ. Nawˬ hui g'a kaˇ ve tawˇ hkawˇ lehˬ, ngaˬ ve tawˇ hkawˇ maˇ heˆ. Ngaˬ hta‸ peu laˇ shehˍ hpaˇ Awˬ pa ve tawˇ hkawˇ hpeh‸ ve yoˬ. 25 Ngaˬ nawˬ hui geh chehˇ ve teˇ yanˇ, tawˇ hkawˇ chi teˇ hpaˍ ngaˬ nawˬ hui hta‸ k'oˆ taˉ laˇ ve yoˬ. 26 Awˬ pa lehˬ, ngaˬ ve awˬ meh awˬ hk'aw lo nawˬ hui hta‸ Ga piˇ shehˍ hpaˇ, da‸ ve kehˍ ve Awˬ ha hpu peu laˇ tuˬ yoˬ. Yawˇ lehˬ, nawˬ hui hta‸ teˇ ceuˬ le le maˍ laˇ leh, ngaˬ nawˬ hui hta‸ hk'a k'oˆ taˍ ve tawˇ hkawˇ hk'a peu-eˬ nawˬ hui hta‸ k'aw‸ dawˇ nawˇ laˇ tuˬ yoˬ. 27 Dawˇ sha gaˇ sha ve teˇ ceuˬ ngaˬ nawˬ hui hta‸ teh taˉ laˇ ve yoˬ. Ngaˬ ve dawˇ sha gaˇ sha ve teˇ ceuˬ ngaˬ nawˬ hui hta‸ pe‸ taˉ laˇ ve yoˬ. Miˬ guiˬ yaˇ hui piˇ ve hk'e ngaˬ nawˬ hui hta‸ pe‸ laˇ ve maˇ heˆ. Nawˬ hui ve nyi ma taˇ dawˇ haˍ gaˇ haˍ. Kawˆ ve nyi ma ka‸ taˇ cawˬ piˇ. 28 Ngaˬ k'o‸-e leh nawˬ hui geh ngaˬ teˇ pawˆ k'aw‸ laˬ tuˬ yoˬ teh‸ ngaˬ k'oˆ taˍ ve tawˇ hkawˇ hta‸ nawˬ hui g'a kaˇ peuˬ. Nawˬ hui ngaˬ hta‸ ha‸ ve k'o, Awˬ pa geh ngaˬ k'o‸-e ve pa taw nawˬ hui ha lehˬ tuˬ yoˬ. Awˬ lawn k'o, Awˬ pa lehˬ ngaˬ a‸ kehˉ uiˍ ve yoˬ. 29 Awˬ ceuˬ oˇ ve teˇ hpaˍ hpeh‸ la ve teˇ yanˇ, nawˬ hui g'a yonˍ tuˬ, maˇ hpeh‸ la sheˍ g'uˇ suhˍ chi beu‸ ka‸ ngaˬ nawˬ hui hta‸ k'oˆ laˇ peuˬ. 30 Chi beu‸ hta‸ tanˬ leh ngaˬ nawˬ hui hta‸ tawˇ tcuhˇ tcuhˬ maˇ k'aw‸ yaw-o. Awˬ lawn k'o, chi miˬ guiˬ hta‸ uˉ peunˍ shehˍ hpaˇ laˬ chehˇ ve yoˬ. Yawˇ lehˬ ngaˬ awˬ hk'oˆ te‸ chiˉ kanˇ paˆ maˇ cawˬ. 31 Ya‸ hk'aˇ, Awˬ pa hta‸ ngaˬ ha‸ ve yoˬ teh‸, miˬ guiˬ yaˇ hui g'a shiˍ tuˬ, Awˬ pa ngaˬ hta‸ tawˇ pe‸ laˇ ve hk'e ngaˬ te ve yoˬ. Tu loˬ. K'ai-a veuˬ.

Yoˇhanˬ 15

1 Ngaˬ lehˬ awˬ tehˬ awˬ na ve a pehˉ meuˇ te hpeh‸ ve yoˬ. Ngaˬ ve Awˬ pa lehˬ, hko ha‸ shaˉ shehˍ hpaˇ hpeh‸ ve yoˬ. 2 Awˬ shiˍ maˇ naw‸ ve ngaˬ ve awˬ k'aˉ teˇ hpaˍ hta‸ yawˇ tawˆ baˬ ve yoˬ. Awˬ shiˍ naw‸ ve awˬ k'aˉ teˇ hpaˍ lehˬ, leuˉ leh awˬ shiˍ naw‸ maˇ la tuˬ, yawˇ kehˬ lehˍ gu shawˍ piˇ ve yoˬ. 3 Ngaˬ nawˬ hui hta‸ maˍ laˇ ve tawˇ hkawˇ hta‸ pa taw, chi beu‸ ka‸ nawˬ hui kehˬ la peuˬ. 4 Ngaˬ awˬ hk'aw lo chehˇ-oˆ. Ngaˬ htawˇ nawˬ hui awˬ hk'aw lo chehˇ tuˬ yoˬ. Awˬ k'aˉ lehˬ, awˬ te hta‸ maˇ tcuhˉ naw‸ k'o, yawˇ hk'aˇ yawˇ awˬ shiˍ naw‸ la maˇ hpeh‸ ve hk'a shuˍ shuˍ, nawˬ hui htawˇ ngaˬ awˬ hk'aw lo maˇ chehˇ ve k'o, awˬ shiˍ naw‸ la maˇ hpeh‸. 5 Ngaˬ lehˬ a pehˉ meuˇ te hpeh‸ leh, nawˬ hui lehˬ awˬ k'aˉ teˇ hpaˍ hpeh‸ ve yoˬ. Ngaˬ awˬ hk'aw lo chehˇ leh, ngaˬ htawˇ yawˇ awˬ hk'aw lo chehˇ ve chaw teˇ g'aˇ lehˬ, awˬ shiˍ maˇ maˇ naw‸ la ve yoˬ. Awˬ lawn k'o, ngaˬ hta‸ hpaˆ da‸ ve k'o, nawˬ hui te‸ chiˉ ka‸ te maˇ hpeh‸. 6 Ngaˬ awˬ hk'aw lo maˇ chehˇ ve chaw lehˬ, awˬ k'aˉ teˇ hpaˍ hk'a shuˍ shuˍ chiˇ baˬ ve hta‸ g'a hkanˍ leh, nawˍ k'ai goˇ k'ai tuˬ yoˬ. Oˇ hk'e ve awˬ k'aˉ teˇ hpaˍ hta‸ shu g'awˆ hpoˆ leh, aˬ miˍ awˬ hk'aw lo baˬ keu leh aˬ miˍ to‸ baˬ ve yoˬ. 7 Nawˬ hui ngaˬ awˬ hk'aw lo chehˇ leh ngaˬ ve tawˇ hkawˇ nawˬ hui awˬ hk'aw lo chehˇ ve k'o, nawˬ hui lawˬ gaˇ ve hk'e lawˬ-o‸. Nawˬ hui g'a tuˬ yoˬ. 8 Nawˬ hui awˬ shiˍ maˇ maˇ naw‸ la ve pa taw, ngaˬ Awˬ pa awˬ me‸ awˬ hponˇ g'a leh, nawˬ hui htawˇ ngaˬ ve awˬ la‸ g'awˇ awˬ tehˬ awˬ na hpeh‸ ve hta‸ shu g'a mawˬ tuˬ yoˬ. 9 Awˬ pa ngaˬ hta‸ ha‸ ve hk'e, ngaˬ htawˇ nawˬ hui hta‸ ha‸ ve yoˬ. Ngaˬ ve ha‸ pehnˇ ve awˬ hk'aw lo chehˇ-oˆ. 10 Ngaˬ lehˬ ngaˬ Awˬ pa piˇ taˍ ve tawˇ hkawˇ teˇ hpaˍ hta‸ na yuˬ leh, yawˇ ve ha‸ pehnˇ ve awˬ hk'aw lo chehˇ ve yoˬ. Chi hk'a shuˍ shuˍ, nawˬ hui htawˇ ngaˬ piˇ taˍ ve tawˇ hkawˇ teˇ hpaˍ hta‸ na yuˬ ve k'o, ngaˬ ve ha‸ pehnˇ ve awˬ hk'aw lo nawˬ hui chehˇ tuˬ yoˬ. 11 Nawˬ hui awˬ hk'aw lo ngaˬ ve ha lehˬ ve cawˬ tuˬ leh, nawˬ hui ha lehˬ ve biˇ la tuˬ, tawˇ chi teˇ hpaˍ ngaˬ nawˬ hui hta‸ hto laˇ ve yoˬ. 12 Ngaˬ piˇ taˍ ve tawˇ lehˬ, ngaˬ nawˬ hui hta‸ ha‸ ve hk'e nawˬ hui teˇ g'aˇ leh teˇ g'aˇ ha‸ da‸-o‸. 13 A shu yawˇ ve awˬ chawˇ awˬ pon a shu yawˇ ve a sha‸ tanˇ piˇ ve ha‸ pehnˇ ve teˇ ceuˬ a‸ kehˉ uiˍ ve ha‸ pehnˇ ve teˇ ceuˬ ka‸ maˇ cawˬ. 14 Nawˬ hui lehˬ ngaˬ piˇ taˍ ve tawˇ hkawˇ teˇ hpaˍ hta‸ te ve k'o, nawˬ hui ngaˬ ve awˬ chawˇ hpeh‸ ve yoˬ. 15 Chi beu‸ hta‸ tanˬ leh, ngaˬ nawˬ hui hta‸ awˬ ceˬ teh‸ maˇ k'aw‸ k'oˆ-o. Awˬ lawn k'o, awˬ ceˬ lehˬ awˬ shehˍ hpaˇ aˬ hto‸ ma te chehˇ ve hta‸ maˇ shiˍ. Ngaˬ nawˬ hui hta‸ awˬ chawˇ teh‸ k'oˆ ve yoˬ. Awˬ lawn k'o, Awˬ pa geh ngaˬ g'a kaˇ ve hk'a peu-eˬ ngaˬ nawˬ hui hta‸ hto laˇ peuˬ. 16 Nawˬ hui ngaˬ hta‸ leuˆ yuˬ ve maˇ heˆ. Ngaˬ nawˬ hui hta‸ leuˆ yuˬ ve yoˬ. Nawˬ hui k'ai leh awˬ shiˍ naw‸ la leh, awˬ shiˍ oˇ ve yeˬ chehˇ tuˬ awˬ pon, ngaˬ nawˬ hui hta‸ leuˆ teh taˍ ve yoˬ. Hk'e te leh, ngaˬ ve awˬ meh awˬ hk'aw lo Awˬ pa geh nawˬ hui hk'a lawˬ ve hk'a peu-eˬ yawˇ nawˬ hui hta‸ pe‸ laˇ tuˬ yoˬ. 17 Ngaˬ nawˬ hui hta‸ tawˇ chi hk'e piˇ ve yoˬ. Nawˬ hui teˇ g'aˇ leh teˇ g'aˇ ha‸ da‸-o‸. 18 Miˬ guiˬ yaˇ nawˬ hui hta‸ canˇ ve k'o, nawˬ hui hta‸ maˇ canˇ sheˍ awˬ g'uˇ suhˍ htaˇ ka‸ ngaˬ hta‸ canˇ ve teh‸ shiˍ-o‸. 19 Nawˬ hui lehˬ chi miˬ guiˬ hta‸ caˉ da‸ ve k'o, miˬ guiˬ yaˇ hui lehˬ a shu yawˇ ve chaw hta‸ ha‸ tuˬ yoˬ. Ya‸ hk'aˇ, nawˬ hui lehˬ chi miˬ guiˬ hta‸ maˇ caˉ da‸ leh, miˬ guiˬ awˬ hk'aw lo ngaˬ nawˬ hui hta‸ leuˆ tawˆ ve pa taw, miˬ guiˬ yaˇ teˇ hpaˍ nawˬ hui hta‸ canˇ ve yoˬ. 20 Awˬ ceˬ lehˬ yawˇ ve awˬ shehˍ hpaˇ a‸ kehˉ uiˍ ve maˇ heˆ teh‸, ngaˬ nawˬ hui hta‸ k'oˆ laˇ taˍ peuˬ ve hta‸ dawˇ nawˇ-oˆ. Miˬ guiˬ yaˇ teˇ hpaˍ ngaˬ hta‸ fawˉ mehˍ laˇ ve k'o, nawˬ hui hta‸ htawˇ fawˉ mehˍ laˇ tuˬ yoˬ. Ngaˬ ve tawˇ hkawˇ hta‸ yawˇ hui na yuˬ leh te ve k'o, nawˬ hui ve tawˇ hkawˇ hta‸ htawˇ na yuˬ leh te tuˬ yoˬ. 21 Ya‸ hk'aˇ, yawˇ hui lehˬ ngaˬ hta‸ pa taw awˬ ceuˬ chi hk'a peu-eˬ nawˬ hui hta‸ te laˇ tuˬ yoˬ. Awˬ lawn k'o, ngaˬ hta‸ peu laˇ shehˍ hpaˇ hta‸ yawˇ hui maˇ shiˍ. 22 Ngaˬ yawˇ hui hta‸ maˇ ca hto piˇ la ve k'o, yawˇ hui venˇ baˆ maˇ cawˬ. Ya‸ hk'aˇ, chi beu‸ lehˬ yawˇ hui venˇ baˆ g'a ponˬ tuˬ te‸ chiˉ ca k'oˆ maˇ hpeh‸. 23 Ngaˬ hta‸ canˇ ve chaw lehˬ, ngaˬ ve Awˬ pa hta‸ htawˇ canˇ ve yoˬ. 24 Awˬ kaˍ awˬ nu chaw teˇ g'aˇ ka‸ maˇ te jaw ve kanˉ hta‸ yawˇ hui mehˆ g'aˇ suhˍ ngaˬ maˇ te ve k'o, yawˇ hui lehˬ venˇ baˆ maˇ cawˬ. Ya‸ hk'aˇ, ngaˬ hta‸ maˇ k'oˆ, ngaˬ Awˬ pa hta‸ maˇ k'oˆ, chi beu‸ yawˇ hui g'a mawˬ leh canˇ ve yoˬ. 25 Chi hk'e hpeh‸ la ve lehˬ, yawˇ hui ve awˬ liˇ tawˇ hkawˇ awˬ hk'aw lo bvuh‸ taˍ ve hk'e, Te‸ chiˉ awˬ lawn maˇ cawˬ ka‸, yawˇ hui ngaˬ hta‸ canˇ ve yoˬ teh‸ k'oˆ taˍ ve tawˇ teˇ hkawˇ biˇ la tuˬ awˬ pon hpeh‸ la ve yoˬ. 26 Awˬ pa geh lo tawˆ la ve Ga piˇ shehˍ hpaˇ hta‸ ngaˬ nawˬ hui geh peu laˇ tuˬ yoˬ. Yawˇ lehˬ, Awˬ pa lo tawˆ la ve, hteˇ ve cawˇ ve teˇ ceuˬ hta‸ caˉ da‸ ve Awˬ ha hpu hpeh‸ ve yoˬ. Yawˇ gaˬ la ve teˇ yanˇ, ngaˬ awˬ lawn yawˇ shaˉ hkiˆ hkanˍ tuˬ yoˬ. 27 Nawˬ hui htawˇ, awˉ lawˉ htaˇ ka‸ ngaˬ geh chehˇ taˍ ve pa taw, ngaˬ awˬ lawn shaˉ hkiˆ hkanˍ tuˬ yoˬ.

Yoˇhanˬ 16

1 Nawˬ hui nyi ma maˇ g'a luˬ k'ai tuˬ, awˬ lawn chi teˇ hpaˍ ngaˬ nawˬ hui hta‸ k'oˆ taˉ laˇ ve yoˬ. 2 Shu nawˬ hui hta‸ Yuˇda‸ awˬ moˍ awˬ hk'aw lo g'a‸ k'oˬ tuˬ yoˬ. Nawˬ hui hta‸ tiˇ pehˍ ve chaw lehˬ, G'uiˬ sha ve kanˉ hta‸ te peuˬ teh‸ yawˇ dawˇ tuˬ yoˬ. Chi hk'e ve awˬ yanˇ gaˬ la tuˬ yoˬ. 3 Yawˇ hui lehˬ, Awˬ pa hta‸ maˇ k'oˆ, ngaˬ hta‸ htawˇ maˇ k'oˆ, maˇ shiˍ ve pa taw oˇ hk'e te tuˬ yoˬ. 4 Awˬ yanˇ oˇ ve gaˬ la ve teˇ yanˇ, awˬ lawn chi teˇ hpaˍ ngaˬ nawˬ hui hta‸ k'oˆ taˉ laˇ ve hta‸ nawˬ hui dawˇ nawˇ tuˬ, tawˇ chi teˇ hpaˍ ngaˬ nawˬ hui hta‸ k'oˆ laˇ ve yoˬ. Ngaˬ nawˬ hui geh teˇ geh chehˇ taˍ sheˍ ve pa taw, awˉ lawˉ htaˇ awˬ lawn chi teˇ hpaˍ ngaˬ nawˬ hui hta‸ maˇ k'oˆ laˇ sheˍ. 5 Ngaˬ hta‸ peu laˇ shehˍ hpaˇ geh chi beu‸ ngaˬ k'o‸-e ve yoˬ. Nawˬ hk'aˬ lo k'ai tuˬ le teh‸, nawˬ hui teˇ g'aˇ ka‸ ngaˬ hta‸ maˇ na nyi. 6 Ya‸ hk'aˇ, awˬ lawn chi teˇ hpaˍ ngaˬ nawˬ hui hta‸ k'oˇ laˇ ve pa taw, nawˬ hui ve nyi ma awˬ hk'aw lo dawˇ haˍ tuˬ hk'a biˇ cawˬ la ve yoˬ. 7 Ngaˬ nawˬ hui hta‸ hteˇ lehˍ k'oˆ laˇ ve, ngaˬ k'o‸-e ve lehˬ nawˬ hui awˬ pon awˬ bon cawˬ ve yoˬ. Awˬ lawn k'o, ngaˬ maˇ k'o‸-e ve k'o, Ga piˇ shehˍ hpaˇ nawˬ hui geh maˇ laˬ. Ya‸ hk'aˇ ngaˬ k'o‸-e ve k'o, ngaˬ yawˇ hta‸ nawˬ hui geh peu laˇ tuˬ yoˬ. 8 Yawˇ gaˬ la htaˇ, venˇ baˆ awˬ lawn maˇ k'oˆ, hteˇ ve cawˇ ve awˬ lawn maˇ k'oˆ, suhˉ jehˬ suhˉ taˆ ve awˬ lawn htawˇ maˇ k'oˆ, miˬ guiˬ yaˇ hui hta‸ yawˇ hk'a tawˍ lehˆ hpeu‸ maˍ piˇ tuˬ yoˬ. 9 Yawˇ hui ngaˬ hta‸ maˇ yonˍ ve hta‸ pa taw, venˇ baˆ awˬ lawn hpeu‸ maˍ piˇ tuˬ yoˬ. 10 Ngaˬ lehˬ Awˬ pa geh k'o‸-e leh, nawˬ hui ngaˬ hta‸ maˇ g'a k'aw‸ mawˬ ve hta‸ pa taw, hteˇ ve cawˇ ve awˬ lawn hpeu‸ maˍ piˇ tuˬ yoˬ. 11 Miˬ guiˬ chi hta‸ uˉ peunˍ ve jawˇ mawˇ teˇ g'aˇ hta‸ suhˉ taˆ piˇ peuˬ ve hta‸ pa taw suhˉ jehˬ suhˉ taˆ ve awˬ lawn ka‸ hpeu‸ maˍ piˇ tuˬ yoˬ. 12 Ngaˬ nawˬ hui hta‸ k'oˆ laˇ tuˬ ve awˬ ceuˬ maˇ maˇ cawˬ sheˍ ve htawˇ, chi beu‸ nawˬ hui hkanˍ yuˬ maˇ hpeh‸ sheˍ. 13 Ya‸ hk'aˇ, hteˇ ve cawˇ ve Awˬ ha hpu gaˬ la htaˇ, hteˇ ve cawˇ ve hk'a peu-eˬ awˬ hk'aˇ suh nawˬ hui k'ai tuˬ, yawˇ nawˬ hui hta‸ shiˍ maˍ laˇ tuˬ yoˬ. Awˬ lawn k'o, yawˇ hk'a g'a kaˇ ve teˇ hpaˍ ceh tiˉ k'oˆ maˍ laˇ tuˬ yoˬ. Yawˇ hk'aˇ yawˇ dawˇ tawˆ leh yaw ve maˇ heˆ. Awˬ hk'aw‸ nawˉ hpeh‸ la tuˬ ve awˬ lawn teˇ hpaˍ htawˇ, yawˇ nawˬ hui hta‸ k'oˆ maˍ laˇ tuˬ yoˬ. 14 Yawˇ lehˬ, ngaˬ ve awˬ me‸ awˬ hponˇ hta‸ tawˆ la piˇ tuˬ yoˬ. Awˬ lawn k'o, ngaˬ hta‸ caˉ da‸ ve awˬ ceuˬ yawˇ yuˬ leh nawˬ hui hta‸ k'oˆ maˍ laˇ tuˬ yoˬ. 15 Awˬ pa hk'a cawˬ taˍ ve awˬ ceuˬ hk'a peu-eˬ ngaˬ ve htawˇ hpeh‸ ve yoˬ. Hk'e te leh, ngaˬ hta‸ caˉ da‸ ve awˬ ceuˬ yawˇ yuˬ leh, nawˬ hui hta‸ k'oˆ maˍ laˇ tuˬ yoˬ teh‸ ngaˬ k'oˆ laˇ peuˬ. 16 Teˇ hkui gaˬ k'o, nawˬ hui ngaˬ hta‸ maˇ g'a mawˬ. Teˇ hkui k'aw‸ gaˬ k'o, g'a k'aw‸ mawˬ tuˬ yoˬ teh‸ k'oˆ piˇ ve yoˬ. 17 Oˇ htaˇ yawˇ ve awˬ la‸ g'awˇ teˇ hpaˍ hpaˍ k'oˆ ve, Teˇ hkui gaˬ k'o, nawˬ hui ngaˬ hta‸ maˇ g'a mawˬ. Teˇ hkui k'aw‸ gaˬ k'o, g'a k'aw‸ mawˬ tuˬ yoˬ teh‸ k'oˆ laˇ ve maˇ k'oˆ, Ngaˬ Awˬ pa geh k'o‸-e ve pa taw teh‸ k'oˆ laˇ ve maˇ k'oˆ, yawˇ ngaˬ hui hta‸ hk'aˬ hk'e k'oˆ laˇ gaˇ ve leh naˍ teh‸, teˇ g'aˇ leh teˇ g'aˇ k'oˆ da‸ ve yoˬ. 18 Peuˬ leh yawˇ hui k'aw‸ k'oˆ ve, Teˇ hkui gaˬ k'o teh‸ yawˇ k'oˆ ve tawˇ teˇ hkawˇ aˬ hto‸ ma k'oˆ gaˇ ve le, Yawˇ k'oˆ ve tawˇ hkawˇ hta‸ ngaˬ hui maˇ shiˍ teh‸, yawˇ hui k'oˆ da‸ ve yoˬ. 19 Yawˇ hui yawˇ hta‸ na nyi gaˇ ve hta‸ Yeˍsuˆ shiˍ ve pa taw yawˇ k'oˆ ve, Teˇ hkui gaˬ k'o, nawˬ hui ngaˬ hta‸ maˇ g'a mawˬ. Teˇ hkui k'aw‸ gaˬ k'o, g'a k'aw‸ mawˬ tuˬ yoˬ teh‸ ngaˬ k'oˆ laˇ ve tawˇ hkawˇ hta‸ nawˬ hui teˇ g'aˇ leh teˇ g'aˇ na nyi da‸ chehˇ ve laˇ. 20 Ngaˬ nawˬ hui hta‸ awˬ tehˬ awˬ na k'oˆ laˇ ve, nawˬ hui g'a kuˬ hawˬ paˆ hawˬ tuˬ yoˬ. Ya‸ hk'aˇ, miˬ guiˬ yaˇ hui lehˬ, g'a ha lehˬ tuˬ yoˬ. Nawˬ hui g'a dawˇ haˍ tuˬ ve htawˇ, nawˬ hui dawˇ haˍ ve oˇ ve lehˬ, ha lehˬ tuˬ k'aw‸ hpeh‸ la tuˬ yoˬ. 21 Yaˇ miˇ teˇ g'aˇ yaˇ paw ve teˇ yanˇ, yaˇ paw tuˬ ve awˬ yanˇ gaˬ la ve pa taw, yawˇ dawˇ haˍ ve yoˬ. Ya‸ hk'aˇ, yaˇ paw peuˬ hk'aw‸ nawˉ, chi miˬ guiˬ hk'oˆ lo chaw teˇ g'aˇ paw la peuˬ ve pa taw yawˇ ha lehˬ jaˇ leh, awˉ lawˉ htaˇ yawˇ g'a hkanˍ ve teˇ hpaˍ hta‸ maˇ k'aw‸ dawˇ nawˇ ve yoˬ. 22 Oˇ ve hk'a shuˍ shuˍ, chi beu‸ nawˬ hui g'a dawˇ haˍ ve htawˇ, ngaˬ nawˬ hui hta‸ teˇ pawˆ k'aw‸ hpuˇ da‸ tuˬ ve pa taw, nawˬ hui ve nyi ma g'a ha lehˬ tuˬ yoˬ. Nawˬ hui ve ha lehˬ tuˬ oˇ ve hta‸ chaw teˇ g'aˇ ka‸ nawˬ hui geh hiˉ yuˬ maˇ g'a. 23 Oˇ ve teˇ nyi gaˬ k'o, nawˬ hui ngaˬ hta‸ te‸ chiˉ ka‸ maˇ k'aw‸ na nyi. Ngaˬ nawˬ hui hta‸ awˬ tehˬ awˬ na k'oˆ laˇ ve, Awˬ pa geh nawˬ hui teˇ ceuˬ ceuˬ lawˬ ve k'o, ngaˬ ve awˬ meh awˬ hk'aw lo yawˇ nawˬ hui hta‸ pe‸ laˇ tuˬ yoˬ. 24 Chi beu‸ hk'a gaˬ ngaˬ ve awˬ meh hta‸ cuˇ leh nawˬ hui teˇ ceuˬ ka‸ maˇ lawˬ jaw sheˍ. Nawˬ hui ha lehˬ tuˬ ve biˇ la tuˬ lawˬ loˬ. Lawˬ ve k'o, g'a tuˬ yoˬ. 25 Ngaˬ tawˇ pa haˉ yehˇ leh, nawˬ hui hta‸ awˬ lawn chi teˇ hpaˍ k'oˆ maˍ laˇ peuˬ. Tawˇ pa haˉ maˇ k'aw‸ yehˇ leh, Awˬ pa awˬ lawn ngaˬ nawˬ hui hta‸ hk'a tawˍ lehˆ k'oˆ maˍ laˇ tuˬ ve awˬ yanˇ gaˬ la tuˬ yoˬ. 26 Awˬ yanˇ oˇ ve awˬ hk'aw lo nawˬ hui ngaˬ ve awˬ meh hta‸ cuˇ leh lawˬ tuˬ yoˬ. Nawˬ hui awˬ pon Awˬ pa geh ngaˬ lawˬ tuˬ yoˬ teh‸, nawˬ hui hta‸ ngaˬ maˇ k'oˆ. 27 Awˬ lawn k'o, nawˬ hui ngaˬ hta‸ ha‸ leh, Awˬ pa geh lo ngaˬ laˬ ve yoˬ teh‸ nawˬ hui yonˍ ve pa taw, Awˬ pa yawˇ awˬ to nawˬ hui hta‸ ha‸ ve yoˬ. 28 Ngaˬ lehˬ Awˬ pa geh lo tawˆ la leh, miˬ guiˬ hk'oˆ lo gaˬ la peuˬ. Teˇ pawˆ miˬ guiˬ chi awˬ hk'aw lo ngaˬ tawˆ k'ai leh Awˬ pa geh k'aw‸ k'o‸-e tuˬ yoˬ teh‸ k'oˆ piˇ ve yoˬ. 29 Yawˇ ve awˬ la‸ g'awˇ teˇ hpaˍ k'oˆ ve, Chi beu‸ nawˬ tawˇ pa haˉ maˇ yehˇ leh hk'a tawˍ lehˆ k'oˆ laˇ ve yoˬ. 30 Nawˬ hk'a peu-eˬ hta‸ shiˍ taˍ ve hta‸ maˇ k'oˆ, chaw teˇ g'aˇ ka‸ nawˬ hta‸ na nyi laˇ tuˬ nawˬ maˇ loˍ ve hta‸ maˇ k'oˆ, chi beu‸ ngaˬ hui shiˍ ve yoˬ. Chi hta‸ pa taw, nawˬ G'uiˬ sha geh lo laˬ ve hta‸ ngaˬ hui yonˍ ve yoˬ teh‸ k'oˇ ve yoˬ. 31 Yeˍsuˆ k'aw‸ k'oˆ ve, Chi beu‸ nawˬ hui yonˍ peuˬ laˇ. 32 Nawˬ hui hpaˆ da‸ leh, nawˬ hui teˇ g'aˇ le le a shu yawˇ ve chehˇ kuiˬ lo k'o‸-e leh ngaˬ hta‸ tiˉ baˬ taˉ laˇ tuˬ ve awˬ yanˇ gaˬ la chehˇ leh chi beu‸ ka‸ gaˬ la peuˬ. Ya‸ hk'aˇ, ngaˬ lehˬ ngaˬ teˇ g'aˇ tiˉ g'a chehˇ tuˬ ve maˇ heˆ. Awˬ pa ngaˬ geh chehˇ taˍ ve yoˬ. 33 Nawˬ hui lehˬ ngaˬ awˬ hk'aw lo dawˇ sha gaˇ sha ve teˇ ceuˬ hta‸ g'a tuˬ, tawˇ chi teˇ hpaˍ ngaˬ nawˬ hui hta‸ k'oˆ laˇ peuˬ. Chi miˬ guiˬ hk'oˆ lo nawˬ hui g'a tu‸ g'a hkanˍ ve yoˬ. Ya‸ hk'aˇ nyi ma taˇ luˬ, ha lehˬ chehˇ-oˆ. Ngaˬ lehˬ chi miˬ guiˬ hta‸ g'aˇ peuˬ teh‸, yawˇ hui hta‸ k'oˆ piˇ ve yoˬ.

Yoˇhanˬ 17

1 Tawˇ oˇ ve teˇ hpaˍ hta‸ Yeˍsuˆ k'oˆ peuˬ hk'aw‸ nawˉ, yawˇ mvuhˇ naw ma lo chiˇ nyi leh k'oˆ ve, A pa-oˬ, awˬ yanˇ gaˬ la peuˬ. Yaˇ hpu lehˬ nawˬ hta‸ awˬ me‸ awˬ hponˇ tawˆ la piˇ tuˬ, nawˬ ve Yaˇ hpu hta‸ awˬ me‸ awˬ hponˇ tawˆ la piˇ-oˆ. 2 Nawˬ lehˬ Yaˇ hpu hta‸ hk'a chiˇ a‸ piˇ peuˬ ve chaw hui hta‸ yawˇ co ti‸ ha ti‸ piˇ tuˬ, chaw ceuˬ hk'a peu-eˬ awˬ hk'oˆ nawˬ yawˇ hta‸ kanˇ paˆ piˇ peuˬ ve pa taw, nawˬ ve Yaˇ hpu hta‸ awˬ me‸ awˬ hponˇ tawˆ la piˇ-oˆ. 3 Co ti‸ ha ti‸ teˇ ceuˬ lehˬ, awˬ tehˬ awˬ na ve G'uiˬ sha nawˬ teˇ g'aˇ tiˉ hta‸ maˇ k'oˆ, nawˬ peu laˇ ve Yeˍsuˆ Hkri‸ hta‸ maˇ k'oˆ, yawˇ hui shiˍ ve teˇ ceuˬ hpeh‸ ve yoˬ. 4 Nawˬ ngaˬ hta‸ te tcuh laˇ ve kanˉ hta‸ ngaˬ te peuˬ leh, chi miˬ guiˬ hk'oˆ lo nawˬ ve awˬ me‸ awˬ hponˇ hta‸ ngaˬ tawˆ la piˇ lawˬ peuˬ. 5 A pa-oˬ, miˬ guiˬ maˇ te hpanˍ sheˍ htaˇ ka‸ nawˬ geh teˇ geh ngaˬ cawˬ taˍ ve awˬ me‸ awˬ hponˇ, chi beu‸ nawˬ mehˆ g'uˇ suhˍ ngaˬ awˬ hk'aw lo k'aw‸ tawˆ la piˇ lawˬ-o‸. 6 Miˬ guiˬ yaˇ hui awˬ hk'aw lo nawˬ ngaˬ hta‸ pe‸ laˇ peuˬ ve chaw teˇ hpaˍ hta‸ nawˬ ve awˬ lawn ngaˬ hpeu‸ maw piˇ peuˬ. Yawˇ hui lehˬ nawˬ ve chaw hpeh‸ leh, ngaˬ ve la‸ sheh awˬ hk'aw lo nawˬ yawˇ hui hta‸ a‸ laˇ peuˬ. Peuˬ leh, nawˬ ve tawˇ hkawˇ hta‸ yawˇ hui na yuˬ leh te k'ai peuˬ. 7 Nawˬ ngaˬ hta‸ hk'a pe‸ laˇ ve awˬ ceuˬ hk'a peu-eˬ nawˬ lo laˬ ve hta‸ chi beu‸ yawˇ hui shiˍ ve yoˬ. 8 Awˬ lawn k'o, nawˬ ngaˬ hta‸ k'oˆ laˇ ve tawˇ hkawˇ teˇ hpaˍ ngaˬ yawˇ hui hta‸ k'oˆ piˇ peuˬ. Tawˇ hkawˇ oˇ ve teˇ hpaˍ hta‸ yawˇ hui na yuˬ leh, ngaˬ nawˬ geh lo tawˆ la ve hta‸ yawˇ hui awˬ tehˬ awˬ na shiˍ leh, nawˬ ngaˬ hta‸ peu laˇ ve hta‸ yawˇ hui yonˍ ve yoˬ. 9 Yawˇ hui awˬ pon ngaˬ bon lawˬ chehˇ ve yoˬ. Miˬ guiˬ yaˇ hui awˬ pon ngaˬ bon lawˬ ve maˇ heˆ. Nawˬ ngaˬ hta‸ pe‸ laˇ ve chaw teˇ hpaˍ lehˬ, nawˬ ve chaw hpeh‸ ve pa taw, yawˇ hui awˬ pon ngaˬ bon lawˬ chehˇ ve yoˬ. 10 Ngaˬ hk'a cawˬ ve hk'a peu-eˬ lehˬ, nawˬ ve yoˬ. Nawˬ hk'a cawˬ ve hk'a peu-e htawˇ ngaˬ ve yoˬ. Oˇ ve teˇ hpaˍ hta‸ pa taw ngaˬ ve awˬ me‸ awˬ hponˇ tawˆ la ve yoˬ. 11 Chi beu‸ hta‸ tanˬ leh miˬ guiˬ hk'oˆ lo ngaˬ maˇ k'aw‸ chehˇ. Chaw chi teˇ hpaˍ lehˬ, miˬ guiˬ hk'oˆ lo chehˇ taˍ ve yoˬ. Ngaˬ lehˬ nawˬ geh lo k'aw‸ la ve yoˬ. Da‸ ve kehˬ ve A pa-oˬ, ngaˬ huiˉ maˬ teˇ g'aˇ tiˉ hpeh‸ ve hk'a shuˍ shuˍ yawˇ hui htawˇ teˇ g'aˇ tiˉ hpeh‸ la tuˬ, nawˬ ngaˬ hta‸ pe‸ laˇ ve chaw teˇ hpaˍ hta‸ nawˬ ve awˬ meh awˬ hk'aw lo ha‸ shaˉ-oˆ. 12 Ngaˬ yawˇ hui geh chehˇ taˍ ve teˇ yanˇ, nawˬ ngaˬ hta‸ pe‸ laˇ ve chaw teˇ hpaˍ hta‸ nawˬ ve awˬ meh awˬ hk'aw lo ngaˬ ha‸ shaˉ taˍ peuˬ. Ngaˬ yawˇ hui hta‸ ha‸ shaˉ taˍ ve pa taw, luˬ k'ai sheˆ k'ai ve yaˇ teˇ g'aˇ maˇ heˆ k'o, teˇ g'aˇ ka‸ maˇ luˬ maˇ sheˆ. Chaw oˇ ve teˇ g'aˇ luˬ k'ai ve lehˬ, Li‸ hpu hk'aw biˇ la tuˬ awˬ pon hpeh‸ ve yoˬ. 13 Chi beu‸ ngaˬ nawˬ geh lo k'aw‸ la ve yoˬ. Ngaˬ ve ha lehˬ tuˬ yawˇ hui awˬ hk'aw lo biˇ la tuˬ, ngaˬ miˬ guiˬ hk'oˆ lo chehˇ ve teˇ yanˇ tawˇ chi teˇ hpaˍ hta‸ ngaˬ k'oˆ piˇ taˉ ve yoˬ. 14 Nawˬ ve tawˇ hkawˇ ngaˬ yawˇ hui hta‸ k'oˇ piˇ peuˬ. Ngaˬ lehˬ, chi miˬ guiˬ hta‸ maˇ caˉ da‸ ve hk'e yawˇ hui htawˇ chi miˬ guiˬ hta‸ maˇ caˉ da‸ ve pa taw, miˬ guiˬ yaˇ yawˇ hui hta‸ canˇ ve yoˬ. 15 Chi miˬ guiˬ hk'oˆ lo nawˬ yawˇ hui hta‸ yuˬ tawˆ tuˬ ngaˬ lawˬ ve maˇ heˆ. Yawˇ hui lehˬ, haiˬ ve awˬ ceuˬ hta‸ g'a ponˬ tuˬ awˬ pon yawˇ hui hta‸ ha‸ shaˉ tuˬ ngaˬ lawˬ ve yoˬ. 16 Ngaˬ lehˬ chi miˬ guiˬ hta‸ maˇ caˉ da‸ ve hk'e, yawˇ hui htawˇ chi miˬ guiˬ hta‸ maˇ caˉ da‸. 17 Hteˇ ve cawˇ ve teˇ ceuˬ hta‸ cuˇ leh yawˇ hui hta‸ da‸ la kehˬ la piˇ-oˆ. Nawˬ ve tawˇ hkawˇ lehˬ hteˇ ve cawˇ ve teˇ ceuˬ hpeh‸ ve yoˬ. 18 Nawˬ ngaˬ hta‸ chi miˬ guiˬ hk'oˆ lo peu laˇ ve hk'a shuˍ shuˍ, ngaˬ htawˇ yawˇ hui hta‸ chi miˬ guiˬ hk'oˆ lo peu k'ai ve yoˬ. 19 Yawˇ hui lehˬ, hteˇ ve cawˇ ve teˇ ceuˬ awˬ hk'aw lo g'a da‸ g'a kehˬ la tuˬ, yawˇ hui awˬ pon ngaˬ ve awˬ to hta‸ ngaˬ da‸ lehˍ kehˬ lehˍ teh taˍ peuˬ. 20 Chaw chi teˇ hpaˍ awˬ pon ceh tiˉ ngaˬ bon lawˬ ve maˇ heˆ. Yawˇ hui maˍ ve tawˇ hkawˇ hta‸ pa taw ngaˬ hta‸ yonˍ la tuˬ ve chaw teˇ hpaˍ awˬ pon htawˇ ngaˬ bon lawˬ ve yoˬ. 21 Yawˇ hui hk'a peu-eˬ teˇ g'aˇ tiˉ hpeh‸ la tuˬ ngaˬ bon lawˬ ve yoˬ. A pa-oˬ, nawˬ ngaˬ awˬ hk'aw lo chehˇ leh ngaˬ htawˇ nawˬ awˬ hk'aw lo chehˇ ve hk'a shuˍ shuˍ, yawˇ hui hk'a peu-eˬ ngaˬ huiˉ maˬ awˬ hk'aw lo chehˇ piˇ-oˆ. Oˇ hk'e te ve k'o, nawˬ ngaˬ hta‸ peu laˇ ve yoˬ teh‸ miˬ guiˬ yaˇ hui yonˍ la tuˬ yoˬ. 22 Ngaˬ huiˉ maˬ teˇ g'aˇ tiˉ hpeh‸ ve hk'a shuˍ shuˍ, yawˇ hui htawˇ teˇ g'aˇ tiˉ hpeh‸ la tuˬ, nawˬ ngaˬ hta‸ pe‸ laˇ ve awˬ me‸ awˬ hponˇ yawˇ hui hta‸ ngaˬ piˇ peuˬ. 23 Ngaˬ yawˇ hui awˬ hk'aw lo chehˇ leh, nawˬ htawˇ ngaˬ awˬ hk'aw lo chehˇ ve pa taw, yawˇ hui awˬ tehˬ awˬ na teˇ g'aˇ tiˉ hk'a deh‸ hpeh‸ la tuˬ yoˬ. Chi hta‸ pa taw, nawˬ ngaˬ hta‸ peu laˇ ve hta‸ maˇ k'oˆ, ngaˬ hta‸ ha‸ ve hk'a shuˍ shuˍ, yawˇ hui hta‸ htawˇ nawˬ ha‸ ve maˇ k'oˆ, miˬ guiˬ yaˇ teˇ hpaˍ g'a shiˍ tuˬ yoˬ. 24 A pa-oˬ, miˬ guiˬ chi maˇ te hpanˍ sheˍ htaˇ ka‸ nawˬ ngaˬ hta‸ ha‸ ve pa taw nawˬ ngaˬ hta‸ pe‸ laˇ ve awˬ me‸ awˬ hponˇ hta‸ yawˇ hui g'a mawˬ tuˬ, nawˬ ngaˬ hta‸ pe‸ laˇ ve chaw teˇ hpaˍ hta‸ ngaˬ geh teˇ geh chehˇ piˇ lawˬ gaˇ ve yoˬ. 25 Hteˇ ve cawˇ ve A pa-oˬ, miˬ guiˬ yaˇ hui nawˬ hta‸ maˇ shiˍ ve htawˇ, ngaˬ nawˬ hta‸ shiˍ taˍ ve yoˬ. Nawˬ ngaˬ hta‸ peu laˇ ve yoˬ teh‸, chaw chi teˇ hpaˍ shiˍ taˍ ve yoˬ. 26 Nawˬ ngaˬ hta‸ ha‸ ve ha‸ pehnˇ ve teˇ ceuˬ yawˇ hui awˬ hk'aw lo g'a cawˬ tuˬ maˇ k'oˆ, ngaˬ yawˇ hui awˬ hk'aw lo g'a chehˇ tuˬ maˇ k'oˆ, nawˬ ve awˬ meh ngaˬ yawˇ hui hta‸ shiˍ piˇ lawˬ peuˬ. Chi hk'oˆ ka‸, k'aw‸ shiˍ piˇ tuˬ sheˍ ve yoˬ teh‸ k'oˆ ve yoˬ.

Yoˇhanˬ 18

1 Yeˍsuˆ oˇ hk'e k'oˆ peuˬ hk'aw‸ nawˉ, yawˇ ve awˬ la‸ g'awˇ hui geh teˇ geh tawˆ k'ai leh, Keˍdronˍ lawˬ k'aˉ coˇ paˉ lo hkanˍ k'ai ve yoˬ. Oˇ kaˬ lo cawˬ ve hko awˬ hk'aw lo yawˇ leh yawˇ ve awˬ la‸ g'awˇ teˇ hpaˍ teˇ geh lo‸-e ve yoˬ. 2 Yeˍsuˆ lehˬ yawˇ ve awˬ la‸ g'awˇ hui geh teˇ geh oˇ kaˬ lo laiˉ pawˆ k'ai jaw ve pa taw, yawˇ hta‸ chiˇ a‸ piˇ shehˍ hpaˇ Yuˇda‸ lehˬ, chehˇ kuiˬ oˇ ve hta‸ shiˍ ve yoˬ. 3 Hk'e te leh Yuˇda‸ lehˬ, ma‸ yaˇ teˇ moˍ leh paw hkuˇ lonˉ leh Hpiˍriˍsehˇ hui hta‸ caˉ da‸ ve ma‸ yaˇ teˇ hpaˍ hta‸ shiˍ veu laˇ leh laˬ ve yoˬ. Yawˇ hui lehˬ, kawˆ faiˇ tuˉ aˬ miˍ tuˉ leh, la‸ caˉ ka‸ yuˬ veu laˇ ve yoˬ. 4 Yeˍsuˆ lehˬ, yawˇ awˬ hk'oˆ hk'aˬ hk'e gaˬ la tuˬ ve hk'a peu-eˬ hta‸ shiˍ leh, yawˇ yawˇ hui geh k'ai leh, Nawˬ hui a shu hta‸ ca ve le teh‸, yawˇ hui hta‸ na nyi ve yoˬ. 5 Yawˇ hui k'aw‸ k'oˆ ve, Naˍzaˍrehˆ chaw Yeˍsuˆ hta‸ ca ve yoˬ teh‸ k'oˆ ve teˇ yanˇ, Ngaˬ lehˬ yawˇ yoˬ teh‸, Yeˍsuˆ yawˇ hui hta‸ k'aw‸ k'oˆ piˇ ve yoˬ. Yawˇ hta‸ chiˇ a‸ piˇ shehˍ hpaˇ Yuˇda‸ htawˇ yawˇ hui geh huˉ taˍ ve yoˬ. 6 Ngaˬ lehˬ yawˇ yoˬ teh‸ Yeˍsuˆ k'oˆ ve teˇ yanˇ, yawˇ hui awˬ hk'aw‸ nawˉ htunˍ k'o‸-e leh miˬ chaˇ hk'oˆ paiˍ ve yoˬ. 7 Nawˬ hui a shu hta‸ ca ve le teh‸ yawˇ yawˇ hui hta‸ teˇ pawˆ k'aw‸ na nyi htaˇ, Naˍzaˍrehˆ chaw Yeˍsuˆ hta‸ ca ve yoˬ teh‸, yawˇ hui k'aw‸ k'oˆ ve yoˬ. 8 Yeˍsuˆ k'aw‸ k'oˆ ve, Ngaˬ lehˬ yawˇ yoˬ teh‸ nawˬ hui hta‸ ngaˬ hto laˇ peuˬ. Hk'e te leh, nawˬ hui ngaˬ hta‸ ca ve k'o, chaw chi teˇ hpaˍ hta‸ hpehˇ piˇ-oˆ teh‸ k'oˆ ve yoˬ. 9 Yawˇ chi hk'e k'oˆ ve lehˬ, Nawˬ ngaˬ hta‸ pe‸ laˇ ve chaw hui awˬ hk'aw lo chaw teˇ g'aˇ ka‸ maˇ luˬ k'ai teh‸ k'oˆ taˍ ve tawˇ teˇ hkawˇ hta‸ biˇ la tuˬ awˬ pon k'oˆ ve yoˬ. 10 Oˇ htaˇ, Siˉmonˍ Peˍtruˆ aˉ htaw pfuhˇ taˍ ve pa taw, aˉ htaw oˇ ve hta‸ yawˇ g'awˬ tawˆ leh, paw hkuˇ lonˉ ve awˬ ceˬ hta‸ chaw leh, la‸ sha paˉ ve naˍ paw cheˆ ve yoˬ. Awˬ ceˬ oˇ ve lehˬ, Maˍlaˍhkuˆ meh ve yoˬ. 11 Oˇ htaˇ, Yeˍsuˆ lehˬ Peˍtruˆ hta‸ k'oˆ piˇ ve, Nawˬ ve aˉ htaw hta‸ awˬ hpui awˬ hk'aw lo k'aw‸ hk'aw‸ keu-o. Awˬ pa ngaˬ hta‸ pe‸ laˇ ve kawˆ hta‸ ngaˬ maˇ g'a dawˬ leh laˇ teh‸ k'oˆ ve yoˬ. 12 Oˇ htaˇ, ma‸ yaˇ teˇ moˍ leh ma‸ poˍ ka‸, Yuˇda‸ chaw hui ve ma‸ yaˇ teˇ hpaˍ ka‸ Yeˍsuˆ hta‸ yuˬ hpeh taˍ ve yoˬ. 13 Awˉ lawˉ htaˇ yawˇ hta‸ Aˍnaˆ geh yuˬ k'ai ve yoˬ. Awˬ lawn k'o, Aˍnaˆ lehˬ Kaˍyaˍhpaˆ ve awˬ puˍ hpeh‸ ve yoˬ. Kaˍyaˍhpaˆ lehˬ, oˇ ve teˇ hk'aw‸ awˬ hk'aw lo paw hkuˇ lonˉ te chehˇ ve yoˬ. 14 Kaˍyaˍhpaˆ oˇ ve teˇ g'aˇ lehˬ, Chaw ceuˬ awˬ pon chaw teˇ g'aˇ suh ve k'o, leuˉ leh da‸ ve yoˬ teh‸, Yuˇda‸ chaw hui hta‸ awˬ hk'aˇ beˆ maˍ piˇ jaw ve teˇ g'aˇ yoˬ. 15 Siˉmonˍ Peˍtruˆ leh awˬ kaˍ awˬ nu awˬ la‸ g'awˇ teˇ g'aˇ Yeˍsuˆ awˬ hk'aˇ suh k'ai ve yoˬ. Awˬ la‸ g'awˇ oˇ ve teˇ g'aˇ lehˬ, paw hkuˇ lonˉ hta‸ shiˍ da‸ ve pa taw, paw hkuˇ lonˉ ve shaˉ nanˉ awˬ paˇ ko taˍ kuiˬ awˬ hk'aw lo Yeˍsuˆ geh teˇ geh lo‸-e ve yoˬ. 16 Peˍtruˆ lehˬ, awˬ baˬ hpawˇ yehˬ miˉ awˬ paˇ lo huˉ taˍ ve yoˬ. Hk'e te leh, paw hkuˇ lonˉ hta‸ shiˍ da‸ ve awˬ la‸ g'awˇ oˇ ve teˇ g'aˇ tawˆ k'ai leh, yehˬ miˉ shaw shehˍ ma hta‸ k'oˆ piˇ peuˬ hk'aw‸ nawˉ, Peˍtruˆ hta‸ shiˍ lo‸ la ve yoˬ. 17 Oˇ htaˇ, yehˬ miˉ shaw shehˍ ma lehˬ, Nawˬ htawˇ chaw oˇ ve teˇ g'aˇ ve awˬ la‸ g'awˇ hpeh‸ ve maˇ heˆ laˇ teh‸ Peˍtruˆ hta‸ na nyi htaˇ, Maˇ heˆ teh‸, yawˇ k'aw‸ k'oˆ piˇ ve yoˬ. 18 Oˇ htaˇ kaˆ ve pa taw, awˬ ceˬ teˇ hpaˍ leh ma‸ yaˇ teˇ hpaˍ lehˬ, shiˉ g'eu‸ hta‸ aˬ miˍ ceh leh, huˉ lehˬ chehˇ ve yoˬ. Peˍtruˆ htawˇ yawˇ hui geh huˉ taˍ leh aˬ miˍ lehˬ chehˇ ve yoˬ. 19 Oˇ htaˇ paw hkuˇ lonˉ lehˬ, Yeˍsuˆ hta‸ yawˇ ve awˬ la‸ g'awˇ teˇ hpaˍ leh yawˇ maˍ piˇ ve teˇ hpaˍ awˬ lawn na nyi ve yoˬ. 20 Yeˍsuˆ k'aw‸ k'oˆ ve, Miˬ guiˬ yaˇ hui hta‸ ngaˬ hk'a tawˍ lehˆ maˍ piˇ peuˬ. Yuˇda‸ chaw hk'a peu-eˬ hpawnˬ da‸ kuiˬ, bon yehˬ teˇ hpaˍ awˬ hk'aw lo maˇ k'oˆ, bon yehˬ lonˉ awˬ hk'aw lo maˇ k'oˆ, ngaˬ hk'a htaˆ ka‸ maˍ piˇ chehˇ ve yoˬ. Ngaˬ shu hta‸ teˇ ceuˬ ka‸ maˇ hk'awˇ maˍ jaw. 21 Aˬ hto‸ ma pa taw nawˬ ngaˬ hta‸ na nyi laˇ ve le. Ngaˬ yawˇ hui hta‸ hk'aˬ hk'e maˍ piˇ ve awˬ lawn, ngaˬ maˍ piˇ ve chaw teˇ hpaˍ hta‸ na nyi-o. Ngaˬ hk'aˬ hk'e maˍ ve hta‸ yawˇ hui shiˍ ve yoˬ teh‸, yawˇ hta‸ k'aw‸ k'oˆ piˇ ve yoˬ. 22 Yawˇ chi hk'e k'oˆ ve teˇ yanˇ, awˬ paˇ lo huˉ chehˇ ve ma‸ yaˇ teˇ g'aˇ lehˬ, Yeˍsuˆ hta‸ hta hpehˇ leh, Paw hkuˇ lonˉ hta‸ nawˬ chi hk'e yaw hk'aw‸ ve laˇ teh‸ k'oˆ piˇ ve yoˬ. 23 Yeˍsuˆ k'aw‸ k'oˆ ve, Ngaˬ k'oˆ ve maˇ cawˇ k'o, maˇ cawˇ ve hta‸ hk'a deh‸ beˆ maˍ laˇ-oˆ. Ngaˬ k'oˆ ve cawˇ ve k'o, aˬ hto‸ ma te ngaˬ hta‸ dawˆ laˇ ve le teh‸, yawˇ hta‸ k'oˆ piˇ ve yoˬ. 24 Yeˍsuˆ hta‸ shu hpeh taˍ ve hta‸ Aˍnaˆ maˇ hpui leh, paw hkuˇ lonˉ Kaˍyaˍhpaˆ geh sheh k'ai tcuh ve yoˬ. 25 Siˉmonˍ Peˍtruˆ huˉ taˍ leh aˬ miˍ lehˬ chehˇ ve teˇ yanˇ, Nawˬ htawˇ yawˇ ve awˬ la‸ g'awˇ maˇ heˆ laˇ teh‸, yawˇ hui yawˇ hta‸ na nyi ve yoˬ. Maˇ heˆ teh‸ yawˇ k'oˆ leh g'awˬ hk'aˆ ve yoˬ. 26 Peˍtruˆ chaw leh naˍ paw cheˆ ve chaw teˇ g'aˇ ve awˬ viˉ awˬ nyi hpeh‸ ve, paw hkuˇ lonˉ ve awˬ ceˬ teˇ g'aˇ k'oˆ ve, Nawˬ lehˬ hko awˬ hk'aw lo chaw oˇ ve geh teˇ geh chehˇ ve hta‸ ngaˬ mawˬ ve yoˬ maˇ heˆ laˇ teh‸ k'oˆ ve yoˬ. 27 Peˍtruˆ teˇ pawˆ k'aw‸ g'awˬ hk'aˆ ve yoˬ. Oˇ teˇ hkui g'aˆ hpfuh bvuhˬ la ve yoˬ. 28 Oˇ ve awˬ hk'aw‸ nawˉ mvuhˇ shawˉ teˇ na‸ htaˇ, yawˇ hui lehˬ Yeˍsuˆ hta‸ Kaˍyaˍhpaˆ geh lo te leh jawˇ mawˇ lonˉ ve hawˉ yehˬ awˬ hk'aw lo yuˬ k'ai ve yoˬ. Yawˇ hui lehˬ, maˇ g'a cha‸ chiˆ leh, Paˍsaˍhkaˍ pawehˇ hta‸ g'a caˇ tuˬ, jawˇ mawˇ lonˉ ve hawˉ yehˬ awˬ hk'aw lo maˇ lo‸-e. 29 Hk'e te leh, jawˇ mawˇ Piˉla‸ tawˆ la leh, Chi hpaˇ awˬ hk'oˆ nawˬ hui aˬ hto‸ ma venˇ baˆ taˍ kuiˬ cawˬ le teh‸, yawˇ hui hta‸ na nyi ve yoˬ. 30 Yawˇ hui k'aw‸ k'oˆ ve, Chaw chi hpaˇ lehˬ, haiˬ ve hta‸ maˇ te ve hk'e k'o, ngaˬ hui nawˬ hta‸ chiˇ a‸ laˇ tuˬ ve maˇ heˆ teh‸ yawˇ hta‸ k'oˆ piˇ ve yoˬ. 31 Hk'e te leh, jawˇ mawˇ Piˉla‸ k'oˆ ve, Nawˬ hui yawˇ hta‸ yuˬ leh, nawˬ hui awˬ liˇ tawˇ hkawˇ cawˬ taˍ ve hk'e suhˉ jehˬ-o‸ teh‸ yawˇ hui hta‸ k'oˆ piˇ ve yoˬ. Yuˇda‸ chaw teˇ hpaˍ k'aw‸ k'oˆ ve, Ngaˬ hui lehˬ, chaw teˇ g'aˇ hta‸ ka‸ tiˇ pehˍ tuˬ a hkaw-anˬ maˇ cawˬ teh‸ yawˇ hta‸ k'oˆ piˇ ve yoˬ. 32 Yawˇ hui chi hk'e k'oˆ ve lehˬ, Yeˍsuˆ yawˇ hk'aˬ hk'e g'a te suh tuˬ ve awˬ lawn k'oˆ taˍ ve hk'e biˇ la tuˬ awˬ pon hpeh‸ ve yoˬ. 33 Hk'e te leh jawˇ mawˇ Piˉla‸ lehˬ, hawˉ yehˬ awˬ hk'aw lo k'aw‸ lo‸-e leh, Yeˍsuˆ hta‸ kuˬ yuˬ peuˬ hk'aw‸ nawˉ, Nawˬ lehˬ Yuˇda‸ chaw hui ve Hkunˉ hawˉ hkanˇ yoˬ laˇ teh‸, yawˇ hta‸ na nyi ve yoˬ. 34 Yeˍsuˆ k'aw‸ k'oˆ ve, Nawˬ hk'aˇ nawˬ dawˇ tawˆ leh na nyi ve laˇ. Maˇ heˆ k'o, ngaˬ ve awˬ lawn shu nawˬ hta‸ k'oˆ laˇ ve laˇ teh‸ na nyi ve yoˬ. 35 Jawˇ mawˇ Piˉla‸ k'aw‸ k'oˆ ve, Ngaˬ lehˬ Yuˇda‸ chaw hpeh‸ ve leh laˇ. Nawˬ ve chaw ceuˬ leh paw hkuˇ lonˉ teˇ hpaˍ nawˬ hta‸ ngaˬ ve la‸ hk'aw lo chiˇ a‸ laˇ peuˬ. Nawˬ aˬ hto‸ ma teˇ ceuˬ te ya‸ ve le teh‸ na nyi ve yoˬ. 36 Yeˍsuˆ k'aw‸ k'oˆ ve, Ngaˬ hkunˉ hawˉ hkanˇ te kuiˬ lehˬ, chi miˬ guiˬ hta‸ maˇ caˉ da‸. Ngaˬ hkunˉ hawˉ hkanˇ te kuiˬ chi miˬ guiˬ hta‸ caˉ da‸ ve hk'e k'o, ngaˬ lehˬ Yuˇda‸ chaw hui ve la‸ hk'aw lo maˇ g'a gaˬ tuˬ, ngaˬ ve yaˇ g'uiˬ teˇ hpaˍ yawˇ hui hta‸ bawˆ tuˬ yoˬ. Ya‸ hk'aˇ, ngaˬ hkunˉ hawˉ hkanˇ te kuiˬ lehˬ, chi miˬ guiˬ hta‸ maˇ caˉ da‸ teh‸ k'oˆ piˇ ve yoˬ. 37 Jawˇ mawˇ Piˉla‸ k'oˆ ve, Hk'e te k'o, nawˬ hkunˉ hawˉ hkanˇ hpeh‸ ve yoˬ laˇ teh‸ yawˇ hta‸ na nyi ve teˇ yanˇ, Yeˍsuˆ k'aw‸ k'oˆ ve, Nawˬ k'oˆ ve hk'e, ngaˬ hkunˉ hawˉ hkanˇ hpeh‸ ve yoˬ. Hteˇ ve cawˇ ve teˇ ceuˬ awˬ lawn shaˉ hkiˆ hkanˍ tuˬ awˬ pon ngaˬ paw la leh miˬ guiˬ hk'oˆ lo laˬ ve yoˬ. Hteˇ ve cawˇ ve hta‸ caˉ da‸ ve chaw hk'a peu-eˬ lehˬ, ngaˬ ve tawˇ hkawˇ hta‸ na ve yoˬ teh‸ k'oˆ ve yoˬ. 38 Jawˇ mawˇ Piˉla‸ k'oˆ ve, Hteˇ ve cawˇ ve teˇ ceuˬ lehˬ, aˬ hto‸ ma le teh‸ yawˇ hta‸ na nyi ve yoˬ. Jawˇ mawˇ Piˉla‸ chi hk'e k'oˆ peuˬ hk'aw‸ nawˉ, Yuˇda‸ chaw hui chehˇ taˍ kuiˬ lo yawˇ tawˆ k'ai leh k'oˆ ve, Chaw chi hpaˇ awˬ hk'aw lo ya‸ kuiˬ hta‸ ngaˬ ca maˇ mawˬ. 39 Paˍsaˍhkaˍ pawehˇ te ve teˇ yanˇ, ngaˬ nawˬ hui awˬ pon chaw teˇ g'aˇ hta‸ hpehˇ piˇ ve awˬ liˇ cawˬ ve yoˬ. Hk'e te leh, Yuˇda‸ chaw hui ve Hkunˉ hawˉ hkanˇ hta‸ ngaˬ hpehˇ laˇ tuˬ nawˬ hui heuˆ gaˇ ve laˇ teh‸, yawˇ hui hta‸ na nyi ve yoˬ. 40 Yawˇ hui teˇ pawˆ k'aw‸ kuˬ leh k'oˆ ve, Chi hpaˇ hta‸ maˇ heˆ. Baˍraˍbaˆ hta‸ hpehˇ laˇ-oˆ teh‸ k'oˆ ve yoˬ. Baˍraˍbaˆ lehˬ, chaw hpfuhˆ hpeh‸ ve yoˬ.

Yoˇhanˬ 19

1 Oˇ htaˇ jawˇ mawˇ Piˉla‸ lehˬ, Yeˍsuˆ hta‸ yuˬ leh jaw‸ ve yoˬ. 2 Ma‸ yaˇ teˇ hpaˍ lehˬ, aˉ chuˇ te hta‸ yuˬ leh shi uˉ tcuhˍ hk'e te g'a‸ sheˬ leh, yawˇ ve oˉ k'oˍ hta‸ hk'awˆ piˇ ve yoˬ. Peuˬ leh, nyi naˆ meuˉ lehˍ ve aˉ po‸ zuhˬ ma yawˇ hta‸ deh piˇ ve yoˬ. 3 Oˇ htaˇ, yawˇ hui yawˇ geh laˬ leh, Yuˇda‸ chaw hui ve Hkunˉ hawˉ hkanˇ-oˬ, nawˬ awˬ bon uiˍ piˇ-oˆ teh‸ k'oˆ leh, yawˇ hta‸ hta hpehˇ ve yoˬ. 4 Jawˇ mawˇ Piˉla‸ teˇ pawˆ k'aw‸ tawˆ la leh k'oˆ ve, Chaw chi hpaˇ awˬ hk'aw lo ngaˬ ya‸ kuiˬ te‸ chiˉ maˇ mawˬ ve hta‸ nawˬ hui g'a shiˍ tuˬ, ngaˬ yawˇ hta‸ nawˬ hui geh shiˍ tawˆ la ve yoˬ teh‸, yawˇ hui hta‸ k'oˆ piˇ ve yoˬ. 5 Oˇ htaˇ, Yeˍsuˆ lehˬ aˉ chuˇ uˉ tcuhˍ hta‸ hk'awˆ taˍ leh, nyi naˆ meuˉ lehˍ ve aˉ po‸ zuhˬ ma hta‸ deh taˍ leh tawˆ la ve yoˬ. Jawˇ mawˇ Piˉla‸ lehˬ, Chaw chi hpaˇ hta‸ nyi-o teh‸ yawˇ hui hta‸ k'oˆ piˇ ve yoˬ. 6 Paw hkuˇ lonˉ teˇ hpaˍ leh bon yehˬ lonˉ ve ma‸ yaˇ teˇ hpaˍ lehˬ, Yeˍsuˆ hta‸ g'a mawˬ ve teˇ yanˇ, Yawˇ hta‸ la‸ ka hk'oˆ lo hta‸ pehˍ loˬ, hta‸ pehˍ loˬ teh‸ g'aˇ hte‸ kuˬ ve yoˬ. Jawˇ mawˇ Piˉla‸ k'oˆ ve, Nawˬ hui hk'aˇ nawˬ hui yawˇ hta‸ yuˬ leh la‸ ka hk'oˆ lo hta‸ pehˍ-o‸. Ngaˬ lehˬ yawˇ awˬ hk'aw lo ya‸ kuiˬ te‸ chiˉ maˇ mawˬ teh‸, yawˇ hui hta‸ k'oˆ piˇ ve yoˬ. 7 Yuˇda‸ chaw teˇ hpaˍ k'aw‸ k'oˆ ve, Ngaˬ hui awˬ liˇ tawˇ hkawˇ cawˬ taˍ ve hk'e te ve k'o, yawˇ lehˬ suh keunˍ ve yoˬ. Awˬ lawn k'o, yawˇ lehˬ yawˇ awˬ to hta‸ G'uiˬ sha ve Yaˇ hpu hpeh‸ ve yoˬ teh‸ k'oˆ ve pa taw yoˬ. 8 Jawˇ mawˇ Piˉla‸ tawˇ oˇ ve hta‸ g'a kaˇ ve teˇ yanˇ, leuˉ leh kawˆ jaˇ ve yoˬ. 9 Yawˇ hawˉ yehˬ awˬ hk'aw lo teˇ pawˆ k'aw‸ lo‸-e leh, Nawˬ hk'aˬ lo laˬ ve chaw le teh‸, Yeˍsuˆ hta‸ na nyi ve yoˬ. Ya‸ hk'aˇ, Yeˍsuˆ yawˇ hta‸ te‸ chiˉ maˇ yaw hk'aw‸ piˇ. 10 Hk'e te leh jawˇ mawˇ Piˉla‸ k'aw‸ k'oˆ ve, Nawˬ ngaˬ hta‸ tawˇ maˇ yaw laˇ leh laˇ. Nawˬ hta‸ hpehˇ laˇ tuˬ maˇ k'oˆ, la‸ ka hk'oˆ lo hta‸ pehˍ tuˬ maˇ k'oˆ, ngaˬ kanˇ paˆ cawˬ ve hta‸ nawˬ maˇ shiˍ leh laˇ teh‸, yawˇ hta‸ k'oˆ piˇ ve yoˬ. 11 Yeˍsuˆ k'aw‸ k'oˆ ve, Mvuhˇ naw ma lo nawˬ hta‸ kanˇ paˆ maˇ piˇ ve hk'e k'o, nawˬ ngaˬ awˬ hk'oˆ te‸ chiˉ kanˇ paˆ maˇ cawˬ. Chi hta‸ pa taw, nawˬ ve la‸ hk'aw lo ngaˬ hta‸ chiˇ a‸ laˇ ve chaw teˇ g'aˇ lehˬ, leuˉ leh venˇ baˆ uiˍ ve yoˬ teh‸, yawˇ hta‸ k'oˆ piˇ ve yoˬ. 12 Chi hk'e k'oˆ ve teˇ yanˇ, jawˇ mawˇ Piˉla‸ lehˬ Yeˍsuˆ hta‸ hpehˇ piˇ tuˬ ya‸ k'aw ca ve yoˬ. Ya‸ hk'aˇ Yuˇda‸ chaw teˇ hpaˍ kuˬ leh k'oˆ ve, Nawˬ chaw chi hpaˇ hta‸ hpehˇ piˇ ve k'oˆ, nawˬ jawˇ mawˇ Kehˉsaˍ ve awˬ chawˇ hpeh‸ ve maˇ heˆ. A shu yawˇ hk'aˇ yawˇ hkunˉ hawˉ hkanˇ te ve chaw teˇ g'aˇ le le lehˬ, jawˇ mawˇ Kehˉsaˍ ve canˇ paˍ hpeh‸ ve yoˬ teh‸ k'oˆ ve yoˬ. 13 Tawˇ oˇ ve hta‸ jawˇ mawˇ Piˉla‸ g'a kaˇ htaˇ, yawˇ Yeˍsuˆ hta‸ shiˍ tawˆ-e leh, suhˉ jehˬ ve k'aw jaw hk'oˆ lo ca mui ve yoˬ. Chehˇ kuiˬ oˇ ve lehˬ, Heˍbrehˇ hkawˇ Gaˍbaˍtaˆ teh‸ k'oˆ ve, haˉ pui hk'awˇ taˍ ve chehˇ kuiˬ teˇ kaˬ hpeh‸ ve yoˬ. 14 Awˬ nyi oˇ ve lehˬ, Paˍsaˍhkaˍ pawehˇ te tuˬ awˬ pon gu ve awˬ nyi hpeh‸ leh, awˬ yanˇ lehˬ mvuhˇ law‸ k'aw tcuhˆ hk'e teˇ yanˇ hpeh‸ ve yoˬ. Jawˇ mawˇ Piˉla‸ lehˬ, Yuˇda‸ chaw hui hta‸ k'oˆ piˇ ve, Nawˬ hui ve Hkunˉ hawˉ hkanˇ hta‸ nyi loˬ. 15 Yawˇ hui k'oˆ ve, Yawˇ hta‸ tiˇ pehˍ loˬ, tiˇ pehˍ loˬ. La‸ ka hk'oˆ lo hta‸ pehˍ loˬ teh‸, g'aˇ hte‸ kuˬ ve yoˬ. Jawˇ mawˇ Piˉla‸ k'oˆ ve, Nawˬ hui ve Hkunˉ hawˉ hkanˇ hta‸ la‸ ka hk'oˆ lo ngaˬ g'a hta‸ pehˍ tuˬ ve laˇ teh‸ yawˇ hui hta‸ na nyi htaˇ, Kehˉsaˍ maˇ heˆ k'o, ngaˬ hui hkunˉ hawˉ hkanˇ maˇ cawˬ teh‸, paw hkuˇ lonˉ teˇ hpaˍ k'aw‸ k'oˆ piˇ ve yoˬ. 16 Oˇ htaˇ, Yeˍsuˆ hta‸ la‸ ka hk'oˆ lo hta‸ pehˍ tuˬ, jawˇ mawˇ Piˉla‸ lehˬ yawˇ hui ve la‸ sheh awˬ hk'aw lo chiˇ a‸ piˇ ve yoˬ. 17 Hk'e te leh, yawˇ hui Yeˍsuˆ hta‸ yuˬ leh yawˇ hta‸ sheh tawˆ-e ve yoˬ. Yawˇ lehˬ yawˇ ve la‸ ka hta‸ taˆ leh, oˉ koˆ teh‸ k'oˆ ve chehˇ kuiˬ lo k'ai ve yoˬ. Chehˇ kuiˬ oˇ ve lehˬ Heˍbrehˇ hkawˇ k'o, Gawˇlaˍgawˇtaˆ meh ve yoˬ. 18 Oˇ kaˬ lo yawˇ hui yawˇ hta‸ la‸ ka hk'oˆ lo hta‸ keu taˍ ve yoˬ. Yawˇ geh teˇ geh awˬ kaˍ awˬ nu chaw nyiˇ g'aˇ hta‸ htawˇ, teˇ hpawˇ lo teˇ g'aˇ la‸ ka hk'oˆ lo hta‸ keu taˍ leh, Yeˍsuˆ hta‸ awˬ k'aw ji lo hta‸ keu piˇ taˍ ve yoˬ. 19 Jawˇ mawˇ Piˉla‸ lehˬ, li‸ bvuh‸ leh, la‸ ka hk'oˆ lo nehˉ taˍ ve yoˬ. Li‸ oˇ ve lehˬ, Yuˇda‸ chaw hui ve Hkunˉ hawˉ hkanˇ Naˍzaˍrehˆ chaw Yeˍsuˆ yoˬ teh‸ bvuh‸ taˍ ve yoˬ. 20 Yeˍsuˆ hta‸ la‸ ka hk'oˆ lo hta‸ pehˍ ve teˇ kaˬ lehˬ, venˇ hta‸ neˇ ve pa taw, Yuˇda‸ chaw laiˉ g'aˇ li‸ oˇ ve hta‸ g'aw ve yoˬ. Li‸ oˇ ve lehˬ, Heˍbrehˇ li‸, Roˉma‸ li‸ leh Heˍlaˍsaˆ li‸ bvuh‸ taˍ ve yoˬ. 21 Hk'e te leh, Yuˇda‸ chaw hui ve paw hkuˇ lonˉ teˇ hpaˍ lehˬ, jawˇ mawˇ Piˉla‸ hta‸ k'oˆ piˇ ve, Yuˇda‸ chaw hui ve Hkunˉ hawˉ hkanˇ yoˬ teh‸ taˇ bvuh‸. Ngaˬ lehˬ Yuˇda‸ chaw hui ve Hkunˉ hawˉ hkanˇ yoˬ teh‸ chi hpaˇ yawˇ k'oˆ ve yoˬ teh‸ bvuh‸-o‸. 22 Jawˇ mawˇ Piˉla‸ lehˬ, Ngaˬ bvuh‸ taˍ ve hta‸ ngaˬ maˇ k'aw‸ gu bvuh‸-o teh‸ k'aw‸ k'oˆ piˇ ve yoˬ. 23 Ma‸ yaˇ teˇ hpaˍ lehˬ, Yeˍsuˆ hta‸ la‸ ka hk'oˆ lo hta‸ keu taˍ peuˬ hk'aw‸ nawˉ, yawˇ ve veu‸ k'aˇ hta‸ yuˬ leh awˬ pun pehˬ leh, teˇ g'aˇ teˇ pun yuˬ ve yoˬ. Awˬ hk'aw ve aˉ po‸ zuhˬ ma hta‸ htawˇ yawˇ hui yuˬ ve yoˬ. Aˉ po‸ oˇ ve lehˬ, awˬ hk'awˇ ma maˇ cawˬ. Hpaw k'awˍ hta‸ tanˬ leh hpaw mehˍ hk'a gaˬ te chiˇ taˍ ve aˉ po‸ hpeh‸ ve yoˬ. 24 Hk'e te leh yawˇ hui k'oˆ ve, Aˉ po‸ chi hta‸ ngaˬ hui maˇ tzuh‸ hkoˇ leh, a shu g'a cawˇ ve hta‸ shiˍ tuˬ kuˇ da‸ yuˬ-a veuˬ teh‸, teˇ g'aˇ leh teˇ g'aˇ k'oˆ da‸ ve yoˬ. Yawˇ hui chi hk'e te ve lehˬ, Ngaˬ ve veu‸ k'aˇ hta‸ yawˇ hui pehˬ yuˬ leh, ngaˬ ve aˉ po‸ hta‸ htawˇ yawˇ hui kuˇ da‸ yuˬ ve yoˬ, teh‸ Li‸ hpu hk'aw bvuh‸ taˍ ve tawˇ hkawˇ biˇ la tuˬ awˬ pon hpeh‸ ve yoˬ. 25 Yeˍsuˆ ve la‸ ka paˇ lo yawˇ ve awˬ e, awˬ e ve awˬ nyi ma, Kaˍlawˉhpaˆ ve awˬ miˇ ma Maˍriˆ leh, Maˍriˆ Maˍgaˍdaˍlaˆ hui huˉ chehˇ taˍ ve yoˬ. 26 Yeˍsuˆ lehˬ, yawˇ ve awˬ e leh yawˇ ha‸ ve awˬ la‸ g'awˇ yawˇ awˬ paˇ lo huˉ chehˇ ve hta‸ g'a mawˬ htaˇ, yawˇ ve awˬ e hta‸ yawˇ k'oˆ piˇ ve, Yaˇ miˇ-oˬ, nawˬ ve yaˇ paˍ hta‸ nyi-o teh‸ k'oˆ ve yoˬ. 27 Awˬ la‸ g'awˇ oˇ ve teˇ g'aˇ hta‸ htawˇ, Nawˬ ve awˬ e hta‸ nyi-o teh‸ k'oˆ piˇ ve yoˬ. Oˇ ve teˇ yanˇ hta‸ tanˬ leh, awˬ la‸ g'awˇ oˇ ve teˇ g'aˇ lehˬ, yawˇ ve aˉ hk'aw lo Yeˍsuˆ ve awˬ e hta‸ shiˍ teh taˍ ve yoˬ. 28 Oˇ ve awˬ hk'aw‸ nawˉ, kanˉ hk'a peu-eˬ te peuˬ ve hta‸ Yeˍsuˆ shiˍ leh, Ngaˍ iˉ kaˆ shiˉ ve yoˬ teh‸ yawˇ k'oˆ ve yoˬ. Yawˇ oˇ hk'e k'oˆ ve lehˬ, Li‸ hpu tawˇ hkawˇ k'oˆ taˍ ve hk'e biˇ la ve yoˬ. 29 Oˇ kaˬ lo ci ve awˬ g'uiˬ hk'a biˇ cawˬ ve mu‸ hk'u teˇ shiˍ cawˬ ve yoˬ. Yawˇ hui lehˬ, laˇ tsuhˇ g'uiˬ mvuhˬ teˇ maˬ hta‸ yuˬ leh ci ve awˬ g'uiˬ awˬ hk'aw lo tuˍ peuˬ hk'aw‸ nawˉ, lo taˬ hta‸ choˆ leh yawˇ ve maw‸ k'aw hta‸ chiˇ daw‸ piˇ ve yoˬ. 30 Yeˍsuˆ lehˬ, ci ve awˬ g'uiˬ hta‸ chaw‸ dawˬ peuˬ hk'aw‸ nawˉ, Kanˉ te peuˬ teh‸ k'oˆ leh, oˉ k'oˍ k'aw‸ lehˍ te sheˬ leh shaˉ cheˆ ve yoˬ. 31 Oˇ ve teˇ nyi lehˬ, pawehˇ awˬ pon gu ve awˬ nyi hpeh‸ leh, awˬ hk'aw‸ nawˉ teˇ nyi k'o, uiˍ jaˇ ve shinˉ nyi hpeh‸ ve pa taw, shinˉ nyi teˇ nyi awˬ hk'aw lo la‸ ka hk'oˆ lo suh taˍ ve awˬ to teˇ hpaˍ maˇ g'a teh taˉ tuˬ, Yuˇda‸ chaw hui lehˬ jawˇ mawˇ Piˉla‸ geh k'ai leh, chaw oˇ ve teˇ hpaˍ ve hkui sheh hta‸ dawˆ hteh leh, suh taˍ ve awˬ to oˇ ve teˇ hpaˍ hta‸ yuˬ baˬ tuˬ, yawˇ hta‸ lawˬ ve yoˬ. 32 Hk'e te leh, ma‸ yaˇ teˇ hpaˍ laˬ leh, Yeˍsuˆ geh teˇ geh la‸ ka hk'oˆ lo hta‸ keu taˍ ve chaw nyiˇ g'aˇ ve hkui sheh hta‸ dawˆ hteh ve yoˬ. 33 Ya‸ hk'aˇ, Yeˍsuˆ geh gaˬ la htaˇ, yawˇ suh peuˬ ve hta‸ g'a mawˬ ve pa taw, yawˇ ve hkui sheh hta‸ yawˇ hui maˇ dawˆ hteh. 34 Ma‸ yaˇ teˇ g'aˇ yawˇ ve nyi kuˇ hpawˇ hta‸ gehˇ juˆ leh, awˬ suhˍ leh iˉ kaˆ teˇ cawˬ haˉ tawˆ la ve yoˬ. 35 Nawˬ hui htawˇ g'a yonˍ tuˬ, oˇ ve hta‸ g'a mawˬ ve teˇ g'aˇ shaˉ hkiˆ hkanˍ ve yoˬ. Yawˇ shaˉ hkiˆ hkanˍ ve lehˬ hteˇ ve cawˇ ve yoˬ. Yawˇ k'oˆ ve tawˇ hkawˇ lehˬ, hteˇ ve cawˇ ve yoˬ teh‸ yawˇ shiˍ ve yoˬ. 36 Oˇ hk'e hpeh‸ la ve lehˬ, Yawˇ ve awˬ mu‸ ku teˇ ma ka‸ maˇ g'a dawˆ hteh teh‸, Li‸ hpu hk'aw bvuh‸ taˍ ve tawˇ hkawˇ biˇ la tuˬ awˬ pon hpeh‸ la ve yoˬ. 37 Li‸ hpu awˬ hk'aw lo awˬ kaˍ awˬ nu teˇ kaˬ k'oˆ taˍ ve, Yawˇ hui juˆ pawnˍ taˍ ve teˇ g'aˇ hta‸ yawˇ hui nyi tuˬ yoˬ teh‸ k'oˆ taˍ ve yoˬ. 38 Oˇ ve awˬ hk'aw‸ nawˉ, Aˍriˆma‸htehˍ venˇ yaˇ Yoˇseh‸ lehˬ, Yeˍsuˆ ve awˬ to hta‸ g'a yuˬ k'ai tuˬ jawˇ mawˇ Piˉla‸ geh ca lawˬ leh, jawˇ mawˇ Piˉla‸ yawˇ hta‸ a hkaw-anˬ piˇ ve yoˬ. Hk'e te leh yawˇ laˬ leh, Yeˍsuˆ ve awˬ to hta‸ yuˬ k'ai ve yoˬ. Yoˇseh‸ oˇ ve teˇ g'aˇ lehˬ, Yeˍsuˆ ve awˬ la‸ g'awˇ hpeh‸ ve htawˇ, Yuˇda‸ chaw hui hta‸ kawˆ ve pa taw, awˬ la‸ g'awˇ hpeh‸ ve yoˬ teh‸ shu hta‸ maˇ shiˍ tcuh. 39 Ponˬ laˬ htaˇ Yeˍsuˆ geh lo tanˇ hkuinˇ htaˇ laˬ ve Niˆkawˇdeˍ teˇ g'aˇ htawˇ laˬ ve yoˬ. Yawˇ lehˬ, muˇraˍ leh aˬ cawˍ hkaw‸ da‸ taˍ ve, aˬ laˬ hk'e shehˆ chi cawehˬ yuˬ laˬ ve yoˬ. 40 Yawˇ huiˉ maˬ lehˬ, Yeˍsuˆ ve awˬ to hta‸ yuˬ leh, Yuˇda‸ chaw hui chaw tuˍ ve awˬ liˇ cawˬ ve hk'e, sha hawnˉ teˇ hpaˍ hta‸ keu leh, hpa hpu yuˬ htiˆ taˍ ve yoˬ. 41 Yawˇ hta‸ la‸ ka hk'oˆ hta‸ pehˍ kuiˬ lo, hko teˇ hko cawˬ ve yoˬ. Hko oˇ ve awˬ hk'aw lo chaw teˇ g'aˇ hta‸ ka‸ maˇ tuˍ jaw sheˍ ve tuˍ hpfuh awˬ suhˉ teˇ maˬ cawˬ ve yoˬ. 42 Oˇ ve teˇ nyi lehˬ, Yuˇda‸ chaw hui ve pawehˇ awˬ pon gu ve awˬ nyi hpeh‸ leh, tuˍ hpfuh oˇ ve htawˇ awˬ paˇ lo cawˬ ve pa taw, yawˇ huiˉ maˬ yawˇ hta‸ oˇ kaˬ lo ca tuˍ ve yoˬ.

Yoˇhanˬ 20

1 Suhˍ nyi awˬ hk'aw lo awˉ lawˉ teˇ nyi, mvuhˇ maˇ htiˇ sheˍ htaˇ, Maˍriˆ Maˍgaˍdaˍlaˆ lehˬ teˇ na‸ tuˍ hpfuh lo k'ai leh, tuˍ hpfuh awˬ hk'oˇ meuˇ lo tsuhˇ taˍ ve haˉ pui shiˍ hpfuhˆ baˬ taˍ ve hta‸ g'a mawˬ ve yoˬ. 2 Hk'e te leh Siˉmonˍ Peˍtruˆ leh Yeˍsuˆ ha‸ ve awˬ kaˍ awˬ nu awˬ la‸ g'awˇ teˇ g'aˇ geh lo yawˇ g'uiˇ laˬ leh k'oˆ ve, Tuˍ hpfuh awˬ hk'aw lo Jawˇ mawˇ Yeˍsuˆ hta‸ shu yuˬ k'ai leh, yawˇ hta‸ hk'aˬ lo ca teh taˍ leh naˍ ngaˬ hui maˇ shiˍ teh‸, yawˇ huiˉ maˬ hta‸ k'oˆ piˇ ve yoˬ. 3 Hk'e te leh, Peˍtruˆ leh awˬ kaˍ awˬ nu awˬ la‸ g'awˇ oˇ ve teˇ g'aˇ tawˆ k'ai leh tuˍ hpfuh lo k'ai ve yoˬ. 4 Yawˇ huiˉ maˬ teˇ geh g'uiˇ k'ai ve teˇ yanˇ, awˬ la‸ g'awˇ oˇ ve teˇ g'aˇ lehˬ Peˍtruˆ a‸ kehˉ g'uiˇ gehˬ leh, tuˍ hpfuh lo yawˇ awˉ lawˉ gaˬ ve yoˬ. 5 Tuˍ hpfuh awˬ hk'aw lo yawˇ k'aw‸ k'ehˉ nyi htaˇ, hpa hpu oˇ kaˬ lo teh taˍ ve hta‸ g'a mawˬ ve yoˬ, Ya‸ hk'aˇ tuˍ hpfuh awˬ hk'aw lo yawˇ maˇ lo‸-e. 6 Yawˇ awˬ hk'aˇ suh g'uiˇ laˬ chehˇ ve Siˉmonˍ Peˍtruˆ gaˬ la leh, tuˍ hpfuh awˬ hk'aw lo lo‸-e ve yoˬ. Lo‸-e ve teˇ yanˇ, hpa hpu teh taˍ laˇ ve hta‸ maˇ k'oˆ, 7 Oˉ k'oˍ hta‸ beh ve hpaˉ ce‸ hta‸ maˇ k'oˆ, yawˇ g'a mawˬ ve yoˬ. Hpaˉ ce‸ oˇ ve hpa hpu geh teˇ geh maˇ teh taˍ leh, awˬ kaˍ awˬ nu teˇ kaˬ lo lo‸ teh taˍ ve yoˬ. 8 Oˇ htaˇ, tuˍ hpfuh lo awˉ lawˉ gaˬ ve, awˬ kaˍ awˬ nu awˬ la‸ g'awˇ oˇ ve teˇ g'aˇ htawˇ lo‸-e leh g'a mawˬ ve pa taw yonˍ ve yoˬ. 9 Yeˍsuˆ suh kuiˬ lo g'a k'aw‸ te‸ tu la tuˬ yoˬ teh‸ Li‸ hpu hk'aw k'oˆ taˍ ve hta‸ yawˇ huiˉ maˬ maˇ shiˍ sheˍ. 10 Oˇ htaˇ, awˬ la‸ g'awˇ oˇ ve nyiˇ g'aˇ lehˬ, aˉ hk'aw lo k'aw‸ k'o‸-e ve yoˬ. 11 Maˍriˆ lehˬ, tuˍ hpfuh awˬ paˇ lo huˉ taˍ leh hawˬ chehˇ ve yoˬ. Yawˇ hawˬ chehˇ htaˇ, tuˍ hpfuh k'aw lo k'aw‸ k'ehˉ nyi leh, 12 hpuˉ-ehˍ ve veu‸ k'aˇ veu‸ deh taˍ ve mvuhˇ naw ma tcuh yaˇ nyiˇ g'aˇ hta‸ g'a mawˬ ve yoˬ. Yawˇ huiˉ maˬ lehˬ, Yeˍsuˆ ve awˬ to teh taˍ kuiˬ oˉ k'oˍ hpawˇ teˇ g'aˇ, hkui sheh hpawˇ teˇ g'aˇ mui taˍ ve yoˬ. 13 Yawˇ huiˉ maˬ lehˬ, Yaˇ miˇ-oˬ, aˬ hto‸ ma te hawˬ chehˇ ve le teh‸, yawˇ hta‸ na nyi htaˇ yawˇ k'aw‸ k'oˆ ve, Ngaˬ ve Awˬ jawˇ mawˇ hta‸ shu yuˬ k'ai leh, hk'aˬ lo ca teh taˍ leh naˍ ngaˬ maˇ shiˍ ve pa taw hawˬ chehˇ ve yoˬ teh‸, yawˇ huiˉ maˬ hta‸ k'aw‸ k'oˆ piˇ ve yoˬ. 14 Yawˇ oˇ hk'e k'oˆ peuˬ leh awˬ hk'aw‸ nawˉ hpawˇ hpfuhˆ nyi ve teˇ yanˇ, Yeˍsuˆ huˉ chehˇ ve hta‸ g'a mawˬ ve yoˬ. Ya‸ hk'aˇ, Yeˍsuˆ yoˬ teh‸ yawˇ maˇ shiˍ. 15 Yeˍsuˆ k'oˆ ve, Yaˇ miˇ-oˬ, aˬ hto‸ ma te hawˬ chehˇ ve le. Nawˬ a shu hta‸ ca ve le teh‸ yawˇ hta‸ na nyi ve yoˬ. Maˍriˆ lehˬ, yawˇ hta‸ hko ha‸ shaˉ shehˍ hpaˇ hpeh‸ ve hehˉ teh‸ dawˇ leh k'oˆ ve, Saˍ la‸-oˬ, nawˬ yawˇ hta‸ yuˬ k'ai ve k'o, hk'aˬ lo teh taˍ ve ngaˬ hta‸ a ciˉ hto laˇ-oˆ. Ngaˬ yawˇ hta‸ ca yuˬ tuˬ yoˬ teh‸ yawˇ hta‸ k'oˆ piˇ ve yoˬ. 16 Yeˍsuˆ lehˬ, Maˍriˆ-oˬ teh‸ yawˇ hta‸ k'oˆ piˇ ve yoˬ. Maˍriˆ hpfuhˆ nyi leh, Raˍbuˇniˆ-oˬ teh‸, Heˍbrehˇ hkawˇ yaw leh k'oˆ piˇ ve yoˬ. (Raˍbuˇniˆ teh‸ k'oˆ ve lehˬ saˍ la‸ teh‸ k'oˆ ve yoˬ.) 17 Yeˍsuˆ k'oˆ ve, Ngaˬ hta‸ taˇ vawˆ taˍ. Awˬ lawn k'o, Awˬ pa geh ngaˬ maˇ g'a taˆ-e sheˍ. Ngaˬ ve awˬ viˉ awˬ nyi hui geh k'ai leh chi hk'e k'oˆ piˇ-oˆ. Ngaˬ ve Awˬ pa leh nawˬ hui ve Awˬ pa, ngaˬ ve G'uiˬ sha leh nawˬ hui ve G'uiˬ sha geh lo ngaˬ taˆ-e tuˬ yoˬ teh‸ Maˍriˆ hta‸ k'oˆ piˇ ve yoˬ. 18 Maˍriˆ Maˍgaˍdaˍlaˆ k'ai leh, Ngaˬ Jawˇ mawˇ Yeˍsuˆ hta‸ g'a mawˬ peuˬ teh‸, awˬ la‸ g'awˇ hui hta‸ k'oˆ piˇ ve yoˬ. Peuˬ leh, Yeˍsuˆ yawˇ hta‸ k'oˆ laˇ ve awˬ lawn teˇ hpaˍ htawˇ, yawˇ yawˇ hui hta‸ hto piˇ ve yoˬ. 19 Suhˍ nyi awˬ hk'aw lo awˉ lawˉ teˇ nyi Yeˍsuˆ k'aw‸ te‸ tu la ve teˇ nyi mvuhˇ hpeu‸ htaˇ, awˬ la‸ g'awˇ teˇ hpaˍ hpawnˬ da‸ chehˇ ve yoˬ. Yawˇ hui lehˬ, Yuˇda‸ chaw hui hta‸ kawˆ ve pa taw yehˬ miˉ teˇ hpaˍ hta‸ hoˆ taˍ ve yoˬ. Oˇ htaˇ Yeˍsuˆ laˬ leh yawˇ hui awˬ k'aw ji huˉ taˍ leh, Nawˬ hui geh dawˇ sha tuˬ cawˬ piˇ-oˆ teh‸, yawˇ hui hta‸ k'oˆ piˇ ve yoˬ. 20 Yawˇ chi hk'e k'oˆ peuˬ hk'aw‸ nawˉ, yawˇ ve la‸ sheh leh yawˇ ve nyi kuˇ hpawˇ yawˇ hui hta‸ maw piˇ ve yoˬ. Hk'e te leh, awˬ la‸ g'awˇ teˇ hpaˍ lehˬ, Jawˇ mawˇ Yeˍsuˆ hta‸ g'a mawˬ ve teˇ yanˇ, ha lehˬ jaˇ ve yoˬ. 21 Yeˍsuˆ teˇ pawˆ k'aw‸ k'oˆ ve, Nawˬ hui geh dawˇ sha tuˬ cawˬ piˇ-oˆ. Awˬ pa ngaˬ hta‸ peu laˇ ve hk'e, ngaˬ htawˇ nawˬ hui hta‸ peu k'ai ve yoˬ teh‸, yawˇ hui hta‸ k'oˆ piˇ ve yoˬ. 22 Yawˇ chi hk'e k'oˆ peuˬ hk'aw‸ nawˉ, yawˇ hui awˬ hk'oˆ hta‸ meuˆ peu leh k'oˆ ve, Da‸ ve kehˬ ve Awˬ ha hpu hta‸ ha‸ yuˬ-o‸. 23 A shu teˇ g'aˇ ve venˇ baˆ hta‸ maˇ k'oˆ, nawˬ hui hpehˇ hk'a ve k'o venˇ baˆ hpehˇ hk'a ve hta‸ yawˇ g'a tuˬ yoˬ. A shu teˇ g'aˇ ve venˇ baˆ hta‸ maˇ k'oˆ, nawˬ hui maˇ hpehˇ piˇ ve k'o, yawˇ venˇ baˆ cawˬ taˍ tuˬ yoˬ teh‸ yawˇ hui hta‸ k'oˆ piˇ ve yoˬ. 24 Yeˍsuˆ yawˇ hui geh laˬ ve teˇ yanˇ, awˬ la‸ g'awˇ teˇ chi nyiˇ g'aˇ awˬ hk'aw lo Yaˇ cehˬ k'a teh‸ k'oˆ ve Htoˉma‸ teˇ g'aˇ lehˬ, yawˇ hui geh maˇ chehˇ ve yoˬ. 25 Hk'e te leh, awˬ kaˍ awˬ nu awˬ la‸ g'awˇ teˇ hpaˍ lehˬ, Jawˇ mawˇ Yeˍsuˆ hta‸ ngaˬ hui g'a mawˬ peuˬ teh‸, yawˇ hta‸ k'oˆ piˇ ve yoˬ. Htoˉma‸ k'aw‸ k'oˆ ve, Yawˇ ve la‸ sheh awˬ hk'aw lo sho cuˇ hta‸ keu ve awˬ haiˇ hta‸ ngaˬ maˇ g'a mawˬ leh, awˬ haiˇ oˇ ve hta‸ ngaˬ ve la‸ naw maˇ g'a htawˇ nyi ve awˬ hk'oˆ, yawˇ ve nyi kuˇ hpawˇ ngaˬ ve la‸ sheh maˇ g'a juˆ keu nyi ve k'o, ngaˬ maˇ yonˍ teh‸, yawˇ hui hta‸ k'oˆ piˇ ve yoˬ. 26 Awˬ hk'aw‸ nawˉ hiˉ nyi gaˬ htaˇ, Yeˍsuˆ ve awˬ la‸ g'awˇ teˇ hpaˍ yehˬ awˬ hk'aw lo teˇ pawˆ k'aw‸ chehˇ taˍ leh, Htoˉma‸ htawˇ yawˇ hui geh teˇ geh chehˇ taˍ ve yoˬ. Yehˬ miˉ teˇ hpaˍ hoˆ taˍ ve htawˇ, Yeˍsuˆ laˬ leh yawˇ hui awˬ k'aw ji huˉ taˍ leh, Nawˬ hui geh dawˇ sha tuˬ cawˬ piˇ-oˆ teh‸ k'oˆ piˇ ve yoˬ. 27 Oˇ htaˇ yawˇ Htoˉma‸ hta‸ k'oˆ piˇ ve, Nawˬ ve la‸ naw choˬ kaˬ lo htawˇ nyi leh, ngaˬ ve la‸ taw k'aw hta‸ nyi-o. Nawˬ ve la‸ sheh che leh, ngaˬ ve nyi kuˇ hpawˇ hta‸ juˇ keu nyi-o. Maˇ yonˍ ve taˇ cawˬ piˇ. Yonˍ ve teˇ ceuˬ cawˬ piˇ-oˆ teh‸ k'oˆ piˇ ve yoˬ. 28 Htoˉma‸ k'aw‸ k'oˆ ve, Nawˬ lehˬ ngaˬ ve Jawˇ mawˇ, ngaˬ ve G'uiˬ sha hpeh‸ ve yoˬ teh‸ yawˇ hta‸ k'oˆ piˇ ve yoˬ. 29 Yeˍsuˆ k'aw‸ k'oˆ ve, Nawˬ lehˬ ngaˬ hta‸ mawˬ ve pa taw yonˍ ve law leˇ. Ngaˬ hta‸ maˇ mawˬ htawˇ yonˍ ve chaw hui lehˬ, awˬ bon uiˍ ve yoˬ teh‸ yawˇ hta‸ k'oˆ piˇ ve yoˬ. 30 Yeˍsuˆ lehˬ awˬ la‸ g'awˇ teˇ hpaˍ mehˆ g'uˇ suhˍ te maˍ piˇ ve awˬ kaˍ awˬ nu awˬ heˆ teˇ hpaˍ li‸ chi awˬ hk'aw lo maˇ bvuh‸ keu taˍ ve maˇ maˇ cawˬ sheˍ ve yoˬ. 31 Yeˍsuˆ lehˬ, G'uiˬ sha ve Yaˇ hpu Hkri‸ hpeh‸ ve yoˬ teh‸ nawˬ hui yonˍ tuˬ leh, yawˇ hta‸ yonˍ ve pa taw yawˇ ve awˬ meh awˬ hk'aw lo nawˬ hui co ha g'a te‸ tuˬ, awˬ lawn chi teˇ hpaˍ chi ma bvuh‸ taˍ ve yoˬ

Yoˇhanˬ 21

1 Oˇ ve awˬ hk'aw‸ nawˉ Yeˍsuˆ lehˬ, Tiˍbeˍriˆ g'uiˬ po awˬ paˇ lo awˬ la‸ g'awˇ teˇ hpaˍ hta‸ yawˇ ve awˬ to teˇ pawˆ k'aw‸ maw piˇ ve yoˬ. Yawˇ ve awˬ to maw piˇ ve lehˬ chi hk'e yoˬ. 2 Siˉmonˍ Peˍtruˆ, Yaˇ cehˬ k'a teh‸ k'oˆ ve Htoˉma‸, Gaˍliˍlehˇ mvuhˇ miˬ Kaˍnaˆ hk'aˆ yaˇ Naˍtaˍneˍlaˆ, Zeˍbeˍdehˇ ve yaˇ paˍ nyiˇ g'aˇ leh, Yeˍsuˆ ve awˬ la‸ g'awˇ awˬ kaˍ awˬ nu nyiˇ g'aˇ yawˇ hui geh teˇ geh chehˇ taˍ ve yoˬ. 3 Siˉmonˍ Peˍtruˆ lehˬ, Ngaˬ ngaˇ ca-e shaˍ teh‸, yawˇ hui hta‸ k'oˆ piˇ ve yoˬ. Yawˇ hui k'aw‸ k'oˆ ve, Ngaˬ hui ka‸ k'ai-a teh‸ yawˇ hta‸ k'oˆ piˇ ve yoˬ. Yawˇ hui k'ai leh, haw lo‸ k'oˍ hk'aw lo‸-e ve yoˬ. Oˇ ve teˇ haˉ yawˇ hui ngaˇ ca ve, teˇ hkeh ka‸ maˇ g'a. 4 Mvuhˇ htiˇ la ve teˇ yanˇ, Yeˍsuˆ lehˬ g'uiˬ pfuhˍ paˇ lo huˉ taˍ ve yoˬ. Ya‸ hk'aˇ, Yeˍsuˆ yoˬ teh‸ awˬ la‸ g'awˇ teˇ hpaˍ maˇ shiˍ. 5 Yeˍsuˆ k'oˆ ve, Yaˇ teˇ hpaˍ-oˬ, ngaˇ g'a-aw laˇ teh‸ yawˇ hui hta‸ na nyi htaˇ, Maˇ g'a teh‸ yawˇ hui yawˇ hta‸ k'aw‸ k'oˆ piˇ ve yoˬ. 6 Oˇ htaˇ Yeˍsuˆ k'oˆ ve, Haw lo‸ k'oˍ la‸ sha paˉ lo geu‸ hpehˇ-oˆ. Oˇ hk'e te ve k'o, g'a tuˍ yoˬ teh‸ yawˇ hui hta‸ k'oˆ piˇ ve yoˬ. Hk'e te leh yawˇ hui geu‸ hpehˇ leh, ngaˇ maˇ maˇ g'a ve pa taw, geu‸ hta‸ g'awˬ maˇ g'aˇ. 7 Oˇ htaˇ, Yeˍsuˆ ha‸ ve awˬ la‸ g'awˇ teˇ g'aˇ lehˬ, Peˍtruˆ hta‸ k'oˆ piˇ ve, Jawˇ mawˇ Yeˍsuˆ yoˬ. Jawˇ mawˇ Yeˍsuˆ yoˬ teh‸ Siˉmonˍ Peˍtruˆ g'a kaˇ htaˇ, yawˇ veu‸ k'aˇ maˇ veu‸ taˍ ve pa taw, aˉ po‸ zuhˬ ma hta‸ deh sheˬ leh, g'uiˬ po hk'aw lo pawˆ lo‸-e ve yoˬ. 8 Awˬ kaˍ awˬ nu awˬ la‸ g'awˇ teˇ hpaˍ lehˬ, g'uiˬ pfuhˍ hta‸ maˇ vuiˇ, ngaˇ chi loˬ hk'e ceh tiˉ vuiˇ ve pa taw, ngaˇ hk'a biˇ geh taˍ ve geu‸ hta‸ g'awˬ leh, haw lo‸ k'oˍ ciˇ laˬ ve yoˬ. 9 Yawˇ hui pehˬ shaˉ lo gaˬ htaˇ, shiˉ g'eu‸ aˬ miˍ ceh taˍ ve hta‸ g'a mawˬ leh, ngaˇ pinˍ taˍ ve hta‸ maˇ k'oˆ, hkaoˍ monˇ teh taˍ ve hta‸ maˇ k'oˆ, g'a mawˬ ve yoˬ. 10 Yeˍsuˆ k'oˆ ve, Chi beu‸ nawˬ hui g'a taˍ ve ngaˇ teˇ hpaˍ hpaˍ hta‸ yuˬ veu laˇ-oˆ teh‸ yawˇ hui hta‸ k'oˆ piˇ ve yoˬ. 11 Hk'e te leh, Siˉmonˍ Peˍtruˆ lehˬ, haw lo‸ k'oˍ hk'aw lo‸-e leh, ngaˇ hk'a biˇ cawˬ ve geu‸ oˇ ve hta‸ pehˬ shaˉ lo g'awˬ veu laˇ ve yoˬ. Geu‸ oˇ ve awˬ hk'aw lo uiˍ ve ngaˇ 153 hkeh cawˬ ve yoˬ. Ngaˇ chi taw taw g'a maˇ ve htawˇ, geu‸ maˇ tzuh‸. 12 Oˇ htaˇ Yeˍsuˆ k'oˆ ve, Awˍ caˇ la-o teh‸, yawˇ hui hta‸ k'oˆ piˇ ve yoˬ. Yawˇ lehˬ Jawˇ mawˇ Yeˍsuˆ hpeh‸ ve yoˬ teh‸, awˬ la‸ g'awˇ hui shiˍ ve pa taw, Nawˬ a shu le teh‸, teˇ g'aˇ ka‸ yawˇ hta‸ na nyi maˇ haˆ. 13 Yeˍsuˆ laˬ leh hkaoˍ monˇ hta‸ yuˬ leh awˬ la‸ g'awˇ teˇ hpaˍ hta‸ pehˬ piˇ ve yoˬ. Ngaˇ shaˍ hta‸ htawˇ oˇ hk'e te pehˬ piˇ ve yoˬ. 14 Yeˍsuˆ yawˇ suh kuiˬ lo k'aw‸ te‸ tu la peuˬ hk'aw‸ nawˉ, yawˇ ve awˬ to awˬ la‸ g'awˇ hui hta‸ maw piˇ ve lehˬ, chi teˇ pawˆ shehˆ pawˆ teˇ pawˆ hpeh‸ ve yoˬ. 15 Yawˇ hui awˍ caˇ peuˬ hk'aw‸ nawˉ, Yeˍsuˆ lehˬ Siˉmonˍ Peˍtruˆ hta‸ k'oˆ piˇ ve, Yoˇhanˬ ve yaˇ Siˉmonˍ-oˬ, chaw chi teˇ hpaˍ ha‸ ve a‸ kehˉ nawˬ ngaˬ hta‸ ha‸-aw laˇ teh‸ na nyi ve teˇ yanˇ, Ha‸ ve yoˬ, Jawˇ mawˇ-oˬ, ngaˬ nawˬ hta‸ ha‸ ve nawˬ shiˍ ve yoˬ teh‸ k'aw‸ k'oˆ piˇ ve yoˬ. Yeˍsuˆ k'aw‸ k'oˆ ve, Ngaˬ ve yawˬ ehˉ teˇ hpaˍ hta‸ caˍ piˇ taw piˇ-oˆ teh‸ yawˇ hta‸ k'oˆ piˇ ve yoˬ. 16 Yeˍsuˆ yawˇ hta‸ teˇ pawˆ k'aw‸ k'oˆ ve, Yoˇhanˬ ve yaˇ Siˉmonˍ-oˬ, nawˬ ngaˬ hta‸ ha‸-aw laˇ teh‸ k'aw‸ na nyi ve teˇ yanˇ, Ha‸ ve yoˬ, Jawˇ mawˇ-oˬ, ngaˬ nawˬ hta‸ ha‸ ve nawˬ shiˍ ve yoˬ teh‸ k'aw‸ k'oˆ piˇ ve yoˬ. Yeˍsuˆ k'aw‸ k'oˆ ve, Ngaˬ ve yawˬ teˇ hpaˍ hta‸ ha‸ shaˉ-oˆ teh‸ yawˇ hta‸ k'oˆ piˇ ve yoˬ. 17 Yeˍsuˆ yawˇ hta‸ shehˆ pawˆ teˇ pawˆ k'aw‸ k'oˆ piˇ ve, Yoˇhanˬ ve yaˇ Siˉmonˍ-oˬ, nawˬ ngaˬ hta‸ ha‸-aw laˇ teh‸ na nyi ve yoˬ. Nawˬ ngaˬ hta‸ ha‸-aw laˇ teh‸ shehˆ pawˆ hk'a gaˬ Yeˍsuˆ yawˇ hta‸ na nyi ve pa taw Peˍtruˆ dawˇ haˍ leh k'oˆ ve, Jawˇ mawˇ-oˬ, nawˬ hk'a peu-eˬ hta‸ shiˍ ve yoˬ. Ngaˬ nawˬ hta‸ ha‸ ve nawˬ shiˍ ve yoˬ teh‸ k'aw‸ k'oˆ piˇ ve yoˬ. Yeˍsuˆ k'aw‸ k'oˆ ve, Ngaˬ ve yawˬ teˇ hpaˍ hta‸ caˍ piˇ taw piˇ-oˆ. 18 Ngaˬ nawˬ hta‸ awˬ tehˬ awˬ na k'oˆ laˇ ve, nawˬ yaˇ nehˬ hpeh‸ ve teˇ yanˇ nawˬ hk'aˇ nawˬ haˍ pi tsuh‸ leh, nawˬ k'ai gaˇ kuiˬ lo k'ai ve yoˬ. Ya‸ hk'aˇ, nawˬ mawˇ la ve teˇ yanˇ, nawˬ ve la‸ sheh nyiˇ paˉ che leh, shu nawˬ hta‸ haˍ pi tsuh‸ laˇ peuˬ hk'aw‸ nawˉ, nawˬ maˇ k'ai gaˇ kuiˬ teˇ kaˬ lo shu nawˬ hta‸ yuˬ k'ai tuˬ yoˬ teh‸ yawˇ hta‸ k'oˆ piˇ ve yoˬ. 19 (Yeˍsuˆ chi hk'e k'oˆ ve lehˬ, G'uiˬ sha ve awˬ me‸ awˬ hponˇ tawˆ la tuˬ ve awˬ pon Peˍtruˆ hk'aˬ hk'e g'a te suh tuˬ ve hta‸ k'oˆ gaˇ ve yoˬ.) Yeˍsuˆ tawˇ oˇ ve teˇ hpaˍ hta‸ k'oˆ peuˬ hk'aw‸ nawˉ, Ngaˬ hk'aˇ suh laˬ-o‸ teh‸ Peˍtruˆ hta‸ k'oˆ piˇ ve yoˬ. 20 Peˍtruˆ hpfuhˆ nyi ve teˇ yanˇ, Yeˍsuˆ ha‸ ve awˬ la‸ g'awˇ teˇ g'aˇ awˬ hk'aˇ suh laˬ chehˇ ve hta‸ g'a mawˬ ve yoˬ. Awˬ la‸ g'awˇ oˇ ve teˇ g'aˇ lehˬ, ponˬ laˬ ve teˇ pawˆ yawˇ hui mvuhˇ hpeu‸ awˍ caˇ chehˇ ve teˇ yanˇ, Yeˍsuˆ ve nyi ma pui awˬ paˇ lo ngeh mui taˍ leh, Jawˇ mawˇ-oˬ, nawˬ hta‸ chiˇ a‸ piˇ tuˬ ve a shu le teh‸ na nyi shehˍ hpaˇ teˇ g'aˇ yoˬ. 21 Peˍtruˆ lehˬ, awˬ la‸ g'awˇ oˇ ve hta‸ g'a mawˬ ve teˇ yanˇ, Jawˇ mawˇ-oˬ, chi hpaˇ hk'aˬ hk'e g'a hpeh‸ tuˬ ve le teh‸ Yeˍsuˆ hta‸ na nyi ve yoˬ. 22 Yeˍsuˆ k'aw‸ k'oˆ ve, Ngaˬ k'aw‸ laˬ htaˇ hk'a gaˬ ngaˬ yawˇ hta‸ chehˇ tcuh piˇ gaˇ ve k'o, nawˬ hta‸ hk'aˬ hk'e caˉ da‸ le. Nawˬ awˬ to ngaˬ hk'aˇ suh laˬ-o‸ teh‸, yawˇ hta‸ k'oˆ piˇ ve yoˬ. 23 Tawˇ hkawˇ oˇ ve hta‸ pa taw, awˬ la‸ g'awˇ oˇ ve teˇ g'aˇ maˇ g'a suh teh‸, awˬ viˉ awˬ nyi teˇ hpaˍ awˬ hk'aw lo bvuhˬ k'ai ve yoˬ. Ya‸ hk'aˇ, awˬ la‸ g'awˇ oˇ ve teˇ g'aˇ maˇ g'a suh teh‸ Yeˍsuˆ k'oˆ ve maˇ heˆ. Ngaˬ k'aw‸ laˬ htaˇ hk'a gaˬ ngaˬ yawˇ hta‸ chehˇ tcuh piˇ gaˇ ve k'o, nawˬ hta‸ hk'aˬ hk'e caˉ da‸ le teh‸ Yeˍsuˆ k'oˆ ve yoˬ. 24 Awˬ la‸ g'awˇ oˇ ve teˇ g'aˇ lehˬ, awˬ lawn chi teˇ hpaˍ hta‸ shaˉ hkiˆ hkanˍ leh bvuh‸ taˍ shehˍ hpaˇ hpeh‸ ve yoˬ. Yawˇ shaˉ hkiˆ hkanˍ ve lehˬ cawˇ ve yoˬ teh‸ ngaˬ hui shiˍ ve yoˬ. 25 Yeˍsuˆ te ve kanˉ awˬ kaˍ awˬ nu laiˉ ceuˬ cawˬ sheˍ ve yoˬ. Yawˇ hk'a te ve awˬ lawn teˇ ceuˬ le le hta‸ bvuh‸ taˍ ve hk'e k'o, bvuh‸ taˍ ve li‸ daw oˇ ve teˇ hpaˍ miˬ guiˬ chi ka‸ maˇ daw teh‸ ngaˬ dawˇ ve yoˬ.

Tcuh yaˇ 1

1 Htawˇhpiˇluˆ-oˬ, Yeˍsuˆ awˬ hkuiˉ puiˍ tanˬ te tanˬ maˍ ve hta‸ te leh, yawˇ mvuhˇ naw ma lo taˆ k'o‸-e ve teˇ nyi hk'a gaˬ ve awˬ lawn teˇ hpaˍ, li‸ awˉ lawˉ teˇ k'oˆ awˬ hk'aw lo ngaˬ nawˬ hta‸ bvuh‸ laˇ peuˬ. 2 Yawˇ maˇ taˆ k'o‸-e sheˍ htaˇ, da‸ ve kehˬ ve Awˬ ha hpu hta‸ cuˇ leh, yawˇ leuˆ yuˬ taˍ ve tcuh yaˇ teˇ hpaˍ hta‸ tawˇ piˇ taˉ ve yoˬ. 3 Yawˇ hkanˍ suh peuˬ hk'aw‸ nawˉ, awˇ chi nyi awˬ hk'aw lo tcuh yaˇ hui hta‸ yawˇ awˬ to maw piˇ leh, G'uiˬ sha ve mvuhˇ miˬ awˬ lawn k'aoˍ maˍ piˇ ve yoˬ. Yawˇ awˬ to te‸ chehˇ ve hta‸ yawˇ hui hk'a deh‸ yonˍ hpeh‸ tuˬ, yawˇ shaˉ hkiˆ laiˉ ceuˬ te maˍ piˇ ve yoˬ. 4 Teˇ pawˆ yawˇ hui hpawnˬ da‸ chehˇ htaˇ, yawˇ yawˇ hui hta‸ k'oˆ piˇ ve, Yeˍruˆsaˍlehnˍ venˇ awˬ hk'aw lo taˇ tawˆ k'ai sheˍ. Ngaˬ geh nawˬ hui g'a kaˇ taˍ peuˬ ve, Awˬ pa ve ka ti‸ tawˇ hkawˇ biˇ la htaˇ hk'a gaˬ law taˍ sheˍ. 5 Yoˇhanˬ lehˬ, iˉ kaˆ awˬ hk'aw lo baˆtiˆsaˬ piˇ ve yoˬ. Ya‸ hk'aˇ, nawˬ hui lehˬ maˇ maw maw k'o, da‸ ve kehˬ ve Awˬ ha hpu awˬ hk'aw lo baˆtiˆsaˬ g'a hkanˍ yuˬ tuˬ yoˬ teh‸, Yeˍsuˆ yawˇ hui hta‸ k'oˆ piˇ ve yoˬ. 6 Hk'e te leh yawˇ hui hpawnˬ da‸ chehˇ htaˇ yawˇ hui k'oˆ ve, Jawˇ mawˇ-oˬ, chi beu‸ nawˬ lehˬ Iˉsaˍreˍlaˆ chaw ceuˬ hta‸ mvuhˇ miˬ k'aw‸ hk'aw‸ piˇ tuˬ laˇ teh‸, yawˇ hta‸ na nyi ve yoˬ. 7 Yeˍsuˆ k'aw‸ k'oˆ piˇ ve, Awˬ pa yawˇ hk'aˇ yawˇ dawˇ cheˆ taˍ ve awˬ yanˇ teˇ hpaˍ hta‸ nawˬ hui shiˍ tuˬ maˇ loˍ. 8 Ya‸ hk'aˇ, da‸ ve kehˬ ve Awˬ ha hpu nawˬ hui awˬ hk'oˆ lo ya‸ la htaˇ, nawˬ hui kanˇ paˆ g'a tuˬ yoˬ. Oˇ htaˇ Yeˍruˆsaˍlehnˍ venˇ hta‸ tanˬ leh Yuˇda‸ mvuhˇ miˬ, Saˍmaˍriˆ mvuhˇ miˬ leh mvuhˇ leh miˬ leh hk'a gaˬ, nawˬ hui ngaˬ ve shaˉ hkiˆ hkanˍ shehˍ hpaˇ g'a hpeh‸ tuˬ yoˬ teh‸, Yeˍsuˆ yawˇ hui hta‸ k'oˆ piˇ ve yoˬ. 9 Yawˇ chi hk'e k'oˆ peuˬ hk'aw‸ nawˉ, tcuh yaˇ hui yawˇ hta‸ nyi chehˇ htaˇ, G'uiˬ sha yawˇ hta‸ chiˇ taˆ-e leh, yawˇ hui mawˬ leh htaˇ hk'a gaˬ, moˬ yawˇ hta‸ yuˬ taˆ-e ve yoˬ. 10 Yeˍsuˆ taˆ-e chehˇ ve hta‸ tcuh yaˇ hui chiˇ nyi chehˇ htaˇ, hpu ve veu‸ k'aˇ hta‸ veu‸ deh ve chaw nyiˇ g'aˇ teˇ cawˬ haˉ tawˆ la leh, yawˇ hui awˬ paˇ lo huˉ chehˇ ve yoˬ. 11 Yawˇ huiˉ maˬ k'oˆ ve, Gaˍliˍlehˇ chaw teˇ hpaˍ-oˬ, aˬ hto‸ ma te nawˬ hui mvuhˇ naw ma lo chiˇ nyi chehˇ ve le. Nawˬ hui hta‸ hpaˆ da‸ leh mvuhˇ naw ma lo chiˇ taˆ-e ve Yeˍsuˆ chi teˇ g'aˇ lehˬ, nawˬ hui mehˆ g'uˇ suhˍ mvuhˇ naw ma lo taˆ k'o‸-e ve hk'a shuˍ shuˍ, teˇ pawˆ k'aw‸ ya‸ la tuˬ yoˬ teh‸ k'oˆ piˇ ve yoˬ. 12 Oˇ htaˇ, tcuh yaˇ hui lehˬ Shaˍlonˍ meh ve hk'aw lo tu leh, Yeˍruˆsaˍlehnˍ venˇ lo k'aw‸ la ve yoˬ. Hk'aw oˇ ve lehˬ, Yeˍruˆsaˍlehnˍ venˇ hta‸ maˇ vuiˇ da‸, shinˉ nyi teˇ nyi toˇ hpeh‸ ve ya‸ k'aw hk'e fui tiˉ cawˬ ve yoˬ. 13 Yawˇ hui venˇ hk'aw k'aw‸ gaˬ la htaˇ, yehˬ awˬ hta‸ teˇ htai‸ yawˇ hui hpawnˬ da‸ jaw ve bawehˇ lo taˆ-e ve yoˬ. Yawˇ hui teˇ hpaˍ lehˬ, Peˍtruˆ, Yoˇhanˬ, Yaˍkoˆ, Anˍdrehˍ, Hpiˇliˇpuˆ, Htoˉma‸, Baˍhtawˇlaˍmehˇ, Ma‸htehˍ, Aˍlaˍhpehˇ ve awˬ yaˇ paˍ Yaˍkoˆ, Siˉmonˍ Seˍluˆ leh, Yaˍkoˆ ve awˬ yaˇ paˍ Yuˇda‸, chi teˇ hpaˍ yoˬ. 14 Yawˇ hui hk'a peu-eˬ leh yaˇ miˇ teˇ hpaˍ, Yeˍsuˆ ve awˬ e Maˍriˆ leh Yeˍsuˆ ve awˬ nyi paˍ teˇ hpaˍ geh teˇ geh nyi ma teˇ shiˍ tiˉ taˍ leh, hk'aˬ htaˆ ka‸ bon lawˬ chehˇ ve yoˬ. 15 Awˬ nyi awˬ haˉ oˇ ve teˇ hpaˍ awˬ hk'aw lo, awˬ viˉ awˬ nyi teˇ ha nyiˇ chi g'a hk'e hpawnˬ da‸ chehˇ htaˇ, Peˍtruˆ yawˇ hui awˬ k'aw ji lo tu huˉ leh k'oˆ ve, 16 Awˬ viˉ awˬ nyi teˇ hpaˍ-oˬ, Li‸ hpu hk'aw bvuh‸ taˍ ve tawˇ chi teˇ hkawˇ g'a biˇ la tehˬ tehˬ ve yoˬ. Hk'aˬ ve teˇ hkawˇ le teh‸ k'oˆ k'o, Yeˍsuˆ hta‸ hpeh yuˬ ve chaw hui hta‸ ya‸ k'aw maˍ piˇ paˍ Yuˇda‸ awˬ lawn awˬ g'uˇ suhˍ htaˇ ka‸ da‸ ve kehˬ ve Awˬ ha hpu Daˍviˆ ve maw‸ k'aw hta‸ cuˇ leh k'oˆ taˍ ve tawˇ teˇ hkawˇ yoˬ. 17 Yuˇda‸ lehˬ, ngaˬ hui ve awˬ moˍ awˬ hk'aw lo chehˇ leh ngaˬ hui geh teˇ geh kanˉ te ve chaw teˇ g'aˇ hpeh‸ ve yoˬ. 18 (Chaw oˇ ve lehˬ, maˇ hteˇ maˇ cawˇ ve kanˉ hta‸ te leh, g'a ve awˬ hpfuhˇ miˬ guiˬ teˇ peˆ vuiˬ taˍ ve yoˬ. Yawˇ oˉ k'oˍ hpawˇ ce leh, g'oˇ peˬ hkoˇ ve pa taw, awˬ g'uˬ tehˆ hk'a peu-eˬ tawˆ la ve yoˬ. 19 Awˬ lawn oˇ ve hta‸ Yeˍruˆsaˍlehnˍ venˇ yaˇ hk'a peu-eˬ g'a shiˍ ve yoˬ. Hk'e te leh miˬ guiˬ oˇ ve teˇ peˆ hta‸ yawˇ hui ve hkawˇ Aˍkeˍdaˍmaˆ teh‸ meh piˇ ve yoˬ. Tcuhˉ kuiˬ lehˬ, awˬ suhˍ miˬ guiˬ teh‸ k'oˆ ve yoˬ.) 20 Awˬ lawn k'o, Chiˇ mvuh ve li‸ awˬ hk'aw lo chi hk'e bvuh‸ taˍ ve Yawˇ ve chehˇ kuiˬ hta‸ gawˬ cu gawˬ pehˆ ve chehˇ kuiˬ hpeh‸ piˇ-oˆ. Teˇ g'aˇ ka‸ taˇ chehˇ piˇ lawˬ-o‸. Yawˇ ve aˉ yaˇ shu hta‸ k'aw‸ piˇ-oˆ, teh‸ bvuh‸ taˍ ve yoˬ. 21 Hk'e te leh, Yeˍsuˆ k'aw‸ te‸ tu la ve awˬ lawn ngaˬ hui geh shaˉ hkiˆ ga hkanˍ tuˬ, chaw teˇ g'aˇ loˍ ve yoˬ. 22 Chaw oˇ ve teˇ g'aˇ lehˬ, Jawˇ mawˇ Yeˍsuˆ Yoˇhanˬ geh baˆtiˆsaˬ hkanˍ ve teˇ nyi hta‸ tanˬ leh, ngaˬ hui geh yiˬ yiˬ laˬ laˬ te toˇ ve awˬ yanˇ hk'a peu-eˬ awˬ hk'aw lo leh, ngaˬ hui hta‸ hpaˆ da‸ leh k'aw‸ taˆ k'o‸-e ve teˇ nyi hk'a gaˬ, ngaˬ hui geh chehˇ taˍ ve chaw teˇ g'aˇ g'a hpeh‸ ve yoˬ teh‸, Peˍtruˆ k'oˆ ve yoˬ. 23 Hk'e te leh, yawˇ hui chaw nyiˇ g'aˇ ve awˬ meh hta‸ kuˬ ve yoˬ. Teˇ g'aˇ lehˬ, awˬ meh awˬ suhˉ Yuˇtuˆ meh ve, Baˍsaˍbaˆ ve awˬ yaˇ paˍ Yoˇseh‸ yoˬ. Nyiˇ g'aˇ teˇ g'aˇ lehˬ Maˍhtiˆ yoˬ. 24 Yawˇ hui bon lawˬ leh k'oˆ ve, Chaw yaˇ hk'a peu-eˬ ve nyi ma hta‸ shiˍ ve Jawˇ mawˇ G'uiˬ sha-oˬ, 25 Yuˇda‸ lehˬ tcuh yaˇ ve aˉ yaˇ hta‸ baˬ taˉ leh, yawˇ ve chehˇ kuiˬ lo k'o‸-e peuˬ. Yawˇ ve kanˉ hta‸ k'aw‸ te leh tcuh yaˇ ve aˉ yaˇ hta‸ k'aw‸ g'a tuˬ, chi nyiˇ g'aˇ awˬ hk'aw lo nawˬ leuˆ yuˬ ve teˇ g'aˇ hta‸ a ciˉ beˆ maˍ laˇ-oˆ teh‸ bon lawˬ ve yoˬ. 26 Yawˇ huiˉ maˬ ve awˬ meh bvuh‸ keu leh hkaˆ yuˬ ve teˇ yanˇ, Maˍhtiˆ hta‸ cawˇ ve yoˬ. Hk'e te leh, tcuh yaˇ teˇ chi teˇ g'aˇ geh yawˇ lo‸-e ve yoˬ.

Tcuh yaˇ 2

1 Peˍteˍkoˆteˍ pawehˇ awˬ nyi gaˬ la htaˇ, yawˇ hui hk'a peu-eˬ teˇ kaˬ lo tiˉ hpawnˬ chehˇ taˍ ve yoˬ. 2 Oˇ htaˇ, mvuhˇ haw lonˉ meuˆ ve hk'a shuˍ shuˍ, teˇ cawˬ haˉ mvuhˇ naw ma lo awˬ hkawˇ bvuhˬ ya‸ la leh, yawˇ hui mui taˍ ve yehˬ teˇ yehˬ awˬ hk'aw lo biˇ sheˬ ve yoˬ. 3 Aˬ miˬ ha hk'a shuˍ shuˍ, ha tehˍ teˇ hpaˍ hta‸ yawˇ hui g'a mawˬ ve yoˬ. Ha tehˍ oˇ ve teˇ hpaˍ pehˬ taˍ leh teˇ g'aˇ le le awˬ hk'oˆ hta‸ jehˇ taˍ ve yoˬ. 4 Yawˇ hui hk'a peu-eˬ awˬ hk'aw lo da‸ ve kehˬ ve Awˬ ha hpu biˇ la leh, Awˬ ha hpu yawˇ hui hta‸ k'oˆ tcuh yaw tcuh ve hk'e, awˬ kaˍ awˬ nu tawˇ laiˉ ceuˬ hkawˇ yaw ve yoˬ. 5 Oˇ htaˇ, G'uiˬ sha hta‸ yawˆ yan ve Yuˇda‸ chaw teˇ hpaˍ Yeˍruˆsaˍlehnˍ venˇ hk'aw lo chehˇ taˍ ve yoˬ. Yawˇ hui lehˬ, miˬ guiˬ hk'oˆ mvuhˇ miˬ teˇ peˆ le le lo laˬ ve chaw teˇ hpaˍ hpeh‸ ve yoˬ. 6 Awˬ hkawˇ oˇ ve hta‸ g'a kaˇ htaˇ, chaw awˬ moˍ lonˉ hpawnˬ la leh, a shu yawˇ ve tawˇ hkawˇ shu yaw laˇ ve hta‸ g'a kaˇ ve pa taw, yawˇ hui ka keh chehˇ ve yoˬ. 7 Yawˇ hui anˇ jaˇ leh dawˇ maˇ tawˆ ve yoˬ. Yawˇ hui k'oˆ ve, Nyi loˬ, tawˇ yaw chehˇ ve chaw chi hk'a peu-eˬ lehˬ, Gaˍliˍlehˇ chaw maˇ heˆ laˇ. 8 Ngaˬ hui teˇ g'aˇ le le a shu yawˇ paw la kuiˬ mvuhˇ miˬ ve tawˇ hkawˇ hta‸ g'a kaˇ ve, hk'aˬ hk'e le. 9 Ngaˬ hui Paˍtiˆ chaw, Meˍdiˆ chaw, Eˇlanˍ chaw, Meˍsoˇpoˇtaˍmiˆ mvuhˇ miˬ lo chehˇ ve chaw, Yuˇda‸ leh Kaˍpaˍdawˇkiˆ mvuhˇ miˬ lo chehˇ ve chaw, Poˍtuˆ leh Aˍsiˆ mvuhˇ miˬ lo chehˇ ve chaw, 10 Hpuˍgiˆ leh Paˍpuˇliˆ mvuhˇ miˬ lo chehˇ ve chaw, Eˇjiˇtu‸ leh Kuˇreˍneˍ mvuhˇ miˬ hta‸ caˉ da‸ ve Liˍbuˆ mvuhˇ miˬ lo chehˇ ve chaw, Roˉma‸ venˇ lo laˬ ve hkehˉ chaw teˇ hpaˍ, Yuˇda‸ chaw maˇ k'oˆ, Yuˇda‸ awˬ liˇ hta‸ yuˬ ve chaw maˇ k'oˆ, 11 Kaˍreˍte chaw leh Aˍraˆ chaw, G'uiˬ sha ve uiˍ jaˇ ve kanˉ teˇ hpaˍ awˬ lawn shu yaw laˇ ve hta‸ ngaˬ hui a shu yawˇ ve tawˇ hkawˇ g'a kaˇ ve yoˬ teh‸ yawˇ hui k'oˆ ve yoˬ. 12 Yawˇ hui hk'a peu-eˬ anˇ jaˇ leh dawˇ maˇ tawˆ ve awˬ hk'aw lo, Aˬ hto‸ ma hpeh‸ ve leh naˍ teh‸, teˇ g'aˇ leh teˇ g'aˇ na nyi da‸ ve yoˬ. 13 Ya‸ hk'aˇ teˇ hpaˍ hpaˍ hk'aiˉ leh k'oˆ ve, Yawˇ hui lehˬ, a pehˉ meuˇ g'uiˬ awˬ suhˉ dawˬ bvuhˆ ve yoˬ. 14 Oˇ htaˇ, Peˍtruˆ lehˬ tcuh yaˇ teˇ chi teˇ g'aˇ hui geh huˉ taˍ leh, awˬ hkawˇ bvuhˬ chaweh kuˬ leh chaw chi ma ve hta‸ k'oˆ piˇ ve, Yuˇda‸ mvuhˇ miˬ chaw leh Yeˍruˆsaˍlehnˍ venˇ hk'aw lo hk'a chehˇ ve chaw teˇ hpaˍ-oˬ, ngaˬ ve tawˇ hkawˇ hta‸ na leh awˬ lawn chi hta‸ shiˍ-o‸. 15 Chaw chi teˇ hpaˍ lehˬ, nawˬ hui dawˇ taˍ ve hk'e a pehˉ meuˇ g'uiˬ dawˬ bvuhˆ ve maˇ heˆ. Awˬ lawn k'o, chi beu‸ lehˬ mvuhˇ shawˉ k'awˇ naˍ riˍ ceh tiˉ gaˬ sheˍ ve yoˬ. 16 Awˬ lawn chi ve lehˬ, tcuh kaˍ paˍ Yawˇlaˆ k'oˆ taˍ ve hk'e hpeh‸ ve yoˬ. 17 G'uiˬ sha k'oˆ ve, Awˬ leh meuˇ ve awˬ nyi awˬ haˉ teˇ hpaˍ awˬ hk'aw lo chaw ceuˬ hk'a peu-eˬ awˬ hk'oˆ hta‸ ngaˬ ve Awˬ ha hpu ngaˬ ngeuˍ pfuhˍ piˇ tuˬ yoˬ. Nawˬ hui ve yaˇ paˍ yaˇ miˇ teˇ hpaˍ lehˬ bon maˍ tuˬ yoˬ. Nawˬ hui ve chaw haˉ paˍ teˇ hpaˍ lehˬ, awˬ ha awˬ hk'aw g'a mawˬ tuˬ yoˬ. Nawˬ hui ve chaw mawˇ teˇ hpaˍ htawˇ, zuh‸ maˆ mawˬ tuˬ yoˬ. 18 Awˬ nyi awˬ haˉ oˇ ve teˇ hpaˍ awˬ hk'aw lo, ngaˬ ve awˬ ceˬ paˍ awˬ ceˬ ma teˇ hpaˍ awˬ hk'oˆ hta‸ ka‸, ngaˬ ve Awˬ ha hpu ngaˬ ngeuˍ pfuhˍ piˇ leh, yawˇ hui htawˇ bon maˍ tuˬ yoˬ. 19 Awˬ na hpawˇ mvuhˇ naw ma lo anˇ tuˬ teˇ hpaˍ hta‸ maˇ k'oˆ, awˬ hawˉ hpawˇ miˬ guiˬ hk'oˆ lo, awˬ suhˍ, aˬ miˍ leh mvuhˇ hk'awˇ, awˬ heˆ chi teˇ hpaˍ hta‸ maˇ k'oˆ, ngaˬ maˍ piˇ tuˬ yoˬ. 20 Jawˇ mawˇ G'uiˬ sha ve uiˍ jaˇ da‸ jaˇ ve awˬ nyi maˇ gaˬ sheˍ htaˇ, mvuhˇ nyi naˆ ho‸ hpeh‸ la leh, ha pa htawˇ awˬ suhˍ hpeh‸ la tuˬ yoˬ. 21 Oˇ htaˇ, Jawˇ mawˇ G'uiˬ sha ve awˬ meh hta‸ peun leh kuˬ ve chaw hk'aˬ ve teˇ g'aˇ maˇ k'oˆ, htaiˍ hk'aw‸ ve hta‸ g'a tuˬ yoˬ teh‸ Yawˇlaˆ k'oˆ taˍ ve yoˬ. 22 Iˉsaˍreˍlaˆ chaw hui-oˬ, tawˇ hkawˇ chi hta‸ na-o. Nawˬ hui shiˍ taˍ ve hk'a shuˍ shuˍ, G'uiˬ sha lehˬ Naˍzaˍrehˆ chaw Yeˍsuˆ hta‸ cuˇ leh kanˉ uiˍ ve teˇ hpaˍ, anˇ tuˬ teˇ hpaˍ leh awˬ heˆ teˇ hpaˍ hta‸ nawˬ hui mehˆ g'uˇ suhˍ te ve awˬ hk'aw lo yawˇ awˬ pon shaˉ hkiˆ hkanˍ ve yoˬ. 23 Awˉ lawˉ htaˇ ka‸ G'uiˬ sha shiˍ taˍ leh dawˇ cheˆ taˍ ve hk'e Yeˍsuˆ chi teˇ g'aˇ lehˬ, chiˇ a‸ piˇ ve hta‸ g'a hkanˍ ve yoˬ. Nawˬ hui lehˬ, chaw haiˬ teˇ hpaˍ hta‸ cuˇ leh, yawˇ hta‸ la‸ ka hk'oˆ lo hta‸ pehˍ peuˬ. 24 Ya‸ hk'aˇ, suh ve awˬ hk'aw lo tu‸ ve hkanˍ ve teˇ hpaˍ hta‸ G'uiˬ sha hpui baˬ piˇ leh, yawˇ hta‸ k'aw‸ te‸ tu la piˇ peuˬ. Awˬ lawn k'o, suh ve oˇ ve lehˬ, yawˇ hta‸ hpeh taˍ maˇ g'a. 25 Yawˇ awˬ lawn Daˍviˆ chi hk'e k'oˆ taˍ ve, Jawˇ mawˇ G'uiˬ sha lehˬ, ngaˬ mehˆ g'uˇ suhˍ lo hk'aˬ htaˆ ka‸ chehˇ taˍ ve hta‸ ngaˬ g'a mawˬ ve yoˬ. Ngaˬ hk'aˬ htaˆ ka‸ yeˬ chehˇ tuˬ, yawˇ ngaˬ ve la‸ sha paˉ lo chehˇ taˍ ve yoˬ. 26 Chi hta‸ pa taw ngaˬ ve nyi ma ha lehˬ leh, ngaˬ ve maw‸ k'aw ha lehˬ chiˇ mvuh ve yoˬ. Chi hk'oˆ ka‸, ngaˬ ve awˬ to dawˇ law ve awˬ hk'aw lo chehˇ tuˬ yoˬ. 27 Awˬ lawn k'o, nawˬ lehˬ ngaˬ ve co ha hta‸ suh mvuhˇ suh miˬ lo baˬ taˉ tuˬ maˇ heˆ. Nawˬ ve da‸ kehˬ ve Chaw teˇ g'aˇ hta‸ kuiˇ k'ai luˬ k'ai tuˬ nawˬ maˇ hpeh‸ piˇ. 28 Co ha te‸ ve ya‸ k'aw nawˬ ngaˬ hta‸ maˍ laˇ peuˬ. Nawˬ ve mehˆ hpfuhˇ hta‸ g'a mawˬ ve pa taw, ngaˬ ha lehˬ ve biˇ la tuˬ nawˬ te laˇ tuˬ yoˬ, teh‸ Daˍviˆ k'oˆ taˍ ve yoˬ. 29 Awˬ viˉ awˬ nyi teˇ hpaˍ-oˬ, ngaˬ hui ve awˬ puˍ lonˉ Daˍviˆ awˬ lawn ngaˬ nawˬ hui hta‸ hk'a deh‸ k'oˆ laˇ hpeh‸ ve yoˬ. Yawˇ suh leh, shu yawˇ hta‸ tuˍ piˇ peuˬ. Chi hk'oˆ ka‸, ya‸ nyi hk'a gaˬ yawˇ ve tuˍ hpfuh ngaˬ hui geh cawˬ taˍ sheˍ ve yoˬ. 30 Yawˇ lehˬ G'uiˬ sha ve tcuh kaˍ paˍ hpeh‸ leh, yawˇ ve awˬ ceuˬ awˬ hk'aˇ awˬ hk'aw lo teˇ g'aˇ hta‸ yawˇ ve k'aw jaw hk'oˆ lo mui tcuh tuˬ, G'uiˬ sha yawˇ hta‸ ka ti‸ te leh hkanˍ taˍ ve hta‸ yawˇ shiˍ ve yoˬ. 31 Chi hta‸ pa taw, Hkri‸ k'aw‸ te‸ tu la tuˬ ve awˬ lawn yawˇ awˉ lawˉ htaˇ ka‸ dawˇ shiˍ dawˇ mawˬ leh, Hkri‸ hta‸ suh mvuhˇ suh miˬ lo maˇ baˬ taˉ ve awˬ hk'oˆ ka‸, yawˇ ve awˬ to htawˇ kuiˇ ve luˬ ve hta‸ maˇ g'a hkanˍ teh‸ Daˍviˆ k'oˆ ve yoˬ. 32 Yeˍsuˆ chi teˇ g'aˇ hta‸ G'uiˬ sha k'aw‸ te‸ tu la piˇ ve yoˬ. Ngaˬ hui hk'a peu-eˬ htawˇ awˬ lawn chi hta‸ shaˉ hkiˆ hkanˍ paˍ hpeh‸ ve yoˬ. 33 Hk'e te leh, G'ui sha ve la‸ sha paˉ lo yawˇ hta‸ yuˬ uiˍ yuˬ mvuh piˇ leh, da‸ ve kehˬ ve Awˬ ha hpu piˇ tuˬ yoˬ teh‸, Awˬ pa k'oˆ taˍ ve hk'e Awˬ pa geh yawˇ g'a ve yoˬ. Chi beu‸ nawˬ hui g'a kaˇ g'a mawˬ ve hk'e, Awˬ ha hpu hta‸ yawˇ ngeuˍ pfuhˍ laˇ ve yoˬ. 34 Awˬ lawn k'o, Daˍviˆ lehˬ mvuhˇ naw ma hk'oˆ lo taˆ-e ve maˇ heˆ. Ya‸ hk'aˇ, yawˇ awˬ to k'oˆ ve, Jawˇ mawˇ G'uiˬ sha lehˬ ngaˬ ve Jawˇ mawˇ hta‸ k'oˆ piˇ ve, 35 Nawˬ ve canˇ paˍ teˇ hpaˍ hta‸ nawˬ ve hkui sheh awˬ hawˉ lo ngaˬ taˍ htaˇ hk'a ga, ngaˬ ve la‸ sha paˉ lo mui chehˇ-oˆ, teh‸ Daˍviˆ k'oˆ taˍ ve yoˬ. 36 Hk'e te leh, Iˉsaˍreˍlaˆ teˇ yehˬ hk'a peu-eˬ chi hta‸ hk'a deh‸ shiˍ-o‸. Nawˬ hui la‸ ka hk'oˆ lo hta‸ pehˍ ve Yeˍsuˆ chi teˇ g'aˇ hta‸ G'uiˬ sha lehˬ Jawˇ mawˇ ka‸ Hkri‸ ka‸ hpeh‸ piˇ lawˬ peuˬ teh‸ Peˍtruˆ k'oˆ ve yoˬ. 37 Chaw oˇ ve teˇ hpaˍ tawˇ hkawˇ chi hta‸ g'a kaˇ htaˇ, yawˇ hui ve nyi ma hta‸ heuˆ jaˇ leh, Awˬ viˉ awˬ nyi teˇ hpaˍ-oˬ, ngaˬ hui hk'aˬ hk'e g'a te tuˬ le teh‸, Peˍtruˆ leh awˬ kaˍ awˬ nu tcuh yaˇ teˇ hpaˍ hta‸ na nyi ve yoˬ. 38 Peˍtruˆ yawˇ hui hta‸ k'oˆ piˇ ve, Nawˬ hui ve venˇ baˆ hta‸ hpehˇ hk'a laˇ tuˬ, venˇ baˆ dawˇ hpfuhˆ leh Yeˍsuˆ Hkri‸ ve awˬ meh awˬ hawˉ lo baˆtiˆsaˬ hkanˍ yuˬ-o‸. Chi hk'e te ve k'o, da‸ ve kehˬ ve Awˬ ha hpu hta‸ nawˬ hui g'a tuˬ yoˬ. 39 Awˬ lawn k'o, ka ti‸ tawˇ hkawˇ chi lehˬ, nawˬ hui awˬ pon ka‸, nawˬ hui ve awˬ yaˇ awˬ duˬ awˬ pon ka‸, vuiˇ kuiˬ lo chehˇ ve chaw hk'a peu-eˬ awˬ pon ka‸, ngaˬ hui ve Jawˇ mawˇ G'uiˬ sha hk'a kuˬ yuˬ taˍ ve chaw hk'a peu-eˬ awˬ pon hpeh‸ ve yoˬ teh‸ k'oˆ piˇ ve yoˬ. 40 Yawˇ awˬ kaˍ awˬ nu tawˇ maˇ maˇ yaw ve awˬ hk'aw lo shaˉ hkiˆ hkanˍ leh k'oˆ ve, Nyi ma k'aw‸ ve chaw chi teˇ co awˬ hk'aw lo g'a ponˬ tuˬ te-o teh‸, yawˇ hui hta‸ g'aˇ hte‸ awˬ g'aˇ piˇ ve yoˬ. 41 Hk'e te leh, yawˇ ve tawˇ hkawˇ hta‸ na yuˬ ve chaw hui lehˬ, baˆtiˆsaˬ hkanˍ yuˬ ve yoˬ. Oˇ ve teˇ nyi awˬ hk'aw lo chaw aˬ laˬ hk'e shehˆ hinˉ g'aˇ k'aw‸ maˇ la ve yoˬ. 42 Chaw oˇ ve teˇ hpaˍ lehˬ, tcuh yaˇ hui maˍ piˇ ve tawˇ hkawˇ hta‸ na yuˬ ve, awˬ chawˇ te da‸ ve, Jawˇ mawˇ ve pawehˇ hta‸ caˇ ve leh bon lawˬ ve teˇ hpaˍ hta‸ hk'aˬ htaˆ ka‸ te tcuhˉ taˍ ve yoˬ. 43 Chaw teˇ g'aˇ le le kawˆ jaˇ ve yoˬ. Tcuh yaˇ hui lehˬ, anˇ tuˬ leh awˬ heˆ teˇ hpaˍ maˇ maˇ te tawˆ la ve yoˬ. 44 Hk'a yonˍ ve chaw hk'a peu-eˬ teˇ moˍ tiˉ te leh, mawˇ hk'a peu-eˬ hta‸ teˇ geh yehˇ ve yoˬ. 45 Yawˇ hui lehˬ a shu yawˇ ve mawˇ jeˬ teˇ hpaˍ hta‸ hawˇ leh, hk'aˬ ve teˇ g'aˇ hta‸ maˇ k'oˆ, loˍ ve hk'e chaw hk'a peu-eˬ hta‸ pehˬ piˇ ve yoˬ. 46 Teˇ nyi le le yawˇ hui teˇ geh bon yehˬ lonˉ lo taˆ-e ve awˬ hk'oˆ ka‸, yawˇ hui ve yehˬ awˬ hk'aw lo hkaoˍ monˇ hk'eh‸ leh, ha lehˬ ha k'a nyi ma teˇ shiˍ tiˉ taˍ ve awˬ hk'aw lo yawˇ hui teˇ geh caˇ tuˬ caˇ ve yoˬ. 47 Yawˇ hui G'uiˬ sha hta‸ chiˇ mvuh leh, chaw hk'a peu-eˬ yawˇ hui hta‸ nyi ma cawˇ ve yoˬ. Teˇ nyi le le Jawˇ mawˇ G'uiˬ sha lehˬ, htaiˍ hk'aw‸ ve hta‸ g'a ve chaw hui hta‸ yawˇ hui ve awˬ moˍ awˬ hk'aw lo maˇ la piˇ chehˇ ve yoˬ.

Tcuh yaˇ 3

1 Teˇ nyi htaˇ Peˍtruˆ leh Yoˇhanˬ, mvuhˇ hpeu‸ hpawˇ shehˆ naˍ riˍ bon lawˬ ve awˬ yanˇ awˬ hk'aw lo, bon yehˬ lonˉ lo taˆ-e ve yoˬ. 2 Paw la htaˇ ka‸ hkui sheh luˬ ve chaw teˇ g'aˇ lehˬ, bon yehˬ lonˉ hk'aw lo‸-e ve chaw teˇ hpaˍ geh lawˬ caˇ tuˬ, teˇ nyi le le shu yawˇ hta‸ taˆ laˬ leh, bon yehˬ lonˉ awˬ hk'aw lo, Nyi sha ve teh‸ k'oˆ ve yehˬ miˉ awˬ paˇ lo teh taˍ ve yoˬ. 3 Peˍtruˆ leh Yoˇhanˬ bon yehˬ lonˉ awˬ hk'aw lo lo‸-e chehˇ ve hta‸ yawˇ g'a mawˬ leh yawˇ huiˉ maˬ geh lawˬ ve yoˬ. 4 Oˇ htaˇ, Peˍtruˆ leh Yoˇhanˬ yawˇ hta‸ hk'a deh‸ nyi leh, Ngaˬ huiˉ maˬ hta‸ nyi-o teh‸ Peˍtruˆ k'oˆ piˇ ve yoˬ. 5 Yawˇ lehˬ yawˇ huiˉ maˬ geh teˇ ceuˬ ceuˬ g'a tuˬ teh‸ dawˇ leh, yawˇ huiˉ maˬ hta‸ hk'a deh‸ nyi taˍ ve yoˬ. 6 Peˍtruˆ k'oˆ ve, Ngaˬ geh hpu shi maˇ cawˬ. Ya‸ hk'aˇ, ngaˬ cawˬ ve awˬ ceuˬ nawˬ hta‸ pe‸ laˇ ve yoˬ. Naˍzaˍrehˆ chaw Yeˍsuˆ Hkri‸ ve awˬ meh awˬ hawˉ lo juˇ k'ai loˬ teh‸ k'oˆ piˇ ve yoˬ. 7 Oˇ htaˇ, yawˇ ve la‸ sha paˉ la‸ sheh hta‸ Peˍtruˆ g'awˬ tu piˇ leh, teˇ cawˬ haˉ yawˇ ve hkui taw peh leh hkui k'awˍ lehˍ awˬ g'aˇ cawˬ la ve yoˬ. 8 Yawˇ pawˆ tu leh juˇ k'ai ve yoˬ. Yawˇ hui geh teˇ geh bon yehˬ lonˉ hk'aw lo‸-e leh juˇ k'ai, pawˆ k'ai leh G'uiˬ sha hta‸ chiˇ mvuh ve yoˬ. 9 Yawˇ juˇ k'ai chehˇ leh G'uiˬ sha hta‸ chiˇ mvuh chehˇ ve hta‸ chaw hk'a peu-eˬ g'a mawˬ ve teˇ yanˇ, 10 yawˇ lehˬ bon yehˬ lonˉ ve Nyi sha ve yehˬ miˉ awˬ paˇ lo mui taˍ leh lawˬ caˇ chehˇ ve chaw teˇ g'aˇ yoˬ teh‸, yawˇ hui g'a shiˍ ve yoˬ. Yawˇ hk'aˬ hk'e hpeh‸ la peuˬ ve hta‸ yawˇ hui g'a mawˬ leh, yawˇ hui anˇ jaˇ leh dawˇ maˇ tawˆ ve yoˬ. 11 Chaw oˇ ve teˇ g'aˇ lehˬ, Peˍtruˆ leh Yoˇhanˬ hta‸ vawˆ taˍ htaˇ, chaw chi ma ve anˇ jaˇ ve awˬ hk'aw lo yawˇ huiˉ maˬ geh Sawˉla‸monˍ ve koˇ caˉ teh‸ k'oˆ ve teˇ kaˬ lo g'uiˇ laˬ ve yoˬ. 12 Peˍtruˆ chi hta‸ g'a mawˬ htaˇ, chaw chi ma ve hta‸ yawˇ k'oˆ piˇ ve, Iˉsaˍreˍlaˆ chaw teˇ hpaˍ-oˬ, aˬ hto‸ ma pa taw awˬ lawn chi hta‸ naw hui anˇ ve le. Ngaˬ huiˉ maˬ lehˬ, a shu yawˇ ve kanˇ paˆ leh a shu yawˇ ve da‸ hkuiˇ ja hkuiˇ hta‸ pa taw chaw chi teˇ g'aˇ hta‸ ya‸ k'aw juˇ piˇ lawˬ ve teh‸ nawˬ hui dawˇ leh, aˬ hto‸ ma pa taw ngaˬ huiˉ maˬ hta‸ tiˉ nyi tiˍ taˍ ve le. 13 Aˍbraˍhanˍ, Iˉcaˆ leh Yaˍkoˆ hui ve G'uiˬ sha hpeh‸ ve, ngaˬ hui ve awˬ puˍ awˬ pi hui ve G'uiˬ sha lehˬ, yawˇ ve awˬ ceˬ Yeˍsuˆ hta‸ awˬ me‸ awˬ hponˇ tawˆ la piˇ peuˬ. Nawˬ hui lehˬ, yawˇ hta‸ chiˇ a‸ piˇ leh jawˇ mawˇ Piˉla‸ yawˇ hta‸ hpehˇ piˇ tuˬ dawˇ cheˆ ve teˇ yanˇ, nawˬ hui jawˇ mawˇ Piˉla‸ mehˆ g'uˇ suhˍ yawˇ hta‸ chiˇ baˬ ve yoˬ. 14 Da‸ ve kehˬ ve leh hteˇ ve cawˇ ve Awˬ shehˍ hpaˇ teˇ g'aˇ hta‸ nawˬ hui chiˇ baˬ leh, shu hta‸ tiˇ pehˍ shehˍ hpaˇ teˇ g'aˇ hta‸ nawˬ hui lawˬ yuˬ ve yoˬ. 15 Co ha te‸ piˇ shehˍ hpaˇ hta‸ nawˬ hui tiˇ pehˍ ve htawˇ, G'uiˬ sha yawˇ hta‸ suh kuiˬ lo k'aw‸ te‸ tu la piˇ ve yoˬ. Ngaˬ hui lehˬ, awˬ lawn chi hta‸ shaˉ hkiˆ hkanˍ paˍ hpeh‸ ve yoˬ. 16 Nawˬ hui g'a mawˬ g'a shiˍ ve chaw chi teˇ g'aˇ awˬ g'aˇ cawˬ la ve lehˬ, Yeˍsuˆ ve awˬ meh hta‸ yonˍ ve pa taw, awˬ meh oˇ ve lehˬ yawˇ hta‸ awˬ g'aˇ cawˬ la piˇ ve yoˬ. Yonˍ ve teˇ ceuˬ lehˬ, Yeˍsuˆ hta‸ pa taw g'a leh, yonˍ ve oˇ ve lehˬ, nawˬ hui hk'a peu-eˬ mehˆ g'uˇ suhˍ chaw chi teˇ g'aˇ hta‸ hk'a deh‸ chehˇ sha la piˇ peuˬ. 17 Awˬ viˉ awˬ nyi teˇ hpaˍ-oˬ, nawˬ hui ve jawˇ mawˇ teˇ hpaˍ maˇ shiˍ leh te ve hk'e, nawˬ hui htawˇ maˇ shiˍ leh chi hk'e te ve hta‸ ngaˬ shiˍ ve yoˬ. 18 G'uiˬ sha lehˬ yawˇ ve Hkri‸ g'a tu‸ g'a hkanˍ tuˬ yoˬ teh‸, yawˇ ve tcuh kaˍ paˍ hui hta‸ cuˇ leh awˬ g'uˇ suhˍ htaˇ ka‸ k'oˆ taˍ ve hk'e, yawˇ te biˇ la peuˬ. 19 Hk'e te leh, G'uiˬ sha nawˬ hui ve venˇ baˆ hta‸ shiˆ baˬ laˇ tuˬ, venˇ baˆ hta‸ dawˇ hpfuhˆ leh nyi ma k'aw‸ pa-o. Chi hk'e te ve k'o, Jawˇ mawˇ G'uiˬ sha lo laˬ ve dawˇ sha ve awˬ yanˇ gaˬ la leh, 20 nawˬ hui awˬ pon leuˆ yuˬ taˍ ve Yeˍsuˆ teh‸ k'oˆ ve Hkri‸ teˇ g'aˇ hta‸ yawˇ peu laˇ tuˬ yoˬ. 21 G'uiˬ sha lehˬ, aˬ sho-eˬ htaˇ ka‸ yawˇ ve da‸ kehˬ ve tcuh kaˍ paˍ teˇ hpaˍ hta‸ cuˇ leh k'oˆ taˍ ve hk'a shuˍ shuˍ, awˬ ceuˬ hk'a peu-eˬ ve hta‸ awˬ suhˉ k'aw‸ gu te htaˇ hk'a gaˬ, Yeˍsuˆ mvuhˇ naw ma hk'oˆ lo g'a chehˇ tuˬ yoˬ. 22 Moˉseˍ k'oˆ ve, Jawˇ mawˇ G'uiˬ sha lehˬ, nawˬ hui ve awˬ ceuˬ awˬ hk'aˇ awˬ hk'aw lo, ngaˬ hta‸ shuˍ ve tcuh kaˍ paˍ teˇ g'aˇ hta‸ nawˬ hui awˬ pon tawˆ la piˇ tuˬ yoˬ. Yawˇ nawˬ hui hta‸ hk'a k'oˆ laˇ ve tawˇ hkawˇ teˇ hpaˍ hta‸ nawˬ hui g'a na yuˬ tuˬ yoˬ. 23 A shu teˇ g'aˇ maˇ k'oˆ, G'uiˬ sha ve tcuh kaˍ paˍ oˇ ve teˇ g'aˇ ve tawˇ hkawˇ hta‸ maˇ na yuˬ ve k'o, chaw oˇ ve teˇ g'aˇ lehˬ, a shu yawˇ ve chaw ceuˬ awˬ hk'aw lo tawˆ baˬ ve hta‸ g'a hkanˍ tuˬ yoˬ teh‸ Moˉseˍ k'oˆ taˍ ve yoˬ. 24 Saˍmo-eˍlaˆ hta‸ tanˬ leh, yawˇ awˬ hk'aw‸ nawˉ hk'a tawˆ la ve tcuh kaˍ paˍ hk'a peu-eˬ lehˬ, awˬ nyi awˬ haˉ chi teˇ hpaˍ awˬ lawn hta‸ k'oˆ taˍ ve yoˬ. 25 Nawˬ hui lehˬ, G'uiˬ sha ve tcuh kaˍ paˍ hui ve awˬ yaˇ awˬ duˬ hpeh‸ leh, nawˬ hui ve awˬ puˍ awˬ pi teˇ hpaˍ hta‸ G'uiˬ sha piˇ taˍ ve ka ti‸ shaˉ caˆ hta‸ caˉ da‸ ve awˬ yaˇ awˬ duˬ hui htawˇ hpeh‸ ve yoˬ. Ka ti‸ shaˉ caˆ oˇ ve lehˬ, G'uiˬ sha Aˍbraˍhanˍ hta‸ k'oˆ piˇ ve, Nawˬ ve awˬ ceuˬ awˬ hk'aˇ hta‸ pa taw, miˬ guiˬ chaw ceuˬ hk'a peu-eˬ awˬ bon g'a tuˬ yoˬ teh‸ G'uiˬ sha k'oˆ taˍ ve yoˬ. 26 Nawˬ hui awˬ hk'aw lo teˇ g'aˇ le le, a shu yawˇ ve venˇ baˆ hta‸ hpfuhˆ baˬ taˉ ve pa taw, G'uiˬ sha nawˬ hui hta‸ na‸ piˇ tuˬ, yawˇ lehˬ yawˇ ve awˬ ceˬ hta‸ tawˆ la piˇ leh, nawˬ hui geh awˉ lawˉ peu laˇ ve yoˬ teh‸, Peˍtruˆ yawˇ hui hta‸ k'oˆ piˇ ve yoˬ.

Tcuh yaˇ 4

1 Yawˇ huiˉ maˬ chaw chi ma ve hta‸ maˍ piˇ chehˇ htaˇ, paw hkuˇ teˇ hpaˍ, bon yehˬ lonˉ hta‸ shaw ve ma‸ poˍ leh Saˍduˆkehˇ teˇ hpaˍ yawˇ hui geh gaˬ la ve yoˬ. 2 Yawˇ huiˉ maˬ chaw chi ma ve hta‸ maˍ piˇ leh, suh ve chaw hui hta‸ Yeˍsuˆ k'aw‸ te‸ tu la piˇ ve awˬ lawn bon maˍ ve pa taw, gaˬ la ve chaw chi teˇ hpaˍ hpeh‸ bawˬ jaˇ ve yoˬ. 3 Hk'e te leh, yawˇ huiˉ maˬ hta‸ hpeh yuˬ leh, mvuhˇ hpeu‸ la ve pa taw, shawˉ pawˍ teˇ nyi hk'a gaˬ htawnˍ hk'aw keu taˍ ve yoˬ. 4 Bon hkawˇ hta‸ g'a kaˇ ve chaw maˇ maˇ yonˍ ve yoˬ. Yonˍ ve chaw hawˉ hk'aˆ tiˉ ngaˇ hinˉ g'aˇ hk'e cawˬ ve yoˬ. 5 Shawˉ pawˍ teˇ nyi hk'e gaˬ leh Yuˇda‸ chaw hui ve jawˇ mawˇ teˇ hpaˍ, awˬ hoˉ chaw mawˇ teˇ hpaˍ leh li‸ bvuh‸ paˍ teˇ hpaˍ Yeˍruˆsaˍlehnˍ venˇ hk'aw lo hpawnˬ da‸ ve yoˬ. 6 Paw hkuˇ lonˉ Aˍnaˆ leh, Kaˍyaˍhpaˆ, Yoˇhanˬ, Aˍleˍsaˍduˆ leh, paw hkuˇ lonˉ ve awˬ ceuˬ awˬ hk'aˇ hk'a peu-eˬ htawˇ, yawˇ hui geh teˇ geh hpawnˬ da‸ ve yoˬ. 7 Yawˇ huiˉ maˬ hta‸ yawˇ hui awˬ k'aw ji lo teh taˍ leh k'oˆ piˇ ve, Nawˬ huiˉ maˬ a shu ve kanˇ paˆ, a shu ve awˬ meh awˬ hawˉ lo chi hk'e te ve le teh‸ na nyi ve yoˬ. 8 Oˇ htaˇ Peˍtruˆ lehˬ, da‸ ve kehˬ ve Awˬ ha hpu hk'a biˇ cawˬ leh yawˇ hui hta‸ k'oˆ piˇ ve, Iˉsaˍreˍlaˆ chaw hui ve jawˇ mawˇ leh awˬ hoˉ chaw mawˇ teˇ hpaˍ-oˬ, 9 hkui luˬ paˍ teˇ g'aˇ hta‸ awˬ bon te piˇ leh, yawˇ hta‸ hk'aˬ hk'e te gu na-e piˇ ve awˬ lawn ya‸ nyi ngaˬ huiˉ maˬ hta‸ na nyi laˇ ve k'o, 10 nawˬ hui hk'a peu-eˬ leh Iˉsaˍreˍlaˆ chaw hk'a peu-eˬ chi hta‸ shiˍ-o‸. Nawˬ hui la‸ ka hk'oˆ lo hta‸ pehˍ leh suh kuiˬ lo G'uiˬ sha k'aw‸ te‸ tu la piˇ ve Naˍzaˍrehˆ chaw Yeˍsuˆ Hkri‸ ve awˬ meh hta‸ pa taw, chaw chi teˇ g'aˇ na-e la leh, nawˬ hui mehˆ g'uˇ suhˍ lo huˉ taˍ ve yoˬ. 11 Yeˍsuˆ lehˬ, nawˬ hui yehˬ kawˍ shehˍ hpaˇ teˇ hpaˍ baˬ taˍ ve haˉ pui shiˍ hpeh‸ htawˇ, awˬ hkuiˉ puiˍ awˬ ceˍ k'aweh‸ ve haˉ pui shiˍ hpeh‸ la peuˬ. 12 Yawˇ maˇ heˆ k'o, awˬ kaˍ awˬ nu chaw teˇ g'aˇ ka‸ htaiˍ hk'aw‸ laˇ maˇ g'a. Awˬ lawn k'o, ngaˬ hui htaiˍ hk'aw‸ ve hta‸ g'a tuˬ, yawˇ ve awˬ meh maˇ heˆ k'o, miˬ guiˬ hk'oˆ lo chaw yaˇ hui hta‸ piˇ taˍ ve awˬ kaˍ awˬ nu awˬ meh maˇ cawˬ teh‸ Peˍtruˆ k'oˆ piˇ ve yoˬ. 13 Yawˇ hui lehˬ, Peˍtruˆ leh Yoˇhanˬ nyi ma ha‸ hanˉ ve hta‸ g'a mawˬ leh, yawˇ huiˉ maˬ li‸ maˇ shiˍ ve chaw, te‸ chiˉ maˇ g'a henˇ jaw ve chaw hpeh‸ ve hta‸ g'a shiˍ ve pa taw, anˇ ve yoˬ. Yawˇ huiˉ maˬ Yeˍsuˆ geh chehˇ jaw ve hta‸ yawˇ hui g'a shiˍ ve yoˬ. 14 Na-e la peuˬ ve chaw teˇ g'aˇ lehˬ, yawˇ huiˉ maˬ geh huˉ chehˇ ve hta‸ g'a mawˬ ve pa taw, yawˇ hui te‸ chiˉ ka‸ k'aw‸ k'oˆ maˇ hpeh‸. 15 Oˇ htaˇ, yawˇ huiˉ maˬ hta‸ hpawnˬ da‸ kuiˬ awˬ baˬ lo tawˆ k'ai tcuh peuˬ hk'aw‸ nawˉ, yawˇ hui teˇ g'aˇ leh teˇ g'aˇ jehˬ da‸ leh k'oˆ ve, 16 Chaw chi nyiˇ g'aˇ hta‸ ngaˬ hui hk'aˬ hk'e te tuˬ le. Awˬ lawn k'o, yawˇ huiˉ maˬ lehˬ, awˬ heˆ awˬ tehˬ awˬ na te tawˆ la ve hta‸ Yeˍruˆsaˍlehnˍ venˇ hk'aw chehˇ ve chaw hk'a peu-eˬ g'a mawˬ g'a shiˍ ve pa taw, ngaˬ hui te‸ chiˉ ca k'oˆ maˇ hpeh‸ ve yoˬ. 17 ya‸ hk'aˇ, chaw chi ma ve awˬ hk'aw lo awˬ lawn chi leuˉ leh maˇ g'a bvuhˬ k'ai tuˬ, awˬ meh chi hta‸ cuˇ ve awˬ hk'aw lo teˇ g'aˇ hta‸ ka‸ maˇ g'a maˍ tuˬ, yawˇ huiˉ maˬ hta‸ tawˇ hk'a deh‸ nyiˉ piˇ shaˍ teh‸, yawˇ hui k'oˆ da‸ ve yoˬ. 18 Hk'e te leh, yawˇ hui yawˇ huiˉ maˬ hta‸ k'aw‸ kuˬ leh, Yeˍsuˆ ve awˬ meh hta‸ cuˇ ve awˬ hk'aw lo maˍ piˇ hto piˇ ve teˇ ceuˬ a ciˉ ka‸ taˇ te teh‸ tawˇ piˇ ve yoˬ. 19 Ya‸ hk'aˇ, Peˍtruˆ leh Yoˇhanˬ yawˇ hui hta‸ k'aw‸ k'oˆ piˇ ve, G'uiˬ sha ve tawˇ hkawˇ hta‸ na yuˬ ve a‸ kehˉ nawˬ hui ve tawˇ hkawˇ hta‸ na yuˬ tuˬ, G'uiˬ sha mehˆ g'uˇ suhˍ cawˇ maˇ cawˇ ve hta‸ nawˬ hui hk'aˇ nawˬ hui dawˇ nyi-o. 20 Ngaˬ huiˉ maˬ lehˬ, g'a kaˇ g'a mawˬ ve awˬ lawn teˇ hpaˍ hta‸ maˇ hto maˇ maˍ ve k'o, chehˇ maˇ hpeh‸ teh‸ k'aw‸ k'oˆ piˇ ve yoˬ. 21 Oˇ htaˇ yawˇ hui lehˬ, yawˇ huiˉ maˬ hta‸ tawˇ hk'a deh‸ k'aw‸ nyiˉ piˇ leh hpehˇ piˇ ve yoˬ. Chaw chi ma ve hta‸ pa taw yawˇ huiˉ maˬ hta‸ hk'aˬ hk'e te ciˍ yanˍ piˇ tuˬ yawˇ hui ca maˇ g'a ve yoˬ. Awˬ lawn k'o, hpeh‸ la ve awˬ lawn chi hta‸ pa taw chaw hk'a peu-eˬ G'uiˬ sha hta‸ chiˇ uiˍ chiˇ mvuh ve yoˬ. 22 Na-e la peuˬ ve, awˬ heˆ chi hta‸ g'a hkanˍ ve chaw teˇ g'aˇ lehˬ, a sha‸ awˇ chi hk'aw‸ hpaˆ gaˬ peuˬ ve yoˬ. 23 Yawˇ huiˉ maˬ hta‸ hpehˇ piˇ peuˬ htaˇ, awˬ chawˇ teˇ hpaˍ geh yawˇ huiˉ maˬ k'o‸-e leh, paw hkuˇ lonˉ hui leh awˬ hoˉ chaw mawˇ hui hk'a k'oˆ laˇ ve hk'a peu-eˬ yawˇ hui hta‸ k'aw‸ hto piˇ ve yoˬ. 24 Yawˇ hui g'a kaˇ htaˇ, nyi ma teˇ shiˍ tiˉ taˍ ve awˬ hk'aw lo, awˬ hkawˇ bvuhˬ chaweh te leh G'uiˬ sha hta‸ k'oˆ piˇ ve, Hk'a peu-eˬ awˬ hk'oˆ uiˍ ve Jawˇ mawˇ-oˬ, nawˬ lehˬ mvuhˇ naw ma, miˬ naˆ ma, laˇ tsuhˇ g'uiˬ leh oˇ ve teˇ hpaˍ awˬ hk'aw lo hk'a cawˬ ve hk'a peu-eˬ hta‸ te hpanˍ shehˍ hpaˇ hpeh‸ ve yoˬ. 25 Nawˬ lehˬ da‸ ve kehˬ ve Awˬ ha hpu hta‸ cuˇ leh nawˬ ve awˬ ceˬ, ngaˬ hui ve awˬ pa Daˍviˆ ve maw‸ k'aw awˬ hk'aw lo chi hk'e k'oˆ ve, Aˬ hto‸ ma pa taw buiˇ shaˆ aˉ naˆ chaw teˇ hpaˍ nyi ma zuhˆ jaˇ ve le. Aˬ hto‸ ma pa taw chaw yaˇ teˇ hpaˍ awˬ bon maˇ cawˬ ve awˬ ceuˬ hta‸ ca dawˇ nyi ve le. 26 Jawˇ mawˇ G'uiˬ sha leh yawˇ ve Hkri‸ hta‸ tawˍ da‸ tuˬ, chi miˬ guiˬ ve hkunˉ hawˉ hkanˇ teˇ hpaˍ tu la leh, uˉ peunˍ shehˍ hpaˇ teˇ hpaˍ lehˬ teˇ geh hpawnˬ chehˇ ve yoˬ, teh‸ Daˍviˆ k'oˆ taˍ ve yoˬ. 27 Nawˬ naˍ manˇ shehˍ taˍ ve, nawˬ ve da‸ kehˬ ve awˬ ceˬ Yeˍsuˆ hta‸ tawˍ da‸ tuˬ, jawˇ mawˇ Heˍroˆ leh jawˇ mawˇ Poˍtiˆ Piˉla‸, buiˇ shaˆ aˉ naˆ chaw hui leh, Iˉsaˍreˍlaˆ chaw hui ka‸, venˇ chi awˬ hk'aw lo awˬ tehˬ awˬ na teˇ geh hpawnˬ da‸ ve yoˬ. 28 Aˬ sho-eˬ htaˇ ka‸ nawˬ ve kanˇ paˆ leh nawˬ ve a loˍ cawˇ ve hk'e nawˬ dawˇ cheˆ taˍ ve hk'a shuˍ shuˍ hpeh‸ la tuˬ, yawˇ hui hpawnˬ da‸ ve yoˬ. 29 Jawˇ mawˇ G'uiˬ sha-oˬ, chi beu‸ yawˇ hui tawˇ nyiˉ laˇ ve hta‸ nawˬ nyi leh, nawˬ ve awˬ ceˬ hui nyi ma ha‸ hanˉ te leh nawˬ ve tawˇ hkawˇ hta‸ maˍ piˇ hpeh‸ tuˬ ga laˇ sheˍ. 30 Naˬ ve gawˬ ve hta‸ gu na-e piˇ tuˬ, nawˬ ve la‸ sheh che leh, nawˬ ve da‸ kehˬ ve awˬ ceˬ Yeˍsuˆ ve awˬ meh hta‸ pa taw, awˬ heˆ leh anˇ tuˬ teˇ hpaˍ hta‸ nawˬ te chehˇ ve yoˬ teh‸, yawˇ hui bon lawˬ ve yoˬ. 31 Yawˇ hui bon lawˬ peuˬ hk'aw‸ nawˉ, yawˇ hui hpawnˬ da‸ ve chehˇ kuiˬ hiˆ la ve yoˬ. Yawˇ hui hk'a peu-eˬ awˬ hk'aw lo da‸ ve kehˬ ve Awˬ ha hpu biˇ la leh, G'uiˬ sha ve tawˇ hkawˇ hta‸ nyi ma ha‸ hanˉ te leh maˍ ve yoˬ. 32 Yonˍ ve chaw awˬ moˍ lonˉ oˇ ve lehˬ, nyi ma teˇ shiˍ tiˉ, dawˇ hk'aˇ teˇ hk'aˇ tiˉ taˍ ve yoˬ. Hk'aˬ ve teˇ g'aˇ maˇ k'oˆ, a shu yawˇ cawˬ ve mawˇ jeˬ hta‸ a shu yawˇ ve teh‸ maˇ k'oˆ leh, hk'a cawˬ ve mawˇ hk'a peu-eˬ hta‸ teˇ geh yehˇ ve yoˬ. 33 Tcuh yaˇ hui lehˬ, uiˍ jaˇ ve kanˇ paˆ awˬ hk'aw lo, Jawˇ mawˇ Yeˍsuˆ k'aw‸ te‸ tu la ve awˬ lawn shaˉ hkiˆ hkanˍ ve yoˬ. Yawˇ hui hk'a peu-eˬ awˬ hk'oˆ hta‸ uiˍ jaˇ ve awˬ bon cawˬ ve yoˬ. 34 Yawˇ hui awˬ hk'aw lo loˍ ve cuˆ ve chaw teˇ g'aˇ ka‸ maˇ cawˬ. Awˬ lawn k'o, miˬ guiˬ leh yehˬ hk'a cawˬ ve chaw teˇ hpaˍ, yawˇ hui ve miˬ guiˬ leh yehˬ hta‸ hawˇ leh, g'a ve hpu hta‸ yuˬ laˬ leh, tcuh yaˇ hui ve hkui paˇ lo taˍ ve yoˬ. 35 Yawˇ hui ve awˬ moˍ awˬ hk'aw lo, teˇ g'aˇ peuˬ teˇ g'aˇ loˍ ve hk'e yawˇ hui hta‸ pehˬ piˇ ve yoˬ. 36 Oˇ htaˇ, Kuˇpaˍruˆ conˇ lo paw la ve Leˍviˆ chaw, Yoˇseh‸ meh ve chaw teˇ g'aˇ cawˬ ve yoˬ. Tcuh yaˇ hui yawˇ hta‸ awˬ meh awˬ suhˉ Baˍnaˍbaˆ teh‸ meh piˇ ve yoˬ. Baˍnaˍbaˆ k'oˆ ve tcuhˉ kuiˬ lehˬ, awˬ g'aˇ piˇ shehˍ hpaˇ teh‸ k'oˆ ve yoˬ. 37 Yawˇ cawˬ taˍ ve miˬ guiˬ teˇ peˆ hta‸ hawˇ leh, g'a ve hpu hta‸ tcuh yaˇ hui ve hkui paˇ lo laˬ taˍ ve yoˬ.

Tcuh yaˇ 5

1 Aˍnaˍniˆ meh ve chaw teˇ g'aˇ leh yawˇ ve awˬ miˇ ma Saˍhpiˉra‸, yawˇ huiˉ maˬ ka‸ miˬ guiˬ teˇ peˆ hawˇ ve yoˬ. 2 Yawˇ huiˉ maˬ awˬ hpawˇ awˬ miˇ nyi ma hawˍ da‸ leh, awˬ hpfuhˇ oˇ ve awˬ hk'aw lo teˇ pun yuˬ teh taˉ leh teˇ pun ceh tiˉ tcuh yaˇ hui ve hkui paˇ lo laˬ taˍ ve yoˬ. 3 Peˍtruˆ k'oˆ ve, Aˍnaˍniˆ-oˬ, da‸ ve kehˬ ve Awˬ ha hpu hta‸ heˍ piˇ tuˬ maˇ k'oˆ, miˬ guiˬ awˬ hpfuhˇ teˇ pun yuˬ teh taˉ tuˬ maˇ k'oˆ, nawˬ chi hk'e te gaˇ ve nyi ma hk'a biˇ cawˬ la tuˬ aˬ hto‸ ma te Saˍtanˍ nawˬ hta‸ dawˇ tawˆ piˇ lawˬ ve le. 4 Miˬ guiˬ oˇ ve maˇ hawˇ sheˍ htaˇ, nawˬ ve maˇ heˆ laˇ. Hawˇ leh g'a ve awˬ hpfuhˇ htawˇ, nawˬ ve mawˇ hpeh‸ ve maˇ heˆ laˇ. Aˬ hto‸ ma pa taw chi hk'e te tuˬ nawˬ ve nyi ma hk'aw ca dawˇ ve le. Nawˬ chaw yaˇ hta‸ heˍ ve maˇ heˆ, G'uiˬ sha hta‸ heˍ ve yoˬ teh‸ k'oˆ piˇ ve yoˬ. 5 Tawˇ hkawˇ oˇ ve hta‸ g'a kaˇ htaˇ, Aˍnaˍniˆ paiˍ leh suh-e ve yoˬ. Awˬ lawn oˇ ve hta‸ g'a kaˇ ve chaw hk'a peu-eˬ kawˆ jaˇ ve yoˬ. 6 Oˇ htaˇ, chaw haˉ paˍ hui tu la leh, yawˇ hta‸ htiˆ leh ca taˆ tuˍ ve yoˬ. 7 Awˬ hk'aw‸ nawˉ shehˆ naˍ riˍ hk'e gaˬ htaˇ, yawˇ ve awˬ miˇ ma lo‸ la ve yoˬ. Hk'aˬ hk'e hpeh‸ la peuˬ ve awˬ lawn hta‸ yawˇ maˇ shiˍ. 8 Peˍtruˆ k'oˆ ve, Nawˬ huiˉ maˬ miˬ guiˬ hawˇ ve awˬ hpfuhˇ chi ma tiˉ g'a ve yoˬ laˇ teh‸ yawˇ hta‸ na nyi htaˇ, Yoˬ, chi ma tiˉ g'a ve yoˬ teh‸ yawˇ k'aw‸ k'oˆ piˇ ve yoˬ. 9 Peˍtruˆ yawˇ hta‸ k'oˆ piˇ ve, Nawˬ huiˉ maˬ lehˬ, aˬ hto‸ ma te nyi ma teˇ shiˍ tiˉ taˍ leh Jawˇ mawˇ G'uiˬ sha ve Awˬ ha hpu hta‸ lawˇ nyi ve le. Nyi loˬ. Nawˬ ve awˬ hpawˇ hta‸ ca tuˍ ve chaw hui lehˬ, yehˬ miˉ hpe‸ lo k'aw‸ gaˬ la peuˬ. Nawˬ hta‸ htawˇ yawˇ hui taˆ k'ai tuˬ yoˬ teh‸ k'oˇ piˇ ve yoˬ. 10 Teˇ cawˬ haˉ yaˇ miˇ oˇ ve Peˍtruˆ ve hkui paˇ lo paiˍ leh suh-e ve yoˬ. Chaw haˉ paˍ teˇ hpaˍ lo‸ la leh, yaˇ miˇ suh taˍ ve hta‸ g'a mawˬ ve yoˬ. Yawˇ hta‸ htawˇ yawˇ hui taˆ veu leh, awˬ hpawˇ awˬ paˇ lo ca tuˍ ve yoˬ. 11 Hkri‸ yaˇ awˬ moˍ awˬ hk'aw chehˇ ve chaw hk'a peu-eˬ leh awˬ lawn chi ve hta‸ g'a kaˇ ve chaw hk'a peu-eˬ kawˆ jaˇ ve yoˬ. 12 Tcuh yaˇ hui lehˬ chaw chi ma ve mehˆ g'uˇ suhˍ awˬ heˆ leh anˇ tuˬ maˇ maˇ te ve yoˬ. Yawˇ hui hk'a peu-eˬ nyi ma teˇ shiˍ tiˉ taˍ leh Sawˉla‸monˍ ve koˇ caˉ lo hpawnˬ chehˇ taˍ ve yoˬ. 13 Awˬ kaˍ awˬ nu chaw teˇ g'aˇ ka‸ yawˇ hui hta‸ ca pawnˇ da‸ maˇ haˆ htawˇ, chaw chi ma ve yawˇ hui hta‸ yawˆ yan leh taˍ uiˍ ve yoˬ. 14 Yonˍ ve chaw, hawˉ hk'aˆ yaˇ miˇ awˬ moˍ lonˉ teˇ hpaˍ, Jawˇ mawˇ G'uiˬ sha hta‸ pawnˇ da‸ la ve yoˬ. 15 Peˍtruˆ ya‸ k'aw k'ai htaˇ, yawˇ ve aˉ g'uiˬ ha chaw naˬ teˇ g'aˇ g'aˇ hta‸ baˬ piˇ tuˬ, chaw naˬ teˇ hpaˍ hta‸ shu taˆ leh, ya‸ k'aw paˇ lo zuh‸ hpui leh ku-iˍ teˇ hpaˍ awˬ hk'oˆ lo teh taˍ ve yoˬ. 16 Yeˍruˆsaˍlehnˍ venˇ awˬ paˇ awˬ kui lo cawˬ ve venˇ hk'aˆ teˇ hpaˍ awˬ hk'aw lo chehˇ ve chaw maˇ maˇ hpawnˬ laˬ ve yoˬ. Chaw naˬ teˇ hpaˍ leh neˇ cha‸ chiˆ geh ve chaw teˇ hpaˍ hta‸ shiˍ veu laˇ leh yawˇ hui hk'a peu-eˬ hta‸ gu na-e piˇ ve yoˬ. 17 Oˇ htaˇ, paw hkuˇ lonˉ leh yawˇ ve chaw Saˍduˆkehˇ awˬ moˍ awˬ hk'aw chehˇ ve chaw teˇ hpaˍ hkawehˉ ve nyi ma hk'a biˇ cawˬ ve awˬ hk'aw lo, teˇ geh tu la leh, 18 tcuh yaˇ hui hta‸ hpeh yuˬ leh htawnˍ hk'aw keu taˍ ve yoˬ. 19 Ya‸ hk'aˇ, tanˇ hkuinˇ htaˇ, Jawˇ mawˇ G'uiˬ sha ve mvuhˇ naw ma tcuh yaˇ teˇ g'aˇ lehˬ, htawnˍ yehˬ miˉ teˇ hpaˍ hta‸ hpaw sheˬ leh, yawˇ hui hta‸ shiˍ tawˆ-e leh k'oˆ piˇ ve, 20 Nawˬ hui k'ai loˬ. Bon yehˬ lonˉ hk'aw huˉ leh, co ha te‸ ve chi hta‸ caˉ da‸ ve tawˇ hkawˇ hk'a peu-eˬ chaw chi ma ve hta‸ maˍ piˇ-oˆ teh‸ k'oˆ piˇ ve yoˬ. 21 Tawˇ chi hta‸ g'a kaˇ htaˇ, mvuhˇ shawˉ teˇ na‸ bon yehˬ lonˉ hk'aw yawˇ hui lo‸-e leh maˍ piˇ ve yoˬ. Paw hkuˇ lonˉ leh yawˇ ve awˬ chawˇ teˇ hpaˍ laˬ leh, jehˬ da‸ shehˍ hpaˇ awˬ moˍ leh, Iˉsaˍreˍlaˆ awˬ hk'aw lo chaw mawˇ chaw kehˉ teˇ hpaˍ hta‸ kuˬ hpawnˬ peuˬ hk'aw‸ nawˉ, tcuh yaˇ hui hta‸ ca shiˍ laˬ tuˬ, bon yehˬ ma‸ yaˇ teˇ hpaˍ hta‸ htawnˍ hk'aw lo k'ai tcuh ve yoˬ. 22 Ya‸ hk'aˇ yawˇ hui htawnˍ hk'aw lo gaˬ htaˇ, tcuh yaˇ teˇ hpaˍ hta‸ maˇ mawˬ. Yawˇ hui k'o‸-e leh k'oˆ ve, 23 Htawnˍ yehˬ miˉ teˇ hpaˍ hk'a deh‸ hoˆ taˍ leh, shaw shehˍ hpaˇ teˇ hpaˍ htawˇ yehˬ miˉ awˬ baˬ lo shaw chehˇ ve hta‸ ngaˬ hui g'a mawˬ ve yoˬ. Ya‸ hk'aˇ, ngaˬ hui yehˬ miˉ hta‸ hpaw htaˇ, awˬ hk'aw lo chaw teˇ g'aˇ hta‸ ka‸ maˇ mawˬ teh‸ hto piˇ ve yoˬ. 24 Bon yehˬ lonˉ ve ma‸ poˍ leh paw hkuˇ lonˉ teˇ hpaˍ tawˇ chi hta‸ g'a kaˇ htaˇ, hk'aˬ hk'e hpeh‸ la tuˬ leh naˍ, yawˇ hui dawˇ maˇ tawˆ ve yoˬ. 25 Oˇ htaˇ, chaw teˇ g'aˇ lo‸ la leh k'oˆ ve, Htawnˍ hk'aw lo nawˬ hui haw taˍ ve chaw hui lehˬ, bon yehˬ lonˉ hk'aw lo huˉ taˍ leh chaw chi ma ve hta‸ maˍ piˇ chehˇ ve yoˬ teh‸, yawˇ hui hta‸ hto piˇ ve yoˬ. 26 Oˇ htaˇ, bon yehˬ lonˉ ve ma‸ poˍ leh yawˇ ve ma‸ yaˇ teˇ hpaˍ teˇ geh k'ai leh, tcuh yaˇ hui hta‸ ca shiˍ veu laˇ ve yoˬ. Ya‸ hk'aˇ, chaw chi ma ve yawˇ hui hta‸ haˉ pui baˬ la puiˉ-aˆ teh‸ yawˇ hui kawˆ ve pa taw, tcuh yaˇ hui hta‸ hehnˇ chaweh maˇ te. 27 Yawˇ hui hta‸ shiˍ veu laˇ leh, jehˬ da‸ shehˍ hpaˇ awˬ moˍ mehˆ g'uˇ suhˍ teh taˍ ve yoˬ. Oˇ htaˇ, paw hkuˇ lonˉ yawˇ hui hta‸ na nyi ve, 28 Awˬ meh chi hta‸ cuˇ ve awˬ hk'aw lo nawˬ hui maˇ g'a maˍ maˇ g'a hto tuˬ ngaˬ hui nawˬ hui hta‸ hehnˇ chaweh tawˇ piˇ taˍ peuˬ ve maˇ heˆ laˇ, Ya‸ hk'aˇ, nawˬ hui maˍ piˇ ve teˇ hpaˍ Yeˍruˆsaˍlehnˍ venˇ awˬ hk'aw lo nawˬ hui hk'a biˇ biˇ la piˇ peuˬ. Chaw oˇ ve hpaˇ ve awˬ suhˍ ngaˬ hui awˬ hk'oˆ gaˬ la piˇ tuˬ nawˬ hui dawˇ taˍ ve yoˬ teh‸ k'oˆ piˇ ve yoˬ. 29 Peˍtruˆ leh tcuh yaˇ hui k'aw‸ k'oˆ ve, Chaw yaˇ ve tawˇ hkawˇ a‸ kehˉ G'uiˬ sha ve tawˇ hkawˇ hta‸ ngaˬ hui g'a na yuˬ ve yoˬ. 30 Ngaˬ hui ve awˬ puˍ awˬ pi hui ve G'uiˬ sha lehˬ, nawˬ hui suhˆ hkuiˉ daw hk'oˆ lo hta‸ pehˍ ve Yeˍsuˆ hta‸ k'aw‸ te‸ tu la piˇ peuˬ. 31 Iˉsaˍreˍlaˆ chaw hui venˇ baˆ dawˇ hpfuhˆ leh venˇ baˆ hpehˇ hk'a g'a tuˬ awˬ pon, G'uiˬ sha lehˬ yawˇ hta‸ Uˉ peunˍ shehˍ hpaˇ leh Htaiˍ hk'aw‸ shehˍ hpaˇ hpeh‸ piˇ lawˬ leh, yawˇ ve la‸ sha paˉ lo yawˇ hta‸ chiˇ taˆ-e peuˬ ve yoˬ. 32 Ngaˬ hui lehˬ, awˬ lawn chi teˇ hpaˍ hta‸ shaˉ hkiˆ hkanˍ shehˍ hpaˇ hpeh‸ ve yoˬ. Yawˇ ve tawˇ hkawˇ hta‸ na yuˬ ve chaw hui hta‸ G'uiˬ sha piˇ taˍ ve da‸ ve kehˬ ve Awˬ ha hpu htawˇ, shaˉ hkiˆ hkanˍ shehˍ hpaˇ hpeh‸ ve yoˬ teh‸ k'oˆ piˇ ve yoˬ. 33 Tawˇ hkawˇ chi hta‸ g'a kaˇ htaˇ, yawˇ hui nyi ma zuhˆ jaˇ leh, tcuh yaˇ hui hta‸ tiˇ pehˍ gaˇ ve yoˬ. 34 Chaw hk'a peu-eˬ yawˆ yan ve Gaˍmaˍleˍlaˆ meh ve Hpaˍriˍsehˇ teˇ g'aˇ cawˬ ve yoˬ. Yawˇ lehˬ, awˬ liˇ tawˇ hkawˇ maˍ shehˍ hpaˇ hpeh‸ ve yoˬ. Jehˬ da‸ shehˍ hpaˇ awˬ moˍ awˬ hk'aw lo yawˇ tu leh, tcuh yaˇ hui hta‸ teˇ hkui shiˍ tawˆ-e tuˬ tawˇ piˇ ve yoˬ. 35 Oˇ htaˇ yawˇ k'oˆ ve, Iˉsaˍreˍlaˆ chaw hui-oˬ, chaw chi teˇ hpaˍ hta‸ nawˬ hui hk'aˬ hk'e te tuˬ ve shaˍ ti‸ hk'a deh‸ taˍ-o‸. 36 Awˬ lawn k'o, ponˬ laˬ htaˇ Htuˇda‸ meh ve chaw teˇ g'aˇ tu la leh, yawˇ chaw uiˍ teˇ g'aˇ hpeh‸ ve yoˬ teh‸ k'oˆ ve yoˬ. Yawˇ awˬ hk'aˇ suh k'ai ve chaw aˬ laˬ hk'e awˇ ha g'aˇ cawˬ ve yoˬ. Yawˇ hta‸ tiˇ pehˍ peuˬ hk'aw‸ nawˉ, yawˇ ve tawˇ hkawˇ hta‸ na yuˬ ve chaw hk'a peu-eˬ hpaˆ da‸ guiˇ da‸ leh luˬ k'ai mehˉ k'ai ve yoˬ. 37 Yawˇ luˬ peuˬ hk'aw‸ nawˉ, mvuhˇ miˬ yaˇ hui awˬ meh keu ve teˇ yanˇ, Yuˇda‸ meh ve Gaˍliˍlehˇ chaw teˇ g'aˇ htawˇ tawˆ la leh, mvuhˇ miˬ yaˇ teˇ hpaˍ hpaˍ hta‸ yawˇ awˬ hk'aˇ suh k'ai tuˬ beˬ yuˬ ve yoˬ. Yawˇ htawˇ, luˬ k'ai sheˆ k'ai leh, yawˇ ve tawˇ hkawˇ hta‸ na yuˬ ve chaw hk'a peu-eˬ hpaˆ da‸ guiˇ da‸ k'ai ve yoˬ. 38 Hk'e te leh, chi beu‸ chaw chi teˇ hpaˍ hta‸ te‸ chiˉ taˇ te. Yawˇ hui hk'aˇ yawˇ hui chehˇ piˇ. Yawˇ hui dawˇ ve leh yawˇ hui te ve chi teˇ hpaˍ, chaw yaˇ lo hpeh‸ la ve k'o, luˬ k'ai sheˆ k'ai tuˬ yoˬ. 39 Ya‸ hk'aˇ, G'uiˬ sha lo hpeh‸ la ve k'o, nawˬ hui te luˬ g'a tuˬ ve maˇ heˆ. Nawˬ hui lehˬ, G'uiˬ sha hta‸ heh‸ hkehnˉ ve chaw htawˇ hpeh‸ la puiˉ-aˆ mehˍ teh‸, yawˇ yawˇ hui hta‸ k'oˆ piˇ ve yoˬ. 40 Yawˇ k'oˆ ve tawˇ hta‸ yawˇ hui na yuˬ leh, tcuh yaˇ hui hta‸ k'aw‸ kuˬ yuˬ ve yoˬ. Yawˇ hui hta‸ jaw‸ peuˬ hk'aw‸ nawˉ, Yeˍsuˆ ve awˬ meh hta‸ cuˇ ve awˬ hk'aw lo shu hta‸ maˇ g'a maˍ piˇ tuˬ, yawˇ hui hta‸ tawˇ k'aw‸ piˇ peuˬ leh hpehˇ peu ve yoˬ. 41 Tcuh yaˇ hui lehˬ, awˬ meh oˇ ve hta‸ pa taw maˇ shawˍ maˇ caˆ te laˇ ve hta‸ hkanˍ keunˍ ve yoˬ teh‸ G'uiˬ sha shawˍ taˍ ve pa taw, jehˬ da‸ shehˍ hpaˇ awˬ moˍ mehˆ g'uˇ suhˍ yawˇ hui ha lehˬ ha k'a tawˆ k'ai ve yoˬ. 42 Yawˇ hui teˇ nyi le le bon yehˬ lonˉ hk'aw lo maˇ k'oˆ, yehˬ hk'aw lo maˇ k'oˆ, Yeˍsuˆ lehˬ Hkri‸ hpeh‸ ve yoˬ teh‸, hk'aˬ htaˆ ka‸ maˍ piˇ leh bon maˍ tcuhˉ taˍ ve yoˬ.

Tcuh yaˇ 6

1 Awˬ yanˇ oˇ ve awˬ hk'aw lo, awˬ la‸ g'awˇ teˇ hpaˍ maˇ la chehˇ htaˇ, Heˍlaˍsaˆ hkawˇ yaw ve Yuˇda‸ chaw teˇ hpaˍ lehˬ, Heˍbrehˇ chaw teˇ hpaˍ hta‸ ca beu ve yoˬ. Awˬ lawn k'o, teˇ nyi le le caˇ tuˬ pehˬ piˇ ve awˬ hk'aw lo, yawˇ hui ve mehˇ chawˇ ma teˇ hpaˍ lehˬ, caˇ tuˬ hk'a deh‸ maˇ g'a ve hta‸ pa taw yoˬ. 2 Oˇ htaˇ, tcuh yaˇ teˇ chi nyiˇ g'aˇ lehˬ, awˬ la‸ g'awˇ hk'a peu-eˬ hta‸ kuˬ hpawnˬ leh k'oˆ ve, Ngaˬ hui G'uiˬ sha ve tawˇ hkawˇ maˍ ve kanˉ hta‸ teh taˉ leh caˇ tuˬ dawˬ tuˬ pehˬ caˍ ve kanˉ hta‸ te ve lehˬ maˇ cawˇ. 3 Hk'e te leh, awˬ viˉ awˬ nyi teˇ hpaˍ-oˬ, nawˬ hui awˬ hk'aw lo awˬ meh da‸ ve, Awˬ ha hpu ka‸ cuˇ yiˍ maˍ yiˍ ka‸ hk'a biˇ cawˬ ve chaw suhˍ g'aˇ hta‸ nawˬ hui leuˆ yuˬ sheˍ. Yawˇ hui hta‸ kanˉ chi teˇ maˬ ngaˬ hui te tcuh tuˬ yoˬ. 4 Ngaˬ hui lehˬ, bon lawˬ leh bon hkawˇ maˍ piˇ ve kanˉ hta‸ hk'aˬ htaˆ ka‸ te tuˬ yoˬ teh‸ k'oˆ piˇ ve yoˬ. 5 Yawˇ hui k'oˆ ve hta‸ chaw awˬ moˍ lonˉ hk'a peu-eˬ nyi ma cawˇ leh chaw chi teˇ hpaˍ hta‸ leuˆ yuˬ ve yoˬ. Yonˍ ve leh da‸ ve kehˬ ve Awˬ ha hpu hk'a biˇ cawˬ ve Saˍteˍhpanˍ teˇ g'aˇ leh, Hpiˇliˇpuˆ, Pawˇhkawˍ, Niˆkaˍnawˍ, Tiˉmonˍ, Paˍmeˍnaˆ leh Yuˇda‸ awˬ liˇ yuˬ ve Anˍtiˆawˍ venˇ yaˇ Niˇkawˇlaˆ hui hta‸ leuˆ yuˬ ve yoˬ. 6 Tcuh yaˇ hui mehˆ g'uˇ suhˍ yawˇ hui hta‸ teh taˍ leh, tcuh yaˇ hui bon lawˬ peuˬ hk'aw‸ nawˉ yawˇ hui awˬ hk'oˆ la‸ sheh taˍ ve yoˬ. 7 G'uiˬ sha ve tawˇ hkawˇ awˬ g'uˇ suhˍ bvuhˬ k'ai leh, Yeˍruˆsaˍlehnˍ venˇ awˬ hk'aw lo awˬ la‸ g'awˇ maˇ maˇ k'aw‸ maˇ la ve yoˬ. Paw hkuˇ laiˉ g'a htawˇ na yuˬ leh yonˍ ve yoˬ. 8 Saˍteˍhpanˍ lehˬ, awˬ bon leh kanˇ paˆ hk'a biˇ cawˬ leh, chaw yaˇ hui mehˆ g'uˇ suhˍ uiˍ jaˇ ve anˇ tuˬ leh awˬ heˆ teˇ hpaˍ hta‸ te ve yoˬ. 9 Oˇ htaˇ, ponˬ ve chaw hui teh‸ k'oˆ ve Yuˇda‸ bon yehˬ hta‸ caˉ da‸ ve chaw hui leh, Kuˇreˍneˍ chaw, Aˍleˍsaˍduˆ chaw, Kiˇliˇkiˆ chaw leh, Aˍsiˆ mvuhˇ miˬ chaw hui tu la leh Saˍteˍhpanˍ hta‸ tawˇ g'awˬ da‸ ve yoˬ. 10 Ya‸ hk'aˇ, yawˇ yaw ve cuˇ yiˍ tawˇ hkawˇ leh Awˬ ha hpu ve tawˇ hkawˇ hta‸ yawˇ hui tawˍ da‸ maˇ hpeh‸. 11 Oˇ htaˇ, yawˇ hui chaw teˇ hpaˍ hta‸ hk'awˇ jehˬ leh chi hk'e k'oˆ tcuh ve, Chaw chi hpaˇ lehˬ, Moˉseˍ hta‸ ka‸ G'uiˬ sha hta‸ ka‸ maˇ shawˍ maˇ caˆ k'oˆ ve hta‸ ngaˬ hui g'a kaˇ peuˬ teh‸ k'oˆ tcuh ve yoˬ. 12 Yawˇ hui lehˬ mvuhˇ miˬ yaˇ teˇ hpaˍ, awˬ hoˉ chaw mawˇ teˇ hpaˍ leh, li‸ bvuh‸ paˍ teˇ hpaˍ hta‸ ca juˆ piˇ leh, Saˍteˍhpanˍ hta‸ ca hpeh yuˬ peuˬ hk'aw‸ nawˉ, jehˬ da‸ shehˍ hpaˇ awˬ moˬ mehˆ g'uˇ suhˍ yawˇ hta‸ yuˬ k'ai ve yoˬ. 13 Yawˇ hui lehˬ, heˍ ve shaˉ hkiˆ hkanˍ shehˍ hpaˇ oˇ ve teˇ hpaˍ hta‸ kuˬ teh taˍ ve yoˬ. Shaˉ hkiˆ hkanˍ shehˍ hpaˇ oˇ ve teˇ hpaˍ k'oˆ ve, Chaw chi hpaˇ lehˬ, da‸ kehˬ ve bon yehˬ lonˉ hta‸ leh awˬ liˇ tawˇ hkawˇ hta‸ hk'aˬ htaˆ ka‸ maˇ shawˍ maˇ caˆ k'oˆ chehˇ ve yoˬ. 14 Naˍzaˍrehˆ chaw Yeˍsuˆ chi teˇ g'aˇ lehˬ, bon yehˬ lonˉ chi ve hta‸ te luˬ leh, Moˉseˍ ngaˬ hui hta‸ piˇ taˉ laˇ ve awˬ liˇ teˇ hpaˍ hta‸ pa tuˬ yoˬ teh‸ yawˇ chi hk'e k'oˆ ve hta‸ ngaˬ hui g'a kaˇ ve yoˬ teh‸, yawˇ hui k'oˆ piˇ ve yoˬ. 15 Oˇ htaˇ, jehˬ da‸ shehˍ hpaˇ ve awˬ moˍ awˬ hk'aw lo hk'a chehˇ ve chaw hk'a peu-eˬ Saˍteˍhpanˍ hta‸ hk'a deh‸ nyi htaˇ, yawˇ ve mehˆ hpfuhˇ lehˬ mvuhˇ naw ma tcuh yaˇ ve mehˆ hpfuhˇ hk'a shuˍ shuˍ hpeh‸ ve hta‸ g'a mawˬ ve yoˬ.

Tcuh yaˇ 7

1 Oˇ htaˇ paw hkuˇ lonˉ k'oˆ ve, Chi hk'e yoˬ laˇ teh‸, Saˍteˍhpanˍ hta‸ na nyi ve yoˬ. 2 Saˍteˍhpanˍ k'aw‸ k'oˆ ve, Awˬ viˉ awˬ nyi leh awˬ pa hui-oˬ, a ciˉ na sheˍ. Ngaˬ hui ve awˬ pa Aˍbraˍhanˍ lehˬ, Haˍranˍ venˇ lo maˇ ca chehˇ sheˍ awˬ g'uˇ suhˍ, Meˍsoˇpoˇtaˍmiˆ mvuhˇ miˬ awˬ hk'aw lo chehˇ htaˇ, awˬ me‸ awˬ hponˇ uiˍ ve G'uiˬ sha yawˇ geh tawˆ la leh k'oˆ piˇ ve, 3 Nawˬ ve mvuhˇ miˬ leh nawˬ ve chaw ceuˬ teˇ hpaˍ lo tawˆ k'ai leh, ngaˬ nawˬ hta‸ maˍ laˇ tuˬ ve mvuhˇ miˬ lo k'ai-o teh‸, yawˇ hta‸ k'oˆ piˇ ve yoˬ. 4 Oˇ htaˇ, yawˇ Hkaˍlaˍdehˇ mvuhˇ miˬ lo tawˆ k'ai leh, Haˍranˍ venˇ lo ca chehˇ ve yoˬ. Yawˇ ve awˬ pa suh peuˬ hk'aw‸ nawˉ, G'uiˬ sha yawˇ hta‸ oˇ kaˬ lo k'aw‸ tawˆ la tcuh leh, chi beu‸ nawˬ hui chehˇ taˍ ve mvuhˇ miˬ chi awˬ hk'aw lo jiˆ laˬ tcuh ve yoˬ. 5 Mvuhˇ miˬ chi awˬ hk'aw lo yawˇ hta‸ awˬ shinˉ hkui taw k'aw hui ka‸ maˇ piˇ. Ya‸ hk'aˇ, yawˇ yaˇ maˇ cawˬ sheˍ htaˇ ka‸, mvuhˇ miˬ chi yawˇ hta‸ ka‸ yawˇ ve awˬ yaˇ awˬ duˬ hui hta‸ ka‸ piˇ tuˬ yoˬ teh‸, G'uiˬ sha yawˇ hta‸ k'oˆ piˇ taˍ ve yoˬ. 6 G'uiˬ sha chi hk'e k'oˆ ve, Aˍbraˍhanˍ ve awˬ yaˇ awˬ duˬ hui lehˬ, shu ve mvuhˇ miˬ awˬ hk'aw lo hkehˉ chaw g'a te leh, mvuhˇ miˬ yaˇ oˇ ve teˇ hpaˍ awˬ hawˉ lo yawˇ hui awˇ ha hk'aw‸ hk'a gaˬ awˬ ceˬ g'a te leh fawˉ ve mehˍ ve hta‸ g'a hkanˍ tuˬ yoˬ. 7 Yawˇ hui hta‸ awˬ ceˬ te tcuh ve chaw ceuˬ hta‸ ngaˬ suhˉ jehˬ leh ciˍ yanˍ piˇ tuˬ yoˬ. Oˇ ve awˬ hk'aw‸ nawˉ, yawˇ hui tawˆ la leh choˬ kaˬ lo ngaˬ hta‸ oˉ k'oˍ pui tuˬ yoˬ teh‸, G'uiˬ sha k'oˆ taˍ ve yoˬ. 8 Awˬ guiˬ meuˇ shoˍ ve hta‸ caˉ da‸ ve ka ti‸ shaˉ caˆ htawˇ Aˍbraˍhanˍ hta‸ piˇ ve yoˬ. Hk'e te leh, yawˇ ve yaˇ paˍ Iˉcaˆ paw la leh, hiˉ nyi teˇ nyi gaˬ htaˇ, yawˇ hta‸ awˬ guiˬ meuˇ shoˍ piˇ ve yoˬ. Iˉcaˆ lehˬ yawˇ ve yaˇ paˍ Yaˍkoˆ paw la leh, Yaˍkoˆ htawˇ yawˇ ve awˬ yaˇ teˇ hpaˍ paw la ve yoˬ. Yawˇ hui lehˬ, awˬ puˍ lonˉ teˇ chi nyiˇ g'aˇ hpeh‸ la ve yoˬ. 9 Awˬ puˍ lonˉ teˇ hpaˍ lehˬ, Yoˇseh‸ hta‸ hkawehˉ ve pa taw, Eˇjiˇtu‸ mvuhˇ miˬ lo yawˇ hta‸ hawˇ baˬ ve yoˬ. Ya‸ hk'aˇ, G'uiˬ sha yawˇ geh chehˇ leh, 10 yawˇ g'a tu‸ g'a hkanˍ ve hk'a peu-eˬ awˬ hk'aw lo yawˇ hta‸ ponˬ piˇ ve yoˬ. Eˇjiˇtu‸ hkunˉ hawˉ hkanˇ Hpaˍrawˇ mehˆ g'uˇ suhˍ Yoˇseh‸ k'ai htaˇ, G'uiˬ sha yawˇ hta‸ awˬ bon awˬ shinˉ leh cuˇ yiˍ maˍ yiˍ piˇ ve pa taw, hkunˉ hawˉ hkanˇ lehˬ, Eˇjiˇtu‸ mvuhˇ miˬ hk'a peu-eˬ leh yawˇ ve hawˉ yehˬ ka‸ Yoˇseh‸ hta‸ uˉ peunˍ tcuh ve yoˬ. 11 Oˇ htaˇ, Eˇjiˇtu‸ mvuhˇ miˬ leh Hkaˍnanˍ mvuhˇ miˬ hk'a peu-eˬ awˬ hk'aw lo meu‸ ve kaˆ ve gaˬ la leh, tu‸ jaˇ hkanˍ jaˇ ve yoˬ. Hk'e te leh, nyiˬ hui ve awˬ puˍ lonˉ teˇ hpaˍ lehˬ, caˇ tuˬ ca maˇ g'a ve yoˬ. 12 Ya‸ hk'aˇ, Eˇjiˇtu‸ mvuhˇ miˬ awˬ hk'aw lo caˬ shiˍ cawˬ ve teh‸ Yaˍkoˆ g'a kaˇ htaˇ, nyiˬ hui ve awˬ puˍ lonˉ teˇ hpaˍ hta‸ awˉ lawˉ teˇ pawˆ yawˇ peu k'ai ve yoˬ. 13 Yawˇ hui nyiˇ pawˆ teˇ pawˆ k'aw‸ k'ai htaˇ, Yoˇseh‸ lehˬ yawˇ awˬ viˉ awˬ nyi teˇ hpaˍ hta‸ yawˇ awˬ to shiˍ piˇ leh, Hpaˍrawˇ htawˇ Yoˇseh‸ ve awˬ ceuˬ awˬ hk'aˇ hta‸ g'a shiˍ ve yoˬ. 14 Oˇ htaˇ Yoˇseh‸ lehˬ, awˬ pa Yaˍkoˆ leh yawˇ ve awˬ ceuˬ awˬ hk'aˇ hk'a peu-eˬ hta‸ ca shiˍ laˬ tcuh ve yoˬ. Yawˇ hui chaw hk'a peu-eˬ suhˍ chi ngaˇ g'aˇ cawˬ ve yoˬ. 15 Yaˍkoˆ htawˇ Eˇjiˇtu‸ mvuhˇ miˬ lo k'ai leh, yawˇ awˬ to ka‸, ngaˬ hui ve awˬ puˍ lonˉ hui kaˬ oˇ kaˬ lo suh peuˬ ve yoˬ. 16 Yawˇ hui hta‸ Sheˍhkenˍ venˇ lo taˆ k'o‸-e leh, Sheˍhkenˍ venˇ yaˇ Haˍmawˍ ve awˬ yaˇ awˬ duˬ hui geh Aˍbraˍhanˍ hpu piˇ leh vuiˬ taˍ ve tuˍ hpfuh lo ca tuˍ ve yoˬ. 17 G'uiˬ sha Aˍbraˍhanˍ hta‸ k'oˆ piˇ taˍ ve awˬ yanˇ biˇ la paˇ neˇ htaˇ, Eˇjiˇtu‸ mvuhˇ miˬ awˬ hk'aw lo nyiˬ hui ve chaw ceuˬ uiˍ la maˇ la ve yoˬ. 18 Yoˇseh‸ hta‸ maˇ shiˍ ve hkunˉ hawˉ hkanˇ teˇ g'aˇ tawˆ la htaˇ hk'a gaˬ, yawˇ hui maˇ la chehˇ ve yoˬ. 19 Jawˇ mawˇ oˇ ve lehˬ, nyiˬ hui ve chaw ceuˬ hta‸ cuˇ yiˍ te leh, yaˇ ehˉ teˇ hpaˍ maˇ g'a te‸ tuˬ, nyiˬ hui ve awˬ puˍ lonˉ hui hta‸ fawˉ mehˍ leh yaˇ ehˉ teˇ hpaˍ hta‸ yuˬ baˬ tcuh ve yoˬ. 20 Oˇ htaˇ, G'uiˬ sha mehˆ g'uˇ suhˍ nyi sha jaˇ ve Moˉseˍ teˇ g'a paw la ve yoˬ. Ha pa sheh lehˇ hk'a gaˬ awˬ pa ve aˉ hk'aw lo yawˇ hta‸ hu taˍ ve yoˬ. 21 Awˬ hk'aw‸ nawˉ yawˇ hta‸ ca baˬ taˍ ve teˇ yanˇ, Hpaˍrawˇ ve yaˇ miˇ yawˇ hta‸ g'awˆ yuˬ leh yawˇ ve yaˇ hk'e shawˍ leh hu taˍ ve yoˬ. 22 Moˉseˍ lehˬ Eˇjiˇtu‸ chaw hui ve cuˇ yiˍ hk'a peu-eˬ hta‸ g'a henˇ leh, tawˇ yaw ve awˬ hk'aw lo maˇ k'oˆ, kanˉ te ve awˬ hk'aw lo maˇ k'oˆ, awˬ g'aˇ uiˍ jaˇ ve yoˬ. 23 Yawˇ a sha‸ awˇ chi hk'aw‸ gaˬ htaˇ, yawˇ ve awˬ viˉ awˬ nyi Iˉsaˍreˍlaˆ chaw ceuˬ hta‸ ca nyi tuˬ, yawˇ nyi ma hk'aw dawˇ tawˆ la ve yoˬ. 24 Yawˇ ve chaw ceuˬ teˇ g'aˇ hta‸ shu fawˉ mehˍ chehˇ ve hta‸ yawˇ g'a mawˬ htaˇ, yawˇ ve chaw hta‸ ga piˇ leh, fawˉ mehˍ chehˇ ve Eˇjiˇtu‸ chaw hta‸ te hk'aw‸ piˇ leh tiˇ pehˍ ve yoˬ. 25 G'uiˬ sha yawˇ hta‸ cuˇ leh, yawˇ ve chaw ceuˬ hta‸ htaiˍ hk'aw‸ piˇ chehˇ ve awˬ lawn awˬ viˉ awˬ nyi teˇ hpaˍ shiˍ-aw hehˉ teh‸ Moˉseˍ dawˇ ve htawˇ, yawˇ hui maˇ shiˍ. 26 Awˬ hk'aw‸ nawˉ teˇ nyi yawˇ ve chaw ceuˬ nyiˇ g'aˇ ya‸ da‸ chehˇ ve hta‸ g'a mawˬ leh, Awˬ chawˇ hui-oˬ, nawˬ huiˉ maˬ lehˬ awˬ viˉ awˬ nyi hpeh‸ ve yoˬ. Aˬ hto‸ ma pa taw teˇ g'aˇ hta‸ teˇ g'aˇ ya‸ da‸ ve le teh‸ k'oˆ leh, yawˇ huiˉ maˬ k'aw‸ cawˇ da‸ la tuˬ hka piˇ ve yoˬ. 27 Yawˇ ve awˬ chawˇ hta‸ ya‸ shehˍ hpaˇ teˇ g'aˇ k'aw‸ k'oˆ ve, Ngaˬ hui awˬ hk'oˆ hta‸ jawˇ mawˇ leh suhˉ jehˬ shehˍ hpaˇ te tuˬ, a shu nawˬ hta‸ teh taˍ ve le. 28 Aˉ nyi htaˇ Eˇjiˇtu‸ chaw hta‸ nawˬ tiˇ pehˍ ve hk'e, ngaˬ hta‸ ka‸ tiˇ pehˍ gaˇ ve laˇ teh‸ k'oˆ leh, Moˉseˍ hta‸ ca‸ baˬ ve yoˬ. 29 Tawˇ hkawˇ oˇ ve hta‸ Moˉseˍ g'a kaˇ htaˇ, yawˇ Meˇdiˍanˍ mvuhˇ miˬ lo ca hpaw chehˇ ve yoˬ. Yawˇ oˇ kaˬ lo chehˇ htaˇ, yaˇ paˍ nyiˇ g'aˇ cawˬ la ve yoˬ. 30 Awˇ chi hk'aw‸ ponˬ peuˬ hk'aw‸ nawˉ, Siˉnaˆ hk'aw awˬ paˇ lo cawˬ ve heh puiˉ hk'aw lo aˉ chuˇ buiˇ aˬ miˍ to‸ chehˇ leh, aˬ miˍ ha oˇ ve awˬ hk'aw lo mvuhˇ naw ma tcuh yaˇ teˇ g'aˇ hta‸ yawˇ g'a mawˬ ve yoˬ. 31 Moˉseˍ oˇ ve hta‸ g'a mawˬ htaˇ, yawˇ anˇ leh, hk'a deh‸ nyi tuˬ awˬ paˇ lo jiˆ k'ai ve yoˬ. 32 Jawˇ mawˇ G'uiˬ sha ve awˬ hkawˇ tawˆ la leh, Ngaˬ lehˬ nawˬ ve awˬ puˍ lonˉ hui ve G'uiˬ sha, Aˍbraˍhanˍ, Iˉcaˆ, Yaˍkoˆ hui ve G'uiˬ sha hpeh‸ ve yoˬ teh‸ k'oˆ piˇ ve yoˬ. Oˇ htaˇ Moˉseˍ kawˆ cheˆ leh nyi maˇ haˆ. 33 Jawˇ mawˇ G'uiˬ sha yawˇ hta‸ k'oˆ piˇ ve, Nawˬ ve hkuiˉ nuˆ k'ehˆ-oˆ. Awˬ lawn k'o, nawˬ huˉ taˍ ve chehˇ kuiˬ lehˬ, da‸ kehˬ ve miˬ guiˬ hpeh‸ ve yoˬ. 34 Eˇjiˇtu‸ mvuhˇ miˬ awˬ hk'aw lo ngaˬ ve chaw ceuˬ hta‸ shu fawˉ mehˍ chehˇ ve hta‸ ngaˬ hk'a deh‸ g'a mawˬ leh, yawˇ hui hk'anˇ ve awˬ hkawˇ hta‸ htawˇ ngaˬ g'a kaˇ ve yoˬ. Yawˇ hui hta‸ ponˬ piˇ tuˬ ngaˬ ya‸ la peuˬ. Chi beu‸ laˬ-o‸. Ngaˬ nawˬ hta‸ Eˇjiˇtu‸ mvuhˇ miˬ lo k'ai tcuh laˇ tuˬ yoˬ teh‸ k'oˆ piˇ ve yoˬ. 35 Moˉseˍ chi teˇ g'aˇ hta‸ yawˇ hui baˬ taˉ leh k'oˆ ve, Jawˇ mawˇ leh suhˉ jehˬ shehˍ hpaˇ te tuˬ a shu nawˬ hta‸ teh taˍ ve le. Ya‸ hk'aˇ, yawˇ jawˇ mawˇ leh htaiˍ hk'aw‸ paˍ hpeh‸ la tuˬ, aˉ chuˇ buiˇ awˬ hk'aw lo yawˇ g'a mawˬ ve mvuhˇ naw ma tcuh yaˇ hta‸ G'uiˬ sha cuˇ leh, Moˉseˍ hta‸ k'ai tcuh ve yoˬ. 36 Moˉseˍ lehˬ, Iˉsaˍreˍlaˆ chaw hui hta‸ sheh tawˆ-e ve yoˬ. Eˇjiˇtu‸ mvuhˇ miˬ awˬ hk'aw lo maˇ k'oˆ, Laˇ tsuhˇ g'uiˬ nyi awˬ hk'aw lo maˇ k'oˆ, awˇ chi hk'aw‸ hk'a gaˬ heh puiˉ hk'aw lo maˇ k'oˆ, yawˇ anˇ tuˬ leh awˬ heˆ teˇ hpaˍ hta‸ te ve yoˬ. 37 Moˉseˍ chi teˇ g'aˇ lehˬ, Nawˬ hui ve awˬ ceuˬ awˬ hk'aˇ awˬ hk'aw lo ngaˬ hta‸ shuˍ ve tcuh kaˍ paˍ teˇ g'aˇ nawˬ hui awˬ pon G'uiˬ sha peu laˇ tuˬ yoˬ teh‸, Iˉsaˍreˍlaˆ chaw hui hta‸ hto piˇ taˍ ve chaw teˇ g'aˇ hpeh‸ ve yoˬ. 38 Moˉseˍ chi teˇ g'aˇ lehˬ, Siˉnaˆ hk'aw hk'oˆ lo yawˇ hta‸ tawˇ yaw piˇ ve mvuhˇ naw ma tcuh yaˇ geh maˇ k'oˆ, ngaˬ hui awˬ puˍ lonˉ teˇ hpaˍ geh maˇ k'oˆ, heh puiˉ hk'aw lo ve awˬ moˍ awˬ hk'aw lo chehˇ ve chaw teˇ g'aˇ hpeh‸ ve yoˬ. Ngaˬ hui hta‸ pe‸ laˇ tuˬ, yawˇ lehˬ te‸ chehˇ ve tawˇ hkawˇ hta‸ ha‸ yuˬ ve yoˬ. 39 Ngaˬ hui ve awˬ puˍ lonˉ teˇ hpaˍ lehˬ, yawˇ ve tawˇ hkawˇ hta‸ maˇ na yuˬ leh yawˇ hta‸ chiˇ baˬ ve yoˬ. Yawˇ hui lehˬ Eˇjiˇtu‸ mvuhˇ miˬ lo k'o‸-e gaˇ ve nyi ma tiˉ cawˬ ve yoˬ. 40 Yawˇ hui Aˍronˍ hta‸ k'oˆ piˇ ve, Awˬ g'uˇ suhˍ lo ngaˬ hui hta‸ sheh k'ai laˇ tuˬ, ngaˬ hui awˬ pon g'uiˬ sha teˇ hpaˍ te laˇ-oˆ. Awˬ lawn k'o, ngaˬ hui hta‸ Eˇjiˇtu‸ mvuhˇ miˬ hk'aw sheh tawˆ la ve Moˉseˍ teˇ g'aˇ hk'aˬ hk'e hpeh‸ leh naˍ, ngaˬ hui maˇ shiˍ teh‸ k'oˆ piˇ ve yoˬ. 41 Awˬ nyi awˬ haˉ oˇ ve awˬ hk'aw lo yawˇ hui lehˬ, nuˇ ehˉ awˬ han shaˉ ho‸ teˇ maˬ te leh oˇ ve hta‸ tanˇ tuˬ tanˇ piˇ leh, yawˇ hui la‸ sheh te taˍ ve kanˉ hta‸ ha lehˬ chehˇ ve yoˬ. 42 Ya‸ hk'aˇ, G'uiˬ sha yawˇ hui hta‸ hpfuhˆ k'ai leh, meu‸ keu shiˍ teˇ hpaˍ hta‸ oˉ k'oˍ pui tuˬ yawˇ hui hta‸ hpehˇ piˇ ve yoˬ. Chi hk'a shuˍ shuˍ, G'uiˬ sha ve tcuh kaˍ paˍ hui ve li‸ awˬ hk'aw lo chi hk'e bvuh‸ taˍ ve, Iˉsaˍreˍlaˆ chaw teˇ yehˬ-oˬ, nawˬ hui heh puiˉ hk'aw lo awˇ chi hk'aw‸ chehˇ htaˇ, to nuˇ to shaˆ teˇ hpaˍ tiˇ tanˇ leh awˬ kaˍ awˬ nu tanˇ tuˬ teˇ hpaˍ ngaˬ hta‸ tanˇ laˇ ve laˇ. 43 Nawˬ hui oˉ k'oˍ pui tuˬ awˬ pon te taˍ ve Mawˇloˆ shaˉ ho‸ ve hpa aˉ po k'o leh, Reˍhpanˍ g'uiˬ sha ve meu‸ keu shiˍ hta‸ nawˬ hui taˍ uiˍ leh taˆ toˇ ve yoˬ. Hk'e te leh, ngaˬ nawˬ hui hta‸ Baˍbuˍlonˍ venˇ coˇ paˉ hk'a gaˬ shiˍ k'ai tuˬ yoˬ. teh‸ bvuh‸ taˍ ve yoˬ. 44 Ngaˬ hui ve awˬ puˍ lonˉ teˇ hpaˍ lehˬ, heh puiˉ hk'aw lo ka ti‸ shaˉ caˆ hpa aˉ po k'o cawˬ ve yoˬ. Moˉseˍ yawˇ awˬ hk'aˇ hta‸ g'a mawˬ ve hk'a shuˍ shuˍ g'a te ve teh‸, G'uiˬ sha k'oˆ piˇ taˍ ve hk'e yawˇ te taˍ ve hpa aˉ po k'o hpeh‸ ve yoˬ. 45 Ngaˬ hui ve awˬ puˍ lonˉ teˇ hpaˍ mehˆ g'uˇ suhˍ G'uiˬ sha lehˬ buiˇ shaˆ aˉ naˆ chaw hui hta‸ g'a‸ k'oˬ peuˬ hk'aw‸ nawˉ, ngaˬ hui ve awˬ puˍ lonˉ hui lehˬ, Yawˇsuˆ geh teˇ geh mvuhˇ miˬ chi awˬ hk'aw lo lo‸ la htaˇ, hpa aˉ po k'o oˇ ve hta‸ yuˬ lo‸ la ve yoˬ. Hpa aˉ po k'o oˇ ve lehˬ, Daˍviˆ ve awˬ co-e htaˇ hk'a gaˬ cawˬ taˍ ve yoˬ. 46 Daˍviˆ lehˬ, G'uiˬ sha nyi ma cawˇ ve chaw hpeh‸ leh Yaˍkoˆ ve G'uiˬ sha awˬ pon chehˇ kuiˬ yehˬ te tuˬ a hkaw-anˬ lawˬ ve htawˇ, 47 G'uiˬ sha awˬ pon yehˬ g'a te ve teˇ g'aˇ lehˬ Sawˉla‸monˍ yoˬ. 48 Ya‸ hk'aˇ, uiˍ jaˇ mvuh jaˇ ve G'uiˬ sha lehˬ, chaw yaˇ la‸ sheh te taˍ ve yehˬ awˬ hk'aw lo chehˇ ve maˇ heˆ. G'uiˬ sha ve tcuh kaˍ paˍ k'oˆ taˍ ve hk'e, 49 Mvuhˇ naw ma lehˬ, ngaˬ ve k'aw jaw hpeh‸ ve yoˬ. Miˬ guiˬ lehˬ ngaˬ hkui sheh taˍ kuiˬ hpeh‸ ve yoˬ. Ngaˬ awˬ pon nawˬ hui hk'aˬ hk'e ve yehˬ te tuˬ ve le. Ngaˬ jehˇ tuˬ ve chehˇ kuiˬ hk'aˬ ve teˇ kaˬ le. 50 Chi hk'a peu-eˬ hta‸ ngaˬ ve la‸ sheh te taˍ ve maˇ heˆ laˇ teh‸, Jawˇ mawˇ G'uiˬ sha k'oˆ ve yoˬ. 51 K'awˍ peˍ heh ve chaw, nyi ma leh naˍ paw awˬ guiˬ meuˇ maˇ shoˍ ve chaw teˇ hpaˍ-oˬ, nawˬ hui hk'aˬ htaˆ ka‸ da‸ ve kehˬ ve Awˬ ha hpu hta‸ tawˍ taˍ ve yoˬ. Nawˬ hui ve awˬ puˍ lonˉ teˇ hpaˍ te ve hk'e, nawˬ hui htawˇ te chehˇ ve yoˬ. 52 Nawˬ hui ve awˬ puˍ lonˉ teˇ hpaˍ maˇ fawˉ maˇ mehˍ piˇ ve, G'uiˬ sha ve tcuh kaˍ paˍ hk'aˬ ve teˇ g'aˇ cawˬ le. Hteˇ ve cawˇ ve chaw teˇ g'aˇ laˬ tuˬ ve awˬ lawn hto piˇ ve chaw hui hta‸ yawˇ hui tiˇ pehˍ ve yoˬ. Chi beu‸ htawˇ, hteˇ ve cawˇ ve chaw oˇ ve teˇ g'aˇ hta‸ nawˬ hui chiˇ a‸ leh tiˇ pehˍ peuˬ. 53 Mvuhˇ naw ma tcuh yaˇ hui ve la‸ sheh awˬ hk'aw lo awˬ liˇ tawˇ hkawˇ hta‸ nawˬ hui g'a taˍ ve ka‸, nawˬ hui maˇ na yuˬ teh‸ yawˇ hui hta‸ k'oˆ piˇ ve yoˬ. 54 Tawˇ hkawˇ chi teˇ hpaˍ hta‸ chaw chi ma ve g'a kaˇ htaˇ, yawˇ hui yawˇ hta‸ nyi ma zuhˆ jaˇ leh, ciˬ geu‸ ve yoˬ. 55 Oˇ htaˇ Saˍteˍhpanˍ lehˬ, da‸ ve kehˬ ve Awˬ ha hpu hk'a biˇ cawˬ leh, mvuhˇ naw ma lo chiˇ nyi ve teˇ yanˇ, G'uiˬ sha ve awˬ me‸ awˬ hponˇ hta‸ ka‸, G'uiˬ sha ve la‸ sha paˉ lo Yeˍsuˆ huˉ chehˇ ve hta‸ ka‸ g'a mawˬ leh k'oˆ ve, Nyi loˬ. 56 Mvuhˇ naw ma hpaw taˍ leh, G'uiˬ sha ve la‸ sha paˉ lo chaw yaˇ ve Yaˇ hpu huˉ chehˇ ve hta‸ ngaˬ mawˬ ve yoˬ teh‸ yawˇ k'oˆ ve yoˬ. 57 Oˇ htaˇ, yawˇ hui g'aˇ hte‸ kuˬ leh, a shu yawˇ ve naˍ paw tsuhˇ taˍ leh yawˇ hui hk'a peu-eˬ teˇ geh Saˍteˍhpanˍ geh g'uiˇ lo‸-e ve yoˬ. 58 Peuˬ leh, venˇ awˬ baˬ lo yawˇ hta‸ g'awˬ tawˆ-e leh, yawˇ hta‸ haˉ pui shiˍ ga hpoˆ baˬ ve yoˬ. Shaˉ hkiˆ hkanˍ shehˍ hpaˇ hui htawˇ, a shu yawˇ ve aˉ po‸ k'ehˆ leh Sawˉlu‸ meh ve chaw haˉ paˍ teˇ g'aˇ ve hkui paˇ lo teh taˍ ve yoˬ. 59 Yawˇ hui Saˍteˍhpanˍ hta‸ haˉ pui shiˍ ga baˬ chehˇ htaˇ, Saˍteˍhpanˍ bon lawˬ leh, Jawˇ mawˇ Yeˍsuˆ-oˬ, ngaˬ ve co ha hta‸ ha‸ yuˬ laˇ-oˆ teh‸ k'oˆ ve yoˬ. 60 Oˇ htaˇ yawˇ hkui tcuhˉ teh leh, Jawˇ mawˇ-oˬ, venˇ baˆ chi yawˇ hui awˬ hk'oˆ hta‸ taˇ taˍ teh‸, awˬ hkawˇ bvuhˬ chaweh kuˬ ve yoˬ. Chi hk'e k'oˆ peuˬ hk'aw‸ nawˉ, yawˇ suh ve yoˬ.

Tcuh yaˇ 8

1 Yawˇ hta‸ tiˇ pehˍ ve lehˬ, Sawˉlu‸ htawˇ nyi ma cawˇ ve yoˬ. Oˇ ve teˇ nyi hta‸ tanˬ leh Yeˍruˆsaˍlehnˍ venˇ hk'aw chehˇ ve hkri‸ yaˇ awˬ moˍ lehˬ, fawˉ mehˍ jaˇ ve hta‸ g'a hkanˍ ve pa taw, tcuh yaˇ teˇ hpaˍ maˇ heˆ k'o, yawˇ hui hk'a peu-eˬ hpaˆ da‸ leh Yuˇda‸ mvuhˇ miˬ leh Saˍmaˍriˆ mvuhˇ miˬ teˇ kaˬ le le lo hpaw-e ve yoˬ. 2 G'uiˬ sha hta‸ yawˆ yan ve chaw teˇ hpaˍ lehˬ, Saˍteˍhpanˍ hta‸ ca tuˍ piˇ leh, yawˇ hta‸ pa taw g'aˇ hte‸ paˆ hawˬ kehˇ hawˬ ve yoˬ. 3 Ya‸ hk'aˇ Sawˉlu‸ lehˬ, Hkri‸ yaˇ awˬ moˍ hta‸ te luˬ chehˇ ve yoˬ. Yawˇ teˇ yehˬ peuˬ teˇ yehˬ hk'aw lo‸-e leh, hawˉ hk'aˆ yaˇ miˇ teˇ hpaˍ hta‸ g'awˬ k'ai leh, htawnˍ hk'aw lo ca keu taˍ ve yoˬ. 4 Hk'e te leh hpaˆ da‸ k'ai ve chaw teˇ hpaˍ lehˬ, teˇ kaˬ peuˬ teˇ kaˬ lo k'ai leh ha lehˬ ve bon hkawˇ ca maˍ piˇ ve yoˬ. 5 Hpiˇliˇpuˆ htawˇ, Saˍmaˍriˆ venˇ lo k'ai leh yawˇ hui hta‸ Hkri‸ awˬ lawn maˍ piˇ ve yoˬ. 6 Yawˇ maˍ ve hta‸ g'a kaˇ leh, yawˇ te ve awˬ heˆ hta‸ g'a mawˬ htaˇ, chaw awˬ moˍ lonˉ lehˬ, nyi ma teˇ shiˍ tiˉ taˍ leh yawˇ ve tawˇ hkawˇ hta‸ na ve yoˬ. 7 Awˬ lawn k'o, neˇ cha‸ chiˆ geh ve chaw maˇ maˇ awˬ hk'aw lo, neˇ teˇ hpaˍ bvuhˬ chaweh kuˬ leh tawˆ k'ai ve yoˬ. Hkui sheh la‸ sheh suh ve chaw leh, hkui luˬ ve chaw maˇ maˇ hta‸ htawˇ gu na-e piˇ ve yoˬ. 8 Hk'e te leh, venˇ yaˇ oˇ ve teˇ hpaˍ maˇ maˇ ha lehˬ jaˇ ve yoˬ. 9 Siˉmonˍ meh ve chaw teˇ g'aˇ lehˬ, ponˬ laˬ htaˇ venˇ oˇ ve awˬ hk'aw lo faˍ te leh, Saˍmaˍriˆ chaw hui hta‸ maˇ maˇ anˇ piˇ lawˬ ve yoˬ. Ngaˬ lehˬ chaw uiˍ teˇ g'aˇ hpeh‸ ve yoˬ teh‸ yawˇ k'oˆ ve yoˬ. 10 Uiˍ ve i ve chaw hk'a peu-eˬ htawˇ, Chaw chi hpaˇ lehˬ, uiˍ jaˇ ve kanˇ paˆ teh‸ k'oˆ ve G'uiˬ sha ve kanˇ paˆ hpeh‸ ve yoˬ teh‸ yawˇ hui k'oˆ leh, yawˇ ve tawˇ hkawˇ hta‸ na ve yoˬ. 11 Chaw oˇ ve lehˬ, maw chaweh faˍ te maˍ leh, yawˇ hui hta‸ anˇ piˇ lawˬ ve pa taw, yawˇ hui yawˇ ve tawˇ hkawˇ hta‸ na ve yoˬ. 12 Ya‸ hk'aˇ, G'uiˬ sha ve mvuhˇ miˬ leh Yeˍsuˆ Hkri‸ ve awˬ meh hta‸ caˉ da‸ ve ha lehˬ ve bon hkawˇ awˬ lawn Hpiˇliˇpuˆ maˍ ve hta‸ yawˇ hui yonˍ la leh, hawˉ hk'aˆ yaˇ miˇ teˇ hpaˍ baˆtiˆsaˬ hkanˍ yuˬ ve yoˬ. 13 Siˉmonˍ yawˇ awˬ to htawˇ yonˍ la leh, baˆtiˆsaˬ hkanˍ yuˬ peuˬ hk'aw‸ nawˉ, Hpiˇliˇpuˆ awˬ hk'aˇ suh k'ai ve yoˬ. Awˬ heˆ leh uiˍ ve anˇ tuˬ teˇ hpaˍ hta‸ g'a mawˬ htaˇ, yawˇ anˇ jaˇ ve yoˬ. 14 Saˍmaˍriˆ chaw hui G'uiˬ sha ve tawˇ hkawˇ hta‸ ha‸ yuˬ ve awˬ lawn Yeˍruˆsaˍlehnˍ venˇ hk'aw chehˇ ve tcuh yaˇ teˇ hpaˍ g'a kaˇ htaˇ, yawˇ hui Peˍtruˆ leh Yoˇhanˬ hta‸ oˇ kaˬ lo k'ai tcuh ve yoˬ. 15 Yawˇ huiˉ maˬ oˇ kaˬ lo gaˬ htaˇ, chaw oˇ ve teˇ hpaˍ da‸ ve kehˬ ve Awˬ ha hpu g'a tuˬ, yawˇ hui awˬ pon bon lawˬ piˇ ve yoˬ. 16 Awˬ lawn k'o, yawˇ hui awˬ hk'aw lo chaw teˇ g'aˇ awˬ hk'oˆ hta‸ ka‸, da‸ ve kehˬ ve Awˬ ha hpu maˇ ya‸ la sheˍ. Yawˇ hui lehˬ, Jawˇ mawˇ Yeˍsuˆ ve awˬ meh awˬ hk'aw lo baˆtiˆsaˬ hkanˍ ve ceh tiˉ sheˍ. 17 Oˇ htaˇ, tcuh yaˇ oˇ ve nyiˇ g'aˇ yawˇ hui awˬ hk'oˆ hta‸ la‸ sheh taˍ leh, yawˇ hui da‸ ve kehˬ ve awˬ ha hpu g'a ve yoˬ. 18 Tcuh yaˇ oˇ ve nyiˇ g'aˇ shu awˬ hk'oˆ hta‸ la‸ sheh taˍ ve pa taw da‸ ve kehˬ ve Awˬ ha hpu g'a ve hta‸ Siˉmonˍ g'a mawˬ htaˇ, yawˇ hpu yuˬ veu laˇ leh k'oˆ ve, 19 Hk'aˬ ve teˇ g'aˇ awˬ hk'oˆ hta‸ maˇ k'oˆ, ngaˬ la‸ sheh taˍ ve teˇ yanˇ yawˇ da‸ ve kehˬ ve Awˬ ha hpu g'a tuˬ, kanˇ paˆ chi ngaˬ hta‸ htawˇ pe‸ laˇ-oˆ teh‸ lawˬ ve yoˬ. 20 Peˍtruˆ yawˇ hta‸ k'aw‸ k'oˆ piˇ ve, G'uiˬ sha ve la‸ shawnˍ hta‸ hpu piˇ leh g'a tuˬ teh‸ nawˬ dawˇ ve pa taw, nawˬ ve hpu lehˬ nawˬ geh hk'a geh luˬ k'ai piˇ-oˆ. 21 G'uiˬ sha mehˆ g'uˇ suhˍ nawˬ ve nyi ma maˇ hteˇ ve pa taw, kanˉ chi hta‸ nawˬ a ciˉ ka‸ maˇ caˉ da‸. 22 Hk'e te leh, nawˬ awˬ hk'aw lo haiˬ ve chi hta‸ dawˇ hpfuhˆ loˬ. Hpeh‸ ve k'o, nawˬ ve nyi ma dawˇ hk'aˇ hta‸ Jawˇ mawˇ G'uiˬ sha hpehˇ laˇ tuˬ yawˇ hta‸ lawˬ hkawˉ-oˆ. 23 Awˬ lawn k'o, nawˬ awˬ hk'aw lo hk'aˇ ve awˬ taw‸ ma cawˬ leh, venˇ baˆ nawˬ hta‸ hpeh tiˍ taˍ ve hta‸ ngaˬ g'a mawˬ ve yoˬ teh‸, yawˇ hta‸ k'oˆ piˇ ve yoˬ. 24 Oˇ htaˇ Siˉmonˍ k'aw‸ k'oˆ piˇ ve, Nawˬ huiˉ maˬ hk'a k'oˆ ve teˇ hpaˍ, teˇ ceuˬ ka‸ ngaˬ awˬ hk'oˆ lo maˇ g'a gaˬ la tuˬ, ngaˬ awˬ pon Jawˇ mawˇ G'uiˬ sha geh lawˬ hkawˉ laˇ-oˆ teh‸ k'oˆ ve yoˬ. 25 Hk'e te leh yawˇ huiˉ maˬ shaˉ hkiˆ hkanˍ leh, Jawˇ mawˇ G'uiˬ sha ve tawˇ hkawˇ maˍ piˇ peuˬ hk'aw‸ nawˉ, Yeˍruˆsaˍlehnˍ venˇ lo k'aw‸ k'o‸-e ve yoˬ. K'o‸-e chehˇ htaˇ, Saˍmaˍriˆ hk'aˆ laiˉ hk'aˆ awˬ hk'aw lo ha lehˬ ve bon hkawˇ maˍ piˇ ve yoˬ. 26 Oˇ htaˇ, Jawˇ mawˇ G'uiˬ sha ve mvuhˇ naw ma tcuh yaˇ Hpiˇliˇpuˆ hta‸ k'oˆ piˇ ve, Nawˬ tu leh, awˬ hawˉ hpawˇ lo k'ai-o. Yeˍruˆsaˍlehnˍ venˇ te leh Gaˍsaˍ lo k'ai ve ya‸ k'aw hta‸ k'ai-o teh‸ k'oˆ piˇ ve yoˬ. Ya‸ k'aw oˇ ve lehˬ, shehˇ de hk'aw k'ai ve ya‸ k'aw yoˬ. 27 Hk'e te leh, yawˇ tu leh k'ai ve yoˬ. Oˇ htaˇ, Ehˇtaˍyoˇpiˆ mvuhˇ miˬ hta‸ uˉ peunˍ ve, Kanˍdaˍkeˍ meh ve nanˇ hawˉ hkanˇ ma awˬ hawˉ lo jawˇ mawˇ te ve Ehˇtaˍyoˇpiˆ chaw teˇ g'aˇ lehˬ, Yeˍruˆsaˍlehnˍ venˇ lo oˉ k'oˍ ca pui k'aw‸ la ve yoˬ. Yawˇ lehˬ, nanˇ hawˉ hkanˇ ma ve hpu shi mawˇ jeˬ hk'a peu-eˬ hta‸ ha‸ shaˉ shehˍ hpaˇ lonˉ teˇ g'aˇ hpeh‸ ve yoˬ. 28 Yawˇ k'o‸-e chehˇ htaˇ, yawˇ ve iˉ mvuhˇ lawˬ awˬ hk'aw lo mui leh, tcuh kaˍ paˍ Iˉsaˍyaˆ ve li‸ hta‸ g'aw chehˇ ve yoˬ. 29 Oˇ htaˇ, Hpiˇliˇpuˆ hta‸ Awˬ ha hpu k'oˆ piˇ ve, Iˉ mvuhˇ lawˬ oˇ ve geh teˇ geh k'ai-o teh‸ k'oˆ piˇ ve yoˬ. 30 Hk'e te leh, Hpiˇliˇpuˆ g'uiˇ k'ai leh, tcuh kaˍ paˍ Iˉsaˍyaˆ ve li‸ hk'aw lo jawˇ mawˇ oˇ ve g'aw chehˇ ve hta‸ yawˇ g'a kaˇ htaˇ, Nawˬ g'aw chehˇ ve awˬ lawn chi hta‸ nawˬ shiˍ-aˬ laˇ teh‸ yawˇ hta‸ na nyi ve yoˬ. 31 Yawˇ k'aw‸ k'oˆ ve, Shu ngaˬ hta‸ tcuhˉ kuiˬ maˇ k'aoˍ maˍ laˇ ve k'o, hk'aˬ hk'e te shiˍ hpeh‸ tuˬ le teh‸ k'oˆ peuˬ leh, yawˇ geh teˇ geh taˆ mui la tuˬ yawˇ Hpiˇliˇpuˆ hta‸ kuˬ ve yoˬ. 32 Yawˇ g'aw chehˇ ve Li‸ hpu lehˬ chi teˇ tawn yoˬ. Tiˇ pehˍ tuˬ awˬ pon yawˬ hk'a shuˍ shuˍ yawˇ hta‸ sheh k'ai ve yoˬ. Yawˬ mvuh nuˆ shehˍ hpaˇ mehˆ g'uˇ suhˍ yawˬ ehˉ ta‸ iˉ chehˇ ve hk'e, yawˇ ka‸ yawˇ ve maw‸ k'aw maˇ ngaˉ leh ta‸ iˉ chehˇ taˍ ve yoˬ. 33 Nyiˉ ya‸ ve hta‸ g'a hkanˍ htaˇ, shu yawˇ hta‸ maˇ hteˇ maˇ cawˇ ve awˬ hk'aw lo suhˉ jehˬ ve yoˬ. Yawˇ ve awˬ ceuˬ awˬ hk'aˇ hta‸ a shu k'aoˍ hpeh‸ tuˬ le. Awˬ lawn k'o, miˬ guiˬ hk'oˆ lo yawˇ ve a sha‸ hta‸ yuˬ baˬ ve yoˬ, teh‸ bvuh‸ taˍ ve yoˬ. 34 A ma‸ lonˉ lehˬ Hpiˇliˇpuˆ hta‸ na nyi ve, G'uiˬ sha ve tcuh kaˍ paˍ chi teˇ g'aˇ a shu awˬ lawn k'oˆ ve le. Yawˇ awˬ to awˬ lawn k'oˆ ve laˇ. Maˇ heˆ k'o, awˬ kaˍ awˬ nu teˇ g'aˇ awˬ lawn k'oˆ ve laˇ, ngaˬ nawˬ hta‸ a ciˉ na nyi gaˇ ve yoˬ teh‸ k'oˆ piˇ ve yoˬ. 35 Oˇ htaˇ, Hpiˇliˇpuˆ maw‸ k'aw ngaˉ leh, Li‸ hpu chi teˇ tawn hta‸ tanˬ leh, Yeˍsuˆ ve awˬ lawn ha lehˬ ve bon hkawˇ yawˇ hta‸ k'aoˍ maˍ piˇ ve yoˬ. 36 Yawˇ hui ya‸ k'aw k'aˉ lo k'ai chehˇ htaˇ, iˉ kaˆ cawˬ kuiˬ teˇ kaˬ lo gaˬ la leh, a ma‸ lonˉ k'oˆ ve, Nyi loˬ, choˬ kaˬ iˉ kaˆ cawˬ ve yoˬ. Ngaˬ baˆtiˆsaˬ maˇ g'a hkanˍ tuˬ, aˬ hto‸ ma tawˍ taˍ tuˬ cawˬ le teh‸ k'oˇ piˇ ve yoˬ. 38 Oˇ htaˇ, yawˇ iˉ mvuhˇ lawˬ hta‸ jehˇ tcuh leh, yawˇ huiˉ maˬ nyiˇ g'aˇ g'aˇ iˉ kaˆ hk'aw lo ya‸-e leh, Hpiˇliˇpuˆ lehˬ a ma‸ lonˉ hta‸ baˆtiˆsaˬ piˇ ve yoˬ. 39 Yawˇ huiˉ maˬ iˉ kaˆ hk'aw lo tawˆ la htaˇ, Jawˇ mawˇ G'uiˬ sha ve Awˬ ha hpu Hpiˇliˇpuˆ hta‸ teˇ cawˬ haˉ yuˬ k'ai leh, a ma‸ lonˉ yawˇ hta‸ maˇ k'aw‸ mawˬ. A ma‸ lonˉ lehˬ, ha lehˬ ha k'a awˬ g'uˇ suhˍ k'aw‸ k'ai ve yoˬ. 40 Oˇ htaˇ, Aˍcoˆ venˇ awˬ hk'aw lo Hpiˇliˇpuˆ hta‸ shu g'a mawˬ ve yoˬ. Yawˇ awˬ g'uˇ suhˍ k'ai leh, Kehˉsaˍriˆ venˇ hk'a gaˬ, venˇ hk'aˆ hk'a peu-eˬ awˬ hk'aw lo ha lehˬ ve bon hkawˇ maˍ piˇ ve yoˬ.

Tcuh yaˇ 9

1 Sawˉlu‸ lehˬ, Jawˇ mawˇ Yeˍsuˆ ve awˬ la‸ g'awˇ hui hta‸ tiˇ pehˍ-a teh‸ tiˉ k'oˆ leh, g'aˇ hte‸ caˬ chehˇ ve yoˬ. 2 Ya‸ k'aw awˬ liˇ chi hta‸ lo‸-e ve chaw, hawˉ hk'aˆ maˇ k'oˆ, yaˇ miˇ maˇ k'oˆ, hk'a mawˬ ve chaw teˇ hpaˍ hta‸ yawˇ hpeh yuˬ leh Yeˍruˆsaˍlehnˍ venˇ lo sheh veu laˇ tuˬ, Daˍmaˍsehˆ venˇ lo cawˬ ve bon yehˬ teˇ hpaˍ hta‸ piˇ tuˬ awˬ pon, yawˇ paw hkuˇ lonˉ geh k'ai leh li‸ lawˬ ve yoˬ. 3 Yawˇ Daˍmaˍsehˆ venˇ lo k'ai chehˇ htaˇ, venˇ awˬ paˇ lo gaˬ la leh, mvuhˇ naw ma lo awˬ g'euˆ teˇ cawˬ haˉ yawˇ hta‸ hk'a caw zuhˇ hti la ve yoˬ. 4 Yawˇ miˬ chaˇ hk'oˆ lo paiˍ leh, Sawˉlu‸-oˬ, Sawˉlu‸-oˬ, aˬ hto‸ ma pa taw nawˬ ngaˬ hta‸ fawˉ mehˍ laˇ ve le teh‸, yawˇ hta‸ k'oˆ laˇ ve awˬ hkawˇ g'a kaˇ ve yoˬ. 5 Jawˇ mawˇ-oˬ, nawˬ a shu le teh‸ yawˇ na nyi htaˇ, Yeˍsuˆ k'aw‸ k'oˆ ve, Ngaˬ lehˬ nawˬ fawˉ mehˍ laˇ chehˇ ve Yeˍsuˆ yoˬ. 6 Tu leh venˇ hk'aw lo lo‸-e loˬ. Nawˬ hk'aˬ hk'e g'a te tuˬ ve hta‸ hto laˇ tuˬ yoˬ teh‸ k'oˆ piˇ ve yoˬ. 7 Yawˇ geh k'ai chehˇ ve chaw teˇ hpaˍ lehˬ, awˬ hkawˇ oˇ ve hta‸ g'a kaˇ htawˇ, teˇ g'aˇ hta‸ ka‸ maˇ mawˬ ve pa taw, yawˇ hui ka keh leh huˉ chehˇ taˍ ve yoˬ. 8 Sawˉlu‸ tu la leh, mehˆ ngaˉ nyi htawˇ yawˇ mehˆ maˇ mawˬ. Hk'e te leh, yawˇ hui yawˇ ve la‸ sheh hta‸ yuˬ leh, Daˍmaˍsehˆ venˇ lo yawˇ hta‸ sheh k'ai ve yoˬ. 9 Shehˆ nyi hk'a gaˬ yawˇ mehˆ maˇ mawˬ leh, maˇ caˇ maˇ dawˬ te chehˇ ve yoˬ. 10 Oˇ htaˇ, Daˍmaˍsehˆ venˇ awˬ hk'aw lo Aˍnaˍniˆ meh ve awˬ la‸ g'awˇ teˇ g'aˇ cawˬ ve yoˬ. Jawˇ mawˇ Yeˍsuˆ lehˬ, awˬ ha awˬ hk'aw lo, Aˍnaˍniˆ-oˬ teh‸ yawˇ hta‸ kuˬ htaˇ, Jawˇ mawˇ-oˬ, ngaˬ choˬ kaˬ chehˇ taˍ ve yoˬ teh‸, yawˇ k'aw‸ k'oˆ piˇ ve yoˬ. 11 Jawˇ mawˇ Yeˍsuˆ yawˇ hta‸ k'aw‸ k'oˆ piˇ ve, Tu leh, Hteˇ ve ya‸ k'aw teh‸ k'oˆ ve teˇ caˆ lo k'ai-o. Yuˇda‸ ve aˉ hk'aw lo Taˍsuˆ venˇ yaˇ Sawˉlu‸ hta‸ ca nyi-o. Awˬ lawn k'o, yawˇ bon lawˬ chehˇ ve yoˬ. 12 Yawˇ mehˆ k'aw‸ mawˬ la tuˬ, Aˍnaˍniˆ meh ve chaw teˇ g'aˇ lo‸ la leh, yawˇ awˬ hk'oˆ la‸ sheh taˍ ve hta‸ g'a mawˬ peuˬ teh‸, Yeˍsuˆ Aˍnaˍniˆ hta‸ k'oˆ piˇ ve yoˬ. 13 Ya‸ hk'aˇ Aˍnaˍniˆ k'aw‸ k'oˆ ve, Jawˇ mawˇ-oˬ, chaw oˇ ve lehˬ Yeˍruˆsaˍlehnˍ venˇ hk'aw lo nawˬ ve da‸ kehˬ ve chaw hui hta‸ haiˬ ve hk'aˬ ma te ve awˬ lawn chaw laiˉ g'aˇ hto laˇ ve hta‸ ngaˬ g'a kaˇ peuˬ. 14 Choˬ kaˬ lo htawˇ, nawˬ ve awˬ meh hta‸ hk'a kuˬ ve chaw hk'a peu-eˬ hta‸ hpeh yuˬ tuˬ, paw hkuˇ lonˉ hui geh yawˇ a hkaw-anˬ g'a peuˬ teh‸, Aˍnaˍniˆ k'aw‸ k'oˆ piˇ ve yoˬ. 15 Ya‸ hk'aˇ, Jawˇ mawˇ Yeˍsuˆ yawˇ hta‸ k'aw‸ k'oˆ piˇ ve, K'ai loˬ. Awˬ lawn k'o, chaw oˇ ve lehˬ, buiˇ shaˆ aˉ naˆ chaw leh hkunˉ hawˉ hkanˇ hui mehˆ g'uˇ suhˍ maˇ k'oˆ, Iˉsaˍreˍlaˆ chaw hui mehˆ g'uˇ suhˍ maˇ k'oˆ, ngaˬ ve awˬ meh hta‸ pfuhˇ k'ai tuˬ, yawˇ lehˬ ngaˬ leuˆ yuˬ taˍ ve awˬ hk'eun hpeh‸ ve yoˬ. 16 Awˬ lawn k'o, ngaˬ ve awˬ meh hta‸ pa taw yawˇ hk'aˬ ma g'a tu‸ g'a hkanˍ tuˬ ve ngaˬ yawˇ hta‸ maw piˇ tuˬ yoˬ teh‸ k'oˆ piˇ ve yoˬ. 17 Hk'e te leh, Aˍnaˍniˆ k'ai leh yehˬ oˇ ve awˬ hk'aw lo lo‸-e ve yoˬ. Oˇ htaˇ, yawˇ Sawˉlu‸ awˬ hk'oˆ la‸ sheh taˍ leh k'oˆ ve, Awˬ nyi paˍ Sawˉlu‸-oˬ, nawˬ mehˆ k'aw‸ mawˬ la leh da‸ ve kehˬ ve Awˬ ha hpu biˇ la tuˬ, ya‸ k'aw k'aˉ lo nawˬ laˬ ve teˇ yanˇ, nawˬ hta‸ yawˇ awˬ to maw laˇ ve Jawˇ mawˇ Yeˍsuˆ lehˬ, ngaˬ hta‸ peu laˇ ve yoˬ teh‸ k'oˆ piˇ ve yoˬ. 18 Teˇ cawˬ haˉ Sawˉlu‸ ve mehˆ shiˍ awˬ hk'aw lo awˬ shehˆ hta‸ shuˍ ve awˬ ceuˬ ce la leh, yawˇ mehˆ k'aw‸ mawˬ la ve yoˬ. Oˇ htaˇ, yawˇ tu leh baˆtiˆsaˬ hkanˍ yuˬ peuˬ hk'aw‸ nawˉ, caˇ tuˬ caˇ leh awˬ g'aˇ k'aw‸ cawˬ la ve yoˬ. 19 Daˍmaˍsehˆ venˇ awˬ hk'aw lo awˬ la‸ g'awˇ hui geh yawˇ teˇ tcuhˉ teˇ jaw chehˇ leh, 20 Yeˍsuˆ lehˬ G'uiˬ sha ve Yaˇ hpu yoˬ teh‸, teˇ cawˬ haˉ bon yehˬ teˇ hpaˍ awˬ hk'aw lo yawˇ tanˬ maˍ piˇ ve yoˬ. 21 G'a kaˇ ve chaw hk'a peu-eˬ anˇ leh k'oˆ ve, Chi hpaˇ lehˬ, Yeˍruˆsaˍlehnˍ venˇ awˬ hk'aw lo awˬ meh oˇ ve hta‸ hk'a kuˬ ve chaw hui hta‸ te luˬ shehˍ hpaˇ hpeh‸ ve maˇ heˆ laˇ. Choˬ kaˬ lo htawˇ, oˇ hk'e ve chaw teˇ hpaˍ hta‸ hpeh yuˬ leh paw hkuˇ lonˉ hui geh sheh k'ai tuˬ yawˇ gaˬ la peuˬ teh‸ yawˇ hui k'oˆ da‸ ve yoˬ. 22 Sawˉlu‸ lehˬ, co ha hpawˇ shaˬ te shaˬ awˬ g'aˇ uiˍ la leh, Yeˍsuˆ lehˬ Hkri‸ hpeh‸ tehˬ ve yoˬ teh‸ hk'a deh‸ maˍ piˇ ve pa taw, Daˍmaˍsehˆ venˇ hk'aw chehˇ ve Yuˇda‸ chaw teˇ hpaˍ hk'aˬ hk'e k'aw‸ k'oˆ tuˬ, yawˇ hui a ciˉ ka‸ dawˇ maˇ tawˆ ve yoˬ. 23 Awˬ nyi awˬ haˉ hk'a cawˇ cawˇ maw la peuˬ htaˇ, Sawˉlu‸ hta‸ tiˇ pehˍ tuˬ Yuˇda‸ chaw hui jehˬ da‸ ve yoˬ. 24 Ya‸ hk'aˇ, yawˇ hui jehˬ da‸ ve hta‸ Sawˉlu‸ g'a shiˍ ve yoˬ. Yawˇ hta‸ tiˇ pehˍ tuˬ, venˇ yehˬ miˉ teˇ hpaˍ hta‸ tanˇ hkuinˇ tanˇ vanˇ yawˇ hui shaw chehˇ ve pa taw, 25 yawˇ ve awˬ la‸ g'awˇ teˇ hpaˍ tanˇ hkuinˇ htaˇ Sawˉlu‸ hta‸ shiˍ veu leh, hk'aˉ puˍ lu hk'aw keu leh lanˇ venˇ awˬ baˬ lo yawˇ hta‸ hpehˇ ya‸-e ve yoˬ. 26 Yawˇ Yeˍruˆsaˍlehnˍ venˇ lo gaˬ la htaˇ, awˬ la‸ g'awˇ hui hta‸ ca pawnˇ da‸ tuˬ yawˇ te ve htawˇ, yawˇ awˬ la‸ g'awˇ hpeh‸ la peuˬ ve hta‸ yawˇ hui maˇ yonˍ ve pa taw, yawˇ hui hk'a peu-eˬ yawˇ hta‸ kawˆ ve yoˬ. 27 Ya‸ hk'aˇ Baˍnaˍbaˆ yawˇ hta‸ shiˍ veu leh, tcuh yaˇ hui geh k'ai ve yoˬ. Sawˉlu‸ yawˇ ya‸ k'aw k'aˉ lo Jawˇ mawˇ Yeˍsuˆ hta‸ g'a mawˬ leh, Jawˇ mawˇ Yeˍsuˆ yawˇ hta‸ tawˇ yaw laˇ ve awˬ lawn maˇ k'oˆ, Daˍmaˍsehˆ venˇ hk'aw lo Yeˍsuˆ ve awˬ meh hta‸ cuˇ leh nyi ma ha‸ hanˉ ve awˬ hk'aw lo yawˇ bon maˍ piˇ ve awˬ lawn maˇ k'oˆ, Baˍnaˍbaˆ yawˇ hui hta‸ k'aoˍ maˍ piˇ ve yoˬ. 28 Hk'e te leh, Sawˉlu‸ lehˬ Yeˍruˆsaˍlehnˍ venˇ awˬ hk'aw lo yawˇ hui geh chehˇ leh, tawˆ tawˆ lo‸ lo‸ te chehˇ ve yoˬ. Jawˇ mawˇ Yeˍsuˆ ve awˬ meh hta‸ cuˇ leh, nyi ma ha‸ hanˉ ve awˬ hk'aw lo yawˇ bon maˍ ve yoˬ. 29 Heˍlaˍsaˆ hkawˇ yaw ve Yuˇda‸ chaw teˇ hpaˍ geh yawˇ na‸ uˉ te da‸ leh tawˇ g'awˬ da‸ ve yoˬ. Oˇ htaˇ, yawˇ hui lehˬ yawˇ hta‸ tiˇ pehˍ tuˬ te chehˇ ve yoˬ. 30 Awˬ lawn oˇ ve hta‸ awˬ viˉ awˬ nyi teˇ hpaˍ g'a shiˍ htaˇ, yawˇ hta‸ Kehˉsaˍriˆ venˇ lo shiˍ k'ai leh, Taˍsuˆ venˇ hk'a gaˬ yawˇ hta‸ k'o‸-e tcuh ve yoˬ. 31 Oˇ hta‸, Yuˇda‸ mvuhˇ miˬ, Gaˍliˍlehˇ mvuhˇ miˬ leh Saˍmaˍriˆ mvuhˇ miˬ teˇ kaˬ le le lo chehˇ ve Hkri‸ yaˇ awˬ moˍ lehˬ, dawˇ sha gaˇ sha cawˬ leh, uiˍ la mvuh la ve yoˬ. Jawˇ mawˇ G'uiˬ sha hta‸ kawˆ ve awˬ hk'aw lo maˇ k'oˆ, da‸ ve kehˬ ve Awˬ ha hpu dawˇ sha piˇ ve awˬ hk'aw lo maˇ k'oˆ, yawˇ hui toˇ k'ai leh maˇ la chehˇ ve yoˬ. 32 Oˇ htaˇ Peˍtruˆ lehˬ, yawˇ hui ve chehˇ kuiˬ teˇ kaˬ peuˬ teˇ kaˬ lo k'ai leh, Luˇdaˆ venˇ hk'aw lo chehˇ ve Hkri‸ yaˇ hui geh gaˬ ve yoˬ. 33 Oˇ kaˬ lo hkui sheh la‸ sheh suh leh, hiˉ hk'aw‸ hk'a gaˬ zuh‸ chehˇ ve Ehˉneˍ meh ve chaw teˇ g'aˇ hta‸ yawˇ g'a mawˬ ve yoˬ. 34 Peˍtruˆ yawˇ hta‸ k'oˆ piˇ ve, Ehˉneˍ-oˬ, Yeˍsuˆ Hkri‸ nawˬ hta‸ gu na-e laˇ ve yoˬ. Tu leh nawˬ ve zuh‸ hpui hta‸ gu teh-o teh‸, yawˇ hta‸ k'oˆ piˇ htaˇ, teˇ cawˬ haˉ yawˇ tu la ve yoˬ. 35 Luˇdaˆ venˇ leh Shaˍronˍ mvuhˇ miˬ awˬ hk'aw chehˇ ve chaw hk'a peu-eˬ na-e la peuˬ ve chaw oˇ ve hta‸ g'a mawˬ leh, Jawˇ mawˇ Yeˍsuˆ geh hpfuhˆ k'aw‸ la ve yoˬ. 36 Yuˇpeˍ venˇ awˬ hk'aw lo Taˍbiˉtaˆ meh ve awˬ la‸ g'awˇ ma teˇ g'aˇ cawˬ ve yoˬ. Awˬ meh oˇ ve Heˍlaˍsaˆ hkawˇ k'o, Dawˍkaˍ yoˬ. Yaˇ miˇ oˇ ve lehˬ, da‸ ve kanˉ teˇ hpaˍ leh, shu hta‸ ha k'aˉ leh tanˇ piˇ ve teˇ hpaˍ hk'a biˇ cawˬ ve yoˬ. 37 Awˬ yanˇ oˇ ve awˬ hk'aw lo yawˇ naˬ leh suh ve yoˬ. Yawˇ hui yawˇ hta‸ iˉ kaˆ tsuhˇ piˇ peuˬ leh, bawehˇ awˬ hta‸ teˇ htai‸ lo yawˇ hta‸ teh taˍ ve yoˬ. 38 Luˇdaˆ venˇ lehˬ Yuˇpeˍ venˇ hta‸ neˇ leh, Peˍtruˆ Luˇdaˆ venˇ awˬ hk'aw lo chehˇ taˍ ve awˬ lawn hta‸ awˬ la‸ g'awˇ hui g'a kaˇ htaˇ, yawˇ hui chaw nyiˇ g'aˇ hta‸ k'ai tcuh leh, Awˬ yanˇ maˇ jiˆ leh ngaˬ hui geh haˆ haˆ laˬ-o‸ teh‸, yawˇ huiˉ maˬ yawˇ hta‸ lawˬ hkawˉ ve yoˬ. 39 Hk'e te leh, Peˍtruˆ tu leh yawˇ huiˉ maˬ geh k'ai ve yoˬ. Oˇ kaˬ lo gaˬ htaˇ, bawehˇ awˬ hta‸ teˇ htai‸ lo yawˇ hta‸ shiˍ k'ai ve yoˬ. Mehˇ chawˇ ma hk'a peu-eˬ Peˍtruˆ awˬ paˇ huˉ taˍ leh hawˬ leh, Dawˍkaˍ yawˇ hui geh chehˇ htaˇ, tawˉ taˍ ve aˉ po‸ veu‸ k'aˇ teˇ hpaˍ yawˇ hta‸ maˍ piˇ ve yoˬ. 40 Peˍtruˆ lehˬ, yawˇ hui hk'a peu-eˬ hta‸ tawˆ k'ai tcuh peuˬ hk'aw‸ nawˉ, yawˇ hkui tcuhˉ teh leh bon lawˬ ve yoˬ. Peuˬ leh, awˬ suh ku hpawˇ yawˇ hpfuhˆ leh, Taˍbiˉtaˆ-oˬ, tu-o teh‸ k'oˆ ve yoˬ. Yaˇ miˇ oˇ ve mehˆ hpaw leh Peˍtruˆ hta‸ mawˬ htaˇ, tu mui ve yoˬ. 41 Oˇ htaˇ, Peˍtruˆ la‸ sheh che leh, yawˇ hta‸ g'awˬ tu piˇ peuˬ hk'aw‸ nawˉ, Hkri‸ yaˇ hui leh mehˇ chawˇ ma teˇ hpaˍ hta‸ kuˬ yuˬ leh, te‸ la peuˬ ve yaˇ miˇ oˇ ve yawˇ hui hta‸ k'aw‸ a‸ piˇ ve yoˬ. 42 Awˬ lawn chi, Yuˇpeˍ venˇ teˇ kaˬ le le awˬ hk'aw lo bvuhˬ k'ai leh, chaw maˇ maˇ Jawˇ mawˇ Yeˍsuˆ hta‸ yonˍ la ve yoˬ. 43 Peˍtruˆ lehˬ, Yuˇpeˍ venˇ awˬ hk'aw lo Siˉmonˍ meh ve shaˍ guiˬ te paˍ geh awˬ nyi awˬ haˉ a ciˉ maw chaweh chehˇ ve yoˬ.

