The New Testament of our Lord and Saviour Jesus Christ

ꓟ-ꓔꓲ 1

1 ꓓ-ꓪꓵ ꓠꓬ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓢꓲ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓬꓰ-ꓢꓴ ꓙꓲ-ꓢꓴ ꓬꓲ ꓫꓵꓽ ꓚ ꓠꓬ ꓕꓱ ꓡꓱ ꓥꓳ꓿ 2 ꓮ-ꓐ-ꓡ-ꓦ ꓠꓬ ꓬꓲ-ꓢ ꓬꓲ ꓐꓹ ꓐ ꓥꓳ꓿ ꓬꓲ-ꓢ ꓠꓬ ꓬ-ꓗꓴ ꓬꓲ ꓐꓹ ꓐ ꓥꓳ꓿ ꓬ-ꓗꓴ ꓠꓬ ꓬꓴ-ꓔˍ ꓐꓰ ꓬꓲ ꓬꓲꓼ ꓬꓲꓸ ꓠꓬꓲ ꓐꓴ ꓐꓹ ꓐ ꓥꓳ꓿ 3 ꓬꓴ-ꓔ ꓠꓬ ꓕ-ꓟ ꓗꓪ ꓐꓰ ꓦꓵꓻ ꓔ ꓟ ꓩ-ꓡꓷ-ꓢꓶˍ ꓐꓰ ꓢꓰ-ꓡꓽ ꓬꓲ ꓪꓽ ꓐꓹ ꓐ ꓥꓳ꓿ ꓩ-ꓡꓷ-ꓢꓶ ꓠꓬ ꓧꓷ-ꓞꓷ-ꓠꓳ ꓬꓲ ꓐꓹ ꓐ ꓥꓳ꓿ ꓧꓷ-ꓞꓷ-ꓠꓳ ꓠꓬ ꓮ-ꓣ-ꓟꓷ ꓬꓲ ꓐꓹ ꓐ ꓥꓳ꓿ 4 ꓮ-ꓣ-ꓟꓷ ꓠꓬ ꓬ-ꓟꓲ-ꓠ-ꓓ ꓬꓲ ꓐꓹ ꓐ ꓥꓳ꓿ ꓬ-ꓟꓲ-ꓠ-ꓓ ꓠꓬ ꓠ-ꓢꓷ ꓬꓲ ꓐꓹ ꓐ ꓥꓳ꓿ ꓠ-ꓢꓷ ꓠꓬ ꓢ-ꓟꓱ ꓬꓲ ꓐꓹ ꓐ ꓥꓳ꓿ 5 ꓢ-ꓟꓱ ꓠꓬ ꓡꓽ-ꓧꓳꓽ ꓗꓪ ꓐꓰ ꓦꓵꓻ ꓔ ꓟ ꓐꓳ-ꓮ-ꓢꓶ ꓬꓲ ꓐꓹ ꓐ ꓥꓳ꓿ ꓐꓳ-ꓮ-ꓢꓶ ꓠꓬ ꓣꓴ-ꓕꓱ ꓗꓪ ꓐꓰ ꓦꓵꓻ ꓔ ꓟ ꓳ-ꓐꓷꓽ ꓬꓲ ꓐꓹ ꓐ ꓥꓳ꓿ ꓳ-ꓐꓷꓽ ꓠꓬ ꓬꓰ-ꓫꓲ ꓬꓲ ꓐꓹ ꓐ ꓥꓳ꓿ 6 ꓬꓰ-ꓫꓲ ꓠꓬ ꓪ ꓔꓲ ꓓ-ꓪꓵ ꓬꓲ ꓐꓹ ꓐ ꓥꓳ꓿ ꓓ-ꓪꓵ ꓠꓬ ꓢꓳ-ꓡꓳ-ꓟꓳ ꓬꓲ ꓐꓹ ꓐ ꓥ ꓢꓲ꓾ ꓢꓳ-ꓡꓳ-ꓟꓳ ꓔꓯ ꓠꓬ ꓪꓴ-ꓡꓲ-ꓬ ꓟꓶꓽ ꓛꓵꓽ ꓟ ꓗꓪ ꓐꓰ ꓦꓵꓻ ꓟꓶˍ ꓟ ꓥꓳ꓿ 7 ꓢꓳ-ꓡꓳ-ꓟꓳ ꓠꓬ ꓣꓱ-ꓧꓳ-ꓐꓳ ꓬꓲ ꓐꓹ ꓐ ꓥꓳ꓿ ꓣꓱ-ꓧꓳ-ꓐꓳ ꓠꓬ ꓬ-ꓑꓲ-ꓬ ꓬꓲ ꓐꓹ ꓐ ꓥꓳ꓿ ꓬ-ꓑꓲ-ꓬ ꓠꓬ ꓬ-ꓢ ꓬꓲ ꓐꓹ ꓐ ꓥꓳ꓿ 8 ꓬ-ꓢ ꓠꓬ ꓬꓳ-ꓫ-ꓩ ꓬꓲ ꓐꓹ ꓐ ꓥꓳ꓿ ꓬꓳ-ꓫ-ꓩ ꓠꓬ ꓬꓰ-ꓧꓳ-ꓡ-ꓟꓷ ꓬꓲ ꓐꓹ ꓐ ꓥꓳ꓿ ꓬꓰ-ꓧꓳ-ꓡ-ꓟꓷ ꓠꓬ ꓪꓴ-ꓢꓲ-ꓬ ꓬꓲ ꓐꓹ ꓐ ꓥꓳ꓿ 9 ꓪꓴ-ꓢꓲ-ꓬ ꓠꓬ ꓬꓳ-ꓕ ꓬꓲ ꓐꓹ ꓐ ꓥꓳ꓿ ꓬꓳ-ꓕ ꓠꓬ ꓬ-ꓧ-ꓢꓶ ꓬꓲ ꓐꓹ ꓐ ꓥꓳ꓿ ꓬ-ꓧ-ꓢꓶ ꓠꓬ ꓧꓷ-ꓫꓲ-ꓘꓷ-ꓬꓼ ꓬꓲ ꓐꓹ ꓐ ꓥꓳ꓿ 10 ꓧꓷ-ꓫꓲ-ꓘꓷ-ꓬ ꓠꓬ ꓟ-ꓠ-ꓢꓲ ꓬꓲ ꓐꓹ ꓐ ꓥꓳ꓿ ꓟ-ꓠ-ꓢꓲ ꓠꓬ ꓬ-ꓟꓷ ꓬꓲ ꓐꓹ ꓐ ꓥꓳ꓿ ꓬ-ꓟꓷ ꓠꓬ ꓬꓳ-ꓢꓲ-ꓬ ꓬꓲ ꓐꓹ ꓐ ꓥꓳ꓿ 11 ꓬꓳ-ꓢꓲ-ꓬ ꓠꓬ ꓑ ꓫꓬꓼ ꓐꓴ ꓔꓯ ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰˍ ꓕꓯ ꓦꓵꓻ ꓔ ꓢꓴ ꓬꓰ-ꓗꓳ-ꓠꓲ-ꓬˍ ꓐꓰ ꓬꓲ ꓬꓲꓼ ꓬꓲꓸ ꓠꓬꓲ ꓐꓴ ꓐꓹ ꓐ ꓥꓳ꓿ 12 ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰ ꓗꓸ ꓠꓯꓸ ꓦꓵꓻ ꓟꓶ ꓢꓴ ꓢ-ꓡ-ꓕꓰ ꓬꓲ ꓐꓹ ꓐ ꓠꓬ ꓬꓰ-ꓗꓳ-ꓠꓲ-ꓬ ꓥꓳ꓿ ꓢ-ꓡ-ꓕꓰ ꓠꓬ ꓢꓳ-ꓡꓳ-ꓑ-ꓑꓷꓼ ꓬꓲ ꓐꓹ ꓐ ꓥꓳ꓿ 13 ꓢꓳ-ꓡꓳ-ꓑ-ꓑꓷ ꓠꓬ ꓬ-ꓐꓲ-ꓬ ꓬꓲ ꓐꓹ ꓐ ꓥꓳ꓿ ꓬ-ꓐꓲ-ꓬ ꓠꓬ ꓬꓲ-ꓡꓲ-ꓬ-ꓘꓷ ꓬꓲ ꓐꓹ ꓐ ꓥꓳ꓿ ꓬꓲ-ꓡꓲ-ꓬ-ꓘꓷ ꓠꓬ ꓬ-ꓢꓳ ꓬꓲ ꓐꓹ ꓐ ꓥꓳ꓿ 14 ꓬ-ꓢꓳ ꓠꓬ ꓢ-ꓓꓴ ꓬꓲ ꓐꓹ ꓐ ꓥꓳ꓿ ꓢ-ꓓꓴ ꓠꓬ ꓬ-ꓚꓰꓼ ꓬꓲ ꓐꓹ ꓐ ꓥꓳ꓿ ꓬ-ꓚꓰꓼ ꓠꓬ ꓬꓲ-ꓡꓲ-ꓪꓴ ꓬꓲ ꓐꓹ ꓐ ꓥꓳ꓿ 15 ꓬꓲ-ꓡꓲ-ꓪꓴ ꓠꓬ ꓬꓲ-ꓡꓲ-ꓬ-ꓢ ꓬꓲ ꓐꓹ ꓐ ꓥꓳ꓿ ꓬꓲ-ꓡꓲ-ꓬ-ꓢ ꓠꓬ ꓟ-ꓔ-ꓠ ꓬꓲ ꓐꓹ ꓐ ꓥꓳ꓿ ꓟ-ꓔ-ꓠ ꓠꓬ ꓬ-ꓗꓴ ꓬꓲ ꓐꓹ ꓐ ꓥꓳ꓿ 16 ꓬ-ꓗꓴ ꓠꓬ ꓟ-ꓡꓲ ꓬꓲ ꓤ ꓖꓴ ꓬꓳ-ꓢꓷ ꓬꓲ ꓐꓹ ꓐ ꓥꓳ꓿ ꓙꓲ-ꓢꓴ ꓟꓬꓱ ꓔ ꓟ ꓬꓰ-ꓢꓴ ꓠꓬ ꓟ-ꓡꓲ ꓡꓰ ꓦꓵꓻ ꓔ ꓟ ꓤꓽ ꓥꓳ꓿ 17 ꓖꓳ ꓡꓱ ꓠꓬꓲ ꓮ-ꓐ-ꓡ-ꓦ ꓗꓪ ꓐꓰ ꓓ-ꓪꓵ ꓗꓪ ꓛꓲ ꓞꓲ ꓡꓲ ꓤꓶ꓾ ꓓ-ꓪꓵ ꓗꓪ ꓐꓰ ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰ ꓗꓪ ꓛꓲ ꓝꓮꓲ ꓞꓲ ꓡꓲ ꓤꓶ꓾ ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰ ꓟ ꓗꓪ ꓐꓰ ꓙꓲ-ꓢꓴ ꓗꓪ ꓛꓲ ꓝꓮꓲ ꓞꓲ ꓡꓲ ꓤꓶ ꓥ ꓡꓳ꓿ 18 ꓬꓰ-ꓢꓴ ꓙꓲ-ꓢꓴ ꓔꓯ ꓦꓵꓻˍ ꓟ ꓚ ꓟꓲꓽ ꓠꓬ ꓕꓱ ꓡꓱ ꓥꓳ꓿ ꓟ-ꓡꓲ ꓠꓬ ꓬꓳ-ꓢꓷ ꓔꓯ ꓠꓲꓹ ꓒꓴ ꓗꓷ ꓗꓸ ꓠꓯ꓾ ꓬꓲ ꓪꓽ ꓟꓽ ꓝꓱꓺ ꓡꓯꓽ ꓘꓳ ꓢꓰ ꓕꓯ ꓡꓰ꓾ ꓢꓲ-ꓫꓬ-ꓟ-ꓦ ꓗꓪ ꓐꓰ ꓟ-ꓡꓲ ꓖꓳ ꓓꓱ ꓗꓪ ꓤ ꓠꓱ ꓶꓻ ꓞꓹ ꓟ ꓢꓷꓸ ꓡꓰꓳ꓿ 19 ꓬꓲ ꓤ ꓖꓴ ꓬꓳ-ꓢꓷ ꓠꓬ ꓔꓱꓹ ꓜꓳꓽ ꓢꓴ ꓕꓲ ꓣꓳ ꓥ ꓢꓲ꓾ ꓟ-ꓡꓲ ꓔꓯ ꓞꓳ ꓜꓴ ꓟꓲꓽ ꓙꓬ ꓗꓪ ꓫꓸ ꓔꓳ ꓡꓰ ꓝꓲ ꓠꓲꓹ ꓟꓽ ꓫꓵꓺ ꓠꓬꓲ꓾ ꓬꓲ ꓔꓯ ꓘꓳ ꓫꓱ ꓫꓱˍ ꓒꓰꓻ ꓗꓷ ꓠꓹ ꓟ ꓓꓵꓽ ꓙˍ ꓡꓳ꓿ 20 ꓬꓲ ꓕꓱ ꓡꓱ ꓓꓵꓽ ꓙ ꓞꓷꓹ ꓗꓷ ꓗ ꓠꓯ꓾ ꓢꓲ ꓒꓽ ꓬꓲ ꓝꓲ ꓓꓴ ꓕꓲ ꓣꓳ ꓬꓲ ꓔꓯ ꓬꓲꓼ ꓟꓬ ꓘꓳꓻ ꓟ ꓗꓪ ꓐꓰ ꓟꓳꓸ ꓖꓶ ꓡ ꓢꓲ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓬꓳ-ꓢꓷꓽꓳ꓾ ꓟ-ꓡꓲˍ ꓐꓰ ꓝꓱꓺ ꓡꓯꓽ ꓘꓳ ꓠꓹ ꓟ ꓕꓽ ꓓꓵꓽ ꓙ ꓟꓬ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓢꓲ-ꓫꓬ-ꓟ-ꓦ ꓗꓪ ꓐꓰ ꓤꓽ ꓶꓻ ꓡꓰ ꓟ ꓥ ꓡꓳ꓿ 21 ꓬꓲ ꓠꓬ ꓤ ꓕꓲ ꓣꓳ ꓦꓵꓻ ꓡ ꓥꓳ꓿ ꓤꓽ ꓖꓳ ꓕꓲ ꓣꓳ ꓠꓬ ꓬꓲ ꓑ ꓫꓬꓼ ꓐꓴ ꓔꓯ ꓝꓴꓲ ꓗꓪ ꓐꓰ ꓚꓬꓴ ꓓꓳ ꓡ ꓠ ꓗꓹ ꓢꓴ ꓥ ꓠꓬꓲ꓾ ꓠꓴ ꓬꓲ ꓔꓯ꓾ ꓬꓰ-ꓢꓴ꓾ ꓟꓬꓱꓺ ꓖꓶ ꓠ ꓗꓹ ꓡꓳ꓾ ꓐꓯˍ ꓡꓳ꓿ 22 ꓕꓱ ꓟꓬ ꓫꓵꓽ ꓒꓬꓱꓼ ꓡ ꓟ ꓠꓬ ꓢꓲ ꓒꓽ ꓡꓰ ꓬꓲ ꓟꓷꓽ ꓠꓷꓹ ꓝꓸ ꓢꓴ ꓗꓪ ꓐꓰ ꓐꓯ ꓗꓷ ꓟ꓾ 23 ꓠꓬꓲ ꓠꓹ꓾ ꓤ ꓟꓶ ꓡꓯꓸ ꓚꓵ ꓠꓬ ꓤ ꓠꓱ ꓶꓻ ꓡꓰ ꓢꓲ ꓤ ꓕꓲ ꓣꓳ ꓦꓵꓻ ꓡ ꓥꓳ꓿ ꓬꓲ ꓪꓽ ꓡꓰ ꓬꓲ ꓔꓯ ꓲ-ꓟ-ꓠꓴ-ꓡꓲ ꓟꓬꓱ ꓖꓶˍ ꓥꓳ꓾ ꓐꓰ ꓐꓯ ꓔ ꓟ ꓐꓲꓺ ꓡꓰ ꓝꓲ ꓠꓹ ꓟ ꓥ ꓡꓳ꓿ (ꓲ-ꓟ-ꓠꓴ-ꓡꓲ ꓐꓯˍ ꓟ ꓠꓬ꓾ ꓪꓴ-ꓢ ꓣꓳꓽˍ ꓐꓰ ꓔꓬ ꓡꓳ꓾ ꓐꓯˍ ꓟ ꓥꓳ꓿) 24 ꓬꓳ-ꓢꓷ ꓬꓲꓼ ꓟꓶ ꓧꓪꓸ ꓛꓲꓽ ꓡ ꓠꓬ꓾ ꓢꓲ ꓒꓽ ꓬꓲ ꓝꓲ ꓓꓴ ꓡꓰ ꓐꓯˍ ꓟ ꓔꓯ ꓛꓳ ꓢꓲ꓾ ꓟ-ꓡꓲ ꓔꓯ ꓬꓲ ꓦꓲ ꓢꓲ ꓟ ꓬꓰ ꓠꓹ ꓟ ꓘꓳ ꓣꓴ ꓗꓷˍ ꓡꓳ꓿ 25 ꓖꓳ ꓡꓱ ꓥ ꓟꓲ ꓤ ꓠꓱ ꓟꓽ ꓦꓵꓻ ꓡ ꓕ ꓑꓳꓸ ꓬꓲˍ ꓐꓰ ꓕꓲ ꓪꓺꓼ ꓟꓽ ꓬꓲꓼ ꓔ꓿ ꓤ ꓠꓱ ꓦꓵꓻ ꓡ ꓕꓯ ꓬꓳ-ꓢꓷ ꓡꓰ ꓬꓲ ꓔꓯ꓾ ꓬꓰ-ꓢꓴ꓾ ꓟꓬꓱꓺ ꓖꓶˍ ꓡꓳ꓿

ꓟ-ꓔꓲ 2

1 ꓪ ꓔꓲ ꓩꓴ-ꓡꓲ ꓦꓬꓼ ꓠꓬꓲ ꓗꓪ꓾ ꓬꓴ-ꓔ ꓟꓵꓽ ꓐꓱ-ꓡꓱ-ꓦꓱ ꓗꓪ ꓬꓰ-ꓢꓴ ꓔꓯ ꓦꓵꓻ ꓔ ꓕꓯ꓾ ꓢꓷꓸ ꓠꓲꓹ ꓙꓳ ꓢꓴ ꓕꓲ ꓧꓳꓽ ꓐꓶꓽ ꓓꓳ ꓗꓪ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓡ ꓢꓲ꓾ 2 ꓬꓴ-ꓔ ꓡ ꓞꓳ ꓪ ꓔꓲ ꓣꓱꓽˍ ꓐꓰ ꓦꓵꓻ ꓡ ꓟ ꓖꓳ ꓕꓲ ꓣꓳ ꓮ ꓡꓲ ꓗꓪ ꓔꓬ ꓡ? ꓐꓶꓽ ꓓꓳ ꓟꓵꓽ ꓗꓪ ꓬꓲ ꓗꓴ ꓤꓽ ꓔꓯ ꓥꓪ ꓠꓴꓽ ꓟꓳꓻ ꓗꓷ ꓠꓬꓲ꓾ ꓥꓪ ꓠꓴꓽ ꓠꓬ ꓬꓲ ꓔꓯ ꓪꓴꓸ ꓓꓵ ꓕꓱꓼˍ ꓐꓰ ꓡꓻ ꓟ ꓥ ꓡꓳ꓾ ꓐꓯˍ ꓡꓳ꓿ 3 ꓕꓱ ꓟ ꓔꓯ ꓪ ꓔꓲ ꓩꓴ-ꓡꓲ ꓑ ꓙꓽ ꓗꓷ ꓠꓬ꓾ ꓬꓲˍ ꓟꓲ꓾ ꓙꓱ-ꓣꓴ-ꓢ-ꓡꓱ ꓢꓴ ꓮꓽ ꓙꓵˍ ꓟꓲ꓾ ꓓꓵꓽ ꓙꓽ ꓫꓸˍ ꓡꓳ꓿ 4 ꓪ ꓔꓲ ꓩꓴ-ꓡꓲ ꓡꓰ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓑ ꓫꓬꓼ ꓗꓪ ꓟ ꓕꓳ ꓶ ꓐꓳ ꓒ ꓐꓴ ꓔꓯ ꓘꓴꓻ ꓜꓲꓼ ꓡ ꓢꓲ꓾ ꓙꓲ-ꓢꓴ ꓮ ꓡꓲ ꓗꓪ ꓦꓵꓻ ꓡ ꓠꓯꓹ ꓡ?꓾ ꓐꓰ ꓬꓲ ꓪꓽ ꓔꓯ ꓠ ꓠꓬꓲˍ ꓡꓳ꓿ 5 ꓬꓲ ꓪꓽ ꓡꓰ ꓬꓲ ꓔꓯ꓾ ꓬꓴ-ꓔ ꓟꓵꓽ ꓐꓱ-ꓡꓱ-ꓦꓱ ꓗꓪ ꓥꓳ꓿ ꓮ ꓡꓲꓳ ꓐꓯ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓡꓰ꓾ 6 ꓬꓴ-ꓔ ꓟꓵꓽ ꓐꓱ-ꓡꓱ-ꓦꓱꓳ꓾ ꓠꓴ ꓠꓬ ꓬꓴ-ꓔ ꓔꓯ ꓙꓵꓽ ꓢꓴ ꓐꓴ ꓡꓳ ꓒꓱ ꓗꓳ ꓡꓳ ꓗꓪ ꓣꓳꓺ ꓓꓰˍ ꓟ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓥꓪ ꓑ ꓫꓬꓼ ꓬꓲ-ꓢꓷ-ꓡꓰ ꓔꓯ ꓡꓳꓸ ꓙ ꓢꓴ ꓬꓰ ꓠꓹ ꓟ꓾ ꓙꓵꓽ ꓢꓲꓽ ꓒ ꓕꓲ ꓣꓳ ꓠꓴꓻ ꓗꓪ ꓐꓰ ꓓꓳ ꓡ ꓥꓳ꓾ ꓐꓰ ꓐꓳ ꓔ ꓡꓳ꓾ ꓐꓯˍ ꓡꓳ꓿ 7 ꓖꓳ ꓕꓯ ꓩꓴ-ꓡꓲ ꓠꓬ ꓢꓷꓸ ꓠꓲꓹ ꓙꓳ ꓒ ꓐꓴ ꓔꓯ ꓘꓳ ꓫꓱ ꓫꓱˍ ꓘꓴ ꓔꓯꓹ ꓡ ꓢꓲ꓾ ꓗꓴ ꓤ ꓖꓳ ꓟ ꓮ ꓕꓯꓽ ꓕꓲ ꓝꓲꓸ ꓗꓪ ꓓꓳ ꓡ ꓟ ꓬꓲ ꓜꓶꓻ ꓠ ꓠꓬꓲ ꓟꓶ ꓡꓰ ꓠꓬ꓾ 8 ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓐꓱ-ꓡꓱ-ꓦꓱ ꓗꓪ ꓙꓰ ꓢꓲ ꓞꓳ ꓫꓵꓼ ꓤ ꓖꓳ ꓟ ꓔꓯ ꓬꓲ ꓜꓶꓻ ꓧꓪ ꓠꓬꓲ꓿ ꓧꓪ ꓟꓶ ꓗꓷ ꓠꓬ ꓥꓪˍ ꓟꓲ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓙꓰ ꓠꓹ ꓟ ꓥꓪ ꓔꓯˍ ꓟꓲ ꓐꓯ ꓖꓶ ꓡꓯ꓾ ꓐꓯ ꓖꓶˍ ꓡꓳ꓿ 9 ꓪ ꓔꓲ ꓡꓰ ꓕꓱ ꓡꓱ ꓐꓯ ꓖꓶꓽ ꓗꓷ ꓠꓬ ꓬꓲ ꓪꓽ ꓙꓰˍ ꓡꓳ꓿ ꓐꓶꓽ ꓓꓳ ꓟꓵꓽ ꓗꓪ ꓬꓲ ꓪꓽ ꓟꓳꓻˍ ꓟ ꓗꓴ ꓤ ꓖꓳ ꓕꓲ ꓢꓶꓽ ꓠꓬ ꓬꓲ ꓪꓽ ꓟꓲꓽ ꓕꓯꓽ ꓢꓲ ꓗꓪ ꓙꓰ ꓢꓲ꓾ ꓤ ꓠꓱ ꓤ ꓔꓬ ꓖꓴ ꓕꓯꓽ ꓢꓲ ꓗꓪ ꓛꓲ ꓬꓰ ꓠꓬ ꓠꓽ ꓡꓰꓳ꓿ 10 ꓗꓴ ꓤ ꓖꓳ ꓟ ꓔꓯ ꓬꓲ ꓪꓽ ꓟꓳꓻ ꓗꓷ ꓠꓬ ꓮꓸ ꓓꓲꓽ ꓗꓹ ꓛꓲˍ ꓡꓳ꓿ 11 ꓦꓲ ꓗꓪ ꓓꓵꓽ ꓡꓰ ꓢꓲ ꓤ ꓠꓱ ꓤˍ ꓐꓰ ꓬꓲ ꓟꓹ ꓟ ꓟ-ꓡꓲ ꓔꓯ ꓟꓳꓻ ꓗꓷ ꓠꓬ꓾ ꓟꓳꓼ ꓔ ꓢꓲ ꓬꓰ-ꓢꓴ ꓔꓯ ꓪꓴꓸ ꓓꓵ ꓕꓱꓼˍ ꓡꓳ꓿ ꓬꓲ ꓪꓽ ꓠꓬ ꓒꓵꓽˍ ꓟ ꓖꓴꓽ ꓙꓴ ꓟꓰꓹ ꓓꓳ ꓡ ꓢꓲ꓾ ꓫꓵꓺˍ ꓐꓰ ꓫꓳꓺ ꓠꓱ ꓟ ꓢꓲꓹ ꓜꓲꓽˍ ꓐꓰ ꓟꓴ-ꓬ ꓣꓴ ꓢꓲ ꓠꓬꓲ ꓬꓲ ꓔꓯ ꓡꓯꓼ ꓫꓴ ꓔꓲ ꓖꓶˍ ꓡꓳ꓿ 12 ꓖꓳ ꓡꓱ ꓥ ꓟꓲ ꓩꓴ-ꓡꓲ ꓔꓯ ꓟꓽ ꓐꓯ ꓖꓶ ꓬꓰ ꓝꓲ ꓠꓹ ꓟ꓾ ꓬꓲ ꓪꓽ ꓬꓲꓼ ꓟꓬ ꓘꓳˍ ꓗꓪ ꓪꓴ-ꓢ ꓡꓰ ꓙꓳ ꓗꓽ ꓗꓷ ꓠꓬꓲ꓾ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓠꓬ ꓠꓱꓸ ꓐꓯꓼ ꓕꓲ ꓚꓱꓹ ꓗꓪ ꓐꓰ ꓚꓲꓸ ꓛꓬ ꓟꓵꓽ ꓗꓪ ꓬꓲꓼ ꓙꓰˍ ꓡꓳ꓿ 13 ꓢꓷꓸ ꓠꓲꓹ ꓙꓳ ꓒꓽ ꓐꓴ ꓙꓰ ꓗꓷ ꓗꓸ ꓠꓯ ꓬꓳ-ꓢꓷ ꓬꓲꓼ ꓟꓬ ꓘꓳˍ ꓗꓪ ꓢꓲ ꓒꓽ ꓝꓲ ꓓꓴ ꓕꓲ ꓣꓳ ꓬꓲ ꓔꓯ ꓟꓳꓸ ꓖꓶ ꓡ ꓢꓲ꓾ ꓩꓴ-ꓡꓲ ꓠꓽ ꓤ ꓠꓱ ꓤ ꓔꓯ ꓢꓰꓼ ꓠꓹ ꓟ ꓧꓪ ꓡ ꓥꓳ꓿ ꓖꓳ ꓡꓱ ꓠꓬꓲ ꓠꓴ ꓠꓬ ꓔꓴ ꓢꓲ꓾ ꓤ ꓠꓱ ꓤˍ ꓐꓰ ꓬꓲ ꓟꓹ ꓟ ꓔꓯ ꓬꓲ-ꓙꓲ ꓟꓵꓽ ꓗꓪ ꓧꓳꓽ ꓛꓰꓹ ꓙꓰ꓿ ꓥꓪ ꓡꓰ ꓠꓴ ꓔꓯ ꓝꓮꓲ ꓟꓽ ꓐꓯ ꓖꓶ ꓡ ꓕ ꓑꓳꓸ ꓖꓳ ꓗꓪ ꓔꓬ꓾ ꓐꓯˍ ꓡꓳ꓿ 14 ꓖꓳ ꓡꓱ ꓠꓬ ꓬꓳ-ꓢꓷ ꓠꓽ ꓢ ꓘꓪ ꓢ ꓟꓰ ꓤ ꓠꓱ ꓤˍ ꓐꓰ ꓬꓲ ꓟꓹ ꓟ ꓔꓯ ꓧꓳꓽ ꓔ ꓢꓲ꓾ ꓬꓲ-ꓙꓲ ꓟꓵꓽ ꓗꓪ ꓛꓰꓹ ꓙꓰ ꓢꓲ ꓠꓬꓲ꓾ 15 ꓩꓴ-ꓡꓲ ꓫꓵꓻ ꓗꓪ ꓛꓲ ꓖꓳ ꓗꓪ ꓔꓬ ꓡꓳ꓿ ꓕꓱ ꓟ ꓠꓬ ꓢꓲ ꓒꓽ ꓡꓰ ꓟꓷꓽ ꓠꓷꓹ ꓝꓸ ꓢꓴ ꓗꓪ ꓐꓰ꓾ ꓥꓪ ꓠꓬ ꓬꓲ-ꓙꓲ ꓗꓪ ꓐꓰ ꓥꓪ ꓤꓽ ꓔꓯ ꓘꓴꓻ ꓓꓳ ꓡ ꓥꓳ꓾ ꓐꓰ ꓐꓯ ꓔ ꓟ ꓔꓯ ꓐꓲꓺ ꓡ ꓝꓲ ꓠꓹ ꓟ ꓥꓳ꓿ 16 ꓩꓴ-ꓡꓲ ꓠꓬ ꓢꓷꓸ ꓠꓲꓹ ꓙꓳ ꓒ ꓐꓴ ꓬꓲ ꓔꓯ ꓟꓽ ꓒꓵ ꓒꓵ ꓘꓳ ꓫꓱ ꓫꓱˍ ꓙꓰ ꓗꓷ ꓟ ꓢꓷꓸ ꓗꓷ ꓠꓬ ꓮꓽ ꓘꓶꓸ ꓠꓲꓹ ꓟ ꓦꓶꓻ ꓢꓲ꓾ ꓧꓶꓸ ꓕꓯ ꓬꓲ ꓪꓽ ꓔꓯ ꓬꓲ ꓠ ꓠꓬꓲ ꓟꓶ ꓟ ꓦꓬꓼ ꓠꓬꓲ ꓔꓯ ꓬꓲ ꓜꓶ ꓵ ꓠꓬꓲ ꓢꓲ ꓠꓬꓲ꓾ ꓐꓱ-ꓡꓱ-ꓦꓱˍ ꓐꓰ ꓚꓳ ꓡꓳ ꓗꓪ ꓟ꓾ ꓠꓬꓲꓽ ꓘꓳꓼˍ ꓐꓰ ꓠꓬꓲ ꓘꓳꓼ ꓠꓯꓸ ꓘꓪ ꓟ ꓮ ꓐꓲ ꓮꓽ ꓙꓵ ꓔꓯ ꓢꓰꓼ ꓦ ꓗꓷ ꓝꓲˍ ꓡꓳ꓿ 17 ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓬꓰ-ꓡꓲ-ꓟꓲ ꓗꓪ ꓐꓰ꓾ 18 ꓣ-ꓟ ꓗꓪ ꓥꓴꓻˍ ꓟ ꓢꓯꓼˍ ꓐꓰ ꓮꓸ ꓛꓬꓹ ꓙꓱˍ ꓟ ꓢꓯꓼ ꓓꓽ ꓟ ꓑ ꓙꓽˍ ꓡꓳ꓿ ꓡ-ꓚꓰ ꓠꓬ ꓬꓲ ꓤꓽ ꓐꓴ ꓫꓵꓻ ꓖꓴ ꓡꓰ ꓠꓬꓲ꓾ ꓠꓲꓹ ꓟ ꓗꓴꓺ ꓖꓶˍ ꓟ ꓔꓯˍ ꓟꓲ ꓘꓳ ꓣꓴ ꓟꓽ ꓫꓳ꓾ ꓐꓯˍ ꓟ ꓐꓯ ꓘꓶꓽ ꓐꓲ ꓡꓰ ꓟ ꓥꓳ꓿ 19 ꓩꓴ-ꓡꓲ ꓫꓵꓻ ꓗꓸ ꓠꓯꓸ꓾ ꓬꓲ-ꓙꓲ ꓟꓵꓽ ꓗꓪ ꓢꓲ ꓒꓽ ꓬꓲ ꓝꓲ ꓓꓴ ꓕꓲ ꓣꓳ ꓬꓳ-ꓢꓷ ꓔꓯ ꓬꓲꓼ ꓟꓬ ꓘꓳꓻˍ ꓗꓪ ꓟꓳꓸ ꓖꓶ ꓡ ꓢꓲ꓾ 20 ꓔꓴ꓾ ꓤ ꓠꓱ ꓤˍ ꓐꓰ ꓬꓲ ꓟꓹ ꓟ ꓔꓯ ꓧꓳꓽ ꓔ ꓢꓲ ꓬꓲ-ꓢꓷ-ꓡꓰ ꓟꓵꓽ ꓗꓪ ꓬꓲꓼ ꓙꓰ꓿ ꓮ ꓡꓲꓳ ꓐꓯ ꓠꓬ ꓤ ꓠꓱ ꓤ ꓢꓯꓼ ꓟꓬ ꓣꓴꓻ ꓠꓲꓹ ꓫꓵ ꓢꓴ ꓠꓽ ꓫꓵꓳ꓾ ꓐꓯˍ ꓡꓳ꓿ 21 ꓖꓳ ꓡꓱ ꓠꓬ ꓬꓳ-ꓢꓷ ꓠꓽ ꓤ ꓠꓱ ꓤˍ ꓐꓰ ꓬꓲ ꓟꓹ ꓟ ꓔꓯ ꓧꓳꓽ ꓔ ꓢꓲ ꓬꓲ-ꓢꓷ-ꓡꓰ ꓟꓵꓽ ꓗꓪ ꓬꓲꓼ ꓙꓰˍ ꓡꓳ꓿ 22 ꓖꓳ ꓡꓱ ꓥ ꓟꓲ ꓬꓹ-ꓚꓲ-ꓡꓳꓽ ꓠꓬ ꓬꓲ ꓐꓹ ꓐ ꓩꓴ-ꓡꓲ ꓔꓯ ꓝꓸ ꓢꓲ ꓬꓴ-ꓔ ꓪ ꓔꓲ ꓣꓱꓽ ꓔꓬ ꓟ ꓔꓯ ꓬꓳ-ꓢꓷ ꓑ ꓙꓽ ꓗꓷ ꓕꓯ꓾ ꓬꓲ ꓖꓳ ꓗꓪ ꓙꓰ ꓟꓽ ꓑꓶꓸ꓿ ꓬꓲꓸ ꓬꓲꓼ ꓟꓬ ꓘꓳˍ ꓟ ꓗꓪ ꓢꓲ ꓒꓽ ꓡꓰ ꓙꓳꓺ ꓗꓽ ꓖꓶˍ ꓟ ꓗꓪ ꓐꓰ꓾ ꓬꓲ ꓠꓬ ꓖ-ꓡꓲ-ꓡꓲ ꓟꓵꓽ ꓗꓪ ꓓꓵꓽ ꓙꓰ ꓢꓲ꓾ 23 ꓠ-ꓢ-ꓡꓱ ꓟꓬꓱꓺ ꓔ ꓟ ꓡꓳ ꓒꓱ ꓕꓲꓽ ꓟ ꓗꓪ ꓔꓬ ꓬꓰˍ ꓡꓳ꓿ ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓗꓪ ꓐꓰ꓾ ꓬꓲ ꓔꓯ ꓠꓬ ꓠ-ꓢ-ꓡꓱ ꓢꓴ ꓘꓴꓻˍ ꓥꓳ꓾ ꓐꓰ ꓐꓯ ꓔ ꓟ ꓐꓲꓺ ꓡ ꓝꓲ ꓠꓹ ꓟ ꓥ ꓡꓳ꓿

ꓟ-ꓔꓲ 3

1 ꓖꓳ ꓕꓲ ꓝꓲꓸ ꓗꓪ ꓖꓳ ꓓꓱꓽ ꓔꓲꓹ ꓢꓴ ꓬꓳ-ꓦ ꓓꓳ ꓡ ꓢꓲ꓾ ꓬꓴ-ꓔ ꓟꓵꓽ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓟꓸ ꓟꓲ ꓚ ꓢꓲ ꓠꓬꓲ꓾ 2 ꓟꓴꓽ ꓗꓪ ꓗꓴꓷꓼ ꓠꓶꓽ ꓡꓺꓳ꓾ ꓠꓴ ꓪꓽ ꓠꓲꓹ ꓟ ꓡꓶꓸ꓾ ꓐꓯˍ ꓡꓳ꓿ 3 ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓡꓰ꓾ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓡ ꓞꓳ ꓕꓲ ꓣꓳ ꓘꓴꓻ ꓔꓬ ꓟ ꓢꓯꓼ ꓠꓬ꓾ ꓢꓲ ꓒꓽ ꓙ ꓖꓴ ꓠꓴ ꓪꓽ ꓙꓽ ꓖꓶ꓾ ꓬꓲ ꓚꓱꓹ ꓔꓱꓹ ꓔꓱꓹꓼ ꓐꓰ ꓫꓬ꓾ ꓐꓯˍ ꓟ ꓖꓳ ꓕꓲ ꓣꓳ ꓥ ꓡꓳ꓿ 4 ꓬꓳ-ꓦ ꓠꓬ ꓡꓳꓽ ꓕꓳ ꓟꓵꓺ ꓐꓵ ꓞꓶꓽ ꓖꓪꓽ ꓢꓲ꓾ ꓬꓲ ꓙꓴꓽ ꓝꓲꓸ ꓗꓪ ꓧꓪꓽ ꓙꓲ ꓙꓽ ꓧꓷꓹ ꓧꓷꓹ ꓔ ꓡꓳ꓿ ꓬꓲ ꓜꓽ ꓓꓴ ꓠꓬ ꓚ ꓑꓴˍ ꓐꓰ ꓡꓲ ꓛꓲ ꓐꓬꓽ ꓬꓲꓻ ꓥ ꓡꓳ꓿ 5 ꓖꓳ ꓕꓲ ꓝꓲꓸ ꓗꓪ ꓙꓱ-ꓣꓴ-ꓢ-ꓡꓱˍ ꓐꓰ ꓬꓴ-ꓔ ꓕꓲ ꓟꓵꓽ ꓡꓱSˍ ꓐꓰ꓾ ꓬꓳ-ꓔ ꓬꓲꓽ ꓟ ꓖꓳ ꓐꓽ ꓕ ꓐꓽ ꓗꓪ ꓔꓬ ꓢꓴ ꓠꓬ ꓬꓳ-ꓦ ꓔꓬ ꓗꓪ ꓓꓳ ꓙꓰ ꓢꓲ꓾ 6 ꓬꓲ ꓪꓽ ꓝꓴꓲ ꓣꓷꓠꓸ ꓗꓷ ꓠꓬ꓾ ꓬꓳ-ꓔ ꓬꓲꓽ ꓟ ꓗꓪ ꓬꓳ-ꓦ ꓡꓰ ꓖꓳ ꓓꓱ ꓔꓲꓹ ꓖꓶˍ ꓡꓳ꓿ 7 ꓒ-ꓡꓲ-ꓢꓷ ꓐꓴˍ ꓐꓰ ꓢ-ꓓꓴ-ꓗꓷ ꓐꓴ ꓮꓽ ꓟꓬꓹ ꓠꓬ ꓖꓳ ꓓꓱ ꓔꓲꓹ ꓟꓶ ꓠꓹ ꓟ꓾ ꓬꓲ ꓔꓬ ꓗꓪ ꓡ ꓟ ꓔꓯ ꓬꓳ-ꓦ ꓟꓳꓻ ꓗꓷ ꓠꓬ ꓬꓲ ꓪꓽ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ ꓓꓳꓼ ꓩꓴ ꓬꓲ ꓤ ꓐꓴꓳ꓾ ꓡ ꓠꓹ ꓟ ꓦꓶꓻ ꓠꓲꓹ ꓗꓪ ꓐꓰ ꓡꓲꓹ ꓗꓷ ꓠꓹ ꓟ꓾ ꓮꓽ ꓟ ꓡꓰ ꓠꓴ ꓪꓽ ꓔꓯ ꓙꓳꓺ ꓗꓽ ꓖꓶˍ ꓡ? 8 ꓠꓲꓹ ꓟ ꓡꓶꓸˍ ꓟ ꓔꓯ ꓪꓽˍ ꓟ ꓟꓬꓱꓽ ꓬꓰ ꓓꓳ ꓡꓯ꓿ 9 ꓠꓴ ꓪꓽ ꓠꓬ꓾ ꓥꓪ ꓠꓴꓽ ꓠꓽ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥꓳ꓾ ꓐꓯ ꓢꓲ ꓕꓽ ꓠꓲꓹ ꓪꓴꓽ꓿ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓪꓴ-ꓢ ꓠꓬ Bꓸ ꓛꓲ ꓕꓱ ꓟꓬ ꓔꓯ ꓮ-ꓐ-ꓡ-ꓦ ꓐꓱ ꓶ ꓞꓲꓼ ꓤ ꓡꓯꓹ ꓤ ꓒꓬꓱꓼ ꓡ ꓝꓲ ꓐ ꓡ ꓡꓳ꓿ 10 ꓮꓸ ꓞꓳꓹ ꓠꓬ ꓮ ꓟꓶˍ ꓡꓰ ꓢꓲꓹ ꓜꓲ ꓬꓲꓸ ꓚꓰ ꓗꓪ ꓟꓳꓸ ꓞꓹ ꓡꓳ꓿ ꓖꓳ ꓡꓱ ꓠꓬꓲ ꓙꓲꓻˍ ꓟ ꓢꓶꓹ ꓢꓶꓽ ꓟꓽ ꓓꓱꓼˍ ꓟ ꓢꓲꓹ ꓜꓲ ꓮꓽ ꓙꓵ ꓠꓬ ꓘꓷꓹ ꓩꓴ ꓗꓷ ꓢꓲ ꓮꓸ ꓔꓳ ꓗꓪ ꓡꓳꓺ ꓧꓳꓽ ꓗꓷˍ ꓥꓳ꓿ 11 ꓠꓴ ꓪꓽ ꓠꓲꓹ ꓟ ꓡꓶꓸ ꓗꓷ ꓟ ꓢꓷꓸ ꓡꓰ ꓓꓴ꓾ ꓥꓪ ꓡꓰ ꓠꓴ ꓪꓽ ꓔꓯ ꓬꓲꓻ ꓙꓬ ꓗꓪ ꓖꓳ ꓓꓱ ꓔꓲꓹ ꓖꓶˍ ꓡꓳ꓿ ꓥꓪ ꓗꓸ ꓠꓯ ꓢꓲ ꓗꓪ ꓡ ꓢꓴ ꓠꓬ ꓥꓪ ꓢꓶꓸ ꓟꓽ ꓞꓲ ꓪꓽ ꓠꓬꓲˍ ꓡꓳ꓿ ꓥꓪ ꓠꓬ ꓬꓲ ꓛꓲ ꓠꓲ ꓡꓵꓸ ꓙ ꓠꓹ ꓟˍ ꓟꓲ ꓟꓽ ꓒꓵꓽ꓿ ꓬꓲ ꓠꓽ ꓢꓲ-ꓫꓬ-ꓟ-ꓦˍ ꓐꓰ ꓮꓸ ꓔꓳꓸ ꓡꓰ ꓠꓴ ꓪꓽ ꓔꓯ ꓔꓲꓹ ꓖꓶ ꓡ ꓥꓳ꓿ 12 ꓬꓲ ꓡꓯꓼ ꓒꓯꓹ ꓗꓪ ꓠꓬ ꓪꓺ ꓟ ꓔꓯꓹ ꓔ ꓢꓲ꓾ ꓬꓲ ꓫꓪꓺ ꓓꓶꓽ ꓓꓰ ꓗꓪ ꓟ ꓫꓪ ꓔꓯ ꓪꓺ ꓫꓬꓻ ꓡꓰ ꓝꓲˍ ꓥꓳ꓿ ꓫꓪ ꓠꓬ ꓫꓪ ꓗꓹ ꓗꓪ ꓫꓺ ꓔ ꓥꓳ꓿ ꓬꓲ ꓒꓲꓻ ꓠꓽ ꓟꓽ ꓫꓵꓻ ꓮꓸ ꓔꓳꓸ ꓗꓪ ꓛꓴꓻ ꓗꓷˍ ꓥꓳ꓾ ꓐꓯˍ ꓡꓳ꓿ 13 ꓖꓳ ꓕꓲ ꓝꓲꓸ ꓗꓪ ꓬꓰ-ꓢꓴ ꓠꓬ꓾ ꓬꓳ-ꓦ ꓡꓰ ꓖꓳ ꓓꓱꓽ ꓔꓲꓹ ꓖꓶ ꓝꓲ ꓠꓹ ꓟ꓾ ꓖ-ꓡꓲ-ꓡꓲ ꓗꓪ ꓐꓰ ꓬꓳ-ꓦ ꓔꓬ ꓟ ꓬꓳ-ꓔ ꓬꓲꓽ ꓟ ꓗꓪ ꓛꓲ ꓡ ꓡꓳ꓿ 14 ꓬꓳ-ꓦ ꓠꓬ ꓬꓲ ꓔꓯ ꓗꓽ ꓔ ꓠꓲꓹ ꓫꓵ ꓢꓲ꓾ ꓠꓴ ꓡꓰ ꓥꓪ ꓔꓯ ꓖꓳ ꓓꓱ ꓔꓲꓹ ꓖꓶ ꓠꓯꓹ ꓡꓳ ꓫꓵꓽ ꓥ ꓡꓳ꓿ ꓮ ꓡꓲ ꓗꓹ ꓠꓬꓲ ꓠꓴ ꓥꓪ ꓔꓯ ꓖꓳ ꓓꓱꓽ ꓔꓲꓹ ꓪꓽ ꓧꓪ ꓡ ꓡ?꓾ ꓐꓯˍ ꓡꓳ꓿ 15 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓮ ꓟꓶ ꓠꓬ ꓥ ꓝꓲ꓿ ꓣꓳ ꓕꓱ ꓡꓱ ꓬꓰ ꓢꓲ ꓔꓱꓹ ꓜꓳꓽˍ ꓟ ꓮꓽ ꓙꓵ ꓬꓰ ꓐꓲ ꓡꓰ ꓝꓲ ꓙꓲꓽ ꓙꓳˍ ꓡꓳ꓾ ꓐꓯˍ ꓠꓬꓲ꓾ ꓬꓳ-ꓦ ꓬꓲ ꓔꓯ ꓓꓽ ꓔꓳꓹˍ ꓡꓳ꓿ 16 ꓬꓰ-ꓢꓴ ꓖꓳ ꓓꓱ ꓔꓲꓹ ꓟꓶ ꓢꓲ ꓬꓲꓻ ꓙꓬ ꓗꓪ ꓐꓰ ꓓꓳ ꓡ ꓟꓶꓽ ꓕꓯ꓾ ꓟꓴꓽ ꓗꓪ ꓒꓴ ꓡ ꓢꓲ ꓪꓴ-ꓢ ꓦꓻ ꓠꓬ ꓮꓸ ꓖꓴꓽˍ ꓡꓰ ꓐꓰ ꓬꓯꓼ ꓡ ꓢꓲ ꓠꓬꓲ꓾ ꓬꓰ-ꓢꓴ ꓔꓯ ꓥꓳꓽ ꓡ ꓟ ꓔꓯ ꓬꓲ ꓟꓳꓻˍ ꓡꓳ꓿ 17 ꓖꓳ ꓕꓯ ꓟꓴꓽ ꓗꓪ ꓗꓪ ꓐꓰ ꓡꓻ ꓟ ꓢꓯꓼ ꓡꓰ꓾ ꓕꓱ ꓟ ꓠꓬ ꓥꓪ ꓠꓲꓹ ꓠꓵˍ ꓟ ꓮ ꓐꓲ ꓥꓳ꓿ ꓬꓲ ꓔꓯ ꓥꓪ ꓮꓽ ꓘꓶꓸ ꓠꓲꓹ ꓒꓴˍ ꓡꓳ꓾ ꓐꓯˍ ꓡꓳ꓿

ꓟ-ꓔꓲ 4

1 ꓖꓳ ꓕꓯ ꓢ-ꓓꓯꓽ ꓡꓰ ꓬꓰ-ꓢꓴ ꓔꓯ ꓫꓵꓽ ꓠꓬꓲ ꓝꓲ ꓠꓹ ꓟ꓾ ꓢꓲ-ꓫꓬ-ꓟ-ꓦ ꓡꓰ ꓬꓰ-ꓢꓴ ꓔꓯ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓧꓳꓽ ꓙꓰˍ ꓡꓳ꓿ 2 ꓖꓳ ꓕꓯ ꓬꓲ ꓠꓬ ꓜꓽ ꓓꓴ ꓟꓽ ꓜꓽ ꓡꓲ ꓞꓲ ꓦꓬꓼ ꓡꓲ ꓞꓲ ꓠꓬꓲꓻ ꓔꓬ ꓗꓷ ꓗ ꓠꓯꓸ ꓦꓰꓼ ꓟꓷꓼˍ ꓡꓳ꓿ 3 ꓫꓵꓽ ꓠꓬꓲ ꓢꓴ ꓠꓬ ꓬꓲ ꓔꓯ ꓡ ꓢꓲ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ꓾ Bꓸ ꓛꓲ ꓕꓱ ꓟꓬ ꓟ ꓔꓯ ꓫꓪ ꓒꓵꓼ ꓒꓬꓱꓼ ꓡ ꓠꓹ ꓟ ꓕꓵꓼ ꓪꓽ ꓖꓶ ꓟꓴꓽ꓾ ꓐꓯ ꓖꓶˍ ꓡꓳ꓿ 4 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓞꓳ ꓤ ꓠꓬ ꓫꓪ ꓒꓵꓼ ꓗꓪ ꓐꓰˍ ꓡꓰ ꓢꓯꓸ ꓔꓬ ꓟ ꓟꓽ ꓥ꓿ ꓪꓴ-ꓢ ꓟꓷꓽ ꓠꓷꓹ ꓗꓪ ꓐꓰ ꓓꓳ ꓡ ꓟ ꓐꓯ ꓘꓶꓽ ꓕꓲ ꓘꓶꓽ ꓡꓰ ꓕꓲ ꓘꓶ ꓗꓪ ꓐꓰ ꓢꓯꓸ ꓔꓬ ꓟ ꓥꓳ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ 5 ꓖꓳ ꓗ ꓠꓯꓸ ꓢ-ꓓꓯ ꓡꓰ ꓬꓰ-ꓢꓴ ꓔꓯ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓧꓳꓽ ꓓꓵ ꓡꓰ ꓢꓲ꓾ ꓢꓲ-ꓫꓬ-ꓦꓲ ꓟꓴ ꓓꓰˍ ꓟ ꓕꓲꓽ ꓔꓳꓸ ꓗꓪ ꓦꓰꓼ ꓔꓬ ꓝꓲ ꓢꓲ ꓠꓬꓲ꓾ 6 ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯꓽ ꓠ ꓔꓷꓹ ꓬꓯꓼ ꓙꓰ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓢꓲ ꓒꓽ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓠꓴ ꓐꓱ ꓶ ꓕꓵꓼ ꓪꓽ ꓖꓶ ꓢꓲ꓾ ꓠꓴ ꓛꓲ ꓒꓯꓹ ꓔꓯ Bꓸ ꓛꓲ ꓗꓪ ꓟꓽ ꓕꓯꓼ ꓡꓰ ꓝꓲ ꓠꓹ ꓟ ꓬꓲ ꓪꓽ ꓡꓯꓼ ꓒꓯꓹ ꓡꓰ ꓠꓴ ꓔꓯ ꓓꓽ ꓔ ꓖꓶˍ ꓥꓳ꓾ ꓐꓰ ꓐꓳ ꓔ ꓡꓳ꓾ ꓐꓯˍ ꓡꓳ꓿ 7 ꓬꓰ-ꓢꓴ ꓡꓰ ꓢ-ꓓꓯ ꓔꓯ꓾ ꓠꓴ ꓢꓲ ꓒꓽ ꓪꓴ-ꓢ ꓔꓯ ꓫꓵꓽ ꓠꓬꓲ ꓟꓽ ꓓ꓾ ꓐꓰˍ ꓟꓲ ꓐꓳ ꓔ ꓢꓰꓽ ꓡꓳ꓾ ꓐꓯ ꓖꓶˍ ꓡꓳ꓿ 8 ꓝꓮꓲ ꓢ-ꓓꓯ ꓡꓰ ꓬꓲ ꓔꓯ ꓮꓽ ꓘꓶꓸ ꓟꓴꓺˍ ꓟ ꓪꓽ ꓚꓲ ꓗꓪ ꓧꓳꓽ ꓓꓯ ꓙꓰ ꓢꓲ꓾ ꓟꓵꓽ ꓗꓳꓹ ꓓꓵ ꓓꓵ ꓟ ꓗꓴꓷꓼ ꓥ ꓕ ꓑꓳꓸˍ ꓐꓰ꓾ ꓗꓴꓷꓼ ꓖꓳ ꓟꓬ ꓟ ꓟꓬꓱ ꓓꓳꓽ ꓬꓲ ꓔꓯ ꓖꓴ ꓟꓸ ꓖꓶ ꓢꓲ ꓠꓬꓲ꓾ 9 ꓠꓴ ꓟꓳꓼ ꓔ ꓢꓲ ꓥꓪ ꓔꓯ ꓪꓴꓸ ꓓꓵ ꓕꓱꓼˍ ꓕꓯꓽ ꓠꓽ꓾ ꓕꓱ ꓟꓬ ꓟ ꓮꓽ ꓙꓵ ꓠꓴ ꓔꓯ ꓥꓪ ꓖꓶˍ ꓥꓳ꓾ ꓐꓯˍ ꓡꓳ꓿ 10 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ꓾ ꓢ-ꓓꓯꓳ꓾ ꓠꓴ ꓙꓰ Gꓽ꓿ ꓮ ꓡꓲꓳ ꓐꓯ ꓠꓬ꓾ ꓠꓴ ꓠꓬ ꓠꓴ ꓢꓲ ꓒꓽ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓬꓲ ꓔꓯˍ ꓡꓰꓽ ꓣꓱꓽ ꓙ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ 11 ꓖꓳ ꓕꓯ ꓢ-ꓓꓯ ꓠꓬ ꓬꓲ ꓔꓯˍ ꓐꓰ ꓧꓹ ꓗꓷ ꓢꓲ꓾ ꓟꓴꓽ ꓗꓪ ꓝꓲ ꓓꓴ ꓐꓴ ꓡꓰ ꓬꓰ-ꓢꓴ ꓔꓯ ꓣꓱꓽ ꓙ ꓡꓻˍ ꓡꓳ꓿ 12 ꓬꓳ-ꓦ ꓔꓯ ꓐꓱ ꓓꓴꓽ ꓗꓪ ꓐꓱ ꓗꓷ ꓟ ꓓꓳꓽ ꓬꓰ-ꓢꓴ ꓑ ꓙꓽ ꓗꓷ ꓕꓯ꓾ ꓬꓲ ꓠꓬ ꓖ-ꓡꓲ-ꓡꓲ ꓟꓵꓽ ꓗꓪ ꓙꓵꓺ ꓓꓵꓽ ꓙꓰˍ ꓡꓳ꓿ 13 ꓬꓲ ꓠꓬ ꓠ-ꓢ-ꓡꓱ ꓗꓪ ꓐꓰ ꓓꓳ ꓙꓰ ꓢꓲ꓾ ꓬꓲꓻ ꓡꓴꓽ ꓐꓱꓻ ꓘꓶ ꓗꓪ ꓟ ꓘꓹ-ꓒꓱ-ꓠꓴ ꓗꓪ ꓔꓬ ꓬꓰˍ ꓡꓳ꓿ ꓖꓳ ꓟ ꓠꓬ ꓢꓲ-ꓑꓴ-ꓡꓶˍ ꓐꓰ ꓠ-ꓩꓴ-ꓕ-ꓡꓲ ꓟꓵꓽ ꓘꓶꓽ ꓗꓪ ꓥ ꓡꓳ꓿ 14 ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓡꓰ꓾ 15 ꓢꓲ-ꓑꓴ-ꓡꓶˍ ꓐꓰ ꓠ-ꓩꓴ-ꓕ-ꓡꓲ ꓟꓵꓽ ꓬꓲꓻ ꓡꓴꓽ ꓐꓱꓻ ꓘꓶꓽ ꓗꓪ ꓟ ꓙ ꓖꓴ꓾ ꓬꓳ-ꓔ ꓬꓲꓽ ꓟ ꓖꓳ ꓐꓽ ꓢꓲ꓾ ꓐꓶꓽ ꓞꓳ ꓟꓵꓽ ꓖ-ꓡꓲ-ꓡꓲꓳ꓾ 16 ꓠꓯ ꓞꓲꓹ ꓟ ꓗꓪ ꓔꓬ ꓟ ꓑ ꓫꓬꓼ ꓐꓴ ꓠꓬ ꓠꓬꓲ ꓟꓳꓻ ꓓꓴ ꓓꓽ ꓟ ꓔꓯ ꓡꓳꓸ ꓟꓳꓻ ꓡꓰꓳ꓿ ꓫꓵꓻ ꓶꓻ ꓥꓳꓽ ꓟꓵꓽ ꓗꓪ ꓠꓬꓲꓸ ꓠꓸ ꓔꓬ ꓢꓴ ꓐꓴ ꓔꓯ ꓠꓬꓲ ꓟꓳꓻ ꓓꓴ ꓣꓳꓺ ꓖꓶ ꓡꓺꓳ꓾ ꓐꓯˍ ꓟ ꓔꓯ ꓐꓲ ꓡꓰ ꓝꓲ ꓠꓹ ꓟ ꓥꓳ꓿ 17 ꓖꓳ ꓕꓲ ꓝꓲꓸ ꓗꓪ ꓐꓰ ꓬꓰ-ꓢꓴ ꓠꓬ ꓟꓸ ꓟꓲ ꓚ ꓪꓴꓸ ꓔꓴ ꓢꓲ꓾ ꓠꓴ ꓪꓽ ꓠꓲꓹ ꓟ ꓡꓶꓸ꓾ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓶꓽ ꓡꓺꓳ꓾ ꓐꓯˍ ꓡꓳ꓿ 18 ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓬꓲꓻ ꓡꓴꓽ ꓐꓱꓻ ꓘꓶꓽ ꓗꓪ ꓫꓱꓽ ꓔꓬ ꓕꓯ꓾ ꓥꓪꓸ ꓧꓪ ꓒꓽ ꓒꓲ-ꓕꓱ ꓟꓬꓱ ꓔ ꓟ ꓢꓲ-ꓟꓴˍ ꓐꓰ ꓬꓲ ꓠꓬꓲ ꓤ ꓯ-ꓓꓱ-ꓣꓴ ꓬꓲ ꓪꓽ ꓠꓬꓲꓽ ꓫꓵꓸ ꓬꓲꓻ ꓡꓴꓽ ꓐꓱꓻ ꓗꓪ ꓥꓪꓸ ꓓꓳꓽ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 19 ꓖꓳ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓯ ꓛꓳ ꓡꓯ꓾ ꓥꓪꓸ ꓧꓪ ꓟꓶˍ ꓟ ꓡꓰ ꓐꓰ ꓥꓪ ꓡꓰ ꓠꓴ ꓪꓽ ꓔꓯ ꓡ ꓞꓳ ꓧꓪ ꓟꓶ ꓢꓴ ꓒꓬꓱꓼ ꓡ ꓝꓲˍ ꓥꓳ꓾ ꓐꓯ ꓖꓶꓽ ꓗꓷ ꓠꓬ꓾ 20 ꓬꓲ ꓪꓽ ꓠꓽ ꓞꓼ ꓐꓰ ꓥꓪꓸ ꓑꓱꓸ ꓗꓶꓺ ꓔ ꓬꓰ ꓢꓲ ꓬꓲ ꓔꓯ ꓛꓳꓻ ꓙꓰˍ ꓡꓳ꓿ 21 ꓖꓳ ꓗꓪ ꓐꓰ ꓝꓮꓲ ꓙꓰˍ ꓠꓬ꓾ ꓜꓲ-ꓐꓱ-ꓓꓲ ꓬꓲ ꓤ ꓬ-ꓗꓴˍ ꓐꓰ ꓬꓲ ꓠꓬꓲ ꓤ ꓬꓳ-ꓦ ꓔꓯ ꓬꓲ ꓟꓳꓻˍ ꓡꓳ꓿ ꓬꓲ ꓪꓽ ꓠꓬ ꓡꓲ ꓠꓯꓸꓼ ꓗꓪ ꓬꓲ ꓪꓽ ꓐꓹ ꓐꓽ ꓜꓲ-ꓐꓱ-ꓓꓲˍ ꓐꓰ ꓕꓲ ꓪꓺꓼ ꓥꓪꓸ ꓑꓱꓸ ꓑꓱꓺ ꓔꓬ ꓕꓯ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓘꓴꓻ ꓗꓷ ꓠꓬ꓾ 22 ꓬꓲ ꓪꓽˍ ꓟꓲ ꓞꓼ ꓐꓰ ꓡꓲꓺˍ ꓐꓰ ꓬꓲ ꓪꓽ ꓐꓹ ꓐ ꓔꓯ ꓗꓶꓺ ꓔ ꓬꓰ ꓢꓲ ꓬꓰ-ꓢꓴ ꓔꓯ ꓛꓳ ꓙꓰˍ ꓡꓳ꓿ 23 ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓕꓲ ꓟꓵꓽ ꓡꓱꓸꓼ ꓚꓳ ꓙꓰ ꓢꓲ꓾ ꓬꓲ ꓪꓽ ꓜꓲꓼ ꓦꓲ ꓗꓪ ꓟꓸ ꓟꓲ ꓟꓸ ꓠꓬꓲ꓾ ꓟꓴꓽ ꓗꓪ ꓗꓴꓷꓼ ꓶꓼ ꓓꓳꓽ ꓫꓱꓹ ꓓꓳ ꓚ ꓟꓸ ꓖꓶ ꓠꓬꓲ꓾ ꓑ ꓫꓬꓼ ꓐꓴ ꓠꓻ ꓫꓵꓽ ꓠꓻ ꓙꓰ ꓫꓬꓹ ꓖꓶ ꓠꓬꓲ ꓐꓰ ꓬꓰˍ ꓡꓳ꓿ 24 ꓬꓲ ꓟꓬꓱ ꓓꓳꓽ ꓠꓬ ꓫꓲ-ꓡꓲ-ꓬ ꓕꓲ ꓟꓵꓽ ꓡꓱꓸꓼ ꓗꓪ ꓐꓯ ꓒꓬꓱ ꓙꓰ ꓠꓬꓲ꓾ ꓠꓻ ꓒꓬꓽ ꓬꓲ ꓫꓵꓽ ꓬꓲ ꓙꓰꓽ ꓠꓻ ꓢꓴˍ ꓐꓰ ꓠꓲꓽ ꓟꓯꓹ ꓠꓲꓽ ꓪꓴꓸ ꓢꓴˍ ꓐꓰ꓾ ꓚꓵꓹ ꓢꓴ ꓐꓰ꓾ ꓛꓲ ꓫꓵꓻ ꓡꓯ ꓫꓵ ꓢꓴ ꓔꓯ ꓫꓬꓹ ꓓꓻ ꓡꓰ ꓝꓲˍ ꓡꓳ꓿ 25 ꓖ-ꓡꓲ-ꓡꓲˍ ꓐꓰ ꓓꓱ-ꓘꓹ-ꓒꓳ-ꓡꓲˍ ꓐꓰ ꓙꓱ-ꓣꓴ-ꓢ-ꓡꓱ꓾ ꓬꓴ-ꓔ ꓟꓵˍ ꓐꓰ꓾ ꓬꓳ-ꓔ ꓬꓲꓽ ꓟ ꓖꓳ ꓐꓽ ꓢꓲ ꓗꓪ ꓐꓰ ꓡꓻ ꓟ ꓞꓳ ꓜꓴ ꓞꓳ ꓟꓯꓼ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿

