Kangso' Mungdang:
1 He; mougmyid yoo soo" ri aphain" too" shi" mo Mungdang: gi jo, jo, gu nghoid bye. Hau: mungdang: gi Mangsoo yo" dage" nyid. Mungdang: we Mangsoo nyang: nghoid bye. 2 Hau: mungdang: gi apoem: ayang mo nyang:- Mangsoo yo" dage" nyid bye. 3 Nyang: khyo" wigi Mangsoo gi - jo, moo jo, ri phain" so: to. Phain" to" jang" moo nyang: aboo loo bue" lo zi gi daja we ajo. 4 Hau: mungdang: gi kangso' ajhung nghoid- hau: da" kangso' gi Byu yi da" bidbang nghoid. 5 Hau: bidbang gi moug coid moo thoin" pang byid: nyid. Hau: moug coid gi bidbang ri khanham we ayo" nghoeb too. 6 Mangsoo gi nya: lagyoo: Yohan ga: su: dayug ri nhang: kaid. 7 Mangso: mungdang: ri Byu dangain" shau" gyo: lho: loem" jeing" lo boem baja" ga: hau: Yohan gi bidbang da" khyoo: ri sagsi: kham: byid: wa ga juri" bye. 8 Nyang: gi bidbang anghoid. Bid bang da" khyoo: ri sagsi: kham: wa ga: dare. 9 Hau: gyeing" da" bidbang gi mougmyid moo gyoo" lo lho: Byumyu" bain sho' mo da" tho' moo thoin" pang too" bye. 10 Mungdang: gi mougmyid moo jo, jo bye. Mangsoo gi mougmyid ri Mungdang yo" phain" too" bye: nghoid loug we' mougmyid gi nyang: ri asi. 11 Nyang: gi nya: da" moug moo juri" nghoid loug we' nya: da" byu yi gi nyang: ri alhoem: kham: yu boem. 12 Nghoidloug we' dayham" koem gi nyang ri lhoem: yu lho: loem" jeung" lo boem bye:- houg: su" nyang: ri loem" jeing" mo ri Mangso da" nya: zoo: yi yo" bue" loo wa akhang" byid: bye. 13 Houg: bang: gi byu da" nya phoo mo khu: lo da" nya: zoo yi nghoid nyid wigi xangsu: suid shoo" khyo" Mangso: nya: zoo: yi yo" bue" lo zi anghoid. Mangsoo nyang- nyangnu da nya: phoo nghoid nyid. 14 Mungdang gi Byu gung bue" lo lho: Jeju" yo" deingmain" khyoo: byeung" zoore"- ngoonu" jang" moo re" nyid bye. Ngoonu" gi nya: da" Phung" yoeb ri yo" myang boem bye. Hau: da" phung" yoeb gi Nya: pho, zooti" zoo: khyo" yo" kham: yu da" myonhoo: phung" yoeb nghoid. 15 Yohan gi nya: khyoo: ri tid bye nyang tid zigi Nga" thang: moo juri" wa su: gi nga" tho' je gyi: su nghoid. Khasu" wim gari nyang: gi ngoo: akhu: shi" mo, nyid nyid bye: su: nghoid ein: ngoo lhoung tid nyid da" su: gi he: yug nyang nghoid bye" ga: nyho: tid. 16 Nyang: gi Jeju" yo" byeung" su: nghoid zi yo" dakhyoo" ti"- Jeju" da loem: thang: moo daloem: nyhang" ri shamain" byid: nyid. 17 Mangsoo gi tarha" ri Moshe khyoo" wigi byid: kaid. Nghoidloug we' Jeju" yo" deingmain" zigi Yesu Hkristu khyo" wi ju" loo bye. 18 Byu hang" we' Mangsoo ri amyang yu" nghoid loug we' nya: pho da" shid khoin moo nyid da" Mangsoo: yo' dakhyoo" ti" da" zooti" zoo: gi Mangsoo ri thoin" pang shug nyid bye.
Babtisma Byid: su: Sara: Yohan Da" Mungdang:
19 Yerusalem voo moo nyid da" yuda zoug: yi gi Khainjung agyi yi dayham" yo"- Levi yi dayham" bang: ri Yohan jhang khyoo: nhang: kaid lho: nang gi hang" nghoid ga: myid: nhang: kaid boem. 20 Houg: lang" Yohan gi Ngoo gi Meshia anghoid- ga: wigi azoug" loo: bang bang lhoem: tid kyo. Houg: bang: gi nang Meshia anghoid rigi hang" nghoid Elia nghoid la"» ga: doem myid: boem. 21 Houg rigi nang hang" nghoid- Elia nghoid la"» ga: myed: ‹‹Yohan gi ngoo Elia anghoid ga: tid.» Nyangnu" gi nang gi Lapi: nghoid la"» ga: doem myid: lang" Yohan gi ‹‹Ngoo gi hau: da" lapi: we anghoid ga: tid.» 22 ‹‹Houg: bang: gi Houg: ri nang hang" nghoid-» ngoonu" ri nhang: kaid mo, ri lo" tid kyoo" ca. Nang nya: gung ri nang hang" nghoid ein: myid nyid ga: doem tid. 23 Yohan gi lapi: Esaia tid kyo" to" zi ' dakhyoo" ti"-- ngoo gi Aseing: ri" wa da" khyoo: ri dain: dain: nyheing ge' ga: dain" pyoid yoo moo nyho: nyid su: da" thui: nghoid ga: tid. 24 Yohan jang" moo Pharishe" yi nhang: kaid da" lagyoo: yi doem myid: zigi 25 Nang Meshia we anghoid- Elia we anghoid- Mangso: da" lapi: phoophoo we anghoid rigi Ce: noem koid; wigi Babtisma kham: byid: yen" lha"» ga: zheing: myid: boem. 26 Yohan gi ngooo gi gyid yo' Babtisma ri kham: byid. Nanu" da" Phung: moo nanu" asi su: dayug bo yab jo. 27 Hau: yug gi nga" thang: moo da ju" ri" nghoid loug we' Ngoo gi nya: khyid: baid tei" phid: byid: wa zi lang" amoin: yi" su: nghoid- ga: tid. 28 He khyoo: gi Babtisma kham: byid: da" Yodan gyidlang bid thu' shoid moo jo, da" Bethani voo moo bue" da" khyoo: nghoid.
Mangso: Da" Yang Nu"
29 Thang: nyid" ri nya: jang" moo Yesu jure" zi myang lang" Yohan tid zigi Mougmyid byu yi da" yooboo ri yu pyam byid: da:- Mangso: yang nu" ri yu" yu" ge'. 30 Nga" thang: moo juri" su: danghoid loug- Nga" tho' mo je gyi: su: nghoid. Khasu" wim gari he: yug gi ngoo akhu: shi" mo nyid nyid su: nghoid- ngoo lhoung tid nyid su: gi he: yug nyang: nghoid bye. 31 He: yug hang" su: nghoid zi xang: shi" ri ngoo asi. Nghoidloug we' Israela Byumyu" yi nyang: ri zheing: se' boem wa shid' re" Ngoo gi gyid yo Babtisma ri kham: byid. 32 Hau: thang: Yohan sagsi; kham: da" zi gi gyeungshang: Venyi: gi mougkhung: khyo" pheing" kyoug" yhangti"- gyoo" lo lho: nya: tho' moo zhoung: jo, ziri ngoo myang. 33 Nyang: gi hang" su: nghoid zi xang: shid" ri ngoo asi- nghoid loug we' gyid yo" Babtisma kham: byid: wa shid' re" ngoori nhang: kaid da" Mangsoo: tid zigi gyeungshang: Venyi: gi gyoo" lo lho: dayug yug da" atho' moo zhoung: jo, ziri nang shau" myang wa. Hau: yug gi gyeungshang: da" Venyi: yo" Babtisma byid: wa su: nghoid. 34 Houg: su" tid to" ziyo' dakhyoo" ti"- ngoo shau" yang bye. Houg: yoomo ngoo nanu" ri tid ba- nyang: gi Mangso da" nya: zoo: nghoid.
Yesu Da" Xang: Shid" Mo Cangzoo: Yi
35 Thang: nyid" moo Yohan gi nya cangzoo: eig yug yo" dage" yab jo, da" uri 36 Aseing Yesu jure" zi myang lang" thei: yug gi Mangso yang nu" nghoid ga: tid. 37 Cangzoo: eig yug gi hau: dang: khoin" ri shaug" gyoo: lang" Yesu da" thang: moo cang lo" ago". 38 Aseing Yesu gi thang: khyoo: lheing: yu" kaid ri houg: bang: cang lo ziri myang lang" ‹‹Nanu" ce: noem sho: yen" go" ga: wigi myid. Houg: bang: gi ‹‹Rabai we" nang khamoo nyid la"»ga: myid: boem. (Rabai ga: da" dangkang: gi sara: we" ga: tid nau zi nghoid.) 39 Yesu gi hid: moo re" yu" ge" ga: phougtu. (hau: ayo gi myenthang: myid nayi: koo nghoid bye.) Houg: lang" nyangnu" gi nya: thang: cang yhe: ri nyang: nyid joyoo yhe: zheing: myang boem lho: nyangnu" gi Yohan yo' danyid" goin" nyid koin ago". 40 Hau: cangzoo: yi mo dayug gi Simun Petru da" nya: nhung"- Andre nghoid. 41 Nyang: gi nya: mang: Simun ri myang lang" tid zigi ‹‹Ngoonu" koem Meshia ri myang bye.» (Meshia ga: da" dangkang: gi)- Khristu ga: zi nghoid ga: tid. 42 Hau: thang: ri nyang: gi Simun ri Yesu jhang khyoo: khe: shu" yhe. Yesu gi Simun ri yu" lho: tid zigi ‹‹Nang gi Yohan nya: zoo: Simun nghoid. Nghoidloug we' nang rigi Kepha ein: myheing wa zi nghoid. (Hau: zigi Petru ga: ziyo' du: lho: lung: moo" boem ga: da" dangkang: bo.)
Yesu Philib Yo" Nathanela Ri: Khe: Khyoo:
43 Thang: nyid" moo Yesu gi Galile mung" khyoo: loo" wa shid' re" myid phyed' to". Philib ri myang lang" nga" thang: cang we' ga: tid. 44 Philib gi Besaida voo mo nghoid. Besaida gi Andre yo" Petru eig yug nyid da" voogung nghoid. 45 Philib gi Nathanela ri myang lang" Moshe da" tarha" pug moo nghoid loug- Lapi: yi da" Jhoem: mungdang: moo nghoid loug- lhid" shed' too" su: ri ngoonu" myang bye. Hau: yug gi Yoseb da" nya: zoo:- Nazared mo Yesu nghoid ga: tid. 46 Nathanela gi Nazared voo mo zi gi daja: ja: thu' yu" la"» ga: myid. ‹‹Philib gi re" we' yu" we' ga: tid.» 47 Nathanela re" nyid zi Yesu myang lang" nya: khyoo: Yesu tid zigi fain" da" nheigloem: abo da" Israela Byu gyeing" dayug hid: moo ju" bye: ga: wigi tid. 48 Nathanela gi-Yesu ri nang khasu" wim ngoori khayo se' lha"» ga: myid: yu". Yesu phougtu" zigi ‹‹Nang ri Philib are" khi: shi" re- lafoem gam gyid" moo danyid shi" mo nang ri ngoo myang bye.» 49 Houg: lang" Nathanela gi Sara: we" nang gi ‹‹Mangso da" nya: zoo: nghoid Israela byumyu" yi da" khokham" nghoid.» ga: wigi Nathanela phougtu. 50 Aseing Yesu tid zigi Lafoem gam gyid" moo ngoo nang ri myang bye: ga: tid yoomo za: nang loem" jeing" la". He: tho' moo je gyi: da" moozoo" joem ri nang myang shi" wa zi nghoid. 51 Ngoo deing" deing nanu" ri tid ba- mougkhung: khoem" phang lho: Byu da" nya: zoo: tho' moo moug: lagyoo: yi gyoo" loo do, loo" koid' nyid da" ziri nanu" shau" myang wa ga: wigi nyangnu" ri Yesu tid.
Khana Voo Mo Loxo' Pui"
1 Eig nyid" myang" thang: ri Galile mung" mo Khana voo moo loxo' pui" daloem: jo. Hau: da" pui" moo Yesu da" nya: myhi' we bo. 2 Yesu yo' nya: cangzoo: yi ri we' hau: pui" moo khe: to. 3 zabyidd" thang byug lang" Yesu da" nya: myhi' gi Hid: bang: zabyidd" thang boem bye: ga: Yesu ri tid. 4 ‹‹Yesu gi myi: yi myhi, we" ci: koid; ca" zi nang ngoori atid noo"-» nga" ayo, aju" shi" ga: wigi phougtu. 5 Hau: thang: ri nya: yhed' gi dei dei mo ri nyang: ci: tid ci: koid; ge' ga: tid. 6 Hau: joyoo moo galain eigsoem" xi: koo: vang da" yam: zeing: khyug loem: jo. Yuda byumyu" yi da" loem khau : khyoo: yo' dakhyoo" ti"-- cid" sain wa shid' re" to" da" yam: joem nghoid. 7 Yesu gi He: yam: joem moo gyid byeung" byeung" kham: kaid too" ge" ga: Dei zoo: yi ri tid lang" nyangnu" gi yam: nhoid ju" sho' sho' gyid kham: kaid pyeing to" boem. 8 Hau: thang: ri nyangnu" ri tid zigi He: yam: mo gyid dajhi' khu" yu lho: Pui" vhoeb jhang lo" byid: ge ga: tid ziyo' dakhyoo" ti"- dei zoo: yi gi khu" ci: lo" boem. 9 Pui" vhoeb gi zabyidd" agyeing" khyo" bue" lo da gyid ri shug ca, yu". zabyidd" yeing ri khakhyo" yo" ziri gyid kham: kaid da" dei zoo yi gi se Pui" vhoeb phoo gi asi-( nghoid loug gyid kham: zei da" deizoo: yi gi se )yoomo pui: vhoeb gi phoo seig ri khe: yu wi- 10 tid zigi ‹‹Byu hang" we' zabyidd" yeing je ge ziyo'- xang: shid" being" dalhoem: se. Hau: thang: ri she, ade: ngham" da" zabyidd" ri dalhoung jang- Nghoidloug we' nang gi je ngham" da" zabyidd" rigi akhid" ju" sho' da yhoem" too" nhung: lha"» ga: tid. 11 Yesu gi he: xang shid" mau" pho" alhoo: again ri Galile mung" Khana voo moo koid shug zoo" re" nya: myonhoo: phung" yoeb ri toin" shid. Houg: yoomo nya: da" cangzoo: yi gi nyang: ri loem" jeing" loem: khau lo boem. 12 Hau: thang: ri Yesu yo"- nya: yhed nya: no, - nya: cangzoo: yi yo" dage" Kaperna-um voo khyoo: lo" wigi hougmoo da eig nyid" theing: nyid boem.
Yesu Noku Yhoem: Moo" Khyoo: Ju" Yhe:
13 Yuda byu yi da" lhed: kaid' pui" jhang lo da" uri Aseing Yesu gi Yerusalem voo khyoo: yhe: lo. 14 Noku yhoem moo" khoug: moo nu: jung- Yang- jid vhu:- ung" mo yo"- ngei thid' nyid mo zoobui" joem moo zhoung: jo, lang" ziri lo" myang. 15 Hau: uri tei" shoem, voosi" dakhaid koid; yu lho: yang joem yo" nujung joem gougnyhoug dangain" ri no ku" yhoem moo" khoug: mo khaid thu' pyam. Ngei thid' mo da" zoobui" joem yo"- ngei joem ri we' tu: phaug foid' sain" pyam byid. 16 Aseing Yesu gi ‹‹Haug: bang: ri hid mo yu pyam' ge' Nga" pho, Yhoem: moo" ri kid" yhoem: akoid logoo" ga: wigi-jid: vhu: ung" bang: ri amyeing" khyo, 17 Houg: lang" cangzoo: yi gi ‹‹O"- Mangsoo we"- ngoo coung" nghei seing" gam avoem" da" nheig nhei: jang:- Re" yhoem: moo" ri" jheddab myid gi nheigloem: moo myi: su" nge" nyid bye.» ga: wigi lhid" to" da" jhoem: dang: ri myid boin: boem ago". 18 Yuda zoug: yi gi ‹‹Nang gi he: da" moozoo" yo" koid; wa da" amyeing" yoo" su: nghoid ziri ngoonu" ri ce: da" alhoo: again yo" koid; shug wa lha".» ga: wigi re" zheung: myid: boem. 19 Yesu phougtu" zigi ‹‹He: no ku" yhoem: moo" ri phyo' pyam' ge'. soem" nyid" agyoo: moo ngoo doem yo" koid; too" wa.» 20 Yuda byu yi tid zi gi myid: xe: khyug zain ju" sho' koid; ri dabain da" no ku" yhoem moo" ri nang gi soem" nyid agyoo: moo yo" koid' wa la"» ga: myid nyid boem. 21 Nghoidloug we' Yesu tid da No ku" yhoem: moo" ga: zigi nya: gung doem: ri tid nyid zi nghoid. 22 Houg: yoomo Nya: cangzoo: yi gi Yesu shid: jang" mo doem dei to'' lo da" uri he: khyoo: ri doem myid boin: boem lho: Jhoem: mungdang: ri nghoid loug we' Yesu tid kyoo" khare" da" mungdang: ri nghoid loug we' loem" jeing" lo ago".
Byu Da" Khyoo: Ri Yesu Se
23 Yerusalem voo moo koid; da" lhed: kaid pui" moo Yesu zei: shug da" mau" pho" moo" ri zheung: shau" myang boem yoomo Byu myoo" sho' gi nyang: ri loem" jeing" vang lo boem. 24 Nghoidloug we' Yesu gi byu dangain" mo da" nheigloem: ri si' yoomo houg: bang: ri aloem. 25 Yesu ri byu da" akhyoo" hang" wigi we' tid kyoo" anoo. Nyang: gi byu da" nheigloem: ung: khoug: moo ci: bo ziri dangain" si' gu nghoid bye.
Yesu Yo" Nikodi Da" Khyoo:
1 Pharishe yi phung: moo boo su:- Nikodi ga: da Yuda vhu' jhung: dayug nyid. 2 Nyang: gi myen" damyen ri Yesu jhang khyoo: re" lho: Rabai we"- Nang gi Mangsoo nhang: kaid da" Sara: dayug nghoid ziri ngoonu" se' khasu" wim gari nang koid; shug da" mau" pho" moozoo" gi Mangsoo za: abo ri hang" we' ayo" koid; zi nghoid ga: wigi tid. 3 Yesu gi ‹‹Ngoo nang ri deing" deing tid ba- eig lheing: khu: ziri akham: yu su: hang" we' Mangso Mungdain: shau" myang wa zi anghoid » ga: tid. 4 Houg ‹‹Nikodi gi Byu gi apyaid bain gyi: thang: ri khasu" se' doem yo" khu: loo: wa lha".» ‹‹Nya: myhi' da" ung: khoug: khyoo: vang lo" lho: doem yo" khu: wa la".» ga: myid. 5 Yesu phougtu" zigi ‹‹ngoo nang ri deing" deing tid kyoo" ba- gyid yo" Venyi: khyo" akhu: loo su: hang" nghoid loug we' Mangso da" Mungdain: moo ayo" vang. 6 Gung shoo" khyo" khu: zigi gung shoo" nghoid- Venyi yo' khu: lo da" zigi Venyi nghoid nyid. 7 Ngoo nang ri dalheing: doem khu: kham' ca" ein: tid ziri nang agyo: moug. 8 Lid' gi nyang: houg nau jang" khyoo: hau' loo" se nyid. Lid' houg thui: ri shaug" gyoo: nghoid loug we' kha: shoid khyo" hau lo lho: kha: shoid khyoo: hau lo" nyid zi ri nang asi. Venyi: mo khu: loo mo, hang" we' houg: yhangti" nghoid nyid. 9 Nikodi gi ‹‹he: da" khyoo: gi khasu" se' ge bue" loo wa lha".» ga: doem myid. 10 Yesu doem phougtu" zigi nang gi Israela amyu" mo Sara: moo" dayug nghoid to" nyid lho: wigi he: da" khyoo: ri nang ase' lo nhung: lha". 11 Nang ri ngoo deing" deing tid kyo"- Ngoonu" gi nyang: nyang: se' da" khyoo: yo" myang da khyoo: ri tid kyoo". Nghoidloug we' ngoonu" tid kyo" da" dang: ri nanu" hang we' anau lhoem: yu nghoid ago". 12 Mougmyid yo" sen: da" khyoo: ngoo tid kyo" ri nanu" aloem" jeing" lang" gi Mougkhung: mungdain: yo' sen: da" khyoo: tid kyo" uri nanu" khasu" koid; wigi se' loem" jeing" goo" wa lha". 13 Mougkhung: mo gyoo" lo da" byu nya: zoo: mo gootu: hang" we' Mougkhung: khyoo: ado, lo" yu. 14 Dain" pyoid yoo moo Moshe gi seig zeing: moo gyid: lhang myu ri tu: to' to" yhangti"- Byu da" nya: zoo: we' tu: to' to" zi shau" wa nghoid. 15 Houg su" nyang ri loem jeung" mo, hang" we' apyaid ato: Kangso' ri yo" yu boem wa. 16 Khasu" wim gari Mangso da" nya: zoo: ri loem" jeing" bang: hang" nghoid loug we' ashid: loo za. Apyaid ato: kangso' yo" yu baja" ga: Mangsoo gi nya: zooti" zoo: ri byid: pyam jang moo ju" sho' Mougmyid xangsu: byu yi ri jheddab nyid. 17 Khasu" wim gari Mangsoo gi nya: zoo: ri nhang: kaid da" khyoo: gi Mougmyid byu yi ri tarha" dang: phyed wa shid' re" anghoid. Mougmyid byu yi da: khyoid yu Aseing bui" wa shid re nghoid. 18 Nya: zoo: ri loem" jeing" mo, hang" nghoid loug we' Tarha" dang: phyed' zi ashug" loo. Aloem" jeing" mo, koem gi Mang" so da" zooti" zoo: ri aloem" jeing" yoomo akhid" lang" tarha" dang: phyed zi shau" nyid. 19 Tarha" dang: phyed byid: da" akhyoo" dangkang: gi hid: su" nghoid bidbang zeing gi he: mougmyid moo juri" bye: nghoid loug we' Byu xangsu: yi gi akhyeing" ashoeb mo, nghoid nyid yoomo bidbang tho' moo moug: coid ri daje vho: boem. 20 Akhyeing" ashoeb moo" zei mo, gi bidbang ri ngheing" boem yoomo bidbang khyoo ari" nghoid boem wigi nyang: nya: akhyeing" ashoeb da" moozoo" bang thu' loo wa ziri avhoo: nghoid ago" gyoug yoomo - bidbang nam, moo avoem" tain" ri. 21 Nghoidloug we' deingmain" da" moo" zei: mo, gi nyangnu" koid da" khyoo: Mangsoo: myid khyoo: nghoid ziri yo" toin' shed wa shid re" bidbang moore" ago".
Yesu Yo" Yohan
22 Hau: thang: ri Aseing Yesu gi nya: Cangzoo: yi yo" dage" Yuda meing joem khyoo: so" koem" lo boem. Hau: joyoo moo cangzoo: yi yo" dage" nyid nyid lho: Babtisma ri we kham: byid. 23 Salim: joyoo anam, mo Enon: moo gi gyid myoo" sho' jo, yoomo Yohan we' Babtisma ri kham: byid: nyid. Byu yi we' Yohan jang" moo zeing: re" lho: Babtisma ri zheing: kham: yu nyid boem. 24 He: zigi Yohan thung: alung" shi" uri bue" da" khyoo: nghoid. 25 Yohan da" cangzoo: yi dayham" bang: gi loem: hau khyoo: moo ced" shang: khyoo: yo" sen: lho: Yuda byu dayug yo" ngeig go" nyid. 26 Houg: yoomo nyangnu" gi Yohan jang" moo yhe: lho: ‹‹Sara: we"- Yodan gyidlang bid thu' tab' moo Sara: moo" jhang jure" yu" bye: da" byu- nang lhoung tid nyid da" su: ri aboin: la". Akhid" nyang: gi Babtisma ri cang kham: byid yen"- byu myoo" sho' we nya: jang" moo zeing: re" nyid ago"» ga: re" tid. 27 Yohan gi ‹‹Mangso: wigi a ab byid: ri byu gi ce" moo" ri we' ayo" kham: yu›› ga: wigi phougtu. 28 Ngoo gi Meshia anghoid. Hau: Aseing: da" gam, shid" khyoo: khyoeb su: date: nghoid. He: khyoo: ngoo nanu" ri tid kyoo" bye: zi gi nanu" nyang: sagsi: nghoid boem bye. 29 Lo, xo myhi, seig ri yo" seing: ci: su: gi loxo' phoo seig nghoid. Phooseig da" byen cang" phoo gi nya: nam, moo yab nyid lho: phoo seig da" thui: ri tam" gyo: nyid su: gi phoo seig da" thui: ri shaug" gyoo: lang" gau yi ngei pyoo: zi nghoid. Ngoo we' houg: su" joeb joeb byeung" byeung" gau yi ngei pyo: nyid bye. 30 Nyang: gi je gyi: sheung: loo wa. Ngoo koem gi neing: gyo" loo" wa zi nghoid.
Mougkhung: Tho, Mo Gyoo" Loo Su:
31 Mougkhung: tho' mo gyoo" lo da" su: gi dangain" tho' moo je gyi. Mougmyid: mo nyid ri" su: gi mougmyid: byu te: nghoid yoomo mougmyid yo" sen: da" khyoo: ri te: se' tid. Nghoidloug we' mougkhung: tho' mo gyoo" lo da" su gi dangain" tho' moo nyid: su: nghoid. 32 Nyang: tid ri nyang: shau" myang shau" gyo: da" khyoo:- nghoid loug we' nya: mungdang: ri hang" we alhoem: kham: yu boem. 33 Nghoid loug we' nya: da" mungdang: ri kham: yu su: koem gi Mangsoo gideing main" su: nghoid khyoo: ri lhoem: kham: yu khyo" geing: teing nhang: su nghoid. 34 Mangsoo nyang: nhang: kaid su: gi Mangsoo mungdang: ri tid nyid khasu wim gari nya: - Venyi: byeung" byeung" kaid byid: to. 35 Nya phoo gi nya: zoo: ri jheddab yoomo nya: yoem: vhoo" bain sho' nya: zoo: ri ab byid: to. 36 Hou zoo: shang: ri loem" jeing" su: hang" nghoid loug we' apyaid ato: kangso' yoo" wa zi nghoid. Nghoidloug we' nya: zoo: da" dang: ri atam" gyoo: su: gi kangso' ayo" yu Mangso da" yoobo dam byid: zigi hau: youg tho' moo dajo, jo, nyid wa zi nghoid.