Tcuh yaˇ 10

1 Kehˉsaˍriˆ venˇ awˬ hk'aw lo, Kawˍneˍliˆ meh ve ma‸ poˍ teˇ g'aˇ cawˬ ve yoˬ. Yawˇ lehˬ, Iˉtaˍliˍ ma‸ moˍ teˇ ta‸ hta‸ caˉ da‸ ve yoˬ. 2 Yawˇ leh yawˇ ve yehˬ yaˇ k'a yaˇ hk'a peu-eˬ G'uiˬ sha hta‸ kawˆ puiˉ leh yawˆ yan puiˉ ve chaw hpeh‸ ve yoˬ. Yawˇ shu hta‸ ha k'aˉ ve awˬ hk'aw lo maˇ maˇ tanˇ piˇ leh, G'uiˬ sha geh hk'aˬ htaˆ ka‸ bon lawˬ tcuhˉ taˍ ve yoˬ. 3 Teˇ nyi htaˇ, mvuhˇ hpeu‸ hpawˇ aˬ laˬ hk'e shehˆ naˍ riˍ teˇ yanˇ, awˬ ha awˬ hk'aw lo G'uiˬ sha ve mvuhˇ naw ma tcuh yaˇ teˇ g'aˇ yawˇ geh laˬ ve hta‸ hk'a tawˍ lehˆ g'a mawˬ ve yoˬ. Mvuhˇ naw ma tcuh yaˇ oˇ ve lehˬ, Kawˍneˍliˆ-oˬ teh‸ yawˇ hta‸ kuˬ ve yoˬ. 4 Kawˍneˍliˆ yawˇ hta‸ hk'a deh‸ nyi leh kawˆ jaˇ ve awˬ hk'aw lo, Jawˇ mawˇ-oˬ, aˬ hto‸ ma le teh‸ na nyi ve yoˬ. Mvuhˇ naw ma tcuh yaˇ yawˇ hta‸ k'oˆ piˇ ve, Nawˬ bon lawˬ ve hkawˇ leh tanˇ piˇ ve teˇ hpaˍ G'uiˬ sha mehˆ g'uˇ suhˍ gaˬ leh, yawˇ dawˇ nawˇ chehˇ ve yoˬ. 5 Chi beu‸ Yuˇpeˍ venˇ lo chaw hta‸ k'ai tcuh leh, Peˍtruˆ teh‸ k'oˆ ve Siˉmonˍ meh ve teˇ g'aˇ hta‸ ca kuˬ tcuh-o. 6 Yawˇ lehˬ shaˍ guiˬ te paˍ Siˉmonˍ ve aˉ hk'aw lo chehˇ taˍ ve yoˬ. Yehˬ oˇ ve lehˬ, laˇ tsuhˇ g'uiˬ pfuhˍ paˇ lo cawˬ ve yoˬ teh‸ k'oˆ piˇ ve yoˬ. 7 Yawˇ hta‸ tawˇ yaw ve mvuhˇ naw ma tcuh yaˇ k'o‸-e peuˬ hk'aw‸ nawˉ, yawˇ ve awˬ ceˬ nyiˇ g'aˇ leh, yawˇ geh hk'aˬ htaˆ ka‸ chehˇ ve ma‸ yaˇ hui awˬ hk'aw lo G'uiˬ sha hta‸ yawˆ yan ve teˇ g'aˇ hta‸ kuˬ ve yoˬ. 8 Awˬ lawn hk'a peu-eˬ yawˇ hui hta‸ k'aoˍ maˍ piˇ peuˬ hk'aw‸ nawˉ, Yuˇpeˍ venˇ lo k'ai tcuh ve yoˬ. 9 Awˬ hk'aw‸ nawˉ teˇ nyi yawˇ hui k'ai leh, Yuˇpeˍ venˇ awˬ paˇ lo gaˬ la ve teˇ yanˇ, Peˍtruˆ lehˬ bon lawˬ tuˬ, aˬ laˬ hk'e mvuhˇ law‸ k'aw tcuhˆ htaˇ yehˬ awˬ hta‸ teˇ htai‸ lo taˆ-e ve yoˬ. 10 Oˇ htaˇ, yawˇ awˍ meu‸ la leh, awˍ caˇ gaˇ ve yoˬ. Shu caˇ tuˬ gu chehˇ ve teˇ yanˇ, zuh‸ maˆ mawˬ ve hk'e awˬ ha awˬ hk'aw lo mvuhˇ naw ma hpaw taˍ ve hta‸ yawˇ g'a mawˬ ve yoˬ. 11 Aˉ boˆ lonˉ hk'a shuˍ shuˍ ve teˇ maˬ lehˬ, awˬ ceˍ awˇ ceˍ hta‸ hpeh taˍ leh, miˬ guiˬ hk'oˆ lo hpehˇ ya‸ la ve hta‸ yawˇ g'a mawˬ ve yoˬ. 12 Oˇ ve awˬ hk'aw lo, hkui sheh la‸ sheh awˍ lehˇ cawˬ ve to nuˇ to shaˆ awˬ ceuˬ hk'a peu-eˬ, loˇ k'ai gaˆ k'ai puiˉ ve awˬ ceuˬ hk'a peu-eˬ leh, mvuhˇ hpe lo poˬ ve ngaˆ awˬ ceuˬ hk'a peu-eˬ cawˬ ve yoˬ. 13 Oˇ htaˇ, awˬ hkawˇ bvuhˬ la ve, Peˍtruˆ-oˬ, tu leh tiˇ caˇ-oˆ teh‸ k'oˆ ve hta‸ yawˇ g'a kaˇ ve yoˬ. 14 Ya‸ hk'aˇ Peˍtruˆ lehˬ, Jawˇ mawˇ-oˬ, maˇ hpeh‸ taˬ. Cha‸ chiˆ leh maˇ da‸ maˇ kehˬ ve awˬ ceuˬ hta‸ ngaˬ teˇ pawˆ ka‸ maˇ caˇ jaw teh‸ k'aw‸ k'oˆ piˇ ve yoˬ. 15 Teˇ pawˆ awˬ hkawˇ k'aw‸ bvuhˬ la leh k'oˆ ve, G'uiˬ sha da‸ piˇ kehˬ piˇ peuˬ ve awˬ ceuˬ hta‸ cha‸ chiˆ ve taˇ k'oˆ teh‸, yawˇ g'a k'aw‸ kaˇ ve yoˬ. 16 Chi hk'e shehˆ pawˆ hpeh‸ peuˬ leh, aˉ boˆ lonˉ hk'a shuˍ shuˍ ve oˇ ve hta‸ teˇ cawˬ haˉ mvuhˇ naw ma lo k'aw‸ yuˬ taˆ-e ve yoˬ. 17 Peˍtruˆ lehˬ, awˬ ha awˬ hk'aw g'a mawˬ ve aˬ hto‸ ma tcuhˉ kuiˬ leh naˍ, yawˇ ve nyi ma hk'aw lo dawˇ maˇ tawˆ te chehˇ htaˇ, Kawˍneˍliˆ tcuh peu laˇ ve chaw hui lehˬ, Siˉmonˍ ve yehˬ hta‸ ca na laˬ leh, yehˬ miˉ hpe‸ lo gaˬ la peuˬ. 18 Yawˇ hui kuˬ leh, Peˍtruˆ teh‸ k'oˆ ve Siˉmonˍ meh ve teˇ g'aˇ choˬ kaˬ chehˇ-aw laˇ teh‸ na nyi ve yoˬ. 19 Peˍtruˆ lehˬ, awˬ ha awˬ hk'aw lo yawˇ g'a mawˬ ve hta‸ dawˇ nyi chehˇ htaˇ, Awˬ ha hpu yawˇ hta‸ k'oˆ piˇ ve, Chaw shehˆ g'aˇ nawˬ hta‸ ca chehˇ ve yoˬ. Tu leh ya‸ k'ai loˬ. 20 Nyi ma htawˇ dawˇ nawˬ dawˇ taˇ te. Yawˇ hui geh k'ai loˬ. Awˬ lawn k'o, ngaˬ yawˇ hui hta‸ peu laˇ ve yoˬ teh‸ k'oˆ piˇ ve yoˬ. 21 Oˇ htaˇ Peˍtruˆ chaw oˇ ve teˇ hpaˍ geh ya‸-e leh, Ngaˬ lehˬ nawˬ hui ca ve chaw teˇ g'aˇ yoˬ. Aˬ hto‸ ma awˬ lawn cawˬ leh laˬ ve le teh‸, yawˇ hui hta‸ na nyi ve yoˬ. 22 Yawˇ hui k'aw‸ k'oˆ piˇ ve, Chaw da‸ chaw hteˇ, G'uiˬ sha hta‸ kawˆ leh, Yuˇda‸ chaw hk'a peu-eˬ yawˇ awˬ lawn shaˉ hkiˆ hkanˍ ve Kawˍneˍliˆ meh ve ma‸ poˍ teˇ g'aˇ cawˬ ve yoˬ. Nawˬ hta‸ yawˇ ve yehˬ hk'aw lo kuˬ yuˬ leh, nawˬ ve tawˇ hkawˇ hta‸ na tuˬ, da‸ kehˬ ve mvuhˇ naw ma tcuh yaˇ teˇ g'aˇ yawˇ hta‸ hpeu‸ maˍ piˇ peuˬ teh‸ yawˇ hui k'oˆ piˇ ve yoˬ. 23 Hk'e te leh, Peˍtruˆ yawˇ hui hta‸ aˉ hk'aw lo kuˬ yuˬ leh hk'a deh‸ ha‸ yuˬ ve yoˬ. Shawˉ pawˍ teˇ nyi hk'e yawˇ tu leh yawˇ hui geh teˇ geh k'ai ve yoˬ. Yuˇpeˍ venˇ hk'aw lo chehˇ ve awˬ viˉ awˬ nyi teˇ hpaˍ hpaˍ htawˇ yawˇ geh k'ai ve yoˬ. 24 Awˬ hk'aw‸ nawˉ teˇ nyi yawˇ hui Kehˉsaˍriˆ venˇ hk'aw gaˬ ve yoˬ. Kawˍneˍliˆ lehˬ, yawˇ ve awˬ viˇ awˬ nyi leh awˬ chawˇ awˬ paˆ hui hta‸ kuˬ hpawnˬ peuˬ leh, yawˇ hui hta‸ law chehˇ ve yoˬ. 25 Peˍtruˆ lo‸ la htaˇ, Kawˍneˍliˆ yawˇ hta‸ ha‸ yuˬ leh, Peˍtruˆ ve hkui paˇ lo boˆ sheˬ leh oˉ k'oˍ pui ve yoˬ. 26 Ya‸ hk'aˇ, Peˍtruˆ yawˇ hta‸ g'awˬ tu leh, Tu-o, ngaˬ htawˇ chaw hpeh‸ ve yoˬ teh‸ k'oˆ piˇ ve yoˬ. 27 Oˇ htaˇ, Peˍtruˆ Kawˍneˍliˆ geh na‸ uˉ te da‸ leh lo‸-e ve teˇ yanˇ, chaw maˇ maˇ hpawnˬ chehˇ taˍ ve hta‸ g'a mawˬ ve yoˬ. 28 Peˍtruˆ yawˇ hui hta‸ k'oˆ piˇ ve, Yuˇda‸ chaw teˇ g'aˇ lehˬ, buiˇ shaˆ aˉ naˆ chaw hta‸ awˬ chawˇ te ve maˇ k'oˆ, yawˇ geh ca guiˇ ve maˇ k'oˆ, te maˇ keunˍ te maˇ cawˇ ve hta‸ nawˬ hui shiˍ taˍ ve yoˬ. Ya‸ hk'aˇ, hk'aˬ ve chaw teˇ g'aˇ hta‸ maˇ k'oˆ, cha‸ chiˆ ve ka‸, maˇ da‸ maˇ kehˬ ve ka‸ maˇ g'a k'oˆ tuˬ G'uiˬ sha ngaˬ hta‸ maˍ laˇ peuˬ. 29 Chi hta‸ pa taw ngaˬ hta‸ kuˬ htaˇ, ngaˬ te‸ chiˉ maˇ k'aw‸ k'oˆ leh laˬ ve yoˬ. Hk'e te leh, aˬ hto‸ ma awˬ lawn cawˬ leh ngaˬ hta‸ ca kuˬ la ve le, ngaˬ na nyi gaˇ ve yoˬ teh‸, yawˇ hui hta‸ k'oˆ piˇ ve yoˬ. 30 Kawˍneˍliˆ k'aw‸ k'oˆ ve, Ponˬ laˬ ve awˇ nyi htaˇ, mvuhˇ hpeu‸ hpawˇ shehˆ naˍ riˍ chi teˇ yanˇ, ngaˬ aˉ hk'aw lo bon lawˬ chehˇ ve yoˬ. Oˇ htaˇ, awˬ g'euˆ ba ve veu‸ k'aˇ veu‸ deh ve chaw teˇ g'aˇ ngaˬ mehˆ g'uˇ suhˍ huˉ taˍ leh k'oˆ ve, 31 Kawˍneˍliˆ-oˬ, nawˬ bon lawˬ ve hta‸ G'uiˬ sha g'a kaˇ leh, nawˬ ha k'aˉ leh tanˇ piˇ ve teˇ hpaˍ hta‸ G'uiˬ sha dawˇ nawˇ chehˇ ve yoˬ. 32 Hk'e te leh, Yuˇpeˍ venˇ lo chaw hta‸ k'ai tcuh leh, Peˍtruˆ teh‸ k'oˆ ve Siˉmonˍ meh ve chaw teˇ g'aˇ hta‸ ca kuˬ tcuh-o. Yawˇ lehˬ, laˇ tsuhˇ g'uiˬ pfuhˍ paˇ lo chehˇ ve shaˍ guiˬ te paˍ Siˉmonˍ ve aˉ hk'aw lo chehˇ taˍ ve yoˬ teh‸, mvuhˇ naw ma tcuh yaˇ k'oˆ laˇ ve yoˬ. 33 Chi hta‸ pa taw, teˇ cawˬ haˉ ngaˬ nawˬ geh chaw hta‸ k'ai tcuh ve yoˬ. Nawˬ laˬ ve lehˬ, da‸ jaˇ ve yoˬ. Hk'e te leh, Jawˇ mawˇ G'uiˬ sha nawˬ hta‸ hk'a k'oˆ tcuh laˇ ve hk'a peu-eˬ hta‸ na tuˬ, chi beu‸ ngaˬ hui hk'a peu-eˬ G'uiˬ sha mehˆ g'uˇ suhˍ chehˇ taˍ ve yoˬ teh‸, Kawˍneˍliˆ k'aw‸ k'oˆ piˇ ve yoˬ. 34 Oˇ htaˇ, Peˍtruˆ maw‸ k'aw ngaˉ leh k'oˆ ve, G'uiˬ sha lehˬ chaw mehˆ hpfuhˇ hta‸ maˇ nyi ve ngaˬ awˬ tehˬ awˬ na g'a shiˍ ve yoˬ. 35 Chaw teˇ ceuˬ le le awˬ hk'aw lo G'uiˬ sha hta‸ kawˆ leh, hteˇ ve cawˇ ve hta‸ te ve chaw teˇ g'aˇ hta‸ yawˇ nyi ma cawˇ ve yoˬ. 36 G'uiˬ sha lehˬ, Iˉsaˍreˍlaˆ chaw hui hta‸ piˇ ve tawˇ hkawˇ hta‸ nawˬ hui shiˍ ve yoˬ. Tawˇ hkawˇ oˇ ve lehˬ, hk'a peu-eˬ awˬ hk'oˆ Jawˇ mawˇ hpeh‸ ve Yeˍsuˆ Hkri‸ hta‸ pa taw dawˇ sha gaˇ sha ve hta‸ caˉ da‸ ve ha lehˬ ve bon hkawˇ hpehˬ ve yoˬ. 37 Yoˇhanˬ maˍ ve baˆtiˆsaˬ piˇ ve teˇ ceuˬ awˬ hk'aw‸ nawˉ, Gaˍliˍlehˇ mvuhˇ miˬ hta‸ tanˬ leh Yuˇda‸ mvuhˇ miˬ teˇ kaˬ le le lo ha lehˬ ve bon hkawˇ oˇ ve bvuhˬ k'ai ve yoˬ. 38 Bon hkawˇ oˇ ve lehˬ, Naˍzaˍrehˆ chaw Yeˍsuˆ awˬ lawn yoˬ. G'uiˬ sha lehˬ, da‸ ve kehˬ ve Awˬ ha hpu maˇ k'oˆ, kanˇ paˆ maˇ k'oˆ, yawˇ hta‸ ngeuˍ pfuhˍ piˇ ve awˬ lawn leh, G'uiˬ sha yawˇ geh chehˇ ve pa taw, yawˇ teˇ kaˬ peuˬ teˇ kaˬ lo k'ai chehˇ htaˇ, da‸ ve hta‸ te leh, neˇ haiˬ fawˉ mehˍ ve chaw hk'a peu-eˬ hta‸ gu na-e piˇ ve awˬ lawn yoˬ. 39 Yuˇda‸ chaw hui ve mvuhˇ miˬ awˬ hk'aw lo maˇ k'oˆ, Yeˍruˆsaˍlehnˍ venˇ awˬ hk'aw lo maˇ k'oˆ, yawˇ hk'a te ve hk'a peu-eˬ hta‸ ngaˬ hui htawˇ shaˉ hkiˆ hkanˍ shehˍ hpaˇ hpeh‸ ve yoˬ. Shu yawˇ hta‸ suhˆ hkuiˉ daw hk'oˆ lo hta‸ pehˍ ve yoˬ. 40 Ya‸ hk'aˇ, shehˆ nyi teˇ nyi gaˬ htaˇ, G'uiˬ sha yawˇ hta‸ k'aw‸ te‸ tuˬ la piˇ leh, chaw teˇ hpaˍ hpaˍ hta‸ yawˇ awˬ to maw piˇ ve yoˬ. 41 Chaw hk'a peu-eˬ hta‸ maw piˇ ve maˇ heˆ. Shaˉ hkiˆ hkanˍ tuˬ awˬ pon awˉ lawˉ htaˇ G'uiˬ sha leuˆ yuˬ taˍ ve ngaˬ hui hta‸ yawˇ maw laˇ ve yoˬ. Suh kuiˬ lo yawˇ k'aw‸ te‸ tu la peuˬ hk'aw‸ nawˉ, ngaˬ hui yawˇ geh hk'a geh caˇ ve dawˬ ve yoˬ. 42 Ngaˬ hui lehˬ, chaw chi ma ve hta‸ bon maˍ piˇ tuˬ yawˇ ngaˬ hui hta‸ tawˇ piˇ taˉ laˇ ve yoˬ. Chi hk'oˆ ka‸, te‸ chehˇ ve chaw hta‸ maˇ k'oˆ, suh peuˬ ve chaw hta‸ maˇ k'oˆ, Yeˍsuˆ lehˬ suhˉ jehˬ shehˍ hpaˇ hpeh‸ tuˬ G'uiˬ sha yawˇ hta‸ fuiˍ teh taˍ ve awˬ lawn shaˉ hkiˆ hkanˍ tuˬ htawˇ, yawˇ ngaˬ hui hta‸ tawˇ piˇ taˉ laˇ ve yoˬ. 43 Yawˇ hta‸ hk'a yonˍ ve chaw hk'a peu-eˬ, yawˇ ve awˬ meh hta‸ pa taw venˇ baˆ hpehˇ hk'a ve hta‸ g'a ve yoˬ teh‸, G'uiˬ sha ve tcuh kaˍ paˍ hk'a peu-eˬ yawˇ awˬ lawn shaˉ hkiˆ hkanˍ taˍ ve yoˬ teh‸, Peˍtruˆ k'oˆ piˇ ve yoˬ. 44 Tawˇ hkawˇ chi teˇ hpaˍ hta‸ Peˍtruˆ k'oˆ chehˇ htaˇ, tawˇ hkawˇ chi hta‸ g'a kaˇ ve chaw hk'a peu-eˬ awˬ hk'oˆ hta‸ da‸ ve kehˬ ve Awˬ ha hpu ya‸ la ve yoˬ. 45 Buiˇ shaˆ aˉ naˆ chaw hui awˬ hk'oˆ hta‸ htawˇ, da‸ ve kehˬ ve Awˬ ha hpu ngeuˍ pfuhˍ piˇ ve hta‸ pa taw, Peˍtruˆ geh laˬ ve Yuˇda‸ Hkri‸ yaˇ teˇ hpaˍ lehˬ anˇ jaˇ ve yoˬ. 46 Awˬ lawn k'o, chaw oˇ ve teˇ hpaˍ lehˬ, tawˇ laiˉ ceuˬ yaw chiˇ mvuh leh G'uiˬ sha hta‸ taˍ uiˍ taˍ mvuh piˇ ve hta‸ yawˇ hui g'a kaˇ ve yoˬ. 47 Oˇ htaˇ Peˍtruˆ k'oˆ ve, Ngaˬ hui da‸ ve kehˬ ve Awˬ ha hpu g'a ve hk'a shuˍ shuˍ, da‸ ve kehˬ ve Awˬ ha hpu g'a ve chaw chi teˇ hpaˍ hta‸ iˉ kaˆ awˬ hk'aw lo baˆtiˆsaˬ maˇ g'a piˇ tuˬ, tawˍ taˍ tsuhˇ taˍ paˍ a shu cawˬ le teh‸ na nyi ve yoˬ. 48 Yeˍsuˆ Hkri‸ ve awˬ meh awˬ hawˉ lo baˆtiˆsaˬ hkanˍ-o‸ teh‸, yawˇ yawˇ hui hta‸ k'oˆ piˇ ve yoˬ. Oˇ htaˇ, yawˇ hui geh a ciˉ maw chaweh chehˇ taˉ tuˬ, yawˇ hui yawˇ hta‸ lawˬ hkawˉ ve yoˬ.

Tcuh yaˇ 11

1 Buiˇ shaˆ aˉ naˆ chaw hui htawˇ G'uiˬ sha ve tawˇ hkawˇ hta‸ ha‸ yuˬ ve awˬ lawn hta‸ Yuˇda‸ mvuhˇ miˬ hk'aw lo chehˇ ve tcuh yaˇ hui leh awˬ viˉ awˬ nyi teˇ hpaˍ g'a kaˇ ve yoˬ. 2 Hk'e te leh, Peˍtruˆ Yeˍruˆsaˍlehnˍ venˇ lo taˆ-e htaˇ, awˬ guiˬ meuˇ shoˍ ve chaw teˇ hpaˍ yawˇ hta‸ k'oˆ piˇ ve, 3 Nawˬ lehˬ awˬ guiˬ meuˇ maˇ shoˍ ve chaw hui ve yehˬ hk'aw lo‸-e leh yawˇ hui geh caˇ ve dawˬ ve law leˇ teh‸, yawˇ hta‸ deˇ piˇ ve yoˬ. 4 Oˇ htaˇ, Peˍtruˆ yawˇ hui hta‸ awˬ hkuiˉ puiˍ te leh awˬ leh meuˇ hk'a gaˬ awˬ lawn teˇ ceuˬ peuˬ teˇ ceuˬ k'aoˍ maˍ piˇ leh k'oˆ ve, 5 Ngaˬ lehˬ Yuˇpeˍ venˇ awˬ hk'aw lo bon lawˬ chehˇ htaˇ, aˉ boˆ lonˉ hk'a shuˍ shuˍ ve teˇ maˬ lehˬ, awˬ ceˍ awˇ ceˍ hta‸ hpeh taˍ leh, mvuhˇ naw ma lo te leh ngaˬ geh hk'a gaˬ hpehˇ ya‸ la ve hta‸, zuh‸ maˆ mawˬ ve hk'e awˬ ha awˬ hk'aw lo ngaˬ g'a mawˬ ve yoˬ. 6 Oˇ ve hta‸ ngaˬ hk'a deh‸ nyi htaˇ, miˬ guiˬ hk'oˆ lo hkui sheh la‸ sheh awˍ lehˇ cawˬ ve to nuˇ to shaˆ awˬ ceuˬ, loˇ k'ai gaˆ k'ai puiˉ ve awˬ ceuˬ leh mvuhˇ hpe lo poˬ ve ngaˆ awˬ ceuˬ teˇ hpaˍ hta‸ ngaˬ g'a mawˬ ve yoˬ. 7 Oˇ htaˇ, Peˍtruˆ-oˬ, tu leh tiˇ caˇ-oˆ teh‸ k'oˆ laˇ ve awˬ hkawˇ hta‸ ngaˬ g'a kaˇ ve yoˬ. 8 Ya‸ hk'aˇ ngaˬ k'aw‸ k'oˆ piˇ ve, Jawˇ mawˇ-oˬ, maˇ hpeh‸ taˬ. Awˬ lawn k'o, cha‸ chiˆ leh maˇ da‸ maˇ kehˬ ve awˬ ceuˬ ngaˬ ve maw‸ k'aw awˬ hk'aw lo teˇ pawˆ ka‸ maˇ lo‸ la jaw teh‸ k'oˆ piˇ ve yoˬ. 9 Mvuhˇ naw ma lo awˬ hkawˇ teˇ pawˆ k'aw‸ bvuhˬ la leh, G'uiˬ sha da‸ piˇ kehˬ piˇ peuˬ ve awˬ ceuˬ hta‸ cha‸ chiˆ ve taˇ k'oˆ teh‸ ngaˬ hta‸ k'aw‸ k'oˆ laˇ ve yoˬ. 10 Chi hk'e shehˆ pawˆ hpeh‸ peuˬ leh, oˇ ve hk'a peu-eˬ hta‸ mvuhˇ naw ma lo k'aw‸ g'awˬ taˆ-e ve yoˬ. 11 Oˇ teˇ hkui awˬ hk'aw lo, Kehˉsaˍriˆ venˇ lo ngaˬ geh tcuh peu laˇ ve chaw shehˆ g'aˇ ngaˬ hui chehˇ taˍ ve yehˬ awˬ paˇ lo gaˬ la ve yoˬ. 12 Nyi ma htawˇ dawˇ nawˬ dawˇ maˇ te leh yawˇ hui geh k'ai loˬ teh‸, Awˬ ha hpu ngaˬ hta‸ k'oˆ laˇ ve yoˬ. Awˬ viˉ awˬ nyi chi hkaw‸ g'aˇ htawˇ ngaˬ geh k'ai leh, chaw oˇ ve teˇ g'aˇ ve yehˬ awˬ hk'aw lo ngaˬ hui lo‸-e ve yoˬ. 13 Chaw oˇ ve lehˬ, mvuhˇ naw ma tcuh yaˇ teˇ g'aˇ yawˇ ve aˉ hk'aw lo tu huˉ chehˇ ve hta‸ yawˇ g'a mawˬ ve awˬ lawn ngaˬ hui hta‸ hto laˇ ve yoˬ. Mvuhˇ naw ma tcuh yaˇ yawˇ hta‸ k'oˆ piˇ ve, Yuˇpeˍ venˇ lo chaw hta‸ k'ai tcuh leh, Peˍtruˆ teh‸ k'oˆ ve Siˉmonˍ meh ve teˇ g'aˇ hta‸ ca kuˬ tcuh-o. 14 Nawˬ leh nawˬ ve yehˬ yaˇ k'a yaˇ hk'a peu-eˬ hk'aˬ hk'e te leh htaiˍ hk'aw‸ ve hta‸ g'a tuˬ, yawˇ nawˬ hui hta‸ hto laˇ tuˬ yoˬ teh‸, mvuhˇ naw ma tcuh yaˇ yawˇ hta‸ k'oˆ piˇ ve awˬ lawn htawˇ, ngaˬ hui hta‸ k'aw‸ hto laˇ ve yoˬ. 15 Ngaˬ awˬ hkuiˉ puiˍ tanˬ maˍ piˇ chehˇ htaˇ ka‸, awˉ lawˉ htaˇ da‸ ve kehˬ ve Awˬ ha hpu ngaˬ hui awˬ hk'oˆ hta‸ ya‸ la ve hk'a shuˍ shuˍ, yawˇ hui awˬ hk'oˆ hta‸ htawˇ ya‸ la ve yoˬ. 16 Oˇ htaˇ, Jawˇ mawˇ Yeˍsuˆ k'oˆ laˇ ve tawˇ chi teˇ hkawˇ hta‸ ngaˬ dawˇ nawˇ ve yoˬ. Yoˇhanˬ lehˬ iˉ kaˆ awˬ hk'aw lo baˆtiˆsaˬ piˇ ve yoˬ. Ya‸ hk'aˇ, nawˬ hui lehˬ da‸ ve kehˬ ve Awˬ ha hpu awˬ hk'aw lo baˆtiˆsaˬ g'a hkanˍ yuˬ tuˬ yoˬ teh‸ yawˇ k'oˆ ve yoˬ. 17 Hk'e te leh, Jawˇ mawˇ Yeˍsuˆ Hkri‸ hta‸ ngaˬ hui yonˍ ve teˇ yanˇ, G'uiˬ sha ngaˬ hui hta‸ la‸ shawnˍ pe‸ laˇ ve hk'a shuˍ shuˍ yawˇ hui hta‸ htawˇ piˇ ve k'o, ngaˬ hk'aˬ hk'e ve chaw hpeh‸ leh G'uiˬ sha hta‸ tawˍ taˍ tuˬ le teh‸, Peˍtruˆ k'oˆ piˇ ve yoˬ. 18 Awˬ lawn chi hta‸ yawˇ hui g'a kaˇ htaˇ, yawˇ hui te‸ chiˉ maˇ k'aw‸ k'oˆ. Yawˇ hui G'uiˬ sha hta‸ chiˇ uiˍ chiˇ mvuh leh k'oˆ ve, Hk'e te k'o, buiˇ shaˆ aˉ naˆ chaw hui htawˇ co ha g'a te‸ tuˬ, G'uiˬ sha lehˬ yawˇ hui hta‸ venˇ baˆ dawˇ hpfuhˆ hpeh‸ tuˬ a hkaw-anˬ piˇ ve yoˬ teh‸ k'oˆ ve yoˬ. 19 Oˇ htaˇ, Saˍteˍhpanˍ hta‸ tanˬ leh fawˉ mehˍ ve teˇ ceuˬ hta‸ g'a hkanˍ ve pa taw, hpaˆ da‸ guiˇ da‸ ve chaw teˇ hpaˍ lehˬ, Hpiˇniˆ mvuhˇ miˬ, Kuˇpaˍruˆ conˇ leh Anˍtiˆawˍ venˇ hk'a gaˬ k'ai ve awˬ hk'aw lo, Yuˇda‸ chaw hui hta‸ ceh tiˉ yawˇ hui bon hkawˇ maˍ piˇ ve yoˬ. 20 Ya‸ hk'aˇ, yawˇ hui teˇ hpaˍ hpaˍ lehˬ, Anˍtiˆawˍ venˇ lo gaˬ la htaˇ, Heˍlaˍsaˆ chaw hui hta‸ htawˇ, Jawˇ mawˇ Yeˍsuˆ awˬ lawn ha lehˬ ve bon hkawˇ maˍ piˇ ve yoˬ. Oˇ hk'e maˍ piˇ ve chaw teˇ hpaˍ lehˬ, Kuˇpaˍruˆ conˇ chaw leh Kuˇreˍneˍ mvuhˇ miˬ chaw teˇ hpaˍ hpeh‸ ve yoˬ. 21 Jawˇ mawˇ G'uiˬ sha ve kanˇ paˆ yawˇ hui geh cawˬ ve pa taw, chaw maˇ maˇ yonˍ la leh Jawˇ mawˇ Yeˍsuˆ geh hpfuhˆ k'aw‸ la ve yoˬ. 22 Awˬ lawn chi hta‸ Yeˍruˆsaˍlehnˍ venˇ awˬ hk'aw chehˇ ve Hkri‸ yaˇ awˬ moˍ g'a kaˇ leh, yawˇ hui Baˍnaˍbaˆ hta‸ Anˍtiˆawˍ venˇ lo k'ai tcuh ve yoˬ. 23 Yawˇ oˇ kaˬ lo gaˬ leh G'uiˬ sha ve awˬ bon hta‸ g'a mawˬ htaˇ ha lehˬ jaˇ ve yoˬ. Yawˇ hui nyi ma yeˬ leh Jawˇ mawˇ Yeˍsuˆ hta‸ vawˆ tcuhˉ taˍ tuˬ, yawˇ yawˇ hui hk'a peu-eˬ hta‸ awˬ g'aˇ piˇ ve yoˬ. 24 Awˬ lawn k'o, Baˍnaˍbaˆ lehˬ da‸ ve chaw hpeh‸ leh, da‸ ve kehˬ ve Awˬ ha hpu maˇ k'oˆ, yonˍ ve teˇ ceuˬ maˇ k'oˆ, hk'a biˇ cawˬ ve chaw hpeh‸ ve yoˬ. Oˇ htaˇ, chaw maˇ maˇ Jawˇ mawˇ Yeˍsuˆ hta‸ k'aw‸ pawnˇ da‸ la ve yoˬ. 25 Baˍnaˍbaˆ lehˬ, Sawˉlu‸ hta‸ ca tuˬ, Taˍsuˆ venˇ lo k'ai ve yoˬ. 26 Yawˇ hta‸ g'a mawˬ htaˇ, Anˍtiˆawˍ venˇ lo shiˍ laˬ ve yoˬ. Yawˇ huiˉ maˬ lehˬ, teˇ hk'aw‸ hk'a zuh Hkri‸ yaˇ awˬ moˍ geh hpawnˬ da‸ leh, chaw awˬ moˍ lonˉ hta‸ maˍ piˇ ve yoˬ. Awˬ la‸ g'awˇ teˇ hpaˍ hta‸ Hkri‸ yaˇ teh‸ k'oˆ ve awˬ meh lehˬ, Anˍtiˆawˍ venˇ lo awˉ lawˉ k'oˆ tawˆ la ve yoˬ. 27 Awˬ nyi awˬ haˉ oˇ ve teˇ hpaˍ awˬ hk'aw lo, G'uiˬ sha ve tcuh kaˍ paˍ teˇ hpaˍ hpaˍ Yeˍruˆsaˍlehnˍ venˇ lo tu la leh Anˍtiˆawˍ venˇ lo laˬ ve yoˬ. 28 Yawˇ hui awˬ hk'aw lo Aˍgaˍbuˆ meh ve chaw teˇ g'aˇ tu leh, Miˬ guiˬ hk'a peu-eˬ awˬ hk'aw lo meu‸ lonˉ kaˆ lonˉ hpeh‸ la tuˬ yoˬ teh‸, Awˬ ha hpu hta‸ cuˇ leh hto piˇ ve yoˬ. Meu‸ ve kaˆ ve oˇ ve lehˬ, jawˇ mawˇ Kaˍlawˇdiˆ ve awˬ co-e htaˇ hpeh‸ la ve yoˬ. 29 Hk'e te leh, awˬ la‸ g'awˇ teˇ hpaˍ lehˬ, teˇ g'aˇ le le a shu yawˇ puiˉ ve hpeh‸ ve hk'e, Yuˇda‸ mvuhˇ miˬ awˬ hk'aw lo chehˇ ve awˬ viˉ awˬ nyi teˇ hpaˍ hta‸ ga piˇ tuˬ dawˇ cheˆ taˍ ve yoˬ. 30 Yawˇ hui dawˇ cheˆ taˍ ve hk'e te peuˬ leh, Baˍnaˍbaˆ leh Sawˉlu‸ la‸ sheh hk'aw lo awˬ hoˉ chaw mawˇ teˇ hpaˍ hta‸ feu piˇ ve yoˬ.

Tcuh yaˇ 12

1 Awˬ yanˇ oˇ ve awˬ hk'aw lo hkunˉ hawˉ hkanˇ Heˍroˆ lehˬ, Hkri‸ yaˇ awˬ moˍ awˬ hk'aw lo chehˇ ve chaw teˇ hpaˍ hpaˍ hta‸ g'aˇ hte‸ fawˉ mehˍ ve yoˬ. 2 Yawˇ lehˬ Yoˇhanˬ ve awˬ viˉ paˍ Yaˍkoˆ hta‸ aˉ htaw chaw pehˍ ve yoˬ. 3 Chi ve hta‸ Yuˇda‸ chaw hui nyi ma cawˇ ve hta‸ yawˇ g'a mawˬ htaˇ, Peˍtruˆ hta‸ htawˇ hpeh yuˬ ve yoˬ. Awˬ yanˇ oˇ ve lehˬ, Hkaoˍ monˇ awˬ hk'aw lo diˇ maˇ keu ve pawehˇ awˬ yanˇ hpeh‸ ve yoˬ. 4 Peˍtruˆ hta‸ hpeh yuˬ peuˬ hk'aw‸ nawˉ, htawnˍ hk'aw keu leh, yawˇ hta‸ shaw tuˬ ve ma‸ yaˇ teˇ chi hkaw‸ g'aˇ ve la‸ sheh hk'aw lo chiˇ a‸ piˇ ve yoˬ. Paˍsaˍhkaˍ pawehˇ peuˬ hk'aw‸ nawˉ heh‸, chaw chi ma ve mehˆ g'uˇ suhˍ Peˍtruˆ hta‸ yuˬ tawˆ la tuˬ yawˇ dawˇ taˍ ve yoˬ. 5 Hk'e te leh, Peˍtruˆ htawnˍ hk'aw lo g'a chehˇ ve yoˬ. Ya‸ hk'aˇ, Hkri‸ yaˇ awˬ moˍ lehˬ, yawˇ awˬ pon G'uiˬ sha geh g'aˇ hte‸ bon lawˬ chehˇ ve yoˬ. 6 Jawˇ mawˇ Heˍroˆ lehˬ, shawˉ pawˍ hk'e yawˇ hta‸ yuˬ tawˆ-a teh‸ te ve teˇ haˉ htaˇ, Peˍtruˆ hta‸ sho caˆ nyiˇ caˆ hpeh taˍ ve yoˬ. Yawˇ lehˬ, ma‸ yaˇ nyiˇ g'aˇ awˬ kaˍ lo zuh‸ muiˉ k'a chehˇ leh, shaw shehˍ hpaˇ teˇ hpaˍ htawˇ htawnˍ yehˬ miˇ awˬ baˬ lo shaw chehˇ ve yoˬ. 7 Oˇ htaˇ, Jawˇ mawˇ G'uiˬ sha ve mvuhˇ naw ma tcuh yaˇ teˇ g'aˇ tawˆ la leh, bawehˇ oˇ ve awˬ hk'aw lo awˬ g'euˆ ba ve yoˬ. Yawˇ lehˬ, Peˍtruˆ ve nyi kuˇ hpawˇ hta‸ hta leh, Haˆ haˆ tu loˬ teh‸ k'oˆ leh, yawˇ hta‸ nawˍ piˇ ve yoˬ. Oˇ htaˇ sho caˆ teˇ hpaˍ lehˬ, yawˇ ve la‸ sheh lo k'ehˆ ce ve yoˬ. 8 Mvuhˇ naw ma tcuh yaˇ yawˇ hta‸ k'oˆ piˇ ve, Haˍ pi tsuh‸ leh hkuiˉ nuˆ tcuhˉ-oˆ teh‸ k'oˆ htaˇ, yawˇ htawˇ oˇ hk'e te ve yoˬ. Peuˬ leh, Nawˬ ve aˉ po‸ lonˉ deh leh ngaˬ hk'aˇ suh laˬ-o‸ teh‸, yawˇ hta‸ k'aw‸ k'oˆ piˇ ve yoˬ. 9 Oˇ htaˇ yawˇ tawˆ-e leh mvuhˇ naw ma tcuh yaˇ hk'aˇ suh k'ai ve yoˬ. Ya‸ hk'aˇ, mvuhˇ naw ma tcuh yaˇ te ve kanˉ lehˬ, awˬ tehˬ awˬ na hpeh‸ ve hta‸ yawˇ maˇ shiˍ leh, zuh‸ maˆ mawˬ ve hk'e awˬ ha awˬ hk'aw lo mawˬ ve teh‸ yawˇ dawˇ ve yoˬ. 10 Yawˇ huiˉ maˬ lehˬ, shaw shehˍ hpaˇ awˉ lawˉ teˇ moˍ leh nyiˇ moˍ teˇ moˍ hta‸ ka‸ ponˬ k'ai peuˬ hk'aw‸ nawˉ, venˇ hk'aw lo‸-e ve sho yehˬ miˉ lo gaˬ la ve yoˬ. Yawˇ huiˉ maˬ awˬ pon yehˬ miˉ oˇ ve yawˇ hk'aˇ yawˇ hpaw baˬ leh, yawˇ huiˉ maˬ tawˆ k'ai ve yoˬ. Ya‸ k'aw ceh teˇ maˬ lo gaˬ htaˇ, teˇ cawˬ haˉ mvuhˇ naw ma tcuh yaˇ yawˇ hta‸ hpaˆ da‸ ve yoˬ. 11 Oˇ htaˇ, Peˍtruˆ nyi ma hk'aw k'aw‸ nawˇ la leh k'oˆ ve, Jawˇ mawˬ G'uiˬ sha lehˬ, yawˇ ve mvuhˇ naw ma tcuh yaˇ hta‸ peu laˇ leh, jawˇ mawˇ Heˍroˆ ve la‸ sheh awˬ hk'aw lo maˇ k'oˇ Yuˇda‸ chaw hui hk'a dawˇ law taˍ ve awˬ hk'aw lo maˇ k'oˆ, ngaˬ hta‸ ponˬ laˇ ve awˬ tehˬ awˬ na ngaˬ g'a shiˍ ve yoˬ teh‸ k'oˆ ve yoˬ. 12 Awˬ lawn chi hta‸ yawˇ g'a shiˍ peuˬ htaˇ, Yoˇhanˬ ve awˬ e Maˍriˆ ve aˉ hk'aw lo yawˇ k'ai ve yoˬ. (Yoˇhanˬ ve awˬ meh awˬ suhˉ lehˬ Maˍkuˆ yoˬ.) Oˇ kaˬ lo chaw maˇ maˇ hpawnˬ da‸ leh bon lawˬ chehˇ ve yoˬ. 13 Yehˬ g'uˇ suhˍ ve yehˬ miˉ hta‸ Peˍtruˆ htawˆ htaˇ, Roˇdeˍ meh ve awˬ ceˬ ma ehˉ teˇ g'aˇ laˬ na la ve yoˬ. 14 Peˍtruˆ ve awˬ hkawˇ yoˬ teh‸ yawˇ g'a shiˍ htaˇ, yawˇ ha lehˬ jaˇ ve pa taw yehˬ miˉ hta‸ maˇ hpaw piˇ sheˍ. Ya‸ hk'aˇ, aˉ hk'aw g'uiˇ lo‸-e leh, Peˍtruˆ lehˬ yehˬ g'uˇ suhˍ ve yehˬ miˉ awˬ paˇ lo huˉ chehˇ ve yoˬ teh‸ yawˇ hui hta‸ k'oˆ piˇ ve yoˬ. 15 Yawˇ hui lehˬ, Nawˬ chaw g'uˇ yoˬ teh‸ yawˇ hta‸ k'oˆ piˇ ve htawˇ yawˇ lehˬ, Awˬ tehˬ awˬ na yoˬ teh‸ g'aˇ hte‸ k'oˇ tcuhˉ taˍ ve yoˬ. Yawˇ hui k'aw‸ k'oˆ ve, Peˍtruˆ ve mvuhˇ naw ma tcuh yaˇ yoˬ teh‸ k'oˆ piˇ ve yoˬ. 16 Peˍtruˆ lehˬ, htawˆ chehˇ sheˍ ve yoˬ. Yawˇ hui yehˬ miˉ hta‸ ca hpaw htaˇ, yawˇ hta‸ g'a mawˬ leh anˇ jaˇ ve yoˬ. 17 Yawˇ lehˬ, yawˇ hui ta‸ iˉ chehˇ tuˬ la‸ sheh te maˍ piˇ peuˬ leh, Jawˇ mawˇ G'uiˬ sha yawˇ hta‸ htawnˍ awˬ hk'aw lo hk'aˬ hk'e te yuˬ tawˆ laˇ ve awˬ lawn yawˇ hui hta‸ k'aoˍ maˍ piˇ ve yoˬ. Yaˍkoˆ leh awˬ viˉ awˬ nyi teˇ hpaˍ hta‸ awˬ lawn chi ve kaˇ piˇ-oˆ teh‸ k'oˆ peuˬ hk'aw‸ nawˉ, yawˇ tawˆ k'ai leh awˬ kaˍ awˬ nu teˇ kaˬ lo k'ai ve yoˬ. 18 Mvuhˇ htiˇ la ve teˇ yanˇ, Peˍtruˆ hk'aˬ hk'e k'ai ve awˬ lawn ma‸ yaˇ teˇ hpaˍ maˇ shiˍ ve pa taw, yawˇ hui duiˆ-ehˍ shaˇ-ehˍ g'aˇ hte‸ te chehˇ ve yoˬ. 19 Jawˇ mawˇ Heˍroˆ lehˬ, Peˍtruˆ hta‸ ca nyi leh maˇ mawˬ htaˇ, shaw shehˍ hpaˇ teˇ hpaˍ hta‸ yawˇ hk'a deh‸ na nyi peuˬ hk'aw‸ nawˉ, yawˇ hui hta‸ tiˇ pehˍ tuˬ tawˇ piˇ ve yoˬ. Oˇ htaˇ, jawˇ mawˇ Heˍroˆ lehˬ Yuˇda‸ mvuhˇ miˬ lo tu leh Kehˉsaˍriˆ venˇ lo k'ai leh oˇ kaˬ lo chehˇ taˍ ve yoˬ. 20 Jawˇ mawˇ Heˍroˆ lehˬ, Tuˇruˆ venˇ yaˇ leh Siˉdonˍ venˇ yaˇ hui hta‸ nyi ma zuhˆ jaˇ ve yoˬ. Hk'e te leh, yawˇ hui lehˬ nyi ma teˇ shiˍ tiˉ te leh yawˇ geh laˬ ve yoˬ. Hkunˉ hawˉ hkanˇ zuh‸ kuiˬ bawehˇ hta‸ ha‸ shaˉ shehˍ hpaˇ Baˍlaˍtuˆ meh ve teˇ g'aˇ hta‸ yawˇ hui jehˬ g'a leh, hkunˉ hawˉ hkanˇ hta‸ k'aw‸ cawˇ da‸ hui da‸ la tuˬ yawˇ hui lawˬ hkawˉ ve yoˬ. Awˬ lawn k'o, yawˇ hui caˇ tuˬ dawˬ tuˬ awˬ pon, hkunˉ hawˉ hkanˇ ve mvuhˇ miˬ hta‸ g'a cuˇ ve yoˬ. 21 Jawˇ mawˇ Heˍroˆ lehˬ, tinˍ taˍ ve awˬ nyi gaˬ la htaˇ, hkunˉ hawˉ hkanˇ ve veu‸ k'aˇ hta‸ veu‸ deh leh, k'aw jaw hk'oˆ lo mui leh yawˇ hui hta‸ maˍ piˇ ve yoˬ. 22 Oˇ htaˇ, chaw oˇ ve teˇ hpaˍ lehˬ, Awˬ hkawˇ chi ve lehˬ, chaw yaˇ ve awˬ hkawˇ maˇ heˆ, g'uiˬ sha ve awˬ hkawˇ hpeh‸ ve yoˬ teh‸, g'aˇ hte‸ kuˬ ve yoˬ. 23 Hkunˉ hawˉ hkanˇ Heˍroˆ lehˬ, G'uiˬ sha hta‸ maˇ chiˇ uiˍ maˇ chiˇ mvuh ve pa taw, teˇ cawˬ haˉ Jawˇ mawˇ G'uiˬ sha ve mvuhˇ naw ma tcuh yaˇ yawˇ hta‸ ciˍ yanˍ piˇ ve yoˬ. Oˇ htaˇ, yawˇ awˬ to awˬ hk'aw lo hawehˆ caˇ leh, yawˇ shaˉ cheˆ ve yoˬ. 24 Ya‸ hk'aˇ, G'uiˬ sha ve tawˇ hkawˇ lehˬ, uiˍ la maˇ la ve yoˬ. 25 Baˍnaˍbaˆ leh Sawˉlu‸ lehˬ, shu hta‸ ga piˇ ve kanˉ te peuˬ hk'aw‸ nawˉ, awˬ meh awˬ suhˉ Maˍkuˆ teh‸ k'oˆ ve Yoˇhanˬ meh ve teˇ g'aˇ hta‸ shiˍ veu leh, Yeˍruˆsaˍlehnˍ venˇ lo tu leh, Anˍtiˆawˍ venˇ lo k'aw‸ k'o‸-e ve yoˬ.

Tcuh yaˇ 13

1 Anˍtiˆawˍ Hkri‸ yaˇ awˬ moˍ awˬ hk'aw lo, bon maˍ paˍ hui leh maˍ piˇ shehˍ hpaˇ hui cawˬ ve yoˬ. Chaw chi teˇ hpaˍ lehˬ, Baˍnaˍbaˆ, Niˇgaˍ teh‸ k'oˆ ve Suˉmonˍ, Kuˇreˍneˍ mvuhˇ miˬ yaˇ Luˇkiˆ, hkunˉ hawˉ hkanˇ Heˍroˆ geh teˇ geh uiˍ la ve Maˍneˍ leh Sawˉlu‸ hui yoˬ. 2 Yawˇ hui Jawˇ mawˇ G'uiˬ sha hta‸ oˉ k'oˍ pui leh caˇ tuˬ ce chehˇ htaˇ, da‸ ve kehˬ ve Awˬ ha hpu k'oˆ ve, Ngaˬ te tcuh tuˬ ve kanˉ hta‸ Baˍnaˍbaˆ leh Sawˉlu‸ te tuˬ, yawˇ huiˉ maˬ hta‸ fuiˍ teh taˍ-o‸ teh‸ k'oˆ piˇ ve yoˬ. 3 Oˇ htaˇ yawˇ hui caˇ tuˬ ce leh bon lawˬ peuˬ hk'aw‸ nawˉ, yawˇ huiˉ maˬ awˬ hk'oˆ lo la‸ sheh taˍ leh hpehˇ k'ai ve yoˬ. 4 Hk'e te leh, da‸ ve kehˬ ve Awˬ ha hpu yawˇ huiˉ maˬ hta‸ k'ai tcuh ve hk'e, Seˍluˍkiˆ venˇ lo ya‸-e leh, Kuˇpaˍruˆ conˇ 5 Saˍlaˍmiˆ venˇ lo yawˇ huiˉ maˬ gaˬ htaˇ, Yuˇda‸ chaw hui ve bon yehˬ teˇ hpaˍ awˬ hk'aw lo G'uiˬ sha ve bon hkawˇ maˍ piˇ ve yoˬ. Yoˇhanˬ htawˇ yawˇ huiˉ maˬ hta‸ ga piˇ ve yoˬ. 6 Yawˇ hui conˇ oˇ ve awˬ hk'aw lo teˇ kaˬ peuˬ teˇ kaˬ k'ai leh, Paˍhpuˆ venˇ lo gaˬ htaˇ, Baˍyeˍsuˆ meh ve Yuˇda‸ chaw teˇ g'aˇ hta‸ g'a hpuˇ da‸ ve yoˬ. Yawˇ lehˬ, faˍ te puiˉ ve maˇ heˆ heˆ ve tcuh kaˍ paˍ teˇ g'aˇ hpeh‸ ve yoˬ. 7 Chaw oˇ ve lehˬ, Seˍraˍgiˆ Pawˇlu‸ teh‸ k'oˆ ve dawˇ shiˍ puiˉ ve mvuhˇ miˬ jawˇ mawˇ teˇ g'aˇ geh chehˇ ve yoˬ. Mvuhˇ miˬ jawˇ mawˇ oˇ ve lehˬ, G'uiˬ sha ve tawˇ hkawˇ hta‸ kaˇ gaˇ ve pa taw, Baˍnaˍbaˆ leh Sawˉlu‸ hta‸ kuˬ ve yoˬ. 8 Eˇluˇmaˆ lehˬ, mvuhˇ miˬ jawˇ mawˇ oˇ ve maˇ g'a yonˍ tuˬ yawˇ huiˉ maˬ hta‸ tawˍ taˍ ve yoˬ. (Eˇluˇmaˆ k'oˆ ve tcuhˉ kuiˬ lehˬ, faˍ te puiˉ paˍ teh‸ k'oˆ ve yoˬ.) 9 Oˇ htaˇ Pawˇlu‸ teh‸ k'oˆ ve Sawˉlu‸ teˇ g'aˇ lehˬ, da‸ ve kehˬ ve Awˬ ha hpu hk'a biˇ cawˬ leh, faˍ te puiˉ paˍ hta‸ hk'a deh‸ nyi leh k'oˆ piˇ ve, 10 Neˇ haiˬ ve yaˇ-oˬ, nawˬ lehˬ heˍ ve leh haiˬ ve awˬ ceuˬ hk'a biˇ cawˬ ve yoˬ. Hteˇ ve cawˇ ve hk'a peu-eˬ ve canˇ paˍ teˇ g'aˇ htawˇ nawˬ hpeh‸ ve yoˬ. Jawˇ mawˇ G'uiˬ sha ve hteˇ ve ya‸ k'aw teˇ hpaˍ hta‸ k'aw‸ lehˍ hpeh‸ k'ai tuˬ, nawˬ maˇ jehˇ jehˇ leh te tuˬ laˇ. 11 Chi beu‸ Jawˇ mawˇ G'uiˬ sha ve kanˇ paˆ nawˬ awˬ hk'oˆ gaˬ la leh, nawˬ mehˆ cuˉ leh teˇ tcuhˉ teˇ jaw mvuhˇ nyi hta‸ maˇ g'a mawˬ teh‸ k'oˆ piˇ ve yoˬ. Teˇ cawˬ haˉ moˬ hk'a shuˍ shuˍ naˆ ho‸ ve yawˇ awˬ hk'oˆ lo gaˬ la leh, yawˇ ve la‸ sheh hta‸ sheh k'ai tuˬ, yawˇ shu hta‸ ca chehˇ ve yoˬ. 12 Chi hk'e hpeh‸ la ve hta‸ mvuhˇ miˬ jawˇ mawˇ g'a mawˬ htaˇ, yawˇ yonˍ ve yoˬ. Awˬ lawn k'o, Jawˇ mawˇ G'uiˬ sha ve maˍ piˇ ve tawˇ hkawˇ hta‸ yawˇ anˇ jaˇ ve yoˬ. 13 Pawˇlu‸ leh yawˇ ve awˬ chawˇ teˇ hpaˍ lehˬ, Paˍhpuˆ venˇ lo tu leh, Paˍpuˇliˆ mvuhˇ miˬ Peˍraˍgeˍ venˇ lo haw lo‸ k'oˍ ciˇ k'ai ve yoˬ. Oˇ kaˬ lo Yoˇhanˬ yawˇ huiˉ maˬ hta‸ hpaˆ da‸ leh, Yeˍruˆsaˍlehnˍ venˇ lo k'aw‸ k'o‸-e ve yoˬ. 14 Oˇ htaˇ, yawˇ huiˉ maˬ Peˍraˍgeˍ venˇ lo k'aw‸ tu leh, Piˇsiˇdiˆ mvuhˇ miˬ Anˍtiˆawˍ venˇ lo gaˬ ve yoˬ. Shinˉ nyi htaˇ yawˇ huiˉ maˬ bon yehˬ taˆ-e leh mui ve yoˬ. 15 Awˬ liˇ tawˇ hkawˇ li‸ leh tcuh kaˍ paˍ hui ve li‸ hta‸ shu g'aw peuˬ hk'aw‸ nawˉ, bon yehˬ awˬ hoˉ teˇ hpaˍ lehˬ, yawˇ huiˉ maˬ geh chaw k'ai tcuh leh, Awˬ viˉ awˬ nyi teˇ hpaˍ-oˬ, chaw chi ma ve hta‸ awˬ g'aˇ piˇ tuˬ ve tawˇ hkawˇ cawˬ ve k'o, k'oˆ piˇ-oˆ teh‸ k'oˆ piˇ ve yoˬ. 16 Oˇ htaˇ Pawˇlu‸ tu leh, la‸ sheh te maˍ leh k'oˆ ve, Iˉsaˍreˍlaˆ chaw hui leh G'uiˬ sha hta‸ kawˆ ve chaw teˇ hpaˍ-oˬ, na sheˍ. 17 Iˉsaˍreˍlaˆ chaw ceuˬ ve G'uiˬ sha lehˬ, ngaˬ hui ve awˬ puˍ lonˉ teˇ hpaˍ hta‸ leuˆ yuˬ leh, yawˇ hui Eˇjiˇtu‸ mvuhˇ miˬ awˬ hk'aw lo chehˇ htaˇ, yawˇ hui hta‸ taˍ uiˍ taˍ mvuh piˇ ve yoˬ. Awˬ hk'aw‸ nawˉ yawˇ la‸ sheh chiˇ leh yawˇ hui hta‸ sheh tawˆ-e ve yoˬ. 18 Heh puiˉ hk'aw lo aˬ laˬ hk'e awˇ chi hk'aw‸ hk'a gaˬ, yawˇ hui te ve awˬ liˇ awˬ hk'aˇ teˇ hpaˍ hta‸ yawˇ yeunˇ hkanˍ ve yoˬ. 19 Hkaˍnanˍ mvuhˇ miˬ awˬ hk'aw lo chehˇ ve chaw suhˍ ceuˬ hta‸ G'uiˬ sha te luˬ peuˬ hk'aw‸ nawˉ, awˇ ha ngaˇ chi hk'aw‸ hk'e chaw oˇ ve teˇ hpaˍ ve mvuhˇ miˬ Iˉsaˍreˍlaˆ chaw hui hta‸ piˇ ve yoˬ. 20 Oˇ ve hk'aw‸ nawˉ, tcuh kaˍ paˍ Saˍmo-eˍlaˆ ve awˬ co-e hk'a gaˬ, G'uiˬ sha yawˇ hui hta‸ suhˉ jehˬ shehˍ hpaˇ hui piˇ ve yoˬ. 21 Oˇ htaˇ, yawˇ hui hkunˉ hawˉ hkanˇ lawˬ leh, Beˍyaˍmenˍ ve awˬ ceuˬ awˬ hk'aˇ Kiˇshaˆ ve yaˇ Sawˉlu‸ teˇ g'aˇ awˇ chi hk'aw‸ hk'a gaˬ hkunˉ hawˉ hkanˇ te tuˬ G'uiˬ sha yawˇ hui hta‸ piˇ ve yoˬ. 22 G'uiˬ sha yawˇ hta‸ yuˬ baˬ peuˬ hk'aw‸ nawˉ, yawˇ hui ve hkunˉ hawˉ hkanˇ hpeh‸ la tuˬ Daˍviˆ hta‸ chiˇ taˆ-e ve yoˬ. G'uiˬ sha Daˍviˆ awˬ lawn shaˉ hkiˆ hkanˍ leh k'oˆ ve, Ngaˬ nyi ma cawˇ ve chaw, Yeˍsehˇ ve yaˇ Daˍviˆ hta‸ ngaˬ mawˬ peuˬ. Yawˇ lehˬ ngaˬ ve a loˍ hk'a biˇ te tuˬ yoˬ teh‸ k'oˆ ve yoˬ. 23 G'uiˬ sha ka ti‸ piˇ taˍ ve hk'e, Daˍviˆ ve awˬ ceuˬ awˬ hk'aˇ awˬ hk'aw lo Iˉsaˍreˍlaˆ chaw hui awˬ pon Htaiˍ hk'aw‸ shehˍ hpaˇ Yeˍsuˆ hta‸ yawˇ tawˆ la piˇ peuˬ. 24 Yeˍsuˆ maˇ tawˆ la sheˍ awˬ g'uˇ suhˍ, Yoˇhanˬ lehˬ venˇ baˆ dawˇ hpfuhˆ ve hta‸ caˉ da‸ ve baˆtiˆsaˬ awˬ lawn Iˉsaˍreˍlaˆ chaw hk'a peu-eˬ hta‸ maˍ piˇ ve yoˬ. 25 Yoˇhanˬ lehˬ, yawˇ ve kanˉ te peuˬ paˇ neˇ htaˇ yawˇ k'oˆ ve, Ngaˬ a shu hpeh‸ ve teh‸ nawˬ hui dawˇ le. Ngaˬ lehˬ chaw oˇ ve teˇ g'aˇ maˇ heˆ. Ya‸ hk'aˇ, chaw oˇ ve teˇ g'aˇ lehˬ, ngaˬ awˬ hk'aw‸ nawˉ laˬ chehˇ ve yoˬ. Yawˇ ve hkuiˉ nuˇ caˆ hta‸ hpui tuˬ ve ceh ka‸ ngaˬ maˇ keunˍ teh‸ yawˇ k'oˆ ve yoˬ. 26 Aˍbraˍhanˍ awˬ ceuˬ awˬ hk'aˇ awˬ yaˇ awˬ duˬ hui leh, nawˬ hui awˬ hk'aw lo G'uiˬ sha hta‸ kawˆ ve awˬ viˉ awˬ nyi teˇ hpaˍ-oˬ, htaiˍ hk'aw‸ ve awˬ lawn chi ngaˬ hui g'a kaˇ peuˬ. 27 Awˬ lawn k'o, Yeˍruˆsaˍlehnˍ venˇ awˬ hk'aw lo chehˇ ve chaw leh yawˇ hui ve jawˇ mawˇ teˇ hpaˍ lehˬ, yawˇ hta‸ maˇ k'oˆ, teˇ shinˉ nyi le le g'aw chehˇ ve tcuh kaˍ paˍ hui ve li‸ hta‸ htawˇ maˇ k'oˆ, maˇ shiˍ ve pa taw, yawˇ hta‸ suhˉ taˆ ve awˬ hk'aw lo tawˇ hkawˇ oˇ ve teˇ hpaˍ hta‸ te biˇ la ve yoˬ. 28 Yawˇ awˬ hk'aw lo suh keunˍ ve venˇ baˆ hta‸ yawˇ hui maˇ mawˬ htawˇ, yawˇ hta‸ tiˇ pehˍ tuˬ jawˇ mawˇ Piˉla‸ geh lawˬ ve yoˬ. 29 Yawˇ awˬ lawn hk'a bvuh‸ taˍ ve teˇ hpaˍ hta‸ yawˇ hui te biˇ peuˬ hk'aw‸ nawˉ, yawˇ hta‸ suhˆ hkuiˉ daw hk'oˆ yuˬ ya‸-e leh, tuˍ hpfuh hk'aw keu taˍ ve yoˬ. 30 Ya‸ hk'aˇ, G'uiˬ sha lehˬ yawˇ hta‸ suh kuiˬ lo k'aw‸ te‸ tu la piˇ ve yoˬ. 31 Gaˍliˍlehˇ mvuhˇ miˬ te leh Yeˍruˆsaˍlehnˍ venˇ hk'a gaˬ yawˇ geh k'ai jaw ve chaw teˇ hpaˍ hta‸ awˬ nyi awˬ haˉ a ciˉ maw chaweh yawˇ awˬ to maw piˇ ve yoˬ. Chaw oˇ ve teˇ hpaˍ lehˬ, chi beu‸ shu mehˆ g'uˇ suhˍ shaˉ hkiˆ hkanˍ shehˍ hpaˇ hpeh‸ ve yoˬ. 32 Awˬ puˍ lonˉ teˇ hpaˍ hta‸ G'uiˬ sha ka ti‸ piˇ taˍ ve hk'e, ha lehˬ ve bon hkawˇ chi ngaˬ huiˉ maˬ nawˬ hui hta‸ maˍ laˇ ve yoˬ. 33 G'uiˬ sha Yeˍsuˆ hta‸ k'aw‸ te‸ tu la piˇ ve teˇ yanˇ, yawˇ hui hta‸ ka ti‸ piˇ taˍ ve hk'e, yawˇ hui ve yaˇ teˇ hpaˍ hpeh‸ ve ngaˬ hui hta‸ yawˇ te biˇ la piˇ ve yoˬ. Chiˇ mvuh ve li‸ nyiˇ maˬ teˇ maˬ awˬ hk'aw lo bvuh‸ taˍ ve hk'e, Nawˬ lehˬ ngaˬ ve Yaˇ hpu hpeh‸ ve yoˬ. Ya‸ nyi ngaˬ nawˬ ve Awˬ pa hpeh‸ la peuˬ, teh bvuh‸ taˍ ve yoˬ. 34 Chi hk'oˆ ka‸, yawˇ suh kuiˬ lo k'aw‸ te‸ tu la leh, kuiˇ ve luˬ ve awˬ hk'aw lo teˇ pawˆ ka‸ maˇ g'a k'aw‸ gaˬ tuˬ ve awˬ lawn G'uiˬ sha chi hk'e k'oˆ ve, Daˍviˆ g'a taˍ ve, da‸ kehˬ leh yeˬ ve awˬ bon teˇ hpaˍ, ngaˬ nawˬ hui hta‸ piˇ tuˬ yoˬ teh‸ k'oˆ ve yoˬ. 35 Chi hta‸ pa taw, Chiˇ mvuh ve li‸ awˬ hk'aw lo awˬ kaˍ awˬ nu teˇ kaˬ bvuh‸ taˍ sheˍ ve, Nawˬ ve da‸ kehˬ ve Chaw lehˬ, kuiˇ ve luˬ ve hta‸ hpuˇ tuˬ nawˬ hkanˍ tuˬ ve maˇ heˆ teh‸ yawˇ k'oˇ taˍ ve yoˬ. 36 Daˍviˆ lehˬ, yawˇ ve teˇ co-e awˬ hk'aw lo G'uiˬ sha a loˍ cawˇ ve hk'e te peuˬ hk'aw‸ nawˉ suh ve yoˬ. Yawˇ ve awˬ puˍ teˇ hpaˍ geh shu yawˇ hta‸ taˍ leh, yawˇ kuiˇ k'ai luˬ k'ai ve yoˬ. 37 Ya‸ hk'aˇ, G'uiˬ sha k'aw‸ te‸ tu la piˇ ve teˇ g'aˇ lehˬ, kuiˇ ve luˬ ve hta‸ maˇ g'a hpuˇ. 38 Chi hta‸ pa taw, awˬ viˉ awˬ nyi teˇ hpaˍ-oˬ, chi hta‸ shiˍ-o‸. Chaw chi teˇ g'aˇ hta‸ pa taw venˇ baˆ hpehˇ hk'a g'a ve awˬ lawn nawˬ hui hta‸ k'aoˍ maˍ laˇ ve yoˬ. 39 Yawˇ hta‸ hk'a yonˍ ve chaw teˇ g'aˇ le le lehˬ, Moˉseˍ ve awˬ liˇ tawˇ hkawˇ ponˬ piˇ maˇ g'a ve awˬ ceuˬ hk'a peu-eˬ hta‸ g'a ponˬ ve yoˬ. 40 G'uiˬ sha ve tcuh kaˍ paˍ hui k'oˆ ve, Maˇ shawˍ maˇ caˆ k'oˆ ve chaw hui-oˬ, nyi leh anˇ leh luˬ k'ai-o. Awˬ lawn k'o, nawˬ hui ve awˬ nyi awˬ haˉ teˇ hpaˍ awˬ hk'aw lo ngaˬ kanˉ teˇ maˬ te ve yoˬ. Awˬ lawn chi chaw teˇ g'aˇ g'aˇ nawˬ hui hta‸ k'aoˍ maˍ laˇ ve htawˇ, nawˬ hui yonˍ tuˬ ve maˇ heˆ, teh‸ k'oˆ taˍ ve yoˬ. 41 Hk'e te leh, yawˇ hui k'oˆ ve hk'e nawˬ hui awˬ hk'oˆ maˇ g'a gaˬ la tuˬ shaˍ ti‸ taˍ-o‸ teh‸, Pawˇlu‸ k'oˆ piˇ ve yoˬ. 42 Yawˇ huiˉ maˬ bon yehˬ hk'aw tawˆ k'ai chehˇ htaˇ, awˬ lawn chi teˇ hpaˍ awˬ hk'aw‸ nawˉ teˇ shinˉ htawˇ k'aw‸ hto laˇ tuˬ, chaw chi ma ve yawˇ huiˉ maˬ hta‸ lawˬ ve yoˬ. 43 Bon yehˬ ya‸ ve teˇ yanˇ, Yuˇda‸ chaw hui leh G'uiˬ sha hta‸ oˉ k'oˍ pui ve Yuˇda‸ awˬ liˇ yuˬ ve chaw maˇ maˇ Pawˇlu‸ leh Baˍnaˍbaˆ awˬ hk'aˇ suh k'ai ve yoˬ. G'uiˬ sha ve awˬ bon awˬ hk'aw lo chehˇ yeˬ tuˬ, yawˇ huiˉ maˬ lehˬ yawˇ hui hta‸ maˍ piˇ leh awˬ g'aˇ piˇ ve yoˬ. 44 Awˬ hk'aw‸ nawˉ teˇ shinˉ, shinˉ nyi htaˇ, G'uiˬ sha ve tawˇ hkawˇ hta‸ na tuˬ aˬ laˬ hk'e venˇ yaˇ hk'a peu-eˬ hpawnˬ la ve yoˬ. 45 Ya‸ hk'aˇ, Yuˇda‸ chaw hui lehˬ chaw awˬ moˍ lonˉ teˇ hpaˍ hta‸ g'a mawˬ htaˇ, hkawehˉ ve nyi ma hk'a biˇ cawˬ ve yoˬ. Pawˇlu‸ k'oˆ ve hta‸ yawˇ hui g'awˬ hk'aˆ leh, yawˇ hta‸ maˇ shawˍ maˇ caˆ k'oˆ piˇ ve yoˬ. 46 Pawˇlu‸ leh Baˍnaˍbaˆ nyi ma ha‸ hanˉ te leh k'oˆ ve, G'uiˬ sha ve tawˇ hkawˇ nawˬ hui hta‸ awˉ lawˉ g'a hto piˇ ve yoˬ. Ya‸ hk'aˇ, nawˬ hui lehˬ G'uiˬ sha ve tawˇ hkawˇ hta‸ chiˇ baˬ taˉ leh co ti‸ ha ti‸ hta‸ g'a maˇ keunˍ teh‸ nawˬ hui hk'aˇ nawˬ hui shawˍ taˍ ve pa taw, ngaˬ huiˉ maˬ buiˇ shaˆ aˉ naˆ chaw hui geh k'ai tuˬ yoˬ. 47 Awˬ lawn k'o, Miˬ guiˬ awˬ leh hk'a gaˬ nawˬ hta‸ pa taw htaiˍ hk'aw‸ ve hta‸ g'a tuˬ, buiˇ shaˆ aˉ naˆ chaw hui awˬ pon awˬ g'euˆ hpeh‸ tuˬ, ngaˬ nawˬ hta‸ teh taˍ ve yoˬ. teh‸ Jawˇ mawˇ G'uiˬ sha ngaˬ huiˉ maˬ hta‸ chi hk'e tawˇ piˇ taˍ ve yoˬ teh‸, Pawˇlu‸ k'oˆ piˇ ve yoˬ. 48 Buiˇ shaˆ aˉ naˆ chaw hui tawˇ hkawˇ chi hta‸ g'a kaˇ htaˇ, ha lehˬ leh G'uiˬ sha ve tawˇ hkawˇ hta‸ chiˇ uiˍ chiˇ mvuh ve yoˬ. Co ti‸ ha ti‸ hta‸ g'a tuˬ awˬ pon hk'a fuiˍ taˍ ve chaw hui lehˬ yonˍ la ve yoˬ. 49 Hk'e te leh Jawˇ mawˇ G'uiˬ sha ve tawˇ hkawˇ lehˬ, mvuhˇ miˬ oˇ ve awˬ hk'aw teˇ kaˬ le le lo bvuhˬ k'ai ve yoˬ. 50 Ya‸ hk'aˇ, Yuˇda‸ chaw hui lehˬ, G'uiˬ sha hta‸ yawˆ yan ve awˬ me‸ awˬ hponˇ cawˬ ve yaˇ miˇ teˇ hpaˍ leh, venˇ oˇ ve awˬ hk'aw lo chehˇ ve awˬ hoˉ awˬ naˬ teˇ hpaˍ hta‸ ca juˆ piˇ ve yoˬ. Pawˇlu‸ leh Baˍnaˍbaˆ hta‸ fawˉ mehˍ tuˬ yawˇ hui g'aˇ hte‸ te leh, yawˇ huiˉ maˬ hta‸ mvuhˇ miˬ oˇ ve awˬ hk'aw lo g'a‸ k'oˬ ve yoˬ. 51 Yawˇ huiˉ maˬ lehˬ, chaw oˇ ve teˇ hpaˍ awˬ hk'oˆ shaˉ hkiˆ hpeh‸ tuˬ, hkui taw k'aw hawˉ ve je‸ meu-e hpi baˬ taˉ leh, Iˇkawˇniˆ venˇ lo k'ai ve yoˬ. 52 Awˬ la‸ g'awˇ teˇ hpaˍ lehˬ, ha lehˬ ve teˇ ceuˬ maˇ k'oˆ, da‸ ve kehˬ ve Awˬ ha hpu maˇ k'oˆ, hk'a biˇ cawˬ ve yoˬ.

Tcuh yaˇ 14

1 Yawˇ huiˉ maˬ Iˇkawˇniˆ venˇ lo gaˬ leh, Yuˇda‸ ve bon yehˬ awˬ hk'aw lo teˇ geh lo‸-e ve yoˬ. Oˇ kaˬ lo yawˇ huiˉ maˬ hk'a deh‸ maˍ piˇ ve pa taw, Yuˇda‸ chaw leh Heˍlaˍsaˆ chaw hui maˇ maˇ yonˍ la ve yoˬ. 2 Ya‸ hk'aˇ, maˇ yonˍ ve Yuˇda‸ chaw teˇ hpaˍ lehˬ, buiˇ shaˆ aˉ naˆ chaw hui hta‸ ca juˆ piˇ leh, awˬ viˉ awˬ nyi oˇ ve teˇ hpaˍ hta‸ canˇ ve nyi ma cawˬ la tuˬ te ve yoˬ. 3 Hk'e te leh, oˇ kaˬ lo yawˇ huiˉ maˬ maw chaweh chehˇ leh, Jawˇ mawˇ Yeˍsuˆ awˬ hk'aw lo nyi ma ha‸ hanˉ te leh maˍ piˇ ve yoˬ. Jawˇ mawˇ Yeˍsuˆ htawˇ, yawˇ huiˉ maˬ hta‸ cuˇ leh anˇ tuˬ leh awˬ heˆ teˇ hpaˍ te ve awˬ hk'aw lo, yawˇ ve awˬ bon awˬ shinˉ awˬ lawn maˍ ve tawˇ hkawˇ awˬ pon shaˉ hkiˆ hkanˍ ve yoˬ. 4 Ya‸ hk'aˇ, venˇ yaˇ teˇ hpaˍ lehˬ, nyiˇ moˍ hpeh‸ sheˬ leh, teˇ hpaˍ hpaˍ Yuˇda‸ chaw hui hpawˇ chehˇ leh, teˇ hpaˍ hpaˍ tcuh yaˇ hui hpawˇ chehˇ ve yoˬ. 5 Buiˇ shaˆ aˉ naˆ chaw hui leh Yuˇda‸ chaw teˇ hpaˍ lehˬ, yawˇ hui ve awˬ hoˉ awˬ naˬ teˇ hpaˍ geh teˇ geh Pawˇlu‸ leh Baˍnaˍbaˆ hta‸ hk'a mvuhˇ hk'a na te leh haˉ pui baˬ-a teh‸ te ve hta‸ yawˇ huiˉ maˬ g'a shiˍ htaˇ, 6 Luˇkawˇniˆ mvuhˇ miˬ awˬ hk'aw lo cawˬ ve Luˇtaˍraˆ venˇ, Deˍbeˍ venˇ leh, awˬ paˇ awˬ kui ve mvuhˇ miˬ lo hpaw-e ve yoˬ. 7 Mvuhˇ miˬ oˇ ve awˬ hk'aw lo htawˇ, yawˇ huiˉ maˬ ha lehˬ ve bon hkawˇ maˍ piˇ ve yoˬ. 8 Luˇtaˍraˆ venˇ awˬ hk'aw lo hkui luˬ paˍ teˇ g'aˇ mui chehˇ ve yoˬ. Yawˇ paw la htaˇ ka‸ hkui luˬ paˍ hpeh‸ leh, ya‸ kaw teˇ pawˆ ka‸ maˇ toˇ jaw. 9 Yawˇ lehˬ Pawˇlu‸ maˍ piˇ ve hta‸ na chehˇ ve yoˬ. Pawˇlu‸ yawˇ hta‸ hk'a deh‸ nyi leh, na-e la tuˬ yawˇ yonˍ ve nyi ma cawˬ ve hta‸ g'a shiˍ htaˇ, 10 awˬ hkawˇ bvuhˬ chaweh kuˬ leh, Hteˇ lehˍ tu huˉ-oˆ teh‸, yawˇ hta‸ k'oˆ piˇ ve yoˬ. Yawˇ pawˆ tu leh, ya‸ k'aw juˇ k'ai ve yoˬ. 11 Pawˇlu‸ chi hk'e te ve hta‸ chaw awˬ moˍ lonˉ g'a mawˬ htaˇ, yawˇ hui lehˬ Luˇkawˇniˆ hkawˇ yaw leh, G'uiˬ sha teˇ hpaˍ lehˬ chaw yaˇ hk'e te leh ngaˬ hui geh ya‸ la peuˬ teh‸, awˬ hkawˇ bvuhˬ chaweh kuˬ ve yoˬ. 12 Yawˇ hui lehˬ, Baˍnaˍbaˆ hta‸ Cuˇsaˆ teh‸ meh piˇ ve yoˬ. Pawˇlu‸ lehˬ leuˉ leh tawˇ yaw ve pa taw, yawˇ hta‸ Heˍmeˍ teh‸ meh piˇ ve yoˬ. 13 Venˇ awˬ baˬ hpawˇ lo Cuˇsaˆ ve bon yehˬ teˇ yehˬ cawˬ ve yoˬ. Bon yehˬ oˇ ve hta‸ caˉ da‸ ve paw hkuˇ teˇ g'aˇ lehˬ, nuˇ teˇ hpaˍ leh suhˉ veˆ hk'aw teˇ hpaˍ hta‸ venˇ taˍ meu‸ hpe‸ lo yuˬ laˬ leh, chaw awˬ moˍ lonˉ geh teˇ geh yawˇ huiˉ maˬ hta‸ tanˇ piˇ tuˬ dawˇ taˍ ve yoˬ. 14 Ya‸ hk'aˇ, tcuh yaˇ Baˍnaˍbaˆ leh Pawˇlu‸ awˬ lawn oˇ ve hta‸ g'a kaˇ htaˇ, yawˇ huiˉ maˬ ve veu‸ k'aˇ hta‸ tzuh‸ suhˍ leh, chaw awˬ moˍ lonˉ awˬ hk'aw lo g'uiˇ lo‸-e leh k'oˆ ve, 15 Awˬ chawˇ teˇ hpaˍ-oˬ, aˬ hto‸ ma pa taw chi hk'e te ve le. Ngaˬ huiˉ maˬ htawˇ nawˬ hui hk'a shuˍ shuˍ chaw yaˇ hpeh‸ ve yoˬ. Awˬ bon maˇ cawˬ ve chi teˇ hpaˍ hta‸ baˬ taˉ leh, te‸ chehˇ ve G'uiˬ sha geh k'aw‸ hpfuhˆ k'aw‸ la tuˬ, ngaˬ huiˉ maˬ nawˬ hui hta‸ ha lehˬ ve bon hkawˇ maˍ laˇ ve yoˬ. Te‸ chehˇ ve G'uiˬ sha lehˬ mvuhˇ naw ma, miˬ guiˬ, laˇ tsuhˇ g'uiˬ leh oˇ ve teˇ hpaˍ awˬ hk'aw hk'a cawˬ ve teˇ hpaˍ hta‸ yawˇ hpanˍ taˍ ve yoˬ. 16 G'uiˬ sha lehˬ, ponˬ laˬ ve awˬ co-e teˇ hpaˍ awˬ hk'aw lo chaw ceuˬ hk'a peu-eˬ ve hta‸ a shu yawˇ ve a loˍ awˬ hk'aˇ suh te k'ai tuˬ hpehˇ piˇ taˍ ve yoˬ. 17 Ya‸ hk'aˇ, yawˇ awˬ lawn shaˉ hkiˆ hkanˍ ve awˬ ceuˬ teˇ hpaˍ hta‸ yawˇ maˇ teh taˍ ve maˇ heˆ. Awˬ lawn k'o, yawˇ da‸ ve hta‸ te leh, mvuhˇ naw ma lo mvuhˇ yeˬ laˬ piˇ ve, awˬ shiˍ awˬ nu naw‸ la tuˬ awˬ tcuhˉ awˬ yanˇ piˇ ve, caˇ tuˬ dawˬ tuˬ hk'a bvuhˆ caˍ piˇ leh, ha lehˬ tuˬ nyi hk'aˇ suh htaˇ hk'a gaˬ yawˇ piˇ ve yoˬ teh‸, yawˇ huiˉ maˬ g'aˇ hte‸ kuˬ ve yoˬ. 18 Chi hk'e k'oˆ ve htawˇ, chaw awˬ moˍ lonˉ yawˇ huiˉ maˬ hta‸ maˇ g'a tanˇ laˇ tuˬ, aˬ laˬ hk'e tawˍ taˍ maˇ g'a ve yoˬ. 19 Oˇ ve hk'aw‸ nawˉ, Anˍtiˆawˍ venˇ leh Iˇkawˇniˆ venˇ lo chehˇ ve Yuˇda‸ chaw teˇ hpaˍ laˬ leh, chaw awˬ moˍ lonˉ hta‸ beˬ g'a peuˬ hk'aw‸ nawˉ, yawˇ hui Pawˇlu‸ hta‸ haˉ pui baˬ ve yoˬ. Yawˇ suh peuˬ teh‸ dawˇ leh, yawˇ hui yawˇ hta‸ venˇ awˬ baˬ lo g'awˬ baˬ ve yoˬ. 20 Ya‸ hk'aˇ, awˬ la‸ g'awˇ teˇ hpaˍ yawˇ hta‸ hk'a caw zuhˇ chehˇ htaˇ, yawˇ tu leh venˇ hk'aw k'aw‸ lo‸-e ve yoˬ. Awˬ hk'aw‸ nawˉ teˇ nyi yawˇ Baˍnaˍbaˆ geh teˇ geh Deˍbeˍ venˇ lo k'ai ve yoˬ. 21 Venˇ oˇ ve awˬ hk'aw lo ha lehˬ ve bon hkawˇ maˍ piˇ leh, chaw maˇ maˇ hta‸ awˬ la‸ g'awˇ hpeh‸ la piˇ peuˬ hk'aw‸ nawˉ, yawˇ huiˉ maˬ lehˬ Luˇtaˍraˆ venˇ, Iˇkawˇniˆ venˇ leh Anˍtiˆawˍ venˇ lo k'aw‸ k'o‸-e ve yoˬ. 22 Awˬ la‸ g'awˇ teˇ hpaˍ nyi ma yeˬ la leh, yonˍ ve awˬ hk'aw lo yeˬ chehˇ tuˬ, yawˇ hui hta‸ awˬ g'aˇ piˇ ve yoˬ. Ngaˬ hui lehˬ tu‸ ve hkanˍ ve maˇ maˇ hta‸ hkanˍ ve hk'aw lo G'uiˬ sha ve mvuhˇ miˬ hk'aw g'a lo‸-e ve yoˬ teh‸ yawˇ hui hta‸ maˍ piˇ ve yoˬ. 23 Yawˇ hui caˇ tuˬ ce leh bon lawˬ ve awˬ hk'aw lo, Hkri‸ yaˇ awˬ moˍ teˇ moˍ le le awˬ pon awˬ hoˉ chaw mawˇ teˇ hpaˍ hta‸ leuˆ yuˬ leh, yawˇ hui yonˍ chehˇ ve Jawˇ mawˇ G'uiˬ sha ve la‸ sheh awˬ hk'aw lo chiˇ a‸ piˇ ve yoˬ. 24 Peuˬ leh yawˇ huiˉ maˬ Piˇsiˇdiˆ mvuhˇ miˬ lo hpanˍ k'ai leh, Paˍpuˇliˆ mvuhˇ miˬ lo gaˬ ve yoˬ. 25 Peˍraˍgeˍ venˇ awˬ hk'aw lo bon hkawˇ maˍ piˇ peuˬ hk'aw‸ nawˉ, yawˇ huiˉ maˬ Aˍtaˍliˆ venˇ lo k'ai ve yoˬ. 26 Oˇ kaˬ lo haw lo‸ k'oˍ ciˇ leh, Anˍtiˆawˍ venˇ lo k'aw‸ k'o‸-e ve yoˬ. Venˇ oˇ ve awˬ hk'aw lo ponˬ laˬ htaˇ yawˇ huiˉ maˬ G'uiˬ sha ve kanˉ te tuˬ awˬ pon awˬ bon piˇ shehˍ hpaˇ G'uiˬ sha ve la‸ sheh awˬ hk'aw lo shu yawˇ huiˉ maˬ hta‸ chiˇ a‸ piˇ taˍ ve yoˬ. Chi beu‸ kanˉ oˇ ve hta‸ yawˇ huiˉ maˬ te biˇ peuˬ. 27 Yawˇ huiˉ maˬ gaˬ la htaˇ, Hkri‸ yaˇ awˬ moˍ hta‸ kuˬ hpawnˬ leh, G'uiˬ sha yawˇ huiˉ maˬ hta‸ cuˇ leh hk'a te ve awˬ lawn maˇ k'oˆ, buiˇ shaˆ aˉ naˆ chaw hui yonˍ hpeh‸ tuˬ, G'uiˬ sha yehˬ miˉ hpaw piˇ ve awˬ lawn maˇ k'oˆ, yawˇ hui hta‸ k'aoˍ maˍ piˇ ve yoˬ. 28 Oˇ kaˬ lo yawˇ huiˉ maˬ awˬ la‸ g'awˇ hui geh a ciˉ maw chaweh chehˇ ve yoˬ.

Tcuh yaˇ 15

1 Oˇ htaˇ, Yuˇda‸ mvuhˇ miˬ lo chehˇ ve chaw teˇ hpaˍ hpaˍ gaˬ la leh, Nawˬ hui lehˬ Moˉseˍ ve awˬ liˇ cawˬ ve hk'e awˬ guiˬ meuˇ maˇ shoˍ ve k'o, htaiˍ hk'aw‸ ve hta‸ g'a maˇ hpeh‸ teh‸, awˬ viˉ awˬ nyi teˇ hpaˍ hta‸ maˍ piˇ ve yoˬ. 2 Pawˇlu‸ leh Baˍnaˍbaˆ chaw oˇ ve teˇ hpaˍ hta‸ maˇ hawˍ da‸ leh tawˇ g'aˇ hte‸ g'awˬ da‸ peuˬ hk'aw‸ nawˉ, awˬ lawn chi hta‸ ca na nyi tuˬ, awˬ viˉ awˬ nyi teˇ hpaˍ lehˬ, Pawˇlu‸, Baˍnaˍbaˆ leh awˬ kaˍ awˬ nu chaw teˇ hpaˍ hpaˍ hta‸ leuˆ yuˬ leh, Yeˍruˆsaˍlehnˍ venˇ lo chehˇ ve tcuh yaˇ hui leh awˬ hoˉ chaw mawˇ teˇ hpaˍ geh k'ai tcuh ve yoˬ. 3 Hk'e te leh, Hkri‸ yaˇ awˬ moˍ yawˇ hui hta‸ k'ai tcuh ve teˇ yanˇ, yawˇ hui lehˬ Hpiˇniˆ mvuhˇ miˬ leh Saˍmaˍriˆ mvuhˇ miˬ hta‸ hpanˍ k'ai leh, buiˇ shaˆ aˉ naˆ chaw teˇ hpaˍ nyi ma k'aw‸ pa ve awˬ lawn k'aoˍ maˍ piˇ ve pa taw, awˬ viˉ awˬ nyi hk'a peu-eˬ ha lehˬ jaˇ ve yoˬ. 4 Yawˇ hui Yeˍruˆsaˍlehnˍ venˇ lo gaˬ la htaˇ, Hkri‸ yaˇ awˬ moˍ, tcuh yaˇ hui leh, awˬ hoˉ chaw mawˇ teˇ hpaˍ yawˇ hui hta‸ ha‸ yuˬ ve yoˬ. Oˇ htaˇ, G'uiˬ sha yawˇ huiˉ maˬ hta‸ cuˇ ve awˬ hk'aw lo, hk'a te ve awˬ lawn hk'a peu-eˬ yawˇ huiˉ maˬ yawˇ hui hta‸ k'aoˍ maˍ piˇ ve yoˬ. 5 Ya‸ hk'aˇ, Hpaˍriˍsehˇ awˬ moˍ awˬ hk'aw lo Yeˍsuˆ hta‸ yonˍ ve chaw teˇ hpaˍ hpaˍ tu la leh k'oˆ ve, Yawˇ hui hta‸ awˬ guiˬ meuˇ g'a shoˍ piˇ leh, Moˉseˍ ve awˬ liˇ tawˇ hkawˇ awˬ hk'aˇ suh te tuˬ yawˇ hui hta‸ tawˇ g'a piˇ ve yoˬ teh‸ k'oˆ piˇ ve yoˬ. 6 Oˇ htaˇ, tcuh yaˇ hui leh, awˬ hoˉ chaw mawˇ teˇ hpaˍ awˬ lawn chi ve hta‸ jehˬ da‸ tuˬ hpawnˬ da‸ ve yoˬ. 7 Awˬ lawn chi hta‸ maˇ maˇ jehˬ da‸ peuˬ hk'aw‸ nawˉ, Peˍtruˆ tu la leh yawˇ hui hta‸ k'oˆ piˇ ve, Awˬ viˉ awˬ nyi teˇ hpaˍ-oˬ, ngaˬ hta‸ pa taw buiˇ shaˆ aˉ naˆ chaw teˇ hpaˍ ha lehˬ ve bon hkawˇ hta‸ g'a kaˇ leh g'a yonˍ tuˬ, awˉ lawˉ htaˇ ka‸ nawˬ hui awˬ hk'aw lo G'uiˬ sha ngaˬ hta‸ leuˆ yuˬ taˍ ve hta‸ nawˬ hui shiˍ ve yoˬ. 8 Nyi ma hta‸ shiˍ ve G'uiˬ sha lehˬ, ngaˬ hui hta‸ da‸ ve kehˬ ve Awˬ ha hpu pe‸ laˇ ve hk'a shuˍ shuˍ, yawˇ hui hta‸ htawˇ piˇ ve awˬ hk'aw lo, yawˇ hui awˬ pon yawˇ shaˉ hkiˆ hkanˍ ve yoˬ. 9 G'uiˬ sha lehˬ, ngaˬ hui leh yawˇ hui hta‸ maˇ peun da‸ piˇ lawˬ. Yonˍ ve hta‸ pa taw, yawˇ hui ve nyi ma hta‸ htawˇ yawˇ da‸ piˇ kehˬ piˇ peuˬ. 10 Hk'e te leh, ngaˬ hui ve awˬ puˍ awˬ pi teˇ hpaˍ ka‸ ngaˬ hui ka‸ taˆ maˇ g'aˇ ve taˆ tuˬ hta‸ yuˬ leh, G'uiˬ sha hta‸ lawˇ nyi tuˬ, aˬ hto‸ ma te awˬ la‸ g'awˇ hui ve la‸ k'aˉ hk'oˆ ca taˍ piˇ ve le. 11 Ngaˬ hui htawˇ yawˇ hui hk'a shuˍ shuˍ, Jawˇ mawˇ Yeˍsuˆ ve awˬ bon hta‸ pa taw ceh tiˉ htaiˍ hk'aw‸ g'a tuˬ ve hta‸ ngaˬ hui yonˍ ve yoˬ teh‸ Peˍtruˆ k'oˆ piˇ ve yoˬ. 12 Oˇ htaˇ, hk'a hpawnˬ la ve chaw hk'a peu-eˬ ta‸ iˉ gawˬ lehˍ chehˇ ve yoˬ. Baˍnaˍbaˆ leh Pawˇlu‸ lehˬ, G'uiˬ sha yawˇ huiˉ maˬ hta‸ cuˇ leh, buiˇ shaˆ aˉ naˆ chaw hui awˬ hk'aw lo anˇ tuˬ leh awˬ heˆ hk'a te ve teˇ hpaˍ awˬ lawn yawˇ huiˉ maˬ k'aoˍ maˍ piˇ ve hta‸ yawˇ hui na chehˇ ve yoˬ. 13 Yawˇ huiˉ maˬ tawˇ yaw peuˬ htaˇ, Yaˍkoˆ k'oˆ ve, Awˬ viˉ awˬ nyi teˇ hpaˍ-oˬ, ngaˬ ve hkawˇ hta‸ na sheˍ. 14 G'uiˬ sha lehˬ, yawˇ ve awˬ meh hta‸ pfuhˇ tuˬ ve awˬ pon buiˇ shaˆ aˉ naˆ chaw hui awˬ hk'aw lo chaw teˇ moˍ hta‸ yuˬ tawˆ tuˬ, awˉ lawˉ htaˇ G'uiˬ sha yawˇ hui hta‸ dawˇ nyi leh ha k'aˉ ve awˬ lawn Suˉmonˍ ngaˬ hui hta‸ k'aoˍ maˍ laˇ peuˬ. 15 Yawˇ k'oˆ ve tawˇ hkawˇ lehˬ, G'uiˬ sha ve tcuh kaˍ paˍ hui ve tawˇ hkawˇ hta‸ hawˍ da‸ ve yoˬ. Tcuh kaˍ paˍ ve li‸ awˬ hk'aw lo chi hk'e bvuh‸ taˍ ve, 16 Chi teˇ hpaˍ hpeh‸ la peuˬ hk'aw‸ nawˉ ngaˬ k'aw‸ la leh, paiˍ peuˬ ve Daˍviˆ ve yehˬ hta‸ ngaˬ k'aw‸ te tuˬ yoˬ. Luˬ k'ai sheˆ k'ai peuˬ ve hta‸ htawˇ ngaˬ k'aw‸ gu leh, yehˬ oˇ ve hta‸ ngaˬ k'aw‸ cawˍ ti tuˬ yoˬ. 17 Oˇ htaˇ, cawˬ taˍ sheˍ ve chaw teˇ hpaˍ leh, ngaˬ ve awˬ meh hk'a pfuhˇ ve buiˇ shaˆ aˉ naˆ chaw hui hk'a peu-eˬ, Jawˇ mawˇ G'uiˬ sha hta‸ ca tuˬ yoˬ. 18 Aˬ sho-eˬ htaˇ ka‸ awˬ lawn chi ngaˬ hui hta‸ shiˍ tcuh laˇ ve Jawˇ mawˇ G'uiˬ sha chi hk'e k'oˆ ve yoˬ teh‸ bvuh‸ taˍ ve yoˬ. 19 Hk'e te leh, G'uiˬ sha geh k'aw‸ hpfuhˆ k'aw‸ la ve buiˇ shaˆ aˉ naˆ chaw teˇ hpaˍ hta‸ sho‸ sha‸ tuˬ te maˇ cawˇ. 20 Ya‸ hk'aˇ, shaˉ ho‸ hta‸ caˉ da‸ ve cha‸ chiˆ ve teˇ hpaˍ maˇ k'oˆ, haˉ chawˇ haˉ paˆ te ve maˇ k'oˆ, k'awˍ peˍ nyiˉ pehˍ ve awˬ shaˍ hta‸ caˇ ve maˇ k'oˆ, awˬ suhˍ hta‸ caˇ ve maˇ k'oˆ, chi teˇ hpaˍ hta‸ jaw k'ai tuˬ, yawˇ hui hta‸ li‸ bvuh‸ piˇ cawˇ ve yoˬ teh‸ ngaˬ dawˇ ve yoˬ. 21 Awˬ lawn k'o, teˇ shinˉ nyi le le bon yehˬ awˬ hk'aw lo Moˉseˍ ve awˬ liˇ tawˇ hkawˇ hta‸ g'aw maˍ piˇ ve pa taw, aˬ sho-eˬ htaˇ ka‸ te leh teˇ venˇ le le awˬ hk'aw lo maˍ piˇ shehˍ hpaˇ teˇ hpaˍ cawˬ ve yoˬ teh‸ Yaˍkoˆ k'oˆ piˇ ve yoˬ. 22 Oˇ htaˇ, yawˇ hui awˬ hk'aw lo chaw hta‸ leuˆ yuˬ leh, Pawˇlu‸ leh Baˍnaˍbaˆ geh Anˍtiˆawˍ venˇ lo k'ai tcuh tuˬ, tcuh yaˇ teˇ hpaˍ leh awˬ hoˉ chaw mawˇ teˇ hpaˍ, Hkri‸ yaˇ awˬ moˍ hk'a peu-eˬ geh teˇ geh nyi ma cawˇ ve yoˬ. Awˬ viˉ awˬ nyi teˇ hpaˍ awˬ hk'aw lo awˬ hoˉ te ve Baˍsaˍbaˆ teh‸ k'oˆ ve Yuˇda‸ leh Siˍlaˆ hta‸ k'ai tcuh ve yoˬ. 23 Yawˇ huiˉ maˬ yuˬ k'ai ve li‸ lehˬ chi hk'e bvuh‸ taˍ ve yoˬ. Awˬ viˉ awˬ nyi awˬ hk'aw lo tcuh yaˇ hui leh awˬ hoˉ chaw mawˇ teˇ hpaˍ lehˬ, Anˍtiˆawˍ venˇ, Suˇriˆ mvuhˇ miˬ leh Kiˇliˇkiˆ mvuhˇ miˬ lo chehˇ ve buiˇ shaˆ aˉ naˆ chaw hui awˬ hk'aw lo awˬ viˉ awˬ nyi teˇ hpaˍ hta‸ ha‸ pehnˇ ve tawˇ shanˍ feu laˇ ve yoˬ. 24 Ngaˬ hui awˬ hk'aw lo ve chaw teˇ hpaˍ hpaˍ lehˬ, ngaˬ hui maˇ k'ai tcuh ve ka‸ nawˬ hui geh k'ai leh, nawˬ hui hta‸ sho‸ sha‸ piˇ leh nyi ma htawˇ hpfuhˆ nawˬ hpfuhˆ k'ai tuˬ maˍ piˇ ve awˬ lawn hta‸ ngaˬ hui g'a kaˇ ve yoˬ. 25 Chi hta‸ pa taw, ngaˬ hui jehˬ da‸ ve awˬ hk'aw lo nyi ma teˇ shiˍ tiˉ taˍ leh, nawˬ hui geh k'ai tuˬ chaw nyiˇ g'aˇ hta‸ leuˆ yuˬ ve yoˬ. 26 Ngaˬ hui ve Jawˇ mawˇ Yeˍsuˆ Hkri‸ awˬ pon a shu yawˇ ve a sha‸ hta‸ tanˇ taˬ ve, ngaˬ hui ha‸ ve Baˍnaˍbaˆ leh Pawˇlu‸ geh yawˇ huiˉ maˬ hta‸ k'ai tcuh ve yoˬ. 27 Hk'e te leh, li‸ hk'aw bvuh‸ taˍ ve awˬ lawn chi teˇ hpaˍ nawˬ hui hta‸ k'aoˍ maˍ laˇ tuˬ, Yuˇda‸ leh Siˍlaˆ hta‸ nawˬ hui geh peu laˇ ve yoˬ. 28 Jaw k'ai tuˬ loˍ jaˇ ve awˬ ceuˬ chi teˇ hpaˍ awˬ hk'oˆ, awˬ kaˍ awˬ nu ve awˬ vuiˬ nawˬ hui hta‸ maˇ taˍ tuˬ, da‸ ve kehˬ ve Awˬ ha hpu ka‸ ngaˬ hui ka‸ nyi ma cawˇ ve yoˬ. 29 Nawˬ hui jaw k'ai cawˇ ve teˇ hpaˍ lehˬ, shaˉ ho‸ hta‸ tanˇ taˍ ve awˬ ceuˬ hta‸ caˇ ve maˇ k'oˆ, awˬ suhˍ hta‸ caˇ ve maˇ k'oˆ, k'awˍ peˍ nyiˉ pehˍ ve awˬ shaˍ hta‸ caˇ ve maˇ k'oˆ, haˉ chawˇ haˉ paˆ te ve hta‸ maˇ k'oˆ, chi teˇ hpaˍ yoˬ. Chi teˇ hpaˍ hta‸ nawˬ hui jaw k'ai ve k'o da‸ jaˇ ve yoˬ. Dawˇ sha gaˇ sha ve cawˬ piˇ-oˆ teh‸ bvuh‸ taˍ ve yoˬ. 30 Yawˇ hui tawˆ k'ai leh Anˍtiˆawˍ venˇ lo gaˬ ve teˇ yanˇ, chaw chi ma ve hta‸ kuˬ hpawnˬ leh, yawˇ hui hta‸ li‸ oˇ ve piˇ ve yoˬ. 31 Li‸ oˇ ve hta‸ g'aw htaˇ, yawˇ hui hta‸ awˬ g'aˇ pe‸ laˇ ve pa taw ha lehˬ jaˇ ve yoˬ. 32 Yuˇda‸ leh Siˍlaˆ lehˬ, yawˇ huiˉ maˬ htawˇ bon maˍ paˍ hpeh‸ ve pa taw, awˍ viˉ awˬ nyi hui hta‸ maˇ maˇ maˍ piˇ ve awˬ hk'aw lo, awˬ g'aˇ piˇ leh yawˇ hui hta‸ yeˬ la piˇ lawˬ ve yoˬ. 33 Yawˇ huiˉ maˬ oˇ kaˬ lo a ciˉ maw chaweh chehˇ peuˬ hk'aw‸ nawˉ, tcuh peu laˇ ve chaw hui geh k'aw‸ k'o‸-e tuˬ, awˬ viˉ awˬ nyi teˇ hpaˍ lehˬ, dawˇ sha gaˇ sha ve awˬ hk'aw lo yawˇ huiˉ maˬ hta‸ k'o‸-e tcuh ve yoˬ. 35 Ya‸ hk'aˇ, Pawˇlu‸ leh Baˍnaˍbaˆ Anˍtiˆawˍ venˇ hk'aw lo chehˇ taˍ leh, awˬ kaˍ awˬ nu chaw laiˉ g'aˇ geh teˇ geh Jawˇ mawˇ G'uiˬ sha ve tawˇ hkawˇ maˍ piˇ leh bon maˍ ve yoˬ. 36 Awˬ nyi awˬ haˉ hk'a cawˇ cawˇ maw peuˬ hk'aw‸ nawˉ, Pawˇlu‸ lehˬ Baˍnaˍbaˆ hta‸ k'oˆ piˇ ve, Jawˇ mawˇ G'uiˬ sha ve tawˇ hkawˇ maˍ piˇ jaw peuˬ ve teˇ venˇ le le awˬ hk'aw lo chehˇ ve awˬ viˉ awˬ nyi teˇ hpaˍ hk'aˬ hk'e hpeh‸ chehˇ ve hta‸ ca k'aw‸ toˇ nyi-a veuˬ teh‸ k'oˆ piˇ ve yoˬ. 37 Baˍnaˍbaˆ lehˬ, Maˍkuˆ teh‸ k'oˆ ve Yoˇhanˬ hta‸ shiˍ k'ai gaˇ ve yoˬ. 38 Ya‸ hk'aˇ Pawˇlu‸ lehˬ, yawˇ hta‸ maˇ shiˍ k'ai cawˇ teh‸ dawˇ ve yoˬ. Awˬ lawn k'o, ponˬ laˬ ve teˇ pawˆ Paˍpuˇliˆ mvuhˇ miˬ lo gaˬ htaˇ, yawˇ huiˉ maˬ hta‸ hpaˆ da‸ taˉ leh kanˉ te kuiˬ lo yawˇ maˇ k'ai ve hta‸ pa taw yoˬ. 39 Hk'e te leh, awˬ lawn oˇ ve hta‸ pa taw yawˇ huiˉ maˬ maˇ cawˇ da‸ leh hpaˆ da‸ ve yoˬ. Baˍnaˍbaˆ lehˬ Maˍkuˆ hta‸ shiˍ veu leh, Kuˇpaˍruˆ conˇ lo haw lo‸ k'oˍ ciˇ k'ai ve yoˬ. 40 Awˬ viˉ awˬ nyi teˇ hpaˍ lehˬ, awˬ bon piˇ shehˍ hpaˇ Jawˇ mawˇ G'uiˬ sha ve la‸ sheh awˬ hk'aw lo Pawˇlu‸ hta‸ chiˇ a‸ piˇ peuˬ hk'aw‸ nawˉ, yawˇ Siˍlaˆ hta‸ leuˆ yuˬ leh tawˆ k'ai ve yoˬ. 41 Pawˇlu‸ lehˬ Suˇriˆ mvuhˇ miˬ leh Kiˇliˇkiˆ mvuhˇ miˬ hta‸ hpanˍ k'ai leh, Hkri‸ yaˇ awˬ moˍ teˇ hpaˍ yeˬ la tuˬ awˬ g'aˇ piˇ ve yoˬ.

Tcuh yaˇ 16

1 Oˇ htaˇ Pawˇlu‸ lehˬ, Deˍbeˍ venˇ leh Luˇtaˍraˆ venˇ lo gaˬ ve yoˬ. Luˇtaˍraˆ venˇ awˬ hk'aw lo Tiˆmoˉseˍ meh ve awˬ la‸ g'awˇ teˇ g'aˇ cawˬ ve yoˬ. Yawˇ ve awˬ e lehˬ, yonˍ ve Yuˇda‸ ma hpeh‸ leh, yawˇ ve awˬ pa lehˬ, Heˍlaˍsaˆ chaw hpeh‸ ve yoˬ. 2 Awˬ la‸ g'awˇ oˇ ve lehˬ, Luˇtaˍraˆ venˇ leh Iˇkawˇniˆ venˇ lo chehˇ ve awˬ viˉ awˬ nyi hui awˬ hk'aw lo awˬ meh da‸ ve chaw teˇ g'aˇ hpeh‸ ve yoˬ. 3 Pawˇlu‸ lehˬ, Tiˆmoˉseˍ hta‸ yawˇ geh shiˍ k'ai gaˇ ve yoˬ. Yawˇ ve awˬ pa Heˍlaˍsaˆ chaw hpeh‸ ve hta‸ oˇ kaˬ lo chehˇ ve Yuˇda‸ chaw teˇ hpaˍ shiˍ ve pa taw, Pawˇlu‸ Tiˆmoˉseˍ hta‸ yuˬ leh awˬ guiˬ meuˇ shoˍ piˇ ve yoˬ. 4 Yawˇ hui venˇ teˇ hpaˍ lo hpanˍ k'ai chehˇ htaˇ, Yeˍruˆsaˍlehnˍ venˇ lo chehˇ ve tcuh yaˇ hui leh awˬ hoˉ chaw mawˇ teˇ hpaˍ jehˬ cheˆ taˍ ve teˇ hpaˍ hta‸ te k'ai tuˬ, teˇ caˉ yawˇ hui hta‸ hto piˇ ve yoˬ. 5 Hk'e te leh, Hkri‸ yaˇ awˬ moˍ teˇ hpaˍ yonˍ ve awˬ hk'aw lo awˬ g'aˇ uiˍ la leh, teˇ nyi le le chaw maˇ la ve yoˬ. 6 Aˍsiˆ mvuhˇ miˬ awˬ hk'aw lo bon hkawˇ maˇ g'a maˍ tuˬ, da‸ ve kehˬ ve Awˬ ha hpu yawˇ hui hta‸ tawˍ taˍ ve pa taw, yawˇ hui Hpuˍgiˆ mvuhˇ miˬ leh Gaˍlaˍtiˆ mvuhˇ miˬ lo hpanˍ k'ai ve yoˬ. 7 Muˇsiˆ mvuhˇ miˬ lo gaˬ la htaˇ, Beˍtuˇniˆ mvuhˇ miˬ awˬ hk'aw lo‸-e tuˬ dawˇ taˍ ve htawˇ, Yeˍsuˆ ve Awˬ ha hpu yawˇ hui hta‸ a hkaw-anˬ maˇ piˇ. 8 Hk'e te leh, yawˇ hui Muˇsiˆ mvuhˇ miˬ awˬ jaˇ lo hpanˍ k'ai leh, Taˍroˇaˆ venˇ lo gaˬ ve yoˬ. 9 Tanˇ hkuinˇ htaˇ Pawˇlu‸ lehˬ, awˬ ha awˬ hk'aw lo Maˍkeˍdawˇniˆ chaw teˇ g'aˇ huˉ taˍ ve hta‸ g'a mawˬ ve yoˬ. Yawˇ Pawˇlu‸ hta‸ lawˬ hkawˉ leh k'oˆ ve, Maˍkeˍdawˇniˆ mvuhˇ miˬ lo laˬ leh ngaˬ hui hta‸ ga laˇ-oˆ teh‸ k'oˆ ve yoˬ. 10 Awˬ ha awˬ hk'aw lo yawˇ chi hk'e g'a mawˬ peuˬ hk'aw‸ nawˉ, Maˍkeˍdawˇniˆ chaw hui hta‸ ha lehˬ ve bon hkawˇ maˍ piˇ tuˬ, G'uiˬ sha ngaˬ hui hta‸ kuˬ yuˬ ve teh‸ g'a shiˍ leh, teˇ cawˬ haˉ Maˍkeˍdawˇniˆ mvuhˇ miˬ lo g'a k'ai tuˬ ngaˬ hui te ve yoˬ. 11 Hk'e te leh, ngaˬ hui Taˍroˇaˆ venˇ te leh Saˍmoˍtaˍrehˆ conˇ lo hteˇ lehˍ haw lo‸ k'oˍ ciˇ k'ai leh, awˬ hk'aw‸ nawˉ teˇ nyi Naˍpawˇliˆ venˇ lo gaˬ ve yoˬ. 12 Venˇ oˇ ve awˬ hk'aw lo k'aw‸ tawˆ k'ai leh Hpiˇliˇpiˆ venˇ lo gaˬ ve yoˬ. Venˇ oˇ ve lehˬ, Maˍkeˍdawˇniˆ mvuhˇ miˬ awˬ hk'aw lo Roˉma‸ chaw hui teh taˍ ve venˇ lonˉ hpeh‸ ve yoˬ. Ngaˬ hui oˇ kaˬ lo a ciˉ maw chaweh chehˇ taˍ ve yoˬ. 13 Shinˉ nyi gaˬ ve teˇ yanˇ, shu bon lawˬ kuiˬ cawˬ hehˉ teh‸ ngaˬ hui dawˇ leh, venˇ awˬ baˬ hpawˇ iˉ kaˆ g'uiˬ pfuhˍ paˇ lo k'ai ve yoˬ. Ngaˬ hui oˇ kaˬ lo mui taˍ leh, hk'a hpawnˬ la ve yaˇ miˇ teˇ hpaˍ hta‸ maˍ piˇ ve yoˬ. 14 Oˇ htaˇ, G'uiˬ sha hta‸ oˉ k'oˍ pui ve Luˍdiˇ meh ve yaˇ miˇ teˇ g'aˇ ngaˬ hui ve hkawˇ hta‸ na chehˇ ve yoˬ. Yawˇ lehˬ, hpa nyi naˆ meuˉ lehˍ ve hta‸ hawˇ ve Saˍtiˍrehˇ venˇ yaˇ hpeh‸ ve yoˬ. Pawˇ lu‸ ve tawˇ hkawˇ hta‸ na yuˬ tuˬ Jawˇ mawˇ G'uiˬ sha yawˇ ve nyi ma hta‸ hpaw piˇ ve yoˬ. 15 Yaˇ miˇ oˇ ve leh yawˇ ve yehˬ yaˇ k'a yaˇ hk'a peu-eˬ baˆtiˆsaˬ hkanˍ yuˬ peuˬ hk'aw‸ nawˉ, yawˇ ngaˬ hui hta‸ k'oˆ laˇ ve, Ngaˬ lehˬ Jawˇ mawˇ G'uiˬ sha awˬ hk'aw lo ka ti‸ yeˬ ve chaw hpeh‸ ve teh‸ nawˬ hui dawˇ ve k'o, ngaˬ ve yehˬ lo ca chehˇ la-o teh‸ k'oˆ leh, ngaˬ hui hta‸ g'aˇ hte‸ lawˬ hkawˉ ve yoˬ. 16 Oˇ ve hk'aw‸ nawˉ, ngaˬ hui bon lawˬ kuiˬ lo k'aw‸ k'ai chehˇ ve teˇ yanˇ, mawˉ te puiˉ ve awˬ ceˬ ma ehˉ teˇ g'aˇ ngaˬ hui hta‸ laˬ ha‸ la ve yoˬ. Yawˇ lehˬ kuˇ puiˉ k'aoˍ puiˉ ve pa taw, yawˇ ve awˬ shehˍ hpaˇ teˇ hpaˍ maˇ maˇ paw sha la ve yoˬ. 17 Yaˇ miˇ oˇ ve lehˬ, Pawˇlu‸ leh ngaˬ hui awˬ hk'aˇ suh laˬ leh, Chaw chi teˇ hpaˍ lehˬ, nawˬ hui hta‸ htaiˍ hk'aw‸ ve ya‸ k'aw maˍ laˇ ve, mvuh jaˇ ve G'uiˬ sha teˇ g'aˇ ve awˬ ceˬ hui hpeh‸ ve yoˬ teh‸ yawˇ kuˬ ve yoˬ. 18 Awˬ nyi awˬ haˉ maw chaweh yawˇ chi hk'e te ve pa taw, Pawˇlu‸ hkanˍ maˇ g'a ve yoˬ. Yawˇ k'aw‸ hpfuhˆ leh neˇ hta‸ k'oˆ piˇ ve, Yeˍsuˆ Hkri‸ ve awˬ meh awˬ hk'aw lo ngaˬ nawˬ hta‸ tawˇ piˇ ve, yawˇ awˬ hk'aw lo tawˆ k'ai-o teh‸ k'oˆ piˇ htaˇ, oˇ teˇ hkui neˇ tawˆ k'ai ve yoˬ. 19 Yawˇ ve awˬ shehˍ hpaˇ teˇ hpaˍ lehˬ, yawˇ hui paw sha la tuˬ dawˇ law kuiˬ maˇ k'aw‸ cawˬ ve teh‸ g'a shiˍ htaˇ, Pawˇlu‸ leh Siˍlaˆ hta‸ yawˇ hui hpeh yuˬ leh, shaˉ nanˉ lo chehˇ ve jawˇ mawˇ teˇ hpaˍ geh g'awˬ k'ai ve yoˬ. 20 Yawˇ huiˉ maˬ hta‸ jawˇ mawˇ lonˉ teˇ hpaˍ geh sheh k'ai leh k'oˆ piˇ ve, Chaw chi teˇ hpaˍ lehˬ, Yuˇda‸ chaw hpeh‸ leh, ngaˬ hui ve venˇ hta‸ sho‸ sha‸ tuˬ maˇ maˇ te chehˇ ve yoˬ. 21 Ngaˬ hui Roˉma‸ chaw teˇ hpaˍ ha‸ yuˬ maˇ hpeh‸, te maˇ hpeh‸ ve awˬ liˇ awˬ hk'aˇ teˇ hpaˍ yawˇ hui maˍ piˇ chehˇ ve yoˬ teh‸ k'oˆ ve yoˬ. 22 Chaw awˬ moˍ lonˉ htawˇ, Pawˇlu‸ leh Siˍlaˆ awˬ hk'oˆ hta‸ venˇ baˆ g'aˇ hte‸ taˍ ve yoˬ. Jawˇ mawˇ lonˉ teˇ hpaˍ lehˬ, yawˇ huiˉ maˬ ve veu‸ k'aˇ hta‸ k'ehˆ baˬ sheˬ leh, suhˆ taˬ yuˬ leh dawˆ tuˬ tawˇ piˇ ve yoˬ. 23 Yawˇ huiˉ maˬ hta‸ maˇ maˇ dawˆ peuˬ hk'aw‸ nawˉ, htawnˍ hk'aw keu taˍ leh, yawˇ huiˉ maˬ hta‸ hk'a deh‸ shaw tuˬ htawnˍ awˬ hoˉ teˇ g'aˇ hta‸ tawˇ piˇ ve yoˬ. 24 Htawnˍ awˬ hoˉ teˇ g'aˇ htawˇ, shu tawˇ piˇ ve hk'e yawˇ huiˉ maˬ hta‸ htawnˍ awˬ k'aw ji ve teˇ bawehˇ lo keu leh, yawˇ huiˉ maˬ ve hkui sheh hta‸ ka‸ suhˆ htawˆ taˍ ve awˬ hk'aw lo keu leh shawˇ hoˆ taˍ ve yoˬ. 25 Shehˍ k'aw hkui teˇ yanˇ htaˇ, Pawˇlu‸ leh Siˍlaˆ bon lawˬ leh G'uiˬ sha hta‸ k'a muiˬ chiˇ mvuh chehˇ ve yoˬ. Htawnˍ hk'aw chehˇ ve chaw teˇ hpaˍ lehˬ, yawˇ huiˉ maˬ ve hkawˇ hta‸ na chehˇ ve yoˬ. 26 Teˇ cawˬ haˉ miˬ hiˆ jaˇ ve pa taw, htawnˍ awˬ hkuiˉ puiˍ hiˆ hiˆ naˇ naˇ hpeh‸ ve yoˬ. Yehˬ miˉ hk'a peu-eˬ teˇ cawˬ haˉ hpaw baˬ sheˬ leh, chaw hk'a peu-eˬ hta‸ hpeh taˍ ve sho caˆ teˇ hpaˍ k'ehˆ tawˆ-e ve yoˬ. 27 Htawnˍ awˬ hoˉ teˇ cawˬ haˉ nawˇ la leh, htawnˍ yehˬ miˉ hk'a peu-eˬ hpaw baˬ taˍ ve hta‸ g'a mawˬ ve yoˬ. Htawnˍ hk'aw chehˇ ve chaw hk'a peu-eˬ hpaw-e peuˬ hehˉ teh‸ dawˇ leh, yawˇ ve aˉ htaw g'awˬ tawˆ leh yawˇ awˬ to hta‸ juˆ pehˍ-a teh‸ te ve yoˬ. 28 Pawˇlu‸ bvuhˬ chaweh kuˬ leh k'oˆ ve, Nawˬ awˬ to hta‸ te‸ chiˉ taˇ te, Ngaˬ hui hk'a peu-eˬ chehˇ taˍ ve yoˬ teh‸ k'oˆ piˇ ve yoˬ. 29 Oˇ htaˇ, htawnˍ awˬ hoˉ lehˬ, Aˬ miˍ tuˉ veu laˇ-oˆ teh‸ k'oˆ leh g'uiˇ lo‸-e ve yoˬ. Yawˇ kawˆ cheˇ ve awˬ hk'aw lo Pawˇlu‸ leh Siˍlaˆ mehˆ g'uˇ suhˍ boˆ taˍ ve yoˬ. 30 Yawˇ yawˇ huiˉ maˬ hta‸ shiˍ tawˆ-e peuˬ leh, Jawˇ mawˇ teˇ hpaˍ-oˬ, htaiˍ hk'aw‸ g'a tuˬ ngaˬ hk'aˬ hk'e g'a te tuˬ le teh‸ na nyi ve yoˬ. 31 Yawˇ huiˉ maˬ k'oˆ piˇ ve, Jawˇ mawˇ Yeˍsuˆ hta‸ yonˍ loˬ. Nawˬ leh nawˬ ve yehˬ yaˇ k'a yaˇ hui htaiˍ hk'aw‸ ve hta‸ g'a tuˬ yoˬ teh‸ k'aw‸ k'oˆ piˇ ve yoˬ. 32 Oˇ htaˇ, yawˇ huiˉ maˬ lehˬ, htawnˍ awˬ hoˉ leh yawˇ ve yehˬ yaˇ k'a yaˇ hui hta‸ Jawˇ mawˇ G'uiˬ sha ve tawˇ hkawˇ maˍ piˇ ve yoˬ. 33 Oˇ ve teˇ haˉ awˬ hk'aw lo yawˇ yawˇ huiˉ maˬ hta‸ shiˍ k'ai leh, yawˇ huiˉ maˬ ve naˬ kuiˬ teˇ hpaˍ hta‸ tsuhˇ baˬ piˇ peuˬ hk'aw‸ nawˉ, yawˇ awˬ to ka‸ yawˇ ve yehˬ yaˇ k'a yaˇ hk'a peu-eˬ ka‸ teˇ cawˬ haˉ baˆtiˆsaˬ hkanˍ yuˬ ve yoˬ. 34 Oˇ ve awˬ hk'aw‸ nawˉ, yawˇ huiˉ maˬ hta‸ yawˇ ve aˉ hk'aw lo shiˍ k'ai leh, te caˍ te taw piˇ ve yoˬ. G'uiˬ sha hta‸ yonˍ peuˬ ve pa taw, yawˇ leh yawˇ ve yehˬ yaˇ k'a yaˇ hk'a peu-eˬ ha lehˬ jaˇ ve yoˬ. 35 Mvuhˇ htiˇ la htaˇ, jawˇ mawˇ lonˉ teˇ hpaˍ lehˬ, paˍ leˆ teˇ hpaˍ hta‸ k'ai tcuh leh, Chaw oˇ ve nyiˇ g'aˇ hta‸ hpehˇ piˇ-oˆ teh‸, ca k'oˆ piˇ tcuh ve yoˬ. 36 Oˇ htaˇ, htawnˍ awˬ hoˉ teˇ g'aˇ tawˇ hkawˇ oˇ ve Pawˇlu‸ hta‸ k'oˆ piˇ ve, Nawˬ huiˉ maˬ hta‸ hpehˇ piˇ tuˬ, jawˇ mawˇ lonˉ teˇ hpaˍ chaw hta‸ tcuh peu laˇ peuˬ. Hk'e te leh, chi beu‸ tawˆ-e leh dawˇ sha gaˇ sha ve awˬ hk'aw lo k'ai-o teh‸ k'oˆ piˇ ve yoˬ. 37 Ya‸ hk'aˇ, Pawˇlu‸ yawˇ hui hta‸ k'oˆ piˇ ve, Ngaˬ huiˉ maˬ Roˉma‸ chaw hpeh‸ ve ka‸, suhˉ maˇ jehˬ sheˍ htaˇ shu mehˆ g'uˇ suhˍ ngaˬ huiˉ maˬ hta‸ dawˆ leh htawnˍ hk'aw keu taˍ ve yoˬ. Chi beu‸ ta‸ iˉ gawˬ lehˍ ve awˬ hk'aw lo ngaˬ huiˉ maˬ hta‸ hpehˇ laˇ tuˬ laˇ. Chi hk'e maˇ heˆ. Yawˇ hui laˬ leh ngaˬ huiˉ maˬ hta‸ yuˬ tawˆ piˇ lawˬ-o‸ teh‸, yawˇ hui hta‸ k'oˆ piˇ ve yoˬ. 38 Paˍ leˆ teˇ hpaˍ lehˬ, jawˇ mawˇ lonˉ hui hta‸ ca hto piˇ ve teˇ yanˇ, yawˇ huiˉ maˬ Roˉma‸ chaw hpeh‸ ve hta‸ yawˇ hui g'a kaˇ leh kawˆ jaˇ ve yoˬ. 39 Yawˇ hui yawˇ huiˉ maˬ geh laˬ leh, yawˇ hui ve ya‸ kuiˬ hpehˇ laˇ tuˬ lawˬ hkawˉ ve yoˬ. Hk'e te leh, yawˇ huiˉ maˬ hta‸ yuˬ tawˆ peuˬ leh, venˇ oˇ ve awˬ hk'aw lo tawˆ k'ai tuˬ lawˬ ve yoˬ. 40 Oˇ htaˇ, yawˇ huiˉ maˬ htawnˍ hk'aw tawˆ k'ai leh, Luˍdiˇ ve aˉ hk'aw lo k'ai ve yoˬ. Awˬ viˉ awˬ nyi teˇ hpaˍ hta‸ g'a mawˬ htaˇ, yawˇ hui hta‸ awˬ g'aˇ piˇ peuˬ leh, yawˇ huiˉ maˬ venˇ oˇ ve awˬ hk'aw lo tawˆ k'ai ve yoˬ.

Tcuh yaˇ 17

1 Oˇ ve hk'aw‸ nawˉ, yawˇ hui Aˍhpiˇpawˇliˆ venˇ leh Aˍpawˇ lawˇniˆ venˇ hta‸ hpanˍ k'ai leh, Hteˇsaˍ lawˇniˆ venˇ lo gaˬ ve yoˬ. Oˇ kaˬ lo Yuˇda‸ chaw hui ve bon yehˬ cawˬ ve yoˬ. 2 Pawˇlu‸ yawˇ te jaw ve hk'e, yawˇ hui geh lo‸-e leh, shehˆ shinˉ hk'a gaˬ Li‸ hpu hta‸ cuˇ leh yawˇ hui geh jehˬ da‸ cehˇ da‸ ve yoˬ. 3 Hkri‸ lehˬ, tu‸ ve hkanˍ ve hta‸ g'a hkanˍ leh, suh kuiˬ lo g'a k'aw‸ te‸ tu la ve yoˬ teh‸, yawˇ hk'a tawˍ lehˆ hpeu‸ maˍ piˇ ve yoˬ. Ngaˬ nawˬ hui hta‸ k'aoˍ maˍ laˇ ve Yeˍsuˆ chi teˇ g'aˇ lehˬ, Hkri‸ hpeh‸ ve yoˬ teh‸ k'oˆ ve yoˬ. 4 Yawˇ hui teˇ hpaˍ hpaˍ yonˍ la leh, Pawˇlu‸ leh Siˍlaˆ hta‸ pawnˇ da‸ ve yoˬ. G'uiˬ sha hta‸ oˉ k'oˍ pui ve Heˍlaˍsaˆ chaw maˇ maˇ yonˍ leh, awˬ me‸ awˬ hponˇ cawˬ ve yaˇ miˇ teˇ hpaˍ htawˇ hk'a cawˇ cawˇ yonˍ maˇ ve yoˬ. 5 Ya‸ hk'aˇ, Yuˇda‸ chaw teˇ hpaˍ lehˬ, hkawehˉ ve nyi ma cawˬ leh, kanˉ maˇ cawˬ ve chaw haiˬ teˇ hpaˍ hta‸ kuˬ yuˬ peuˬ hk'aw‸ nawˉ, chaw awˬ moˍ lonˉ hta‸ hpawnˬ da‸ piˇ leh, venˇ awˬ hk'aw lo duiˆ-ehˍ shaˇ-ehˍ te ve yoˬ. Yawˇ hui Yaˍsonˍ ve yehˬ hta‸ hoˆ yuˬ leh, Pawˇlu‸ leh Siˍlaˆ hta‸ chaw chi ma ve mehˆ g'uˇ suhˍ g'awˬ tawˆ la tuˬ ca ve yoˬ. 6 Yawˇ huiˉ maˬ hta‸ ca maˇ mawˬ htaˇ, Yaˍsonˍ leh awˬ viˉ awˬ nyi teˇ hpaˍ hpaˍ hta‸ jawˇ mawˇ lonˉ hui geh g'awˬ k'ai leh k'oˆ ve, Miˬ guiˬ hk'a peu-eˬ hta‸ sho‸ sha‸ tuˬ te piˇ lawˬ shehˍ hpaˇ teˇ hpaˍ lehˬ, choˬ kaˬ lo htawˇ gaˬ la peuˬ. 7 Yaˍsonˍ lehˬ yawˇ hui hta‸ ha‸ yuˬ peuˬ. Yeˍsuˆ teh‸ k'oˆ ve awˬ kaˍ awˬ nu hkunˉ hawˉ hkanˇ teˇ g'aˇ cawˬ ve yoˬ teh‸, yawˇ hui k'oˆ leh, jawˇ mawˇ Kehˉsaˍ ve awˬ liˇ tawˇ hkawˇ hta‸ maˇ hawˍ da‸ ve teˇ hpaˍ yawˇ hui hk'a peu-eˬ te chehˇ ve yoˬ teh‸ kuˬ ve yoˬ. 8 Venˇ yaˇ teˇ hpaˍ leh jawˇ mawˇ lonˉ hui lehˬ, awˬ lawn chi hta‸ g'a kaˇ htaˇ, yawˇ hui nyi ma sho‸ sha‸ jaˇ ve yoˬ. 9 Yawˇ hui lehˬ, Yaˍsonˍ leh awˬ kaˍ awˬ nu awˬ viˉ awˬ nyi teˇ hpaˍ hta‸ hpu tanˇ keu tcuh leh hkanˍ piˇ lawˬ peuˬ hk'aw‸ nawˉ, yawˇ hui hta‸ hpehˇ piˇ ve yoˬ. 10 Awˬ viˉ awˬ nyi teˇ hpaˍ lehˬ, teˇ cawˬ haˉ Pawˇlu‸ leh Siˍlaˆ hta‸ Beˍriˆ venˇ lo tanˇ hkuinˇ htaˇ k'ai tcuh ve yoˬ. Yawˇ huiˉ maˬ oˇ kaˬ lo gaˬ la htaˇ, Yuˇda‸ chaw hui ve bon yehˬ hk'aw lo‸-e ve yoˬ. 11 Chaw chi teˇ hpaˍ lehˬ, Hteˇsaˍlawˇniˆ chaw hui a‸ kehˉ dawˇ nyi puiˉ leh, G'uiˬ sha ve tawˇ hkawˇ hta‸ yawˇ hui ha lehˬ ha k'a ha‸ yuˬ ve yoˬ. Awˬ lawn chi teˇ hpaˍ cawˇ maˇ cawˇ ve hta‸ g'a shiˍ tuˬ, yawˇ hui teˇ nyi le le Li‸ hpu hta‸ hk'a deh‸ g'aw nyi chehˇ ve yoˬ. 12 Hk'e te leh, yawˇ hui awˬ hk'aw lo chaw maˇ maˇ yonˍ la ve yoˬ. Awˬ me‸ awˬ hponˇ cawˬ ve Heˍlaˍsaˆ yaˇ miˇ teˇ hpaˍ leh hawˉ hk'aˆ teˇ hpaˍ htawˇ, yonˍ la ve chaw hk'a cawˇ cawˇ maˇ ve yoˬ. 13 Pawˇlu‸ lehˬ, Beˍriˆ venˇ awˬ hk'aw lo G'uiˬ sha ve tawˇ hkawˇ maˍ piˇ chehˇ ve hta‸ Hteˇsaˍlawˇniˆ venˇ lo chehˇ ve Yuˇda‸ chaw teˇ hpaˍ g'a shiˍ htaˇ, oˇ kaˬ lo htawˇ yawˇ hui k'ai leh, chaw awˬ moˍ lonˉ teˇ hpaˍ hta‸ juˆ piˇ leh duiˆ-ehˍ shaˇ-ehˍ te piˇ lawˬ ve yoˬ. 14 Oˇ htaˇ, awˬ viˉ awˬ nyi teˇ hpaˍ lehˬ, Pawˇlu‸ hta‸ laˇ tsuhˇ g'uiˬ hk'a gaˬ teˇ cawˬ haˉ k'ai tcuh ve yoˬ. Ya‸ hk'aˇ, Siˍlaˆ leh Tiˆmoˉseˍ oˇ kaˬ lo chehˇ taˉ sheˍ ve yoˬ. 15 Pawˇlu‸ hta‸ shiˍ k'oˬ ve chaw hui lehˬ, Aˍhtenˍ venˇ hk'a gaˬ shiˍ k'oˬ piˇ ve yoˬ. Siˍlaˆ leh Tiˆmoˉseˍ yawˇ geh haˆ haˆ laˬ tuˬ, Pawˇlu‸ yawˇ hui hta‸ tawˇ shanˍ feu piˇ leh yawˇ hui k'aw‸ k'o‸-e ve yoˬ. 16 Pawˇlu‸ Aˍhtenˍ venˇ awˬ hk'aw lo yawˇ huiˉ maˬ hta‸ law chehˇ htaˇ, venˇ oˇ ve awˬ hk'aw lo shaˉ ho‸ hk'a biˇ cawˬ ve hta‸ yawˇ g'a mawˬ leh, yawˇ ve nyi ma awˬ hk'aw lo hpeh‸ bawˬ jaˇ ve yoˬ. 17 Hk'e te leh, yawˇ lehˬ bon yehˬ awˬ hk'aw lo Yuˇda‸ chaw hui leh G'uiˬ sha hta‸ oˉ k'oˍ pui ve chaw hui hta‸ maˇ k'oˆ, teˇ nyi le le tcuh hk'aw lo hk'a mawˬ hk'a hpuˇ ve chaw teˇ hpaˍ hta‸ htawˇ maˇ k'oˆ, jehˬ da‸ cehˇ da‸ ve yoˬ. 18 Oˇ htaˇ, Eˇpiˇkuˇruˆ awˬ liˇ leh Saˍtawˉeˆ awˬ liˇ yuˬ ve cuˇ yiˍ cawˬ ve chaw teˇ hpaˍ lehˬ, Pawˇ lu‸ geh jehˬ da‸ ve yoˬ. Yawˇ hui teˇ hpaˍ hpaˍ k'oˆ ve, Shu hkawˇ ca g'awˆ k'aoˍ toˇ ve chaw chi teˇ g'aˇ aˬ hto‸ ma hta‸ k'oˆ gaˇ ve leh naˍ teh‸ k'oˆ ve yoˬ. Pawˇlu‸ lehˬ, Yeˍsuˆ awˬ lawn leh k'aw‸ te‸ tu la ve awˬ lawn maˍ piˇ ve pa taw, teˇ hpaˍ hpaˍ k'oˆ ve, Yawˇ lehˬ awˬ kaˍ awˬ nu mvuhˇ miˬ ve g'uiˬ sha teˇ hpaˍ awˬ lawn ca maˍ toˇ ve chaw yoˬ teh‸ k'oˆ ve yoˬ. 19 Oˇ htaˇ, yawˇ hui Pawˇlu‸ hta‸ yuˬ leh, jehˬ da‸ kuiˬ Aˍreˍ hk'aw teˇ shiˍ lo shiˍ k'ai leh k'oˆ ve, Nawˬ maˍ piˇ ve awˬ lawn awˬ suhˉ chi ngaˬ hui hta‸ htawˇ a ciˉ maˍ laˇ-oˆ. 20 Awˬ lawn k'o, ngaˬ hui maˇ shiˍ maˇ kaˇ jaw ve awˬ ceuˬ teˇ hpaˍ nawˬ k'oˆ laˇ ve yoˬ. Awˬ ceuˬ oˇ ve teˇ hpaˍ aˬ hto‸ ma tcuhˉ kuiˬ cawˬ ve hta‸ ngaˬ hui shiˍ gaˇ ve yoˬ teh‸, yawˇ hui k'oˆ ve yoˬ. 21 Aˍhtenˍ venˇ chaw hk'a peu-eˬ leh hkehˉ chaw teˇ hpaˍ lehˬ, awˬ lawn awˬ suhˉ teˇ ceuˬ ceuˬ hta‸ g'a kaˇ g'a hto tuˬ awˬ pon ceh tiˉ yawˇ hui awˬ yanˇ te peuˬ piˇ chehˇ ve yoˬ. 22 Oˇ htaˇ Pawˇlu‸ lehˬ, jehˬ da‸ kuiˬ Aˍreˍ hk'aw awˬ k'aw ji ve teˇ kaˬ lo huˉ taˍ leh k'oˆ ve, Aˍhtenˍ chaw teˇ hpaˍ-oˬ, nawˬ hui lehˬ hk'a peu-eˬ awˬ hk'aw lo g'uiˬ sha teˇ hpaˍ hta‸ yawˆ yan puiˉ jaˇ ve hta‸ ngaˬ g'a mawˬ ve yoˬ. 23 Awˬ lawn k'o, ngaˬ teˇ kaˬ peuˬ teˇ kaˬ k'ai leh nawˬ hui oˉ k'oˍ pui ve awˬ ceuˬ teˇ hpaˍ hta‸ nyi ve teˇ yanˇ, Ngaˬ hui maˇ shiˍ ve G'uiˬ sha awˬ pon teh‸ bvuh‸ taˍ ve tanˇ kuiˬ teˇ maˬ hta‸ ngaˬ g'a mawˬ ve yoˬ. Nawˬ hui maˇ shiˍ leh oˉ k'oˍ pui chehˇ ve G'uiˬ sha teˇ g'aˇ awˬ lawn ngaˬ nawˬ hui hta‸ k'aoˍ maˍ laˇ ve yoˬ. 24 Miˬ guiˬ leh miˬ guiˬ hk'oˆ hk'a cawˬ ve hk'a peu-eˬ hta‸ te hpanˍ ve G'uiˬ sha lehˬ, mvuhˇ naw ma leh miˬ guiˬ ve Awˬ shehˍ hpaˇ hpeh‸ ve yoˬ. Yawˇ lehˬ chaw yaˇ la‸ sheh te taˍ ve yehˬ awˬ hk'aw lo chehˇ tuˬ ve maˇ heˆ. 25 Chaw yaˇ ve la‸ sheh yawˇ awˬ pon teˇ ceuˬ ceuˬ te tuˬ yawˇ loˍ ve ka‸ maˇ heˆ. Awˬ lawn k'o, yawˇ lehˬ chaw hk'a peu-eˬ hta‸ a sha‸ te‸ piˇ leh, teˇ ceuˬ le le piˇ ve yoˬ. 26 Yawˇ lehˬ miˬ guiˬ hk'oˆ teˇ kaˬ le le lo chehˇ tuˬ, chaw teˇ ceuˬ le le hta‸ chaw teˇ g'aˇ awˬ hk'aw lo ceh tiˉ te hpanˍ taˍ ve yoˬ. Yawˇ hui awˬ pon fuiˍ da‸ pehˬ da‸ ve awˬ yanˇ maˇ k'oˆ, yawˇ hui chehˇ tuˬ ve miˬ tcuhˉ teˇ hpaˍ maˇ k'oˆ, yawˇ gu taˍ ve yoˬ. 27 Hk'aˬ hk'e te leh chaw yaˇ yawˇ hta‸ ca ve awˬ hk'aw lo ca shoˆ nyi leh g'a mawˬ tuˬ awˬ pon, yawˇ chaw yaˇ hta‸ te hpanˍ taˍ ve yoˬ. Chi hk'e k'oˆ ve ka‸, yawˇ lehˬ ngaˬ hui hk'aˬ ve teˇ g'aˇ hta‸ htawˇ vuiˇ da‸ ve maˇ heˆ. 28 Awˬ lawn k'o, yawˇ hta‸ pa taw ngaˬ hui te‸ chehˇ ve, hiˆ hiˆ naˇ naˇ te chehˇ ve leh hpeh‸ chehˇ taˍ ve yoˬ. Nawˬ hui ve k'a muiˬ hkawˇ k'a shehˍ hpaˇ teˇ hpaˍ hpaˍ k'oˆ ve hk'e, Ngaˬ hui lehˬ yawˇ lo caˉ ya‸ la ve awˬ yaˇ awˬ duˬ hpeh‸ ve yoˬ. 29 Hk'e te leh, ngaˬ hui G'uiˬ sha lo caˉ ya‸ la ve awˬ yaˇ awˬ duˬ hpeh‸ ve hta‸ pa taw, chaw yaˇ hui dawˇ puiˉ te puiˉ ve awˬ ho‸ awˬ han teˇ hpaˍ, shi maˇ k'oˆ, hpu maˇ k'oˆ, haˉ pui maˇ k'oˆ, G'uiˬ sha lehˬ chi teˇ hpaˍ hta‸ shuˍ da‸ ve teh‸ ngaˬ hui maˇ dawˇ cawˇ. 30 Ponˬ laˬ htaˇ nawˬ hui maˇ shiˍ leh te ve teˇ hpaˍ hta‸ G'uiˬ sha maˇ tawnˇ taˍ ve htawˇ, chi beu‸ lehˬ teˇ kaˬ le le lo chehˇ ve chaw hk'a peu-eˬ venˇ baˆ hta‸ dawˇ hpfuhˆ tuˬ G'uiˬ sha tawˇ piˇ taˍ ve yoˬ. 31 Awˬ lawn k'o, yawˇ leuˆ yuˬ ve teˇ g'aˇ hta‸ cuˇ leh miˬ guiˬ yaˇ hui hta‸ hteˇ ve cawˇ ve awˬ hk'aw lo suhˉ jehˬ tuˬ, yawˇ awˬ nyi tinˍ taˍ peuˬ. Chi teˇ g'aˇ hta‸ G'uiˬ sha leuˆ yuˬ ve teh‸ chaw hk'a peu-eˬ g'a shiˍ tuˬ, suh kuiˍ lo yawˇ hta‸ k'aw‸ te‸ tu la piˇ peuˬ teh‸ Pawˇlu‸ maˍ piˇ ve yoˬ. 32 Suh peuˬ ve chaw k'aw‸ te‸ tu la ve awˬ lawn yawˇ hui g'a kaˇ htaˇ, chaw teˇ hpaˍ hpaˍ yawˇ hta‸ hk'a mvuhˇ hk'a na k'oˆ leh g'uiˬ ve yoˬ. Ya‸ hk'aˇ, teˇ hpaˍ hpaˍ k'oˆ ve, Nawˬ k'oˆ laˇ ve awˬ lawn chi awˬ hk'aw‸ nawˉ teˇ pawˆ ngaˬ hui na tuˬ sheˍ teh‸ k'oˆ ve yoˬ. 33 Hk'e te leh, Pawˇlu‸ yawˇ hui hpawnˬ da‸ kuiˬ awˬ hk'aw lo tawˆ k'ai ve yoˬ. 34 Chaw teˇ hpaˍ hpaˍ yonˍ la leh Pawˇlu‸ hta‸ pawnˇ da‸ ve yoˬ. Chaw oˇ ve teˇ hpaˍ awˬ hk'aw lo, Daˍyawˉnaˍsiˆ meh ve Aˍreˍ hk'aw jawˇ mawˇ teˇ g'aˇ, Daˍmaˍriˆ meh ve yaˇ miˇ teˇ g'aˇ leh, awˬ kaˍ awˬ nu chaw teˇ hpaˍ htawˇ cawˬ ve yoˬ.

Tcuh yaˇ 18

1 Oˇ ve awˬ hk'aw‸ nawˉ Pawˇlu‸ lehˬ, Aˍhtenˍ venˇ lo tawˆ k'ai leh Kawˇrenˍhtuˆ venˇ lo k'ai ve yoˬ. 2 Oˇ kaˬ lo, Poˍtuˆ mvuhˇ miˬ yaˇ Aˍkuˉlaˆ meh ve Yuˇda‸ chaw teˇ g'aˇ hta‸ yawˇ hpuˇ da‸ ve yoˬ. Chaw oˇ ve lehˬ, Yuˇda‸ chaw hk'a peu-eˬ Roˉma‸ venˇ hk'aw lo g'a tawˆ k'ai ve yoˬ teh‸, jawˇ mawˇ Kaˍlawˇdiˆ tawˇ piˇ ve hta‸ pa taw, yawˇ ve awˬ miˇ ma Piˇkiˇlaˆ yawˇ huiˉ maˬ Iˉtaˍliˍ mvuhˇ miˬ lo tawˆ la leh, oˇ kaˬ lo gaˬ la gehˇ sheˍ ve yoˬ. 3 Pawˇlu‸ yawˇ huiˉ maˬ geh k'ai leh, yawˇ hui te ve kanˉ teˇ ceuˬ tiˉ hpeh‸ ve pa taw, yawˇ yawˇ huiˉ maˬ geh chehˇ leh kanˉ te ve yoˬ. Awˬ lawn k'o, yawˇ hui lehˬ hpa aˉ po k'o tawˉ shehˍ hpaˇ hpeh‸ ve yoˬ. 4 Teˇ shinˉ nyi le le bon yehˬ awˬ hk'aw lo, Yuˇda‸ chaw hui hta‸ maˇ k'oˆ, Heˍlaˍsaˆ chaw hui hta‸ maˇ k'oˆ, maˍ g'a tuˬ yawˇ hui hta‸ jehˬ piˇ cehˇ piˇ ve yoˬ. 5 Siˍlaˆ leh Tiˆmoˉseˍ Maˍkeˍdawˇniˆ mvuhˇ miˬ lo tawˆ la leh Pawˇlu‸ geh gaˬ la htaˇ, yawˇ lehˬ g'aˇ hte‸ bon maˍ chehˇ leh, Yeˍsuˆ lehˬ Hkri‸ hpeh‸ ve yoˬ teh‸, Yuˇda‸ chaw hui hta‸ coˇ caˇ leh shaˉ hkiˆ hkanˍ chehˇ ve yoˬ. 6 Yawˇ hui lehˬ, yawˇ hta‸ tawˍ taˍ leh maˇ shawˍ maˇ caˆ k'oˆ ve teˇ yanˇ, Pawˇlu‸ yawˇ ve aˉ po‸ hta‸ hpi maˍ leh k'oˆ ve, Nawˬ hui ve awˬ suhˍ nawˬ hui ve oˉ k'oˍ awˬ hk'oˆ lo gaˬ la piˇ-oˆ. Ngaˬ awˬ hk'oˆ maˇ cawˬ. Ya‸ nyi hk'aw‸ nawˉ k'o, buiˇ shaˆ aˉ naˆ chaw hui geh ngaˬ k'ai tuˬ yoˬ teh‸, yawˇ hui hta‸ k'oˆ piˇ ve yoˬ. 7 Yawˇ oˇ kaˬ lo tawˆ k'ai leh, G'uiˬ sha hta‸ oˉ k'oˍ pui ve Tiˇtuˆ Yuˇtuˆ meh ve chaw teˇ g'aˇ ve aˉ hk'aw lo k'ai ve yoˬ. Yawˇ ve yehˬ lehˬ, bon yehˬ hta‸ neˇ da‸ jaˇ ve yoˬ. 8 Kaˍliˇpuˆ meh ve bon yehˬ awˬ hoˉ teˇ g'aˇ leh, yawˇ ve yehˬ yaˇ k'a yaˇ hk'a peu-eˬ Jawˇ mawˇ Yeˍsuˆ hta‸ yonˍ ve yoˬ. Kawˇrenˍhtuˆ chaw laiˉ g'aˇ htawˇ Pawˇlu‸ maˍ ve hta‸ g'a kaˇ leh yonˍ ve awˬ hk'aw lo baˆtiˆsaˬ hkanˍ yuˬ ve yoˬ. 9 Tanˇ hkuinˇ htaˇ, Jawˇ mawˇ G'uiˬ sha lehˬ Pawˇlu‸ hta‸ awˬ ha awˬ hk'aw lo maˍ piˇ leh k'oˆ ve, Nawˬ taˇ kawˆ. Ta‸ iˉ gawˬ lehˍ taˇ chehˇ. Hk'a deh‸ maˍ piˇ-oˆ. 10 Ngaˬ +nawˬ geh chehˇ ve yoˬ. Nawˬ hta‸ naˬ tuˬ chaw teˇ g'aˇ ka‸ hk'a mvuhˇ hk'a na te tuˬ maˇ heˆ. Awˬ lawn k'o, venˇ chi awˬ hk'aw lo ngaˬ ve chaw maˇ maˇ cawˬ ve yoˬ teh‸, yawˇ hta‸ k'oˆ piˇ ve yoˬ. 11 Yawˇ oˇ kaˬ lo teˇ hk'aw‸ leh ha pa hkaw‸ maˬ chehˇ leh, yawˇ hui hta‸ G'uiˬ sha ve tawˇ hkawˇ maˍ piˇ ve yoˬ. 12 Aˍhkaˍyaˆ mvuhˇ miˬ awˬ hk'aw lo Gaˍliˍoˍ jawˇ mawˇ lonˉ te chehˇ htaˇ, Yuˇda‸ chaw teˇ hpaˍ nyi ma teˇ shiˍ tiˉ taˍ leh, Pawˇlu‸ hta‸ te luˬ tuˬ tu la leh yawˇ hta‸ suhˉ jehˬ kuiˬ k'aw jaw lo yuˬ k'ai ve yoˬ. 13 Yawˇ hui k'oˆ ve, Chaw chi teˇ g'aˇ lehˬ, chaw yaˇ G'uiˬ sha hta‸ oˉ k'oˍ pui htaˇ, awˬ liˇ tawˇ hkawˇ hta‸ maˇ hawˍ ve awˬ hk'aw lo pui tuˬ beˬ chehˇ ve yoˬ teh‸ k'oˆ ve yoˬ. 14 Oˇ htaˇ, Pawˇlu‸ lehˬ tawˇ yaw-a teh‸ te ve teˇ yanˇ, Yuˇda‸ chaw hui hta‸ Gaˍliˍoˍ k'oˆ piˇ ve, Yuˇda‸ chaw teˇ hpaˍ-oˬ, awˬ lawn chi lehˬ maˇ hteˇ maˇ cawˇ ve, maˇ heˆ k'o haiˬ ve awˬ ceuˬ hpeh‸ ve k'o, ngaˬ yeunˇ hkanˍ leh nawˬ hui ve hkawˇ hta‸ na yuˬ tuˬ yoˬ. 15 Ya‸ hk'aˇ, tawˇ hkawˇ teˇ hpaˍ, awˬ meh teˇ hpaˍ leh nawˬ hui ve awˬ liˇ tawˇ hkawˇ hta‸ caˉ da‸ ve awˬ lawn hpeh‸ ve pa taw, nawˬ hui hk'aˇ nawˬ hui te-o. Awˬ lawn chi hk'e ve hta‸ ngaˬ suhˉ maˇ jehˬ teh‸ k'oˆ piˇ ve yoˬ. 16 Oˇ htaˇ, yawˇ yawˇ hui hta‸ suhˉ jehˬ kuiˬ k'aw jaw lo g'a‸ tawˆ ve yoˬ. 17 Hk'e te leh, yawˇ hui hk'a peu-eˬ bon yehˬ awˬ hoˉ Suˇtenˍ hta‸ hpeh yuˬ leh, suhˉ jehˬ kuiˬ k'aw jaw awˬ g'uˇ suhˍ lo yawˇ hta‸ jaw‸ ve yoˬ. Ya‸ hk'aˇ, Gaˍliˍoˍ lehˬ awˬ lawn oˇ ve hta‸ te‸ chiˉ ka‸ maˇ dawˇ ve yoˬ. 18 Oˇ ve hk'aw‸ nawˉ, Pawˇlu‸ oˇ kaˬ lo a ciˉ maw chaweh chehˇ peuˬ htaˇ, awˬ viˉ awˬ nyi hui hta‸ hpaˆ da‸ taˉ leh Suˇriˆ mvuhˇ miˬ lo haw lo‸ k'oˍ ciˇ k'ai ve yoˬ. Piˇkiˇlaˆ leh Aˍkuˉlaˆ, yawˇ huiˉ maˬ htawˇ yawˇ geh k'ai ve yoˬ. Yawˇ ka ti‸ shaˉ caˆ te taˍ ve hk'e, Keˍcheˍ venˇ lo gaˬ htaˇ, yawˇ ve oˉ k'oˍ chiˇ baˬ ve yoˬ. 19 Oˇ htaˇ, yawˇ hui Eˇfeˇsu‸ venˇ lo gaˬ leh, yawˇ yawˇ huiˉ maˬ hta‸ oˇ kaˬ lo teh taˉ ve yoˬ. Yawˇ lehˬ, bon yehˬ hk'aw lo‸-e leh Yuˇda‸ chaw hui geh jehˬ da‸ cehˇ da‸ ve yoˬ. 20 Yawˇ hui geh a ciˉ maw chaweh chehˇ tuˬ, yawˇ hui Pawˇlu‸ hta‸ lawˬ hkawˉ ve htawˇ, yawˇ chehˇ maˇ hpeh‸ teh‸ k'oˆ ve yoˬ. 21 Ya‸ hk'aˇ, yawˇ hui hta‸ hpaˆ da‸ htaˇ yawˇ k'oˆ ve, G'uiˬ sha ve a loˍ cawˇ k'o, nawˬ hui geh ngaˬ teˇ pawˆ k'aw‸ laˬ tuˬ yoˬ teh‸ k'oˇ piˇ ve yoˬ. Oˇ htaˇ, yawˇ haw lo‸ k'oˍ ciˇ leh Eˇfeˇsu‸ venˇ hk'aw tawˆ k'ai ve yoˬ. 22 Kehˉsaˍriˆ venˇ lo gaˬ htaˇ, yawˇ Yeˍruˆsaˍlehnˍ venˇ lo teˆ-e leh Hkri‸ yaˇ awˬ moˍ hta‸ ca hpuˇ da‸ peuˬ hk'aw‸ nawˉ, Anˍtiˆawˍ venˇ lo k'aw‸ k'o‸-e ve yoˬ. 23 Oˇ kaˬ lo a ciˉ maw chaweh chehˇ peuˬ htaˇ, yawˇ k'aw‸ tawˆ k'ai leh, Gaˍlaˍtiˆ mvuhˇ miˬ leh Hpuˍgiˆ mvuhˇ miˬ awˬ hk'aw lo teˇ kaˬ peuˬ teˇ kaˬ k'ai leh awˬ la‸ g'awˇ hk'a peu-eˬ hta‸ awˬ g'aˇ ca piˇ ve yoˬ. 24 Oˇ htaˇ, Aˍleˍsaˍduˆ venˇ yaˇ Aˍpawˇlu‸ meh ve Yuˇda‸ chaw teˇ g'aˇ Eˇfeˇsu‸ venˇ lo gaˬ la ve yoˬ. Yawˇ lehˬ tawˇ yaw puiˉ ve chaw leh, Liˬ hpu shiˍ jaˇ ve chaw teˇ g'aˇ hpeh‸ ve yoˬ. 25 Yawˇ lehˬ, Jawˇ mawˇ Yeˍsuˆ ve ya‸ k'aw awˬ lawn g'a henˇ leh nyi ma pfuhˇ jaˇ ve awˬ hk'aw lo, Yeˍsuˆ ve awˬ lawn hk'a deh‸ maˍ piˇ puiˉ ve htawˇ, Yoˇhanˬ maˍ piˇ ve baˆtiˆsaˬ teˇ ceuˬ hta‸ ceh tiˉ shiˍ ve yoˬ. 26 Yawˇ lehˬ, bon yehˬ awˬ hk'aw lo nyi ma ha‸ hanˉ te leh tanˬ maˍ piˇ ve yoˬ. Piˇkiˇlaˆ leh Aˍkuˉlaˆ yawˇ maˍ piˇ ve tawˇ hkawˇ hta‸ g'a kaˇ htaˇ, yawˇ hta‸ kuˬ leh G'uiˬ sha ve awˬ lawn yawˇ hta‸ hk'a deh‸ hteˇ lehˍ k'aw‸ maˍ piˇ ve yoˬ. 27 Yawˇ lehˬ, Aˍhkaˍyaˆ mvuhˇ miˬ hpawˇ lo hkanˍ k'ai gaˇ ve teˇ yanˇ htaˇ, awˬ viˉ awˬ nyi teˇ hpaˍ yawˇ hta‸ awˬ g'aˇ piˇ leh, oˇ hpawˇ chehˇ ve awˬ la‸ g'awˇ teˇ hpaˍ yawˇ hta‸ ha‸ yuˬ tuˬ yawˇ hui hta‸ li‸ bvuh‸ piˇ ve yoˬ. Oˇ kaˬ lo chehˇ ve chaw hui lehˬ, G'uiˬ sha ve awˬ bon hta‸ pa taw yonˍ ve yoˬ. Yawˇ oˇ kaˬ lo gaˬ htaˇ, yawˇ hui hta‸ maˇ maˇ ga piˇ ve yoˬ. 28 Awˬ lawn k'o, Yeˍsuˆ lehˬ Hkri‸ hpeh‸ ve yoˬ teh‸, Li‸ hpu hk'aw yawˇ hk'a deh‸ hpeu‸ maˍ piˇ leh, chaw hk'a peu-eˬ mehˆ g'uˇ suhˍ Yuˇda‸ chaw teˇ hpaˍ hta‸ tawˇ g'awˬ da‸ ve awˬ hk'aw lo yawˇ g'aˇ ve yoˬ.

Tcuh yaˇ 19

1 Aˍpawˇlu‸ lehˬ, Kawˇrenˍhtuˆ venˇ awˬ hk'aw lo chehˇ htaˇ, Pawˇlu‸ awˬ na hpawˇ ve mvuhˇ miˬ teˇ hpaˍ hta‸ hpanˍ k'ai leh, Eˇfeˇsu‸ venˇ lo gaˬ ve yoˬ. Oˇ kaˬ lo awˬ la‸ g'awˇ teˇ hpaˍ hta‸ yawˇ g'a mawˬ leh yawˇ hui hta‸ k'oˆ piˇ ve, 2 Nawˬ hui yonˍ ve teˇ yanˇ, da‸ ve kehˬ ve Awˬ ha hpu hta‸ g'a peuˬ laˇ teh‸ na nyi htaˇ, yawˇ hui k'aw‸ k'oˆ ve, Da‸ ve kehˬ ve Awˬ ha hpu cawˬ ve hta‸ ngaˬ hui maˇ kaˇ jaw teh‸ k'aw‸ k'oˆ piˇ ve yoˬ. 3 Pawˇlu‸ k'oˆ ve, Hk'e te leh, nawˬ hui hk'aˬ hk'e ve baˆtiˆsaˬ hkanˍ ve le teh‸ na nyi htaˇ, Yoˇhanˬ ve baˆtiˆsaˬ teˇ ceuˬ hta‸ hkanˍ ve yoˬ teh‸ yawˇ hui k'aw‸ k'oˆ piˇ ve yoˬ. 4 Oˇ htaˇ Pawˇlu‸ k'aw‸ k'oˆ piˇ ve, Yoˇhanˬ lehˬ, venˇ baˆ hta‸ dawˇ hpfuhˆ ve hta‸ caˉ da‸ ve baˆtiˆsaˬ teˇ ceuˬ piˇ leh, yawˇ awˬ hk'aw‸ nawˉ laˬ tuˬ ve teˇ g'aˇ hta‸ g'a yonˍ tuˬ chaw chi ma ve hta‸ maˍ piˇ ve yoˬ. Chaw oˇ ve teˇ g'aˇ lehˬ Yeˍsuˆ yoˬ teh‸ k'oˆ piˇ ve yoˬ. 5 Tawˇ hkawˇ chi hta‸ yawˇ hui g'a kaˇ htaˇ, Jawˇ mawˇ Yeˍsuˆ ve awˬ meh awˬ hawˉ lo baˆtiˆsaˬ hkanˍ yuˬ ve yoˬ. 6 Pawˇlu‸ yawˇ hui awˬ hk'oˆ la‸ sheh taˍ htaˇ, da‸ ve kehˬ ve Awˬ ha hpu yawˇ hui awˬ hk'oˆ lo ya‸ la ve yoˬ. Yawˇ hui tawˇ laiˉ ceuˬ yaw chiˇ mvuh leh bon maˍ ve yoˬ. 7 Yawˇ hui hk'a peu-eˬ teˇ chi nyiˇ g'aˇ hk'e cawˬ ve yoˬ. 8 Oˇ ve awˬ hk'aw‸ nawˉ, Pawˇlu‸ lehˬ bon yehˬ awˬ hk'aw lo‸-e leh, nyi ma ha‸ hanˉ te leh ha pa sheh lehˇ hk'a gaˬ maˍ piˇ ve yoˬ. Yawˇ hui geh yawˇ jehˬ da‸ cehˇ da‸ leh, G'uiˬ sha ve mvuhˇ miˬ awˬ lawn yawˇ hui yonˍ la tuˬ yawˇ g'aˇ hte‸ maˍ piˇ ve yoˬ. 9 Ya‸ hk'aˇ, yawˇ hui teˇ hpaˍ hpaˍ nyi ma heh leh maˇ yonˍ ve pa taw, yawˇ hui chaw chi ma ve mehˆ g'uˇ suhˍ Ya‸ k'aw awˬ liˇ awˬ lawn hta‸ maˇ shawˍ maˇ caˆ k'oˆ ve yoˬ. Oˇ htaˇ, yawˇ yawˇ hui geh tawˆ k'ai leh, awˬ la‸ g'awˇ teˇ hpaˍ hta‸ shiˍ k'ai leh, Tuˇraˍnuˆ ve cawnˇ yehˬ awˬ hk'aw lo teˇ nyi le le jehˬ da‸ cehˇ da‸ ve yoˬ. 10 Yawˇ nyiˇ hk'aw‸ hk'a gaˬ chi hk'e te ve pa taw, Aˍsiˆ mvuhˇ miˬ awˬ hk'aw lo hk'a chehˇ ve chaw hk'a peu-eˬ, Yuˇda‸ chaw maˇ k'oˆ, Heˍlaˍsaˆ chaw maˇ k'oˆ, Jawˇ mawˇ Yeˍsuˆ ve tawˇ hkawˇ hta‸ g'a kaˇ ve yoˬ. 11 G'uiˬ sha lehˬ Pawˇlu‸ hta‸ cuˇ leh uiˍ jaˇ ve anˇ tuˬ teˇ hpaˍ hta‸ te ve yoˬ. 12 Pawˇlu‸ yehˇ ve hpaˉ ce‸ teˇ hpaˍ maˇ k'oˆ, tsuh‸ tuˬ ve hpa teˇ hpaˍ maˇ k'oˆ, chaw naˬ teˇ hpaˍ geh shu yuˬ k'ai ve teˇ yanˇ, yawˇ hui na-e la leh, haiˬ ve neˇ teˇ hpaˍ htawˇ tawˆ k'ai ve yoˬ. 13 Oˇ htaˇ, neˇ hta‸ g'a‸ k'oˬ toˇ ve Yuˇda‸ chaw teˇ hpaˍ hpaˍ lehˬ, haiˬ ve neˇ geh ve chaw teˇ hpaˍ awˬ hk'oˆ hta‸ k'oˆ piˇ ve, Pawˇlu‸ maˍ ve Yeˍsuˆ teˇ g'aˇ ve awˬ meh awˬ hawˉ lo ngaˬ nawˬ hui hta‸ tawˇ piˇ ve yoˬ teh‸ k'oˆ leh, Jawˇ mawˇ Yeˍsuˆ ve awˬ meh hta‸ kuˬ ve yoˬ. 14 Keˍvaˆ meh ve Yuˇda‸ paw hkuˇ lonˉ teˇ g'aˇ ve awˬ yaˇ paˍ suhˍ g'aˇ htawˇ chi hk'e te chehˇ ve yoˬ. 15 Ya‸ hk'aˇ, haiˬ ve neˇ yawˇ hui hta‸ k'aw‸ k'oˆ ve, Yeˍsuˆ hta‸ ngaˬ shiˍ ve yoˬ. Pawˇlu‸ awˬ lawn htawˇ ngaˬ shiˍ ve yoˬ. Nawˬ hui teˇ hpaˍ a shu le teh‸ k'oˆ piˇ ve yoˬ. 16 Oˇ htaˇ, haiˬ ve neˇ geh ve chaw lehˬ, yawˇ hui hta‸ pawˆ k'uˉ leh, yawˇ hui hk'a peu-eˬ hta‸ g'aˇ ve awˬ hk'aw lo hehnˇ chaweh te ve pa taw, yawˇ hui g'a naˬ leh, yehˬ oˇ ve awˬ hk'aw lo awˬ k'u nyi te hpaw tawˆ-e ve yoˬ. 17 Eˇfeˇsu‸ venˇ awˬ hk'aw lo hk'a chehˇ ve chaw hk'a peu-eˬ, Yuˇda‸ chaw maˇ k'oˆ, Heˍlaˍsaˆ chaw maˇ k'oˆ, awˬ lawn chi hta‸ g'a shiˍ g'a kaˇ ve yoˬ. Yawˇ hui hk'a peu-eˬ kawˆ jaˇ leh, Jawˇ mawˇ Yeˍsuˆ ve awˬ meh hta‸ chiˇ uiˍ chiˇ mvuh ve yoˬ. 18 Yonˍ peuˬ ve chaw htawˇ maˇ maˇ laˬ leh yawˇ hui te ya‸ ve teˇ hpaˍ hta‸ k'aoˍ maˍ hto maˍ piˇ ve yoˬ. 19 Faˍ te paˍ laiˉ g'aˇ htawˇ, yawˇ hui ve li‸ teˇ hpaˍ hta‸ yuˬ laˬ leh, chaw hk'a peu-eˬ mehˆ g'uˇ suhˍ tuˉ baˬ ve yoˬ. Li‸ oˇ ve teˇ hpaˍ awˬ hpfuhˇ yawˇ hui shawˍ nyi htaˇ, ngaˇ meunˍ hteh‸ hpfuhˇ cawˬ ve yoˬ. 20 Hk'e te leh, awˬ g'aˇ uiˍ ve awˬ hk'aw lo Jawˇ mawˇ G'uiˬ sha ve tawˇ hkawˇ uiˍ la maˇ la leh, kanˇ paˆ uiˍ jaˇ ve yoˬ. 21 Chi teˇ hpaˍ hpeh‸ la peuˬ hk'aw‸ nawˉ, Pawˇlu‸ yawˇ ve nyi ma hk'aw dawˇ taˍ ve, Maˍkeˍdawˇniˆ mvuhˇ miˬ leh Aˍhkaˍyaˆ mvuhˇ miˬ hta‸ hpanˍ k'ai peuˬ hk'aw‸ nawˉ, Yeˍruˆsaˍlehnˍ venˇ lo k'ai tuˬ yoˬ. Yawˇ k'oˆ ve, Ngaˬ oˇ kaˬ lo gaˬ peuˬ hk'aw‸ nawˉ Roˉma‸ venˇ lo htawˇ ngaˬ g'a gaˬ tuˬ yoˬ teh‸ k'oˆ ve yoˬ. 22 Yawˇ hta‸ ga piˇ shehˍ hpaˇ teˇ hpaˍ awˬ hk'aw lo, Tiˆmoˉseˍ leh Eˇraˍtuˆ nyiˇ g'aˇ hta‸ Maˍkeˍdawˇniˆ mvuhˇ miˬ lo yawˇ k'ai tcuh peuˬ hk'aw‸ nawˉ, yawˇ awˬ to Aˍsiˆ mvuhˇ miˬ awˬ hk'aw lo teˇ tcuhˉ teˇ jaw chehˇ sheˍ ve yoˬ. 23 Awˬ yanˇ oˇ ve awˬ hk'aw lo, Ya‸ k'aw awˬ liˇ hta‸ pa taw sho‸ sha‸ tuˬ maˇ maˇ tawˆ la ve yoˬ. 24 Awˬ lawn k'o, Deˍmeˍtriˆ meh ve hpu dawˆ paˍ teˇ g'aˇ cawˬ ve yoˬ. Yawˇ hpu yuˬ leh Aˍteˍmiˆ g'uiˬ sha ma ve fuˍ yehˬ ehˉ teˇ hpaˍ hta‸ te leh, yawˇ hta‸ pa taw hpu dawˆ paˍ teˇ hpaˍ maˇ maˇ paw sha la ve yoˬ. 25 Yawˇ lehˬ hpu dawˆ paˍ hui hta‸ leh oˇ hk'e ve kanˉ te ve chaw teˇ hpaˍ hta‸ kuˬ hpawnˬ peuˬ leh k'oˆ ve, Awˬ chawˇ teˇ hpaˍ-oˬ, kanˉ chi hta‸ pa taw ngaˬ hui paw sha la ve hta‸ nawˬ hui shiˍ ve yoˬ. 26 Pawˇlu‸ chi teˇ g'aˇ lehˬ, chaw yaˇ hui ve la‸ sheh hk'a te ve g'uiˬ sha teˇ hpaˍ lehˬ, g'uiˬ sha maˇ heˆ teh‸ k'oˆ ve yoˬ. Hk'e te leh, Eˇfeˇsu‸ venˇ awˬ hk'aw lo ceh tiˉ maˇ heˆ, aˬ laˬ hk'e Aˍsiˆ mvuhˇ miˬ hk'a peu-eˬ awˬ hk'aw lo chaw maˇ maˇ hta‸ yawˇ beˬ leh, nyi ma hpfuhˆ k'ai tuˬ te ve hta‸ nawˬ hui g'a kaˇ g'a mawˬ ve yoˬ. 27 Hk'e te leh, ngaˬ hui ve kanˉ luˬ k'ai ve hta‸ dawˇ haˍ tuˬ cawˬ ve awˬ hk'oˆ ka‸, uiˍ jaˇ mvuh jaˇ ve Aˍteˍmiˆ g'uiˬ sha ma ve fuˍ yehˬ lehˬ, te‸ chiˉ awˬ bon maˇ cawˬ ve hk'e hpeh‸ leh, Aˍsiˆ mvuhˇ miˬ hk'a peu-eˬ leh miˬ guiˬ hk'a peu-eˬ oˉ k'oˍ pui ve Aˍteˍmiˆ g'uiˬ sha ma ve awˬ me‸ awˬ hponˇ luˬ k'ai tuˬ ve hta‸ htawˇ dawˇ haˍ tuˬ cawˬ ve yoˬ teh‸ yawˇ k'oˆ piˇ ve yoˬ. 28 Tawˇ oˇ ve hta‸ g'a kaˇ htaˇ, yawˇ hui nyi ma zuhˆ jaˇ leh, Eˇfeˇsu‸ chaw hui ve Aˍteˍmiˆ g'uiˬ sha ma lehˬ, uiˍ jaˇ mvuh jaˇ ve yoˬ teh‸ k'oˆ leh kuˬ ve yoˬ. 29 Hk'e te leh, venˇ oˇ ve hk'a peu-eˬ awˬ hk'aw lo duiˆ-ehˍ shaˇ-ehˍ hk'a biˇ cawˬ leh, Pawˇlu‸ geh toˇ ve Maˍkeˍdawˇniˆ chaw Gaˍyuˆ leh Aˍriˍtaˍhkuˆ hta‸ yawˇ hui g'awˬ yuˬ leh, pawehˇ te ve chehˇ kuiˬ lo teˇ geh g'uiˇ lo‸-e ve yoˬ. 30 Pawˇlu‸ lehˬ, chaw awˬ moˍ lonˉ awˬ hk'aw lo lo‸-e gaˇ ve htawˇ, awˬ la‸ g'awˇ teˇ hpaˍ yawˇ hta‸ tawˍ taˍ ve yoˬ. 31 Pawˇlu‸ ve awˬ chawˇ hpeh‸ ve Aˍsiˆ mvuhˇ miˬ hta‸ caˉ da‸ ve jawˇ mawˇ teˇ hpaˍ hpaˍ htawˇ, pawehˇ te ve chehˇ kuiˬ awˬ hk'aw lo yawˇ maˇ g'a lo‸-e tuˬ, chaw hta‸ k'ai tcuh leh yawˇ hta‸ lawˬ hkawˉ ve yoˬ. 32 Hpawˬ da‸ ve awˬ moˍ oˇ ve lehˬ, duiˆ-ehˍ shaˇ-ehˍ hpeh‸ leh, teˇ g'aˇ teˇ ceuˬ kuˬ ve yoˬ. Yawˇ hui maˇ-awˍ ve aˬ hto‸ ma hta‸ pa taw hpawnˬ da‸ ve hta‸ maˇ shiˍ. 33 Oˇ htaˇ, Yuˇda‸ chaw hui lehˬ, Aˍleˍsaˍduˆ meh ve teˇ g'aˇ hta‸ chaw chi ma ve mehˆ g'uˇ suhˍ lo ca‸ peu leh, yawˇ tawˇ yaw tuˬ, chaw awˬ moˍ lonˉ awˬ hk'aw lo chaw teˇ hpaˍ hpaˍ yawˇ hta‸ awˬ g'aˇ piˇ ve yoˬ. Hk'e te leh, yawˇ chaw chi ma ve hta‸ tawˇ yaw hk'aw‸ piˇ gaˇ leh, yawˇ la‸ sheh awˬ heˆ te maˍ ve yoˬ. 34 Ya‸ hk'aˇ, yawˇ Yuˇda‸ chaw hpeh‸ ve hta‸ yawˇ hui g'a shiˍ htaˇ, Eˇfeˇsu‸ chaw hui ve Aˍteˍmiˆ g'uiˬ sha ma lehˬ, uiˍ jaˇ mvuh jaˇ ve yoˬ teh‸, aˬ laˬ hk'e nyiˇ naˍ riˍ hk'a gaˬ chaw hk'a peu-eˬ teˇ hkawˇ tiˉ te leh kuˬ chehˇ ve yoˬ. 35 Venˇ ceˇ leˇ lonˉ lehˬ, chaw awˬ moˍ lonˉ hta‸ ta‸ iˉ chehˇ tcuh peuˬ hk'aw‸ nawˉ, yawˇ yawˇ hui hta‸ k'oˆ piˇ ve, Eˇfeˇsu‸ chaw teˇ hpaˍ-oˬ, Eˇfeˇsu‸ venˇ lehˬ, uiˍ jaˇ mvuh jaˇ ve Aˍteˍmiˆ g'uiˬ sha ma ve fuˍ yehˬ hta‸ maˇ k'oˆ, mvuhˇ naw ma lo ce la ve shaˉ ho‸ hta‸ maˇ k'oˆ, ha‸ shaˉ ve venˇ hpeh‸ ve hta‸ maˇ shiˍ ve chaw a shu cawˬ le. 36 Awˬ lawn chi teˇ hpaˍ hta‸ tawˇ g'awˬ da‸ tuˬ maˇ cawˬ ve pa taw, nawˬ hui ta‸ iˉ chehˇ cawˇ ve awˬ hk'oˆ ka‸, maˇ dawˇ nyi leh te ve teˇ ceuˬ maˇ te cawˇ ve yoˬ. 37 Chaw chi teˇ hpaˍ lehˬ, bon yehˬ hta‸ te luˬ ve ka‸ maˇ heˆ, ngaˬ hui ve g'uiˬ sha ma hta‸ maˇ shawˍ maˇ caˆ k'oˆ ve ka‸ maˇ heˆ. Ya‸ hk'aˇ, yawˇ hui hta‸ nawˬ hui choˬ kaˬ lo g'awˬ veu laˇ peuˬ. 38 Hk'e te leh, Deˍmeˍtriˆ leh yawˇ ve awˬ chawˇ hpu dawˆ paˍ hui lehˬ, teˇ g'aˇ g'aˇ hta‸ tawˇ te da‸ tuˬ cawˬ ve k'o, shaˉ nanˉ cawˬ leh, mvuhˇ miˬ jawˇ mawˇ htawˇ cawˬ ve yoˬ. Yawˇ hui hk'aˇ yawˇ hui tawˇ te da‸ piˇ lawˬ-o‸. 39 Chi awˬ hk'oˆ nawˬ hui te gaˇ ve k'o, tawˇ jehˬ shehˍ hpaˇ awˬ moˍ lonˉ g'a jehˬ cheˆ ve yoˬ. 40 Awˬ lawn k'o, ya‸ nyi duiˆ-ehˍ shaˇ-ehˍ te ve lehˬ, awˬ lawn te‸ chiˉ maˇ cawˬ ve pa taw, shu ngaˬ hui awˬ hk'oˆ venˇ baˆ taˍ laˇ ve hta‸ dawˇ haˬ tuˬ cawˬ ve yoˬ. Aˬ hto‸ ma pa taw chi hk'e hpawnˬ da‸ le teh‸ shu na nyi laˇ htaˇ, ngaˬ hui te‸ chiˉ k'aw‸ k'oˆ piˇ tuˬ maˇ cawˬ teh‸, chaw chi ma ve hta‸ yawˇ k'oˆ piˇ ve yoˬ. 41 Yawˇ chi hk'e k'oˆ peuˬ hk'aw‸ nawˉ, hpawnˬ da‸ ve chaw hui hta‸ yawˇ hpehˇ piˇ ve yoˬ

Tcuh yaˇ 20

1 Duiˆ-ehˍ shaˇ-ehˍ te ve chi gawˬ k'ai peuˬ hk'aw‸ nawˉ, Pawˇlu‸ lehˬ, awˬ la‸ g'awˇ hui hta‸ kuˬ leh awˬ g'aˇ piˇ peuˬ htaˇ, yawˇ hui hta‸ hpaˆ da‸ leh Maˍkeˍdawˇniˆ mvuhˇ miˬ lo k'ai ve yoˬ. 2 Yawˇ Maˍkeˍdawˇniˆ mvuhˇ miˬ hta‸ hpanˍ k'ai leh, yawˇ hui hta‸ awˬ g'aˇ maˇ maˇ piˇ peuˬ hk'aw‸ nawˉ, Heˍlaˍsaˆ mvuhˇ miˬ lo gaˬ la ve yoˬ. 3 Pawˇlu‸ oˇ kaˬ lo ha pa sheh lehˇ chehˇ peuˬ hk'aw‸ nawˉ, haw lo‸ k'oˍ ciˇ leh Suˇriˆ mvuhˇ miˬ lo k'o‸-e-a teh‸ te htaˇ, Yuˇda‸ chaw teˇ hpaˍ yawˇ hta‸ tiˇ pehˍ tuˬ jehˬ da‸ taˍ ve pa taw, Maˍkeˍdawˇniˆ mvuhˇ miˬ hpawˇ lo k'aw‸ k'o‸-e tuˬ yawˇ dawˇ taˍ ve yoˬ. 4 Pawˇlu‸ geh k'ai ve chaw teˇ hpaˍ lehˬ, Beˍriˆ venˇ yaˇ Puˇluˆ ve yaˇ paˍ Sawˇpaˍtaˍruˆ, Hteˇsaˍlawˇniˆ venˇ yaˇ Aˍriˍtaˍhkuˆ leh Seˍkuˍduˆ, Deˍbeˍ venˇ yaˇ Gaˍyuˆ leh Tiˆmoˉseˍ, Aˍsiˆ mvuhˇ miˬ chaw Tuˇhkiˆ leh Taˍroˆhpeˍ hui yoˬ. 5 Yawˇ hui awˉ lawˉ k'ai leh, Taˍroˇaˆ venˇ lo ngaˬ hui hta‸ law chehˇ ve yoˬ. 6 Hkaoˍ monˇ awˬ hk'aw lo diˇ maˇ keu ve pawehˇ peuˬ hk'aw‸ nawˉ, ngaˬ hui Hpiˇliˇpiˆ venˇ lo haw lo‸ k'oˍ ciˇ tawˆ-e leh, ngaˇ nyi gaˬ heh‸, Taˍroˇaˆ venˇ lo yawˇ hui geh gaˬ leh, oˇ kaˬ lo suhˍ nyi chehˇ ve yoˬ. 7 Suhˍ nyi awˬ hk'aw awˉ lawˉ teˇ haˉ htaˇ, hkaoˍ monˇ hk'eh‸ tuˬ awˬ pon ngaˬ hui hpawnˬ da‸ ve yoˬ. Pawˇlu‸ lehˬ, shawˉ pawˍ tawˆ k'ai tuˬ dawˇ ve pa taw, yawˇ hui hta‸ maˍ piˇ jehˬ piˇ leh, shehˍ k'aw hkui hk'a gaˬ yawˇ hui hta‸ maˍ piˇ ve yoˬ. 8 Ngaˬ hui hpawnˬ da‸ ve awˬ hta‸ teˇ htai‸ ve awˬ bawehˇ awˬ hk'aw lo kawˆ faiˇ maˇ maˇ cawˬ ve yoˬ. 9 Uˇtuˇhkuˆ meh ve chaw haˉ paˍ teˇ g'aˇ yehˬ miˉ ehˉ awˬ hpe‸ lo mui taˍ ve yoˬ. Pawˇlu‸ maw chaweh maˍ piˇ ve pa taw yawˇ zuh‸ muiˉ jo leh, zuh‸ muiˉ k'a ve teˇ yanˇ, yehˬ shehˆ htai‸ ve hta‸ yawˇ ce leh, suh peuˬ ve hta‸ shu ca chiˇ yuˬ ve yoˬ. 10 Oˇ htaˇ, Pawˇlu‸ ya‸-e leh, chaw oˇ ve awˬ hk'oˆ hta‸ boˆ taˍ peuˬ hk'aw‸ nawˉ, yawˇ hta‸ k'uˉ taˍ leh k'oˆ ve, Duiˆ-ehˍ shaˇ-ehˍ taˇ te. Yawˇ awˬ hk'aw lo a sha‸ cawˬ sheˍ ve yoˬ teh‸, yawˇ hui hta‸ k'oˆ piˇ ve yoˬ. 11 Pawˇlu‸ k'aw‸ taˆ-e leh, hkaoˍ monˇ hk'eh‸ leh caˇ ve yoˬ. Mvuhˇ htiˇ htaˇ hk'a gaˬ yawˇ hui geh maw chaweh na‸ uˉ te da‸ peuˬ hk'aw‸ nawˉ, yawˇ tawˆ k'ai ve yoˬ. 12 Yawˇ hui lehˬ, yaˇ paˍ oˇ ve hta‸ awˬ te‸ g'a shiˍ k'o‸-e leh, ha lehˬ jaˇ ve yoˬ. 13 Ngaˬ hui lehˬ, haw lo‸ k'oˍ ciˇ leh Aˍsoˆ venˇ lo awˉ lawˉ k'ai taˍ ve yoˬ. Pawˇlu‸ lehˬ, ya‸ k'aw juˇ k'ai leh, oˇ kaˬ lo gaˬ htaˇ ngaˬ hui geh haw lo‸ k'oˍ g'a k'aw‸ ciˇ tuˬ yawˇ gu taˍ ve yoˬ. 14 Aˍsoˆ venˇ lo yawˇ ngaˬ hui hta‸ hpuˇ da‸ htaˇ, yawˇ hta‸ ngaˬ hui haw lo‸ k'oˍ hk'aw ha‸ yuˬ leh, Miˍtuˆleˍ venˇ lo ciˇ k'ai ve yoˬ. 15 Oˇ kaˬ lo tawˆ k'ai leh, shawˉ pawˍ teˇ nyi hk'e ngaˬ hui Hkiˇoˆ conˇ awˬ paˇ lo gaˬ leh, hpa‸ nyi hk'e teˇ nyi Saˍmoˆ conˇ lo gaˬ ve yoˬ. Hpiˇ nyi hk'e teˇ nyi oˇ kaˬ lo k'aw‸ tawˆ k'ai leh, Meˍleˍtuˆ venˇ lo gaˬ ve yoˬ. 16 Pawˇlu‸ lehˬ, Aˍsiˆ mvuhˇ miˬ awˬ hk'aw lo maw maw maˇ g'a chehˇ tuˬ, Eˇfeˇsu‸ venˇ lo maˇ deh leh teˇ pawˆ tiˉ awˬ g'uˇ suhˍ k'ai tuˬ yawˇ dawˇ cheˆ taˍ ve yoˬ. Hpeh‸ ve k'o, Peˍteˍkoˆteˍ awˬ nyi htaˇ Yeˍruˆsaˍlehnˍ venˇ awˬ hk'aw lo g'a chehˇ taˍ tuˬ, yawˇ haˆ haˆ k'ai gaˇ ve yoˬ. 17 Pawˇlu‸ lehˬ, Meˍleˍtuˆ venˇ lo chehˇ taˍ leh, Eˇfeˇsu‸ venˇ lo chaw hta‸ k'ai tcuh leh Hkri‸ yaˇ awˬ moˍ awˬ hoˉ chaw mawˇ teˇ hpaˍ hta‸ ca kuˬ tcuh ve yoˬ. 18 Yawˇ hui yawˇ geh gaˬ la htaˇ, yawˇ yawˇ hui hta‸ k'oˆ piˇ ve, Ngaˬ lehˬ Aˍsiˆ mvuhˇ miˬ awˬ hk'aw lo awˉ lawˉ gaˬ la ve teˇ nyi te leh, ngaˬ nawˬ hui geh hk'aˬ htaˆ ka‸ hk'aˬ hk'e te chehˇ ve awˬ lawn hta‸ nawˬ hui shiˍ ve yoˬ. 19 Ngaˬ Jawˇ mawˇ Yeˍsuˆ ve kanˉ hta‸ te htaˇ, nyi ma nuˇ nuˇ nehˬ nehˬ taˍ ve, mehˆ g'uiˬ maˇ maˇ ya‸ la ve leh, Yuˆda‸ chaw hui ngaˬ hta‸ tiˇ pehˍ tuˬ jehˬ da‸ ve pa taw, beˬ ve lawˇ ve laiˉ ceuˬ ngaˬ g'a hkanˍ ve awˬ lawn hta‸ htawˇ nawˬ hui shiˍ taˍ ve yoˬ. 20 Ngaˬ nawˬ hui hta‸ maˍ laˇ hto laˇ htaˇ, nawˬ hui awˬ pon awˬ bon cawˬ ve teˇ hpaˍ, teˇ ceuˬ hta‸ ka‸ ngaˬ maˇ faˉ taˍ leh, chaw hk'a peu-eˬ mehˆ g'uˇ suhˍ maˇ k'oˆ, teˇ yehˬ peuˬ teˇ yehˬ awˬ hk'aw lo maˇ k'oˆ, ngaˬ nawˬ hui hta‸ maˍ laˇ ve yoˬ. 21 G'uiˬ sha mehˆ g'uˇ suhˍ venˇ baˆ dawˇ hpfuhˆ tuˬ maˇ k'oˆ, ngaˬ hui ve Jawˇ mawˇ Yeˍsuˆ Hkri‸ hta‸ yonˍ tuˬ maˇ k'oˆ, Yuˇda‸ chaw leh Heˍlaˍsaˆ chaw hui hta‸ ngaˬ shaˉ hkiˆ hkanˍ peuˬ ve awˬ lawn hta‸ htawˇ nawˬ hui shiˍ ve yoˬ. 22 Chi beu‸ ngaˬ lehˬ, Awˬ ha hpu awˬ hk'aw lo hpeh taˍ ve hta‸ g'a hkanˍ leh, Yeˍruˆsaˍlehnˍ venˇ lo k'ai chehˇ ve yoˬ. Oˇ kaˬ lo ngaˬ hk'aˬ hk'e hpeh‸ la tuˬ leh naˍ maˇ shiˍ. 23 Ya‸ hk'aˇ, shu hpeh yuˬ leh fawˉ mehˍ laˇ tuˬ ve teˇ hpaˍ ngaˬ hta‸ law taˍ ve yoˬ teh‸, teˇ venˇ le le awˬ hk'aw lo da‸ ve kehˬ ve Awˬ ha hpu ngaˬ hta‸ hk'a tawˍ lehˆ hto laˇ ve yoˬ. 24 Ya‸ hk'aˇ, ngaˬ g'a toˇ tuˬ ve ya‸ k'aw hta‸ awˬ leh hk'a gaˬ ngaˬ toˇ peuˬ leh, Jawˇ mawˇ Yeˍsuˆ ngaˬ hta‸ kanˉ pe‸ laˇ ve hk'e G'uiˬ sha ve awˬ bon hta‸ caˉ da‸ ve ha lehˬ ve bon hkawˇ awˬ lawn shaˉ hkiˆ g'a hkanˍ peuˬ ve k'o, ngaˬ ve a sha‸ awˬ hpfuhˇ hk'aˆ ve teh‸ ngaˬ maˇ shawˍ. 25 G'uiˬ sha ve mvuhˇ miˬ awˬ lawn ngaˬ nawˬ hui hta‸ ca toˇ maˍ piˇ peuˬ. Nawˬ hui hk'a g'a kaˇ ve chaw hk'a peu-eˬ lehˬ, awˬ hk'aw‸ nawˉ teˇ pawˆ ka‸ ngaˬ ve mehˆ hpfuhˇ hta‸ maˇ g'a k'aw‸ mawˬ tuˬ ve ngaˬ shiˍ ve yoˬ. 26 Hk'e te leh, nawˬ hui hk'a peu-eˬ ve awˬ suhˍ hta‸ ngaˬ ponˬ ve yoˬ teh‸, ya‸ nyi ngaˬ nawˬ hui hta‸ shaˉ hkiˆ hkanˍ ve yoˬ. 27 Awˬ lawn k'o, G'uiˬ sha ve a loˍ hk'a peu-eˬ nawˬ hui hta‸ maˍ laˇ tuˬ ngaˬ maˇ jaw k'ai. 28 Nawˬ hui lehˬ, a shu yawˇ awˬ to hta‸ maˇ k'oˆ, yawˬ awˬ moˍ hk'a peu-eˬ hta‸ maˇ k'oˆ, hk'a deh‸ nyi ha‸ shaˉ-oˆ. Jawˇ mawˇ G'uiˬ sha lehˬ, yawˇ ve awˬ suhˍ vuiˬ yuˬ taˍ ve awˬ moˍ hta‸ caˍ piˇ taw piˇ tuˬ, da‸ ve kehˬ ve Awˬ ha hpu nawˬ hui hta‸ nyi ha‸ shaˉ shehˍ hpaˇ hpeh‸ piˇ lawˬ peuˬ. 29 Ngaˬ tawˆ k'ai peuˬ hk'aw‸ nawˉ, yawˬ awˬ moˍ hta‸ te luˬ te sheˆ tuˬ ve haiˬ jaˇ ve veˬ teˇ hpaˍ nawˬ hui awˬ hk'aw lo‸ la tuˬ ve hta‸ ngaˬ shiˍ ve yoˬ. 30 Chi hk'oˆ ka‸, nawˬ hui awˬ hk'aw lo chaw teˇ hpaˍ hpaˍ tu la leh, awˬ la‸ g'awˇ teˇ hpaˍ hta‸ yawˇ hui awˬ hk'aˇ suh k'ai tuˬ ve awˬ pon beˬ yuˬ tuˬ hteˇ ve tawˇ hkawˇ hta‸ yawˇ hpfuhˆ piˇ tuˬ yoˬ. 31 Chi hta‸ pa taw shaw taˍ-o‸. Ngaˬ lehˬ nawˬ hui teˇ g'aˇ le le hta‸ shehˆ hk'aw‸ hk'a gaˬ, tanˇ hkuinˇ tanˇ vanˇ maˇ jehˇ jehˇ leh mehˆ g'uiˬ ya‸ la ve awˬ hk'aw lo shaˍ ti‸ pe‸ laˇ ve hta‸ dawˇ nawˇ-oˆ. 32 Ngaˬ lehˬ chi beu‸ nawˬ hui hta‸ G'uiˬ sha ve la‸ sheh hk'aw leh, yawˇ ve awˬ bon uiˍ ve tawˇ hkawˇ awˬ hk'aw lo a‸ piˇ ve yoˬ. Awˬ bon uiˍ ve tawˇ hkawˇ oˇ ve lehˬ, nawˬ hui hta‸ uiˍ la mvuh la piˇ puiˉ leh, da‸ la kehˬ la peuˬ ve chaw hk'a peu-eˬ geh teˇ geh nawˬ hui hta‸ chehˇ kuiˬ pe‸ laˇ puiˉ ve yoˬ. 33 Ngaˬ lehˬ, a shu teˇ g'aˇ ve hpu, shi, veu‸ tuˬ k'aˇ tuˬ hta‸ ka‸ maˇ sheˉ lai. 34 Ngaˬ ve la‸ sheh chi lehˬ, ngaˬ leh ngaˬ geh chehˇ ve chaw hui hk'a loˍ ve teˇ hpaˍ hta‸ g'a tuˬ kanˉ te ve hta‸ nawˬ hui shiˍ ve yoˬ. 35 Nawˬ hui htawˇ chi hk'e g'aˇ hte‸ te leh awˬ g'aˇ nuˇ ve chaw hui hta‸ g'a ga piˇ tuˬ, ngaˬ nawˬ hui hta‸ te maˍ laˇ peuˬ. Piˇ ve lehˬ g'a ve a‸ kehˉ awˬ bon uiˍ ve yoˬ teh‸, Jawˇ mawˇ Yeˍsuˆ k'oˆ taˍ ve tawˇ hkawˇ hta‸ dawˇ nawˇ tuˬ htawˇ, hk'a peu-eˬ awˬ hk'aw lo ngaˬ nawˬ hui hta‸ te maˍ laˇ peuˬ teh‸, Pawˇlu‸ yawˇ hui hta‸ k'oˆ piˇ ve yoˬ. 36 Yawˇ chi hk'e k'oˆ peuˬ hk'aw‸ nawˉ, yawˇ hui hk'a peu-eˬ geh teˇ geh hkui tcuhˉ teh leh bon lawˬ ve yoˬ. 37 Yawˇ hui hk'a peu-eˬ g'aˇ hte‸ hawˬ leh, Pawˇlu‸ ve k'awˍ peˍ hta‸ k'uˉ taˍ leh yawˇ hta‸ boˆ nu ve yoˬ, 38 Awˬ hk'aw‸ nawˉ teˇ pawˆ ka‸ yawˇ ve mehˆ hpfuhˇ hta‸ maˇ g'a k'aw‸ mawˬ teh‸ yawˇ k'oˆ ve tawˇ teˇ hkawˇ hta‸ pa taw yawˇ hui dawˇ haˍ jaˇ ve yoˬ. Oˇ htaˇ, yawˇ hui Pawˇlu‸ hta‸ haw lo‸ k'oˍ lo hk'a gaˬ shiˍ k'oˬ piˇ ve yoˬ.

Tcuh yaˇ 21

1 Yawˇ hui hta‸ hpaˆ da‸ peuˬ hk'aw‸ nawˉ, ngaˬ hui haw lo‸ k'oˍ k'aw‸ ciˇ leh, Kawˇsaˆ conˇ lo hteˇ lehˍ kai ve yoˬ. Awˬ hk'aw‸ nawˉ teˇ nyi Rawˇduˆ conˇ lo k'ai leh, oˇ kaˬ lo k'aw‸ tu leh Paˍtaˍraˆ venˇ lo gaˬ ve yoˬ. 2 Oˇ kaˬ lo Hpiˇniˆ mvuhˇ miˬ lo k'ai ve haw lo‸ k'oˍ hta‸ ngaˬ hui g'a mawˬ leh, haw lo‸ k'oˍ oˇ ve hta‸ k'aw‸ ciˇ k'ai ve yoˬ 3 Kuˇpaˍruˆ conˇ hta‸ g'a mawˬ htaˇ, la‸ sha paˉ hpawˇ lo ngaˬ hui k'ai peuˬ hk'aw‸ nawˉ, Suˇriˆ mvuhˇ miˬ lo ciˇ k'ai leh, Tuˇruˆ venˇ lo deh ve yoˬ. Awˬ lawn k'o, haw lo‸ k'oˍ hk'aw taˆ taˍ ve mawˇ teˇ hpaˍ hta‸ oˇ kaˬ lo yuˬ ya‸-e ve yoˬ. 4 Oˇ kaˬ lo awˬ la‸ g'awˇ teˇ hpaˍ hta‸ ngaˬ hui ca mawˬ leh, suhˍ nyi hk'a gaˬ chehˇ ve yoˬ. Awˬ la‸ g'awˇ oˇ ve teˇ hpaˍ lehˬ, Pawˇlu‸ Yeˍruˆsaˍlehnˍ venˇ lo maˇ g'a k'ai tuˬ, Awˬ ha hpu hta‸ cuˇ leh yawˇ hta‸ k'oˆ piˇ ve yoˬ. 5 Suhˍ nyi biˇ peuˬ hk'aw‸ nawˉ, ngaˬ hui tawˆ k'ai ve yoˬ. Yawˇ hui hk'a peu-eˬ leh, awˬ miˇ awˬ yaˇ hui ka‸ teˇ geh venˇ awˬ baˬ lo hk'a gaˬ ngaˬ hui hta‸ shiˍ k'oˬ laˇ leh, g'uiˬ pfuhˍ paˇ lo ngaˬ hui hk'a peu-eˬ hkui tcuhˉ teh leh bon lawˬ ve yoˬ. 6 Teˇ g'aˇ leh teˇ g'aˇ hpaˆ da‸ hkawˇ yaw da‸ peuˬ hk'aw‸ nawˉ, ngaˬ hui haw lo‸ k'oˍ hk'aw lo taˆ lo‸-e leh, yawˇ hui htawˇ a shu yawˇ ve aˉ hk'aw lo k'o‸-e ve yoˬ. 7 Ngaˬ hui Tuˇruˆ venˇ lo tu leh, haw lo‸ k'oˍ ciˇ ve ya‸ k'aw leh peuˬ htaˇ, Paˍtawˇleˍ venˇ lo gaˬ ve yoˬ. Oˇ kaˬ lo chehˇ ve awˬ viˉ awˬ nyi hui geh ca guiˇ leh, yawˇ hui geh teˇ nyi chehˇ ve yoˬ. 8 Awˬ hk'aw‸ nawˉ teˇ nyi ngaˬ hui k'aw‸ tawˆ k'ai leh, Kehˉsaˍriˆ venˇ lo gaˬ ve yoˬ. Suhˍ g'aˇ awˬ hk'aw lo, Hpiˇliˇpuˆ meh ve ha lehˬ ve bon hkawˇ maˍ piˇ shehˍ hpaˇ teˇ g'aˇ ve aˉ hk'aw lo ngaˬ hui lo‸-e leh, yawˇ geh chehˇ ve yoˬ. 9 G'uiˬ sha ve tcuh kaˍ ma te ve yawˇ ve yaˇ miˇ awˇ g'aˇ cawˬ ve yoˬ. Yaˇ miˇ oˇ ve awˇ g'aˇ lehˬ, yaˇ miˇ haˉ hpeh‸ ve yoˬ. 10 Yawˇ aˉ hk'aw lo ngaˬ hui a ciˉ maw chaweh chehˇ ve teˇ yanˇ, Aˍgaˍbuˆ meh ve G'uiˬ sha ve tcuh kaˍ paˍ teˇ g'aˇ Yuˇda‸ mvuhˇ miˬ lo tu leh oˇ kaˬ lo gaˬ la ve yoˬ. 11 Yawˇ ngaˬ hui geh lo‸ la peuˬ hk'aw‸ nawˉ, Pawˇlu‸ ve haˍ pi caˆ hta‸ yuˬ leh, yawˇ hk'aˇ yawˇ, yawˇ ve hkui sheh la‸ sheh hta‸ hpeh taˍ ve yoˬ. Oˇ htaˇ yawˇ k'oˆ ve, Da‸ ve kehˬ ve Awˬ ha hpu chi hk'e k'oˆ ve yoˬ. Haˍ pi caˆ chi ve awˬ shehˍ hpaˇ hta‸ Yeˍruˆsaˍlehnˍ venˇ hk'aw lo Yuˇda‸ chaw teˇ hpaˍ chi hk'e te hpeh yuˬ leh buiˇ shaˆ aˉ naˆ chaw hui ve la‸ sheh hk'aw lo chiˇ a‸ piˇ tuˬ yoˬ teh‸, Aˍgaˍbuˆ k'oˆ piˇ ve yoˬ. 12 Ngaˬ hui tawˇ hkawˇ chi hta‸ g'a kaˇ htaˇ, ngaˬ hui leh oˇ kaˬ lo chehˇ ve chaw hui lehˬ, Yeˍruˆsaˍlehnˍ venˇ lo maˇ g'a k'ai tuˬ Pawˇlu‸ hta‸ lawˬ hkawˉ ve yoˬ. 13 Pawˇlu‸ k'aw‸ k'oˆ ve, Aˬ hto‸ ma te nawˬ hui hawˬ leh ngaˬ ve nyi ma hkoˇ k'ai tuˬ te laˇ ve le. Jawˇ mawˇ Yeˍsuˆ ve awˬ meh hta‸ pa taw, Yeˍruˆsaˍlehnˍ venˇ awˬ hk'aw lo shu hpeh laˇ ve ceh tiˉ maˇ heˆ, suh ve hta‸ hkanˍ tuˬ ve ka‸ ngaˬ gu taˍ peuˬ teh‸ k'oˆ laˇ ve yoˬ. 14 Ngaˬ hui yawˇ hta‸ beˬ maˇ g'a ve teˇ yanˇ, Jawˇ mawˇ G'uiˬ sha ve a loˍ cawˇ ve hk'e hpeh‸ la piˇ-oˆ teh‸, ngaˬ hui k'oˆ leh ta‸ iˉ chehˇ taˍ ve yoˬ. 15 Oˇ ve awˬ hk'aw‸ nawˉ, ngaˬ hui mawˇ gu taˍ leh Yeˍruˆsaˍlehnˍ venˇ lo taˆ-e ve yoˬ. 16 Kehˉsaˍriˆ venˇ hk'aw chehˇ ve awˬ la‸ g'awˇ teˇ hpaˍ hpaˍ ngaˬ hui geh teˇ geh k'ai leh, Maˍnaˍsonˍ meh ve Kuˇpaˍruˆ chaw teˇ g'aˇ geh haˉ tuˬ, ngaˬ hui hta‸ yawˇ geh shiˍ k'oˬ laˇ ve yoˬ. Yawˇ lehˬ, awˬ la‸ g'awˇ hpeh‸ maw peuˬ ve chaw teˇ g'aˇ hpeh‸ ve yoˬ. 17 Ngaˬ hui Yeˍruˆsaˍlehnˍ venˇ lo gaˬ htaˇ, awˬ viˉ awˬ nyi teˇ hpaˍ ngaˬ hui hta‸ ha lehˬ ha k'a ha‸ yuˬ laˇ ve yoˬ. 18 Awˬ hk'aw‸ nawˉ teˇ nyi, Pawˇlu‸ lehˬ ngaˬ hui geh teˇ geh Yaˍkoˆ geh k'ai leh, awˬ hoˉ chaw mawˇ hk'a peu-eˬ htawˇ hpawnˬ chehˇ taˍ ve yoˬ. 19 Pawˇlu‸ lehˬ, yawˇ hui hta‸ hpuˇ da‸ hkawˇ yaw da‸ peuˬ hk'aw‸ nawˉ, yawˇ kanˉ te ve awˬ hk'aw lo buiˇ shaˆ aˉ naˆ chaw hui awˬ pon G'uiˬ sha hk'a te ve kanˉ teˇ hpaˍ awˬ lawn, teˇ ceuˬ peuˬ teˇ ceuˬ yawˇ hui hta‸ k'aoˍ maˍ piˇ ve yoˬ. 20 Tawˇ hkawˇ chi hta‸ g'a kaˇ htaˇ, yawˇ hui G'uiˬ sha hta‸ chiˇ uiˍ chiˇ mvuh ve yoˬ. Oˇ htaˇ, yawˇ hui Pawˇlu‸ hta‸ k'oˆ piˇ ve, Awˬ viˉ paˍ-oˬ, Yuˇda‸ chaw hui awˬ hk'aw lo yonˍ ve chaw hk'aˬ nyiˇ meunˍ cawˬ ve hta‸ nawˬ shiˍ taˍ ve yoˬ. Yawˇ hui hk'a peu-eˬ awˬ liˇ tawˇ hkawˇ hta‸ nyi ma pfuhˇ jaˇ ve yoˬ. 21 Nawˬ lehˬ, a shu yawˇ ve awˬ yaˇ teˇ hpaˍ hta‸ awˬ guiˬ meuˇ maˇ g'a shoˍ leh, awˬ liˇ awˬ hk'aˇ cawˬ ve hk'e maˇ g'a te teh‸ nawˬ k'oˆ leh, Moˉseˍ ve awˬ liˇ hta‸ baˬ taˉ tuˬ, buiˇ shaˆ aˉ naˆ chaw hui geh chehˇ ve Yuˇda‸ chaw teˇ hpaˍ hta‸ nawˬ maˍ piˇ ve yoˬ teh‸, yawˇ hui laiˉ pawˆ g'a kaˇ ve yoˬ. 22 Hk'e te leh, hk'aˬ hk'e te tuˬ le. Nawˬ gaˬ la ve awˬ lawn hta‸ yawˇ hui awˬ tehˬ awˬ na g'a kaˇ tuˬ yoˬ. 23 Chi hta‸ pa taw, nawˬ hta‸ ngaˬ hui k'oˆ laˇ ve hk'e te-o. Ka ti‸ shaˉ caˆ te taˍ ve chaw awˇ g'aˇ ngaˬ hui geh chehˇ ve yoˬ. 24 Yawˇ hui hta‸ kuˬ yuˬ leh, yawˇ hui geh teˇ geh da‸ la kehˬ la tuˬ ve awˬ liˇ hta‸ ca te-o. Yawˇ hui oˉ k'oˍ chiˇ baˬ hpeh‸ tuˬ, yawˇ hui awˬ pon awˬ hpfuhˇ ca keu piˇ-oˆ. Oˇ hk'e te ve k'o, nawˬ ve awˬ lawn chaw chi ma ve g'a kaˇ ve hk'e maˇ cawˇ ve law teh‸ g'a shiˍ leh, nawˬ awˬ to awˬ liˇ tawˇ hkawˇ awˬ hk'aˇ suh hk'a deh‸ k'ai chehˇ ve hta‸ g'a shiˍ tuˬ yoˬ. 25 Yonˍ ve buiˇ shaˆ aˉ naˆ chaw hui awˬ pon lehˬ, shaˉ ho‸ hta‸ tanˇ taˍ ve awˬ ceuˬ hta‸ caˇ ve maˇ k'oˆ, awˬ suhˍ hta‸ caˇ ve maˇ k'oˆ, k'awˍ peˍ nyiˉ pehˍ ve awˬ shaˍ hta‸ caˇ ve maˇ k'oˆ, haˉ chawˇ haˉ paˆ te ve hta‸ maˇ k'oˆ, chi teˇ hpaˍ hta‸ jaw k'ai tuˬ ngaˬ hui jehˬ cheˆ taˍ ve hk'e yawˇ hui hta‸ li‸ bvuh‸ piˇ peuˬ teh‸, yawˇ hui Pawˇlu‸ hta‸ k'oˆ piˇ ve yoˬ. 26 Oˇ htaˇ Pawˇlu‸ lehˬ, shawˉ pawˍ teˇ nyi hk'e chaw oˇ ve awˇ g'aˇ hta‸ kuˬ yuˬ leh, yawˇ hui geh teˇ geh da‸ la kehˬ la tuˬ ve awˬ liˇ hta‸ ca te peuˬ hk'aw‸ nawˉ, bon yehˬ lonˉ hk'aw lo‸-e ve yoˬ. Yawˇ hui awˬ pon da‸ la kehˬ la ve awˬ liˇ te ve awˬ nyi biˇ la tuˬ ve awˬ yanˇ, yawˇ hui teˇ g'aˇ peuˬ teˇ g'aˇ awˬ pon tanˇ tuˬ g'a tanˇ piˇ tuˬ ve awˬ yanˇ ca hto piˇ ve yoˬ. 27 Suhˍ nyi oˇ ve biˇ la paˇ neˇ htaˇ, Aˍsiˆ mvuhˇ miˬ lo laˬ ve Yuˇda‸ chaw teˇ hpaˍ lehˬ, Pawˇlu‸ hta‸ bon yehˬ lonˉ awˬ hk'aw lo g'a mawˬ leh, chaw awˬ moˍ lonˉ hta‸ ca juˆ piˇ ve yoˬ. Oˇ htaˇ, yawˇ hui Pawˇlu‸ hta‸ hpeh yuˬ peuˬ hk'aw‸ nawˉ kuˬ leh k'oˆ ve, 28 Iˉsaˍreˍlaˆ chaw teˇ hpaˍ-oˬ, haˆ ga la-o. Chaw chi hpaˇ lehˬ, ngaˬ hui ve chaw ceuˬ hta‸ maˇ k'oˆ, awˬ liˇ tawˇ hkawˇ hta‸ maˇ k'oˆ, chehˇ kuiˬ chi hta‸ maˇ k'oˆ, chi teˇ hpaˍ hta‸ canˇ tuˬ teˇ kaˬ le le lo chehˇ ve chaw hk'a peu-eˬ hta‸ maˍ piˇ ve chaw teˇ g'aˇ hpeh‸ ve yoˬ. Chi hk'oˆ ka‸, yawˇ Heˍlaˍsaˆ chaw teˇ hpaˍ hta‸ bon yehˬ lonˉ awˬ hk'aw lo shiˍ veu laˇ leh, da‸ kehˬ ve chehˇ kuiˬ chi hta‸ cha‸ chiˆ tuˬ te ve yoˬ teh‸ k'oˆ ve yoˬ. 29 Awˬ lawn k'o, Taˍroˇhpeˍ meh ve Eˇfeˇsu‸ chaw teˇ g'aˇ hta‸ ponˬ laˬ htaˇ venˇ awˬ hk'aw lo Pawˇlu‸ geh te toˇ chehˇ ve hta‸ yawˇ hui g'a mawˬ leh, chaw oˇ ve hta‸ bon yehˬ lonˉ awˬ hk'aw lo Pawˇlu‸ shiˍ veu laˇ ve yoˬ teh‸ yawˇ hui dawˇ ve yoˬ. 30 Venˇ yaˇ hk'a peu-eˬ duiˆ-ehˍ shaˇ-ehˍ te leh, chaw awˬ hpoˆ awˬ diˬ g'uiˇ laˬ ve yoˬ. Yawˇ hui Pawˇlu‸ hta‸ yuˬ leh, yawˇ hta‸ bon yehˬ lonˉ awˬ baˬ hpawˇ lo g'awˬ tawˆ peuˬ hk'aw‸ nawˉ, teˇ cawˬ haˉ yehˬ miˉ teˇ hpaˍ hta‸ hoˆ taˍ ve yoˬ. 31 Pawˇlu‸ suh tuˬ yawˇ hui te chehˇ ve teˇ yanˇ, Yeˍruˆsaˍlehnˍ venˇ teˇ venˇ hk'a peu-eˬ duiˆ-ehˍ shaˇ-ehˍ te chehˇ ve awˬ lawn ma‸ teˇ hinˉ poˍ hta‸ shu ca hto piˇ ve yoˬ. 32 Teˇ cawˬ haˉ ma‸ yaˇ leh ma‸ poˍ teˇ hpaˍ hta‸ yawˇ kuˬ yuˬ leh, chaw awˬ moˍ lonˉ duiˆ-ehˍ shaˇ-ehˍ te chehˇ kuiˬ lo g'uiˇ ya‸-e ve yoˬ. Chaw chi ma ve lehˬ, ma‸ teˇ hinˉ poˍ leh ma‸ yaˇ hui hta‸ g'a mawˬ htaˇ, Pawˇlu‸ hta‸ maˇ k'aw‸ dawˆ ve yoˬ. 33 Oˇ htaˇ, ma‸ teˇ hinˉ poˍ Pawˇlu‸ geh k'ai leh yawˇ hta‸ yuˬ taˍ peuˬ hk'aw‸ nawˉ, sho caˆ nyiˇ caˆ hpeh tuˬ tawˇ piˇ ve yoˬ. Peuˬ leh yawˇ k'oˆ ve, Yawˇ hk'aˬ hk'e ve chaw hpeh‸ ve le, aˬ hto‸ ma te ve le teh‸ na nyi ve yoˬ. 34 Chaw awˬ moˍ lonˉ awˬ hk'aw lo, teˇ hpaˍ teˇ ceuˬ kuˬ chehˇ ve yoˬ. Chi hk'e duiˆ-ehˍ shaˇ-ehˍ te ve hta‸ pa taw, awˬ lawn hk'a deh‸ maˇ shiˍ hpeh‸ leh, Pawˇlu‸ hta‸ ma‸ yaˇ yehˬ awˬ hk'aw lo yuˬ k'ai tuˬ ma‸ teˇ hinˉ poˍ tawˇ piˇ ve yoˬ. 35 Pawˇlu‸ go tcuhˉ puiˍ lo gaˬ ve teˇ yanˇ, chaw awˬ moˍ lonˉ hehnˇ chaweh te ve pa taw, ma‸ yaˇ teˇ hpaˍ yawˇ hta‸ g'a chiˇ taˆ-e ve yoˬ. 36 Awˬ lawn k'o, chaw awˬ moˍ lonˉ yawˇ awˬ hk'aˇ suh g'a‸ leh, Yawˇ hta‸ tiˇ pehˍ loˬ teh‸ kuˬ chehˇ ve yoˬ. 37 Ma‸ yaˇ ve yehˬ awˬ hk'aw lo Pawˇlu‸ hta‸ yuˬ lo‸-e-a teh‸ te ve teˇ yanˇ, yawˇ ma‸ teˇ hinˉ poˍ hta‸ k'oˆ piˇ ve, Nawˬ hta‸ ngaˬ tawˇ yaw hpeh‸-aw laˇ teh‸ na nyi ve teˇ yanˇ, ma‸ teˇ hinˉ poˍ k'oˆ ve, Nawˬ Heˍlaˍsaˆ hkawˇ shiˍ-aˍ laˇ. 38 Nawˬ lehˬ, aˉ suhˆ htaˇ mvuhˇ miˬ hta‸ hpfuhˆ leh shu hta‸ tiˇ pehˍ ve chaw awˇ hinˉ g'aˇ hta‸ shawˍ veu leh heh puiˉ hk'aw lo shiˍ k'ai ve Eˇjiˇtu‸ chaw oˇ ve teˇ g'aˇ maˇ heˆ laˇ teh‸ na nyi ve yoˬ. 39 Pawˇlu‸ k'aw‸ k'oˆ piˇ ve, Ngaˬ lehˬ Kiˇliˇkiˆ mvuhˇ miˬ awˬ hk'aw lo cawˬ ve Taˍsuˆ venˇ yaˇ, Yuˇda‸ chaw teˇ g'aˇ hpeh‸ ve yoˬ. Venˇ oˇ ve lehˬ, awˬ meh maˇ uiˍ ve venˇ hpeh‸ ve maˇ heˆ. Chaw chi ma ve hta‸ tawˇ yaw tuˬ a hkaw-anˬ a ciˉ pe‸ laˇ-oˆ teh‸, yawˇ hta‸ lawˬ ve yoˬ. 40 Ma‸ teˇ hinˉ poˍ yawˇ hta‸ a hkaw-anˬ piˇ ve teˇ yanˇ Pawˇlu‸ lehˬ, go awˬ hk'oˆ huˉ taˍ leh, chaw chi ma ve hta‸ la‸ sheh awˬ heˆ te maˍ piˇ ve yoˬ. Yawˇ hui ta‸ iˉ gawˬ lehˍ chehˇ htaˇ, yawˇ yawˇ hui hta‸ Heˍbrehˇ hkawˇ yaw leh k'oˆ ve,

Tcuh yaˇ 22

1 Awˬ viˉ awˬ nyi hui leh awˬ pa teˇ hpaˍ-oˬ, nawˬ hui mehˆ g'uˇ suhˍ ngaˬ ve awˬ lawn ngaˬ yaw hk'aw‸ ve tawˇ hkawˇ hta‸ a ciˉ na sheˍ teh‸ k'oˆ piˇ ve yoˬ. 2 Yawˇ Heˍbrehˇ hkawˇ yaw ve hta‸ yawˇ hui g'a kaˇ htaˇ, ya‸ sheh htaˇ a‸ kehˉ ka‸ ta‸ iˉ gawˬ lehˍ chehˇ ve yoˬ. Oˇ htaˇ yawˇ k'oˆ ve, 3 Ngaˬ lehˬ Kiˇliˇkiˆ mvuhˇ miˬ Taˍsuˆ venˇ awˬ hk'aw lo paw la ve Yuˇda‸ chaw teˇ g'aˇ hpeh‸ ve yoˬ. Ya‸ hk'aˇ, Yeˍruˆsaˍlehnˍ venˇ chi awˬ hk'aw lo Gaˍmaˍleˍlaˆ ve hkui paˇ lo ngaˬ uiˍ la leh, awˬ puˍ awˬ pi hui ve awˬ liˇ tawˇ hkawˇ hta‸ ngaˬ hk'a deh‸ g'a henˇ ve yoˬ. Ya‸ nyi nawˬ hui hk'a peu-eˬ G'uiˬ sha awˬ pon nyi ma pfuhˇ jaˇ ve hk'a shuˍ shuˍ ngaˬ htawˇ nyi ma pfuhˇ jaˇ ve yoˬ. 4 Ponˬ laˬ htaˇ, hawˉ hk'aˆ yaˇ miˇ teˇ hpaˍ hta‸ hpeh yuˬ leh htawnˍ hk'aw lo keu leh, tiˇ pehˍ htaˇ hk'a gaˬ Ya‸ k'aw awˬ liˇ chi hta‸ ngaˬ fawˉ mehˍ jaw peuˬ. 5 Paw hkuˇ lonˉ leh awˬ hoˉ chaw mawˇ hk'a peu-eˬ htawˇ ngaˬ awˬ pon shaˉ hkiˆ hkanˍ hpeh‸ ve yoˬ. Yawˇ hui geh awˬ viˉ awˬ nyi teˇ hpaˍ awˬ pon ngaˬ li‸ g'a leh, Daˍmaˍsehˆ venˇ hk'aw lo chehˇ ve chaw teˇ hpaˍ hta‸ htawˇ hpeh yuˬ veu laˇ leh Yeˍruˆsaˍlehnˍ venˇ awˬ hk'aw lo ciˍ yanˍ piˇ tuˬ, ngaˬ Daˍmaˍsehˆ venˇ lo k'ai ve yoˬ. 6 Ngaˬ k'ai leh Daˍmaˍsehˆ venˇ awˬ paˇ lo gaˬ la htaˇ, mvuhˇ law‸ k'aw tcuhˆ teˇ yanˇ, mvuhˇ naw ma lo hehnˇ jaˇ ve awˬ g'euˆ teˇ cawˬ haˉ ngaˬ hta‸ hk'a caw zuhˇ hti la ve yoˬ. 7 Ngaˬ miˬ chaˇ hk'oˆ paiˍ leh, Sawˇlu‸-oˬ, Sawˇlu‸-oˬ, aˬ hto‸ ma pa taw nawˬ ngaˬ hta‸ fawˉ mehˍ laˇ ve le teh‸, ngaˬ hta‸ k'oˆ laˇ ve awˬ hkawˇ hta‸ g'a kaˇ ve yoˬ. 8 Jawˇ mawˇ-oˬ, nawˬ a shu le teh‸, ngaˬ na nyi htaˇ, yawˇ k'aw‸ k'oˆ laˇ ve, Ngaˬ lehˬ nawˬ fawˉ mehˍ laˇ chehˇ ve Naˍzaˍrehˆ chaw Yeˍsuˆ yoˬ teh‸ k'aw‸ k'oˆ laˇ ve yoˬ. 9 Ngaˬ geh k'ai chehˇ ve chaw teˇ hpaˍ lehˬ, awˬ g'euˆ oˇ ve hta‸ g'a mawˬ htawˇ, ngaˬ hta‸ tawˇ yaw laˇ ve awˬ hkawˇ hta‸ yawˇ hui maˇ g'a kaˇ. 10 Oˇ htaˇ ngaˬ k'aw‸ k'oˆ piˇ ve, Jawˇ mawˇ-oˬ, ngaˬ aˬ hto‸ ma g'a te tuˬ le teh‸ na nyi htaˇ, Jawˇ mawˇ k'aw‸ k'oˆ laˇ ve, Tu leh Daˍmaˍsehˆ venˇ hk'aw lo k'ai-o. Nawˬ awˬ pon hk'a fuiˍ teh taˍ ve kanˉ hk'a peu-eˬ oˇ kaˬ lo nawˬ hta‸ hto laˇ tuˬ yoˬ teh‸, ngaˬ hta‸ k'aw‸ k'oˆ laˇ ve yoˬ. 11 Hehnˇ jaˇ ve awˬ g'euˆ oˇ ve hta‸ pa taw ngaˬ mehˆ maˇ mawˬ ve teˇ yanˇ, ngaˬ geh k'ai ve chaw teˇ hpaˍ ngaˬ ve la‸ sheh hta‸ sheh veu leh, Daˍmaˍsehˆ venˇ hk'aw lo‸-e ve yoˬ. 12 Oˇ kaˬ lo chehˇ ve Yuˇda‸ chaw hk'a peu-eˬ awˬ hk'aw lo awˬ meh da‸ leh awˬ liˇ tawˇ hkawˇ awˬ hk'aˇ suh G'uiˬ sha hta‸ yawˆ yan puiˉ ve Aˍnaˍniˆ meh ve chaw teˇ g'aˇ cawˬ ve yoˬ. 13 Yawˇ ngaˬ geh laˬ leh, Awˬ nyi paˍ Sawˉlu‸-oˬ, nawˬ mehˆ k'aw‸ mawˬ la-o teh‸ ngaˬ awˬ paˇ lo huˉ taˍ leh k'oˆ laˇ ve yoˬ. Oˇ teˇ hkui awˬ hk'aw lo ngaˬ mehˆ k'aw‸ mawˬ la leh yawˇ hta‸ g'a mawˬ ve yoˬ. 14 Oˇ htaˇ yawˇ k'oˆ ve, Nawˬ lehˬ G'uiˬ sha ve a loˍ hta‸ g'a shiˍ tuˬ ve maˇ k'oˆ, hteˇ ve cawˇ ve teˇ g'aˇ hta‸ g'a mawˬ tuˬ ve maˇ k'oˆ, yawˇ ve maw‸ k'aw hk'aw tawˆ la ve tawˇ hkawˇ hta‸ g'a kaˇ tuˬ ve maˇ k'oˆ, ngaˬ hui ve awˬ puˍ awˬ pi hui ve G'uiˬ sha lehˬ, nawˬ hta‸ leuˆ yuˬ peuˬ. 15 Awˬ lawn k'o, nawˬ g'a mawˬ g'a kaˇ ve teˇ hpaˍ hta‸ chaw hk'a peu-eˬ mehˆ g'uˇ suhˍ yawˇ awˬ pon nawˬ shaˉ hkiˆ hkanˍ shehˍ hpaˇ g'a hpeh‸ tuˬ yoˬ. 16 Chi beu‸ nawˬ aˬ hto‸ ma pa taw law chehˇ ve le. Tu la-o. Yawˇ ve awˬ meh hta‸ peun ve awˬ hk'aw lo baˆtiˆsaˬ hkanˍ yuˬ leh, nawˬ ve venˇ baˆ teˇ hpaˍ htaˬ tsuhˇ hk'a-o teh‸ yawˇ ngaˬ hta‸ k'oˆ laˇ ve yoˬ. 17 Oˇ ve awˬ hk'aw‸ nawˉ, ngaˬ Yeˍruˆsaˍlehnˍ venˇ lo k'aw‸ gaˬ la leh, bon yehˬ lonˉ awˬ hk'aw lo bon lawˬ chehˇ htaˇ, awˬ ha awˬ hk'aw lo ngaˬ Jawˇ mawˇ Yeˍsuˆ hta‸ g'a mawˬ ve yoˬ. 18 Yawˇ ngaˬ hta‸ k'oˆ laˇ ve, Yeˍruˆsaˍlehnˍ venˇ awˬ hk'aw lo haˆ haˆ tawˆ k'ai loˬ. Awˬ lawn k'o, ngaˬ awˬ lawn nawˬ shaˉ hkiˆ hkanˍ ve hta‸ chaw chi teˇ hpaˍ maˇ ha‸ yuˬ teh‸ yawˇ k'oˆ laˇ ve yoˬ. 19 Oˇ htaˇ ngaˬ k'aw‸ k'oˆ piˇ ve, Jawˇ mawˇ-oˬ, nawˬ hta‸ yonˍ ve chaw teˇ hpaˍ hta‸ ngaˬ htawnˍ hk'aw yuˬ keu leh, bon yehˬ teˇ yehˬ le le awˬ hk'aw lo ngaˬ yawˇ hui hta‸ dawˆ ve awˬ lawn yawˇ hui shiˍ taˍ ve yoˬ. 20 Nawˬ ve shaˉ hkiˆ hkanˍ shehˍ hpaˇ Saˍteˍhpanˍ ve awˬ suhˍ hta‸ yuˬ sheˆ ve teˇ yanˇ, ngaˬ lehˬ awˬ paˇ lo huˉ taˍ leh yawˇ hui te chehˇ ve hta‸ ngaˬ nyi ma cawˇ ve yoˬ. Yawˇ hta‸ tiˇ pehˍ shehˍ hpaˇ hui ve veu‸ k'aˇ hta‸ htawˇ ngaˬ shaw taˍ ve yoˬ teh‸, ngaˬ k'aw‸ k'oˆ piˇ ve yoˬ. 21 Yawˇ k'aw‸ k'oˆ laˇ ve, Tawˆ k'ai loˬ. Ngaˬ nawˬ hta‸ vuiˇ kuiˬ lo chehˇ ve buiˇ shaˆ aˉ naˆ chaw hui geh k'ai tcuh tuˬ yoˬ teh‸, Pawˇlu‸ yawˇ hui hta‸ k'oˆ piˇ ve yoˬ. 22 Tawˇ chi teˇ hkawˇ hk'a gaˬ yawˇ hui yawˇ ve hkawˇ hta‸ ta‸ iˉ na taˍ ve yoˬ. Oˇ htaˇ, yawˇ hui awˬ hkawˇ bvuhˬ chaweh kuˬ leh k'oˆ ve, Chi hk'e ve chaw hta‸ miˬ guiˬ hk'oˆ lo yuˬ baˬ loˬ. Yawˇ te‸ chehˇ maˇ keunˍ teh‸ yawˇ hui k'oˆ ve yoˬ. 23 Yawˇ hui kuˬ leh, a shu yawˇ ve veu‸ k'aˇ hta‸ k'ehˆ leh baˬ taˆ ve, je‸ meu-e ka‸ mvuhˇ hpe lo hkaˆ baˬ ve yoˬ. 24 Hk'e te leh, ma‸ teˇ hinˉ poˍ lehˬ, Pawˇlu‸ hta‸ ma‸ yaˇ yehˬ awˬ hk'aw lo yuˬ k'ai tcuh leh, aˬ hto‸ ma pa taw shu yawˇ awˬ lawn chi hk'e k'oˆ kuˬ chehˇ ve hta‸ g'a shiˍ tuˬ, Yawˇ hta‸ jaw‸ leh na nyi-o teh‸ tawˇ piˇ ve yoˬ. 25 Shaˍ guiˬ caˆ yuˬ leh yawˇ hta‸ hpeh ve teˇ yanˇ, Pawˇlu‸ lehˬ awˬ paˇ lo huˉ taˍ ve ma‸ poˍ hta‸ k'oˆ piˇ ve, Roˉma‸ chaw hpeh‸ ve teˇ g'aˇ hta‸ suhˉ maˇ jehˬ leh nawˬ hui jaw‸ ve awˬ liˇ cawˬ leh laˇ teh‸ na nyi ve yoˬ. 26 Tawˇ oˇ ve hta‸ ma‸ poˍ g'a kaˇ htaˇ, ma‸ teˇ hinˉ poˍ geh k'ai leh, Nawˬ hk'aˬ hk'e te tuˬ dawˇ ve le. Chaw chi teˇ g'aˇ lehˬ, Roˉma‸ chaw hpeh‸ ve law teh‸, yawˇ hta‸ k'oˆ piˇ ve yoˬ. 27 Ma‸ teˇ hinˉ poˍ lehˬ Pawˇlu‸ geh laˬ leh, Nawˬ Roˉma‸ chaw yoˬ laˇ. Ngaˬ hta‸ hto laˇ-oˆ teh‸ na nyi htaˇ, Yoˬ teh‸ Pawˇlu‸ k'aw‸ k'oˆ piˇ ve yoˬ. 28 Ma‸ teˇ hinˉ poˍ k'aw‸ k'oˆ piˇ ve, Ngaˬ Roˉma‸ chaw hpeh‸ la tuˬ hpu maˇ maˇ g'a piˇ ve yoˬ teh‸ k'oˆ htaˇ, Pawˇlu‸ k'aw‸ k'oˆ ve, Ngaˬ lehˬ, paw la htaˇ ka‸ Roˉma‸ chaw hpeh‸ ve yoˬ teh‸ k'oˇ piˇ ve yoˬ. 29 Oˇ htaˇ, yawˇ hta‸ jaw‸ leh na nyi-a teh‸ te ve chaw teˇ hpaˍ teˇ cawˬ haˉ tawˆ k'ai ve yoˬ. Ma‸ teˇ hinˉ poˍ htawˇ, Pawˇlu‸ Roˉma‸ chaw hpeh‸ ve hta‸ g'a shiˍ htaˇ, yawˇ hta‸ g'a hpeh peuˬ ve pa taw kawˆ jaˇ ve yoˬ. 30 Awˬ hk'aw‸ nawˉ teˇ nyi, Yuˇda‸ chaw hui Pawˇlu‸ awˬ hk'oˆ venˇ baˆ taˍ ve hta‸ hk'a deh‸ g'a shiˍ tuˬ, ma‸ teˇ hinˉ poˍ lehˬ, Pawˇlu‸ hta‸ hpeh taˍ ve hta‸ hpui hk'a leh, paw hkuˇ lonˉ hui leh jehˬ da‸ shehˍ hpaˇ awˬ moˍ hta‸ kuˬ hpawnˬ peuˬ hk'aw‸ nawˉ, Pawˇlu‸ hta‸ shiˍ ya‸-e leh, yawˇ hui awˬ k'aw ji lo teh taˍ ve yoˬ.

Tcuh yaˇ 23

1 Oˇ htaˇ, Pawˇlu‸ lehˬ jehˬ da‸ shehˍ hpaˇ awˬ moˍ hta‸ hk'a deh‸ nyi leh k'oˆ ve, Awˬ viˉ awˬ nyi teˇ hpaˍ-oˬ, ya‸ nyi hk'a gaˬ G'uiˬ sha mehˆ g'uˇ suhˍ ngaˬ hk'a te ve teˇ hpaˍ hta‸ pa taw ngaˬ ve shiˍ puiˉ ve nyi ma lehˬ, ngaˬ awˬ hk'oˆ venˇ baˆ maˇ taˍ. 2 Oˇ htaˇ paw hkuˇ lonˉ Aˍnaˍniˆ lehˬ, Yawˇ ve maw‸ k'aw hta‸ dawˆ hpehˇ-oˆ teh‸, Pawˇlu‸ awˬ paˇ lo huˉ chehˇ ve chaw hui hta‸ k'oˆ piˇ ve yoˬ. 3 Oˇ htaˇ Pawˇlu‸ yawˇ hta‸ k'oˆ piˇ ve, Htunˉ shehˍ taˍ ve g'o‸ pa-oˬ, G'uiˬ sha nawˬ hta‸ dawˆ tuˬ yoˬ. Awˬ liˇ tawˇ hkawˇ awˬ hk'aˇ suh ngaˬ hta‸ suhˉ jehˬ tuˬ nawˬ choˬ kaˬ mui chehˇ ve ka‸, awˬ liˇ tawˇ hkawˇ hta‸ maˇ hawˍ ve awˬ hk'aw lo nawˬ ngaˬ hta‸ dawˆ tcuh ve laˇ teh‸ k'oˆ piˇ ve yoˬ. 4 Awˬ paˇ lo huˉ chehˇ ve chaw teˇ hpaˍ lehˬ, G'uiˬ sha ve paw hkuˇ lonˉ hta‸ nawˬ maˇ shawˍ maˇ caˆ k'oˆ ve laˇ teh‸ na nyi ve yoˬ. 5 Pawˇlu‸ k'aw‸ k'oˆ ve, Awˬ viˉ awˬ nyi teˇ hpaˍ-oˬ, yawˇ lehˬ paw hkuˇ lonˉ hpeh‸ ve hta‸ ngaˬ maˇ shiˍ. Nawˬ ve chaw ceuˬ hta‸ uˉ peunˍ shehˍ hpaˇ awˬ lawn nawˬ haiˬ ve hkawˇ maˇ g'a yaw teh‸ bvuh‸ taˍ ve yoˬ teh‸, Pawˇlu‸ k'oˆ ve yoˬ. 6 Hpawnˬ da‸ ve chaw teˇ hpaˍ hpaˍ Saˍduˆkehˇ hpeh‸ leh, teˇ hpaˍ hpaˍ Hpaˍriˍsehˇ hpeh‸ ve hta‸ Pawˇlu‸ g'a mawˬ g'a shiˍ htaˇ, jehˬ da‸ shehˍ hpaˇ awˬ moˍ hta‸ yawˇ k'oˆ piˇ ve, Awˬ viˉ awˬ nyi teˇ hpaˍ-oˬ, ngaˬ lehˬ Hpaˍriˍsehˇ hpeh‸ leh, Hpaˍriˍsehˇ ve awˬ yaˇ htawˇ hpeh‸ ve yoˬ. Suh ve chaw hui k'aw‸ te‸ tu la ve hta‸ dawˇ law ve teˇ ceuˬ hta‸ pa taw ngaˬ suhˉ jehˬ ve hta‸ g'a hkanˍ ve yoˬ teh‸, bvuhˬ chaweh k'oˆ ve yoˬ.' 7 Yawˇ chi hk'e k'oˆ ve teˇ yanˇ, Hpaˍriˍsehˇ hui leh Saˍduˆkehˇ hui tawˇ g'awˬ da‸ leh, hpawnˬ da‸ ve chaw hui nyiˇ moˍ hpeh‸ sheˬ ve yoˬ. 8 Awˬ lawn k'o, Saˍduˆkehˇ hui lehˬ, k'aw‸ te‸ tu la ve maˇ cawˬ, mvuhˇ naw ma tcuh yaˇ ka‸ awˬ ha ka‸ maˇ cawˬ teh‸ k'oˆ ve yoˬ. Ya‸ hk'aˇ Hpaˍriˍsehˇ hui lehˬ, chi hk'a peu-eˬ cawˬ ve yoˬ teh‸ yonˍ ve yoˬ. 9 Hk'e te leh duiˆ-ehˍ shaˇ-ehˍ hpeh‸ la ve yoˬ. Oˇ htaˇ, Hpaˍriˍsehˇ ve awˬ moˍ awˬ hk'aw lo ve li‸ bvuh‸ paˍ teˇ hpaˍ hpaˍ tu leh k'oˆ ve, Chi hpaˇ awˬ hk'aw lo venˇ baˆ teˇ ceuˬ hta‸ ka‸ ngaˬ hui maˇ mawˬ. Awˬ ha, maˇ heˆ k'o mvuhˇ naw ma tcuh yaˇ yawˇ hta‸ tawˇ yaw piˇ leh naˍ teh‸ k'oˆ leh tawˇ g'awˬ da‸ ve yoˬ. 10 Chi hk'e tawˇ g'awˬ da‸ jaˇ ve teˇ yanˇ, chaw oˇ ve teˇ hpaˍ lehˬ Pawˇlu‸ hta‸ g'awˬ tzuh‸ sheˬ puiˉ-aˆ teh‸, ma‸ teˇ hinˉ poˍ dawˇ haˍ ve pa taw, yawˇ ma‸ yaˇ teˇ hpaˍ hta‸ ya‸-e tcuh leh, Pawˇlu‸ hta‸ yawˇ hui ve la‸ sheh awˬ hk'aw lo lu yuˬ peuˬ hk'aw‸ nawˉ, ma‸ yaˇ yehˬ awˬ hk'aw lo k'aw‸ yuˬ k'ai tuˬ, yawˇ tawˇ piˇ ve yoˬ. 11 Oˇ ve teˇ haˉ, Jawˇ mawˇ G'uiˬ sha Pawˇlu‸ awˬ paˇ lo huˉ taˍ leh k'oˆ ve, Nyi ma taˇ luˬ. Yeˍruˆsaˍlehnˍ venˇ awˬ hk'aw lo ngaˬ ve awˬ lawn nawˬ shaˉ hkiˆ hkanˍ peuˬ ve hk'a shuˍ shuˍ Roˉma‸ venˇ awˬ hk'aw lo htawˇ nawˬ shaˉ hkiˆ g'a hkanˍ tuˬ yoˬ teh‸ yawˇ hta‸ k'oˆ piˇ ve yoˬ. 12 Mvuhˇ htiˇ la ve teˇ yanˇ, Yuˇda‸ chaw teˇ hpaˍ hpawnˬ da‸ leh, Pawˇlu‸ hta‸ maˇ g'a tiˇ pehˍ ve ceh ceh, te‸ chiˉ ka‸ maˇ caˇ maˇ dawˬ teh‸ k'oˆ leh, a shu yawˇ awˬ to hta‸ hkanˍ taˍ ve yoˬ. 13 Chi hk'e hkanˍ taˍ ve chaw awˇ chi hpaˆ cawˬ ve yoˬ. 14 Yawˇ hui lehˬ, paw hkuˇ lonˉ teˇ hpaˍ leh awˬ hoˉ chaw mawˇ teˇ hpaˍ geh k'ai leh k'oˆ ve, Ngaˬ hui Pawˇlu‸ hta‸ maˇ g'a tiˇ pehˍ ve ceh ceh, caˇ tuˬ a ciˉ ka‸ maˇ leh‸ nyi teh‸ k'oˆ leh, a shu yawˇ awˬ to hta‸ hkanˍ taˍ ve yoˬ. 15 Hk'e te leh, nawˬ hui leh jehˬ da‸ shehˍ hpaˇ awˬ moˍ teˇ geh Pawˇlu‸ ve awˬ lawn hta‸ leuˉ leh hk'a deh‸ na nyi tuˬ ve hk'e te leh, yawˇ hta‸ nawˬ hui geh yuˬ laˬ tuˬ ma‸ teˇ hinˉ poˍ hta‸ lawˬ hk'awˉ-oˆ. Awˬ paˇ lo yawˇ maˇ gaˬ la sheˍ htaˇ yawˇ hta‸ tiˇ pehˍ tuˬ ngaˬ hui gu taˍ peuˬ teh‸ k'oˆ piˇ ve yoˬ. 16 Yawˇ hui chi hk'e naˆ taˍ ve awˬ lawn hta‸ Pawˇlu‸ ve awˬ nuˍ ma ve yaˇ paˍ g'a shiˍ leh, yawˇ ma‸ yaˇ yehˬ hk'aw lo‸-e leh Pawˇlu‸ hta‸ ca hto piˇ ve yoˬ. 17 Pawˇlu‸ lehˬ, ma‸ poˍ teˇ g'aˇ hta‸ kuˬ leh yawˇ hta‸ k'oˆ piˇ ve, Chaw haˉ paˍ chi hta‸ ma‸ teˇ hinˉ poˍ geh shiˍ k'ai-o. Yawˇ hta‸ k'oˆ piˇ tuˬ awˬ lawn cawˬ ve yoˬ teh‸ k'oˆ piˇ ve yoˬ. 18 Hk'e te leh, ma‸ poˍ yawˇ hta‸ shiˍ k'ai leh, ma‸ teˇ hinˉ poˍ geh gaˬ htaˇ yawˇ hta‸ k'oˆ piˇ ve, Chaw haˉ paˍ chi nawˬ hta‸ k'oˆ laˇ tuˬ awˬ lawn cawˬ ve pa taw, yawˇ hta‸ nawˬ geh shiˍ veu laˇ tuˬ, htawnˍ hk'aw chehˇ ve Pawˇlu‸ ngaˬ hta‸ kuˬ leh lawˬ hkawˉ laˇ ve yoˬ teh‸ k'oˆ piˇ ve yoˬ. 19 Ma‸ teˇ hinˉ poˍ lehˬ, chaw haˉ paˍ ve la‸ sheh hta‸ yuˬ leh, baˬ kuiˬ lo shiˍ k'ai leh k'oˆ ve, Nawˬ ngaˬ hta‸ aˬ hto‸ ma k'oˆ laˇ tuˬ cawˬ le teh‸ na nyi ve yoˬ. 20 Oˇ htaˇ yawˇ k'aw‸ k'oˆ ve, Pawˇlu‸ awˬ lawn hk'a deh‸ na nyi gaˇ ve hk'e te leh, shawˉ pawˍ k'o jehˬ da‸ shehˍ hpaˇ awˬ moˍ geh shiˍ veu laˇ tuˬ Yuˇda‸ chaw teˇ hpaˍ nawˬ hta‸ lawˬ hkawˉ tuˬ nyi ma hawˍ da‸ peuˬ. 21 Ya‸ hk'aˇ, yawˇ hui nyi ma cawˇ ve hk'e nawˬ taˇ te. Awˬ lawn k'o, Pawˇlu‸ hta‸ maˇ g'a tiˇ pehˍ ve ceh ceh, te‸ chiˉ ka‸ maˇ caˇ maˇ dawˬ teh‸, chaw awˇ chi hpaˆ shaˉ hkiˆ hkanˍ taˍ leh, yawˇ hta‸ naˆ chehˇ taˍ ve yoˬ. Chi beu‸ yawˇ hui gu taˍ leh, nawˬ ve tawˇ hkawˇ hta‸ law na chehˇ ve yoˬ teh‸ k'oˆ piˇ ve yoˬ. 22 Ma‸ teˇ hinˉ poˍ chaw haˉ paˍ hta‸ k'oˆ piˇ ve, Nawˬ ngaˬ hta‸ hto laˇ ve awˬ lawn chi, chaw teˇ g'aˇ hta‸ ka‸ taˇ hto piˇ teh‸ tawˇ piˇ peuˬ leh, yawˇ hta‸ k'o‸-e tcuh ve yoˬ. 23 Oˇ htaˇ, ma‸ teˇ hinˉ poˍ lehˬ, ma‸ poˍ nyiˇ g'aˇ hta‸ kuˬ yuˬ leh k'oˆ piˇ ve, Ya‸ puiˉ k'awˇ naˍ riˍ htaˇ Kehˉsaˍriˆ venˇ lo k'ai tuˬ, la‸ caˉ pfuhˇ ve ma‸ yaˇ nyiˇ ha, iˉ mvuhˇ ciˇ ve ma‸ yaˇ suhˍ chi leh, gehˇ taˆ ve ma‸ yaˇ nyiˇ ha hta‸ hk'a deh‸ gu taˍ-o‸. 24 Chi hk'oˆ ka‸, Pawˇlu‸ ciˇ tuˬ ve iˉ mvuhˇ teˇ hpaˍ hta‸ hk'a deh‸ gu taˍ leh, mvuhˇ miˬ jawˇ mawˇ lonˉ Hpeˍliˆ geh yawˇ hta‸ hk'a deh‸ shiˍ k'oˬ piˇ-oˆ teh‸, yawˇ huiˉ maˬ hta‸ tawˇ piˇ ve yoˬ. 25 Ma‸ teˇ hinˉ poˍ lehˬ li‸ chi hk'e bvuh‸ feu piˇ ve, 26 Kaˍlawˇdiˆ Luˇsiˆ lehˬ, awˬ me‸ awˬ hponˇ uiˍ ve mvuhˇ miˬ jawˇ mawˇ lonˉ Hpeˍliˆ hta‸ ha‸ hphnˇ ve tawˇ hkawˇ shanˍ feu laˇ ve yoˬ. 27 Chaw chi teˇ g'a hta‸ Yuˇda‸ chaw hui hpeh yuˬ leh, yawˇ hta‸ tiˇ pehˍ-a teh‸ te ve teˇ yanˇ, ma‸ yaˇ teˇ hpaˍ geh teˇ geh ngaˬ k'ai leh, yawˇ Roˉma‸ chaw hpeh‸ ve hta‸ g'a shiˍ ve pa taw yawˇ hta‸ ponˬ piˇ ve yoˬ. 28 Yuˇda‸ chaw teˇ hpaˍ yawˇ awˬ hk'oˆ venˇ baˆ hk'aˬ hk'e taˍ ve hta‸ ngaˬ shiˍ gaˇ ve pa taw, yawˇ hui ve jehˬ da‸ shehˍ hpaˇ awˬ moˍ geh ngaˬ yawˇ hta‸ shiˍ k'ai ve yoˬ. 29 Suh keunˍ ve venˇ baˆ maˇ k'oˆ, htawnˍ hk'aw geh keunˍ ve venˇ baˆ maˇ k'oˆ, yawˇ hui yawˇ awˬ hk'oˆ maˇ taˍ. Ya‸ hk'aˇ, yawˇ hui ve awˬ liˇ tawˇ hkawˇ hta‸ caˉ da‸ ve awˬ lawn hta‸ ceh venˇ baˆ taˍ ve hta‸ ngaˬ g'a mawˬ ve yoˬ. 30 Chaw chi teˇ g'aˇ hta‸ tiˇ pehˍ tuˬ shu gu taˍ ve hta‸ ngaˬ g'a kaˇ htaˇ, teˇ cawˬ haˉ yawˇ hta‸ nawˬ geh peu laˇ leh, yawˇ hta‸ venˇ baˆ taˍ ve chaw teˇ hpaˍ nawˬ mehˆ g'uˇ suhˍ yawˇ awˬ lawn k'oˆ tuˬ ngaˬ yawˇ hui hta‸ tawˇ piˇ taˍ ve yoˬ teh‸ bvuh‸ piˇ ve yoˬ. 31 Hk'e teˇ leh, ma‸ teˇ hinˉ poˍ k'oˆ taˍ ve hk'e, ma‸ yaˇ teˇ hpaˍ Pawˇlu‸ hta‸ shiˍ veu leh, Anˍtiˇpaˍriˆ venˇ hk'a gaˬ tanˇ hkuinˇ htaˇ yawˇ hta‸ shiˍ k'oˬ piˇ ve yoˬ. 32 Shawˉ pawˍ teˇ nyi hk'e Pawˇlu‸ hta‸ awˬ g'uˇ suhˍ shiˍ k'ai tuˬ, awˬ kaˍ awˬ nu ma‸ yaˇ teˇ hpaˍ lehˬ, iˉ mvuhˇ ciˇ ve ma‸ yaˇ teˇ hpaˍ hta‸ teh taˉ leh, yawˇ hui ve chehˇ kuiˬ lo k'aw‸ k'o‸-e ve yoˬ. 33 Iˉ mvuhˇ ciˇ ve ma‸ yaˇ teˇ hpaˍ lehˬ, Kehˉsaˍriˆ venˇ lo gaˬ htaˇ, mvuhˇ miˬ jawˇ mawˇ lonˉ hta‸ li‸ piˇ leh, Pawˇlu‸ hta‸ htawˇ yawˇ geh shiˍ teh taˍ ve yoˬ. 34 Mvuhˇ miˬ jawˇ mawˇ lonˉ lehˬ, li‸ hta‸ g'aw peuˬ hk'aw‸ nawˉ, Pawˇlu‸ hk'aˬ ve teˇ mvuhˇ miˬ hta‸ caˉ da‸ ve le teh‸ na nyi ve yoˬ. Yawˇ lehˬ Kiˇliˇkiˆ mvuhˇ miˬ hta‸ caˉ da‸ ve teh‸ g'a shiˍ htaˇ, 35 mvuhˇ miˬ jawˇ mawˇ lonˉ k'oˆ ve, Nawˬ hta‸ venˇ baˆ taˍ shehˍ hpaˇ teˇ hpaˍ gaˬ la htaˇ, nawˬ k'oˆ tuˬ cawˬ ve teˇ phaˍ hta‸ ngaˬ na tuˬ yoˬ teh‸ k'oˆ piˇ ve yoˬ. Peuˬ leh, Pawˇlu‸ hta‸ Heˍroˆ ve hawˉ yehˬ awˬ hk'aw lo haw taˍ tuˬ yawˇ tawˇ piˇ ve yoˬ.

Tcuh yaˇ 24

1 Awˬ hk'aw‸ nawˉ ngaˇ nyi gaˬ ve teˇ yanˇ, paw hkuˇ lonˉ Aˍnaˍniˆ geh awˬ hoˉ chaw mawˇ teˇ hpaˍ hpaˍ leh Teˍraˍtuˇluˆ meh ve tawˇ yaw puiˉ shehˍ hpaˇ teˇ g'aˇ teˇ geh oˇ kaˬ lo laˬ ve yoˬ. Yawˇ hui lehˬ, mvuhˇ miˬ jawˇ mawˇ lonˉ mehˆ g'uˇ suhˍ Pawˇlu‸ hta‸ venˇ baˆ taˍ leh yawˇ ve awˬ lawn k'oˆ piˇ ve yoˬ. 2 Pawˇlu‸ hta‸ jawˇ mawˇ kuˬ teh taˍ peuˬ ve teˇ yanˇ, Teˍraˍtuˇluˆ yawˇ awˬ hk'oˆ venˇ baˆ taˍ leh k'oˆ ve, Awˬ me‸ awˬ hponˇ uiˍ ve jawˇ mawˇ Hpeˍliˆ-oˬ, nawˬ hta‸ pa taw ngaˬ hui dawˇ sha gaˇ sha jaˇ ve awˬ hk'aw lo g'a chehˇ leh, nawˬ ve cuˇ yiˍ hta‸ pa taw chaw ceuˬ chi awˬ pon awˬ liˇ teˇ hpaˍ da‸ la tuˬ nawˬ te ve yoˬ. 3 Chi hta‸ pa taw, teˇ ceuˬ le le awˬ hk'aw lo, teˇ kaˬ le le ngaˬ hui nawˬ ve awˬ bon hta‸ chiˇ mvuh leh ha‸ yuˬ ve yoˬ. 4 Ya‸ hk'aˇ, ngaˬ nawˬ hta‸ maw chaweh maˇ g'a sho‸ sha‸ tuˬ, yeunˇ hkanˍ leh ngaˬ hui k'oˆ tuˬ ve tawˇ teˇ nyiˇ hkawˇ hta‸ a ciˉ na laˇ sheˍ teh‸ ngaˬ nawˬ hta‸ lawˬ hkawˇ ve yoˬ. 5 Chaw chi hpaˇ lehˬ, haiˬ jaˇ ve chaw hpeh‸ leh, miˬ guiˬ hk'oˆ teˇ kaˬ le le Yuˇda‸ chaw hui hk'a peu-eˬ hpfuhˆ k'ai tuˬ ca juˆ shehˍ hpaˇ hpeh‸ ve yoˬ. Shu hta‸ hpaˆ da‸ k'ai ve Naˍzaˍrehˆ awˬ moˍ awˬ hk'aw lo htawˇ, yawˇ lehˬ awˬ hoˉ teˇ g'aˇ hpeh‸ ve yoˬ. 6 Chi hk'oˆ ka‸, bon yehˬ lonˉ hta‸ cha‸ chiˆ tuˬ yawˇ coˇ caˇ chehˇ ve hta‸ ngaˬ hui shiˍ leh yawˇ hta‸ hpeh yuˬ ve yoˬ. 8 Nawˬ awˬ to yawˇ hta‸ hk'a deh‸ na nyi ve k'o, ngaˬ hui yawˇ awˬ hk'oˆ venˇ baˆ taˍ ve awˬ ceuˬ hk'a peu-eˬ hta‸ nawˬ g'a shiˍ tuˬ yoˬ teh‸, Teˍraˍtuˇluˆ k'oˆ piˇ ve yoˬ. 9 Yuˇda‸ chaw teˇ hpaˍ htawˇ, Yawˇ k'oˆ ve hk'e cawˇ ve yoˬ teh‸ k'oˆ leh venˇ baˆ ga hpoˆ taˍ ve yoˬ. 10 Mvuhˇ miˬ jawˇ mawˇ lonˉ lehˬ, Pawˇlu‸ tawˇ yaw tuˬ awˬ heˆ te maˍ piˇ ve teˇ yanˇ, Pawˇlu‸ k'oˆ piˇ ve, Nawˬ laiˉ hk'aw‸ chaw ceuˬ chi awˬ hk'oˆ suhˉ jehˬ shehˍ hpaˇ te jaw ve hta‸ ngaˬ shiˍ ve pa taw, ngaˬ ve awˬ lawn ha lehˬ ha k'a yaw hk'aw‸ laˇ ve yoˬ. 11 Oˉ k'oˍ pui tuˬ ngaˬ Yeˍruˆsaˍlehnˍ venˇ lo k'ai ve, teˇ chi nyiˇ nyi awˬ hk'oˆ maˇ gaˬ sheˍ ve hta‸ nawˬ shiˍ hpeh‸ ve yoˬ. 12 Bon yehˬ lonˉ awˬ hk'aw lo maˇ k'oˆ, bon yehˬ teˇ hpaˍ awˬ hk'aw lo maˇ k'oˆ, venˇ awˬ hk'aw lo maˇ k'oˆ, chaw teˇ g'aˇ hta‸ ka‸ ngaˬ tawˇ g'awˬ da‸ leh chaw awˬ moˍ lonˉ hta‸ duiˆ-ehˍ shaˇ-ehˍ te piˇ lawˬ ve hta‸ yawˇ hui maˇ mawˬ. 13 Chi beu‸ ngaˬ awˬ hk'oˆ yawˇ hui venˇ baˆ taˍ ve awˬ lawn, nawˬ hta‸ yuˬ maˍ piˇ tuˬ yawˇ hui shaˉ hkiˆ maˇ cawˬ. 14 Ya‸ hk'aˇ, ngaˬ lehˬ nawˬ hta‸ chi hk'e hteˇ lehˍ hto laˇ ve yoˬ. Shu hta‸ hpaˆ da‸ k'ai ve awˬ moˍ teh‸ yawˇ hui k'oˆ ve, Ya‸ k'aw awˬ liˇ chi awˬ hk'aˇ suh ngaˬ lehˬ ngaˬ hui ve awˬ puˍ awˬ pi hui ve G'uiˬ sha hta‸ oˉ k'oˍ pui ve yoˬ. Awˬ liˇ tawˇ hkawˇ li‸ leh tcuh kaˍ paˍ hui ve li‸ awˬ hk'aw lo hk'a bvuh‸ taˍ ve hk'a peu-eˬ hta‸ ngaˬ yonˍ ve yoˬ. 15 Hteˇ ve chaw ka‸ maˇ hteˇ ve chaw ka‸ k'aw‸ te‸ tu la tuˬ yoˬ teh‸ yawˇ hui dawˇ law ve hk'a shuˍ shuˍ, ngaˬ htawˇ G'uiˬ sha hta‸ cuˇ leh dawˇ law ve yoˬ. 16 G'uiˬ sha mehˆ g'uˇ suhˍ maˇ k'oˆ, chaw yaˇ mehˆ g'uˇ suhˍ maˇ k'oˆ, ngaˬ ve shiˍ puiˉ ve nyi ma lehˬ ngaˬ awˬ hk'oˆ venˇ baˆ taˍ kuiˬ maˇ g'a cawˬ tuˬ ngaˬ coˇ caˇ leh te chehˇ ve yoˬ. 17 Awˬ hk'aw‸ a ciˉ maw chaweh ponˬ peuˬ hk'aw‸ nawˉ, ngaˬ ve chaw ceuˬ haˍ yaˇ g'awˇ yaˇ hta‸ ga piˇ tuˬ ve teˇ hpaˍ leh tanˇ tuˬ teˇ hpaˍ ngaˬ yuˬ laˬ ve yoˬ. 18 Ngaˬ chi hk'e te chehˇ ve teˇ yanˇ, ngaˬ da‸ ve kehˬ ve awˬ liˇ te peuˬ hk'aw‸ nawˉ, bon yehˬ lonˉ awˬ hk'aw lo yawˇ hui ngaˬ hta‸ g'a mawˬ ve yoˬ. Chaw awˬ moˍ lonˉ ngaˬ geh chehˇ ve ka‸ maˇ heˆ. Ngaˬ duiˆ-ehˍ shaˇ-ehˍ te chehˇ ve ka‸ maˇ heˆ. Ya‸ hk'aˇ, Aˍsiˆ mvuhˇ miˬ lo chehˇ ve Yuˇda‸ chaw teˇ hpaˍ laˬ leh, 19 yawˇ hui lehˬ ngaˬ awˬ hk'oˆ venˇ baˆ teˇ ceuˬ ceuˬ taˍ tuˬ cawˬ ve k'o, nawˬ mehˆ g'uˇ suhˍ yawˇ hui laˬ leh k'oˆ cawˇ ve yoˬ. 20 Maˇ heˆ k'o, jehˬ da‸ shehˍ hpaˇ ve awˬ moˍ mehˆ g'uˇ suhˍ ngaˬ tu huˉ ve teˇ yanˇ, Suh ve chaw hui k'aw‸ te‸ tu la ve awˬ lawn hta‸ pa taw ya‸ nyi ngaˬ nawˬ hui mehˆ g'uˇ suhˍ suhˉ jehˬ ve hta‸ g'a hkanˍ ve yoˬ teh‸, 21 ngaˬ bvuhˬ chaweh k'oˆ ve tawˇ chi teˇ hkawˇ maˇ heˆ k'o, ngaˬ awˬ hk'aw lo ya‸ kuiˬ hk'aˬ hk'e cawˬ ve awˬ lawn yawˇ hui hk'aˇ yawˇ hui k'oˆ tcuh-o teh‸, Pawˇlu‸ k'oˆ piˇ ve yoˬ. 22 Jawˇ mawˇ Hpeˍliˆ lehˬ, Ya‸ k'aw awˬ liˇ awˬ lawn hta‸ hk'a cawˇ cawˇ shiˍ ve pa taw, yawˇ awˬ yanˇ jiˆ piˇ leh k'oˆ ve, Ma‸ teˇ hinˉ poˍ Luˇsiˆ gaˬ la htaˇ, nawˬ hui awˬ lawn ngaˬ jehˬ cheˆ laˇ tuˬ yoˬ teh‸, yawˇ hui hta‸ k'oˆ piˇ ve yoˬ. 23 Pawˇlu‸ hta‸ shaw taˍ tuˬ, jawˇ mawˇ Hpeˍliˆ lehˬ ma‸ poˍ teˇ g'aˇ hta‸ tawˇ piˇ ve yoˬ. Ya‸ hk'aˇ, yawˇ hta‸ hehnˇ chaweh maˇ te leh, yawˇ loˍ ve hk'e yawˇ ve awˬ chawˇ teˇ hpaˍ yawˇ hta‸ ga piˇ tuˬ taˇ tawˍ taˍ teh‸ k'oˆ piˇ ve yoˬ. 24 Awˬ hk'aw‸ nawˉ maˇ maw maw gaˬ leh, jawˇ mawˇ Hpeˍliˆ lehˬ, Duˍsiˆleˍ meh ve yawˇ ve awˬ miˇ ma geh teˇ geh laˬ ve yoˬ. Yawˇ ve awˬ miˇ ma lehˬ, Yuˇda‸ ma yoˬ. Jawˇ mawˇ Hpeˍliˆ Pawˇlu‸ hta‸ kuˬ leh, Yeˍsuˆ Hkri‸ hta‸ yonˍ ve awˬ lawn k'oˆ maˍ laˇ ve hta‸ yawˇ na ve yoˬ. 25 Pawˇlu‸ lehˬ, hteˇ ve cawˇ ve awˬ lawn, a shu yawˇ awˬ to hta‸ g'aˇ ve awˬ lawn leh, awˬ hk'aw‸ nawˉ gaˬ la tuˬ ve suhˉ jehˬ ve awˬ lawn k'aoˍ maˍ piˇ ve teˇ yanˇ, jawˇ mawˇ Hpeˍliˆ kawˆ leh k'oˆ ve, Chi beu‸ k'o‸-e sheˍ. Awˬ hk'aw‸ nawˉ awˬ yanˇ cawˇ ve teˇ yanˇ, ngaˬ nawˬ hta‸ k'aw‸ kuˬ tuˬ yoˬ teh‸ k'oˆ piˇ ve yoˬ. 26 Pawˇlu‸ yawˇ hta‸ hpu pe‸ laˇ tuˬ yawˇ dawˇ law ve pa taw, laiˉ pawˆ Pawˇlu‸ hta‸ kuˬ leh na‸ uˉ te da‸ ve yoˬ. 27 Nyiˇ hk'aw‸ biˇ la ve teˇ yanˇ, Hpeˍliˆ jawˇ mawˇ te kuiˬ lo Pawˇkiˆ Hpeˍtuˆ jawˇ mawˇ ca te la ve yoˬ. Jawˇ mawˇ Hpeˍliˆ lehˬ, Yuˇda‸ chaw hui yawˇ hta‸ nyi ma cawˇ tuˬ heuˆ gaˇ ve pa taw, Pawˇlu‸ hta‸ htawnˍ hk'aw lo haw taˉ ve yoˬ.

Tcuh yaˇ 25

1 Jawˇ mawˇ Hpeˍtuˆ lehˬ mvuhˇ miˬ oˇ ve awˬ hk'aw lo gaˬ la leh, shehˆ nyi gaˬ peuˬ hk'aw‸ nawˉ, yawˇ Kehˉsaˍriˆ venˇ lo tu leh Yeˍruˆsaˍlehnˍ venˇ lo k'ai ve yoˬ. 2 Oˇ htaˇ, paw hkuˇ lonˉ hui leh Yuˇda‸ chaw hui ve awˬ hoˉ awˬ naˬ teˇ hpaˍ Pawˇlu‸ awˬ lawn maˇ da‸ ve teˇ hpaˍ jawˇ mawˇ Hpeˍtuˆ hta‸ hto piˇ ve yoˬ. 3 Yawˇ hui k'oˆ ve, Awˬ bon te leh Pawˇlu‸ hta‸ Yeˍruˆsaˍlehnˍ venˇ lo a ciˉ peu laˇ-oˆ teh‸, jawˇ mawˇ Hpeˍtuˆ hta‸ lawˬ hkawˉ ve yoˬ. Awˬ lawn k'o, ya‸ k'aw k'aˉ lo yawˇ hui naˆ taˍ leh Pawˇlu‸ hta‸ tiˇ pehˍ tuˬ dawˇ taˍ ve yoˬ. 4 Jawˇ mawˇ Hpeˍtuˆ k'aw‸ k'oˆ ve, Pawˇlu‸ lehˬ, Kehˉsaˍriˆ venˇ awˬ hk'aw lo haw taˍ ve yoˬ. Maˇ maw maw ngaˬ awˬ to oˇ kaˬ lo k'aw‸ k'o‸-e tuˬ yoˬ. 5 Hk'e te leh, nawˬ hui awˬ hk'aw lo kanˇ paˆ cawˬ ve chaw teˇ hpaˍ ngaˬ geh teˇ geh k'ai leh, chaw oˇ ve awˬ hk'oˆ venˇ baˆ taˍ tuˬ cawˬ ve k'o ca taˍ-o‸ teh‸, yawˇ k'aw‸ k'oˆ piˇ ve yoˬ. 6 Yawˇ yawˇ hui geh aˬ laˬ hk'e teˇ chi nyi chehˇ peuˬ hk'aw‸ nawˉ, yawˇ Kehˉsaˍriˆ venˇ lo k'aw‸ k'o‸-e ve yoˬ. Awˬ hk'aw‸ nawˉ teˇ nyi yawˇ suhˉ jehˬ kuiˬ k'aw jaw hk'oˆ mui leh, Pawˇlu‸ hta‸ ca shiˍ veu laˇ tuˬ tawˇ piˇ ve yoˬ. 7 Pawˇlu‸ gaˬ la htaˇ, Yeˍruˆsaˍlehnˍ venˇ lo laˬ ve Yuˇda‸ chaw teˇ hpaˍ lehˬ, yawˇ hta‸ hk'a caw zuhˇ huˉ taˍ leh, yawˇ hui shaˉ hkiˆ yuˬ maˍ piˇ maˇ g'a ve htawˇ, uiˍ jaˇ ve venˇ baˆ teˇ hpaˍ yawˇ awˬ hk'oˆ taˍ ve yoˬ. 8 Pawˇlu‸ yawˇ ve awˬ lawn k'aw‸ yaw hk'aw‸ leh k'oˆ ve, Yuˇda‸ chaw hui ve awˬ liˇ tawˇ hkawˇ hta‸ maˇ k'oˆ, bon yehˬ lonˉ hta‸ maˇ k'oˆ, jawˇ mawˇ Kehˉsaˍ hta‸ maˇ k'oˆ, ngaˬ te‸ chiˉ ka‸ maˇ te ya‸ teh‸ k'oˆ piˇ ve yoˬ. 9 Ya‸ hk'aˇ, jawˇ mawˇ Hpeˍtuˆ lehˬ, Yuˇda‸ chaw hui yawˇ hta‸ nyi ma cawˇ tuˬ heuˆ gaˇ ve pa taw, Pawˇlu‸ hta‸ k'oˆ piˇ ve, Awˬ lawn chi teˇ hpaˍ ngaˬ mehˆ g'uˇ suhˍ suhˉ jehˬ tuˬ, nawˬ Yeˍruˆsaˍlehnˍ venˇ lo k'ai gaˇ laˇ teh‸ na nyi ve yoˬ. 10 Pawˇlu‸ k'aw‸ k'oˆ ve, Jawˇ mawˇ Kehˉsaˍ ve suhˉ jehˬ kuiˬ k'aw jaw awˬ g'uˇ suhˍ lo ngaˬ huˉ chehˇ ve yoˬ. Choˬ kaˬ lo ngaˬ hta‸ suhˉ jehˬ laˇ cawˇ ve yoˬ. Nawˬ awˬ to hk'a deh‸ shiˍ taˍ ve hk'e, ngaˬ Yuˇda‸ chaw teˇ hpaˍ hta‸ te‸ chiˉ ka‸ maˇ te ya‸. 11 Ngaˬ te ya‸ leh suh keunˍ ve teˇ ceuˬ ceuˬ te taˍ ve k'o, suh ve hta‸ ngaˬ maˇ jaw k'ai. Ya‸ hk'aˇ, yawˇ hui ngaˬ awˬ hk'oˆ venˇ baˆ taˍ ve teˇ hpaˍ, teˇ ceuˬ ka‸ maˇ cawˇ ve k'o, yawˇ hui ve la‸ shehˍ hk'aw ngaˬ hta‸ teˇ g'aˇ ka‸ chiˇ a‸ piˇ maˇ hpeh‸. Jawˇ mawˇ Kehˉsaˍ geh k'ai tuˬ ngaˬ lawˬ ve yoˬ teh k'oˆ piˇ ve yoˬ. 12 Oˇ htaˇ jawˇ mawˇ Hpeˍtuˆ lehˬ, yawˇ ve jehˬ da‸ shehˍ hpaˇ awˬ moˍ geh jehˬ da‸ peuˬ hk'aw‸ nawˉ, Nawˬ jawˇ mawˇ Kehˉsaˍ geh k'ai tuˬ lawˬ ve pa taw, jawˇ mawˇ Kehˉsaˍ geh nawˬ g'a k'ai tuˬ yoˬ teh‸ k'aw‸ k'oˆ piˇ ve yoˬ. 13 Awˬ hk'aw‸ nawˉ maˇ maw maw gaˬ leh, hkunˉ hawˉ hkawnˇ Aˍgiˇpaˆ leh awˬ miˇ ma Beˍraˍniˆ lehˬ, jawˇ mawˇ Hpeˍtuˆ hta‸ ha‸ yuˬ tuˬ Kehˉsaˍriˆ venˇ lo gaˬ la ve yoˬ. 14 Yawˇ huiˉ maˬ oˇ kaˬ lo a ciˉ maw chaweh chehˇ ve awˬ yanˇ awˬ hk'aw lo, jawˇ mawˇ Hpeˍtuˆ lehˬ Pawˇlu‸ awˬ lawn hkunˉ hawˉ hkanˇ hta‸ hto piˇ leh k'oˆ ve, Jawˇ mawˇ Hpeˍliˆ htawnˍ hk'aw keu taˉ ve chaw teˇ g'aˇ cawˬ ve yoˬ. 15 Ngaˬ Yeˍruˆsaˍlehnˍ venˇ awˬ hk'aw lo chehˇ htaˇ, paw hkuˇ lonˉ hui leh Yuˇda‸ awˬ hoˉ chaw mawˇ teˇ hpaˍ lehˬ, yawˇ ve awˬ lawn hto laˇ leh, yawˇ hta‸ suhˉ taˆ tuˬ yawˇ hui ngaˬ hta‸ lawˬ ve yoˬ. 16 Ngaˬ yawˇ hui hta‸ k'aw‸ k'oˆ piˇ ve, Venˇ baˆ taˍ ve hta‸ g'a hkanˍ ve chaw teˇ g'aˇ lehˬ, venˇ baˆ taˍ shehˍ hpaˇ teˇ hpaˍ hta‸ mehˆ hpfuhˇ tawˍ da‸ leh, venˇ baˆ taˍ ve awˬ lawn hta‸ yawˇ maˇ g'a yaw hk'aw‸ sheˍ ve ceh ceh, hk'aˬ ve teˇ g'aˇ hta‸ htawˇ maˇ k'oˆ, shu la‸ hk'aw chiˇ a‸ piˇ tuˬ Roˉma‸ chaw hui awˬ liˇ maˇ cawˬ teh‸, ngaˬ yawˇ hui hta‸ k'aw‸ k'oˆ piˇ ve yoˬ. 17 Hk'e te leh, yawˇ hui choˬ kaˬ lo hpawnˬ la ve teˇ yanˇ htaˇ, ngaˬ awˬ yanˇ maˇ jiˆ leh, awˬ hk'aw‸ nawˉ teˇ nyi suhˉ jehˬ kuiˬ k'aw jaw hk'oˆ mui leh, chaw oˇ ve hta‸ shiˍ veu laˇ tuˬ tawˇ piˇ ve yoˬ. 18 Oˇ htaˇ, yawˇ hui tu leh chaw oˇ ve teˇ g'aˇ awˬ hk'oˆ venˇ baˆ taˍ ve teˇ yanˇ, ngaˬ dawˇ taˍ ve venˇ baˆ teˇ ceuˬ ka‸ yawˇ hui maˇ taˍ. 19 Ya‸ hk'aˇ, yawˇ hui oˉ k'oˍ pui ve awˬ liˇ awˬ hk'aˇ teˇ hpaˍ awˬ lawn leh, Yeˍsuˆ teh‸ meh ve suh peuˬ ve chaw teˇ g'aˇ awˬ lawn ceh tiˉ yawˇ geh tawˇ g'awˬ da‸ chehˇ ve yoˬ. Yeˍsuˆ oˇ ve lehˬ, te‸ chehˇ ve yoˬ teh‸ Pawˇlu‸ k'oˆ tcuhˉ taˍ ve yoˬ. 20 Awˬ lawn chi hta‸ hk'aˬ hk'e na nyi tuˬ ngaˬ dawˇ maˇ tawˆ ve pa taw, Awˬ lawn chi teˇ hpaˍ Yeˍruˆsaˍlehnˍ venˇ awˬ hk'aw lo suhˉ jehˬ tuˬ, nawˬ oˇ kaˬ lo k'ai gaˇ laˇ teh‸, ngaˬ yawˇ hta‸ na nyi ve yoˬ. 21 Ya‸ hk'aˇ Pawˇlu‸ lehˬ, hkunˉ hawˉ hkanˇ lonˉ suhˉ taˆ laˇ tuˬ awˬ pon teh taˍ laˇ sheˍ teh‸ yawˇ lawˬ hkawˉ ve pa taw, yawˇ hta‸ jawˇ mawˇ Kehˉsaˍ geh k'ai tcuh htaˇ hk'a gaˬ shaw taˍ tuˬ ngaˬ tawˇ piˇ taˍ ve yoˬ teh‸, jawˇ mawˇ Hpeˍtuˆ k'oˆ piˇ ve yoˬ. 22 Oˇ htaˇ jawˇ mawˇ Aˍgiˇpaˆ k'oˆ ve, Ngaˬ htawˇ yawˇ ve tawˇ hkawˇ hta‸ kaˇ gaˇ ve yoˬ teh‸ jawˇ mawˇ Hpeˍtuˆ hta‸ k'oˆ piˇ htaˇ, Shawˉ pawˍ nawˬ g'a kaˇ tuˬ yoˬ teh‸, jawˇ mawˇ Hpeˍtuˆ k'aw‸ k'oˆ piˇ ve yoˬ. 23 Hk'e te leh, awˬ hk'aw‸ nawˉ teˇ nyi jawˇ mawˇ Aˍgiˇpaˆ leh Beˍraˍniˆ yawˇ huiˉ maˬ lehˬ, awˬ me‸ awˬ hponˇ jiˇ leh, ma‸ teˇ hinˉ poˍ hui leh, venˇ awˬ hk'aw lo ve chaw uiˍ teˇ hpaˍ geh teˇ geh hpawnˬ da‸ kuiˬ bawehˇ awˬ hk'aw lo lo‸-e ve yoˬ. Jawˇ mawˇ Hpeˍtuˆ tawˇ piˇ ve teˇ yanˇ, Pawˇlu‸ hta‸ shu shiˍ veu laˇ ve yoˬ. 24 Oˇ htaˇ jawˇ mawˇ Hpeˍtuˆ k'oˆ ve, Hkunˉ hawˉ hkanˇ Aˍgiˇpaˆ leh choˬ kaˬ lo hpawnˬ chehˇ ve chaw teˇ hpaˍ-oˬ, chi beu‸ nawˬ hui mawˬ ve chaw chi teˇ g'aˇ lehˬ, Yeˍruˆsaˍlehnˍ venˇ awˬ hk'aw lo maˇ k'oˆ, choˬ kaˬ lo maˇ k'oˆ, yawˇ awˬ lawn Yuˇda‸ chaw hk'a peu-eˬ ngaˬ geh laˬ leh, Chi hpaˇ te‸ chehˇ maˇ keunˍ teh‸ yawˇ hui g'aˇ hte‸ kuˬ ve yoˬ. 25 Ya‸ hk'aˇ, chaw chi hpaˇ awˬ hk'aw lo suh keunˍ ve venˇ baˆ hta‸ ngaˬ maˇ mawˬ. Yawˇ awˬ to hkunˉ hawˉ hkanˇ lonˉ geh k'ai tuˬ lawˬ ve pa taw, yawˇ hta‸ k'ai tcuh tuˬ ngaˬ dawˇ cheˆ taˍ peuˬ. 26 Yawˇ ve awˬ lawn ngaˬ ve jawˇ mawˇ lonˉ hta‸ li‸ bvuh‸ piˇ tuˬ awˬ ti teˇ ceuˬ ka‸ maˇ cawˬ sheˍ. Hk'e te leh, ngaˬ hui yawˇ hta‸ hk'a deh‸ na nyi peuˬ k'o, yawˇ ve awˬ lawn ngaˬ teˇ ceuˬ ceuˬ bvuh‸ hpeh‸ tuˬ, nawˬ hui chi ma ve mehˆ g'uˇ suhˍ maˇ k'oˆ, hkunˉ hawˉ hkanˇ Aˍgiˇpaˆ-oˬ, leuˉ leh nawˬ mehˆ g'uˇ suhˍ maˇ k'oˆ, ngaˬ yawˇ hta‸ shiˍ veu laˇ peuˬ. 27 Awˬ lawn k'o, htawnˍ hk'aw keu taˍ ve chaw teˇ g'aˇ hta‸ peu k'ai ve teˇ yanˇ, yawˇ hta‸ venˇ baˆ taˍ ve awˬ lawn teˇ hpaˍ li‸ hk'a deh‸ maˇ bvuh‸ piˇ k'o, a ciˉ ka‸ maˇ cawˇ teh‸ ngaˬ dawˇ ve yoˬ teh‸ jawˇ mawˇ Hpeˍtuˆ k'oˆ piˇ ve yoˬ.