ꓟ-ꓔꓲ 5

1 ꓬꓰ-ꓢꓴ ꓠꓬ ꓞꓳ ꓜꓴꓻ ꓞꓳ ꓟꓯꓼ ꓔꓯ ꓟꓳꓻˍ ꓕꓯ꓾ ꓪꓽ ꓚꓲ ꓗꓪ ꓓꓯ ꓙꓰ ꓢꓲ ꓠꓬꓲꓸ ꓠꓸ ꓗꓷ ꓠꓬ꓾ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓔꓬ ꓗꓪ ꓜꓲꓼ ꓡ ꓡꓳ꓿ 2 ꓬꓲ ꓠꓬ ꓘꓶꓽ ꓒꓴ ꓢꓲ ꓬꓲ ꓪꓽ ꓔꓯ ꓕꓱ ꓡꓱ ꓟꓸ ꓖꓶˍ ꓡꓳ꓿ 3 ꓦꓻ ꓗꓪ ꓞꓳ ꓫꓸ ꓥ ꓟ ꓚꓬꓹ ꓪ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓽ ꓬꓲ ꓪꓽ ꓔꓯ ꓟ ꓥ ꓡꓳ꓿ 4 ꓠꓲꓹ ꓥꓴꓻ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓠꓲꓹ ꓗꓴ ꓟꓬ ꓗꓴ ꓟꓶˍ ꓥꓳ꓿ 5 ꓠꓲꓹ ꓟ ꓠꓴꓽ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓠꓽ ꓬꓲ ꓪꓽ ꓡꓯꓼ ꓪ ꓒꓬꓱꓼ ꓡ ꓥꓳ꓿ 6 ꓔꓱꓹ ꓜꓳꓽˍ ꓟ ꓔꓯ ꓟꓷꓼ ꓢꓲꓼ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓢꓲꓼ ꓘꓪꓽ ꓓꓰꓼ ꓡꓰˍ ꓥꓳ꓿ 7 ꓢꓴ ꓔꓯ ꓫꓱꓸ ꓤ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓫꓱꓸ ꓤ ꓟ ꓟꓶˍ ꓥꓳ꓿ 8 ꓠꓲꓹ ꓟ ꓢꓲꓽ ꓫꓬ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓪꓴ-ꓢ ꓔꓯ ꓟꓳꓻ ꓪˍ ꓥꓳ꓿ 9 ꓢꓴ ꓔꓯ ꓧꓳꓹ ꓡꓯꓽ ꓘꓳ ꓝꓲ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓔꓯ ꓠꓽ ꓪꓴ-ꓢ ꓤ ꓠꓱ꓾ ꓐꓰ ꓘꓴˍ ꓥꓳ꓿ 10 ꓔꓱꓹ ꓜꓳꓽˍ ꓟ ꓪꓴꓸ ꓠꓬꓲ ꓗꓸ ꓧꓪ ꓟ ꓟꓶ ꓢꓴ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓽ ꓬꓲ ꓪꓽ ꓔꓯ ꓟ ꓥ ꓡꓳ꓿ 11 ꓥꓪ ꓪꓴꓸ ꓠꓬꓲ ꓢꓴꓻ ꓠꓴ ꓪꓽ ꓔꓯ ꓫꓸ ꓚꓲ꓾ ꓠꓴ ꓪꓽ ꓔꓯ ꓗꓸ ꓧꓪ꓾ ꓝꓮꓲ ꓠꓴ ꓪꓽ ꓔꓯ ꓥꓶˍ ꓟ ꓬꓲ ꓫꓵꓽ ꓬꓲ ꓙꓰꓽ ꓮꓽ ꓔꓳ ꓐꓯ ꓡ ꓕꓯ꓾ ꓠꓴ ꓪꓽ ꓠꓽ ꓶꓼ ꓙꓳ ꓫꓱ ꓙꓳˍ ꓡꓳ꓿ 12 ꓠꓴ ꓪꓽ ꓠꓬ ꓠꓲꓹ ꓒꓴ ꓗꓹ ꓛꓲ ꓔꓬ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓪ ꓠꓴ ꓪꓽ ꓡꓯꓼ ꓫꓴ ꓠꓽ ꓬꓲ ꓓꓽ ꓟ ꓥ ꓡꓳ꓿ ꓠꓴ ꓪꓽ ꓧꓶꓸ ꓕꓯ ꓗꓪ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓔꓯˍ ꓟꓲ꓾ ꓬꓲ ꓪꓽ ꓕꓱ ꓡꓱ ꓗꓸ ꓧꓪ ꓗꓷꓳ꓿ 13 ꓠꓴ ꓪꓽ ꓠꓬ ꓟꓲ ꓠꓯ ꓗꓪ ꓔꓬ ꓢꓴ ꓐꓱ ꓶ ꓞꓼ ꓐꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓞꓼ ꓐꓳ ꓬꓲ ꓢꓯꓼ ꓒꓲꓼ ꓬꓰ ꓠꓬ ꓝꓮꓲ ꓛꓵꓻ ꓡ ꓝꓲ ꓟꓽ ꓠ ꓠꓬꓲ꓾ ꓣꓱꓽ ꓬꓯꓼ ꓖꓴ ꓟꓽ ꓙꓳ꓿ ꓠꓱꓸ ꓫꓱꓸ ꓟꓸꓼ ꓗꓪ ꓡꓳ ꓩꓴ ꓗꓷ ꓢꓲ ꓞꓳ ꓤ ꓕꓳꓼ ꓓꓴ ꓗꓷ ꓡꓰˍ ꓡꓳ꓿ 14 ꓠꓴ ꓪꓽ ꓠꓬ ꓟꓲ ꓠꓯ ꓗꓪ ꓔꓬ ꓢꓴ ꓐꓱ ꓶ ꓠꓬꓲ ꓟꓳꓻ ꓓꓴ ꓥꓳ꓿ ꓪꓽ ꓚꓲ ꓗꓪ ꓔꓶ ꓔꓸ ꓟ ꓡꓳ ꓒꓱ ꓔꓯ ꓠꓬ ꓚꓵ ꓔꓸ ꓟꓽ ꓐ ꓡ꓿ 15 ꓝꓮꓲ ꓠꓬ ꓟꓬ ꓡꓴ ꓟꓬ ꓢꓲ ꓐꓽ ꓕꓴꓽ ꓡꓰ ꓝꓴꓸ ꓔ ꓢꓴ ꓟꓽ ꓙꓳ꓿ ꓟꓬ ꓡꓴ ꓕꓲ ꓗꓪ ꓗꓶ ꓔ ꓢꓲ ꓦꓲ ꓗꓪ ꓔꓬ ꓢꓴ ꓮꓽ ꓙꓵ ꓔꓯ ꓣꓳꓺ ꓖꓶˍ ꓡꓳ꓿ 16 ꓖꓳ ꓟ ꓡꓰ ꓐꓰ ꓞꓳ ꓤꓽ ꓠꓬ ꓠꓴ ꓪꓽ ꓙꓲꓻˍ ꓟ ꓬꓰˍ ꓟ ꓔꓯ ꓟꓳꓻ ꓢꓲ꓾ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐ ꓔꓯ ꓟꓬꓱ ꓓꓳꓽ ꓖꓶ ꓝꓲ ꓠꓹ ꓟ꓾ ꓠꓴ ꓪꓽ ꓠꓬꓲ ꓟꓳꓻ ꓓꓴ ꓠꓬ ꓬꓲ ꓪꓽ ꓟꓲꓽ ꓙꓬꓽ ꓗꓪ ꓣꓳꓺ ꓖꓶ꓿ 17 ꓥꓪ ꓠꓬ ꓙꓵꓽ ꓗ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓕꓳ ꓶ ꓔꓯ ꓐꓬ ꓡꓰ ꓝꓲˍ ꓐꓰ ꓡꓻ ꓡꓳ꓾ ꓕꓽ ꓓꓵꓽ ꓙ꓿ ꓥꓪ ꓠꓬ ꓐꓬ ꓡꓰ ꓝꓲˍ ꓐꓰ ꓡꓻ ꓟ ꓟꓽ ꓥ꓾ ꓐꓲ ꓡ ꓝꓲˍ ꓐꓰ ꓡꓻ ꓟ ꓥ ꓡꓳ꓿ 18 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓟꓴꓽ ꓗꓪ ꓟꓲ ꓠꓯ ꓡꓳꓹ ꓬꓰ ꓢꓲ ꓙꓵꓽ ꓗ ꓗꓪ ꓟ ꓮꓽ ꓙꓵ ꓡꓱꓸꓼ ꓐꓲ ꓡ ꓗꓪ ꓛꓲ꓾ ꓙꓵꓽ ꓗ ꓕꓳ ꓶ ꓗꓪ ꓟ ꓕꓲ ꓔꓳꓹ ꓕꓲ ꓖꓳꓼ ꓤˍ ꓟꓲ ꓟꓽ ꓒꓲꓼ ꓬꓰ꓿ 19 ꓖꓳ ꓡꓱ ꓠꓬꓲ ꓮꓽ ꓟ ꓥ ꓟꓲ꓾ ꓕꓵꓼ ꓪꓽ ꓕꓱ ꓟꓬ ꓟ ꓠꓯꓸꓼ ꓗꓪ ꓣꓳꓺ ꓓꓰˍ ꓟ ꓕꓲ ꓚꓱꓹ ꓚꓱꓹ ꓔꓯ ꓟꓽ ꓛꓳ ꓛꓳ꓾ ꓠꓱꓸ ꓐꓯꓼ ꓢꓴ ꓔꓯˍ ꓟꓲ ꓬꓲ ꓖꓳ ꓡꓱ ꓟꓸ ꓖꓶˍ ꓠꓬ꓾ ꓟꓴꓽ ꓗꓪ ꓗꓴꓷꓼ ꓗꓪ ꓬꓲ ꓔꓯ ꓣꓳꓺ ꓓꓰˍ ꓟ ꓘꓴˍ ꓥꓳ꓿ ꓮꓽ ꓟ ꓥ ꓟꓲ ꓕꓵꓼ ꓪꓽ ꓕꓱ ꓟꓬ ꓟ ꓔꓯ ꓛꓳ ꓢꓲ꓾ ꓢꓴ ꓔꓯˍ ꓟꓲ ꓬꓲ ꓖꓳ ꓡꓱ ꓟꓸ ꓖꓶˍ ꓠꓬ꓾ ꓟꓴꓽ ꓗꓪ ꓗꓴꓷꓼ ꓗꓪ ꓬꓲ ꓔꓯ ꓪꓴꓽˍ ꓟ ꓘꓴˍ ꓥꓳ꓿ 20 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓔꓱꓹ ꓜꓳꓽˍ ꓟ ꓕꓯꓽ ꓢꓲ ꓟꓽ ꓔꓱꓹ ꓜꓳꓽˍ ꓕꓯ ꓠꓽ꓾ ꓮ ꓡꓲ ꓥ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓟꓽ ꓓ꓿ 21 ꓮ ꓠꓱ ꓟ ꓡ ꓞꓳ ꓔꓯ ꓐꓯ ꓖꓶˍ ꓟ꓾ ꓞꓳ ꓤ ꓢꓰꓼ ꓟꓽ ꓓ꓾ ꓐꓯˍ ꓟ ꓐꓰ꓾ ꓞꓳ ꓤ ꓢꓰꓼ ꓢꓴ ꓮꓽ ꓟ ꓥ ꓟꓲ ꓐꓯꓺ ꓟꓴ ꓘꓶꓽˍ ꓟ ꓟꓽ ꓡꓲꓹ ꓗꓷ꓾ ꓐꓯˍ ꓟ ꓠꓴ ꓪꓽ ꓑ ꓙꓽ ꓠꓬꓲꓳ꓿ 22 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓮꓽ ꓟ ꓥ ꓟꓲ ꓬꓲ ꓬꓲꓼ ꓬꓲꓸ ꓠꓬꓲ ꓕꓲ ꓣꓳ ꓔꓯ ꓠꓲꓹ ꓟ ꓦꓶꓻ ꓢꓴ ꓠꓬ ꓐꓯ ꓟꓴ ꓘꓶꓽˍ ꓟ ꓟꓽ ꓡꓲꓹ ꓗꓷ꓿ ꓮꓽ ꓟ ꓥ ꓟꓲ ꓬꓲꓼ ꓠꓬꓲ ꓕꓲ ꓣꓳ ꓔꓯ ꓟꓳꓻ ꓟꓽ ꓟꓵ ꓢꓲ꓾ ꓠꓴ ꓠꓬ ꓢꓯꓸ ꓔꓬ ꓥ ꓟꓲ ꓣꓱꓽ ꓬꓯꓼ ꓖꓴ ꓟꓽ ꓙꓳ꓾ ꓐꓯ ꓢꓴ ꓠꓬ ꓐꓯꓺ ꓟꓴ ꓜꓲꓼ ꓓꓴ ꓓꓽ ꓟ ꓗꓪ ꓐꓰ ꓡꓲꓹ ꓗꓷ ꓟꓽ ꓓ꓿ ꓮꓽ ꓟ ꓥ ꓟꓲ ꓬꓲ ꓬꓲꓼ ꓬꓲꓸ ꓠꓬꓲ ꓕꓲ ꓣꓳ ꓔꓯ ꓑꓱꓹ ꓢꓲ꓾ ꓞꓳ ꓟꓶꓻ ꓠꓴ꓾ ꓐꓯ ꓢꓴˍ ꓟꓲ ꓛꓬꓼ ꓟꓵꓽ ꓮ ꓔꓳꓸ ꓗꓪ ꓐꓰ ꓡꓲꓹ ꓗꓷ ꓟꓽ ꓓ꓿ 23 ꓖꓳ ꓡꓱ ꓠꓬꓲ ꓔꓲ ꓖꓴ ꓗꓪ ꓠꓴ ꓔꓲ ꓓꓴ ꓔꓲˍ ꓐꓰ ꓬꓰ ꓔꓬ ꓕꓯ꓾ ꓠꓴ ꓬꓲꓼ ꓠꓴ ꓠꓬꓲ ꓕꓲ ꓣꓳ ꓠꓴ ꓔꓯ ꓠꓲꓹ ꓟ ꓫ ꓖꓴ ꓙꓳˍ ꓟ ꓠꓴ ꓓꓵꓽ ꓙ ꓛꓲ ꓡ ꓠꓬ꓾ 24 ꓠꓴ ꓔꓲꓺ ꓓꓴ ꓠꓬ ꓔꓲ ꓖꓴ ꓛꓲ ꓔꓲ ꓗꓪ ꓗꓶ ꓔ ꓬꓰ ꓢꓲ꓾ ꓬꓲ ꓔꓯ ꓧꓶꓸ ꓕꓯ ꓙꓰ ꓢꓲ ꓠꓬꓲ꓾ ꓬꓲˍ ꓐꓰ ꓧꓳꓹ ꓡꓯꓽ ꓘꓳ ꓬꓰ꓿ ꓖꓳ ꓗꓸ ꓠꓯꓸ ꓢꓲˍ ꓡꓰꓽ ꓔꓲꓺ ꓓꓴ ꓔꓲ ꓡ ꓛꓵˍ ꓡꓳ꓿ 25 ꓠꓴ ꓠꓬ ꓠꓴ ꓔꓯ ꓗꓳꓹ ꓡꓯꓽ ꓘꓳ ꓢꓴˍ ꓐꓰ ꓙ ꓖꓴ ꓗꓪ ꓫꓱꓽ ꓔꓬ ꓢꓰ ꓕꓯˍ ꓡꓰ꓾ ꓮꓸ ꓟꓲꓸ ꓟꓲꓸ ꓬꓲˍ ꓐꓰ ꓧꓳꓹ ꓡꓯꓽ ꓘꓳ꓿ ꓟꓽ ꓥ ꓠꓬ ꓬꓲ ꓡꓰ ꓠꓴ ꓔꓯ ꓐꓯꓺ ꓟꓴ ꓘꓶꓽ ꓢꓲꓽ ꓒ ꓔꓯ ꓡꓯꓼ ꓙꓱ ꓗꓷ ꓢꓲ꓾ ꓐꓯꓺ ꓟꓴ ꓘꓶꓽ ꓢꓲꓽ ꓒ ꓡꓰ ꓬꓲ ꓟꓯꓼ ꓐꓴ ꓔꓯ ꓡꓯꓼ ꓙꓱ ꓗꓷ ꓠꓬ꓾ ꓠꓴ ꓔꓯ ꓐꓱꓻ ꓓꓴꓽ ꓗꓪ ꓐꓱꓻ ꓗꓷˍ ꓥꓳ꓿ 26 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓐꓶꓻ ꓟꓽ ꓖꓴ ꓟ ꓙꓲꓽ ꓒꓬꓸ ꓕꓲꓽ ꓒꓬꓸ ꓤꓽˍ ꓡꓰꓽ ꓛˍ ꓟꓲ꓾ ꓠꓴ ꓖꓳ ꓗꓪ ꓐꓰ ꓓꓳ ꓡ ꓪ ꓟꓽ ꓓ꓿ 27 ꓠꓴ ꓪꓽ ꓠꓬ꓾ ꓢꓴ ꓤ ꓟꓶꓻ ꓔꓯ ꓕꓽ ꓛꓬ꓾ ꓐꓯˍ ꓟ ꓑ ꓙꓽ ꓠꓬꓲꓳ꓿ 28 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓮꓽ ꓟ ꓥ ꓟꓲ ꓤ ꓟꓶ ꓤ ꓔꓯ ꓡꓳꓸ ꓔꓸ ꓢꓲ ꓦꓯꓸ ꓠꓲꓹ ꓙꓵꓽˍ ꓠꓬ꓾ ꓬꓲ ꓠꓽ ꓠꓲꓹ ꓟ ꓠꓯꓸꓼ ꓗꓪ ꓬꓲˍ ꓐꓰ ꓦꓬꓽ ꓛꓳꓽ ꓧꓪ ꓗꓷꓳ꓿ 29 ꓠꓴ ꓟꓬ ꓙ ꓐꓽ ꓡꓰ ꓠꓴ ꓔꓯ ꓡꓱꓸ ꓗꓷ ꓝꓲˍ ꓠꓬ ꓗꓳꓸ ꓓꓳ ꓡ ꓢꓲ ꓡꓳ ꓩꓴ ꓗꓷ꓿ ꓠꓴ ꓖꓳ ꓓꓱ ꓗꓪ ꓟ ꓡꓯꓼ ꓗ ꓕꓲ ꓗꓸ ꓒꓲꓼ ꓬꓰˍ ꓟ ꓠꓬ꓾ ꓠꓴ ꓕꓲ ꓖꓳ ꓓꓱ ꓡꓱꓸꓼ ꓛꓬꓼ ꓟꓵꓽ ꓗꓪ ꓙꓰˍ ꓟ ꓕꓯꓽ ꓢꓲ ꓙꓲꓻˍ ꓡꓳ꓿ 30 ꓠꓴ ꓡꓯꓼ ꓙ ꓐꓽ ꓡꓰ ꓠꓴ ꓔꓯ ꓡꓱꓸ ꓗꓷ ꓝꓲˍ ꓠꓬ ꓓꓶ ꓡꓳ ꓗꓷ꓿ ꓠꓴ ꓖꓳ ꓓꓱ ꓗꓪ ꓟ ꓡꓯꓼ ꓗꓸ ꓕꓲ ꓗꓸ ꓒꓲꓼ ꓬꓰˍ ꓟ ꓠꓬ꓾ ꓠꓴ ꓕꓲ ꓖꓳ ꓓꓱ ꓡꓱꓸꓼ ꓛꓬꓼ ꓟꓵꓽ ꓗꓪ ꓙꓰˍ ꓟ ꓕꓯꓽ ꓢꓲ ꓙꓲꓻˍ ꓡꓳ꓿ 31 ꓖꓳ ꓟˍ ꓡꓰ ꓟꓽ ꓞꓲ꓾ ꓮꓽ ꓟ ꓥ ꓟꓲ ꓬꓲ ꓤ ꓟꓶ ꓔꓯ ꓒꓰꓻ ꓗꓷˍ ꓠꓬ꓾ ꓬꓲ ꓡꓰ ꓬꓲ ꓔꓯ ꓤꓽ ꓟꓶ ꓒꓰꓻ ꓗꓷˍ ꓟ ꓕꓳ ꓶ ꓖꓶ ꓠ ꓗꓹ ꓡꓳ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓙꓳˍ ꓡꓳ꓿ 32 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓮꓽ ꓟ ꓥ ꓟꓲ ꓟꓽ ꓢꓲ ꓟꓽ ꓫꓬꓻ ꓟ ꓝꓴꓲ ꓪꓴꓸ ꓠꓬꓲ ꓟꓽ ꓥ ꓥ ꓬꓲ ꓤꓽ ꓟꓶ ꓔꓯ ꓒꓰꓻ ꓗꓷ ꓢꓲ꓾ ꓬꓲ ꓤ ꓟꓶ ꓠꓬ ꓠꓱꓸ ꓐꓯꓼ ꓤ ꓖꓴ ꓧꓪ ꓙꓰ ꓐꓷˍ ꓠꓬ ꓬꓲ ꓔꓯ ꓦꓬꓽ ꓛꓳꓽ ꓧꓪ ꓟꓺ ꓗꓷ ꓡꓰ ꓝꓲˍ ꓟ ꓥ ꓡꓳ꓿ ꓤ ꓟꓶ ꓤ ꓖꓳ ꓟ ꓔꓯ ꓫꓺ ꓢꓴˍ ꓟꓲ ꓦꓬꓽ ꓛꓳꓽ ꓧꓪ ꓒꓽ ꓗꓷ ꓡꓰˍ ꓟ ꓥ ꓡꓳ꓿ 33 ꓝꓮꓲ ꓮꓽ ꓠꓱ ꓟ ꓡ ꓞꓳ ꓔꓯ꓾ ꓠꓴ ꓪꓵꓼ ꓙꓱꓽ ꓔ ꓟ ꓒꓳꓹ ꓟꓽ ꓓ꓾ ꓢꓲ ꓒꓽ ꓔꓯ ꓪꓵꓼ ꓙꓱꓽ ꓗꓷ ꓟ ꓠꓽ ꓬꓰ ꓓꓳ ꓡꓰ ꓝꓲ ꓠ ꓗꓹ ꓡꓳ꓾ ꓐꓰ ꓐꓯˍ ꓟ ꓠꓴ ꓪꓽ ꓑ ꓙꓽ ꓠꓬꓲꓳ꓿ 34 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓮ ꓡꓲˍ ꓟꓲ ꓕꓽ ꓙꓱꓽ꓿ ꓟꓴꓽ ꓗꓪ ꓔꓯ ꓖꓴ ꓠꓬꓲˍ ꓟꓲ ꓕꓽ ꓙꓱ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓠꓽ ꓪꓴ-ꓢ ꓙꓵꓽ ꓠꓬꓲꓸ ꓕꓲ ꓥ ꓡꓳ꓿ 35 ꓟꓲ ꓠꓯ ꓔꓯ ꓖꓴ ꓠꓬꓲˍ ꓟꓲ ꓕꓽ ꓙꓱ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓠꓽ ꓬꓲ ꓛꓲ ꓕꓳꓼ ꓕꓲ ꓥ ꓡꓳ꓿ ꓙꓱ-ꓣꓴ-ꓢ-ꓡꓱ ꓔꓯ ꓖꓴ ꓠꓬꓲˍ ꓟꓲ ꓕꓽ ꓙꓱꓽ꓿ ꓮ ꓡꓲꓳ ꓐꓯ ꓠꓬ ꓙꓱ-ꓣꓴ-ꓢ-ꓡꓱ ꓠꓽ ꓪ ꓔꓲ ꓓꓽ ꓟ ꓡꓳ ꓒꓱ ꓥ ꓡꓳ꓿ 36 ꓠꓴ ꓪꓴꓸ ꓓꓵ ꓔꓯ ꓖꓴ ꓠꓬꓲ ꓐꓰˍ ꓟꓲ ꓕꓽ ꓪꓵꓼ ꓙꓱꓽ꓿ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓪꓴꓸ ꓞꓱ ꓕꓲ ꓚ ꓔꓯ ꓒꓴˍ ꓟꓲ ꓒꓴ ꓡꓰ ꓝꓲ ꓟꓽ ꓗꓴꓸ꓾ ꓠꓯꓺˍ ꓟꓲ ꓠꓯ ꓡꓰ ꓝꓲ ꓟꓽ ꓗꓴꓸ꓿ 37 ꓠꓴ ꓠꓽ꓾ ꓥ ꓟ ꓠꓬ ꓥ ꓡꓳ꓾ ꓟꓽ ꓥ ꓟ ꓠꓬ ꓟꓽ ꓥ꓾ ꓐꓯ ꓠ ꓗꓹ ꓡꓳ꓿ ꓕꓱ ꓟ ꓕꓯꓽ ꓢꓲ ꓟꓬꓽ ꓠꓬꓲ ꓐꓯ ꓕꓯ ꓠꓽ ꓥꓶˍ ꓟ ꓖꓳ ꓕꓲ ꓣꓳ ꓗꓪ ꓐꓰ ꓡꓻˍ ꓟ ꓥ ꓡꓳ꓿ 38 ꓟꓬ ꓢꓶ ꓬꓲꓸ ꓛꓲ ꓟꓬ ꓢꓶꓽ ꓚꓱꓹ ꓖꓶ꓾ ꓢꓶꓽ ꓛꓲ ꓬꓲꓸ ꓛꓲ ꓢꓶꓽ ꓛꓲ ꓚꓱꓹ ꓖꓶ꓾ ꓐꓯˍ ꓟ ꓠꓴ ꓪꓽ ꓑ ꓙꓽ ꓠꓬꓲꓳ꓿ 39 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓞꓳ ꓥꓶ ꓔꓯ ꓕꓽ ꓗꓽ ꓔ꓿ ꓮꓽ ꓟ ꓡꓰ ꓠꓴ ꓒꓬꓱꓽ ꓟꓬ ꓡꓯꓼ ꓙ ꓕꓲ ꓛꓱꓽ ꓗꓪ ꓓꓶꓽ ꓡ ꓠꓬ꓾ ꓡꓯꓼ ꓶꓸ ꓕꓲ ꓛꓱꓽˍ ꓟꓲ ꓬꓲ ꓔꓯ ꓒꓳꓹ ꓟꓳꓸ ꓖꓶ꓿ 40 ꓮꓽ ꓟ ꓡꓰ ꓠꓴ ꓐꓵ ꓞꓶ ꓠꓯꓸ ꓘꓪ ꓕꓲ ꓘꓳꓹ ꓟ ꓣꓴ ꓔꓯꓹ ꓙꓰ ꓠꓲꓹ ꓫꓵ ꓢꓲ ꓠꓴ ꓔꓯ ꓗꓳꓹ ꓢꓴ ꓙꓳˍ ꓠꓬ꓾ ꓕꓯꓽ ꓢꓲ ꓕꓲ ꓘꓳꓹ ꓟˍ ꓟꓲ ꓬꓲ ꓔꓯ ꓔꓯꓹ ꓙꓰ ꓝꓲ꓿ 41 ꓮꓽ ꓟ ꓡꓰ ꓠꓴ ꓔꓯ ꓟꓽ ꓓ ꓟꓽ ꓞꓽ ꓡꓳꓺ ꓔ ꓕꓲ ꓕꓷꓹ ꓫꓱꓽ ꓝꓲ ꓡ ꓠꓬ꓾ ꓠꓴ ꓬꓲ ꓔꓯ ꓡꓳꓺ ꓔ ꓠꓬꓲꓽ ꓕꓷꓹ ꓛꓳ ꓫꓱꓽ꓿ 42 ꓠꓴ ꓔꓯ ꓓꓰꓽ ꓢꓴ ꓔꓯ ꓖꓶ꓿ ꓠꓴ ꓔꓯ ꓥꓪꓸ ꓠꓲꓹ ꓫꓵ ꓢꓴ ꓔꓯˍ ꓟꓲ ꓟꓽ ꓥꓪꓸ ꓖꓶ ꓕꓽ ꓬꓰ꓿ 43 ꓠꓴ ꓠꓶꓽ ꓛꓳ ꓕꓲ ꓛꓳ ꓔꓯ ꓠꓲꓹ ꓠꓵ ꓢꓲ꓾ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓜꓳ꓾ ꓐꓯˍ ꓟ ꓠꓴ ꓪꓽ ꓑ ꓙꓽ ꓠꓬꓲꓳ꓿ 44 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓢꓲ꓾ ꓠꓴ ꓪꓽ ꓔꓯ ꓗꓸ ꓧꓪ ꓢꓴ ꓐꓱ ꓶ ꓪꓽ ꓘꓴ ꓙ꓿ 45 ꓠꓴ ꓪꓽ ꓕꓱ ꓡꓱ ꓬꓰˍ ꓠꓬ ꓠꓴ ꓪꓽ ꓠꓽ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐꓽ ꓬꓲ ꓤ ꓠꓱ ꓒꓬꓱꓼ ꓡ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓬꓲ ꓟꓲꓽ ꓟꓲ ꓠꓬ꓾ ꓞꓳ ꓙꓲꓻˍ ꓐꓰ ꓞꓳ ꓥꓶ ꓔꓯ ꓕꓲ ꓡꓰꓹꓼ ꓐꓰ ꓣꓳꓺ ꓖꓶˍ ꓡꓳ꓿ ꓟꓶꓽ ꓦˍ ꓟꓲ ꓔꓱꓹ ꓜꓳꓽ ꓢꓴˍ ꓐꓰ ꓟꓽ ꓔꓱꓹ ꓜꓳꓽ ꓢꓴ ꓔꓯ ꓕꓲ ꓡꓰꓹꓼ ꓐꓰ ꓦ ꓖꓶˍ ꓡꓳ꓿ 46 ꓠꓴ ꓪꓽ ꓠꓬ ꓠꓴ ꓪꓽ ꓔꓯ ꓠꓲꓹ ꓠꓵ ꓢꓴ ꓔꓯˍ ꓡꓰꓽ ꓠꓲꓹ ꓠꓵˍ ꓕꓯ ꓠꓽ ꓮꓸ ꓫꓵ ꓡꓯꓼ ꓫꓴ ꓟꓽ ꓙꓳ꓿ ꓝꓲꓸ ꓫ ꓢꓴˍ ꓟꓲ ꓕꓱ ꓡꓱ ꓬꓰˍ ꓡꓳ꓾ ꓟꓽ ꓥ ꓡ? 47 ꓠꓴ ꓪꓽ ꓠꓬ ꓠꓴ ꓬꓲꓼ ꓠꓴ ꓠꓬꓲ ꓔꓯˍ ꓡꓰ ꓒꓵꓽ ꓗ ꓬꓰˍ ꓠꓬ꓾ ꓢꓴ ꓬꓰˍ ꓟ ꓕꓯꓽ ꓢꓲ ꓮꓸ ꓫꓵ ꓬꓰˍ ꓡ? ꓐꓶꓽ ꓞꓳ ꓐꓴˍ ꓟꓲ ꓖꓳ ꓡꓱ ꓬꓰˍ ꓡꓳ꓾ ꓟꓽ ꓥ ꓡ? 48 ꓖꓳ ꓡꓱ ꓠꓬꓲ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐ ꓜꓳꓽ ꓓꓰˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓜꓳꓽ ꓓꓰ ꓡꓰ ꓠ ꓗꓹ ꓡꓳ꓿

ꓟ-ꓔꓲ 6

1 ꓠꓴ ꓪꓽ ꓠꓬ ꓙꓲꓻˍ ꓟ ꓟꓬꓱꓽ ꓬꓰˍ ꓕꓯꓽ꓾ ꓢꓴ ꓟꓲꓽ ꓕꓯꓽ ꓗꓪ ꓟꓬꓱ ꓓꓳꓽ ꓟꓶ ꓠꓹ ꓟ ꓬꓰˍ ꓟ ꓕꓽ ꓗꓷ ꓡꓰ ꓝꓲ꓿ ꓟꓽ ꓥ ꓠꓬ꓾ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓐꓹ ꓐ ꓬꓲ ꓡꓯꓼ ꓫꓴ ꓠꓴ ꓪꓽ ꓟꓽ ꓟꓶ꓿ 2 ꓖꓳ ꓡꓱ ꓠꓬꓲ꓾ ꓠꓴ ꓪꓽ ꓫꓱꓸ ꓤ ꓓꓴ ꓟꓬꓱꓽ ꓬꓰˍ ꓕꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱ ꓢꓴˍ ꓡꓰ ꓐꓰ ꓞꓳ ꓤ ꓟꓲ ꓙꓬꓽ ꓗꓪ ꓟꓬꓱ ꓓꓳꓽ ꓟꓶ ꓠꓹ ꓟ꓾ ꓜꓲꓼ ꓦꓲˍ ꓐꓰ ꓙꓵꓺ ꓙ ꓖꓴ ꓓꓽ ꓟ ꓗꓪ ꓬꓰˍ ꓟ ꓡꓰ ꓐꓰ꓾ ꓠꓴ ꓪꓽ ꓟꓲꓽ ꓙꓬ ꓢꓲ ꓗꓪ ꓐꓽ ꓡ ꓕꓽ ꓟꓵ꓿ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓖꓳ ꓡꓱ ꓬꓰ ꓢꓴ ꓠꓬ ꓬꓲ ꓪꓽ ꓡꓯꓼ ꓫꓴ ꓮꓽ ꓙꓵꓽ ꓬꓲ ꓪꓽ ꓟꓶ ꓗꓷꓳ꓿ 3 ꓠꓴ ꓠꓽ ꓫꓱꓸ ꓤ ꓓꓴ ꓟꓬꓱꓽ ꓬꓰˍ ꓕꓯ꓾ ꓠꓴ ꓡꓯꓼ ꓙꓺ ꓐꓽ ꓡꓰ ꓬꓰˍ ꓟ ꓠꓬ꓾ ꓡꓯ ꓶꓸ ꓐꓽ ꓔꓯ ꓕꓽ ꓢꓷꓸ ꓡꓰ ꓝꓲ꓿ 4 ꓖꓳ ꓡꓱ ꓬꓰˍ ꓠꓬ ꓘꓳ ꓫꓱ ꓫꓱˍ ꓗꓪ ꓬꓰ ꓗꓷ ꓟ ꓔꓯ ꓡꓳꓸ ꓟꓳꓻˍ ꓟ ꓠꓴ ꓐꓹ ꓐ ꓡꓰ ꓠꓴ ꓔꓯ ꓡꓯꓼ ꓫꓴ ꓖꓶ ꓡ ꓥꓳ꓿ 5 ꓠꓴ ꓪꓽ ꓪꓽ ꓘꓴˍ ꓕꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴˍ ꓡꓰ ꓐꓰ ꓕꓽ ꓬꓰ꓿ ꓬꓲ ꓪꓽ ꓠꓽ ꓞꓳ ꓤ ꓔꓯ ꓟꓳ ꓝꓲ ꓠꓹ ꓟ꓾ ꓜꓲꓼ ꓦꓲ ꓠꓯꓸꓼˍ ꓐꓰ ꓙ ꓫꓬꓸ ꓗꓪ ꓦꓰꓼ ꓞ ꓢꓲ ꓪꓽ ꓘꓴ ꓠꓲꓹ ꓫꓵˍ ꓡꓳ꓿ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓖꓳ ꓡꓱ ꓬꓰ ꓢꓴ ꓠꓬ ꓬꓲ ꓪꓽ ꓡꓯꓼ ꓫꓴ ꓮꓽ ꓙꓵ ꓬꓲ ꓪꓽ ꓟꓶ ꓗꓷꓳ꓿ 6 ꓠꓴ ꓪꓽ ꓪꓽ ꓘꓴˍ ꓕꓯ꓾ ꓘꓷꓹ ꓖꓳꓼ ꓗꓪ ꓓꓵꓽ ꓡꓰ ꓢꓲ꓾ ꓗ ꓘꓶꓽ ꓚꓵꓸ ꓗꓷ ꓢꓲ ꓠꓬꓲ꓾ ꓘꓳ ꓫꓱ ꓫꓱˍ ꓗꓪ ꓠꓴ ꓐꓰ ꓔꓬ ꓟ ꓠꓴ ꓐꓹ ꓐ ꓔꓯ ꓪꓽ ꓘꓴ꓿ ꓖꓳ ꓡꓱ ꓠꓬ ꓘꓳ ꓫꓱ ꓫꓱˍ ꓗꓪ ꓠꓴ ꓔꓯ ꓡꓳꓸ ꓟꓳˍ ꓟ ꓠꓴ ꓐꓹ ꓐ ꓡꓰ ꓠꓴ ꓔꓯ ꓡꓯꓼ ꓫꓴ ꓖꓶ ꓡ ꓥꓳ꓿ 7 ꓠꓴ ꓪꓽ ꓪꓽ ꓘꓴˍ ꓠꓬ ꓐꓶꓽ ꓞꓳ ꓬꓰˍ ꓟ ꓡꓰ ꓐꓰ꓾ ꓮꓽ ꓔꓳꓺˍ ꓡꓰꓽ ꓓꓴ ꓔꓲꓸ ꓓꓴ ꓡꓰꓼ ꓕꓽ ꓐꓯ꓿ ꓬꓲ ꓪꓽ ꓠꓽ ꓐꓯ ꓘꓶꓽ ꓮꓽ ꓟꓬꓹ ꓣꓱꓽ ꓢꓲ ꓪꓽ ꓘꓴˍ ꓠꓬꓲ꓾ ꓬꓲ ꓪꓽ ꓔꓯ ꓪꓴ-ꓢ ꓠ ꓠꓹ ꓖꓶ ꓡ ꓥꓳ꓾ ꓓꓵꓽ ꓙꓽˍ ꓡꓳ꓿ 8 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓬꓲ ꓪꓽ ꓡꓰ ꓐꓰ ꓕꓽ ꓬꓰ꓿ ꓠꓴ ꓪꓽ ꓐꓹ ꓐ ꓔꓯ ꓟꓽ ꓓꓰ ꓧꓶꓸ ꓕꓯˍ ꓡꓰ꓾ ꓠꓴ ꓪꓽ ꓮꓸ ꓫꓵ ꓣꓱꓽ ꓬꓯꓼˍ ꓟ ꓬꓲ ꓢꓷꓸˍ ꓡꓳ꓿ 9 ꓖꓳ ꓡꓱ ꓠꓬꓲ ꓠꓴ ꓪꓽ ꓪꓽ ꓘꓴˍ ꓠꓬ ꓕꓱ ꓡꓱ ꓐꓯ꓿ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓔꓬ ꓟ ꓥꓪ ꓠꓴ ꓐꓹ ꓐꓽꓳ꓾ ꓠꓴ ꓢꓲꓽ ꓫꓬˍ ꓟ ꓟꓬꓱꓺ ꓔꓯ ꓒꓵꓽ ꓔꓬ ꓝꓲ꓿ 10 ꓠꓴ ꓗꓴꓷꓼ ꓓꓳ ꓡ ꓝꓲ꓿ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓠꓴ ꓠꓲꓹ ꓡꓶꓽ ꓒꓬꓱꓼ ꓡ ꓟ ꓡꓰ ꓐꓰ ꓟꓲ ꓠꓯ ꓗꓪˍ ꓟꓲ ꓒꓬꓱꓼ ꓡ ꓝꓲ꓿ 11 ꓕꓲ ꓠꓬꓲ ꓡꓰ ꓕꓲ ꓠꓬꓲ ꓥꓪ ꓠꓴ ꓣꓱꓽ ꓬꓯꓼˍ ꓟ ꓜꓽ ꓓꓴ ꓥꓪ ꓠꓴ ꓔꓯ ꓖꓶ ꓜꓽ ꓡꓯ꓿ 12 ꓥꓪ ꓠꓴꓽ ꓔꓯ ꓛꓬꓻ ꓡ ꓢꓴ ꓔꓯ ꓥꓪ ꓠꓴ ꓖꓽ ꓖꓶ ꓗꓷ ꓟ ꓡꓰ ꓐꓰ꓾ ꓠꓴ ꓡꓰ ꓥꓪ ꓠꓴ ꓛꓬꓻ ꓗꓷ ꓟ ꓖꓽ ꓖꓶ ꓡꓯ꓿ 13 ꓫꓵꓽ ꓠꓬꓲˍ ꓟ ꓗꓪ ꓥꓪ ꓠꓴꓽ ꓔꓯ ꓕꓽ ꓧꓳꓽ ꓓꓵ ꓙꓰ꓿ ꓥꓶˍ ꓟ ꓗꓪ ꓐꓰ ꓠꓽ ꓥꓪ ꓠꓴꓽ ꓔꓯ ꓚꓬꓴ ꓓꓳ ꓖꓶ ꓡꓯ꓿ ꓮ ꓡꓲꓳ ꓐꓯ ꓠꓬ ꓗꓴꓷˍ ꓐꓰ ꓪꓽ ꓠꓬꓲˍ ꓟ ꓐꓰ ꓟꓬꓱ ꓓꓳꓽ ꓠꓬ꓾ ꓕꓲ ꓞꓲꓼ ꓕꓲ ꓑ ꓠꓴ ꓔꓯꓸ ꓟ ꓥꓳ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓐꓰ ꓐꓯ꓿ 14 ꓢꓴ ꓡꓰ ꓛꓬꓻ ꓡ ꓟ ꓔꓯ ꓠꓴ ꓪꓽ ꓖꓽ ꓖꓶˍ ꓠꓬ꓾ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓟ ꓠꓴ ꓪꓽ ꓐꓹ ꓐˍ ꓟꓲ꓾ ꓠꓴ ꓪꓽ ꓛꓬꓻ ꓗꓷˍ ꓟ ꓖꓽ ꓖꓶ ꓡ ꓥꓳ꓿ 15 ꓢꓴ ꓡꓰ ꓛꓬꓻ ꓡ ꓟ ꓔꓯ ꓠꓴ ꓪꓽ ꓟꓽ ꓖꓽ ꓖꓶ ꓠꓬ꓾ ꓟꓴꓽ ꓗꓪ ꓗꓪ ꓟ ꓠꓴ ꓪꓽ ꓐꓹ ꓐˍ ꓟꓲ ꓠꓴ ꓪꓽ ꓛꓬꓻ ꓗꓷˍ ꓟ ꓟꓽ ꓖꓽ ꓖꓶ ꓡ꓿ 16 ꓠꓴ ꓪꓽ ꓠꓬ ꓜꓽ ꓓꓴ ꓚꓲꓸˍ ꓕꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱ ꓢꓴˍ ꓡꓰ ꓐꓰ ꓠꓲꓹ ꓟ ꓫꓸ ꓒꓬꓱꓽ ꓕꓽ ꓶꓻ ꓝꓲ꓿ ꓬꓲ ꓪꓽ ꓠꓽ ꓜꓽ ꓓꓴ ꓚꓲꓸˍ ꓕꓯ ꓢꓴ ꓔꓯ ꓡꓳꓸ ꓓꓳ ꓡ ꓝꓲ ꓠꓹ ꓟ꓾ ꓬꓲ ꓪꓽ ꓒꓬꓱꓽ ꓟꓬ ꓡꓳꓸ ꓫꓸ ꓫ ꓟꓴꓽ ꓗꓷ ꓡꓰ ꓝꓲˍ ꓡꓳ꓿ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓬꓲ ꓪꓽ ꓡꓯꓼ ꓫꓴ ꓮꓽ ꓙꓵꓽ ꓬꓲ ꓪꓽ ꓟꓶ ꓗꓷꓳ꓿ 17 - 18 ꓠꓴ ꓪꓽ ꓠꓽ ꓜꓽ ꓓꓴ ꓚꓲꓸˍ ꓕꓯ꓾ ꓢꓴ ꓔꓯ ꓟꓽ ꓡꓳꓸ ꓓꓳ ꓡ ꓝꓲ ꓠꓹ ꓟ꓾ ꓒꓬꓱꓽ ꓟꓬ ꓞꓲꓽ ꓠꓬꓲ꓾ ꓪꓴꓸ ꓓꓵ ꓗꓪ ꓟꓰꓺ ꓞꓶ ꓟꓰ ꓢꓲ ꓪꓴꓸ ꓓꓵ ꓑꓶꓸ ꓠꓬꓲ ꓬꓰ꓿ ꓖꓳ ꓡꓱ ꓠꓬ ꓘꓳ ꓫꓱ ꓫꓱˍ ꓗꓪ ꓠꓴ ꓪꓽ ꓔꓯ ꓡꓳꓸ ꓟꓳꓻˍ ꓟ ꓠꓴ ꓪꓽ ꓐꓹ ꓐ ꓡꓰ ꓠꓴ ꓪꓽ ꓔꓯ ꓡꓯꓼ ꓫꓴ ꓖꓶ ꓡ ꓥꓳ꓿ 19 ꓟꓲ ꓠꓯ ꓗꓪ ꓧꓪꓽ ꓟꓵ ꓐꓵꓽ ꓡꓴꓻˍ ꓐꓰ ꓙꓲꓽ ꓜꓽ ꓡ ꓟ ꓗꓪ꓾ ꓘꓴꓽ ꓒˍ ꓟꓲ ꓦꓲ ꓘꓴꓻ ꓕꓴꓻ ꓢꓲ ꓘꓴꓽ ꓡ ꓟ ꓗꓪ꓾ ꓠꓴ ꓪꓽ ꓚꓲꓸ ꓛꓬ ꓐꓱ ꓶ ꓒꓵꓽ ꓶꓽ ꓕꓽ ꓫꓺ ꓔ꓿ 20 ꓖꓳ ꓡꓱ ꓥ ꓟꓲ ꓧꓪꓽ ꓟꓵ ꓐꓵꓽ ꓡꓴꓻˍ ꓐꓰ ꓙꓲꓽ ꓟꓽ ꓜꓽ ꓡ ꓟ ꓗꓪ꓾ ꓘꓴꓽ ꓒꓽˍ ꓟꓲ ꓦꓲ ꓘꓴꓻ ꓕꓴꓻ ꓢꓲ ꓘꓴꓽ ꓡ ꓟ ꓟꓽ ꓙꓳ ꓟ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓠꓴ ꓪꓽ ꓚꓲꓸ ꓛꓬ ꓐꓱ ꓶ ꓒꓵꓽ ꓶꓽ ꓫ ꓔ꓿ 21 ꓠꓴ ꓪꓽ ꓒꓵꓽ ꓶꓽ ꓮ ꓡꓲ ꓗꓪ ꓓꓹ ꓠꓬ꓾ ꓠꓴ ꓪꓽ ꓠꓲꓹ ꓟˍ ꓟꓲ ꓖꓳ ꓗꓪ ꓥꓳꓺ ꓞꓹ ꓥꓳ꓿ 22 ꓟꓬ ꓢꓶꓽ ꓠꓬ ꓖꓳ ꓓꓱ ꓗꓪ ꓟ ꓟꓬ ꓡꓴꓻ ꓥꓳ꓿ ꓖꓳ ꓡꓱ ꓠꓬꓲ ꓠꓴ ꓟꓬ ꓢꓶꓽ ꓫꓬꓻ ꓫꓬˍ ꓡꓰꓽ ꓗꓹ ꓕꓯ ꓠꓽ꓾ ꓕꓲꓽ ꓖꓳ ꓓꓱ ꓡꓱꓸꓼ ꓠꓬꓲ ꓟꓳꓻ ꓓꓴ ꓐꓲ ꓞꓹ ꓥꓳ꓿ 23 ꓠꓴ ꓟꓬ ꓢꓶꓽ ꓐꓬ ꓡꓰˍ ꓕꓯ ꓠꓽ ꓠꓴ ꓕꓲ ꓖꓳ ꓓꓱ ꓡꓱꓸꓼ ꓠꓯ ꓞꓲꓹ ꓡꓰˍ ꓥꓳ꓿ ꓖꓳ ꓡꓱ ꓠꓬꓲ ꓠꓴ ꓠꓯꓸꓼ ꓗꓪ ꓟ ꓠꓬꓲ ꓟꓳꓻ ꓓꓴ ꓟꓽ ꓡꓬꓸ ꓗꓷ ꓡꓰ ꓠꓬ꓾ ꓠꓯ ꓞꓲꓹ ꓠꓯ ꓕꓳꓽ ꓓꓽ ꓟ ꓗꓷ ꓡꓰˍ ꓥꓳ꓿ 24 ꓕꓲ ꓧꓪꓹˍ ꓐꓰ ꓢꓲ ꓒꓽ ꓠꓬꓲꓽ ꓣꓳ ꓔꓯ ꓣꓱꓽ ꓙ ꓐ ꓡ ꓢꓴ ꓟꓽ ꓙꓳ꓿ ꓬꓲ ꓠꓬ ꓕꓱ ꓕꓲ ꓣꓳ ꓔꓯ ꓠꓲꓹ ꓜꓳ ꓢꓲ꓾ ꓖꓳ ꓕꓲ ꓣꓳ ꓔꓯ ꓠꓲꓹ ꓠꓵˍ ꓥꓳ꓿ ꓥ ꓠꓬ ꓕꓱ ꓕꓲ ꓣꓳ ꓔꓯ ꓒꓵꓽ ꓢꓲ꓾ ꓖꓳ ꓕꓲ ꓣꓳ ꓔꓯ ꓟꓽ ꓒꓵꓽ ꓐꓰ ꓗꓹ ꓥꓳ꓿ ꓖꓳ ꓟ ꓡꓰ ꓐꓰ ꓠꓴ ꓪꓽ ꓠꓬ ꓪꓴ-ꓢ ꓔꓯˍ ꓟꓲ ꓣꓱꓽ ꓙ꓾ ꓒꓴ ꓤ ꓫꓵ ꓤ ꓔꓯˍ ꓟꓲ ꓣꓱꓽ ꓙ꓾ ꓐꓰ ꓬꓰ ꓟꓽ ꓠꓺ꓿ 25 ꓖꓳ ꓡꓱ ꓠꓬꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓢꓯꓼ ꓟꓬ ꓪꓴꓸ ꓠꓬꓲ꓾ ꓮꓸ ꓫꓵ ꓜꓽ ꓮꓸ ꓫꓵ ꓓꓳ ꓢꓲ ꓢꓯꓸ ꓔꓬ ꓠꓯꓹ ꓡ?꓾ ꓐꓰ ꓕ ꓙꓽ ꓫꓸ꓿ ꓖꓳ ꓓꓱ ꓮꓸ ꓫꓵ ꓖꓪꓽ ꓠꓯꓹ ꓡ?꓾ ꓐꓰˍ ꓟꓲ ꓕ ꓛꓲ꓿ ꓢꓯꓼ ꓟꓬ ꓠꓬ ꓜꓽ ꓓꓴ ꓢꓶꓸ ꓟꓽ ꓞꓲ ꓒꓵꓽˍ ꓡꓳ꓾ ꓟꓽ ꓥ ꓡ? ꓖꓳ ꓓꓱˍ ꓟꓲ ꓖꓪꓽ ꓓꓴ ꓢꓶꓸ ꓟꓽ ꓞꓲ ꓒꓵꓽˍ ꓡꓳ꓾ ꓟꓽ ꓥ ꓡ? 26 ꓟꓵꓽ ꓪꓴꓽ ꓗꓪ ꓟ ꓠꓬꓹ ꓤ ꓔꓯ ꓡꓳꓸ ꓠꓬꓲ꓿ ꓬꓲ ꓪꓽ ꓠꓽ ꓫꓵꓸˍ ꓟꓲ ꓟꓽ ꓫꓵꓸ꓾ ꓶꓼˍ ꓟꓲ ꓟꓽ ꓶꓼ꓾ ꓜꓻ ꓗꓹ ꓗꓪˍ ꓟꓲ ꓜꓻ ꓟꓽ ꓫ ꓗꓶ ꓔ꓿ ꓖꓳ ꓡꓱ ꓥ ꓟꓲ ꓟꓴꓽ ꓗꓪ ꓗꓪ ꓟ ꓠꓴ ꓪꓽ ꓐꓹ ꓐ ꓠꓽ ꓬꓲ ꓪꓽ ꓔꓯ ꓫꓳꓺ ꓙ ꓔꓬ ꓡꓳ꓿ ꓠꓴ ꓪꓽ ꓠꓬ ꓠꓬꓹ ꓤ ꓕꓯꓽ ꓢꓲ ꓮꓽ ꓘꓶꓸ ꓒꓵꓽˍ ꓡꓳ꓾ ꓟꓽ ꓥ ꓡ? 27 ꓙꓽ ꓫꓸˍ ꓟ ꓗꓪ ꓐꓰ ꓠꓴ ꓪꓽ ꓮ ꓡꓲ ꓕꓲ ꓣꓳ ꓚꓲꓸ ꓛꓬ ꓤꓶꓻ ꓔꓯ ꓫꓵꓺ ꓡ ꓝꓲ ꓗꓴꓸˍ ꓡ? 28 ꓮꓸ ꓫꓵ ꓪꓴꓸ ꓠꓬꓲ ꓶꓼ ꓓꓴ ꓖꓪꓽ ꓓꓴ ꓑꓶꓸ ꓓꓴ ꓙꓽ ꓫꓸˍ ꓡ? ꓡꓲ ꓛꓲ ꓗꓪ ꓟ ꓬꓲꓹ ꓫꓵꓺ ꓪꓰꓺ ꓮ ꓡꓲ ꓐꓰ ꓪꓴꓽ ꓡ ꓟ ꓔꓯ ꓓꓵꓽ ꓙ ꓠꓬꓲ꓿ ꓢꓲꓹ ꓪꓰ ꓖꓳ ꓟ ꓠꓽ ꓟꓬꓱꓽˍ ꓟꓲ ꓟꓽ ꓬꓰ꓾ ꓛꓲ ꓤˍ ꓟꓲ ꓟꓽ ꓑꓴꓺ꓿ 29 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓢꓳ-ꓡꓳ-ꓟꓳ ꓟꓬꓱ ꓓꓳꓽ ꓮꓽ ꓘꓶꓸ ꓙꓳˍ ꓕꓯˍ ꓟꓲ꓾ ꓬꓲ ꓠꓬ ꓬꓲꓹ ꓫꓵꓺ ꓪꓰꓺˍ ꓡꓰ ꓐꓰ ꓐꓲꓻˍ ꓟ ꓖꓪꓽ ꓓꓴ ꓟꓽ ꓪ ꓖꓪꓽ ꓠꓬꓲ꓿ 30 ꓙꓵꓻ ꓠꓲꓹ ꓣꓳꓺ ꓢꓴ ꓐꓴꓳ꓾ ꓡꓲ ꓛꓲ ꓗꓪ ꓟ ꓟꓳꓼ ꓤ ꓫꓵꓸ ꓤ꓾ ꓠꓬꓲꓸ ꓠꓬꓲ ꓕꓲ ꓠꓬꓲ ꓓꓹ ꓢꓲ ꓢꓸ ꓖꓶ ꓕꓲ ꓠꓬꓲ ꓠꓬ ꓮꓸ ꓔꓳꓸ ꓗꓪ ꓛꓴꓻ ꓩꓴ ꓗꓷ ꓓꓴ ꓥ ꓟ ꓔꓯ꓾ ꓪꓴ-ꓢ ꓡꓰ ꓖꓳ ꓘꓶ ꓛꓲ ꓐꓲꓻ ꓔꓬ ꓝꓲˍ ꓠꓬ꓾ ꓠꓴ ꓪꓽ ꓔꓯ ꓪ ꓜꓲ ꓖꓶ ꓖꓪꓽ ꓡ ꓥꓳ ꓟꓽ ꓥ ꓡ? 31 ꓖꓳ ꓡꓱ ꓠꓬꓲ꓾ ꓮꓸ ꓫꓵ ꓜꓽ ꓠꓯꓹ ꓡ?꓾ ꓮꓸ ꓫꓵ ꓓꓳ ꓠꓯꓹ ꓡ?꓾ ꓮꓸ ꓫꓵ ꓖꓪꓽ ꓠꓯꓹ ꓡ?꓾ ꓐꓯ ꓢꓲ ꓕꓽ ꓙꓽ ꓫꓸ꓿ 32 ꓕꓱ ꓟꓬ ꓫꓵꓽ ꓠꓬ ꓐꓶꓽ ꓞꓳ ꓐꓴ ꓙꓽ ꓫꓸ ꓓꓴ ꓥꓳ꓿ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐ ꓠꓽ ꓕꓱ ꓟꓬ ꓫꓵꓽ ꓮꓽ ꓙꓵ ꓔꓯ ꓠꓴ ꓪꓽ ꓣꓱꓽ ꓬꓯꓼˍ ꓟ ꓬꓲ ꓢꓷˍ ꓡꓳ꓿ 33 ꓠꓴ ꓪꓽ ꓠꓽ ꓪꓴ-ꓢ ꓗꓴꓷꓼˍ ꓐꓰ ꓬꓲ ꓔꓱꓹ ꓜꓳꓽˍ ꓟ ꓔꓯ ꓧꓶꓸ ꓕꓯ ꓧꓪ꓿ ꓖꓳ ꓡꓱ ꓠꓬ ꓕꓱ ꓟꓬ ꓟ ꓮꓽ ꓙꓵ ꓠꓴ ꓪꓽ ꓔꓯ ꓡꓴꓽ ꓖꓶ ꓡ ꓥꓳ꓿ 34 ꓖꓳ ꓡꓱ ꓠꓬꓲ ꓢꓸ ꓖꓶ ꓕꓲ ꓠꓬꓲ ꓐꓱ ꓶ ꓕꓽ ꓙꓽ ꓫꓸ꓾ ꓢꓸ ꓖꓶ ꓙꓽ ꓫꓸ ꓠꓹ ꓟ ꓠꓬ ꓢꓸ ꓖꓶ ꓬꓲ ꓚꓲꓸ ꓛꓬ ꓙꓽ ꓫꓸ ꓝꓲ꓿ ꓕꓲ ꓠꓬꓲ ꓫꓸ ꓓꓴ ꓕꓲ ꓠꓬꓲ ꓐꓱ ꓶ ꓡꓳꓼˍ ꓥꓳ꓿