Yesu Yo" Samari Myhi,
1 Yesu gi Yohan tho' mo Byu myoo" sho' ri Babtisma byid: nyid ziyo' cangzoo: yi je myo: lo ziri Pharishe zheung: shau" gyo: boem. 2 Gyeing" nyang: ga: rigi Aseing Yesu nya: gung gi Babtisma ri a byid. Nya: cangzoo: yi za: date: kham: byid. 3 Houg: su" Pharishe yi shau" gyo: ga: zi Aseing Yesu si' lang" gi Yuda mung" mo, thu' lo" lho: Galile mung" khyoo: tau" lo. 4 Nya: khyoo: gi Samari mung" khyo" phyed led: loo" ca" zi nghoid. 5 Samari mung" mo Sukha ga: da" voogung moo ju" lo. Hau: voo gi Yaku nya: zoo: Yoseb ri byid: to" da" mougmyid yo" athei" ve: da" joyoo nghoid. 6 Hau: joyoo moo Yaku da" gyid thung" jo, Yesu gi khyoo: so" myung: yoomo gyid thung" nam, moo zhoung: jo. Hau: da" ayo, gi bidnyid" gung tu: da" ayo, nghoid bye. 7 Samari myhi, dayug gi gyid kham: wa shid' mo jure. Aseing Yesu gi Ngoori shug gyid dagoem koo: byid: we' ga: hau: myiyi: ri tid. 8 (Nya: cangzoo: yi gi zoo: noem qei wa shid' re" voo khoug: khyoo: vang lo" boem uri nghoid.) 9 Myiyi myhi, phougtu" zigi nang gi Yuda byumyu" dayug nghoid. Ngoo gi Samari byu dayug nghoid nga" jang" mo khasu" wim wigi shug gyid ri mho' lha". (Hid: su" myid: da" khyoo: gi Yuda byumyu" yi gi Samari byu yi oug" khu, alhoung poung" ci: yu" yoomo nghoid.) 10 Yesu phougtid zigi Mangsoo ci: byid: nyid ziyo'- nang ri shug gyid dagoem mho' nyid su: gi hang" nghoid da" khyoo: ri nang se' nghoid ri koem gi hau: youg jang" mo nang gyid mho' wa zi nghoid. Hau: yug we' nang ri kangso' gyid byid: wa zi nghoid ga: tid. 11 Hau: myiyi: gi ‹‹Aseing: we" gyid thung" gi gye no,- Aseing: nang gyid pung" we' aci:- nang khayo kangso' gyid se' yoo" wa lha".» 12 He: gyid thung" gi phoug" Yaku ngoonu" ri byid: to" zi nghoid. Nyang: we' nya: zoo: yi we' Yang joem Nu: joem gi he: gyid thung" mo shug led loo" bye. Nang Yaku tho' je gyi: la". 13 Yesu doem phougtid zigi «He: gyid shug mo, dangain"- thang: ri gyid doem shed shi" wa. 14 Nghoidloug we' ngoo byid: wa da" gyid shug mo, hang" we' khanham we' gyid doem shed loo: wa zi anghoid. Hau: ngoo byid: da" gyid shug su: gi nya: da" akhoug: moo gyid bug dalang bue" loo wa. Hau: zigi nya: da" shid' re" Kangso' gyid bue" wigi nyang: ri apyaid ato: kangso' byid: wa zi nghoid. 15 Hau: myiyi: tid zigi ‹‹Lu daid' we"- Ngoo ri thang: phyang" gyid adoem shid wa shid' re" we' He: joyoo moo re" lho: gyid akham: ca" loo: wa shid' re" we' hau: gyid ngoori byid: jhug we"» ga: mho' da. 16 Yesu tid zigi lo" lho: Re" yhoem: seing: phoo ri khe: shu" ri" we' ga: tid. 17 Hau: myiyi: phougtu" zigi ‹‹Ngoo yhoem: seing: phoo dayug we' ayoo"» ga: tid. Yesu phougtu" zigi ngoo yhoem: seing: phoo ayoo" ga: nang tid zi deing. 18 Nang gi yuggi wim: yug yo" loxo' yu bye:- Akhid" nang yo" dage" nyid su: gi re" yhoem: seing: phoo anghoid. Nang gi nghoid deing ziri tid nyid abye:.» 19 ‹‹Ngoo yu" ri nang gi Lapi: dayug nghoid zi myang si' bye: ga:›› myiyi: myhi, tid. 20 Nga" phoug" phyid" gi he: da" boem moo Mangsoo ri noku boem. Nanu" Yuda byumyu" yi gi Yerusalem voo moo da noku ga: tid boem›› ga: tid. 21 Yesu gi myiyi: zoo: nang we"- nga" dang: ri loem" jeing" we' he: boem tho' moo we' Yerusalem voo moo we' phoo Mangsoo ri anoku lo: da" ayo, gi ju" loo wam bye. 22 Nanu" Samari yi gi nyang: tu: nyang: ase' da" Mangsoo ri Noku ago". Ngoo nu" gi ngoonu" nyang: si' bye: da" Mangsoo ri da noku boem. Khasu" wim gari Khyoid yu khyoo: gi Yuda byumyu" mo wigi ju" loo yoomo nghoid nyid. 23 Noku loem: khoug: mo, gi Phoo Mangsoo ri Venyi: yoem: vhoo" yo"- deingmain" khyo" noku wa ayo, gi ju" loo wa. Akhid" lang" hid: moo ju" nyid bye. Houg: su" loem" jeing" noku mo, ri Mangsoo vho: ngei nyid. 24 Mangsoo gi Venyi: nghoid- Venyi: da yoem: vhoo" khyo" za: byugi deingmain" khyoo" yo' noku nyid. 25 Hau: myiyi: myhi, gi ‹‹Meshia nyang: ju" gyoo" ri" wa zi ngoo se'- Hau: da" ju" gyoo" loo lang" gi ngoonu" ri khyoo" dangain" re" tid shed wa zi nghoid›› ga: tid. 26 Yesu doem tid zigi ‹‹Hau: yug gi akhid" nang yo" doem go" nyid su:- ngoo nyang: nghoid bye.» 27 Hau: uri nya: cangzoo: yi gi doem ju" loo bye. Nyangnu" gi Yesu myiyi: myhi, dayug yo" doem go" nyid zi lo myang yoomo gye" yu" mau" boem ago". Nghoidloug we' hau myiyi: myhi, ri ‹‹Ce: noem vho: ga: khyoo: ri we'›› Yesu: ri ‹‹Ci: koid; hau myiyi: myhi, yo" doem go" nyid›› ga: nyangnu" hang" we' avoem" myid: yu" boem nghoid ago". 28 Myiyi: myhi, gi gyid yam: ri too" kho' lho: voo khoug: khyoo: lo" wigi voo byu yi ri 29 Ngoo koid; da" khyoo: dangain" ri tid thu' byid: su: ri re" yu" ge'. Nyang: gi Meshia nghoid wa la"» ga: wigi lo" tid kyo. 30 Houg: yoomo byu yi gi voo mo thu' re" boem lho: Yesu jhang re" lo ago". 31 He: da" uri cangzoo: yi gi ‹‹Sara: we" zoo: noem shi" zoo: we' ga: zheung: sang: boem.» 32 Nghoid loug we' Yesu phougtu" zigi ‹‹nanu" ase' da" zoo: noem ri ngoo yoo" bye›› ga: tid. 33 Houg: yoomo cangzoo: yi gi Yesu ri ‹‹zoo: noem dayug yug ci: ri" bye: la'» ga: nyang: cang" nyang: myid: go" nyid. 34 Yesu gi ‹‹Nga" da" zoo: noem gi Ngoo ri nhang: kaid' su: vho: khyo" cang pyeing lho: Hau: Aseing: byid: to" da" moozoo" ri bain sho' voin vu, khyoo: gi nga" zoo: noem nghoid bye:» ga: tid. 35 ‹‹Lham" moo" myid: khyab koo: myang" loo" lang" gug myheing yo, ju" wam: bye: ga: tid -dang: khyang" jo, anghoid goo" la". Nghoidloug we' ngoo nanu" ri tid ba;- Yoo thung" dain" khyoo: lheing: yu" kaid ge' yham" wa gug gi akhid" nyang: byang: yo" ne- myheing voin" jo, bye: ziyo' yham" wa jen" jen" nghoid bye. 36 Gug yham" mo, gi aphoug" ri shau" yu lho: Apyaid ato: kangso' yo" sen: da" amyoug: ashi" ri yo" yham" yu boem wa. Houg: yoomo shoo" su: yo" yham" su: gi dage" za: gau yi boem wa zi nghoid. 37 Dayug gi sho" lho: dayug gi yham"- ga: da" dang: khyang" gi deung nyid zi nghoid. 38 Nanu" ashoo" azhoung" to" da" yoo: thung" mo gug ri yham" yu wa shid' re" ngoo nanu" ri nhang: kaid bye. Gootu: da" byu yi zei: to" jang" mo- nanu" gi akyu" ri shau" kham: yu nyid boem"» ga: tid. 39 Samari myiyi: myhi, gi ‹‹He: yug gi ngoo koid; da" moo" dangain" yo" tid kyo"» ga: tid yoomo hau: voo mo, Samari byu yi myoo" sho' gi Yesu ri loem" jeing" lo boem. 40 Houg: yoomo Samari byu yi gi Yesu jhang jure" boem lho: nyangnu" jang" moo lo theing: we' ga: sang: boem yoomo Yesu gi hau: joyoo moo eig nyid" koo: theing: nyid kho. 41 Nya: da" mungdang: ri shau" gyo: boem yoomo byu gootu: myoo" sho' we' loem" jeing" lo boem bye. 42 Houg: bang: gi Samari myiyi: myhi, ri ‹‹Akhid" ngoonu" gi Aseing: ri loem" jeing" lo boem zigi re" dang: yoomo za: anghoid- Aseing: da" mungdang: ri ngoonu" nyang: shaug" gyoo: boem yoomo danghoid. He: da" Aseing: gi mougmyid da" khyoid yu su:- gyeing" gyeing"- nyang: nghoid da" khyoo: ri ngoonu" si' bye: ga: tid boem.
Zoug: Dayug Da" Yuggi Zoo: Ri: Noo Ge Loo" Nhang:
43-44 ‹‹Khasu" wim ga: ri lapi; gi nya: da: moug moo ce: myonhoo: aboo›› ga: Aseing: nyang: tid ziyo dakhyoo" ti" nghoid- eig nyid" koo: myang" lang" hau: joyoo mo, Galile mung" khyoo: yhe: lo". 45 Houg: su"Galile moo ju" lo" ri Galile byumyu" yi gi Yesu ri lhoem: tau yu boem. Khasu" wim gari Yerusalem voo moo koid; led: lo da" lhed: kaid pui" moo nyangnu" da" gung nyang: yhe: ju" yu" lho: hau: pui" uri Yesu zei: shug da" akhyoo" again joem ri zheing: myang yoomo nghoid. 46 Hau: thang: ri Yesu gi gyid ri zabyidd" yeing bui" nhang: da" Galile mung" khana voogung moo dalheing: doem ju" lo. Hau: voo moo asu" ya zoug: dayug nyid. Nya: zoo: yuggi nu" gi Karpena-um voo moo no nyid. 47 Hau: da" zoug: phoo gi Yuda mung" mo, Galile mung" khyoo: Yesu ju" lo" ziri shaug" gyoo: yoomo Yesu jang" moo re" lho: shid: tham: no nyid da" nya: zoo: ri Karpena-um voo khyoo: yhe: lho gi byid: wa shid' re" Yesu ri re" sang: nyid. 48 Yesu tid zigi nang gi mau" pho" da" alhoo: again ri ashau" myang nghoid ri gi loem" jeing" wa zi anghoid. 49 Hau: zoug: phoo gi ‹‹Aseing: we"- nga" zoo: ashid: shi" ri juri" byid: we'» ga: mho' 50 Yesu gi ‹‹loo" we' re" zoo: gi kangso' dei nyid wa›› ga: tid. Hau: yug gi Yesu tid da" dang: ri loem" jeing" ziyo' tau" loo" bye. 51 Nyang: gi khyoo: laid moo daso" loo" shi" ri nya: dei zoo: yi jure" boem lho: re" yuggi zoo: gi ge loo bye: ga: re" tid lang" boem bye. 52 Hau: zoug: phoo gi kha: yo, ri nga" zoo: ge lo lha"» ga: myid: uri nya: dei zoo: yi gi anyi" nab' danayi: koo mo ge gyeing: loo bye. ga: tid kyo" boem. 53 Houg: lang" nya: phoo gi houg: noo ge lo da" ayo, gi ‹‹Re" zoo: gi kangso' dei nyid wa›› ga: Yesu nyang: ri tid da" ayo, nghoid da" khyoo: ri myid boin: kaid. Houg: yoomo nyang: yo" yhoem: byu dangain" mi" yi, Yesu ri loem: khau lo. 54 He: khyoo: gi Yuda mung" mo, Galile mung" khyoo:- Yesu ju" lo" thang: ri eig lheing: ein: lheing: toin" shid' da" mau" pho" moozoo" nghoid.
Gyid Thoem" Yam Moo Noo Ge Loo" Nhang: Da" Khyoo:
1 Hau: thang: ri Yuda byumyu" yi da" pui" zeing: daloem: jo, yoomo Yesu gi Yerusalem voo moo" khyoo: yhe: lo. 2 Yerusalem mo yang khoem" duang: vang wa khyoo: wim: loem: jo, da" nam, moo gyid thoem" daloem: jo. Hau: gyid thoem" ri Hebre myeing" khyo" Bedsaida ga: tid. 3 Hau: vang wa khyoo: moo gi myo, amyang mo, khyoo: ayo" soo" mo gung joem: shid: mo, noophyoo" shau" mo, myoo" sho' leung yoin" to. 4 (Aseing: da" moug: lagyoo: yi gi daso' dadam gyid thoem" moo gyoo" lo lho: gyid ri lhu: nhoin, yoomo gyid thoem" noin" loo wa zi ri noo mo gi lang" nyid boem. Khasu" wim gari hau: gyid thoem" noin" lo da" uri xang" shid" gyid thoem" khoug: khyoo: yo" vang yhi: su: gi noo ge lo.) 5 Hau: joyoo moo soem" xe: shed zain ju" sho' no nyid da" byu dayug nyid. 6 Hau: yug leung jo, ziri Yesu myang lang" myang" sho' hid: su" no leung jo, ziri nyang: se. Houg: yoomo Yesu gi nang ge loo nau la"» ga: myid: yu. 7 Hau: yug gi yhoem: seing: we"- gyid thoem" noin" lo da" uri ngoori gyid thoem" khyoo: shu" gyoo" loo" wa byu dayug we aboo. Ngoo gyoo" loo" wa ein: dasoin, nyid shi" ri nga" shid' moo byu dayug yug shi" gyid thoem" moo ju" nyid lang" bye: ga: tid. 8 Yesu gi too we' re" da" myhu" lu ri deing: vu, lho: so" loo" we' ga: hau: yug ri tid. 9 Hau: yug gi dalheing: dam ge yangzain: lo lho: nya: myhu" lu yoeb' ci: lho: so" loo" bye. Hau: nyid" gi Dougno: Bidnyid nghoid. 10 Houg: yoomo Yuda zoug: yi gi noo ge loo su: ri akhid" nyid" gi labain nyid nghoid. re" myhu" lu ri dang lo zigi tung: to" tarha" ri shoid da" zi nghoid. ga: gyikoid boem. 11 Hau: yug gi ‹‹Ngoori ge loo nhang: su: gi re" myhu" lu yoeb ci: lho: loo" we'›› ga: tid ga: doem tid kyo. 12 Nyangnu" gi nang ri houg: su" koid; nhang: su: gi hang" nghoid la"» ga: myid: ago". 13 Nghoidloug we' noo ge loo nhang: shoung" su: gi Yesu khayug: nghoid ziri nyang asi- khasu" wim gari Aseing Yesu gi hau: byu phung: moo" mo yho' thu' lo" byug yoomo nghoid. 14 Hau: thang: ri Yesu gi hau: yug ri no ku" yhoem moo" khoug: moo myang yoomo nang gi akhid" yangzain: bye. thang: ri yooboo ashoid loo. Houg: su: anghoid lang" gi nang he: tho' mo je yau: da" noo thoung" shau" shi" wa"- ga: tid. 15 Hau: yug gi thu' lo" lho: nyang: ri noo ge loo nhang: su: gi Yesu nyang: nghoid da" khyoo: ri Yuda zoug: yi ri tid kyo. 16 Houg: su" wigi Dougno: Bidnyid moo noo gi nhaung moo" zei: yoomo Yuda zoug: yi gi hau: nyid mo Yesu rishen" yhen' wa soin' lo boem. 17 Yesu gi Nga" phoo gi kha: u" we' moozoo" moo nyid. Houg: su: nghoid yoomo ngoo we' atheing: anoo: loo: moo" zei: nyid zi nghoid ga: houg: bang: ri tid kyo. 18 Hid: su" tid yoomo we' Dougno: tarha" ri do, rhue tho' agoo"- Mangsoo ri nya: phoo ga: du lho: nya: gung ri Mangsoo yo" dayi" too" yoomo we' Yuda zoug: yi gi nyang: ri said pyam wa shid' re" khyoo: sho: lo nyid boem bye. 19 Houg: yoomo Yesu gi Yuda zoug: yi ri tid zigi Nanu" ri ngoo deing" deing tid ba"- Nya: zoo: gi nya: nheigloem: khyo" ce" moo" we' ayo" zei. Nya: phoo koid; da" moozoo" ri yu" lho: za: dazei:- Nya: phoo cikoid; ziri nya: zoo: we' houg: su" bo koid. 20 Nya: phoo gi nya: zoo: ri jheddab yoomo nyang: zei: moozoo" dangain" nya: zoo: ri toin" shid. He: da" moozoo" tho' re" je gyi: da" moozoo" ri lang" zei: wa shid' re" nya: phoo gi nya: zoo: ri toin" shid' wa zi nghoid. Hau: ziri nanu" gi yu" mau" boem wa nghoid. 21 Nya: phoo gi byu shid: ri doem dei loo nhang: lho: kangso' byid: yhangti"- Nya: zoo: we' nyang: vho: ngei bang: ri kangso' byid: wa zi nghoid. 22 Nya: phoo gi hang" ri we' Tarha" dang: aphyed'- Nya: zoo: ri tarha" dang: phyed' wa zoug: myeing" dangain" byid: too" bye. 23 Byu yi gi nya: phoo ri phau" myang: boem yhangti"- nya: zoo: ri we' phau" myang: boem wa nghoid. Nya: zoo: ri aphoug" amyang: bang: hang" nghoid loug we' nyang: ri nhang: kaid da" nya: phoo ri aphoug" myang: zi nghoid. 24 Deing" deing nanu" ri ngoo tid ba"- Nga" da" dang: ri shau" gyo: lho: ngoori nhang: kaid su: ri loem" jeing" su: gi Apyaid' ato: kangso' yo. Nyang: gi tarha" dang: phyed' zi athoung" shau" loo za: shid: jo, jang" mo- Kangso' dei nyid da" shoid khyoo: yo" rue' led loo" su: nghoid bye. 25 Deing" deing Nanu" ri ngoo tid ba"- shid: jo, mo, gi Mangso nya: zoo: da" thui: ri shaug" gyoo: lang" Kangso' doem dei loo wa. Hau: ayo, gi akhid" nyang: ju" jo, bye. 26 Nga" phoo gi kangso' ajhung: nghoid ziyo' dakhyoo" ti"-- Nya: zoo: ri we' kangso' ajhung: bue" loo wa shid' re" koid; too" bye. 27 Nyang: gi byu da" nya: zoo: nghoid yoomo nyang: gi nya: zoo: ri tarha" dang: yo" phyed' da" zoug: myeing" ab byid: too" bye. 28 He: da" khyoo: ri nanu" amoug" goo"- Loeb' khoug: mo shid' mang yi gi nya: zoo: da" thui: ri shau" gyoo: lang" thu' lo boem da" ayo, ju" loo wa. 29 Ge da" moo" zei: mo, gi Kangso' yoo" wa shid' re" to' wigi doem dei loo wa. Akhyeing" ashoeb moo" zei: mo gi yoobo dam kham: zoo: wa shid' re" to' wi gidoem dei lo boem wa zi nghoid.
Yesu Da" Khyoo: Ri: Sagsi; Kham: Mo,
30 Ngoo gi ngoo nyang: vho: khyo" ce: moo" we' ayo" zei:- Phoo Mangsoo toin" shid' khyo" za: dang: daphyed' dakho. Ngoo gi ngoo nyang: vho: khyo" acang- ngoori nhang: kaid su: vho: khyo" dacang yoomo Nga" da" tarha" dang: phyed' da" khyoo: gi jo nyid. 31 Ngoo gi ngoo nya: da" khyoo: sagsi: kham: nghoid rigi nga" da" sagsi: kham: khyoo: gi loem: agi. 32 Nghoidloug we' nga" da" khyoo: sagsi: kham: su: dayug nyid. Nyang: nga" da" khyoo: sagsi: kham: da" zi gi deingmain" nyid zi ngoo se. 33 Nanu" gi Yohan jang" moo lagyoo: nhang: kaid ago". Nyang: nga" khyoo: sagsi: kham: zigi deingmain" zi nghoid. 34 Nga" da" khyoo: ri byu dayug yug gi sagsi: kham: byid: aca" loo. Nanu" khyoid yu zi shau" wa shid' re" za: he: dang: ri ngoo tid nyid zi nghoid. 35 Yohan gi myiyham: dab lho: bang nyid da" myibung: yhangti" nghoid nyid yoomo nanu" gi nya: da" bidbang khoug: moo daso' za: te: pyoo: nau boem. 36 Nghoidloug we' Yohan da" sagsi: kham: khyoo: tho' moo je gyi: da" sagsi: ngoo moo daja: jo. Phoo Mangsoo ngoori ab byid: to" wigi akhid" ngoo koid; nyid da" moozoo" joem gi ngoori phoo Mangsoo nhang: kaid da" khyoo: ri sagsi: kham: nyid zi nghoid. 37 Ngoori nhang: kaid da" phoo Mangsoo nyang: we' nga" da" khyoo: ri sagsi: kham: nyid. Nanu" gi nya: da" myonhoo: yo' nya: da" thui: ri khanham we ashaug" gyoo: yu"- ashau" myang yu" boem. 38 Phoo Mangsoo nhang: kaid su: ri aloem" jeing" boem yoomo nya: da" mungdang: gi nanu" da" nheigloem: khoug: moo aboo. 39 Nanu" gi apyaid' ato: kangso' yoo" abe ga: wigi Mungdang: ri ayoeb' yoeb' nghab' nyid ago". Hau: jhoem: mungdang: dangain" gi nga" khyoo: ri tid nyid zi nghoid. 40 Nghoidloug we' nanu" gi apyaid' ato: kangso' yoo" sho' ga: nga" jhang khyoo: anau re" boem. 41 Ngoo gi byu yi wi coung" byid: wa shid' re" sho: yen" zi anghoid. 42 Nghoid loug we' nanu" da" khyoo ri ngoo se'- Nanu" moo Mangsoo ri jheddab nheigloem: abo boem. 43 Ngoo gi Phoo Mangso da" zoug: myeing" zoug: thui: yo" juri" nghoid loug Nanu" gi ngoori alhoem: kham: yu boem. Gootu: dayug yug khyoo: nyang: nya: da" myid khyo" jure" nghoid rigi nanu" lhoem: kham: yu boem wa. 44 Nanu" gi nyang: cang" nyang:- coung" ngei phau" myang: goo" wa ziri vho: ngei nyid ago". Nghoidloug we' dayug kyeing" da" Phoo Mangsoo mo coung" nghei myonhoo: byid: zi shau" yu wa shid' re" gi yoem: akaid boem. Houg: su" nghoid yoomo nanu" gi ngoori khasu" koid; se' loem" jeing" wa go" 45 Nghoidloug we' ngoo gi Phoo Mangso da" shid' khoin" moo yooboo foin: dang: phyed' loo wa ein: ajhoo: goo. Nanu" ri yooboo foin wa su: gi nanu" nyang: nheig byu loem: khau: nyid da" Moshe nyang: nghoid. 46 Moshe gi nga" da" khyoo: ri lhid" toin" shid' su: nghoid. Houg: yoomo Moshe ri nanu" loem" jeing" lang" gi Ngoori we' loem" jeing" goo" zi nghoid. 47 Nghoidloug we' nanu" gi Moshe lhid" toin" shid to" da:- khyoo: ri aloem" jeing" boem yoomo khasu" koid; wigi nga" da" dang: ri yo" loem" jeing" goo" wa lha".
Yesu Byu Wim: Khyeing" Ri: Doo" Zho" Da" Khyoo:
1 Hau: thang: ri Yesu gi Galile gyid nung" (Tiberi thoem" we' ga: da" jang" moo gu: led lo. 2 Noo phyoo" shau" nyid da" byu yi ri ge loo" nhang: ziri zheing: myang boem yoomo byu phung: moo" gi thang: moo cang lo nyid boem. 3 Yesu gi boug tho' khyoo: do, lo" lho: nya: cangzoo: yi yo" dage" zhoung: jo. 4 Hau: uri lhed: kaid da" pui" zeing we' jhang loo bye. 5 Yesu gi lheing: yu" kaid da" uri byu phung: moo" cang lo nyid ziri myang kaid lang" hid: bang: zo: wa zoo: noem khayo se' qei wa lha"» ga: Philib ri myid: da. 6 (Hid: su" myid: da" khyoo: gi Philib ri ca: yu" noug yoomo nghoid. Nghoidloug we' Yesu ri nyang: khasu" koid; nau zi si' gu nghoid.) 7 Philib phougtu" zigi byu dayug ri zoo: noem dajhi' jhi, yo" gam zhoo" sho' gi ngei eig shoo: kyab koo: mo qei ri datham: wa zi nghoid›› ga: wigi phougtu. 8 Simun Petru da" nya: nhung" cangzoo: dayug nghoid da" Andre tid zigi 9 Hid: moo zooshang: dayug nyid. Nyang: moo zooyho' wim: loem: yo"- ngoo: zoo eig du: bo. Nghoidloug we' hid: myhoo' gyeing" da" byu Phung: yi ri Khasu" koid: wigi gyi: sho' yo" zhoo" zi anghoid ga: tid. 10 Yesu nyangnu" ri tid zigi Byu yi ri zhoung: jo, nhang: ge' hau: joyoo moo vufu" myo, gye thu: joyoo moo byu wim: khyeing" bang: gi vufu" yoo moo zhoung: yoin" to. 11 Houg: lang" Yesu gi zooyho' ri yu lho: Jeju" ri bain coung" lang" zhoung: jo, mo, ri gam byid. Ngoo zoo: ri we' houg: yo' dakhyoo" ti"- koid lho:. Byu dangain" gi gyi" gyi: shau" zo: boem bye. 12 Houg: bang: zo: gyi: boem thang: ri Yesu gi zo: teing to" zi amyid afoo" abui" wa shid' re" cang koid: zheing" ge ga: cangzoo: yi ri tid. 13 Houg: yoomo cangzoo: yi gi zheing: cang koid: zheing" yu" ri zooyho' wim: loem: yo' ngoo: eig du: mo zo: teing ajab amoin"- kyileing" ceing daxe: eig gyoin byeung" nghoid shi. 14 Hid: su" Yesu zei: shug da" mau" pho" moozoo" ri myang mo, gi He: yug gi moug myid moo gyoo" loo wa ga: da" Lapi: amain" yang: nghoid bye ga: tid boem. 15 Yesu gi houg: bang: jure" wigi Nyang: ri myheig yu lho: agyoo: ayoid- khokham" tu: to' boem wa zi si' yoomo nyang: kyeing" boug: tho' khyoo: gau' yhe: lo" byug.
Yesu Gyid Dang Moo Khyoo: So" Zi
16 Myenthang: zoo" ju" lo da" uri cangzoo: yi gi Galile gyid thoem" khyoo: gyoo" lo" boem. 17 Lhid' tho' moo bain do, lo" boem lang" gyid thei: tab' Kaperna-um voo khyoo: gu: lo" ago". Moug: coid loo: loug we' Aseing Yesu gi nyang: Nu" jang" moo atain" loo shi. 18 Hau: uri ug lid' we' hau nyid yoomo gyid thoem" moo being: mhoid to' lo nyid. 19 Cangzoo: yi gi soem" myid main: koo gu: lo" nyid da" uri Aseing Yesu gi gyid tho' moo khyoo: so" lho: wigi nyangnu" anam moo tain" lo nyid ziri myang boem. Houg: lang" nyangnu" gi gyoug dain ago". 20 Yesu gi agyug goo"- ngoo danghoid ga: nyangnu" ri tid. 21 Houg: lang" nyangnu" gi goug goug za: Yesu ri lhid' khoug: moo khe: yu boem. Hau: thang: daso' ri nyangnu" ju" nau da" gyid yam moo yo" dab, lo" boem bye.