Tcuh yaˇ 26

1 Oˇ htaˇ, jawˇ mawˇ Aˍgiˇpaˆ lehˬ Pawˇlu‸ hta‸ k'oˆ piˇ ve, Nawˬ ve awˬ lawn k'oˆ tuˬ a hkaw-anˬ cawˬ ve yoˬ teh‸ k'oˆ piˇ ve yoˬ. Hk'e te leh, Pawˇlu‸ yawˇ ve la‸ sheh che leh yawˇ ve awˬ lawn k'aw‸ yaw hk'aw‸ piˇ ve, 2 Hkunˉ hawˉ hkanˇ Aˍgiˇpaˆ-oˬ, Yuˇda‸ chaw teˇ hpaˍ ngaˬ awˬ hk'oˆ venˇ baˆ taˍ laˇ ve hk'a peu-eˬ awˬ lawn, ya‸ nyi nawˬ mehˆ g'uˇ suhˍ ngaˬ k'aw‸ yaw hk'aw‸ hpeh‸ ve pa taw, ngaˬ ha lehˬ jaˇ ve yoˬ. 3 Awˬ lawn k'o, Yuˇda‸ chaw hui ve awˬ liˇ awˬ hk'aˇ teˇ hpaˍ leh, yawˇ hui tawˇ g'awˬ da‸ ve teˇ hpaˍ awˬ lawn nawˬ hk'a deh‸ shiˍ ve yoˬ. Hk'e te leh, a ciˉ yeunˇ hkanˍ leh ngaˬ ve tawˇ hkawˇ hta‸ na tuˬ ngaˬ nawˬ hta‸ lawˬ hkawˉ ve yoˬ 4 Awˉ lawˉ htaˇ, ngaˬ yaˇ nehˬ hpeh‸ ve teˇ yanˇ hta‸ tanˬ leh, ngaˬ ve chaw ceuˬ awˬ hk'aw lo maˇ k'oˆ, Yeˍruˆsaˍlehnˍ venˇ awˬ hk'aw lo maˇ k'oˆ, ngaˬ te ve awˬ liˇ awˬ hk'aˇ teˇ hpaˍ hta‸ Yuˇda‸ chaw hk'a peu-eˬ shiˍ taˍ ve yoˬ. 5 Awˬ hkuiˉ puiˍ htaˇ ka‸ yawˇ hui ngaˬ ve awˬ lawn shiˍ taˍ ve pa taw, ngaˬ hui ve oˉ k'oˍ pui ve awˬ liˇ awˬ hk'aw lo, Hpaˍriˍsehˇ teh‸ k'oˆ ve hehnˇ jaˇ ve awˬ liˇ te ve teˇ moˍ hta‸ ngaˬ caˉ da‸ ve teh‸ yawˇ hui shaˉ hkiˆ hkanˍ gaˇ ve k'o hkanˍ hpeh‸ ve yoˬ. 6 G'uiˬ sha lehˬ, ngaˬ hui ve awˬ puˍ awˬ pi hui hta‸ piˇ taˍ ve ka ti‸ hta‸ ngaˬ dawˇ law ve pa taw, chi beu‸ suhˉ jehˬ ve hta‸ g'a hkanˍ tuˬ, ngaˬ choˬ kaˬ lo huˉ taˍ ve yoˬ. 7 Ngaˬ hui ve chaw ceuˬ teˇ chi nyiˇ ceuˬ lehˬ, tanˇ hkuinˇ tanˇ vanˇ coˇ caˇ leh G'uiˬ sha hta‸ oˉ k'oˍ pui ve awˬ hk'aw lo, ka ti‸ oˇ ve hta‸ g'a tuˬ yawˇ hui dawˇ law chehˇ ve yoˬ. Hkunˉ hawˉ hkanˇ-oˬ, dawˇ law taˍ ve oˇ ve hta‸ pa taw Yuˇda‸ chaw teˇ hpaˍ ngaˬ hta‸ venˇ baˆ taˍ laˇ ve yoˬ. 8 Suh peuˬ ve chaw hui hta‸ G'uiˬ sha k'aw‸ te‸ tu la piˇ ve teˇ ceuˬ hta‸ yonˍ maˇ hpeh‸ ve teh‸ aˬ hto‸ ma pa taw nawˬ hui dawˇ ve le. 9 Naˍzaˍrehˆ chaw Yeˍsuˆ ve awˬ meh hta‸ tawˍ taˍ tuˬ laiˉ ceuˬ te cawˇ ve yoˬ teh‸ ngaˬ awˬ tehˬ awˬ na dawˇ nyi jaw ve yoˬ. 10 Yeˍruˆsaˍlehnˍ venˇ awˬ hk'aw lo ngaˬ oˇ hk'e te jaw ve yoˬ. Paw hkuˇ lonˉ hui geh a hkaw-anˬ g'a peuˬ leh, Hkri‸ yaˇ hui laiˉ g'aˇ hta‸ htawnˍ hk'aw haw taˍ ve yoˬ. Shu yawˇ hui hta‸ tiˇ pehˍ ve teˇ yanˇ, ngaˬ htawˇ nyi ma cawˇ leh la‸ sheh chiˇ jaw ve yoˬ. 11 Bon yehˬ hk'a peu-eˬ awˬ hk'aw lo ngaˬ yawˇ hui hta‸ laiˉ pawˆ ciˍ yanˍ piˇ leh, yawˇ hui G'uiˬ sha hta‸ maˇ shawˍ maˇ caˆ k'oˆ tuˬ ngaˬ g'aˇ hte‸ te ve yoˬ. Nyi ma zuhˆ jaˇ beu‸ jaˇ ve awˬ hk'aw lo, shu mvuhˇ shu miˬ ve venˇ teˇ hpaˍ hk'a gaˬ ngaˬ yawˇ hui hta‸ fawˉ mehˍ jaw ve yoˬ. 12 Hkunˉ hawˉ hkanˇ-oˬ, ngaˬ chi hk'e te chehˇ ve awˬ hk'aw lo, paw hkuˇ lonˉ hui ngaˬ hta‸ kanˉ chi chiˇ a‸ laˇ leh a hkaw-anˬ pe‸ laˇ ve pa taw, ngaˬ Daˍmaˍsehˆ venˇ lo k'ai ve yoˬ. 13 Ya‸ k'aw k'aˉ lo mvuhˇ law‸ k'aw tcuhˆ teˇ yanˇ, mvuhˇ naw ma lo mvuhˇ nyi a‸ kehˉ hehnˇ ve awˬ g'euˆ lehˬ, ngaˬ leh ngaˬ geh teˇ geh k'ai chehˇ ve chaw hui hta‸ hk'a caw zuhˇ hti la ve hta‸ ngaˬ g'a mawˬ ve yoˬ. 14 Ngaˬ hui hk'a peu-eˬ miˬ chaˇ hk'oˆ lo paiˍ taˍ htaˇ, Heˍbrehˇ hkawˇ yaw leh chi hk'e k'oˆ laˇ ve awˬ hkawˇ hta‸ ngaˬ g'a kaˇ ve, Sawˉlu‸-oˬ, Sawˉlu‸-oˬ, aˬ hto‸ ma pa taw nawˬ ngaˬ hta‸ fawˉ mehˍ laˇ ve le. Nuˇ juˆ tuˬ ve aˉ taˬ hta‸ nawˬ hteˆ ve lehˬ, nawˬ g'a naˬ ve ceh tiˉ yoˬ teh‸ k'oˆ laˇ ve yoˬ. 15 Jawˇ mawˇ-oˬ, nawˬ a shu le teh‸ ngaˬ na nyi ve teˇ yanˇ, Jawˇ mawˇ k'aw‸ k'oˆ laˇ ve, Ngaˬ lehˬ nawˬ fawˉ mehˍ chehˇ ve Yeˍsuˆ yoˬ. 16 Tu leh hteˇ lehˍ huˉ-oˆ. Awˬ lawn k'o, nawˬ ngaˬ hta‸ g'a mawˬ ve lehˬ, chi awˬ pon yoˬ. Nawˬ ngaˬ hta‸ g'a mawˬ peuˬ ve teˇ hpaˍ awˬ lawn maˇ k'oˆ, awˬ hk'aw‸ nawˉ ngaˬ hta‸ g'a k'aw‸ mawˬ tuˬ ve teˇ hpaˍ awˬ lawn maˇ k'oˆ, nawˬ kanˉ te leh shaˉ hkiˆ hkanˍ tuˬ, ngaˬ nawˬ hta‸ leuˆ yuˬ taˍ ve yoˬ. 17 Yuˇda‸ chaw leh buiˇ shaˆ aˉ naˆ chaw hui mehˆ g'a mawˬ la tuˬ, yawˇ hui geh ngaˬ nawˬ hta‸ k'ai tcuh leh, yawˇ hui ve la‸ sheh awˬ hk'aw lo nawˬ hta‸ ponˬ laˇ tuˬ yoˬ. 18 Yawˇ hui mehˆ mawˬ la ve pa taw, naˆ ho‸ ve hta‸ hpfuhˆ baˬ taˉ leh, awˬ g'euˆ lo laˬ tuˬ yoˬ. Chi hk'oˆ ka‸, saˍtanˍ ve kanˇ paˆ hta‸ hpfuhˆ baˬ taˉ leh G'uiˬ sha geh laˬ tuˬ yoˬ. Hk'e te leh, yawˇ hui venˇ baˆ hpehˇ hk'a ve hta‸ ka‸ g'a leh ngaˬ hta‸ yonˍ ve awˬ hk'aw lo da‸ la kehˬ la peuˬ ve chaw teˇ hpaˍ geh teˇ geh ka‸ g'a chehˇ tuˬ yoˬ. 19 Hk'e te leh hkunˉ hawˉ hkanˇ Aˍgiˇpaˆ-oˬ, mvuhˇ naw ma lo hpeu‸ maˍ laˇ ve awˬ ceuˬ hta‸ ngaˬ maˇ na yuˬ ve maˇ heˆ. 20 Awˉ lawˉ htaˇ Daˍmaˍsehˆ venˇ chaw teˇ hpaˍ hta‸ maˇ k'oˆ, awˬ hk'aw‸ nawˉ Yeˍruˆsaˍlehnˍ venˇ leh Yuˇda‸ mvuhˇ miˬ hk'a peu-eˬ awˬ hk'aw lo maˇ k'oˆ, buiˇ shaˆ aˉ naˆ chaw teˇ hpaˍ hta‸ htawˇ maˇ k'oˆ, ngaˬ bon maˍ piˇ ve yoˬ. Yawˇ hui lehˬ, a shu yawˇ ve venˇ baˆ hta‸ dawˇ hpfuhˆ leh, G'uiˬ sha geh k'aw‸ hpfuhˆ k'aw‸ la leh, venˇ baˆ dawˇ hpfuhˆ ve hta‸ keunˍ da‸ ve kanˉ teˇ hpaˍ te tuˬ ngaˬ yawˇ hui hta‸ maˍ piˇ ve yoˬ. 21 Chi hta‸ pa taw, bon yehˬ lonˉ awˬ hk'aw lo Yuˇda‸ chaw hui ngaˬ hta‸ hpeh yuˬ leh tiˇ pehˍ tuˬ te ve yoˬ. 22 Ya‸ hk'aˇ, ya‸ nyi hk'a gaˬ G'uiˬ sha ga laˇ ve pa taw, ngaˬ choˬ kaˬ lo g'a huˉ taˍ leh, uiˍ ve i ve chaw hk'a peu-eˬ hta‸ shaˉ hkiˆ hkanˍ chehˇ ve yoˬ. Hk'aˬ hk'e hpeh‸ la tuˬ ve awˬ lawn G'uiˬ sha ve tcuh kaˍ paˍ hui leh Moˉseˍ k'oˆ ve hk'e ceh ngaˬ k'oˆ ve yoˬ. 23 Yawˇ hui k'oˆ ve lehˬ, Hkri‸ g'a tu‸ g'a hkanˍ leh, suh kuiˬ lo yawˇ awˉ lawˉ k'aw‸ te‸ tu la ve teˇ g'aˇ hpeh‸ ve pa taw, Yuˇda‸ chaw leh buiˇ shaˆ aˉ naˆ chaw hui hta‸ awˬ g'euˆ awˬ lawn yawˇ hto piˇ maˍ piˇ tuˬ yoˬ teh‸ Pawˇlu‸ k'oˆ ve yoˬ. 24 Pawˇlu‸ chi hk'e yaw hk'aw‸ chehˇ ve teˇ yanˇ, jawˇ mawˇ Hpeˍtuˆ k'oˆ ve, Pawˇlu‸-oˬ, nawˬ g'uˇ k'ai peuˬ. Nawˬ li‸ maˇ maˇ henˇ ve pa taw nawˬ g'uˇ k'ai ve yoˬ teh‸, awˬ hkawˇ bvuhˬ chaweh k'oˆ ve yoˬ. 25 Pawˇlu‸ k'aw‸ k'oˆ ve, Awˬ me‸ awˬ hponˇ uiˍ ve jawˇ mawˇ Hpeˍtuˆ-oˬ, ngaˬ g'uˇ ve maˇ heˆ. Chaw hkawˇ hk'a deh‸ nawˇ taˍ ve awˬ hk'aw lo ngaˬ nawˬ hta‸ hteˇ ve cawˇ ve tawˇ hkawˇ yaw laˇ ve yoˬ. 26 Awˬ lawn chi teˇ hpaˍ hta‸ hkunˉ hawˉ hkanˇ Aˍgiˇpaˆ shiˍ taˍ ve pa taw, ngaˬ yawˇ hta‸ hk'a tawˍ lehˆ k'oˆ piˇ hpeh‸ ve yoˬ. Chi lehˬ baˬ kuiˬ lo hpeh‸ la ve maˇ heˆ ve pa taw, awˬ lawn chi teˇ hpaˍ hkunˉ hawˉ hkanˇ maˇ shiˍ maˇ mawˬ ve te ceuˬ ka‸ maˇ cawˬ teh‸ ngaˬ yonˍ ve yoˬ. 27 Hkunˉ hawˉ hkanˇ Aˍgiˇpaˆ-oˬ, G'uiˬ sha ve tcuh kaˍ paˍ hui ve tawˇ hkawˇ hta‸ nawˬ yonˍ ve laˇ. Nawˬ yonˍ ve hta‸ ngaˬ shiˍ ve yoˬ teh‸ k'oˆ piˇ ve yoˬ. 28 Jawˇ mawˇ Aˍgiˇpaˆ lehˬ Pawˇlu‸ hta‸ k'oˆ piˇ ve, Teˇ hkui tiˉ awˬ hk'aw lo ngaˬ Hkri‸ yaˇ hpeh‸ la tuˬ nawˬ te ve law leˇ teh‸ k'oˆ piˇ ve yoˬ. 29 Pawˇlu‸ k'aw‸ k'oˆ ve, Awˬ yanˇ ngeh ve maˇ k'oˆ, awˬ yanˇ maw ve maˇ k'oˆ, nawˬ awˬ to ka‸, ya‸ nyi ngaˬ ve tawˇ hkawˇ hta‸ g'a kaˇ ve chaw hk'a peu-eˬ ka‸, sho caˆ hpeh taˍ ve teˇ ceuˬ maˇ heˆ k'o, ngaˬ hk'a shuˍ shuˍ hpeh‸ la tuˬ ngaˬ G'uiˬ sha hta‸ bon lawˬ ve yoˬ teh‸ k'oˆ piˇ ve yoˬ. 30 Oˇ htaˇ, hkunˉ hawˉ hkanˇ tu leh, mvuhˇ miˬ jawˇ mawˇ lonˉ ka‸, Beˍraˍniˆ ka‸, yawˇ hui geh mui taˍ ve chaw teˇ hpaˍ ka‸ tu ve yoˬ. 31 Yawˇ hui tawˆ k'ai peuˬ hk'aw‸ nawˉ, yawˇ hui teˇ g'aˇ leh teˇ g'aˇ k'oˆ da‸ ve, Chaw chi lehˬ, tiˇ pehˍ keunˍ ve maˇ k'oˆ, hpeh taˍ keunˍ ve maˇ k'oˆ, venˇ baˆ teˇ ceuˬ ka‸ maˇ cawˬ teh‸ k'oˆ da‸ ve yoˬ. 32 Jawˇ mawˇ Aˍgiˇpaˆ lehˬ jawˇ mawˇ Hpeˍtuˆ hta‸ k'oˆ piˇ ve, Chaw chi lehˬ, jawˇ mawˇ Kehˉsaˍ geh k'ai tuˬ maˇ lawˬ ve hk'e k'o, yawˇ hta‸ hpehˇ piˇ hpeh‸ ve yoˬ teh‸ k'oˆ ve yoˬ.

Tcuh yaˇ 27

1 Iˉtaˍliˍ mvuhˇ miˬ lo ngaˬ hui haw lo‸ k'oˍ g'a ciˇ k'ai tuˬ jawˇ mawˇ dawˇ cheˆ peuˬ ve teˇ yanˇ, Pawˇlu‸ leh awˬ kaˍ awˬ nu hpeh taˍ ve chaw teˇ hpaˍ hta‸, Awˇguˇtuˆ ma‸ teˇ ta‸ hta‸ caˉ da‸ ve Yuˇluˆ meh ve ma‸ poˍ teˇ g'aˇ ve la‸ sheh awˬ hk'aw lo chiˇ a‸ piˇ ve yoˬ. 2 Aˍsiˆ mvuhˇ miˬ awˬ hk'aw laˇ tsuhˇ g'uiˬ pfuhˍ lo cawˬ ve venˇ teˇ hpaˍ lo k'ai tuˬ ve, Aˍdaˍmuˇtiˆ venˇ yaˇ ve haw lo‸ k'oˍ hta‸ ngaˬ hui ciˇ k'ai ve yoˬ. Maˍkeˍdawˇniˆ mvuhˇ miˬ awˬ hk'aw lo ve Hteˇsaˍlawˇniˆ venˇ yaˇ Aˍriˍtaˍhkuˆ htawˇ, ngaˬ hui geh k'ai ve yoˬ. 3 Awˬ hk'aw‸ nawˉ teˇ nyi ngaˬ hui Siˉdonˍ venˇ lo deh ve yoˬ. Pawˇlu‸ yawˇ ve awˬ chawˇ teˇ hpaˍ geh k'ai tuˬ leh awˬ chawˇ teˇ hpaˍ yawˇ hta‸ ha‸ shaˉ tuˬ, Yuˇluˆ lehˬ yawˇ hta‸ ha k'aˉ leh a hkaw-anˬ piˇ ve yoˬ. 4 Ngaˬ hui oˇ kaˬ lo tawˆ k'ai ve teˇ yanˇ, mvuhˇ haw hpawˇ maˇ cawˇ ve pa taw, mvuhˇ haw maˇ htinˍ ve teˇ hpawˇ lo Kuˇpaˍruˆ conˇ hta‸ ngaˬ hui peun leh k'ai ve yoˬ. 5 Kiˇliˇkiˆ mvuhˇ miˬ leh Paˍpuˇliˆ mvuhˇ miˬ awˬ paˇ lo cawˬ ve laˇ tsuhˇ g'uiˬ teˇ tawn hta‸ ngaˬ hui hpanˍ k'ai peuˬ hk'aw‸ nawˉ, Luˇkiˆ mvuhˇ miˬ awˬ hk'aw lo cawˬ ve Muˍraˆ venˇ lo gaˬ ve yoˬ. 6 Ma‸ poˍ lehˬ oˇ kaˬ Iˉtaˍliˍ mvuhˇ miˬ lo k'ai ve haw lo‸ k'oˍ hta‸ mawˬ leh, ngaˬ hui hta‸ lo‸-e tcuh ve yoˬ. Haw lo‸ k'oˍ oˇ ve lehˬ, Aˍleˍsaˍduˆ venˇ yaˇ ve haw lo‸ k'oˍ hpeh‸ ve yoˬ. 7 Awˬ nyi awˬ haˉ maw chaweh ngaˬ hui a yehˉ yehˉ k'ai leh, haˍ jaˇ ve awˬ hk'aw lo Kaˍniˆ venˇ hta‸ hk'a tawˍ hui lo gaˬ ve yoˬ. Mvuhˇ haw hpawˇ maˇ cawˇ ve pa taw, ngaˬ hui awˬ g'uˇ suhˍ k'aw‸ k'ai maˇ hpeh‸ leh, mvuhˇ haw maˇ htinˍ ve teˇ hpawˇ lo Kaˍreˍteˍ conˇ hta‸ peun leh Saˍmoˍneˍ venˇ hpawˇ lo k'ai ve yoˬ. 8 Haˍ jaˇ ve awˬ hk'aw lo conˇ oˇ ve awˬ paˇ lo ngaˬ hui k'ai leh, Laˍsehˇ venˇ hta‸ neˇ ve Nyi sha ve deh kuiˬ meh ve teˇ kaˬ lo gaˬ ve yoˬ. 9 Awˬ nyi awˬ haˉ maˇ maˇ peuˬ k'ai leh, caˇ tuˬ ce ve awˬ nyi ponˬ k'ai peuˬ ve pa taw, haw lo‸ k'oˍ ciˇ ve kawˆ tuˬ uiˍ jaˇ ve awˬ yanˇ gaˬ la peuˬ. Pawˇlu‸ yawˇ hui hta‸ shaˍ ti‸ piˇ leh k'oˆ ve, 10 Awˬ chawˇ teˇ hpaˍ-oˬ, chi beu‸ haw lo‸ k'oˍ ciˇ k'ai ve k'o, haw lo‸ k'oˍ leh mawˇ teˇ hpaˍ g'a luˬ ve ceh tiˉ maˇ heˆ. Ngaˬ hui ve a sha‸ htawˇ g'a shonˇ tuˬ ve hta‸ ngaˬ dawˇ shiˍ dawˇ mawˬ ve yoˬ teh‸ k'oˆ piˇ ve yoˬ. 11 Ya‸ hk'aˇ ma‸ poˍ lehˬ, Pawˇlu‸ ve tawˇ hkawˇ a‸ kehˉ haw lo‸ k'oˍ awˬ hoˉ leh haw lo‸ k'oˍ awˬ shehˍ hpaˇ ve tawˇ hkawˇ hta‸ na ve yoˬ. 12 Deh kuiˬ oˇ ve lehˬ, mvuhˇ kaˆ ve awˬ yanˇ awˬ hk'aw chehˇ tuˬ awˬ pon maˇ da‸ ve pa taw, oˇ kaˬ tawˆ k'ai leh, hpeh‸ ve k'o Hpiˇniˆ venˇ haw lo‸ k'oˍ deh kuiˬ lo gaˬ leh, mvuhˇ kaˆ ve awˬ yanˇ peuˬ htaˇ hk'a gaˬ oˇ kaˬ lo chehˇ tuˬ chaw maˇ-awˍ ve nyi ma cawˇ ve yoˬ. Hpiˇniˆ venˇ ve haw lo‸ k'oˍ deh kuiˬ g'uiˬ k'aweh‸ lehˬ, Kaˍreˍteˍ conˇ lo cawˬ leh, mvuhˇ nyi tawˆ awˬ na teˇ ceˍ leh, mvuhˇ nyi tawˆ awˬ hawˉ teˇ ceˍ lo mawˬ taˍ ve yoˬ. 13 Awˬ hawˉ hpawˇ ve mvuhˇ haw a yehˉ yehˉ meuˆ la ve teˇ yanˇ, yawˇ hui dawˇ law taˍ ve hk'e hpeh‸ la peuˬ teh‸ dawˇ leh, sho k'uˉ k'aweh‸ g'awˬ tawˆ peuˬ hkaw‸ nawˉ, Kaˍreˍteˍ conˇ awˬ paˇ lo hpanˍ k'ai ve yoˬ. 14 Ya‸ hk'aˇ, maˇ maw maw gaˬ leh mvuhˇ nyi tawˆ awˬ na teˇ ceˍ lo laˬ ve mvuhˇ haw lonˉ lehˬ, miˬ guiˬ hpawˇ lo te leh g'aˇ hte‸ meuˆ la ve yoˬ. 15 Mvuhˇ haw oˇ ve haw lo‸ k'oˍ hta‸ htinˍ ve teˇ yanˇ, haw lo‸ k'oˍ hkanˍ maˇ g'aˇ ve pa taw, ngaˬ hui haw lo‸ k'oˍ hta‸ hk'e leˇ hpehˇ peu leh, haw lo‸ k'oˍ hta‸ mvuhˇ haw meuˆ k'ai ve yoˬ. 16 Kaˍlawˉdeˍ teh‸ k'oˆ ve conˇ ehˉ, mvuhˇ haw maˇ hehnˇ jaˇ ve teˇ hpawˇ lo ngaˬ hui k'ai chehˇ htaˇ, haw lo‸ k'oˍ ehˉ maˇ g'a luˬ k'ai tuˬ, g'aˇ hte‸ coˇ caˇ ve awˬ hk'aw lo haw lo‸ k'oˍ ehˉ hta‸ g'awˬ yuˬ leh, haw lo‸ k'oˍ lonˉ awˬ hk'oˆ lo g'awˬ teh taˍ ve yoˬ. 17 Haw lo‸ k'oˍ lonˉ maˇ g'a paˆ-e tuˬ, yawˇ hui aˉ caˆ hkeh yuˬ leh hk'a deh‸ hpeh tcuh‸ taˍ ve yoˬ. Oˇ htaˇ, shehˇ shiˍ hpoˆ lonˉ cawˬ kuiˬ lo yawˇ hui ca hkanˉ taˍ puiˉ-aˆ teh‸ dawˇ haˍ ve pa taw, hpa peˆ lonˉ teˇ hpaˍ hta‸ yuˬ ya‸-e leh, hk'e leˇ mvuhˇ haw meuˆ k'ai tcuh ve yoˬ. 18 Mvuhˇ haw lonˉ meuˆ hehnˇ jaˇ leh, haw lo‸ k'oˍ taˆ taˆ ya‸ ya‸ te ve pa taw, awˬ hk'aw‸ nawˉ teˇ nyi yawˇ hui taˆ taˍ ve mawˇ teˇ hpaˍ hta‸ yuˬ baˬ ve yoˬ. 19 Shehˆ nyi gaˬ la htaˇ, haw lo‸ k'oˍ ve awˬ hk'eun teˇ hpaˍ hta‸ htawˇ yawˇ hui hk'aˇ yawˇ hui yuˬ baˬ ve yoˬ. 20 Awˬ nyi awˬ haˉ maw chaweh awˬ hk'aw lo mvuhˇ nyi ka‸ meu‸ keu teˇ hpaˍ ka‸ maˇ tawˆ la ve awˬ hk'oˆ, mvuhˇ haw lonˉ meuˆ tcuhˉ taˍ ve pa taw, ngaˬ hui g'a pon tuˬ ve teh‸ dawˇ law kuiˬ a ciˉ ka‸ maˇ cawˬ. 21 Yawˇ hui caˇ tuˬ maˇ caˇ ve maw peuˬ hk'aw‸ nawˉ, Pawˇlu‸ yawˇ hui awˬ k'aw ji lo tu huˉ leh k'oˆ ve, Awˬ chawˇ teˇ hpaˍ-oˬ, nawˬ hui ngaˬ ve hk'awˇ hta‸ na leh keˍreˍteˍ conˇ lo maˇ tawˆ la sheˍ ve hk'e k'o, luˬ ve sheˆ ve chi hta‸ maˇ g'a hpuˇ. 22 Ya‸ hk'aˇ, chi beu‸ ha lehˬ chehˇ-oˆ teh‸, ngaˬ nawˬ hui hta‸ lawˬ hkawˉ ve yoˬ. Nawˬ hui awˬ hk'aw lo teˇ g'a ka‸ maˇ g'a suh, haw lo‸ k'oˍ ceh tiˉ luˬ k'ai tuˬ yoˬ. 23 Awˬ lawn k'o, ngaˬ hta‸ uˉ peunˍ leh ngaˬ oˉ k'oˍ pui ve G'uiˬ sha yawˇ ve mvuhˇ naw ma tcuh yaˇ teˇ g'aˇ lehˬ, ya‸ puiˉ haˉ ngaˬ awˬ paˇ lo huˉ taˍ leh k'oˆ ve, 24 Pawˇlu‸-oˬ, taˇ kawˆ, Hkunˉ hawˉ hkanˇ lonˉ Kehˉsaˍ mehˆ g'uˇ suhˍ nawˬ g'a tu huˉ tuˬ yoˬ. Nawˬ geh teˇ geh haw lo‸ k'oˍ ciˇ taˍ ve chaw hk'a peu-eˬ htawˇ, G'uiˬ sha nawˬ hta‸ pe‸ laˇ tuˬ yoˬ teh‸ ngaˬ hta‸ k'oˆ laˇ ve yoˬ. 25 Hk'e te leh, awˬ chawˇ teˇ hpaˍ-oˬ, ha lehˬ chehˇ-oˆ. Ngaˬ hta‸ k'oˆ laˇ ve hk'a shuˍ shuˍ hpeh‸ la tuˬ yoˬ teh‸, ngaˬ G'uiˬ sha hta‸ yonˍ ve yoˬ. 26 Ya‸ hk'aˇ ngaˬ hui lehˬ, conˇ teˇ maˬ maˬ awˬ hk'oˆ lo g'a hkanˉ taˍ tuˬ yoˬ teh‸, Pawˇlu‸ yawˇ hui hta‸ k'oˆ piˇ ve yoˬ. 27 Teˇ chi awˇ nyi teˇ haˉ gaˬ leh, ngaˬ hui Aˍdiˆ laˇ tsuhˇ g'uiˬ hta‸ hpanˍ k'ai chehˇ ve teˇ yanˇ, shehˍ k'aw hkui htaˇ hk'e gaˬ leh, ngaˬ hui miˬ guiˬ teˇ peˆ peˆ hta‸ neˇ la peuˬ hehˉ teh‸, haw lo‸ k'oˍ hk'aw kanˉ te paˍ teˇ hpaˍ dawˇ ve yoˬ. 28 Yawˇ hui iˉ kaˆ hta‸ tehˆ nyi ve teˇ yanˇ, nyiˇ chi loˬ naˉ ve hta‸ g'a shiˍ ve yoˬ. Awˬ hk'aw‸ nawˉ maˇ maw maw yawˇ hui teˇ pawˆ k'aw‸ tehˆ nyi htaˇ, teˇ chi ngaˇ loˬ naˉ ve hta‸ g'a shiˍ ve yoˬ. 29 Yawˇ hui lehˬ, haˉ pui hta‸ htinˍ heuˆ la puiˉ-aˆ teh‸ dawˇ haˍ ve pa taw, haw lo‸ k'oˍ awˬ mehˍ hpawˇ lo sho k'uˉ k'aweh awˍ lehˇ hpehˇ ya‸-e peuˬ leh, mvuhˇ haˆ haˆ htiˇ la tuˬ ve hta‸ dawˇ law chehˇ ve yoˬ. 30 Haw lo‸ k'oˍ hk'aw kanˉ te ve chaw teˇ hpaˍ lehˬ, haw lo‸ k'oˍ hta‸ baˬ taˉ leh hpaw-e tuˬ dawˇ taˍ ve yoˬ. Chi hta‸ pa taw, haw lo‸ k'oˍ oˉ k'oˍ hpawˇ lo sho k'uˉ k'aweh‸ hpehˇ ya‸-e ve hk'e te leh, haw lo‸ k'oˍ ehˉ hta‸ iˉ kaˆ awˬ hk'aw lo yuˬ ya‸-e ve teˇ yanˇ, 31 Pawˇlu‸ lehˬ ma‸ poˍ leh ma‸ yaˇ teˇ hpaˍ hta‸ k'oˆ piˇ ve, Chaw chi teˇ hpaˍ haw lo‸ k'oˍ awˬ hk'aw lo maˇ chehˇ taˍ ve k'o, nawˬ hui ponˬ maˇ hpeh‸ teh‸ k'oˆ piˇ ve yoˬ. 32 Oˇ htaˇ, ma‸ yaˇ teˇ hpaˍ lehˬ, haw lo‸ k'oˍ ehˉ ve aˉ caˆ hkeh teˇ hpaˍ hta‸ tawˆ cheˆ leh, laˇ tsuhˇ g'uiˬ hk'aw shi peu ve yoˬ. 33 Mvuhˇ htiˇ la paˇ neˇ htaˇ, yawˇ hui hk'a peu-eˬ awˍ caˇ tuˬ Pawˇlu‸ yawˇ hui hta‸ awˬ g'aˇ piˇ leh k'oˆ ve, Nawˬ hui dawˇ haˍ dawˇ hkiˉ ve awˬ hk'aw lo law chehˇ leh, caˇ tuˬ te‸ chiˉ ka‸ maˇ caˇ ve, ya‸ nyi teˇ chi awˇ nyi gaˬ peuˬ. 34 Chi hta‸ pa taw, caˇ tuˬ caˇ-oˆ teh‸ ngaˬ nawˬ hui hta‸ lawˬ hk'awˉ ve yoˬ. Chi lehˬ, nawˬ hui g'a ponˬ tuˬ awˬ pon ngaˬ k'oˆ ve yoˬ. Awˬ lawn k'o, nawˬ hui teˇ g'aˇ ka‸ uˉ hkeh mvuh teˇ mvuh ka‸ maˇ g'a luˬ maˇ g'a sheˆ teh‸, Pawˇlu‸ yawˇ hui hta‸ k'oˆ piˇ ve yoˬ. 35 Yawˇ chi hk'e k'oˆ peuˬ htaˇ, hkaoˍ monˇ hta‸ yuˬ leh, yawˇ hui hk'a peu-eˬ mehˆ g'uˇ suhˍ G'uiˬ sha hta‸ chiˇ mvuh peuˬ hk'aw‸ nawˉ, yawˇ hk'aoˍ monˇ hk'eh‸ leh caˇ ve yoˬ. 36 Oˇ htaˇ, yawˇ hui hk'a peu-eˬ htawˇ ha lehˬ la leh caˇ tuˬ caˇ ve yoˬ. 37 Haw lo‸ k'oˍ oˇ ve hta‸ ciˇ taˍ ve chaw hk'a peu-eˬ lehˬ, 276 g'aˇ cawˬ ve yoˬ. 38 Yawˇ hui hk'a bvuhˆ caˇ peuˬ hk'aw‸ nawˉ, caˬ shiˍ caˬ hk'a hta‸ laˇ tsuhˇ g'uiˬ awˬ hk'aw lo baˬ keu leh, haw lo‸ k'oˍ hta‸ lawˬ la piˇ lawˬ ve yoˬ. 39 Mvuhˇ htiˇ la ve teˇ yanˇ, miˬ guiˬ oˇ ve teˇ peˆ hta‸ yawˇ hui maˇ shiˍ. Ya‸ hk'aˇ, shehˇ shiˍ cawˬ ve g'uiˬ k'aweh‸ hta‸ g'a mawˬ leh, hpeh‸ ve k'o haw lo‸ k'oˍ hta‸ oˇ kaˬ lo g'a‸ k'ai tuˬ dawˇ taˍ ve yoˬ. 40 Hk'e te leh, sho k'uˉ k'aweh‸ teˇ hpaˍ hta‸ laˇ tsuhˇ g'uiˬ hk'aw lo hpui baˬ taˉ ve yoˬ. Haw lo‸ k'oˍ g'a‸ tuˬ ve caˉ behˆ teˇ hpaˍ hpeh taˍ ve aˉ caˆ hkeh teˇ hpaˍ hta‸ htawˇ hpui sheˬ leh, haw lo‸ k'oˍ oˉ k'oˍ hpawˇ ve hpa peˆ lonˉ hta‸ mvuhˇ haw meuˆ tuˬ chiˇ taˆ-e peuˬ hk'aw‸ nawˉ, shehˇ shiˍ cawˬ ve g'uiˬ pfuhˍ lo g'a‸ k'ai ve yoˬ. 41 Ya‸ hk'aˇ, iˉ kaˆ maˇ naˉ kuiˬ lo miˬ pui diˬ hta‸ htinˍ heuˆ leh, haw lo‸ k'oˍ hkanˉ sheˍ ve yoˬ. Haw lo‸ k'oˍ oˉ k'oˍ hpawˇ hkanˉ yeˬ jaˇ leh, a ciˉ ka‸ maˇ jiˆ. Oˇ htaˇ, awˬ mehˍ hpawˇ teˇ tawn hta‸ g'uiˬ baˇ g'aˇ hte‸ dawˆ leh paˆ-e ve yoˬ. 42 Hpeh taˍ ve chaw teˇ hpaˍ iˉ kaˆ lawehˇ leh hpaw tawˆ-e puiˉ-aˆ teh‸ ma‸ yaˇ teˇ hpaˍ dawˇ haˍ ve pa taw, yawˇ hui hta‸ tiˇ pehˍ tuˬ jehˬ daˬ ve yoˬ. 43 Ya‸ hk'aˇ, ma‸ poˍ lonˉ lehˬ Pawˇlu‸ hta‸ ponˬ piˇ gaˇ ve pa taw, yawˇ hui jehˬ da‸ ve hta‸ yawˇ tawˍ taˍ ve yoˬ. Oˇ htaˇ, iˉ kaˆ lawehˇ puiˉ ve chaw teˇ hpaˍ hta‸ iˉ kaˆ hk'aw pawˆ lo‸-e leh, g'uiˬ pfuhˍ lo lawehˇ tawˆ-e tuˬ, ma‸ poˍ lonˉ tawˇ piˇ ve yoˬ. 44 Awˬ kaˍ awˬ nu chaw teˇ hpaˍ lehˬ, teˇ hpaˍ hpaˍ suhˆ baˉ hta‸ ciˇ tuˬ leh, teˇ hpaˍ hpaˍ haw lo‸ k'oˍ ve awˬ hk'eun teˇ hpaˍ hta‸ ciˇ tuˬ, yawˇ tawˇ piˇ ve yoˬ. Hk'e te leh, chaw hk'a peu-eˬ g'a ponˬ leh, g'uiˬ pfuhˍ lo gaˬ ve yoˬ.

Tcuh yaˇ 28

1 Ngaˬ hui luˬ ve sheˆ ve hta‸ ponˬ peuˬ hk'aw‸ nawˉ, conˇ oˇ ve Meˍleˍteˍ k'oˆ ve hta‸ ngaˬ hui g'a shiˍ ve yoˬ. 2 Conˇ oˇ ve awˬ hk'aw chehˇ ve chaw teˇ hpaˍ ngaˬ hui hta‸ ha k'aˉ jaˇ leh hk'a deh‸ ga laˇ ve yoˬ. Awˬ lawn k'o, mvuhˇ yeˬ laˬ leh kaˆ ve pa taw, yawˇ hui aˬ miˍ ceh leh ngaˬ hui hta‸ ha‸ yuˬ laˇ ve yoˬ. 3 Oˇ htaˇ Pawˇlu‸ lehˬ, suhˆ k'aˉ ku-iˍ teˇ k'a‸ g'awˆ veu laˇ leh, aˬ miˍ hk'aw keu ve teˇ yanˇ, aˬ miˍ chiˆ ve pa taw vuiˬ haiˬ teˇ hkeh tawˆ la leh, Pawˇlu‸ ve la‸ sheh hta‸ hawˆ taˍ ve yoˬ. 4 Oˇ kaˬ lo chehˇ ve chaw teˇ hpaˍ lehˬ, Pawˇlu‸ ve la‸ sheh hta‸ vuiˬ haiˬ hawˆ leh yu taˍ ve hta‸ g'a mawˬ ve teˇ yanˇ, yawˇ hui k'oˆ ve, Chaw chi teˇ g'aˇ lehˬ, awˬ tehˬ awˬ na chaw hta‸ tiˇ pehˍ shehˍ hpaˇ hpeh‸ ve yoˬ. Laˇ tsuhˇ g'uiˬ awˬ hk'aw lo yawˇ g'a ponˬ htawˇ, hteˇ ve cawˇ ve awˬ ceuˬ lehˬ, yawˇ te‸ chehˇ tuˬ a hkaw-anˬ maˇ piˇ teh‸ teˇ g'aˇ leh teˇ g'aˇ k'oˆ da‸ ve yoˬ. 5 Pawˇlu‸ lehˬ, vuiˬ oˇ ve hta‸ aˬ miˍ awˬ hk'aw lo hpi keu leh, yawˇ awˬ to te‸ chiˉ maˇ hpeh‸ ve yoˬ. 6 Yawˇ lehˬ awˬ to hpo‸ la tuˬ, maˇ heˆ k'o, teˇ cawˬ haˉ paˍ suh-e tuˬ yoˬ teh‸ yawˇ hui dawˇ leh law nyi chehˇ ve yoˬ. Ya‸ hk'aˇ, maw chaweh law nyi chehˇ ve htawˇ, yawˇ te‸ chiˉ maˇ hpeh‸ la ve hta‸ g'a mawˬ htaˇ, yawˇ hui dawˇ hk'aˇ k'aw‸ pa leh, Chaw chi hpaˇ lehˬ, g'uiˬ sha teˇ g'aˇ hpeh‸ ve yoˬ teh‸ k'oˆ ve yoˬ. 7 Chehˇ kuiˬ oˇ ve awˬ paˇ lo, conˇ awˬ hoˉ Puˍbaˍliˆ meh ve teˇ g'aˇ lehˬ miˬ guiˬ teˇ hpaˍ cawˬ ve yoˬ. Yawˇ ngaˬ hui hta‸ hk'a deh‸ ha‸ yuˬ laˇ leh, shehˆ nyi hk'a gaˬ ngaˬ hui hta‸ caˍ laˇ taw laˇ ve yoˬ. 8 Oˇ htaˇ Puˍbaˍliˆ ve awˬ pa lehˬ, kaˆ naˬ leh g'oˇ peˬ awˬ nyi te ve pa taw zuh‸ chehˇ ve yoˬ. Pawˇlu‸ yawˇ geh k'ai leh, bon lawˬ peuˬ hk'aw‸ nawˉ yawˇ awˬ hk'oˆ la‸ sheh taˍ leh, yawˇ hta‸ gu na-e piˇ ve yoˬ. 9 Oˇ hk'e hpeh‸ la ve pa taw, conˇ oˇ ve awˬ hk'aw lo chehˇ ve awˬ kaˍ awˬ nu chaw naˬ teˇ hpaˍ htawˇ laˬ leh, Pawˇlu‸ yawˇ hui hta‸ ka‸ gu na-e piˇ ve yoˬ. 10 Yawˇ hui htawˇ ngaˬ hui hta‸ maˇ maˇ yawˆ yan leh, ngaˬ hui haw lo‸ k'oˍ k'aw‸ ciˉ tawˆ-e ve teˇ yanˇ, ngaˬ hui hk'a loˍ ve teˇ hpaˍ haw lo‸ k'oˍ hk'aw lo keu laˇ ve yoˬ. 11 Shehˆ ha pa gaˬ peuˬ hk'aw‸ nawˉ, Aˍleˍsaˍduˆ venˇ yaˇ ve haw lo‸ k'oˍ teˇ maˬ hta‸ ngaˬ hui k'aw‸ ciˇ tawˆ-e ve yoˬ. Haw lo‸ k'oˍ oˇ ve lehˬ, mvuhˇ kaˆ yanˇ peuˬ htaˇ hk'a gaˬ conˇ oˇ ve teˇ maˬ lo deh taˍ ve yoˬ. Haw lo‸ k'oˍ oˇ ve awˬ han lehˬ, yaˇ cehˬ k'a g'uiˬ sha ve awˬ han hpeh‸ ve yoˬ. 12 Suˇraˍkuˆ venˇ lo gaˬ leh, oˇ kaˬ lo ngaˬ hui shehˆ nyi chehˇ ve yoˬ. 13 Ngaˬ hui oˇ kaˬ lo k'aw‸ tawˆ k'ai leh, htawˇ k'aw‸ nawˬ k'aw‸ te k'ai leh, Reˍgiˍonˍ venˇ lo gaˬ ve yoˬ. Awˬ hk'aw‸ nawˉ teˇ nyi, awˬ hawˉ hpawˇ ve mvuhˇ haw meuˆ la leh, nyiˇ nyi teˇ nyi gaˬ htaˇ, ngaˬ hui Pawˇtaˍyawˇliˆ venˇ lo gaˬ ve yoˬ. 14 Oˇ kaˬ lo ngaˬ hui awˬ viˉ awˬ nyi teˇ hpaˍ hta‸ mawˬ da‸ leh, yawˇ hui geh suhˍ nyi chehˇ tuˬ ngaˬ hui hta‸ lawˬ hkawˉ laˇ ve yoˬ. Ngaˬ hui chi hk'e te k'ai leh, Roˉma‸ venˇ lo gaˬ ve yoˬ. 15 Oˇ kaˬ lo chehˇ ve awˬ viˉ awˬ nyi teˇ hpaˍ lehˬ, ngaˬ hui laˬ chehˇ ve awˬ lawn hta‸ g'a kaˇ htaˇ, Aˍpiˆ tcuh teh‸ k'oˆ ve teˇ kaˬ leh, Saˉ laˆ shehˆ yehˬ teh‸ k'oˆ ve teˇ kaˬ lo hk'a gaˬ laˬ leh, ngaˬ hui hta‸ ca ha‸ yuˬ la ve yoˬ. Pawˇlu‸ yawˇ hui hta‸ g'a mawˬ htaˇ, G'uiˬ sha ve bon hta‸ chiˇ mvuh leh nyi ma awˬ g'aˇ cawˬ la ve yoˬ. 16 Ngaˬ hui Roˉma‸ venˇ lo gaˬ ve teˇ yanˇ, Pawˇlu‸ lehˬ yawˇ hta‸ shaw ve ma‸ yaˇ teˇ g'aˇ geh hk'a geh yawˇ hk'aˇ yawˇ chehˇ tuˬ a hkaw-anˬ g'a ve yoˬ. 17 Shehˆ nyi gaˬ peuˬ hk'aw‸ nawˉ, Pawˇlu‸ lehˬ oˇ kaˬ lo chehˇ ve Yuˇda‸ chaw hui awˬ hk'aw lo awˬ hoˉ teˇ hpaˍ hta‸ kuˬ yuˬ ve yoˬ. Yawˇ hui hpawnˬ la htaˇ, Pawˇlu‸ yawˇ hui hta‸ k'oˆ piˇ ve, Awˬ viˉ awˬ nyi teˇ hpaˍ-oˬ, ngaˬ hui ve chaw ceuˬ hta‸ maˇ k'oˆ, awˬ puˬ awˬ pi hui ve awˬ liˇ hta‸ maˇ k'oˆ, ngaˬ te‸ chiˉ ka‸ maˇ te ya‸ htawˇ, Yeˍruˆsaˍlehnˍ venˇ awˬ hk'aw lo Yuˇda‸ chaw hui ngaˬ hta‸ hpeh yuˬ leh, Roˉma‸ chaw hui ve la‸ sheh awˬ hk'aw lo chiˇ a‸ piˇ ve yoˬ. 18 Roˉma‸ chaw hui ngaˬ hta‸ hk'a deh‸ na nyi peuˬ htaˇ, ngaˬ awˬ hk'aw lo suh keunˍ ve venˇ baˆ maˇ mawˬ ve pa taw, ngaˬ hta‸ hpehˇ laˇ gaˇ ve yoˬ. 19 Ya‸ hk'aˇ, Yuˇda‸ chaw teˇ hpaˍ tawˍ taˍ ve pa taw, Kehˉsaˍ suhˉ taˆ laˇ tuˬ ngaˬ g'a lawˬ ve yoˬ. Ngaˬ chi hk'e g'a te lawˬ ve htawˇ, ngaˬ ve chaw ceuˬ awˬ hk'oˆ ngaˬ venˇ baˆ taˍ ve maˇ heˆ. 20 Chi hta‸ pa taw, nawˬ hui hta‸ mawˬ leh tawˇ g'a yaw da‸ tuˬ, ngaˬ nawˬ hui hta‸ kuˬ ve yoˬ. Awˬ lawn k'o, Iˉsaˍreˍlaˆ chaw ceuˬ dawˇ law taˍ ve teˇ ceuˬ hta‸ pa taw sho caˆ chi hpeh taˍ ve hta‸ ngaˬ g'a hkanˍ ve yoˬ teh‸, Pawˇlu‸ yawˇ hui hta‸ k'oˆ piˇ ve yoˬ. 21 Oˇ htaˇ, yawˇ hui k'aw‸ k'oˆ piˇ ve, Nawˬ ve awˬ lawn Yuˇda‸ mvuhˇ miˬ lo laˬ ve li‸ hta‸ ngaˬ hui maˇ g'a jaw. Awˬ viˉ awˬ nyi teˇ hpaˍ teˇ g'aˇ ka‸ nawˬ awˬ lawn maˇ da‸ ve ca k'oˆ ca k'aoˍ la ve ka‸ maˇ cawˬ. 22 Ya‸ hk'aˇ, teˇ kaˬ le le lo chehˇ ve chaw hui lehˬ, shu hta‸ hpaˆ da‸ k'ai ve chaw awˬ moˍ chi hta‸ venˇ baˆ taˍ chehˇ ve awˬ lawn ngaˬ hui shiˍ ve pa taw, nawˬ dawˇ taˍ ve teˇ hpaˍ nawˬ k'oˆ laˇ ve hta‸ ngaˬ hui kaˇ gaˇ ve yoˬ teh‸ k'aw‸ k'oˆ piˇ ve yoˬ. 23 Hk'e te leh, yawˇ hui awˬ nyi tinˍ da‸ ve yoˬ. Tinˍ da‸ taˍ ve awˬ nyi gaˬ la htaˇ, Pawˇlu‸ chehˇ taˍ kuiˬ lo chaw maˇ maˇ hpawnˬ laˬ ve yoˬ. Oˇ htaˇ yawˇ lehˬ, mvuhˇ shawˉ te leh mvuhˇ hpeu‸ hk'a gaˬ G'uiˬ sha ve mvuhˇ miˬ awˬ lawn shaˉ hkiˆ hkanˍ leh, yawˇ hui Yeˍsuˆ hta‸ yonˍ la tuˬ Moˉseˍ ve awˬ liˇ tawˇ hkawˇ leh tcuh kaˍ paˍ hui ve li‸ hta‸ cuˇ ve awˬ hk'aw lo, yawˇ hui hta‸ hpeu‸ maˍ piˇ ve yoˬ. 24 Yawˇ maˍ piˇ ve tawˇ hkawˇ hta‸ chaw teˇ hpaˍ hpaˍ yonˍ la ve, ya‸ hk'aˇ teˇ hpaˍ hpaˍ maˇ yonˍ. 25 Yawˇ hui teˇ g'aˇ leh teˇ g'aˇ maˇ hawˍ da‸ leh, tawˆ k'ai ve yoˬ. Ya‸ hk'aˇ, yawˇ hui maˇ tawˆ k'ai sheˍ awˬ g'uˇ suhˍ Pawˇlu‸ yawˇ hui hta‸ tawˇ chi teˇ hkawˇ k'oˆ piˇ ve, Da‸ ve kehˬ ve Awˬ ha hpu lehˬ, tcuh kaˍ paˍ Iˉsaˍyaˆ hta‸ cuˇ leh nawˬ hui ve awˬ puˍ awˬ pi hui hta‸ k'oˆ piˇ taˍ ve tawˇ hkawˇ lehˬ, cawˇ tehˬ ve yoˬ. Tawˇ hkawˇ oˇ ve lehˬ, 26 Chaw chi teˇ ceuˬ geh k'ai leh chi hk'e k'oˆ piˇ-oˆ. Nawˬ hui awˬ tehˬ awˬ na g'a kaˇ ve htawˇ, na maˇ g'a taˍ. Nawˬ hui awˬ tehˬ awˬ na g'a mawˬ ve htawˇ, maˇ shiˍ taˍ. 27 Awˬ lawn k'o, yawˇ hui mehˆ shiˍ maˇ g'a mawˬ tuˬ, naˍ paw maˇ g'a kaˇ tuˬ, nyi ma hk'aw lo maˇ g'a shiˍ tuˬ, nyi ma maˇ k'aw‸ pa leh ngaˬ yawˇ hui hta‸ maˇ g'a gu na-e tuˬ, chaw chi teˇ ceuˬ ve nyi ma heh leh, yawˇ hui ve naˍ paw maˇ na gaˇ leh, yawˇ hui ve mehˆ shiˍ me‸ taˍ ve yoˬ. teh‸ k'oˆ taˍ ve yoˬ. 28 Hk'e te leh, G'uiˬ sha ve htaiˍ hk'aw‸ ve chi, buiˇ shaˆ aˉ naˆ chaw hui hta‸ yawˇ piˇ k'ai leh, yawˇ hui na tuˬ yoˬ teh‸ nawˬ hui shiˍ-o‸ teh‸, Pawˇlu‸ k'oˆ piˇ ve yoˬ. 30 Pawˇlu‸ lehˬ, yawˇ ngaˍ taˍ ve yehˬ awˬ hk'aw lo nyiˇ hk'aw‸ chehˇ leh, yawˇ geh hk'a laˬ ve chaw hk'a peu-eˬ hta‸ ha‸ yuˬ ve yoˬ. 31 Yawˇ nyi ma ha‸ hanˉ ve awˬ hk'aw lo G'uiˬ sha ve mvuhˇ miˬ awˬ lawn bon maˍ leh, Jawˇ mawˇ Yeˍsuˆ Hkri‸ ve awˬ lawn maˍ piˇ ve teˇ yanˇ, a shu ka‸ yawˇ hta‸ maˇ tawˍ taˍ.

Roˉma‸ 1

1 Ngaˬ lehˬ Yeˍsuˆ Hkri‸ ve awˬ ceˬ Pawˇlu‸ yoˬ. Yawˇ ve tcuh yaˇ te tuˬ G'uiˬ sha ngaˬ hta‸ kuˬ yuˬ laˇ peuˬ. Ha lehˬ ve bon hkawˇ k'aoˍ maˍ piˇ tuˬ G'uiˬ sha ngaˬ hta‸ fuiˍ teh taˍ peuˬ. 2 Ha lehˬ ve bon hkawˇ chi lehˬ, G'uiˬ sha pe‸ laˇ tuˬ yoˬ teh‸ aˬ sho-eˬ htaˇ ka‸ yawˇ k'oˆ taˍ ve yoˬ. Yawˇ ve tcuh kaˍ paˍ teˇ hpaˍ hta‸ cuˇ leh Li‸ hpu hk'aw lo bvuh‸ tcuh taˍ ve yoˬ. 3 Ha lehˬ ve bon hkawˇ chi lehˬ, yawˇ ve Yaˇ hpu awˬ lawn hta‸ k'oˆ ve yoˬ. Yaˇ hpu oˇ ve lehˬ, awˬ suhˍ awˬ shaˍ hpawˇ k'o, Daˍviˆ ve awˬ ceuˬ awˬ hk'aˇ hpeh‸ ve yoˬ. 4 Yawˇ lehˬ ngaˬ ve Yaˇ hpu yoˬ teh‸, kanˇ paˆ awˬ hk'aw lo G'uiˬ sha hpeu‸ maˍ laˇ peuˬ. Awˬ lawn k'o, da‸ ve kehˬ ve Awˬ ha hpu yawˇ hta‸ suh kuiˬ lo k'aw‸ te‸ tu la piˇ ve hta‸ pa taw yoˬ. Yawˇ lehˬ ngaˬ hui ve Jawˇmawˇ Yeˍsuˆ Hkri‸ yoˬ. 5 Yawˇ hta‸ pa taw, G'uiˬ sha ve awˬ bon hta‸ ka‸, yawˇ ve tcuh yaˇ te tuˬ ve kanˉ hta‸ ka‸ ngaˬ hui g'a taˍ peuˬ. Kanˉ chi ve lehˬ, chaw ceuˬ hk'a peu-eˬ yonˍ leh na yuˬ tuˬ, yawˇ ve awˬ meh awˬ hawˉ lo ngaˬ hui te ve yoˬ. 6 Nawˬ hui htawˇ Yeˍsuˆ Hkri‸ kuˬ yuˬ taˍ ve chaw hui hpeh‸ ve pa taw, chaw ceuˬ oˇ ve awˬ hk'aw lo nawˬ hui lo‸-e taˍ ve yoˬ. 7 G'uiˬ sha ha‸ leh, Hkri‸ yaˇ hpeh‸ la tuˬ kuˬ yuˬ taˍ ve Roˉma‸ venˇ hk'aw chehˇ ve nawˬ hui hk'a peu-eˬ hta‸ ngaˬ li‸ bvuh‸ laˇ ve yoˬ. Ngaˬ hui ve Awˬ pa G'uiˬ sha leh Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 8 Awˉ lawˉ teˇ ceuˬ lehˬ, miˬ guiˬ teˇ kaˬ le le lo nawˬ hui yonˍ ve awˬ lawn bvuhˬ k'ai ve hta‸ pa taw, nawˬ hui hk'a peu-eˬ awˬ pon ngaˬ Yeˍsuˆ Hkri‸ hta‸ cuˇ leh ngaˬ ve G'uiˬ sha hta‸ chiˇ mvuh ve yoˬ. 9 Nawˬ hui awˬ pon hk'aˬ htaˆ ka‸ ngaˬ bon lawˬ chehˇ ve hta‸ ngaˬ ve G'uiˬ sha shaˉ hkiˆ hkanˍ hpeh‸ ve yoˬ. Yawˇ awˬ pon ngaˬ ve nyi ma awˬ tawˬ hk'a gaˬ kanˉ te leh, yawˇ ve Yaˇ hpu awˬ lawn ha lehˬ ve bon hkawˇ hta‸ k'aoˍ maˍ chehˇ ve yoˬ. 10 Ngaˬ bon lawˬ ve lehˬ, G'uiˬ sha ve a loˍ hta‸ pa taw ya‸ k'aw teˇ caˆ caˆ tawˆ la leh nawˬ hui geh ngaˬ g'a gaˬ la tuˬ, hk'aˬ htaˆ ka‸ ngaˬ lawˬ chehˇ ve yoˬ. 11 Nawˬ hui hta‸ ngaˬ mawˬ gaˇ jaˇ ve yoˬ. G'a mawˬ da‸ ve k'o, nawˬ hui nyi ma yeˬ la tuˬ, Awˬ ha hpu ve la‸ shawnˍ teˇ ceuˬ ceuˬ nawˬ hui hta‸ pehˬ laˇ gaˇ ve yoˬ. 12 Ngaˬ chi hk'e k'oˆ ve lehˬ, ngaˬ yonˍ ve leh nawˬ hui yonˍ ve awˬ hk'aw lo, teˇ g'aˇ hta‸ teˇ g'aˇ awˬ g'aˇ piˇ da‸ tuˬ ve hta‸ k'oˆ gaˇ ve yoˬ. 13 Awˬ viˉ awˬ nyi teˇ hpaˍ-oˬ, awˬ kaˍ awˬ nu buiˇ shaˆ aˉ naˆ chaw hui geh ngaˬ awˬ shiˍ g'a taˍ ve hk'e, nawˬ hui geh htawˇ ngaˬ awˬ shiˍ teˇ ceuˬ ceuˬ hta‸ g'a tuˬ ve, nawˬ hui geh laˬ tuˬ ngaˬ laiˉ pawˆ dawˇ cheˆ taˍ ve awˬ lawn nawˬ hui hta‸ shiˍ piˇ gaˇ ve yoˬ. Ya‸ hk'aˇ, chi beu‸ hk'a gaˬ tawˍ taˍ tuˬ cawˬ ve yoˬ. 14 Heˍlaˍsaˆ chaw maˇ k'oˆ, chaw hteunˍ maˇ k'oˆ, cuˇ yiˍ cawˬ ve chaw maˇ k'oˆ, cuˇ yiˍ maˇ cawˬ ve chaw maˇ k'oˆ, chaw ceuˬ chi ma ve hta‸ ngaˬ shaiˍ piˇ tuˬ jeˬ cawˬ taˍ ve yoˬ. 15 Hk'e te leh, puiˉ ve hpeh‸ ve hk'e nawˬ hui Roˉma‸ venˇ yaˇ hui hta‸ ka‸ ha lehˬ ve bon hkawˇ maˍ piˇ tuˬ ngaˬ gu taˍ peuˬ. 16 Ha lehˬ ve bon hkawˇ maˍ tuˬ ngaˬ maˇ ya‸ taw. Awˬ lawn k'o, hk'a yonˍ ve chaw teˇ g'aˇ le le hta‸ htaiˍ hk'aw‸ piˇ tuˬ ha lehˬ ve bon hkawˇ chi G'uiˬ sha ve kanˇ paˆ hpeh‸ ve yoˬ. Awˉ lawˉ Yuˇda‸ chaw hui, hk'aw‸ nawˉ Heˍlaˍsaˆ chaw hui hta‸ htaiˍ hk'aw‸ piˇ ve yoˬ. 17 Ha lehˬ ve bon hkawˇ oˇ ve awˬ hk'aw lo, yonˍ ve awˬ hk'oˆ k'aw‸ yonˍ maˇ la tuˬ, G'uiˬ sha ve hteˇ ve cawˇ ve awˬ ceuˬ hta‸ hpeu‸ maˍ laˇ ve yoˬ. Li‸ hpu hk'aw bvuh‸ taˍ ve hk'e, Hteˇ ve cawˇ ve chaw lehˬ yonˍ ve hta‸ pa taw co ha g'a te‸ tuˬ yoˬ teh‸ k'oˆ taˍ ve yoˬ. 18 G'uiˬ sha hta‸ maˇ yonˍ leh maˇ hteˇ maˇ cawˇ ve hta‸ te ve chaw hui awˬ hk'oˆ hta‸, G'uiˬ sha nyi ma zuhˆ ve teˇ ceuˬ mvuhˇ naw ma hk'oˆ lo tawˆ la ve hta‸ g'a mawˬ ve yoˬ. Chaw oˇ ve teˇ hpaˍ lehˬ, maˇ hteˇ maˇ cawˇ ve hta‸ te leh, hteˇ ve cawˇ ve hta‸ tawˍ taˍ tsuhˇ taˍ ve yoˬ. 19 Awˬ lawn k'o, G'uiˬ sha ve awˬ lawn teˇ hpaˍ hta‸ yawˇ hui shiˍ hpeh‸ ve hk'e, hk'a tawˍ lehˆ g'a shiˍ g'a mawˬ peuˬ. G'uiˬ sha yawˇ hui hta‸ hk'a tawˍ lehˆ hpeu‸ maˍ piˇ peuˬ ve hta‸ pa taw yoˬ. 20 Hk'aˬ hk'e le teh‸ k'oˆ k'o, G'uiˬ sha hpanˍ taˍ te taˍ ve awˬ ceuˬ teˇ hpaˍ hta‸ g'a mawˬ ve hta‸ pa taw, G'uiˬ sha awˬ lawn mehˆ mawˬ maˇ hpeh‸ ve teˇ hpaˍ hta‸ g'a k'aw‸ mawˬ ve yoˬ. Yawˇ te taˍ ve teˇ hpaˍ hta‸ pa taw, co co taiˍ taiˍ G'uiˬ sha ve kanˇ paˆ hta‸ ka‸, yawˇ co co taiˍ taiˍ G'uiˬ sha hpeh‸ ve hta‸ ka‸, yawˇ hui dawˇ shiˍ dawˇ mawˬ la ve yoˬ. Chi hta‸ pa taw, maˇ shiˍ teh‸ yawˇ hui k'aw‸ k'oˆ maˇ hpeh‸. 21 Awˬ lawn k'o, chaw oˇ ve teˇ hpaˍ lehˬ, G'uiˬ sha hta‸ shiˍ ve ka‸, G'uiˬ sha hta‸ chiˇ uiˍ chiˇ mvuh keunˍ ve hk'e maˇ chiˇ uiˍ maˇ chiˇ mvuh. Yawˇ ve awˬ bon hta‸ htawˇ maˇ shiˍ maˇ nawˇ. Yawˇ hui ve dawˇ hk'aˇ teˇ hpaˍ lehˬ, tcuhˉ kuiˬ te‸ chiˉ maˇ k'aw‸ cawˬ. Yawˇ hui ve nyi ma hk'aw maˇ dawˇ nyi puiˉ leh naˆ ho‸ lehˍ hpeh‸ sheˬ ve yoˬ. 22 A shu yawˇ awˬ to hta‸, Ngaˬ cuˇ yiˍ cawˬ ve yoˬ teh‸ k'oˆ ve htawˇ, yawˇ hui chaw k'aˍ chaw buiˬ hpeh‸ la ve yoˬ. 23 Maˇ luˬ maˇ suh puiˉ ve G'uiˬ sha ve awˬ me‸ awˬ hponˇ hta‸ yawˇ hui maˇ ha‸ yuˬ. Ya‸ hk'aˇ, luˬ puiˉ suh puiˉ ve chaw, ngaˆ, hkui sheh la‸ sheh awˍ lehˇ cawˬ ve to nuˇ to shaˆ, vuiˬ, chi teˇ hpaˍ ve shaˉ ho‸ hta‸ yawˇ hui ha‸ yuˬ ve yoˬ. 24 Chi hta‸ pa taw, yawˇ hui ve nyi ma hk'aw cha‸ cha‸ chiˆ chiˆ ve teˇ hpaˍ hta‸ te gaˇ ve hk'a shuˍ shuˍ te tuˬ, G'uiˬ sha yawˇ hui hta‸ hpehˇ piˇ ve yoˬ. Hk'e te leh, yawˇ hui te g'aˇ ve awˬ to hta‸ teˇ g'aˇ awˬ haiˬ te da‸ ve yoˬ. 25 Awˬ lawn k'o, G'uiˬ sha ve awˬ lawn hteˇ ve cawˇ ve teˇ hpaˍ hta‸ yawˇ hui maˇ ha‸ yuˬ. Ya‸ hk'aˇ, maˇ hteˇ maˇ cawˇ ve awˬ ceuˬ hta‸ ha‸ yuˬ ve yoˬ. Te hpanˍ shehˍ hpaˇ hta‸ yawˇ hui baˬ taˍ leh, te hpanˍ taˍ ve teˇ hpaˍ hta‸ oˉ k'oˍ pui leh, oˇ ve teˇ hpaˍ awˬ pon kanˉ te ve yoˬ. Te hpanˍ shehˍ hpaˇ hta‸ co co taiˍ taiˍ chiˇ mvuh cawˇ ve yoˬ. A menˬ. 26 Chi hta‸ pa taw, yawˇ hui haiˬ ve hta‸ te gaˇ jaˇ ve nyi ma cawˬ ve hk'e te tuˬ, G'uiˬ sha yawˇ hui hta‸ hpehˇ piˇ ve yoˬ. Hk'aˬ hk'e le teh‸ k'oˆ k'o, yawˇ hui ve yaˇ miˇ teˇ hpaˍ lehˬ, te keunˍ ve awˬ liˇ hta‸ baˬ taˉ leh, te maˇ keunˍ ve awˬ liˇ hta‸ te ve yoˬ. 27 Hawˉ hk'aˆ teˇ hpaˍ htawˇ, oˇ ve hk'a shuˍ shuˍ te ve yoˬ. Yaˇ miˇ teˇ hpaˍ geh yawˇ hui maˇ k'aw‸ zuh‸. Hawˉ hk'aˆ chawˇ hawˉ hk'aˆ peh‸ ve tzuhˆ ve awˬ hk'aˇ suh te da‸ gaˇ jaˇ ve yoˬ. Yawˇ hui teˇ g'aˇ leh teˇ g'aˇ ya‸ taw tuˬ uiˍ jaˇ ve awˬ ceuˬ hta‸ te da‸ leh, venˇ baˆ hta‸ keunˍ da‸ ve awˬ hpfuhˇ a shu yawˇ awˬ to awˬ hk'aw lo g'a hkanˍ ve yoˬ. 28 Yawˇ hui G'uiˬ sha hta‸ shiˍ gaˇ ve nyi ma maˇ cawˬ. Hk'e te leh, maˇ shiˍ puiˉ ve nyi ma cawˬ la leh, maˇ keunˍ maˇ cawˇ ve kanˉ teˇ hpaˍ hta‸ te tuˬ, G'uiˬ sha yawˇ hui hta‸ hpehˇ piˇ ve yoˬ. 29 Yawˇ hui lehˬ, maˇ hteˇ maˇ cawˇ ve, haiˬ ve, shu mawˇ shu jeˬ hta‸ sheˉ lai ve, shu hta‸ naˬ tuˬ te gaˇ ve teˇ hpaˍ, yawˇ hui awˬ hk'aw lo hk'a biˇ cawˬ ve yoˬ. Shu hta‸ hkawehˉ puiˉ ve, shu hta‸ tiˇ pehˍ ve, shu hta‸ ya‸ gaˇ puiˉ ve, shu hta‸ heˍ puiˉ ve, shu hta‸ nyi bawˬ ve teˇ hpaˍ htawˇ hk'a biˇ cawˬ ve yoˬ. 30 Yawˇ hui lehˬ, shu hta‸ hk'awˇ deˇ ve chaw, shu hta‸ hk'aiˉ ve chaw, G'uiˬ sha hta‸ canˇ ve chaw, caˆ muiˬ puiˉ ve chaw, nyi ma uiˍ ve mvuh ve chaw, a shu yawˇ awˬ to hta‸ taˍ uiˍ taˍ mvuh ve chaw, sho‸ sha‸ tuˬ te puiˉ ve chaw leh, awˬ pa awˬ e hkawˇ hta‸ maˇ na yuˬ puiˉ ve chaw teˇ hpaˍ hpeh‸ ve yoˬ. 31 Yawˇ hui lehˬ maˇ dawˇ shiˍ puiˉ, ka ti‸ maˇ yeˬ puiˉ, shu hta‸ ha‸ cawˇ ve hk'e maˇ ha‸ puiˉ leh, shu hta‸ maˇ ha k'aˉ puiˉ ve chaw teˇ hpaˍ hpeh‸ ve yoˬ. 32 Chi teˇ hpaˍ hta‸ hk'a te ve chaw hui lehˬ, suh keunˍ ve yoˬ teh‸ G'uiˬ sha k'oˆ taˍ ve hta‸ yawˇ hui shiˍ taˍ ve yoˬ. Chi hk'e shiˍ taˍ ve htawˇ, yawˇ hui awˬ to te chehˇ ve awˬ hk'oˆ ka‸, oˇ hk'e te ve chaw hui hta‸ yawˇ hui nyi ma cawˇ jaˇ ve yoˬ.

Roˉma‸ 2

1 Hk'e te leh, shu hta‸ venˇ baˆ taˍ ve chaw-oˬ, nawˬ awˬ to ka‸ ca k'oˆ kuiˬ maˇ cawˬ. Awˬ lawn k'o, shu hta‸ nawˬ venˇ baˆ taˍ ve hk'e, nawˬ awˬ to ka‸ te chehˇ ve yoˬ. Hk'e te leh shu hta‸ venˇ baˆ taˍ ve teˇ yanˇ, nawˬ awˬ to hta‸ ka‸ venˇ baˆ k'aw‸ taˍ chehˇ ve yoˬ. 2 Oˇ hk'e te ve chaw teˇ hpaˍ hta‸ G'uiˬ sha ciˍ yanˍ ve lehˬ, hteˇ jaˇ cawˇ jaˇ ve teh‸ ngaˬ hui shiˍ ve yoˬ. 3 Shu awˬ hk'oˆ nawˬ venˇ baˆ taˍ ve hk'e nawˬ awˬ to ka‸ te chehˇ ve k'o, G'uiˬ sha ciˍ yanˍ ve hta‸ nawˬ g'a ponˬ tuˬ teh‸ dawˇ ve laˇ. 4 G'uiˬ sha yawˇ ve paw sha jaˇ ve awˬ bon te laˇ ve, yeunˇ hkanˍ ve leh, nyi ma dawˇ zuhˬ gaˇ zuhˬ ve teˇ hpaˍ hta‸ nawˬ maˇ shawˍ maˇ caˆ te ve laˇ. G'uiˬ sha ve awˬ bon lehˬ, nawˬ venˇ baˆ hta‸ dawˇ hpfuhˆ tuˬ sheh k'ai laˇ ve hta‸ nawˬ maˇ shiˍ laˇ. 5 Nawˬ nyi ma heh leh venˇ baˆ hta‸ maˇ dawˇ hpfuhˆ ve hta‸ pa taw, G'uiˬ sha nyi ma zuhˆ ve awˬ nyi teˇ nyi awˬ pon, yawˇ nyi ma zuhˆ ve teˇ ceuˬ hta‸ nawˬ shaw hpoˆ chehˇ taˍ ve yoˬ. Oˇ ve teˇ nyi gaˬ k'o, G'uiˬ sha hteˇ lehˍ cawˇ lehˍ tawˇ jehˬ ve hta‸ hk'a tawˍ lehˆ g'a mawˬ tuˬ yoˬ. 6 G'uiˬ sha lehˬ, chaw teˇ g'aˇ le le a shu yawˇ te ve kanˉ hta‸ keunˍ da‸ ve hk'e yawˇ hui hta‸ piˇ tuˬ yoˬ. 7 Yeunˇ hkanˍ leh da‸ ve kanˉ te ve awˬ hk'aw lo, awˬ me‸ awˬ hponˇ, da‸ ve awˬ meh leh, maˇ luˬ maˇ sheˆ puiˉ ve teˇ ceuˬ, chi teˇ hpaˍ hta‸ ca ve chaw hui hta‸ yawˇ co ti‸ ha ti‸ piˇ tuˬ yoˬ. 8 Ya‸ hk'aˇ, tawˇ g'awˬ da‸ ve, hteˇ ve cawˇ ve tawˇ hkawˇ hta‸ maˇ na yuˬ leh, maˇ hteˇ maˇ cawˇ ve hta‸ na yuˬ ve chaw hui awˬ hk'oˆ, hehnˇ jaˇ ve nyi ma zuhˆ ve teˇ ceuˬ gaˬ la tuˬ yoˬ. 9 Haiˬ ve hta‸ hk'a te ve chaw hui hk'a peu-eˬ awˬ hk'oˆ, tu‸ ve hkanˍ ve leh dawˇ tui‸ gaˇ tui‸ ve gaˬ la tuˬ yoˬ. Awˉ lawˉ Yuˇda‸ chaw hui, hk'aw‸ nawˉ Heˍlaˍsaˆ chaw hui awˬ hk'oˆ gaˬ la tuˬ yoˬ. 10 Ya‸ hk'aˇ, da‸ ve hta‸ hk'a te ve chaw hui hk'a peu-eˬ lehˬ, awˬ me‸ awˬ hponˇ hta‸ maˇ k'oˆ, da‸ ve awˬ meh hta‸ maˇ k'oˆ, dawˇ sha gaˇ sha ve teˇ ceuˬ hta‸ maˇ k'oˆ, chi teˇ hpaˍ hta‸ g'a tuˬ yoˬ. Awˉ lawˉ Yuˇda‸ chaw hui, hk'aw‸ nawˉ Heˍlaˍsaˆ chaw hui g'a tuˬ yoˬ. 11 Awˬ lawn k'o, G'uiˬ sha lehˬ chaw mehˆ hpfuhˇ hta‸ maˇ nyi. 12 Awˬ liˇ tawˇ hkawˇ maˇ cawˬ leh venˇ baˆ hk'a te ve chaw hui lehˬ, awˬ liˇ tawˇ hkawˇ hta‸ maˇ caˉ da‸ ve awˬ hk'aw lo g'a luˬ g'a sheˆ tuˬ yoˬ. Awˬ liˇ tawˇ hkawˇ cawˬ taˍ leh venˇ baˆ hk'a te ve chaw hui lehˬ, awˬ liˇ tawˇ hkawˇ awˬ hawˉ lo tawˇ jehˬ ve hta‸ g'a hkanˍ tuˬ yoˬ. 13 Awˬ lawn k'o, awˬ liˇ tawˇ hkawˇ hta‸ kaˇ ve chaw hui lehˬ, G'uiˬ sha mehˆ g'uˇ suhˍ hteˇ ve cawˇ ve chaw hpeh‸ ve maˇ heˆ. Awˬ liˇ tawˇ hkawˇ hta‸ na yuˬ ve chaw hui ceh, hteˇ ve cawˇ ve chaw hpeh‸ ve yoˬ. 14 Awˬ liˇ tawˇ hkawˇ maˇ cawˬ ve buiˇ shaˆ aˉ naˆ chaw hui lehˬ, awˬ liˇ tawˇ hkawˇ maˇ cawˬ ve ka‸ yawˇ hui hk'aˇ yawˇ hui dawˇ shiˍ leh awˬ liˇ tawˇ hkawˇ k'oˆ taˍ ve hk'e te ve k'o, yawˇ hui ve nyi ma awˬ hk'aw lo awˬ liˇ tawˇ hkawˇ cawˬ taˍ ve hk'e yoˬ. 15 Yawˇ hui ve nyi ma awˬ hk'aw lo awˬ liˇ tawˇ hkawˇ k'oˆ taˍ ve hk'e bvuh‸ taˍ ve hta‸ ngaˬ hui g'a mawˬ g'a shiˍ ve yoˬ. Yawˇ hui ve shiˍ puiˉ ve nyi ma htawˇ shaˉ hkiˆ hkanˍ leh, yawˇ hui ve nyi ma hk'aw dawˇ hk'aˇ teˇ hpaˍ lehˬ, venˇ baˆ cawˬ ve teh‸ k'oˆ ve, maˇ heˆ k'o venˇ baˆ maˇ cawˬ teh‸ k'oˆ ve yoˬ. 16 Ngaˬ ha lehˬ ve bon hkawˇ maˍ piˇ ve hk'a shuˍ shuˍ, G'uiˬ sha lehˬ Yeˍsuˆ Hkri‸ hta‸ cuˇ leh, chaw yaˇ hui nyi ma hk'aw faˉ taˍ ve teˇ hpaˍ hta‸ tawˇ jehˬ ve awˬ nyi awˬ hk'aw lo, awˬ ceuˬ chi teˇ hpaˍ hpeh‸ la tuˬ yoˬ. 17 Nawˬ Yuˇda‸ chaw teh‸ k'oˆ leh, awˬ liˇ tawˇ hkawˇ hta‸ g'aˇ va leh, G'uiˬ sha ve awˬ lawn hta‸ nawˬ nyi ma uiˍ chaweh te ve yoˬ. 18 Nawˬ awˬ liˇ tawˇ hkawˇ hta‸ g'a henˇ ve pa taw, G'uiˬ sha ve a loˍ hta‸ shiˍ ve chaw leh, da‸ jaˇ ve teˇ hpaˍ hta‸ fuiˍ puiˉ pehˬ puiˉ ve chaw hpeh‸ ve teh‸ k'oˆ ve yoˬ. 19 Nawˬ lehˬ mehˆ cuˉ ve chaw hui hta‸ sheh k'ai shehˍ hpaˇ hpeh‸ leh, naˆ ho‸ ve awˬ hk'aw lo chehˇ ve chaw hui hta‸ awˬ g'euˆ ba piˇ shehˍ hpaˇ hpeh‸ ve teh‸ nawˬ yonˍ ve yoˬ. 20 Nawˬ lehˬ, maˇ dawˇ nyi puiˉ ve chaw teˇ hpaˍ hta‸ sheh k'ai shehˍ hpaˇ te leh, yaˇ ehˉ teˇ hpaˍ hta‸ maˍ piˇ shehˍ hpaˇ te ve teh‸ nawˬ dawˇ taˍ ve yoˬ. Awˬ liˇ tawˇ hkawˇ awˬ hk'aw lo cuˇ yiˍ hta‸ maˇ k'oˆ, hteˇ ve cawˇ ve hta‸ maˇ k'oˆ, nawˬ cawˬ ve teh‸ dawˇ taˍ ve yoˬ. 21 Hk'e te leh, nawˬ shu hta‸ maˍ piˇ chehˇ ve ka‸, nawˬ awˬ to hta‸ maˇ maˍ leh laˇ. Shu ve mawˇ hta‸ taˇ hk'awˇ teh‸ nawˬ maˍ piˇ chehˇ ve ka‸, nawˬ awˬ to shu ve mawˇ hta‸ hk'awˇ ve laˇ. 22 Haˉ chawˇ haˉ paˆ taˇ te teh‸ nawˬ maˍ piˇ chehˇ ve ka‸, nawˬ awˬ to haˉ chawˇ haˉ paˆ te ve laˇ. Shaˉ ho‸ hta‸ nawˬ cha‸ naˬ chehˇ ve ka‸, shaˉ ho‸ yehˬ hk'aw cawˬ ve mawˇ hta‸ nawˬ hk'awˇ yuˬ ve laˇ. 23 Awˬ liˇ tawˇ hkawˇ hta‸ nawˬ g'aˇ va leh nyi ma uiˍ ve ka‸, awˬ liˇ tawˇ hkawˇ hta‸ nawˬ k'aw‸ te ya‸ leh G'uiˬ sha ve awˬ me‸ awˬ hponˇ hta‸ te luˬ ve laˇ. 24 Awˬ lawn k'o, Li‸ hpu hk'aw bvuh‸ taˍ ve hk'e, buiˇ shaˆ aˉ naˆ chaw hui lehˬ, nawˬ hui hta‸ pa taw G'uiˬ sha ve awˬ meh hta‸ maˇ shawˍ maˇ caˆ k'oˆ chehˇ ve yoˬ. 25 Nawˬ awˬ liˇ tawˇ hkawˇ hta‸ na yuˬ ve k'o, awˬ guiˬ meuˇ shoˍ ve teˇ ceuˬ lehˬ awˬ bon cawˬ ve yoˬ. Ya‸ hk'aˇ, nawˬ awˬ liˇ tawˇ hkawˇ hta‸ ya‸ ve k'o, nawˬ awˬ guiˬ meuˇ shoˍ ve lehˬ, awˬ guiˬ meuˇ maˇ shoˍ ve hk'e k'aw‸ hpeh‸ la ve yoˬ. 26 Hk'e te leh, awˬ guiˬ meuˇ maˇ shoˍ ve chaw lehˬ, awˬ liˇ tawˇ hkawˇ hta‸ na yuˬ ve k'o, yawˇ awˬ guiˬ meuˇ maˇ shoˍ ve ka‸, awˬ guiˬ meuˇ shoˍ ve chaw hk'e hpeh‸ ve maˇ heˆ laˇ. 27 Bvuh‸ taˍ ve awˬ liˇ tawˇ hkawˇ leh awˬ guiˬ meuˇ shoˍ ve awˬ liˇ nawˬ cawˬ ve ka‸, nawˬ awˬ liˇ tawˇ hkawˇ hta‸ te ya‸ ve yoˬ. Hk'e te leh, awˬ suhˍ awˬ shaˍ hpawˇ awˬ guiˬ meuˇ maˇ shoˍ ve ka‸, awˬ liˇ tawˇ hkawˇ hta‸ na yuˬ ve chaw teˇ hpaˍ lehˬ, nawˬ hta‸ venˇ baˆ taˍ laˇ tuˬ maˇ heˆ laˇ. 28 Awˬ lawn k'o, awˬ hta‸ hpawˇ ceh Yuˇda‸ chaw hpeh‸ ve teˇ g'aˇ lehˬ, awˬ tehˬ awˬ na Yuˇda‸ chaw maˇ heˆ. Awˬ hta‸ hpawˇ ceh awˬ guiˬ meuˇ shoˍ ve teˇ ceuˬ lehˬ, awˬ tehˬ awˬ na awˬ guiˬ meuˇ shoˍ ve teˇ ceuˬ maˇ heˆ. 29 Awˬ hk'aw hpawˇ Yuˇda‸ chaw hpeh‸ ve teˇ g'aˇ lehˬ, awˬ tehˬ awˬ na Yuˇda‸ chaw hpeh‸ ve yoˬ. Awˬ tehˬ awˬ na awˬ guiˬ meuˇ shoˍ ve teˇ ceuˬ lehˬ, awˬ liˇ tawˇ hkawˇ ve li‸ mehˆ biˇ la tuˬ ceh shoˍ ve maˇ heˆ. Co ha leh nyi ma awˬ hk'aw shoˍ ve teˇ ceuˬ hpeh‸ ve yoˬ. Oˇ hk'e ve chaw hta‸ chaw yaˇ maˇ chiˇ mvuh htawˇ G'uiˬ sha chiˇ mvuh ve yoˬ.

Roˉma‸ 3

1 Hk'e te leh Yuˇda‸ chaw teˇ ceuˬ lehˬ, shu a‸ kehˉ awˬ bon hk'aˬ hk'e cawˬ leuˉ ve le. Awˬ guiˬ meuˇ shoˍ ve teˇ ceuˬ lehˬ, aˬ hto‸ ma awˬ bon cawˬ le. 2 Teˇ ceuˬ le le awˬ hk'aw lo awˬ bon cawˬ maˇ ve yoˬ. Awˉ lawˉ teˇ ceuˬ lehˬ, G'uiˬ sha yawˇ ve tawˇ hkawˇ teˇ hpaˍ Yuˇda‸ chaw hui hta‸ piˇ ve yoˬ. 3 Yawˇ hui teˇ hpaˍ hpaˍ ka ti‸ maˇ yeˬ htawˇ, aˬ hto‸ ma k'oˆ tuˬ cawˬ le. Yawˇ hui ka ti‸ maˇ yeˬ ve pa taw, G'uiˬ sha ve ka ti‸ hta‸ te luˬ ve laˇ. Maˇ te luˬ taˬ. 4 Chaw hk'a peu-eˬ heˍ paˍ hpeh‸ ve htawˇ G'uiˬ sha lehˬ hteˇ ve yoˬ. Li‸ hpu hk'aw bvuh‸ taˍ ve hk'e, Nawˬ lehˬ hteˇ ve cawˇ ve yoˬ teh‸, nawˬ ve tawˇ hkawˇ shaˉ hkiˆ hkanˍ ve yoˬ. Nawˬ suhˉ jehˬ ve hta‸ g'a hkanˍ htaˇ, nawˬ g'aˇ tuˬ yoˬ. teh‸ bvuh‸ taˍ ve yoˬ. 5 Ya‸ hk'aˇ, ngaˬ hui ve maˇ hteˇ maˇ cawˇ ve awˬ ceuˬ lehˬ, G'uiˬ sha ve hteˇ ve cawˇ ve awˬ ceuˬ hta‸ te tawˆ la piˇ ve k'o, k'oˆ kuiˬ hk'aˬ hk'e cawˬ le. G'uiˬ sha ngaˬ hui hta‸ nyi ma zuhˆ leh ciˍ yanˍ laˇ ve lehˬ, maˇ hteˇ maˇ cawˇ ve hta‸ te laˇ ve maˇ heˆ laˇ. (Tawˇ chi teˇ hkawˇ lehˬ, chaw yaˇ k'oˆ jaw ve hk'e ceh ngaˬ k'oˆ ve yoˬ.) 6 Chi hk'e maˇ heˆ. Tawˇ chi teˇ hkawˇ cawˇ ve k'o, G'uiˬ sha lehˬ miˬ guiˬ yaˇ hta‸ hk'aˬ hk'e te suhˉ jehˬ hpeh‸ tuˬ le. 7 Ngaˬ heˍ ve hta‸ pa taw G'uiˬ sha ve hteˇ ve cawˇ ve awˬ ceuˬ hta‸ leuˉ leh awˬ me‸ awˬ hponˇ cawˬ la piˇ ve k'o, aˬ hto‸ ma te ngaˬ hta‸ venˇ baˆ yaˇ hpeh‸ ve yoˬ teh‸ suhˉ taˆ chehˇ sheˍ le. 8 Da‸ ve tawˆ la tuˬ maˇ da‸ ve hta‸ te shaˍ teh‸, chaw teˇ hpaˍ hpaˍ k'oˆ ve yoˬ. Ngaˬ hui chi hk'e k'oˆ ve teh‸ yawˇ hui teˇ hpaˍ hpaˍ hk'aiˉ chehˇ ve law. Oˇ hk'e k'oˆ ve chaw hui ciˍ yanˍ ve hta‸ g'a hkanˍ ve lehˬ cawˇ ve yoˬ. 9 Hk'e te leh, ngaˬ hui Yuˇda‸ chaw teˇ hpaˍ shu a‸ kehˉ da‸ ve laˇ. Maˇ heˆ. Awˬ lawn k'o, Yuˇda‸ chaw maˇ k'oˆ, Heˍlaˍsaˆ chaw maˇ k'oˆ, chaw hk'a peu-eˬ venˇ baˆ ve kanˇ paˆ awˬ hawˉ chehˇ ve yoˬ teh‸, ngaˬ teˇ pawˆ k'oˆ taˍ peuˬ. 10 Li‸ hpu hk'aw bvuh‸ taˍ ve hk'e, Hteˇ ve cawˇ ve chaw maˇ cawˬ, teˇ g'aˇ ka‸ maˇ cawˬ tehˬ ve yoˬ. 11 Shiˍ ve chaw teˇ g'aˇ ka‸ maˇ cawˬ. G'uiˬ sha hta‸ ca ve chaw htawˇ teˇ g'aˇ ka‸ maˇ cawˬ 12 Chaw hk'a peu-eˬ ya‸ k'aw ya‸ k'ai peuˬ. Yawˇ hui hk'a peu-eˬ hk'a shuˍ shuˍ awˬ bon maˇ cawˬ ve chaw hpeh‸ la peuˬ. Da‸ ve kanˉ hta‸ te ve chaw maˇ cawˬ, teˇ g'aˇ ka‸ maˇ cawˬ tehˬ ve yoˬ. 13 Yawˇ hui ve hk'aw‸ hk'aw lehˬ, hpaw taˍ ve tuˍ hpfuh hpeh‸ ve yoˬ. Yawˇ hui ve ha tehˍ lehˬ, heˍ puiˉ ve yoˬ. Yawˇ hui ve meuˇ guiˬ awˬ hk'aw hpawˇ lo vuiˬ haiˬ awˬ taw‸ ma cawˬ ve yoˬ. 14 Yawˇ hui ve maw‸ k'aw awˬ hk'aw lo hkeu ve hkawˇ leh, nyi ma naˬ ve hkawˇ hk'a biˇ cawˬ ve yoˬ. 15 Shu ve awˬ suhˍ yuˬ sheˆ tuˬ yawˇ hui ve hkui sheh gehˬ jaˇ ve yoˬ. 16 Yawˇ hui hk'a k'ai kuiˬ lo, shu awˬ pon luˬ tuˬ sheˆ tuˬ leh dawˇ haˍ gaˇ haˍ tuˬ ceh tiˉ cawˬ ve yoˬ. 17 Dawˇ sha gaˇ sha ve ya‸ k'aw hta‸ yawˇ hui maˇ shiˍ. 18 Yawˇ hui hk'a nyi ve teˇ hpaˍ aw hk'aw lo, G'uiˬ sha hta‸ kawˆ ve nyi ma maˇ cawˬ, teh‸ bvuh‸ taˍ ve yoˬ. 19 Awˬ liˇ tawˇ hkawˇ awˬ hk'aw lo hk'a k'oˆ taˍ ve tawˇ teˇ hpaˍ lehˬ, awˬ liˇ tawˇ hkawˇ awˬ hawˉ lo chehˇ ve chaw hui hta‸ k'oˆ piˇ ve teh‸ ngaˬ hui shiˍ ve yoˬ. Hk'e te leh, chaw hk'a peu-eˬ tawˇ teˇ hk'awˇ ka‸ k'aw‸ yaw tuˬ maˇ cawˬ leh, miˬ guiˬ yaˇ hk'a peu-eˬ G'uiˬ sha mehˆ g'uˇ suhˍ suhˉ jehˬ ve hta‸ g'a hkanˍ ve yoˬ. 20 Awˬ liˇ tawˇ hkawˇ hta‸ na yuˬ ve pa taw, G'uiˬ sha mehˆ g'uˇ suhˍ chaw teˇ g'aˇ ka‸ hteˇ ve cawˇ ve chaw hpeh‸ la tuˬ maˇ heˆ. Awˬ lawn k'o, awˬ liˇ tawˇ hkawˇ hta‸ pa taw venˇ baˆ cawˬ ve hta‸ g'a shiˍ ve yoˬ. 21 Chi beu‸ lehˬ, awˬ liˇ tawˇ hkawˇ hta‸ maˇ caˉ da‸ ve awˬ hk'aw lo, G'uiˬ sha lo laˬ ve hteˇ ve cawˇ ve awˬ ceuˬ hta‸ g'a mawˬ peuˬ. Awˬ lawn chi ve hta‸ awˬ liˇ tawˇ hkawˇ li‸ teˇ hpaˍ leh tcuh kaˍ paˍ hui ve li‸ teˇ hpaˍ awˬ hk'aw lo shaˉ hkiˆ hkanˍ taˍ peuˬ. 22 Yeˍsuˆ Hkri‸ hta‸ hk'a yonˍ ve chaw hk'a peu-eˬ lehˬ, yonˍ ve pa taw G'uiˬ sha ve hteˇ ve cawˇ ve awˬ ceuˬ hta‸ yawˇ hui g'a ve yoˬ. Awˬ lawn k'o, peun da‸ kuiˬ maˇ cawˬ. 23 Chaw hk'a peu-eˬ venˇ baˆ te leh G'uiˬ sha ve awˬ me‸ awˬ hponˇ hta‸ maˇ mi taˬ. 24 Awˬ hpfuhˇ maˇ piˇ leh, yawˇ ve awˬ bon hta‸ pa taw hteˇ ve cawˇ ve chaw hpeh‸ la ve yoˬ. Hteˇ ve cawˇ ve chaw hpeh‸ la ve lehˬ, Yeˍsuˆ Hkri‸ htaiˍ hk'aw‸ laˇ ve hta‸ pa taw yoˬ. 25 Yeˍsuˆ ve awˬ suhˍ hta‸ pa taw hk'a yonˍ ve chaw hui hta‸ venˇ baˆ hpehˇ hk'a tuˬ, Yeˍsuˆ lehˬ tanˇ tuˬ hpeh‸ ve yoˬ teh‸, G'uiˬ sha yawˇ hta‸ teh taˍ ve yoˬ. G'uiˬ sha yeunˇ hkanˍ puiˉ leh, ponˬ laˬ htaˇ chaw yaˇ te ya‸ ve venˇ baˆ teˇ hpaˍ hta‸ maˇ ciˍ yanˍ sheˍ ve awˬ hk'aw lo, yawˇ hteˇ ve cawˇ ve awˬ ceuˬ hta‸ te maˍ laˇ ve yoˬ. 26 Yawˇ chi hk'e te ve lehˬ, chi beu‸ awˬ yanˇ awˬ hk'aw lo yawˇ lehˬ, hteˇ ve cawˇ ve yoˬ teh‸ shu hta‸ hpeu‸ maˍ piˇ leh, Yeˍsuˆ hta‸ hk'a yonˍ ve chaw teˇ hpaˍ hta‸ hteˇ ve cawˇ ve chaw hpeh‸ la tuˬ yawˇ te ve yoˬ. 27 Hk'e te leh, nyi ma uiˍ kuiˬ hk'aˬ lo cawˬ le. Nyi ma uiˍ kuiˬ maˇ k'aw‸ cawˬ. Aˬ hto‸ ma hta‸ pa taw maˇ k'aw‸ cawˬ le. Kanˉ te ve hta‸ pa taw laˇ. Maˇ heˆ, yonˍ ve hta‸ pa taw yoˬ. 28 Awˬ lawn k'o, awˬ liˇ tawˇ hkawˇ ve kanˉ hta‸ maˇ caˉ da‸ leh, yonˍ ve hta‸ pa taw ceh tiˉ chaw teˇ g'aˇ lehˬ hteˇ ve cawˇ ve chaw hpeh‸ la ve yoˬ teh‸ ngaˬ hui shawˍ taˍ ve yoˬ. 29 G'uiˬ sha lehˬ, Yuˇda‸ chaw hui ve G'uiˬ sha ceh tiˉ hpeh‸ ve laˇ. Yawˇ lehˬ, buiˇ shaˆ aˉ naˆ chaw hui ve G'uiˬ sha htawˇ hpeh‸ ve maˇ heˆ laˇ. Yoˬ, buiˇ shaˆ aˉ naˆ chaw hui ve G'uiˬ sha htawˇ hpeh‸ ve yoˬ. 30 Awˬ lawn k'o, G'uiˬ sha teˇ g'aˇ tiˉ cawˬ ve yoˬ. Awˬ guiˬ meuˇ shoˍ ve chaw hui yonˍ ve hta‸ pa taw, G'uiˬ sha yawˇ hui hta‸ hteˇ ve cawˇ ve chaw teh‸ shawˍ taˍ ve yoˬ. Awˬ guiˬ meuˇ maˇ shoˍ ve chaw hui htawˇ, yonˍ ve hta‸ pa taw yawˇ yawˇ hui hta‸ hteˇ ve cawˇ ve chaw teh‸ shawˍ taˍ ve yoˬ. 31 Hk'e te leh, yonˍ ve hta‸ pa taw ngaˬ hui awˬ liˇ tawˇ hkawˇ hta‸ te luˬ ve laˇ. Maˇ te luˬ. Awˬ liˇ tawˇ hkawˇ hta‸ leuˉ leh yeˬ la tuˬ ngaˬ hui te ve yoˬ.

Roˉma‸ 4

1 Hk'e te leh, awˬ suhˍ awˬ shaˍ hpawˇ ngaˬ hui ve awˬ pa Aˍbraˍhanˍ awˬ lawn hk'aˬ hk'e g'a k'oˆ tuˬ le. 2 Awˬ lawn k'o, kanˉ te ve hta‸ pa taw Aˍbraˍhanˍ lehˬ hteˇ ve cawˇ ve chaw hpeh‸ la ve hk'e k'o, yawˇ nyi ma uiˍ kuiˬ cawˬ tuˬ yoˬ. Ya‸ hk'aˇ, G'uiˬ sha mehˆ g'uˇ suhˍ nyi ma uiˍ kuiˬ cawˬ tuˬ ve maˇ heˆ. 3 Li‸ hpu awˬ hk'aw lo hk'aˬ hk'e k'oˆ ve le. Aˍbraˍhanˍ lehˬ G'uiˬ sha hta‸ yonˍ ve pa taw, G'uiˬ sha yawˇ hta‸ hteˇ ve cawˇ ve chaw shawˍ taˍ ve yoˬ teh‸ k'oˆ taˍ ve yoˬ. 4 Kanˉ te ve chaw teˇ g'aˇ lehˬ, g'aˇ hpfuhˇ g'a ve teˇ yanˇ, shu yawˇ hta‸ awˬ bon te piˇ ve teh‸ chaw teˇ g'aˇ ka‸ maˇ shawˍ. Yawˇ g'a keunˍ ve pa taw g'a ve teh‸ shawˍ ve yoˬ. 5 Yonˍ ve chaw teˇ g'aˇ hta‸ hteˇ ve cawˇ ve chaw teh‸ shawˍ ve yoˬ. Yawˇ kanˉ te ve hta‸ pa taw maˇ heˆ. Haiˬ ve chaw teˇ hpaˍ hta‸ hteˇ ve cawˇ ve chaw hpeh‸ la piˇ lawˬ shehˍ hpaˇ hta‸ yawˇ yonˍ ve pa taw yoˬ. 6 Chi hk'a shuˍ shuˍ, G'uiˬ sha lehˬ kanˉ hta‸ maˇ nyi leh, hteˇ ve cawˇ ve teh‸ shawˍ taˍ ve chaw teˇ g'aˇ lehˬ, awˬ bon uiˍ ve yoˬ teh‸ Daˍviˆ k'oˆ taˍ ve yoˬ. 7 Yawˇ k'oˆ ve, Ya‸ kuiˬ jiˆ kuiˬ teˇ hpaˍ hta‸ hpehˇ piˇ peuˬ leh, venˇ baˆ hta‸ beh taˍ peuˬ ve chaw teˇ hpaˍ lehˬ, awˬ bon uiˍ ve yoˬ. 8 Jawˇ mawˇ G'uiˬ sha venˇ baˆ maˇ taˍ ve chaw lehˬ, awˬ bon uiˍ ve yoˬ. teh‸ k'oˆ ve yoˬ. 9 Awˬ guiˬ meuˇ shoˍ ve chaw hui ceh tiˉ awˬ bon chi hta‸ g'a ve laˇ. Maˇ heˆ k'o, awˬ guiˬ meuˇ maˇ shoˍ ve chaw hui htawˇ g'a ve laˇ. Awˬ lawn k'o, Aˍbraˍhanˍ yonˍ ve pa taw G'uiˬ sha yawˇ hta‸ hteˇ ve cawˇ ve chaw shawˍ taˍ ve yoˬ teh‸ ngaˬ hui k'oˆ ve yoˬ. 10 Hk'e te leh, yawˇ hta‸ hk'aˬ htaˆ teˇ yanˇ chi hk'e shawˍ taˍ piˇ ve le. Awˬ guiˬ meuˇ shoˍ peuˬ htaˇ laˇ, maˇ heˆ k'o, maˇ shoˍ sheˍ htaˇ laˇ. Awˬ guiˬ meuˇ shoˍ peuˬ hk'aw‸ nawˉ maˇ heˆ. Maˇ shoˍ sheˍ htaˇ ka‸ shawˍ taˍ ve yoˬ. 11 Yawˇ awˬ guiˬ meuˇ maˇ shoˍ sheˍ awˬ g'uˇ suhˍ htaˇ ka‸, yawˇ yonˍ ve htaˬ pa taw hteˇ ve cawˇ ve chaw hpeh‸ la ve yoˬ. Yawˇ hteˇ ve cawˇ ve chaw hpeh‸ la peuˬ ve hta‸ yinˉ tcuhˉ taˍ tuˬ, yawˇ awˬ guiˬ meuˇ shoˍ ve awˬ heˆ hta‸ hkanˍ yuˬ ve yoˬ. Awˬ guiˬ meuˇ maˇ shoˍ ve ka‸, yonˍ ve hta pa taw hteˇ ve cawˇ ve chaw hpeh‸ la peuˬ ve chaw hk'a peu-eˬ ve awˬ pa hpeh‸ la tuˬ, G'uiˬ sha Aˍbraˍhanˍ hta‸ dawˇ taˍ ve yoˬ. 12 Awˬ guiˬ meuˇ shoˍ ve chaw teˇ hpaˍ ve awˬ pa htawˇ yawˇ hpeh‸ ve yoˬ. Ya‸ hk'aˇ, chaw oˇ ve teˇ hpaˍ lehˬ, awˬ guiˬ meuˇ shoˍ ve ceh tiˉ maˇ heˆ. Aˍbraˍhanˍ awˬ guiˬ meuˇ maˇ shoˍ sheˍ awˬ g'uˇ suhˍ htaˇ ka‸, yawˇ yonˍ ve hk'a shuˍ shuˍ yawˇ hui htawˇ yonˍ leh yawˇ ve hkui ha awˬ hk'aˇ suh g'a‸ k'ai ve chaw teˇ hpaˍ hpeh‸ ve yoˬ. 13 Aˍbraˍhanˍ leh yawˇ ve awˬ yaˇ awˬ duˬ teˇ hpaˍ g'a tuˬ ve awˬ shinˉ lehˬ, miˬ guiˬ yoˬ teh‸ ka ti‸ shaˉ caˆ g'a taˍ ve yoˬ. Awˬ liˇ tawˇ hkawˇ hta‸ pa taw yawˇ hui g'a ve maˇ heˆ. Yonˍ ve hta‸ caˉ da‸ ve hteˇ ve cawˇ ve awˬ ceuˬ hta‸ pa taw yawˇ hui g'a ve yoˬ. 14 Awˬ lawn k'o, awˬ liˇ tawˇ hkawˇ hta‸ cuˇ ve chaw hui awˬ shinˉ hta‸ g'a ve k'o, yonˍ ve teˇ ceuˬ lehˬ, te‸ chiˉ awˬ bon maˇ cawˬ leh, ka ti‸ shaˉ caˆ oˇ ve ka‸ luˬ k'ai peuˬ. 15 Awˬ liˇ tawˇ hkawˇ lehˬ, nyi ma zuhˆ ve hta‸ te tawˆ la ve yoˬ. Ya‸ hk'aˇ, awˬ liˇ tawˇ hkawˇ maˇ cawˬ ve k'o, ya‸ kuiˬ jiˆ kuiˬ ka‸ maˇ cawˬ. 16 Hk'e te leh, G'uiˬ sha ve awˬ bon hta‸ pa taw ceh tiˉ awˬ shinˉ hta‸ g'a hpeh‸ leh, Aˍbraˍhanˍ ve awˬ yaˇ awˬ duˬ hk'a peu-eˬ ka ti‸ shaˉ caˆ hta‸ awˬ tehˬ awˬ na g'a hpeh‸ tuˬ, Aˍbraˍhanˍ yonˍ ve teˇ ceuˬ hta‸ G'uiˬ sha cuˇ leh awˬ shinˉ piˇ ve yoˬ. Awˬ liˇ tawˇ hkawˇ hta‸ cuˇ ve chaw hui ceh tiˉ ka ti‸ shaˉ caˆ hta‸ g'a tuˬ ve maˇ heˆ. Ngaˬ hui hk'a peu-eˬ ve awˬ pa Aˍbraˍhanˍ yonˍ ve hk'a shuˍ shuˍ, hk'a yonˍ ve chaw hui htawˇ g'a tuˬ yoˬ. 17 Aˍbraˍhanˍ lehˬ, ngaˬ hui ve awˬ pa hpeh‸ ve awˬ lawn Li‸ hpu hk'aw lo chi hk'e bvuh‸ taˍ ve, Chaw ceuˬ laiˉ ceuˬ ve awˬ pa ngaˬ nawˬ hta‸ hpeh‸ piˇ lawˬ ve yoˬ teh‸ bvuh‸ taˍ ve yoˬ. Suh peuˬ ve chaw teˇ hpaˍ hta‸ k'aw‸ te‸ tu la piˇ leh, maˇ hpeh‸ la sheˍ ve awˬ ceuˬ teˇ hpaˍ hta‸ hpeh‸ la piˇ shehˍ hpaˇ G'uiˬ sha hta‸ yawˇ yonˍ leh, G'uiˬ sha mehˆ g'uˇ suhˍ ka ti‸ shaˉ caˆ hta‸ yawˇ g'a ve yoˬ. 18 Chaw ceuˬ laiˉ ceuˬ ve awˬ pa hpeh‸ la tuˬ, dawˇ law kuiˬ maˇ cawˬ htawˇ, yawˇ yonˍ leh dawˇ law chehˇ ve yoˬ. Awˬ lawn k'o, Nawˬ ve awˬ yaˇ awˬ duˬ lehˬ, oˇ hk'e hpeh‸ tuˬ yoˬ teh‸ G'uiˬ sha yawˇ hta‸ k'oˆ piˇ taˍ ve pa taw yoˬ. 19 A sha‸ aˬ laˬ hk'e teˇ ha hk'aw‸ gaˬ leh, yawˇ awˬ to suh taˍ ve hk'e hpeh‸ leh, Saˍraˇ htawˇ yaˇ hu yaˇ leh ve awˬ yanˇ gaˬ peuˬ ve hta‸ yawˇ dawˇ nyi ve teˇ yanˇ, yonˍ ve teˇ ceuˬ awˬ g'aˇ maˇ nuˇ k'ai. 20 G'uiˬ sha ve ka ti‸ shaˉ caˆ hta‸ yawˇ dawˇ nyi htaˇ, yawˇ yonˍ ve teˇ ceuˬ lehˬ htawˇ dawˇ nawˬ dawˇ maˇ cawˬ. Yawˇ yonˍ ve awˬ g'aˇ uiˍ la leh, G'uiˬ sha hta‸ chiˇ uiˍ chiˇ mvuh ve yoˬ. 21 Ka ti‸ shaˉ caˆ piˇ taˍ ve hk'e G'uiˬ sha te hpeh‸ ve hta‸ Aˍbraˍhanˍ yonˍ yeˬ jaˇ ve yoˬ. 22 Hk'e te leh yawˇ yonˍ ve pa taw, yawˇ hta‸ hteˇ ve cawˇ ve chaw teh‸ shawˍ taˍ ve yoˬ. 23 Yawˇ hta‸ chi hk'e shawˍ taˍ ve teh‸ bvuh‸ taˍ ve tawˇ teˇ hkawˇ lehˬ, Aˍbraˍhanˍ awˬ pon ceh tiˉ maˇ heˆ. 24 Ngaˬ hui awˬ pon htawˇ bvuh‸ taˍ ve yoˬ. Ngaˬ hui ve Jawˇ mawˇ Yeˍsuˆ hta‸ suh kuiˬ lo k'aw‸ te‸ tu la piˇ shehˍ hpaˇ hta‸ ngaˬ hui yonˍ ve k'o, ngaˬ hui hta‸ htawˇ hteˇ ve cawˇ ve chaw hpeh‸ ve yoˬ teh‸ shawˍ taˍ laˇ tuˬ yoˬ. 25 Ngaˬ hui ve ya‸ kuiˬ jiˆ kuiˬ teˇ hpaˍ hta‸ pa taw Jawˇ mawˇ Yeˍsuˆ hkanˍ suh leh, ngaˬ hui hteˇ ve cawˇ ve chaw hpeh‸ la tuˬ, yawˇ k'aw‸ te‸ tu la peuˬ ve yoˬ.

Roˉma‸ 5

1 Ngaˬ hui yonˍ ve awˬ hk'aw lo hteˇ ve cawˇ ve chaw hpeh‸ la peuˬ ve hta‸ pa taw, ngaˬ hui ve Jawˇ mawˇ Yeˍsuˆ Hkri‸ awˬ hk'aw lo, G'uiˬ sha hta‸ k'aw‸ cawˇ da‸ hui da‸ ve yoˬ. 2 Jawˇ mawˇ Yeˍsuˆ Hkri‸ hta‸ pa taw awˬ bon chi awˬ hk'aw lo ngaˬ hui g'a lo‸ la leh g'a chehˇ taˍ ve yoˬ. G'uiˬ sha ve awˬ me‸ awˬ hponˇ hta‸ ngaˬ hui dawˇ law leh, ha lehˬ chiˇ mvuh chehˇ ve yoˬ. 3 Chi hk'oˆ ka‸, tu‸ ve hkanˍ ve hta‸ ngaˬ hui g'a hkanˍ ve teˇ yanˇ, ha lehˬ chiˇ mvuh chehˇ ve yoˬ. Awˬ lawn k'o, tu‸ ve hkanˍ ve hta‸ pa taw ngaˬ hui yeunˇ hkanˍ puiˉ la ve yoˬ. 4 Yeunˇ hkanˍ puiˉ ve hta‸ pa taw da‸ ve hta‸ te puiˉ la ve yoˬ. Da‸ ve hta‸ te puiˉ ve pa taw ngaˬ hui dawˇ law puiˉ la ve hta‸ shiˍ ve yoˬ. 5 Dawˇ law puiˉ ve hta‸ pa taw g'a ya‸ taw tuˬ ve maˇ heˆ. Awˬ lawn k'o, ngaˬ hui hta‸ pe‸ laˇ peuˬ ve da‸ ve kehˬ ve Awˬ ha hpu lehˬ, ngaˬ hui ve nyi ma awˬ hk'aw lo G'uiˬ sha ve ha‸ pehnˇ ve teˇ ceuˬ ngeuˍ keu laˇ peuˬ. 6 Ngaˬ hui g'aˇ nuˇ jaˇ ve teˇ yanˇ, awˬ yanˇ cawˇ ve awˬ hk'aw lo, chaw haiˬ hui awˬ pon Hkri‸ hkanˍ suh ve yoˬ. 7 Hteˇ ve cawˇ ve chaw awˬ pon hkanˍ suh tuˬ ve chaw ca haˍ jaˇ ve yoˬ. Teˇ pawˆ pawˆ chaw da‸ awˬ pon hkanˍ suh haˆ ve chaw teˇ g'aˇ g'aˇ cawˬ tuˬ yoˬ hehˉ. 8 Ya‸ hk'aˇ, ngaˬ hui venˇ baˆ yaˇ hpeh‸ chehˇ ve teˇ yanˇ htaˇ, Hkri‸ ngaˬ hui awˬ pon hkanˍ suh leh, G'uiˬ sha yawˇ ngaˬ hui hta‸ hk'aˬ ma ha‸ ve hk'a tawˍ lehˆ maw laˇ ve yoˬ. 9 Hkri‸ ve awˬ suhˍ hta‸ pa taw, chi beu‸ ngaˬ hui hteˇ ve cawˇ ve chaw hpeh‸ la peuˬ. Hk'e te leh, yawˇ hta‸ pa taw G'uiˬ sha nyi ma zuhˆ ve hta‸ chi a‸ kehˉ leuˉ leh ngaˬ hui g'a ponˬ tuˬ yoˬ. 10 Awˬ lawn k'o, ngaˬ hui yawˇ ve canˇ paˍ hpeh‸ chehˇ ve teˇ yanˇ, yawˇ ve Yaˇ hpu hkanˍ suh ve hta‸ pa taw, ngaˬ hui G'uiˬ sha hta‸ k'aw‸ cawˇ da‸ hui da‸ la ve yoˬ. Ngaˬ hui chi hk'e yawˇ hta‸ cawˇ da‸ hui da‸ la peuˬ ve k'o, Yaˇ hpu te‸ chehˇ ve hta‸ pa taw, chi a‸ kehˉ leuˉ leh ngaˬ hui hta‸ htaiˍ hk'aw‸ laˇ tuˬ yoˬ. 11 Chi ceh tiˉ maˇ heˆ sheˍ. Ngaˬ hui ve Jawˇ mawˇ Yeˍsuˆ Hkri‸ hta‸ pa taw G'uiˬ sha hta‸ ha lehˬ chiˇ mvuh chehˇ ve yoˬ. Yawˇ hta‸ pa taw ngaˬ hui G'uiˬ sha hta‸ k'aw‸ cawˇ da‸ hui da‸ la peuˬ. 12 Chaw teˇ g'aˇ hta‸ pa taw miˬ guiˬ hk'oˆ lo venˇ baˆ lo‸ la leh, venˇ baˆ hta‸ pa taw suh ve teˇ ceuˬ cawˬ la ve yoˬ. Hk'e te leh, chaw hk'a peu-eˬ venˇ baˆ te peuˬ ve pa taw, chaw hk'a peu-eˬ awˬ hk'oˆ hta‸ suh ve teˇ ceuˬ gaˬ la ve yoˬ. 13 Awˬ liˇ tawˇ hkawˇ maˇ taˍ sheˍ htaˇ ka‸, miˬ guiˬ hk'oˆ lo venˇ baˆ cawˬ taˍ peuˬ. Ya‸ hk'aˇ, awˬ liˇ tawˇ hkawˇ maˇ cawˬ sheˍ ve awˬ yanˇ awˬ hk'aw lo, venˇ baˆ maˇ taˍ sheˍ. 14 Ya‸ hk'aˇ, Aˍdanˍ hta‸ tanˬ leh Moˉseˍ ve awˬ co-e hk'a gaˬ, suh ve teˇ ceuˬ uˉ peunˍ chehˇ ve yoˬ. Chaw oˇ ve teˇ hpaˍ te ya‸ ve lehˬ, Aˍdanˍ te ya‸ ve hta‸ maˇ shuˍ da‸ htawˇ, suh ve teˇ ceuˬ yawˇ hui hta‸ uˉ peunˍ chehˇ ve yoˬ. Aˍdanˍ oˇ ve teˇ g'aˇ lehˬ, awˬ hk'aw‸ nawˉ laˬ tuˬ ve chaw teˇ g'aˇ ve awˬ heˆ hpeh‸ ve yoˬ. 15 Ya‸ hk'aˇ, te ya‸ ve oˇ ve lehˬ hk'e leˇ piˇ ve awˬ bon hta‸ maˇ shuˍ da‸. Awˬ lawn k'o, chaw teˇ g'aˇ te ya‸ ve pa taw, chaw maˇ maˇ g'a suh ve k'o, G'uiˬ sha ve awˬ bon ka‸, Yeˍsuˆ Hkri‸ teh‸ k'oˆ ve chaw teˇ g'aˇ ve awˬ bon hta‸ pa taw hk'e leˇ piˇ ve awˬ bon ka‸, chaw maˇ ve awˬ pon leuˉ leh k'aw‸ maˇ la ve yoˬ. 16 Chi hk'oˆ ka‸, chaw teˇ g'aˇ teˇ ya‸ ve hta‸ pa taw hpeh‸ la ve teˇ ceuˬ lehˬ, hk'e leˇ piˇ ve awˬ bon hta‸ maˇ shuˍ da‸. Awˬ lawn k'o, teˇ pawˆ ceh tiˉ te ya‸ ve ka‸, suhˉ jehˬ leh ciˍ yanˍ ve hta‸ g'a hkanˍ ve yoˬ. Ya‸ hk'aˇ, te ya‸ maˇ ve ka‸, hk'e leˇ piˇ ve awˬ bon hta‸ pa taw hteˇ ve cawˇ ve chaw hpeh‸ la ve yoˬ. 17 Chi hk'oˆ ka‸, chaw teˇ g'aˇ te ya‸ leh, te ya‸ shehˍ hpaˇ oˇ ve teˇ g'aˇ hta‸ pa taw suh ve teˇ ceuˬ uˉ peunˍ ve k'o, maˇ jaˇ ve awˬ bon hta‸ ka‸, hteˇ ve cawˇ ve la‸ shawnˍ hta‸ ka‸ g'a ve chaw hui lehˬ, Yeˍsuˆ Hkri‸ teˇ g'aˇ hta‸ pa taw te‸ ve awˬ hk'aw lo leuˉ leh g'a uˉ peunˍ tuˬ yoˬ. 18 Hk'e te leh, chaw teˇ g'aˇ te ya‸ ve hta‸ pa taw, chaw hk'a peu-eˬ ciˍ yanˍ ve hta‸ g'a hkanˍ ve yoˬ. Chi hk'a shuˍ shuˍ, chaw teˇ g'aˇ hteˇ ve cawˇ ve hta‸ te ve pa taw, chaw hk'a peu-eˬ hteˇ ve cawˇ ve chaw hpeh‸ la leh, co ha g'a te‸ ve yoˬ. 19 Awˬ lawn k'o, chaw teˇ g'aˇ maˇ na yuˬ ve hta‸ pa taw, chaw maˇ maˇ venˇ baˆ yaˇ hpeh‸ la ve yoˬ. Chi hk'a shuˍ shuˍ, chaw teˇ g'aˇ na yuˬ ve hta‸ pa taw, chaw maˇ maˇ hteˇ ve cawˇ ve chaw hpeh‸ la tuˬ yoˬ. 20 Ya‸ ve jiˆ ve teˇ hpaˍ maˇ la tuˬ, awˬ liˇ tawˇ hkawˇ lo‸ la ve yoˬ. Ya‸ hk'aˇ venˇ baˆ maˇ la ve teˇ kaˬ lo awˬ bon leuˉ leh k'aw‸ maˇ la ve yoˬ. 21 Chi hta‸ pa taw, venˇ baˆ teˇ ceuˬ lehˬ, suh ve hta‸ cuˇ leh uˉ peunˍ ve hk'a shuˍ shuˍ, awˬ bon teˇ ceuˬ lehˬ ngaˬ hui ve Jawˇ mawˇ Yeˍsuˆ Hkri‸ hta‸ pa taw ngaˬ hui co co taiˍ taiˍ te‸ hpeh‸ tuˬ, hteˇ ve cawˇ ve hta‸ cuˇ leh uˉ peunˍ chehˇ ve yoˬ.

Roˉma‸ 6

1 Hk'e te leh, ngaˬ hui hk'aˬ hk'e k'oˆ tuˬ cawˬ le. Awˬ bon maˇ la tuˬ ngaˬ hui venˇ baˆ awˬ hk'aˇ suh k'aw‸ k'ai tuˬ sheˍ laˇ. Maˇ k'ai taˬ. 2 Ngaˬ hui venˇ baˆ hpawˇ suh peuˬ ve chaw hui lehˬ, venˇ baˆ awˬ hk'aw lo hk'aˬ hk'e te k'aw‸ te‸ chehˇ hpeh‸ tuˬ le. 3 Ngaˬ hui Yeˍsuˆ Hkri‸ awˬ hk'aw lo baˆtiˆsaˬ hkanˍ yuˬ peuˬ ve chaw hk'a peu-eˬ lehˬ, yawˇ suh ve awˬ hk'aw lo baˆtiˆsaˬ hkanˍ taˍ peuˬ ve hta‸ nawˬ hui maˇ shiˍ laˇ. 4 Hk'e te leh, baˆtiˆsaˬ hta‸ ngaˬ hui hkanˍ htaˇ, yawˇ geh teˇ geh suh leh tuˍ taˍ ve hta‸ ngaˬ hui hkanˍ taˍ ve yoˬ. Hkri‸ lehˬ, Awˬ pa ve awˬ me‸ awˬ hponˇ hta‸ pa taw suh kuiˬ lo k'aw‸ te‸ tu la ve hk'a shuˍ shuˍ, ngaˬ hui htawˇ te‸ la leh chaw awˬ suhˉ hpeh‸ la ve yoˬ. 5 Awˬ lawn k'o, ngaˬ hui yawˇ geh teˇ geh suh ve k'o, ngaˬ hui yawˇ geh teˇ geh k'aw‸ te‸ tu la tuˬ yoˬ. 6 Ngaˬ hui venˇ baˆ ve awˬ ceˬ maˇ g'a k'aw‸ te leh, venˇ baˆ ve awˬ to luˬ k'ai tuˬ, ngaˬ hui ve nyi ma awˬ piˍ lehˬ, yawˇ geh teˇ geh la‸ ka hk'oˆ lo hkanˍ suh peuˬ ve hta‸ ngaˬ hui shiˍ ve yoˬ. 7 Suh peuˬ ve chaw teˇ g'aˇ lehˬ, venˇ baˆ awˬ hk'aw lo ponˬ tawˆ la peuˬ. 8 Ngaˬ hui Hkri‸ geh teˇ geh suh ve k'o, yawˇ geh teˇ geh te‸ chehˇ tuˬ yoˬ teh‸ ngaˬ hui yonˍ ve yoˬ. 9 Hkri‸ lehˬ, suh kuiˬ lo k'aw‸ te‸ tu la peuˬ ve pa taw, awˬ hk'aw‸ nawˉ teˇ pawˆ ka‸ yawˇ maˇ k'aw‸ suh leh, suh ve teˇ ceuˬ yawˇ hta‸ maˇ k'aw‸ uˉ peunˍ ve teh‸ ngaˬ hui shiˍ ve yoˬ. 10 Yawˇ hkanˍ suh ve lehˬ, venˇ baˆ hpawˇ teˇ pawˆ ceh tiˉ hkanˍ suh leh, yawˇ te‸ chehˇ ve lehˬ, G'uiˬ sha hpawˇ te‸ chehˇ ve yoˬ. 11 Chi hk'a shuˍ shuˍ, nawˬ hui htawˇ venˇ baˆ hpawˇ suh peuˬ ve chaw hpeh‸ leh, Yeˍsuˆ Hkri‸ hta‸ pa taw G'uiˬ sha hpawˇ te‸ chehˇ ve chaw hpeh‸ ve teh‸ shawˍ taˍ-o‸. 12 Venˇ baˆ ve a loˍ awˬ hk'aˇ suh maˇ g'a k'ai tuˬ, nawˬ hui suh puiˉ ve awˬ to awˬ hk'aw lo venˇ baˆ hta‸ taˇ uˉ peunˍ tcuh. 13 Nawˬ hui ve awˬ to awˬ hk'eun teˇ hpaˍ lehˬ, haiˬ ve awˬ pon la‸ caˉ hk'e yehˇ tuˬ, venˇ baˆ hta‸ taˇ a‸ piˇ. Ya‸ hk'aˇ, nawˬ hui suh kuiˬ lo k'aw‸ te‸ tu la peuˬ ve chaw hui hpeh‸ ve pa taw, a shu yawˇ awˬ to G'uiˬ sha hta‸ a‸ piˇ-oˆ. Nawˬ hui ve awˬ to awˬ hk'eun teˇ hpaˍ htawˇ, hteˇ ve cawˇ ve awˬ pon la‸ caˉ hk'e yehˇ tuˬ G'uiˬ sha hta‸ a‸ piˇ-oˆ. 14 Awˬ lawn k'o, nawˬ hui lehˬ awˬ liˇ tawˇ hkawˇ awˬ hawˉ lo chehˇ ve maˇ heˆ. Awˬ bon awˬ hawˉ lo chehˇ ve pa taw, venˇ baˆ nawˬ hui hta‸ k'aw‸ uˉ peunˍ tuˬ maˇ heˆ. 15 Hk'e te leh hk'aˬ hk'e le. Awˬ liˇ tawˇ hkawˇ awˬ hawˉ maˇ k'aw‸ chehˇ leh awˬ bon awˬ hawˉ lo chehˇ ve pa taw, ngaˬ hui venˇ baˆ k'aw‸ te tuˬ laˇ. Maˇ heˆ taˬ. 16 Chaw teˇ g'aˇ g'aˇ ve hkawˇ hta‸ na yuˬ leh, yawˇ ve awˬ ceˬ te tuˬ nawˬ hui ve awˬ to yawˇ hta‸ a‸ piˇ ve k'o, nawˬ hui lehˬ nawˬ hui na yuˬ chehˇ ve chaw oˇ ve teˇ g'aˇ ve awˬ ceˬ hpeh‸ ve hta‸ nawˬ hui maˇ shiˍ laˇ. Venˇ baˆ teˇ ceuˬ awˬ hawˉ lo awˬ ceˬ te ve k'o, g'a suh tuˬ yoˬ. Maˇ heˆ k'o, na yuˬ ve teˇ ceuˬ awˬ hawˉ lo awˬ ceˬ te ve k'o, hteˇ ve cawˇ ve chaw hpeh‸ tuˬ yoˬ. 17 Nawˬ hui lehˬ venˇ baˆ ve awˬ ceˬ hpeh‸ jaw htawˇ, nawˬ hui g'a henˇ ve awˬ liˇ awˬ hk'aˇ teˇ hpaˍ hta‸ nyi ma awˬ tawˬ hk'a gaˬ na yuˬ ve pa taw, G'uiˬ sha ve awˬ bon hta‸ chiˇ uiˍ chiˇ mvuh piˇ-oˆ. 18 Nawˬ hui venˇ baˆ awˬ hk'aw lo ponˬ tawˆ la peuˬ leh, hteˇ ve cawˇ ve teˇ ceuˬ awˬ hawˉ lo awˬ ceˬ hpeh‸ la peuˬ. 19 Nawˬ hui awˬ suhˍ awˬ shaˍ hpawˇ ceh dawˇ pawnˍ puiˉ ve pa taw, chaw yaˇ hui shiˍ hpeh‸ ve tawˇ chi teˇ hpaˍ ngaˬ nawˬ hui hta‸ k'oˆ laˇ ve yoˬ. Awˬ lawn k'o, ponˬ laˬ htaˇ nawˬ hui ve awˬ to awˬ hk'eun teˇ hpaˍ lehˬ, cha‸ chiˆ ve hta‸ te tuˬ leh, haiˬ ve awˬ hk'oˆ haiˬ ve hta‸ te tuˬ a‸ piˇ jaw ve hk'a shuˍ shuˍ, chi beu‸ nawˬ hui da‸ la kehˬ la tuˬ awˬ pon, hteˇ ve cawˇ ve teˇ ceuˬ awˬ hawˉ lo awˬ ceˬ te tuˬ, nawˬ hui ve awˬ to awˬ hk'eun teˇ hpaˍ hta‸ a‸ piˇ-oˆ. 20 Nawˬ hui venˇ baˆ ve awˬ ceˬ hpeh‸ chehˇ ve teˇ yanˇ, nawˬ hui lehˬ hteˇ ve cawˇ ve teˇ ceuˬ awˬ hawˉ lo awˬ ceˬ maˇ hpeh‸. 21 Oˇ ve teˇ hpaˍ hta‸ nawˬ hui te ve pa taw, awˬ bon hk'aˬ hk'e g'a le. Chi beu‸ nawˬ hui awˬ pon ya‸ taw tuˬ ceh tiˉ hpeh‸ ve yoˬ. Oˇ ve teˇ hpaˍ ve awˬ leh meuˇ lehˬ, suh ve teˇ ceuˬ yoˬ. 22 Ya‸ hk'aˇ chi beu‸ nawˬ hui lehˬ, venˇ baˆ awˬ hk'aw lo ponˬ tawˆ la peuˬ leh, G'uiˬ sha ve awˬ ceˬ hpeh‸ la peuˬ ve pa taw, naw hui da‸ ve kehˬ ve awˬ bon hta‸ g'a ve yoˬ. Awˬ bon oˇ ve awˬ leh meuˇ lehˬ, co ti‸ ha ti‸ teˇ ceuˬ hpeh‸ ve yoˬ. 23 Awˬ lawn k'o, venˇ baˆ te leh g'a ve awˬ hpfuhˇ lehˬ, suh ve teˇ ceuˬ yoˬ. Ya‸ hk'aˇ, G'uiˬ sha ngaˬ hui hta‸ hk'e leˇ pe‸ laˇ ve awˬ bon lehˬ, ngaˬ hui ve Jawˇ mawˇ Yeˍsuˆ Hkri‸ hta‸ pa taw, co co taiˍ taiˍ te‸ ve teˇ ceuˬ yoˬ.

Roˉma‸ 7

1 Awˬ viˉ awˬ nyi teˇ hpaˍ-oˬ, chaw teˇ g'aˇ te‸ chehˇ ve awˬ yanˇ awˬ hk'aw lo ceh tiˉ yawˇ awˬ liˇ tawˇ hkawˇ awˬ hawˉ lo chehˇ ve hta‸ nawˬ hui maˇ shiˍ laˇ. (Ngaˬ chi hk'e k'oˆ ve lehˬ, awˬ liˇ tawˇ hkawˇ shiˍ paˍ hui hta‸ k'oˆ ve yoˬ.) 2 Awˬ lawn k'o, awˬ miˇ ma teˇ g'aˇ yawˇ ve awˬ hpawˇ te‸ chehˇ ve awˬ yanˇ awˬ hk'aw lo, awˬ liˇ tawˇ hkawˇ lehˬ, awˬ miˇ ma oˇ ve hta‸ yawˇ ve awˬ hpawˇ geh hpeh ka taˍ ve yoˬ. Ya‸ hk'aˇ awˬ hpawˇ suh peuˬ ve k'o, awˬ hpawˇ hta‸ caˉ da‸ ve awˬ liˇ hta‸ awˬ miˇ ma g'a ponˬ peuˬ. 3 Chi hta‸ pa taw, yawˇ ve awˬ hpawˇ maˇ suh sheˍ htaˇ, awˬ kaˍ awˬ nu hawˉ hk'aˆ teˇ g'aˇ hta‸ ca heuˆ ve k'o, haˉ chawˇ haˉ paˆ te shehˍ ma teh‸ shu yawˇ hta‸ k'oˆ tuˬ yoˬ. Ya‸ hk'aˇ yawˇ ve awˬ hpawˇ suh peuˬ ve k'o, awˬ liˇ tawˇ hkawˇ oˇ ve hta‸ ponˬ peuˬ ve pa taw, awˬ kaˍ awˬ nu hawˉ hk'aˆ teˇ g'aˇ hta‸ ca heuˆ ve htawˇ, yawˇ haˉ chawˇ haˉ paˆ te shehˍ ma maˇ heˆ. 4 Ngaˬ awˬ viˉ awˬ nyi teˇ hpaˍ-oˬ, chi hk'a shuˍ shuˍ nawˬ hui Hkri‸ ve awˬ to geh teˇ geh suh peuˬ ve pa taw, awˬ liˇ tawˇ hkawˇ hta‸ maˇ k'aw‸ caˉ da‸. Hk'e te leh, ngaˬ hui G'uiˬ sha awˬ pon awˬ shiˍ naw‸ la hpeh‸ tuˬ, suh kuiˬ lo k'aw‸ te‸ tu la peuˬ ve awˬ kaˍ awˬ nu teˇ g'aˇ hta‸ nawˬ hui heuˆ da‸ peuˬ. 5 Awˬ lawn k'o, ngaˬ hui lehˬ awˬ suhˍ awˬ shaˍ a loˍ awˬ hk'aˇ suh k'ai chehˇ ve teˇ yanˇ, suh ve teˇ ceuˬ awˬ pon awˬ shiˍ naw‸ la tuˬ, venˇ baˆ te gaˇ ve nyi ma teˇ ceuˬ lehˬ ngaˬ hui ve awˬ to awˬ hk'eun teˇ hpaˍ awˬ hk'aw lo kanˉ te chehˇ ve yoˬ. Venˇ baˆ te gaˇ ve nyi ma oˇ ve lehˬ, awˬ liˇ tawˇ hkawˇ hta‸ pa taw nawˇ la ve yoˬ. 6 Ya‸ hk'aˇ, chi beu‸ ngaˬ hui awˬ liˇ tawˇ hkawˇ hta‸ ponˬ peuˬ. Ponˬ laˬ htaˇ ngaˬ hui hta‸ hpeh tiˍ taˍ ve teˇ ceuˬ hta‸ ngaˬ hui suh taˉ peuˬ ve pa taw, chi beu‸ ngaˬ hui kanˉ te ve lehˬ, bvuh‸ taˍ ve awˬ liˇ awˬ piˍ awˬ hawˉ lo te ve maˇ heˆ. Ya‸ hk'aˇ, Awˬ ha hpu hta‸ caˉ da‸ ve nyi ma awˬ suhˉ awˬ hk'aw lo ngaˬ hui te ve yoˬ. 7 Hk'e te leh, ngaˬ hui hk'aˬ hk'e g'a k'oˆ tuˬ le. Awˬ liˇ tawˇ hkawˇ lehˬ, venˇ baˆ hpeh‸ ve laˇ. Maˇ heˆ taˬ. Ya‸ hk'aˇ awˬ liˇ tawˇ hkawˇ maˇ cawˬ ve k'o, venˇ baˆ hta‸ ngaˬ maˇ shiˍ. Awˬ lawn k'o, Shu mawˇ shu jeˬ hta‸ taˇ sheˉ lai teh‸ awˬ liˇ tawˇ hkawˇ maˇ k'oˆ ve k'o, sheˉ lai ve teˇ ceuˬ hta‸ ngaˬ maˇ shiˍ. 8 Ya‸ hk'aˇ venˇ baˆ lehˬ, awˬ liˇ tawˇ hkawˇ hta‸ pa taw awˬ yanˇ cawˇ ve hta‸ g'a leh, ngaˬ awˬ hk'aw lo sheˉ lai ve laiˉ ceuˬ te tawˆ la piˇ lawˬ ve yoˬ. Awˬ lawn k'o, awˬ liˇ tawˇ hkawˇ maˇ cawˬ ve k'o, venˇ baˆ lehˬ suh taˍ ve yoˬ. 9 Ponˬ laˬ htaˇ, awˬ liˇ tawˇ hkawˇ hta‸ maˇ caˉ da‸ ve awˬ hk'aw lo ngaˬ te‸ chehˇ ve yoˬ. Ya‸ hk'aˇ, awˬ liˇ tawˇ hkawˇ gaˬ la htaˇ, venˇ baˆ te‸ la leh ngaˬ suh ve yoˬ. 10 Awˬ liˇ tawˇ hkawˇ chi hta‸ pa taw ngaˬ co ha g'a te‸ tuˬ ve teh‸ dawˇ ve ka‸, ngaˬ awˬ pon suh ve teˇ ceuˬ hpeh‸ ve hta‸ g'a mawˬ ve yoˬ. 11 Awˬ lawn k'o venˇ baˆ lehˬ, awˬ liˇ tawˇ hkawˇ hta‸ pa taw awˬ yanˇ cawˇ ve hta‸ g'a leh, ngaˬ hta‸ heˍ laˇ ve awˬ hk'oˆ ka‸, oˇ ve hta‸ yehˇ leh ngaˬ hta‸ tiˇ pehˍ laˇ ve yoˬ. 12 Hk'e te leh, awˬ liˇ tawˇ hkawˇ lehˬ, da‸ kehˬ ve yoˬ. Piˇ taˍ ve tawˇ hkawˇ htawˇ, da‸ ve kehˬ ve, hteˇ ve cawˇ ve leh, da‸ jaˇ ve teˇ ceuˬ yoˬ. 13 Hk'e te leh da‸ ve awˬ ceuˬ lehˬ, ngaˬ hta‸ suh tuˬ te laˇ ve laˇ. Chi hk'e maˇ heˆ taˬ. Venˇ baˆ lehˬ, awˬ tehˬ awˬ na venˇ baˆ hpeh‸ ve hta‸ hk'a tawˍ lehˆ tawˆ la tuˬ, venˇ baˆ lehˬ da‸ ve awˬ ceuˬ hta‸ yehˇ leh ngaˬ hta‸ suh tuˬ te laˇ ve yoˬ. Hk'e te leh, piˇ taˍ ve awˬ liˇ tawˇ hkawˇ hta‸ pa taw, venˇ baˆ hk'aˬ ma haiˬ jaˇ ve hk'a tawˍ lehˆ tawˆ la ve yoˬ. 14 Awˬ liˇ tawˇ hkawˇ lehˬ, co ha hta‸ caˉ da‸ ve teh‸ ngaˬ hui shiˍ ve yoˬ. Ya‸ hk'aˇ ngaˬ lehˬ, awˬ suhˍ awˬ shaˍ hta‸ caˉ da‸ leh, venˇ baˆ vuiˬ yuˬ taˍ ve awˬ ceˬ hpeh‸ ve yoˬ. 15 Ngaˬ te ve teˇ hpaˍ hta‸ ngaˬ ca dawˇ maˇ tawˆ. Ngaˬ te gaˇ ve teˇ hpaˍ hta‸ ngaˬ maˇ te leh, ngaˬ canˇ jaˇ ve teˇ hpaˍ hta‸ ngaˬ te ve yoˬ. 16 Ya‸ hk'aˇ, maˇ te gaˇ ve hta‸ ngaˬ te ve k'o, awˬ liˇ tawˇ hkawˇ lehˬ da‸ ve yoˬ teh‸ ngaˬ hkanˍ ve yoˬ. 17 Hk'e te leh maˇ da‸ ve oˇ ve hta‸ chi beu‸ ngaˬ awˬ to te ve maˇ heˆ. Ngaˬ awˬ hk'aw lo chehˇ taˍ ve venˇ baˆ te ve yoˬ. 18 Ngaˬ ve awˬ suhˍ awˬ shaˍ awˬ to chi awˬ hk'aw lo, da‸ ve teˇ ceuˬ a ciˉ ka‸ maˇ cawˬ ve hta‸ ngaˬ shiˍ ve yoˬ. Da‸ ve hta‸ te gaˇ ve nyi ma cawˬ htawˇ, da‸ ve hta‸ ngaˬ te maˇ puiˉ. 19 Awˬ lawn k'o, ngaˬ lehˬ da‸ ve hta‸ te gaˇ ve ka‸ maˇ te. Maˇ te gaˇ ve awˬ haiˬ hta‸ ngaˬ te ve yoˬ. 20 Ngaˬ maˇ te gaˇ ve hta‸ ngaˬ te ve k'o, ngaˬ awˬ to oˇ ve hta‸ te ve maˇ heˆ. Ngaˬ awˬ hk'aw lo chehˇ taˍ ve venˇ baˆ te ve yoˬ. 21 Hk'e te leh, ngaˬ da‸ ve hta‸ te gaˇ ve teˇ yanˇ, awˬ haiˬ teˇ ceuˬ ngaˬ geh chehˇ taˍ ve awˬ liˇ hta‸ ngaˬ g'a mawˬ ve yoˬ. 22 Ngaˬ ve nyi ma hk'aw lo tiˉ k'o, G'uiˬ sha ve awˬ liˇ tawˇ hkawˇ hta‸ ngaˬ ha lehˬ ve yoˬ. 23 Ya‸ hk'aˇ, ngaˬ ve awˬ to awˬ hk'eun teˇ hpaˍ awˬ hk'aw lo, awˬ kaˍ awˬ nu awˬ liˇ hta‸ ngaˬ g'a mawˬ ve yoˬ. Awˬ liˇ chi teˇ maˬ lehˬ, ngaˬ ve nyi ma dawˇ hk'aˇ hta‸ bawˆ da‸ chehˇ leh, ngaˬ ve awˬ to awˬ hk'eun teˇ hpaˍ awˬ hk'aw lo cawˬ ve venˇ baˆ teˇ ceuˬ ngaˬ hta‸ hpeh k'ai tuˬ ka‸ te chehˇ ve yoˬ. 24 Ngaˬ lehˬ hpeh‸ bawˬ jaˇ, dawˇ haˍ jaˇ ve chaw teˇ g'aˇ hpeh‸ ve yoˬ. Ngaˬ hta‸ suh piˇ lawˬ puiˉ ve awˬ to chi awˬ hk'aw lo a shu ponˬ laˇ tuˬ le. 25 Ngaˬ hui ve Jawˇ mawˇ Yeˍsuˆ Hkri‸ ponˬ laˇ ve pa taw, G'uiˬ sha hta‸ chiˇ mvuh ve yoˬ. Hk'e te leh, ngaˬ ve nyi ma dawˇ hk'aˇ lehˬ, G'uiˬ sha ve awˬ liˇ awˬ hk'aˇ hta‸ cawˇ ve hk'e te ve yoˬ. Ya‸ hk'aˇ, ngaˬ ve awˬ suhˍ awˬ shaˍ lehˬ, venˇ baˆ ve awˬ liˇ awˬ hk'aˇ hta‸ cawˇ ve hk'e te ve yoˬ.

Roˉma‸ 8

1 Hk'e te leh, Yeˍsuˆ Hkri‸ awˬ hk'aw lo chehˇ ve chaw teˇ hpaˍ hta‸ chi beu‸ ciˍ yanˍ tuˬ maˇ k'aw‸ cawˬ. 2 Awˬ lawn k'o, Yeˍsuˆ Hkri‸ awˬ hk'aw lo co ha te‸ piˇ lawˬ ve Awˬ ha hpu ve awˬ liˇ awˬ hk'aˇ lehˬ, venˇ baˆ ve awˬ liˇ awˬ hk'aˇ awˬ hk'aw lo leh, suh ve awˬ liˇ awˬ hk'aˇ awˬ hk'aw lo ngaˬ hta‸ hpehˇ laˇ peuˬ. 3 Awˬ suhˍ awˬ shaˍ hta‸ pa taw, awˬ liˇ tawˇ hkawˇ awˬ g'aˇ nuˇ leh te maˇ g'a ve awˬ ceuˬ hta‸ G'uiˬ sha te taˍ peuˬ. Venˇ baˆ yaˇ awˬ pon G'uiˬ sha yawˇ ve Yaˇ hpu hta‸ peu laˇ ve yoˬ. Yaˇ hpu lehˬ, venˇ baˆ awˬ pon tanˇ tuˬ hpeh‸ tuˬ, venˇ baˆ yaˇ hui awˬ to cawˬ ve hk'a shuˍ shuˍ awˬ to cawˬ ve yoˬ. Hk'e te leh, venˇ baˆ yaˇ hui awˬ hk'aw lo cawˬ ve venˇ baˆ hta‸ G'uiˬ sha ciˍ yanˍ piˇ ve yoˬ. 4 Yawˇ chi hk'e te ve lehˬ, ngaˬ hui awˬ suhˍ awˬ shaˍ awˬ hk'aˇ suh maˇ k'ai leh, Awˬ ha hpu awˬ hk'aˇ suh k'ai ve chaw teˇ hpaˍ awˬ hk'aw lo, awˬ liˇ tawˇ hkawˇ k'oˆ taˍ ve hk'e biˇ la tuˬ awˬ pon yawˇ te ve yoˬ. 5 Awˬ lawn k'o, awˬ suhˍ awˬ shaˍ hta‸ caˉ da‸ ve chaw teˇ hpaˍ lehˬ, awˬ suhˍ awˬ shaˍ hpawˇ hta‸ dawˇ nyi tcuhˉ taˍ ve nyi ma cawˬ ve yoˬ. Ya‸ hk'aˇ, Awˬ ha hpu hta‸ caˉ da‸ ve chaw teˇ hpaˍ lehˬ, Awˬ ha hpu hta‸ caˉ da‸ ve awˬ ceuˬ teˇ hpaˍ hta‸ dawˇ nyi tcuhˉ taˍ ve nyi ma cawˬ ve yoˬ. 6 Awˬ suhˍ awˬ shaˍ hta‸ dawˇ nyi tcuhˉ taˍ ve nyi ma lehˬ, suh ve awˬ ceuˬ hpeh‸ ve yoˬ. Awˬ ha hpu hta‸ dawˇ nyi tcuhˉ taˍ ve nyi ma lehˬ, co ha te‸ ve leh dawˇ sha ve awˬ ceuˬ hpeh‸ ve yoˬ. 7 Awˬ lawn k'o, awˬ suhˍ awˬ shaˍ hta‸ dawˇ nyi tcuhˉ taˍ ve nyi ma lehˬ, G'uiˬ sha hta‸ canˇ jaˇ ve yoˬ. G'uiˬ sha ve awˬ liˇ tawˇ hkawˇ awˬ hawˉ lo maˇ chehˇ ve awˬ hk'oˆ ka‸, chehˇ maˇ hpeh‸ taˬ. 8 Awˬ suhˍ awˬ shaˍ awˬ hk'aˇ suh k'ai ve chaw hui lehˬ, G'uiˬ sha nyi ma cawˇ tuˬ te maˇ g'a. 9 Ya‸ hk'aˇ, G'uiˬ sha ve Awˬ ha hpu nawˬ hui awˬ hk'aw lo chehˇ tehˬ ve k'o, nawˬ hui awˬ suhˍ awˬ shaˍ a loˍ awˬ hk'aˇ suh k'ai tuˬ maˇ heˆ. Awˬ ha hpu awˬ hk'aˇ suh k'ai tuˬ ve yoˬ. Chaw teˇ g'aˇ g'aˇ awˬ hk'aw lo Hkri‸ ve Awˬ ha hpu maˇ chehˇ ve k'o, yawˇ Hkri‸ hta‸ maˇ caˉ da‸. 10 Ya‸ hk'aˇ, Hkri‸ nawˬ hui awˬ hk'aw lo chehˇ ve k'o, awˬ to lehˬ venˇ baˆ hta‸ pa taw suh peuˬ ve htawˇ, co ha lehˬ hteˇ ve cawˇ ve teˇ ceuˬ hta‸ pa taw te‸ chehˇ ve yoˬ. 11 Chi hk'oˆ ka‸, Yeˍsuˆ hta‸ suh kuiˬ lo k'aw‸ te‸ tu la piˇ shehˍ hpaˇ ve Awˬ ha hpu nawˬ hui awˬ hk'aw lo chehˇ taˍ ve k'o, Yeˍsuˆ Hkri‸ hta‸ suh kuiˬ lo k'aw‸ te‸ tu la piˇ shehˍ hpaˇ lehˬ, nawˬ hui suh puiˉ ve awˬ to hta‸ htawˇ k'aw‸ te‸ tu la piˇ tuˬ yoˬ. Nawˬ hui awˬ hk'aw lo chehˇ ve yawˇ ve Awˬ ha hpu hta‸ cuˇ leh yawˇ chi hk'e k'aw‸ te‸ tu la piˇ tuˬ yoˬ. 12 Hk'e te leh, awˬ viˉ awˬ nyi teˇ hpaˍ-oˬ, ngaˬ hui lehˬ awˬ suhˍ awˬ shaˍ a loˍ awˬ hk'aˇ suh k'ai tuˬ, awˬ suhˍ awˬ shaˍ geh jeˬ pfuhˇ taˍ ve chaw hpeh‸ ve maˇ heˆ. 13 Awˬ lawn k'o, nawˬ hui lehˬ awˬ suhˍ awˬ shaˍ a loˍ awˬ hk'aˇ suh a sha‸ te‸ ve k'o, nawˬ hui g'a suh tuˬ yoˬ. Ya‸ hk'aˇ, nawˬ hui lehˬ Awˬ ha hpu hta‸ cuˇ leh awˬ to te ve kanˉ teˇ hpaˍ hta‸ suh piˇ lawˬ ve k'o, nawˬ hui co ha g'a te‸ tuˬ yoˬ. 14 G'uiˬ sha ve Awˬ ha hpu shiˍ k'ai sheh k'ai ve chaw teˇ hpaˍ lehˬ, G'uiˬ sha ve awˬ yaˇ awˬ duˬ hpeh‸ ve yoˬ. 15 Awˬ lawn k'o, nawˬ hui teˇ pawˆ k'aw‸ kawˆ tuˬ, awˬ ceˬ ve nyi ma hta‸ g'a ve maˇ heˆ. Nawˬ hui awˬ yaˇ ve nyi ma hta‸ g'a ve yoˬ. Hk'e te leh, Aˍbaˆ a pa-oˬ teh‸ ngaˬ hui yawˇ hta‸ kuˬ hpeh‸ ve yoˬ. 16 Ngaˬ hui G'uiˬ sha ve awˬ yaˇ hpeh‸ ve yoˬ teh‸ Awˬ ha hpu lehˬ ngaˬ hui ve nyi ma geh teˇ geh shaˉ hkiˆ hkanˍ ve yoˬ. 17 Awˬ yaˇ hpeh‸ ve k'o, awˬ shinˉ caˇ shehˍ hpaˇ ka‸ hpeh‸ ve yoˬ. Hkri‸ geh teˇ geh awˬ me‸ awˬ hponˇ g'a tuˬ yawˇ geh teˇ geh ngaˬ hui g'a tu‸ g'a hkanˍ ve k'o, G'uiˬ sha ve awˬ shinˉ caˇ shehˍ hpaˇ hpeh‸ leh, Hkri‸ geh teˇ geh awˬ shinˉ hta‸ ngaˬ hui g'a caˇ tuˬ yoˬ. 18 Chi beu‸ teˇ yanˇ awˬ hk'aw lo g'a tu‸ g'a hkanˍ ve lehˬ, awˬ hk'aw‸ nawˉ ngaˬ hui hta‸ hpeu‸ maˍ laˇ tuˬ ve awˬ me‸ awˬ hponˇ hta‸ tehˆ nyi maˇ keunˍ ve teh‸ ngaˬ dawˇ ve yoˬ. 19 Hpanˍ taˍ te taˍ ve awˬ ceuˬ hk'a peu-eˬ lehˬ, G'uiˬ sha ve awˬ yaˇ teˇ hpaˍ hk'a tawˍ lehˆ tawˆ la ve hta‸ g'a mawˬ tuˬ, dawˇ law jaˇ leh law chehˇ taˍ ve yoˬ. 20 Awˬ lawn k'o, hpanˍ taˍ te taˍ ve hk'a peu-eˬ lehˬ, te‸ chiˉ te maˇ g'a ve awˬ hk'aw lo g'a chehˇ taˍ ve yoˬ. Yawˇ hk'aˇ yawˇ chehˇ gaˇ ve hta‸ pa taw maˇ heˆ. Yawˇ hta‸ chehˇ tcuh shehˍ hpaˇ ve a loˍ hta‸ pa taw g'a chehˇ taˍ ve yoˬ. 21 Hpanˍ taˍ te taˍ ve hk'a peu-eˬ lehˬ, luˬ ve sheˆ ve awˬ ceuˬ awˬ hawˉ lo awˬ ceˬ te ve hta‸ g'a ponˬ leh, G'uiˬ sha ve awˬ yaˇ awˬ duˬ teˇ hpaˍ ve awˬ me‸ awˬ hponˇ hta‸ caˉ da‸ ve ponˬ ve teˇ ceuˬ hta‸ g'a tuˬ, yawˇ hui dawˇ law chehˇ ve yoˬ. 22 Chi beu‸ hk'a gaˬ hpanˍ taˍ teˍtaˍ ve awˬ ceuˬ hk'a peu-eˬ lehˬ, teˇ geh hk'anˇ chehˇ leh, teˇ geh tu‸ jaˇ hkanˍ jaˇ chehˇ ve hta‸ ngaˬ hui shiˍ ve yoˬ. 23 Hpanˍ taˍ ve awˬ ceuˬ ceh tiˉ maˇ heˆ. Awˬ ha hpu ve awˬ bon hta‸ awˉ lawˉ g'a peuˬ ve ngaˬ hui htawˇ, awˬ yaˇ awˬ tehˬ awˬ na hpeh‸ la leh, awˬ to chi htaiˍ hk'aw‸ g'a tuˬ ve hta‸ ngaˬ hui law chehˇ htaˇ, nyi ma awˬ hk'aw lo hk'anˇ chehˇ ve yoˬ. 24 Awˬ lawn k'o, dawˇ law ve awˬ hk'aw lo ngaˬ hui htaiˍ hk'aw‸ ve hta‸ g'a ve yoˬ. Dawˇ law taˍ ve hta‸ g'a mawˬ peuˬ ve k'o, k'aw‸ dawˇ law tuˬ maˇ loˍ. G'a mawˬ peuˬ ve awˬ ceuˬ hta‸ a shu teˇ g'aˇ k'aw‸ dawˇ law tuˬ sheˍ le. 25 Ya‸ hk'aˇ, ngaˬ hui maˇ mawˬ ve awˬ ceuˬ hta‸ dawˇ law chehˇ ve k'o, oˇ ve hta‸ ngaˬ hui yeunˇ hkanˍ leh law chehˇ taˍ ve yoˬ. 26 Chi hk'a shuˍ shuˍ, ngaˬ hui awˬ g'aˇ nuˇ ve hta‸ Awˬ ha hpu ga laˇ ve yoˬ. Awˬ lawn k'o, ngaˬ hui bon hk'aˬ hk'e te lawˬ cawˇ ve hta‸ ngaˬ hui maˇ shiˍ. Ya‸ hk'aˇ, Awˬ ha hpu lehˬ hk'anˇ ve awˬ hk'aw lo ngaˬ hui awˬ pon lawˬ hkawˉ ve yoˬ. Yawˇ hk'anˇ ve lehˬ, tawˇ yaw maˇ tawˆ leh hk'anˇ ve teˇ ceuˬ hpeh‸ ve yoˬ. 27 Nyi ma hta‸ ca nyi shehˍ hpaˇ lehˬ, Awˬ ha hpu ve dawˇ hk'aˇ hta‸ shiˍ ve yoˬ. Awˬ lawn k'o, G'uiˬ sha ve a loˍ cawˇ ve hk'e, Hkri‸ yaˇ hui awˬ pon Awˬ ha hpu lawˬ hkawˉ ve yoˬ. 28 G'uiˬ sha hta‸ hk'a ha‸ ve chaw hui awˬ pon, hk'a peu-eˬ awˬ hk'aw lo da‸ ve awˬ ceuˬ yawˇ te tawˆ la ve hta‸ ngaˬ hui shiˍ ve yoˬ. G'uiˬ sha yawˇ dawˇ taˍ ve hk'e hpeh‸ la tuˬ awˬ pon, yawˇ hui hta‸ kuˬ yuˬ taˍ ve yoˬ. 29 Awˬ g'uˇ suhˍ htaˇ ka‸ yawˇ shiˍ taˍ ve chaw teˇ hpaˍ lehˬ, yawˇ ve Yaˇ hpu awˬ ho‸ awˬ han hk'a shuˍ shuˍ hpeh‸ la tuˬ, G'uiˬ sha yawˇ hui hta‸ awˉ lawˉ htaˇ ka‸ fuiˍ teh taˍ ve yoˬ. Aˬ hto‸ ma hta‸ pa taw le teh‸ k'oˆ k'o, awˬ viˉ awˬ nyi maˇ ve awˬ hk'aw lo Yaˇ hpu lehˬ, yaˇ uiˍ hpeh‸ tuˬ ve awˬ pon G'uiˬ sha te ve yoˬ. 30 Awˉ lawˉ htaˇ ka‸ yawˇ fuiˍ teh taˍ ve chaw hui hta‸ yawˇ kuˬ yuˬ ve yoˬ. Kuˬ yuˬ taˍ ve chaw hui hta‸ htawˇ, yawˇ hteˇ ve cawˇ ve chaw hpeh‸ piˇ lawˬ ve yoˬ. Hteˇ ve cawˇ ve chaw hpeh‸ piˇ lawˬ peuˬ ve chaw hui hta‸ htawˇ, yawˇ awˬ me‸ awˬ hponˇ piˇ ve yoˬ. 31 Hk'e te leh, awˬ lawn chi teˇ hpaˍ hta‸ aˬ hto‸ ma k'oˆ tuˬ cawˬ le. G'uiˬ sha ngaˬ hui hpawˇ chehˇ ve k'o, a shu ngaˬ hui hta‸ tawˍ da‸ hpeh‸ tuˬ le. 32 Yawˇ ve Yaˇ hpu hta‸ yawˇ maˇ ponˬ piˇ leh, ngaˬ hui hk'a peu-eˬ awˬ pon yawˇ hta‸ chiˇ a‸ piˇ shehˍ hpaˇ G'uiˬ sha lehˬ, yawˇ ve Yaˇ hpu geh teˇ geh hk'a cawˬ ve hk'a peu-eˬ ngaˬ hui hta‸ pe‸ laˇ tuˬ maˇ heˆ laˇ. 33 G'uiˬ sha leuˆ yuˬ taˍ ve chaw hui hta‸ a shu venˇ baˆ taˍ hpeh‸ tuˬ le. Hteˇ ve cawˇ ve chaw hpeh‸ la piˇ lawˬ shehˍ hpaˇ lehˬ G'uiˬ sha yoˬ. 34 Venˇ baˆ cawˬ ve teh‸ a shu suhˉ taˆ hpeh‸ tuˬ le. Hkanˍ suh shehˍ hpaˇ lehˬ Yeˍsuˆ Hkri‸ yoˬ. Yawˇ hkanˍ suh ve ceh tiˉ maˇ heˆ, suh kuiˬ lo yawˇ k'aw‸ te‸ tu la leh, G'uiˬ sha ve la‸ sha paˉ lo chehˇ taˍ leh, ngaˬ hui awˬ pon lawˬ hkawˉ chehˇ ve maˇ heˆ laˇ. 35 Hkri‸ ve ha‸ pehnˇ ve awˬ hk'aw lo, a shu ngaˬ hui hta‸ yuˬ hpaˆ laˇ hpeh‸ tuˬ le. Tu‸ ve hkanˍ ve, dawˇ tui‸ gaˇ tui‸ ve, fawˉ ve mehˍ ve, meu‸ ve kaˆ ve, veu‸ k'aˇ maˇ cawˬ ve, kawˆ tuˬ ve, aˉ hte‸ aˉ htaw, chi teˇ hpaˍ laˇ. 36 Li‸ hpu hk'aw bvuh‸ taˍ ve hk'e, Nawˬ awˬ pon teˇ nyi tanˇ vanˇ ngaˬ hui tiˇ pehˍ ve hta‸ g'a hkanˍ chehˇ ve yoˬ. Tiˇ pehˍ tuˬ awˬ pon teh taˍ ve yawˬ hk'a shuˍ shuˍ ngaˬ hui hta‸ shu shawˍ taˍ laˇ ve yoˬ. teh‸ bvuh‸ taˍ ve yoˬ. 37 Ya‸ hk'aˇ ngaˬ hui hta‸ ha‸ ve chaw teˇ g'aˇ hta‸ pa taw, chi hk'a peu-eˬ hta‸ ngaˬ hui leuˉ leh g'aˇ shehˍ hpaˇ hpeh‸ chehˇ taˍ peuˬ. 38 Awˬ lawn k'o, suh ve teˇ ceuˬ maˇ k'oˆ, te‸ ve teˇ ceuˬ maˇ k'oˆ, mvuhˇ naw ma tcuh yaˇ teˇ hpaˍ maˇ k'oˆ, jawˇ mawˇ teˇ hpaˍ maˇ k'oˆ, chi beu‸ cawˬ taˍ ve awˬ ceuˬ maˇ k'oˆ, awˬ hk'aw‸ nawˉ cawˬ la tuˬ ve awˬ ceuˬ maˇ k'oˆ, 39 kanˇ paˆ maˇ k'oˆ, mvuh ve teˇ ceuˬ maˇ k'oˆ, naˉ ve teˇ ceuˬ maˇ k'oˆ, hk'a hpanˍ taˍ ve awˬ kaˍ awˬ nu hk'aˬ ve teˇ ceuˬ htawˇ maˇ k'oˆ, ngaˬ hui Jawˇ mawˇ Yeˍsuˆ Hkri‸ hta‸ pa taw, G'uiˬ sha ve ha‸ pehnˇ ve awˬ hk'aw lo ngaˬ hui hta‸ yuˬ hpaˆ laˇ maˇ hpeh‸ ve teh‸ ngaˬ yonˍ tehˬ ve yoˬ.

Roˉma‸ 9

1 Hkri‸ awˬ hk'aw lo ngaˬ hteˇ lehˍ cawˇ lehˍ k'oˆ ve yoˬ. Ngaˬ heˍ ve maˇ heˆ. 2 Ngaˬ ve nyi ma awˬ hk'aw lo ngaˬ dawˇ haˍ jaˇ leh, hk'aˬ htaˆ ka‸ ngaˬ nyi ma haw haw chiˆ chiˆ cawˬ ve yoˬ. Da‸ ve kehˬ ve Awˬ ha hpu hta‸ pa taw ngaˬ ve shiˍ puiˉ ve nyi ma htawˇ, ngaˬ geh teˇ geh awˬ lawn chi hta‸ shaˉ hkiˆ hkanˍ ve yoˬ. 3 Awˬ lawn k'o, ngaˬ ve chaw ceuˬ, ngaˬ ve awˬ viˉ awˬ nyi hui awˬ pon, ngaˬ awˬ to Hkri‸ hta‸ hpaˆ da‸ leh hkeu ve hta‸ hkanˍ gaˇ ve nyi ma cawˬ ve yoˬ. 4 Yawˇ hui lehˬ, Iˉsaˍreˍlaˆ chaw hui hpeh‸ ve yoˬ. Awˬ yaˇ hpeh‸ la ve teˇ ceuˬ maˇ k'oˆ, awˬ me‸ awˬ hponˇ maˇ k'oˆ, ka ti‸ shaˉ caˆ teˇ hpaˍ maˇ k'oˆ, awˬ liˇ tawˇ hkawˇ hta‸ g'a ve maˇ k'oˆ, oˉ k'oˍ pui ve awˬ liˇ maˇ k'oˆ, ka ti‸ teˇ hpaˍ htawˇ maˇ k'oˆ, hk'a peu-eˬ yawˇ hui ve hpeh‸ ve yoˬ. 5 Awˬ puˍ lonˉ hui lehˬ, yawˇ hui ve awˬ puˍ lonˉ teˇ hpaˍ hpeh‸ leh, awˬ suhˍ awˬ shaˍ hpawˇ shawˍ k'o, Hkri‸ htawˇ yawˇ hui ve chaw ceuˬ hpeh‸ ve yoˬ. Yawˇ lehˬ, hk'a peu-eˬ ve awˬ hk'oˆ hta‸ chehˇ leh, co co taiˍ taiˍ awˬ bon uiˍ ve G'uiˬ sha hpeh‸ ve yoˬ. A menˬ. 6 Ya‸ hk'aˇ, G'uiˬ sha ve tawˇ hkawˇ luˬ k'ai ve maˇ heˆ. Awˬ lawn k'o, Iˉsaˍreˍlaˆ ve awˬ ceuˬ awˬ hk'aˇ hk'a peu-eˬ lehˬ, Iˉsaˍreˍlaˆ chaw awˬ tehˬ hpeh‸ ve maˇ heˆ. 7 Aˍbraˍhanˍ ve awˬ yaˇ awˬ duˬ hk'a peu-eˬ hta‸ yawˇ ve awˬ yaˇ awˬ duˬ teh‸ k'oˆ hpeh‸ ve maˇ heˆ. Iˉcaˆ awˬ hk'aw lo ceh tiˉ nawˬ ve awˬ yaˇ awˬ duˬ shawˍ tuˬ yoˬ teh‸ k'oˆ taˍ ve yoˬ. 8 K'oˆ gaˇ ve lehˬ chi hk'e yoˬ. Awˬ suhˍ awˬ shaˍ hta‸ caˉ da‸ ve awˬ yaˇ awˬ duˬ hui lehˬ, G'uiˬ sha ve awˬ yaˇ awˬ duˬ hpeh‸ ve maˇ heˆ. Ka ti‸ shaˉ caˆ hta‸ caˉ da‸ ve awˬ yaˇ awˬ duˬ hui ceh tiˉ yawˇ ve awˬ yaˇ awˬ duˬ hpeh‸ ve teh‸ shawˍ taˍ ve yoˬ. 9 Awˬ lawn k'o, ka ti‸ tawˇ hkawˇ chi hk'e k'oˆ taˍ ve, Nehˉ hk'aw‸ chi teˇ yanˇ ngaˬ k'aw‸ laˬ htaˇ, Saˍraˇ lehˬ yaˇ paˍ teˇ g'aˇ g'a tuˬ yoˬ, teh‸ k'oˆ taˍ ve yoˬ. 10 Oˇ ve ceh tiˉ maˇ heˆ. Reˍbehˆka‸ htawˇ ngaˬ hui ve awˬ pa Iˉcaˆ hta‸ heuˆ leh yaˇ hu chehˇ htaˇ, yawˇ ve yaˇ paˍ oˇ ve nyiˇ g'aˇ maˇ paw la sheˍ. 11 Yawˇ huiˉ maˬ da‸ ve kanˉ ka‸ maˇ da‸ ve kanˉ ka‸ maˇ g'a te sheˍ. Ya‸ hk'aˇ, G'uiˬ sha chaw yaˇ hta‸ leuˆ yuˬ ve lehˬ, kanˉ te ve hta‸ pa taw maˇ heˆ. Yawˇ dawˇ taˍ ve teˇ ceuˬ maˇ g'a luˬ tuˬ, kuˬ yuˬ ve teˇ ceuˬ hta‸ pa taw ceh tiˉ chaw hta‸ leuˆ yuˬ ve yoˬ teh‸ shu g'a shiˍ tuˬ, awˬ e hta‸ yawˇ k'oˆ piˇ ve, 12 Awˬ viˉ paˍ teˇ g'aˇ lehˬ, awˬ nyi paˍ teˇ g'aˇ ve awˬ ceˬ g'a te tuˬ yoˬ teh‸ k'oˆ piˇ ve yoˬ. 13 Li‸ hpu hk'aw bvuh‸ taˍ ve hk'e, Yaˍkoˆ hta‸ ngaˬ ha‸ leh Iˉsawˇ hta‸ ngaˬ canˇ ve yoˬ. 14 Hk'e te leh, ngaˬ hui hk'aˬ hk'e k'oˆ tuˬ cawˬ le. G'uiˬ sha awˬ hk'aw lo maˇ hteˇ maˇ cawˇ ve teˇ ceuˬ cawˬ ve laˇ. Maˇ heˆ taˬ. 15 Awˬ lawn k'o, yawˇ Moˉseˍ hta‸ k'oˆ piˇ ve, Ngaˬ awˬ bon te piˇ gaˇ ve chaw hta‸ awˬ bon te piˇ leh, ngaˬ ha k'aˉ piˇ gaˇ ve chaw hta‸ ha k'aˉ piˇ tuˬ yoˬ teh‸ k'oˆ ve yoˬ. 16 Heuˆ gaˇ ve hta‸ pa taw g'a ve maˇ heˆ. G'aˇ hte‸ te ve hta‸ pa taw g'a ve ka‸ maˇ heˆ. G'uiˬ sha awˬ bon te piˇ ve hta‸ pa taw ceh tiˉ g'a ve yoˬ. 17 Li‸ hpu hk'aw jawˇ mawˇ Hpaˍrawˇ hta‸ k'oˆ ve, Nawˬ awˬ hk'aw lo ngaˬ ve kanˇ paˆ hpeu‸ tawˆ leh, miˬ guiˬ hk'a peu-eˬ awˬ hk'aw lo ngaˬ ve awˬ meh bvuhˬ k'ai tuˬ ngaˬ nawˬ hta‸ chiˇ taˆ piˇ ve yoˬ teh‸ k'oˆ piˇ ve yoˬ. 18 Hk'e te leh, awˬ bon te piˇ gaˇ ve chaw hta‸ yawˇ te piˇ leh, nyi ma heh piˇ lawˬ gaˇ ve chaw hta‸ yawˇ heh piˇ lawˬ ve yoˬ. 19 Hk'e te leh, aˬ hto‸ ma te G'uiˬ sha venˇ baˆ k'aw‸ taˍ laˇ sheˍ le. Yawˇ ve a loˍ hta‸ a shu tawˍ taˍ g'a tuˬ le teh‸ nawˬ ngaˬ hta‸ k'oˆ laˇ tuˬ yoˬ. 20 G'uiˬ sha hta‸ tawˇ k'aw‸ shaˬ ve chaw-oˬ, nawˬ lehˬ hk'aˬ hk'e ve chaw le. Te taˍ ve mawˇ lehˬ, te shehˍ hpaˇ hta‸, Aˬ hto‸ ma te ngaˬ hta‸ chi hk'e te laˇ ve le teh‸ k'oˆ tuˬ laˇ. 21 Mu‸ hk'u te shehˍ hpaˇ lehˬ, mu‸ hk'u te tuˬ ve je‸ awˬ hk'oˆ hta‸ kanˇ paˆ cawˬ ve maˇ heˆ laˇ. Je‸ teˇ diˬ tiˉ awˬ hk'aw lo awˬ me‸ awˬ hponˇ cawˬ ve awˬ pon yehˇ tuˬ ve mu‸ hk'u teˇ shiˍ leh, awˬ me‸ awˬ hponˇ maˇ cawˬ ve awˬ pon yehˇ tuˬ ve mu‸ hk'u teˇ shiˍ hta‸ yawˇ te hpeh‸ ve maˇ heˆ laˇ. 22 G'uiˬ sha lehˬ, yawˇ nyi ma zuhˆ ve hta‸ maw piˇ tuˬ leh, yawˇ ve kanˇ paˆ hta‸ shiˍ piˇ lawˬ tuˬ, luˬ k'ai sheˆ k'ai tuˬ awˬ pon gu taˍ ve nyi ma zuhˆ ve hta‸ g'a hkanˍ ve mu‸ hk'u teˇ hpaˍ hta‸ yawˇ dawˇ zuhˬ gaˇ zuhˬ leh yeunˇ hkanˍ chehˇ ve k'o, aˬ hto‸ ma k'oˆ tuˬ cawˬ le. 23 Awˬ me‸ awˬ hponˇ cawˬ tuˬ ve awˬ pon awˉ lawˉ htaˇ ka‸ gu taˍ ve, yawˇ ha k'aˉ ve mu‸ hk'u teˇ hpaˍ awˬ hk'oˆ hta‸ yawˇ ve awˬ me‸ awˬ hponˇ hk'aˬ ma uiˍ hk'aˬ ma maˇ ve hta‸ shiˍ piˇ lawˬ ve k'o, aˬ hto‸ ma k'oˆ tuˬ cawˬ le. 24 Yawˇ hk'a kuˬ yuˬ taˍ ve ngaˬ hui teˇ hpaˍ lehˬ, chi hk'e ve muˬ hk'u hpeh‸ ve yoˬ. Yuˇda‸ chaw hui awˬ hk'aw lo ceh tiˉ kuˬ yuˬ ve maˇ heˆ. Buiˇ shaˆ aˉ naˆ chaw hui awˬ hk'aw lo htawˇ yawˇ kuˬ yuˬ taˍ ve yoˬ. 25 Chi hk'a shuˍ shuˍ, Hawˇseˍ li‸ awˬ hk'aw lo G'uiˬ sha k'oˆ ve, Ngaˬ ve chaw ceuˬ maˇ heˆ ve hta‸ ngaˬ ve chaw ceuˬ teh‸ k'oˆ leh, maˇ ha‸ ve yaˇ miˇ hta‸ ha‸ ve yaˇ miˇ teh‸ ngaˬ k'oˆ tuˬ yoˬ. 26 Yawˇ hui hta‸, Nawˬ hui lehˬ ngaˬ ve chaw ceuˬ maˇ heˆ teh‸ k'oˆ taˍ ve chehˇ kuiˬ awˬ hk'aw lo, te‸ chehˇ ve G'uiˬ sha ve awˬ yaˇ awˬ duˬ hpeh‸ ve yoˬ teh‸ shu k'oˆ tuˬ yoˬ. 27 Iˉsaˍyaˆ htawˇ, Iˉsaˍreˍlaˆ chaw ceuˬ awˬ lawn bvuhˬ chaweh kuˬ leh k'oˆ ve, Iˉsaˍreˍlaˆ chaw hui lehˬ, laˇ tsuhˇ g'uiˬ ve shehˇ shiˍ hk'a shuˍ shuˍ maˇ ve htawˇ, chaw a ciˉ ceh tiˉ htaiˍ hk'aw‸ ve hta‸ g'a tuˬ yoˬ. 28 Awˬ lawn k'o, Jawˇ mawˇ G'uiˬ sha lehˬ miˬ guiˬ hk'oˆ lo yawˇ ve tawˇ hkawˇ biˇ la htaˇ hk'a gaˬ haˆ haˆ te tuˬ yoˬ teh‸ k'oˆ taˍ ve yoˬ. 29 Awˉ lawˉ htaˇ Iˉsaˍyaˆ k'oˆ taˍ ve hk'e, Hk'a peu-eˬ awˬ hk'oˆ uiˍ shehˍ hpaˇ Jawˇ mawˇ G'uiˬ sha lehˬ, ngaˬ hui awˬ pon awˬ ceuˬ awˬ hk'aˇ maˇ teh taˉ laˇ ve k'o, Sawˉdonˍ venˇ hk'e ngaˬ hui hpeh‸ leh, Gawˇmawˇra‸ venˇ hk'a shuˍ shuˍ hpeh‸ tuˬ yoˬ, teh‸ k'oˆ ve yoˬ. 30 Hk'e te leh, ngaˬ hui hk'aˬ hk'e k'oˆ tuˬ cawˬ le. Buiˇ shaˆ aˉ naˆ chaw hui lehˬ, hteˇ ve cawˇ ve teˇ ceuˬ hta‸ maˇ ca ve htawˇ, hteˇ ve cawˇ ve hta‸ g'a peuˬ. Ngaˬ chi hk'e k'oˆ ve lehˬ, yonˍ leh g'a ve hteˇ ve cawˇ ve teˇ ceuˬ hta‸ k'oˆ gaˇ ve yoˬ. 31 Iˉsaˍreˍlaˆ chaw hui lehˬ, awˬ liˇ tawˇ hkawˇ hta‸ caˉ da‸ ve hteˇ ve cawˇ ve teˇ ceuˬ hta‸ ca ve htawˇ, awˬ liˇ tawˇ hkawˇ hta‸ te biˇ maˇ g'a. 32 Aˬ hto‸ ma pa taw hteˇ ve cawˇ ve teˇ ceuˬ hta‸ maˇ g'a le teh‸ k'oˆ k'o, yonˍ ve hta‸ maˇ cuˇ leh kanˉ hta‸ ceh tiˉ cuˇ ve pa taw yoˬ. 33 Li‸ hpu hk'aw bvuh‸ taˍ ve, Nyi loˬ. Chaw yaˇ hkui htiˇ poˬ tuˬ ve haˉ pui leh, paiˍ piˇ lawˬ tuˬ ve haˉ pui shiˍ hta‸ Ziˉonˍ awˬ hk'aw lo ngaˬ kawˍ chehˇ ve yoˬ. Yawˇ hta‸ hk'a yonˍ ve chaw lehˬ maˇ g'a ya‸ taw, teh‸ bvuh‸ taˍ ve hk'a shuˍ shuˍ, shu hkui htiˇ poˬ ve haˉ pui shiˍ hta‸ yawˇ hui htawˇ hkui htiˇ poˬ paiˍ ve yoˬ.

Roˉma‸ 10

1 Awˬ viˉ awˬ nyi teˇ hpaˍ-oˬ. Iˉsaˍ reˍlaˆ chaw hui htaiˍ hk'aw‸ ve hta‸ g'a tuˬ, ngaˬ nyi ma cawˇ jaˇ leh, yawˇ hui awˬ pon G'uiˬ sha hta‸ ngaˬ bon lawˬ chehˇ ve yoˬ. 2 Awˬ lawn k'o, yawˇ hui lehˬ G'uiˬ sha awˬ pon nyi ma pfuhˇ jaˇ ve hta‸ ngaˬ shaˉ hkiˆ hkanˍ ve yoˬ. Ya‸ hk'aˇ, yawˇ hui shiˍ leh te ve teˇ ceuˬ maˇ heˆ. 3 G'uiˬ sha ve hteˇ ve cawˇ ve awˬ ceuˬ hta‸ yawˇ hui maˇ shiˍ leh, a shu yawˇ hteˇ ve cawˇ ve awˬ ceuˬ hta‸ yeˬ piˇ lawˬ tuˬ te ve pa taw, yawˇ hui G'uiˬ sha ve hteˇ ve cawˇ ve awˬ ceuˬ awˬ hawˉ lo maˇ hkanˍ chehˇ ve yoˬ. 4 Awˬ lawn k'o, hk'a yonˍ ve chaw hk'a peu-eˬ hteˇ ve cawˇ ve chaw hpeh‸ la tuˬ, Hkri‸ lehˬ awˬ liˇ tawˇ hkawˇ hta‸ te leh piˇ ve yoˬ. 5 Moˉseˍ bvuh‸ taˍ ve lehˬ, Awˬ liˇ tawˇ hkawˇ hta‸ caˉ da‸ ve hteˇ ve cawˇ ve awˬ ceuˬ hta‸ te ve chaw lehˬ, awˬ liˇ tawˇ hkawˇ awˬ hawˉ lo g'a chehˇ tuˬ yoˬ teh‸ bvuh‸ taˍ ve yoˬ. 6 Ya‸ hk'aˇ, yonˍ ve hta‸ caˉ da‸ ve hteˇ ve cawˇ ve teˇ ceuˬ lehˬ chi hk'e k'oˆ ve yoˬ. Mvuhˇ naw ma hk'oˆ lo a shu taˆ-e tuˬ le. Naˉ jaˇ kuiˬ lo a shu ya‸-e tuˬ le teh‸ nyi ma awˬ hk'aw lo taˇ dawˇ teh‸ k'oˆ ve yoˬ. 7 (Chi hk'e k'oˆ ve lehˬ, Hkri‸ hta‸ ca shiˍ ya‸ la tuˬ, mvuhˇ naw ma hk'oˆ lo a shu taˆ-e tuˬ le. Hkri‸ hta‸ suh kuiˬ lo k'aw‸ te‸ tu la piˇ tuˬ, naˉ jaˇ kuiˬ lo a shu ya‸-e tuˬ le teh‸ k'oˆ gaˇ ve yoˬ.) 8 Hk'e te leh, yonˍ ve hta‸ caˉ da‸ ve hteˇ ve cawˇ ve teˇ ceuˬ hk'aˬ hk'e k'oˆ ve le. Tawˇ hkawˇ lehˬ, nawˬ hta‸ neˇ jaˇ ve yoˬ. Nawˬ ve maw‸ k'aw awˬ hk'aw lo ka‸, nawˬ ve nyi ma awˬ hk'aw lo ka‸ cawˬ ve yoˬ teh‸ k'oˆ ve yoˬ. (Tawˇ hkawˇ oˇ ve lehˬ, ngaˬ maˍ piˇ ve yonˍ ve hta‸ caˉ da‸ ve tawˇ hkawˇ hta‸ k'oˆ gaˇ ve yoˬ.) 9 Yeˍsuˆ lehˬ Jawˇ mawˇ hpeh‸ ve yoˬ teh‸ nawˬ ve maw‸ k'aw hkanˍ yuˬ leh, G'uiˬ sha lehˬ yawˇ hta‸ suh kuiˬ lo k'aw‸ te‸ tu la piˇ ve hta‸ nawˬ ve nyi ma awˬ hk'aw lo yonˍ ve k'o, nawˬ htaiˍ hk'aw‸ ve hta‸ g'a tuˬ yoˬ. 10 Awˬ lawn k'o, chaw yaˇ lehˬ nyi ma hk'aw yonˍ ve pa taw hteˇ ve cawˇ ve chaw hpeh‸ la leh, maw‸ k'aw hkanˍ yuˬ ve pa taw htaiˍ hk'aw‸ ve hta‸ g'a ve yoˬ. 11 Li‸ hpu hk'aw k'oˆ ve, Yawˇ hta‸ hk'a yonˍ ve chaw hk'a peu-eˬ lehˬ, maˇ g'a ya‸ taw teh‸ k'oˆ taˍ ve yoˬ. 12 Awˬ lawn k'o, Yuˇda‸ chaw leh Heˍlaˍsaˆ chaw peun da‸ kuiˬ maˇ cawˬ. Chaw hk'a peu-eˬ hta‸ uˉ peunˍ ve Jawˇ mawˇ teˇ g'aˇ tiˉ cawˬ leh, yawˇ hta‸ hk'a kuˬ ve chaw hk'a peu-eˬ hta‸ yawˇ awˬ bon hk'a biˇ piˇ ve yoˬ. 13 Awˬ lawn k'o, Jawˇ mawˇ G'uiˬ sha ve awˬ meh hta‸ hk'a kuˬ ve chaw teˇ g'aˇ le le htaiˍ hk'aw‸ ve hta‸ g'a tuˬ yoˬ. 14 Ya‸ hk'aˇ, yawˇ hta‸ maˇ yonˍ ve k'o, hk'aˬ hk'e te kuˬ tuˬ le. Yawˇ awˬ lawn maˇ g'a kaˇ jaw ve k'o, hk'aˬ hk'e te yonˍ tuˬ le. Maˍ piˇ shehˍ hpaˇ maˇ cawˬ ve k'o, hk'aˬ hk'e te g'a kaˇ tuˬ le. 15 Chaw hta‸ maˇ k'ai tcuh ve k'o, hk'aˬ hk'e te maˍ piˇ hpeh‸ tuˬ le. Chi hk'a shuˍ shuˍ, Ha lehˬ ve bon hkawˇ maˍ piˇ shehˍ hpaˇ hui ve hkui sheh lehˬ, hk'aˬ ma nyi sha jaˇ ve le teh‸ Li‸ hpu hk'aw bvuh‸ taˍ ve yoˬ. 16 Ya‸ hk'aˇ, chaw hk'a peu-eˬ ha lehˬ ve bon hkawˇ hta‸ na yuˬ ve maˇ heˆ. Awˬ lawn k'o, Iˉsaˍyaˆ k'oˆ ve, Jawˇ mawˇ-oˬ, ngaˬ hui maˍ piˇ ve tawˇ hkawˇ hta‸ a shu yonˍ ve le teh‸ k'oˆ taˍ ve yoˬ. 17 Hk'e te leh yonˍ ve lehˬ, g'a kaˇ ve hta‸ pa taw yoˬ. G'a kaˇ ve htawˇ, Hkri‸ ve tawˇ hkawˇ shu hto laˇ ve hta‸ pa taw yoˬ. 18 Ya‸ hk'aˇ ngaˬ k'oˆ ve lehˬ, yawˇ hui maˇ g'a kaˇ leh laˇ. G'a kaˇ tehˬ ve yoˬ. Yawˇ hui ve awˬ hkawˇ lehˬ, miˬ guiˬ hk'oˆ teˇ kaˬ le le lo bvuhˬ k'ai leh, yawˇ hui ve tawˇ hkawˇ lehˬ, miˬ guiˬ awˬ leh hk'a gaˬ, gaˬ peuˬ ve yoˬ. 19 Teˇ pawˆ ngaˬ k'aw‸ na nyi ve, Iˉsaˍreˍlaˆ chaw hui maˇ shiˍ leh laˇ. Moˉseˍ k'oˆ ve, Mvuhˇ miˬ maˇ cawˬ ve chaw ceuˬ hta‸ nawˬ hui hkawehˉ tuˬ ngaˬ te leh, cuˇ yiˍ maˇ cawˬ ve chaw ceuˬ hta‸ nawˬ hui nyi ma zuhˆ tuˬ ngaˬ te tuˬ yoˬ, teh‸ awˉ lawˉ htaˇ ka‸ k'oˆ taˍ ve yoˬ. 20 Iˉsaˍyaˆ htawˇ nyi ma ha‸ hanˉ te leh k'oˆ ve, Ngaˬ hta‸ maˇ ca ve chaw hui lehˬ, ngaˬ hta‸ g'a mawˬ peuˬ. Ngaˬ ve awˬ lawn maˇ na nyi ve chaw hui hta‸ ngaˬ ve awˬ lawn shiˍ piˇ peuˬ, teh‸ k'oˆ ve yoˬ. 21 Iˉsaˍreˍlaˆ chaw hui awˬ lawn yawˇ teˇ pawˆ k'aw‸ k'oˆ ve, Maˇ na yuˬ leh tawˇ k'aw‸ shaˬ puiˉ ve chaw ceuˬ hta‸ ha‸ yuˬ tuˬ, teˇ nyi tanˇ vanˇ ngaˬ ve la‸ sheh che law taˍ ve yoˬ, teh‸ k'oˆ ve yoˬ.

Roˉma‸ 11

1 Hk'e te leh ngaˬ na nyi ve, G'uiˬ sha yawˇ ve chaw ceuˬ hta‸ baˬ taˉ peuˬ laˇ. Maˇ baˬ taˉ taˬ. Ngaˬ htawˇ Iˉsaˍreˍlaˆ chaw hpeh‸ leh, Aˍbraˍhanˍ ve awˬ yaˇ awˬ duˬ awˬ hk'aw lo Beˍyaˍmenˍ ve awˬ ceuˬ awˬ hk'aˇ teˇ g'aˇ hpeh‸ ve yoˬ. 2 Awˬ g'uˇ suhˍ htaˇ ka‸ G'uiˬ sha shiˍ taˍ ve, yawˇ ve chaw hui hta‸ yawˇ baˬ taˉ ve maˇ heˆ. Eˇliˇya‸ lehˬ G'uiˬ sha mehˆ g'uˇ suhˍ Iˉsaˍreˍlaˆ chaw hui awˬ hk'oˆ venˇ baˆ taˍ leh k'oˆ ve, 3 Jawˇ mawˇ-oˬ, nawˬ ve tcuh kaˍ paˍ hui hta‸ yawˇ hui tiˇ pehˍ peuˬ. Nawˬ hta‸ tanˇ kuiˬ teˇ hpaˍ hta‸ ka‸ yawˇ hui duˇ baˬ peuˬ. Ngaˬ teˇ g'aˇ tiˉ cawˬ taˉ leh, ngaˬ hta‸ ka‸ tiˇ pehˍ tuˬ yawˇ hui ca chehˇ ve yoˬ teh‸, Li‸ hpu hk'aw bvuh‸ taˍ ve hta‸ nawˬ hui maˇ shiˍ laˇ. 4 Ya‸ hk'aˇ, G'uiˬ sha yawˇ hta‸ hk'aˬ hk'e k'aw‸ k'oˆ piˇ ve le. Baˍlaˆ shaˉ ho‸ mehˆ g'uˇ suhˍ hkui tcuhˉ maˇ teh ve chaw suhˍ hinˉ g'aˇ ngaˬ awˬ pon ngaˬ teh taˍ sheˬ ve yoˬ teh‸ k'aw‸ k'oˆ piˇ ve yoˬ. 5 Chi hk'a shuˍ shuˍ, chi beu‸ awˬ yanˇ awˬ hk'aw lo htawˇ, awˬ bon hta‸ pa taw leuˆ yuˬ taˍ ve chaw a ciˉ cawˬ taˍ sheˍ ve yoˬ. 6 Awˬ bon hta‸ pa taw leuˆ yuˬ ve k'o, kanˉ te ve hta‸ maˇ k'aw‸ caˉ da‸. Kanˉ te ve hta‸ caˉ da‸ ve k'o, awˬ bon oˇ ve lehˬ, awˬ bon maˇ k'aw‸ hpeh‸ ve yoˬ. 7 Hk'e te leh, hk'aˬ hk'e le. Iˉsaˍreˍlaˆ chaw hui lehˬ, yawˇ hui ca ve hta‸ maˇ g'a. Leuˆ yuˬ ve chaw hui ceh tiˉ g'a leh, maˇ leuˆ yuˬ ve chaw hui lehˬ, nyi ma heh k'ai ve yoˬ. 8 Li‸ hpu hk'aw k'oˆ ve hk'e, Ya‸ nyi hk'a gaˬ zuh‸ muiˉ jo ve nyi ma maˇ k'oˆ, maˇ mawˬ puiˉ ve mehˆ shiˍ maˇ k'oˆ, maˇ kaˇ puiˉ ve naˍ paw maˇ k'oˆ, G'uiˬ sha yawˇ hui hta‸ piˇ ve yoˬ, teh‸ k'oˆ taˍ ve yoˬ. 9 Daˍviˆ htawˇ k'oˆ ve, Yawˇ hui ve hti caˇ hti dawˬ ve lehˬ, yawˇ hui awˬ pon pehˍ htaw taˍ ve, va htaw taˍ ve, ce lo‸-e tuˬ paˆ te taˍ ve leh, yawˇ hui g'a hkanˍ cawˇ ve ciˍ yanˍ tuˬ k'aw‸ hpeh‸ la piˇ-oˆ. 10 Yawˇ hui mehˆ maˇ mawˬ tuˬ, yawˇ hui ve mehˆ shiˍ naˆ ho‸ lehˍ hpeh‸ piˇ lawˬ-o‸. Yawˇ hui ve caw‸ htawˇ hk'aˬ htaˇ ka‸ k'aw‸ lehˍ hpeh‸ piˇ lawˬ-o‸, teh‸ k'oˆ ve yoˬ. 11 Hk'e te leh ngaˬ na nyi ve, Iˉsaˍreˍlaˆ chaw hui lehˬ, paiˍ htaˇ hk'a gaˬ hkui htiˇ poˬ ve laˇ. Maˇ heˆ taˬ. Ya‸ hk'aˇ, Iˉsaˍreˍlaˆ chaw hui ya‸ ve jiˆ ve hta‸ pa taw buiˇ shaˆ aˉ naˆ chaw hui lehˬ, htaiˍ hk'aw‸ ve hta‸ g'a ve yoˬ. Chi lehˬ, Iˉsaˍreˍlaˆ chaw hui hkawehˉ ve nyi ma cawˬ la tuˬ awˬ pon hpeh‸ ve yoˬ. 12 Yawˇ hui ya‸ ve jiˆ ve teˇ ceuˬ lehˬ, miˬ guiˬ yaˇ hui hta‸ paw sha la piˇ lawˬ leh, yawˇ hui shonˇ ve teˇ ceuˬ lehˬ, buiˇ shaˆ aˉ naˆ chaw hui hta‸ paw sha la piˇ lawˬ ve k'o, awˬ moˍ awˬ hk'aw lo yawˇ hui hk'a biˇ lo‸ la htaˇ, chi a‸ kehˉ leuˉ leh hk'aˬ ma k'aw‸ paw sha la piˇ lawˬ tuˬ ve le. 13 Hk'e te leh, nawˬ hui buiˇ shaˆ aˉ naˆ chaw hui hta‸ ngaˬ chi hk'e k'oˆ laˇ ve yoˬ. Ngaˬ buiˇ shaˆ aˉ naˆ chaw hui awˬ pon tcuh yaˇ hpeh‸ leh, kanˉ chi ve hta‸ ngaˬ taˍ uiˍ taˍ mvuh ve yoˬ. 14 Ngaˬ kanˉ chi ve hta‸ taˍ uiˍ taˍ mvuh ve lehˬ, ngaˬ ve chaw ceuˬ hkawehˉ ve nyi ma cawˬ la leh, yawˇ hui teˇ hpaˍ hpaˍ htaiˍ hk'aw‸ ve hta‸ g'a tuˬ ngaˬ te ve yoˬ. 15 Awˬ lawn k'o, Iˉsaˍreˍlaˆ chaw hui hta‸ baˬ taˍ ve pa taw, miˬ guiˬ yaˇ G'uiˬ sha hta‸ k'aw‸ cawˇ da‸ hui da‸ la ve k'o, Iˉsaˍreˍlaˆ chaw hui hta‸ k'aw‸ ha‸ yuˬ ve teˇ ceuˬ lehˬ, suh kuiˬ lo k'aw‸ te‸ tu la ve hk'e hpeh‸ ve maˇ heˆ laˇ. 16 Awˉ lawˉ tanˇ piˇ ve hkaoˍ monˇ awˬ tcuhˇ teˇ diˬ ehˉ da‸ kehˬ ve k'o, hkaoˍ monˇ teˇ diˬ lonˉ hk'a peu-eˬ ka‸ da‸ kehˬ ve yoˬ. Awˬ geu da‸ kehˬ ve k'o, awˬ k'aˉ teˇ hpaˍ htawˇ da‸ kehˬ ve yoˬ. 17 Awˬ k'aˉ teˇ hpaˍ hta‸ tawˆ baˬ leh, nawˬ hui shaˍlonˍ awˬ hteunˍ ve awˬ k'aˉ hpeh‸ ve htawˇ, shaˍlonˍ meuˇ cehˬ hta‸ nawˬ hui caˉ da‸ leh, awˬ kaˍ awˬ nu awˬ k'aˉ teˇ hpaˍ geh awˬ tcuhˇ hta‸ g'a caˇ ve k'o, tawˆ baˬ taˍ ve awˬ k'aˉ teˇ hpaˍ awˬ hk'oˆ hta‸ nyi ma taˇ uiˍ. 18 Nawˬ hui nyi ma uiˍ ve k'o, chi hta‸ dawˇ nyi sheˍ. Nawˬ awˬ geu hta‸ kanˬ chiˇ taˍ ve maˇ heˆ, awˬ geu nawˬ hta‸ kanˬ chiˇ taˍ ve yoˬ. 19 Ngaˬ awˬ cehˬ hta‸ g'a caˉ da‸ tuˬ, awˬ k'aˉ teˇ hpaˍ hta‸ tawˆ baˬ peuˬ teh‸, nawˬ k'oˆ tuˬ yoˬ. Cawˇ ve yoˬ. 20 Yawˇ hui maˇ yonˍ ve pa taw tawˆ baˬ ve hta‸ g'a hkanˍ ve yoˬ. Nawˬ lehˬ yonˍ ve hta‸ pa taw yeˬ chehˇ ve yoˬ. Hk'e te leh, nyi ma taˇ uiˍ. Kawˆ ve nyi ma cawˬ piˇ-oˆ. 21 Awˬ lawn k'o, G'uiˬ sha lehˬ shaˍlonˍ meuˇ awˬ k'aˉ hta‸ maˇ teh taˍ piˇ ve k'o, nawˬ hta‸ htawˇ teh taˍ laˇ tuˬ maˇ heˆ. 22 Hk'e te leh, G'uiˬ sha ha k'aˉ ve teˇ ceuˬ leh yawˇ hehnˇ chaweh te ve teˇ ceuˬ hta‸ dawˇ nyi sheˍ. Paiˍ taˍ ve chaw hui hta‸ yawˇ hehnˇ chaweh te ve yoˬ. Ya‸ hk'aˇ, yawˇ ve ha k'aˉ ve teˇ ceuˬ awˬ hk'aw lo nawˬ chehˇ taˍ ve k'o, nawˬ awˬ hk'oˆ yawˇ ha k'aˉ ve teˇ ceuˬ cawˬ taˍ ve yoˬ. Yawˇ ve ha k'aˉ ve teˇ ceuˬ awˬ hk'aw lo nawˬ maˇ chehˇ ve k'o, nawˬ hta‸ htawˇ tawˆ baˬ laˇ tuˬ yoˬ. 23 Chaw oˇ ve teˇ hpaˍ htawˇ, maˇ yonˍ ve awˬ hk'aw lo maˇ k'aw‸ chehˇ tcuhˉ taˍ ve k'o, awˬ cehˬ hta‸ teˇ pawˆ k'aw‸ caˉ da‸ piˇ tuˬ yoˬ. Awˬ lawn k'o, yawˇ hui hta‸ teˇ pawˆ k'aw‸ caˉ da‸ piˇ tuˬ G'uiˬ sha te puiˉ ve yoˬ. 24 Awˬ lawn k'o, awˬ liˇ maˇ heˆ htawˇ, shaˍlonˍ cehˬ awˬ hteunˍ awˬ hk'aw lo nawˬ hta‸ tawˆ yuˬ leh, shaˍlonˍ meuˇ cehˬ hta‸ caˉ da‸ piˇ ve k'o, shaˍlonˍ meuˇ awˬ k'aˉ teˇ hpaˍ lehˬ, a shu yawˇ ve shaˍlonˍ meuˇ cehˬ hta‸ leuˉ leh k'aw‸ caˉ da‸ piˇ tuˬ maˇ heˆ laˇ. 25 Awˬ viˉ awˬ nyi teˇ hpaˍ-oˬ, nawˬ hui a shu yawˇ ve cuˇ yiˍ hta‸ maˇ g'a cuˇ tuˬ, faˉ taˍ ve awˬ lawn chi nawˬ hui hta‸ shiˍ piˇ lawˬ gaˇ ve yoˬ. Buiˇ shaˆ aˉ naˆ chaw teˇ hpaˍ lo‸ la maˇ biˇ sheˍ ve ceh ceh, Iˉsaˍreˍlaˆ chaw teˇ hpaˍ hpaˍ nyi ma heh chehˇ ve yoˬ. 26 Hk'e te leh, Iˉsaˍreˍlaˆ chaw hui hk'a peu-eˬ htaiˍ hk'aw‸ ve hta‸ g'a tuˬ yoˬ. Li‸ hpu hk'aw bvuh‸ taˍ ve hk'e, Ponˬ piˇ shehˍ hpaˇ lehˬ, Ziˉonˍ awˬ hk'aw lo tawˆ la leh, Yaˍkoˆ awˬ ceuˬ awˬ hk'aw lo haiˬ ve teˇ ceuˬ hta‸ yawˇ yuˬ baˬ tuˬ yoˬ. 27 Ngaˬ yawˇ hui ve venˇ baˆ hta‸ yuˬ baˬ ve teˇ yanˇ, chi ve lehˬ yawˇ hui geh ngaˬ te tuˬ ve ka ti‸ shaˉ caˆ hpeh‸ ve yoˬ, teh‸ bvuh‸ taˍ ve yoˬ. 28 Ha lehˬ ve bon hkawˇ hta‸ caˉ da‸ ve lehˬ, nawˬ hui awˬ bon g'a tuˬ yawˇ hui G'uiˬ sha ve canˇ paˍ hpeh‸ ve yoˬ. Ya‸ hk'aˇ, G'uiˬ sha leuˆ yuˬ ve hta‸ caˉ da‸ ve lehˬ, awˬ puˍ lonˉ teˇ hpaˍ hta‸ pa taw, G'uiˬ sha ha‸ ve chaw hpeh‸ ve yoˬ. 29 Awˬ lawn k'o, G'uiˬ sha hk'e leˇ piˇ ve awˬ bon hta‸ yawˇ maˇ k'aw‸ yuˬ hk'aw‸. Yawˇ kuˬ yuˬ taˍ ve chaw hta‸ yawˇ maˇ k'aw‸ dawˇ hpfuhˆ. 30 Nawˬ hui awˉ lawˉ htaˇ G'uiˬ sha hta‸ maˇ na yuˬ ve htawˇ, chi beu‸ nawˬ hui ha k'aˉ ve teˇ ceuˬ hta‸ g'a peuˬ. Awˬ lawn k'o, Iˉsaˍreˍlaˆ chaw hui maˇ na yuˬ ve pa taw yoˬ. 31 Chi hk'a shuˍ shuˍ, nawˬ hui ha k'aˉ ve hta‸ g'a ve pa taw, yawˇ hui htawˇ ha k'aˉ ve hta‸ g'a tuˬ, chi beu‸ yawˇ hui maˇ na yuˬ ve yoˬ. 32 Chaw hk'a peu-eˬ hta‸ ha k'aˉ piˇ tuˬ, G'uiˬ sha lehˬ chaw hk'a peu-eˬ hta‸ maˇ na yuˬ ve teˇ ceuˬ awˬ hk'aw lo haw tiˍ taˍ ve yoˬ. 33 G'uiˬ sha ve uiˍ jaˇ maˇ jaˇ ve cuˇ yiˍ maˍ yiˍ leh shiˍ puiˉ ve nyi ma lehˬ, hk'aˬ ma naˉ jaˇ ve le. G'uiˬ sha suhˉ taˆ ve teˇ hpaˍ lehˬ, a shu ka‸ ca dawˇ maˇ gaˬ. Yawˇ ve ya‸ k'aw teˇ hpaˍ hta‸ a shu ka‸ ca maˇ mawˬ. 34 Jawˇ mawˇ G'uiˬ sha ve nyi ma hta‸ a shu shiˍ ve le. Yawˇ hta‸ a shu maˍ piˇ jehˬ piˇ jaw ve le. 35 G'uiˬ sha awˬ bon k'aw‸ te hk'aw‸ laˇ tuˬ, a shu yawˇ hta‸ awˉ lawˉ awˬ bon te piˇ jaw ve le. Awˬ lawn k'o, hk'a cawˬ taˍ ve teˇ ceuˬ le le lehˬ, 36 yawˇ lo laˬ ve, yawˇ hta‸ pa taw cawˬ la ve leh, yawˇ awˬ pon hpeh‸ ve yoˬ. Co co taiˍ taiˍ yawˇ hta‸ chiˇ uiˍ chiˇ mvuh piˇ-oˆ. A menˬ.

Roˉma‸ 12

1 Awˬ viˉ awˬ nyi teˇ hpaˍ-oˬ, G'uiˬ sha ha k'aˉ ve awˬ bon teˇ hpaˍ hta‸ pa taw, ngaˬ naw hui hta‸ chi hk'e lawˬ hkawˉ ve yoˬ. Nawˬ hui ve awˬ to lehˬ, te‸ chehˇ ve, da‸ kehˬ ve leh, G'uiˬ sha nyi ma cawˇ ve tanˇ tuˬ, yawˇ hta‸ chiˇ a‸ piˇ-oˆ. Chi lehˬ, nawˬ hui te keunˍ ve oˉ k'oˍ pui ve awˬ liˇ teˇ ceuˬ hpeh‸ ve yoˬ. 2 Chi miˬ guiˬ yaˇ ve awˬ liˇ awˬ hk'aˇ teˇ hpaˍ awˬ hk'aˇ suh taˇ k'ai. G'uiˬ sha ve da‸ jaˇ ve, nyi ma cawˇ jaˇ ve leh biˇ jaˇ ve a loˍ hta‸ nawˬ hui shiˍ leh fuiˍ da‸ g'a tuˬ, nyi ma awˬ suhˉ k'aw‸ pa leh, chaw awˬ suhˉ hpeh‸ la piˇ-oˆ. 3 Ngaˬ hta‸ pe‸ laˇ ve awˬ bon hta‸ pa taw, nawˬ hui awˬ hk'aw lo chehˇ ve chaw teˇ g'aˇ le le hta‸ ngaˬ chi hk'e k'oˆ laˇ ve yoˬ. A shu yawˇ awˬ to awˬ lawn dawˇ keunˍ dawˇ cawˇ ve a‸ kehˉ leuˉ leh taˇ dawˇ. G'uiˬ sha lehˬ, teˇ g'aˇ peuˬ teˇ g'aˇ hta‸ yonˍ ve teˇ ceuˬ pehˬ piˇ taˍ ve hk'a shuˍ shuˍ, dawˇ keunˍ dawˇ cawˇ ve hk'e ceh, a shu yawˇ awˬ to awˬ lawn dawˇ nyi-o. 4 Awˬ lawn k'o, awˬ to teˇ to tiˉ awˬ hk'aw lo, awˬ hk'eun maˇ maˇ cawˬ ve yoˬ. Awˬ hk'eun oˇ ve teˇ hpaˍ lehˬ, kanˉ te ve maˇ shuˍ da‸. 5 Chi hk'a shuˍ shuˍ, ngaˬ hui chaw maˇ ve htawˇ, Hkri‸ awˬ hk'aw lo awˬ to teˇ to tiˉ hpeh‸ leh, ngaˬ hui teˇ g'aˇ leh teˇ g'aˇ caˉ da‸ taˍ ve awˬ hk'eun teˇ hpaˍ hpeh‸ ve yoˬ. 6 Ngaˬ hui hta‸ awˬ bon pe‸ laˇ taˍ ve hk'a shuˍ shuˍ, ngaˬ hui g'a taˍ ve la‸ shawnˍ teˇ hpaˍ lehˬ peun da‸ ve yoˬ. Bon maˍ paˍ te tuˬ ve awˬ bon g'a ve k'o, yonˍ ve teˇ ceuˬ cawˬ ve hk'e bon maˍ paˍ ve kanˉ hta‸ te-o. 7 Ga piˇ shehˍ hpaˇ te tuˬ ve awˬ bon g'a ve k'o, ga piˇ shehˍ hpaˇ ve kanˉ hta‸ te-o. Maˍ piˇ shehˍ hpaˇ te ve chaw lehˬ, maˍ piˇ ve kanˉ hta‸ te-o. 8 Shu hta‸ awˬ g'aˇ piˇ ve chaw lehˬ, awˬ g'aˇ piˇ ve kanˉ hta‸ te-o. Shu hta‸ pehˬ piˇ ve chaw lehˬ, ha lehˬ ha k'a maˇ chaweh pehˬ piˇ-oˆ. Awˬ hoˉ te ve chaw lehˬ, g'aˇ hte‸ coˇ caˇ leh te-o. Ha k'aˉ piˇ ve chaw lehˬ, ha lehˬ ha k'a te leh ha k'aˉ piˇ-oˆ. 9 Nawˬ hui ha‸ ve lehˬ, awˬ tehˬ awˬ na ha‸ ve teˇ ceuˬ hpeh‸ piˇ-oˆ. Haiˬ ve awˬ ceuˬ hta‸ cha‸ loˬ. Da‸ ve teˇ ceuˬ hta‸ vawˆ taˍ-o‸. 10 Awˬ viˉ awˬ nyi ha‸ da‸ ve hk'e teˇ g'aˇ leh teˇ g'aˇ ha‸ da‸-o‸. A shu yawˇ awˬ to hta‸ taˇ taˍ uiˍ. Ya‸ hk'aˇ shu hta‸ taˍ uiˍ piˇ-oˆ. 11 Coˇ caˇ ve awˬ hk'aw lo awˬ g'aˇ taˇ nuˇ piˇ. Nyi ma pfuhˇ leh Jawˇ mawˇ G'uiˬ sha awˬ pon kanˉ g'aˇ hte‸ te-o. 12 Dawˇ law ve awˬ hk'aw lo ha lehˬ chehˇ-oˆ. Tu‸ ve hkanˍ ve hta‸ g'a hkanˍ ve teˇ yanˇ, yeunˇ hkanˍ chehˇ-oˆ. Hk'aˬ htaˆ ka‸ bon lawˬ tcuhˉ taˍ-o‸. 13 Hkri‸ yaˇ teˇ hpaˍ loˍ ve hk'e pehˬ piˇ ga piˇ-oˆ. Hkehˉ chaw teˇ hpaˍ hta‸ hk'a deh‸ nyi ha‸ shaˉ-oˆ. 14 Nawˬ hui hta‸ fawˉ mehˍ laˇ ve chaw hui hta‸ na‸ piˇ-oˆ. Yawˇ hui hta‸ taˇ hkeu piˇ. Na‸ piˇ ve ceh tiˉ te-o. 15 Ha lehˬ ve chaw hui geh teˇ geh ha lehˬ-o‸. Hawˬ ve chaw hui geh teˇ geh hawˬ-o‸. 16 Teˇ g'aˇ leh teˇ g'aˇ nyi ma htaˇ da‸ hawˍ da‸ cawˬ piˇ-oˆ. Uiˍ gaˇ mvuh gaˇ ve awˬ lawn teˇ hpaˍ hta‸ taˇ dawˇ. Awˬ me‸ awˬ hponˇ maˇ cawˬ ve chaw teˇ hpaˍ geh awˬ chawˇ te-o. A shu yawˇ awˬ to hta‸ cuˇ yiˍ cawˬ ve teh‸ taˇ dawˇ. 17 Shu haiˬ ve te laˇ htawˇ, teˇ g'aˇ hta‸ ka‸ awˬ haiˬ taˇ k'aw‸ te hk'aw‸ piˇ. Chaw hk'a peu-eˬ mehˆ g'uˇ suhˍ da‸ ve cawˇ ve hta‸ tiˉ te tuˬ dawˇ nyi taˍ-o‸. 18 Te hpeh‸ ve k'o, nawˬ hui puiˉ ve hpeh‸ ve hk'e chaw hk'a peu-eˬ ve hta‸ cawˇ da‸ hui da‸ te chehˇ-oˆ. 19 Ha‸ ve chaw teˇ hpaˍ-oˬ, shu nawˬ hui hta‸ te ya‸ laˇ ve k'o, nawˬ hui hk'aˇ nawˬ hui taˇ k'aw‸ te hk'aw‸ piˇ. G'uiˬ sha nyi ma zuhˆ leh te hk'aw‸ tuˬ awˬ pon teh taˍ piˇ-oˆ. Li‸ hpu hk'aw bvuh‸ taˍ ve hk'e, Jawˇ mawˇ G'uiˬ sha k'oˆ ve, K'aw‸ te hk'aw‸ tuˬ ve teˇ ceuˬ lehˬ, ngaˬ ve kanˉ yoˬ. Ngaˬ k'aw‸ te hk'aw‸ piˇ tuˬ yoˬ teh‸ bvuh‸ taˍ ve yoˬ. 20 Hk'e te leh nawˬ ve canˇ paˍ awˍ meu‸ ve k'o, yawˇ hta‸ caˍ piˇ-oˆ. Iˉ kaˆ shiˉ ve k'o, taw piˇ-oˆ. Chi hk'e te ve k'o, yawˇ ya‸ taw jaˇ leh mehˆ hpfuhˇ haw tuˬ yoˬ. 21 Haiˬ ve teˇ ceuˬ nawˬ hui hta‸ taˇ g'aˇ piˇ lawˬ. Da‸ ve hta‸ cuˇ leh haiˬ ve hta‸ g'aˇ piˇ lawˬ-o‸.

Roˉma‸ 13

1 Chaw teˇ g'aˇ le le uˉ peunˍ shehˍ hpaˇ teˇ hpaˍ awˬ hawˉ lo hk'a deh‸ chehˇ-oˆ. Awˬ lawn k'o, G'uiˬ sha geh g'a ve maˇ heˆ k'o, uˉ peunˍ tuˬ kanˇ paˆ maˇ cawˬ. Yawˇ hui cawˬ taˍ ve kanˇ paˆ teˇ hpaˍ G'uiˬ sha teh taˍ ve yoˬ. 2 Hk'e te leh, uˉ peunˍ shehˍ hpaˇ teˇ hpaˍ hta‸ hpfuhˆ ve chaw lehˬ, G'uiˬ sha teh taˍ ve aˉ yaˇ hta‸ tawˍ taˍ shehˍ hpaˇ hpeh‸ ve yoˬ. Tawˍ taˍ ve chaw hui lehˬ, ciˍ yanˍ ve hta‸ g'a hkanˍ tuˬ yoˬ. 3 Awˬ lawn k'o, da‸ ve kanˉ hta‸ te ve chaw teˇ hpaˍ lehˬ, jawˇ mawˇ teˇ hpaˍ hta‸ kawˆ tuˬ maˇ cawˬ. Haiˬ ve hta‸ te ve chaw teˇ hpaˍ lehˬ kawˆ tuˬ cawˬ ve yoˬ. Uˉ peunˍ shehˍ hpaˇ teˇ hpaˍ hta‸ kawˆ tuˬ maˇ cawˬ ve chaw hpeh‸ gaˇ laˇ. Da‸ ve hta‸ te-o. Chi hk'e te ve k'o, yawˇ nawˬ hta‸ chiˇ mvuh tuˬ yoˬ. 4 Nawˬ awˬ pon awˬ bon cawˬ tuˬ, yawˇ G'uiˬ sha ve awˬ ceˬ hpeh‸ ve yoˬ. Ya‸ hk'aˇ, nawˬ haiˬ ve hta‸ te ve k'o, kawˆ chehˇ-oˆ. Awˬ lawn k'o, yawˇ lehˬ aˉ htaw hk'e leˇ pfuhˇ taˍ ve maˇ heˆ. Awˬ haiˬ hk'a te ve chaw hui hta‸ ciˍ yanˍ piˇ tuˬ, yawˇ lehˬ G'uiˬ sha ve awˬ ceˬ hpeh‸ ve yoˬ. 5 Hk'e te leh, uˉ peunˍ shehˍ hpaˇ awˬ hawˉ lo hk'a deh‸ chehˇ-oˆ. Ciˍ yanˍ ve hta‸ kawˆ ve pa taw ceh tiˉ maˇ heˆ. Nawˬ ve shiˍ puiˉ ve nyi ma htawˇ, dawˇ sha hpeh‸ tuˬ hk'a deh‸ chehˇ-oˆ. 6 Chi hta‸ pa taw, nawˬ hui a moˇ ka‸ keu piˇ chehˇ ve yoˬ. Awˬ lawn k'o, uˉ peunˍ shehˍ hpaˇ teˇ hpaˍ lehˬ, G'uiˬ sha ve kanˉ te shehˍ hpaˇ hpeh‸ leh kanˉ chi ve hta‸ yawˇ hui hk'aˬ htaˆ ka‸ te tcuhˉ taˍ ve yoˬ. 7 Yawˇ hui hk'a peu-eˬ hta‸ piˇ keunˍ piˇ cawˇ ve hk'e piˇ-oˆ. A moˇ shaw ve chaw hui hta‸ a moˇ keu piˇ-oˆ. Awˬ hkawnˍ shaw ve chaw hui hta‸ awˬ hkawnˍ keu piˇ-oˆ. Kawˆ keunˍ ve chaw hui hta‸ kawˆ-oˆ. Yawˆ yan keunˍ ve chaw hui hta‸ yawˆ yan-o. 8 Jeˬ a ciˉ ka‸ taˇ pfuhˇ. Ya‸ hk'aˇ, teˇ g'aˇ leh teˇ g'aˇ ha‸ da‸ ve jeˬ teˇ ceuˬ hta‸ pfuhˇ taˍ-o‸. Awˬ lawn k'o, awˬ paˇ awˬ kui chehˇ ve chaw hui hta‸ ha‸ ve chaw lehˬ, awˬ liˇ tawˇ hkawˇ hta‸ te biˇ peuˬ. 9 Haˉ chawˇ haˉ paˆ maˇ g'a te, chaw hta‸ maˇ g'a tiˇ pehˍ, shu ve mawˇ hta‸ maˇ g'a hk'awˇ, shu mawˇ shu jeˬ hta‸ maˇ g'a sheˉ lai teh‸ k'oˆ taˍ ve awˬ liˇ tawˇ hkawˇ teˇ hpaˍ maˇ k'oˆ, awˬ kaˍ awˬ nu cawˬ taˍ ve awˬ liˇ tawˇ hkawˇ teˇ hpaˍ htawˇ maˇ k'oˆ, tawˇ chi hk'a peu-eˬ lehˬ, Nawˬ awˬ to hta‸ ha‸ ve hk'e, awˬ paˇ awˬ kui chehˇ ve chaw teˇ hpaˍ hta‸ ha‸-o‸ teh‸ k'oˆ taˍ ve teˇ hkawˇ awˬ hk'aw lo biˇ la ve yoˬ. 10 Ha‸ ve teˇ ceuˬ lehˬ, awˬ paˇ awˬ kui chehˇ ve chaw hta‸ awˬ haiˬ maˇ te. Hk'e te leh, ha‸ ve teˇ ceuˬ lehˬ, awˬ liˇ tawˇ hkawˇ hta‸ te biˇ ve yoˬ. 11 Chi hk'oˆ ka‸, chi beu‸ awˬ yanˇ lehˬ nawˬ hui zuh‸ nawˇ la tuˬ ve awˬ yanˇ gaˬ peuˬ ve hta‸ nawˬ hui shiˍ chehˇ ve yoˬ. Awˬ lawn k'o, ngaˬ hui awˉ lawˉ yonˍ gehˇ ve teˇ yanˇ a‸ kehˉ, chi beu‸ htaiˍ hk'aw‸ ve teˇ ceuˬ leuˉ leh ngaˬ hui hta‸ neˇ la peuˬ. 12 Mvuhˇ hpeu‸ awˬ yanˇ peuˬ la paˇ neˇ leh, mvuhˇ law‸ k'aw awˬ yanˇ gaˬ la paˇ neˇ ve yoˬ. Hk'e te leh, naˆ ho‸ ve hta‸ caˉ da‸ ve kanˉ teˇ hpaˍ hta‸ k'ehˆ baˬ taˉ leh, awˬ g'euˆ hta‸ caˉ da‸ ve la‸ caˉ teˇ hpaˍ hta‸ veu‸ deh-a veuˬ. 13 Ha lehˬ tuˬ te ponˬ te leuˉ leh tzuhˬ dawˬ bvuhˆ ve, haˉ chawˇ haˉ paˆ te leh te ponˬ te leuˉ ve, shu hta‸ ya‸ da‸ jiˆ da‸ leh hkawehˉ ve, chi teˇ hpaˍ hta‸ taˇ te. Mvuhˇ law‸ k'aw htaˇ te keunˍ ve teˇ hpaˍ hta‸ ngaˬ hui te-a veuˬ. 14 Chi hk'oˆ ka‸, Jawˇ mawˇ Yeˍsuˆ Hkri‸ hta‸ veu‸ deh-o. Awˬ suhˍ awˬ shaˍ a loˍ awˬ hk'aˇ suh te k'ai tuˬ te‸ chiˉ taˇ gu taˍ.

Roˉma‸ 14

1 Yonˍ ve nyi ma awˬ g'aˇ nuˇ ve chaw hta‸ ha‸ yuˬ-o‸. Ya‸ hk'aˇ, dawˇ hk'aˇ maˇ hawˍ da‸ ve teˇ hpaˍ awˬ lawn yawˇ geh tawˇ g'awˬ da‸ tuˬ awˬ pon ha‸ yuˬ ve taˇ te. 2 Chaw teˇ g'aˇ lehˬ, caˇ tuˬ teˇ ceuˬ le le hta‸ caˇ hpeh‸ ve teh‸ yonˍ ve yoˬ. Ya‸ hk'aˇ yonˍ ve nyi ma awˬ g'aˇ nuˇ ve chaw teˇ g'aˇ lehˬ, g'awˇ hpa‸ mvuhˬ naweh hta‸ ceh tiˉ caˇ ve yoˬ. 3 Teˇ ceuˬ le le hta‸ caˇ ve chaw lehˬ, maˇ caˇ ve chaw hta‸ maˇ shawˍ maˇ caˆ maˇ g'a te. Maˇ caˇ ve chaw htawˇ, caˇ ve chaw hta‸ venˇ baˆ maˇ g'a taˍ. Awˬ lawn k'o, G'uiˬ sha lehˬ yawˇ hta‸ ha‸ yuˬ peuˬ. 4 Shu ve awˬ ceˬ awˬ hk'oˆ venˇ baˆ taˍ ve nawˬ lehˬ, hk'aˬ hk'e ve chaw le. Yawˇ hta‸ chehˇ tcuh tuˬ maˇ k'oˆ, g'a‸ k'oˬ tuˬ maˇ k'oˆ, yawˇ ve awˬ jawˇ mawˇ hta‸ cawˬ ve yoˬ. Ya‸ hk'aˇ, jawˇ mawˇ lehˬ yawˇ hta‸ chehˇ tcuh tuˬ yoˬ. Awˬ lawn k'o, jawˇ mawˇ yawˇ hta‸ chehˇ tcuh tuˬ kanˇ paˆ cawˬ ve yoˬ. 5 Chaw teˇ g'aˇ lehˬ, awˬ nyi teˇ hpaˍ hpaˍ awˬ hk'aw lo, teˇ nyi nyi hta‸ awˬ kaˍ awˬ nu awˬ nyi teˇ hpaˍ a‸ kehˉ taˍ uiˍ ve yoˬ. Chaw teˇ g'aˇ lehˬ, awˬ nyi hk'a peu-eˬ hk'a shuˍ shuˍ yoˬ teh‸ shawˍ taˍ ve yoˬ. Chaw teˇ g'aˇ le le a shu yawˇ nyi ma hk'aw hk'a deh‸ dawˇ cheˆ loˬ. 6 Awˬ nyi hta‸ taˍ uiˍ ve chaw teˇ g'aˇ lehˬ, Jawˇ mawˇ Yeˍsuˆ hta‸ dawˇ nawˇ leh taˍ uiˍ ve yoˬ. Teˇ ceuˬ le le hta‸ caˇ ve chaw teˇ g'aˇ htawˇ, Jawˇ mawˇ Yeˍsuˆ hta‸ dawˇ nawˇ leh caˇ ve yoˬ. Awˬ lawn k'o, yawˇ G'uiˬ sha hta‸ chiˇ mvuh leh caˇ ve yoˬ. Maˇ caˇ ve chaw teˇ g'aˇ htawˇ, Jawˇ mawˇ Yeˍsuˆ hta‸ dawˇ nawˇ ve awˬ hk'aw lo caˇ tuˬ ce leh G'uiˬ sha hta‸ chiˇ mvuh ve yoˬ. 7 Awˬ lawn k'o, ngaˬ hui awˬ hk'aw lo a shu htawˇ maˇ k'oˆ, a shu yawˇ awˬ to awˬ pon te‸ chehˇ ve maˇ heˆ. A shu htawˇ maˇ k'oˆ, a shu yawˇ awˬ to awˬ pon suh ve maˇ heˆ. 8 Ngaˬ hui te‸ ve lehˬ, Jawˇ mawˇ Yeˍsuˆ awˬ pon te‸ ve yoˬ. Ngaˬ hui suh ve htawˇ, Jawˇ mawˇ Yeˍsuˆ awˬ pon suh ve yoˬ. Hk'e te leh te‸ ve maˇ k'oˆ, suh ve maˇ k'oˆ, ngaˬ hui lehˬ Jawˇ mawˇ Yeˍsuˆ ve mawˇ hpeh‸ ve yoˬ. 9 Awˬ lawn k'o, suh peuˬ ve chaw hta‸ ka‸, te‸ chehˇ ve chaw hta‸ ka‸ uˉ peunˍ tuˬ, Hkri‸ hkanˍ suh leh k'aw‸ te‸ tu la ve yoˬ. 10 Nawˬ lehˬ, aˬ hto‸ ma hta‸ pa taw nawˬ ve awˬ viˉ awˬ nyi awˬ hk'oˆ hta‸ venˇ baˆ taˍ ve le. Aˬ hto‸ ma hta‸ pa taw, nawˬ ve awˬ viˉ awˬ nyi hta‸ maˇ shawˍ maˇ caˆ te ve le. Awˬ lawn k'o, ngaˬ hui hk'a peu-eˬ G'uiˬ sha ve suhˉ jehˬ kuiˬ k'aw jaw awˬ g'uˇ suhˍ g'a gaˬ tuˬ yoˬ. 11 Li‸ hpu hk'aw bvuh‸ taˍ ve hk'e, Jawˇ mawˇ G'uiˬ sha k'oˆ ve, Ngaˬ te‸ chehˇ ve hk'e ngaˬ mehˆ g'uˇ suhˍ chaw teˇ g'aˇ le le hkui tcuhˉ teh leh, maw‸ k'aw teˇ maˬ le le G'uiˬ sha hta‸ chiˇ mvuh tuˬ yoˬ, teh‸ bvuh‸ taˍ ve yoˬ. 12 Hk'e te leh, ngaˬ hui teˇ g'aˇ le le a shu yawˇ awˬ to awˬ lawn G'uiˬ sha hta‸ g'a k'aoˍ maˍ piˇ tuˬ yoˬ. 13 Chi hta‸ pa taw, ya‸ nyi hk'aw‸ nawˉ teˇ g'aˇ hta‸ teˇ g'aˇ venˇ baˆ taˇ k'aw‸ taˍ da‸. Awˬ viˉ awˬ nyi hkui htiˇ poˬ paiˍ leh te ya‸ tuˬ ngaˬ maˇ te-o teh‸, nawˬ hui dawˇ cheˆ taˍ loˬ. 14 Hk'aˬ ve teˇ ceuˬ maˇ k'oˆ, yawˇ hk'aˇ yawˇ cha‸ chiˆ ve teˇ ceuˬ ka‸ maˇ cawˬ teh‸ Jawˇ mawˇ Yeˍsuˆ awˬ hk'aw lo ngaˬ shiˍ leh yonˍ ve yoˬ. Ya‸ hk'aˇ, chaw teˇ g'aˇ lehˬ, teˇ ceuˬ ceuˬ hta‸ cha‸ chiˆ ve teh‸ yawˇ shawˍ ve k'o, yawˇ awˬ pon cha‸ chiˆ ve teˇ ceuˬ hpeh‸ ve yoˬ. 15 Caˇ tuˬ dawˬ tuˬ hta‸ pa taw nawˬ ve awˬ viˉ awˬ nyi g'a dawˇ haˍ ve k'o, nawˬ lehˬ ha‸ pehnˇ ve awˬ hk'aˇ suh k'ai chehˇ ve maˇ heˆ. Nawˬ ve caˇ tuˬ hta‸ pa taw nawˬ awˬ viˉ awˬ nyi hta‸ taˇ te luˬ piˇ. Yawˇ awˬ pon htawˇ Hkriˬ hkanˍ suh taˍ peuˬ. 16 Nawˬ awˬ pon da‸ ve teˇ ceuˬ hta‸ shu maˇ shawˍ maˇ caˆ k'oˆ tuˬ taˇ cawˬ piˇ. 17 Awˬ lawn k'o, G'uiˬ sha ve mvuhˇ miˬ lehˬ, caˇ tuˬ dawˬ tuˬ hpeh‸ ve maˇ heˆ. Ya‸ hk'aˇ, da‸ ve kehˬ ve Awˬ ha hpu hta‸ pa taw hteˇ ve cawˇ ve, dawˇ sha gaˇ sha ve leh, ha lehˬ ve awˬ ceuˬ hpeh‸ ve yoˬ. 18 Hkri‸ awˬ pon chi hk'e kanˉ te ve chaw hta‸ G'uiˬ sha nyi hk'aˇ suh leh, chaw yaˇ htawˇ yawˇ hta‸ nyi ma cawˇ ve yoˬ. 19 Hk'e te leh cawˇ da‸ hui da‸ tuˬ leh, teˇ g'aˇ leh teˇ g'aˇ uiˍ la mvuh la tuˬ, hk'aˬ htaˆ ka‸ te k'ai-a veuˬ. 20 Caˇ tuˬ dawˬ tuˬ hta‸ pa taw G'uiˬ sha ve kanˉ hta‸ taˇ te luˬ piˇ. Hk'a peu-eˬ lehˬ da‸ kehˬ ve yoˬ. Ya‸ hk'aˇ, caˇ ve hta‸ pa taw shu hkui htiˇ poˬ paiˍ ve k'o, caˇ ve chaw teˇ g'aˇ lehˬ te ya‸ ve yoˬ. 21 Shaˍ caˇ ve maˇ k'oˆ, a pehˉ meuˇ g'uiˬ dawˬ ve maˇ k'oˆ, hk'aˬ ve teˇ ceuˬ te ve htawˇ maˇ k'oˆ, nawˬ ve awˬ viˉ awˬ nyi hkui htiˇ poˬ paiˍ tuˬ hpeh‸ ve k'o, maˇ te cawˇ ve yoˬ. 22 Nawˬ yonˍ ve teˇ ceuˬ lehˬ, nawˬ awˬ to leh G'uiˬ sha mehˆ g'uˇ suhˍ ceh tiˉ cawˬ piˇ-oˆ. A shu yawˇ nyi ma cawˇ ve hta‸ te ve chaw lehˬ, a shu yawˇ awˬ to hta‸ venˇ baˆ maˇ taˍ ve pa taw, ha lehˬ ve chaw hpeh‸ ve yoˬ. 23 Yonˍ ve awˬ hk'aw lo nyi ma htawˇ dawˇ nawˬ dawˇ te ve chaw teˇ g'aˇ caˇ ve k'o, yonˍ ve nyi ma maˇ cawˬ leh caˇ ve pa taw, nyi ma hk'aw suhˉ taˆ ve hta‸ g'a hkanˍ peuˬ. Yonˍ ve hta‸ maˇ caˉ da‸ ve hk'aˬ ve teˇ ceuˬ maˇ k'oˆ, venˇ baˆ hpeh‸ ve yoˬ.

Roˉma‸ 15

1 Ngaˬ hui awˬ g'aˇ uiˍ ve chaw teˇ hpaˍ lehˬ, a shu yawˇ ve a loˍ awˬ hk'aˇ suh maˇ te leh, awˬ g'aˇ nuˇ ve chaw hui g'aˇ nuˇ ve awˬ ceuˬ teˇ hpaˍ hta‸ yeunˇ hkanˍ cawˇ ve yoˬ. 2 Ngaˬ hui teˇ g'aˇ le le, a shu yawˇ awˬ paˇ awˬ kui lo chehˇ ve chaw hui hta‸ da‸ la uiˍ la tuˬ awˬ pon, yawˇ hui nyi ma cawˇ tuˬ te piˇ-a veuˬ. 3 Awˬ lawn k'o, Hkri‸ htawˇ yawˇ awˬ to nyi ma cawˇ ve hta‸ yawˇ maˇ te. Li‸ hpu hk'aw bvuh‸ taˍ ve hk'e, Nawˬ hta‸ hk'aiˉ ve chaw teˇ hpaˍ, yawˇ hui hk'aiˉ ve tawˇ hkawˇ ngaˬ awˬ hk'oˆ gaˬ la peuˬ teh‸ bvuh‸ taˍ ve yoˬ. 4 Awˬ lawn k'o, aˬ sho-eˬ htaˇ hk'a bvuh‸ taˍ ve teˇ hpaˍ lehˬ, ngaˬ hui hta‸ maˍ laˇ tuˬ ve awˬ pon bvuh‸ taˍ ve yoˬ. Hk'e te leh, ngaˬ hui yeunˇ hkanˍ leh Li‸ hpu awˬ hk'aw lo dawˇ sha ve hta‸ g'a ve pa taw, dawˇ law tuˬ cawˬ ve yoˬ. 5 Yeˍsuˆ Hkri‸ awˬ hk'aw lo nawˬ hui teˇ g'aˇ leh teˇ g'aˇ htaˇ da‸ hawˍ da‸ tuˬ, yeunˇ hkanˍ puiˉ leh dawˇ sha piˇ puiˉ ve G'uiˬ sha lehˬ nawˬ hui hta‸ sheh k'ai piˇ lawˬ-o‸. 6 Hk'e te leh, nawˬ hui nyi ma teˇ shiˍ tiˉ te leh, ngaˬ hui ve Jawˇ mawˇ Yeˍsuˆ Hkri‸ ve Awˬ pa G'uiˬ sha hta‸ chiˇ uiˍ chiˇ mvuh hkawˇ teˇ hkawˇ tiˉ chiˇ mvuh hpeh‸ tuˬ yoˬ. 7 Hk'e te leh, G'uiˬ sha hta‸ awˬ me‸ awˬ hponˇ cawˬ piˇ lawˬ tuˬ, Hkri‸ nawˬ hui hta‸ ha‸ yuˬ ve hk'e, nawˬ hui teˇ g'aˇ leh teˇ g'aˇ hta‸ ha‸ yuˬ-o‸. 8 Awˬ lawn k'o, G'uiˬ sha ve hteˇ ve awˬ ceuˬ awˬ pon Hkri‸ lehˬ, awˬ guiˬ meuˇ shoˍ ve chaw hui ve awˬ ceˬ hpeh‸ la ve yoˬ teh‸ ngaˬ k'oˆ ve yoˬ. Hk'aˬ hk'e te leh, awˬ puˍ lonˉ hui hta‸ piˇ taˍ ve ka ti‸ teˇ hpaˍ yeˬ la tuˬ leh, 9 yawˇ ha k'aˉ puiˉ ve hta‸ pa taw buiˇ shaˆ aˉ naˆ chaw hui G'uiˬ sha hta‸ chiˇ uiˍ chiˇ mvuh tuˬ, Hkri‸ lehˬ awˬ guiˬ meuˇ shoˍ ve chaw hui ve awˬ ceˬ hpeh‸ la ve yoˬ, Li‸ hpu hk'aw bvuh‸ taˍ ve hk'e, Chi hta‸ pa taw, buiˇ shaˆ aˉ naˆ chaw hui awˬ hk'aw lo ngaˬ nawˬ hta‸ chiˇ mvuh leh, nawˬ ve awˬ meh hta‸ k'a muiˬ chiˇ mvuh tuˬ yoˬ, teh‸ bvuh‸ taˍ ve yoˬ. 10 Teˇ pawˆ k'aw‸ k'oˆ ve, Buiˇ shaˆ aˉ naˆ chaw teˇ hpaˍ-oˬ, yawˇ ve chaw hui geh teˇ geh ha lehˬ-o‸, teh‸ bvuh‸ taˍ ve yoˬ. 11 Teˇ pawˆ k'aw‸ k'oˆ sheˍ ve, Buiˇ shaˆ aˉ naˆ chaw hk'a peu-eˬ Jawˇ mawˇ G'uiˬ sha hta‸ chiˇ mvuh-o. Chaw ceuˬ hk'a peu-eˬ yawˇ hta‸ chiˇ mvuh piˇ lawˬ-o‸, teh‸ k'oˆ ve yoˬ. 12 Iˉsaˍyaˆ htawˇ teˇ pawˆ k'oˆ ve, Yeˍsehˇ ve awˬ geu lo awˬ caˍ caˍ la tuˬ yoˬ. Buiˇ shaˆ aˉ naˆ chaw hui hta‸ uˉ peunˍ tuˬ yawˇ tawˆ la leh, buiˇ shaˆ aˉ naˆ chaw hui yawˇ awˬ hk'aw lo dawˇ law kuiˬ cawˬ tuˬ yoˬ, teh‸ k'oˆ taˍ ve yoˬ. 13 Da‸ ve kehˬ ve Awˬ ha hpu ve kanˇ paˆ hta‸ pa taw, dawˇ law ve awˬ hk'aw lo nawˬ hui biˇ la tuˬ, dawˇ law tuˬ cawˬ la piˇ ve G'uiˬ sha lehˬ, nawˬ hui yonˍ ve awˬ hk'aw lo ha lehˬ dawˇ sha ve teˇ ceuˬ le le biˇ la piˇ-oˆ. 14 Ngaˬ ve awˬ viˉ awˬ nyi teˇ hpaˍ-oˬ, nawˬ hui lehˬ da‸ ve awˬ ceuˬ hk'a biˇ cawˬ ve chaw, shiˍ puiˉ ve teˇ ceuˬ biˇ ve chaw leh, nawˬ hui teˇ g'aˇ leh teˇ g'aˇ maˍ da‸ puiˉ ve chaw hpeh‸ ve yoˬ teh‸ ngaˬ yonˍ ve yoˬ. 15 Ngaˬ lehˬ, buiˇ shaˆ aˉ naˆ chaw hui awˬ pon Yeˍsuˆ Hkri‸ ve paw hkuˇ te tuˬ G'uiˬ sha ngaˬ hta‸ awˬ bon pe‸ laˇ ve pa taw, nawˬ hui hta‸ awˬ lawn teˇ hpaˍ hpaˍ dawˇ nawˇ piˇ tuˬ ngaˬ nyi ma ha‸ hanˉ te leh, li‸ chi bvuh‸ laˇ ve yoˬ. 16 Da‸ ve kehˬ ve Awˬ ha hpu lehˬ, buiˇ shaˆ aˉ naˆ chaw hui hta‸ da‸ piˇ kehˬ piˇ ve pa taw, yawˇ hui hta‸ tanˇ tuˬ hk'e G'uiˬ sha hta‸ tanˇ piˇ ve teˇ yanˇ yawˇ nyi ma cawˇ tuˬ, ngaˬ lehˬ G'uiˬ sha ve ha lehˬ ve bon hkawˇ maˍ piˇ shehˍ hpaˇ hpeh‸ ve yoˬ. 17 Hk'e te leh, G'uiˬ sha hta‸ caˉ da‸ ve teˇ hpaˍ awˬ hk'aw lo, Yeˍsuˆ Hkri‸ hta‸ pa taw ngaˬ nyi ma uiˍ kuiˬ cawˬ ve yoˬ. 18 Awˬ lawn k'o, buiˇ shaˆ aˉ naˆ chaw hui na yuˬ tuˬ, tawˇ yaw leh kanˉ te ve maˇ k'oˆ, awˬ heˆ leh anˇ tuˬ ve kanˇ paˆ awˬ hk'aw lo maˇ k'oˆ, da‸ ve kehˬ ve Awˬ ha hpu ve kanˇ paˆ awˬ hk'aw lo maˇ k'oˆ, Hkri‸ ngaˬ hta‸ cuˇ leh te ve teˇ hpaˍ awˬ lawn maˇ heˆ k'o, awˬ kaˍ awˬ nu awˬ lawn te‸ chiˉ ka‸ ngaˬ maˇ ca k'oˆ. 19 Chi hta‸ pa taw, Yeˍruˆsaˍlehnˍ venˇ te leh Iˇluˇriˆ mvuhˇ miˬ hk'a gaˬ, hk'a caw zuhˇ Hkri‸ ve ha lehˬ ve bon hkawˇ ngaˬ hk'a deh‸ maˍ piˇ peuˬ. 20 Yehˬ awˬ hkuiˉ puiˍ hta‸ shu te taˍ ve awˬ hk'oˆ hta‸ ngaˬ maˇ k'aw‸ caˉ te tuˬ, Hkri‸ ve awˬ meh hta‸ maˇ g'a kaˇ jaw sheˍ ve chehˇ kuiˬ teˇ hpaˍ awˬ hk'aw lo ceh tiˉ ngaˬ ha lehˬ ve bon hkawˇ maˍ piˇ gaˇ jaˇ ve yoˬ. 21 Li‸ hpu hk'aw bvuh‸ taˍ ve hk'e, Yawˇ ve awˬ lawn hta‸ shu maˇ hto piˇ jaw htawˇ, yawˇ hui g'a mawˬ tuˬ yoˬ. Yawˇ ve awˬ lawn maˇ g'a kaˇ jaw htawˇ, yawˇ hui g'a shiˍ tuˬ yoˬ, teh‸ bvuh‸ taˍ ve yoˬ. 22 Chi hta‸ pa taw, nawˬ hui geh ngaˬ maˇ g'a gaˬ la tuˬ laiˉ pawˆ ngaˬ hta‸ tawˍ taˍ laˇ ve awˬ ceuˬ cawˬ ve yoˬ. 23 Chi beu‸ lehˬ, mvuhˇ miˬ chi teˇ hpaˍ awˬ hk'aw lo kanˉ te kuiˬ maˇ k'aw‸ cawˬ leh, laiˉ hk'aw‸ nawˬ hui geh ngaˬ laˬ gaˇ jaˇ ve pa taw, 24 Saˍpenˍ mvuhˇ miˬ lo ngaˬ k'ai ve teˇ yanˇ, nawˬ hui geh ca guiˇ taˉ tuˬ dawˇ law taˍ ve yoˬ. Nawˬ hui geh teˇ tcuhˉ teˇ jaw awˬ chawˇ te da‸ peuˬ hk'aw‸ nawˉ, mvuhˇ miˬ oˇ ve lo nawˬ hui ngaˬ hta‸ peu k'ai laˇ tuˬ htawˇ ngaˬ dawˇ law chehˇ ve yoˬ. 25 Ya‸ hk'aˇ, Hkri‸ yaˇ hui hta‸ ga piˇ tuˬ, chi beu‸ Yeˍruˆsaˍlehnˍ venˇ lo ngaˬ k'ai ve yoˬ. 26 Awˬ lawn k'o, Maˍkeˍdawˇniˆ mvuhˇ miˬ leh Aˍhkaˍyaˆ mvuhˇ miˬ hk'aw chehˇ ve chaw teˇ hpaˍ lehˬ, Yeˍruˆsaˍlehnˍ venˇ hk'aw chehˇ ve Hkri‸ yaˇ hui awˬ hk'aw lo haˍ ve g'awˇ ve chaw hui hta‸ mawˇ jeˬ pehˬ piˇ tuˬ, yawˇ hui ha lehˬ ha k'a ga piˇ taˍ ve yoˬ. 27 Yawˇ hui ha lehˬ ha k'a ga piˇ ve lehˬ, awˬ bon k'aw‸ te hk'aw‸ piˇ ve teˇ ceuˬ yoˬ. Awˬ lawn k'o, co ha hpawˇ Yuˇda‸ chaw hui ve awˬ bon teˇ hpaˍ hta‸ buiˇ shaˆ aˉ naˆ chaw hui htawˇ g'a ve k'o, awˬ suhˍ awˬ shaˍ hpawˇ ve mawˇ jeˬ teˇ hpaˍ yawˇ hui lehˬ, Yuˇda‸ chaw hui hta‸ k'aw‸ ga piˇ cawˇ ve yoˬ. 28 Hk'e te leh, kanˉ chi hta‸ ngaˬ te peuˬ leh, la‸ shawnˍ chi teˇ hpaˍ yawˇ hui hta‸ chiˇ a‸ piˇ peuˬ hk'aw‸ nawˉ, nawˬ hui geh te leh Saˍpenˍ mvuhˇ miˬ lo ngaˬ k'ai tuˬ yoˬ. 29 Ngaˬ nawˬ hui geh gaˬ la htaˇ, Hkri‸ ve awˬ bon hk'a biˇ cawˬ ve awˬ hk'aw lo gaˬ la tuˬ ve hta‸ ngaˬ shiˍ ve yoˬ. 30 Awˬ viˉ awˬ nyi teˇ hpaˍ-oˬ, ngaˬ hui ve Jawˇ mawˇ Yeˍsuˆ Hkri‸ hta‸ pa taw maˇ k'oˆ, Awˬ ha hpu ve ha‸ da‸ pehnˇ da‸ ve hta‸ pa taw maˇ k'oˆ, ngaˬ nawˬ hui hta‸ chi hk'e lawˬ hkawˉ ve yoˬ. 31 Yuˇda‸ mvuhˇ miˬ awˬ hk'aw lo maˇ na yuˬ puiˉ ve chaw hui la‸ hk'aw ngaˬ g'a ponˬ leh, Yeˍruˆsaˍlehnˍ chaw hui awˬ pon ngaˬ g'a te ve kanˉ teˇ hpaˍ hta‸ Hkri‸ yaˇ hui nyi hk'aˇ suh tuˬ, ngaˬ awˬ pon bon ga lawˬ laˆ mehˍ. 32 Chi hk'oˆ ka‸, G'uiˬ sha ve a loˍ hta‸ pa taw ha lehˬ ha k'a nawˬ hui geh g'a gaˬ la tuˬ leh, nawˬ hui geh ngaˬ awˬ g'aˇ k'aw‸ g'a tuˬ, ngaˬ geh teˇ geh G'uiˬ sha hta‸ bon g'aˇ hte‸ ga lawˬ laˇ-oˆ teh‸, nawˬ hui hta‸ lawˬ hkawˉ ve yoˬ. 33 Dawˇ sha piˇ shehˍ hpaˇ G'uiˬ sha lehˬ, nawˬ hui hk'a peu-eˬ geh chehˇ piˇ-oˆ. A menˬ.

Roˉma‸ 16

1 Keˍcheˍ venˇ Hkri‸ yaˇ awˬ moˍ awˬ hk'aw lo ga piˇ shehˍ ma hpeh‸ ve ngaˬ hui ve awˬ nyi ma Hpiˉbeˍ hta‸ nawˬ hui geh lo ngaˬ k'ai tcuh ve yoˬ. 2 Hkri‸ yaˇ hui te keunˍ ve hk'e, Jawˇ mawˇ Yeˍsuˆ ve mehˆ hpfuhˇ hta‸ nyi leh yawˇ hta‸ ha‸ yuˬ-o‸. Yawˇ hk'aˬ ve teˇ ceuˬ loˍ ve htawˇ maˇ k'oˆ, yawˇ hta‸ ga piˇ-oˆ. Awˬ lawn k'o, yawˇ lehˬ chaw laiˉ g'aˇ hta‸ ga piˇ peuˬ ve awˬ hk'oˆ, ngaˬ hta‸ ka‸ ga laˇ peuˬ ve yoˬ. 3 Ngaˬ geh teˇ geh Yeˍsuˆ Hkri‸ ve kanˉ ga te ve Piˇkiˇlaˆ leh Aˍkuˉlaˆ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. 4 Yawˇ huiˉ maˬ lehˬ, ngaˬ a sha‸ g'a ponˬ tuˬ ngaˬ awˬ pon hkanˍ suh taˬ ve chaw hpeh‸ ve yoˬ. Ngaˬ ceh tiˉ chiˇ mvuh ve maˇ heˆ, buiˇ shaˆ aˉ naˆ Hkri‸ yaˇ awˬ moˍ hk'a peu-eˬ htawˇ yawˇ huiˉ maˬ ve awˬ bon hta‸ dawˇ nawˇ leh chiˇ mvuh chehˇ ve yoˬ. 5 Yawˇ huiˉ maˬ ve yehˬ awˬ hk'aw hpawnˬ da‸ chehˇ ve Hkri‸ yaˇ awˬ moˍ hta‸ htawˇ ngaˬ dawˇ nawˇ chehˇ ve yoˬ teh‸ hto piˇ-oˆ. Aˍsiˆ mvuhˇ miˬ awˬ hk'aw lo Hkri‸ yaˇ awˉ lawˉ hpeh‸ la ve ngaˬ ha‸ ve Eˇpehˇnehˆ hta‸ ka‸ ngaˬ dawˇ nawˇ chehˇ ve yoˬ teh‸ hto piˇ-oˆ. 6 Nawˬ hui awˬ pon kanˉ g'aˇ hte‸ te ve Maˍriˆ hta‸ htawˇ ngaˬ dawˇ nawˇ chehˇ ve yoˬ teh‸ hto piˇ-oˆ. 7 Ngaˬ geh htawnˍ hk'aw chehˇ jaw ve, ngaˬ ve awˬ ceuˬ awˬ hk'aˇ Aˍdawˇniˆ leh Yuˇniˆ hta‸ ka‸, ngaˬ dawˇ nawˇ chehˇ ve yoˬ teh‸ hto piˇ-oˆ. Yawˇ huiˉ maˬ lehˬ, tcuh yaˇ hui awˬ hk'aw lo awˬ meh bvuhˬ ve chaw hpeh‸ ve yoˬ. Ngaˬ Hkri‸ yaˇ maˇ hpeh‸ la sheˍ htaˇ ka‸ yawˇ huiˉ maˬ Hkri‸ yaˇ hpeh‸ la peuˬ. 8 Jawˇ mawˇ Yeˍsuˆ awˬ hk'aw lo ngaˬ ha‸ ve Aˍpaˍliˆ hta‸ htawˇ ngaˬ dawˇ nawˇ chehˇ ve yoˬ teh‸ hto piˇ-oˆ. 9 Ngaˬ geh teˇ geh Hkri‸ ve kanˉ te ve Uˇraˍbaˍ leh ngaˬ ha‸ ve Saˍtaˍhkuˆ hta‸ ka‸ ngaˬ dawˇ nawˇ chehˇ ve yoˬ teh‸ hto piˇ-oˆ. 10 Hk'a deh‸ lawˇ nyi peuˬ ve Hkri‸ yaˇ Aˍpeˍleˍ hta‸ ka‸, Aˍriˇtawˇbuˆ ve yehˬ yaˇ k'a yaˇ hui hta‸ ka‸ ngaˬ dawˇ nawˇ chehˇ ve yoˬ teh‸ hto piˇ-oˆ. 11 Ngaˬ ve awˬ ceuˬ awˬ hk'aˇ hpeh‸ ve Heˍroˍdiˍoˍ leh, Jawˇ mawˇ Yeˍsuˆ awˬ hk'aw lo chehˇ ve Naˍkiˍsuˆ ve yehˬ yaˇ k'a yaˇ hui hta‸ ka‸ ngaˬ dawˇ nawˇ chehˇ ve yoˬ teh‸ hto piˇ-oˆ. 12 Jawˇ mawˇ Yeˍsuˆ awˬ pon kanˉ te chehˇ ve Taˍruˇhpehˇnaˆ leh Taˍruˇ hpawˇsaˆ hta‸ maˇ k'oˆ, Jawˇ mawˇ Yeˍsuˆ ve kanˉ hta‸ g'aˇ hte‸ te chehˇ ve ngaˬ ha‸ ve Peˍraˍsiˆ hta‸ maˇ k'oˆ, ngaˬ dawˇ nawˇ chehˇ ve yoˬ teh‸ hto piˇ-oˆ. 13 Jawˇ mawˇ Yeˍsuˆ awˬ hk'aw lo leuˆ yuˬ taˍ ve Ruˇhpuˆ leh ngaˬ ve awˬ e hk'a shuˍ shuˍ shawˍ taˍ ve, yawˇ ve awˬ e yawˇ huiˉ maˬ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. 14 Aˍsoˍkaˍreˆ, Hpaˍleˍgoˍ, Heˍraˍmeˍ, Paˇrawˇbaˆ, Heˍraˍmaˆ leh, yawˇ hui geh chehˇ ve awˬ viˉ awˬ nyi teˇ hpaˍ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. 15 Hpiˇlawˇluˆ, Yuˇliˆ, Neˍruˆ leh Neˍruˆ ve awˬ nyi ma Awˇloˍpaˆ leh, yawˇ hui geh chehˇ ve Hkri‸ yaˇ hk'a peu-eˬ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. 16 Nawˬ hui teˇ g'aˇ leh teˇ g'aˇ da‸ ve kehˬ ve awˬ hk'aw lo boˆ nu da‸ leh la‸ sheh caˉ da‸-o‸. Hkri‸ yaˇ awˬ moˍ hk'a peu-eˬ nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ. 17 Awˬ viˉ awˬ nyi teˇ hpaˍ-oˬ, nawˬ hui g'a henˇ peuˬ ve maˍ laˇ ve tawˇ hkawˇ teˇ hpaˍ hta‸ maˇ hawˍ ve, hpaˆ da‸ tuˬ te puiˉ ve, shu ya‸ k'ai tuˬ te puiˉ ve chaw teˇ hpaˍ hta‸ hk'a deh‸ nyi leh jaw k'ai-o teh‸, ngaˬ nawˬ hui hta‸ lawˬ hkawˉ ve yoˬ. 18 Awˬ lawn k'o, chi hk'e ve chaw teˇ hpaˍ lehˬ, ngaˬ hui ve Jawˇ mawˇ Hkri‸ awˬ pon kanˉ te ve maˇ heˆ. A shu yawˇ ve g'oˇ peˬ awˬ pon ceh kanˉ te ve yoˬ. Yawˇ hui lehˬ, na sha ve tawˇ leh chiˇ mvuh ve tawˇ hkawˇ hta‸ yehˇ leh, da‸ ve chaw teˇ hpaˍ hta‸ heˍ yuˬ puiˉ ve yoˬ. 19 Nawˬ hui na yuˬ puiˉ ve awˬ lawn lehˬ, chaw hk'a peu-eˬ g'a kaˇ ve pa taw, ngaˬ ha lehˬ chehˇ ve yoˬ. Ya‸ hk'aˇ, nawˬ hui lehˬ da‸ ve awˬ ceuˬ hta‸ shiˍ puiˉ leh, nyi ma awˬ hk'aw lo haiˬ ve awˬ ceuˬ a ciˉ ka‸ maˇ g'a cawˬ tuˬ ngaˬ heuˆ gaˇ sheˍ ve yoˬ. 20 Maˇ maw maw k'o, dawˇ sha piˇ shehˍ hpaˇ G'uiˬ sha lehˬ, nawˬ hui ve hkui taw k'aw awˬ hawˉ lo Saˍtanˍ hta‸ naˆ nehˆ sheˬ tuˬ yoˬ. Ngaˬ hui ve Jawˇ mawˇ Yeˍsuˆ Hkri‸ ve awˬ bon awˬ shinˉ nawˬ hui geh cawˬ piˇ-oˆ. 21 Ngaˬ geh teˇ geh kanˉ te shehˍ hpaˇ Tiˆmoˉseˍ leh, ngaˬ ve awˬ ceuˬ awˬ hk'aˇ Luˇkiˆ, Yaˍsonˍ leh Sawˇsiˇpaˍtaˆ hui lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 22 Ngaˬ lehˬ, li‸ chi bvuh‸ shehˍ hpaˇ Teˍraˍtiˆ yoˬ. Ngaˬ htawˇ Jawˇ mawˇ Yeˍsuˆ awˬ hk'aw lo nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 23 Ngaˬ hta‸ maˇ k'oˆ, Hkri‸ yaˇ teˇ moˍ hk'a peu-eˬ hta‸ maˇ k'oˆ, ha‸ yuˬ leh caˍ laˇ taw laˇ shehˍ hpaˇ Gaˍyuˆ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Venˇ chi awˬ hk'aw hpu ha‸ shaˉ shehˍ hpaˇ Eˇraˍtuˆ leh awˬ viˉ awˬ nyi Kawˍtuˆ htawˇ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 25 G'uiˬ sha hta‸ awˬ me‸ awˬ hponˇ cawˬ piˇ-oˆ. Yawˇ lehˬ, ngaˬ maˍ piˇ ve ha lehˬ ve bon hkawˇ leh Yeˍsuˆ Hkri‸ awˬ lawn ngaˬ bon maˍ ve hk'a shuˍ shuˍ, nawˬ hui hta‸ yeˬ la piˇ puiˉ ve yoˬ. Ngaˬ maˍ piˇ ve bon hkawˇ chi lehˬ, tcuhˉ kuiˬ naˉ jaˇ ve tawˇ hkawˇ hpeh‸ ve yoˬ. Tawˇ hkawˇ chi lehˬ, aˬ sho-eˬ htaˇ faˉ taˍ ve htawˇ, chi beu‸ hk'a tawˍ lehˆ tawˆ la peuˬ. 26 Chaw ceuˬ hk'a peu-eˬ yonˍ leh na yuˬ tuˬ, co co taiˍ taiˍ G'uiˬ sha tawˇ piˇ taˍ ve hk'e, faˉ taˍ ve oˇ ve chi beu‸ tawˆ la peuˬ leh, tcuh kaˍ paˍ hui ve li‸ hta‸ pa taw faˉ taˍ ve oˇ ve hta‸ chaw ceuˬ hk'a peu-eˬ g'a shiˍ ve yoˬ. 27 Yawˇ teˇ g'aˇ ceh tiˉ cuˇ yiˍ hk'a biˇ cawˬ ve G'uiˬ sha hpeh‸ ve yoˬ. Yeˍsuˆ Hkri‸ awˬ hk'aw lo co co taiˍ taiˍ yawˇ hta‸ chiˇ uiˍ chiˇ mvuh piˇ-oˆ. A menˬ.

1 Kawˇrenˍhtuˆ 1

1 Ngaˬ lehˬ Yeˍsuˆ Hkri‸ ve tcuh yaˇ Pawˇlu‸ yoˬ. G'uiˬ sha ve a loˍ cawˇ ve hta‸ pa taw, tcuh yaˇ te tuˬ yawˇ ngaˬ hta‸ kuˬ yuˬ ve yoˬ. 2 Nawˬ hui Kawˇrenˍhtuˆ venˇ hk'aw chehˇ ve G'uiˬ sha ve Hkri‸ yaˇ awˬ moˍ hta‸ ngaˬ leh awˬ viˉ awˬ nyi Suˇtenˍ, li‸ chi bvuh‸ laˇ ve yoˬ. Nawˬ hui lehˬ Yeˍsuˆ Hkri‸ hta‸ pa taw da‸ la kehˬ la peuˬ. Teˇ kaˬ le le lo chehˇ ve chaw hui, ngaˬ hui ve Jawˇ mawˇ Yeˍsuˆ Hkri‸ ve awˬ meh hta‸ hk'a kuˬ ve chaw hk'a peu-eˬ geh teˇ geh Hkri‸ yaˇ hpeh‸ la tuˬ, G'uiˬ sha nawˬ hui hta‸ kuˬ yuˬ taˍ peuˬ. Yeˍsuˆ lehˬ ngaˬ hui ve Jawˇ mawˇ ceh tiˉ maˇ heˆ. Yawˇ hui ve Jawˇ mawˇ htawˇ hpeh‸ ve yoˬ. 3 Ngaˬ hui ve Awˬ pa G'uiˬ sha leh Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 4 Nawˬ hui hta‸ pa taw ngaˬ G'uiˬ sha hta‸ hk'aˬ htaˆ ka‸ chiˇ mvuh chehˇ ve yoˬ. Awˬ lawn k'o, Yeˍsuˆ Hkri‸ awˬ hk'aw lo nawˬ hui G'uiˬ sha ve awˬ bon hta‸ g'a peuˬ. 5 Yeˍsuˆ Hkri‸ hta‸ pa taw, tawˇ yaw ve maˇ k'oˆ, shiˍ puiˉ ve maˇ k'oˆ, teˇ ceuˬ le le awˬ hk'aw lo nawˬ hui biˇ la peuˬ. 6 Hkri‸ awˬ lawn ngaˬ shaˉ hkiˆ hkanˍ ve hk'e cawˇ ve yoˬ teh‸ nawˬ hui g'a shiˍ peuˬ. 7 Hk'e te leh, ngaˬ hui ve Jawˇ mawˇ Yeˍsuˆ Hkri‸ k'aw‸ tawˆ la ve hta‸ law chehˇ htaˇ, nawˬ hui awˬ hk'aw lo awˬ bon teˇ ceuˬ ka‸ maˇ yawnˇ k'ai ve yoˬ. 8 Ngaˬ hui ve Jawˇ mawˇ Yeˍsuˆ Hkri‸ ve awˬ nyi awˬ hk'aw lo, nawˬ hui venˇ baˆ taˍ kuiˬ maˇ g'a cawˬ tuˬ, awˬ leh hk'a gaˬ yawˇ nawˬ hui hta‸ yeˬ piˇ lawˬ tuˬ yoˬ. 9 G'uiˬ sha lehˬ ka ti‸ yeˬ jaˇ ve yoˬ. Yawˇ ve Yaˇ hpu hpeh‸ ve, ngaˬ hui ve Jawˇ mawˇ Yeˍsuˆ Hkri‸ geh nawˬ hui awˬ chawˇ g'a te da‸ tuˬ, yawˇ nawˬ hui hta‸ kuˬ yuˬ taˍ ve yoˬ. 10 Awˬ viˉ awˬ nyi teˇ hpaˍ-oˬ, ngaˬ hui ve Jawˇ mawˇ Yeˍsuˆ Hkri‸ ve awˬ meh awˬ hk'aw lo, ngaˬ nawˬ hui hta‸ chi hk'e lawˬ hkawˉ ve yoˬ. Nawˬ hui tawˇ yaw da‸ ve hawˍ da‸ piˇ-oˆ. Awˬ moˍ shawˍ da‸ pehˬ da‸ ve taˇ cawˬ piˇ. Ya‸ hk'aˇ, nyi ma teˇ shiˍ tiˉ te leh, dawˇ hk'aˇ teˇ hk'aˇ tiˉ cawˬ ve awˬ hk'aw lo nawˬ hui cawˇ da‸ hui da‸ ve teˇ ceuˬ hk'a biˇ cawˬ piˇ-oˆ. 11 Awˬ lawn k'o, ngaˬ ve awˬ viˉ awˬ nyi teˇ hpaˍ-oˬ, nawˬ hui awˬ hk'aw lo ya‸ da‸ jiˆ da‸ ve cawˬ ve yoˬ teh‸ Hkaˍlawˇiˆ ve yehˬ yaˇ k'a yaˇ teˇ hpaˍ ngaˬ hta‸ hto laˇ ve yoˬ. 12 Ngaˬ k'oˆ gaˇ ve lehˬ chi hk'e yoˬ. Nawˬ hui k'oˆ ve, Ngaˬ lehˬ Pawˇlu‸ ve chaw yoˬ, Ngaˬ lehˬ Aˍpawˇlu‸ ve chaw yoˬ, Ngaˬ lehˬ Keˍhpaˆ ve chaw yoˬ. Ngaˬ lehˬ Hkri‸ ve chaw yoˬ teh‸, nawˬ hui teˇ g'aˇ leh teˇ g'aˇ k'oˆ da‸ chehˇ ve yoˬ. 13 Hkri‸ lehˬ hpaˆ da‸ pehˬ da‸ taˍ ve leh laˇ. Pawˇlu‸ lehˬ nawˬ hui awˬ pon la‸ ka hk'oˆ lo hkanˍ suh ve leh laˇ. Maˇ heˆ k'o, Pawˇlu‸ ve awˬ meh awˬ hk'aw lo nawˬ hui baˆtiˆsaˬ hkanˍ yuˬ ve leh laˇ. 14 Kaˍliˇpuˆ leh Gaˍyuˆ, yawˇ huiˉ maˬ hta‸ maˇ heˆ k'o, nawˬ hui awˬ hk'aw lo chaw teˇ g'aˇ hta‸ ka‸ ngaˬ baˆtiˆsaˬ maˇ piˇ ve pa taw ngaˬ ha lehˬ ve yoˬ. 15 Hk'e te leh, ngaˬ ve awˬ meh awˬ hk'aw lo baˆtiˆsaˬ hkanˍ yuˬ peuˬ teh‸ chaw teˇ g'aˇ ka‸ k'oˆ maˇ hpeh‸. 16 (Saˍteˍhpanˍ ve yehˬ yaˇ k'a yaˇ hui hta‸ htawˇ ngaˬ baˆtiˆsaˬ piˇ ve yoˬ. Chi awˬ hk'oˆ awˬ kaˍ awˬ nu chaw hta‸ baˆtiˆsaˬ piˇ ve hta‸ ngaˬ maˇ dawˇ nawˇ.) 17 Awˬ lawn k'o, baˆtiˆsaˬ piˇ tuˬ awˬ pon Hkri‸ ngaˬ hta‸ tcuh peu laˇ ve maˇ heˆ. Ya‸ hk'aˇ, ha lehˬ ve bon hkawˇ maˍ piˇ tuˬ ngaˬ hta‸ tcuh peu laˇ ve yoˬ. Ha lehˬ ve bon hkawˇ maˍ piˇ htaˇ, Hkri‸ ve la‸ ka kanˇ paˆ maˇ g'a yawnˇ k'ai tuˬ, cuˇ yiˍ maˍ yiˍ uiˍ ve tawˇ hkawˇ yaw leh maˍ piˇ ve maˇ heˆ. 18 Awˬ lawn k'o, la‸ ka awˬ lawn maˍ piˇ ve teˇ yanˇ, luˬ k'ai sheˆ k'ai chehˇ ve chaw hui awˬ pon cuˇ yiˍ maˇ cawˬ ve tawˇ hkawˇ hpeh‸ ve yoˬ. Ya‸ hk'aˇ, la‸ ka lehˬ ngaˬ hui htaiˍ hk'aw‸ ve hta‸ g'a chehˇ ve chaw hui awˬ pon G'uiˬ sha ve kanˇ paˆ hpeh‸ ve yoˬ. 19 Li‸ hpu hk'aw bvuh‸ taˍ ve hk'e, Cuˇ yiˍ cawˬ ve chaw hui ve cuˇ yiˍ hta‸ ngaˬ te luˬ leh, shiˍ puiˉ ve chaw hui ve shiˍ puiˉ ve hta‸ ngaˬ tawˍ taˍ tuˬ yoˬ, teh‸ bvuh‸ taˍ ve yoˬ. 20 Cuˇ yiˍ cawˬ paˍ hk'aˬ lo le. Li‸ bvuh‸ paˍ hk'aˬ lo le. Chi beu‸ awˬ yanˇ awˬ hk'aw lo awˬ lawn laiˉ ceuˬ shiˍ leh tawˇ g'awˬ da‸ paˍ hk'aˬ lo le. G'uiˬ sha lehˬ, miˬ guiˬ ve cuˇ yiˍ hta‸ cuˇ yiˍ maˇ cawˬ ve awˬ ceuˬ hpeh‸ piˇ lawˬ ve maˇ heˆ laˇ. 21 Awˬ lawn k'o, miˬ guiˬ yaˇ lehˬ, a shu yawˇ ve cuˇ yiˍ maˍ yiˍ hta‸ pa taw G'uiˬ sha hta‸ shiˍ ve maˇ heˆ. Chi lehˬ, G'uiˬ sha dawˇ cheˆ taˍ ve cuˇ yiˍ hpeh‸ ve yoˬ. Hk'e te leh, cuˇ yiˍ maˇ cawˬ teh‸ shu shawˍ ve ngaˬ hui maˍ piˇ ve bon hkawˇ hta‸ yonˍ ve chaw hui hta‸ htaiˍ hk'aw‸ piˇ tuˬ G'uiˬ sha nyi ma cawˇ ve yoˬ. 22 Yuˇda‸ chaw hui lehˬ, awˬ heˆ teˇ hpaˍ hta‸ lawˬ leh, Heˍlaˍsaˆ chaw hui lehˬ, cuˇ yiˍ hta‸ ca ve yoˬ. 23 Ya‸ hk'aˇ ngaˬ hui lehˬ, la‸ ka hk'oˆ lo hkanˍ suh ve Hkri‸ teˇ g'aˇ ve awˬ lawn bon maˍ piˇ ve yoˬ. Awˬ lawn chi lehˬ, Yuˇda‸ chaw hui awˬ pon hkui htiˇ poˬ paiˍ tuˬ hpeh‸ leh, buiˇ shaˆ aˉ naˆ chaw hui awˬ pon cuˇ yiˍ maˇ cawˬ ve teˇ ceuˬ hpeh‸ ve yoˬ. 24 Ya‸ hk'aˇ, hk'a kuˬ yuˬ taˍ ve chaw teˇ hpaˍ awˬ pon, Yuˇda‸ chaw maˇ k'oˆ, Heˍlaˍsaˆ chaw maˇ k'oˆ, Hkri‸ lehˬ G'uiˬ sha ve kanˇ paˆ leh G'uiˬ sha ve cuˇ yiˍ hpeh‸ ve yoˬ. 25 Awˬ lawn k'o, G'uiˬ sha ve cuˇ yiˍ maˇ cawˬ ve teˇ ceuˬ lehˬ, chaw yaˇ ve cuˇ yiˍ maˍ yiˍ a‸ kehˉ leuˉ leh cuˇ yiˍ cawˬ ve yoˬ. G'uiˬ sha ve g'aˇ nuˇ ve teˇ ceuˬ lehˬ, chaw yaˇ ve g'aˇ uiˍ ve a‸ kehˉ leuˉ leh awˬ g'aˇ uiˍ ve yoˬ. 26 Awˬ viˉ awˬ nyi teˇ hpaˍ-oˬ, G'uiˬ sha nawˬ hui hta‸ kuˬ yuˬ ve awˬ lawn hta‸ dawˇ nyi sheˍ. Miˬ guiˬ hpawˇ hta‸ shawˍ k'o, kuˬ taˍ ve chaw hui awˬ hk'aw lo, cuˇ yiˍ maˍ yiˍ cawˬ ve chaw hui maˇ ve maˇ heˆ. Kanˇ paˆ uiˍ ve chaw hui ka‸ maˇ ve maˇ heˆ. Jawˇ mawˇ ve awˬ ceuˬ awˬ hk'aˇ hui htawˇ maˇ ve maˇ heˆ. 27 Ya‸ hk'aˇ, cuˇ yiˍ cawˬ ve chaw hui hta‸ ya‸ taw piˇ lawˬ tuˬ, miˬ guiˬ hk'oˆ lo cuˇ yiˍ maˇ cawˬ ve chaw hui hta‸ G'uiˬ sha leuˆ yuˬ ve yoˬ. Awˬ g'aˇ uiˍ ve chaw hui hta‸ ya‸ taw piˇ lawˬ tuˬ, miˬ guiˬ hk'oˆ lo awˬ g'aˇ nuˇ ve chaw hui hta‸ Guiˬ sha leuˆ yuˬ ve yoˬ. 28 Cawˬ taˍ hpeh‸ taˍ ve awˬ ceuˬ teˇ hpaˍ hta‸ te mehˉ tuˬ, miˬ guiˬ hk'oˆ lo awˬ me‸ awˬ hponˇ maˇ cawˬ ve awˬ ceuˬ, shu shawˍ baˬ ve awˬ ceuˬ leh, te‸ chiˉ maˇ hpeh‸ ve awˬ ceuˬ teˇ hpaˍ hta‸ G'uiˬ sha leuˆ yuˬ ve yoˬ. 29 Chi hta‸ pa taw, G'uiˬ sha mehˆ g'uˇ suhˍ lo chaw teˇ g'aˇ ka‸ nyi ma uiˍ kuiˬ maˇ cawˬ. 30 G'uiˬ sha hta‸ pa taw, Yeˍsuˆ Hkri‸ awˬ hk'aw lo nawˬ hui g'a chehˇ ve yoˬ. Ngaˬ hui awˬ pon cuˇ yiˍ maˍ yiˍ, hteˇ ve cawˇ ve, da‸ ve kehˬ ve leh, htaiˍ hk'aw‸ ve awˬ ceuˬ, G'uiˬ sha lehˬ Yeˍsuˆ hta‸ hpeh‸ la piˇ ve yoˬ. 31 Hk'e te leh, Li‸ hpu hk'aw bvuh‸ taˍ ve hk'e, Nyi ma uiˍ ve chaw lehˬ, Jawˇ mawˇ G'uiˬ sha awˬ hk'aw lo ceh tiˉ nyi ma uiˍ piˇ-oˆ teh‸ bvuh‸ taˍ ve yoˬ.