ꓟ-ꓔꓲ 7

1 ꓠꓴ ꓪꓽ ꓔꓯ ꓐꓯꓺ ꓟꓴ ꓟꓽ ꓞꓷꓹ ꓡ ꓠꓹ ꓟ꓾ ꓠꓴ ꓪꓽˍ ꓟꓲ ꓢꓴ ꓔꓯ ꓐꓯꓺ ꓟꓴ ꓕꓽ ꓞꓷꓹ꓿ 2 ꓠꓴ ꓪꓽ ꓢꓴ ꓔꓯ ꓮ ꓡꓲ ꓐꓯꓺ ꓟꓴ ꓞꓷˍ ꓠꓬ꓾ ꓠꓴ ꓪꓽ ꓔꓯˍ ꓟꓲ ꓖꓳ ꓡꓱ ꓐꓯꓺ ꓟꓴ ꓞꓷꓹ ꓡ ꓥꓳ꓿ ꓠꓴ ꓪꓽ ꓮ ꓡꓲ ꓫꓵꓽ ꓙꓳꓻ ꓓꓴ ꓡꓰ ꓙꓳꓻ ꓖꓶˍ ꓠꓬ꓾ ꓖꓳ ꓕꓲ ꓫꓵꓽ ꓙꓳꓻ ꓓꓴ ꓡꓰ ꓠꓴ ꓔꓯ ꓙꓳꓻ ꓡꓲꓸ ꓖꓶꓽ ꓡ ꓥꓳ꓿ 3 ꓮꓸ ꓫꓵ ꓪꓴꓸ ꓠꓬꓲ ꓠꓴ ꓬꓲꓼ ꓠꓴ ꓠꓬꓲ ꓟꓬ ꓢꓶꓽ ꓗꓪ ꓓꓯꓹ ꓟ ꓑꓱꓸ ꓛꓵꓽ ꓔꓯˍ ꓡꓰꓽ ꓡꓯꓼ ꓠꓬꓲ ꓖꓴ ꓢꓲ꓾ ꓠꓴ ꓚꓲꓸ ꓛꓬ ꓟꓬ ꓢꓶꓽ ꓗꓪ ꓓꓯꓹˍ ꓟ ꓢꓲꓹ ꓓꓱꓽ ꓔꓯ ꓟꓽ ꓓꓵꓽ ꓙ ꓠꓬꓲ ꓡ? 4 ꓠꓴ ꓚꓲꓸ ꓛꓬ ꓟꓬ ꓢꓶꓽ ꓗꓪ ꓢꓲꓹ ꓓꓱ ꓓꓯꓹ ꓢꓲ ꓠꓴ ꓬꓲꓼ ꓠꓴ ꓠꓬꓲ ꓔꓯ꓾ ꓠꓴ ꓟꓬ ꓢꓶꓽ ꓗꓪ ꓓꓯꓹ ꓟ ꓑꓱꓸ ꓛꓵꓽ ꓥꓪ ꓔꓯ ꓗꓳꓸ ꓡꓳ ꓗꓷ ꓝꓲ ꓡꓯ꓾ ꓐꓰ ꓮ ꓡꓲ ꓐꓯ ꓓꓻ ꓢꓰ? 5 ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴꓳ꓾ ꓠꓴ ꓚꓲꓸ ꓛꓬ ꓟꓬ ꓢꓶ ꓗꓪ ꓓꓯꓹ ꓟ ꓢꓲꓹ ꓓꓱꓽ ꓧꓶꓸ ꓕꓯ ꓗꓳꓸ ꓡꓳ ꓗꓷ꓿ ꓖꓳ ꓗ ꓠꓯꓸ ꓢꓲꓸˍ ꓡꓰ ꓠꓴ ꓬꓲꓼ ꓠꓴ ꓠꓬꓲ ꓟꓬ ꓢꓶ ꓗꓪ ꓟ ꓑꓱꓸ ꓛꓵꓽ ꓗꓳꓸ ꓠꓹ ꓟ꓾ ꓠꓴ ꓠꓬ ꓫꓬꓽ ꓫꓬˍ ꓡꓰꓽ ꓟꓳꓻˍ ꓥꓳ꓿ 6 ꓚꓰꓸ ꓔ ꓡꓳ ꓫꓵꓽ ꓠꓬ ꓮꓸ ꓠꓽ ꓔꓯ ꓕꓽ ꓖꓶ꓿ ꓠꓴ ꓪꓽ ꓡꓳ ꓒꓴ ꓡꓴꓸ ꓢꓶꓽˍ ꓟꓲ ꓮꓸ ꓪꓯꓼ ꓟꓲꓽ ꓙꓬ ꓗꓪ ꓕꓽ ꓡꓳꓺ ꓔ꓿ ꓟꓽ ꓥ ꓠꓬ ꓮꓽ ꓧꓪꓹ ꓮꓸ ꓪꓯꓼ ꓠꓽ ꓡꓳ ꓒꓴ ꓡꓴ ꓢꓶꓽ ꓔꓯ ꓕꓳꓼ ꓗꓷ ꓠꓬ꓾ ꓔꓲꓸ ꓒꓳꓹ ꓡ ꓢꓲ ꓠꓴ ꓪꓽ ꓔꓯ ꓘꓳꓼ ꓚꓵꓹ ꓡ ꓥꓳ꓿ 7 ꓓꓰꓽ꓾ ꓖꓳ ꓡꓱ ꓠꓬ ꓠꓴ ꓪꓽ ꓔꓯ ꓖꓶꓽ ꓡ ꓥꓳ꓿ ꓧꓪꓺ꓾ ꓖꓳ ꓡꓱ ꓠꓬ ꓠꓴ ꓪꓽ ꓧꓪ ꓟꓶˍ ꓥꓳ꓿ ꓗ ꓘꓶꓽ ꓲ'ꓼ꓾ ꓖꓳ ꓡꓱ ꓠꓬ ꓠꓴ ꓪꓽ ꓔꓯ ꓒꓴ ꓖꓶ ꓡ ꓥꓳ꓿ 8 ꓮ ꓡꓲꓳ ꓐꓯ ꓠꓬ ꓓꓰꓽ ꓢꓴ ꓥ ꓕ ꓑꓳꓸ ꓟꓶˍ ꓥꓳ꓿ ꓧꓪ ꓢꓴˍ ꓟꓲ ꓧꓪ ꓟꓶˍ ꓥꓳ꓿ ꓗ ꓘꓶꓽ ꓲ'ꓼ ꓢꓴ ꓔꓯ ꓠꓬ ꓒꓴ ꓖꓶ ꓡ ꓥꓳ꓿ 9 ꓠꓴ ꓪꓽ ꓗꓪ ꓟ ꓕꓲ ꓣꓳ ꓣꓳ ꓔꓯ ꓬꓲ ꓤꓽ ꓡꓰ ꓑ ꓑ ꓓꓰꓽ ꓡ ꓠꓬ ꓬꓲ ꓔꓯ Bꓸ ꓛꓲ ꓖꓶˍ ꓡ? 10 ꓥꓪꓸ ꓓꓰꓽˍ ꓠꓬ ꓬꓲ ꓔꓯ ꓩꓴꓺ ꓖꓶꓽˍ ꓡ? 11 ꓠꓴ ꓪꓽ ꓠꓬ ꓞꓳ ꓥꓶ ꓥ ꓢꓲ ꓠꓴ ꓪꓽ ꓤ ꓠꓱ ꓐꓴ ꓔꓯ ꓙꓲꓻˍ ꓟ ꓡꓯꓼ ꓫꓴ ꓖꓶ ꓗꓴꓸˍ ꓠꓬ꓾ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐ ꓠꓽ꓾ ꓬꓲ ꓔꓯ ꓓꓰꓽ ꓢꓴ ꓔꓯ ꓠꓴ ꓪꓽ ꓢꓶꓸ ꓟꓽ ꓞꓲ ꓙꓲꓻˍ ꓟ ꓡꓯꓼ ꓫꓴ ꓖꓶ ꓡ ꓥꓳ ꓟꓽ ꓥ ꓡ? 12 ꓖꓳ ꓡꓱ ꓠꓬꓲ ꓢꓴ ꓡꓰ ꓠꓴ ꓪꓽ ꓔꓯ ꓮ ꓡꓲ ꓬꓰ ꓖꓶ ꓡ ꓝꓲ ꓠꓲ ꓫꓵˍ ꓠꓬ꓾ ꓠꓴ ꓪꓽˍ ꓟꓲ ꓬꓲ ꓪꓽ ꓔꓯ ꓖꓳ ꓡꓱ ꓬꓰ ꓖꓶ꓿ ꓕꓱ ꓡꓱ ꓬꓰˍ ꓟ ꓠꓬ ꓙꓵꓽ ꓗ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓟꓸ ꓟꓲ ꓬꓲ ꓧꓷꓹ ꓚ ꓥ ꓡꓳ꓿ 13 ꓠꓴ ꓪꓽ ꓠꓬ ꓣꓳꓺˍ ꓟ ꓗ ꓘꓶꓽ ꓗꓪ ꓓꓵꓽ ꓙꓰ꓿ ꓟꓶꓽ ꓬꓰ ꓖꓴ ꓗꓪ ꓙꓰˍ ꓟ ꓗ ꓘꓶꓽ ꓖꓳ ꓕꓲ ꓒꓰꓼ ꓠꓽ ꓦꓲꓺˍ ꓡꓳ꓾ ꓙ ꓖꓴˍ ꓟꓲ ꓪꓴꓽˍ ꓡꓳ꓾ ꓓꓵꓽ ꓙꓰ ꓢꓴˍ ꓟꓲ ꓟꓬꓽˍ ꓡꓳ꓿ 14 ꓢꓯꓼ ꓟꓬ ꓟꓶ ꓖꓴ ꓗꓪ ꓓꓵꓽ ꓙꓰˍ ꓟ ꓗ ꓘꓶꓽ ꓖꓳ ꓕꓲ ꓒꓰꓼ ꓠꓽ ꓣꓳꓺˍ ꓟꓲ ꓣꓳ꓾ ꓙ ꓖꓴˍ ꓟꓲ ꓫꓸˍ ꓠꓬꓲ꓾ ꓧꓪ ꓟꓶ ꓢꓴ ꓮꓽ ꓟꓬꓹ ꓟꓽ ꓙꓳ꓿ 15 ꓠꓴ ꓪꓽ ꓠꓬ ꓟꓽ ꓔꓱꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓔꓯ ꓤ ꓟꓳ꓿ ꓬꓲ ꓪꓽ ꓠꓬ ꓕꓯꓽ ꓢꓲ ꓗꓪ ꓮ ꓣꓳ ꓙꓲꓻ ꓘꓳꓹ ꓔ ꓢꓲ ꓠꓴ ꓪꓽ ꓔꓯ ꓡꓻˍ ꓟꓲ꓾ ꓠꓯꓸꓼ ꓗꓪ ꓠꓽ ꓪꓳꓹˍ ꓟ ꓪꓰ ꓕꓳꓹ ꓥ ꓡꓳ꓿ 16 ꓬꓲ ꓪꓽ ꓬꓰˍ ꓟ ꓟꓬꓱꓽ ꓗꓪ ꓐꓰ ꓬꓲ ꓪꓽ ꓔꓯ ꓠꓴ ꓪꓽ ꓢꓷꓸˍ ꓥꓳ꓿ ꓛꓴꓽ ꓑꓳ ꓗꓪ ꓛꓱꓼ ꓡꓱ ꓢꓶ ꓧꓼ ꓟꓶˍ ꓡ? ꓛꓴꓽ ꓟꓳꓼ ꓗꓪ ꓘꓶꓽ ꓢꓶꓽ ꓧꓼ ꓟꓶˍ ꓡ? 17 ꓙꓲꓻˍ ꓟ ꓢꓲꓹ ꓜꓲ ꓮꓽ ꓙꓵ ꓠꓬ ꓙꓲꓻˍ ꓟ ꓢꓶꓹ ꓢꓶ ꓓꓱꓼˍ ꓡꓳ꓿ ꓟꓽ ꓙꓲ ꓟ ꓢꓲꓹ ꓜꓲ ꓠꓽ ꓟꓽ ꓙꓲ ꓟ ꓢꓶꓹ ꓢꓶ ꓓꓱꓼˍ ꓡꓳ꓿ 18 ꓙꓲꓻˍ ꓟ ꓢꓲꓹ ꓜꓲ ꓠꓬ ꓟꓽ ꓙꓲ ꓟ ꓢꓶꓹ ꓢꓶ ꓓꓱꓼ ꓟꓽ ꓗꓴ꓿ ꓟꓽ ꓙꓲ ꓟ ꓢꓲꓹ ꓜꓲˍ ꓟꓲ ꓙꓲꓻˍ ꓟ ꓢꓶꓹ ꓢꓶ ꓓꓱꓼ ꓟꓽ ꓗꓴꓸ꓿ 19 ꓙꓲꓻˍ ꓟ ꓢꓶꓹ ꓢꓶ ꓟꓽ ꓓꓱꓼˍ ꓟ ꓢꓲꓹ ꓜꓲ ꓮꓽ ꓙꓵ ꓔꓯ ꓠꓬ ꓘꓷꓹ ꓩꓴ ꓗꓷ ꓢꓲ ꓮꓸ ꓔꓳ ꓗꓪ ꓡꓳ ꓧꓳꓽ ꓗꓷˍ ꓥꓳ꓿ 20 ꓖꓳ ꓡꓱ ꓠꓬꓲ ꓬꓲ ꓪꓽ ꓬꓰˍ ꓟ ꓟꓬꓱꓽ ꓗꓪ ꓐꓰ ꓬꓲ ꓪꓽ ꓔꓯ ꓠꓴ ꓪꓽ ꓢꓷꓸˍ ꓥꓳ꓿ 21 ꓥꓪ ꓔꓯ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓐꓰ ꓘꓴꓻ ꓢꓴ ꓮꓽ ꓙꓵ ꓠꓽ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓓꓵꓽ ꓡꓰ꓿ ꓟꓴꓽ ꓗꓪ ꓗꓪ ꓟ ꓥꓪ ꓐꓹ ꓐ ꓠꓲꓹ ꓡꓶꓽ ꓛꓳꓻ ꓢꓴˍ ꓡꓰꓽ ꓓꓵꓽ ꓡꓰˍ ꓥꓳ꓿ 22 ꓐꓯꓺ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓠꓬ ꓡꓽ ꓞꓳ ꓮꓽ ꓟꓬꓹ ꓥꓪ ꓔꓯ ꓡꓻ ꓢꓲ꓾ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓠꓴ ꓟꓬꓱꓺ ꓗꓪ ꓐꓰ ꓟꓸ ꓟꓲ ꓚ ꓠꓬꓲꓳ꓾ ꓠꓴ ꓟꓬꓱ ꓗꓪ ꓐꓰ ꓠꓲꓽ ꓖꓼ ꓓꓳ ꓠꓬꓲꓳ꓾ ꓠꓴ ꓟꓬꓱ ꓗꓪ ꓐꓰ ꓪꓽ ꓠꓬꓲˍ ꓟ ꓟꓬꓱꓽ ꓮꓽ ꓟꓬꓹ ꓬꓰ ꓠꓬꓲꓳ꓾ ꓐꓯ ꓡ ꓥꓳ꓿ 23 ꓖꓳ ꓕꓯ ꓥꓪ ꓠꓬ ꓬꓲ ꓪꓽ ꓔꓯ꓾ ꓟꓽ ꓙꓲ ꓟ ꓬꓰ ꓢꓴ ꓐꓴꓳ꓾ ꓠꓴ ꓪꓽ ꓔꓯ ꓥꓪ ꓮ ꓕꓯꓽˍ ꓟꓲ ꓟꓽ ꓢꓷ ꓠꓬꓲ꓿ ꓥꓪ ꓔꓯˍ ꓐꓰ ꓧꓹ ꓙꓰ꓾ ꓐꓰ ꓐꓯ ꓖꓶˍ ꓥꓳ꓿ 24 ꓖꓳ ꓡꓱ ꓠꓬꓲ ꓮꓽ ꓟ ꓥ ꓟꓲ ꓥꓪ ꓐꓯ ꓘꓶꓽ ꓕꓱ ꓟꓬ ꓟ ꓑ ꓙꓽ ꓢꓲ꓾ ꓛꓳꓻˍ ꓟꓲ ꓛꓳ꓾ ꓬꓰˍ ꓟꓲ ꓬꓰ ꓢꓴ ꓠꓽ꓾ ꓡꓳ ꓓꓰ ꓑꓸ ꓕꓯꓽ ꓢꓲ ꓗꓪ ꓦꓲ ꓫꓬꓹˍ ꓟ ꓢꓷꓸ ꓠꓲꓹ ꓙꓳ ꓢꓴ ꓕꓲ ꓣꓳˍ ꓡꓰ ꓐꓰ ꓗꓹ ꓡꓳ꓿ 25 ꓟꓶꓽ ꓦ ꓦ ꓡ꓾ ꓬꓲꓻ ꓙꓬ ꓙꓵꓽ ꓡ꓾ ꓟꓲꓽ ꓦꓲ ꓙꓱꓼ ꓡ ꓢꓲ ꓦꓲ ꓖꓳ ꓕꓲ ꓦꓲ ꓔꓯ ꓓꓶꓽ ꓬꓯꓼ ꓡ ꓥ ꓟꓲ꓾ ꓬꓲꓸ ꓦꓲ ꓚꓰ ꓠꓽ ꓡꓳ ꓓꓰ ꓑꓸ ꓕꓯꓽ ꓢꓲ ꓗꓪ ꓜꓶꓻ ꓔ ꓠꓬꓲ ꓟꓽ ꓐꓱꓽ ꓙꓰ꓿ 26 ꓮꓽ ꓟ ꓥ ꓟꓲ ꓥꓪ ꓐꓯ ꓘꓶꓽ ꓕꓱ ꓟꓬ ꓟ ꓑ ꓙꓽ ꓢꓲ ꓟꓽ ꓛꓳ ꓬꓰ ꓢꓴ ꓠꓽ꓾ ꓧꓶꓽ ꓚꓲ ꓕꓯꓽ ꓢꓲ ꓗꓪ ꓦꓲ ꓫꓬꓹˍ ꓟ ꓞꓳ ꓙꓲꓽ ꓕꓲ ꓣꓳˍ ꓡꓰ ꓐꓰ ꓗꓹ ꓡꓳ꓿ 27 ꓟꓶꓽ ꓦ ꓦ ꓡ꓾ ꓬꓲꓻ ꓙꓬ ꓙꓵꓽ ꓡ꓾ ꓟꓲꓽ ꓦꓲ ꓙꓱꓼ ꓡ ꓢꓲ ꓦꓲ ꓖꓳ ꓕꓲ ꓦꓲ ꓔꓯ ꓓꓶꓽ ꓬꓯꓼ ꓡ ꓠꓬ ꓐꓱꓽ ꓫꓬꓽ ꓡꓰˍ ꓥꓳ꓾ ꓐꓯˍ ꓡꓳ꓿ 28 ꓬꓰ-ꓢꓴ ꓡꓰ ꓕꓱ ꓟꓬ ꓫꓵꓽ ꓟꓸ ꓖꓶˍ ꓟ ꓔꓯ ꓞꓳ ꓜꓴ ꓐꓴ ꓮꓽ ꓘꓶ ꓓꓵꓽ ꓙꓽ ꓟꓶˍ ꓡꓳ꓿ 29 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓔꓯ ꓬꓲ ꓟꓸ ꓖꓶˍ ꓟ ꓠꓬ꓾ ꓙꓵꓽ ꓪ ꓙꓳ ꓙꓳˍ ꓡꓰ ꓟꓸ ꓖꓶˍ ꓟ ꓥ ꓢꓲ꓾ ꓙꓵꓽ ꓗ ꓟꓸ ꓒ ꓐꓴ ꓡꓰ ꓟꓸ ꓖꓶˍ ꓟ ꓡꓰ ꓐꓰ ꓟꓽ ꓗꓹ꓿

ꓟ-ꓔꓲ 8

1 ꓬꓰ-ꓢꓴ ꓠꓬ ꓪꓽ ꓚꓲ ꓗꓪ ꓐꓰ ꓬꓯꓼ ꓡ ꓕꓯ꓾ ꓞꓳ ꓜꓴ ꓞꓳ ꓟꓯꓼ ꓬꓲ ꓔꓯ ꓛꓳ ꓙꓰˍ ꓡꓳ꓿ 2 ꓖꓳ ꓕꓯ ꓔ-ꓟ-ꓩꓴ ꓓꓲꓻ ꓢꓴ ꓕꓲ ꓣꓳ ꓠꓬ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓡ ꓢꓲ꓾ ꓢꓲ ꓒꓽꓳ꓾ ꓠꓴ ꓠꓲꓹ ꓫꓵˍ ꓠꓬ ꓥꓪ ꓔꓯ ꓫꓬꓻ ꓡꓰ ꓝꓲ ꓐ ꓡ ꓡꓳ꓾ ꓐꓯ ꓡꓳ꓿ 3 ꓬꓰ-ꓢꓴ ꓠꓬ ꓡꓯ ꓒꓯꓹ ꓛꓱ ꓢꓲ ꓬꓲ ꓔꓯ ꓫꓱꓹ ꓖꓶ ꓢꓲ ꓠꓬꓲ꓾ ꓥꓪ ꓠꓲꓹ ꓫꓵˍ ꓡꓳ꓾ ꓠꓴ ꓫꓬꓻ ꓡꓰ Gꓽ꓾ ꓐꓯ ꓖꓶˍ ꓕꓯ꓾ ꓬꓲ ꓔ-ꓟ-ꓩꓴ ꓓꓲˍ ꓟ ꓠꓬ ꓞꓼ ꓐꓰ ꓫꓬꓻ ꓡꓰꓳ꓿ 4 ꓬꓰ-ꓢꓴ ꓡꓰ ꓬꓲ ꓔꓯ꓾ ꓤ ꓟꓳ꓾ ꓮꓽ ꓟ ꓔꓯˍ ꓟꓲ ꓕꓽ ꓐꓯ ꓖꓶ꓿ ꓖꓳ ꓡꓱ ꓥ ꓟꓲ ꓠꓴ ꓙꓰ ꓢꓲ꓾ ꓢꓷꓸ ꓙ ꓟꓳꓻ ꓙ ꓓꓴ ꓬꓰ ꓠꓹ ꓟ꓾ ꓠꓴ ꓖꓳ ꓓꓱ ꓠꓬ ꓔꓲ ꓒ ꓔꓯ ꓟꓳꓸ ꓖꓶ ꓬꓰ ꓢꓲ ꓠꓬꓲ꓾ ꓟꓳ-ꓫꓲ ꓡꓰ ꓐꓯ ꓔ ꓟ ꓔꓲ ꓓꓴ ꓔꓲ ꓖꓶ ꓬꓰ꓾ ꓐꓯ ꓖꓶˍ ꓡꓳ꓿ 5 ꓬꓰ-ꓢꓴ ꓠꓬ ꓘ-ꓒꓱ-ꓠꓴ ꓗꓪ ꓓꓵꓽ ꓡꓰ ꓗ ꓠꓯ꓾ ꓟꓯꓼ ꓕꓲ ꓦꓬꓻ ꓙꓵꓽ ꓒ ꓕꓲ ꓣꓳ ꓬꓲ ꓔꓯ ꓡꓻ ꓢꓲ ꓕꓱ ꓡꓱ ꓓꓰꓽˍ ꓡꓳ꓿ 6 ꓢꓲ ꓒꓽꓳ꓾ ꓥꓪ ꓔꓯ ꓣꓱꓽ ꓙ ꓢꓴ ꓠꓬ ꓛꓲ ꓫꓵꓻ ꓡꓯꓼ ꓫꓵꓻ ꓠꓬꓲ ꓦꓲ ꓗꓪ ꓓꓳꓽ ꓞ ꓢꓲ ꓮꓽ ꓘꓶꓸ ꓫꓸ ꓙꓵꓻ ꓔꓬ ꓡꓳ꓾ ꓐꓰ ꓐꓯˍ ꓡꓳ꓿ 7 ꓬꓰ-ꓢꓴ ꓡꓰ꓾ ꓥꓪ ꓙꓰ ꓢꓲ ꓬꓲ ꓔꓯ ꓠꓻ ꓫꓬꓹ ꓖꓶ ꓛꓵˍ ꓡꓳ꓾ ꓐꓯˍ ꓡꓳ꓿ 8 ꓖꓳ ꓕꓯ ꓟꓯꓼ ꓕꓲ ꓦꓬ ꓙꓵꓽ ꓒ ꓡꓰ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓠꓴ ꓠꓬ ꓥꓪ ꓦꓲ ꓗꓪ ꓓꓵꓽ ꓡ ꓠꓹ ꓟ ꓥꓪ ꓟꓽ ꓒꓵꓽ꓿ ꓠꓴ ꓐꓯ ꓘꓶꓽ ꓕꓲ ꓘꓶ ꓐꓯ ꓕꓲ ꓖꓺꓼ ꓥꓪ ꓔꓯ ꓣꓱꓽ ꓙ ꓢꓴ ꓠꓽ ꓓꓻ ꓡꓰˍ ꓥꓳ꓿ 9 ꓥꓪˍ ꓟꓲ ꓢꓴ ꓙꓵꓽ ꓪꓽ ꓠꓯꓸ ꓘꓪ ꓔꓬ ꓢꓴ ꓥ ꓢꓲ꓾ ꓥꓪ ꓠꓯꓸ ꓘꓪˍ ꓟꓲ ꓟꓯꓼ ꓤ ꓙꓳˍ ꓡꓳ꓿ ꓥꓪ ꓡꓰ ꓕꓱ ꓕꓲ ꓣꓳ ꓔꓯ ꓝꓲꓺˍ ꓠꓬ ꓬꓲ ꓙꓰˍ ꓥꓳ꓿ ꓖꓳ ꓕꓲ ꓣꓳ ꓔꓯ ꓘꓴꓻˍ ꓟꓲ ꓬꓲ ꓡꓻˍ ꓥꓳ꓿ ꓥꓪ ꓚꓳ ꓑꓸ ꓔꓯ꓾ ꓠꓴ ꓕꓱ ꓕꓲ ꓫꓵꓽ ꓬꓰ꓾ ꓐꓯˍ ꓠꓬ ꓬꓲ ꓠꓽ ꓬꓰˍ ꓥꓳ꓾ ꓐꓯˍ ꓡꓳ꓿ 10 ꓬꓰ-ꓢꓴ ꓑ ꓙꓽ ꓗꓷ ꓠꓬ ꓓꓵꓽ ꓙ ꓟꓶ ꓢꓲ꓾ ꓬꓲ ꓔꓯ ꓛꓳꓻ ꓡ ꓢꓴ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓬꓲ-ꓢꓷ-ꓡꓰ ꓟꓵꓽ ꓗꓪˍ ꓟꓲ ꓕꓱ ꓘꓶ ꓛꓲ ꓪꓴꓽˍ ꓟ ꓙꓵꓻ ꓠꓲꓹ ꓙꓳ ꓢꓴ ꓥꓪ ꓟꓽ ꓟꓳꓻ ꓠꓬꓲ꓿ 11 ꓥꓪ ꓝꓮꓲ ꓠꓴ ꓪꓽ ꓔꓯ ꓐꓯ ꓖꓶꓽˍ ꓠꓬꓲ꓾ ꓢꓸ ꓖꓪ ꓠꓽ ꓐꓶꓻ ꓓꓳ ꓐꓶꓻ ꓓꓵꓽ ꓗꓪ ꓐꓰ ꓡꓽ ꓞꓳ ꓮꓽ ꓟꓬꓹ ꓡ ꓢꓲ ꓟꓴꓽ ꓗꓪ ꓗꓴꓷꓼ ꓜ ꓫꓳꓺˍ ꓟ ꓗꓪ꓾ ꓮ-ꓐ-ꓡ-ꓦˍ ꓐꓰ ꓬꓲ-ꓢˍ ꓐꓰ ꓬ-ꓗꓴˍ ꓐꓰ ꓕꓲ ꓪꓺꓼ ꓠꓬꓲꓸ ꓠꓸˍ ꓥꓳ꓿ 12 ꓖꓳ ꓡꓱ ꓥ ꓟꓲ ꓗꓴꓷꓼ ꓗꓪ ꓟ ꓑ ꓫꓬꓼ ꓐꓴ ꓔꓯ ꓠꓽ ꓠꓱ ꓫꓱꓸ ꓟꓸꓼ ꓠꓯ ꓞꓲꓹ ꓟ ꓗꓪ ꓖꓼ ꓓꓳ ꓗꓷˍ ꓥꓳ꓿ ꓖꓳ ꓗꓪ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 13 ꓖꓳ ꓕꓯ ꓬꓰ-ꓢꓴ ꓠꓬ ꓟꓯꓼ ꓕꓲ ꓦꓬ ꓙꓵꓽ ꓒ ꓔꓯ꓾ ꓠꓴ ꓬꓲꓼ ꓙꓰ Gꓽ꓿ ꓠꓴ ꓙꓵꓻˍ ꓟ ꓡꓰ ꓐꓰ ꓠꓴ ꓐꓱ ꓶ ꓒꓬꓱꓼ ꓡ ꓝꓲ꓾ ꓐꓯ ꓖꓶˍ ꓡꓳ꓿ ꓖꓳ ꓕꓲꓽ ꓙꓵꓹ ꓗꓪ ꓬꓲ ꓔꓯ ꓣꓱꓽ ꓙ ꓢꓴ ꓠꓬ ꓓꓻ ꓡꓰꓳ꓿ 14 ꓒꓲ-ꓕꓱ ꓦꓲ ꓗꓪ ꓬꓰ-ꓢꓴ ꓛꓲ ꓬꓰ ꓕꓯ꓾ ꓒꓲ-ꓕꓱ ꓬꓲ ꓟꓹ ꓟ ꓑꓯꓹ ꓠꓬ ꓖꓳ ꓓꓱ ꓛꓴꓻ ꓞꓻ ꓢꓲ ꓠꓻ ꓓꓳꓽ ꓞꓹ ꓟ ꓔꓯ ꓬꓲ ꓟꓳꓻˍ ꓡꓳ꓿ 15 ꓬꓰ-ꓢꓴ ꓡꓰ ꓬꓲ ꓡꓯꓼ ꓒꓯꓹ ꓗꓪ ꓫꓱꓹ ꓗꓷ ꓠꓬ꓾ ꓬꓲ ꓖꓳ ꓓꓱ ꓛꓴꓻ ꓞꓹ ꓟ ꓓꓻ ꓡꓰ ꓢꓲ꓾ ꓔꓴ ꓡ ꓢꓲ ꓠꓬꓲ ꓬꓰ-ꓢꓴ ꓔꓯ ꓣꓱꓽ ꓙˍ ꓡꓳ꓿ 16 ꓟꓰꓻ ꓬꓰ ꓠꓬ ꓢꓴ ꓡꓰ ꓠꓲꓽ ꓜꓶꓽ ꓞꓹ ꓢꓴ ꓮꓽ ꓟꓬꓹ ꓬꓰ-ꓢꓴ ꓔꓬ ꓗꓪ ꓧꓳꓽ ꓡ ꓡꓳ꓿ ꓬꓲ ꓠꓬ ꓐꓯ ꓘꓶꓽ ꓕꓲ ꓘꓶꓽˍ ꓡꓰ ꓠꓲꓽ ꓔꓯ ꓖꓼ ꓓꓳ ꓗꓷ ꓢꓲ꓾ ꓠꓻ ꓢꓴ ꓒꓬꓽ ꓢꓴ ꓮꓽ ꓙꓵ ꓔꓯˍ ꓟꓲ ꓫꓬꓹ ꓓꓻ ꓡꓰ ꓝꓲ ꓡꓳ꓿ 17 ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓡꓰ꓾ ꓬꓲ ꓠꓽ ꓣꓳꓽ ꓠꓻ ꓓꓱꓽ ꓠ ꓧꓶꓺ ꓣꓴ ꓦ ꓗꓷ ꓢꓲ꓾ ꓣꓳꓽ ꓠꓻ ꓒꓬꓼ ꓟꓯꓻ ꓙ ꓗꓷꓳ꓾ ꓐꓯˍ ꓟ ꓐꓯ ꓘꓶꓽ ꓔꓯ ꓐꓲ ꓡ ꓝꓲ ꓠꓹ ꓟ ꓥ ꓡꓳ꓿ 18 ꓬꓲ ꓚꓳ ꓡꓳ ꓗꓪ ꓞꓳ ꓜꓴ ꓞꓳ ꓟꓯꓼ ꓔꓯ ꓬꓰ-ꓢꓴ ꓟꓳꓻ ꓗꓷ ꓠꓬ꓾ ꓬꓲꓻ ꓡꓴ ꓐꓱ ꓖꓳ ꓐꓽ ꓢꓲ ꓗꓪ ꓙꓰ ꓠꓹ ꓟ ꓕꓵꓼ ꓪꓽ ꓖꓶˍ ꓡꓳ꓿ 19 ꓙꓵꓽ ꓗ ꓟꓸ ꓒ ꓕꓲ ꓣꓳ ꓠꓬ ꓬꓰ-ꓢꓴ ꓔꓯ ꓡ ꓢꓲ꓾ ꓟꓸ ꓒꓽꓳ꓾ ꓠꓴ ꓮ ꓡꓲ ꓗꓪ ꓙꓰˍ ꓟꓲ ꓥꓪ ꓠꓽ ꓠꓴ ꓔꓯ ꓛꓳꓻ ꓙꓰˍ ꓥꓳ꓾ ꓐꓯˍ ꓡꓳ꓿ 20 ꓬꓰ-ꓢꓴ ꓡꓰ ꓬꓲ ꓔꓯ꓾ ꓪꓴꓸ ꓓꓵꓽ ꓠꓬ ꓬꓲꓸ ꓘꓴꓻ ꓙꓳˍ ꓡꓳ꓿ ꓟꓵꓽ ꓪꓴꓽ ꓗꓪ ꓟ ꓠꓬꓹ ꓤˍ ꓟꓲ ꓬꓲꓸ ꓘꓶꓻ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓡ-ꓞꓳ-ꓮ-ꓐꓲ ꓠꓽ ꓪꓴꓸ ꓓꓵ ꓗꓳꓺ ꓖꓴˍ ꓟꓲ ꓟꓽ ꓙꓳ꓾ ꓐꓯ ꓖꓶˍ ꓡꓳ꓿ 21 ꓛꓳꓽ ꓒꓯꓹ ꓝꓮꓲ ꓕꓲ ꓣꓳ ꓡꓰ꓾ ꓢꓲ ꓒꓽꓳ꓾ ꓥꓪ ꓐꓹ ꓐ ꓔꓯ ꓧꓶꓸ ꓕꓯ ꓔꓵꓸ ꓬꓰ ꓝꓲ ꓡꓯ꓾ ꓐꓯˍ ꓕꓯ꓾ 22 ꓬꓰ-ꓢꓴ ꓡꓰ ꓬꓲ ꓔꓯ꓾ ꓫꓵꓻ ꓞꓹ ꓢꓴ ꓐꓴ ꓡꓰ ꓞꓳ ꓫꓵꓻ ꓔꓯ ꓔꓵꓸ ꓝꓲ꓿ ꓠꓴ ꓠꓽ ꓥꓪ ꓔꓯ ꓛꓳꓻ ꓡꓯ꓾ ꓐꓯ ꓖꓶˍ ꓡꓳ꓿ 23 ꓖꓳ ꓕꓯ ꓡꓲ ꓗꓪ ꓬꓰ-ꓢꓴ ꓓꓵꓽ ꓡꓰ ꓠꓬ꓾ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓔꓯ ꓛꓳ ꓙꓰˍ ꓡꓳ꓿ 24 ꓬꓲꓻ ꓡꓴꓽ ꓐꓱꓻ ꓗꓪ ꓕꓳꓽ ꓥꓳ ꓓꓽ ꓟ ꓙꓱꓼ ꓔꓴ ꓡ ꓢꓲ꓾ ꓬꓲꓻ ꓡꓯꓼ ꓟꓰꓼ ꓡꓰ ꓡꓲꓺ ꓔꓯ ꓑꓲꓸ ꓡꓰˍ ꓐꓰ ꓗꓹˍ ꓟꓲ꓾ ꓬꓰ-ꓢꓴ ꓠꓽ ꓬꓲꓼ ꓟꓶ ꓔꓬ ꓡꓳ꓿ 25 ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ ꓡꓵꓹ ꓖꓶ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓠꓽ ꓫꓵꓻ ꓡ ꓓꓴ ꓬꓰꓳ꓾ ꓚꓬꓴ ꓙ ꓡꓯ꓾ ꓐꓯˍ ꓡꓳ꓿ 26 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓙꓵꓻ ꓠꓲꓹ ꓣꓳ ꓢꓴ ꓐꓴꓳ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓙꓳꓺˍ ꓡ?꓾ ꓐꓯ ꓗꓷ ꓠꓬ꓾ ꓔꓴ ꓡ ꓢꓲ ꓕꓳꓽ ꓥꓳꓽˍ ꓐꓰ ꓬꓲꓻ ꓡꓯꓼ ꓟꓰꓼ ꓔꓯ ꓕꓼ ꓗꓷˍ ꓡꓳ꓿ ꓖꓳ ꓕꓯ ꓮꓽ ꓙꓵ ꓢꓲ ꓡꓲ ꓡꓲˍ ꓗꓷ ꓡꓰꓳ꓿ 27 ꓡ ꓞꓳ ꓖꓳ ꓕꓲ ꓧꓳꓽ ꓟ ꓠꓬ ꓓꓵꓽ ꓙ ꓟꓶꓻ ꓢꓲ꓾ ꓟꓲ ꓦꓲˍ ꓐꓰ ꓬꓲꓻ ꓡꓯꓼ ꓟꓰꓼˍ ꓟꓲ ꓬꓲ ꓔꓯ ꓠꓺ ꓡꓳꓹˍ ꓟ ꓕꓱ ꓟ ꓠꓬ ꓮ ꓡꓲ ꓡꓴ ꓫꓵꓽ ꓡ ꓞꓳ ꓥ ꓡ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 28 ꓬꓰ-ꓢꓴ ꓠꓬ ꓖꓳ ꓐꓽ ꓢꓲ ꓗꓪ ꓟ ꓖ-ꓓ-ꓡꓲ ꓟꓵꓽ ꓗꓪ ꓛꓲ ꓬꓰ ꓠꓬ꓾ ꓙ ꓖꓴ ꓖꓳ ꓕꓲ ꓚꓱꓹ ꓗꓪ ꓮꓽ ꓟˍ ꓟꓲ ꓗꓳꓸ ꓙꓰ ꓟꓽ ꓓ ꓠ ꓛꓲ꓾ ꓮꓽ ꓘꓶꓸ ꓪꓳꓹˍ ꓟ ꓠꓲꓽ ꓜꓶꓽ ꓞ ꓢꓴ ꓠꓬꓲꓽ ꓣꓳ꓾ ꓡꓱꓼ ꓜꓴ ꓐꓬꓼ ꓗꓪ ꓐꓰ ꓓꓳ ꓡ ꓢꓲ ꓬꓰ-ꓢꓴ ꓔꓯ ꓔꓳꓹ ꓜꓳꓽ ꓡꓰˍ ꓡꓳ꓿ 29 ꓬꓲ ꓪꓽ ꓠꓬ ꓘꓴ ꓔꓴ ꓡ ꓢꓲ꓾ ꓪꓴ-ꓢ ꓮ ꓐꓲꓳ꓾ ꓠꓴ ꓠꓬ ꓮꓸ ꓫꓵ ꓑꓶꓸ ꓓꓴ ꓥꓪ ꓠꓴꓽ ꓔꓬ ꓗꓪ ꓡꓻˍ ꓡ? ꓦꓬꓼ ꓠꓬꓲ ꓟꓽ ꓛꓲ ꓡ ꓢꓰꓽ ꓕꓯꓽˍ ꓡꓰ꓾ ꓥꓪ ꓠꓴꓽ ꓔꓯ ꓫ ꓙꓵꓻ ꓝꓲ ꓠꓹ ꓟ ꓕꓱ ꓗꓪ ꓡꓻˍ ꓟ ꓥ ꓡ?꓾ ꓐꓯˍ ꓡꓳ꓿ 30 ꓠꓲꓽ ꓜꓶ ꓞꓹ ꓢꓴ ꓐꓴ ꓗꓪ ꓐꓰ ꓶꓽ ꓤ ꓟꓽ ꓥ ꓟ ꓗꓪ ꓮ ꓪꓯꓼ ꓕꓲ ꓜꓴꓻ ꓓꓽ ꓟ ꓖꓺ ꓜꓽ ꓔꓬ ꓡꓳ꓿ 31 ꓠꓲꓽ ꓠꓬ ꓬꓰ-ꓢꓴ ꓔꓯ꓾ ꓥꓪ ꓠꓴꓽ ꓔꓯ ꓖꓼ ꓓꓳ ꓗꓷˍ ꓥꓳ ꓐꓯˍ ꓠꓬ꓾ ꓮꓸ ꓪꓯꓼ ꓜꓴꓻ ꓔꓯ ꓓꓵꓽ ꓙꓰ ꓝꓲ ꓡꓯ꓾ ꓐꓰ ꓓꓰꓽˍ ꓡꓳ꓿ 32 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓙꓰ Gꓽ꓾ ꓐꓯ ꓖꓶꓽ ꓗꓷ ꓠꓬ꓾ ꓠꓲꓽ ꓜꓴꓻ ꓠꓬ ꓓꓳ ꓡ ꓢꓲ ꓮ ꓪꓯꓼ ꓠꓯꓸꓼ ꓗꓪ ꓓꓵꓽ ꓡꓰ ꓢꓲ ꓠꓬꓲ꓾ ꓮꓸ ꓪꓯꓼ ꓕꓲ ꓜꓴ ꓡꓱꓸꓼ ꓠꓬ ꓐꓶꓽ ꓘꓶꓽ ꓗꓪ ꓐꓰ ꓬꓲꓻ ꓡꓴꓽ ꓐꓱꓻ ꓗꓪ ꓔꓷꓹ ꓬꓯꓼ ꓙꓰ ꓢꓲ ꓔꓲꓹ ꓫꓵꓻ ꓖꓴꓳ꓿ 33 ꓮ ꓪꓯꓼ ꓡꓳꓸ ꓢꓴ ꓠꓽ ꓡꓳ ꓒꓱ ꓗꓪ ꓛꓰꓹ ꓓꓵꓽ ꓡꓰ ꓢꓲ꓾ ꓕꓱ ꓟꓬ ꓫꓵꓽ ꓮꓽ ꓙꓵˍ ꓐꓰ ꓠꓲꓽ ꓜꓶꓽ ꓞ ꓢꓴ ꓐꓴ ꓮ ꓡꓲ ꓗꓷ ꓡꓰ ꓟ ꓮꓽ ꓙꓵ ꓡꓳ ꓒꓱ ꓗꓪ ꓔꓬ ꓢꓴꓻ ꓔꓯ ꓐꓯ ꓟꓸ ꓖꓶˍ ꓡꓳ꓿ 34 ꓖꓳ ꓕꓯ ꓖꓳ ꓕꓲ ꓡꓳ ꓒꓱ ꓗꓪ ꓟ ꓡ ꓞꓳ ꓮꓽ ꓙꓵ ꓬꓰ-ꓢꓴ ꓔꓯ ꓧꓪ ꓡ ꓢꓲ ꓬꓲ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓪꓽ ꓟꓵꓽ ꓗꓪ ꓐꓰ ꓓꓳ ꓙꓰ ꓠꓹ ꓟ ꓬꓲ ꓔꓯ ꓓꓰꓽˍ ꓡꓳ꓿