Aseing Yesu Ri: Byu Yi Sho: Nyid Boem
22 Thang: nyid ri gyid thoem" thei: tab' moo deing nyid kho' da" Byu phung: moo" yi gi hau: joyoo moo lhid' dakhyab kyeing" date: jo, ziri myid boin: ago". Hau: da" lhid' moo Aseing Yesu abo loo loo: za: Cangzoo: yi boug" zhoung: lo" zi boin: so" boem. 23 Nghoid sho, loug we-Tiberi voo mo lo da lhid joem giAseing Yesu da Jeju" ri coung" nghei lho:-Byu phung: yi ri zooyho, gam, zho" da jo, yoo nam moo-ju" lo" abye: go". 24 Byu Phung: moo" yi gi hau: joyoo moo Aseing: Yesu nghoid loug we' nya: cangzoo: yi abo nyid ziri se' boem wigi hau: da" lhid' joem moo do, lho: wigi Yesu ri shoo: wa shid' re" Kaperna-um voo khyoo: gu: lo" boem ago".
Kangso' Zooyho' Aseing Yesu
25 Gyid thoem" thei: tab' moo Aseing Yesu ri myang boem lang" gi Byu phung: moo" yi gi Sara: moo" we"- nang gi hid: tab' moo khanham jure" lha"» ga: myid: boem. 26 Aseing Yesu gi deing" deing ngoo nanu" ri tid ba- Nanu" ngoori cang sho: da" khyoo: gi Ngoo koid; shug da" mau" pho" moozoo" ri se' gyoo: yoomo anghoid. Voem: ri gyi" sho' shug zoo: yoomo danghoid ago". 27 Boeb' yoin" loo" se' da" zoo: noem shid' re" yoem: akaid goo. Apyaid ato: kangso' yoo" nhang: da" aboeb ayoin" loo" se' da" zoo: noem shid' re" yoem: dakaid nyid ge'. Phoo Mangsoo gi byu da" nya: zoo: ri nyang: vho: ngei da" sag si nyang: moo byid: too" bye. Houg: yoomo byu da" nya: zoo: gi hau: da" zoo: noem nanu" ri byid: wa zi nghoid ga: tid. 28 Byu yi gi Ngoonu" phoo Mang" soo: vho: da" khyoo: ri yo" voin vu, wa shid' re" khasu" koid; wa lha"» ga: myid: boem. 29 Yesu phougtu" zigi Phoo Mangsoo nanu" ri koid; nhang: nau da" khyoo: gi nyang: nhang: kaid su: ri loem" jeing" wa da" khyoo: nghoid. 30 Houg: bang: gi Yesu ri ngoonu" yo" loem" jeing" loo wa shid' re" Ce: noem da" mau" pho" moo" ri pya shug wa lha". Aseing: ce: moo" ri nang zei: shug wa lha". 31 Ngoonu" da" phoug" phyid" yi gi Jhoem: dang: moo tid to" ziyo' dakhyoo" ti"-- dain" pyoid yoo moo Mana, zooyho' ri nyang: khyoo: zhoo" bye. 32 Yesu gi deing" deing nanu" ri ngoo tid ba-Moshe gi nanu" ri mougkhung: mo zooyho' ri byid: zi anghoid. Nga" phoo gi nanu" ri mougkhung: mo zooyho' amain" agyeing" ri byid. 33 Hau: da" main" gyeing" da" zooyho' gi Mougkhung: mo gyoo" lo lho: mougmyid xangsu: byu yi ri kangso' dei loo nhang: su: nyang: nghoid bye. 34 Houg: lang" nyangnu" gi Aseing: we" hau: zooyho' ngoonu" ri Khanham we' dabyid: nyid we' ga: doem mho' ago". 35 Yesu gi ngoo gi Kangso' zooyho' nghoid. Nga" jhang ri" su: gi Khanham we' zooyoid zi shau" loo wa anghoid. Ngoori loem" jeing" su: we' khanham we' gyid shed' zi shau" loo: wa anghoid ga: wigi tid. 36 Akhid" nanu" ri tid ba- Nanu" gi ngoori myang bye: nghoid loug we' loem" jeing" boem wa zi anghoid. 37 Phoo Mangsoo ngoori ab byid: to" da" byu dangain" gi Nga" jang" moo ju" loo wa. Nga" jang" moo ju" loo mo, ri ngoo she: lhei" pyam wa zi anghoid. 38 Khasu" wim gari ngoo gi ngoo nya: myid khyo" voin vu, wa shid' re" mougkhung: khyo" gyoo" lo zi anghoid. Ngoori nhang: kaid su: Aseing: vho: khyo" zei: voin vu, wa shid' re" gyoo" lo zi danghoid. 39 Ngoori nhang: kaid da" Aseing: vho: da" khyoo: gi nyang: ab byid: to" da" xangsu: byu yi bain sho' gi dayug we' asoem" joem: loo" sho' lo" thang da" bidnyid rishid: jang" mo- Ngoo doem dei to'' loo nhang: wa khyoo: nghoid. 40 Khasu" wim gari nya: zoo: ri Noku loem: jeing" loo mo, dangain" gi Apyaid' ato: kangso' ri yo" yu wa shid' re" Nga" phoo gi vho: nyid. Ngoo we' houg: bang: ri lo" thang bidnyid moo shid: jang mo doem dei to'' loo nhang: wa zi nghoid. 41 Yesu gi Ngoo gi mougkhung: mo gyoo" lo da" zooyho' nghoid ga: tid yoomo hau: byu yi gi nya: khyoo: ri ngeig go" lo" boem bye. 42 Nyangnu" tid da" zigi He: yug gi Yoseb da" nya: zoo: Yesu anghoid la". Nya: myhi' yo' nya: phoo ri ngoonu" se'- anghoid goo" la". Houg: su" nghoid ri ci: yoomo ngoo gi mougkhung: mo gyoo" lo ga: tid nyid lha"» ga: tid go" nyid boem. 43 Yesu phougtu" zigi noo: ge' nanu" nyang: cang" nyang: angeig go" nyid goo. 44 Ngoori nhang: kaid da" phoo Mangso wigi amhoid" shu" lo rigi hang" we' nga" jang" moo ayo" loo. Nga" jhang ju" loo su: ri ngoo gi lo" thang da" bidnyid moo shid: jang" mo doem dei to'' loo nhang: wa. 45 Lapi: yi da" jhoem: dang: moo Houg: bang: dangain" gi Mangso da" jhoug" myeing" jhoug" thui: ri kham: yu boem wa ga: bo. Houg: su" nghoid yoomo Phoo Mangso da" jhoug" myeing" ri shau" gyo: lho: phoo jang" mo, thung" lid kham: yu mo, dangain" gi nga" jang" moo jure" boem bye. 46 Hid: su" ein: ngoo tid ri Phoo Mangsoo ri myang yu" su: dayug yug bo ein: ngoo atid noug. Mangso jang" mo, gyoo" loo su: dayug kyeing" za: Phoo Mangsoo ri damyang yu. 47 Deing" deing nanu" ri ngoo tid zigi ngoori loem: jeing" su: gi apyaid' ato: kangso' yo. 48 Ngoo gi kangso' zoo yho' nghoid. 49 Nanu" da" phoug" phyid" yi gi dain" pyoid yoo mo:- Mana, zoo yho' ri shau" zo: boem nghoid loug we' shid: thang lo" boem bye. 50 He; da" zoo: yho' koem gi mougkhung: khyo" gyo" da" zoo: yho' nghoid yoomo hau: ziri shau" zoo: su: gi shid: loo" zi anghoid. 51 Ngoo gi mougkhung: mo, gyoo" lo da" kangso' zoo yho' nghoid. Nang he: zoo yho' ri shau" zo: ri khanham we' dadei nyid wa ngoo nanung" ri byid: wa zoo yho' gi mougmyid byu xangsu: yi dei nyid wa shid' re" ngoo byid: da' nga" shoo" nghoid. 52 Hau: da" uri He: yug gi khasu" koid; wigi ngoonu" ri zo: wa shid' re" nya: shoo" yo" byid: wa lha"» ga: byu joem gi nyang: cang" nyang: soo" soo" ngeig byo, go" nyid boem. 53 Aseing Yesu gi deing" deing ngoo nanu" ri tid zigi Byu nya: zoo: da" shoo" ri nanu" azoo:- nya: da" suid" ri we' ashug nghoid rigi nanu" gi kangso' yoo" wa zi anghoid. 54 Nga" da shoo" rizo: lho: nga" da suid" ri shug su: gi-apyaid ato: kang: so' yoo" bye. Ngoo we lo" thang da bidnyid moo-hau: yug ri shid: jo, jang" mo doem dei loo nhang: wa. 55 Nga" da" shoo" gi zoo: noem agyeing" nyang: nghoid bye. Nga" da" suid" we' shug phoo" agyeing" nyang: nghoid bye. 56 Nga" da" shoo" ri zo: lho: nga" da" suid" ri shug su: gi ngoo yo" dadeing: daloem: za: nyid su: nghoid. Ngoo we' hau: yug yo" dadeing: daloem: za: nyid wa zi nghoid. 57 Dadei nyid da" nga" phoo gi ngoori nhang: kaid bye. Nyang: yoomo ngoo kangso' dadei nyid. Houg: yo' dakhyoo" ti"-- ngoori zo: shug su: we' ngoo yoomo kangso' yo" dei nyid wa zi nghoid. 58 Houg" su" wigi he: da" zoo yho' gi mougkhung: khyo" gyoo" lo da" zoo: yho' nghoid. Nanu" da" nya: phoug" nya: phyid" yi zo: lho: shid lo" zoo: yho' ti anghoid he zooyho' ri zoo: su: gi khanham we' dadei nyid wa ga: tid. 59 Aseing Yesu gi Kaperna-um voo mo tarha" jung: moo jhau" mhoo, byid: nyid da" uri he: da" mungdang: ri jhoug" byid: kaid.
Apyaid' Ato: Kangso' Yo" Sen: Da" Jhoug" Myeing"
60 Hau: da" jhoug" myeing" ri cangzoo: yi myoo" sho' mo, zheing: shau" gyo: boem. Nyangnu" gi he: da" jhoug" myeing" joem- gye youg: yoomo hang" se' yo" cang boem wa lha"» ga: tid go" nyid boem. 61 Hid: su" cangzoo: yi ngeig byo, go" nyid ziri Yesu se' nyid nanu" nheigloem: yoin" go" la". 62 Byu da" nya: zoo: gi nyang: nyid da" moug: khyoo: doem do, lo" ziri myang lang" nanu" khasu" myid: goo" wa lha". 63 Mangso da" Venyi: wi za: Kangso' ri dayo" dei nyid nhang. Byu yi da" yoem: so' gi ci: we' ayo" bui. Nanu" ri ngoo tid da" dang: gi kangso' yo" dei loo nhang: da" Venyi: yo" sen: da" dang: nghoid nyid. 64 Nghoidloug we' nanu" mo byu dayham" bang: gi aloem" jeing" boem ga: tid kyo. (Houg: su" aloem" jeing" ziri we' kha: yug gi Aseing: ri gyivoo yi da" lo, moo ab byid: pyam wa ziri we' Yesu gi xang: shed" mo nyang: si' gu nghoid bye. 65 Houg: su" nghoid yoomo Yesu gi Nga" jang" moo ayo" juri"- ein: ngoo nanu" ri tid lid: loo bye ga: tid. 66 Hau: ayo, mo wigi cangzoo: yi myoo" sho' nyang:- Yesu jang" mo doem tau" lo" lho: Yesu thang: moo abo cang boem loo. 67 Houg: yoomo Yesu gi nanu" we' nga" jang" mo doem tau" loo" noug: go" la"» ga: cangzoo: yi daxe: eig youg bang: ri myid. 68 Simun Petru gi Aseing: we" ngoonu" gi hang" jhang khyoo: se' loo" wa Aseing: dayug kyeing" za: apyaid' ato: kangso' yo" sen: da" khyoo: ri dakho" kyo. 69 Hau: tho' mo gootu: Aseing: gi Phoo Mangso jang" mo gyoo" lo da" gyeungshang: Aseing: nyang: nghoid bye: da" khyoo: ri akhid" ngoonu" gi yu" myang loem" jeing boem bye: ga: phougtu. 70 Yesu doem phougtu" zigi Ngoo gi cangzoo: daxe: eig yug ri khyen: yu lho: nyheing nhang: kaid to" anghoid la". nghoid loug we' nanu" moo yu satan vang ci: su: dayug bo nyid ga: tid. 71 Simun Iskarud da" nya: zoo:- Yuda gi cangzoo: daxe: eig yug moo boo nghoid loug we' Aseing: ri gyivoo yi lo, moo ab pyam wa su: nghoid yoomo hau: yug ri yeing lho: hid: su" ga: tid zi nghoid.
Yesu yo' Nya: No,
1 Hau: thang: ri Aseing Yesu gi Galile mung" moo daso' so" koem" lheing: yen. Yuda zoug: myeing" ci: mo, gi Yesu ri said pyam wa ga: soin' go" nyid yoomo Yesu gi Yuda mung" moo aso" koem" yen" noug. 2 Yuda byumyu" yi da" seig kyang: zoem loung" da" pui" we' jhang loo bye. 3 Yesu da" nya: no, gi Yesu ri «Nang koid; da" moozoo" joem ri Re" cangzoo: yi myang wa shid' re" he: joyoo mo thu' lo" lho: Yuda mung" khyoo: loo" we'. 4 Myeing thu' myeing fu" nougsu: nghoid rigi hang" nghoid loug we' nya: moo" ri zau" too" khyoo: aboo. Nang gi hid: yhi' te" mau" pho" moo" ri zei: wa shid' re" gi re" moozoo" ri moug myid si' sho' zei we'» ga: tid boem. 5 (Nya: no, nyang: lang" Yesu ri aloem" jeing" boem nghoid ago".) 6 Aseing Yesu nyangnu" ri doem tid zigi «Nga" ayo, aju" shi"- nanu" da" ayo, gi khanham we' ju" nyid. 7 Mougmyid xangsu: byu yi gi nanu" ri ayo" ngheing". Ngoori gi ngheing" boem. Khasu" wim gari Ngoo gi nyangnu" da" akhyeing" ashoeb da" nheigloem: ri toin" shid' nyid yoomo nghoid. 8 Hau: da" pui" khyoo: nanu" dangain" mo, yhi: ge'. ngoo gi nga" ayo, aju" shi" yoomo yhi: wa zi anghoid» ga: wigi doem tid. 9 Houg: su" ga: bain tid thang: ri Yesu gi Galile mung" moo danyid" nyid shi.
Seig Kyang: Zoem" Loung" Da" Gug Shab' Pui" Khyoo: Yesu Yhe:
10 Hau: pui" mo nya: no, bain thu' loo" lang" Aseing Yesu we' hau: pui" moo yhe: gau" nyid yen. 11 Yuda zoug: myeing" ci: mo, gi hau: pui" moo Yesu ri re" sho: zoore"- «hau: yug gi kha: khyoo: lo"» ga: yen: nyid boem. 12 Byu phung: moo" yi gi Yesu yo" sen: lho: so' so' ga: gau" doem go" nyid boem. Byu dayham" bang: gi he: yug gi byu gi nyang: danghoid ga: tid go" nyid boem. Dayham" tid nyid zigi byu gi anghoid mung" byu yi ri khyoo: shu" vhang: loo" su: danghoid ga: tid go" nyid. 13 Nghoidloug we' Yuda zoug: myeing" ci: mo, ri gyoug yoomo Yesu da" khyoo: ri hang" we bang bang avoem" tid. 14 Pui" koid; nyid da" bidnyid dago" yi" koo: led' lo" nyid lang" Yesu gi noku Yhoem: moo" moo vang yhe: lho: Tarha" kho" kyo" jhau" mhoo, byid: nyid. 15 Yuda zoug: myeing" ci: mo, gi gye" mau" nyid boem lho: He: yug gi khayoo: ce: jung we' ado, yu" zi Hid: te" phajhi" gi khayo, yu lha"» ga: tid moug" go" nyid. 16 Aseing Yesu phougtu" zigi Ngoo kho" kyo" jhoug" byid: da" tarha" mungdang: gi nga" tarha" anghoid ngoori nhang: kaid su:- Mangso da" tarha" dangoid. 17 Hau: Mangsoo: vho: da" khyoo: moo cang loo" noug: su: gi Ngoo kho" kyo" da" tarha" gi Mangso da" tarha" nghoid la". Ngoo nya: vho: da" nga" tarha" nghoid la"» ga: zigi se' soin: myed yu" boem wa. 18 Nyang: nya: da" Tarha" ri kho" kyo" jhoug" byid: su: gi nyang: nya: da" myonhoo: ngeilang: ri shoo: wa nghoid. Nghoidsho' loug we' nyang: ri nhang: kaid su: da" myonhoo: ngeilang: ri shoo: su: gi deing: deing: main" main" se' kho" kyo. lho: nyang: moo mhau' fain" zi aboo. 19 Moshe gi nanu" ri tarha" byid: to" anghoid goo" la". Nghoidloug nanu" dayug we' hau: tarha" ri acang boem. Nanu" gi ngoori said pyam wa shid' re" cikoid; sho: nyid go"- ga: myid. 20 Meing: byu: yi gi nang gi yu vang ci: su: nghoid. Nang ri said wa ga: hang" su: se' soin nyid wa ga: tid boem. 21 Yesu phougtu" zigi Ngoo mau" pho" moo" daja: koid; shug lang" gi nanu" dangain" mo, gye mau" lo" ago"- 22 Moshe gi nanu" da" zooshang: mi" ri athang: yham" pyam wa da" tarha" byid: to". Houg: yoomo nanu" gi Dougno: Bidnyid ri lang" athang: yham" da" moo" ri koid; boem ago". (Khyag ga: rigi shooyid thang: phyed' da" tarha" ri byid: zigi Moshe anghoid Nanu" da" phoug" phyid" yi danghoid ago".) 23 Houg: su" nghoid lang" gi zooshang: dayug yug ri Dougno: Bidnyid moo shooyid thang: yham" byid: ri Moshe da" tarha" ri ashoid ga: nanu" myid: ago". Houg: yo' dakhyoo" ti"-- Ngoo gi labain nyid" ri byu dayug yug ri akhang: yhangti" doem yang" zain: loo nhang: lang" ci: wim wigi ngoori nheig yo: nyid go" lha". 24 Atho' pyam: mo da" akhyoo" again ri za: yu" lho: dang: aphyed goo. Deung main" da" khyoo" khyo" dang: daphyed ge ga: tid.
Nyang: Gi: Meshia NghoidLa?
25 Yerusalem mo, voo byu yi dayham" gi He: yug gi zoug: myeing" ci: mo, said pyam wa sho: nyid su: anghoid la". 26 Yu" ge' nyang: gi bang bang kho" kyo" nyid da" hang" dayug we' nyang: ri atoem boem nhung: lha". He: yug gi Meshia nghoid zi zoug: myeing" ci: mo, gi gyeing" nyang: se' boem bye: go" la". Nghoidloug we' he: yug kha: moug: mo, nyid lo zi ngoonu" se. 27 Nghoidloug we' Meshia gyoo" lo nghoid ri koem gi nya: ayang: ri hang" we' si' zi anghoid. 28 Yesu gi no ku" yhoem moo" moo tid zigi Nanu" ngoori se' boem go" la". Ngoo khayo, re" ziri we' se' boem bye. Nghoidloug we' ngoo gi ngoo nyang: vho: khyo" re" zi anghoid. Ngoori nhang: kaid su: gi deung main" ziyo' joeb byeung" su: nghoid. Hau: Aseing: ri nanu" gi ase' boem nghoid da. 29 Nghoidloug we' ngoo gi hau: Aseng: jang" mo ri" yoomo ngoori nhang: kaid su: ri nyang: ngoo se' nyid. 30 Byu yi gi Yesu ri myheig tei" wa da" akhyoo" ri sho: nyid nghoid loug we' ayo, aju" shi" yoomo Yesu ri hang" lo, we' ayo" toin" shid' boem shi. 31 Meing: byu yi da" akhoug: mo Nyang: ri loem" jeing" mo, myoo" sho' gi Meshia gyoo" lo da" uri he: youg tho' moo mau" pho" khyoo: je yo" koid; shug wa la"» ga: myid: ago".
Yesu Ri: Myheig Tei" Wa Shid' Re" Pyada: Yiri Nhang: Kaid
32 Houg: su" Yesu da" khyoo: ri Meing: byu yi so' so' ga: doem go" nyid khyoo: ri Pharishe shau" gyo: boem. Houg: yoomo nyangnu" yo" khainjung agyi yi gi zung" lhug: nyid da" pyada: yi dayham" ri Yesu ri myheig wa shid' re" nhang: kaid boem. 33 Aseing Yesu tid zigi Ngoo gi nanu" yo" daso' za: byam nyid lho: Ngoori nhang: kaid da" Aseing: jhang khyoo: doem loo" wa su: nghoid. 34 Nanu" gi ngoori cang shoo: nghoid loug we' myang zi anghoid. Khasu" wim gari ngoo nyid wa joyoo moo nanu" yo" ju" zi we' anghoid ga: tid. 35 Yuda zoug: myeing" ci: mo, gi ngoonu" ashau" shoo: sho' nyang: kha: moug: khyoo: loo" wa la'- Yuda byumyu" yi nyid da" Greed voo gung yi moo lo" lho: Greed byumyu" yi ri jhau" mhoo, byid: wa la". 36 Nyang: gi Nanu" ngoori shoo: nghoid loug myang zi anghoid. Ngoo nyid wa joyoo moo nanu" ayo" ju" boem ga: tid. He: da" dangkang: gi ce: noem nghoid lha"» ga: nyang: cang" nyang: myid go" nyid boem.
Kangso' Gyid Gyung:
37 Hau: pui" zeing: da" lo" thang ziyo'- yhoug gyen: tang da" bidnyid moo Aseing: Yesu gi yab jo, lho: nyang tid zigi Gyid shed' su: hang" nghoid loug we' nga" jang" mo re" shug yu ge'. 38 Ngoori loem" jeung" sugi jhoem: mungdang: moo bo ziyo' dakhyoo" ti"- nya: da" nheigloem: khoug: mo we' dei kangso' gyid gyung: joem myoo" sho' yau thu' lo nyid wa zi nghoid. 39 Aseing Yesu hid: su" tid da" zigi Nyang: ri loem" jeing" mo, yo" yu wa da" gyeungshang: venyi da khyoo" ri tid zi nghoid. Nghoidsho' loug we' Yesu gi Myo, nhoo: phung" yoeb' ri ayo" yu shi"- houg yomoo gyeing shang Venyi: ri abyid: shi" zi nghoid.
Meing Byu Yi Nheugloem: Azhung" Go" Khyoo:
40 Meing: byu yi mo dayham" gi Yesu hid: su" tid da" khyoo: ri shau" gyo: boem. Houg: su" nghoid yoomo he yug gi Deing" deing Lapi: nghoid ga: tid boem. 41 Dayham" bang: tid zigi Meshia nyang: nghoid ga: tid boem. Nghoidloug we' dayham" bang: gi Meshia gi Galile mung" mo thu' loo wa zi anghoid. 42 Meshia gi David da" nya: myid nya: zoo: nghoid ca" ga: wigi we' David nyid khare" da" Bedlehem mo po" thu' loo wa ga: wigi we' Jhoem: dang: moo bo ga: wigi we' tid go" nyid boem da. 43 Houg: nghoid yoomo Yesu yo" sen: lho: wigi Meing: byu yi gi nheigloem: azhung" goo" loo nyid boem ago". 44 Byu dayham" bang: gi Yesu ri myheig noug: nghoid loug we' Hang" we' nyang: ri adab zei: boem nghoid ago".
Yuda zoug: Myeing" Ci: Mo Aloem" Ajeing" Khyoo:
45 Zung" lhoug: da" pyada: yi gi Khainjung agyi yi yo, Pharishe yi jhang khyoo: doem lo da" uri nyangnu" gi ci: wim wigi hau: yug ri amyheig ci: loo go" ga: lhoem: myid: boem. 46 Zung" lhug da" pyada: yi gi He: yug kho" kyo" yhangti"- hang" dayug we' akho" kyo" yu" ga: lo tid boem. 47 Pharishe gi «Nanu" we' nyang: mhau' da" khyoo: ri kham: zoo: bye: go" rhe"» ga: tid boem. 48 «Ngoonu" da" vhu" jhung: yi Pharishe bang: da" akhoug" mo, dayug we' hau: yug ri loem" jeing" yu" zi nanu" si' go" la". 49 He: mung" byu phung: yi gi Toung: to" da" tarha" ri asi yoomo Mangsoo shen" yhen zi shau" boem bye: nhung: lha".» ga: wigi tid boem. 50 Houg: bang: da" akhoug: moo Nikodi ga: su: bo- Nyang: gi xang: shed" ri Aseing Yesu jhang re" yu" bye: zi goo" ji ri tid kyo. 51 Nikodi gi «Ngoonu" da" tarha" khyo" ce: moo" ri shoid da" khyoo: ri kyeung yu zi akoid. Tarha" shoid su: ri tid nyheing tid feing wa akhang"- we abyid:- loo: za: dayug yug ri tarha" dang: phyed' yu" la".» ga: tid. 52 Houg: bang: gi «Nang we' Galile mung" mo byu nghoid la". Jhoem: mungdang: moo nghab' yu" we' Galile mung" mo ce: lapi: dayug we' athu' lo yu" zigi nang si' ca"» ga: tid boem. 53 (Houg: lang" nyangnu" dangain" bang: gi nyang: nu" nya: yhoem: khyoo: lo" byug boem bye.)
Soem" Lid Shoo: Go" Nyid Jangmo Myheug Da" Myiyi:
1 (Hau: thang: ri nyangnu" gi nyang: tu: nya: yhoem: khyoo: yug khang" moo" lo" boem. Aseing: Yesu gi zhainlun boem khyoo: yhe: lo. 2 Hau: thang: nab kyoo ri no ku" yhoem moo" moo dalheing: dam ju" lo" da" uri byu myoo" sho' mo, gi Aseing: jang" moo re" lheung khoem byid ago". Yesu gi: zhoung: jo, lho: houg: bang: ri jhoug" byid: nyid. 3 Tarha" sara: yi yo"- Pharishe bi: gi myiyi: dayug ri Yesu jang" moo khe: shu" re. Hau: yug gi soem" lid shoo: go" nyid jang" mo shau" myheug da" myiyi: nghoid. Tarha" sara: yi yo"- Pharishe gi-hau: myiyi: ridangain" mo, da" shid' khoin" moo yab jo, nhang: lho: 4 Aseing Yesu ri Sara: we"- He: myiyi: gi soem" lid shoo: go" nyid jang" mo- myo, moo gyo, nyang: shau" myheug boem bye. 5 Moshe tarha" moo sang: to" zigi hid: yhangti" myiyi: rigi-luggo, wigi du" said pyam ca"- ga: ngoonu" ri tarha" byid: to. Yesu ri nang khasu" tid noug: la"» ga: myid: boem. 6 Nyangnu" gi Yesu ri yooboo zhug lho: myheig wa shid' re. Pyi: sho: nyid boem. Nghoidloug we' Aseing Yesu gi goeb' ci: lho: myidjang: moo lo, nyhau" wigi thau" lhid" nyid. 7 Houg: bang: gi doem phoug myid myid koid; nyid boem. Houg: lang" Yesu gi to' yu" kaid lho: Nanu" mo ce: yooboo adab su: gi nyang: ri luggo, yo" xang: shed" du" ge' ga: amyeing" byid: kaid. 8 Hau: lho: myidjang: moodoem goeb lho: thau" lhid" nyid. 9 Houg: bang: gi Hau da" amyeing" ri shaug" gyoo: lang" gi apyaid' je gyi: mo, mo shi"- dayoug thang: moo dayug- thu' lo" byug boem ago". Yesu yo" houg moo yab jo, da" myiyi: myhi za: date: nyid lo. 10 Yesu gi doem lheing: yu kaid lho: myiyi: myhi nang we"- houg: bang: gi khayoo: lo? Nang ri yooboo dam: byid wa mo, dayug we' anyid loo: rhe" ga: myid. 11 Houg: lang" hau: da" myiyi: gi Aseing: we" dayug we' azheung: nyid khari" loo:- ga: phougtu. ‹‹Yesu gi Ngoo we' nang ri yooboo dam abyid: loo" we' yooboo adoem koid loo: lhe" ga: tid kaid.»