1 Kawˇrenˍhtuˆ 2

1 Awˬ viˉ awˬ nyi teˇ hpaˍ-oˬ, ponˬ laˬ htaˇ ngaˬ nawˬ hui geh laˬ leh, G'uiˬ sha k'oˆ taˍ ve tawˇ hkawˇ nawˬ hui hta‸ ca maˍ la ve teˇ yanˇ, na sha jaˇ ve tawˇ hkawˇ yaw leh cuˇ yiˍ maˍ yiˍ hta‸ yehˇ leh ngaˬ ca maˍ la ve maˇ heˆ. 2 Awˬ lawn k'o, nawˬ hui geh ngaˬ chehˇ htaˇ, Yeˍsuˆ Hkri‸ leh, yawˇ la‸ ka hk'oˆ lo hkanˍ suh ve awˬ lawn hta‸ ceh tiˉ ngaˬ shiˍ tuˬ yoˬ teh‸, ngaˬ dawˇ cheˆ taˍ ve yoˬ. 3 Nawˬ hui geh ngaˬ chehˇ htaˇ, awˬ g'aˇ nuˇ leh kawˆ jaˇ cheˇ jaˇ ve awˬ hk'aw lo chehˇ ve yoˬ. 4 Nawˬ hui yonˍ ve teˇ ceuˬ lehˬ, chaw yaˇ ve cuˇ yiˍ awˬ hk'aw lo maˇ g'a yeˬ tuˬ leh G'uiˬ sha ve kanˇ paˆ awˬ hk'aw lo yeˬ tuˬ, 5 ngaˬ tawˇ yaw ve maˇ k'oˆ, bon maˍ laˇ ve maˇ k'oˆ, cuˇ yiˍ tawˇ hkawˇ hta‸ yehˇ leh beˬ yuˬ ve maˇ heˆ. Ya‸ hk'aˇ, ngaˬ awˬ hk'aw lo Awˬ ha hpu chehˇ ve hta‸ hpeu‸ maˍ laˇ leh, yawˇ ve kanˇ paˆ awˬ hk'aw lo maˍ laˇ ve yoˬ. 6 Biˇ la peuˬ ve chaw teˇ hpaˍ hta‸ ngaˬ hui cuˇ yiˍ tawˇ hkawˇ maˍ piˇ ve yoˬ. Chi miˬ guiˬ ve cuˇ yiˍ hta‸ k'oˆ ve maˇ heˆ. Luˬ k'ai mehˉ k'ai tuˬ ve miˬ guiˬ jawˇ mawˇ teˇ hpaˍ ve cuˇ yiˍ hta‸ ka‸ k'oˆ ve maˇ heˆ. 7 Ya‸ hk'aˇ faˉ taˍ ve leh naˉ jaˇ ve G'uiˬ sha ve cuˇ yiˍ hta‸ ngaˬ hui maˍ ve yoˬ. Cuˇ yiˍ oˇ ve lehˬ, ngaˬ hui awˬ me‸ awˬ hponˇ g'a tuˬ awˬ pon, miˬ guiˬ maˇ te hpanˍ sheˍ htaˇ ka‸, G'uiˬ sha dawˇ cheˆ taˍ ve cuˇ yiˍ hpeh‸ ve yoˬ. 8 Cuˇ yiˍ chi hta‸ chi miˬ guiˬ jawˇ mawˇ teˇ hpaˍ htawˇ, teˇ g'aˇ ka‸ maˇ shiˍ. Yawˇ hui shiˍ ve hk'e k'o, awˬ me‸ awˬ hponˇ ve Awˬ jawˇ mawˇ teˇ g'aˇ hta‸ la‸ ka hk'oˆ lo hta‸ pehˍ tuˬ ve maˇ heˆ. 9 Li‸ hpu hk'aw bvuh‸ taˍ ve hk'e, G'uiˬ sha hta‸ ha‸ ve chaw hui awˬ pon yawˇ gu taˍ ve awˬ ceuˬ teˇ hpaˍ hta‸ mehˆ shiˍ maˇ mawˬ jaw, naˍ paw maˇ kaˇ jaw leh, chaw yaˇ ve nyi ma hk'aw lo maˇ dawˇ shiˍ jaw ve yoˬ, teh‸ bvuh‸ taˍ ve yoˬ. 10 Ya‸ hk'aˇ G'uiˬ sha lehˬ, Awˬ ha hpu hta‸ cuˇ leh awˬ ceuˬ chi teˇ hpaˍ ngaˬ hui hta‸ hpeu‸ maˍ laˇ peuˬ. Awˬ lawn k'o, Awˬ ha hpu lehˬ hk'a peu-eˬ hta‸ ca nyi leh, G'uiˬ sha ve naˉ jaˇ ve awˬ ceuˬ teˇ hpaˍ hta‸ htawˇ yawˇ ca nyi ve yoˬ. 11 Chaw yaˇ awˬ hk'aw lo cawˬ taˍ ve nyi ma maˇ heˆ k'o, chaw yaˇ hta‸ caˉ da‸ ve awˬ ceuˬ teˇ hpaˍ hta‸ a shu shiˍ hpeh‸ tuˬ le. Oˇ ve hk'a shuˍ shuˍ, G'uiˬ sha ve Awˬ ha hpu maˇ heˆ k'o, G'uiˬ sha hta‸ caˉ da‸ ve awˬ ceuˬ teˇ hpaˍ hta‸ htawˇ a shu ka‸ shiˍ maˇ hpeh‸. 12 Ngaˬ hui lehˬ, miˬ guiˬ yaˇ hui ve nyi ma hta‸ g'a taˍ ve maˇ heˆ. Ya‸ hk'aˇ, G'uiˬ sha ngaˬ hui hta‸ piˇ taˍ ve awˬ bon teˇ hpaˍ hta‸ shiˍ hpeh‸ tuˬ, G'uiˬ sha lo laˬ ve Awˬ ha hpu hta‸ ngaˬ hui g'a taˍ ve yoˬ. 13 Awˬ bon oˇ ve teˇ hpaˍ awˬ lawn maˍ piˇ htaˇ, ngaˬ hui lehˬ chaw yaˇ maˍ laˇ ve cuˇ yiˍ hta‸ cuˇ leh k'aw‸ maˍ piˇ ve maˇ heˆ. Awˬ ha hpu maˍ laˇ ve hk'a shuˍ shuˍ ngaˬ hui k'aw‸ maˍ piˇ ve yoˬ. Co ha hpawˇ awˬ lawn maˍ piˇ htaˇ, co ha hpawˇ hta‸ caˉ da‸ ve awˬ ceuˬ hta‸ cuˇ leh maˍ piˇ ve yoˬ. 14 Co ha hpawˇ maˇ dawˇ pawnˍ ve chaw lehˬ, G'uiˬ sha ve Awˬ ha hpu hta‸ caˉ da‸ ve teˇ hpaˍ hta‸ maˇ ha‸ yuˬ. Awˬ ceuˬ oˇ ve teˇ hpaˍ lehˬ, yawˇ awˬ pon cuˇ yiˍ maˇ cawˬ ve awˬ ceuˬ hpeh‸ ve yoˬ. Co ha hpawˇ ceh tiˉ oˇ ve teˇ hpaˍ hta‸ fuiˍ da‸ pehˬ da‸ g'a ve pa taw, yawˇ lehˬ oˇ ve teˇ hpaˍ hta‸ maˇ shiˍ puiˉ. 15 Co ha hpawˇ dawˇ pawnˍ ve chaw lehˬ, hk'a peu-eˬ hta‸ fuiˍ da‸ pehˬ da‸ g'a ve yoˬ. Ya‸ hk'aˇ, chaw oˇ ve awˬ lawn hta‸ teˇ g'aˇ ka‸ fuiˍ da‸ pehˬ da‸ maˇ g'a. 16 Awˬ lawn k'o, Jawˇ mawˇ G'uiˬ sha hta‸ maˍ piˇ tuˬ, yawˇ ve nyi ma hta‸ a shu shiˍ ve le. Ya‸ hk'aˇ, ngaˬ hui lehˬ Hkri‸ ve nyi ma cawˬ taˍ ve yoˬ.

1 Kawˇrenˍhtuˆ 3

1 Awˬ viˉ awˬ nyi teˇ hpaˍ-oˬ, co ha hpawˇ hta‸ caˉ da‸ ve chaw hui hta‸ maˍ piˇ ve hk'e ngaˬ nawˬ hui hta‸ maˍ laˇ maˇ hpeh‸. Ya‸ hk'aˇ, miˬ guiˬ hpawˇ hta‸ ceh tiˉ caˉ da‸ ve chaw leh, Hkri‸ awˬ hk'aw lo yaˇ ehˉ hpeh‸ ve chaw hta‸ maˍ piˇ ve hk'e ceh ngaˬ nawˬ hui hta‸ maˍ laˇ hpeh‸ ve yoˬ. 2 Nawˬ hui lehˬ, heh ve caˇ tuˬ hta‸ caˇ maˇ g'a ve pa taw, ngaˬ nawˬ hui hta‸ maˇ caˍ laˇ. Cuˉ g'uiˬ ceh tiˉ nawˬ hui hta‸ taw laˇ ve yoˬ. Chi beu‸ ka‸, nawˬ hui heh ve caˇ tuˬ hta‸ caˇ maˇ g'a sheˍ. 3 Awˬ lawn k'o, nawˬ hui lehˬ miˬ guiˬ hpawˇ hta‸ caˉ da‸ ve chaw ceh tiˉ hpeh‸ chehˇ sheˍ ve yoˬ. Nawˬ hui awˬ hk'aw lo hkawehˉ da‸ leh, ya‸ da‸ jiˆ da‸ chehˇ ve pa taw, miˬ guiˬ hpawˇ hta‸ caˉ da‸ ve chaw hpeh‸ leh, miˬ guiˬ yaˇ hk'a shuˍ shuˍ nawˬ hui te chehˇ ve maˇ heˆ laˇ. 4 Chaw teˇ g'aˇ lehˬ, Ngaˬ Pawˇlu‸ ve chaw yoˬ. Awˬ kaˍ awˬ nu teˇ g'aˇ lehˬ, Ngaˬ Aˍpawˇlu‸ ve chaw yoˬ teh‸, nawˬ hui k'oˆ da‸ chehˇ ve ceh ceh, nawˬ hui miˬ guiˬ yaˇ ceh tiˉ hpeh‸ chehˇ sheˍ ve maˇ heˆ laˇ. 5 Aˍpawˇlu‸ lehˬ a shu le. Pawˇlu‸ htawˇ a shu le. Nawˬ hui g'a yonˍ tuˬ awˬ pon ngaˬ huiˉ maˬ lehˬ awˬ ceˬ hpeh‸ ve yoˬ. Jawˇ mawˇ Yeˍsuˆ kanˉ piˇ taˍ ve hk'a shuˍ shuˍ ngaˬ huiˉ maˬ htawˇ a shu yawˇ ve kanˉ cawˬ ve yoˬ. 6 Ngaˬ ti taˍ leh Aˍpawˇlu‸ iˉ kaˆ pfuhˍ piˇ ve yoˬ. Ya‸ hk'aˇ, yeˬ la uiˍ la piˇ shehˍ hpaˇ lehˬ G'uiˬ sha yoˬ. 7 Hk'e te leh, ti shehˍ hpaˇ leh iˉ kaˆ pfuhˍ shehˍ hpaˇ lehˬ uiˍ ve maˇ heˆ. Yeˬ la uiˍ la piˇ shehˍ hpaˇ G'uiˬ sha ceh tiˉ uiˍ ve yoˬ. 8 Ti shehˍ hpaˇ leh iˉ kaˆ pfuhˍ shehˍ hpaˇ lehˬ hk'a shuˍ shuˍ yoˬ. Ya‸ hk'aˇ, a shu yawˇ ve kanˉ te taˍ ve hk'e, teˇ g'aˇ peuˬ teˇ g'aˇ awˬ bon g'a tuˬ yoˬ. 9 Ngaˬ huiˉ maˬ lehˬ, teˇ geh G'uiˬ sha ve kanˉ te shehˍ hpaˇ hpeh‸ ve yoˬ. Nawˬ hui lehˬ, G'uiˬ sha ve ti mi leh G'uiˬ sha ve yehˬ hpeh‸ ve yoˬ. 10 G'uiˬ sha ngaˬ hta‸ awˬ bon pe‸ laˇ ve hk'a shuˍ shuˍ, cuˇ yiˍ cawˬ ve yehˬ te shehˍ hpaˇ hk'e yehˬ awˬ hkuiˉ puiˍ hta‸ ngaˬ te taˍ peuˬ. Awˬ kaˍ awˬ nu chaw lehˬ, awˬ hkuiˉ puiˍ oˇ ve awˬ hk'oˆ hta‸ k'aw‸ caˉ te ve yoˬ. Ya‸ hk'aˇ, hk'aˬ hk'e k'aw‸ caˉ te ve hta‸ te shehˍ hpaˇ teˇ g'aˇ le le shaˍ ti‸ te cawˇ ve yoˬ. 11 Awˬ lawn k'o, teh taˍ peuˬ ve awˬ hkuiˉ puiˍ lehˬ Yeˍsuˆ Hkri‸ yoˬ. Hk'aˬ ve chaw teˇ g'aˇ htawˇ maˇ k'oˆ, awˬ kaˍ awˬ nu awˬ hkuiˉ puiˍ teh taˍ maˇ g'a. 12 Chaw teˇ g'aˇ g'aˇ, awˬ hkuiˉ puiˍ oˇ ve awˬ hk'oˆ hta‸ shi, hpu, haˉ pui shehnˉ, suhˆ, zuhˇ, chi g'awˇ teˇ hpaˍ hta‸ k'aw‸ caˉ te ve k'o, teˇ g'aˇ le le a shu yawˇ kanˉ te taˍ ve hk'e tawˆ la tuˬ yoˬ. 13 Awˬ lawn k'o, awˬ nyi oˇ ve teˇ nyi gaˬ htaˇ, aˬ miˍ lehˬ chaw teˇ g'aˇ le le ve kanˉ hta‸ hpeu‸ maˍ tuˬ yoˬ. Chaw teˇ g'aˇ le le ve kanˉ lehˬ, hk'aˬ hk'e ve kanˉ hpeh‸ ve hta‸ aˬ miˍ oˇ ve lawˇ nyi tuˬ yoˬ. 14 Chaw teˇ g'aˇ g'aˇ awˬ hkuiˉ puiˍ awˬ hk'oˆ hta‸ k'aw‸ caˉ te ve kanˉ yeˬ chehˇ ve k'o, yawˇ lehˬ awˬ bon g'a tuˬ yoˬ. 15 Chaw teˇ g'aˇ g'aˇ ve kanˉ hta‸ aˬ miˍ to‸ baˬ ve k'o, yawˇ ve awˬ bon lehˬ shonˇ k'ai tuˬ yoˬ. Ya‸ hk'aˇ, yawˇ awˬ to htaiˍ hk'aw‸ ve hta‸ g'a tuˬ yoˬ. Htaiˍ hk'aw‸ ve oˇ ve lehˬ, aˬ miˍ awˬ hk'aw g'a ponˬ ve hk'e hpeh‸ tuˬ yoˬ. 16 Nawˬ hui lehˬ G'uiˬ sha ve bon yehˬ hpeh‸ leh, G'uiˬ sha ve Awˬ ha hpu nawˬ hui awˬ hk'aw lo chehˇ ve hta‸ nawˬ hui maˇ shiˍ laˇ. 17 Chaw teˇ g'aˇ g'aˇ G'uiˬ sha ve bon yehˬ hta‸ te luˬ ve k'o, G'uiˬ sha lehˬ yawˇ hta‸ te luˬ tuˬ yoˬ. Awˬ lawn k'o, G'uiˬ sha ve bon yehˬ lehˬ da‸ kehˬ ve yoˬ. Nawˬ hui lehˬ bon yehˬ oˇ ve hpeh‸ ve yoˬ. 18 Chaw hk'aˬ ve teˇ g'aˇ maˇ k'oˆ, a shu yawˇ awˬ to hta‸ taˇ heˍ. Nawˬ hui awˬ hk'aw lo chaw teˇ g'aˇ g'aˇ chi miˬ guiˬ ve cuˇ yiˍ cawˬ ve yoˬ teh‸ dawˇ ve k'o, yawˇ cuˇ yiˍ cawˬ la tuˬ cuˇ yiˍ maˇ cawˬ ve chaw hpeh‸ la piˇ-oˆ. 19 Awˬ lawn k'o, chi miˬ guiˬ ve cuˇ yiˍ lehˬ, G'uiˬ sha mehˆ g'uˇ suhˍ lo cuˇ yiˍ maˇ cawˬ ve teˇ ceuˬ hpeh‸ ve yoˬ. Li‸ hpu hk'aw bvuh‸ taˍ ve hk'e, G'uiˬ sha lehˬ cuˇ yiˍ cawˬ ve chaw teˇ hpaˍ, yawˇ hui cuˇ yiˍ te chehˇ ve awˬ hk'aw lo yawˇ hui hta‸ hpeh yuˬ ve yoˬ teh‸ bvuh‸ taˍ ve yoˬ. 20 Teˇ kaˬ k'aw‸ bvuh‸ taˍ sheˍ ve, Cuˇ yiˍ cawˬ ve chaw hui ve dawˇ hk'aˇ lehˬ, hk'e leˇ hpeh‸ ve hta‸ Jawˇ mawˇ G'uiˬ sha shiˍ ve yoˬ teh‸ bvuh‸ taˍ ve yoˬ. 21 Hk'e te leh, chaw yaˇ hta‸ g'aˇ va ve awˬ hk'aw lo nyi ma taˇ uiˍ. Awˬ lawn k'o, awˬ ceuˬ hk'a peu-eˬ nawˬ hui ve hpeh‸ ve yoˬ. 22 Pawˇlu‸ maˇ k'oˆ, Aˍpawˇlu‸ maˇ k'oˆ, Keˍhpaˆ maˇ k'oˆ, miˬ guiˬ maˇ k'oˆ, te‸ ve leh suh ve awˬ ceuˬ maˇ k'oˆ, chi beu‸ hpeh‸ chehˇ ve leh awˬ hk'aw‸ nawˉ hpeh‸ la tuˬ ve awˬ ceuˬ htawˇ maˇ k'oˆ, chi hk'a peu-eˬ lehˬ nawˬ hui ve hpeh‸ ve yoˬ. 23 Nawˬ hui Hkri‸ ve hpeh‸ leh, Hkri‸ lehˬ G'uiˬ sha ve hpeh‸ ve yoˬ.

1 Kawˇrenˍhtuˆ 4

1 Hk'e te leh, ngaˬ hui lehˬ Hkri‸ ve awˬ ceˬ hpeh‸ leh, G'uiˬ sha ve naˉ jaˇ ve awˬ lawn teˇ hpaˍ hta‸ ha‸ shaˉ shehˍ hpaˇ hpeh‸ ve yoˬ teh‸, shu ngaˬ hui hta‸ shawˍ taˍ laˇ cawˇ ve yoˬ. 2 Ha‸ shaˉ shehˍ hpaˇ teˇ hpaˍ lehˬ, ka ti‸ yeˬ ve chaw g'a hpeh‸ ve yoˬ. 3 Ya‸ hk'aˇ, nawˬ hui maˇ k'oˆ, awˬ kaˍ awˬ nu chaw maˇ k'oˆ, ngaˬ hta‸ suhˉ jehˬ laˇ ve lehˬ, i jaˇ ve awˬ ceuˬ hpeh‸ ve yoˬ teh‸ ngaˬ shawˍ taˍ ve yoˬ. Ngaˬ hk'aˇ ngaˬ awˬ to hta‸ ka‸ suhˉ maˇ jehˬ. 4 Awˬ lawn k'o, ngaˬ awˬ to ya‸ kuiˬ cawˬ ve hta‸ ngaˬ maˇ dawˇ. Ya‸ hk'aˇ, chi hta‸ pa taw ngaˬ hteˇ ve cawˇ ve chaw hpeh‸ ve maˇ heˆ. Ngaˬ hta‸ suhˉ jehˬ shehˍ hpaˇ lehˬ, Jawˇ mawˇ Yeˍsuˆ yoˬ. 5 Hk'e te leh, awˬ yanˇ maˇ gaˬ sheˍ ve ceh ceh, hk'aˬ ve teˇ ceuˬ awˬ lawn hta‸ maˇ k'oˆ, suhˉ taˇ taˆ sheˍ. Jawˇ mawˇ Yeˍsuˆ gaˬ la htaˇ naˆ ho‸ ve awˬ hk'aw lo faˉ taˍ ve awˬ ceuˬ teˇ hpaˍ hk'a tawˍ lehˆ tawˆ la tuˬ yawˇ te leh, chaw yaˇ ve nyi ma dawˇ hk'aˇ teˇ hpaˍ hta‸ yawˇ hpeu‸ tawˆ la tuˬ yoˬ. Oˇ htaˇ, a shu yawˇ keunˍ ve hk'e chaw teˇ g'aˇ le le hta‸ G'uiˬ sha chiˇ mvuh piˇ tuˬ yoˬ. 6 Awˬ viˉ awˬ nyi teˇ hpaˍ-oˬ, awˬ lawn chi teˇ hpaˍ ngaˬ bvuh‸ laˇ ve lehˬ, ngaˬ leh Aˍpawˇlu‸ hta‸ nawˬ hui henˇ yuˬ jawˬ yuˬ hpeh‸ tuˬ, nawˬ hui awˬ pon ngaˬ tawˇ pa haˉ te maˍ laˇ ve yoˬ. Li‸ hpu hk'aw bvuh‸ taˍ ve awˬ hk'aˇ suh ceh tiˉ nawˬ hui te tuˬ leh, teˇ g'aˇ hta‸ chiˇ uiˍ chiˇ mvuh leh teˇ g'aˇ hta‸ maˇ shawˍ maˇ caˆ nawˬ hui maˇ g'a te tuˬ, ngaˬ chi hk'e te maˍ laˇ ve yoˬ. 7 Awˬ lawn k'o, shu hta‸ peun da‸ tuˬ a shu nawˬ hta‸ te laˇ ve le. G'uiˬ sha geh g'a taˍ ve maˇ heˆ k'o, nawˬ aˬ hto‸ ma cawˬ le. G'uiˬ sha geh g'a taˍ ve k'o, G'uiˬ sha geh maˇ g'a ve hk'e te leh aˬ hto‸ ma te nawˬ nyi ma uiˍ ve le. 8 Chi beu‸ lehˬ, nawˬ hui nyi hk'aˇ suh peuˬ leˇ. Chi beu‸ lehˬ, nawˬ hui paw sha la peuˬ leˇ. Ngaˬ hui maˇ heˆ ka‸, nawˬ hui uˉ peunˍ g'a ve law leˇ. Nawˬ hui awˬ tehˬ awˬ na uˉ peunˍ tuˬ ve hta‸ ngaˬ heuˆ gaˇ ve yoˬ. Oˇ hk'e hpeh‸ ve k'o, ngaˬ hui htawˇ nawˬ hui geh teˇ geh g'a uˉ peunˍ tuˬ yoˬ. 9 Awˬ lawn k'o, tiˇ pehˍ ve hta‸ g'a hkanˍ tuˬ suhˉ taˆ peuˬ ve chaw hui hk'e, G'uiˬ sha lehˬ ngaˬ hui tcuh yaˇ teˇ hpaˍ hta‸ awˬ leh meuˇ htaˇ maw piˇ tuˬ awˬ pon teh taˍ ve yoˬ teh‸ ngaˬ dawˇ ve yoˬ. Ngaˬ hui lehˬ, miˬ guiˬ yaˇ hui, mvuhˇ naw ma tcuh yaˇ hui leh chaw yaˇ hui mehˆ g'uˇ suhˍ nyi guiˇ tuˬ awˬ pon ceh hpeh‸ ve yoˬ. 10 Ngaˬ hui Hkri‸ awˬ pon cuˇ yiˍ maˇ cawˬ ve chaw hpeh‸ ve ka‸, nawˬ hui lehˬ Hkri‸ awˬ hk'aw lo cuˇ yiˍ cawˬ paˍ hpeh‸ ve yoˬ. Ngaˬ hui awˬ g'aˇ nuˇ ve chaw hpeh‸ ve ka‸, nawˬ hui lehˬ awˬ g'aˇ uiˍ ve chaw hpeh‸ ve yoˬ. Nawˬ hui awˬ me‸ awˬ hponˇ cawˬ ve chaw hpeh‸ ve ka‸, ngaˬ hui lehˬ shu shawˍ baˬ taˍ ve chaw hpeh‸ ve yoˬ. 11 Chi beu‸ hk'a gaˬ ngaˬ hui lehˬ, awˍ meu‸ ve, iˉ kaˆ shiˉ ve, maˇ g'a veu‸ maˇ g'a deh ve, dawˆ ve tiˇ ve hta‸ g'a hkanˍ leh, chehˇ kuiˬ awˬ ti maˇ cawˬ ve chaw hpeh‸ ve yoˬ. 12 Ngaˬ hui ve la‸ sheh kanˉ g'aˇ hte‸ g'a te caˇ chehˇ ve yoˬ. Shu ngaˬ hui hta‸ hk'a mvuhˇ hk'a na k'oˆ laˇ htaˇ, ngaˬ hui bon k'aw‸ na‸ piˇ ve yoˬ. Shu ngaˬ hui hta‸ fawˉ mehˍ laˇ htaˇ, ngaˬ hui yeunˇ hkanˍ ve yoˬ. 13 Shu ngaˬ hui hta‸ maˇ shawˍ maˇ caˆ k'oˆ laˇ htaˇ, k'aw‸ cawˇ da‸ tuˬ ngaˬ hui lawˬ hkawˉ ve yoˬ. Chi beu‸ hk'a gaˬ miˬ guiˬ ve cha‸ chiˆ ve teˇ ceuˬ hk'e ngaˬ hui hpeh‸ leh, hk'a peu-eˬ ve hta‸ shu shiˆ baˬ taˍ ve awˬ puiˍ taˆ hk'e hpeh‸ ve yoˬ. 14 Nawˬ hui ya‸ taw tuˬ ngaˬ chi hk'e bvuh‸ ve maˇ heˆ. Ya‸ hk'aˇ, nawˬ hui hta‸ ngaˬ ha‸ ve yaˇ hk'a shuˍ shuˍ shawˍ taˍ leh, shaˍ ti‸ pe‸ laˇ ve yoˬ. 15 Awˬ lawn k'o, Hkri‸ awˬ hk'aw lo nawˬ hui saˍ la‸ awˬ meunˍ g'aˇ hk'e cawˬ htawˇ, awˬ pa laiˉ g'aˇ maˇ cawˬ. Ngaˬ ha lehˬ ve bon hkawˇ hta‸ cuˇ leh nawˬ hui hta‸ Yeˍsuˆ Hkri‸ awˬ hk'aw lo paw la piˇ peuˬ. 16 Hk'e te leh, ngaˬ te ve hk'a shuˍ shuˍ nawˬ hui te tuˬ, ngaˬ nawˬ hui hta‸ lawˬ hkawˉ ve yoˬ. 17 Chi hta‸ pa taw, Jawˇ mawˇ Yeˍsuˆ awˬ hk'aw lo ka ti‸ yeˬ ve, ngaˬ ha‸ ve yaˇ Tiˆmoˉseˍ hta‸ nawˬ hui geh ngaˬ peu laˇ ve yoˬ. Teˇ kaˬ le le lo chehˇ ve Hkri‸ yaˇ awˬ moˍ hk'a peu-eˬ hta‸ ngaˬ maˍ piˇ ve hk'e, Hkri‸ awˬ hk'aw lo ngaˬ te ve awˬ hk'aˇ teˇ hpaˍ yawˇ nawˬ hui hta‸ k'aw‸ dawˇ nawˇ piˇ tuˬ yoˬ. 18 Ngaˬ nawˬ hui geh maˇ laˬ teh‸ chaw teˇ hpaˍ hpaˍ dawˇ leh nyi ma uiˍ chehˇ ve yoˬ. 19 Ya‸ hk'aˇ, Jawˇ mawˇ Yeˍsuˆ a loˍ cawˇ ve k'o, maˇ maw maw ngaˬ nawˬ hui geh laˬ tuˬ yoˬ. Ngaˬ gaˬ la htaˇ, ngaˬ g'a shiˍ tuˬ ve lehˬ, nyi ma uiˍ ve mvuh ve chaw oˇ ve teˇ hpaˍ ve tawˇ hkawˇ hta‸ maˇ heˆ, yawˇ hui kanˇ paˆ cawˬ maˇ cawˬ ve hta‸ g'a shiˍ tuˬ yoˬ. 20 Awˬ lawn k'o, G'uiˬ sha ve mvuhˇ miˬ lehˬ, tawˇ yaw ve hkawˇ hta‸ caˉ da‸ ve maˇ heˆ. Kanˇ paˆ hta‸ caˉ da‸ ve yoˬ. 21 Nawˬ hui hk'aˬ hk'e heuˆ gaˇ ve le. Ngaˬ lehˬ, suhˆ taˬ yuˬ leh g'a laˬ tuˬ ve laˇ. Maˇ heˆ k'o, ha‸ pehnˇ ve leh nyi ma nuˇ nehˬ ve awˬ hk'aw lo g'a laˬ tuˬ ve laˇ.

1 Kawˇrenˍhtuˆ 5

1 Nawˬ hui awˬ hk'aw lo haˉ chawˇ haˉ paˆ cawˬ ve awˬ lawn hta‸ ngaˬ g'a kaˇ ve yoˬ. Haˉ chawˇ haˉ paˆ chi teˇ ceuˬ lehˬ, lawˇ kiˍ yaˇ hui geh ka‸ maˇ cawˬ jaw ve teˇ ceuˬ hpeh‸ ve yoˬ. Awˬ lawn k'o, chaw teˇ g'aˇ yawˇ awˬ pa ve awˬ miˇ ma hta‸ heuˆ peuˬ. 2 Chi hk'e te chehˇ ve ka‸ nawˬ hui nyi ma uiˍ chehˇ ve yoˬ. Nawˬ hui dawˇ haˍ cawˇ ve maˇ heˆ laˇ. Chi hk'e te ve chaw hta‸ nawˬ hui awˬ hk'aw lo g'a‸ k'oˬ cawˇ ve yoˬ. 3 Ngaˬ awˬ to nawˬ hui geh maˇ chehˇ htawˇ, ngaˬ ve nyi ma nawˬ hui geh cawˬ ve yoˬ. Ngaˬ awˬ to nawˬ hui geh chehˇ ve hk'e, chi hk'e te ve chaw hta‸ chi beu‸ ka‸ ngaˬ suhˉ taˆ peuˬ. 4 Jawˇ mawˇ Yeˍsuˆ ve awˬ meh awˬ hk'aw lo nawˬ hui leh ngaˬ ve nyi ma teˇ geh hpawnˬ da‸ htaˇ, Jawˇ mawˇ Yeˍsuˆ ve kanˇ paˆ hta‸ cuˇ leh chi hk'e te loˬ. 5 Te ya‸ ve chaw teˇ g'aˇ hta‸ awˬ suhˍ awˬ shaˍ hpawˇ te luˬ piˇ tuˬ, Saˍtanˍ la‸ hk'aw lo chiˇ a‸ piˇ-oˆ. Oˇ hk'e te ve k'o, Jawˇ mawˇ Yeˍsuˆ ve awˬ nyi awˬ hk'aw lo yawˇ ve co ha lehˬ htaiˍ hk'aw‸ ve hta‸ g'a hpeh‸ tuˬ yoˬ. 6 Nawˬ hui chi hk'e nyi ma uiˍ ve lehˬ maˇ da‸. Diˇ a ciˉ ceh tiˉ hkaoˍ monˇ awˬ tcuhˇ teˇ diˬ hk'a peu-eˬ hta‸ ciˇ la piˇ puiˉ ve hta‸ nawˬ hui maˇ shiˍ laˇ. 7 Nawˬ hui diˇ maˇ cawˬ ve hkaoˍ monˇ awˬ suhˉ teˇ diˬ hk'e hpeh‸ la tuˬ, diˇ awˬ piˍ hta‸ yuˬ baˬ-o‸. Awˬ lawn k'o, Hkri‸ lehˬ ngaˬ hui awˬ pon tanˇ peuˬ ve Paˍsaˍhkaˍ yawˬ ehˉ hpeh‸ ve yoˬ. 8 Hk'e te leh, ngaˬ hui pawehˇ caˇ htaˇ, diˇ awˬ piˍ hta‸ taˇ yehˇ. Haiˬ ve leh cha‸ chiˆ ve diˇ hta‸ ka‸ taˇ yehˇ. Ya‸ hk'aˇ, diˇ maˇ cawˬ ve hkaoˍ monˇ, da‸ kehˬ ve leh hteˇ ve cawˇ ve hkaoˍ monˇ hta‸ caˇ-a veuˬ. 9 Haˉ chawˇ haˉ paˆ te ve chaw hui geh awˬ chawˇ maˇ g'a te teh‸ ngaˬ nawˬ hui hta‸ li‸ bvuh‸ laˇ peuˬ ve yoˬ. 10 Ngaˬ li‸ chi hk'e bvuh‸ laˇ ve lehˬ, haˉ chawˇ haˉ paˆ te ve miˬ guiˬ yaˇ hui geh maˇ k'oˆ, shu mawˇ shu jeˬ hta‸ sheˉ lai leh hiˉ yuˬ lu yuˬ ve chaw hui geh maˇ k'oˆ, shaˉ ho‸ hta‸ oˉ k'oˍ pui ve chaw hui geh maˇ k'oˆ, awˬ chawˇ maˇ g'a te teh‸ ngaˬ k'oˆ gaˇ ve maˇ heˆ. Oˇ hk'e yoˬ k'o, nawˬ hui miˬ guiˬ chi awˬ hk'aw lo g'a tawˆ k'ai tuˬ yoˬ. 11 Ya‸ hk'aˇ, ngaˬ bvuh‸ laˇ ve lehˬ, awˬ viˉ awˬ nyi teh‸ k'oˆ ve htawˇ, haˉ chawˇ haˉ paˆ te ve, shu mawˇ shu jeˬ hta‸ sheˉ lai ve, shaˉ ho‸ hta‸ oˉ k'oˍ pui ve, hk'a mvuhˇ hk'a na k'oˆ ve, tzuhˬ dawˬ bvuhˆ ve leh, shu mawˇ hta‸ hiˉ yuˬ lu yuˬ ve chaw hui geh awˬ chawˇ maˇ g'a te ve awˬ hk'oˆ ka‸, chi hk'e ve chaw geh awˍ ka‸ taˇ caˇ teh‸ ngaˬ nawˬ hui hta‸ bvuh‸ laˇ ve yoˬ. 12 Awˬ lawn k'o, awˬ baˬ hpawˇ chehˇ ve chaw hui hta‸ suhˉ jehˬ tuˬ ngaˬ hta‸ hk'aˬ hk'e caˉ da‸ ve le. Hkri‸ yaˇ awˬ moˍ awˬ hk'aw lo chehˇ ve chaw hui hta‸ nawˬ hui suhˉ g'a jehˬ ve maˇ heˆ laˇ. 13 Awˬ baˬ hpawˇ chehˇ ve chaw hui hta‸ G'uiˬ sha suhˉ jehˬ ve yoˬ. Haiˬ ve chaw oˇ ve teˇ g'aˇ hta‸ nawˬ hui awˬ hk'aw lo g'a‸ k'oˬ loˬ.

1 Kawˇrenˍhtuˆ 6

1 Nawˬ hui teˇ g'aˇ g'aˇ awˬ viˉ awˬ nyi hta‸ tawˇ te da‸ tuˬ cawˬ htaˇ, Hkri‸ yaˇ hui geh maˇ k'ai leh, nawˬ hui hta‸ suhˉ jehˬ laˇ tuˬ lawˇ kiˍ yaˇ hui geh k'ai ve laˇ. 2 Hkri‸ yaˇ hui lehˬ, miˬ guiˬ yaˇ hui hta‸ suhˉ g'a jehˬ tuˬ ve hta‸ nawˬ hui maˇ shiˍ laˇ. Nawˬ hui lehˬ, miˬ guiˬ yaˇ hta‸ suhˉ g'a jehˬ k'o, i jaˇ ve awˬ lawn teˇ hpaˍ hta‸ nawˬ hui suhˉ jehˬ maˇ keunˍ leh laˇ. 3 Nyiˬ hui lehˬ, mvuhˇ naw ma tcuh yaˇ hui hta‸ suhˉ g'a jehˬ tuˬ ve hta‸ nawˬ hui maˇ shiˍ laˇ. Hk'e te leh, miˬ guiˬ hk'oˆ te‸ chehˇ ve awˬ yanˇ awˬ hk'aw lo leuˉ leh suhˉ g'a jehˬ tuˬ ve maˇ heˆ laˇ. 4 Chi hk'e ve teˇ hpaˍ hta‸ suhˉ jehˬ tuˬ cawˬ ve k'o, awˬ me‸ awˬ hponˇ maˇ cawˬ teh‸ Hkri‸ yaˇ awˬ moˍ shawˍ taˍ ve chaw teˇ hpaˍ hta‸ suhˉ jehˬ shehˍ hpaˇ te tcuh tuˬ, nawˬ hui teh taˍ ve laˇ. 5 Ngaˬ chi hk'e k'oˆ ve lehˬ, nawˬ hui ya‸ taw tuˬ awˬ pon ngaˬ k'oˆ ve yoˬ. Awˬ viˉ awˬ nyi teˇ g'aˇ leh teˇ g'aˇ maˇ cawˇ da‸ ve awˬ kaˍ lo jehˬ cheˆ tuˬ, nawˬ hui awˬ hk'aw lo cuˇ yiˍ cawˬ ve chaw teˇ g'aˇ ka‸ maˇ cawˬ leh laˇ. 6 Ya‸ hk'aˇ, awˬ viˉ awˬ nyi teˇ g'aˇ leh teˇ g'aˇ tawˇ te da‸ ve awˬ hk'oˆ, maˇ yonˍ ve chaw hui mehˆ g'uˇ suhˍ ka‸ tawˇ te da‸ ve law leˇ. 7 Nawˬ hui teˇ g'aˇ leh teˇ g'aˇ tawˇ te da‸ ve pa taw, nawˬ hui awˬ pon co ha hpawˇ shonˇ ve teˇ ceuˬ hpeh‸ ve yoˬ. Shu te ya‸ laˇ ve hta‸ aˬ hto‸ ma pa taw nawˬ hui maˇ hkanˍ le. Shu nawˬ hui ve mawˇ heˍ caˇ laˇ ve hta‸ aˬ hto‸ ma pa taw nawˬ hui maˇ hkanˍ le. 8 Ya‸ hk'aˇ, nawˬ hui hk'aˇ nawˬ hui shu hta‸ te ya‸ leh heˍ caˇ chehˇ ve awˬ hk'oˆ, nawˬ hui ve awˬ viˉ awˬ nyi teˇ hpaˍ hta‸ chi hk'e te chehˇ ve yoˬ. 9 Maˇ hteˇ maˇ cawˇ ve chaw teˇ hpaˍ lehˬ, G'uiˬ sha ve mvuhˇ miˬ awˬ hk'aw lo maˇ g'a lo‸-e ve nawˬ hui maˇ shiˍ laˇ. Nawˬ hui taˇ dawˇ ya‸. Guiˇ ya‸ ve chaw, shaˉ ho‸ hta‸ oˉ k'oˍ puiˬ ve chaw, haˉ chawˇ haˉ paˆ te ve chaw, hawˉ hk'aˆ chawˇ hawˉ hk'aˆ peh‸ ve tzuhˆ ve awˬ hk'aˇ suh te k'ai ve chaw, 10 shu mawˇ hta‸ hk'awˇ ve chaw, shu mawˇ shu jeˬ hta‸ sheˉ lai ve chaw, tzuhˬ dawˬ bvuhˆ ve chaw, hk'a mvuhˇ hk'a na k'oˆ ve chaw leh, shu mawˇ hta‸ hiˉ yuˬ lu yuˬ ve chaw teˇ hpaˍ lehˬ, G'uiˬ sha ve mvuhˇ miˬ awˬ hk'aw lo maˇ g'a lo‸-e. 11 Awˉ lawˉ htaˇ nawˬ hui teˇ hpaˍ hpaˍ chi hk'e ve chaw hpeh‸ jaw ve yoˬ. Ya‸ hk'aˇ, chi beu‸ nawˬ hui tsuhˇ hk'a peuˬ leh da‸ la kehˬ la peuˬ. Jawˇ mawˇ Yeˍsuˆ Hkri‸ ve awˬ meh leh ngaˬ hui ve G'uiˬ sha ve Awˬ ha hpu awˬ hk'aw lo nawˬ hui hteˇ ve cawˇ ve chaw hpeh‸ la peuˬ. 12 Ngaˬ hk'a peu-eˬ ve hta‸ te tuˬ a hkaw-anˬ cawˬ ve yoˬ. Ya‸ hk'aˇ, hk'a peu-eˬ ve hta‸ te tuˬ awˬ bon cawˬ ve maˇ heˆ. Ngaˬ hk'a peu-eˬ ve hta‸ te tuˬ a hkaw-anˬ cawˬ ve yoˬ. Ya‸ hk'aˇ, hk'aˬ ve teˇ ceuˬ awˬ hawˉ lo maˇ k'oˆ, ngaˬ lehˬ awˬ ceˬ te tuˬ ve maˇ heˆ. 13 Caˇ tuˬ lehˬ, g'oˇ peˬ awˬ pon yoˬ. G'oˇ peˬ lehˬ, caˇ tuˬ awˬ pon yoˬ. Ya‸ hk'aˇ G'uiˬ sha lehˬ, chi nyiˇ ceuˬ ceuˬ hta‸ te luˬ piˇ tuˬ yoˬ. Awˬ to lehˬ, haˉ chawˇ haˉ paˆ te tuˬ awˬ pon hpeh‸ ve maˇ heˆ. Jawˇ mawˇ Yeˍsuˆ awˬ pon hpeh‸ ve yoˬ. Jawˇ mawˇ Yeˍsuˆ htawˇ awˬ to awˬ pon hpeh‸ ve yoˬ. 14 G'uiˬ sha lehˬ, yawˇ ve kanˇ paˆ hta‸ yehˇ leh Jawˇ mawˇ Yeˍsuˆ hta‸ k'aw‸ te‸ tu la piˇ ve hk'e, ngaˬ hui hta‸ htawˇ yawˇ k'aw‸ te‸ tu la piˇ tuˬ yoˬ. 15 Nawˬ hui ve awˬ to lehˬ, Hkri‸ ve awˬ hk'eun teˇ hpaˍ hpeh‸ ve hta‸ nawˬ hui maˇ shiˍ laˇ. Hk'e te leh, Hkri‸ ve awˬ hk'eun teˇ hpaˍ hta‸ ngaˬ yuˬ leh meh maˬ lanˉ ve awˬ hk'eun hpeh‸ piˇ lawˬ tuˬ ve laˇ. Maˇ heˆ taˬ. 16 Meh maˬ lanˉ hta‸ caˉ da‸ ve chaw lehˬ, yawˇ geh awˬ to teˇ to tiˉ hpeh‸ la ve hta‸ nawˬ hui maˇ shiˍ laˇ. Awˬ lawn k'o, yawˇ huiˉ maˬ lehˬ, teˇ to tiˉ hpeh‸ la tuˬ yoˬ teh‸ Li‸ hpu hk'aw bvuh‸ taˍ ve yoˬ. 17 Ya‸ hk'aˇ, Jawˇ mawˇ Yeˍsuˆ hta‸ caˉ da‸ ve chaw lehˬ, yawˇ geh co ha teˇ maˬ tiˉ hpeh‸ ve yoˬ. 18 Haˉ chawˇ haˉ paˆ te ve hta‸ jaw k'ai loˬ. Chaw yaˇ te ve awˬ kaˍ awˬ nu venˇ baˆ hk'a peu-eˬ lehˬ, a shu yawˇ awˬ to awˬ baˬ hpawˇ lo hpeh‸ ve yoˬ. Ya‸ hk'aˇ, haˉ chawˇ haˉ paˆ te ve chaw lehˬ, a shu yawˇ ve awˬ to hta‸ te ya‸ ve yoˬ. 19 Nawˬ hui ve awˬ to lehˬ, da‸ ve kehˬ ve Awˬ ha hpu ve bon yehˬ hpeh‸ ve hta‸ nawˬ hui maˇ shiˍ laˇ. Yawˇ lehˬ, G'uiˬ sha lo laˬ leh nawˬ hui awˬ hk'aw lo chehˇ taˍ ve yoˬ. Nawˬ hui ve awˬ to lehˬ, nawˬ hui ve mawˇ hpeh‸ ve maˇ heˆ. 20 Awˬ lawn k'o, G'uiˬ sha awˬ hpfuhˇ piˇ leh nawˬ hui hta‸ vuiˬ hk'aw‸ taˍ peuˬ. Hk'e te leh, nawˬ hui ve awˬ to awˬ hk'aw lo G'uiˬ sha hta‸ awˬ me‸ awˬ hponˇ cawˬ piˇ-oˆ.

1 Kawˇrenˍhtuˆ 7

1 Nawˬ hui ngaˬ hta‸ li‸ bvuh‸ laˇ ve awˬ lawn teˇ hpaˍ ngaˬ nawˬ hui hta‸ k'aw‸ bvuh‸ laˇ shaˍ. Hawˉ hk'aˆ lehˬ, awˬ miˇ ma maˇ heuˆ k'o da‸ ve yoˬ. 2 Ya‸ hk'aˇ, haˉ chawˇ haˉ paˆ cawˬ maˇ ve pa taw, hawˉ hk'aˆ teˇ g'aˇ le le awˬ miˇ ma heuˆ cawˇ leh, yaˇ miˇ teˇ g'aˇ le le htawˇ awˬ hpawˇ heuˆ cawˇ ve yoˬ. 3 Awˬ hpawˇ lehˬ, awˬ liˇ awˬ hk'aˇ cawˬ ve hk'e, awˬ miˇ ma hta‸ hk'a deh‸ caˉ da‸ cawˇ ve yoˬ. Awˬ miˇ ma htawˇ, oˇ ve hk'a shuˍ shuˍ yawˇ ve awˬ hpawˇ hta‸ hk'a deh‸ caˉ da‸ cawˇ ve yoˬ. 4 Awˬ miˇ ma lehˬ, a shu yawˇ ve awˬ to hta‸ maˇ uˉ peunˍ. Ya‸ hk'aˇ, awˬ hpawˇ uˉ peunˍ ve yoˬ. Oˇ ve hk'a shuˍ shuˍ, awˬ hpawˇ htawˇ a shu yawˇ ve awˬ to hta‸ maˇ uˉ peunˍ. Ya‸ hk'aˇ, awˬ miˇ ma uˉ peunˍ ve yoˬ. 5 Awˬ hpawˇ awˬ miˇ teˇ geh zuh‸ tuˬ, teˇ g'aˇ leh teˇ g'aˇ taˇ tawˍ taˍ. Bon hk'a deh‸ lawˬ hpeh‸ tuˬ, nyiˇ g'aˇ g'aˇ nyi ma cawˇ leh teˇ tcuhˉ teˇ yanˇ teˇ geh maˇ zuh‸ ve teˇ ceuˬ maˇ heˆ k'o, teˇ g'aˇ leh teˇ g'aˇ taˇ tawˍ taˍ. Awˬ to hta‸ maˇ g'aˇ puiˉ ve pa taw, Saˍtanˍ nawˬ hui hta‸ maˇ g'a beˬ tuˬ, awˬ hk'aw‸ nawˉ teˇ geh k'aw‸ chehˇ-oˆ. 6 Ngaˬ chi hk'e k'oˆ ve lehˬ, tawˇ piˇ ve teˇ ceuˬ maˇ heˆ, a hkaw-anˬ piˇ ve teˇceuˬ yoˬ. 7 Chaw hk'a peu-eˬ hta‸ ngaˬ hk'a shuˍ shuˍ hpeh‸ piˇ gaˇ ve yoˬ. Ya‸ hk'aˇ, chaw teˇ g'aˇ peuˬ teˇ g'aˇ, G'uiˬ sha geh a shu yawˇ ve la‸ shawnˍ teˇ g'aˇ teˇ ceuˬ g'a taˍ ve yoˬ. 8 Awˬ hpawˇ awˬ miˇ maˇ heuˆ sheˍ ve chaw leh mehˇ chawˇ ma teˇ hpaˍ hta‸ ngaˬ chi hk'e k'oˆ ve yoˬ. Yawˇ hui ngaˬ hk'a shuˍ shuˍ te chehˇ ve k'o da‸ ve yoˬ. 9 Ya‸ hk'aˇ, a shu yawˇ awˬ to hta‸ maˇ g'aˇ ve k'o, heuˆ da‸ cawˇ ve yoˬ. Awˬ lawn k'o, awˬ hpawˇ awˬ miˇ heuˆ gaˇ leh nyi ma haw haw chiˆ chiˆ hpeh‸ ve a‸ kehˉ heuˆ da‸ ve lehˬ da‸ leuˉ ve yoˬ. 10 Awˬ miˇ ma teˇ g'aˇ lehˬ, a shu yawˇ ve awˬ hpawˇ hta‸ maˇ g'a hpaˆ da‸ teh‸, heuˆ da‸ peuˬ ve chaw hui hta‸ ngaˬ tawˇ piˇ ve yoˬ. Chi lehˬ ngaˬ ve tawˇ hkawˇ maˇ heˆ, Jawˇ mawˇ Yeˍsuˆ ve tawˇ hkawˇ hpeh‸ ve yoˬ. 11 Ya‸ hk'aˇ, hpaˆ da‸ peuˬ ve k'o, yawˇ awˬ hpawˇ maˇ k'aw‸ ca leh, yawˇ hk'aˇ yawˇ chehˇ cawˇ ve yoˬ. Maˇ heˆ k'o, yawˇ awˬ hpawˇ hta‸ k'aw‸ cawˇ da‸ tuˬ te cawˇ ve yoˬ. Awˬ hpawˇ htawˇ, awˬ miˇ ma hta‸ maˇ g'a baˬ. 12 Awˬ viˉ awˬ nyi teˇ g'aˇ g'aˇ, a shu yawˇ ve awˬ miˇ ma Hkri‸ yaˇ maˇ hpeh‸ ve ka‸, yawˇ ve awˬ hpawˇ geh chehˇ gaˇ ve nyi ma cawˬ ve k'o, yawˇ hta‸ maˇ baˬ cawˇ ve teh‸, awˬ kaˍ awˬ nu chaw teˇ hpaˍ hta‸ ngaˬ k'oˆ ve yoˬ. Tawˇ chi ve hta‸ Jawˇ mawˇ Yeˍsuˆ k'oˆ ve maˇ heˆ, ngaˬ k'oˆ ve yoˬ. 13 Awˬ miˇ ma htawˇ, a shu yawˇ ve awˬ hpawˇ Hkri‸ yaˇ maˇ hpeh‸ ve ka‸, yawˇ ve awˬ miˇ ma geh chehˇ gaˇ ve nyi ma cawˬ ve k'o, yawˇ hta‸ maˇ baˬ cawˇ ve yoˬ. 14 Awˬ lawn k'o, Hkri‸ yaˇ maˇ hpeh‸ ve awˬ hpawˇ lehˬ, awˬ miˇ ma hta‸ pa taw da‸ la kehˬ la ve yoˬ. Hkri‸ yaˇ maˇ hpeh‸ ve awˬ miˇ ma htawˇ, awˬ hpawˇ hta‸ pa taw da‸ la kehˬ la ve yoˬ. Chi hk'e maˇ heˆ k'o, nawˬ hui ve awˬ yaˇ awˬ duˬ lehˬ, maˇ da‸ maˇ kehˬ ve yoˬ. Ya‸ hk'aˇ, chi beu‸ lehˬ yawˇ hui da‸ kehˬ peuˬ. 15 Ya‸ hk'aˇ, Hkri‸ yaˇ maˇ hpeh‸ ve chaw teˇ g'aˇ lehˬ, awˬ hpawˇ awˬ miˇ hpaˆ da‸ gaˇ ve k'o, hpaˆ da‸ piˇ-oˆ. Chi hk'e te hpaˆ da‸ gaˇ ve k'o, awˬ viˉ awˬ nyi teˇ g'aˇ, hawˉ hk'aˆ maˇ k'oˆ, yaˇ miˇ maˇ k'oˆ, Hkri‸ yaˇ maˇ hpeh‸ ve teˇ g'aˇ hta‸ hpeh ka taˍ ve maˇ heˆ. Awˬ lawn k'o, G'uiˬ sha ngaˬ hui hta‸ kuˬ taˍ ve lehˬ, cawˇ da‸ hui da‸ tuˬ awˬ pon kuˬ taˍ ve yoˬ. 16 Awˬ miˇ ma teˇ hpaˍ-oˬ, a shu yawˇ ve awˬ hpawˇ hta‸ htaiˍ hk'aw‸ piˇ g'a tuˬ leh naˍ, maˇ g'a tuˬ leh naˍ, nawˬ hui hk'aˬ hk'e te shiˍ hpeh‸ le. Awˬ hpawˇ teˇ hpaˍ-oˬ, a shu yawˇ ve awˬ miˇ ma hta‸ htaiˍ hk'aw‸ piˇ g'a tuˬ leh naˍ, maˇ g'a tuˬ leh naˍ, nawˬ hui hk'aˬ hk'e te shiˍ hpeh‸ le. 17 Jawˇ mawˇ Yeˍsuˆ lehˬ teˇ g'aˇ peuˬ teˇ g'aˇ hta‸ hpeh‸ tcuh ve hk'e leh, G'uiˬ sha lehˬ teˇ g'aˇ peuˬ teˇ g'aˇ hta‸ kuˬ taˍ ve hk'e ceh, chaw teˇ g'aˇ le le te k'ai sheˍ. Hkri‸ yaˇ awˬ moˍ teˇ moˍ le le awˬ hk'aw lo ngaˬ awˬ hk'aˇ chi hk'e te teh taˍ ve yoˬ. 18 Chaw teˇ g'aˇ g'aˇ hta‸ G'uiˬ sha kuˬ yuˬ htaˇ, yawˇ awˬ guiˬ meuˇ shoˍ ve chaw hpeh‸ ve laˇ. Awˬ guiˬ meuˇ maˇ shoˍ ve hk'e taˇ k'aw‸ te. Chaw teˇ g'aˇ g'aˇ hta‸ kuˬ yuˬ htaˇ, awˬ guiˬ meuˇ maˇ shoˍ ve chaw hpeh‸ ve laˇ. Awˬ guiˬ meuˇ shoˍ ve taˇ te. 19 Awˬ lawn k'o, awˬ guiˬ meuˇ shoˍ ve maˇ k'oˆ, awˬ guiˬ meuˇ maˇ shoˍ ve maˇ k'oˆ, te‸ chiˉ awˬ bon maˇ cawˬ. G'uiˬ sha ve awˬ liˇ tawˇ hkawˇ hta‸ na yuˬ leh te ve teˇ ceuˬ ceh tiˉ awˬ bon cawˬ ve yoˬ. 20 Teˇ g'aˇ peuˬ teˇ g'aˇ kuˬ yuˬ htaˇ hpeh‸ chehˇ taˍ ve hk'e ceh, hpeh‸ chehˇ taˍ sheˍ. 21 Nawˬ hta‸ kuˬ yuˬ htaˇ, nawˬ awˬ ceˬ hpeh‸ chehˇ ve laˇ. Chi ve hta‸ nawˬ taˇ dawˇ haˍ. Ya‸ hk'aˇ, awˬ ceˬ te ve awˬ hk'aw lo nawˬ ponˬ hpeh‸ ve hk'e k'o, nawˬ tawˆ k'ai cawˇ ve yoˬ. 22 Awˬ lawn k'o, awˬ ceˬ hpeh‸ chehˇ htaˇ, Jawˇ mawˇ Yeˍsuˆ kuˬ yuˬ taˍ ve chaw teˇ g'aˇ lehˬ, Jawˇ mawˇ Yeˍsuˆ ve ponˬ ve chaw hpeh‸ la ve yoˬ. Chi hk'a shuˍ shuˍ, ponˬ ve chaw hpeh‸ chehˇ htaˇ, Jawˇ mawˇ Yeˍsuˆ kuˬ yuˬ taˍ ve chaw teˇ g'aˇ lehˬ, yawˇ ve awˬ ceˬ hpeh‸ la ve yoˬ. 23 G'uiˬ sha awˬ hpfuhˇ piˇ leh nawˬ hui hta‸ vuiˬ hk'aw‸ taˍ ve pa taw, chaw yaˇ ve awˬ ceˬ taˇ hpeh‸ la piˇ. 24 Awˬ viˉ awˬ nyi teˇ hpaˍ-oˬ, nawˬ hui hta‸ kuˬ yuˬ htaˇ teˇ g'aˇ peuˬ teˇ g'aˇ hpeh‸ chehˇ taˍ ve hk'e, G'uiˬ sha geh teˇ geh oˇ hk'e hpeh‸ chehˇ taˍ-o‸. 25 Yaˇ miˇ haˉ teˇ hpaˍ awˬ pon Jawˇ mawˇ Yeˍsuˆ geh ngaˬ g'a taˍ ve tawˇ maˇ cawˬ. Ya‸ hk'aˇ, Jawˇ mawˇ Yeˍsuˆ ha k'aˉ laˇ ve awˬ bon hta‸ pa taw ngaˬ ka ti‸ yeˬ ve chaw hpeh‸ ve hk'e, ngaˬ ve dawˇ hk'aˇ nawˬ hui hta‸ hto laˇ ve yoˬ. 26 Hk'e te leh, chi beu‸ tu‸ hkanˍ jaˇ ve awˬ yanˇ gaˬ la ve pa taw, chaw teˇ g'aˇ le le a shu yawˇ hpeh‸ chehˇ ve hk'e chehˇ taˍ ve k'o, da‸ jaˇ ve yoˬ. 27 Nawˬ awˬ miˇ ma cawˬ laˇ. Cawˬ k'o, yawˇ hta‸ taˇ baˬ. Nawˬ awˬ miˇ ma maˇ cawˬ laˇ. Maˇ cawˬ k'o awˬ miˇ ma taˇ heuˆ. 28 Ya‸ hk'aˇ, nawˬ awˬ miˇ ma heuˆ ve k'o, venˇ baˆ te ve maˇ heˆ. Yaˇ miˇ haˉ htawˇ, awˬ hpawˇ heuˆ ve k'o, venˇ baˆ te ve maˇ heˆ. Ya‸ hk'aˇ, chi hk'e te ve chaw lehˬ, awˬ suhˍ awˬ shaˍ hpawˇ g'a tu‸ g'a hkanˍ tuˬ yoˬ. Tu‸ ve hkanˍ ve chi ngaˬ nawˬ hui hta‸ ponˬ piˇ gaˇ ve yoˬ. 29 Awˬ viˉ awˬ nyi teˇ hpaˍ-oˬ, ngaˬ k'oˆ gaˇ ve lehˬ, awˬ yanˇ ngeh jaˇ peuˬ. Chi beu‸ hta‸ tanˬ leh, awˬ miˇ ma cawˬ ve chaw lehˬ, awˬ miˇ ma maˇ cawˬ ve chaw hk'e chehˇ-oˆ. 30 Paˆ hawˬ kehˇ hawˬ ve chaw lehˬ, maˇ hawˬ ve chaw hk'e chehˇ-oˆ. Ha lehˬ ve chaw lehˬ, maˇ ha lehˬ ve chaw hk'e chehˇ-oˆ. Mawˇ vuiˬ ve chaw lehˬ, mawˇ maˇ cawˬ ve chaw hk'e chehˇ-oˆ. 31 Miˬ guiˬ hta‸ caˉ da‸ ve teˇ hpaˍ hta‸ ca ve chaw lehˬ, maˇ ca ve chaw hk'e chehˇ-oˆ. Awˬ lawn k'o, miˬ guiˬ ve awˬ liˇ awˬ hk'aˇ lehˬ, pa k'ai mehˉ k'ai chehˇ ve yoˬ. 32 Nawˬ hui maˇ g'a dawˇ haˍ tuˬ ngaˬ heuˆ gaˇ ve yoˬ. Awˬ miˇ ma maˇ cawˬ ve chaw lehˬ, hk'aˬ hk'e te leh Jawˇ mawˇ Yeˍsuˆ nyi ma cawˇ tuˬ, Jawˇ mawˇ Yeˍsuˆ ve kanˉ hta‸ yawˇ dawˇ nyi leh shaˍ ti‸ taˍ puiˉ ve yoˬ. 33 Ya‸ hk'aˇ, awˬ miˇ ma cawˬ ve chaw teˇ g'aˇ lehˬ, hk'aˬ hk'e te leh awˬ miˇ ma nyi ma cawˇ tuˬ, miˬ guiˬ ve kanˉ hta‸ yawˇ dawˇ nyi leh dawˇ hkiˉ puiˉ ve yoˬ. Yawˇ lehˬ, nyi ma nyiˇ hk'aˇ dawˇ puiˉ ve yoˬ. 34 Awˬ hpawˇ maˇ cawˬ ve yaˇ miˇ leh yaˇ miˇ haˉ teˇ hpaˍ lehˬ, hk'aˬ hk'e te leh awˬ to hpawˇ leh co ha hpawˇ da‸ la kehˬ la tuˬ, Jawˇ mawˇ Yeˍsuˆ ve kanˉ hta‸ yawˇ hui dawˇ nyi leh shaˍ ti‸ taˍ puiˉ ve yoˬ. Ya‸ hk'aˇ, awˬ hpawˇ cawˬ ve yaˇ miˇ lehˬ, hk'aˬ hk'e te leh awˬ hpawˇ nyi ma cawˇ tuˬ miˬ guiˬ ve kanˉ hta‸ yawˇ dawˇ nyi leh dawˇ hkiˉ puiˉ ve yoˬ. 35 Ngaˬ chi hk'e k'oˆ ve lehˬ, nawˬ hui awˬ pon awˬ bon cawˬ tuˬ ngaˬ k'oˆ ve yoˬ. Ngaˬ nawˬ hui hta‸ va htaw ve maˇ heˆ. Ya‸ hk'aˇ, nawˬ hui lehˬ, keunˍ ve cawˇ ve hk'e te leh, nyi ma htawˇ hpfuhˆ nawˬ hpfuhˆ maˇ cawˬ ve awˬ hk'aw lo Jawˇ mawˇ Yeˍsuˆ awˬ pon kanˉ hk'a deh‸ te tuˬ, ngaˬ chi hk'e k'oˆ ve yoˬ. 36 Awˬ pa teˇ g'aˇ lehˬ, yawˇ ve awˬ yaˇ miˇ, yaˇ miˇ haˉ te ve awˬ yanˇ ponˬ leh, awˬ hpawˇ maˇ heuˆ ve teˇ ceuˬ maˇ da‸ teh‸ dawˇ ve k'o, awˬ yaˇ miˇ awˬ hpawˇ heuˆ gaˇ ve hk'e heuˆ piˇ lawˬ-o‸. Awˬ pa lehˬ, venˇ baˆ te ve maˇ heˆ. Yawˇ huiˉ maˬ hta‸ heuˆ da‸ tcuh-o. 37 Ya‸ hk'aˇ, a shu htawˇ maˇ k'oˆ, nyi ma yeˬ leh yawˇ ve yaˇ miˇ hta‸ awˬ hpawˇ maˇ heuˆ tcuh ka‸ hpeh‸ chehˇ ve awˬ hk'oˆ, yawˇ te gaˇ ve hk'e te hpeh‸ leh, yawˇ hta‸ awˬ hpawˇ maˇ heuˆ tcuh tuˬ nyi ma awˬ hk'aw lo dawˇ cheˆ taˍ ve k'o, yawˇ da‸ ve hta‸ te ve yoˬ. 38 Hk'e te leh, yawˇ ve yaˇ miˇ hta‸ awˬ hpawˇ heuˆ tcuh ve chaw lehˬ da‸ ve hta‸ te ve yoˬ. Maˇ heuˆ tcuh ve chaw htawˇ, leuˉ leh da‸ ve hta‸ te ve yoˬ. 39 Awˬ miˇ ma lehˬ, yawˇ ve awˬ hpawˇ maˇ suh ve ceh ceh, yawˇ ve awˬ hpawˇ geh hpeh ka taˍ ve yoˬ. Yawˇ ve awˬ hpawˇ suh peuˬ k'o, yawˇ heuˆ gaˇ ve chaw hta‸ k'aw‸ heuˆ hpeh‸ ve yoˬ. Ya‸ hk'aˇ, Jawˇ mawˇ Yeˍsuˆ hta‸ cuˇ ve awˬ hk'aw lo ceh tiˉ heuˆ hpeh‸ ve yoˬ. 40 Ngaˬ dawˇ ve lehˬ, maˇ k'aw‸ heuˆ leh chehˇ hpeh‸ ve k'o, leuˉ leh yawˇ pon ha lehˬ tuˬ cawˬ ve yoˬ. Ngaˬ chi hk'e k'oˆ ve lehˬ, G'uiˬ sha ve Awˬ ha hpu cawˬ leh k'oˆ ve teh‸ dawˇ ve yoˬ.

1 Kawˇrenˍhtuˆ 8

1 Shaˉ ho‸ hta‸ tanˇ peuˬ ve caˇ tuˬ awˬ lawn lehˬ chi hk'e yoˬ. Ngaˬ hui hk'a peu-eˬ shiˍ puiˉ ve cuˇ yiˍ cawˬ ve hta‸ ngaˬ hui shiˍ ve yoˬ. Shiˍ puiˉ ve cuˇ yiˍ lehˬ, nyi ma uiˍ tuˬ te puiˉ ve yoˬ. Ya‸ hk'aˇ, ha‸ pehnˇ ve lehˬ uiˍ la yeˬ la piˇ puiˉ ve yoˬ. 2 Chaw teˇ g'aˇ g'aˇ lehˬ, teˇ ceuˬ ceuˬ hta‸ shiˍ ve teh‸ dawˇ ve k'o, shiˍ keunˍ shiˍ cawˇ ve hk'e yawˇ maˇ shiˍ sheˍ. 3 Ya‸ hk'aˇ, chaw teˇ g'aˇ g'aˇ G'uiˬ sha hta‸ ha‸ ve k'o, G'uiˬ sha yawˇ hta‸ shiˍ ve yoˬ. 4 Hk'e te leh, shaˉ ho‸ hta‸ tanˇ peuˬ ve caˇ tuˬ hta‸ caˇ ve awˬ lawn lehˬ chi hk'e yoˬ. Shaˉ ho‸ lehˬ, chi miˬ guiˬ hk'oˆ lo hk'e leˇ hpeh‸ ve hta‸ ngaˬ hui shiˍ leh, G'uiˬ sha teˇ g'aˇ tiˉ maˇ heˆ k'o, awˬ kaˍ awˬ nu G'uiˬ sha maˇ cawˬ ve hta‸ ka‸ ngaˬ hui shiˍ ve yoˬ. 5 Awˬ lawn k'o, g'uiˬ sha teˇ hpaˍ leh jawˇ mawˇ teˇ hpaˍ cawˬ maˇ jaˇ leh, mvuhˇ naw ma hk'oˆ lo maˇ k'oˆ, miˬ guiˬ hk'oˆ lo maˇ k'oˆ, g'uiˬ sha teh‸ shu meh piˇ taˍ ve g'uiˬ sha teˇ hpaˍ cawˬ htawˇ, 6 ngaˬ hui awˬ pon G'uiˬ sha teˇ g'aˇ tiˉ cawˬ ve yoˬ. Yawˇ lehˬ ngaˬ hui ve Awˬ pa hpeh‸ ve yoˬ. Yawˇ awˬ hk'aw lo awˬ ceuˬ hk'a peu-eˬ hpeh‸ la leh, ngaˬ hui htawˇ yawˇ awˬ pon hpeh‸ chehˇ ve yoˬ. Ngaˬ hui awˬ pon Jawˇ mawˇ teˇ g'aˇ tiˉ cawˬ ve yoˬ. Yawˇ lehˬ Yeˍsuˆ Hkri‸ yoˬ. Yawˇ awˬ hk'aw lo awˬ ceuˬ hk'a peu-eˬ hpeh‸ la leh, yawˇ hta‸ pa taw ngaˬ hui htawˇ hpeh‸ chehˇ ve yoˬ. 7 Ya‸ hk'aˇ, shiˍ puiˉ ve cuˇ yiˍ chi teˇ ceuˬ hta‸ chaw hk'a peu-eˬ maˇ cawˬ. Chaw teˇ hpaˍ hpaˍ lehˬ, ya‸ nyi hk'a gaˬ shaˉ ho‸ hta‸ taˍ uiˍ chehˇ sheˍ ve pa taw, caˇ tuˬ oˇ ve shaˉ ho‸ hta‸ tanˇ peuˬ ve teh‸ shawˍ leh caˇ ve yoˬ. Yawˇ hui ve shiˍ puiˉ ve nyi ma awˬ g'aˇ nuˇ ve pa taw, cha‸ chiˆ k'ai ve yoˬ. 8 Caˇ tuˬ dawˬ tuˬ hta‸ pa taw, ngaˬ hui G'uiˬ sha geh awˬ me‸ awˬ hponˇ g'a tuˬ ve maˇ heˆ. Ngaˬ hui maˇ caˇ ve k'o, awˬ bon yawnˇ k'ai tuˬ ve maˇ heˆ. Ngaˬ hui caˇ ve k'o, awˬ bon leuˉ leh g'a tuˬ ve ka‸ maˇ heˆ. 9 Ya‸ hk'aˇ, nawˬ hui te hpeh‸ ve awˬ ceuˬ lehˬ, awˬ g'aˇ nuˇ ve chaw teˇ hpaˍ awˬ pon hkui htiˇ poˬ paiˍ kuiˬ maˇ g'a cawˬ tuˬ, shaˍ ti‸ te-o. 10 Awˬ lawn k'o, nawˬ lehˬ shiˍ puiˉ ve cuˇ yiˍ cawˬ ve chaw hpeh‸ leh, shaˉ ho‸ yehˬ awˬ hk'aw lo mui caˇ chehˇ ve hta‸ chaw teˇ g'aˇ g'aˇ mawˬ leh, yawˇ shiˍ puiˉ ve nyi ma awˬ g'aˇ nuˇ ve k'o, shaˉ ho‸ hta‸ tanˇ peuˬ ve caˇ tuˬ hta‸ yawˇ caˇ tuˬ, nyi ma ha‸ hanˉ la tuˬ ve maˇ heˆ laˇ. 11 Hk'e te leh, nawˬ ve shiˍ puiˉ ve cuˇ yiˍ hta‸ pa taw awˬ g'aˇ nuˇ ve chaw teˇ g'aˇ luˬ k'ai peuˬ. Awˬ viˉ awˬ nyi chi teˇ g'aˇ awˬ pon htawˇ, Hkri‸ hkanˍ suh peuˬ ve yoˬ. 12 Chi hk'e te ve lehˬ, awˬ viˉ awˬ nyi hui hta‸ te ya‸ piˇ leh, yawˇ hui ve awˬ g'aˇ nuˇ ve shiˍ puiˉ ve nyi ma hta‸ naˬ tuˬ te piˇ ve pa taw, Hkri‸ hta‸ htawˇ nawˬ hui te ya‸ ve yoˬ. 13 Hk'e te leh, caˇ tuˬ hta‸ pa taw ngaˬ ve awˬ viˉ awˬ nyi hta‸ ngaˬ te ya‸ piˇ lawˬ ve k'o, ngaˬ awˬ viˉ awˬ nyi maˇ g'a te ya‸ tuˬ, ngaˬ hk'aˬ htaˆ ka‸ shaˍ maˇ k'aw‸ caˇ ve yoˬ.

1 Kawˇrenˍhtuˆ 9

1 Ngaˬ lehˬ ponˬ peuˬ ve chaw hpeh‸ ve maˇ heˆ laˇ. Tcuh yaˇ ka‸ ngaˬ hpeh‸ ve maˇ heˆ laˇ. Ngaˬ hui ve Jawˇ mawˇ Yeˍsuˆ hta‸ ngaˬ g'a mawˬ peuˬ ve maˇ heˆ laˇ. Nawˬ hui lehˬ, Jawˇ mawˇ Yeˍsuˆ awˬ hk'aw lo ngaˬ te taˍ ve kanˉ hpeh‸ ve maˇ heˆ laˇ. 2 Shu awˬ pon ngaˬ tcuh yaˇ maˇ hpeh‸ htawˇ, nawˬ hui awˬ pon ngaˬ tcuh yaˇ hpeh‸ tehˬ ve yoˬ. Awˬ lawn k'o, ngaˬ lehˬ Jawˇ mawˇ Yeˍsuˆ ve tcuh yaˇ hpeh‸ ve yoˬ teh‸, nawˬ hui lehˬ ngaˬ ve shaˉ hkiˆ hpeh‸ ve yoˬ. 3 Ngaˬ hta‸ lawˇ nyi ve chaw teˇ hpaˍ hta‸ ngaˬ chi hk'e k'aw‸ yaw hk'aw‸ piˇ tuˬ yoˬ. 4 Ngaˬ hui g'a caˇ g'a dawˬ tuˬ a hkaw-anˬ maˇ cawˬ laˇ. 5 Awˬ kaˍ awˬ nu tcuh yaˇ teˇ hpaˍ, Jawˇ mawˇ Yeˍsuˆ ve awˬ nyi paˍ teˇ hpaˍ leh, Keˍhpaˆ hui hk'a shuˍ shuˍ, awˬ miˇ ma hta‸ shiˍ toˇ tuˬ ngaˬ hui a hkaw-anˬ maˇ cawˬ laˇ. 6 Ngaˬ leh Baˍnaˍbaˆ ceh tiˉ la‸ sheh kanˉ maˇ g'a te tuˬ a hkaw-anˬ maˇ cawˬ laˇ. 7 A shu yawˇ ve caˇ tuˬ hta‸ caˇ leh ma‸ yaˇ te ve chaw, a shu teˇ g'aˇ cawˬ le. Hko te leh iˉ shiˍ maˇ shaˉ caˇ ve, a shu teˇ g'aˇ cawˬ le. Ceˇ caˬ awˬ moˍ hta‸ hawˉ leh cuˉ g'uiˬ maˇ dawˬ ve, a shu teˇ g'aˇ cawˬ le. 8 Chaw yaˇ ve tawˇ hkawˇ hta‸ cuˇ leh ngaˬ k'oˆ ve laˇ. Awˬ liˇ tawˇ hkawˇ htawˇ chi hk'e k'oˆ taˍ ve maˇ heˆ laˇ. 9 Awˬ lawn k'o, Moˉseˍ ve awˬ liˇ tawˇ hkawˇ li‸ awˬ hk'aw lo bvuh‸ taˍ ve hk'e, Caˬ naˆ chehˇ ve nuˇ hta‸ maw‸ k'aw maˇ g'a hoˆ taˍ teh‸ bvuh‸ taˍ ve yoˬ. G'uiˬ sha lehˬ nuˇ awˬ pon dawˇ nyi ve laˇ. Ngaˬ hui awˬ pon yawˇ dawˇ nyi leh k'oˆ ve maˇ heˆ laˇ. 10 Yoˬ, ngaˬ hui awˬ pon bvuh‸ taˍ ve yoˬ. Awˬ lawn k'o, ti mi mehˇ ve chaw lehˬ, dawˇ law ve awˬ hk'aw lo mehˇ cawˇ ve yoˬ. Caˬ jaw‸ ve chaw htawˇ, caˬ shiˍ g'a tuˬ dawˇ law leh jaw‸ cawˇ ve yoˬ. 11 Ngaˬ hui lehˬ, nawˬ hui awˬ hk'aw lo co ha hpawˇ ve awˬ yawˇ sheˍ peuˬ leh, awˬ suhˍ awˬ shaˍ hpawˇ ve awˬ shiˍ teˇ hpaˍ hta‸ g'a g'eu‸ ve k'o, ngaˬ hui te ya‸ ve teh‸ nawˬ hui dawˇ ve laˇ. 12 Awˬ kaˍ awˬ nu chaw nawˬ hui geh awˬ suhˍ awˬ shaˍ hpawˇ ve awˬ shiˍ hta‸ g'eu‸ tuˬ a hkaw-anˬ cawˬ ve k'o, ngaˬ hui leuˉ leh a hkaw-anˬ cawˬ ve maˇ heˆ laˇ. Ya‸ hk'aˇ, ngaˬ hui a hkaw-anˬ cawˬ htawˇ maˇ te. Awˬ lawn k'o, Hkri‸ ve ha lehˬ ve bon hkawˇ hta‸ maˇ g'a tawˍ taˍ tuˬ, hk'a peu-eˬ hta‸ ngaˬ hui yeunˇ hkanˍ ve yoˬ. 13 Bon yehˬ lonˉ awˬ hk'aw lo kanˉ te ve chaw hui lehˬ, bon yehˬ lonˉ hta‸ caˉ da‸ ve caˇ tuˬ hta‸ g'a caˇ leh, tanˇ kuiˬ lo kanˉ te ve chaw hui lehˬ, tanˇ taˍ ve teˇ hpaˍ hpaˍ hta‸ g'a pehˬ caˇ ve hta‸ nawˬ hui maˇ shiˍ laˇ. 14 Oˇ ve hk'a shuˍ shuˍ, ha lehˬ ve bon hkawˇ maˍ piˇ ve chaw hui lehˬ, ha lehˬ ve bon hkawˇ maˍ piˇ ve hta‸ pa taw g'a caˇ g'a dawˬ tuˬ yoˬ teh‸, Jawˇ mawˇ Yeˍsuˆ tawˇ piˇ taˍ ve yoˬ. 15 Ya‸ hk'aˇ ngaˬ lehˬ, chi teˇ hpaˍ hta‸ te tuˬ a hkaw-anˬ cawˬ ve ka‸ ngaˬ maˇ te. Nawˬ hui ngaˬ hta‸ chi hk'e te laˇ tuˬ awˬ pon ngaˬ li‸ chi bvuh‸ laˇ ve maˇ heˆ. Awˬ lawn k'o, chaw teˇ g'aˇ g'aˇ ngaˬ nyi ma uiˍ kuiˬ chi hta‸ te luˬ te mehˉ laˇ ve a‸ kehˉ, ngaˬ suh k'o da‸ ve yoˬ. 16 Ngaˬ ha lehˬ ve bon hkawˇ maˍ piˇ ve lehˬ, ngaˬ awˬ pon nyi ma uiˍ kuiˬ maˇ cawˬ. Awˬ lawn k'o, ngaˬ ha lehˬ ve bon hkawˇ maˇ maˍ k'o, chehˇ maˇ hpeh‸ leh, ngaˬ awˬ pon dawˇ haˍ jaˇ ve teˇ ceuˬ hpeh‸ ve yoˬ. 17 Hpu maˇ caˇ leh ha lehˬ ve bon hkawˇ maˍ piˇ ve hta‸ ngaˬ te gaˇ leh te ve k'o, awˬ bon g'a ve yoˬ. Ya‸ hk'aˇ, ngaˬ maˇ te gaˇ ve ka‸ ngaˬ hta‸ chiˇ a‸ taˍ laˇ ve kanˉ cawˬ leh g'a te ve yoˬ. 18 Hk'e te leh, ngaˬ awˬ bon g'a ve lehˬ hk'aˬ hk'e ve le. Ha lehˬ ve bon hkawˇ maˍ piˇ ve teˇ yanˇ, hpu caˇ tuˬ a hkawn-anˬ cawˬ ve ka‸ ngaˬ maˇ caˇ leh, na shehˍ hpaˇ hui te‸ chiˉ awˬ hpfuhˇ maˇ peuˬ ve pa taw, ngaˬ awˬ bon g'a ve yoˬ. 19 Ngaˬ lehˬ, chaw teˇ g'aˇ ve awˬ ceˬ ka‸ maˇ hpeh‸ htawˇ, chaw maˇ maˇ hta‸ maˍ g'a hpeh‸ tuˬ, chaw hk'a peu-eˬ ve awˬ ceˬ ngaˬ hpeh‸ la peuˬ. 20 Yuˇda‸ chaw hui hta‸ maˍ g'a hpeh‸ tuˬ, Yuˇda‸ chaw hui awˬ pon Yuˇda‸ chaw hk'e ngaˬ hpeh‸ la peuˬ. Ngaˬ awˬ to awˬ liˇ tawˇ hkawˇ awˬ hawˉ lo maˇ chehˇ htawˇ, awˬ liˇ tawˇ hkawˇ awˬ hawˉ lo chehˇ ve chaw hui hta‸ maˍ g'a hpeh‸ tuˬ, yawˇ hui awˬ pon awˬ liˇ tawˇ hkawˇ awˬ hawˉ lo chehˇ ve chaw hk'e ngaˬ hpeh‸ la peuˬ. 21 Awˬ liˇ tawˇ hkawˇ maˇ cawˬ ve chaw hui hta‸ maˍ g'a hpeh‸ tuˬ, yawˇ hui awˬ pon awˬ liˇ tawˇ hkawˇ maˇ cawˬ ve chaw hk'e ngaˬ hpeh‸ la peuˬ. G'uiˬ sha mehˆ g'uˇ suhˍ lo ngaˬ awˬ pon awˬ liˇ tawˇ hkawˇ maˇ cawˬ ve maˇ heˆ. Hkri‸ ve awˬ liˇ tawˇ hkawˇ awˬ hawˉ lo ngaˬ chehˇ ve yoˬ. 22 Awˬ g'aˇ nuˇ ve chaw hui hta‸ maˍ g'a hpeh‸ tuˬ, yawˇ hui awˬ pon ngaˬ awˬ g'aˇ nuˇ ve chaw hk'e hpeh‸ la peuˬ. Hk'aˬ hk'e te leh chaw teˇ hpaˍ hpaˍ htaiˍ hk'aw‸ ve hta‸ g'a tuˬ, chaw hk'a peu-eˬ awˬ pon ngaˬ teˇ ceuˬ le le hpeh‸ la peuˬ. 23 Ha lehˬ ve bon hkawˇ ve awˬ bon hta‸ ngaˬ htawˇ shu geh teˇ geh g'a tuˬ, ha lehˬ ve bon hkawˇ awˬ pon chi hk'a peu-eˬ hta‸ ngaˬ te ve yoˬ. 24 G'uiˇ da‸ ve awˬ hk'aw lo, g'uiˇ da‸ shehˍ hpaˇ hk'a peu-eˬ g'uiˇ ve htawˇ, teˇ g'aˇ tiˉ la‸ shawnˍ g'a ve hta‸ nawˬ hui maˇ shiˍ laˇ. Hk'e te leh, nawˬ hui la‸ shawnˍ hta‸ g'a tuˬ g'uiˇ-oˆ. 25 G'uiˇ da‸ ve pawehˇ awˬ hk'aw lo g'uiˇ da‸ ve chaw teˇ g'aˇ le le lehˬ, teˇ ceuˬ le le awˬ hk'aw lo a shu yawˇ awˬ to hta‸ o‸ yuˬ puiˉ ve yoˬ. Yawˇ hui lehˬ, luˬ puiˉ sheˆ puiˉ ve uˉ tcuhˍ hta‸ g'a tuˬ te ve yoˬ. Ya‸ hk'aˇ, ngaˬ hui lehˬ maˇ luˬ maˇ sheˆ puiˉ ve uˉ tcuhˍ hta‸ g'a tuˬ te ve yoˬ. 26 Hk'e te leh, htawˇ dawˇ nawˬ dawˇ te leh ngaˬ g'uiˇ ve maˇ heˆ. Chu-iˬ da‸ ve teˇ yanˇ, hk'e leˇ mvuhˇ haw hta‸ ceh ngaˬ chu-iˬ ve maˇ heˆ. 27 Ya‸ hk'aˇ, ngaˬ shu hta‸ bon maˍ piˇ peuˬ hk'aw‸ nawˉ, ngaˬ awˬ to shawˍ baˬ taˍ ve chaw maˇ g'a hpeh‸ tuˬ, ngaˬ ve awˬ to hta‸ chu-iˬ leh, ngaˬ ve awˬ to hta‸ uˉ peunˍ tuˬ te ve yoˬ.

1 Kawˇrenˍhtuˆ 10

1 Awˬ viˉ awˬ nyi teˇ hpaˍ-oˬ, ngaˬ nawˬ hui hta‸ chi hk'e shiˍ piˇ gaˇ ve yoˬ. Ngaˬ hui ve awˬ puˍ awˬ pi hk'a peu-eˬ lehˬ, moˬ awˬ hawˉ lo chehˇ leh, laˇ tsuhˇ g'uiˬ hta‸ hpanˍ k'ai ve yoˬ. 2 Yawˇ hui hk'a peu-eˬ lehˬ, moˬ leh laˇ tsuhˇ g'uiˬ awˬ hk'aw lo Moˉseˍ geh baˆtiˆsaˬ hkanˍ taˍ peuˬ. 3 Yawˇ hui hk'a peu-eˬ co ha ve caˇ tuˬ teˇ ceuˬ tiˉ caˇ leh, 4 yawˇ hui hk'a peu-eˬ co ha ve dawˬ tuˬ teˇ ceuˬ tiˉ dawˬ ve yoˬ. Awˬ lawn k'o, co ha ve haˉ hpawˇ yawˇ hui awˬ hk'aˇ suh k'ai leh, haˉ hpawˇ oˇ ve awˬ hk'aw lo tawˆ la ve iˉ kaˆ hta‸ yawˇ hui g'a dawˬ ve yoˬ. 5 Haˉ hpawˇ oˇ ve lehˬ, Hkri‸ hpeh‸ ve yoˬ. Ya‸ hk'aˇ, yawˇ hui maˇ-awˍ ve hta‸ G'uiˬ sha nyi hk'aˇ maˇ suh. Yawˇ hui heh puiˉ hk'aw lo g'a luˬ g'a sheˆ ve yoˬ. 6 Yawˇ hui haiˬ ve awˬ ceuˬ teˇ hpaˍ hta‸ sheˉ lai ve hk'e ngaˬ hui maˇ g'a sheˉ lai tuˬ, chi teˇ hpaˍ lehˬ, ngaˬ hui awˬ pon shaˍ ti‸ g'a tuˬ ve awˬ ceuˬ hpeh‸ ve yoˬ. 7 Yawˇ hui teˇ hpaˍ hpaˍ shaˉ ho‸ hta‸ oˉ k'oˍ pui ve chaw hpeh‸ ve hk'e, nawˬ hui taˇ hpeh‸ piˇ. Li‸ hpu hk'aw bvuh‸ taˍ ve hk'e, Chaw teˇ hpaˍ lehˬ, caˇ ve dawˬ ve awˬ pon mui leh, leˍ guiˇ tuˬ awˬ pon tu la ve yoˬ teh‸ bvuh‸ taˍ ve yoˬ. 8 Yawˇ hui teˇ hpaˍ hpaˍ haˉ chawˇ haˉ paˆ te ve yoˬ. Ngaˬ hui oˇ hk'e maˇ g'a te. Yawˇ hui oˇ hk'e te ve pa taw, teˇ nyi tiˉ awˬ hk'aw lo chaw nyiˇ meunˍ shehˆ hinˉ g'aˇ paˍ suh-e ve yoˬ. 9 Yawˇ hui teˇ hpaˍ hpaˍ Jawˇ mawˇ G'uiˬ sha hta‸ lawˇ nyi ve yoˬ. Ngaˬ hui oˇ hk'e maˇ g'a te. Yawˇ hui oˇ hk'e te ve pa taw, vuiˬ yawˇ hui hta‸ te luˬ te sheˆ ve yoˬ. 10 Yawˇ hui teˇ hpaˍ hpaˍ hk'anˇ ve awˬ hk'aw lo beu ve deˇ ve yoˬ. Ngaˬ hui oˇ hk'e maˇ g'a te. Yawˇ hui oˇ hk'e te ve pa taw, te luˬ shehˍ hpaˇ ve la‸ sheh awˬ hk'aw lo g'a luˬ g'a sheˆ ve yoˬ. 11 Awˬ ceuˬ oˇ ve teˇ hpaˍ lehˬ, shu shaˍ ti‸ g'a tuˬ awˬ pon yawˇ hui awˬ hk'aw hpeh‸ la leh, awˬ leh meuˇ ve awˬ yanˇ awˬ hk'aw lo chehˇ ve ngaˬ hui hta‸ maˍ laˇ tuˬ awˬ pon Li‸ hpu hk'aw lo bvuh‸ taˍ ve yoˬ. 12 Hk'e te leh, chaw teˇ g'aˇ g'aˇ, Ngaˬ yeˬ lehˍ huˉ chehˇ ve teh‸ dawˇ ve k'o, yawˇ maˇ g'a paiˍ tuˬ shaˍ ti‸ te cawˇ ve yoˬ. 13 Chaw yaˇ hui g'a hpuˇ jaw ve beˬ ve lawˇ ve hta‸ ceh tiˉ nawˬ hui g'a hpuˇ ve yoˬ. G'uiˬ sha htawˇ, ka ti‸ yeˬ leh, nawˬ hui hkanˍ maˇ g'a ve beˬ ve lawˇ ve hta‸ g'a hpuˇ tuˬ, yawˇ a hkaw-anˬ maˇ piˇ. Ya‸ hk'aˇ, beˬ ve lawˇ ve hta‸ hpuˇ htaˇ, nawˬ hui hkanˍ hpeh‸ tuˬ, ponˬ ve ya‸ k'aw hta‸ yawˇ gu taˍ tuˬ yoˬ. 14 Hk'e te leh, ngaˬ ha‸ ve chaw teˇ hpaˍ-oˬ, shaˉ ho‸ hta‸ oˉ k'oˍ pui ve teˇ ceuˬ hta‸ jaw k'ai loˬ. 15 Dawˇ nyi puiˉ ve chaw teˇ hpaˍ hta‸ ngaˬ k'oˆ piˇ ve yoˬ. Ngaˬ k'oˆ ve cawˇ maˇ cawˇ ve hta‸ nawˬ hui dawˇ nyi-o. 16 Ngaˬ hui chiˇ mvuh ve awˬ bon uiˍ ve kawˆ lehˬ, Hkri‸ ve awˬ suhˍ awˬ hk'aw lo ngaˬ hui teˇ geh caˉ da‸ ve teˇ ceuˬ hpeh‸ ve maˇ heˆ laˇ. Ngaˬ hui hk'eh‸ ve hkaoˍ monˇ lehˬ, Hkri‸ ve awˬ to awˬ hk'aw lo ngaˬ hui teˇ geh caˉ da‸ ve teˇ ceuˬ hpeh‸ ve maˇ heˆ laˇ. 17 Hkaoˍ monˇ teˇ diˬ tiˉ cawˬ ve pa taw, ngaˬ hui maˇ ve htawˇ, teˇ to tiˉ hpeh‸ ve yoˬ. Awˬ lawn k'o, ngaˬ hui hk'a peu-eˬ hkaoˍ monˇ teˇ diˬ hta‸ tiˉ hpawnˬ caˇ ve yoˬ. 18 Iˉsaˍreˍlaˆ chaw hui te ve awˬ liˇ hta‸ dawˇ nyi sheˍ. Tanˇ peuˬ ve hta‸ caˇ ve chaw hui lehˬ, tanˇ kuiˬ hta‸ caˉ da‸ ve chaw hpeh‸ ve maˇ heˆ laˇ. 19 Hk'e te leh, ngaˬ hk'aˬ hk'e k'oˆ gaˇ ve le. Shaˉ ho‸ hta‸ tanˇ peuˬ ve teˇ ceuˬ lehˬ, aˬ hto‸ ma k'oˆ tuˬ cawˬ le. Shaˉ ho‸ ka‸, aˬ hto‸ ma k'oˆ tuˬ cawˬ le. 20 K'oˆ tuˬ te‸ chiˉ maˇ cawˬ. Lawˇ kiˍ yaˇ hui lehˬ, yawˇ hui ve tanˇ tuˬ G'uiˬ sha hta‸ tanˇ ve maˇ heˆ, neˇ teˇ hpaˍ hta‸ tanˇ ve yoˬ. Nawˬ hui lehˬ, neˇ teˇ hpaˍ hta‸ caˉ da‸ tuˬ ngaˬ maˇ heuˆ gaˇ. 21 Jawˇ mawˇ Yeˍsuˆ ve kawˆ leh neˇ teˇ hpaˍ ve kawˆ, teˇ maˬ hta‸ dawˬ ve k'o, teˇ maˬ hta‸ nawˬ hui dawˬ maˇ hpeh‸. Jawˇ mawˇ Yeˍsuˆ ve hpui lawˇ leh neˇ teˇ hpaˍ ve hpui lawˇ, teˇ maˬ lo mui caˇ ve k'o teˇ maˬ lo nawˬ hui mui caˇ maˇ hpeh‸. 22 Jawˇ mawˇ Yeˍsuˆ nyi ma zuhˆ tuˬ ngaˬ hui te tuˬ laˇ. Ngaˬ hui yawˇ a‸ kehˉ awˬ g'aˇ uiˍ ve laˇ. 23 Ngaˬ hk'a peu-eˬ ve hta‸ te tuˬ a hkaw-anˬ cawˬ ve yoˬ. Ya‸ hk'aˇ, hk'a peu-eˬ ve hta‸ te tuˬ awˬ bon cawˬ ve maˇ heˆ. Ngaˬ hk'a peu-eˬ ve hta‸ te tuˬ a hkaw-anˬ cawˬ ve yoˬ. Ya‸ hk'aˇ, hk'a peu-eˬ ve uiˍ la yeˬ la piˇ puiˉ ve maˇ heˆ, 24 Hk'aˬ ve teˇ g'aˇ maˇ k'oˆ, a shu yawˇ awˬ to awˬ pon awˬ bon g'a tuˬ taˇ ca. Ya‸ hk'aˇ, shu awˬ pon awˬ bon g'a tuˬ ca-o. 25 Tcuh hk'aw hk'a hawˇ ve teˇ hpaˍ hta‸ caˇ-oˆ. Shiˍ puiˉ ve nyi ma hta‸ pa taw, te‸ chiˉ taˇ na nyi. 26 Awˬ lawn k'o, miˬ guiˬ leh miˬ guiˬ hk'oˆ hk'a cawˬ ve hk'a peu-eˬ lehˬ, Jawˇ mawˇ G'uiˬ sha ve mawˇ hpeh‸ ve yoˬ. 27 Maˇ yonˍ ve chaw teˇ g'aˇ g'aˇ nawˬ hui hta‸ kuˬ leh nawˬ hui k'ai gaˇ ve k'o, nawˬ hui mehˆ g'uˇ suhˍ hk'a teh laˇ ve caˇ tuˬ hta‸ caˇ-oˆ. Shiˍ puiˉ ve nyi ma hta‸ pa taw, te‸ chiˉ taˇ na nyi. 28 Ya‸ hk'aˇ chaw teˇ g'aˇ g'aˇ, Chi lehˬ shaˉ ho‸ hta‸ tanˇ peuˬ ve caˇ tuˬ yoˬ teh‸ nawˬ hta‸ k'oˆ laˇ ve k'o, nawˬ hta‸ hto laˇ ve chaw teˇ g'aˇ hta‸ pa taw maˇ k'oˆ, shiˍ puiˉ ve nyi ma hta‸ pa taw maˇ k'oˆ, taˇ caˇ loˬ. 29 Shiˍ puiˉ ve nyi ma teh‸ k'oˆ ve lehˬ nawˬ ve shiˍ puiˉ ve nyi ma hta‸ k'oˆ gaˇ ve maˇ heˆ. Shu ve shiˍ puiˉ ve nyi ma hta‸ k'oˆ gaˇ ve yoˬ. Awˬ lawn k'o, ngaˬ te hpeh‸ ve teˇ hpaˍ hta‸ aˬ hto‸ ma pa taw shu ve shiˍ puiˉ ve nyi ma tawˍ taˍ laˇ ve le. 30 Awˬ bon hta‸ dawˇ nawˇ leh ngaˬ caˇ ve k'o, bon hta‸ chiˇ mvuh leh caˇ ve awˬ hk'aw lo, aˬ hto‸ ma pa taw shu ngaˬ hta‸ maˇ shawˍ maˇ caˆ k'oˆ laˇ ve le. 31 Hk'e te leh, nawˬ hui caˇ ve maˇ k'oˆ, dawˬ ve maˇ k'oˆ, aˬ hto‸ ma teˇ ceuˬ te ve maˇ k'oˆ, hk'a peu-eˬ awˬ hk'aw lo G'uiˬ sha ve awˬ me‸ awˬ hponˇ tawˆ la tuˬ te-o. 32 Chaw maˇ maˇ htaiˍ hk'aw‸ ve hta‸ g'a tuˬ, ngaˬ awˬ to awˬ pon awˬ bon hta‸ ngaˬ maˇ ca leh, teˇ ceuˬ le le awˬ hk'aw lo chaw hk'a peu-eˬ nyi hk'aˇ suh tuˬ ngaˬ ca ve yoˬ. 33 Chi hk'a shuˍ shuˍ, nawˬ hui htawˇ, Yuˇda‸ chaw hui hta‸ maˇ k'oˆ, Heˍlaˍsaˆ chaw hui hta‸ maˇ k'oˆ, G'uiˬ sha ve Hkri‸ yaˇ awˬ moˍ hta‸ maˇ k'oˆ, hkui htiˇ poˬ paiˍ tuˬ taˇ te.

1 Kawˇrenˍhtuˆ 11

1 Hkri‸ te ve hk'a shuˍ shuˍ ngaˬ te ve hk'e, nawˬ hui htawˇ ngaˬ te ve hk'a shuˍ shuˍ te-o. 2 Nawˬ hui lehˬ, teˇ ceuˬ le le awˬ hk'aw lo ngaˬ hta‸ dawˇ nawˇ leh, ngaˬ nawˬ hui hta‸ awˬ liˇ awˬ hk'aˇ maˍ laˇ ve hk'e nawˬ hui na yuˬ leh te k'ai ve pa taw, ngaˬ nawˬ hui hta‸ chiˇ mvuh ve yoˬ. 3 Ya‸ hk'aˇ, ngaˬ nawˬ hui hta‸ chi hk'e shiˍ tcuh gaˇ ve yoˬ. Hawˉ hk'aˆ teˇ g'aˇ le le ve oˉ k'oˍ lehˬ Hkri‸ yoˬ. Yaˇ miˇ ve oˉ k'oˍ lehˬ hawˉ hk'aˆ yoˬ. Hkri‸ ve oˉ k'oˍ lehˬ G'uiˬ sha yoˬ. 4 Hawˉ hk'aˆ teˇ g'aˇ g'aˇ, bon lawˬ htaˇ maˇ k'oˆ, bon maˍ htaˇ maˇ k'oˆ, oˉ k'oˍ hta‸ beh ve k'o, a shu yawˇ ve oˉ k'oˍ hta‸ awˬ me‸ awˬ hponˇ te luˬ ve yoˬ. 5 Ya‸ hk'aˇ, yaˇ miˇ teˇ g'aˇ g'aˇ bon lawˬ htaˇ maˇ k'oˆ, bon maˍ htaˇ maˇ k'oˆ, oˉ k'oˍ hta‸ maˇ beh ve k'o, a shu yawˇ ve oˉ k'oˍ hta‸ awˬ me‸ awˬ hponˇ te luˬ ve yoˬ. Yawˇ ve oˉ k'oˍ hta‸ maˇ beh ve k'o, yawˇ ve oˉ k'oˍ chiˇ baˬ taˍ ve hk'e yoˬ. 6 Awˬ lawn k'o, yaˇ miˇ lehˬ oˉ k'oˍ hta‸ maˇ beh ve k'o, uˉ hkeh mvuh nuˆ baˬ cawˇ ve yoˬ. Ya‸ hk'aˇ, uˉ hkeh mvuh nuˆ baˬ ve maˇ k'oˆ, oˉ k'oˍ chiˇ baˬ ve maˇ k'oˆ, yaˇ miˇ awˬ pon ya‸ taw tuˬ hpeh‸ ve k'o, yawˇ ve oˉ k'oˍ hta‸ beh taˍ piˇ lawˬ-o‸. 7 Hawˉ hk'aˆ lehˬ, G'uiˬ sha ve awˬ ho‸ awˬ han leh awˬ me‸ awˬ hponˇ hpeh‸ ve pa taw, oˉ k'oˍ hta‸ beh maˇ cawˇ ve yoˬ. Yaˇ miˇ lehˬ, hawˉ hk'aˆ ve awˬ me‸ awˬ hponˇ hpeh‸ ve yoˬ. 8 Awˬ lawn k'o, hawˉ hk'aˆ hta‸ yaˇ miˇ lo yuˬ te taˍ ve maˇ heˆ. Yaˇ miˇ hta‸ hawˉ hk'aˆ lo yuˬ te taˍ ve yoˬ. 9 Chi hk'oˆ ka‸, hawˉ hk'aˆ lehˬ yaˇ miˇ awˬ pon hpanˍ taˍ ve maˇ heˆ. Yaˇ miˇ lehˬ hawˉ hk'aˆ awˬ pon hpanˍ taˍ ve yoˬ. 10 Hk'e te leh mvuhˇ naw ma tcuh yaˇ hui hta‸ pa taw, yaˇ miˇ lehˬ a shu yawˇ ve oˉ k'oˍ hta‸ beh taˍ cawˇ ve yoˬ. 11 Ya‸ hk'aˇ, Jawˇ mawˇ Yeˍsuˆ awˬ hk'aw lo yaˇ miˇ lehˬ hawˉ hk'aˆ hta‸ loˍ leh, hawˉ hk'aˆ htawˇ yaˇ miˇ hta‸ loˍ ve yoˬ. 12 Awˬ lawn k'o, yaˇ miˇ lehˬ hawˉ hk'aˆ lo hpeh‸ la ve hk'e, hawˉ hk'aˆ htawˇ yaˇ miˇ awˬ hk'aw lo paw la ve yoˬ. Chi hk'oˆ ka‸, awˬ ceuˬ hk'a peu-eˬ ve lehˬ, G'uiˬ sha lo hpeh‸ la ve yoˬ. 13 Yaˇ miˇ lehˬ, oˉ k'oˍ hta‸ maˇ beh leh G'uiˬ sha hta‸ bon lawˬ keunˍ maˇ keunˍ ve hta‸ nawˬ hui hk'aˇ nawˬ hui dawˇ nyi-o. 14 Hawˉ hk'aˆ lehˬ, uˉ hkeh mvuh hu ve k'o, yawˇ awˬ pon ya‸ taw tuˬ hpeh‸ ve teh‸, awˬ suhˍ awˬ shaˍ hpawˇ ve awˬ liˇ ka‸ nawˬ hui hta‸ maˍ laˇ ve maˇ heˆ laˇ. 15 Ya‸ hk'aˇ, yaˇ miˇ lehˬ uˉ hkeh mvuh hu ve k'o, yawˇ ve awˬ me‸ awˬ hponˇ hpeh‸ ve yoˬ. Awˬ lawn k'o, yawˇ ve uˉ hkeh mvuh lehˬ, yawˇ hta‸ beh tuˬ awˬ pon piˇ taˍ ve yoˬ. 16 Ya‸ hk'aˇ, chaw teˇ g'aˇ g'aˇ tawˇ g'awˬ da‸ gaˇ ve k'o, ngaˬ hui maˇ k'oˆ, G'uiˬ sha ve Hkri‸ yaˇ awˬ moˍ teˇ hpaˍ maˇ k'oˆ, awˬ kaˍ awˬ nu awˬ liˇ maˇ cawˬ. 17 Ya‸ hk'aˇ nawˬ hui hpawnˬ da‸ ve teˇ yanˇ, leuˉ leh da‸ la tuˬ awˬ pon hpawnˬ da‸ ve maˇ heˆ. Leuˉ leh luˬ k'ai tuˬ awˬ pon hpawnˬ da‸ ve pa taw, tawˇ piˇ laˇ tuˬ ve chi teˇ hpaˍ awˬ hk'aw lo ngaˬ nawˬ hui hta‸ chiˇ mvuh ve maˇ heˆ. 18 Awˉ lawˉ peuˇ ve teˇ ceuˬ lehˬ, nawˬ hui Hkri‸ yaˇ awˬ moˍ hpawnˬ da‸ ve awˬ hk'aw lo, nawˬ hui awˬ moˍ shawˍ da‸ pehˬ da‸ chehˇ ve hta‸ ngaˬ g'a kaˇ ve yoˬ. Ngaˬ kaˇ ve hk'e cawˇ ve yoˬ hehˉ teh‸ ngaˬ yonˍ ve yoˬ. 19 Awˬ lawn k'o, nawˬ hui awˬ hk'aw lo da‸ ve chaw teˇ hpaˍ hk'a tawˍ lehˆ tawˆ la tuˬ, awˬ moˍ fuiˍ da‸ pehˬ da‸ ve teˇ ceuˬ g'a cawˬ ve yoˬ. 20 Nawˬ hui hpawnˬ da‸ ve teˇ yanˇ, Jawˇ mawˇ Yeˍsuˆ ve pawehˇ hta‸ caˇ tuˬ awˬ pon hpawnˬ da‸ ve maˇ heˆ. 21 Awˬ lawn k'o, nawˬ hui teˇ g'aˇ peuˬ teˇ g'aˇ, a shu yawˇ ve caˇ tuˬ hta‸ a shu yawˇ hk'aˇ yawˇ awˉ lawˉ caˇ sheˬ ve yoˬ. Hk'e te leh, teˇ g'aˇ k'o awˍ meu‸ leh, teˇ g'aˇ k'o a pehˉ meuˇ g'uiˬ dawˬ bvuhˆ ve yoˬ. 22 Hk'aˬ hk'e le. Nawˬ hui caˇ kuiˬ dawˬ kuiˬ awˬ pon a shu yawˇ ve yehˬ maˇ cawˬ leh laˇ. Maˇ heˆ k'o, nawˬ hui G'uiˬ sha ve Hkri‸ yaˇ awˬ moˍ hta‸ maˇ shawˍ maˇ caˆ te leh, haˍ ve g'awˇ ve chaw hui hta‸ ya‸ taw piˇ lawˬ ve laˇ. Ngaˬ nawˬ hui hta‸ hk'aˬ hk'e g'a k'oˆ tuˬ ve le. Chi hk'e te ve awˬ hk'aw lo ngaˬ nawˬ hui hta‸ chiˇ mvuh tuˬ ve laˇ. Ngaˬ nawˬ hui hta‸ chiˇ mvuh laˇ tuˬ maˇ heˆ. 23 Awˬ lawn k'o, nawˬ hui hta‸ ngaˬ maˍ laˇ peuˬ ve teˇ hpaˍ lehˬ, ngaˬ Jawˇ mawˇ Yeˍsuˆ geh g'a taˍ ve yoˬ. Jawˇ mawˇ Yeˍsuˆ lehˬ, shu yawˇ hta‸ chiˇ a‸ piˇ ve teˇ haˉ htaˇ, hkaoˍ monˇ hta‸ yuˬ leh, 24 awˬ bon hta‸ chiˇ mvuh peuˬ hk'aw‸ nawˉ, yawˇ hkaoˍ monˇ hta‸ hk'eh‸ leh k'oˆ ve, Chi lehˬ nawˬ hui awˬ pon ngaˬ ve awˬ to hpeh‸ ve yoˬ. Ngaˬ hta‸ dawˇ nawˇ tuˬ chi hta‸ te-o teh‸ k'oˆ ve yoˬ. 25 Yawˇ hui mvuhˇ haˉ awˍ caˇ peuˬ hk'aw‸ nawˉ, chi hk'a shuˍ shuˍ yawˇ kawˆ hta‸ yuˬ leh k'oˆ ve, Kawˆ chi lehˬ, ngaˬ ve awˬ suhˍ awˬ hk'aw lo ka ti‸ shaˉ caˆ awˬ suhˉ hpeh‸ ve yoˬ. Nawˬ hui dawˬ ve teˇ pawˆ le le ngaˬ hta‸ dawˇ nawˇ tuˬ te-o teh‸ k'oˆ piˇ ve yoˬ. 26 Awˬ lawn k'o, nawˬ hui hkaoˍ monˇ chi hta‸ caˇ leh, kawˆ chi hta‸ dawˬ ve teˇ pawˆ le le, Jawˇ mawˇ Yeˍsuˆ k'aw‸ ya‸ la htaˇ hk'a gaˬ, yawˇ suh ve teˇ ceuˬ hta‸ nawˬ hui hpeu‸ maˍ piˇ ve yoˬ. 27 Hk'e te leh, chaw hk'aˬ ve teˇ g'aˇ maˇ k'oˆ, maˇ keunˍ ve awˬ hk'aw lo hkaoˍ monˇ hta‸ caˇ leh Jawˇ mawˇ Yeˍsuˆ ve kawˆ hta‸ dawˬ ve k'o, Jawˇ mawˇ Yeˍsuˆ ve awˬ to leh awˬ suhˍ hta‸ yawˇ te ya‸ ve yoˬ. 28 Chaw teˇ g'aˇ le le, a shu yawˇ awˬ to hta‸ lawˇ nyi peuˬ hk'aw‸ nawˉ, hkaoˍ monˇ hta‸ caˇ leh kawˆ hta‸ dawˬ cawˇ ve yoˬ. 29 Awˬ lawn k'o, hk'aˬ ve teˇ g'aˇ maˇ k'oˆ, Jawˇ mawˇ Yeˍsuˆ ve awˬ to hta‸ maˇ pehˬ maˇ fuiˍ g'a leh caˇ ve dawˬ ve k'o, a shu yawˇ awˬ to awˬ hk'oˆ ciˍ yanˍ ve gaˬ la tuˬ yawˇ caˇ ve dawˬ ve yoˬ. 30 Chi hta‸ pa taw, nawˬ hui awˬ hk'aw lo chaw maˇ maˇ awˬ g'aˇ nuˇ leh naˬ chehˇ ve yoˬ. Chaw laiˉ g'aˇ htawˇ suh peuˬ ve yoˬ. 31 Ngaˬ hui lehˬ, a shu yawˇ awˬ to hta‸ hk'a deh‸ lawˇ nyi ve k'o, ciˍ yanˍ ve hta‸ maˇ g'a hkanˍ. 32 Jawˇ mawˇ Yeˍsuˆ ngaˬ hui hta‸ suhˉ jehˬ laˇ ve teˇ yanˇ, miˬ guiˬ yaˇ hui geh teˇ geh ciˍ yanˍ ve hta‸ maˇ g'a hkanˍ tuˬ, yawˇ ngaˬ hui hta‸ jaw‸ maˍ laˇ ve yoˬ. 33 Hk'e te leh, ngaˬ ve awˬ viˉ awˬ nyi teˇ hpaˍ-oˬ, caˇ ve dawˬ ve awˬ pon nawˬ hui teˇ geh hpawnˬ la ve teˇ yanˇ, teˇ g'aˇ leh teˇ g'aˇ hk'a deh‸ law da‸-o‸. 34 Chaw teˇ g'aˇ g'aˇ awˍ meu‸ ve k'o, yawˇ ve aˉ hk'aw lo caˇ cawˇ ve yoˬ. Maˇ heˆ k'o, nawˬ hui hpawnˬ da‸ ve lehˬ, ciˍ yanˍ ve hta‸ g'a hkanˍ tuˬ awˬ pon hpeh‸ tuˬ yoˬ. Awˬ kaˍ awˬ nu ve awˬ lawn teˇ hpaˍ lehˬ, ngaˬ nawˬ hui geh laˬ htaˇ hk'a deh‸ maˍ laˇ gu laˇ tuˬ yoˬ.

1 Kawˇrenˍhtuˆ 12

1 Awˬ viˉ awˬ nyi teˇ hpaˍ-oˬ, co ha hpawˇ ve la‸ shawnˍ teˇ hpaˍ awˬ lawn nawˬ hui shiˍ tuˬ ngaˬ heuˆ gaˇ ve yoˬ. 2 Nawˬ hui lawˇ kiˍ yaˇ hpeh‸ chehˇ ve teˇ yanˇ htaˇ, shu nawˬ hui hta‸ shiˍ k'ai ve hk'e nawˬ hui k'ai leh, tawˇ yaw maˇ puiˉ ve shaˉ ho‸ teˇ hpaˍ hta‸ oˉ k'oˍ ca pui ve hta‸ nawˬ hui shiˍ chehˇ ve yoˬ. 3 Hk'e te leh, ngaˬ nawˬ hui hta‸ chi hk'e shiˍ piˇ lawˬ gaˇ ve yoˬ. Yeˍsuˆ lehˬ hkeu taˍ ve chaw hpeh‸ ve yoˬ teh‸, chaw teˇ g'aˇ ka‸ G'uiˬ sha ve Awˬ ha hpu hta‸ cuˇ leh k'oˆ maˇ hpeh‸. Chi hk'oˆ ka‸, da‸ ve kehˬ ve Awˬ ha hpu hta‸ maˇ cuˇ ve k'o, Yeˍsuˆ lehˬ Jawˇ mawˇ hpeh‸ ve yoˬ teh‸, chaw teˇ g'aˇ ka‸ k'oˆ maˇ hpeh‸. 4 La‸ shawnˍ laiˉ ceuˬ cawˬ ve htawˇ, Awˬ ha hpu teˇ g'aˇ tiˉ cawˬ ve yoˬ. 5 Yeˍsuˆ awˬ pon te tuˬ ve kanˉ laiˉ ceuˬ cawˬ ve htawˇ, Jawˇ mawˇ teˇ g'aˇ tiˉ cawˬ ve yoˬ. 6 Te tawˆ la ve kanˉ laiˉ ceuˬ cawˬ ve htawˇ, chaw teˇ g'aˇ le le awˬ hk'aw lo hk'a peu-eˬ te tawˆ la piˇ shehˍ hpaˇ lehˬ, G'uiˬ sha teˇ g'aˇ tiˉ cawˬ ve yoˬ. 7 Chaw hk'a peu-eˬ awˬ pon awˬ bon cawˬ tuˬ, Awˬ ha hpu hpeu‸ maˍ laˇ ve teˇ ceuˬ, teˇ g'aˇ le le hta‸ piˇ taˍ ve yoˬ. 8 Awˬ lawn k'o Awˬ ha hpu lehˬ, chaw teˇ g'aˇ hta‸ cuˇ yiˍ tawˇ hkawˇ piˇ ve yoˬ. Awˬ ha hpu oˇ ve lehˬ, awˬ kaˍ awˬ nu teˇ g'aˇ hta‸ shiˍ puiˉ ve tawˇ hkawˇ piˇ ve yoˬ. 9 Awˬ ha hpu oˇ ve lehˬ, awˬ kaˍ awˬ nu teˇ g'aˇ hta‸ yonˍ puiˉ ve teˇ ceuˬ piˇ ve yoˬ. Awˬ ha hpu oˇ ve teˇ g'aˇ tiˉ lehˬ, awˬ kaˍ awˬ nu teˇ g'aˇ hta‸ chaw naˬ hta‸ gu na-e piˇ puiˉ ve la‸ shawnˍ piˇ ve yoˬ. 10 Teˇ g'aˇ hta‸ anˇ tuˬ te hpeh‸ tuˬ piˇ ve, teˇ g'aˇ hta‸ bon maˍ puiˉ tuˬ piˇ ve, teˇ g'aˇ hta‸ awˬ ha teˇ hpaˍ hta‸ fuiˍ da‸ pehˬ da‸ puiˉ tuˬ piˇ ve, teˇ g'aˇ hta‸ tawˇ laiˉ ceuˬ yaw chiˇ mvuh puiˉ tuˬ piˇ ve, teˇ g'aˇ hta‸ tawˇ laiˉ ceuˬ yaw chiˇ mvuh ve hta‸ tcuhˉ kuiˬ yuˬ tawˆ puiˉ tuˬ piˇ ve yoˬ. 11 Chi hk'a peu-eˬ Awˬ ha hpu teˇ g'aˇ tiˉ te tawˆ la leh, yawˇ a loˍ cawˇ ve hk'e teˇ g'aˇ peuˬ teˇ g'aˇ hta‸ pehˬ piˇ ve yoˬ. 12 Awˬ to lehˬ, teˇ to tiˉ hpeh‸ leh awˬ hk'eun maˇ maˇ cawˬ ve yoˬ. Awˬ to ve awˬ hk'eun teˇ hpaˍ maˇ ve htawˇ, awˬ to teˇ to tiˉ hpeh‸ ve hk'e, Hkri‸ htawˇ oˇ hk'e hpeh‸ ve yoˬ. 13 Awˬ lawn k'o, Yuˇda‸ chaw leh Heˍlaˍsaˆ chaw maˇ k'oˆ, awˬ ceˬ leh ponˬ peuˬ ve chaw maˇ k'oˆ, ngaˬ hui hk'a peu-eˬ awˬ to teˇ to tiˉ hpeh‸ la tuˬ, Awˬ ha hpu teˇ g'aˇ tiˉ awˬ hk'aw lo ngaˬ hui baˆtiˆsaˬ hkanˍ taˍ peuˬ. Ngaˬ hui hk'a peu-eˬ teˇ geh Awˬ ha hpu teˇ g'aˇ tiˉ hta‸ g'a dawˬ peuˬ. 14 Awˬ lawn k'o, awˬ to lehˬ awˬ hk'eun teˇ maˬ tiˉ cawˬ ve maˇ heˆ. Cawˬ maˇ ve yoˬ. 15 Hkui sheh lehˬ, Ngaˬ la‸ sheh maˇ heˆ ve pa taw awˬ to hta‸ maˇ caˉ da‸ teh‸ k'oˆ ve htawˇ, oˇ hk'e k'oˆ ve pa taw awˬ to hta‸ maˇ caˉ da‸ ve maˇ heˆ. 16 Naˍ paw lehˬ, ngaˬ mehˆ shiˍ maˇ heˆ ve pa taw awˬ to hta‸ maˇ caˉ da‸ teh‸ k'oˆ ve htawˇ, oˇ hk'e k'oˆ ve pa taw awˬ to hta‸ maˇ caˉ da‸ ve maˇ heˆ. 17 Awˬ to hk'a peu-eˬ mehˆ shiˍ hpeh‸ ve k'o, hk'aˬ hk'e te kaˇ hpeh‸ tuˬ ve le. Awˬ to hk'a peu-eˬ naˍ paw hpeh‸ ve k'o, hk'aˬ hk'e te nuˬ hpeh‸ tuˬ ve le. 18 Ya‸ hk'aˇ, G'uiˬ sha lehˬ yawˇ a loˍ cawˇ ve hk'e, awˬ to awˬ hk'aw lo awˬ hk'eun teˇ hpaˍ hta‸ a shu yawˇ ve chehˇ kuiˬ lo keu taˍ ve yoˬ. 19 Awˬ hk'eun hk'a peu-eˬ lehˬ, awˬ hk'eun teˇ maˬ tiˉ hpeh‸ ve k'o, awˬ to hk'aˬ hk'e te cawˬ hpeh‸ tuˬ le. 20 Ya‸ hk'aˇ, awˬ hk'eun cawˬ maˇ ve htawˇ, awˬ to teˇ to tiˉ hpeh‸ ve yoˬ. 21 Mehˆ shiˍ lehˬ, Ngaˬ nawˬ hta‸ maˇ loˍ teh‸, la‸ sheh hta‸ k'oˆ maˇ hpeh‸. Oˉ k'oˍ htawˇ, Ngaˬ nawˬ hta‸ maˇ loˍ teh‸, hkui sheh hta‸ k'oˆ maˇ hpeh‸. 22 Ya‸ hk'aˇ, awˬ to awˬ hk'aw lo awˬ g'aˇ nuˇ ve teh‸ ngaˬ hui dawˇ ve awˬ hk'eun teˇ hpaˍ htawˇ g'a cawˬ ve yoˬ. 23 Awˬ to awˬ hk'aw lo awˬ me‸ awˬ hponˇ maˇ cawˬ ve teh‸ ngaˬ hui dawˇ taˍ ve awˬ hk'eun teˇ hpaˍ hta‸ leuˉ leh ngaˬ hui awˬ me‸ awˬ hponˇ piˇ ve yoˬ. Ngaˬ hui ve nyi maˇ sha ve awˬ hk'eun teˇ hpaˍ hta‸ htawˇ, leuˉ leh nyi sha tuˬ ngaˬ hui te piˇ ve yoˬ. 24 Nyi sha chehˇ ve awˬ hk'eun teˇ hpaˍ hta‸ oˇ hk'e te tuˬ maˇ loˍ. Awˬ to awˬ hk'aw lo hpaˆ da‸ guiˇ da‸ ve maˇ g'a cawˬ leh, awˬ hk'eun teˇ hpaˍ teˇ maˬ leh teˇ maˬ dawˇ nyi da‸ puiˉ tuˬ, 25 G'uiˬ sha lehˬ awˬ to hta‸ caˉ da‸ piˇ ve awˬ hk'aw lo, awˬ g'aˇ nuˇ ve awˬ hk'eun teˇ hpaˍ hta‸ leuˉ leh awˬ me‸ awˬ hponˇ piˇ ve yoˬ. 26 Awˬ hk'eun teˇ maˬ tu‸ hkanˍ ve k'o, awˬ hk'eun hk'a peu-eˬ htawˇ yawˇ geh tu‸ hkanˍ ve yoˬ. Awˬ hk'eun teˇ maˬ awˬ me‸ awˬ hponˇ g'a ve k'o, awˬ hk'eun hk'a peu-eˬ htawˇ yawˇ geh g'a ha lehˬ ve yoˬ. 27 Nawˬ hui lehˬ Hkri‸ ve awˬ to hpeh‸ leh, teˇ g'aˇ peuˬ teˇ g'aˇ awˬ to oˇ ve awˬ hk'aw lo awˬ hk'eun hpeh‸ ve yoˬ. 28 G'uiˬ sha lehˬ, Hkri‸ yaˇ awˬ moˍ awˬ hk'aw lo chaw chi teˇ hpaˍ hta‸ teh taˍ ve yoˬ. Awˉ lawˉ teˇ moˍ tcuh yaˇ hui, nyiˇ moˍ teˇ moˍ bon maˍ paˍ hui, shehˆ moˍ teˇ moˍ maˍ piˇ shehˍ hpaˇ hui, oˇ ve hk'aw‸ nawˉ anˇ tuˬ te shehˍ hpaˇ hui, oˇ ve hk'aw‸ nawˉ chaw naˬ hui hta‸ gu na-e piˇ puiˉ ve chaw hui, ga piˇ shehˍ hpaˇ hui, awˬ hoˉ te ve chaw hui leh, tawˇ laiˉ ceuˬ yaw chiˇ mvuh puiˉ ve chaw hui hta‸ Hkri‸ yaˇ awˬ moˍ awˬ hk'aw lo G'uiˬ sha teh taˍ peuˬ ve yoˬ. 29 Hk'a peu-eˬ tcuh yaˇ hpeh‸ ve laˇ. Hk'a peu-eˬ bon maˍ paˍ hpeh‸ ve laˇ. Hk'a peu-eˬ maˍ piˇ shehˍ hpaˇ hpeh‸ ve laˇ. Hk'a peu-eˬ anˇ tuˬ te shehˍ hpaˇ hpeh‸ ve laˇ. 30 Hk'a peu-eˬ chaw naˬ hta‸ gu na-e piˇ puiˉ ve la‸ shawnˍ cawˬ ve laˇ. Hk'a peu-eˬ tawˇ laiˉ ceuˬ yaw chiˇ mvuh puiˉ ve laˇ. Hk'a peu-eˬ tcuhˉ kuiˬ yuˬ tawˆ puiˉ ve laˇ. 31 Nawˬ hui lehˬ, hk'a peu-eˬ a‸ kehˉ da‸ ve la‸ shawnˍ teˇ hpaˍ hta‸ sheˉ lai jaˇ ve nyi ma cawˬ piˇ-oˆ. Chi hk'oˆ ka‸, hk'a peu-eˬ a‸ kehˉ da‸ jaˇ ve ya‸ k'aw teˇ caˆ ngaˬ nawˬ hui hta‸ maˍ laˇ tuˬ yoˬ.

1 Kawˇrenˍhtuˆ 13

1 Ngaˬ lehˬ chaw yaˇ ve tawˇ hkawˇ leh mvuhˇ naw ma tcuh yaˇ ve tawˇ hkawˇ yaw puiˉ ve htawˇ, ha‸ pehnˇ ve maˇ cawˬ k'o, bo lo k'oˍ dawˆ ve awˬ hkawˇ leh shehnˍ hehˆ ve awˬ hkawˇ hk'e ceh ngaˬ hpeh‸ ve yoˬ. 2 Ngaˬ bon maˍ puiˉ ve maˇ k'oˆ, faˉ taˍ ve hk'a peu-eˬ leh cuˇ yiˍ hk'a peu-eˬ hta‸ ngaˬ shiˍ ve maˇ k'oˆ, hk'aw teˇ hpaˍ hta‸ jiˆ k'ai g'a tuˬ yonˍ ve nyi ma hk'a biˇ cawˬ ve maˇ k'oˆ, ha‸ pehnˇ ve maˇ cawˬ k'o, ngaˬ te‸ chiˉ awˬ bon maˇ cawˬ. 3 Ngaˬ ve mawˇ jeˬ hk'a peu-eˬ shu hta‸ pehˬ piˇ tanˇ piˇ leh, ngaˬ awˬ to hta‸ ka‸ aˬ miˍ tuˉ tanˇ piˇ ve htawˇ, ha‸ pehnˇ ve maˇ cawˬ k'o, ngaˬ te‸ chiˉ awˬ bon maˇ g'a. 4 Ha‸ pehnˇ ve lehˬ, dawˇ zuhˬ gaˇ zuhˬ leh ha k'aˉ puiˉ ve yoˬ. Ha‸ pehnˇ ve lehˬ maˇ hkawehˉ puiˉ, maˇ caˆ muiˬ puiˉ, nyi ma uiˍ ve mvuh ve maˇ cawˬ. 5 Ha‸ pehnˇ ve lehˬ, maˇ shawˍ maˇ caˆ maˇ te puiˉ, a shu yawˇ awˬ to awˬ pon maˇ ca puiˉ, nyi ma maˇ zuhˆ puiˉ, shu awˬ hk'oˆ venˇ baˆ maˇ taˍ puiˉ. 6 Ha‸ pehnˇ ve lehˬ, maˇ hteˇ maˇ cawˇ ve awˬ hk'aw lo maˇ ha lehˬ puiˉ. Ya‸ hk'aˇ hteˇ ve cawˇ ve awˬ hk'aw lo ha lehˬ puiˉ ve yoˬ. 7 Ha‸ pehnˇ ve lehˬ hk'a peu-eˬ hta‸ hkanˍ puiˉ ve, hk'a peu-eˬ hta‸ yonˍ puiˉ ve, hk'a peu-eˬ hta‸ dawˇ law puiˉ ve leh, hk'a peu-eˬ hta‸ yeunˇ hkanˍ puiˉ ve yoˬ. 8 Ha‸ pehnˇ ve lehˬ maˇ luˬ puiˉ. Ya‸ hk'aˇ, bon maˍ ve maˇ k'oˆ, tawˇ laiˉ ceuˬ yaw chiˇ mvuh ve maˇ k'oˆ, shiˍ puiˉ ve cuˇ yiˍ maˇ k'oˆ, hk'a peu-eˬ mehˉ k'ai tuˬ yoˬ. 9 Chi beu‸ ngaˬ hui shiˍ taˍ ve lehˬ, maˇ biˇ sheˍ. Ngaˬ hui bon maˍ ve ka‸ maˇ biˇ sheˍ. 10 Ya‸ hk'aˇ, biˇ ve awˬ ceuˬ gaˬ la htaˇ, maˇ biˇ ve teˇ hpaˍ mehˉ k'ai tuˬ yoˬ. 11 Ngaˬ yaˇ ehˉ hpeh‸ chehˇ htaˇ, yaˇ ehˉ hk'e ngaˬ tawˇ yaw ve, yaˇ ehˉ hk'e ngaˬ nyi ma cawˬ ve leh, yaˇ ehˉ hk'e ngaˬ dawˇ nyi ve yoˬ. Ya‸ hk'aˇ, ngaˬ chaw mawˇ hpeh‸ la htaˇ, yaˇ ehˉ ve awˬ liˇ awˬ hk'aˇ teˇ hpaˍ hta‸ ngaˬ baˬ taˉ ve yoˬ. 12 Chi beu‸ lehˬ, maˇ kehˬ da‸ ve mehˆ g'euˆ awˬ hk'aw lo ngaˬ hui nyi chehˇ ve hk'e yoˬ. Ya‸ hk'aˇ oˇ htaˇ gaˬ k'o, mehˆ hpfuhˇ tawˍ da‸ leh g'a mawˬ da‸ tuˬ yoˬ. Chi beu‸ ngaˬ hk'a biˇ maˇ shiˍ sheˍ. Ya‸ hk'aˇ, chi beu‸ G'uiˬ sha ngaˬ hta‸ shiˍ taˍ ve hk'e, oˇ htaˇ gaˬ k'o ngaˬ hk'a biˇ shiˍ tuˬ yoˬ. 13 Chi beu‸ lehˬ, yonˍ ve, dawˇ law ve leh ha‸ pehnˇ ve, chi shehˆ ceuˬ cawˬ taˍ ve yoˬ. Ya‸ hk'aˇ, chi shehˆ ceuˬ awˬ hk'aw lo uiˍ jaˇ ve lehˬ ha‸ pehnˇ ve teˇ ceuˬ yoˬ.

1 Kawˇrenˍhtuˆ 14

1 Ha‸ pehnˇ ve awˬ hk'aˇ suh g'aˇ hte‸ k'ai leh, co ha hpawˇ ve la‸ shawnˍ teˇ hpaˍ hta‸ g'aˇ hte‸ sheˉ lai-o. Bon maˍ puiˉ ve la‸ shawnˍ hta‸ leuˉ leh sheˉ lai-o. 2 Awˬ lawn k'o, tawˇ laiˉ ceuˬ yaw chiˇ mvuh ve chaw lehˬ, chaw yaˇ hta‸ tawˇ yaw ve maˇ heˆ. G'uiˬ sha hta‸ tawˇ yaw ve yoˬ. Yawˇ ve tawˇ hkawˇ hta‸ teˇ g'aˇ ka‸ na maˇ g'a. Awˬ ha hpu hta‸ pa taw, tcuhˉ kuiˬ naˉ ve teˇ hpaˍ hta‸ yawˇ yaw ve yoˬ. 3 Ya‸ hk'aˇ bon maˍ ve chaw lehˬ, chaw yaˇ hui hta‸ uiˍ la yeˬ la piˇ tuˬ, awˬ g'aˇ piˇ tuˬ leh, dawˇ sha la piˇ tuˬ, yawˇ hui hta‸ tawˇ yaw ve yoˬ. 4 Tawˇ laiˉ ceuˬ yaw chiˇ mvuh ve chaw lehˬ, yawˇ awˬ to hta‸ tiˉ uiˍ la yeˬ la piˇ ve yoˬ. Ya‸ hk'aˇ bon maˍ ve chaw lehˬ, Hkri‸ yaˇ awˬ moˍ hta‸ uiˍ la yeˬ la piˇ ve yoˬ. 5 Nawˬ hui hk'a peu-eˬ tawˇ laiˉ ceuˬ yaw chiˇ mvuh g'a tuˬ ngaˬ heuˆ gaˇ ve yoˬ. Ya‸ hk'aˇ, chi a‸ kehˉ leuˉ leh nawˬ hui bon maˍ puiˉ tuˬ ngaˬ heuˆ gaˇ ve yoˬ. Awˬ lawn k'o, tawˇ laiˉ ceuˬ yaw chiˇ mvuh ve chaw lehˬ, Hkri‸ yaˇ awˬ moˍ hta‸ uiˍ la yeˬ la piˇ tuˬ, tcuhˉ kuiˬ maˇ yuˬ tawˆ maˍ piˇ ve k'o, bon maˍ puiˉ ve chaw teˇ g'aˇ lehˬ yawˇ a‸ kehˉ uiˍ ve yoˬ. 6 Awˬ viˉ awˬ nyi teˇ hpaˍ-oˬ, ngaˬ nawˬ hui geh laˬ leh tawˇ laiˉ ceuˬ yaw chiˇ mvuh ve htawˇ, hpeu‸ maˍ ve tawˇ hkawˇ, shiˍ puiˉ ve cuˇ yiˍ tawˇ hkawˇ, bon maˍ ve tawˇ hkawˇ, maˍ piˇ ve tawˇ hkawˇ, ngaˬ nawˬ hui hta‸ chi hk'e ve tawˇ teˇ hkawˇ hkawˇ maˇ k'oˆ maˍ laˇ ve k'o, nawˬ hui awˬ pon aˬ hto‸ ma awˬ bon cawˬ le. 7 Chi hk'a shuˍ shuˍ, a sha‸ maˇ cawˬ ve awˬ ceuˬ teˇ hpaˍ, lehˉ lu maˇ k'oˆ, tinˍ maˇ k'oˆ, awˬ hkawˇ hk'a deh‸ maˇ cehnˍ k'o, hk'aˬ hk'e ve teˇ ceuˬ meuˆ gaˇ ve leh naˍ, hk'aˬ hk'e ve teˇ ceuˬ hteˆ gaˇ ve leh naˍ, shu hk'aˬ hk'e te shiˍ hpeh‸ tuˬ le. 8 Behˬ heh ma meuˆ ve hkawˇ htawˇ maˇ cehnˍ k'o, ma‸ bawˆ tuˬ awˬ pon a shu gu taˍ tuˬ le. 9 Chi hk'a shuˍ shuˍ, nawˬ hui maw‸ k'aw yehˇ leh tawˇ yaw ve awˬ hk'aw lo, shu na g'a ve tawˇ hkawˇ maˇ yaw ve k'o, nawˬ yaw ve tawˇ hkawˇ hta‸ shu hk'aˬ hk'e te shiˍ hpeh‸ tuˬ le. Awˬ lawn k'o, nawˬ hui lehˬ mvuhˇ haw hta‸ tawˇ yaw piˇ ve hk'e ceh hpeh‸ ve yoˬ. 10 Miˬ guiˬ hk'oˆ lo tawˇ hkawˇ laiˉ ceuˬ cawˬ tuˬ yoˬ. Ya‸ hk'aˇ, tcuhˉ kuiˬ maˇ cawˬ ve tawˇ hkawˇ teˇ ceuˬ ka‸ maˇ cawˬ. 11 Tawˇ hkawˇ oˇ ve tcuhˉ kuiˬ hta‸ ngaˬ maˇ shiˍ k'o, tawˇ yaw shehˍ hpaˇ mehˆ g'uˇ suhˍ ngaˬ lehˬ shu mvuhˇ miˬ ve chaw hpeh‸ leh, tawˇ yaw shehˍ hpaˇ htawˇ, ngaˬ mehˆ g'uˇ suhˍ shu mvuhˇ miˬ ve chaw hpeh‸ tuˬ yoˬ. 12 Chi hk'a shuˍ shuˍ, nawˬ hui htawˇ Awˬ ha hpu ve la‸ shawnˍ teˇ hpaˍ hta‸ sheˉ lai jaˇ ve chaw hui hpeh‸ ve pa taw, Hkri‸ yaˇ awˬ moˍ hta‸ uiˍ la yeˬ la piˇ puiˉ tuˬ leuˉ leh ca-o. 13 Hk'e te leh, tawˇ laiˉ ceuˬ yaw chiˇ mvuh ve chaw lehˬ, tcuhˉ kuiˬ yuˬ tawˆ g'a tuˬ bon lawˬ cawˇ ve yoˬ. 14 Awˬ lawn k'o, ngaˬ tawˇ laiˉ ceuˬ yaw leh bon lawˬ ve k'o, ngaˬ ve nyi ma hk'aw bon lawˬ ve htawˇ, ngaˬ shiˍ puiˉ ve teˇ ceuˬ awˬ pon awˬ bon maˇ cawˬ. 15 Hk'e te leh, hk'aˬ hk'e te tuˬ le. Ngaˬ ve nyi ma awˬ hk'aw lo ngaˬ bon lawˬ leh, ngaˬ ve shiˍ puiˉ ve teˇ ceuˬ awˬ hk'aw lo htawˇ ngaˬ bon lawˬ tuˬ yoˬ. Ngaˬ ve nyi ma awˬ hk'aw lo ngaˬ k'a muiˬ chiˇ mvuh leh, ngaˬ ve shiˍ puiˉ ve teˇ ceuˬ awˬ hk'aw lo htawˇ ngaˬ k'a muiˬ chiˇ mvuh tuˬ yoˬ. 16 Hk'e maˇ heˆ leh, nyi ma awˬ hk'aw lo ceh tiˉ bon hta‸ nawˬ chiˇ mvuh ve k'o, Awˬ ha hpu ve la‸ shawnˍ maˇ cawˬ ve chaw teˇ g'aˇ lehˬ, nawˬ chiˇ mvuh ve hkawˇ hta‸ na maˇ g'a ve pa taw, hk'aˬ hk'e te, A menˬ teh‸ k'oˆ hpeh‸ tuˬ le. 17 Nawˬ lehˬ bon hta‸ hk'a deh‸ chiˇ mvuh ve htawˇ, shu hta‸ uiˍ la yeˬ la piˇ maˇ g'a. 18 Ngaˬ lehˬ nawˬ hui hk'a peu-eˬ a‸ kehˉ tawˇ laiˉ ceuˬ yaw chiˇ mvuh puiˉ ve pa taw, ngaˬ G'uiˬ sha hta‸ chiˇ mvuh ve yoˬ. 19 Ya‸ hk'aˇ, Hkri‸ yaˇ awˬ moˍ hpawnˬ da‸ ve awˬ hk'aw lo ngaˬ tawˇ laiˉ ceuˬ yaw chiˇ mvuh leh tawˇ teˇ meunˍ hkawˇ yaw ve a‸ kehˉ, ngaˬ shu hta‸ maˍ piˇ hpeh‸ tuˬ ngaˬ shiˍ puiˉ ve teˇ ceuˬ awˬ hk'aw lo tawˇ ngaˇ hkawˇ ceh yaw gaˇ ve yoˬ. 20 Awˬ viˉ awˬ nyi teˇ hpaˍ-oˬ, nawˬ hui dawˇ nyi ve awˬ hk'aw lo, yaˇ ehˉ hk'a shuˍ shuˍ taˇ hpeh‸ piˇ. Haiˬ ve awˬ hk'aw lo yaˇ ehˉ hk'e hpeh‸ piˇ-oˆ. Ya‸ hk'aˇ, dawˇ nyi ve awˬ hk'aw lo chaw mawˇ hk'e hpeh‸ piˇ-oˆ. 21 Awˬ liˇ tawˇ hkawˇ awˬ hk'aw lo bvuh‸ taˍ ve hk'e, Awˬ kaˍ awˬ nu chaw ceuˬ ve ha tehˍ leh awˬ kaˍ awˬ nu chaw ceuˬ ve maw‸ k'aw hta‸ ngaˬ cuˇ leh, chaw chi teˇ ceuˬ hta‸ ngaˬ tawˇ yaw piˇ tuˬ yoˬ. Ya‸ hk'aˇ chi hk'e te yaw piˇ ve htawˇ, yawˇ hui ngaˬ hta‸ na yuˬ tuˬ maˇ heˆ teh‸, Jawˇ mawˇ G'uiˬ sha k'oˆ ve yoˬ. 22 Hk'e te leh, tawˇ laiˉ ceuˬ yaw chiˇ mvuh ve lehˬ, yonˍ ve chaw hui awˬ pon awˬ heˆ hpeh‸ ve maˇ heˆ. Maˇ yonˍ ve chaw hui awˬ pon awˬ heˆ hpeh‸ ve yoˬ. Bon maˍ ve teˇ ceuˬ lehˬ, maˇ yonˍ ve chaw hui awˬ pon maˇ heˆ. Yonˍ ve chaw hui awˬ pon yoˬ. 23 Hk'e te leh, Hkri‸ yaˇ awˬ moˍ hk'a peu-eˬ hpawnˬ da‸ leh, yawˇ hui hk'a peu-eˬ tawˇ laiˉ ceuˬ yaw chiˇ mvuh chehˇ htaˇ, Awˬ ha hpu ve la‸ shawnˍ maˇ cawˬ ve chaw hui, maˇ heˆ k'o maˇ yonˍ ve chaw hui lo‸ la k'o, nawˬ hui hta‸ chaw g'uˇ yoˬ teh‸ yawˇ hui k'oˆ tuˬ maˇ heˆ laˇ. 24 Ya‸ hk'aˇ, hk'a peu-eˬ bon maˍ chehˇ ve k'o, maˇ yonˍ ve chaw, maˇ heˆ k'o Awˬ ha hpu ve la‸ shawnˍ maˇ cawˬ ve chaw teˇ g'aˇ g'aˇ lo‸ la htaˇ, bon maˍ ve chaw hk'a peu-eˬ lehˬ yawˇ ve venˇ baˆ hta‸ hpeu‸ maˍ piˇ leh, yawˇ awˬ to venˇ baˆ cawˬ ve hta‸ yawˇ jawˬ la tuˬ yoˬ. 25 Yawˇ nyi ma hk'aw faˉ taˍ ve awˬ ceuˬ teˇ hpaˍ htawˇ tawˆ la tuˬ yoˬ. Oˇ htaˇ, yawˇ mehˆ hpfuhˇ miˬ chaˇ hk'oˆ boˆ taˍ leh G'uiˬ sha hta‸ oˉ k'oˍ pui leh, G'uiˬ sha nawˬ hui geh awˬ tehˬ awˬ na chehˇ ve yoˬ teh‸ yawˇ k'oˆ tuˬ yoˬ. 26 Awˬ viˉ awˬ nyi teˇ hpaˍ-oˬ, hk'aˬ hk'e le. Nawˬ hui hpawnˬ da‸ htaˇ, k'a muiˬ hkawˇ k'a ve, maˍ piˇ ve, hpeu‸ maˍ ve, tawˇ laiˉ ceuˬ yaw chiˇ mvuh ve, tcuhˉ kuiˬ yuˬ tawˆ ve, teˇ g'aˇ le le teˇ g'aˇ teˇ ceuˬ te ve yoˬ. Shu uiˍ la yeˬ la tuˬ awˬ pon hk'a peu-eˬ hta‸ te-o. 27 Tawˇ laiˉ ceuˬ yaw chiˇ mvuh ve chaw cawˬ k'o, nyiˇ g'aˇ shehˆ g'aˇ awˬ hk'oˆ taˇ yaw tcuh. Yawˇ hui teˇ g'aˇ peuˬ teˇ g'aˇ chiˇ mvuh peuˬ hk'aw‸ nawˉ, teˇ g'aˇ hta‸ tcuhˉ kuiˬ yuˬ tawˆ piˇ lawˬ-o‸. 28 Ya‸ hk'aˇ, Hkri‸ yaˇ awˬ moˍ hpawnˬ da‸ htaˇ, tcuhˉ kuiˬ yuˬ tawˆ shehˍ hpaˇ maˇ cawˬ ve k'o, tawˇ laiˉ ceuˬ yaw chiˇ mvuh ve chaw hui hta‸ ta‸ iˉ chehˇ piˇ lawˬ-o‸. Yawˇ hui a shu yawˇ awˬ to hta‸ ka‸ G'uiˬ sha hta‸ ka‸ na‸ uˉ te da‸ piˇ lawˬ-o‸. 29 Bon maˍ paˍ nyiˇ g'aˇ maˇ heˆ k'o shehˆ g'aˇ hta‸ maˍ tcuh leh, awˬ kaˍ awˬ nu chaw teˇ hpaˍ hta‸ hk'a deh‸ shawˍ nyi dawˇ nyi piˇ lawˬ-o‸. 30 Oˇ kaˬ lo mui taˍ ve awˬ kaˍ awˬ nu teˇ g'aˇ g'aˇ lehˬ, hpeu‸ maˍ laˇ ve teˇ ceuˬ ceuˬ hta‸ g'a ve k'o, awˉ lawˉ maˍ chehˇ ve teˇ g'aˇ hta‸ ta‸ iˉ chehˇ piˇ lawˬ-o‸. 31 Awˬ lawn k'o, chaw hk'a peu-eˬ henˇ yuˬ jawˬ yuˬ leh awˬ g'aˇ g'a tuˬ, nawˬ hui hk'a peu-eˬ teˇ g'aˇ peuˬ teˇ g'aˇ bon maˍ hpeh‸ ve yoˬ. 32 Bon maˍ paˍ hui ve nyi ma lehˬ, bon maˍ paˍ teˇ hpaˍ awˬ hawˉ lo chehˇ ve yoˬ. 33 Awˬ lawn k'o, G'uiˬ sha lehˬ sho‸ sha‸ tuˬ te piˇ shehˍ hpaˇ hpeh‸ ve maˇ heˆ. Yawˇ lehˬ gawˬ lehˍ ve hta‸ te piˇ shehˍ hpaˇ G'uiˬ sha hpeh‸ ve yoˬ. 34 Hkri‸ yaˇ awˬ moˍ hk'a peu-eˬ te chehˇ ve hk'e, yaˇ miˇ teˇ hpaˍ lehˬ, Hkri‸ yaˇ awˬ moˍ awˬ hk'aw lo ta‸ iˉ chehˇ cawˇ ve yoˬ. Awˬ lawn k'o, yawˇ hui tawˇ yaw tuˬ a hkaw-anˬ maˇ cawˬ. Awˬ liˇ tawˇ hkawˇ k'oˆ taˍ ve hk'e, yawˇ hui lehˬ shu awˬ hawˉ lo g'a chehˇ ve yoˬ. 35 Yawˇ hui teˇ ceuˬ ceuˬ shiˍ gaˇ ve k'o, aˉ hk'aw lo a shu yawˇ ve awˬ hpawˇ hta‸ na nyi cawˇ ve yoˬ. Awˬ lawn k'o, yaˇ miˇ lehˬ Hkri‸ yaˇ awˬ moˍ awˬ hk'aw lo tawˇ yaw ve k'o, ya‸ taw tuˬ hpeh‸ ve yoˬ. 36 G'uiˬ sha ve tawˇ hkawˇ lehˬ, nawˬ hui awˬ hk'aw lo awˉ lawˉ tawˆ la ve laˇ. Maˇ heˆ k'o, nawˬ hui geh ceh tiˉ gaˬ la ve laˇ. 37 Chaw teˇ g'aˇ g'aˇ bon maˍ paˍ hpeh‸ ve, maˇ heˆ k'o Awˬ ha hpu la‸ shawnˍ cawˬ ve teh‸ yawˇ dawˇ ve k'o, ngaˬ nawˬ hui hta‸ bvuh‸ laˇ ve teˇ hpaˍ lehˬ, Jawˇ mawˇ Yeˍsuˆ piˇ taˍ ve tawˇ hkawˇ hpeh‸ ve yoˬ teh‸, yawˇ shiˍ cawˇ ve yoˬ. 38 Ya‸ hk'aˇ, chaw teˇ g'aˇ g'aˇ maˇ shiˍ teh‸ k'oˆ ve k'o, ngaˬ hui htawˇ yawˇ hta‸ maˇ shiˍ. 39 Hk'e te leh, ngaˬ awˬ viˉ awˬ nyi teˇ hpaˍ-oˬ, bon maˍ puiˉ ve teˇ ceuˬ hta‸ sheˉ lai jaˇ ve nyi ma cawˬ piˇ-oˆ. Tawˇ laiˉ ceuˬ yaw chiˇ mvuh ve hta‸ htawˇ taˇ tawˍ taˍ. 40 Ya‸ hk'aˇ, hk'a peu-eˬ ve hta‸ keunˍ da‸ cawˇ da‸ ve hk'e, nyi sha ve awˬ hk'aw lo te-o.

1 Kawˇrenˍhtuˆ 15

1 Awˬ viˉ awˬ nyi teˇ hpaˍ-oˬ, ngaˬ nawˬ hui hta‸ maˍ piˇ taˍ peuˬ ve ha lehˬ ve bon hkawˇ nawˬ hui hta‸ k'aw‸ dawˇ nawˇ laˇ ve yoˬ. Ha lehˬ ve bon hkawˇ oˇ ve hta‸ nawˬ hui ha‸ yuˬ peuˬ leh, oˇ ve awˬ hk'aw lo nawˬ hui yeˬ chehˇ ve yoˬ. 2 Ha lehˬ ve bon hkawˇ oˇ ve hta‸ nawˬ hui hk'e leˇ yonˍ ve teˇ ceuˬ maˇ heˆ leh hk'a deh‸ vawˆ yeˬ taˍ ve k'o, oˇ ve hta‸ pa taw nawˬ hui htaiˍ hk'aw‸ ve hta‸ g'a ve yoˬ. 3 Awˬ lawn k'o, ngaˬ g'a taˍ ve awˬ lawn uiˍ ve teˇ ceuˬ ngaˬ nawˬ hui hta‸ maˍ laˇ peuˬ ve yoˬ. Awˬ lawn oˇ ve lehˬ, Li‸ hpu hk'aw bvuh‸ taˍ ve hk'e, Hkri‸ lehˬ ngaˬ hui ve venˇ baˆ awˬ pon hkanˍ suh peuˬ. 4 Tuˍ hpfuh hk'aw tuˍ peuˬ hk'aw‸ nawˉ, Li‸ hpu hk'aw bvuh‸ taˍ ve hk'e, shehˍ nyi teˇ nyi gaˬ htaˇ yawˇ k'aw‸ te‸ tu la ve yoˬ. 5 Yawˇ lehˬ, Keˍhpaˆ hta‸ yawˇ awˬ to maw piˇ peuˬ hk'aw‸ nawˉ, tcuh yaˇ teˇ chi nyiˇ g'aˇ hta‸ ka‸ maw piˇ ve yoˬ. 6 Oˇ ve awˬ hk'aw‸ nawˉ, teˇ pawˆ tiˉ awˬ viˉ awˬ nyi ngaˇ ha g'aˇ hpaˆ hta‸ ka‸ yawˇ awˬ to k'aw‸ maw piˇ ve yoˬ. Chaw oˇ ve teˇ hpaˍ chi beu‸ hk'a gaˬ maˇ-awˍ ve te‸ chehˇ sheˍ ve yoˬ. Ya‸ hk'aˇ, teˇ hpaˍ hpaˍ suh peuˬ. 7 Awˬ hk'aw‸ nawˉ Yaˍkoˆ hta‸ ka‸ yawˇ maw piˇ leh, awˬ hk'aw‸ nawˉ tcuh yaˇ hk'a peu-eˬ hta‸ ka‸ yawˇ awˬ to k'aw‸ maw piˇ ve yoˬ. 8 Ngaˬ lehˬ awˬ yanˇ maˇ gaˬ sheˍ ka‸ paw la ve yaˇ ehˉ hk'e hpeh‸ ve htawˇ, awˬ leh teˇ pawˆ yawˇ awˬ to ngaˬ hta‸ htawˇ maw laˇ ve yoˬ. 9 Awˬ lawn k'o, ngaˬ lehˬ tcuh yaˇ hui awˬ hk'aw lo i jaˇ ve teˇ g'aˇ hpeh‸ ve yoˬ. G'uiˬ sha ve Hkri‸ yaˇ awˬ moˍ hta‸ ngaˬ fawˉ mehˍ jaw ve pa taw, shu ngaˬ hta‸ tcuh yaˇ k'oˆ tuˬ ve hta‸ ka‸ ngaˬ maˇ keunˍ ve yoˬ. 10 Ya‸ hk'aˇ, ngaˬ tcuh yaˇ hpeh‸ chehˇ ve lehˬ, G'uiˬ sha ve awˬ bon hta‸ pa taw yoˬ. Ngaˬ g'a ve awˬ bon htawˇ hk'e leˇ hpeh‸ ve maˇ heˆ. Awˬ kaˍ awˬ nu tcuh yaˇ hui a‸ kehˉ leuˉ leh ngaˬ kanˉ te ve yoˬ. Ya‸ hk'aˇ, ngaˬ te ve maˇ heˆ. G'uiˬ sha ve awˬ bon ngaˬ geh cawˬ leh, awˬ bon oˇ ve kanˉ te ve yoˬ. 11 Hk'e te leh, ngaˬ awˬ to maˇ k'oˆ, yawˇ hui htawˇ maˇ k'oˆ, chi hk'e bon maˍ leh, nawˬ hui htawˇ chi hk'e yonˍ taˍ peuˬ ve yoˬ. 12 Hkri‸ lehˬ suh kuiˬ lo k'aw‸ te‸ tu la peuˬ teh‸, ngaˬ hui bon maˍ ve k'o, suh ve chaw hui k'aw‸ te‸ tu la ve maˇ cawˬ teh‸ nawˬ hui awˬ hk'aw lo chaw teˇ hpaˍ hpaˍ hk'aˬ hk'e te k'oˆ hpeh‸ ve le. 13 Suh ve chaw hui k'aw‸ te‸ tu la ve maˇ cawˬ k'o, Hkri‸ lehˬ k'aw‸ te‸ tu la peuˬ ve maˇ heˆ. 14 Hkri‸ lehˬ maˇ k'aw‸ te‸ tu la ve k'o, ngaˬ hui bon maˍ ve chi, hk'e leˇ hpeh‸ leh, ngaˬ hui yonˍ ve htawˇ hk'e leˇ hpeh‸ ve yoˬ. 15 Chi hk'oˆ ka‸, ngaˬ hui lehˬ G'uiˬ sha ve awˬ lawn maˇ heˆ heˆ ve shaˉ hkiˆ hkanˍ shehˍ hpaˇ hpeh‸ ve yoˬ. Awˬ lawn k'o, G'uiˬ sha lehˬ Hkri‸ hta‸ suh kuiˬ lo k'aw‸ te‸ tu la piˇ peuˬ teh‸, G'uiˬ sha awˬ lawn ngaˬ hui shaˉ hkiˆ hkanˍ ve yoˬ. Ya‸ hk'aˇ, suh ve chaw hta‸ awˬ tehˬ awˬ na maˇ k'aw‸ te‸ tu la piˇ ve k'o, Hkri‸ hta‸ htawˇ yawˇ k'aw‸ te‸ tu la piˇ ve maˇ heˆ. 16 Awˬ lawn k'o, suh ve chaw hui hta‸ maˇ k'aw‸ te‸ tu la piˇ ve k'o, Hkri‸ hta‸ htawˇ k'aw‸ te‸ tu la piˇ peuˬ ve maˇ heˆ. 17 Hkri‸ lehˬ maˇ k'aw‸ te‸ tu la ve k'o, nawˬ hui yonˍ ve teˇ ceuˬ hk'e leˇ hpeh‸ leh, nawˬ hui ve venˇ baˆ awˬ hk'aw lo nawˬ hui chehˇ sheˍ ve yoˬ. 18 Chi hk'oˆ ka‸, Hkri‸ awˬ hk'aw lo suh peuˬ ve chaw hui lehˬ luˬ k'ai peuˬ. 19 Chi beu‸ ngaˬ hui a sha‸ te‸ chehˇ ve teˇ yanˇ ceh tiˉ Hkri‸ awˬ hk'aw lo dawˇ law tuˬ cawˬ ve k'o, chaw hk'a peu-eˬ a‸ kehˉ ngaˬ hui hta‸ ha k'aˉ tuˬ cawˬ ve yoˬ. 20 Ya‸ hk'aˇ Hkri‸ lehˬ suh kuiˬ lo awˬ tehˬ awˬ na k'aw‸ te‸ tu la peuˬ leh, suh peuˬ ve chaw hui awˬ hk'aw lo awˉ lawˉ naw‸ la ve awˬ shiˍ hpeh‸ ve yoˬ. 21 Awˬ lawn k'o, chaw teˇ g'aˇ hta‸ pa taw suh ve teˇ ceuˬ cawˬ la ve hk'e, chaw teˇ g'aˇ hta‸ pa taw suh ve chaw hui k'aw‸ te‸ tu la ve teˇ ceuˬ cawˬ la ve yoˬ. 22 Aˍdanˍ awˬ hk'aw lo chaw hk'a peu-eˬ suh ve hk'e, Hkri‸ awˬ hk'aw lo chaw hk'a peu-eˬ k'aw‸ te‸ tu la tuˬ yoˬ. 23 Ya‸ hk'aˇ, chaw teˇ g'aˇ le le a shu yawˇ ve awˬ yanˇ cawˇ ve hk'e k'aw‸ te‸ tu la tuˬ yoˬ. Hkri‸ lehˬ awˉ lawˉ naw‸ ve awˬ shiˍ hpeh‸ ve yoˬ. Awˬ hk'aw‸ nawˉ Hkri‸ k'aw‸ ya‸ la ve teˇ yanˇ, yawˇ hta‸ hk'a caˉ da‸ ve chaw teˇ hpaˍ k'aw‸ te‸ tu la tuˬ yoˬ. 24 Oˇ ve hk'aw‸ nawˉ awˬ leh meuˇ gaˬ la tuˬ yoˬ. Oˇ htaˇ yawˇ lehˬ uˉ peunˍ ve hk'a peu-eˬ, aˉ yaˇ hk'a peu-eˬ leh, kanˇ paˆ hk'a peu-eˬ hta‸ te luˬ peuˬ hk'aw‸ nawˉ, yawˇ Awˬ pa G'uiˬ sha hta‸ mvuhˇ miˬ chiˇ a‸ piˇ tuˬ yoˬ. 25 Hkri‸ lehˬ canˇ paˍ hk'a peu-eˬ hta‸ yawˇ ve hkui taw k'aw awˬ hawˉ lo taˍ htaˇ hk'a gaˬ yawˇ g'a uˉ peunˍ tuˬ yoˬ. 26 Awˬ leh meuˇ te luˬ piˇ tuˬ ve canˇ paˍ lehˬ, suh ve teˇ ceuˬ hta‸ yoˬ. 27 Awˬ lawn k'o, awˬ ceuˬ hk'a peu-eˬ hta‸ Yaˇ hpu ve hkui taw k'aw awˬ hawˉ lo G'uiˬ sha teh taˍ ve yoˬ. Ya‸ hk'aˇ, awˬ ceuˬ hk'a peu-eˬ Yaˇ hpu awˬ hawˉ lo chehˇ ve teh‸ k'oˆ ve teˇ yanˇ, awˬ ceuˬ hk'a peu-eˬ ve hta‸ yawˇ awˬ hawˉ lo teh taˍ piˇ shehˍ hpaˇ lehˬ, yawˇ awˬ hawˉ lo maˇ chehˇ ve hta‸ hk'a tawˍ lehˆ g'a shiˍ ve yoˬ. 28 Awˬ ceuˬ hk'a peu-eˬ ve hta‸ Yaˇ hpu awˬ hawˉ lo teh taˍ peuˬ htaˇ, yawˇ awˬ hawˉ lo hk'a peu-eˬ hta‸ teh taˍ piˇ shehˍ hpaˇ G'uiˬ sha awˬ hawˉ lo Yaˇ hpu htawˇ chehˇ tuˬ yoˬ. Awˬ lawn k'o, G'uiˬ sha lehˬ teˇ ceuˬ le le awˬ hk'aw lo hk'a peu-eˬ hpeh‸ tuˬ ve hta‸ pa taw yoˬ. 29 Suh peuˬ ve chaw hui awˬ pon baˆtiˆsaˬ hkanˍ ve chaw hui lehˬ, aˬ hto‸ ma pa taw ca hkanˍ ve le. Suh ve chaw hui awˬ tehˬ awˬ na maˇ k'aw‸ te‸ tu la ve k'o, aˬ hto‸ ma pa taw yawˇ hui ve awˬ tan shu baˆtiˆsaˬ hkanˍ yuˬ ve le. 30 Ngaˬ hui htawˇ, aˬ hto‸ ma pa taw teˇ naˍ riˍ le le kawˆ tuˬ dawˇ haˍ tuˬ ve hta‸ g'a hkanˍ chehˇ ve le. 31 Awˬ viˉ awˬ nyi teˇ hpaˍ-oˬ, ngaˬ hui ve Jawˇ mawˇ Yeˍsuˆ Hkri‸ awˬ hk'aw lo nawˬ hui hta‸ pa taw ngaˬ nyi ma uiˍ kuiˬ cawˬ leh, teˇ nyi le le suh ve teˇ ceuˬ hta‸ hpuˇ da‸ chehˇ ve yoˬ teh‸ ngaˬ k'oˆ hpeh‸ ve yoˬ. 32 Shu te jaw ve hk'e, ngaˬ lehˬ Eˇfeˇsu‸ venˇ awˬ hk'aw lo haiˬ ve to nuˇ to shaˆ teˇ hpaˍ hta‸ g'a loˍ yuˬ da‸ jaw ve htawˇ, ngaˬ awˬ pon aˬ hto‸ ma awˬ bon cawˬ le. Suh ve chaw hui maˇ k'aw‸ te‸ tu la k'o, shu k'oˆ ve hk'e, Shawˉ pawˍ ngaˬ hui g'a suh tuˬ ve pa taw, caˇ bvuhˆ dawˬ bvuhˆ te chehˇ-a veuˬ. 33 Nawˬ hui taˇ dawˇ ya‸. Haiˬ ve chaw teˇ hpaˍ hta‸ awˬ chawˇ te ve teˇ ceuˬ lehˬ, da‸ ve awˬ liˇ teˇ hpaˍ hta‸ te luˬ ve yoˬ. 34 Nawˇ la leh hteˇ ve cawˇ ve awˬ hk'aˇ suh te k'ai-o. Venˇ baˆ hta‸ taˇ k'aw‸ te. Awˬ lawn k'o, chaw teˇ hpaˍ hpaˍ G'uiˬ sha hta‸ maˇ shiˍ. Nawˬ hui ya‸ taw tuˬ ngaˬ chi hk'e k'oˆ ve yoˬ. 35 Ya‸ hk'aˇ, teˇ g'aˇ g'aˇ chi hk'e na nyi laˇ tuˬ yoˬ. Suh ve chaw hui lehˬ, hk'aˬ hk'e te k'aw‸ te‸ tu la tuˬ le. Hk'aˬ hk'e ve awˬ to cawˬ leh k'aw‸ tawˆ la tuˬ le teh‸ k'oˆ tuˬ yoˬ. 36 Maˇ dawˇ nyi puiˉ ve chaw-oˬ, nawˬ sheˍ ve awˬ yawˇ lehˬ, maˇ luˬ maˇ suh ve k'o, te‸ la tuˬ maˇ heˆ. 37 Chi hk'oˆ ka‸, nawˬ sheˍ ve lehˬ, hpeh‸ la tuˬ ve awˬ cehˬ hta‸ nawˬ sheˍ ve maˇ heˆ. Caˬ yawˇ, maˇ heˆ k'o awˬ kaˍ awˬ nu awˬ yawˇ teˇ hpaˍ hta‸ ceh nawˬ sheˍ ve yoˬ. 38 G'uiˬ sha lehˬ yawˇ a loˍ cawˇ ve hk'e, awˬ yawˇ hta‸ awˬ cehˬ hpeh‸ la piˇ ve yoˬ. Awˬ yawˇ teˇ ceuˬ le le hta‸ htawˇ, a shu yawˇ ve awˬ cehˬ hpeh‸ la piˇ ve yoˬ. 39 Shaˍ hk'a cawˬ ve lehˬ, teˇ ceuˬ tiˉ hpeh‸ ve maˇ heˆ. Chaw yaˇ ve awˬ shaˍ teˇ ceuˬ, to nuˇ to shaˆ ve awˬ shaˍ teˇ ceuˬ, ngaˆ awˬ shaˍ teˇ ceuˬ leh, ngaˇ awˬ shaˍ teˇ ceuˬ hpeh‸ ve yoˬ. 40 Mvuhˇ naw ma hta‸ caˉ da‸ ve awˬ to teˇ hpaˍ cawˬ leh, miˬ guiˬ hta‸ caˉ da‸ ve awˬ to teˇ hpaˍ htawˇ cawˬ ve yoˬ. Mvuhˇ naw ma hta‸ caˉ da‸ ve awˬ to teˇ hpaˍ ve awˬ me‸ awˬ hponˇ teˇ ceuˬ hpeh‸ leh, miˬ guiˬ hta‸ caˉ da‸ ve awˬ to teˇ hpaˍ ve awˬ me‸ awˬ hponˇ htawˇ teˇ ceuˬ hpeh‸ ve yoˬ. 41 Mvuhˇ nyi ve awˬ me‸ awˬ hponˇ teˇ ceuˬ, ha pa ve awˬ me‸ awˬ hponˇ teˇ ceuˬ leh, meu‸ keu teˇ hpaˍ ve awˬ me‸ awˬ hponˇ teˇ ceuˬ hpeh‸ ve yoˬ. Meu‸ keu teˇ hpaˍ htawˇ, teˇ shiˍ leh teˇ shiˍ awˬ me‸ awˬ hponˇ peun da‸ ve yoˬ. 42 Suh peuˬ ve chaw hui k'aw‸ te‸ tu la tuˬ ve lehˬ, oˇ ve hk'a shuˍ shuˍ hpeh‸ tuˬ yoˬ. Awˬ to lehˬ, luˬ puiˉ kuiˇ puiˉ ve awˬ hk'aw lo sheˍ leh, maˇ luˬ maˇ kuiˇ puiˉ ve awˬ hk'aw lo k'aw‸ te‸ tu la piˇ tuˬ yoˬ. 43 Awˬ me‸ awˬ hponˇ maˇ cawˬ ve awˬ hk'aw lo sheˍ leh, awˬ me‸ awˬ hponˇ cawˬ ve awˬ hk'aw lo k'aw‸ te‸ tu la piˇ tuˬ yoˬ. Awˬ g'aˇ nuˇ ve awˬ hk'aw lo sheˍ leh, kanˇ paˆ uiˍ ve awˬ hk'aw lo k'aw‸ te‸ tu la piˇ tuˬ yoˬ. 44 Sheˍ ve teˇ yanˇ, awˬ suhˍ awˬ shaˍ awˬ to hpeh‸ leh, k'aw‸ te‸ tu la piˇ ve teˇ yanˇ, co ha ve awˬ to hpeh‸ tuˬ yoˬ. Awˬ suhˍ awˬ shaˍ ve awˬ to cawˬ ve k'o, co ha ve awˬ to htawˇ cawˬ ve yoˬ. 45 Chi hk'a shuˍ shuˍ, awˉ lawˉ peuˇ ve Aˍdanˍ teˇ g'aˇ lehˬ, a sha‸ te‸ ve chaw hpeh‸ la ve yoˬ teh‸ bvuh‸ taˍ ve yoˬ. Awˬ leh meuˇ ve Aˍdanˍ teˇ g'aˇ lehˬ, a sha‸ te‸ piˇ shehˍ hpaˇ hpeh‸ ve yoˬ. 46 Co ha hta‸ caˉ da‸ ve awˉ lawˉ laˬ ve maˇ heˆ. Awˬ suhˍ awˬ shaˍ hta‸ caˉ da‸ ve teˇ ceuˬ awˉ lawˉ laˬ leh, oˇ ve hk'aw‸ nawˉ co ha hta‸ caˉ da‸ ve teˇ ceuˬ laˬ ve yoˬ. 47 Awˉ lawˉ peuˇ ve chaw lehˬ, je‸ hpeh‸ leh, miˬ guiˬ lo tawˆ la ve yoˬ. Nyiˇ g'aˇ teˇ g'aˇ lehˬ, mvuhˇ naw ma lo tawˆ la ve yoˬ. 48 Je‸ hta‸ caˉ da‸ ve chaw teˇ hpaˍ lehˬ, je‸ lo tawˆ la ve chaw oˇ ve teˇ g'aˇ hk'a shuˍ shuˍ hpeh‸ ve yoˬ. Mvuhˇ naw ma hta‸ caˉ da‸ ve chaw teˇ hpaˍ lehˬ, mvuhˇ naw ma lo tawˆ la ve chaw oˇ ve teˇ g'aˇ hk'a shuˍ shuˍ hpeh‸ ve yoˬ. 49 Ngaˬ hui lehˬ, je‸ lo tawˆ la ve chaw teˇ g'aˇ ve awˬ ho‸ awˬ han hta‸ pfuhˇ ve hk'e, mvuhˇ naw ma lo tawˆ la ve chaw teˇ g'aˇ ve awˬ ho‸ awˬ han hta‸ htawˇ ngaˬ hui pfuhˇ tuˬ yoˬ. 50 Awˬ viˉ awˬ nyi teˇ hpaˍ-oˬ, ngaˬ nawˬ hui hta‸ chi hk'e k'oˆ laˇ ve yoˬ. Awˬ suhˍ awˬ shaˍ awˬ to lehˬ, G'uiˬ sha ve mvuhˇ miˬ awˬ hk'aw lo lo‸-e maˇ hpeh‸. Luˬ puiˉ kuiˇ puiˉ ve awˬ ceuˬ lehˬ, maˇ luˬ maˇ kuiˇ puiˉ ve awˬ ceuˬ awˬ hk'aw lo lo‸-e maˇ hpeh‸. 51 Nyi loˬ, tcuhˉ kuiˬ naˉ jaˇ ve tawˇ teˇ hkawˇ ngaˬ nawˬ hui hta‸ hto maˍ laˇ shaˍ. Nyiˬ hui hk'a peu-eˬ g'a suh tuˬ ve maˇ heˆ. 52 Ya‸ hk'aˇ, awˬ leh meuˇ ve behˬ heh ma meuˆ ve teˇ yanˇ, teˇ hkui tiˉ, mehˆ teˇ me‸ tiˉ awˬ hk'aw lo, nyiˬ hui hk'a peu-eˬ g'a pa tuˬ yoˬ. Awˬ lawn k'o, behˬ heh ma awˬ hkawˇ bvuhˬ la tuˬ yoˬ. Oˇ htaˇ, suh peuˬ ve chaw hui lehˬ, maˇ luˬ maˇ kuiˇ puiˉ ve awˬ hk'aw lo k'aw‸ te‸ tu la leh, nyiˬ hui htawˇ g'a pa tuˬ yoˬ. 53 Awˬ lawn k'o, luˬ puiˉ kuiˇ puiˉ ve awˬ ceuˬ chi lehˬ, maˇ luˬ maˇ kuiˇ puiˉ ve awˬ ceuˬ hta‸ g'a veu‸ deh tuˬ yoˬ. Suh puiˉ ve awˬ ceuˬ chi htawˇ, maˇ suh puiˉ ve awˬ ceuˬ hta‸ g'a veu‸ deh tuˬ yoˬ. 54 Luˬ puiˉ kuiˇ puiˉ ve awˬ ceuˬ lehˬ, maˇ luˬ maˇ kuiˇ puiˉ ve awˬ ceuˬ hta‸ veu‸ deh leh, suh puiˉ ve awˬ ceuˬ htawˇ maˇ suh puiˉ ve awˬ ceuˬ hta‸ veu‸ deh ve teˇ yanˇ, Li‸ hpu hk'aw bvuh‸ taˍ ve tawˇ chi teˇ hkawˇ biˇ la tuˬ yoˬ. G'aˇ ve teˇ ceuˬ lehˬ, suh ve teˇ ceuˬ hta‸ hehˆ dawˬ peuˬ. 55 Suh ve teˇ ceuˬ-oˬ, nawˬ g'aˇ tuˬ hk'aˬ lo cawˬ le. Suh ve teˇ ceuˬ-oˬ, nawˬ ve awˬ viˇ hk'aˬ lo cawˬ le. 56 Suh ve awˬ viˇ lehˬ, venˇ baˆ hpeh‸ ve yoˬ. Venˇ baˆ ve kanˇ paˆ lehˬ, awˬ liˇ tawˇ hkawˇ hpeh‸ ve yoˬ. 57 Ya‸ hk'aˇ ngaˬ hui ve Jawˇ mawˇ Yeˍsuˆ Hkri‸ hta‸ pa taw ngaˬ hui hta‸ g'aˇ shehˍ hpaˇ hpeh‸ piˇ lawˬ ve G'uiˬ sha hta‸ chiˇ mvuh-o. 58 Hk'e te leh, ngaˬ ha‸ ve awˬ viˉ awˬ nyi teˇ hpaˍ-oˬ, nyi ma yeˬ ve chaw, te kuiˬ dawˇ kuiˬ yeˬ ve chaw leh, Jawˇ mawˇ Yeˍsuˆ ve kanˉ hta‸ hk'aˬ htaˆ ka‸ g'aˇ hte‸ te chehˇ ve chaw hpeh‸ piˇ-oˆ. Awˬ lawn k'o, Jawˇ mawˇ Yeˍsuˆ awˬ pon nawˬ hui te ve kanˉ lehˬ hk'e leˇ hpeh‸ ve maˇ heˆ teh‸ shiˍ chehˇ-oˆ.

1 Kawˇrenˍhtuˆ 16

1 Hkri‸ yaˇ hui awˬ pon hpu tanˇ shaw ve awˬ lawn lehˬ, Gaˍlaˍtiˆ mvuhˇ miˬ hk'aw chehˇ ve Hkri‸ yaˇ awˬ moˍ teˇ hpaˍ hta‸ ngaˬ hto piˇ taˍ ve hk'e, nawˬ hui htawˇ oˇ hk'e te-o. 2 Ngaˬ gaˬ la htaˇ hpu tanˇ maˇ g'a shaw tuˬ, teˇ shinˉ le le awˬ hk'aw lo awˉ lawˉ teˇ nyi htaˇ, nawˬ hui teˇ g'aˇ le le a shu yawˇ awˬ bon g'a taˍ ve hk'e, hpu tanˇ piˇ tuˬ awˬ pon yuˬ tawˆ leh ha‸ shaˉ taˍ-o‸. 3 Ngaˬ gaˬ la ve teˇ yanˇ, nawˬ hui ve hpu tanˇ hta‸ Yeˍruˆsaˍlehnˍ venˇ lo yuˬ k'oˬ piˇ tuˬ, nawˬ hui nyi ma cawˇ ve chaw hui hta‸ leuˆ yuˬ leh, yawˇ hui awˬ pon shaˉ hkiˆ hkanˍ ve li‸ bvuh‸ piˇ peuˬ hk'aw‸ nawˉ, ngaˬ yawˇ hui hta‸ peu k'ai tuˬ yoˬ. 4 Ngaˬ htawˇ k'ai cawˇ ve k'o, yawˇ hui ngaˬ geh teˇ geh k'ai hpeh‸ ve yoˬ. 5 Maˍkeˍdawˇniˆ mvuhˇ miˬ hta‸ ngaˬ hpanˍ k'ai peuˬ hk'aw‸ nawˉ, ngaˬ nawˬ hui geh gaˬ la tuˬ yoˬ. Awˬ lawn k'o, ngaˬ Maˍkeˍdawˇniˆ mvuhˇ miˬ hta‸ g'a hpanˍ k'ai tuˬ yoˬ. 6 Ngaˬ hk'aˬ ve teˇ hpawˇ lo k'aw‸ k'ai tuˬ ve maˇ k'oˆ, nawˬ hui ngaˬ hta‸ awˬ g'uˇ suhˍ peu k'ai laˇ tuˬ, ngaˬ nawˬ hui geh a ciˉ maw chaweh chehˇ tuˬ teh‸ dawˇ taˍ ve yoˬ. Mvuhˇkaˆ yanˇ peuˬ htaˇ hk'a gaˬ nawˬ hui geh chehˇ tuˬ yoˬ hehˉ. 7 Awˬ lawn k'o, chi beu‸ hpanˍ k'ai chehˇ ve awˬ hk'aw lo ceh nawˬ hui hta‸ g'a mawˬ da‸ tuˬ ngaˬ maˇ te gaˇ. Ya‸ hk'aˇ, Jawˇ mawˇ Yeˍsuˆ nyi ma cawˇ ve k'o, ngaˬ nawˬ hui geh a ciˉ maw chaweh chehˇ tuˬ dawˇ law taˍ ve yoˬ. 8 Peˍteˍkoˆteˍ pawehˇ awˬ nyi hk'a gaˬ, ngaˬ Eˇfeˇsu‸ venˇ hk'aw chehˇ tuˬ yoˬ. 9 Awˬ lawn k'o, kanˉ hk'a deh‸ te hpeh‸ tuˬ ngaˬ awˬ pon k'ehˬ jaˇ ve yehˬ miˉ teˇ maˬ hpaw taˍ ve yoˬ. Tawˍ taˍ shehˍ hpaˇ htawˇ maˇ maˇ cawˬ ve yoˬ. 10 Tiˆmoˉseˍ nawˬ hui geh gaˬ la k'o, nawˬ hui geh chehˇ htaˇ yawˇ maˇ g'a kawˆ tuˬ nawˬ hui shaˍ ti‸ taˍ-o‸. Awˬ lawn k'o, yawˇ lehˬ ngaˬ hk'a shuˍ shuˍ Jawˇ mawˇ Yeˍsuˆ ve kanˉ te shehˍ hpaˇ hpeh‸ ve yoˬ. 11 Hk'e te leh, a shu ka‸ yawˇ hta‸ maˇ shawˍ maˇ caˆ taˇ te. Yawˇ ngaˬ geh k'aw‸ la hpeh‸ tuˬ, dawˇ sha ve awˬ hk'aw lo yawˇ hta‸ k'aw‸ peu laˇ-oˆ. Awˬ viˉ awˬ nyi teˇ hpaˍ geh teˇ geh yawˇ k'aw‸ la tuˬ ve hta‸ ngaˬ dawˇ law chehˇ ve yoˬ. 12 Awˬ viˉ awˬ nyi Aˍpawˇlu‸ awˬ lawn lehˬ, awˬ viˉ awˬ nyi teˇ hpaˍ geh teˇ geh nawˬ hui ve chehˇ kuiˬ lo laˬ tuˬ, ngaˬ yawˇ hta‸ g'aˇ hte‸ awˬ g'aˇ piˇ ve htawˇ, chi beu‸ nawˬ hui ve chehˇ kuiˬ lo laˬ tuˬ yawˇ nyi ma a ciˉ ka‸ maˇ cawˬ ve yoˬ. Ya‸ hk'aˇ, awˬ yanˇ cawˇ ve teˇ yanˇ, yawˇ nawˬ hui geh laˬ tuˬ yoˬ. 13 Nawˬ hui hk'a deh‸ shaw taˍ-o‸. Yonˍ ve awˬ hk'aw lo yeˬ lehˍ chehˇ-oˆ. Awˬ g'aˇ yuˬ tawˆ leh, nyi ma ha‸ hanˉ te chehˇ-oˆ. 14 Nawˬ hui hk'a te ve hk'a peu-eˬ lehˬ, ha‸ pehnˇ ve awˬ hk'aw lo te-o. 15 Awˬ viˉ awˬ nyi teˇ hpaˍ-oˬ, Saˍteˍhpanˍ ve yehˬ yaˇ k'a yaˇ hui lehˬ, Aˍhkaˍyaˆ mvuhˇ miˬ awˬ hk'aw lo Hkri‸ yaˇ awˉ lawˉ hpeh‸ la leh, Hkri‸ yaˇ hui awˬ pon kanˉ te tuˬ, yawˇ hui lehˬ a shu yawˇ ve awˬ to chiˇ a‸ piˇ taˍ ve hta‸ nawˬ hui shiˍ ve yoˬ. 16 Nawˬ hui lehˬ, chi hk'e ve chaw hui awˬ hawˉ lo maˇ k'oˆ, nawˬ hui awˬ hk'aw lo ga piˇ leh kanˉ g'aˇ hte‸ te chehˇ ve chaw teˇ g'aˇ le le awˬ hawˉ lo maˇ k'oˆ, hk'a deh‸ chehˇ tuˬ ngaˬ nawˬ hui hta‸ lawˬ hkawˉ ve yoˬ. 17 Saˍteˍhpanˍ, Hpawˍtuˇnaˆ leh Aˍhkaˍyaˍkuˆ hui gaˬ la ve pa taw, ngaˬ ha lehˬ jaˇ ve yoˬ. Awˬ lawn k'o, ngaˬ nawˬ hui hta‸ maˇ g'a mawˬ htawˇ, yawˇ hui hta‸ g'a mawˬ ve pa taw ngaˬ nyi ma sha la ve yoˬ. 18 Yawˇ hui lehˬ, ngaˬ ve nyi ma leh nawˬ hui ve nyi ma hta‸ dawˇ sha la piˇ ve yoˬ. Chi hk'e ve chaw teˇ hpaˍ hta‸ hk'a deh‸ yawˆ yan-o. 19 Aˍsiˆ mvuhˇ miˬ awˬ hk'aw lo Hkri‸ yaˇ awˬ moˍ teˇ hpaˍ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Aˍkuˉlaˆ leh Piˇkiˇlaˆ ka‸, yawˇ hui ve yehˬ hk'aw hpawnˬ da‸ ve Hkri‸ yaˇ awˬ moˍ ka‸, Jawˇ mawˇ Yeˍsuˆ awˬ hk'aw lo nawˬ hui hta‸ dawˇ nawˇ jaˇ ve yoˬ teh‸, teˇ geh tawˇ shanˍ feu laˇ ve yoˬ. 20 Awˬ viˉ awˬ nyi hk'a peu-eˬ nawˬ hui hta‸ dawˇ nawˇ ve yoˬ teh‸ tawˇ shanˍ feu laˇ ve yoˬ. Nawˬ hui teˇ g'aˇ leh teˇ g'aˇ da‸ ve kehˬ ve awˬ hk'aw lo boˆ nu da‸ leh la‸ sheh caˉ da‸-o‸. 21 Ngaˬ Pawˇlu‸ lehˬ, nawˬ hui hta‸ dawˇ nawˇ ve awˬ hk'aw lo tawˇ chi teˇ hkawˇ ngaˬ awˬ to nawˬ hui hta‸ bvuh‸ laˇ ve yoˬ. 22 Chaw teˇ g'aˇ g'aˇ Jawˇ mawˇ Yeˍsuˆ hta‸ maˇ ha‸ ve k'o, hkeu ve hta‸ hkanˍ piˇ lawˬ-o‸. Ngaˬ hui ve Jawˇ mawˇ laˬ chehˇ ve yoˬ. 23 Jawˇ mawˇ Yeˍsuˆ ve awˬ bon awˬ shinˉ nawˬ hui geh cawˬ piˇ-oˆ. 24 Ngaˬ ve ha‸ pehnˇ ve teˇ ceuˬ lehˬ, Yeˍsuˆ Hkri‸ awˬ hk'aw lo nawˬ hui hk'a peu-eˬ geh cawˬ piˇ-oˆ.

2 Kawˇrenˍhtuˆ 1

1 G'uiˬ sha ve a loˍ cawˇ ve hta‸ pa taw Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ lehˬ, Kawˇrenˍhtuˆ venˇ hk'aw lo chehˇ ve G'uiˬ sha ve Hkri‸ yaˇ awˬ moˍ leh, Aˍhkaˍyaˆ mvuhˇ miˬ hk'a peu-eˬ awˬ hk'aw lo chehˇ ve Hkri‸ yaˇ hk'a peu-eˬ hta‸, awˬ viˉ awˬ nyi Tiˆmoˉseˍ ngaˬ huiˉ maˬ teˇ geh li‸ chi teˇ k'oˆ bvuh‸ laˇ ve yoˬ. 2 Ngaˬ hui ve Awˬ pa G'uiˬ sha leh Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 3 Ngaˬ hui ve Jawˇ mawˇ Yeˍsuˆ Hkri‸ ve Awˬ pa G'uiˬ sha hta‸ chiˇ mvuh-o. Yawˇ lehˬ ha k'aˉ puiˉ ve Awˬ pa hpeh‸ leh, dawˇ sha gaˇ sha tuˬ hk'a peu-eˬ piˇ shehˍ hpaˇ G'uiˬ sha hpeh‸ ve yoˬ. 4 Ngaˬ hui g'a tu‸ g'a hkanˍ ve hk'a peu-eˬ awˬ hk'aw lo yawˇ ngaˬ hui hta‸ dawˇ sha la piˇ ve yoˬ. Hk'e te leh, G'uiˬ sha ngaˬ hui hta‸ dawˇ sha la piˇ ve hk'a shuˍ shuˍ, tu‸ ve hkanˍ ve teˇ ceuˬ le le g'a hkanˍ ve chaw hui hta‸ ngaˬ hui htawˇ dawˇ sha la piˇ hpeh‸ ve yoˬ. 5 Awˬ lawn k'o, Hkri‸ g'a tu‸ g'a hkanˍ ve teˇ hpaˍ ngaˬ hui awˬ hk'aw lo maˇ la ve hk'e, Hkri‸ hta‸ pa taw dawˇ sha gaˇ sha ve teˇ ceuˬ htawˇ ngaˬ hui awˬ hk'aw lo maˇ la ve yoˬ. 6 Hk'e te leh, ngaˬ hui tu‸ ve hkanˍ ve hta‸ g'a hkanˍ ve k'o, nawˬ hui awˬ pon dawˇ sha gaˇ sha ve awˬ ceuˬ leh htaiˍ hk'aw‸ ve awˬ ceuˬ hpeh‸ ve yoˬ. Ngaˬ hui dawˇ sha gaˇ sha ve k'o, nawˬ hui awˬ pon dawˇ sha gaˇ sha ve awˬ ceuˬ hpeh‸ ve yoˬ. Ngaˬ hui g'a tu‸ g'a hkanˍ ve teˇ hpaˍ hta‸ nawˬ hui htawˇ g'a hkanˍ ve teˇ yanˇ, nawˬ hui yeunˇ hkanˍ ve k'o, dawˇ sha gaˇ sha ve chi hta‸ nawˬ hui g'a tuˬ yoˬ. 7 Nawˬ hui awˬ pon ngaˬ hui dawˇ law ve teˇ ceuˬ lehˬ yeˬ chehˇ ve yoˬ. Awˬ lawn k'o, ngaˬ hui ve tu‸ ve hkanˍ ve teˇ hpaˍ hta‸ nawˬ hui g'a hkanˍ ve hk'e, ngaˬ hui ve dawˇ sha gaˇ sha ve hta‸ htawˇ nawˬ hui g'a tuˬ yoˬ teh‸ ngaˬ hui shiˍ ve yoˬ. 8 Awˬ viˉ awˬ nyi teˇ hpaˍ-oˬ, Aˍsiˆ mvuhˇ miˬ awˬ hk'aw lo ngaˬ hui g'a hkanˍ peuˬ ve tu‸ ve hkanˍ ve teˇ hpaˍ awˬ lawn nawˬ hui hta‸ shiˍ piˇ gaˇ ve yoˬ. Ngaˬ hui a sha‸ g'a ponˬ tuˬ ve hta‸ maˇ dawˇ htaˇ hk'a gaˬ, ngaˬ hui hkanˍ maˇ g'aˇ ve tu‸ jaˇ hkanˍ jaˇ ve teˇ hpaˍ ngaˬ hui hta‸ nyiˉ tiˍ taˍ ve yoˬ. 9 Ngaˬ hui g'a suh tuˬ yoˬ teh‸, suhˉ taˆ ve hta‸ ngaˬ hui g'a hkanˍ ve hk'e yoˬ. Ya‸ hk'aˇ ngaˬ hui lehˬ, ngaˬ hui awˬ to hta‸ g'aˇ maˇ va leh, suh taˍ ve chaw teˇ hpaˍ hta‸ k'aw‸ te‸ tu la piˇ shehˍ hpaˇ G'uiˬ sha hta‸ ceh tiˉ g'aˇ va tuˬ, chi hk'e hpeh‸ la ve yoˬ. 10 Yawˇ lehˬ, chi taw taw uiˍ jaˇ ve suh ve teˇ ceuˬ awˬ hk'aw lo ngaˬ hui hta‸ ponˬ laˇ peuˬ leh k'aw‸ ponˬ laˇ tuˬ sheˍ ve yoˬ. Yawˇ ngaˬ hui hta‸ k'aw‸ ponˬ laˇ tuˬ sheˍ ve hta‸ htawˇ, ngaˬ hui yawˇ hta‸ dawˇ law chehˇ ve yoˬ. 11 Nawˬ hui htawˇ, bon ga lawˬ laˇ-oˆ. Oˇ hk'e te ve k'o, chaw laiˉ g'aˇ bon lawˬ ve hta‸ pa taw ngaˬ hui g'a ve awˬ bon teˇ hpaˍ awˬ pon, chaw laiˉ g'aˇ G'uiˬ sha hta‸ chiˇ mvuh tuˬ yoˬ. 12 Ngaˬ hui nyi ma uiˍ kuiˬ lehˬ chi hk'e yoˬ. Miˬ guiˬ yaˇ mehˆ g'uˇ suhˍ maˇ k'oˆ, leuˉ leh nawˬ hui mehˆ g'uˇ suhˍ maˇ k'oˆ, G'uiˬ sha pe‸ laˇ ve da‸ ve kehˬ ve leh hteˇ ve cawˇ ve awˬ hk'aw lo ngaˬ hui te ve yoˬ teh‸, ngaˬ hui ve shiˍ puiˉ ve nyi ma shaˉ hkiˆ hkanˍ ve yoˬ. Ngaˬ hui chi hk'e te ve lehˬ, miˬ guiˬ ve cuˇ yiˍ hta‸ g'aˇ va ve maˇ heˆ. G'uiˬ sha ve awˬ bon hta‸ g'aˇ va ve yoˬ. 13 Nawˬ hui g'aw g'a leh shiˍ g'a ve awˬ ceuˬ ceh tiˉ ngaˬ hui nawˬ hui hta‸ bvuh‸ laˇ ve yoˬ. 14 Nawˬ hui hk'a cawˇ cawˇ shiˍ taˍ peuˬ ve hk'e, hk'a biˇ shiˍ la tuˬ ngaˬ dawˇ law chehˇ ve yoˬ. Nawˬ hui oˇ hk'e shiˍ la ve k'o, ngaˬ hui ve Jawˇ mawˇ Yeˍsuˆ ve awˬ nyi awˬ hk'aw lo nawˬ hui hta‸ pa taw ngaˬ hui nyi ma uiˍ kuiˬ cawˬ ve hk'e, nawˬ hui htawˇ ngaˬ hui hta‸ pa taw nyi ma uiˍ kuiˬ cawˬ tuˬ yoˬ. 15 Ngaˬ chi hta‸ hk'a deh‸ yonˍ ve pa taw, nawˬ hui nyiˇ pawˆ teˇ pawˆ g'a k'aw‸ ha lehˬ tuˬ ngaˬ nawˬ hui geh awˉ lawˉ laˬ tuˬ yoˬ teh‸, dawˇ taˍ ve yoˬ. 16 Ngaˬ Maˍkeˍdawˇniˆ mvuhˇ miˬ lo k'ai ve teˇ yanˇ nawˬ hui geh ca guiˇ la taˉ leh, Maˍkeˍdawˇniˆ mvuhˇ miˬ lo k'aw‸ la ve teˇ yanˇ nawˬ hui geh ca k'aw‸ guiˇ la leh, nawˬ hui ngaˬ hta‸ Yuˇda‸ mvuhˇ miˬ hpawˇ lo shiˍ k'oˬ laˇ tuˬ ve hta‸ htawˇ ngaˬ dawˇ taˍ ve yoˬ. 17 Ngaˬ chi hk'e dawˇ taˍ ve teˇ yanˇ, ngaˬ lehˬ htawˇ dawˇ nawˬ dawˇ te ve laˇ. Maˇ heˆ k'o, miˬ guiˬ yaˇ teˇ hpaˍ te ve hk'e, yoˬ ka‸ maˇ heˆ ka‸ teˇ pawˆ tiˉ ngaˬ k'oˆ ve laˇ. 18 G'uiˬ sha ka ti‸ yeˬ ve hk'e, ngaˬ hui nawˬ hui hta‸ k'oˆ laˇ ve tawˇ hkawˇ lehˬ, yoˬ ka‸ maˇ heˆ ka‸ teˇ pawˆ tiˉ k'oˆ ve maˇ heˆ. 19 Awˬ lawn k'o, Siˍlaˍnuˆ, Tiˆmoˉseˍ, ngaˬ hui teˇ hpaˍ nawˬ hui hta‸ k'aoˍ maˍ laˇ ve G'uiˬ sha ve Yaˇ hpu Yeˍsuˆ Hkri‸ lehˬ, yoˬ ka‸ maˇ heˆ ka‸ teˇ pawˆ tiˉ hpeh‸ ve maˇ heˆ. Yawˇ awˬ hk'aw lo yoˬ ceh tiˉ hpeh‸ ve yoˬ. 20 G'uiˬ sha ve ka ti‸ tawˇ hkawˇ hk'a peu-eˬ lehˬ, yawˇ awˬ hk'aw lo yoˬ ceh tiˉ hpeh‸ ve yoˬ. Hk'e te leh, ngaˬ hui G'uiˬ sha hta‸ chiˇ uiˍ chiˇ mvuh ve teˇ yanˇ, Yeˍsuˆ hta‸ pa taw ngaˬ hui A menˬ teh‸ k'oˆ ve yoˬ. 21 Nawˬ hui geh teˇ geh ngaˬ hui hta‸ Hkri‸ awˬ hk'aw lo chehˇ yeˬ piˇ shehˍ hpaˇ leh leuˆ yuˬ laˇ shehˍ hpaˇ lehˬ, G'uiˬ sha yoˬ. 22 Yawˇ lehˬ, ngaˬ hui hk'a peu-eˬ hta‸ maiˉ taˍ leh, awˬ hk'aw‸ nawˉ awˬ shinˉ g'a tuˬ ve hta‸ shiˍ tuˬ, chi beu‸ ka‸ ngaˬ hui ve nyi ma awˬ hk'aw lo yawˇ ve Awˬ ha hpu pe‸ laˇ taˍ peuˬ. 23 Ngaˬ nawˬ hui hta‸ maˇ dawˇ haˍ piˇ lawˬ gaˇ ve pa taw, ngaˬ Kawˇrenˍhtuˆ venˇ lo maˇ laˬ ve teh‸, G'uiˬ sha shaˉ hkiˆ hkanˍ tuˬ ngaˬ ve nyi ma awˬ hk'aw lo ngaˬ yawˇ hta‸ lawˬ ve yoˬ. 24 Ngaˬ hui chi hk'e k'oˆ ve lehˬ, nawˬ hui yonˍ ve teˇ ceuˬ hta‸ ngaˬ hui uˉ peunˍ ve maˇ heˆ. Nawˬ hui g'a ha lehˬ tuˬ, ngaˬ hui nawˬ hui geh teˇ geh te ve yoˬ. Awˬ lawn k'o, nawˬ hui yonˍ ve lehˬ yeˬ chehˇ ve yoˬ.

2 Kawˇrenˍhtuˆ 2

1 Dawˇ haˍ ve awˬ hk'aw lo ngaˬ nawˬ hui geh maˇ k'aw‸ laˬ teh‸, ngaˬ dawˇ cheˆ taˍ peuˬ. 2 Awˬ lawn k'o, ngaˬ nawˬ hui hta‸ dawˇ haˍ piˇ lawˬ ve k'o, a shu ngaˬ hta‸ ha lehˬ piˇ lawˬ tuˬ le. Ngaˬ dawˇ haˍ piˇ lawˬ ve chaw ceh tiˉ ngaˬ hta‸ ha lehˬ piˇ lawˬ hpeh‸ ve yoˬ. 3 Chi hk'oˆ ka‸ ngaˬ ha lehˬ ve teˇ ceuˬ lehˬ, nawˬ hui hk'a peu-eˬ awˬ pon ha lehˬ ve teˇ ceuˬ hpeh‸ ve yoˬ teh‸, nawˬ hui hk'a peu-eˬ nyi ma cawˬ ve hta‸ ngaˬ shiˍ ve pa taw, ngaˬ gaˬ la ve teˇ yanˇ, ngaˬ hta‸ ha lehˬ piˇ lawˬ cawˇ ve chaw hui lehˬ ngaˬ hta‸ maˇ g'a dawˇ haˍ piˇ lawˬ tuˬ, ngaˬ nawˬ hui hta‸ li‸ bvuh‸ laˇ peuˬ ve yoˬ. 4 Awˬ lawn k'o, tu‸ ve hkanˍ ve, nyi ma dawˇ haˍ jaˇ ve leh, mehˆ g'uiˬ maˇ maˇ ya‸ la ve awˬ hk'aw lo ngaˬ nawˬ hui hta‸ li‸ bvuh‸ laˇ peuˬ ve yoˬ. Nawˬ hui g'a dawˇ haˍ tuˬ awˬ pon maˇ heˆ. Ngaˬ nawˬ hui hta‸ hk'aˬ ma ha‸ jaˇ ve nawˬ hui shiˍ tuˬ awˬ pon ngaˬ li‸ bvuh‸ laˇ ve yoˬ. 5 Chaw teˇ g'aˇ g'aˇ, yawˇ shu hta‸ dawˇ haˍ piˇ lawˬ ve k'o, ngaˬ hta‸ dawˇ haˍ piˇ lawˬ ve maˇ heˆ. Nawˬ hui hk'a peu-eˬ hta‸ hk'a cawˇ cawˇ dawˇ haˍ piˇ lawˬ ve yoˬ. (Ngaˬ chi hk'e k'oˆ ve lehˬ k'oˆ ponˬ k'oˆ leuˉ ve teˇ ceuˬ ngaˬ maˇ te gaˇ.) 6 Oˇ hk'e ve chaw hta‸ nawˬ hui maˇ-awˍ ve chi hk'e ciˍ yanˍ piˇ ve lehˬ law‸ peuˬ. 7 Dawˇ haˍ jaˇ ve awˬ hk'aw lo yawˇ maˇ g'a gaˬ tuˬ, yawˇ ve venˇ baˆ hta‸ hpehˇ piˇ cawˇ leh, yawˇ hta‸ k'aw‸ dawˇ sha la piˇ cawˇ ve yoˬ. 8 Hk'e te leh, nawˬ hui yawˇ hta‸ awˬ tehˬ awˬ na ha‸ ve yoˬ teh‸ hk'a deh‸ shiˍ piˇ tuˬ ngaˬ nawˬ hui hta‸ lawˬ hkawˉ ve yoˬ. 9 Chi hk'oˆ ka‸, teˇ ceuˬ le le awˬ hk'aw lo nawˬ hui na yuˬ chehˇ ve leh naˍ teh‸ ngaˬ g'a shiˍ tuˬ, nawˬ hui hta‸ lawˇ nyi ve awˬ hk'aw lo ngaˬ li‸ bvuh‸ laˇ peuˬ ve yoˬ. 10 Chaw teˇ g'aˇ g'aˇ ve venˇ baˆ hta‸ nawˬ hui hpehˇ piˇ ve k'o, ngaˬ htawˇ yawˇ ve venˇ baˆ hta‸ hpehˇ piˇ ve yoˬ. Awˬ lawn k'o, venˇ baˆ teˇ ceuˬ ceuˬ hta‸ ngaˬ hpehˇ hk'a ve k'o, nawˬ hui awˬ pon Hkri‸ mehˆ g'uˇ suhˍ ngaˬ hpehˇ hk'a ve yoˬ. 11 Hk'e maˇ heˆ k'o, Saˍtanˍ lehˬ ngaˬ hui hta‸ g'aˇ tuˬ yoˬ. Awˬ lawn k'o, yawˇ ve dawˇ hk'aˇ hta‸ ngaˬ hui shiˍ taˍ ve yoˬ. 12 Chi hk'oˆ ka‸, Hkri‸ ve ha lehˬ ve bon hkawˇ maˍ piˇ tuˬ Taˍroˇaˆ venˇ lo ngaˬ gaˬ ve teˇ yanˇ, Jawˇ mawˇ G'uiˬ sha ngaˬ awˬ pon yehˬ miˉ hpaw laˇ ve yoˬ. 13 Ya‸ hk'aˇ, ngaˬ ve awˬ nyi paˍ Tiˇtuˆ hta‸ maˇ g'a mawˬ ve pa taw, ngaˬ nyi ma maˇ sha ve yoˬ. Hk'e te leh, ngaˬ Taˍroˇaˆ chaw teˇ hpaˍ hta‸ hpaˆ da‸ taˉ leh, Maˍkeˍdawˇniˆ mvuhˇ miˬ lo k'ai ve yoˬ. 14 Ya‸ hk'aˇ, ngaˬ hui G'uiˬ sha hta‸ chiˇ mvuh ve yoˬ. Ngaˬ hui g'aˇ shehˍ hpaˇ hpeh‸ la tuˬ, Hkri‸ awˬ hk'aw lo yawˇ ngaˬ hui hta‸ hk'aˬ htaˆ ka‸ sheh k'ai laˇ leh, shu yawˇ hta‸ g'a shiˍ tuˬ ve awˬ shaˉ hawnˉve teˇ ceuˬ teˇ kaˬ le le lo zuhˇ k'ai piˇ lawˬ tuˬ, yawˇ ngaˬ hui hta‸ cuˇ chehˇ ve yoˬ. 15 Awˬ lawn k'o, ngaˬ hui lehˬ htaiˍ hk'aw‸ ve hta‸ g'a ve chaw hui awˬ hk'aw lo maˇ k'oˆ, luˬ k'ai sheˆ k'ai chehˇ ve chaw teˇ hpaˍ awˬ hk'aw lo maˇ k'oˆ, G'uiˬ sha mehˆ g'uˇ suhˍ Hkri‸ ve awˬ shaˉ hawnˉ ve teˇ ceuˬ hpeh‸ ve yoˬ. 16 Luˬ k'ai sheˆ k'ai chehˇ ve chaw hui awˬ pon, suh htaˇ hk'a gaˬ suh ve awˬ shaˉ hpeh‸ leh, htaiˍ hk'aw‸ ve hta‸ g'a ve chaw hui awˬ pon co ha te‸ htaˇ hk'a gaˬ te‸ ve awˬ shaˉ hpeh‸ ve yoˬ. Chi teˇ hpaˍ hta‸ a shu teˇ g'aˇ te hpeh‸ ve le. 17 Chaw laiˉ g'aˇ G'uiˬ sha ve tawˇ hkawˇ maˍ piˇ ve teˇ yanˇ, awˬ yawˬ g'a tuˬ laiˉ ceuˬ hkaw‸ da‸ lehmaˍ piˇ ve yoˬ. Ngaˬ hui lehˬ, oˇ hk'e ve chaw hpeh‸ ve maˇ heˆ. G'uiˬ sha maˍ tcuh laˇ ve hk'e ceh, G'uiˬ sha mehˆ g'uˇ suhˍ Hkri‸ awˬ hk'aw lo ngaˬ hui nyi ma pfuhˇ leh hteˇ lehˍ maˍ ve yoˬ.

2 Kawˇrenˍhtuˆ 3

1 Ngaˬ hui lehˬ, ngaˬ hui awˬ to awˬ pon shaˉ hkiˆ k'aw‸ hkanˍ ve teˇ ceuˬ hta‸ te ve laˇ. Maˇ heˆ k'o, chaw teˇ hpaˍ hpaˍ hk'a shuˍ shuˍ nawˬ hui awˬ pon shaˉ hkiˆ hkanˍ ve li‸ bvuh‸ laˇ tuˬ maˇ k'oˆ, nawˬ hui geh shaˉ hkiˆ hkanˍ ve li‸ hta‸ g'a tuˬ maˇ k'oˆ, ngaˬ hui loˍ ve laˇ. 2 Nawˬ hui lehˬ ngaˬ hui ve shaˉ hkiˆ hkanˍ ve li‸ hpeh‸ ve yoˬ. Li‸ chi lehˬ, ngaˬ hui ve nyi ma shiˍ awˬ hk'oˆ lo bvuh‸ taˍ leh, chaw hk'a peu-eˬ shiˍ leh g'aw g'a ve li‸ hpeh‸ ve yoˬ. 3 Nawˬ hui lehˬ, Hkri‸ ngaˬ hui hta‸ cuˇ leh bvuh‸ taˍ ve li‸ hpeh‸ ve hta‸ hk'a tawˍ lehˆ hpeu‸ maˍ ve yoˬ. Naˬ meu‸ g'uiˬ bvuh‸ taˍ ve li‸ hpeh‸ ve maˇ heˆ. Haˉ pui baˉ awˬ hk'oˆ bvuh‸ taˍ ve ka‸ maˇ heˆ. Te‸ chehˇ ve G'uiˬ sha ve Awˬ ha hpu lehˬ, chaw yaˇ ve nyi ma awˬ hk'oˆ hta‸ bvuh‸ taˍ ve li‸ hpeh‸ ve yoˬ. 4 G'uiˬ sha mehˆ g'uˇ suhˍ Hkri‸ awˬ hk'aw lo ngaˬ hui chi hk'e yonˍ tehˬ ve yoˬ. 5 Ngaˬ hui lehˬ, ngaˬ hui ve awˬ g'aˇ hta‸ cuˇ leh teˇ ceuˬ ceuˬ te hpeh‸ ve hta‸ k'oˆ ve maˇ heˆ. G'uiˬ sha ve awˬ g'aˇ hta‸ ceh tiˉ ngaˬ hui cuˇ ve yoˬ. 6 Ka ti‸ shaˉ caˆ awˬ suhˉ awˬ pon kanˉ te puiˉ te g'a tuˬ, G'uiˬ sha ngaˬ hui hta‸ awˬ g'aˇ awˬ shaˉ leh cuˇ yiˍ maˍ yiˍ pe‸ laˇ ve yoˬ. Ka ti‸ shaˉ caˆ chi ve lehˬ, li‸ mehˆ hta‸ caˉ da‸ ve maˇ heˆ. Awˬ ha hpu hta‸ caˉ da‸ ve yoˬ. Awˬ lawn k'o, li‸ mehˆ lehˬ tiˇ pehˍ shehˍ hpaˇ hpeh‸ ve yoˬ. Ya‸ hk'aˇ, Awˬ ha hpu lehˬ co ha te‸ la piˇ shehˍ hpaˇ hpeh‸ ve yoˬ. 7 Haˉ pui baˉ awˬ hk'oˆ hta‸ htawˆ bvuh‸ taˍ ve, suh piˇ lawˬ puiˉ ve awˬ liˇ lehˬ, awˬ me‸ awˬ hponˇ uiˍ jaˇ ve awˬ hk'aw lo tawˆ la ve yoˬ. Oˇ htaˇ, Moˉseˍ ve mehˆ hpfuhˇ lo ba tawˆ la chehˇ ve awˬ me‸ awˬ hponˇ lehˬ, shaˬ te shaˬ mehˉ k'ai chehˇ ve htawˇ, Iˉsaˍreˍlaˆ chaw hui yawˇ ve mehˆ hpfuhˇ hta‸ nyi maˇ hpeh‸ htaˇ hk'a gaˬ awˬ me‸ awˬ hponˇ ba tawˆ la ve yoˬ. 8 Hk'e te k'o, Awˬ ha hpu hta‸ caˉ da‸ ve awˬ liˇ lehˬ, chi a‸ kehˉ leuˉ leh awˬ me‸ awˬ hponˇ hk'aˬ ma uiˍ tuˬ ve le. 9 Awˬ lawn k'o, ciˍ yanˍ tuˬ suhˉ taˆ ve awˬ liˇ gaˬ la ve awˬ hk'aw lo, awˬ me‸ awˬ hponˇ cawˬ ve k'o, hteˇ ve cawˇ ve awˬ liˇ gaˬ la ve awˬ hk'aw lo, leuˉ leh awˬ me‸ awˬ hponˇ cawˬ tuˬ yoˬ. 10 Awˬ hk'aw‸ nawˉ tawˆ la ve awˬ me‸ awˬ hponˇ lehˬ, uiˍ jaˇ da‸ jaˇ ve pa taw, awˉ lawˉ cawˬ taˍ ve awˬ me‸ awˬ hponˇ mehˉ k'ai ve yoˬ. 11 Awˬ lawn k'o, mehˉ k'ai chehˇ ve awˬ ceuˬ lehˬ, awˬ me‸ awˬ hponˇ cawˬ ve awˬ hk'aw lo gaˬ la ve k'o, yeˬ chehˇ ve awˬ ceuˬ lehˬ, awˬ me‸ awˬ hponˇ leuˉ leh cawˬ ve yoˬ. 12 Hk'e te leh, ngaˬ hui dawˇ law kuiˬ chi hk'e cawˬ ve pa taw, nyi ma ha‸ hanˉ ve awˬ hk'aw lo ngaˬ hui hk'a tawˍ lehˆ k'aoˍ maˍ laˇ ve yoˬ. 13 Mehˉ k'ai chehˇ ve awˬ me‸ awˬ hponˇ hta‸ awˬ leh hk'a gaˬ Iˉsaˍreˍlaˆ chaw teˇ hpaˍ maˇ g'a nyi tuˬ, Moˉseˍ lehˬ yawˇ ve mehˆ hpfuhˇ hta‸ hpa beh taˍ ve yoˬ. Ya‸ hk'aˇ, ngaˬ lehˬ oˇ hk'e maˇ te. 14 Yawˇ hui nyi ma heh leh maˇ dawˇ pawnˍ puiˉ ve pa taw, ya‸ nyi hk'a gaˬ ka ti‸ shaˉ caˆ awˬ piˍ hta‸ yawˇ hui g'aw ve teˇ yanˇ, beh taˍ ve hpa maˇ yehˬ baˬ sheˍ ve yoˬ. Awˬ lawn k'o, Hkri‸ awˬ hk'aw lo ceh tiˉ hpa oˇ ve hta‸ yehˬ baˬ hpeh‸ ve yoˬ. 15 Ya‸ nyi hk'a gaˬ, hk'aˬ ve teˇ yanˇ maˇ k'oˆ, Moˉseˍ ve li‸ hta‸ g'aw ve teˇ yanˇ, yawˇ hui ve nyi ma hta‸ hpa beh taˍ sheˍ ve yoˬ. 16 Ya‸ hk'aˇ, hk'aˬ ve teˇ yanˇ maˇ k'oˆ, Jawˇ mawˇ Yeˍsuˆ geh hpfuhˆ k'aw‸ la ve k'o, beh taˍ ve hpa oˇ ve hta‸ yehˬ baˬ tuˬ yoˬ. 17 Jawˇ mawˇ Yeˍsuˆ lehˬ Awˬ ha hpu hpeh‸ leh, Jawˇ mawˇ Yeˍsuˆ ve Awˬ ha hpu chehˇ ve teˇ kaˬ lo ponˬ ve teˇ ceuˬ cawˬ ve yoˬ. 18 Ngaˬ hui hk'a peu-eˬ lehˬ, mehˆ hpfuhˇ maˇ beh leh, mehˆ g'euˆ hk'a shuˍ shuˍ Jawˇ mawˇ Yeˍsuˆ ve awˬ me‸ awˬ hponˇ hta‸ ngaˬ hui k'aw‸ ba piˇ chehˇ ve yoˬ. Awˬ ha hpu hpeh‸ ve Jawˇ mawˇ Yeˍsuˆ hta‸ pa taw, ngaˬ hui lehˬ awˬ me‸ awˬ hponˇ shaˬ te shaˬ maˇ la leh yawˇ hk'e hpeh‸ la chehˇ ve yoˬ.

2 Kawˇrenˍhtuˆ 4

1 G'uiˬ sha ha k'aˉ laˇ ve pa taw, kanˉ chi ve hta‸ ngaˬ hui g'a ve yoˬ. Hk'e te leh, ngaˬ hui nyi ma maˇ luˬ, 2 Ngaˬ hui lehˬ, faˉ taˍ ve awˬ ceuˬ leh ya‸ taw tuˬ ve awˬ ceuˬ teˇ hpaˍ hta‸ baˬ taˉ ve yoˬ. Heˍ ve maˇ k'oˆ, G'uiˬ sha ve tawˇ hkawˇ hta‸ yuˬ hpfuhˆ ve teˇ ceuˬ maˇ k'oˆ, ngaˬ hui maˇ te. Ya‸ hk'aˇ, hteˇ ve cawˇ ve teˇ ceuˬ hta‸ hk'a tawˍ lehˆ hpeu‸ maˍ piˇ ve awˬ hk'aw lo, G'uiˬ sha mehˆ g'uˇ suhˍ chaw hk'a peu-eˬ ve shiˍ puiˉ ve nyi ma hta‸ cawˇ tuˬ ngaˬ hui te ve yoˬ. 3 Ngaˬ hui maˍ chehˇ ve ha lehˬ ve bon hkawˇ lehˬ beh taˍ ve k'o, luˬ k'ai sheˆ k'ai ve chaw hui awˬ pon ceh tiˉ beh taˍ ve yoˬ. 4 G'uiˬ sha ve awˬ ho‸ awˬ han hpeh‸ ve Hkri‸ ve awˬ me‸ awˬ hponˇ hta‸ caˉ da‸ ve ha lehˬ ve bon hkawˇ awˬ g'euˆ lehˬ, maˇ yonˍ ve chaw hui awˬ hk'aw lo maˇ g'a ba tuˬ, chi miˬ guiˬ ve g'uiˬ sha lehˬ yawˇ hui ve nyi ma hta‸ naˆ ho‸ piˇ lawˬ ve yoˬ. 5 Awˬ lawn k'o, ngaˬ hui lehˬ ngaˬ hui awˬ to awˬ lawn bon maˍ ve maˇ heˆ. Yeˍsuˆ hkri‸ lehˬ Jawˇ mawˇ hpeh‸ ve awˬ lawn leh, ngaˬ hui Yeˍsuˆ awˬ pon nawˬ hui ve awˬ ceˬ hpeh‸ ve awˬ lawn ngaˬ hui bon maˍ ve yoˬ. 6 Naˆ ho‸ ve awˬ hk'aw lo awˬ g'euˆ ba tawˆ la tuˬ yoˬ teh‸ k'oˆ ve G'uiˬ sha lehˬ, ngaˬ hui ve nyi ma awˬ hk'aw lo awˬ g'euˆ ba laˇ peuˬ. Chi hta‸ pa taw, Hkri‸ ve mehˆ hpfuhˇ awˬ hk'aw lo cawˬ ve G'uiˬ sha ve awˬ me‸ awˬ hponˇ hta‸ shu g'a shiˍ tuˬ, ngaˬ hui awˬ g'euˆ ba piˇ chehˇ ve yoˬ. 7 Ya‸ hk'aˇ, uiˍ jaˇ da‸ jaˇ ve kanˇ paˆ chi lehˬ, ngaˬ hui lo tawˆ la ve maˇ heˆ. G'uiˬ sha geh lo tawˆ la ve yoˬ teh‸, hpeu‸ maw piˇ tuˬ awˬ pon, awˬ hpfuhˇ hk'aˆ jaˇ ve mawˇ chi lehˬ, je‸ mu‸ hk'u awˬ hk'aw lo ngaˬ hui cawˬ taˍ ve yoˬ. 8 Ngaˬ hui lehˬ, teˇ hpawˇ le le lo nyi tiˍ taˍ laˇ ve hta‸ g'a hkanˍ ve htawˇ, hoˆ tiˍ taˍ laˇ ve maˇ heˆ. Dawˇ maˇ tawˆ ve htawˇ, dawˇ tui‸ gaˇ tui‸ htaˇ hk'a gaˬ maˇ heˆ. 9 Fawˉ mehˍ laˇ ve hta‸ g'a hkanˍ ve htawˇ, ga laˇ paˍ maˇ cawˬ ve maˇ heˆ. Shu dawˆ baˬ laˇ ve htawˇ, luˬ k'ai htaˇ hk'a gaˬ maˇ heˆ. 10 Yeˍsuˆ ve te‸ ve teˇ ceuˬ lehˬ, ngaˬ hui ve awˬ to awˬ hk'aw lo hk'a tawˍ lehˆ tawˆ la hpeh‸ tuˬ, Yeˍsuˆ ve suh ve teˇ ceuˬ hta‸ ngaˬ hui ve awˬ to awˬ hk'aw lo hk'aˬ htaˆ ka‸ pfuhˇ taˍ ve yoˬ. 11 Awˬ lawn k'o, Yeˍsuˆ ve te‸ ve teˇ ceuˬ lehˬ, ngaˬ hui ve suh puiˉ ve awˬ to awˬ hk'aw lo hk'a tawˍ lehˆ tawˆ la hpeh‸ tuˬ, ngaˬ hui te‸ chehˇ ve teˇ yanˇ, Yeˍsuˆ awˬ pon suh tuˬ hk'aˬ htaˆ ka‸ chiˇ a‸ piˇ ve hta‸ ngaˬ hui g'a hkanˍ ve yoˬ. 12 Hk'e te leh, ngaˬ hui awˬ hk'aw lo suh ve teˇ ceuˬ kanˉ te chehˇ ve yoˬ. Ya‸ hk'aˇ, nawˬ hui awˬ hk'aw lo lehˬ, te‸ ve teˇ ceuˬ kanˉ te chehˇ ve yoˬ. 13 Ngaˬ hui yonˍ ve hta‸ pa taw ngaˬ hui k'oˆ taˍ ve yoˬ teh‸, Li‸ hpu hk'aw bvuh‸ taˍ ve hk'a shuˍ shuˍ, ngaˬ hui htawˇ yonˍ ve nyi ma cawˬ ve pa taw, yonˍ ve awˬ hk'aw lo ngaˬ hui k'oˆ ve yoˬ. 14 Jawˇ mawˇ Yeˍsuˆ hta‸ k'aw‸ te‸ tu la piˇ shehˍ hpaˇ lehˬ, ngaˬ hui hta‸ htawˇ Yeˍsuˆ geh teˇ geh k'aw‸ te‸ tu la piˇ lawˬ leh, nawˬ hui geh teˇ geh yawˇ mehˆ g'uˇ suhˍ lo ngaˬ hui hta‸ chehˇ tcuh laˇ tuˬ yoˬ teh‸ ngaˬ hui shiˍ ve yoˬ. 15 Chi hk'a peu-eˬ lehˬ, nawˬ hui awˬ pon hpeh‸ ve yoˬ. Awˬ lawn k'o, G'uiˬ sha ve awˬ bon shaˬ te shaˬ maˇ la ve hk'e, shu yawˇ hta‸ shaˬ te shaˬ chiˇ mvuh ve awˬ hk'aw lo yawˇ awˬ me‸ awˬ hponˇ g'a tuˬ yoˬ. 16 Hk'e te leh, ngaˬ hui nyi ma maˇ luˬ. Ngaˬ hui lehˬ, awˬ suhˍ awˬ shaˍ hpawˇ luˬ k'ai chehˇ ve htawˇ, co ha hpawˇ lehˬ teˇ nyi peuˬ teˇ nyi awˬ suhˉ k'aw‸ hpeh‸ la chehˇ ve yoˬ. 17 Chi beu‸ g'a hkanˍ chehˇ ve i jaˇ lawˬ jaˇ ve tu‸ ve hkanˍ ve teˇ ceuˬ lehˬ, ca tehˆ nyi maˇ g'a ve uiˍ jaˇ biˇ jaˇ ve co co taiˍ taiˍ awˬ me‸ awˬ hponˇ ngaˬ hui awˬ pon te laˇ chehˇ ve yoˬ. 18 Awˬ lawn k'o, mawˬ hpeh‸ ve awˬ ceuˬ teˇ hpaˍ hta‸ ngaˬ hui nyi ve maˇ heˆ. Maˇ mawˬ hpeh‸ ve awˬ ceuˬ teˇ hpaˍ hta‸ ngaˬ hui nyi ve yoˬ. Mawˬ hpeh‸ ve awˬ ceuˬ teˇ hpaˍ lehˬ, teˇ hkui tiˉ cawˬ ve yoˬ. Ya‸ hk'aˇ, maˇ mawˬ hpeh‸ ve awˬ ceuˬ teˇ hpaˍ lehˬ, co co taiˍ taiˍ cawˬ chehˇ ve yoˬ

2 Kawˇrenˍhtuˆ 5

1 Miˬ guiˬ hk'oˆ lo ngaˬ hui chehˇ taˍ ve aˉ po k'o chi luˬ k'ai ve k'o, la‸ sheh maˇ te ve, mvuhˇ naw ma hk'oˆ lo co co taiˍ taiˍ cawˬ ve, G'uiˬ sha te taˍ ve yehˬ teˇ yehˬ cawˬ ve yoˬ teh‸ ngaˬ hui shiˍ ve yoˬ. 2 Awˬ lawn k'o, aˉ po k'o chi ve awˬ hk'aw lo ngaˬ hui hk'anˇ chehˇ leh, mvuhˇ naw ma hk'oˆ lo cawˬ ve ngaˬ hui ve yehˬ hta‸ veu‸ deh gaˇ jaˇ ve yoˬ. 3 Oˇ hk'e g'a veu‸ deh ve k'o, awˬ k'u nyi g'a chehˇ tuˬ maˇ heˆ. 4 Aˉ po k'o chi awˬ hk'aw lo ngaˬ hui chehˇ taˍ sheˍ ve teˇ yanˇ, hawˇ ve mawˇ pfuhˇ leh hk'anˇ chehˇ ve yoˬ. Veu‸ k'aˇ maˇ veu‸ deh gaˇ leh hk'anˇ chehˇ ve maˇ heˆ. Suh puiˉ ve awˬ ceuˬ hta‸ te‸ ve awˬ ceuˬ g'a hehˆ dawˬ tuˬ, veu‸ k'aˇ hta‸ ngaˬ hui veu‸ deh gaˇ ve yoˬ. 5 Chi hk'e hpeh‸ la tuˬ awˬ pon, ngaˬ hui hta‸ gu laˇ shehˍ hpaˇ lehˬ, G'uiˬ sha yoˬ. Awˬ hk'aw‸ nawˉ ngaˬ hui awˬ bon chi hta‸ g'a tuˬ yoˬ teh‸ shiˍ hpeh‸ tuˬ, yawˇ lehˬ chi beu‸ ka‸ Awˬ ha hpu pe‸ laˇ taˍ peuˬ. 6 Hk'e te leh, ngaˬ hui hk'aˬ htaˆ ka‸ nyi ma yeˬ ve yoˬ. Ngaˬ hui lehˬ, awˬ to awˬ hk'aw lo chehˇ taˍ ve teˇ yanˇ, Jawˇ mawˇ Yeˍsuˆ hta‸ hpaˆ da‸ chehˇ ve yoˬ teh‸ ngaˬ hui shiˍ ve yoˬ. 7 Awˬ lawn k'o, ngaˬ hui te k'ai chehˇ ve lehˬ mehˆ shiˍ mawˬ ve hta‸ pa taw maˇ heˆ, yonˍ ve hta‸ pa taw yoˬ. 8 Ngaˬ hui nyi ma yeˬ ve awˬ hk'aw lo, awˬ to chi hta‸ hpaˆ da‸ taˉ leh Jawˇ mawˇ Yeˍsuˆ geh leuˉ leh chehˇ gaˇ ve yoˬ. 9 Hk'e te leh, ngaˬ hui awˬ to awˬ hk'aw lo chehˇ taˍ ve maˇ k'oˆ, awˬ to hta‸ hpaˆ da‸ chehˇ ve maˇ k'oˆ, Jawˇ mawˇ G'uiˬ sha nyi ma cawˇ ve chaw hpeh‸ tuˬ ngaˬ hui coˇ caˇ leh te chehˇ ve yoˬ. 10 Awˬ lawn k'o, ngaˬ hui teˇ g'aˇ le le, a shu yawˇ awˬ to awˬ hk'aw lo chehˇ htaˇ te ve hk'e, da‸ ve maˇ k'oˆ, maˇ da‸ ve maˇ k'oˆ, g'a tuˬ awˬ pon, ngaˬ hui hk'a peu-eˬ Hkri‸ ve suhˉ jehˬ kuiˬ k'aw jaw g'uˇ suhˍ lo g'a gaˬ tuˬ yoˬ. 11 Hk'e te leh, Jawˇ mawˇ G'uiˬ sha hta‸ kawˆ ve teˇ ceuˬ hta‸ ngaˬ hui shiˍ ve pa taw, chaw yaˇ teˇ hpaˍ hta‸ g'aˇ hte‸ maˍ piˇ chehˇ ve yoˬ. Ngaˬ hui hk'aˬ hk'e ve chaw hpeh‸ ve hta‸ G'uiˬ sha hk'a tawˍ lehˆ shiˍ leh, nawˬ hui htawˇ nyi ma awˬ hk'aw lo shiˍ chehˇ ve yoˬ teh‸ ngaˬ hui dawˇ ve yoˬ. 12 Ngaˬ hui chi hk'e k'oˆ ve lehˬ, nawˬ hui mehˆ g'uˇ suhˍ ngaˬ hui awˬ to hta‸ chiˇ mvuh ve maˇ heˆ. Ya‸ hk'aˇ, chaw teˇ hpaˍ hpaˍ lehˬ nyi ma hk'aw lo hk'aˬ hk'e hpeh‸ chehˇ ve hta‸ maˇ dawˇ nyi leh awˬ hta‸ hpawˇ ceh tiˉ nyi ma uiˍ chehˇ ve yoˬ. Chaw oˇ ve teˇ hpaˍ hta‸ nawˬ hui k'aw‸ yaw hk'aw‸ hpeh‸ tuˬ, ngaˬ hui hta‸ pa taw nawˬ hui nyi ma uiˍ hpeh‸ tuˬ ve awˬ hk'aˇ maˍ laˇ ve yoˬ. 13 Awˬ lawn k'o, ngaˬ hui g'uˇ ve k'o, G'uiˬ sha awˬ pon g'uˇ ve yoˬ. Ngaˬ hui nyi ma biˇ ve k'o, nawˬ hui awˬ pon biˇ ve yoˬ. 14 Hkri‸ ve ha‸ pehnˇ ve teˇ ceuˬ lehˬ, ngaˬ hui hta‸ vawˆ taˍ leh shiˍ k'ai sheh k'ai chehˇ ve yoˬ. Awˬ lawn k'o, chaw teˇ g'aˇ lehˬ, chaw hk'a peu-eˬ awˬ pon hkanˍ suh ve pa taw, chaw hk'a peu-eˬ suh peuˬ teh‸ ngaˬ hui dawˇ cheˆ taˍ peuˬ. 15 Yawˇ lehˬ, a sha‸ te‸ chehˇ ve chaw hui a shu yawˇ awˬ to awˬ pon maˇ k'aw‸ te‸ leh, yawˇ hui awˬ pon hkanˍ suh leh k'aw‸ te‸ tu la ve awˬ shehˍ hpaˇ teˇ g'aˇ awˬ pon te‸ chehˇ tuˬ, chaw hk'a peu-eˬ awˬ pon hkanˍ suh ve yoˬ. 16 Hk'e te leh, ya‸ nyi hk'aw‸ nawˉ k'o, chaw yaˇ hui shu hta‸ shawˍ taˍ ve hk'e, ngaˬ hui lehˬ chaw teˇ g'aˇ hta‸ ka‸ maˇ shawˍ taˍ. Ponˬ laˬ htaˇ ngaˬ hui Hkri‸ hta‸ chaw yaˇ hui shawˍ taˍ ve hk'e ceh shawˍ taˍ chehˇ ve htawˇ, ya‸ nyi hk'aw‸ nawˉ k'o, yawˇ hta‸ oˇ hk'e maˇ k'aw‸ shawˍ taˍ. 17 Hk'e te leh, chaw teˇ g'aˇ Hkri‸ awˬ hk'aw lo chehˇ ve k'o, yawˇ lehˬ chaw awˬ suhˉ hpeh‸ la peuˬ, Awˬ piˍ teˇ hpaˍ mehˉ k'ai peuˬ leh, hk'a peu-eˬ awˬ suhˉ hpeh‸ la peuˬ. 18 Awˬ ceuˬ chi hk'a peu-eˬ lehˬ, G'uiˬ sha lo tawˆ la ve yoˬ. Yawˇ lehˬ, Hkri‸ awˬ hk'aw lo ngaˬ hui yawˇ hta‸ cawˇ da‸ hawˍ da‸ tuˬ te laˇ peuˬ. Chi hk'oˆ ka‸ shu yawˇ hta‸ cawˇ da‸ hawˍ da‸ la tuˬ, yawˇ ngaˬ hui hta‸ te tcuh laˇ ve yoˬ. 19 Yawˇ lehˬ Hkri‸ awˬ hk'aw lo chehˇ leh, miˬ guiˬ yaˇ yawˇ hta‸ cawˇ da‸ hawˍ da‸ la tuˬ te ve yoˬ. Yawˇ hui ve venˇ baˆ yawˇ hui awˬ hk'oˆ hta‸ yawˇ maˇ taˍ. Shu yawˇ hta‸ cawˇ da‸ hawˍ da‸ tuˬ ve awˬ lawn maˍ piˇ tuˬ, yawˇ ngaˬ hui hta‸ te tcuh laˇ ve yoˬ. 20 Hk'e te leh, ngaˬ hui Hkri‸ ve awˬ tan te shehˍ hpaˇ hpeh‸ ve yoˬ. G'uiˬ sha ngaˬ hui hta‸ cuˇ leh nawˬ hui hta‸ kuˬ yuˬ ve yoˬ. G'uiˬ sha hta‸ cawˇ da‸ hawˍ da‸ loˬ teh‸, Hkri‸ ve awˬ tan te leh ngaˬ hui nawˬ hui hta‸ lawˬ hkawˉ ve yoˬ. 21 Hkri‸ lehˬ, venˇ baˆ hta‸ maˇ shiˍ jaw htawˇ, yawˇ awˬ hk'aw lo ngaˬ hui G'uiˬ sha ve hteˇ ve cawˇ ve hpeh‸ la tuˬ, ngaˬ hui awˬ pon G'uiˬ sha yawˇ hta‸ venˇ baˆ hpeh‸ la piˇ lawˬ ve yoˬ.

2 Kawˇrenˍhtuˆ 6

1 Ngaˬ hui G'uiˬ sha geh teˇ geh kanˉ te ve awˬ hk'aw lo, nawˬ hui yawˇ ve awˬ bon hta‸ ha‸ yuˬ ve teˇ ceuˬ hk'e leˇ maˇ g'a hpeh‸ la tuˬ, ngaˬ hui nawˬ hui hta‸ lawˬ hkawˉ ve yoˬ. 2 Awˬ lawn k'o, yawˇ k'oˆ taˍ ve, Cawˇ ve awˬ yanˇ awˬ hk'aw lo ngaˬ nawˬ ve hkawˇ hta‸ na yuˬ ve yoˬ. Htaiˍ hk'aw‸ ve awˬ nyi awˬ hk'aw lo ngaˬ nawˬ hta‸ ga laˇ ve yoˬ. teh‸ k'oˆ ve yoˬ. Chi beu‸ lehˬ cawˇ ve awˬ yanˇ hpeh‸ ve yoˬ. Ya‸ nyi lehˬ htaiˍ hk'aw‸ ve awˬ nyi hpeh‸ ve yoˬ. 3 Ngaˬ hui kanˉ te ve hta‸ shu venˇ baˆ taˍ maˇ hpeh‸ tuˬ, chaw teˇ g'aˇ ka‸ hkui htiˇ poˬ tuˬ ve hta‸ ngaˬ hui a ciˉ ka‸ maˇ te. 4 Ngaˬ hui lehˬ, awˬ tehˬ awˬ na G'uiˬ sha ve kanˉ te paˍ hpeh‸ ve hta‸ shu shiˍ hpeh‸ tuˬ, teˇ ceuˬ le le awˬ hk'aw lo ngaˬ hui te ve yoˬ. G'aˇ hte‸ yeunˇ hkanˍ ve, tu‸ ve hkanˍ ve, dawˇ tui‸ gaˇ tui‸ ve, haˍ jaˇ ve, 5 dawˆ laˇ jaw‸ laˇ ve, htawnˍ hk'aw keu laˇ ve, shu duiˆ-ehˍ shaˇ-ehˍ te ve, kanˉ te hkeu‸ ve, maˇ g'a zuh‸ ve leh, meu‸ ve kaˆ ve, chi teˇ hpaˍ hta‸ g'a hkanˍ ve awˬ hk'aw lo ngaˬ hui te ve yoˬ. 6 Da‸ kehˬ ve nyi ma cawˬ ve, shiˍ puiˉ ve, dawˇ zuhˬ gaˇ zuhˬ ve, shu awˬ pon da‸ ve hta‸ te ve, da‸ ve kehˬ ve Awˬ ha hpu hta‸ cuˇ ve, awˬ tehˬ awˬ na ha‸ ve, hteˇ lehˍ cawˇ lehˍ maˍ piˇ ve, 7 G'uiˬ sha ve kanˇ paˆ hta‸ cuˇ ve, hteˇ ve cawˇ ve la‸ caˉ teˇ hpaˍ hta‸ la‸ sha paˉ la‸ mehˍ paˉ vawˆ taˍ ve awˬ hk'aw lo, 8 awˬ me‸ awˬ hponˇ g'a ve maˇ k'oˆ, shu maˇ shawˍ maˇ caˆ te laˇ ve maˇ k'oˆ, shu chiˇ mvuh laˇ ve maˇ k'oˆ, shu hk'aiˉ laˇ ve maˇ k'oˆ, ngaˬ hui te ve yoˬ. Shu hta‸ heˍ yuˬ beˬ yuˬ ve chaw hk'e, shu ngaˬ hui hta‸ shawˍ laˇ ve htawˇ, hteˇ lehˍ cawˇ lehˍ ngaˬ hui te ve yoˬ. 9 Ngaˬ hui hta‸ shu maˇ shiˍ ve chaw hk'e hpeh‸ ve htawˇ, shu hk'a peu-eˬ shiˍ ve chaw hpeh‸ ve yoˬ. Suh paˇ neˇ ve chaw hk'e hpeh‸ ve htawˇ, te‸ chehˇ ve chaw hpeh‸ ve yoˬ. Ciˍ yanˍ ve hta‸ g'a hkanˍ ve chaw hk'e hpeh‸ ve htawˇ, tiˇ pehˍ laˇ ve hta‸ maˇ g'a hkanˍ. 10 Dawˇ haˍ ve chaw hk'e hpeh‸ ve htawˇ, hk'aˬ htaˆ ka‸ ha lehˬ chehˇ ve yoˬ. Haˍ g'awˇ ve chaw hk'e hpeh‸ ve htawˇ, chaw maˇ maˇ hta‸ paw sha la piˇ ve yoˬ. Te‸ chiˉ maˇ cawˬ ve chaw hk'e hpeh‸ ve htawˇ, teˇ ceuˬ le le cawˬ ve chaw hpeh‸ ve yoˬ. 11 Kawˇrenˍhtuˆ chaw teˇ hpaˍ-oˬ, ngaˬ hui nawˬ hui hta‸ te‸ chiˉ ka‸ maˇ faˉ taˍ leh, hk'a tawˍ lehˆ hto laˇ ve yoˬ. Ngaˬ hui ve nyi ma awˬ hk'aw lo nawˬ hui hk'a peu-eˬ hta‸ ha‸ ve teˇ ceuˬ uiˍ jaˇ ve yoˬ. 12 Ngaˬ hui ve nyi ma awˬ hk'aw lo nawˬ hui hta‸ ha‸ ve teˇ ceuˬ i ve maˇ heˆ. Ya‸ hk'aˇ, nawˬ hui ngaˬ hui hta‸ ha‸ ve teˇ ceuˬ i jaˇ ve yoˬ. 13 Nawˬ hui htawˇ ngaˬ hui hta‸ k'aw‸ ha‸ laˇ-oˆ. Chi hk'e k'oˆ ve lehˬ, a shu yawˇ ve yaˇ teˇ hpaˍ hta‸ k'oˆ piˇ ve hk'e ngaˬ k'oˆ ve yoˬ. 14 Maˇ yonˍ ve chaw teˇ hpaˍ hta‸ taˇ caˉ da‸, taˇ pawnˇ da‸. Awˬ lawn k'o, hteˇ ve cawˇ ve teˇ ceuˬ lehˬ, maˇ hteˇ maˇ cawˇ ve teˇ ceuˬ hta‸ hk'aˬ hk'e te caˉ da‸ hpeh‸ tuˬ le. Awˬ g'euˆ lehˬ, naˆ ho‸ ve hta‸ hk'aˬ hk'e te awˬ chawˇ te da‸ hpeh‸ tuˬ le. 15 Hkri‸ lehˬ Beˍleˍlaˆ hta‸ hk'aˬ hk'e te cawˇ da‸ hawˍ da‸ hpeh‸ tuˬ le. Yonˍ ve chaw lehˬ, maˇ yonˍ ve chaw geh hk'aˬ hk'e te leh nyi ma teˇ shiˍ tiˉ taˍ hpeh‸ tuˬ le. 16 G'uiˬ sha ve bon yehˬ lonˉ lehˬ, shaˉ ho‸ shaˉ nanˉ teˇ hpaˍ hta‸ hk'aˬ hk'e te cawˇ da‸ hpeh‸ tuˬ le. Awˬ lawn k'o, ngaˬ hui lehˬ te‸ chehˇ ve G'uiˬ sha ve bon yehˬ lonˉ hpeh‸ ve yoˬ. G'uiˬ sha chi hk'e k'oˆ taˍ ve, Ngaˬ yawˇ hui awˬ hk'aw lo chehˇ leh, yawˇ hui geh ngaˬ te toˇ tuˬ yoˬ. Ngaˬ lehˬ yawˇ hui ve G'uiˬ sha hpeh‸ leh, yawˇ hui htawˇ ngaˬ ve chaw hpeh‸ tuˬ yoˬ. 17 Hk'e te leh, yawˇ hui awˬ hk'aw lo tawˆ la leh yawˇ hui hta‸ hpaˆ da‸ chehˇ taˍ-o‸ teh‸ Jawˇ mawˇ G'uiˬ sha k'oˆ ve yoˬ. Cha‸ chiˆ ve teˇ ceuˬ hta‸ taˇ htawˇ, Maˇ htawˇ ve k'o, ngaˬ nawˬ hui hta‸ ha‸ yuˬ laˇ tuˬ yoˬ. 18 Ngaˬ lehˬ nawˬ hui ve awˬ pa hpeh‸ leh, nawˬ hui htawˇ ngaˬ ve yaˇ paˍ yaˇ miˇ teˇ hpaˍ hpeh‸ tuˬ yoˬ teh‸, kanˇ paˆ hk'a biˇ cawˬ ve Jawˇ mawˇ G'uiˬ sha k'oˆ ve yoˬ.

2 Kawˇrenˍhtuˆ 7

1 Hk'e te leh, ha‸ ve chaw teˇ hpaˍ-oˬ, ngaˬ hui lehˬ ka ti‸ tawˇ hkawˇ chi teˇ hpaˍ hta‸ g'a taˍ ve pa taw, ngaˬ hui ve awˬ to leh nyi ma hta‸ cha‸ chiˆ tuˬ te ve teˇ ceuˬ le le hta‸ tsuhˇ baˬ leh, G'uiˬ sha hta‸ kawˆ leh yawˆ yan ve awˬ hk'aw lo, da‸ ve kehˬ ve teˇ ceuˬ hta‸ biˇ la piˇ-a veuˬ. 2 Nyi ma awˬ hk'aw lo ngaˬ hui hta‸ ha‸ yuˬ laˇ-oˆ. Ngaˬ hui lehˬ, chaw teˇ g'aˇ hta‸ ka‸ maˇ te ya‸, teˇ g'aˇ hta‸ ka‸ luˬ k'ai sheˆ k'ai tuˬ maˇ te leh, teˇ g'aˇ hta‸ ka‸ heˍ caˇ ve maˇ te. 3 Ngaˬ nawˬ hui awˬ hk'oˆ hta‸ venˇ baˆ taˍ leh chi hk'e k'oˆ ve maˇ heˆ. Awˬ lawn k'o, suh k'o teˇ geh suh tuˬ, te‸ k'o teˇ geh te‸ tuˬ, ngaˬ hui ve nyi ma hk'aw lo nawˬ hui hta‸ ha‸ ve yoˬ teh‸, ponˬ laˬ htaˇ ka‸ ngaˬ chi hk'e k'oˆ taˍ ve yoˬ. 4 Nawˬ hui hta‸ ngaˬ hk'a deh‸ yonˍ ve yoˬ. Nawˬ hui hta‸ pa taw, ngaˬ nyi ma uiˍ kuiˬ maˇ maˇ cawˬ ve yoˬ. Dawˇ sha gaˇ sha ve awˬ ceuˬ htawˇ ngaˬ hk'a biˇ cawˬ ve yoˬ. Ngaˬ hui tu‸ ve hkanˍ ve hta‸ hpuˇ da‸ ve awˬ hk'aw lo, ca k'oˆ maˇ peuˬ htaˇ hk'a gaˬ ngaˬ ha lehˬ tuˬ cawˬ maˇ jaˇ ve yoˬ. 5 Awˬ lawn k'o, Maˍkeˍdawˇniˆ mvuhˇ miˬ lo ngaˬ hui gaˬ la ve teˇ yanˇ, ngaˬ hui ve awˬ to g'aˇ jehˇ kuiˬ a ciˉ ka‸ maˇ cawˬ. Teˇ ceuˬ le le awˬ hk'aw lo tu‸ ve hkanˍ ve hta‸ ngaˬ hui g'a hkanˍ ve yoˬ. Awˬ baˬ hpawˇ lo bawˆ da‸ tuˬ cawˬ leh, awˬ hk'aw hpawˇ lo kawˆ tuˬ cawˬ ve yoˬ. 6 Ya‸ hk'aˇ, nyi ma luˬ ve chaw teˇ hpaˍ hta‸ dawˇ sha piˇ shehˍ hpaˇ G'uiˬ sha lehˬ, Tiˇtuˆ gaˬ la ve awˬ hk'aw lo ngaˬ hui hta‸ dawˇ sha la piˇ ve yoˬ. 7 Tiˇtuˆ gaˬ la ve pa taw ceh tiˉ dawˇ sha la ve maˇ heˆ. Tiˇtuˆ lehˬ, nawˬ hui geh g'a veu laˇ ve dawˇ sha ve teˇ ceuˬ hta‸ pa taw ngaˬ hui dawˇ sha la ve yoˬ. Hk'aˬ hk'e le teh‸ k'oˆ k'o, nawˬ hui ngaˬ hta‸ dawˇ law chehˇ ve teˇ ceuˬ, dawˇ haˍ jaˇ ve teˇ ceuˬ leh, ngaˬ awˬ pon nyi ma pfuhˇ ve teˇ ceuˬ hta‸ pa taw, ngaˬ leuˉ leh ha lehˬ jaˇ ve yoˬ. 8 Awˉ lawˉ htaˇ ngaˬ bvuh‸ laˇ ve li‸ nawˬ hui hta‸ dawˇ haˍ piˇ lawˬ ve pa taw, oˇ htaˇ ngaˬ hpeh‸ bawˬ ve htawˇ, chi beu‸ ngaˬ maˇ k'aw‸ hpeh‸ bawˬ. Awˬ lawn k'o, li‸ oˇ ve lehˬ nawˬ hui hta‸ teˇ hkui ceh tiˉ dawˇ haˍ piˇ lawˬ ve hta‸ ngaˬ g'a mawˬ ve yoˬ. 9 Ngaˬ nawˬ hui hta‸ dawˇ haˍ piˇ lawˬ ve pa taw ngaˬ ha lehˬ ve maˇ heˆ. Nawˬ hui venˇ baˆ hta‸ dawˇ hpfuhˆ htaˇ hk'a gaˬ dawˇ haˍ ve pa taw ngaˬ ha lehˬ ve yoˬ. Ngaˬ hui hta‸ pa taw nawˬ hui awˬ bon teˇ ceuˬ ka‸ maˇ g'a shonˇ k'ai tuˬ, G'uiˬ sha hta‸ caˉ da‸ve dawˇ haˍ ve teˇ ceuˬ hta‸ nawˬ hui g'a hkanˍ ve yoˬ. 10 Awˬ lawn k'o, G'uiˬ sha hta‸ caˉ da‸ ve dawˇ haˍ ve teˇ ceuˬ lehˬ, htaiˍ hk'aw‸ ve hta‸ g'a htaˇ hk'a gaˬ, venˇ baˆ dawˇ hpfuhˆ ve teˇ ceuˬ hta‸ te tawˆ la ve yoˬ. Oˇ hk'e te ve k'o, hpeh‸ bawˬ tuˬ maˇ cawˬ. Ya‸ hk'aˇ, miˬ guiˬ hta‸ caˉ da‸ ve dawˇ haˍ ve teˇ ceuˬ lehˬ, suh ve teˇ ceuˬ hta‸ te tawˆ la ve yoˬ. 11 G'uiˬ sha hta‸ caˉ da‸ ve dawˇ haˍ ve teˇ ceuˬ lehˬ, nawˬ hui awˬ hk'aw lo hk'aˬ hk'e ve teˇ hpaˍ te tawˆla piˇ ve hta‸ dawˇ nyi sheˍ. Nawˬ hui coˇ caˇ ve nyi ma cawˬ la tuˬ maˇ k'oˆ, a shu yawˇ awˬ to hteˇ ve awˬ lawn k'aw‸ k'oˆ tuˬ maˇ k'oˆ, nyi ma zuhˆ tuˬ maˇ k'oˆ, kawˆ ve nyi ma cawˬ tuˬ maˇ k'oˆ, dawˇ law tuˬ maˇ k'oˆ, nyi ma pfuhˇ tuˬ maˇ k'oˆ, ciˍ yanˍ piˇ tuˬ maˇ k'oˆ, chi teˇ hpaˍ nawˬ hui awˬ hk'aw lo hk'aˬ ma te tawˆ la ve le. Kanˉ chi hta‸ caˉ da‸ ve teˇ ceuˬ le le awˬ hk'aw lo nawˬ hui venˇ baˆ maˇ cawˬ ve hta‸ hk'a tawˍ lehˆ hpeu‸ maˍ laˇ peu. 12 Hk'e te leh, ngaˬ nawˬ hui hta‸ li‸ bvuh‸ laˇ ve lehˬ, te ya‸ shehˍ hpaˇ awˬ pon maˇ heˆ. Te ya‸ ve hta‸ g'a hkanˍ ve chaw awˬ pon ka‸ maˇ heˆ. Nawˬ hui lehˬ, ngaˬ hui awˬ pon G'uiˬ sha mehˆ g'uˇ suhˍ hk'aˬ ma coˇ caˇ ve nyi ma cawˬ ve hta‸ nawˬ hui g'a mawˬ g'a shiˍ tuˬ awˬ pon ngaˬ bvuh‸ laˇ ve yoˬ. 13 Chi hta‸ pa taw ngaˬ hui dawˇ sha la peuˬ. Ngaˬ hui dawˇ sha gaˇ sha peuˬ ve awˬ hk'oˆ ka‸, Tiˇtuˆ ha lehˬ ve hta‸ pa taw ngaˬ hui leuˉ leh ha lehˬ jaˇ ve yoˬ. Awˬ lawn k'o, nawˬ hui hk'a peu-eˬ yawˇ hta‸ nyi ma sha la piˇ peuˬ. 14 Ngaˬ lehˬ, nawˬ hui awˬ lawn chiˇ mvuh ve hkawˇ yawˇ hta‸ k'oˆ piˇ taˍ ve pa taw, ngaˬ g'a ya‸ taw tuˬ maˇ heˆ. Ngaˬ hui lehˬ, hk'a peu-eˬ awˬ hk'aw lo nawˬ hui hta‸ hteˇ lehˍ k'oˆ laˇ peuˬ ve hk'a shuˍ shuˍ, Tiˇtuˆ mehˆ g'uˇ suhˍ ngaˬ nawˬ hui awˬ lawn chiˇ mvuh ve hkawˇ yaw taˍ ve lehˬ hteˇ ve yoˬ. 15 Nawˬ hui hk'a peu-eˬ na yuˬ leh, kawˆ ve cheˇ ve awˬ hk'aw lo yawˇ hta‸ ha‸ yuˬ ve hta‸ yawˇ dawˇ nawˇ ve teˇ yanˇ, yawˇ nawˬ hui hta‸ leuˉ leh ha‸ jaˇ ve yoˬ. 16 Teˇ ceuˬ le le awˬ hk'aw lo ngaˬ nawˬ hui hta‸ awˬ tehˬ awˬ na yonˍ ve hta‸ pa taw ngaˬ ha lehˬ ve yoˬ.

2 Kawˇrenˍhtuˆ 8

1 Awˬ viˉ awˬ nyi teˇ hpaˍ-oˬ, Maˍkeˍ dawˇniˆ mvuhˇ miˬ awˬ hk'aw lo cawˬ ve Hkri‸ yaˇ awˬ moˍ teˇ hpaˍ hta‸ G'uiˬ sha awˬ bon hk'aˬ hk'e na‸ piˇ ve awˬ lawn ngaˬ hui nawˬ hui hta‸ shiˍ piˇ lawˬ gaˇ ve yoˬ. 2 Tu‸ ve hkanˍ ve maˇ maˇ yawˇ hui hta‸ lawˇ nyi ve htawˇ, yawˇ hui ha lehˬ jaˇ ve teˇ ceuˬ leh, haˍ g'awˇ jaˇ ve teˇ ceuˬ awˬ hk'aw lo, biˇ sheˆ htaˇ hk'a gaˬ yawˇ hui mawˇ jeˬ maˇ maˇ tanˇ piˇ ve yoˬ. 3 Awˬ lawn k'o, yawˇ hui puiˉ ve hpeh‸ ve hk'e tanˇ piˇ peuˬ. Puiˉ ve hpeh‸ ve hk'e tanˇ piˇ ve awˬ hk'oˆ ka‸, yawˇ hui hk'aˇ yawˇ hui ha lehˬ ha k'a k'aw‸ tanˇ piˇ sheˍ ve hta‸ ngaˬ hui shaˉ hkiˆ hkanˍ ve yoˬ. 4 Hkri‸ yaˇ teˇ hpaˍ hta‸ ga piˇ ve awˬ bon chi teˇ ceuˬ g'a te tuˬ, a hkaw-anˬ pe‸ laˇ-oˆ teh‸, yawˇ hui ngaˬ hui hta‸ g'aˇ hte‸ lawˬ hkawˉ ve yoˬ. 5 Ngaˬ hui dawˇ law ve a‸ kehˉ ka‸ yawˇ hui te ve yoˬ. Awˬ lawn k'o, G'uiˬ sha ve a loˍ cawˇ ve hk'e, yawˇ hui lehˬ awˉ lawˉ htaˇ Jawˇ mawˇ Yeˍsuˆ hta‸ ka‸ ngaˬ hui hta‸ ka‸ a shu yawˇ awˬ to tanˇ ve yoˬ. 6 Hk'e te leh, Tiˇtuˆ lehˬ nawˬ hui awˬ hk'aw lo awˉ lawˉ tanˬ te ve hk'a shuˍ shuˍ, awˬ bon uiˍ ve kanˉ chi hta‸ te peuˬ tuˬ ngaˬ hui yawˇ hta‸ awˬ g'aˇ piˇ ve yoˬ. 7 Nawˬ hui lehˬ, teˇ ceuˬ le le awˬ hk'aw lo, yonˍ ve maˇ k'oˆ, tawˇ yaw ve maˇ k'oˆ, cuˇ yiˍ maˇ k'oˆ, g'aˇ hte‸ coˇ caˇ ve maˇ k'oˆ, nawˬ hui ngaˬ hui hta‸ ha‸ ve maˇ k'oˆ nawˬ hui g'aˇ hte‸ te taˍ ve hk'e, awˬ bon uiˍ ve kanˉ chi teˇ maˬ hta‸ htawˇ g'aˇ hte‸ te-o. 8 Ngaˬ chi hk'e k'oˆ ve lehˬ, tawˇ piˇ ve hk'e ngaˬ k'oˆ ve maˇ heˆ. Shu coˇ caˇ ve awˬ lawn hta‸ ngaˬ k'oˆ htaˇ, nawˬ hui ha‸ pehnˇ ve teˇ ceuˬ awˬ tehˬ awˬ na cawˬ ve hta‸ hk'a tawˍ lehˆ tawˆ la tuˬ ngaˬ k'oˆ ve yoˬ. 9 Awˬ lawn k'o, ngaˬ hui ve Jawˇ mawˇ Yeˍsuˆ Hkri‸ ve awˬ bon hta‸ nawˬ hui shiˍ taˍ ve yoˬ. Yawˇ lehˬ paw sha chehˇ ve htawˇ, nawˬ hui awˬ pon haˍ ve g'awˇ ve hta‸ hkanˍ leh, haˍ ve g'awˇ ve oˇ ve hta‸ yawˇ hkanˍ ve pa taw, nawˬ hui paw sha la ve yoˬ. 10 Chi awˬ lawn ngaˬ hk'aˬ hk'e dawˇ ve nawˬ hui hta‸ k'aoˍ maˍ laˇ shaˍ. Awˉ lawˉ htaˇ nawˬ hui te gaˇ leh te ve awˬ hk'aw lo, aˉ nyi hk'aw‸ nawˬ hui tanˬ te laˬ ve hk'e chi beu‸ te peuˬ piˇ-oˆ. Chi lehˬ, nawˬ hui awˬ pon da‸ ve yoˬ. 11 Hk'e te leh, awˉ lawˉ htaˇ nawˬ hui te gaˇ ve nyi ma cawˬ ve hk'a shuˍ shuˍ, nawˬ hui te puiˉ te hpeh‸ ve hk'e te peuˬ piˇ-oˆ. 12 Awˬ lawn k'o, chaw teˇ g'aˇ cawˬ maˇ cawˬ ve hta‸ G'uiˬ sha nyi ve maˇ heˆ. Te gaˇ ve nyi ma cawˬ ve k'o, yawˇ ha‸ yuˬ ve yoˬ. 13 Kanˉ chi hta‸ te ve awˬ hk'aw lo awˬ kaˍ awˬ nu chaw teˇ hpaˍ awˬ pon sha leh, nawˬ hui awˬ pon haˍ jaˇ tuˬ ngaˬ te gaˇ ve maˇ heˆ. 14 Ya‸ hk'aˇ, hk'a shuˍ shuˍ hpeh‸ la tuˬ ngaˬ te gaˇ ve yoˬ. Chi beu‸ nawˬ hui awˬ leuˉ cawˬ ve awˬ hk'aw lo yawˇ hui loˍ ve cuˆ ve hta‸ ga piˇ leh, awˬ hk'aw‸ nawˉ nawˬ hui loˍ ve cuˆ ve teˇ yanˇ, yawˇ hui awˬ leuˉ cawˬ ve awˬ hk'aw lo nawˬ hui hta‸ k'aw‸ ga laˇ leh, hk'a shuˍ shuˍ hpeh‸ la tuˬ yoˬ. 15 Li‸ hpu hk'aw bvuh‸ taˍ ve hk'e, Maˇ chaweh g'awˆ yuˬ ve chaw lehˬ awˬ leuˉ maˇ cawˬ leh, a ciˉ ceh tiˉ g'awˆ yuˬ ve chaw lehˬ loˍ ve cuˆ ve maˇ cawˬ teh‸ bvuh‸ taˍ ve yoˬ. 16 Nawˬ hui awˬ pon ngaˬ nyi ma pfuhˇ ve hk'e, Tiˇtuˆ htawˇ nyi ma pfuhˇ la tuˬ G'uiˬ sha te piˇ ve pa taw, G'uiˬ sha ve awˬ bon hta‸ chiˇ mvuh ve yoˬ. 17 Tiˇtuˆ lehˬ, ngaˬ hui awˬ g'aˇ piˇ ve tawˇ hkawˇ hta‸ na yuˬ ve awˬ hk'oˆ ka‸, yawˇ nyi ma pfuhˇ jaˇ ve pa taw, yawˇ hk'aˇ yawˇ nawˬ hui geh laˬ ve yoˬ. 18 Ha lehˬ ve bon hkawˇ maˍ piˇ puiˉ ve hta‸ pa taw, Hkri‸ yaˇ awˬ moˍ hk'a peu-eˬ chiˇ mvuh chehˇ ve awˬ viˉ awˬ nyi teˇ g'aˇ hta‸ htawˇ, yawˇ geh teˇ geh ngaˬ hui k'ai tcuh ve yoˬ. 19 Awˬ viˉ awˬ nyi oˇ ve teˇ g'aˇ lehˬ, awˬ bon uiˍ ve kanˉ chi hta‸ ga te tuˬ, Hkri‸ yaˇ awˬ moˍ teˇ hpaˍ yawˇ hta‸ leuˆ yuˬ leh, ngaˬ hui geh teˇ geh k'ai tcuh ve yoˬ. Kanˉ chi hta‸ te ve lehˬ, Jawˇ mawˇ Yeˍsuˆ ve awˬ me‸ awˬ hponˇ tawˆ la leh, shu hta‸ ga piˇ gaˇ ve nyi ma hk'a tawˍ lehˆ tawˆ la tuˬ te ve yoˬ. 20 Ngaˬ hui lehˬ, maˇ jaˇ ve tanˇ tuˬ chi teˇ hpaˍ hta‸ shaw leh pehˬ piˇ ve kanˉ hta‸ te ve awˬ hk'aw lo, shu venˇ baˆ maˇ g'a taˍ laˇ tuˬ ngaˬ hui shaˍ ti‸ taˍ ve yoˬ. 21 Awˬ lawn k'o, Jawˇ mawˇ Yeˍsuˆ mehˆ g'uˇ suhˍ ceh tiˉ maˇ heˆ, chaw yaˇ mehˆ g'uˇ suhˍ htawˇ keunˍ ve cawˇ ve hta‸ te tuˬ ngaˬ hui dawˇ taˍ leh te ve yoˬ. 22 Yawˇ huiˉ maˬ geh teˇ geh awˬ kaˍ awˬ nu awˬ viˉ awˬ nyi teˇ g'aˇ hta‸ htawˇ ngaˬ hui k'ai tcuh ve yoˬ. Awˬ viˉ awˬ nyi chi teˇ g'aˇ hta‸ laiˉ ceuˬ awˬ hk'aw lo laiˉ pawˆ lawˇ nyi peuˬ leh, yawˇ nyi ma pfuhˇ jaˇ ve chaw teˇ g'aˇ hpeh‸ ve hta‸ g'a shiˍ ve yoˬ. Yawˇ nawˬ hui hta‸ yonˍ jaˇ ve pa taw, chi beu‸ leuˉ leh nyi ma pfuhˇ jaˇ ve yoˬ. 23 Tiˇtuˆ awˬ lawn lehˬ chi hk'e yoˬ. Yawˇ ngaˬ ve awˬ chawˇ hpeh‸ leh, nawˬ hui awˬ pon ngaˬ geh teˇ geh kanˉ te shehˍ hpaˇ hpeh‸ ve yoˬ. Awˬ viˉ awˬ nyi chi nyiˇ g'aˇ lehˬ, Hkri‸ yaˇ awˬ moˍ teˇ hpaˍ peu laˇ ve chaw hpeh‸ leh, Hkri‸ ve awˬ me‸ awˬ hponˇ tawˆ la piˇ shehˍ hpaˇ hpeh‸ ve yoˬ. 24 Hk'e te leh, nawˬ hui ha‸ pehnˇ ve nyi ma cawˬ leh, nawˬ hui awˬ lawn chaw chi teˇ hpaˍ hta‸ ngaˬ hui chiˇ mvuh ve hkawˇ yaw ve lehˬ cawˇ ve yoˬ teh‸ yawˇ hui shiˍ hpeh‸ tuˬ, Hkri‸ yaˇ awˬ moˍ teˇ hpaˍ mehˆ g'uˇ suhˍ nawˬ hui hk'a deh‸ te-o.

2 Kawˇrenˍhtuˆ 9

1 Hkri‸ yaˇ teˇ hpaˍ hta‸ ga piˇ ve kanˉ awˬ lawn ngaˬ nawˬ hui hta‸ li‸ bvuh‸ laˇ tuˬ maˇ loˍ. 2 Awˬ lawn k'o, nawˬ hui lehˬ shu hta‸ ga piˇ gaˇ ve nyi ma cawˬ ve hta‸ ngaˬ shiˍ ve yoˬ. Nawˬ hui shu hta‸ ga piˇ gaˇ ve nyi ma cawˬ ve awˬ lawn ngaˬ Maˍkeˍdawˇniˆ chaw hui hta‸ hto piˇ leh nawˬ hui hta‸ ngaˬ chiˇ mvuh ve yoˬ. Aˍhkaˍyaˆ chaw teˇ hpaˍ lehˬ, aˉ nyi hk'aw‸ htaˇ ka‸ gu taˍ hehnˇ taˍ peuˬ teh‸, yawˇ hui hta‸ ngaˬ k'oˆ piˇ ve yoˬ. Nawˬ hui g'aˇ hte‸ te ve teˇ ceuˬ lehˬ, yawˇ hui maˇ-awˍ ve hta‸ nawˍ piˇ peuˬ. 3 Ya‸ hk'aˇ, nawˬ hui awˬ lawn ngaˬ chiˇ mvuh ve lehˬ, kanˉ chi awˬ hk'aw hk'e leˇ maˇ g'a hpeh‸ leh, ngaˬ k'oˆ ve hk'e nawˬ hui hk'a deh‸ gu taˍ hehnˇ taˍ tuˬ, awˬ viˉ awˬ nyi chi teˇ hpaˍ hta‸ ngaˬ peu laˇ ve yoˬ. 4 Maˇ heˆ k'o, Maˍkeˍdawˇniˆ chaw teˇ hpaˍ hpaˍ ngaˬ geh teˇ geh laˬ leh, nawˬ hui maˇ gu maˇ hehnˇ taˍ ve hta‸ g'a mawˬ ve teˇ yanˇ, nawˬ hui g'a ya‸ taw ve ceh tiˉ maˇ heˆ. Ngaˬ hui htawˇ, nawˬ hui hta‸ yonˍ ve pa taw g'a ya‸ taw tuˬ yoˬ. 5 Chi hta‸ pa taw, awˉ lawˉ htaˇ ka‸ k'oˆ taˍ ve awˬ bon uiˍ ve kanˉ chi teˇ maˬ hta‸ hk'a deh‸ te peuˬ taˍ laˇ tuˬ, awˬ viˉ awˬ nyi teˇ hpaˍ hta‸ ngaˬ awˬ g'uˇ suhˍ nawˬ hui geh peu k'ai cawˇ ve yoˬ teh‸ ngaˬ dawˇ leh, yawˇ hui hta‸ awˬ g'aˇ piˇ ve yoˬ. Tanˇ tuˬ chi piˇ ve teˇ yanˇ, nawˬ hui hta‸ nyiˉ te ve teˇ ceuˬ maˇ g'a hpeh‸ leh, ha lehˬ ha k'a tanˇ piˇ tuˬ ve hta‸ ngaˬ heuˆ gaˇ ve yoˬ. 6 Awˬ lawn chi ve lehˬ chi hk'e yoˬ. A ciˉ ceh tiˉ sheˍ ve chaw lehˬ, a ciˉ ceh tiˉ g'a g'eu‸ tuˬ yoˬ. Maˇ chaweh sheˍ ve chaw lehˬ, maˇ chaweh g'a g'eu‸ tuˬ yoˬ. 7 Chaw teˇ g'aˇ le le, a shu yawˇ ve nyi ma hk'aw dawˇ taˍ ve hk'e tanˇ piˇ-oˆ. Dawˇ haˍ leh te ve maˇ k'oˆ, g'a te ve hta‸ pa taw te ve maˇ k'oˆ, taˇ hpeh‸ piˇ. Awˬ lawn k'o, ha lehˬ ha k'a tanˇ piˇ ve chaw hta‸ G'uiˬ sha ha‸ ve yoˬ. 8 Nawˬ hui lehˬ, hk'aˬ htaˆ ka‸ teˇ ceuˬ le le cawˬ law‸ leh, da‸ ve kanˉ teˇ ceuˬ le le awˬ hk'aw lo biˇ la tuˬ, G'uiˬ sha lehˬ nawˬ hui hta‸ awˬ bon teˇ ceuˬ le le maˇ chaweh piˇ hpeh‸ ve yoˬ. 9 Li‸ hpu hk'aw bvuh‸ taˍ ve hk'e, Yawˇ maˇ chaweh sheˍ peuˬ. Haˍ ve g'awˇ ve chaw hui hta‸ yawˇ piˇ peuˬ. Yawˇ ve hteˇ ve cawˇ ve teˇ ceuˬ lehˬ, co co taiˍ taiˍ yeˬ chehˇ ve yoˬ. 10 Awˬ yawˇ sheˍ shehˍ hpaˇ hta‸ awˬ yawˇ ka‸ caˇ tuˬ dawˬ tuˬ ka‸ piˇ shehˍ hpaˇ lehˬ, nawˬ hui hta‸ awˬ yawˇ piˇ leh maˇ la piˇ tuˬ yoˬ. Nawˬ hui ve hteˇ ve cawˇ ve awˬ shiˍ teˇ hpaˍ hta‸ htawˇ yawˇ maˇ la piˇ tuˬ yoˬ. 11 Hk'a peu-eˬ awˬ hk'aw lo nawˬ hui maˇ chaweh piˇ hpeh‸ tuˬ, teˇ ceuˬ le le awˬ hk'aw lo nawˬ hui paw sha la tuˬ yoˬ. Chi hk'e te ve lehˬ, ngaˬ hui hta‸ pa taw shu G'uiˬ sha hta‸ chiˇ mvuh tuˬ awˬ pon te ve yoˬ. 12 Awˬ lawn k'o, shu hta‸ ga piˇ ve kanˉ chi lehˬ, Hkri‸ yaˇ teˇ hpaˍ loˍ ve hk'e hk'a biˇ ga piˇ ve ceh tiˉ maˇ heˆ, shu G'uiˬ sha ve awˬ bon hta‸ maˇ maˇ chiˇ mvuh tuˬ htawˇ te ve yoˬ. 13 Shu hta‸ ga piˇ ve kanˉ chi awˬ hk'aw lo, nawˬ hui hk'aˬ hk'e ve chaw hpeh‸ ve hta‸ yawˇ hui shiˍ ve yoˬ. Awˬ lawn k'o, Hkri‸ ve ha lehˬ ve bon hkawˇ hta‸ nawˬ hui ha‸ yuˬ leh awˬ hk'aˇ suh te k'ai ve pa taw maˇ k'oˆ, yawˇ hui hta‸ ka‸, awˬ kaˍ awˬ nu chaw hk'a peu-eˬ hta‸ ka‸ nawˬ hui maˇ chaweh tanˇ piˇ ve pa taw maˇ k'oˆ, yawˇ hui lehˬ G'uiˬ sha hta‸ chiˇ uiˍ chiˇ mvuh ve yoˬ. 14 G'uiˬ sha nawˬ hui hta‸ uiˍ jaˇ maˇ jaˇ ve awˬ bon na‸ laˇ ve pa taw, yawˇ hui lehˬ nawˬ hui hta‸ dawˇ nawˇ jaˇ leh, nawˬ hui awˬ pon bon lawˬ tuˬ yoˬ. 15 Ca k'oˆ maˇ peuˬ ve la‸ shawnˍ G'uiˬ sha pe‸ laˇ ve pa taw, yawˇ hta‸ chiˇ mvuh-o.