ꓟ-ꓔꓲ 9

1 ꓬꓰ-ꓢꓴ ꓠꓬ ꓡꓲ ꓗꓪ ꓓꓵꓽ ꓡꓰ ꓢꓲ ꓬꓲꓻ ꓡꓴꓽ ꓐꓱꓻ ꓗꓪ ꓗꓳꓸ ꓙꓰ ꓢꓲ ꓠꓬꓲ꓾ ꓬꓲ ꓚꓲꓸ ꓛꓬ ꓡꓳ ꓒꓱ ꓗꓪ ꓛꓲ ꓡ ꓡꓳ꓿ 2 ꓖꓳ ꓕꓯ ꓛꓲ ꓫꓵꓻ ꓡꓯꓼ ꓫꓵ ꓢꓴ ꓕꓲ ꓣꓳ ꓔꓯ ꓬꓲꓼ ꓖꓴ ꓗꓪ ꓬꓲꓼ ꓔ ꓔꓬ ꓝꓲ ꓢꓲ꓾ ꓬꓲ ꓪꓽ ꓡꓰ ꓬꓰ-ꓢꓴ ꓔꓬ ꓗꓪ ꓑꓱꓸ ꓦ ꓡ ꓡꓳ꓿ ꓬꓲ ꓪꓽ ꓙꓵꓻ ꓠꓲꓹ ꓔꓯ ꓬꓰ-ꓢꓴ ꓟꓳꓻ ꓗꓷ ꓠꓬ ꓛꓲ ꓫꓵꓻ ꓡꓯꓼ ꓫꓵ ꓢꓴ ꓔꓯ꓾ ꓮ ꓐꓲꓳ꓾ ꓠꓲꓹ ꓪꓴꓽ ꓪꓴˍ ꓡꓰ ꓔꓬ꓾ ꓠꓴ ꓝꓴꓲ ꓖꓽ ꓖꓶ ꓗꓷꓳ꓾ ꓐꓯ ꓖꓶˍ ꓡꓳ꓿ 3 ꓖꓳ ꓕꓯ ꓙꓵꓽ ꓗ ꓟꓸ ꓒ ꓐꓴ ꓕꓲ ꓐꓱ ꓠꓬ ꓠꓲꓹ ꓟ ꓗꓪ꓾ ꓡ ꓞꓳ ꓕꓱ ꓟ ꓠꓽ ꓐꓯ ꓟꓽ ꓚꓰꓼ ꓟ ꓐꓯˍ ꓡꓳ꓾ ꓐꓰ ꓓꓵꓽ ꓙ ꓔꓬ ꓡꓳ꓿ 4 ꓬꓰ-ꓢꓴ ꓠꓬ ꓬꓲ ꓪꓽ ꓓꓵꓽ ꓙꓽˍ ꓟ ꓔꓯ ꓢꓷˍ ꓠꓬꓲ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓥꓶˍ ꓟ ꓓꓵꓽ ꓙ ꓔꓬ ꓡ? 5 ꓠꓴ ꓝꓴꓲ ꓖꓽ ꓖꓶ ꓗꓷꓳ꓾ ꓐꓯˍ ꓟ ꓐꓰ꓾ ꓔꓴ ꓢꓲ ꓙ ꓖꓴ ꓫꓱ꓾ ꓐꓯˍ ꓟ꓾ ꓕꓱ ꓠꓬꓲꓽ ꓘꓶꓽ ꓗꓪ ꓟ ꓮ ꓡꓲ ꓕꓲ ꓘꓶꓽ ꓟꓬꓽ ꓠꓬꓲ ꓐꓯ ꓢꓻˍ ꓡ? 6 ꓡ-ꓞꓳ-ꓮ-ꓐꓲ ꓠꓽ ꓟꓲ ꓠꓯ ꓗꓪ ꓝꓴꓲ ꓖꓽ ꓖꓶ ꓓꓴ ꓙꓵꓽ ꓪ ꓙꓳˍ ꓟ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲˍ ꓥꓳ꓾ ꓐꓯ ꓢꓲ꓾ ꓬꓲ ꓡꓰ ꓛꓲ ꓫꓵꓻ ꓡꓯꓼ ꓫꓵ ꓢꓴ ꓔꓯ꓾ ꓔꓴ꓾ ꓠꓴ ꓬꓲꓼ ꓖꓴ ꓔꓯꓹ ꓢꓲ ꓠꓴ ꓦꓲ ꓗꓪ ꓬꓲꓼ ꓙꓰ Gꓽ꓾ ꓐꓯ ꓖꓶˍ ꓡꓳ꓿ 7 ꓖꓳ ꓡꓱ ꓠꓬ ꓬꓲ ꓔꓴ ꓡ ꓢꓲ ꓦꓲ ꓗꓪ ꓬꓲꓼ ꓙꓰꓳ꓿ 8 ꓞꓳ ꓜꓴ ꓐꓴ ꓟꓳꓻ ꓗꓷ ꓠꓬ ꓓꓵꓽ ꓙ ꓮ'ꓺ ꓡꓰ ꓢꓲ꓾ ꓞꓳ ꓤ ꓔꓯ ꓕꓱ ꓡꓱ ꓡꓳ ꓫꓵꓽ ꓙꓵꓽ ꓪ ꓖꓶ ꓢꓴ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ 9 ꓖꓳ ꓗꓪ ꓐꓰ ꓬꓰ-ꓢꓴ ꓙꓰˍ ꓕꓯ꓾ ꓟ-ꓕꓲ ꓟꓬꓱ ꓔ ꓟ ꓕꓲ ꓣꓳ꓾ ꓝꓲꓸ ꓫ ꓖꓴ ꓗꓪ ꓠꓬꓲꓸ ꓠꓸ ꓔꓬ ꓟ ꓔꓯ ꓬꓰ-ꓢꓴ ꓟꓳꓻ ꓗꓷ ꓠꓬ꓾ ꓥꓪ ꓔꓯ ꓛꓳꓻ ꓡꓯ꓾ ꓐꓰ ꓬꓲ ꓔꓯ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓬꓲ ꓔꓴ ꓡ ꓢꓲ ꓬꓰ-ꓢꓴ ꓔꓯ ꓛꓳ ꓙꓰˍ ꓡꓳ꓿ 10 ꓖꓳ ꓗꓸ ꓠꓯꓸ ꓬꓲ ꓠꓬ ꓟ-ꓕꓲ ꓦꓲ ꓗꓪ ꓗꓳꓺ ꓢꓲ ꓜꓻ ꓜꓽ ꓔꓬ ꓕꓯ꓾ ꓝꓲꓸ ꓫ ꓢꓴˍ ꓐꓰ ꓝꓴꓲ ꓙꓳ ꓢꓴ ꓐꓴ ꓠꓬ꓾ ꓬꓰ-ꓢꓴ ꓐꓰ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓕꓲ ꓪꓺꓼ ꓠꓬꓲꓸ ꓠꓸ ꓡ ꓡꓳ꓿ 11 ꓖꓳ ꓟ ꓔꓯ ꓒ-ꓡꓲ-ꓢꓷ ꓐꓴ ꓟꓳꓻ ꓗꓷ ꓠꓬ꓾ ꓬꓲ ꓪꓽ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓠꓴ ꓪꓽ ꓟꓸ ꓒ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓝꓲꓸ ꓫꓺ ꓢꓴˍ ꓐꓰ ꓝꓴꓲ ꓙꓳ ꓢꓴ ꓐꓴˍ ꓐꓰ ꓕꓲ ꓪꓺꓼ ꓜ ꓜꓽˍ ꓡ?꓾ ꓐꓯˍ ꓡꓳ꓿ 12 ꓬꓰ-ꓢꓴ ꓑ ꓙꓽ ꓗꓷ ꓠꓬ ꓬꓲ ꓡꓰ꓾ ꓟꓽ ꓠꓻ ꓟꓽ ꓒꓬ ꓢꓴ ꓠꓬ ꓠꓻ ꓫꓬꓹ ꓒ ꓔꓯ ꓣꓱꓽ ꓟꓽ ꓬꓯꓼ꓿ ꓠꓻ ꓢꓴ ꓒꓬꓽ ꓢꓴ ꓠꓽ ꓣꓱꓽ ꓬꓯꓼˍ ꓡꓳ꓿ 13 ꓕꓳ ꓶ ꓗꓪ꓾ ꓥꓪ ꓠꓬ ꓫꓱꓸ ꓤˍ ꓟ ꓔꓯ ꓠꓵˍ ꓡꓳ꓿ ꓢꓰꓼ ꓔꓲ ꓓꓴ ꓔꓯ ꓟꓽ ꓠꓵ꓾ ꓐꓯˍ ꓟ ꓕꓱ ꓕꓲ ꓘꓶꓽ ꓬꓲ ꓬꓲꓹ ꓢꓶ ꓠꓴ ꓪꓽ ꓢꓳ ꓬꓰ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓔꓱꓹ ꓜꓳꓽ ꓢꓴ ꓔꓯ ꓘꓴꓻˍ ꓐꓰ ꓡꓻ ꓟ ꓟꓽ ꓥ꓿ ꓝꓴꓲ ꓙꓳ ꓢꓴ ꓔꓯ ꓘꓴꓻˍ ꓐꓰ ꓡꓻˍ ꓟ ꓥ ꓡꓳ꓾ ꓐꓯˍ ꓡꓳ꓿ 14 ꓖꓳ ꓕꓯ ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴ ꓬꓰ-ꓢꓴ ꓔꓯ ꓡ ꓢꓲ꓾ ꓥꓪ ꓠꓴꓽˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓜꓽ ꓓꓴ ꓚꓲꓸˍ ꓡꓳ꓿ ꓠꓴ ꓛꓳꓽ ꓒꓯꓹ ꓐꓴ ꓠꓬ ꓮꓸ ꓫꓵ ꓑꓶꓸ ꓓꓴ ꓜꓽ ꓓꓴ ꓟꓽ ꓚꓲꓸ ꓡ?꓾ ꓐꓯˍ ꓡꓳ꓿ 15 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓤꓽ ꓟꓶ ꓝꓱꓺ ꓑꓮꓲ ꓗꓪ ꓟꓯꓸ ꓡꓯꓸ ꓒ ꓔꓬ ꓢꓰꓽ ꓕꓯ ꓪꓰ ꓤ ꓐꓴ ꓠꓬ ꓠꓲꓹ ꓥꓴ ꓚꓰꓼ ꓡ? ꓖꓳ ꓡꓱ ꓥ ꓟꓲ ꓟꓯꓸ ꓡꓯꓸ ꓒ ꓔꓯ ꓠꓬ꓾ ꓬꓲ ꓪꓽ ꓗꓪ ꓐꓰ ꓧꓳꓽ ꓔꓯꓹ ꓙꓰˍ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ ꓖꓳ ꓕꓯꓽ ꓠꓽ ꓬꓲ ꓪꓽ ꓜꓽ ꓓꓴ ꓚꓲꓸˍ ꓥꓳ꓿ 16 ꓐꓵ ꓞꓶ ꓐꓰꓽ ꓗꓪ ꓟꓶ ꓛ ꓫꓵꓼ ꓡꓰ ꓑꓱꓺˍ ꓠꓬ ꓟꓬꓽ ꓠꓬꓲ ꓚꓵꓹ ꓧꓽ ꓡꓰˍ ꓠꓬꓲ ꓖꓳ ꓡꓱ ꓬꓰ ꓢꓴ ꓟꓽ ꓙꓳ꓿ 17 ꓛꓱꓼ ꓡꓱ ꓙꓵ ꓫꓵꓼˍ ꓟꓲ ꓧꓪꓽ ꓙꓲ ꓡꓵꓸ ꓬꓲ ꓐꓰꓽ ꓗꓪ ꓧꓳꓽ ꓢꓴ ꓟꓽ ꓙꓳ꓿ ꓟꓽ ꓥ ꓠꓬ ꓧꓪꓽ ꓙꓲ ꓡꓵꓸ ꓐꓶꓽ ꓡꓰ ꓢꓲ꓾ ꓛꓱꓼ ꓡꓱ ꓙꓵˍ ꓟꓲ ꓧꓳꓸ ꓡꓰ ꓢꓲ ꓠꓬꓲ꓾ ꓧꓪꓽ ꓙꓲ ꓡꓵꓸˍ ꓟꓲ ꓐꓬꓺ ꓡꓰˍ ꓥꓳ꓿ ꓛꓱꓼ ꓡꓱ ꓙꓵ ꓫꓵꓼ ꓠꓽ ꓧꓪ ꓙꓲ ꓡꓵꓸ ꓫꓵꓼ ꓗꓪ ꓧꓳꓽˍ ꓠꓬ꓾ ꓠꓬꓲꓽ ꓫꓵꓽ ꓡꓱꓸꓼ ꓟꓽ ꓐꓬ ꓡꓰ꓾ ꓐꓯ ꓖꓶˍ ꓡꓳ꓿ 18 ꓬꓰ-ꓢꓴ ꓬꓲ ꓪꓽ ꓔꓯ ꓖꓳ ꓡꓱ ꓐꓯ ꓔꓬ ꓕꓯ꓾ ꓜꓲꓼ ꓦꓲ ꓙꓵꓽ ꓢꓴ ꓕꓲ ꓣꓳ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓡ ꓢꓲ꓾ ꓥꓪ ꓮꓸ ꓟꓲꓽ ꓠꓬ ꓕꓱ ꓕꓲ ꓑꓹ ꓢꓲ ꓫꓵꓻꓳ꓿ ꓠꓴ ꓡ ꓢꓲ ꓬꓲ ꓔꓯ ꓡꓯꓼ ꓒꓯꓹ ꓚꓰꓹ ꓖꓶˍ ꓠꓬ꓾ ꓬꓲ ꓠꓽ ꓢꓯꓸ ꓬꓲꓼ ꓡ ꓥꓳ꓾ ꓐꓯˍ ꓡꓳ꓿ 19 ꓖꓳ ꓡꓱ ꓠꓬꓲ ꓬꓰ-ꓢꓴ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓜꓲꓼ ꓦꓲ ꓙꓵꓽ ꓒ ꓖꓳ ꓟ ꓔꓯ ꓛꓳ ꓙꓰ ꓔꓬ ꓕꓯ꓾ 20 ꓫꓵꓽ ꓜꓲꓺ ꓓꓳꓺ ꓠꓬꓲ ꓞꓲ ꓠꓬꓲꓽ ꓘꓳꓼ ꓠꓻˍ ꓟ ꓤ ꓟꓶ ꓤ ꓕꓲ ꓣꓳ ꓠꓬ ꓬꓲ ꓠꓲꓹ ꓟ ꓗꓪ꓾ ꓥꓪ ꓠꓬ ꓬꓰ-ꓢꓴ ꓬꓲ ꓐꓵ ꓞꓶ ꓟꓶꓽ ꓗꓪˍ ꓡꓰꓽ ꓫꓱꓹ ꓪˍ ꓟꓲ ꓓꓻ ꓡꓰˍ ꓥꓳ꓾ ꓓꓵꓽ ꓙ ꓢꓲ꓾ ꓬꓰ-ꓢꓴ ꓔꓯ ꓡ ꓢꓲ ꓠꓬꓲ꓾ ꓬꓲ ꓐꓵ ꓞꓶ ꓟꓶꓽ ꓗꓪ ꓫꓱꓹˍ ꓡꓳ꓿ 22 ꓬꓰ-ꓢꓴ ꓔꓲꓸ ꓒꓳꓹ ꓢꓲ ꓬꓲ ꓔꓯ ꓟꓳꓻ ꓗꓷ ꓠꓬ꓾ ꓮꓸ ꓟꓲꓽꓳ꓾ ꓠꓲꓹ ꓪꓴꓽ ꓪꓴꓽ ꓔꓬ꓾ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓾ ꓐꓯ ꓖꓶˍ ꓡꓳ꓿ ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓬꓲ ꓖꓳ ꓕꓲ ꓑꓹ ꓗꓪ ꓓꓻ ꓡꓰꓳ꓿ 23 ꓜꓲꓼ ꓦꓲ ꓙꓵꓽ ꓢꓴ ꓦꓲ ꓗꓪ ꓬꓰ-ꓢꓴ ꓓꓵꓽ ꓙꓰ ꓕꓯ꓾ ꓙꓵꓽ ꓡꓵꓽ ꓟꓵ ꓢꓴˍ ꓐꓰ꓾ ꓞꓳ ꓜꓴ ꓢꓴꓺ ꓔꓬ ꓟ ꓔꓯ ꓟꓳꓻˍ ꓡꓳ꓿ 24 ꓬꓲ ꓡꓰ꓾ ꓠꓴ ꓪꓽ ꓓꓳ ꓙꓰ꓿ ꓮꓸ ꓟꓲꓽ ꓤ ꓠꓽ ꓟꓽ ꓫꓵꓻ꓾ ꓬꓲꓼˍ ꓡꓰꓽ ꓬꓲꓼ ꓟꓶ ꓔꓬ ꓡꓳ꓾ ꓐꓯˍ ꓡꓳ꓿ ꓖꓳ ꓕꓯ ꓬꓲ ꓪꓽ ꓠꓬ ꓬꓲ ꓔꓯ ꓤꓲꓺˍ ꓡꓳ꓿ 25 ꓖꓳ ꓡꓱ ꓥ ꓟꓲ ꓞꓳ ꓜꓴ ꓔꓯ ꓓꓳ ꓙꓰ ꓝꓲ ꓗꓸ ꓠꓯ ꓬꓰ-ꓢꓴ ꓓꓵꓽ ꓡꓰ ꓢꓲ ꓮꓸ ꓟꓲꓽ ꓤ ꓡꓯꓼ ꓒꓯꓹ ꓗꓪ ꓣꓴꓻ ꓗꓷ ꓠꓬ ꓢꓯꓸ ꓬꓲꓼ ꓡꓺꓳ꓿ 26 ꓖꓳ ꓡꓱ ꓢꓲ ꓓꓳꓽ ꓕꓱ ꓟ ꓠꓬ ꓖꓳ ꓕꓲ ꓟꓵꓽ ꓡꓱꓸꓼ ꓐꓯ ꓒꓬꓱ ꓙꓰꓳ꓿ 27 ꓬꓰ-ꓢꓴ ꓖꓳ ꓗꓪ ꓐꓰ ꓗꓳꓸ ꓙꓰˍ ꓕꓯ꓾ ꓟꓬ ꓔꓶ ꓠꓬꓲꓽ ꓣꓳ ꓬꓲ ꓗꓸ ꓠꓯꓸ ꓛꓳ ꓙꓰ ꓢꓲ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤꓽꓳ꓾ ꓥꓪ ꓠꓴꓽ ꓔꓯ ꓫꓱꓸ ꓤ ꓙ ꓡꓯ꓾ ꓐꓰ ꓘꓴꓻˍ ꓡꓳ꓿ 28 ꓬꓲ ꓠꓬ ꓦꓲ ꓗꓪ ꓓꓵ ꓡꓰ ꓕꓯ꓾ ꓟꓬ ꓔꓶ ꓢꓴ ꓐꓴ ꓬꓲ ꓔꓯ ꓡ ꓡꓳ꓿ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓟꓬꓱꓽ ꓕꓱ ꓟ ꓥꓪ ꓬꓰ ꓐ ꓡ ꓟ ꓠꓴ ꓪꓽ ꓙꓵꓻˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓡꓰ꓾ ꓢꓲ ꓒꓽꓳ꓾ ꓥꓪ ꓠꓴ ꓙꓵꓻˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 29 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓟꓬ ꓢꓶ ꓗꓪ ꓫꓱꓹ ꓖꓶ ꓢꓲ꓾ ꓠꓴ ꓪꓽ ꓙꓵꓻˍ ꓟ ꓡꓰ ꓐꓰ ꓠꓴ ꓪꓽ ꓐꓱ ꓶ ꓒꓬꓱꓼ ꓡ ꓝꓲ꓾ ꓐꓯ ꓖꓶˍ ꓡꓳ꓿ 30 ꓖꓳ ꓕꓯ ꓬꓲ ꓪꓽ ꓟꓬ ꓢꓶꓽ ꓒꓴ ꓡ ꓡꓳ꓿ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓡꓲꓽ ꓡꓲꓽˍ ꓡꓰ꓾ ꓕꓱ ꓡꓱ ꓫꓬꓹ ꓓ ꓡꓰ ꓟ ꓓꓳꓽ ꓮꓽ ꓟ ꓔꓯˍ ꓟꓲ ꓕꓽ ꓢꓷꓸ ꓡꓰ ꓝꓲ꓾ ꓐꓰ ꓐꓯ ꓖꓶˍ ꓡꓳ꓿ 31 ꓖꓳ ꓡꓱ ꓥ ꓟꓲ ꓖꓳ ꓠꓬꓲꓽ ꓣꓳ ꓓꓳ ꓙꓰ ꓢꓲ ꓬꓲ ꓟꓬꓱꓺ ꓓꓳꓽ ꓠꓬ ꓖꓳ ꓕꓲ ꓟꓵꓽ ꓡꓱꓸꓼ ꓚ ꓒꓬꓱ ꓙꓰˍ ꓡꓳ꓿ 32 ꓬꓲ ꓪꓽ ꓓꓳ ꓙꓰˍ ꓕꓯ꓾ ꓠꓲꓽ ꓜꓶꓽ ꓞꓹ ꓟ ꓞꓳ ꓟꓶꓻ ꓕꓲ ꓣꓳ ꓔꓯ ꓬꓲ ꓔꓬ ꓗꓪ ꓧꓳꓽ ꓡ ꓡꓳ꓿ 33 ꓠꓲꓽ ꓔꓯ ꓖꓼ ꓓꓳ ꓗꓷ ꓠꓬ ꓞꓳ ꓟꓶ ꓠꓽ ꓫ ꓕꓱ ꓓꓳ ꓡ ꓠꓬꓲ꓾ ꓞꓳ ꓜꓴ ꓠꓬ ꓓꓵꓽ ꓙ ꓟꓶ ꓡꓰ ꓢꓲ꓾ ꓬꓲ-ꓢꓷ-ꓡꓰ ꓗꓳ ꓡꓳ ꓗꓪ ꓕꓱ ꓡꓱ ꓡꓴ ꓫꓵꓽ ꓮ ꓕꓯꓽˍ ꓟꓲ ꓟꓽ ꓟꓳꓻ ꓠꓬꓲ꓾ ꓐꓯˍ ꓡꓳ꓿ 34 ꓖꓳ ꓡꓱ ꓥ ꓟꓲ ꓒ-ꓡꓲ-ꓢꓷ ꓐꓴ ꓡꓰ꓾ ꓬꓲ ꓠꓽ ꓠꓲꓽ ꓪ ꓔꓲ ꓢꓯꓼ ꓗꓪ ꓐꓰ ꓠꓲꓽ ꓖꓼ ꓓꓳˍ ꓡꓳ꓾ ꓐꓯˍ ꓡꓳ꓿ 35 ꓬꓰ-ꓢꓴ ꓠꓬ ꓡꓳ ꓒꓱꓻˍ ꓐꓰ ꓘꓹ ꓥ ꓕ ꓑꓳꓸ ꓗꓪ ꓚꓳ ꓙꓰ ꓢꓲ꓾ ꓬꓲ ꓪꓽ ꓜꓲꓼ ꓦꓲ ꓗꓪ ꓟꓸ ꓟꓲ ꓟꓸ ꓖꓶ ꓠꓬꓲ꓾ ꓟꓴꓽ ꓗꓪ ꓗꓴꓷꓼ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓠꓬꓲ ꓐꓰ ꓠꓻ ꓫꓵꓽ ꓠꓻ ꓙꓰꓽ ꓮꓽ ꓙꓵ ꓫꓬꓹ ꓖꓶˍ ꓡꓳ꓿ 36 ꓞꓳ ꓜꓴꓻ ꓠꓬ ꓡꓳꓸ ꓢꓴ ꓟꓽ ꓙꓳ ꓟ ꓮ ꓣꓳˍ ꓡꓰ ꓐꓰ ꓗꓹ ꓢꓲ꓾ ꓬꓰ ꓙ ꓢꓴ ꓟꓽ ꓙꓳ ꓙꓳ ꓫꓸ ꓙꓵꓻ ꓟꓷ ꓙꓵꓻ ꓔꓬ ꓟ ꓔꓯ ꓬꓰ-ꓢꓴ ꓟꓳꓻˍ ꓠꓬꓲ꓾ ꓬꓲ ꓪꓽ ꓔꓯ ꓬꓲ ꓫꓱꓸ ꓤˍ ꓡꓳ꓿ 37 ꓖꓳ ꓕꓯ ꓬꓲ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓶꓼ ꓫꓺ ꓠꓯꓹ ꓟ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓮꓽ ꓘꓶꓸ ꓟꓬꓽˍ ꓟꓲ ꓟꓬꓱꓽ ꓬꓰ ꓢꓴ ꓠꓽ ꓠꓲꓸˍ ꓡꓳ꓿ 38 ꓖꓳ ꓡꓱ ꓠꓬꓲ ꓜꓻ ꓫ ꓢꓲ ꓒꓽ ꓔꓯ ꓜꓻ ꓫ ꓢꓴ ꓝꓲꓺ ꓩꓴ ꓖꓶ ꓡ ꓠꓹ ꓟ ꓓꓰ꓾ ꓐꓯˍ ꓡꓳ꓿

ꓟ-ꓔꓲ 10

1 ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓟꓽ ꓫꓬꓻ ꓠꓲꓽ ꓔꓯ ꓖꓼ ꓓꓳ ꓗꓷ ꓠꓹ ꓟ ꓐꓰ꓾ ꓠꓻ ꓫꓵꓽ ꓠ ꓙꓰꓽ ꓮꓽ ꓙꓵ ꓔꓯ ꓫꓬꓹ ꓓ ꓡꓰ ꓠꓹ ꓟ ꓙꓵꓽ ꓪ ꓖꓶꓽˍ ꓡꓳ꓿ 2 ꓝꓲ ꓓꓴ ꓐꓴ ꓞꓲ ꓠꓬꓲꓽ ꓣꓳ ꓟ ꓟꓬꓱꓺ ꓠꓬ ꓕꓱ ꓡꓱ ꓥꓳ꓿ ꓬꓲ ꓪꓴꓸ ꓕꓲ ꓣꓳ ꓠꓬ꓾ ꓒꓲ-ꓕꓱ ꓟꓬꓱ ꓔ ꓟ ꓢꓲꓹ-ꓟꓴ꓾ ꓝꓮꓲ ꓠꓬ ꓬꓲ ꓠꓬꓲꓺ ꓤ ꓯ-ꓓꓱ-ꓣꓴ꓾ ꓜꓲ-ꓐꓱ-ꓓꓲ ꓬꓲ ꓮ ꓐꓲ ꓬ-ꓗꓴˍ ꓐꓰ ꓬꓲ ꓠꓬꓲ ꓤ ꓬꓳ-ꓦ꓾ 3 ꓒꓲ-ꓡꓲˍ ꓐꓰ ꓐ-ꓕꓳ-ꓡꓱ-ꓟꓲ꓾ ꓕꓳ-ꓟ ꓐꓰ ꓝꓲꓸ ꓫ ꓢꓴ ꓟ-ꓕꓲ꓾ ꓮ-ꓡꓱ-ꓒꓲꓹ ꓬꓲ ꓮ ꓐꓲ ꓬ-ꓗꓴˍ ꓐꓰ ꓕ-ꓓꓲ-ꓪꓴ꓾ 4 ꓠꓲꓹ ꓡꓱ ꓢꓴ ꓢꓲ-ꓟꓴˍ ꓐꓰ ꓬꓰ-ꓢꓴ ꓔꓯ ꓪꓴꓽ ꓜ ꓢꓴ ꓘꓹ-ꓡꓲꓳ ꓒ ꓬꓴ-ꓓ ꓥ ꓡꓳ꓿ 5 ꓬꓰ-ꓢꓴ ꓠꓬ ꓕꓱ ꓞꓲ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷ ꓢꓲ꓾ ꓬꓲ ꓪꓽ ꓔꓯ ꓕꓱ ꓡꓱ ꓕꓵꓼ ꓪꓽ ꓖꓶˍ ꓡꓳ꓿ ꓐꓶꓽ ꓞꓳ ꓔꓬ ꓗꓪ ꓕꓽ ꓙꓰ꓿ ꓢ-ꓟ-ꓡꓲ ꓡ ꓞꓳ ꓡꓳ ꓒꓱ ꓗꓪˍ ꓟꓲ ꓕꓽ ꓓꓵꓽ ꓡꓰ꓿ 6 ꓟꓬꓽ ꓠꓬꓲ ꓠꓽ ꓬꓲ-ꓢꓷ-ꓡꓰ ꓕꓲ ꓦꓲ ꓗꓪ ꓒꓲꓼ ꓬꓰ ꓟ ꓮ ꓣꓳ ꓔꓬ ꓗꓪ ꓙꓰ꓿ 7 ꓕꓱ ꓡꓱ ꓙꓰ ꓕꓱ ꓡꓱ ꓟꓸ ꓟꓲ ꓚ ꓢꓲ꓾ ꓟꓴꓽ ꓗꓪ ꓗꓴꓷꓼ ꓠꓶꓽ ꓡꓺꓳ꓾ ꓐꓯ ꓖꓶ꓿ 8 ꓞꓳ ꓠꓻ ꓔꓯ ꓫꓬꓹ ꓖꓶ꓿ ꓞꓳ ꓫꓵꓻ ꓔꓯ ꓢꓯꓸ ꓬꓲꓼ ꓡ ꓝꓲ꓿ ꓔ ꓟꓼ ꓩꓴ ꓓꓲꓻ ꓢꓴ ꓔꓯ ꓫꓬꓻ ꓡꓰ ꓝꓲ꓿ ꓠꓲꓽ ꓔꓯ ꓖꓼ ꓓꓳ ꓗꓷ꓿ ꓠꓴ ꓪꓽ ꓠꓬ ꓬꓲ ꓒꓵꓽ ꓟꓽ ꓓꓳ ꓓꓳ ꓟꓶꓻ ꓡꓰꓳ꓿ ꓢꓴ ꓔꓯˍ ꓟꓲ ꓬꓲ ꓒꓵꓽ ꓟꓽ ꓧꓪ ꓧꓪ ꓖꓶ꓿ 9 ꓒꓴ ꓗꓶꓺ ꓓꓴ ꓙꓽ ꓧꓷꓹ ꓗꓪ ꓫꓵˍ ꓐꓰ ꓒꓴˍ ꓐꓰ ꓙꓲꓽ ꓒꓬꓸ ꓕꓽ ꓧꓪ ꓧꓳꓽ꓿ 10 ꓓꓴ ꓓꓳ ꓙꓰˍ ꓕꓯ ꓡꓯꓼ ꓔꓲꓸ ꓕꓽ ꓟꓯꓻ꓿ ꓐꓵ ꓞꓶˍ ꓟꓲ ꓠꓬꓲꓽ ꓘꓳꓹ ꓕꓽ ꓔꓯꓹ꓿ ꓛꓲ ꓠꓲˍ ꓐꓰ ꓙꓽ ꓥꓳˍ ꓟꓲ ꓕꓽ ꓔꓯꓹ꓿ ꓮ ꓡꓲꓳ ꓐꓯ ꓠꓬ ꓟꓬꓱꓽ ꓬꓰ ꓢꓴ ꓠꓽ ꓬꓲ ꓜꓽ ꓓꓴ ꓟꓶꓻ ꓒꓵꓽˍ ꓡꓳ꓿ 11 ꓠꓴ ꓪꓽ ꓠꓬ ꓡꓳ ꓒꓱˍ ꓐꓰ ꓘꓹ ꓗꓪ ꓓꓵꓽ ꓙꓰˍ ꓕꓯ꓾ ꓠꓴ ꓪꓽ ꓔꓯ ꓘꓳ ꓣꓴ ꓠꓲꓹ ꓒꓴ ꓢꓴ ꓮꓽ ꓟ ꓥ ꓟ ꓠ ꓠꓬꓲ ꓢꓲ꓾ ꓟꓽ ꓓꓳ ꓙꓰ ꓕ ꓑꓳꓸ ꓖꓳ ꓕꓲ ꓦꓲ ꓗꓪ ꓔꓬ꓿ 12 ꓦꓲ ꓖꓳ ꓟ ꓗꓪ ꓓꓵꓽ ꓡꓰ ꓠꓬ ꓢꓲꓺ ꓡꓲ ꓟ ꓟꓶꓻ ꓝꓲ꓾ ꓐꓰ ꓒꓵꓽ ꓗ ꓬꓰ ꓖꓶ꓿ 13 ꓖꓳ ꓕꓲ ꓦꓲ ꓢꓴ ꓢꓲꓺ ꓡꓲ ꓟ ꓟꓶꓻ ꓒꓵꓽˍ ꓠꓬ꓾ ꓖꓳ ꓕꓲ ꓦꓲ ꓗꓪ ꓬꓯꓼ ꓡ ꓝꓲ꓿ ꓟꓶꓻ ꓟꓽ ꓒꓵꓽ ꓠꓬ ꓢꓲꓺ ꓡꓲ ꓟ ꓖꓳ ꓟ ꓠꓴ ꓪꓽ ꓔꓯ ꓬꓲꓼ ꓡ ꓝꓲ꓿ 14 ꓮ ꓡꓲ ꓕꓲ ꓣꓳ ꓠꓴ ꓪꓽ ꓔꓯ ꓟꓽ ꓘꓳ ꓣꓴ꓾ ꓥ ꓠꓬ ꓠꓴ ꓪꓽ ꓐꓯ ꓘꓶꓽ ꓔꓯ ꓟꓽ ꓠ ꓡꓳꓹ ꓐꓷˍ ꓠꓬ꓾ ꓖꓳ ꓕꓲ ꓦꓲ꓾ ꓥ ꓠꓬ ꓖꓳ ꓕꓲ ꓡꓳ ꓒꓱ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓠꓴ ꓪꓽ ꓛꓲ ꓒꓯꓹ ꓗꓪ ꓟ ꓠꓱꓸ ꓦꓱꓽ ꓧꓶꓽ ꓟꓱꓸ ꓞꓰꓻ ꓩꓴ ꓗꓷ꓿ 15 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓐꓯꓺ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ꓾ ꓡꓳ ꓒꓱ ꓖꓳ ꓕꓲ ꓟ ꓔꓯ ꓗꓷ ꓡꓰ ꓠꓹ ꓟ ꓠꓬ꓾ ꓢꓳ-ꓓꓳ-ꓟˍ ꓐꓰ ꓳ-ꓟꓳ-ꓡ ꓔꓯ ꓗꓷ ꓡꓰ ꓠꓹ ꓟ ꓢꓶꓸ ꓟꓽ ꓞꓲ ꓡꓲꓽˍ ꓥꓳ꓿ 16 ꓧꓪꓸ ꓛꓲꓽ ꓔ꓾ ꓥꓪ ꓡꓰ ꓠꓴ ꓪꓽ ꓔꓯ ꓝꓲ ꓩꓴ ꓗꓷˍ ꓟ ꓠꓬ꓾ ꓪꓰ ꓕꓳꓹ ꓜꓴꓻ ꓗꓳ ꓡꓳ ꓗꓪ ꓮ ꓣꓳ ꓔꓯ ꓝꓲ ꓩꓴ ꓗꓷˍ ꓟ ꓡꓰ ꓐꓰ ꓗꓹ ꓡꓳ꓿ ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓩꓴꓺˍ ꓡꓰ ꓐꓰ ꓕꓰꓻ ꓢꓲ ꓮꓸ ꓖꓴꓽˍ ꓡꓰ ꓐꓰ ꓠꓲꓹ ꓟ ꓙꓲ ꓠ ꓗꓹ ꓡꓳ꓿ 17 ꓠꓴ ꓪꓽ ꓤ ꓟꓳ꓾ ꓮ ꓡꓲꓳ ꓐꓯ ꓠꓬ ꓢꓴ ꓡꓰ ꓠꓴ ꓪꓽ ꓔꓯ ꓐꓯꓺ ꓟꓴ ꓜꓲꓼ ꓓꓴ ꓗꓪ ꓡꓯꓼ ꓙꓱ ꓗꓷˍ ꓥꓳ꓿ ꓜꓲꓼ ꓦꓲ ꓗꓪˍ ꓟꓲ ꓠꓴ ꓪꓽ ꓔꓯ ꓧꓶꓹ ꓡ ꓥꓳ꓿ 18 ꓖꓳ ꓟˍ ꓡꓰ ꓟꓽ ꓞꓲ꓾ ꓥꓪ ꓪꓴꓸ ꓠꓬꓲ ꓠꓴ ꓪꓽ ꓔꓯ ꓢꓲꓽ ꓒ ꓐꓴˍ ꓐꓰ ꓪ ꓔꓲ ꓐꓴ ꓟꓲꓽ ꓙꓬꓽ ꓗꓪ ꓧꓳꓽ ꓛꓲ ꓬꓰ ꓢꓲ꓾ ꓠꓴ ꓪꓽ ꓠꓬ ꓬꓲ ꓪꓽˍ ꓐꓰ ꓐꓶꓽ ꓞꓳ ꓐꓴ ꓔꓯ ꓥꓪ ꓐꓱ ꓶ ꓢꓷꓸ ꓙ ꓟꓳꓻ ꓙ ꓢꓴ ꓬꓰˍ ꓥꓳ꓿ 19 ꓠꓴ ꓪꓽ ꓔꓯ ꓢꓲꓽ ꓒ ꓐꓴ ꓡꓰ ꓐꓯꓺ ꓟꓴ ꓠ ꓠꓬꓲ ꓡ ꓕꓯ꓾ ꓮ ꓡꓲ ꓒꓳꓹ ꓖꓶ ꓠꓯꓹ ꓟ ꓕꓽ ꓙꓽ ꓫꓸ꓿ ꓖꓳ ꓕꓲ ꓝꓲꓸ ꓗꓪ ꓣꓱꓽ ꓬꓯꓼˍ ꓟ ꓐꓯ ꓘꓶꓽ ꓠꓴ ꓪꓽ ꓔꓯ ꓖꓶ ꓡ ꓥꓳ꓿ 20 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓫ ꓕꓱˍ ꓟ ꓟꓽ ꓥ꓾ ꓠꓴ ꓪꓽ ꓐꓹ ꓐꓽ ꓬꓲ ꓦꓻ ꓡꓰ ꓠꓴ ꓪꓽ ꓠꓯꓸꓼ ꓗꓪ ꓐꓰ ꓫꓸ ꓕꓱˍ ꓟ ꓥ ꓡꓳ꓿ 21 ꓬꓲꓼ ꓤ ꓠꓬꓲ ꓤ ꓐꓴˍ ꓟꓲ ꓬꓲꓼ ꓠꓬꓲ ꓐꓴ ꓔꓯ ꓫꓵꓻ ꓝꓲ ꓠꓹ ꓟ ꓡꓯꓼ ꓙꓱ ꓡꓯꓽ ꓘꓳˍ ꓥꓳ꓿ ꓐꓹ ꓐꓽˍ ꓟꓲ ꓬꓲ ꓤ ꓠꓱ ꓔꓯ ꓫꓵꓻ ꓝꓲ ꓠꓹ ꓟ ꓡꓯꓼ ꓙꓱ ꓗꓷˍ ꓥꓳ꓿ ꓤ ꓠꓱ ꓐꓴˍ ꓟꓲ ꓐꓹ ꓐ ꓟꓹ ꓟ ꓔꓯ ꓫꓵꓻ ꓝꓲ ꓠꓹ ꓟ ꓒꓳꓹ ꓔꓴ ꓡ ꓥꓳ꓿ 22 ꓥꓪ ꓟꓬꓱꓺ ꓪꓴꓸ ꓠꓬꓲ ꓡ ꓞꓳ ꓮꓽ ꓙꓵ ꓠꓴ ꓪꓽ ꓔꓯ ꓠꓲꓹ ꓜꓳ ꓡ ꓥꓳ꓿ ꓡꓳꓹ ꓬꓰ ꓗꓪ ꓛꓲ ꓜꓲꓽ ꓘꓴ ꓢꓴ ꓬꓲ ꓠꓽ ꓢꓯꓼ ꓟꓬ ꓝꓸ ꓟꓶˍ ꓥꓳ꓿ 23 ꓕꓱ ꓕꓲ ꓡꓳ ꓒꓱ ꓗꓪ ꓠꓴ ꓪꓽ ꓔꓯ ꓗꓸ ꓧꓪˍ ꓠꓬ꓾ ꓖꓳ ꓕꓲ ꓡꓳ ꓒꓱ ꓗꓪ ꓛꓰꓹ ꓙꓰ꓿ ꓥꓪ ꓠꓴ ꓪꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓬꓲ-ꓢꓷ-ꓡꓰ ꓡꓳ ꓒꓱ ꓮꓽ ꓙꓵ ꓗꓪ ꓙꓰ ꓟꓽ ꓖꓴ ꓢꓰꓽ ꓕꓯˍ ꓡꓰ꓾ ꓡ-ꓞꓳ-ꓮ-ꓐꓲ ꓛꓲ ꓡ ꓥꓳ꓿ 24 ꓢꓳ ꓒꓽ ꓠꓬ ꓬꓲ ꓟꓸ ꓒ ꓕꓯꓽ ꓢꓲ ꓟꓽ ꓪꓴꓽ꓿ ꓚꓳ ꓑˍ ꓟꓲ ꓬꓲ ꓢꓲ ꓒꓽ ꓕꓯꓽ ꓢꓲ ꓟꓽ ꓪꓴꓽ꓿ 25 ꓢꓳ ꓒ ꓠꓬ ꓬꓲ ꓟꓸ ꓒˍ ꓐꓰ ꓕꓲ ꓡꓰꓹꓼ꓾ ꓚꓳ ꓑꓸ ꓠꓬ ꓬꓲ ꓢꓲ ꓒꓽˍ ꓐꓰ ꓕꓲ ꓡꓰꓹꓼ ꓗꓷ ꓡꓰ ꓠꓬ ꓡꓳꓼˍ ꓥꓳ꓿ ꓦꓲ ꓢꓲ ꓒꓽ ꓔꓯ ꓐꓲ-ꓜꓲ-ꓐꓷ ꓘꓴꓻˍ ꓠꓬ꓾ ꓬꓲ ꓕꓲ ꓦꓲ ꓗꓪ ꓟ ꓡ ꓞꓳ ꓔꓯ ꓠꓬ ꓪ ꓜꓲ ꓟꓽ ꓙꓲ ꓟ ꓟꓬꓱꓺ ꓡꓰ ꓘꓴꓻ ꓡ ꓥꓳ꓿ 26 ꓖꓳ ꓡꓱ ꓠꓬꓲ ꓡ ꓞꓳ ꓔꓯ ꓕꓽ ꓙꓳꓺ꓿ ꓮ ꓡꓲꓳ ꓐꓯ ꓠꓬ ꓑꓲꓸ ꓔ ꓟ ꓮꓸ ꓫꓵˍ ꓟꓲ ꓟꓳꓸ ꓖꓶ ꓓꓳ ꓡ ꓥꓳ꓿ ꓚꓵꓺ ꓔ ꓟˍ ꓟꓲ ꓢꓷꓸ ꓡꓰˍ ꓥꓳ꓿ 27 ꓥꓪ ꓡꓰ ꓘꓳ ꓫꓱ ꓫꓱˍ ꓗꓪ ꓠꓴ ꓪꓽ ꓔꓯ ꓐꓯ ꓖꓶˍ ꓟ ꓠꓬ꓾ ꓫꓬꓽ ꓫꓬ ꓟ ꓗꓪ ꓐꓯ ꓓꓳ ꓙꓰ꓿ ꓠꓴ ꓪꓽ ꓠꓸ ꓑꓳ ꓗꓪ ꓒꓽ ꓛꓽ ꓗꓷ ꓟ ꓠꓬ ꓦꓲ ꓪꓴꓸ ꓓꓵ ꓗꓪ ꓚ ꓒꓬꓱ ꓙꓰ꓿ 28 ꓖꓳ ꓓꓱ ꓔꓯ ꓢꓰꓼ ꓐ ꓡ ꓟꓲ꓾ ꓶꓻ ꓟꓬ ꓔꓯ ꓢꓰꓼ ꓟꓽ ꓐ ꓡ ꓢꓴ ꓔꓯ ꓕꓽ ꓙꓳ꓿ ꓖꓳ ꓓꓱˍ ꓟꓲ ꓦꓻˍ ꓟꓲ ꓛꓬꓼ ꓟꓵꓽ ꓗꓪ ꓟꓶꓽ ꓬꓰ ꓝꓲ ꓐ ꓡ ꓢꓴ ꓪꓴ-ꓢ ꓔꓯ ꓠꓽ ꓙꓳ ꓠ ꓗ ꓡꓳ꓿ 29 ꓠꓬꓹ ꓛꓬꓼ ꓡꓯꓼ ꓠꓬꓲꓽ ꓟ ꓠꓬ ꓙꓲꓽ ꓒꓬꓸ ꓕꓲꓽ ꓒꓬꓸˍ ꓡꓰꓽ ꓪꓴꓽˍ ꓡꓳ꓾ ꓟꓽ ꓥ ꓡ? ꓖꓳ ꓡꓱ ꓥ ꓟꓲ ꓠꓴ ꓪꓽ ꓐꓹ ꓐ ꓟꓽ ꓢꓷꓸ ꓢꓷ ꓟꓲ ꓛꓬ ꓗꓪ ꓠꓬꓹ ꓛꓬꓼ ꓡꓯꓼ ꓕꓲ ꓟˍ ꓟꓲ ꓟꓽ ꓞꓰꓻ ꓡꓰ꓿ 30 ꓠꓴ ꓪꓽ ꓪꓴꓸ ꓞꓱꓻˍ ꓟꓲ ꓮꓽ ꓙꓵꓽ ꓵ ꓔ ꓡꓳ꓿ 31 ꓖꓳ ꓡꓱ ꓠꓬꓲ ꓕꓽ ꓙꓳꓺ꓾ ꓠꓴ ꓪꓽ ꓠꓬ ꓠꓬꓹ ꓛꓬꓼ ꓡꓯꓼ ꓮꓽ ꓟꓬꓹ ꓟ ꓢꓶꓸ ꓟ ꓞꓲ ꓒꓵꓽˍ ꓡꓳ꓿ 32 ꓮꓽ ꓟ ꓥ ꓟꓲ ꓞꓳ ꓤ ꓟꓲꓽ ꓙꓬ ꓗꓪ ꓥꓪ ꓔꓯ ꓣꓷꓠꓸˍ ꓠꓬ꓾ ꓟꓴꓽ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐ ꓟꓲꓽ ꓙꓬꓽ ꓗꓪ ꓥꓪˍ ꓟꓲ ꓬꓲ ꓔꓯ ꓥꓪ ꓣꓷꓠꓸˍ ꓥꓳ꓿ 33 ꓮꓽ ꓟ ꓥ ꓟꓲ ꓞꓳ ꓤ ꓟꓲꓽ ꓙꓬ ꓗꓪ ꓥꓪ ꓔꓯ ꓟꓽ ꓣꓷꓠꓸˍ ꓠꓬ꓾ ꓟꓴꓽ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐ ꓟꓲꓽ ꓙꓬ ꓗꓪ ꓥꓪˍ ꓟꓲ ꓬꓲ ꓔꓯ ꓟꓽ ꓣꓷꓠꓸ꓿ 34 ꓥꓪ ꓠꓬ ꓟꓲ ꓠꓯ ꓗꓪ ꓢꓲꓺ ꓡꓲ ꓟ ꓔꓯꓹ ꓧꓳꓽ ꓡ ꓡꓳ ꓕꓽ ꓓꓵꓽ ꓙ꓿ ꓥꓪ ꓠꓬ ꓟꓲ ꓠꓯ ꓗꓪ ꓢꓲꓺ ꓡꓲ ꓟ ꓔꓯꓹ ꓧꓳꓽ ꓡ ꓟ ꓟꓽ ꓥ꓿ ꓮꓸ ꓕꓽ ꓔꓯꓹ ꓧꓳꓽ ꓡ ꓟ ꓥ ꓡꓳ꓿ 35 ꓮ ꓡꓲꓳ ꓐꓯ ꓠꓬ ꓥꓪ ꓠꓽ꓾ ꓬꓲꓸ ꓤꓽˍ ꓐꓰ ꓬꓲꓸ ꓐꓹ ꓐ꓾ ꓮꓸ ꓟꓲꓽˍ ꓐꓰ ꓟꓹ ꓟ꓾ ꓛꓲꓼ ꓟ ꓐꓰ ꓟꓹ ꓟ ꓑꓯꓹ ꓔꓯ ꓔꓳꓹ ꓡꓯꓽ ꓘꓳ ꓝꓲˍ ꓐꓰ ꓡꓻ ꓟ ꓥ ꓡꓳ꓿ 36 ꓡ ꓞꓳ ꓬꓲ ꓚꓲꓸ ꓛꓬ ꓕꓲ ꓦꓲ ꓢꓴ ꓠꓬ ꓬꓲ ꓔꓯ ꓛꓴꓽ ꓙꓳ ꓢꓴ ꓗꓷ ꓡꓰˍ ꓥꓳ꓿ 37 ꓥꓪ ꓔꓯ ꓠꓲꓹ ꓠꓵˍ ꓟ ꓢꓶꓸ ꓟꓽ ꓞꓲ ꓮ ꓐꓽ ꓮ ꓟ ꓔꓯ ꓠꓲꓹ ꓠꓵ ꓢꓴ ꓠꓽ ꓥꓪ ꓢꓲ ꓤ ꓬꓰ ꓟꓽ ꓒꓵꓽ꓿ ꓥꓪ ꓔꓯ ꓠꓲꓹ ꓠꓵˍ ꓟ ꓕꓯꓽ ꓢꓲ ꓬꓲ ꓮ ꓐꓲ ꓮꓸ ꓟꓲꓽ ꓔꓯ ꓠꓲꓹ ꓠꓵ ꓢꓴˍ ꓟꓲ ꓥꓪ ꓢꓲ ꓤ ꓬꓰ ꓟꓽ ꓒꓵꓽ꓿ 38 ꓬꓲ ꓡꓯ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ ꓥꓪ ꓔꓯ ꓟꓽ ꓛꓳꓻ ꓢꓴ ꓠꓬ ꓥꓪ ꓢꓲ ꓤ ꓬꓰ ꓟꓽ ꓒꓵꓽ꓿ 39 ꓚꓲꓸ ꓛꓬ ꓢꓯꓼ ꓟꓬ ꓔꓯ ꓠꓲ ꓥꓳꓺ ꓢꓴ ꓠꓬ ꓬꓲ ꓢꓯꓼ ꓟꓬ ꓟꓶꓽ ꓬꓰˍ ꓥꓳ꓿ ꓥꓪ ꓐꓱ ꓶ ꓢꓯꓼ ꓟꓬ ꓒꓲꓼ ꓬꓰ ꓢꓴ ꓠꓽ ꓬꓲ ꓢꓯꓼ ꓟꓬ ꓧꓪ ꓟꓶˍ ꓥꓳ꓿ 40 ꓠꓴ ꓪꓽ ꓔꓯ ꓘꓳ ꓣꓴ ꓢꓴ ꓠꓬ ꓥꓪ ꓔꓯ ꓘꓳ ꓣꓴˍ ꓟ ꓥ ꓡꓳ꓿ ꓥꓪ ꓔꓯ ꓘꓳ ꓣꓴ ꓢꓴ ꓠꓽ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓘꓳ ꓣꓴˍ ꓟ ꓥ ꓡꓳ꓿ 41 ꓟꓷꓽ ꓠꓷꓹ ꓝꓸ ꓢꓴ ꓔꓯ ꓘꓳ ꓣꓴ ꓢꓴ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓟꓶˍ ꓟ ꓡꓯꓼ ꓫꓴ ꓬꓲˍ ꓟꓲ ꓟꓶˍ ꓥꓳ꓿ ꓔꓱꓹ ꓜꓳꓽ ꓢꓴ ꓔꓯ ꓘꓳ ꓣꓴ ꓢꓴ ꓠꓬ ꓔꓱꓹ ꓜꓳꓽ ꓢꓴ ꓟꓶˍ ꓟ ꓡꓯꓼ ꓫꓴ ꓬꓲˍ ꓟꓲ ꓟꓶˍ ꓥꓳ꓿ 42 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓥꓪ ꓢꓲ ꓤ ꓐꓴ ꓕꓱ ꓟꓬ ꓗꓪ ꓣꓳꓺ ꓓꓰꓺˍ ꓟ ꓕꓲ ꓣꓳ ꓔꓯ꓾ ꓬꓲꓻ ꓛꓵꓼ ꓕꓲ ꓗꓶꓸ ꓤꓽˍ ꓡꓰꓽ ꓖꓶ ꓓꓳꓻ ꓢꓴˍ ꓟꓲ꓾ ꓬꓲ ꓡꓯꓼ ꓫꓴ ꓟꓽ ꓒꓲꓼ ꓬꓰ꓾ ꓐꓯˍ ꓡꓳ꓿

ꓟ-ꓔꓲ 11

1 ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓕꓵꓼ ꓪꓽ ꓖꓶꓽ ꓗꓷ ꓠꓬ꓾ ꓬꓲ ꓠꓽ ꓡꓳ ꓒꓱ ꓘꓹ ꓒꓱ ꓗꓪ ꓟꓸ ꓟꓲ ꓚ ꓙꓰ ꓠꓹ ꓟ ꓖꓳ ꓗꓪ ꓐꓰ ꓓꓳ ꓙꓰˍ ꓡꓳ꓿ 2 ꓬꓳ-ꓦ ꓠꓬ ꓐꓱ ꓓꓴꓽ ꓗꓪ ꓔꓬ ꓢꓲ ꓙꓲ-ꓢꓴ ꓡꓰ ꓬꓰˍ ꓟ ꓟꓬꓱꓽ ꓬꓲ ꓓꓳꓽ ꓑ ꓙꓽ ꓗꓷ ꓠꓬ꓾ ꓬꓰ-ꓢꓴ ꓔꓬ ꓗꓪ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓝꓲ ꓩꓴ ꓗꓷ ꓢꓲ꓾ 3 ꓡꓻ ꓠꓹ ꓟ ꓖꓳ ꓕꓲ ꓣꓳ ꓠꓬ ꓠꓴ ꓥ ꓡ? ꓥ ꓠꓬ ꓥꓪ ꓠꓴꓽ ꓠꓽ ꓠꓱꓸ ꓐꓯ ꓕꓲ ꓣꓳ ꓔꓯ ꓡꓳ ꓔꓬ ꓢꓰꓽ ꓠꓯꓹ ꓡ?꓾ ꓐꓰ ꓠ ꓠꓬꓲ ꓝꓲˍ ꓡꓳ꓿ 4 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓙꓰ ꓢꓲ ꓠꓴ ꓪꓽ ꓑ ꓙꓽˍ ꓟ ꓐꓰ ꓡꓳꓸ ꓟꓳꓻˍ ꓟ ꓬꓳ-ꓦ ꓔꓯ ꓐꓯ ꓖꓶ ꓬꓰ꓿ 5 ꓠꓴ ꓪꓽ ꓡꓳꓸ ꓟꓳꓻˍ ꓟ ꓐꓰ ꓑ ꓙꓽ ꓟꓶˍ ꓟ ꓠꓬ꓾ ꓟꓬ ꓔꓶ ꓠꓬꓲ ꓟꓳꓻ ꓡ ꓟ꓾ ꓛꓲ ꓫꓳꓸ ꓫꓱꓽ ꓙꓰˍ ꓟ꓾ ꓔ ꓟꓼ ꓩꓴ ꓓꓲ ꓢꓴ ꓫꓬꓻ ꓡꓰˍ ꓟ꓾ ꓠꓸ ꓐꓳꓽ ꓑ ꓙꓽ ꓡ ꓟ꓾ ꓞꓳ ꓫꓵꓻ ꓢꓯꓸ ꓬꓲꓼ ꓡ ꓟ꓾ ꓞꓳ ꓫ ꓔꓯ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶˍ ꓟ꓾ ꓕꓱ ꓟꓬ ꓫꓵꓽ ꓥꓳ꓿ 6 ꓥꓪ ꓔꓯ ꓓꓵꓽ ꓙ ꓟꓬꓽ ꓓꓴ ꓟꓽ ꓙꓳ ꓢꓴ ꓠꓽ꓾ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯˍ ꓡꓳ꓿ 7 ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴ ꓙꓰˍ ꓐꓰ ꓬꓰˍ ꓕꓯ꓾ ꓬꓰ-ꓢꓴ ꓠꓬ ꓬꓳ-ꓦ ꓔꓯ ꓖꓴ ꓢꓲ ꓞꓳ ꓜꓴ ꓔꓯ ꓕꓱ ꓡꓱ ꓐꓯ ꓖꓶ ꓪꓴꓸ ꓔꓴˍ ꓡꓳ꓿ ꓠꓴ ꓪꓽ ꓠꓬ ꓮꓸ ꓫꓵ ꓔꓯ ꓡꓳꓸ ꓠꓹ ꓟ ꓡꓲ ꓛꓲ ꓗꓪ ꓓꓳ ꓙꓰˍ ꓡ? ꓟꓲꓽ ꓦꓲ ꓡꓰ ꓙꓱꓼ ꓶꓹ ꓔꓬ ꓟ ꓬꓲꓻ ꓑ ꓒꓴꓽ ꓓꓻ ꓔꓯ ꓡꓳꓸ ꓠꓹ ꓟ ꓙꓰˍ ꓡ? 8 ꓠꓴ ꓪꓽ ꓮꓸ ꓫꓵ ꓔꓯ ꓟꓳꓻ ꓠꓹ ꓟ ꓙꓰˍ ꓡ? ꓠꓴꓽ ꓡꓯꓻ ꓟ ꓐꓵ ꓞꓶꓽ ꓖꓪꓽ ꓢꓴ ꓔꓯ ꓟꓳꓻ ꓠꓹ ꓟ ꓙꓰˍ ꓡ? ꓠꓴꓽ ꓡꓯꓻ ꓟ ꓐꓵ ꓞꓶ ꓖꓪꓽ ꓢꓴ ꓠꓽ ꓪ ꓔꓲ ꓙꓻ ꓗꓪ ꓔꓬ ꓡꓳ꓿ 9 ꓠꓴ ꓪꓽ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓓꓳ ꓙꓰˍ ꓡ? ꓟꓷꓽ ꓠꓷꓹ ꓝꓸ ꓢꓴ ꓔꓯ ꓟꓳꓻ ꓠꓹ ꓟ ꓙꓰˍ ꓡ? ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓥ ꓡꓳ꓾ ꓬꓳ-ꓦ ꓠꓽ ꓟꓷꓽ ꓠꓷꓹ ꓝꓸ ꓢꓴ ꓕꓯꓽ ꓢꓲ ꓮꓽ ꓘꓶꓸ ꓪꓴꓽˍ ꓡꓳ꓿ 10 ꓕꓳ ꓶ ꓗꓪ ꓐꓳ ꓔ ꓟ꓾ ꓥꓪ ꓠꓬ ꓠꓴ ꓟꓲꓽ ꓕꓯꓽ ꓢꓲ ꓗꓪ ꓥꓪ ꓝꓲ ꓓꓴ ꓝꓲ ꓩꓴ ꓗꓷ ꓢꓲ꓾ ꓬꓲ ꓠꓬ ꓠꓴ ꓙꓻ ꓖꓴ ꓙꓽ ꓖꓶˍ ꓥꓳ꓾ ꓐꓯˍ ꓟ ꓠꓬ ꓕꓱ ꓕꓲ ꓣꓳ ꓔꓯ ꓐꓯˍ ꓟ ꓥꓳ꓿ 11 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓤꓽ ꓟꓶ ꓤ ꓡꓰ ꓦꓵꓻ ꓔ ꓢꓴ ꓐꓴ ꓗꓳ ꓡꓳ ꓗꓪ꓾ ꓖꓳ ꓓꓱ ꓔꓲꓹ ꓢꓴ ꓬꓳ-ꓦ ꓕꓯꓽ ꓢꓲ ꓪꓴꓽˍ ꓟ ꓟꓽ ꓓꓳ ꓡ ꓠꓬꓲ꓿ ꓖꓳ ꓡꓱ ꓥ ꓟꓲ ꓟꓴꓽ ꓗꓪ ꓗꓴꓷꓼ ꓠꓯꓸꓼ ꓗꓪ ꓮꓽ ꓘꓶꓸ ꓣꓳꓺ ꓢꓴ ꓠꓬ꓾ ꓬꓲ ꓕꓯꓽ ꓢꓲ ꓪꓴꓽˍ ꓢꓰꓽ ꓡꓳ꓿ 12 ꓖꓳ ꓓꓱ ꓔꓲꓹ ꓢꓴ ꓬꓳ-ꓦ ꓦꓬꓼ ꓠꓬꓲ ꓗꓪ ꓐꓰ ꓮ ꓟꓶ ꓗꓪ ꓛꓲ꓾ ꓟꓴꓽ ꓗꓪ ꓗꓴꓷꓼ ꓠꓬ ꓜꓲꓽ ꓜꓲ ꓑꓰꓹ ꓑꓰ ꓬꓰ ꓡ ꓟ ꓔꓳꓹ ꓜꓳꓽ ꓢꓲ꓾ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰ ꓢꓴ ꓡꓰ ꓟꓴꓽ ꓗꓪ ꓗꓴꓷꓼ ꓔꓯ ꓦꓴꓺ ꓡ ꓡꓳ꓿ 13 ꓮ ꓡꓲꓳ ꓐꓯ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓮꓽ ꓙꓵˍ ꓐꓰ ꓙꓵꓽ ꓗ ꓠꓬ꓾ ꓬꓳ-ꓦ ꓦꓬꓼ ꓠꓬꓲ ꓗꓪ ꓛꓲ ꓮ ꓡꓲ ꓒꓬꓱꓼ ꓡ ꓠ ꓗꓹ ꓟ ꓮꓽ ꓙꓵ ꓐꓯ ꓗꓷꓳ꓿ 14 ꓬꓲ ꓪꓽ ꓐꓯ ꓖꓶꓽ ꓗꓷ ꓟ ꓔꓯ ꓠꓴ ꓪꓽ ꓘꓳ ꓣꓴ ꓠꓲꓹ ꓫꓵˍ ꓕꓯ ꓠꓽ꓾ ꓬꓲ-ꓡꓲ-ꓬ ꓡꓻˍ ꓥꓳ꓾ ꓐꓯ ꓔ ꓟ ꓠꓬ ꓬꓳ-ꓦ ꓕꓱ ꓕꓲ ꓣꓳ ꓥꓳ꓿ 15 ꓠꓸ ꓑꓳ ꓙꓳ ꓢꓴ ꓠꓬ ꓠ ꓠꓹ꓾ ꓐꓯˍ ꓡꓳ꓿ 16 ꓕꓱ ꓕꓲ ꓤꓶ ꓟ ꓔꓯ ꓥꓪ ꓮꓸ ꓫꓵ ꓡꓰ ꓔꓯꓺ ꓠꓯꓹ ꓡ? ꓕꓱ ꓕꓲ ꓤꓶ ꓟ ꓠꓬ ꓙꓵꓺ ꓗꓪ ꓤ ꓠꓱ ꓤ ꓐꓴ ꓠꓬꓲꓸ ꓠꓸ ꓢꓲ ꓬꓲ ꓪꓽ ꓛꓳꓽ ꓒꓯꓹ ꓐꓴ ꓔꓯ꓾ 17 ꓠꓴ ꓪꓽ ꓐꓱ ꓶ ꓥꓪ ꓠꓴꓽ ꓡꓰ ꓙꓵꓽ ꓡꓵꓽ ꓟꓵ ꓖꓶˍ ꓟꓲ ꓠꓴ ꓪꓽ ꓗꓪꓺ ꓛꓰꓹ ꓟꓽ ꓫꓳ꓿ ꓥꓪ ꓠꓴꓽ ꓮꓸ ꓛꓬꓹ ꓙꓱˍ ꓟꓲ ꓠꓴ ꓪꓽ ꓳ' ꓟꓶꓽ ꓓꓶꓽ ꓠꓬꓲ ꓟꓽ ꓥꓴꓻ ꓡ꓾ ꓐꓰ ꓘꓴꓻ ꓔꓬ ꓢꓴˍ ꓡꓰ ꓐꓰ ꓗꓹ ꓡꓳ꓿ 18 ꓮ ꓡꓲꓳ ꓐꓯ ꓠꓬ ꓬꓳ-ꓦ ꓠꓽ ꓜꓽ ꓓꓴ ꓚꓲꓸ ꓠꓬꓲ꓾ ꓙꓲꓻ ꓒꓶꓽˍ ꓟꓲ ꓟꓽ ꓓꓳꓻ ꓓꓳ ꓡꓻˍ ꓠꓬ꓾ ꓬꓲ ꓪꓽ ꓠꓽ꓾ ꓬꓲ ꓔꓯ ꓠꓲꓽ ꓕꓲ ꓟ ꓓꓯꓹ ꓡꓳ꓾ ꓐꓯˍ ꓡꓳ꓿ 19 ꓡ-ꓞꓳ-ꓮ-ꓐꓲ ꓠꓽ ꓜꓽ ꓠꓬꓲ ꓓꓳ ꓠꓬꓲ ꓐꓰ ꓡꓻˍ ꓠꓬ꓾ ꓬꓲ ꓪꓽ ꓡꓰ ꓬꓲ ꓔꓯ꓾ ꓜꓽ ꓓꓴˍ ꓐꓰ ꓛꓱꓼ ꓡꓱ ꓙꓵ ꓗꓪꓸ ꓢꓴ ꓥꓳ꓾ ꓝꓲꓸ ꓫ ꓢꓴˍ ꓐꓰ ꓝꓴꓲ ꓙꓳ ꓢꓴ ꓗꓪ ꓛꓳꓽ ꓥꓳ꓾ ꓐꓰ ꓐꓯˍ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓬꓲ ꓙꓽ ꓗꓴꓸ ꓠꓲꓹ ꓠꓬ ꓜꓳꓽˍ ꓟ ꓥ ꓟ꓾ ꓬꓲ ꓙꓽ ꓗꓴꓸ ꓠꓲꓹ ꓟꓬꓱꓽ ꓡꓰ ꓟꓳꓸ ꓖꓶ ꓓꓳ ꓡ ꓡꓳ꓾ ꓐꓯˍ ꓡꓳ꓿ 20 ꓬꓰ-ꓢꓴ ꓬꓲ ꓪꓽ ꓠꓬꓲˍ ꓟ ꓟꓬꓱꓽ ꓟꓬꓽ ꓠꓬꓲ ꓬꓰ ꓗꓷ ꓟ ꓡꓳ ꓒꓱ ꓖꓳ ꓟꓬ ꓗꓪ ꓔꓬ ꓢꓴ ꓐꓴ ꓟꓽ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓬꓲ꓾ ꓬꓲ ꓡꓰ ꓬꓲ ꓪꓽ ꓔꓯ ꓕꓼ ꓔꓴ ꓡ ꓢꓲ ꓕꓱ ꓡꓱ ꓐꓯˍ ꓡꓳ꓿ 21 ꓗꓳ-ꓡ-ꓢꓲꓳ꓾ ꓠꓴ ꓠꓽ ꓫ ꓙꓵˍ ꓥꓳ꓾ ꓐꓱ-ꓢꓰ-ꓓꓽꓳ꓾ ꓠꓴ ꓠꓽ ꓫ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓬꓰ ꓗꓷ ꓟ ꓪꓽ ꓠꓬꓲˍ ꓟ ꓟꓬꓱꓽ ꓖꓳ ꓟꓬ ꓟ꓾ ꓕꓲ-ꓬˍ ꓐꓰ ꓢꓲ-ꓓꓳ ꓗꓪ ꓬꓰ ꓗꓷ ꓐꓷˍ ꓠꓬ꓾ ꓬꓲ ꓪꓽ ꓠꓬ ꓧꓶꓸ ꓕꓯˍ ꓡꓰ ꓫꓸ ꓙꓽ ꓐꓵ ꓞꓶ ꓖꓪꓽ ꓠꓬꓲ꓾ ꓘꓴꓽ ꓦ ꓗꓪ ꓠꓬꓲꓸ ꓠꓸ ꓠꓬꓲ꓾ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓡꓳ ꓫꓵꓽ ꓥꓳ꓿ 22 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓐꓯꓺ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓠꓴ ꓪꓽ ꓔꓯ ꓗꓷ ꓡꓰ ꓠꓹ ꓟ ꓠꓬ꓾ ꓕꓲ-ꓬ ꓐꓰ ꓢꓲ-ꓓꓳ ꓔꓯ ꓗꓷ ꓡꓰ ꓠꓹ ꓟ ꓢꓶꓸ ꓟ ꓞꓲ ꓡꓲꓽˍ ꓥꓳ꓿ 23 ꓘ-ꓒꓱ-ꓠꓴꓳ꓾ ꓠꓴ ꓔꓯ ꓠꓬ ꓟꓴꓽ ꓗꓪ ꓟꓴ ꓛꓲ ꓓꓳꓹ ꓟꓴ ꓡ ꓥꓳ꓾ ꓓꓵꓽ ꓙꓽˍ ꓡ? ꓟꓽ ꓥ꓿ ꓠꓴ ꓠꓽ ꓟꓸ ꓟꓲ ꓟꓵꓽ ꓗꓪ ꓬꓯꓼ ꓙꓰˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓗꓳ ꓡꓳ ꓗꓪ ꓬꓰ ꓗꓷ ꓟ ꓪꓽ ꓠꓬꓲˍ ꓟ ꓟꓬꓱꓽ ꓖꓳ ꓟꓬ ꓟ ꓔꓯ ꓢꓳ-ꓓꓳ-ꓟ ꓗꓪ ꓬꓰ ꓗꓷ ꓐꓷˍ ꓠꓬ꓾ ꓢꓳ-ꓓꓳ-ꓟ ꓠꓽ ꓠꓬꓲꓸ ꓠꓬꓲ ꓗꓪ ꓛꓲ ꓓꓹ ꓞ ꓡꓳ ꓫꓵꓽ ꓥꓳ꓿ 24 ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓐꓯꓺ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓠꓴ ꓔꓯ ꓗꓷ ꓡꓰ ꓠꓹ ꓟ ꓠꓬ꓾ ꓢꓳ-ꓓꓳ-ꓟ ꓔꓯ ꓗꓷ ꓡꓰ ꓠꓹ ꓟ ꓢꓶꓸ ꓟꓽ ꓞꓲ ꓡꓲꓽˍ ꓥꓳ꓾ ꓐꓯˍ ꓡꓳ꓿ 25 ꓖꓳ ꓕꓯ ꓬꓰ-ꓢꓴ ꓡꓰ꓾ ꓐꓹ ꓐꓽꓳ꓾ ꓟꓴꓽ ꓗꓪ ꓟꓲ ꓠꓯ ꓢꓲ ꓒꓽꓳ꓾ ꓠꓴ ꓔꓯ ꓫꓸ ꓟꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓙꓽ ꓜꓲꓼ ꓢꓴˍ ꓐꓰ ꓢꓷꓸ ꓠꓲꓹ ꓙꓳ ꓢꓴ ꓔꓯˍ ꓐꓰ ꓕꓱ ꓟꓬ ꓫꓵꓽ ꓟ ꓚꓵꓺ ꓔ ꓢꓲ꓾ ꓤ ꓠꓱ ꓤ ꓔꓯ ꓟꓳꓸ ꓖꓶˍ ꓡꓳ꓿ 26 ꓥ ꓡꓳ꓾ ꓐꓹ ꓐꓽꓳ꓾ ꓠꓴ ꓠꓲꓹ ꓒꓴˍ ꓟ ꓠꓽ ꓕꓱ ꓡꓱ ꓥꓳ꓿ 27 ꓙꓳˍ ꓟ ꓥ ꓕ ꓑꓳꓸ ꓠꓬ ꓥꓪ ꓐꓹ ꓐ ꓡꓰ ꓥꓪ ꓔꓯ ꓡꓯꓼ ꓙꓱ ꓔ ꓟ ꓥ ꓡꓳ꓿ ꓐꓹ ꓐꓽ ꓟꓽ ꓥ ꓠꓬ ꓮ ꓐꓲ ꓔꓯ ꓢꓷꓸ ꓢꓴ ꓟꓽ ꓙꓳ꓿ ꓝꓮꓲ ꓮ ꓐꓲ ꓡꓰ ꓟꓳꓸ ꓖꓶ ꓠꓲꓹ ꓫꓵ ꓢꓴ ꓖꓳ ꓕꓲ ꓣꓳ ꓟꓽ ꓥ ꓠꓬ ꓐꓹ ꓐ ꓔꓯ ꓢꓷꓸ ꓢꓴ ꓟꓽ ꓙꓳ꓿ 28 ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴ ꓐꓴꓳ꓾ ꓥꓪ ꓔꓯ ꓡꓯ꓿ ꓖꓳ ꓡꓱ ꓠꓬ ꓠꓴ ꓪꓽ ꓔꓯ ꓥꓪ ꓡꓰ ꓪꓴꓽ ꓧꓶ ꓠꓽ ꓝꓲˍ ꓥꓳ꓿ 29 ꓥꓪ ꓡꓽ ꓡꓰ ꓟꓯꓻ ꓢꓲ ꓥꓪ ꓔꓯ ꓢꓳꓺ ꓡꓯ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓲꓹ ꓟ ꓠꓽ ꓠꓴꓽ ꓢꓲ ꓙꓻ ꓣꓳꓽˍ ꓡꓳ꓿ ꓖꓳ ꓡꓱ ꓠꓬ ꓠꓴ ꓪꓽ ꓶꓻ ꓟꓬ ꓐꓱ ꓶ ꓪꓴꓽ ꓧꓶ ꓠꓽ ꓖꓴ ꓧꓪ ꓟꓶˍ ꓥꓳ꓿ 30 ꓮ ꓡꓲꓳ ꓐꓯ ꓠꓬ ꓥꓪ ꓡꓽ ꓡꓰ ꓠꓽ ꓟꓯꓻ ꓢꓻˍ ꓡꓳ꓿ ꓥꓪ ꓶꓻˍ ꓟꓲ ꓡꓳꓻˍ ꓡꓳ꓾ ꓐꓯˍ ꓡꓳ꓿