Mougmyid Bid Bang Yesu
12 Dalheing: ri Yesu gi hparishe yi ri ngoo gi mougmyid: bidbang nghoid. Nga" thang: moo cang loo su: gi apyaid' ato: kangso' bidbang ri yo" yu lho: moug: coid' khoug: moo khanham we' asoo" loo: wa zi nghoid. ga: tid. 13 Pharishe yi gi nang gi na nya: khyoo: nanyang: sagsi: kham: nyid. Houg: yoomo re" da" sagsi: dang: gi adeung ga: tid nyid boem. 14 Yesu phougtu" zigi ngoo nya: khyoo: ri ngoo sagsi: kham: nghoid loug we' nga" sagsi: dang: gi deung main" nyid. Khasu" wim ga: ri ngoo gi khayo, re" lho: kha: khyoo: doem yhe: lo" nyid zi ngoo se' nyid. Nanu" gi ngoo khayo, re" ziri we' kha: joyoo khyoo: doem yhe: lo" nyid ziri we' ase' boem. 15 Nanu" gi byu da" akhyoo" khyo" dang: phyed' boem- Ngoo gi hang" ri we' aca: joeb- dang: aphyed. 16 Nghoid loug ngoo gyeing" nyang: dato' jeyang: dang: phyed' nghoid rigi ngoo dayug kyeing dang: phyed' zi anghoid. Ngoori nhang: kaid da" phoo Mangsoo gi ngoo yo" dage" nyid yoomo ngoo je: yang: dang: phyed' khyoo: gi deung main" nyid. 17 Nanu" da" tarha" moo lhid" to" jang" moo Sagsi: eig yug joeb lang" gi deung main" bye: ga: tid to. 18 Ngoo gi ngoo nya: khyoo: ri sagsi: kham lho:. Ngoo ri nhang: kaid da" Pho we' nga" da" khyoo: ri sagsi: kham: byid: nyid ga: tid. 19 Houg: bang: gi Re" Phoo khayoo: nyid ga: myid: boem. ‹‹Nanu" gi ngoori we' nga" Phoo ri we' ase' boem. gyeing" nyang: nanu" ngoori se' nghoid rigi nga" phoo ri we' si' goo" zi nghoid ga: doem sho' kyoo.» 20 Yesu gi He: da" Mungdang: ri-no ku" yhoem: moo" khoug: Alu: kham: da" sadeig to" yab moo kho" kyo" jhoug" byid: uri tid da" mungdang: nghoid nyid. Nghoidsho' loug we' Yesu da" ayo, aju" shi" yoomo hang" we' Yesu ri amyheig atei" shi.
Ngoo Lo" Jangmoo Nanu" Ayo" Loo wa
21 Dalheing: riYesu gi ngoo gi thu' loo" wam: bye. Nanu" gi ngoori shoo: boem wa. Nanu" gi nanu" nya: yooboo mo, shid: boem wa. Ngoo lo" da" joyoo moo nanu" ayo" cang loo wa" ga: tid. 22 Yuda zoug: myeing: ci: mo, gi ngoo lo" da" joyoo moo Nanu" ayo" loo" ga: nyang: tid bye. Nyang: gi nya: gung nyang: said' shid: wa ga la lha"» ga: tid go" nyid boem. 23 Yesu phougtu" zigi nanu" gi mougmyid mo byu yi nghoid. Nghoidloug we' ngoo gi mougkhung: khyo" ri" su: nghoid. Nanu" gi he: mougmyid mo byu nu" yi nghoid boem. Ngoo koem gi he: mougmyid mo byu anghoid. 24 Houg: yoomo nanu" gi nanu" da" yooboo moo shid: lo" boem wa ein: wigi ngoo tid bye. Ngoo gi ngoo nghoid nyid ziyo' dakhyoo" ti"-- ngoo nghoid ziri nanu" aloem" boem rigi Nanu" gi nanu" nya: yooboo moo shid: lo" boem wam bye. ga: tid. 25 Houg: bang: gi nang gi hang" nghoid ga: myid: boem. Yesu gi Ngoo hang" nghoid zi xang: shid" mo nyang: ngoo tid kyoo" bye. 26 Nanu" da" khyoo: yo" sen: lho: ngoo tid kyoo" ca" da" khyoo: soo" soo" bo. Nanu" ri yooboo foin: wa khyoo: we' myoo" sho' bo. Ngoori nhang: kaid da" Aseing: gi dang main" da" Aseing: danghoid. Hau: Aseing: jang" mo ngoo shau" gyo: da" khyoo: ri za: he: mougmyid byu yi ri ngoo tid kyo. 27 Yesu gi nya: pho da" khyoo: tid nyid ziri houg: bang: gi ase' gyoo. 28 Houg: yoomo Yesu gi byu nya: zoo: ri myidjang: moo tu: zhug lhang" too" lang" she- ngoo gi hang" nghoid nyid ziri nanu" yo" si' zi nghoid. Ngoo gi ngoo ngoonya: amyeing" akhang" khyo" ce: moo" we azei:- Nga" phoo nhang: kaid ziyo' dakhyoo" ti"- za: ngoo dazei: ziri we' nanu" se' loo wa. 29 Hau: tho' moo gootu: Ngoori nhang: kaid su" gi ngoo yo" dage" nyid. Hau: yug vho: da" moozoo" ri ngoo gi ayo, bain sho' moo zei: nyid wigi hau: Aseing: gi ngoo nyang: kyeing" ri ashe: lhei" too ga: tid kyo. 30 Hid: su" ga: tid da" dang: ri shau" gyo: da" byu myoo" sho' mo nyang:- Yesu ri loem" jeing" lo boem ago".
Deing Main Zigi- Nanu Ri Loid Byoin Nhang Wa
31 Aseing Yesu gi nyang ri loem" jeing" loo mo, ri Nanu" gi ngoo jhoug" byid: khyo" cang zei: loo" lang" gi nga" da" cangzoo: agyeing" yi nghoid bye. 32 Nanu" gi deungmain" da" zi ri we' ci: wa. Hau: deungmain" da" zi gi nanu" ri lhoid pyoin kaid wa zi nghoid ga: tid. 33 Hau: da" byu yi gi Ngoonu" gi Abraham da" nya: myid nya: zoo: yi nghoid. Khanham we' sube" join, abue" yu" boem- Nanu" ri lhoid pyoin kaid wa ein: nang ci: koid; tid ga: myid boem. 34 Aseing Yesu nyangnu" ri tid zigi Deing" deing nanu" ri ngoo tid ba- Yooboo shoid vhang: mo, dangain" gi yooboo da" join, nghoid. 35 Join, gi hau: ikoin deungkhu: daloem: moo pyaid goin" nyid zi anghoid nghoid loug nya: zoo: nghoid su: gi hau: deungkhu: moo khanham we' danyid nyid wa nghoid. 36 Houg: su" nghoid yoomo nya: zoo: gi nanu" ri loid byoin nhang: nghoid rigi nanu" deing" deing loid byoin loo" wa. 37 Nanu" gi Abraham nya: myid: nya: zoo: nghoid zi ngoo se'- Houg: su" nghoid loug we' nanu" gi nga" da" jhoug" myeing" ri akham: yu noug: yoomo ngoori said wa ga: yoem: kaid nyid boem. 38 Ngoo gi nga" pho, jang" mo, yo" se' yu gu: dangain"- nanu" ri tid kyoo" bye: houg: nghoid loug we' nanu" gi nanu" da" nya: phoo tid ziri za: da cang nyid ago". 39 Nyang: nu" phougtu zigi ngoonu" dangain" mo, nya: phoo gi Abraham nghoid ga: tid boem. Aseing Yesu gi Nanu" gi Abraham da" nya: myid nya: zoo: yi nghoid boem rigi Abraham yhangti" koid; boem zi nghoid. 40 Mangso jang" mo shau" gyo: yu da" deingmain" da" moo ri nanu" ri kho" kyoo" nghoid loug ngoori- said wa shid' re" nanu" yoem kaid nyid ago". Abraham gi houg su" alhoung koid'. 41 Nanu" gi nanu" da" nya: phoo nyang: yhangti" koid; nyid boem ga: Yesu tid. nyangnu" doem phoug tid zigi ngoonu" moo Mangsoo ga: da" phoo dayug kyeing" date: nyid lho. Ngoonu" we' nya: zoo: gyeing" yi nyang: nghoid bye: ga: tid. 42 Yesu nyangnu" ri doem tid zigi Mangsoo gi nanu" da" nya: phoo gyeing" nghoid rigi nanu" ngoori jheddab goo" wa. Khasu" wimgari ngoo gi Mangso jang" mo gyoo" lo lho: akhid" hid: moo re" ju" nyid. Ngoo nyang: vho: khyo" re" zi anghoid. Phoo Mangsoo gi ngoori nhang: kaid. 43 Ngoo tid ziri nanu" ci: wim ase' gyoo: go. Nanu" moo nga" da" mungdang: ri gyo: yu wa nheigloem: nyang: aboo yoomo nghoid boem ago". 44 Nanu" gi nya: phoo yu satan da" nya: zoo: nghoid yoomo nanu" nya: phoo vho: da" khyoo: moo cang koid; nyid boem. satan gi xang: shid" mo nyang: byu said da" sarhi' nyang: nghoid. Nyang: moo deingmain" zi ci" we' aboo nghoid yoomo deung main" ziri asi- se' mhau' fain" su: nghoid. Nyang: gi mhoug mo, dangain" da" nya: phoo nghoid yoomo nya: void voo: yo' dakhyoo" ti" mhoug nyid. 45 Nghoid loug Ngoo gi deung main" da" dang: ri za: tid ri ngoori ci: wim aloem" jeing" go"- 46 Ngoo gi yooboo yoo" su: nghoid ein:- hang" sagsi: yo" shoo go" ngoo gi deung main" da" dang: ri za: da tid ri nanu" ci: wim- aloem" jeing" go". 47 Mangso jhang" mo ju" ri" su: gi Mangso da" dang: ri tam" gyo: nyid nghoid loug nanu" gi Mangso jang" mo anghoid boem yoomo atam" gyo: zi nghoid ago".
Yesu Yo" Abraham
48 Nyangnu" Yesu ri Nang gi Samari byumyu" dayug nghoid lho: yu vang ci: su: nghoid ga: wigi ngoonu" tid dang: shoid la"» ga: myid: boem. 49 Yesu phougtu" zigi ngoo gi yu vang ci: su: anghoid. Ngoo gi nga" phoo ri phau" myang: nghoid loug we' nanu" gi ngoori aphoug" amyang. 50 Ngoo gi ngoo nya: myonhoo: ri ngoo ashoo: nghoid loug dayug su: gi nga" da" myonhoo: ri shoo: byid: lho: nga" shoid khyoo: dang: phyed' byid: nyid. 51 Deing" deing nanu" ri ngoo tid ba- Nga" da" jhoug" myeing" dang: ri tam" gyo: yu su: gi khanham we' shid: wa zi anghoid ga: tid. 52 Nyangnu" gi nang gi yu vang ci: su: dayug nghoid da" khyoo: ri akhid" ngoonu" yo" si' bye. Abraham gi shid: led: loo" bye:- Lapi: yi we' shid: led: loo" bye. Houg: su" danghoid ri nang gi nga" dang: tam" gyo: yu su: gi khanham we ashid: wa ga: tid. 53 Ngoonu" da" phoo Abraham gi shid: led: loo" bye. Abraham tho' moo nang gi je gyi: la". Abraham tho' je gyi: ein: atid Lapi: yi we' shid: led: lo" boem bye:- nang gi na nya: gung ri hang" nghoid ein: myid nyid la"» ga: zheing: myid: boem. 54 Yesu phougtu" zigi Ngoo gi ngoo nya: gung ri coung" nghei nyid rigi nga" myonhoo: ngeilang: gi akoem: za danghoid wa. Ngoo ri coung" byid: su: gi nanu" lhoung: tid da" nanu" da" Mangsoo ga: su: nga" phoo danghoid. 55 Hau: da" Mangsoo ri nanu" ase' boem. Nghoid loug ngoo koem gi se- gyeing" nyang: ngoo asi ein: tid nghoid rigi ngoo gi nanu" yo' dakhyoo" ti"-- mhoug su: bue" loo" wa. Ngoo gi phoo ri gyeing" gyeing" si' yoomo nya: da" dang: ri tam" gyo: nyid. 56 Nanu" da" nya: phoo Abraham gi ngoo ju" ri" wa da" ayo, ri shau" myang wa ziri myed nyid. Hau: ziri nyang: shau" myang yoomo tid loo a ung: gau yi nyid bye. 57 Nyangnu" gi nyang: ri Nang gi apyaid' wim: xi: zain: lang" aboo shi"- khasu" koid; wigi Abraham ri myang yu" wa lha" ga: tid boem. 58 Yesu doem phougtu" zigi Deing" deing nanu" ri ngoo tid ba- Abraham akhu: ri" shi" mo ngoo nyid nyid bye: ga: tid. 59 Houg: lang" nyangnu" gi Yesu ri du" wa ga: luggo, joem: ri koid: zei: ci: boem. Nghoidloug we' Yesu gi no ku" yhoem moo" khoug: mo gau" lheing thu' lo" byug.
Ung: Khoug: Mo, Myo, Amyang Su: Ri:- Myo, Myang Loo Nhang: Khyoo:
1 Yesu khyoo: so" lo" nyid da" uri nya: myhi' ung: khoug: mo, myo, amyang da" su: dayug ri shau" myang. 2 Cangzoo: yi: gi sara: we"- he: yug myo, amyang zigi hang" yooboo nghoid la". nya: yooboo yoo mo nghoid la". nya: myhi' nya: pho, yooboo yoo mo nghoid la"» ga: zheing: myid: boem. 3 Aseing Yesu phougtu" zigi Nya: yooboo mo we' anghoid. Nya: myhi' nya: pho, yooboo mo we' anghoid. Mangso: da" phung" yoeb nyang: mo bang thu' loo nhang wa yoomo nghoid. 4 Ngoori nhang: kaid su: da" moo" ri nyid" ayo nghoid shi" ri ngoonu" koid; wa zi nghoid . Hang" we ce" moo" we' ayo" zei: lo da" myen" ayo, gi ju" loo wa. 5 Ngoo gi he: mougmyid moo nyid shi" uri mougmyid shid' mo bidbang nghoid ga: tid. 6 Houg: su" ga: bain tid thang: ri Yesu gi myidjang: moo shikain" byi" teig lho: thoem" boeb' koid: yu wigi myo, amyang su: da" myojid" moo joid' byid: lho: 7 Loo" we' Silon gyid thoem" moo myo, lo" cid" we' ga: tid kaid. (Silon ga: dangkang: gi nhang: kaid shau" bye: ga: zi nghoid.) Hau: yug we' lo" wigi myo, lo" cid" lho: myo, myang lo ziyo' doem tau" lo. 8 Nyang: gi mo: phyi: nghoid yoomo akhang: re nyang: ri lhoung myang nyid da" yhoem: kyoo" cang" yi gi he: yug gi zhoung: jo, lho: ngei lhoung: mho' nyid su: anghoid la"» ga: myid go" nyid. 9 Byu dayham" gi nghoid ga: wigi we dayham" gi hau: yug anghoid hau: yug yo' du goo" su: dayug nghoid ga: wigi we tid ago". Houg: loug we' hau: yug nyang: tid zigi ngoo gi hau: yug nyang: nghoid bye›› ga: tid. 10 Byu yi gi Akhid" nang myo, khasu" wim doem myang lo lha"» ga: myid nyid boem. 11 Hau: yug gi Yesu ga: su: thoem" boeb' dajhi' koid: yu lho: nga" myojid" moo joid byid: wigi ngoori Silon gyid thoem" moo myo, cid" nhang: kaid. Houg: yoomo ngoo lo" wigi myo, cid" lang" su'- myo, doem myang lo. ga: tid kyo. 12 Byu yi gi hau: yug akhid" khayoo" nyid ga: myid boem. ‹‹Nyang: gi ngoo asi ga: doem tid.»
Myo, Jed, Ze: Ge Da" Khyoo: Ri:- Pharishe Yi Myid: Sho:
13 Byu yi gi shid' phyang" myo, amyang su: ri Pharishe yi jhang khyoo: khe: shu" yhe: lo" boem. 14 Yesu thoem" boeb' koid: yu lho: hau: yug ri myo, myang loo nhang: da" bidnyid gi Yuda Dougno: Bidnyid nghoid. 15 Pharishe yi gi hau: yug myo, myang lo da" khyoo: ri doem: myid: boem. Hau: yug gi nyang: gi nga" myojid" moo thoem" boeb' joid byid. Hau: thang: ri ngoo myo, yhe: cid" lang" akhid" ngoo myang lo ga: tid kyo. 16 Pharishe dayham" gi hau: yug Dougno: Bidnyid tarha" ri acang yoomo Mangso jang" mo gyoo" loo su: age bui" ga: tid ago". Gootu: dayham" gi Yooboo dashoid vhang: nyid su: gi khasu" wim wigi hid: yhang: ti" tid boem. Hid: su" nghoid yoomo houg: bang: gi myid azhung" goo" loo: nyid boem. 17 Houg: yoomo Pharishe yi gi Myo, amyang nyid led: loo su: ri nang ri myo, myang loo nhang: su: gi kha yhang te" su: nghoid ga: doem zheing: myid: sho: boem. ‹‹Hau: yug gi lapi: dayug nghoid ga: doem phoid: kyo.» 18 Nyhoid' loug we' Yuda zoug: myeing" ci: mo, gi akhang: re hau: yug myo, amyang wim lid: lo da" khyoo: ri we' akhuid myo, myang lo zi: ri nyangnu" aloem" jeing" yoomo nya: myhi' phoo yi ri khe: myid: yu ago". 19 Nyangnu" gi he: yug gi nanu" da" nya: zoo: anghoid goo" la". nanu" tid ziyo' dakhyoo" ti"-- ung: khoug: mo nyang: myo, amyang zi nghoid la". Houg: su" nghoid ri ciwim wigi akhid" myo, myang la"» ga: zheing: myid: boem. 20 Nya: myhi' phoo yi gi He: yug gi ngoonu" nya: zoo: nghoid. Ung: khoug: mo nyang: myo, amyang gu khu: re" zi ri ngoo nu" se. 21 Nghoidloug we' khasu: wigi myo, myang lo zi ngoonu" asi. Nyang: ri hang" wigi myo, myang loo: nhang: zi ngoonu" asi. Nyang: gi nheig boo bye. Nyang: ri myid: yu" ge'. nya: khyoo: ri nyang: yo" tid kyoo" wa ga: phoid: kyo" boem. 22 Hid: su" ga: phoid: kyo" zigi Yuda zoug: myeing" ci: mo, ri gyoug yoomo nghoid. Aseing: ri Meshia nghoid ga: loem" jeing" mo, bain sho' ri Tarha" jung: mo khaid thu' wa ga: Yuda zoug: yi sham: phyid' go" too" bye. 23 Houg: yoomo myhi, phoo yi gi nyang: nheig boo bye: nyang: ri myid: yu" ge' ga: tid zi nghoid. 24 Pharishe yi gi myo, amyang wim led: lo yu" su: ri eig lheing: ga: lheing: doem khe: lho: Mangso da" shid' khoin" moo nghoid main" da" dang: ri tid we' jham' tang: we' nang ri myo, myang loo nhang: su: gi yooboo dab, su nghoid zi ngoonu" se' bye: ga: doem tid boem. 25 Hau: yug gi he: yug yooboo dab su: nghoid anghoid zi ngoo asi- ngoo gi goonham, mo myo, jed' nghoid loug we' akhid" gi ngoo myo, myang bye:- houg: za: ngoo date: se' ga: tid. 26 Houg: bang: gi nyang: gi nang ri khasu" koid re" myojid" ri khasu" doem myang loo nhang: ga: doem myid: boem. Hau: yug gi Nanu" ri ngoo dalheing: tid kyoo" bye:- nanu" atam" gyo: boem. 27 Ce: noem wim wigi-doem poug gyoo: noug go" lha". Nanu" we nya: da cang: zoo: bui" noug go" la". ga: myid: da. 28 Houg: bang: gi nang za: nya: cangzoo: danghoid. Ngoonu" gi Moshe da" cangzoo: yi nghoid ga: nyang: ri juang" ago". 29 Mangsoo gi Moshe ri dang: tid byid: zi ngoonu" se' nghoid loug - He: yug gi khayo thu' lo zi ngoonu" asi ga: tid boem. 30 Myo, amyang led: lo yu" su: gi nyang: gi ngoori myo, myang loo nhang: su: nghoid. loug: nanu" gi hau: yug khayo re" zi asi ga: zigi moug" cang bo nyid nhung: lha"» ga: phoug tu. 31 Mangsoo gi yooboo yoo" mo, da" Kyu" mho' dang: ri atam" gyoo:- Aseing: ri loem: khau: phau" myang: lho: Mangsoo vho: khyo" koid; su: da" thui: ri za: date: tam" gyoo: byid. 32 Nya: myhi' da" ung: khoug: mo myo, amyang su: ri dayug yug wigi myo, myang loo nhang: ga: zigi mougmyid jo, shid" jang" mo wigi khanham we' hang" we' ashug" gyo: yu" da" khyoo: nghoid. 33 He: yug gi Mangso jang" mo ju" ri" su: anghoid rigi Hid: te" moo" daja: we' yo" zei: zi anghoid ga: nyang tid. 34 Houg: bang: gi nang gi ung: khoug: mo, yooboo yo" gyi: sheung: loo su: nghoid lho: wigi ngoonu" ri dajhoug" byid: nyid shi" la"» ga: tid boem lho: tarha" jung mo khaid thu' kaid.
Venyi: Myo, Jed' Da" Khyoo:
35 Hid: su" khaid thu' kaid zi: Yesu shaug" gyoo: lang" hau: yug yo" shau" go" lho: nang gi byu da" nya: zoo: ri loem" jeing" la"» ga: myid: yu. 36 Hau: yug gi Ludaid' phoo we"- ngoo yo" loem" jeing" wa shid' re" hau: byu nya: zoo: gi hang" nghoid lha"» ga: myid. 37 Aseing Yesu phougtu" zigi nyang: ri nang myang yu" bye. Akhid" nang yo" doem: go" nyid su: gi hau: yug nyang: nghoid bye. 38 Hau: yug gi Yesu shid' moo poid' thug thoug lho: Aseing: we" ngoo loem" jeing" bye: ga: tid. 39 Aseing Yesu gi-myo, amyang mo, ri myo, myang nhang: wa ziyo'- myo, myang mo, myo, jed' loo" wa shid' re" dang: phyed' byid: wa he: mougmyid khyoo: ngoo ju" re zi nghoid ga: tid. 40 Yesu da" anam, moo zheing: nyid da" pharishe gi hau: dang: ri zheing: shau" gyo: boem yoomo ngoonu" ri we' myo, amyang mo, nghoid ein: wigi tid nau la"» ga: wigi myid: boem. 41 Aseing Yesu gi nanu" myo, amyang mo, jen" nghoid rigi yooboo yo" boem wa zi anghoid. Akhid" nanu" gi ngoonu" myo, myang mo, nghoid ga: tid boem yoomo hau: zigi nanu" moo yooboo yo" nyid zi nghoid bye.
Yang Zung" Su: Da" Dangtu'
1 Aseing Yesu gi Deing" deing nanu" ri ngoo tid ba- yang khyam: khoug: khyoo: khoem" duang: khyo" avang loo loo: za: goo" khyo" do, rhoid vang loo su: gi khoug" su: yo" khyangtoug: danghoid. 2 Khoem" duang: khyo" vang loo su: koem gi yang zung" su: nghoid. 3 Yang zung" su: nghoid rigi khoem" zung" su: we' khoem" lhoem: phang byid: se' nyid. Yang joem we' nya: thui: ri se' gyo. Nyang: gi yang joem ri myeing yu khe: lho: yang khyam: mo, shu" thu' lo. 4 Nyang: gi yang joem ri shu" vhu" thu' lo" uri yang joem da" shid' khyoo: shu" vhu" she: yhe: lo. Yang joem we' nya: thui: ri se' gyoo: yoomo thang: moo bo cang lo" boem. 5 Yang joem gi byu being" thang: moo gi cang lo" boem wa zi anghoid. Byu being" da" thui: rigi ase' gyoo: yoomo nya: jang" mo gi phang: sain" loo" goo" wa zi nghoid. 6 Aseing Yesu gi he: dangtu' khyo" nyangnu" ri tid kyoo" nghoid loug- nyangnu" gi dangtu' da" dangkang: ri ase' gyo: boem.
Ge Da" Yang Zung" Su:
7 Houg: lang" Yesu doem tid zigi nanu" ri ngoo tid ba:- ngoo gi yang joem vang loo wa da" khoem" duang: nghoid. 8 Nga" shid' moo juri" mo, gi khoug" mo khyangtoug: joem danghoid. Houg: su" nghoid yoomo Yang joem gi houg: bang: da" dang: ri atam" gyoo. 9 Ngoo gi khoem" duang: nghoid. Nga" jhang khyo" vang ri" su: gi goem loem joyoo shau" bye. Nyang: gi thu' thu' vang vang yo" koid; wigi mhain" nu" jang: ri shau" myang wa zi nghoid. 10 Khoug" su: gi khoug" wa said wa ga: lhu: phyo' wa ga: date: re. Ngoo koem gi nanu" da" kangso' yoo" wa tho' moo byeung" shoin: lo" da" kangso' yo" dei nyid wa shid' re" re" zi nghoid. 11 Ngoo gi ge da" yang zung" su: nghoid. ge da" yang zung" su: gi yang joem shid' re" nya: kangso' dain, pyam nyid. 12 Lang: jhang gi yang zung" su: ti" anghoid. Yang seing: we' anghoid. Yoomo voem, khuid" joem ri" yo" myang lang" yang joem ri she: pyam too" kho' lho: thu' phang: lo" nyid. Houg: yoomo voem, khuid" joem gi yang phung: ri khaid ngaid wigi lhu: sain" pyam nyid. 13 Lang: jhang gi lang: jhang date: nghoid nyid ziyo' dakhyoo" ti"-- yang joem ri ce: nheig akhyeig loo:- thu' phang: loo" se' nyid. 14-15 Ngoo gi ge da" yang zung" su: nghoid. Phoo Mangsoo gi ngoori se' yhangti"- ngoo we' phoo ri se' nyid. Houg: yo" dayhangti"- yang joem ri we' ngoo se' nyid. Yang joem we' ngoori se houg: yoomo ngoo gi yang joem shid' re" kang: ri yo" ab pyam zi nghoid. 16 He: da" yang khyam: moo abo da" yang- gootu: we' ngoo yoo" shi" Hau: yang joem ri we' nga" yang khyam: khoug: moo shu" vang loo ca" shi. Nyangnu" gi nga" thui: ri tam" gyoo: goo" wa houg: yoomo yang Phung: daphung: za: yang zung" su: dayug za: bue" loo wa nghoid. 17 Ngoo gi kangso' ri dalheing: doem yo" yu wa shid' re" nga" kang: ri yo" byid: pyam yoo mo phoo Mangsoo gi ngoori jheddab nyid. 18 Khayug we' nga" kangso' ri ayo" yu pyam byid ngoo nya: myid khyo" ngoo byid: pyam da" khyoo: nghoid. Ngoo gi kangso' ri byid: pyam wa amyeing" yo"- Kangso' doem yo" tau" yu wa amyeing" ngoo ci:- Hid: su" koid; wa shid' re" phoo gi ngoori akhyeing byid: to" amyeing" byid: to" zi nghoid ga: tid. 19 Hid: su" tid yoomo Yuda byu yi moo nheigloem: aveing" go" boem loo. 20 Byu dayham" gi he: yug gi yu vang ci: da" foin" su: danghoid: ci: wim wigi nya: dang: ri nanu" tam" gyoo: go" ga: tid boem. 21 Nghoidloug we' byu dayham" bang: gi yu vang ci: su: gi hid: yhang te" da" dang: ayo" tid. Yu vang ci: mo, hang" su;- myo, amyang su: ri myo, yo" myang nhang: yu" la"» ga: tid boem.