2 Kawˇrenˍhtuˆ 10

1 Ngaˬ Pawˇlu‸ awˬ to lehˬ, Hkri‸ ve nyi ma nuˇ nehˬ ve teˇ ceuˬ leh, yawˇ ve nyi ma da‸ ve teˇ ceuˬ awˬ hk'aw lo nawˬ hui hta‸ lawˬ hkawˉ ve yoˬ. Ngaˬ hui hta‸ mehˆ hpfuhˇ tawˍ da‸ ve teˇ yanˇ nyi ma nuˇ nehˬ lehˍ taˍ leh, ngaˬ hui geh maˇ chehˇ ve teˇ yanˇ nyi ma ha‸ hanˉ ve yoˬ teh‸ nawˬ hui k'oˆ ve chaw teˇ g'aˇ lehˬ ngaˬ yoˬ. 2 Ngaˬ lehˬ, miˬ guiˬ yaˇ te ve hk'e te ve chaw hpeh‸ ve teh‸ shawˍ ve chaw teˇ hpaˍ hta‸ ngaˬ nyi ma ha‸ hanˉ ve teˇ ceuˬ te maˍ piˇ tuˬ ngaˬ dawˇ taˍ ve yoˬ. Ngaˬ nawˬ hui geh gaˬ la ve teˇ yanˇ, chi taw taw nyi ma ha‸ hanˉ ve teˇ ceuˬ ngaˬ maˇ g'a te maˍ laˇ tuˬ ngaˬ nawˬ hui hta‸ lawˬ hkawˉ ve yoˬ. 3 Awˬ lawn k'o, ngaˬ hui miˬ guiˬ hk'oˆ lo chehˇ ve htawˇ, miˬ guiˬ hta‸ caˉ da‸ ve ma‸ bawˆ ve teˇ ceuˬ hta‸ ngaˬ hui te ve maˇ heˆ. 4 Ngaˬ hui ma‸ bawˆ ve la‸ caˉ teˇ hpaˍ lehˬ, miˬ guiˬ hta‸ caˉ da‸ ve la‸ caˉ hpeh‸ ve maˇ heˆ. Ta‸ teˇ hpaˍ hta‸ te luˬ tuˬ awˬ pon, G'uiˬ sha ve kanˇ paˆ cawˬ ve la‸ caˉ teˇ hpaˍ hpeh‸ ve yoˬ. 5 Tawˇ g'awˬ da‸ ve awˬ ceuˬ teˇ hpaˍ hta‸ maˇ k'oˆ, G'uiˬ sha hta‸ maˇ g'a shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ hta‸ maˇ k'oˆ, ngaˬ hui yuˬ baˬ hpaˆ baˬ ve yoˬ. Dawˇ hk'aˇ teˇ maˬ le le hta‸ ngaˬ hui hpeh yuˬ leh, Hkri‸ hta‸ na yuˬ piˇ lawˬ ve yoˬ. 6 Nawˬ hui na yuˬ ve teˇ ceuˬ biˇ la peuˬ hk'aw‸ nawˉ, maˇ na yuˬ ve chaw hk'a peu-eˬ hta‸ ciˍ yanˍ piˇ tuˬ ngaˬ hui gu taˍ hehnˇ taˍ peuˬ. 7 Nawˬ hui mehˆ g'uˇ suhˍ cawˬ taˍ ve teˇ hpaˍ hta‸ hk'a deh‸ nyi sheˍ. A shu yawˇ awˬ to Hkri‸ ve chaw hpeh‸ ve yoˬ teh‸ chaw teˇ g'aˇ g'aˇ shawˍ taˍ ve k'o, yawˇ Hkri‸ ve chaw hpeh‸ ve hk'e ngaˬ hui htawˇ hpeh‸ ve hta‸ dawˇ nawˇ cawˇ ve yoˬ. 8 Nawˬ hui hta‸ uiˍ la yeˬ la piˇ tuˬ awˬ pon Jawˇ mawˇ Yeˍsuˆ ngaˬ hui hta‸ aˉ yaˇ pe‸ laˇ ve yoˬ. Nawˬ hui hta‸ te luˬ tuˬ awˬ pon pe‸ laˇ ve maˇ heˆ. Hk'e te leh, aˉ yaˇ chi awˬ lawn ngaˬ nyi ma uiˍ ve awˬ hk'aw lo hk'a cawˇ cawˇ k'oˆ maˇ ve htawˇ, ngaˬ g'a ya‸ taw tuˬ ve maˇ heˆ. 9 Ngaˬ li‸ chi hk'e bvuh‸ laˇ ve lehˬ, nawˬ hui hta‸ kawˆ tuˬ ngaˬ te gaˇ ve maˇ heˆ. 10 Awˬ lawn k'o, Yawˇ ve li‸ teˇ hpaˍ lehˬ kanˇ paˆ uiˍ leh hehnˇ jaˇ ve htawˇ, yawˇ awˬ to chehˇ taˍ ve teˇ yanˇ, awˬ g'aˇ nuˇ leh, yawˇ k'oˆ ve teˇ hpaˍ te‸ chiˉ awˬ bon maˇ cawˬ teh‸ chaw teˇ hpaˍ hpaˍ ngaˬ ve awˬ lawn chi hk'e k'oˆ chehˇ ve yoˬ. 11 Ngaˬ hui nawˬ hui geh maˇ chehˇ ve teˇ yanˇ, ngaˬ hui nawˬ hui hta‸ li‸ bvuh‸ laˇ ve hk'a shuˍ shuˍ, ngaˬ hui nawˬ hui geh chehˇ taˍ ve teˇ yanˇ htawˇ chi hk'e te ve yoˬ teh‸, chaw oˇ ve teˇ hpaˍ hta‸ shiˍ piˇ-oˆ. 12 A shu yawˇ awˬ to hta‸ chiˇ mvuh ve chaw teˇ hpaˍ ve awˬ moˍ awˬ hk'aw lo lo‸-e tuˬ maˇ k'oˆ, ngaˬ hui awˬ to yawˇ hui hta‸ tehˆ da‸ tuˬ maˇ k'oˆ, ngaˬ hui te maˇ haˆ. Yawˇ hui lehˬ, a shu yawˇ awˬ to teˇ g'aˇ leh teˇ g'aˇ tehˆ da‸ leh, teˇ g'aˇ leh teˇ g'aˇ shuˍ da‸ ve hta‸ nyi ve pa taw, yawˇ hui cuˇ yiˍ maˇ cawˬ ve chaw hpeh‸ ve yoˬ. 13 Ngaˬ hui lehˬ, nyi ma uiˍ ve awˬ hk'aw lo k'oˆ ponˬ k'oˆ leuˉ ve teˇ ceuˬ maˇ te. Ya‸ hk'aˇ, G'uiˬ sha ngaˬ hui hta‸ kanˉ te kuiˬ pehˬ laˇ ve hk'e ceh ngaˬ hui te tuˬ yoˬ. Ngaˬ hui htawˇ, yawˇ ngaˬ hui hta‸ pehˬ laˇ ve kanˉ te kuiˬ awˬ hk'aw lo lo‸-e taˍ ve yoˬ. 14 Nawˬ hui lehˬ, G'uiˬ sha ngaˬ hui hta‸ pehˬ laˇ ve kanˉ te kuiˬ awˬ hk'aw lo lo‸-e taˍ ve pa taw, yawˇ pe‸ laˇ ve kanˉ te kuiˬ hta‸ ngaˬ hui te ponˬ te leuˉ ve maˇ heˆ. Awˬ lawn k'o, Hkri‸ ve ha lehˬ ve bon hkawˇ nawˬ hui geh hk'a gaˬ awˉ lawˉ ca maˍ la ve lehˬ ngaˬ hui yoˬ. 15 Shu te taˍ ve kanˉ hta‸ ngaˬ hui te ve hk'e te leh, nyi ma uiˍ ve awˬ hk'aw lo g'aˇ hte‸ ca k'oˆ ve maˇ heˆ. Nawˬ hui ve yonˍ ve teˇ ceuˬ uiˍ la maˇ la ve hk'e, nawˬ hui hta‸ pa taw G'uiˬ sha ngaˬ hui hta‸ pehˬ laˇ taˍ ve kanˉ te kuiˬ htawˇ leuˉ leh uiˍ la k'ehˬ la tuˬ ve hta‸ ngaˬ hui dawˇ law ve yoˬ. 16 Chi hk'e te ve k'o, nawˬ hui ve chehˇ kuiˬ coˇ paˉ lo hk'a gaˬ ngaˬ hui ha lehˬ ve bon hkawˇ g'a maˍ piˇ tuˬ yoˬ. Awˬ lawn k'o, shu kanˉ te kuiˬ lo shu te taˍ ve kanˉ hta‸ nyi ma uiˍ ve awˬ hk'aw lo ngaˬ hui ca k'oˆ tuˬ maˇ heˆ. 17 Ya‸ hk'aˇ, nyi ma uiˍ ve awˬ hk'aw lo k'oˆ ve chaw lehˬ, Jawˇ mawˇ G'uiˬ sha awˬ hk'aw lo ceh tiˉ nyi ma uiˍ leh k'oˆ loˬ. 18 Awˬ lawn k'o, a shu yawˇ awˬ to awˬ pon shaˉ hkiˆ hkanˍ ve chaw hta‸ G'uiˬ sha nyi hk'aˇ suh ve maˇ heˆ. Yawˇ awˬ pon Jawˇ mawˇ G'uiˬ sha shaˉ hkiˆ hkanˍ ve chaw hta‸ ceh tiˉ G'uiˬ sha nyi hk'aˇ suh ve yoˬ.

2 Kawˇrenˍhtuˆ 11

1 Cuˇ yiˍ maˇ cawˬ ve tawˇ hkawˇ ngaˬ a ciˉ bvuh‸ laˇ ve hta‸ nawˬ hui yeunˇ hkanˍ tuˬ ngaˬ dawˇ law ve yoˬ. Awˬ tehˬ awˬ na nawˬ hui a ciˉ yeunˇ hkanˍ laˇ sheˍ. 2 G'uiˬ sha nawˬ hui hta‸ sheˉ lai ve hk'e, ngaˬ htawˇ nawˬ hui hta‸ sheˉ lai ve yoˬ. Awˬ lawn k'o, nawˬ hui lehˬ da‸ kehˬ ve yaˇ miˇ haˉ hk'a shuˍ shuˍ hpeh‸ leh, Hkri‸ hta‸ chiˇ a‸ piˇ tuˬ awˬ pon ngaˬ nawˬ hui hta‸ awˬ hpawˇ teˇ g'aˇ tiˉ hta‸ caˉ da‸ piˇ peuˬ. 3 Ya‸ hk'aˇ, vuiˬ lehˬ heˍ ve awˬ hk'aw lo Eˇva‸ hta‸ beˬ yuˬ ve hk'e, nawˬ hui ve dawˇ hk'aˇ luˬ k'ai leh, Hkri‸ hta‸ da‸ ve kehˬ ve awˬ hk'aw lo ha‸ ve teˇ ceuˬ mehˉ k'ai puiˉ-aˆ teh‸ ngaˬ dawˇ haˍ ve yoˬ. 4 Awˬ lawn k'o, chaw teˇ g'aˇ g'aˇ nawˬ hui geh laˬ leh, ngaˬ maˍ ve Yeˍsuˆ teˇ g'aˇ awˬ lawn hta‸ maˇ maˍ leh awˬ kaˍ awˬ nu Yeˍsuˆ teˇ g'aˇ awˬ lawn maˍ ve maˇ k'oˆ, nawˬ hui g'a peuˬ ve awˬ ha maˇ heˆ leh awˬ kaˍ awˬ nu awˬ ha hta‸ g'a ve maˇ k'oˆ, nawˬ hui ha‸ yuˬ peuˬ ve ha lehˬ ve bon hkawˇ maˇ heˆ leh awˬ kaˍ awˬ nu ve bon hkawˇ hta‸ ha‸ yuˬ ve maˇ k'oˆ, nawˬ hui hk'a deh‸ yeunˇ hkanˍ ve law. 5 Ngaˬ lehˬ, uiˍ ve mvuh ve tcuh yaˇ oˇ ve teˇ hpaˍ awˬ hawˉ lo a ciˉ ka‸ maˇ chehˇ ve teh‸ ngaˬ dawˇ ve yoˬ. 6 Tawˇ yaw ve awˬ hk'aw lo ngaˬ maˇ puiˉ ve htawˇ, cuˇ yiˍ hpawˇ ngaˬ puiˉ ve yoˬ. Ngaˬ chi hk'e puiˉ ve yoˬ teh‸, teˇ ceuˬ le le awˬ hk'aw lo ngaˬ nawˬ hui hta‸ hk'a tawˍ lehˆ hpeu‸ maˍ laˇ peuˬ. 7 Nawˬ hui hta‸ chiˇ uiˍ piˇ tuˬ, ngaˬ awˬ to hta‸ nehˬ piˇ lawˬ leh, awˬ hpfuhˇ maˇ yuˬ ve awˬ hk'aw lo G'uiˬ sha ve ha lehˬ ve bon hkawˇ nawˬ hui hta‸ maˍ laˇ ve pa taw, ngaˬ venˇ baˆ te ve leh laˇ. 8 Ngaˬ nawˬ hui awˬ pon kanˉ te hpeh‸ tuˬ, awˬ kaˍ awˬ nu Hkri‸ yaˇ awˬ moˍ teˇ hpaˍ geh hpu hta‸ ngaˬ ha‸ yuˬ ve lehˬ, yawˇ hui ve mawˇ hta‸ hiˉ yuˬ ve hk'e yoˬ. 9 Ngaˬ nawˬ hui geh chehˇ leh teˇ ceuˬ ceuˬ loˍ ve teˇ yanˇ, nawˬ hui hta‸ ngaˬ sho‸ sha‸ tuˬ maˇ te. Awˬ lawn k'o, Maˍkeˍdawˇniˆ mvuhˇ miˬ lo laˬ ve awˬ viˉ awˬ nyi teˇ hpaˍ lehˬ, ngaˬ hk'a loˍ ve teˇ hpaˍ hta‸ pe‸ laˇ ve yoˬ. Hk'e te leh, nawˬ hui hta‸ ngaˬ a ciˉ ka‸ maˇ g'a sho‸ sha‸ tuˬ ngaˬ te taˍ leh, awˬ g'uˇ suhˍ hpawˇ htawˇ ngaˬ te tuˬ yoˬ. 10 Hkri‸ ve hteˇ ve cawˇ ve awˬ ceuˬ ngaˬ awˬ hk'aw lo cawˬ ve hk'e, ngaˬ chi hk'e nyi ma uiˍ kuiˬ cawˬ leh k'oˆ ve tawˇ hkawˇ hta‸, Aˍhkaˍyaˆ mvuhˇ miˬ awˬ hk'aw lo chaw teˇ g'aˇ ka‸ tawˍ taˍ maˇ g'a. 11 Aˬ hto‸ ma hta‸ pa taw le. Ngaˬ nawˬ hui hta‸ maˇ ha‸ ve pa taw laˇ. Ngaˬ nawˬ hui hta‸ ha‸ ve yoˬ teh‸ G'uiˬ sha shiˍ taˍ ve yoˬ. 12 Ponˬ la htaˇ ngaˬ te chehˇ ve hk'e, awˬ g'uˇ suhˍ hpawˇ htawˇ k'aw‸ te k'ai tuˬ sheˍ ve yoˬ. Aˬ hto‸ ma hta‸ pa taw le teh‸ k'oˆ k'o, nyi ma uiˍ ve awˬ hk'aw lo chaw teˇ hpaˍ hpaˍ lehˬ, ngaˬ hui hk'a shuˍ shuˍ kanˉ te chehˇ ve yoˬ teh‸ maˇ g'a k'aw‸ k'oˆ hpeh‸ tuˬ, ngaˬ chi hk'e te ve yoˬ. 13 Awˬ lawn k'o, chi hk'e ve chaw teˇ hpaˍ lehˬ, maˇ heˆ heˆ ve tcuh yaˇ teˇ hpaˍ hpeh‸ ve yoˬ. Yawˇ hui lehˬ, Hkri‸ ve tcuh yaˇ hpeh‸ ve hk'e te leh, heˍ puiˉ ve kanˉ te shehˍ hpaˇ teˇ hpaˍ hpeh‸ ve yoˬ. 14 Yawˇ hui chi hk'e te ve lehˬ, anˇ tuˬ maˇ cawˬ. Awˬ lawn k'o, Saˍtanˍ ka‸ awˬ g'euˆ ba ve mvuhˇ naw ma tcuh yaˇ hpeh‸ ve hk'a shuˍ shuˍ te puiˉ ve yoˬ. 15 Hk'e te leh, yawˇ ve awˬ ceˬ teˇ hpaˍ htawˇ, hteˇ ve cawˇ ve awˬ ceˬ hpeh‸ ve hk'e te ve k'o, anˇ tuˬ uiˍ ve teˇ ceuˬ hpeh‸ ve maˇ heˆ, Yawˇ hui kanˉ te ve hk'e, awˬ leh meuˇ gaˬ k'o g'a hkanˍ tuˬ yoˬ. 16 Ngaˬ teˇ pawˆ k'aw‸ k'oˆ shaˍ. Ngaˬ cuˇ yiˍ maˇ cawˬ ve chaw hpeh‸ ve yoˬ teh‸ chaw teˇ g'aˇ ka‸ taˇ dawˇ. Ya‸ hk'aˇ, nawˬ hui chi hk'e dawˇ ve ka‸, ngaˬ nyi ma uiˍ ve awˬ hk'aw lo tawˇ a ciˉ yaw hpeh‸ tuˬ, cuˇ yiˍ maˇ cawˬ ve chaw teˇ g'aˇ hk'e ngaˬ hta‸ ha‸ yuˬ laˇ sheˍ. 17 (Ngaˬ chi hk'e k'oˆ ve lehˬ, Jawˇ mawˇ Yeˍsuˆ ngaˬ hta‸ k'oˆ tcuh laˇ leh k'oˆ ve maˇ heˆ. Cuˇ yiˍ maˇ cawˬ ve chaw hk'e, nyi ma ha‸ hanˉ ve awˬ hk'aw lo ngaˬ nyi ma uiˍ chaweh te leh k'oˆ ve yoˬ. 18 Chaw laiˉ g'aˇ lehˬ, awˬ suhˍ awˬ shaˍ hpawˇ awˬ lawn nyi ma uiˍ ve awˬ hk'aw lo k'oˆ ve hk'e, ngaˬ htawˇ nyi ma uiˍ ve awˬ hk'aw lo k'oˆ tuˬ yoˬ.) 19 Nawˬ hui cuˇ yiˍ cawˬ ve chaw hpeh‸ ve pa taw, cuˇ yiˍ maˇ cawˬ ve chaw hui hta‸ nawˬ hui ha lehˬ ha k'a yeunˇ hkanˍ ve law. 20 Awˬ lawn k'o, chaw teˇ g'aˇ g'aˇ nawˬ hui hta‸ awˬ ceˬ te tcuh ve maˇ k'oˆ, nawˬ hui hta‸ hiˉ caˇ ve maˇ k'oˆ, nawˬ hui hta‸ heˍ caˇ ve maˇ k'oˆ, a shu yawˇ awˬ to hta‸ chiˇ uiˍ chiˇ mvuh ve maˇ k'oˆ, nawˬ hui ve mehˆ hpfuhˇ hta‸ hta ve maˇ k'oˆ, nawˬ hui yeunˇ hkanˍ chehˇ ve yoˬ. 21 Nawˬ hui hta‸ oˇ hk'e te laˇ tuˬ ngaˬ hui awˬ g'aˇ nuˇ ve yoˬ teh‸, ya‸ taw ve awˬ hk'aw lo ngaˬ g'a k'oˆ ve yoˬ. Ya‸ hk'aˇ, teˇ ceuˬ ceuˬ awˬ lawn hta‸ chaw teˇ g'aˇ g'aˇ nyi ma uiˍ ve awˬ hk'aw lo k'oˆ haˆ ve k'o, ngaˬ htawˇ nyi ma uiˍ ve awˬ hk'aw lo awˬ lawn oˇ ve hta‸ k'oˆ haˆ ve yoˬ. (Ngaˬ chi hk'e k'oˆ ve lehˬ, cuˇ yiˍ maˇ cawˬ ve chaw hk'e ngaˬ k'oˆ ve yoˬ.) 22 Yawˇ hui Heˍbrehˇ chaw hpeh‸ ve laˇ. Ngaˬ htawˇ hpeh‸ ve yoˬ. Yawˇ hui Iˉsaˍreˍlaˆ chaw hpeh‸ ve laˇ. Ngaˬ htawˇ hpeh‸ ve yoˬ. Yawˇ hui Aˍbraˍhanˍ ve awˬ ceuˬ awˬ hk'aˇ hpeh‸ ve laˇ. Ngaˬ htawˇ hpeh‸ ve yoˬ. 23 Yawˇ hui Hkri‸ ve awˬ ceˬ hpeh‸ ve laˇ. Yawˇ hui a‸ kehˉ leuˉ leh ngaˬ Hkri‸ ve awˬ ceˬ hpeh‸ ve yoˬ. (Ngaˬ chi hk'e k'oˆ ve lehˬ, chaw g'uˇ hk'e k'oˆ chehˇ ve yoˬ.) Shu a‸ kehˉ leuˉ leh ngaˬ kanˉ te ve yoˬ. Shu a‸ kehˉ leuˉ leh ngaˬ htawnˍ hk'aw g'a chehˇ jaw ve yoˬ. G'aw maˇ peuˬ htaˇ hk'a gaˬ dawˆ laˇ jaw‸ laˇ ve hta‸ ngaˬ g'a hkanˍ jaw ve yoˬ. Suh paˇ neˇ ve ka‸ laiˉ pawˆ ngaˬ cawˬ jaw ve yoˬ. 24 Yuˇda‸ chaw hui ngaˬ hta‸ shehˆ chi k'awˇ hk'e jaw‸ laˇ ve, ngaˇ pawˆ hk'a gaˬ ngaˬ g'a hkanˍ jaw peuˬ. 25 Shehˆ pawˆ hk'a gaˬ gawˇ taˬ jaw‸ laˇ ve hta‸ ngaˬ g'a hkanˍ leh, haˉ pui baˬ laˇ ve hta‸ ka‸ ngaˬ teˇ pawˆ g'a hkanˍ jaw peuˬ. Shehˆ pawˆ hk'a gaˬ haw lo‸ k'oˍ luˬ k'ai ve hta‸ ngaˬ g'a hkanˍ jaw peuˬ. Teˇ nyi teˇ haˉ laˇ tsuhˇ g'uiˬ awˬ hk'aw lo ngaˬ g'a chehˇ jaw peuˬ. 26 Laiˉ pawˆ ngaˬ ca te toˇ jaw peuˬ. Iˉ kaˆ lawˬ hta‸ hkanˍ ve awˬ hk'aw lo kawˆ tuˬ cawˬ ve, Chaw hk'awˇ hta‸ kawˆ tuˬ cawˬ ve, ngaˬ ve chaw ceuˬ hta‸ kawˆ tuˬ cawˬ ve, buiˇ shaˆ aˉ naˆ chaw hui hta‸ kawˆ tuˬ cawˬ ve, venˇ hk'aˆ teˇ hpaˍ awˬ hk'aw lo kawˆ tuˬ cawˬ ve, heh puiˉ hk'aw lo kawˆ tuˬ cawˬ ve, laˇ tsuhˇ g'uiˬ awˬ hk'aw lo kawˆ tuˬ cawˬ ve, maˇ heˆ heˆ ve awˬ viˉ awˬ nyi teˇ hpaˍ hta‸ kawˆ tuˬ cawˬ ve, chi teˇ hpaˍ hta‸ htawˇ ngaˬ g'a hpuˇ jaw peuˬ. 27 Kanˉ te hkeu‸ leh heuˬ jaˇ ve, laiˉ pawˆ maˇ g'a zuh‸ ve, awˍ meu‸ ve leh iˉ kaˆ shiˉ ve, laiˉ pawˆ caˇ tuˬ maˇ cawˬ ve, kaˆ ve leh veu‸ k'aˇ maˇ cawˬ ve, chi teˇ hpaˍ hta‸ htawˇ ngaˬ g'a hkanˍ jaw peuˬ. 28 Awˬ ceuˬ chi ve teˇ hpaˍ hta‸ ngaˬ g'a hkanˍ ve awˬ hk'oˆ ka‸, Hkri‸ yaˇ awˬ moˍ hk'a peu-eˬ awˬ pon dawˇ haˍ dawˇ hkiˉ ve teˇ hpaˍ htawˇ, teˇ nyi le le ngaˬ hta‸ nyiˉ tiˍ taˍ laˇ ve yoˬ. 29 Chaw teˇ g'aˇ g'aˇ awˬ g'aˇ nuˇ ve k'o, ngaˬ htawˇ awˬ g'aˇ maˇ nuˇ leh laˇ. Chaw teˇ g'aˇ g'aˇ ya‸ k'ai ve k'o, ngaˬ maˇ hpeh‸ bawˬ leh laˇ. 30 Ngaˬ nyi ma uiˍ ve awˬ hk'aw lo tawˇ g'a yaw ve k'o, ngaˬ awˬ g'aˇ nuˇ ve teˇ hpaˍ awˬ lawn ceh, nyi ma uiˍ ve awˬ hk'aw lo tawˇ yaw tuˬ yoˬ. 31 Ngaˬ heˍ ve maˇ heˆ teh‸, co co taiˍ taiˍ awˬ bon uiˍ shehˍ hpaˇ Jawˇ mawˇ Yeˍsuˆ ve Awˬ pa G'uiˬ sha shiˍ taˍ ve yoˬ. 32 Daˍmaˍsehˆ venˇ awˬ hk'aw lo ngaˬ hta‸ hpeh yuˬ tuˬ, hkunˉ hawˉ hkanˇ Aˍreˍtaˆ awˬ hawˉ ve mvuhˇ miˬ jawˇ mawˇ lonˉ lehˬ, Daˍmaˍsehˆ venˇ hta‸ shaw tcuh taˍ ve yoˬ. 33 Ya‸ hk'aˇ, shu ngaˬ hta‸ hk'aˉ puˍ lu awˬ hk'aw keu leh, lanˇ venˇ yehˬ miˉ ehˉ awˬ hpe‸ lo ngaˬ hta‸ hpehˇ ya‸-e laˇ ve hta‸ pa taw, mvuhˇ miˬ jawˇ mawˇ lonˉ ve la‸ sheh awˬ hk'aw lo ngaˬ g'a ponˬ ve yoˬ.

2 Kawˇrenˍhtuˆ 12

1 Ngaˬ lehˬ nyi ma uiˍ ve awˬ hk'aw lo g'a k'oˆ tuˬ yoˬ. Chi hk'e k'oˆ tuˬ awˬ bon maˇ cawˬ ve htawˇ, Jawˇ mawˇ Yeˍsuˆ hpeu‸ maˍ laˇ leh awˬ ha awˬ hk'aw lo maw laˇ ve awˬ ceuˬ teˇ hpaˍ awˬ lawn ngaˬ k'aoˍ maˍ laˇ shaˍ. 2 Hkri‸ awˬ hk'aw lo chehˇ ve chaw teˇ g'aˇ hta‸ ngaˬ shiˍ ve yoˬ. Yawˇ lehˬ, ponˬ laˬ ve teˇ chi awˇ hk'aw‸ htaˇ mvuhˇ naw ma shehˆ htai‸ teˇ htai‸ hk'a gaˬ chiˇ taˆ-e ve hta‸ g'a hkanˍ ve yoˬ. (Awˬ to taˆ-e ve leh naˍ, awˬ ha ceh tiˉ taˆ-e ve leh naˍ, ngaˬ maˇ shiˍ. G'uiˬ sha ceh tiˉ shiˍ ve yoˬ.) 3 Chaw oˇ ve teˇ g'aˇ lehˬ, Paˍraˍdiˇsuˆ lo chiˇ taˆ-e ve hta‸ g'a hkanˍ ve yoˬ. (Awˬ to taˆ-e ve leh naˍ, awˬ ha ceh tiˉ taˆ-e ve leh naˍ, ngaˬ maˇ shiˍ. G'uiˬ sha ceh tiˉ shiˍ ve yoˬ.) 4 Chaw teˇ g'aˇ ka‸ k'oˆ maˇ hpeh‸ k'oˆ maˇ keunˍ ve tawˇ hkawˇ teˇ hpaˍ hta‸ oˇ kaˬ lo yawˇ g'a kaˇ ve yoˬ. 5 Chaw oˇ ve awˬ lawn ngaˬ nyi ma uiˍ ve awˬ hk'aw lo k'oˆ shaˍ. Ngaˬ awˬ g'aˇ nuˇ ve teˇ hpaˍ awˬ lawn maˇ heˆ k'o, ngaˬ ve awˬ to awˬ lawn nyi ma uiˍ ve awˬ hk'aw lo ngaˬ k'oˆ tuˬ ve maˇ heˆ. 6 Ya‸ hk'aˇ, ngaˬ nyi ma uiˍ ve awˬ hk'aw lo k'oˆ gaˇ ve k'o, ngaˬ cuˇ yiˍ maˇ cawˬ ve chaw hpeh‸ tuˬ ve maˇ heˆ. Awˬ lawn k'o, hteˇ ve cawˇ ve awˬ hk'aw lo ngaˬ k'oˆ tuˬ yoˬ. Ya‸ hk'aˇ, ngaˬ te ve teˇ hpaˍ hta‸ g'a mawˬ leh, ngaˬ k'oˆ ve teˇ hpaˍ hta‸ g'a kaˇ ve chi nyiˇ ceuˬ maˇ heˆ k'o, chaw teˇ g'aˇ ka‸ ngaˬ awˬ lawn maˇ g'a dawˇ nyi tuˬ, ngaˬ awˬ to awˬ lawn nyi ma uiˍ ve awˬ hk'aw lo ngaˬ te‸ chiˉ maˇ k'oˆ. 7 Uiˍ jaˇ da‸ jaˇ ve hpeu‸ maˍ laˇ ve teˇ hpaˍ hta‸ pa taw, ngaˬ awˬ to hta‸ leuˉ leh maˇ g'a taˍ uiˍ tuˬ, awˬ suhˍ awˬ shaˍ hpawˇ ngaˬ hta‸ aˉ chuˇ teˇ maˬ tcuhˍ laˇ ve yoˬ. Aˉ chuˇ chi lehˬ, Saˍtanˍ ve tcuh yaˇ hpeh‸ leh, ngaˬ awˬ to hta‸ leuˉ leh maˇ g'a taˍ uiˍ tuˬ, ngaˬ hta‸ fawˉ mehˍ laˇ chehˇ ve yoˬ. 8 Aˉ chuˇ chi hta‸ ngaˬ g'a ponˬ tuˬ, Jawˇ mawˇ Yeˍsuˆ hta‸ shehˆ pawˆ hk'a gaˬ ngaˬ lawˬ hkawˉ ve yoˬ. 9 Ya‸ hk'aˇ yawˇ k'oˆ ve, Ngaˬ ve awˬ bon lehˬ, nawˬ awˬ pon law‸ ve yoˬ. Awˬ g'aˇ nuˇ ve teˇ kaˬ awˬ hk'aw lo ngaˬ ve kanˇ paˆ biˇ la ve yoˬ teh‸, ngaˬ hta‸ k'oˆ laˇ ve yoˬ. Hk'e te leh, Hkri‸ ve kanˇ paˆ lehˬ, ngaˬ awˬ hk'oˆ lo g'a cawˬ taˍ tuˬ, ngaˬ awˬ g'aˇ nuˇ ve teˇ hpaˍ awˬ lawn hta‸ leuˉ leh nyi ma uiˍ ve awˬ hk'aw lo ngaˬ ha lehˬ ha k'a k'oˆ tuˬ yoˬ. 10 Chi hta‸ pa taw, Hkri‸ awˬ pon g'a hkanˍ ve teˇ hpaˍ, awˬ g'aˇ nuˇ ve, hk'a mvuhˇ hk'a na k'oˆ laˇ ve, haˍ ve g'awˇ ve, fawˉ ve mehˍ ve, tu‸ jaˇ hkanˍ jaˇ ve, chi teˇ hpaˍ hta‸ ngaˬ ha lehˬ ha k'a hkanˍ ve yoˬ. Awˬ lawn k'o, ngaˬ awˬ g'aˇ nuˇ ve teˇ yanˇ ngaˬ awˬ g'aˇ uiˍ ve yoˬ. 11 Ngaˬ lehˬ, cuˇ yiˍ maˇ cawˬ ve chaw hpeh‸ la peuˬ. Nawˬ hui ngaˬ hta‸ chi hk'e hpeh‸ la piˇ lawˬ peuˬ. Awˬ lawn k'o, nawˬ hui ngaˬ hta‸ chiˇ mvuh laˇ cawˇ ve yoˬ. Ngaˬ lehˬ, te‸ chiˉ maˇ hpeh‸ ve chaw teˇ g'aˇ hpeh‸ ve htawˇ, uiˍ jaˇ mvuh jaˇ ve tcuh yaˇ oˇ ve teˇ hpaˍ awˬ hawˉ lo ngaˬ a ciˉ ka‸ maˇ chehˇ. 12 Awˬ tehˬ awˬ na tcuh yaˇ hpeh‸ ve awˬ heˆ teˇ hpaˍ ngaˬ nawˬ hui mehˆ g'uˇ suhˍ te maˍ laˇ peuˬ. Awˬ heˆ teˇ hpaˍ maˇ k'oˆ, anˇ tuˬ teˇ hpaˍ maˇ k'oˆ, kanˇ paˆ uiˍ ve kanˉ teˇ hpaˍ maˇ k'oˆ, hk'a peu-eˬ hta‸ yeunˇ hkanˍ ve awˬ hk'aw lo ngaˬ te maˍ laˇ peuˬ ve yoˬ. 13 Awˬ lawn k'o, nawˬ hui ngaˬ hta‸ maˇ g'a hu ve teˇ ceuˬ maˇ heˆ k'o, awˬ kaˍ awˬ nu Hkri‸ yaˇ awˬ moˍ teˇ hpaˍ hta‸ ngaˬ taˍ uiˍ leh nawˬ hui hta‸ ngaˬ maˇ taˍ uiˍ ve, aˬ hto‸ ma teˇ ceuˬ cawˬ le. Nawˬ hui ngaˬ hta‸ maˇ g'a hu ve, ngaˬ ve ya‸ kuiˬ chi hta‸ a ciˉ hpehˇ laˇ-oˆ. 14 Shehˆ pawˆ teˇ pawˆ nawˬ hui geh laˬ tuˬ chi beu‸ ngaˬ gu taˍ leh, chi teˇ pawˆ ka‸ nawˬ hui ngaˬ hta‸ g'a hu tuˬ ve maˇ heˆ. Awˬ lawn k'o, nawˬ hui ve mawˇ hta‸ ngaˬ ca ve maˇ heˆ. Nawˬ hui hta‸ ceh tiˉ ngaˬ ca ve yoˬ. Yaˇ ehˉ teˇ hpaˍ lehˬ, awˬ pa awˬ e awˬ pon mawˇ jeˬ g'a shaw hpoˆ taˍ tuˬ ve maˇ heˆ. Awˬ pa awˬ e teˇ hpaˍ lehˬ, yaˇ ehˉ teˇ hpaˍ awˬ pon mawˇ jeˬ g'a shaw hpoˆ taˍ ve yoˬ. 15 Nawˬ hui ve co ha awˬ pon ngaˬ ve mawˇ jeˬ g'a peuˬ ve maˇ k'oˆ, ngaˬ ve awˬ to g'a luˬ ve maˇ k'oˆ, ngaˬ ha lehˬ ha k'a te tuˬ yoˬ. Ngaˬ nawˬ hui hta‸ ha‸ ve teˇ ceuˬ maˇ la ve pa taw, nawˬ hui ngaˬ hta‸ ha‸ ve teˇ ceuˬ g'a i k'ai tuˬ ve leh laˇ. 16 Nawˬ hui ngaˬ hta‸ maˇ g'a hu ve htawˇ, ngaˬ cuˇ yiˍ te leh heˍ ve awˬ hk'aw lo nawˬ hui hta‸ maˍ g'a ve yoˬ teh‸, nawˬ hui k'oˆ chehˇ ve yoˬ. 17 Nawˬ hui chehˇ kuiˬ lo chaw teˇ g'aˇ g'aˇ hta‸ ngaˬ k'ai tcuh ve awˬ hk'aw lo, nawˬ hui ve mawˇ jeˬ hta‸ ngaˬ heˍ yuˬ ve leh laˇ. 18 Tiˇtuˆ nawˬ hui ve chehˇ kuiˬ lo k'ai tuˬ ngaˬ yawˇ hta‸ lawˬ hkawˉ leh, awˬ viˉ awˬ nyi oˇ ve teˇ g'aˇ hta‸ htawˇ yawˇ geh k'ai tcuh ve yoˬ. Tiˇtuˆ lehˬ, nawˬ hui ve mawˇ jeˬ hta‸ heˍ yuˬ ve leh laˇ. Ngaˬ huiˉ maˬ nyi ma teˇ shiˍ tiˉ taˍ leh kanˉ te ve maˇ heˆ laˇ. Ngaˬ huiˉ maˬ ya‸ k'aw teˇ caˆ tiˉ toˇ ve maˇ heˆ laˇ. 19 Ngaˬ hui lehˬ, nawˬ hui mehˆ g'uˇ suhˍ ngaˬ hui awˬ to awˬ pon k'aw‸ yaw hk'aw‸ chehˇ ve teh‸ nawˬ hui chi maw maw dawˇ chehˇ ve leh laˇ. Hkri‸ awˬ hk'aw lo G'uiˬ sha mehˆ g'uˇ suhˍ ngaˬ hui k'oˆ chehˇ ve yoˬ. Ha‸ ve chaw teˇ hpaˍ-oˬ, nawˬ hui uiˍ la yeˬ la tuˬ awˬ pon chi hk'a peu-eˬ hta‸ ngaˬ hui te ve yoˬ. 20 Awˬ lawn k'o, nawˬ hui geh ngaˬ gaˬ la ve teˇ yanˇ, ngaˬ dawˇ law taˍ ve hk'e nawˬ hui maˇ hpeh‸ leh, nawˬ hui dawˇ law taˍ ve hk'e ngaˬ htawˇ maˇ hpeh‸ ve hta‸ ngaˬ dawˇ haˍ ve yoˬ. Ya‸ da‸ jiˆ da‸ ve, hkawehˉ da‸ ve, nyi ma zuhˆ ve, pehˬ da‸ hpaˆ da‸ ve, hk'aiˉ da‸ ve, hk'awˇ deˇ ve, nyi ma uiˍ ve leh, duiˆ-ehˍ shaˇ-ehˍ te ve, chi teˇ hpaˍ hta‸ nawˬ hui te chehˇ tuˬ yoˬ hehˉ teh‸ ngaˬ dawˇ haˍ ve yoˬ. 21 Nawˬ hui geh ngaˬ k'aw‸ gaˬ la ve teˇ yanˇ, ngaˬ ve G'uiˬ sha lehˬ, nawˬ hui mehˆ g'uˇ suhˍ ngaˬ hta‸ nyiˉ ya‸ laˇ tuˬ ve hta‸ htawˇ ngaˬ dawˇ haˍ ve yoˬ. Ponˬ laˬ htaˇ, cha‸ chiˆ ve hta‸ te ve, haˉ chawˇ haˉ paˆ te ve leh, te ponˬ te leuˉ ve hta‸ te ve chaw laiˉ g'aˇ lehˬ, venˇ baˆ maˇ dawˇ hpfuhˆ ve hta‸ pa taw, ngaˬ g'a dawˇ haˍ jaˇ tuˬ yoˬ hehˉ teh‸ dawˇ hkiˉ ve yoˬ.

2 Kawˇrenˍhtuˆ 13

1 Chi teˇ pawˆ ngaˬ nawˬ hui geh laˬ tuˬ ve lehˬ, shehˆ pawˆ teˇ pawˆ yoˬ. Nawˬ hui hk'a k'oˆ tuˬ ve awˬ lawn teˇ ceuˬ le le awˬ ti cawˬ hpeh‸ tuˬ, shaˉ hkiˆ hkanˍ shehˍ hpaˇ nyiˇ g'aˇ maˇ heˆ k'o shehˆ g'aˇ g'aˇ cawˬ tuˬ yoˬ. 2 Ngaˬ nawˬ hui geh nyiˇ pawˆ teˇ pawˆ ca guiˇ la htaˇ ngaˬ k'oˆ laˇ taˍ ve hk'e, chi beu‸ nawˬ hui geh maˇ chehˇ ve awˬ yanˇ awˬ hk'aw lo htawˇ ngaˬ k'aw‸ k'oˆ laˇ ve yoˬ. Ponˬ laˬ htaˇ venˇ baˆ te ve chaw hta‸ maˇ k'oˆ, te ya‸ chehˇ ve awˬ kaˍ awˬ nu chaw hk'a peu-eˬ hta‸ maˇ k'oˆ, ngaˬ teˇ pawˆ k'aw‸ gaˬ la ve k'o, ngaˬ yawˇ hui hta‸ ponˬ piˇ tuˬ ve maˇ heˆ. 3 Hkri‸ ngaˬ hta‸ cuˇ leh tawˇ yaw chehˇ ve leh naˍ teh‸, nawˬ hui hk'a deh‸ shiˍ gaˇ ve pa taw, ngaˬ yawˇ hui hta‸ maˇ ponˬ piˇ. Nawˬ hui hta‸ caˉ da‸ ve teˇ hpaˍ te tuˬ, Hkri‸ awˬ g'aˇ nuˇ ve maˇ heˆ. Nawˬ hui ve awˬ moˍ awˬ hk'aw lo yawˇ kanˇ paˆ uiˍ ve yoˬ. 4 Awˬ lawn k'o, Hkri‸ lehˬ awˬ g'aˇ nuˇ ve awˬ hk'aw lo la‸ ka hk'oˆ lo g'a hkanˍ suh ve htawˇ, G'uiˬ sha ve kanˇ paˆ hta‸ pa taw yawˇ te‸ chehˇ ve yoˬ. Ngaˬ hui htawˇ, Hkri‸ awˬ hk'aw lo awˬ g'aˇ nuˇ ve ka‸, G'uiˬ sha ve kanˇ paˆ hta‸ pa taw nawˬ hui awˬ pon ngaˬ hui Hkri‸ geh teˇ geh te‸ chehˇ tuˬ yoˬ. 5 Nawˬ hui yonˍ ve awˬ hk'aw lo yeˬ chehˇ-aw laˇ, maˇ yeˬ chehˇ laˇ, a shu yawˇ awˬ to hta‸ hk'a deh‸ tehˆ nyi lawˇ nyi sheˍ. Yeˍsuˆ Hkri‸ nawˬ hui awˬ hk'aw lo chehˇ ve hta‸ nawˬ hui maˇ shiˍ laˇ. Ya‸ hk'aˇ, lawˇ nyi ve hta‸ hkanˍ maˇ g'a ve chaw hpeh‸ ve k'o, Hkri‸ nawˬ hui awˬ hk'aw lo maˇ chehˇ. 6 Lawˇ nyi ve awˬ hk'aw lo ngaˬ hui lehˬ hkanˍ g'a ve chaw hpeh‸ ve yoˬ teh‸, nawˬ hui shiˍ tuˬ ve hta‸ ngaˬ hui dawˇ law ve yoˬ. 7 Haiˬ ve hta‸ nawˬ hui maˇ g'a te tuˬ, ngaˬ hui G'uiˬ sha hta‸ bon lawˬ ve yoˬ. Lawˇ nyi ve hta‸ ngaˬ hui hkanˍ g'a peuˬ ve teh‸ ngaˬ hui tawˆ la piˇ lawˬ gaˇ ve maˇ heˆ. ngaˬ hui hkanˍ maˇ g'a ve chaw hta‸ shuˍ ve htawˇ, nawˬ hui lehˬ da‸ ve hta‸ te tuˬ awˬ pon ngaˬ hui bon lawˬ chehˇ ve yoˬ. 8 Awˬ lawn k'o, hteˇ ve cawˇ ve teˇ ceuˬ hta‸ tawˍ taˍ tuˬ ngaˬ hui te‸ chiˉ te maˇ hpeh‸. Hteˇ ve cawˇ ve teˇ ceuˬ awˬ pon ceh tiˉ ngaˬ hui te hpeh‸ ve yoˬ. 9 Ngaˬ hui awˬ g'aˇ nuˇ ve htawˇ, nawˬ hui awˬ g'aˇ uiˍ ve pa taw ngaˬ hui ha lehˬ ve yoˬ. Nawˬ hui da‸ la biˇ la tuˬ awˬ pon ngaˬ hui bon lawˬ chehˇ ve yoˬ. 10 Ngaˬ nawˬ hui geh gaˬ la ve teˇ yanˇ, Jawˇ mawˇ Yeˍsuˆ ngaˬ hta‸ pe‸ laˇ ve aˉ yaˇ hta‸ ngaˬ hehnˇ chaweh maˇ g'a yehˇ tuˬ, ngaˬ nawˬ hui geh maˇ chehˇ ve teˇ yanˇ, awˬ ceuˬ chi teˇ hpaˍ ngaˬ li‸ bvuh‸ laˇ ve yoˬ. Yawˇ pe‸ laˇ ve aˉ yaˇ lehˬ, nawˬ hui hta‸ te luˬ tuˬ awˬ pon maˇ heˆ. Nawˬ hui hta‸ uiˍ la yeˬ la piˇ tuˬ awˬ pon yawˇ pe‸ laˇ ve yoˬ. 11 Awˬ viˉ awˬ nyi teˇ hpaˍ-oˬ, awˬ leh ve tawˇ teˇ hkawˇ lehˬ chi hk'e yoˬ. Ha lehˬ chehˇ-oˆ. Da‸ la biˇ la piˇ-oˆ. Dawˇ sha gaˇ sha cawˬ piˇ-oˆ. Nyi ma teˇ shiˍ tiˉ taˍ-o‸. Cawˇ da‸ hui da‸ ve awˬ hk'aw lo chehˇ-oˆ. Chi hk'e te ve k'o, ha‸ pehnˇ ve nyi ma cawˬ leh cawˇ da‸ hawˍ da‸ piˇ shehˍ hpaˇ G'uiˬ sha lehˬ nawˬ hui geh chehˇ tuˬ yoˬ. 12 Nawˬ hui teˇ g'aˇ leh teˇ g'aˇ da‸ ve kehˬ ve awˬ hk'aw lo boˆ nu da‸ leh la‸ sheh caˉ da‸-o‸. 13 Hkri‸ yaˇ hui hk'a peu-eˬ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 14 Jawˇ mawˇ Yeˍsuˆ Hkri‸ ve awˬ bon awˬ shinˉ, G'uiˬ sha ve ha‸ ve pehnˇ ve leh, da‸ ve kehˬ ve Awˬ ha hpu hta‸ awˬ chawˇ te da‸ ve, chi teˇ hpaˍ nawˬ hui hk'a peu-eˬ geh cawˬ piˇ-oˆ.

Gaˍlaˍtiˆ 1

1 Ngaˬ tcuh yaˇ hpeh‸ ve Pawˇlu‸ leh ngaˬ geh chehˇ ve awˬ viˉ awˬ nyi hk'a peu-eˬ lehˬ, Gaˍlaˍtiˆ mvuhˇ miˬ awˬ hk'aw lo cawˬ ve Hkri‸ yaˇ awˬ moˍ teˇ hpaˍ hta‸ li‸ bvuh‸ laˇ ve yoˬ. 2 Ngaˬ tcuh yaˇ hpeh‸ ve lehˬ, chaw yaˇ geh lo g'a ve maˇ heˆ. Chaw yaˇ hta‸ pa taw hpeh‸ la ve ka‸ maˇ heˆ. Yeˍsuˆ Hkri‸ leh yawˇ hta‸ suh kuiˬ lo k'aw‸ te‸ tu la piˇ shehˍ hpaˇ Awˬ pa G'uiˬ sha hta‸ pa taw hpeh‸ la ve yoˬ. 3 Awˬ pa G'uiˬ sha leh ngaˬ hui ve Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 4 Jawˇ mawˇ Yeˍsuˆ Hkri‸ lehˬ, ngaˬ hui ve Awˬ pa G'uiˬ sha ve a loˍ cawˇ ve hk'e, haiˬ ve chi teˇ ca‸ na‸ awˬ hk'aw lo ngaˬ hui hta‸ ponˬ laˇ tuˬ, ngaˬ hui ve venˇ baˆ hta‸ pa taw ngaˬ hui awˬ pon yawˇ awˬ to chiˇ a‸ piˇ ve yoˬ. 5 Awˬ pa G'uiˬ sha hta‸ co co taiˍ taiˍ chiˇ uiˍ chiˇ mvuh piˇ-oˆ. A menˬ. 6 Hkri‸ ve awˬ bon awˬ shinˉ awˬ hk'aw lo nawˬ hui hta‸ kuˬ yuˬ taˍ ve G'uiˬ sha hta‸ haˆ haˆ baˬ taˉ leh awˬ kaˍ awˬ nu ha lehˬ ve bon hkawˇ hta‸ nawˬ hui ha‸ yuˬ ve pa taw, ngaˬ anˇ jaˇ ve yoˬ. 7 Awˬ kaˍ awˬ nu ha lehˬ ve bon hkawˇ cawˬ tehˬ ve maˇ heˆ. Ya‸ hk'aˇ, nawˬ hui hta‸ sho‸ sha‸ tuˬ te laˇ leh, Hkri‸ ve ha lehˬ ve bon hkawˇ hta‸ yuˬ hpfuhˆ gaˇ ve chaw teˇ hpaˍ hpaˍ cawˬ ve yoˬ. 8 Ngaˬ hui nawˬ hui hta‸ maˍ laˇ peuˬ ve ha lehˬ ve bon hkawˇ hta‸ maˇ caˉ da‸ ve awˬ kaˍ awˬ nu ve bon hkawˇ ngaˬ hui maˇ k'oˆ, mvuhˇ naw ma tcuh yaˇ maˇ k'oˆ, nawˬ hui hta‸ maˍ laˇ ve k'o, hkeu ve hta‸ g'a hkanˍ piˇ-oˆ. 9 Ponˬ laˬ htaˇ ngaˬ hui k'oˆ taˍ ve hk'e, ngaˬ teˇ pawˆ k'aw‸ k'oˆ laˇ shaˍ. Nawˬ hui ha‸ yuˬ peuˬ ve ha lehˬ ve bon hkawˇ hta‸ maˇ caˉ da‸ ve awˬ kaˍ awˬ nu ve bon hkawˇ, chaw teˇ g'aˇ g'aˇ nawˬ hui hta‸ maˍ laˇ ve k'o, hkeu ve hta‸ g'a hkanˍ piˇ-oˆ. 10 Ngaˬ chi hk'e k'oˆ ve lehˬ, chaw yaˇ nyi ma cawˇ tuˬ ngaˬ te ve laˇ. Maˇ heˆ k'o, G'uiˬ sha nyi ma cawˇ tuˬ ngaˬ te ve laˇ. Chaw yaˇ hui nyi hk'aˇ suh tuˬ ngaˬ ca ve laˇ. Chaw yaˇ hui nyi hk'aˇ suh tuˬ ngaˬ ca chehˇ sheˍ ve hk'e k'o, ngaˬ lehˬ Hkri‸ ve awˬ ceˬ hpeh‸ ve maˇ heˆ. 11 Awˬ viˉ awˬ nyi teˇ hpaˍ-oˬ, ngaˬ maˍ piˇ taˍ ve ha lehˬ ve bon hkawˇ lehˬ, chaw yaˇ geh lo tawˆ la ve maˇ heˆ teh‸, ngaˬ nawˬ hui hta‸ hk'a deh‸ shiˍ tcuh laˇ gaˇ ve yoˬ. 12 Awˬ lawn k'o, chaw yaˇ geh lo ngaˬ g'a ve maˇ heˆ. Shu ngaˬ hta‸ maˍ laˇ ve ka‸ maˇ heˆ. Yeˍsuˆ Hkri‸ ngaˬ hta‸ hpeu‸ maˍ laˇ ve pa taw g'a ve yoˬ. 13 Yuˇda‸ ve awˬ liˇ awˬ hk'aw lo ngaˬ chehˇ sheˍ ve teˇ yanˇ, ngaˬ hk'aˬ hk'e te ve awˬ lawn hta‸ nawˬ hui kaˇ jaw ve yoˬ. Oˇ htaˇ, G'uiˬ sha ve Hkri‸ yaˇ awˬ moˍ hta‸ ngaˬ g'aˇ hte‸ fawˉ mehˍ leh, luˬ k'ai tuˬ te ve yoˬ. 14 Ngaˬ ve awˬ puˍ awˬ pi hui teh taˉ laˇ ve awˬ liˇ teˇ hpaˍ hta‸ te tuˬ ngaˬ nyi ma pfuhˇ jaˇ ve pa taw, ngaˬ ve chaw ceuˬ awˬ hk'aw lo a sha‸ ngaˬ hk'e ceh ve chaw maˇ-awˍ ve a‸ kehˉ Yuˇda‸ awˬ liˇ hta‸ ngaˬ te ve yoˬ. 15 Ya‸ hk'aˇ, ngaˬ maˇ paw la sheˍ htaˇ ka‸ ngaˬ hta‸ leuˆ yuˬ leh, yawˇ ve awˬ bon hta‸ pa taw ngaˬ hta‸ kuˬ yuˬ laˇ ve G'uiˬ sha lehˬ, 16 yawˇ ve Yaˇ hpu awˬ lawn ha lehˬ ve bon hkawˇ chi, buiˇ shaˆ aˉ naˆ chaw hui hta‸ maˍ piˇ tuˬ, yawˇ a loˍ cawˇ ve hk'e, yawˇ ve Yaˇ hpu ngaˬ hta‸ yawˇ hpeu‸ maˍ laˇ ve yoˬ. Chi hk'e hpeu‸ maˍ laˇ peuˬ hk'aw‸ nawˉ, chaw yaˇ geh ngaˬ ca jehˬ da‸ ve maˇ heˆ. 17 Chi hk'oˆ ka‸, ngaˬ tcuh yaˇ maˇ hpeh‸ la sheˍ htaˇ tcuh yaˇ hpeh‸ chehˇ taˍ ve, Yeˍruˆsaˍlehnˍ venˇ hk'aw lo chehˇ ve chaw teˇ hpaˍ geh ngaˬ maˇ k'ai. Aˍraˆ mvuhˇ miˬ lo ngaˬ k'ai leh, awˬ hk'aw‸ nawˉ Daˍmaˍsehˆ venˇ lo k'aw‸ la ve yoˬ. 18 Oˇ ve hk'aw‸ nawˉ, shehˆ hk'aw‸ gaˬ ve teˇ yanˇ, Keˍhpaˆ geh ngaˬ ca guiˇ-e tuˬ Yeˍruˆsaˍlehnˍ venˇ lo k'ai leh, yawˇ geh teˇ chi ngaˇ nyi hk'a gaˬ chehˇ taˍ ve yoˬ. 19 Jawˇ mawˇ Yeˍsuˆ ve awˬ nyi paˍ Yaˍkoˆ hta‸ maˇ heˆ k'o, awˬ kaˍ awˬ nu tcuh yaˇ teˇ g'aˇ hta‸ ka‸ ngaˬ maˇ mawˬ. 20 (Ngaˬ nawˬ hui hta‸ li‸ chi hk'e bvuh‸ laˇ ve lehˬ, ngaˬ heˍ ve maˇ heˆ teh‸, G'uiˬ sha mehˆ g'uˇ suhˍ ngaˬ k'oˆ ve yoˬ.) 21 Oˇ ve hk'aw‸ nawˉ, Suˇriˆ leh Kiˇliˇkiˆ mvuhˇ miˬ lo ngaˬ k'ai ve yoˬ. 22 Oˇ htaˇ, Yuˇda‸ mvuhˇ miˬ awˬ hk'aw lo cawˬ ve Hkri‸ yaˇ awˬ moˍ teˇ hpaˍ ngaˬ hta‸ maˇ mawˬ jaw sheˍ. 23 Ponˬ laˬ htaˇ ngaˬ hui hta‸ fawˉ mehˍ laˇ jaw ve teˇ g'aˇ lehˬ, oˇ htaˇ yawˇ te luˬ chehˇ ve yonˍ ve teˇ ceuˬ hta‸ chi beu‸ bon maˍ chehˇ ve yoˬ teh‸, k'oˆ ve awˬ hkawˇ hta‸ ceh tiˉ yawˇ hui g'a kaˇ ve yoˬ. 24 Ngaˬ hta‸ pa taw yawˇ hui G'uiˬ sha hta‸ chiˇ uiˍ chiˇ mvuh ve yoˬ.

Gaˍlaˍtiˆ 2

1 Oˇ ve awˬ hk'aw‸ nawˉ, teˇ chi awˇ hk'aw‸ gaˬ htaˇ, ngaˬ Tiˇtuˆ hta‸ shiˍ veu leh, Baˍnaˍbaˆ geh Yeˍruˆsaˍlehnˍ venˇ lo teˇ pawˆ k'aw‸ k'ai ve yoˬ. 2 G'uiˬ sha hpeu‸ maˍ laˇ ve hta‸ pa taw ngaˬ k'ai ve yoˬ. Ngaˬ te peuˬ ve kanˉ leh chi beu‸ te chehˇ ve kanˉ teˇ hpaˍ hk'e leˇ maˇ g'a hpeh‸ tuˬ, buiˇ shaˆ aˉ naˆ chaw hui hta‸ ngaˬ maˍ piˇ ve ha lehˬ ve bon hkawˇ yawˇ hui mehˆ g'uˇ suhˍ ngaˬ k'aoˍ maˍ piˇ ve yoˬ. (Ya‸ hk'aˇ, awˉ lawˉ htaˇ awˬ hoˉ teˇ hpaˍ hta‸ ceh tiˉ ngaˬ k'aoˍ maˍ piˇ ve yoˬ.) 3 Ngaˬ geh teˇ geh k'ai ve Tiˇtuˆ lehˬ, Heˍlaˍsaˆ chaw hpeh‸ ve htawˇ, shu yawˇ hta‸ awˬ guiˬ meuˇ maˇ shoˍ tcuh. 4 Yeˍsuˆ Hkri‸ awˬ hk'aw lo ngaˬ hui g'a taˍ ve ponˬ ve teˇ ceuˬ hta‸ jaˆ nyi leh ngaˬ hui hta‸ awˬ ceˬ te tcuh laˇ tuˬ, awˬ viˉ awˬ nyi teh‸ k'oˆ ve ka‸, awˬ viˉ awˬ nyi maˇ heˆ ve chaw teˇ hpaˍ ngaˬ hui geh lo hk'awˇ lo‸ la ve yoˬ. 5 Ya‸ hk'aˇ, ha lehˬ ve bon hkawˇ ve hteˇ ve cawˇ ve teˇ ceuˬ nawˬ hui awˬ hk'aw lo yeˬ chehˇ tuˬ, ngaˬ yawˇ hui ve hkawˇ hta‸ a ciˉ ka‸ maˇ na. 6 Awˬ hoˉ teˇ hpaˍ lehˬ, ngaˬ maˍ piˇ ve ha lehˬ ve bon hkawˇ hta‸ te‸ chiˉ maˇ htehˍ laˇ. (Yawˇ hui awˬ hoˉ hpeh‸ ve teh‸ k'oˆ ve lehˬ, yawˇ hui hk'aˬ hk'e ve chaw hpeh‸ ve hta‸ ngaˬ te‸ chiˉ maˇ dawˇ. G'uiˬ sha lehˬ chaw yaˇ ve mehˆ hpfuhˇ hta‸ maˇ nyi.) 7 Yawˇ hui te‸ chiˉ maˇ htehˍ laˇ ve awˬ hk'oˆ ka‸, awˬ guiˬ meuˇ shoˍ ve chaw hui hta‸ ha lehˬ ve bon hkawˇ maˍ piˇ tuˬ G'uiˬ sha Peˍtruˆ hta‸ chiˇ a‸ piˇ taˍ ve hk'e, awˬ guiˬ meuˇ maˇ shoˍ ve chaw hui hta‸ ha lehˬ ve bon hkawˇ maˍ piˇ tuˬ G'uiˬ sha ngaˬ hta‸ chiˇ a‸ laˇ taˍ ve yoˬ teh‸, yawˇ hui g'a shiˍ g'a mawˬ ve yoˬ. 8 (Awˬ lawn k'o, awˬ guiˬ meuˇ shoˍ ve chaw hui awˬ pon kanˉ te tuˬ Peˍtruˆ hta‸ aˉ yaˇ piˇ shehˍ hpaˇ teˇ g'aˇ lehˬ, buiˇ shaˆ aˉ naˆ chaw hui awˬ pon kanˉ te tuˬ ngaˬ hta‸ htawˇ aˉ yaˇ pe‸ laˇ ve yoˬ.) 9 Ngaˬ hta‸ pe‸ laˇ ve awˬ bon hta‸ yawˇ hui g'a shiˍ g'a mawˬ ve teˇ yanˇ, nyi ma yeˬ jaˇ ve awˬ hoˉ teˇ hpaˍ, Yaˍkoˆ, Keˍhpaˆ leh Yoˇhanˬ hui lehˬ, Baˍnaˍbaˆ ngaˬ huiˉ maˬ hta‸ la‸ sha paˉ la‸ sheh caˉ laˇ ve yoˬ. Oˇ hk'e te ve lehˬ, awˬ chawˇ te da‸ ve awˬ heˆ hpeh‸ ve yoˬ. Ngaˬ huiˉ maˬ lehˬ, buiˇ shaˆ aˉ naˆ chaw hui geh k'ai leh, yawˇ hui lehˬ, awˬ guiˬ meuˇ shoˍ ve chaw hui geh k'ai tuˬ yoˬ teh‸ k'oˆ da‸ taˍ ve yoˬ. 10 Haˍ ve g'awˇ ve chaw hui hta‸ ngaˬ hui dawˇ nawˇ tuˬ, chi teˇ ceuˬ ngaˬ hui hta‸ yawˇ hui lawˬ hkawˉ laˇ ve yoˬ. Oˇ hk'e te tuˬ ngaˬ htawˇ te gaˇ jaˇ ve yoˬ. 11 Oˇ ve awˬ hk'aw‸ nawˉ Keˍhpaˆ lehˬ, Anˍtiˆawˍ venˇ lo gaˬ la ve teˇ yanˇ, yawˇ te maˇ cawˇ ve teˇ ceuˬ hk'a tawˍ lehˆ tawˆ la ve pa taw, ngaˬ yawˇ hta‸ mehˆ hpfuhˇ tawˍ da‸ taˍ leh deˇ piˇ ve yoˬ. 12 Awˬ lawn k'o, Yaˍkoˆ ve chaw teˇ hpaˍ maˇ gaˬ la sheˍ htaˇ, Keˍhpaˆ lehˬ, buiˇ shaˆ aˉ naˆ chaw teˇ hpaˍ geh awˍ caˇ chehˇ ve yoˬ. Ya‸ hk'aˇ, yawˇ hui gaˬ la ve teˇ yanˇ, awˬ guiˬ meuˇ shoˍ ve chaw teˇ moˍ hta‸ yawˇ kawˆ ve pa taw, buiˇ shaˆ aˉ naˆ chaw teˇ hpaˍ hta‸ hpaˆ da‸ leh, awˬ chawˇ maˇ k'aw‸ te ve yoˬ. 13 Awˬ kaˍ awˬ nu Yuˇda‸ chaw teˇ hpaˍ htawˇ, yawˇ geh teˇ geh maˇ heˆ ve hta‸ k'aw‸ te ve pa taw, Baˍnaˍbaˆ ka‸ yawˇ hui awˬ hk'aˇ suh k'ai ve yoˬ. 14 Yawˇ hui lehˬ, ha lehˬ ve bon hkawˇ ve hteˇ ve cawˇ ve teˇ ceuˬ awˬ hk'aˇ suh hteˇ lehˍ maˇ k'ai ve hta‸ ngaˬ g'a mawˬ ve teˇ yanˇ, yawˇ hui hk'a peu-eˬ mehˆ g'uˇ suhˍ Keˍhpaˆ hta‸ ngaˬ chi hk'e k'oˆ piˇ ve, Nawˬ lehˬ Yuˇda‸ chaw hpeh‸ ve ka‸, Yuˇda‸ ve awˬ liˇ hta‸ nawˬ maˇ te leh buiˇ shaˆ aˉ naˆ ve awˬ liˇ hta‸ te ve k'o, buiˇ shaˆ aˉ naˆ chaw teˇ hpaˍ lehˬ, Yuˇda‸ ve awˬ liˇ hta‸ te tuˬ, aˬ hto‸ ma pa taw nawˬ yawˇ hui hta‸ nyiˉ te ve le teh‸ k'oˆ piˇ ve yoˬ. 15 Ngaˬ hui lehˬ, paw la htaˇ ka‸ Yuˇda‸ chaw hpeh‸ ve yoˬ. Venˇ baˆ yaˇ teh‸ k'oˆ ve buiˇ shaˆ aˉ naˆ chaw hpeh‸ ve maˇ heˆ. 16 Ngaˬ hui Yuˇda‸ chaw hpeh‸ ve ka‸, chaw teˇ g'aˇ hteˇ ve cawˇ ve chaw hpeh‸ la ve lehˬ, awˬ liˇ tawˇ hkawˇ hta‸ caˉ da‸ ve kanˉ teˇ hpaˍ hta‸ te ve pa taw maˇ heˆ. Yeˍsuˆ Hkri‸ hta‸ yonˍ ve pa taw hteˇ ve cawˇ ve chaw hpeh‸ la ve hta‸ ngaˬ hui shiˍ ve yoˬ. Ngaˬ hui htawˇ, Hkri‸ hta‸ yonˍ ve awˬ hk'aw lo hteˇ ve cawˇ ve chaw hpeh‸ la tuˬ, Yeˍsuˆ Hkri‸ hta‸ ngaˬ hui yonˍ taˍ peuˬ. Awˬ liˇ tawˇ hkawˇ hta‸ caˉ da‸ ve kanˉ teˇ hpaˍ hta‸ cuˇ ve awˬ hk'aw lo hteˇ ve cawˇ ve chaw hpeh‸ la ve maˇ heˆ. Awˬ lawn k'o, awˬ liˇ tawˇ hkawˇ hta‸ caˉ da‸ ve kanˉ teˇ hpaˍ hta‸ cuˇ ve awˬ hk'aw lo chaw teˇ g'aˇ ka‸ hteˇ ve cawˇ ve chaw hpeh‸ la tuˬ maˇ heˆ. 17 Hkri‸ hta‸ pa taw hteˇ ve cawˇ ve chaw hpeh‸ la tuˬ ngaˬ hui ca chehˇ ve teˇ yanˇ, ngaˬ hui venˇ baˆ yaˇ hpeh‸ ve yoˬ teh‸ tawˆ la ve k'o, Hkri‸ lehˬ venˇ baˆ awˬ pon kanˉ te shehˍ hpaˇ hpeh‸ ve leh laˇ. Chi hk'e maˇ heˆ taˬ. 18 Awˬ lawn k'o, ngaˬ hpaˆ baˬ peuˬ ve awˬ ceuˬ hta‸ ngaˬ k'aw‸ gu te ve k'o, ngaˬ te ya‸ shehˍ hpaˇ hpeh‸ ve hta‸ hk'a tawˍ lehˆ tawˆ la piˇ lawˬ ve yoˬ. 19 Awˬ lawn k'o, ngaˬ lehˬ G'uiˬ sha hta‸ caˉ da‸ ve teˇ hpawˇ lo g'a te‸ tuˬ, awˬ liˇ tawˇ hkawˇ hta‸ caˉ da‸ ve teˇ hpawˇ lo, awˬ liˇ tawˇ hkawˇ awˬ hawˉ lo ngaˬ suh ve yoˬ. 20 Ngaˬ Hkri‸ geh teˇ geh la‸ ka hk'oˆ lo hkanˍ suh peuˬ. Hk'e te leh, chi beu‸ te‸ chehˇ ve lehˬ ngaˬ awˬ to maˇ heˆ, Hkri‸ ngaˬ awˬ hk'aw lo te chehˇ ve yoˬ. Chi beu‸ awˬ suhˍ awˬ shaˍ hpawˇ ngaˬ a sha‸ te‸ ve teˇ ceuˬ lehˬ, ngaˬ hta‸ ha‸ leh ngaˬ awˬ pon yawˇ awˬ to tanˇ peuˬ ve, G'uiˬ sha ve Yaˇ hpu hta‸ ngaˬ yonˍ ve pa taw te‸ chehˇ ve teˇ ceuˬ yoˬ. 21 G'uiˬ sha ve awˬ bon hta‸ ngaˬ baˬ taˉ ve maˇ heˆ. Awˬ lawn k'o, awˬ liˇ tawˇ hkawˇ hta‸ pa taw hteˇ ve cawˇ ve chaw hpeh‸ la g'a ve hk'e k'o, Hkri‸ suh ve lehˬ hk'e leˇ hpeh‸ ve yoˬ.

Gaˍlaˍtiˆ 3

1 Cuˇ yiˍ maˇ cawˬ ve Gaˍlaˍtiˆ chaw teˇ hpaˍ-oˬ, Yeˍsuˆ Hkri‸ la‸ ka hk'oˆ lo hkanˍ suh ve hk'a tawˍ lehˆ hpeu‸ maˍ laˇ ve hta‸ nawˬ hui g'a mawˬ peuˬ ve htawˇ, a shu nawˬ hui hta‸ heˍ g'a ve le. 2 Ngaˬ nawˬ hui hta‸ chi hk'e ceh tiˉ na nyi gaˇ ve yoˬ. Awˬ ha hpu hta‸ nawˬ hui g'a ve lehˬ, awˬ liˇ tawˇ hkawˇ hta‸ caˉ da‸ ve kanˉ te ve hta‸ pa taw laˇ. Maˇ heˆ k'o, tawˇ hkawˇ hta‸ kaˇ ve awˬ hk'aw lo yonˍ ve hta‸ pa taw laˇ. 3 Nawˬ hui chi taw taw cuˇ yiˍ maˇ cawˬ leh laˇ. Awˬ ha hpu hta‸ cuˇ leh nawˬ hui tanˬ te taˍ ve ka‸, chi beu‸ awˬ suhˍ awˬ shaˍ hta‸ k'aw‸ cuˇ leh te peuˬ piˇ tuˬ ve laˇ. 4 Chi taw taw tu‸ ve hkanˍ ve hta‸ nawˬ hui hk'e leˇ hkanˍ peuˬ ve leh laˇ. Awˬ tehˬ awˬ na hk'e leˇ hpeh‸ tuˬ ve teh‸ ngaˬ maˇ dawˇ. 5 Chi hk'oˆ ka‸, nawˬ hui hta‸ Awˬ ha hpu pe‸ laˇ leh nawˬ hui awˬ hk'aw lo anˇ tuˬ te tawˆ la shehˍ hpaˇ lehˬ, awˬ liˇ tawˇ hkawˇ hta‸ caˉ da‸ ve awˬ hk'aw lo kanˉ te ve laˇ. Maˇ heˆ k'o, tawˇ hkawˇ hta‸ nawˬ hui kaˇ leh yonˍ ve awˬ hk'aw lo yawˇ te ve laˇ. 6 Chi hk'a shuˍ shuˍ, Aˍbraˍhanˍ lehˬ G'uiˬ sha hta‸ yonˍ ve pa taw, G'uiˬ sha yawˇ hta‸ hteˇ ve cawˇ ve chaw shawˍ taˍ ve yoˬ. 7 Hk'e te leh, yonˍ ve chaw teˇ hpaˍ lehˬ, Aˍbraˍhanˍ ve awˬ yaˇ awˬ duˬ hpeh‸ ve yoˬ teh‸ shiˍ-o‸. 8 Buiˇ shaˆ aˉ naˆ chaw hui lehˬ, yonˍ ve hta‸ pa taw G'uiˬ sha yawˇ hui hta‸ hteˇ ve cawˇ ve chaw hpeh‸ piˇ lawˬ tuˬ yoˬ teh‸, awˬ g'uˇ suhˍ htaˇ ka‸ Li‸ hpu shiˍ taˍ mawˬ taˍ leh, Nawˬ hta‸ pa taw chaw ceuˬ hk'a peu-eˬ awˬ bon g'a tuˬ yoˬ teh‸, Liˬ hpu lehˬ awˉ lawˉ htaˇ ka‸ Aˍbraˍhanˍ hta‸ ha lehˬ ve bon hkawˇ maˍ piˇ ve yoˬ. 9 Hk'e te leh, yonˍ ve chaw teˇ hpaˍ lehˬ, yonˍ puiˉ ve Aˍbraˍhanˍ geh teˇ geh awˬ bon g'a ve yoˬ. 10 Awˬ liˇ tawˇ hkawˇ hta‸ caˉ da‸ ve kanˉ teˇ hpaˍ hta‸ cuˇ ve chaw hk'a peu-eˬ lehˬ, hkeu ve teˇ ceuˬ awˬ hawˉ lo chehˇ taˍ ve yoˬ. Awˬ lawn k'o, Awˬ liˇ tawˇ hkawˇ li‸ awˬ hk'aw lo bvuh‸ taˍ ve hk'a peu-eˬ hta‸ hk'aˬ htaˆ ka‸ maˇ te tcuhˉ taˍ ve chaw hk'a peu-eˬ lehˬ, hkeu ve hta‸ g'a hkanˍ ve yoˬ teh‸ bvuh‸ taˍ ve yoˬ. 11 Awˬ liˇ tawˇ hkawˇ hta‸ pa taw, chaw teˇ g'aˇ ka‸ G'uiˬ sha mehˆ g'uˇ suhˍ hteˇ ve cawˇ ve chaw hpeh‸ la g'a tuˬ ve maˇ heˆ teh‸, hk'a tawˍ lehˆ tawˆ la ve yoˬ. Awˬ lawn k'o, hteˇ ve cawˇ ve chaw lehˬ, yonˍ ve teˇ ceuˬ hta‸ pa taw co ha g'a te‸ tuˬ yoˬ. 12 Awˬ liˇ tawˇ hkawˇ lehˬ, yonˍ ve hta‸ maˇ caˉ da‸. Awˬ liˇ tawˇ hkawˇ awˬ hk'aˇ suh te ve chaw lehˬ, oˇ ve awˬ hk'aw lo ceh tiˉ g'a te k'ai tuˬ yoˬ teh‸ k'oˆ taˍ ve yoˬ. 13 Suhˆ cehˬ awˬ hk'oˆ g'a hkanˍ suh ve chaw teˇ g'aˇ le le lehˬ, hkeu ve hta‸ g'a hkanˍ ve chaw hpeh‸ ve yoˬ teh‸ bvuh‸ taˍ ve hk'e, Hkri‸ lehˬ ngaˬ hui awˬ pon hkeu ve hta‸ g'a hkanˍ ve chaw hpeh‸ ve pa taw, awˬ liˇ tawˇ hkawˇ lo laˬ ve hkeu ve teˇ ceuˬ awˬ hk'aw lo yawˇ ngaˬ hui hta‸ ponˬ laˇ ve yoˬ. 14 Hk'e te leh, Aˍbraˍhanˍ hta‸ piˇ taˍ ve awˬ bon Yeˍsuˆ Hkri‸ awˬ hk'aw lo buiˇ shaˆ aˉ naˆ chaw ceuˬ awˬ hk'oˆ gaˬ la leh, yawˇ piˇ tuˬ yoˬ teh‸ k'oˆ taˍ ve Awˬ ha hpu hta‸ ngaˬ hui g'a taˍ ve yoˬ. Ngaˬ hui g'a taˍ ve lehˬ, yonˍ ve hta‸ pa taw yoˬ. 15 Awˬ viˉ awˬ nyi teˇ hpaˍ-oˬ, chaw yaˇ hui g'a hpuˇ g'a mawˬ jaw ve tawˇ pa haˉ ngaˬ k'oˆ maˍ laˇ shaˍ. Chaw yaˇ lehˬ, ka ti‸ shaˉ caˆ te leh li‸ hk'a deh‸ bvuh‸ taˍ peuˬ ve k'o, chaw yaˇ hui te ve ka ti‸ shaˉ caˆ ceh tiˉ hpeh‸ ve ka‸, teˇ g'aˇ ka‸ baˬ taˉ maˇ hpeh‸. K'aw‸ htehˍ piˇ ve teˇ ceuˬ ka‸ te maˇ hpeh‸. 16 Ka ti‸ shaˉ caˆ oˇ ve teˇ hpaˍ lehˬ, Aˍbraˍhanˍ leh yawˇ ve awˬ ceuˬ awˬ hk'aˇ hta‸ piˇ taˍ ve yoˬ. Awˬ ceuˬ awˬ hk'aˇ teh‸ k'oˆ ve lehˬ, laiˉ g'aˇ hta‸ k'oˆ ve maˇ heˆ. Nawˬ ve awˬ ceuˬ awˬ hk'aˇ teh‸ k'oˆ ve lehˬ, teˇ g'aˇ ve awˬ lawn hta‸ ceh tiˉ yawˇ k'oˆ ve yoˬ. Oˇ ve teˇ g'aˇ lehˬ Hkri‸ yoˬ. 17 Ngaˬ chi hk'e k'oˆ gaˇ ve yoˬ. Awˬ g'uˇ suhˍ htaˇ ka‸ G'uiˬ sha ka ti‸ shaˉ caˆ teh taˍ ve yoˬ. Awˬ hk'aw‸ nawˉ awˇ ha shehˆ chi hk'aw‸ gaˬ htaˇ, yawˇ piˇ ve awˬ liˇ tawˇ hkawˇ lehˬ, ka ti‸ shaˉ caˆ oˇ ve hta‸ hk'e leˇ hpeh‸ piˇ lawˬ leh te luˬ ve maˇ heˆ. 18 Awˬ lawn k'o, awˬ shinˉ piˇ ve teˇ ceuˬ lehˬ, awˬ liˇ tawˇ hkawˇ hta‸ caˉ da‸ ve k'o, ka ti‸ tawˇ hkawˇ hta‸ maˇ k'aw‸ caˉ da‸. Ya‸ hk'aˇ, G'uiˬ sha lehˬ ka ti‸ tawˇ hkawˇ hta‸ cuˇ leh Aˍbraˍhanˍ hta‸ awˬ shinˉ piˇ ve yoˬ. 19 Hk'e te leh, awˬ liˇ tawˇ hkawˇ aˬ hto‸ ma awˬ bon cawˬ le. Ka ti‸ hta‸ g'a tuˬ ve awˬ ceuˬ awˬ hk'aˇ oˇ ve teˇ g'aˇ maˇ gaˬ la sheˍ ve ceh ceh, te ya‸ te jiˆ ve teˇ hpaˍ tawˆ la tuˬ awˬ liˇ tawˇ hkawˇ htehˍ piˇ ve yoˬ. Awˬ liˇ tawˇ hkawˇ oˇ ve hta‸ piˇ ve teˇ yanˇ, mvuhˇ naw ma tcuh yaˇ hui hta‸ cuˇ leh, awˬ kaˍ te shehˍ hpaˇ ve la‸ sheh awˬ hk'aw lo piˇ ve yoˬ. 20 Awˬ kaˍ te shehˍ hpaˇ cawˬ ve k'o, teˇ g'aˇ ceh tiˉ cawˬ tuˬ ve maˇ heˆ. Ya‸ hk'aˇ, G'uiˬ sha lehˬ teˇ g'aˇ ceh tiˉ hpeh‸ ve yoˬ. 21 Hk'e te leh, awˬ liˇ tawˇ hkawˇ lehˬ, G'uiˬ sha ve ka ti‸ tawˇ hkawˇ teˇ hpaˍ hta‸ maˇ cawˇ da‸ leh tawˍ taˍ ve laˇ. Oˇ hk'e maˇ heˆ taˬ. Awˬ lawn k'o, piˇ taˍ ve awˬ liˇ tawˇ hkawˇ lehˬ, co ha te‸ piˇ lawˬ hpeh‸ ve hk'e k'o, hteˇ ve cawˇ ve teˇ ceuˬ lehˬ awˬ liˇ tawˇ hkawˇ hta‸ pa taw awˬ tehˬ awˬ na cawˬ hpeh‸ tuˬ yoˬ. 22 Ya‸ hk'aˇ, Yeˍsuˆ Hkri‸ hta‸ yonˍ ve pa taw, yonˍ ve chaw teˇ hpaˍ lehˬ ka ti‸ piˇ taˍ ve hk'e g'a tuˬ, Li‸ hpu lehˬ awˬ ceuˬ hk'a peu-eˬ hta‸ venˇ baˆ awˬ hawˉ lo teh taˍ ve yoˬ. 23 Yonˍ ve oˇ ve maˇ gaˬ la sheˍ htaˇ, awˬ liˇ tawˇ hkawˇ awˬ hawˉ lo hpeh taˍ leh shaw taˍ ve hta‸ ngaˬ hui g'a hkanˍ leh, yonˍ ve teˇ ceuˬ hta‸ G'uiˬ sha tawˆ la piˇ lawˬ htaˇ hk'a gaˬ, awˬ liˇ tawˇ hkawˇ awˬ hawˉ lo ngaˬ hui chehˇ taˍ ve yoˬ. 24 Hk'e te leh, yonˍ ve hta‸ pa taw ngaˬ hui hteˇ ve cawˇ ve chaw g'a hpeh‸ la tuˬ, awˬ liˇ tawˇ hkawˇ lehˬ Hkri‸ gaˬ la htaˇ hk'a gaˬ ngaˬ hui hta‸ nyi ha‸ shaˉ laˇ shehˍ hpaˇ hpeh‸ ve yoˬ. 25 Chi beu‸ lehˬ, yonˍ ve teˇ ceuˬ gaˬ la peuˬ ve pa taw, nyi ha‸ shaˉ laˇ shehˍ hpaˇ oˇ ve awˬ hawˉ lo ngaˬ hui maˇ k'aw‸ chehˇ. 26 Awˬ lawn k'o, Yeˍsuˆ Hkri‸ hta‸ yonˍ ve hta‸ pa taw nawˬ hui hk'a peu-eˬ G'uiˬ sha ve awˬ yaˇ awˬ duˬ hpeh‸ ve yoˬ. 27 Nawˬ hui Hkri‸ awˬ hk'aw lo baˆtiˆsaˬ hkanˍ yuˬ peuˬ ve chaw hui lehˬ, Hkri‸ hta‸ veu‸ deh taˍ peuˬ. 28 Nawˬ hui hk'a peu-eˬ Yeˍsuˆ Hkri‸ awˬ hk'aw lo teˇ to tiˉ hpeh‸ ve pa taw, Yuˇda‸ chaw leh Heˍlaˍsaˆ chaw maˇ cawˬ. Awˬ ceˬ leh ponˬ ve chaw maˇ cawˬ. Hawˉ hk'aˆ leh yaˇ miˇ maˇ cawˬ. 29 Nawˬ hui lehˬ Hkri‸ ve chaw hpeh‸ ve k'o, nawˬ hui Aˍbraˍhanˍ ve awˬ ceuˬ awˬ hk'aˇ hpeh‸ leh, ka ti‸ shaˉ caˆ cawˬ taˍ ve hk'e, awˬ shinˉ caˇ shehˍ hpaˇ htawˇ hpeh‸ ve yoˬ.

Gaˍlaˍtiˆ 4

1 Ngaˬ k'oˆ gaˇ ve lehˬ chi hk'e yoˬ. Awˬ shinˉ caˇ shehˍ hpaˇ teˇ g'aˇ lehˬ, awˬ shinˉ hk'a peu-eˬ awˬ hk'oˆ hta‸ yawˇ jawˇ mawˇ hpeh‸ ve htawˇ, yawˇ yaˇ ehˉ hpeh‸ chehˇ ve teˇ yanˇ htaˇ, awˬ ceˬ teˇ g'aˇ hta‸ maˇ peun da‸. 2 Awˬ pa tinˍ taˍ ve awˬ yanˇ maˇ gaˬ sheˍ ve ceh ceh, yaˇ ehˉ lehˬ shaw shehˍ hpaˇ leh ha‸ shaˉ shehˍ hpaˇ teˇ hpaˍ awˬ hawˉ lo chehˇ taˍ ve yoˬ. 3 Oˇ ve hk'a shuˍ shuˍ, ngaˬ hui yaˇ ehˉ hpeh‸ chehˇ sheˍ ve teˇ yanˇ, miˬ guiˬ hta‸ caˉ da‸ ve awˬ liˇ awˬ hk'aˇ teˇ hpaˍ awˬ hawˉ lo awˬ ceˬ g'a te chehˇ ve yoˬ. 4 Awˬ liˇ tawˇ hkawˇ awˬ hawˉ lo hpeh taˍ ve chaw teˇ hpaˍ hta‸ vuiˬ hk'aw‸ piˇ leh, ngaˬ hui G'uiˬ sha ve awˬ yaˇ hpeh‸ la tuˬ, awˬ yanˇ biˇ la ve teˇ yanˇ, G'uiˬ sha yawˇ ve Yaˇ hpu hta‸ peu laˇ ve yoˬ. 5 Yaˇ hpu lehˬ, yaˇ miˇ teˇ g'aˇ geh paw la leh, awˬ liˇ tawˇ hkawˇ awˬ hawˉ lo paw la ve yoˬ. 6 Nawˬ hui lehˬ, awˬ yaˇ awˬ duˬ hpeh‸ ve pa taw, G'uiˬ sha lehˬ yawˇ ve Yaˇ hpu ve Awˬ ha hpu ngaˬ hui ve nyi ma awˬ hk'aw lo peu laˇ leh, Awˬ ha hpu lehˬ, Aˍbaˆ A pa-oˬ teh‸ kuˬ ve yoˬ. 7 Hk'e te leh, nawˬ lehˬ awˬ ceˬ maˇ k'aw‸ hpeh‸. Nawˬ lehˬ awˬ yaˇ hpeh‸ ve yoˬ. Awˬ yaˇ hpeh‸ ve k'o, G'uiˬ sha hta‸ pa taw awˬ shinˉ caˇ shehˍ hpaˇ htawˇ hpeh‸ ve yoˬ. 8 Nawˬ hui G'uiˬ sha hta‸ maˇ shiˍ sheˍ ve teˇ yanˇ, maˇ heˆ heˆ ve g'uiˬ sha teˇ hpaˍ awˬ hawˉ lo nawˬ hui awˬ ceˬ te chehˇ ve yoˬ. 9 Ya‸ hk'aˇ, chi beu‸ nawˬ hui G'uiˬ sha hta‸ shiˍ ve awˬ hk'oˆ ka‸, awˬ tehˬ k'oˆ k'o G'uiˬ sha nawˬ hui hta‸ shiˍ chehˇ ve yoˬ. Hk'e ka‸, awˬ g'aˇ nuˇ leh haˍ g'awˇ jaˇ ve awˬ ceuˬ teˇ hpaˍ geh aˬ hto‸ ma te nawˬ hui k'aw‸ hpfuhˆ k'o‸-e ve le. Awˬ ceuˬ oˇ ve teˇ hpaˍ awˬ hawˉ lo aˬ hto‸ ma te nawˬ hui awˬ ceˬ k'aw‸ te gaˇ ve le. 10 Nawˬ hui lehˬ, awˬ hk'aw‸ awˬ nyi, ha pa, awˬ tcuhˉ awˬ yanˇ teˇ hpaˍ hta‸ k'aw‸ ce kan chehˇve law leˇ. 11 Ngaˬ nawˬ hui awˬ pon g'aˇ hte‸ g'aˇ na te ve lehˬ, hk'e leˇ hpeh‸ ve yoˬ hehˉ teh‸ ngaˬ dawˇ haˍ ve yoˬ. 12 Awˬ viˉ awˬ nyi teˇ hpaˍ-oˬ, ngaˬ nawˬ hui hk'a shuˍ shuˍ hpeh‸ la peuˬ ve pa taw, nawˬ hui htawˇ ngaˬ hk'a shuˍ shuˍ hpeh‸ la tuˬ ngaˬ nawˬ hui hta‸ lawˬ hkawˉ ve yoˬ. Nawˬ hui ngaˬ hta‸ te‸ chiˉ maˇ te ya‸ laˇ jaw. 13 Ngaˬ awˬ to naˬ ve pa taw, ngaˬ nawˬ hui hta‸ awˉ lawˉ teˇ pawˆ ha lehˬ ve bon hkawˇ g'a maˍ laˇ ve hta‸ nawˬ hui shiˍ ve yoˬ. 14 Ngaˬ awˬ to naˬ ve chi lehˬ, nawˬ hui awˬ pon hkanˍ haˍ ve htawˇ, nawˬ hui ngaˬ hta‸ maˇ shawˍ maˇ caˆ maˇ te, ngaˬ hta‸ maˇ baˬ taˉ. Nawˬ hui lehˬ, G'uiˬ sha ve mvuhˇ naw ma tcuh yaˇ hta‸ ha‸ yuˬ ve hk'a shuˍ shuˍ maˇ k'oˆ, Yeˍsuˆ Hkri‸ hta‸ ha‸ yuˬ ve hk'a shuˍ shuˍ maˇ k'oˆ, ngaˬ hta‸ ha‸ yuˬ laˇ ve yoˬ. 15 Ponˬ laˬ htaˇ nawˬ hui ha lehˬ puiˉ ve teˇ ceuˬ chi beu‸ hk'aˬ lo mehˉ k'ai ve le. Awˬ lawn k'o, nawˬ hui ve mehˆ shiˍ hta‸ k'ehˉ tawˆ leh ngaˬ hta‸ pe‸ laˇ hpeh‸ ve hk'e k'o, pe‸ laˇ peuˬ teh‸, nawˬ hui awˬ lawn ngaˬ shaˉ hkiˆ hkanˍ hpeh‸ ve yoˬ. 16 Chi beu‸ ngaˬ nawˬ hui hta‸ hteˇ lehˍ k'oˆ laˇ ve pa taw, ngaˬ nawˬ hui ve canˇ paˍ hpeh‸ la ve laˇ. 17 Chaw oˇ ve teˇ hpaˍ lehˬ, nawˬ hui awˬ pon g'aˇ hte‸ awˬ bon te laˇ ve htawˇ, da‸ ve teˇ ceuˬ hta‸ dawˇ law leh te ve maˇ heˆ. Yawˇ hui awˬ pon nawˬ hui g'aˇ hte‸ awˬ bon te piˇ tuˬ yawˇ hui dawˇ law ve pa taw, nawˬ hui hta‸ awˬ baˬ hpawˇ lo chehˇ tcuh gaˇ ve yoˬ. 18 Da‸ ve teˇ ceuˬ awˬ pon shu nawˬ hui hta‸ g'aˇ hte‸ awˬ bon te laˇ ve lehˬ, hk'aˬ htaˆ ka‸ da‸ ve yoˬ. Ngaˬ nawˬ hui geh chehˇ ve teˇ yanˇ ceh tiˉ da‸ ve maˇ heˆ. 19 Ngaˬ ve yaˇ ehˉ teˇ hpaˍ-oˬ, Hkri‸ nawˬ hui awˬ hk'aw lo hk'a biˇ chehˇ la htaˇ hk'a gaˬ, yaˇ paw tuˬ naˬ ve hta‸ nawˬ hui awˬ pon ngaˬ teˇ pawˆ g'a k'aw‸ hkanˍ chehˇ ve yoˬ. 20 Ngaˬ nawˬ hui awˬ lawn dawˇ maˇ tawˆ ve pa taw, chi beu‸ ngaˬ nawˬ hui geh teˇ geh chehˇ gaˇ leh, ngaˬ k'oˆ hehnˇ ve awˬ hkawˇ hta‸ k'aw‸ pa gaˇ ve yoˬ. 21 Awˬ liˇ tawˇ hkawˇ awˬ hawˉ lo chehˇ gaˇ ve chaw teˇ hpaˍ-oˬ, awˬ liˇ tawˇ hkawˇ hta‸ nawˬ hui maˇ kaˇ laˇ. Ngaˬ hta‸ hto laˇ-oˆ. 22 Awˬ lawn k'o, Li‸ hpu hk'aw chi hk'e bvuh‸ taˍ ve, Aˍbraˍhanˍ lehˬ yaˇ paˍ nyiˇ g'aˇ cawˬ ve yoˬ. Teˇ g'aˇ lehˬ, awˬ ceˬ ma ve yaˇ hpeh‸ leh, teˇ g'aˇ lehˬ awˬ ceˬ ma maˇ heˆ ve yaˇ miˇ teˇ g'aˇ ve yaˇ hpeh‸ ve yoˬ. 23 Awˬ ceˬ ma ve yaˇ paˍ lehˬ, awˬ suhˍ awˬ shaˍ a loˍ hta‸ pa taw paw la ve yoˬ. Awˬ ceˬ ma maˇ heˆ ve yaˇ miˇ teˇ g'aˇ ve yaˇ paˍ lehˬ, ka ti‸ piˇ taˍ ve hta‸ caˉ da‸ ve awˬ hk'aw lo paw la ve yoˬ. 24 Awˬ lawn chi hta‸ tehˆ nyi leh henˇ yuˬ tuˬ cawˬ ve yoˬ. Yaˇ miˇ oˇ ve nyiˇ g'aˇ lehˬ, ka ti‸ shaˉ caˆ oˇ ve nyiˇ ceuˬ hpeh‸ ve yoˬ. Teˇ g'aˇ lehˬ, Siˉnaˆ hk'aw hta‸ caˉ da‸ ve Haˍgaˍraˆ yoˬ. Yawˇ yaˇ paw la piˇ ve lehˬ, awˬ ceˬ hpeh‸ la tuˬ awˬ pon paw la piˇ ve yoˬ. 25 Haˍgaˍraˆ lehˬ, Aˍraˆ mvuhˇ miˬ awˬ hk'aw lo cawˬ ve Siˉnaˆ hk'aw hpeh‸ leh, chi beu‸ cawˬ taˍ ve Yeˍruˆsaˍlehnˍ venˇ hta‸ shuˍ ve yoˬ. Awˬ lawn k'o, yawˇ lehˬ yawˇ ve awˬ yaˇ teˇ hpaˍ geh teˇ geh awˬ ceˬ hpeh‸ ve yoˬ. 26 Ya‸ hk'aˇ, mvuhˇ naw ma lo cawˬ ve Yeˍruˆsaˍlehnˍ venˇ lehˬ, awˬ ceˬ ma maˇ heˆ ve yaˇ miˇ hpeh‸ leh, ngaˬ hui ve awˬ e hpeh‸ ve yoˬ. 27 Awˬ lawn k'o, Li‸ hpu hk'aw chi hk'e bvuh‸ taˍ ve, Yaˇ maˇ paw jaw ve chaw meh ma-oˬ, ha lehˬ chehˇ-oˆ. Yaˇ paw tuˬ maˇ g'a hkanˍ ve yaˇ miˇ-oˬ, ha lehˬ leh g'aˇ hte‸ kuˬ chehˇ-oˆ. Awˬ lawn k'o, awˬ hpawˇ maˇ cawˬ ve yaˇ miˇ lehˬ, awˬ hpawˇ cawˬ ve yaˇ miˇ a‸ kehˉ awˬ yaˇ awˬ duˬ cawˬ maˇ ve yoˬ. teh‸ bvuh‸ taˍ ve yoˬ. 28 Awˬ viˉ awˬ nyi teˇ hpaˍ-oˬ, ngaˬ hui lehˬ Iˉcaˆ hk'a shuˍ shuˍ, ka ti‸ piˇ taˍ ve hta‸ caˉ da‸ ve awˬ yaˇ awˬ duˬ teˇ hpaˍ hpeh‸ ve yoˬ. 29 Oˇ htaˇ, awˬ suhˍ awˬ shaˍ a loˍ hta‸ pa taw paw la ve yaˇ teˇ g'aˇ lehˬ, Awˬ ha hpu hta‸ pa taw paw la ve yaˇ teˇ g'aˇ hta‸ fawˉ mehˍ ve hk'a shuˍ shuˍ, chi beu‸ ka‸ oˇ hk'e hpeh‸ ve yoˬ. 30 Ya‸ hk'aˇ, Li‸ hpu hk'aˬ hk'e k'oˆ taˍ ve le. Awˬ ceˬ ma leh yawˇ ve yaˇ paˍ hta‸ g'a‸ k'oˬ-o‸. Awˬ lawn k'o, awˬ ceˬ ma ve yaˇ paˍ lehˬ, awˬ ceˬ ma maˇ heˆ ve yaˇ miˇ teˇ g'aˇ ve yaˇ paˍ geh teˇ geh awˬ shinˉ hta‸ a ciˉ ka‸ g'a caˇ tuˬ maˇ heˆ teh‸ k'oˆ taˍ ve yoˬ. 31 Hk'e te leh awˬ viˉ awˬ nyi teˇ hpaˍ-oˬ, ngaˬ hui lehˬ awˬ ceˬ ma ve yaˇ hpeh‸ ve maˇ heˆ. Awˬ ceˬ ma maˇ heˆ ve yaˇ miˇ teˇ g'aˇ ve yaˇ hpeh‸ ve yoˬ.

Gaˍlaˍtiˆ 5

1 Ngaˬ hui g'a ponˬ tuˬ awˬ pon Hkri‸ lehˬ ngaˬ hui hta‸ ponˬ laˇ peuˬ. Hk'e te leh, hk'a deh‸ yeˬ chehˇ leh, awˬ ceˬ pfuhˇ ve ehˉ k'aweh‸ hta‸ teˇ pawˆ taˇ k'aw‸ pfuhˇ-oˆ. 2 Na sheˍ. Ngaˬ Pawˇlu‸ nawˬ hui hta‸ chi hk'e k'oˆ laˇ ve yoˬ. Nawˬ hui awˬ guiˬ meuˇ shoˍ ve hta‸ hkanˍ yuˬ ve k'o, Hkri‸ lehˬ nawˬ hui awˬ pon awˬ bon te‸ chiˉ maˇ cawˬ. 3 Awˬ guiˬ meuˇ shoˍ ve hta‸ hkanˍ yuˬ ve chaw hk'a peu-eˬ hta‸ ngaˬ teˇ pawˆ k'aw‸ k'oˆ laˇ shaˍ. Oˇ hk'e ve chaw lehˬ, awˬ liˇ tawˇ hkawˇ hk'a peu-eˬ hta‸ g'a na yuˬ leh g'a te ve yoˬ. 4 Awˬ liˇ tawˇ hkawˇ hta‸ pa taw hteˇ ve cawˇ ve chaw hpeh‸ la tuˬ yoˬ teh‸ nawˬ hui hk'a dawˇ ve chaw teˇ hpaˍ lehˬ, Hkri‸ hta‸ hpaˆ da‸ k'ai peuˬ. Awˬ bon hta‸ nawˬ hui shonˇ k'ai peuˬ. 5 Ngaˬ hui lehˬ, yonˍ ve hta‸ pa taw hteˇ ve cawˇ ve chaw hpeh‸ la tuˬ dawˇ law ve teˇ ceuˬ hta‸ Awˬ ha hpu awˬ hk'aw lo law chehˇ ve yoˬ. 6 Awˬ lawn k'o, Yeˍsuˆ Hkri‸ awˬ hk'aw lo chehˇ ve chaw hui lehˬ, awˬ guiˬ meuˇ shoˍ ve maˇ k'oˆ, maˇ shoˍ ve maˇ k'oˆ, te‸ chiˉ awˬ bon maˇ cawˬ. Yonˍ ve teˇ ceuˬ ceh tiˉ awˬ bon cawˬ ve yoˬ. Yonˍ ve oˇ ve lehˬ, ha‸ pehnˇ ve awˬ hk'aw lo kanˉ te ve teˇ ceuˬ yoˬ. 7 Awˉ lawˉ htaˇ nawˬ hui hk'a deh‸ g'uiˇ k'ai chehˇ ve yoˬ. Hteˇ ve cawˇ ve teˇ ceuˬ hta‸ maˇ g'a na yuˬ tuˬ, a shu nawˬ hui hta‸ tawˍ taˍ laˇ ve le. 8 Nawˬ hui nyi ma chi hk'e hpfuhˆ k'ai tuˬ beˬ ve oˇ ve lehˬ, nawˬ hui hta‸ kuˬ yuˬ shehˍ hpaˇ G'uiˬ sha lo laˬ ve maˇ heˆ. 9 Diˇ a ciˉ ceh tiˉ ka‸ hkaoˍ monˇ teˇ diˬ hk'a peu-eˬ hta‸ ciˇ la piˇ puiˉ ve yoˬ. 10 Ngaˬ dawˇ ve hk'e nawˬ hui ka‸ teˇ ceuˬ ceh tiˉ dawˇ tuˬ ve hta‸ Jawˇ mawˇ Yeˍsuˆ awˬ hk'aw lo ngaˬ hk'a deh‸ yonˍ taˍ ve yoˬ. Nawˬ hui hta‸ sho‸ sha‸ tuˬ te laˇ ve chaw teˇ g'aˇ lehˬ, yawˇ hk'aˬ hk'e ve chaw hpeh‸ ve htawˇ, ciˍ yanˍ ve hta‸ g'a hkanˍ tuˬ yoˬ. 11 Awˬ viˉ awˬ nyi teˇ hpaˍ-oˬ, ngaˬ lehˬ awˬ guiˬ meuˇ shoˍ ve awˬ liˇ hta‸ maˍ piˇ chehˇ sheˍ ve hk'e k'o, aˬ hto‸ ma pa taw fawˉ mehˍ ve hta‸ ngaˬ g'a hkanˍ chehˇ sheˍ le. Oˇ hk'e maˍ piˇ ve k'o, la‸ ka hta‸ caˉ da‸ ve hkui htiˇ poˬ paiˍ tuˬ ve teˇ ceuˬ hta‸ yuˬ baˬ peuˬ. 12 Nawˬ hui hta‸ nyi ma sho‸ sha‸ tuˬ te chehˇ ve chaw hui lehˬ, a shu yawˇ awˬ to hta‸ yawˇ shawˆ baˬ tuˬ ngaˬ heuˆ gaˇ ve yoˬ. 13 Awˬ viˉ awˬ nyi teˇ hpaˍ-oˬ, nawˬ hui g'a ponˬ tuˬ G'uiˬ sha nawˬ hui hta‸ kuˬ yuˬ taˍ ve yoˬ. Ya‸ hk'aˇ, ponˬ ve chi, awˬ suhˍ awˬ shaˍ a loˍ awˬ hk'aˇ suh te k'ai tuˬ awˬ pon taˇ yehˇ. Ha‸ pehnˇ ve awˬ hk'aw lo, teˇ g'aˇ leh teˇ g'aˇ awˬ ceˬ te da‸-o‸. 14 Nawˬ awˬ to hta‸ ha‸ ve hk'e, awˬ paˇ awˬ kui chehˇ ve chaw teˇ hpaˍ hta‸ ha‸-o‸ teh‸ k'oˆ taˍ ve tawˇ teˇ hkawˇ awˬ hk'aw lo, awˬ liˇ tawˇ hkawˇ hk'a peu-eˬ biˇ la peuˬ. 15 Nawˬ hui teˇ g'aˇ hta‸ teˇ g'aˇ che‸ caˇ da‸ ve k'o, nawˬ hui teˇ g'aˇ hta‸ teˇ g'aˇ maˇ g'a te luˬ da‸ tuˬ shaˍ ti‸ te-o. 16 Ngaˬ k'oˆ ve lehˬ, Awˬ ha hpu awˬ hk'aˇ suh k'ai-o. Oˇ hk'e te ve k'o, awˬ suhˍ awˬ shaˍ a loˍ awˬ hk'aˇ suh nawˬ hui maˇ k'ai taˬ. 17 Awˬ lawn k'o, awˬ suhˍ awˬ shaˍ a loˍ lehˬ, Awˬ ha hpu hta‸ heh‸ hkehnˉ leh, Awˬ ha hpu htawˇ, awˬ suhˍ awˬ shaˍ a loˍ hta‸ heh‸ hkehnˉ ve yoˬ. Nawˬ hui te gaˇ ve hta‸ maˇ g'a te tuˬ, oˇ ve nyiˇ ceuˬ tanˬ da‸ chehˇ ve yoˬ. 18 Ya‸ hk'aˇ, Awˬ ha hpu nawˬ hui hta‸ sheh k'ai ve k'o, nawˬ hui awˬ liˇ tawˇ hkawˇ awˬ hawˉ lo maˇ k'aw‸ chehˇ. 19 Awˬ suhˍ awˬ shaˍ ve kanˉ teˇ hpaˍ hk'a tawˍ lehˆ tawˆ la peuˬ.Kanˉ oˇ ve teˇ hpaˍ lehˬ, haˉ chawˇ haˉ paˆ te ve, cha‸ chiˆ ve hta‸ te ve, peh‸ ve tzuhˆ ve hta‸ te ve, 20 shaˉ ho‸ hta‸ oˉ k'oˍ pui ve, neˇ te ve, canˇ da‸ ve, ya‸ da‸ jiˆ da‸ ve, shu ve mawˇ hta‸ sheˉ lai ve, nyi ma zuhˆ ve, tawˇ g'awˬ da‸ ve, hpaˆ da‸ guiˇ da‸ ve, awˬ moˍ pehˬ da‸ ve, 21 hkawehˉ ve, tzuhˬ dawˬ bvuhˆ ve, ha lehˬ tuˬ te ponˬ te leuˉ ve, chi hk'e ve teˇ hpaˍ yoˬ. Chi hk'e te ve chaw teˇ hpaˍ lehˬ, G'uiˬ sha ve mvuhˇ miˬ awˬ hk'aw lo maˇ g'a lo‸-e teh‸, awˉ lawˉ htaˇ ngaˬ k'oˆ piˇ taˍ ve hk'e, chi beu‸ htawˇ nawˬ hui hta‸ k'aw‸ k'oˆ laˇ ve yoˬ. 22 Ya‸ hk'aˇ, Awˬ ha hpu ve awˬ shiˍ naw‸ la ve teˇ hpaˍ lehˬ, ha‸ pehnˇ ve, ha lehˬ ve, dawˇ sha ve, dawˇ zuhˬ gaˇ zuhˬ ve, ha k'aˉ ve, shu awˬ pon da‸ ve hta‸ te ve, ka ti‸ yeˬ ve, 23 nyi ma nuˇ nehˬ ve leh, a shu yawˇ awˬ to hta‸ g'aˇ puiˉ ve, chi teˇ hpaˍ yoˬ. Chi teˇ hpaˍ hta‸ maˇ g'a te teh‸ k'oˆ taˍ ve awˬ liˇ tawˇ hkawˇ teˇ maˬ ka‸ maˇ cawˬ. 24 Yeˍsuˆ Hkri‸ hta‸ hk'a caˉ da‸ ve chaw hui lehˬ, awˬ suhˍ awˬ shaˍ hpawˇ hta‸ maˇ k'oˆ, awˬ suhˍ awˬ shaˍ hta‸ caˉ da‸ ve a loˍ leh sheˉ lai ve teˇ hpaˍ hta‸ htawˇ maˇ k'oˆ, teˇ geh la‸ ka hk'oˆ lo hta‸ pehˍ peuˬ. 25 Ngaˬ hui Awˬ ha hpu awˬ hk'aw lo te‸ chehˇ ve k'o, Awˬ ha hpu awˬ hk'aˇ suh k'ai-a veuˬ. 26 Ngaˬ hui nyi ma uiˍ ve maˇ k'oˆ, teˇ g'aˇ leh teˇ g'aˇ ya‸ da‸ tuˬ te ve maˇ k'oˆ, teˇ g'aˇ leh teˇ g'aˇ hkawehˉ da‸ ve maˇ k'oˆ, chi teˇ hpaˍ hta‸ ngaˬ hui baˬ taˉ-a veuˬ.

Gaˍlaˍtiˆ 6

1 Awˬ viˉ awˬ nyi teˇ hpaˍ-oˬ, chaw teˇ g'aˇ g'aˇ lehˬ venˇ baˆ teˇ ceuˬ ceuˬ te chehˇ ve hta‸ nawˬ hui g'a mawˬ ve k'o, yawˇ k'aw‸ da‸ la tuˬ, nawˬ hui co ha hpawˇ awˬ g'aˇ cawˬ ve chaw teˇ hpaˍ lehˬ, nyi ma nuˇ nehˬ ve awˬ hk'aw lo yawˇ hta‸ k'aw‸ gu piˇ-oˆ. Nawˬ htawˇ, beˬ ve lawˇ ve awˬ hk'aˇ suh maˇ g'a k'ai tuˬ, nawˬ awˬ to shaˍ ti‸ te-o. 2 Nawˬ hui teˇ g'aˇ leh teˇ g'aˇ ve awˬ vuiˬ hta‸ ga pfuhˇ da‸-o‸. Chi hk'e te ve k'o, Hkri‸ ve awˬ liˇ tawˇ hkawˇ hta‸ nawˬ hui te biˇ la tuˬ yoˬ. 3 Chaw teˇ g'aˇ g'aˇ lehˬ, yawˇ te‸ chiˉ te maˇ puiˉ ve ka‸, ngaˬ lehˬ, cheuˬ ve yoˬ teh‸ yawˇ dawˇ ve k'o, yawˇ lehˬ yawˇ awˬ to hta‸ heˍ ve yoˬ. 4 Chaw teˇ g'aˇ le le lehˬ, a shu yawˇ te taˍ ve kanˉ hta‸ dawˇ nyi tehˆ nyi-o. Oˇ hk'e te ve k'o, shu te taˍ ve kanˉ awˬ hk'aw lo yawˇ g'a ha lehˬ tuˬ ve teˇ ceuˬ maˇ heˆ. Yawˇ awˬ to te taˍ ve kanˉ awˬ hk'aw lo ceh tiˉ yawˇ g'a ha lehˬ tuˬ yoˬ. 5 Awˬ lawn k'o, chaw teˇ g'aˇ le le lehˬ, a shu yawˇ ve awˬ vuiˬ hta‸ g'a pfuhˇ tuˬ yoˬ. 6 Bon hkawˇ hta‸ g'a henˇ ve chaw teˇ g'aˇ lehˬ, yawˇ hta‸ maˍ laˇ shehˍ hpaˇ teˇ g'aˇ hta‸ da‸ ve awˬ ceuˬ hk'a peu-eˬ pehˬ piˇ cawˇ ve yoˬ. 7 Taˇ dawˇ ya‸. G'uiˬ sha hta‸ hk'a mvuhˇ hk'a na te maˇ hpeh‸. Chaw teˇ g'aˇ lehˬ, yawˇ awˬ yawˇ sheˍ ve hk'e yawˇ g'a g'eu‸ tuˬ yoˬ. 8 A shu yawˇ awˬ suhˍ awˬ shaˍ hta‸ caˉ da‸ ve teˇ ceuˬ hta‸ sheˍ ve k'o, awˬ suhˍ awˬ shaˍ hta‸ caˉ da‸ ve awˬ hk'aw lo luˬ ve sheˆ ve hta‸ g'a g'eu‸ tuˬ yoˬ. Awˬ ha hpu hta‸ caˉ da‸ ve teˇ ceuˬ hta‸ sheˍ ve k'o, Awˬ ha hpu awˬ hk'aw lo co ti‸ ha ti‸ hta‸ g'a g'eu‸ tuˬ yoˬ. 9 Da‸ ve hta‸ te ve awˬ hk'aw lo awˬ g'aˇ maˇ nuˇ leh te-a veuˬ. Awˬ lawn k'o, ngaˬ hui nyi ma maˇ luˬ ve k'o, awˬ yanˇ cawˇ ve teˇ yanˇ ngaˬ hui g'a g'eu‸ tuˬ yoˬ. 10 Te hpeh‸ ve hk'e, chaw hk'a peu-eˬ awˬ pon da‸ ve hta‸ te-a veuˬ. Yehˬ yaˇ k'a yaˇ teh‸ k'oˆ ve yonˍ ve chaw teˇ hpaˍ awˬ pon leuˉ leh da‸ ve hta‸ te-a veuˬ. 11 Ngaˬ awˬ to ngaˬ ve la‸ sheh nawˬ hui hta‸ bvuh‸ laˇ ve li‸ mehˆ chi teˇ hpaˍ hk'aˬ ma uiˍ ve hta‸ nyi-o. 12 Awˬ suhˍ awˬ shaˍ hpawˇ awˬ liˇ teˇ hpaˍ nyi sha tuˬ te gaˇ ve chaw teˇ hpaˍ lehˬ, nawˬ hui awˬ guiˬ meuˇ g'a shoˍ tuˬ nawˬ hui hta‸ nyiˉ leh te tcuh laˇ ve yoˬ. Yawˇ hui chi hk'e te ve lehˬ, Hkri‸ ve la‸ ka hta‸ pa taw fawˉ ve mehˍ ve hta‸ yawˇ hui maˇ g'a hkanˍ tuˬ te ve ceh tiˉ yoˬ. 13 Awˬ lawn k'o, awˬ guiˬ meuˇ shoˍ ve hta‸ hkanˍ yuˬ ve chaw teˇ hpaˍ lehˬ, yawˇ hui awˬ to ka‸ awˬ liˇ tawˇ hkawˇ hta‸ hk'a biˇ na yuˬ ve maˇ heˆ. Nawˬ hui ve awˬ suhˍ awˬ shaˍ hta‸ pa taw yawˇ hui nyi ma uiˍ kuiˬ cawˬ tuˬ, nawˬ hui hta‸ awˬ guiˬ meuˇ shoˍ tcuh gaˇ ve yoˬ. 14 Ya‸ hk'aˇ ngaˬ lehˬ, ngaˬ hui ve Jawˇ mawˇ Yeˍsuˆ Hkri‸ ve la‸ ka awˬ hk'aw lo ceh tiˉ nyi ma uiˍ kuiˬ cawˬ tuˬ yoˬ. Awˬ kaˍ awˬ nu awˬ hk'aw lo nyi ma uiˍ kuiˬ cawˬ tuˬ maˇ heˆ. La‸ ka oˇ ve hta‸ pa taw miˬ guiˬ ve awˬ liˇ awˬ hk'aˇ teˇ hpaˍ ngaˬ awˬ pon suh peuˬ leh, ngaˬ htawˇ miˬ guiˬ ve awˬ liˇ awˬ hk'aˇ teˇ hpaˍ hta‸ suh baˬ taˉ peuˬ. 15 Awˬ lawn k'o, awˬ guiˬ meuˇ shoˍ ve maˇ k'oˆ, maˇ shoˍ ve maˇ k'oˆ, te‸ chiˉ awˬ bon maˇ cawˬ. Chaw awˬ suhˉ hpeh‸ la ve teˇ ceuˬ ceh tiˉ awˬ bon cawˬ ve yoˬ. 16 Chaw awˬ suhˉ hpeh‸ la ve awˬ liˇ chi awˬ hk'aˇ suh k'ai chehˇ ve chaw hk'a peu-eˬ awˬ hk'oˆ hta‸ maˇ k'oˆ, G'uiˬ sha ve Iˉsaˍreˍlaˆ chaw hui awˬ hk'oˆ hta‸ maˇ k'oˆ, dawˇ sha gaˇ sha ve teˇ ceuˬ leh ha k'aˉ ve teˇ ceuˬ cawˬ piˇ-oˆ. 17 Ya‸ nyi hk'aw‸ nawˉ k'o, chaw teˇ g'aˇ ka‸ ngaˬ hta‸ taˇ k'aw‸ sho‸ sha‸ laˇ. Awˬ lawn k'o, ngaˬ ve awˬ to hta‸ Yeˍsuˆ ve awˬ maiˉ teˇ hpaˍ cawˬ taˍ ve yoˬ. 18 Awˬ viˉ awˬ nyi teˇ hpaˍ-oˬ, ngaˬ hui ve Jawˇ mawˇ Yeˍsuˆ Hkri‸ ve awˬ bon awˬ shinˉ nawˬ hui ve nyi ma awˬ hk'aw lo cawˬ piˇ-oˆ. A menˬ.

Eˇfeˇsu‸ 1

1 G'uiˬ sha ve a loˍ cawˇ ve hta‸ pa taw, Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ lehˬ, Eˇfeˇsu‸ venˇ hk'aw chehˇ ve Hkri‸ yaˇ hpeh‸ leh Yeˍsuˆ Hkri‸ hta‸ yonˍ yeˬ ve chaw hui hta‸ li‸ chi teˇ k'oˆ bvuh‸ laˇ ve yoˬ. 2 Ngaˬ hui ve Awˬ pa G'uiˬ sha leh Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 3 Ngaˬ hui Jawˇ mawˇ Yeˍsuˆ Hkri‸ ve Awˬ pa G'uiˬ sha hta‸ chiˇ mvuh-o. Yawˇ lehˬ, co ha hpawˇ awˬ pon mvuhˇ naw ma hta‸ caˉ da‸ ve awˬ bon teˇ ceuˬ le le, Hkri‸ hta‸ cuˇ leh ngaˬ hui hta‸ na‸ laˇ peuˬ. 4 Miˬ guiˬ maˇ te hpanˍ sheˍ htaˇ ka‸, G'uiˬ sha lehˬ ngaˬ hui hta‸ ha‸ leh, Hkri‸ awˬ hk'aw lo ngaˬ hui hta‸ leuˆ yuˬ taˍ peuˬ. Ngaˬ hui lehˬ, yawˇ mehˆ g'uˇ suhˍ da‸ kehˬ ve chaw leh, ya‸ kuiˬ maˇ cawˬ ve chaw g'a hpeh‸ tuˬ, yawˇ ngaˬ hui hta‸ leuˆ yuˬ taˍ ve yoˬ. 5 Yeˍsuˆ Hkri‸ hta‸ pa taw ngaˬ hui G'uiˬ sha ve awˬ yaˇ hpeh‸ la tuˬ, awˉ lawˉ htaˇ ka‸ yawˇ ngaˬ hui hta‸ fuiˍ teh taˍ peuˬ. Chi hk'e te tuˬ, G'uiˬ sha yawˇ nyi ma cawˇ ve yoˬ. 6 Yawˇ ve awˬ bon hta‸ chiˇ mvuh tuˬ, G'uiˬ sha ha‸ jaˇ ve yawˇ ve Yaˇ hpu awˬ hk'aw lo, awˬ me‸ awˬ hponˇ cawˬ ve yawˇ ve awˬ bon ngaˬ hui hta‸ yawˇ pe‸ laˇ taˍ ve yoˬ. 7 Yaˇ hpu ve awˬ suhˍ hta‸ pa taw, yawˇ awˬ hk'aw lo ngaˬ hui htaiˍ hk'aw‸ ve hta‸ g'a peuˬ. Yeˍsuˆ yawˇ ve awˬ bon uiˍ jaˇ maˇ jaˇ ve hta‸ pa taw, ngaˬ hui ve ya‸ kuiˬ jiˆ kuiˬ teˇ hpaˍ hta‸ yawˇ hpehˇ hk'a laˇ ve yoˬ. 8 Cuˇ yiˍ maˍ yiˍ leh shiˍ puiˉ ve awˬ hk'aw lo ceh tiˉ, G'uiˬ sha ve awˬ bon ngaˬ hui hta‸ shaˬ te shaˬ maˇ la tuˬ yawˇ te laˇ ve yoˬ. 9 Awˬ lawn k'o, ponˬ laˬ htaˇ G'uiˬ sha ve a loˍ lehˬ faˉ taˍ ve ka‸, chi beu‸ ngaˬ hui hta‸ G'uiˬ sha yawˇ hpeu‸ maˍ laˇ peuˬ. Yeˍsuˆ hta‸ cuˇ leh chi hk'e te tuˬ yawˇ nyi ma cawˇ ve yoˬ. 10 Hk'aˬ hk'e le teh‸ k'oˆ k'o, awˬ yanˇ biˇ la ve teˇ yanˇ, mvuhˇ naw ma hk'oˆ cawˬ ve awˬ ceuˬ hk'a peu-eˬ maˇ k'oˆ, miˬ guiˬ hk'oˆ cawˬ ve awˬ ceuˬ hk'a peu-eˬ maˇ k'oˆ, Hkri‸ awˬ hk'aw lo G'uiˬ sha tcuhˉ da‸ caˉ da‸ piˇ leh, yawˇ hta‸ uˉ peunˍ tcuh tuˬ yoˬ. 11 Yeˍsuˆ hta‸ pa taw, ngaˬ hui htawˇ awˬ shinˉ caˇ shehˍ hpaˇ hpeh‸ la peuˬ. Yawˇ a loˍ cawˇ ve hk'e hk'a peu-eˬ hta‸ te ve yoˬ. G'uiˬ sha lehˬ, yawˇ dawˇ taˍ ve hk'e, awˉ lawˉ htaˇ ka‸ ngaˬ hui hta‸ fuiˍ teh taˍ peuˬ. 12 Hkri‸ hta‸ awˉ lawˉ dawˇ law taˍ ve ngaˬ hui teˇ hpaˍ lehˬ, yawˇ ve awˬ me‸ awˬ hponˇ hta‸ chiˇ mvuh tuˬ ve awˬ pon, yawˇ ngaˬ hui hta‸ fuiˍ teh taˍ peuˬ. 13 Nawˬ hui htawˇ, nawˬ hui g'a ponˬ ve awˬ lawn ha lehˬ ve bon hkawˇ teh‸ k'oˆ ve, hteˇ ve cawˇ ve tawˇ hkawˇ hta‸ g'a kaˇ peuˬ leh, Yeˍsuˆ hta‸ yonˍ peuˬ hk'aw‸ nawˉ, peu laˇ tuˬ yoˬ teh‸ k'oˆ taˍ ve da‸ ve kehˬ ve Awˬ ha hpu hta‸ cuˇ leh, G'uiˬ sha nawˬ hui hta‸ maiˉ taˍ peuˬ. 14 G'uiˬ sha ve awˬ shinˉ hta‸ ngaˬ hui hk'a biˇ g'a caˇ tuˬ ve hta‸ shiˍ tuˬ, chi beu‸ ka‸ yawˇ ve Awˬ ha hpu ngaˬ hui hta‸ pe‸ laˇ taˍ peuˬ. Chi lehˬ, yawˇ ve awˬ me‸ awˬ hponˇ hta‸ ngaˬ hui chiˇ mvuh tuˬ ve awˬ pon yoˬ. 15 Nawˬ hui Jawˇ mawˇ Yeˍsuˆ hta‸ yonˍ leh, Hkri‸ yaˇ hui hk'a peu-eˬ hta‸ ha‸ ve awˬ lawn ngaˬ g'a kaˇ peuˬ. 16 Hk'e te leh, nawˬ hui hta‸ pa taw ngaˬ G'uiˬ sha hta‸ hk'aˬ htaˆ ka‸ chiˇ mvuh leh, nawˬ hui awˬ pon bon lawˬ chehˇ ve yoˬ. 17 Ngaˬ bon lawˬ htaˇ, awˬ me‸ awˬ hponˇ uiˍ ve Awˬ pa hpeh‸ ve, ngaˬ hui ve Jawˇ mawˇ Yeˍsuˆ Hkri‸ ve G'uiˬ sha lehˬ, yawˇ ve awˬ lawn hta‸ nawˬ hui shiˍ tuˬ, dawˇ shiˍ puiˉ ve nyi ma leh hpeu‸ maˍ ve teˇ hpaˍ hta‸ shiˍ puiˉ ve nyi ma yawˇ nawˬ hui hta‸ piˇ tuˬ ngaˬ lawˬ ve yoˬ. 18 Yawˇ nawˬ hui hta‸ kuˬ yuˬ ve hta‸ pa taw, dawˇ law tuˬ hk'aˬ hk'e cawˬ ve maˇ k'oˆ, Hkri‸ yaˇ hui g'a tuˬ ve awˬ shinˉ hk'aˬ ma uiˍ jaˇ maˇ jaˇ ve leh hk'aˬ ma awˬ me‸ awˬ hponˇ cawˬ ve maˇ k'oˆ, nawˬ hui ve nyi ma awˬ hk'aw lo hk'a tawˍ lehˆ dawˇ mawˬ hpeh‸ tuˬ ngaˬ bon lawˬ chehˇ ve yoˬ. 19 Chi hk'oˆ ka‸, ngaˬ hui hk'a yonˍ ve chaw teˇ hpaˍ awˬ pon, k'oˆ maˇ peuˬ htaˇ hk'a gaˬ yawˇ ve kanˇ paˆ hk'aˬ ma uiˍ jaˇ ve hta‸ nawˬ hui shiˍ tuˬ ve ka‸, ngaˬ bon lawˬ ve yoˬ. Chi hta‸ G'uiˬ sha te htaˇ, kanˇ paˆ uiˍ jaˇ hehnˇ jaˇ ve awˬ hk'aw lo yawˇ te ve yoˬ. 20 Kanˇ paˆ oˇ ve lehˬ, Hkri‸ hta‸ suh kuiˬ lo k'aw‸ te‸ tu la piˇ leh, mvuhˇ naw ma hk'oˆ G'uiˬ sha yawˇ ve la‸ sha paˉ lo yawˇ hta‸ mui tcuh taˍ ve yoˬ. 21 Yawˇ lehˬ, uˉ peunˍ shehˍ hpaˇ hk'a peu-eˬ, kanˇ paˆ uiˍ shehˍ hpaˇ hk'a peu-eˬ, awˬ g'aˇ uiˍ shehˍ hpaˇ hk'a peu-eˬ, jawˇ mawˇ hk'a peu-eˬ leh, awˬ meh hk'a cawˬ taˍ ve hk'a peu-eˬ, chi teˇ ca‸ na‸ maˇ k'oˆ, awˬ hk'aw‸ nawˉ teˇ ca‸ na‸ maˇ k'oˆ, chi hk'a peu-eˬ awˬ hk'oˆ hta‸ yawˇ uiˍ jaˇ mvuh jaˇ ve yoˬ. 22 Awˬ ceuˬ hk'a peu-eˬ hta‸ yawˇ awˬ hawˉ lo G'uiˬ sha teh taˍ leh, Hkri‸ yaˇ awˬ moˍ hta‸ hk'a caˉ da‸ ve hk'a peu-eˬ awˬ hk'oˆ yawˇ hta‸ oˉ k'oˍ hpeh‸ piˇ lawˬ ve yoˬ. 23 Hkri‸ yaˇ awˬ moˍ lehˬ, Yeˍsuˆ ve awˬ to yoˬ. Hk'a peu-eˬ awˬ hk'aw lo yawˇ biˇ ve hk'e, hk'a peu-eˬ k'aw‸ biˇ la tuˬ yawˇ te chehˇ ve yoˬ.

Eˇfeˇsu‸ 2

1 Nawˬ hui lehˬ, te ya‸ kuiˬ leh venˇ baˆ teˇ hpaˍ awˬ hk'aw lo suh chehˇ taˍ ve teˇ yanˇ, yawˇ nawˬ hui hta‸ k'aw‸ te‸ tu la piˇ ve yoˬ. 2 Ponˬ laˬ htaˇ nawˬ hui miˬ guiˬ ve awˬ liˇ awˬ hk'aˇ teˇ hpaˍ awˬ hk'aˇ suh k'ai ve awˬ hk'aw lo, venˇ baˆ teˇ hpaˍ hta‸ te ve yoˬ. Oˇ htaˇ, mvuhˇ hpe lo ve kanˇ paˆ hta‸ uˉ peunˍ shehˍ hpaˇ awˬ hk'aˇ suh ka‸ nawˬ hui k'ai ve yoˬ. Yawˇ lehˬ, maˇ na yuˬ, ve chaw teˇ hpaˍ ve nyi ma awˬ hk'aw lo kanˉ te ve awˬ ha hpeh‸ ve yoˬ. 3 Oˇ htaˇ, ngaˬ hui hk'a peu-eˬ htawˇ maˇ na yuˬ ve chaw teˇ hpaˍ geh teˇ geh chehˇ leh, awˬ suhˍ awˬ shaˍ nyi hk'aˇ suh tuˬ te ve pa taw, awˬ suhˍ awˬ shaˍ te gaˇ ve hk'e te ve maˇ k'oˆ, dawˇ taˍ ve hk'e te ve maˇ k'oˆ, ngaˬ hui te ve yoˬ. Hk'e te leh, awˬ kaˍ awˬ nu chaw teˇ hpaˍ hk'a shuˍ shuˍ, ngaˬ hui lehˬ nyi ma zuhˆ ve hta‸ g'a hkanˍ ve chaw teˇ hpaˍ hpeh‸ tehˬ ve yoˬ. 4 Ya‸ hk'aˇ, ha k'aˉ puiˉ jaˇ ve G'uiˬ sha lehˬ, yawˇ ve ha‸ pehnˇ uiˍ jaˇ ve awˬ hk'aw lo ngaˬ hui hta‸ ha‸ ve pa taw, 5 venˇ baˆ teˇ hpaˍ awˬ hk'aw lo ngaˬ hui suh taˍ ve htawˇ, Hkri‸ geh hk'a geh yawˇ ngaˬ hui hta‸ k'aw‸ te‸ la piˇ peuˬ. (G'uiˬ sha ve awˬ bon hta‸ pa taw nawˬ hui htaiˍ hk'aw‸ ve hta‸ g'a peuˬ.) 6 G'uiˬ sha lehˬ, Yeˍsuˆ Hkri‸ geh hk'a geh ngaˬ hui hta‸ k'aw‸ te‸ tu la piˇ leh, yawˇ hta‸ pa taw mvuhˇ naw ma ve chehˇ kuiˬ awˬ hk'aw lo ngaˬ hui hta‸ yawˇ geh mui tcuh laˇ ve yoˬ. 7 Yawˇ chi hk'e te ve lehˬ, Yeˍsuˆ Hkri‸ hta‸ pa taw yawˇ ngaˬ hui hta‸ ha k'aˉ laˇ ve awˬ hk'aw lo, awˬ hk'aw‸ nawˉ laˬ tuˬ ve teˇ yanˇ htaˇ, yawˇ ve awˬ bon hk'aˬ ma uiˍ jaˇ maˇ jaˇ ve hta‸ hpeu‸ maˍ laˇ tuˬ awˬ pon te ve yoˬ. 8 Awˬ lawn k'o, nawˬ hui yonˍ ve awˬ hk'aw lo G'uiˬ sha ve awˬ bon hta‸ pa taw nawˬ hui htaiˍ hk'aw‸ ve hta‸ g'a ve yoˬ. Nawˬ hui hk'aˇ nawˬ hui te ve pa taw g'a ve maˇ heˆ. G'uiˬ sha pe‸ laˇ ve la‸ shawnˍ hpeh‸ ve yoˬ. 9 Chaw teˇ g'aˇ ka‸ nyi ma maˇ g'a uiˍ tuˬ, kanˉ te ve hta‸ pa taw g'a ve maˇ heˆ. 10 Awˬ lawn k'o, ngaˬ hui hta‸ yawˇ te taˍ ve yoˬ. Ngaˬ hui da‸ ve kanˉ teˇ hpaˍ hta‸ te tuˬ, Yeˍsuˆ Hkri‸ awˬ hk'aw lo yawˇ ngaˬ hui hta‸ hpanˍ taˍ ve yoˬ. Da‸ ve kanˉ oˇ ve teˇ hpaˍ hta‸ ngaˬ hui te k'ai tuˬ awˬ pon awˬ g'uˇ suhˍ htaˇ ka‸ G'uiˬ sha gu taˍ peuˬ. 11 Hk'e te leh, awˬ suhˍ awˬ shaˍ hpawˇ buiˇ shaˆ aˉ naˆ chaw hpeh‸ ve nawˬ hui teˇ hpaˍ lehˬ, ponˬ laˬ htaˇ Hkri‸ hta‸ a ciˉ ka‸ maˇ caˉ da‸ ve hta‸ dawˇ nawˇ-oˆ. Oˇ htaˇ, awˬ guiˬ meuˇ shoˍ ve chaw teˇ hpaˍ lehˬ, nawˬ hui hta‸ awˬ guiˬ meuˇ maˇ shoˍ ve chaw teˇ hpaˍ hpeh‸ ve teh‸ k'oˆ ve yoˬ. Awˬ guiˬ meuˇ shoˍ ve oˇ ve lehˬ, awˬ suhˍ awˬ shaˍ hpawˇ la‸ sheh te ve teˇ ceuˬ hpeh‸ ve yoˬ. 12 Awˬ yanˇ oˇ ve awˬ hk'aw lo nawˬ hui lehˬ, Iˉsaˍreˍlaˆ awˬ moˍ hta‸ maˇ g'a pawnˇ da‸. Awˬ bon g'a tuˬ yoˬ teh‸ k'oˆ taˍ ve ka ti‸ shaˉ caˆ tawˇ hkawˇ hta‸ ka‸ nawˬ huiˬ maˇ caˉ da‸. Nawˬ hui lehˬ, miˬ guiˬ hk'oˆ lo dawˇ law kuiˬ ka‸ maˇ cawˬ leh G'uiˬ sha ka‸ maˇ cawˬ ve hta‸ dawˇ nawˇ-oˆ. 13 Ponˬ laˬ htaˇ nawˬ hui vuiˇ kuiˬ lo chehˇ ve htawˇ, chi beu‸ Yeˍsuˆ Hkri‸ awˬ hk'aw lo nawˬ hui lehˬ, Hkri‸ ve awˬ suhˍ hta‸ pa taw awˬ paˇ neˇ lo gaˬ la peuˬ. 14 Awˬ lawn k'o, yawˇ hta‸ pa taw ngaˬ hui cawˇ da‸ hawˍ da‸ ve yoˬ. Yawˇ lehˬ, ngaˬ hui chaw nyiˇ ceuˬ hpeh‸ chehˇ ve hta‸ teˇ ceuˬ tiˉ hpeh‸ la piˇ leh, ngaˬ hui awˬ kaˍ lo ko taˍ ve g'o‸ pa hta‸ yawˇ hpaˆ baˬ peuˬ. 15 Yawˇ ve awˬ to awˬ hk'aw lo awˬ liˇ tawˇ hkawˇ ve awˬ liˇ awˬ hk'aˇ leh tawˇ piˇ taˍ ve teˇ hpaˍ hta‸ te luˬ peuˬ. Yawˇ chi hk'e te ve lehˬ, chaw nyiˇ ceuˬ hpeh‸ chehˇ ve hta‸ yawˇ awˬ hk'aw lo chaw awˬ suhˉ teˇ g'aˇ hpeh‸ la leh, cawˇ da‸ hawˍ da‸ tuˬ te ve yoˬ. 16 La‸ ka hta‸ pa taw, ngaˬ hui chaw nyiˇ ceuˬ hta‸ awˬ to teˇ to tiˉ hpeh‸ ve awˬ hk'aw lo G'uiˬ sha hta‸ cawˇ da‸ hawˍ da‸ tuˬ awˬ pon htawˇ yawˇ te ve yoˬ. Yawˇ chi hk'e te ve pa taw, canˇ da‸ ve teˇ ceuˬ hta‸ yawˇ tiˇ pehˍ ve yoˬ. 17 Hkri‸ laˬ leh, nawˬ hui vuiˇ kuiˬ lo chehˇ ve chaw hui hta‸ maˇ k'oˆ, neˇ kuiˬ lo chehˇ ve chaw hui hta‸ maˇ k'oˆ, Cawˇ da‸ hawˍ da‸ piˇ-oˆ teh‸ k'oˆ leh, ha lehˬ ve bon hkawˇ maˍ piˇ ve yoˬ. 18 Awˬ lawn k'o, yawˇ hta‸ pa taw ngaˬ hui chaw nyiˇ ceuˬ lehˬ, Awˬ ha hpu teˇ g'aˇ tiˉ awˬ hk'aw lo Awˬ pa geh k'ai tuˬ, ya‸ k'aw cawˬ taˍ peuˬ. 19 Hk'e te leh, nawˬ hui lehˬ shu mvuhˇ miˬ ve chaw maˇ k'aw‸ hpeh‸. Hkehˉ chaw ka‸ maˇ k'aw‸ hpeh‸. Chi beu‸ nawˬ hui lehˬ, Hkri‸ yaˇ hui geh teˇ mvuhˇ miˬ awˬ hk'aw lo ceh tiˉ chehˇ leh, G'uiˬ sha ve yehˬ awˬ hk'aw lo yehˬ yaˇ k'a yaˇ teˇ hpaˍ hpeh‸ ve yoˬ. 20 Yehˬ chi awˬ hk'aw lo tcuh yaˇ hui leh G'uiˬ sha ve tcuh kaˍ paˍ hui awˬ hkuiˉ puiˍ hpeh‸ leh, Yeˍsuˆ Hkri‸ awˬ to lehˬ, awˬ hkuiˉ puiˍ awˬ ceˍ k'aweh‸ ve haˉ pui shiˍ hpeh‸ ve yoˬ. 21 Yawˇ awˬ hk'aw lo teˇ yehˬ hk'a peu-eˬ caˉ da‸ taˍ leh, Jawˇ mawˇ G'uiˬ sha awˬ hk'aw lo da‸ kehˬ ve bon yehˬ lonˉ hpeh‸ la tuˬ uiˍ la chehˇ ve yoˬ. 22 G'uiˬ sha awˬ pon chehˇ kuiˬ hpeh‸ tuˬ yawˇ lehˬ, Awˬ ha hpu hta‸ cuˇ ve awˬ hk'aw lo nawˬ hui hta‸ yuˬ leh yehˬ oˇ ve hta‸ te chehˇ ve yoˬ.

Eˇfeˇsu‸ 3

1 Awˬ lawn oˇ ve hta‸ pa taw, ngaˬ Pawˇlu‸ lehˬ Yeˍsuˆ Hkri‸ awˬ pon htawnˍ hk'aw g'a chehˇ taˍ ve yoˬ. 2 Nawˬ hui hta‸ piˇ tuˬ ve awˬ pon G'uiˬ sha ve awˬ bon ngaˬ hta‸ pe‸ laˇ peuˬ ve hta‸ nawˬ hui g'a shiˍ g'a kaˇ ve hk'e, nawˬ hui buiˇ shaˆ aˉ naˆ chaw hui awˬ pon ngaˬ g'a hkanˍ ve yoˬ. 3 Ngaˬ nawˬ hui hta‸ li‸ a ciˉ bvuh‸ laˇ peuˬ ve hk'e, G'uiˬ sha lehˬ faˉ taˍ ve awˬ ceuˬ teˇ hpaˍ ngaˬ hta‸ hpeu‸ maˍ laˇ ve pa taw, ngaˬ g'a shiˍ ve yoˬ teh‸ nawˬ hui shiˍ taˍ ve yoˬ. 4 Li‸ chi hta‸ nawˬ hui g'aw chehˇ ve teˇ yanˇ, Hkri‸ hta‸ caˉ da‸ ve faˉ taˍ ve awˬ ceuˬ hta‸ ngaˬ hk'a deh‸ shiˍ ve yoˬ teh‸, nawˬ hui g'a shiˍ tuˬ yoˬ. 5 Faˉ taˍ ve awˬ ceuˬ oˇ ve awˬ lawn, ponˬ laˬ htaˇ ve chaw teˇ hpaˍ hta‸ maˇ shiˍ piˇ ve htawˇ, chi beu‸ ve awˬ yanˇ awˬ hk'aw lo Awˬ ha hpu lehˬ G'uiˬ sha ve da‸ kehˬ ve tcuh yaˇ teˇ hpaˍ leh tcuh kaˍ paˍ teˇ hpaˍ hta‸ hpeu‸ maˍ piˇ taˍ ve yoˬ. 6 Faˉ taˍ ve awˬ ceuˬ oˇ ve lehˬ, chi hk'e yoˬ. Ha lehˬ ve bon hkawˇ hta‸ pa taw, buiˇ shaˆ aˉ naˆ chaw teˇ hpaˍ lehˬ, Yeˍsuˆ Hkri‸ awˬ hk'aw lo Yuˇda‸ chaw hui geh teˇ geh awˬ shinˉ g'a caˇ ve, yawˇ hui geh awˬ to teˇ to tiˉ hpeh‸ la leh, piˇ taˍ ve ka ti‸ shaˉ caˆ hta‸ yawˇ hui geh teˇ geh g'a ve yoˬ. 7 G'uiˬ sha yawˇ ve awˬ bon ngaˬ hta‸ hk'e leˇ pe‸ laˇ ve hk'a shuˍ shuˍ, ha lehˬ ve bon hkawˇ chi shu hta‸ maˍ piˇ tuˬ yawˇ ngaˬ hta‸ te tcuh laˇ ve yoˬ. Yawˇ ve la‸ shawnˍ chi hta‸ ngaˬ g'a ve lehˬ, yawˇ ve kanˇ paˆ awˬ hk'aw lo yawˇ te laˇ ve hta‸ pa taw g'a ve yoˬ. 8 Hkri‸ awˬ hk'aw lo cawˬ ve biˇ jaˇ maˇ jaˇ leh awˬ hpfuhˇ hk'aˆ jaˇ ve awˬ lawn teˇ hpaˍ buiˇ shaˆ aˉ naˆ chaw teˇ hpaˍ hta‸ bon maˍ piˇ tuˬ, Hkri‸ yaˇ hui hk'a peu-eˬ awˬ hk'aw lo ngaˬ shu a‸ kehˉ i ve chaw teˇ g'aˇ hpeh‸ ve htawˇ, awˬ bon chi yawˇ ngaˬ hta‸ pe‸ laˇ ve yoˬ. 9 Peuˬ leh, hk'a peu-eˬ hta‸ te hpanˍ ve G'uiˬ sha awˬ hk'aw lo, aˬ sho-eˬ htaˇ ka‸ faˉ taˍ ve awˬ ceuˬ oˇ ve hk'aˬ hk'e hpeh‸ la biˇ la chehˇ ve awˬ lawn chaw hk'a peu-eˬ hta‸ hk'a tawˍ lehˆ hpeu‸ maˍ piˇ tuˬ awˬ pon ka‸, awˬ bon chi hta‸ ngaˬ g'a ve yoˬ. 10 Aˬ hto‸ ma pa taw faˉ taˍ ve le teh‸ k'oˆ ve k'o, G'uiˬ sha ve cuˇ yiˍ maˍ yiˍ hk'aˬ ma uiˍ jaˇ maˇ jaˇ ve awˬ lawn Hkri‸ yaˇ awˬ moˍ hta‸ pa taw mvuhˇ hpe lo chehˇ ve uˉ peunˍ shehˍ hpaˇ leh kanˇ paˆ cawˬ shehˍ hpaˇ hui hta‸ chi beu‸ shiˍ piˇ tuˬ awˬ pon, oˇ htaˇ yawˇ faˉ taˍ ve yoˬ. 11 Chi hk'e te ve lehˬ, miˬ guiˬ maˇ te hpanˍ sheˍ htaˇ ka‸ yawˇ dawˇ law taˍ ve hk'e, ngaˬ hui ve Jawˇ mawˇ Yeˍsuˆ Hkri‸ awˬ hk'aw lo biˇ la tuˬ awˬ pon yawˇ te ve yoˬ. 12 Jawˇ mawˇ Yeˍsuˆ Hkri‸ awˬ hk'aw lo ngaˬ hui nyi ma ha‸ hanˉ te leh, yawˇ hta‸ yonˍ ve pa taw, maˇ kawˆ ve awˬ hk'aw lo ngaˬ hui G'uiˬ sha mehˆ g'uˇ suhˍ k'ai hpeh‸ ve yoˬ. 13 Hk'e te leh, nawˬ hui awˬ pon ngaˬ g'a tu‸ g'a hkanˍ ve teˇ hpaˍ hta‸ pa taw nawˬ hui nyi ma maˇ g'a luˬ tuˬ, ngaˬ lawˬ hkawˉ ve yoˬ. Tu‸ ve hkanˍ ve chi teˇ hpaˍ lehˬ, nawˬ hui awˬ pon awˬ me‸ awˬ hponˇ hpeh‸ ve yoˬ. 14 Awˬ lawn chi hta‸ pa taw, Awˬ pa mehˆ g'uˇ suhˍ ngaˬ hkui tcuhˉ teh leh bon lawˬ ve yoˬ. 15 Yawˇ lehˬ, mvuhˇ naw ma hk'oˆ lo chehˇ ve mvuhˇ naw ma tcuh yaˇ hui awˬ hk'oˆ hta‸ maˇ k'oˆ, miˬ guiˬ hk'oˆ lo chehˇ ve chaw ceuˬ hk'a peu-eˬ awˬ hk'oˆ hta‸ maˇ k'oˆ, Awˬ pa hpeh‸ ve yoˬ. 16 Ngaˬ bon lawˬ ve lehˬ, G'uiˬ sha ve awˬ me‸ awˬ hponˇ uiˍ jaˇ maˇ jaˇ ve hk'e, yawˇ ve Awˬ ha hpu hta‸ pa taw nawˬ hui ve nyi ma awˬ hk'aw lo kanˇ paˆ hta‸ yawˇ yehˇ leh, awˬ g'aˇ cawˬ la piˇ lawˬ tuˬ maˇ k'oˆ, 17 nawˬ hui yonˍ ve hta‸ pa taw Hkri‸ nawˬ hui ve nyi ma awˬ hk'aw lo chehˇ yeˬ tuˬ maˇ k'oˆ, ngaˬ lawˬ ve yoˬ. 18 Ha‸ pehnˇ ve awˬ hk'aw lo nawˬ hui awˬ geu tcuhˆ naˉ leh awˬ hkuiˉ puiˍ yeˬ ve pa taw, Hkri‸ yaˇ hui hk'a peu-eˬ geh teˇ geh Hkri‸ ve ha‸ pehnˇ ve hk'aˬ ma k'ehˬ ve, hk'aˬ ma zuhˬ ve, hk'aˬ ma mvuh ve leh hk'aˬ ma naˉ ve hta‸ nawˬ hui htawˇ hk'a deh‸ shiˍ hpeh‸ tuˬ awˬ pon ka‸ ngaˬ bon lawˬ ve yoˬ. 19 Chaw yaˇ shiˍ maˇ gaˬ ve Hkri‸ ve ha‸ pehnˇ ve hta‸ nawˬ hui shiˍ tuˬ awˬ pon ka‸ ngaˬ bon lawˬ chehˇ ve yoˬ. Oˇ hk'e shiˍ ve k'o, G'uiˬ sha ve biˇ ve awˬ ceuˬ hk'a peu-eˬ nawˬ hui awˬ hk'aw lo biˇ la tuˬ yoˬ. 20 G'uiˬ sha ve kanˇ paˆ lehˬ, ngaˬ hui awˬ hk'aw lo kanˉ te chehˇ ve hta‸ pa taw, ngaˬ hui lawˬ ve leh dawˇ ve hk'a peu-eˬ a‸ kehˉ leuˉ leh yawˇ maˇ chaweh te laˇ puiˉ ve yoˬ. 21 Hkri‸ yaˇ awˬ moˍ awˬ hk'aw lo maˇ k'oˆ, Yeˍsuˆ Hkri‸ awˬ hk'aw lo maˇ k'oˆ, co co taiˍ taiˍ hk'aˬ htaˆ ka‸ yawˇ hta‸ chiˇ uiˍ chiˇ mvuh piˇ-oˆ. A menˬ.

Eˇfeˇsu‸ 4

1 Hk'e te leh, Jawˇ mawˇ Yeˍsuˆ awˬ pon htawnˍ hk'aw lo g'a chehˇ ve ngaˬ lehˬ, nawˬ hui hta‸ chi hk'e lawˬ hkawˉ ve yoˬ. G'uiˬ sha nawˬ hui hta‸ kuˬ yuˬ taˍ ve hk'e, yawˇ kuˬ yuˬ taˍ ve hta‸ keunˍ da‸ ve awˬ hk'aˇ suh ceh tiˉ te k'ai-o. 2 Hk'a peu-eˬ ve awˬ hk'aw lo a shu yawˇ awˬ to hta‸ taˍ nehˬ ve, nyi ma nuˇ nuˇ nehˬ nehˬ ve, nyi ma dawˇ zuhˬ gaˇ zuhˬ ve leh, ha‸ pehnˇ ve awˬ hk'aw lo teˇ g'aˇ leh teˇ g'aˇ yeunˇ hkanˍ da‸ ve, chi teˇ hpaˍ awˬ hk'aˇ suh te k'ai-o. 3 Aˉ caˆ hkeh hpeh tsuh‸ taˍ ve hk'e, cawˇ da‸ hawˍ da‸ ve teˇ ceuˬ nawˬ hui hta‸ hpeh tsuh‸ taˍ ve awˬ hk'aw lo, Awˬ ha hpu hta‸ pa taw hk'aˬ htaˆ ka‸ nyi ma teˇ shiˍ tiˉ cawˬ hpeh‸ tuˬ g'aˇ hte‸ ta-o. 4 G'uiˬ sha nawˬ hui hta‸ kuˬ yuˬ taˍ ve teˇ yanˇ, nawˬ hui dawˇ law kuiˬ teˇ ceuˬ tiˉ cawˬ tuˬ yawˇ kuˬ yuˬ taˍ ve hk'a shuˍ shuˍ, awˬ to teˇ to tiˉ cawˬ leh, Awˬ ha hpu teˇ g'aˇ tiˉ cawˬ ve yoˬ. 5 Jawˇ mawˇ teˇ g'aˇ tiˉ, yonˍ ve teˇ ceuˬ tiˉ, baˆtiˆsaˬ teˇ ceuˬ tiˉ cawˬ ve yoˬ. 6 Chaw hk'a peu-eˬ ve Awˬ pa hpeh‸ ve G'uiˬ sha teˇ g'aˇ tiˉ cawˬ ve yoˬ. Yawˇ lehˬ, hk'a peu-eˬ awˬ hk'oˆ hta‸ chehˇ leh, hk'a peu-eˬ awˬ hk'aw lo kanˉ te leh, hk'a peu-eˬ awˬ hk'aw lo chehˇ taˍ ve yoˬ. 7 Hkri‸ lehˬ yawˇ ve la‸ shawnˍ hk'aˬ ma pe‸ laˇ ve hk'e, ngaˬ hui teˇ g'aˇ le le awˬ bon chi ma g'a peuˬ. 8 Hk'e te leh, Li‸ hpu hk'aw chi hk'e k'oˆ taˍ ve, Yawˇ lehˬ mvuh kuiˬ lo taˆ-e ve teˇ yanˇ, chaw maˇ maˇ hta‸ yawˇ hpeh veu leh, chaw yaˇ hui hta‸ la‸ shawnˍ teˇ hpaˍ piˇ ve yoˬ. teh‸ k'oˆ taˍ ve yoˬ. 9 Yawˇ taˆ-e ve teh‸ k'oˆ ve lehˬ, awˉ lawˉ htaˇ miˬ guiˬ awˬ hawˉ teˇ htai‸ lo yawˇ ya‸-e taˍ peuˬ ve hta‸ k'oˆ ve maˇ heˆ laˇ. 10 Ya‸-e ve teˇ g'aˇ lehˬ, awˬ ceuˬ hk'a peu-eˬ hta‸ biˇ la piˇ tuˬ awˬ pon, mvuhˇ nawˬ ma hk'a peu-eˬ awˬ hk'oˆ hta‸ taˆ-e ve chaw teˇ g'aˇ hpeh‸ ve yoˬ. 11 Hkri‸ yaˇ teˇ hpaˍ biˇ la tuˬ awˬ pon maˇ k'oˆ, shu awˬ pon kanˉ te tuˬ maˇ k'oˆ, Hkri‸ ve awˬ to uiˍ la yeˬ la piˇ tuˬ awˬ pon maˇ k'oˆ, la‸ shawnˍ teˇ hpaˍ yawˇ piˇ ve yoˬ. 12 La‸ shawnˍ oˇ ve teˇ hpaˍ lehˬ, chaw teˇ hpaˍ hpaˍ tcuh yaˇ te tuˬ, teˇ hpaˍ hpaˍ bon maˍ paˍ te tuˬ, teˇ hpaˍ hpaˍ ha lehˬ ve bon hkawˇ maˍ paˍ te tuˬ, teˇ hpaˍ hpaˍ Hkri‸ yaˇ awˬ moˍ hta‸ ha‸ shaˉ paˍ te tuˬ, teˇ hpaˍ hpaˍ maˍ piˇ shehˍ hpaˇ te tuˬ, chi teˇ hpaˍ hpeh‸ ve yoˬ. 13 Ngaˬ hui hk'a peu-eˬ lehˬ, yonˍ ve awˬ hk'aw lo maˇ k'oˆ, G'uiˬ sha ve Yaˇ hpu hta‸ shiˍ ve awˬ hk'aw lo maˇ k'oˆ, nyi ma teˇ shiˍ tiˉ taˍ leh, uiˍ la peuˬ ve chaw hpeh‸ leh, Hkri‸ biˇ ve hk'a shuˍ shuˍ ngaˬ hui htawˇ biˇ la htaˇ hk'a gaˬ yawˇ te laˇ chehˇ ve yoˬ. 14 Chi hk'e uiˍ la ve k'o, ngaˬ hui yaˇ ehˉ maˇ k'aw‸ hpeh‸ leh, la‸ lehnˉ ve chaw teˇ hpaˍ cuˇ yiˍ te leh heˍ ve awˬ hk'aw lo laiˉ ceuˬ hta‸ maˍ ve teˇ yanˇ, mvuhˇ haw meuˆ chiˇ veu ve hk'a shuˍ shuˍ, ngaˬ hui hta‸ choˬ hpawˇ oˇ hpawˇ meuˆ chiˇ veu g'a tuˬ ve maˇ heˆ. 15 Ya‸ hk'aˇ, ha‸ pehnˇ ve awˬ hk'aw lo ngaˬ hui hteˇ ve cawˇ ve tawˇ hkawˇ hta‸ yaw leh, Hkri‸ awˬ hk'aw lo ngaˬ hui hk'a biˇ biˇ uiˍ la tuˬ yoˬ. Yawˇ lehˬ oˉ k'oˍ hpeh‸ ve yoˬ. 16 Oˉ k'oˍ oˇ ve hta‸ caˉ da‸ ve pa taw, awˬ to teˇ to hk'a peu-eˬ uiˍ la chehˇ leh, ha‸ pehnˇ ve awˬ hk'aw lo yeˬ la chehˇ ve yoˬ. Awˬ to oˇ ve lehˬ, awˬ tcuhˉ hk'a cawˬ ve hk'a peu-eˬ hta‸ pa taw, teˇ tawn leh teˇ tawn caˉ da‸ taˍ leh, awˬ hk'eun teˇ maˬ peuˬ teˇ maˬ a shu yawˇ ve kanˉ cawˬ ve hk'e te ve pa taw, awˬ to oˇ ve uiˍ la ve yoˬ. 17 Hk'e te leh, Jawˇ mawˇ Yeˍsuˆ awˬ hk'aw lo ngaˬ nawˬ hui hta‸ chi hk'e k'oˆ laˇ leh shaˉ hkiˆ hkanˍ ve yoˬ. Buiˇ shaˆ aˉ naˆ chaw teˇ hpaˍ te ve hk'e, nawˬ hui taˇ k'aw‸ te. Yawˇ hui dawˇ ve teˇ hpaˍ lehˬ, te‸ chiˉ awˬ bon maˇ cawˬ ve yoˬ. 18 Yawˇ hui lehˬ, nyi ma heh leh te‸ chiˉ maˇ shiˍ ve pa taw, yawˇ hui shiˍ puiˉ ve teˇ ceuˬ naˆ ho‸ lehˍ hpeh‸ k'ai leh, G'uiˬ sha ve te‸ ve teˇ ceuˬ hta‸ yawˇ hui maˇ caˉ da‸. 19 Yawˇ hui lehˬ, ya‸ taw puiˉ ve teˇ ceuˬ maˇ cawˬ leh, cha‸ chiˆ ve teˇ ceuˬ le le hta‸ te gaˇ jaˇ leh, peh‸ ve tzuhˆ ve hta‸ te tuˬ yawˇ hui a shu yawˇ awˬ to chiˇ a‸ piˇ ve yoˬ. 20 Nawˬ hui lehˬ, Hkri‸ hta‸ oˇ hk'e g'a henˇ taˍ ve maˇ heˆ. 21 Nawˬ hui lehˬ, yawˇ ve tawˇ hkawˇ hta‸ g'a kaˇ leh, Yeˍsuˆ awˬ hk'aw lo hteˇ ve cawˇ ve tawˇ hkawˇ cawˬ ve hk'e, nawˬ hui yawˇ awˬ hk'aw lo chehˇ leh g'a henˇ taˍ ve k'o, haiˬ ve oˇ ve teˇ hpaˍ hta‸ nawˬ hui g'a henˇ taˍ ve maˇ heˆ. 22 Nawˬ hui ve nyi ma awˬ piˍ hta‸ k'ehˆ baˬ taˉ-oˆ. Nyi ma awˬ piˍ oˇ ve lehˬ, ponˬ laˬ htaˇ nawˬ hui te chehˇ ve awˬ liˇ awˬ hk'aˇ teˇ hpaˍ hta‸ caˉ da‸ leh, ya‸ k'ai tuˬ te puiˉ ve sheˉ lai ve teˇ hpaˍ hta‸ pa taw, luˬ k'ai sheˆ k'ai chehˇ ve yoˬ. 23 Nawˬ hui ve nyi ma awˬ hk'aw lo dawˇ hk'aˇ awˬ suhˉ cawˬ la piˇ-oˆ. 24 Awˬ tehˬ awˬ na hteˇ ve cawˇ ve leh da‸ ve kehˬ ve awˬ hk'aw lo, G'uiˬ sha hpanˍ taˍ ve nyi ma awˬ suhˉ hta‸ veu‸ deh-o. 25 Hk'e te leh, heˍ ve tawˇ hkawˇ hta‸ baˬ taˉ leh, teˇ g'aˇ le le a shu yawˇ awˬ paˇ awˬ kui lo chehˇ ve chaw hui hta‸ hteˇ ve cawˇ ve tawˇ hkawˇ ceh tiˉ yaw da‸-o‸. Awˬ lawn k'o, ngaˬ hui lehˬ teˇ g'aˇ leh teˇ g'aˇ caˉ da‸ taˍ ve awˬ hk'eun teˇ hpaˍ hpeh‸ ve yoˬ. 26 Nawˬ hui nyi ma zuhˆ ve htawˇ, venˇ baˆ taˇ te. Mvuhˇ nyi maˇ k'ehˬ sheˍ htaˇ, nyi ma zuhˆ ve teˇ ceuˬ hta‸ mehˉ k'ai piˇ lawˬ-o‸. 27 Neˇ haiˬ kanˉ te hpeh‸ tuˬ, yawˇ hta‸ a hkaw-anˬ taˇ piˇ. 28 Shu ve mawˇ hta‸ hk'awˇ jaw ve chaw taˇ k'aw‸ hk'awˇ loˬ. Loˍ ve chaw teˇ hpaˍ hta‸ teˇ ceuˬ ceuˬ ga piˇ hpeh‸ tuˬ, a shu yawˇ ve la‸ sheh yehˇ leh da‸ ve kanˉ teˇ hpaˍ hta‸ te-o. 29 Nawˬ hui ve maw‸ k'aw awˬ hk'aw lo cha‸ chiˆ ve tawˇ hkawˇ teˇ peu-eˍ ka‸ taˇ tawˆ la piˇ. Ya‸ hk'aˇ, g'a kaˇ ve chaw hui awˬ pon awˬ bon cawˬ tuˬ, shu loˍ chehˇ ve awˬ ceuˬ hta‸ cawˇ da‸ ve tawˇ ceh tiˉ yaw leh, shu hta‸ uiˍ la yeˬ la piˇ puiˉ ve da‸ ve tawˇ hta‸ ceh tiˉ yaw-o. 30 G'uiˬ sha ve da‸ ve kehˬ ve Awˬ ha hpu hta‸ taˇ dawˇ haˍ piˇ. Htaiˍ hk'aw‸ ve awˬ nyi teˇ nyi hk'a gaˬ G'uiˬ sha nawˬ hui hta‸ yawˇ awˬ hk'aw lo yinˉ tcuhˉ taˍ laˇ peuˬ. 31 Shu hta‸ nyi ma naˬ ve, shu hta‸ beu‸ ve, shu hta‸ nyi ma zuhˆ ve, shu hta‸ deˇ da‸ ya‸ da‸ ve leh, shu hta‸ maˇ shawˍ maˇ caˆ k'oˆ ve, chi hk'a peu-eˬ hta‸ baˬ taˉ-oˆ. Shu hta‸ naˬ tuˬ te gaˇ ve teˇ ceuˬ le le hta‸ htawˇ baˬ taˉ-oˆ. 32 Nawˬ hui teˇ g'aˇ leh teˇ g'aˇ da‸ ve hta‸ te da‸ leh, teˇ g'aˇ leh teˇ g'aˇ ha k'aˉ da‸-o‸. G'uiˬ sha lehˬ Hkri‸ awˬ hk'aw lo nawˬ hui ve venˇ baˆ hpehˇ hk'a laˇ peuˬ ve hk'e, nawˬ hui htawˇ teˇ g'aˇ leh teˇ g'aˇ venˇ baˆ hpehˇ da‸-o‸.

Eˇfeˇsu‸ 5

1 Hk'e te leh, nawˬ hui lehˬ G'uiˬ sha ha‸ ve awˬ yaˇ awˬ duˬ hpeh‸ ve hk'e, yawˇ te ve hk'a shuˍ shuˍ te-o. 2 Hkri‸ nawˬ hui hta‸ ha‸ ve hk'e, ha‸ pehnˇ ve awˬ hk'aˇ suh k'ai-o. Yawˇ nawˬ hui hta‸ ha‸ ve pa taw, awˬ shaˉ hawnˉ ve tanˇ tuˬ G'uiˬ sha hta‸ tanˇ piˇ tuˬ awˬ pon, yawˇ ve awˬ to G'uiˬ sha hta‸ chiˇ a‸ piˇ ve yoˬ. 3 Haˉ chawˇ haˉ paˆ te ve, cha‸ chiˆ ve hk'a peu-eˬ ve leh, shu mawˇ shu jeˬ hta‸ sheˉ lai ve, chi teˇ hpaˍ awˬ lawn nawˬ hui awˬ hk'aw lo tawˇ yaw da‸ ve ceh ka‸ taˇ te. Hkri‸ yaˇ hui lehˬ, awˬ lawn chi teˇ hpaˍ hta‸ k'oˆ maˇ keunˍ ve yoˬ. 4 Cha‸ chiˆ ve tawˇ hkawˇ, tcuhˉ kuiˬ maˇ cawˬ ve tawˇ hkawˇ leh baˇ da‸ g'uiˬ da‸ ve tawˇ hkawˇ, tawˇ hkawˇ chi teˇ hpaˍ hta‸ nawˬ hui k'oˆ maˇ keunˍ. Chiˇ mvuh ve tawˇ hkawˇ hta‸ ceh tiˉ yaw-o. 5 Awˬ lawn k'o, haˉ chawˇ haˉ paˆ te ve chaw, maˇ da‸ maˇ kehˬ ve chaw leh, shu mawˇ shu jeˬ hta‸ sheˉ lai ve chaw hk'aˬ ve teˇ g'aˇ maˇ k'oˆ, Hkri‸ leh G'uiˬ sha ve mvuhˇ miˬ awˬ hk'aw lo awˬ shinˉ maˇ g'a ve hta‸ nawˬ hui shiˍ taˍ ve yoˬ. (Shu ve mawˇ hta‸ sheˉ lai ve chaw lehˬ, shaˉ ho‸ hta‸ oˉ k'oˍ pui ve chaw hk'a shuˍ shuˍ hpeh‸ ve yoˬ.) 6 Chaw teˇ g'aˇ ka‸ awˬ bon maˇ cawˬ ve tawˇ hkawˇ hta‸ yaw leh nawˬ hui hta‸ maˇ g'a heˍ yuˬ tuˬ shaˍ ti‸ te-o. Awˬ lawn k'o, awˬ ceuˬ chi teˇ hpaˍ hta‸ pa taw G'uiˬ sha nyi ma zuhˆ ve teˇ ceuˬ lehˬ, maˇ na yuˬ ve chaw hui awˬ hk'oˆ gaˬ la ve yoˬ. 7 Hk'e te leh, yawˇ hui hta‸ awˬ chawˇ taˇ te da‸. 8 Awˬ lawn k'o, nawˬ hui awˉ lawˉ htaˇ naˆ ho‸ lehˍ hpeh‸ ve htawˇ, chi beu‸ Jawˇ mawˇ Yeˍsuˆ awˬ hk'aw lo awˬ g'euˆ hpeh‸ ve yoˬ. 9 Awˬ g'euˆ yaˇ hk'e te k'ai-o. (Awˬ lawn k'o, awˬ g'euˆ ve awˬ shiˍ lehˬ, da‸ ve hk'a peu-eˬ hteˇ ve cawˇ ve hk'a peu-eˬ leh, awˬ tehˬ awˬ na ve awˬ ceuˬ hk'a peu-eˬ awˬ hk'aw lo cawˬ taˍ ve yoˬ.) 10 Jawˇ mawˇ Yeˍsuˆ nyi ma cawˇ ve awˬ ceuˬ hta‸ nawˬ hui shiˍ la tuˬ te-o. 11 Awˬ shiˍ maˇ naw‸ ve, naˆ hoˆ ve kanˉ teˇ hpaˍ hta‸ a ciˉ ka‸ taˇ te. Chi hk'oˆ ka‸, kanˉ oˇ ve teˇ hpaˍ ve ya‸ kuiˬ hta‸ hpeu‸ tawˆ la piˇ-oˆ. 12 Awˬ lawn k'o, baˬ kuiˬ lo yawˇ hui te ve kanˉ teˇ hpaˍ awˬ lawn ngaˬ hui tawˇ yaw ve ceh ka‸ ya‸ taw tuˬ cawˬ ve yoˬ. 13 Ya‸ kuiˬ hta‸ hpeu‸ tawˆ la piˇ ve hk'a peu-eˬ lehˬ, awˬ g'euˆ hta‸ pa taw hk'a tawˍ lehˆ tawˆ la ve yoˬ. Hk'a tawˍ lehˆ tawˆ la ve awˬ ceuˬ hk'a peu-eˬ htawˇ, awˬ g'euˆ hpeh‸ ve yoˬ. 14 Hk'e te leh, chi hk'e k'oˆ taˍ ve, Zuh‸ muiˉ k'a chehˇ ve chaw-oˬ, nawˇ la-o. Suh kuiˬ lo k'aw‸ te‸ tuˬ la-o. Hkri‸ nawˬ hta‸ awˬ g'euˆ ba laˇ tuˬ yoˬ, teh‸ k'oˆ taˍ ve yoˬ. 15 Hk'e te leh, nawˬ hui hk'aˬ hk'e dawˇ ve te ve hta‸ shaˍ ti‸ hk'a deh‸ taˍ-o‸. Cuˇ yiˍ maˇ cawˬ ve chaw hui hk'e taˇ te. Cuˇ yiˍ cawˬ ve chaw hui hk'e te chehˇ-oˆ. 16 Chi beu‸ ve awˬ nyi awˬ haˉ teˇ hpaˍ haiˬ ve hta‸ pa taw, awˬ yanˇ hta‸ vuiˬ hk'aw‸ leh hk'a deh‸ yehˇ-oˆ. 17 Chi hta‸ pa taw, cuˇ yiˍ maˇ cawˬ ve chaw taˇ hpeh‸ piˇ. Ya‸ hk'aˇ, Jawˇ mawˇ Yeˍsuˆ ve a loˍ hk'aˬ hk'e cawˬ ve hta‸ shiˍ ve chaw hpeh‸ piˇ-oˆ. 18 A pehˉ meuˇ g'uiˬ dawˬ bvuhˆ ve taˇ te. Oˇ hk'e te ve lehˬ, te ponˬ te leuˉ jaˇ ve teˇ ceuˬ yoˬ. Nawˬ awˬ hk'aw lo Awˬ ha hpu hk'a biˇ cawˬ piˇ-oˆ. 19 Chiˇ mvuh ve tawˇ hkawˇ, k'a muiˬ hkawˇ leh co ha hpawˇ hta‸ caˉ da‸ ve k'a muiˬ hkawˇ teˇ hpaˍ hta‸ cuˇ leh, teˇ g'aˇ leh teˇ g'aˇ k'oˆ da‸-o‸. Nawˬ hui ve nyi ma awˬ tawˬ hk'a gaˬ Jawˇ mawˇ Yeˍsuˆ hta‸ k'a muiˬ chiˇ mvuh-o. 20 Nawˬ hui lehˬ, ngaˬ hui ve Jawˇ mawˇ Yeˍsuˆ Hkri‸ ve awˬ meh hta‸ cuˇ leh, awˬ ceuˬ hk'a peu-eˬ ve awˬ pon Awˬ pa G'uiˬ sha hta‸ hk'aˬ htaˆ ka‸ chiˇ mvuh chehˇ-oˆ. 21 Hkri‸ hta‸ yawˆ yan ve awˬ hk'aw lo, teˇ g'aˇ awˬ hawˉ lo teˇ g'aˇ hk'a deh‸ chehˇ-oˆ. 22 Awˬ miˇ ma teˇ hpaˍ-oˬ, Jawˇ mawˇ Yeˍsuˆ awˬ hawˉ lo nawˬ hui chehˇ ve hk'e, a shu yawˇ ve awˬ hpawˇ awˬ hawˉ lo chehˇ-oˆ. 23 Awˬ lawn k'o, Hkri‸ lehˬ yawˇ ve awˬ moˍ ve oˉ k'oˍ hpeh‸ ve hk'e, awˬ hpawˇ htawˇ awˬ miˇ ma ve oˉ k'oˍ hpeh‸ ve yoˬ. Hkri‸ lehˬ, yawˇ ve awˬ to hpeh‸ ve Hkri‸ yaˇ awˬ moˍ hta‸ Htaiˍ hk'aw‸ shehˍ hpaˇ hpeh‸ ve yoˬ. 24 Hkri‸ yaˇ awˬ moˍ lehˬ, yawˇ awˬ hawˉ lo chehˇ ve hk'e, awˬ miˇ ma teˇ hpaˍ htawˇ teˇ ceuˬ le le awˬ hk'aw lo a shu yawˇ ve awˬ hpawˇ awˬ hawˉ lo chehˇ-oˆ. 25 Awˬ hpawˇ teˇ hpaˍ-oˬ, Hkri‸ lehˬ yawˇ ve awˬ moˍ hta‸ ha‸ ve hk'e nawˬ hui a shu yawˇ ve awˬ miˇ ma hta‸ ha‸-o‸. 26 Hkri‸ yaˇ awˬ moˍ da‸ la kehˬ la tuˬ, iˉ kaˆ tsuhˇ ve hk'a shuˍ shuˍ, Hkri‸ lehˬ bon hkawˇ hta‸ yehˇ leh Hkri‸ yaˇ awˬ moˍ hta‸ tsuhˇ kehˬ piˇ ve yoˬ. Chi hk'e te tuˬ awˬ pon, yawˇ ve awˬ to chiˇ a‸ piˇ ve yoˬ. 27 Yawˇ aˬ hto‸ ma te Hkri‸ yaˇ awˬ moˍ hta‸ tsuhˇ kehˬ piˇ le teh‸ k'oˆ k'o, da‸ kehˬ ve, ya‸ kuiˬ maˇ cawˬ ve, awˬ kuiˉ awˬ haiˇ hk'e ve teˇ ceuˬ ka‸ maˇ cawˬ ve awˬ moˍ hpeh‸ leh, awˬ me‸ awˬ hponˇ hk'a biˇ cawˬ ve awˬ hk'aw lo, awˬ moˍ oˇ ve yawˇ awˬ to hta‸ yawˇ chiˇ a‸ piˇ hpeh‸ tuˬ awˬ pon tsuhˇ kehˬ piˇ ve yoˬ. 28 Oˇ ve hk'a shuˍ shuˍ, awˬ hpawˇ teˇ hpaˍ lehˬ, a shu yawˇ ve awˬ to hta‸ ha‸ ve hk'e, a shu yawˇ ve awˬ miˇ ma hta‸ ha‸ cawˇ ve yoˬ. A shu yawˇ ve awˬ miˇ ma hta‸ ha‸ ve chaw lehˬ, a shu yawˇ awˬ to hta‸ ha‸ ve yoˬ. 29 Awˬ lawn k'o, a shu yawˇ ve awˬ to hta‸ canˇ ve chaw teˇ g'aˇ ka‸ maˇ cawˬ. A shu yawˇ awˬ to hta‸ caˍ piˇ taw piˇ leh, hk'a deh‸ ha‸ shaˉ ve yoˬ. Hkri‸ lehˬ, yawˇ ve awˬ moˍ hta‸ oˇ ve hk'a shuˍ shuˍ te ve yoˬ. 30 Awˬ lawn k'o, ngaˬ hui lehˬ yawˇ awˬ to ve awˬ hk'eun teˇ hpaˍ hpeh‸ ve yoˬ. 31 Chi hta‸ pa taw hawˉ hk'aˆ lehˬ, yawˇ ve awˬ pa awˬ e hta‸ hpaˆ da‸ taˉ leh, yawˇ ve awˬ miˇ ma hta‸ caˉ da‸ ve awˬ hk'aw lo yawˇ huiˉ maˬ lehˬ, teˇ suhˍ teˇ shaˍ tiˉ hpeh‸ la tuˬ yoˬ. 32 Awˬ lawn chi lehˬ, naˉ jaˇ ve teˇ ceuˬ hpeh‸ ve yoˬ. Ngaˬ chi hk'e k'oˆ ve lehˬ, Hkri‸ leh yawˇ ve awˬ moˍ awˬ lawn hta‸ k'oˆ gaˇ ve yoˬ. 33 Nawˬ hui teˇ g'aˇ le le htawˇ, a shu yawˇ awˬ to hta‸ ha‸ ve hk'e, a shu yawˇ awˬ miˇ ma hta‸ ha‸-o‸. Awˬ miˇ ma htawˇ, a shu yawˇ ve awˬ hpawˇ hta‸ yawˆ yan-o.

Eˇfeˇsu‸ 6

1 Yaˇ ehˉ teˇ hpaˍ-oˬ, Jawˇ mawˇ Yeˍsuˆ awˬ hk'aw lo nawˬ hui ve awˬ pa awˬ e ve tawˇ hkawˇ hta‸ na yuˬ-o‸. Awˬ lawn k'o, chi hk'e te cawˇ ve yoˬ. 2 Teˇ ceuˬ le le nawˬ awˬ pon da‸ leh, miˬ guiˬ hk'oˆ lo co zuhˬ ha zuhˬ cawˬ tuˬ, nawˬ ve awˬ pa awˬ e hta‸ yawˆ yawˆ yan yan te-o. 3 (Awˬ liˇ tawˇ hkawˇ teˇ hpaˍ awˬ hk'aw lo, tawˇ chi teˇ hkawˇ lehˬ, ka ti‸ piˇ taˍ ve tawˇ awˉ lawˉ teˇ hkawˇ hpeh‸ ve yoˬ.) 4 Awˬ pa teˇ hpaˍ-oˬ, a shu yawˇ ve yaˇ teˇ hpaˍ hta‸ nyi ma zuhˆ tuˬ taˇ te. Nawˬ hui yaˇ hu duˬ hu ve awˬ hk'aw lo Jawˇ mawˇ Yeˍsuˆ maˍ laˇ ve hk'e yawˇ hui hta‸ hk'a deh‸ maˍ piˇ leh sheh k'ai-o. 5 Vuiˬ taˍ ve awˬ ceˬ hpeh‸ ve chaw teˇ hpaˍ-oˬ, Hkri‸ ve tawˇ hkawˇ hta‸ na yuˬ ve hk'e, miˬ guiˬ hk'oˆ chehˇ ve nawˬ hui ve awˬ shehˍ hpaˇ ve tawˇ hkawˇ hta‸ kawˆ cheˇ leh nyi ma teˇ hk'aˇ tiˉ taˍ ve awˬ hk'aw lo na yuˬ-o‸. 6 Shu mehˆ mawˬ kuiˬ ceh te ve leh, chaw yaˇ nyi hk'aˇ suh tuˬ ceh te ve teˇ ceuˬ taˇ hpeh‸ piˇ. Hkri‸ ve awˬ ceˬ hpeh‸ ve hk'e, nyi ma pfuhˇ ve awˬ hk'aw lo G'uiˬ sha ve a loˍ hta‸ te-o. 7 Chaw yaˇ awˬ pon ceh te ve maˇ heˆ. Jawˇ mawˇ Yeˍsuˆ awˬ pon te ve hk'e, ha lehˬ, ha k'a te-o. 8 Chaw teˇ g'aˇ g'aˇ, da‸ ve hk'aˬ ve teˇ ceuˬ hta‸ te ve maˇ k'oˆ, Jawˇ mawˇ Yeˍsuˆ lehˬ oˇ ve teˇ ceuˬ yawˇ hta‸ k'aw‸ hk'aw‸ piˇ tuˬ yoˬ. Yawˇ lehˬ, shu vuiˬ taˍ ve awˬ ceˬ hpeh‸ ve maˇ k'oˆ, ponˬ ve chaw hpeh‸ ve maˇ k'oˆ, Yeˍsuˆ yawˇ hta‸ chi hk'e k'aw‸ hk'aw‸ piˇ tuˬ yoˬ teh‸ shiˍ chehˇ-oˆ. 9 Awˬ shehˍ hpaˇ teˇ hpaˍ-oˬ, nawˬ hui htawˇ oˇ ve hk'a shuˍ shuˍ yawˇ hui hta‸ te piˇ-oˆ. Yawˇ hui kawˆ tuˬ taˇ te. Yawˇ hui ve Awˬ shehˍ hpaˇ leh nawˬ hui ve Awˬ shehˍ hpaˇ teˇ g'aˇ tiˉ hpeh‸ leh, yawˇ mvuhˇ naw ma hk'oˆ lo chehˇ taˍ ve yoˬ. Yawˇ lehˬ, shu ve mehˆ hpfuhˇ hta‸ maˇ nyi ve teh‸ shiˍ chehˇ-oˆ. 10 Awˬ leh meuˇ ve tawˇ teˇ hkawˇ lehˬ chi hk'e yoˬ. Jawˇ mawˇ Yeˍsuˆ awˬ hk'aw lo maˇ k'oˆ, yawˇ ve kanˇ paˆ hta‸ caˉ da‸ ve awˬ g'aˇ awˬ shaˉ awˬ hk'aw lo maˇ k'oˆ, yeˬ chehˇ-oˆ. 11 Neˇ haiˬ heˍ yuˬ beˬ yuˬ ve teˇ hpaˍ hta‸ nawˬ hui g'aˇ hpeh‸ tuˬ, G'uiˬ sha pe‸ laˇ ve la‸ caˉ hk'a peu-eˬ hta‸ nawˬ hui veu‸ deh leh pfuhˇ taˍ-o‸, 12 Awˬ lawn k'o, ngaˬ hui lehˬ chaw yaˇ hta‸ g'a tawˍ da‸ ve maˇ heˆ. Uˉ peunˍ shehˍ hpaˇ teˇ hpaˍ hta‸ maˇ k'oˆ, kanˇ paˆ cawˬ shehˍ hpaˇ teˇ hpaˍ hta‸ maˇ k'oˆ, chi beu‸ ve awˬ yanˇ awˬ hk'aw lo miˬ guiˬ hk'oˆ naˆ ho‸ ve hta‸ uˉ peunˍ chehˇ ve teˇ hpaˍ hta‸ maˇ k'oˆ, mvuhˇ hpe lo chehˇ ve haiˬ ve awˬ ha teˇ hpaˍ hta‸ maˇ k'oˆ, g'a tawˍ da‸ ve yoˬ. 13 Hk'e te leh, haiˬ ve awˬ nyi awˬ hk'aw lo nawˬ hui yeˬ chehˇ hpeh‸ leh, hk'a peu-eˬ hta‸ te peuˬ hk'aw‸ nawˉ huˉ chehˇ hpeh‸ tuˬ, G'uiˬ sha pe‸ laˇ ve la‸ caˉ hk'a peu-eˬ hta‸ vawˆ taˍ-o‸. 14 Hteˇ ve cawˇ ve teˇ ceuˬ nawˬ hui ve caw‸ cehˍ nyi hta‸ tsuh‸ taˍ leh, nyi ma hteˇ ve cawˇ ve teˇ ceuˬ nyi ma pui hta‸ htanˬ tuˬ veu‸ deh leh, 15 cawˇ da‸ hawˍ da‸ tuˬ te hpeh‸ ve ha lehˬ ve bon hkawˇ hta‸ pa taw gu taˍ ve teˇ ceuˬ hkuiˉ nuˆ tcuhˉ ve hk'e tcuhˉ leh huˉ taˍ-o‸. 16 Chi hk'oˆ ka‸, haiˬ ve awˬ shehˍ hpaˇ teˇ g'aˇ bawˆ laˇ ve aˬ miˍ to‸ chehˇ ve hkaˆ ce teˇ hpaˍ hta‸ tiˇ pehˍ g'a tuˬ, htanˬ tuˬ hta‸ pfuhˇ ve hk'e, yonˍ ve teˇ ceuˬ hta‸ pfuhˇ taˍ-o‸. 17 Htaiˍ hk'aw‸ ve sho uˉ tcuhˍ hta‸ hk'awˆ taˍ leh, Awˬ ha hpu ve aˉ htaw hta‸ pfuhˇ taˍ-o‸. Aˉ htaw oˇ ve lehˬ, G'uiˬ sha ve tawˇ hkawˇ hpeh‸ ve yoˬ. 18 Hk'aˬ htaˆ ka‸ bon lawˬ ve leh lawˬ hkawˉ ve teˇ ceuˬ le le hta‸ te leh, Awˬ ha hpu awˬ hk'aw lo bon lawˬ chehˇ-oˆ. Oˇ hk'e bon lawˬ tuˬ awˬ g'aˇ maˇ nuˇ leh, Hkri‸ yaˇ hui hk'a peu-eˬ awˬ pon bon lawˬ leh shaw chehˇ-oˆ. 19 Ha lehˬ ve bon hkawˇ hta‸ caˉ da‸ ve faˉ taˍ ve awˬ ceuˬ hta‸ nyi ma ha‸ hanˉ ve awˬ hk'aw lo ngaˬ hk'a tawˍ lehˆ k'aoˍ maˍ piˇ hpeh‸ tuˬ, ngaˬ awˬ pon htawˇ bon lawˬ-o‸. 20 Ha lehˬ ve bon hkawˇ oˇ ve awˬ pon ngaˬ lehˬ awˬ tan te shehˍ hpaˇ hpeh‸ leh, sho caˆ hpeh taˍ ve hta‸ ngaˬ g'a hkanˍ chehˇ ve yoˬ. Ha lehˬ ve bon hkawˇ oˇ ve hta‸ ngaˬ maˍ piˇ keunˍ ve hk'e, nyi ma ha‸ hanˉ ve awˬ hk'aw lo maˍ piˇ hpeh‸ tuˬ ngaˬ awˬ pon bon lawˬ-o‸. 21 Ngaˬ hk'aˬ hk'e hpeh‸ chehˇ leh hk'aˬ hk'e te chehˇ ve awˬ lawn nawˬ hui htawˇ g'a shiˍ tuˬ, ngaˬ ha‸ ve awˬ viˉ awˬ nyi Tuˇhkiˆ lehˬ awˬ ceuˬ hk'a peu-eˬ nawˬ hui hta‸ hto laˇ tuˬ yoˬ. Yawˇ lehˬ, Jawˇ mawˇ Yeˍsuˆ awˬ hk'aw lo ka ti‸ yeˬ ve kanˉ te shehˍ hpaˇ teˇ g'aˇ hpeh‸ ve yoˬ. 22 Chi hta‸ pa taw, ngaˬ hk'aˬ hk'e hpeh‸ chehˇ ve hta‸ nawˬ hui shiˍ tuˬ leh, yawˇ nawˬ hui ve nyi ma hta‸ awˬ g'aˇ cawˬ la piˇ tuˬ, ngaˬ yawˇ hta‸ nawˬ hui geh peu laˇ ve yoˬ. 23 Awˬ viˉ awˬ nyi teˇ hpaˍ awˬ hk'aw lo dawˇ sha gaˇ sha tuˬ cawˬ piˇ-oˆ. Chi hk'oˆ ka‸, Awˬ pa G'uiˬ sha leh Jawˇ mawˇ Yeˍsuˆ Hkri‸ pe‸ laˇ ve ha‸ pehnˇ ve teˇ ceuˬ leh yonˍ ve teˇ ceuˬ htawˇ cawˬ piˇ-oˆ. 24 Ngaˬ hui ve Jawˇ mawˇ Yeˍsuˆ Hkri‸ hta‸ awˬ tehˬ awˬ na ha‸ tcuhˉ taˍ ve chaw hk'a peu-eˬ geh awˬ bon awˬ shinˉ cawˬ piˇ-oˆ.

Hpiˇliˇpiˆ 1

1 Yeˍsuˆ Hkri‸ awˬ ceˬ hpeh‸ ve ngaˬ Pawˇlu‸ leh Tiˆmoˉseˍ ngaˬ huiˉ maˬ lehˬ, Hpiˇliˇpiˆ venˇ hk'aw chehˇ ve Yeˍsuˆ Hkri‸ awˬ hk'aw lo da‸ kehˬ ve chaw hk'a peu-eˬ hta‸ maˇ k'oˆ, Hkri‸ yaˇ awˬ moˍ hta‸ nyi ha‸ shaˉ shehˍ hpaˇ teˇ hpaˍ leh ga piˇ shehˍ hpaˇ teˇ hpaˍ hta‸ maˇ k'oˆ, li‸ chi bvuh‸ laˇ ve yoˬ. 2 Ngaˬ hui ve Awˬ pa G'uiˬ sha leh Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 3 Teˇ pawˆ le le ngaˬ nawˬ hui hta‸ dawˇ nawˇ ve teˇ yanˇ, ngaˬ ve G'uiˬ sha hta‸ chiˇ mvuh ve yoˬ. 4 Nawˬ hui hk'a peu-eˬ awˬ pon ngaˬ bon lawˬ htaˇ, teˇ pawˆ le le ha lehˬ ha k'a bon lawˬ ve yoˬ. 5 Awˉ lawˉ teˇ nyi te leh chi beu‸ hk'a gaˬ, ha lehˬ ve bon hkawˇ bvuhˬ k'ai tuˬ nawˬ hui ngaˬ geh teˇ geh awˬ chawˇ te ve pa taw, ngaˬ G'uiˬ sha hta‸ chiˇ mvuh ve yoˬ. 6 Nawˬ hui awˬ hk'aw lo da‸ ve kanˉ hta‸ tanˬ te shehˍ hpaˇ G'uiˬ sha lehˬ, Yeˍsuˆ Hkri‸ ve awˬ nyi teˇ nyi hk'a gaˬ kanˉ oˇ ve hta‸ te peuˬ piˇ tuˬ yoˬ teh‸ ngaˬ yonˍ tehˬ ve yoˬ. 7 Nawˬ hui hk'a peu-eˬ awˬ lawn ngaˬ chi hk'e dawˇ ve lehˬ cawˇ ve yoˬ. Awˬ lawn k'o, nyi ma awˬ tawˬ hk'a gaˬ ngaˬ nawˬ hui hta‸ ha‸ ve yoˬ. Ngaˬ htawnˍ hk'aw chehˇ ve maˇ k'oˆ, ha lehˬ ve bon hkawˇ lehˬ cawˇ ve yoˬ teh‸ ngaˬ shaˉ hkiˆ hkanˍ ve awˬ hk'aw lo maˇ k'oˆ, nawˬ hui ngaˬ geh teˇ geh G'uiˬ sha ve awˬ bon hta‸ g'a ve yoˬ. 8 Awˬ lawn k'o, Yeˍsuˆ Hkri‸ ve ha‸ pehnˇ ve awˬ hk'aw lo ngaˬ nawˬ hui hk'a peu-eˬ hta‸ hk'aˬ ma dawˇ nawˇ jaˇ ve awˬ lawn, G'uiˬ sha lehˬ ngaˬ awˬ pon shaˉ hkiˆ hkanˍ hpeh‸ ve yoˬ. 9 Ngaˬ bon lawˬ ve lehˬ, nawˬ hui da‸ ve awˬ ceuˬ hta‸ shiˍ puiˉ tuˬ, cuˇ yiˍ maˍ yiˍ teˇ ceuˬ leh pehˬ puiˉ fuiˍ puiˉ ve teˇ ceuˬ maˇ la ve awˬ hk'aw lo nawˬ hui ve ha‸ pehnˇ ve teˇ ceuˬ shaˬ te shaˬ uiˍ la maˇ la tuˬ awˬ pon ngaˬ bon lawˬ ve yoˬ. 10 Chi hk'oˆ ka‸, G'uiˬ sha hta‸ awˬ me‸ awˬ hponˇ piˇ leh yawˇ hta‸ chiˇ mvuh piˇ tuˬ, Yeˍsuˆ Hkri‸ hta‸ pa taw g'a ve hteˇ ve cawˇ ve awˬ shiˍ nawˬ hui hk'a biˇ cawˬ leh, 11 Hkri‸ ve awˬ nyi teˇ nyi awˬ pon da‸ ve kehˬ ve nyi ma cawˬ leh, venˇ baˆ taˍ kuiˬ maˇ cawˬ ve chaw g'a hpeh‸ tuˬ awˬ pon ka‸ ngaˬ bon lawˬ ve yoˬ. 12 Awˬ viˉ awˬ nyi teˇ hpaˍ-oˬ, ngaˬ g'a hpuˇ g'a hkanˍ ve awˬ ceuˬ teˇ hpaˍ lehˬ, ha lehˬ ve bon hkawˇ bvuhˬ k'ai piˇ lawˬ ve law teh‸, ngaˬ nawˬ hui hta‸ shiˍ piˇ lawˬ gaˇ ve yoˬ. 13 Hk'e te leh, Hkri‸ awˬ pon ngaˬ htawnˍ hk'aw g'a chehˇ ve hta‸ jawˇ mawˇ lonˉ ve ma‸ yaˇ teˇ ta‸ hk'a peu-eˬ leh awˬ kaˍ awˬ nu chaw hk'a peu-eˬ g'a shiˍ ve yoˬ. 14 Ngaˬ htawnˍ hk'aw g'a chehˇ ve pa taw, awˬ viˉ awˬ nyi maˇ-awˍ ve lehˬ, Jawˇ mawˇ Yeˍsuˆ awˬ hk'aw lo nyi ma yeˬ leh, nyi ma ha‸ hanˉ ve awˬ hk'aw lo yawˇ ve tawˇ hkawˇ maˍ piˇ tuˬ yawˇ hui maˇ kawˆ. 15 Chaw teˇ hpaˍ hpaˍ lehˬ, hkawehˉ ve leh ya‸ da‸ gaˇ ve awˬ hk'aw lo Hkri‸ awˬ lawn bon maˍ ve yoˬ. Ya‸ hk'aˇ teˇ hpaˍ hpaˍ lehˬ, da‸ ve hta‸ tawˆ la tuˬ dawˇ law leh bon maˍ ve yoˬ. 16 Ha lehˬ ve bon hkawˇ lehˬ, cawˇ ve yoˬ teh‸ ngaˬ g'a yaw hk'aw‸ tuˬ ve awˬ pon ngaˬ choˬ kaˬ lo g'a chehˇ taˍ ve yoˬ teh‸, da‸ ve hta‸ dawˇ law leh maˍ ve chaw teˇ hpaˍ shiˍ leh ha‸ pehnˇ ve awˬ hk'aw lo bon maˍ ve yoˬ. 17 Ya‸ hk'aˇ, hkawehˉ ve awˬ hk'aw lo Hkri‸ awˬ lawn bon maˍ ve chaw teˇ hpaˍ lehˬ, hteˇ ve nyi ma maˇ cawˬ. Ngaˬ htawnˍ hk'aw g'a chehˇ ve hta‸ leuˉ leh tu‸ hkanˍ jaˇ la tuˬ yawˇ hui dawˇ taˍ leh, tanˬ da‸ ve awˬ hk'aw lo bon maˍ ve yoˬ. 18 Hk'e te leh, hk'aˬ hk'e le. Heˍ ve awˬ hk'aw lo maˇ k'oˆ, hteˇ ve cawˇ ve awˬ hk'aw lo maˇ k'oˆ, teˇ ceuˬ le le awˬ hk'aw lo Hkri‸ awˬ lawn shu bon maˍ chehˇ ve yoˬ. Hkri‸ awˬ lawn shu bon maˍ chehˇ ve hta‸ pa taw ngaˬ ha lehˬ leh, awˬ g'uˇ suhˍ hpawˇ htawˇ k'aw‸ ha lehˬ tuˬ sheˍ ve yoˬ. 19 Awˬ lawn k'o, nawˬ hui bon lawˬ ve leh Yeˍsuˆ Hkri‸ ve Awˬ ha hpu ga laˇ ve hta‸ pa taw, tu‸ ve hkanˍ ve chi awˬ hk'aw lo ngaˬ g'a ponˬ tuˬ yoˬ teh‸ ngaˬ shiˍ ve yoˬ. 20 Ngaˬ dawˇ law leh heuˆ gaˇ ve lehˬ chi hk'e yoˬ. Hk'aˬ ve teˇ ceuˬ awˬ hk'aw lo htawˇ ngaˬ maˇ g'a ya‸ taw leh, ponˬ laˬ htaˇ hk'a shuˍ shuˍ chi beu‸ htawˇ ngaˬ nyi ma ha‸ hanˉ ve hk'a deh‸ cawˬ taˍ ve awˬ hk'aw lo, ngaˬ te‸ ve maˇ k'oˆ, suh ve maˇ k'oˆ, ngaˬ ve awˬ to awˬ hk'aw lo ngaˬ Hkri‸ hta‸ chiˇ uiˍ chiˇ mvuh tuˬ yoˬ. 21 Awˬ lawn k'o, ngaˬ te‸ chehˇ ve teˇ ceuˬ lehˬ, Hkri‸ hpeh‸ ve yoˬ. Ngaˬ suh ve k'o, ngaˬ awˬ pon awˬ yawˬ hpeh‸ tuˬ yoˬ. 22 Ngaˬ awˬ to te‸ chehˇ ve k'o, ngaˬ kanˉ te ve awˬ hk'aw lo awˬ shiˍ naw‸ la tuˬ yoˬ. Hk'e te leh, suh ve leh te‸ ve, hk'aˬ hk'e ve teˇ ceuˬ hta‸ ngaˬ g'a leuˆ yuˬ tuˬ leh naˍ maˇ shiˍ. 23 Oˇ ve nyiˇ ceuˬ awˬ kaˍ lo ngaˬ chehˇ leh dawˇ maˇ tawˆ ve yoˬ. Ngaˬ heuˆ gaˇ ve lehˬ, ngaˬ k'o‸-e leh Hkri‸ geh chehˇ gaˇ ve yoˬ. Chi lehˬ leuˉ leh da‸ jaˇ ve teˇ ceuˬ yoˬ. 24 Ya‸ hk'aˇ, awˬ to awˬ hk'aw lo ngaˬ g'a chehˇ ve lehˬ, nawˬ hui awˬ pon leuˉ leh awˬ bon cawˬ ve yoˬ. 25 Ngaˬ chi hta‸ hk'a deh‸ yonˍ ve pa taw, yonˍ ve awˬ hk'aw lo nawˬ hui uiˍ la leh ha lehˬ la tuˬ awˬ pon, nawˬ hui hk'a peu-eˬ geh teˇ geh ngaˬ g'a chehˇ tuˬ yoˬ teh‸ ngaˬ shiˍ taˍ ve yoˬ. 26 Hk'e te leh, ngaˬ nawˬ hui geh teˇ pawˆ k'aw‸ laˬ ve teˇ yanˇ, ngaˬ hta‸ pa taw Yeˍsuˆ Hkri‸ awˬ hk'aw lo nawˬ hui leuˉ leh G'uiˬ sha hta‸ chiˇ mvuh hpeh‸ tuˬ yoˬ. 27 Hk'aˬ hk'e hpeh‸ ve htawˇ, nawˬ hui hk'a te hk'a dawˇ ve teˇ hpaˍ Hkri‸ ve ha lehˬ ve bon hkawˇ hta‸ keunˍ da‸ piˇ lawˬ-o‸. Oˇ hk'e te ve k'o, ngaˬ gaˬ la leh nawˬ hui hta‸ g'a mawˬ ve teˇ yanˇ maˇ k'oˆ, nawˬ hui geh maˇ chehˇ ve teˇ yanˇ maˇ k'oˆ, nawˬ hui nyi ma teˇ shiˍ tiˉ taˍ leh, dawˇ hk'aˇ teˇ hk'aˇ tiˉ taˍ ve awˬ hk'aw lo, ha lehˬ ve bon hkawˇ hta‸ caˉ da‸ ve yonˍ ve teˇ ceuˬ awˬ pon nawˬ hui teˇ geh g'aˇ hte‸ te chehˇ ve awˬ lawn hta‸ ngaˬ g'a kaˇ tuˬ yoˬ. 28 Nawˬ hui hta‸ tawˍ taˍ ve chaw teˇ hpaˍ hta‸ taˇ kawˆ. Maˇ kawˆ ve k'o, yawˇ hui awˬ pon awˬ heˆ chi ve nyiˇ ceuˬ hpeh‸ tuˬ yoˬ. Yawˇ hui g'a luˬ g'a sheˆ ve awˬ heˆ hpeh‸ leh, nawˬ hui lehˬ G'uiˬ sha lo laˬ ve htaiˍ hk'aw‸ ve hta‸ g'a taˍ ve awˬ heˆ hpeh‸ tuˬ yoˬ. 29 Awˬ lawn k'o, Hkri‸ hta‸ pa taw nawˬ hui g'a ve awˬ bon lehˬ, yawˇ hta‸ yonˍ ve teˇ ceuˬ ceh tiˉ maˇ heˆ, yawˇ awˬ pon g'a tu‸ g'a hkanˍ tuˬ ve teˇ ceuˬ hta‸ htawˇ g'a ve yoˬ. 30 Ngaˬ g'a bawˆ da‸ ve leh nawˬ hui g'a bawˆ da‸ ve, teˇ ceuˬ tiˉ hpeh‸ ve yoˬ, Bawˆ da‸ ve chi, ponˬ laˬ htaˇ ngaˬ te chehˇ ve hta‸ nawˬ hui g'a mawˬ leh, chi beu‸ htawˇ ngaˬ te chehˇ ve awˬ lawn hta‸ nawˬ hui g'a kaˇ ve yoˬ.

Hpiˇliˇpiˆ 2

1 Hk'e te leh, Hkri‸ awˬ hk'aw lo awˬ g'aˇ g'a ve teˇ ceuˬ maˇ k'oˆ, ha‸ pehnˇ ve awˬ hk'aˇ suh k'ai ve teˇ ceuˬ maˇ k'oˆ, Awˬ ha hpu awˬ hk'aw lo awˬ chawˇ te ve teˇ ceuˬ maˇ k'oˆ, shu hta‸ dawˇ nyi leh ha k'aˉ puiˉ ve teˇ ceuˬ maˇ k'oˆ, chi teˇ hpaˍ nawˬ hui awˬ hk'aw lo cawˬ ve k'o, 2 ngaˬ ha lehˬ tuˬ ve biˇ la tuˬ chi hk'e te-o. Nawˬ hui nyi ma teˇ shiˍ tiˉ, ha‸ da‸ pehnˇ da‸ ve teˇ ceuˬ tiˉ leh, nyi ma dawˇ hk'aˇ taˍ hk'aˇ teˇ hk'aˇ tiˉ cawˬ piˇ-oˆ. 3 Hk'aˬ ve teˇ ceuˬ htawˇ maˇ k'oˆ, tawˇ g'awˬ da‸ leh nyi ma uiˍ ve awˬ hk'aw lo taˇ te. Ya‸ hk'aˇ, nyi ma nuˇ nehˬ ve awˬ hk'aw lo, teˇ g'aˇ leh teˇ g'aˇ a shu yawˇ awˬ to a‸ kehˉ shu hta‸ taˍ uiˍ taˍ mvuh piˇ-oˆ. 4 A shu yawˇ awˬ to hta‸ caˉ da‸ ve awˬ lawn teˇ hpaˍ hta‸ ceh tiˉ taˇ dawˇ nyi. Ya‸ hk'aˇ, shu hta‸ caˉ da‸ ve awˬ lawn teˇ hpaˍ hta‸ htawˇ dawˇ nyi-o. 5 Yeˍsuˆ Hkri‸ nyi ma taˍ ve hk'e, nawˬ hui htawˇ taˍ-o‸. 6 Yawˇ lehˬ G'uiˬ sha ve awˬ ho‸ awˬ han awˬ hk'aw lo chehˇ ve htawˇ, G'uiˬ sha hk'a shuˍ shuˍ hpeh‸ chehˇ ve teˇ ceuˬ hta‸ g'aˇ hte‸ vawˆ taˍ cawˇ ve yoˬ teh‸ yawˇ maˇ dawˇ. 7 Ya‸ hk'aˇ, yawˇ ve awˬ me‸ awˬ hponˇ hta‸ k'ehˆ teh taˉ leh, awˬ ceˬ ve awˬ ho‸ awˬ han hta‸ deh leh, chaw yaˇ hk'a shuˍ shuˍ hpeh‸ la ve yoˬ. 8 Chi hk'oˆ ka‸, yawˇ chaw yaˇ hpeh‸ tehˬ ve hta‸ shu g'a mawˬ ve yoˬ. Yawˇ awˬ to hta‸ yawˇ taˍ nehˬ leh, suh htaˇ hk'a gaˬ na yuˬ ve yoˬ. Suh ve oˇ ve lehˬ, la‸ ka hk'oˆ lo hkanˍ suh ve teˇ ceuˬ yoˬ. 9 Hk'e te leh, G'uiˬ sha lehˬ yawˇ hta‸ hk'a peu-eˬ awˬ hk'oˆ hta‸ yuˬ uiˍ yuˬ mvuh piˇ leh, awˬ meh hk'a peu-eˬ a‸ kehˉ uiˍ jaˇ da‸ jaˇ ve awˬ meh yawˇ hta‸ piˇ taˍ ve yoˬ. 10 Awˬ lawn k'o, mvuhˇ naw ma hk'oˆ chehˇ ve maˇ k'oˆ, miˬ guiˬ hk'oˆ chehˇ ve maˇ k'oˆ, miˬ guiˬ awˬ hawˉ lo chehˇ ve maˇ k'oˆ, hk'a chehˇ ve hk'a peu-eˬ Yeˍsuˆ ve awˬ meh awˬ hawˉ lo hkui tcuhˉ g'a teh tuˬ yoˬ. 11 Chi hk'oˆ ka‸, Awˬ pa G'uiˬ sha awˬ me‸ awˬ hponˇ g'a tuˬ Yeˍsuˆ Hkri‸ lehˬ Jawˇ mawˇ hpeh‸ ve yoˬ teh‸, maw‸ k'aw teˇ maˬ le le shaˉ hkiˆ g'a hkanˍ tuˬ yoˬ. 12 Hk'e te leh, ngaˬ ha‸ ve chaw teˇ hpaˍ-oˬ, nawˬ hui hk'aˬ htaˆ ka‸ ngaˬ ve hkawˇ hta‸ na yuˬ ve hk'e, ngaˬ nawˬ hui geh chehˇ ve teˇ yanˇ ceh tiˉ maˇ heˆ, leuˉ leh chi beu‸ ngaˬ nawˬ hui geh maˇ chehˇ ve awˬ yanˇ awˬ hk'aw lo htawˇ, nawˬ hui a shu yawˇ awˬ to htaiˍ hk'aw‸ ve hta‸ g'a tuˬ, kawˆ ve cheˇ ve awˬ hk'aw lo g'aˇ hte‸ te-o. 13 Awˬ lawn k'o, G'uiˬ sha nyi ma cawˇ ve hta‸ nawˬ hui te gaˇ ve nyi ma cawˬ tuˬ leh te g'a tuˬ, nawˬ hui awˬ hk'aw lo yawˇ te chehˇ ve yoˬ. 14 Nawˬ hui hk'a te ve hk'a peu-eˬ awˬ hk'aw lo, hk'anˇ ve leh tawˇ k'aw‸ shaˬ ve teˇ ceuˬ taˇ te. 15 Oˇ hk'e maˇ te ve k'o, nawˬ hui venˇ baˆ taˍ kuiˬ maˇ cawˬ leh, shu hta‸ maˇ ya‸ puiˉ ve chaw hpeh‸ tuˬ yoˬ. Nyi ma k'aw‸ ve leh nyi ma hpfuhˆ puiˉ ve chaw chi teˇ co awˬ hk'aw lo, nawˬ hui lehˬ ya‸ kuiˬ maˇ cawˬ ve, G'uiˬ sha ve awˬ yaˇ awˬ duˬ hpeh‸ tuˬ yoˬ. Co ha te‸ piˇ lawˬ ve tawˇ hkawˇ hta‸ nawˬ hui vawˆ taˍ leh, awˬ g'euˆ ba ve hk'e miˬ guiˬ hk'oˆ lo chaw chi teˇ co hta‸ nawˬ hui ba piˇ chehˇ ve yoˬ. 16 Hk'e te leh, Hkri‸ ve awˬ nyi teˇ nyi gaˬ k'o, ngaˬ nyi ma uiˍ kuiˬ chi hk'e cawˬ tuˬ yoˬ. Ngaˬ g'uiˇ ve lehˬ, hk'e leˇ hpeh‸ ve maˇ heˆ. Ngaˬ kanˉ te hkeu‸ ve htawˇ, hk'e leˇ hpeh‸ ve maˇ heˆ. 17 Nawˬ hui ve yonˍ ve teˇ ceuˬ lehˬ, tanˇ tuˬ hk'e hpeh‸ ve yoˬ. Tanˇ tuˬ oˇ ve awˬ hk'oˆ lo ngaˬ hta‸ ngeuˍ baˬ ve htawˇ ngaˬ ha lehˬ jaˇ leh, nawˬ hui hk'a peu-eˬ geh teˇ geh ha lehˬ ve yoˬ. 18 Oˇ ve hk'a shuˍ shuˍ nawˬ hui htawˇ ha lehˬ leh, ngaˬ geh teˇ geh ha lehˬ chehˇ-oˆ. 19 Nawˬ hui awˬ lawn ngaˬ g'a shiˍ ve teˇ yanˇ ngaˬ g'a ha lehˬ tuˬ, maˇ maw maw Tiˆmoˉseˍ hta‸ nawˬ hui geh peu laˇ tuˬ yoˬ teh‸, Jawˇ mawˇ Yeˍsuˆ awˬ hk'aw lo ngaˬ dawˇ law taˍ ve yoˬ. 20 Awˬ lawn k'o, yawˇ hk'a shuˍ shuˍ nyi ma taˍ ve chaw teˇ g'aˇ ka‸ ngaˬ geh maˇ cawˬ. Yawˇ lehˬ, nawˬ hui awˬ pon da‸ ve teˇ ceuˬ hta‸ awˬ tehˬ awˬ na dawˇ nyi puiˉ ve chaw teˇ g'aˇ hpeh‸ ve yoˬ. 21 Awˬ kaˍ awˬ nu chaw hk'a peu-eˬ lehˬ, Yeˍsuˆ Hkri‸ awˬ pon da‸ ve teˇ ceuˬ hta‸ maˇ ca leh, a shu yawˇ awˬ to awˬ pon da‸ ve teˇ ceuˬ hta‸ ceh tiˉ ca ve yoˬ. 22 Ya‸ hk'aˇ, Tiˆmoˉseˍ lehˬ awˬ liˇ awˬ hk'aˇ hk'aˬ ma da‸ ve hta‸ nawˬ hui shiˍ ve yoˬ. Yaˇ paˍ teˇ g'aˇ lehˬ, awˬ pa geh teˇ geh kanˉ te ve hk'e, ha lehˬ ve bon hkawˇ bvuhˬ k'ai tuˬ yawˇ ngaˬ geh teˇ geh kanˉ te ve yoˬ. 23 Hk'e te leh, shu ngaˬ hta‸ hk'aˬ hk'e te laˇ tuˬ ve hta‸ ngaˬ g'a shiˍ ve teˇ yanˇ, teˇ cawˬ haˉ yawˇ hta‸ nawˬ hui geh peu laˇ tuˬ yoˬ teh‸ ngaˬ dawˇ law taˍ ve yoˬ. 24 Maˇ maw maw ngaˬ awˬ to nawˬ hui geh laˬ tuˬ yoˬ teh‸, Jawˇ mawˇ Yeˍsuˆ awˬ hk'aw lo ngaˬ hk'a deh‸ yonˍ taˍ ve yoˬ. 25 Ngaˬ ve awˬ viˉ awˬ nyi Eˇpaˍhpawˍdiˆ hta‸ nawˬ hui geh k'aw‸ la tcuh cawˇ ve yoˬ teh‸ ngaˬ dawˇ taˍ ve yoˬ. Yawˇ lehˬ, ngaˬ geh teˇ geh kanˉ te leh ngaˬ geh teˇ geh bon hpawˇ ve ma‸ yaˇ hpeh‸ ve yoˬ. Nawˬ hui ve tcuh yaˇ ka‸ hpeh‸ leh, ngaˬ loˍ ve teˇ hpaˍ hta‸ ga laˇ shehˍ hpaˇ ka‸ hpeh‸ ve yoˬ. 26 Yawˇ nawˬ hui hk'a peu-eˬ hta‸ nyi ma haˍ jaˇ leh, yawˇ naˬ ve awˬ lawn nawˬ hui g'a kaˇ ve pa taw, yawˇ maˇ maˇ dawˇ haˍ jaˇ ve yoˬ. Chi hta‸ pa taw, ngaˬ yawˇ hta‸ nawˬ hui geh k'aw‸ la tcuh ve yoˬ. 27 Suh paˇ neˇ htaˇ hk'a gaˬ yawˇ naˬ jaˇ tehˬ ve yoˬ. Ya‸ hk'aˇ, G'uiˬ sha yawˇ hta‸ ha k'aˉ ve yoˬ. Yawˇ hta‸ ceh tiˉ ha k'aˉ ve maˇ heˆ. Ngaˬ dawˇ haˍ chehˇ ve awˬ hk'oˆ leuˉ leh maˇ g'a dawˇ haˍ tuˬ, ngaˬ hta‸ htawˇ G'uiˬ sha ha k'aˉ laˇ ve yoˬ. 28 Hk'e te leh, nawˬ hui yawˇ hta‸ g'a mawˬ ve teˇ yanˇ nawˬ hui g'a ha lehˬ tuˬ maˇ k'oˆ, ngaˬ dawˇ haˍ ve a ciˉ hkehnˇ la tuˬ maˇ k'oˆ, ngaˬ yawˇ hta‸ nawˬ hui geh haˆ haˆ k'aw‸ la tcuh ve yoˬ. 29 Jawˇ mawˇ Yeˍsuˆ hta‸ pa taw, ha lehˬ ve hk'a biˇ cawˬ ve awˬ hk'aw lo yawˇ hta‸ ha‸ yuˬ-o‸. Chi hk'e ve chaw teˇ hpaˍ hta‸ yawˆ yawˆ yan yan te-o. 30 Awˬ lawn k'o, nawˬ hui ngaˬ hta‸ ga laˇ ve awˬ hk'aw lo loˍ ve cuˆ ve teˇ hpaˍ hta‸ te biˇ la tuˬ awˬ pon, yawˇ ve a sha‸ tanˇ leh, Hkri‸ ve kanˉ hta‸ te ve pa taw, yawˇ aˬ laˬ hk'e suh ve yoˬ.

Hpiˇliˇpiˆ 3

1 Awˬ viˉ awˬ nyi teˇ hpaˍ-oˬ, awˬ leh ve teˇ hkawˇ lehˬ chi hk'e yoˬ. Jawˇ mawˇ Yeˍsuˆ awˬ hk'aw lo ha lehˬ chehˇ-oˆ. Nawˬ hui hta‸ awˬ lawn chi teˇ hpaˍ teˇ pawˆ peuˬ teˇ pawˆ ngaˬ bvuh‸ laˇ ve lehˬ, ngaˬ awˬ pon hkeu‸ ve teˇ ceuˬ maˇ heˆ. Chi hk'oˆ ka‸, nawˬ hui yeˬ la tuˬ awˬ pon awˬ bon cawˬ ve yoˬ. 2 Hpuiˇ hk'e ve chaw teˇ hpaˍ hta‸ maˇ k'oˆ, haiˬ ve kanˉ te ve chaw teˇ hpaˍ hta‸ maˇ k'oˆ, awˬ guiˬ meuˇ shoˍ baˬ shawˆ baˬ ve chaw teˇ hpaˍ hta‸ maˇ k'oˆ, nawˬ hui shaˍ ti‸ te-o. 3 Awˬ tehˬ awˬ na ve awˬ guiˬ meuˇ shoˍ ve chaw teˇ hpaˍ lehˬ ngaˬ hui yoˬ. Awˬ lawn k'o, ngaˬ hui lehˬ nyi ma awˬ hk'aw lo G'uiˬ sha hta‸ oˉ k'oˍ pui leh, Yeˍsuˆ Hkri‸ awˬ hk'aw lo nyi ma uiˍ kuiˬ cawˬ leh, awˬ suhˍ awˬ shaˍ hpawˇ hta‸ maˇ g'aˇ va ve chaw teˇ hpaˍ hpeh‸ ve yoˬ. 4 Awˬ tehˬ k'oˆ k'o, ngaˬ lehˬ awˬ suhˍ awˬ shaˍ hpawˇ hta‸ g'aˇ va gaˇ k'o, hpeh‸ ve yoˬ. Awˬ kaˍ awˬ nu chaw teˇ g'aˇ lehˬ, awˬ suhˍ awˬ shaˍ hpawˇ hta‸ g'aˇ va tuˬ cawˬ ve k'o, ngaˬ yawˇ a‸ kehˉ leuˉ leh cawˬ ve yoˬ. 5 Ngaˬ paw la peuˬ hk'aw‸ nawˉ hiˉ nyi gaˬ ve teˇ yanˇ, awˬ guiˬ meuˇ shoˍ ve hta‸ hkanˍ ve yoˬ. Ngaˬ lehˬ, Iˉsaˍreˍlaˆ chaw ceuˬ awˬ hk'aw lo Beˍyaˍmenˍ awˬ ceuˬ awˬ hk'aˇ hpeh‸ leh, Heˍbrehˇ chaw hui awˬ hk'aw lo paw la ve Heˍbrehˇ chaw hpeh‸ tehˬ ve yoˬ. Awˬ liˇ tawˇ hkawˇ hta‸ caˉ da‸ ve awˬ hk'aw lo ngaˬ Hpaˍriˍsehˇ hpeh‸ ve yoˬ. 6 Ngaˬ g'aˇ hte‸ te jaw ve awˬ lawn hta‸ k'oˆ ve k'o, Hkri‸ yaˇ awˬ moˍ hta‸ ngaˬ fawˉ mehˍ shehˍ hpaˇ hpeh‸ ve yoˬ. Awˬ liˇ tawˇ hkawˇ hta‸ caˉ da‸ ve hteˇ ve cawˇ ve teˇ ceuˬ hta‸ k'oˆ ve k'o, ngaˬ lehˬ venˇ baˆ maˇ cawˬ ve chaw hpeh‸ ve yoˬ. 7 Ya‸ hk'aˇ, ponˬ laˬ htaˇ ngaˬ hk'a cawˬ taˍ ve awˬ yawˬ teˇ hpaˍ, Hkri‸ hta‸ ngaˬ ha‸ ve pa taw, shonˇ ve awˬ ceuˬ hpeh‸ ve yoˬ teh‸ ngaˬ shawˍ taˍ ve yoˬ. 8 Awˬ tehˬ awˬ na k'oˆ ve k'o, ngaˬ ve Jawˇ mawˇ Yeˍsuˆ Hkri‸ hta‸ ngaˬ shiˍ ve lehˬ, uiˍ jaˇ da‸ jaˇ ve hta‸ pa taw, awˬ kaˍ awˬ nu hk'a peu-eˬ hta‸ shonˇ ve awˬ ceuˬ hpeh‸ ve yoˬ teh‸ ngaˬ shawˍ taˍ ve yoˬ. Ngaˬ yawˇ hta‸ ha‸ ve pa taw, awˬ ceuˬ hk'a peu-eˬ hta‸ ngaˬ shonˇ baˬ peuˬ ve yoˬ. 9 Hkri‸ hta‸ ngaˬ g'a leh, yawˇ awˬ hk'aw lo chehˇ hpeh‸ tuˬ, awˬ ceuˬ oˇ ve hk'a peu-eˬ hta‸ chiˇ baˬ peuˬ ve cha‸ chiˆ ve awˬ ceuˬ hpeh‸ ve yoˬ teh‸, ngaˬ shawˍ taˍ ve yoˬ. Ngaˬ lehˬ, awˬ liˇ tawˇ hkawˇ hta‸ caˉ da‸ ve hteˇ ve cawˇ ve teˇ ceuˬ maˇ cawˬ. Hkri‸ hta‸ yonˍ ve hta‸ caˉ da‸ ve hteˇ ve cawˇ ve teˇ ceuˬ ngaˬ cawˬ taˍ ve yoˬ. Hteˇ ve cawˇ ve oˇ ve lehˬ, G'uiˬ sha lo laˬ leh, yonˍ ve hta‸ pa taw ceh tiˉ g'a ve yoˬ. 10 Ngaˬ htawˇ suh kuiˬ lo k'aw‸ te‸ tu la ve teˇ ceuˬ hta‸ g'a tuˬ dawˇ law ve maˇ k'oˆ, yawˇ hta‸ ka‸, yawˇ k'aw‸ te‸ tu la ve kanˇ paˆ hta‸ ka‸ shiˍ tuˬ maˇ k'oˆ, 11 yawˇ ve tu‸ ve hkanˍ ve teˇ hpaˍ hta‸ yawˇ geh teˇ geh hkanˍ leh, yawˇ suh ve teˇ ceuˬ awˬ hk'aw lo yawˇ hta‸ shuˍ da‸ la tuˬ maˇ k'oˆ, awˬ ceuˬ hk'a peu-eˬ hta‸ ngaˬ shonˇ baˬ leh, chiˇ baˬ peuˬ ve cha‸ chiˆ ve awˬ ceuˬ hpeh‸ ve yoˬ teh‸ ngaˬ shawˍ taˍ ve yoˬ. 12 Ngaˬ chi hk'e k'oˆ ve lehˬ, chi beu‸ ka‸ ngaˬ g'a peuˬ, maˇ heˆ k'o chi beu‸ ka‸ ngaˬ biˇ peuˬ teh‸ k'oˆ gaˇ ve maˇ heˆ. Ya‸ hk'aˇ, Yeˍsuˆ Hkri‸ ngaˬ hta‸ vawˆ yuˬ peuˬ ve hk'e, ngaˬ htawˇ oˇ ve hta‸ g'a vawˆ yuˬ tuˬ, awˬ hk'aˇ suh ngaˬ g'a‸ yuˬ tcuhˉ taˍ ve yoˬ. 13 Awˬ viˉ awˬ nyi teˇ hpaˍ-oˬ, oˇ ve hta‸ ngaˬ vawˆ yuˬ peuˬ teh‸ ngaˬ dawˇ ve maˇ heˆ. Ya‸ hk'aˇ, ngaˬ teˇ ceuˬ hta‸ te chehˇ ve yoˬ. 14 Ponˬ laˬ peuˬ ve awˬ ceuˬ teˇ hpaˍ hta‸ ngaˬ leunˇ baˬ taˉ leh, awˬ g'uˇ suhˍ lo cawˬ taˍ ve awˬ ceuˬ teˇ hpaˍ hta‸ g'aˇ hte‸ la‸ sheh che yuˬ chehˇ ve yoˬ. Ngaˬ mvuhˇ naw ma lo taˆ-e tuˬ, G'uiˬ sha lehˬ Yeˍsuˆ Hkri‸ hta‸ cuˇ leh ngaˬ hta‸ kuˬ yuˬ ve la‸ shawnˍ hta‸ g'a htaˇ hk'a gaˬ ngaˬ g'a‸ yuˬ tcuhˉ taˍ ve yoˬ. 15 Yonˍ ve awˬ hk'aw lo uiˍ la peuˬ ve ngaˬ hui teˇ hpaˍ lehˬ, nyi ma oˇ hk'e taˍ-a veuˬ. Nawˬ hui nyi ma oˇ hk'e maˇ taˍ ve chaw teˇ hpaˍ hta‸ awˬ lawn oˇ ve G'uiˬ sha hpeu‸ maˍ laˇ tuˬ yoˬ. 16 Ya‸ hk'aˇ, ngaˬ hui hk'a g'a‸ mi taˍ ve teˇ hpaˍ hta‸ vawˆ taˍ leh hteˇ lehˍ k'ai-a veuˬ. 17 Awˬ viˉ awˬ nyi teˇ hpaˍ-oˬ, ngaˬ te ve hk'e nawˬ hui htawˇ te-o. Ngaˬ hta‸ henˇ yuˬ leh te k'ai chehˇ ve chaw teˇ hpaˍ hta‸ chiˇ nyi-o. 18 Awˬ lawn k'o, ponˬ laˬ htaˇ ngaˬ nawˬ hui hta‸ laiˉ pawˆ hto laˇ peuˬ leh, chi beu‸ ka‸ mehˆ g'uiˬ ya‸ la ve awˬ hk'aw lo k'aw‸ hto laˇ ve hk'e, Hkri‸ ve la‸ ka hta‸ canˇ paˍ te chehˇ ve chaw maˇ maˇ cawˬ ve yoˬ. 19 Chaw oˇ ve teˇ hpaˍ lehˬ, awˬ leh meuˇ gaˬ k'o, luˬ k'ai sheˆ k'ai tuˬ yoˬ. Yawˇ hui ve g'oˇ peˬ lehˬ, yawˇ hui ve g'uiˬ sha hpeh‸ ve yoˬ. Yawˇ hui ya‸ taw cawˇ ve awˬ ceuˬ awˬ hk'aw lo nyi ma uiˍ ve yoˬ. Miˬ guiˬ hpawˇ ve awˬ ceuˬ teˇ hpaˍ hta‸ ceh tiˉ yawˇ hui dawˇ nyi ve yoˬ. 20 Ngaˬ hui lehˬ, mvuhˇ naw ma hta‸ caˉ da‸ ve chaw hpeh‸ leh, Htaiˍ hk'aw‸ paˍ Jawˇ mawˇ Yeˍsuˆ Hkri‸ oˇ kaˬ lo tawˆ la tuˬ ve hta‸ ngaˬ hui law chehˇ ve yoˬ. 21 Yawˇ lehˬ, awˬ ceuˬ hk'a peu-eˬ hta‸ yawˇ awˬ hawˉ lo chehˇ tcuh tuˬ ve kanˇ paˆ hta‸ yehˇ leh, awˬ me‸ awˬ hponˇ uiˍ jaˇ ve yawˇ ve awˬ to hk'a shuˍ shuˍ hpeh‸ la tuˬ, awˬ me‸ awˬ hponˇ maˇ cawˬ ve ngaˬ hui ve awˬ to hta‸ yawˇ awˬ suhˉ k'aw‸ pa laˇ tuˬ yoˬ.

Hpiˇliˇpiˆ 4

1 Hk'e te leh, ngaˬ ha‸ leh ngaˬ nyi ma haˍ ve awˬ viˉ awˬ nyi teˇ hpaˍoˬ, nawˬ hui lehˬ ngaˬ ve ha lehˬ tuˬ hpeh‸ leh ngaˬ ve shi uˉ tcuhˍ hpeh‸ ve yoˬ. Ngaˬ ha‸ ve chaw teˇ hpaˍ-oˬ, Jawˇ mawˇ Yeˍsuˆ awˬ hk'aw lo yeˬ chehˇ taˍ-o‸. 2 Jawˇ mawˇ Yeˍsuˆ awˬ hk'aw lo nyi ma hawˍ da‸ la tuˬ, Eˇvawˇdiˆ leh Suˇtuˆ hta‸ ngaˬ lawˬ hkawˉ ve yoˬ. 3 Ngaˬ geh teˇ geh kanˉ hk'a deh‸ te jaw ve chaw teˇ g'aˇ-oˬ, nawˬ htawˇ yaˇ miˇ oˇ ve nyiˇ g'aˇ hta‸ ga piˇ tuˬ ngaˬ nawˬ hta‸ lawˬ hkawˉ ve yoˬ. Awˬ lawn k'o, yawˇ huiˉ maˬ ka‸, Kaˍleˍmeˍ teˇ g'aˇ ka‸, co ti‸ ha ti‸ li‸ awˬ hk'aw lo awˬ meh bvuh‸ taˍ ve, ngaˬ geh kanˉ te ve awˬ kaˍ awˬ nu chaw teˇ hpaˍ ka‸, ngaˬ geh teˇ geh ha lehˬ ve bon hkawˇ bvuhˬ k'ai tuˬ te jaw ve yoˬ. 4 Jawˇ mawˇ Yeˍsuˆ awˬ hk'aw lo hk'aˬ htaˆ ka‸ ha lehˬ chehˇ-oˆ. Ngaˬ teˇ pawˆ k'aw‸ k'oˆ laˇ ve, ha lehˬ chehˇ-oˆ. 5 Nawˬ hui nyi ma da‸ ve chaw hpeh‸ ve yoˬ teh‸ chaw hk'a peu-eˬ shiˍ hpeh‸ tuˬ, shaˍ ti‸ taˍ-o‸. Jawˇ mawˇ Yeˍsuˆ gaˬ la paˇ neˇ ve yoˬ. 6 Aˬ hto‸ ma teˇ ceuˬ awˬ lawn hta‸ maˇ k'oˆ, taˇ dawˇ hkiˉ. Teˇ ceuˬ le le awˬ hk'aw lo nawˬ hui bon lawˬ ve, lawˬ hkawˉ ve leh chiˇ mvuh ve awˬ hk'aw lo, nawˬ hui hk'a lawˬ gaˇ ve teˇ hpaˍ G'uiˬ sha hta‸ hto piˇ-oˆ. 7 Oˇ hk'e te ve k'o, G'uiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve teˇ ceuˬ lehˬ, nawˬ hui ve nyi ma leh nawˬ hui ve dawˇ hk'aˇ teˇ hpaˍ hta‸ Yeˍsuˆ Hkri‸ awˬ hk'aw lo ha‸ shaˉ laˇ tuˬ yoˬ. 8 Awˬ viˉ awˬ nyi teˇ hpaˍ-oˬ, awˬ leh meuˇ ve tawˇ teˇ hkawˇ lehˬ chi hk'e yoˬ. Hteˇ ve awˬ ceuˬ hk'a peu-eˬ, yawˆ yan keunˍ ve awˬ ceuˬ hk'a peu-eˬ, cawˇ ve awˬ ceuˬ hk'a peu-eˬ, da‸ ve kehˬ ve awˬ ceuˬ hk'a peu-eˬ, nyi sha ve awˬ ceuˬ hk'a peu-eˬ leh, shu ve awˬ lawn da‸ ve awˬ ceuˬ g'a kaˇ ve hk'a peu-eˬ, oˇ ve teˇ hpaˍ awˬ hk'aw lo da‸ jaˇ ve awˬ ceuˬ teˇ ceuˬ ceuˬ, chiˇ mvuh keunˍ ve awˬ ceuˬ teˇ ceuˬ ceuˬ cawˬ ve k'o, awˬ lawn oˇ ve teˇ hpaˍ hta‸ dawˇ nyi-o. 9 Ngaˬ geh nawˬ hui g'a henˇ g'a ha‸ yuˬ leh, g'a kaˇ g'a mawˬ peuˬ ve awˬ ceuˬ teˇ hpaˍ hta‸ te-o. Oˇ hk'e te ve k'o, dawˇ sha piˇ shehˍ hpaˇ G'uiˬ sha lehˬ, nawˬ hui geh chehˇ tuˬ yoˬ. 10 Chi beu‸ htawˇ, nawˬ hui ngaˬ hta‸ k'aw‸ dawˇ nawˇ laˇ ve pa taw, Jawˇ mawˇ Yeˍsuˆ awˬ hk'aw lo ngaˬ ha lehˬ jaˇ ve yoˬ. Ponˬ laˬ htaˇ nawˬ hui ngaˬ hta‸ dawˇ nawˇ chehˇ ve htawˇ, ngaˬ hta‸ ga laˇ tuˬ ya‸ k'aw maˇ cawˬ sheˍ ve yoˬ. 11 Ngaˬ chi hk'e k'oˆ ve lehˬ, ngaˬ loˍ ve awˬ ceuˬ cawˬ leh k'oˆ ve teˇ ceuˬ maˇ heˆ. Ngaˬ hk'aˬ hk'e g'a hpuˇ da‸ ve htawˇ, oˇ ve awˬ hk'aw lo nyi hk'aˇ suh tuˬ ngaˬ shiˍ la peuˬ. 12 Haˍ g'awˇ jaˇ ve hta‸ maˇ k'oˆ, paw sha jaˇ ve hta‸ maˇ k'oˆ, ngaˬ hkanˍ puiˉ la peuˬ. Caˇ bvuhˆ dawˬ bvuhˆ ve maˇ k'oˆ, meu‸ ve kaˆ ve maˇ k'oˆ, paw sha ve maˇ k'oˆ, haˍ g'awˇ ve maˇ k'oˆ, chi teˇ hpaˍ hta‸ hk'aˬ hk'e te hkanˍ tuˬ, teˇ ceuˬ le le awˬ hk'aw lo ngaˬ shiˍ la peuˬ. 13 Ngaˬ hta‸ awˬ g'aˇ awˬ shaˉ pe‸ laˇ shehˍ hpaˇ hta‸ cuˇ ve awˬ hk'aw lo, hk'a peu-eˬ hta‸ ngaˬ te puiˉ te hpeh‸ ve yoˬ. 14 Ya‸ hk'aˇ, ngaˬ g'a tu‸ g'a hkanˍ ve awˬ hk'aw lo nawˬ hui awˬ chawˇ te laˇ ve lehˬ, da‸ jaˇ ve yoˬ. 15 Hpiˇliˇpiˆ chaw teˇ hpaˍ-oˬ, ha lehˬ ve bon hkawˇ hta‸ tanˬ maˍ gehˇ ve teˇ yanˇ, ngaˬ Maˍkeˍdawˇniˆ mvuhˇ miˬ awˬ hk'aw lo tawˆ k'ai htaˇ, piˇ ve leh ha‸ yuˬ ve teˇ ceuˬ awˬ hk'aw lo, nawˬ hui ceh tiˉ ngaˬ hta‸ awˬ chawˇ te laˇ ve yoˬ. Awˬ kaˍ awˬ nu Hkri‸ yaˇ awˬ moˍ teˇ moˍ ka‸ chi hk'e maˇ te ve hta‸ nawˬ hui shiˍ ve yoˬ. 16 Awˬ lawn k'o, ngaˬ Hteˇsaˍlawˇniˆ venˇ awˬ hk'aw lo chehˇ sheˍ ve teˇ yanˇ, ngaˬ loˍ ve awˬ ceuˬ teˇ hpaˍ nawˬ hui ngaˬ hta‸ teˇ pawˆ nyiˇ pawˆ feu laˇ ve yoˬ. 17 Ngaˬ chi hk'e k'oˆ ve lehˬ, la‸ shawnˍ hta‸ ngaˬ ca ve maˇ heˆ. Nawˬ hui awˬ shiˍ naw‸ maˇ ve pa taw, nawˬ hui awˬ bon g'a maˇ tuˬ ve hta‸ ceh tiˉ ngaˬ ca ve yoˬ. 18 Chi beu‸ lehˬ, ngaˬ teˇ ceuˬ le le hk'a law‸ cawˬ leh, awˬ leuˉ ka‸ cawˬ ve yoˬ. Eˇpaˍhpawˍdiˆ geh nawˬ hui feu laˇ ve la‸ shawnˍ teˇ hpaˍ hta‸ pa taw ngaˬ hk'a biˇ cawˬ ve yoˬ. La‸ shawnˍ oˇ ve teˇ hpaˍ lehˬ, awˬ shaˉ hawnˉ ve awˬ ceuˬ ka‸, G'uiˬ sha nyi hk'aˇ suh leh ha‸ yuˬ ve tanˇ tuˬ ka‸ hpeh‸ ve yoˬ. 19 Ngaˬ ve G'uiˬ sha lehˬ awˬ me‸ awˬ hponˇ uiˍ jaˇ maˇ jaˇ ve awˬ hk'aw lo, nawˬ hui hk'a loˍ ve hk'a peu-eˬ Yeˍsuˆ Hkri‸ hta‸ cuˇ leh, nawˬ hui hta‸ hk'a biˇ pe‸ laˇ tuˬ yoˬ. 20 Ngaˬ hui ve Awˬ pa G'uiˬ sha hta‸ co co taiˍ taiˍ chiˇ uiˍ chiˇ mvuh piˇ-oˆ. A menˬ. 21 Yeˍsuˆ Hkri‸ awˬ hk'aw lo chehˇ ve Hkri‸ yaˇ hk'a peu-eˬ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. Ngaˬ geh teˇ geh chehˇ ve awˬ viˉ awˬ nyi teˇ hpaˍ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 22 Hkri‸ yaˇ hk'a peu-eˬ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Leuˉ leh jawˇ mawˇ Kehˉsaˍ ve hawˉ yehˬ hk'aw chehˇ ve Hkri‸ yaˇ teˇ hpaˍ lehˬ, nawˬ hui hta‸ dawˇ nawˇ chehˇ ve yoˬ. 23 Ngaˬ hui ve Jawˇ mawˇ Yeˍsuˆ Hkri‸ ve awˬ bon awˬ shinˉ nawˬ hui ve nyi ma awˬ hk'aw lo cawˬ piˇ-oˆ.

Kawˇlawˇsehˇ 1

1 G'uiˬ sha ve a loˍ cawˇ ve hta‸ pa taw, Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ leh awˬ viˉ awˬ nyi Tiˆmoˉseˍ ngaˬ huiˉ maˬ lehˬ, Kawˇlawˇsehˇ venˇ awˬ hk'aw lo chehˇ ve Hkri‸ yaˇ hui leh, Hkri‸ awˬ hk'aw lo ka ti‸ yeˬ ve awˬ viˉ awˬ nyi teˇ hpaˍ hta‸ li‸ chi teˇ k'oˆ bvuh‸ laˇ ve yoˬ. 2 Ngaˬ hui ve Awˬ pa G'uiˬ sha ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 3 Nawˬ hui awˬ pon ngaˬ hui bon lawˬ ve teˇ yanˇ, ngaˬ hui ve Jawˇ mawˇ Yeˍsuˆ Hkri‸ ve Awˬ pa G'uiˬ sha hta‸ hk'aˬ htaˆ ka‸ chiˇ mvuh ve yoˬ. 4 Awˬ lawn k'o, nawˬ hui Yeˍsuˆ Hkri‸ hta‸ yonˍ ve awˬ lawn maˇ k'oˆ, Hkri‸ yaˇ hk'a peu-eˬ hta‸ nawˬ hui ha‸ ve awˬ lawn maˇ k'oˆ, ngaˬ hui g'a kaˇ ve hta‸ pa taw G'uiˬ sha hta‸ chiˇ mvuh ve yoˬ. 5 Chi hk'oˆ ka‸, mvuhˇ naw ma lo nawˬ hui awˬ pon ha‸ shaˉ taˍ ve dawˇ law ve teˇ ceuˬ cawˬ ve hta‸ pa taw htawˇ, ngaˬ hui G'uiˬ sha hta‸ chiˇ mvuh ve yoˬ. Dawˇ law ve chi awˬ lawn awˬ tehˬ awˬ na ve ha lehˬ ve bon hkawˇ hta‸ maˍ ve awˬ hk'aw lo nawˬ hui g'a kaˇ ve yoˬ. 6 Ha lehˬ ve bon hkawˇ oˇ ve lehˬ, nawˬ hui geh gaˬ la peuˬ ve awˬ hk'oˆ ka‸, miˬ guiˬ hk'oˆ teˇ kaˬ le le lo awˬ shiˍ naw‸ la uiˍ la chehˇ ve hk'e, nawˬ hui g'a kaˇ leh G'uiˬ sha ve awˬ bon hta‸ awˬ tehˬ awˬ na g'a shiˍ ve teˇ nyi hta‸ tanˬ leh, nawˬ hui awˬ hk'aw lo htawˇ, awˬ shiˍ naw‸ la leh uiˍ la chehˇ ve yoˬ. 7 Awˬ lawn oˇ ve hta‸ nawˬ hui g'a shiˍ ve lehˬ, ngaˬ hui geh teˇ geh kanˉ te ve, ngaˬ hui ha‸ ve Eˇpaˍhpaˍraˆ geh nawˬ hui g'a henˇ taˍ peuˬ. Yawˇ lehˬ, ngaˬ hui awˬ pon Hkri‸ ve ka ti‸ yeˬ ve kanˉ te shehˍ hpaˇ hpeh‸ leh, 8 Awˬ ha hpu awˬ hk'aw lo nawˬ hui ngaˬ hui hta‸ ha‸ ve awˬ lawn yawˇ ngaˬ hui hta‸ hto laˇ ve yoˬ. 9 Hk'e te leh, nawˬ hui yonˍ leh ha‸ ve awˬ lawn ngaˬ hui g'a kaˇ ve teˇ nyi hta‸ tanˬ leh, nawˬ hui awˬ pon ngaˬ hui hk'aˬ htaˆ ka‸ bon lawˬ chehˇ ve yoˬ. Co ha hpawˇ ve cuˇ yiˍ maˍ yiˍ leh dawˇ pawnˍ dawˇ shiˍ puiˉ ve hk'a peu-eˬ awˬ hk'aw lo, G'uiˬ sha ve a loˍ hta‸ nawˬ hui hk'a biˇ biˇ shiˍ tuˬ ngaˬ hui bon lawˬ ve yoˬ. 10 Nawˬ hui oˇ hk'e shiˍ ve k'o, Jawˇ mawˇ Yeˍsuˆ hta‸ keunˍ da‸ ve hk'e nawˬ hui te k'ai leh, teˇ ceuˬ le le awˬ hk'aw lo yawˇ nawˬ hui hta‸ nyi hk'aˇ suh tuˬ yoˬ. Chi hk'oˆ ka‸, da‸ ve kanˉ teˇ ceuˬ le le awˬ hk'aw lo nawˬ hui awˬ shiˍ naw‸ la tuˬ leh, leuˉ leh G'uiˬ sha hta‸ shiˍ maˇ la tuˬ yoˬ. 11 Yawˇ ve awˬ me‸ awˬ hponˇ kanˇ paˆ uiˍ ve pa taw, nawˬ hui ha lehˬ ha k'a ve awˬ hk'aw lo nyi ma yeˬ leh yeunˇ hkanˍ puiˉ tuˬ, nawˬ hui kanˇ paˆ hk'a biˇ cawˬ tuˬ awˬ pon htawˇ ngaˬ hui bon lawˬ ve yoˬ. 12 Hk'e te leh, awˬ g'euˆ awˬ hk'aw lo chehˇ ve Hkri‸ yaˇ teˇ hpaˍ geh teˇ geh ngaˬ hui awˬ shinˉ caˇ keunˍ ve chaw hpeh‸ la tuˬ te laˇ shehˍ hpaˇ Awˬ pa hta‸ nawˬ hui chiˇ mvuh tuˬ yoˬ. 13 Awˬ pa lehˬ, naˆ ho‸ ve kanˇ paˆ awˬ hk'aw lo ngaˬ hui hta‸ ponˬ laˇ peuˬ leh, yawˇ ha‸ ve Yaˇ hpu ve mvuhˇ miˬ awˬ hk'aw lo lo‸-e tcuh laˇ ve yoˬ. 14 Yaˇ hpu oˇ ve awˬ hk'aw lo ngaˬ hui htaiˍ hk'aw‸ ve hta‸ g'a ve yoˬ. Htaiˍ hk'aw‸ ve oˇ ve lehˬ, venˇ baˆ hpehˇ laˇ ve teˇ ceuˬ yoˬ. 15 Yawˇ lehˬ, chaw yaˇ mawˬ maˇ hpeh‸ ve G'uiˬ sha ve awˬ ho‸ awˬ han hpeh‸ leh, hpanˍ taˍ ve hk'a peu-eˬ awˬ hk'aw lo yaˇ kaoˬ hpeh‸ ve yoˬ. 16 Mvuhˇ naw ma hk'oˆ leh miˬ guiˬ hk'oˆ ve awˬ ceuˬ teˇ hpaˍ maˇ k'oˆ, mawˬ hpeh‸ ve leh mawˬ maˇ hpeh‸ ve awˬ ceuˬ teˇ hpaˍ maˇ k'oˆ, k'aw jaw teˇ hpaˍ, jawˇ mawˇ teˇ hpaˍ, uˉ peunˍ shehˍ hpaˇ teˇ hpaˍ leh kanˇ paˆ uiˍ shehˍ hpaˇ teˇ hpaˍ maˇ k'oˆ, awˬ ceuˬ hk'a peu-eˬ yawˇ awˬ hk'aw lo te hpanˍ taˍ ve yoˬ. Awˬ ceuˬ hk'a peu-eˬ yawˇ hta‸ pa taw leh yawˇ awˬ pon te hpanˍ taˍ ve yoˬ. 17 Teˇ ceuˬ ka‸ maˇ cawˬ sheˍ htaˇ ka‸, yawˇ cawˬ taˍ ve yoˬ. Awˬ ceuˬ hk'a peu-eˬ yawˇ awˬ hk'aw lo yeˬ chehˇ ve yoˬ. 18 Yawˇ lehˬ, Hkri‸ yaˇ awˬ moˍ ve oˉ k'oˍ hpeh‸ leh, Hkri‸ yaˇ awˬ moˍ lehˬ, yawˇ ve awˬ to hpeh‸ ve yoˬ. Yawˇ lehˬ, awˬ hkuiˉ puiˍ hpeh‸ leh hk'a peu-eˬ awˬ hk'aw lo yawˇ awˉ lawˉ peuˇ ve teˇ g'aˇ hpeh‸ tuˬ, suh kuiˬ lo awˉ lawˉ k'aw‸ te‸ tu la ve teˇ g'aˇ hpeh‸ ve yoˬ. 19 Awˬ lawn k'o, yawˇ awˬ hk'aw lo biˇ ve awˬ ceuˬ hk'a peu-eˬ cawˬ tuˬ Awˬ pa nyi hk'aˇ suh leh, 20 la‸ ka hk'oˆ lo sheˆ ve yawˇ ve awˬ suhˍ hta‸ pa taw, miˬ guiˬ hk'oˆ ve awˬ ceuˬ teˇ hpaˍ maˇ k'oˆ, mvuhˇ naw ma hk'oˆ ve awˬ ceuˬ teˇ hpaˍ maˇ k'oˆ, awˬ ceuˬ hk'a peu-eˬ G'uiˬ sha yawˇ awˬ to hta‸ cawˇ da‸ hui da‸ hpeh‸ tuˬ te ve yoˬ. 21 Ponˬ laˬ htaˇ nawˬ hui lehˬ, yawˇ hta‸ hpaˆ da‸ leh haiˬ ve kanˉ hta‸ te ve awˬ hk'aw lo nyi ma hpawˇ yawˇ ve canˇ paˍ hpeh‸ ve yoˬ. 22 Ya‸ hk'aˇ chi beu‸ lehˬ, yawˇ awˬ suhˍ awˬ shaˍ awˬ to hkanˍ suh ve pa taw, yawˇ nawˬ hui hta‸ k'aw‸ cawˇ da‸ hawˍ da‸ piˇ lawˬ peuˬ. Yawˇ chi hk'e te ve lehˬ, nawˬ hui da‸ kehˬ ve chaw, venˇ baˆ taˍ kuiˬ maˇ cawˬ ve chaw leh, shu k'oˆ kuiˬ yaw kuiˬ maˇ cawˬ ve chaw hpeh‸ ve awˬ hk'aw lo, G'uiˬ sha hta‸ chiˇ a‸ piˇ tuˬ awˬ pon yawˇ te ve yoˬ. 23 Nawˬ hui g'a kaˇ taˍ peuˬ ve ha lehˬ ve bon hkawˇ hta‸ caˉ da‸ ve dawˇ law ve teˇ ceuˬ awˬ hk'aw lo maˇ jiˆ leh, yonˍ ve teˇ ceuˬ hta‸ awˬ hkuiˉ puiˍ taˍ leh yeˬ chaweh vawˆ taˍ ve k'o, yawˇ chi hk'e chiˇ a‸ piˇ hpeh‸ tuˬ yoˬ. Mvuhˇ naw ma awˬ hawˉ lo cawˬ taˍ ve, hk'a hpanˍ taˍ ve te‸ chehˇ ve awˬ ceuˬ hk'a peu-eˬ hta‸ ha lehˬ ve bon hkawˇ oˇ ve shu maˍ piˇ taˍ peuˬ. Ngaˬ Pawˇlu‸ htawˇ ha lehˬ ve bon hkawˇ oˇ ve hta‸ maˍ piˇ shehˍ hpaˇ hpeh‸ la ve yoˬ. 24 Chi beu‸ ngaˬ nawˬ hui awˬ pon g'a tu‸ g'a hkanˍ ve awˬ hk'aw lo ngaˬ ha lehˬ chehˇ ve yoˬ. Hkri‸ ve tu‸ ve hkanˍ ve hk'a cawˬ taˍ sheˍ ve teˇ hpaˍ hta‸ yawˇ ve awˬ to awˬ pon ngaˬ ve awˬ to awˬ hk'aw lo biˇ la tuˬ ngaˬ te chehˇ ve yoˬ. Yawˇ ve awˬ to teh‸ k'oˆ ve lehˬ, Hkri‸ yaˇ awˬ moˍ hta‸ k'oˆ ve yoˬ. 25 G'uiˬ sha ve tawˇ hkawˇ hk'a biˇ shiˍ piˇ hpeh‸ tuˬ, G'uiˬ sha ngaˬ hta‸ leuˆ yuˬ laˇ ve hk'e, Hkri‸ yaˇ awˬ moˍ awˬ pon ngaˬ kanˉ te shehˍ hpaˇ hpeh‸ ve yoˬ. Kanˉ chi G'uiˬ sha ngaˬ hta‸ pe‸ laˇ ve lehˬ, nawˬ hui awˬ pon yoˬ. 26 G'uiˬ sha ve tawˇ hkawˇ lehˬ, aˬ sho-eˬ htaˇ teˇ co peuˬ teˇ co faˉ taˍ leh tcuhˉ kuiˬ naˉ jaˇ ve tawˇ hkawˇ hpeh‸ ve htawˇ, chi beu‸ yawˇ ve Hkri‸ yaˇ teˇ hpaˍ hta‸ yawˇ hpeu‸ maˍ piˇ taˍ peuˬ. 27 Buiˇ shaˆ aˉ naˆ chaw hui awˬ pon tcuhˉ kuiˬ naˉ jaˇ ve tawˇ hkawˇ chi, awˬ me‸ awˬ hponˇ hk'aˬ ma uiˍ jaˇ maˇ jaˇ ve awˬ lawn, Hkri‸ yaˇ teˇ hpaˍ hta‸ shiˍ piˇ tuˬ, G'uiˬ sha yawˇ heuˆ gaˇ ve yoˬ. Tcuhˉ kuiˬ naˉ ve tawˇ hkawˇ oˇ ve lehˬ, Hkri‸ nawˬ hui awˬ hk'aw lo chehˇ taˍ ve pa taw, nawˬ hui awˬ me‸ awˬ hponˇ g'a tuˬ ve hta‸ dawˇ law chehˇ ve teˇ ceuˬ yoˬ. 28 Yawˇ awˬ lawn ngaˬ hui bon maˍ ve yoˬ. Hk'aˬ hk'e te leh, chaw teˇ g'aˇ le le Hkri‸ awˬ hk'aw lo uiˍ la peuˬ ve chaw hpeh‸ leh, ngaˬ hui yawˇ hui hta‸ G'uiˬ sha ve la‸ sheh hk'aw chiˇ a‸ piˇ hpeh‸ tuˬ, ngaˬ hui lehˬ chaw teˇ g'aˇ le le hta‸ shaˍ ti‸ piˇ leh, cuˇ yiˍ hk'a peu-eˬ hta‸ yehˇ leh, chaw teˇ g'aˇ le le hta‸ maˍ piˇ ve yoˬ. 29 Oˇ ve awˬ pon ngaˬ g'aˇ hte‸ te ve yoˬ. Yawˇ ngaˬ hta‸ kanˇ paˆ pe‸ laˇ leh ngaˬ awˬ hk'aw lo g'aˇ hte‸ te chehˇ ve hk'e, ngaˬ htawˇ coˇ caˇ leh te ve yoˬ.

Kawˇlawˇsehˇ 2

1 Awˬ lawn k'o, nawˬ hui awˬ pon maˇ k'oˆ, Lawˍdiˍkiˆ venˇ yaˇ teˇ hpaˍ awˬ pon maˇ k'oˆ, ngaˬ ve mehˆ hpfuhˇ hta‸ maˇ mawˬ jaw ve chaw hk'a peu-eˬ awˬ pon maˇ k'oˆ, ngaˬ hk'aˬ ma coˇ caˇ ve hta‸ nawˬ hui shiˍ tuˬ ngaˬ heuˆ gaˇ ve yoˬ. 2 Aˬ hto‸ ma pa taw le teh‸ k'oˆ ve k'o, Hkri‸ hta‸ caˇ da‸ ve G'uiˬ sha ve tcuhˉ kuiˬ naˉ jaˇ ve awˬ lawn hta‸ yawˇ hui hk'a deh‸ na g'a leh shiˍ puiˉ ve cuˇ yiˍ hk'a biˇ cawˬ tuˬ maˇ k'oˆ, ha‸ pehnˇ ve cawˬ leh teˇ g'aˇ leh teˇ g'aˇ hk'a deh‸ caˉ da‸ ve awˬ hk'aw lo yawˇ hui nyi ma awˬ g'aˇ g'a hpeh‸ tuˬ awˬ pon maˇ k'oˆ, ngaˬ te ve yoˬ. 3 Awˬ hpfuhˇ hk'aˆ ve cuˇ yiˍ maˍ yiˍ leh shiˍ puiˉ ve awˬ ceuˬ hk'a peu-eˬ Hkri‸ awˬ hk'aw lo faˉ taˍ ve yoˬ. 4 A shu teˇ g'aˇ maˇ k'oˆ, na sha ve tawˇ hkawˇ hta‸ yehˇ leh nawˬ hui hta‸ maˇ g'a heˍ yuˬ beˬ yuˬ tuˬ, ngaˬ chi hk'e k'oˆ laˇ ve yoˬ. 5 Awˬ lawn k'o, ngaˬ awˬ to nawˬ hui geh maˇ chehˇ ve htawˇ, ngaˬ ve nyi ma nawˬ hui geh cawˬ leh, awˬ liˇ awˬ hk'aˇ cawˬ ve hk'e nawˬ hui hk'a deh‸ te chehˇ ve hta‸ maˇ k'oˆ, Hkri‸ awˬ hk'aw lo nawˬ hui yonˍ yeˬ jaˇ ve teˇ ceuˬ hta‸ maˇ k'oˆ, ngaˬ g'a mawˬ ve pa taw ha lehˬ ve yoˬ. 6 Hk'e te leh, Jawˇ mawˇ Yeˍsuˆ Hkri‸ hta‸ nawˬ hui ha‸ yuˬ peuˬ ve hk'e, yawˇ awˬ hk'aw lo k'ai chehˇ-oˆ. 7 Yawˇ awˬ hk'aw lo nawˬ hui awˬ geu g'a tcuhˉ naw‸ taˍ leh g'a uiˍ la yeˬ la chehˇ ve yoˬ. Nawˬ hui g'a henˇ taˍ ve hk'e, yonˍ ve teˇ ceuˬ awˬ hk'aw lo nawˬ hui yeˬ chaweh chehˇ taˍ leh, oˇ ve hta‸ pa taw chiˇ mvuh ve teˇ ceuˬ g'aˇ hte‸ te chehˇ-oˆ. 8 Chaw teˇ g'aˇ ka‸ cuˇ yiˍ maˍ yiˍ tawˇ hkawˇ leh tcuhˉ kuiˬ maˇ cawˬ ve heˍ ve tawˇ hkawˇ hta‸ yehˇ leh nawˬ hui hta‸ maˇ g'a hpeh yuˬ veu tuˬ, shaˍ ti‸ taˍ-o‸. Tawˇ hkawˇ oˇ ve teˇ hpaˍ Hkri‸ hta‸ caˉ da‸ ve maˇ heˆ. Chaw yaˇ teˇ caˉ peuˬ teˇ caˉ piˇ taˍ ve tawˇ hkawˇ leh, miˬ guiˬ hta‸ caˉ da‸ ve dawˇ hk'aˇ ceh hpeh‸ ve yoˬ. 9 Awˬ lawn k'o, G'uiˬ sha ve biˇ ve awˬ ceuˬ Hkri‸ ve awˬ to awˬ hk'aw lo hk'a biˇ cawˬ taˍ ve yoˬ. 10 Yawˇ awˬ hk'aw lo nawˬ hui biˇ la peuˬ. Yawˇ lehˬ, uˉ peunˍ shehˍ hpaˇ leh kanˇ paˆ cawˬ shehˍ hpaˇ hk'a peu-eˬ ve oˉ k'oˍ hpeh‸ ve yoˬ. 11 Yawˇ awˬ hk'aw lo nawˬ hui awˬ guiˬ meuˇ shoˍ ve hta‸ g'a hkanˍ peuˬ. Awˬ guiˬ meuˇ shoˍ ve oˇ ve lehˬ, la‸ sheh te ve teˇ ceuˬ hpeh‸ ve maˇ heˆ. Hkri‸ ve awˬ guiˬ meuˇ shoˍ ve teh‸ k'oˆ ve, awˬ suhˍ awˬ shaˍ a loˍ hta‸ baˬ taˉ ve teˇ ceuˬ hpeh‸ ve yoˬ. 12 Nawˬ hui baˆtiˆsaˬ hkanˍ ve teˇ yanˇ, yawˇ geh teˇ geh tuˍ taˍ ve yoˬ. Yawˇ hta‸ suh kuiˬ lo k'aw‸ te‸ tu la piˇ shehˍ hpaˇ G'uiˬ sha te taˍ ve hta‸ nawˬ hui yonˍ ve pa taw, baˆtiˆsaˬ hkanˍ ve oˇ ve awˬ hk'aw lo yawˇ geh teˇ geh nawˬ hui k'aw‸ te‸ tu la ve yoˬ. 13 Nawˬ hui lehˬ, te ya‸ ve teˇ hpaˍ awˬ hk'aw lo maˇ k'oˆ, awˬ suhˍ awˬ shaˍ awˬ guiˬ meuˇ maˇ shoˍ ve awˬ hk'aw lo maˇ k'oˆ, suh taˍ ve chaw teˇ hpaˍ hpeh‸ ve htawˇ, yawˇ lehˬ nawˬ hui hta‸ Hkri‸ geh teˇ geh k'aw‸ te‸ tu la piˇ leh, ngaˬ hui te ya‸ ve hk'a peu-eˬ hta‸ hpehˇ hk'a laˇ peuˬ. 14 Awˬ liˇ tawˇ hkawˇ hta‸ cuˇ leh ngaˬ hui awˬ hk'oˆ venˇ baˆ taˍ ve la‸ ma‸ oˇ ve teˇ maˬ hta‸ yawˇ hk'aˇ pehˍ ve yoˬ. Oˇ ve hta‸ la‸ ka hk'oˆ lo hta‸ keu ve awˬ hk'aw lo yawˇ yuˬ baˬ ve yoˬ. 15 Uˉ peunˍ ve awˬ ceuˬ leh kanˇ paˆ cawˬ ve awˬ ceuˬ teˇ hpaˍ ve la‸ caˉ hta‸ yawˇ yuˬ baˬ sheˬ leh, oˇ ve nyiˇ ceuˬ hta‸ shu g'a mawˬ g'a shiˍ tuˬ hk'a tawˍ lehˆ hpeu‸ tawˆ la ve yoˬ. La‸ ka hta‸ pa taw awˬ ceuˬ oˇ ve teˇ hpaˍ hta‸ yawˇ g'aˇ ve yoˬ. 16 Hk'e te leh, caˇ tuˬ dawˬ tuˬ awˬ lawn maˇ k'oˆ, pawehˇ te ve awˬ lawn maˇ k'oˆ, ha pa cheˆ ve awˬ nyi awˬ lawn maˇ k'oˆ, shinˉ nyi awˬ lawn maˇ k'oˆ, shu nawˬ hui hta‸ venˇ baˆ taˍ ve hkawˇ hta‸ taˇ na. 17 Awˬ ceuˬ oˇ ve teˇ hpaˍ lehˬ, gaˬ la tuˬ ve awˬ ceuˬ teˇ hpaˍ ve aˉ g'uiˬ ha ceh tiˉ hpeh‸ ve yoˬ. Ya‸ hk'aˇ, awˬ tehˬ awˬ na ve awˬ ceuˬ lehˬ, Hkri‸ awˬ hk'aw lo cawˬ ve yoˬ. 18 Chaw teˇ hpaˍ hpaˍ k'oˆ ve, A shu yawˇ awˬ to hta‸ nehˬ lehˍ g'a taˍ leh, mvuhˇ naw ma tcuh yaˇ hui hta‸ oˉ k'oˍ g'a pui ve yoˬ teh‸ k'oˆ ve yoˬ. Yawˇ hui lehˬ, awˬ suhˍ awˬ shaˍ hpawˇ ceh tiˉ dawˇ nyi puiˉ ve pa taw, yawˇ hui te ve teˇ hpaˍ te‸ chiˉ awˬ bon maˇ cawˬ ve ka‸ nyi ma uiˍ chaweh te ve yoˬ. Awˬ ha awˬ hk'aw lo yawˇ hui g'a mawˬ ve awˬ ceuˬ teˇ hpaˍ hta‸ ceh tiˉ g'aˇ va ve yoˬ. Chi hk'e ve chaw teˇ g'aˇ ka‸ nawˬ hui ve la‸ shawnˍ hta‸ maˇ g'a lu yuˬ tuˬ shaˍ ti‸ taˍ-o‸. 19 Yawˇ hui lehˬ, oˉ k'oˍ hta‸ hk'a deh‸ maˇ caˉ da‸. Oˉ k'oˍ oˇ ve hta‸ pa taw awˬ to teˇ to hk'a peu-eˬ uiˍ la chehˇ leh, uiˍ la ve oˇ ve lehˬ G'uiˬ sha geh lo laˬ ve yoˬ. Awˬ to lehˬ, awˬ tcuhˉ awˬ caˆ teˇ hpaˍ hta‸ pa taw caˉ da‸ taˍ leh, awˬ g'aˇ biˇ la chehˇ ve yoˬ. 20 Nawˬ hui lehˬ, miˬ guiˬ hta‸ caˉ da‸ ve awˬ ceuˬ teˇ hpaˍ Hkri‸ geh teˇ geh suh taˍ peuˬ ve k'o, aˬ hto‸ ma te miˬ guiˬ hta‸ caˉ da‸ ve chaw hk'e nawˬ hui te chehˇ sheˍ ve le. 21 Taˇ ca vawˆ, taˇ ca leh‸, taˇ ca htawˇ teh‸ k'oˆ ve awˬ liˇ awˬ hk'aˇ teˇ hpaˍ hta‸ aˬ hto‸ ma pa taw nawˬ hui te chehˇ sheˍ ve le. 22 Awˬ ceuˬ oˇ ve teˇ hpaˍ hta‸ te ve teˇ yanˇ, luˬ k'ai sheˆ k'ai ve awˬ ceuˬ ceh tiˉ hpeh‸ ve yoˬ. Awˬ liˇ awˬ hk'aˇ oˇ ve teˇ hpaˍ lehˬ, chaw yaˇ hui teh taˍ leh maˍ piˇ ve awˬ liˇ awˬ hk'aˇ teˇ hpaˍ hpeh‸ ve yoˬ. 23 A shu yawˇ hk'aˇ yawˇ dawˇ tawˆ leh oˉ k'oˍ pui ve teˇ ceuˬ maˇ k'oˆ, nyi ma taˍ nehˬ ve teˇ ceuˬ maˇ k'oˆ, awˬ to hta‸ fawˉ mehˍ ve teˇ ceuˬ maˇ k'oˆ, chi teˇ hpaˍ cuˇ yiˍ cawˬ ve hk'e hpeh‸ ve htawˇ, awˬ suhˍ awˬ shaˍ sheˉ lai ve teˇ hpaˍ hta‸ g'aˇ tuˬ te‸ chiˉ awˬ bon maˇ cawˬ ve yoˬ.

Kawˇlawˇsehˇ 3

1 Hk'e te leh, nawˬ hui Hkri‸ geh teˇ geh k'aw‸ te‸ tu la peuˬ ve k'o, mvuhˇ naw ma hk'oˆ lo cawˬ ve awˬ ceuˬ teˇ hpaˍ hta‸ ca-o. Hkri‸ lehˬ, oˇ kaˬ lo G'uiˬ sha ve la‸ sha paˉ mui chehˇ taˍ ve yoˬ. 2 Miˬ guiˬ hk'oˆ lo cawˬ ve awˬ ceuˬ teˇ hpaˍ hta‸ dawˇ tcuhˉ taˍ ve taˇ te. Mvuhˇ naw ma hk'oˆ lo cawˬ ve awˬ ceuˬ teˇ hpaˍ hta‸ dawˇ tcuhˉ taˍ-o‸. 3 Awˬ lawn k'o, nawˬ hui suh peuˬ ve chaw hpeh‸ leh, nawˬ hui ve co ha te‸ ve teˇ ceuˬ lehˬ, Hkri‸ geh teˇ geh G'uiˬ sha awˬ hk'aw lo faˉ taˍ ve yoˬ. 4 Ngaˬ hui ve co ha te‸ ve awˬ ceuˬ lehˬ, Hkri‸ hpeh‸ ve yoˬ. Yawˇ k'aw‸ tawˆ la ve teˇ yanˇ, nawˬ hui htawˇ yawˇ geh teˇ geh awˬ me‸ awˬ hponˇ awˬ hk'aw lo tawˆ la tuˬ yoˬ. 5 Nawˬ hui awˬ hk'aw lo cawˬ ve, miˬ guiˬ hta‸ caˉ da‸ ve awˬ ceuˬ teˇ hpaˍ hta‸ tiˇ pehˍ-o‸. Awˬ ceuˬ oˇ ve teˇ hpaˍ lehˬ, haˉ chawˇ haˉ paˆ te ve, cha‸ chiˆ ve hta‸ te ve, peh‸ ve tzuhˆ ve hta‸ te ve, haiˬ ve hta‸ te ve leh, shu mawˇ shu jeˬ hta‸ sheˉ lai ve, awˬ ceuˬ chi teˇ hpaˍ hpeh‸ ve yoˬ. Shu mawˇ shu jeˬ hta‸ sheˉ lai ve teˇ ceuˬ lehˬ, shaˉ ho‸ hta‸ oˉ k'oˍ pui ve teˇ ceuˬ hpeh‸ ve yoˬ. 6 Awˬ ceuˬ oˇ ve teˇ hpaˍ hta‸ pa taw G'uiˬ sha nyi ma zuhˆ ve teˇ ceuˬ gaˬ la chehˇ ve yoˬ. 7 Nawˬ hui htawˇ ponˬ laˬ htaˇ awˬ ceuˬ oˇ ve teˇ hpaˍ awˬ hk'aˇ suh k'ai leh, oˇ ve teˇ hpaˍ hta‸ te jaw ve yoˬ. 8 Ya‸ hk'aˇ, chi beu‸ lehˬ nyi ma zuhˆ ve, beu‸ jaˇ ve, shu hta‸ naˬ tuˬ te gaˇ ve, shu hta‸ hk'aiˉ ve leh, cha‸ chiˆ ve tawˇ hta‸ yaw ve, awˬ ceuˬ chi teˇ hpaˍ hk'a peu-eˬ hta‸ baˬ taˉ-oˆ. 9 Teˇ g'aˇ leh teˇ g'aˇ taˇ heˍ da‸. Awˬ lawn k'o, nawˬ hui lehˬ chaw awˬ piˍ hta‸ ka‸, chaw awˬ piˍ ve awˬ liˇ awˬ hk'aˇ teˇ hpaˍ hta‸ ka‸ k'ehˆ baˬ peuˬ leh, chaw awˬ suhˉ hta‸ veu‸ deh taˍ peuˬ. 10 Chaw awˬ suhˉ oˇ ve lehˬ, yawˇ hta‸ te hpanˍ shehˍ hpaˇ ve awˬ ho‸ awˬ han hk'a shuˍ shuˍ, shiˍ puiˉ ve teˇ ceuˬ lehˬ, awˬ suhˉ k'aw‸ hpeh‸ la chehˇ ve yoˬ. 11 Chaw awˬ suhˉ hpeh‸ ve awˬ hk'aw lo, Heˍlaˍsaˆ chaw leh Yuˇda‸ chaw maˇ cawˬ. Awˬ guiˬ meuˇ shoˍ ve chaw leh awˬ guiˬ meuˇ maˇ shoˍ ve chaw maˇ cawˬ. Chaw hteunˍ leh Saˍkuˍsiˆ chaw maˇ cawˬ. Vuiˬ taˍ ve awˬ ceˬ leh ponˬ ve chaw maˇ cawˬ. Hkri‸ lehˬ hk'a peu-eˬ hpeh‸ leh, hk'a peu-eˬ awˬ hk'aw lo yawˇ chehˇ ve yoˬ. 12 Chi hta‸ pa taw, G'uiˬ sha nawˬ hui hta‸ leuˆ yuˬ taˍ leh, nawˬ hui da‸ kehˬ ve leh yawˇ ha‸ ve chaw hpeh‸ ve hk'e, chi teˇ hpaˍ hta‸ veu‸ deh-o. Ha k'aˉ puiˉ ve, shu awˬ pon da‸ ve hta‸ te ve, nyi ma taˍ nehˬ ve, nyi ma nuˇ nuˇ nehˬ nehˬ ve leh, nyi ma dawˇ zuhˬ gaˇ zuhˬ ve, chi teˇ hpaˍ hta‸ veu‸ deh-o. 13 Teˇ g'aˇ leh teˇ g'aˇ yeunˇ hkanˍ da‸-o‸. Teˇ g'aˇ leh teˇ g'aˇ venˇ baˆ taˍ da‸ kuiˬ cawˬ k'o, venˇ baˆ hpehˇ da‸-o‸. Jawˇ mawˇ G'uiˬ sha nawˬ hui ve venˇ baˆ hta‸ hpehˇ hk'a peuˬ ve hk'e, nawˬ hui htawˇ venˇ baˆ hpehˇ da‸-o‸. 14 Oˇ ve hk'a peu-eˬ awˬ hk'oˆ ha‸ pehnˇ ve teˇ ceuˬ hta‸ veu‸ deh taˍ-o‸. Ha‸ pehnˇ ve lehˬ, hk'a peu-eˬ biˇ la tuˬ hpeh tsuh‸ taˍ ve yoˬ. 15 Hkri‸ ve dawˇ sha gaˇ sha ve teˇ ceuˬ nawˬ hui ve nyi ma awˬ hk'aw lo uˉ peunˍ piˇ lawˬ-o‸. Chi hk'e hpeh‸ la tuˬ ve awˬ pon, awˬ to teˇ to tiˉ awˬ hk'aw lo G'uiˬ sha nawˬ hui hta‸ kuˬ yuˬ taˍ ve yoˬ. Chi hk'oˆ ka‸, yawˇ ve bon hta‸ dawˇ nawˇ-oˆ. 16 Cuˇ yiˍ maˍ yiˍ hk'a biˇ cawˬ ve Hkri‸ ve tawˇ hkawˇ lehˬ, nawˬ hui awˬ hk'aw lo hk'a biˇ cawˬ piˇ-oˆ. Chiˇ mvuh ve tawˇ hkawˇ, k'a muiˬ hkawˇ leh co ha hpawˇ hta‸ caˉ da‸ ve k'a muiˬ hkawˇ teˇ hpaˍ hta‸ cuˇ leh, nawˬ hui teˇ g'aˇ leh teˇ g'aˇ hta‸ maˍ da‸ leh shaˍ ti‸ piˇ da‸-o‸. Nawˬ hui ve nyi ma awˬ hk'aw lo G'uiˬ sha hta‸ k'a muiˬ chiˇ mvuh chehˇ-oˆ. 17 Nawˬ hui hk'a te ve hk'a peu-eˬ awˬ hk'aw lo, tawˇ yaw ve maˇ k'oˆ, kanˉ te ve maˇ k'oˆ, Jawˇ mawˇ Yeˍsuˆ ve awˬ meh awˬ hk'aw lo hk'a peu-eˬ hta‸ te-o. Yawˇ hta‸ cuˇ leh Awˬ pa G'uiˬ sha hta‸ chiˇ mvuh chehˇ-oˆ. 18 Awˬ miˇ ma teˇ hpaˍ-oˬ, Jawˇ mawˇ Yeˍsuˆ hta‸ keunˍ da‸ ve hk'e, a shu yawˇ ve awˬ hpawˇ awˬ hawˉ lo chehˇ-oˆ. 19 Awˬ hpawˇ teˇ hpaˍ-oˬ, a shu yawˇ ve awˬ miˇ ma hta‸ ha‸ leh, yawˇ hui hta‸ hehnˇ chaweh taˇ te. 20 Yaˇ ehˉ teˇ hpaˍ-oˬ, teˇ ceuˬ le le awˬ hk'aw lo awˬ pa awˬ e ve tawˇ hkawˇ hta‸ na yuˬ-o‸. Awˬ lawn k'o, nawˬ hui chi hk'e te ve hta‸ Jawˇ mawˇ Yeˍsuˆ nyi ma cawˇ ve yoˬ. 21 Awˬ pa teˇ hpaˍ-oˬ, nawˬ hui ve yaˇ teˇ hpaˍ nyi ma maˇ g'a luˬ tuˬ, yawˇ hui nyi ma zuhˆ tuˬ taˇ te. 22 Vuiˬ taˍ ve awˬ ceˬ teˇ hpaˍ -oˬ, teˇ ceuˬ le le awˬ hk'aw lo miˬ guiˬ hk'oˆ chehˇ ve nawˬ hui ve awˬ shehˍ hpaˇ ve tawˇ hkawˇ hta‸ na yuˬ-o‸. Shu g'a mawˬ kuiˬ ceh te ve leh chaw yaˇ nyi hk'aˇ suh tuˬ ceh te ve taˇ hpeh‸ piˇ. Nyi ma taˍ hk'aˇ teˇ hk'aˇ tiˉ te leh, Jawˇ mawˇ Yeˍsuˆ hta‸ kawˆ ve awˬ hk'aw lo na yuˬ-o‸. 23 Nawˬ hui kanˉ hk'aˬ hk'e ve teˇ ceuˬ te ve maˇ k'oˆ, chaw yaˇ awˬ pon te ve maˇ heˆ, Jawˇ mawˇ Yeˍsuˆ awˬ pon te ve hk'e nyi ma pfuhˇ leh g'aˇ hte‸ te-o. 24 Nawˬ hui g'a tuˬ ve awˬ bon teˇ ceuˬ lehˬ, Jawˇ mawˇ Yeˍsuˆ pe‸ laˇ tuˬ ve awˬ shinˉ hpeh‸ ve yoˬ teh‸ shiˍ chehˇ-oˆ. Awˬ lawn k'o, nawˬ hui Jawˇ mawˇ Hkri‸ awˬ pon kanˉ te chehˇ ve yoˬ. 25 Maˇ hteˇ maˇ cawˇ ve hta‸ te ve chaw teˇ g'aˇ lehˬ, yawˇ te ve maˇ hteˇ maˇ cawˇ ve oˇ ve teˇ ceuˬ hta‸ g'a k'aw‸ hkanˍ tuˬ yoˬ. G'uiˬ sha lehˬ, chaw yaˇ ve mehˆ hpfuhˇ hta‸ maˇ nyi.