ꓟ-ꓔꓲ 12

1 ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓕꓵꓼ ꓪꓽ ꓖꓶꓽ ꓗꓷ ꓠꓬ꓾ ꓬꓲ ꓠꓽ ꓡꓳ ꓒꓱ ꓘꓹ ꓒꓱ ꓗꓪ ꓟꓸ ꓟꓲ ꓚ ꓙꓰ ꓠꓹ ꓟ ꓖꓳ ꓗꓪ ꓐꓰ ꓓꓳ ꓙꓰˍ ꓡꓳ꓿ 2 ꓬꓳ-ꓦ ꓠꓬ ꓐꓱ ꓓꓴꓽ ꓗꓪ ꓔꓬ ꓢꓲ ꓙꓲ-ꓢꓴ ꓡꓰ ꓬꓰˍ ꓟ ꓟꓬꓱꓽ ꓬꓲ ꓓꓳꓽ ꓑ ꓙꓽ ꓗꓷ ꓠꓬ꓾ ꓬꓰ-ꓢꓴ ꓔꓬ ꓗꓪ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓝꓲ ꓩꓴ ꓗꓷ ꓢꓲ꓾ 3 ꓡꓻ ꓠꓹ ꓟ ꓖꓳ ꓕꓲ ꓣꓳ ꓠꓬ ꓠꓴ ꓥ ꓡ? ꓥ ꓠꓬ ꓥꓪ ꓠꓴꓽ ꓠꓽ ꓠꓱꓸ ꓐꓯ ꓕꓲ ꓣꓳ ꓔꓯ ꓡꓳ ꓔꓬ ꓢꓰꓽ ꓠꓯꓹ ꓡ?꓾ ꓐꓰ ꓠ ꓠꓬꓲ ꓝꓲˍ ꓡꓳ꓿ 4 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓙꓰ ꓢꓲ ꓠꓴ ꓪꓽ ꓑ ꓙꓽˍ ꓟ ꓐꓰ ꓡꓳꓸ ꓟꓳꓻˍ ꓟ ꓬꓳ-ꓦ ꓔꓯ ꓐꓯ ꓖꓶ ꓬꓰ꓿ 5 ꓠꓴ ꓪꓽ ꓡꓳꓸ ꓟꓳꓻˍ ꓟ ꓐꓰ ꓑ ꓙꓽ ꓟꓶˍ ꓟ ꓠꓬ꓾ ꓟꓬ ꓔꓶ ꓠꓬꓲ ꓟꓳꓻ ꓡ ꓟ꓾ ꓛꓲ ꓫꓳꓸ ꓫꓱꓽ ꓙꓰˍ ꓟ꓾ ꓔ ꓟꓼ ꓩꓴ ꓓꓲ ꓢꓴ ꓫꓬꓻ ꓡꓰˍ ꓟ꓾ ꓠꓸ ꓐꓳꓽ ꓑ ꓙꓽ ꓡ ꓟ꓾ ꓞꓳ ꓫꓵꓻ ꓢꓯꓸ ꓬꓲꓼ ꓡ ꓟ꓾ ꓞꓳ ꓫ ꓔꓯ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶˍ ꓟ꓾ ꓕꓱ ꓟꓬ ꓫꓵꓽ ꓥꓳ꓿ 6 ꓥꓪ ꓔꓯ ꓓꓵꓽ ꓙ ꓟꓬꓽ ꓓꓴ ꓟꓽ ꓙꓳ ꓢꓴ ꓠꓽ꓾ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯˍ ꓡꓳ꓿ 7 ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴ ꓙꓰˍ ꓐꓰ ꓬꓰˍ ꓕꓯ꓾ ꓬꓰ-ꓢꓴ ꓠꓬ ꓬꓳ-ꓦ ꓔꓯ ꓖꓴ ꓢꓲ ꓞꓳ ꓜꓴ ꓔꓯ ꓕꓱ ꓡꓱ ꓐꓯ ꓖꓶ ꓪꓴꓸ ꓔꓴˍ ꓡꓳ꓿ ꓠꓴ ꓪꓽ ꓠꓬ ꓮꓸ ꓫꓵ ꓔꓯ ꓡꓳꓸ ꓠꓹ ꓟ ꓡꓲ ꓛꓲ ꓗꓪ ꓓꓳ ꓙꓰˍ ꓡ? ꓟꓲꓽ ꓦꓲ ꓡꓰ ꓙꓱꓼ ꓶꓹ ꓔꓬ ꓟ ꓬꓲꓻ ꓑ ꓒꓴꓽ ꓓꓻ ꓔꓯ ꓡꓳꓸ ꓠꓹ ꓟ ꓙꓰˍ ꓡ? 8 ꓠꓴ ꓪꓽ ꓮꓸ ꓫꓵ ꓔꓯ ꓟꓳꓻ ꓠꓹ ꓟ ꓙꓰˍ ꓡ? ꓠꓴꓽ ꓡꓯꓻ ꓟ ꓐꓵ ꓞꓶꓽ ꓖꓪꓽ ꓢꓴ ꓔꓯ ꓟꓳꓻ ꓠꓹ ꓟ ꓙꓰˍ ꓡ? ꓠꓴꓽ ꓡꓯꓻ ꓟ ꓐꓵ ꓞꓶ ꓖꓪꓽ ꓢꓴ ꓠꓽ ꓪ ꓔꓲ ꓙꓻ ꓗꓪ ꓔꓬ ꓡꓳ꓿ 9 ꓠꓴ ꓪꓽ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓓꓳ ꓙꓰˍ ꓡ? ꓟꓷꓽ ꓠꓷꓹ ꓝꓸ ꓢꓴ ꓔꓯ ꓟꓳꓻ ꓠꓹ ꓟ ꓙꓰˍ ꓡ? ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓥ ꓡꓳ꓾ ꓬꓳ-ꓦ ꓠꓽ ꓟꓷꓽ ꓠꓷꓹ ꓝꓸ ꓢꓴ ꓕꓯꓽ ꓢꓲ ꓮꓽ ꓘꓶꓸ ꓪꓴꓽˍ ꓡꓳ꓿ 10 ꓕꓳ ꓶ ꓗꓪ ꓐꓳ ꓔ ꓟ꓾ ꓥꓪ ꓠꓬ ꓠꓴ ꓟꓲꓽ ꓕꓯꓽ ꓢꓲ ꓗꓪ ꓥꓪ ꓝꓲ ꓓꓴ ꓝꓲ ꓩꓴ ꓗꓷ ꓢꓲ꓾ ꓬꓲ ꓠꓬ ꓠꓴ ꓙꓻ ꓖꓴ ꓙꓽ ꓖꓶˍ ꓥꓳ꓾ ꓐꓯˍ ꓟ ꓠꓬ ꓕꓱ ꓕꓲ ꓣꓳ ꓔꓯ ꓐꓯˍ ꓟ ꓥꓳ꓿ 11 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓤꓽ ꓟꓶ ꓤ ꓡꓰ ꓦꓵꓻ ꓔ ꓢꓴ ꓐꓴ ꓗꓳ ꓡꓳ ꓗꓪ꓾ ꓖꓳ ꓓꓱ ꓔꓲꓹ ꓢꓴ ꓬꓳ-ꓦ ꓕꓯꓽ ꓢꓲ ꓪꓴꓽˍ ꓟ ꓟꓽ ꓓꓳ ꓡ ꓠꓬꓲ꓿ ꓖꓳ ꓡꓱ ꓥ ꓟꓲ ꓟꓴꓽ ꓗꓪ ꓗꓴꓷꓼ ꓠꓯꓸꓼ ꓗꓪ ꓮꓽ ꓘꓶꓸ ꓣꓳꓺ ꓢꓴ ꓠꓬ꓾ ꓬꓲ ꓕꓯꓽ ꓢꓲ ꓪꓴꓽˍ ꓢꓰꓽ ꓡꓳ꓿ 12 ꓖꓳ ꓓꓱ ꓔꓲꓹ ꓢꓴ ꓬꓳ-ꓦ ꓦꓬꓼ ꓠꓬꓲ ꓗꓪ ꓐꓰ ꓮ ꓟꓶ ꓗꓪ ꓛꓲ꓾ ꓟꓴꓽ ꓗꓪ ꓗꓴꓷꓼ ꓠꓬ ꓜꓲꓽ ꓜꓲ ꓑꓰꓹ ꓑꓰ ꓬꓰ ꓡ ꓟ ꓔꓳꓹ ꓜꓳꓽ ꓢꓲ꓾ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰ ꓢꓴ ꓡꓰ ꓟꓴꓽ ꓗꓪ ꓗꓴꓷꓼ ꓔꓯ ꓦꓴꓺ ꓡ ꓡꓳ꓿ 13 ꓮ ꓡꓲꓳ ꓐꓯ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓮꓽ ꓙꓵˍ ꓐꓰ ꓙꓵꓽ ꓗ ꓠꓬ꓾ ꓬꓳ-ꓦ ꓦꓬꓼ ꓠꓬꓲ ꓗꓪ ꓛꓲ ꓮ ꓡꓲ ꓒꓬꓱꓼ ꓡ ꓠ ꓗꓹ ꓟ ꓮꓽ ꓙꓵ ꓐꓯ ꓗꓷꓳ꓿ 14 ꓬꓲ ꓪꓽ ꓐꓯ ꓖꓶꓽ ꓗꓷ ꓟ ꓔꓯ ꓠꓴ ꓪꓽ ꓘꓳ ꓣꓴ ꓠꓲꓹ ꓫꓵˍ ꓕꓯ ꓠꓽ꓾ ꓬꓲ-ꓡꓲ-ꓬ ꓡꓻˍ ꓥꓳ꓾ ꓐꓯ ꓔ ꓟ ꓠꓬ ꓬꓳ-ꓦ ꓕꓱ ꓕꓲ ꓣꓳ ꓥꓳ꓿ 15 ꓠꓸ ꓑꓳ ꓙꓳ ꓢꓴ ꓠꓬ ꓠ ꓠꓹ꓾ ꓐꓯˍ ꓡꓳ꓿ 16 ꓕꓱ ꓕꓲ ꓤꓶ ꓟ ꓔꓯ ꓥꓪ ꓮꓸ ꓫꓵ ꓡꓰ ꓔꓯꓺ ꓠꓯꓹ ꓡ? ꓕꓱ ꓕꓲ ꓤꓶ ꓟ ꓠꓬ ꓙꓵꓺ ꓗꓪ ꓤ ꓠꓱ ꓤ ꓐꓴ ꓠꓬꓲꓸ ꓠꓸ ꓢꓲ ꓬꓲ ꓪꓽ ꓛꓳꓽ ꓒꓯꓹ ꓐꓴ ꓔꓯ꓾ 17 ꓠꓴ ꓪꓽ ꓐꓱ ꓶ ꓥꓪ ꓠꓴꓽ ꓡꓰ ꓙꓵꓽ ꓡꓵꓽ ꓟꓵ ꓖꓶˍ ꓟꓲ ꓠꓴ ꓪꓽ ꓗꓪꓺ ꓛꓰꓹ ꓟꓽ ꓫꓳ꓿ ꓥꓪ ꓠꓴꓽ ꓮꓸ ꓛꓬꓹ ꓙꓱˍ ꓟꓲ ꓠꓴ ꓪꓽ ꓳ' ꓟꓶꓽ ꓓꓶꓽ ꓠꓬꓲ ꓟꓽ ꓥꓴꓻ ꓡ꓾ ꓐꓰ ꓘꓴꓻ ꓔꓬ ꓢꓴˍ ꓡꓰ ꓐꓰ ꓗꓹ ꓡꓳ꓿ 18 ꓮ ꓡꓲꓳ ꓐꓯ ꓠꓬ ꓬꓳ-ꓦ ꓠꓽ ꓜꓽ ꓓꓴ ꓚꓲꓸ ꓠꓬꓲ꓾ ꓙꓲꓻ ꓒꓶꓽˍ ꓟꓲ ꓟꓽ ꓓꓳꓻ ꓓꓳ ꓡꓻˍ ꓠꓬ꓾ ꓬꓲ ꓪꓽ ꓠꓽ꓾ ꓬꓲ ꓔꓯ ꓠꓲꓽ ꓕꓲ ꓟ ꓓꓯꓹ ꓡꓳ꓾ ꓐꓯˍ ꓡꓳ꓿ 19 ꓡ-ꓞꓳ-ꓮ-ꓐꓲ ꓠꓽ ꓜꓽ ꓠꓬꓲ ꓓꓳ ꓠꓬꓲ ꓐꓰ ꓡꓻˍ ꓠꓬ꓾ ꓬꓲ ꓪꓽ ꓡꓰ ꓬꓲ ꓔꓯ꓾ ꓜꓽ ꓓꓴˍ ꓐꓰ ꓛꓱꓼ ꓡꓱ ꓙꓵ ꓗꓪꓸ ꓢꓴ ꓥꓳ꓾ ꓝꓲꓸ ꓫ ꓢꓴˍ ꓐꓰ ꓝꓴꓲ ꓙꓳ ꓢꓴ ꓗꓪ ꓛꓳꓽ ꓥꓳ꓾ ꓐꓰ ꓐꓯˍ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓬꓲ ꓙꓽ ꓗꓴꓸ ꓠꓲꓹ ꓠꓬ ꓜꓳꓽˍ ꓟ ꓥ ꓟ꓾ ꓬꓲ ꓙꓽ ꓗꓴꓸ ꓠꓲꓹ ꓟꓬꓱꓽ ꓡꓰ ꓟꓳꓸ ꓖꓶ ꓓꓳ ꓡ ꓡꓳ꓾ ꓐꓯˍ ꓡꓳ꓿ 20 ꓬꓰ-ꓢꓴ ꓬꓲ ꓪꓽ ꓠꓬꓲˍ ꓟ ꓟꓬꓱꓽ ꓟꓬꓽ ꓠꓬꓲ ꓬꓰ ꓗꓷ ꓟ ꓡꓳ ꓒꓱ ꓖꓳ ꓟꓬ ꓗꓪ ꓔꓬ ꓢꓴ ꓐꓴ ꓟꓽ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓬꓲ꓾ ꓬꓲ ꓡꓰ ꓬꓲ ꓪꓽ ꓔꓯ ꓕꓼ ꓔꓴ ꓡ ꓢꓲ ꓕꓱ ꓡꓱ ꓐꓯˍ ꓡꓳ꓿ 21 ꓗꓳ-ꓡ-ꓢꓲꓳ꓾ ꓠꓴ ꓠꓽ ꓫ ꓙꓵˍ ꓥꓳ꓾ ꓐꓱ-ꓢꓰ-ꓓꓽꓳ꓾ ꓠꓴ ꓠꓽ ꓫ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓬꓰ ꓗꓷ ꓟ ꓪꓽ ꓠꓬꓲˍ ꓟ ꓟꓬꓱꓽ ꓖꓳ ꓟꓬ ꓟ꓾ ꓕꓲ-ꓬˍ ꓐꓰ ꓢꓲ-ꓓꓳ ꓗꓪ ꓬꓰ ꓗꓷ ꓐꓷˍ ꓠꓬ꓾ ꓬꓲ ꓪꓽ ꓠꓬ ꓧꓶꓸ ꓕꓯˍ ꓡꓰ ꓫꓸ ꓙꓽ ꓐꓵ ꓞꓶ ꓖꓪꓽ ꓠꓬꓲ꓾ ꓘꓴꓽ ꓦ ꓗꓪ ꓠꓬꓲꓸ ꓠꓸ ꓠꓬꓲ꓾ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓡꓳ ꓫꓵꓽ ꓥꓳ꓿ 22 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓐꓯꓺ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓠꓴ ꓪꓽ ꓔꓯ ꓗꓷ ꓡꓰ ꓠꓹ ꓟ ꓠꓬ꓾ ꓕꓲ-ꓬ ꓐꓰ ꓢꓲ-ꓓꓳ ꓔꓯ ꓗꓷ ꓡꓰ ꓠꓹ ꓟ ꓢꓶꓸ ꓟ ꓞꓲ ꓡꓲꓽˍ ꓥꓳ꓿ 23 ꓘ-ꓒꓱ-ꓠꓴꓳ꓾ ꓠꓴ ꓔꓯ ꓠꓬ ꓟꓴꓽ ꓗꓪ ꓟꓴ ꓛꓲ ꓓꓳꓹ ꓟꓴ ꓡ ꓥꓳ꓾ ꓓꓵꓽ ꓙꓽˍ ꓡ? ꓟꓽ ꓥ꓿ ꓠꓴ ꓠꓽ ꓟꓸ ꓟꓲ ꓟꓵꓽ ꓗꓪ ꓬꓯꓼ ꓙꓰˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓗꓳ ꓡꓳ ꓗꓪ ꓬꓰ ꓗꓷ ꓟ ꓪꓽ ꓠꓬꓲˍ ꓟ ꓟꓬꓱꓽ ꓖꓳ ꓟꓬ ꓟ ꓔꓯ ꓢꓳ-ꓓꓳ-ꓟ ꓗꓪ ꓬꓰ ꓗꓷ ꓐꓷˍ ꓠꓬ꓾ ꓢꓳ-ꓓꓳ-ꓟ ꓠꓽ ꓠꓬꓲꓸ ꓠꓬꓲ ꓗꓪ ꓛꓲ ꓓꓹ ꓞ ꓡꓳ ꓫꓵꓽ ꓥꓳ꓿ 24 ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓐꓯꓺ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓠꓴ ꓔꓯ ꓗꓷ ꓡꓰ ꓠꓹ ꓟ ꓠꓬ꓾ ꓢꓳ-ꓓꓳ-ꓟ ꓔꓯ ꓗꓷ ꓡꓰ ꓠꓹ ꓟ ꓢꓶꓸ ꓟꓽ ꓞꓲ ꓡꓲꓽˍ ꓥꓳ꓾ ꓐꓯˍ ꓡꓳ꓿ 25 ꓖꓳ ꓕꓯ ꓬꓰ-ꓢꓴ ꓡꓰ꓾ ꓐꓹ ꓐꓽꓳ꓾ ꓟꓴꓽ ꓗꓪ ꓟꓲ ꓠꓯ ꓢꓲ ꓒꓽꓳ꓾ ꓠꓴ ꓔꓯ ꓫꓸ ꓟꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓙꓽ ꓜꓲꓼ ꓢꓴˍ ꓐꓰ ꓢꓷꓸ ꓠꓲꓹ ꓙꓳ ꓢꓴ ꓔꓯˍ ꓐꓰ ꓕꓱ ꓟꓬ ꓫꓵꓽ ꓟ ꓚꓵꓺ ꓔ ꓢꓲ꓾ ꓤ ꓠꓱ ꓤ ꓔꓯ ꓟꓳꓸ ꓖꓶˍ ꓡꓳ꓿ 26 ꓥ ꓡꓳ꓾ ꓐꓹ ꓐꓽꓳ꓾ ꓠꓴ ꓠꓲꓹ ꓒꓴˍ ꓟ ꓠꓽ ꓕꓱ ꓡꓱ ꓥꓳ꓿ 27 ꓙꓳˍ ꓟ ꓥ ꓕ ꓑꓳꓸ ꓠꓬ ꓥꓪ ꓐꓹ ꓐ ꓡꓰ ꓥꓪ ꓔꓯ ꓡꓯꓼ ꓙꓱ ꓔ ꓟ ꓥ ꓡꓳ꓿ ꓐꓹ ꓐꓽ ꓟꓽ ꓥ ꓠꓬ ꓮ ꓐꓲ ꓔꓯ ꓢꓷꓸ ꓢꓴ ꓟꓽ ꓙꓳ꓿ ꓝꓮꓲ ꓮ ꓐꓲ ꓡꓰ ꓟꓳꓸ ꓖꓶ ꓠꓲꓹ ꓫꓵ ꓢꓴ ꓖꓳ ꓕꓲ ꓣꓳ ꓟꓽ ꓥ ꓠꓬ ꓐꓹ ꓐ ꓔꓯ ꓢꓷꓸ ꓢꓴ ꓟꓽ ꓙꓳ꓿ 28 ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴ ꓐꓴꓳ꓾ ꓥꓪ ꓔꓯ ꓡꓯ꓿ ꓖꓳ ꓡꓱ ꓠꓬ ꓠꓴ ꓪꓽ ꓔꓯ ꓥꓪ ꓡꓰ ꓪꓴꓽ ꓧꓶ ꓠꓽ ꓝꓲˍ ꓥꓳ꓿ 29 ꓥꓪ ꓡꓽ ꓡꓰ ꓟꓯꓻ ꓢꓲ ꓥꓪ ꓔꓯ ꓢꓳꓺ ꓡꓯ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓲꓹ ꓟ ꓠꓽ ꓠꓴꓽ ꓢꓲ ꓙꓻ ꓣꓳꓽˍ ꓡꓳ꓿ ꓖꓳ ꓡꓱ ꓠꓬ ꓠꓴ ꓪꓽ ꓶꓻ ꓟꓬ ꓐꓱ ꓶ ꓪꓴꓽ ꓧꓶ ꓠꓽ ꓖꓴ ꓧꓪ ꓟꓶˍ ꓥꓳ꓿ 30 ꓮ ꓡꓲꓳ ꓐꓯ ꓠꓬ ꓥꓪ ꓡꓽ ꓡꓰ ꓠꓽ ꓟꓯꓻ ꓢꓻˍ ꓡꓳ꓿ ꓥꓪ ꓶꓻˍ ꓟꓲ ꓡꓳꓻˍ ꓡꓳ꓾ ꓐꓯˍ ꓡꓳ꓿

ꓟ-ꓔꓲ 13

1 ꓖꓳ ꓕꓲ ꓠꓬꓲ ꓗꓪ ꓬꓰ-ꓢꓴ ꓠꓬ ꓦꓲ ꓗꓪ ꓐꓰ ꓓꓳ ꓙꓰ ꓢꓲ꓾ ꓬꓲꓻ ꓡꓴꓽ ꓐꓱꓻ ꓘꓶꓽ ꓗꓪ ꓠꓬꓲꓸ ꓠꓸˍ ꓡꓳ꓿ 2 ꓖꓳ ꓕꓯ ꓬꓲ ꓔꓬ ꓗꓪ ꓞꓳ ꓜꓴ ꓞꓳ ꓟꓯꓼ ꓜꓲꓼ ꓡ ꓠꓬꓲ꓾ ꓬꓲ ꓠꓬ ꓡꓲ ꓕꓲ ꓟ ꓗꓪ ꓓꓵꓽ ꓡꓰ ꓢꓲ ꓠꓬꓲꓸ ꓠꓸˍ ꓡꓳ꓿ ꓞꓳ ꓜꓴꓻ ꓞꓳ ꓟꓯꓼ ꓠꓬ ꓬꓲꓻ ꓙꓬ ꓘꓶꓽ ꓗꓪ ꓦꓰꓼ ꓞꓹ ꓡꓳ꓿ 3 ꓬꓲ ꓠꓬ ꓔꓯ ꓥꓳꓽ ꓗꓪ ꓐꓰ ꓬꓲ ꓪꓽ ꓔꓯ ꓮꓽ ꓟꓬꓹ ꓫꓵꓽ ꓕꓱ ꓡꓱ ꓐꓯ ꓟꓸ ꓖꓶˍ ꓡꓳ꓿ ꓠ ꓠꓹ꓾ ꓜ ꓫꓵꓸ ꓫꓵ ꓢꓴ ꓠꓬ ꓜ ꓫꓵꓸ ꓫꓵˍ ꓐꓰ ꓓꓳ ꓙꓰˍ ꓡꓳ꓿ 4 ꓬꓲ ꓫꓵꓸˍ ꓕꓯ꓾ ꓕꓲ ꓐꓱ ꓠꓬ ꓙ ꓖꓴ ꓘꓶꓽ ꓗꓪ ꓞꓰ ꓡꓰ ꓢꓲ ꓠꓬꓹ ꓡꓰ ꓖꓳꓺ ꓜꓽ ꓡ ꓡꓳ꓿ 5 ꓕꓲ ꓐꓱꓻ ꓠꓬ Bꓸ ꓒꓲꓽ ꓓꓰꓺ ꓠꓱꓸ ꓦꓱꓽ ꓮꓽ ꓟꓬꓹ ꓟꓽ ꓙꓳ ꓗꓪ ꓞꓰ ꓡꓰ ꓢꓲ꓾ ꓠꓱꓸ ꓦꓱꓽ ꓟꓽ ꓠꓯꓸ ꓠꓬꓲ ꓞꓼ ꓐꓰ ꓣꓱꓻ ꓡ ꓡꓳ꓿ 6 ꓟꓲꓽ ꓟꓲ ꓓꓳ ꓡ ꓢꓲ ꓞꓻ ꓡ ꓠꓬ꓾ ꓬꓲ ꓚꓰ ꓟꓽ ꓙꓳ ꓠꓬꓲ ꓙꓴꓺ ꓬꓰꓳ꓿ 7 ꓕꓲ ꓐꓱ ꓠꓬ ꓛꓴꓽ ꓐꓬꓼ ꓗꓪ ꓞꓰ ꓡꓰ ꓠꓬꓲ꓾ ꓛꓴꓽ ꓪꓴꓽ ꓡ ꓢꓲ ꓦꓱꓹ ꓗꓷꓳ꓿ 8 ꓕꓲ ꓐꓱ ꓠꓬ ꓟꓵꓽ ꓙꓲꓻˍ ꓟ ꓗꓪ ꓞꓰꓻ ꓡꓰ ꓢꓲ꓾ ꓬꓲ ꓢꓶꓽ ꓓꓱꓼ ꓡ ꓠꓬ꓾ ꓕꓲ ꓙꓳꓻ ꓫꓵꓸ ꓔ ꓟ ꓗꓪ꓾ ꓕꓲ ꓦꓬꓻ ꓙꓳꓻ ꓟꓬꓽ ꓡ ꓟ ꓕꓲ ꓐꓱꓻ ꓙꓳ꓾ ꓛꓳꓼ ꓞꓲ ꓙꓳꓻ ꓟꓬꓽ ꓡ ꓟ ꓕꓲ ꓐꓱꓻ ꓙꓳ꓾ ꓢ ꓞꓲ ꓙꓳꓻ ꓟꓬꓽ ꓡ ꓟˍ ꓟꓲ ꓕꓲ ꓐꓱꓻ ꓙꓳˍ ꓡꓳ꓿ 9 ꓑ ꓙꓽ ꓓꓴ ꓠꓸ ꓑꓳ ꓙꓳ ꓢꓴ ꓠꓬ ꓠ ꓠꓹ꓾ ꓐꓯˍ ꓡꓳ꓿ 10 ꓖꓳ ꓕꓯ ꓛꓳꓽ ꓒꓯꓹ ꓐꓴ ꓡ ꓢꓲ ꓬꓲ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓪꓽ ꓔꓯ ꓔꓯ ꓥꓳꓽ ꓗꓪ ꓐꓰ ꓟꓸ ꓖꓶˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 11 ꓖꓳ ꓡꓱ ꓠꓬ ꓬꓲ ꓒꓳꓹ ꓖꓶ ꓢꓲ ꓬꓲ ꓪꓽ ꓔꓯ꓾ ꓟꓴꓽ ꓗꓪ ꓗꓴꓷꓼ ꓚꓵ ꓘꓶꓽ ꓢꓷꓸ ꓡꓰ ꓠꓹ ꓟ ꓠꓬ ꓠꓴ ꓪꓽ ꓔꓯ ꓖꓶ ꓔ ꓡꓳ꓾ ꓬꓲ ꓪꓽ ꓔꓯ ꓠꓽ ꓟꓽ ꓖꓶ ꓔ꓿ 12 ꓮ ꓡꓲꓳ ꓐꓯ ꓠꓬ ꓙꓳ ꓢꓴ ꓮꓽ ꓟ ꓔꓯˍ ꓟꓲ ꓡꓴꓽ ꓖꓶ ꓢꓲ꓾ ꓬꓲ ꓠꓽ ꓮꓽ ꓟꓬꓹ ꓙꓳˍ ꓥꓳ꓿ ꓟꓽ ꓙꓳ ꓢꓴ ꓔꓯ ꓠꓽ ꓬꓲ ꓙꓳ ꓞꓹ ꓟˍ ꓟꓲ ꓬꓲ ꓔꓯˍ ꓐꓰ ꓣꓴ ꓔꓯꓹ ꓙꓰˍ ꓥꓳ꓿ 13 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓟꓳꓻˍ ꓟꓲ ꓟꓽ ꓡꓳꓸ ꓓꓳ ꓡ꓾ ꓑ ꓙꓽˍ ꓟꓲ ꓠꓸ ꓑꓳ ꓗꓪ ꓟꓽ ꓓꓵ꓾ ꓙꓽˍ ꓟꓲ ꓟꓽ ꓙ ꓜꓲꓼ ꓟ ꓑꓶꓸ ꓓꓴ꓾ ꓥꓪ ꓬꓲ ꓪꓽ ꓔꓯ ꓔꓯꓺ ꓥꓳ ꓗꓪ ꓐꓰ ꓐꓯ ꓟꓸ ꓖꓶˍ ꓟ ꓥꓳ꓿ 14 ꓕꓱ ꓟ ꓠꓬ ꓬꓲ-ꓢ-ꓬ ꓟꓷꓽ ꓠꓷꓹ ꓝꓸ ꓘꓶꓽ ꓗꓪ꓾ ꓠꓴ ꓪꓽ ꓑ ꓠꓽ ꓑ ꓙꓽ ꓢꓲ꓾ ꓮ ꓡꓲ ꓥ ꓟꓲ ꓟꓽ ꓙ ꓜꓲꓼ꓿ ꓡꓳꓸ ꓠꓽ ꓡꓳꓸ ꓟꓳꓻ ꓢꓲ꓾ ꓮ ꓡꓲ ꓥ ꓟꓲ ꓟꓽ ꓡꓳꓸ ꓓꓳ ꓡ꓿ 15 ꓮ ꓡꓲꓳ ꓐꓯ ꓠꓬ ꓑ ꓫꓬꓼ ꓕꓱ ꓕꓲ ꓧꓳꓽ ꓟ ꓬꓲ ꓪꓽ ꓠꓲꓹ ꓟ ꓠꓽ ꓔꓯꓽ ꓡꓰꓳ꓿ ꓠꓸ ꓑꓳˍ ꓟꓲ ꓡꓲꓽ ꓡꓰꓳ꓿ ꓟꓬ ꓢꓶꓽˍ ꓟꓲ ꓞꓲꓹ ꓡꓰꓳ꓿ ꓕꓱ ꓕꓲ ꓧꓳꓽ ꓟ ꓬꓲ ꓪꓽ ꓟꓬ ꓢꓶꓽ ꓡꓰ ꓡꓳꓸ ꓓꓳ ꓡ ꓢꓲ꓾ ꓠꓸ ꓑꓳ ꓡꓰ ꓑ ꓙꓽ ꓢꓲ ꓠꓬꓲ꓾ ꓠꓲꓹ ꓟ ꓡꓰ ꓙꓽ ꓜꓲꓼ ꓢꓲ ꓒꓳꓹ ꓬꓲꓼ ꓡ ꓐꓷˍ ꓠꓬ꓾ ꓥꓪ ꓠꓽ ꓬꓲ ꓪꓽ ꓔꓯ ꓫꓬꓹ ꓓ ꓡꓰ ꓝꓲˍ ꓡꓳ ꓫꓵꓽ ꓥꓳ꓾ ꓐꓰ ꓐꓯˍ ꓟ ꓐꓲꓺ ꓡ ꓟ ꓥ ꓡꓳ꓿ 16 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓟꓬ ꓢꓶꓽ ꓠꓬꓲ ꓟꓳꓻ ꓢꓲ꓾ ꓠꓸ ꓑꓳˍ ꓟꓲ ꓑ ꓙꓽˍ ꓠꓬꓲ꓾ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ 17 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓧꓶꓸ ꓕꓯ ꓟꓷꓽ ꓠꓷꓹ ꓝꓸ ꓢꓴ ꓐꓴˍ ꓐꓰ ꓔꓱꓹ ꓜꓳꓽ ꓢꓴ ꓮꓽ ꓟꓬꓹ ꓠꓬ꓾ ꓠꓴ ꓪꓽ ꓟꓳꓻˍ ꓟ ꓔꓯ ꓟꓳꓻ ꓠꓲꓹ ꓫꓵˍ ꓟꓲ ꓟꓳ ꓟꓽ ꓪ꓿ ꓠꓴ ꓪꓽ ꓑ ꓙꓽˍ ꓟ ꓔꓯ ꓑ ꓙꓽ ꓠꓲꓹ ꓫꓵˍ ꓟꓲ ꓑ ꓙꓽ ꓟꓽ ꓪ꓿ 18 ꓠꓴ ꓪꓽ ꓠꓬ ꓜ ꓫꓵꓸ ꓫꓵˍ ꓟ ꓔꓯ ꓥꓳꓽ ꓕꓱ ꓟ ꓔꓯ ꓠ ꓠꓹ꓿ 19 ꓮꓽ ꓟˍ ꓟꓲ ꓟꓴꓽ ꓗꓪ ꓗꓴꓷꓼ ꓐꓯ ꓘꓶꓽ ꓑ ꓙꓽ ꓢꓲ ꓟꓽ ꓙ ꓜꓲꓼ ꓢꓴ ꓔꓯ ꓠꓬ꓾ ꓥꓶˍ ꓟ ꓖꓳ ꓕꓲ ꓣꓳ ꓡ ꓢꓲ ꓬꓲ ꓠꓲꓹ ꓟ ꓗꓪ ꓫꓵꓸ ꓔ ꓟ ꓔꓯ ꓦꓴꓺ ꓔꓯꓹ ꓙꓰˍ ꓡꓳ꓿ ꓕꓱ ꓟ ꓠꓬ ꓙ ꓖꓴ ꓘꓶꓽ ꓗꓪ ꓫꓵꓸ ꓔ ꓟ ꓔꓯ ꓔꓯ ꓬꓯꓼˍ ꓡꓳ꓿ 20 Bꓸ ꓒꓲꓽ ꓓꓰ ꓗꓪ ꓫꓵꓸ ꓔ ꓟ ꓠꓬ꓾ ꓐꓯ ꓘꓶꓽ ꓑ ꓙꓽ ꓗꓷ ꓟꓶꓽ ꓕꓯ ꓠꓲꓹ ꓒꓴ ꓒꓴ ꓘꓳ ꓣꓴ ꓢꓴ ꓔꓯ ꓔꓯ ꓬꓯꓼˍ ꓡꓳ꓿ 21 ꓖꓳ ꓡꓱ ꓥ ꓟꓲ ꓚꓲꓸ ꓛꓬ ꓠꓲꓹ ꓟ ꓗꓪ ꓬꓲ ꓚꓰꓺ ꓟꓽ ꓕꓶꓻ ꓡꓰ ꓠꓬꓲ ꓕꓲ ꓑꓹ ꓤˍ ꓡꓰꓽ ꓜꓲꓽ ꓘꓴˍ ꓡꓳ꓿ ꓐꓯ ꓘꓶꓽ ꓪꓴꓸ ꓠꓬꓲ ꓫꓸ ꓙꓵˍ ꓟ꓾ ꓥ ꓠꓬ ꓗꓸ ꓧꓪˍ ꓟ ꓓꓳ ꓡ ꓕꓯ ꓞꓼ ꓐꓰ ꓡꓱꓸ ꓙꓰˍ ꓡꓳ꓿ 22 ꓛꓴꓽ ꓠꓯꓸꓼ ꓗꓪ ꓫꓵꓸ ꓔ ꓟ ꓠꓽ ꓐꓯ ꓘꓶꓽ ꓑ ꓙꓽ ꓗꓷ ꓢꓲ꓾ ꓕꓱ ꓕꓲ ꓤꓶ ꓟ ꓙꓽ ꓫꓸ ꓓꓴˍ ꓐꓰ ꓒꓴ ꓤ ꓫꓵ ꓤ ꓡꓰ ꓗꓶꓸˍ ꓟ ꓔꓯ ꓠꓲꓹ ꓥꓳꓺˍ ꓟ ꓡꓰ ꓧꓪꓸ ꓡꓰ ꓠꓬꓲ꓾ ꓐꓯ ꓘꓶꓽ ꓔꓯ ꓦꓱꓹ ꓗꓷ ꓢꓲ ꓬꓲ ꓢꓶꓽ ꓟꓽ ꓓꓱꓼ ꓡ ꓢꓴ ꓐꓴ ꓥ ꓡꓳ꓿ 23 ꓟꓵꓽ ꓙꓲꓻ ꓗꓪ ꓫꓵꓸ ꓔ ꓟ ꓠꓬ꓾ ꓐꓯ ꓘꓶꓽ ꓑ ꓙꓽ ꓢꓲ ꓙ ꓜꓲꓼ ꓢꓴ ꓥ ꓡꓳ꓿ ꓬꓲ ꓠꓽ ꓚꓵ ꓚꓵ ꓬꓲ ꓢꓶꓽ ꓓꓱꓼ ꓢꓲ꓾ ꓕꓲ ꓙꓳꓻ ꓫꓵꓸ ꓔ ꓟ ꓗꓪ ꓕꓲ ꓦꓬꓻ ꓙꓳꓻ꓾ ꓛꓳꓼ ꓞꓲ ꓙꓳꓻ꓾ ꓥ ꓠꓬ ꓢ ꓞꓲ ꓙꓳꓻ ꓫ ꓟꓶˍ ꓟ ꓡꓰ ꓐꓰ ꓗꓹ ꓥꓳ꓾ ꓐꓯˍ ꓡꓳ꓿ 24 ꓬꓰ-ꓢꓴ ꓠꓬ ꓝꓮꓲ ꓔꓯ ꓥꓳ ꓕꓲ ꓟ ꓬꓲ ꓪꓽ ꓔꓯ ꓐꓯ ꓟꓸ ꓖꓶ ꓢꓲ ꓕꓱ ꓡꓱ ꓐꓯˍ ꓡꓳ꓿ ꓟꓴꓽ ꓗꓪ ꓗꓴꓷꓼ ꓠꓽ ꓡ ꓞꓳ ꓕꓲ ꓣꓳ ꓬꓲ ꓦ ꓟꓲ ꓗꓪ ꓙꓲꓻˍ ꓟ ꓫꓵꓸ ꓫꓵꓸ ꓔ ꓟ ꓔꓯ ꓔꓯ ꓬꓯꓼˍ ꓡꓳ꓿ 25 ꓮꓽ ꓙꓵ ꓢꓴ ꓬꓲꓼ ꓟꓶ ꓔꓬ ꓕꓯ ꓛꓴꓽ ꓙꓳ ꓢꓴ ꓡ ꓢꓲ꓾ ꓫꓱꓸ ꓢꓶꓽˍ ꓟꓲ ꓫꓪ ꓠꓯꓸꓼ ꓗꓪ ꓫꓵꓸ ꓔꓸ ꓬꓰ ꓢꓲ ꓙꓰ ꓗꓷꓳ꓿ 26 ꓫꓪ ꓣꓱꓻ ꓡ ꓢꓲ ꓬꓲ ꓠꓱꓺ ꓓꓳ ꓡ ꓕꓯ꓾ ꓫꓱꓸ ꓢꓶꓽˍ ꓟꓲ ꓓꓳ ꓡ ꓡꓳ꓿ 27 ꓦ ꓟꓲ ꓢꓲ ꓒꓽ ꓬꓲ ꓚꓳ ꓑꓸ ꓐꓴ ꓠꓬ ꓬꓲ ꓔꓯ ꓡ ꓢꓲ꓾ ꓢꓲ ꓒꓽꓳ꓾ ꓠꓴ ꓦ ꓟꓲ ꓗꓪ ꓠꓬ ꓙꓲꓻˍ ꓟ ꓬꓲ ꓫꓵꓸ ꓫꓵ ꓗꓷ ꓡꓳ꓾ ꓟꓽ ꓥ ꓡ? ꓫꓱꓸ ꓢꓶꓽ ꓠꓬ ꓮ ꓡꓲ ꓐꓰ ꓙꓳ ꓡ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 28 ꓖꓳ ꓡꓱ ꓠꓬ ꓬꓲ ꓡꓰ ꓬꓲ ꓪꓽ ꓔꓯ꓾ ꓕꓱ ꓟ ꓠꓽ ꓛꓴꓽ ꓙꓳ ꓢꓴ ꓕꓲ ꓣꓳ ꓡꓰ ꓬꓰˍ ꓟ ꓥ ꓡꓳ꓾ ꓐꓯˍ ꓡꓳ꓿ ꓚꓳ ꓑꓸ ꓐꓴ ꓠꓬ ꓬꓲ ꓔꓯ꓾ ꓠꓴꓻ ꓡꓰ ꓥꓪ ꓠꓴꓽ ꓔꓯ ꓚꓵꓹ ꓩꓴ ꓗꓷ ꓝꓲ ꓠꓲꓹ ꓫꓵˍ ꓡ?꓾ ꓐꓯˍ ꓕꓯ꓾ 29 ꓬꓲ ꓠꓽ꓾ ꓟꓽ ꓥ꓾ ꓮ ꓧꓪꓹ ꓫꓱꓸ ꓢꓶꓽ ꓔꓯ ꓚꓵꓹˍ ꓠꓬ ꓫꓪ ꓔꓯˍ ꓟꓲ ꓚꓵꓹ ꓑꓶꓺ ꓡ ꓥꓳ꓿ 30 ꓠꓬꓲ ꓫꓵꓽ ꓡꓱꓸꓼ ꓔꓯ ꓶꓼ ꓝꓲꓸ ꓗꓪ ꓛꓲ ꓕꓲ ꓡꓰꓹꓼ ꓐꓰ ꓪꓴꓽ ꓡ ꓝꓲ꓿ ꓶꓼ ꓝꓲꓸ ꓕꓯ ꓥꓪ ꓠꓬ ꓶꓼ ꓢꓴ ꓔꓯ꓾ ꓫꓱꓸ ꓢꓶ ꓧꓶꓸ ꓕꓯ ꓖꓳ ꓫꓺ ꓢꓲ꓾ ꓛꓴꓻ ꓠꓹ ꓟ ꓕꓲ ꓟꓬꓸ ꓕꓲ ꓟꓬꓸ ꓐꓰ ꓧꓷꓹ ꓔ꓿ ꓖꓳ ꓡꓱ ꓥ ꓟꓲ ꓫꓪ ꓠꓬ ꓥꓪ ꓜꓻ ꓗꓹ ꓗꓪ ꓫ ꓔ꓾ ꓐꓰ ꓐꓯ ꓖꓶˍ ꓥꓳ꓾ ꓐꓯˍ ꓡꓳ꓿ 31 ꓬꓲ ꓠꓬ ꓔꓯ ꓥꓳꓽ ꓝꓮꓲ ꓕꓲ ꓟ ꓬꓲ ꓪꓽ ꓔꓯ ꓐꓯ ꓟꓸ ꓖꓶ ꓢꓲ꓾ ꓟꓴꓽ ꓗꓪ ꓗꓴꓷꓼ ꓠꓬ ꓪꓳꓽ ꓒꓲ ꓫꓵꓸ ꓕꓲ ꓢꓶꓽˍ ꓡꓰ ꓐꓰ ꓗꓹ ꓡꓳ꓿ ꓕꓱ ꓟ ꓔꓯ ꓠꓬ ꓡ ꓞꓳ ꓕꓲ ꓣꓳ ꓡꓰ ꓣꓴ ꓢꓲ ꓦ ꓟꓲ ꓗꓪ ꓫꓵꓸˍ ꓡꓳ꓿ 32 ꓖꓳ ꓟ ꓠꓬ ꓜꓻ ꓫꓵꓸ ꓡꓳ ꓫꓵꓸ ꓥ ꓕ ꓑꓳꓸ ꓠꓯꓸ ꓘꓪ ꓣꓳˍ ꓟ ꓕꓲ ꓫꓵꓽ ꓥꓳ꓿ ꓖꓳ ꓡꓱ ꓥ ꓟꓲ ꓪꓴꓽ ꓡ ꓠꓬ꓾ ꓟꓵꓽ ꓪꓴꓽ ꓗꓪ ꓟ ꓠꓬꓹ ꓤꓽˍ ꓟꓲ ꓬꓲ ꓡꓯꓼ ꓗꓸ ꓗꓪ ꓬꓲ ꓘꓶꓻ ꓘꓶ ꓓ ꓠ ꓛꓲ꓾ ꓪꓳꓽ ꓫꓵꓽ ꓪꓳꓽ ꓙꓰꓽ ꓕꓯꓽ ꓢꓲ ꓪꓴꓽˍ ꓟ ꓬꓲ ꓜꓲꓻ ꓕꓲ ꓜꓲꓻ ꓒꓬꓱꓼ ꓡ ꓡꓳ꓾ ꓐꓯˍ ꓡꓳ꓿ 33 ꓬꓲ ꓠꓬ ꓔꓯ ꓥꓳꓽ ꓝꓮꓲ ꓕꓲ ꓟ ꓬꓲ ꓪꓽ ꓔꓯ ꓐꓯ ꓟꓸ ꓖꓶ ꓢꓲ꓾ ꓟꓴꓽ ꓗꓪ ꓗꓴꓷꓼ ꓠꓬ ꓤ ꓟꓶ ꓤ ꓡꓰ ꓫꓪ ꓧꓶꓽ ꓮꓽ ꓙꓵ ꓡꓱꓸꓼ ꓙꓵꓽ ꓡ ꓗꓪ ꓛꓲ꓾ ꓫꓪ ꓧꓶ ꓢ ꓙꓳꓻ ꓗꓪ ꓚꓵ ꓔꓸ ꓟ ꓙꓵꓽ ꓧꓶꓽˍ ꓡꓰ ꓐꓰ ꓗꓹ ꓡꓳ꓾ ꓐꓯˍ ꓡꓳ꓿ 34 ꓕꓱ ꓟꓬ ꓟ ꓠꓬ ꓬꓰ-ꓢꓴ ꓡꓰ ꓔꓯ ꓥꓳꓽ ꓗꓪ ꓐꓰ ꓡꓽ ꓞꓳ ꓬꓲ ꓜꓴ ꓔꓯ ꓚ ꓟꓸ ꓖꓶˍ ꓟ ꓥ ꓡꓳ꓿ ꓔꓯ ꓥꓳꓽ ꓗꓪ ꓐꓰ ꓟꓽ ꓥ ꓠꓬ ꓬꓲꓸ ꓬꓲ ꓪꓽ ꓔꓯ ꓮꓸ ꓫꓵˍ ꓟꓲ ꓟꓽ ꓚ ꓟꓸ ꓖꓶ꓿ 35 ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓡꓰ꓾ ꓥꓪ ꓠꓬ ꓔꓯ ꓥꓳꓽ ꓗꓪ ꓐꓰ ꓘꓶꓽ ꓒꓴˍ ꓥꓳ꓿ ꓟꓵꓽ ꓚꓰꓼ ꓟꓲ ꓚꓰꓼ ꓕ ꓑꓳꓸ ꓚꓵ ꓔ ꓟ ꓠꓬ ꓥꓪ ꓐꓯ ꓓꓳ ꓡ ꓥꓳ꓾ ꓐꓯˍ ꓟ ꓔꓯ ꓐꓲ ꓡ ꓝꓲ ꓠꓹ ꓟ ꓥ ꓡꓳ꓿ 36 ꓬꓰ-ꓢꓴ ꓠꓬ ꓡ ꓞꓳ ꓬꓲ ꓜꓴˍ ꓐꓰ ꓧꓹ ꓗꓷ ꓢꓲ ꓦꓲ ꓗꓪ ꓓꓵꓽ ꓡꓰ ꓠꓬ꓾ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓔꓯ ꓡꓻ ꓢꓲ꓾ ꓦ ꓟꓲ ꓗꓪ ꓟ ꓫꓱꓸ ꓢꓶ ꓔꓯꓺ ꓥꓳꓽ ꓕꓱ ꓟ ꓥꓪ ꓠꓴꓽ ꓔꓯ ꓒꓶꓻ ꓟꓸ ꓖꓶ ꓡꓯ꓾ ꓐꓯˍ ꓡꓳ꓿ 37 ꓬꓲ ꓒꓳꓹ ꓖꓶ ꓢꓲ꓾ ꓙꓲꓻˍ ꓟ ꓫꓵꓸ ꓫꓵꓸ ꓢꓴ ꓖꓳ ꓟ ꓠꓬ ꓡ-ꓞꓳ-ꓮ-ꓐꓲ ꓥ ꓡꓳ꓿ 38 ꓦ ꓟꓲ ꓠꓬ ꓟꓲ ꓠꓯ ꓥ ꓡꓳ꓿ ꓙꓲꓻˍ ꓟ ꓫꓵꓸ ꓠꓬ ꓟꓴꓽ ꓗꓪ ꓗꓴꓷꓼ ꓤ ꓠꓱ ꓐꓴ ꓥꓳ꓿ ꓫꓱꓸ ꓢꓶ ꓠꓬ ꓥꓶˍ ꓟ ꓖꓳ ꓕꓲ ꓣꓳ ꓬꓲ ꓤ ꓠꓱ ꓐꓴ ꓥ ꓡꓳ꓿ 39 ꓫꓱꓸ ꓢꓶ ꓫꓵꓸˍ ꓟ ꓛꓴꓽ ꓙꓳ ꓢꓴ ꓠꓬ ꓠꓲꓽ ꓪ ꓔꓲ ꓥ ꓡꓳ꓿ ꓶꓼ ꓝꓲꓸ ꓠꓬ ꓟꓲ ꓠꓯ ꓡꓳꓹ ꓬꓰˍ ꓟ ꓝꓲꓸ ꓥ ꓡꓳ꓿ ꓶꓼ ꓢꓴ ꓠꓬ ꓟꓴꓽ ꓗꓪ ꓝꓲ ꓓꓴ ꓐꓴ ꓥ ꓡꓳ꓿ 40 ꓖꓳ ꓡꓱ ꓠꓬꓲ ꓫꓱꓸ ꓢꓶ ꓔꓯ ꓖꓳꓺ ꓫ ꓢꓲ ꓮꓸ ꓔꓳꓸ ꓗꓪ ꓛꓴꓻ ꓗꓷˍ ꓟ ꓡꓰ ꓐꓰ꓾ ꓟꓲ ꓠꓯ ꓡꓳꓹ ꓬꓰˍ ꓟ ꓗꓪˍ ꓟꓲ ꓬꓲ ꓕꓱ ꓡꓱ ꓬꓰˍ ꓥꓳ꓿ 41 ꓡ-ꓞꓳ-ꓮ-ꓐꓲ ꓠꓽ ꓬꓲ ꓝꓲ ꓓꓴ ꓐꓴ ꓔꓯ ꓝꓲ ꓩꓴ ꓗꓷ ꓢꓲ꓾ ꓡ ꓞꓳ ꓔꓯ ꓪꓴ-ꓢ ꓚꓱꓹ ꓗꓪ ꓐꓰ ꓪꓴꓸ ꓙꓰ ꓢꓲ ꓡꓱꓸ ꓗꓷ ꓝꓲ ꓢꓴˍ ꓐꓰ꓾ ꓟꓽ ꓙꓲ ꓟꓽ ꓜꓳꓽ ꓟ ꓬꓰ ꓢꓴ ꓮꓽ ꓙꓵ ꓔꓯ ꓬꓲ ꓗꓴꓷꓼ ꓗꓪ ꓐꓰ ꓢꓲꓺ ꓓꓳ ꓡ ꓢꓲ ꓠꓬꓲ꓾ 42 ꓐꓬꓻ ꓞꓹ ꓟ ꓮꓸ ꓔꓳꓸ ꓘꓴꓻ ꓗꓪ ꓡꓳ ꓧꓳꓽ ꓗꓷ ꓠꓬ꓾ ꓖꓳ ꓗꓪ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓿ 43 ꓖꓳ ꓕꓯ ꓔꓱꓹ ꓜꓳꓽ ꓢꓴ ꓠꓽ ꓬꓲ ꓪꓽ ꓐꓹ ꓐ ꓗꓴꓷꓼ ꓠꓯꓸꓼ ꓗꓪ ꓟꓲꓽ ꓟꓲˍ ꓡꓰ ꓐꓰ ꓣꓳꓺ ꓡ ꓥꓳ꓿ ꓑ ꓙꓽ ꓓꓴ ꓠꓸ ꓑꓳ ꓙꓳ ꓢꓴ ꓠꓬ ꓠ ꓠꓹ꓿ 44 ꓟꓴꓽ ꓗꓪ ꓗꓴꓷꓼ ꓠꓬ꓾ ꓦ ꓟꓲ ꓕꓲ ꓡꓯꓼ ꓗꓪ ꓚꓵꓺ ꓞꓹ ꓟ ꓒꓵꓽ ꓶꓽˍ ꓡꓰ ꓐꓰ ꓗꓹ ꓡꓳ꓿ ꓡ ꓞꓳ ꓕꓲ ꓣꓳ ꓡꓰ ꓧꓪ ꓟꓳꓻ ꓗꓷ ꓠꓬ꓾ ꓫꓬꓹ ꓚꓵꓺ ꓗꓷ ꓢꓲ꓾ ꓗꓹ ꓛꓲꓽ ꓠꓬꓲ ꓙꓰ ꓢꓲ ꓬꓲ ꓙꓳˍ ꓟ ꓮꓽ ꓙꓵ ꓪꓴꓽ ꓗꓷ ꓢꓲ ꓠꓬꓲ꓾ ꓦ ꓟꓲ ꓖꓳ ꓕꓲ ꓡꓯꓼ ꓔꓯ ꓪꓴꓻˍ ꓡꓳ꓿ 45 ꓝꓮꓲ ꓟꓴꓽ ꓗꓪ ꓗꓴꓷꓼ ꓠꓬ꓾ ꓙꓲꓻˍ ꓟ ꓡꓳꓻ ꓒꓴ ꓡꓴꓸ ꓢꓶꓽ ꓧꓪˍ ꓟ ꓶꓻ ꓡꓯꓼ ꓟꓴ ꓢꓴ ꓕꓲ ꓣꓳˍ ꓡꓰ ꓐꓰ ꓗꓹ ꓡꓳ꓿ 46 ꓮꓽ ꓘꓶꓸ ꓒꓵꓽˍ ꓟ ꓡꓳꓻ ꓒꓴ ꓡꓴꓸ ꓢꓶꓽ ꓕꓲ ꓢꓶꓽ ꓧꓪ ꓟꓳꓻ ꓗꓷ ꓠꓬ꓾ ꓙꓰ ꓢꓲ ꓬꓲ ꓙꓳˍ ꓟ ꓮꓽ ꓙꓵ ꓪꓴꓽ ꓗꓷ ꓢꓲ ꓠꓬꓲ꓾ ꓡꓳ ꓒꓴ ꓡꓴꓸ ꓢꓶꓽ ꓖꓳ ꓕꓲ ꓢꓶꓽ ꓟ ꓪꓴꓻˍ ꓡꓳ꓿ 47 ꓝꓮꓲ ꓟꓴꓽ ꓗꓪ ꓗꓴꓷꓼ ꓠꓬ꓾ ꓬꓲꓻ ꓡꓴꓽ ꓐꓱꓻ ꓗꓪ ꓓꓳꓽ ꓔꓸ ꓢꓲ꓾ ꓥꓪꓸ ꓫꓵꓽ ꓥꓪꓸ ꓙꓰꓽ ꓥ ꓕ ꓑꓳꓸ ꓓꓳꓽ ꓟꓶˍ ꓟ ꓥꓪꓸ ꓑꓱꓸˍ ꓡꓰ ꓐꓰ ꓗꓹ ꓡꓳ꓿ 48 ꓥꓪꓸ ꓑꓱꓸ ꓐꓲ ꓡ ꓠꓬ ꓥꓪꓸ ꓧꓪ ꓢꓴ ꓡꓰ ꓬꓲꓻ ꓙꓬ ꓘꓶꓽ ꓗꓪ ꓚꓵꓹ ꓓꓯ ꓡ ꓢꓲ꓾ ꓠꓬꓲꓸ ꓠꓸ ꓢꓲ ꓠꓬꓲ꓾ ꓙꓲꓻˍ ꓟ ꓥꓪꓸ ꓔꓯ ꓠꓬ ꓢꓲꓺ ꓓꓳ ꓡ ꓢꓲ ꓡꓴꓻ ꓗꓪ ꓗꓶꓺ ꓔ ꓡꓳ꓿ ꓟꓽ ꓙꓲ ꓟ ꓠꓬ ꓡꓳ ꓩꓴ ꓗꓷˍ ꓡꓳ꓿ 49 ꓖꓳ ꓟ ꓡꓰ ꓐꓰ ꓟꓲ ꓠꓯ ꓡꓳꓹ ꓬꓰˍ ꓟ ꓗꓪˍ ꓟꓲ ꓟꓴꓽ ꓗꓪ ꓝꓲ ꓓꓴ ꓐꓴ ꓓꓳ ꓡ ꓢꓲ꓾ ꓔꓱꓹ ꓜꓳꓽ ꓢꓴ ꓗꓳ ꓡꓳ ꓗꓪ ꓐꓰ ꓥꓶˍ ꓟ ꓡ ꓞꓳ ꓔꓯ ꓐꓱꓻ ꓓꓳ ꓡ ꓢꓲ ꓠꓬꓲ꓾ 50 ꓐꓬꓻ ꓞꓹ ꓟ ꓮꓸ ꓔꓳ ꓘꓴꓻ ꓗꓪ ꓡꓳ ꓧꓳꓽ ꓗꓷˍ ꓥꓳ꓿ ꓖꓳ ꓗꓪ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓿ 51 ꓕꓱ ꓟꓬ ꓙꓰ ꓮꓽ ꓙꓵ ꓠꓴ ꓪꓽ ꓙꓽ ꓜꓲꓼ ꓡꓰ ꓡ?꓾ ꓐꓰ ꓬꓰ-ꓢꓴ ꓡꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓡꓰ꓾ ꓙ ꓜꓲꓼ ꓡꓰꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 52 ꓬꓲ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓠꓬꓲ ꓟꓴꓽ ꓗꓪ ꓗꓴꓷꓼ ꓢꓲ ꓤꓽ ꓒꓬꓱꓼ ꓡ ꓟ ꓙꓵꓽ ꓗ ꓟꓸ ꓒ ꓮꓽ ꓙꓵ ꓠꓬ꓾ ꓬꓲ ꓒꓵꓽ ꓶꓽ ꓗꓹ ꓗꓪ ꓐꓰ ꓖꓴꓽ ꓙꓴꓽ ꓬꓲ ꓡꓵˍ ꓐꓰ ꓬꓲ ꓫꓵꓼ ꓣꓴ ꓓꓳ ꓡ ꓟ ꓦꓲ ꓢꓲ ꓒꓽ ꓕꓲ ꓣꓳˍ ꓡꓰ ꓐꓰ ꓗꓹ ꓡꓳ꓾ ꓐꓯˍ ꓡꓳ꓿ 53 ꓔꓯ ꓥꓳꓽ ꓕꓱ ꓟꓬ ꓟ ꓬꓰ-ꓢꓴ ꓐꓯ ꓗꓷ ꓠꓬ꓾ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ 54 ꓬꓲ ꓚꓲꓸ ꓛꓬ ꓘꓹ ꓗꓪ ꓛꓲ ꓡ ꓠꓬ꓾ ꓬꓲ ꓪꓽ ꓓꓵꓽ ꓙ ꓟꓶ ꓠ ꓛꓲ ꓜꓲꓼ ꓦꓲ ꓗꓪ ꓬꓲ ꓪꓽ ꓔꓯ ꓟꓸ ꓖꓶˍ ꓡꓳ꓿ ꓬꓲ ꓪꓽ ꓡꓰ꓾ ꓡ ꓞꓳ ꓕꓱ ꓟ ꓠꓬ ꓕꓱ ꓡꓱ ꓫꓵ ꓙꓽ ꓜꓲꓼ ꓠꓲꓹˍ ꓐꓰ ꓪꓽ ꓠꓬꓲˍ ꓟ ꓟꓬꓱꓽ ꓬꓰ ꓠꓹ ꓟ ꓮ ꓡꓲ ꓗꓪ ꓐꓰ ꓟꓶ ꓗꓷ ꓡ? 55 ꓕꓱ ꓟ ꓠꓬ ꓢꓲꓹ ꓑꓴ ꓙꓵꓺ ꓒ ꓬꓲ ꓮ ꓐꓲ ꓟꓽ ꓥ ꓡ? ꓬꓲ ꓟꓹ ꓟ ꓠꓬ ꓟ-ꓡꓲ ꓟꓬꓱ ꓔ ꓟ ꓟꓽ ꓥ ꓡ? ꓬꓲ ꓠꓬꓲ ꓤ ꓐꓴ ꓠꓬ ꓬ-ꓗꓴˍ ꓐꓰ ꓬꓳ-ꓢꓷˍ ꓐꓰ ꓢꓲ-ꓟꓴˍ ꓐꓰ ꓬꓴ-ꓔ ꓟꓽ ꓥ ꓡ? 56 ꓬꓲ ꓠꓬꓲꓺ ꓟ ꓐꓴ ꓠꓬ ꓣꓳꓽˍ ꓐꓰ ꓕꓲ ꓪꓺꓼ ꓔꓬ ꓡꓳ꓾ ꓟꓽ ꓥ ꓡ? ꓡ ꓞꓳ ꓕꓱ ꓟ ꓠꓬ ꓕꓱ ꓟꓬ ꓙꓰꓽ ꓟ ꓮ ꓡꓲ ꓗꓪ ꓐꓰ ꓟꓶ ꓗꓷ ꓡ?꓾ ꓐꓰ ꓐꓯˍ ꓡꓳ꓿ 57 ꓖꓳ ꓡꓱ ꓢꓲ ꓬꓲ ꓪꓽ ꓠꓬ ꓬꓲ ꓔꓯ ꓟꓳꓻ ꓟꓽ ꓟꓵ꓿ ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓟꓷꓽ ꓠꓷꓹ ꓝꓸ ꓢꓴ ꓠꓽ ꓬꓲ ꓚꓲꓸ ꓛꓬ ꓘꓹˍ ꓐꓰ ꓚꓲꓸ ꓛꓬ ꓦꓲ ꓗꓪ ꓟꓽ ꓥ ꓠꓬ꓾ ꓟꓬꓱ ꓓꓳꓽ ꓟꓽ ꓙꓳ ꓟꓽ ꓗꓷ ꓡꓰ꓾ ꓐꓯ ꓖꓶˍ ꓡꓳ꓿ 58 ꓬꓲ ꓪꓽ ꓙꓵꓻ ꓠꓲꓹ ꓟꓽ ꓙꓳ ꓠꓬꓲ ꓬꓲ ꓠꓬ ꓖꓳ ꓗꓪ ꓪꓽ ꓠꓬꓲˍ ꓟ ꓟꓬꓱꓽ ꓮꓽ ꓟꓬꓹ ꓟꓽ ꓬꓰ꓿