Yesu Ngeig Pyam Shau" Khyoo:
22 Hau: ayo, moo Yerusalem voo mo, no ku" yhoem moo"- ab noung" pui" zeing: daloem: jo,- hau: ayo, gi xung" gung ayo, nghoid. 23 Aseing Yesu gi no ku" yhoem moo" mo, Sholumon da" vang khoem" moo so" lheing yen. 24 Hau: uri byu yi gi Yesu ri re" lheung: khoem, ci: lho: nang gi kha: myhang myang" sho' ngoonu" ri nheigloem: soin: yau: nyid nhang: wa lha". nang gi Meshia anghoid la".- ngoonu" ri bang bang tid kyoo" we' ga: myid: boem. 25 Yesu gi nanu" ri ngoo tid kyoo" gu, nghoid bye:- nghoid loug we' nanu" gi aloem" jeung" boem. Phoo byid: da" amyeing" akhang" yo' dakhyoo ti"-- ngoo koid; shug da" moo" dangain" gi nga" da" khyoo: ri sagsi: kham: nyid zi nghoid. 26 Nghoidloug we' nanu" ngoori aloem" jeing" yoo mo manu" ginga" yang joem anghoid. 27 Nga" da" yang joem gi nga" da" dang: thui: ri tam" gyo: boem. Ngoo we' nyangnu" ri se' lho: nyangnu" we' nga" thang: moo cang ago". 28 Ngoo gi nyangnu" ri apyaid ato: kangso' ri byid: bye: yoomo nyangnu" gi khanham we' ashid: loo: wa. Hang" we' nga" da" lo, mo houg: bang: ri ayo" lhoid yu loo. 29 Nyangnu" ri nga" lo, moo ab byid: to" da" Phoo gi dangain" tho' moo je gyi: su: nghoid yoomo hang" nghoid loug- nyangnu" ri pho da" coung: goem nyid jang" mo ayo" lhoid yu loo. 30 Phoo yo" ngoo gi dagung dashoo" za: nghoid ga: tid. 31 Houg: lang" mung" byu yi gi Asing: ri du" wa da" luggo, doem koid: ci: boem bye. 32 Yesu gi nyangnu" ri Phoo koid nhang: da" - moo" gi ri nanu" da" shig khoin" moo zei: bye. Hau: moozoo" kha: loem: yoomo nanu" ngoori luggo, yo" du" noug go" la"» ga: myid. 33 Nyangnu" phug tu" zigi moo" gi dajaja: zei: yoomo Nang ri luggo, yo" du" nau zi anghoid. Nang gi byu kyeing" te: nghoid da: zi Mangso ayid void ci: lho: Mangsoo ri shoid vhang: da" dang: tid nyid yoomo luggo, yo" du" wa ga: tid ago". 34 Aseing Yesu phougtu" zigi Nanu" da" tarha" : lhid" to" jang" moo Mangsoo ga: tid pang to" da- Jhoem: dang: moo toin" shid to" khyoo: yi gi khanham we' deingmain" nyid ziri nanu" se. 35 Mangsoo gi nya: da" mungdang: tam gyo: nyid mo, ri Mangsoo ga: tid pang to. 36 Phoo gi ngoori khyen: yu lho: he: mougmyid khyoo: nhang: kaid. Houg: su" nghoid yoomo Ngoo gi Mangso da" nya: zoo: nghoid ein: tid da" uri Ngoo gi Mangsoo ri shoid da" dang: tid ein:- nanu" khasu" koid; yo" tid go" lha". 37 Phoo zei: nhang: nau da" moo" ri ngoo avoin, vu, nghoid ri ngoori aloem" jeing" goo" 38 Ngoo ci: voin vu nyid nghoid ri koem gi ngoori aloem" jeing" nghoid loug we' ngoo voin, vu, da" moozoo" ri loem" jeing" ge'. Houg: lang" ngoo zei: da" moozoo" moo Phoo gi nga" khoug: moo nyid nyid lho wigi ngoo we' phoo yo" dadeing: daloem: za: nyid ziri nanu" se' gyo: loo wa ga: tid kyo". 39 Houg: lang" nyangnu" gi Yesu ri myheig wa zi doem yoem: kaid go" lo" boem bye. Nghoidloug we' Yesu gi nyangnu" jang" mo, gau" jang" phang: thu' lo" byug. 40 Yesu gi Yodan gyung: thei: tab' moo goonham, Yohan Babtisma kham: byid: joyoo khyoo: doem yhe: lho: hau: khyi moo nyid nyid. 41 Byu yi myoo" sho' nyang: Yesu jang" moo jure" boem. Nyangnu" gi Yohan gi ce: mau" pho" moo" ayo" zei: shug- Nghoidloug we' he: youg khyoo: yo" sen: lho: wigi Yohan kho" kyo" dang: gi dangain" deung nyid ga: tid boem. 42 Houg: su" nghoid yoomo hau: joyoo moo byu myoo" sho' nyang:- Yesu ri loem" jeing" lo boem.
Lazaru Shid: Lo" Da" Khyoo:
1 Bethani voo byu Lazaru ga: su: gi no nyid. Bethani voo gi Mari yo' nya: bi: Martha nyid da" voogung nghoid. 2 (He: da" Mari gi Aseing Yesu da" khyid: moo nam, pyo: moora: xu: foid gyoin: lho: nya: xam: wigi doem soid' byid: su: nghoid. No nyid su: Lazaru gi Mari da" nya: no, nghoid.) 3 Nya: be: eig yug gi Aseing: we"- re" jheddab da" byen cang" gi no nyid da:- ga: wigi Yesu jhang khyoo: dang: pyeung: kaid. 4 Yesu hau: ludang: ri shaug" gyoo: long" nyang: gi he: noo gi Lazaru ri shid: nhang: wa da" noo anghoid. Mangso da" myonhoo: phung: yoeb' bang loo nhang: wa ziyo' hau: noo yoomo Mangso da" nya: zoo: gi myonhoo: phung yoeb'- bug thu' sheing" jhu" loo wa"- shig re" nghoid ga: tid. 5 Nghoidloug Yesu gi Martha tang: Mari ri we' Lazaru ri we' jheddab nyid. 6 Lazaru no nyid ziri shau" gyo: lang" Yesu gi nyang: ju" nyid da" joyoo moo eig nyid" doem xo' theing: nyid. 7 Hau: thang: ri nya: cangzoo: yi: ri tid zigi Yuda mung" khyoo:- ngoonu" doem tau" loo" shang- ga: tid. 8 Cangzoo: yi gi sara: we"- houg: mo meing byu yi: gi akhoyo, shi"- Aseing: ri luggo, yo" du" wa ga: nyid boem ri hau: joyoo khyoo: dalheing: dadoem tau" loo" wa la"» ga: myid: boem. 9 Yesu tid zigi danyid" ri daxe: eig nayi: bo anghoid goo" la". nyid kyoug mo bidbang khoug: mooso" yen" mo, gi he mougmyid bidbang moo myo, yo" myang wigi khyid: vhu" athung" loo: yo" so" yen" ago". 10 Myen" ri so" yen" mo, koem gi myo, amyang yoomo khyid: vhu" thoung. 11 Nghoid loug we Yesu gi hid: su" ga: bain tid lho: ngoonu" da" bidnoem Lazaru gi yhoeb' pyo: jo, bye. Nyang: ri nhoug" wa shid' re" ngoo yhe: loo" wa"- ga: doem poug tid. 12 Cangzoo: yi gi Aseing: we"- nyang: yhoeb' pyo: nyid nghoid rigi doem so" loo wa nghoid- ga: tid boem. 13 Yesu gi Lazaru shid: bye: khyoo: ri tid nghoid loug we' nyangnu" gi gyeing" nyang: yhoeb' pyo: da" khyoo: ri tid sam" ga: cangzoo: yi gi jho: nyid ago". 14 Houg: yoomo Yesu gi Lazaru shid: bye: ga: bang bang jha" tid kyo. 15 Hau: joyoo moo ngoo nyang: yo' dage" anyid kho' zigi nanu" ngoori loem" jeing" loo wa khyoo: nghoid yoomo:- nanu" shid' re" ngoo gau:- nya: jhang khyoo: yhe: lo" boem loo: shang ga: tid. 16 (Zoo: zoem, ga: myheing yo" da") Thoma gi nya: cangzoo: byen cang" yiri ngoonu" we' Aseing: yo" dage" shid: kham: wa shid' re cang yhe: lo" boem shang ga: tid. Yesu Gi: Doem Dei To, Lo Da" Khyoo: Yo" Kangso' Nghoid. 17 Aseing Yesu juri" lang" gi Lazaru ri myhoeb' shoung: pyam zi myid: nyid" koo: myang" bye: khyoo: ri yhe: myang se' boem. 18 Bethani voo gi Yerusalem voo yo"-eig main: koo: date: ve:. 19 Yuda byumyu" myoo" sho' mo nyang:- Mari yo" Martha tang: da" nhung" zoo: shid: loo" yoomo nya: eig yug ri nheig teing: wa ga: jure" boem. 20 Martha gi Aseing Yesu re" lo zi shaug" gyoo: lang" yhe: tau yu wa ga: thu' lo" nghoid loug we' Mari gi yhoem: moo nyid kho.. 21 Martha gi Aseing: we"- Nang hid: moo danyid nghoid rigi nga" nhung" zoo: shid: wa zi anghoid. 22 Akhid" nghoid loug we' Aseing: mho' da" khyoo: dangain"- Mangsoo tam" gyoo: byid: wa zigi ngoo loem" jeing" nyid. ga: wigi Aseing: Yesu ri lhoem: tid kyo. 23 Aseing Yesu gi Re" nhung" gi doem dei loo wa zi nghoid ga: tid. 24 Marhta gi Mougmyid thang lo" da" bidnyid ri nyang: doem dei to'' loo wa ziri ngoo se' ga: tid. 25 Aseing Yesu nyang: ri tid zigi Ngoo gi doem dei to'' lo da" khyoo: yo" kangso' nghoid. Ngoori loem" jeing" mo, hang" we' shid: byug bye: nghoid loug we' dadei nyid wa. 26 Ngoori loem" jeing" lho: akhid" dei nyid shi" mo, we' khanham we' shid: wa zi anghoid. He: ziri nang aloem" la"» ga: myid. 27 Martha gi loem" bye: Aseing: we"- He: mougmyid moo gyoo" loo wa ga: da" Mangso: nya: zoo: Meshia nghoid ziri ngoo loem" bye: ga: tid.
Yesu Ngau Khyoo:
28 Houg: su" bain doem go" lho: Martha gi yhoem: khyoo: lo" wigi nya: nhung" Mari ri gau" khe: lho: Sara: moo" ju" loo bye:- nang ri we myid nyid: ga: tid kyo. 29 Hau: dang: shaug" gyoo: lang" Mari myab myab to' lho: Aseing: jhang khyoo: yhe: lo. 30 Aseing Yesu koem gi voo khoug: moo aju" vang loo shi"- Martha yhe: tau yu joyoo moo danyid nyid shi. 31 Mari ri nheig teing dang: tid wa ga: yhoem: moo re" nyid da" byu yi gi Mari myab myab thu' lo" zi myang boem lang" loeb moo ngoug wa ga: yhe: loo" sam" ga: coem jho: boem. Houg: yoomo nyangnu" gi Mari da" thang: moo cang yhe: lo" boem. 32 Mari gi Aseing Yesu nyid da" jang" moo ju" yhi: lang" Aseing: ri myang wigi khyid: yang: moo goeb' zoore"- Aseing: we" nang he: joyoo moo danyid nghoid rigi nga" nhung" shid: byug wa zi anghoid ga: tid. 33 Aseing Yesu gi Mari koug ngau nyid ziri we' nyang: yo" dage" cang loo mo, ngau nyid ziri we' nheigloem: moo gye" lo" zang" wigi nheigloem: apyoo: loo. 34 Houg yoomo Yesu gi nya: nghain" doem: ri khayoo: myhoeb too" go"- ga: myid:- houg: bang: gi Aseing: we" re" yu" we' ga: tid ago". 35 Yesu Ngau. 36 Houg: lang" byu yi gi yu" ge' nyang: gi Lazaru ri khayhi' jheddab nhung: ga: tid go" nyid boem. 37 Byu dayham" bang: gi myo, amyang su: ri myo, yo" myang loo nhang: su: gi Lazaru ri ashid: sho' ayo" koid; nhung: lha"» ga: tid go" nyid.
Lazaru Ri: Doem Dei Loo Nhang: Da" khyoo:
38 Yesu gi nheigloem: moo gye" zang" loo yoomo loeb khyoo: yhe: lo. Hau: loeb khoem" moo gi lugloem: yo" tu" myhed" to. 39 Aseing Yesu gi lugloem: ri tu: shed pyam ge" ga: amyeing" byid. Shid: loo" su: nya: bi: Martha gi Aseing: we" akhid" gi boeb' nham nyid wam: bye. Nyang: shid: thang: ri myid: nyid" myang" bye: ga: tid. 40 Aseing Yesu tid zigi nang loem" jeing" nghoid rigi Mangso da" myonhoo: phung yoeb' ri shau" myang wa ein: ngoo tid bye: anghoid la"» ga: myid. 41 Houg: yoomo byu yi gi lugloem: ri doin: shu" kaid ago". Hau: uri Yesu gi-Moug khyoo: nghang yu" kaid lho: Phoo we" nang gi ngoo mho' yoid thui: ri tam" gyoo: byid: yoomo jeju" gye gyi: bye. 42 Khanham we' nga" da" akyu" mho' dang: ri tam" gyoo: byid: da" khyoo: ri ngoo se' nyid. Nghoidsho' loug we' nang gi ngoori nhang: kaid su: nghoid ziri he: da" byu yi dangain" mo, loem" jeing" loo nhang: wa da" shid' re" ngoo mho' nyid zi nghoid. 43 Hau: thang: ri Lazaru we" thu' ri" we"- ga: thui: moo" yo" yoid kaid. 44 Hau: uri shid: jo, su: gi khyid: yo" lo, moo pain" thoeb pyam lho: myonhoo: moo phajed baid yeig ci: zi do: thu' ri" bye. Aseing Yesu gi nyang: ri thoeb to" da" byimi: joem ri phoid: pyam byid: lho: nhang: kaid' ge' ga: tid.
Yesu Ri: Said Soin Da" Khyoo:
45 Hau: uri Mari jang" moo re" koem" da" byu myoo" sho' moo gi Yesu koid; da" moozoo" ri shau" myang yoomo houg: bang: nyang: ri loem" jeing" lo boem. 46 Nghoidloug we' dayham" mo, gi Pharishe bang: jhang khyoo: zheing: yhe: lho: Yesu koid; da" moozoo" ri tid kyo" boem. 47 Houg: su" nghoid yoomo khainjung agyi moo" yi yo"- Pharishe yi gi Yuda zoug: yi da" kongsi: zoeb phung: khe lho: Yu" ge, he: yug gi mau" pho" moozoo" myoo: zei: shug nyid bye. Ngoonu" khasu" koid' boem wa lha". 48 Nyang: ri hid: su" akhang" dabyid: to" nghoid rigi Byu yug khang" moo" nyang: gi loem" jeing" lo" boem wa. Houg: lang" Roma amyeing" ci: mo, re" lho: wigi ngoonu" da" no ku" yhoem: moo" ri we' ngoonu" da" byumyu" bain sho' ri we' lhu: phyo' pyam byid: wa nghoid ga: tid boem. 49 Houg: bang: mo hau: zain shid' re" Khainjung agyi nghoid da" Kayapha ga: su: gi nanu" ce: noem ko" nyid go". 50 Byumyu" bain sho' shid: doem: pyam wa tho' moo gi dangain" shid' re" byu dayug te: shid: wa zigi je ge ziri nanu" asi goo" rhe" ga: wigi myid. 51 Houg: su" tid zigi"- nyang: nya nheigloem: khyo" tid zi anghoid. Hau: zain shid' mo khainjung agyi nghoid yoomo:- Yuda byu damyu" goin" da" shid' re" Aseing: Yesu kham: shid: wa ziri lapi: dang: tid nyid zi nghoid. 52 He: zigi nyangnu" shid' re" za anghoid byo sain" nyid da" Mangso byumyu" yi bain sho' ri dadeing: daloem: za: bue" loo wa shid' re" we' nghoid nyid. 53 Hau: da" bidnyid mo wigi Yuda zoug: myeing" ci: mo gi Yesu ri said pyam wa shid' re" nyheung lo" boem bye. 54 Houg: su" yoomo Yesu gi Yuda mung" moo bang bang aso" yen" shug loo:- hau: joyoo mo thu' lo" lho: Ephrim ga: da" dain" pyoid yoo moo nya: byen cang" yi yo" dage" lo" nyid. 55 Yuda byumyu" yi da" lhed: kaid pui" we' jhang loo bye: yoomo voogung khang" moo" mo byu yi myoo" sho' Pui" aju" shi" ri cid" shang: kham wa shig re" Yerusalem voo khyoo: zeing: re" boem bye. 56 Houg: bang: gi Yesu ri sho: nyid boem lho: no ku" Yhoem: moo" moo shau" zeing: foem: loo" lang" Nyang: gi gyeing" nyang: he: pui" moo" moo ri" wa la". ari" wa la".:- Nanu" khasu" ein: jho: nyid go" ga: nyang: cang" nyang: myid: go" nyid boem 57 Khainjung agyi zoug: moo" yi yo"- Pharishe yi gi hang" nghoid loug Yesu nyid da" joyoo se' ri Nyang: ri yo" myheig tei" wa shid' re" lo tid kyoo" ca" ga: wigi amyeung" khyo, too" gu nghoid.
Yesu Da" Khyid: Moo Moora: Xu: Joid' Byid: Da" Khyoo:
1 Lhed: kaid da" pui" ju" wa khyug nyid" ca" shi" moo shid: bye: jang" mo doem dei to'' lo da" Lazaru nyid da" Bethani voogung khyoo:- Yesu doem ju" yhe: lo. 2 Nyangnu" gi houg: moo Yesu ri myen" xoin: damyoo: lhoem: nyheing zho" jang" moo- Martha gidei bo dei nyid .Yesu yo" dage" zoobue" moo zhung: nyid mo, moo Lazaru we' bo nyid. 3 Hau: uri Mari gi gye phoug" dab, da" shoem: nam pyo: da" Nardu xu:- agyeing" da parheing" yu lho: Yesu da" khyid: moo joid byid: wigi nya: xam: yo' doem soid' byid. He: nam pyo: da" xu: ngei" gi dayhoem: goin" moo nam pyo: lo. 4 Nya: cangzoo: dayug nghoid da" Yuda Iskarud gi 5 Hid: yhi' nam pyo: da" xu: ri Denari ngei soem" shoo: kyab yo" oung" pyam lho: shojhen: mo, ri ciwim agam byid: lha"» ga: tid. 6 Nyang: gi thang: phyang" Yesu ri gyivoo yi da" lo, moo ab pyam wa su: nghoid. Nyang: hid: su" tid da" zigi shojhen: mo, ri nheig khyeig yoomo tid zi anghoid. Khoug" su: nghoid. Nyang: gi ngei thung: voin su: nghoid yoomo ngei ri lhoung gau" khau" yhung: nyid. 7 Yesu gi hau: myiyi: zoo: ri alhu: nhung byid. Nyang: gi ngoori myhoeb wa da" ayo, shid' re" he: da" nam pyo: xu: ri shoung: to" zi nghoid.. 8 Shojhen: mo, gi nanu" yo" dage" khanham we danyid nyid. Ngoo koem gi nanu" yo" dage" nyid wa zi anghoid ga: tid.
Lazaru Ri: Said Wa Soin, Khyoo:
9 Bethani voo moo Yesu ju" nyid da" khyoo: ri shau" gyo: boem lang. Meing: byu phung: moo" gi voo moo jure" boem. Nyangnu" gi Aseing Yesu yoomo za: jure" boem zi anghoid. Aseing: wi gi doem dei to'' loo nhang: da:- Lazaru ri myang noug yoomo re" zi nghoid boem. 10 Khainjung agyi yi gi Lazaru ri we' said wa ga: soin' nyid boem ago". 11 Khasu" wim gari Lazaru da" khyoo: yoomo mung" byu yi gi khainjung agyi yi ri aloem loo za: Yesu ri te: loem" jeing" lo" boem yoomo nghoid. Myo, Nhoo: Phung" Yoeb' Zeing: Yo"- Yerusalem Voo Khyoo Vang Lo" 12 Thang: nyid" moo lhed: kaid da" pui" moo jure" da" mung" byu yi gi Yerusalem voo khyoo: Yesu jure" nyid ziri shau" gyo: boem yoomo 13 Zhainlun seig kyang joem ri khyau" ci: wigi thu' lo" boem lho: Mangso da" myonhoo: phung" yoeb' ri coung" byid: ge' Mangso: da" myeing yo" gyoo" ri" su: gi ngi lho, nyid: baja"- Israela da" khokham" ri Mangsoo: mainkaid byid: baja" o"- ga: yoid' nyho: da" thui: yo"- Aseing Yesu ri lhoem: tau yu boem. 14 Yesu gi loozei: dadu: moo zhoung: lho: jure". Houg: gi Jhoem: mungdang: moo tid to" ziyo' dakhyoo ti. 15 Ziun voo we" agyug- Yu" we' re" da" khokham" zeing: gi Loozei: nu" moo zhoung: lho: juri" bye. 16 Nya: cangzoo: yi gi hau: yo, moo he: jhoem: dang: ri ase' gyo: boem. Nghoid loug we' Yesu gi phung yoeb myo nhoo: yo' coung" nghei tu: to shau" thang: ri she' he: jhoem: mungdang: gi nya: khyoo: ri tid to" zi yo; dakhyoo" ti" nyang: ri koid' abye: go" ziri doem myed boin: so" lo boem. 17 Lazaru ri loeb' khoug: mo khe: thu' yu lho: shid: jang mo dei to'' loo nhang: da" uri bo myang bang: gi Yesu khasu" koid; da" khyoo: ri khyang" lo" shid' boem. 18 Hau khyoo: ri shaug" gyoo: boem yoomo shaug" gyoo: mo, dangain" gi Yesu ri tau yu wa ga: jure" boem da" zi nghoid. 19 Pharishe" yen, gi ngoonu" moo oung: lo" da" khyoo: dajhi' we' aboo. Yu" ge' mougmyid daloem: goin" nya: thang: moo cang lo" boem bye: ga: nyang: cang" nyang: tid go" nyid boem.
Greed Byu Myu" Yi dayham" Yesu Ri: Sho: Da" Khyoo:
20 Hau: pue" uri noku yhe: da" byu yi akhoug: moo Greed byumyu" dayham" we' bo 21 Nyangnu" gi (Galile moug mo Besaida voo byu ) Philib jhang khyoo: yhe: lho: wigi Sara: we"- ngoonu" gi Aseing Yesu ri myang: nau- ga: yhe: tid boem. 22 Philib gi Andre jang" moo yhe: lho: hau: khyoo: ri tid kyo. Hau: thang: ri nya: eig yug gi Aseing Yesu jang" moo zheing: yhe: lho: hau: khyoo: ri tid kyo" to. 23 Yesu phougtu" da" zigi byu nya: zoo: da" myonhoo: phung" yoeb' bang: thu' loo wa da" ayo, ju" bye. 24 Deing" deing nanu" ri ngoo tid ba- gug cab' gi myidjang: moo agyo"- aboeb ayoin" nghoid rigi dacab tho' moo myo: loo zi anghoid. Boeb' yoin" lo" nghoid ri koem gi ashi" myoo" sho' ri yo" bue" loo nhang: zi nghoid. 25 Nyang: nya: kangso' ri jheddab mo hang" nghoid loug kangso' soem" wa nyang: nya: kangso' ri ajhed' dab, she: pyam su: hang" nghoid loug we' nya: da" kangso' ri khanham we' yo" zoem: ci: su: nghoid wa. 26 Ngoo nyid da" jo, yooo moonga" dei zoo: we' yo" nyid wa shigre" Nga" moo" voin, noug su: gi nga" thang: moo cang ca. Nga" moozoo" ri voin, vu, su: hang" nghoid loug ri nga" phoo we' coung" byid: wa zi nghoid. Nyang: Shid Wa Da" Khyoo: Ri Yesu tid. 27 Ngoo gi nheigloem: gye seing" kho" nyid ngoo khasu" ein: tid loo: wa lha". Phoo we"- ngoori he: da" kyi" khyeug jamjau yo, mo loid byoin loo" nhang: we' ein: wigi tid wa la". nghoid loug we' ngoo gi he: da" kyi" kyeig jamjau ri kham: yu wa shid' re" gyoo" re" zi nghoid. 28 Phoo we"- re" da" myonhoo: phung" yoeb' ri dathu' ri" nhang: we' ga: tid nyid. Houg: lang" mougkhung: mo thui: thu' lo zigi ngoo gi nya: myeing ri myonhoo: phung" yoeb' ri thu' ri" nhang: bye. thang: ri dalheing: we doem thu' ri" nhang: shi" wa" ga: tid. 29 Hau: joyoo moo yab jo, da" mung" byu yi gi hau: da" thui: ri shaug" gyoo: lho: dayham" gi moug doem doem: myheing ga: dayham" gi Aseing: ri mau lagyoo: yi dang: re" tid zi nghoid ga: tid nyid boem. 30 Yesu gi he: da" thui: thu' lo zigi nga" shid' re" anghoid. Nanu" da" shid' re" danghoid ga: tid. 31 He: moug myid gi akhid" lang" Tarha" dang: phyed' zi thoung" shau" nyid abye:. Mougmyid ri vhoeb khang" nyid da" su: we' akhid" nyang: keing" pyam zi shau" wam: bye. 32 Ngoo gi myidjang: tho' moo tu: zhug lhang" to" zi shau" nyid uri Byu dangain" ri nga" jhang khyoo: lang: yu wa zi nghoid ga: tid. 33 (Hid: su" ga: tid da" zigi nyang: khasu" koid; wi shid: kham: wa da" khyoo: ri avoid ayoeb khyo" toin" shid nyid da" khyoo: nghoid.) 34 Byu yi gi Meshia khanham we' kangso' dadei nyid ga: Moshe tarha" moo tid to. Houg: su" nghoid ri Byu da" nya: zoo: gi khasu" wim wigi se' jen" lhang" too" wa lha?Hau: byu da" nya: zoo: gi kha: yug nghoid lha"» ga: myid: ago". 35 Yesu phougtu" da" zigi Bid' bang gi nanu" moo daso date: jo, loo- wa. Nanu" ri moug coid alo nghoeb' pyam wa da" shid' re" bidbang jo shi" da" uri so" yen" ge'. Moug coid khoug: moo so" yen" mo gi nyang: nyang: kha: khyoo: so" lo" zi asi nghoid ago". 36 Houg: su" nghoid yoomo bidbang jo, shi" da" uri hau: bidbang ri loem" jeing" ge'. Houg: su" nghoid ri za: nanu" gi bidbang da" byu yi bui" wa nghoid ga: tid. Hid: su" ga: bain tid thang: ri Yesu gi nyangnu" jang" mo phang: gau" loo bye.
Byu Yi Aloem" Jeing" Boem Da" Khyoo:
37 Nyangnu" da" shid' khoin" moo mau" pho" moozoo"- myoo" sho' zei: shug nghoid loug we' nyangnu" gi Yesu ri aloem" jeing" boem. 38 Hid: su" bue" da" khyoo: gi Lapi: Esaia tid to" khyoo: zung: loo wa yoomo bue" lo zi nghoid. O" Aseing: we"- kha: yug gi ngoonu" kho" kyo" da" khyoo: ri loem" jeing" boem lha". kha: yug ri Mangso yoem: vhoo" phung" yoeb' toin" shid' lha". 39 Houg: yoomo nyangnu" gi atho' oung: loem" jeing" zi nghoid. Khasu" wim gari Lapi: Esaia hid: su" tid to. 40 Nyangnu" abyang" yu yu gi nyangnu" da" myojid" joem gi ayo" myang wigi Nyangnu" da" nheigloem: gi a oung: se' gyoo: wa ziyo' nyangnu" nya: jhang khyoo: ayo" tau" loo wa shig re" Mangsoo gi-nyangnu" da" myo, ri jed' nhang: lho: nyangnu" nheigloem: khoem" ri myhid" too" bye: ga tid. 41 Esaia gi Aseing Yesu da" myonhoo: phung" yoeb' ri shau" myang yoomo Aseing: da" khyoo: ri hid: su" ga: tid zi nghoid. 42 Yuda zoug: myeing" ci: mo, myoo" sho' nyang:- Yesu ri loem" jeing" lo boem. Houg: su: nghoid loug we' Pharishe" yi yoomo Tarha" jung mo khaid thu' pyam wa zi gyoug yoomo nyangnu" loem" jeing" da" khyoo: ri bang bang ayhen: yu boem nghoid da. 43 Nyangnu" gi byu yi coung" byid: wa ziri Mangso coung" byid: wa tho' moo je vho: ngei nyid ago".