Kawˇlawˇsehˇ 4

1 Awˬ shehˍ hpaˇ teˇ hpaˍ-oˬ, nawˬ hui htawˇ mvuhˇ naw ma hk'oˆ lo Awˬ shehˍ hpaˇ cawˬ ve hta‸ shiˍ chehˇ ve awˬ hk'aw lo, nawˬ hui ve awˬ ceˬ teˇ hpaˍ hta‸ hteˇ ve cawˇ ve leh keunˍ da‸ cawˇ da‸ ve hk'e ceh te piˇ-oˆ. 2 Hk'aˬ htaˆ ka‸ bon lawˬ chehˇ-oˆ. Bon lawˬ ve awˬ hk'aw lo shaw chehˇ leh, chiˇ mvuh chehˇ-oˆ. 3 Hkri‸ ve tcuhˉ kuiˬ naˉ ve tawˇ hkawˇ ngaˬ hui g'a k'aoˍ maˍ piˇ tuˬ ve, G'uiˬ sha ngaˬ hui pon yehˬ miˉ hpaw laˇ tuˬ, ngaˬ hui awˬ pon htawˇ bon lawˬ laˇ-oˆ. Tcuhˉ kuiˬ naˉ ve tawˇ hkawˇ oˇ ve awˬ pon ngaˬ htawnˍ hk'aw lo g'a chehˇ taˍ ve yoˬ. 4 Tawˇ hkawˇ oˇ ve hta‸ ngaˬ k'oˆ keunˍ ve hk'e ngaˬ hk'a tawˍ lehˆ k'oˆ maˍ piˇ hpeh‸ tuˬ ve awˬ pon ka‸ bon lawˬ laˇ-oˆ. 5 Hkri‸ yaˇ awˬ moˍ awˬ hk'aw lo maˇ chehˇ ve chaw teˇ hpaˍ mehˆ g'uˇ suhˍ, cuˇ yiˍ cawˬ ve awˬ hk'aw lo hk'a deh‸ dawˇ nyi leh te-o. Awˬ yanˇ hta‸ vuiˬ hk'aw‸ leh hk'a deh‸ yehˇ-oˆ. 6 Chaw teˇ g'aˇ le le hta‸ nawˬ hui hk'aˬ hk'e g'a yaw hk'aw‸ cawˇ ve hta‸ shiˍ tuˬ, nawˬ hui tawˇ yaw ve teˇ hpaˍ lehˬ, hk'aˬ htaˆ ka‸ shu awˬ pon cawˇ da‸ leh na sha ve tawˇ hkawˇ hta‸ yaw leh, aˉ leh‸ hkaw‸ taˍ ve hk'e hpeh‸ piˇ-oˆ. 7 Ngaˬ ha‸ ve awˬ viˉ awˬ nyi Tuˇhkiˆ lehˬ, ngaˬ ve awˬ lawn hk'a peu-eˬ nawˬ hui hta‸ hto maˍ laˇ tuˬ yoˬ. Yawˇ lehˬ, ka ti‸ yeˬ ve kanˉ te shehˍ hpaˇ hpeh‸ leh, ngaˬ geh teˇ geh Jawˇ mawˇ Yeˍsuˆ ve kanˉ hta‸ te ve chaw teˇ g'aˇ hpeh‸ ve yoˬ. 8 Chi hta‸ pa taw ngaˬ hui hk'aˬ hk'e hpeh‸ chehˇ ve hta‸ nawˬ hui shiˍ leh, yawˇ nawˬ hui ve nyi ma hta‸ awˬ g'aˇ cawˬ la piˇ tuˬ, ngaˬ yawˇ hta‸ nawˬ hui geh peu laˇ ve yoˬ. 9 Chi hk'oˆ ka‸, nawˬ hui chehˇ kuiˬ lo laˬ ve, ka ti‸ yeˬ leh ngaˬ hui ha‸ ve awˬ viˉ awˬ nyi Awˍneˍsiˍmuˆ hta‸ htawˇ, yawˇ geh teˇ geh peu laˇ ve yoˬ. Yawˇ huiˉ maˬ lehˬ, choˬ kaˬ lo hk'a hpeh‸ la ve awˬ lawn hk'a peu-eˬ nawˬ hui hta‸ k'aoˍ maˍ laˇ tuˬ yoˬ. 10 Ngaˬ geh teˇ geh htawnˍ hk'aw g'a chehˇ ve Aˍriˍtaˍhkuˆ lehˬ, nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ. Baˍnaˍbaˆ ve awˬ viˉ awˬ nyi Maˍkuˆ htawˇ, nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ. (Maˍkuˆ awˬ lawn ngaˬ nawˬ hui hta‸ tawˇ shanˍ feu laˇ peuˬ. Yawˇ nawˬ hui geh gaˬ la ve k'o, yawˇ hta‸ ha‸ yuˬ-o‸.) 11 Yuˇtuˆ meh ve Yeˍsuˆ teˇ g'aˇ htawˇ nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ. Yuˇda‸ chaw hui awˬ hk'aw lo ngaˬ geh teˇ geh G'uiˬ sha ve mvuhˇ miˬ awˬ pon kanˉ te chehˇ ve lehˬ, chaw chi teˇ hpaˍ ceh tiˉ cawˬ ve yoˬ. Yawˇ hui hta‸ pa taw ngaˬ maˇ maˇ dawˇ sha la ve yoˬ. 12 Nawˬ hui ve awˬ moˍ awˬ hk'aw lo chehˇ leh, Yeˍsuˆ Hkri‸ ve awˬ ceˬ hpeh‸ ve Eˇpaˍhpaˍraˆ htawˇ, nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ. Nawˬ hui lehˬ, G'uiˬ sha ve a loˍ hk'a peu-eˬ awˬ hk'aw lo uiˍ la leh hk'a deh‸ yeˬ chehˇ hpeh‸ tuˬ, yawˇ nawˬ hui awˬ pon hk'aˬ htaˆ ka‸ bon lawˬ chehˇ ve yoˬ. 13 Awˬ lawn k'o, yawˇ lehˬ, nawˬ hui awˬ pon maˇ k'oˆ, Lawˍdiˍkiˆ venˇ leh Heˍraˍpawˇliˆ venˇ awˬ hk'aw lo chehˇ ve chaw teˇ hpaˍ awˬ pon maˇ k'oˆ, hk'aˬ ma coˇ caˇ leh te ve awˬ lawn ngaˬ yawˇ awˬ pon shaˉ hkiˆ hkanˍ ve yoˬ. 14 Ngaˬ hui ha‸ jaˇ ve saˍ la‸ g'onˍ Luˉka‸ leh Deˍmaˆ nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 15 Lawˍdiˍkiˆ venˇ hk'aw lo chehˇ ve awˬ viˉ awˬ nyi teˇ hpaˍ hta‸ maˇ k'oˆ, Noˍhpaˆ leh yawˇ ve yehˬ hk'aw lo hpawnˬ da‸ ve Hkri‸ yaˇ awˬ moˍ hta‸ maˇ k'oˆ, ngaˬ dawˇ nawˇ chehˇ ve yoˬ teh‸ hto piˇ-oˆ. 16 Li‸ chi hta‸ nawˬ hui g'aw peuˬ k'o, Lawˍdiˍkiˆ Hkri‸ yaˇ awˬ moˍ hta‸ g'aw tcuh-o. Lawˍdiˍkiˆ chaw hui g'a ve li‸ hta‸ htawˇ nawˬ hui g'aw-o. 17 Aˍhkiˇpuˆ hta‸ htawˇ, Jawˇ mawˇ Yeˍsuˆ geh nawˬ g'a taˍ ve kanˉ hta‸ peuˬ htaˇ hk'a gaˬ te tuˬ shaˍ ti‸ te-o teh‸ k'oˆ piˇ-oˆ. 18 Ngaˬ Pawˇlu‸ lehˬ, nawˬ hui hta‸ dawˇ nawˇ ve awˬ hk'aw lo tawˇ chi teˇ hkawˇ ngaˬ awˬ to nawˬ hui hta‸ bvuh‸ laˇ ve yoˬ. Ngaˬ htawnˍ hk'aw g'a hkanˍ chehˇ ve hta‸ dawˇ nawˇ-oˆ. Nawˬ hui geh awˬ bon awˬ shinˉ cawˬ piˇ-oˆ.

1 Hteˇsaˍlawˇniˆ 1

1 Pawˇlu‸, Siˍlaˍnuˆ leh Tiˆmoˉseˍ hui lehˬ, Awˬ pa G'uiˬ sha leh Jawˇ mawˇ Yeˍsuˆ Hkri‸ awˬ hk'aw lo chehˇ ve Hteˇsaˍlawˇniˆ Hkri‸ yaˇ awˬ moˍ hta‸ li‸ chi teˇ k'oˆ bvuh‸ laˇ ve yoˬ. Awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 2 Nawˬ hui hk'a peu-eˬ awˬ pon ngaˬ hui hk'aˬ htaˆ ka‸ G'uiˬ sha hta‸ chiˇ mvuh leh, ngaˬ hui bon lawˬ ve teˇ yanˇ nawˬ hui hta‸ dawˇ nawˇ chehˇ ve yoˬ. 3 Nawˬ hui yonˍ ve hta‸ pa taw kanˉ te ve maˇ k'oˆ, ha‸ pehnˇ ve hta‸ pa taw kanˉ hkeu‸ ve hta‸ te ve maˇ k'oˆ, ngaˬ hui ve Jawˇ mawˇ Yeˍsuˆ Hkri‸ hta‸ dawˇ law ve pa taw nyi ma yeˬ ve maˇ k'oˆ, ngaˬ hui ve Awˬ pa G'uiˬ sha mehˆ g'uˇ suhˍ, chi teˇ hpaˍ hta‸ ngaˬ hui hk'aˬ htaˆ ka‸ dawˇ nawˇ chehˇ ve yoˬ. 4 G'uiˬ sha ha‸ ve awˬ viˉ awˬ nyi teˇ hpaˍ-oˬ, G'uiˬ sha nawˬ hui hta‸ leuˆ yuˬ taˍ ve yoˬ teh‸ ngaˬ hui shiˍ ve yoˬ. 5 Awˬ lawn k'o, ngaˬ hui maˍ ve ha lehˬ ve bon hkawˇ lehˬ, tawˇ hkawˇ ceh hpeh‸ leh nawˬ hui geh gaˬ la ve maˇ heˆ. Kanˇ paˆ awˬ hk'aw lo maˇ k'oˆ, da‸ ve kehˬ ve Awˬ ha hpu awˬ hk'aw lo maˇ k'oˆ, yonˍ yeˬ jaˇ ve nyi ma awˬ hk'aw lo maˇ k'oˆ, nawˬ hui geh gaˬ la ve yoˬ. Ngaˬ hui nawˬ hui geh chehˇ ve teˇ yanˇ, nawˬ hui awˬ pon awˬ bon cawˬ tuˬ ngaˬ hui hk'aˬ hk'e ve chaw hpeh‸ ve hta‸ nawˬ hui shiˍ ve yoˬ. 6 Nawˬ hui lehˬ, ngaˬ hui hta‸ ka‸ Jawˇ mawˇ Yeˍsuˆ hta‸ ka‸ henˇ yuˬ leh te chehˇ ve yoˬ. Awˬ lawn k'o, bon hkawˇ hta‸ pa taw nawˬ hui g'a tu‸ g'a hkanˍ jaˇ ve htawˇ, da‸ ve kehˬ ve Awˬ ha hpu pe‸ laˇ ve ha lehˬ ve teˇ ceuˬ awˬ hk'aw lo bon hkawˇ hta‸ nawˬ hui ha‸ yuˬ ve yoˬ. 7 Chi hta‸ pa taw nawˬ hui lehˬ, Maˍkeˍdawˇniˆ mvuhˇ miˬ leh Aˍhkaˍyaˆ mvuhˇ miˬ awˬ hk'aw lo chehˇ ve yonˍ ve chaw hk'a peu-eˬ awˬ pon henˇ kuiˬ jawˬ kuiˬ hpeh‸ la ve yoˬ. 8 Awˬ lawn k'o, nawˬ hui hta‸ pa taw Jawˇ mawˇ Yeˍsuˆ ve tawˇ hkawˇ lehˬ, Maˍkeˍdawˇniˆ mvuhˇ miˬ leh Aˍhkaˍyaˆ mvuhˇ miˬ awˬ hk'aw lo bvuhˬ k'ai ve ceh tiˉ maˇ heˆ. Nawˬ hui G'uiˬ sha hta‸ yonˍ ve awˬ lawn teˇ kaˬ le le lo bvuhˬ k'ai ve pa taw, oˇ ve awˬ lawn ngaˬ hui te‸ chiˉ k'oˆ tuˬ maˇ loˍ. 9 Awˬ lawn k'o, nawˬ hui lehˬ ngaˬ hui hta‸ ha lehˬ ha k'a ha‸ yuˬ laˇ ve awˬ lawn shu k'oˆ da‸ chehˇ ve yoˬ. Chi hk'oˆ ka‸, te‸ chehˇ ve leh awˬ tehˬ awˬ na ve G'uiˬ sha awˬ pon kanˉ hta‸ nawˬ hui te hpeh‸ tuˬ, shaˉ ho‸ teˇ hpaˍ hta‸ nawˬ hui baˬ taˉ leh G'uiˬ sha geh k'aw‸ hpfuhˆ k'aw‸ la ve awˬ lawn hta‸ htawˇ, shu k'oˆ da‸ chehˇ ve yoˬ. 10 Suh kuiˬ lo G'uiˬ sha k'aw‸ te‸ tu la piˇ ve yawˇ ve Yaˇ hpu mvuhˇ naw ma lo ya‸ la tuˬ ve hta‸ nawˬ hui law chehˇ ve awˬ lawn htawˇ, shu k'oˆ da‸ chehˇ ve yoˬ. Yaˇ hpu oˇ ve lehˬ, gaˬ la tuˬ ve nyi ma zuhˆ ve teˇ ceuˬ awˬ hk'aw lo ngaˬ hui hta‸ ponˬ laˇ shehˍ hpaˇ Yeˍsuˆ hpeh‸ ve yoˬ.

1 Hteˇsaˍlawˇniˆ 2

1 Awˬ viˉ awˬ nyi teˇ hpaˍ-oˬ, ngaˬ hui nawˬ hui geh laˬ ve lehˬ, hk'e leˇ hpeh‸ ve maˇ heˆ teh‸ nawˬ hui shiˍ chehˇ ve yoˬ. 2 Nawˬ hui shiˍ taˍ ve hk'e, Hpiˇliˇpiˆ venˇ awˬ hk'aw lo tu‸ ve hkanˍ ve leh maˇ shawˍ maˇ caˆ te laˇ ve hta‸ ngaˬ hui g'a hkanˍ peuˬ ve yoˬ. Ya‸ hk'aˇ, nawˬ hui hta‸ G'uiˬ sha ve ha lehˬ ve bon hkawˇ ca maˍ la ve teˇ yanˇ, g'a tawˍ da‸ tuˬ cawˬ maˇ jaˇ ve htawˇ, ngaˬ hui ve G'uiˬ sha hta‸ pa taw ngaˬ hui nyi ma ha‸ hanˉ te leh maˍ laˇ ve yoˬ. 3 Ngaˬ hui lehˬ dawˇ ya‸ te ya‸ ve awˬ hk'aw lo maˇ k'oˆ, cha‸ chiˆ ve awˬ hk'aw lo maˇ k'oˆ, heˍ ve awˬ hk'aw lo maˇ k'oˆ, nawˬ hui hta‸ awˬ g'aˇ pe‸ laˇ ve maˇ heˆ. 4 Ha lehˬ ve bon hkawˇ maˍ tuˬ G'uiˬ sha ngaˬ hui hta‸ nyi hk'aˇ suh leh chiˇ a‸ laˇ ve hk'e ceh ngaˬ hui maˍ ve yoˬ. Chaw yaˇ nyi hk'aˇ suh tuˬ ngaˬ hui maˍ ve maˇ heˆ. Ngaˬ hui ve nyi ma hta‸ lawˇ nyi laˇ shehˍ hpaˇ G'uiˬ sha nyi hk'aˇ suh tuˬ ngaˬ hui maˍ ve yoˬ. 5 Awˬ lawn k'o, nawˬ hui shiˍ taˍ ve hk'e, shu nyi ma cawˇ tuˬ ngaˬ hui shu hta‸ chiˇ mvuh piˇ ve maˇ heˆ. Shu mawˇ shu jeˬ hta‸ ngaˬ hui sheˉ lai leh maˍ ve ka‸ maˇ heˆ teh‸ G'uiˬ sha shaˉ hkiˆ hkanˍ hpeh‸ ve yoˬ. 6 Ngaˬ hui Hkri‸ ve tcuh yaˇ hpeh‸ ve pa taw, kanˇ paˆ hta‸ yehˇ hpeh‸ ve htawˇ, nawˬ hui geh maˇ k'oˆ, awˬ kaˍ awˬ nu chaw geh maˇ k'oˆ, chaw yaˇ hui geh awˬ me‸ awˬ hponˇ g'a tuˬ ngaˬ hui maˇ ca. 7 Awˬ e teˇ g'aˇ lehˬ, yawˇ ve yaˇ ehˉ teˇ hpaˍ hta‸ ha‸ shaˉ ve hk'e, ngaˬ hui nawˬ hui geh nyi ma nuˇ nehˬ ve awˬ hk'aw lo chehˇ ve yoˬ. 8 Hk'e te leh, ngaˬ hui nawˬ hui hta‸ ha‸ jaˇ ve pa taw, G'uiˬ sha ve ha lehˬ ve bon hkawˇ ceh tiˉ nawˬ hui hta‸ pe‸ laˇ ve maˇ heˆ, ngaˬ hui ve a sha‸ htawˇ nawˬ hui hta‸ pe‸ laˇ gaˇ jaˇ ve yoˬ. Awˬ lawn k'o, nawˬ hui lehˬ ngaˬ hui ha‸ jaˇ ve chaw teˇ hpaˍ hpeh‸ la peuˬ. 9 Awˬ viˉ awˬ nyi teˇ hpaˍ-oˬ, ngaˬ hui kanˉ te ve hk'aˬ ma hkeu‸ jaˇ ve hta‸ nawˬ hui dawˇ nawˇ tuˬ yoˬ. Ngaˬ hui nawˬ hui hta‸ G'uiˬ sha ve ha lehˬ ve bon hkawˇ maˍ laˇ ve teˇ yanˇ, nawˬ hui teˇ g'aˇ ka‸ maˇ g'a hkeu‸ tuˬ, ngaˬ hui lehˬ tanˇ hkuinˇ tanˇ vanˇ kanˉ te ve yoˬ. 10 Nawˬ hui Hkri‸ yaˇ teˇ hpaˍ hta‸ ngaˬ hui te laˇ ve lehˬ, da‸ ve kehˬ ve, hteˇ ve cawˇ ve leh venˇ baˆ taˍ kuiˬ maˇ cawˬ ve yoˬ teh‸, nawˬ hui ka‸ G'uiˬ sha ka‸ shaˉ hkiˆ hkanˍ hpeh‸ ve yoˬ. 11 Nawˬ hui shiˍ taˍ ve hk'e, awˬ pa teˇ g'aˇ lehˬ, a shu yawˇ ve yaˇ teˇ hpaˍ hta‸ te piˇ ve hk'e, ngaˬ hui nawˬ hui teˇ g'aˇ le le hta‸ awˬ g'aˇ pe‸ laˇ leh dawˇ sha gaˇ sha tuˬ te laˇ ve yoˬ. 12 G'uiˬ sha hta‸ keunˍ ve hk'e ceh te tuˬ ngaˬ hui nawˬ hui hta‸ tawˇ piˇ ve yoˬ. Yawˇ ve mvuhˇ miˬ leh yawˇ ve awˬ me‸ awˬ hponˇ awˬ hk'aw lo lo‸-e tuˬ, yawˇ nawˬ hui hta‸ kuˬ yuˬ laˇ peuˬ. 13 Nawˬ hui lehˬ, ngaˬ hui maˍ laˇ ve G'uiˬ sha ve tawˇ hkawˇ hta‸ g'a kaˇ ve teˇ yanˇ ha‸ yuˬ ve pa taw, G'uiˬ sha hta‸ ngaˬ hui hk'aˬ htaˆ ka‸ chiˇ mvuh ve yoˬ. Tawˇ hkawˇ oˇ ve hta‸ chaw yaˇ ve tawˇ hkawˇ hk'e nawˬ hui shawˍ taˍ leh ha‸ yuˬ ve maˇ heˆ. G'uiˬ sha ve tawˇ hkawˇ awˬ tehˬ awˬ na hpeh‸ ve hta‸ nawˬ hui shawˍ taˍ leh ha‸ yuˬ ve yoˬ. Tawˇ hkawˇ oˇ ve lehˬ, nawˬ hui Hkri‸ yaˇ teˇ hpaˍ awˬ hk'aw lo kanˉ te chehˇ ve yoˬ. 14 Awˬ lawn k'o, awˬ viˉ awˬ nyi teˇ hpaˍ-oˬ, Yuˇda‸ mvuhˇ miˬ awˬ hk'aw lo cawˬ ve, Yeˍsuˆ Hkri‸ awˬ hk'aw lo chehˇ ve G'uiˬ sha ve Hkri‸ yaˇ awˬ moˍ teˇ hpaˍ hta‸ nawˬ hui henˇ yuˬ jawˬ yuˬ ve yoˬ. Yawˇ hui lehˬ, Yuˇda‸ chaw hui ve la‸ hk'aw lo tu‸ ve hkanˍ ve hta‸ g'a hkanˍ ve hk'e, nawˬ hui htawˇ nawˬ hui ve mvuhˇ miˬ awˬ hk'aw lo chehˇ ve chaw teˇ hpaˍ ve la‸ hk'aw lo tu‸ ve hkanˍ ve hta‸ g'a hkanˍ ve yoˬ. 15 Yuˇda‸ chaw oˇ ve teˇ hpaˍ lehˬ, Jawˇ mawˇ Yeˍsuˆ hta‸ ka‸, G'uiˬ sha ve tcuh kaˍ paˍ teˇ hpaˍ hta‸ ka‸ tiˇ pehˍ leh, ngaˬ hui hta‸ htawˇ g'a‸ k'oˬ laˇ ve yoˬ. Yawˇ hui lehˬ, G'uiˬ sha nyi ma cawˇ tuˬ maˇ te ve awˬ hk'oˆ ka‸ chaw hk'a peu-eˬ ve canˇ paˍ hpeh‸ ve yoˬ. 16 Buiˇ shaˆ aˉ naˆ chaw teˇ hpaˍ htaiˍ hk'aw‸ ve hta‸ g'a tuˬ ngaˬ hui maˍ piˇ ve hta‸ Yuˇda‸ chaw oˇ ve teˇ hpaˍ tawˍ taˍ laˇ ve yoˬ. Yawˇ hui chi hk'e te ve lehˬ, a shu yawˇ ve venˇ baˆ biˇ la tuˬ te chehˇ ve yoˬ. Hk'e te leh, G'uiˬ sha nyi ma zuhˆ ve teˇ ceuˬ yawˇ hui awˬ hk'oˆ hk'a biˇ gaˬ la peuˬ. 17 Awˬ viˉ awˬ nyi teˇ hpaˍ-oˬ, teˇ hkui teˇ yanˇ ngaˬ hui nawˬ hui hta‸ g'a hpaˆ da‸ ve pa taw, ngaˬ hui nawˬ hui hta‸ k'aw‸ mawˬ gaˇ jaˇ leh g'aˇ hte‸ te chehˇ ve yoˬ. Awˬ to nawˬ hui hta‸ g'a hpaˆ da‸ ve htawˇ, ngaˬ hui ve nyi ma nawˬ hui hta‸ maˇ hpaˆ da‸. 18 Hk'e te leh ngaˬ Pawˇlu‸ lehˬ, nawˬ hui geh laiˉ pawˆ laˬ gaˇ ve yoˬ. Ya‸ hk'aˇ, Saˍtanˍ ngaˬ hui hta‸ tawˍ taˍ laˇ ve yoˬ. 19 Ngaˬ hui ve Jawˇ mawˇ Yeˍsuˆ Hkri‸ k'aw‸ ya‸ la ve teˇ yanˇ, yawˇ mehˆ g'uˇ suhˍ ngaˬ hui ve dawˇ law kuiˬ, ha lehˬ kuiˬ leh awˬ me‸ awˬ hponˇ cawˬ ve shi uˉ tcuhˍ aˬ hto‸ ma le. Nawˬ hui yoˬ maˇ heˆ laˇ. 20 Awˬ lawn k'o, nawˬ hui lehˬ ngaˬ hui ve awˬ me‸ awˬ hponˇ leh ngaˬ hui ve ha lehˬ kuiˬ hpeh‸ ve yoˬ.

1 Hteˇsaˍlawˇniˆ 3

1 Hk'e te leh, nawˬ hui awˬ lawn ngaˬ hui maˇ g'a shiˍ maˇ g'a kaˇ ve pa taw hkanˍ maˇ g'a ve teˇ yanˇ, ngaˬ teˇ g'aˇ tiˉ Aˍhtenˍ venˇ awˬ hk'aw lo chehˇ taˉ tuˬ ngaˬ dawˇ cheˆ taˍ ve yoˬ. 2 Ngaˬ hui ve awˬ viˉ awˬ nyi Tiˆmoˉseˍ hta‸ ngaˬ hui nawˬ hui geh peu laˇ ve yoˬ. Yawˇ lehˬ, Hkri‸ ve ha lehˬ ve bon hkawˇ maˍ shehˍ hpaˇ G'uiˬ sha ve awˬ ceˬ hpeh‸ ve yoˬ. 3 Tu‸ ve hkanˍ ve chi teˇ hpaˍ hta‸ nawˬ hui g'a hkanˍ ve htawˇ, nawˬ hui nyi ma yeˬ chehˇ tuˬ awˬ pon maˇ k'oˆ, yonˍ ve teˇ ceuˬ awˬ hk'aw lo nawˬ hui hk'a deh‸ chehˇ yeˬ leh awˬ g'aˇ cawˬ tuˬ awˬ pon maˇ k'oˆ, ngaˬ hui yawˇ hta‸ peu laˇ ve yoˬ. Tu‸ ve hkanˍ ve teˇ hpaˍ hta‸ ngaˬ hui g'a hkanˍ ve yoˬ teh‸ nawˬ hui shiˍ chehˇ ve yoˬ. 4 Awˬ lawn k'o, tu‸ ve hkanˍ ve hta‸ ngaˬ hui g'a hkanˍ tuˬ yoˬ teh‸, ngaˬ hui nawˬ hui geh chehˇ ve teˇ yanˇ ngaˬ hui k'oˆ taˍ ve yoˬ. K'oˆ taˍ ve hk'e hpeh‸ la ve hta‸ htawˇ nawˬ hui shiˍ ve yoˬ. 5 Chi hta‸ pa taw, ngaˬ hkanˍ maˇ g'a ve teˇ yanˇ, nawˬ hui hk'aˬ hk'e yonˍ chehˇ ve hta‸ ngaˬ g'a shiˍ tuˬ, Tiˆmoˉseˍ hta‸ ngaˬ peu laˇ ve yoˬ. Beˬ shehˍ hpaˇ nawˬ hui hta‸ beˬ yuˬ leh, ngaˬ hui kanˉ te hkeu‸ ve teˇ hpaˍ hk'e leˇ hpeh‸ la puiˉ-aˆ teh‸ ngaˬ dawˇ haˍ ve yoˬ. 6 Ya‸ hk'aˇ, chi beu‸ Tiˆmoˉseˍ k'aw‸ gaˬ la leh, nawˬ hui yonˍ ve teˇ ceuˬ leh ha‸ pehnˇ ve teˇ ceuˬ awˬ lawn, ha lehˬ tuˬ uiˍ jaˇ ve tawˇ hkawˇ ngaˬ hui hta‸ hto laˇ ve yoˬ. Nawˬ hui hk'aˬ htaˆ ka‸ ngaˬ hui hta‸ hk'a deh‸ dawˇ nawˇ chehˇ leh, ngaˬ hui nawˬ hui hta‸ mawˬ gaˇ ve hk'e nawˬ hui htawˇ ngaˬ hui hta‸ mawˬ gaˇ jaˇ ve awˬ lawn ka‸, yawˇ hto laˇ ve yoˬ. 7 Awˬ viˉ awˬ nyi teˇ hpaˍ-oˬ, ngaˬ hui dawˇ haˍ jaˇ ve leh tu‸ ve hkanˍ ve teˇ ceuˬ le le hta‸ g'a hkanˍ ve htawˇ, nawˬ hui ve yonˍ ve teˇ ceuˬ hta‸ pa taw dawˇ sha ve teˇ ceuˬ hta‸ ngaˬ hui g'a ve yoˬ. 8 Awˬ lawn k'o, Jawˇ mawˇ Yeˍsuˆ awˬ hk'aw lo nawˬ hui yeˬ chehˇ ve k'o, chi beu‸ ngaˬ hui awˬ pon te‸ ve teˇ ceuˬ hpeh‸ ve yoˬ. 9 Nawˬ hui hta‸ pa taw ngaˬ hui ve G'uiˬ sha mehˆ g'uˇ suhˍ ngaˬ hui ha lehˬ tuˬ maˇ maˇ cawˬ ve yoˬ. Ha lehˬ tuˬ chi hk'a peu-eˬ hta‸ ngaˬ hui dawˇ nyi ve teˇ yanˇ, nawˬ hui awˬ pon G'uiˬ sha hta‸ ngaˬ hui maˇ maˇ chiˇ mvuh ve yoˬ. 10 Ngaˬ hui nawˬ hui hta‸ g'a k'aw‸ mawˬ da‸ leh, nawˬ hui yonˍ maˇ biˇ sheˍ ve awˬ ceuˬ biˇ la tuˬ, tanˇ hkuinˇ tanˇ venˇ ngaˬ hui bon g'aˇ hte‸ lawˬ chehˇ ve yoˬ. 11 Nawˬ hui geh ngaˬ hui laˬ hpeh‸ tuˬ, ngaˬ hui ve Awˬ pa G'uiˬ sha leh ngaˬ hui ve Jawˇ mawˇ Yeˍsuˆ ngaˬ hui pon ya‸ k'aw gu taˍ laˇ piˇ-oˆ. 12 Ngaˬ hui nawˬ hui hta‸ ha‸ ve hk'e, nawˬ hui htawˇ teˇ g'aˇ leh teˇ g'aˇ hta‸ ha‸ da‸ ve maˇ k'oˆ, chaw hk'a peu-eˬ hta‸ ha‸ ve maˇ k'oˆ, nawˬ hui awˬ hk'aw lo uiˍ la maˇ la tuˬ, Jawˇ mawˇ Yeˍsuˆ te laˇ piˇ-oˆ. 13 Ngaˬ hui ve Jawˇ mawˇ Yeˍsuˆ lehˬ, yawˇ ve da‸ kehˬ ve chaw hk'a peu-eˬ geh teˇ geh k'aw‸ ya‸ la ve teˇ yanˇ, ngaˬ hui ve Awˬ pa G'uiˬ sha mehˆ g'uˇ suhˍ nawˬ hui ve nyi ma da‸ kehˬ ve awˬ hk'aw lo venˇ baˆ taˍ kuiˬ maˇ g'a cawˬ tuˬ, yawˇ nawˬ hui ve nyi ma hta‸ yeˬ piˇ lawˬ tuˬ yoˬ.

1 Hteˇsaˍlawˇniˆ 4

1 Awˬ viˉ awˬ nyi teˇ hpaˍ-oˬ, awˬ leh meuˇ ve tawˇ teˇ hkawˇ lehˬ, Jawˇ mawˇ Yeˍsuˆ awˬ hk'aw lo ngaˬ hui nawˬ hui hta‸ chi hk'e lawˬ hkawˉ leh awˬ g'aˇ pe‸ laˇ ve yoˬ. Nawˬ hui hk'aˬ hk'e g'a te keunˍ ve leh, G'uiˬ sha nyi hk'aˇ suh tuˬ hk'aˬ hk'e g'a te cawˇ ve teˇ hpaˍ ngaˬ hui geh g'a henˇ taˍ peuˬ ve hk'e, chi beu‸ nawˬ hui te chehˇ ve hk'a shuˍ shuˍ chi a‸ kehˉ leuˉ leh awˬ g'uˇ suhˍ g'aˇ hte‸ te k'ai sheˍ. 2 Jawˇ mawˇ Yeˍsuˆ ve kanˇ paˆ awˬ hawˉ lo ngaˬ hui nawˬ hui hta‸ tawˇ pe‸ laˇ ve teˇ hpaˍ hta‸ nawˬ hui shiˍ chehˇ ve yoˬ. 3 Awˬ lawn k'o, nawˬ hui g'a da‸ g'a kehˬ tuˬ, chi lehˬ G'uiˬ sha ve a loˍ cawˇ ve yoˬ. Hk'e te leh, haˉ chawˇ haˉ paˆ te ve teˇ ceuˬ hta‸ jaw k'ai-o. 4 Nawˬ hui teˇ g'aˇ le le da‸ ve kehˬ ve leh yawˆ yan ve awˬ hk'aw lo a shu yawˇ ve awˬ miˇ ma hta‸ hk'a deh‸ heuˆ chehˇ-oˆ. 5 G'uiˬ sha hta‸ maˇ shiˍ ve buiˇ shaˆ aˉ naˆ chaw teˇ hpaˍ lehˬ, peh‸ ve tzuhˆ ve awˬ hk'aˇ suh te k'ai ve yoˬ. Nawˬ hui oˇ hk'e taˇ te. 6 Kanˉ chi teˇ ceuˬ awˬ hk'aw lo chaw teˇ g'aˇ ka‸ a shu yawˇ ve awˬ viˉ awˬ nyi hta‸ maˇ g'a te ponˬ te leuˉ leh maˇ g'a te ya‸. Awˬ lawn k'o, ponˬ laˬ htaˇ ngaˬ hui nawˬ hui hta‸ shaˍ ti‸ hk'a deh‸ pe‸ laˇ taˍ ve hk'e, Jawˇ mawˇ Yeˍsuˆ lehˬ, chi hk'a peu-eˬ awˬ pon k'aw‸ te hk'aw‸ piˇ shehˍ hpaˇ hpeh‸ ve yoˬ. 7 Awˬ lawn k'o, cha‸ chiˆ ve chaw hpeh‸ tuˬ awˬ pon G'uiˬ sha ngaˬ hui hta‸ kuˬ yuˬ taˍ ve maˇ heˆ. Da‸ kehˬ ve chaw hpeh‸ la tuˬ awˬ pon yawˇ kuˬ yuˬ taˍ ve yoˬ. 8 Hk'e te leh, chi hta‸ baˬ taˉ ve chaw lehˬ, chaw yaˇ hta‸ baˬ taˉ ve maˇ heˆ. Ngaˬ hui hta‸ yawˇ ve da‸ ve kehˬ ve Awˬ ha hpu pe‸ laˇ shehˍ hpaˇ G'uiˬ sha hta‸ baˬ taˉ ve yoˬ. 9 Awˬ viˉ awˬ nyi teˇ g'aˇ leh teˇ g'aˇ ha‸ da‸ tuˬ ve awˬ lawn ngaˬ hui nawˬ hui hta‸ li‸ bvuh‸ laˇ tuˬ maˇ loˍ. Awˬ lawn k'o, teˇ g'aˇ leh teˇ g'aˇ ha‸ da‸ tuˬ G'uiˬ sha nawˬ hui hta‸ maˍ laˇ peuˬ. 10 Awˬ tehˬ k'oˆ ve k'o, Maˍkeˍdawˇniˆ mvuhˇ miˬ teˇ kaˬ le le lo chehˇ ve awˬ viˉ awˬ nyi hk'a peu-eˬ hta‸ nawˬ hui ha‸ chehˇ ve yoˬ. Ya‸ hk'aˇ awˬ viˉ awˬ nyi teˇ hpaˍ-oˬ, chi a‸ kehˉ leuˉ leh yawˇ hui hta‸ ha‸ maˇ la tuˬ ngaˬ hui nawˬ hui hta‸ awˬ g'aˇ pe‸ laˇ ve yoˬ. 11 Chi hk'oˆ ka‸, awˬ baˬ hpawˇ chehˇ ve chaw teˇ hpaˍ nawˬ hui hta‸ nyi ma cawˇ tuˬ leh nawˬ hui chaw teˇ g'aˇ hta‸ ka‸ maˇ g'a ca cuˇ tuˬ, 12 ngaˬ hui nawˬ hui hta‸ k'oˆ laˇ peuˬ ve hk'e, ta‸ iˉ gawˬ lehˍ chehˇ leh a shu yawˇ te kuiˬ hta‸ te leh, a shu yawˇ awˬ to la‸ sheh kanˉ te tuˬ ngaˬ nawˬ hui hta‸ awˬ g'aˇ pe‸ laˇ ve yoˬ. 13 Awˬ viˉ awˬ nyi teˇ hpaˍ-oˬ, dawˇ law kuiˬ maˇ cawˬ ve awˬ kaˍ awˬ nu chaw teˇ hpaˍ dawˇ haˍ ve hk'a shuˍ shuˍ, nawˬ hui maˇ g'a dawˇ haˍ tuˬ, suh peuˬ ve chaw teˇ hpaˍ awˬ lawn ngaˬ hui nawˬ hui hta‸ shiˍ piˇ lawˬ gaˇ ve yoˬ. 14 Awˬ lawn k'o, Yeˍsuˆ suh leh k'aw‸ te‸ tu la ve hta‸ ngaˬ hui yonˍ ve yoˬ. Hk'e te leh yawˇ k'aw‸ te‸ tu la ve hk'a shuˍ shuˍ, G'uiˬ sha lehˬ Yeˍsuˆ hta‸ cuˇ ve awˬ hk'aw lo, suh peuˬ ve chaw teˇ hpaˍ hta‸ yawˇ geh teˇ geh k'aw‸ shiˍ veu laˇ tuˬ yoˬ. 15 Jawˇ mawˇ Yeˍsuˆ ve tawˇ hkawˇ hta‸ ngaˬ hui cuˇ leh nawˬ hui hta‸ chi hk'e hto laˇ ve yoˬ. Jawˇ mawˇ Yeˍsuˆ k'aw‸ gaˬ la htaˇ hk'a gaˬ a sha‸ te‸ chehˇ sheˍ ve ngaˬ hui teˇ hpaˍ lehˬ, suh peuˬ ve chaw teˇ hpaˍ awˬ g'uˇ suhˍ g'a gaˬ tuˬ maˇ heˆ. 16 Jawˇ mawˇ Yeˍsuˆ lehˬ mvuhˇ naw ma hk'oˆ lo ya‸ la ve teˇ yanˇ, tawˇ piˇ ve awˬ hk'aw lo awˬ hkawˇ bvuhˬ chaweh kuˬ tuˬ yoˬ. Chi hk'oˆ ka‸, mvuhˇ naw ma tcuh yaˇ uiˍ ve teˇ g'aˇ ve awˬ hkawˇ leh, G'uiˬ sha ve behˬ heh ma meuˆ ve awˬ hkawˇ htawˇ bvuhˬ la tuˬ yoˬ. Oˇ htaˇ, Hkri‸ awˬ hk'aw lo suh peuˬ ve chaw teˇ hpaˍ awˉ lawˉ te‸ tu la tuˬ yoˬ. 17 Oˇ ve awˬ hk'aw‸ nawˉ a sha‸ te‸ chehˇ sheˍ ve ngaˬ hui teˇ hpaˍ lehˬ, mvuhˇ hpe lo Jawˇ mawˇ Yeˍsuˆ hta‸ hpuˇ da‸ tuˬ, chaw oˇ ve teˇ hpaˍ geh hk'a geh moˬ cawˬ kuiˬ lo ngaˬ hui hta‸ chiˇ taˆ-e laˇ tuˬ yoˬ. Hk'e te leh, Jawˇ mawˇ Yeˍsuˆ geh ngaˬ hui hk'aˬ htaˆ ka‸ g'a chehˇ tuˬ yoˬ. 18 Chi hta‸ pa taw, nawˬ hui dawˇ sha la tuˬ, tawˇ hkawˇ chi teˇ hpaˍ hta‸ k'oˆ da‸ leh, teˇ g'aˇ leh teˇ g'aˇ awˬ g'aˇ piˇ da‸-o‸.

1 Hteˇsaˍlawˇniˆ 5

1 Awˬ viˉ awˬ nyi teˇ hpaˍ-oˬ, awˬ nyi awˬ haˉ leh awˬ tcuhˉ awˬ yanˇ teˇ hpaˍ awˬ lawn nawˬ hui hta‸ li‸ bvuh‸ laˇ tuˬ maˇ loˍ. 2 Awˬ lawn k'o, tanˇ hkuinˇ htaˇ chaw hk'awˇ laˬ ve hk'e Jawˇ mawˇ Yeˍsuˆ ve awˬ nyi gaˬ la tuˬ ve hta‸ nawˬ hui hk'a deh‸ shiˍ chehˇ ve yoˬ. 3 Mvuhˇ miˬ gawˬ la peuˬ leh ngaˬ hui te‸ chiˉ dawˇ haˍ tuˬ maˇ cawˬ teh‸, shu k'oˆ da‸ chehˇ ve teˇ yanˇ, yaˇ paw tuˬ naˬ ve yaˇ miˇ teˇ g'aˇ naˬ jaˇ ve hta‸ g'a hkanˍ ve hk'e, luˬ ve sheˆ ve teˇ ceuˬ yawˇ hui awˬ hk'oˆ teˇ cawˬ haˉ gaˬ la tuˬ yoˬ. Yawˇ hui ponˬ kuiˬ a ciˉ ka‸ maˇ cawˬ. 4 Ya‸ hk'aˇ, awˬ viˉ awˬ nyi teˇ hpaˍ-oˬ, nawˬ hui naˆ ho‸ ve hk'aw lo maˇ chehˇ ve pa taw, awˬ nyi oˇ ve lehˬ, chaw hk'awˇ hk'a shuˍ shuˍ nawˬ hui geh gaˬ la tuˬ ve maˇ heˆ. 5 Awˬ lawn k'o, nawˬ hui hk'a peu-eˬ lehˬ awˬ g'euˆ ve awˬ yaˇ awˬ duˬ leh mvuhˇ law‸ k'aw ve awˬ yaˇ awˬ duˬ hpeh‸ ve yoˬ. Ngaˬ hui lehˬ mvuhˇ hpeu‸ ve teˇ ceuˬ hta‸ maˇ k'oˆ, naˆ ho‸ ve teˇ ceuˬ hta‸ maˇ k'oˆ, maˇ caˉ da‸. 6 Hk'e te leh, awˬ kaˍ awˬ nu chaw teˇ hpaˍ zuh‸ muiˉ k'a ve hk'e ngaˬ hui zuh‸ muiˉ taˇ k'a chehˇ. Ngaˬ hui hk'a deh‸ shaw chehˇ leh shaˍ ti‸ taˍ-a veuˬ. 7 Awˬ lawn k'o, zuh‸ muiˉ k'a ve chaw teˇ hpaˍ lehˬ, tanˇ hkuinˇ htaˇ zuh‸ muiˉ k'a chehˇ ve yoˬ. Tzuhˬ dawˬ bvuhˆ ve chaw hui htawˇ, tanˇ hkuinˇ htaˇ dawˬ bvuhˆ chehˇ ve yoˬ. 8 Ngaˬ hui lehˬ mvuhˇ law‸ k'aw hta‸ caˉ da‸ ve chaw teˇ hpaˍ hpeh‸ ve pa taw, shaˍ ti‸ taˍ chehˇ-a veuˬ. Yonˍ ve leh ha‸ pehnˇ ve teˇ ceuˬ nyi ma pui hta‸ htanˬ tuˬ hk'e veu‸ deh leh, htaiˍ hk'aw‸ ve hta‸ caˉ da‸ ve dawˇ law ve teh‸ k'oˆ ve sho uˉ tcuhˍ hta‸ hk'awˆ taˍ-a veuˬ. 9 Awˬ lawn k'o, nyi ma zuhˆ ve hta‸ g'a hkanˍ tuˬ G'uiˬ sha ngaˬ hui hta‸ fuiˍ teh taˍ ve maˇ heˆ. Ngaˬ hui ve Jawˇ mawˇ Yeˍsuˆ Hkri‸ hta‸ pa taw htaiˍ hk'aw‸ ve hta‸ g'a tuˬ, yawˇ ngaˬ hui hta‸ fuiˍ teh taˍ ve yoˬ. 10 Ngaˬ hui te‸ chehˇ ve maˇ k'oˆ, suh ve maˇ k'oˆ, yawˇ geh teˇ geh g'a te‸ chehˇ tuˬ, yawˇ ngaˬ hui awˬ pon hkanˍ suh peuˬ. 11 Hk'e te leh, chi beu‸ nawˬ hui te chehˇ ve hk'e, teˇ g'aˇ leh teˇ g'aˇ awˬ g'aˇ piˇ da‸ leh, teˇ g'aˇ leh teˇ g'aˇ uiˍ la yeˬ la tuˬ te da‸-o‸. 12 Awˬ viˉ awˬ nyi teˇ hpaˍ-oˬ, ngaˬ hui nawˬ hui hta‸ chi hk'e lawˬ hkawˉ ve yoˬ. Nawˬ hui awˬ hk'aw lo kanˉ te leh, Jawˇ mawˇ Yeˍsuˆ awˬ hk'aw lo nawˬ hui hta‸ ha‸ shaˉ leh shaˍ ti‸ pe‸ laˇ ve chaw teˇ hpaˍ hta‸ yawˆ yan-o. 13 Yawˇ hui te ve kanˉ teˇ hpaˍ hta‸ pa taw, ha‸ pehnˇ ve awˬ hk'aw lo yawˇ hui hta‸ taˍ uiˍ taˍ mvuh piˇ-oˆ. Nawˬ hui htawˇ, teˇ g'aˇ leh teˇ g'aˇ cawˇ da‸ hui da‸ chehˇ-oˆ. 14 Awˬ viˉ awˬ nyi teˇ hpaˍ-oˬ, ngaˬ hui nawˬ hui hta‸ awˬ g'aˇ chi hk'e pe‸ laˇ ve yoˬ. Kanˉ maˇ te ve chaw teˇ hpaˍ hta‸ shaˍ ti‸ piˇ-oˆ. Nyi ma i puiˉ ve chaw teˇ hpaˍ hta‸ awˬ g'aˇ piˇ-oˆ. Awˬ g'aˇ nuˇ ve chaw teˇ hpaˍ hta‸ ga piˇ-oˆ. Chaw hk'a peu-eˬ awˬ hk'oˆ hta‸ nyi ma zuhˬ chaweh taˍ-o‸. 15 Shu haiˬ ve teˇ ceuˬ te laˇ ve teˇ yanˇ, nawˬ hui teˇ g'aˇ ka‸ haiˬ ve teˇ ceuˬ maˇ g'a k'aw‸ te hk'aw‸ piˇ tuˬ shaˍ ti‸ te-o. Nawˬ hui teˇ g'aˇ leh teˇ g'aˇ hta‸ maˇ k'oˆ, chaw hk'a peu-eˬ hta‸ maˇ k'oˆ, hk'aˬ htaˆ ka‸ da‸ ve teˇ ceuˬ hta‸ te tcuhˉ taˍ-o‸. 16 Hk'aˬ htaˆ ka‸ ha lehˬ chehˇ-oˆ. 17 Hk'aˬ htaˆ ka‸ bon lawˬ tcuhˉ taˍ-o‸. 18 Teˇ ceuˬ le le awˬ hk'aw lo G'uiˬ sha hta‸ chiˇ mvuh chehˇ-oˆ. Awˬ lawn k'o, chi hk'e te tuˬ nawˬ hui awˬ pon Yeˍsuˆ Hkri‸ awˬ hk'aw lo G'uiˬ sha ve a loˍ cawˇ ve yoˬ. 19 Awˬ ha hpu ve aˬ miˍ hta‸ taˇ tiˇ pehˍ. 20 Shu G'uiˬ sha ve tawˇ hkawˇ maˍ laˇ ve hta‸ maˇ shawˍ maˇ caˆ taˇ te. 21 Awˬ ceuˬ hk'a peu-eˬ hta‸ lawˇ nyi-o. Da‸ ve awˬ ceuˬ hta‸ hk'a deh‸ vawˆ taˍ-o‸. 22 Haiˬ ve teˇ ceuˬ le le hta‸ jaw k'ai-o. 23 Dawˇ sha piˇ shehˍ hpaˇ G'uiˬ sha lehˬ, nawˬ hui hta‸ teˇ ceuˬ le le awˬ hk'aw lo da‸ la kehˬ la piˇ-oˆ. Ngaˬ hui ve Jawˇ mawˇ Yeˍsuˆ Hkri‸ k'aw‸ ya‸ la ve teˇ yanˇ, nawˬ hui ve nyi ma, co ha leh awˬ to biˇ chehˇ ve awˬ hk'aw lo venˇ baˆ taˍ kuiˬ maˇ cawˬ tuˬ, G'uiˬ sha nawˬ hui hta‸ ha‸ shaˉ piˇ-oˆ. 24 Nawˬ hui hta‸ kuˬ yuˬ shehˍ hpaˇ lehˬ, ka ti‸ yeˬ leh, nawˬ hui hta‸ chi hk'e te laˇ tuˬ yoˬ. 25 Awˬ viˉ awˬ nyi teˇ hpaˍ-oˬ, ngaˬ hui awˬ pon bon lawˬ-o‸. 26 Awˬ viˉ awˬ nyi hk'a peu-eˬ hta‸ da‸ ve kehˬ ve awˬ hk'aw lo boˆ nu da‸ leh la‸ sheh caˉ da‸-o‸. 27 Awˬ viˉ awˬ nyi hk'a peu-eˬ hta‸ li‸ chi g'aw maˍ piˇ tuˬ, Jawˇ mawˇ Yeˍsuˆ hta‸ ngaˬ cuˇ leh nawˬ hui hta‸ tawˇ piˇ ve yoˬ. 28 Ngaˬ hui ve Jawˇ mawˇ Yeˍsuˆ Hkri‸ ve awˬ bon awˬ shinˉ nawˬ hui geh cawˬ piˇ-oˆ.

2 Hteˇsaˍlawˇniˆ 1

1 Pawˇlu‸, Siˍlaˍnuˆ leh Tiˆmoˉseˍ hui lehˬ, ngaˬ hui ve Awˬ pa G'uiˬ sha leh Jawˇ mawˇ Yeˍsuˆ Hkri‸ awˬ hk'aw lo chehˇ ve Hteˇsaˍlawˇniˆ Hkri‸ yaˇ awˬ moˍ hta‸ li‸ chi teˇ k'oˆ bvuh‸ laˇ ve yoˬ. 2 Awˬ pa G'uiˬ sha leh Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 3 Awˬ viˉ awˬ nyi teˇ hpaˍ-oˬ, nawˬ hui awˬ pon ngaˬ hui hk'aˬ htaˆ ka‸ G'uiˬ sha hta‸ chiˇ mvuh cawˇ tehˬ ve yoˬ. Awˬ lawn k'o, nawˬ hui yonˍ ve teˇ ceuˬ uiˍ la maˇ la chehˇ leh, nawˬ hui hk'a peu-eˬ teˇ g'aˇ leh teˇ g'aˇ hta‸ ha‸ da‸ ve teˇ ceuˬ maˇ la chehˇ ve pa taw, ngaˬ hui chi hk'e chiˇ mvuh keunˍ ve yoˬ. 4 Hk'e te leh, fawˉ ve mehˍ ve leh tu‸ ve hkanˍ ve hk'a peu-eˬ hta‸ nawˬ hui g'a hkanˍ ve awˬ hk'aw lo, nawˬ hui nyi ma yeˬ leh yonˍ chehˇ taˍ ve pa taw, G'uiˬ sha ve Hkri‸ yaˇ awˬ moˍ teˇ hpaˍ mehˆ g'uˇ suhˍ ngaˬ hui nawˬ hui hta‸ chiˇ mvuh ve yoˬ. 5 Hkanˍ ve awˬ hk'aw lo nawˬ hui nyi ma yeˬ ve pa taw, G'uiˬ sha hteˇ lehˍ suhˉ jehˬ ve awˬ heˆ hpeh‸ ve yoˬ. G'uiˬ sha ve mvuhˇ miˬ awˬ pon nawˬ hui hkanˍ chehˇ leh, mvuhˇ miˬ oˇ ve hta‸ keunˍ da‸ tuˬ yawˇ te chehˇ ve yoˬ. 6 Awˬ lawn k'o, Jawˇ mawˇ Yeˍsuˆ lehˬ mvuhˇ naw ma hk'oˆ lo yawˇ ve kanˇ paˆ hk'a biˇ cawˬ ve mvuhˇ naw ma tcuh yaˇ hui geh teˇ geh aˬ miˍ awˬ g'euˆ ba jaˇ ve awˬ hk'aw lo tawˆ la ve teˇ yanˇ, 7 chi beu‸ nawˬ hui hta‸ fawˉ mehˍ chehˇ ve chaw teˇ hpaˍ hta‸ yawˇ k'aw‸ fawˉ mehˍ piˇ tuˬ ve maˇ k'oˆ, fawˉ mehˍ ve hta‸ g'a hkanˍ ve nawˬ hui teˇ hpaˍ lehˬ, ngaˬ hui geh teˇ geh g'aˇ jehˇ piˇ tuˬ ve maˇ k'oˆ, hteˇ ve cawˇ ve yoˬ teh‸ G'uiˬ sha dawˇ taˍ ve yoˬ. 8 Oˇ htaˇ, G'uiˬ sha hta‸ maˇ shiˍ ve chaw hui hta‸ maˇ k'oˆ, ngaˬ hui ve Jawˇ mawˇ Yeˍsuˆ ve ha lehˬ ve bon hkawˇ hta‸ maˇ na yuˬ ve chaw hui hta‸ maˇ k'oˆ, yawˇ hehnˇ chaweh k'aw‸ te hk'aw‸ piˇ tuˬ yoˬ. 9 Yeˍsuˆ k'aw‸ ya‸ la ve teˇ nyi htaˇ chaw oˇ ve teˇ hpaˍ lehˬ, Jawˇ mawˇ Yeˍsuˆ hta‸ ka‸, awˬ me‸ awˬ hponˇ hk'a biˇ cawˬ ve yawˇ ve kanˇ paˆ hta‸ ka‸ g'a hpaˆ da‸ leh, co co taiˍ taiˍ luˬ ve sheˆ ve hta‸ g'a hkanˍ tuˬ yoˬ. 10 Oˇ ve teˇ nyi awˬ hk'aw lo, Yeˍsuˆ lehˬ yawˇ ve Hkri‸ yaˇ teˇ hpaˍ hta‸ pa taw awˬ me‸ awˬ hponˇ g'a tuˬ leh, yonˍ ve chaw hk'a peu-eˬ yawˇ hta‸ anˇ leh chiˇ mvuh tuˬ awˬ pon yawˇ laˬ tuˬ yoˬ. Ngaˬ hui shaˉ hkiˆ hkanˍ ve hta‸ nawˬ hui yonˍ ve pa taw, nawˬ hui htawˇ oˇ ve teˇ moˍ awˬ hk'aw lo chehˇ taˍ ve yoˬ. 11 Nawˬ hui awˬ pon ngaˬ hui hk'aˬ htaˆ ka‸ chi hk'e bon lawˬ chehˇ ve yoˬ. Ngaˬ hui ve G'uiˬ sha kuˬ yuˬ taˍ ve awˬ bon hta‸ nawˬ hui keunˍ ve chaw hpeh‸ la tuˬ maˇ k'oˆ, da‸ ve hta‸ hk'a dawˇ law ve hk'a peu-eˬ leh, yonˍ ve awˬ hk'aw lo hk'a te ve kanˉ hk'a peu-eˬ yawˇ ve kanˇ paˆ hta‸ pa taw nawˬ hui te peuˬ hpeh‸ tuˬ maˇ k'oˆ, ngaˬ hui bon lawˬ chehˇ ve yoˬ. 12 Nawˬ hui chi hk'e te ve k'o, ngaˬ hui ve G'uiˬ sha leh Jawˇ mawˇ Yeˍsuˆ Hkri‸ ve awˬ bon uiˍ jaˇ maˇ jaˇ ve hk'e, nawˬ hui hta‸ pa taw ngaˬ hui ve Jawˇ mawˇ Yeˍsuˆ ve awˬ meh awˬ me‸ awˬ hponˇ g'a tuˬ leh, yawˇ hta‸ pa taw nawˬ hui htawˇ awˬ me‸ awˬ hponˇ g'a tuˬ yoˬ.

2 Hteˇsaˍlawˇniˆ 2

1 Awˬ viˉ awˬ nyi teˇ hpaˍ-oˬ, ngaˬ hui nawˬ hui hta‸ chi hk'e lawˬ hkawˉ ve yoˬ. Ngaˬ hui ve Jawˇ mawˇ Yeˍsuˆ Hkri‸ k'aw‸ ya‸ la leh, yawˇ hta‸ hpuˇ da‸ tuˬ ngaˬ hui g'a hpawnˬ da‸ tuˬ ve awˬ lawn hta‸ nawˬ hui taˇ dawˇ hkiˉ. 2 Jawˇ mawˇ Yeˍsuˆ ve awˬ nyi gaˬ la peuˬ teh‸, awˬ ha awˬ hk'aw lo shu g'a mawˬ ve maˇ k'oˆ, shu k'oˆ chehˇ ve maˇ k'oˆ, ngaˬ hui li‸ chi hk'e bvuh‸ laˇ ve yoˬ teh‸ shu k'oˆ ve maˇ k'oˆ, chi teˇ hpaˍ hta‸ pa taw nawˬ hui nyi ma sho‸ sha‸ ve taˇ cawˬ piˇ. 3 Chaw teˇ g'aˇ ka‸ nawˬ hui hta‸ teˇ ceuˬ awˬ hk'aw lo ka‸ maˇ g'a heˍ yuˬ beˬ yuˬ g'a tuˬ, shaˍ ti‸ te-o. Awˬ lawn k'o, awˬ nyi oˇ ve maˇ gaˬ sheˍ g'uˇ suhˍ, awˉ lawˉ htaˇ G'uiˬ sha hta‸ hpfuhˆ k'ai ve teˇ ceuˬ hpeh‸ la tuˬ leh, venˇ baˆ awˬ shehˍ hpaˇ teh‸ k'oˆ ve, luˬ ve sheˆ ve awˬ yaˇ teˇ g'aˇ tawˆ la tuˬ yoˬ. 4 Chaw oˇ ve teˇ g'aˇ lehˬ, g'uiˬ sha teh‸ shu hk'a k'oˆ ve hk'a peu-eˬ hta‸ maˇ k'oˆ, oˉ k'oˍ pui ve awˬ ceuˬ hk'a peu-eˬ hta‸ maˇ k'oˆ, yawˇ g'aˇ hte‸ tawˍ taˍ leh, oˇ ve teˇ hpaˍ a‸ kehˉ yawˇ awˬ to hta‸ yawˇ taˍ uiˍ ve yoˬ. Yawˇ lehˬ G'uiˬ sha ve bon yehˬ lonˉ awˬ hk'aw lo mui taˍ leh, yawˇ awˬ to G'uiˬ sha hpeh‸ ve yoˬ teh‸ yawˇ k'oˆ ve yoˬ. 5 Ngaˬ nawˬ hui geh chehˇ sheˍ ve teˇ yanˇ, awˬ lawn chi teˇ hpaˍ ngaˬ nawˬ hui hta‸ hto laˇ peuˬ ve hta‸ nawˬ hui maˇ dawˇ nawˇ leh laˇ. 6 Chaw oˇ ve teˇ g'aˇ lehˬ, yawˇ ve awˬ yanˇ cawˇ ve teˇ yanˇ hk'a tawˍ lehˆ tawˆ la tuˬ, chi beu‸ yawˇ hta‸ hk'aˬ hk'e tawˍ taˍ chehˇ ve awˬ lawn nawˬ hui shiˍ ve yoˬ. 7 Awˬ lawn k'o, haiˬ ve teˇ ceuˬ lehˬ, chi beu‸ ka‸ baˬ kuiˬ lo kanˉ te chehˇ ve yoˬ. Ya‸ hk'aˇ, haiˬ ve teˇ ceuˬ hta‸ tawˍ taˍ shehˍ hpaˇ maˇ tawˆ k'ai ve ceh ceh, oˇ ve hta‸ yawˇ tawˍ taˍ tuˬ yoˬ. 8 Tawˍ taˍ shehˍ hpaˇ teˇ g'aˇ tawˆ k'ai peuˬ hk'aw‸ nawˉ, venˇ baˆ awˬ shehˍ hpaˇ oˇ ve teˇ g'aˇ hk'a tawˍ lehˆ tawˆ la tuˬ yoˬ. Jawˇ mawˇ Yeˍsuˆ lehˬ chaw oˇ ve hta‸ meuˆ pehˍ leh, yawˇ hk'a tawˍ lehˆ ya‸ la ve awˬ hk'aw lo chaw oˇ ve teˇ g'aˇ hta‸ te luˬ tuˬ yoˬ. 9 Chaw oˇ ve teˇ g'aˇ laˬ ve lehˬ, Saˍtanˍ te taˍ ve kanˉ hta‸ cuˇ leh laˬ tuˬ yoˬ. Kanˇ paˆ hk'a biˇ cawˬ ve awˬ hk'aw lo maˇ k'oˆ, shu hta‸ heˍ yuˬ tuˬ awˬ heˆ leh anˇ tuˬ teˇ hpaˍ hta‸ te ve awˬ hk'aw lo maˇ k'oˆ, 10 luˬ k'ai sheˆ k'ai tuˬ ve chaw oˇ ve teˇ hpaˍ hta‸ heˍ yuˬ beˬ yuˬ g'a tuˬ, maˇ hteˇ maˇ cawˇ ve teˇ ceuˬ le le hta‸ yehˇ ve awˬ hk'aw lo maˇ k'oˆ, yawˇ laˬ tuˬ yoˬ. Luˬ k'ai sheˆ k'ai tuˬ ve chaw teˇ hpaˍ lehˬ, htaiˍ hk'aw‸ ve hta‸ g'a tuˬ, hteˇ ve cawˇ ve teˇ ceuˬ hta‸ ha‸ ve nyi ma maˇ cawˬ ve pa taw, luˬ k'ai sheˆ k'ai tuˬ yoˬ. 11 Hk'e te leh, hteˇ ve cawˇ ve teˇ ceuˬ hta‸ maˇ yonˍ leh, maˇ hteˇ maˇ cawˇ ve teˇ ceuˬ awˬ hk'aw lo ha lehˬ ve chaw hk'a peu-eˬ hta‸ suhˉ taˆ piˇ tuˬ, 12 maˇ heˆ heˆ ve teˇ ceuˬ hta‸ yawˇ hui yonˍ tuˬ awˬ pon dawˇ ya‸ jaˇ ve teˇ ceuˬ G'uiˬ sha yawˇ hui awˬ hk'oˆ hta‸ gaˬ la piˇ lawˬ ve yoˬ. 13 Jawˇ mawˇ Yeˍsuˆ ha‸ ve awˬ viˉ awˬ nyi teˇ hpaˍ-oˬ, nawˬ hui awˬ pon G'uiˬ sha hta‸ ngaˬ hui hk'aˬ htaˆ ka‸ g'a chiˇ mvuh ve yoˬ. Awˬ lawn k'o, Awˬ ha hpu nawˬ hui hta‸ da‸ piˇ kehˬ piˇ leh, hteˇ ve cawˇ ve tawˇ hkawˇ hta‸ nawˬ hui yonˍ ve pa taw, htaiˍ hk'aw‸ ve hta‸ g'a tuˬ awˬ hkuiˉ puiˍ htaˇ ka‸ G'uiˬ sha nawˬ hui hta‸ leuˆ yuˬ taˍ peuˬ. 14 Oˇ hk'e hpeh‸ la tuˬ, ngaˬ hui maˍ ve ha lehˬ ve bon hkawˇ hta‸ G'uiˬ sha cuˇ leh nawˬ hui hta‸ kuˬ yuˬ taˍ peuˬ. Yawˇ chi hk'e te ve lehˬ, ngaˬ hui ve Jawˇ mawˇ Yeˍsuˆ Hkri‸ ve awˬ me‸ awˬ hponˇ hta‸ nawˬ hui g'a tuˬ awˬ pon te ve yoˬ. 15 Hk'e te leh awˬ viˉ awˬ nyi teˇ hpaˍ-oˬ, yeˬ chaweh chehˇ taˍ-o‸. Ngaˬ hui nawˬ hui hta‸ tawˇ yaw laˇ ve awˬ hk'aw lo maˇ k'oˆ, li‸ bvuh‸ laˇ ve awˬ hk'aw lo maˇ k'oˆ, ngaˬ hui hk'a maˍ laˇ ve awˬ liˇ awˬ hk'aˇ teˇ hpaˍ hta‸ hk'a deh‸ vawˆ taˍo‸. 16 Ngaˬ hui ve Jawˇ mawˇ Yeˍsuˆ Hkri‸ awˬ to leh ngaˬ hui ve Awˬ pa G'uiˬ sha lehˬ, nawˬ hui ve nyi ma hta‸ dawˇ sha la piˇ leh, da‸ ve kanˉ leh da‸ ve tawˇ teˇ ceuˬ le le awˬ hk'aw lo nawˬ hui hta‸ yeˬ la piˇ lawˬ-o‸. 17 Ngaˬ hui ve Awˬ pa G'uiˬ sha lehˬ, ngaˬ hui hta‸ ha‸ leh, yawˇ ve awˬ bon hta‸ pa taw co co taiˍ taiˍ dawˇ sha ve teˇ ceuˬ maˇ k'oˆ, dawˇ law ve teˇ ceuˬ maˇ k'oˆ, ngaˬ hui hta‸ pe‸ laˇ peuˬ ve yoˬ.

2 Hteˇsaˍlawˇniˆ 3

1 Awˬ viˉ awˬ nyi teˇ hpaˍ-oˬ, awˬ leh meuˇ ve tawˇ teˇ hkawˇ lehˬ chi hk'e yoˬ. Jawˇ mawˇ Yeˍsuˆ ve tawˇ hkawˇ lehˬ, nawˬ hui awˬ hk'aw lo haˆ haˆ bvuhˬ k'ai leh awˬ me‸ awˬ hponˇ g'a ve hk'e, teˇ kaˬ peuˬ teˇ kaˬ lo oˇ ve hk'a shuˍ shuˍ hpeh‸ la tuˬ ngaˬ hui awˬ pon bon lawˬ-o‸. 2 Te ponˬ te leuˉ ve chaw leh haiˬ ve chaw teˇ hpaˍ ve la‸ hk'aw lo ngaˬ hui g'a ponˬ tuˬ htawˇ bon lawˬ-o‸. Awˬ lawn k'o, chaw hk'a peu-eˬ yonˍ ve maˇ heˆ. 3 Ya‸ hk'aˇ, Jawˇ mawˇ Yeˍsuˆ lehˬ, ka ti‸ yeˬ ve yoˬ. Yawˇ lehˬ, nawˬ hui hta‸ yeˬ la piˇ lawˬ leh, haiˬ ve teˇ ceuˬ hta‸ nawˬ hui g'a ponˬ tuˬ, yawˇ ha‸ shaˉ laˇ tuˬ yoˬ. 4 Ngaˬ hui nawˬ hui hta‸ tawˇ piˇ taˍ ve teˇ hpaˍ hta‸ nawˬ hui te chehˇ ve awˬ hk'oˆ, awˬ g'uˇ suhˍ hpawˇ htawˇ nawˬ hui te tuˬ yoˬ teh‸, Jawˇ mawˇ Yeˍsuˆ hta‸ pa taw ngaˬ hui hk'a deh‸ yonˍ ve yoˬ. 5 Nawˬ hui ve nyi ma lehˬ, G'uiˬ sha ve ha‸ pehnˇ ve teˇ ceuˬ leh Hkri‸ ve nyi ma yeˬ ve teˇ ceuˬ awˬ hk'aw lo lo‸-e tuˬ, Jawˇ mawˇ Yeˍsuˆ nawˬ hui hta‸ sheh k'ai piˇ-oˆ. 6 Awˬ viˉ awˬ nyi teˇ hpaˍ-oˬ, ngaˬ hui ve Jawˇ mawˇ Yeˍsuˆ Hkri‸ ve awˬ meh awˬ hawˉ lo ngaˬ hui nawˬ hui hta‸ chi hk'e tawˇ piˇ ve yoˬ. Ngaˬ hui geh nawˬ hui g'a henˇ taˍ peuˬ ve awˬ liˇ awˬ hk'aˇ teˇ hpaˍ awˬ hk'aˇ suh maˇ k'ai leh te‸ chiˉ kanˉ maˇ te ve awˬ viˉ awˬ nyi hk'a peu-eˬ hta‸ awˬ chawˇ taˇ te. 7 Awˬ lawn k'o, ngaˬ hui te ve hta‸ nawˬ hui henˇ yuˬ leh te cawˇ ve yoˬ teh‸, nawˬ hui shiˍ chehˇ ve yoˬ. Ngaˬ hui nawˬ hui geh chehˇ ve teˇ yanˇ, ngaˬ hui kanˉ maˇ te leh hk'e leˇ chehˇ taˍ ve maˇ heˆ. 8 A shu teˇ g'aˇ ve caˇ tuˬ hta‸ maˇ k'oˆ, awˬ hpfuhˇ maˇ piˇ leh ngaˬ hui caˇ ve maˇ heˆ. Nawˬ hui teˇ g'aˇ ka‸ maˇ g'a hkeu‸ tuˬ, ngaˬ hui lehˬ tanˇ hkuinˇ tanˇ vanˇ kanˉ g'aˇ hte‸ te ve yoˬ. 9 Shu caˍ laˇ ve caˇ tuˬ hta‸ ngaˬ hui g'a caˇ tuˬ a hkaw-anˬ maˇ cawˬ ve pa taw ngaˬ hui chi hk'e te ve maˇ heˆ. Nawˬ hui ngaˬ hui hta‸ henˇ yuˬ tuˬ, nawˬ hui awˬ pon ngaˬ hui awˬ hk'aˇ chi hk'e te teh taˍ ve yoˬ. 10 Ngaˬ hui nawˬ hui geh chehˇ ve teˇ yanˇ, ngaˬ hui nawˬ hui hta‸ chi hk'e tawˇ piˇ taˍ peuˬ. Chaw teˇ g'aˇ g'aˇ kanˉ maˇ te gaˇ ve k'o, awˍ taˇ caˍ piˇ teh‸ k'oˆ taˍ ve yoˬ. 11 Nawˬ hui awˬ hk'aw lo chaw teˇ hpaˍ hpaˍ lehˬ, bawˬ jaˇ leh, shu ve kanˉ hta‸ ca sho‸ sha‸ piˇ leh, a shu yawˇ awˬ to kanˉ te‸ chiˉ maˇ te ve hta‸ ngaˬ hui g'a kaˇ ve yoˬ. 12 Chi hk'e ve chaw teˇ hpaˍ hta‸ Jawˇ mawˇ Yeˍsuˆ Hkri‸ awˬ hk'aw lo ngaˬ hui chi hk'e tawˇ piˇ leh awˬ g'aˇ pe‸ laˇ ve yoˬ. Gawˬ lehˍ chehˇ ve awˬ hk'aw lo a shu yawˇ ve kanˉ hta‸ te leh, a shu yawˇ ve caˇ tuˬ hta‸ caˇ-oˆ. 13 Awˬ viˉ awˬ nyi teˇ hpaˍ-oˬ, da‸ ve hta‸ te ve awˬ hk'aw lo awˬ g'aˇ taˇ nuˇ piˇ. 14 Li‸ chi awˬ hk'aw lo ngaˬ hui bvuh‸ taˍ ve tawˇ hkawˇ hta‸ chaw teˇ g'aˇ g'aˇ maˇ na yuˬ ve k'o, yawˇ hta‸ tawnˇ taˍ-o‸. Yawˇ g'a ya‸ taw tuˬ yawˇ hta‸ awˬ chawˇ taˇ te. 15 Ya‸ hk'aˇ, canˇ paˍ hk'a shuˍ shuˍ yawˇ hta‸ taˇ shawˍ taˍ. Awˬ viˉ awˬ nyi hk'a shuˍ shuˍ shawˍ taˍ leh, yawˇ hta‸ shaˍ ti‸ piˇ-oˆ. 16 Dawˇ sha piˇ shehˍ hpaˇ lehˬ, nawˬ hui hta‸ teˇ ceuˬ le le awˬ hk'aw lo hk'aˬ htaˆ ka‸ dawˇ sha gaˇ sha tuˬ cawˬ piˇ lawˬ-o‸. Jawˇ mawˇ Yeˍsuˆ nawˬ hui hk'a peu-eˬ geh chehˇ piˇ-oˆ. 17 Ngaˬ Pawˇlu‸ lehˬ, nawˬ hui hta‸ dawˇ nawˇ ve awˬ hk'aw lo tawˇ chi teˇ hkawˇ ngaˬ awˬ to nawˬ hui hta‸ bvuh‸ laˇ ve yoˬ. Ngaˬ bvuh‸ ve li‸ teˇ k'oˆ le le awˬ hk'aw lo nawˬ hui shiˍ hpeh‸ tuˬ, chi hk'e cawˬ ve yoˬ. Ngaˬ bvuh‸ ve la‸ meuˇ lehˬ, chi hk'e cawˬ ve yoˬ teh‸ shiˍ-o‸. 18 Ngaˬ hui ve Jawˇ mawˇ Yeˍsuˆ Hkri‸ ve awˬ bon awˬ shinˉ nawˬ hui hk'a peu-eˬ geh cawˬ piˇ-oˆ.

1 Tiˆmoˉseˍ 1

1 Ngaˬ hui ve Htaiˍ hk'aw‸ paˍ G'uiˬ sha leh, ngaˬ hui ve dawˇ law kuiˬ hpeh‸ ve Yeˍsuˆ Hkri‸ tawˇ piˇ taˍ ve hk'e, Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ lehˬ, yonˍ ve teˇ ceuˬ awˬ hk'aw lo ngaˬ ve yaˇ awˬ tehˬ awˬ na hpeh‸ ve Tiˆmoˉseˍ hta‸ li‸ chi bvuh‸ laˇ ve yoˬ. 2 Awˬ pa G'uiˬ sha leh ngaˬ hui ve Jawˇ mawˇ Yeˍsuˆ Hkri‸ ve awˬ bon awˬ shinˉ, ha k'aˉ puiˉ ve teˇ ceuˬ leh dawˇ sha gaˇ sha ve teˇ ceuˬ nawˬ geh cawˬ piˇ-oˆ. 3 Ngaˬ Maˍkeˍdawˇniˆ mvuhˇ miˬ lo k'ai ve teˇ yanˇ, Eˇfeˇsu‸ venˇ awˬ hk'aw lo nawˬ chehˇ taˉ tuˬ ngaˬ nawˬ hta‸ lawˬ hkawˉ ve yoˬ. Peun da‸ ve yonˍ hk'aˇ teˇ hpaˍ hta‸ yawˇ hui maˇ g'a maˍ piˇ tuˬ, chaw teˇ hpaˍ hpaˍ hta‸ tawˇ piˇ tuˬ awˬ pon ngaˬ nawˬ hta‸ chehˇ tcuh taˉ laˇ ve yoˬ. 4 Chi hk'oˆ ka‸, kaˇ puiˇ kaˇ lao teˇ hpaˍ hta‸ maˇ k'oˆ, awˬ ceuˬ awˬ hk'aˇ teˇ caˉ peuˬ teˇ caˉ k'oˆ leh peuˬ kuiˬ leh kuiˬ maˇ cawˬ ve teˇ hpaˍ hta‸ maˇ k'oˆ, maˇ g'a taˍ uiˍ tuˬ nawˬ yawˇ hui hta‸ tawˇ piˇ tuˬ awˬ pon htawˇ, ngaˬ nawˬ hta‸ chehˇ tcuh taˉ laˇ ve yoˬ. Awˬ ceuˬ chi teˇ hpaˍ lehˬ, G'uiˬ sha pe‸ laˇ ve yonˍ ve teˇ ceuˬ hta‸ caˉ da‸ ve awˬ hk'aˇ hpeh‸ ve maˇ heˆ. Tawˇ g'awˬ da‸ tuˬ ceh tiˉ te tawˆ la ve yoˬ. 5 Nawˬ yawˇ hui hta‸ tawˇ piˇ ve awˬ hk'aw lo, yawˇ hui ha‸ pehnˇ ve cawˬ la tuˬ ve hta‸ ngaˬ dawˇ law taˍ ve yoˬ. Ha‸ pehnˇ ve chi lehˬ, da‸ kehˬ ve nyi ma, venˇ baˆ taˍ kuiˬ maˇ cawˬ ve nyi ma leh, awˬ tehˬ awˬ na yonˍ ve nyi ma, chi teˇ hpaˍ awˬ hk'aw lo tawˆ la ve yoˬ. 6 Chaw teˇ hpaˍ hpaˍ lehˬ, awˬ ceuˬ chi teˇ hpaˍ hta‸ baˬ taˉ leh, awˬ bon maˇ cawˬ ve awˬ ceuˬ teˇ hpaˍ awˬ lawn hta‸ ceh tiˉ tawˇ yaw da‸ ve yoˬ. 7 Yawˇ hui lehˬ, awˬ liˇ tawˇ hkawˇ maˍ paˍ te gaˇ ve htawˇ, yawˇ hui hk'aˬ hk'e k'oˆ chehˇ ve hta‸ maˇ k'oˆ, nyi ma uiˍ ve awˬ hk'aw lo yawˇ hui k'oˆ chehˇ ve awˬ hk'aˇ teˇ hpaˍ hta‸ maˇ k'oˆ, yawˇ hui maˇ shiˍ. 8 Chaw teˇ g'aˇ g'aˇ lehˬ, awˬ liˇ tawˇ hkawˇ awˬ hk'aˇ suh hteˇ lehˍ te k'ai htaˇ, awˬ liˇ tawˇ hkawˇ lehˬ da‸ ve yoˬ teh‸, ngaˬ hui g'a shiˍ ve yoˬ. 9 Hteˇ ve cawˇ ve chaw hui awˬ pon awˬ liˇ tawˇ hkawˇ teh taˍ ve maˇ heˆ. Maˇ hteˇ maˇ cawˇ ve hta‸ te ve chaw, maˇ na yuˬ puiˉ ve chaw, G'uiˬ sha hta‸ maˇ yawˆ maˇ yan te ve chaw, venˇ baˆ te ve chaw, maˇ da‸ maˇ kehˬ ve chaw, bon liˇ hta‸ maˇ yawˆ maˇ yan ve chaw, awˬ pa awˬ e hta‸ dawˆ ve chaw, shu hta‸ tiˇ pehˍ ve chaw, 10 haˉ chawˇ haˉ paˆ te ve chaw, hawˉ hk'aˆ chawˇ hawˉ hk'aˆ peh‸ ve tzuhˆ ve hta‸ te ve chaw, chaw hta‸ hk'awˇ yuˬ ve chaw, heˍ ve chaw, shaˉ hkiˆ hkanˍ ve awˬ hk'aw lo heˍ ve chaw leh, cawˇ ve maˍ hk'aˇ hta‸ heh‸ hkehnˉ ve chaw, chaw chi teˇ hpaˍ awˬ pon awˬ liˇ tawˇ hkawˇ teh taˍ ve yoˬ teh‸ ngaˬ hui shiˍ ve yoˬ. 11 Ngaˬ chi hk'e k'oˆ ve lehˬ, ngaˬ hta‸ chiˇ a‸ laˇ taˍ ve awˬ me‸ awˬ hponˇ uiˍ ve ha lehˬ ve bon hkawˇ hta‸ hawˍ da‸ ve yoˬ. Ha lehˬ ve bon hkawˇ oˇ ve lehˬ, awˬ bon uiˍ ve G'uiˬ sha ve ha lehˬ ve bon hkawˇ hpeh‸ ve yoˬ. 12 Ngaˬ hta‸ awˬ g'aˇ pe‸ laˇ ve, ngaˬ hui ve Jawˇ mawˇ Yeˍsuˆ Hkri‸ hta‸ ngaˬ chiˇ mvuh ve yoˬ. Awˬ lawn k'o, kanˉ chi hta‸ te tuˬ ngaˬ ka ti‸ yeˬ ve yoˬ teh‸, yawˇ dawˇ taˍ leh ngaˬ hta‸ leuˆ yuˬ laˇ ve yoˬ. 13 Ngaˬ lehˬ ponˬ laˬ htaˇ Yeˍsuˆ hta‸ maˇ shawˍ maˇ caˆ k'oˆ ve, yawˇ hta‸ fawˉ mehˍ ve leh, hk'a mvuhˇ hk'a na k'oˆ ve htawˇ, ngaˬ maˇ shiˍ leh maˇ yonˍ ve awˬ hk'aw lo te ve pa taw, yawˇ ngaˬ hta‸ ha k'aˉ laˇ ve yoˬ. 14 Yeˍsuˆ Hkri‸ awˬ hk'aw lo cawˬ ve yonˍ ve leh ha‸ pehnˇ ve awˬ ceuˬ geh teˇ geh, ngaˬ hui ve Jawˇ mawˇ G'uiˬ sha ve awˬ bon hta‸ htawˇ, ca k'oˆ maˇ peuˬ htaˇ hk'a gaˬ ngaˬ g'a ve yoˬ. 15 Yeˍsuˆ Hkri‸ lehˬ, venˇ baˆ yaˇ hui hta‸ htaiˍ hk'aw‸ tuˬ awˬ pon miˬ guiˬ hk'oˆ lo laˬ ve yoˬ teh‸ k'oˆ taˍ ve tawˇ teˇ hkawˇ lehˬ, cawˇ jaˇ leh, awˬ tehˬ awˬ na ha‸ yuˬ cawˇ ve tawˇ hkawˇ hpeh‸ ve yoˬ. Venˇ baˆ yaˇ hui awˬ hk'aw lo ngaˬ lehˬ shu a‸ kehˉ venˇ baˆ uiˍ ve chaw teˇ g'aˇ hpeh‸ ve yoˬ. 16 Ya‸ hk'aˇ, Yeˍsuˆ Hkri‸ lehˬ, yawˇ hk'aˬ ma yeunˇ hkanˍ puiˉ jaˇ ve hta‸ hpeu‸ maˍ piˇ tuˬ awˬ pon, ngaˬ shu a‸ kehˉ venˇ baˆ uiˍ ve chaw teˇ g'aˇ hpeh‸ ve htawˇ, yawˇ ngaˬ hta‸ ha k'aˉ laˇ ve yoˬ. Hk'e te leh, yawˇ hta‸ yonˍ ve awˬ hk'aw lo co ti‸ ha ti‸ g'a tuˬ ve chaw teˇ hpaˍ awˬ pon ngaˬ lehˬ, henˇ kuiˬ jawˬ kuiˬ hpeh‸ ve yoˬ. 17 Co co taiˍ taiˍ uˉ peunˍ ve Hkunˉ hawˉ hkanˇ, maˇ luˬ maˇ sheˆ puiˉ leh, chaw yaˇ mawˬ maˇ hpeh‸ ve teˇ g'aˇ tiˉ ve G'uiˬ sha hta‸ co co taiˍ taiˍ chiˇ uiˍ chiˇ mvuh leh awˬ me‸ awˬ hponˇ cawˬ piˇ-oˆ. A menˬ. 18 Ngaˬ yaˇ Tiˆmoˉseˍ-oˬ, ponˬ laˬ htaˇ shu G'uiˬ sha awˬ tan te leh, nawˬ hta‸ caˉ da‸ ve G'uiˬ sha ve tawˇ hkawˇ teˇ hpaˍ k'oˆ taˍ ve hk'a shuˍ shuˍ, ngaˬ nawˬ hta‸ tawˇ chi hk'e pe‸ laˇ ve yoˬ. Yonˍ ve hta‸ vawˆ taˍ leh, venˇ baˆ taˍ tuˬ maˇ cawˬ ve nyi ma awˬ hk'aw lo, ponˬ laˬ htaˇ k'oˆ taˍ ve teˇ hpaˍ hta‸ cuˇ leh, da‸ ve teˇ ceuˬ awˬ pon ma‸ bawˆ loˬ. 19 Venˇ baˆ taˍ tuˬ maˇ cawˬ ve nyi ma hta‸ chaw teˇ hpaˍ hpaˍ baˬ taˉ ve pa taw, haw lo‸ k'oˍ luˬ k'ai ve hk'e, yawˇ hui yonˍ ve nyi ma htawˇ luˬ k'ai peuˬ. 20 Yawˇ hui awˬ hk'aw lo, Huˍmeˍnehˇ leh Aˍleˍsaˍduˆ chehˇ ve yoˬ. Yawˇ huiˉ maˬ lehˬ, G'uiˬ sha hta‸ maˇ shawˍ maˇ caˆ maˇ g'a k'oˆ tuˬ ve awˬ lawn henˇ yuˬ tuˬ, Saˍtanˍ ve la‸ sheh awˬ hk'aw lo ngaˬ yawˇ huiˉ maˬ hta‸ chiˇ a‸ piˇ peuˬ.

1 Tiˆmoˉseˍ 2

1 Hk'e te leh, awˉ lawˉ teˇ ceuˬ ngaˬ nawˬ hta‸ chi hk'e awˬ g'aˇ pe‸ laˇ ve yoˬ. G'uiˬ sha geh lawˬ hkawˉ ve, bon lawˬ ve, shu awˬ pon bon lawˬ ve leh chiˇ mvuh ve teˇ hpaˍ, chaw hk'a peu-eˬ awˬ pon te-o. 2 Ngaˬ hui lehˬ, dawˇ sha leh nyi ma gawˬ lehˍ ve awˬ hk'aw lo maˇ k'oˆ, G'uiˬ sha hta‸ hk'a deh‸ yawˆ yan leh, teˇ ceuˬ le le hta‸ hk'a deh‸ te ve awˬ hk'aw lo maˇ k'oˆ, a sha‸ te‸ hpeh‸ tuˬ hkunˉ hawˉ hkanˇ teˇ hpaˍ leh jawˇ mawˇ teˇ hpaˍ awˬ pon htawˇ oˇ hk'e te-o. 3 Oˇ hk'e te ve lehˬ, da‸ ve kanˉ hpeh‸ leh, ngaˬ hui ve Htaiˍ hk'aw‸ paˍ G'uiˬ sha nyi ma cawˇ ve kanˉ hpeh‸ ve yoˬ. 4 Chaw hk'a peu-eˬ htaiˍ hk'aw‸ ve hta‸ g'a tuˬ ve awˬ hk'oˆ ka‸, hteˇ ve cawˇ ve hta‸ shiˍ la tuˬ yawˇ heuˆ gaˇ ve yoˬ. 5 Awˬ lawn k'o, G'uiˬ sha teˇ g'aˇ tiˉ cawˬ leh, G'uiˬ sha leh chaw yaˇ awˬ kaˍ lo awˬ kaˍ te shehˍ hpaˇ teˇ g'aˇ tiˉ cawˬ ve yoˬ. Yawˇ lehˬ, chaw yaˇ hpeh‸ ve Yeˍsuˆ Hkri‸ yoˬ. 6 Yawˇ lehˬ, chaw hk'a peu-eˬ hta‸ htaiˍ hk'aw‸ piˇ tuˬ, yawˇ awˬ to tanˇ piˇ ve yoˬ. Awˬ yanˇ cawˇ ve awˬ hk'aw lo awˬ lawn oˇ ve hta‸ shaˉ hkiˆ hkanˍ ve teˇ ceuˬ tawˆ la ve yoˬ. 7 Awˬ lawn oˇ ve hta‸ shaˉ hkiˆ hkanˍ tuˬ awˬ pon, ngaˬ lehˬ bon maˍ paˍ leh tcuh yaˇ hpeh‸ la tuˬ maˇ k'oˆ, yonˍ ve leh hteˇ ve cawˇ ve awˬ hk'aw lo buiˇ shaˆ aˉ naˆ chaw hui hta‸ maˍ piˇ shehˍ hpaˇ hpeh‸ la tuˬ maˇ k'oˆ, G'uiˬ sha ngaˬ hta‸ leuˆ teh taˍ laˇ ve yoˬ. (Ngaˬ chi hk'e k'oˆ ve lehˬ, heˍ ve maˇ heˆ. Hteˇ ve cawˇ ve awˬ hk'aw lo ngaˬ k'oˆ ve yoˬ.) 8 Hk'e te leh, teˇ kaˬ le le lo chehˇ ve hawˉ hk'aˆ teˇ hpaˍ lehˬ, nyi ma zuhˆ ve leh tawˇ g'awˬ da‸ ve maˇ cawˬ ve awˬ hk'aw lo, da‸ kehˬ ve la‸ sheh chiˇ leh bon lawˬ tuˬ ve hta‸ ngaˬ heuˆ gaˇ ve yoˬ. 9 Chi hk'a shuˍ shuˍ yaˇ miˇ teˇ hpaˍ htawˇ, nyi ma nuˇ nehˬ ve leh nyi ma taˍ puiˉ ve awˬ hk'aw lo, keunˍ da‸ cawˇ da‸ ve veu‸ k'aˇ teˇ hpaˍ veu‸ deh ve hta‸ ngaˬ heuˆ gaˇ ve yoˬ. Uˉ hkeh mvuh hpeˇ ve, shi hk'eun tcuhˉ ve, piˉ ko-eˍ shehnˉ tcuhˉ ve leh, awˬ hpfuhˇ hk'aˆ ve veu‸ k'aˇ teˇ hpaˍ veu‸ deh ve hta‸ ngaˬ maˇ heuˆ gaˇ. 10 Ngaˬ G'uiˬ sha hta‸ yawˆ yan chehˇ ve yoˬ teh‸ k'oˆ ve yaˇ miˇ teˇ hpaˍ lehˬ, yawˇ hui te keunˍ ve hk'e, da‸ ve kanˉ teˇ hpaˍ hta‸ te tcuhˉ taˍ tuˬ ngaˬ heuˆ gaˇ ve yoˬ. 11 Yaˇ miˇ teˇ hpaˍ lehˬ, nyi ma nuˇ nehˬ taˍ leh, ta‸ iˉ gawˬ lehˍ chehˇ ve awˬ hk'aw lo henˇ yuˬ piˇ lawˬ-o‸. 12 Yaˇ miˇ lehˬ, shu hta‸ maˍ piˇ tuˬ maˇ k'oˆ, hawˉ hk'aˆ awˬ hk'oˆ hta‸ kanˇ paˆ cawˬ tuˬ maˇ k'oˆ, ngaˬ a hkaw-anˬ maˇ piˇ. Yawˇ ta‸ iˉ g'a chehˇ taˍ ve yoˬ. 13 Awˬ lawn k'o, Aˍdanˍ hta‸ awˉ lawˉ te hpanˍ leh, awˬ hk'aw‸ nawˉ Eˇva‸ hta‸ te hpanˍ ve yoˬ. 14 Chi hk'oˆ ka‸, Aˍdanˍ hta‸ heˍ g'a ve maˇ heˆ. Yaˇ miˇ hta‸ heˍ g'a leh, yaˇ miˇ oˇ ve te ya‸ ve yoˬ. 15 Ya‸ hk'aˇ, yonˍ ve, ha‸ pehnˇ ve, da‸ kehˬ ve leh nyi ma taˍ puiˉ ve, chi teˇ hpaˍ awˬ hk'aw lo yeˬ chehˇ ve k'o, yaˇ paw ve pa taw yawˇ g'a ponˬ tuˬ yoˬ.

1 Tiˆmoˉseˍ 3

1 Hkri‸ yaˇ awˬ moˍ hta‸ nyi ha‸ shaˉ shehˍ hpaˇ te ve kanˉ hta‸ ca ve chaw lehˬ, da‸ ve kanˉ hta‸ ca ve yoˬ teh‸ k'oˆ ve tawˇ chi teˇ hkawˇ cawˇ tehˬ ve yoˬ. 2 Hk'e te leh, Hkri‸ yaˇ awˬ moˍ hta‸ nyi ha‸ shaˉ shehˍ hpaˇ teˇ g'aˇ lehˬ, venˇ baˆ taˍ kuiˬ maˇ cawˬ ve chaw, awˬ miˇ ma teˇ g'aˇ tiˉ cawˬ ve chaw, shaˍ ti‸ taˍ puiˉ ve chaw, nyi ma taˍ puiˉ ve chaw, te keunˍ te cawˇ ve hta‸ te ve chaw, hkehˉ chaw hta‸ ha‸ yuˬ puiˉ ve chaw leh, maˍ piˇ puiˉ ve chaw teˇ g'aˇ g'a hpeh‸ ve yoˬ. 3 Yawˇ a pehˉ meuˇ g'uiˬ dawˬ ponˬ dawˬ leuˉ ve chaw leh, shu hta‸ ya‸ da‸ dawˆ da‸ ve chaw maˇ g'a hpeh‸. Ya‸ hk'aˇ, nyi ma nuˇ nehˬ ve chaw, shu hta‸ tawˇ maˇ g'awˬ da‸ puiˉ ve chaw, hpu hta‸ maˇ sheˉ lai puiˉ ve chaw teˇ g'aˇ g'a hpeh‸ ve yoˬ. 4 Yawˇ ve yehˬ k'a hta‸ hk'a deh‸ uˉ peunˍ leh, yehˬ yaˇ k'a yaˇ teˇ hpaˍ hta‸ hteˇ ve cawˇ ve awˬ hk'aw lo hk'a deh‸ te tuˬ maˍ g'aˇ ve chaw teˇ g'aˇ g'a hpeh‸ ve yoˬ. 5 Awˬ lawn k'o, a shu yawˇ ve yehˬ k'a hta‸ uˉ peunˍ maˇ g'aˇ ve chaw lehˬ, G'uiˬ sha ve Hkri‸ yaˇ awˬ moˍ hta‸ hk'aˬ hk'e te nyi ha‸ shaˉ g'a tuˬ le. 6 Yawˇ lehˬ, Hkri‸ yaˇ awˬ suhˉ maˇ g'a hpeh‸. Maˇ heˆ k'o, yawˇ nyi ma uiˍ la mvuh la leh neˇ haiˬ ve ciˍ yanˍ kuiˬ lo ce lo‸-e tuˬ yoˬ. 7 Awˬ baˬ hpawˇ chehˇ ve chaw mehˆ g'uˇ suhˍ yawˇ da‸ ve awˬ meh cawˬ ve chaw g'a hpeh‸ ve yoˬ. Maˇ heˆ k'o, shu hk'aiˉ leh venˇ baˆ taˍ ve hta‸ g'a hkanˍ leh, neˇ haiˬ va htaw taˍ ve hta‸ yaw tuˬ yoˬ. 8 Chi hk'a shuˍ shuˍ, ga piˇ shehˍ hpaˇ teˇ hpaˍ htawˇ, dawˇ yeˬ gaˇ yeˬ ve chaw g'a hpeh‸ ve yoˬ. Ha tehˬ nyiˇ maˬ cawˬ ve chaw, a pehˉ meuˇ g'uiˬ dawˬ ponˬ dawˬ leuˉ ve chaw, hpu shi mawˇ jeˬ hta‸ sheˉ lai ve chaw maˇ g'a hpeh‸. 9 Da‸ ve kehˬ ve shiˍ puiˉ ve nyi ma awˬ hk'aw lo, hpeu‸ maˍ laˇ peuˬ ve yonˍ hk'aˇ teˇ hpaˍ hta‸ hk'a deh‸ yonˍ yeˬ ve chaw g'a hpeh‸ ve yoˬ. 10 Yawˇ hui hta‸ htawˇ awˉ lawˉ lawˇ nyi sheˍ. Lawˇ nyi peuˬ leh, venˇ baˆ taˍ tuˬ maˇ cawˬ k'o, ga piˇ shehˍ hpaˇ te tcuh cawˇ ve yoˬ. 11 Chi hk'a shuˍ shuˍ, ga piˇ shehˍ ma teˇ hpaˍ htawˇ, dawˇ yeˬ gaˇ yeˬ ve chaw g'a hpeh‸ ve yoˬ. Ca hk'aiˉ ca k'oˆ puiˉ ve chaw maˇ g'a hpeh‸, shaˍ ti‸ cawˬ ve chaw leh teˇ ceuˬ le le awˬ hk'aw lo ka ti‸ yeˬ ve chaw g'a hpeh‸ ve yoˬ. 12 Ga piˇ shehˍ hpaˇ lehˬ, awˬ miˇ ma teˇ g'aˇ tiˉ g'a cawˬ ve yoˬ. A shu yawˇ ve awˬ yaˇ awˬ duˬ leh, a shu yawˇ ve yehˬ k'a hta‸ hk'a deh‸ uˉ peunˍ ve chaw g'a hpeh‸ ve yoˬ. 13 Awˬ lawn k'o, ga piˇ shehˍ hpaˇ ve kanˉ hta‸ hk'a deh‸ te ve chaw hui lehˬ, da‸ ve awˬ meh g'a ve awˬ hk'oˆ, Yeˍsuˆ Hkri‸ hta‸ yonˍ ve awˬ hk'aw lo, ha‸ hanˉ ve nyi ma ka‸ cawˬ la ve yoˬ. 14 Maˇ maw maw nawˬ geh laˬ tuˬ ngaˬ dawˇ law taˍ ve htawˇ, ngaˬ haˆ haˆ maˇ gaˬ la k'o, 15 G'uiˬ sha ve yehˬ k'a awˬ hk'aw lo hk'aˬ hk'e te keunˍ te cawˇ ve teˇ hpaˍ hta‸ nawˬ g'a shiˍ tuˬ, awˬ lawn chi teˇ hpaˍ ngaˬ nawˬ hta‸ bvuh‸ laˇ ve yoˬ. Yehˬ k'a oˇ ve lehˬ, te‸ chehˇ ve G'uiˬ sha ve awˬ moˍ hpeh‸ ve yoˬ. Awˬ moˍ oˇ ve lehˬ, hteˇ ve cawˇ ve awˬ ceuˬ awˬ pon, awˬ hkuiˉ daw leh awˬ hkuiˉ puiˍ hpeh‸ ve yoˬ. 16 Ngaˬ hui G'uiˬ sha hta‸ yawˆ yan leh oˉ k'oˍ pui ve awˬ liˇ teˇ hpaˍ lehˬ, tcuhˉ kuiˬ naˉ jaˇ tehˬ tehˬ ve yoˬ teh‸, ngaˬ htawˇ shaˉ hkiˆ hkanˍ hpeh‸ ve yoˬ. G'uiˬ sha lehˬ, awˬ suhˍ awˬ shaˍ pfuhˇ ve hta‸ hk'a tawˍ lehˆ g'a mawˬ peuˬ. Yawˇ hteˇ ve cawˇ ve awˬ lawn hta‸ Awˬ ha hpu shaˉ hkiˆ hkanˍ peuˬ. Mvuhˇ naw ma tcuh yaˇ teˇ hpaˍ yawˇ hta‸ g'a mawˬ peuˬ. Yawˇ awˬ lawn awˬ kaˍ awˬ nu chaw ceuˬ teˇ hpaˍ hta‸ bon maˍ piˇ peuˬ. Miˬ guiˬ yaˇ teˇ hpaˍ yawˇ hta‸ yonˍ peuˬ. Awˬ me‸ awˬ hponˇ awˬ hk'aw lo yawˇ taˆ k'o‸-e peuˬ.

1 Tiˆmoˉseˍ 4

1 Awˬ ha hpu lehˬ, chi hk'e hk'a tawˍ lehˆ k'oˆ taˍ ve, Awˬ leh meuˇ ve awˬ yanˇ awˬ hk'aw lo chaw teˇ hpaˍ hpaˍ lehˬ, yonˍ ve teˇ ceuˬ hta‸ baˬ taˉ tuˬ yoˬ. Yawˇ hui lehˬ, heˍ puiˉ ve awˬ ha teˇ hpaˍ leh, neˇ teˇ hpaˍ maˍ piˇ ve tawˇ hkawˇ teˇ hpaˍ hta‸ na yuˬ tuˬ yoˬ. 2 Heˍ puiˉ jaˇ ve chaw teˇ hpaˍ hta‸ neˇ haiˬ cuˇ leh oˇ hk'e maˍ piˇ tuˬ yoˬ. Yawˇ hui ve shiˍ puiˉ ve nyi ma hta‸ sho chiˆ ngawˉ piˇ leh hkeu‸ k'ai peuˬ ve hk'e hpeh‸ ve yoˬ. 3 Awˬ hpawˇ awˬ miˇ maˇ g'a heuˆ da‸ leh, caˇ tuˬ teˇ hpaˍ hpaˍ hta‸ maˇ g'a caˇ teh‸ yawˇ hui k'oˆ ve yoˬ. Caˇ tuˬ teˇ ceuˬ lehˬ, yonˍ ve leh hteˇ ve cawˇ ve hta‸ shiˍ ve chaw teˇ hpaˍ, G'uiˬ sha hta‸ chiˇ mvuh ve awˬ hk'aw lo g'a caˇ tuˬ ve awˬ pon G'uiˬ sha te hpanˍ taˍ ve htawˇ, yawˇ hui tawˍ taˍ ve yoˬ. 4 G'uiˬ sha te hpanˍ taˍ ve awˬ ceuˬ hk'a peu-eˬ lehˬ da‸ ve yoˬ. G'uiˬ sha hta‸ chiˇ mvuh ve awˬ hk'aw lo ha‸ yuˬ ve k'o, hk'aˬ ve teˇ ceuˬ hta‸ ka‸ maˇ g'a baˬ. 5 Awˬ lawn k'o, G'uiˬ sha ve tawˇ hkawˇ hta‸ pa taw maˇ k'oˆ, bon lawˬ ve hta‸ pa taw maˇ k'oˆ, awˬ ceuˬ oˇ ve teˇ hpaˍ da‸ peuˬ kehˬ peuˬ. 6 Nawˬ lehˬ, awˬ viˉ awˬ nyi teˇ hpaˍ hta‸ awˬ lawn chi teˇ hpaˍ hk'a deh‸ maˍ piˇ ve k'o, Yeˍsuˆ Hkri‸ ve da‸ ve kanˉ te shehˍ hpaˇ nawˬ hpeh‸ tuˬ yoˬ. Peuˬ leh, yonˍ hk'aˇ hta‸ caˉ da‸ ve tawˇ hkawˇ teˇ hpaˍ leh, nawˬ te k'ai chehˇ ve da‸ ve maˍ hk'aˇ hta‸ caˉ da‸ ve tawˇ hkawˇ teˇ hpaˍ hta‸ nawˬ hk'a deh‸ caˇ chehˇ dawˬ chehˇ ve chaw hpeh‸ tuˬ yoˬ. 7 A pi k'u teˇ hpaˍ k'aoˍ maˍ piˇ puiˉ ve, G'uiˬ sha hta‸ maˇ yawˆ yan ve kaˇ lao teˇ hpaˍ hta‸ taˇ na. G'uiˬ sha hta‸ yawˆ yan puiˉ la tuˬ, nawˬ awˬ to hk'a deh‸ te jawˬ-o‸. 8 Awˬ lawn k'o, awˬ suhˍ awˬ shaˍ hpawˇ awˬ g'aˇ cawˬ la tuˬ te jawˬ ve teˇ ceuˬ lehˬ, awˬ bon a ciˉ ceh tiˉ cawˬ ve yoˬ. Ya‸ hk'aˇ, G'uiˬ sha hta‸ yawˆ yan ve teˇ ceuˬ lehˬ, hk'a peu-eˬ awˬ hk'aw lo awˬ bon cawˬ ve yoˬ. Chi teˇ ca‸ na‸ awˬ pon maˇ k'oˆ, awˬ hk'aw‸ nawˉ teˇ ca‸ na‸ awˬ pon maˇ k'oˆ, awˬ tehˬ awˬ na awˬ bon cawˬ ve yoˬ teh‸ g'a shiˍ ve yoˬ. 9 Tawˇ hkawˇ chi lehˬ, cawˇ jaˇ leh awˬ tehˬ awˬ na ha‸ yuˬ cawˇ ve tawˇ hkawˇ hpeh‸ ve yoˬ. 10 Te‸ chehˇ ve G'uiˬ sha hta‸ ngaˬ hui dawˇ law tcuhˉ taˍ ve hta‸ pa taw, ngaˬ hui g'aˇ hte‸ coˇ caˇ leh kanˉ te chehˇ ve yoˬ. Yawˇ lehˬ, chaw hk'a peu-eˬ ve Htaiˍ hk'aw‸ paˍ hpeh‸ ve yoˬ. Yonˍ ve chaw teˇ hpaˍ awˬ pon leuˉ leh Htaiˍ hk'aw‸ paˍ hpeh‸ ve yoˬ. 11 Awˬ lawn chi teˇ hpaˍ shu hta‸ tawˇ piˇ leh maˍ piˇ-oˆ. 12 Nawˬ yaˇ nehˬ hpeh‸ ve hta‸ chaw teˇ g'aˇ ka‸ maˇ shawˍ maˇ caˆ maˇ g'a k'oˆ maˇ g'a te tuˬ shaˍ ti‸ te-o. Tawˇ yaw ve awˬ hk'aw lo maˇ k'oˆ, kanˉ te ve awˬ hk'aw lo maˇ k'oˆ, ha‸ pehnˇ ve, yonˍ ve leh da‸ kehˬ ve awˬ hk'aw lo maˇ k'oˆ, nawˬ lehˬ yonˍ ve chaw teˇ hpaˍ awˬ pon henˇ kuiˬ jawˬ kuiˬ hpeh‸ piˇ-oˆ. 13 Ngaˬ gaˬ la htaˇ hk'a gaˬ, shu hta‸ Li‸ hpu g'aw maˍ piˇ ve, awˬ g'aˇ piˇ ve leh maˍ piˇ ve teˇ hpaˍ hta‸ coˇ caˇ leh te chehˇ taˍ-o‸. 14 Awˬ hoˉ chaw mawˇ teˇ hpaˍ nawˬ awˬ hk'oˆ hta‸ la‸ sheh taˍ ve teˇ yanˇ, yawˇ hui lehˬ G'uiˬ sha awˬ tan te leh yawˇ ve tawˇ hkawˇ yaw ve awˬ hk'aw lo nawˬ hta‸ piˇ taˍ ve la‸ shawnˍ hta‸ nawˬ hk'a deh‸ yehˇ leh te-o mehˍ. 15 Nawˬ kanˉ te ve awˬ hk'aw lo uiˍ la mvuh la chehˇ ve hta‸ chaw hk'a peu-eˬ mawˬ hpeh‸ tuˬ, chi teˇ hpaˍ hta‸ nyi ma pfuhˇ ve awˬ hk'aw lo g'aˇ hte‸ te-o. 16 Nawˬ awˬ to hta‸ maˇ k'oˆ, nawˬ maˍ piˇ ve awˬ ceuˬ teˇ hpaˍ hta‸ maˇ k'oˆ, shaˍ ti‸ te leh, chi teˇ hpaˍ awˬ hk'aw lo yeˬ chehˇ-oˆ. Nawˬ chi hk'e te ve k'o, nawˬ awˬ to hta‸ maˇ k'oˆ, nawˬ ve hkawˇ hta‸ g'a kaˇ ve chaw teˇ hpaˍ hta‸ maˇ k'oˆ, nawˬ htaiˍ hk'aw‸ piˇ tuˬ yoˬ.

1 Tiˆmoˉseˍ 5

1 Chaw mawˇ hta‸ deˇ maˍ piˇ ve taˇ te. Awˬ pa hk'a shuˍ shuˍ shawˍ taˍ leh, yawˇ hui hta‸ awˬ g'aˇ piˇ-oˆ. Yaˇ nehˬ teˇ hpaˍ hta‸ awˬ viˉ awˬ nyi hk'e shawˍ taˍ-o‸. 2 Chaw mawˇ ma teˇ hpaˍ hta‸ awˬ e hk'a shuˍ shuˍ shawˍ taˍ leh, yaˇ nehˬ hpeh‸ ve yaˇ miˇ teˇ hpaˍ hta‸, da‸ kehˬ ve nyi ma hk'a biˇ cawˬ ve awˬ hk'aw lo, awˬ viˉ awˬ nyi hk'e shawnˍ taˍ-o‸. 3 Ga piˇ paˍ maˇ cawˬ ve mehˇ chawˇ ma teˇ hpaˍ hta‸ hk'a deh‸ nyi ha‸ shaˉ-oˆ. 4 Mehˇ chawˇ ma lehˬ, awˬ yaˇ maˇ heˆ k'o awˬ hawehˍ cawˬ ve k'o, yaˇ oˇ ve teˇ hpaˍ lehˬ a shu yawˇ yehˬ hk'aw ve chaw teˇ hpaˍ hta‸ ha‸ shaˉ leh, awˬ pa awˬ e awˬ puˍ awˬ pi teˇ hpaˍ hta‸ awˬ bon k'aw‸ te hk'aw‸ piˇ ve teˇ ceuˬ lehˬ, G'uiˬ sha hta‸ yawˆ yan ve awˬ liˇ awˬ hk'aw lo awˉ lawˉ teˇ ceuˬ hpeh‸ ve yoˬ teh‸, yawˇ hui hta‸ maˍ piˇ-oˆ. Awˬ lawn k'o, chi hk'e ha‸ shaˉ piˇ ve teˇ ceuˬ hta‸ G'uiˬ sha nyi ma cawˇ ve yoˬ. 5 Ga piˇ paˍ maˇ cawˬ leh, yawˇ teˇ g'aˇ tiˉ chehˇ taˍ ve mehˇ chawˇ ma lehˬ, G'uiˬ sha hta‸ dawˇ law chehˇ leh, tanˇ hkuinˇ tanˇ vanˇ htaˇ lawˬ hkawˉ ve awˬ hk'aw lo bon lawˬ tcuhˉ taˍ ve yoˬ. 6 Ya‸ hk'aˇ, ha lehˬ tuˬ hta‸ ceh tiˉ ca ve mehˇ chawˇ ma lehˬ, yawˇ te‸ chehˇ ve htawˇ, suh taˍ peuˬ ve chaw hpeh‸ ve yoˬ. 7 Shu venˇ baˆ taˍ kuiˬ maˇ g'a cawˬ tuˬ, mehˇ chawˇ ma hui ve awˬ yaˇ awˬ duˬ teˇ hpaˍ hta‸ oˇ hk'e tawˇ piˇ-oˆ. 8 Chaw teˇ g'aˇ g'aˇ lehˬ, a shu yawˇ ve awˬ ceuˬ awˬ hk'aˇ hta‸ maˇ k'oˆ, leuˉ leh a shu yawˇ ve yehˬ hk'aw ve chaw hta‸ maˇ k'oˆ, maˇ ha‸ shaˉ ve k'o, yawˇ lehˬ yonˍ ve teˇ ceuˬ hta‸ baˬ taˉ peuˬ. Yawˇ lehˬ, maˇ yonˍ ve chaw a‸ kehˉ haiˬ ve yoˬ. 9 A sha‸ hkaw‸ chi hk'aw‸ maˇ gaˬ sheˍ ve mehˇ chawˇ ma teˇ hpaˍ ve awˬ meh hta‸ mehˇ chawˇ ma ve caˇ lanˇ awˬ hk'aw lo taˇ bvuh‸ keu. 10 Awˬ hpawˇ teˇ g'aˇ tiˉ heuˆ jaw ve, da‸ ve kanˉ te ve yoˬ teh‸ shu shaˉ hkiˆ hkanˍ ve, awˬ yaˇ awˇ duˬ hta‸ ha‸ shaˉ ve, hkehˉ chaw hta‸ ha‸ yuˬ ve, Hkri‸ yaˇ hui ve hkui sheh hta‸ tsuhˇ piˇ ve, tu‸ ve hkanˍ ve chaw teˇ hpaˍ hta‸ ga piˇ ve leh, da‸ ve kanˉ teˇ ceuˬ le le hta‸ hk'a deh‸ te ve mehˇ chawˇ ma hpeh‸ ve k'o, caˇ lanˇ awˬ hk'aw lo awˬ meh bvuh‸ keu-o. 11 Ya‸ hk'aˇ, yaˇ nehˬ hpeh‸ ve mehˇ chawˇ ma teˇ hpaˍ hta‸ caˇ lanˇ awˬ hk'aw lo awˬ meh taˇ bvuh‸ keu. Awˬ lawn k'o, yawˇ hui Hkri‸ hta‸ hpfuhˆ baˬ taˉ ve teˇ yanˇ, awˬ hpawˇ k'aw‸ heuˆ gaˇ la tuˬ yoˬ. 12 Hk'e te leh, awˉ lawˉ htaˇ ve ka ti‸ hta‸ yawˇ hui te luˬ ve pa taw, ciˍ yanˍ ve hta‸ g'a hkanˍ ve yoˬ. 13 Chi hk'oˆ ka‸, yawˇ hui teˇ yehˬ peuˬ teˇ yehˬ lo k'ai leh, bawˬ la puiˉ ve yoˬ. Bawˬ ve ceh tiˉ maˇ heˆ. Yawˇ hui tawˇ maˇ leh, k'oˆ maˇ keunˍ ve teˇ hpaˍ hta‸ yawˇ hui k'oˆ ve yoˬ. Yawˇ hui hta‸ maˇ caˉ da‸ ve shu te kuiˬ hta‸ ca sho‸ sha‸ piˇ ve chaw hpeh‸ ve yoˬ. 14 Hk'e te leh, yaˇ nehˬ hpeh‸ ve mehˇ chawˇ ma teˇ hpaˍ lehˬ, awˬ hpawˇ k'aw‸ heuˆ tuˬ, yaˇ paw la piˇ tuˬ leh, a shu yawˇ ve yehˬ k'a hta‸ hk'a deh‸ nyi ha‸ shaˉ tuˬ ngaˬ heuˆ gaˇ ve yoˬ. Chi hk'e te ve k'o, canˇ paˍ lehˬ ngaˬ hui hta‸ maˇ shawˍ maˇ caˆ k'oˆ maˇ hpeh‸. 15 Awˬ lawn k'o, chi beu‸ ka‸ mehˇ chawˇ ma teˇ hpaˍ hpaˍ ya‸ k'ai leh, Saˍtanˍ awˬ hk'aˇ suh k'ai peuˬ. 16 Yonˍ ve yaˇ miˇ teˇ g'aˇ lehˬ, yawˇ hta‸ caˉ da‸ ve mehˇ chawˇ ma teˇ hpaˍ cawˬ ve k'o, yawˇ awˬ to yawˇ hui hta‸ ga piˇ cawˇ ve yoˬ. Hkri‸ yaˇ awˬ moˍ lehˬ, ga piˇ paˍ maˇ cawˬ ve mehˇ chawˇ ma hpeh‸ ve chaw teˇ hpaˍ hta‸ ga piˇ hpeh‸ tuˬ, awˬ vuiˬ chi Hkri‸ yaˇ awˬ moˍ awˬ hk'oˆ hta‸ taˇ gaˬ piˇ. 17 A shu yawˇ ve kanˉ hk'a deh‸ te ve awˬ hoˉ chaw mawˇ teˇ hpaˍ hta‸ nyiˇ pun yawˆ yan cawˇ ve yoˬ. Bon maˍ ve leh shu hta‸ maˍ piˇ ve kanˉ hta‸ te ve awˬ hoˉ chaw mawˇ teˇ hpaˍ hta‸ leuˉ leh yawˆ yan cawˇ ve yoˬ. 18 Awˬ lawn k'o, Li‸ hpu hk'aw k'oˆ taˍ ve, Caˬ shiˍ naˆ chehˇ ve nuˇ maw‸ k'aw hta‸ nawˬ maˇ g'a hoˆ taˍ. Peuˬ leh, Kanˉ te shehˍ hpaˇ lehˬ, g'aˇ hpfuhˇ g'a cawˇ ve yoˬ teh‸ k'oˆ taˍ ve yoˬ. 19 Shaˉ hkiˆ hkanˍ shehˍ hpaˇ nyiˇ g'aˇ, maˇ heˆ k'o shehˆ g'aˇ maˇ cawˬ ve k'o, awˬ hoˉ chaw mawˇ awˬ hk'oˆ hta‸ venˇ baˆ taˍ ve chaw teˇ hpaˍ ve tawˇ hkawˇ hta‸ taˇ na. 20 Venˇ baˆ te tcuhˉ taˍ ve chaw teˇ hpaˍ hta‸ chaw hk'a peu-eˬ mehˆ g'uˇ suhˍ deˇ maˍ piˇ-oˆ. Oˇ hk'e te ve k'o, awˬ kaˍ awˬ nu chaw teˇ hpaˍ htawˇ kawˆ ve nyi ma cawˬ tuˬ yoˬ. 21 Awˬ ceuˬ chi teˇ hpaˍ hta‸ te ve teˇ yanˇ, maˇ fuiˍ maˇ pehˬ leh, shu ve mehˆ hpfuhˇ hta‸ maˇ nyi ve awˬ hk'aw lo te-o teh‸, G'uiˬ sha leh Yeˍsuˆ Hkri‸ mehˆ g'uˇ suhˍ maˇ k'oˆ, leuˆ yuˬ taˍ ve mvuhˇ naw ma tcuh yaˇ teˇ hpaˍ mehˆ g'uˇ suhˍ maˇ k'oˆ, ngaˬ nawˬ hta‸ tawˇ piˇ ve yoˬ. 22 A shu hta‸ ka‸ aˉ yaˇ haˆ haˆ taˇ piˇ. Awˬ kaˍ awˬ nu chaw teˇ hpaˍ venˇ baˆ te chehˇ ve hta‸ nawˬ a ciˉ ka‸ taˇ caˉ da‸. Nawˬ awˬ to da‸ lehˍ kehˬ lehˍ chehˇ taˍ-o‸. 23 Chi hk'aw‸ nawˉ iˉ kaˆ ceh tiˉ taˇ dawˬ. Nawˬ ve g'oˇ peˬ awˬ pon leh, nawˬ teˇ hkui teˇ hkui naˬ chehˇ ve awˬ pon, a pehˉ meuˇ g'uiˬ hta‸ ka‸ a ciˉ dawˬ-o‸. 24 Chaw teˇ hpaˍ hpaˍ ve venˇ baˆ hk'a tawˍ lehˆ tawˆ la leh, suhˉ jehˬ kuiˬ lo yawˇ hui hta‸ sheh k'ai chehˇ ve yoˬ. Chaw teˇ hpaˍ hpaˍ ve venˇ baˆ awˬ hk'aw‸ nawˉ tawˆ la tuˬ yoˬ. 25 Oˇ ve hk'a shuˍ shuˍ, da‸ ve kanˉ teˇ hpaˍ htawˇ hk'a tawˍ lehˆ tawˆ la ve yoˬ. Chi beu‸ hk'a tawˍ lehˆ maˇ tawˆ la sheˍ ve teˇ hpaˍ hta‸ hk'aˬ htaˆ ka‸ faˉ taˍ g'a tuˬ ve maˇ heˆ.

1 Tiˆmoˉseˍ 6

1 G'uiˬ sha ve awˬ meh hta‸ maˇ k'oˆ, ngaˬ hui maˍ piˇ ve teˇ hpaˍ hta‸ maˇ k'oˆ, shu maˇ shawˍ maˇ caˆ maˇ g'a k'oˆ tuˬ, shu vuiˬ taˍ ve awˬ ceˬ g'a hpeh‸ chehˇ ve chaw teˇ hpaˍ lehˬ, a shu yawˇ ve awˬ shehˍ hpaˇ hta‸ teˇ ceuˬ le le awˬ hk'aw lo yawˆ yan keunˍ ve yoˬ teh‸ shiˍ cawˇ ve yoˬ. 2 Hkri‸ yaˇ hpeh‸ ve awˬ shehˍ hpaˇ awˬ hawˉ lo g'a chehˇ ve awˬ ceˬ teˇ hpaˍ lehˬ, a shu yawˇ awˬ shehˍ hpaˇ ve awˬ viˉ awˬ nyi hpeh‸ la peuˬ ve pa taw, yawˇ hui hta‸ maˇ shawˍ maˇ caˆ te maˇ cawˇ. Yawˇ hui awˬ pon leuˉ leh kanˉ hk'a deh‸ te cawˇ ve yoˬ. Awˬ lawn k'o, yawˇ hui oˇ hk'e te ve teˇ yanˇ, ha‸ ve Hkri‸ yaˇ hpeh‸ ve awˬ shehˍ hpaˇ teˇ hpaˍ lehˬ, awˬ bon g'a ve yoˬ. 3 Awˬ lawn chi teˇ hpaˍ hta‸ nawˬ maˍ piˇ leh awˬ g'aˇ piˇ-oˆ. Chaw teˇ g'aˇ g'aˇ lehˬ, peun da‸ ve teˇ ceuˬ shu hta‸ maˍ piˇ leh, ngaˬ hui ve Jawˇ mawˇ Yeˍsuˆ Hkri‸ ve da‸ jaˇ biˇ jaˇ ve tawˇ hkawˇ leh, G'uiˬ sha hta‸ yawˆ yan ve awˬ lawn maˍ piˇ ve tawˇ hkawˇ hta‸ yawˇ maˇ ha‸ yuˬ ve k'o, 4 yawˇ lehˬ nyi ma uiˍ leh, te‸ chiˉ ka‸ maˇ shiˍ ve chaw hpeh‸ ve yoˬ. Tawˇ na da‸ leh, tawˇ hkawˇ teˇ hpaˍ awˬ lawn tawˇ g'awˬda‸ ve hta‸ ceh tiˉ yawˇ te gaˇ tcuhˉ taˍ ve yoˬ. Oˇ hk'e te ve teˇ ceuˬ lehˬ, hkawehˉ da‸ ve, deˇ da‸ ya‸ da‸ ve, maˇ shawˍ maˇ caˆ k'oˆ ve, shu awˬ lawn haiˬ ve hta‸ ca dawˇ ve leh, 5 da‸ ve hta‸ dawˇ nyi puiˉ ve teˇ ceuˬ luˬ k'ai sheˆ k'ai ve awˬ hk'oˆ ka‸, hteˇ ve cawˇ ve tawˇ hkawˇ a ciˉ ka‸ maˇ cawˬ ve chaw teˇ hpaˍ tawˇ g'awˬ da‸ ve, chi teˇ hpaˍ hta‸ te tawˆ la puiˉ ve yoˬ. G'uiˬ sha hta‸ yawˆ yan ve pa taw awˬ yawˬ g'a tuˬ yoˬ teh‸ yawˇ hui dawˇ taˍ ve yoˬ. 6 Awˬ tehˬ k'oˆ k'o, G'uiˬ sha hta‸ yawˆ yan ve awˬ hk'aw lo nyi hk'aˇ suh ve k'o, awˬ yawˬ uiˍ jaˇ ve yoˬ. 7 Awˬ lawn k'o, chi miˬ guiˬ hk'oˆ lo ngaˬ hui lo‸ la ve teˇ yanˇ, te‸ chiˉ maˇ yuˬ laˬ leh, ngaˬ hui tawˆ k'ai ve teˇ yanˇ htaˇ htawˇ, te‸ chiˉ yuˬ k'ai maˇ hpeh‸. 8 Hk'e te leh, caˇ tuˬ dawˬ tuˬ leh veu‸ tuˬ k'aˇ tuˬ cawˬ ve k'o, ngaˬ hui nyi hk'aˇ suh tuˬ yoˬ. 9 Paw sha la gaˇ ve chaw teˇ hpaˍ lehˬ, venˇ baˆ beˬ ve, va htaw taˍ ve leh, cuˇ yiˍ maˇ cawˬ ve awˬ hk'oˆ ka‸ te luˬ puiˉ ve sheˉ lai ve laiˉ ceuˬ awˬ hk'aw lo ce lo‸-e ve yoˬ. Sheˉ lai ve oˇ ve teˇ hpaˍ lehˬ, chaw yaˇ hta‸ luˬ kuiˬ sheˆ kuiˬ lo k'a piˇ lawˬ ve yoˬ. 10 Awˬ lawn k'o, hpu hta‸ sheˉ lai ve teˇ ceuˬ lehˬ, haiˬ ve hk'a peu-eˬ ve awˬ hkuiˉ puiˍ hpeh‸ ve yoˬ. Chaw teˇ hpaˍ hpaˍ lehˬ, hpu hta‸ sheˉ lai ve hta‸ pa taw, yonˍ ve teˇ ceuˬ hta‸ hpfuhˆ baˬ taˉ leh, dawˇ haˍ tuˬ laiˉ ceuˬ yawˇ hui ve nyi ma hta‸ juˆ pawnˍ peuˬ ve yoˬ. 11 G'uiˬ sha ve chaw-oˬ, nawˬ lehˬ awˬ ceuˬ oˇ ve teˇ hpaˍ hta‸ jaw k'ai-o. Hteˇ ve cawˇ ve teˇ ceuˬ, G'uiˬ sha hta‸ yawˆ yan ve teˇ ceuˬ, yonˍ ve teˇ ceuˬ, ha‸ pehnˇ ve teˇ ceuˬ, nyi ma yeˬ ve teˇ ceuˬ leh, nyi ma nuˇ nehˬ ve teˇ ceuˬ, awˬ ceuˬ chi teˇ hpaˍ awˬ hk'aˇ suh hk'a deh‸ k'ai-o. 12 Yonˍ ve hta‸ caˉ da‸ ve, da‸ ve bawˆ da‸ tuˬ teˇ ceuˬ hta‸ bawˆ da‸ chehˇ-oˆ. Co ti‸ ha ti‸ hta‸ hk'a deh‸ vawˆ taˍ-o‸. Oˇ ve hta‸ g'a tuˬ awˬ pon G'uiˬ sha nawˬ hta‸ kuˬ yuˬ leh, shaˉ hkiˆ hkanˍ shehˍ hpaˇ laiˉ g'aˇ mehˆ g'uˇ suhˍ da‸ ve shaˉ hkiˆ nawˬ hkanˍ taˍ peuˬ. 13 Awˬ ceuˬ hk'a peu-eˬ hta‸ a sha‸ te‸ piˇ shehˍ hpaˇ G'uiˬ sha mehˆ g'uˇ suhˍ maˇ k'oˆ, jawˇ mawˇ Poˍtiˆ Piˉla‸ g'uˇ suhˍ da‸ ve shaˉ hkiˆ hkanˍ ve Yeˍsuˆ Hkri‸ mehˆ g'uˇ suhˍ maˇ k'oˆ, ngaˬ nawˬ hta‸ tawˇ chi hk'e pe‸ laˇ ve yoˬ. 14 Ngaˬ hui ve Jawˇ mawˇ Yeˍsuˆ Hkri‸ k'aw‸ tawˆ la htaˇ hk'a gaˬ, nawˬ ya‸ kuiˬ leh venˇ baˆ taˍ kuiˬ a ciˉ ka‸ maˇ cawˬ ve awˬ hk'aw lo, yawˇ tawˇ piˇ taˍ ve hta‸ hk'a deh‸ na yuˬ leh te k'ai-o. 15 G'uiˬ sha nyi ma cawˇ ve awˬ yanˇ awˬ hk'aw lo, yawˇ hta‸ k'aw‸ tawˆ la piˇ tuˬ yoˬ. G'uiˬ sha lehˬ, awˬ bon uiˍ shehˍ hpaˇ hpeh‸ leh, yawˇ teˇ g'aˇ tiˉ uˉ peunˍ shehˍ hpaˇ hpeh‸ ve yoˬ. Yawˇ lehˬ, hkunˉ hawˉ hkanˇ awˬ hk'oˆ Hkunˉ hawˉ hkanˇ hpeh‸ leh, jawˇ mawˇ awˬ hk'oˆ Jawˇ mawˇ hpeh‸ ve yoˬ. 16 Yawˇ ceh tiˉ co co taiˍ taiˍ a sha‸ te‸ chehˇ leh, a shu teˇ g'aˇ ka‸ awˬ paˇ lo k'ai maˇ hpeh‸ ve awˬ g'euˆ awˬ hk'aw lo chehˇ taˍ ve yoˬ. Chaw teˇ g'aˇ ka‸ yawˇ hta‸ maˇ mawˬ jaw leh, mawˬ maˇ hpeh‸ ve yoˬ. Co co taiˍ taiˍ awˬ me‸ awˬ hponˇ leh kanˇ paˆ yawˇ geh cawˬ piˇ-oˆ. A menˬ. 17 Chi teˇ ca‸ na‸ awˬ hk'aw lo paw sha ve chaw teˇ hpaˍ nyi ma maˇ g'a uiˍ tuˬ leh, luˬ puiˉ sheˆ puiˉ ve mawˇ jeˬ teˇ hpaˍ hta‸ maˇ g'a dawˇ law tuˬ, yawˇ hui hta‸ tawˇ piˇ-oˆ. Ngaˬ hui g'a ha lehˬ tuˬ awˬ pon awˬ ceuˬ hk'a peu-eˬ pe‸ laˇ shehˍ hpaˇ G'uiˬ sha hta‸ ceh tiˉ g'a dawˇ law tuˬ, yawˇ hui hta‸ tawˇ piˇ-oˆ. 18 Yawˇ hui lehˬ, shu hta‸ awˬ bon te piˇ tuˬ maˇ k'oˆ, da‸ ve kanˉ maˇ chaweh te tuˬ maˇ k'oˆ, shu hta‸ pehˬ piˇ tanˇ piˇ ve awˬ hk'aw lo maˇ chaweh piˇ tuˬ maˇ k'oˆ, yawˇ hui hta‸ tawˇ piˇ-oˆ. 19 Awˬ tehˬ awˬ na yeˬ ve a sha‸ te‸ ve teˇ ceuˬ hta‸ vawˆ taˍ hpeh‸ tuˬ, awˬ hk'aw‸ nawˉ teˇ ca‸ na‸ awˬ hk'aw lo yawˇ hui da‸ ve awˬ hkuiˉ puiˍ cawˬ tuˬ ve awˬ pon, da‸ ve awˬ ceuˬ teˇ hpaˍ hta‸ shaw hpoˆ taˍ-o‸ teh‸, yawˇ hui hta‸ tawˇ piˇ-oˆ. 20 Tiˆmoˉseˍ-oˬ, nawˬ hta‸ a‸ piˇ taˍ ve awˬ ceuˬ hta‸ hk'a deh‸ ha‸ shaˉ taˍ-o‸. Cuˇ yiˍ cawˬ ve teh‸ k'oˆ ve htawˇ, maˇ heˆ heˆ ve cuˇ yiˍ teˇ ceuˬ hta‸ caˉ da‸ ve, G'uiˬ sha hta‸ maˇ yawˆ yan ve awˬ hk'aw lo hk'e leˇ k'oˆ guiˇ ve teˇ hpaˍ leh tawˇ g'awˬ da‸ ve teˇ hpaˍ hta‸ jaw k'ai-o. 21 Maˇ heˆ heˆ ve cuˇ yiˍ oˇ ve hta‸ chaw teˇ hpaˍ hpaˍ hkanˍ yuˬ ve hta‸ pa taw, yonˍ ve hta‸ caˉ da‸ ve awˬ hk'aw lo yawˇ hui ya‸ k'aw ya‸ k'ai peuˬ. Nawˬ hui geh awˬ bon cawˬ piˇ-oˆ.

2 Tiˆmoˉseˍ 1

1 Yeˍsuˆ Hkri‸ hta‸ pa taw co ha g'a te‸ ve yoˬ teh‸ k'oˆ ve ka ti‸ tawˇ hkawˇ awˬ lawn k'aoˍ maˍ piˇ tuˬ, G'uiˬ sha ve a loˍ cawˇ ve hta‸ pa taw Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ lehˬ, ngaˬ ha‸ ve yaˇ Tiˆmoˉseˍ hta‸ li‸ chi bvuh‸ laˇ ve yoˬ. 2 Awˬ pa G'uiˬ sha leh ngaˬ hui ve Jawˇ mawˇ Yeˍsuˆ Hkri‸ ve awˬ bon awˬ shinˉ ha k'aˉ puiˉ ve teˇ ceuˬ leh dawˇ sha gaˇ sha ve teˇ ceuˬ nawˬ geh cawˬ piˇ-oˆ. 3 Bon lawˬ ve awˬ hk'aw lo ngaˬ nawˬ hta‸ hk'aˬ htaˆ ka‸ dawˇ nawˇ leh, G'uiˬ sha hta‸ ngaˬ chiˇ mvuh ve yoˬ. Awˬ puˍ awˬ pi hui lehˬ, da‸ ve kehˬ ve shiˍ puiˉ ve nyi ma cawˬ ve awˬ hk'aw lo yawˇ awˬ pon kanˉ te ve hk'e ngaˬ htawˇ kanˉ te ve yoˬ. 4 Nawˬ ve mehˆ g'uiˬ ya‸ la ve hta‸ ngaˬ dawˇ nawˇ ve teˇ yanˇ, teˇ nyi teˇ haˉ le le ngaˬ nawˬ hta‸ mawˬ gaˇ chehˇ ve yoˬ. Nawˬ hta‸ g'a mawˬ ve k'o, ngaˬ ha lehˬ ve biˇ la tuˬ yoˬ. 5 Nawˬ nyi ma awˬ tawˬ hk'a gaˬ yonˍ ve teˇ ceuˬ hta‸ ngaˬ dawˇ nawˇ ve yoˬ. Nawˬ yonˍ ve chi lehˬ, awˉ lawˉ htaˇ nawˬ ve awˬ pi Lawˇiˆ leh nawˬ ve awˬ e Uˇniˆ awˬ hk'aw lo cawˬ leh, chi beu‸ nawˬ awˬ hk'aw lo htawˇ cawˬ ve hta‸ ngaˬ hk'a deh‸ shiˍ ve yoˬ. 6 Hk'e te leh, ngaˬ nawˬ awˬ hk'oˆ la‸ sheh taˍ ve pa taw nawˬ awˬ hk'aw lo cawˬ taˍ ve G'uiˬ sha ve la‸ shawnˍ hta‸ aˬ miˍ gu ceh ve hk'e hk'a deh‸ gu ceh tuˬ, ngaˬ nawˬ hta‸ dawˇ nawˇ laˇ ve yoˬ. 7 Awˬ lawn k'o, G'uiˬ sha lehˬ ngaˬ hui hta‸ kawˆ puiˉ ve nyi ma pe‸ laˇ ve maˇ heˆ. Kanˇ paˆ cawˬ ve nyi ma, ha‸ pehnˇ ve nyi ma leh, a shu yawˇ awˬ to hta‸ g'aˇ puiˉ ve nyi ma yawˇ ngaˬ hui hta‸ pe‸ laˇ ve yoˬ. 8 Hk'e te leh, ngaˬ hui ve Jawˇ mawˇ Yeˍsuˆ awˬ pon shaˉ hkiˆ hkanˍ tuˬ taˇ ya‸ taw. Yawˇ awˬ pon htawnˍ hk'aw g'a chehˇ ve ngaˬ hta‸ pa taw htawˇ taˇ ya‸ taw. G'uiˬ sha geh kanˇ paˆ g'a taˍ ve hk'e, ha lehˬ ve bon hkawˇ awˬ pon g'a tu‸ g'a hkanˍ ve teˇ hpaˍ hta‸ ngaˬ geh teˇ geh hkanˍ-o‸. 9 G'uiˬ sha lehˬ, yawˇ dawˇ law taˍ ve hk'e hpeh‸ la tuˬ, yawˇ ve awˬ bon hta‸ pa taw ngaˬ hui hta‸ htaiˍ hk'aw‸ laˇ leh, da‸ kehˬ ve hta‸ te tuˬ awˬ pon ngaˬ hui hta‸ kuˬ yuˬ taˍ ve yoˬ. Ngaˬ hui kanˉ te ve hta‸ pa taw yawˇ chi hk'e te laˇ ve maˇ heˆ. 10 Yawˇ ve awˬ bon oˇ ve lehˬ, aˬ sho-eˬ htaˇ ka‸ Yeˍsuˆ Hkri‸ awˬ hk'aw lo ngaˬ hui hta‸ pe‸ laˇ leh, ngaˬ hui ve Htaiˍ hk'aw‸ paˍ Yeˍsuˆ Hkri‸ tawˆ la ve hta‸ pa taw, chi beu‸ awˬ bon oˇ ve hta‸ ngaˬ hui hk'a tawˍ lehˆ g'a mawˬ ve yoˬ. Yawˇ lehˬ, suh ve teˇ ceuˬ hta‸ te luˬ leh, co ha te‸ ve teˇ ceuˬ leh maˇ luˬ maˇ sheˆ puiˉ ve teˇ ceuˬ hta‸, ha lehˬ ve bon hkawˇ awˬ hk'aw lo hk'a tawˍ lehˆ tawˆ la piˇ lawˬ peuˬ. 11 Ha lehˬ ve bon hkawˇ chi awˬ pon bon maˍ paˍ, tcuh yaˇ leh, saˍ la‸ te tuˬ, G'uiˬ sha ngaˬ hta‸ leuˆ yuˬ laˇ ve yoˬ. 12 Chi hta‸ pa taw ngaˬ chi hk'e g'a tu‸ g'a hkanˍ ve yoˬ. Ya‸ hk'aˇ, ngaˬ maˇ ya‸ taw. Awˬ lawn k'o, ngaˬ yonˍ chehˇ ve awˬ shehˍ hpaˇ hta‸ ngaˬ shiˍ taˍ ve yoˬ. Ngaˬ yawˇ hta‸ hk'a chiˇ a‸ piˇ taˍ ve teˇ hpaˍ, awˬ nyi oˇ ve teˇ nyi hk'a gaˬ yawˇ ha‸ shaˉ taˍ g'a ve yoˬ teh‸ ngaˬ hk'a deh‸ shiˍ taˍ ve yoˬ. 13 Yeˍsuˆ Hkri‸ hta‸ caˉ da‸ ve yonˍ ve leh ha‸ ve teˇ ceuˬ awˬ hk'aw lo, nawˬ lehˬ ngaˬ geh g'a kaˇ taˍ ve, da‸ jaˇ biˇ jaˇ ve tawˇ hkawˇ teˇ hpaˍ hta‸ hk'a deh‸ na yuˬ leh te k'ai-o. 14 Ngaˬ hui awˬ hk'aw lo chehˇ taˍ ve da‸ ve kehˬ ve Awˬ ha hpu hta‸ nawˬ cuˇ leh, nawˬ hta‸ chiˇ a‸ laˇ peuˬ ve, da‸ jaˇ ve awˬ ceuˬ hta‸ hk'a deh‸ ha‸ shaˉ taˍ-o‸. 15 Aˍsiˆ mvuhˇ miˬ awˬ hk'aw lo chehˇ ve chaw hk'a peu-eˬ ngaˬ hta‸ hpfuhˆ baˬ taˉ peuˬ ve teh‸ nawˬ shiˍ ve yoˬ. Yawˇ hui awˬ hk'aw lo, Hpuˍgeˍluˆ leh Heˍraˆmoˇgenˍ ka‸ chehˇ ve yoˬ. 16 Awˇneˍsiˉhpawˍ teˇ yehˬ awˬ hk'oˆ hta‸ Jawˇ mawˇ Yeˍsuˆ ha k'aˉ ve teˇ ceuˬ cawˬ piˇ-oˆ. Awˬ lawn k'o, yawˇ ngaˬ hta‸ laiˉ pawˆ dawˇ sha la piˇ ve yoˬ. Ngaˬ sho caˆ hpeh taˍ ve hta‸ yawˇ maˇ ya‸ taw. 17 Yawˇ Roˉma‸ venˇ lo gaˬ la ve teˇ yanˇ, ngaˬ hta‸ mawˬ htaˇ hk'a gaˬ g'aˇ hte‸ ca ve yoˬ. 18 Yawˇ lehˬ, suhˉ jehˬ ve awˬ nyi teˇ nyi awˬ hk'aw lo Jawˇ mawˇ Yeˍsuˆ geh lo ha k'aˉ ve teˇ ceuˬ hta‸ g'a tuˬ, Jawˇ mawˇ Yeˍsuˆ yawˇ hta‸ ha k'aˉ piˇ lawˬ-o‸. Eˇfeˇsu‸ venˇ awˬ hk'aw lo htawˇ, yawˇ ngaˬ hta‸ hk'aˬ ma ga laˇ peuˬ ve awˬ lawn hta‸ nawˬ hk'a deh‸ shiˍ taˍ ve yoˬ.

2 Tiˆmoˉseˍ 2

1 Hk'e te leh, ngaˬ yaˇ-oˬ, Yeˍsuˆ Hkri‸ ve awˬ bon awˬ hk'aw lo awˬ g'aˇ cawˬ la piˇ-oˆ. 2 Shaˉ hkiˆ hkanˍ shehˍ hpaˇ laiˉ g'aˇ mehˆ g'uˇ suhˍ nawˬ ngaˬ geh g'a kaˇ taˍ peuˬ ve awˬ ceuˬ teˇ hpaˍ, shu hta‸ maˍ piˇ puiˉ ve ka ti‸ yeˬ ve chaw teˇ hpaˍ hta‸ k'aw‸ chiˇ a‸ piˇ-oˆ. 3 Yeˍsuˆ Hkri‸ ve da‸ ve ma‸ yaˇ hk'a shuˍ shuˍ, nawˬ ngaˬ geh teˇ geh tu‸ ve hkanˍ ve hta‸ hkanˍ yuˬ-o‸. 4 Ma‸ yaˇ te chehˇ ve chaw hk'aˬ ve teˇ g'aˇ maˇ k'oˆ, a shu yawˇ ve ma‸ poˍ nyi hk'aˇ suh tuˬ te gaˇ ve pa taw, a shu yawˇ awˬ to awˬ pon kanˉ teˇ hpaˍ awˬ hk'aw lo k'aˉ tiˍ hawˆ tiˍ taˍ tuˬ yawˇ maˇ te. 5 G'uiˇ da‸ ve pawehˇ awˬ hk'aw lo lo‸-e ve chaw teˇ g'aˇ lehˬ, awˬ liˇ awˬ hk'aˇ cawˬ ve hk'e maˇ g'uiˇ ve k'o, shu yawˇ hta‸ g'aˇ shehˍ hpaˇ yoˬ teh‸ maˇ shawˍ piˇ. 6 Kanˉ te hkeu‸ ve muiˬ caˇ paˍ lehˬ, awˬ shiˍ hta‸ awˉ lawˉ g'a caˇ cawˇ ve yoˬ. 7 Ngaˬ k'oˆ ve hta‸ dawˇ nyi sheˍ. Awˬ lawn k'o, Jawˇ mawˇ Yeˍsuˆ lehˬ, teˇ ceuˬ le le hta‸ nawˬ shiˍ puiˉ tuˬ cuˇ yiˍ pe‸ laˇ tuˬ yoˬ. 8 Ngaˬ ha lehˬ ve bon hkawˇ maˍ piˇ taˍ peuˬ ve hk'e, Daˍviˆ ve awˬ ceuˬ awˬ hk'aˇ hpeh‸ ve, suh kuiˍ lo k'aw‸ te‸ tu la peuˬ ve Yeˍsuˆ Hkri‸ hta‸ dawˇ nawˇ-oˆ. 9 Ha lehˬ ve bon hkawˇ oˇ ve hta‸ pa taw, chaw haiˬ teˇ g'aˇ hk'a shuˍ shuˍ ngaˬ hta‸ shu hpeh taˍ laˇ leh, tu‸ ve hkanˍ ve hta‸ ngaˬ g'a hkanˍ ve yoˬ. Ya‸ hk'aˇ, G'uiˬ sha ve tawˇ hkawˇ hta‸ shu hpeh taˍ maˇ g'a. 10 Chi hta‸ pa taw, leuˆ yuˬ taˍ ve chaw teˇ hpaˍ htawˇ, Yeˍsuˆ Hkri‸ awˬ hk'aw lo cawˬ ve htaiˍ hk'aw‸ ve teˇ ceuˬ hta‸ g'a tuˬ awˬ pon, awˬ ceuˬ hk'a peu-eˬ hta‸ ngaˬ yeunˇ hkanˍ ve yoˬ. Htaiˍ hk'aw‸ ve oˇ ve geh teˇ geh co co taiˍ taiˍ awˬ me‸ awˬ hponˇ ka‸ yawˇ hui g'a tuˬ yoˬ. 11 Tawˇ chi teˇ hkawˇ lehˬ, ka ti‸ yeˬ ve tawˇ hkawˇ hpeh‸ ve yoˬ. Ngaˬ hui yawˇ geh teˇ geh suh ve k'o, yawˇ geh teˇ geh g'a te‸ tuˬ yoˬ. 12 Ngaˬ hui yeunˇ hkanˍ ve k'o, yawˇ geh teˇ geh g'a uˉ peunˍ tuˬ yoˬ. Ngaˬ hui yawˇ hta‸ chiˇ baˬ ve k'o, yawˇ htawˇ ngaˬ hui hta‸ chiˇ baˬ laˇ tuˬ yoˬ. 13 Ngaˬ hui ka ti‸ maˇ ye‸ ve htawˇ, yawˇ lehˬ ka ti‸ yeˬ chehˇ ve yoˬ. Awˬ lawn k'o, yawˇ awˬ to hta‸ yawˇ chiˇ baˬ maˇ hpeh‸. 14 Awˬ lawn chi teˇ hpaˍ yawˇ hui hta‸ k'aw‸ dawˇ nawˇ piˇ-oˆ. Tawˇ hkawˇ teˇ hpaˍ awˬ lawn tawˇ maˇ g'a g'awˬ da‸ tuˬ, G'uiˬ sha mehˆ g'uˇ suhˍ yawˇ hui hta‸ shaˍ ti‸ piˇ-oˆ. Chi hk'e tawˇ g'awˬ da‸ ve lehˬ, te‸ chiˉ awˬ bon maˇ cawˬ ve awˬ hk'oˆ ka‸, kaˇ shehˍ hpaˇ hui hta‸ te luˬ piˇ ve yoˬ. 15 Nawˬ lehˬ, G'uiˬ sha nyi ma cawˇ ve kanˉ te shehˍ hpaˇ hpeh‸ ve awˬ hk'aw lo, nawˬ awˬ to yawˇ hta‸ chiˇ a‸ piˇ hpeh‸ tuˬ, g'aˇ hte‸ coˇ caˇ leh te-o. Chi hk'e te ve k'o, nawˬ lehˬ ya‸ taw tuˬ maˇ cawˬ leh, awˬ tehˬ awˬ na ve tawˇ hkawˇ hta‸ hteˇ lehˍ cawˇ lehˍ maˍ piˇ puiˉ ve kanˉ te shehˍ hpaˇ hpeh‸ tuˬ yoˬ. 16 G'uiˬ sha hta‸ maˇ yawˆ yan ve awˬ hk'aw lo hk'e leˇ k'oˆ guiˇ ve tawˇ hkawˇ teˇ hpaˍ hta‸ jaw k'ai-o. Awˬ lawn k'o, chaw teˇ hpaˍ lehˬ, G'uiˬ sha hta‸ maˇ yawˆ maˇ yan ve nyi ma shaˬ te shaˬ maˇ la leh, 17 yawˇ hui maˍ piˇ ve teˇ hpaˍ lehˬ, kuiˇ ve behˬ ve hk'aw kuiˬ uiˍ la k'ehˬ la ve hk'e hpeh‸ ve yoˬ. Yawˇ hui awˬ hk'aw lo Huˍmeˍnehˇ leh Hpiˇlehˆ ka‸ chehˇ ve yoˬ. 18 Suh kuiˬ lo k'aw‸ te‸ tu la ve teˇ ceuˬ lehˬ, hpeh‸ la peuˬ teh‸ yawˇ huiˉ maˬ k'oˆ leh, hteˇ ve cawˇ ve teˇ ceuˬ hta‸ ya‸ k'ai peuˬ. Chaw teˇ hpaˍ hpaˍ ve yonˍ ve nyi ma hta‸ yawˇ huiˉ maˬ hpfuhˆ baˬ piˇ chehˇ ve yoˬ. 19 Ya‸ hk'aˇ, G'uiˬ sha ve yeˬ ve awˬ hkuiˉ puiˍ lehˬ, hk'aˬ htaˆ ka‸ yeˬ chehˇ leh, yinˉ chi hk'e tcuhˉ taˍ ve yoˬ. Jawˇ mawˇ G'uiˬ sha lehˬ, yawˇ ve chaw teˇ hpaˍ hta‸ shiˍ taˍ ve yoˬ. Peuˬ leh, Jawˇ mawˇ G'uiˬ sha ve awˬ meh hta‸ pfuhˇ taˍ ve chaw teˇ g'aˇ le le lehˬ, maˇ hteˇ maˇ cawˇ ve hta‸ baˬ taˉ-oˆ teh‸ bvuh‸ taˍ ve yoˬ. 20 Uiˍ ve yehˬ teˇ yehˬ awˬ hk'aw lo hpu hk'eun shi hk'eun ceh tiˉ cawˬ ve maˇ heˆ. Suhˆ leh je‸ te taˍ ve awˬ hk'eun teˇ hpaˍ htawˇ cawˬ ve yoˬ. Awˬ hk'eun teˇ hpaˍ hpaˍ hta‸ awˬ me‸ awˬ hponˇ cawˬ ve awˬ pon yehˇ leh, teˇ hpaˍ hpaˍ hta‸ awˬ me‸ awˬ hponˇ maˇ cawˬ ve awˬ pon yehˇ ve yoˬ. 21 Hk'e te leh, awˬ me‸ awˬ hponˇ maˇ cawˬ ve awˬ ceuˬ teˇ hpaˍ hta‸ a shu yawˇ awˬ to awˬ hk'aw lo yuˬ baˬ ve k'o, yawˇ lehˬ awˬ shehˍ hpaˇ yehˇ hpeh‸ ve da‸ ve kehˬ ve awˬ hk'eun hpeh‸ leh, da‸ ve kanˉ hk'a peu-eˬ hta‸ te tuˬ awˬ pon gu taˍ hehnˇ taˍ ve, awˬ me‸ awˬ hponˇ cawˬ ve awˬ hk'eun hpeh‸ tuˬ yoˬ. 22 Yaˇ nehˬ teˇ hpaˍ awˬ suhˍ awˬ shaˍ hpawˇ sheˉ lai puiˉ ve awˬ ceuˬ teˇ hpaˍ hta‸ nawˬ jaw k'ai-o. Da‸ kehˬ ve nyi ma awˬ hk'aw lo Jawˇ mawˇ Yeˍsuˆ hta‸ kuˬ ve chaw hui geh teˇ geh hteˇ ve cawˇ ve awˬ ceuˬ, yonˍ ve awˬ ceuˬ, ha‸ pehnˇ ve awˬ ceuˬ leh, cawˇ da‸ hui da‸ ve awˬ ceuˬ teˇ hpaˍ awˬ hk'aˇ suh k'ai-o. 23 Cuˇ yiˍ maˇ cawˬ leh, te‸ chiˉ tcuhˉ kuiˬ maˇ cawˬ ve awˬ lawn teˇ hpaˍ jehˬ da‸ ve hta‸ ka‸ jaw k'ai-o. Awˬ lawn k'o, chi hk'e jehˬ da‸ ve teˇ ceuˬ lehˬ, tawˇ g'awˬ da‸ ve teˇ ceuˬ hta‸ ceh tiˉ te tawˆ la ve yoˬ. 24 Jawˇ mawˇ Yeˍsuˆ ve awˬ ceˬ lehˬ, deˇ da‸ ya‸ da‸ ve chaw maˇ g'a hpeh‸. Yawˇ lehˬ, chaw hk'a peu-eˬ hta‸ nyi ma nuˇ nehˬ te ve chaw, maˍ piˇ puiˉ ve chaw leh, yeunˇ hkanˍ puiˉ ve chaw g'a hpeh‸ ve yoˬ. 25 Yawˇ hta‸ tawˍ da‸ ve chaw teˇ hpaˍ hta‸ nyi ma nuˇ nehˬ ve awˬ hk'aw lo maˍ piˇ puiˉ ve chaw htawˇ g'a hpeh‸ ve yoˬ. Chi hk'e te ve k'o, hteˇ ve cawˇ ve teˇ ceuˬ hta‸ yawˇ hui shiˍ hpeh‸ tuˬ, yawˇ hui venˇ baˆ dawˇ hpfuhˆ tuˬ G'uiˬ sha te piˇ tuˬ leh naˍ, maˇ shiˍ. 26 Chi hk'oˆ ka‸, neˇ haiˬ ve a loˍ hta‸ te tuˬ awˬ pon yawˇ hui hta‸ neˇ haiˬ hpeh yuˬ peuˬ hk'aw‸ nawˉ, yawˇ ve va awˬ hk'aw lo yawˇ hui g'a ponˬ tuˬ yoˬ.

2 Tiˆmoˉseˍ 3

1 Awˬ leh meuˇ ve awˬ nyi awˬ haˉ teˇ hpaˍ awˬ hk'aw lo haˍ jaˇ ve awˬ yanˇ gaˬ la tuˬ yoˬ teh‸ shiˍ taˍ-o‸. 2 Awˬ lawn k'o, chaw teˇ hpaˍ lehˬ, a shu yawˇ awˬ to hta‸ ha‸ ve chaw, hpu hta‸ sheˉ lai ve chaw, caˆ muiˬ puiˉ ve chaw, nyi ma uiˍ ve chaw, maˇ shawˍ maˇ caˆ k'oˆ ve chaw, awˬ pa awˬ e hkawˇ hta‸ maˇ na yuˬ ve chaw, shu ve awˬ bon hta‸ maˇ shiˍ puiˉ ve chaw, maˇ da‸ maˇ kehˬ ve chaw, 3 shu hta‸ maˇ ha‸ puiˉ ve chaw, shu ve venˇ baˆ hta‸ maˇ hpehˇ piˇ puiˉ ve chaw, shu hta‸ hk'aiˉ puiˉ ve chaw, a shu yawˇ awˬ to hta‸ maˇ g'aˇ puiˉ ve chaw, haiˬ jaˇ ve chaw leh, da‸ ve hta‸ canˇ ve chaw hpeh‸ tuˬ yoˬ. 4 Yawˇ hui lehˬ, shu hta‸ chiˇ a‸ piˇ puiˉ ve chaw, shu shaˍ ti‸ piˇ ve tawˇ hkawˇ hta‸ maˇ na yuˬ puiˉ ve chaw, nyi ma uiˍ jaˇ ve chaw leh, G'uiˬ sha hta‸ maˇ ha‸ leh miˬ guiˬ ha lehˬ tuˬ teˇ hpaˍ hta‸ ha‸ ve chaw hpeh‸ tuˬ yoˬ. 5 Yawˇ hui lehˬ, G'uiˬ sha hta‸ yawˆ yan ve hta‸ caˉ da‸ ve awˬ liˇ awˬ hk'aˇ teˇ hpaˍ hta‸ te ve htawˇ, oˇ ve hta‸ caˉ da‸ ve kanˇ paˆ hta‸ yawˇ hui chiˇ baˬ ve chaw hpeh‸ ve yoˬ. Chi hk'e ve chaw teˇ hpaˍ hta‸ jaw k'ai-o. 6 Yawˇ hui awˬ hk'aw lo chaw teˇ hpaˍ hpaˍ lehˬ, shu ve yehˬ awˬ hk'aw lo lo‸-e leh, cuˇ yiˍ maˇ cawˬ ve yaˇ miˇ teˇ hpaˍ hta‸ maˍ g'a ve yoˬ. Yaˇ miˇ oˇ ve teˇ hpaˍ lehˬ, venˇ baˆ maˇ maˇ pfuhˇ taˍ leh, awˬ suhˍ awˬ shaˍ sheˉ lai ve laiˉ ceuˬ yawˇ hui hta‸ sheh k'ai chehˇ ve yoˬ. 7 Yawˇ hui lehˬ, hk'aˬ htaˆ ka‸ shu maˍ ve hkawˇ hta‸ na chehˇ ve ka‸, awˬ tehˬ awˬ na ve tawˇ hkawˇ hta‸ maˇ shiˍ la puiˉ. 8 Yaˍneˍ leh Yaˍbeˍ hui Moˉseˍ hta‸ tawˍ taˍ ve hk'e, chaw oˇ ve teˇ hpaˍ htawˇ awˬ tehˬ awˬ na ve tawˇ hkawˇ hta‸ tawˍ taˍ ve yoˬ. Yawˇ hui dawˇ nyi puiˉ ve teˇ ceuˬ luˬ k'ai peuˬ leh, yawˇ hui yonˍ ve teˇ ceuˬ lehˬ, awˬ tehˬ awˬ na yonˍ ve teˇ ceuˬ hpeh‸ ve maˇ heˆ. 9 Yawˇ hui lehˬ, awˬ g'u suhˍ k'ai maˇ g'a. Awˬ lawn k'o, chaw oˇ ve nyiˇ g'aˇ cuˇ yiˍ maˇ cawˬ ve awˬ lawn hk'a tawˍ lehˆ tawˆ la ve hk'e, chaw chi teˇ hpaˍ cuˇ yiˍ maˇ cawˬ ve awˬ lawn htawˇ, chaw hk'a peu-eˬ mehˆ g'uˇ suhˍ hk'a tawˍ lehˆ tawˆ la tuˬ yoˬ. 10 Ngaˬ maˍ piˇ ve, ngaˬ te ve, ngaˬ dawˇ law taˍ ve, ngaˬ yonˍ ve, ngaˬ dawˇ zuhˬ gaˇ zuhˬ ve, ngaˬ ha‸ pehnˇ ve leh ngaˬ nyi ma yeˬ ve, chi teˇ hpaˍ hta‸ nawˬ g'a mawˬ g'a shiˍ taˍ peuˬ. 11 Anˍtiˆawˍ venˇ, Iˇkawˇniˆ venˇ leh Luˇtaˍraˆ venˇ teˇ hpaˍ awˬ hk'aw lo shu fawˉ mehˍ laˇ ve hta‸ ngaˬ g'a hkanˍ ve hk'e, fawˉ ve mehˍ ve leh tu‸ ve hkanˍ ve hta‸ ngaˬ hk'aˬ hk'e g'a hkanˍ ve hta‸ htawˇ nawˬ g'a mawˬ g'a shiˍ taˍ peuˬ. Oˇ ve hk'a peu-eˬ awˬ hk'aw lo Jawˇ mawˇ Yeˍsuˆ ngaˬ hta‸ ponˬ laˇ peuˬ ve yoˬ. 12 Awˬ tehˬ awˬ na k'oˆ ve k'o, Yeˍsuˆ Hkri‸ awˬ hk'aw lo G'uiˬ sha hta‸ yawˆ yan gaˇ ve chaw hk'a peu-eˬ lehˬ, fawˉ ve mehˍ ve hta‸ g'a hkanˍ tuˬ yoˬ. 13 Haiˍ ve chaw leh heˍ puiˉ ve chaw teˇ hpaˍ lehˬ, shaˬ te shaˬ haiˬ la tuˬ yoˬ. Yawˇ hui shu hta‸ heˍ leh, shu htawˇ yawˇ hui hta‸ k'aw‸ heˍ piˇ tuˬ yoˬ. 14 Nawˬ lehˬ, nawˬ g'a henˇ leh hk'a deh‸ g'a yonˍ taˍ ve teˇ hpaˍ hta‸ yeˬ chaweh vawˆ taˍ-o‸. Nawˬ a shu geh g'a henˇ taˍ peuˬ ve hta‸ nawˬ shiˍ taˍ ve yoˬ. 15 Chi hk'oˆ ka‸, nawˬ yaˇ ehˉ hpeh‸ htaˇ ka‸ da‸ ve kehˬ ve Li‸ hpu hta‸ htawˇ nawˬ shiˍ taˍ ve yoˬ. Li‸ hpu oˇ ve lehˬ, Yeˍsuˆ Hkri‸ hta‸ yonˍ ve awˬ hk'aw lo nawˬ htaiˍ hk'aw‸ ve hta‸ g'a tuˬ cuˇ yiˍ pe‸ laˇ hpeh‸ ve yoˬ. 16 Li‸ hpu hk'a peu-eˬ lehˬ, G'uiˬ sha ve Awˬ ha hpu dawˇ pawnˍ piˇ ve hta‸ pa taw cawˬ la ve yoˬ. 17 G'uiˬ sha ve chaw lehˬ, hk'aˬ hk'e te leh biˇ ve chaw leh, da‸ ve kanˉ teˇ ceuˬ le le awˬ pon gu taˍ ve chaw hpeh‸ la tuˬ, Li‸ hpu lehˬ maˍ piˇ ve, venˇ baˆ hpeu‸ maˍ piˇ ve, k'aw‸ da‸ la piˇ ve leh, hteˇ ve cawˇ ve hta‸ te tuˬ maˍ piˇ ve yoˬ. Chi hk'a peu-eˬ awˬ pon Li‸ hpu lehˬ awˬ bon cawˬ ve yoˬ.

2 Tiˆmoˉseˍ 4

1 G'uiˬ sha mehˆ g'uˇ suhˍ maˇ k'oˆ, te‸ chehˇ ve chaw hui leh suh peuˬ ve chaw hui hta‸ suhˉ jehˬ tuˬ ve Yeˍsuˆ Hkri‸ mehˆ g'uˇ suhˍ maˇ k'oˆ, yawˇ k'aw‸ tawˆ la tuˬ ve leh yawˇ uˉ peunˍ tuˬ ve hta‸ ngaˬ cuˇ leh nawˬ hta‸ tawˇ chi hk'e pe‸ laˇ ve yoˬ. 2 Bon hkawˇ hk'a deh‸ maˍ piˇ-oˆ. Awˬ yanˇ cawˇ ve maˇ k'oˆ, maˇ cawˇ ve maˇ k'oˆ, g'aˇ hte‸ te-o. Deˇ maˍ piˇ leh shaˍ ti‸ piˇ-oˆ. Dawˇ zuhˬ gaˇ zuhˬ ve leh maˍ piˇ ve awˬ hk'aw lo awˬ g'aˇ piˇ-oˆ. 3 Awˬ lawn k'o, chaw yaˇ hui lehˬ, hteˇ ve cawˇ ve maˍ piˇ ve tawˇ hkawˇ hta‸ maˇ na yuˬ ve awˬ yanˇ gaˬ la tuˬ yoˬ. Yawˇ hui lehˬ, aˬ hto‸ ma teˇ ceuˬ awˬ lawn ka‸ kaˇ gaˇ puiˉ leh, a shu yawˇ nyi ma cawˇ ve hk'e maˍ laˇ ve saˍ la‸ maˇ chaweh hta‸ yawˇ hui geh chehˇ piˇ lawˬ tuˬ yoˬ. 4 Hteˇ ve cawˇ ve tawˇ hkawˇ hta‸ maˇ g'a na tuˬ yawˇ hui hpfuhˆ k'ai leh, kaˇ puiˇ kaˇ lao hkawˇ hta‸ na leh awˬ hk'aˇ suh k'ai tuˬ yoˬ. 5 Nawˬ lehˬ, teˇ ceuˬ le le awˬ hk'aw lo nyi ma taˍ puiˉ ve chaw hpeh‸ leh shaˍ ti‸ taˍ-o‸. Tu‸ ve hkanˍ ve hta‸ hkanˍ chehˇ-oˆ. Ha lehˬ ve bon hkawˇ maˍ ve kanˉ hta‸ te chehˇ-oˆ. Nawˬ te chehˇ ve kanˉ hta‸ biˇ la htaˇ hk'a gaˬ te-o. 6 Awˬ lawn k'o, chi beu‸ ka‸ tanˇ tuˬ hk'e tanˇ piˇ chehˇ ve hta‸ ngaˬ g'a hkanˍ leh, ngaˬ g'a k'o‸-e ve awˬ yanˇ gaˬ la paˇ neˇ ve yoˬ. 7 Da‸ jaˇ ve bawˆ da‸ tuˬ hta‸ ngaˬ bawˆ da‸ peuˬ. G'uiˇ da‸ ve teˇ ceuˬ hta‸ awˬ leh hk'a gaˬ ngaˬ g'uiˇ peuˬ. Yonˍ ve teˇ ceuˬ hta‸ ngaˬ hk'a deh‸ vawˆ taˍ peuˬ. 8 Chi beu‸ lehˬ, hteˇ ve cawˇ ve shi uˉ tcuhˍ ngaˬ awˬ pon ha‸ shaˉ taˍ ve yoˬ. Awˬ nyi oˇ ve awˬ hk'aw lo hteˇ ve cawˇ ve suhˉ jehˬ shehˍ hpaˇ Jawˇ mawˇ Yeˍsuˆ lehˬ, shi uˉ tcuhˍ oˇ ve ngaˬ hta‸ pe‸ laˇ tuˬ yoˬ. Ngaˬ hta‸ ceh tiˉ maˇ heˆ. Yawˇ k'aw‸ tawˆ la tuˬ ve hta‸ dawˇ law chehˇ ve chaw hk'a peu-eˬ hta‸ htawˇ yawˇ piˇ tuˬ yoˬ. 9 Nawˬ ngaˬ geh haˆ haˆ laˬ hpeh‸ tuˬ coˇ caˇ-oˆ. 10 Awˬ lawn k'o, Deˍmaˆ lehˬ chi miˬ guiˬ hta‸ ha‸ ve pa taw, ngaˬ hta‸ baˬ taˉ leh, Hteˇsaˍlawˇniˆ venˇ lo k'ai peuˬ. Kaˍreˍkeˍ lehˬ, Gaˍlaˍtiˆ mvuhˇ miˬ lo k'ai leh, Tiˇtuˆ lehˬ Daˍlaˍmaˍtiˆ mvuhˇ miˬ lo k'ai peuˬ. 11 Luˉka‸ teˇ g'a ceh tiˉ ngaˬ geh chehˇ taˍ ve yoˬ. Nawˬ laˬ ve teˇ yanˇ, Maˍkuˆ hta‸ ka‸ shiˍ veu laˇ-oˆ. Awˬ lawn k'o, kanˉ te ve awˬ hk'aw lo yawˇ ngaˬ hta‸ hk'a deh‸ ga laˇ hpeh‸ ve yoˬ. 12 Tuˇhkiˆ hta‸ Eˇfeˇsu‸ venˇ lo ngaˬ k'ai tcuh peuˬ. 13 Nawˬ laˬ ve teˇ yanˇ, Taˍroˇaˆ venˇ hk'aw lo Kaˍpuˆ geh ngaˬ teh taˉ ve aˉ po‸ zuhˬ ma hta‸ maˇ k'oˆ, li‸ teˇ hpaˍ hta‸ htawˇ maˇ k'oˆ, leuˉ leh shaˍ guiˬ k'uˉ hta‸ bvuh‸ taˍ ve li‸ teˇ hpaˍ hta‸ maˇ k'oˆ, yuˬ veu laˇ-oˆ. 14 Ca liˉ paˍ Aˍleˍsaˍduˆ lehˬ, ngaˬ hta‸ haˍ tuˬ laiˉ ceuˬ te laˇ peuˬ. Yawˇ te ve kanˉ teˇ hpaˍ hta‸ keunˍ da‸ ve hk'e Jawˇ mawˇ Yeˍsuˆ yawˇ hta‸ k'aw‸ te hk'aw‸ piˇ tuˬ yoˬ. 15 Nawˬ htawˇ yawˇ hta‸ shaˍ ti‸ te-o. Awˬ lawn k'o, ngaˬ maˍ ve tawˇ hkawˇ hta‸ yawˇ g'aˇ hte‸ tawˍ taˍ ve yoˬ. 16 Ngaˬ awˬ to awˬ pon ngaˬ awˉ lawˉ teˇ pawˆ g'a yaw hk'aw‸ ve teˇ yanˇ, chaw teˇ g'aˇ ka‸ ngaˬ hpawˇ lo maˇ chehˇ. Chaw hk'a peu-eˬ ngaˬ hta‸ baˬ taˉ ve yoˬ. Yawˇ hui awˬ hk'oˆ hta‸ venˇ baˆ taˇ taˍ piˇ lawˬ. 17 Chaw hk'a peu-eˬ ngaˬ hta‸ baˬ taˉ ve htawˇ, ngaˬ lehˬ bon hkawˇ hk'a biˇ maˍ piˇ leh, buiˇ shaˆ aˉ naˆ chaw hk'a peu-eˬ g'a kaˇ tuˬ, Jawˇ mawˇ Yeˍsuˆ ngaˬ geh chehˇ leh awˬ g'aˇ pe‸ laˇ ve yoˬ. Hk'e te leh, laˇ caˬ shiˉ ve maw‸ k'aw awˬ hk'aw lo ngaˬ hta‸ ponˬ laˇ ve yoˬ. 18 Jawˇ mawˇ Yeˍsuˆ lehˬ, haiˬ ve hk'a peu-eˬ awˬ hk'aw lo ngaˬ hta‸ ponˬ laˇ tuˬ ve awˬ hk'oˆ ka‸, yawˇ ve mvuhˇ naw ma mvuhˇ miˬ hk'a gaˬ ngaˬ hta‸ htaiˍ hk'aw‸ laˇ tuˬ yoˬ. Yawˇ hta‸ co co taiˍ taiˍ chiˇ uiˍ chiˇ mvuh piˇ-oˆ. A men. 19 Piˇkiˇlaˆ leh Aˍkuˉlaˆ hta‸ maˇ k'oˆ, Awˇneˍsiˉhpawˍ ve yehˬ yaˇ k'a yaˇ hui hta‸ maˇ k'oˆ, ngaˬ dawˇ nawˇ chehˇ ve yoˬ teh‸ yawˇ hui hta‸ hto piˇ-oˆ. 20 Eˇraˍtuˆ lehˬ, Kawˇrenˍhtuˆ venˇ lo chehˇ taˉ ve yoˬ. Taˍroˆhpeˍ teˇ g'aˇ naˬ leh, ngaˬ yawˇ hta‸ Meˍleˍtuˆ venˇ hk'aw lo teh taˉ ve yoˬ. 21 Mvuhˇ kaˆ yanˇ maˇ gaˬ sheˍ htaˇ nawˬ haˆ haˆ gaˬ la tuˬ coˇ caˇ-oˆ. Uˇbuˇluˆ, Puˇdeˍ, Liˇnuˆ, Kaˍlawˉduˆ leh awˬ viˉ awˬ nyi hk'a peu-eˬ nawˬ hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 22 Jawˇ mawˇ G'uiˬ sha lehˬ, nawˬ ve nyi ma awˬ hk'aw lo chehˇ piˇ-oˆ. Awˬ bon awˬ shinˉ ka‸ nawˬ geh cawˬ piˇ-oˆ.

Tiˇtuˆ 1

1 G'uiˬ sha ve awˬ ceˬ leh Yeˍsuˆ Hkri‸ ve tcuh yaˇ hpeh‸ ve ngaˬ Pawˇlu‸ lehˬ, yonˍ ve teˇ ceuˬ tiˉ awˬ hk'aw lo ngaˬ ve yaˇ awˬ tehˬ awˬ na hpeh‸ ve Tiˇtuˆ hta‸ li‸ chi bvuh‸ laˇ ve yoˬ. 2 Ngaˬ Yeˍsuˆ Hkri‸ ve tcuh yaˇ hpeh‸ ve lehˬ, G'uiˬ sha leuˆ yuˬ taˍ ve chaw hui yonˍ ve teˇ ceuˬ uiˍ la maˇ la leh, G'uiˬ sha hta‸ yawˆ yan ve hta‸ caˉ da‸ ve hteˇ ve cawˇ ve teˇ ceuˬ hta‸ shiˍ la tuˬ awˬ pon tcuh yaˇ hpeh‸ ve yoˬ. 3 Yawˇ piˇ tuˬ yoˬ teh‸, maˇ heˍ puiˉ ve G'uiˬ sha aˬ sho-eˬ htaˇ ka‸ k'oˆ taˍ ve co ti‸ ha ti‸ hta‸ ngaˬ dawˇ law taˍ ve awˬ hk'aw lo te ve yoˬ. Co ti‸ ha ti‸ oˇ ve lehˬ, awˬ yanˇ cawˇ ve teˇ yanˇ htaˇ yawˇ ngaˬ hui hta‸ hpeu‸ maˍ laˇ ve yoˬ. Ngaˬ hui ve Htaiˍ hk'aw‸ paˍ G'uiˬ sha lehˬ, tawˇ hkawˇ oˇ ve hta‸ maˍ piˇ tuˬ ngaˬ hta‸ tawˇ pe‸ laˇ leh chiˇ a‸ laˇ ve yoˬ. 4 Awˬ pa G'uiˬ sha leh ngaˬ hui ve Htaiˍ hk'aw‸ paˍ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha ve teˇ ceuˬ nawˬ geh cawˬ piˇ-oˆ. 5 Ngaˬ nawˬ hta‸ maˍ piˇ taˍ ve hk'e, loˍ sheˍ ve awˬ ceuˬ teˇ hpaˍ hta‸ k'aw‸ gu k'aw‸ te leh, teˇ venˇ le le awˬ hk'aw lo awˬ hoˉ chaw mawˇ teˇ hpaˍ hta‸ leuˆ teh taˍ tuˬ, ngaˬ nawˬ hta‸ Keˍreˍteˍ conˇ lo chehˇ tcuh taˉ laˇ ve yoˬ. 6 Awˬ hoˉ chaw mawˇ chi teˇ hpaˍ lehˬ, venˇ baˆ taˍ kuiˬ maˇ cawˬ ve chaw leh, awˬ miˇ ma teˇ g'aˇ tiˉ cawˬ ve chaw g'a hpeh‸ ve yoˬ. Yawˇ hui ve yaˇ teˇ hpaˍ lehˬ, Hkri‸ yaˇ g'a hpeh‸ ve awˬ hk'oˆ ka‸, yawˇ hui awˬ lawn shu k'oˆ kuiˬ yaw kuiˬ maˇ g'a cawˬ tuˬ, awˬ liˇ da‸ leh, shu ve hkawˇ hta‸ na yuˬ puiˉ ve chaw g'a hpeh‸ ve yoˬ. 7 Awˬ lawn k'o, Hkri‸ yaˇ awˬ moˍ hta‸ nyi ha‸ shaˉ ve chaw lehˬ, G'uiˬ sha ve mawˇ hta‸ ha‸ shaˉ shehˍ hpaˇ hpeh‸ ve pa taw, venˇ baˆ taˍ kuiˬ maˇ cawˬ ve chaw g'a hpeh‸ ve yoˬ. A shu yawˇ ve a loˍ awˬ hk'aˇ suh te ve chaw, nyi ma ngeh ve chaw, a pehˉ meuˇ g'uiˬ dawˬ ponˬ dawˬ leuˉ ve chaw, shu hta‸ ya‸ da‸ dawˆ da‸ ve chaw leh, hpu shi mawˇ jeˬ hta‸ sheˉ lai ve chaw maˇ g'a hpeh‸. 8 Ya‸ hk'aˇ, hkehˉ chaw hta‸ ha‸ yuˬ puiˉ ve chaw, da‸ ve hta‸ nyi ma cawˇ ve chaw, nyi ma taˍ puiˉ ve chaw, hteˇ ve cawˇ ve chaw, da‸ ve kehˬ ve chaw leh, a shu yawˇ awˬ to hta‸ g'aˇ puiˉ ve chaw g'a hpeh‸ ve yoˬ. 9 Da‸ jaˇ biˇ jaˇ ve tawˇ hkawˇ teˇ hpaˍ maˍ piˇ ve awˬ hk'aw lo shu hta‸ awˬ g'aˇ piˇ hpeh‸ leh, g'awˬ hk'aˆ ve chaw teˇ hpaˍ hta‸ maˍ g'aˇ hpeh‸ tuˬ, maˍ piˇ taˍ ve ka ti‸ yeˬ ve tawˇ hkawˇ hta‸ yeˬ chaweh vawˆ taˍ ve chaw g'a hpeh‸ ve yoˬ. 10 Awˬ lawn k'o, shu hkawˇ maˇ na yuˬ puiˉ ve chaw, awˬ bon maˇ cawˬ ve tawˇ hkawˇ hta‸ hk'e leˇ ca k'oˆ puiˉ ve chaw leh, heˍ puiˉ ve chaw teˇ hpaˍ maˇ maˇ cawˬ ve yoˬ. Awˬ guiˬ meuˇ shoˍ ve chaw teˇ moˍ awˬ hk'aw lo chi hk'e ve chaw leuˉ leh cawˬ maˇ ve yoˬ. 11 Yawˇ hui ve maw‸ k'aw hta‸ g'a hoˆ taˍ tuˬ yoˬ. Awˬ lawn k'o, yawˇ hui lehˬ, hpu shi mawˇ jeˬ hta‸ g'a tuˬ awˬ pon, maˍ piˇ maˇ keunˍ ve hta‸ maˍ piˇ leh, yehˬ k'a teˇ hpaˍ awˬ hk'aw lo sho‸ sha‸ tuˬ te ve yoˬ. 12 Yawˇ hui awˬ hk'aw lo, yawˇ hui ve awˬ ceuˬ awˬ hk'aˇ ve tcuh kaˍ paˍ teˇ g'aˇ k'oˆ taˍ ve, Keˍreˍteˍ chaw hui lehˬ, hk'aˬ htaˆ ka‸ heˍ ve chaw, haiˬ ve to nuˇ to shaˆ hk'e hpeh‸ ve chaw leh, caˇ ponˬ caˇ leuˉ ve chaw bawˬ hpeh‸ ve yoˬ teh‸ k'oˆ taˍ ve yoˬ. 13 Shaˉ hkiˆ hkanˍ ve tawˇ oˇ ve teˇ hkawˇ lehˬ cawˇ ve yoˬ. Hk'e te leh, Yuˇda‸ ve kaˇ puiˇ kaˇ lao teˇ hpaˍ hta‸ maˇ k'oˆ, hteˇ ve cawˇ ve hta‸ baˬ taˉ ve chaw hui tawˇ piˇ taˍ ve teˇ hpaˍ hta‸ maˇ k'oˆ, maˇ g'a na yuˬ leh, yonˍ ve awˬ hk'aw lo awˬ g'aˇ uiˍ la tuˬ, 14 yawˇ hui hta‸ hehnˇ chaweh maˍ piˇ-oˆ. 15 Nyi ma hk'aw da‸ kehˬ ve chaw hui awˬ pon, awˬ ceuˬ hk'a peu-eˬ da‸ kehˬ ve yoˬ. Ya‸ hk'aˇ cha‸ chiˆ ve chaw leh maˇ yonˍ ve chaw hui awˬ pon, da‸ kehˬ ve teˇ ceuˬ ka‸ maˇ cawˬ. Yawˇ hui ve dawˇ hk'aˇ leh yawˇ hui ve shiˍ puiˉ ve nyi ma lehˬ, cha‸ chiˆ ve yoˬ. 16 G'uiˬ sha hta‸ shiˍ ve yoˬ teh‸ yawˇ hui k'oˆ ve htawˇ, yawˇ hui te ve teˇ hpaˍ awˬ hk'aw lo yawˇ hta‸ maˇ shiˍ ve hk'e te ve yoˬ. Shu yawˇ hui hta‸ cha‸ naˬ ve chaw, maˇ na yuˬ puiˉ ve chaw leh, da‸ ve kanˉ te tuˬ awˬ pon yawˇ hui hta‸ a ciˉ ka‸ yehˇ maˇ hpeh‸ ve chaw hpeh‸ ve yoˬ.

Tiˇtuˆ 2

1 Nawˬ lehˬ, da‸ jaˇ biˇ jaˇ ve yonˍ hk'aˇ hta‸ keunˍ da‸ ve teˇ hpaˍ hta‸ maˍ piˇ-oˆ. 2 Chaw mawˇ teˇ hpaˍ lehˬ, shaˍ ti‸ cawˬ ve chaw, dawˇ yeˬ gaˇ yeˬ ve chaw, nyi ma taˍ puiˉ ve chaw, yonˍ ve, ha‸ pehnˇ ve leh nyi ma yeˬ ve awˬ hk'aw lo biˇ ve chaw g'a hpeh‸ ve yoˬ. 3 Oˇ ve hk'a shuˍ shuˍ, chaw mawˇ ma teˇ hpaˍ htawˇ, te ve dawˇ ve teˇ hpaˍ awˬ hk'aw lo keunˍ ve hk'e te ve chaw g'a hpeh‸ ve yoˬ. Shu hta‸ hk'aiˉ puiˉ ve chaw leh, a pehˉ meuˇ g'uiˬ dawˬ ponˬ dawˬ leuˉ ve chaw maˇ g'a hpeh‸. Da‸ ve hta‸ maˍ piˇ ve chaw g'a hpeh‸ ve yoˬ. 4 Yawˇ hui chi hk'e te ve k'o, a sha‸ i ve yaˇ miˇ teˇ hpaˍ lehˬ, a shu yawˇ ve awˬ hpawˇ leh awˬ yaˇ teˇ hpaˍ hta‸ ha‸ puiˉ tuˬ, yawˇ hui maˍ piˇ hpeh‸ ve yoˬ. 5 Chi hk'oˆ ka‸, nyi ma taˍ puiˉ ve chaw, da‸ kehˬ ve chaw, a shu yawˇ ve yehˬ hta‸ ha‸ shaˉ puiˉ ve chaw, nyi ma da‸ ve chaw leh, a shu yawˇ ve awˬ hpawˇ hkawˇ hta‸ na yuˬ puiˉ ve chaw hpeh‸ la tuˬ htawˇ, yawˇ hui maˍ piˇ hpeh‸ ve yoˬ. Yaˇ miˇ teˇ hpaˍ chi hk'e te ve k'o, G'uiˬ sha ve tawˇ hkawˇ hta‸ shu maˇ shawˍ maˇ caˆ k'oˆ maˇ hpeh‸. 6 A sha‸ i ve hawˉ hk'aˆ teˇ hpaˍ htawˇ nyi ma taˍ puiˉ tuˬ, oˇ ve hk'a shuˍ shuˍ yawˇ hui hta‸ awˬ g'aˇ hk'a deh‸ piˇ-oˆ. 7 Teˇ ceuˬ le le awˬ hk'aw lo, da‸ ve kanˉ teˇ hpaˍ nawˬ awˬ to hk'a deh‸ te maˍ piˇ-oˆ. Maˍ piˇ ve awˬ hk'aw lo hteˇ lehˍ te leh, dawˇ yeˬ gaˇ yeˬ ve awˬ hk'aw lo maˍ piˇ-oˆ. 8 Shu venˇ baˆ taˍ kuiˬ maˇ g'a cawˬ tuˬ, da‸ jaˇ biˇ jaˇ ve tawˇ hkawˇ hta‸ maˍ piˇ-oˆ. Chi hk'e te ve k'o, ngaˬ hui hta‸ tawˍ taˍ ve chaw lehˬ, ngaˬ hui hta‸ te‸ chiˉ hk'aiˉ maˇ hpeh‸ leh, g'a ya‸ taw tuˬ yoˬ. 9 Shu vuiˬ taˍ ve awˬ ceˬ teˇ hpaˍ lehˬ, a shu yawˇ ve awˬ shehˍ hpaˇ hkawˇ hta‸ na yuˬ leh, teˇ ceuˬ le le awˬ hk'aw lo awˬ shehˍ hpaˇ nyi hk'aˇ suh tuˬ te cawˇ ve yoˬ. 10 Awˬ shehˍ hpaˇ hta‸ g'awˬ hk'aˆ ve maˇ k'oˆ, yawˇ ve mawˇ hta‸ hk'awˇ ve maˇ k'oˆ, maˇ g'a te. Ya‸ hk'aˇ, hk'a peu-eˬ awˬ hk'aw lo a shu yawˇ ve awˬ shehˍ hpaˇ awˬ hawˉ lo hk'a deh‸ g'a chehˇ ve yoˬ. Chi hk'e te ve k'o, teˇ ceuˬ le le awˬ hk'aw lo ngaˬ hui ve Htaiˍ hk'aw‸ pa G'uiˬ sha ve maˍ piˇ ve tawˇ hkawˇ hta‸ awˬ hkiˇ shawˍ ve hk'e yawˇ hui te hpeh‸ tuˬ yoˬ. 11 G'uiˬ sha ve awˬ bon lehˬ, chaw hk'a peu-eˬ hta‸ htaiˍ hk'aw‸ tuˬ awˬ pon tawˆ la peuˬ. 12 Awˬ bon oˇ ve lehˬ, ngaˬ hui hta‸ chi hk'e maˍ laˇ ve yoˬ. G'uiˬ sha hta‸ maˇ yawˆ maˇ yan ve teˇ ceuˬ leh, miˬ guiˬ hta‸ caˉ da‸ ve sheˉ lai ve teˇ hpaˍ hta‸ baˬ taˉ tuˬ maˍ laˇ ve yoˬ. Chi teˇ ca‸ na‸ awˬ hk'aw lo ngaˬ hui lehˬ, nyi ma taˍ puiˉ ve, hteˇ ve cawˇ ve hta‸ te puiˉ ve leh, G'uiˬ sha hta‸ yawˆ yan puiˉ tuˬ ka‸ maˍ laˇ ve yoˬ. 13 Ngaˬ hui ve uiˍ jaˇ da‸ jaˇ ve G'uiˬ sha hpeh‸ ve Htaiˍ hk'aw‸ paˍ Yeˍsuˆ Hkri‸ ve awˬ me‸ awˬ hponˇ tawˆ la tuˬ ve awˬ bon uiˍ ve hta‸ ngaˬ hui dawˇ law chehˇ taˍ ve yoˬ. 14 Yawˇ lehˬ, venˇ baˆ hk'a peu-eˬ awˬ hk'aw lo ngaˬ hui hta‸ htaiˍ hk'aw‸ laˇ tuˬ maˇ k'oˆ, yawˇ awˬ to awˬ pon da‸ ve kehˬ ve chaw teˇ ceuˬ cawˬ la tuˬ maˇ k'oˆ, yawˇ ve awˬ to tanˇ piˇ ve yoˬ. Chaw oˇ ve teˇ ceuˬ lehˬ, da‸ ve kanˉ teˇ hpaˍ hta‸ te gaˇ jaˇ ve nyi ma cawˬ tuˬ yoˬ. 15 Awˬ lawn chi teˇ hpaˍ hta‸ hk'a deh‸ hto piˇ-oˆ. Awˬ tehˬ awˬ na kanˇ paˆ cawˬ ve awˬ hk'aw lo awˬ g'aˇ piˇ leh deˇ maˍ piˇ-oˆ. Chaw teˇ g'aˇ ka‸ nawˬ hta‸ maˇ yawˆ maˇyan maˇ g'a te tuˬ, shaˍ ti‸ te-o.

Tiˇtuˆ 3

1 Yawˇ hui lehˬ, jawˇ mawˇ leh uˉ peunˍ shehˍ hpaˇ teˇ hpaˍ awˬ hawˉ lo chehˇ leh yawˇ hui ve hkawˇ hta‸ na yuˬ tuˬ maˇ k'oˆ, da‸ ve kanˉ teˇ ceuˬ le le hta‸ te tuˬ awˬ pon gu taˍ hehnˇ taˍ tuˬ maˇ k'oˆ, yawˇ hui hta‸ hk'a deh‸ dawˇ nawˇ piˇ-oˆ. 2 A shu hta‸ ka‸ maˇ shawˍ maˇ caˆ maˇ g'a k'oˆ. Tawˇ maˇ g'a g'awˬ da‸. Ya‸ hk'aˇ, nyi ma nuˇ nehˬ taˍ leh, teˇ ceuˬ le le awˬ hk'aw lo chaw hk'a peu-eˬ hta‸ yawˆ yawˆ yan yan te tuˬ ka‸, yawˇ hui hta‸ hk'a deh‸ dawˇ nawˇ piˇ-oˆ. 3 Awˬ lawn k'o, ponˬ laˬ htaˇ ngaˬ hui htawˇ cuˇ yiˍ maˇ cawˬ ve chaw, maˇ na yuˬ puiˉ ve chaw, ya‸ k'aw ya‸ ve chaw, awˬ suhˍ awˬ shaˍ sheˉ lai leh ha lehˬ tuˬ laiˉ ceuˬ awˬ hk'aˇ suh te k'ai ve chaw, shu hta‸ hkawehˉ leh naˬ tuˬ te ve chaw, shu ngaˬ hui hta‸ canˇ leh, ngaˬ hui teˇ g'aˇ leh teˇ g'aˇ hta‸ canˇ da‸ ve chaw hpeh‸ jaw ve yoˬ. 4 Ya‸ hk'aˇ, ngaˬ hui ve Htaiˍ hk'aw‸ shehˍ hpaˇ G'uiˬ sha ve ha k'aˉ ve teˇ ceuˬ leh, yawˇ chaw yaˇ hta‸ ha‸ ve teˇ ceuˬ tawˆ la ve teˇ yanˇ, yawˇ ngaˬ hui hta‸ htaiˍ hk'aw‸ laˇ ve yoˬ. 5 Ngaˬ hui hteˇ ve cawˇ ve kanˉ te ve hta‸ pa taw maˇ heˆ. Yawˇ ngaˬ hui hta‸ ha k'aˉ ve hta‸ pa taw htaiˍ hk'aw‸ laˇ ve yoˬ. Da‸ ve kehˬ ve Awˬ ha hpu awˬ hk'aw lo awˬ suhˉ teˇ pawˆ paw la ve hta‸ caˉ da‸ ve tsuhˇ hk'a laˇ ve teˇ ceuˬ leh, awˬ suhˉ k'aw‸ gu te laˇ ve teˇ ceuˬ hta‸ cuˇ leh ngaˬ hui hta‸ htaiˍ hk'aw‸ laˇ ve yoˬ. 6 Ngaˬ hui ve Htaiˍ hk'aw‸ paˍ Yeˍsuˆ Hkri‸ hta‸ yawˇ cuˇ leh, oˇ ve nyiˇ ceuˬ ngaˬ hui awˬ hk'oˆ hta‸ hk'a biˇ ngeuˍ pfuhˍ laˇ ve yoˬ. 7 Hk'e te leh, yawˇ ve awˬ bon hta‸ pa taw ngaˬ hui hteˇ ve cawˇ ve chaw hpeh‸ leh, co ti‸ ha ti‸ hta‸ dawˇ law ve awˬ hk'aw lo ngaˬ hui yawˇ ve awˬ shinˉ hta‸ caˇ shehˍ hpaˇ hpeh‸ la ve yoˬ. 8 Tawˇ hkawˇ chi hta‸ nawˬ yonˍ hpeh‸ ve yoˬ. G'uiˬ sha hta‸ yonˍ ve chaw hui lehˬ, da‸ ve kanˉ teˇ hpaˍ hta‸ g'a te tcuhˉ taˍ ve yoˬ teh‸ dawˇ nawˇ tuˬ awˬ pon, awˬ lawn chi teˇ hpaˍ nawˬ g'aˇ hte‸ maˍ piˇ tuˬ ngaˬ heuˆ gaˇ ve yoˬ. Chi teˇ hpaˍ lehˬ, da‸ ve kanˉ hpeh‸ leh, chaw yaˇ hui awˬ pon awˬ bon cawˬ ve yoˬ. 9 Ya‸ hk'aˇ, cuˇ yiˍ maˇ cawˬ ve jehˬ da‸ cehˇ da‸ ve teˇ hpaˍ hta‸ maˇ k'oˆ, awˬ ceuˬ awˬ hk'aˇ teˇ caˉ peuˬ teˇ caˉ shawˍ nyi ve hta‸ maˇ k'oˆ, ya‸ da‸ jiˆ da‸ ve hta‸ maˇ k'oˆ, awˬ liˇ tawˇ hkawˇ awˬ lawn tawˇ g'awˬ da‸ ve teˇ hpaˍ hta‸ maˇ k'oˆ, jaw k'ai-o. Awˬ lawn k'o, awˬ ceuˬ oˇ ve teˇ hpaˍ lehˬ, te‸ chiˉ awˬ bon maˇ cawˬ leh, hk'e leˇ hpeh‸ ve yoˬ. 10 Awˬ moˍ pehˬ da‸ hpaˆ da‸ tuˬ te ve chaw hta‸ teˇ pawˆ nyiˇ pawˆ hk'a deh‸ maˍ piˇ peuˬ hk'aw‸ nawˉ yawˇ hta‸ awˬ chawˇ taˇ k'aw‸ te. 11 Chi hk'e ve chaw lehˬ, nyi ma a ciˉ ka‸ maˇ hteˇ leh, venˇ baˆ te chehˇ ve yoˬ teh‸ shiˍ-o‸. Yawˇ lehˬ, a shu yawˇ awˬ to hta‸ suhˉ taˆ peuˬ. 12 Ngaˬ lehˬ, Aˍteˍmaˆ hta‸ maˇ k'oˆ, Tuˇhkiˆ hta‸ maˇ k'oˆ, nawˬ geh peu laˇ ve teˇ yanˇ, Niˇkawˇpaˍliˆ venˇ lo ngaˬ hta‸ g'a hpuˇ da‸ tuˬ coˇ caˇ leh laˬ-o‸. Awˬ lawn k'o, mvuhˇ kaˆ ve awˬ yanˇ htaˇ venˇ oˇ ve awˬ hk'aw lo ngaˬ chehˇ tuˬ yoˬ teh‸ dawˇ taˍ ve yoˬ. 13 Awˬ liˇ tawˇ hkawˇ shiˍ pa Seˍnaˆ leh Aˍpawˇlu‸ hta‸ haˆ haˆ peu laˇ-oˆ. Yawˇ huiˉ maˬ laˬ ve teˇ yanˇ te‸ chiˉ ka‸ maˇ g'a loˍ tuˬ hk'a deh‸ ga piˇ-oˆ. 14 Ngaˬ hui ve chaw teˇ hpaˍ lehˬ, da‸ ve kanˉ teˇ hpaˍ hta‸ g'aˇ hte‸ te k'ai hpeh‸ tuˬ maˍ piˇ-oˆ. Yawˇ hui chi hk'e te ve k'o, loˍ jaˇ ve chaw teˇ hpaˍ hta‸ ga piˇ hpeh‸ leh, awˬ shiˍ naw‸ ve chaw hpeh‸ tuˬ yoˬ. 15 Ngaˬ geh chehˇ ve chaw hk'a peu-eˬ lehˬ, nawˬ hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Yonˍ ve awˬ hk'aw lo ngaˬ hui hta‸ ha‸ ve chaw teˇ hpaˍ hta‸ ngaˬ hui dawˇ nawˇ chehˇ ve yoˬ teh‸ hto piˇ-oˆ. Nawˬ hui hk'a peu-eˬ geh awˬ bon awˬ shinˉ cawˬ piˇ-oˆ.

Hpiˇleˍmonˍ 1

1 Yeˍsuˆ Hkri‸ awˬ pon htawnˍ hk'aw g'a chehˇ ve ngaˬ Pawˇlu‸ leh, ngaˬ hui ve awˬ viˉ awˬ nyi Tiˆmoˉseˍ lehˬ, ngaˬ huiˉ maˬ geh teˇ geh kanˉ te ve ha‸ ve Hpiˇleˍmonˍ hta‸ maˇ k'oˆ, 2 awˬ nyi ma Aˍpiˆ leh ngaˬ huiˉ maˬ geh teˇ geh bon hpawˇ ma‸ yaˇ te ve Aˍhkiˇpuˆ hta‸ maˇ k'oˆ, nawˬ ve yehˬ awˬ hk'aw lo hpawnˬ da‸ ve Hkri‸ yaˇ awˬ moˍ hta‸ maˇ k'oˆ, li‸ chi bvuh‸ laˇ ve yoˬ. 3 Ngaˬ hui ve Awˬ pa G'uiˬ sha leh Jawˇ mawˇ Yeˍsuˆ Hkri‸ ve awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. 4 Nawˬ lehˬ, Jawˇ mawˇ Yeˍsuˆ hta‸ yonˍ leh, Hkri‸ yaˇ hk'a peu-eˬ hta‸ ha‸ ve yoˬ teh‸ ngaˬ g'a kaˇ ve pa taw, 5 nawˬ awˬ pon ngaˬ bon lawˬ chehˇ ve teˇ yanˇ, nawˬ hta‸ pa taw ngaˬ ve G'uiˬ sha hta‸ hk'aˬ htaˆ ka‸ ngaˬ chiˇ mvuh ve yoˬ. 6 Ngaˬ bon lawˬ ve lehˬ, shu geh teˇ geh nawˬ Hkri‸ hta‸ yonˍ ve awˬ hk'aw lo, yawˇ hta‸ pa taw ngaˬ hui cawˬ taˍ ve da‸ ve hk'a peu-eˬ hta‸ nawˬ shiˍ maˇ la tuˬ awˬ pon ngaˬ lawˬ ve yoˬ. 7 Awˬ nyi paˍ-oˬ, nawˬ ve ha‸ pehnˇ ve hta‸ pa taw, ngaˬ ha lehˬ dawˇ sha jaˇ ve yoˬ. Awˬ lawn k'o, nawˬ hta‸ pa taw Hkri‸ yaˇ teˇ hpaˍ ve nyi ma awˬ g'aˇ cawˬ la ve yoˬ. 8 Chi hta‸ pa taw, nawˬ te keunˍ te cawˇ ve kanˉ hta‸ te tuˬ awˬ pon nawˬ hta‸ tawˇ piˇ tuˬ, Hkri‸ awˬ hk'aw lo ngaˬ ha‸ hanˉ ve nyi ma cawˬ ve htawˇ, ngaˬ oˇ hk'e maˇ te. 9 Chaw mawˇ hpeh‸ leh, chi beu‸ Yeˍsuˆ Hkri‸ awˬ pon htawnˍ hk'aw g'a chehˇ taˍ ve ngaˬ Pawˇlu‸ lehˬ, ha‸ pehnˇ ve awˬ hk'aw lo nawˬ hta‸ lawˬ hkawˉ ve yoˬ. 10 Ngaˬ htawnˍ hk'aw chehˇ ve awˬ yanˇ awˬ hk'aw lo, co ha hpawˇ ngaˬ paw la piˇ taˍ ve, ngaˬ ve yaˇ Awˍneˍsiˍmuˆ awˬ pon ngaˬ nawˬ hta‸ lawˬ hkawˉ ve yoˬ. 11 (Yawˇ lehˬ, ponˬ laˬ htaˇ nawˬ awˬ pon awˬ bon maˇ cawˬ ve htawˇ, chi beu‸ nawˬ awˬ pon maˇ k'oˆ, ngaˬ awˬ pon maˇ k'oˆ, awˬ bon cawˬ tehˬ ve yoˬ.) 12 Ngaˬ yawˇ hta‸ nawˬ geh k'aw‸ peu laˇ ve yoˬ. Ngaˬ chi hk'e peuˬ laˇ ve teˇ yanˇ, ngaˬ ve nyi ma shiˍ hta‸ nawˬ geh peu laˇ ve hk'e yoˬ. 13 Ha lehˬ ve bon hkawˇ hta‸ pa taw ngaˬ htawnˍ hk'aw g'a chehˇ ve awˬ yanˇ awˬ hk'aw lo, yawˇ nawˬ ve awˬ tan te leh ngaˬ awˬ pon kanˉ te tuˬ yawˇ hta‸ ngaˬ geh chehˇ tcuh gaˇ ve yoˬ. 14 Ya‸ hk'aˇ, nawˬ awˬ bon te laˇ ve lehˬ, g'a te ve pa taw te ve teˇ ceuˬ maˇ g'a hpeh‸ leh, te gaˇ ve awˬ hk'aw lo te ve teˇ ceuˬ g'a hpeh‸ tuˬ, nawˬ geh a hkaw-anˬ maˇ g'a ve ceh ceh, ngaˬ a ciˉ ka‸ maˇ te gaˇ. 15 Chi hk'oˆ ka‸, yawˇ nawˬ geh hk'aˬ htaˆ ka‸ chehˇ hpeh‸ tuˬ, yawˇ nawˬ hta‸ teˇ tcuhˉ teˇ yanˇ g'a hpaˆ da‸ ve yoˬ hehˉ. 16 Ya‸ hk'aˇ, chi teˇ pawˆ nawˬ geh k'aw‸ chehˇ ve lehˬ, awˬ ceˬ hk'e maˇ heˆ. Ha‸ ve awˬ viˉ awˬ nyi hk'e chehˇ piˇ-oˆ. Ngaˬ yawˇ hta‸ ha‸ jaˇ ve yoˬ. Nawˬ htawˇ chi a‸ kehˉ leuˉ leh, awˬ suhˍ awˬ shaˍ hpawˇ maˇ k'oˆ, Jawˇ mawˇ Yeˍsuˆ awˬ hk'aw lo maˇ k'oˆ, yawˇ hta‸ ha‸ cawˇ ve yoˬ. 17 Ngaˬ hta‸ awˬ tehˬ awˬ na nawˬ ve awˬ chawˇ hpeh‸ ve yoˬ teh‸ nawˬ shawˍ taˍ ve k'o, ngaˬ hta‸ ha‸ yuˬ ve hk'e yawˇ hta‸ ha‸ yuˬ-o‸. 18 Yawˇ nawˬ hta‸ teˇ ceuˬ ceuˬ te ya‸ ve maˇ k'oˆ, jeˬ teˇ ceuˬ ceuˬ cawˬ ve maˇ k'oˆ, ngaˬ ve jeˬ hk'e shawˍ taˍ-o‸. 19 Ngaˬ Pawˇlu‸ lehˬ, jeˬ oˇ ve hta‸ shaiˍ laˇ tuˬ yoˬ teh‸ ngaˬ awˬ to bvuh‸ ve yoˬ. Ya‸ hk'aˇ, nawˬ awˬ to nawˬ ve co ha ngaˬ hta‸ shaiˍ laˇ cawˇ ve awˬ lawn ngaˬ te‸ chiˉ maˇ k'oˆ. 20 Awˬ nyi paˍ-oˬ, Jawˇ mawˇ Yeˍsuˆ awˬ hk'aw lo ngaˬ nawˬ geh awˬ bon teˇ ceuˬ ceuˬ g'a gaˇ ve yoˬ. Hkri‸ awˬ hk'aw lo ngaˬ ve nyi ma hta‸ awˬ g'aˇ cawˬ la piˇ-oˆ. 21 Nawˬ ngaˬ ve hkawˇ hta‸ na yuˬ tuˬ yoˬ teh‸, ngaˬ yonˍ ve pa taw, ngaˬ nawˬ hta‸ li‸ bvuh‸ laˇ ve yoˬ. Ngaˬ k'oˆ ve a‸ kehˉ ka‸ nawˬ te tuˬ yoˬ teh‸ ngaˬ shiˍ ve yoˬ. 22 Chi hk'oˆ ka‸, ngaˬ awˬ pon chehˇ kuiˬ a ciˉ gu taˍ-o‸. Awˬ lawn k'o, nawˬ hui bon lawˬ ve hta‸ pa taw, ngaˬ nawˬ hui geh teˇ pawˆ g'a k'aw‸ laˬ tuˬ yoˬ teh‸ ngaˬ dawˇ law taˍ ve yoˬ. 23 Yeˍsuˆ Hkri‸ hta‸ pa taw ngaˬ geh teˇ geh htawnˍ hk'aw chehˇ taˍ ve Eˇpaˍhpaˍraˆ lehˬ, nawˬ hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 24 Ngaˬ geh teˇ geh kanˉ te shehˍ hpaˇ Maˍkuˆ, Aˍriˍtaˍhkuˆ, Deˍmaˆ leh Luˉka‸ hui htawˇ, nawˬ hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 25 Jawˇ mawˇ Yeˍsuˆ Hkri‸ ve awˬ bon awˬ shinˉ nawˬ hui ve nyi ma awˬ hk'aw lo cawˬ piˇ-oˆ.

Heˍbrehˇ 1

1 G'uiˬ sha lehˬ, aˬ sho-eˬ htaˇ tcuh kaˍ paˍ teˇ hpaˍ hta‸ cuˇ leh, awˬ puˍ awˬ pi teˇ hpaˍ hta‸ laiˉ ceuˬ awˬ hk'aw lo laiˉ pawˆ tawˇ yaw piˇ ve yoˬ. 2 Awˬ leh meuˇ ve awˬ nyi awˬ haˉ chi awˬ hk'aw lo, yawˇ ve Yaˇ hpu hta‸ cuˇ leh, yawˇ ngaˬ hui hta‸ tawˇ k'aw‸ yaw laˇ peuˬ. Awˬ shinˉ hk'a peu-eˬ hta‸ caˇ shehˍ hpaˇ hpeh‸ tuˬ, Yaˇ hpu oˇ ve hta‸ G'uiˬ sha leuˆ yuˬ taˍ ve yoˬ. G'uiˬ sha yawˇ hta‸ cuˇ leh, sha hpa‸ laˬ hpa‸ htaˆ hk'a peu-eˬ hta‸ te hpanˍ taˍ ve yoˬ. 3 Yaˇ hpu lehˬ, G'uiˬ sha ve awˬ me‸ awˬ hponˇ hta‸ ba tawˆ la leh, G'uiˬ sha nyi ma taˍ ve hk'a shuˍ shuˍ, yawˇ taˍ ve yoˬ. Kanˇ paˆ hk'a biˇ cawˬ ve yawˇ ve tawˇ hkawˇ hta‸ cuˇ leh, hk'a cawˬ ve hk'a peu-eˬ hta‸ yawˇ ha‸ shaˉ leh ga piˇ chehˇ ve yoˬ. Chaw yaˇ ve venˇ baˆ teˇ hpaˍ hta‸ yawˇ tsuhˇ baˬ peuˬ hk'aw‸ nawˉ, mvuh kuiˬ lo chehˇ ve kanˇ paˆ uiˍ shehˍ hpaˇ ve la‸ sha paˉ lo yawˇ mui taˍ ve yoˬ. 4 Mvuhˇ naw ma tcuh yaˇ hui da‸ ve awˬ meh cawˬ ve a‸ kehˉ yawˇ g'a taˍ ve awˬ meh lehˬ da‸ leuˉ ve yoˬ. Chi hk'a shuˍ shuˍ, yawˇ lehˬ yawˇ hui a‸ kehˉ uiˍ leuˉ da‸ leuˉ ve yoˬ. 5 Nawˬ lehˬ ngaˬ ve Yaˇ hpu yoˬ. Ya‸ nyi ngaˬ nawˬ ve Awˬ pa hpeh‸ la peuˬ, teh‸ G'uiˬ sha lehˬ mvuhˇ naw ma tcuh yaˇ hk'aˬ ve teˇ g'aˇ hta‸ k'oˆ piˇ jaw le. Maˇ heˆ k'o, Ngaˬ lehˬ yawˇ ve awˬ pa hpeh‸ leh, yawˇ ngaˬ ve yaˇ hpeh‸ tuˬ yoˬ, teh‸ G'uiˬ sha lehˬ mvuhˇ naw ma tcuh yaˇ hk'aˬ ve teˇ g'aˇ hta‸ k'oˆ piˇ jaw le. 6 Chi hk'oˆ ka‸, yaˇ uiˍ hta‸ miˬ guiˬ hk'oˆ peu laˇ ve teˇ yanˇ, G'uiˬ sha ve mvuhˇ naw ma tcuh yaˇ hk'a peu-eˬ yawˇ hta‸ oˉ k'oˍ pui loˬ, teh‸ yawˇ k'oˆ piˇ ve yoˬ. 7 Mvuhˇ naw ma tcuh yaˇ teˇ hpaˍ awˬ lawn G'uiˬ sha k'oˆ ve, Yawˇ ve tcuh yaˇ teˇ hpaˍ hta‸ mvuhˇ haw hk'a shuˍ shuˍ hpeh‸ tcuh leh, yawˇ ve awˬ ceˬ teˇ hpaˍ hta‸ aˬ miˍ ha hk'a shuˍ shuˍ hpeh‸ tcuh ve yoˬ, teh‸ yawˇ k'oˆ taˍ ve yoˬ. 8 Ya‸ hk'aˇ, Yaˇ hpu ve awˬ lawn chi hk'e k'oˆ ve, G'uiˬ sha-oˬ, nawˬ ve k'aw jaw co co taiˍ taiˍ yeˬ chehˇ ve yoˬ. Nawˬ ve mvuhˇ miˬ hta‸ hteˇ lehˍ cawˇ lehˍ nawˬ uˉ peunˍ ve yoˬ. 9 Nawˬ hteˇ ve cawˇ ve hta‸ ha‸ leh, maˇ hteˇ maˇ cawˇ ve hta‸ canˇ ve yoˬ. Chi hta‸ pa taw nawˬ ve G'uiˬ sha lehˬ, nawˬ ve awˬ chawˇ teˇ hpaˍ hta‸ pfuhˍ piˇ ve a‸ kehˉ, ha lehˬ ve naˍ manˇ nawˬ hta‸ yawˇ pfuhˍ laˇ peuˬ, teh‸ k'oˆ ve yoˬ. 10 Peuˬ leh, Jawˇ mawˇ G'uiˬ sha-oˬ, awˬ hkuiˉ puiˍ htaˇ nawˬ miˬ guiˬ hta‸ te hpanˍ taˍ leh, mvuhˇ naw ma hta‸ htawˇ nawˬ ve la‸ sheh te hpanˍ taˍ ve yoˬ. 11 Oˇ ve teˇ hpaˍ luˬ k'ai tuˬ yoˬ. Ya‸ hk'aˇ, nawˬ lehˬ hk'aˬ htaˆ ka‸ yeˬ chehˇ tuˬ yoˬ. Oˇ ve hk'a peu-eˬ veu‸ k'aˇ hk'e piˍ k'ai tuˬ yoˬ. 12 Aˉ po‸ lonˉ hta‸ lo‸ taˍ ve hk'a shuˍ shuˍ, oˇ ve teˇ hpaˍ hta‸ nawˬ lo‸ leh k'aw‸ pa piˇ tuˬ yoˬ. Ya‸ hk'aˇ, nawˬ hk'aˬ htaˆ ka‸ hk'a shuˍ shuˍ hpeh‸ leh, nawˬ ve awˬ hk'aw‸ htawˇ maˇ peuˬ maˇ leh, teh‸ k'oˆ ve yoˬ. 13 Oˇ ve awˬ hk'oˆ ka‸, Nawˬ ve canˇ paˍ teˇ hpaˍ hta‸ nawˬ ve hkui sheh awˬ hawˉ lo ngaˬ taˍ htaˇ hk'a gaˬ, ngaˬ ve la‸ sha paˉ lo mui chehˇ-oˆ, teh‸ G'uiˬ sha lehˬ mvuhˇ naw ma tcuh yaˇ hk'aˬ ve teˇ g'aˇ hta‸ k'oˆ piˇ jaw le. 14 Mvuhˇ naw ma tcuh yaˇ hk'a peu-eˬ lehˬ, htaiˍ hk'aw‸ ve awˬ shinˉ hta‸ g'a caˇ tuˬ ve chaw hui awˬ pon kanˉ te tuˬ, tcuh taˍ ve awˬ ha teˇ hpaˍ hpeh‸ ve maˇ heˆ laˇ.

Heˍbrehˇ 2

1 Chi hta‸ pa taw, ngaˬ hui g'a kaˇ taˍ peuˬ ve tawˇ hkawˇ teˇ hpaˍ awˬ hk'aw lo maˇ g'a jiˆ tawˆ-e tuˬ, tawˇ hkawˇ oˇ ve teˇ hpaˍ hta‸ leuˉ leh hk'a deh‸ na yuˬ-o‸. 2 Mvuhˇ naw ma tcuh yaˇ hui hta‸ G'uiˬ sha k'oˆ tcuh ve tawˇ hkawˇ teˇ hpaˍ cawˇ ve pa taw, tawˇ hkawˇ oˇ ve teˇ hpaˍ hta‸ te ya‸ leh maˇ na yuˬ ve teˇ ceuˬ le le hta‸ keunˍ da‸ ve hk'e yawˇ ciˍ yanˍ piˇ ve yoˬ. 3 Hk'e te leh, uiˍ jaˇ ve htaiˍ hk'aw‸ ve chi hta‸ ngaˬ hui maˇ ha‸ yuˬ ve k'o, ngaˬ hui hk'aˬ hk'e te ponˬ hpeh‸ tuˬ le. Htaiˍ hk'aw‸ ve awˬ lawn chi awˬ hkuiˉ puiˍ htaˇ ka‸ Jawˇ mawˇ Yeˍsuˆ k'oˆ taˍ leh, g'a kaˇ ve chaw hui lehˬ, Awˬ lawn chi awˬ tehˬ awˬ na cawˇ ve yoˬ teh‸, ngaˬ hui hta‸ k'aw‸ k'oˆ laˇ ve yoˬ. 4 G'uiˬ sha htawˇ, awˬ heˆ leh anˇ tuˬ teˇ hpaˍ awˬ hk'aw lo maˇ k'oˆ, kanˇ paˆ uiˍ ve kanˉ teˇ hpaˍ awˬ hk'aw lo maˇ k'oˆ, yawˇ ve a loˍ cawˇ ve hk'e da‸ ve kehˬ ve Awˬ ha hpu ve la‸ shawnˍ teˇ hpaˍ pehˬ piˇ ve awˬ hk'aw lo maˇ k'oˆ, yawˇ hui geh teˇ geh shaˉ hkiˆ hkanˍ ve yoˬ. 5 Awˬ lawn k'o, chi beu‸ ngaˬ hui k'oˆ chehˇ ve, awˬ hk'aw‸ nawˉ cawˬ la tuˬ ve miˬ guiˬ chi hta‸ mvuhˇ naw ma tcuh yaˇ hui awˬ hawˉ lo yawˇ teh taˍ ve maˇ heˆ. 6 Li‸ hpu teˇ kaˬ awˬ hk'aw lo chaw teˇ g'aˇ chi hk'e shaˉ hkiˆ hkanˍ leh k'oˆ ve, Nawˬ chaw yaˇ hta‸ dawˇ nyi tuˬ, chaw yaˇ lehˬ aˬ hto‸ ma hpeh‸ ve le. Nawˬ chaw yaˇ ve yaˇ hta‸ nyi ha‸ shaˉ tuˬ, chaw yaˇ ve yaˇ lehˬ aˬ hto‸ ma hpeh‸ ve le. 7 Nawˬ yawˇ hta‸ mvuhˇ naw ma tcuh yaˇ teˇ hpaˍ awˬ hawˉ lo a ciˉ ceh tiˉ nehˬ piˇ leh, da‸ ve awˬ meh leh awˬ me‸ awˬ hponˇ, shi uˉ tcuhˍ hk'e nawˬ yawˇ ve oˉ k'oˍ hta‸ hk'awˆ piˇ taˍ peuˬ. 8 Awˬ ceuˬ hk'a peu-eˬ yawˇ ve hkui taw k'aw awˬ hawˉ lo nawˬ teh taˍ peuˬ, teh‸ k'oˆ taˍ ve yoˬ. Yawˇ awˬ hawˉ lo awˬ ceuˬ hk'a peu-eˬ hta‸ teh taˍ ve teh‸ k'oˆ ve teˇ yanˇ, yawˇ awˬ hawˉ lo maˇ teh taˍ ve teˇ ceuˬ ka‸ maˇ cawˬ. Ya‸ hk'aˇ, yawˇ awˬ hawˉ lo awˬ ceuˬ hk'a peu-eˬ teh taˍ ve hta‸ chi beu‸ ngaˬ hui maˇ g'a mawˬ sheˍ. 9 Ya‸ hk'aˇ, ngaˬ hui Yeˍsuˆ hta‸ g'a mawˬ ve yoˬ. Yawˇ hta‸ mvuhˇ naw ma tcuh yaˇ teˇ hpaˍ awˬ hawˉ lo a ciˉ ceh tiˉ nehˬ piˇ leh, suh ve awˬ hk'aw lo g'a tu‸ g'a hkanˍ ve pa taw, da‸ ve awˬ meh leh awˬ me‸ awˬ hponˇ, shi uˉ tcuhˍ hk'e yawˇ hta‸ hk'awˆ piˇ taˍ ve yoˬ. G'uiˬ sha ve awˬ bon hta‸ pa taw, chaw hk'a peu-eˬ awˬ pon suh ve hta‸ yawˇ g'a hkanˍ ve yoˬ. 10 Awˬ lawn k'o, G'uiˬ sha lehˬ awˬ yaˇ awˬ duˬ maˇ maˇ hta‸ awˬ me‸ awˬ hponˇ cawˬ kuiˬ lo shiˍ k'ai ve teˇ yanˇ, yawˇ hui hta‸ htaiˍ hk'aw‸ leh sheh k'ai piˇ shehˍ hpaˇ lehˬ, tu‸ ve hkanˍ ve awˬ hk'aw lo biˇ la tuˬ yawˇ te piˇ ve teˇ ceuˬ lehˬ cawˇ ve yoˬ. Awˬ ceuˬ hk'a peu-eˬ G'uiˬ sha awˬ pon hpeh‸ leh, yawˇ hta‸ pa taw awˬ ceuˬ chi hk'a peu-eˬ hpeh‸ la ve yoˬ. 11 Awˬ lawn k'o, da‸ piˇ kehˬ piˇ shehˍ hpaˇ leh, yawˇ da‸ piˇ kehˍ piˇ ve chaw teˇ hpaˍ lehˬ, teˇ g'aˇ awˬ hk'aw lo ceh tiˉ hpeh‸ tawˆ la ve yoˬ. Chi hta‸ pa taw, yawˇ hui hta‸ awˬ viˉ awˬ nyi teh‸ k'oˆ tuˬ yawˇ maˇ ya‸ taw. 12 Yawˇ k'oˆ ve, Nawˬ ve awˬ meh ngaˬ ve awˬ viˉ awˬ nyi teˇ hpaˍ hta‸ ngaˬ k'aoˍ maˍ piˇ tuˬ yoˬ. Hpawnˬ da‸ kuiˬ awˬ k'aw ji lo ngaˬ nawˬ hta‸ k'a muiˬ chiˇ mvuh tuˬ yoˬ. 13 Yawˇ teˇ pawˆ k'aw‸ k'oˆ ve, Yawˇ hta‸ ngaˬ g'aˇ va tuˬ yoˬ. Peuˬ leh teˇ pawˆ k'aw‸ k'oˆ ve, Nyi loˬ, ngaˬ leh G'uiˬ sha ngaˬ hta‸ pe‸ laˇ ve awˬ yaˇ awˬ duˬ teˇ hpaˍ choˬ kaˬ lo chehˇ ve yoˬ, teh‸ yawˇ k'oˆ taˍ ve yoˬ. 14 Hk'e te leh, awˬ yaˇ awˬ duˬ oˇ ve teˇ hpaˍ awˬ suhˍ awˬ shaˍ pfuhˇ ve pa taw, yawˇ htawˇ oˇ ve hk'a shuˍ shuˍ awˬ suhˍ awˬ shaˍ pfuhˇ ve yoˬ. Aˬ hto‸ ma pa taw le teh‸ k'oˆ k'o, yawˇ suh ve awˬ hk'aw lo, suh ve teˇ ceuˬ awˬ hk'oˆ kanˇ paˆ cawˬ ve neˇ haiˬ hta‸ te luˬ tuˬ maˇ k'oˆ, 15 suh ve hta‸ kawˆ ve pa taw, te‸ chehˇ ve teˇ co-e awˬ hk'aw lo awˬ ceˬ g'a te chehˇ ve chaw hui hta‸ ponˬ piˇ tuˬ maˇ k'oˆ, yawˇ awˬ suhˍ awˬ shaˍ pfuhˇ ve yoˬ. 16 Awˬ lawn k'o, mvuhˇ naw ma tcuh yaˇ hui hta‸ ga piˇ tuˬ awˬ pon yawˇ laˬ ve maˇ heˆ. Awˬ tehˬ awˬ na k'oˆ k'o, Aˍbraˍhanˍ ve awˬ ceuˬ awˬ hk'aˇ hta‸ ga piˇ tuˬ awˬ pon laˬ ve yoˬ. 17 Hk'e te leh, yawˇ lehˬ G'uiˬ sha awˬ pon kanˉ te ve awˬ hk'aw lo, ha k'aˉ puiˉ jaˇ leh ka ti‸ yeˬ ve paw hkuˇ lonˉ hpeh‸ leh, chaw yaˇ hui ve venˇ baˆ hta‸ hpehˇ hk'a tuˬ awˬ pon yawˇ awˬ to tanˇ hpeh‸ tuˬ, teˇ ceuˬ le le awˬ hk'aw lo yawˇ ve awˬ viˉ awˬ nyi hui hk'a shuˍ shuˍ yawˇ g'a hpeh‸ la ve yoˬ. 18 Awˬ lawn k'o, yawˇ awˬ to tu‸ ve hkanˍ ve leh beˬ ve lawˇ ve hta‸ g'a hkanˍ jaw peuˬ ve pa taw, beˬ ve lawˇ ve hta‸ g'a hkanˍ ve chaw hui hta‸ yawˇ ga piˇ hpeh‸ ve yoˬ.

Heˍbrehˇ 3

1 Hk'e te leh, mvuhˇ naw ma hk'oˆ lo kuˬ yuˬ ve awˬ bon hta‸ ngaˬ hui geh hk'a geh g'a ve, da‸ ve kehˬ ve awˬ viˉ awˬ nyi teˇ hpaˍ-oˬ, Yeˍsuˆ hta‸ dawˇ nyi-o. Yawˇ lehˬ, ngaˬ hui yonˍ taˍ ve teˇ ceuˬ awˬ hk'aw lo tcuh yaˇ leh paw hkuˇ lonˉ hpeh‸ ve yoˬ. 2 Moˉseˍ lehˬ G'uiˬ sha ve yehˬ teˇ yehˬ awˬ hk'aw lo ka ti‸ yeˬ leh na yuˬ puiˉ ve hk'e, Yeˍsuˆ htawˇ yawˇ hta‸ leuˆ teh taˍ piˇ shehˍ hpaˇ hta‸ ka ti‸ yeˬ leh na yuˬ puiˉ ve yoˬ. 3 Yehˬ te shehˍ hpaˇ lehˬ, yehˬ a‸ kehˉ awˬ me‸ awˬ hponˇ cawˬ ve hk'e, Yeˍsuˆ htawˇ Moˉseˍ a‸ kehˉ awˬ me‸ awˬ hponˇ cawˬ keunˍ ve yoˬ teh‸ G'uiˬ sha shawˍ taˍ ve yoˬ. 4 Awˬ lawn k'o, yehˬ teˇ yehˬ le le lehˬ, te shehˍ hpaˇ cawˬ ve yoˬ. Ya‸ hk'aˇ, teˇ ceuˬ le le hta‸ te shehˍ hpaˇ lehˬ G'uiˬ sha yoˬ. 5 Moˉseˍ lehˬ, awˬ hk'aw‸ nawˉ hk'a k'oˆ maˍ tuˬ ve teˇ hpaˍ hta‸ shaˉ hkiˆ hkanˍ tuˬ awˬ pon, G'uiˬ sha ve yehˬ teˇ yehˬ hk'a peu-eˬ awˬ hkaw, awˬ ceˬ ve kanˉ hta‸ te ve awˬ hk'aw lo yawˇ ka ti‸ yeˬ leh na yuˬ puiˉ ve yoˬ. 6 Ya‸ hk'aˇ Hkri‸ lehˬ, G'uiˬ sha ve yehˬ awˬ hk'oˆ hta‸ yaˇ paˍ hpeh‸ ve awˬ hk'aw lo ka ti‸ yeˬ leh na yuˬ puiˉ ve yoˬ. Ngaˬ hui htawˇ, nyi ma ha‸ hanˉ ve teˇ ceuˬ hta‸ maˇ k'oˆ, dawˇ law ve awˬ hk'aw lo ha lehˬ leh nyi ma uiˍ tuˬ cawˬ ve teˇ ceuˬ hta‸ maˇ k'oˆ, awˬ leh meuˇ hk'a gaˬ yeˬ chaweh vawˆ taˍ ve k'o, ngaˬ hui lehˬ yehˬ oˇ ve teˇ yehˬ hpeh‸ ve yoˬ. 7 Hk'e te leh, da‸ ve kehˬ ve Awˬ ha hpu k'oˆ taˍ ve hk'e, Ya‸ nyi yawˇ ve awˬ hkawˇ hta‸ nawˬ hui g'a kaˇ ve k'o, 8 heh puiˉ hk'aw lo ngaˬ hta‸ lawˇ nyi leh nyi ma zuhˆ tuˬ te laˇ ve awˬ nyi teˇ nyi hk'a shuˍ shuˍ, nawˬ hui ve nyi ma taˇ heh piˇ. 9 Oˇ kaˬ lo nawˬ hui ve awˬ puˍ awˬ pi hui ngaˬ hta‸ lawˇ nyi canˇ nyi leh, awˇ chi hk'aw‸ hk'a gaˬ ngaˬ te ve kanˉ teˇ hpaˍ hta‸ g'a mawˬ ve yo. 10 Hk'e te leh, chaw oˇ ve teˇ co hta‸ ngaˬ nyi ma zuhˆ leh k'oˆ ve, Yawˇ hui ve nyi ma awˬ hk'aw lo hk'aˬ htaˆ ka‸ ya‸ k'ai chehˇ leh, ngaˬ ve ya‸ k'aw teˇ hpaˍ hta‸ yawˇ hui maˇ shiˍ teh‸ ngaˬ k'oˆ ve yoˬ. 11 Hk'e te leh, Yawˇ hui lehˬ ngaˬ ve g'aˇ jehˇ kuiˬ awˬ hk'aw lo maˇ g'a lo‸-e teh‸, nyi ma zuhˆ ve awˬ hk'aw lo ngaˬ hkanˍ taˍ peuˬ, teh‸ da‸ ve kehˬ ve Awˬ ha hpu k'oˆ ve yoˬ. 12 Awˬ viˉ awˬ nyi teˇ hpaˍ-oˬ, nawˬ hui awˬ hk'aw lo haiˬ ve leh maˇ yonˍ puiˉ ve nyi ma maˇ g'a cawˬ tuˬ shaˍ ti‸ te-o. Chi hk'e ve nyi ma lehˬ, nawˬ hui leh te‸ chehˇ ve, G'uiˬ sha hta‸ hpaˆ da‸ piˇ puiˉ ve yoˬ. 13 Venˇ baˆ heˍ yuˬ beˬ yuˬ ve teˇ ceuˬ hta‸ pa taw nawˬ hui awˬ hk'aw lo teˇ g'aˇ ka‸ nyi ma maˇ g'a heh k'ai tuˬ, ya‸ nyi teh‸ k'oˆ hpeh‸ ve awˬ yanˇ awˬ hk'aw lo, teˇ nyi le le nawˬ hui teˇ g'aˇ leh teˇ g'aˇ awˬ g'aˇ piˇ da‸-o‸. 14 Awˬ hkuiˉ puiˍ htaˇ ka‸ ngaˬ hui nyi ma yeˬ ve hk'e, awˬ leh meuˇ hk'a gaˬ nyi ma hk'a deh‸ yeˬ taˍ ve k'o, ngaˬ hui Hkri‸ hta‸ caˉ da‸ ve chaw hpeh‸ ve yoˬ. 15 Li‸ hpu hk'aw k'oˆ taˍ ve hk'e, Ya‸ nyi yawˇ ve awˬ hkawˇ hta‸ nawˬ hui g'a kaˇ ve k'o, nyi ma zuhˆ tuˬ te laˇ ve awˬ nyi teˇ nyi hk'a shuˍ shuˍ, nawˬ hui ve nyi ma taˇ heh piˇ. 16 G'a kaˇ peuˬ ve htawˇ nyi ma zuhˆ tuˬ te ve chaw hui lehˬ, a shu le. Eˇjiˇtu‸ mvuhˇ miˬ awˬ hk'aw lo Moˉseˍ sheh tawˆ la ve chaw hk'a peu-eˬ yoˬ maˇ heˆ laˇ. 17 Awˇ chi hk'aw‸ hk'a gaˬ yawˇ a shu hta‸ nyi ma zuhˆ ve le. Venˇ baˆ te leh, heh puiˉ hk'aw lo paˍ suh-e ve chaw teˇ hpaˍ hta‸ maˇ heˆ laˇ. 18 Nawˬ hui lehˬ, ngaˬ ve g'aˇ jehˇ kuiˬ awˬ hk'aw lo maˇ g'a lo‸-e teh‸, a shu hta‸ yawˇ hkanˍ ve le. Maˇ na yuˬ ve chaw hui hta‸ yawˇ hkanˍ ve maˇ heˆ laˇ. 19 Hk'e te leh, yawˇ hui maˇ yonˍ ve pa taw maˇ g'a lo‸-e ve hta‸ ngaˬ hui g'a mawˬ g'a shiˍ ve yoˬ.

Heˍbrehˇ 4

1 Hk'e te leh, yawˇ ve g'aˇ jehˇ kuiˬ awˬ hk'aw lo lo‸-e tuˬ a hkaw-anˬ cawˬ sheˍ ve teˇ yanˇ, nawˬ hui awˬ hk'aw lo teˇ g'aˇ g'aˇ maˇ g'a lo‸-e puiˉ-aˆ teh‸ nyiˬ hui teˇ geh dawˇ hkiˉ cawˇ ve yoˬ. 2 Awˬ lawn k'o, yawˇ hui ha lehˬ ve bon hkawˇ g'a kaˇ ve hk'e, ngaˬ hui htawˇ g'a kaˇ peuˬ. Ya‸ hk'aˇ, yawˇ hui g'a kaˇ ve bon hkawˇ hta‸ maˇ yonˍ ve pa taw, yawˇ hui awˬ pon awˬ bon maˇ cawˬ. 3 Ngaˬ hui yonˍ peuˬ ve chaw teˇ hpaˍ lehˬ, g'aˇ jehˇ kuiˬ oˇ ve awˬ hk'aw lo lo‸-e chehˇ ve yoˬ. Oˇ ve hk'a shuˍ shuˍ yawˇ k'oˆ ve, Yawˇ hui lehˬ, ngaˬ ve g'aˇ jehˇ kuiˬ awˬ hk'aw lo maˇ g'a lo‸-e teh‸ nyi ma zuhˆ ve awˬ hk'aw lo ngaˬ hkanˍ ve yoˬ, teh‸ k'oˆ taˍ ve yoˬ. Ya‸ hk'aˇ, miˬ guiˬ te hpanˍ htaˇ ka‸ yawˇ ve kanˉ teˇ hpaˍ hta‸ yawˇ te taˍ peuˬ ve yoˬ. 4 Awˬ lawn k'o, G'uiˬ sha lehˬ yawˇ kanˉ hk'a peu-eˬ hta‸ te peuˬ leh, suhˍ nyi teˇ nyi awˬ hk'aw lo g'aˇ jehˇ ve yoˬ teh‸, suhˍ nyi teˇ nyi awˬ lawn Li‸ hpu teˇ kaˬ awˬ hk'aw lo k'oˆ taˍ ve yoˬ. 5 Li‸ hpu teˇ tawn awˬ hk'aw lo, Yawˇ hui lehˬ, ngaˬ ve g'aˇ jehˇ kuiˬ awˬ hk'aw lo maˇ g'a lo‸-e, teh‸ teˇ pawˆ k'aw‸ k'oˆ taˍ ve yoˬ. 6 Awˉ lawˉ htaˇ ka‸ ha lehˬ ve bon hkawˇ hta‸ g'a kaˇ peuˬ ve chaw hui maˇ na yuˬ ve pa taw yawˇ hui maˇ g'a lo‸-e ve htawˇ, g'a lo‸-e tuˬ ve chaw teˇ hpaˍ hpaˍ cawˬ ve pa taw, 7 G'uiˬ sha lehˬ awˬ nyi teˇ pawˆ k'aw‸ tinˍ ve yoˬ. Awˬ yanˇ maw peuˬ hk'aw‸ nawˉ, G'uiˬ sha lehˬ Daˍviˆ hta‸ cuˇ leh ya‸ sheh bvuh‸ taˍ ve hk'e, Ya‸ nyi yawˇ ve awˬ hkawˇ hta‸ nawˬ hui g'a kaˇ ve k'o, nawˬ hui nyi ma taˇ heh, teh‸ k'oˆ ve yoˬ. Yawˇ tinˍ taˍ ve awˬ nyi oˇ ve lehˬ ya‸ nyi yoˬ. 8 Awˬ lawn k'o, Yawˇsuˆ lehˬ yawˇ hui hta‸ g'aˇ jehˇ kuiˬ hk'aw lo lo‸-e piˇ lawˬ peuˬ ve hk'e k'o, awˬ hk'aw‸ nawˉ awˬ kaˍ awˬ nu teˇ nyi hta‸ G'uiˬ sha k'aw‸ k'oˆ tuˬ ve maˇ heˆ. 9 Hk'e te leh, G'uiˬ sha ve chaw teˇ hpaˍ awˬ pon g'aˇ jehˇ tuˬ ve awˬ nyi cawˬ sheˍ ve yoˬ. 10 Awˬ lawn k'o, G'uiˬ sha yawˇ kanˉ te peuˬ leh g'aˇ jehˇ ve hk'e, yawˇ ve g'aˇ jehˇ kuiˬ awˬ hk'aw lo lo‸-e ve chaw teˇ hpaˍ htawˇ, a shu yawˇ ve kanˉ hta‸ te peuˬ leh g'aˇ g'a jehˇ ve yoˬ. 11 Hk'e te leh, g'aˇ jehˇ kuiˬ oˇ ve awˬ hk'aw lo g'a lo‸-e tuˬ, ngaˬ hui g'aˇ hte‸ te-a veuˬ. Hk'e maˇ heˆ k'o, shu maˇ na yuˬ leh paiˍ ve hk'e, ngaˬ hui htawˇ teˇ g'aˇ g'aˇ paiˍ tuˬ yoˬ. 12 Awˬ lawn k'o, G'uiˬ sha ve tawˇ hkawˇ lehˬ, te‸ chehˇ leh kanˇ paˆ cawˬ ve yoˬ. Tawˇ hkawˇ oˇ ve lehˬ, awˬ viˇ nyiˇ hpawˇ cawˬ ve aˉ htaw hk'a peu-eˬ a‸ kehˉ tcuhˆ leh, nyi ma leh co ha hta‸ maˇ k'oˆ, awˬ mu‸ ku awˬ tcuhˉ leh awˬ caw paw hta‸ maˇ k'oˆ, juˆ pawnˍ leh pehˬ da‸ puiˉ ve yoˬ. Nyi ma awˬ hk'aw lo dawˇ leh heuˆ gaˇ ve teˇ hpaˍ hta‸ htawˇ, fuiˍ da‸ pehˬ da‸ puiˉ ve yoˬ. 13 Hk'a hpanˍ taˍ ve awˬ ceuˬ hk'a peu-eˬ yawˇ mehˆ g'uˇ suhˍ faˉ taˍ ve teˇ ceuˬ ka‸ maˇ cawˬ. Yawˇ hta‸ ngaˬ hui g'a k'aoˍ maˍ piˇ tuˬ ve awˬ shehˍ hpaˇ mehˆ g'uˇ suhˍ lo hk'a peu-eˬ awˬ k'u nyi hpeh‸ leh, hk'a peu-eˬ ve hta‸ yawˇ mawˬ chehˇ ve yoˬ. 14 Ngaˬ hui uiˍ jaˇ ve paw hkuˇ lonˉ teˇ g'aˇ cawˬ ve pa taw, ngaˬ hui yonˍ taˍ ve teˇ ceuˬ hta‸ yeˬ chaweh vawˆ taˍ-a veuˬ, Paw hkuˇ lonˉ oˇ ve lehˬ, mvuhˇ naw ma hk'oˆ hk'a gaˬ lo‸-e peuˬ ve, G'uiˬ sha ve Yaˇ hpu Yeˍsuˆ hpeh‸ ve yoˬ. 15 Ngaˬ hui awˬ g'aˇ nuˇ ve teˇ yanˇ, maˇ ha k'aˉ puiˉ ve paw hkuˇ lonˉ teˇ g'aˇ ngaˬ hui cawˬ ve maˇ heˆ. Ngaˬ hui hk'a shuˍ shuˍ beˬ ve lawˇ ve teˇ ceuˬ le le hta‸ yawˇ g'a hkanˍ jaw ve yoˬ. Ya‸ hk'aˇ, yawˇ venˇ baˆ maˇ te. 16 Hk'e te leh, ngaˬ hui ha k'aˉ ve teˇ ceuˬ hta‸ ka‸, loˍ ve awˬ yanˇ awˬ hk'aw lo ga laˇ tuˬ ve awˬ bon hta‸ ka‸ g'a tuˬ, nyi ma ha‸ hanˉ ve awˬ hk'aw lo awˬ bon uiˍ ve k'aw jaw awˬ paˇ lo ngaˬ hui jiˆ k'ai-a veuˬ.

Heˍbrehˇ 5

1 Awˬ lawn k'o, chaw yaˇ hui awˬ hk'aw lo leuˆ yuˬ taˍ ve paw hkuˇ lonˉ teˇ g'aˇ le le lehˬ, G'uiˬ sha hta‸ caˉ da‸ ve kanˉ teˇ hpaˍ te tuˬ, chaw yaˇ hui awˬ tan leuˆ teh taˍ ve yoˬ. Yawˇ hui lehˬ, venˇ baˆ teˇ hpaˍ awˬ pon la‸ shawnˍ leh tanˇ tuˬ teˇ hpaˍ tanˇ piˇ ve yoˬ. 2 Yawˇ hui awˬ to htawˇ g'aˇ nuˇ puiˉ ve chaw hpeh‸ ve pa taw, maˇ shiˍ ve chaw leh ya‸ k'ai ve chaw hui hta‸ yawˇ hui ha k'aˉ puiˉ ve yoˬ. 3 Yawˇ hui g'aˇ nuˇ puiˉ ve pa taw, chaw yaˇ hui ve venˇ baˆ awˬ pon g'a tanˇ piˇ ve hk'e, a shu yawˇ ve venˇ baˆ awˬ pon htawˇ yawˇ hui g'a tanˇ piˇ sheˍ ve yoˬ. 4 Peuˬ leh, chaw teˇ g'aˇ ka‸ a shu yawˇ hk'aˇ yawˇ aˉ yaˇ chi hta‸ yuˬ hpeh‸ ve maˇ heˆ. Aˍronˍ hta‸ G'uiˬ sha kuˬ yuˬ ve hk'e, yawˇ hui hta‸ htawˇ G'uiˬ sha g'a kuˬ yuˬ ve yoˬ. 5 Chi hk'a shuˍ shuˍ, Hkri‸ lehˬ yawˇ awˬ to hta‸ taˍ uiˍ leh paw hkuˇ lonˉ hpeh‸ la tuˬ ve aˉ yaˇ hta‸ g'a tuˬ yawˇ hk'aˇ yawˇ ca te yuˬ ve maˇ heˆ. Nawˬ lehˬ ngaˬ ve Yaˇ hpu hpeh‸ ve yoˬ. Ya‸ nyi ngaˬ nawˬ ve Awˬ pa hpeh‸ la peuˬ, teh‸ yawˇ hta‸ k'oˆ piˇ shehˍ hpaˇ lehˬ, yawˇ hta‸ aˉ yaˇ piˇ ve yoˬ. 6 Chi hk'a shuˍ shuˍ, awˬ kaˍ awˬ nu teˇ kaˬ lo yawˇ k'oˆ taˍ ve, Maˍlaˍhkiˆsaˍdehˆ paw hkuˇ hpeh‸ ve awˬ hk'aˇ hk'a shuˍ shuˍ, nawˬ lehˬ co co taiˍ taiˍ paw hkuˇ hpeh‸ ve yoˬ. 7 Yeˍsuˆ lehˬ, miˬ guiˬ hk'oˆ lo chehˇ ve teˇ yanˇ, suh kuiˬ lo yawˇ hta‸ htaiˍ hk'aw‸ laˇ puiˉ shehˍ hpaˇ hta‸ g'aˇ hte‸ kuˬ leh mehˆ g'uiˬ ya‸ la ve awˬ hk'aw lo bon lawˬ leh lawˬ hkawˉ ve yoˬ. Yawˇ G'uiˬ sha hta‸ yawˆ yan puiˉ, na yuˬ puiˉ ve pa taw, G'uiˬ sha yawˇ ve hkawˇ hta‸ na yuˬ ve yoˬ. 8 Yawˇ lehˬ, Yaˇ hpu hpeh‸ ve htawˇ tu‸ ve hkanˍ ve hta‸ hkanˍ ve awˬ hk'aw lo, yawˇ na yuˬ puiˉ ve teˇ ceuˬ hta‸ shiˍ la ve yoˬ. 9 Yawˇ biˇ la peuˬ hk'aw‸ nawˉ, yawˇ ve tawˇ hkawˇ hta‸ hk'a na yuˬ ve chaw hui awˬ pon yawˇ lehˬ, co co taiˍ taiˍ Htaiˍ hk'aw‸ shehˍ hpaˇ hpeh‸ la ve yoˬ. 10 Maˍlaˍhkiˆsaˍdehˆ paw hkuˇ lonˉ hpeh‸ ve awˬ hk'aˇ hk'a shuˍ shuˍ, G'uiˬ sha yawˇ hta‸ paw hkuˇ lonˉ teh taˍ ve yoˬ. 11 Awˬ lawn chi ngaˬ k'oˆ tuˬ maˇ maˇ cawˬ ve yoˬ. Ya‸ hk'aˇ, nawˬ hui haˆ haˆ na maˇ g'a puiˉ ve pa taw, tcuhˉ kuiˬ k'aoˍ maˍ laˇ tuˬ haˍ ve yoˬ. 12 Awˬ yanˇ chi maw maw gaˬ peuˬ ve hta‸ dawˇ nyi ve k'o, nawˬ hui lehˬ shu hta‸ maˍ piˇ shehˍ hpaˇ hpeh‸ cawˇ ve htawˇ, G'uiˬ sha ve tawˇ hkawˇ awˬ lawn lonˉ ma teˇ hpaˍ, shu nawˬ hui hta‸ maˍ laˇ tuˬ loˍ sheˍ ve yoˬ. Heh ve caˇ tuˬ hta‸ nawˬ hui caˇ maˇ g'a ve pa taw, cuˉ g'uiˬ hta‸ nawˬ hui dawˬ cawˇ sheˍ ve yoˬ. 13 Awˬ lawn k'o, cuˉ g'uiˬ hta‸ dawˬ ve chaw teˇ g'aˇ le le lehˬ, yaˇ ehˉ hpeh‸ chehˇ sheˍ ve pa taw, hteˇ ve cawˇ ve tawˇ hkawˇ hta‸ maˇ shiˍ puiˉ. 14 Ya‸ hk'aˇ, heh ve caˇ tuˬ lehˬ, chaw mawˇ teˇ hpaˍ awˬ pon yoˬ. Yawˇ hui lehˬ, a shu yawˇ mawˬ ve kaˇ ve jawˬ ve awˬ ceuˬ teˇ hpaˍ hta‸ puiˉ la tuˬ laiˉ pawˆ te jawˬ ve pa taw, da‸ ve leh maˇ da‸ ve hta‸ fuiˍ da‸ pehˬ da‸ g'a ve yoˬ.

Heˍbrehˇ 6

1 Chi hta‸ pa taw, Hkri‸ ve awˬ lawn awˬ hkuiˉ puiˍ ngaˬ hui shiˍ taˍ ve teˇ hpaˍ hta‸ teh taˉ leh, uiˍ la biˇ la tuˬ awˬ g'uˇ suhˍ k'ai-a veuˬ. Suh taˍ ve kanˉ teˇ hpaˍ hta‸ dawˇ hpfuhˆ ve teˇ ceuˬ maˇ k'oˆ, G'uiˬ sha hta‸ yonˍ ve teˇ ceuˬ maˇ k'oˆ, 2 baˆtiˆsaˬ awˬ lawn maˍ piˇ ve teˇ ceuˬ maˇ k'oˆ, la‸ sheh taˍ piˇ ve teˇ ceuˬ maˇ k'oˆ, suh ve chaw hui k'aw‸ te‸ tu la ve teˇ ceuˬ maˇ k'o, co co taiˍ taiˍ awˬ pon suhˉ jehˬ ve teˇ ceuˬ maˇ k'oˆ, chi teˇ hpaˍ hta‸ awˬ hkuiˉ puiˍ ceh tiˉ taˇ k'aw‸ kawˍ chehˇ-oˆ. 3 G'uiˬ sha a hkaw-anˬ pe‸ laˇ ve k'o, chi teˇ hpaˍ hta‸ ngaˬ hui teh taˉ leh awˬ g'uˇ suhˍ k'ai tuˬ yoˬ. 4 Awˬ lawn k'o, awˬ g'euˆ hta‸ teˇ pawˆ g'a mawˬ peuˬ ve, mvuhˇ naw ma ve la‸ shawnˍ hta‸ g'a leh‸ nyi peuˬ ve leh, da‸ ve kehˬ ve Awˬ ha hpu hta‸ g'a peuˬ ve chaw teˇ hpaˍ lehˬ, 5 G'uiˬ sha ve da‸ jaˇ ve tawˇ hkawˇ hta‸ maˇ k'oˆ, awˬ hk'aw‸ nawˉ laˬ tuˬ ve teˇ co ve kanˇ paˆ hta‸ maˇ k'oˆ, g'a leh‸ nyi peuˬ ve htawˇ, 6 yawˇ hui k'aw‸ luˬ k'aw‸ kuiˇ k'ai ve k'o, venˇ baˆ hta‸ teˇ pawˆ k'aw‸ dawˇ hpfuhˇ tuˬ te maˇ hpeh‸. Awˬ lawn k'o, yawˇ hui ka‸ G'uiˬ sha ve Yaˇ hpu hta‸ la‸ ka hk'oˆ lo k'aw‸ hta‸ pehˍ leh, yawˇ hta‸ shu mehˆ g'uˇ suhˍ ya‸ taw tuˬ te piˇ ve yoˬ. 7 Miˬ guiˬ lehˬ, laiˉ pawˆ laˬ ve mvuhˇ yeˬ g'uiˬ hta‸ g'a chaw‸ leh, muiˬ caˇ shehˍ hpaˇ teˇ hpaˍ awˬ pon awˬ bon cawˬ ve g'awˇ hpa‸ mvuhˬ naweh leh awˬ shiˍ awˬ nu hta‸ cawˬ la piˇ lawˬ ve k'o, miˬ guiˬ oˇ ve lehˬ, G'uiˬ sha na‸ piˇ ve awˬ bon hta‸ g'a ve yoˬ. 8 Ya‸ hk'aˇ, miˬ guiˬ oˇ ve aˉ chuˇ leh mvuh‸ teˇ hpaˍ ceh tiˉ yeˬ la ve k'o, awˬ bon maˇ cawˬ ve pa taw, baˬ taˍ leh hkeu ve hta‸ g'a hkanˍ paˇ neˇ ve yoˬ. Awˬ leh meuˇ gaˬ k'o, aˬ miˬ tuˉ baˬ tuˬ yoˬ. 9 Ha‸ ve chaw teˇ hpaˍ-oˬ, ngaˬ chi hk'e k'oˆ ve htawˇ, oˇ ve a‸ kehˉ da‸ jaˇ ve awˬ ceuˬ, htaiˍ hk'aw‸ ve hta‸ caˉ da‸ ve teˇ hpaˍ nawˬ hui g'a tuˬ yoˬ teh‸ ngaˬ dawˇ taˍ ve yoˬ. 10 Awˬ lawn k'o, G'uiˬ sha lehˬ maˇ hteˇ maˇ cawˇ ve G'uiˬ sha hpeh‸ ve maˇ heˆ. Ponˬ laˬ htaˇ nawˬ hui te taˍ ve kanˉ leh, Hkri‸ yaˇ hui hta‸ ga piˇ taˍ peuˬ ve awˬ hk'oˆ, chi beu‸ ka‸ nawˬ hui chi hk'e te chehˇ ve awˬ hk'aw lo, ha‸ pehnˇ ve chi G'uiˬ sha awˬ pon nawˬ hui hpeu‸ maˍ piˇ ve hta‸ G'uiˬ sha yawˇ leunˇ tuˬ ve maˇ heˆ. 11 Dawˇ law taˍ ve teˇ ceuˬ biˇ la tuˬ ve awˬ pon, nawˬ hui teˇ g'aˇ le le awˬ leh meuˇ hk'a gaˬ chi hk'a shuˍ shuˍ g'aˇ hte‸ te tuˬ ve hta‸ ngaˬ heuˆ gaˇ ve yoˬ. 12 Hk'e te leh, a yehˉ yehˉ taˇ te. Ya‸ hk'aˇ, yonˍ ve leh yeunˇ hkanˍ ve hta‸ pa taw, G'uiˬ sha k'oˆ taˍ ve teˇ hpaˍ hta‸ g'a taˍ ve chaw teˇ hpaˍ hk'a shuˍ shuˍ, nawˬ hui htawˇ te-o. 13 Awˬ lawn k'o, G'uiˬ sha lehˬ Aˍbraˍhanˍ hta‸ ka ti‸ piˇ ve teˇ yanˇ, yawˇ a‸ kehˉ uiˍ ve teˇ g'aˇ hta‸ cuˇ leh hkanˍ tuˬ maˇ cawˬ ve pa taw, G'uiˬ sha yawˇ hk'aˇ yawˇ awˬ to hta‸ cuˇ leh hkanˍ taˍ ve yoˬ. 14 Yawˇ hkanˍ taˍ ve lehˬ, Ngaˬ nawˬ hta‸ awˬ tehˬ awˬ na bon na‸ piˇ tuˬ yoˬ. Ngaˬ nawˬ hta‸ awˬ tehˬ awˬ na maˇ la piˇ tuˬ yoˬ teh‸ k'oˆ leh hkanˍ ve yoˬ. 15 Hk'e te leh, Aˍbraˍhanˍ yeunˇ hkanˍ leh law taˍ ve pa taw, G'uiˬ sha yawˇ hta‸ ka ti‸ piˇ taˍ ve hk'e yawˇ g'a ve yoˬ. 16 Chaw yaˇ hui lehˬ, a shu yawˇ awˬ to a‸ kehˉ uiˍ ve teˇ g'aˇ hta‸ cuˇ leh hkanˍ ve awˬ liˇ cawˬ ve yoˬ. Hkanˍ ve teˇ ceuˬ hta‸ te ve teˇ yanˇ, yawˇ hui tawˇ g'awˬ da‸ ve hk'a peu-eˬ hta‸ te peuˬ piˇ ve yoˬ. 17 G'uiˬ sha htawˇ, yawˇ dawˇ cheˆ taˍ ve teˇ ceuˬ maˇ pa puiˉ ve awˬ lawn, ka ti‸ shaˉ caˆ g'a taˍ ve chaw hui hta‸ leuˉ leh hk'a deh‸ maˍ piˇ gaˇ ve teˇ yanˇ, yawˇ awˬ to hkanˍ ve teˇ ceuˬ hta‸ te ve yoˬ. 18 Ka ti‸ piˇ ve teˇ ceuˬ leh hkanˍ ve teˇ ceuˬ, chi nyiˇ ceuˬ hta‸ pa taw ngaˬ hui ponˬ kuiˬ lo hpaw lo‸ la ve chaw teˇ hpaˍ lehˬ, ngaˬ hui mehˆ g'uˇ suhˍ cawˬ taˍ ve dawˇ law taˍ ve teˇ ceuˬ hta‸ yeˬ chaweh vawˆ taˍ tuˬ, ngaˬ hui hta‸ awˬ g'aˇ pe‸ laˇ ve yoˬ. Maˇ pa puiˉ ve chi nyiˇ ceuˬ awˬ hk'aw lo, G'uiˬ sha lehˬ heˍ maˇ hpeh‸. 19 Dawˇ law ve chi lehˬ, ngaˬ hui ve nyi ma awˬ pon yeˬ leh maˇ jiˆ k'ai puiˉ ve sho k'uˉ k'aweh‸ hk'e hpeh‸ leh, hpaˬ kaˍ nyiˇ maˬ teˇ maˬ awˬ hk'aw hpawˇ lo cawˬ taˍ ve yoˬ. 20 Maˍlaˍhkiˆsaˍdehˆ paw hkuˇ lonˉ hpeh‸ ve awˬ hk'aˇ hk'a shuˍ shuˍ Yeˍsuˆ lehˬ, co co taiˍ taiˍ paw hkuˇ lonˉ hpeh‸ la leh, ngaˬ hui awˬ pon yawˇ oˇ kaˬ lo awˬ g'uˇ suhˍ lo‸-e taˍ peuˬ ve yoˬ.

Heˍbrehˇ 7

1 Maˍlaˍhkiˆsaˍdehˆ chi teˇ g'aˇ lehˬ, Saˍlehnˍ ve hkunˉ hawˉ hkanˇ hpeh‸ leh, mvuh jaˇ ve G'uiˬ sha ve paw hkuˇ hpeh‸ ve yoˬ. Hkunˉ hawˉ hkanˇ teˇ hpaˍ hta‸ Aˍbraˍhanˍ bawˆ pehˍ taˉ leh k'aw‸ la chehˇ ve teˇ yanˇ, Maˍlaˍhkiˆsaˍ dehˆ yawˇ hta‸ hpuˇ da‸ leh bon na‸ piˇ ve yoˬ. 2 Aˍbraˍhanˍ htawˇ, yawˇ hk'a g'a taˍ ve hk'a peu-eˬ awˬ hk'aw lo teˇ chi pun teˇ pun yawˇ hta‸ piˇ ve yoˬ. Maˍlaˍhkiˆsaˍdehˆ teh‸ k'oˆ ve awˬ meh chi lehˬ, hteˇ ve cawˇ ve teˇ ceuˬ ve hkunˉ hawˉ hkanˇ hpeh‸ ve teh‸ k'oˆ ve yoˬ. Chi hk'oˆ ka‸, Saˍlehnˍ ve hkunˉ hawˉ hkanˇ hpeh‸ ve teh‸ k'oˆ ve yoˬ. Tcuhˉ kuiˬ k'o, dawˇ sha gaˇ sha ve teˇ ceuˬ ve hkunˉ hawˉ hkanˇ hpeh‸ ve teh‸ k'oˆ taˍ ve yoˬ. 3 Yawˇ lehˬ, awˬ pa awˬ e maˇ cawˬ, awˬ ceuˬ awˬ hk'aˇ ka‸ maˇ cawˬ leh, yawˇ ve a sha‸ awˬ hkuiˉ puiˍ awˬ leh meuˇ maˇ cawˬ. G'uiˬ sha ve Yaˇ hpu hk'a shuˍ shuˍ, hk'aˬ htaˆ ka‸ yawˇ paw hkuˇ hpeh‸ chehˇ ve yoˬ. 4 Yawˇ hk'aˬ ma uiˍ jaˇ ve hta‸ dawˇ nyi sheˍ. Ngaˬ hui ve awˬ puˍ lonˉ Aˍbraˍhanˍ lehˬ, bawˆ da‸ kuiˬ lo g'a veu laˇ ve mawˇ teˇ hpaˍ awˬ hk'aw lo, yawˇ hta‸ teˇ chi pun teˇ pun piˇ ve yoˬ. 5 Leˍviˆ ve awˬ ceuˬ awˬ hk'aˇ awˬ hk'aw lo paw hkuˇ te tuˬ aˉ yaˇ g'a ve chaw teˇ hpaˍ lehˬ, yawˇ hui ve awˬ viˉ awˬ nyi Iˉsaˍreˍlaˆ chaw teˇ hpaˍ geh teˇ chi pun teˇ pun shaw yuˬ tuˬ, awˬ liˇ tawˇ hkawˇ yawˇ hui hta‸ tawˇ piˇ taˍ ve yoˬ. Iˉsaˍreˍlaˆ chaw teˇ hpaˍ lehˬ, Aˍbraˍhanˍ ve awˬ yaˇ awˬ duˬ hpeh‸ ve htawˇ, yawˇ hui geh g'a shaw yuˬ ve yoˬ. 6 Ya‸ hk'aˇ, hkunˉ hawˉ hkanˇ oˇ ve teˇ g'aˇ lehˬ, yawˇ hui ve awˬ ceuˬ awˬ hk'aˇ maˇ heˆ htawˇ, Aˍbraˍhanˍ geh yawˇ teˇ chi pun teˇ pun g'a leh, ka ti‸ teˇ hpaˍ g'a shehˍ hpaˇ hta‸ yawˇ bon na‸ piˇ ve yoˬ. 7 Uiˍ ve chaw teˇ g'aˇ lehˬ, i ve chaw teˇ g'aˇ hta‸ bon na‸ piˇ ve yoˬ. Awˬ lawn chi ve hta‸ tawˇ g'awˬ da‸ tuˬ maˇ cawˬ. 8 Suh puiˉ ve chaw teˇ hpaˍ lehˬ, chi beu‸ teˇ yanˇ teˇ chi pun teˇ pun hta‸ ha‸ yuˬ ve yoˬ. Te‸ chehˇ ve teh‸ yawˇ awˬ lawn shaˉ hkiˆ hkanˍ taˍ ve chaw teˇ g'aˇ lehˬ, oˇ ve teˇ yanˇ teˇ chi pun teˇ pun hta‸ ha‸ yuˬ ve yoˬ. 9 Shu geh teˇ chi pun teˇ pun ha‸ yuˬ ve Leˍviˆ teˇ g'aˇ htawˇ, Aˍbraˍhanˍ awˬ hk'aw lo teˇ chi pun teˇ pun piˇ taˍ peuˬ teh‸ k'oˆ hpeh‸ ve yoˬ. 10 Awˬ lawn k'o, Maˍlaˍhkiˆsaˍdehˆ lehˬ Aˍbraˍhanˍ hta‸ hpuˇ da‸ ve teˇ yanˇ, Leˍviˆ lehˬ yawˇ ve awˬ puˍ lonˉ Aˍbraˍhanˍ awˬ hk'aw lo chehˇ taˍ sheˍ ve yoˬ. 11 Leˍviˆ chaw hui paw hkuˇ te ve teˇ yanˇ, Iˉsaˍraˍlaˆ chaw hui lehˬ awˬ liˇ tawˇ hkawˇ hta‸ g'a ve yoˬ. Oˇ htaˇ, Leˍviˆ chaw hui paw hkuˇ te ve awˬ hk'aw lo chaw yaˇ hui biˇ la g'a ve hk'e k'o, aˬ hto‸ ma te awˬ kaˍ awˬ nu paw hkuˇ teˇ g'aˇ tawˆ la tuˬ loˍ sheˍ ve le. Chi hk'oˆ ka‸, paw hkuˇ oˇ ve lehˬ, Aˍronˍ paw hkuˇ hpeh‸ ve awˬ hk'aˇ hk'a shuˍ shuˍ maˇ heˆ. Maˍlaˍhkiˆsaˍdehˆ ve awˬ hk'aˇ hk'a shuˍ shuˍ hpeh‸ ve yoˬ. 12 Awˬ lawn k'o, paw hkuˇ te ve awˬ ceuˬ awˬ hk'aˇ hta‸ pa ve teˇ yanˇ, awˬ liˇ tawˇ hkawˇ hta‸ htawˇ g'a pa ve yoˬ. 13 Awˬ lawn chi teˇ hpaˍ Li‸ hpu hk'aw k'oˆ taˍ ve awˬ shehˍ hpaˇ teˇ g'aˇ lehˬ, awˬ kaˍ awˬ nu awˬ ceuˬ awˬ hk'aˇ hta‸ caˉ da‸ ve yoˬ. Awˬ ceuˬ awˬ hk'aˇ oˇ ve awˬ hk'aw lo, teˇ g'aˇ ka‸ tanˇ kuiˬ lo kanˉ maˇ te jaw. 14 Awˬ lawn k'o, ngaˬ hui ve Jawˇ mawˇ Yeˍsuˆ lehˬ, Yuˇda‸ awˬ ceuˬ awˬ hk'aˇ hpeh‸ ve hta‸ ngaˬ hui hk'a deh‸ g'a shiˍ ve yoˬ. Awˬ ceuˬ awˬ hk'aˇ oˇ ve hta‸ caˉ da‸ ve chaw teˇ hpaˍ paw hkuˇ g'a te tuˬ ve awˬ lawn Moˉseˍ te‸ chiˉ maˇ k'oˆ taˍ. 15 Maˍlaˍhkiˆsaˍdehˆ paw hkuˇ hpeh‸ ve awˬ hk'aˇ hk'a shuˍ shuˍ awˬ kaˍ awˬ nu paw hkuˇ teˇ g'aˇ tawˆ la peuˬ ve pa taw, paw hkuˇ awˬ ceuˬ k'aw‸ pa peuˬ ve hta‸ leuˉ leh hk'a deh‸ g'a shiˍ ve yoˬ. 16 Yawˇ paw hkuˇ hpeh‸ la ve lehˬ, awˬ liˇ tawˇ hkawˇ k'oˆ taˍ ve hk'a shuˍ shuˍ, awˬ suhˍ awˬ shaˍ hpawˇ yawˇ paw hkuˇ awˬ ceuˬ awˬ hk'aˇ cawˇ ve pa taw hpeh‸ la ve maˇ heˆ. Ya‸ hk'aˇ, maˇ luˬ maˇ suh puiˉ ve a sha‸ te‸ ve kanˇ paˆ hta‸ pa taw yawˇ paw hkuˇ hpeh‸ la ve yoˬ. 17 Awˬ lawn k'o, yawˇ awˬ lawn chi hk'e shaˉ hkiˆ hkanˍ ve, Nawˬ lehˬ Maˍlaˍhkiˆsaˍdehˆ paw hkuˇ hpeh‸ ve awˬ hk'aˇ hk'a shuˍ shuˍ, co co taiˍ taiˍ paw hkuˇ hpeh‸ ve yoˬ, teh‸ G'uiˬ sha hkanˍ taˍ ve yoˬ. 18 Ponˬ laˬ htaˇ piˇ taˍ ve tawˇ hkawˇ lehˬ, awˬ g'aˇ nuˇ leh te‸ chiˉ awˬ bon maˇ cawˬ ve pa taw, tawˇ hkawˇ oˇ ve hta‸ G'uiˬ sha teh taˉ ve yoˬ. 19 (Awˬ lawn k'o, awˬ liˇ tawˇ hkawˇ lehˬ teˇ ceuˬ hta‸ ka‸ biˇ la piˇ maˇ g'a.) Hk'e te leh, oˇ ve a‸ kehˉ da‸ leuˉ ve dawˇ law tuˬ cawˬ ve teˇ ceuˬ hta‸ G'uiˬ sha k'aw‸ pe‸ laˇ ve yoˬ. Dawˇ law tuˬ chi hta‸ pa taw, ngaˬ hui lehˬ G'uiˬ sha geh lo jiˆ k'ai hpeh‸ ve yoˬ. 20 Chaw oˇ ve teˇ hpaˍ lehˬ, hkanˍ taˍ ve maˇ cawˬ ka‸, paw hkuˇ te tuˬ aˉ yaˇ g'a ve yoˬ. 21 Ya‸ hk'aˇ, Yeˍsuˆ aˉ yaˇ g'a ve lehˬ, hkanˍ taˍ ve teˇ ceuˬ cawˬ leh g'a ve yoˬ. Hkanˍ taˍ ve oˇ ve lehˬ, Jawˇ mawˇ G'uiˬ sha hkanˍ taˍ leh, yawˇ k'aw‸ dawˇ hpfuhˆ tuˬ ve maˇ heˆ. Nawˬ lehˬ co co taiˍ taiˍ paw hkuˇ hpeh‸ ve yoˬ, teh‸ yawˇ hta‸ k'oˆ piˇ leh hkanˍ taˍ ve yoˬ. 22 Chi hta‸ pa taw, da‸ leuˉ ve ka ti‸ shaˉ caˆ chi hta‸ yeˬ chehˇ tuˬ, Yeˍsuˆ lehˬ te shehˍ hpaˇ hpeh‸ ve yoˬ. 23 Oˇ htaˇ, paw hkuˇ maˇ maˇ g'a cawˬ ve yoˬ. Awˬ lawn k'o, suh ve teˇ ceuˬ hta‸ pa taw yawˇ hui hk'aˬ htaˆ ka‸ kanˉ te maˇ hpeh‸. 24 Ya‸ hk'aˇ, Yeˍsuˆ lehˬ co co taiˍ taiˍ te‸ chehˇ ve pa taw, hk'aˬ htaˆ ka‸ yawˇ paw hkuˇ hpeh‸ chehˇ ve yoˬ. 25 Chi hta‸ pa taw, yawˇ hta‸ cuˇ leh G'uiˬ sha geh jiˆ laˬ ve chaw hk'a peu-eˬ hta‸ yawˇ hk'aˬ htaˆ ka‸ htaiˍ hk'aw‸ piˇ tuˬ kanˇ paˆ cawˬ ve yoˬ. Awˬ lawn k'o, yawˇ hui awˬ pon lawˬ hkawˉ tuˬ, yawˇ hk'aˬ htaˆ ka‸ te‸ chehˇ ve yoˬ. 26 Ngaˬ hui lehˬ, chi hk'e ve paw hkuˇ lonˉ hta‸ loˍ ve yoˬ. Yawˇ lehˬ, da‸ ve kehˬ ve, ya‸ kuiˬ jiˆ kuiˬ maˇ cawˬ ve, cha‸ chiˆ kuiˬ maˇ cawˬ ve, venˇ baˆ yaˇ hui hta‸ hpaˆ da‸ taˍ ve leh, mvuhˇ naw ma mvuh ve a‸ kehˉ G'uiˬ sha yawˇ hta‸ chiˇ taˆ piˇ taˍ ve chaw teˇ g'aˇ hpeh‸ ve yoˬ. 27 Yawˇ lehˬ, awˬ kaˍ awˬ nu paw hkuˇ lonˉ hui hk'a shuˍ shuˍ, awˉ lawˉ htaˇ a shu yawˇ ve venˇ baˆ awˬ pon, awˬ hk'aw‸ nawˉ chaw yaˇ teˇ hpaˍ ve venˇ baˆ awˬ pon, teˇ nyi le le tanˇ tuˬ g'a tanˇ piˇ ve maˇ heˆ. Yawˇ awˬ to hta‸ teˇ pawˆ ceh tiˉ tanˇ piˇ ve yoˬ. Awˬ hk'aw‸ nawˉ teˇ pawˆ ka‸ k'aw‸ tanˇ piˇ tuˬ maˇ loˍ. 28 Chaw yaˇ hui lehˬ, awˬ g'aˇ nuˇ puiˉ ve htawˇ, paw hkuˇ lonˉ te tuˬ awˬ liˇ tawˇ hkawˇ yawˇ hui hta‸ aˉ yaˇ piˇ ve yoˬ. Ya‸ hk'aˇ, awˬ liˇ tawˇ hkawˇ awˬ hk'aw‸ nawˉ laˬ ve hkanˍ taˍ ve tawˇ teˇ hkawˇ lehˬ, hk'aˬ htaˆ ka‸ biˇ jaˇ ve Yaˇ hpu teˇ g'aˇ hta‸ aˉ yaˇ piˇ taˍ ve yoˬ.

Heˍbrehˇ 8

1 Ngaˬ k'oˆ gaˇ ve awˬ lawn uiˍ ve lehˬ chi hk'e yoˬ. Chi hk'e ve paw hkuˇ lonˉ teˇ g'aˇ ngaˬ hui cawˬ ve yoˬ. Yawˇ lehˬ, mvuhˇ naw ma lo chehˇ ve Kanˇ paˆ uiˍ shehˍ hpaˇ ve k'aw jaw la‸ sha paˇ lo mui taˍ leh, 2 awˬ tehˬ awˬ na ve aˉ po k'o bon yehˬ awˬ hk'aw, da‸ kehˬ ve chehˇ kuiˬ lo, kanˉ te shehˍ hpaˇ hpeh‸ ve yoˬ. Awˬ tehˬ awˬ na ve aˉ po k'o bon yehˬ oˇ ve lehˬ, chaw yaˇ te ve maˇ heˆ, Jawˇ mawˇ G'uiˬ sha te taˍ ve yoˬ. 3 Awˬ lawn k'o, paw hkuˇ lonˉ teˇ g'aˇ le le lehˬ, la‸ shawnˍ leh tanˇ tuˬ teˇ hpaˍ tanˇ piˇ tuˬ awˬ pon, yawˇ hui hta‸ leuˆ teh taˍ ve yoˬ. Hk'e te leh, paw hkuˇ lonˉ chi teˇ g'aˇ htawˇ, tanˇ tuˬ teˇ ceuˬ ceuˬ yawˇ g'a cawˬ taˍ ve yoˬ. 4 Yawˇ lehˬ miˬ guiˬ hk'oˆ lo chehˇ taˍ ve hk'e k'o, yawˇ paw hkuˇ hpeh‸ tuˬ ve maˇ heˆ. Awˬ lawn k'o, awˬ liˇ tawˇ hkawˇ awˬ hk'aˇ suh te leh, la‸ shawnˍ teˇ hpaˍ tanˇ piˇ shehˍ hpaˇ hui cawˬ taˍ ve yoˬ. 5 Yawˇ hui lehˬ, mvuhˇ naw ma hk'oˆ bon yehˬ ve awˬ ho‸ awˬ han leh aˉ g'uiˬ ha ceh hpeh‸ ve bon yehˬ teˇ maˬ awˬ hk'aw lo kanˉ te chehˇ ve yoˬ. Awˬ lawn k'o, Moˉseˍ lehˬ aˉ po k'o bon yehˬ hta‸ te-a teh‸ te ve teˇ yanˇ, G'uiˬ sha yawˇ hta‸ chi hk'e maˍ piˇ ve, Hk'aw pui hk'oˆ lo nawˬ hta‸ maw laˇ peuˬ ve awˬ hk'aˇ hk'a shuˍ shuˍ hk'a peu-eˬ ve hta‸ nawˬ te tuˬ shaˍ ti‸ taˍ-o‸ teh‸, yawˇ hta‸ k'oˆ piˇ ve yoˬ. 6 Chi beu‸ Yeˍsuˆ lehˬ, da‸ leuˉ ve ka ti‸ shaˉ caˆ awˬ pon awˬ kaˍ te shehˍ hpaˇ hpeh‸ ve hk'e, yawˇ g'a taˍ ve kanˉ htawˇ da‸ leuˉ ve yoˬ. Aˬ hto‸ ma pa taw ka ti‸ shaˉ caˆ oˇ ve da‸ leuˉ ve le teh‸ k'oˆ k'o, da‸ leuˉ ve ka ti‸ teˇ hpaˍ awˬ hk'oˆ teh taˍ ve hta‸ pa taw yoˬ. 7 Awˬ lawn k'o, awˉ lawˉ peuˇ ve ka ti‸ shaˉ caˆ teˇ maˬ biˇ ve hk'e k'o, ka ti‸ shaˉ caˆ nyiˇ pawˆ teˇ pawˆ k'aw‸ piˇ tuˬ maˇ loˍ. 8 Ya‸ hk'aˇ, Jawˇ mawˇ G'uiˬ sha yawˇ hta‸ venˇ baˆ taˍ leh k'oˆ ve, Nyi loˬ, Iˉsaˍreˍlaˆ teˇ yehˬ leh Yuˇda‸ teˇ yehˬ hta‸ ka ti‸ shaˉ caˆ awˬ suhˉ ngaˬ teh taˍ piˇ tuˬ ve awˬ nyi gaˬ la tuˬ yoˬ. 9 Ka ti‸ shaˉ caˆ awˬ suhˉ oˇ ve lehˬ, yawˇ hui ve awˬ puˍ awˬ pi teˇ hpaˍ hta‸ ngaˬ la‸ sheh g'awˬ leh Eˇjiˇtu‸ mvuhˇ miˬ awˬ hk'aw lo sheh tawˆ la ve teˇ nyi htaˇ, ngaˬ yawˇ hui hta‸ te piˇ taˍ ve ka ti‸ shaˉ caˆ hk'e maˇ heˆ. Awˬ lawn k'o, ngaˬ ve ka ti‸ shaˉ caˆ awˬ hk'aˇ suh yawˇ hui maˇ k'aw‸ te. Hk'e te leh, ngaˬ htawˇ yawˇ hui hta‸ teh taˉ ve yoˬ teh‸, Jawˇ mawˇ G'uiˬ sha k'oˆ ve yoˬ. 10 Awˬ yanˇ oˇ ve awˬ hk'aw lo, Iˉsaˍreˍlaˆ teˇ yehˬ hta‸ ngaˬ te piˇ tuˬ ve ka ti‸ shaˉ caˆ lehˬ chi hk'e yoˬ. Ngaˬ ve awˬ liˇ tawˇ hkawˇ teˇ hpaˍ yawˇ hui ve nyi ma dawˇ hk'aˇ awˬ hk'aw lo keu piˇ leh, yawˇ hui ve nyi ma awˬ hk'oˆ hta‸ bvuh‸ piˇ tuˬ yoˬ. Ngaˬ yawˇ hui ve G'uiˬ sha hpeh‸ leh, yawˇ hui htawˇ ngaˬ ve chaw hpeh‸ tuˬ yoˬ. 11 Yawˇ hui lehˬ, Jawˇ mawˇ G'uiˬ sha hta‸ shiˍ-o‸ teh‸, mvuhˇ miˬ yaˇ chawˇ chawˇ maˇ k'oˆ, awˬ viˉ awˬ nyi maˇ k'oˆ, teˇ g'aˇ hta‸ teˇ g'aˇ maˍ piˇ da‸ tuˬ maˇ loˍ. Awˬ lawn k'o, yawˇ hui awˬ hk'aw lo i jaˇ ve teˇ g'aˇ te leh uiˍ jaˇ ve teˇ g'aˇ hk'a gaˬ, yawˇ hui hk'a peu-eˬ ngaˬ hta‸ shiˍ tuˬ yoˬ. 12 Ngaˬ yawˇ hui ve ya‸ kuiˬ jiˆ kuiˬ teˇ hpaˍ hta‸ ha k'aˉ piˇ tuˬ yoˬ. Yawˇ hui ve venˇ baˆ teˇ hpaˍ hta‸ ngaˬ k'aw‸ dawˇ nawˇ tuˬ ve maˇ heˆ, teh‸ Jawˇ mawˇ G'uiˬ sha k'oˆ ve yoˬ. 13 Ka ti‸ shaˉ caˆ awˬ suhˉ teh‸ yawˇ k'oˆ ve teˇ yanˇ, awˉ lawˉ piˇ taˍ ve ka ti‸ shaˉ caˆ hta‸ awˬ piˍ hpeh‸ la piˇ lawˍ ve yoˬ. Maw jaˇ leh piˍ k'ai peuˬ ve awˬ ceuˬ lehˬ, mehˉ k'ai paˇ neˇ ve yoˬ.