ꓟ-ꓔꓲ 14

1 ꓖꓳ ꓕꓲ ꓝꓲꓸ ꓗꓪ ꓖ-ꓡꓲ-ꓡꓲ ꓟꓵꓽ ꓡꓲ ꓫꓴꓺ ꓕꓲꓽ ꓫꓴꓺ ꓔꓯ ꓙꓵꓽ ꓒ ꓩꓴ-ꓡꓲ ꓠꓬ ꓬꓰ-ꓢꓴ ꓓꓳꓽ ꓑ ꓙꓽ ꓗꓷ ꓕꓯ꓾ 2 ꓬꓲ ꓔꓯ ꓣꓱꓽ ꓙ ꓢꓴ ꓐꓴ ꓔꓯ꓾ ꓕꓱ ꓟ ꓠꓬ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓲ꓾ ꓪꓽ ꓠꓬꓲˍ ꓟ ꓕꓱ ꓟꓬ ꓫꓵꓽ ꓬꓰ ꓔꓬ ꓟ ꓥꓳ꓾ ꓐꓯˍ ꓡꓳ꓿ 3 ꓮ ꓡꓲꓳ ꓐꓯ ꓠꓬ ꓩꓴ-ꓡꓲ ꓠ꓾ ꓬꓲ ꓠꓬꓲ ꓤ ꓒꓲ-ꓡꓲ ꓤ ꓟꓶꓻ ꓩꓴ-ꓡꓳ-ꓓꓲ ꓑꓶꓸ ꓓꓴ ꓬꓳ-ꓦ ꓔꓯ ꓣꓴ ꓢꓲ ꓐꓱ ꓓꓴꓽ ꓗꓪ ꓐꓱ ꓗꓷꓳ꓿ 4 ꓕꓱ ꓟ ꓠꓬ ꓬꓳ-ꓦ ꓡꓰ ꓩꓴ-ꓡꓲ ꓔꓯ꓾ ꓠꓴ ꓠꓽ ꓩꓴ-ꓡꓳ-ꓓꓲ ꓔꓯ ꓫ ꓟ ꓠꓬ ꓬꓲ ꓡꓲꓽ ꓟꓽ ꓧꓳꓹ꓾ ꓐꓯ ꓖꓶꓽ ꓗꓷ ꓠꓬꓲ ꓥ ꓡꓳ꓿ 5 ꓩꓴ-ꓡꓲ ꓠꓬ ꓬꓲ ꓔꓯ ꓢꓰꓼ ꓠꓲꓹ ꓫꓵˍ ꓟꓲ꓾ ꓑ ꓫꓬꓼ ꓐꓴ ꓡꓰ ꓬꓳ-ꓦ ꓔꓯ ꓟꓷꓽ ꓠꓷꓹ ꓝꓸ ꓢꓴ ꓚꓬꓹ ꓔ ꓟ ꓑꓶꓸ ꓓꓴ ꓢꓰꓼ ꓟ ꓑꓶꓸ꓿ 6 ꓖꓳ ꓡꓱ ꓥ ꓟꓲ ꓩꓴ-ꓡꓲ ꓦꓵꓻ ꓦꓬꓼ ꓠꓬꓲ ꓛꓲ ꓡ ꓠꓬ꓾ ꓩꓴ-ꓡꓳ-ꓓꓲ ꓬꓲ ꓮꓸ ꓟꓲꓽ ꓠꓽ ꓮꓽ ꓙꓵ ꓢꓴ ꓟꓲꓽ ꓙꓬꓽ ꓗꓪ꓾ ꓗꓪ ꓛꓰꓹ ꓢꓲ ꓩꓴ-ꓡꓲ ꓔꓯ ꓠꓲꓹ ꓒꓴ ꓡꓰ ꓝꓲˍ ꓡꓳ꓿ 7 ꓖꓳ ꓡꓱ ꓠꓬꓲ ꓬꓲ ꓠꓬ ꓪꓵꓼ ꓙꓱꓽ ꓘꓶꓽ ꓡꓰ꓾ ꓬꓲ ꓮꓸ ꓫꓵ ꓓꓰꓽˍ ꓟꓲ ꓬꓲ ꓔꓯ ꓖꓶˍ ꓥꓳ꓾ ꓐꓰ ꓙꓺ ꓟꓳˍ ꓡꓳ꓿ 8 ꓖꓳ ꓡꓱ ꓠꓬꓲ ꓤ ꓟꓶ ꓡꓯꓸ ꓠꓬ ꓬꓲ ꓟꓹ ꓟ ꓡꓰ ꓚꓴꓽ ꓬꓲꓹ ꓖꓶˍ ꓟ ꓔꓯ ꓛꓳ ꓢꓲ꓾ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓪꓴꓸ ꓓꓵ ꓔꓯ ꓐꓯꓻ ꓗꓪ ꓗꓶ ꓢꓲ ꓥꓪ ꓔꓯ ꓔꓯꓹ ꓖꓶ ꓡꓯ꓾ ꓐꓯˍ ꓡꓳ꓿ 9 ꓖꓳ ꓕꓯ ꓪ ꓔꓲ ꓠꓽ ꓠꓲꓹ ꓟ ꓫꓸˍ ꓟꓲ꓾ ꓬꓲˍ ꓐꓰ ꓕꓲ ꓪꓺꓼ ꓜꓻ ꓜꓽ ꓔꓬ ꓢꓴ ꓐꓴ ꓟꓲꓽ ꓙꓬ ꓗꓪ ꓪꓵꓼ ꓗꓷ ꓠꓬꓲ꓾ ꓤ ꓟꓶ ꓡꓯꓸ ꓔꓯ ꓬꓳ-ꓦ ꓬꓲ ꓪꓴꓸ ꓓꓵ ꓖꓶ ꓠꓹ ꓟ ꓕꓵꓼ ꓪꓽ ꓖꓶˍ ꓡꓳ꓿ 10 ꓖꓳ ꓡꓱ ꓠꓬ ꓐꓱ ꓓꓴꓽ ꓗꓪ ꓡ ꓞꓳ ꓝꓲ ꓩꓴ ꓗꓷ ꓢꓲ꓾ ꓬꓳ-ꓦ ꓪꓴꓸ ꓓꓵ ꓓꓶ ꓗꓷ ꓝꓲˍ ꓡꓳ꓿ 11 ꓬꓲ ꓪꓽ ꓡꓰ ꓬꓲ ꓪꓴꓸ ꓓꓵ ꓔꓯ ꓐꓯꓻ ꓗꓪ ꓗꓶ ꓔꓯꓹ ꓡ ꓢꓲ꓾ ꓤ ꓟꓶ ꓡꓯꓸ ꓔꓯ ꓖꓶꓽ ꓗꓷ ꓠꓬ꓾ ꓬꓲ ꓟꓹ ꓟ ꓔꓯ ꓔꓯꓹ ꓖꓶ ꓬꓰˍ ꓡꓳ꓿ 12 ꓖꓳ ꓡꓱ ꓠꓬ ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴ ꓡ ꓢꓲ꓾ ꓬꓲ ꓫꓵꓻ ꓟꓳ ꓔꓯ ꓑꓱꓸ ꓔꓯꓹ ꓙꓰ ꓢꓲ ꓠꓬꓲ꓾ ꓔꓵꓸ ꓗꓷ ꓠꓬ ꓬꓰ-ꓢꓴ ꓔꓯ ꓐꓯ ꓖꓶ ꓙꓰˍ ꓡꓳ꓿ 13 ꓕꓱ ꓟ ꓔꓯ ꓬꓰ-ꓢꓴ ꓑ ꓙꓽ ꓗꓷ ꓠꓬ꓾ ꓬꓲ ꓖꓳ ꓗꓪ ꓐꓰ ꓡꓲꓺ ꓜꓶꓽ ꓢꓲ꓾ ꓘꓳ ꓫꓱ ꓫꓱˍ ꓟ ꓡꓲ ꓛꓲ ꓕꓲ ꓔꓳꓸ ꓗꓪ ꓙꓵꓺ ꓙꓰˍ ꓡꓳ꓿ ꓡꓳ ꓒꓱ ꓘꓹ ꓒꓱ ꓗꓪ ꓔꓬ ꓟ ꓞꓳ ꓜꓴꓻ ꓐꓴ ꓕꓱ ꓟ ꓔꓯ ꓢꓷꓸ ꓡꓰ ꓠꓬ꓾ ꓙ ꓖꓴ ꓫꓱꓽ ꓢꓲ ꓬꓲ ꓔꓯ ꓧꓪ ꓙꓰˍ ꓡꓳ꓿ 14 ꓬꓰ-ꓢꓴ ꓠꓬ ꓡꓲ ꓗꓪ ꓐꓰ ꓓꓳ ꓡ ꓢꓲ ꓞꓳ ꓜꓴ ꓞꓳ ꓟꓯꓼ ꓔꓯ ꓟꓳꓻ ꓗꓷ ꓠꓬ ꓬꓲ ꓪꓽ ꓔꓯ ꓫꓱꓸ ꓤ ꓠꓬꓲ꓾ ꓬꓲ ꓪꓽ ꓗꓪ ꓟ ꓠꓻ ꓢꓴ ꓒꓬꓽ ꓢꓴ ꓔꓯ ꓫꓬꓹ ꓓꓻ ꓡꓰ ꓝꓲˍ ꓡꓳ꓿ 15 ꓟꓰꓻ ꓬꓰ ꓕꓯ ꓛꓳꓽ ꓒꓯꓹ ꓐꓴ ꓬꓲ ꓔꓯ ꓡ ꓢꓲ꓾ ꓕꓱ ꓗꓪ ꓠꓽ ꓡꓲ ꓛꓲ ꓥ ꓢꓲ꓾ ꓟꓰꓻˍ ꓟꓲ ꓟꓰꓻ ꓬꓰꓳ꓿ ꓞꓳ ꓜꓴꓻ ꓔꓯ ꓘꓹ ꓗꓪ ꓚꓲꓸ ꓛꓬ ꓜꓽ ꓓꓴ ꓪꓴꓻ ꓜꓽ ꓬꓰ ꓝꓲ ꓠꓹ ꓟ ꓬꓲ ꓪꓽ ꓔꓯ ꓙꓰ ꓝꓲ꓾ ꓐꓯˍ ꓡꓳ꓿ 16 ꓬꓰ-ꓢꓴ ꓠꓽ ꓬꓲ ꓪꓽ ꓔꓯ꓾ ꓬꓲ ꓪꓽ ꓙꓰ ꓟꓽ ꓛꓵ꓾ ꓬꓲ ꓪꓽ ꓔꓯ ꓠꓴ ꓪꓽ ꓡꓰ ꓖꓶꓽ ꓜ꓾ ꓐꓯˍ ꓡꓳ꓿ 17 ꓬꓲ ꓪꓽ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓠꓬ ꓕꓱ ꓗꓪ ꓑ ꓑ ꓥꓪꓽ ꓑꓬˍ ꓐꓰ ꓥꓪꓸ ꓠꓬꓲꓽ ꓟˍ ꓡꓰꓽ ꓙꓳˍ ꓡꓳ꓾ ꓐꓯˍ ꓡꓳ꓿ 18 ꓬꓲ ꓡꓰ꓾ ꓖꓳ ꓟ ꓕꓻ ꓥꓪ ꓔꓯ ꓔꓯꓹ ꓖꓶ ꓡꓯ꓾ ꓐꓯˍ ꓡꓳ꓿ 19 ꓬꓲ ꓠꓬ ꓞꓳ ꓜꓴ ꓔꓯ ꓟꓳꓼ ꓕꓯꓽ ꓢꓲ ꓗꓪ ꓠꓬꓲꓸ ꓠꓸ ꓠꓹ ꓟ ꓕꓵꓼ ꓪꓽ ꓖꓶ ꓢꓲ꓾ ꓑ ꓑ ꓥꓪꓽ ꓑꓬˍ ꓐꓰ ꓥꓪꓸ ꓠꓬꓲꓽ ꓟ ꓣꓴ ꓔ ꓢꓲ ꓠꓬꓲ꓾ ꓟꓴꓽ ꓗꓪ ꓗꓪ ꓡꓳꓸ ꓢꓲ ꓶꓼ ꓥꓳ ꓙꓱꓽ ꓗꓷ ꓠꓬ꓾ ꓑ ꓑ ꓦꓶꓹ ꓢꓲ ꓛꓳꓽ ꓒꓯꓹ ꓐꓴ ꓔꓯ ꓖꓶ ꓢꓲ ꓠꓬꓲ꓾ ꓛꓳꓽ ꓒꓯꓹ ꓐꓴ ꓡꓰ ꓞꓳ ꓜꓴꓻ ꓔꓯ ꓑꓶꓺ ꓖꓶˍ ꓡꓳ꓿ 20 ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓜꓽ ꓐꓳ ꓡꓰ ꓗ ꓠꓯꓸ꓾ ꓜꓰꓻ ꓡꓰ ꓟ ꓬꓲ ꓧꓶꓽ ꓬꓲ ꓟꓲ ꓞꓲ ꓠꓬꓲꓽ ꓠꓳꓸ ꓘꓴꓽ ꓒ ꓐꓲꓺꓼ ꓖꓳ ꓫ ꓟꓶˍ ꓡꓳ꓿ 21 ꓜꓽ ꓢꓴ ꓠꓬ ꓤ ꓟꓶ ꓤˍ ꓐꓰ ꓤ ꓠꓱ ꓤ ꓟꓽ ꓢꓪꓸ ꓢꓪꓸ ꓞꓳ ꓑꓸ ꓤˍ ꓡꓰꓽ ꓥꓪ ꓔꓴ ꓣꓳ ꓛꓲ ꓙꓳˍ ꓡꓳ꓿ 22 ꓬꓰ-ꓢꓴ ꓡꓰ ꓞꓳ ꓜꓴꓻ ꓔꓯ ꓬꓲꓼ ꓙꓰ ꓝꓲ ꓔꓬ ꓕꓯ꓾ ꓬꓲ ꓠꓬ ꓞꓼ ꓐꓰ ꓛꓳꓽ ꓒꓯꓹ ꓐꓴ ꓔꓯ ꓡꓲ ꓗꓪ ꓓꓵꓽ ꓡꓰ ꓝꓲ ꓢꓲ꓾ ꓬꓲ ꓪꓽ ꓔꓯ ꓧꓶꓸ ꓕꓯ ꓖꓳ ꓐꓽ ꓢꓲ ꓗꓪ ꓙꓰ ꓝꓲˍ ꓡꓳ꓿ 23 ꓞꓳ ꓜꓴꓻ ꓔꓯ ꓬꓲꓼ ꓙꓰ ꓝꓲ ꓗꓷ ꓠꓬ꓾ ꓬꓲ ꓠꓽ ꓬꓲ ꓕꓲ ꓣꓳˍ ꓡꓰꓽ ꓪꓽ ꓘꓴ ꓠꓹ ꓟ ꓪꓽ ꓚꓲ ꓗꓪ ꓓꓯ ꓙꓰ ꓢꓲ꓾ ꓟꓰꓻ ꓬꓰˍ ꓟꓲ ꓬꓲ ꓕꓲ ꓣꓳˍ ꓡꓰꓽ ꓖꓳ ꓗꓪ ꓔꓬ ꓡꓳ꓿ 24 ꓖꓳ ꓡꓱ ꓥ ꓟꓲ ꓛꓳꓽ ꓒꓯꓹ ꓐꓴ ꓜꓶꓽ ꓔ ꓟ ꓡꓲ ꓠꓽ꓾ ꓬꓲꓻ ꓡꓴꓽ ꓐꓱꓻ ꓘꓶꓽ ꓗꓪ ꓐꓰ ꓶ ꓤ ꓗꓳꓹ ꓞ ꓕꓯ꓾ ꓟꓲꓽ ꓦꓲ ꓓꓶꓽ ꓡ ꓢꓲ ꓬꓲꓻ ꓡꓯꓼ ꓟꓰꓼ ꓡꓰ ꓡꓲ ꓔꓯ ꓶꓹ ꓡꓰ ꓔꓬ ꓡꓳ꓿ 25 ꓠꓯꓼ ꓡꓲ ꓙꓵꓹ ꓛꓲ ꓗꓪ ꓬꓰ-ꓢꓴ ꓠꓬ ꓬꓲ ꓪꓽ ꓔꓬ ꓗꓪ ꓬꓲꓻ ꓡꓴꓽ ꓐꓱ ꓕꓯꓽ ꓢꓲ ꓫꓱꓽ ꓡ ꓡꓳ꓿ 26 ꓬꓲꓻ ꓡꓴꓽ ꓐꓱ ꓕꓯꓽ ꓢꓲ ꓗꓪ ꓬꓲ ꓫꓱꓽ ꓔꓬ ꓟ ꓔꓯ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ ꓦꓲꓸ ꓡꓰ ꓢꓲ꓾ ꓫꓵꓻ ꓗꓴꓸ ꓫꓵ ꓦ ꓥ ꓠꓳꓹ꓾ ꓐꓯ ꓢꓲ ꓙꓳꓺ ꓠꓬꓲ ꓘꓴꓻ ꓔꓴ ꓡ ꓡꓳ꓿ 27 ꓬꓰ-ꓢꓴ ꓠꓽ ꓞꓼ ꓐꓰ ꓬꓲ ꓪꓽ ꓔꓯ ꓫ ꓕꓱ ꓡ ꓢꓲ꓾ ꓠꓲꓹ ꓪꓴꓽ ꓪꓴꓽ ꓔꓬ꓿ ꓥꓪ ꓥ ꓡꓳ꓾ ꓕꓽ ꓙꓳ꓾ ꓐꓯ ꓖꓶˍ ꓡꓳ꓿ 28 ꓒꓲ-ꓕꓱ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓢꓲ ꓒꓽꓳ꓾ ꓠꓴ ꓥ ꓠꓬ꓾ ꓬꓲꓻ ꓙꓬ ꓕꓯꓽ ꓢꓲ ꓫꓱꓽ ꓢꓲ ꓠꓴ ꓔꓬ ꓗꓪ ꓡ ꓠꓹ ꓟ ꓥꓪ ꓔꓯ ꓕꓵꓼ ꓪꓽ ꓖꓶ ꓡꓯ꓾ ꓐꓯˍ ꓡꓳ꓿ 29 ꓬꓰ-ꓢꓴ ꓡꓰ꓾ ꓡꓯ꓾ ꓐꓯ ꓗꓷ ꓠꓬ꓾ ꓒꓲ-ꓕꓱ ꓠꓽ ꓡꓲ ꓗꓪ ꓐꓰ ꓬꓯꓼ ꓡꓰ ꓢꓲ꓾ ꓬꓲꓻ ꓙꓬ ꓕꓯꓽ ꓢꓲ ꓬꓰ-ꓢꓴ ꓔꓬ ꓗꓪ ꓫꓱꓽ ꓙꓰˍ ꓡꓳ꓿ 30 ꓖꓳ ꓡꓱ ꓥ ꓟꓲ ꓟꓲꓽ ꓦꓲ ꓓꓽ ꓟ ꓙꓱꓼˍ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓙꓳꓺ ꓡꓰ ꓠꓬꓲ ꓦꓱꓺ ꓓꓵꓽ ꓡꓰˍ ꓐꓰ ꓗꓹ ꓡꓳ꓿ ꓖꓳ ꓕꓯ ꓬꓲ ꓡꓰ꓾ ꓢꓲ ꓒꓽꓳ꓾ ꓥꓪ ꓔꓯ ꓚꓬꓴ ꓙ ꓡꓯ꓾ ꓐꓰ ꓘꓴˍ ꓡꓳ꓿ 31 ꓬꓰ-ꓢꓴ ꓠꓬ ꓞꓼ ꓐꓰ ꓬꓲ ꓡꓯ ꓒꓯꓹ ꓛꓱ ꓓꓳ ꓡ ꓢꓲ꓾ ꓒꓲ-ꓕꓱ ꓔꓯ ꓖꓳꓻ ꓖꓶ ꓢꓲ ꓠꓬꓲ꓾ ꓙꓵꓻ ꓠꓲꓹ ꓣꓳꓺ ꓢꓴꓳ꓾ ꓮꓸ ꓫꓵ ꓪꓴꓸ ꓠꓬꓲ ꓓꓵꓽ ꓙ ꓟꓬꓽˍ ꓡ?꓾ ꓐꓯˍ ꓡꓳ꓿ 32 ꓬꓲ ꓪꓽ ꓠꓬꓲꓽ ꓣꓳ ꓡꓲ ꓗꓪ ꓓꓵꓽ ꓡꓰ ꓠꓬ ꓟꓲꓽ ꓦꓲ ꓙꓱꓼ ꓠꓽ ꓡꓰꓳ꓿ 33 ꓡꓲ ꓗꓪ ꓔꓬ ꓢꓴ ꓠꓬ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓠꓴ ꓠꓽ ꓚꓵ ꓚꓵ ꓪꓴ-ꓢ ꓮ ꓐꓲ ꓥꓳ꓾ ꓐꓯˍ ꓡꓳ꓿ 34 ꓬꓲ ꓪꓽ ꓡꓲ ꓗꓴꓸ ꓢꓲ ꓙꓰ ꓗꓷ ꓠꓬ꓾ ꓖꓶ-ꓠꓲ-ꓢ-ꓡꓱ ꓟꓵꓽ ꓗꓪ ꓛꓲ ꓬꓰˍ ꓡꓳ꓿ 35 ꓖꓳ ꓗꓪ ꓔꓬ ꓢꓴ ꓐꓴ ꓬꓰ-ꓢꓴ ꓛꓲ ꓡ ꓟ ꓢꓷꓸ ꓗꓷ ꓠꓬ꓾ ꓬꓲ ꓪꓽ ꓡꓰ ꓖꓳ ꓕꓲ ꓟꓵꓽ ꓚꓳ ꓡꓳ ꓗꓪ ꓡꓽ ꓞꓳ ꓝꓲ ꓩꓴ ꓗꓷ ꓢꓲ꓾ ꓠꓻ ꓢꓴ ꓒꓬꓽ ꓢꓴ ꓮꓽ ꓙꓵ ꓔꓯ ꓬꓲ ꓔꓬ ꓗꓪ ꓧꓳꓽ ꓡ ꓡꓳ꓿ 36 ꓬꓲ ꓪꓽ ꓠꓬ ꓬꓲ ꓐꓵ ꓞꓶꓽ ꓟꓶꓽ ꓗꓪˍ ꓡꓰꓽ ꓫꓱꓹ ꓠꓹ ꓟ ꓬꓲ ꓔꓯ ꓓꓰꓽ ꓢꓲ꓾ ꓖꓳ ꓡꓱ ꓫꓱꓹ ꓪ ꓢꓴ ꓮꓽ ꓙꓵ ꓓꓻ ꓡꓰˍ ꓡꓳ꓿

ꓟ-ꓔꓲ 15

1 ꓖꓳ ꓗꓸ ꓠꓯꓸ ꓒ-ꓡꓲ-ꓢꓷ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓡ ꓢꓲ꓾ ꓬꓰ-ꓢꓴ ꓔꓯ꓾ 2 ꓠꓴ ꓛꓳꓽ ꓒꓯꓹ ꓐꓴ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓒꓵꓽ ꓒ ꓐꓴ ꓡꓲꓽ ꓒꓰꓼ ꓔꓯ ꓛꓬˍ ꓡ? ꓬꓲ ꓪꓽ ꓠꓬ ꓜ ꓜꓽˍ ꓕꓯ ꓡꓯꓼ ꓒꓯꓹ ꓟꓽ ꓞꓲꓽ ꓞꓲꓽ ꓜˍ ꓡꓳ꓾ ꓐꓯˍ ꓡꓳ꓿ 3 ꓬꓲ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽˍ ꓟꓲ ꓮꓸ ꓫꓵ ꓪꓴꓸ ꓠꓬꓲ ꓠꓴ ꓪꓽ ꓒꓵꓽ ꓒ ꓐꓴ ꓡꓲꓽ ꓒꓰꓼ ꓔꓯˍ ꓡꓰꓽ ꓛꓳ ꓢꓲ꓾ ꓪꓴ-ꓢ ꓕꓵꓼ ꓪꓽ ꓔꓯ ꓛꓬꓻ ꓗꓷˍ ꓡ? 4 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ꓾ ꓠꓴ ꓮꓽ ꓐꓽ ꓮ ꓟ ꓔꓯ ꓒꓵꓽ꓾ ꓐꓯˍ ꓡꓳ꓿ ꓝꓮꓲ ꓠꓬ ꓮꓽ ꓐꓽ ꓮ ꓟ ꓔꓯ ꓙꓱꓽ ꓢꓴ ꓔꓯ ꓠꓽ ꓫꓵꓻ ꓝꓲ ꓠ ꓗꓹ ꓡꓳ꓾ ꓐꓯˍ ꓡꓳ꓿ 5 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ꓾ ꓠꓴ ꓪꓽ ꓐꓹ ꓐ ꓥ ꓠꓬ ꓠꓴ ꓪꓽ ꓟꓹ ꓟ ꓔꓯ꓾ ꓠꓴ ꓔꓯ ꓥꓪ ꓖꓶ ꓙꓲꓽ ꓙꓳˍ ꓟ ꓠꓬ ꓪꓴ-ꓢ ꓔꓯ ꓔꓲ ꓖꓶꓽ ꓗꓷꓳ꓾ ꓐꓯ ꓗꓷ ꓠꓬ꓾ 6 ꓐꓹ ꓐ ꓟꓹ ꓟ ꓔꓯ ꓒꓵꓽ ꓟꓽ ꓛꓵꓳ꓾ ꓐꓰ ꓐꓯ ꓢꓲ꓾ ꓠꓴ ꓪꓽ ꓠꓬ ꓠꓴ ꓪꓽ ꓡꓲꓽ ꓒꓰꓼ ꓔꓯ ꓛꓳˍ ꓠꓬꓲ ꓪꓴ-ꓢ ꓐꓯ ꓘꓶꓽ ꓔꓯ ꓖꓳꓽ ꓡꓰ ꓝꓲˍ ꓡꓳ꓿ 7 ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓐꓴꓳ꓾ ꓬꓲ-ꓢ-ꓬ ꓡꓰ ꓟꓷꓽ ꓠꓷꓹ ꓝ ꓢꓲ꓾ 8 ꓑ ꓫꓬꓼ ꓐꓴ ꓕꓱ ꓕꓷ ꓠꓬ ꓟꓷꓽ ꓠꓷꓹ ꓗꓴꓹ ꓙꓲˍ ꓡꓰꓽ ꓥꓪ ꓔꓯ ꓒꓵꓽˍ ꓡꓳ꓿ ꓬꓲ ꓪꓽ ꓠꓲꓹ ꓟ ꓠꓽ ꓥꓪ ꓔꓯˍ ꓐꓰ ꓶꓽ ꓤ ꓗꓳꓹ ꓞꓹ ꓡꓳ꓿ 9 ꓬꓲ ꓪꓽ ꓠꓬ ꓞꓳ ꓤ ꓟꓸ ꓘꓶꓽ ꓣꓴ ꓢꓲ ꓟꓸ ꓓꓴ ꓟꓸ ꓟꓲ ꓬꓰˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪꓽ ꓥꓪ ꓔꓯ ꓪꓴꓸ ꓓꓵ ꓕꓱꓼˍ ꓟ ꓠꓬ ꓮꓽ ꓔꓳˍ ꓡꓰꓽ ꓥꓳ꓾ ꓐꓰ ꓐꓯ ꓗꓷ ꓟ ꓠꓬ ꓚꓵ ꓚꓵ ꓠꓴ ꓪꓽ ꓔꓯ ꓐꓯ ꓬꓯꓼˍ ꓡꓳ꓾ ꓐꓯˍ ꓡꓳ꓿ 10 ꓬꓰ-ꓢꓴ ꓡꓰ ꓞꓳ ꓜꓴꓻ ꓔꓯ ꓬꓲ ꓔꓬ ꓗꓪ ꓘꓴꓻ ꓔꓯꓹ ꓡ ꓢꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓠ ꓠꓹ ꓢꓲ ꓙꓽ ꓜꓲꓼ ꓔ꓿ 11 ꓡ ꓞꓳ ꓕꓲ ꓣꓳ ꓬꓲ ꓟꓷꓽ ꓠꓷꓹ ꓗꓪ ꓓꓵꓽ ꓡꓰˍ ꓟ ꓡꓰ ꓬꓲ ꓔꓯ ꓟꓽ ꓫꓬꓻ ꓗꓷ ꓡꓰ ꓝꓲˍ ꓟ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓬꓲ ꓟꓷꓽ ꓠꓷꓹ ꓗꓪ ꓐꓰ ꓓꓳ ꓡ ꓟ ꓠꓽ꓾ ꓬꓲ ꓔꓯ ꓟꓽ ꓫꓬꓻ ꓟ ꓗꓷ ꓡꓰ ꓝꓲ ꓐ ꓡ ꓡꓳ꓾ ꓐꓯˍ ꓡꓳ꓿ 12 ꓖꓳ ꓕꓯ ꓛꓳꓽ ꓒꓯꓹ ꓐꓴ ꓬꓲ ꓔꓯ ꓡꓻ ꓢꓲ꓾ ꓐꓯ ꓘꓶꓽ ꓕꓱ ꓟ ꓡꓰ ꓒ-ꓡꓲ-ꓢꓷ ꓐꓴ ꓔꓯ ꓗꓸ ꓬꓯꓼ ꓗꓷ ꓟ ꓠꓴ ꓟꓽ ꓢꓷ ꓡ?꓾ ꓐꓯˍ ꓡꓳ꓿ 13 ꓬꓲ ꓒꓳꓹ ꓖꓶ ꓢꓲ꓾ ꓟꓴꓽ ꓗꓪ ꓗꓪ ꓟ ꓥꓪ ꓐꓹ ꓐ ꓡꓰ ꓟꓽ ꓔꓶ ꓔ ꓟ ꓡꓲꓸ ꓤ ꓥ ꓕ ꓑꓳꓸ ꓠꓽ ꓚꓵꓹ ꓓꓳ ꓡ ꓥꓳ꓿ 14 ꓬꓲ ꓪꓽ ꓠꓽ ꓟꓬ ꓔꓶ ꓢꓲ ꓙ ꓖꓴ ꓧꓳꓽ ꓢꓴ ꓬꓰˍ ꓠꓬꓲ ꓥꓻ ꓝꓲ꓿ ꓟꓬ ꓔꓶ ꓡꓰ ꓟꓬ ꓔꓶ ꓔꓯ ꓙ ꓖꓴ ꓧꓳꓽˍ ꓠꓬ꓾ ꓠꓬꓲ ꓣꓳ ꓡꓱꓸꓼ ꓟꓲ ꓘꓴꓻ ꓗꓪ ꓞꓰꓻ ꓓꓵꓽ ꓡꓰˍ ꓥꓳ꓾ ꓐꓯˍ ꓡꓳ꓿ 15 ꓒꓲ-ꓕꓱ ꓡꓰ꓾ ꓔꓯ ꓥꓳꓽ ꓕꓱ ꓟ ꓥꓪ ꓠꓴꓽ ꓔꓯ ꓒꓶꓻ ꓟꓸ ꓖꓶ ꓡꓯ꓾ ꓐꓯˍ ꓡꓳ꓿ 16 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽˍ ꓟꓲ ꓬꓲ ꓪꓽˍ ꓡꓰ ꓐꓰ ꓟꓽ ꓙ ꓜꓲꓼˍ ꓢꓰꓽ ꓡ? 17 ꓮꓸ ꓫꓵˍ ꓟꓲ ꓡ ꓞꓳ ꓡꓰ ꓜꓽ ꓗꓷ ꓠꓬ ꓬꓲ ꓦꓰꓼ ꓛꓲꓼ ꓗꓪ ꓓꓵꓽ ꓡꓰ ꓢꓲ꓾ ꓠꓱꓺ ꓢꓲꓺ ꓙꓰ ꓖꓴ ꓗꓪ ꓡꓳ ꓗꓷˍ ꓟ ꓔꓯ ꓠꓴ ꓪꓽ ꓟꓽ ꓢꓷ ꓡ? 18 ꓖꓳ ꓡꓱ ꓥ ꓟꓲ ꓟꓷꓽ ꓠꓷꓹ ꓡꓰ ꓐꓯ ꓓꓳ ꓡ ꓟ ꓠꓽ꓾ ꓠꓲꓹ ꓟ ꓗꓪ ꓐꓰ ꓓꓳ ꓡ ꓟ ꓥ ꓢꓲ꓾ ꓞꓳ ꓤ ꓔꓯ ꓟꓽ ꓫꓬꓻ ꓟ ꓗꓷ ꓡꓰ ꓝꓲˍ ꓡꓳ꓿ 19 ꓮ ꓡꓲꓳ ꓐꓯ ꓠꓬ ꓠꓲꓹ ꓟ ꓗꓪ ꓐꓰ ꓓꓳ ꓡ ꓟ꓾ ꓥꓶˍ ꓟ ꓓꓵꓽ ꓙꓽˍ ꓟ꓾ ꓞꓳ ꓤ ꓢꓰꓼˍ ꓟ꓾ ꓦꓬꓼ ꓛꓳꓽ ꓧꓪˍ ꓟ꓾ ꓟꓽ ꓢꓲꓽ ꓟ ꓫꓬꓻ ꓟ꓾ ꓘꓴꓽ ꓜꓽ ꓠꓯ ꓜˍ ꓟ꓾ ꓟꓽ ꓔꓱꓹ ꓟ ꓢꓷꓸ ꓙ ꓟꓳꓻ ꓙˍ ꓟ꓾ ꓪ ꓕꓱꓻˍ ꓟ꓾ 20 ꓕꓱ ꓟꓬ ꓫꓵꓽ ꓡꓰ ꓞꓳ ꓤ ꓔꓯ ꓟꓽ ꓫꓬꓻˍ ꓟ ꓒꓬꓱꓼ ꓡ ꓝꓲˍ ꓡꓳ꓿ ꓜ ꓜˍ ꓕꓯꓽ ꓡꓯꓼ ꓒꓯꓹ ꓟꓽ ꓞꓲꓽ ꓟ ꓠꓽ ꓞꓳ ꓤ ꓔꓯ ꓟꓽ ꓫꓬꓻ ꓟ ꓟꓽ ꓗꓷ ꓡꓰ ꓝꓲ꓾ ꓐꓯˍ ꓡꓳ꓿ 21 ꓬꓰ-ꓢꓴ ꓠꓬ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓕꓲ-ꓬˍ ꓐꓰ ꓢꓲ-ꓓꓳ ꓟꓵꓽ ꓗꓪ ꓙꓵꓺ ꓙꓰ ꓠꓬ꓾ 22 ꓟꓵꓽ ꓖꓳ ꓟ ꓗꓪ ꓔꓬ ꓢꓴ ꓘꓷ-ꓠ ꓤ ꓟꓶꓽ ꓤ ꓕꓲ ꓣꓳ ꓡꓻ ꓢꓲ꓾ ꓘꓴꓻ ꓢꓲ ꓠꓬꓲ꓾ ꓢꓲ ꓒꓽꓳ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤꓽꓳ꓾ ꓥꓪ ꓔꓯ ꓫꓱꓸ ꓤ ꓙ ꓡꓯ꓿ ꓥꓪ ꓮꓸ ꓟꓲꓽ ꓤ ꓔꓯ ꓠꓲꓽ ꓜꓶ ꓞꓹ ꓠꓬꓲ ꓮꓽ ꓘꓶꓸ ꓫ ꓙꓵ ꓔꓬ ꓡꓳ꓾ ꓐꓯˍ ꓡꓳ꓿ 23 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓽ ꓬꓲ ꓔꓯ ꓕꓲ ꓘꓶꓽˍ ꓟꓲ ꓟꓽ ꓒꓳꓹ ꓖꓶ꓿ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓲ ꓔꓯ ꓡꓻ ꓢꓲ꓾ ꓣꓳꓽ ꓗ ꓠꓯꓸ ꓢꓲ ꓗꓪ ꓘꓴꓻ ꓔꓬ ꓢꓴ ꓕꓱ ꓟ ꓔꓯ ꓬꓲꓼ ꓙꓰ ꓝꓲ꓾ ꓐꓯˍ ꓡꓳ꓿ 24 ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓬꓲ-ꓢꓷ-ꓡꓰ ꓦꓲ ꓗꓪ ꓒꓲꓼ ꓬꓰˍ ꓟ ꓮ ꓣꓳ ꓔꓯˍ ꓡꓰꓽ ꓟꓽ ꓥ ꓠꓬ ꓥꓪ ꓔꓯ ꓟꓽ ꓝꓲ ꓔ꓾ ꓐꓯ ꓖꓶˍ ꓡꓳ꓿ 25 ꓤ ꓟꓶ ꓤ ꓠꓽ ꓬꓲ ꓟꓲꓽ ꓙꓬ ꓗꓪ ꓟꓳꓼ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓔꓯ ꓬꓰ ꓙ ꓡꓯ꓾ ꓐꓯˍ ꓡꓳ꓿ 26 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓤ ꓠꓱ ꓐꓴ ꓑ ꓑ ꓣꓴ ꓢꓲ ꓮꓸ ꓠꓽ ꓔꓯ ꓡꓳꓺ ꓖꓶ ꓜꓽ ꓙꓲꓽ ꓟꓽ ꓙꓳ꓾ ꓐꓯ ꓖꓶˍ ꓡꓳ꓿ 27 ꓤ ꓟꓶ ꓤ ꓡꓰ꓾ ꓥ ꓡꓳ꓾ ꓢꓲ ꓒꓽꓳ꓾ ꓖꓳ ꓡꓱ ꓥ ꓟꓲ ꓬꓲ ꓢꓲ ꓒꓽ ꓢꓽ ꓡ ꓗꓪ ꓐꓰ ꓞꓰꓻ ꓡꓰˍ ꓟ ꓜꓻ ꓟꓰꓽ ꓠꓬ ꓮꓸ ꓠꓽˍ ꓟꓲ ꓖꓳ ꓜꓽ ꓓꓻˍ ꓡꓳ ꓫꓵ ꓥꓳ꓾ ꓐꓯˍ ꓡꓳ꓿ 28 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓤ ꓟꓶ ꓤꓽꓳ꓾ ꓠꓴ ꓙꓵꓻ ꓠꓲꓹ ꓠꓽ ꓪꓴꓽˍ ꓡꓳ꓿ ꓠꓴ ꓠꓵˍ ꓟ ꓡꓰ ꓐꓰ ꓠꓴ ꓐꓱ ꓶ ꓒꓬꓱꓼ ꓡ ꓝꓲ꓾ ꓐꓯ ꓖꓶˍ ꓡꓳ꓿ ꓖꓳ ꓕꓲ ꓑꓹ ꓗꓪ ꓬꓲ ꓮꓸ ꓟꓲꓽ ꓤ ꓠꓬ ꓓꓻ ꓡꓰꓳ꓿ 29 ꓬꓰ-ꓢꓴ ꓠꓬ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓖ-ꓡꓲ-ꓡꓲ ꓬꓲꓻ ꓡꓴꓽ ꓐꓱꓻ ꓘꓶꓽ ꓗꓪ ꓛꓲ ꓡ ꓠꓬ꓾ ꓪꓽ ꓚꓲ ꓗꓪ ꓓꓯ ꓙꓰ ꓢꓲ ꓠꓬꓲꓸ ꓠꓸˍ ꓡꓳ꓿ 30 ꓖꓳ ꓕꓯ ꓞꓳ ꓜꓴ ꓞꓳ ꓟꓯꓼ ꓬꓲ ꓔꓯ ꓡ ꓢꓲ꓾ ꓛꓲ ꓫꓳꓸˍ ꓐꓰ ꓟꓬ ꓔꓶꓺˍ ꓐꓰ ꓞꓳ ꓟꓶˍ ꓐꓰ ꓛꓲ ꓐꓬ ꓡꓯꓼ ꓐꓬ ꓢꓴˍ ꓐꓰ꓾ ꓠꓱꓸ ꓐꓯꓼ ꓠꓻ ꓢꓴ ꓒꓬꓽ ꓢꓴ ꓮꓽ ꓟꓬꓹ ꓔꓯ ꓧꓳꓽ ꓔꓯꓹ ꓡ ꓢꓲ ꓠꓬꓲ ꓬꓲ ꓟꓲꓽ ꓕꓯꓽ ꓗꓪ ꓔꓬ ꓝꓲˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ ꓬꓲ ꓪꓽ ꓔꓯ ꓫꓬꓹ ꓓ ꓡꓰˍ ꓡꓳ꓿ 31 ꓖꓳ ꓡꓱ ꓢꓲ ꓞꓳ ꓜꓴꓻ ꓠꓬ꓾ ꓞꓳ ꓟꓶꓻ ꓫꓸ ꓕꓱ ꓡ ꓟ꓾ ꓛꓲ ꓐꓬ ꓡꓯꓼ ꓐꓬ ꓢꓴ ꓓꓻ ꓡꓰˍ ꓟ꓾ ꓛꓲ ꓫꓳꓸ ꓙ ꓖꓴ ꓫꓱꓽˍ ꓟ ꓐꓰ꓾ ꓟꓬ ꓔꓶ ꓠꓬꓲ ꓟꓳꓻ ꓡ ꓟ ꓔꓯ ꓟꓳꓻˍ ꓕꓯ꓾ ꓬꓲ ꓪ ꓓꓵꓽ ꓙ ꓟꓶ ꓡꓰ ꓢꓲ꓾ ꓬꓲ-ꓢꓷ-ꓡꓰ ꓐꓴ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ 32 ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓬꓲ ꓔꓬ ꓗꓪ ꓘꓴꓻ ꓔꓯ ꓡ ꓢꓲ꓾ ꓥꓪ ꓠꓬ ꓞꓳ ꓜꓴ ꓕꓱ ꓟ ꓔꓯ ꓫꓱꓸ ꓤˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓮ ꓟꓶ ꓬꓲ ꓪꓽ ꓠꓬ ꓥꓪˍ ꓐꓰ ꓕꓲ ꓪꓺꓼ ꓢ ꓠꓬꓲ ꓔꓬ ꓗꓷ ꓠꓬꓲ꓾ ꓬꓲ ꓪꓽ ꓜꓽ ꓓꓴ ꓖꓴꓻ ꓡꓰꓳ꓿ ꓥꓪ ꓬꓲ ꓪꓽ ꓔꓯ ꓦꓰꓼ ꓟꓷꓼ ꓦꓰꓼ ꓙꓬ ꓬꓲꓼ ꓙꓰ ꓝꓲˍ ꓠꓬ꓾ ꓙ ꓖꓴ ꓗꓪ ꓬꓲ ꓪꓽ ꓢꓯꓼ ꓐ ꓡꓰˍ ꓟꓽ ꓢꓷ꓾ ꓐꓯˍ ꓡꓳ꓿ 33 ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓟꓵꓽ ꓖꓳꓽ ꓕꓱ ꓟ ꓗꓪ ꓡ ꓞꓳ ꓕꓱ ꓟꓬ ꓕꓲ ꓜꓴ ꓔꓯ ꓐꓳ ꓡꓰ ꓝꓲ ꓓꓴ ꓑ ꓑ ꓖꓳ ꓟꓬ ꓣꓳꓽ ꓮ ꓡꓲ ꓗꓪ ꓐꓰ ꓧꓪ ꓪ ꓓꓻ ꓢꓰꓽ꓾ ꓐꓯˍ ꓡꓳ꓿ 34 ꓖꓳ ꓡꓱ ꓠꓬ ꓬꓰ-ꓢꓴ ꓬꓲ ꓪꓽ ꓔꓯ꓾ ꓠꓴ ꓪꓽ ꓑ ꓑ ꓮ ꓟꓬꓺ ꓑꓬ ꓙꓳˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓠꓬ꓾ ꓫꓵꓽ ꓑꓬˍ ꓐꓰ ꓥꓪꓸ ꓤ ꓠꓬꓲꓽ ꓢ ꓟ ꓙꓳˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 35 ꓬꓲ ꓠꓬ ꓞꓳ ꓜꓴ ꓔꓯ ꓟꓲ ꓛꓬ ꓗꓪ ꓠꓬꓲꓸ ꓠꓸ ꓠꓹ ꓟ ꓕꓵꓼ ꓪꓽ ꓖꓶꓽ ꓗꓷ ꓠꓬ꓾ 36 ꓬꓲ ꓡꓰ ꓑ ꓑ ꓖꓳ ꓫꓵꓽ ꓑꓬˍ ꓐꓰ ꓥꓪꓸ ꓣꓴ ꓢꓲ꓾ ꓫꓸ ꓟꓳ ꓢꓲ ꓠꓬꓲ ꓦꓶꓹ ꓗꓷ ꓠꓬ ꓛꓳꓽ ꓒꓯꓹ ꓐꓴ ꓔꓯ ꓖꓶꓽ ꓢꓲ꓾ ꓛꓳꓽ ꓒꓯꓹ ꓐꓴ ꓡꓰ ꓞꓳ ꓜꓴꓻ ꓔꓯ ꓑꓶꓺ ꓖꓶˍ ꓡꓳ꓿ 37 ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓜꓽ ꓐꓳ ꓡꓰˍ ꓡꓳ꓿ ꓜꓰꓻ ꓡꓰˍ ꓟ ꓬꓲ ꓧꓶꓽ ꓬꓲ ꓟꓲꓺ ꓮꓽ ꓙꓵ ꓠꓬ ꓫꓵꓽ ꓠꓳꓸ ꓘꓴꓽ ꓒ ꓐꓲꓺꓼ ꓖꓳꓺ ꓫꓺ ꓟꓶˍ ꓡꓳ꓿ 38 ꓜꓽ ꓢꓴ ꓠꓬ ꓤ ꓟꓶ ꓤˍ ꓐꓰ ꓤ ꓠꓱ ꓤ ꓟꓽ ꓢꓪꓸ ꓢꓪꓸ ꓞꓳ ꓑꓸ ꓤˍ ꓡꓰꓽ ꓡꓲ ꓔꓴ ꓣꓳ ꓛꓲ ꓙꓳˍ ꓡꓳ꓿ 39 ꓬꓰ-ꓢꓴ ꓡꓰ ꓞꓳ ꓜꓴ ꓔꓯ ꓙꓰ ꓝꓲ ꓗꓷ ꓗꓸ ꓠꓯ꓾ ꓬꓲ ꓠꓬ ꓡꓲ ꓗꓪ ꓓꓵꓽ ꓡꓰ ꓢꓲ꓾ ꓟ-ꓖ-ꓓ ꓟꓵꓽ ꓗꓪ ꓛꓲ ꓬꓰˍ ꓡꓳ꓿