Yesu Da" Mungdang: Khyo" Dang: Kho' Phyed' Khyoo:
44 Yesu phougtu" da" zigi ngoori loem" jeing" su: gi ngoori za: anghoid. Ngoori nhang: kaid da" yug ri we' bo loem" jeing" su: nghoid. 45 Ngoori myang su: gi ngoori za: anghoid. Ngoori nhang: kaid da" Aseing: ri we' myang zi nghoid bye. 46 Ngoori loem" mo dangain" gi moug: coid khoug: moo anyid loo: wa shid re" ngoo gi bidbang khyo" nyang: mougmyid moo ri" bye. 47 Nga" Mungdang: ri alhoem: yu su: ri ngoo gi dang: aphyed'- Mougmyid: byu yi ri dang: phyed' wa da" shid' re" ngoo gyoo" re" zi anghoid. Mougmyid byu yi ri khyoid yu wa shid' re" ngoo gyoo" re: lo zi danghoid. 48 Ngoori alhoem yu lho: nga" mungdang: akham: yu su: ri dang: phyed' wa dayug nyid. Houg: nga" Mungdang: wigi nyang:- hau: yug ri lo" thang da" bidnyid moo Tarha" agyi khyo" dang: phyed' wa zi nghoid. 49 Khasu" wim gari Ngoo gi ngoo nya: amyeing" khyo" kho" kyo" da" khyoo: anghoid. Ngoori nhang: kaid da" phoo Mangso da" amyeing" yo' dakhyoo" ti"-- kho" kyo" khyoo: danghoid. 50 Phoo Mangso da" amyeing" zeing: gi Apyaid' ato: da" kangso' yo" byid: da" zi ngoo se. Houg: yoomo ngoo kho" kyo" da" khyoo: dangain" gi pho da" amyeing" yo' dakhyoo" ti"- za: date: tid zi nghoid.
Yesu Nya: Cangzoo: Yi Da" Khyid: Cid" Byid: Khyoo:
1 Lhed: kaid da" pui" ju" wa ayo, gi danyid" ca" shi" ri Aseing Yesu gi He: mougmyid mo thu' lo" lho: phoo jhang khyoo: loo" wa da" ayo, ju" loo bye: ziri se' boin: loo bye. Yesu gi he: mougmyid moo nyid da" nya: thang cang mo, ri jheddab lid lo bye. Nyangnu" ri lo" thang bidnyid ju" sho' jheddab bye:.. 2 Aseing Yesu yo' nya: cangzoo: yi gi myen" xoin: shoin" zo: nyid. Yu satan gi Simun Iskarud da" nya: zoo: Yuda da" nheig loem: moo vang lho: Yesu ri gyivoo yi da" lo, moo ab pyam' wa da" shid' re" phajhi" byid: too" gu nghoid bye. 3 Aseing Yesu gi nyang: ri phoo Mangso wigi amyeing" bain sho' ab byid: to" ziri we' nyang: gi Mangso jang" mo gyoo" lo lho: Mangso jhang khyoo: doem loo" loo: wa da" khyoo: ri we' si' gu nghoid. 4 Houg: yoomo zoo: bui" mo to' lho: byi: sheing: ri khyoid wigi phajed' ri yu lho: phyid" doem moo yeing" ci. 5 Hau: thang: ri jarung: moo gyid kaid ci: lho: cangzoo: yi da" khyid: ri cang cid" byid: wigi phyid" cu" cu" ci: da" phajed' yo" doem cang soid byid. 6 Simun Petru jang" moo ju" rigi Aseing: we" nang nga" khyid: ri cid" byid: wa la". ga: lhoem: myid. 7 Aseing Yesu gi Ngoo koid; da" moo" ri nang akhid" asi shi"- thang: phyang" she dase' gyoo: loo wa ga: phoid: kyo. 8 Petru gi Nga" khyid ri Aseing: khanham we ayo" cid" byid: ga: tid. Yesu gi Re" khyid: ngoo ayo" cid" byid: lang" gi nang yo' ngoo ci: asen loo: ga: tid. 9 Houg: lang" Petru gi Aseing: we" nga" khyid: za: anghoid loo:- lo, yo" vhuloem ri we bo cid" byid: we' ga: tid. 10 Yesu tid zigi gung bain cid" bye: su: gi dagung goin" young" lhoo, bye: nghoid yoomo khyid: date: cid" ca" lo:- dayug mo lid wigi nanu" dangain" gi young" lhoo gu nghoid boem bye. 11 (Nyang: ri gyivoo yi da" lo, moo ab pyam wa su: hang" nghoid zi: ri si' yoomo Yesu gi dayug mo, lid wigi ga: tid da" khyoo: nghoid.) 12 Yesu gi cangzoo: yi da" khyid: ri bain cid" byid: lang" byisheing: ri doem yu void ci: lho: zhoung: jo. Nyang: gi nanu" da: shid' re" ngoo koid; da" moo" ri se' gyoo: go" la"» ga: myid. 13 Nanu" gi ngoori sara: ga: we' Aseing: ga: wigi we' lhoung yoid ago". Houg: yo" dakhyoo ti"- ngoo nghoid bye:- nanu" yoid da" khyoo: we' gye du da" khyoo nyang nghoid bye. 14 Ngoo gi nanu" da" sara: moo" we' nghoid- Aseing: we' nghoid. Houg: su" nghoid to" lho: nanu" da" khyid: ri ngoo cid" byid: bye. 15 Houg: yoomo nanu" nghoid loug we' nyang: cang" nyang: khyid: ri cid" byid: goo" lho,- nanu" ri ngoo koid; yhangti"- nanu" nyang: cang" we' houg: su" koid; wa khyo" akhyoo" ri ngoo shid' too" bye. 16 Deing" deing nanu" ri ngoo tid nau da" zigi join, gi yhoem: seing: tho' moo je gyi su: anghoid. Lagyoo: we' nhang: kaid su: da" tho' moo je gyi: zi anghoid. 17 He: da" deung main" da" khyoo: ri akhid" nanu" se' boem bye. Houg: su" si' bye: ziyo' dakhyoo" ti"-- nanu" cang zei: lo" rigi ngi lho, boem wa. 18 Nanu" dangain" mo, ri ngoo yeung lho: tid zi anghoid. Ngoo khyen: too" mo, ri ngoo se' nyid. Nghoidloug we' Jhoem: mungdang: moo nga" voem: zoo: su: gi ngoori khoo: thang: theing wa ga: lhid" to" zi nghoid. 19 Houg: su" bue" lo da" uri ngoo gi ngoo nyang: nghoid da" khyoo: ri nanu" ri loem" jeing" nhang: wa da" shid' re" akhid" mo nyang: nanu" ri tid poin" to" zi nghoid. 20 Deing" deing nanu" ri ngoo tid da" zigi ngoo nhang: kaid su: ri lhoem: kham: yu su: gi ngoori lhoem: kham: yu zi nghoid. Ngoori lhoem: kham: yu su: we' ngoori nhang: kaid da" su: ri lhoem: kham: yu zi nghoid ga: wigi tid.
Yesu Ri: Ung" Zo: Pyam Wa Da" Khyoo:- No" Re" tid To"
21 Hid: su" ga: bain tid da" thang: ri Yesu gi atho' tid loo: sho' nheigloem: myid myo: lho: Deing" deing nanu" ri ngoo tid da" zigi nanu" da" akhoug: mo byu dayug gi ngoori gyivoo yi da" lo, moo ab pyam wa"- ga: bang" bang tid kyoo" bye. 22 Kha: yug ri yeung lho: tid nyid zigi cangzoo: yi ase' boem yoomo nyang: cang" nyang: yu" moug" go" nyid boem. 23 Hau: da" uri Aseing Yesu jheddab da" cangzoo: dayug gi Aseing: da" nam, moo zhoung: jo. 24 Simun Petru gi hau: yug jhang yhe: lho: «kha: yug ri yeung lho: tid nau la' myid: yu" we'» ga tid. 25 Hau: cangzoo: gi Aseing Yesu da: namtain" moo yu: re" lho: Aseing: we" houg: su" koid' wa zigi kha yug nghoid wa lha". ga: myid. 26 Yesu gi he: zooyho' daloem: ri xoin" khu, moo joem lho: ngoo byid: su: gi hau: yug nyang: nghoid bye: ga: tid kyo. Hau: thang: ri zooyho' dakhyi ri xoin" khu, moo joem lho: Simun Iskarud da" nya: zoo:- Yuda ri byid. 27 Hau: zoo: yho' ri Yuda zo: kaid ziyo' dage" satan gi nya: nheigloem: khoug: moo vang loo" bye. Yesu gi nyang ri nang koid; wa da" moo" ri myab myab zei: we' ga: wigi tid. 28 Yuda ri houg: su" ga: cikoid; tid da" zi zoobui" moo zhoung: jo, mo, hang" we' ase boem. 29 Yuda gi ngei thung: zoem su: nghoid yoomo pui" shid' re" yhoug: gyen: da" zi qei wa ga: la' shojhen: mo, ri gam byid: wa shid' re" la'- Yesu dang: pyeung: nyid sam" ga: cangzoo: yi dayham" jho: nyid boem. 30 Yuda Iskarud gi zooyho' dakhyi, ri kham: yu ci: lho: myab myab thu' loo" khari" bye. Hau: ayo gi myen" ayo, nghoid nyid.
Tarha" Aseig
31 Yuda thu' loo" khare" thang: ri Aseing: Yesu gi Akhid" byu da" nya: zoo: gi myo, nhoo: ngei: lang: bug thu' sheing" jhu" lo zi shau" bye. Mangsoo we' hau: yug: yoomo myonhoo: bug thu' sheing" jhu" lo zi shau" bye. 32 Mangsoo gi hau: yug khyo" wigi myonhoo: ngei: lang:- bug thu' sheing" jhu" lo rigi phoo Mangsoo gi nya: gungdu: khyo" wigi byu da" nya: zoo: ri we' myonhoo: bug thu' sheing" jhu" loo nhang: wam bye. 33 Nga" zoo: yi we"- ngoo gi nanu" yo daso' date: nyid loo: wa. Nanu" gi ngoori sho: goo" wa. Nghoid loug ngoo yhe: lo" nyid da" khyoo: moo nanu" ayo" cang loo ga: wigi Yuda zoug: myeing" ci: mo, ri kho" kyo" yu" ziyo' dayhangti"- nanu" ri we' akhid" ngoo kho" kyo. 34 Nanu" nyang: cang" nyang: jheddab goo" ge" ein: da" tarha" aseig ri nanu" ri ngoo byid: bye. Ngoo nanu" ri jheddab yhangti"- nanu" we' nyang: cang" nyang: jhed' dab, go" nyid ge'. 35 Nanu" nyang: cang" nyang: se' jheddab go' nyid rigi Byu dangain" mo, hau: jhed' kang: da" khyoo: ri yu myang lho: nanu" gi nga" da" cangzoo: yi nghoid da" khyoo: ri se' lo boem wa ga: tid kyo.
Yesu Ri: Petru Ngeig Pyam Wa Khyoo:- No" Re Poin" Bye
36 Simun Petru gi Aseing: we"- nang khayoo: loo" wa lha"» ga: myid. ‹‹Yesu gi ngoo yhe: lo" nyid da" jang" moo akhid" nang ayo" cang.» ‹‹Nghoid loug thang: phyang" ri dayo" cang loo wa» ga: tid. 37 Petru gi ‹‹Aseing: we"- ciwim akhid" ngoo re jhang ayo" cang wa lha".» ‹‹Aseing: da" shid' re" nga" da" kangso' lang" ab pyam wa zi jen" jen" nghoid bye.» 38 Yesu tid zigi nang gi nga" shid' re" kangso' yo" ab wa jen" bye: la". Deing" deing nang ri ngoo tid da" zigi gyo, atoin: shi" ri nang gi ngoori asi ga: soem" lheing: ju" sho' ngeig pyam wa su: nghoid ga: tid kyo" to.
Yesu Gi: Pho Jhang Ju" Lo" Da" Khyoo: Nghoid'
1 Yesu gi nanu" nheigloem: myid amyo: nyid goo"- Mangsoo: ri loem" ge' ngoori we' loem" ge' ga: wigi tid. 2 Nga" pho da" yhoem: moo yab myoo" sho' jo. Houg: ajo, nghoid rigi ajo, ein: ngoo atid loo: za: nyid wa anghoid. Ngoo gi nanu" da" shid' re" joyoo nyheing wa ein: lo" zi danghoid. 3 Houg: su" nanu" shid' mo joyoo daloem: lo" nyheing too" kho lho: nanu" jang" moo ngoo doem re" wigi ngoo nyid jang" moo nanu" we' yo" nyid sho' nanu" ri nga" jhang khyoo: re" shu" yu wa zi nghoid. 4 Ngoo lo" nyid da" joyoo moo ju" da" khyoo: ri nanu" si' bye: ga: tid. 5 Thoma gi Aseing: we"- nang khayoo: loo" wa zi ngoonu" asi bye: re- houg: moo yo" ju" da" khyoo: ri ngoonu" khasu" se' si wa ga: tid. 6 Aseing Yesu tid zigi khyoo: gi ngoo nghoid- deung main" ziyo' kangso' we' ngoo nghoid. Ngoo moo anghe: khoug: loo: za: hang" we' Nga" phoo jang" moo ayo" ju" loo. 7 Akhid" nanu" gi ngoori si' bye: yoomo Nga" phoo ri we' si wam: bye. Akhid" mo nyang:- phoo ri nanu" se' lho: myang yu" boem bye: ga: tid. 8 Philib, gi Aseing: we"- hau: phoo ga: zi ngoonu" ri toin" shid' we' houg: su" yo" toin" shid' lang" ngoonu" gi nheig shid: wa ga: tid. 9 Yesu gi Philib, we"- ngoo gi nanu" yo" hid: myhang nyid lo ri ngoori nang asi shi" la". Ngoori myang yu su: gi phoo ri we' shau" myang zi nghoid bye. Houg: su" nghoid ri phoo ngoonu" ri toin" shid' we' ein: ci: koid; tid nyid go" lha". 10 Ngoo gi phoo moo nyid phoo we' ngoo moo nyid. Phoo nyid zi nang aloem" rhe. Ngoo tid da" dang: dangain" gi nga" da" dang: anghoid. Ngoo koid; da" moozoo" we' Ngoo yo" dage" nyid da" phoo Mangsoo: nyang: koid; da" moozoo" nghoid bye. 11 Ngoo gi phoo yo" dadeing: daloem za: nghoid wigi Phoo we' ngoo yo" dadeing: daloem: za: nghoid yoomo ngoo tid ziri loem" jeing" ge'. Houg: su" anghoid lang" gi ngoo koid; da" moozoo" ri yu" lho: loem" jeing" ge' ga: tid. 12 Deing" deing nanu" ri ngoo tid da" zigi ngoori loem" jeing" su: gi ngoo zei: da" moo" ri yo" zei: wa. Hau: tho' re je gyi: da" moo" ri we' yo" zei: wa nghoid. Khasu" wim gari ngoo gi phoo jhang khyoo: loo" wa yoomo nghoid. 13 Nya: zoo: yoomo wigi nya: pho da" myonhoo: ngeilang bang thu' loo baja" ga: Nga" da" myeing ri nghe: khau: lho: nanu" mho' da" zi dangain" ngoo koid; byid: wa. 14 Nga" da" myeing ri lang: lho: nanu" ce" ja: akyu" ri nghoid loug- mho' ge'. Mho' ziyo' dakhyoo" ti"-- ngoo koid byid: wa nghoid.
Gyeungshang: Venyi da" Dang Theing
15 Nanu" ngoori jheddab nghoid rigi Nga" tarha" ri phau" cang goo" wa nghoid. 16 Ngoo gi phoo ri mho' lho: nanu" yo" khanham we' dage" nyid nyid wigi nanu" ri pang" thoug byid: wa da" yug- nanu" da" jhang khyoo: nhang: kaid wa. 17 Hau: da" Aseing: gi Mangso da" deung main" khyoo: ri toin" shid' wa da" Venyi: nghoid. Mougmyid gi hau: Venyi: ri myang we' amyang- si' we' asi yoomo ayo" kham: yu boem. Nghoidloug we' Hau: Venyi gi nanu" yo" dage" nyid lho: nanu" da" khoug: moo loung" jo.Hau: Aseing: ri nanu" se' boem bye. 18 Ngoo loo" lang" nanu" nyang: kyeing" ri she: pyam too" khoo, wa zi anghoid. Nanu" jang" moo ngoo doem ri" wa. 19 Ayo, dajhi' myang" lo" ri he: mougmyid byu yi gi ngoori amyang lo: boem wa. Nghoidloug we' nanu" koem gi myang boem shi" wa. Khasu" wim gari ngoo gi kangso' dei nyid su: nghoid yoomo nanu" we' kangso' shau" dei nyid boem wa. 20 Ngoo gi phoo yo" dadeing: daloem: za: nghoid ziri we' nanu" gi ngoo yo" dadeing: daloem: za: nghoid ziri we' hau: bidnyid ri nanu" yo" se' boem wa nghoid. 21 Ngoo ri kham: yu lho: cang loo" su: gi ngoori jheddab su: nghoid. Ngoori jheddab su: ri nga" Phoo we' jheddab wa zi nghoid. Ngoo we' nyang: ri jheddab lho: Nga" da" gung nyang: ri toin" shid' wa zi nghoid ga: tid. 22 (Yuda sakarud anghoid da") Yuda goo" yug gi Aseing: we"- re" da" gung du: ngoonu" rigi: toin" shid' lho: Mougmyid byu yi ri atoin" shid' ga: rigi khasu" se' bui" wa lha"» ga: myid. 23 Yesu doem tid da" zigi Ngoori jhed' dab, su: gi nga" da" moo" myeing" ung: voin su: nghoid. Houg: yoomo nga" Phoo gi nyang: ri jheddab wa. Nga" phoo yo" ngoo we' nya: jang" moo yhe: lho: nyang: yo" dage" nyid wa zi nghoid. 24 Ngoori ajheddab su: gi nga" jhoug" myeing" ri ase' gyo: yu. Nanu" shau" gyo: yu" da" jhoug" myeing" gi nga" da" jhoug" myeing" anghoid. Ngoori nhang: kaid da" nga" pho jhoug" myeing" danghoid. 25 Nanu" yo" dage" nyid shi" da" uri he: khyoo: ri ngoo tid kyoo" bye. 26 Nghoidloug we' Phoo gi nga" myeing mo nhang: kaid wa da" pang" thoug su: ein: da" gyeungshang: da" Venyi: gi nanu" ri ja: khang" moo" jhoug" byid: wigi ngoo tid kyo" da" khyoo: dangain" ri doem myid boin: loo nhang: wa zi nghoid. 27 Ngoo gi myenjham" khyoo: nanu" ri byid: khoo bye:- hau: da" ngei pyo: myenjham" da" khyoo: gi nanu" ri moug myid byu yi byid: te" da" zi anghoid. Nanu" nheigloem: myid amyoo: goo. Nheugloem: athang goo"- gyoug we' agyug goo. 28 Ngoo gi akhid" loo" nghoid loug we' nanu" jang" moo doem ri" wa ein: wigi tid da" dang: ri nanu" shaug" gyoo: bye. Phoo gi nga" tho' agoo" je gyi: su: nghoid. Houg: su" nghoid yoomo nanu" ngoori jheddab nghoid rigi pho jhang khyoo: ngoo lo" ziri gau yi boem wa zi nghoid. 29 Hau: da" moozoo" bue" lo da" uri nanu" loem" jeing" loo wa shid' re" abui" shi" re" nyang: nanu" ri ngoo tid bye. 30 Mougmyid da" zoug: phoo gi jure" nyid bye. Houg: yoomo ngoo gi nanu" yo" dang:- myang" sho' shau" tid go" nyid wa da" ayo, ajo, loo. Hau: mougmyid zoug: phoo gi nga" tho' moo ce" amyeing" ajo. 31 Nghoidloug we' ngoo gi phoo rijheddab nyid da" khyoo:- mougmyid gi si' ca" nyid. Ngoo gi phoo ri jheddab yoomo ngoori tid kyo" da" khyoo: dangain" ri ngoo cang pyeing bye. He: joyoo mo to' lho: ngoonu" thu' lo" boem loo: shang ga: tid.
Main" Da" Zabyidd" Nei Yesu
1 Aseing Yesu gi Ngoo gi main" da" zabyidd" nei nghoid. Nga" phoo gi khyam: seing: nghoid. 2 Ngoo moo ashi" azei: da" akung: ako' dangain" ri nyang: cu: khyo, pyam lho: ashi" zei: da" akung: ako'' ri koem gi je zei: baja" ga: kyid shang: to. 3 Houg: yo' dakhyoo" ti"-- ngoo jhoug" byid: da" Mungdang: gi akhid" lang" nanu" ri kyid shang: nyid bye. 4 Ngoo yo" dadeing: daloem: za: nyid ge'. Ngoo we nanu" yo" dadeing: daloem: za: nyid wa. zabyidd" ako' gi agam moo atei" axo, to" nghoid rigi nyang: kyeing" ashi" yo" zei: wa zi anghoid. Houg: yo' dakhyoo" ti"-- nanu" we' ngoo yo" atei" axo, to" nghoid rigi ashi" yo" zei: boem wa zi anghoid. 5 Ngoo gi zabyidd" nei yang: nghoid. Nanu" gi akung: ako'' joem nghoid. Ngoo moo xo' wigi ngoo we nanu" yo' xo' to" ri gi na nu" ashi" myo" sho' yo" zei: loo wa khasu" wim gari ngoo yo' gang go" loo" lang" nanu" ci" we' ayo" koid loo. 6 Ngoo yo" axo' to" su: gi nghi: zain khyoo: cu: khyo, pyam wigi kyoug main lo" da" seig kung: yo" du wa. Byu yi gi hau akung ako joem ri cang sho: zheing" yu lho: myi: moo du kaid wigi nyang: gi nghe" joem: pyam wa.. 7 Nanu" gi ngoo yo" dadeing: daloem: za: nyid wigi Nga" da" Mungdang: we' nanu" da" nheigloem: ung: khoug: moo bo jo, nghoid rigi nanu" mho' da" akyu" ci: mho' ci: yo" yu boem wa nghoid. 8 Nanu" gi ashi" myoo" sho' zei loo yoomo Mangso da" myonhoo: phung: yoeb' ri thu' loo nhang. Hid: khyo" nanu" gi nga" cangzoo: yi bue" lo boem. 9 Phoo gi ngoori jheddab nyid yhangti"- ngoo we' nanu" ri jheddab nyid. nga" jheddab jang" moo nyid nyid ge'. 10 Ngoo gi nga" pho, amyein g" ri tam gyo: wigi nya jheddab jang moo nyid nyid yhang ti"- nanu nga amyeing" tam gyo rigi nanu" we' nga" jheddab jang" moo nyid nyid. 11 Nga" gau yi da" khyoo: gi nanu" moo jo, jo wigi nanu" da" gau yi zi we' joeb, byeung" loo baja"- ein: ngoo he: khyoo: nanu" ri tid bye. 12 Nga" da" amyeing" gi hid: nghoid ngoo gi nanu" ri jheddab yhangti"- nanu" nyang: cang" nyang: jheddab goo" ge,. 13 Nyang: nya: da" bidnoem pho shid' re" kangso' ab pyam sho' jheddab da" tho' moo je gyi: da" jheddab nheigloem: gi hang" moo we' aboo loo. 14 Nanu" ngoo tid da" mungdang: khyo" cang nghoid rigi nga" da" bidnoem yi nghoid boem wa. 15 Akhid" mo wigi nanu" ri ngoo join atid loo wa. Khasu" wim gari-join gi Yhoem: seing: koid da" moozoo" ri asi. Nanu" ri bidnoem da ein: loo wa khasu" wim gari pho jang" mo ngoo shau" gyo: khyoo: dangain" nanu" ri yo tid kyoo" bye. 16 Nanu" gi ngoori khyen: yu zi anghoid ngoo she nanu" rida khyen: yu- nanu gi thu lo" lho: geng teing ashi myoo" sho' zei: wa zi yo"- nga" myeng mo, nanu" mho' moo mho'- phoo nanu" ri byid baja" ngoo nanu" ri nyheung to". 17 He: zi gi nanu" ri ngoo byid: da" amyeing" nghoid- nyang cang" nyang jheddab goo" ge' ga: Yesu tid.
Mougmyid Byu Yi Ngheing" Da" Khyoo:
18 Mougmyid byu yi nanu" ri ngheing" nghoid rigi nanu" ri angheung" shi" ri ngoori shi" ngheing" bye khyoo: ri boin: nyid ge'. 19 Nanu gi moug myid ge' seing mo nghoid ri gi moug myid gi nanu" ri nyang: seung zi yhangti" jheddab wa zi nghoid. Nghoid loug we' ngoo gi nanu" ri he: mougmyid mo khyen: thu' too" bye: yoomo nanu" gi he: mougmyid yo' ci: asen. Houg: yoomo mougmyid gi nanu" ri ngheing" zi nghoid. 20 Join gi yhoem: seing: tho' moo je gyi: zi anghoid. Ngoo nanu" ri tid yu" bye: ziri myid boin ge'. Mougmyid byu wi gi ngoori shen" yhen nghoid rigi nanu" ri we shen" yhen wa zi nghoid. Nyangnu" gi nga" da" dang: ri cang lo" boem wa nghoid rigi nanu" da" dang: ri we' cang lo" boem wa zi nghoid. 21 Nghoidloug we' nyangnu" gi ngoori nhang: kaid da" Aseing: ri ase' boem yoomo nga" myeing yoomo nanu" ri shen" yhen boem wa zi nghoid. 22 Ngoo gi jure" lho: nanu" ri akho" kyo" nghoid rigi nyangnu" yooboo shoid vhang goo" wa zi anghoid. Akhid" nyangnu" gi nyang: nya: da" yooboo ri shoid vhang: ci: boem yoomo ci" we' ayo" ga: boem loo. 23 Ngoori ngheing" su: gi nga" phoo ri we' bo ngheing" zi nghoid bye. 24 Gyeing" nyang: ngoo gi goo" ji hang" we' akoid; da" moo" joem ri nyangnu" da" shid' moo akoid; shug loo: nyid rigi nyangnu" moo yooboo aboo wa zi nghoid. Akhid" koem gi nyangnu" gi ngoo koid; shug da" moo" ri myang boem bye. yoomo ngoori we' nga" phoo ri we' ngheing" boem bye. 25 Hid: su" ngheing" da" khyoo: gi-Nyangnu" da" tarha" moo lhid' to" ziyo' nyangnu" gi ngoori ci: yoo abo da" jang" moo- ngheing" boem ga: to" ziyo' dakhyoo" bue" lo da" khyoo: nyang: nghoid bye. 26 Mangso da" deung main" khyoo: ri phang shug da: pang" thoug wa da" Mangso: jang" mo gyoo lo da" pang" thoug Aseing: ein: da:- gyeungshang: venyi nghoid. Ngoo gi nyang: ri Pho jang" mo nhang: kaid' lho: nga" khyoo: ri sagsi: kham: wa zi nghoid. 27 Nanu" we' xang: shid" mo nyang:- ngoo yo" dage" nyid boem yoomo nga" da" khyoo: ri sagsi: kham: boem wa zi nghoid.
1 Re" da" loem" jeing" khyoo: abyo, yoin" loo" wa shid' re" he: khyoo: joem ri ngoo tid kyoo" khoo bye. 2 Nanu" gi Tarha" jung joem mo khaid thu' pyam zi shau" boem lho: Nanu" ri said loo wa hougsu" koid' mo nyangnu" gi Mangso moozoo" voin, vu, khyoo: nyang: nghoid ga: soin: yu wa da" ayo gi ju" loo wa, 3 Nyangnu" gi phoo ri ase' boem ngoori we' azheing: se' boem. Houg: yoomo hid: su" nanu" ri we' koid; lo boem wa. 4 Ngoo nanu" ri he khyoo: tid kyo" zigi nyangnu" we' nanu" ri tid yhang: ti" koid wa ayo, ju" ngoo nanu" ri no, mo tid too" bye zigi nanu" myid boin wa shid re: nghoid.