Heˍbrehˇ 9

1 Awˉ lawˉ peuˇ ve ka ti‸ shaˉ caˆ lehˬ, oˉ k'oˍ pui ve hta‸ caˉ da‸ ve awˬ liˇ awˬ hk'aˇ teˇ hpaˍ leh, miˬ guiˬ hta‸ caˉ da‸ ve da‸ kehˬ ve yehˬ teˇ yehˬ cawˬ ve yoˬ. 2 Awˬ lawn k'o, aˉ po k'o bon yehˬ hta‸ te taˍ leh, awˉ lawˉ teˇ tawn awˬ hk'aw lo kawˆ faiˇ taˍ kuiˬ, hpui lawˇ leh, tanˇ taˍ ve hkaoˍ monˇ cawˬ ve yoˬ. Chehˇ kuiˬ oˇ ve teˇ tawn hta‸ da‸ kehˬ ve chehˇ kuiˬ teh‸ k'oˆ ve yoˬ. 3 Hpaˬ kaˍ nyiˇ maˬ teˇ maˬ awˬ hk'aw hpawˇ lo, da‸ kehˬ jaˇ ve chehˇ kuiˬ teh‸ k'oˆ ve aˉ po k'o bon yehˬ teˇ tawn cawˬ sheˍ ve yoˬ. 4 Oˇ ve awˬ hk'aw lo shi oˍ taˍ ve sha tuˉ tanˇ kuiˬ leh, shi hk'a caw zuhˇ oˍ taˍ ve ka ti‸ shaˉ caˆ ta k'oˍ cawˬ taˍ ve yoˬ. Ta k'oˍ oˇ ve awˬ hk'aw lo, maˍnaˆ shiˍ keu taˍ ve shi mu‸ hk'u, awˬ tuˍ tuˍ ve Aˍronˍ ve juˇ fuiˍ leh, ka ti‸ shaˉ caˆ awˬ liˇ bvuh‸ taˍ ve haˉ pui baˉ teˇ hpaˍ cawˬ taˍ ve yoˬ. 5 Ta k'oˍ oˇ ve awˬ hk'oˆ hta‸ awˬ me‸ awˬ hponˇ cawˬ ve hkeˍruˆbenˍ nyiˇ maˬ lehˬ, venˇ baˆ hpehˇ kuiˬ awˬ hoˆ hta‸ beh taˍ ve yoˬ. Awˬ lawn oˇ ve teˇ hpaˍ, teˇ ceuˬ le le hta‸ chi beu‸ k'oˆ maˇ tanˇ sheˍ. 6 Oˇ ve teˇ hpaˍ hta‸ chi hk'e te peuˬ hk'aw‸ nawˉ, paw hkuˇ teˇ hpaˍ lehˬ, a shu yawˇ ve kanˉ hta‸ te tuˬ, aˉ po k'o bon yehˬ awˉ lawˉ peuˇ ve teˇ tawn awˬ hk'aw lo hk'aˬ htaˆ ka‸ lo‸-e chehˇ ve yoˬ. 7 Ya‸ hk'aˇ, nyiˇ tawn teˇ tawn awˬ hk'aw lo paw hkuˇ lonˉ teˇ g'aˇ ceh tiˉ lo‸-e hpeh‸ ve yoˬ. Yawˇ lo‸-e ve teˇ yanˇ, yawˇ awˬ to awˬ pon maˇ k'oˆ, chaw yaˇ hui ve venˇ baˆ awˬ pon maˇ k'oˆ, tanˇ piˇ tuˬ awˬ suhˍ yuˬ leh, teˇ hk'aw‸ teˇ pawˆ ceh tiˉ g'a lo‸-e ve yoˬ. 8 Aˉ po k'o bon yehˬ awˉ lawˉ peuˇ ve teˇ tawn cawˬ chehˇ sheˍ ve ceh ceh, da‸ kehˬ ve chehˇ kuiˬ awˬ hk'aw lo lo‸-e tuˬ ve ya‸ k'aw maˇ pawnˍ sheˍ teh‸, da‸ ve kehˬ ve Awˬ ha hpu hpeu‸ maˍ laˇ ve yoˬ. 9 Awˬ lawn chi lehˬ, chi teˇ co-e awˬ pon tawˇ pa haˉ hpeh‸ ve yoˬ. Oˇ kaˬ lo la‸ shawnˍ leh tanˇ tuˬ teˇ hpaˍ tanˇ piˇ chehˇ ve htawˇ, la‸ shawnˍ leh tanˇ tuˬ oˇ ve teˇ hpaˍ lehˬ, oˉ k'oˍ pui la ve chaw teˇ g'aˇ ve shiˍ puiˉ ve nyi ma hta‸ biˇ la tuˬ te maˇ g'a. 10 Awˬ ceuˬ chi teˇ hpaˍ lehˬ, caˇ tuˬ dawˬ tuˬ maˇ k'oˆ, tsuhˇ baˬ ve laiˉ ceuˬ maˇ k'oˆ, awˬ to hta‸ caˉ da‸ ve awˬ liˇ awˬ hk'aˇ teˇ hpaˍ ceh tiˉ hpeh‸ leh k'aw‸ gu hteˇ ve awˬ yanˇ hk'a gaˬ ceh tiˉ teh taˍ ve yoˬ. 11 Pawˇ hkuˇ lonˉ te leh da‸ ve awˬ ceuˬ te laˇ tuˬ awˬ pon Hkri‸ gaˬ la htaˇ, leuˉ leh uiˍ jaˇ biˇ jaˇ ve aˉ po k'o bon yehˬ teˇ yehˬ awˬ hk'aw lo yawˇ hpanˍ k'ai leh, da‸ kehˬ ve chehˇ kuiˬ awˬ hk'aw lo teˇ pawˆ ceh tiˉ lo‸-e ve yoˬ. Awˬ hk'aw‸ nawˉ teˇ pawˆ ka‸ k'aw‸ lo‸-e tuˬ maˇ loˍ. Aˉ po k'o bon yehˬ oˇ ve lehˬ, la‸ sheh te taˍ ve maˇ heˆ, miˬ guiˬ chi hta‸ caˉ da‸ ve ka‸ maˇ heˆ. 12 Da‸ kehˬ ve chehˇ kuiˬ awˬ hk'aw lo yawˇ lo‸-e ve teˇ yanˇ, aˉ cheˬ leh nuˇ ehˉ awˬ suhˍ hta‸ yuˬ lo‸-e ve maˇ heˆ. Yawˇ ve awˬ suhˍ hta‸ yuˬ lo‸-e ve pa taw, ngaˬ hui co co taiˍ taiˍ htaiˍ hk'aw‸ ve teˇ ceuˬ hta‸ g'a tuˬ yawˇ te ve yoˬ. 13 Awˬ lawn k'o, aˉ che‸ leh nuˇ paˍ ve awˬ suhˍ ka‸, nuˇ ma haˉ hta‸ tuˉ tanˇ ve hk'aw‸ laˉ ka‸, awˬ liˇ awˬ hk'aˇ hpawˇ maˇ da‸ maˇ kehˬ ve chaw hui hta‸ hpeh‸ pfuhˍ piˇ ve teˇ yanˇ, awˬ suhˍ awˬ shaˍ hpawˇ da‸ piˇ kehˬ piˇ tuˬ te g'a ve k'o, 14 Hkri‸ ve awˬ suhˍ lehˬ, nawˬ hui ve shiˍ puiˉ ve nyi ma awˬ hk'aw lo suh taˍ ve kanˉ teˇ hpaˍ hta‸ tsuhˇ baˬ piˇ leh, te‸ chehˇ ve G'uiˬ sha awˬ pon kanˉ te hpeh‸ tuˬ, chi a‸ kehˉ leuˉ leh hk'aˬ ma te g'a tuˬ le. Yawˇ lehˬ, co co taiˍ taiˍ te‸ chehˇ ve Awˬ ha hpu hta‸ cuˇ leh, awˬ kuiˉ awˬ haiˇ a ciˉ ka‸ maˇ cawˬ ve awˬ hk'aw lo, yawˇ ve awˬ to G'uiˬ sha hta‸ tanˇ piˇ ve yoˬ. 15 Chi hta‸ pa taw, awˉ lawˉ peuˇ ve ka ti‸ shaˉ caˆ awˬ hawˉ lo te ya‸ ve teˇ hpaˍ hta‸ ponˬ piˇ tuˬ awˬ pon, Yeˍsuˆ hkanˍ suh peuˬ ve yoˬ. Hk'e te leh, kuˬ yuˬ taˍ ve chaw teˇ hpaˍ lehˬ, G'uiˬ sha yawˇ hui hta‸ piˇ tuˬ yoˬ teh‸ k'oˆ taˍ ve co co taiˍ taiˍ ve awˬ shinˉ hta‸ g'a tuˬ, Yeˍsuˆ lehˬ, ka ti‸ shaˉ caˆ awˬ suhˉ awˬ pon awˬ kaˍ te shehˍ hpaˇ hpeh‸ ve yoˬ. 16 Awˬ shinˉ piˇ tuˬ awˬ pon li‸ bvuh‸ teh taˍ ve teˇ ceuˬ cawˬ ve k'o, awˬ shinˉ piˇ shehˍ hpaˇ awˬ tehˬ awˬ na suh peuˬ ve hta‸ awˉ lawˉ g'a shiˍ ve yoˬ. 17 Awˬ lawn k'o, awˬ shinˉ piˇ tuˬ awˬ pon li‸ bvuh‸ taˍ ve hk'e, awˬ shehˍ hpaˇ suh peuˬ htaˇ heh‸ awˬ shinˉ pehˬ piˇ hpeh‸ ve yoˬ. Awˬ shehˍ hpaˇ te‸ chehˇ ve ceh ceh, bvuh‸ taˍ ve hk'e awˬ shinˉ pehˬ piˇ maˇ hpeh‸ sheˍ. 18 Awˉ lawˉ peuˇ ve ka ti‸ shaˉ caˆ teˇ maˬ ka‸, awˬ suhˍ maˇ yehˇ leh tanˬ te laˬ ve maˇ heˆ. 19 Awˬ lawn k'o, awˬ liˇ tawˇ hkawˇ awˬ hk'aw lo piˇ taˍ ve tawˇ teˇ hkawˇ le le Moˉseˍ chaw chi ma ve hta‸ k'oˆ piˇ peuˬ hk'aw‸ nawˉ, nuˇ ehˉ awˬ suhˍ leh aˉ che‸ awˬ suhˍ hta‸ iˉ kaˆ hkaw‸ da‸ leh, nyiˉ-ehˍ ve yawˬ mvuh leh huˇsoˆ teh‸ k'oˆ ve mvuh‸ teˇ tsuh‸ hta‸ yehˇ leh, li‸ hta‸ maˇ k'oˆ, chaw hk'a peu-eˬ hta‸ maˇ k'oˆ, yawˇ hpeh‸ pfuhˍ piˇ ve yoˬ. 20 Oˇ htaˇ yawˇ k'oˆ ve, Awˬ suhˍ chi lehˬ, G'uiˬ sha nawˬ hui hta‸ tawˇ piˇ taˍ ve ka ti‸ shaˉ caˆ ve awˬ suhˍ hpeh‸ ve yoˬ teh‸ k'oˆ ve yoˬ. 21 Aˉ po k'o bon yehˬ leh oˇ kaˬ lo yehˇ ve awˬ hk'eun hk'a peu-eˬ hta‸ htawˇ, oˇ ve hk'a shuˍ shuˍ yawˇ awˬ suhˍ yuˬ leh hpeh‸ pfuhˍ piˇ ve yoˬ. 22 Awˬ liˇ tawˇ hkawˇ piˇ taˍ ve hk'a shuˍ shuˍ, aˬ laˬ hk'e awˬ ceuˬ hk'a peu-eˬ hta‸ awˬ suhˍ yuˬ leh tsuhˇ baˬ ve yoˬ. Awˬ suhˍ sheˆ ve teˇ ceuˬ maˇ cawˬ k'o, venˇ baˆ hpehˇ ve teˇ ceuˬ ka‸ maˇ cawˬ. 23 Hk'e te leh, mvuhˇ naw ma hk'oˆ ve awˬ ceuˬ teˇ hpaˍ ve awˬ ho‸ awˬ han hta‸ tsuhˇ baˬ tuˬ, chi hk'e ve teˇ hpaˍ hta‸ g'a te ve yoˬ. Ya‸ hk'aˇ, mvuhˇ naw ma hk'oˆ awˬ tehˬ awˬ na ve awˬ ceuˬ teˇ hpaˍ hta‸ tsuhˇ baˬ tuˬ, leuˉ leh da‸ ve tanˇ tuˬ teˇ hpaˍ hta‸ g'a yehˇ ve yoˬ. 24 Awˬ lawn k'o, Hkri‸ lehˬ chaw yaˇ la‸ sheh te taˍ ve da‸ kehˬ ve chehˇ kuiˬ awˬ hk'aw lo lo‸-e ve maˇ heˆ. Oˇ ve lehˬ, awˬ tehˬ awˬ na ve chehˇ kuiˬ teˇ maˬ ve awˬ ho‸ awˬ han ceh hpeh‸ ve yoˬ. Ya‸ hk'aˇ, ngaˬ hui awˬ pon G'uiˬ sha mehˆ g'uˇ suhˍ yawˇ chehˇ taˍ tuˬ, mvuhˇ naw ma hk'oˆ lo yawˇ lo‸-e taˍ peuˬ ve yoˬ. 25 Paw hkuˇ lonˉ lehˬ, a shu yawˇ ve awˬ suhˍ maˇ heˆ ve hta‸ yuˬ leh, da‸ kehˬ ve chehˇ kuiˬ awˬ hk'aw lo teˇ hk'aw‸ le le lo‸-e ve yoˬ. Ya‸ hk'aˇ, Hkri‸ lehˬ oˇ ve hk'a shuˍ shuˍ yawˇ awˬ to laiˉ pawˆ g'a tanˇ piˇ ve maˇ heˆ. 26 Oˇ hk'e g'a tanˇ piˇ ve k'o, miˬ guiˬ te hpanˍ htaˇ ka‸ tanˬ leh, yawˇ laiˉ pawˆ g'a hkanˍ suh tuˬ yoˬ. Ya‸ hk'aˇ, yawˇ awˬ to tanˇ piˇ ve awˬ hk'aw lo venˇ baˆ hta‸ yuˬ baˬ tuˬ, awˬ leh meuˇ ve awˬ yanˇ chi awˬ hk'aw lo yawˇ teˇ pawˆ ceh tiˉ tawˆ la ve yoˬ. 27 Chaw yaˇ hui lehˬ, teˇ pawˆ ceh tiˉ suh leh, awˬ hk'aw‸ nawˉ suhˉ jehˬ ve hta‸ g'a hkanˍ ve yoˬ. 28 Chi hk'a shuˍ shuˍ Hkri‸ lehˬ, chaw maˇ maˇ ve venˇ baˆ hta‸ hkanˍ pfuhˇ tuˬ, teˇ pawˆ ceh tiˉ yawˇ awˬ to tanˇ piˇ ve hta‸ g'a hkanˍ ve yoˬ. Yawˇ nyiˇ pawˆ teˇ pawˆ k'aw‸ ya‸ la htaˇ, venˇ baˆ hta‸ maˇ caˉ da‸ ve awˬ hk'aw lo ya‸ la leh, yawˇ hta‸ dawˇ law chehˇ ve chaw teˇ hpaˍ hta‸ yawˇ htaiˍ hk'aw‸ piˇ tuˬ yoˬ.

Heˍbrehˇ 10

1 Awˬ liˇ tawˇ hkawˇ lehˬ, gaˬ la tuˬ ve da‸ ve awˬ ceuˬ teˇ hpaˍ awˬ tehˬ awˬ na hpeh‸ ve maˇ heˆ. Oˇ ve teˇ hpaˍ ve aˉ g'uiˬ ha ceh tiˉ hpeh‸ ve yoˬ. Chi hta‸ pa taw, teˇ hk'aw‸ peuˬ teˇ hk'aw‸ hk'aˬ htaˆ ka‸ tanˇ tuˬ hta‸ ceh tiˉ tanˇ piˇ ve lehˬ, awˬ paˇ lo jiˆ k'ai ve chaw hui hta‸ biˇ la tuˬ te maˇ g'a. 2 Yawˇ hui biˇ la ve hk'e k'o, awˬ hk'aw‸ nawˉ yawˇ hui tanˇ tuˬ maˇ k'aw‸ tanˇ ve maˇ heˆ laˇ. Oˉ k'oˍ pui la ve chaw teˇ hpaˍ lehˬ, teˇ pawˆ da‸ peuˬ kehˬ peuˬ ve hk'e k'o, awˬ hk'aw‸ nawˉ teˇ pawˆ ka‸ venˇ baˆ cawˬ ve teh‸, yawˇ hui ve nyi ma hk'aw maˇ k'aw‸ dawˇ. 3 Ya‸ hk'aˇ, tanˇ tuˬ chi teˇ hpaˍ hta‸ tanˇ piˇ ve awˬ hk'aw lo, teˇ hk'aw‸ peuˬ teˇ hk'aw‸ venˇ baˆ teˇ hpaˍ hta‸ yawˇ hui k'aw‸ dawˇ nawˇ la ve yoˬ. 4 Awˬ lawn k'o, nuˇ paˍ awˬ suhˍ leh aˉ che‸ awˬ suhˍ lehˬ, venˇ baˆ teˇ hpaˍ hta‸ yuˬ baˬ maˇ hpeh‸ taˬ. 5 Chi hta‸ pa taw, Hkri‸ miˬ guiˬ hk'oˆ lo ya‸ la htaˇ yawˇ k'oˆ ve, G'uiˬ sha-oˬ, nawˬ lehˬ tanˇ tuˬ leh la‸ shawnˍ hta‸ heuˆ gaˇ ve maˇ heˆ. Nawˬ ngaˬ awˬ pon awˬ to gu taˍ peuˬ. 6 Aˬ miˍ tuˉ tanˇ ve tanˇ tuˬ leh, venˇ baˆ awˬ pon tanˇ tuˬ teˇ hpaˍ hta‸ nawˬ ha lehˬ ve maˇ heˆ. 7 Oˇ htaˇ ngaˬ k'oˆ ve, Nyi loˬ, lo‸ taˍ ve li‸ awˬ hk'aw lo ngaˬ awˬ lawn bvuh‸ taˍ ve hk'e, nawˬ ve a loˍ hta‸ te tuˬ ngaˬ laˬ ve yoˬ, teh‸ k'oˆ taˍ ve yoˬ. 8 Awˉ lawˉ htaˇ yawˇ k'oˆ ve, Tanˇ tuˬ leh la‸ shawnˍ teˇ hpaˍ hta‸ maˇ k'oˆ, aˬ miˍ tuˉ tanˇ ve tanˇ tuˬ leh venˇ baˆ awˬ pon tanˇ tuˬ teˇ hpaˍ hta‸ htawˇ maˇ k'oˆ, nawˬ maˇ heuˆ gaˇ leh maˇ ha lehˬ ve yoˬ teh‸ k'oˆ taˍ ve yoˬ. (Tanˇ tuˬ chi teˇ hpaˍ hta‸ awˬ liˇ tawˇ hkawˇ k'oˆ taˍ ve hk'a shuˍ shuˍ tanˇ piˇ ve yoˬ.) 9 Nyi loˬ, nawˬ ve a loˍ hta‸ te tuˬ ngaˬ laˬ ve yoˬ teh‸, yawˇ teˇ pawˆ k'aw‸ k'oˆ ve yoˬ. Awˬ hk'aw‸ nawˉ ve teˇ maˬ hta‸ yeˬ piˇ lawˬ tuˬ, awˉ lawˉ peuˇ ve teˇ maˬ hta‸ yawˇ baˬ taˉ ve yoˬ. 10 Oˇ hk'e te tuˬ G'uiˬ sha ve a loˍ cawˇ ve hta‸ pa taw, Yeˍsuˆ Hkri‸ yawˇ ve awˬ to teˇ pawˆ ceh tiˉ tanˇ piˇ ve awˬ hk'aw lo ngaˬ hui da‸ la kehˬ la peuˬ. 11 Paw hkuˇ hk'a peu-eˬ lehˬ, teˇ nyi le le tanˇ kuiˬ lo huˉ taˍ leh, venˇ baˆ hta‸ hpehˇ maˇ g'a ve tanˇ tuˬ teˇ hpaˍ hta‸ tanˇ piˇ tcuhˉ taˍ ve yoˬ. 12 Ya‸ hk'aˇ, Yeˍsuˆ lehˬ venˇ baˆ hta‸ hpehˇ hk'a tuˬ, co co taiˍ taiˍ awˬ pon tanˇ tuˬ teˇ maˬ tiˉ ve hta‸ tanˇ piˇ peuˬ hk'aw‸ nawˉ, G'uiˬ sha ve la‸ sha paˉ lo mui taˍ ve yoˬ. 13 Yawˇ oˇ kaˬ lo mui taˍ ve lehˬ, yawˇ ve canˇ paˍ teˇ hpaˍ hta‸ yawˇ ve hkui taw k'aw hawˉ lo, G'uiˬ sha taˍ piˇ htaˇ hk'a gaˬ law chehˇ taˍ ve yoˬ. 14 Awˬ lawn k'o, tanˇ tuˬ teˇ maˬ tiˉ ve hta‸ tanˇ ve awˬ hk'aw lo, da‸ la kehˬ la peuˬ ve chaw hui hta‸ yawˇ co co taiˍ taiˍ biˇ la piˇ peuˬ. 15 Da‸ ve kehˬ ve Awˬ ha hpu htawˇ ngaˬ hui hta‸ shaˉ hkiˆ hkanˍ laˇ ve yoˬ. Awˬ lawn k'o yawˇ k'oˆ ve, 16 Awˬ yanˇ oˇ ve awˬ hk'aw lo, ngaˬ yawˇ hui hta‸ te tuˬ ve ka ti‸ shaˉ caˆ lehˬ chi hk'e yoˬ. Ngaˬ ve awˬ liˇ tawˇ hkawˇ teˇ hpaˍ yawˇ hui ve nyi ma awˬ hk'aw lo keu piˇ leh, yawˇ hui ve nyi ma dawˇ hk'aˇ awˬ hk'oˆ hta‸ ngaˬ bvuh‸ piˇ tuˬ yoˬ teh‸, Jawˇ mawˇ G'uiˬ sha k'oˆ taˍ ve yoˬ. 17 Peuˬ leh, Yawˇ hui ve venˇ baˆ teˇ hpaˍ leh haiˬ ve kanˉ teˇ hpaˍ hta‸ ngaˬ k'aw‸ dawˇ nawˇ tuˬ ve maˇ heˆ teh‸, da‸ ve kehˬ ve Awˬ ha hpu k'oˆ ve yoˬ. 18 Chi teˇ hpaˍ hta‸ hpehˇ hk'a peuˬ hk'aw‸ nawˉ, venˇ baˆ awˬ pon tanˇ tuˬ teˇ ceuˬ hta‸ maˇ k'aw‸ loˍ. 19 Hk'e te leh, awˬ viˉ awˬ nyi teˇ hpaˍ-oˬ, Yeˍsuˆ ve awˬ suhˍ hta‸ pa taw, da‸ kehˬ ve chehˇ kuiˬ awˬ hk'aw lo ngaˬ hui nyi ma ha‸ hanˉ te leh lo‸-e hpeh‸ ve yoˬ. 20 Ngaˬ hui lo‸-e ve lehˬ, Yeˍsuˆ ngaˬ hui awˬ pon hpaˬ kaˍ hta‸ yehˬ baˬ taˍ leh, co ha te‸ ve ya‸ k'aw awˬ suhˉ teˇ caˆ yawˇ ngaˬ hui awˬ pon te pawnˍ taˍ laˇ ve hta‸ ngaˬ hui cuˇ leh lo‸-e ve yoˬ. Hpaˬ kaˍ oˇ ve lehˬ, Yeˍsuˆ ve awˬ to hta‸ k'oˆ ve yoˬ. 21 G'uiˬ sha ve yehˬ teˇ yehˬ awˬ hk'oˆ hta‸ uiˍ jaˇ ve paw hkuˇ teˇ g'aˇ ngaˬ hui cawˬ ve yoˬ. 22 Hk'e te leh, shiˍ puiˉ ve nyi ma awˬ hk'aw lo cawˬ taˍ ve haiˬ ve awˬ ceuˬ teˇ hpaˍ mehˉ k'ai htaˇ hk'a gaˬ, ngaˬ hui ve nyi ma hta‸ awˬ suhˍ hpeh‸ pfuhˍ laˇ leh da‸ kehˬ ve iˉ kaˆ hta‸ yehˇ leh ngaˬ hui ve awˬ to hta‸ tsuhˇ baˬ laˇ peuˬ ve pa taw, ngaˬ hui hk'a biˇ yonˍ ve awˬ hk'aw lo, awˬ tehˬ awˬ na nyi ma awˬ tawˬ hk'a gaˬ yawˇ geh jiˆ lo‸-e veuˬ. 23 Ngaˬ hui hkanˍ yuˬ taˍ ve dawˇ law ve teˇ ceuˬ hta‸ hiˆ hiˆ naˇ naˇ maˇ te leh, yeˬ chaweh vawˆ taˍ-a veuˬ. Awˬ lawn k'o, ka ti‸ piˇ shehˍ hpaˇ lehˬ, ka ti‸ yeˬ ve yoˬ. 24 Chi hk'oˆ ka‸, teˇ g'aˇ leh teˇ g'aˇ ha‸ pehnˇ ve nyi ma cawˬ leh, da‸ ve kanˉ teˇ hpaˍ hta‸ te tuˬ, shu hta‸ dawˇ nyi leh awˬ g'aˇ piˇ-a veuˬ. 25 Chaw teˇ hpaˍ hpaˍ teˇ geh hpawnˬ da‸ ve teˇ ceuˬ hta‸ baˬ taˉ peuˬ. Nawˬ hui oˇ hk'e taˇ te. Ya‸ hk'aˇ, awˬ nyi oˇ ve teˇ nyi gaˬ la paˇ neˇ ve hta‸ nawˬ hui shiˍ ve pa taw, leuˉ leh awˬ g'aˇ piˇ da‸ chehˇ-oˆ. 26 Awˬ lawn k'o, hteˇ ve cawˇ ve awˬ lawn hta‸ ngaˬ hui shiˍ leh ha‸ yuˬ peuˬ hk'aw‸ nawˉ, a shu yawˇ ve a loˍ awˬ hk'aˇ suh venˇ baˆ k'aw‸ te ve k'o, venˇ baˆ awˬ pon tanˇ tuˬ maˇ k'aw‸ cawˬ. 27 Ya‸ hk'aˇ, kawˆ tuˬ uiˍ jaˇ ve suhˉ jehˬ ve teˇ ceuˬ hta‸ maˇ k'oˆ, canˇ paˍ teˇ hpaˍ hta‸ nyi ma zuhˆ jaˇ ve awˬ hk'aw lo aˬ miˍ tuˉ baˬ ve hta‸ maˇ k'oˆ, law taˍ tuˬ ceh tiˉ cawˬ ve yoˬ. 28 Moˉseˍ ve awˬ liˇ tawˇ hkawˇ hta‸ te ya‸ ve chaw teˇ g'aˇ lehˬ, shaˉ hkiˆ hkanˍ shehˍ hpaˇ nyiˇ g'aˇ maˇ heˆ k'o shehˆ g'aˇ cawˬ ve k'o, shu yawˇ hta‸ maˇ ha k'aˉ leh tiˇ pehˍ ve yoˬ. 29 G'uiˬ sha ve Yaˇ hpu hta‸ naˆ tiˍ taˍ leh, a shu yawˇ awˬ to hta‸ da‸ kehˬ piˇ lawˬ ve ka ti‸ shaˉ caˆ ve awˬ suhˍ hta‸ cha‸ chiˆ ve teh‸ shawˍ leh, awˬ bon pe‸ laˇ shehˍ hpaˇ Awˬ ha hpu hta‸ maˇ shawˍ maˇ caˆ k'oˆ ve chaw teˇ g'aˇ lehˬ, oˇ ve a‸ kehˉ leuˉ leh hk'aˬ ma hehnˇ jaˇ ve ciˍ yanˍ ve hta‸ yawˇ hkanˍ keunˍ ve teh‸ nawˬ hui dawˇ ve le. 30 Awˬ lawn k'o, K'aw‸ te hk'aw‸ tuˬ ve teˇ ceuˬ lehˬ, ngaˬ ve kanˉ yoˬ. Ngaˬ k'aw‸ shaiˍ piˇ tuˬ yoˬ teh‸ k'oˆ taˍ ve tawˇ teˇ hkawˇ hta‸ maˇ k'oˆ, Jawˇ mawˇ G'uiˬ sha lehˬ, yawˇ ve chaw teˇ hpaˍ hta‸ suhˉ jehˬ tuˬ yoˬ teh‸ k'oˆ taˍ ve tawˇ teˇ hkawˇ hta‸ maˇ k'oˆ, chi hk'e k'oˆ shehˍ hpaˇ hta‸ ngaˬ hui shiˍ taˍ ve yoˬ. 31 Te‸ chehˇ ve G'uiˬ sha ve la‸ sheh awˬ hk'aw lo ce lo‸-e tuˬ ve lehˬ, kawˆ tuˬ uiˍ jaˇ ve teˇ ceuˬ hpeh‸ ve yoˬ. 32 Ponˬ laˬ ve awˬ nyi awˬ haˉ teˇ hpaˍ hta‸ dawˇ nawˇ-oˆ. Oˇ htaˇ, nawˬ hui awˬ g'euˆ hta‸ g'a mawˬ peuˬ hk'aw‸ nawˉ, yeunˇ hkanˍ ve awˬ hk'aw lo tu‸ ve hkanˍ ve hta‸ g'aˇ hte‸ g'a bawˆ da‸ ve yoˬ. 33 Shu mehˆ g'uˇ suhˍ nawˬ hui hta‸ maˇ shawˍ maˇ caˆ te laˇ ve maˇ k'oˆ, fawˉ mehˍ laˇ ve maˇ k'oˆ, nawˬ hui g'a hkanˍ ve awˬ hk'oˆ ka‸, oˇ hk'e g'a hkanˍ ve chaw teˇ hpaˍ geh teˇ geh nawˬ hui nyi ma awˬ hk'aw lo g'a hkanˍ jaw ve yoˬ. 34 Awˬ lawn k'o, htawnˍ hk'aw chehˇ ve chaw teˇ hpaˍ hta‸ nawˬ hui ha k'aˉ ve awˬ hk'oˆ ka‸, shu nawˬ hui ve mawˇ jeˬ hta‸ hiˉ yuˬ lu yuˬ ve htawˇ, nawˬ hui ha lehˬ ha k'a hkanˍ ve yoˬ. Awˬ lawn k'o, oˇ ve a‸ kehˉ leuˉ leh da‸ jaˇ ve, maˇ mehˉ puiˉ maˇ luˬ puiˉ ve mawˇ jeˬ nawˬ hui cawˬ taˍ ve hta‸ nawˬ hui shiˍ taˍ ve yoˬ. 35 Hk'e te leh, nawˬ hui nyi ma ha‸ hanˉ ve teˇ ceuˬ hta‸ taˇ baˬ taˉ. Awˬ lawn k'o, oˇ ve hta‸ pa taw la‸ shawnˍ uiˍ ve teˇ ceuˬ hta‸ nawˬ hui g'a tuˬ yoˬ. 36 G'uiˬ sha ve a loˍ hta‸ nawˬ hui te leh, yawˇ k'oˆ taˍ ve hk'e g'a hpeh‸ tuˬ, yeunˇ hkanˍ puiˉ ve nyi ma hta‸ nawˬ hui loˍ ve yoˬ. 37 Awˬ lawn k'o, laˬ tuˬ ve teˇ g'aˇ lehˬ, yawˇ maˇ law chehˇ leh maˇ maw maw gaˬ la tuˬ yoˬ. 38 Ngaˬ ve hteˇ ve cawˇ ve chaw teˇ g'aˇ lehˬ, yonˍ ve hta‸ pa taw co ha g'a te‸ tuˬ yoˬ. Yawˇ lehˬ awˬ hk'aw‸ nawˉ jiˆ k'o‸-e ve k'o, ngaˬ yawˇ awˬ hk'aw lo nyi hk'aˇ suh tuˬ maˇ heˆ, teh‸ k'oˆ taˍ ve yoˬ. 39 Ya‸ hk'aˇ, ngaˬ hui lehˬ awˬ hk'aw‸ nawˉ jiˆ k'o‸-e leh luˬ k'ai sheˆ k'ai ve chaw teˇ hpaˍ hpeh‸ ve maˇ heˆ. Ngaˬ hui yonˍ ve awˬ hk'aw lo ngaˬ hui ve co ha htaiˍ hk'aw‸ ve hta‸ g'a ve chaw teˇ hpaˍ hpeh‸ ve yoˬ.

Heˍbrehˇ 11

1 Yonˍ ve teˇ ceuˬ hta‸ pa taw, ngaˬ hui dawˇ law taˍ ve teˇ hpaˍ hta‸ awˬ tehˬ awˬ na g'a tuˬ ve hta‸ maˇ k'oˆ, ngaˬ hui maˇ mawˬ sheˍ ve awˬ ceuˬ teˇ hpaˍ awˬ tehˬ awˬ na cawˬ taˍ ve hta‸ maˇ k'oˆ, ngaˬ hui hk'a deh‸ deh‸ shiˍ taˍ ve yoˬ. 2 Aˍ sho-eˬ htaˇ ve chaw teˇ hpaˍ yonˍ ve pa taw, G'uiˬ sha yawˇ hui hta‸ nyi hk'aˇ suh ve yoˬ. 3 G'uiˬ sha ve tawˇ hkawˇ hta‸ pa taw sha hpa‸ laˬ hpa‸ htaˆ hk'a peu-eˬ hpeh‸ la ve hta‸ ngaˬ hui g'a shiˍ ve lehˬ, ngaˬ hui yonˍ ve hta‸ pa taw yoˬ. Hk'e te leh, ngaˬ hui g'a mawˬ ve awˬ ceuˬ teˇ hpaˍ lehˬ, maˇ mawˬ ve awˬ ceuˬ teˇ hpaˍ awˬ hk'aw lo tawˆ la ve hta‸ ka‸ ngaˬ hui g'a shiˍ ve yoˬ. 4 Aˍbeˍlaˆ lehˬ, yonˍ ve awˬ hk'aw lo, Kaˍiˉnaˆ ve tanˇ tuˬ a‸ kehˉ da‸ ve tanˇ tuˬ G'uiˬ sha hta‸ tanˇ piˇ ve yoˬ. Yawˇ ve la‸ shawnˍ teˇ hpaˍ hta‸ G'uiˬ sha ha‸ yuˬ ve pa taw, yawˇ hteˇ ve cawˇ ve chaw hpeh‸ ve yoˬ teh‸, G'uiˬ sha yawˇ awˬ lawn shaˉ hkiˆ hkanˍ ve yoˬ. Hk'e te leh, Aˍbeˍlaˆ suh peuˬ htawˇ, yonˍ ve oˇ ve hta‸ pa taw yawˇ tawˇ yaw chehˇ sheˍ ve yoˬ. 5 Eˇnawˆ lehˬ, yonˍ ve hta‸ pa taw suh ve teˇ ceuˬ hta‸ maˇ g'a hkanˍ tuˬ G'uiˬ sha yawˇ hta‸ mvuhˇ naw ma lo yuˬ taˆ-e ve yoˬ. G'uiˬ sha yawˇ hta‸ yuˬ taˆ-e ve pa taw, shu yawˇ hta‸ ca maˇ mawˬ. G'uiˬ sha yawˇ hta‸ maˇ yuˬ taˆ-e sheˍ htaˇ, Yawˇ hta‸ ngaˬ nyi hk'aˇ suh ve yoˬ teh‸ G'uiˬ sha shaˉ hkiˆ hkanˍ ve yoˬ. 6 Chaw yaˇ lehˬ, yonˍ ve teˇ ceuˬ maˇ cawˬ ve k'o, G'uiˬ sha nyi hk'aˇ suh tuˬ te maˇ g'a. Awˬ lawn k'o, G'uiˬ sha geh jiˆ k'ai ve chaw lehˬ, G'uiˬ sha cawˬ ve hta‸ maˇ k'oˆ, yawˇ hta‸ ca ve chaw hui hta‸ awˬ bon piˇ ve hta‸ maˇ k'oˆ, yawˇ g'a yonˍ ve yoˬ. 7 Noˉa‸ lehˬ yonˍ ve hta‸ pa taw, maˇ hpeh‸ la sheˍ ve awˬ ceuˬ teˇ hpaˍ awˬ lawn G'uiˬ sha yawˇ hta‸ hto piˇ maˍ piˇ ve teˇ yanˇ, yawˆ yan ve awˬ hk'aw lo na yuˬ leh, yawˇ ve yehˬ yaˇ k'a yaˇ teˇ hpaˍ g'a ponˬ tuˬ, yawˇ haw lo‸ k'oˍ te ve yoˬ. Chi hk'e yonˍ ve awˬ hk'aw lo, yawˇ miˬ guiˬ yaˇ hui hta‸ suhˉ taˆ leh, yonˍ ve hta‸ pa taw hteˇ ve cawˇ ve teˇ ceuˬ hta‸ g'a ve yoˬ. 8 Aˍbraˍhanˍ lehˬ yonˍ ve hta‸ pa taw, yawˇ awˬ shinˉ g'a tuˬ ve mvuhˇ miˬ lo k'ai tuˬ G'uiˬ sha yawˇ hta‸ kuˬ ve teˇ yanˇ, hk'aˬ lo g'a k'ai tuˬ ve hta‸ yawˇ maˇ shiˍ htawˇ na yuˬ leh k'ai ve yoˬ. 9 Yonˍ ve hta‸ pa taw, yawˇ g'a tuˬ ve mvuhˇ miˬ awˬ hk'aw lo, shu mvuhˇ miˬ hk'aw ca chehˇ ve chaw hk'e yawˇ hkehˉ chaw te chehˇ ve yoˬ. Yawˇ geh teˇ geh mvuhˇ miˬ oˇ ve hta‸ g'a tuˬ ve Iˉcaˆ leh Yaˍkoˆ hui geh aˉ po k'o teˇ hpaˍ awˬ hk'aw lo yawˇ chehˇ taˍ ve yoˬ. 10 Awˬ lawn k'o, G'uiˬ sha kawˍ taˍ te taˍ ve, awˬ hkuiˉ puiˍ yeˬ jaˇ ve venˇ hta‸ yawˇ dawˇ law chehˇ ve yoˬ. 11 Saˍraˇ htawˇ yonˍ ve hta‸ pa taw, yaˇ hu ve awˬ yanˇ leh peuˬ ve htawˇ, yawˇ yaˇ hu g'a ve yoˬ. Awˬ lawn k'o, ka ti‸ piˇ shehˍ hpaˇ lehˬ, ka ti‸ yeˬ ve yoˬ teh‸ yawˇ dawˇ taˍ ve yoˬ. 12 Hk'e te leh, mawˇ jaˇ leh suh paˇ neˇ ve hawˉ hk'aˆ teˇ g'aˇ tiˉ awˬ hk'aw lo, awˬ yaˇ awˬ duˬ maˇ maˇ cawˬ la ve yoˬ. Yawˇ hui lehˬ, mvuhˇ naw ma lo cawˬ ve meu‸ keu shiˍ hk'a shuˍ shuˍ maˇ jaˇ leh, laˇ tsuhˇ g'uiˬ pfuhˍ paˇ lo cawˬ ve shehˇ shiˍ hk'a shuˍ shuˍ g'aw maˇ g'a htaˇ hk'a gaˬ cawˬ ve yoˬ. 13 Chaw chi teˇ hpaˍ hk'a peu-eˬ lehˬ, yonˍ ve awˬ hk'aw lo suh ve yoˬ. G'uiˬ sha yawˇ hui hta‸ piˇ tuˬ yoˬ teh‸ k'oˆ taˍ ve awˬ ceuˬ teˇ hpaˍ hta‸ yawˇ hui maˇ g'a sheˍ htawˇ, awˬ ceuˬ oˇ ve teˇ hpaˍ hta‸ vuiˇ kuiˬ lo yawˇ hui g'a mawˬ leh ha lehˬ jaˇ ve yoˬ. Yawˇ hui lehˬ, miˬ guiˬ hk'oˆ lo chehˇ htaˇ, shu mvuhˇ shu miˬ lo hkehˉ chaw hk'e hpeh‸ chehˇ ve yoˬ teh‸ yawˇ hui k'oˆ ve yoˬ. 14 Oˇ hk'e k'oˆ ve chaw teˇ hpaˍ lehˬ, yawˇ hui g'a tuˬ ve mvuhˇ miˬ hta‸ ca chehˇ ve yoˬ teh‸, yawˇ hui hk'a tawˍ lehˆ hpeu‸ maˍ laˇ ve yoˬ. 15 Yawˇ hui tawˆ la ve mvuhˇ miˬ hta‸ dawˇ nawˇ chehˇ ve k'o, yawˇ hui k'o‸-e tuˬ awˬ yanˇ cawˬ ve yoˬ. 16 Ya‸ hk'aˇ, yawˇ hui dawˇ law taˍ ve mvuhˇ miˬ lehˬ, oˇ ve a‸ kehˉ da‸ ve mvuhˇ naw ma mvuhˇ miˬ hpeh‸ ve yoˬ. Chi hta‸ pa taw, G'uiˬ sha lehˬ yawˇ hui ve G'uiˬ sha hpeh‸ ve yoˬ teh‸, shu k'oˆ ve hta‸ yawˇ maˇ ya‸ taw. Awˬ lawn k'o, yawˇ hui chehˇ tuˬ awˬ pon venˇ hta‸ yawˇ gu taˍ peuˬ. 17 Aˍbraˍhanˍ lehˬ, yonˍ ve hta‸ pa taw, G'uiˬ sha yawˇ hta‸ lawˇ nyi ve teˇ yanˇ, yawˇ Iˉcaˆ hta‸ yuˬ leh tanˇ piˇ ve yoˬ. 18 Iˉcaˆ awˬ hk'aw lo nawˬ ve awˬ ceuˬ awˬ hk'aˇ cawˬ la tuˬ yoˬ teh‸, ka ti‸ g'a taˍ ve chaw teˇ g'aˇ lehˬ, yawˇ ve yaˇ paˍ teˇ g'aˇ tiˉ ve hta‸ tanˇ piˇ ve yoˬ. 19 Awˬ lawn k'o, G'uiˬ sha lehˬ chaw yaˇ hta‸ suh kuiˬ lo k'aw‸ te‸ tu la piˇ puiˉ ve hta‸ yawˇ yonˍ taˍ ve yoˬ. Tawˇ pa haˉ k'oˆ ve k'o, suh kuiˬ lo yawˇ ve yaˇ paˍ hta‸ yawˇ k'aw‸ g'a ve yoˬ. 20 Iˉcaˆ lehˬ yonˍ ve hta‸ pa taw, Yaˍkoˆ leh Iˉsawˇ hta‸ awˬ hk'aw‸ nawˉ g'a tuˬ ve awˬ bon na‸ piˇ taˍ ve yoˬ. 21 Yaˍkoˆ lehˬ, yonˍ ve hta‸ pa taw, suh la paˇ neˇ ve teˇ yanˇ, Yoˇseh‸ ve yaˇ paˍ nyiˇ g'aˇ hta‸ bon na‸ piˇ leh, yawˇ ve juˇ fuiˍ awˬ meuˇ awˬ hk'oˆ boˆ taˍ leh G'uiˬ sha hta‸ oˉ k'oˍ pui ve yoˬ. 22 Yoˇseh‸ lehˬ yonˍ ve hta‸ pa taw, yawˇ ve a sha‸ leh la paˇ neˇ ve teˇ yanˇ, Iˉsaˍreˍlaˆ chaw teˇ hpaˍ g'a tawˆ k'ai tuˬ ve awˬ lawn hto piˇ leh, yawˇ ve awˬ mu‸ ku hta‸ hk'aˬ hk'e te tuˬ ve awˬ lawn yawˇ tawˇ piˇ taˉ ve yoˬ. 23 Moˉseˍ ve awˬ pa awˬ e lehˬ yonˍ ve hta‸ pa taw, Moˉseˍ paw la peuˬ hk'aw‸ nawˉ, ha pa sheh lehˇ hk'a gaˬ yawˇ hta‸ faˉ taˍ ve yoˬ. Awˬ lawn k'o, yaˇ paˍ oˇ ve lehˬ awˬ hkiˇ awˬ nganˇ da‸ jaˇ ve hta‸ yawˇ huiˉ maˬ g'a mawˬ leh, hkunˉ hawˉ hkanˇ tawˇ piˇ taˍ ve hta‸ yawˇ huiˉ maˬ maˇ kawˆ. 24 Moˉseˍ lehˬ yonˍ ve hta‸ pa taw, yawˇ uiˍ la ve teˇ yanˇ htaˇ, Hpaˍrawˇ yaˇ miˇ ve awˬ yaˇ paˍ teh‸ k'oˆ ve hta‸ yawˇ maˇ hkanˍ gaˇ. 25 Teˇ tcuhˉ teˇ yanˇ venˇ baˆ awˬ hk'aw ha lehˬ chehˇ ve a‸ kehˉ G'uiˬ sha ve awˬ yaˇ awˬ duˬ teˇ hpaˍ geh hk'a geh g'a tu‸ g'a hkanˍ tuˬ ve hta‸ yawˇ leuˉ leh heuˆ gaˇ ve yoˬ. 26 Hkri‸ awˬ pon g'a tu‸ g'a hkanˍ ve teˇ ceuˬ lehˬ, Eˇjiˇtu‸ mvuhˇ miˬ awˬ hk'aw lo cawˬ ve da‸ jaˇ ve mawˇ jeˬ a‸ kehˉ leuˉ leh awˬ hpfuhˇ hk'aˆ jaˇ ve teˇ ceuˬ hpeh‸ ve teh‸, yawˇ dawˇ taˍ ve yoˬ. Awˬ lawn k'o, yawˇ g'a tuˬ ve la‸ shawnˍ hta‸ yawˇ chiˇ nyi tcuhˉ taˍ ve yoˬ. 27 Yonˍ ve hta‸ pa taw, hkunˉ hawˉ hkanˇ nyi ma zuhˆ ve hta‸ yawˇ maˇ kawˆ leh, Eˇjiˇtu‸ mvuhˇ miˬ awˬ hk'aw lo tawˆ k'ai ve yoˬ. Awˬ lawn k'o, mawˬ maˇ hpeh‸ ve teˇ g'aˇ hta‸ mawˬ taˍ ve hk'e te leh, yawˇ nyi ma yeˬ ve yoˬ. 28 Yaˇ uiˍ teˇ hpaˍ hta‸ te luˬ shehˍ hpaˇ lehˬ, yawˇ hui hta‸ maˇ g'a htawˇ tuˬ, Moˉseˍ yawˇ yonˍ ve hta‸ pa taw, Paˍsaˍhkaˍ pawehˇ te leh awˬ suhˍ hpeh‸ pfuhˍ taˍ ve yoˬ. 29 Yonˍ ve hta‸ pa taw, Iˉsaˍreˍlaˆ chaw teˇ hpaˍ lehˬ goˇ lehˍ ve miˬ guiˬ hk'oˆ hta‸ juˇ k'ai ve hk'e, Laˇ tsuhˇ g'uiˬ nyi hta‸ hkanˍ k'ai ve yoˬ. Ya‸ hk'aˇ Eˇjiˇtu‸ chaw teˇ hpaˍ oˇ ve hk'a shuˍ shuˍ hkanˍ k'ai chehˇ ve teˇ yanˇ, k'a suh peuˬ ve yoˬ. 30 Yonˍ ve hta‸ pa taw, Iˉsaˍreˍlaˆ chaw hui Yeˍriˆhkoˇ venˇ hta‸ suhˍ nyi caw peuˬ hk'aw‸ nawˉ, lanˇ venˇ paˆ ce ve yoˬ. 31 Meh maˬ lanˉ Raˍhaˆ lehˬ, yonˍ ve hta‸ pa taw maˇ na yuˬ ve chaw teˇ hpaˍ geh maˇ g'a luˬ. Awˬ lawn k'o, jaˆ nyi shehˍ hpaˇ teˇ hpaˍ hta‸ yawˇ ha lehˬ ha k'a ha‸ yuˬ ve hta‸ pa taw yoˬ. 32 Chi hk'oˆ ka‸, ngaˬ aˬ hto‸ ma g'a k'aw‸ k'oˆ tuˬ sheˍ le. Awˬ lawn k'o, Giˉdonˍ, Baˍrehˆ, Saˍsonˍ, Yeˍhpaˍtaˆ, Daˍviˆ, Saˍmo-eˍlaˆ leh G'uiˬ sha ve tcuh kaˍ paˍ teˇ hpaˍ awˬ lawn ca k'aoˍ maˇ peuˬ taˬ. 33 Chaw oˇ ve teˇ hpaˍ lehˬ, yonˍ ve hta‸ pa taw mvuhˇ miˬ teˇ hpaˍ hta‸ g'aˇ ve, hteˇ lehˍ cawˇ lehˍ uˉ peunˍ ve, G'uiˬ sha ve ka ti‸ tawˇ hkawˇ teˇ hpaˍ hta‸ g'a taˍ ve, laˇ caˬ shiˉ ve maw‸ k'aw hta‸ hoˆ taˍ ve, 34 hehnˇ jaˇ ve aˬ miˍ hta‸ shiˉ pehˍ g'aˇ ve, aˉ htaw la‸ hk'aw g'a ponˬ ve, awˬ g'aˇ nuˇ ve teˇ ceuˬ awˬ hk'aw lo awˬ g'aˇ uiˍ ve hta‸ g'a ve, ma‸ bawˆ ve awˬ hk'aw lo awˬ g'aˇ uiˍ la leh, shu mvuhˇ miˬ ve ma‸ yaˇ teˇ hpaˍ hta‸ g'a‸ k'oˬ ve yoˬ. 35 Yaˇ miˇ teˇ hpaˍ lehˬ, suh kuiˬ lo a shu yawˇ ve chaw k'aw‸ te‸ tu la ve hta‸ g'a ve yoˬ. Chaw teˇ hpaˍ hpaˍ lehˬ, hehnˇ jaˇ ve fawˉ mehˍ ve hta‸ g'a hkanˍ ve yoˬ. Awˬ lawn k'o, leuˉ leh da‸ ve k'aw‸ te‸ tu la ve teˇ ceuˬ hta‸ g'a hpeh‸ tuˬ, shu ponˬ piˇ ve hta‸ yawˇ hui maˇ hkanˍ yuˬ. 36 Chaw teˇ hpaˍ hpaˍ lehˬ, shu maˇ shawˍ maˇ caˆ te leh dawˆ ve hta‸ g'a hkanˍ ve awˬ hk'oˆ ka‸, sho caˆ hpeh leh htawnˍ hk'aw keu taˍ ve hta‸ g'a hkanˍ ve yoˬ. 37 Shu haˉ pui baˬ ve, liˉ leu g'eu‸ cheˆ ve leh, aˉ htaw chaw pehˍ ve hta‸ yawˇ hui g'a hkanˍ ve yoˬ. Haˍ g'awˇ jaˇ ve teˇ ceuˬ, fawˉ ve mehˍ ve teˇ ceuˬ leh, tu‸ ve hkanˍ ve teˇ ceuˬ hta‸ yawˇ hui g'a hkanˍ ve awˬ hk'aw lo, yawˬ guiˬ k'uˉ aˉ che‸ guiˬ k'uˉ hta‸ veu‸ deh leh, teˇ kaˬ peuˬ teˇ kaˬ lo yawˇ hui g'a hpaw toˇ ve yoˬ. 38 Yawˇ hui lehˬ, heh puiˉ hk'aw leh hk'aw hk'oˆ lawˬ hk'oˆ lo, miˬ k'oˍ haˉ k'oˍ hk'aw lo ca chehˇ toˇ ve yoˬ. Yawˇ hui da‸ ve pa taw, miˬ guiˬ chi yawˇ hui hta‸ maˇ keunˍ. 39 Chaw oˇ ve teˇ hpaˍ hk'a peu-eˬ lehˬ, yawˇ hui yonˍ ve teh‸ G'uiˬ sha shaˉ hkiˆ hkanˍ ve htawˇ, ka ti‸ piˇ taˍ ve teˇ hpaˍ hta‸ yawˇ hui maˇ g'a sheˍ. 40 Aˬ hto‸ ma hta‸ pa taw le teh‸ k'oˆ k'o, chaw oˇ ve teˇ hpaˍ lehˬ, ngaˬ hui geh teˇ geh maˇ heˆ k'o, yawˇ hui biˇ ve teˇ ceuˬ hta‸ maˇ g'a sheˍ. Awˬ lawn k'o, G'uiˬ sha lehˬ ngaˬ hui awˬ pon da‸ leuˉ ve teˇ ceuˬ hta‸ gu taˍ ve hta‸ pa taw yoˬ.

Heˍbrehˇ 12

1 Hk'e te leh, shaˉ hkiˆ hkanˍ shehˍ hpaˇ chi taw taw maˇ leh, moˬ hk'a shuˍ shuˍ ngaˬ hui hta‸ caw zuhˇ chehˇ taˍ ve pa taw, tawˍ taˍ ve awˬ ceuˬ hk'a peu-eˬ hta‸ yuˬ baˬ sheˬ leh, hawˆ taˍ ve venˇ baˆ hk'a peu-eˬ hta‸ k'ehˆ baˬ taˉ leh, a shu yawˇ awˬ pon gu taˍ laˇ ve awˬ hk'aˇ hta‸ nyi ma yeˬ ve awˬ hk'aw lo g'uiˇ k'ai-a veuˬ. 2 G'uiˇ k'ai chehˇ ve teˇ yanˇ, Yeˍsuˆ hta‸ hk'a deh‸ nyi taˍ-o‸. Yawˇ lehˬ, ngaˬ hui ve yonˍ ve teˇ ceuˬ hta‸ awˬ hkuiˉ puiˍ tanˬ te leh biˇ la piˇ shehˍ hpaˇ hpeh‸ ve yoˬ. Yawˇ awˬ g'uˇ suhˍ teh taˍ ve ha lehˬ tuˬ ve teˇ ceuˬ hta‸ pa taw, ya‸ taw ve teˇ ceuˬ hta‸ maˇ dawˇ leh, la‸ ka hk'oˆ lo hkanˍ suh peuˬ ve yoˬ. Yawˇ lehˬ chi beu‸ G'uiˬ sha ve k'aw jaw la‸ sha paˉ lo mui chehˇ taˍ peuˬ. 3 Nawˬ hui awˬ g'aˇ maˇ g'a nuˇ leh, nyi ma maˇ g'a luˬ tuˬ, venˇ baˆ yaˇ hui ve la‸ sheh awˬ hk'aw lo chi taw taw hk'a mvuhˇ hk'a na te leh tawˍ taˍ ve hta‸ g'a hkanˍ ve teˇ g'aˇ hta‸ dawˇ nyi-o. 4 Nawˬ hui lehˬ, venˇ baˆ hta‸ g'a tawˍ da‸ bawˆ da‸ ve awˬ hk'aw lo, nawˬ hui ve awˬ suhˍ sheˆ htaˇ hk'a gaˬ maˇ g'a hkanˍ jaw sheˍ. 5 Yaˇ paˍ teˇ hpaˍ hta‸ awˬ pa maˍ piˇ ve hk'e, yawˇ nawˬ hui hta‸ k'oˆ maˍ laˇ ve tawˇ hkawˇ hta‸ nawˬ hui leunˇ peuˬ laˇ. Yawˇ k'oˆ ve, Ngaˬ yaˇ paˍ-oˬ, Jawˇ mawˇ G'uiˬ sha maˍ laˇ ve hta‸ hk'e leˇ taˇ dawˇ. Yawˇ nawˬ hta‸ deˇ maˍ laˇ ve teˇ yanˇ, nyi ma taˇ luˬ. 6 Awˬ lawn k'o, Jawˇ mawˇ G'uiˬ sha lehˬ yawˇ ha‸ ve chaw hta‸ maˍ piˇ leh, yawˇ ha‸ yuˬ ve yaˇ paˍ teˇ g'aˇ le le hta‸ jaw‸ maˍ piˇ ve yoˬ, teh‸ yawˇ k'oˆ taˍ ve yoˬ. 7 Yawˇ maˍ laˇ ve hta‸ yeunˇ hkanˍ-o‸. Yaˇ paˍ teˇ hpaˍ hta‸ awˬ pa te piˇ ve hk'a shuˍ shuˍ, G'uiˬ sha nawˬ hui hta‸ te laˇ chehˇ ve yoˬ. Awˬ lawn k'o, awˬ pa maˇ maˍ piˇ ve yaˇ paˍ a shu teˇ g'aˇ cawˬ le. 8 Yaˇ hk'a peu-eˬ maˍ ve teˇ ceuˬ hta‸ g'a hkanˍ ve hk'e nawˬ hui maˇ g'a hkanˍ ve k'o, nawˬ hui yaˇ awˬ tehˬ ma hpeh‸ ve maˇ heˆ, haˉ chawˇ haˉ paˆ yaˇ hpeh‸ ve yoˬ. 9 Chi hk'oˆ ka‸, ngaˬ hui hta‸ maˍ laˇ tuˬ, awˬ suhˍ awˬ shaˍ hpawˇ awˬ pa teˇ hpaˍ cawˬ leh, yawˇ hui hta‸ ngaˬ hui yawˆ yan ve yoˬ. Chi a‸ kehˉ leuˉ leh, co ha hpawˇ ve Awˬ pa awˬ hawˉ lo ngaˬ hui chehˇ leh co ha g'a te‸ ve maˇ heˆ laˇ. 10 Awˬ lawn k'o, yawˇ hui lehˬ a shu yawˇ nyi ma cawˇ ve hk'e ngaˬ hui hta‸ teˇ tcuhˉ teˇ yanˇ awˬ hk'aw lo ceh maˍ laˇ ve yoˬ. Ya‸ hk'aˇ G'uiˬ sha lehˬ, yawˇ da‸ ve kehˬ ve hk'e ngaˬ hui htawˇ da‸ la kehˬ la tuˬ, ngaˬ hui awˬ pon da‸ ve hta‸ yawˇ dawˇ leh maˍ laˇ ve yoˬ. 11 Maˍ laˇ ve teˇ ceuˬ le le hta‸ g'a hkanˍ ve teˇ yanˇ, ha lehˬ tuˬ cawˬ ve maˇ heˆ, dawˇ haˍ tuˬ ceh tiˉ cawˬ ve yoˬ. Ya‸ hk'aˇ, maˍ ve hta‸ g'a hkanˍ yuˬ ve chaw teˇ hpaˍ awˬ pon, awˬ hk'aw‸ nawˉ k'o, hteˇ ve cawˇ ve awˬ hk'aw lo dawˇ sha gaˇ sha ve awˬ shiˍ naw‸ la ve yoˬ. 12 Hk'e te leh, nawˬ hui ve la‸ sheh deu lehˍ te chehˇ ve teˇ hpaˍ hta‸ chiˇ leh, awˬ g'aˇ maˇ cawˬ ve hkui tcuhˉ k'u teˇ hpaˍ hta‸ awˬ g'aˇ cawˬ la piˇ-oˆ. 13 Hkui sheh luˬ ve chaw teˇ hpaˍ awˬ tcuhˉ maˇ g'a jiˆ k'ai leh na-e la tuˬ, nawˬ hui ve hkui sheh awˬ pon ya‸ k'aw hteˇ lehˍ gu taˍ-o‸. 14 Nawˬ hui lehˬ, da‸ la kehˬ la tuˬ maˇ k'oˆ, chaw hk'a peu-eˬ hta‸ cawˇ da‸ hui da‸ tuˬ maˇ k'oˆ, g'aˇ hte‸ te-o. Da‸ ve kehˬ ve maˇ cawˬ ve chaw a shu teˇ g'aˇ maˇ k'oˆ, Jawˇ mawˇ G'uiˬ sha hta‸ maˇ g'a mawˬ. 15 Nawˬ hui shaˍ ti‸ hk'a deh‸ taˍ-o‸. Maˇ heˆ k'o, nawˬ hui awˬ hk'aw lo chaw teˇ g'aˇ g'aˇ G'uiˬ sha ve awˬ bon hta‸ maˇ g'a puiˉ-aˆ. Nawˬ hui hta‸ sho‸ sha‸ laˇ tuˬ, hk'aˇ ve awˬ geu tawˆ la leh, chaw maˇ maˇ hta‸ cha‸ chiˆ tuˬ htawˇ te laˇ puiˉ-aˆ. 16 Awˍ teˇ poˬ ceh tiˉ g'a caˇ tuˬ awˬ pon, yaˇ uiˍ ve aˉ yaˇ hta‸ hawˇ baˬ ve Iˉsawˇ hk'a shuˍ shuˍ, haˉ chawˇ haˉ paˆ te leh G'uiˬ sha hta‸ maˇ yawˆ maˇ yan ve chaw, nawˬ hui awˬ hk'aw lo teˇ g'aˇ ka‸ maˇ g'a cawˬ tuˬ, shaˍ ti‸ hk'a deh‸ taˍ-o‸. 17 Awˬ lawn k'o, awˬ hk'aw‸ nawˉ Iˉsawˇ lehˬ na‸ piˇ ve awˬ bon hta‸ k'aw‸ heuˆ gaˇ ve teˇ yanˇ, baˬ taˉ ve hta‸ yawˇ g'a hkanˍ ve teh‸ nawˬ hui shiˍ ve yoˬ. Mehˆ g'uiˬ ya‸ la ve awˬ hk'aw lo yawˇ g'aˇ hte‸ ca ve htawˇ, k'aw‸ dawˇ hpfuhˆ tuˬ awˬ yanˇ maˇ k'aw‸ cawˬ. 18 Awˬ lawn k'o, la‸ sheh htawˇ g'a ve, aˬ miˍ to‸ ve, naˆ tawˉ naˆ ho‸ ve leh, mvuhˇ haw lonˉ meuˆ la ve hk'aw teˇ shiˍ lo nawˬ hui laˬ ve maˇ heˆ. 19 Hk'aw oˇ ve teˇ shiˍ lo behˬ heh ma meuˆ ve awˬ hkawˇ leh tawˇ yaw ve awˬ hkawˇ hta‸ g'a kaˇ ve chaw hui lehˬ, yawˇ hui hta‸ tawˇ maˇ g'a k'aw‸ yaw laˇ tuˬ lawˬ hkawˉ ve yoˬ. 20 Awˬ lawn k'o, To nuˇ to shaˆ ka‸ hk'aw oˇ ve hta‸ g'a daw‸ ve k'o, haˉ pui baˬ pehˍ-o‸ teh‸, tawˇ piˇ taˍ ve hta‸ yawˇ hui hkanˍ maˇ g'a. 21 Oˇ ve teˇ hpaˍ hta‸ g'a mawˬ ve teˇ yanˇ, kawˆ tuˬ uiˍ jaˇ ve pa taw, Ngaˬ kawˆ cheˇ jaˇ ve yoˬ teh‸, Moˉseˍ k'oˆ ve yoˬ. 22 Ya‸ hk'aˇ, nawˬ hui laˬ ve lehˬ, Ziˉonˍ hk'aw hk'oˆ lo laˬ ve yoˬ. Hk'aw oˇ ve lehˬ, te‸ chehˇ ve G'uiˬ sha ve venˇ, mvuhˇ naw ma hk'oˆ ve Yeˍruˆsaˍlehnˍ, ca g'aw maˇ peuˬ ve mvuhˇ naw ma tcuh yaˇ hui ha lehˬ ha k'a hpawnˬ da‸ kuiˬ, 23 mvuhˇ naw ma ve caˇ lanˇ awˬ hk'aw lo awˬ meh bvuh‸ taˍ ve yaˇ uiˍ teˇ hpaˍ hpawnˬ da‸ kuiˬ hpeh‸ ve yoˬ. Chaw hk'a peu-eˬ hta‸ suhˉ jehˍ shehˍ hpaˇ G'uiˬ sha geh lo, biˇ la peuˬ ve hteˇ ve cawˇ ve chaw hui ve co ha teˇ hpaˍ cawˬ kuiˬ lo, 24 ka ti‸ shaˉ caˆ awˬ suhˉ awˬ pon awˬ kaˍ te shehˍ hpaˇ Yeˍsuˆ geh lo leh, Aˍbeˍlaˆ ve awˬ suhˍ tawˇ yaw ve a‸ kehˉ leuˉ leh da‸ ve tawˇ hta‸ yaw ve, pfuhˍ taˍ ve awˬ suhˍ geh lo nawˬ hui laˬ ve yoˬ. 25 Nawˬ hui lehˬ, tawˇ yaw laˇ shehˍ hpaˇ ve awˬ hkawˇ hta‸ maˇ na ve chaw maˇ g'a hpeh‸ tuˬ, shaˍ ti‸ taˍ-o‸. Awˬ lawn k'o, miˬ guiˬ hk'oˆ lo shaˍ ti‸ piˇ sheh hpaˇ hkawˇ hta‸ yawˇ hui maˇ na ve pa taw maˇ g'a ponˬ ve k'o, mvuhˇ naw ma hk'oˆ chehˇ ve shaˍ ti‸ piˇ shehˍ hpaˇ hkawˇ hta‸ ngaˬ hui maˇ na ve k'o, leuˉ leh ponˬ maˇ hpeh‸. 26 Oˇ htaˇ, yawˇ ve awˬ hkawˇ miˬ guiˬ hta‸ hiˆ piˇ ve yoˬ. Ya‸ hk'aˇ, chi beu‸ ka ti‸ cawˬ taˍ ve lehˬ, Miˬ guiˬ hta‸ ngaˬ teˇ pawˆ k'aw‸ hiˆ piˇ tuˬ sheˍ ve awˬ hk'oˆ ka‸, mvuhˇ naw ma hta‸ htawˇ hiˆ piˇ tuˬ yoˬ teh‸ yawˇ k'oˆ taˍ ve yoˬ. 27 Teˇ pawˆ k'aw‸ hiˆ piˇ tuˬ sheˍ teh‸ k'oˆ taˍ ve lehˬ, hiˆ piˇ maˇ g'a ve awˬ ceuˬ teˇ hpaˍ hk'aˬ htaˆ ka‸ yeˬ chehˇ tuˬ, hiˆ piˇ g'a ve awˬ ceuˬ teˇ hpaˍ hta‸ yuˬ baˬ tuˬ yoˬ teh‸ k'oˆ gaˇ ve yoˬ. Hiˆ piˇ g'a ve awˬ ceuˬ teˇ hpaˍ lehˬ, te hpanˍ taˍ ve awˬ ceuˬ teˇ hpaˍ hpeh‸ ve yoˬ. 28 Hk'e te leh, hiˆ piˇ maˇ g'a ve mvuhˇ miˬ hta‸ ngaˬ hui g'a taˍ ve hta‸ pa taw, G'uiˬ sha ve awˬ bon hta‸ chiˇ mvuh-a veuˬ. Yawˆ yan puiˉ kawˆ puiˉ ve awˬ hk'aw lo, G'uiˬ sha nyi ma cawˇ ve hk'e yawˇ hta‸ oˉ k'oˍ pui-a veuˬ. 29 Awˬ lawn k'o, ngaˬ hui ve G'uiˬ sha lehˬ, to‸ baˬ chehˇ ve aˬ miˍ hpeh‸ ve yoˬ.

Heˍbrehˇ 13

1 Awˬ viˉ awˬ nyi ha‸ da‸ ve teˇ ceuˬ nawˬ hui hk'aˬ htaˆ ka‸ cawˬ piˇ-oˆ. 2 Hkehˉ chaw teˇ hpaˍ hta‸ ha‸ yuˬ tuˬ taˇ leunˇ. Awˬ lawn k'o, chaw teˇ hpaˍ hpaˍ hkehˉ chaw hta‸ ha‸ yuˬ ve teˇ yanˇ, yawˇ hui maˇ shiˍ ve awˬ hk'aw lo mvuhˇ naw ma tcuh yaˇ teˇ hpaˍ hta‸ ha‸ yuˬ jaw ve yoˬ. 3 Nawˬ hui lehˬ, htawnˍ hk'aw chehˇ ve chaw hui geh teˇ geh chehˇ ve hk'a shuˍ shuˍ shawˍ taˍ leh, yawˇ hui hta‸ dawˇ nawˇ-oˆ. Nawˬ hui htawˇ awˬ suhˍ awˬ shaˍ pfuhˇ taˍ ve hta‸ pa taw, fawˉ mehˍ ve hta‸ g'a hkanˍ ve chaw teˇ hpaˍ hta‸ dawˇ nawˇ-oˆ. 4 Awˬ hpawˇ awˬ miˇ heuˆ da‸ ve teˇ ceuˬ hta‸ chaw hk'a peu-eˬ taˍ uiˍ taˍ mvuh piˇ-oˆ. Awˬ hpawˇ awˬ miˇ teˇ hpaˍ maˇ hteˇ maˇ cawˇ ve awˬ hk'aˇ suh taˇ k'ai. Awˬ lawn k'o, guiˇ ya‸ ve chaw leh haˉ chawˇ haˉ paˆ te ve chaw teˇ hpaˍ hta‸ G'uiˬ sha ciˍ yanˍ piˇ tuˬ yoˬ. 5 Hpu hta‸ sheˉ lai ve teˇ ceuˬ nawˬ hui awˬ hk'aw lo taˇ cawˬ piˇ. Nawˬ hui hk'a cawˬ taˍ ve teˇ hpaˍ hta‸ nyi hk'aˇ suh chehˇ-oˆ. Awˬ lawn k'o, Ngaˬ nawˬ hta‸ hk'aˬ htaˆ ka‸ maˇ hpaˆ, hk'aˬ htaˆ ka‸ maˇ baˬ teh‸ G'uiˬ sha k'oˆ taˍ ve yoˬ. 6 Chi hta‸ pa taw, Jawˇ mawˇ G'uiˬ sha lehˬ, ngaˬ hta‸ ga laˇ shehˍ hpaˇ hpeh‸ leh, ngaˬ te‸ chiˉ kawˆ tuˬ maˇ cawˬ. Chaw yaˇ ngaˬ hta‸ aˬ hto‸ ma te laˇ hpeh‸ tuˬ le, teh‸ nyi ma ha‸ hanˉ ve awˬ hk'aw lo ngaˬ hui k'oˆ hpeh‸ ve yoˬ. 7 Nawˬ hui ve awˬ hoˉ teˇ hpa hta‸ dawˇ nawˇ-oˆ. Yawˇ hui lehˬ, nawˬ hui hta‸ G'uiˬ sha ve tawˇ hkawˇ maˍ laˇ ve yoˬ. Yawˇ hui suh htaˇ hk'a gaˬ te ve awˬ liˇ awˬ hk'aˇ teˇ hpaˍ hta‸ nawˬ hui dawˇ nyi leh, yawˇ hui yonˍ ve teˇ ceuˬ hta‸ henˇ yuˬ leh te-o. 8 Yeˍsuˆ Hkri‸ lehˬ, aˉ nyi, ya‸ nyi leh co co taiˍ taiˍ hk'a shuˍ shuˍ hpeh‸ chehˇ ve yoˬ. 9 Maˇ heˆ heˆ ve awˬ ceuˬ teˇ hpaˍ shu laiˉ ceuˬ ca maˍ la ve awˬ hk'aˇ suh nawˬ hui taˇ k'ai. G'uiˬ sha ve awˬ bon hta‸ pa taw nyi ma yeˬ ve k'o, da‸ jaˇ ve yoˬ. Caˇ tuˬ ce kan ve hta‸ pa taw nyi ma yeˬ tuˬ ve maˇ heˆ. Caˇ tuˬ ce kan ve awˬ liˇ hta‸ yehˇ ve chaw teˇ hpaˍ lehˬ, oˇ ve awˬ hk'aw lo awˬ bon maˇ g'a. 10 Ngaˬ hui tanˇ kuiˬ teˇ maˬ cawˬ ve yoˬ. Aˉ po k'o bon yehˬ awˬ hk'aw lo kanˉ te ve chaw teˇ hpaˍ lehˬ, tanˇ kuiˬ chi teˇ maˬ lo g'a caˇ tuˬ a hkaw-anˬ maˇ cawˬ. 11 Awˬ lawn k'o, paw hkuˇ lonˉ lehˬ venˇ baˆ hpehˇ tuˬ ve tanˇ tuˬ awˬ pon to nuˇ to shaˆ ve awˬ suh hta‸ yuˬ leh, da‸ kehˬ ve chehˇ kuiˬ awˬ hk'aw lo lo‸-e peuˬ hk'aw‸ nawˉ, awˬ to oˇ ve teˇ hpaˍ hta‸ yawˇ hui ve chehˇ kuiˬ awˬ baˬ lo aˬ miˍ tuˉ baˬ ve yoˬ. 12 Oˇ ve hk'a shuˍ shuˍ Yeˍsuˆ htawˇ, yawˇ ve awˬ suhˍ hta‸ pa taw chaw yaˇ hta‸ da‸ piˇ kehˬ piˇ tuˬ, lanˇ venˇ yehˬ miˉ awˬ baˬ lo yawˇ hkanˍ suh ve yoˬ. 13 Hk'e te leh ngaˬ hui htawˇ, shu maˇ shawˍ maˇ caˆ te ve hta‸ yawˇ hkanˍ ve hk'a shuˍ shuˍ, ngaˬ hui hkanˍ ve awˬ hk'aw lo, deh kuiˬ awˬ baˬ lo yawˇ geh tawˆ k'ai-a veuˬ. 14 Awˬ lawn k'o, ngaˬ hui chi miˬ guiˬ hk'oˆ lo yeˬ ve venˇ maˇ cawˬ. Ya‸ hk'aˇ, awˬ hk'aw‸ nawˉ cawˬ la tuˬ ve venˇ hta‸ ngaˬ hui dawˇ law leh ca chehˇ ve yoˬ. 15 Hk'e te leh, Yeˍsuˆ hta‸ pa taw, ngaˬ hui G'uiˬ sha hta‸ hk'aˬ htaˆ ka‸ chiˇ mvuh ve tanˇ tuˬ teˇ ceuˬ tanˇ piˇ-a veuˬ. Chi hk'e k'oˆ ve lehˬ, ngaˬ hui ve maw‸ k'aw awˬ hk'aw lo tawˆ la ve tawˇ hkawˇ teˇ hpaˍ yawˇ ve awˬ meh hta‸ chiˇ mvuh ve teˇ ceuˬ hta‸ k'oˆ ve yoˬ. 16 Da‸ ve hta‸ te ve teˇ ceuˬ leh shu hta‸ mawˇ jeˬ pehˬ piˇ ve teˇ ceuˬ hta‸ taˇ leunˇ. Awˬ lawn k'o, chi hk'e ve tanˇ tuˬ teˇ hpaˍ hta‸ G'uiˬ sha nyi ma cawˇ ve yoˬ. 17 Nawˬ hui ve awˬ hoˉ teˇ hpaˍ ve hkawˇ hta‸ na yuˬ leh, yawˇ hui awˬ hawˉ lo hk'a deh‸ chehˇ-oˆ. Awˬ lawn k'o, yawˇ hui te ve kanˉ awˬ lawn G'uiˬ sha hta‸ g'a k'aoˍ maˍ piˇ tuˬ ve chaw hpeh‸ ve pa taw, nawˬ hui ve co ha hta‸ yawˇ hui hk'a deh‸ nyi ha‸ shaˉ chehˇ ve yoˬ. Yawˇ hui chi hk'e nyi ha‸ shaˉ chehˇ ve teˇ yanˇ, dawˇ haˍ tuˬ maˇ cawˬ leh ha lehˬ ha k'a te hpeh‸ tuˬ, yawˇ hui ve hkawˇ hta‸ hk'a deh‸ na-o. Hk'e maˇ heˆ k'o, nawˬ hui awˬ pon awˬ bon te‸ chiˉ maˇ cawˬ. 18 Ngaˬ awˬ pon bon lawˬ laˇ-oˆ. Awˬ lawn k'o, ngaˬ ve shiˍ puiˉ ve nyi ma lehˬ, ya‸ kuiˬ maˇ cawˬ teh‸ ngaˬ shiˍ taˍ ve yoˬ. Teˇ ceuˬ le le awˬ hk'aw lo ngaˬ da‸ ve hta‸ tiˉ te gaˇ ve yoˬ. 19 Ngaˬ nawˬ hui geh haˆ haˆ g'a k'aw‸ la hpeh‸ tuˬ ve, bon lawˬ laˇ tuˬ leuˉ leh ngaˬ nawˬ hui hta‸ lawˬ hkawˉ ve yoˬ. 20 Ngaˬ hui ve Jawˇ mawˇ Yeˍsuˆ lehˬ, yawˬ hawˉ shehˍ hpaˇ uiˍ jaˇ ve teˇ g'aˇ hpeh‸ ve yoˬ. Co co taiˍ taiˍ ka ti‸ shaˉ caˆ te tuˬ yawˇ ve awˬ suhˍ sheˆ leh, G'uiˬ sha yawˇ hta‸ k'aw‸ te‸ tu la piˇ ve yoˬ. 21 Dawˇ sha gaˇ sha tuˬ te shehˍ hpaˇ G'uiˬ sha ve a loˍ hta‸ nawˬ hui te g'a tuˬ, da‸ ve teˇ ceuˬ le le nawˬ hui awˬ hk'aw lo biˇ la tuˬ ngaˬ G'uiˬ sha hta‸ lawˬ ve yoˬ. G'uiˬ sha lehˬ, Yeˍsuˆ Hkri‸ hta‸ cuˇ leh yawˇ mehˆ g'uˇ suhˍ nyi ma cawˇ ve teˇ ceuˬ hta‸ ngaˬ hui awˬ hk'aw lo te chehˇ ve yoˬ. Yeˍsuˆ Hkri‸ hta‸ co co taiˍ taiˍ chiˇ uiˍ chiˇ mvuh piˇ-oˆ. A menˬ. 22 Awˬ viˉ awˬ nyi teˇ hpaˍ-oˬ, ngaˬ nawˬ hui hta‸ ngeh ve li‸ teˇ k'oˆ bvuh‸ feu laˇ ve yoˬ. Ngaˬ awˬ g'aˇ pe‸ laˇ ve tawˇ hkawˇ hta‸ yeunˇ hkanˍ leh na yuˬ tuˬ ngaˬ nawˬ hui hta‸ lawˬ hkawˉ ve yoˬ. 23 Ngaˬ hui ve awˬ viˉ awˬ nyi Tiˆmoˉseˍ hta‸ shu hpehˇ hk'a peuˬ ve teh‸ shiˍ-o‸. Yawˇ haˆ haˆ gaˬ la ve k'o, ngaˬ htawˇ yawˇ geh teˇ geh laˬ leh nawˬ hui hta‸ g'a mawˬ da‸ tuˬ yoˬ. 24 Nawˬ hui ve awˬ hoˉ hk'a peu-eˬ leh Hkri‸ yaˇ hk'a peu-eˬ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. Choˬ kaˬ lo chehˇ taˍ ve Iˉtaˍliˍ chaw teˇ hpaˍ nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 25 Nawˬ hui hk'a peu-eˬ geh awˬ bon awˬ shinˉ cawˬ piˇ-oˆ. A menˬ.

Yaˍkoˆ 1

1 Ngaˬ lehˬ, G'uiˬ sha leh Jawˇ mawˇ Yeˍsuˆ Hkri‸ ve awˬ ceˬ Yaˍkoˆ yoˬ. Nawˬ hui hpaˆ da‸ k'ai peuˬ ve chaw teˇ chi nyiˇ ceuˬ awˬ hk'oˆ lo dawˇ sha ha lehˬ tuˬ cawˬ piˇ-oˆ. 2 Ngaˬ ve awˬ viˉ awˬ nyi teˇ hpaˍ-oˬ, beˬ ve lawˇ ve laiˉ ceuˬ hta‸ g'a hpuˇ da‸ ve teˇ yanˇ ha lehˬ chehˇ-oˆ. 3 Awˬ lawn k'o, nawˬ hui yonˍ ve nyi ma lehˬ, lawˇ nyi ve hta‸ g'a hpuˇ da‸ htaˇ, nawˬ hui yeunˇ hkanˍ puiˉ la tuˬ ve hta‸ nawˬ hui shiˍ ve yoˬ. 4 Nawˬ hui teˇ ceuˬ ka‸ maˇ yawnˇ k'ai leh, teˇ ceuˬ le le awˬ hk'aw lo hk'a biˇ hpeh‸ la tuˬ yeunˇ hkanˍ puiˉ ve nyi ma biˇ la htaˇ hk'a gaˬ te-o. 5 Nawˬ hui awˬ hk'aw lo teˇ g'aˇ g'aˇ cuˇ yiˍ maˇ biˇ ve k'o, G'uiˬ sha geh lawˬ-o‸. G'uiˬ sha lehˬ, maˇ deˇ leh chaw hk'a peu-eˬ hta‸ maˇ chaweh hk'e leˇ piˇ ve hk'a shuˍ shuˍ, cuˇ yiˍ lawˬ ve chaw hta‸ ka‸ piˇ tuˬ yoˬ. 6 Ya‸ hk'aˇ, yonˍ ve awˬ hk'aw lo lawˬ-o‸. Nyi ma htawˇ dawˇ nawˬ dawˇ taˇ te. Awˬ lawn k'o, nyi ma htawˇ dawˇ nawˬ dawˇ te ve chaw lehˬ, laˇ tsuhˇ g'uiˬ hta‸ mvuhˇ haw meuˆ leh g'uiˬ baˇ taˆ taˆ ya‸ ya‸ te ve hk'e hpeh‸ ve yoˬ. 7 Oˇ hk'e ve chaw lehˬ, Jawˇ mawˇ G'uiˬ sha geh yawˇ teˇ ceuˬ ceuˬ g'a tuˬ ve teh‸ taˇ dawˇ. 8 Yawˇ lehˬ, nyi ma nyiˇ shiˍ cawˬ ve chaw hpeh‸ leh, hk'a peu-eˬ awˬ hk'aw lo yawˇ maˇ yeˬ ve chaw hpeh‸ ve yoˬ. 9 Shu awˬ hawˉ lo chehˇ ve awˬ viˉ awˬ nyi teˇ g'aˇ g'aˇ, awˬ me‸ awˬ hponˇ cawˬ ve chehˇ kuiˬ awˬ hk'aw lo g'a chehˇ ve k'o, yawˇ ha lehˬ cawˇ ve yoˬ. 10 Paw sha ve awˬ viˉ awˬ nyi teˇ g'aˇ g'aˇ, awˬ me‸ awˬ hponˇ maˇ cawˬ ve chehˇ kuiˬ awˬ hk'aw lo g'a chehˇ ve k'o, yawˇ htawˇ ha lehˬ cawˇ ve yoˬ. Awˬ lawn k'o, paw sha ve chaw lehˬ, mvuh‸ veˆ hk'a shuˍ shuˍ mehˉ k'ai tuˬ yoˬ. 11 Mvuhˇ nyi tawˆ la leh, haw jaˇ chiˆ jaˇ ve teˇ yanˇ, mvuh‸ lehˬ nawˍ k'ai goˇ k'ai ve yoˬ. Awˬ veˆ ka‸ piˬ k'ai ce k'ai leh, nyi sha ve awˬ ceuˬ ka‸ mehˉ k'ai ve yoˬ. Oˇ ve hk'a shuˍ shuˍ, paw sha ve chaw lehˬ, yawˇ te chehˇ ve kanˉ awˬ hk'aw lo luˬ k'ai mehˉ k'ai tuˬ yoˬ. 12 eˬ ve lawˇ ve hta‸ g'a hpuˇ da‸ htaˇ, yeunˇ hkanˍ puiˉ ve chaw lehˬ, awˬ bon uiˍ ve yoˬ. Awˬ lawn k'o, lawˇ nyi ve teˇ ceuˬ hta‸ hkanˍ g'aˇ peuˬ hk'aw‸ nawˉ, co ti‸ ha ti‸ shi uˉ tcuhˍ hta‸ yawˇ g'a tuˬ yoˬ. Shi uˉ tcuhˍ oˇ ve lehˬ, G'uiˬ sha hta‸ ha‸ ve chaw teˇ hpaˍ hta‸ yawˇ piˇ tuˬ yoˬ teh‸ k'oˆ taˍ ve yoˬ. 13 Venˇ baˆ beˬ ve hta‸ g'a hkanˍ ve teˇ yanˇ, G'uiˬ sha ngaˬ hta‸ beˬ chehˇ ve yoˬ teh‸, teˇ g'aˇ ka‸ taˇ k'oˆ. Awˬ lawn k'o, haiˬ ve awˬ ceuˬ G'uiˬ sha hta‸ beˬ maˇ hpeh‸. Haiˬ ve te tuˬ G'uiˬ sha chaw teˇ g'aˇ hta‸ ka‸ maˇ beˬ. 14 Hk'aˬ ve chaw teˇ g'aˇ maˇ k'oˆ, a shu yawˇ sheˉ lai puiˉ ve nyi ma lehˬ, venˇ baˆ te tuˬ yawˇ hta‸ heˍ yuˬ beˬ yuˬ chehˇ ve yoˬ. 15 Oˇ htaˇ, sheˉ lai puiˉ ve nyi ma lehˬ, yaˇ hu ve hk'e yawˇ awˬ hk'aw lo hu la leh, venˇ baˆ hta‸ paw la piˇ ve yoˬ. Venˇ baˆ htawˇ, uiˍ la biˇ la ve teˇ yanˇ, suh ve teˇ ceuˬ hta‸ paw la piˇ ve yoˬ. 16 Ngaˬ ha‸ ve awˬ viˉ awˬ nyi teˇ hpaˍ-oˬ, taˇ dawˇ ya‸. 17 Da‸ ve awˬ bon hk'a peu-eˬ leh, biˇ ve la‸ shawnˍ hk'a peu-eˬ, mvuhˇ naw ma lo chehˇ ve awˬ g'euˆ ve Awˬ pa geh ya‸ la ve yoˬ. Yawˇ lehˬ maˇ pa puiˉ. Yawˇ ve awˬ g'euˆ awˬ hk'aw lo aˉ g'uiˬ ha ka‸ maˇ cawˬ. 18 Hpanˍ taˍ ve awˬ ceuˬ hk'a peu-eˬ awˬ hk'aw lo ngaˬ hui lehˬ, awˉ lawˉ naw‸ la ve iˉ shiˍ hk'e hpeh‸ la tuˬ, yawˇ a loˍ cawˇ ve hta‸ pa taw, hteˇ ve cawˇ ve bon hkawˇ hta‸ cuˇ leh ngaˬ hui hta‸ paw la piˇ ve yoˬ. 19 Ngaˬ ha‸ ve awˬ viˉ awˬ nyi teˇ hpaˍ-oˬ, awˬ lawn chi hta‸ nawˬ hui shiˍ cawˇ ve yoˬ. Shu tawˇ yaw ve hta‸ hk'a deh‸ na sheˍ. Tawˇ haˆ haˆ taˇ yaw. Nyi ma haˆ haˆ taˇ zuhˆ. 20 Awˬ lawn k'o, chaw yaˇ nyi ma zuhˆ ve teˇ ceuˬ lehˬ, G'uiˬ sha ve hteˇ ve cawˇ ve hta‸ tawˆ la tuˬ te maˇ g'a. 21 Chi hta‸ pa taw, cha‸ chiˆ ve hk'a peu-eˬ leh, haiˬ ve hta‸ te ponˬ te leuˉ ve hk'a peu-eˬ hta‸ baˬ taˉ-oˆ. Nawˬ hui ve co ha hta‸ htaiˍ hk'aw‸ puiˉ ve, nawˬ hui awˬ hk'aw ti taˍ ve bon hkawˇ hta‸ nyi ma nuˇ nehˬ ve awˬ hk'aw lo ha‸ yuˬ-o‸, 22 Nawˬ hui lehˬ, bon hkawˇ hta‸ na yuˬ leh te ve chaw hpeh‸ piˇ-oˆ. Kaˇ ve chaw ceh tiˉ taˇ hpeh‸ piˇ. Kaˇ ve chaw ceh tiˉ hpeh‸ ve k'o, nawˬ hui a shu yawˇ awˬ to hta‸ heˍ paˍ hpeh‸ ve yoˬ. 23 Tawˇ hkawˇ oˇ ve hta‸ g'a kaˇ leh maˇ te ve chaw hk'aˬ ve teˇ g'aˇ maˇ k'oˆ, mehˆ g'euˆ awˬ hk'aw lo a shu yawˇ ve mehˆ hpfuhˇ hta‸ nyi ve chaw hta‸ shuˍ ve yoˬ. 24 Awˬ lawn k'o, yawˇ mehˆ hpfuhˇ hta‸ nyi peuˬ hk'aw‸ nawˉ, yawˇ tawˆ k'ai leh, yawˇ awˬ ho‸ awˬ han hk'aˬ hk'e cawˬ ve hta‸ teˇ cawˬ haˉ leunˇ k'ai ve yoˬ. 25 Chaw hta‸ ponˬ piˇ ve, biˇ ve awˬ liˇ tawˇ hkawˇ hta‸ nyi tcuhˉ taˍ ve chaw teˇ g'aˇ lehˬ, kaˇ leh leunˇ k'ai ve chaw maˇ heˆ. Ya‸ hk'aˇ, yawˇ na yuˬ leh te ve chaw hpeh‸ ve pa taw, yawˇ hk'a te ve kanˉ teˇ hpaˍ awˬ hk'aw lo awˬ bon uiˍ ve yoˬ. 26 Chaw teˇ g'aˇ g'aˇ, oˉ k'oˍ pui ve awˬ liˇ hta‸ yawˇ hk'a deh‸ te ve teh‸ dawˇ htawˇ, yawˇ ve ha tehˍ hta‸ maˇ g'aˇ ve k'o, yawˇ awˬ to hta‸ heˍ chehˇ ve yoˬ. Yawˇ oˉ k'oˍ pui ve lehˬ hk'e leˇ hpeh‸ ve yoˬ. 27 Awˬ pa G'uiˬ sha mehˆ g'uˇ suhˍ cha‸ chiˆ ve maˇ cawˬ leh da‸ kehˬ ve oˉ k'oˍ pui ve awˬ liˇ lehˬ chi hk'e yoˬ. Yaˇ cuˬ shi leh mehˇ chawˇ ma teˇ hpaˍ g'a tu‸ g'a hkanˍ ve teˇ yanˇ, yawˇ hui hta‸ nyi ha‸ shaˉ leh, a shu yawˇ awˬ to hta‸ miˬ guiˬ ve cha‸ chiˆ ve teˇ hpaˍ maˇ g'a ngawˉ tuˬ g'a faˬ taˍ ve yoˬ.

Yaˍkoˆ 2

1 Ngaˬ ve awˬ viˉ awˬ nyi teˇ hpaˍ-oˬ, awˬ me‸ awˬ hponˇ uiˍ ve ngaˬ hui ve Jawˇ mawˇ Yeˍsuˆ Hkri‸ hta‸ yonˍ ve awˬ hk'aw lo, chaw yaˇ mehˆ hpfuhˇ hta‸ taˇ nyi. 2 Awˬ lawn k'o, shi la‸ peˍ tcuhˉ leh da‸ ve veu‸ k'aˇ veu‸ deh ve chaw teˇ g'aˇ leh, maˇ da‸ ve veu‸ k'aˇ veu‸ deh ve haˍ yaˇ g'awˇ yaˇ teˇ g'aˇ, yawˇ hui nyiˇ g'aˇ nawˬ hui ve hpawnˬ da‸ kuiˬ lo lo‸ la htaˇ, 3 da‸ ve veu‸ k'aˇ veu‸ deh ve chaw teˇ g'aˇ hta‸ nawˬ hui nyi leh k'oˆ piˇ ve, Da‸ ve mui kuiˬ chi hta‸ mui-o. Peuˬ leh haˍ yaˇ g'awˇ yaˇ teˇ g'aˇ hta‸ k'oˆ piˇ ve, Oˇ kaˬ lo huˉ taˍ-o‸, maˇ heˆ k'o, Ngaˬ ve hkui paˇ lo mui taˍ-o‸ teh‸ nawˬ hui k'oˆ ve k'o, 4 nawˬ hui teˇ g'aˇ peuˬ teˇ g'aˇ hta‸ pehˬ da‸ fuiˍ da‸ leh, haiˬ ve dawˇ hk'aˇ awˬ hk'aw lo shu hta‸ suhˉ jehˬ ve chaw hpeh‸ ve maˇ heˆ laˇ. 5 Ngaˬ ha‸ ve awˬ viˉ awˬ nyi teˇ hpaˍ-oˬ, hk'a deh‸ na sheˍ. Yonˍ ve teˇ ceuˬ awˬ hk'aw lo paw sha la tuˬ, haˍ ve g'awˇ ve miˬ guiˬ yaˇ hui hta‸ G'uiˬ sha leuˆ yuˬ ve maˇ heˆ laˇ. G'uiˬ sha hta‸ ha‸ ve chaw hui hta‸ yawˇ ve mvuhˇ miˬ piˇ tuˬ yoˬ teh‸ k'oˆ taˍ ve hk'e, yawˇ hui lehˬ mvuhˇ miˬ awˬ shinˉ caˇ shehˍ hpaˇ hpeh‸ ve yoˬ. 6 Ya‸ hk'aˇ, nawˬ hui lehˬ haˍ ve g'awˇ ve chaw hui hta‸ maˇ shawˍ maˇ caˆ te ve yoˬ. Nawˬ hui hta‸ fawˉ mehˍ leh suhˉ jehˬ tuˬ shaˉ nanˉ lo g'awˬ k'ai ve chaw hui lehˬ, paw sha ve chaw hui maˇ heˆ laˇ. 7 Nawˬ hui g'a taˍ ve da‸ ve awˬ meh hta‸ maˇ shawˍ maˇ caˆ k'oˆ chehˇ ve chaw hui lehˬ, paw sha ve chaw hui maˇ heˆ laˇ. 8 Nawˬ awˬ to hta‸ ha‸ ve hk'e, nawˬ awˬ paˇ awˬ kui chehˇ ve chaw hui hta‸ ha‸-o‸ teh‸, Li‸ hpu hk'aw bvuh‸ taˍ ve yoˬ. Hkunˉ hawˉ hkanˇ ve awˬ liˇ tawˇ hkawˇ chi hta‸ nawˬ hui te biˇ ve k'o, da‸ ve hta‸ nawˬ hui te peuˬ. 9 Shu mehˆ hpfuhˇ hta‸ nawˬ hui nyi chehˇ ve k'o, nawˬ hui venˇ baˆ te chehˇ leh, nawˬ hui te ponˬ te leuˉ ve chaw teˇ hpaˍ hpeh‸ ve yoˬ teh‸, awˬ liˇ tawˇ hkawˇ hpeu‸ maˍ laˇ ve. yoˬ. 10 Awˬ lawn k'o, hk'aˬ ve chaw teˇ g'aˇ maˇ k'oˆ, awˬ liˇ tawˇ hkawˇ hk'a peu-eˬ hta‸ te ve awˬ hk'aw lo, awˬ liˇ teˇ maˬ hta‸ ceh te ya‸ ve ka‸, hk'a peu-eˬ hta‸ ya‸ ve chaw hpeh‸ ve yoˬ. 11 Haˉ chawˇ haˉ paˆ taˇ te teh‸ k'oˆ shehˍ hpaˇ teˇ g'aˇ lehˬ, Shu hta‸ taˇ tiˇ pehˍ ka‸ k'oˆ ve yoˬ. Hk'e te leh, nawˬ haˉ chawˇ haˉ paˆ maˇ te htawˇ shu hta‸ tiˇ pehˍ ve k'o, awˬ liˇ tawˇ hkawˇ hta‸ nawˬ te ponˬ te leuˉ ve chaw hpeh‸ ve yoˬ. 12 Ponˬ piˇ ve awˬ liˇ tawˇ hkawˇ hta‸ cuˇ leh, nawˬ hui hta‸ suhˉ g'a jehˬ tuˬ ve pa taw, nawˬ hui tawˇ yaw ve maˇ k'oˆ, kanˉ te ve maˇ k'oˆ, hk'a deh‸ te-o. 13 Awˬ lawn k'o, shu hta‸ maˇ ha k'aˉ puiˉ ve chaw teˇ g'aˇ suhˉ jehˬ ve hta‸ g'a hkanˍ htaˇ, Suhˉ jehˬ shehˍ hpaˇ yawˇ hta‸ maˇ ha k'aˉ piˇ. Ha k'aˉ puiˉ ve teˇ ceuˬ lehˬ, suhˉ jehˬ ve hta‸ g'aˇ ve yoˬ. 14 Ngaˬ awˬ viˉ awˬ nyi teˇ hpaˍ-oˬ, chaw teˇ g'aˇ g'aˇ, Ngaˬ lehˬ yonˍ ve yoˬ teh‸ k'oˆ htawˇ, kanˉ maˇ te ve k'o, aˬ hto‸ ma awˬ bon cawˬ le. Yonˍ ve oˇ ve lehˬ, yawˇ hta‸ htaiˍ hk'aw‸ piˇ hpeh‸-aw laˇ. 15 Awˬ viˉ awˬ nyi teˇ g'aˇ g'aˇ veu‸ k'aˇ maˇ cawˬ leh, teˇ nyi pon teˇ nyi caˇ tuˬ maˇ cawˬ ve k'o, 16 nawˬ hui awˬ hk'aw lo chaw teˇ g'aˇ g'aˇ k'oˆ ve, Dawˇ sha ve awˬ hk'aw lo k'o‸-e loˬ. Nawˬ awˬ to hta‸ lehˬ la piˆ, bvuhˆ la piˆ teh‸ k'oˆ piˇ ve htawˇ, yawˇ hui awˬ to pon loˍ ve hta‸ nawˬ hui maˇ piˇ ve k'o, aˬ hto‸ ma awˬ bon cawˬ le. 17 Oˇ ve hk'a shuˍ shu, yonˍ ve teˇ ceuˬ lehˬ, kanˉ maˇ te ve k'o, shuˍ yonˍ ve oˇ ve suh taˍ ve yoˬ. 18 Ya‸ hk'aˇ, nawˬ hui teˇ g'aˇ g'aˇ k'oˆ ve, Nawˬ lehˬ yonˍ ve yoˬ. Ngaˬ lehˬ kanˉ te ve yoˬ teh‸ k'oˆ tuˬ yoˬ. Kanˉ maˇ te leh, nawˬ yonˍ ve maˍ laˇ-oˆ. Ngaˬ lehˬ, kanˉ te ve awˬ hk'aw lo, ngaˬ yonˍ ve nawˬ hta‸ maˍ laˇ tuˬ yoˬ. 19 G'uiˬ sha teˇ g'aˇ tiˉ cawˬ ve hta‸ nawˬ yonˍ ve leˇ. Nawˬ yonˍ ve lehˬ cawˇ ve yoˬ. Neˇ teˇ hpaˍ htawˇ yonˍ leh kawˆ cheˇ chehˇ ve yoˬ. 20 Maˇ dawˇ nyi puiˉ ve chaw-oˬ, yonˍ leh kanˉ maˇ te ve teˇ ceuˬ lehˬ, te‸ chiˉ awˬ bon maˇ cawˬ ve hta‸ nawˬ hk'a deh‸ shiˍ gaˇ laˇ. 21 Ngaˬ hui ve awˬ pa Aˍbraˍhanˍ lehˬ, yawˇ ve yaˇ paˍ Iˉcaˆ hta‸ tanˇ kuiˬ hk'oˆ tanˇ ve teˇ yanˇ, kanˉ te ve pa taw yawˇ hteˇ ve cawˇ ve chaw hpeh‸ la ve maˇ heˆ laˇ. 22 Yawˇ te ve kanˉ geh hk'a geh yonˍ ve ka‸ cawˬ leh, kanˉ hta‸ pa taw yawˇ yonˍ ve biˇ la ve hta‸ nawˬ g'a mawˬ ve yoˬ. 23 Aˍbraˍhanˍ G'uiˬ sha hta‸ yonˍ ve pa taw, G'uiˬ sha yawˇ hta‸ hteˇ ve cawˇ ve chaw teh‸ shawˍ taˍ ve yoˬ teh‸ k'oˆ taˍ ve Li‸ hpu tawˇ hkawˇ chi teˇ hkawˇ biˇ la ve yoˬ. Chi hk'oˆ ka‸, G'uiˬ sha ve awˬ chawˇ yoˬ teh‸ k'oˆ ve yoˬ. 24 Hk'e te leh, chaw teˇ g'aˇ yonˍ ve hta‸ pa taw ceh tiˉ hteˇ ve cawˇ ve chaw hpeh‸ la ve maˇ heˆ. Kanˉ ka‸ te ve hta‸ pa taw hteˇ ve cawˇ ve chaw hpeh‸ la ve hta‸ nawˬ g'a mawˬ ve yoˬ. 25 Chi hk'a shuˍ shuˍ, Raˍhaˆ meh ve meh maˬ lanˉ teˇ g'aˇ lehˬ, tcuh peu ve chaw hta‸ ha‸ yuˬ leh, awˬ kaˍ awˬ nu ya‸ k'aw teˇ caˆ hta‸ k'o‸-e tcuh ve pa taw, kanˉ te leh hteˇ ve cawˇ ve chaw hpeh‸ la ve maˇ heˆ laˇ. 26 Awˬ lawn k'o, awˬ to awˬ hk'aw lo co ha maˇ cawˬ k'o suh ve yoˬ. Chi hk'a shuˍ shuˍ, yonˍ ve teˇ ceuˬ htawˇ kanˉ maˇ te ve k'o, suh taˍ ve yoˬ.

Yaˍkoˆ 3

1 Ngaˬ awˬ viˉ awˬ nyi teˇ hpaˍ-oˬ, nawˬ hui laiˉ g'aˇ maˍ piˇ shehˍ hpaˇ taˇ te. Awˬ lawn k'o, maˍ pi shehˍ hpaˇ teˇ hpaˍ lehˬ, shu a‸ kehˉ leuˉ leh suhˉ jehˬ ve hta‸ g'a hkanˍ tuˬ ve hta‸ nawˬ hui shiˍ chehˇ ve yoˬ. 2 Awˬ lawn k'o, ngaˬ hui hk'a peu-eˬ laiˉ ceuˬ te ya‸ ve yoˬ. Chaw teˇ g'aˇ g'aˇ, yawˇ tawˇ teˇ pawˆ ka‸ maˇ yaw ya‸ jaw k'o, yawˇ biˇ ve chaw hpeh‸ leh, awˬ to teˇ to hk'a peu-eˬ hta‸ g'aˇ ve chaw hpeh‸ ve yoˬ. 3 Iˉ mvuhˇ hta‸ ngaˬ hui g'aˇ tuˬ yawˇ ve maw‸ k'aw awˬ hk'aw lo sho caˆ keu ve k'o, yawˇ awˬ to hk'a peu-eˬ hta‸ ngaˬ hui g'awˬ caw hpeh‸ ve yoˬ. 4 Haw lo‸ k'oˍ lonˉ teˇ hpaˍ hta‸ nyi sheˍ. Uiˍ jaˇ ve haw lo‸ k'oˍ teˇ hpaˍ hta‸ mvuhˇ haw lonˉ meuˆ k'ai ve htawˇ, haw lo‸ k'oˍ g'a‸ shehˍ hpaˇ lehˬ, i jaˇ ve caˉ behˆ ehˉ hta‸ yehˇ leh, yawˇ dawˇ taˍ ve hk'e haw lo‸ k'oˍ lonˉ hta‸ suhˉ caw piˇ g'a ve yoˬ. 5 Chi hk'a shuˍ shuˍ ha tehˍ lehˬ, awˬ to awˬ hk'aw lo i jaˇ ve awˬ hk'eun hpeh‸ ve htawˇ uiˍ jaˇ ve awˬ lawn teˇ hpaˍ hta‸ tawˇ uiˍ tawˇ mvuh yaw puiˉ ve yoˬ. I jaˇ ve aˬ miˍ lehˬ, uiˍ jaˇ ve heh puiˉ hk'aw hta‸ to‸ baˬ g'a ve hta‸ nyi sheˍ. 6 Ha tehˍ lehˬ, aˬ miˍ hk'e hpeh‸ ve yoˬ. Ngaˬ hui ve awˬ to awˬ hk'aw lo, ha tehˍ lehˬ venˇ baˆ ve mvuhˇ miˬ htawˇ hpeh‸ ve yoˬ. Ngaˬ hui ve awˬ to hk'a peu-eˬ hta‸ cha‸ chiˆ tuˬ te ve yoˬ. Nyi ma awˬ hk'aw lo haiˬ ve awˬ ceuˬ maˇ maˇ hpehˇ tawˆ la piˇ leh, shaˬ te shaˬ maˇ la tcuhˉ taˍ ve yoˬ. Moˬ naˆ ho‸ lehˬ, ha tehˍ hta‸ aˬ miˍ tuˉ piˇ ve yoˬ. 7 Awˬ lawn k'o, to nuˇ to shaˆ, ngaˆ, loˇ k'ai gaˆ k'ai puiˉ ve awˬ ceuˬ, iˉ kaˆ hk'aw chehˇ ve awˬ ceuˬ, teˇ ceuˬ le le hta‸ chaw yaˇ meuˇ la tuˬ te g'a leh, te meuˇ taˍ peuˬ ve yoˬ. 8 Ya‸ hk'aˇ, chaw yaˇ lehˬ, ha tehˍ hta‸ meuˇ la tuˬ te maˇ g'a. Ha tehˍ lehˬ, ta‸ iˉ maˇ chehˇ puiˉ ve haiˬ ve awˬ ceuˬ hpeh‸ ve yoˬ. Suh piˇ puiˉ ve awˬ taw‸ ma htawˇ, yawˇ awˬ hk'aw lo hk'a biˇ cawˬ ve yoˬ. 9 Ngaˬ hui ha tehˍ hta‸ yehˇ leh ngaˬ hui ve Awˬ pa hpeh‸ ve Jawˇ mawˇ G'uiˬ sha hta‸ chiˇ mvuh ve yoˬ. Peuˬ leh, G'uiˬ sha ve awˬ ho‸ awˬ han hk'a shuˍ shuˍ te hpanˍ taˍ ve chaw yaˇ hta‸ ngaˬ hui ha tehˍ hta‸ yehˇ leh k'aw‸ hkeu piˇ sheˍ ve yoˬ. 10 Maw‸ k'aw teˇ maˬ tiˉ awˬ hk'aw lo, chiˇ mvuh ve hkawˇ ka‸, hkeu ve hkawˇ ka‸ tawˆ la ve yoˬ. Ngaˬ awˬ viˉ awˬ nyi teˇ hpaˍ-oˬ, chi hk'e te maˇ cawˇ ve yoˬ. 11 G'uiˬ tuˇ teˇ maˬ tiˉ awˬ hk'aw lo mehˬ ve iˉ kaˆ leh hk'aˇ ve iˉ kaˆ teˇ geh tawˆ la tuˬ laˇ. 12 Ngaˬ awˬ viˉ awˬ nyi teˇ hpaˍ-oˬ, maˉ nawˆ cehˬ hta‸ shaˍlonˍ shiˍ naw‸ hpeh‸-aw laˇ. A pehˉ meuˇ te hta‸ maˉ nawˆ shiˍ naw‸ hpeh‸-aw laˇ. Oˇ hk'e naw‸ maˇ hpeh‸ ve hk'a shuˍ shuˍ, hk'aˇ ve g'uiˬ tuˇ lehˬ, mehˬ ve iˉ kaˆ hta‸ tawˆ la piˇ maˇ hpeh‸. 13 Nawˬ hui awˬ hk'aw lo, cuˇ yiˍ cawˬ leh shiˍ puiˉ ve chaw a shu le. Chaw oˇ ve lehˬ, cuˇ yiˍ maˍ yiˍ cawˬ ve hk'e, nyi ma nuˇ nehˬ ve awˬ hk'aw lo, da‸ ve awˬ liˇ awˬ hk'aˇ teˇ hpaˍ hta‸ te leh, yawˇ ve kanˉ teˇ hpaˍ hta‸ hpeu‸ maˍ piˇ lawˬ-o‸. 14 Ya‸ hk'aˇ, nawˬ hui hkawehˉ puiˉ jaˇ ve nyi ma cawˬ leh, nyi ma uiˍ ve awˬ hk'aw lo awˬ moˍ shawˍ da‸ pehˬ da‸ gaˇ ve nyi ma cawˬ ve k'o, nawˬ hui a shu yawˇ awˬ to hta‸ chiˇ uiˍ chiˇ mvuh leh, hteˇ ve cawˇ ve tawˇ hkawˇ hta‸ g'awˬ hk'aˆ ve taˇ te. 15 Chi hk'e ve cuˇ yiˍ lehˬ, mvuhˇ naw ma lo ya‸ la ve cuˇ yiˍ maˇ heˆ. Miˬ guiˬ ve cuˇ yiˍ, awˬ suhˍ awˬ shaˍ hpawˇ ve cuˇ yiˍ leh, neˇ haiˬ ve cuˇ yiˍ hpeh‸ ve yoˬ. 16 Awˬ lawn k'o, hkawehˉ puiˉ ve nyi ma cawˬ leh, nyi ma uiˍ ve awˬ hk'aw lo awˬ moˍ shawˍ da‸ pehˬ da‸ puiˉ ve nyi ma cawˬ ve k'o, sho‸ sha‸ ve awˬ ceuˬ leh haiˬ ve awˬ ceuˬ hk'a biˇ cawˬ ve yoˬ. 17 Mvuhˇ naw ma lo ya‸ la ve cuˇ yiˍ lehˬ, awˉ lawˉ da‸ ve kehˬ ve, hk'aw‸ nawˉ cawˇ da‸ hui da‸ ve, nyi ma nuˇ nehˬ ve, na yuˬ puiˉ ve leh, ha k'aˉ ve teˇ ceuˬ ka‸, da‸ ve awˬ shiˍ ka‸, hk'a biˇ cawˬ ve yoˬ. Htawˇ hpfuhˆ nawˬ hpfuhˆ te ve nyi ma leh, heˍ ve nyi ma maˇ cawˬ ve yoˬ. 18 Cawˇ da‸ hui da‸ tuˬ te ve chaw hui lehˬ, dawˇ sha ve awˬ hk'aw lo sheˍ leh, hteˇ ve cawˇ ve awˬ shiˍ hta‸ g'a ve yoˬ.

Yaˍkoˆ 4

1 Nawˬ hui awˬ hk'aw lo canˇ da‸ ve leh ya‸ da‸ jiˆ da‸ ve teˇ hpaˍ aˬ hto‸ ma pa taw tawˆ la ve le. Nawˬ hui awˬ suhˍ awˬ shaˍ nyi hk'aˇ suh tuˬ te gaˇ ve teˇ hpaˍ lehˬ, nawˬ hui awˬ to awˬ hk'aw lo bawˆ da‸ chehˇ ve hta‸ pa taw tawˆ la ve maˇ heˆ laˇ. 2 Nawˬ hui heuˆ gaˇ jaˇ ve hk'e maˇ g'a ve pa taw, shu hta‸ tiˇ pehˍ ve yoˬ. Nawˬ hui shu mawˇ shu jeˬ hta‸ sheˉ lai ve hk'e maˇ g'a ve pa taw, shu hta‸ ya‸ da‸ jiˆ da‸ ve yoˬ. Nawˬ hui maˇ lawˬ ve pa taw nawˬ hui maˇ g'a. 3 Nawˬ hui lawˬ htawˇ maˇ g'a. Awˬ lawn k'o, nawˬ hui awˬ suhˍ awˬ shaˍ hpawˇ nyi hk'aˇ suh tuˬ ceh te gaˇ ve pa taw, nawˬ hui lawˬ ya‸ ve yoˬ. 4 Haˉ chawˇ haˉ paˆ te shehˍ ma hta‸ shuˍ ve chaw teˇ hpaˍ-oˬ, miˬ guiˬ awˬ liˇ hta‸ awˬ chawˇ te ve chaw teˇ hpaˍ lehˬ, G'uiˬ sha ve canˇ paˍ hpeh‸ ve hta‸ nawˬ hui maˇ shiˍ laˇ. Miˬ guiˬ awˬ liˇ hta‸ awˬ chawˇ te gaˇ ve chaw hk'aˬ ve teˇ g'aˇ maˇ k'oˆ, G'uiˬ sha ve canˇ paˍ hpeh‸ ve yoˬ. 5 Li‸ hpu awˬ hk'aw lo bvuh‸ taˍ ve, Ngaˬ hui awˬ hk'aw lo yawˇ keu laˇ ve co ha hta‸ yawˇ sheˉ lai jaˇ ve yoˬ teh‸ k'oˆ ve tawˇ chi lehˬ, hk'e leˇ bvuh‸ taˍ ve teh‸ dawˇ ve laˇ. 6 Yawˇ lehˬ awˬ bon leuˉ leh piˇ ve yoˬ. Li‸ hpu hk'aw bvuh‸ taˍ ve hk'e, G'uiˬ sha lehˬ nyi ma uiˍ ve mvuh ve chaw hui hta‸ tawˍ taˍ leh, nyi ma nuˇ nehˬ ve chaw hui hta‸ awˬ bon piˇ ve yoˬ teh‸ bvuh‸ taˍ ve yoˬ. 7 Chi hta‸ pa taw, G'uiˬ sha uˉ peunˍ ve awˬ hawˉ lo hk'a deh‸ chehˇ-oˆ. Neˇ haiˬ hta‸ tawˍ taˍ-o‸. Nawˬ hui lo yawˇ hpaw tawˆ-e tuˬ yoˬ. 8 G'uiˬ sha geh jiˆ laˬ-o‸. Hk'e te k'o, yawˇ nawˬ hui geh jiˆ laˬ tuˬ yoˬ. Venˇ baˆ yaˇ hui-oˬ, nawˬ hui ve la‸ sheh hta‸ tsuhˇ hpu tsuhˇ kehˬ-o‸. Nyi ma nyiˇ hk'aˇ dawˇ ve chaw hui-oˬ, nawˬ hui ve nyi ma hta‸ da‸ la kehˬ la piˇ-oˆ. 9 Nyi ma hk'aw tu‸ hkanˍ chehˇ-oˆ. Nyi ma hk'aw dawˇ haˍ leh hk'anˇ chehˇ-oˆ. Paˆ hawˬ kehˇ hawˬ chehˇ-oˆ. Nawˬ hui g'uiˬ yawˬ ve lehˬ, nyi ma hk'aw dawˇ haˍ leh hk'anˇ ve hta‸ k'aw‸ hpeh‸ la piˇ-oˆ. Nawˬ hui ve ha lehˬ tuˬ lehˬ, dawˇ haˍ tuˬ hta‸ k'aw‸ pa piˇ-oˆ. 10 Jawˇ mawˇ G'uiˬ sha mehˆ g'uˇ suhˍ nyi ma nehˬ lehˍ taˍ-o‸. Yawˇ nawˬ hui hta‸ chiˇ taˆ laˇ tuˬ yoˬ. 11 Awˬ viˉ awˬ nyi teˇ hpaˍ-oˬ, teˇ g'aˇ hta‸ teˇ g'aˇ taˇ hk'aiˉ da‸. Awˬ viˉ awˬ nyi hta‸ hk'aiˉ ve maˇ k'oˆ, venˇ baˆ taˍ ve maˇ k'oˆ, yawˇ lehˬ awˬ liˇ tawˇ hkawˇ hta‸ hk'aiˉ leh venˇ baˆ taˍ ve chaw hpeh‸ ve yoˬ. Awˬ liˇ tawˇ hkawˇ hta‸ nawˬ venˇ baˆ taˍ ve k'o, nawˬ lehˬ awˬ liˇ tawˇ hkawˇ hta‸ na yuˬ shehˍ hpaˇ maˇ heˆ. Awˬ liˇ tawˇ hkawˇ hta‸ nawˬ venˇ baˆ taˍ shehˍ hpaˇ hpeh‸ ve yoˬ. 12 Awˬ liˇ tawˇ hkawˇ teh taˍ shehˍ hpaˇ leh suhˉ jehˬ shehˍ hpaˇ teˇ g'aˇ tiˉ cawˬ ve yoˬ. Yawˇ lehˬ, ponˬ piˇ tuˬ ka‸, te luˬ tuˬ ka‸ kanˇ paˆ cawˬ ve yoˬ. Hk'e te leh, nawˬ awˬ paˇ awˬ kui chehˇ ve chaw awˬ hk'oˆ venˇ baˆ taˍ ve chaw-oˬ, nawˬ lehˬ hk'aˬ hk'e ve chaw le. 13 Nawˬ hui teˇ hpaˍ hpaˍ k'oˆ ve, Ya‸ nyi shawˉ pawˍ ngaˬ hui venˇ teˇ venˇ venˇ lo teˇ hk'aw‸ ca chehˇ tuˬ yoˬ. Oˇ kaˬ lo tanˇ kaˬ te leh, awˬ yawˬ g'a tuˬ yoˬ teh‸ k'oˆ ve yoˬ. Chi hk'e k'oˆ ve chaw hui-oˬ, hk'a deh‸ dawˇ nyi sheˍ. 14 Shawˉ pawˍ hk'aˬ hk'e hpeh‸ la tuˬ ve hta‸ nawˬ hui maˇ shiˍ. Nawˬ ve a sha‸ aˬ hto‸ ma hta‸ shuˍ da‸ le. Teˇ hkui tiˉ g'a mawˬ taˉ leh, mehˉ k'ai ve iˉ kaˆ shaˉ hta‸ shuˍ da‸ ve yoˬ. 15 Nawˬ hui k'oˆ cawˇ ve lehˬ, Jawˇ mawˇ G'uiˬ sha nyi ma cawˇ ve k'o, ngaˬ hui a sha‸ te‸ leh, chi hk'e oˇ hk'e te tuˬ yoˬ teh‸ k'oˆ cawˇ ve yoˬ. 16 Ya‸ hk'aˇ, chi beu‸ nawˬ hui nyi ma uiˍ leh caˆ muiˬ puiˉ ve yoˬ. Nyi ma uiˍ ve chi hk'e ve hk'a peu-eˬ lehˬ haiˬ ve yoˬ. 17 Hk'e te leh, da‸ ve hta‸ te tuˬ shiˍ taˍ htawˇ maˇ te ve chaw lehˬ, yawˇ awˬ pon venˇ baˆ hpeh‸ ve yoˬ.

Yaˍkoˆ 5

1 Chaw paw chaw sha teˇ hpaˍ-oˬ, chi beu‸ na sheˍ. Tu‸ ve hkanˍ ve nawˬ hui awˬ hk'oˆ lo gaˬ la tuˬ ve hta‸ pa taw, g'aˇ hte‸ kuˬ hawˬ chehˇ-oˆ. 2 Nawˬ hui ve mawˇ jeˬ lehˬ kuiˇ k'ai peuˬ. Nawˬ hui ve veu‸ k'aˇ teˇ hpaˍ hta‸ htawˇ pfuhˇ shehˍ ma caˇ peuˬ. 3 Nawˬ hui ve hpu shi htawˇ yawˇ caˇ peuˬ. Yawˇ caˇ ve oˇ ve lehˬ, nawˬ hui venˇ baˆ te ve hta‸ shaˉ hkiˆ hkanˍ leh, aˬ miˍ hk'a shuˍ shuˍ nawˬ hui ve awˬ shaˍ hta‸ caˇ tuˬ yoˬ. Awˬ leh meuˇ ve awˬ nyi teˇ hpaˍ awˬ pon, nawˬ hui mawˇ jeˬ shaw hpoˆ taˍ peuˬ. 4 Na sheˍ. Nawˬ hui ve ti mi hk'aw caˬ g'eu‸ shehˍ hpaˇ teˇ hpaˍ hta‸ heˍ leh awˬ hpfuhˇ maˇ piˇ ve pa taw, awˬ hpfuhˇ oˇ ve kuˬ chehˇ ve yoˬ. Caˬ g'eu‸ shehˍ hpaˇ hui ve kuˬ hkawˇ htawˇ, hk'a peu-eˬ awˬ hk'oˆ uiˍ shehˍ hpaˇ Jawˇ mawˇ G'uiˬ sha ve naˍ paw awˬ hk'aw lo geh peuˬ. 5 Nawˬ hui miˬ guiˬ hk'oˆ lo paw sha jaˇ leh nyi hk'aˇ suh htaˇ hk'a gaˬ te taˍ peuˬ. Tiˇ pehˍ ve awˬ nyi awˬ pon nawˬ hui lehˬ, a shu yawˇ ve nyi ma hta‸ hu leh gu taˍ peuˬ. 6 Hteˇ ve cawˇ ve chaw hta‸ nawˬ hui suhˉ taˆ leh tiˇ pehˍ peuˬ. Yawˇ nawˬ hui hta‸ maˇ tawˍ taˍ. 7 Chi hta‸ pa taw, awˬ viˉ awˬ nyi teˇ hpaˍ-oˬ, Jawˇ mawˇ Yeˍsuˆ gaˬ la htaˇ hk'a gaˬ yeunˇ hkanˍ chehˇ-oˆ. Muiˬ caˇ paˍ lehˬ, miˬ guiˬ ve awˬ hpfuhˇ hk'aˆ ve awˬ shiˍ hta‸ g'a tuˬ yawˇ law taˍ ve yoˬ. Mvuhˇ yeˬ awˉ lawˉ laˬ ve teˇ yanˇ leh, awˬ leh laˬ ve teˇ yanˇ hk'a gaˬ, yawˇ yeunˇ hkanˍ leh law taˍ ve yoˬ. 8 Nawˬ hui htawˇ, yeunˇ hkanˍ leh law taˍ-o‸. Jawˇ mawˇ Yeˍsuˆ k'aw‸ ya‸ la tuˬ ve awˬ yanˇ gaˬ la paˇ neˇ ve pa taw, nawˬ hui nyi ma yeˬ chehˇ-oˆ. 9 Awˬ viˉ awˬ nyi teˇ hpaˍ-oˬ, nawˬ hui suhˉ jehˬ ve hta‸ maˇ g'a hkanˍ tuˬ, teˇ g'aˇ hta‸ teˇ g'aˇ venˇ baˆ taˇ taˍ da‸. Nyi-o, Suhˉ jehˬ shehˍ hpaˇ lehˬ, yehˬ miˉ awˬ paˇ lo huˉ chehˇ taˍ peuˬ. 10 Awˬ viˉ awˬ nyi teˇ hpaˍ-oˬ, Jawˇ mawˇ G'uiˬ sha ve awˬ meh hta‸ peun leh maˍ laˇ ve tcuh kaˍ paˍ teˇ hpaˍ lehˬ, tu‸ ve hkanˍ ve hta‸ g'a hpuˇ htaˇ, yawˇ hui yeunˇ hkanˍ puiˉ ve nyi ma cawˬ ve hta‸ nawˬ hui henˇ yuˬ jawˬ yuˬ-o‸. 11 Yeunˇ hkanˍ puiˉ ve chaw hui lehˬ, awˬ bon uiˍ ve yoˬ teh‸ ngaˬ hui k'oˆ ve yoˬ. Yawˇbaˆ yeunˇ hkanˍ puiˉ ve awˬ lawn hta‸ nawˬ hui g'a kaˇ peuˬ. Jawˇ mawˇ G'uiˬ sha yawˇ dawˇ taˍ ve hk'e te piˇ leh, yawˇ hk'aˬ ma ha‸ leh ha k'aˉ puiˉ ve hta‸ nawˬ hui g'a mawˬ peuˬ. 12 Ngaˬ awˬ viˉ awˬ nyi teˇ hpaˍ-oˬ, a ciˉ ka‸ taˇ hkanˍ. Tawˇ chi lehˬ uiˍ jaˇ ve teˇ hkawˇ yoˬ. Mvuhˇ naw ma hta‸ maˇ k'oˆ, miˬ guiˬ hta‸ maˇ k'oˆ, awˬ kaˍ awˬ nu ve awˬ ceuˬ hta‸ maˇ k'oˆ, chi teˇ hpaˍ hta‸ cuˇ leh taˇ hkanˍ. Nawˬ hui suhˉ jehˬ ve hta‸ maˇ g'a hkanˍ tuˬ, nawˬ ve tawˇ hkawˇ lehˬ, yoˬ ve k'o yoˬ, maˇ heˆ ve k'o maˇ heˆ teh‸ ceh tiˉ k'oˆ loˬ. 13 Nawˬ hui awˬ hk'aw lo chaw teˇ g'aˇ g'aˇ tu‸ chehˇ hkanˍ chehˇ ve laˇ. Yawˇ hta‸ bon lawˬ piˇ lawˬ-o‸. Chaw teˇ g'aˇ g'aˇ ha lehˬ chehˇ ve laˇ. Yawˇ hta‸ k'a muiˬ chiˇ mvuh piˇ lawˬ-o‸. 14 Nawˬ hui awˬ hk'aw lo chaw teˇ g'aˇ g'aˇ naˬ chehˇ gawˬ chehˇ ve laˇ. Yawˇ lehˬ, Hkri‸ yaˇ awˬ moˍ awˬ hoˉ chaw mawˇ teˇ hpaˍ hta‸ kuˬ cawˇ ve yoˬ. Yawˇ hui lehˬ, Jawˇ mawˇ Yeˍsuˆ ve awˬ meh hta‸ cuˇ leh, chaw naˬ oˇ ve hta‸ naˍ manˇ shehˍ peuˬ hk'aw‸ nawˉ, yawˇ awˬ pon bon lawˬ cawˇ ve yoˬ. 15 Yonˍ ve awˬ hk'aw lo bon lawˬ ve teˇ ceuˬ lehˬ, chaw naˬ hta‸ na-e la piˇ leh, Jawˇ mawˇ Yeˍsuˆ yawˇ hta‸ tu la piˇ tuˬ yoˬ. Yawˇ venˇ baˆ cawˬ ve k'o, yawˇ ve venˇ baˆ hta‸ hpehˇ hk'a piˇ tuˬ yoˬ. 16 Hk'e te leh, nawˬ hui na-e la tuˬ, teˇ g'aˇ leh teˇ g'aˇ venˇ baˆ k'aoˍ maˍ da‸ leh, teˇ g'aˇ leh teˇ g'aˇ awˬ pon bon lawˬ-o‸. Hteˇ ve cawˇ ve chaw bon lawˬ ve lehˬ, kanˇ paˆ cawˬ maˇ jaˇ ve yoˬ. 17 Eˇliˇya‸ lehˬ ngaˬ hui hk'a shuˍ shuˍ chaw yaˇ hpeh‸ ve htawˇ, mvuhˇ yeˬ maˇ laˬ tuˬ yawˇ bon g'aˇ hte‸ lawˬ htaˇ, shehˆ hk'aw‸ leh ha pa hkaw‸ maˬ hk'a gaˬ miˬ guiˬ hk'oˆ lo mvuhˇ yeˬ maˇ laˬ. 18 Teˇ pawˆ yawˇ bon k'aw‸ lawˬ htaˇ, mvuhˇ naw ma lehˬ mvuhˇ yeˬ k'aw‸ laˬ piˇ leh, miˬ guiˬ htawˇ awˬ shiˍ k'aw‸ naw‸ la ve yoˬ. 19 Ngaˬ awˬ viˉ awˬ nyi teˇ hpaˍ-oˬ, nawˬ hui awˬ hk'aw lo chaw teˇ g'aˇ g'aˇ hteˇ ve cawˇ ve ya‸ k'aw hta‸ ya‸ k'ai leh, chaw teˇ g'aˇ g'aˇ yawˇ hta‸ k'aw‸ shiˍ hk'aw‸ veu laˇ ve k'o, 20 venˇ baˆ yaˇ teˇ g'aˇ ya‸ k'aw ya‸ k'ai chehˇ ve hta‸ k'aw‸ shiˍ hk'aw‸ veu laˇ ve chaw oˇ ve teˇ g'aˇ lehˬ, suh kuiˬ lo co ha teˇ maˬ hta‸ htaiˍ hk'aw‸ piˇ leh, venˇ baˆ maˇ ve hta‸ yawˇ beh taˍ peuˬ teh‸, yawˇ hta‸ shiˍ piˇ-oˆ.

1 Peˍtruˆ 1

1 Ngaˬ lehˬ, Yeˍsuˆ Hkri‸ ve tcuh yaˇ Peˍtruˆ yoˬ. Hpaˆ da‸ leh, Poˍtuˆ, Gaˍlaˍtiˆ, Kaˍpaˍdawˇkiˆ, Aˍsiˆ leh Beˍtuˇniˆ mvuhˇ miˬ teˇ hpaˍ awˬ hk'aw lo ca chehˇ k'ai peuˬ ve chaw teˇ hpaˍ hta‸ ngaˬ li‸ bvuh‸ laˇ ve yoˬ. 2 Yeˍsuˆ Hkri‸ hta‸ na yuˬ leh, yawˇ ve awˬ suhˍ nawˬ hui hta‸ pfuhˍ piˇ tuˬ, aˬ sho-eˬ htaˇ ka‸ Awˬ pa G'uiˬ sha nawˬ hui hta‸ leuˆ yuˬ taˍ leh, Awˬ ha hpu nawˬ hui hta‸ da‸ piˇ kehˬ piˇ peuˬ. Awˬ bon awˬ shinˉ leh dawˇ sha gaˇ sha tuˬ nawˬ hui awˬ hk'aw lo maˇ la piˇ-oˆ. 3 Ngaˬ hui ve Jawˇ mawˇ Yeˍsuˆ Hkri‸ ve Awˬ pa G'uiˬ sha hta‸ chiˇ mvuh-o. Yawˇ ha k'aˉ puiˉ jaˇ ve hta‸ pa taw, ngaˬ hui chaw awˬ suhˉ hpeh‸ la leh, te‸ chehˇ ve dawˇ law kuiˬ cawˬ la ve yoˬ. Dawˇ law kuiˬ oˇ ve lehˬ, Yeˍsuˆ Hkri‸ suh kuiˬ lo k'aw‸ te‸ tu la ve hta‸ pa taw cawˬ la ve yoˬ. 4 Hk'e te leh, ngaˬ hui G'uiˬ sha ve awˬ shinˉ caˇ shehˍ hpaˇ teˇ hpaˍ hpeh‸ la ve yoˬ. Maˇ luˬ puiˉ, maˇ cha‸ chiˆ puiˉ, maˇ pehˆ puiˉ ve awˬ shinˉ oˇ ve hta‸ mvuhˇ naw ma hk'oˆ lo nawˬ hui awˬ pon yawˇ ha‸ shaˉ taˍ ve yoˬ. 5 Awˬ leh meuˇ teˇ nyi htaiˍ hk'aw‸ ve hta‸ hk'a tawˍ lehˆ hpeu‸ maˍ laˇ htaˇ hk'a gaˬ, nawˬ hui hk'a yonˍ ve chaw hui hta‸ G'uiˬ sha yawˇ ve kanˇ paˆ hta‸ cuˇ leh ha‸ shaˉ chehˇ ve yoˬ. 6 Hk'e te leh, chi beu‸ teˇ hkui teˇ yanˇ awˬ hk'aw lo, tu‸ ve hkanˍ ve leh lawˇ nyi ve laiˉ ceuˬ hta‸ nawˬ hui g'a hpuˇ da‸ ve htawˇ, ha lehˬ chehˇ-oˆ. 7 Aˬ miˍ awˬ hk'aw lo shi hta‸ lawˇ nyi ve hk'e, tu‸ hkanˍ ve chi teˇ hpaˍ lehˬ nawˬ hui yonˍ ve nyi ma hta‸ lawˇ nyi tuˬ yoˬ. Nawˬ hui yonˍ ve nyi ma lehˬ, luˬ puiˉ sheˆ puiˉ ve shi a‸ kehˉ awˬ hpfuhˇ hk'aˆ jaˇ ve yoˬ. Nawˬ hui yonˍ yeˬ ve k'o, Yeˍsuˆ Hkri‸ k'aw‸ ya‸ la ve teˇ yanˇ, chiˇ mvuh ve, awˬ me‸ awˬ hponˇ leh, taˍ uiˍ taˍ mvuh ve hta‸ nawˬ hui g'a tuˬ yoˬ. 8 Yawˇ hta‸ nawˬ hui maˇ mawˬ jaw htawˇ, nawˬ hui yawˇ hta‸ ha‸ chehˇ ve yoˬ. Chi beu‸ yawˇ hta‸ maˇ mawˬ htawˇ, nawˬ hui yawˇ hta‸ yonˍ ve awˬ hk'aw lo awˬ me‸ awˬ hponˇ uiˍ jaˇ leh, ca k'oˆ maˇ peuˬ ve ha lehˬ tuˬ nawˬ hui geh cawˬ ve yoˬ. 9 Nawˬ hui yonˍ ve pa taw, nawˬ hui ve co ha htaiˍ hk'aw‸ ve hta‸ g'a ve yoˬ. 10 Htaiˍ hk'aw‸ ve chi hta‸ G'uiˬ sha ve tcuh kaˍ paˍ hui hk'a deh‸ na nyi leh ca nyi peuˬ. G'uiˬ sha nawˬ hui hta‸ awˬ bon pe‸ laˇ tuˬ ve awˬ lawn, aˬ sho-eˬ htaˇ ka‸ yawˇ hui bon maˍ peuˬ. 11 Tcuh kaˍ paˍ oˇ ve teˇ hpaˍ awˬ hk'aw lo, Hkri‸ ve Awˬ ha hpu kanˉ te chehˇ ve yoˬ. Miˬ guiˬ yaˇ hta‸ htaiˍ hk'aw‸ tuˬ, hk'aˬ ve teˇ g'aˇ, hk'aˬ ve teˇ yanˇ te tuˬ leh naˍ, yawˇ hui ca nyi peuˬ ve yoˬ. Aˬ sho-eˬ htaˇ yawˇ hui k'oˆ ve, Hkri‸ g'a tu‸ g'a hkanˍ leh, awˬ hk'aw‸ nawˉ awˬ me‸ awˬ hponˇ g'a tuˬ yoˬ teh‸ k'oˆ taˍ ve yoˬ. 12 Tcuh kaˍ paˍ oˇ ve teˇ hpaˍ te ve kanˉ lehˬ, yawˇ hui awˬ pon maˇ heˆ, nawˬ hui awˬ pon yoˬ teh‸, G'uiˬ sha yawˇ hui hta‸ hpeu‸ maˍ piˇ taˍ ve yoˬ. Chi beu‸ ha lehˬ ve bon hkawˇ chi shu nawˬ hui hta‸ maˍ laˇ chehˇ ve yoˬ. Mvuhˇ naw ma lo peu laˇ ve da‸ ve kehˬ ve Awˬ ha hpu yawˇ hui hta‸ hpeu‸ maˍ piˇ leh, yawˇ hui shiˍ ve yoˬ. Awˬ ceuˬ oˇ ve teˇ hpaˍ hta‸ mvuhˇ naw ma tcuh yaˇ hui ka‸ mawˬ gaˇ jaˇ ve yoˬ. 13 Hk'e te leh, nawˬ hui nyi ma gu taˍ leh shaˍ ti‸ taˍ chehˇ-oˆ. Yeˍsuˆ Hkri‸ k'aw‸ ya‸ la ve teˇ yanˇ, nawˬ hui hta‸ piˇ tuˬ ve awˬ bon hta‸ hk'a deh‸ dawˇ law taˍ-o‸. 14 Aˉ suhˆ nawˬ hui maˇ shiˍ sheˍ htaˇ, a shu yawˇ ve a loˍ awˬ hk'aˇ suh te ve hk'e, chi beu‸ taˇ k'aw‸ te. Na yuˬ puiˉ ve yaˇ ehˉ hk'e te-o. 15 Nawˬ hui hta‸ kuˬ yuˬ ve teˇ g'aˇ da‸ kehˬ ve hk'e, nawˬ hui hk'a te ve awˬ liˇ awˬ hk'aˇ hk'a peu-eˬ awˬ hk'aw lo da‸ kehˬ piˇ-oˆ. 16 Ngaˬ da‸ kehˬ ve pa taw, nawˬ hui htawˇ da‸ kehˬ piˇ-oˆ teh‸, Li‸ hpu hk'aw bvuh‸ taˍ ve yoˬ. 17 G'uiˬ sha hta‸ nawˬ hui bon lawˬ htaˇ, A pa-oˬ teh‸ nawˬ hui k'oˆ ve yoˬ. Yawˇ lehˬ chaw mehˆ hpfuhˇ hta‸ maˇ nyi leh, teˇ g'aˇ peuˬ teˇ g'aˇ te ve kanˉ hta‸ nyi leh suhˉ jehˬ ve yoˬ. Chi hta‸ pa taw, nawˬ hui miˬ guiˬ hk'oˆ hkehˉ chaw te chehˇ ve teˇ yanˇ, yawˇ hta‸ yawˆ yan ve awˬ hk'aw lo te-o. 18 Awˬ puˍ awˬ pi teˇ hpaˍ geh g'a ve awˬ bon maˇ cawˬ ve awˬ liˇ awˬ hk'aˇ teˇ hpaˍ hta‸ ponˬ tuˬ, yawˇ nawˬ hui hta‸ htaiˍ hk'aw‸ laˇ ve yoˬ. Luˬ puiˉ sheˆ puiˉ ve hpu shi hta‸ yehˇ leh htaiˍ hk'aw‸ laˇ ve maˇ heˆ. 19 Ya‸ hk'aˇ, awˬ hpfuhˇ hk'aˆ jaˇ ve Hkri‸ ve awˬ suhˍ nawˬ hui hta‸ htaiˍ hk'aw‸ laˇ ve nawˬ hui shiˍ ve yoˬ. Awˬ suhˍ oˇ ve lehˬ, awˬ kuiˉ awˬ haiˇ maˇ cawˬ leh awˬ meˇ maˇ cawˬ ve yawˬ ehˉ awˬ suhˍ hk'e hpeh‸ ve yoˬ. 20 Miˬ guiˬ hta‸ maˇ te hpanˍ sheˍ htaˇ ka‸, chi hk'e g'a te hkanˍ tuˬ, G'uiˬ sha yawˇ hta‸ leuˆ yuˬ taˍ peuˬ. Hk'e te leh, awˬ leh meuˇ ve awˬ yanˇ chi awˬ hk'aw lo, nawˬ hui awˬ pon G'uiˬ sha yawˇ hta‸ peu laˇ ve yoˬ. 21 Hkri‸ hta‸ pa taw nawˬ hui G'uiˬ sha hta‸ yonˍ ve yoˬ. G'uiˬ sha yawˇ hta‸ suh kuiˬ lo k'aw‸ te‸ tu la piˇ leh, awˬ me‸ awˬ hponˇ piˇ ve yoˬ. Chi hta‸ pa taw, nawˬ hui yonˍ ve awˬ ceuˬ leh dawˇ law ve awˬ ceuˬ G'uiˬ sha awˬ hk'aw lo cawˬ ve yoˬ. 22 Nawˬ hui hteˇ ve cawˇ ve hta‸ na yuˬ ve pa taw, awˬ viˉ awˬ nyi hui hta‸ awˬ tehˬ awˬ na ha‸ hpeh‸ tuˬ, nawˬ hui ve nyi ma da‸ la kehˬ la peuˬ. Hk'e te leh, nawˬ hui nyi ma awˬ tawˬ hk'a gaˬ teˇ g'aˇ leh teˇ g'aˇ ha‸ da‸-o‸. 23 Nawˬ hui awˬ suhˉ teˇ pawˆ k'aw‸ paw la peuˬ. Paw la ve chi lehˬ, luˬ puiˉ sheˆ puiˉ ve awˬ yawˇ hta‸ pa taw maˇ heˆ. Maˇ luˬ maˇ sheˆ puiˉ ve awˬ yawˇ, G'uiˬ sha ve te‸ chehˇ yeˬ chehˇ ve tawˇ hkawˇ hta‸ pa taw paw la ve yoˬ. 24 Awˬ lawn k'o, Chaw ceuˬ hk'a peu-eˬ mvuh‸ hk'a shuˍ shuˍ hpeh‸ leh, yawˇ hui ve awˬ me‸ awˬ hponˇ htawˇ mvuh‸ veˆ hk'a shuˍ shuˍ hpeh‸ ve yoˬ. Mvuh‸ lehˬ nawˍ k'ai goˇ k'ai leh, awˬ veˆ htawˇ piˬ k'ai ce k'ai ve yoˬ. 25 Ya‸ hk'aˇ, Jawˇ mawˇ G'uiˬ sha ve tawˇ hkawˇ lehˬ, co co taiˍ taiˍ yeˬ chehˇ ve yoˬ. Tawˇ hkawˇ oˇ ve lehˬ, nawˬ hui hta‸ k'aoˍ maˍ laˇ ve ha lehˬ ve bon hkawˇ hpeh‸ ve yoˬ.

1 Peˍtruˆ 2

1 Hk'e te leh, shu hta‸ naˬ tuˬ te ve, shu hta‸ heˍ ve, maˇ heˆ ve awˬ ceuˬ hta‸ ka‸ yoˬ ve hk'e te ve, hkawehˉ ve leh hk'aiˉ ve, chi teˇ hpaˍ hk'a peu-eˬ hta‸ baˬ taˉ-oˆ. 2 Paw la gehˇ sheˍ ve yaˇ ehˉ hk'a shuˍ shuˍ, co ha hpawˇ da‸ jaˇ ve cuˉ g'uiˬ hta‸ sheˉ lai-o. Co ha hpawˇ ve cuˉ g'uiˬ hta‸ nawˬ hui dawˬ ve pa taw, htaiˍ hk'aw‸ ve awˬ hk'aw lo nawˬ hui uiˍ la tuˬ yoˬ. 3 Awˬ lawn k'o, Jawˇ mawˇ G'uiˬ sha ve ha k'aˉ puiˉ jaˇ ve teˇ ceuˬ hta‸ nawˬ hui g'a leh‸ nyi peuˬ. 4 Jawˇ mawˇ oˇ ve geh laˬ-o‸. Yawˇ lehˬ te‸ chehˇ ve haˉ pui shiˍ hpeh‸ ve yoˬ. Chaw yaˇ yawˇ hta‸ chiˇ baˬ ve htawˇ, G'uiˬ sha yawˇ hta‸ leuˆ yuˬ leh, awˬ hpfuhˇ hk'aˆ jaˇ ve teh‸ shawˍ taˍ ve yoˬ. 5 Nawˬ hui htawˇ te‸ chehˇ ve haˉ pui shiˍ teˇ hpaˍ hk'a shuˍ shuˍ, G'uiˬ sha nawˬ hui hta‸ yuˬ leh co ha hpawˇ ve yehˬ te hpeh‸ tuˬ, a shu yawˇ awˬ to G'uiˬ sha hta‸ chiˇ a‸ piˇ-oˆ. Co ha hpawˇ ve tanˇ tuˬ teˇ hpaˍ hta‸ nawˬ hui g'a tanˇ tuˬ, nawˬ hui da‸ kehˬ ve paw hkuˇ teˇ hpaˍ hpeh‸ la peuˬ. Nawˬ hui Yeˍsuˆ Hkri‸ hta‸ cuˇ leh tanˇ ve teˇ yanˇ, tanˇ tuˬ oˇ ve teˇ hpaˍ hta‸ G'uiˬ sha ha‸ yuˬ tuˬ yoˬ. 6 Li‸ hpu awˬ hk'aw chi hk'e bvuh‸ taˍ ve, Nyi-o, ngaˬ leuˆ yuˬ taˍ ve, awˬ hpfuhˇ hk'aˆ jaˇ ve haˉ pui shiˍ hta‸ Ziˉonˍ awˬ hk'aw awˬ hkuiˉ puiˍ awˬ ceˍ k'aweh‸ lo ngaˬ kawˍ chehˇ ve yoˬ. Haˉ pui shiˍ oˇ ve hta‸ hk'a yonˍ ve chaw lehˬ maˇ g'a ya‸ taw, teh‸ k'oˆ taˍ ve yoˬ. 7 Hk'e te leh, nawˬ hui hk'a yonˍ ve chaw hui awˬ pon, yawˇ da‸ jaˇ leh awˬ hpfuhˇ hk'aˆ jaˇ ve yoˬ. Ya‸ hk'aˇ, maˇ yonˍ ve chaw hui awˬ pon, Li‸ hpu hk'aw bvuh‸ taˍ ve hk'e, Yehˬ kawˍ shehˍ hpaˇ hui baˬ taˍ ve haˉ pui shiˍ lehˬ, awˬ hkuiˉ puiˍ awˬ ceˍ k'aweh‸ ve haˉ pui teˇ shiˍ hpeh‸ la peuˬ. 8 Chaw yaˇ hkui htiˇ poˬ paiˍ leh, nyi ma luˬ tuˬ ve haˉ pui shiˍ htawˇ hpeh‸ ve yoˬ, teh‸ bvuh‸ taˍ ve yoˬ. Yawˇ hui G'uiˬ sha ve tawˇ hkawˇ hta‸ maˇ na yuˬ ve pa taw, yawˇ hui hkui htiˇ poˬ paiˍ ve yoˬ. Chi hk'e hpeh‸ la tuˬ awˬ g'uˇ suhˍ htaˇ ka‸ G'uiˬ sha k'oˆ taˍ peuˬ. 9 Nawˬ hui lehˬ, G'uiˬ sha leuˆ yuˬ ve chaw ceuˬ hpeh‸ ve yoˬ. Jawˇ mawˇ G'uiˬ sha ve paw hkuˇ ka‸ nawˬ hui hpeh‸ ve yoˬ. Nawˬ hui da‸ kehˬ ve mvuhˇ miˬ yaˇ hpeh‸ leh, G'uiˬ sha ve awˬ yaˇ awˬ duˬ awˬ tehˬ awˬ na hpeh‸ ve yoˬ. Yawˇ ve da‸ jaˇ ve awˬ g'euˆ awˬ hk'aw lo lo‸ la tuˬ, naˆ ho‸ ve awˬ hk'aw lo yawˇ nawˬ hui hta‸ kuˬ tawˆ la peuˬ. Hk'e te leh, yawˇ ve da‸ jaˇ ve awˬ lawn shu hta‸ k'aoˍ maˍ piˇ-oˆ. 10 Awˉ lawˉ htaˇ, nawˬ hui lehˬ awˬ meh maˇ cawˬ ve chaw ceuˬ hpeh‸ ve yoˬ. Ya‸ hk'aˇ chi beu‸ lehˬ, nawˬ hui G'uiˬ sha ve chaw ceuˬ hpeh‸ la peuˬ. Awˉ lawˉ htaˇ nawˬ hui lehˬ, ha k'aˉ ve awˬ bon hta‸ maˇ g'a. Ya‸ hk'aˇ chi beu‸ ha k'aˉ ve awˬ bon hta‸ nawˬ hui g'a peuˬ. 11 Ha‸ ve chaw teˇ hpaˍ-oˬ, shu mvuhˇ miˬ awˬ hk'aw lo nawˬ hui hkehˉ chaw hpeh‸ chehˇ ve yoˬ. Hk'e te leh, co ha hta‸ bawˆ da‸ chehˇ ve, awˬ suhˍ awˬ shaˍ a loˍ hta‸ jaw k'ai tuˬ, ngaˬ nawˬ hui hta‸ lawˬ hkawˉ ve yoˬ. 12 Buiˇ shaˆ aˉ naˆ chaw teˇ hpaˍ mehˆ g'uˇ suhˍ nawˬ hui da‸ ve awˬ liˇ awˬ hk'aˇ hta‸ ceh tiˉ te-o. Yawˇ hui nawˬ hui hta‸ hk'aiˉ leh venˇ baˆ taˍ ve htawˇ, nawˬ hui ve da‸ ve kanˉ hta‸ g'a mawˬ ve pa taw, suhˉ jehˬ ve awˬ nyi gaˬ la htaˇ, yawˇ hui G'uiˬ sha hta‸ chiˇ uiˍ chiˇ mvuh tuˬ yoˬ. 13 Jawˇ mawˇ Hkri‸ hta‸ pa taw, chaw yaˇ hui leuˆ yuˬ taˍ ve Jawˇ mawˇ teˇ hpaˍ uˉ peunˍ ve awˬ hawˉ lo hk'a deh‸ chehˇ-oˆ. Hk'a peu-eˬ awˬ hk'oˆ uiˍ shehˍ hpaˇ hkunˉ hawˉ hkanˇ awˬ hawˉ lo chehˇ-oˆ. 14 A shu yawˇ ve mvuhˇ miˬ hta‸ uˉ peunˍ ve jawˇ mawˇ awˬ hawˉ lo htawˇ hk'a deh‸ chehˇ-oˆ. Chaw haiˬ hta‸ ciˍ yanˍ piˇ leh, chaw da‸ hta‸ chiˇ mvuh piˇ tuˬ, hkunˉ hawˉ hkanˇ yawˇ hui hta‸ peu laˇ ve yoˬ. 15 Awˬ lawn k'o, nawˬ hui da‸ ve hteˇ ve hta‸ te tuˬ G'uiˬ sha nyi ma cawˇ ve yoˬ. Chi hk'e te ve pa taw, maˇ shiˍ puiˉ maˇ dawˇ nyi puiˉ ve chaw teˇ hpaˍ lehˬ, te‸ chiˉ ca k'oˆ maˇ hpeh‸ leh, ta‸ iˉ chehˇ tuˬ yoˬ. 16 Nawˬ hui ponˬ peuˬ ve chaw hpeh‸ ve yoˬ. Ya‸ hk'aˇ nawˬ hui ponˬ ve lehˬ, haiˬ ve hta‸ te tuˬ awˬ pon maˇ heˆ. G'uiˬ sha ve awˬ ceˬ te tuˬ awˬ pon hpeh‸ ve yoˬ. 17 Chaw hk'a peu-eˬ hta‸ yawˆ yan-o. Awˬ viˉ awˬ nyi teˇ hpaˍ hta‸ ha‸-o‸. G'uiˬ sha hta‸ kawˆ-oˆ. Hkunˉ hawˉ hkanˇ hta‸ yawˆ yan-o. 18 Awˬ ceˬ teˇ hpaˍ-oˬ, nawˬ hui ve jawˇ mawˇ teˇ hpaˍ hta‸ kawˆ leh, yawˇ hui awˬ hawˉ lo hk'a deh‸ chehˇ-oˆ. Nyi ma da‸ leh nuˇ nehˬ ve jawˇ mawˇ teˇ hpaˍ hta‸ ceh tiˉ maˇ heˆ. Haiˬ ve jawˇ mawˇ teˇ hpaˍ awˬ hawˉ lo htawˇ hk'a deh‸ chehˇ-oˆ. 19 Nawˬ hui venˇ baˆ maˇ cawˬ leh, shu fawˉ mehˍ laˇ ve teˇ yanˇ yeunˇ hkanˍ sheˍ. Nawˬ hui G'uiˬ sha hta‸ dawˇ nawˇ leh chi hk'e te ve k'o, G'uiˬ sha nyi hk'aˇ suh tuˬ yoˬ. 20 Nawˬ hui venˇ baˆ cawˬ ve pa taw shu dawˆ laˇ tiˇ laˇ ve hta‸ yeunˇ hkanˍ htaˇ, aˬ hto‸ ma chiˇ mvuh tuˬ cawˬ le. Ya‸ hk'aˇ, da‸ ve hta‸ te ve pa taw, tu‸ ve hkanˍ ve hta‸ g'a hkanˍ ve teˇ yanˇ yeunˇ hkanˍ ve k'o, G'uiˬ sha nyi hk'aˇ suh tuˬ yoˬ. 21 Oˇ hk'e g'a hkanˍ tuˬ, nawˬ hui hta‸ kuˬ yuˬ taˍ peuˬ. Hkri‸ htawˇ nawˬ hui awˬ pon g'a tu‸ g'a hkanˍ leh, nawˬ hui yawˇ ve hkui ha awˬ hk'aˇ suh g'a‸ k'ai tuˬ, nawˬ hui awˬ pon henˇ kuiˬ jawˬ kuiˬ yawˇ te taˉ peuˬ. 22 Yawˇ lehˬ venˇ baˆ maˇ te jaw. Yawˇ ve maw‸ k'aw hk'aw lo heˍ ve tawˇ hkawˇ ka‸ maˇ tawˆ la jaw. 23 Shu yawˇ hta‸ hk'a mvuhˇ hk'a na k'oˆ htaˇ, yawˇ shu hta‸ hk'a mvuhˇ hk'a na maˇ k'aw‸ k'oˆ. Yawˇ g'a tu‸ g'a hkanˍ ve teˇ yanˇ, shu hta‸ yawˇ maˇ k'aw‸ te hk'aw‸. Hteˇ lehˍ cawˇ lehˍ Suhˉ jehˬ shehˍ hpaˇ G'uiˬ sha ve la‸ hk'aw lo yawˇ awˬ to hta‸ a‸ piˇ ve yoˬ. 24 Suhˆ hkuiˉ daw hk'oˆ yawˇ g'a hkanˍ suh htaˇ, yawˇ awˬ to awˬ hk'aw lo ngaˬ hui ve venˇ baˆ hta‸ yawˇ pfuhˇ taˍ ve yoˬ. Ngaˬ hui a shu yawˇ ve venˇ baˆ hta‸ suh baˬ taˉ leh, hteˇ ve cawˇ ve awˬ hk'aw lo g'a te‸ chehˇ tuˬ, yawˇ hkanˍ suh ve yoˬ. Yawˇ ve naˬ kuiˬ hta‸ pa taw nawˬ hui na-e la peuˬ. 25 Nawˬ hui lehˬ, awˉ lawˉ htaˇ ya‸ k'aw ya‸ leh mehˉ k'ai ve yawˬ hk'e hpeh‸ ve yoˬ. Ya‸ hk'aˇ, chi beu‸ lehˬ nawˬ hui ve co ha hta‸ nyi ha‸ shaˉ shehˍ hpaˇ Yawˬ hawˉ paˍ geh nawˬ hui k'aw‸ la peuˬ.

1 Peˍtruˆ 3

1 Chi hk'a shuˍ shuˍ, awˬ miˇ ma teˇ hpaˍ htawˇ, a shu yawˇ ve awˬ hpawˇ awˬ hawˉ lo hk'a deh‸ chehˇ-oˆ. Nawˬ hui ve awˬ hpawˇ teˇ hpaˍ hpaˍ lehˬ, bon hkawˇ hta‸ maˇ na yuˬ ve htawˇ, nawˬ hui yawˆ yan puiˉ ve leh da‸ kehˬ ve awˬ liˇ awˬ hk'aˇ teˇ hpaˍ te ve hta‸ yawˇ hui g'a mawˬ ve teˇ yanˇ, 2 nawˬ hui te‸ chiˉ maˇ k'oˆ maˍ piˇ ve ka‸, nawˬ hui ve da‸ ve awˬ liˇ awˬ hk'aˇ hta‸ pa taw, nawˬ hui yawˇ hui hta‸ maˍ g'a tuˬ yoˬ. 3 Nawˬ hui awˬ hkiˇ shawˍ ve lehˬ, uˉ hkeh mvuh hpeˇ ve, shi hk'eun tcuhˉ ve, veu‸ jiˇ k'aˇ jiˇ ve, awˬ hta‸ hpawˇ awˬ hkiˇ shawˍ ve ceh taˇ hpeh‸ piˇ. 4 Ya‸ hk'aˇ nawˬ hui awˬ hkiˇ shawˍ ve lehˬ, nyi ma nuˇ nehˬ ve leh gawˬ lehˍ chehˇ puiˉ ve, awˬ hk'aw hpawˇ awˬ hkiˇ shawˍ ve teˇ ceuˬ hpeh‸ piˇ-oˆ. Awˬ hkiˇ shawˍ ve chi teˇ ceuˬ lehˬ, maˇ luˬ puiˉ leh, G'uiˬ sha mehˆ g'uˇ suhˍ awˬ hpfuhˇ hk'aˆ jaˇ ve yoˬ. 5 Aˬ sho-eˬ htaˇ G'uiˬ sha hta‸ dawˇ law chehˇ ve da‸ kehˬ ve yaˇ miˇ teˇ hpaˍ htawˇ, a shu yawˇ awˬ to hta‸ awˬ hkiˇ chi hk'e te shawˍ ve yoˬ. Yawˇ hui lehˬ, a shu yawˇ ve awˬ hpawˇ awˬ hawˉ lo hk'a deh‸ chehˇ puiˉ ve yoˬ. 6 Tawˇ pa haˉ te k'o, Saˍraˇ lehˬ, Aˍbraˍhanˍ ve hkawˇ hta‸ na yu‸ leh, yawˇ hta‸ jawˇ mawˇ teh‸ k'oˆ ve yoˬ. Nawˬ hui da‸ ve hta‸ te leh, hk'aˬ hk'e hpeh‸ htawˇ kawˆ puiˉ ve nyi ma maˇ cawˬ ve k'o, nawˬ hui Saˍraˇ ve yaˇ miˇ teˇ hpaˍ hpeh‸ ve yoˬ. 7 Chi hk'a shuˍ shuˍ, awˬ hpawˇ teˇ hpaˍ-oˬ, a shu yawˇ ve awˬ miˇ ma geh chehˇ ve awˬ hk'aw lo, yawˇ awˬ pon dawˇ nyi puiˉ ve nyi ma cawˬ piˇ-oˆ. Yawˇ hui lehˬ, nawˬ hui a‸ kehˉ awˬ g'aˇ nuˇ ve htawˇ, co ha te‸ ve awˬ bon hta‸ nawˬ hui geh teˇ geh awˬ shinˉ g'a caˇ ve pa taw, yawˇ hui hta‸ yawˆ yan-o. Chi hk'e te ve k'o, nawˬ hui bon lawˬ ve hta‸ tawˍ taˍ tuˬ maˇ cawˬ. 8 Awˬ leh meuˇ ve tawˇ lehˬ, nawˬ hui hk'a peu-eˬ nyi ma teˇ shiˍ tiˉ taˍ-o‸. Awˬ viˉ awˬ nyi teˇ g'aˇ leh teˇ g'aˇ ha k'aˉ da‸ leh ha‸ da‸-o‸. Nyi ma nuˇ lehˍ te leh, shu awˬ hawˉ lo nyi ma nehˬ lehˍ taˍ-o‸. 9 Shu awˬ haiˬ te laˇ ve htawˇ, awˬ haiˬ taˇ k'aw‸ te hk'aw‸. Shu hk'a mvuhˇ hk'a na k'oˆ laˇ ve htawˇ, hk'a mvuhˇ hk'a na taˇ k'aw‸ k'oˆ hk'aw‸. Ya‸ hk'aˇ, yawˇ hui hta‸ na‸ piˇ-oˆ. Nawˬ hui awˬ bon g'a tuˬ, chi ve awˬ pon G'uiˬ sha nawˬ hui hta‸ kuˬ yuˬ taˍ peuˬ. 10 A sha‸ te‸ gaˇ leh, ha lehˬ dawˇ sha ve awˬ nyi teˇ hpaˍ hta‸ mawˬ gaˇ ve chaw lehˬ, a shu yawˇ ve ha tehˍ haiˬ ve hkawˇ hta‸ taˇ yaw. A shu yawˇ ve meuˇ guiˬ heˍ ve hkawˇ hta‸ ka‸ taˇ k'oˆ. 11 Haiˬ ve hta‸ jaw k'ai leh, da‸ ve hta‸ te-o. Cawˇ da‸ hui da‸ ve teˇ ceuˬ hta‸ ca leh, oˇ ve awˬ hk'aˇ suh g'a‸ k'ai-o. 12 Awˬ lawn k'o, Jawˇ mawˇ G'uiˬ sha ve mehˆ shiˍ lehˬ, hteˇ ve cawˇ ve chaw hui hta‸ nyi chehˇ ve yoˬ. Yawˇ ve naˍ paw htawˇ, yawˇ hui ve bon lawˬ hkawˇ hta‸ na chehˇ ve yoˬ. Ya‸ hk'aˇ, Jawˇ mawˇ G'uiˬ sha lehˬ, awˬ haiˬ hk'a te ve chaw teˇ hpaˍ hta‸ yawˇ ve canˇ paˍ yoˬ teh‸ shawˍ taˍ ve yoˬ. 13 Nawˬ hui da‸ ve hta‸ g'aˇ hte‸ te chehˇ ve k'o, a shu nawˬ hui hta‸ ca ya‸ la tuˬ le. 14 Ya‸ hk'aˇ, hteˇ ve cawˇ ve hta‸ pa taw nawˬ hui g'a tu‸ g'a hkanˍ puiˉ ve law k'o, awˬ bon uiˍ ve yoˬ. Yawˇ hui ho laˇ ve hta‸ taˇ kawˆ, sho‸ sha‸ ve nyi ma ka‸ taˇ cawˬ piˇ. 15 Nawˬ hui ve nyi ma awˬ hk'aw lo Hkri‸ hta‸ Jawˇ mawˇ yoˬ teh‸ shawˍ taˍ leh yawˆ yan-o. Nawˬ hui dawˇ law taˍ ve awˬ lawn, hk'a na nyi laˇ ve chaw teˇ hpaˍ hta‸ hk'aˬ hk'e yaw hk'aw‸ piˇ tuˬ, hk'a deh‸ gu taˍ-o‸. Ya‸ hk'aˇ, nyi ma nuˇ nehˬ leh yawˆ yan ve awˬ hk'aw lo te-o. 16 Nawˬ hui shiˍ puiˉ ve nyi ma hta‸ kehˬ lehˍ cawˬ piˇ-oˆ. Oˇ hk'e te ve k'o, Hkri‸ awˬ hk'aw lo nawˬ hui te ve da‸ ve awˬ liˇ awˬ hk'aˇ teˇ hpaˍ hta‸ hk'aiˉ leh venˇ baˆ taˍ ve chaw teˇ hpaˍ lehˬ, g'a ya‸ taw tuˬ yoˬ. 17 G'uiˬ sha nyi ma cawˇ ve k'o, da‸ ve hta‸ te leh tu‸ ve hkanˍ ve hta‸ g'a hkanˍ ve lehˬ, haiˬ ve hta‸ te leh g'a hkanˍ ve a‸ kehˉ leuˉ leh da‸ ve yoˬ. 18 Awˬ lawn k'o, Hkri‸ lehˬ ngaˬ hui ve venˇ baˆ hta‸ pa taw teˇ pawˆ g'a suh ve yoˬ. G'uiˬ sha geh ngaˬ hui hta‸ shiˍ k'o‸-e g'a tuˬ, hteˇ ve cawˇ ve chaw teˇ g'aˇ lehˬ, maˇ hteˇ maˇ cawˇ ve chaw hui awˬ pon hkanˍ suh ve yoˬ. Yawˇ awˬ to suh ve htawˇ, Awˬ ha hpu hta‸ pa taw k'aw‸ te‸ la ve yoˬ. 19 Awˬ ha hpu hta‸ pa taw yawˇ k'ai leh, htawnˍ hk'aw chehˇ ve awˬ ha teˇ hpaˍ hta‸ bon ca maˍ ve yoˬ. 20 Awˬ ha oˇ ve teˇ hpaˍ lehˬ, Noˉa‸ ve awˬ co-e htaˇ G'uiˬ sha ve hkawˇ hta‸ maˇ na yuˬ ve pa taw, htawnˍ hk'aw chehˇ taˍ ve yoˬ. Noˉa‸ haw lo‸ k'oˍ lonˉ hta‸ te chehˇ htaˇ, chaw yaˇ G'uiˬ sha hkawˇ hta‸ na yuˬ tuˬ G'uiˬ sha yeunˇ hkanˍ leh law taˍ htawˇ, yawˇ hui maˇ na yuˬ. Hk'e te leh, chaw hiˉ g'aˇ ceh tiˉ iˉ kaˆ awˬ hk'aw lo g'a ponˬ ve yoˬ. 21 Chi hk'a shuˍ shuˍ, chi beu‸ baˆtiˆsaˬ lehˬ, nawˬ hui hta‸ ponˬ laˇ ve yoˬ. Baˆtiˆsaˬ k'oˆ ve lehˬ, awˬ to hta‸ ngawˉ taˍ ve awˬ meˇ tsuhˇ baˬ ve hta‸ k'oˆ ve maˇ heˆ. Ya‸ hk'aˇ, Yeˍsuˆ Hkri‸ k'aw‸ te‸ tu la ve pa taw, G'uiˬ sha mehˆ g'uˇ suhˍ shiˍ puiˉ ve nyi ma da‸ la kehˬ la ve hta‸ k'oˆ ve yoˬ. 22 Yeˍsuˆ Hkri‸ lehˬ mvuhˇ naw ma lo taˆ k'o‸-e leh, G'uiˬ sha ve la‸ sha paˉ lo chehˇ taˍ ve yoˬ. Mvuhˇ naw ma tcuh yaˇ teˇ hpaˍ uˉ peunˍ shehˍ hpaˇ teˇ hpaˍ leh, kanˇ paˆ cawˬ shehˍ hpaˇ teˇ hpaˍ ka‸ yawˇ awˬ hawˉ lo chehˇ ve yoˬ.

1 Peˍtruˆ 4

1 Hk'e te leh, Hkri‸ yawˇ ve awˬ to g'a tu‸ g'a hkanˍ htaˇ, yawˇ nyi ma taˍ ve hk'e, nawˬ hui htawˇ nyi ma taˍ leh, gu taˍ hehnˇ taˍ-o‸. A shu yawˇ ve awˬ to g'a tu‸ g'a hkanˍ ve chaw lehˬ, venˇ baˆ te ve teˇ ceuˬ hta‸ baˬ taˉ peuˬ. 2 Oˇ hk'e ve chaw teˇ hpaˍ lehˬ, awˬ to te‸ chehˇ ve awˬ yanˇ awˬ hk'aw lo awˬ suhˍ awˬ shaˍ a loˍ awˬ hk'aˇ suh maˇ k'aw‸ te. G'uiˬ sha ve a loˍ awˬ hk'aˇ suh te ve yoˬ. 3 Buiˇ shaˆ aˉ naˆ chaw teˇ hpaˍ te ve hk'e, ponˬ laˬ htaˇ nawˬ hui htawˇ te chehˇ ve yoˬ. Oˇ htaˇ nawˬ hui htawˇ te ponˬ te leuˉ ve, awˬ suhˍ awˬ shaˍ a loˍ te ve, a pehˉ meuˇ g'uiˬ dawˬ bvuhˆ ve, ha lehˬ tuˬ te ponˬ te leuˉ ve, caˇ leuˉ dawˬ leuˉ ve leh, shaˉ ho‸ hta‸ oˉ k'oˍ maˇ pui cawˇ ve ka‸ oˉ k'oˍ pui ve yoˬ. Chi teˇ hpaˍ hta‸ nawˬ hui taˇ k'aw‸ te loˬ. 4 Chi beu‸ nawˬ hui lehˬ, yawˇ hui geh te ponˬ te leuˉ jaˇ ve awˬ hk'aˇ suh maˇ k'aw‸ g'a‸ ve pa taw, yawˇ hui anˇ leh nawˬ hui hta‸ hk'a mvuhˇ hk'a na k'oˆ ve yoˬ. 5 Ya‸ hk'aˇ, suhˉ jehˬ shehˍ hpaˇ mehˆ g'uˇ suhˍ yawˇ hui lehˬ a shu yawˇ awˬ to awˬ lawn g'a k'aoˍ maˍ piˇ tuˬ yoˬ. Suhˉ jehˬ shehˍ hpaˇ oˇ ve lehˬ, te‸ chehˇ ve chaw hui hta‸ leh suh peuˬ ve chaw hui hta‸ suhˉ jehˬ tuˬ, yawˇ gu taˍ hehnˇ taˍ peuˬ. 6 Chi hta‸ pa taw, suh peuˬ ve chaw hui hta‸ htawˇ yawˇ ha lehˬ ve bon hkawˇ ca maˍ piˇ ve yoˬ. Awˬ lawn k'o, awˬ suhˍ awˬ shaˍ awˬ to cawˬ ve chaw hui hk'a shuˍ shuˍ, yawˇ hui suhˉ jehˬ ve hta‸ g'a hkanˍ htawˇ, G'uiˬ sha te‸ ve hk'a shuˍ shuˍ co ha hpawˇ yawˇ hui te‸ hpeh‸ tuˬ yawˇ ca maˍ piˇ ve yoˬ. 7 Awˬ ceuˬ hk'a peu-eˬ ve lehˬ, awˬ leh meuˇ gaˬ la paˇ neˇ ve yoˬ. Hk'e te leh, bon hk'a deh‸ lawˬ hpeh‸ tuˬ, nyi ma taˍ puiˉ leh, shaˍ ti‸ taˍ puiˉ ve chaw hpeh‸ piˇ-oˆ. 8 Nawˬ hui teˇ g'aˇ leh teˇ g'aˇ, g'aˇ hte‸ ha‸ da‸-o‸. Tawˇ chi lehˬ, uiˍ jaˇ ve tawˇ teˇ hkawˇ hpeh‸ ve yoˬ. Awˬ lawn k'o, ha‸ pehnˇ ve teˇ ceuˬ lehˬ, maˇ jaˇ ve venˇ baˆ teˇ hpaˍ hta‸ beh taˍ ve yoˬ. 9 Hkehˉ chaw teˇ hpaˍ hta‸ hk'a deh‸ ha‸ yuˬ-o‸. Hpeh‸ bawˬ ve nyi ma taˇ cawˬ piˇ. 10 Nawˬ hui teˇ g'aˇ peuˬ teˇ g'aˇ awˬ bon g'a taˍ ve hk'e, teˇ g'aˇ leh teˇ g'aˇ awˬ pon yehˇ-oˆ. Nawˬ hui chi hk'e te ve k'o, G'uiˬ sha ve awˬ bon laiˉ ceuˬ hta‸ nawˬ hui hk'a deh‸ ha‸ shaˉ leh yehˇ ve chaw hpeh‸ ve yoˬ. 11 Chaw teˇ g'aˇ g'aˇ tawˇ yaw ve k'o, G'uiˬ sha yaw tcuh ve hk'e ceh yaw-o. Chaw teˇ g'aˇ g'aˇ shu hta‸ ga piˇ ve k'o, G'uiˬ sha pe‸ laˇ ve awˬ g'aˇ awˬ shaˉ hta‸ cuˇ leh ga piˇ-oˆ. Chi hk'e te ve k'o, Yeˍsuˆ Hkri‸ hta‸ pa taw teˇ ceuˬ le le awˬ hk'aw lo, shu G'uiˬ sha hta‸ chiˇ uiˍ chiˇ mvuh tuˬ yoˬ. Yeˍsuˆ Hkri‸ lehˬ, awˬ me‸ awˬ hponˇ leh kanˇ paˆ co co taiˍ taiˍ cawˬ ve yoˬ. A menˬ. 12 Ha‸ ve chaw teˇ hpaˍ-oˬ, tu‸ ve hkanˍ ve teˇ ceuˬ lehˬ aˬ miˍ hk'a shuˍ shuˍ nawˬ hui hta‸ lawˇ nyi ve teˇ yanˇ, taˇ anˇ. Chi lehˬ anˇ tuˬ hpeh‸ ve maˇ heˆ. 13 Ya‸ hk'aˇ, Hkri‸ ve awˬ me‸ awˬ hponˇ tawˆ la ve teˇ yanˇ, nawˬ hui g'a ha lehˬ jaˇ tuˬ ve awˬ pon, yawˇ tu‸ ve hkanˍ ve hk'a shuˍ shuˍ nawˬ hui ka‸ g'a tu‸ g'a hkanˍ ve pa taw ha lehˬ chehˇ-oˆ. 14 Hkri‸ ve awˬ meh hta‸ pa taw, shu nawˬ hui hta‸ maˇ shawˍ maˇ caˆ k'oˆ laˇ ve k'o, nawˬ hui awˬ bon uiˍ ve yoˬ. Awˬ lawn k'o, G'uiˬ sha ve awˬ me‸ awˬ hponˇ uiˍ ve Awˬ ha hpu lehˬ, nawˬ hui awˬ hk'oˆ chehˇ taˍ ve yoˬ. 15 Ya‸ hk'aˇ, chaw hta‸ tiˇ pehˍ ve, shu mawˇ hk'awˇ ve, awˬ haiˬ te ve, shu hta‸ sho‸ sha‸ tuˬ te ve, nawˬ hui awˬ hk'aw lo teˇ g'aˇ ka‸ chi teˇ hpaˍ hta‸ pa taw g'a hkanˍ ve teˇ ceuˬ taˇ hpeh‸ piˇ. 16 Nawˬ hui teˇ g'aˇ g'aˇ Hkri‸ yaˇ hpeh‸ ve pa taw g'a tu‸ g'a hkanˍ ve k'o, taˇ ya‸ taw. Awˬ meh chi hta‸ pa taw g'a hkanˍ ve teˇ yanˇ G'uiˬ sha hta‸ chiˇ uiˍ chiˇ mvuh-o. 17 Awˬ lawn k'o, G'uiˬ sha suhˉ tanˬ jehˬ tuˬ ve awˬ yanˇ gaˬ la peuˬ. Yawˇ ve yehˬ yaˇ k'a yaˇ hui hta‸ awˉ lawˉ suhˉ jehˬ ve yoˬ. Yawˇ ngaˬ hui hta‸ awˉ lawˉ suhˉ jehˬ ve k'o, G'uiˬ sha ve ha lehˬ ve bon hkawˇ hta‸ maˇ na yuˬ ve chaw hui awˬ pon, awˬ leh meuˇ hk'aˬ hk'e hpeh‸ la tuˬ ve le. 18 Hteˇ ve cawˇ ve chaw lehˬ, htaiˍ hk'aw‸ g'a tuˬ haˍ ve k'o, G'uiˬ sha hta‸ maˇ yawˆ yan ve venˇ baˆ yaˇ lehˬ, hk'aˬ hk'e te ponˬ hpeh‸ tuˬ ve le. 19 Hk'e te leh, G'uiˬ sha ve a loˍ hta‸ te ve pa taw g'a tu‸ g'a hkanˍ ve chaw teˇ hpaˍ lehˬ, awˬ g'uˇ suhˍ hpawˇ ka‸ da‸ ve hta‸ te cawˇ sheˍ ve yoˬ. Chi hk'oˆ ka‸, ka ti‸ yeˬ ve te hpanˍ shehˍ hpaˇ hta‸ a shu yawˇ ve co ha a‸ piˇ-oˆ.

1 Peˍtruˆ 5

1 Nawˬ hui awˬ hoˉ chaw mawˇ teˇ hpaˍ hta‸ ngaˬ lawˬ hkawˉ gaˇ ve yoˬ. Ngaˬ htawˇ nawˬ hui hk'e awˬ hoˉ chaw mawˇ hpeh‸ leh, Hkri‸ g'a tu‸ g'a hkanˍ ve hta‸ ngaˬ awˬ to g'a mawˬ ve yoˬ. Tawˆ la tuˬ ve awˬ me‸ awˬ hponˇ hta‸ htawˇ ngaˬ g'a tuˬ yoˬ. 2 Nawˬ hui geh cawˬ ve G'uiˬ sha ve yawˬ awˬ moˍ hta‸ hk'a deh‸ ha‸ shaˉ-oˆ. Shu hkawˇ leuˉ maˇ g'a leh te ve teˇ ceuˬ taˇ hpeh‸ piˇ. Ha lehˬ ha k'a te-o. Hpu g'a gaˇ leh te ve ka‸ taˇ hpeh‸ piˇ. Nyi ma pfuhˇ leh te-o. 3 Nawˬ ve yawˬ awˬ moˍ awˬ hk'oˆ jawˇ mawˇ hk'e taˇ te. Ya‸ hk'aˇ, yawˬ awˬ moˍ mehˆ g'uˇ suhˍ henˇ kuiˬ jawˬ kuiˬ hpeh‸ piˇ-oˆ. 4 Chi hk'e te ve k'o, Yawˬ hawˉ shehˍ hpaˇ awˬ hoˉ teˇ g'aˇ k'aw‸ tawˆ la ve teˇ yanˇ, maˇ nawˍ k'ai puiˉ ve, awˬ me‸ awˬ hponˇ cawˬ ve shi uˉ tcuhˍ hta‸ nawˬ hui g'a tuˬ yoˬ. 5 Oˇ ve hk'a shuˍ shuˍ yaˇ nehˬ teˇ hpaˍ-oˬ, awˬ hoˉ chaw mawˇ teˇ hpaˍ awˬ hawˉ lo chehˇ-oˆ. Chi hk'oˆ ka‸, nawˬ hui hk'a peu-eˬ teˇ g'aˇ leh teˇ g'aˇ awˬ ceˬ hk'e nyi ma nehˬ lehˍ taˍ-o‸. Awˬ lawn k'o, G'uiˬ sha lehˬ nyi ma uiˍ ve chaw teˇ hpaˍ hta‸ tawˍ taˍ ve yoˬ. Ya‸ hk'aˇ, nyi ma nuˇ nehˬ ve chaw teˇ hpaˍ hta‸ awˬ bon piˇ ve yoˬ. 6 Hk'e te leh, G'uiˬ sha ve uiˍ jaˇ ve kanˇ paˆ awˬ hawˉ lo nyi ma nehˬ lehˍ taˍ-o‸. Awˬ yanˇ cawˇ ve teˇ yanˇ htaˇ, yawˇ nawˬ hui hta‸ taˍ uiˍ taˍ mvuh laˇ tuˬ yoˬ. 7 G'uiˬ sha nawˬ hui awˬ pon dawˇ nyi puiˉ ve pa taw, nawˬ hui ve dawˇ haˍ dawˇ hkiˉ tuˬ hk'a peu-eˬ yawˇ hta‸ chiˇ a‸ piˇ-oˆ. 8 Shaˍ ti‸ te leh hk'a deh‸ shaw taˍ-o‸. Nawˬ hui ve canˇ paˍ neˇ haiˬ lehˬ, kuˬ chehˇ ve laˇ caˬ shiˉ hk'a shuˍ shuˍ, shu hta‸ che‸ caˇ tuˬ ca caw nyi toˇ chehˇ ve yoˬ. 9 Yonˍ yeˬ ve awˬ hk'aw lo neˇ haiˬ hta‸ tawˍ taˍ-o‸. Miˬ guiˬ hk'oˆ chehˇ ve nawˬ hui ve awˬ viˉ awˬ nyi teˇ hpaˍ htawˇ, chi hk'a shuˍ shuˍ g'a tu‸ g'a hkanˍ chehˇ ve hta‸ nawˬ hui shiˍ ve yoˬ. 10 Nawˬ hui teˇ hkui teˇ yanˇ g'a tu‸ g'a hkanˍ peuˬ hk'aw‸ nawˉ, awˬ bon hk'a biˇ cawˬ ve G'uiˬ sha lehˬ, nawˬ hui hta‸ biˇ la piˇ, yeˬ la piˇ leh awˬ g'aˇ cawˬ la piˇ tuˬ yoˬ. Co co taiˍ taiˍ yawˇ ve awˬ me‸ awˬ hponˇ hta‸ nawˬ hui g'a tuˬ, G'uiˬ sha lehˬ Hkri‸ hta‸ cuˇ leh nawˬ hui hta‸ kuˬ taˍ ve yoˬ. 11 G'uiˬ sha hta‸ co co taiˍ taiˍ awˬ me‸ awˬ hponˇ leh kanˇ paˆ cawˬ piˇ-oˆ. A menˬ. 12 Ka ti‸ yeˬ ve teh‸ ngaˬ shawˍ taˍ ve awˬ viˉ awˬ nyi Siˍlaˍnuˆ hta‸ ngaˬ cuˇ leh nawˬ hui hta‸ ngeh ve li‸ chi teˇ k'oˆ bvuh‸ laˇ ve yoˬ. Nawˬ hui hta‸ awˬ g'aˇ pe‸ laˇ leh, G'uiˬ sha ve awˬ tehˬ awˬ na ve awˬ bon awˬ lawn hta‸ shaˉ hkiˆ hkanˍ tuˬ, li‸ chi bvuh‸ laˇ ve yoˬ. G'uiˬ sha ve awˬ bon chi awˬ hk'aw lo nawˬ hui yeˬ chaweh chehˇ taˍ-o‸. 13 Baˍbuˍlonˍ venˇ awˬ hk'aw chehˇ ve, nawˬ hui hk'a shuˍ shuˍ leuˆ yuˬ taˍ ve awˬ moˍ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Ngaˬ ve yaˇ Maˍkuˆ ka‸, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. 14 Nawˬ hui teˇ g'aˇ leh teˇ g'aˇ ha‸ pehnˇ ve awˬ hk'aw lo boˆ nu da‸ leh la‸ sheh caˉ da‸-o‸. Hkri‸ awˬ hk'aw lo chehˇ ve nawˬ hui hk'a peu-eˬ awˬ hk'oˆ dawˇ sha gaˇ sha tuˬ cawˬ piˇ-oˆ.

2 Peˍtruˆ 1

1 Ngaˬ lehˬ, Yeˍsuˆ Hkri‸ ve awˬ ceˬ leh tcuh yaˇ Siˉmonˍ Peˍtruˆ yoˬ. Ngaˬ hui yonˍ ve hk'a shuˍ shuˍ, awˬ hpfuhˇ hk'aˆ ve yonˍ ve nyi ma cawˬ ve nawˬ hui hta‸ li‸ bvuh‸ laˇ ve yoˬ. Ngaˬ hui yonˍ ve nyi ma cawˬ ve lehˬ, ngaˬ hui ve G'uiˬ sha hpeh‸ ve Htaiˍ hk'aw‸ paˍ Yeˍsuˆ Hkri‸ yawˇ hteˇ ve cawˇ ve hta‸ pa taw yoˬ. 2 G'uiˬ sha hta‸ ka‸, ngaˬ hui ve Jawˇ mawˇ Yeˍsuˆ hta‸ ka‸ shiˍ ve awˬ hk'aw lo, awˬ bon awˬ shinˉ leh dawˇ sha gaˇ sha tuˬ nawˬ hui awˬ hk'oˆ maˇ la piˇ-oˆ. 3 Ngaˬ hui co ha te‸ leh G'uiˬ sha hta‸ yawˆ yan hpeh‸ tuˬ, hk'a loˍ ve hk'a peu-eˬ G'uiˬ sha yawˇ ve kanˇ paˆ hta‸ cuˇ leh ngaˬ hui hta‸ pe‸ laˇ peuˬ. Yawˇ chi hk'e te ve lehˬ, ngaˬ hui yawˇ hta‸ shiˍ ve pa taw yoˬ. Yawˇ ve awˬ me‸ awˬ hponˇ leh biˇ jaˇ ve kanˇ paˆ awˬ hk'aw lo ngaˬ hui hta‸ yawˇ kuˬ yuˬ peuˬ. 4 Yawˇ ve awˬ hpfuhˇ hk'aˆ jaˇ leh uiˍ jaˇ ve ka ti‸ teˇ hpaˍ htawˇ, ngaˬ hui hta‸ pe‸ laˇ peuˬ. Awˬ suhˍ awˬ shaˍ a loˍ hta‸ pa taw, miˬ guiˬ hk'oˆ lo luˬ ve sheˆ ve cawˬ la ve yoˬ. Ka ti‸ oˇ ve teˇ hpaˍ hta‸ pa taw, luˬ ve sheˆ ve chi hta‸ nawˬ hui g'a ponˬ leh, G'uiˬ sha nyi ma taˍ ve hk'e nawˬ hui htawˇ taˍ g'a tuˬ yoˬ. 5 Chi hta‸ pa taw, g'aˇ hte‸ coˇ caˇ leh, nawˬ hui yonˍ ve teˇ ceuˬ awˬ hk'oˆ, da‸ ve awˬ liˇ cawˬ piˇ-oˆ. 6 Da‸ ve awˬ liˇ awˬ hk'oˆ, cuˇ yiˍ cawˬ piˇ-oˆ. Cuˇ yiˍ cawˬ ve awˬ hk'oˆ, a shu yawˇ awˬ to hta‸ g'aˇ puiˉ ve teˇ ceuˬ cawˬ piˇ-oˆ. A shu yawˇ awˬ to hta‸ g'aˇ puiˉ ve awˬ hk'oˆ, yeunˇ hkanˍ puiˉ ve teˇ ceuˬ cawˬ piˇ-oˆ. Yeunˇ hkanˍ puiˉ ve awˬ hk'oˆ, G'uiˬ sha hta‸ yawˆ yan puiˉ ve teˇ ceuˬ cawˬ piˇ-oˆ. 7 G'uiˬ sha hta‸ yawˆ yan puiˉ ve awˬ hk'oˆ, awˬ viˉ awˬ nyi hta‸ ha‸ ve teˇ ceuˬ cawˬ piˇ-oˆ. Awˬ viˉ awˬ nyi hta‸ ha‸ ve awˬ hk'oˆ, ha‸ da‸ pehnˇ da‸ ve cawˬ piˇ-oˆ. 8 Awˬ lawn k'o, chi teˇ hpaˍ nawˬ hui awˬ hk'aw lo cawˬ leh maˇ la ve k'o, ngaˬ hui ve Jawˇ mawˇ Yeˍsuˆ Hkri‸ hta‸ shiˍ ve awˬ hk'aw lo, nawˬ hui awˬ bon cawˬ ve chaw hpeh‸ leh, awˬ shiˍ maˇ maˇ naw‸ la tuˬ yoˬ. 9 Chi teˇ hpaˍ maˇ cawˬ ve chaw lehˬ, mehˆ cuˉ paˍ hk'e hpeh‸ leh, mehˆ hk'oˆ hta‸ ceh tiˉ mawˬ hpeh‸ ve yoˬ. Yawˇ ve venˇ baˆ awˬ piˍ teˇ hpaˍ hta‸ Yeˍsuˆ tsuhˇ hpu tsuhˇ kehˬ piˇ ve hta‸ yawˇ leunˇ k'ai peuˬ. 10 Chi hta‸ pa taw awˬ viˉ awˬ nyi teˇ hpaˍ-oˬ, G'uiˬ sha nawˬ hui hta‸ kuˬ yuˬ leuˆ yuˬ ve teˇ ceuˬ yeˬ la tuˬ g'aˇ hte‸ te-o. Chi hk'e te ve k'o, nawˬ hui teˇ pawˆ ka‸ maˇ paiˍ. 11 Hk'e te leh, ngaˬ hui ve Jawˇ mawˇ leh Htaiˍ hk'aw‸ paˍ Yeˍsuˆ Hkri‸ ve co co taiˍ taiˍ yeˬ ve mvuhˇ miˬ awˬ hk'aw lo, nawˬ hui g'aˇ shehˍ hpaˇ hk'e awˬ me‸ awˬ hponˇ uiˍ ve awˬ hk'aw lo g'a lo‸-e tuˬ gu taˍ laˇ tuˬ yoˬ. 12 Hk'e te leh, chi teˇ hpaˍ hta‸ nawˬ hui shiˍ leh, hteˇ ve cawˇ ve tawˇ hkawˇ awˬ hk'aw lo chehˇ yeˬ ve htawˇ, chi teˇ hpaˍ nawˬ hui hta‸ dawˇ nawˇ piˇ tuˬ, ngaˬ hk'aˬ htaˆ ka‸ dawˇ taˍ ve yoˬ. 13 Chi teˇ hpaˍ hta‸ nawˬ hui maˇ g'a leunˇ k'ai tuˬ, ngaˬ awˬ to te‸ chehˇ ve ceh ceh, nawˬ hui hta‸ dawˇ nawˇ piˇ cawˇ ve yoˬ teh‸ ngaˬ dawˇ taˍ ve yoˬ. 14 Ngaˬ hui ve Jawˇ mawˇ Yeˍsuˆ Hkri‸ ngaˬ hta‸ hpeu‸ maˍ laˇ ve hk'a shuˍ shuˍ, maˇ maw maw ngaˬ ve awˬ to chi hta‸ g'a baˬ taˉ tuˬ ngaˬ shiˍ ve yoˬ. 15 Miˬ guiˬ hk'oˆ lo ngaˬ tawˆ k'ai peuˬ hk'aw‸ nawˉ htawˇ, chi teˇ hpaˍ hta‸ nawˬ hui hk'aˬ htaˆ ka‸ dawˇ nawˇ tuˬ, chi beu‸ ngaˬ g'aˇ hte‸ te tuˬ yoˬ. 16 Awˬ lawn k'o, ngaˬ hui ve Jawˇ mawˇ Yeˍsuˆ Hkri‸ ve kanˇ paˆ awˬ lawn leh yawˇ k'aw‸ ya‸ la tuˬ ve awˬ lawn ngaˬ hui lehˬ nawˬ hui hta‸ k'aoˍ maˍ laˇ htaˇ, cuˇ yiˍ hta‸ yehˇ leh ca dawˇ k'oˆ ve kaˇ puiˇ kaˇ lao hkawˇ ceh hpeh‸ ve maˇ heˆ. Ya‸ hk'aˇ, yawˇ ve awˬ me‸ awˬ hponˇ hta‸ ngaˬ hui mehˆ shiˍ g'a mawˬ ve chaw hpeh‸ ve yoˬ. 17 Awˬ pa G'uiˬ sha yawˇ hta‸ taˍ uiˍ taˍ mvuh leh awˬ me‸ awˬ hponˇ piˇ ve hta‸ ngaˬ hui g'a mawˬ ve yoˬ. Chaw chi lehˬ, ngaˬ ha‸ jaˇ ve Yaˇ hpu yoˬ. Yawˇ hta‸ ngaˬ nyi hk'aˇ suh ve yoˬ teh‸, awˬ me‸ awˬ hponˇ hk'a biˇ cawˬ shehˍ hpaˇ yawˇ hta‸ chi hk'e k'oˆ piˇ ve tawˇ hkawˇ hta‸ ngaˬ hui g'a kaˇ ve yoˬ. 18 Da‸ kehˬ ve hk'aw oˇ ve teˇ shiˍ awˬ hk'oˆ yawˇ geh chehˇ ve teˇ yanˇ, tawˇ hkawˇ oˇ ve mvuhˇ naw ma lo tawˆ la ve hta‸ ngaˬ hui g'a kaˇ ve yoˬ. 19 Chi hta‸ pa taw, G'uiˬ sha ve tcuh kaˍ paˍ hui ve tawˇ hkawˇ hta‸ ngaˬ hui leuˉ leh yonˍ hpeh‸ ve yoˬ. Nawˬ hui ve nyi ma awˬ hk'aw lo mvuhˇ htiˇ la leh peuˬ tawˆ tawˆ la htaˇ hk'a gaˬ, naˆ ho‸ ve awˬ hk'aw lo awˬ g'euˆ ba chehˇ ve kawˆ faiˇ hta‸ cuˇ ve hk'a shuˍ shuˍ, G'uiˬ sha ve tcuh kaˍ paˍ hui ve hkawˇ hta‸ hk'a deh‸ na yuˬ leh cuˇ cawˇ ve yoˬ. 20 Li‸ hpu hk'aw cawˬ ve G'uiˬ sha ve tcuh kaˍ paˍ ve tawˇ, hk'aˬ ve teˇ hkawˇ maˇ k'oˆ, a shu yawˇ hk'aˇ yawˇ tcuhˉ kuiˬ hta‸ dawˇ tawˆ hpeh‸ ve maˇ heˆ teh‸ awˉ lawˉ shiˍ-o‸. 21 Awˬ lawn k'o, G'uiˬ sha ve tcuh kaˍ paˍ teˇ hpaˍ lehˬ, yawˇ hui hk'aˇ yawˇ hui ve a loˍ hta‸ pa taw yaw ve maˇ heˆ. Ya‸ hk'aˇ, da‸ ve kehˬ ve Awˬ ha hpu yawˇ hui hta‸ dawˇ pawnˍ piˇ leh, yawˇ hui teˇ caˉ G'uiˬ sha ve tawˇ hkawˇ k'aw‸ yaw ve yoˬ.

2 Peˍtruˆ 2

1 Ya‸ hk'aˇ, Yuˇda‸ chaw awˬ hk'aw lo maˇ heˆ heˆ ve tcuh kaˍ paˍ teˇ hpaˍ tawˆ la jaw ve hk'e, nawˬ hui awˬ hk'aw lo htawˇ maˇ heˆ heˆ ve saˍ la‸ teˇ hpaˍ tawˆ la tuˬ yoˬ. Yawˇ hui lehˬ, shu hta‸ te luˬ te hpaˆ puiˉ ve yonˍ hk'aˇ teˇ hpaˍ hta‸ ca hk'awˇ keu la ve yoˬ. Yawˇ hui hta‸ vuiˬ yuˬ peuˬ ve Awˬ Jawˇ mawˇ hta‸ chiˇ baˬ taˉ leh, a shu yawˇ awˬ to haˆ haˆ luˬ k'ai sheˆ k'ai tuˬ, yawˇ hui te chehˇ ve yoˬ. 2 Chaw laiˉ g'aˇ yawˇ hui ve cha‸ chiˆ ve awˬ liˇ awˬ hk'aˇ suh k'ai tuˬ yoˬ. Yawˇ hui hta‸ pa taw, hteˇ ve cawˇ ve ya‸ k'aw hta‸ shu maˇ shawˍ maˇ caˆ k'oˆ tuˬ yoˬ. 3 Yawˇ hui lehˬ, mawˇ jeˬ hta‸ sheˉ lai jaˇ ve pa taw, nawˬ hui hta‸ heˍ leh, yawˇ hui awˬ pon awˬ bon tawˆ la tuˬ ceh nawˬ hui hta‸ awˬ chawˇ hk'e te ve yoˬ. Ya‸ hk'aˇ, aˬ sho-eˬ htaˇ ka‸ G'uiˬ sha yawˇ hui hta‸ suhˉ taˆ cheˆ taˍ ve lehˬ, hk'e leˇ hpeh‸ tuˬ ve maˇ heˆ. Yawˇ hui awˬ tehˬ awˬ na luˬ k'ai sheˆ k'ai tuˬ yoˬ. 4 Venˇ baˆ te ve mvuhˇ naw ma tcuh yaˇ hui hta‸ ka‸ G'uiˬ sha maˇ ponˬ piˇ. Yawˇ hui hta‸ moˬ naˆ ho‸ awˬ hk'aw lo baˬ keu leh, suhˉ jehˬ ve awˬ nyi hk'a gaˬ naˆ ho‸ jaˇ kuiˬ lo yawˇ hui hta‸ haw taˍ ve yoˬ. 5 Aˬ sho-eˬ htaˇ ve miˬ guiˬ yaˇ hui hta‸ ka‸ G'uiˬ sha maˇ ponˬ piˇ. Yawˇ hta‸ oˉ k'oˍ maˇ pui ve chaw teˇ hpaˍ hta‸ G'uiˬ sha iˉ kaˆ htonˍ pehˍ piˇ ve yoˬ. Ya‸ hk'aˇ, hteˇ ve cawˇ ve awˬ lawn hta‸ bon maˍ ve Noˉa‸ leh yawˇ geh chaw suhˍ g'aˇ hta‸ ceh tiˉ G'uiˬ sha ponˬ piˇ taˍ ve yoˬ. 6 Sawˉdonˍ venˇ leh Gawˇmawˇra‸ venˇ hta‸ htawˇ, G'uiˬ sha hk'aw‸ laˉ hpeh‸ la piˇ ve yoˬ. Yawˇ oˇ hk'e te ciˍ yanˍ piˇ ve lehˬ, awˬ hk'aw‸ nawˉ yawˇ hta‸ oˉ k'oˍ maˇ pui ve chaw hui awˬ pon henˇ kuiˬ jawˬ kuiˬ teh taˍ ve yoˬ. 7 Ya‸ hk'aˇ, hteˇ ve cawˇ ve Lawˇtaˍ teˇ g'aˇ hta‸ yawˇ ponˬ piˇ ve yoˬ. Chaw haiˬ teˇ hpaˍ cha‸ chiˆ ve awˬ liˇ awˬ hk'aˇ hta‸ te ve pa taw, Lawˇtaˍ lehˬ dawˇ haˍ gaˇ haˍ jaˇ ve yoˬ. 8 (Awˬ lawn k'o, hteˇ ve cawˇ ve chaw oˇ ve teˇ g'aˇ lehˬ, yawˇ hui geh chehˇ ve teˇ yanˇ, yawˇ hui ve haiˬ ve kanˉ hta‸ g'a mawˬ g'a kaˇ ve pa taw, teˇ nyi le le yawˇ ve hteˇ ve cawˇ ve nyi ma awˬ hk'aw lo tu‸ hkanˍ jaˇ ve yoˬ.) 9 G'uiˬ sha hta‸ yawˆ yan ve chaw teˇ hpaˍ lehˬ, beˬ ve lawˇ ve hta‸ g'a hpuˇ htaˇ, yawˇ hui hta‸ hk'aˬ hk'e te ponˬ piˇ tuˬ, Jawˇ mawˇ G'uiˬ sha shiˍ taˍ ve yoˬ. Suhˉ jehˬ ve awˬ nyi hk'a gaˬ, maˇ hteˇ maˇ cawˇ ve chaw hui hta‸ hk'aˬ hk'e te ciˍ yanˍ piˇ tcuhˉ taˍ tuˬ htawˇ yawˇ shiˍ taˍ ve yoˬ. 10 Cha‸ chiˆ ve hta‸ sheˉ lai ve awˬ hk'aw lo, awˬ suhˍ awˬ shaˍ a loˍ awˬ hk'aˇ suh te k'ai leh jawˇ mawˇ teˇ hpaˍ awˬ hawˉ maˇ chehˇ gaˇ ve chaw hui hta‸ leuˉ leh ciˍ yanˍ piˇ tuˬ yoˬ. Chaw chi teˇ hpaˍ lehˬ, nyi ma ha‸ hanˉ leh a shu yawˇ ve a loˍ awˬ hk'aˇ suh tiˉ te ve yoˬ. Awˬ me‸ awˬ hponˇ uiˍ paˍ teˇ hpaˍ hta‸ maˇ shawˍ maˇ caˆ k'oˆ tuˬ yawˇ hui maˇ kawˆ puiˉ. 11 Mvuhˇ naw ma tcuh yaˇ hui lehˬ, yawˇ hui a‸ kehˉ awˬ g'aˇ leh kanˇ paˆ uiˍ ve htawˇ, Jawˇ mawˇ G'uiˬ sha mehˆ g'uˇ suhˍ chaw oˇ ve teˇ hpaˍ hta‸ maˇ shawˍ maˇ caˆ maˇ te, venˇ baˆ ka‸ maˇ taˍ. 12 Chaw oˇ ve teˇ hpaˍ lehˬ, hpeh yuˬ leh tiˇ pehˍ tuˬ awˬ pon paw la ve, maˇ dawˇ shiˍ puiˉ ve to nuˇ to shaˆ hk'e ceh tiˉ hpeh‸ ve yoˬ. Yawˇ hui maˇ shiˍ ve awˬ ceuˬ teˇ hpaˍ hta‸ ka‸, maˇ shawˍ maˇ caˆ k'oˆ ve yoˬ. Yawˇ hui hk'aˇ yawˇ hui haiˬ ve awˬ hk'aw lo luˬ k'ai sheˆ k'ai leh, 13 maˇ hteˇ maˇ cawˇ ve kanˉ teˇ hpaˍ awˬ pon maˇ hteˇ maˇ cawˇ ve hta‸ g'a hkanˍ tuˬ yoˬ. Yawˇ hui lehˬ, mvuhˇ law‸ k'aw htaˇ ka‸ te ponˬ te leuˉ ve teˇ ceuˬ hta‸ ha lehˬ ve yoˬ. Nawˬ hui geh yawˇ hui pawehˇ te leh ha lehˬ tuˬ te ponˬ te leuˉ ve yoˬ. Yawˇ hui lehˬ, nawˬ hui ve awˬ to hta‸ cawˬ taˍ ve cha‸ chiˆ ve awˬ kuiˉ awˬ haiˇ hpeh‸ ve hk'e yoˬ. 14 Yawˇ hui ve mehˆ shiˍ lehˬ, haˉ chawˇ haˉ paˆ te ve yaˇ miˇ teˇ hpaˍ hta‸ ceh tiˉ nyi gaˇ ve yoˬ. Yawˇ hui venˇ baˆ te ve teˇ ceuˬ hta‸ maˇ bvuhˆ puiˉ. Nyi ma maˇ yeˬ ve chaw hui hta‸ yawˇ hui beˬ yuˬ puiˉ leh, shu mawˇ shu jeˬ hta‸ yawˇ hui sheˉ lai puiˉ jaˇ ve yoˬ. Yawˇ hui lehˬ, hkeu taˍ ve awˬ yaˇ awˬ duˬ hpeh‸ ve yoˬ. 15 Hteˇ ve ya‸ k'aw hta‸ yawˇ hui baˬ taˉ leh ya‸ k'aw ya‸ k'ai peuˬ. Bawˉsawˍ ve yaˇ Baˍlanˍ ve ya‸ k'aw awˬ hk'aˇ suh yawˇ hui g'a‸ k'ai peuˬ. 16 Baˍlanˍ oˇ ve teˇ g'aˇ lehˬ, maˇ hteˇ maˇ cawˇ ve kanˉ awˬ hpfuhˇ hta‸ sheˉ lai leh, yawˇ ve venˇ baˆ hta‸ pa taw deˇ maˍ ve hta‸ yawˇ g'a hkanˍ ve yoˬ. Hk'aˬ hk'e le teh‸ k'oˆ k'o, tawˇ maˇ yaw puiˉ ve piˉ laˬ teˇ hkeh lehˬ, chaw yaˇ hk'a shuˍ shuˍ tawˇ yaw leh, tcuh kaˍ paˍ Baˍlanˍ g'uˇ ve hta‸ tawˍ taˍ ve yoˬ. 17 Chaw oˇ ve teˇ hpaˍ lehˬ, iˉ kaˆ fiˍ k'ai peuˬ ve g'uiˬ tuˇ hk'e hpeh‸ leh, mvuhˇ haw meuˆ chiˇ veu ve moˬ hk'e hpeh‸ ve yoˬ. Yawˇ hui awˬ pon naˆ ho‸ jaˇ ve chehˇ kuiˬ gu taˍ peuˬ. 18 Awˬ lawn k'o, awˬ bon maˇ cawˬ ve tawˇ uiˍ tawˇ mvuh teˇ hpaˍ hta‸ yawˇ hui yaw ve yoˬ. Ya‸ k'aw ya‸ ve chaw teˇ hpaˍ awˬ hk'aw lo ponˬ tawˆ la gehˇ sheˍ ve chaw hui hta‸, awˬ suhˍ awˬ shaˍ a loˍ te ponˬ te leuˉ ve teˇ ceuˬ hta‸ yawˇ hui yehˇ leh k'aw‸ beˬ yuˬ ve yoˬ. 19 Nawˬ hui shu awˬ ceˬ maˇ g'a k'aw‸ te teh‸ yawˇ hui shu hta‸ k'oˆ piˇ ve htawˇ, yawˇ hui awˬ to lehˬ luˬ ve sheˆ ve teˇ ceuˬ awˬ hawˉ lo awˬ ceˬ hpeh‸ chehˇ ve yoˬ. Awˬ lawn k'o, chaw yaˇ hta‸ g'aˇ ve hk'aˬ ve teˇ ceuˬ htawˇ maˇ k'oˆ, chaw yaˇ lehˬ oˇ ve awˬ hawˉ lo awˬ ceˬ hpeh‸ ve yoˬ. 20 Ngaˬ hui ve Jawˇ mawˇ leh Htaiˍ hk'aw‸ paˍ Yeˍsuˆ Hkri‸ hta‸ yawˇ hui shiˍ ve pa taw, miˬ guiˬ ve cha‸ chiˆ ve teˇ hpaˍ hta‸ g'a ponˬ ve yoˬ. Chi hk'e g'a ponˬ ve htawˇ, cha‸ chiˆ ve awˬ hk'aw lo yawˇ hui teˇ pawˆ k'aw‸ lo‸-e leh hkanˉ taˍ ve pa taw, cha‸ chiˆ ve oˇ ve yawˇ hui hta‸ g'aˇ ve k'o, awˬ leh meuˇ hpeh‸ la ve lehˬ awˬ hkuiˉ puiˍ htaˇ hpeh‸ ve a‸ kehˉ jaˇ tuˬ yoˬ. 21 Hteˇ ve cawˇ ve ya‸ k'aw hta‸ shiˍ peuˬ hk'aw‸ nawˉ, yawˇ hui hta‸ piˇ taˍ ve da‸ ve kehˬ ve awˬ liˇ tawˇ hkawˇ hta‸ yawˇ hui k'aw‸ hpfuhˆ baˬ taˉ ve k'o, hteˇ ve cawˇ ve ya‸ k'aw oˇ ve hta‸ shiˍ ve a‸ kehˉ maˇ shiˍ ve lehˬ, yawˇ hui awˬ pon leuˉ leh da‸ ve yoˬ. 22 Hpuiˇ teˇ ceuˬ lehˬ hpe‸ baˬ taˍ ve hta‸ k'aw‸ g'awˆ leh‸ leh, va‸ teˇ ceuˬ lehˬ yawˇ hta‸ iˉ kaˆ tsuhˇ piˇ peuˬ hk'aw‸ nawˉ yawˇ hk'aˇ yawˇ meh‸ g'uˬ k'aw‸ hehˉ ve yoˬ teh‸ k'oˆ taˍ ve chaw mawˇ hkawˇ chi teˇ hkawˇ lehˬ, yawˇ hui hta‸ cawˇ da‸ jaˇ ve yoˬ.

2 Peˍtruˆ 3

1 Ha‸ ve chaw teˇ hpaˍ-oˬ, ngaˬ nawˬ hui hta‸ bvuh‸ laˇ ve li‸ chi lehˬ, nyiˇ k'oˆ teˇ k'oˆ yoˬ. Li‸ chi ve nyiˇ k'oˆ k'oˆ awˬ hk'aw lo, nawˬ hui hteˇ lehˍ cawˇ lehˍ dawˇ nyi puiˉ tuˬ, ngaˬ nawˬ hui hta‸ dawˇ nawˇ laˇ ve yoˬ. 2 Ponˬ laˬ htaˇ G'uiˬ sha ve da‸ kehˬ ve tcuh kaˍ paˍ hui k'oˆ ve tawˇ hkawˇ teˇ hpaˍ nawˬ hui hta‸ dawˇ nawˇ laˇ ve yoˬ. Jawˇ mawˇ Htaiˍ hk'aw‸ paˍ lehˬ, nawˬ hui ve tcuh yaˇ hui hta‸ cuˇ leh piˇ taˍ ve tawˇ hkawˇ teˇ hpaˍ htawˇ nawˬ hui hta‸ dawˇ nawˇ laˇ ve yoˬ. 3 Awˉ lawˉ shiˍ cawˇ ve teˇ ceuˬ lehˬ chi hk'e yoˬ. Awˬ leh meuˇ ve awˬ yanˇ awˬ hk'aw lo, awˬ suhˍ awˬ shaˍ a loˍ awˬ hk'aˇ suh k'ai leh, k'oˆ guiˇ g'uiˬ guiˇ ve chaw teˇ hpaˍ tawˆ la tuˬ yoˬ. 4 Yawˇ hui chi hk'e k'oˆ tuˬ yoˬ. Jawˇ mawˇ Yeˍsuˆ k'aw‸ ya‸ la tuˬ ve teh‸ k'oˆ taˍ ve ka ti‸ tawˇ hkawˇ hk'aˬ hk'e k'ai le. Awˬ puˍ awˬ pi hui ka‸ suh peuˬ. Ya‸ hk'aˇ, miˬ guiˬ te hpanˍ htaˇ ka‸ tanˬ leh ya‸ nyi hk'a gaˬ, hk'a peu-eˬ hk'a shuˍ shuˍ hpeh‸ chehˇ ve maˇ heˆ laˇ teh‸ k'oˆ tuˬ yoˬ. 5 Aˬ sho-eˬ htaˇ ka‸ G'uiˬ sha ve tawˇ hkawˇ hta‸ pa taw mvuhˇ naw ma cawˬ la ve hta‸ yawˇ hui maˇ dawˇ nawˇ gaˇ. Chi hk'oˆ ka‸, G'uiˬ sha ve tawˇ hkawˇ hta‸ pa taw, iˉ kaˆ awˬ hk'aw lo miˬ guiˬ tawˆ la leh, iˉ kaˆ hta‸ pa taw miˬ guiˬ hpeh‸ la ve hta‸ ka‸ yawˇ hui maˇ shiˍ gaˇ ve yoˬ. 6 Oˇ htaˇ, miˬ guiˬ hta‸ iˉ kaˆ htonˍ piˇ leh, chaw yaˇ hui hta‸ te luˬ te sheˆ piˇ ve yoˬ. 7 G'uiˬ sha ve tawˇ hkawˇ oˇ ve lehˬ, chi beuˬ cawˬ taˍ ve mvuhˇ naw ma leh miˬ guiˬ hta‸ aˬ miˍ tuˉ baˬ tuˬ ve awˬ pon leh, G'uiˬ sha hta‸ maˇ yawˆ maˇ yan ve chaw teˇ hpaˍ hta‸ suhˉ jehˬ leh te luˬ ve teˇ nyi hk'a gaˬ, mvuhˇ naw ma leh miˬ guiˬ hta‸ yawˇ ve tawˇ hkawˇ ha‸ shaˉ chehˇ taˍ ve yoˬ. 8 Ha‸ ve chaw teˇ hpaˍ-oˬ, Jawˇ mawˇ G'uiˬ sha lehˬ teˇ nyi hta‸ teˇ hinˉ hk'aw‸ hk'e shawˍ leh, teˇ hinˉ hk'aw‸ hta‸ teˇ nyi hk'e shawˍ ve hta‸ nawˬ hui taˇ leunˇ. 9 Jawˇ mawˇ G'uiˬ sha ka ti‸ te taˍ ve hk'e biˇ la tuˬ yawˇ naiˇ jaˇ law teh‸ chaw teˇ hpaˍ hpaˍ dawˇ ve yoˬ. Ya‸ hk'aˇ, ka ti‸ biˇ la tuˬ yawˇ naiˇ ve maˇ heˆ. Chaw hk'a peu-eˬ venˇ baˆ hta‸ dawˇ hpfuhˆ leh teˇ g'aˇ ka‸ maˇ g'a luˬ k'ai tuˬ yawˇ heuˆ gaˇ ve pa taw, yawˇ nawˬ hui hta‸ yeunˇ hkanˍ chehˇ ve teˇ ceuˬ yoˬ. 10 Chaw hk'awˇ chaw naˆ laˬ ve hk'e, Jawˇ mawˇ Yeˍsuˆ ve awˬ nyi gaˬ la tuˬ yoˬ. Oˇ ve teˇ nyi awˬ hk'aw lo, mvuhˇ naw ma lehˬ awˬ hkawˇ bvuhˬ chaweh te leh mehˉ k'ai tuˬ yoˬ. Awˬ ceuˬ hk'a peu-eˬ ve aˬ miˍ chiˆ jaˇ leh kuiˬ k'ai tuˬ yoˬ. Miˬ guiˬ leh miˬ guiˬ awˬ hk'oˆ hk'a te taˍ ve kanˉ hk'a peu-eˬ hta‸ aˬ miˍ to‸ baˬ tuˬ yoˬ. 11 Chi hk'a peu-eˬ kuiˬ k'ai tuˬ ve hta‸ pa taw, nawˬ hui lehˬ da‸ kehˬ ve awˬ liˇ awˬ hk'aˇ hta‸ tiˉ te leh, G'uiˬ sha hta‸ yawˆ yan ve chaw hpeh‸ keunˍ hpeh‸ cawˇ ve maˇ heˆ laˇ. 12 Nawˬ hui lehˬ G'uiˬ sha ve awˬ nyi hta‸ law taˍ leh dawˇ law chehˇ ve yoˬ. Awˬ nyi oˇ ve hta‸ pa taw, mvuhˇ naw ma hta‸ aˬ miˍ to‸ baˬ leh, awˬ ceuˬ hk'a peu-eˬ ve aˬ miˍ chiˆ jaˇ leh kuiˬ k'ai tuˬ yoˬ. 13 Ya‸ hk'aˇ, G'uiˬ sha yawˇ ka ti‸ cawˬ taˍ ve hk'e, mvuhˇ naw ma awˬ suhˉ leh miˬ guiˬ awˬ suhˉ cawˬ la tuˬ ve hta‸ ngaˬ hui dawˇ law chehˇ ve yoˬ. Oˇ kaˬ lo hteˇ ve cawˇ ve awˬ ceuˬ ceh tiˉ cawˬ tuˬ yoˬ. 14 Hk'e te leh ha‸ ve chaw teˇ hpaˍ-oˬ, nawˬ hui chi teˇ hpaˍ hta‸ dawˇ law chehˇ ve hta‸ pa taw, yawˇ mehˆ g'uˇ suhˍ cha‸ chiˆ ve leh awˬ kuiˉ awˬ haiˇ maˇ g'a cawˬ tuˬ leh, dawˇ sha gaˇ sha ve nyi ma g'a cawˬ tuˬ, coˇ caˇ leh te-o. 15 Ngaˬ hui ve Jawˇ mawˇ Yeˍsuˆ yeunˇ hkanˍ chehˇ ve lehˬ, chaw yaˇ htaiˍ hk'aw‸ g'a tuˬ ve awˬ pon yeunˇ hkanˍ chehˇ ve teh‸ dawˇ-oˆ. Ngaˬ hui ha‸ ve awˬ viˉ awˬ nyi Pawˇlu‸ htawˇ, yawˇ cuˇ yiˍ g'a ve hk'e, awˬ lawn chi teˇ hpaˍ nawˬ hui hta‸ li‸ bvuh‸ laˇ ve yoˬ. 16 Yawˇ ve li‸ hk'a peu-eˬ awˬ hk'aw lo awˬ lawn chi teˇ hpaˍ hta‸ yawˇ bvuh‸ taˍ ve yoˬ. Li‸ oˇ ve teˇ hpaˍ awˬ hk'aw lo shiˍ haˍ jaˇ ve awˬ lawn teˇ hpaˍ hpaˍ htawˇ cawˬ ve yoˬ. Maˇ shiˍ puiˉ leh nyi ma maˇ yeˬ puiˉ ve chaw teˇ hpaˍ lehˬ, yawˇ ve tawˇ hkawˇ hta‸ maˇ k'oˆ, awˬ kaˍ awˬ nu Li‸ hpu tawˇ hkawˇ teˇ hpaˍ hta‸ maˇ k'oˆ, yuˬ hpfuhˆ ve yoˬ. Yawˇ hui chi hk'e te ve hta‸ pa taw, g'a luˬ g'a sheˆ tuˬ yoˬ. 17 Hk'e te leh ha‸ ve chaw teˇ hpaˍ-oˬ, awˬ lawn chi ve hta‸ awˉ lawˉ htaˇ ka‸ nawˬ hui shiˍ taˍ peuˬ ve hta‸ pa taw, haiˬ ve chaw teˇ hpaˍ lehˬ yawˇ hui te ya‸ ve awˬ hk'aˇ suh nawˬ hui hta‸ maˇ g'a sheh k'ai tuˬ shaˍ ti‸ taˍ-o‸. Nawˬ hui shaˍ ti‸ maˇ taˍ k'o, nawˬ hui nyi ma yeˬ taˍ ve teˇ ceuˬ lehˬ luˬ k'ai tuˬ yoˬ. 18 Ngaˬ hui ve Jawˇ mawˇ leh Htaiˍ hk'aw‸ paˍ Yeˍsuˆ Hkri‸ ve awˬ bon awˬ hk'aw lo leh yawˇ hta‸ shiˍ ve teˇ ceuˬ awˬ hk'aw lo, nawˬ hui uiˍ la piˇ-oˆ. Chi beu‸ ka‸ te leh co co taiˍ taiˍ yawˇ hta‸ chiˇ uiˍ chiˇ mvuh piˇ-oˆ. A menˬ.

1 Yoˇhanˬ 1

1 Awˬ hkuiˉ puiˍ htaˇ ka‸ cawˬ taˍ ve, co ha te‸ piˇ lawˬ ve tawˇ hkawˇ awˬ lawn ngaˬ hui nawˬ hui hta‸ bvuh‸ laˇ ve yoˬ. Tawˇ hkawˇ oˇ ve hta‸ ngaˬ hui g'a kaˇ leh, mehˆ shiˍ htawˇ g'a mawˬ peuˬ ve yoˬ. Tawˇ hkawˇ oˇ ve hta‸ ngaˬ hui hk'a deh‸ nyi leh, g'a htawˇ g'a yuˬ nyi jaw peuˬ ve yoˬ. 2 Co ha te‸ ve oˇ ve hk'a tawˍ lehˆ tawˆ la ve hta‸ ngaˬ hui g'a mawˬ leh, oˇ ve awˬ lawn shaˉ hkiˆ hkanˍ ve yoˬ. Peuˬ leh, Awˬ pa geh cawˬ ve co ti‸ ha ti‸ teˇ ceuˬ yawˇ ngaˬ hui hta‸ hpeu‸ maˍ laˇ leh, ngaˬ hui nawˬ hui hta‸ k'aw‸ k'aoˍ maˍ laˇ ve yoˬ. 3 Nawˬ hui htawˇ ngaˬ hui geh awˬ chawˇ g'a te da‸ tuˬ, ngaˬ hui g'a mawˬ g'a kaˇ peuˬ ve teˇ hpaˍ nawˬ hui hta‸ k'aoˍ maˍ laˇ ve yoˬ. Ngaˬ hui awˬ chawˇ te da‸ ve lehˬ, Awˬ pa leh yawˇ ve Yaˇ hpu Yeˍsuˆ Hkri‸ geh awˬ chawˇ te da‸ ve teˇ ceuˬ hpeh‸ ve yoˬ. 4 Ngaˬ hui ha lehˬ ve biˇ la tuˬ, awˬ lawn chi teˇ hpaˍ nawˬ hui hta‸ bvuh‸ feu laˇ ve yoˬ. 5 Yawˇ geh ngaˬ hui g'a kaˇ leh nawˬ hui hta‸ k'aoˍ maˍ laˇ ve yawˇ ve tawˇ hkawˇ lehˬ chi hk'e yoˬ. G'uiˬ sha lehˬ awˬ g'euˆ hpeh‸ leh, yawˇ awˬ hk'aw lo naˆ ho‸ ve a ciˉ ka‸ maˇ cawˬ. 6 Ngaˬ hui yawˇ geh awˬ chawˇ te da‸ chehˇ ve yoˬ teh‸ k'oˆ ve htawˇ, naˆ ho‸ ve awˬ hk'aw lo chehˇ taˍ ve k'o, ngaˬ hui heˍ chehˇ leh, hteˇ ve cawˇ ve hta‸ maˇ te. 7 Ya‸ hk'aˇ G'uiˬ sha lehˬ, awˬ g'euˆ awˬ hk'aw lo chehˇ ve hk'e ngaˬ hui htawˇ awˬ g'euˆ awˬ hk'aw lo chehˇ taˍ ve k'o, ngaˬ hui teˇ g'aˇ leh teˇ g'aˇ awˬ chawˇ te da‸ tuˬ yoˬ. Chi hk'oˆ ka‸, yawˇ ve Yaˇ hpu Yeˍsuˆ Hkri‸ ve awˬ suhˍ lehˬ, ngaˬ hui ve venˇ baˆ teˇ ceuˬ le le hta‸ tsuhˇ baˬ laˇ chehˇ ve yoˬ. 8 Ngaˬ hui venˇ baˆ maˇ cawˬ teh‸ k'oˆ ve k'o, ngaˬ hui a shu yawˇ awˬ to hta‸ heˍ leh, ngaˬ hui awˬ hk'aw lo hteˇ ve cawˇ ve teˇ ceuˬ maˇ cawˬ. 9 Ngaˬ hui a shu yawˇ ve venˇ baˆ teˇ hpaˍ hta‸ hpeu‸ maˍ ve k'o, ngaˬ hui ve venˇ baˆ hta‸ hpehˇ hk'a laˇ leh maˇ hteˇ maˇ cawˇ ve hk'a peu-eˬ hta‸ tsuhˇ baˬ laˇ tuˬ, yawˇ ka ti‸ yeˬ leh hteˇ ve cawˇ ve yoˬ. 10 Ngaˬ hui venˇ baˆ maˇ te jaw teh‸ k'oˆ ve k'o, G'uiˬ sha hta‸ ngaˬ hui heˍ paˍ meh piˇ leh, yawˇ ve tawˇ hkawˇ ngaˬ hui awˬ hk'aw lo maˇ cawˬ ve yoˬ.

1 Yoˇhanˬ 2

1 Ngaˬ ha‸ ve yaˇ teˇ hpaˍ-oˬ, nawˬ hui venˇ baˆ maˇ g'a te tuˬ awˬ lawn chi teˇ hpaˍ ngaˬ nawˬ hui hta‸ bvuh‸ laˇ ve yoˬ. Ya‸ hk'aˇ, teˇ g'aˇ g'aˇ venˇ baˆ te ve k'o, ngaˬ hui hta‸ ga laˇ shehˍ hpaˇ teˇ g'aˇ lehˬ Awˬ pa geh chehˇ taˍ ve yoˬ. Yawˇ lehˬ, hteˇ ve cawˇ ve awˬ shehˍ hpaˇ Yeˍsuˆ Hkri‸ yoˬ. 2 Ngaˬ hui ve venˇ baˆ hta‸ hpehˇ hk'a laˇ tuˬ awˬ pon, yawˇ lehˬ tanˇ tuˬ hpeh‸ ve yoˬ. Ya‸ hk'aˇ, ngaˬ hui awˬ pon ceh tiˉ maˇ heˆ. Miˬ guiˬ yaˇ hk'a peu-eˬ awˬ pon htawˇ hpeh‸ ve yoˬ. 3 Ngaˬ hui lehˬ, yawˇ piˇ taˍ ve tawˇ hkawˇ hta‸ na yuˬ leh te ve k'o, ngaˬ hui yawˇ hta‸ shiˍ ve yoˬ teh‸ hk'a deh‸ deh‸ g'a shiˍ ve yoˬ. 4 Ngaˬ yawˇ hta‸ shiˍ ve yoˬ teh‸ chaw teˇ g'aˇ g'aˇ k'oˆ ve htawˇ, yawˇ piˇ taˍ ve tawˇ hkawˇ hta‸ chaw oˇ ve teˇ g'aˇ maˇ na yuˬ ve k'o, yawˇ lehˬ chaw heˍ paˍ hpeh‸ leh, hteˇ ve cawˇ ve teˇ ceuˬ yawˇ awˬ hk'aw lo maˇ cawˬ. 5 Ya‸ hk'aˇ, Yeˍsuˆ Hkri‸ ve tawˇ hkawˇ hta‸ na yuˬ leh te ve chaw hk'aˬ ve teˇ g'aˇ maˇ k'oˆ, G'uiˬ sha hta‸ ha‸ ve teˇ ceuˬ yawˇ awˬ hk'aw lo awˬ tehˬ awˬ na biˇ la peuˬ. Ngaˬ hui yawˇ awˬ hk'aw lo chehˇ ve hta‸ ngaˬ hui chi hk'e g'a shiˍ ve yoˬ. 6 Ngaˬ yawˇ awˬ hk'aw lo chehˇ ve yoˬ teh‸ k'oˆ ve chaw lehˬ, Yeˍsuˆ te ve hk'e yawˇ htawˇ te cawˇ ve yoˬ. 7 Ha‸ ve chaw teˇ hpaˍ-oˬ, tawˇ piˇ ve awˬ suhˉ teˇ hkawˇ ngaˬ nawˬ hui hta‸ bvuh‸ laˇ ve maˇ heˆ. Awˬ hkuiˉ puiˍ htaˇ ka‸ nawˬ hui hta‸ piˇ leh, nawˬ hui geh cawˬ taˍ ve tawˇ awˬ piˍ hpeh‸ ve yoˬ. Piˇ taˍ ve tawˇ awˬ piˍ oˇ ve lehˬ, nawˬ hui g'a kaˇ jaw peuˬ ve tawˇ hpeh‸ ve yoˬ. 8 Ya‸ hk'aˇ htawˇ, tawˇ piˇ taˍ ve awˬ suhˉ teˇ hkawˇ ngaˬ nawˬ hui hta‸ bvuh‸ laˇ ve yoˬ. Tawˇ chi teˇ hkawˇ lehˬ, yawˇ awˬ hk'aw lo ka‸, nawˬ hui awˬ hk'aw lo ka‸, hteˇ ve cawˇ ve yoˬ. Awˬ lawn k'o, naˆ ho‸ ve teˇ ceuˬ lehˬ mehˉ k'ai chehˇ leh, hteˇ ve cawˇ ve awˬ g'euˆ lehˬ chi beu‸ ka‸ ba tawˆ la chehˇ ve yoˬ. 9 Awˬ g'euˆ awˬ hk'aw lo ngaˬ chehˇ ve yoˬ teh‸ chaw teˇ g'aˇ g'aˇ k'oˆ ve htawˇ, yawˇ ve awˬ viˉ awˬ nyi hta‸ canˇ chehˇ ve k'o, yawˇ lehˬ chi beu‸ hk'a gaˬ naˆ ho‸ ve awˬ hk'aw lo chehˇ taˍ sheˍ ve yoˬ. 10 A shu yawˇ ve awˬ viˉ awˬ nyi hta‸ ha‸ ve chaw teˇ g'aˇ lehˬ, awˬ g'euˆ awˬ hk'aw lo chehˇ taˍ leh, awˬ g'euˆ awˬ hk'aw lo hkui htiˇ poˬ kuiˬ maˇ cawˬ. 11 A shu yawˇ ve awˬ viˉ awˬ nyi hta‸ canˇ ve chaw teˇ g'aˇ lehˬ, naˆ ho‸ ve awˬ hk'aw lo chehˇ taˍ leh, naˆ ho‸ ve awˬ hk'aw lo toˇ k'ai chehˇ ve yoˬ. Naˆ ho‸ ve oˇ ve lehˬ, yawˇ hta‸ mehˆ cuˉ piˇ lawˬ ve pa taw, yawˇ hk'aˬ lo k'ai chehˇ ve hta‸ yawˇ maˇ shiˍ. 12 Ha‸ ve yaˇ teˇ hpaˍ-oˬ, Yeˍsuˆ ve awˬ meh hta‸ pa taw nawˬ hui ve venˇ baˆ hpehˇ hk'a peuˬ. Chi hta‸ pa taw, ngaˬ nawˬ hui hta‸ li‸ bvuh‸ laˇ ve yoˬ. 13 Awˬ pa teˇ hpaˍ-oˬ, awˬ hkuiˉ puiˍ htaˇ ka‸ cawˬ chehˇ taˍ ve teˇ g'aˇ hta‸ nawˬ hui shiˍ taˍ ve pa taw, ngaˬ nawˬ hui hta‸ li‸ bvuh‸ laˇ ve yoˬ. Chaw haˉ paˍ teˇ hpaˍ-oˬ, haiˬ ve awˬ shehˍ hpaˇ hta‸ nawˬ hui g'aˇ peuˬ ve pa taw, ngaˬ nawˬ hui hta‸ li‸ bvuh‸ laˇ ve yoˬ. Yaˇ ehˉ teˇ hpaˍ-oˬ, Awˬ pa G'uiˬ sha hta‸ nawˬ hui shiˍ ve pa taw, ngaˬ nawˬ hui hta‸ li‸ bvuh‸ laˇ ve yoˬ. 14 Awˬ pa teˇ hpaˍ-oˬ, awˬ hkuiˉ puiˍ htaˇ ka‸ cawˬ chehˇ taˍ ve teˇ g'aˇ hta‸ nawˬ hui shiˍ taˍ ve pa taw, ngaˬ nawˬ hui hta‸ li‸ bvuh‸ laˇ ve yoˬ. Chaw haˉ paˍ teˇ hpaˍ-oˬ, nawˬ hui awˬ g'aˇ uiˍ leh G'uiˬ sha ve tawˇ hkawˇ nawˬ hui awˬ hk'aw lo cawˬ taˍ leh, haiˬ ve awˬ shehˍ hpaˇ hta‸ nawˬ hui g'aˇ peuˬ ve pa taw ngaˬ nawˬ hui hta‸ li‸ bvuh‸ laˇ ve yoˬ. 15 Miˬ guiˬ hta‸ maˇ k'oˆ, miˬ guiˬ hk'oˆ cawˬ ve awˬ ceuˬ teˇ hpaˍ hta‸ maˇ k'oˆ, taˇ ha‸ loˬ. Chaw teˇ g'aˇ g'aˇ miˬ guiˬ hta‸ ha‸ ve k'o, Awˬ pa G'uiˬ sha hta‸ ha‸ ve teˇ ceuˬ yawˇ awˬ hk'aw lo maˇ cawˬ. 16 Awˬ lawn k'o, miˬ guiˬ hk'oˆ cawˬ ve awˬ ceuˬ hk'a peu-eˬ, awˬ suhˍ awˬ shaˍ a loˍ te gaˇ ve maˇ k'oˆ, mehˆ shiˍ mawˬ leh heuˆ gaˇ ve maˇ k'oˆ, hpu shi mawˇ jeˬ hta‸ pa taw nyi ma uiˍ ve maˇ k'oˆ, Awˬ pa G'uiˬ sha lo tawˆ la ve maˇ heˆ. Miˬ guiˬ lo tawˆ la ve yoˬ. 17 Miˬ guiˬ leh miˬ guiˬ hta‸ caˉ da‸ ve sheˉ lai ve teˇ hpaˍ lehˬ, mehˉ k'ai chehˇ ve yoˬ. Ya‸ hk'aˇ, G'uiˬ sha ve a loˍ hta‸ te ve chaw teˇ g'aˇ lehˬ, co co taiˍ taiˍ te‸ chehˇ tuˬ yoˬ. 18 Ha‸ ve yaˇ teˇ hpaˍ-oˬ, chi beu‸ lehˬ awˬ leh meuˇ ve awˬ yanˇ hpeh‸ ve yoˬ. Hkri‸ ve canˇ paˍ lonˉ tawˆ la tuˬ yoˬ teh‸, nawˬ hui g'a kaˇ ve hk'e, chi beu‸ ka‸ Hkri‸ ve canˇ paˍ lonˉ laiˉ g'aˇ tawˆ la peuˬ. Hk'e te leh, chi beu‸ lehˬ awˬ leh meuˇ ve awˬ yanˇ hpeh‸ ve hta‸ ngaˬ hui g'a shiˍ ve yoˬ. 19 Chaw oˇ ve teˇ hpaˍ ngaˬ hui awˬ hk'aw lo tawˆ k'ai peuˬ. Ya‸ hk'aˇ, yawˇ hui lehˬ ngaˬ hui hta‸ caˉ da‸ ve chaw hpeh‸ ve maˇ heˆ. Awˬ lawn k'o, yawˇ hui ngaˬ hui hta‸ caˉ da‸ ve k'o, ngaˬ hui geh teˇ geh chehˇ taˍ tuˬ yoˬ. Ya‸ hk'aˇ, yawˇ hui hk'a peu-eˬ ngaˬ hui hta‸ maˇ caˉ da‸ teh‸ hk'a tawˍ lehˆ tawˆ la tuˬ, yawˇ hui tawˆ k'ai peuˬ. 20 Da‸ kehˬ shehˍ hpaˇ nawˬ hui hta‸ leuˆ yuˬ taˍ peuˬ ve pa taw, teˇ ceuˬ le le hta‸ nawˬ hui shiˍ ve yoˬ. 21 Hteˇ ve cawˇ ve hta‸ nawˬ hui maˇ shiˍ ve pa taw, ngaˬ nawˬ hui hta‸ li‸ bvuh‸ laˇ ve maˇ heˆ. Hteˇ ve cawˇ ve hta‸ nawˬ hui shiˍ leh, heˍ ve hk'aˬ ve teˇ ceuˬ maˇ k'oˆ, hteˇ ve cawˇ ve hta‸ maˇ caˉ da‸ ve teh‸ nawˬ hui shiˍ ve pa taw, ngaˬ nawˬ hui hta‸ li‸ bvuh‸ laˇ ve yoˬ. 22 Heˍ shehˍ hpaˇ a shu le. Yeˍsuˆ lehˬ Hkri‸ maˇ heˆ teh‸ k'oˆ ve g'awˬ hk'aˆ ve chaw teˇ g'aˇ yoˬ maˇ heˆ laˇ. Awˬ pa leh Yaˇ hpu hta‸ g'awˬ hk'aˆ ve chaw teˇ g'aˇ lehˬ, Hkri‸ ve canˇ paˍ lonˉ hpeh‸ ve yoˬ. 23 Yaˇ hpu hta‸ hk'a chiˇ baˬ ve chaw lehˬ, Awˬ pa hta‸ maˇ caˉ da‸. Yaˇ hpu hta‸ ha‸ yuˬ leh hkanˍ yuˬ ve chaw teˇ g'aˇ lehˬ, Awˬ pa hta‸ htawˇ caˉ da‸ ve yoˬ. 24 Awˬ hkuiˉ puiˍ htaˇ ka‸ nawˬ hui g'a kaˇ peuˬ ve awˬ lawn teˇ hpaˍ, nawˬ hui ve nyi ma awˬ hk'aw lo cawˬ piˇ-oˆ. Awˬ hkuiˉ puiˍ htaˇ ka‸ nawˬ hui g'a kaˇ peuˬ ve awˬ lawn teˇ hpaˍ, nawˬ hui ve nyi ma awˬ hk'aw lo cawˬ ve k'o, nawˬ hui htawˇ Yaˇ hpu awˬ hk'aw lo maˇ k'oˆ, Awˬ pa awˬ hk'aw lo maˇ k'oˆ, chehˇ tuˬ yoˬ. 25 Yawˇ ngaˬ hui hta‸ co ti‸ ha ti‸ pe‸ laˇ tuˬ yoˬ teh‸ k'oˆ taˍ ve yoˬ. 26 Nawˬ hui hta‸ heˍ yuˬ beˬ yuˬ ve chaw teˇ hpaˍ ve awˬ lawn ngaˬ nawˬ hui hta‸ li‸ chi hk'e bvuh‸ laˇ ve yoˬ. 27 Yeˍsuˆ nawˬ hui hta‸ leuˆ yuˬ ve teˇ ceuˬ lehˬ, nawˬ hui awˬ hk'aw lo cawˬ taˍ ve pa taw, a shu ka‸ nawˬ hui hta‸ maˍ laˇ tuˬ maˇ loˍ. Ya‸ hk'aˇ, yawˇ nawˬ hui hta‸ leuˆ yuˬ taˍ ve lehˬ, awˬ lawn hk'a peu-eˬ yawˇ nawˬ hui hta‸ maˍ laˇ ve yoˬ. Leuˆ yuˬ taˍ ve oˇ ve lehˬ, heˍ ve teˇ ceuˬ maˇ heˆ, hteˇ ve cawˇ ve teˇ ceuˬ hpeh‸ ve yoˬ. Hk'e te leh, leuˆ yuˬ taˍ ve oˇ ve nawˬ hui hta‸ maˍ laˇ ve hk'a shuˍ shuˍ, yawˇ awˬ hk'aw lo chehˇ taˍ-o‸. 28 Ha‸ ve yaˇ teˇ hpaˍ-oˬ, yawˇ k'aw‸ tawˆ la ve teˇ yanˇ, ngaˬ hui nyi ma ha‸ hanˉ ve cawˬ tuˬ leh yawˇ mehˆ g'uˇ suhˍ maˇ g'a ya‸ taw tuˬ, chi beu‸ yawˇ awˬ hk'aw lo chehˇ taˍ-o‸. 29 Yawˇ lehˬ hteˇ ve cawˇ ve yoˬ teh‸ nawˬ hui shiˍ ve k'o, hteˇ ve cawˇ ve hta‸ te ve chaw teˇ g'aˇ le le lehˬ, yawˇ lo paw la peuˬ ve hta‸ nawˬ hui g'a shiˍ ve yoˬ.

1 Yoˇhanˬ 3

1 Awˬ pa ngaˬ hui hta‸ hk'aˬ ma ha‸ ve hta‸ dawˇ nyi-o. Ngaˬ hui hta‸ G'uiˬ sha ve awˬ yaˇ awˬ duˬ teh‸ meh laˇ leh, ngaˬ hui lehˬ yawˇ ve awˬ yaˇ awˬ duˬ hpeh‸ tehˬ ve yoˬ. Hk'e te leh, miˬ guiˬ yaˇ yawˇ hta‸ maˇ shiˍ ve pa taw, ngaˬ hui hta‸ htawˇ yawˇ hui maˇ shiˍ. 2 Ha‸ ve chaw teˇ hpaˍ-oˬ, chi beu‸ ngaˬ hui G'uiˬ sha ve awˬ yaˇ awˬ duˬ hpeh‸ ve yoˬ. Awˬ hk'aw‸ nawˉ ngaˬ hui hk'aˬ hk'e hpeh‸ la tuˬ ve hta‸ maˇ hpeu‸ maˍ laˇ sheˍ. Ya‸ hk'aˇ, yawˇ k'aw‸ tawˆ la ve teˇ yanˇ, ngaˬ hui yawˇ hk'e hpeh‸ la tuˬ ve hta‸ ngaˬ hui shiˍ ve yoˬ. Awˬ lawn k'o, yawˇ awˬ to hta‸ ngaˬ hui hk'a tawˍ lehˆ g'a mawˬ tuˬ yoˬ. 3 Yawˇ hta‸ chi hk'e dawˇ law chehˇ ve chaw teˇ g'aˇ le le lehˬ, yawˇ da‸ kehˬ ve hk'e, chaw oˇ ve htawˇ a shu yawˇ awˬ to hta‸ da‸ piˇ kehˬ piˇ ve yoˬ. 4 Venˇ baˆ hk'a te ve chaw teˇ g'aˇ le le lehˬ, awˬ liˇ tawˇ hkawˇ hta‸ te ya‸ ve yoˬ. Venˇ baˆ teˇ ceuˬ lehˬ, awˬ liˇ tawˇ hkawˇ hta‸ te ya‸ ve teˇ ceuˬ hpeh‸ ve yoˬ. 5 Yeˍsuˆ lehˬ, venˇ baˆ teˇ hpaˍ hta‸ yuˬ baˬ tuˬ awˬ pon tawˆ la ve hta‸ nawˬ hui shiˍ ve yoˬ. Yawˇ awˬ hk'aw lo venˇ baˆ maˇ cawˬ. 6 Yawˇ awˬ hk'aw lo chehˇ ve chaw hk'aˬ ve teˇ g'aˇ maˇ k'oˆ, venˇ baˆ maˇ te. Venˇ baˆ te ve chaw hk'aˬ ve teˇ g'aˇ maˇ k'oˆ, yawˇ hta‸ maˇ mawˬ maˇ shiˍ sheˍ. 7 Ha‸ ve yaˇ teˇ hpaˍ-oˬ, a shu htawˇ maˇ k'oˆ, nawˬ hui hta‸ maˇ g'a heˍ yuˬ beˬ yuˬ tuˬ shaˍ ti‸ taˍ-o‸. Yeˍsuˆ lehˬ, hteˇ ve cawˇ ve teˇ g'aˇ hpeh‸ ve hk'a shuˍ shuˍ, hteˇ ve cawˇ ve hta‸ te ve chaw hk'aˬ ve teˇ g'aˇ maˇ k'oˆ, hteˇ ve cawˇ ve chaw hpeh‸ ve yoˬ. 8 Venˇ baˆ te ve chaw teˇ g'aˇ lehˬ, neˇ haiˬ hta‸ caˉ da‸ ve yoˬ. Awˬ lawn k'o, neˇ haiˬ lehˬ, awˬ hkuiˉ puiˍ htaˇ ka‸ venˇ baˆ te chehˇ ve yoˬ. Hk'e te leh, neˇ haiˬ ve kanˉ teˇ hpaˍ hta‸ te luˬ tuˬ, G'uiˬ sha ve Yaˇ hpu tawˆ la ve yoˬ. 9 G'uiˬ sha ve awˬ yaˇ awˬ duˬ hk'aˬ ve teˇ g'aˇ maˇ k'oˆ, venˇ baˆ maˇ te. Awˬ lawn k'o, G'uiˬ sha ve te‸ ve awˬ yawˇ teˇ ceuˬ yawˇ awˬ hk'aw lo cawˬ taˍ leh, yawˇ G'uiˬ sha geh paw la peuˬ ve pa taw, yawˇ venˇ baˆ te maˇ hpeh‸. 10 Chi hta‸ pa taw, G'uiˬ sha ve awˬ yaˇ awˬ duˬ leh neˇ haiˬ ve awˬ yaˇ awˬ duˬ teˇ hpaˍ hta‸ hk'a tawˍ lehˆ fuiˍ da‸ pehˬ da‸ g'a ve yoˬ. Hteˇ ve cawˇ ve hta‸ maˇ te ve chaw hk'aˬ ve teˇ g'aˇ maˇ k'oˆ, G'uiˬ sha hta‸ maˇ caˉ da‸. A shu yawˇ ve awˬ viˉ awˬ nyi hta‸ maˇ ha‸ ve chaw htawˇ, G'uiˬ sha hta‸ maˇ caˉ da‸ ve yoˬ. 11 Ngaˬ hui teˇ g'aˇ leh teˇ g'aˇ g'a ha‸ da‸ ve yoˬ teh‸ k'oˆ taˍ ve tawˇ chi teˇ hkawˇ hta‸ awˬ hkuiˉ puiˍ htaˇ ka‸ nawˬ hui g'a kaˇ taˍ peuˬ. 12 Haiˬ ve awˬ shehˍ hpaˇ teˇ g'aˇ hta‸ caˉ da‸ leh yawˇ ve awˬ nyi paˍ hta‸ tiˇ pehˍ shehˍ hpaˇ Kaˍiˉnaˆ hk'e taˇ hpeh‸ piˇ. Yawˇ lehˬ, aˬ hto‸ ma te awˬ nyi paˍ hta‸ tiˇ pehˍ ve le teh‸ k'oˆ k'o, yawˇ te ve kanˉ teˇ hpaˍ haiˬ leh, awˬ nyi paˍ te ve kanˉ teˇ hpaˍ hteˇ ve cawˇ ve hta‸ pa taw yawˇ hta‸ tiˇ pehˍ ve yoˬ. 13 Awˬ viˉ awˬ nyi teˇ hpaˍ-oˬ, miˬ guiˬ yaˇ nawˬ hui hta‸ canˇ ve k'o, taˇ anˇ. 14 Ngaˬ hui lehˬ, suh ve teˇ ceuˬ awˬ hk'aw lo tawˆ k'ai leh co ha te‸ ve teˇ ceuˬ awˬ hk'aw lo lo‸-e peuˬ ve hta‸ ngaˬ hui hk'aˬ hk'e g'a shiˍ le teh‸ k'oˆ k'o, awˬ viˉ awˬ nyi teˇ hpaˍ hta‸ ngaˬ hui ha‸ ve pa taw g'a shiˍ ve yoˬ. Ha‸ pehnˇ ve maˇ cawˬ ve chaw teˇ g'aˇ lehˬ, suh ve teˇ ceuˬ awˬ hk'aw lo chehˇ taˍ sheˍ ve yoˬ. 15 A shu yawˇ ve awˬ viˉ awˬ nyi hta‸ canˇ ve chaw teˇ g'aˇ le le lehˬ, chaw hta‸ tiˇ pehˍ shehˍ hpaˇ hpeh‸ ve yoˬ. Chaw hta‸ tiˇ pehˍ shehˍ hpaˇ hk'aˬ ve teˇ g'aˇ maˇ k'oˆ, yawˇ awˬ hk'aw lo co ti‸ ha ti‸ maˇ cawˬ ve hta‸ nawˬ hui shiˍ ve yoˬ. 16 Hkri‸ lehˬ ngaˬ hui awˬ pon yawˇ ve a sha‸ tanˇ piˇ ve hta‸ pa taw, ha‸ pehnˇ ve teˇ ceuˬ hta‸ ngaˬ hui shiˍ ve yoˬ. Ngaˬ hui htawˇ, awˬ viˉ awˬ nyi teˇ hpaˍ awˬ pon ngaˬ hui ve a sha‸ hta‸ tanˇ piˇ cawˇ ve yoˬ. 17 Chaw hk'aˬ ve teˇ g'aˇ maˇ k'oˆ, chi miˬ guiˬ ve hpu shi mawˇ jeˬ cawˬ leh, yawˇ ve awˬ viˉ awˬ nyi haˍ g'awˇ ve hta‸ g'a mawˬ htawˇ, ha k'aˉ ve teˇ ceuˬ yawˇ awˬ hk'aw lo maˇ cawˬ ve k'o, G'uiˬ sha ve ha‸ pehnˇ ve teˇ ceuˬ yawˇ awˬ hk'aw lo hk'aˬ hk'e te cawˬ hpeh‸ tuˬ le. 18 Ha‸ ve yaˇ teˇ hpaˍ-oˬ, maw‸ k'aw ceh ha‸ ve teˇ ceuˬ taˇ te. Ya‸ hk'aˇ, kanˉ te ve leh hteˇ ve cawˇ ve awˬ hk'aw lo ha‸-o‸. 19 Ngaˬ hui chi hk'e ha‸ ve k'o, ngaˬ hui hteˇ ve cawˇ ve hta‸ caˉ da‸ ve teh‸ g'a shiˍ ve yoˬ. Ngaˬ hui ve nyi ma ngaˬ hui awˬ hk'oˆ venˇ baˆ teˇ ceuˬ ceuˬ taˍ ve k'o, G'uiˬ sha mehˆ g'uˇ suhˍ ngaˬ hui ve nyi ma dawˇ sha la tuˬ yoˬ. 20 Awˬ lawn k'o, ngaˬ hui ve nyi ma a‸ kehˉ G'uiˬ sha lehˬ uiˍ jaˇ da‸ jaˇ leh, hk'a peu-eˬ hta‸ yawˇ shiˍ ve yoˬ. 21 Ha‸ ve chaw teˇ hpaˍ-oˬ, ngaˬ hui ve nyi ma ngaˬ hui awˬ hk'oˆ venˇ baˆ maˇ taˍ ve k'o, G'uiˬ sha mehˆ g'uˇ suhˍ ngaˬ hui nyi ma ha‸ hanˉ tuˬ yoˬ. 22 Yawˇ piˇ taˍ ve tawˇ hkawˇ teˇ hpaˍ hta‸ ngaˬ hui na yuˬ leh yawˇ nyi ma cawˇ ve hta‸ te ve pa taw, yawˇ geh ngaˬ hui hk'a lawˬ ve teˇ hpaˍ hta‸ g'a ve yoˬ. 23 Yawˇ piˇ taˍ ve tawˇ hkawˇ lehˬ chi hk'e yoˬ. Yawˇ ve Yaˇ hpu Yeˍsuˆ Hkri‸ ve awˬ meh hta‸ ngaˬ hui g'a yonˍ leh, Yaˇ hpu tawˇ piˇ laˇ ve hk'e, teˇ g'aˇ leh teˇ g'aˇ g'a ha‸ da‸ ve yoˬ. 24 Yawˇ piˇ taˍ ve tawˇ hkawˇ hta‸ na yuˬ leh te ve chaw teˇ g'aˇ lehˬ, yawˇ awˬ hk'aw lo chehˇ leh, yawˇ htawˇ chaw oˇ ve awˬ hk'aw lo chehˇ ve yoˬ. Yawˇ ngaˬ hui hta‸ pe‸ laˇ ve Awˬ ha hpu hta‸ pa taw, yawˇ ngaˬ hui awˬ hk'aw lo chehˇ ve yoˬ teh‸ ngaˬ hui g'a shiˍ ve yoˬ.

1 Yoˇhanˬ 4

1 Ha‸ ve chaw teˇ hpaˍ-oˬ, awˬ ha teˇ maˬ le le hta‸ taˇ yonˍ. Ya‸ hk'aˇ, awˬ ha teˇ hpaˍ lehˬ, G'uiˬ sha hta‸ caˉ da‸ ve leh naˍ, hk'a deh‸ lawˇ nyi sheˍ. Awˬ lawn k'o, maˇ heˆ heˆ ve tcuh kaˍ paˍ laiˉ g'aˇ miˬ guiˬ hk'oˆ teˇ kaˬ le le lo k'ai peuˬ. 2 G'uiˬ sha ve Awˬ ha hpu hta‸ nawˬ hui chi hk'e shiˍ hpeh‸ ve yoˬ. Yeˍsuˆ Hkri‸ lehˬ, awˬ suhˍ awˬ shaˍ pfuhˇ leh laˬ ve yoˬ teh‸, shaˉ hkiˆ hkanˍ ve awˬ ha teˇ maˬ le le G'uiˬ sha hta‸ caˉ da‸ ve yoˬ. 3 Yeˍsuˆ Hkri‸ lehˬ, awˬ suhˍ awˬ shaˍ pfuhˇ leh laˬ ve yoˬ teh‸ shaˉ hkiˆ maˇ hkanˍ ve awˬ ha hk'aˬ ve teˇ maˬ maˇ k'oˆ, G'uiˬ sha hta‸ maˇ caˉ da‸. Chi hk'e ve awˬ ha lehˬ, Hkri‸ ve canˇ paˍ lonˉ hta‸ caˉ da‸ ve yoˬ. Chi hk'e ve awˬ ha laˬ tuˬ yoˬ teh‸, nawˬ hui g'a kaˇ taˍ peuˬ ve hk'e, chi beu‸ ka‸ miˬ guiˬ hk'oˆ lo chehˇ taˍ peuˬ. 4 Ha‸ ve yaˇ teˇ hpaˍ-oˬ, nawˬ hui G'uiˬ sha hta‸ caˉ da‸ ve chaw hpeh‸ leh, yawˇ hui hta‸ g'aˇ peuˬ. Awˬ lawn k'o, nawˬ hui awˬ hk'aw lo chehˇ ve teˇ g'aˇ lehˬ, miˬ guiˬ hk'oˆ lo chehˇ ve teˇ g'aˇ a‸ kehˉ uiˍ ve yoˬ. 5 Maˇ heˆ heˆ ve tcuh kaˍ paˍ oˇ ve teˇ hpaˍ lehˬ, miˬ guiˬ hta‸ caˉ da‸ ve yoˬ. Chi hta‸ pa taw, miˬ guiˬ hta‸ caˉ da‸ ve tawˇ hkawˇ hta‸ yawˇ hui yaw leh, miˬ guiˬ yaˇ teˇ hpaˍ lehˬ, yawˇ hui ve tawˇ hkawˇ hta‸ na yuˬ ve yoˬ. 6 Ngaˬ hui lehˬ, G'uiˬ sha hta‸ caˉ da‸ ve yoˬ. G'uiˬ sha hta‸ shiˍ ve chaw lehˬ, ngaˬ hui ve tawˇ hkawˇ hta‸ na yuˬ ve yoˬ. G'uiˬ sha hta‸ maˇ caˉ da‸ ve chaw lehˬ, ngaˬ hui ve tawˇ hkawˇ hta‸ maˇ na yuˬ. Chi hta‸ pa taw, hteˇ ve cawˇ ve hta‸ caˉ da‸ ve awˬ ha hta‸ maˇ k'oˆ, maˇ hteˇ maˇ cawˇ ve hta‸ caˉ da‸ ve awˬ ha hta‸ maˇ k'oˆ, ngaˬ hui g'a shiˍ ve yoˬ. 7 Ha‸ ve chaw teˇ hpaˍ-oˬ, ngaˬ hui teˇ g'aˇ leh teˇ g'aˇ ha‸ da‸-a veuˬ. Awˬ lawn k'o, ha‸ pehnˇ ve teˇ ceuˬ lehˬ G'uiˬ sha geh tawˆ la ve yoˬ. Ha‸ puiˉ ve chaw teˇ g'aˇ le le lehˬ, G'uiˬ sha ve awˬ yaˇ hpeh‸ leh, G'uiˬ sha hta‸ shiˍ ve yoˬ. 8 Maˇ ha‸ puiˉ ve chaw lehˬ, G'uiˬ sha hta‸ maˇ shiˍ. Awˬ lawn k'o, G'uiˬ sha lehˬ ha‸ pehnˇ ve teˇ ceuˬ hpeh‸ ve yoˬ. 9 G'uiˬ sha ngaˬ hui hta‸ ha‸ ve lehˬ, yawˇ ngaˬ hui hta‸ chi hk'e hpeu‸ maˍ laˇ ve yoˬ. Yaˇ hpu hta‸ pa taw ngaˬ hui co ha g'a te‸ tuˬ, G'uiˬ sha lehˬ yawˇ ve Yaˇ hpu tiˍ hta‸ miˬ guiˬ hk'oˆ lo peu laˇ ve yoˬ. 10 Ha‸ pehnˇ ve teˇ ceuˬ lehˬ chi hk'e yoˬ. Ngaˬ hui G'uiˬ sha hta‸ ha‸ ve teh‸ k'oˆ gaˇ ve maˇ heˆ. Ya‸ hk'aˇ, yawˇ ngaˬ hui hta‸ ha‸ leh, ngaˬ hui ve venˇ baˆ hta‸ hpehˇ hk'a laˇ tuˬ awˬ pon yawˇ ve Yaˇ hpu peu laˇ ve hta‸ k'oˆ ve yoˬ. 11 Ha‸ ve chaw teˇ hpaˍ-oˬ, G'uiˬ sha lehˬ ngaˬ hui hta‸ chi taw taw ha‸ ve k'o, ngaˬ hui htawˇ teˇ g'aˇ leh teˇ g'aˇ ha‸ da‸ cawˇ ve yoˬ. 12 G'uiˬ sha hta‸ chaw teˇ g'aˇ ka‸ maˇ mawˬ jaw. Ngaˬ hui teˇ g'aˇ leh teˇ g'aˇ ha‸ da‸ ve k'o, G'uiˬ sha ngaˬ hui awˬ hk'aw lo chehˇ leh, yawˇ ve ha‸ pehnˇ ve teˇ ceuˬ ngaˬ hui awˬ hk'aw lo biˇ la peuˬ. 13 G'uiˬ sha lehˬ, yawˇ ve Awˬ ha hpu ngaˬ hui hta‸ pe‸ laˇ ve pa taw, ngaˬ hui G'uiˬ sha awˬ hk'aw lo chehˇ leh, yawˇ htawˇ ngaˬ hui awˬ hk'aw lo chehˇ ve hta‸ ngaˬ hui g'a shiˍ ve yoˬ. 14 Miˬ guiˬ yaˇ ve Htaiˍ hk'aw‸ shehˍ hpaˇ te tuˬ, Awˬ pa lehˬ yawˇ ve Yaˇ hpu peu laˇ ve hta‸ ngaˬ hui g'a mawˬ leh, shaˉ hkiˆ hkanˍ ve yoˬ. 15 Yeˍsuˆ lehˬ, G'uiˬ sha ve Yaˇ hpu yoˬ teh‸ hkanˍ yuˬ ve chaw hk'aˬ ve teˇ g'aˇ maˇ k'oˆ, G'uiˬ sha yawˇ awˬ hk'aw lo chehˇ leh, yawˇ htawˇ G'uiˬ sha awˬ hk'aw lo chehˇ ve yoˬ. 16 G'uiˬ sha lehˬ, ngaˬ hui hta‸ ha‸ ve hta‸ ngaˬ hui shiˍ leh yonˍ ve yoˬ. G'uiˬ sha lehˬ, ha‸ pehnˇ ve teˇ ceuˬ hpeh‸ ve yoˬ. Ha‸ pehnˇ ve awˬ hk'aw lo chehˇ ve chaw lehˬ, G'uiˬ sha awˬ hk'aw lo chehˇ leh, G'uiˬ sha htawˇ yawˇ awˬ hk'aw lo chehˇ ve yoˬ. 17 Suhˉ jehˬ ve awˬ nyi awˬ hk'aw lo ngaˬ hui nyi ma ha‸ hanˉ ve cawˬ hpeh‸ tuˬ, ngaˬ hui awˬ hk'aw lo ha‸ pehnˇ ve teˇ ceuˬ biˇ la peuˬ. Awˬ lawn k'o, yawˇ hpeh‸ chehˇ ve hk'e ngaˬ hui htawˇ chi miˬ guiˬ hk'oˆ lo hpeh‸ chehˇ ve yoˬ. 18 Ha‸ pehnˇ ve awˬ hk'aw lo kawˆ ve teˇ ceuˬ maˇ cawˬ. Ha‸ pehnˇ ve biˇ ve teˇ ceuˬ lehˬ, kawˆ ve hta‸ mehˉ k'ai piˇ lawˬ ve yoˬ. Awˬ lawn k'o, kawˆ ve teˇ ceuˬ lehˬ, ciˍ yanˍ ve hta‸ caˉ da‸ ve pa taw, kawˆ puiˉ ve chaw teˇ g'aˇ lehˬ, yawˇ awˬ hk'aw lo ha‸ pehnˇ ve teˇ ceuˬ maˇ biˇ sheˍ. 19 G'uiˬ sha ngaˬ hui hta‸ awˉ lawˉ ha‸ ve pa taw, ngaˬ hui htawˇ ha‸ ve yoˬ. 20 Ngaˬ G'uiˬ sha hta‸ ha‸ ve yoˬ teh‸ chaw teˇ g'aˇ g'aˇ k'oˆ ve htawˇ, yawˇ ve awˬ viˉ awˬ nyi hta‸ yawˇ canˇ ve k'o, yawˇ lehˬ heˍ paˍ hpeh‸ ve yoˬ. Awˬ lawn k'o, a shu yawˇ mawˬ chehˇ ve awˬ viˉ awˬ nyi hta‸ maˇ ha‸ ve chaw teˇ g'aˇ lehˬ, maˇ mawˬ jaw ve G'uiˬ sha hta‸ yawˇ hk'aˬ hk'e te ha‸ hpeh‸ tuˬ le. 21 G'uiˬ sha hta‸ ha‸ ve chaw lehˬ, a shu yawˇ ve awˬ viˉ awˬ nyi hta‸ htawˇ g'a ha‸ ve yoˬ teh‸, piˇ taˍ ve tawˇ hkawˇ ngaˬ hui yawˇ geh g'a taˍ ve yoˬ.

1 Yoˇhanˬ 5

1 Yeˍsuˆ lehˬ Hkri‸ hpeh‸ ve yoˬ teh‸ hk'a yonˍ ve chaw teˇ g'aˇ le le lehˬ, G'uiˬ sha ve awˬ yaˇ hpeh‸ ve yoˬ. Awˬ pa hta‸ hk'a ha‸ ve chaw teˇ g'aˇ le le lehˬ, awˬ yaˇ hta‸ ka‸ ha‸ ve yoˬ. 2 Ngaˬ hui G'uiˬ sha hta‸ ha‸ leh yawˇ piˇ taˍ ve tawˇ hkawˇ teˇ hpaˍ hta‸ na yuˬ htaˇ, yawˇ ve awˬ yaˇ teˇ hpaˍ hta‸ ngaˬ hui ha‸ ve yoˬ teh‸ ngaˬ hui g'a shiˍ ve yoˬ. 3 Awˬ lawn k'o, G'uiˬ sha hta‸ ha‸ ve teh‸ k'oˆ ve lehˬ, yawˇ piˇ taˍ ve tawˇ hkawˇ teˇ hpaˍ hta‸ ngaˬ hui na yuˬ leh te ve hta‸ k'oˆ ve yoˬ. Chi hk'oˆ ka‸, yawˇ piˇ taˍ ve tawˇ hkawˇ teˇ hpaˍ lehˬ, haˍ jaˇ ve teˇ ceuˬ hpeh‸ ve maˇ heˆ. 4 G'uiˬ sha ve awˬ yaˇ hk'a hpeh‸ ve chaw hk'a peu-eˬ lehˬ, miˬ guiˬ hta‸ g'aˇ ve yoˬ. Miˬ guiˬ hta‸ g'aˇ ve teˇ ceuˬ lehˬ, ngaˬ hui ve yonˍ ve teˇ ceuˬ yoˬ. 5 Miˬ guiˬ hta‸ g'aˇ ve chaw lehˬ a shu le. Yeˍsuˆ lehˬ, G'uiˬ sha ve Yaˇ hpu hpeh‸ ve yoˬ teh‸ yonˍ ve chaw teˇ g'aˇ ceh tiˉ g'aˇ hpeh‸ ve maˇ heˆ laˇ. 6 Chi teˇ g'aˇ lehˬ, iˉ kaˆ leh awˬ suhˍ awˬ hk'aw lo laˬ ve Yeˍsuˆ Hkri‸ hpeh‸ ve yoˬ. Iˉ kaˆ awˬ hk'aw lo ceh tiˉ maˇ heˆ, iˉ kaˆ leh awˬ suhˍ awˬ hk'aw lo yawˇ laˬ ve yoˬ. 7 Awˬ ha hpu lehˬ hteˇ ve cawˇ ve hta‸ pa taw, yawˇ htawˇ shaˉ hkiˆ hkanˍ shehˍ hpaˇ hpeh‸ ve yoˬ. 8 Awˬ lawn k'o, Awˬ ha hpu, iˉ kaˆ leh awˬ suhˍ, shaˉ hkiˆ hkanˍ shehˍ hpaˇ chi shehˆ ceuˬ cawˬ leh, chi shehˆ ceuˬ hawˍ da‸ ve yoˬ. 9 Chaw yaˇ shaˉ hkiˆ hkanˍ ve hta‸ ngaˬ hui na ve k'o, G'uiˬ sha shaˉ hkiˆ hkanˍ ve teˇ ceuˬ lehˬ leuˉ leh uiˍ ve yoˬ. Awˬ lawn k'o, G'uiˬ sha shaˉ hkiˆ hkanˍ ve lehˬ, yawˇ ve Yaˇ hpu awˬ lawn shaˉ hkiˆ hkanˍ ve yoˬ. 10 G'uiˬ sha ve Yaˇ hpu hta‸ yonˍ ve chaw teˇ g'aˇ lehˬ, yawˇ awˬ hk'aw lo shaˉ hkiˆ oˇ ve cawˬ ve yoˬ. G'uiˬ sha hta‸ maˇ yonˍ ve chaw teˇ g'aˇ lehˬ, G'uiˬ sha hta‸ heˍ paˍ meh piˇ ve yoˬ. Awˬ lawn k'o, G'uiˬ sha lehˬ yawˇ ve Yaˇ hpu awˬ lawn shaˉ hkiˆ hkanˍ ve hta‸ yawˇ maˇ yonˍ ve pa taw yoˬ. 11 G'uiˬ sha shaˉ hkiˆ hkanˍ ve oˇ ve lehˬ, yawˇ ngaˬ hui hta‸ co ti‸ ha ti‸ pe‸ laˇ leh, co ti‸ ha ti‸ chi yawˇ ve Yaˇ hpu awˬ hk'aw lo cawˬ ve yoˬ. 12 Yaˇ hpu hta‸ ha‸ yuˬ ve chaw teˇ g'aˇ lehˬ, co ti‸ ha ti‸ cawˬ ve yoˬ. Yaˇ hpu hta‸ maˇ ha‸ yuˬ ve chaw teˇ g'aˇ lehˬ, co ti‸ ha ti‸ maˇ cawˬ. 13 G'uiˬ sha ve Yaˇ hpu awˬ meh hta‸ yonˍ ve nawˬ hui teˇ hpaˍ lehˬ, co ti‸ ha ti‸ cawˬ ve hta‸ g'a shiˍ tuˬ, ngaˬ nawˬ hui hta‸ li‸ chi bvuh‸ laˇ ve yoˬ. 14 Yawˇ mehˆ g'uˇ suhˍ ngaˬ hui chi hk'e nyi ma ha‸ hanˉ tuˬ cawˬ ve yoˬ. Yawˇ ve a loˍ cawˇ ve hk'e ngaˬ hui teˇ ceuˬ ceuˬ lawˬ ve k'o, yawˇ na yuˬ tuˬ yoˬ. 15 Ngaˬ hui hk'a lawˬ ve teˇ hpaˍ hta‸ yawˇ na yuˬ ve yoˬ teh‸ ngaˬ hui shiˍ ve k'o, yawˇ geh hk'a lawˬ ve teˇ hpaˍ hta‸ ngaˬ hui g'a peuˬ teh‸ g'a shiˍ ve yoˬ. 16 Chaw teˇ g'aˇ lehˬ, yawˇ ve awˬ viˉ awˬ nyi teˇ g'aˇ, suh maˇ keunˍ ve venˇ baˆ te chehˇ ve hta‸ g'a mawˬ ve k'o, chaw oˇ ve teˇ g'aˇ awˬ pon yawˇ lawˬ leh, suh maˇ keunˍ ve venˇ baˆ te chehˇ ve awˬ viˉ awˬ nyi oˇ ve co ha te‸ ve hta‸ G'uiˬ sha geh yawˇ lawˬ ve hk'e g'a tuˬ yoˬ. Suh keunˍ ve venˇ baˆ htawˇ cawˬ ve yoˬ. Oˇ ve awˬ pon g'a lawˬ ve teh‸ ngaˬ k'oˆ ve maˇ heˆ. 17 Te ya‸ ve hk'a peu-eˬ lehˬ, venˇ baˆ hpeh‸ ve yoˬ. Ya‸ hk'aˇ, suh maˇ keunˍ ve venˇ baˆ htawˇ cawˬ ve yoˬ. 18 G'uiˬ sha geh paw la ve chaw hk'aˬ ve teˇ g'aˇ maˇ k'oˆ, venˇ baˆ maˇ te ve hta‸ ngaˬ hui shiˍ ve yoˬ. G'uiˬ sha geh paw la peuˬ ve yawˇ ve Yaˇ hpu lehˬ, yawˇ hta‸ ha‸ shaˉ leh, haiˬ ve awˬ shehˍ hpaˇ yawˇ hta‸ maˇ htawˇ. 19 Ngaˬ hui G'uiˬ sha hta‸ caˉ da‸ ve hta‸ ka‸, miˬ guiˬ hk'a peu-eˬ lehˬ haiˬ ve awˬ shehˍ hpaˇ ve kanˇ paˆ awˬ hawˉ lo chehˇ taˍ ve hta‸ ka‸, ngaˬ hui shiˍ ve yoˬ. 20 Peuˬ leh, G'uiˬ sha ve Yaˇ hpu gaˬ la leh, hteˇ ve cawˇ ve awˬ shehˍ hpaˇ hta‸ ngaˬ hui shiˍ puiˉ tuˬ yawˇ cuˇ yiˍ pe‸ laˇ ve hta‸ ngaˬ hui shiˍ ve yoˬ. Hteˇ ve cawˇ ve awˬ shehˍ hpaˇ leh yawˇ ve Yaˇ hpu Yeˍsuˆ Hkri‸ awˬ hk'aw lo ngaˬ hui chehˇ taˍ ve yoˬ. G'uiˬ sha chi lehˬ, hteˇ ve cawˇ ve G'uiˬ sha hpeh‸ leh, co ti‸ ha ti‸ htawˇ hpeh‸ ve yoˬ. 21 Ha‸ ve yaˇ teˇ hpaˍ-oˬ, shaˉ ho‸ teˇ hpaˍ hta‸ jaw k'ai-o.