ꓟ-ꓔꓲ 16

1 ꓖꓳ ꓕꓯ ꓒ-ꓡꓲ-ꓢꓷ ꓐꓴˍ ꓐꓰ ꓢ-ꓓꓴ-ꓗꓷ ꓐꓴ ꓠꓬ ꓬꓰ-ꓢꓴ ꓔꓯ ꓫꓵꓽ ꓠꓬꓲ ꓡ ꓢꓲ꓾ ꓟꓴꓽ ꓗꓪ ꓗꓪ ꓐꓰ ꓢꓷꓸ ꓡꓰ ꓓꓴ ꓕꓲ ꓟ ꓟꓳꓸ ꓖꓶ ꓡ ꓠꓹ ꓟ ꓬꓲ ꓔꓯ ꓓꓰꓽˍ ꓡꓳ꓿ 2 ꓬꓲ ꓠꓽ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓟꓶꓼ ꓘꓶ ꓕꓯ ꓟꓵꓽ ꓪꓴ ꓫꓵꓽˍ ꓠꓬ꓾ ꓠꓴ ꓪꓽ ꓠꓽ꓾ ꓟꓴꓽ ꓗꓪ ꓐ ꓡ ꓥꓳ꓾ ꓐꓯˍ ꓡꓳ꓿ 3 ꓠꓯꓼ ꓠꓯ ꓕꓯ ꓟꓵꓽ ꓪꓴ ꓫꓵꓽ ꓢꓲ ꓠꓯꓺ ꓡꓰˍ ꓠꓬ꓾ ꓠꓴ ꓪꓽ ꓠꓽ꓾ ꓠꓬꓲꓸ ꓠꓬꓲ ꓟꓴꓽ ꓗꓪ ꓟꓽ ꓐ꓾ ꓐꓯˍ ꓡꓳ꓿ ꓠꓴ ꓪꓽ ꓠꓬ ꓟꓴꓽ ꓗꓪ ꓔꓯ ꓡꓳꓸ ꓢꓲ꓾ ꓟꓴꓽ ꓗꓪ ꓐ ꓡ ꓟꓽ ꓐ ꓡ ꓟ ꓔꓯ ꓦꓰꓽ ꓗꓴꓸˍ ꓟꓲ꓾ ꓕꓱ ꓕꓲ ꓝꓲꓸ ꓗꓪ ꓟ ꓢꓷꓸ ꓡꓰ ꓓꓴ ꓔꓯ ꓙꓽ ꓜꓲꓼ ꓟꓽ ꓗꓴꓸ ꓡ? 4 ꓥꓶˍ ꓟ ꓐꓰ ꓠꓲꓹ ꓟꓽ ꓒꓵꓽ ꓠꓲꓹ ꓟꓽ ꓡꓱꓻ ꓟ ꓕꓱ ꓕꓲ ꓤꓶ ꓢꓴ ꓠꓬ ꓓꓵꓽ ꓙ ꓟꓶ ꓓꓴˍ ꓐꓰ ꓢꓷꓸ ꓡꓰ ꓓꓴˍ ꓡꓰꓽ ꓧꓪˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓳ-ꓠ ꓢꓷꓸ ꓡꓰ ꓓꓴ ꓟꓽ ꓥ ꓠꓬ꓾ ꓠꓴ ꓪꓽ ꓔꓯ ꓮꓸ ꓫꓵ ꓢꓷꓸ ꓡꓰ ꓓꓴˍ ꓟꓲ ꓟꓽ ꓖꓶ꓾ ꓐꓯ ꓗꓷ ꓠꓬ꓾ ꓬꓰ-ꓢꓴ ꓠꓽ ꓬꓲ ꓪꓽ ꓔꓯ ꓧꓹ ꓔ ꓬꓰ ꓢꓲ ꓙꓰˍ ꓡꓳ꓿ 5 ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓲꓻ ꓡꓴ ꓐꓱ ꓖꓳ ꓐꓽ ꓗꓪ ꓙꓰ ꓛꓲ ꓬꓰ ꓕꓯ꓾ ꓬꓲ ꓪꓽ ꓡꓰ ꓑ ꓑ ꓔꓯꓹ ꓠꓹ ꓟ ꓟꓲ ꓡꓰ ꓐꓷ꓿ 6 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓒ-ꓡꓲ-ꓢꓷ ꓐꓴˍ ꓐꓰ ꓢ-ꓓꓴ-ꓗꓷ ꓐꓴ ꓙꓵꓽ ꓧꓶꓽ ꓔꓯ ꓧꓪꓸ ꓛꓲꓽ ꓐꓰ ꓤ ꓟꓳ꓾ ꓐꓯˍ ꓡꓳ꓿ 7 ꓬꓲ ꓛꓳꓽ ꓒꓯꓹ ꓐꓴ ꓠꓬ꓾ ꓣꓳꓽ ꓠꓽ ꓑ ꓑ ꓔꓯꓹ ꓟꓲ ꓡꓰ ꓠꓬꓲ ꓬꓲ ꓕꓱ ꓡꓱ ꓐꓯˍ ꓟ ꓥ ꓠꓳꓹ꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 8 ꓖꓳ ꓟ ꓔꓯ ꓬꓰ-ꓢꓴ ꓡꓳꓸ ꓓꓳ ꓡ ꓠꓬ꓾ ꓙꓵꓻ ꓠꓲꓹ ꓣꓳ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓑ ꓑ ꓙꓳ ꓟꓽ ꓙꓳ ꓟ ꓔꓯꓸ ꓟꓳꓸ ꓐꓯ ꓡꓯꓽ ꓘꓳ ꓔꓬ ꓡ? 9 ꓠꓴ ꓪꓽ ꓟꓽ ꓙꓽ ꓜꓲꓼ ꓢꓰꓽ ꓡ? ꓡ ꓞꓳ ꓥꓪꓽ ꓔꓴ ꓔꓯ ꓑ ꓑ ꓥꓪꓽ ꓑꓬ ꓐꓱ ꓖꓶˍ ꓟ ꓐꓰ꓾ ꓮ ꓟꓬ ꓠꓳꓸ ꓘꓴꓽ ꓖꓳ ꓫ ꓟꓶˍ ꓟ ꓔꓯ ꓠꓴ ꓪꓽ ꓚꓲꓸ ꓟꓽ ꓟꓶ ꓡ? 10 ꓝꓮꓲ꓾ ꓡ ꓞꓳ ꓡꓲ ꓔꓴ ꓔꓯ ꓑ ꓑ ꓫꓵꓽ ꓑꓬ ꓐꓱꓻ ꓖꓶˍ ꓟ ꓐꓰ꓾ ꓮ ꓟꓬ ꓠꓳꓸ ꓘꓴ ꓖꓳ ꓫ ꓟꓶˍ ꓟ ꓔꓯˍ ꓟꓲ ꓠꓴ ꓪꓽ ꓚꓲꓸ ꓟꓽ ꓟꓶ ꓡ? 11 ꓥꓪ ꓠꓴ ꓪꓽ ꓔꓯ ꓐꓯ ꓖꓶˍ ꓟ ꓠꓬ꓾ ꓑ ꓑ ꓔꓯ ꓐꓯˍ ꓟ ꓟꓽ ꓥ ꓟ ꓠꓴ ꓪꓽ ꓟꓽ ꓙ ꓜꓲꓼ ꓡ? ꓒ-ꓡꓲ-ꓢꓷ ꓐꓴˍ ꓐꓰ ꓢ-ꓓꓴ-ꓗꓷ ꓐꓴ ꓙꓵꓽ ꓧꓶꓽ ꓔꓯ ꓤ ꓟꓳ꓾ ꓐꓯˍ ꓟ ꓥꓳ꓾ ꓐꓯ ꓖꓶˍ ꓡꓳ꓿ 12 ꓖꓳ ꓡꓱ ꓠꓬ ꓑ ꓑ ꓙꓵꓽ ꓧꓶꓽ ꓔꓯ ꓤ ꓟꓳ꓾ ꓐꓯˍ ꓟ ꓟꓽ ꓥ ꓥ꓾ ꓒ-ꓡꓲ-ꓢꓷ ꓐꓴˍ ꓐꓰ ꓢ-ꓓꓴ-ꓗꓷ ꓐꓴ ꓟꓸ ꓟꓲꓽ ꓔꓯ ꓤ ꓟꓳ꓾ ꓐꓯˍ ꓟ ꓥ ꓟ ꓔꓯ ꓬꓲ ꓪꓽ ꓙ ꓜꓲꓼ ꓡꓰˍ ꓡꓳ꓿ 13 ꓢꓲ-ꓢ-ꓡꓰ ꓒꓲ-ꓡꓲ-ꓒꓲ ꓟꓵꓽ ꓗꓪ ꓛꓲ ꓬꓰ ꓕꓯ꓾ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓡ-ꓞꓳ-ꓮ-ꓐꓲ ꓥꓪ ꓮꓽ ꓟ ꓥ ꓟ ꓢꓴꓻ ꓮ ꓡꓲ ꓐꓯˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 14 ꓖꓳ ꓕꓯ ꓬꓲ ꓪꓽ ꓡꓰ꓾ ꓠꓴ ꓠꓬ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓥꓳ꓾ ꓐꓯ ꓢꓴ ꓕꓲ ꓐꓱ ꓙꓳˍ ꓡꓳ꓿ ꓬꓲ-ꓡꓲ-ꓬ ꓥ ꓡꓳ꓾ ꓥ ꓠꓬ ꓬꓰ-ꓡꓲ-ꓟꓲ ꓥꓳ꓾ ꓥ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓗꓪ ꓟ ꓕꓲ ꓣꓳ ꓥꓳ꓾ ꓐꓯ ꓢꓴˍ ꓟꓲ ꓕꓲ ꓐꓱ ꓙꓳˍ ꓡꓳ꓾ ꓐꓯ ꓖꓶˍ ꓡꓳ꓿ 15 ꓬꓲ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓮꓽ ꓟ ꓥ ꓟ ꓠꓴ ꓪꓽ ꓡꓲꓸꓽ꓾ ꓮ ꓡꓲ ꓐꓯˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 16 ꓢꓲ-ꓟꓴ ꓒꓲ-ꓕꓱ ꓡꓰ ꓒꓳꓹ ꓖꓶ ꓢꓲ꓾ ꓠꓴ ꓠꓽ ꓙꓲ-ꓢꓴ ꓖꓳ ꓕꓲ ꓣꓳ ꓟ ꓥꓳ꓿ ꓢꓯꓸ ꓔꓬ ꓟ ꓪꓴ-ꓢ ꓬꓲ ꓮ ꓐꓲ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 17 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ ꓬꓲ ꓔꓯ꓾ ꓬꓳ-ꓠ ꓬꓲ ꓤ ꓢꓲ-ꓟꓴꓳ꓾ ꓠꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ ꓡ ꓞꓳ ꓡꓰ ꓠꓴ ꓔꓯ ꓟꓳꓸ ꓖꓶˍ ꓟ ꓟꓽ ꓥ꓾ ꓟꓴꓽ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐ ꓡꓰ ꓟꓳꓸ ꓖꓶˍ ꓟ ꓥ ꓡꓳ꓿ 18 ꓥꓪ ꓝꓮꓲ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓠꓽ ꓒꓲ-ꓕꓱ ꓥꓳ꓿ ꓡꓳ ꓓꓰ ꓕꓱ ꓟ ꓕꓯꓽ ꓢꓲ ꓗꓪ ꓥꓪ ꓘꓴ ꓜꓲ ꓞꓳ ꓥꓪ ꓜꓶ ꓔ ꓬꓰˍ ꓥꓳ꓿ ꓫꓵꓻ ꓓꓴꓽ ꓬꓲ ꓪꓽ ꓠꓬꓲˍ ꓟ ꓡꓰ ꓥꓪ ꓘꓴ ꓜꓲ ꓞꓳ ꓔꓯ ꓧꓪꓸ ꓡꓰ ꓟꓽ ꓘꓴꓻ꓿ 19 ꓥꓪ ꓠꓬ ꓟꓴꓽ ꓗꓪ ꓗꓴꓷꓼ ꓜꓳꓺ ꓜꓴꓻ ꓠꓴ ꓔꓯ ꓖꓶˍ ꓥꓳ꓿ ꓟꓲ ꓠꓯ ꓗꓪ ꓠꓴꓻ ꓡꓰ ꓞꓳꓹ ꓔ ꓟ ꓮꓸ ꓫꓵ ꓥ ꓟꓲ ꓟꓴꓽ ꓗꓪ ꓗꓪˍ ꓟꓲ ꓞꓳꓹ ꓔ ꓥꓳ꓿ ꓟꓲ ꓠꓯ ꓗꓪ ꓠꓴ ꓡꓰ ꓩꓴ ꓗꓷˍ ꓟ ꓮꓸ ꓫꓵ ꓥ ꓟꓲ꓾ ꓟꓴꓽ ꓗꓪ ꓗꓪˍ ꓟꓲ ꓩꓴ ꓗꓷˍ ꓥꓳ꓾ ꓐꓯ ꓖꓶˍ ꓡꓳ꓿ 20 ꓖꓳ ꓡꓱ ꓢꓲ ꓬꓲ ꓠꓬ ꓙꓲ-ꓢꓴ ꓖꓳ ꓕꓲ ꓣꓳ ꓥ ꓟ꓾ ꓮꓽ ꓟ ꓔꓯˍ ꓟꓲ ꓟꓽ ꓐꓯ ꓖꓶ ꓠꓹ ꓟ꓾ ꓬꓲ ꓡꓰ ꓛꓳꓽ ꓒꓯꓹ ꓐꓴ ꓔꓯ ꓙꓳ ꓗꓽ ꓖꓶˍ ꓡꓳ꓿ 21 ꓖꓳ ꓕꓲ ꓝꓲꓸ ꓕ ꓑꓳꓸ ꓬꓰ-ꓢꓴ ꓡꓰ꓾ ꓬꓲ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰ ꓢꓲ꓾ ꓞꓳ ꓪꓴꓽ ꓞꓳ ꓔꓲ ꓐꓴˍ ꓐꓰ ꓔꓲ ꓒ ꓪꓴꓸ ꓓꓵ ꓣꓱ ꓢꓴˍ ꓐꓰ꓾ ꓙꓵꓽ ꓗ ꓟꓸ ꓒ ꓐꓴ ꓡꓯꓼ ꓒꓯꓹ ꓗꓪ ꓫ ꓙꓵˍ ꓟ ꓮꓽ ꓟꓬꓹ ꓜꓲꓽ ꓠ ꓗꓹ ꓟ ꓐꓰ꓾ ꓢꓰꓼ ꓗꓷˍ ꓟˍ ꓟꓲ ꓔꓳꓹ ꓜꓳꓽ ꓢꓲ꓾ ꓢꓽ ꓠꓬꓲ ꓕꓲ ꓠꓬꓲ ꓗꓪ ꓢꓯꓸ ꓬꓲꓼ ꓡ ꓠ ꓗꓹ ꓟ꓾ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓐꓯ ꓟꓳꓸ ꓖꓶ ꓪꓴꓸ ꓔꓴˍ ꓡꓳ꓿ 22 ꓖꓳ ꓕꓯ ꓒꓲ-ꓕꓱ ꓡꓰ ꓬꓲ ꓔꓯ ꓧꓳꓽ ꓓꓳ ꓙꓰ ꓢꓲ꓾ ꓢꓲ ꓒꓽꓳ꓾ ꓮ ꓡꓲ ꓥ ꓟꓲ ꓠꓴ ꓔꓯ ꓖꓳ ꓡꓱ ꓕꓽ ꓗꓷ ꓡꓰ ꓝꓲ꓾ ꓐꓯˍ ꓡꓳ꓿ 23 ꓬꓰ-ꓢꓴ ꓠꓬ ꓔꓲꓹ ꓒꓳꓹ ꓢꓲ ꓒꓲ-ꓕꓱ ꓔꓯ꓾ ꓢ-ꓓꓯꓳ꓾ ꓠꓴ ꓥꓪ ꓗꓸ ꓠꓯ ꓢꓲ ꓗꓪ ꓙꓰ꓿ ꓠꓴ ꓠꓽ ꓥꓪ ꓛꓲ ꓕꓲꓽ ꓓꓴ ꓕꓲ ꓟ ꓥ ꓡꓳ꓿ ꓠꓴ ꓓꓵꓽ ꓙꓽˍ ꓟ ꓠꓬ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓧꓳꓹ꓿ ꓠꓴ ꓠꓽ ꓞꓳ ꓤ ꓓꓵꓽ ꓙ ꓚꓱꓹ ꓗꓪˍ ꓡꓰꓽ ꓓꓵꓽ ꓙ ꓔꓬ ꓐꓷ꓾ ꓐꓯ ꓖꓶˍ ꓡꓳ꓿ 24 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓮꓽ ꓟ ꓥꓪ ꓔꓯ ꓛꓳ ꓠꓲ ꓫꓵˍ ꓠꓬ꓾ ꓬꓲ ꓚꓲꓸ ꓛꓬ ꓔꓯ ꓟꓽ ꓗꓹ ꓐꓽ ꓐ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ ꓥꓪ ꓔꓯ ꓛꓳ ꓡ ꓠꓯꓹ ꓡꓳ꓿ 25 ꓮ ꓟˍ ꓟꓲ ꓬꓲ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓗꓹ ꓐꓽ ꓢꓴ ꓠꓬ ꓬꓲ ꓢꓯꓼ ꓟꓬ ꓒꓲꓼ ꓬꓰˍ ꓥꓳ꓿ ꓥꓪ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓟꓽ ꓗꓹ ꓐꓽ ꓢꓴ ꓠꓽ ꓬꓲ ꓢꓯꓼ ꓟꓬ ꓧꓪ ꓟꓶˍ ꓥꓳ꓿ 26 ꓞꓳ ꓤ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓮꓽ ꓙꓵ ꓡꓱꓸꓼ ꓒꓳꓹ ꓟꓶˍ ꓟꓲ꓾ ꓚꓲꓸ ꓛꓬ ꓢꓯꓼ ꓟꓬ ꓑ ꓗꓷ ꓠꓬ ꓮꓸ ꓫꓵ ꓙꓲ ꓖꓴ ꓟꓶˍ ꓥꓳ ꓪ? ꓞꓳ ꓤ ꓠꓬ ꓮꓸ ꓫꓵ ꓡꓰ ꓬꓲ ꓚꓲꓸ ꓛꓬ ꓢꓯꓼ ꓟꓬ ꓑ ꓟꓶ ꓓ ꓢꓰ? 27 ꓡ-ꓞꓳ-ꓮ-ꓐꓲ ꓠꓬ ꓬꓲ ꓐꓹ ꓐ ꓐꓬꓱꓼ ꓡꓱꓼ ꓡꓱ ꓟ ꓠꓯꓸꓼ ꓗꓪ꓾ ꓟꓴꓽ ꓗꓪ ꓝꓲ ꓓꓴ ꓐꓴˍ ꓐꓰ ꓬꓯꓼ ꓡ ꓥꓳ꓿ ꓖꓳ ꓕꓯ ꓮꓽ ꓟ ꓔꓯˍ ꓟꓲ ꓬꓲ ꓬꓰ ꓗꓷ ꓟ ꓟꓬꓱꓽ ꓔꓯ ꓛꓳ ꓢꓲ ꓬꓲ ꓔꓯ ꓚꓱꓹ ꓖꓶˍ ꓥꓳ꓿ 28 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓕꓱ ꓗꓪ ꓦꓰꓼ ꓞ ꓢꓴ ꓕꓲ ꓐꓱ ꓠꓬ꓾ ꓡ-ꓞꓳ-ꓮ-ꓐꓲ ꓬꓲ ꓗꓴꓷꓼ ꓠꓯꓸꓼ ꓗꓪ ꓡꓻˍ ꓟ ꓔꓯ ꓟꓽ ꓟꓳ ꓕ ꓑꓳ꓾ ꓮ ꓡꓲ ꓥ ꓟꓲ ꓟꓽ ꓫꓵꓻ꓾ ꓐꓯ ꓖꓶˍ ꓡꓳ꓿

ꓟ-ꓔꓲ 17

1 ꓛꓳꓼ ꓠꓬꓲ ꓗꓳꓸ ꓗꓷ ꓠꓬ꓾ ꓬꓰ-ꓢꓴ ꓠꓽ ꓒꓲ-ꓕꓱˍ ꓐꓰ ꓬ-ꓗꓴˍ ꓐꓰ ꓬ-ꓗꓴ ꓬꓲ ꓠꓬꓲ ꓤꓽ ꓬꓳ-ꓦ ꓔꓯˍ ꓡꓰꓽ ꓧꓳꓽ ꓔ ꓢꓲ꓾ ꓟꓴˍ ꓟ ꓪꓽ ꓚꓲ ꓕꓲꓽ ꓚꓲ ꓗꓪ ꓓꓯ ꓙꓰˍ ꓡꓳ꓿ 2 ꓖꓳ ꓗꓪ ꓬꓰ-ꓢꓴ ꓠꓬ ꓬꓲ ꓪꓽ ꓟꓳꓻ ꓟꓳˍ ꓡꓰꓽ ꓬꓲ ꓒꓬꓱꓽ ꓑꓶꓸ ꓡꓰ ꓢꓲ꓾ ꓬꓲ ꓒꓬꓱꓽ ꓟꓬ ꓠꓬ ꓟꓲꓽ ꓟꓲˍ ꓡꓰ ꓐꓰ ꓣꓳꓺ ꓡ ꓡꓳ꓿ ꓬꓲ ꓐꓵꓻ ꓞꓶꓽˍ ꓟꓲ ꓠꓬꓲ ꓟꓳꓻ ꓓꓴ ꓡꓰ ꓐꓰ ꓒꓴꓻ ꓛꓹ ꓛ ꓗꓷ ꓡꓰꓳ꓿ 3 ꓖꓳ ꓕꓯ ꓟꓳ-ꓫꓲˍ ꓐꓰ ꓬꓲ-ꓡꓲ-ꓬˍ ꓟꓲ ꓡ ꓢꓲ꓾ ꓬꓰ-ꓢꓴˍ ꓐꓰ ꓫꓸ ꓕꓱ ꓡꓯꓽ ꓘꓳ ꓔꓬ ꓟ ꓔꓯ ꓛꓳꓽ ꓒꓯꓹ ꓖꓳ ꓢ ꓣꓳ ꓟꓳꓻˍ ꓡꓳ꓿ 4 ꓒꓲ-ꓕꓱ ꓡꓰ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓕꓱ ꓗꓪ ꓔꓬ ꓠꓬ ꓣꓳꓽ ꓐꓱ ꓶ ꓙꓲꓻˍ ꓡꓳ꓿ ꓠꓴ ꓠꓲꓹ ꓫꓵˍ ꓠꓬ ꓥꓪ ꓡꓰ ꓕꓱ ꓗꓪ ꓦꓲ ꓐꓱ ꓢ ꓟ ꓫꓬˍ ꓥꓳ꓿ ꓠꓴ ꓐꓱ ꓶ ꓕꓲ ꓟ꓾ ꓟꓳ-ꓫꓲ ꓐꓱ ꓶ ꓕꓲ ꓟ꓾ ꓬꓲ-ꓡꓲ-ꓬ ꓐꓱ ꓶ ꓕꓲ ꓟ ꓫꓬˍ ꓥꓳ꓾ ꓐꓯˍ ꓡꓳ꓿ 5 ꓒꓲ-ꓕꓱ ꓖꓳ ꓡꓱ ꓐꓯ ꓔꓬ ꓢꓰꓽ ꓕꓯ꓾ ꓐꓬꓱꓼ ꓡꓱꓼ ꓟ ꓟꓴ ꓗꓴꓸ ꓕꓲ ꓘꓴꓸ ꓡꓰ ꓬꓲ ꓪꓽ ꓔꓯ ꓛꓸ ꓡꓰ ꓢꓲ꓾ ꓟꓴ ꓗꓴꓸ ꓠꓯꓸꓼ ꓗꓪ ꓐꓰ ꓢꓯꓼ ꓕꓲ ꓟ ꓓꓳ ꓡ ꓢꓲ ꓠꓬꓲ꓾ ꓕꓱ ꓟ ꓠꓬ ꓥꓪ ꓠꓲꓹ ꓠꓵˍ ꓟ ꓐꓰ ꓥꓪ ꓠꓲꓹ ꓒꓴˍ ꓟ ꓮ ꓐꓲ ꓥ ꓡꓳ꓿ ꓠꓴ ꓪꓽ ꓬꓲ ꓔꓯ ꓠ ꓠꓹ꓾ ꓐꓯˍ ꓡꓳ꓿ 6 ꓢꓯꓼ ꓕꓱ ꓟ ꓔꓯ ꓛꓳꓽ ꓒꓯꓹ ꓐꓴ ꓑ ꓙꓽ ꓗꓷ ꓠꓬ ꓙꓳꓺ ꓠꓬꓲ ꓛꓱꓽ ꓠꓬꓲ ꓟꓲ ꓛꓬ ꓗꓪ ꓟꓳꓼ ꓡꓰˍ ꓡꓳ꓿ 7 ꓖꓳ ꓕꓯ ꓬꓰ-ꓢꓴ ꓡ ꓢꓲ ꓬꓲ ꓪꓽ ꓔꓯ ꓫꓱꓹ ꓢꓲ ꓠꓬꓲ꓾ ꓔꓴ ꓡꓯ꓾ ꓕꓽ ꓙꓳꓺ꓾ ꓐꓯ ꓖꓶˍ ꓡꓳ꓿ 8 ꓖꓳ ꓕꓯ ꓬꓲ ꓪꓽ ꓡꓳꓸ ꓠꓬꓲ ꓠꓬ꓾ ꓬꓰ-ꓢꓴ ꓬꓲ ꓕꓲ ꓣꓳ ꓔꓯˍ ꓡꓰ ꓟꓽ ꓥ ꓠꓬ꓾ ꓠꓱꓸ ꓐꓯꓼ ꓮꓽ ꓟ ꓔꓯˍ ꓟꓲ ꓟꓽ ꓟꓳ꓿ 9 ꓪꓽ ꓚꓲ ꓗꓪ ꓐꓰ ꓬꓲ ꓪꓽ ꓬꓯꓼ ꓡ ꓔꓬ ꓕꓯ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓡ-ꓞꓳ-ꓮ-ꓐꓲ ꓫꓵꓻ ꓢꓲ ꓟꓽ ꓢꓯꓸ ꓬꓲꓼ ꓡ ꓕ ꓑꓳ꓾ ꓠꓴ ꓪꓽ ꓡꓳꓸ ꓟꓳꓻˍ ꓟ ꓮꓽ ꓟ ꓔꓯˍ ꓟꓲ ꓕꓽ ꓐꓯ ꓖꓶ꓾ ꓐꓰ ꓕꓵꓼ ꓪꓽ ꓖꓶˍ ꓡꓳ꓿ 10 ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓙꓵꓽ ꓗ ꓟꓸ ꓒ ꓐꓴ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓬꓲ-ꓡꓲ-ꓬ ꓧꓶꓸ ꓕꓯ ꓡ ꓠ ꓗꓹ ꓡꓳ꓾ ꓐꓯˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 11 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓬꓲ-ꓡꓲ-ꓬ ꓠꓽ ꓚꓵ ꓚꓵ ꓡ ꓢꓲ ꓮꓽ ꓙꓵ ꓡꓱꓸꓼ ꓫꓬꓹ ꓔꓶ ꓖꓶˍ ꓥꓳ꓿ 12 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ-ꓡꓲ-ꓬ ꓠꓬ ꓡ ꓗꓷꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓬꓲ ꓔꓯ ꓟꓽ ꓢꓷ꓿ ꓬꓲ ꓪꓽ ꓬꓲ ꓔꓯ ꓮ ꓡꓲ ꓬꓰ ꓠꓲꓹ ꓫꓵˍ ꓠꓬ ꓖꓳ ꓡꓱ ꓬꓰ ꓖꓶꓽ ꓗꓷꓳ꓿ ꓖꓳ ꓟ ꓡꓰ ꓐꓰ ꓡ-ꓞꓳ-ꓮ-ꓐꓲˍ ꓟꓲ ꓬꓲ ꓪꓽ ꓡꓯꓼ ꓒꓯꓹ ꓗꓪ ꓫꓸ ꓙꓵ ꓠ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 13 ꓖꓳ ꓕꓯ ꓬꓰ-ꓢꓴ ꓠꓽ ꓖꓳ ꓓꓱ ꓔꓲꓹ ꓢꓴ ꓬꓳ-ꓦ ꓔꓯ ꓖꓴ ꓢꓲ ꓐꓯ ꓔꓬ ꓟ ꓔꓯ ꓛꓳꓽ ꓒꓯꓹ ꓐꓴ ꓙꓽ ꓜꓲꓼ ꓡꓰˍ ꓡꓳ꓿ 14 ꓞꓳ ꓜꓴꓻ ꓔꓬ ꓗꓪ ꓬꓲ ꓪꓽ ꓛꓲ ꓬꓰ ꓠꓬ꓾ ꓡ ꓞꓳ ꓕꓲ ꓣꓳ ꓬꓰ-ꓢꓴ ꓔꓯ ꓡ ꓢꓲ꓾ ꓬꓲ ꓟꓲ ꓕꓯ ꓗꓪ ꓛꓲ ꓝꓲꓸ ꓖꓶꓽ ꓢꓲ ꓠꓬꓲ꓾ 15 ꓢꓲ ꓒꓽꓳ꓾ ꓥꓪ ꓮ ꓐꓲ ꓔꓯ ꓫꓱ ꓤ ꓙ ꓡꓯ꓿ ꓬꓲ ꓠꓬ ꓚꓵꓹ ꓠꓻ ꓠꓻ ꓠꓬꓲ ꓮꓽ ꓘꓶ ꓫꓸ ꓙꓵ ꓔꓬ ꓡꓳ꓿ ꓬꓲ ꓠꓽ ꓮꓸ ꓔꓳꓸ ꓗꓪˍ ꓟꓲ꓾ ꓬꓲꓻ ꓙꓬ ꓗꓪˍ ꓟꓲ꓾ ꓮ ꓕꓯꓽ ꓟꓶ ꓕꓯ ꓓꓳꓽ ꓡꓰˍ ꓡꓳ꓿ 16 ꓥꓪ ꓡꓰ ꓬꓲ ꓔꓯ ꓠꓴ ꓛꓳꓽ ꓒꓯꓹ ꓐꓴ ꓔꓬ ꓗꓪ ꓧꓳꓽ ꓔꓯꓹ ꓡ ꓥ ꓟꓲ꓾ ꓬꓲ ꓪꓽ ꓠꓬ ꓬꓲ ꓔꓯ ꓫꓬꓹ ꓓ ꓡꓰ ꓟꓽ ꓐ ꓡ ꓐꓷ꓾ ꓐꓯˍ ꓡꓳ꓿ 17 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓙꓵꓻ ꓠꓲꓹ ꓟꓽ ꓙꓳ ꓟ ꓐꓰ ꓓꓵꓽ ꓙ ꓧꓶꓸ ꓙꓰ ꓟ ꓕꓲ ꓤꓶ ꓢꓴꓳ꓾ ꓠꓴ ꓪꓽˍ ꓐꓰ ꓥꓪ ꓮ ꓡꓲ ꓟꓶ ꓛꓲ ꓔꓬ ꓠꓯꓹ ꓡ? ꓠꓴ ꓪꓽ ꓔꓯ ꓥꓪ ꓮ ꓡꓲ ꓟꓶ ꓛꓲ ꓜꓲꓽ ꓖꓶ ꓠꓯꓹ ꓡ? ꓠꓴ ꓤ ꓔꓯ ꓕꓻ ꓥꓪ ꓔꓬ ꓗꓪ ꓧꓳꓽ ꓔꓯꓹ ꓡꓯ꓾ ꓐꓯ ꓖꓶˍ ꓡꓳ꓿ 18 ꓖꓳ ꓕꓯ ꓬꓰ-ꓢꓴ ꓡꓰ ꓠꓲꓽ ꓔꓯ ꓕꓼ ꓗꓷ ꓠꓬ꓾ ꓠꓲꓽ ꓠꓽ ꓬꓲ ꓔꓯˍ ꓐꓰ ꓓꓳ ꓡ ꓢꓲ꓾ ꓖꓳ ꓕꓲ ꓑꓹ ꓗꓪ ꓐꓰ ꓤ ꓠꓱ ꓤ ꓠꓽ ꓓꓻ ꓡꓰꓳ꓿ 19 ꓬꓲ ꓛꓳꓽ ꓒꓯꓹ ꓐꓴ ꓠꓬ ꓘꓳ ꓫꓱ ꓫꓱˍ ꓗꓪ ꓬꓰ-ꓢꓴ ꓔꓯ ꓡ ꓢꓲ꓾ ꓥꓪ ꓠꓴꓽ ꓠꓬ ꓮ ꓡꓲ ꓗꓹ ꓠꓬꓲ ꓠꓲꓽ ꓔꓯ ꓖꓼ ꓓꓳ ꓗꓷ ꓟꓽ ꓐ ꓡ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 20 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓙꓵꓻ ꓠꓲꓹ ꓣꓳꓺˍ ꓠꓬꓲ ꓥ ꓡꓳ꓿ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓙꓵꓻ ꓠꓲꓹ ꓠꓬ ꓪꓳꓽ ꓒꓲ ꓫꓵꓸ ꓕꓲ ꓢꓶꓽ ꓪꓴꓻ ꓛꓲ ꓤꓽˍ ꓡꓰꓽ ꓙꓳˍ ꓟꓲ꓾ ꓪꓽ ꓚꓲ ꓕꓱ ꓕꓲ ꓚꓲ ꓔꓯ꓾ ꓖꓳ ꓗꓪ ꓙꓵꓺ ꓙꓰ꓾ ꓐꓯˍ ꓠꓬ꓾ ꓙꓵꓺ ꓙꓰˍ ꓥꓳ꓿ ꓖꓳ ꓡꓱ ꓠꓬ ꓠꓴ ꓪꓽ ꓬꓰ ꓟꓽ ꓐ ꓡ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ꓿ 21 ꓕꓱ ꓡꓱ ꓫꓵꓽ ꓦ ꓠꓽ꓾ ꓜꓽ ꓓꓴ ꓚꓲꓸ ꓢꓲ ꓪꓽ ꓘꓴˍ ꓟ ꓗꓪ ꓐꓰ ꓟꓽ ꓥ ꓠꓬ ꓟꓽ ꓓꓳ ꓙꓰ꓾ ꓐꓯˍ ꓡꓳ꓿ 22 ꓬꓲ ꓪꓽ ꓖ-ꓡꓲ-ꓡꓲ ꓗꓪ ꓔꓬ ꓢꓰ ꓕꓯ꓾ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓡ-ꓞꓳ-ꓮ-ꓐꓲ ꓔꓯ ꓠꓽ ꓞꓳ ꓤ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷˍ ꓥꓳ꓿ 23 ꓬꓲ ꓪꓽ ꓡꓰ ꓬꓲ ꓔꓯ ꓢꓰꓼ ꓗꓷ ꓢꓲ꓾ ꓢ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓬꓲ ꓢꓯꓸ ꓬꓲꓼ ꓡ ꓥꓳ꓾ ꓐꓯˍ ꓠꓬꓲ꓾ ꓛꓳꓽ ꓒꓯꓹ ꓐꓴ ꓠꓲꓹ ꓟ ꓮꓽ ꓘꓶꓸ ꓫꓸˍ ꓡꓳ꓿ 24 ꓬꓲ ꓪꓽ ꓘ-ꓒꓱ-ꓠꓴ ꓡꓳ ꓒꓱ ꓗꓪ ꓛꓲ ꓬꓰ ꓕꓯ꓾ ꓢꓲꓽ ꓫꓬ ꓦꓲ ꓐꓱ ꓶ ꓝꓲꓸ ꓒꓴ ꓖꓼ ꓢꓴ ꓠꓬ ꓒꓲ-ꓕꓱ ꓔꓯ ꓡ ꓢꓲ꓾ ꓠꓴ ꓪꓽ ꓟꓸ ꓒ ꓠꓬ ꓢꓲꓽ ꓫꓬ ꓦꓲ ꓐꓱ ꓶ ꓝꓲꓸ ꓒꓴ ꓟꓽ ꓓꓳˍ ꓡ?꓾ ꓐꓯˍ ꓡꓳ꓿ 25 ꓒꓲ-ꓕꓱ ꓡꓰ꓾ ꓓꓳꓺˍ ꓡꓳ꓾ ꓐꓯ ꓖꓶ ꓢꓲ ꓬꓲ ꓦꓲ ꓗꓪ ꓓꓵꓽ ꓡꓰ ꓠꓬ꓾ ꓬꓰ-ꓢꓴ ꓧꓶꓸ ꓕꓯ ꓬꓲ ꓔꓯ꓾ ꓢꓲ-ꓟꓴꓳ꓾ ꓠꓴ ꓮ ꓡꓲ ꓓꓵꓽ ꓙꓽˍ ꓡ? ꓟꓲ ꓠꓯ ꓗꓪ ꓟ ꓪ ꓔꓲ ꓠꓬ꓾ ꓝꓲꓸ ꓒꓴˍ ꓐꓰ ꓟꓵꓽ ꓒꓵꓽ ꓮꓽ ꓟ ꓔꓯ ꓧꓪꓺˍ ꓡ? ꓚꓲꓸ ꓛꓬ ꓤ ꓠꓱ ꓔꓯ ꓧꓪˍ ꓡ? ꓥ ꓠꓬ ꓠꓱꓸ ꓐꓯꓼ ꓢꓴ ꓔꓯ ꓧꓪꓺˍ ꓡ?꓾ ꓐꓯˍ ꓡꓳ꓿ 26 ꓒꓲ-ꓕꓱ ꓡꓰ꓾ ꓠꓱꓸ ꓐꓯꓼ ꓢꓴ ꓔꓯ ꓧꓪˍ ꓡꓳ ꓐꓯˍ ꓕꓯ꓾ ꓬꓰ-ꓢꓴ ꓡꓰ ꓬꓲ ꓔꓯ꓾ ꓖꓳ ꓡꓱ ꓥ ꓠꓬ ꓤ ꓠꓱ ꓐꓴ ꓠꓽ ꓚꓳ ꓪꓴꓸ ꓥ ꓠꓬꓲ ꓝꓲꓸ ꓒꓴ ꓐꓶꓻ ꓟ ꓛꓵ ꓡꓳ ꓫꓵꓽ ꓥꓳ꓾ ꓐꓯˍ ꓡꓳ꓿ 27 ꓖꓳ ꓡꓱ ꓥ ꓟꓲ ꓒꓴ ꓝꓲꓸ ꓢꓴ ꓐꓴ ꓟꓽ ꓓꓵꓽ ꓙ ꓟꓬꓽ ꓡꓰ ꓠꓹ ꓟ꓾ ꓠꓴ ꓠꓬ ꓬꓲꓻ ꓡꓴꓽ ꓐꓱꓻ ꓗꓪ ꓥꓪꓸ ꓟꓬꓺ ꓬꓰ꓿ ꓬꓲ ꓪꓴꓸ ꓟꓬꓺ ꓟꓶˍ ꓟ ꓖꓳ ꓕꓲ ꓟ ꓣꓴ ꓢꓲ꓾ ꓬꓲ ꓟꓷꓽ ꓠꓷꓹ ꓦꓶꓹ ꓗꓷ ꓠꓬ ꓒꓴ ꓕꓲ ꓫꓱ-ꓘꓷ-ꓡꓷ ꓧꓪ ꓟꓶˍ ꓥꓳ꓿ ꓖꓳ ꓟ ꓔꓯꓹ ꓡ ꓢꓲ ꓠꓴˍ ꓐꓰ ꓥꓪ ꓐꓱ ꓶ ꓢꓲꓽ ꓫꓬ ꓦꓲ ꓝꓲꓸ ꓒꓴ ꓬꓲ ꓪꓽ ꓔꓯ ꓖꓶ꓾ ꓐꓯ ꓖꓶˍ ꓡꓳ꓿

ꓟ-ꓔꓲ 18

1 ꓖꓳ ꓕꓲ ꓝꓲ ꓗꓪ ꓛꓳ ꓒꓯꓹ ꓐꓴ ꓠꓬ ꓬꓰ-ꓢꓴ ꓔꓯ ꓡ ꓢꓲ꓾ ꓟꓴꓽ ꓗꓪ ꓗꓴꓷꓼ ꓗꓪ ꓮꓸ ꓓꓲꓽ ꓪꓴꓽˍ ꓟ ꓮꓽ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 2 ꓬꓰ-ꓢꓴ ꓠꓬ ꓤ ꓠꓱ ꓤ ꓕꓲ ꓣꓳ ꓔꓯ ꓘꓴ ꓔꓯꓹ ꓡ ꓢꓲ꓾ ꓬꓲ ꓪꓽ ꓗꓳ ꓡꓳ ꓗꓪ ꓦꓰꓼ ꓞꓹ ꓝꓲ ꓢꓲ ꓠꓬꓲ꓾ 3 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓒꓳꓹ ꓬꓲꓼ ꓡ ꓢꓲ ꓤ ꓠꓱ ꓤˍ ꓡꓰ ꓐꓰ ꓟꓽ ꓒꓬꓱꓼ ꓡ ꓠꓬ꓾ ꓮ ꓡꓲ ꓥ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓠꓴ ꓪꓽ ꓓꓵꓽ ꓡꓰ ꓟꓽ ꓓ꓿ 4 ꓖꓳ ꓡꓱ ꓠꓬꓲ ꓮꓽ ꓟ ꓥ ꓟꓲ ꓤ ꓠꓱ ꓤ ꓕꓱ ꓟ ꓡꓰ ꓐꓰ ꓚꓲꓸ ꓛꓬ ꓔꓯ ꓱꓺ ꓡꓰ ꓝꓲ ꓢꓴ ꓠꓬ꓾ ꓟꓴꓽ ꓗꓪ ꓗꓴꓷꓼ ꓗꓪ ꓮꓸ ꓓꓲꓽ ꓪꓴꓽˍ ꓟ ꓒꓬꓱꓼ ꓡ ꓥꓳ꓿ 5 ꓮꓽ ꓟˍ ꓟꓲ ꓥꓪ ꓟꓬꓱꓺ ꓗꓪ ꓐꓰ ꓕꓱ ꓡꓱ ꓫꓵꓽ ꓤ ꓠꓱ ꓤ ꓕꓲ ꓣꓳ ꓔꓯ ꓘꓳ ꓣꓴˍ ꓠꓬ ꓥꓪ ꓔꓯ ꓘꓳ ꓣꓴˍ ꓟ ꓥ ꓡꓳ꓿ 6 ꓮ ꓟˍ ꓟꓲ ꓥꓪ ꓔꓯ ꓙꓵˍ ꓟ ꓤ ꓠꓱ ꓤ ꓕꓱ ꓟꓬ ꓗꓪ ꓟ ꓕꓲ ꓣꓳ ꓔꓯ ꓡꓱꓸ ꓗꓷ ꓝꓲˍ ꓠꓬ꓾ ꓬꓲ ꓗꓶꓸ ꓝꓲꓸ ꓗꓪ ꓡꓳꓺ ꓙꓱꓻ ꓓꓽ ꓟ ꓞꓳꓹ ꓔ ꓢꓲ꓾ ꓠꓯꓸˍ ꓟ ꓬꓲꓻ ꓡꓴꓽ ꓐꓱꓻ ꓗꓪ ꓔꓲꓹ ꓫꓵꓻ ꓝꓲˍ ꓟ ꓠꓬ ꓬꓲ ꓐꓱ ꓶ ꓟꓬꓽ ꓠꓬꓲ ꓙꓲꓻˍ ꓡꓳ꓿ 7 ꓞꓳ ꓤ ꓔꓯ ꓡꓱꓸ ꓙꓰ ꓝꓲˍ ꓟ ꓟꓲ ꓠꓯ ꓕꓱ ꓟ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓡꓱꓸ ꓙꓰˍ ꓟ ꓬꓲ ꓑꓶꓸ ꓠꓽ ꓟꓽ ꓙꓳ ꓟꓽ ꓗꓷ ꓡꓰ꓿ ꓖꓳ ꓡꓱ ꓥ ꓟꓲ ꓢꓴ ꓔꓯ ꓡꓱꓸ ꓙꓰ ꓝꓲ ꓢꓴ ꓖꓳ ꓕꓲ ꓣꓳ ꓠꓽ ꓟꓬꓽ ꓠꓬꓲ ꓫꓸ ꓙꓵˍ ꓥꓳ꓿ 8 ꓠꓴ ꓡꓯ ꓒꓯꓹ꓾ ꓥ ꓠꓬ ꓛꓲ ꓒꓯꓹ ꓡꓰ ꓠꓴ ꓔꓯ ꓡꓱꓸ ꓙꓰ ꓝꓲˍ ꓠꓬ꓾ ꓓꓶꓺ ꓡꓳꓺ ꓗꓷ꓿ ꓢꓯꓼ ꓟꓬ ꓗꓪ ꓡꓯ ꓓꓴꓽ ꓓꓴ ꓟꓴ꓾ ꓥ ꓠꓬ ꓛꓲ ꓓꓴꓽ ꓓꓴ ꓟꓴ ꓓꓵꓽ ꓡꓰˍ ꓟ ꓠꓽ꓾ ꓠꓴ ꓡꓯꓼ ꓒꓯꓹ ꓠꓬꓲꓽ ꓐ ꓡꓱꓸꓼ꓾ ꓥ ꓠꓬ ꓛꓲ ꓒꓯꓹ ꓠꓬꓲꓽ ꓐ ꓡꓱꓸꓼ ꓠꓳꓽ ꓞ ꓢꓲ ꓕꓲ ꓞꓲꓼ ꓕꓲ ꓑ ꓟ ꓮꓸ ꓔꓳ ꓗꓪ ꓡꓳꓺ ꓧꓳ ꓗꓷˍ ꓟ ꓢꓶꓸ ꓟ ꓞꓲ ꓙꓲꓻˍ ꓡꓳ꓿ 9 ꓠꓴ ꓟꓬ ꓢꓶ ꓕꓲ ꓐꓽ ꓡꓰ ꓠꓴ ꓔꓯ ꓡꓱꓸ ꓗꓷ ꓝꓲˍ ꓠꓬ꓾ ꓗꓳꓸ ꓡꓳꓺ ꓗꓷ꓿ ꓮ ꓡꓲꓳ ꓐꓯ ꓠꓬ ꓠꓴ ꓟꓬ ꓔꓲꓸ ꓔꓲꓸ ꓟꓴ ꓢꓯꓼ ꓟꓬ ꓗꓪ ꓓꓵꓽ ꓡꓰˍ ꓟ ꓠꓽ꓾ ꓟꓬ ꓢꓶꓽ ꓠꓬꓲꓽ ꓐ ꓡꓱꓸꓼ ꓠꓳꓽ ꓞꓹ ꓢꓲ ꓛꓬꓼ ꓟꓵꓽ ꓮꓸ ꓔꓳꓸ ꓗꓪ ꓡꓳ ꓧꓳꓽ ꓗꓷˍ ꓟ ꓢꓶꓸ ꓟꓽ ꓞꓲ ꓙꓲꓻˍ ꓡꓳ꓿ 10 ꓤ ꓟꓳ꓾ ꓤ ꓠꓱ ꓤ ꓕꓱ ꓟꓬ ꓗꓪ ꓟ ꓕꓲ ꓣꓳ ꓔꓯ ꓠꓴ ꓪꓽ ꓟꓳꓻ ꓟꓽ ꓟꓵ ꓕꓽ ꓬꓰ꓿ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓔꓬ ꓟ ꓬꓲ ꓪꓽ ꓝꓲ ꓓꓴ ꓠꓬ꓾ ꓮ ꓕꓯꓽˍ ꓟꓲ ꓟꓴꓽ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐ ꓬꓲ ꓒꓬꓱꓽ ꓔꓯ ꓟꓳꓻˍ ꓡꓳ꓿ 11ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓠꓽ ꓒꓲꓼ ꓬꓰˍ ꓟ ꓡ ꓞꓳ ꓔꓯ ꓚꓬꓴˍ ꓐꓰ ꓡꓻ ꓟ ꓥ ꓡꓳ꓿ 12 ꓠꓴ ꓪꓽ ꓮ ꓡꓲ ꓓꓵꓽ ꓙꓽˍ ꓡ? ꓡ ꓞꓳ ꓕꓲ ꓣꓳ ꓠꓬ ꓮ ꓣꓳ ꓕꓲ ꓦꓬꓻ ꓙꓳ ꓢꓲ ꓕꓲ ꓟ ꓪꓴꓸ ꓙꓰ ꓠꓬ꓾ ꓬꓲ ꓠꓬ ꓗꓴ ꓞꓲ ꓗꓴ ꓟ ꓔꓯ ꓪꓽ ꓚꓲ ꓗꓪ ꓗꓶ ꓔ ꓬꓰ ꓢꓲ꓾ ꓒꓲꓼ ꓬꓰ ꓟ ꓖꓳ ꓕꓲ ꓟ ꓔꓯ ꓧꓪ ꓙꓰˍ ꓡꓳ꓾ ꓟꓽ ꓥ ꓡ? 13 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓧꓪ ꓟꓶ ꓗꓷ ꓐꓷˍ ꓠꓬ꓾ ꓬꓲ ꓠꓽ ꓮ ꓣꓳ ꓕꓱ ꓕꓲ ꓟ ꓑꓶꓸ ꓓꓴ ꓗꓹ ꓛꓲˍ ꓟ ꓠꓬ꓾ ꓟꓽ ꓪꓴꓸ ꓙꓰ ꓟ ꓖꓳ ꓗꓴ ꓞꓲ ꓗꓴ ꓟ ꓑꓶꓸ ꓓꓴ ꓗꓹ ꓛꓲˍ ꓟ ꓢꓶꓸ ꓟꓽ ꓞꓲ ꓗꓹ ꓛꓲˍ ꓥꓳ꓿ 14 ꓖꓳ ꓟ ꓡꓰ ꓐꓰ ꓤ ꓠꓱ ꓤ ꓕꓱ ꓟꓬ ꓗꓪ ꓟ ꓕꓲ ꓣꓳ ꓬꓲ ꓢꓯꓼ ꓟꓬ ꓒꓲꓼ ꓬꓰ ꓠꓹ ꓟ ꓠꓬ꓾ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐ ꓠꓲꓹ ꓡꓶꓽ ꓟꓽ ꓥ꓿ 15 ꓠꓴ ꓬꓲꓼ ꓠꓴ ꓠꓬꓲ ꓕꓲ ꓣꓳ ꓡꓰ ꓠꓴ ꓔꓯ ꓛꓬ ꓡ ꓠꓬ꓾ ꓠꓴ ꓙꓰ ꓢꓲ ꓠꓴ ꓪꓽ ꓠꓬꓲꓽ ꓣꓳ ꓔꓵꓸꓼ ꓔꓬ ꓗꓪ ꓬꓲ ꓝꓴꓲ ꓖꓴ ꓟꓳꓸ ꓖꓶ꓿ ꓬꓲ ꓠꓴ ꓔꓯ ꓠ ꓠꓹˍ ꓕꓯ ꓠꓽ꓾ ꓠꓴ ꓬꓲꓼ ꓠꓴ ꓠꓬꓲ ꓔꓯ ꓠꓴ ꓘꓶꓸ ꓟꓶˍ ꓟ ꓥ ꓡꓳ꓿ 16 ꓬꓲ ꓟꓽ ꓠ ꓡꓳꓹ ꓕꓯ ꓠꓽ꓾ ꓢꓷꓸ ꓙ ꓟꓳꓻ ꓙ ꓢꓴ ꓠꓬꓲꓽ ꓢ ꓣꓳ ꓐꓯ ꓘꓶꓽ ꓗꓪ ꓐꓰ꓾ ꓮ ꓡꓲ ꓕꓲ ꓘꓶˍ ꓟꓲ ꓕꓶꓻ ꓡꓰ ꓝꓲ ꓠꓹ ꓟ꓾ ꓠꓴ ꓡꓰ ꓠꓱꓸ ꓐꓯꓼ ꓕꓲ ꓠꓬꓲꓽ ꓣꓳ ꓧꓳꓽ ꓙꓰ꓿ 17 ꓬꓲ ꓪꓽ ꓘꓶꓸ ꓘꓶꓽ ꓔꓯˍ ꓟꓲ ꓟꓽ ꓘꓳ ꓣꓴ ꓠꓬ꓾ ꓘꓴ ꓜꓲ ꓞꓳ ꓔꓯ ꓐꓯ ꓖꓶ꓿ ꓘꓴ ꓜꓲ ꓞꓳ ꓐꓯ ꓘꓶꓽ ꓔꓯˍ ꓟꓲ ꓟꓽ ꓘꓳ ꓣꓴ ꓐꓷˍ ꓠꓬ꓾ ꓬꓲ ꓔꓯ ꓐꓶꓽ ꓞꓳˍ ꓐꓰ ꓝꓲꓸ ꓫ ꓢꓴ ꓡꓰ ꓐꓰ ꓚꓬꓹ ꓗꓷ꓿ 18 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓟꓲ ꓠꓯ ꓗꓪ ꓠꓴ ꓪꓽ ꓡꓰ ꓞꓳꓹ ꓔ ꓟ ꓔꓯ ꓠꓬ ꓟꓴꓽ ꓗꓪ ꓗꓪˍ ꓟꓲ ꓞꓳꓹ ꓔ ꓥꓳ꓿ ꓟꓲ ꓠꓯ ꓗꓪ ꓠꓴ ꓪꓽ ꓡꓰ ꓩꓴ ꓗꓷˍ ꓟ ꓔꓯ ꓠꓬ ꓟꓴꓽ ꓗꓪ ꓗꓪˍ ꓟꓲ ꓩꓴ ꓗꓷˍ ꓥꓳ꓿ 19 ꓥꓪ ꓝꓮꓲ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓟꓲ ꓠꓯ ꓗꓪ ꓡ ꓞꓳ ꓠꓬꓲꓽ ꓣꓳ ꓮꓸ ꓫꓵ ꓓꓰꓽˍ ꓟꓲ꓾ ꓠꓴ ꓪꓽ ꓕꓲ ꓠꓲꓹ ꓟˍ ꓡꓰꓽ ꓥ ꓕꓯ ꓠꓽ꓾ ꓟꓴꓽ ꓗꓪ ꓗꓪ ꓟ ꓥꓪ ꓐꓹ ꓐ ꓡꓰ ꓠꓴ ꓪꓽ ꓐꓱ ꓶ ꓒꓬꓱꓼ ꓡ ꓝꓲˍ ꓥꓳ꓿ 20 ꓮ ꓡꓲꓳ ꓐꓯ ꓠꓬ ꓮ ꓡꓲ ꓗꓪˍ ꓟꓲ꓾ ꓡ ꓞꓳ ꓠꓬꓲꓽ ꓢ ꓣꓳ ꓥꓪ ꓟꓬꓱꓺ ꓗꓪ ꓐꓰ ꓜꓲꓼ ꓡꓯꓽ ꓘꓳˍ ꓠꓬ꓾ ꓥꓪˍ ꓟꓲ ꓬꓲ ꓪꓽ ꓗꓳ ꓡꓳ ꓗꓪ ꓔꓬ ꓡꓳ꓾ ꓐꓯˍ ꓡꓳ꓿ 21 ꓖꓳ ꓗꓸ ꓠꓯꓸ ꓒꓲ-ꓕꓱ ꓠꓬ ꓬꓲ ꓔꓯ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓬꓲꓼ ꓥꓪ ꓠꓬꓲ ꓥꓪ ꓔꓯ ꓛꓬꓻ ꓡ ꓠꓬ꓾ ꓥꓪ ꓬꓲ ꓔꓯ ꓮ ꓟꓬꓺ ꓧꓪꓹ ꓖꓽ ꓖꓶ ꓠꓯꓹ ꓡ? ꓫꓵꓽ ꓧꓪꓹ ꓛꓲ ꓠꓬ ꓓꓻˍ ꓥꓳ ꓪ?꓾ ꓐꓰ ꓠ ꓠꓬꓲˍ ꓡꓳ꓿ 22 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓔꓯ ꓥꓪ ꓫꓵꓽ ꓧꓪꓹˍ ꓡꓰ ꓟꓽ ꓐꓯ꓾ ꓫꓵꓽ ꓧꓪꓹ ꓟ ꓫꓵꓽ ꓞꓲ ꓧꓪꓹˍ ꓟꓲ ꓖꓽ ꓖꓶ꓿ 23 ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓽ꓾ ꓪ ꓔꓲ ꓕꓲ ꓣꓳ ꓬꓲ ꓚꓳ ꓑꓸ ꓐꓴˍ ꓐꓰ ꓶ ꓡꓯꓼ ꓢꓪꓸ ꓠꓲꓹ ꓫꓵˍ ꓟ ꓡꓰ ꓐꓰ ꓗꓹ ꓡꓳ꓿ 24 ꓬꓲ ꓢꓪꓸ ꓪꓴꓸ ꓔꓴˍ ꓕꓯ꓾ ꓬꓲ ꓔꓯ ꓒꓴ ꓕꓲ ꓟꓶꓽ ꓕ-ꓡꓰ-ꓔꓷ ꓐꓵˍ ꓟ ꓕꓲ ꓣꓳ ꓧꓳꓽ ꓔꓯꓹ ꓡ ꓡꓳ꓿ 25 ꓬꓲ ꓠꓽ ꓮꓸ ꓫꓵ ꓐꓶꓻ ꓓꓴ ꓟꓽ ꓙꓳ ꓠꓬꓲ ꓪꓽ ꓔꓲ ꓡꓰ꓾ ꓬꓲˍ ꓐꓰ ꓬꓲ ꓤ ꓟꓶꓻ ꓤ ꓠꓱˍ ꓐꓰ꓾ ꓬꓲ ꓙꓳˍ ꓟ ꓮꓽ ꓙꓵ ꓪꓴꓽ ꓗꓷ ꓢꓲ꓾ ꓬꓲ ꓐꓵˍ ꓟ ꓶꓻ ꓡꓯꓼ ꓐꓶꓻ ꓖꓴꓻ ꓡꓰ ꓝꓲ꓾ ꓐꓰ ꓕꓵꓼ ꓪꓽ ꓖꓶˍ ꓡꓳ꓿ 26 ꓖꓳ ꓡꓱ ꓠꓬ ꓚꓳ ꓑꓸ ꓠꓽ꓾ ꓟꓳꓼ ꓔ ꓢꓲ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓠꓬꓲ꓾ ꓢꓲ ꓒꓽꓳ꓾ ꓥꓪ ꓔꓯ ꓠꓲꓹ ꓟ ꓦꓲꓺ ꓖꓶ ꓡꓯ꓿ ꓥꓪ ꓠꓬ ꓮꓽ ꓙꓵ ꓡꓱꓸꓼ ꓚꓱꓹ ꓖꓶˍ ꓥꓳ꓾ ꓐꓰ ꓐꓯˍ ꓡꓳ꓿ 27 ꓖꓳ ꓕꓯ ꓪ ꓔꓲ ꓠꓬ ꓬꓲ ꓚꓳ ꓑꓸ ꓔꓯ ꓫꓱꓸ ꓤ ꓠꓬꓲ꓾ ꓬꓲ ꓔꓯ ꓩꓴ ꓗꓷ ꓢꓲ꓾ ꓬꓲ ꓐꓵˍ ꓟ ꓶꓻ ꓡꓯꓼ ꓮꓽ ꓙꓵ ꓖꓽ ꓖꓶ ꓗꓷꓳ꓿ 28 ꓖꓳ ꓡꓱ ꓥ ꓟꓲ ꓚꓳ ꓑꓸ ꓖꓳ ꓟ ꓓꓳ ꓙꓰ ꓢꓲ꓾ ꓬꓲ ꓔꓯ ꓓꓲ-ꓠ-ꓣꓲ ꓒꓴ ꓕꓲ ꓦꓬꓻ ꓒꓯꓼˍ ꓡꓰꓽ ꓐꓵˍ ꓟ ꓛꓳꓽ ꓒꓯꓹ ꓕꓲ ꓣꓳ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓔꓯ ꓗꓶꓸ ꓝꓲꓸ ꓗꓪ ꓣꓴ ꓠꓬꓲꓸ ꓔ ꓢꓲ꓾ ꓥꓪ ꓔꓯ ꓠꓴ ꓐꓵˍ ꓟ ꓮꓽ ꓙꓵ ꓚꓱꓹ ꓖꓶ ꓡꓯ꓾ ꓐꓯˍ ꓡꓳ꓿ 29 ꓬꓲ ꓛꓳꓽ ꓒꓯꓹ ꓠꓬ ꓟꓳꓼ ꓔ ꓢꓲ꓾ ꓥꓪ ꓔꓯ ꓠꓲꓹ ꓟ ꓦꓲꓺ ꓖꓶ ꓡꓯ꓾ ꓥꓪ ꓠꓬ ꓚꓱꓹ ꓖꓶˍ ꓥꓳ꓾ ꓐꓰ ꓓꓰꓽˍ ꓟꓲ꓾ 30 ꓬꓲ ꓠꓽ ꓟꓽ ꓓꓻ ꓢꓲ꓾ ꓬꓲ ꓐꓵꓻˍ ꓟ ꓟꓽ ꓚꓱꓹ ꓖꓶ ꓡ ꓕ ꓑꓳꓸ ꓬꓲ ꓔꓯ ꓐꓱ ꓓꓴꓽ ꓗꓪ ꓐꓱ ꓔ ꓝꓲˍ ꓡꓳ꓿ 31 ꓬꓲ ꓕꓱ ꓡꓱ ꓬꓰˍ ꓟ ꓔꓯ ꓠꓱꓸ ꓐꓯꓼ ꓚꓳ ꓑꓸ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ ꓠꓲꓹ ꓟ ꓮꓽ ꓘꓶꓸ ꓫꓸ ꓢꓲ꓾ ꓬꓲ ꓬꓰˍ ꓟ ꓮꓽ ꓙꓵ ꓪ ꓔꓲ ꓔꓯ ꓪꓽ ꓗꓳꓹ ꓬꓰˍ ꓡꓳ꓿ 32 ꓖꓳ ꓕꓯ ꓪ ꓔꓲ ꓡꓰ ꓛꓳ ꓑꓸ ꓖꓳ ꓕꓲ ꓣꓳ ꓔꓯ ꓘꓴ ꓔꓯꓹ ꓡ ꓢꓲ꓾ ꓥꓶˍ ꓟ ꓚꓳ ꓑꓸꓳ꓾ ꓠꓴ ꓥꓪ ꓔꓯ ꓓꓰꓽˍ ꓠꓬꓲ ꓠꓴ ꓐꓵˍ ꓟ ꓮꓽ ꓙꓵ ꓥꓪ ꓖꓽ ꓖꓶ ꓗꓷꓳ꓿ 33 ꓠꓴ ꓔꓯ ꓥꓪ ꓫꓱꓸ ꓤ ꓗꓷ ꓟ ꓡꓰ ꓐꓰ ꓚꓳ ꓑꓸ ꓛꓳꓽ ꓒꓯꓹ ꓔꓯ ꓠꓴ ꓫꓱꓸ ꓤ ꓠꓯꓹ ꓡꓳ꓾ ꓟꓽ ꓥ ꓡ?꓾ ꓐꓰ ꓐꓯ ꓗꓷ ꓠꓬ꓾ 34 ꓪ ꓔꓲ ꓠꓬ ꓠꓲꓹ ꓟ ꓮꓽ ꓘꓶꓸ ꓦꓶ ꓢꓲ꓾ ꓬꓲ ꓐꓵ ꓞꓹ ꓟ ꓶꓻ ꓡꓯ ꓟꓽ ꓐꓶꓻ ꓖꓴ ꓡꓰ ꓕ ꓑꓳ꓾ ꓟꓸ ꓙꓽ ꓢꓴ ꓔꓯ ꓡꓯꓼ ꓙꓱ ꓗꓷˍ ꓡꓳ꓿ 35 ꓠꓴ ꓪꓽ ꓮꓽ ꓟ ꓥ ꓟꓲ꓾ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓠꓴ ꓬꓲꓼ ꓠꓴ ꓠꓬꓲ ꓔꓯ ꓟꓽ ꓖꓽ ꓖꓶ ꓠꓬ꓾ ꓟꓴꓽ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐˍ ꓟꓲ ꓖꓳ ꓟ ꓡꓰ ꓐꓰ ꓠꓴ ꓪꓽ ꓔꓯ ꓬꓰ ꓖꓶ ꓡ ꓥꓳ꓾ ꓐꓯˍ ꓡꓳ꓿