Gyeungshang: Da" Venyi: Zei: Da" Moozoo"
Ngoo gi nanu" yo" dage" nyid shi" yoomo nanu" ri hau: da" khyoo: no" re- atid kyoo. 5 Akhid" koem gi ngoori nhang: kaid su: jhang khyoo:- doem: loo" wam: bye. Nghoidloug we' nanu" hang" we' ngoo kha khyoo: loo" wa zigi amyid: boem nghoid da. 6 He: da" khyoo: ri ngoo tid kyoo" yoomo nanu" gi nheig gye" gye" gyo: koug nyid boem ago". 7 Nghoidloug we' nanu" ri ngoo Deing" deung tid nyid da: zigi nanu" shid' re" je ge'. Ngoo alo" nghoid rigi pang" thoug wa su: gi nanu" jhang gyoo" loo wa zi anghoid. Ngoo lo" thang: hau: da" zi: nanu" jhang khyoo: nhang: kaid wa nghoid. 8 Hau: da" yug ju" gyoo" loo lang" gi moug myid byu yi ri yoobo da" khyoo: we' deung main" da" khyoo: ri we' Mangso tarha" dang: phyed' wa da" khyoo: ri we' shoid vhang: khyoo: ri bang bang nyang: phang shug loo wam bye. 9 Houg: bang: gi ngoori loem" jeing" da" khyoo: aboo yoomo yooboo yo" sen: lho nyangnu" shoid nyid boem. 10 Ngoo gi pho jhang khyoo: loo" wa zi nghoid yoomo nanu" ngoori shau" myang loo: wa anghoid loo: yoomo we' nyangnu" gi deung main" da" tarha" yo' sen: lho: shoid nyid boem. 11 He moug myid ri vhoeb khang" su ri tarha" dang: bain phyed' bye yoomo dang: phyed' zi yo sen lho: nyangnu" shed nyid boem. 12 Nanu" ri ngoo tid wa zi myoo" sho' boo shi" nghoid loug we' akhid" nanu" yo" kham: yu goo" wa zi anghoid. 13 Nghoidloug we' Mangso da" khyoo:- deing byeung" da" tarha" ri phang shug da" gyeungshang: Venyi: ju" gyoo" loo lang" gi nanu" ri deung main" da" tarha" bain sho' re" phang shug wam bye. Hau: da" gyeungshang: Venyi: gi nyang: vho: da" khyoo: tid kyoo" wa zi anghoid. Nyang: shaug" gyoo: ci: gu: ri tid kyo" lho: thang: phyang" bue" loo wa khyoo: ri tid wa nghoid. 14 Nyang: gi ngoo tid dang ri gyo: ci. lho: nanu" ri doem tid kyoo" wa nghoid yoomo nga" da" myonhoo: phung" yoeb' ri doug bang loo nhang: wa zi nghoid. 15 Pho jang" moo jo, moo jo, gi ngoo yo" sen: nyid. Houg: yoomo gyeungshang: da" Venyi: gi ngoo byid: zi yu lho: nanu" ri doem tid kyoo" wa ein: wigi ngoo tid.
Nheig Koug Khyoo: Yo" Gauyi Da" Khyoo:
16 Ayo, dajhi' nghoid lang" gi nanu" ngoori myang loo wa zi anghoid. Hau: thang: ri ayo, dajhi' myang" lang" gi ngoori doem shau" myang goo" wa ga: tid. 17 Cangzoo: yi dayham" bang: nyang: cang" nyang: tid go" nyid zi gi ayo, dajhi' myang" lang" nanu" ngoori shau" myang loo: wa zi anghoid. Hau: thang: ri ayo, dajhi' myang" lang" gi ngoori doem myang wa ga: Aseing: tid lho: Hau: tho' moo gootu: we' Aseing: gi ngoo gi pho jhang loo" wa ga: we tid. 18 Ayo, dajhi' myang" ri ga: zigi ce: noem ri tid nau zi nghoid? ce: moozoo" khyoo: ri Aseing: tid nau nyid zi ngoonu" asi- ga: tid go" nyid boem. 19 Aseing Yesu gi nyangnu" nyang: ri houg: su" myid nau nyid boem zigi si' yoomo nanu" nyang: cang" ce: noem khyoo: ri myid: tid go" nyid go" ayo, dajhi' myang" lang" nanu" ngoori myang loo: goo" wa zi anghoid ein: wigi we' hau: thang: ri ayo, dajhi' doem myang" lang" gi ngoori doem shau" myang wa ein: wigi we' ngoo tid da" dang: yo" sen: wigi nghoid go" la". 20 Deing" deing nanu" ri ngoo tid da" zigi nanu" gi ngougmyeing" shoo" thui: to" nyid goo" wa. Nghoid loug mougmyid byu yi koem gi gau yi nyid boem wa. Nanu" sho" jhen: shau" nyid boem nghoid loug nanu" da" sho" jhen: khyoo: gi gau yi myen jhoem" khyoo: bue" loo wa. 21 Myiyi: dayug gi zoo: khu: wa uri gyi" sho' no zi shau" lho: bain khu: kaid lang" gi mougmyid moo byu dayug yo" khu: kaid yoomo nyang: kham: zo: da" noodam ri to" myhid' bye. 22 Nanu" moo akhid" uri nheig koug nyid boem nghoid loug we' nanu" yo" ngoo dalheing: doem shau" goo" wa nghoid yoomo nanu" hau: uri gau yi boem wa zi nghoid. Nanu" da" gau yi da" khyoo: ri hang" wigi we ayo" lhoid' yu pyam. 23 Hau: da" bidnyid ju" lang" nanu" gi ngoori ce: ja: we' mho' aca" loo. Deing" deing nanu" ri ngoo tid da" zigi nanu" mho' da" khyoo: dangain" ri nga" myeing yoo mo phoo Mangsoo gi nanu" ri byid: wam bye. 24 Akhid" ju" sho' nanu" gi nga" da" myeing ri lang lho: daja" we' amho, atid yu" boem shi". Nanu" da" ngei pyo: da" khyoo: byeung" byeung" yo" yu wa shid' re" Akyu" mho' nyid ge'. Nanu" mho' ziyo' dakhyoo" ti"- yo" yu boem wa zi nghoid.
Moug Myid Ri: Oung: Pyam Da" Khyoo:
25 He: da" khyoo: joem ri dangtu' ci: lho: ngoo tid bye. Hid: su" dangtu' aci: loo: Phoo Mangso da" khyoo: ri bang" bang tid kyo" loo wa da" ayo, gi ju" loo wa. 26 Hau: da" bidnyid ayo, ju" lang" nanu" gi nga" da" myeing ri lang: lho: Akyu" mho' yoid: lo boem wa. Houg: gi ngoo nanu" da" gung thid' mho' byid: wa ein: tid nau zi anghoid. 27 Phoo nyang: lhang"- nanu" ri jheddab nyid yoomo nghoid. Nanu" gi ngoori jheddab wigi ngoo gi Mangso jhang khyo" re" da" ziri loem" jeing" yoomo Phoo gi nanu" ri gye jheddab nyid. 28 Ngoo gi phoo jang" mo moug myid moo gyoo" lo. Akhid" he: moug myid ri kang" lho: pho jhang khyoo: doem loo" loo: wa ga: tid. 29 Cangzoo: yi zheing: tid da" zigi Akhid" Aseing: gi dangtu' aci: loo bang bang nyang: tid nyid bye. 30 Aseing Yesu gi khyoo: acang: joeb ri si' su: nghoid zigi akhid" ngoonu" se' boem bye. Aseing: ri hang" ci: myid: nyid cang aboo loo. Houg: yoomo Aseing: gi apyaid' ato: da" Mangso jang" mo gyoo" lo da" Aseing: nyang: nghoid ziri ngoonu" loem" jeing" boem bye"- ga: doem tid boem. 31 Yesu gi Akhid" nanu" ngoori loem" jeing" deing bye: go" la"» ga: myid. 32 Nanu" gi nyang: nya: yhoem: khyoo: nyang: phang: gang: go" lho:. Ngoo we' ngoo nyang: kyeing" ri nyhed: pyam' khoo' shau" wa da" ayo, gi akhid" lang" ju" loo bye. Nghoidloug we' phoo Mangsoo gi ngoo yo" dage" nyid yoomo ngoo gi ngoo nyang: kyeing" nyid zi anghoid. 33 Nanu" gi ngoo yo" dadeing: daloem: za: khyo" myen, jham" khyoo: yo" yu wa da" shid' re" he: dang: ri ngoo tid bye. Nanu" gi mougmyid moo nyid shi" da" uri shojhen: kyi" khyeug zi shau" zoo: goo" wa. Nghoidloug we' geing: geing: teing teing shang" yab jo, ge' ngoo gi he: mougmyid ri oung: pyam bye:- ga: tid.
Cangzoo: Yi Shid' Re" Akyu" Mho' Byid: Khyoo:
1 Hid: su" ga: bain tid kyo" thang: ri Aseing Yesu gi mougkhung: khyoo: nghang yu" to" lho: tid da" zigi O" nga" phoo we"- Ayo, ju" bye:- Nya: zoo: gi nya: pho da" myonhoo: phung" yoeb' ri thoin" pang byid: wa shid' re" re" zo: da" myonhoo: phung" yoeb' ri we' doug bang thu' loo nhang: we'. 2 Re" zoo: ngoo gi ngoo nya: lo, moo pho wigi ab byid: to" da" moo" ri apyaid' ato: kangso' yo" byid: wa da" shid' re" nang nyang: ri Byu xangsu: bain sho' mo ri yo" vhoeb khang" da" zoug: myeing" ri byid: too" bye. 3 Apyaid ato: kangso' ga: zigi dayug kyeing" da" Mangsoo ri we' nang nhang: kaid da" Yesu Khristu ri we' se' da" khyoo nghoid. 4 He: mougmyid moo ngoo gi re" da" myonhoo: phung: yoeb' ri thoin" pang byid: bye. Nang ngoori ab byid: da" moo" zeing: ri bain sho' zei: pyam bye. 5 O" nga" phoo we"- he: mougmyid ajo, aboo shi" re- phoo yo" ngoo dage" kham: yu nyid da" myonhoo: phung" yoeb ri akhid" uri pho da" shid' khoin" moo ngoori byid: we'. 6 He: mougmyid mo khyen: thu' lho: nga" da" lo, moo nang ab byid: da" byu yi ri ngoo gi nang ri we si' nhang: too" bye. Houg: bang: gi nang seing: ci: yoomo ngoori ab byid: bye. Nyangnu" gi re" da" mungdang: ri tam gyo: nyid boem abye:. 7 Ngoo moo yo" da" zi dangain" gi nang jang" mo nghoid zi akhid" nyangnu" se' boem abye:. 8 Ngoori nang ab byid: da" mungdang: ri ngoo gi nyangnu" ri doem ab byid: da" uri nyangnu" kham: yu boem bye. Nang jang" mo ngoo gyoo" lo da" khyoo: yo"- gyeing" nyang: nang ngoori nhang: kaid da" khyoo loem" jeing" boem bye. 9 Ngoo gi nyangnu" shid' re" akyu" mho' nyid. Mougmyid byu yi shid' re" akyu" mho' nyid zi anghoid. Nghoid loug we' nang ngoo ri ab byid: too" mo, shid re" akyu" mho' zi nghoid ciwim ga ri nyangnu" gi nang seing ci mo, nghoid. 10 Ngoo moo yo" da" zi dangain" ri Nang gi yhoem: seing: nghoid yoomo Nang yo" zi dangain" we' nga" zi nghoid nyid. Hau: da" zi yoo mo Nga" da" myonhoo: ngeilang phung" yoeb we' thu' loo nhang: bye. 11 Akhid" Ngoo gi re" jhang khyoo: doem loo wa nghoid yoomo ngoogi mougmyid moo anyid loo. Nghoid loug we' nyangnu" houg: bang: koem gi moug myid moo nyid wa zi nghoid. gyeungshang: thang da" nga" phoo we"- nang yo" ngoo dadeing: daloem: za: nghoid nyid yhangti"- nyangnu" we' dadeing: daloem: za: nghoid wa shid' re" nang ngoori ab byid: to" da" re" voolang myeing da" yoem: vhoo" phung yoeb' khyo" nyangnu" ri zung" lhug byid: we' o". 12 Ngoo gi houg: bang: yo" dage" nyid shi" da" uri nang ab byid: to" da" re" voolang myeing khyang" yoem: vhoo" yo' nyangnu" ri goem loem zung" lhug byid: bye. Ngoo gi nyangnu" ri zung" lhug goin coung: nyid. Yoomo Jhoem: mungdang: moo bo ziyo' dakhyoo ti"- shid: no byo, yoin" loo" wa da" dayug mo jan" lho: gootu: hang" we abyug loo" wa. 13 Akhid" gi ngoo Re" jhang khyoo doem loo loo: wa nghoid. Houg: bang: gi= ngoo gau yi te" da" gau yi khyoo:- byeung" byeung" yo" yu boem wa shid' re" He: mougmyid moo nyid shi" uri he: da" dang: ri ngoo tid. 14 Re" da" mungdang: khoin" nyangnu" ri ngoo byid: bye. Moug: myid byu yi gi nyangnu" ri avho: angei boem. Khasu" wim gari ngoo gi mougmyid yo" asen: ziyo' dakhyoo" ti"-- nyangnu" we' mougmyid yo" asen: nyid. 15 Nyangnu" ri he: mougmyid mo shu" thu' loo" wa da" shid' re" ngoo mho' nyid zi anghoid. Nyangnu" gi akhyeing" su da" lo, mo zung" lhug byid: wa shid' re" za: ngoo mho' nyid. 16 Ngoo gi he: mougmyid yo" asen: ziyo' dakhyoo ti"-- houg: bang: we' asen. 17 Houg: bang: ri deingmain" mungdang: khyo" wigi re" da" shid' re" goo" zu: xen, nyheing too" we' re" da" mungdang: gi deung main" da" khyoo, nghoid nyid. 18 Nang gi ngoori he: mougmyid khyoo: nhang: kaid ziyo' dakhyoo" ti"-- ngoo we' nyangnu" ri he: mougmyid khyoo: nhang: kaid. 19 Nyang: nu" gi re" shid re" gyeing" nyang: ab nung" too" mo bui" baja" nyangnu" shid re" nga" gungdu: nyang: nang ri ab nung" byid: bye.. 20 Ngoo gi nyangnu" da" shid' re" za: Akyu" mho' nyid zi anghoid. Nyangnu" kho" kyoo" yoomo ngoori loem" jeing" loo mo, shid' re" we' akyu" mho' nyid. 21 Moug: myid byu yi gi nang ngoori nhang kaid bye khyoo: ri loem" wa shid re nang gi ngoo moo nyid nyid lho: ngoo we' nang moo nyid nyid yhang: ti" hid: bang: we' yha" eig yug moo nyid baja". 22 Nang yo' ngoo gi dadeing: daloem: za: nghoid nyid yhangti"- nyangnu" we' houg: su" bue" loo wa shid' re" ngoori nang byid: da" myonhoo: phung" yoeb' ri nyangnu" ri we byid: too" bye. 23 Nyangnu" gi joeb byeung" khyo" daloem: za: bui" baja"- ngoo gi nyangnu" moo nyid nyid wigi nang gi ngoo moo nyid nyid . Houg: yoo mo nang ngoori nhang: kaid ziyo' - ngoori jheddab ziyo' dakhyoo" ti" nyangnu" ri jheddab khyoo: mougmyid byu yi se lo boem wa zi nghoid. 24 O" nga" phoo we"- Moug aphain" myid aphain" shi" mo Nang ngoori jheddab yoomo byid: to" da" myonhoo: phung" yoeb' ri Ngoori nang byid: too" mo, myang se' loo wa shid' re" ngoo nyid da" joyoo moo nyangnu" ri we' nyid nhang: nau. 25 Deing: byeung" nyid da" nga" phoo Mangsoo we"- moug myid gi nang ri ase' boem nghoid loug we' ngoo gi nang ri se' nyid. Hid: bang: gi ngoori nang wiginhang: kaid zi se' nyid boem. 26 Nga" da" tho' moo Nang to" da" jhed' khyeing: kang: khyeing: gi nyangnu" moo we bo jo, lho: ngoo we' nyangnu" da" nheugloem: moo yo" loung" jo, wa da" shid' re" Re" da" khyoo: nyangnu" ri ngoo si' nhang: bye. Xo, lho: wigi we' ngoo zei: loo" shi" wa ga: wigi akyu" mho'.
Yesu Ri: Myheig Tei" Lo" Da" Khyoo:
1 Hid: yhangti" akyu" bain mho' da" thang: ri Yesu gi nya: cangzoo: yi yo" dage" Kedron gyid nung" thei: tab' khyoo: gu: dab lo" boem. 2 Hau: joyoo moo khyam: daloem jo. Yesu yo" cangzoo: yi gi hau: khyam: khoug: khyoo: vang lo. Hau: joyoo moo Yesu yo' nya: cangzoo: yi gi atheing: loo: lhoung yhe: yu" yoomo nyang: ri ung" zo: pyam wa da" Yuda we' hau: joyoo ri se' to. 3 Roma gyizoo daphung: yo' khainjung agyi yi yo' pharishe nhang: kaid da" noku yhoem: moo" zung" da" gyi zoo yi ri shu" wigi Yuda gi hau khyam moo re" lho: nyangnu" gi myi bung we' myi doem we gyizi gyi kho joem ri ci boem. 4 Aseing Yesu gi nyang: thoung" shau" wa da" moozoo" dangain" ri si' gu nghoid yoomo houg: bang: jhang khyoo: jhen" yhe: lho. Nanu" hang" ri shoo: go" ga: yhe: myid. 5 Houg: bang: gi Nazared mo Yesu ri sho:- ga: tid boem. ‹‹Ngoo gi hau: yug nyang: nghoid bye:» ga: tid. Aseing: ri gyivoo yi da" lo, moo ab pyam wa da" Yuda gi houg: bang: yo' dage" yab jo. 6 Ngoo gi hau: yug nyang: nghoid bye: ga: Yesu tid lang" su- nyangnu" gi nung zoid' zoid loo" khare" boem lho: dangain" mo, myidjang: moo leung loo" khare" boem. 7 Houg: yoomo Aseing Yesu gi nanu" hang" ri shoo: go" ga: doem myid. Houg: bang: we' ‹‹Nazared mo Yesu›› ri sho: ga: doem tid boem. 8 Yesu gi hau: yug gi ngoo nyang: nghoid bye: ein: nanu" ri ngoo tid bye. Ngoo gi nanu" ngo ri sho: yen" go: nghoid lang" gi hid: bang: ri loo" nhang: kaid ge" ga: doem tid. 9 (Hid: su" ga: tid da" khyoo: gi phoo we"- ngoo nang ngoori ab byid: too" mo, mo dayug we' byug loo" zi aboo baja" ga: da dang byeung" loo wa shid re" nyang: tid to" ziyo' dakhyoo" bue" loo wa shid' re" tid zi nghoid.) 10 Simun Petru gi sham dacam" ci: re" nyang: gi sham ri she: yu lho: Khainjung agyi pho da" join dayug ri she: jab kaid uri hau: join, pho da" lo, yo shoid mo nukhyab byed gyoo" loo" khare". Hau: join, pho da" myeing gi Malkhu ga: su: nghoid. 11 Aseing Yesu Petru ri tid zigi sham: ri sham: byang moo doem xang too" we'. Nga" Phoo gi ngoori shug nhang: da" kyi" khyeug goem ri ngoo ashug wa ein: nang soin: rhe"
Anna Zoug: Pho Da" Shid' Khoin" Moo Yesu Ju" Yhe: Da" Khyoo:
12 Hau: thang: ri Roma gyizoo: yi yo"- Yuda byumyu" yi ri zung" lhug da" gyizoo: yi gi Yesu ri myheig tei" ci: lho: wigi Anna zoug: pho jhang khyoo: xang" shid" khe: shu" yhe: lo" boem. 13 Anna gi hau: zain re- khainjung agyi moo": Kayapha da" yug phoo nghoid nyid. 14 Kayapha gi byu myoo" sho' mo da" shid' re" byu dayug za: te: shid: zigi je ge ga: Yuda zoug: myeing" ci: mo, ri phajhi" byid: su: nghoid.
Petru Gi: Yusu Ri: Ngeug Pyam Da" Khyoo:
15 Simun Petru yo" gootu: cangzoo: dayug gi Aseing Yesu da" thang: moo cang yhe: lo. Gootu: cangzoo: dayug gi Khainjung agyi pho yo" si' goo" yoomo Yesu yo" dage" Khainjung agyi phoo da" yhoem: vang" khoug: khyoo: yo" bo vang lo. 16 Hau uri Petru gi vang" khyam: nghe shoid moo nyid kho''. Khainjung agyi phoo yo" si' go" da" cangzoo: phoo gi thu' re" lho: khoem" zung" da" zayam myhi, ri akhang" mho' wigi Petru ri fang yu. 17 Khoem" zung" da" zooyam myhi, gi nang gi fo: youg da" cangzoo: dayug nghoid da: anghoid la"» ga: myid: ri Petru gi ‹‹ngoo anghoid» ga: tid. 18 Houg: lang" khainjung agyi yi ri zung" da" gyizoo: yi yo"- dei: zoo: yi gi ngam" yoomo,- myi: gyu: nghe, da" myikhyoem' yam lheing moo yab jo, zoore"- myi: gang go" nyid boem. Petru we' houg: bang: yo" dage" myi: yab gang nyid.
Khainjung Agyi Zeing: Yesu Ri: Myid: Kyeing Yu" Da" Khyoo:
19 khainjung agyi moo": gi Yesu ri nya cangzoo: yi da" khyoo: ri we' nya: jhoug" myeing" joem da" khyoo: ri we' myid: kyeing joeb" yu. 20 Yesu phougtu" da" zigi Ngoo gi byu myoo" sho' mo da" shid' khoin" moo khanham we bang bang kho" kyo" jhoug" byid: loo bye. Khanham we' azoug" afu' ngoo akho" yu. 21 Houg: su" nghoid ri ci: wim nang ngoori myid: nyid la". Ngoo kho" kyo" jhoug" byid: da" khyoo: ri gyo: yu" mo ri myid: yu" we'. Ngoo kho" kyo" da" khyoo: ri nyangnu" se' boem bye. 22 Hid: su" ga: phougtu" lang" gung zung" gyizoo: dayug gi Yesu ri thoin: lho: khainjung agyi moo" gi «Nang hid: su" aphoug" akhyoid ge phougtu" la"» ga: tid. 23 Aseing Yesu gi Nga" dang: amain" nghoid rigi amain" khyoo: ri" toin" shid' we' deing da" khyoo: tid loug ciwim ngoori baid go" ga: tid. 24 Hau: thang: ri Anna: khokham" gi Yesu ri myheig tei" lho: khainjung agyi moo": Kayapha jhang khyoo yhe: de" kaid bye.
Petru Gi: Yesu Ri: Doem Ngeig Pyam Da" Khyoo:
25 Simun Petru gi myi: yab gang nyid da" uri Byu dayham" bang: gi nang we' hau: youg da" byen cang" anghoid la"» ga: myid: boem. Petru gi Ngoo anghoid ga: ngeig pyam. 26 Petru wigi nakhyab' jab phyed' byid: shau" da" join pho bidnoem Khainjung agyi dayoug da" join, phoo gi nang ri hau: yug yo" dage" khyam: moo ngoo myang- anghoid la"» ga: tid. 27 Petru gi ngoo anghoid ga: dalheing: doem ngeig pyam. Hau: uri nyang: gyo, toin: bye.
Pilaid Khokham" Jhang Ju" Yhi: Bye
28 Nabsoin: myo, hain" zoo"Yesu ri Kayapha jang" mo zi Pilaid khokham" khoo" khyoo doem shu" yhe: lo" boem. Yuda zoug yi gi lhed: kaid pui" myen" xoin zoo: wa da" shid' re"-noku thung" tarha" yo' dakhyoo" ti"-- nyang: nya: da" gung ri ced" shang: nyid boem yoomo hau: khokham" khoo" khyoo: abo cang yhe: boem. 29 Houg: yoomo Pilaid khokham" gi houg: bang: yo" shau" goo" wa shid' re" nghe: shoid khyoo: thu' re" lho: He: yug ri ce: ja: shoid vhang yoomo yooboo foin: go" ga: myid. 30 Houg: bang: gi yooboo daja: ja: shoid su: anghoid rigi zoug: pho jang" moo ngoonu" khe: shu" ri" wa zi anghoid ga: tid boem. 31 Pilaid khokham" we' nanu" nyang: he: yug ri shu" loo" ge'. Nanu" nya: thung" tarha" khyo" dang: lo" phyed' ge' ga: tid. Nyang: nu" koem gi ngoonu" gi byu hang" ri we' said pyam wa da" dang: ayo" phyed' ga: doem phougtu" boem. 32 (Nyang: nu" doem phougtu" da" khyoo: gi Yesu khasu" shid: wa da" khyoo: ri nang: tid too" bye: ziyo' dakhyoo" ti"-- bue" lo khyoo nghoid nyid.) 33 Pilaid khokham" gi yhoem: khoug: khyoo: doem vang lo" lho: wigi Aseing Yesu ri khe: yu lho: wigi nang gi Yuda yi da" khokham" nghoid la"» ga: myid. 34 Yesu gi he: dang: gyi khoin" ri zoug phoo khyo" myid: la". houg: su" anghoid lang" gi nga" da" khyoo: ri dayug yug re" koug yoomo myid: la"» ga: tid. 35 Pilaid khokham" gi nang gi ngoori Yuda byumyu" dayug yug nghoid ein: jho: nyid la". Nang ri nga" jhang khyoo: shu" ri" mo, gi Re" da" byumyu" yi yo"- khainjung agyi moo": yi za: danghoid ago". Nang gi ce: moo" shoid to" lha"» ga: doem myid. 36 Aseing Yesu tid zigi Nga" mungdain: gi he: mougmyid yo" asen: nghoid rigi ngoo gi Yuda byumyu" da" lo, moo avang loo" sho' nga" da" cangzoo: yi gi Meing: zain wa zi nghoid. Nga" da" mungdain gyeing" gi he: mougmyid yo" asen: ga: wigi tid. 37 Pilaid khokham" gi houg: su" nghoid rigi ‹‹Nang gi khokham" nghoid la".» ga: myid. Aseing Yesu gi Ngoo gi nang tid ziyo' dakhyoo" ti"- khokham" nghoid. Ngoo gi deung main" da" tarha" ri kho" kyoo" baja" ga: khu: re" lho: he: mougmyid moo gyoo" lo zi nghoid. Deungmain" da" tarha" yo" sen: mo, dangain" gi nga" da" dang: ri tam" gyo: ago" ga: tid kyo. 38 Pilaid khokham" gi deung main" ga: zigi ce: noem nghoid lha"» ga: myid.
Said Pyam Wa Shid' Re" Dang: Phyed Da" Khyoo:
Hau: thang: ri Pilaid khokham" gi byu yi jhang khyoo: thu' re" lho: wigi he: yug ri said pyam wa yi, da" yooboo gi ngoo ci: amyang ga: tid. 39 Nanu" da" thung" boo ri jo ziyo' dakhyoo ti"-- lhed: kaid da" pui" nam" ri thung byu dayug yug ri ngoo lhoung nhang: thu' kaid. Nanu" da" Yuda khokham" phoo ri nhang: kaid wa zi vhoo: go" la"» ga: myid. 40 Houg: bang: gi nyang: ri anhang: thu' alhoid pyoin kaid. Baraba ri nhang: thu' kaid we' ga: nyho: yoid lo boem. (Baraba gi khyangtoug: phoo nghoid nyid.)