2 Yoˇhanˬ 1

1 Ngaˬ lehˬ awˬ hoˉ chaw mawˇ teˇ g'aˇ hpeh‸ leh, leuˆ yuˬ taˍ ve yaˇ miˇ teˇ g'aˇ leh yawˇ ve yaˇ ehˉ teˇ hpaˍ hta‸ li‸ chi bvuh‸ laˇ ve yoˬ. Hteˇ ve cawˇ ve teˇ ceuˬ awˬ hk'aw lo ngaˬ nawˬ hui hta‸ ha‸ ve yoˬ. Ngaˬ ceh tiˉ ha‸ ve maˇ heˆ. Hteˇ ve cawˇ ve teˇ ceuˬ hta‸ hk'a shiˍ ve chaw hk'a peu-eˬ htawˇ nawˬ hui hta‸ ha‸ ve yoˬ. 2 Ngaˬ hui awˬ hk'aw lo cawˬ taˍ ve hteˇ ve cawˇ ve teˇ ceuˬ hta‸ pa taw, nawˬ hui hta‸ ha‸ ve yoˬ. Hteˇ ve cawˇ ve chi teˇ ceuˬ lehˬ, co co taiˍ taiˍ ngaˬ hui geh cawˬ tuˬ yoˬ. 3 Awˬ pa G'uiˬ sha leh, Awˬ pa ve Yaˇ hpu Yeˍsuˆ Hkri‸ geh lo, awˬ bon teˇ ceuˬ, ha k'aˉ ve teˇ ceuˬ leh dawˇ sha gaˇ sha ve teˇ ceuˬ ngaˬ hui geh cawˬ tuˬ yoˬ. Hteˇ ve cawˇ ve teˇ ceuˬ leh ha‸ pehnˇ ve teˇ ceuˬ awˬ hk'aw lo chi teˇ hpaˍ ngaˬ hui geh cawˬ tuˬ yoˬ. 4 Awˬ pa ngaˬ hui hta‸ tawˇ pe‸ laˇ ve hk'e, nawˬ ve awˬ yaˇ awˬ duˬ teˇ hpaˍ hpaˍ hteˇ ve cawˇ ve teˇ ceuˬ awˬ hk'aˇ suh k'ai chehˇ ve hta‸ ngaˬ g'a mawˬ ve pa taw, ha lehˬ jaˇ ve yoˬ. 5 Chi beu‸ lehˬ, tawˇ piˇ ve awˬ suhˉ teˇ hkawˇ ngaˬ nawˬ hta‸ bvuh‸ laˇ ve maˇ heˆ. Awˬ hkuiˉ puiˍ htaˇ ka‸ ngaˬ hui g'a taˍ peuˬ ve tawˇ hkawˇ ngaˬ nawˬ hta‸ bvuh‸ laˇ ve yoˬ. Yaˇ miˇ-oˬ, ngaˬ hui teˇ g'aˇ leh teˇ g'aˇ ha‸ da‸ tuˬ nawˬ hta‸ lawˬ hkawˉ ve yoˬ. 6 Yawˇ tawˇ piˇ taˍ ve hk'e ngaˬ hui te ve lehˬ, ha‸ pehnˇ ve teˇ ceuˬ hpeh‸ ve yoˬ. Ha‸ pehnˇ ve awˬ hk'aˇ suh k'ai-o teh‸ tawˇ piˇ taˍ ve chi teˇ hkawˇ hta‸ awˬ hkuiˉ puiˍ htaˇ ka‸ nawˬ hui g'a kaˇ taˍ peuˬ. 7 Awˬ lawn k'o, Yeˍsuˆ Hkri‸ lehˬ chaw yaˇ ve awˬ suhˍ awˬ shaˍ pfuhˇ leh laˬ ve maˇ heˆ teh‸ k'oˆ ve chaw heˍ paˍ laiˉ g'aˇ miˬ guiˬ hk'oˆ teˇ kaˬ le le lo k'ai peuˬ. Chi hk'e ve chaw lehˬ, chaw heˍ paˍ hpeh‸ leh, Yeˍsuˆ ve canˇ paˍ lonˉ htawˇ hpeh‸ ve yoˬ. 8 Nawˬ hui te peuˬ ve kanˉ teˇ hpaˍ maˇ g'a mehˉ k'ai leh, nawˬ hui awˬ bon hk'a biˇ g'a hpeh‸ tuˬ, a shu yawˇ awˬ to hta‸ shaˍ ti‸ taˍ-o‸. 9 Hkri‸ maˍ piˇ ve awˬ hk'aw lo maˇ chehˇ leh, dawˇ ponˬ dawˇ leuˉ ve chaw hk'aˬ ve teˇ g'aˇ maˇ k'oˆ, G'uiˬ sha hta‸ maˇ caˉ da‸. Hkri‸ maˍ piˇ ve awˬ hk'aw lo chehˇ taˍ ve chaw teˇ g'aˇ lehˬ, Awˬ pa hta‸ ka‸ Yaˇ hpu hta‸ ka‸ caˉ da‸ ve yoˬ. 10 Chaw teˇ g'aˇ g'aˇ nawˬ hui geh laˬ leh maˍ piˇ ve tawˇ hkawˇ chi maˇ pfuhˇ laˬ ve k'o, yawˇ hta‸ yehˬ hk'aw taˇ ha‸ yuˬ, hpuˇ da‸ ve teˇ yanˇ tawˇ ka‸ taˇ yaw. 11 Awˬ lawn k'o, hpuˇ da‸ ve teˇ yanˇ yawˇ hta‸ tawˇ yaw ve chaw teˇ g'aˇ lehˬ, yawˇ te ve haiˬ ve kanˉ teˇ hpaˍ hta‸ yawˇ geh teˇ geh te ve hk'e yoˬ. 12 Ngaˬ nawˬ hui hta‸ li‸ bvuh‸ laˇ tuˬ maˇ maˇ cawˬ ve htawˇ, htawˇ g'euˆ leh naˬ meu‸ g'uiˬ maˇ bvuh‸ gaˇ. Ya‸ hk'aˇ, ngaˬ hui ha lehˬ ve biˇ la tuˬ, ngaˬ nawˬ hui geh laˬ leh, mehˆ hpfuhˇ tawˍ da‸ taˍ ve awˬ hk'aw lo tawˇ g'a yaw da‸ tuˬ ve hta‸ ngaˬ dawˇ law chehˇ ve yoˬ. 13 Leuˆ yuˬ taˍ ve nawˬ awˬ viˉ ma ve awˬ yaˇ awˬ duˬ hui nawˬ hta‸ ha‸ pehnˇ ve hkawˇ shanˍ feu laˇ ve yoˬ.

3 Yoˇhanˬ 1

1 Ngaˬ lehˬ awˬ hoˉ chaw mawˇ hpeh‸ leh, ha‸ ve Gaˍyuˆ hta‸ li‸ bvuh‸ laˇ ve yoˬ. Hteˇ ve cawˇ ve teˇ ceuˬ awˬ hk'aw lo ngaˬ nawˬ hta‸ ha‸ ve yoˬ. 2 Ha‸ ve awˬ chawˇ-oˬ, co ha hpawˇ loˍ ve awˬ ceuˬ nawˬ hk'a biˇ cawˬ ve hk'e, teˇ ceuˬ le le awˬ hk'aw lo nawˬ hk'a biˇ cawˬ la tuˬ leh chehˇ sha cawˬ sha tuˬ ngaˬ bon lawˬ chehˇ ve yoˬ. 3 Awˬ viˉ awˬ nyi teˇ hpaˍ laˬ leh, hteˇ ve cawˇ ve teˇ ceuˬ awˬ hk'aˇ suh nawˬ k'ai chehˇ ve awˬ lawn yawˇ hui shaˉ hkiˆ hkanˍ ve pa taw, ngaˬ ha lehˬ jaˇ ve yoˬ. Awˬ lawn k'o, nawˬ hteˇ ve cawˇ ve teˇ ceuˬ awˬ hk'aˇ suh k'ai tehˬ ve yoˬ. 4 Ngaˬ ve awˬ yaˇ awˬ duˬ teˇ hpaˍ hteˇ ve cawˇ ve teˇ ceuˬ awˬ hk'aˇ suh k'ai chehˇ ve hta‸ ngaˬ g'a kaˇ htaˇ, ngaˬ ha lehˬ tuˬ chi a‸ kehˉ uiˍ ve teˇ ceuˬ ka‸ maˇ cawˬ. 5 Ha‸ ve awˬ chawˇ-oˬ, hkehˉ chaw hpeh‸ ve awˬ viˉ awˬ nyi teˇ hpaˍ hta‸ nawˬ maˇ mawˬ maˇ shiˍ da‸ jaw htawˇ, hk'a deh‸ nyi ha‸ shaˉ ve lehˬ, da‸ jaˇ ve yoˬ. 6 Nawˬ ve ha‸ pehnˇ ve awˬ lawn Hkri‸ yaˇ awˬ moˍ mehˆ g'uˇ suhˍ yawˇ hui shaˉ hkiˆ hkanˍ peuˬ. G'uiˬ sha hta‸ keunˍ da‸ ve hk'e nawˬ yawˇ hui hta‸ awˬ g'uˇ suhˍ shiˍ k'oˬ piˇ ve k'o, da‸ jaˇ ve yoˬ. 7 Awˬ lawn k'o, G'uiˬ sha awˬ pon yawˇ hui bon ca maˍ k'ai leh, lawˇ kiˍ yaˇ teˇ hpaˍ ga piˇ ve hta‸ yawˇ hui maˇ ha‸ yuˬ. 8 Hk'e te leh, hteˇ ve cawˇ ve teˇ ceuˬ awˬ hk'aw lo chi hk'e ve chaw teˇ hpaˍ geh teˇ geh ngaˬ hui kanˉ te hpeh‸ tuˬ, ngaˬ hui yawˇ hui hta‸ hk'a deh‸ ha‸ yuˬ cawˇ ve yoˬ. 9 Hkri‸ yaˇ awˬ moˍ hta‸ ngaˬ li‸ a ciˉ bvuh‸ feu piˇ peuˬ. Ya‸ hk'aˇ, nawˬ hui awˬ hk'aw lo shu a‸ kehˉ uiˍ gaˇ ve Daˍyawˇtaˍraˆ teˇ g'aˇ lehˬ, ngaˬ ve hkawˇ hta‸ maˇ na. 10 Chi hta‸ pa taw ngaˬ laˬ ve k'o, yawˇ te chehˇ ve teˇ hpaˍ ngaˬ k'aw‸ dawˇ nawˇ piˇ tuˬ yoˬ. Yawˇ haiˬ ve tawˇ hta‸ yaw leh, ngaˬ awˬ lawn maˇ heˆ heˆ ve teˇ hpaˍ k'oˆ chehˇ ve yoˬ. Chi hk'e ceh tiˉ te ve hta‸ yawˇ nyi hk'aˇ maˇ suh sheˍ. Awˬ viˉ awˬ nyi teˇ hpaˍ hta‸ yawˇ maˇ ha‸ yuˬ ve awˬ hk'oˆ ka‸, ha‸ yuˬ gaˇ ve chaw hui hta‸ tawˍ taˍ leh Hkri‸ yaˇ awˬ moˍ awˬ hk'aw lo g'a‸ k'oˬ ve yoˬ. 11 Ha‸ ve awˬ chawˇ-oˬ, haiˬ ve awˬ hk'aˇ suh taˇ k'ai. Ya‸ hk'aˇ, da‸ ve awˬ hk'aˇ suh k'ai-o. Da‸ ve hta‸ te ve chaw teˇ g'aˇ lehˬ, G'uiˬ sha hta‸ caˉ da‸ ve yoˬ. Haiˬ ve hta‸ te ve chaw teˇ g'aˇ lehˬ, G'uiˬ sha hta‸ maˇ shiˍ maˇ mawˬ jaw. 12 Chaw hk'a peu-eˬ Deˍmeˍtriˆ awˬ pon shaˉ hkiˆ hkanˍ ve yoˬ. Hteˇ ve cawˇ ve teˇ ceuˬ ka‸ yawˇ awˬ pon shaˉ hkiˆ hkanˍ ve yoˬ. Ngaˬ htawˇ shaˉ hkiˆ hkanˍ leh, shaˉ hkiˆ chi ve lehˬ, hteˇ ve cawˇ ve hta‸ nawˬ hui shiˍ ve yoˬ. 13 Ngaˬ nawˬ hta‸ li‸ bvuh‸ laˇ tuˬ maˇ maˇ cawˬ ve htawˇ, naˬ meu‸ taˬ leh naˬ meu‸ g'uiˬ bvuh‸ laˇ ve hta‸ ngaˬ maˇ te gaˇ. 14 Maˇ maw maw k'o, nawˬ hta‸ g'a mawˬ leh, mehˆ hpfuhˇ tawˍ da‸ taˍ ve awˬ hk'aw lo ngaˬ huiˉ maˬ na‸ uˉ g'a te da‸ tuˬ ve hta‸ ngaˬ dawˇ law chehˇ ve yoˬ. 15 Nawˬ geh dawˇ sha gaˇ sha ve cawˬ piˇ-oˆ. Awˬ chawˇ teˇ hpaˍ nawˬ hta‸ ha‸ pehnˇ ve hkawˇ shanˍ feu laˇ ve yoˬ. Nawˬ htawˇ, nawˬ geh chehˇ ve awˬ chawˇ teˇ g'aˇ peuˬ teˇ g'aˇ hta‸ ngaˬ shanˍ feu laˇ ve ha‸ pehnˇ ve hkawˇ k'aw‸ hto piˇ-oˆ.

Yuˇda‸ 1

1 Ngaˬ lehˬ Yeˍsuˆ Hkri‸ ve awˬ ceˬ, Yaˍkoˆ ve awˬ nyi paˍ Yuˇda‸ hpeh‸ ve yoˬ. Kuˬ yuˬ taˍ ve nawˬ hui teˇ hpaˍ hta‸ ngaˬ li‸ chi bvuh‸ laˇ ve yoˬ. Awˬ pa G'uiˬ sha nawˬ hui hta‸ ha‸ leh, Yeˍsuˆ Hkri‸ nawˬ hui hta‸ ha‸ shaˉ chehˇ ve yoˬ. 2 Ha k'aˉ ve teˇ ceuˬ, dawˇ sha ve teˇ ceuˬ leh, ha‸ pehnˇ ve teˇ ceuˬ nawˬ hui awˬ hk'aw lo maˇ la piˇ-oˆ. 3 Ha‸ ve chaw teˇ hpaˍ-oˬ, ngaˬ hui teˇ geh hk'a shuˍ shuˍ g'a taˍ ve htaiˍ hk'aw‸ ve teˇ ceuˬ awˬ lawn, ngaˬ nawˬ hui hta‸ bvuh‸ laˇ gaˇ jaˇ ve yoˬ. Ya‸ hk'aˇ, Hkri‸ yaˇ hui hta‸ teˇ pawˆ ceh tiˉ chiˇ a‸ piˇ taˍ ve yonˍ ve teˇ ceuˬ awˬ pon nawˬ hui g'aˇ hte‸ te tuˬ, ngaˬ nawˬ hui hta‸ awˬ g'aˇ piˇ leh li‸ chi teˇ k'oˆ g'a bvuh‸ laˇ ve yoˬ. 4 Awˬ lawn k'o, chaw teˇ hpaˍ hpaˍ ngaˬ hui geh hk'awˇ lo‸ la peuˬ. G'uiˬ sha hta‸ maˇ yawˆ maˇ yan ve chaw chi teˇ hpaˍ lehˬ, haiˬ ve leh cha‸ chiˆ ve laiˉ ceuˬ te tuˬ awˬ pon, G'uiˬ sha ve awˬ bon hta‸ yuˬ hpfuhˆ piˇ ve yoˬ. Peuˬ leh, Yeˍsuˆ Hkri‸ ceh tiˉ ngaˬ hui ve Uˉ peunˍ shehˍ hpaˇ leh Jawˇ mawˇ hpeh‸ ve ka‸, yawˇ hui yawˇ hta‸ chiˇ baˬ ve yoˬ. Ciˍ yanˍ ve chi hta‸ yawˇ hui g'a hkanˍ tuˬ, aˬ sho-eˬ htaˇ ka‸ k'oˆ cheˆ taˍ peuˬ ve yoˬ. 5 Nawˬ hui teˇ pawˆ hk'a deh‸ shiˍ peuˬ ve htawˇ, ngaˬ nawˬ hui hta‸ chi hk'e k'aw‸ dawˇ nawˇ laˇ gaˇ ve yoˬ. Jawˇ mawˇ G'uiˬ sha lehˬ, Eˇjiˇtu‸ mvuhˇ miˬ awˬ hk'aw lo chaw ceuˬ teˇ ceuˬ hta‸ htaiˍ hk'aw‸ piˇ peuˬ hk'aw‸ nawˉ, maˇ yonˍ ve chaw teˇ hpaˍ hta‸ yawˇ te luˬ te sheˆ piˇ ve yoˬ. 6 Chi hk'oˆ ka‸, a shu yawˇ ve aˉ yaˇ hta‸ baˬ taˉ leh, a shu yawˇ ve chehˇ kuiˬ hta‸ baˬ taˉ ve mvuhˇ naw ma tcuh yaˇ teˇ hpaˍ hta‸ yawˇ co co taiˍ taiˍ yeˬ ve sho caˆ hpeh taˍ leh, naˆ ho‸ ve awˬ hk'aw lo haw taˍ ve yoˬ. Suhˉ jehˬ tuˬ awˬ pon, uiˍ jaˇ ve awˬ nyi teˇ nyi htaˇ hk'a gaˬ, yawˇ yawˇ hui hta‸ chi hk'e haw taˍ ve yoˬ. 7 Oˇ ve hk'a shuˍ shuˍ, Sawˉdonˍ venˇ, Gawˇmawˇra‸ venˇ leh, awˬ paˇ awˬ kui lo cawˬ ve venˇ teˇ hpaˍ htawˇ, ngaˬ hui awˬ pon henˇ yuˬ jawˬ yuˬ tuˬ hpeh‸ ve yoˬ. Venˇ yaˇ oˇ ve teˇ hpaˍ lehˬ, haˉ chawˇ haˉ paˆ te ponˬ te leuˉ leh, hawˉ hk'aˆ chawˇ hawˉ hk'aˆ ka‸ peh‸ ve tzuhˆ ve hta‸ te ve pa taw, co co taiˍ taiˍ aˬ miˍ to‸ chehˇ ve ciˍ yanˍ ve hta‸ g'a hkanˍ chehˇ ve yoˬ. 8 Ya‸ hk'aˇ, chaw chi teˇ hpaˍ lehˬ, zuh‸ maˆ mawˬ ve hta‸ cuˇ ve awˬ hk'aw lo, chi hk'a shuˍ shuˍ a shu yawˇ ve awˬ suhˍ awˬ shaˍ hta‸ cha‸ chiˆ tuˬ te ve yoˬ. Yawˇ hui lehˬ, uˉ peunˍ ve chaw teˇ hpaˍ hta‸ hpfuhˆ baˬ leh, awˬ me‸ awˬ hponˇ cawˬ ve chaw teˇ hpaˍ hta‸ maˇ shawˍ maˇ caˆ k'oˆ ve yoˬ. 9 Uiˍ ve mvuhˇ naw ma tcuh yaˇ Miˆhkeˍlaˆ lehˬ, Moˉseˍ suh taˍ ve awˬ to awˬ lawn neˇ haiˬ hta‸ tawˇ g'awˬ da‸ ve teˇ yanˇ, maˇ shawˍ maˇ caˆ k'oˆ ve awˬ hk'aw lo yawˇ hta‸ suhˉ taˆ maˇ haˆ. Jawˇ mawˇ G'uiˬ sha nawˬ hta‸ deˇ maˍ laˇ tuˬ yoˬ teh‸, yawˇ yawˇ hta‸ k'oˆ piˇ ve yoˬ. 10 Ya‸ hk'aˇ, chaw chi teˇ hpaˍ lehˬ, yawˇ hui maˇ shiˍ ve awˬ ceuˬ teˇ hpaˍ awˬ lawn maˇ shawˍ maˇ caˆ k'oˆ ve yoˬ. Maˇ dawˇ shiˍ puiˉ ve to nuˇ to shaˆ hk'a shuˍ shuˍ, yawˇ hui lehˬ a shu yawˇ hk'aˇ yawˇ shiˍ taˍ ve awˬ hk'aˇ suh te k'ai ve pa taw, luˬ k'ai sheˆ k'ai ve yoˬ. 11 Yawˇ hui g'a dawˇ haˍ jaˇ tuˬ yoˬ. Awˬ lawn k'o, Kaˍiˉnaˆ ve ya‸ k'aw awˬ hk'aˇ suh yawˇ hui k'ai ve yoˬ. Chi hk'oˆ ka‸, yawˇ hui awˬ hpfuhˇ g'a tuˬ awˬ pon, Baˍlanˍ te ya‸ ve awˬ hk'aˇ suh g'uiˇ k'ai leh, Kawˇraˆ hpfuhˆ k'ai ve hk'e, yawˇ hui htawˇ hpfuhˆ k'ai ve pa taw g'a luˬ g'a sheˆ ve yoˬ. 12 Nawˬ hui ha‸ pehnˇ ve pawehˇ hta‸ caˇ htaˇ, yawˇ hui lehˬ iˉ kaˆ awˬ hk'aw lo cawˬ ve, kawˆ tuˬ uiˍ ve haˉ pui shiˍ teˇ hpaˍ hk'e hpeh‸ ve yoˬ. Yawˇ hui teˇ geh hti caˇ hti dawˬ ve awˬ hk'aw lo, maˇ kawˆ puiˉ leh, a shu yawˇ awˬ to awˬ pon ceh tiˉ dawˇ nyi puiˉ ve yoˬ. Yawˇ hui lehˬ, mvuhˇ haw meuˆ chiˇ veu ve, iˉ kaˆ maˇ cawˬ ve moˬ teˇ hpaˍ hk'e hpeh‸ ve yoˬ. Mvuhˇ goˇ htaˇ, awˬ shiˍ maˇ naw‸ leh, g'awˬ baˬ peuˬ leh nyiˇ pawˆ suh peuˬ ve iˉ shiˍ cehˬ hk'e htawˇ yawˇ hui hpeh‸ ve yoˬ. 13 Yawˇ hui lehˬ, htawˇ hpfuhˆ nawˬ hpfuhˆ te ve laˇ tsuhˇ g'uiˬ g'uiˬ baˇ teˇ hpaˍ awˬ fuˇ tawˆ la piˇ ve hk'a shuˍ shuˍ, a shu yawˇ ve ya‸ taw tuˬ teˇ hpaˍ hta‸ tawˆ la piˇ ve yoˬ. Yawˇ hui lehˬ, htawˇ k'aw‸ nawˬ k'aw‸ k'ai ve meu‸ keu shiˍ teˇ hpaˍ hk'e hpeh‸ ve yoˬ. Naˆ ho‸ jaˇ ve chehˇ kuiˬ yawˇ hui awˬ pon co co taiˍ taiˍ teh taˍ ve yoˬ. 14 Aˍdanˍ hta‸ tanˬ leh suhˍ co-e teˇ co-e awˬ hk'aw lo chehˇ ve Eˇnawˆ teˇ g'aˇ htawˇ, yawˇ hui awˬ lawn bon maˍ leh k'oˆ ve, Nyi loˬ, Jawˇ mawˇ G'uiˬ sha lehˬ, yawˇ ve da‸ kehˬ ve chaw awˬ meunˍ awˬ shehnˉ geh teˇ geh laˬ ve yoˬ. 15 Yawˇ laˬ ve lehˬ, chaw hk'a peu-eˬ hta‸ suhˉ jehˬ tuˬ awˬ pon yoˬ. Chi hk'oˆ ka‸, G'uiˬ sha hta‸ maˇ yawˆ yan ve chaw hk'a peu-eˬ, yawˇ hui maˇ yawˆ maˇ yan te leh haiˬ ve kanˉ hk'a te ve hk'a peu-eˬ awˬ pon maˇ k'oˆ, G'uiˬ sha hta‸ maˇ yawˆ yan ve venˇ baˆ yaˇ chi teˇ hpaˍ yawˇ hta‸ tawˇ tzuhˇ tawˇ shaˆ hk'a yaw ve tawˇ hkawˇ hk'a peu-eˬ awˬ pon maˇ k'oˆ, yawˇ yawˇ hui hta‸ suhˉ taˆ leh ciˍ yanˍ piˇ tuˬ awˬ pon htawˇ yawˇ laˬ ve yoˬ teh‸ k'oˆ taˍ ve yoˬ. 16 Chaw oˇ ve teˇ hpaˍ lehˬ, beu puiˉ hk'aiˉ puiˉ ve chaw, k'oˆ puiˉ shanˬ puiˉ ve chaw, a shu yawˇ ve awˬ suhˍ awˬ shaˍ a loˍ awˬ hk'aˇ suh k'ai ve chaw, caˆ muiˬ leh tawˇ uiˍ tawˇ mvuh yaw ve chaw leh, shu geh teˇ ceuˬ ceuˬ g'a tuˬ shu hta‸ chiˇ uiˍ chiˇ mvuh piˇ puiˉ ve chaw hpeh‸ ve yoˬ. 17 Ha‸ ve chaw teˇ hpaˍ-oˬ, ponˬ laˬ htaˇ ngaˬ hui ve Jawˇ mawˇ Yeˍsuˆ Hkri‸ ve tcuh yaˇ teˇ hpaˍ k'oˆ taˍ ve tawˇ hkawˇ teˇ hpaˍ hta‸ nawˬ hui dawˇ nawˇ-oˆ. 18 Awˬ lawn k'o, yawˇ hui k'oˆ ve, Awˬ leh meuˇ ve awˬ yanˇ awˬ hk'aw lo, G'uiˬ sha hta‸ maˇ yawˆ yan leh a shu yawˇ ve awˬ suhˍ awˬ shaˍ a loˍ awˬ hk'aˇ suh te k'ai leh, hk'a mvuhˇ hk'a na k'oˆ guiˇ g'uiˬ guiˇ ve chaw teˇ hpaˍ tawˆ la tuˬ yoˬ teh‸, nawˬ hui hta‸ k'oˆ taˍ laˇ peuˬ. 19 Chaw oˇ ve teˇ hpaˍ lehˬ, awˬ moˍ hta‸ hpaˆ da‸ tuˬ te ve chaw hpeh‸ ve yoˬ. Yawˇ hui awˬ hk'aw lo Awˬ ha hpu maˇ chehˇ leh, awˬ suhˍ awˬ shaˍ hpawˇ hta‸ ceh tiˉ caˉ da‸ ve chaw hpeh‸ ve yoˬ. 20 Ha‸ ve chaw teˇ hpaˍ-oˬ, da‸ kehˬ jaˇ ve nawˬ hui yonˍ ve teˇ ceuˬ awˬ hk'aw lo uiˍ la yeˬ la piˇ leh, da‸ ve kehˬ ve Awˬ ha hpu awˬ hk'aw lo bon lawˬ chehˇ-oˆ. 21 Nawˬ hui lehˬ, G'uiˬ sha ve ha‸ pehnˇ ve awˬ hk'aw lo a shu yawˇ awˬ to yeˬ chaweh chehˇ taˍ-o‸. Co ti‸ ha ti‸ g'a htaˇ hk'a gaˬ, ngaˬ hui ve Jawˇ mawˇ Yeˍsuˆ Hkri‸ ve ha k'aˉ puiˉ ve awˬ ceuˬ hta‸ law chehˇ taˍ-o‸. 22 Hk'a deh‸ maˇ yonˍ ve chaw teˇ hpaˍ yonˍ la tuˬ ga piˇ-oˆ. 23 Chaw teˇ hpaˍ hpaˍ hta‸ ponˬ piˇ tuˬ, aˬ miˍ awˬ hk'aw lo g'awˬ tawˆ-oˆ. Peuˬ leh, kawˆ ve awˬ hk'aw lo chaw teˇ hpaˍ hpaˍ hta‸ ha k'aˉ-oˆ. Awˬ suhˍ awˬ shaˍ a loˍ hta‸ pa taw cha‸ chiˆ k'ai ve veu‸ k'aˇ teˇ hpaˍ hta‸ canˇ-oˆ. 24 Nawˬ hui maˇ g'a paiˍ tuˬ, G'uiˬ sha lehˬ nawˬ hui hta‸ nyi ha‸ shaˉ puiˉ ve yoˬ. Nawˬ hui ya‸ kuiˬ jiˆ kuiˬ maˇ cawˬ leh, yawˇ ve awˬ me‸ awˬ hponˇ hk'a biˇ cawˬ kuiˬ lo nawˬ hui ha lehˬ ha k'a g'a chehˇ tuˬ yawˇ te puiˉ ve yoˬ. 25 Ngaˬ hui ve Jawˇ mawˇ Yeˍsuˆ Hkri‸ awˬ hk'aw lo, ngaˬ hui ve Htaiˍ hk'aw‸ paˍ G'uiˬ sha teˇ g'aˇ tiˉ ve hta‸ awˬ me‸ awˬ hponˇ teˇ ceuˬ, uiˍ ve mvuh ve teˇ ceuˬ, kanˇ paˆ teˇ ceuˬ leh, uˉ peunˍ ve teˇ ceuˬ, awˬ hkuiˉ puiˍ htaˇ ka‸, chi beu‸ ka‸, co co taiˍ taiˍ ka‸ cawˬ piˇ-oˆ. A menˬ.

Hpeu‸ maˍ 1

1 Yeˍsuˆ Hkri‸ hpeu‸ maˍ laˇ ve awˬ lawn teˇ hpaˍ li‸ chi awˬ hk'aw lo bvuh‸ taˍ ve yoˬ. Maˇ maw maw hpeh‸ la tuˬ ve awˬ lawn teˇ hpaˍ Yeˍsuˆ Hkri‸ lehˬ, yawˇ ve awˬ ceˬ teˇ hpaˍ hta‸ maw piˇ tuˬ, hpeu‸ maˍ laˇ ve awˬ lawn chi teˇ hpaˍ G'uiˬ sha Yeˍsuˆ hta‸ piˇ taˍ ve yoˬ. G'uiˬ sha lehˬ yawˇ ve mvuhˇ naw ma tcuh yaˇ teˇ g'aˇ hta‸ peu laˇ leh, yawˇ ve awˬ ceˬ Yoˇhanˬ hta‸ awˬ lawn chi teˇ hpaˍ shiˍ piˇ mawˬ piˇ ve yoˬ. 2 G'uiˬ sha ve tawˇ hkawˇ leh Yeˍsuˆ Hkri‸ shaˉ hkiˆ hkanˍ taˍ ve awˬ lawn hta‸ Yoˇhanˬ yawˇ g'a mawˬ ve hk'e shaˉ hkiˆ hkanˍ ve yoˬ. 3 G'uiˬ sha ve tcuh kaˍ paˍ ve tawˇ hkawˇ chi hta‸ g'aw maˍ ve chaw maˇ k'oˆ, bvuh‸ taˍ ve teˇ hpaˍ hta‸ g'a kaˇ leh te ve chaw teˇ hpaˍ maˇ k'oˆ, awˬ bon uiˍ ve yoˬ. Awˬ lawn k'o, awˬ yanˇ gaˬ la paˇ neˇ ve yoˬ. 4 Ngaˬ Yoˇhanˬ lehˬ, Aˍsiˆ mvuhˇ miˬ awˬ hk'aw lo cawˬ ve Hkri‸ yaˇ awˬ moˍ suhˍ moˍ hta‸ li‸ bvuh‸ laˇ ve yoˬ. Ponˬ laˬ htaˇ ka‸, chi beu‸ ka‸, laˬ tuˬ ve awˬ yanˇ awˬ hk'aw lo ka‸, te‸ chehˇ ve teˇ g'aˇ geh lo maˇ k'oˆ, yawˇ ve k'aw jaw mehˆ g'uˇ suhˍ lo chehˇ taˍ ve awˬ ha suhˍ maˬ geh lo maˇ k'oˆ, 5 ka ti‸ yeˬ ve shaˉ hkiˆ hkanˍ shehˍ hpaˇ Yeˍsuˆ Hkri‸ geh lo maˇ k'oˆ, awˬ bon awˬ shinˉ leh dawˇ sha gaˇ sha tuˬ nawˬ hui geh cawˬ piˇ-oˆ. Yeˍsuˆ Hkri‸ lehˬ, suh peuˬ ve chaw hui awˬ hk'aw lo awˉ lawˉ k'aw‸ te‸ tu la ve teˇ g'aˇ hpeh‸ leh, miˬ guiˬ hk'oˆ ve hkunˉ hawˉ hkanˇ teˇ hpaˍ hta‸ uˉ peunˍ shehˍ hpaˇ hpeh‸ ve yoˬ. Yawˇ ngaˬ hui hta‸ ha‸ leh, yawˇ ve awˬ suhˍ hta‸ cuˇ leh ngaˬ hui ve venˇ baˆ hta‸ hpehˇ hk'a laˇ peuˬ. 6 Ngaˬ hui lehˬ, yawˇ ve mvuhˇ miˬ yaˇ hpeh‸ la tuˬ maˇ k'oˆ, yawˇ ve Awˬ pa G'uiˬ sha ve paw hkuˇ teˇ hpaˍ hpeh‸ la tuˬ maˇ k'oˆ, yawˇ te ve yoˬ. Co co taiˍ taiˍ yawˇ hta‸ awˬ me‸ awˬ hponˇ leh kanˇ paˆ cawˬ piˇ-oˆ. A menˬ. 7 Nyi loˬ, yawˇ lehˬ moˬ geh teˇ geh ya‸ la tuˬ yoˬ. Mehˆ shiˍ teˇ shiˍ le le leh yawˇ hta‸ juˆ pawnˍ ve chaw hui yawˇ hta‸ g'a mawˬ tuˬ yoˬ. Miˬ guiˬ hk'oˆ chehˇ ve chaw ceuˬ hk'a peu-eˬ yawˇ hta‸ pa taw g'a paˆ hawˬ tuˬ yoˬ. Chi hk'e hpeh‸ la tuˬ yoˬ. A menˬ. 8 Ngaˬ lehˬ awˬ hkuiˉ puiˍ leh awˬ leh meuˇ hpeh‸ ve yoˬ teh‸, Jawˇ mawˇ G'uiˬ sha k'oˆ ve yoˬ. Yawˇ lehˬ, ponˬ laˬ htaˇ ka‸, chi beu‸ ka‸, laˬ tuˬ ve awˬ yanˇ awˬ hk'aw lo ka‸, te‸ chehˇ ve Kanˇ paˆ uiˍ shehˍ hpaˇ hpeh‸ ve yoˬ. 9 Ngaˬ lehˬ, nawˬ hui ve awˬ viˉ awˬ nyi Yoˇhanˬ yoˬ. Tu‸ ve hkanˍ ve teˇ ceuˬ hta‸ maˇ k'oˆ, G'uiˬ sha uˉ peunˍ ve teˇ ceuˬ hta‸ maˇ k'oˆ, yeunˇ hkanˍ ve teˇ ceuˬ hta‸ maˇ k'oˆ, Yeˍsuˆ awˬ hk'aw lo ngaˬ nawˬ hui geh teˇ geh hkanˍ chehˇ ve yoˬ. Ngaˬ lehˬ G'uiˬ sha ve tawˇ hkawˇ maˍ leh, Yeˍsuˆ awˬ lawn shaˉ hkiˆ hkanˍ ve pa taw, Paˍmoˆ conˇ lo ngaˬ g'a chehˇ taˍ ve yoˬ. 10 Jawˇ mawˇ Yeˍsuˆ ve awˬ nyi teˇ nyi htaˇ Awˬ ha hpu awˬ hk'aw lo ngaˬ chehˇ leh, behˬ heh ma awˬ hkawˇ bvuhˬ ve hk'a shuˍ shuˍ, ngaˬ awˬ hk'aw‸ nawˉ hpawˇ lo bvuhˬ jaˇ ve tawˇ hkawˇ hta‸ ngaˬ g'a kaˇ ve yoˬ. 11 Tawˇ hkawˇ oˇ ve lehˬ, Nawˬ g'a mawˬ ve teˇ hpaˍ hta‸ li‸ hk'aw bvuh‸ taˍ leh, Hkri‸ yaˇ awˬ moˍ chi suhˍ moˍ hta‸ feu piˇ-oˆ. Eˇfeˇsu‸, Saˍmuˇraˍnaˆ, Peˍraˍgaˍ, Saˍtiˍrehˇ, Saˍdiˆ, Hpiˇlaˍdeˍhpiˆ leh Lawˍdiˍkiˆ, awˬ moˍ chi teˇ hpaˍ hta‸ feu piˇ-oˆ teh‸ k'oˆ laˇ ve yoˬ. 12 Ngaˬ hta‸ tawˇ yaw laˇ shehˍ hpaˇ hta‸ g'a mawˬ tuˬ ngaˬ hpfuhˆ nyi htaˇ, shi kawˆ faiˇ suhˍ maˬ hta‸ ngaˬ g'a mawˬ ve yoˬ. 13 Kawˆ faiˇ oˇ ve teˇ hpaˍ awˬ k'aw ji lo chaw yaˇ ve. Yaˇ hpu hta‸ shuˍ ve chaw teˇ g'aˇ hta‸ ngaˬ g'a mawˬ ve yoˬ. Chaw oˇ ve lehˬ, hkui sheh hk'a gaˬ zuhˬ ve aˉ po‸ hta‸ veu‸ deh leh, yawˇ ve nyi ma pui lo shi haˍ pi caˆ tsuh‸ taˍ ve yoˬ. 14 Yawˇ ve oˉ k'oˍ leh yawˇ ve uˉ hkeh mvuh lehˬ, hpu ve yawˬ mvuh hk'a shuˍ shuˍ maˇ k'oˆ, vaˇ meu-e hk'a shuˍ shuˍ maˇ k'oˆ, hpu ve yoˬ. Yawˇ ve mehˆ shiˍ lehˬ, aˬ miˍ ha hk'a shuˍ shuˍ hpeh‸ ve yoˬ. 15 Yawˇ ve hkui sheh lehˬ, aˬ miˍ awˬ hk'aw lo lawˍ taˍ ve kuiˇ hk'a shuˍ shuˍ hpeh‸ ve yoˬ. Yawˇ tawˇ yaw ve awˬ hkawˇ lehˬ, iˉ kaˆ g'uiˬ baˇ maˇ jaˇ ve awˬ hkawˇ bvuhˬ ve hk'a shuˍ shuˍ hpeh‸ ve yoˬ. 16 Yawˇ ve la‸ sheh la‸ sha paˉ lo meu‸ keu shiˍ suhˍ shiˍ vawˆ taˍ ve yoˬ. Yawˇ ve maw‸ k'aw awˬ hk'aw lo awˬ viˇ nyiˇ hpawˇ cawˬ ve tcuhˆ jaˇ ve aˉ htaw teˇ maˬ tawˆ la ve yoˬ. Yawˇ ve mehˆ hpfuhˇ lehˬ, mvuhˇ nyi g'euˆ hk'a shuˍ shuˍ ba da‸ jaˇ ve yoˬ. 17 Yawˇ hta‸ ngaˬ mawˬ ve teˇ yanˇ, ngaˬ lehˬ suh ve chaw teˇ g'aˇ hk'a shuˍ shuˍ yawˇ ve hkui paˇ lo paiˍ taˍ ve yoˬ. Ya‸ hk'aˇ, yawˇ ve la‸ sha paˉ la‸ sheh ngaˬ awˬ hk'oˆ taˍ leh k'oˆ laˇ ve, Taˇ kawˆ. Ngaˬ lehˬ, awˬ hkuiˉ puiˍ leh awˬ leh meuˇ hpeh‸ ve yoˬ. 18 Te‸ chehˇ ve teˇ g'aˇ htawˇ ngaˬ hpeh‸ ve yoˬ. Ngaˬ suh peuˬ ve htawˇ chi beu‸ co co taiˍ taiˍ ngaˬ te‸ chehˇ ve yoˬ. Suh ve teˇ ceuˬ ve shawˇ leh suh mvuhˇ miˬ ve shawˇ hta‸ ngaˬ vawˆ taˍ ve yoˬ. 19 Hk'e te leh, nawˬ g'a mawˬ peuˬ ve teˇ hpaˍ hta‸ maˇ k'oˆ, chi beu‸ hpeh‸ chehˇ ve teˇ hpaˍ hta‸ maˇ k'oˆ, awˬ hk'aw‸ nawˉ hpeh‸ la tuˬ ve teˇ hpaˍ hta‸ maˇ k'oˆ, bvuh‸ taˍ-o‸. 20 Ngaˬ ve la‸ sheh la‸ sha paˉ lo nawˬ g'a mawˬ peuˬ ve meu‸ keu shiˍ suhˍ shiˍ leh, shi kawˆ faiˇ suhˍ maˬ ve faˉ taˍ ve tcuhˉ kuiˬ lehˬ chi hk'e yoˬ. Meu‸ keu shiˍ suhˍ shiˍ lehˬ, Hkri‸ yaˇ awˬ moˍ suhˍ moˍ ve tcuh yaˇ teˇ hpaˍ hpeh‸ leh, kawˆ faiˇ suhˍ maˬ lehˬ, Hkri‸ yaˇ awˬ moˍ suhˍ moˍ hpeh‸ ve yoˬ.

Hpeu‸ maˍ 2

1 Eˇfeˇsu‸ venˇ awˬ hk'aw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hk'e bvuh‸ piˇ-oˆ. La‸ sha paˉ ve la‸ sheh awˬ hk'aw lo meu‸ keu shiˍ suhˍ shiˍ vawˆ taˍ leh, shi kawˆ faiˇ suhˍ maˬ awˬ k'aw ji lo yiˬ yiˬ laˬ laˬ te chehˇ ve teˇ g'aˇ chi hk'e k'oˆ ve yoˬ. 2 Nawˬ te chehˇ ve teˇ hpaˍ hta‸ maˇ k'oˆ, kanˉ te hkeu‸ ve hta‸ maˇ k'oˆ, yeunˇ hkanˍ puiˉ ve hta‸ maˇ k'oˆ, ngaˬ shiˍ ve yoˬ. Haiˬ ve chaw teˇ hpaˍ hta‸ nawˬ hkanˍ maˇ g'a ve hta‸ ka‸ ngaˬ shiˍ ve yoˬ. Tcuh yaˇ maˇ heˆ ve ka‸, a shu yawˇ awˬ to hta‸ tcuh yaˇ yoˬ teh‸ k'oˆ ve chaw teˇ hpaˍ hta‸ nawˬ lawˇ nyi leh, yawˇ hui heˍ ve chaw hpeh‸ ve hta‸ nawˬ g'a shiˍ ve yoˬ. 3 Nawˬ yeunˇ hkanˍ puiˉ leh, ngaˬ ve awˬ meh hta‸ pa taw tu‸ ve hkanˍ ve hta‸ g'a hkanˍ htawˇ, nawˬ nyi ma maˇ luˬ ve hta‸ ka‸ ngaˬ shiˍ ve yoˬ. 4 Ya‸ hk'aˇ, ngaˬ nawˬ hta‸ venˇ baˆ taˍ tuˬ teˇ ceuˬ cawˬ ve yoˬ. Awˉ lawˉ htaˇ nawˬ ha‸ puiˉ ve htawˇ, chi beu‸ maˇ k'aw‸ ha‸. 5 Hk'e te leh, nawˬ mvuh kuiˬ lo ce k'ai peuˬ ve hta‸ dawˇ nawˇ leh, venˇ baˆ hta‸ dawˇ hpfuhˆ leh, awˉ lawˉ htaˇ te ve teˇ hpaˍ hta‸ k'aw‸ te-o. Nawˬ ve venˇ baˆ hta‸ maˇ dawˇ hpfuhˆ ve k'o, ngaˬ nawˬ geh laˬ leh nawˬ ve kawˆ faiˇ hta‸ taˍ kuiˬ awˬ hk'aw lo ngaˬ yuˬ tawˆ tuˬ yoˬ. 6 Ya‸ hk'aˇ, da‸ ve chi teˇ ceuˬ hta‸ nawˬ te chehˇ sheˍ. Niˇkawˇlaˆ chaw hui te ve kanˉ teˇ hpaˍ hta‸ nawˬ canˇ ve yoˬ. Ngaˬ htawˇ kanˉ oˇ ve teˇ hpaˍ hta‸ canˇ ve yoˬ. 7 Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ k'oˆ piˇ ve tawˇ hkawˇ hta‸ hk'a deh‸ na-o. G'aˇ ve chaw teˇ g'aˇ lehˬ, co ha te‸ piˇ lawˬ ve suhˆ cehˬ teˇ cehˬ ve awˬ shiˍ hta‸ g'a caˇ tuˬ ngaˬ yawˇ hta‸ a hkaw-anˬ piˇ tuˬ yoˬ. Suhˆ cehˬ oˇ ve lehˬ, G'uiˬ sha ve Paˍraˍdiˇsuˆ awˬ hk'aw lo cawˬ taˍ ve yoˬ. 8 Saˍmuˇraˍnaˆ venˇ awˬ hk'aw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hk'e bvuh‸ piˇ-oˆ. Awˬ hkuiˉ puiˍ leh awˬ leh meuˇ hpeh‸ chehˇ ve leh, suh peuˬ ve htawˇ k'aw‸ te‸ la peuˬ ve teˇ g'aˇ chi hk'e k'oˆ ve yoˬ. 9 Nawˬ g'a hkanˍ chehˇ ve tu‸ ve hkanˍ ve leh haˍ ve g'awˇ ve hta‸ ngaˬ shiˍ ve yoˬ. (Ya‸ hk'aˇ, nawˬ paw sha chehˇ ve yoˬ.) Chaw teˇ hpaˍ hpaˍ nawˬ hta‸ hk'aiˉ chehˇ ve hta‸ ka‸ ngaˬ shiˍ ve yoˬ. Yawˇ hui lehˬ, Yuˇda‸ chaw hpeh‸ ve yoˬ teh‸ k'oˆ ve htawˇ, Yuˇda‸ chaw hpeh‸ ve maˇ heˆ, Saˍtanˍ ve awˬ moˍ hpeh‸ ve yoˬ. 10 Maˇ maw maw nawˬ g'a hkanˍ tuˬ ve awˬ ceuˬ hta‸ taˇ kawˆ. Nawˬ hta‸ lawˇ nyi tuˬ neˇ haiˬ lehˬ, nawˬ hui teˇ hpaˍ hpaˍ hta‸ htawnˍ hk'aw lo baˬ keu leh, teˇ chi nyi hk'a gaˬ fawˉ mehˍ ve hta‸ nawˬ hui g'a hkanˍ tuˬ yoˬ. Suh htaˇ hk'a gaˬ nyi ma yeˬ chehˇ-oˆ. Oˇ hk'e te ve k'o, co ha te‸ piˇ lawˬ ve shi uˉ tcuhˍ ngaˬ nawˬ hta‸ hk'awˆ laˇ tuˬ yoˬ. 11 Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ k'oˆ piˇ ve tawˇ hkawˇ hta‸ hk'a deh‸ na-o. Nyiˇ pawˆ teˇ pawˆ suh ve teˇ ceuˬ lehˬ, g'aˇ ve chaw teˇ g'aˇ hta‸ naˬ tuˬ te maˇ g'a. 12 Peˍraˍgaˍ venˇ awˬ hk'aw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hk'e bvuh‸ piˇ-oˆ. Awˬ viˇ nyiˇ hpawˇ cawˬ ve tcuhˆ jaˇ ve aˉ htaw hta‸ vawˆ taˍ ve teˇ g'aˇ chi hk'e k'oˆ ve yoˬ. 13 Nawˬ ve chehˇ kuiˬ lehˬ, Saˍtanˍ ve k'aw jaw hpeh‸ ve hta‸ ngaˬ shiˍ ve yoˬ. Ngaˬ ve awˬ meh hta‸ nawˬ vawˆ yeˬ taˍ ve yoˬ. Ngaˬ ve ka ti‸ yeˬ ve shaˉ hkiˆ hkanˍ shehˍ hpaˇ Anˍtiˇpaˆ ve awˬ nyi awˬ hk'aw lo ka‸, ngaˬ hta‸ yonˍ ve teˇ ceuˬ hta‸ nawˬ maˇ baˬ taˉ. Yawˇ lehˬ, Saˍtanˍ chehˇ taˍ ve nawˬ ve chehˇ kuiˬ awˬ hk'aw lo tiˇ pehˍ ve hta‸ g'a hkanˍ ve yoˬ. 14 Ya‸ hk'aˇ, ngaˬ nawˬ hta‸ venˇ baˆ taˍ tuˬ teˇ hpaˍ cawˬ ve yoˬ. Nawˬ awˬ hk'aw lo chaw teˇ hpaˍ hpaˍ lehˬ, Baˍlanˍ meh ve teˇ g'aˇ maˍ ve awˬ hk'aˇ hta‸ vawˆ taˍ ve yoˬ. Iˉsaˍreˍlaˆ chaw yaˇ teˇ hpaˍ mehˆ g'uˇ suhˍ hkui htiˇ poˬ kuiˬ teh taˍ tuˬ, yawˇ lehˬ Baˍlehˆ hta‸ maˍ piˇ ve yoˬ. Hkui htiˇ poˬ kuiˬ oˇ ve lehˬ, shaˉ ho‸ hta‸ tanˇ taˍ ve caˇ tuˬ hta‸ caˇ ve teˇ ceuˬ leh, haˉ chawˇ haˉ paˆ te ve teˇ ceuˬ hpeh‸ ve yoˬ. 15 Chi hk'oˆ ka‸, nawˬ awˬ hk'aw lo chaw teˇ hpaˍ hpaˍ lehˬ, Niˇkawˇlaˆ chaw hui maˍ ve awˬ hk'aˇ hta‸ vawˆ taˍ ve yoˬ. 16 Hk'e te leh, venˇ baˆ hta‸ dawˇ hpfuhˆ-oˆ. Hk'e maˇ heˆ k'o, ngaˬ nawˬ geh haˆ haˆ laˬ leh, ngaˬ ve maw‸ k'aw awˬ hk'aw lo tawˆ la ve aˉ htaw hta‸ yehˇ leh, yawˇ hui hta‸ ngaˬ ma‸ bawˆ tuˬ yoˬ. 17 Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ k'oˆ piˇ ve tawˇ hkawˇ hta‸ hk'a deh‸ na-o. G'aˇ ve chaw teˇ g'aˇ hta‸ faˉ taˍ ve maˍ naˆ shiˍ maˇ k'oˆ, hpuˉ-ehˍ ve haˉ pui teˇ shiˍ maˇ k'oˆ, ngaˬ piˇ tuˬ yoˬ. Haˉ pui shiˍ oˇ ve awˬ hk'oˆ hta‸ awˬ meh awˬ suhˉ bvuh‸ taˍ leh, haˉ pui shiˍ oˇ ve hta‸ g'a ve chaw teˇ g'aˇ maˇ heˆ k'o, chaw teˇ g'aˇ ka‸ awˬ meh oˇ ve hta‸ maˇ shiˍ. 18 Saˍtiˍrehˇ venˇ awˬ hk'aw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hk'e bvuh‸ piˇ-oˆ. G'uiˬ sha ve Yaˇ hpu ve mehˆ shiˍ lehˬ, aˬ miˍ ha hk'e hpeh‸ leh, yawˇ ve hkui sheh lehˬ, lawˍ taˍ ve kuiˇ hk'e hpeh‸ ve yoˬ. 19 Yawˇ chi hk'e k'oˆ ve, Nawˬ kanˉ te chehˇ ve teˇ ceuˬ, ha‸ pehnˇ ve teˇ ceuˬ, yonˍ ve teˇ ceuˬ, shu hta‸ ga piˇ ve teˇ ceuˬ leh, yeunˇ hkanˍ puiˉ ve teˇ ceuˬ hta‸ ngaˬ shiˍ ve yoˬ. Chi hk'oˆ ka‸, chi beu‸ nawˬ te chehˇ ve kanˉ teˇ hpaˍ lehˬ, awˉ lawˉ htaˇ nawˬ te ve kanˉ teˇ hpaˍ a‸ kehˉ maˇ ve hta‸ ngaˬ shiˍ ve yoˬ. 20 Ya‸ hk'aˇ, ngaˬ nawˬ hta‸ venˇ baˆ taˍ tuˬ teˇ ceuˬ cawˬ ve yoˬ. Yawˇ awˬ to hta‸ G'uiˬ sha ve tcuh kaˍ ma teh‸ k'oˆ ve Yeˍsaˍbeˍlaˆ meh ve yaˇ miˇ teˇ g'aˇ hta‸ nawˬ chehˇ tcuh taˍ sheˍ ve yoˬ. Yawˇ lehˬ, ngaˬ ve awˬ ceˬ teˇ hpaˍ haˉ chawˇ haˉ paˆ te tuˬ leh, shaˉ ho‸ hta‸ tanˇ taˍ ve caˇ tuˬ teˇ hpaˍ hta‸ caˇ tuˬ, yawˇ hui hta‸ maˍ piˇ leh sheh ya‸ chehˇ ve yoˬ. 21 Venˇ baˆ dawˇ hpfuhˆ tuˬ ngaˬ yawˇ hta‸ awˬ yanˇ piˇ ve htawˇ, yawˇ haˉ chawˇ haˉ paˆ te chehˇ ve hta‸ dawˇ hpfuhˆ tuˬ nyi ma maˇ cawˬ. 22 Nyi loˬ, ngaˬ yawˇ hta‸ naˬ kuiˬ gawˬ kuiˬ lo baˬ keu tuˬ yoˬ. Yawˇ geh haˉ chawˇ haˉ paˆ te ve chaw hui hta‸ htawˇ, yawˇ te ve teˇ hpaˍ hta‸ yawˇ hui maˇ dawˇ hpfuhˆ ve k'o, uiˍ jaˇ ve tu‸ ve hkanˍ ve awˬ hk'aw lo ngaˬ yawˇ hui hta‸ baˬ keu tuˬ yoˬ. 23 Yawˇ ve awˬ yaˇ awˬ duˬ teˇ hpaˍ hta‸ ngaˬ tiˇ pehˍ tuˬ yoˬ. Ngaˬ lehˬ, nyi ma leh dawˇ hk'aˇ hta‸ ca nyi shehˍ hpaˇ hpeh‸ ve yoˬ teh‸, Hkri‸ yaˇ awˬ moˍ hk'a peu-eˬ g'a shiˍ tuˬ yoˬ. Nawˬ hui teˇ g'aˇ peuˬ teˇ g'aˇ, a shu yawˇ te ve kanˉ hta‸ keunˍ da‸ ve hk'e ngaˬ piˇ tuˬ yoˬ. 24 Saˍtanˍ ve naˉ jaˇ ve awˬ ceuˬ teh‸ shu k'oˆ ve teˇ hpaˍ hta‸ maˇ shiˍ leh, maˍ piˇ ve oˇ ve hta‸ maˇ na yuˬ ve, Saˍtiˍrehˇ venˇ awˬ hk'aw lo chehˇ taˍ ve nawˬ hui awˬ kaˍ awˬ nu chaw teˇ hpaˍ hta‸ ngaˬ chi hk'e k'oˆ laˇ ve yoˬ. Ngaˬ nawˬ hui awˬ hk'oˆ hta‸ awˬ kaˍ awˬ nu awˬ vuiˬ maˇ k'aw‸ taˍ. 25 Nawˬ hui geh hk'a cawˬ taˍ ve teˇ hpaˍ hta‸ ngaˬ gaˬ la htaˇ hk'a gaˬ hk'a deh‸ vawˆ taˍ-o‸. 26 G'aˇ shehˍ hpaˇ hpeh‸ leh, awˬ leh hk'a gaˬ ngaˬ ve kanˉ hta‸ te ve chaw teˇ g'aˇ hta‸, mvuhˇ miˬ teˇ hpaˍ awˬ hk'oˆ uˉ peunˍ tuˬ, Awˬ pa ngaˬ hta‸ kanˇ paˆ pe‸ laˇ ve hk'e, ngaˬ htawˇ yawˇ hta‸ kanˇ paˆ piˇ tuˬ yoˬ. 27 Je‸ mu‸ hk'u hta‸ dawˆ hkoˇ ve hk'a shuˍ shuˍ, yawˇ lehˬ sho juˇ fuiˍ hta‸ yehˇ leh yawˇ hui hta‸ uˉ peunˍ tuˬ yoˬ. 28 Ngaˬ lehˬ, chaw oˇ ve hta‸ peuˬ tawˆ piˇ tuˬ yoˬ. 29 Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ k'oˆ piˇ ve tawˇ hkawˇ hta‸ hk'a deh‸ na-o.

Hpeu‸ maˍ 3

1 Saˍdiˆ venˇ awˬ hk'aw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hk'e bvuh‸ piˇ-oˆ. G'uiˬ sha ve awˬ ha suhˍ maˬ cawˬ leh meu‸ keu shiˍ suhˍ shiˍ cawˬ ve teˇ g'aˇ chi hk'e k'oˆ ve yoˬ. Nawˬ te chehˇ ve kanˉ teˇ hpaˍ hta‸ ngaˬ shiˍ ve yoˬ. Nawˬ a sha‸ te‸ chehˇ ve yoˬ teh‸ shu k'oˆ ve htawˇ, nawˬ suh taˍ peuˬ ve yoˬ. 2 Shaw chehˇ-oˆ. Cawˬ taˍ sheˍ ve, suh paˇ neˇ ve awˬ ceuˬ teˇ hpaˍ hta‸ awˬ g'aˇ hk'a deh‸ piˇ-oˆ. Awˬ lawn k'o, ngaˬ ve G'uiˬ sha mehˆ g'uˇ suhˍ nawˬ ve kanˉ biˇ la peuˬ ve hta‸ ngaˬ maˇ mawˬ. 3 Hk'e te leh, nawˬ hk'aˬ hk'e g'a ha‸ yuˬ taˍ leh g'a kaˇ taˍ ve teˇ hpaˍ hta‸ dawˇ nawˇ-oˆ. Oˇ ve hta‸ na yuˬ leh venˇ baˆ dawˇ hpfuhˆ-oˆ. Nawˬ maˇ shaw chehˇ taˍ ve k'o, chaw hk'awˇ hk'a shuˍ shuˍ ngaˬ laˬ tuˬ yoˬ. Hk'aˬ ve teˇ yanˇ ngaˬ nawˬ geh gaˬ la tuˬ ve hta‸ nawˬ maˇ shiˍ. 4 Ya‸ hk'aˇ, Saˍdiˆ venˇ awˬ hkaw lo a shu yawˇ ve veu‸ k'aˇ hta‸ cha‸ chiˆ tuˬ maˇ te ve chaw teˇ hpaˍ hpaˍ cawˬ sheˍ ve yoˬ. Yawˇ hui keunˍ ve pa taw, hpu ve veu‸ k'aˇ hta‸ g'a veu‸ deh leh, ngaˬ geh g'a te toˇ tuˬ yoˬ. 5 G'aˇ ve chaw teˇ g'aˇ lehˬ, chi hk'e ve hpu ve veu‸ k'aˇ hta‸ g'a veu‸ deh tuˬ yoˬ. Co ti‸ ha ti‸ li‸ awˬ hk'aw lo yawˇ ve awˬ meh hta‸ ngaˬ shiˆ baˬ tuˬ maˇ heˆ. Ngaˬ Awˬ pa mehˆ g'uˇ suhˍ maˇ k'oˆ, Awˬ pa ve mvuhˇ naw ma tcuh yaˇ teˇ hpaˍ mehˆ g'uˇ suhˍ maˇ k'oˆ, Yawˇ lehˬ ngaˬ ve chaw hpeh‸ ve yoˬ teh‸, ngaˬ shaˉ hkiˆ hkanˍ tuˬ yoˬ. 6 Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ k'oˆ piˇ ve tawˇ hkawˇ hta‸ hk'a deh‸ na-o. 7 Hpiˇlaˍdeˍhpiˆ venˇ awˬ hk'aw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hk'e bvuh‸ piˇ-oˆ. Daˍviˆ ve shawˇ hta‸ vawˆ taˍ ve, da‸ ve kehˬ ve, hteˇ ve cawˇ ve teˇ g'aˇ lehˬ, yawˇ hpaw taˍ k'o, shu hoˆ maˇ g'a, yawˇ hoˆ taˍ k'o, shu hpaw maˇ g'a ve yoˬ. 8 Yawˇ k'oˆ ve, Nawˬ te chehˇ ve kanˉ teˇ hpaˍ hta‸ ngaˬ shiˍ ve yoˬ. Nyi loˬ, chaw teˇ g'aˇ ka‸ hoˆ maˇ g'a ve yehˬ miˉ teˇ maˬ hta‸ nawˬ mehˆ g'uˇ suhˍ lo ngaˬ hpaw taˍ peuˬ. Nawˬ awˬ g'aˇ a ciˉ ceh tiˉ cawˬ ve ka‸, ngaˬ ve tawˇ hkawˇ hta‸ nawˬ na yuˬ peuˬ leh, ngaˬ ve awˬ meh hta‸ nawˬ maˇ baˬ taˉ. 9 Saˍtanˍ ve awˬ moˍ awˬ hk'aw lo chehˇ ve chaw teˇ hpaˍ hta‸ nawˬ ve la‸ hk'aw lo ngaˬ chiˇ a‸ laˇ tuˬ yoˬ. Yawˇ hui lehˬ, Yuˇda‸ chaw hpeh‸ ve yoˬ teh‸ k'oˆ ve htawˇ, Yuˇda‸ chaw hpeh‸ ve maˇ heˆ, yawˇ hui heˍ ve yoˬ. Ngaˬ yawˇ hui hta‸ nawˬ ve hkui sheh awˬ paˇ lo oˉ k'oˍ pui tcuh leh, ngaˬ nawˬ hta‸ ha‸ ve yoˬ teh‸ yawˇ hui g'a shiˍ tuˬ yoˬ. 10 Yeunˇ hkanˍ-o‸ teh‸, ngaˬ nawˬ hta‸ k'oˆ laˇ ve tawˇ hkawˇ hta‸ nawˬ na yuˬ leh te ve pa taw, miˬ guiˬ yaˇ teˇ hpaˍ hta‸ lawˇ nyi tuˬ miˬ guiˬ hk'oˆ teˇ kaˬ le le lo lawˇ nyi ve awˬ yanˇ gaˬ la htaˇ, ngaˬ nawˬ hta‸ ponˬ laˇ tuˬ yoˬ. 11 Ngaˬ haˆ haˆ laˬ tuˬ yoˬ. Nawˬ ve shi uˉ tcuhˍ hta‸ chaw teˇ g'aˇ ka‸ maˇ g'a lu yuˬ tuˬ, nawˬ geh hk'a cawˬ taˍ ve teˇ hpaˍ hta‸ hk'a deh‸ vawˆ taˍ-o‸. 12 G'aˇ ve chaw teˇ g'aˇ lehˬ, ngaˬ ve G'uiˬ sha ve bon yehˬ lonˉ awˬ hk'aw lo awˬ hkuiˉ daw hpeh‸ la tuˬ ngaˬ te tuˬ yoˬ. Yawˇ lehˬ, hk'aˬ htaˆ ka‸ oˇ kaˬ lo maˇ tawˆ k'ai. Yawˇ awˬ hk'oˆ hta‸ ngaˬ ve G'uiˬ sha ve awˬ meh, ngaˬ ve G'uiˬ sha ve venˇ awˬ meh leh, ngaˬ ve awˬ meh awˬ suhˉ ngaˬ bvuh‸ taˍ tuˬ yoˬ. G'uiˬ sha ve venˇ oˇ ve lehˬ, ngaˬ ve G'uiˬ sha geh mvuhˇ naw ma lo ya‸ la ve, Yeˍruˆsaˍlehnˍ venˇ awˬ suhˉ hpeh‸ ve yoˬ. 13 Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ k'oˆ piˇ ve tawˇ hkawˇ hta‸ hk'a deh‸ na-o. 14 Lawˍdiˍkiˆ venˇ awˬ hk'aw lo cawˬ ve Hkri‸ yaˇ awˬ moˍ ve tcuh yaˇ hta‸ li‸ chi hk'e bvuh‸ piˇ-oˆ. Ka ti‸ yeˬ leh hteˇ lehˍ cawˇ lehˍ shaˉ hkiˆ hkanˍ shehˍ hpaˇ, G'uiˬ sha hpanˍ taˍ ve awˬ hkuiˉ puiˍ hpeh‸ ve, A menˬ teh‸ k'oˆ ve teˇ g'aˇ chi hk'e k'oˆ ve yoˬ. 15 Nawˬ te chehˇ ve kanˉ teˇ hpaˍ hta‸ ngaˬ shiˍ ve yoˬ. Nawˬ lehˬ, gawˬ ve ka‸ maˇ heˆ, chiˆ ve ka‸ maˇ heˆ. Nawˬ lehˬ, gawˬ ve teˇ ceuˬ, maˇ heˆ k'o chiˆ ve teˇ ceuˬ hpeh‸ tuˬ ve hta‸ ngaˬ heuˆ gaˇ ve yoˬ. 16 Ya‸ hk'aˇ, nawˬ lehˬ chiˆ ve ka‸ maˇ heˆ, gawˬ ve ka‸ maˇ heˆ, lehˬ ve tiˉ hpeh‸ chehˇ ve pa taw, ngaˬ ve maw‸ k'aw awˬ hk'aw lo ngaˬ nawˬ hta‸ hpe‸ baˬ tuˬ yoˬ. 17 Awˬ lawn k'o, nawˬ k'oˆ ve, Ngaˬ lehˬ paw sha ve yoˬ. Mawˇ jeˬ maˇ maˇ shaw hpoˆ taˍ peuˬ. Ngaˬ te‸ chiˉ ka‸ maˇ loˍ teh‸ nawˬ k'oˆ ve htawˇ, nawˬ lehˬ hk'aˬ ma hpeh‸ bawˬ tuˬ cawˬ ve, hk'aˬ ma ha k'aˉ tuˬ cawˬ ve leh, hk'aˬ ma haˍ g'awˇ chehˇ ve hta‸ nawˬ maˇ shiˍ, Nawˬ mehˆ cuˉ leh awˬ k'u nyi hpeh‸ chehˇ ve hta‸ ka‸ nawˬ maˇ shiˍ law leˇ. 18 Hk'e te leh, ngaˬ nawˬ hta‸ awˬ hk'aˇ chi hk'e maˍ laˇ ve yoˬ. Nawˬ paw sha la tuˬ, aˬ miˍ awˬ hk'aw lo lawˍ taˍ ve shi hta‸ maˇ k'oˆ, nawˬ awˬ k'u nyi hpeh‸ ve hta‸ shu maˇ g'a mawˬ leh nawˬ maˇ g'a ya‸ taw tuˬ, hpu ve veu‸ k'aˇ hta‸ maˇ k'oˆ, nawˬ mehˆ mawˬ la tuˬ, mehˆ shiˍ hk'aw keu tuˬ ve naˆ tsuhˇ hta‸ maˇ k'oˆ, ngaˬ geh laˬ vuiˬ la-o. 19 Ngaˬ ha‸ ve chaw teˇ hpaˍ hta‸ ngaˬ deˇ maˍ piˇ leh, hk'a deh‸ maˍ piˇ ve yoˬ. Hk'e te leh, hk'a deh‸ k'aw‸ nawˇ la leh venˇ baˆ hta‸ dawˇ hpfuhˆ-oˆ. 20 Nyi loˬ, ngaˬ yehˬ miˉ paˇ lo huˉ leh htawˆ chehˇ ve yoˬ. Ngaˬ ve tawˇ hkawˇ hta‸ kaˇ leh yehˬ miˉ hpaw laˇ ve chaw hk'aˬ ve teˇ g'aˇ maˇ k'oˆ, ngaˬ yawˇ geh lo lo‸-e leh, yawˇ geh caˇ tuˬ yoˬ.Yawˇ htawˇ ngaˬ geh caˇ tuˬ yoˬ. 21 Ngaˬ lehˬ, g'aˇ shehˍ hpaˇ hpeh‸ leh, ngaˬ Awˬ pa ve k'aw jaw hk'oˆ lo ngaˬ Awˬ pa geh mui taˍ ve hk'e, g'aˇ ve chaw teˇ g'aˇ hta‸ ngaˬ ve k'aw jaw hk'oˆ lo ngaˬ geh mui tuˬ ngaˬ a hkaw-anˬ piˇ tuˬ yoˬ. 22 Naˍ paw cawˬ ve chaw lehˬ, Awˬ ha hpu Hkri‸ yaˇ awˬ moˍ teˇ hpaˍ hta‸ k'oˆ piˇ ve tawˇ hkawˇ hta‸ hk'a deh‸ na-o teh‸ k'oˆ ve yoˬ.

Hpeu‸ maˍ 4

1 Oˇ ve awˬ hk'aw‸ nawˉ ngaˬ nyi ve teˇ yanˇ, mvuhˇ naw ma hk'oˆ lo yehˬ miˉ hpaw taˍ ve hta‸ ngaˬ g'a mawˬ ve yoˬ. Behˬ heh ma hkawˇ hk'a shuˍ shuˍ bvuhˬ ve, awˉ lawˉ htaˇ ngaˬ hta‸ yaw laˇ leh ngaˬ g'a kaˇ peuˬ ve awˬ hkawˇ lehˬ, ngaˬ hta‸ teˇ pawˆ k'aw‸ k'oˆ laˇ ve, Choˬ kaˬ lo taˆ la-o. Awˬ hk'aw‸ nawˉ g'a hpeh‸ la tuˬ ve awˬ lawn teˇ hpaˍ ngaˬ nawˬ hta‸ maˍ laˇ tuˬ yoˬ teh‸ k'oˆ ve yoˬ. 2 Teˇ cawˬ haˉ ngaˬ Awˬ ha hpu awˬ hk'aw lo chehˇ leh, mvuhˇ naw ma hk'oˆ lo k'aw jaw teˇ maˬ cawˬ taˍ ve hta‸ maˇ k'oˆ, k'aw jaw oˇ ve awˬ hk'oˆ lo teˇ g'aˇ mui chehˇ ve hta‸ maˇ k'oˆ, ngaˬ g'a mawˬ ve yoˬ. 3 Oˇ kaˬ lo mui taˍ ve teˇ g'aˇ lehˬ, awˬ g'euˆ laiˉ ceuˬ cawˬ ve haˉ pui shehnˉ leh, nyiˉ-ehˍ ve haˉ pui shehnˉ hta‸ shuˍ ve yoˬ. Naw naˆ ve haˉ pui shehnˉ hta‸ shuˍ ve aˉ laˇ miˬ shiˉ jaw lehˬ, k'aw jaw oˇ ve hta‸ hk'a caw zuhˇ cawˬ taˍ ve yoˬ. 4 K'aw jaw oˇ ve teˇ maˬ hk'a caw zuhˇ lo k'aw jaw nyiˇ chi awˇ maˬ cawˬ ve yoˬ. K'aw jaw oˇ ve teˇ hpaˍ awˬ hk'oˆ lo chaw mawˇ chaw kehˉ nyiˇ chi awˇ g'aˇ mui taˍ ve yoˬ. Yawˇ hui lehˬ hpuˉ-ehˍ ve veu‸ k'aˇ hta‸ veu‸ deh leh, shi uˉ tcuhˍ hk'awˆ taˍ ve yoˬ. 5 K'aw jaw oˇ ve awˬ hk'aw lo mvuhˇ tiˉ po-e‸ ba tawˆ la ve, awˬ hkawˇ laiˉ ceuˬ bvuhˬ la ve leh, mvuhˇ tawˍ ve awˬ hkawˇ tawˆ la ve yoˬ. K'aw jaw oˇ ve awˬ g'uˇ suhˍ kawˆ faiˇ suhˍ maˬ to‸ chehˇ ve yoˬ. Kawˆ faiˇ oˇ ve teˇ hpaˍ lehˬ, G'uiˬ sha ve awˬ ha suhˍ maˬ hpeh‸ ve yoˬ. 6 K'aw jaw oˇ ve awˬ g'uˇ suhˍ, haˉ pui keh-oˬ hk'a shuˍ shuˍ hpeh‸ ve mehˆ g'euˆ hta‸ shuˍ ve g'uiˬ po teˇ maˬ cawˬ ve yoˬ. K'aw jaw awˬ k'aw ji lo maˇ k'oˆ, hk'a caw zuhˇ lo maˇ k'oˆ, a sha‸ te‸ chehˇ ve awˬ ceuˬ awˇ hkeh cawˬ ve yoˬ Yawˇ hui lehˬ, awˬ g'uˇ suhˍ hpawˇ ka‸ awˬ hk'aw‸ nawˉ hpawˇ ka‸ mehˆ shiˍ hk'a biˇ cawˬ ve yoˬ. 7 Awˉ lawˉ teˇ hkeh lehˬ, laˇ caˬ shiˉ hta‸ shuˍ ve yoˬ. Nyiˇ hkeh teˇ hkeh lehˬ, nuˇ paˍ ehˉ hta‸ shuˍ ve yoˬ. Shehˆ hkeh teˇ hkeh lehˬ, chaw yaˇ ve mehˆ hpfuhˇ cawˬ ve yoˬ. Awˇ hkeh teˇ hkeh lehˬ, poˬ chehˇ ve aˉ ceˬ lonˉ hta‸ shuˍ ve yoˬ. 8 A sha‸ te‸ chehˇ ve awˬ ceuˬ oˇ ve awˇ hkeh lehˬ, teˇ hkeh le le toˍ la‸ k'uˉ hkaw‸ maˬ cawˬ leh, yawˇ hui ve awˬ to hk'a peu-eˬ maˇ k'oˆ, toˍ la‸ k'uˉ awˬ hawˉ lo maˇ k'oˆ, mehˆ shiˍ hk'a biˇ cawˬ ve yoˬ. Yawˇ hui lehˬ, tanˇ hkuinˇ tanˇ vanˇ maˇ jehˇ jehˇ leh chi hk'e k'oˆ chehˇ ve, Kanˇ paˆ uiˍ ve Jawˇ mawˇ G'uiˬ sha lehˬ, da‸ kehˬ jaˇ, da‸ kehˬ jaˇ, da‸ kehˬ jaˇ ve yoˬ. Yawˇ lehˬ, ponˬ laˬ htaˇ ka‸, chi beu‸ ka‸, laˬ tuˬ ve awˬ yanˇ awˬ hk'aw lo ka‸, te‸ chehˇ ve G'uiˬ sha hpeh‸ ve yoˬ, teh‸ k'oˆ ve yoˬ. 9 A sha‸ te‸ chehˇ ve awˬ ceuˬ oˇ ve awˇ hkeh lehˬ, k'aw jaw hk'oˆ mui taˍ ve, co co taiˍ taiˍ te‸ chehˇ ve teˇ g'aˇ hta‸ awˬ me‸ awˬ hponˇ leh yawˆ yan ve teˇ ceuˬ piˇ ve awˬ hk'aw lo yawˇ ve bon hta‸ chiˇ mvuh ve teˇ yanˇ, 10 chaw mawˇ chaw kehˉ oˇ ve nyiˇ chi awˇ g'aˇ htawˇ, k'aw jaw hk'oˆ mui taˍ ve teˇ g'aˇ mehˆ g'uˇ suhˍ hkui tcuhˉ teh leh, co co taiˍ taiˍ te‸ chehˇ shehˍ hpaˇ hta‸ oˉ k'oˍ pui ve yoˬ. K'aw jaw oˇ ve awˬ g'uˇ suhˍ lo yawˇ hui ve shi uˉ tcuhˍ hta‸ k'ehˆ teh taˍ leh k'oˆ ve, 11 Ngaˬ hui ve Jawˇ mawˇ G'uiˬ sha-oˬ, nawˬ lehˬ awˬ me‸ awˬ hponˇ teˇ ceuˬ, yawˆ yan ve teˇ ceuˬ leh kanˇ paˆ teˇ ceuˬ hta‸ g'a keunˍ ve yoˬ. Awˬ lawn k'o, awˬ ceuˬ hk'a peu-eˬ hta‸ nawˬ hpanˍ taˍ ceˍ taˍ leh, nawˬ ve a loˍ hta‸ pa taw awˬ ceuˬ hk'a peu-eˬ hpeh‸ la leh nawˬ te hpanˍ taˍ ve deˇ deˇ yoˬ.

Hpeu‸ maˍ 5

1 K'aw jaw hk'oˆ lo mui taˍ ve teˇ g'aˇ ve la‸ sha paˉ ve la‸ sheh awˬ hk'aw lo lo‸ taˍ ve li‸ teˇ k'oˆ hta‸ ngaˬ g'a mawˬ ve yoˬ. Li‸ oˇ ve teˇ k'oˆ hta‸ awˬ hk'aw hpawˇ maˇ k'oˆ, awˬ hta‸ hpawˇ maˇ k'oˆ li‸ bvuh‸ taˍ leh yinˉ suhˍ maˬ tcuhˉ taˍ ve yoˬ. 2 Oˇ htaˇ, awˬ g'aˇ uiˍ ve mvuhˇ naw ma tcuh yaˇ teˇ g'aˇ k'oˆ ve, Li‸ oˇ ve hta‸ hpeu‸ leh yinˉ tcuhˉ taˍ ve teˇ hpaˍ hta‸ hpaˆ baˬ tuˬ, a shu te keunˍ ve le teh‸, awˬ hkawˇ bvuhˬ chaweh kuˬ chehˇ ve hta‸ ngaˬ g'a mawˬ ve yoˬ. 3 Li‸ oˇ ve hta‸ hpeu‸ leh awˬ hk'aw lo nyi tuˬ, mvuhˇ naw ma hk'oˆ chehˇ ve maˇ k'oˆ, miˬ guiˬ hk'oˆ chehˇ ve maˇ k'oˆ, miˬ guiˬ awˬ hawˉ lo chehˇ ve maˇ k'oˆ, teˇ g'aˇ ka‸ te maˇ g'a. 4 Li‸ oˇ ve hta‸ hpeu‸ keunˍ nyi keunˍ ve teˇ g'aˇ hta‸ ka‸ ca maˇ mawˬ ve pa taw, ngaˬ g'aˇ hte‸ hawˬ ve yoˬ. 5 Oˇ htaˇ, chaw mawˇ chaw kehˉ teˇ g'aˇ ngaˬ hta‸ k'oˆ laˇ ve, Taˇ hawˬ. Yuˇda‸ ve awˬ ceuˬ awˬ hk'aˇ awˬ hk'aw lo tawˆ la ve, laˇ caˬ shiˉ teh‸ k'oˆ ve Daˍviˆ ve awˬ geu hpeh‸ ve teˇ g'aˇ lehˬ, g'aˇ peuˬ. Hk'e te leh, li‸ oˇ ve hta‸ ka‸, yinˉ tcuhˉ taˍ ve suhˍ maˬ hta‸ ka‸ yawˇ hpeu‸ hpeh‸ ve yoˬ teh‸ k'oˆ ve yoˬ. 6 Oˇ htaˇ, k'aw jaw leh a sha‸ te‸ chehˇ ve awˬ ceuˬ awˇ hkeh awˬ k'aw ji lo maˇ k'oˆ, chaw mawˇ chaw kehˉ teˇ hpaˍ awˬ k'aw ji lo maˇ k'oˆ, huˉ chehˇ ve Yawˬ ehˉ hta‸ ngaˬ g'a mawˬ ve yoˬ. Yawˬ ehˉ oˇ ve lehˬ, tiˇ pehˍ ve hta‸ hkanˍ jaw peuˬ ve hta‸ shuˍ ve yoˬ. Yawˇ lehˬ, awˬ hkaw suhˍ maˬ cawˬ leh, mehˆ shiˍ suhˍ shiˍ cawˬ ve yoˬ. Mehˆ shiˍ oˇ ve suhˍ shiˍ lehˬ, miˬ guiˬ hk'oˆ teˇ kaˬ le le lo k'ai tcuh taˍ ve, G'uiˬ sha ve awˬ ha suhˍ maˬ hpeh‸ ve yoˬ. 7 Oˇ htaˇ, Yawˬ ehˉ laˬ leh k'aw jaw hk'oˆ lo mui shehˍ hpaˇ ve la‸ sha paˉ la‸ sheh awˬ hk'aw lo vawˆ taˍ ve li‸ hta‸ yawˇ yuˬ ve yoˬ. 8 Li‸ oˇ ve hta‸ yawˇ yuˬ ve teˇ yanˇ, a sha‸ te‸ chehˇ ve awˬ ceuˬ awˇ hkeh leh, chaw mawˇ chaw kehˉ nyiˇ chi awˇ g'aˇ lehˬ, Yawˬ ehˉ mehˆ g'uˇ suhˍ boˆ taˍ ve yoˬ. Yawˇ hui teˇ g'aˇ le le tinˍ cawˬ leh, sha hawnˉ ve hk'a biˇ cawˬ ve shi mu‸ hk'u vawˆ taˍ ve yoˬ. Sha hawnˉ ve oˇ ve lehˬ, Hkri‸ yaˇ hui bon lawˬ ve hkawˇ hpeh‸ ve yoˬ. 9 Yawˇ hui k'a muiˬ hkawˇ awˬ suhˉ hta‸ k'a leh k'oˆ ve, Li‸ oˇ ve hta‸ yuˬ leh yinˉ tcuhˉ taˍ ve teˇ hpaˍ hta‸ hpeu‸ tuˬ, nawˬ te keunˍ ve yoˬ. Awˬ lawn k'o, nawˬ suh ve hta‸ g'a hkanˍ leh, awˬ ceuˬ awˬ hk'aˇ teˇ ceuˬ le le awˬ hk'aw lo maˇ k'oˆ, tawˇ hkawˇ teˇ ceuˬ le le awˬ hk'aw lo maˇ k'oˆ, chaw teˇ ceuˬ le le awˬ hk'aw lo maˇ k'oˆ, mvuhˇ miˬ teˇ peˆ le le awˬ hk'aw lo maˇ k'oˆ, nawˬ ve awˬ suhˍ hta‸ yehˇ leh, G'uiˬ sha awˬ pon chaw yaˇ hui hta‸ nawˬ vuiˬ hk'aw‸ peuˬ. 10 Yawˇ hui lehˬ, ngaˬ hui ve G'uiˬ sha awˬ pon mvuhˇ miˬ yaˇ leh paw hkuˇ teˇ hpaˍ hpeh‸ la tuˬ nawˬ te piˇ peuˬ leh, yawˇ hui lehˬ miˬ guiˬ hk'oˆ lo g'a uˉ peunˍ tuˬ yoˬ, teh‸ k'a muiˬ ve yoˬ. 11 Oˇ htaˇ ngaˬ nyi leh, k'aw jaw hk'a caw zuhˇ lo a sha‸ te‸ chehˇ ve awˬ ceuˬ awˇ hkeh, chaw mawˇ chaw kehˉ teˇ hpaˍ leh maˇ jaˇ ve mvuhˇ naw ma tcuh yaˇ teˇ hpaˍ ve awˬ hkawˇ hta‸ ngaˬ g'a kaˇ ve yoˬ. Yawˇ hui lehˬ, awˬ meunˍ awˬ meunˍ pawˆ, awˬ hinˉ awˬ hinˉ pawˆ cawˬ ve yoˬ. 12 Yawˇ hui awˬ hkawˇ bvuhˬ chaweh kuˬ leh k'oˆ ve, Tiˇ pehˍ ve hta‸ g'a hkanˍ ve Yawˬ ehˉ lehˬ, kanˇ paˆ teˇ ceuˬ, mawˇ jeˬ teˇ ceuˬ, cuˇ yiˍ maˍ yiˍ teˇ ceuˬ, awˬ g'aˇ awˬ shaˉ teˇ ceuˬ, yawˆ yan ve teˇ ceuˬ, awˬ me‸ awˬ hponˇ teˇ ceuˬ leh chiˇ mvuh ve teˇ ceuˬ hta‸ g'a keunˍ ve yoˬ teh‸ k'oˆ ve yoˬ. 13 Mvuhˇ naw ma hk'oˆ lo maˇ k'oˆ, miˬ guiˬ hk'oˆ lo maˇ k'oˆ, miˬ guiˬ awˬ hawˉ lo maˇ k'oˆ, laˇ tsuhˇ g'uiˬ awˬ hk'aw lo maˇ k'oˆ, teˇ kaˬ le le lo cawˬ ve te‸ chehˇ ve awˬ ceuˬ hk'a peu-eˬ chi hk'e k'oˆ chehˇ ve hta‸ ngaˬ g'a kaˇ ve yoˬ. K'aw jaw hk'oˆ lo mui shehˍ hpaˇ leh Yawˬ ehˉ hta‸ co co taiˍ taiˍ chiˇ mvuh ve teˇ ceuˬ, yawˆ yan ve teˇ ceuˬ, awˬ me‸ awˬ hponˇ teˇ ceuˬ leh uˉ peunˍ ve kanˇ paˆ teˇ ceuˬ cawˬ piˇ-oˆ teh‸ yawˇ hui k'oˆ chehˇ ve yoˬ. 14 A sha‸ te‸ chehˇ ve awˬ ceuˬ awˇ hkeh lehˬ, A menˬ teh‸ k'oˆ ve yoˬ. Chaw mawˇ chaw kehˉ teˇ hpaˍ lehˬ, boˆ taˍ leh oˉ k'oˍ pui ve yoˬ.

Hpeu‸ maˍ 6

1 Yawˬ ehˉ lehˬ, yinˉ tcuhˉ taˍ ve suhˍ maˬ awˬ hk'aw lo teˇ maˬ hpaw ve hta‸ ngaˬ g'a mawˬ ve yoˬ. A sha‸ te‸ chehˇ ve awˬ ceuˬ awˇ hkeh awˬ hk'aw lo teˇ hkeh lehˬ, mvuhˇ tawˍ ve awˬ hkawˇ hk'a shuˍ shuˍ, Laˬ-o‸ teh‸ k'oˆ ve hta‸ ngaˬ g'a kaˇ ve yoˬ. 2 Oˇ htaˇ ngaˬ nyi leh, hpuˉ-ehˍ ve iˉ mvuhˇ teˇ hkeh hta‸ g'a mawˬ ve yoˬ. Iˉ mvuhˇ ciˇ shehˍ hpaˇ lehˬ, hkaˆ teˇ maˬ shi taˍ leh, yawˇ shi uˉ tcuhˍ g'a ve yoˬ. Yawˇ g'aˇ shehˍ hpaˇ hpeh‸ leh, g'aˇ tuˬ awˬ pon yawˇ tawˆ k'ai ve yoˬ. 3 Yinˉ tcuhˉ taˍ ve nyiˇ maˬ teˇ maˬ hta‸ Yawˬ ehˉ hpaw ve teˇ yanˇ, a sha‸ te‸ chehˇ ve awˬ ceuˬ nyiˇ hkeh teˇ hkeh lehˬ, Laˬ-o‸ teh‸ k'oˆ ve hta‸ ngaˬ g'a kaˇ ve yoˬ. 4 Oˇ htaˇ nyiˉ-ehˍ ve iˉ mvuhˇ teˇ hkeh tawˆ la ve yoˬ. Ciˇ shehˍ hpaˇ lehˬ, miˬ guiˬ hk'oˆ lo chaw yaˇ hui cawˇ da‸ hui da‸ ve teˇ ceuˬ hta‸ yuˬ tawˆ leh yawˇ hui teˇ g'aˇ leh teˇ g'aˇ tiˇ pehˍ da‸ piˇ lawˬ tuˬ a hkaw-anˬ g'a ve yoˬ. Yawˇ hta‸ aˉ htaw lonˉ teˇ maˬ piˇ taˍ ve yoˬ. 5 Yinˉ tcuhˉ taˍ ve sheh lehˇ teˇ maˬ hta‸ Yawˬ ehˉ hpaw ve teˇ yanˇ, a sha‸ te‸ chehˇ ve awˬ ceuˬ shehˆ hkeh teˇ hkeh lehˬ, Laˬ-o‸ teh‸ k'oˆ ve hta‸ ngaˬ g'a kaˇ ve yoˬ. Oˇ htaˇ ngaˬ nyi leh, naˆ tawˉ ve iˉ mvuhˇ teˇ hkeh hta‸ g'a mawˬ ve yoˬ. Ciˇ shehˍ hpaˇ lehˬ, la‸ sheh awˬ hk'aw lo yaˍ cuˍ teˇ maˬ hta‸ vawˆ taˍ ve yoˬ. 6 A sha‸ te‸ chehˇ ve awˬ ceuˬ awˇ hkeh awˬ k'aw ji lo tawˇ yaw ve hta‸ shuˍ ve awˬ hkawˇ hta‸ ngaˬ g'a kaˇ ve yoˬ. Awˬ hkawˇ oˇ ve chi hk'e k'oˆ ve, Caˬ shiˍ teˇ panˇ ve teˇ hteh‸ leh, cho‸ shiˍ shehˆ panˇ ve teˇ hteh‸ yoˬ. Naˍ manˇ leh a pehˉ meuˇ g'uiˬ hta‸ taˇ te luˬ piˇ teh‸ k'oˆ ve yoˬ. 7 Yinˉ tcuhˉ taˍ ve awˍ lehˇ teˇ maˬ hta‸ Yawˬ ehˉ hpaw ve teˇ yanˇ, a sha‸ te‸ chehˇ ve awˬ ceuˬ awˇ hkeh teˇ hkeh lehˬ, Laˬ-o‸ teh‸ k'oˆ ve hta‸ ngaˬ g'a kaˇ ve yoˬ. 8 Oˇ htaˇ ngaˬ nyi leh, hpuiˇ tuˇ ve iˉ mvuhˇ teˇ hkeh hta‸ g'a mawˬ ve yoˬ. Ciˇ shehˍ hpaˇ ve awˬ meh lehˬ, Suh jawˇ mawˇ meh ve yoˬ. Suh mvuhˇ miˬ yawˇ awˬ hk'aˇ suh k'ai chehˇ ve yoˬ. Yawˇ huiˉ maˬ lehˬ, miˬ guiˬ awˇ pun teˇ pun hta‸ uˉ peunˍ tuˬ a hkaw-anˬ g'a ve yoˬ. Aˉ htaw, meu‸ ve kaˆ ve, naˬ beuˬ naˬ ve leh, miˬ guiˬ ve haiˬ ve to nuˇ to shaˆ teˇ hpaˍ, chi teˇ hpaˍ hta‸ yehˇ leh shu hta‸ tiˇ pehˍ tuˬ yawˇ huiˉ maˬ a hkaw-anˬ g'a ve yoˬ. 9 Yinˉ tcuhˉ taˍ ve ngaˇ maˬ teˇ maˬ hta‸ Yawˬ ehˉ hpaw ve teˇ yanˇ, co ha teˇ hpaˍ tanˇ kuiˬ awˬ hawˉ lo chehˇ taˍ ve hta‸ ngaˬ g'a mawˬ ve yoˬ. Co ha oˇ ve teˇ hpaˍ lehˬ, G'uiˬ sha ve tawˇ hkawˇ hta‸ pa taw leh yawˇ hui shaˉ hkiˆ hkanˍ ve hta‸ pa taw, tiˇ pehˍ ve hta‸ g'a hkanˍ ve chaw hui ve co ha teˇ hpaˍ hpeh‸ ve yoˬ. 10 Yawˇ hui awˬ hkawˇ bvuhˬ chaweh kuˬ leh k'oˆ ve, Hk'a peu-eˬ awˬ hk'oˆ uiˍ ve Jawˇ mawˇ-oˬ, nawˬ lehˬ da‸ kehˬ ve leh hteˇ ve cawˇ ve yoˬ. Ngaˬ hui awˬ suhˍ g'a sheˆ ve awˬ pon, miˬ guiˬ hk'oˆ chehˇ ve chaw hui hta‸ nawˬ suhˉ taˆ leh ciˍ yanˍ piˇ tuˬ, hk'aˬ maw maw cawˬ tuˬ sheˍ le teh‸ k'oˆ ve yoˬ. 11 Oˇ htaˇ, yawˇ hui teˇ g'aˇ le le hta‸ hpuˉ-ehˍ ve aˉ po‸ zuhˬ ma teˇ g'aˇ teˇ hk'oˆ piˇ ve yoˬ. Yawˇ hui hk'a shuˍ shuˍ tiˇ pehˍ ve hta‸ g'a hkanˍ tuˬ ve, yawˇ hui geh teˇ geh awˬ ceˬ te leh yawˇ hui ve awˬ viˉ awˬ nyi hpeh‸ ve chaw teˇ hpaˍ ve awˬ moˍ biˇ la htaˇ hk'a gaˬ teˇ hkui jehˇ taˍ tuˬ yawˇ hui hta‸ k'oˆ piˇ ve yoˬ. 12 Yinˉ tcuhˉ taˍ ve hkaw‸ maˬ teˇ maˬ hta‸ Yawˬ ehˉ hpaw ve teˇ yanˇ, ngaˬ nyi leh, miˬ hiˆ jaˇ ve hta‸ g'a mawˬ ve yoˬ. Mvuhˇ nyi lehˬ, meh htuˉ pui hpa naˆ tawˉ ve hk'a shuˍ shuˍ hpeh‸ leh, ha pa tawˬ ve lehˬ, awˬ suhˍ hk'e hpeh‸ la ve yoˬ. 13 Maˉ nawˆ cehˬ hta‸ mvuhˇ haw lonˉ meuˆ leh maˇ meh sheˍ ve iˉ shiˍ teˇ hpaˍ ce ve hk'e, mvuhˇ naw ma ve meu‸ keu shiˍ teˇ hpaˍ miˬ guiˬ hk'oˆ lo ce la ve yoˬ. 14 Li‸ hta‸ lo‸ ve hk'a shuˍ shuˍ, mvuhˇ naw ma mehˉ k'ai ve yoˬ. Hk'aw pui hk'a peu-eˬ leh conˇ hk'a peu-eˬ jiˆ tawˆ-e ve yoˬ. 15 Oˇ htaˇ, miˬ guiˬ hk'oˆ chehˇ ve hkunˉ hawˉ hkanˇ teˇ hpaˍ, jawˇ mawˇ teˇ hpaˍ, ma‸ poˍ lonˉ teˇ hpaˍ, chaw paw chaw sha teˇ hpaˍ, kanˇ paˆ uiˍ ve chaw teˇ hpaˍ, awˬ ceˬ hpeh‸ ve chaw leh ponˬ ve chaw hk'a peu-eˬ lehˬ, haˉ k'oˍ teˇ hpaˍ awˬ hk'aw lo leh, hk'aw pui hk'oˆ lo cawˬ ve haˉ pui teˇ hpaˍ awˬ kaˍ lo ca va‸ taˍ ve yoˬ. 16 Yawˇ hui lehˬ, hk'aw pui teˇ hpaˍ leh haˉ pui teˇ hpaˍ hta‸ kuˬ leh k'oˆ ve, Ngaˬ hui awˬ hk'oˆ ce teˍ laˇ-oˆ. K'aw jaw hk'oˆ lo mui shehˍ hpaˇ ngaˬ hui hta‸ maˇ g'a mawˬ tuˬ maˇ k'oˆ, Yawˬ ehˉ ve nyi ma zuhˆ ve hta‸ ngaˬ hui g'a ponˬ tuˬ maˇ k'oˆ, ngaˬ hui hta‸ faˉ taˍ laˇ-oˆ. 17 Awˬ lawn k'o, yawˇ huiˉ maˬ nyi ma zuhˆ jaˇ ve awˬ nyi uiˍ ve teˇ nyi gaˬ la peuˬ. A shu teˇ g'aˇ hkanˍ hpeh‸ tuˬ le teh‸ k'oˆ ve yoˬ.

Hpeu‸ maˍ 7

1 Oˇ ve awˬ hk'aw‸ nawˉ, miˬ guiˬ awˇ ceˍ lo mvuhˇ naw ma tcuh yaˇ awˇ g'aˇ huˉ chehˇ ve hta‸ ngaˬ g'a mawˬ ve yoˬ. Yawˇ hui lehˬ, miˬ guiˬ hk'oˆ lo maˇ k'oˆ, laˇ tsuhˇ g'uiˬ hk'oˆ lo maˇ k'oˆ, suhˆ cehˬ hk'a peu-eˬ hta‸ maˇ k'oˆ, mvuhˇ haw maˇ g'a meuˆ tuˬ miˬ guiˬ awˇ ceˍ awˍ hpawˇ lo ve mvuhˇ haw teˇ hpaˍ hta‸ vawˆ tiˍ taˍ ve yoˬ. 2 Oˇ htaˇ, awˬ kaˍ awˬ nu mvuhˇ naw ma tcuh yaˇ teˇ g'aˇ hta‸ ngaˬ g'a mawˬ ve yoˬ. Yawˇ lehˬ, mvuhˇ nyi tawˆ kuiˬ lo taˆ la leh, te‸ chehˇ ve G'uiˬ sha ve yinˉ cawˬ taˍ ve yoˬ. Miˬ guiˬ leh laˇ tsuhˇ g'uiˬ hta‸ fawˉ mehˍ tuˬ kanˇ paˆ g'a taˍ ve mvuhˇ naw ma tcuh yaˇ awˇ g'aˇ hta‸ yawˇ awˬ hkawˇ bvuhˬ chaweh kuˬ leh k'oˆ piˇ ve, 3 Ngaˬ hui ve G'uiˬ sha ve awˬ ceˬ teˇ hpaˍ hta‸ naˍ k'aˍ pui hk'oˆ lo yinˉ maˇ tcuhˉ piˇ sheˍ ve ceh ceh, miˬ guiˬ hta‸ maˇ k'oˆ, laˇ tsuhˇ g'uiˬ hta‸ maˇ k'oˆ, suhˆ cehˬ teˇ hpaˍ hta‸ maˇ k'oˆ, taˇ fawˉ mehˍ sheˍ teh‸ k'oˆ piˇ ve yoˬ. 4 Yinˉ tcuhˉ taˍ ve chaw hk'aˬ nyiˇ g'aˇ cawˬ ve awˬ lawn ngaˬ g'a kaˇ ve yoˬ. Iˉsaˍreˍlaˆ ve awˬ ceuˬ awˬ hk'aˇ hk'a peu-eˬ awˬ hk'aw lo yinˉ tcuhˉ taˍ ve chaw teˇ shehnˉ awˇ meunˍ awˇ hinˉ g'aˇ cawˬ ve yoˬ. 5 Yuˇda‸ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, Ruˇbenˍ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, Gaˆ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, 6 Aˍshaˍ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, Naˍtaˍliˆ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, Maˍnaˍseˍ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, 7 Suˉmonˍ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, Leˍviˆ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, Iˉsaˍhkaˍ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, 8 Zaˍbuˆlonˍ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, Yoˇseh‸ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, Beˍyaˍmenˍ awˬ ceuˬ awˬ hk'aˇ awˬ hk'aw lo teˇ meunˍ nyiˇ hinˉ, chaw chi ma ve hta‸ yinˉ tcuhˉ taˍ peuˬ ve yoˬ. 9 Oˇ ve awˬ hk'aw‸ nawˉ ngaˬ nyi leh, mvuhˇ miˬ teˇ peˆ le le awˬ hk'aw lo maˇ k'oˆ, awˬ ceuˬ awˬ hk'aˇ teˇ ceuˬ le le awˬ hk'aw lo maˇ k'oˆ, chaw teˇ ceuˬ le le awˬ hk'aw lo maˇ k'oˆ, tawˇ hkawˇ teˇ ceuˬ le le awˬ hk'aw lo maˇ k'oˆ, chaw teˇ g'aˇ ka‸ g'aw maˇ g'a ve chaw awˬ moˍ lonˉ hta‸ ngaˬ g'a mawˬ ve yoˬ. Yawˇ hui lehˬ, hpuˉ-ehˍ ve aˉ po‸ zuhˬ ma hta‸ veu‸ deh leh, a shu yawˇ ve la‸ sheh hk'aw lo tcuhˉ pui meuˇ awˬ k'aˉ teˇ hpaˍ hta‸ vawˆ taˍ leh, k'aw jaw awˬ g'uˇ suhˍ leh Yawˬ ehˉ mehˆ g'uˇ suhˍ huˉ chehˇ taˍ ve yoˬ. 10 Yawˇ hui awˬ hkawˇ bvuhˬ chaweh kuˬ leh k'oˆ ve, K'aw jaw hk'oˆ lo mui chehˇ ve ngaˬ hui ve G'uiˬ sha leh Yawˬ ehˉ hta‸ pa taw, htaiˍ hk'aw‸ ve hta‸ g'a ve yoˬ teh‸ k'oˆ ve yoˬ. 11 Mvuhˇ naw ma tcuh yaˇ hk'a peu-eˬ lehˬ, k'aw jaw hta‸ maˇ k'oˆ, chaw mawˇ chaw kehˉ teˇ hpaˍ hta‸ maˇ k'oˆ, a sha‸ te‸ chehˇ ve awˬ ceuˬ awˇ hkeh hta‸ maˇ k'oˆ, hk'a caw zuhˇ huˉ taˍ ve yoˬ. Oˇ htaˇ, k'aw jaw awˬ g'uˇ suhˍ yawˇ hui boˆ taˍ leh G'uiˬ sha hta‸ oˉ k'oˍ pui ve yoˬ. 12 Yawˇ hui k'oˆ ve, A menˬ. Chiˇ mvuh ve teˇ ceuˬ, awˬ me‸ awˬ hponˇ teˇ ceuˬ, cuˇ yiˍ maˍ yiˍ teˇ ceuˬ, yawˇ ve bon hta‸ chiˇ mvuh ve teˇ ceuˬ, yawˆ yan ve teˇ ceuˬ, kanˇ paˆ teˇ ceuˬ leh awˬ g'aˇ uiˍ ve teˇ ceuˬ ngaˬ hui ve G'uiˬ sha hta‸ co co taiˍ taiˍ cawˬ piˇ-oˆ. A menˬ teh‸ k'oˆ ve yoˬ. 13 Oˇ htaˇ, chaw mawˇ chaw kehˉ teˇ hpaˍ awˬ hk'aw lo teˇ g'aˇ ngaˬ hta‸ k'oˆ laˇ ve, Hpuˉ-ehˍ ve aˉ po‸ zuhˬ ma hta‸ veu‸ deh ve chaw chi teˇ hpaˍ a shu le. Yawˇ hui hk'aˬ lo laˬ ve le teh‸ na nyi laˇ ve yoˬ. 14 Jawˇ mawˇ-oˬ, nawˬ shiˍ ve yoˬ teh‸ ngaˬ yawˇ hta‸ k'aw‸ k'oˆ piˇ ve yoˬ. Oˇ htaˇ yawˇ k'oˆ ve, Chaw chi teˇ hpaˍ lehˬ, uiˍ jaˇ ve tu‸ ve hkanˍ ve awˬ hk'aw lo tawˆ la leh, a shu yawˇ ve aˉ po‸ zuhˬ ma hta‸ Yawˬ ehˉ ve awˬ suhˍ awˬ hk'aw lo tsuhˇ hpu taˍ peuˬ ve chaw hui hpeh‸ ve yoˬ. 15 Hk'e te leh yawˇ hui lehˬ, G'uiˬ sha ve k'aw jaw awˬ g'uˇ suhˍ chehˇ taˍ leh, yawˇ ve bon yehˬ lonˉ awˬ hk'aw lo tanˇ hkuinˇ tanˇ vanˇ yawˇ ve kanˉ hta‸ te chehˇ ve yoˬ. K'aw jaw hk'oˆ lo mui shehˍ hpaˇ lehˬ, yawˇ hui geh chehˇ leh yawˇ hui hta‸ ha‸ shaˉ tuˬ yoˬ. 16 Yawˇ hui lehˬ, awˬ hk'aw‸ nawˉ awˍ maˇ k'aw‸ meu‸ leh, iˉ kaˆ maˇ k'aw‸ shiˉ-o. Mvuhˇ cha chiˆ ve hta‸ maˇ k'oˆ, awˬ kaˍ awˬ nu haw ve chiˆ ve hk'aˬ ve teˇ ceuˬ hta‸ maˇ k'oˆ, yawˇ hui maˇ k'aw‸ g'a hkanˍ-o. 17 Awˬ lawn k'o, k'aw jaw awˬ k'aw ji lo chehˇ taˍ ve Yawˬ ehˉ lehˬ, yawˬ hawˉ ve hk'a shuˍ shuˍ yawˇ hui hta‸ yawˬ hawˉ shehˍ hpaˇ hpeh‸ tuˬ yoˬ. Yawˇ lehˬ, co ha te‸ piˇ lawˬ ve g'uiˬ tuˇ teˇ hpaˍ lo yawˇ hui hta‸ sheh k'ai tuˬ yoˬ. Yawˇ hui ve mehˆ g'uiˬ hk'a peu-eˬ hta‸ G'uiˬ sha shiˆ baˬ piˇ tuˬ yoˬ, teh‸ ngaˬ hta‸ k'oˆ laˇ ve yoˬ.

Hpeu‸ maˍ 8

1 Yinˉ tcuhˉ taˍ ve suhˍ maˬ teˇ maˬ hta‸ Yawˬ ehˉ hpaw ve teˇ yanˇ, naˍ riˍ teˇ hkawehˇ hk'e mvuhˇ naw ma hk'oˆ lo ta‸ iˉ gawˬ lehˍ hpeh‸ sheˬ ve yoˬ. 2 Oˇ htaˇ, G'uiˬ sha mehˆ g'uˇ suhˍ huˉ chehˇ ve mvuhˇ naw ma tcuh yaˇ suhˍ g'aˇ hta‸ ngaˬ g'a mawˬ ve yoˬ. Yawˇ hui hta‸ behˬ heh ma suhˍ maˬ piˇ ve yoˬ. 3 Shi mu‸ hk'u shi taˍ ve, awˬ kaˍ awˬ nu mvuhˇ naw ma tcuh yaˇ teˇ g'aˇ laˬ leh, tanˇ kuiˬ awˬ paˇ lo huˉ taˍ ve yoˬ. K'aw jaw awˬ g'uˇ suhˍ cawˬ taˍ ve shi te taˍ ve tanˇ kuiˬ awˬ hk'oˆ lo, Hkri‸ yaˇ hk'a peu-eˬ ve bon lawˬ hkawˇ geh teˇ geh tanˇ piˇ tuˬ, sha hawnˉ ve maˇ maˇ yawˇ hta‸ piˇ ve yoˬ. 4 Oˇ htaˇ, mvuhˇ naw ma tcuh yaˇ ve la‸ sheh awˬ hk'aw lo cawˬ ve sha hawnˉ ve mvuhˇ hk'awˇ lehˬ, Hkri‸ yaˇ hui ve bon lawˬ hkawˇ geh teˇ geh G'uiˬ sha mehˆ g'uˇ suhˍ taˆ-e ve yoˬ. 5 Mvuhˇ naw ma tcuh yaˇ oˇ ve lehˬ, mu‸ hk'u oˇ ve hta‸ yuˬ leh, tanˇ kuiˬ lo cawˬ ve aˬ miˍ hk'a biˇ keu peuˬ hk'aw‸ nawˉ, miˬ guiˬ hk'oˆ lo baˬ keu ve yoˬ. Oˇ htaˇ, mvuhˇ tawˍ tawˍ ve, awˬ hkawˇ laiˉ ceuˬ bvuhˬ ve, mvuhˇ tiˉ po-e‸ ba ve leh, miˬ hiˆ ve, chi teˇ hpaˍ hpeh‸ la ve yoˬ. 6 Behˬ heh ma suhˍ maˬ cawˬ ve mvuhˇ naw ma tcuh yaˇ suhˍ g'aˇ lehˬ, behˬ heh ma meuˆ tuˬ gu taˍ ve yoˬ. 7 Awˉ lawˉ peuˇ ve mvuhˇ naw ma tcuh yaˇ teˇ g'aˇ behˬ heh ma meuˆ ve teˇ yanˇ, awˬ suhˍ hkaw‸ da‸ taˍ ve vaˇ shiˍ leh aˬ miˍ, miˬ guiˬ hk'oˆ lo ce la ve yoˬ. Miˬ guiˬ shehˆ pun teˇ pun hta‸ maˇ k'oˆ, suhˆ cehˬ shehˆ pun teˇ pun hta‸ maˇ k'oˆ, nawˉ-ehˍ ve mvuh‸ hk'a peu-eˬ hta‸ maˇ k'oˆ, aˬ miˍ to‸ baˬ ve yoˬ. 8 Mvuhˇ naw ma tcuh yaˇ nyiˇ g'aˇ teˇ g'aˇ behˬ heh ma meuˆ ve teˇ yanˇ, aˬ miˍ to‸ chehˇ ve hk'aw pui lonˉ hta‸ shuˍ ve awˬ ceuˬ hta‸ laˇ tsuhˇ g'uiˬ awˬ hk'aw lo baˬ keu ve yoˬ. Laˇ tsuhˇ g'uiˬ shehˆ pun teˇ pun lehˬ, awˬ suhˍ hpeh‸ la ve yoˬ. 9 Laˇ tsuhˇ g'uiˬ awˬ hk'aw lo cawˬ ve te‸ chehˇ ve awˬ ceuˬ shehˆ pun teˇ pun suh ve yoˬ. Haw lo‸ k'oˍ teˇ hpaˍ htawˇ, shehˆ pun teˇ pun luˬ k'ai ve yoˬ. 10 Mvuhˇ naw ma tcuh yaˇ shehˆ g'aˇ teˇ g'aˇ behˬ heh ma meuˆ ve teˇ yanˇ, aˬ miˍ tuˉ taˍ ve hk'a shuˍ shuˍ to‸ chehˇ ve meu‸ keu shiˍ lonˉ teˇ shiˍ mvuhˇ naw ma hk'oˆ lo ce la leh, iˉ kaˆ lawˬ shehˆ pun teˇ pun awˬ hk'oˆ hta‸ maˇ k'oˆ, g'uiˬ tuˇ teˇ hpaˍ awˬ hk'oˆ hta‸ maˇ k'oˆ, ce la ve yoˬ. 11 Meu‸ keu shiˍ oˇ ve lehˬ, Hk'aˇ ve suhˆ meh ve yoˬ. Iˉ kaˆ shehˆ pun teˇ pun lehˬ, hk'aˇ ve suhˆ awˬ g'uiˬ hpeh‸ la leh, iˉ kaˆ hk'aˇ jaˇ ve pa taw, chaw maˇ maˇ suh ve yoˬ. 12 Mvuhˇ naw ma tcuh yaˇ awˇ g'aˇ teˇ g'aˇ behˬ heh ma meuˆ ve teˇ yanˇ, mvuhˇ nyi shehˆ pun teˇ pun, ha pa shehˆ pun teˇ pun leh, meu‸ keu shiˍ teˇ hpaˍ shehˆ pun teˇ pun luˬ k'ai ve pa taw, yawˇ hui ve awˬ g'euˆ shehˆ pun teˇ pun naˆ ho‸ k'ai ve yoˬ. Mvuhˇ law‸ k'aw shehˆ pun teˇ pun awˬ g'euˆ maˇ ba leh, mvuhˇ hpeu‸ shehˆ pun teˇ pun htawˇ oˇ ve hk'a shuˍ shuˍ awˬ g'euˆ maˇ ba ve yoˬ. 13 Oˇ htaˇ ngaˬ nyi leh, mvuhˇ naw ma awˬ k'aw ji lo aˉ ceˬ lonˉ teˇ hkeh poˬ chehˇ ve yoˬ. Yawˇ awˬ hkawˇ bvuhˬ chaweh kuˬ leh k'oˆ ve, Cawˬ taˍ sheˍ ve mvuhˇ naw ma tcuh yaˇ shehˆ g'aˇ behˬ heh ma meuˆ tuˬ ve awˬ hkawˇ hta‸ pa taw, miˬ guiˬ hk'oˆ lo chehˇ ve chaw teˇ hpaˍ g'a dawˇ haˍ jaˇ tuˬ yoˬ, g'a dawˇ haˍ jaˇ tuˬ yoˬ, g'a dawˇ haˍ jaˇ tuˬ yoˬ teh‸ k'oˆ ve hta‸ ngaˬ g'a kaˇ ve yoˬ.

Hpeu‸ maˍ 9

1 Mvuhˇ naw ma tcuh yaˇ ngaˇ g'aˇ teˇ g'aˇ behˬ heh ma meuˆ ve teˇ yanˇ, mvuhˇ naw ma lo te leh miˬ guiˬ hk'oˆ hk'a gaˬ ce k'ai peuˬ ve meu‸ keu shiˍ teˇ shiˍ hta‸ ngaˬ g'a mawˬ ve yoˬ. Leh kuiˬ maˇ cawˬ ve miˬ k'oˍ ve shawˇ yawˇ hta‸ piˇ ve yoˬ. 2 Oˇ htaˇ, leh kuiˬ maˇ cawˬ ve miˬ k'oˍ oˇ ve hta‸ yawˇ hpaw ve yoˬ. Aˬ miˍ buiˬ hpfuh lonˉ ve mvuhˇ hk'awˇ hk'a shuˍ shuˍ, miˬ k'oˍ oˇ ve awˬ hk'aw lo mvuhˇ hk'awˇ tawˆ la leh, miˬ k'oˍ ve mvuhˇ hk'awˇ hta‸ pa taw mvuhˇ nyi naˆ ho‸ hpeh‸ la leh, mvuhˇ haw awˬ hk'aw lo htawˇ naˆ ho‸ hpeh‸ la ve yoˬ. 3 Mvuhˇ hk'awˇ oˇ ve awˬ hk'aw lo paˉ ce‸ teˇ hpaˍ tawˆ la leh, miˬ guiˬ hk'oˆ lo ya‸ la ve yoˬ. Miˬ guiˬ hk'oˆ lo cawˬ ve aˉ ci ku taw‸ ma ve kanˇ paˆ hk'a shuˍ shuˍ, yawˇ hui hta‸ kanˇ paˆ piˇ ve yoˬ. 4 Miˬ guiˬ hk'oˆ lo cawˬ ve mvuh‸ hta‸ maˇ k'oˆ, awˬ hpa‸ nawˉ lehˍ cawˬ ve hk'a peu-eˬ hta‸ maˇ k'oˆ, suhˆ cehˬ hk'a peu-eˬ hta‸ maˇ k'oˆ, maˇ g'a te luˬ teh‸ yawˇ hui hta‸ tawˇ piˇ ve yoˬ. Naˍ k'aˍ pui hta‸ G'uiˬ sha ve yinˉ maˇ tcuhˉ taˍ ve chaw hui hta‸ ceh tiˉ g'a te luˬ ve yoˬ teh‸ tawˇ piˇ ve yoˬ. 5 Chaw yaˇ hui hta‸ tiˇ pehˍ tuˬ yawˇ hui a hkaw-anˬ maˇ g'a. Ya‸ hk'aˇ, ha pa ngaˇ maˬ hk'a gaˬ fawˉ mehˍ piˇ tuˬ a hkaw-anˬ g'a ve yoˬ. Yawˇ hui fawˉ mehˍ ve hta‸ g'a hkanˍ ve lehˬ, aˉ ci ku taw‸ ma chaw hta‸ che‸ leh naˬ ve hk'a shuˍ shuˍ, fawˉ mehˍ ve hta‸ g'a hkanˍ ve yoˬ. 6 Awˬ yanˇ oˇ ve awˬ hk'aw lo, chaw yaˇ hui lehˬ suh ve teˇ ceuˬ hta‸ ca ve ka‸, ca maˇ mawˬ. Yawˇ hui suh gaˇ jaˇ ve htawˇ, suh ve teˇ ceuˬ yawˇ hui lo hpaw tawˆ-e tuˬ yoˬ. 7 Paˉ ce‸ oˇ ve teˇ hpaˍ ve awˬ ho‸ awˬ han lehˬ, ma‸ bawˆ tuˬ awˬ pon gu taˍ ve iˉ mvuhˇ teˇ hpaˍ hta‸ shuˍ ve yoˬ. Shi uˉ tcuhˍ hta‸ shuˍ ve awˬ ceuˬ yawˇ hui ve oˉ k'oˍ hta‸ hk'awˆ taˍ ve yoˬ. Yawˇ hui ve mehˆ hpfuhˇ lehˬ, chaw yaˇ ve mehˆ hpfuhˇ hta‸ shuˍ ve yoˬ. 8 Yawˇ hui ve uˉ hkeh mvuh lehˬ, yaˇ miˇ ve uˉ hkeh mvuh hta‸ shuˍ leh, yawˇ hui ve ciˬ lehˬ, laˇ caˬ shiˉ ve ciˬ hta‸ shuˍ ve yoˬ. 9 Yawˇ hui ve nyi ma pui htanˬ tuˬ ve lehˬ, sho te taˍ ve nyi ma pui htanˬ tuˬ hta‸ shuˍ ve yoˬ. Yawˇ hui ve toˍ la‸ k'uˉ awˬ hkawˇ bvuhˬ ve lehˬ, ma‸ bawˆ kuiˬ lo g'aˇ hte‸ k'ai chehˇ ve iˉ mvuhˇ lawˬ maˇ jaˇ ve awˬ hkawˇ hta‸ shuˍ ve yoˬ. 10 Yawˇ hui ve awˬ mehˍ tu lehˬ, aˉ ci ku taw‸ ma ve awˬ mehˍ tu hta‸ shuˍ leh, awˬ viˇ htawˇ cawˬ ve yoˬ. Chaw yaˇ hui hta‸ ha pa ngaˇ maˬ hk'a gaˬ fawˉ mehˍ tuˬ, yawˇ hui ve awˬ mehˍ tu awˬ hk'aw lo kanˇ paˆ cawˬ ve yoˬ. 11 Yawˇ hui ve hkunˉ hawˉ hkanˇ lehˬ, leh kuiˬ maˇ cawˬ ve miˬ k'oˍ ve tcuh yaˇ yoˬ. Yawˇ ve awˬ meh lehˬ, Heˍbrehˇ hkawˇ k'o Aˍbaˍdonˍ, Heˍlaˍsaˆ hkawˇ k'o Aˍpawˇliˍonˍ teh‸ k'oˆ ve yoˬ. 12 Dawˇ haˍ tuˬ uiˍ jaˇ ve awˉ lawˉ peuˇ ve teˇ ceuˬ lehˬ peuˬ ve yoˬ. Nyi loˬ, dawˇ haˍ tuˬ uiˍ jaˇ ve nyiˇ ceuˬ k'aw‸ laˬ tuˬ sheˍ ve yoˬ. 13 Mvuhˇ naw ma tcuh yaˇ hkaw‸ g'aˇ teˇ g'aˇ behˬ heh ma meuˆ ve teˇ yanˇ, G'uiˬ sha mehˆ g'uˇ suhˍ lo cawˬ ve shi te taˍ ve tanˇ kuiˬ ve awˬ hkaw awˍ lehˇ awˬ hk'aw lo awˬ hkawˇ tawˆ la ve hta‸ ngaˬ g'a kaˇ ve yoˬ. 14 Awˬ hkawˇ oˇ ve lehˬ chi hk'e k'oˆ ve, Uˇhpaˍraˆ g'uiˬ ma lonˉ awˬ paˇ lo hpeh tiˍ taˍ ve mvuhˇ naw ma tcuh yaˇ awˇ g'aˇ hta‸ hpui hpehˇ-oˆ teh‸, behˬ heh ma cawˬ taˍ ve mvuhˇ naw ma tcuh yaˇ hkaw‸ g'aˇ teˇ g'aˇ hta‸ k'oˆ piˇ ve yoˬ. 15 Hk'e te leh, chaw yaˇ shehˆ pun teˇ pun hta‸ tiˇ pehˍ tuˬ awˬ pon gu taˍ ve mvuhˇ naw ma tcuh yaˇ awˇ g'aˇ hta‸ hpui hpehˇ piˇ ve yoˬ. Mvuhˇ naw ma tcuh yaˇ oˇ ve awˇ g'aˇ lehˬ, naˍ riˍ, awˬ nyi, ha pa, awˬ hk'aw‸, awˬ yanˇ chi awˬ pon G'uiˬ sha yawˇ hui hta‸ gu taˍ ve yoˬ. 16 Iˉ mvuhˇ ciˇ ve ma‸ yaˇ hk'aˬ nyiˇ g'aˇ cawˬ ve hta‸ ngaˬ g'a kaˇ ve yoˬ. Yawˇ hui lehˬ, nyiˇ ha lanˬ cawˬ ve yoˬ. 17 Ngaˬ g'a mawˬ chehˇ ve awˬ ha awˬ hk'aw lo, iˉ mvuhˇ teˇ hpaˍ leh ciˇ shehˍ hpaˇ teˇ hpaˍ hta‸ ngaˬ chi hk'e g'a mawˬ ve yoˬ. Ciˇ shehˍ hpaˇ teˇ hpaˍ veu‸ deh ve nyi ma pui htanˬ tuˬ lehˬ, aˬ miˍ hk'e nyiˉ-ehˍ ve, naw hpui ve leh, ma‸ shiˉ hk'e shiˉ-ehˍ cawˬ ve yoˬ. Iˉ mvuhˇ teˇ hpaˍ ve oˉ k'oˍ lehˬ, laˇ caˬ shiˉ ve oˉ k'oˍ hta‸ shuˍ leh, yawˇ hui ve maw‸ k'aw awˬ hk'aw lo aˬ miˍ ha, aˬ miˍ mvuhˇ hk'awˇ leh ma‸ shiˉ tawˆ la chehˇ ve yoˬ. 18 Yawˇ hui ve maw‸ k'aw awˬ hk'aw lo tawˆ la ve aˬ miˍ ha, aˬ miˍ mvuhˇ hk'awˇ leh ma‸ shiˉ, fawˉ mehˍ ve chi shehˆ ceuˬ hta‸ pa taw, chaw yaˇ shehˆ pun teˇ pun g'a suh ve yoˬ. 19 Awˬ lawn k'o, iˉ mvuhˇ teˇ hpaˍ ve kanˇ paˆ lehˬ, yawˇ hui ve maw‸ k'aw awˬ hk'aw leh awˬ mehˍ tu awˬ hk'aw lo cawˬ ve yoˬ. Yawˇ hui ve awˬ mehˍ tu lehˬ, vuiˬ hta‸ shuˍ leh oˉ k'oˍ ka‸ cawˬ ve yoˬ. Shu hta‸ te naˬ piˇ tuˬ, oˉ k'oˍ oˇ ve hta‸ yawˇ hui yehˇ ve yoˬ. 20 Fawˉ mehˍ ve oˇ ve shehˆ ceuˬ hta‸ pa taw maˇ g'a suh leh cawˬ taˍ sheˍ ve chaw teˇ hpaˍ lehˬ, a shu yawˇ la‸ sheh te taˍ ve kanˉ teˇ hpaˍ hta‸ maˇ dawˇ hpfuhˆ. Neˇ teˇ hpaˍ hta‸ oˉ k'oˍ pui ve teˇ ceuˬ hta‸ maˇ k'oˆ, shi, hpu, kuiˇ, haˉ pui leh suhˆ te taˍ ve shaˉ ho‸ teˇ hpaˍ hta‸ oˉ k'oˍ pui ve teˇ ceuˬ hta‸ maˇ k'oˆ, yawˇ hui maˇ baˬ taˉ. Shaˉ ho‸ oˇ ve teˇ hpaˍ lehˬ, maˇ mawˬ puiˉ, maˇ kaˇ puiˉ, ya‸ k'aw maˇ toˇ puiˉ ve yoˬ. 21 Chaw oˇ ve teˇ hpaˍ lehˬ, shu hta‸ tiˇ pehˍ ve maˇ k'oˆ, neˇ te ve maˇ k'oˆ, haˉ chawˇ haˉ paˆ te ve maˇ k'oˆ, shu ve mawˇ hta‸ hk'awˇ ve maˇ k'oˆ, chi teˇ hpaˍ hta‸ htawˇ yawˇ hui maˇ dawˇ hpfuhˆ.

Hpeu‸ maˍ 10

1 Oˇ htaˇ, awˬ g'aˇ uiˍ jaˇ ve awˬ kaˍ awˬ nu mvuhˇ naw ma tcuh yaˇ teˇ g'aˇ moˬ hta‸ veu‸ deh leh mvuhˇ naw ma lo ya‸ la chehˇ ve hta‸ ngaˬ g'a mawˬ ve yoˬ. Yawˇ ve oˉ k'oˍ hk'oˆ lo aˉ laˇ miˬ shiˉ jaw cawˬ ve yoˬ. Yawˇ ve mehˆ hpfuhˇ lehˬ, mvuhˇ nyi hta‸ shuˍ leh, yawˇ ve hkui sheh lehˬ, aˬ miˍ hkuiˉ daw hta‸ shuˍ ve yoˬ. 2 Yawˇ ve la‸ sheh awˬ hk'aw lo hpaw taˍ ve li‸ ehˉ teˇ k'oˆ cawˬ ve yoˬ. Yawˇ ve la‸ sha paˉ ve hkui sheh lehˬ, laˇ tsuhˇ g'uiˬ hk'oˆ lo naˆ taˍ leh, la‸ mehˍ paˉ ve hkui sheh lehˬ, miˬ guiˬ hk'oˆ lo naˆ taˍ ve yoˬ. 3 Laˇ caˬ shiˉ kuˬ ve hk'a shuˍ shuˍ, yawˇ awˬ hkawˇ bvuhˬ chaweh kuˬ ve yoˬ. Yawˇ kuˬ ve teˇ yanˇ, mvuhˇ tawˍ ve awˬ hkawˇ suhˍ maˬ bvuhˬ la ve yoˬ. 4 Mvuhˇ tawˍ ve awˬ hkawˇ suhˍ maˬ bvuhˬ la ve teˇ yanˇ, ngaˬ li‸ bvuh‸-a teh‸ te ve yoˬ. Ya‸ hk'aˇ, mvuhˇ naw ma lo awˬ hkawˇ bvuhˬ la leh k'oˆ ve, Mvuhˇ tawˍ ve awˬ hkawˇ suhˍ maˬ bvuhˬ la ve hta‸ yinˉ tcuhˉ taˍ-o‸. Oˇ ve teˇ hpaˍ hta‸ taˇ bvuh‸ teh‸ k'oˆ laˇ ve hta‸ ngaˬ g'a kaˇ ve yoˬ. 5 Oˇ htaˇ, laˇ tsuhˇ g'uiˬ hk'oˆ leh miˬ guiˬ hk'oˆ lo huˉ chehˇ ve hta‸ ngaˬ g'a mawˬ ve mvuhˇ naw ma tcuh yaˇ teˇ g'aˇ lehˬ, yawˇ ve la‸ sha paˉ la‸ sheh mvuhˇ hpe lo chiˇ taˆ-e leh, 6 mvuhˇ naw ma leh mvuhˇ naw ma hk'oˆ hk'a cawˬ ve hk'a peu-eˬ, miˬ guiˬ leh miˬ guiˬ hk'oˆ hk'a cawˬ ve hk'a peu-eˬ, laˇ tsuhˇ g'uiˬ leh laˇ tsuhˇ g'uiˬ awˬ hk'aw lo hk'a cawˬ ve hk'a peu-eˬ hta‸ hpanˍ taˍ ve awˬ shehˍ hpaˇ hpeh‸ ve, co co taiˍ taiˍ te‸ chehˇ ve teˇ g'aˇ hta‸ cuˇ leh chi hk'e hkanˍ leh k'oˆ ve, Awˬ yanˇ maˇ k'aw‸ jiˆ ve yoˬ. 7 Mvuhˇ naw ma tcuh yaˇ suhˍ g'aˇ teˇ g'aˇ behˬ heh ma awˬ hkawˇ bvuhˬ la ve awˬ yanˇ awˬ hk'aw lo, G'uiˬ sha ve naˉ jaˇ ve awˬ ceuˬ, yawˇ ve awˬ ceˬ hpeh‸ ve tcuh kaˍ paˍ teˇ hpaˍ hta‸ ponˬ laˬ htaˇ yawˇ ha lehˬ ve bon hkawˇ hto piˇ taˍ ve hk'e, biˇ la tuˬ yoˬ. 8 Oˇ htaˇ, mvuhˇ naw ma hk'oˆ lo ngaˬ g'a kaˇ peuˬ ve awˬ hkawˇ ngaˬ hta‸ teˇ pawˆ k'aw‸ k'oˆ laˇ ve, Laˇ tsuhˇ g'uiˬ hk'oˆ leh miˬ guiˬ hk'oˆ lo huˉ chehˇ ve mvuhˇ naw ma tcuh yaˇ ve la‸ sheh awˬ hk'aw lo hpaw taˍ ve li‸ hta‸ ca yuˬ-o‸ teh‸ k'oˆ laˇ ve yoˬ. 9 Hk'e te leh, mvuhˇ naw ma tcuh yaˇ oˇ ve geh ngaˬ k'ai leh, Li‸ ehˉ oˇ ve ngaˬ hta‸ pe‸ laˇ-oˆ teh‸ k'oˆ piˇ ve yoˬ. Yawˇ k'oˆ ve, Yuˬ leh caˇ-oˆ. Nawˬ ve g'oˇ peˬ awˬ hk'aw lo hk'aˇ jaˇ tuˬ yoˬ. Ya‸ hk'aˇ, nawˬ ve maw‸ k'aw awˬ hk'aw lo pehˇ g'uiˬ hk'a shuˍ shuˍ mehˬ jaˇ tuˬ yoˬ teh‸, ngaˬ hta‸ k'oˆ laˇ ve yoˬ. 10 Oˇ htaˇ, li‸ ehˉ oˇ ve hta‸ mvuhˇ naw ma tcuh yaˇ ve la‸ sheh awˬ hk'aw lo ngaˬ yuˬ leh caˇ ve yoˬ. Ngaˬ ve maw‸ k'aw awˬ hk'aw lo pehˇ g'uiˬ hk'a shuˍ shuˍ mehˬ jaˇ ve yoˬ. Ya‸ hk'aˇ, li‸ oˇ ve hta‸ ngaˬ caˇ peuˬ hk'aw‸ nawˉ, ngaˬ ve g'oˇ peˬ awˬ hk'aw lo hk'aˇ la ve yoˬ. 11 Oˇ htaˇ yawˇ hui ngaˬ hta‸ k'oˆ laˇ ve, Chaw ceuˬ laiˉ ceuˬ awˬ lawn maˇ k'oˆ, mvuhˇ miˬ laiˉ peˆ awˬ lawn maˇ k'oˆ, tawˇ hkawˇ laiˉ ceuˬ awˬ lawn maˇ k'oˆ, hkunˉ hawˉ hkanˇ laiˉ g'aˇ awˬ lawn maˇ k'oˆ, G'uiˬ sha nawˬ hta‸ k'oˆ tcuh ve hk'e nawˬ g'a k'aw‸ k'oˆ maˍ piˇ tuˬ yoˬ teh‸ k'oˆ ve yoˬ.

Hpeu‸ maˍ 11

1 Oˇ ve awˬ hk'aw‸ nawˉ, juˇ fuiˍ taˬ hta‸ shuˍ ve lo taˬ teˇ taˬ ngaˬ hta‸ pe‸ laˇ leh k'oˆ laˇ ve, Tu loˬ. Guiˬ sha ve bon yehˬ lonˉ hta‸ maˇ k'oˆ, tanˇ kuiˬ hta‸ maˇ k'oˆ, oˇ kaˬ lo oˉ k'oˍ pui ve chaw hui hta‸ maˇ k'oˆ, tehˆ nyi-o. 2 Ya‸ hk'aˇ, bon yehˬ lonˉ awˬ baˬ hpawˇ lo cawˬ ve vanˇ hta‸ teh taˉ sheˍ. Oˇ ve hta‸ taˇ tehˆ nyi. Awˬ lawn k'o, vanˇ oˇ ve buiˇ shaˆ aˉ naˆ chaw hui hta‸ chiˇ a‸ piˇ peuˬ leh, yawˇ hui lehˬ da‸ kehˬ ve venˇ hta‸ awˇ chi nyiˇ ha pa hk'a gaˬ naˆ tiˍ taˍ tuˬ yoˬ. 3 Ngaˬ ve shaˉ hkiˆ hkanˍ shehˍ hpaˇ nyiˇ g'aˇ hta‸ ngaˬ kanˇ paˆ piˇ leh, yawˇ huiˉ maˬ lehˬ meh htuˉ pui hpa hta‸ veu‸ deh leh, teˇ hinˉ nyiˇ ha hkaw‸ chi nyi hk'a gaˬ G'uiˬ sha ve tawˇ hkawˇ maˍ piˇ tuˬ yoˬ teh‸ k'oˆ ve yoˬ. 4 Yawˇ huiˉ maˬ lehˬ, miˬ guiˬ ve Awˬ shehˍ hpaˇ mehˆ g'uˇ suhˍ lo cawˬ taˍ ve shaˍlonˍ cehˬ nyiˇ cehˬ hpeh‸ leh, kawˆ faiˇ nyiˇ maˬ hpeh‸ ve yoˬ. 5 Chaw teˇ g'aˇ g'aˇ yawˇ huiˉ maˬ hta‸ naˬ tuˬ te gaˇ ve k'o, yawˇ huiˉ maˬ ve maw‸ k'aw awˬ hk'aw lo aˬ miˍ tawˆ la leh, canˇ paˍ teˇ hpaˍ hta‸ to‸ baˬ tuˬ yoˬ. Chaw teˇ g'aˇ g'aˇ yawˇ huiˉ maˬ hta‸ naˬ tuˬ te gaˇ ve k'o, oˇ hk'e g'a suh tuˬ yoˬ. 6 Yawˇ huiˉ maˬ lehˬ, G'uiˬ sha ve tawˇ hkawˇ maˍ chehˇ ve awˬ yanˇ awˬ hk'aw lo, mvuhˇ yeˬ maˇ laˬ tuˬ mvuhˇ naw ma hta‸ hoˆ taˍ tuˬ ve kanˇ paˆ cawˬ ve yoˬ. Iˉ kaˆ teˇ hpaˍ hta‸ awˬ suhˍ hpeh‸ la piˇ lawˬ tuˬ ka‸ kanˇ paˆ cawˬ ve yoˬ. Yawˇ huiˉ maˬ hk'aˬ nyiˇ pawˆ te gaˇ ve ka‸, fawˉ mehˍ tuˬ ve teˇ ceuˬ le le miˬ guiˬ hk'oˆ gaˬ la piˇ tuˬ ve htawˇ kanˇ paˆ cawˬ ve yoˬ. 7 Yawˇ huiˉ maˬ shaˉ hkiˆ hkanˍ peuˬ hk'aw‸ nawˉ, leh kuiˬ maˇ cawˬ ve miˬ k'oˍ awˬ hk'aw lo tawˆ la ve haiˬ ve to nuˇ to shaˆ lehˬ, yawˇ huiˉ maˬ hta‸ bawˆ da‸ tuˬ yoˬ. Bawˆ da‸ ve teˇ yanˇ, yawˇ huiˉ maˬ hta‸ g'aˇ leh tiˇ pehˍ tuˬ yoˬ. 8 Yawˇ huiˉ maˬ ve awˬ to hta‸ venˇ lonˉ ve ya‸ k'aw hpuiˇ lo teh taˍ tuˬ yoˬ. Venˇ oˇ ve lehˬ, yawˇ huiˉ maˬ ve Awˬ shehˍ hpaˇ la‸ ka hk'oˆ lo hkanˍ suh kuiˬ venˇ hpeh‸ leh, tawˇ veˆ yehˇ k'o, Sawˉdonˍ leh Eˇjiˇtu‸ teh‸ k'oˆ ve yoˬ. 9 Oˇ htaˇ, chaw ceuˬ teˇ hpaˍ awˬ hk'aw lo maˇ k'oˆ, awˬ ceuˬ awˬ hk'aˇ awˬ hk'aw lo maˇ k'oˆ, tawˇ hkawˇ laiˉ ceuˬ yaw ve chaw ceuˬ teˇ hpaˍ awˬ hk'aw lo maˇ k'oˆ, mvuhˇ miˬ teˇ hpaˍ awˬ hk'aw lo maˇ k'oˆ, chaw chi teˇ hpaˍ lehˬ, shehˆ nyi teˇ sha g'uˇ hk'a gaˬ yawˇ huiˉ maˬ ve awˬ to hta‸ hpoˆ nyi tuˬ yoˬ. Yawˇ huiˉ maˬ hta‸ shu ca tuˍ piˇ tuˬ yawˇ hui tawˍ taˍ tuˬ yoˬ. 10 Miˬ guiˬ hk'oˆ lo chehˇ ve chaw teˇ hpaˍ lehˬ, yawˇ huiˉ maˬ suh ve pa taw ha lehˬ jaˇ leh, ha lehˬ ha k'a te tuˬ yoˬ. Yawˇ hui teˇ g'aˇ leh teˇ g'aˇ la‸ shawnˍ piˇ da‸ tuˬ yoˬ. Awˬ lawn k'o, G'uiˬ sha ve tcuh kaˍ paˍ oˇ ve nyiˇ g'aˇ lehˬ, miˬ guiˬ hk'oˆ lo chehˇ ve chaw teˇ hpaˍ hta‸ nyi ma sho‸ sha‸ jaˇ tuˬ te piˇ peuˬ. 11 Shehˆ nyi teˇ sha g'uˇ ponˬ peuˬ hk'aw‸ nawˉ, G'uiˬ sha awˬ hk'aw lo tawˆ la ve a sha‸ te‸ piˇ lawˬ ve awˬ shaˉ yawˇ huiˉ maˬ awˬ hk'aw lo lo‸-e leh, yawˇ huiˉ maˬ tu huˉ ve yoˬ. Yawˇ huiˉ maˬ hta‸ g'a mawˬ ve chaw hui lehˬ, kawˆ jaˇ ve yoˬ. 12 Oˇ htaˇ, mvuhˇ naw ma lo awˬ hkawˇ bvuhˬ la leh k'oˆ ve, Choˬ kaˬ lo taˆ la-o teh‸ yawˇ huiˉ maˬ hta‸ k'oˆ piˇ ve awˬ hkawˇ hta‸ yawˇ huiˉ maˬ g'a kaˇ ve yoˬ. Yawˇ huiˉ maˬ ve canˇ paˍ teˇ hpaˍ mehˆ g'uˇ suhˍ moˬ awˬ hk'aw lo yawˇ huiˉ maˬ mvuhˇ naw ma hk'oˆ lo taˆ-e ve yoˬ. 13 Awˬ yanˇ oˇ ve awˬ hk'aw lo miˬ hiˆ jaˇ leh, venˇ oˇ ve teˇ chi pun teˇ pun paˆ ce ve yoˬ. Miˬ hiˆ ve oˇ ve awˬ hk'aw lo chaw suhˍ hinˉ g'aˇ suh ve yoˬ. Cawˬ taˍ sheˍ ve chaw teˇ hpaˍ kawˆ jaˇ leh mvuhˇ naw ma ve G'uiˬ sha hta‸ chiˇ uiˍ chiˇ mvuh piˇ ve yoˬ. 14 Dawˇ haˍ tuˬ uiˍ jaˇ ve nyiˇ ceuˬ teˇ ceuˬ lehˬ peuˬ ve yoˬ. Nyi loˬ, dawˇ haˍ tuˬ uiˍ jaˇ ve shehˆ ceuˬ teˇ ceuˬ haˆ haˆ gaˬ la tuˬ yoˬ. 15 Oˇ htaˇ, mvuhˇ naw ma tcuh yaˇ suhˍ g'aˇ teˇ g'aˇ behˬ heh ma meuˆ ve teˇ yanˇ, mvuhˇ naw ma hk'oˆ lo bvuhˬ jaˇ ve awˬ hkawˇ teˇ hpaˍ tawˆ la leh k'oˆ ve, Miˬ guiˬ ve mvuhˇ miˬ lehˬ, ngaˬ hui ve Jawˇ mawˇ G'uiˬ sha ve mvuhˇ miˬ leh yawˇ ve Hkri‸ ve mvuhˇ miˬ hpeh‸ la peuˬ. Yawˇ lehˬ co co taiˍ taiˍ uˉ peunˍ tuˬ yoˬ teh‸ k'oˆ ve yoˬ. 16 Oˇ htaˇ, G'uiˬ sha mehˆ g'uˇ suhˍ a shu yawˇ ve k'aw jaw hk'oˆ mui chehˇ ve chaw mawˇ chaw kehˉ nyiˇ chi awˇ g'aˇ mehˆ hpfuhˇ miˬ chaˇ hk'oˆ boˆ taˍ leh G'uiˬ sha hta‸ oˉ k'oˍ pui leh k'oˆ ve, 17 Ponˬ laˬ htaˇ ka‸, chi beu‸ ka‸ te‸ chehˇ taˍ ve, kanˇ paˆ hk'a biˇ cawˬ ve Jawˇ mawˇ G'uiˬ sha-oˬ, nawˬ lehˬ uiˍ jaˇ ve kanˇ paˆ hta‸ yuˬ leh chi beu‸ uˉ peunˍ ve pa taw, nawˬ ve bon hta‸ ngaˬ hui chiˇ mvuh ve yoˬ. 18 Mvuhˇ miˬ teˇ hpaˍ nyi ma zuhˆ jaˇ leh, nawˬ htawˇ nyi ma zuhˆ la peuˬ. Suh taˍ peuˬ ve chaw teˇ hpaˍ hta‸ suhˉ jehˬ tuˬ awˬ yanˇ gaˬ la peuˬ. Nawˬ ve awˬ ceˬ hpeh‸ ve tcuh kaˍ paˍ teˇ hpaˍ hta‸ maˇ k'oˆ, Hkri‸ yaˇ teˇ hpaˍ hta‸ maˇ k'oˆ, nawˬ ve awˬ meh hta‸ yawˆ yan ve, uiˍ ve i ve chaw hk'a peu-eˬ hta‸ maˇ k'oˆ, awˬ bon piˇ tuˬ awˬ yanˇ gaˬ la peuˬ. Miˬ guiˬ hta‸ te luˬ ve chaw teˇ hpaˍ hta‸ te luˬ piˇ tuˬ ka‸ awˬ yanˇ gaˬ la peuˬ, teh‸ k'oˆ ve yoˬ. 19 Oˇ htaˇ, mvuhˇ naw ma lo G'uiˬ sha ve bon yehˬ lonˉ hpaw sheˬ leh, bon yehˬ lonˉ awˬ hk'aw lo yawˇ ve ka ti‸ shaˉ caˆ ta k'oˍ htaˬ g'a mawˬ ve yoˬ. Oˇ htaˇ, mvuhˇ tiˉ po-e‸ ba ve, awˬ hkawˇ laiˉ ceuˬ bvuhˬ ve, mvuhˇ tawˍ ve, miˬ hiˆ ve leh vaˇ shiˍ g'aˇ hte‸ k'a ve, chi teˇ hpaˍ hpeh‸ la ve yoˬ.

Hpeu‸ maˍ 12

1 Oˇ ve awˬ hk'aw‸ nawˉ, mvuhˇ naw ma lo uiˍ jaˇ ve awˬ heˆ hta‸ ngaˬ g'a mawˬ ve yoˬ. Yaˇ miˇ teˇ g'aˇ lehˬ, mvuhˇ nyi hta‸ veu‸ deh leh, ha pa hta‸ naˆ taˍ leh, meu‸ keu shiˍ teˇ chi nyiˇ shiˍ cawˬ ve shi uˉ tcuhˍ hta‸ hk'awˆ taˍ ve yoˬ. 2 Yaˇ miˇ oˇ ve yaˇ hu leh, yaˇ paw tuˬ naˬ jaˇ leh g'a hkanˍ jaˇ ve pa taw, yawˇ g'aˇ hte‸ kuˬ ve yoˬ. 3 Mvuhˇ naw ma lo awˬ kaˍ awˬ nu awˬ heˆ teˇ maˬ hta‸ ngaˬ g'a mawˬ ve yoˬ. Nyiˉ-ehˍ ve cawˇ shehˍ ma lonˉ teˇ hkeh tawˆ la ve yoˬ. Yawˇ lehˬ oˉ k'oˍ suhˍ shiˍ cawˬ leh, awˬ hkaw teˇ chi maˬ cawˬ ve yoˬ. Yawˇ ve oˉ k'oˍ teˇ hpaˍ hta‸ shi uˉ tcuhˍ suhˍ shiˍ hk'awˆ taˍ ve yoˬ. 4 Yawˇ ve awˬ mehˍ tu lehˬ, mvuhˇ naw ma lo cawˬ ve meu‸ keu shiˍ shehˆ pun teˇ pun hta‸ shaw yuˬ leh, miˬ guiˬ hk'oˆ lo baˬ keu ve yoˬ. Yaˇ paw la paˇ neˇ ve yaˇ miˇ oˇ ve teˇ g'aˇ yaˇ paw la ve teˇ yanˇ, yaˇ oˇ ve hta‸ g'a caˇ tuˬ, cawˇ shehˍ ma lehˬ yaˇ miˇ oˇ ve mehˆ g'uˇ suhˍ lo huˉ taˍ ve yoˬ. 5 Yaˇ miˇ oˇ ve lehˬ, yaˇ hawˉ hk'aˆ paˍ paw la ve yoˬ. Yaˇ oˇ ve lehˬ, sho juˇ fuiˍ hta‸ yehˇ leh mvuhˇ miˬ hk'a peu-eˬ hta‸ uˉ peunˍ tuˬ yoˬ. Yaˇ miˇ ve yaˇ paˍ oˇ ve hta‸ G'uiˬ sha geh lo leh G'uiˬ sha ve k'aw jaw lo chiˇ taˆ-e ve yoˬ. 6 Yaˇ miˇ oˇ ve lehˬ, heh puiˉ hk'aw lo hpaw-e ve yoˬ. Oˇ kaˬ lo teˇ hinˉ nyiˇ ha hkaw‸ chi nyi hk'a gaˬ yawˇ hta‸ ha‸ shaˉ tuˬ, G'uiˬ sha lehˬ yawˇ awˬ pon chehˇ kuiˬ gu taˍ ve yoˬ. 7 Oˇ htaˇ, mvuhˇ naw ma hk'oˆ lo ma‸ lonˉ hpeh‸ la ve yoˬ. Miˆhkeˍlaˆ leh yawˇ ve tcuh yaˇ teˇ hpaˍ lehˬ, cawˇ shehˍ ma oˇ ve hta‸ bawˆ da‸ ve yoˬ. Cawˇ shehˍ ma leh yawˇ ve tcuh yaˇ teˇ hpaˍ htawˇ yawˇ hui hta‸ k'aw‸ bawˆ da‸ ve yoˬ. 8 Ya‸ hk'aˇ, cawˇ shehˍ ma leh yawˇ ve tcuh yaˇ teˇ hpaˍ maˇ g'aˇ leh, mvuhˇ naw ma hk'oˆ lo yawˇ hui awˬ pon chehˇ kuiˬ maˇ k'aw‸ cawˬ. 9 Oˇ htaˇ, Neˇ haiˬ leh Saˍtanˍ teh‸ meh ve cawˇ shehˍ ma lonˉ oˇ ve teˇ hkeh hta‸ miˬ guiˬ hk'oˆ lo yuˬ baˬ ve yoˬ. Yawˇ lehˬ, miˬ guiˬ yaˇ hk'a peu-eˬ hta‸ heˍ shehˍ hpaˇ hpeh‸ leh aˬ sho-eˬ htaˇ ve vuiˬ haiˬ hpeh‸ ve yoˬ. Yawˇ hta‸ miˬ guiˬ hk'oˆ lo yuˬ baˬ ve teˇ yanˇ, yawˇ ve tcuh yaˇ teˇ hpaˍ hta‸ ka‸ yawˇ geh teˇ geh yuˬ baˬ ve yoˬ. 10 Mvuhˇ naw ma hk'oˆ lo awˬ hkawˇ bvuhˬ jaˇ ve hta‸ ngaˬ g'a kaˇ ve, Chi beu‸ ngaˬ hui ve G'uiˬ sha ve htaiˍ hk'aw‸ ve teˇ ceuˬ, kanˇ paˆ teˇ ceuˬ, uˉ peunˍ ve teˇ ceuˬ leh, yawˇ ve Hkri‸ ve aˉ yaˇ teˇ ceuˬ gaˬ la peuˬ. Awˬ lawn k'o, ngaˬ hui ve awˬ viˉ awˬ nyi teˇ hpaˍ hta‸ G'uiˬ sha mehˆ g'uˇ suhˍ tanˇ hkuinˇ tanˇ vanˇ venˇ baˆ taˍ shehˍ hpaˇ teˇ g'aˇ hta‸ yuˬ baˬ peuˬ. 11 Yawˬ ehˉ ve awˬ suhˍ hta‸ pa taw maˇ k'oˆ, yawˇ hui shaˉ hkiˆ hkanˍ ve tawˇ hkawˇ hta‸ pa taw maˇ k'oˆ, venˇ baˆ taˍ shehˍ hpaˇ hta‸ yawˇ hui g'aˇ ve yoˬ. Awˬ lawn k'o, suh htaˇ hk'a gaˬ yawˇ hui a shu yawˇ ve a sha‸ hta‸ maˇ sheˉ lai ve yoˬ. 12 Hk'e te leh, mvuhˇ naw ma leh mvuhˇ naw ma yaˇ teˇ hpaˍ-oˬ, ha lehˬ chehˇ-oˆ. Miˬ guiˬ leh laˇ tsuhˇ g'uiˬ lehˬ, g'a dawˇ haˍ jaˇ tuˬ yoˬ. Awˬ lawn k'o, neˇ haiˬ lehˬ yawˇ ve awˬ yanˇ a ciˉ ceh tiˉ cawˬ ve hta‸ yawˇ shiˍ ve pa taw, nyi ma zuhˆ jaˇ ve awˬ hk'aw lo yawˇ nawˬ hui geh gaˬ la peuˬ teh‸ k'oˆ ve hta‸ ngaˬ g'a kaˇ ve yoˬ. 13 Cawˇ shehˍ ma oˇ ve lehˬ, yawˇ hta‸ miˬ guiˬ hk'oˆ lo yuˬ baˬ peuˬ ve hta‸ yawˇ g'a mawˬ g'a shiˍ ve teˇ yanˇ, yaˇ hawˉ hk'aˆ paˍ paw la piˇ ve yaˇ miˇ hta‸ fawˉ mehˍ tuˬ yawˇ g'a‸ yuˬ chehˇ ve yoˬ 14 Yaˇ miˇ oˇ ve lehˬ, vuiˬ oˇ ve hta‸ g'a ponˬ leh heh puiˉ hk'aw lo poˬ k'ai hpeh‸ tuˬ, aˉ ceˬ lonˉ ve toˍ la‸ k'uˉ nyiˇ maˬ hta‸ g'a ve yoˬ. Yawˇ ve chehˇ kuiˬ oˇ ve awˬ hk'aw lo awˬ yanˇ teˇ yanˇ, awˬ yanˇ nyiˇ yanˇ leh awˬ yanˇ teˇ hkoˇ yanˇ hk'a gaˬ yawˇ hta‸ ha‸ shaˉ tuˬ yoˬ. 15 Yaˇ miˇ oˇ ve hta‸ iˉ kaˆ shi veu tuˬ, vuiˬ lehˬ yawˇ ve maw‸ k'aw awˬ hk'aw lo iˉ kaˆ lawˬ lonˉ hk'a shuˍ shuˍ yaˇ miˇ awˬ hk'aˇ suh iˉ kaˆ hpe‸ baˬ ve yoˬ. 16 Ya‸ hk'aˇ, miˬ guiˬ lehˬ yaˇ miˇ oˇ ve hta‸ ga piˇ ve yoˬ. Miˬ guiˬ lehˬ, yawˇ ve maw‸ k'aw ngaˉ leh, cawˇ shehˍ ma ve maw‸ k'aw hk'aw lo hpe‸ baˬ ve iˉ kaˆ hta‸ hehˆ dawˬ ve yoˬ. 17 Cawˇ shehˍ ma lehˬ, yaˇ miˇ hta‸ nyi ma zuhˆ jaˇ leh, cawˬ taˍ sheˍ ve yawˇ ve awˬ yaˇ awˬ duˬ teˇ hpaˍ hta‸ ma‸ ca bawˆ ve yoˬ. Awˬ yaˇ awˬ duˬ oˇ ve teˇ hpaˍ lehˬ, G'uiˬ sha piˇ taˍ ve tawˇ hkawˇ hta‸ na yuˬ leh, Yeˍsuˆ awˬ pon shaˉ hkiˆ hkanˍ ve chaw teˇ hpaˍ hpeh‸ ve yoˬ. Cawˇ shehˍ ma oˇ ve lehˬ, laˇ tsuhˇ g'uiˬ pfuhˍ paˇ shehˇ shiˍ hk'oˆ lo huˉ taˍ ve yoˬ.

Hpeu‸ maˍ 13

1 Oˇ htaˇ, laˇ tsuhˇ g'uiˬ awˬ hk'aw lo haiˬ ve to nuˇ to shaˆ teˇ hkeh tawˆ la ve hta‸ ngaˬ g'a mawˬ ve yoˬ. Yawˇ lehˬ, awˬ hkaw teˇ chi maˬ cawˬ leh oˉ k'oˍ suhˍ shiˍ cawˬ ve yoˬ. Awˬ hkaw teˇ hpaˍ hta‸ shi uˉ tcuhˍ teˇ chi shiˍ hk'awˆ taˍ ve yoˬ. G'uiˬ sha hta‸ maˇ shawˍ maˇ caˆ k'oˆ ve awˬ meh teˇ hpaˍ, yawˇ ve oˉ k'oˍ teˇ hpaˍ hta‸ bvuh‸ taˍ ve yoˬ. 2 Ngaˬ g'a mawˬ ve haiˬ ve to nuˇ to shaˆ oˇ ve lehˬ, laˇ ku-i hta‸ shuˍ ve yoˬ. Yawˇ ve hkui sheh lehˬ, yehˬ miˉ tawˍ hkui sheh hta‸ shuˍ leh, yawˇ ve maw‸ k'aw lehˬ, laˇ caˬ shiˉ maw‸ k'aw hta‸ shuˍ ve yoˬ. Cawˇ shehˍ ma lehˬ, haiˬ ve to nuˇ to shaˆ oˇ ve hta‸ kanˇ paˆ piˇ leh, yawˇ ve k'aw jaw hk'oˆ lo mui tcuh leh uˉ peunˍ tcuh ve yoˬ. 3 Haiˬ ve to nuˇ to shaˆ ve oˉ k'oˍ teˇ shiˍ lehˬ, suh law‸ law‸ dawˆ hk'aw taˍ ve hta‸ ngaˬ g'a mawˬ ve yoˬ. Ya‸ hk'aˇ, naˬ kuiˬ awˬ hk'aw oˇ ve k'aw‸ na-e la leh, miˬ guiˬ yaˇ hk'a peu-eˬ haiˬ ve to nuˇ to shaˆ oˇ ve hta‸ anˇ jaˇ leh awˬ hk'aˇ suh k'ai ve yoˬ. 4 Haiˬ ve to nuˇ to shaˆ hta‸ kanˇ paˆ piˇ shehˍ hpaˇ cawˇ shehˍ ma hta‸ yawˇ hui oˉ k'oˍ pui ve yoˬ. Haiˬ ve to nuˇ to shaˆ hta‸ htawˇ yawˇ hui oˉ k'oˍ pui leh k'oˆ ve, Haiˬ ve to nuˇ to shaˆ chi hta‸ a shu shuˍ da‸ ve le. A shu yawˇ hta‸ bawˆ da‸ hpeh‸ tuˬ le teh‸ k'oˆ ve yoˬ. 5 Yawˇ hta‸ tawˇ uiˍ tawˇ mvuh yaw tcuh leh, G'uiˬ sha hta‸ maˇ shawˍ maˇ caˆ k'oˆ tcuh ve yoˬ. Awˇ chi nyiˇ ha pa hk'a gaˬ kanˉ te tuˬ, yawˇ hta‸ a hkaw-anˬ piˇ ve yoˬ. 6 G'uiˬ sha hta‸ maˇ shawˍ maˇ caˆ k'oˆ tuˬ, haiˬ ve to nuˇ to shaˆ yawˇ ve maw‸ k'aw ngaˉ leh, G'uiˬ sha ve awˬ meh hta‸ maˇ k'oˆ, yawˇ ve chehˇ kuiˬ hta‸ maˇ k'oˆ, mvuhˇ naw ma yaˇ hta‸ maˇ k'oˆ, haiˬ ve to nuˇ to shaˆ oˇ ve maˇ shawˍ maˇ caˆ k'oˆ ve yoˬ. 7 Hkri‸ yaˇ hui hta‸ ma‸ bawˆ leh g'aˇ hpeh‸ tuˬ, yawˇ a hkaw-anˬ g'a ve yoˬ. Awˬ ceuˬ awˬ hk'aˇ teˇ ceuˬ le le, chaw ceuˬ teˇ ceuˬ le le, tawˇ hkawˇ teˇ ceuˬ le le leh mvuhˇ miˬ teˇ peˆ le le awˬ hk'oˆ hta‸ uˉ peunˍ tuˬ htawˇ a hkaw-anˬ g'a ve yoˬ. 8 Miˬ guiˬ hta‸ te hpanˍ htaˇ ka‸ co ti‸ ha ti‸ li‸ awˬ hk'aw lo awˬ meh maˇ bvuh‸ keu taˍ ve miˬ guiˬ yaˇ hk'a peu-eˬ lehˬ, haiˬ ve to nuˇ to shaˆ oˇ ve hta‸ oˉ k'oˍ pui tuˬ yoˬ. Li‸ oˇ ve lehˬ, tiˇ pehˍ peuˬ ve Yawˬ ehˉ ve li‸ hpeh‸ ve yoˬ. 9 Naˍ paw cawˬ ve chaw hk'a deh‸ na-o. 10 Shu hta‸ hpeh yuˬ ve chaw lehˬ, hpeh yuˬ ve hta‸ g'a k'aw‸ hkanˍ tuˬ yoˬ. Aˉ htaw yuˬ leh shu hta‸ chaw pehˍ ve chaw lehˬ, aˉ htaw hta‸ pa taw g'a suh tuˬ yoˬ. Chi hk'e te ve hta‸ pa taw, Hkri‸ yaˇ hui hk'aˬ ma nyi ma yeˬ puiˉ leh hk'aˬ ma yonˍ puiˉ ve tawˆ la ve yoˬ. 11 Miˬ guiˬ awˬ hk'aw lo awˬ kaˍ awˬ nu haiˬ ve to nuˇ to shaˆ teˇ hkeh tawˆ la ve hta‸ ngaˬ g'a mawˬ ve yoˬ. Yawˇ lehˬ yawˬ ehˉ ve awˬ hkaw hta‸ shuˍ ve awˬ hkaw nyiˇ maˬ cawˬ leh, cawˇ shehˍ ma tawˇ yaw ve hk'a shuˍ shuˍ yawˇ tawˇ yaw ve yoˬ. 12 Haiˬ ve to nuˇ to shaˆ chi teˇ hkeh lehˬ, awˉ lawˉ tawˆ la ve haiˬ ve to nuˇ to shaˆ teˇ hkeh ve kanˇ paˆ hk'a peu-eˬ hta‸ yuˬ leh yawˇ mehˆ g'uˇ suhˍ yehˇ ve yoˬ. Suh law‸ law‸ dawˆ hk'aw taˍ ve naˬ kuiˬ awˬ hk'aw na-e la peuˬ ve haiˬ ve to nuˇ to shaˆ awˉ lawˉ teˇ hkeh hta‸ miˬ guiˬ leh miˬ guiˬ hk'oˆ hk'a chehˇ ve chaw hui oˉ k'oˍ pui tuˬ, haiˬ ve to nuˇ to shaˆ nyiˇ hkeh teˇ hkeh te ve yoˬ. 13 Uiˍ ve awˬ heˆ teˇ hpaˍ hta‸ yawˇ te maˍ ve yoˬ. Hk'aˬ hk'e le teh‸ k'oˆ k'o, mvuhˇ naw ma lo te leh miˬ guiˬ hk'oˆ hk'a gaˬ, chaw yaˇ mehˆ g'uˇ suhˍ yawˇ aˬ miˍ hta‸ ce la tcuh ve yoˬ. 14 Haiˬ ve to nuˇ to shaˆ awˉ lawˉ teˇ hkeh mehˆ g'uˇ suhˍ awˬ heˆ teˇ hpaˍ te maˍ tuˬ yawˇ a hkaw-anˬ g'a taˍ ve hk'e yawˇ te ve hta‸ pa taw, haiˬ ve to nuˇ to shaˆ nyiˇ hkeh teˇ hkeh lehˬ, miˬ guiˬ hk'oˆ hk'a chehˇ ve chaw teˇ hpaˍ hta‸ heˍ yuˬ beˬ yuˬ ve yoˬ. Haiˬ ve to nuˇ to shaˆ awˉ lawˉ teˇ hkeh lehˬ, aˉ htaw chaw ve hta‸ g'a hkanˍ peuˬ htawˇ te‸ chehˇ sheˍ ve yoˬ. Yawˇ ve shaˉ ho‸ hta‸ te tuˬ, miˬ guiˬ hk'oˆ chehˇ ve chaw teˇ hpaˍ hta‸ haiˬ ve to nuˇ to shaˆ nyiˇ hkeh teˇ hkeh k'oˆ piˇ ve yoˬ. 15 Haiˬ ve to nuˇ to shaˆ ve shaˉ ho‸ tawˇ yaw puiˉ tuˬ, shaˉ ho‸ oˇ ve hta‸ te‸ la piˇ hpeh‸ ve kanˇ paˆ hta‸ yawˇ g'a ve yoˬ. Shaˉ ho‸ oˇ ve hta‸ oˉ k'oˍ maˇ pui ve chaw teˇ hpaˍ hta‸ yawˇ tiˇ pehˍ tcuh ve yoˬ. 16 Chaw uiˍ chaw i maˇ k'oˆ, chaw paw chaw sha maˇ k'oˆ, chaw haˍ chaw g'awˇ maˇ k'oˆ, ponˬ ve chaw maˇ k'oˆ, awˬ ceˬ maˇ k'oˆ, chaw hk'a peu-eˬ ve la‸ sha paˉ la‸ sheh hta‸ maˇ heˆ k'o naˍ k'aˍ pui hta‸ maiˉ taˍ tuˬ, haiˬ ve to nuˇ to shaˆ oˇ ve teˇ hkeh hkanˍ yuˬ tcuh ve yoˬ. 17 Awˬ maiˉ maˇ cawˬ ve chaw teˇ g'aˇ ka‸, mawˇ maˇ g'a vuiˬ maˇ g'a hawˇ tuˬ yawˇ te ve yoˬ. Awˬ maiˉ oˇ ve lehˬ, haiˬ ve to nuˇ to shaˆ ve awˬ meh, maˇ heˆ k'o yawˇ awˬ meh ve nanˍ ba‸ hta‸ k'oˆ ve yoˬ. 18 Chi awˬ hk'aw lo cuˇ yiˍ g'a hpeh‸ ve yoˬ. Dawˇ shiˍ puiˉ ve chaw lehˬ, haiˬ ve to nuˇ to shaˆ ve nanˍ ba‸ hta‸ g'aw nyi shawˍ nyi tcuh-o. Yawˇ ve nanˍ ba‸ lehˬ, chaw teˇ g'aˇ ve nanˍ ba‸ hpeh‸ leh, nanˍ ba‸ oˇ ve hkaw‸ ha hkaw‸ chi hkaw‸ yoˬ.

Hpeu‸ maˍ 14

1 Oˇ htaˇ ngaˬ nyi leh, Ziˉonˍ hk'aw hk'oˆ lo Yawˬ ehˉ huˉ chehˇ ve hta‸ ngaˬ g'a mawˬ ve yoˬ. Yawˬ ehˉ ve awˬ meh leh yawˇ Awˬ pa ve awˬ meh a shu yawˇ ve naˍ k'aˍ pui hta‸ bvuh‸ taˍ ve chaw teˇ shehnˉ awˇ meunˍ awˇ hinˉ g'aˇ htawˇ yawˇ geh teˇ geh huˉ taˍ ve yoˬ. 2 Iˉ kaˆ g'uiˬ baˇ maˇ jaˇ ve awˬ hkawˇ bvuhˬ ve hk'a shuˍ shuˍ leh, hehnˇ jaˇ ve mvuhˇ tawˍ ve awˬ hkawˇ hk'a shuˍ shuˍ, mvuhˇ naw ma lo awˬ hkawˇ bvuhˬ la ve hta‸ ngaˬ g'a kaˇ ve yoˬ. Ngaˬ g'a kaˇ ve awˬ hkawˇ lehˬ, tinˍ hteˆ shehˍ hpaˇ teˇ hpaˍ a shu yawˇ ve tinˍ hteˆ chehˇ ve awˬ hkawˇ hta‸ shuˍ ve yoˬ. 3 Yawˇ hui lehˬ, k'aw jaw awˬ g'uˇ suhˍ maˇ k'oˆ, a sha‸ te‸ chehˇ ve awˬ ceuˬ awˇ hkeh leh chaw mawˇ chaw kehˉ teˇ hpaˍ mehˆ g'uˇ suhˍ maˇ k'oˆ, k'a muiˬ hkawˇ awˬ suhˉ hta‸ k'a chehˇ ve yoˬ. Miˬ guiˬ hk'oˆ lo vuiˬ hk'aw‸ taˍ peuˬ ve chaw teˇ shehnˉ awˇ meunˍ awˇ hinˉ g'aˇ maˇ heˆ k'o, k'a muiˬ hkawˇ awˬ suhˉ oˇ ve hta‸ chaw teˇ g'aˇ ka‸ k'a maˇ g'a taˬ. 4 Chaw oˇ ve teˇ hpaˍ lehˬ, yaˇ miˇ teˇ hpaˍ geh cha‸ chiˆ tuˬ maˇ te ve chaw hui hpeh‸ ve yoˬ. Awˬ lawn k'o, yawˇ hui lehˬ da‸ kehˬ ve yaˇ miˇ haˉ hk'e hpeh‸ leh, Yawˬ ehˉ hk'a k'ai kuiˬ teˇ kaˬ le le lo awˬ hk'aˇ suh k'ai ve chaw hui hpeh‸ ve yoˬ. G'uiˬ sha leh Yawˬ ehˉ awˬ pon awˉ lawˉ naw‸ ve iˉ shiˍ hpeh‸ la tuˬ, chaw yaˇ hui awˬ hk'aw lo yawˇ hui hta‸ vuiˬ hk'aw‸ taˍ ve yoˬ. 5 Yawˇ hui ve maw‸ k'aw awˬ hk'aw lo heˍ ve a ciˉ ka‸ maˇ cawˬ. Yawˇ hui hta‸ venˇ baˆ taˍ tuˬ ka‸ maˇ cawˬ. 6 Oˇ htaˇ, mvuhˇ naw ma awˬ k'aw ji lo awˬ kaˍ awˬ nu mvuhˇ naw ma tcuh yaˇ teˇ g'aˇ poˬ chehˇ ve hta‸ ngaˬ g'a mawˬ ve yoˬ. Miˬ guiˬ hk'oˆ lo chehˇ ve chaw hk'a peu-eˬ, mvuhˇ miˬ teˇ peˆ le le hta‸ maˇ k'oˆ, awˬ ceuˬ awˬ hk'aˇ teˇ ceuˬ le le hta‸ maˇ k'oˆ, tawˇ hkawˇ teˇ ceuˬ le le hta‸ maˇ k'oˆ, chaw ceuˬ teˇ ceuˬ le le hta‸ maˇ k'oˆ, co co taiˍ taiˍ yeˬ ve ha lehˬ ve bon hkawˇ maˍ piˇ tuˬ yawˇ cawˬ taˍ ve yoˬ. 7 Yawˇ awˬ hkawˇ bvuhˬ chaweh kuˬ leh k'oˆ ve, G'uiˬ sha hta‸ kawˆ leh yawˇ hta‸ chiˇ uiˍ chiˇ mvuh piˇ-oˆ. Awˬ lawn k'o, yawˇ suhˉ jehˬ tuˬ ve awˬ yanˇ gaˬ la peuˬ. Mvuhˇ naw ma miˬ naˆ ma hta‸ maˇ k'oˆ, laˇ tsuhˇ g'uiˬ leh iˉ kaˆ tawˆ kuiˬ teˇ hpaˍ hta‸ maˇ k'oˆ, te hpanˍ shehˍ hpaˇ hta‸ oˉ k'oˍ pui-o teh‸ k'oˆ ve yoˬ. 8 Mvuhˇ naw ma tcuh yaˇ nyiˇ g'aˇ teˇ g'aˇ lehˬ, awˉ lawˉ teˇ g'aˇ awˬ hk'aˇ suh laˬ leh k'oˆ ve, Awˬ meh uiˍ ve Baˍbuˍlonˍ venˇ lehˬ paiˍ peuˬ, paiˍ peuˬ. Awˬ lawn k'o, a pehˉ meuˇ g'uiˬ taw piˇ ve hk'e, haˉ chawˇ haˉ paˆ te ve awˬ taw‸ ma yuˬ leh mvuhˇ miˬ hk'a peu-eˬ hta‸ yawˇ taw piˇ peuˬ teh‸ k'oˆ ve yoˬ. 9 Mvuhˇ naw ma tcuh yaˇ shehˆ g'aˇ teˇ g'aˇ lehˬ, yawˇ huiˉ maˬ awˬ hk'aˇ suh laˬ leh awˬ hkawˇ bvuhˬ chaweh kuˬ leh k'oˆ ve, Chaw hk'aˬ ve teˇ g'aˇ maˇ k'oˆ, haiˬ ve to nuˇ to shaˆ leh yawˇ ve awˬ ho‸ awˬ han hta‸ oˉ k'oˍ pui leh, a shu yawˇ ve naˍ k'aˍ pui hta‸ maˇ k'oˆ, a shu yawˇ ve la‸ sheh hta‸ maˇ k'oˆ, maiˉ taˍ ve hta‸ hkanˍ yuˬ ve k'o, 10 a pehˉ meuˇ g'uiˬ dawˬ ve hk'e, G'uiˬ sha nyi ma zuhˆ jaˇ ve teˇ ceuˬ hta‸ yawˇ g'a dawˬ tuˬ yoˬ. A pehˉ meuˇ g'uiˬ oˇ ve hta‸ te‸ chiˉ maˇ hkaw‸ leh, G'uiˬ sha ve nyi ma zuhˆ ve kawˆ awˬ hk'aw lo ngeuˍ keu taˍ ve yoˬ. Da‸ kehˬ ve mvuhˇ naw ma tcuh yaˇ teˇ hpaˍ mehˆ g'uˇ suhˍ maˇ k'oˆ, Yawˬ ehˉ mehˆ g'uˇ suhˍ maˇ k'oˆ, aˬ miˍ leh ma‸ shiˉ hta‸ yehˇ leh, chaw oˇ ve hta‸ hehnˇ chaweh ciˍ yanˍ piˇ tuˬ yoˬ. 11 Yawˇ hui hta‸ ciˍ yanˍ piˇ ve teˇ yanˇ, tawˆ la chehˇ ve aˬ miˍ mvuhˇ hk'awˇ lehˬ, co co taiˍ taiˍ taˆ-e chehˇ ve yoˬ. Haiˬ ve to nuˇ to shaˆ leh yawˇ ve awˬ ho‸ awˬ han hta‸ oˉ k'oˍ pui leh, yawˇ ve awˬ meh maiˉ taˍ ve hta‸ hkanˍ yuˬ ve chaw teˇ hpaˍ lehˬ, tanˇ hkuinˇ tanˇ vanˇ g'aˇ g'a jehˇ kuiˬ maˇ cawˬ teh‸ k'oˆ ve yoˬ. 12 G'uiˬ sha piˇ taˍ ve tawˇ hkawˇ leh Yeˍsuˆ hta‸ yonˍ ve teˇ ceuˬ awˬ hk'aˇ suh k'ai ve Hkri‸ yaˇ hui lehˬ, nyi ma yeˬ ve teˇ ceuˬ cawˬ tuˬ chi awˬ hk'aw lo g'a mawˬ ve yoˬ. 13 Oˇ htaˇ, mvuhˇ naw ma lo awˬ hkawˇ bvuhˬ la ve hta‸ ngaˬ g'a kaˇ ve, Chi hk'e bvuh‸ taˍ-o‸. Ya‸ nyi hk'aw‸ nawˉ k'o, Jawˇ mawˇ Yeˍsuˆ awˬ hk'aw lo suh ve chaw teˇ hpaˍ lehˬ awˬ bon uiˍ ve yoˬ teh‸ k'oˆ laˇ ve yoˬ. Awˬ ha hpu htawˇ k'oˆ ve, Cawˇ ve yoˬ. Yawˇ hui te taˍ ve kanˉ teˇ hpaˍ lehˬ, yawˇ hui awˬ hk'aˇ suh k'ai ve pa taw, a shu yawˇ kanˉ te hkeu‸ ve awˬ hk'aw lo ponˬ peuˬ leh, yawˇ hui g'aˇ g'a jehˇ ve yoˬ teh‸ k'oˆ ve yoˬ. 14 Oˇ ve awˬ hk'aw‸ nawˉ ngaˬ nyi leh hpuˉ-ehˍ ve moˬ hta‸ ngaˬ g'a mawˬ ve yoˬ. Moˬ oˇ ve awˬ hk'oˆ hta‸ chaw yaˇ ve yaˇ hta‸ shuˍ ve teˇ g'aˇ mui taˍ ve yoˬ. Yawˇ lehˬ, shi uˉ tcuhˍ hk'awˆ taˍ leh, yawˇ ve la‸ sheh awˬ hk'aw lo tcuhˆ jaˇ ve law‸ k'awˉ hta‸ vawˆ taˍ ve yoˬ. 15 Awˬ kaˍ awˬ nu mvuhˇ naw ma tcuh yaˇ teˇ g'aˇ lehˬ, bon yehˬ lonˉ awˬ hk'aw lo tawˆ la leh, moˬ awˬ hk'oˆ lo mui taˍ ve teˇ g'aˇ hta‸ awˬ hkawˇ bvuhˬ chaweh kuˬ leh k'oˆ piˇ ve, Miˬ guiˬ hk'oˆ lo caˬ meh jaˇ peuˬ. Caˬ g'eu‸ ve awˬ yanˇ gaˬ peuˬ ve pa taw, law‸ k'awˉ hta‸ yuˬ leh caˬ g'eu‸-o‸ teh‸ k'oˆ ve yoˬ. 16 Oˇ htaˇ, moˬ awˬ hk'oˆ hta‸ mui taˍ ve teˇ g'aˇ lehˬ, yawˇ ve law‸ k'awˉ yuˬ leh, miˬ guiˬ hk'oˆ ve caˬ hk'a peu-eˬ hta‸ k'uˉ yuˬ leh g'eu‸ peuˬ ve yoˬ. 17 Awˬ kaˍ awˬ nu mvuhˇ naw ma tcuh yaˇ teˇ g'aˇ lehˬ, mvuhˇ naw ma hk'oˆ ve bon yehˬ lonˉ awˬ hk'aw lo tawˆ la ve yoˬ. Yawˇ htawˇ, tcuhˆ jaˇ ve law‸ k'awˉ cawˬ taˍ ve yoˬ. 18 Peuˬ leh, aˬ miˍ awˬ hk'oˆ kanˇ paˆ cawˬ ve mvuhˇ naw ma tcuh yaˇ teˇ g'aˇ lehˬ, tanˇ kuiˬ awˬ hk'aw lo tawˆ la leh, tcuhˆ ve law‸ k'awˉ cawˬ ve teˇ g'aˇ hta‸ awˬ hkawˇ bvuhˬ chaweh kuˬ leh k'oˆ piˇ ve, Nawˬ ve tcuhˆ ve law‸ k'awˉ hta‸ yuˬ leh, miˬ guiˬ ve a pehˉ meuˇ shiˍ awˬ k'oˍ teˇ hpaˍ hta‸ g'eu‸-o‸. Awˬ lawn k'o, a pehˉ meuˇ shiˍ teˇ hpaˍ meh la peuˬ teh‸ k'oˆ ve yoˬ. 19 Oˇ htaˇ, mvuhˇ naw ma tcuh yaˇ oˇ ve teˇ g'aˇ lehˬ, yawˇ ve law‸ k'awˉ yuˬ leh miˬ guiˬ hk'oˆ ve a pehˉ meuˇ shiˍ awˬ k'oˍ hk'a peu-eˬ hta‸ k'uˉ yuˬ leh shaw yuˬ peuˬ hk'aw‸ nawˉ, a pehˉ meuˇ g'uiˬ nyiˉ kuiˬ awˬ hk'aw lo baˬ keu ve yoˬ. A pehˉ meuˇ g'uiˬ nyiˉ kuiˬ oˇ ve lehˬ, G'uiˬ sha ve nyi ma zuhˆ ve teˇ ceuˬ hpeh‸ ve yoˬ. 20 A pehˉ meuˇ g'uiˬ nyiˉ kuiˬ oˇ ve hta‸ venˇ awˬ baˬ hpawˇ lo naˆ leh, a pehˉ meuˇ g'uiˬ nyiˉ kuiˬ oˇ ve awˬ hk'aw lo awˬ suhˍ tawˆ la ve yoˬ. Awˬ suhˍ oˇ ve lehˬ, teˇ hinˉ hkaw‸ ha hpaˍlonˍ hk'a gaˬ iˉ mvuhˇ maw‸ k'aw caˆ hk'e mvuh naˉ ve yoˬ.

Hpeu‸ maˍ 15

1 Oˇ ve awˬ hk'aw‸ nawˉ, mvuhˇ naw ma lo anˇ tuˬ uiˍ jaˇ ve awˬ kaˍ awˬ nu ve awˬ heˆ teˇ maˬ hta‸ ngaˬ g'a mawˬ ve yoˬ. Awˬ heˆ oˇ ve lehˬ, fawˉ mehˍ ve suhˍ ceuˬ cawˬ ve mvuhˇ naw ma tcuh yaˇ suhˍ g'aˇ hpeh‸ ve yoˬ. Fawˉ mehˍ ve oˇ ve teˇ hpaˍ lehˬ, awˬ leh meuˇ ve fawˉ mehˍ ve teˇ hpaˍ hpeh‸ ve yoˬ. Awˬ lawn k'o, oˇ ve teˇ hpaˍ awˬ hk'aw lo G'uiˬ sha nyi ma zuhˆ ve teˇ ceuˬ peu-eˬ ve yoˬ. 2 Peuˬ leh, aˬ miˍ leh mehˆ g'euˆ hkaw‸ da‸ taˍ ve g'uiˬ po hta‸ shuˍ ve teˇ ceuˬ hta‸ ngaˬ g'a mawˬ ve yoˬ. Haiˬ ve to nuˇ to shaˆ leh yawˇ ve awˬ ho‸ awˬ han hta‸ maˇ k'oˆ, yawˇ awˬ meh ve nanˍ ba‸ hta‸ maˇ k'oˆ, g'aˇ peuˬ ve chaw teˇ hpaˍ lehˬ, a shu yawˇ ve la‸ sheh hk'aw G'uiˬ sha ve tinˍ hta‸ vawˆ taˍ leh, mehˆ g'euˆ g'uiˬ po awˬ paˇ lo huˉ chehˇ ve yoˬ. 3 Yawˇ hui lehˬ, G'uiˬ sha ve awˬ ceˬ Moˉseˍ ve k'a muiˬ hkawˇ leh Yawˬ ehˉ ve k'a muiˬ hkawˇ hta‸ k'a muiˬ leh k'oˆ ve, Kanˇ paˆ uiˍ ve Jawˇ mawˇ G'uiˬ sha-oˬ, nawˬ ve kanˉ teˇ hpaˍ lehˬ uiˍ jaˇ da‸ jaˇ ve yoˬ. Chaw ceuˬ hk'a peu-eˬ ve Hkunˉ hawˉ hkanˇ-oˬ, nawˬ ve ya‸ k'aw teˇ hpaˍ lehˬ, hteˇ jaˇ cawˇ jaˇ ve yoˬ. 4 Jawˇ mawˇ-oˬ, nawˬ hta‸ maˇ kawˆ leh nawˬ ve awˬ meh hta‸ maˇ chiˇ uiˍ maˇ chiˇ mvuh ve, a shu cawˬ le. Awˬ lawn k'o, nawˬ teˇ g'aˇ ceh tiˉ da‸ kehˬ ve yoˬ. Chaw ceuˬ hk'a peu-eˬ nawˬ geh laˬ leh nawˬ hta‸ oˉ k'oˍ pui tuˬ yoˬ. Awˬ lawn k'o, nawˬ hteˇ lehˍ cawˇ lehˍ te ve teˇ hpaˍ hk'a tawˍ lehˆ tawˆ la peuˬ, teh‸ k'oˆ ve yoˬ. 5 Oˇ ve awˬ hk'aw‸ nawˉ ngaˬ nyi leh, shaˉ hkiˆ hpeh‸ ve aˉ po k'o bon yehˬ lonˉ mvuhˇ naw ma lo hpaw taˍ ve hta‸ ngaˬ g'a mawˬ ve yoˬ. 6 Fawˉ mehˍ ve suhˍ ceuˬ cawˬ ve mvuhˇ naw ma tcuh yaˇ suhˍ g'aˇ lehˬ, bon yehˬ lonˉ oˇ ve awˬ hk'aw lo tawˆ la ve yoˬ. Yawˇ hui lehˬ, awˬ g'euˆ ba ve kehˬ da‸ jaˇ ve hpa hpu hta‸ veu‸ deh leh, a shu yawˇ ve nyi ma pui hta‸ shi haˍ pi caˆ tsuh‸ taˍ ve yoˬ. 7 A sha‸ te‸ chehˇ ve awˬ ceuˬ awˇ hkeh awˬ hk'aw lo teˇ hkeh lehˬ, mvuhˇ naw ma tcuh yaˇ suhˍ g'aˇ hta‸ shi mu‸ hk'u suhˍ shiˍ piˇ ve yoˬ. Shi mu‸ hk'u oˇ ve teˇ hpaˍ awˬ hk'aw lo, co co taiˍ taiˍ te‸ chehˇ ve G'uiˬ sha ve nyi ma zuhˆ ve teˇ ceuˬ hk'a biˇ cawˬ taˍ ve yoˬ. 8 Oˇ htaˇ, G'uiˬ sha ve awˬ me‸ awˬ hponˇ leh yawˇ ve kanˇ paˆ hta‸ pa taw, bon yehˬ lonˉ awˬ hk'aw lo mvuhˇ hk'awˇ hk'a biˇ cawˬ ve yoˬ. Mvuhˇ naw ma tcuh yaˇ suhˍ g'aˇ ve fawˉ mehˍ ve suhˍ ceuˬ maˇ peuˬ ve ceh ceh, chaw teˇ g'aˇ ka‸ bon yehˬ lonˉ awˬ hk'aw lo lo‸-e maˇ hpeh‸.

Hpeu‸ maˍ 16

1 Peuˬ leh, bon yehˬ lonˉ awˬ hk'aw lo bvuhˬ jaˇ ve awˬ hkawˇ tawˆ la ve hta‸ ngaˬ g'a kaˇ ve yoˬ. Awˬ hkawˇ oˇ ve lehˬ, mvuhˇ naw ma tcuh yaˇ suhˍ g'aˇ hta‸ chi hk'e k'oˆ piˇ ve, Nawˬ hui k'ai leh, G'uiˬ sha nyi ma zuhˆ ve teˇ ceuˬ cawˬ ve mu‸ hk'u suhˍ shiˍ hta‸ miˬ guiˬ hk'oˆ lo ngeuˍ baˬ-o‸ teh‸ k'oˆ ve yoˬ. 2 Oˇ htaˇ, awˉ lawˉ peuˇ ve mvuhˇ naw ma tcuh yaˇ teˇ g'aˇ k'ai leh, yawˇ ve mu‸ hk'u hta‸ miˬ guiˬ hk'oˆ lo ngeuˍ baˬ ve yoˬ. Haiˬ ve to nuˇ to shaˆ ve awˬ maiˉ hta‸ hkanˍ yuˬ taˍ leh, yawˇ ve awˬ ho‸ awˬ han hta‸ oˉ k'oˍ pui ve chaw teˇ hpaˍ awˬ hk'aw lo cha‸ chiˆ leh naˬ jaˇ ve pawˆ lawˆ k'uˉ teˇ hpaˍ cawˬ la ve yoˬ. 3 Mvuhˇ naw ma tcuh yaˇ nyiˇ g'aˇ teˇ g'aˇ lehˬ, yawˇ ve mu‸ hk'u hta‸ laˇ tsuhˇ g'uiˬ awˬ hk'aw lo ngeuˍ baˬ ve yoˬ. Laˇ tsuhˇ g'uiˬ lehˬ, chaw suh ve awˬ suhˍ hk'a shuˍ shuˍ hpeh‸ la leh, laˇ tsuhˇ g'uiˬ awˬ hk'aw lo te‸ chehˇ ve awˬ ceuˬ hk'a peu-eˬ suh ve yoˬ. 4 Mvuhˇ naw ma tcuh yaˇ shehˆ g'aˇ teˇ g'aˇ lehˬ, yawˇ ve mu‸ hk'u hta‸ iˉ kaˆ lawˬ teˇ hpaˍ leh iˉ kaˆ tawˆ kuiˬ teˇ hpaˍ awˬ hk'aw lo ngeuˍ baˬ leh, iˉ kaˆ oˇ ve teˇ hpaˍ awˬ suhˍ hpeh‸ la ve yoˬ. 5 Oˇ htaˇ, iˉ kaˆ hpawˇ hta‸ caˉ da‸ ve mvuhˇ naw ma tcuh yaˇ k'oˆ ve, Ponˬ laˬ htaˇ ka‸ chi beu‸ ka‸ te‸ chehˇ taˍ ve Da‸ kehˬ shehˍ hpaˇ-oˬ, nawˬ chi hk'e suhˉ jehˬ ve lehˬ, hteˇ ve cawˇ ve yoˬ. 6 Awˬ lawn k'o, Hkri‸ yaˇ hui ve awˬ suhˍ leh nawˬ ve tcuh kaˍ paˍ teˇ hpaˍ ve awˬ suhˍ hta‸ yawˇ hui yuˬ sheˆ ve pa taw, nawˬ yawˇ hui hta‸ awˬ suhˍ k'aw‸ dawˬ tcuh ve yoˬ. Yawˇ hui chi hk'e g'a hkanˍ ve lehˬ cawˇ ve yoˬ, teh‸ k'oˆ ve hta‸ ngaˬ g'a kaˇ ve yoˬ. 7 Tanˇ kuiˬ awˬ hk'aw lo awˬ hkawˇ tawˆ la leh k'oˆ ve, Kanˇ paˆ uiˍ ve Jawˇ mawˇ G'uiˬ sha-oˬ, cawˇ ve yoˬ. Nawˬ suhˉ jehˬ ve teˇ hpaˍ lehˬ, hteˇ jaˇ cawˇ jaˇ ve yoˬ, teh‸ k'oˆ ve hta‸ ngaˬ g'a kaˇ ve yoˬ. 8 Mvuhˇ naw ma tcuh yaˇ awˇ g'aˇ teˇ g'aˇ lehˬ, yawˇ ve mu‸ hk'u hta‸ mvuhˇ nyi awˬ hk'oˆ lo ngeuˍ baˬ ve yoˬ. Oˇ htaˇ mvuhˇ nyi lehˬ, chaw yaˇ hui hta‸ aˬ miˍ chiˆ piˇ tuˬ kanˇ paˆ g'a ve yoˬ. 9 Haw jaˇ chiˆ jaˇ ve oˇ ve lehˬ, chaw yaˇ hui hta‸ hkeu‸ k'ai piˇ lawˬ ve yoˬ. Fawˉ mehˍ ve chi teˇ hpaˍ awˬ hk'oˆ hta‸ kanˇ paˆ cawˬ ve G'uiˬ sha ve awˬ meh hta‸ yawˇ hui maˇ shawˍ maˇ caˆ k'oˆ ve yoˬ. Yawˇ hui venˇ baˆ maˇ dawˇ hpfuhˆ leh, G'uiˬ sha hta‸ maˇ chiˇ uiˍ maˇ chiˇ mvuh ve yoˬ. 10 Mvuhˇ naw ma tcuh yaˇ ngaˇ g'aˇ teˇ g'aˇ lehˬ, yawˇ ve mu‸ hk'u hta‸ haiˬ ve to nuˇ to shaˆ ve k'aw jaw awˬ hk'oˆ lo ngeuˍ baˬ leh, haiˬ ve to nuˇ to shaˆ ve mvuhˇ miˬ naˆ ho‸ hpeh‸ la ve yoˬ. Mvuhˇ miˬ oˇ ve awˬ hk'aw lo chehˇ ve chaw teˇ hpaˍ lehˬ, naˬ jaˇ ve pa taw, a shu yawˇ ve ha tehˍ hta‸ geu‸ chehˇ ve yoˬ. 11 Naˬ jaˇ ve teˇ ceuˬ hta‸ maˇ k'oˆ, pawˆ lawˆ k'uˉ teˇ hpaˍ hta‸ maˇ k'oˆ, yawˇ hui g'a hkanˍ ve pa taw mvuhˇ naw ma hk'oˆ chehˇ ve G'uiˬ sha hta‸ yawˇ hui maˇ shawˍ maˇ caˆ k'oˆ ve yoˬ. Yawˇ hui te ve kanˉ teˇ hpaˍ hta‸ htawˇ maˇ dawˇ hpfuhˆ. 12 Mvuhˇ naw ma tcuh yaˇ hkaw‸ g'aˇ teˇ g'aˇ lehˬ, yawˇ ve mu‸ hk'u hta‸ Uˇhpaˍraˆ g'uiˬ ma lonˉ awˬ hk'oˆ lo ngeuˍ baˬ ve yoˬ. Mvuhˇ nyi tawˆ hpawˇ lo chehˇ ve hkunˉ hawˉ hkanˇ teˇ hpaˍ awˬ pon ya‸ k'aw gu taˍ tuˬ, iˉ kaˆ lawˬ oˇ ve fiˍ k'ai ve yoˬ. 13 Oˇ htaˇ, cawˇ shehˍ ma ve maw‸ k'aw awˬ hk'aw lo maˇ k'oˆ, haiˬ ve to nuˇ to shaˆ ve maw‸ k'aw awˬ hk'aw lo maˇ k'oˆ, maˇ heˆ heˆ ve tcuh kaˍ paˍ ve maw‸ k'aw awˬ hk'aw lo maˇ k'oˆ, cha‸ chiˆ ve awˬ ha sheh lehˇ tawˆ la ve hta‸ ngaˬ g'a mawˬ ve yoˬ. Awˬ ha oˇ ve teˇ hpaˍ lehˬ, paˍ hta‸ shuˍ ve yoˬ. 14 Yawˇ hui teˇ hpaˍ lehˬ, awˬ heˆ teˇ hpaˍ hta‸ te maˍ chehˇ ve neˇ haiˬ ve awˬ ha teˇ hpaˍ hpeh‸ ve yoˬ. Kanˇ paˆ uiˍ ve G'uiˬ sha ve awˬ nyi uiˍ ve teˇ nyi awˬ hk'aw lo ma‸ bawˆ tuˬ awˬ pon, miˬ guiˬ hk'oˆ teˇ kaˬ le le lo chehˇ ve hkunˉ hawˉ hkanˇ teˇ hpaˍ hta‸ hpawnˬ da‸ piˇ lawˬ tuˬ, awˬ ha oˇ ve teˇ hpaˍ tawˆ k'ai ve yoˬ. 15 (Nyi loˬ, chaw hk'awˇ hk'a shuˍ shuˍ ngaˬ laˬ ve yoˬ. A shu yawˇ awˬ to awˬ k'u nyi maˇ g'a k'ai leh shu mehˆ g'uˇ suhˍ maˇ g'a ya‸ taw tuˬ, nawˇ chehˇ taˍ leh a shu yawˇ ve veu‸ k'aˇ hta‸ ha‸ shaˉ chehˇ ve chaw lehˬ, awˬ bon uiˍ ve yoˬ.) 16 Awˬ ha oˇ ve teˇ hpaˍ lehˬ, hkunˉ hawˉ hkanˇ teˇ hpaˍ hta‸ Aˍmaˍgeˍdonˍ meh ve chehˇ kuiˬ lo hpawnˬ da‸ piˇ lawˬ ve yoˬ. Awˬ meh oˇ ve lehˬ, Heˍbrehˇ hkawˇ hpeh‸ ve yoˬ. 17 Mvuhˇ naw ma tcuh yaˇ suhˍ g'aˇ teˇ g'aˇ lehˬ, yawˇ ve mu‸ hk'u hta‸ mvuhˇ haw awˬ hk'aw lo ngeuˍ baˬ ve yoˬ. Oˇ htaˇ, bon yehˬ lonˉ awˬ hk'aw, k'aw jaw lo bvuhˬ jaˇ ve awˬ hkawˇ tawˆ la leh, Peuˬ ve yoˬ teh‸ k'oˆ ve yoˬ. 18 Oˇ htaˇ, mvuhˇ tiˉ po-e‸ ba ve, awˬ hkawˇ laiˉ ceuˬ bvuhˬ ve, mvuhˇ tawˍ ve leh miˬ hiˆ jaˇ ve, chi teˇ hpaˍ hpeh‸ la ve yoˬ. Miˬ guiˬ hk'oˆ lo chaw yaˇ tanˬ cawˬ la ve teˇ nyi hta‸ tanˬ leh, chi taw taw miˬ hiˆ jaˇ ve teˇ pawˆ ka‸ maˇ hpeh‸ la jaw. 19 Venˇ lonˉ lehˬ, hkoˇ k'ai leh, shehˆ hkoˇ hpeh‸ la ve yoˬ. Mvuhˇ miˬ teˇ hpaˍ ve venˇ teˇ hpaˍ htawˇ paˆ-e ve yoˬ. G'uiˬ sha lehˬ, hehnˇ ja ve nyi ma zuhˆ ve a pehˉ meuˇ g'uiˬ keu taˍ ve kawˆ Baˍbuˍlonˍ venˇ hta‸ taw piˇ tuˬ, venˇ oˇ ve hta‸ yawˇ dawˇ nawˇ chehˇ ve yoˬ. 20 Conˇ hk'a peu-eˬ mehˉ k'ai leh, hk'aw pui teˇ hpaˍ hta‸ maˇ k'aw‸ mawˬ ve yoˬ. 21 Shehˆ chi cawehˬ cawˬ ve vaˇ shiˍ lonˉ teˇ hpaˍ mvuhˇ naw ma lo te leh chaw yaˇ hui awˬ hk'oˆ hta‸ ce la ve yoˬ. Vaˇ shiˍ fawˉ mehˍ ve teˇ ceuˬ hta‸ pa taw chaw yaˇ hui lehˬ, G'uiˬ sha hta‸ maˇ shawˍ maˇ caˆ k'oˆ ve yoˬ. Awˬ lawn k'o, fawˉ mehˍ ve oˇ ve lehˬ, uiˍ jaˇ hehnˇ jaˇ ve teˇ ceuˬ hpeh‸ ve yoˬ.

Hpeu‸ maˍ 17

1 Oˇ htaˇ, mu‸ hk'u suhˍ shiˍ cawˬ ve mvuhˇ naw ma tcuh yaˇ suhˍ g'aˇ awˬ hk'aw lo teˇ g'aˇ laˬ leh ngaˬ hta‸ k'oˆ laˇ ve, Laˬ-o‸. Iˉ kaˆ maˇ ve awˬ hk'oˆ hta‸ mui chehˇ ve meh maˬ lanˉ lonˉ hta‸ suhˉ jehˬ ve teˇ ceuˬ ngaˬ nawˬ hta‸ maˍ laˇ tuˬ yoˬ. 2 Miˬ guiˬ hk'oˆ chehˇ ve hkunˉ hawˉ hkanˇ teˇ hpaˍ lehˬ, yawˇ geh haˉ chawˇ haˉ paˆ te peuˬ ve yoˬ. Miˬ guiˬ hk'oˆ chehˇ ve chaw teˇ hpaˍ lehˬ, a pehˉ meuˇ g'uiˬ dawˬ bvuhˆ ve hk'e, yawˇ ve haˉ chawˇ haˉ paˆ te ve teˇ ceuˬ hta‸ dawˬ bvuhˆ peuˬ teh‸ k'oˆ laˇ ve yoˬ. 3 Oˇ htaˇ, Awˬ ha hpu awˬ hk'aw lo mvuhˇ naw ma tcuh yaˇ oˇ ve ngaˬ hta‸ heh puiˉ hk'aw shiˍ k'ai ve yoˬ. Nyiˉ-ehˍ ve haiˬ ve to nuˇ to shaˆ awˬ hk'oˆ lo yaˇ miˇ teˇ g'aˇ mui chehˇ ve hta‸ ngaˬ g'a mawˬ ve yoˬ. Haiˬ ve to nuˇ to shaˆ oˇ ve lehˬ, oˉ k'oˍ suhˍ shiˍ leh awˬ hkaw teˇ chi maˬ cawˬ leh, G'uiˬ sha hta‸ maˇ shawˍ maˇ caˆ k'oˆ ve awˬ meh teˇ hpaˍ hk'a biˇ cawˬ ve yoˬ. 4 Yaˇ miˇ oˇ ve lehˬ, nyi naˆ meuˉ lehˍ ve leh nyiˉ-ehˍ ve veu‸ k'aˇ hta‸ veu‸ deh leh, shi, haˉ pui shehnˉ leh piˉ ko-eˍ shehnˉ teˇ hpaˍ tcuhˉ taˍ ve yoˬ. Yawˇ haˉ chawˇ haˉ paˆ te ve hta‸ caˉ da‸ ve maˇ da‸ maˇ kehˬ ve awˬ ceuˬ teˇ hpaˍ leh, cha‸ naˬ tuˬ te ve awˬ ceuˬ teˇ hpaˍ hk'a biˇ cawˬ taˍ ve shi kawˆ hta‸ yawˇ vawˆ taˍ ve yoˬ. 5 Yawˇ ve naˍ k'aˍ pui hta‸ tcuhˉ kuiˬ naˉ jaˇ ve awˬ meh chi hk'e bvuh‸ taˍ ve yoˬ. Uiˍ ve Baˍbuˍlonˍ venˇ lehˬ, meh maˬ lanˉ teˇ hpaˍ ve awˬ e leh miˬ guiˬ ve cha‸ chiˆ ve teˇ hpaˍ ve awˬ e hpeh‸ ve yoˬ teh‸ bvuh‸ taˍ ve yoˬ. 6 Yaˇ miˇ oˇ ve lehˬ, Hkri‸ yaˇ hui ve awˬ suhˍ hta‸ maˇ k'oˆ, Yeˍsuˆ awˬ pon shaˉ hkiˆ hkanˍ paˍ hui ve awˬ suhˍ hta‸ maˇ k'oˆ, dawˬ bvuhˆ g'uˇ ve hta‸ ngaˬ g'a mawˬ ve yoˬ. Ngaˬ yawˇ hta‸ mawˬ ve teˇ yanˇ, maˇ maˇ anˇ jaˇ ve yoˬ. 7 Oˇ htaˇ mvuhˇ naw ma tcuh yaˇ oˇ ve teˇ g'aˇ ngaˬ hta‸ k'oˆ laˇ ve, Aˬ hto‸ ma te nawˬ anˇ ve le. Yaˇ miˇ oˇ ve awˬ lawn maˇ k'oˆ, oˉ k'oˍ suhˍ shiˍ leh awˬ hkaw teˇ chi maˬ cawˬ ve yawˇ hta‸ pfuhˇ k'ai ve haiˬ ve to nuˇ to shaˆ awˬ lawn maˇ k'oˆ, tcuhˉ kuiˬ naˉ ve teˇ ceuˬ ngaˬ nawˬ hta‸ k'aoˍ maˍ laˇ tuˬ yoˬ. 8 Nawˬ g'a mawˬ ve haiˬ ve to nuˇ to shaˆ lehˬ, ponˬ laˬ htaˇ cawˬ ve ka‸, chi beu‸ maˇ cawˬ. Yawˇ lehˬ maˇ maw maw k'o, leh kuiˬ maˇ cawˬ ve miˬ k'oˍ awˬ hk'aw lo tawˆ la leh, luˬ kuiˬ sheˆ kuiˬ lo g'a lo‸-e tuˬ yoˬ. Mvuhˇ kawˍ miˬ ya‸ htaˇ ka‸ co ti‸ ha ti‸ li‸ awˬ hk'aw lo awˬ meh maˇ bvuh‸ keu taˍ ve miˬ guiˬ hk'oˆ chehˇ ve chaw teˇ hpaˍ lehˬ, haiˬ ve to nuˇ to shaˆ hta‸ g'a mawˬ ve teˇ yanˇ, anˇ jaˇ tuˬ yoˬ. Awˬ lawn k'o, ponˬ laˬ htaˇ yawˇ cawˬ ve ka‸, chi beu‸ maˇ cawˬ leh, awˬ hk'aw‸ nawˉ k'aw‸ cawˬ la tuˬ ve hta‸ pa taw yoˬ. 9 Awˬ lawn chi hta‸ shiˍ tuˬ cuˇ yiˍ hk'a biˇ cawˬ ve nyi ma hta‸ loˍ ve yoˬ. Oˉ k'oˍ oˇ ve suhˍ shiˍ lehˬ, yaˇ miˇ mui taˍ ve hk'aw suhˍ shiˍ hpeh‸ ve yoˬ. 10 Hkunˉ hawˉ hkanˇ suhˍ g'aˇ htawˇ hpeh‸ ve yoˬ. Ngaˇ g'aˇ lehˬ, ce k'ai peuˬ. Chi beu‸ teˇ g'aˇ chehˇ taˍ sheˍ ve yoˬ. Teˇ g'aˇ lehˬ, maˇ gaˬ la sheˍ. Yawˇ gaˬ la ve teˇ yanˇ, teˇ hkui ceh tiˉ g'a chehˇ tuˬ yoˬ. 11 Ponˬ laˬ htaˇ cawˬ ve ka‸, chi beu‸ maˇ cawˬ ve haiˬ ve to nuˇ to shaˆ lehˬ, hiˉ g'aˇ teˇ g'aˇ hpeh‸ ve yoˬ. Ya‸ hk'aˇ, suhˍ g'aˇ hta‸ yawˇ caˉ da‸ ve yoˬ. Yawˇ lehˬ, luˬ kuiˬ sheˆ kuiˬ lo g'a lo‸-e tuˬ yoˬ. 12 Nawˬ g'a mawˬ ve awˬ hkaw teˇ chi maˬ lehˬ, mvuhˇ miˬ hta‸ maˇ g'a uˉ peunˍ sheˍ ve hkunˉ hawˉ hkanˇ teˇ chi g'aˇ hpeh‸ ve yoˬ. Ya‸ hk'aˇ, yawˇ hui lehˬ haiˬ ve to nuˇ to shaˆ geh teˇ geh hkunˉ hawˉ hkanˇ ve aˉ yaˇ hta‸ teˇ naˍ riˍ hk'a gaˬ g'a tuˬ yoˬ. 13 Hkunˉ hawˉ hkanˇ oˇ ve teˇ hpaˍ lehˬ, nyi ma teˇ shiˍ tiˉ taˍ leh, haiˬ ve to nuˇ to shaˆ hta‸ a shu yawˇ ve kanˇ paˆ leh a shu yawˇ ve aˉ yaˇ chiˇ a‸ piˇ ve yoˬ. 14 Yawˇ hui lehˬ, Yawˬ ehˉ hta‸ bawˆ da‸ tuˬ yoˬ. Ya‸ hk'aˇ, Yawˬ ehˉ yawˇ hui hta‸ g'aˇ tuˬ yoˬ. Awˬ lawn k'o, yawˇ lehˬ jawˇ mawˇ awˬ hk'oˆ Jawˇ mawˇ hpeh‸ leh, hkunˉ hawˉ hkanˇ awˬ hk'oˆ Hkunˉ hawˉ hkanˇ hpeh‸ ve yoˬ. Yawˇ geh teˇ geh chehˇ ve chaw teˇ hpaˍ lehˬ, kuˬ yuˬ taˍ ve chaw, leuˆ yuˬ taˍ ve chaw leh, ka ti‸ yeˬ ve chaw teˇ hpaˍ hpeh‸ ve yoˬ teh‸, ngaˬ hta‸ k'oˆ laˇ ve yoˬ. 15 Mvuhˇ naw ma tcuh yaˇ oˇ ve ngaˬ hta‸ teˇ pawˆ k'aw‸ k'oˆ laˇ ve, Nawˬ g'a mawˬ ve meh maˬ lanˉ mui chehˇ ve iˉ kaˆ oˇ ve teˇ hpaˍ lehˬ, chaw ceuˬ teˇ hpaˍ, chaw awˬ moˍ lonˉ teˇ hpaˍ, mvuhˇ miˬ teˇ hpaˍ leh, tawˇ hkawˇ laiˉ ceuˬ yaw ve chaw teˇ hpaˍ hpeh‸ ve yoˬ. 16 Nawˬ g'a mawˬ ve awˬ hkaw teˇ chi maˬ leh haiˬ ve to nuˇ to shaˆ lehˬ, meh maˬ lanˉ hta‸ canˇ tuˬ yoˬ. Yawˇ hui lehˬ, yawˇ hta‸ gawˬ cu gawˬ pehˆ hpeh‸ piˇ lawˬ leh, awˬ k'u nyi te piˇ tuˬ yoˬ. Yawˇ ve awˬ shaˍ hta‸ yawˇ hui caˇ leh, yawˇ hta‸ aˬ miˍ tuˉ baˬ tuˬ yoˬ. 17 Awˬ lawn k'o, G'uiˬ sha nyi ma cawˇ ve hta‸ yawˇ hui te tuˬ, yawˇ hui ve nyi ma hta‸ G'uiˬ sha dawˇ pawnˍ piˇ ve yoˬ. G'uiˬ sha ve tawˇ hkawˇ biˇ la htaˇ hk'a gaˬ, yawˇ hui lehˬ nyi ma teˇ shiˍ tiˉ taˍ ve awˬ hk'aw lo haiˬ ve to nuˇ to shaˆ hta‸ a shu yawˇ ve aˉ yaˇ chiˇ a‸ piˇ tuˬ, G'uiˬ sha chi hk'e dawˇ pawnˍ piˇ ve yoˬ. 18 Nawˬ g'a mawˬ ve yaˇ miˇ teˇ g'aˇ lehˬ, miˬ guiˬ ve hkunˉ hawˉ hkanˇ teˇ hpaˍ hta‸ uˉ peunˍ ve venˇ lonˉ hpeh‸ ve yoˬ teh‸, ngaˬ hta‸ k'oˆ laˇ ve yoˬ.

Hpeu‸ maˍ 18

1 Oˇ ve awˬ hk'aw‸ nawˉ, awˬ kaˍ awˬ nu mvuhˇ naw ma tcuh yaˇ teˇ g'aˇ mvuhˇ naw ma lo ya‸ la chehˇ ve hta‸ ngaˬ g'a mawˬ ve yoˬ. Yawˇ lehˬ, uiˍ ve kanˇ paˆ cawˬ leh, yawˇ ve awˬ me‸ awˬ hponˇ hta‸ pa taw, miˬ guiˬ hk'oˆ awˬ g'euˆ ba chehˇ ve yoˬ. 2 Yawˇ bvuhˬ chaweh g'aˇ hte‸ kuˬ leh k'oˆ ve, Awˬ meh uiˍ ve Baˍbuˍlonˍ venˇ lehˬ paiˍ peuˬ, paiˍ peuˬ. Chehˇ kuiˬ oˇ ve lehˬ, neˇ haiˬ teˇ hpaˍ ve chehˇ kuiˬ leh cha‸ chiˆ ve awˬ ha teˇ ceuˬ le le ve va‸ taˍ kuiˬ hpeh‸ ve yoˬ. Cha‸ chiˆ leh shu cha‸ naˬ ve ngaˆ teˇ ceuˬ le le ve va‸ taˍ kuiˬ ka‸ hpeh‸ ve yoˬ. 3 Awˬ lawn k'o, chaw ceuˬ hk'a peu-eˬ lehˬ a pehˉ meuˇ g'uiˬ dawˬ ve hk'e, yawˇ ve haˉ chawˇ haˉ paˆ te ve teˇ ceuˬ hta‸ dawˬ leh paiˍ peuˬ. Miˬ guiˬ ve hkunˉ hawˉ hkanˇ teˇ hpaˍ yawˇ geh haˉ chawˇ haˉ paˆ te peuˬ leh, miˬ guiˬ ve tanˇ kaˬ paˍ teˇ hpaˍ lehˬ, yawˇ paw sha jaˇ ve teˇ ceuˬ awˬ hk'aw lo, yawˇ hui htawˇ paw sha la peuˬ, teh‸ k'oˆ ve yoˬ. 4 Mvuhˇ naw ma lo awˬ kaˍ awˬ nu ve awˬ hkawˇ chi hk'e k'oˆ chehˇ ve hta‸ ngaˬ g'a kaˇ ve, Ngaˬ ve chaw teˇ hpaˍ-oˬ, yawˇ ve venˇ baˆ awˬ hk'aw lo maˇ g'a lo‸-e tuˬ maˇ k'oˆ, yawˇ g'a hkanˍ ve fawˉ mehˍ ve teˇ hpaˍ hta‸ nawˬ hui maˇ g'a hkanˍ tuˬ maˇ k'oˆ, venˇ oˇ ve awˬ hk'aw lo tawˆ la-o. 5 Awˬ lawn k'o, yawˇ ve venˇ baˆ teˇ hpaˍ lehˬ mvuhˇ naw ma hta‸ daw‸ htaˇ hk'a gaˬ maˇ jaˇ leh, yawˇ ve maˇ hteˇ maˇ cawˇ ve teˇ hpaˍ hta‸ G'uiˬ sha dawˇ nawˇ chehˇ ve yoˬ. 6 Yawˇ shu hta‸ te piˇ ve hk'e yawˇ hta‸ k'aw‸ te hk'aw‸ piˇ-oˆ. Yawˇ kanˉ te taˍ ve hk'e, yawˇ hta‸ nyiˇ pun k'aw‸ te hk'aw‸ piˇ-oˆ. Kawˆ awˬ hk'aw lo yawˇ hkaw‸ da‸ taˍ ve teˇ ceuˬ nyiˇ pun hkaw‸ da‸ leh yawˇ hta‸ taw piˇ-oˆ. 7 Yawˇ awˬ to hta‸ yawˇ chiˇ uiˍ chiˇ mvuh leh, paw sha jaˇ ve awˬ hk'aw lo ha lehˬ ha k'a te peuˬ ve hk'e taw, yawˇ hta‸ fawˉ mehˍ leh dawˇ haˍ jaˇ ve teˇ ceuˬ yawˇ awˬ hk'oˆ gaˬ la piˇ-oˆ. Awˬ lawn k'o, yawˇ ve nyi ma awˬ hk'aw lo yawˇ k'oˆ ve, Ngaˬ lehˬ nanˇ hawˉ hkanˇ ma te leh mui chehˇ ve yoˬ. Ngaˬ mehˇ chawˇ ma maˇ heˆ. Dawˇ haˍ ve teˇ ceuˬ hta‸ ngaˬ a ciˉ ka‸ g'a hpuˇ tuˬ maˇ heˆ teh‸ k'oˆ ve yoˬ. 8 Hk'e te leh, teˇ nyi tiˉ awˬ hk'aw lo yawˇ awˬ hk'oˆ hta‸ suh ve teˇ ceuˬ, paˆ hawˬ ve teˇ ceuˬ leh meu‸ ve kaˆ ve teˇ ceuˬ, fawˉ mehˍ ve chi teˇ hpaˍ gaˬ la leh, aˬ miˍ to‸ baˬ ve hta‸ yawˇ g'a hkanˍ tuˬ yoˬ. Awˬ lawn k'o, yawˇ hta‸ suhˉ jehˬ ve Jawˇ mawˇ G'uiˬ sha lehˬ kanˇ paˆ uiˍ jaˇ ve yoˬ, teh‸ k'oˆ ve yoˬ. 9 Venˇ oˇ ve geh haˉ chawˇ haˉ paˆ te leh, paw sha jaˇ ve awˬ hk'aw lo ha lehˬ ha k'a te peuˬ ve miˬ guiˬ ve hkunˉ hawˉ hkanˇ teˇ hpaˍ lehˬ, venˇ oˇ ve to‸ chehˇ ve mvuhˇ hk'awˇ hta‸ g'a mawˬ ve teˇ yanˇ, venˇ oˇ ve awˬ pon yawˇ hui kuˬ hawˬ paˆ hawˬ tuˬ yoˬ. 10 Venˇ oˇ ve g'a hkanˍ ve tu‸ ve hkanˍ ve hta‸ yawˇ hui kawˆ jaˇ ve pa taw, yawˇ hui vuiˇ kuiˬ lo huˉ taˍ leh chi hk'e k'oˆ tuˬ yoˬ. Awˬ meh uiˍ leh kanˇ paˆ uiˍ ve Baˍbuˍlonˍ venˇ-oˬ, nawˬ g'a dawˇ haˍ jaˇ, g'a dawˇ haˍ jaˇ ve yoˬ. Teˇ naˍ riˍ tiˉ awˬ hk'aw lo nawˬ hta‸ suhˉ jehˬ ve teˇ ceuˬ gaˬ la peuˬ teh‸ k'oˆ tuˬ yoˬ. 11 Miˬ guiˬ ve tanˇ kaˬ paˍ teˇ hpaˍ htawˇ, venˇ oˇ ve awˬ pon kuˬ hawˬ paˆ hawˬ tuˬ yoˬ. Awˬ lawn k'o, shu yawˇ hui ve mawˇ hta‸ maˇ k'aw‸ vuiˬ. 12 Mawˇ oˇ ve teˇ hpaˍ lehˬ, hpu, shi, haˉ pui shehnˉ, piˉ ko-eˍ shehnˉ, da‸ jaˇ ve hpa hpu, nyi naˆ meuˉ lehˍ ve hpa, pfuhˇ hpa, nyiˉ-ehˍ ve hpa, hawnˉ ve suhˆ teˇ ceuˬ le le, haw ciˬ te taˍ ve mawˇ teˇ ceuˬ le le, awˬ hpfuhˇ hk'aˆ ve suhˆ te taˍ ve mawˇ teˇ ceuˬ le le, kuiˇ te taˍ ve mawˇ, sho te taˍ ve mawˇ, haˉ pui hpu te taˍ ve mawˇ, 13 k'aw hpeh, hk'eu hawnˉ, awˬ shaˉ hawnˉ ve awˬ meu-e, naˍ manˇ hawnˉ, lawˇbanˍ, a pehˉ meuˇ g'uiˬ, naˍ manˇ, meu da‸ ve hkaoˍ monˇ meu-e, caˬ shiˍ, nuˇ, yawˬ, iˉ mvuhˇ, iˉ mvuhˇ lawˬ, awˬ ceˬ leh, chaw yaˇ ve co ha, chi teˇ hpaˍ yoˬ. 14 Nawˬ ve nyi ma sheˉ lai jaˇ ve iˉ shiˍ teˇ hpaˍ lehˬ, mehˉ k'ai peuˬ. Mehˬ jaˇ ve caˇ tuˬ leh da‸ jaˇ ve mawˇ jeˬ hk'a peu-eˬ luˬ k'ai peuˬ leh, awˬ hk'aw‸ nawˉ teˇ pawˆ ka‸ nawˬ maˇ k'aw‸ g'a mawˬ. 15 Mawˇ oˇ ve teˇ hpaˍ hta‸ hawˇ ve vuiˬ ve leh venˇ oˇ ve hta‸ pa taw paw sha la ve tanˇ kaˬ paˍ teˇ hpaˍ lehˬ, venˇ oˇ ve g'a hkanˍ ve tu‸ ve hkanˍ ve hta‸ kawˆ jaˇ ve pa taw, yawˇ hui vuiˇ kuiˬ lo huˉ taˍ tuˬ yoˬ. Yawˇ hui kuˬ hawˬ paˆ hawˬ leh chi hk'e k'oˆ tuˬ yoˬ. 16 Da‸ jaˇ ve hpa hpu, nyi naˆ meuˉ lehˍ ve hpa leh nyiˉ-ehˍ ve hpa hta‸ veu‸ deh leh, shi, haˉ pui shehnˉ leh piˉ ko-eˍ shehnˉ tcuhˉ taˍ ve awˬ meh uiˍ ve venˇ lehˬ, g'a dawˇ haˍ jaˇ, g'a dawˇ haˍ jaˇ ve yoˬ. 17 Chi taw taw maˇ jaˇ ve mawˇ jeˬ hk'a peu-eˬ teˇ naˍ riˍ ceh tiˉ awˬ hk'aw lo luˬ k'ai peuˬ law leˇ, teh‸ k'oˆ tuˬ yoˬ. Haw lo‸ k'oˍ awˬ hoˉ hk'a peu-eˬ, haw lo‸ k'oˍ hta‸ ciˇ leh k'ai k'ai laˬ laˬ te ve chaw hk'a peu-eˬ, haw lo‸ k'oˍ awˬ hk'aw lo kanˉ te ve chaw hk'a peu-eˬ leh, laˇ tsuhˇ g'uiˬ hpawˇ tanˇ kaˬ te ve chaw hk'a peu-eˬ lehˬ, vuiˇ kuiˬ lo huˉ taˍ ve yoˬ. 18 Venˇ oˇ ve to‸ chehˇ ve mvuhˇ hk'awˇ hta‸ yawˇ hui g'a mawˬ ve teˇ yanˇ, Awˬ meh uiˍ ve venˇ chi teˇ venˇ hta‸ shuˍ ve, hk'aˬ ve teˇ venˇ cawˬ le teh‸ kuˬ ve yoˬ. 19 Yawˇ hui lehˬ, a shu yawˇ ve oˉ k'oˍ hta‸ je‸ meu-e hkaˆ pfuhˍ leh kuˬ hawˬ paˆ hawˬ ve yoˬ. Yawˇ hui kuˬ leh k'oˆ ve, Awˬ meh uiˍ ve venˇ lehˬ, g'a dawˇ haˍ jaˇ, g'a dawˇ haˍ jaˇ ve yoˬ. Venˇ oˇ ve awˬ hk'aw lo mawˇ jeˬ cawˬ maˇ jaˇ ve pa taw, laˇ tsuhˇ g'uiˬ awˬ hk'aw ve haw lo‸ k'oˍ awˬ shehˍ hpaˇ hk'a peu-eˬ paw sha la ve yoˬ. Teˇ naˍ riˍ ceh tiˉ awˬ hk'aw lo venˇ oˇ ve luˬ k'ai peuˬ law leˇ. 20 Mvuhˇ naw ma leh da‸ kehˬ ve chaw teˇ hpaˍ, tcuh yaˇ teˇ hpaˍ leh G'uiˬ sha ve tcuh kaˍ paˍ teˇ hpaˍ-oˬ, venˇ oˇ ve luˬ k'ai peuˬ ve pa taw ha lehˬ chehˇ-oˆ. Awˬ lawn k'o, nawˬ hui awˬ pon k'aw‸ te hk'aw‸ piˇ tuˬ, G'uiˬ sha lehˬ venˇ oˇ ve hta‸ suhˉ taˆ peuˬ, teh‸ k'oˆ ve yoˬ. 21 Oˇ ve awˬ hk'aw‸ nawˉ, awˬ g'aˇ uiˍ ve mvuhˇ naw ma tcuh yaˇ teˇ g'aˇ lehˬ, haˉ pui mawˍ lonˉ hta‸ shuˍ ve haˉ pui shiˍ hta‸ chiˇ leh, laˇ tsuhˇ g'uiˬ awˬ hk'aw lo baˬ keu leh k'oˆ ve, Chi hk'a shuˍ shuˍ awˬ meh uiˍ ve Baˍbuˍlonˍ venˇ hta‸ hehnˇ chaweh chiˇ baˬ leh, awˬ hk'aw‸ nawˉ venˇ oˇ ve hta‸ maˇ k'aw‸ mawˬ. 22 Tinˍ hteˆ ve chaw, k'a muiˬ hkawˇ k'a ve chaw, lehˉ lu meuˆ ve chaw leh behˬ heh ma meuˆ ve chaw teˇ hpaˍ te ve awˬ hkawˇ hta‸ nawˬ awˬ hk'aw lo maˇ k'aw‸ g'a kaˇ. La‸ meuˇ te puiˉ ve chaw teˇ g'aˇ ka‸ nawˬ awˬ hk'aw lo maˇ k'aw‸ cawˬ. Haˉ pui mawˍ geuˆ ve awˬ hkawˇ htawˇ, nawˬ awˬ hk'aw lo maˇ k'aw‸ g'a kaˇ. 23 Kawˆ faiˇ awˬ g'euˆ htawˇ nawˬ awˬ hk'aw lo maˇ k'aw‸ g'a ba. La‸ k'awˍ toˆ ve chaw haˉ yaˇ miˇ haˉ ve awˬ hkawˇ htawˇ, nawˬ awˬ hk'aw lo maˇ k'aw‸ g'a kaˇ. Awˬ lawn k'o, nawˬ ve tanˇ kaˬ paˍ teˇ hpaˍ lehˬ, miˬ guiˬ hk'oˆ ve chaw uiˍ chaw mvuh teˇ hpaˍ hpeh‸ ve yoˬ. Nawˬ neˇ te ve hta‸ pa taw, chaw ceuˬ hk'a peu-eˬ ya‸ k'ai peuˬ. 24 G'uiˬ sha ve tcuh kaˍ paˍ hui ve awˬ suhˍ, da‸ kehˬ ve chaw hui ve awˬ suhˍ leh, miˬ guiˬ hk'oˆ lo tiˇ pehˍ ve hta‸ g'a hkanˍ ve chaw hk'a peu-eˬ ve awˬ suhˍ hta‸ venˇ oˇ ve awˬ hk'aw lo g'a mawˬ ve yoˬ, teh‸ mvuhˇ naw ma tcuh yaˇ k'oˆ ve yoˬ.

Hpeu‸ maˍ 19

1 Oˇ ve awˬ hk'aw‸ nawˉ, mvuhˇ naw ma lo chaw awˬ moˍ lonˉ ve awˬ hkawˇ bvuhˬ jaˇ ve hk'a shuˍ shuˍ awˬ hkawˇ bvuhˬ la ve hta‸ ngaˬ g'a kaˇ ve yoˬ. Awˬ hkawˇ oˇ ve lehˬ, Haˍleˍluˇyaˬ. Htaiˍ hk'aw‸ ve teˇ ceuˬ, awˬ me‸ awˬ hponˇ teˇ ceuˬ leh, kanˇ paˆ teˇ ceuˬ ngaˬ hui ve G'uiˬ sha geh ceh tiˉ cawˬ ve yoˬ. 2 Awˬ lawn k'o, yawˇ suhˉ jehˬ ve teˇ hpaˍ lehˬ, hteˇ jaˇ cawˇ jaˇ ve yoˬ. Meh maˬ lanˉ lonˉ haˉ chawˇ haˉ paˆ te ve pa taw, miˬ guiˬ yaˇ hui luˬ k'ai ve yoˬ. Hk'e te leh, G'uiˬ sha yawˇ hta‸ suhˉ taˆ leh, G'uiˬ sha ve awˬ ceˬ teˇ hpaˍ ve awˬ suhˍ hta‸ yuˬ sheˆ ve awˬ pon yawˇ hta‸ k'aw‸ te hk'aw‸ piˇ ve yoˬ, teh‸ kuˬ ve yoˬ. 3 Yawˇ hui k'aw‸ k'oˆ ve, Haˍleˍluˇyaˬ, venˇ oˇ ve aˬ miˍ mvuhˇ hk'awˇ lehˬ, co co taiˍ taiˍ taˆ-e chehˇ ve yoˬ, teh‸ k'oˆ ve yoˬ. 4 Oˇ htaˇ, chaw mawˇ chaw kehˉ nyiˇ chi awˇ g'aˇ leh a sha‸ te‸ chehˇ ve awˬ ceuˬ awˇ hkeh lehˬ, boˆ sheˬ leh, k'aw jaw hk'oˆ lo mui chehˇ ve G'uiˬ sha hta‸ oˉ k'oˍ pui leh, A menˬ, haˍleˍluˇyaˬ teh‸ k'oˆ ve yoˬ. 5 K'aw jaw lo awˬ hkawˇ tawˆ la leh k'oˆ ve, G'uiˬ sha ve awˬ ceˬ hpeh‸ ve, yawˇ hta‸ yawˆ yan ve chaw uiˍ chaw i hk'a peu-eˬ-oˬ, ngaˬ hui ve G'uiˬ sha hta‸ chiˇ mvuh-o, teh‸ k'oˆ ve yoˬ. 6 Peuˬ leh, chaw awˬ moˍ lonˉ ve awˬ hkawˇ hk'a shuˍ shuˍ, iˉ kaˆ g'uiˬ baˇ maˇ jaˇ ve awˬ hkawˇ hk'a shuˍ shuˍ leh, mvuhˇ tawˍ hehnˇ jaˇ ve awˬ hkawˇ hk'a shuˍ shuˍ ngaˬ g'a kaˇ ve yoˬ. Awˬ hkawˇ oˇ ve chi hk'e k'oˆ ve, Haˍleˍluˇyaˬ. Kanˇ paˆ uiˍ jaˇ ve ngaˬ hui ve Jawˇ mawˇ G'uiˬ sha uˉ peunˍ ve yoˬ. 7 Ngaˬ hui g'aˇ hte‸ ha lehˬ ha k'a te-a veuˬ. Ngaˬ hui yawˇ hta‸ chiˇ uiˍ chiˇ mvuh piˇ-a veuˬ. Awˬ lawn k'o, Yawˬ ehˉ la‸ k'awˍ toˆ ve awˬ yanˇ gaˬ la peuˬ. Yawˇ hta‸ heuˆ tuˬ ve yaˇ miˇ lehˬ, yawˇ awˬ to hta‸ gu taˍ peuˬ. 8 Yaˇ miˇ oˇ ve lehˬ, awˬ g'euˆ ba ve kehˬ da‸ jaˇ ve hpa hpu hta‸ veu‸ deh tuˬ a hkaw-anˬ g'a ve yoˬ. Hpa hpu oˇ ve lehˬ, Hkri‸ yaˇ teˇ hpaˍ te taˍ ve hteˇ ve cawˇ ve kanˉ teˇ hpaˍ hpeh‸ ve yoˬ, teh‸ awˬ hkawˇ oˇ ve kuˬ ve yoˬ. 9 Peuˬ leh mvuhˇ naw ma tcuh yaˇ ngaˬ hta‸ k'oˆ laˇ ve, Chi hta‸ bvuh‸ taˍ-o‸. Yawˬ ehˉ ve hkehˉ caˇ kuiˬ lo k'ai tuˬ kuˬ taˍ ve chaw teˇ hpaˍ lehˬ, awˬ bon uiˍ ve yoˬ teh‸ k'oˆ ve yoˬ. Peuˬ leh, Tawˇ hkawˇ chi teˇ hpaˍ lehˬ, awˬ tehˬ awˬ na G'uiˬ sha ve tawˇ hkawˇ hpeh‸ ve yoˬ teh‸, ngaˬ hta‸ k'oˆ laˇ ve yoˬ. 10 Oˇ htaˇ, yawˇ hta‸ oˉ k'oˍ pui tuˬ, yawˇ ve hkui sheh awˬ paˇ lo ngaˬ boˆ taˍ ve yoˬ. Ya‸ hk'aˇ, yawˇ ngaˬ hta‸ k'oˆ laˇ ve, Chi hk'e taˇ te. Nawˬ leh Yeˍsuˆ awˬ pon shaˉ hkiˆ hkanˍ ve nawˬ ve awˬ viˉ awˬ nyi teˇ hpaˍ geh ngaˬ awˬ ceˬ hpeh‸ ve yoˬ. G'uiˬ sha hta‸ oˉ k'oˍ pui-o. Awˬ lawn k'o, Yeˍsuˆ shaˉ hkiˆ hkanˍ ve teˇ ceuˬ lehˬ, G'uiˬ sha ve tcuh kaˍ paˍ hui hta‸ dawˇ pawnˍ piˇ ve yoˬ teh‸ k'oˆ laˇ ve yoˬ. 11 Oˇ htaˇ ngaˬ nyi leh, mvuhˇ naw ma hpaw taˍ ve hta‸ ngaˬ g'a mawˬ ve yoˬ. Hpuˉ-ehˍ ve iˉ mvuhˇ teˇ hkeh cawˬ leh, ciˇ shehˍ hpaˇ lehˬ, Ka ti‸ yeˬ leh Hteˇ ve cawˇ ve awˬ shehˍ hpaˇ hpeh‸ ve yoˬ. Hteˇ ve cawˇ ve awˬ hk'aw lo yawˇ suhˉ jehˬ leh ma‸ bawˆ ve yoˬ. 12 Yawˇ ve mehˆ shiˍ lehˬ, aˬ miˍ ha hpeh‸ leh, yawˇ ve oˉ k'oˍ hta‸ shi uˉ tcuhˍ maˇ maˇ hk'awˆ taˍ ve yoˬ. Yawˇ hta‸ awˬ meh teˇ maˬ bvuh‸ taˍ ve yoˬ. Awˬ meh oˇ ve hta‸ yawˇ awˬ to maˇ heˆ k'o, chaw teˇ g'aˇ ka‸ maˇ shiˍ. 13 Awˬ suhˍ awˬ hk'aw lo tuˍ taˍ peuˬ ve aˉ po‸ zuhˬ ma hta‸ yawˇ veu‸ deh ve yoˬ. Yawˇ ve awˬ meh lehˬ, G'uiˬ sha ve tawˇ hkawˇ teh‸ k'oˆ ve yoˬ. 14 Mvuhˇ naw ma ve ma‸ moˍ ma‸ cuˇ teˇ hpaˍ lehˬ, hpuˉ-ehˍ ve iˉ mvuhˇ hta‸ ciˇ leh yawˇ awˬ hk'aˇ suh k'ai ve yoˬ. Yawˇ hui lehˬ, hpuˉ-ehˍ ve leh da‸ kehˬ ve hpa hpu hta‸ veu‸ deh ve yoˬ. 15 Mvuhˇ miˬ teˇ hpaˍ hta‸ chaw tuˬ, yawˇ ve maw‸ k'aw awˬ hk'aw lo tcuhˆ ve aˉ htaw tawˆ la ve yoˬ. Yawˇ lehˬ, sho juˇ fuiˍ hta‸ yehˇ leh yawˇ hui hta‸ uˉ peunˍ tuˬ yoˬ. Kanˇ paˆ uiˍ jaˇ ve G'uiˬ sha ve nyi ma zuhˆ jaˇ ve a pehˉ meuˇ g'uiˬ nyiˉ kuiˬ hta‸ yawˇ naˆ tuˬ yoˬ. 16 Yawˇ ve aˉ po‸ zuhˬ ma leh yawˇ ve pfuhˬ teh hta‸ awˬ meh chi hk'e bvuh‸ taˍ ve, Hkunˉ hawˉ hkanˇ awˬ hk'oˆ Hkunˉ hawˉ hkanˇ leh, jawˇ mawˇ awˬ hk'oˆ Jawˇ mawˇ teh‸ bvuh‸ taˍ ve yoˬ. 17 Oˇ htaˇ, mvuhˇ naw ma tcuh yaˇ teˇ g'aˇ mvuhˇ nyi awˬ hk'aw lo huˉ chehˇ ve hta‸ ngaˬ g'a mawˬ ve yoˬ. Mvuhˇ naw ma awˬ k'aw ji lo poˬ chehˇ ve ngaˆ hk'a peu-eˬ hta‸ yawˇ awˬ hkawˇ bvuhˬ chaweh kuˬ leh k'oˆ piˇ ve, Laˬ-o‸, G'uiˬ sha ve hti caˇ hti dawˬ ve pawehˇ lonˉ awˬ hk'aw lo hpawnˬ la-o. 18 Hkunˉ hawˉ hkanˇ teˇ hpaˍ ve awˬ shaˍ, ma‸ poˍ lonˉ teˇ hpaˍ ve awˬ shaˍ, awˬ g'aˇ uiˍ ve chaw hui ve awˬ shaˍ, iˉ mvuhˇ leh ciˇ shehˍ hpaˇ hui ve awˬ shaˍ, vuiˬ taˍ ve awˬ ceˬ hui ve awˬ shaˍ, ponˬ ve chaw hui ve awˬ shaˍ, uiˍ ve i ve chaw hk'a peu-eˬ ve awˬ shaˍ hta‸ caˇ la-o teh‸ k'oˆ ve yoˬ. 19 Oˇ htaˇ, haiˬ ve to nuˇ to shaˆ maˇ k'oˆ, miˬ guiˬ ve hkunˉ hawˉ hkanˇ teˇ hpaˍ leh yawˇ hui ve ma‸ moˍ teˇ hpaˍ maˇ k'oˆ, iˉ mvuhˇ ciˇ ve teˇ g'aˇ leh yawˇ ve ma‸ moˍ hta‸ bawˆ da‸ tuˬ, yawˇ hui hpawnˬ da‸ chehˇ ve hta‸ ngaˬ g'a mawˬ ve yoˬ. 20 Oˇ htaˇ, haiˬ ve to nuˇ to shaˆ hta‸ hpeh yuˬ leh, maˇ heˆ heˆ ve tcuh kaˍ paˍ hta‸ htawˇ yawˇ geh teˇ geh hpeh yuˬ ve yoˬ. Maˇ heˆ heˆ ve tcuh kaˍ paˍ oˇ ve lehˬ, haiˬ ve to nuˇ to shaˆ ve yinˉ hta‸ hkanˍ yuˬ leh yawˇ ve shaˉ ho‸ hta‸ oˉ k'oˍ pui ve chaw teˇ hpaˍ hta‸ heˍ yuˬ beˬ yuˬ tuˬ, haiˬ ve to nuˇ to shaˆ mehˆ g'uˇ suhˍ awˬ heˆ teˇ hpaˍ hta‸ te maˍ piˇ paˍ teˇ g'aˇ yoˬ. Aˬ miˍ to‸ chehˇ ve ma‸ shiˉ g'uiˬ po awˬ hk'aw lo yawˇ huiˉ maˬ hta‸ awˬ te‸ te‸ baˬ keu ve yoˬ. 21 Iˉ mvuhˇ ciˇ shehˍ hpaˇ ve maw‸ k'aw awˬ hk'aw lo tawˆ la ve aˉ htaw lehˬ, cawˬ taˍ sheˍ ve chaw teˇ hpaˍ hta‸ chaw pehˍ ve yoˬ. Ngaˆ hk'a peu-eˬ yawˇ hui ve awˬ shaˍ hta‸ hk'a bvuhˆ caˇ ve yoˬ.

Hpeu‸ maˍ 20

1 Oˇ htaˇ, mvuhˇ naw ma tcuh yaˇ teˇ g'aˇ mvuhˇ naw ma lo ya‸ la chehˇ ve hta‸ ngaˬ g'a mawˬ ve yoˬ. Leh kuiˬ maˇ cawˬ ve miˬ k'oˍ ve shawˇ leh sho caˆ lonˉ hta‸ yawˇ ve la‸ sheh awˬ hk'aw lo vawˆ taˍ ve yoˬ. 2 Neˇ haiˬ leh Saˍtanˍ hpeh‸ ve cawˇ shehˍ ma hta‸ yawˇ hpeh yuˬ leh, teˇ hinˉ hk'aw‸ hk'a gaˬ hpeh tiˍ taˍ ve yoˬ. Cawˇ shehˍ ma oˇ ve lehˬ, aˬ sho-eˬ htaˇ ve vuiˬ haiˬ hpeh‸ ve yoˬ. 3 Teˇ hinˉ hk'aw‸ maˇ peuˬ ve ceh ceh, chaw ceuˬ teˇ hpaˍ hta‸ yawˇ maˇ g'a heˍ yuˬ beˬ yuˬ tuˬ, leh kuiˬ maˇ cawˬ ve miˬ k'oˍ awˬ hk'aw lo yawˇ hta‸ baˬ keu sheˬ leh, hoˆ taˍ leh yinˉ tcuhˉ taˍ ve yoˬ. Teˇ hinˉ hk'aw‸ peuˬ hk'aw‸ nawˉ, yawˇ hta‸ teˇ hkui ceh g'a hpehˇ piˇ tuˬ yoˬ. 4 Oˇ htaˇ, k'aw jaw teˇ hpaˍ hta‸ ngaˬ g'a mawˬ ve yoˬ. K'aw jaw oˇ ve teˇ hpaˍ awˬ hk'oˆ hta‸ mui chehˇ ve chaw hui lehˬ, suhˉ jehˬ suhˉ taˆ tuˬ a hkaw-anˬ g'a taˍ ve yoˬ. Yeˍsuˆ leh G'uiˬ sha ve tawˇ hkawˇ awˬ lawn shaˉ hkiˆ hkanˍ ve hta‸ pa taw, oˉ k'oˍ tawˆ ve hta‸ g'a hkanˍ ve chaw hui ve co ha teˇ hpaˍ hta‸ htawˇ ngaˬ g'a mawˬ ve yoˬ. Yawˇ hui lehˬ, haiˬ ve to nuˇ to shaˆ hta‸ maˇ k'oˆ, yawˇ ve shaˉ ho‸ hta‸ maˇ k'oˆ, oˉ k'oˍ maˇ pui leh, yawˇ ve yinˉ tcuhˉ taˍ ve hta‸ a shu yawˇ ve naˍ k'aˍ pui awˬ hk'oˆ hta‸ maˇ k'oˆ, la‸ sheh awˬ hk'oˆ hta‸ maˇ k'oˆ, maˇ hkanˍ yuˬ ve chaw teˇ hpaˍ hpeh‸ ve yoˬ. Yawˇ hui k'aw‸ te‸ la leh, Hkri‸ geh teˇ hinˉ hk'aw‸ hk'a gaˬ uˉ peunˍ ve yoˬ. 5 Cawˬ taˍ sheˍ ve suh taˍ ve chaw teˇ hpaˍ lehˬ, teˇ hinˉ hk'aw‸ maˇ peuˬ ve ceh ceh maˇ g'a k'aw‸ te‸ la. Chi lehˬ, awˉ lawˉ peuˇ ve k'aw‸ te‸ tu la ve teˇ ceuˬ hpeh‸ ve yoˬ. 6 Awˉ lawˉ peuˇ ve k'aw‸ te‸ tu la ve teˇ ceuˬ awˬ hk'aw lo g'a chehˇ ve chaw lehˬ, awˬ bon uiˍ leh da‸ kehˬ ve chaw hpeh‸ ve yoˬ. Nyiˇ pawˆ teˇ pawˆ suh ve teˇ ceuˬ yawˇ hui awˬ hk'oˆ hta‸ kanˇ paˆ maˇ cawˬ. Yawˇ hui lehˬ, G'uiˬ sha leh Hkri‸ ve paw hkuˇ teˇ hpaˍ hpeh‸ leh, Hkri‸ geh teˇ hinˉ hk'aw‸ hk'a gaˬ uˉ peunˍ tuˬ yoˬ. 7 Teˇ hinˉ hk'aw‸ peuˬ hk'aw‸ nawˉ, Saˍtanˍ hta‸ htawnˍ awˬ hk'aw lo hpehˇ piˇ tuˬ yoˬ. 8 Miˬ guiˬ awˇ ceˍ awˍ hpawˇ lo chehˇ ve chaw ceuˬ teˇ hpaˍ hta‸ heˍ yuˬ beˬ yuˬ leh ma‸ bawˆ tuˬ awˬ pon hpawnˬ da‸ piˇ tuˬ, yawˇ tawˆ k'ai ve yoˬ. Chaw ceuˬ oˇ ve teˇ hpaˍ lehˬ, Gawˇgaˆ leh Maˍgawˇgaˆ teh‸ k'oˆ ve yoˬ. Yawˇ hui lehˬ, laˇ tsuhˇ g'uiˬ shehˇ shiˍ hk'a shuˍ shuˍ maˇ ve yoˬ. 9 Yawˇ hui lehˬ, miˬ guiˬ hk'oˆ hk'aˬ hpawˇ chi hpawˇ taˆ-e leh, Hkri‸ yaˇ teˇ hpaˍ ve deh kuiˬ leh ha‸ ve venˇ hta‸ hoˆ taˍ ve yoˬ. Oˇ htaˇ, mvuhˇ naw ma lo aˬ miˍ ce la leh yawˇ hui hta‸ to‸ baˬ ve yoˬ. 10 Yawˇ hui hta‸ heˍ yuˬ beˬ yuˬ ve neˇ haiˬ hta‸ htawˇ, aˬ miˍ leh ma‸ shiˉ g'uiˬ po awˬ hk'aw lo baˬ keu ve yoˬ. Oˇ kaˬ lo haiˬ ve to nuˇ to shaˆ leh maˇ heˆ heˆ ve tcuh kaˍ paˍ chehˇ taˍ ve yoˬ. Yawˇ hui lehˬ, co co taiˍ taiˍ tanˇ hkuinˇ tanˇ vanˇ fawˉ ve mehˍ ve hta‸ g'a hkanˍ tuˬ yoˬ. 11 Oˇ ve awˬ hk'aw‸ nawˉ, hpuˉ-ehˍ ve k'aw jaw lonˉ hta‸ leh k'aw jaw oˇ ve awˬ hk'oˆ lo mui shehˍ hpaˇ hta‸ ngaˬ g'a mawˬ ve yoˬ. Miˬ guiˬ leh mvuhˇ naw ma lehˬ, yawˇ mehˆ g'uˇ suhˍ lo hpaw-e leh, miˬ guiˬ leh mvuhˇ naw ma awˬ pon chehˇ kuiˬ maˇ k'aw‸ cawˬ. 12 Suh taˍ ve chaw uiˍ chaw i hk'a peu-eˬ k'aw jaw oˇ ve awˬ g'uˇ suhˍ lo huˉ chehˇ taˍ ve hta‸ ngaˬ g'a mawˬ ve yoˬ. Oˇ htaˇ, li‸ teˇ hpaˍ hta‸ hpeu‸ taˍ ve yoˬ. Co ti‸ ha ti‸ li‸ teˇ k'oˆ hta‸ htawˇ hpeu‸ taˍ ve yoˬ. Suh peuˬ ve chaw hui te taˍ ve kanˉ teˇ hpaˍ li‸ awˬ hk'aw lo bvuh‸ taˍ ve hk'e, li‸ oˇ ve teˇ hpaˍ hta‸ cuˇ leh yawˇ hui hta‸ suhˉ jehˬ ve yoˬ. 13 Laˇ tsuhˇ g'uiˬ lehˬ, yawˇ awˬ hk'aw lo cawˬ ve suh peuˬ ve chaw teˇ hpaˍ hta‸ chiˇ a‸ piˇ ve yoˬ. Suh ve teˇ ceuˬ leh Suh mvuhˇ miˬ htawˇ, yawˇ hui awˬ hk'aw lo cawˬ ve suh peuˬ ve chaw hui hta‸ chiˇ a‸ piˇ ve yoˬ. Chaw teˇ g'aˇ le le, a shu yawˇ te taˍ ve hk'e suhˉ jehˬ ve hta‸ g'a hkanˍ ve yoˬ. 14 Oˇ htaˇ, Suh ve teˇ ceuˬ leh Suh mvuhˇ miˬ hta‸ aˬ miˍ g'uiˬ po awˬ hk'aw lo baˬ keu ve yoˬ. Aˬ miˍ g'uiˬ po oˇ ve lehˬ, nyiˇ pawˆ teˇ pawˆ suh ve teˇ ceuˬ hpeh‸ ve yoˬ. 15 Co ti‸ ha ti‸ li‸ awˬ hk'aw lo awˬ meh maˇ cawˬ ve chaw hk'aˬ ve teˇ g'aˇ hta‸ maˇ k'oˆ, aˬ miˍ g'uiˬ po awˬ hk'aw lo baˬ keu ve yoˬ.

Hpeu‸ maˍ 21

1 Oˇ htaˇ, mvuhˇ naw ma awˬ suhˉ leh miˬ guiˬ awˬ suhˉ hta‸ ngaˬ g'a mawˬ ve yoˬ. Awˬ lawn k'o, awˉ lawˉ ve mvuhˇ naw ma leh awˉ lawˉ ve miˬ guiˬ lehˬ, mehˉ k'ai peuˬ. Laˇ tsuhˇ g'uiˬ htawˇ maˇ k'aw‸ cawˬ. 2 Oˇ htaˇ, da‸ kehˬ ve venˇ teh‸ k'oˆ ve Yeˍruˆsaˍlehnˍ venˇ awˬ suhˉ lehˬ, mvuhˇ naw ma hk'oˆ G'uiˬ sha geh lo tawˆ la leh ya‸ la chehˇ ve hta‸ ngaˬ g'a mawˬ ve yoˬ. Venˇ oˇ ve lehˬ, awˬ hpawˇ heuˆ tuˬ awˬ pon awˬ hkiˇ shawˍ taˍ ve yaˇ miˇ haˉ hk'a shuˍ shuˍ hk'a deh‸ gu taˍ ve yoˬ. 3 K'aw jaw lo bvuhˬ jaˇ ve awˬ hkawˇ hta‸ ngaˬ g'a kaˇ ve yoˬ. Awˬ hkawˇ oˇ ve chi hk'e k'oˆ ve, Nyi loˬ, G'uiˬ sha ve chehˇ kuiˬ chaw yaˇ hui geh cawˬ leh, yawˇ yawˇ hui geh chehˇ tuˬ yoˬ. Yawˇ hui lehˬ, G'uiˬ sha ve chaw hpeh‸ leh, G'uiˬ sha awˬ to yawˇ hui geh chehˇ tuˬ yoˬ. 4 Yawˇ lehˬ, yawˇ hui ve mehˆ g'uiˬ hk'a peu-eˬ hta‸ shiˆ baˬ piˇ tuˬ yoˬ. Suh ve teˇ ceuˬ maˇ k'aw‸ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ k'aw‸ cawˬ. Awˬ lawn k'o, awˉ lawˉ htaˇ cawˬ ve awˬ ceuˬ teˇ hpaˍ mehˉ k'ai peuˬ teh‸ k'oˆ ve yoˬ. 5 K'aw jaw hk'oˆ lo mui shehˍ hpaˇ k'oˆ ve, Nyi loˬ, awˬ ceuˬ hk'a peu-eˬ hta‸ ngaˬ awˬ suhˉ k'aw‸ te ve yoˬ teh‸ k'oˆ ve yoˬ. Yawˇ teˇ pawˆ k'aw‸ k'oˆ ve, Chi hta‸ bvuh‸ taˍ-o‸. Awˬ lawn k'o, tawˇ hkawˇ chi teˇ hpaˍ lehˬ, ka ti‸ yeˬ leh hteˇ ve cawˇ ve yoˬ teh‸ k'oˆ ve yoˬ. 6 Peuˬ leh, yawˇ teˇ pawˆ k'aw‸ k'oˆ laˇ ve, Peuˬ ve yoˬ. Ngaˬ lehˬ, awˬ hkuiˉ puiˍ leh awˬ leh meuˇ hpeh‸ leh, awˉ lawˉ peuˇ ve awˬ ceuˬ ka‸, awˬ leh meuˇ ve awˬ ceuˬ ka‸ hpeh‸ ve yoˬ. Iˉ kaˆ shiˉ ve chaw hta‸ awˬ hpfuhˇ maˇ yuˬ leh g'uiˬ tuˇ awˬ hk'aw lo tawˆ la ve co ha te‸ piˇ lawˬ ve iˉ kaˆ ngaˬ taw piˇ tuˬ yoˬ. 7 G'aˇ ve chaw teˇ g'aˇ lehˬ, awˬ shinˉ chi teˇ hpaˍ hta‸ g'a caˇ tuˬ yoˬ. Ngaˬ lehˬ yawˇ ve G'uiˬ sha hpeh‸ leh, yawˇ ngaˬ ve yaˇ hpeh‸ tuˬ yoˬ. 8 Ya‸ hk'aˇ, kawˆ puiˉ ve chaw, maˇ yonˍ ve chaw, cha‸ chiˆ ve chaw, shu hta‸ tiˇ pehˍ ve chaw, haˉ chawˇ haˉ paˆ te ve chaw, neˇ te ve chaw, shaˉ ho‸ hta‸ oˉ k'oˍ pui ve chaw leh heˍ ve chaw hk'a peu-eˬ lehˬ, aˬ miˍ leh ma‸ shiˉ to‸ chehˇ ve g'uiˬ po awˬ hk'aw lo g'a hkanˍ tuˬ yoˬ. Oˇ ve lehˬ, nyiˇ pawˆ teˇ pawˆ suh ve teˇ ceuˬ hpeh‸ ve yoˬ teh‸, ngaˬ hta‸ k'oˆ laˇ ve yoˬ. 9 Oˇ htaˇ, awˬ leh meuˇ ve fawˉ mehˍ ve suhˍ ceuˬ hk'a biˇ cawˬ ve mu‸ hk'u suhˍ shiˍ hta‸ vawˆ taˍ ve mvuhˇ naw ma tcuh yaˇ suhˍ g'aˇ awˬ hk'aw lo teˇ g'aˇ laˬ leh ngaˬ hta‸ tawˇ yaw leh k'oˆ laˇ ve, Laˬ-o‸, Yawˬ ehˉ ve awˬ miˇ ma hpeh‸ ve yaˇ miˇ haˉ ngaˬ nawˬ hta‸ maˍ laˇ tuˬ yoˬ teh‸ k'oˆ laˇ ve yoˬ. 10 Yawˇ ngaˬ hta‸ Awˬ ha hpu awˬ hk'aw lo uiˍ jaˇ mvuh jaˇ ve hk'aw pui lo shiˍ k'ai laˇ ve yoˬ. Oˇ htaˇ, G'uiˬ sha geh lo tawˆ la leh mvuhˇ naw ma hk'oˆ lo ya‸ la chehˇ ve da‸ kehˬ ve Yeˍruˆsaˍlehnˍ venˇ ngaˬ hta‸ yawˇ maˍ laˇ ve yoˬ. 11 Venˇ oˇ ve lehˬ, G'uiˬ sha ve awˬ me‸ awˬ hponˇ hk'a biˇ cawˬ ve yoˬ. Venˇ oˇ ve awˬ g'euˆ ba ve lehˬ, awˬ hpfuhˇ hk'aˆ ve haˉ pui shehnˉ hk'e hpeh‸ leh, haˉ pui keh-oˬ hk'a shuˍ shuˍ awˬ g'euˆ laiˉ ceuˬ cawˬ ve haˉ pui shehnˉ hta‸ ka‸ shuˍ ve yoˬ. 12 Venˇ oˇ ve lehˬ, uiˍ jaˇ mvuh jaˇ ve lanˇ venˇ cawˬ leh, lanˇ venˇ yehˬ miˉ teˇ chi nyiˇ maˬ cawˬ ve yoˬ. Yehˬ miˉ oˇ ve teˇ chi nyiˇ maˬ lo mvuhˇ naw ma tcuh yaˇ teˇ chi nyiˇ g'aˇ chehˇ taˍ ve yoˬ. Yehˬ miˉ oˇ ve teˇ hpaˍ awˬ hk'oˆ hta‸ Iˉsaˍreˍlaˆ ve yaˇ paˍ teˇ hpaˍ ve chaw teˇ chi nyiˇ ceuˬ ve awˬ meh bvuh‸ taˍ ve yoˬ. 13 Mvuhˇ nyi tawˆ hpawˇ lo yehˬ miˉ sheh lehˇ, awˬ na hpawˇ lo yehˬ miˉ sheh lehˇ, awˬ hawˉ hpawˇ lo yehˬ miˉ sheh lehˇ leh, mvuhˇ nyi k'ehˬ hpawˇ lo yehˬ miˉ sheh lehˇ cawˬ ve yoˬ. 14 Lanˇ venˇ oˇ ve lehˬ, awˬ hkuiˉ puiˍ kawˍ taˍ ve haˉ pui teˇ chi nyiˇ shiˍ cawˬ leh, oˇ ve teˇ hpaˍ awˬ hk'oˆ hta‸ Yawˬ ehˉ ve tcuh yaˇ teˇ chi nyiˇ g'aˇ ve awˬ meh bvuh‸ taˍ ve yoˬ. 15 Ngaˬ hta‸ tawˇ yaw laˇ shehˍ hpaˇ lehˬ, venˇ hta‸ maˇ k'oˆ, lanˇ venˇ yehˬ miˉ teˇ hpaˍ hta‸ maˇ k'oˆ, lanˇ venˇ hta‸ maˇ k'oˆ, tehˆ nyi tuˬ, shi lo taˬ cawˬ taˍ ve yoˬ. 16 Venˇ oˇ ve lehˬ, awˇ ceˍ cawˬ leh, zuhˬ hpawˇ k'ehˬ hpawˇ hk'a shuˍ shuˍ hpeh‸ ve yoˬ. Chaw oˇ ve lehˬ, yawˇ ve lo taˬ hta‸ yehˇ leh, venˇ hta‸ tehˆ nyi ve teˇ yanˇ, teˇ meunˍ nyiˇ hinˉ hpaˍlonˍ cawˬ ve yoˬ. Zuhˬ hpawˇ k'ehˬ hpawˇ, mvuh hpawˇ hk'a shuˍ shuˍ hpeh‸ ve yoˬ. 17 Peuˬ leh lanˇ venˇ hta‸ yawˇ tehˆ nyi leh, chaw yaˇ ve la‸ jaˆ hta‸ shawˍ k'o, teˇ ha awˇ chi awˇ jaˆ cawˬ ve yoˬ. Chaw yaˇ ve la‸ jaˆ leh mvuhˇ naw ma tcuh yaˇ ve la‸ jaˆ hk'a shuˍ shuˍ hpeh‸ ve yoˬ. 18 Lanˇ venˇ oˇ ve lehˬ, awˬ g'euˆ laiˉ ceuˬ cawˬ ve haˉ pui shehnˉ kawˍ taˍ ve yoˬ. Venˇ lehˬ, da‸ jaˇ ve shi hpeh‸ leh, mehˆ g'euˆ hk'a shuˍ shuˍ kehˬ da‸ ve yoˬ. 19 Lanˇ venˇ awˬ hkuiˉ puiˍ teˇ hpaˍ nyi sha tuˬ, awˬ hpfuhˇ hk'aˆ ve haˉ pui shehnˉ teˇ ceuˬ le le hta‸ yuˬ leh te taˍ ve yoˬ. Awˉ lawˉ teˇ maˬ lehˬ, awˬ g'euˆ laiˉ ceuˬ cawˬ ve haˉ pui shehnˉ hpeh‸ ve yoˬ. Nyiˇ maˬ teˇ maˬ lehˬ, naw hpui ve haˉ pui shehnˉ hpeh‸ ve yoˬ. Sheh lehˇ teˇ maˬ lehˬ, hpuˉ-ehˍ ve haˉ pui shehnˉ hpeh‸ ve yoˬ. Awˍ lehˇ teˇ maˬ lehˬ, naw naˆ ve haˉ pui shehnˉ hpeh‸ ve yoˬ. 20 Ngaˇ maˬ teˇ maˬ lehˬ, ga‸-ehˍ ve haˉ pui shehnˉ hpeh‸ ve yoˬ. Hkaw‸ maˬ teˇ maˬ lehˬ, nyiˉ-ehˍ ve haˉ pui shehnˉ hpeh‸ ve yoˬ. Suhˍ maˬ teˇ maˬ lehˬ, shi nyi ve haˉ pui shehnˉ hpeh‸ ve yoˬ. Hiˉ maˬ teˇ maˬ lehˬ, naw shi ve haˉ pui shehnˉ hpeh‸ ve yoˬ. K'awˇ maˬ teˇ maˬ lehˬ, shiˉ-ehˍ ve haˉ pui shehnˉ hpeh‸ ve yoˬ. Teˇ chi maˬ teˇ maˬ lehˬ, shi naw ve haˉ pui shehnˉ hpeh‸ ve yoˬ. Teˇ chi teˇ maˬ teˇ maˬ lehˬ, nyi hpui ve haˉ pui shehnˉ hpeh‸ ve yoˬ. Teˇ chi nyiˇ maˬ teˇ maˬ lehˬ, nyi naˆ ve haˉ pui shehnˉ hpeh‸ ve yoˬ. 21 Lanˇ venˇ yehˬ miˉ teˇ chi nyiˇ maˬ lehˬ, piˉ ko-eˍ shehnˉ teˇ chi nyiˇ shiˍ hpeh‸ ve yoˬ. Yehˬ miˉ teˇ maˬ le le lehˬ, piˉ k'o-eˍ shehnˉ teˇ shiˍ hpeh‸ ve yoˬ. Venˇ oˇ ve awˬ hk'aw lo cawˬ ve ya‸ k'aw lonˉ lehˬ, da‸ jaˇ ve shi hpeh‸ leh, mehˆ g'euˆ hk'a shuˍ shuˍ kehˬ da‸ ve yoˬ. 22 Venˇ oˇ ve awˬ hk'aw lo bon yehˬ lonˉ hta‸ ngaˬ maˇ mawˬ. Awˬ lawn k'o, kanˇ paˆ uiˍ jaˇ ve Jawˇ mawˇ G'uiˬ sha leh Yawˬ ehˉ lehˬ, venˇ oˇ ve awˬ hk'aw lo bon yehˬ lonˉ hpeh‸ ve yoˬ. 23 Venˇ oˇ ve awˬ hk'aw lo mvuhˇ nyi leh ha pa awˬ g'euˆ ba tuˬ maˇ loˍ. Awˬ lawn k'o, G'uiˬ sha ve awˬ me‸ awˬ hponˇ lehˬ, venˇ oˇ ve hta‸ awˬ g'euˆ ba piˇ leh, Yawˬ ehˉ lehˬ, venˇ oˇ ve awˬ pon kawˆ faiˇ hpeh‸ ve yoˬ. 24 Chaw ceuˬ teˇ hpaˍ lehˬ, awˬ g'euˆ oˇ ve awˬ hk'aw lo toˇ k'ai tuˬ yoˬ. Miˬ guiˬ ve hkunˉ hawˉ hkanˇ teˇ hpaˍ lehˬ, venˇ oˇ ve awˬ hk'aw lo a shu yawˇ ve awˬ me‸ awˬ hponˇ hta‸ yuˬ laˬ tuˬ yoˬ. 25 Venˇ oˇ ve yehˬ miˉ teˇ hpaˍ hta‸ mvuhˇ law‸ k'aw htaˇ hk'aˬ htaˆ ka‸ maˇ hoˆ. Oˇ kaˬ lo mvuhˇ hpeu‸ ve teˇ ceuˬ htawˇ maˇ cawˬ. 26 Chaw ceuˬ teˇ hpaˍ ve awˬ me‸ awˬ hponˇ teˇ ceuˬ leh yawˆ yan ve teˇ ceuˬ venˇ oˇ ve awˬ hk'aw lo yawˇ hui yuˬ laˬ tuˬ yoˬ. 27 Cha‸ chiˆ ve hk'aˬ ve teˇ ceuˬ maˇ k'oˆ, cha‸ chiˆ ve hta‸ te ve chaw leh, heˍ ve chaw hk'aˬ ve teˇ g'aˇ maˇ k'oˆ, venˇ oˇ ve awˬ hk'aw lo a ciˉ ka‸ maˇ g'a lo‸-e. Yawˬ ehˉ ve co ti‸ ha ti‸ li‸ awˬ hk'aw lo awˬ meh bvuh‸ taˍ ve chaw teˇ hpaˍ ceh tiˉ g'a lo‸-e ve yoˬ.

Hpeu‸ maˍ 22

1 Oˇ htaˇ, G'uiˬ sha leh Yawˬ ehˉ ve k'aw jaw lo tawˆ la leh venˇ oˇ ve ya‸ k'aw lonˉ awˬ k'aw ji lo yoˬ ya‸ k'ai chehˇ ve, co ha te‸ piˇ lawˬ ve iˉ kaˆ lawˬ yawˇ ngaˬ hta‸ maˍ laˇ ve yoˬ. Iˉ kaˆ oˇ ve lehˬ, kehˬ da‸ jaˇ ve haˉ pui keh-oˬ hta‸ shuˍ ve yoˬ. 2 Iˉ kaˆ lawˬ oˇ ve nyiˇ hpawˇ hpawˇ lo co ha te‸ piˇ lawˬ ve iˉ shiˍ cehˬ cawˬ ve yoˬ. Iˉ shiˍ cehˬ oˇ ve lehˬ, awˬ shiˍ teˇ chi nyiˇ ceuˬ naw‸ leh, ha pa teˇ maˬ le le awˬ shiˍ naw‸ ve yoˬ. Awˬ hpa‸ teˇ hpaˍ lehˬ, chaw ceuˬ teˇ hpaˍ ve naˬ ve gawˬ ve hta‸ na-e la piˇ tuˬ awˬ pon yoˬ. 3 Awˬ hk'aw‸ nawˉ k'o, teˇ ceuˬ ka‸ hkeu ve hta‸ maˇ g'a hkanˍ. Venˇ oˇ ve awˬ hk'aw lo G'uiˬ sha leh Yawˬ ehˉ ve k'aw jaw cawˬ leh, yawˇ ve awˬ ceˬ teˇ hpaˍ yawˇ hta‸ oˉ k'oˍ pui tuˬ yoˬ. 4 Yawˇ hui lehˬ, yawˇ ve mehˆ hpfuhˇ hta‸ g'a mawˬ leh, yawˇ hui ve naˍ k'aˍ pui lo yawˇ ve awˬ meh cawˬ taˍ tuˬ yoˬ. 5 Awˬ hk'aw‸ nawˉ k'o, mvuhˇ hpeu‸ ve teˇ ceuˬ maˇ k'aw‸ cawˬ. Kawˆ faiˇ awˬ g'euˆ hta‸ maˇ k'oˆ, mvuhˇ nyi awˬ g'euˆ hta‸ maˇ k'oˆ, yawˇ hui maˇ loˍ. Awˬ lawn k'o, Jawˇ mawˇ G'uiˬ sha lehˬ, yawˇ hui hta‸ awˬ g'euˆ ba piˇ tuˬ yoˬ. Yawˇ hui lehˬ, co co taiˍ taiˍ g'a uˉ peunˍ tuˬ yoˬ. 6 Mvuhˇ naw ma tcuh yaˇ teˇ pawˆ k'aw‸ k'oˆ ve, Tawˇ hkawˇ chi teˇ hpaˍ lehˬ, ka ti‸ yeˬ leh hteˇ ve cawˇ ve tawˇ hkawˇ hpeh‸ ve yoˬ. G'uiˬ sha ve tcuh kaˍ paˍ hui ve nyi ma hta‸ uˉ peunˍ ve Jawˇ mawˇ G'uiˬ sha lehˬ maˇ maw maw hpeh‸ la tuˬ ve awˬ ceuˬ teˇ hpaˍ yawˇ ve awˬ ceˬ teˇ hpaˍ hta‸ maˍ piˇ tuˬ, yawˇ ve mvuhˇ naw ma tcuh yaˇ hta‸ peu laˇ peuˬ ve yoˬ. 7 Nyi loˬ, ngaˬ haˆ haˆ laˬ tuˬ yoˬ. Li‸ chi awˬ hk'aw lo bvuh‸ taˍ ve G'uiˬ sha ve tcuh kaˍ paˍ ve tawˇ hkawˇ hta‸ na yuˬ leh te ve chaw lehˬ, awˬ bon uiˍ ve yoˬ teh‸, ngaˬ hta‸ k'oˆ laˇ ve yoˬ. 8 Ngaˬ awˬ to Yoˇhanˬ lehˬ, awˬ ceuˬ chi teˇ hpaˍ hta‸ g'a kaˇ g'a mawˬ ve yoˬ. Chi teˇ hpaˍ hta‸ g'a kaˇ g'a mawˬ peuˬ hkaw‸ nawˉ, ngaˬ hta‸ maˍ laˇ ve mvuhˇ naw ma tcuh yaˇ teˇ g'aˇ hta‸ oˉ k'oˍ pui tuˬ, yawˇ ve hkui paˇ lo ngaˬ boˆ taˍ ve yoˬ. 9 Yawˇ k'oˆ ve, Chi hk'e taˇ te. Ngaˬ htawˇ nawˬ geh teˇ geh awˬ ceˬ hpeh‸ ve yoˬ. Nawˬ ve awˬ viˉ awˬ nyi hpeh‸ ve G'uiˬ sha ve tcuh kaˍ paˍ hui geh maˇ k'oˆ, li‸ chi awˬ hk'aw lo bvuh‸ taˍ ve tawˇ hkawˇ hta‸ na yuˬ leh te ve chaw hui geh maˇ k'oˆ, yawˇ hui geh teˇ geh htawˇ ngaˬ awˬ ceˬ hpeh‸ ve yoˬ. G'uiˬ sha hta‸ oˉ k'oˍ pui-o teh‸, ngaˬ hta‸ k'oˆ laˇ ve yoˬ. 10 Peuˬ leh yawˇ ngaˬ hta‸ k'aw‸ k'oˆ laˇ ve, Li‸ chi awˬ hk'aw lo bvuh‸ taˍ ve G'uiˬ sha ve tcuh kaˍ paˍ ve tawˇ hkawˇ hta‸ yinˉ taˇ tcuhˉ. Awˬ lawn k'o, awˬ yanˇ neˇ la peuˬ. 11 Maˇ hteˇ maˇ cawˇ ve chaw lehˬ, maˇ hteˇ maˇ cawˇ ve hta‸ te piˇ sheˍ. Cha‸ chiˆ ve chaw lehˬ, cha‸ chiˆ ve hta‸ te piˇ sheˍ. Hteˇ ve cawˇ ve chaw lehˬ, hteˇ ve cawˇ ve hta‸ te piˇ sheˍ. Da‸ kehˬ ve chaw lehˬ, da‸ kehˬ ve hta‸ te piˇ sheˍ. 12 Nyi loˬ, ngaˬ haˆ haˆ laˬ tuˬ yoˬ. Chaw teˇ g'aˇ le le, a shu yawˇ te taˍ ve hta‸ keunˍ da‸ ve hk'e piˇ tuˬ, la‸ shawnˍ hta‸ ngaˬ yuˬ laˬ tuˬ yoˬ. 13 Ngaˬ lehˬ Aˍlaˍhpaˆ leh Awˇmeˍgaˆ hpeh‸ ve yoˬ. Awˬ hkuiˉ puiˍ leh awˬ leh meuˇ htawˇ ngaˬ hpeh‸ ve yoˬ. Awˉ lawˉ peuˇ ve awˬ ceuˬ ka‸, awˬ leh meuˇ ve awˬ ceuˬ ka‸ hpeh‸ ve yoˬ. 14 Co ha te‸ piˇ lawˬ ve iˉ shiˍ cehˬ lo laˬ tuˬ a hkaw-anˬ g'a tuˬ leh, lanˇ venˇ yehˬ miˉ awˬ hk'aw lo g'a lo‸-e tuˬ awˬ pon, a shu yawˇ ve aˉ po‸ zuhˬ ma hta‸ tsuhˇ baˬ ve chaw lehˬ, awˬ bon uiˍ ve yoˬ. 15 Awˬ baˬ hpawˇ lo lehˬ, hpuiˇ hk'e ve chaw, neˇ te ve chaw, haˉ chawˇ haˉ paˆ te ve chaw, shu hta‸ tiˇ pehˍ ve chaw, shaˉ ho‸ hta‸ oˉ k'oˍ pui ve chaw leh, heˍ ve hta‸ tiˉ te gaˇ leh heˍ chehˇ ve chaw hk'a peu-eˬ chehˇ taˍ ve yoˬ. 16 Ngaˬ Yeˍsuˆ lehˬ, Hkri‸ yaˇ awˬ moˍ teˇ hpaˍ awˬ pon awˬ ceuˬ chi teˇ hpaˍ nawˬ hui hta‸ shaˉ hkiˆ hkanˍ tuˬ, ngaˬ ve mvuhˇ naw ma tcuh yaˇ hta‸ peu laˇ ve yoˬ. Ngaˬ lehˬ, Daˍviˆ ve awˬ geu leh awˬ ceuˬ awˬ hk'aˇ hpeh‸ ve yoˬ. Awˬ g'euˆ ba hehnˇ jaˇ ve peuˬ tawˆ htawˇ ngaˬ hpeh‸ ve yoˬ. 17 Awˬ ha hpu leh awˬ hpawˇ heuˆ tuˬ ve yaˇ miˇ haˉ k'oˆ ve, Laˬ-o‸. G'a kaˇ ve chaw htawˇ, Laˬ-o‸ teh‸ shu hta‸ k'oˆ piˇ-oˆ. Iˉ kaˆ shiˉ ve chaw laˬ piˇ lawˬ-o‸. Dawˬ gaˇ ve chaw hk'aˬ ve teˇ g'aˇ maˇ k'oˆ, awˬ hpfuhˇ maˇ piˇ leh co ha te‸ piˇ lawˬ ve iˉ kaˆ hta‸ dawˬ piˇ lawˬ-o‸. 18 Li‸ chi awˬ hk'aw lo bvuh‸ taˍ ve G'uiˬ sha ve tcuh kaˍ paˍ ve tawˇ hkawˇ hta‸ g'a kaˇ ve chaw teˇ g'aˇ le le hta‸ ngaˬ chi hk'e shaˍ ti‸ pe‸ laˇ ve yoˬ. Awˬ ceuˬ chi teˇ hpaˍ hta‸ chaw teˇ g'aˇ g'aˇ htehˍ piˇ ve k'o, li‸ chi awˬ hk'aw lo bvuh‸ taˍ ve fawˉ mehˍ ve teˇ hpaˍ G'uiˬ sha yawˇ hta‸ k'aw‸ htehˍ piˇ tuˬ yoˬ. 19 G'uiˬ sha ve tcuh kaˍ paˍ ve tawˇ hkawˇ bvuh‸ taˍ ve li‸ chi awˬ hk'aw lo tawˇ hkawˇ teˇ hpaˍ hpaˍ hta‸ chaw teˇ g'aˇ g'aˇ yuˬ baˬ ve k'o, li‸ chi awˬ hk'aw lo bvuh‸ taˍ ve awˬ ceuˬ teˇ hpaˍ, co ha te‸ piˇ lawˬ ve iˉ shiˍ cehˬ leh da‸ kehˬ ve venˇ awˬ hk'aw lo yawˇ g'a tuˬ ve teˇ hpaˍ hta‸ G'uiˬ sha yuˬ baˬ tuˬ yoˬ. 20 Awˬ lawn chi teˇ hpaˍ hta‸ shaˉ hkiˆ hkanˍ shehˍ hpaˇ k'oˆ ve, Awˬ tehˬ awˬ na ngaˬ haˆ haˆ laˬ tuˬ yoˬ teh‸ k'oˆ ve yoˬ. A menˬ, Jawˇ mawˇ Yeˍsuˆ-oˬ, laˬ-o‸. 21 Jawˇ mawˇ Yeˍsuˆ ve awˬ bon awˬ shinˉ lehˬ, Hkri‸ yaˇ hui geh cawˬ piˇ-oˆ.