1 Hau: thang: ri Pilaid khokham" gi Yesu ri khe: shu" loo" nhang: lho: gyoem thoung" wigi yug nhang. 2 Gyizoo yi gi zu: mug ri koid; yu lho: Yesu da" vhuloem moo zhung" byid. Byi ni sheing: ri we' nyang: ri foid byid: to. 3 Nyangnu" gi Yesu jang" moo tain" re" boem lho: «Yuda khokham" phoo kang: sheing: nyid baja" o"» ga: tid zoore thoin: byid: boem ago". 4 Pilaid khokham" gi nghi: khyoo: dalheing: thu' lo" lho: Meing: byu yi ri yu" ge'. He: yug ri said pyam wa shid' re" ngoo ce: yooboo we' amyang khyoo: nanu" we' si' wa shid' re" nanu" jhang khyoo: ngoo shu" thu' loo wa ga: tid. 5 Aseing Yesu we' zu: mug ri zhoung" ci: lho: byi ni sheing: ri void ci: wigi thu' re. Pilaid khokham" gi yu" ge' he: yug nyang: nghoid bye: ga: tid. 6 Khainjung agyi yi yo"- no ku" yhoem moo" zung" lhug da" gyizoo: yi gi Aseing: Yesu ri myang lang" nyang: ri pyang" zeing: moo baid jen" said pyam ge' ga: nyho: phau kaid ago". Pilaid khokham" gi Nanu" nyang: nyang: ri khe: shu" lo" lho: pyang" zeing: moo baid jen" said pyam ge' nyang: ri shid: dam byid: wa zigi ngoo ce: yooboo we amyang ga: tid. 7 Meing: byu phung: moo" gi He: yug gi nya: da" gung ri Mangso da" nya: zoo: nghoid ga: tid yoomo shid: dam kham: moin: da" khyoo:- ngoonu" da" tarha" moo bo nyid; ga: tid nyid boem. 8 Houg: bang: da" dang: zheing: shaug" gyoo: lang" Pilaid khokham" gi je gyo: gyoug lo. 9 Houg: yoomo yhoem: khoug: khyoo: doem vang lo" lho: Aseing Yesu ri Nang gi kha: mo re" zi nghoid lha"» ga: doem myid. Nghoidloug we' Aseing Yesu gi jed' we" aga: loo: tam" to. 10 Pilaid khokham" gi nang ri ngoo gi nang ri yo" nhang: kaid da" akhang" we' pyang" zeing: moo yo" baid jen" said pyam wa da" amyeing we' ci: zi nang asi rhe" ga: myid. 11 Aseing Yesu phougtu" zigi nang ri Mangsoo ab byid: yoomo za: hid: yhangti" yo" zi nghoid. Houg: yoomo ngoori we' re" da" lo, moo ab byid: su: gi yooboo je gyi wa nghoid- ga: tid. 12 Hid: su" ga: tid yoomo Pilaid khokham" gi Yesu ri doem lhoid kaid wa da" khyoo: sho: nyid. Nghoidloug we' Meing: byu yi gi he: yug ri doem lhoid kaid nghoid rigi Aseing: zoug moo" gi Ketha khokham" da" bidnoem anghoid loo. Hang" nghoid loug we' nyang: nya: da" gungdu: ri khokham" ga: tid su: gi Ketha khokham" ri tu: lhei" su: nghoid- ga: je nyho: lo ago". 13 He: da" dang: ri shaug" gyoo: lang" gi Pilaid khokham" gi Yesu ri nghe: shoid khyoo: shu" thu' lo" lho: Lug pyi" myhu" to" da" tarha" gabyam: tho' mo, zhungtang tho' moo zhoung: jo, nhang. (Hau: lug pyi" myhu" to" da" gabyam: ri Hebre myeing" khyo" gi Gabatha ga: da" joyoo nghoid.) 14 Hau: da" ayo, gi lhed: kaid pui" xang: shid" nyid"- bid gung zoo: tu: ri" yo, nghoid bye. Pilaid khokham" gi yu" ge' He: yug gi nanu" da" khokham" nghoid ga: Yuda byumyu" yi ri tid. 15 Houg: bang: gi nyang: ri said pyam ge' said pyam ge' baid jen" said pyam ge' ga: doem nyho: lo ago". Pilaid khokham" gi Nanu" da" khokham" phoo ri pyang" zeing: tho' moo baid jen" said pyam noug go" la"» ga: doem myid. khainjung agyi moo": yi gi ngoonu" moo Ketha khokham" mo led lho: gootu: khokham" anyid ga: phougtu" boem. 16 Houg: lang" Pilaid khokham" gi Yesu ri pyang" zeing: tho' moo baid jen" said pyam wa shid' re" nyangnu" da" lo, moo jha" ab kaid bye.
Yesu Ri: Pyang" Zeing: Tho, Moo Baid Jen" Said Da" Khyoo:
Houg: su" nghoid yoomo nyangnu" gi Yesu ri khe: shu" lo" boem bye. 17 Yesu gi vhu" gyab' boug ga: da" joyoo khyoo:- nya: pyang" zeing: ri vu, lho: yhe: lo. (Hau: da" joyoo ri Hebre myeing" khyo" Golagotha ga: zi nghoid.) 18 Houg: moo Yesu ri Pyang" zeing: moo baid jen" said boem bye. Yesu yo" dage" gootu: byu eig yug ri we' Yesu da" lo, yo shoid moo dayug- lo, koung" shoid moo dayug- pyang" zeing: tho' moo bo baid jen" said boem. Yesu rigi gung" gung moo kaid to. 19 Pilaid khokham" gi-xang: yoeb ladoo" mougsoug" lhid" lho: Aseing Yesu da" pyang" zeing: tho' moo tab too" nhang. Hau: da" mougsoug" gi (Yuda byu yi khokham" Nazared voo byu Yesu ga: zi nghoid. 20 Yesu ri pyang" zeing; tho' moo baid jen" said da" joyoo gi voogung yo" gye jhang yoomo byu myoo" sho' mo, gi hau: xang: yoeb ladoo" mougsoug" ri re" yo" nghab boem. Hau: mougsoug" ri Hebre myeing"- Latin myeing"- Greek myeing" khyo" lhid" tab to" boem. 21 Khainjung agyi yi gi Yuda khokham" ein: alhid" goo"- He: yug gi ngoo gi Yuda khokham" nghoid ga: tid su ein: za: date: lhid" too" ge' ga: Pilaid khokham" ri re" kyo" to" boem. 22 Pilaid khokham" gi Ngo lhid" to" khyo" nghoid bye: ga: doem tid. 23 Gyizoo: yi gi Aseing Yesu ri pyang" zeing: moo bain baid jen" to" thang: ri Yesu da: byisheing: ri myid: du khyo, lho: dayug dadu zheing: yu lo" ago"- nyangnu" gi nya: adang byisheing: ri nyangnu" me" lab, lho: yu lo" boem. Nghoidloug we' hau: da" byi: gi coeb' khyoo" aboo loo: yo, to" da" byi: nghoid yoomo 24 Gyizoo: yi gi he: byi: ri aceig goo"- me" lab lho: dayu shang ga: nyang: cang" nyang: sham: go" nyid. Gyizoo: yi hid: su" zheing: koid; da" khyoo: gi jhoem mungdang: moo Houg: bang: gi nya: da" byi: ri zheing: gam go. Nga" da" byi: sheung ri me" lab, lho yu lo" boem: gyizoo yi gi hid yhang: ti" koid boem ago". 25 Hau: da" uri Yesu da" nya: myhi' yo"- nya: myhi' da" nya: no gi Klopha da" yhoem: seing: myhi' Mari yo"- Magadala voo mo Mari we' Aseing Yesu da" pyang" zeing: yang moo yab jo, ago". 26 Yesu gi nya: myhi' yo"- nyang: jheddab da" cangzoo: phoo yab jo, ziri myang. Houg: yoomo Yesu gi nya: myhi' ri tid. He: yug gi re" zoo: nghoid- ga: tid. 27 Hau: thang: ri cangzoo: phoo ri he: yug gi re" myhi, nghoid ga: doem tid. Hau: yo, mo wigi hau: cangzoo: phoo gi nyang: yo" dage" nyid wa nya: yhoem: moo shu" lo".
Yesu Kang: Gyo" Lo" Da" Khyoo:
28 Hau: ayo, moo moo" dangain" bain bye: da" khyoo: ri Aseing Yesu gi si' yoomo Jhoem mougsoug" moo bo ziyo' dakhyoo" ti"- bue" loo wa shid' re" Yesu gi ngoo gyid shed' ga: tid. 29 Hau: joyoo moo gyid jhen: yo" kaid pyeing to" da" yam daloem: jo. Houg: bang: gi panglai gyid nyoeb thei" moo gyid jhen nyhoin" yu wigi jam pheing" yang: moo tab' lho: Yesu da" nhoid moo yhoin" jhoug boem. 30 Aseing Yesu gi hau: gyid jhen ri dajhi' shug lho: moo" bain bye" ga: tid zoore"- vhuloem ri nghoe" khyo kaid wigi kang: khyo" loo" khari" bye.
Yesu Da" Nam, Joug Moo Lham: Toid Thau" khyoo:
31 Yuda zoug: myeing ci: mo, gi pyang" zeing: moo baid jen" lhang" too" su: da" khyid ri youg khyau" lho: mang ri yu loo" wa da" amyeing" byid: wa da" shid' re" Pilaid khokham" ri mho' ago". Nyangnu" hid: su" mho' da" khyoo: gi hau: nyid gi bainthu wim: nyid" nghoid. yoomo Yuda Dougno: Bidnyid ri shid: mang doem: ri pyang" zeing: moo alhang" too" nhang: noug yoomo we' nghoid da- hau: Dougno: Bidnyid gi - gooki" led' da" gyeungshang: Dougno: Bidnyid nghoid. 32 Houg: yoomo gyizoo: yi gi re" lho: wigi Aseing Yesu yo" dage" pyang" zeing: moo bo jen" lhang" to" da" xang: shid" dayoug da" khyid ri youg khyau" lho: gootu: dayoug da" khyid: ri we' youg khyoug" byid: pyam boem. 33 Nyang: nu" Yesu jhang ju" yhe: uri nyang: shid: jo, bye: yoomo Yesu da" khyid: ri gi ayoug khyoug" loo: nghoid ago". 34 Nghoidloug we' gyizoo: dayug gi Yesu da" nam joug moo lham: toin wi thau" kaid da" uri dalheing: dam nyang: suid" yo" gyid yau thu' lo. 35 (He: khyoo: ri nanu" we' loem" jeing" loo wa shid' re" myojid" myang da" sagsi: dayug gi tid kyoo" bye. Houg: su" tid kyo" da" khyoo: gi deingmain" da" khyoo: nghoid. Hau: yug nyang: nya: dang: main" da" khyoo:- ri nyang: se.) 36 Hid: su" bue" lo da" khyoo: gi nya: shoo" youg dakhaid ri we' gyoug wa anghoid. wa ga: Jhoem: mungdang: moo bo ziyo' dakhyoo ti"- bue" lo da" khyoo: nghoid. 37 Gootu: da" jhoem dang: moo we' Byu yi gi nyangnu" thau" phoug too" su: ri nyangnu" yu" nyid boem wa"- ga: boo lhid" to" ga: tid.
Yesu Ri: Nyhoeb Shoung: Khyoo:
38 Hau: da" thang: ri Aramathi voo mo Yoseb gi Yesu da" nghain" doem ri yu shung: wa da" shid' re" Pilaid khokham" jang" moo akhang" yhe: mho'. Yoseb gi Yuda zoug myeing" ci: mo, ri gyoug yoomo boin: abang" da" Yesu cangzoo: dayug nghoid nyid. Pilaid khokham" amyeing" byid: yoomo Yoseb gi nghain" doem ri yhe: yu bye. 39 Shid' phyang" Aseing Yesu jang" moo myen gung ri re" shau" su:- Nikodi we' moora: yo" nam pyo: seig xu: lhu: lheig to" da" nam pyo: xu: soem" xi: juid" koo: ci: lho: Yoseb jang" moo bo cang yhe: lo. 40 Nya: eig yug gi Aseing Yesu da" nghain" doem ri yu khyo, lho: Yuda byumyu" yi da" mang myhoeb thung" jo ziyo' dakhyoo" ti"-- nam pyo: moora: yo" dage" pain" phyu: yo" thoeb boem. 41 Yesu ri pyang" zeing: moo baid jen" said da" joyoo nam moo khyam daloem jo. Hau: khyam: khoug: moo hang" ri we' anyhoeb' yu" shi" da" loeb seig daloem: jo. 42 Hau: nyid" gi Yuda Byu yi Dougno: Bidnyid ju" yid nghoid yoomo nghain" doem ri jang" moo jo, da" hau: loeb seig moo yhe: kaid to" boem.
Loeb Koem:
1 Akhid" Labain nyid" myo, myang zoo" ri Magadala Mari gi loeb' moo re" yu" da" uri loeb' khoem" mo da" lugloem: tu: se: pyam to" ziri yhe: myang. 2 Nyang: gi Simun Petru yo"- Yesu jheddab da" cangzoo: yi jhang khyoo gei lo" lho: Aseing: ri loeb mo wigiyu lo" byug boem bye:- khayoo: too" go" la'- asi ga: lo" tid kyo. 3 Houg: thang" ri Petru yo" goo tu: cangzoo: phoo gi loeb' khyoo: yhe: lo" ago". 4 Hau: eig yug gi dage" gei yhe: loo" nghoid loug- goo tu: cangzoo: phoo gi Petru tho' moo je yo" gei yoomo loeb' moo xang: shid" ju" yhe. 5 Nyang: gi yhe: goeb' yu" kaid ri loeb' khoug: moo pain" gyo" jo, ziri date: myang. Nghoidloug we' nyang: gi loeb khoug: moo avang loo" loo: za: nyid nyid. 6 Nya: thang: moo cang ju" re" da" Simun Petru gi ju" re" yo' loeb' khoug: khyoo: dain: vang lo" ri pain" khyoid: khyo, to" ziri we' 7 Yesu da" vhu" loem moo thoeb' da" vhu" thoeb' gi goo tu: joyoo moogyo" jo, ziri we lo" myang. 8 Hau: thang: ri loeb' moo xang: shid" ju" re" da" gootu: cangzoo: we' loeb' khoug: moo cang : vang lo" yu" da" uri houg: moo bue" lo da" khyoo: ri myang yoomo loem" jeing" loo bye. 9 (Yesu gi shid: jang" mo doem dei to'' loo" wa ga: da" jhoem: mungdang: ri houg: bang: akhid" ju" sho ase' gyo: boem shi.) 10 Hau: thang: ri cangzoo: eig yug gi doem tau" lo" ago".
Magadala Mari Ri: Yesu Da" Gung Toin" Shed
11 Mari gi loeb nam moo yab lho: ngau nyid. Nyang: gi ngau zoori loeb' khoug: moo goeb' yu" kaid da 12 Yesu da" gung doem vhuloem yang: moo Mouglagyoo: dayug khyid: thang: khyoo: dayug- Mouglagyoo: eig yug- bang: bang: phyu: da" byimi void ci: lho: zhoung: jo, ziri myang. 13 Hau: Mouglagyoo: eig yug gi myiyi: zoo: we" ci: wim ngau nyid lha"» ga: myid. Mari koem gi nyangnu"- Nga" Aseing: ri yu lo" byug bye. Nyangnu nyang ri khayoo: to" zi ngoo asi ga: tid. 14 Houg: su" tid lho: thang: khyoo: lheing: yu" kaid ri Yesu yab jo, ziri myang. Nghoidloug we' Yesu nghoid zi asi. 15 Yesu gi myiyi: zoo: nang we"- ci: koid ngau nyid. Nang hang" ri sho: yen? ga: myid. Houg: lang" Mari gi Yesu ri khyam: zung" su: ga: jho: lho: nheig boo phoo we" nang nyang ri yu lo" nghoid rigi nang kha joyoo moo to" zi ngoori tid kyoo" we' ngoo nyang ri yhe: yu ci: loo" wa. 16 Aseing Yesu gi Mari we" ga: yoid. Houg: lang" Mari gi lheing: yu" lho: Hebre myeing" khyo" Raboni- ga: tu. (Raboni ga: da" dangkang: gi sara: ga: da" dang: nghoid.) 17 Yesu gi ngoori azei: ci:- ngoo gi nga" pho jhang khyoo: ashau" do, loo" shi"- nghoid loug we' nga" mang nhung" be jhang khyoo: yhe: lho: nga" phoo ga: da" Nanu" da" nya: phoo- Nga" Mangsoo ga: da" nanu" da" Mangso jhang khyoo:- ngoo doem tau" loo" loo: wa da" khyoo: ri tid kyoo" ge' ga: tid. 18 Houg: yoomo Magadala Mari gi cangzoo: yi jhang khyoo: lo" lho: nyang: Yesu ri nyang: myang khoo, bye: da" khyoo: yo' nyang: nyang ri pyeung: kaid da khyoo: ri lo" tid kyo" Aseing: khasu" ga: pyeung: kaid da" khyoo: ri lo" tid kyo.
Nya: Cangzoo: Yiri Nya: Gung Thu' Shoug Khyoo:
19 Cangzoo: yi gi Yuda zoug: myeing" ci: mo, ri gyoug yoomo Labain myen, gamgung yoo ri yhoem: khoem" myhed" pyam lho: zeung: foem: nyid boem. Hau: da" uri Yesu gi ju" lo lho: nyangnu" da" mo, phung: gung moo lo yab jo. Nanu" moo myenjham" ngei pyo: khyoo: dajo, nyid baja" ga: tid. 20 Houg: su" bain tid lang" gi Yesu da" lo, yo nam joug ri cangzoo: yi ri toin" shid. Cangzoo: yi gi Yesu ri shau" myang boem yoomo gau yi nyid boem. 21 Hau: thang: ri we' dalheing:- Yesu gi nanu" moo myenjham" khyoo: dajo, jo, baja" ga: nga" phoo gi ngoori nhang: kaid ziyo' dakhyoo" ti"-- nanu" ri we' ngoo nhang: kaid ga: tid. 22 Houg: su" bain tid thang: ri Yesu gi cangzoo: yi da" tho' moo so' moid kaid lho: gyeungshang: da" Venyi: ri kham: yu ge" ga: tid. 23 Nanu" gi sube" da" yooboo ri khyoid pyam byid: ri nyangnu" gi yooboo gyoid loo" wa zi nghoid. Nanu" wigi akhyoid byid: nghoid rigi nyangnu" da" yooboo gi khyoid pyam shau" wa zi anghoid ga: tid.
Yesu Yo' Thoma
24 Yesu jure" da" ayo, moo (Zoo: zoem" ga: myheing da") cangzoo: daxe eig yug mo, dayug nghoid da" Tho" ma gi cangzoo: yi yo" dage" anyid eung:. 25 Houg: yoomo cangzoo: byen cang" yi gi Yesu ri ngoonu" myang bye:- ga: lhoem tid kyo" boem. Thoma gi lo, mo da" ten" zei: baid khoo: yo' nam joug mo da" dam, khoo: ri za: ashau" soeb' yu" rigi ngoo aloem" ga: tid. 26 Hau: thang: shed nyid" koo: myang" ri cangzoo: yi gi yhoem: khoug: moo doem zheing: foem: to" boem. Thoma we' dage" nyid. khoem" dangain" ri myhed" too" nghoid loug we' Aseing Yesu gi vang lo wigi nyangnu" da" mo, phung: gung moo yab jo, lho: nanu" moo myenjham" khyoo: dajo, jo, baja" ga: tid. 27 Hau: thang: Thoma ri re" lo, nyoug" yo" hid: moo thau" yu" we' nga" lo, joem ri we yu" we' Re" da" lo, yhoin" kaid lho: nga" nam joug moo soeb yu" we' aloem" jeing" loo: loem shoid khyoo: akoid. Loem" jeing" nyid we' ga: tid. 28 Thoma gi Nga" Aseing:- Nga" Mangsoo- nang nghoid bye: nhung: lha"» ga: phaug tu". 29 Aseing Yesu gi nang gi ngoori myang lho: daloem" la". Ngoori amyang loug loem" jeing" mo gi ngi lho, boem wa" ga tid.
He: Jhoem: Pug Da" Myid Too" jang:
30 Yesu gi he: da" mougsoug" moo abo lhid" to" da" mau" pho" alhoo: again myoo" sho' ri nya: cangzoo: yi da" Shid khoin" moo toin" shid bye. 31 Nghoidsho' loug we' Yesu gi Mangso da" nya: zoo: Meshia nghoid da" khyoo: ri nanu" loem" jeing" loo wa ziyo' nanu" nyang ri loem" jeing" lho: kang so' yoo" wa shid re" he khyoo: joem ri lhid" to" zi nghoid.
Cangzoo: Nyhed' Youg Bang: Ri: Yesu Thu' Shoug Khyoo:
1 Hau: thang: ri Yesu gi Tiberi gyid nung" yam moo cangzoo: yi ri nya: gung dalheing: doem thu' shug. Thu' shug da" aved' gi hid: su" nghoid nyid. 2 Simun Petru- Thoma (Galile meing: Kana voo byu) Nathanela- Zebedi da" nya: zoo: yi yo" cangzoo: gootu: eig youg bang: gi dage" nyid boem ago". 3 Simon Petru gi gootu: ri ngoo ngoodo, kuang yhe: loo" wa ga: tid. ‹‹ Houg: bang: gi ngoonu" we' bo cang ri" wa ga: tid boem.» Houg: yoomo nyangnu" gi lhid' yo' ngoodo, kuang thu' yhe: lo" boem. Nghoid loug we' hau: myen goin" nyangnu" ci" we' ashau" boem. 4 Bid xain" lo da" uri Yesu gi gyid yam moo yab jo, nghoid loug we' cangzoo: yi gi Yesu nghoid zire: ase' boem. 5 Hau thang: ri nyang:- nyangnu" ri zoo: lu: yi we"- nanu" ci: ayoo" shi" goo" rhe" ga myid:-. houg: bang: gi ‹‹Ci: ayo" boem o"» ga: phoug tid. 6 Yesu gi nanu" lhid' lo, yo shoid khyoo:- goin re" du" yu" ge' nanu" ngoodo' shau" kuang boem ago" wa ga: tid. Aseing: tid ziyo' dakhyoo" ti"- nyangnu" gi goin ri du" khyo' kaid lang" ngoo: myo: yoo" yoomo ayo" doem lang thoid yu boem ago" da. 7 Yesu jhed' dab, da" cangzoo: phoo gi Aseing: danghoid nhung: o"- ga: Petru ri tid kyo. Aseing: nghoid ga: zi ri shaug" gyoo: lang" Petru gi nyang: khyoid to" da" byi: ri gung moo baid yeig lho: wigi gyid nung" khyoo: byam gyoo" loo" khare". Khasu" wim gari nyang gi byi mi khyoid pyam lho: mod zei: nyid yoo mo nghoid. 8 Cangzoo: goo" ji gi lhid' yo' gyid yam khyoo to" lho: ngoodo' byeung" sho' bo da" goin ri lang she: yu" boem. Nyangnu" gi gyid yam mo wim: xi: lam' koo: ve: jang" moo zheing: nyid boem. 9 Nyangnu" gi lhid' tho' mo gyo" lho: tung: gung moo ju" lo lang" zooyho' ri we' myi: gyu: moo kang: da" ngoodo ri we' lo" myang boem 10 Yesu gi nanu" akhid" yo" da" ngoodo' dayham" ri ci: loo ge" ga tid. 11 Simun Petru gi lhid' tho' moo do, lo" lho: ngoodo' zeing: joem yo" byeung" jo, da" goin ri tung: gung ju" sho' she: yu da. Ngoodo' dasho: wim: xe soem" du: bo da:- ngoodo' houg: myhoo, myoo: nghoid loug we' goin gi ajeig loo. 12 Yesu gi lo zoo: ge'. ga: nyangnu" ri lhoung nyangnu" da" Aseing: nghoid ziri se' boem yoomo cangzoo: yi kha: yug we' nang hang nghoid lha"» ga: avoem" myid: boem nghoid da. 13 Yesu gi nyangnu" nyid da" jang" moo yhe: lho: zooyho' ri yu wigi nyangnu" ri byid. Ngoodo' ri we' houg: su" yu lho: byid. 14 He zigi nyang: shid: jang mo doem dei to'' lo thang ricangzoo: yi ri gung thu' shed da" zigi he: lheing: yo" ri soem" lheing: nghoid bye.
Yesu Yo" Petru
15 Cangzoo: yi bain zoo lang"Yesu gi Yohan nya: zoo: Simun we"- hid: bang: jheddab tho' moo nang ngoori je jheddab la"» ga: Simun Petru ri myid. Simun gi nghoid Aseing: we"- nang ri ngoo jheddab zi nang se' ga: tid. 16 Yesu dalheing: doem tid zigi Yohan nya: zoo: Simun we"- nang ngoori jheddab la"» ga: doem myid. ‹‹ Petru gi nghoid Aseing: we"- nang ri ngoo jheddab zi nang si' gu nghoid ga: tid›› Aseing Yesu gi nga" yang joem ri zung" nyid we' ga: tid. 17 Soem" lheing: ein: lheing: we' yesu gi Yohan nya: zoo: Simun we"- nang ngoori jheddab la"» ga: doem myid. Hid: su" soem" lheing: ju" sho' myid: nyid yoomo Petru gi nheig koug lo wigi Aseing: we" nang gi ce: noem ri we' dangain" si' su: nhgoid' - nang ri ngoo jheddab zigi nang se' ga: doem tid. Yesu gi nga" yang joem ri zung" nyid' we' ga: doem tid. 18 Deing" deing nang ri ngoo tid zigi nang gi ngi shi" da" uri ri ri soin' ci: lho: loo" nau jang" moo loo" se' nyid. Mang loo" lang" gi nang gi eig lo, goin" tu: lho: subi" gi nang ri tei" wigi nang anau lo" da" joyoo khyoo: shu" lo" boem wa ga: tid. 19 (Hid: su" ga: tid jang" moo Petru gi ci: te" da" shid gyoin yo"- Mangso da" myonhoo: phung" Yoeb thoin" pang byid: wa da" khyoo:- Yesu tid shed' zi nghoid.) Hid: su" ga: bain tid lang" Petru ri nga" thang: moo cang we' ga: Yesu tid.
Yesu Yo" Cangzoo: Gootu:
20 Petru gi lheing: yu" kaid da" uri nya: thang: moo Yesu jheddab da" cangzoo: phoo ri myang. Hau: yug gi myen xoin: zoo: uri Yesu da" nam moo nghe: to" lho: Aseing we"- Aseing ri gyivoo yi da" lo, moo ab pyam wa su: gi kha yug nghoid wa lha"» ga: myid su: nyang: nghoid nyid. 21 Petru gi hau: da" cangzoo: phoo ri myang lang" Aseing: we" he: yug gi ci: te" su: nghoid lha"» ga: Yesu ri myid. 22 Yesu gi ngoo doem gyoo" re" da" bidnyid ju sho' nyang: ri dei nyid nhang: nau nghoid rigi houg: gi nang yo' ci: sen: lha". Nang gi nga" thang: cang we' ga: tid. 23 Houg: su" nghoid yoomo hau: cangzoo: phoo gi ashid: loo: wa ga: da" lu dang: gi cangzoo: yi da" akhoug: moo byo sain" loo" bye nghoid loug we' Yesu gi-hau: cangzoo: phoo gi ashid: loo: wa ga: tid nau zi anghoid. Ngoo doem gyoo" lo da" bidnyid ju" sho' nyang: ri dei nyid nhang: nau nghoid ri hau: zigi nang yo" ci: asen: la". ein: wigi date: tid zi nghoid. 24 He da" khyoo: ri lhid" too" su: gi hau: khyoo: ri tid da" cangzoo: phoo nyang: nghoid bye. Nyang: tid da" khyoo: joem gi deung main" nyid ziri ngoonu" se'. 25 Yesu zei: da" moozoo" goo tu: myoo" sho' jo, shi". Hau: zei: to" da" moozoo" dangain" ri daja: thang: moo daja: lhid" to" nghoid rigi mougmyid gyab, goin" jang" moo hau: mougsoug" pug joem too" wa da" jo yoo lang" jo, loo: zi anghoid ein: ngoo myed o".