ꓟ-ꓔꓲ 19

1 ꓐꓯ ꓘꓶꓽ ꓕꓱ ꓟꓬ ꓟ ꓬꓰ-ꓢꓴ ꓐꓯ ꓓꓳ ꓡꓰ ꓠꓬ꓾ ꓖ-ꓡꓲ-ꓡꓲ ꓗꓪ ꓐꓰ ꓓꓳ ꓙꓰ ꓢꓲ꓾ ꓬꓳ-ꓔ ꓬꓲꓽ ꓟ ꓖꓳ ꓐꓽ ꓢꓲ ꓗꓪ ꓟ ꓬꓴ-ꓔ ꓟꓵꓽ ꓗꓪ ꓛꓲ ꓬꓰˍ ꓡꓳ꓿ 2 ꓞꓳ ꓜꓴ ꓞꓳ ꓟꓯꓼˍ ꓟꓲ ꓬꓲ ꓔꓯ ꓛꓳ ꓙꓰ ꓢꓲ꓾ ꓬꓲ ꓡꓰ ꓖꓳ ꓗꓪ ꓬꓲ ꓪꓽ ꓔꓯ ꓠꓻ ꓫꓬꓹ ꓓ ꓡꓰ ꓝꓲˍ ꓡꓳ꓿ 3 ꓒ-ꓡꓲ-ꓢꓷ ꓐꓴ ꓠꓬ ꓬꓰ-ꓢꓴ ꓔꓯ ꓫꓵꓽ ꓠꓬꓲ ꓠꓹ ꓟ ꓬꓲ ꓔꓯ ꓡ ꓢꓲ꓾ ꓞꓳ ꓤ ꓕꓲ ꓣꓳ ꓠꓬ ꓬꓲ ꓑꓶꓸ ꓧꓪ ꓢꓲ ꓬꓲ ꓤ ꓟꓶ ꓔꓯ ꓒꓰꓻ ꓗꓷˍ ꓠꓬ꓾ ꓬꓲ ꓡꓲꓽ ꓙꓳˍ ꓡ? ꓟꓽ ꓙꓳ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 4 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓬꓲ ꓚꓰ ꓬꓲ ꓪꓴꓸ ꓗꓪ ꓞꓳ ꓤ ꓔꓯ ꓚꓰꓼ ꓢꓴ ꓪꓴ-ꓢ ꓡꓰ꓾ ꓞꓳ ꓑꓸ ꓤˍ ꓐꓰ ꓤ ꓟꓶ ꓤ ꓚꓰꓼ ꓔ ꓠꓬꓲ꓾ 5 ꓡ ꓞꓳ ꓕꓲ ꓣꓳ ꓠꓬ ꓬꓲ ꓐꓹ ꓐ ꓟꓹ ꓟ ꓐꓰ ꓧꓹ ꓗꓷ ꓢꓲ꓾ ꓬꓲ ꓤ ꓟꓶꓻ ꓔꓯ ꓝꓱꓺ ꓡꓰˍ ꓥꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓠꓬꓲꓽ ꓟ ꓠꓬ ꓕꓲ ꓧꓪꓽˍ ꓡꓰꓽ ꓒꓬꓱꓼ ꓬꓰˍ ꓥꓳ꓾ ꓐꓰ ꓐꓳ ꓔ ꓟ ꓔꓯ ꓠꓴ ꓪꓽ ꓟꓽ ꓵ ꓠꓬꓲ ꓡ? 6 ꓬꓲ ꓪꓽ ꓠꓽ ꓝꓮꓲ ꓠꓬꓲꓽ ꓣꓳ ꓟꓽ ꓥ꓾ ꓕꓲ ꓧꓪꓽˍ ꓡꓰ ꓥꓳ꓿ ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓝꓱꓺ ꓔ ꓟ ꓠꓬ꓾ ꓞꓳ ꓤ ꓡꓰ ꓕꓽ ꓧꓹ ꓗꓷ ꓝꓲ꓾ ꓐꓯˍ ꓡꓳ꓿ 7 ꓖꓳ ꓕꓯ ꓬꓲ ꓪꓽ ꓡꓰ ꓬꓲ ꓔꓯ꓾ ꓖꓳ ꓡꓱ ꓥ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓟꓳ-ꓫꓲ ꓡꓰ ꓤ ꓟꓶ ꓒꓰꓻ ꓕꓳ ꓶ ꓖꓶ ꓢꓲ ꓬꓲ ꓔꓯ ꓙꓰ ꓝꓲ ꓠꓹ ꓟ ꓕꓵꓼ ꓪꓽ ꓖꓶˍ ꓡ?꓾ ꓐꓯˍ ꓡꓳ꓿ 8 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓠꓲꓹ ꓟ ꓩꓴꓻˍ ꓟ ꓑꓶꓸ ꓓꓴ꓾ ꓟꓳ-ꓫꓲ ꓠꓽ ꓠꓴ ꓪꓽ ꓤ ꓟꓶ ꓒꓰꓻˍ ꓟ ꓔꓯ ꓓꓽ ꓔꓳꓹˍ ꓡꓳ꓿ ꓬꓲ ꓪꓴꓸ ꓕꓯ ꓠꓽ ꓖꓳ ꓡꓱ ꓟꓽ ꓥ꓿ 9 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓮꓽ ꓟ ꓥ ꓟꓲ ꓬꓲ ꓤ ꓟꓶ ꓦꓬꓼ ꓛꓳꓽ ꓧꓪˍ ꓟ ꓑꓶꓸ ꓓꓴ ꓟꓽ ꓥ ꓥ꓾ ꓬꓲ ꓤ ꓟꓶ ꓔꓯ ꓡꓳ ꓗꓷ ꓢꓲ ꓠꓱꓸ ꓐꓯ ꓕꓲ ꓣꓳ ꓫꓺˍ ꓠꓬ꓾ ꓦꓬꓼ ꓛꓳꓽ ꓧꓪˍ ꓟ ꓝꓴꓲ ꓬꓰˍ ꓟ ꓥ ꓡꓳ꓿ ꓡꓳꓺ ꓗꓷ ꓟ ꓤ ꓟꓶ ꓤ ꓔꓯ ꓫꓺ ꓢꓴˍ ꓟꓲ꓾ ꓦꓬꓼ ꓛꓳꓽ ꓧꓪˍ ꓟ ꓝꓴꓲ ꓬꓰˍ ꓟ ꓥ ꓡꓳ꓾ ꓐꓯˍ ꓡꓳ꓿ 10 ꓖꓳ ꓡꓱ ꓠꓬ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓤ ꓖꓴꓻ ꓤ ꓟꓶ ꓠꓬ ꓮꓽ ꓢꓳ ꓐꓯˍ ꓟ ꓡꓰ ꓐꓰ ꓥ ꓕꓯ ꓠꓽ꓾ ꓤ ꓟꓶ ꓟꓽ ꓧꓪ ꓠꓬ ꓙꓲꓻˍ ꓡꓳ꓾ ꓐꓯˍ ꓡꓳ꓿ 11 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓟꓸ ꓘꓶꓽ ꓕꓱ ꓟ ꓔꓯ ꓠꓬ ꓡ ꓞꓳ ꓥ ꓕ ꓑꓳꓸ ꓘꓳ ꓣꓴ ꓟꓽ ꓐ ꓡ꓿ ꓮꓽ ꓟ ꓔꓯ ꓖꓶꓽ ꓔ ꓠꓬ ꓖꓳ ꓟꓻˍ ꓡꓰ ꓘꓳꓻ ꓣꓴ ꓐ ꓡ ꓡꓳ꓿ 12 ꓮ ꓡꓲꓳ ꓐꓯ ꓠꓬ ꓬꓲ ꓟꓹ ꓟ ꓤ ꓘꓶꓻ ꓗꓪ ꓐꓰ ꓦꓵꓻˍ ꓕꓯˍ ꓡꓰ ꓟ ꓞꓳ ꓠꓸ ꓙꓳˍ ꓡꓳ꓿ ꓞꓳ ꓤ ꓡꓰ ꓠꓸ ꓔ ꓟ ꓞꓳ ꓠꓸˍ ꓟꓲ ꓙꓳˍ ꓡꓳ꓿ ꓪꓴ-ꓢ ꓗꓴꓷꓼ ꓐꓱ ꓶ ꓚꓲꓸ ꓛꓬ ꓔꓯ ꓠꓸ ꓗꓷ ꓟ ꓞꓳ ꓠꓸˍ ꓟꓲ ꓙꓳˍ ꓡꓳ꓿ ꓕꓱ ꓟ ꓔꓯ ꓘꓳꓻ ꓣꓴ ꓐ ꓡ ꓢꓴ ꓠꓬ ꓘꓳ ꓣꓴ ꓝꓲ꓾ ꓐꓯˍ ꓡꓳ꓿ 13 ꓖꓳ ꓕꓯ ꓤ ꓠꓱ ꓤ ꓐꓴ ꓔꓯ ꓡꓯꓼ ꓒꓯꓹ ꓚꓰꓹ ꓢꓲ ꓪꓽ ꓘꓴ ꓖꓶ ꓠꓹ ꓟ꓾ ꓬꓲ ꓪꓽ ꓡꓰ ꓤ ꓠꓱ ꓤ ꓐꓴ ꓔꓯ ꓬꓰ-ꓢꓴ ꓔꓬ ꓗꓪ ꓧꓳꓽ ꓡ ꓕꓯ꓾ ꓛꓳꓽ ꓒꓯꓹ ꓐꓴ ꓠꓽ ꓧꓳꓽ ꓢꓴ ꓐꓴ ꓔꓯ ꓕꓼˍ ꓡꓳ꓿ 14 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓡꓰ꓾ ꓤ ꓠꓱ ꓤ ꓐꓴ ꓥꓪ ꓔꓯ ꓡ ꓝꓲ꓾ ꓬꓲ ꓪꓽ ꓔꓯ ꓕꓽ ꓗꓽ ꓔ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓽ ꓕꓱ ꓡꓱ ꓫꓵꓽ ꓡ ꓞꓳ ꓔꓯꓸ ꓟ ꓥ ꓡꓳ꓾ ꓐꓯ ꓢꓲ꓾ 15 ꓬꓲ ꓪꓽ ꓕꓯꓽ ꓢꓲ ꓗꓪ ꓡꓯꓼ ꓒꓯꓹ ꓚꓰꓹ ꓖꓶꓽ ꓗꓷ ꓠꓬ꓾ ꓬꓰ-ꓢꓴ ꓖꓳ ꓗꓪ ꓐꓰ ꓙꓰ ꓗꓷꓳ꓿ 16 ꓕꓲ ꓠꓬꓲ ꓙꓳˍ ꓠꓬ꓾ ꓡ ꓞꓳ ꓕꓲ ꓣꓳ ꓬꓲ ꓔꓯ ꓡ ꓢꓲ꓾ ꓟꓸ ꓒꓽꓳ꓾ ꓥꓪ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ꓾ ꓙꓲꓻˍ ꓟ ꓟꓬꓱꓽ ꓥꓪ ꓮꓸ ꓫꓵ ꓬꓰ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 17 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓙꓲꓻˍ ꓟ ꓔꓯ ꓟꓳꓸ ꓥꓪ ꓔꓯ ꓠ ꓠꓬꓲˍ ꓡ? ꓙꓲꓻˍ ꓟ ꓠꓽ ꓪꓴ-ꓢ ꓕꓲ ꓣꓳˍ ꓡꓰ ꓙꓳˍ ꓡꓳ꓿ ꓠꓴ ꓢꓯꓼ ꓟꓬ ꓗꓪ ꓓꓵꓽ ꓡꓰ ꓠꓲꓹ ꓫꓵˍ ꓕꓯ ꓠꓽ ꓪꓴ-ꓢ ꓕꓵꓼ ꓪꓽ ꓔꓯ ꓛꓳ꓾ ꓐꓯ ꓖꓶˍ ꓡꓳ꓿ 18 ꓖꓳ ꓕꓯ ꓬꓲ ꓡꓰ ꓬꓰ-ꓢꓴ ꓔꓯ꓾ ꓕꓵꓼ ꓪꓽ ꓮ ꓡꓲ ꓕꓲ ꓟꓻ ꓟ ꓛꓳ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓰ-ꓢꓴ ꓡꓰ꓾ ꓞꓳ ꓤ ꓢꓰꓼ ꓟꓽ ꓓ꓿ ꓦꓬꓽ ꓛꓳꓽ ꓧꓪ ꓟꓽ ꓓ꓿ ꓘꓴꓽ ꓜꓽ ꓠꓯꓺ ꓜ ꓟꓽ ꓓ꓿ ꓟꓽ ꓔꓱꓹ ꓟ ꓢꓷꓸ ꓙ ꓟꓳꓻ ꓙ ꓢꓴ ꓬꓰ ꓟꓽ ꓓ꓿ 19 ꓠꓴ ꓮꓽ ꓐ ꓮ ꓟ ꓔꓯ ꓒꓵꓽ꓿ ꓝꓮꓲ ꓠꓴ ꓚꓲꓸ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓢꓴ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ 20 ꓖꓳ ꓕꓯ ꓤ ꓖꓴ ꓡꓯꓸ ꓡꓰ ꓬꓲ ꓔꓯ꓾ ꓕꓱ ꓟꓬ ꓙꓰꓽ ꓟ ꓮꓽ ꓙꓵ ꓥꓪ ꓛꓳ ꓗꓷꓳ꓿ ꓥꓪ ꓮꓸ ꓫꓵ ꓛˍ ꓢꓰꓽ ꓡ?꓾ ꓐꓯˍ ꓡꓳ꓿ 21 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓜꓳꓽ ꓓꓰꓺ ꓡꓰ ꓠꓲꓹ ꓫꓵˍ ꓕꓯ ꓠꓽ꓾ ꓙꓰ꓾ ꓠꓴ ꓙꓳˍ ꓟ ꓪꓴꓽ ꓗꓷ ꓢꓲ ꓞꓳ ꓫꓸ ꓔꓯ ꓖꓶ꓿ ꓖꓳ ꓡꓱ ꓠꓬ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓠꓴ ꓠꓽ ꓒꓵꓽ ꓶꓽ ꓙꓳˍ ꓥꓳ꓿ ꓖꓳ ꓡꓱ ꓢꓲ ꓥꓪ ꓔꓯ ꓛꓳ ꓡꓯ꓾ ꓐꓯ ꓖꓶˍ ꓡꓳ꓿ 22 ꓐꓯ ꓘꓶꓽ ꓖꓳ ꓟ ꓔꓯ ꓤ ꓖꓴ ꓡꓯꓸ ꓑ ꓙꓽ ꓗꓷ ꓠꓬ꓾ ꓬꓲ ꓠꓽ ꓙꓳꓻ ꓒ ꓓꓽ ꓟ ꓥ ꓠꓬꓲ ꓠꓲꓹ ꓟ ꓫꓸ ꓫꓸꓼ ꓐꓰ ꓙꓰ ꓗꓷꓳ꓿ 23 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓞꓳ ꓐꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓫˍ ꓡꓳ꓿ 24 ꓥꓪ ꓝꓮꓲ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓞꓳ ꓐꓳ ꓕꓲ ꓣꓳ ꓪꓴ-ꓢ ꓗꓴꓷꓼ ꓗꓪ ꓓꓵꓽ ꓡꓰ ꓠꓹ ꓟ ꓠꓬ꓾ ꓡꓳꓽ ꓕꓳ ꓕꓲ ꓘꓹ ꓪꓳꓼ ꓠ ꓗ ꓗꓪ ꓙꓻ ꓙꓰ ꓠꓹ ꓟ ꓢꓶꓸ ꓟꓽ ꓞꓲ ꓫꓸˍ ꓡꓳ꓾ ꓐꓯˍ ꓡꓳ꓿ 25 ꓐꓯ ꓘꓶꓽ ꓕꓱ ꓟ ꓛꓳꓽ ꓒꓯꓹ ꓐꓴ ꓑ ꓙꓽ ꓗꓷ ꓠꓬ ꓬꓲ ꓪꓽ ꓮꓽ ꓘꓶꓸ ꓓꓵꓽ ꓙ ꓟꓶ ꓢꓲ꓾ ꓖꓳ ꓡꓱ ꓥ ꓠꓬ ꓮꓽ ꓟ ꓢꓯꓼ ꓟꓬ ꓝꓸ ꓟꓶ ꓓ ꓢꓰ꓾ ꓐꓯˍ ꓡꓳ꓿ 26 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓡꓳꓸ ꓔ ꓢꓲ꓾ ꓞꓳ ꓤ ꓠꓬ ꓬꓰ ꓟꓽ ꓐ ꓡ꓿ ꓪꓴ-ꓢ ꓠꓽ ꓮꓸ ꓫꓵˍ ꓟꓲ ꓬꓰ ꓐ ꓡ ꓡꓳ꓾ ꓐꓯˍ ꓡꓳ꓿ 27 ꓖꓳ ꓕꓯ ꓒꓲ-ꓕꓱ ꓡꓰ ꓒꓳꓹ ꓖꓶ ꓢꓲ ꓬꓲ ꓔꓯ꓾ ꓠꓬꓲ ꓠꓹ꓾ ꓥꓪ ꓠꓴꓽ ꓠꓬ ꓮꓽ ꓙꓵ ꓡꓱꓸꓼ ꓡꓳ ꓗꓷ ꓢꓲ ꓠꓴ ꓔꓯ ꓛꓳˍ ꓡꓳ꓿ ꓖꓳ ꓡꓱ ꓠꓬ ꓥꓪ ꓠꓴꓽ ꓮꓸ ꓫꓵ ꓟꓶˍ ꓥꓳ ꓪ?꓾ ꓐꓯˍ ꓡꓳ꓿ 28 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓥꓪ ꓔꓯ ꓛꓳꓻ ꓢꓴ ꓠꓴ ꓪꓽ ꓠꓬ꓾ ꓫꓬꓹ ꓔꓶˍ ꓟ ꓦꓬꓼ ꓠꓬꓲ ꓗꓪ꓾ ꓡ-ꓞꓳ-ꓮ-ꓐꓲ ꓥꓪ ꓐꓬꓱꓼ ꓡꓱꓼ ꓡꓱ ꓟ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸˍ ꓟ ꓦꓬꓼ ꓠꓬꓲ ꓗꓪ꓾ ꓠꓴ ꓪꓽˍ ꓟꓲ ꓙꓵꓽ ꓠꓬꓲꓸ ꓕꓲ ꓞꓲ ꓠꓬꓲꓽ ꓟ ꓗꓪ ꓠꓬꓲꓸ ꓠꓸ ꓢꓲ꓾ ꓬꓲ-ꓢꓷ-ꓡꓰ ꓞꓲ ꓠꓬꓲꓽ ꓪꓳꓼ ꓟ ꓔꓯ ꓐꓯꓺ ꓟꓴ ꓘꓶꓽˍ ꓥꓳ꓿ 29 ꓥꓪ ꓟꓬꓱꓺ ꓐꓱ ꓶ ꓬꓲ ꓦꓲ꓾ ꓥ ꓠꓬ ꓬꓲꓼ ꓤ ꓠꓬꓲ ꓤ꓾ ꓮꓸ ꓝꓲ ꓠꓬꓲ ꓟ꓾ ꓥ ꓠꓬ ꓮꓽ ꓐꓽ ꓮꓺ ꓟ꓾ ꓥ ꓠꓬ ꓤ ꓟꓶꓻ ꓤ ꓠꓱ꓾ ꓥ ꓠꓬ ꓦ ꓟꓲ ꓗꓶ ꓔ ꓬꓰ ꓢꓴ ꓥ ꓕ ꓑꓳꓸ ꓠꓬ꓾ ꓕꓲ ꓦꓬꓻ ꓝꓸ ꓟꓶ ꓢꓲ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬˍ ꓟꓲ ꓟꓶˍ ꓥꓳ꓿ 30 ꓖꓳ ꓡꓱ ꓥ ꓟꓲ ꓬꓲ ꓪꓴꓸ ꓟ ꓮꓽ ꓟꓬꓹ ꓣꓳ ꓠꓬ꓾ ꓬꓲ ꓟꓶꓽˍ ꓟ ꓗꓷ ꓡꓰˍ ꓥꓳ꓿ ꓬꓲ ꓟꓶꓽˍ ꓟ ꓠꓽ ꓬꓲ ꓪꓴꓸ ꓟ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿

ꓟ-ꓔꓲ 20

1 ꓟꓴꓽ ꓗꓪ ꓗꓴꓷꓼ ꓠꓬ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓝꓲˍ ꓐꓰ ꓪꓽ ꓧꓪ ꓠꓹ ꓟ ꓠꓯꓼ ꓠꓯꓼ ꓓꓳ ꓙꓰˍ ꓟ ꓦ ꓟꓲ ꓢꓲ ꓒꓽ ꓕꓲ ꓣꓳˍ ꓡꓰ ꓐꓰ ꓗꓹ ꓡꓳ꓿ 2 ꓬꓲ ꓠꓬ ꓪꓽ ꓤ ꓐꓴ ꓔꓯ꓾ ꓕꓲ ꓠꓬꓲ ꓪꓽ ꓒꓵꓽ ꓓꓲ-ꓠ-ꓣꓲ ꓕꓲ ꓒꓯꓼ ꓖꓶ ꓙꓺ ꓟꓳ ꓗꓷ ꓠꓬ꓾ ꓬꓲ ꓪꓽ ꓔꓯ ꓛꓱꓼ ꓡꓱꓼ ꓐꓱ ꓗꓪ ꓝꓲ ꓩꓴ ꓗꓷˍ ꓡꓳ꓿ 3 ꓮꓽ ꓡ ꓗꓴ ꓙꓵꓹ ꓛꓲ ꓗꓪ ꓝꓮꓲ ꓓꓳ ꓙꓰ ꓢꓲ꓾ ꓙꓵꓺ ꓗꓪ ꓠꓱꓸ ꓐꓯ ꓢꓴ ꓮꓽ ꓔꓳ ꓦꓰꓼ ꓔꓬ ꓟ ꓬꓲ ꓟꓳꓻˍ ꓠꓬꓲ꓾ 4 ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽˍ ꓟꓲ ꓛꓱꓼ ꓡꓱꓼ ꓐꓱ ꓗꓪ ꓙꓰ꓿ ꓠꓴ ꓪꓽ ꓔꓯ ꓮ ꓡꓲ ꓖꓶꓽ ꓜꓳꓽˍ ꓠꓬ ꓖꓳ ꓡꓱ ꓖꓶˍ ꓥꓳ꓾ ꓐꓯ ꓖꓶꓽ ꓗꓷ ꓠꓬ ꓬꓲ ꓪꓽˍ ꓟꓲ ꓛꓱꓼ ꓡꓱ ꓐꓱ ꓗꓪ ꓓꓵꓽ ꓙꓰˍ ꓡꓳ꓿ 5 ꓮꓽ ꓡ ꓞꓲꓻ ꓠꓬꓲꓽ ꓙꓵꓹˍ ꓐꓰ ꓢ ꓙꓵꓹ ꓗꓪˍ ꓟꓲ ꓬꓲ ꓝꓮꓲ ꓓꓳ ꓙꓰ ꓢꓲ ꓪꓽ ꓧꓪ ꓬꓰˍ ꓢꓰꓽ ꓡꓳ꓿ 6 ꓥꓪꓽ ꓙꓵꓹ ꓛꓲ ꓗꓪ ꓬꓲ ꓝꓮꓲ ꓓꓳ ꓙꓰ ꓠꓬ꓾ ꓠꓱꓸ ꓐꓯꓼ ꓢꓴ ꓦꓰꓼ ꓔꓬ ꓟ ꓔꓯ ꓟꓳꓻˍ ꓠꓬꓲ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓕꓲ ꓠꓬꓲ ꓡꓱꓸꓼ ꓕꓱ ꓗꓪ ꓮꓽ ꓔꓳ ꓦꓰꓼ ꓔꓬ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 7 ꓬꓲ ꓪꓽ ꓡꓰ꓾ ꓥꓪ ꓠꓴꓽ ꓔꓯ ꓪꓽ ꓧꓪ ꓢꓴ ꓟꓽ ꓙꓳ ꓠꓬꓲ ꓕꓱ ꓗꓪ ꓮꓽ ꓔꓳ ꓦꓰꓼ ꓞꓹ ꓟ ꓥꓳ꓾ ꓐꓯˍ ꓠꓬꓲ꓾ ꓠꓴ ꓪꓽˍ ꓟꓲ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓙꓰ꓾ ꓐꓯ ꓖꓶˍ ꓡꓳ꓿ 8 ꓟꓶꓼ ꓘꓶꓼ ꓛꓲ ꓡ ꓠꓬ ꓐꓱ ꓢꓲ ꓒꓽ ꓡꓰ ꓬꓲ ꓐꓱ ꓙꓵꓽ ꓢꓴ ꓔꓯ꓾ ꓪꓽ ꓤ ꓐꓴ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓗꓸ ꓠꓯ ꓡ ꓢꓴ ꓗꓪ ꓐꓰ ꓧꓶꓸ ꓕꓯꓽ ꓡ ꓢꓴ ꓗꓪ ꓛꓲ꓾ ꓬꓲ ꓪꓽ ꓔꓯ ꓪꓽ ꓒꓵꓽ ꓖꓶ꓾ ꓐꓯˍ ꓡꓳ꓿ 9 ꓮꓽ ꓡ ꓥꓪꓽ ꓙꓵꓹ ꓗꓪ ꓪꓽ ꓗꓴꓸ ꓔ ꓢꓴ ꓐꓴ ꓛꓲ ꓡ ꓠꓬ꓾ ꓬꓲ ꓪꓽ ꓮ ꓡꓲ ꓕꓲ ꓣꓳˍ ꓟꓲ ꓓꓲ-ꓠ-ꓣꓲ ꓕꓲ ꓒꓯꓼ ꓟꓶ ꓡꓰˍ ꓡꓳ꓿ 10 ꓬꓲ ꓪꓴꓸ ꓕꓯˍ ꓡꓰ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓠꓽ ꓪ ꓒꓵꓽ ꓟꓬꓽ ꓠꓬꓲ ꓟꓶˍ ꓥꓳ꓾ ꓓꓵꓽ ꓙꓽˍ ꓟꓲ꓾ ꓬꓲ ꓪꓽ ꓮ ꓡꓲ ꓕꓲ ꓣꓳˍ ꓟꓲ ꓕꓲ ꓣꓳ ꓓꓲ-ꓠ-ꓣꓲ ꓕꓲ ꓒꓯꓼˍ ꓡꓰꓽ ꓟꓶˍ ꓠꓬꓲ꓾ 11 ꓬꓲ ꓪꓽ ꓠꓬ ꓐꓱ ꓢꓲ ꓒꓽ ꓔꓯ ꓱ'ꓽ ꓠꓱꓽ ꓢꓲ꓾ 12 ꓥꓪ ꓠꓴꓽ ꓠꓬ ꓕꓲ ꓠꓬꓲ ꓡꓱꓸꓼ ꓟꓬꓱꓽ ꓬꓰ ꓪꓴꓽ ꓧꓶ ꓢꓲ ꓞꓻ ꓜꓲꓽ ꓗꓷꓳ꓿ ꓗꓸ ꓠꓯꓸ ꓡ ꓢꓴ ꓠꓽ ꓕꓲ ꓙꓵꓹ ꓤˍ ꓡꓰ ꓬꓰˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓠꓬ ꓬꓲ ꓪꓽ ꓔꓯ ꓥꓪ ꓠꓴꓽˍ ꓐꓰ ꓕꓲ ꓡꓰꓹꓼ ꓗꓷ ꓡꓰ ꓝꓲˍ ꓡ?꓾ ꓐꓯˍ ꓡꓳ꓿ 13 ꓬꓲ ꓠꓽ ꓬꓲ ꓪꓽ ꓗꓳ ꓡꓳ ꓗꓪ ꓟ ꓕꓲ ꓣꓳ ꓔꓯ ꓒꓳꓹ ꓖꓶ ꓢꓲ꓾ ꓗꓪ ꓛꓳꓽꓳ꓾ ꓠꓴ ꓔꓯ ꓥꓪ ꓟꓽ ꓛꓬꓻ ꓡꓰ꓿ ꓠꓴˍ ꓐꓰ ꓥꓪ ꓐꓯ ꓞꓷꓹ ꓔ ꓟ ꓠꓬ ꓓꓲ-ꓠ-ꓣꓲ ꓕꓲ ꓒꓯꓼˍ ꓡꓰꓽ ꓟꓽ ꓥ ꓡ? 14 ꓠꓴ ꓔꓯꓸ ꓟ ꓔꓯꓹ ꓔ ꓢꓲ ꓙꓰ꓿ ꓥꓪ ꓠꓽ ꓗ ꓠꓯꓸ ꓡ ꓢꓴˍ ꓐꓰ ꓠꓴ ꓔꓯ ꓕꓲ ꓡꓰꓹꓼ ꓖꓶ ꓠꓲꓹ ꓫꓵˍ ꓡꓳ꓿ 15 ꓥꓪ ꓖꓴꓽ ꓙꓴꓽ ꓠꓬ ꓥꓪ ꓠꓵˍ ꓟ ꓡꓰ ꓐꓰ ꓣꓱꓽ ꓟꓽ ꓓ ꓡ? ꓥ ꓠꓬ ꓥꓪ ꓞꓳ ꓙꓲꓻ ꓬꓰˍ ꓟ ꓗꓪ ꓐꓰ ꓠꓴ ꓟꓬ ꓠꓯꓺˍ ꓡ?꓾ ꓐꓯˍ ꓡꓳ꓿ 16 ꓖꓳ ꓟ ꓡꓰ ꓐꓰ ꓗ ꓠꓯꓸ ꓢꓲ ꓢꓴ ꓠꓽ ꓧꓶꓸ ꓕꓯꓽ ꓗꓷ ꓡꓰˍ ꓥꓳ꓿ ꓧꓶꓸ ꓕꓯꓽ ꓢꓴ ꓠꓬ ꓗꓸ ꓠꓯꓸ ꓢꓲ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 17 ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯꓺ ꓙꓰˍ ꓕꓯ꓾ ꓬꓲ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓙ ꓖꓴ ꓐꓺ ꓢꓲ ꓗꓪ ꓧꓳꓽ ꓙꓰ ꓢꓲ꓾ 18 ꓠ ꓠꓹ꓾ ꓣꓳꓽ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰ ꓔꓬ ꓥꓳ꓿ ꓡ-ꓞꓳ-ꓮ-ꓐꓲ ꓥꓪ ꓔꓯ ꓠꓽ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓔꓯ ꓡꓯꓼ ꓙꓱ ꓗꓷ ꓢꓲ ꓫꓵꓻ ꓝꓴꓲ ꓐꓯ ꓞꓷꓹ ꓗꓷˍ ꓥꓳ꓿ 19 ꓥꓪ ꓔꓯ ꓤꓲꓺ ꓠꓬꓲ ꓓꓶꓽ ꓠꓬꓲ ꓬꓰ ꓢꓲ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓢꓰꓼ ꓝꓲ ꓠꓹ ꓟ꓾ ꓐꓶꓽ ꓞꓳ ꓔꓯ ꓡꓯꓼ ꓙꓱ ꓗꓷˍ ꓥꓳ꓿ ꓖꓳ ꓡꓱ ꓥ ꓟꓲ ꓢꓽ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓥꓪ ꓢꓯꓸ ꓬꓲꓼ ꓡ ꓥꓳ꓾ ꓐꓯˍ ꓡꓳ꓿ 20 ꓖꓳ ꓕꓯ ꓜꓲ-ꓐꓱ-ꓓꓲ ꓤ ꓟꓶ ꓠꓬ ꓬꓲ ꓤ ꓠꓬꓲꓽ ꓫꓵꓸˍ ꓐꓰ ꓡꓻ ꓢꓲ꓾ ꓬꓰ-ꓢꓴ ꓔꓯ ꓕꓲ ꓫꓵꓽ ꓓꓰꓽ ꓠꓹ ꓟ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓡ ꓡꓳ꓿ 21 ꓬꓰ-ꓢꓴ ꓡꓰ꓾ ꓠꓴ ꓮꓸ ꓫꓵ ꓠꓵˍ ꓡ?꓾ ꓐꓯˍ ꓕꓯ꓾ ꓠꓴ ꓗꓴꓷꓼ ꓗꓪ ꓥꓪ ꓤ ꓕꓱ ꓠꓬꓲꓽ ꓫꓵꓸ ꓔꓯ꓾ ꓠꓴ ꓡꓯꓼ ꓙ ꓕꓲ ꓛꓱꓽ ꓗꓪ ꓕꓲ ꓣꓳ꓾ ꓡꓯ ꓶꓸ ꓕꓲ ꓛꓱꓽ ꓗꓪ ꓕꓲ ꓣꓳ ꓠꓬꓲꓸ ꓠꓸ ꓠꓹ ꓟ ꓙꓺ ꓟꓳ ꓖꓶꓽ ꓡꓯ꓾ ꓐꓯˍ ꓡꓳ꓿ 22 ꓬꓰ-ꓢꓴ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓮꓸ ꓫꓵ ꓓꓰꓽˍ ꓟ ꓠꓴ ꓪꓽ ꓟꓽ ꓢꓷ꓿ ꓥꓪ ꓓꓳꓻˍ ꓐꓰ ꓬꓰˍ ꓟ ꓡꓴꓻ ꓗꓶꓸ ꓠꓴ ꓪꓽ ꓓꓳꓻ ꓐ ꓡ ꓡ?꓾ ꓐꓯ ꓖꓶˍ ꓕꓯ꓾ ꓥꓪ ꓠꓴꓽ ꓐ ꓡ ꓡꓳ꓾ ꓐꓯˍ ꓡꓳ꓿ 23 ꓖꓳ ꓕꓯ ꓬꓲ ꓡꓰ꓾ ꓥꓪ ꓡꓴ ꓗꓶꓸ ꓠꓬ ꓠꓴ ꓪꓽ ꓚꓵ ꓚꓵ ꓓꓳˍ ꓥꓳ꓿ ꓖꓳ ꓡꓱ ꓥ ꓟꓲ ꓥꓪ ꓡꓯꓼ ꓙ ꓡꓯꓼ ꓶꓸ ꓗꓪ ꓠꓬꓲꓸ ꓠꓸ ꓠꓹ ꓟ ꓙꓺ ꓟꓳ ꓘꓶꓽ ꓖꓶ ꓢꓴ ꓠꓬ ꓥꓪ ꓟꓽ ꓥ꓿ ꓥꓪ ꓐꓹ ꓐ ꓡꓰ ꓮꓽ ꓟ ꓐꓱ ꓶ ꓙꓽ ꓖꓶ ꓔ ꓠꓬ ꓖꓳ ꓟ ꓐꓱ ꓶ ꓥꓳ꓾ ꓐꓯˍ ꓡꓳ꓿ 24 ꓕꓱ ꓟ ꓔꓯ ꓠꓱꓸ ꓐꓯꓼ ꓞꓲꓺ ꓣꓳ ꓟ ꓑ ꓙꓽ ꓗꓷ ꓕꓯ꓾ ꓬꓲ ꓪꓽ ꓠꓬꓲꓽ ꓫꓵꓸ ꓔꓯ ꓠꓲꓹ ꓟ ꓦꓶ ꓔꓴ ꓡ ꓡꓳ꓿ 25 ꓬꓰ-ꓢꓴ ꓠꓽ ꓬꓲ ꓪꓽ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓟꓲ ꓠꓯ ꓗꓪ ꓟ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓠꓬ꓾ ꓑ ꓫꓬꓼ ꓐꓴ ꓔꓯ ꓙꓵꓽ ꓒꓬꓱꓽ ꓟꓳꓸ ꓖꓶˍ ꓟ ꓐꓰ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬ ꓬꓲ ꓪꓽ ꓔꓯ ꓠꓬꓲꓸ ꓤꓲˍ ꓟ ꓠꓴ ꓪꓽ ꓢꓷˍ ꓡꓳ꓿ 26 ꓠꓴ ꓪꓽ ꓠꓽ ꓖꓳ ꓡꓱ ꓬꓰ ꓟꓽ ꓓ꓿ ꓠꓴ ꓪꓽ ꓗꓳ ꓡꓳ ꓗꓪ ꓮꓽ ꓟ ꓪꓴꓽˍ ꓟ ꓬꓰ ꓠꓲꓹ ꓫꓵˍ ꓠꓬ꓾ ꓬꓲ ꓠꓽ ꓣꓱꓽ ꓙ ꓢꓴ ꓬꓰ ꓠꓯꓹ ꓡꓳ꓿ 27 ꓠꓴ ꓪꓽ ꓮꓽ ꓟ ꓪꓴꓸ ꓓꓵ ꓣꓱꓽ ꓢꓴ ꓬꓰ ꓠꓲꓹ ꓫꓵˍ ꓠꓬ꓾ ꓬꓲ ꓠꓽ ꓚꓳ ꓑꓸ ꓬꓰ ꓠꓯꓹ ꓢꓰꓽ ꓡꓳ꓿ 28 ꓕꓱ ꓟ ꓠꓬ ꓡ-ꓞꓳ-ꓮ-ꓐꓲˍ ꓡꓰ ꓐꓰ ꓥ ꓡꓳ꓿ ꓬꓲ ꓠꓬ ꓢꓴꓻ ꓡꓰ ꓬꓲ ꓔꓯ ꓣꓱꓽ ꓙ ꓡ ꓠꓹ ꓟ ꓡꓻ ꓟ ꓟꓽ ꓥ꓿ ꓢꓴ ꓔꓯ ꓣꓱꓽ ꓙ ꓠꓹ ꓟ ꓐꓰ꓾ ꓬꓲ ꓢꓯꓼ ꓟꓬ ꓡꓰ ꓮꓽ ꓟꓬꓹ ꓣꓳ ꓐꓱ ꓶ ꓫꓴꓹ ꓣꓴ ꓒꓵꓽ ꓐꓶꓻ ꓠꓹ ꓟ ꓡꓻ ꓟ ꓥ ꓡꓳ꓾ ꓐꓯˍ ꓡꓳ꓿ 29 ꓙꓱ-ꓡꓱ-ꓘꓳꓽ ꓗꓪ ꓐꓰ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓓꓳ ꓙꓰˍ ꓕꓯ꓾ ꓞꓳ ꓜꓴ ꓞꓳ ꓟꓯꓼ ꓠꓬ ꓬꓲ ꓪꓽ ꓔꓯ ꓛꓳ ꓙꓰˍ ꓡꓳ꓿ 30 ꓟꓬ ꓔꓶ ꓠꓬꓲꓽ ꓣꓳ ꓠꓬ ꓙ ꓖꓴ ꓘꓶꓽ ꓗꓪ ꓠꓬꓲꓸ ꓠꓸ ꓔꓬ ꓢꓲ꓾ ꓬꓰ-ꓢꓴ ꓗꓳꓸ ꓙꓰ ꓔꓬ ꓟ ꓔꓯ ꓑ ꓙꓽ ꓠꓬ꓾ ꓢꓲ ꓒꓽꓳ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤꓽꓳ꓾ ꓥꓪ ꓠꓴꓽ ꓔꓯ ꓫꓱꓸ ꓤ ꓙ ꓡꓯ꓾ ꓐꓰ ꓘꓴꓻˍ ꓡꓳ꓿ 31 ꓖꓳ ꓕꓯ ꓞꓳ ꓜꓴ ꓠꓬ ꓬꓲ ꓪꓽ ꓔꓯ ꓟꓽ ꓪꓳꓹ ꓔꓬ ꓠꓹ ꓟ ꓙꓳ ꓗꓽ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓬ ꓟꓬꓽ ꓠꓬꓲ ꓘꓴꓻ ꓢꓲ꓾ ꓢꓲ ꓒꓽꓳ꓾ ꓓ-ꓪꓵ ꓞꓲ ꓤ ꓡꓯꓹ ꓤꓽꓳ꓾ ꓥꓪ ꓠꓴꓽ ꓔꓯ ꓫꓱꓸ ꓤ ꓙ ꓡꓯ꓾ ꓐꓯˍ ꓡꓳ꓿ 32 ꓖꓳ ꓕꓯ ꓬꓰ-ꓢꓴ ꓦꓰꓼ ꓡꓰ ꓢꓲ꓾ ꓬꓲ ꓪꓽ ꓔꓯ ꓘꓴꓻ ꓔꓯꓹ ꓡ ꓢꓲ ꓠꓬꓲ꓾ ꓠꓴ ꓪꓽ ꓐꓱ ꓶ ꓥꓪ ꓔꓯ ꓮꓸ ꓫꓵ ꓬꓰ ꓝꓲ ꓠꓲꓹ ꓫꓵˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 33 ꓬꓲ ꓪꓽ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓟꓬ ꓢꓶꓽ ꓠꓬꓲ ꓟꓳꓻ ꓡ ꓠꓲꓹ ꓫꓵˍ ꓡꓳ꓾ ꓐꓯˍ ꓡꓳ꓿ 34 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓫꓱꓸ ꓤ ꓢꓲ ꓬꓲ ꓪꓽ ꓟꓬ ꓢꓶꓽ ꓗꓪ ꓫꓱꓹ ꓗꓷ ꓠꓬ꓾ ꓬꓲ ꓪꓽ ꓞꓼ ꓐꓰ ꓠꓬꓲ ꓟꓳꓻ ꓡ ꓢꓲ ꓬꓲ ꓔꓯ ꓛꓳ ꓙꓰˍ ꓡꓳ꓿

ꓟ-ꓔꓲ 21

1 ꓙꓱ-ꓣꓴ-ꓢ-ꓡꓱ ꓗꓪ ꓬꓲ ꓪꓽ ꓠꓶꓽ ꓡꓰ ꓢꓲ꓾ ꓮꓽ-ꓛꓬ-ꓪꓽ-ꓚꓲ ꓗꓪ ꓟ ꓐꓱ-ꓒ-ꓖꓶ ꓘꓹ ꓗꓪ ꓛꓲ ꓡ ꓠꓬ꓾ ꓬꓰ-ꓢꓴ ꓡꓰ ꓛꓳꓽ ꓒꓯꓹ ꓠꓬꓲꓽ ꓣꓳ ꓝꓲ ꓩꓴ ꓗꓷ ꓢꓲ ꓠꓬꓲ꓾ 2 ꓠꓴ ꓪꓽ ꓠꓬ ꓟꓲꓽ ꓕꓯꓽ ꓢꓲ ꓟ ꓘꓹ ꓗꓪ ꓙꓰ꓿ ꓖꓳ ꓗꓪ ꓕꓳꓽ ꓡ ꓟꓴꓽ ꓟꓺ ꓕꓲ ꓛꓲˍ ꓐꓰ ꓬꓲ ꓤ ꓕꓲ ꓛꓲ ꓞꓳꓹ ꓔ ꓟ ꓔꓯ ꓠꓴ ꓪꓽ ꓟꓳꓻˍ ꓥꓳ꓿ ꓒꓶꓻ ꓢꓲ ꓥꓪ ꓔꓯ ꓢꓲꓺ ꓔꓯꓹ ꓖꓶ ꓡꓯ꓿ 3 ꓮꓽ ꓟ ꓡꓰ ꓠꓴ ꓪꓽ ꓔꓯ ꓮꓸ ꓫꓵ ꓐꓯ ꓡ ꓠꓬ꓾ ꓢꓲ ꓒꓽ ꓣꓱꓽ ꓬꓯꓼˍ ꓡꓳ꓾ ꓐꓯ ꓖꓶ꓿ ꓖꓳ ꓡꓱ ꓠꓬ ꓬꓲ ꓞꓼ ꓐꓰ ꓕꓳꓽ ꓡ ꓟꓴꓽ ꓔꓯ ꓢꓲꓺ ꓙꓰ ꓝꓲ ꓡ ꓥꓳ꓾ ꓐꓯˍ ꓡꓳ꓿ 4 ꓕꓱ ꓡꓱ ꓗꓷ ꓡꓰ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓡꓰ꓾ ꓜꓲ-ꓬꓴ ꓮꓸ ꓟꓲꓽꓳ꓾ ꓠꓬꓲ ꓠꓹ꓿ ꓠꓴ ꓪ ꓔꓲꓸ ꓠꓬ ꓙꓻ ꓣꓳꓽ ꓠꓬꓲ ꓐꓰ ꓕꓳꓽ ꓡ ꓟꓴꓽ ꓤ ꓜꓶꓽ ꓢꓲ ꓡ ꓡꓳ꓿ ꓠꓲꓹ ꓠꓴꓽ ꓠꓬꓲ ꓐꓰ ꓶꓻ ꓚꓰꓹ ꓓꓴ ꓙꓱꓽ ꓤ ꓜꓶꓽ ꓢꓲ ꓡꓻ ꓡꓳ꓾ ꓐꓯˍ ꓟ ꓐꓯ ꓘꓶꓽ ꓐꓲ ꓡꓰ ꓝꓲ ꓠꓹ ꓟ ꓥ ꓡꓳ꓿ 6 ꓛꓳꓽ ꓒꓯꓹ ꓐꓴ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓝꓲˍ ꓟ ꓡꓰ ꓐꓰ ꓬꓰ ꓙꓰˍ ꓡꓳ꓿ 7 ꓕꓳꓽ ꓡ ꓟꓴˍ ꓐꓰ ꓕꓳ ꓡ ꓟꓴꓽ ꓤ ꓔꓯ ꓢꓲꓺ ꓔꓯꓹ ꓡ ꓢꓲ꓾ ꓬꓲ ꓪꓽ ꓚꓲꓸ ꓛꓬ ꓐꓵ ꓞꓶ ꓡꓰ ꓕꓳ ꓡ ꓟꓴ ꓕꓯꓽ ꓢꓲ ꓗꓪ ꓘꓳꓽ ꓗꓷ ꓠꓬ ꓬꓰ-ꓢꓴ ꓜꓶꓽˍ ꓡꓳ꓿ 8 ꓖꓳ ꓕꓯ ꓞꓳ ꓜꓴ ꓞꓳ ꓟꓯꓼ ꓕꓲ ꓐꓱ ꓡꓰ ꓙ ꓖꓴ ꓗꓪ ꓬꓲ ꓪꓽ ꓐꓵ ꓞꓶꓽ ꓘꓳꓽ ꓖꓶˍ ꓡꓳ꓿ ꓕꓲꓽ ꓐꓱꓻ ꓠꓬ ꓢꓲꓹ ꓒꓬꓽ ꓑꓳꓺ ꓛꓵ ꓔꓯꓹ ꓡ ꓢꓲ ꓘꓳꓽ ꓖꓶˍ ꓡꓳ꓿ 9 ꓬꓰ-ꓢꓴ ꓟꓲꓽ ꓕꓯꓽ ꓢꓲ ꓗꓪ ꓙꓰ ꓢꓴˍ ꓐꓰ ꓗꓸ ꓠꓯꓸ ꓢꓲ ꓗꓪ ꓛꓳꓻ ꓡ ꓢꓴ ꓞꓳ ꓜꓴ ꓐꓴ ꓠꓬ ꓢꓯꓼ ꓓꓽ ꓟ ꓡꓰ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓔꓯ ꓫꓱꓸ ꓖꓶ꓿ ꓢꓲ ꓒꓽ ꓟꓬꓱ ꓗꓪ ꓐꓰ ꓡꓻ ꓢꓴ ꓔꓯ ꓶꓼ ꓙꓳ ꓫꓱꓹ ꓙꓳ ꓝꓲ꓿ ꓟꓴ ꓡꓳꓹ ꓬꓰ ꓟ ꓪꓴ-ꓢ ꓔꓯ ꓫꓱꓸ ꓖꓶ꓾ ꓐꓰ ꓘꓴˍ ꓡꓳ꓿ 10 ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓵꓽ ꓙꓰˍ ꓕꓯ꓾ ꓕꓲ ꓡꓳ ꓒꓱ ꓡꓱꓸꓼ ꓢꓴꓺ ꓔꓴ ꓡ ꓢꓲ꓾ ꓕꓱ ꓟ ꓮꓽ ꓟ ꓥ ꓡ?꓾ ꓐꓯˍ ꓡꓳ꓿ 11 ꓞꓳ ꓜꓴ ꓠꓬ꓾ ꓕꓱ ꓟ ꓠꓽ ꓖ-ꓡꓲ-ꓡꓲ ꓟꓵꓽ ꓠ-ꓢ-ꓡꓱ ꓘꓹ ꓗꓪ ꓐꓰ ꓡꓻˍ ꓟ ꓟꓷꓽ ꓠꓷꓹ ꓝꓸ ꓢꓴ ꓬꓰ-ꓢꓴ ꓥ ꓡꓳ꓾ ꓐꓯˍ ꓡꓳ꓿ 12 ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓢꓲꓽ ꓫꓬ ꓦꓲ ꓗꓪ ꓪꓴꓽ ꓔꓬ ꓪꓴꓻ ꓔꓬ ꓢꓴ ꓮꓽ ꓙꓵ ꓔꓯ ꓖꓼ ꓓꓳ ꓗꓷ ꓢꓲ ꓠꓬꓲ꓾ ꓒꓴ ꓑ ꓢꓴ ꓢꓽ ꓡ ꓐꓰ ꓮꓸ ꓖꓴꓽ ꓪꓴꓽ ꓢꓴ ꓠꓬꓲꓸ ꓠꓸ ꓖꓴ ꓔꓯ ꓥꓸ ꓩꓴ ꓗꓷˍ ꓡꓳ꓿ 13 ꓖꓳ ꓡꓱ ꓢꓲ ꓬꓲ ꓡꓰ ꓬꓲ ꓪꓽ ꓔꓯ꓾ ꓕꓳ ꓶ ꓗꓪ ꓥꓪ ꓦꓲ ꓠꓽ ꓪꓽ ꓘꓴ ꓦꓲ ꓐꓯ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓿ ꓠꓴ ꓪꓽ ꓠꓽ ꓥꓪ ꓦꓲ ꓔꓯ ꓦꓴꓻ ꓜ ꓢꓴ ꓔꓬ ꓖꓴ ꓒꓬꓱꓼ ꓡ ꓝꓲˍ ꓡꓳ꓾ ꓐꓯˍ ꓡꓳ꓿ 14 ꓢꓲꓽ ꓫꓬ ꓦꓲ ꓗꓪ ꓟꓬ ꓔꓶˍ ꓐꓰ ꓛꓲ ꓫꓳꓸ ꓢꓴ ꓬꓲ ꓔꓯ ꓡꓻˍ ꓕꓯ꓾ ꓬꓲ ꓡꓰ ꓬꓲ ꓪꓽ ꓔꓯ ꓫꓬꓹ ꓓ ꓡꓰ ꓝꓲˍ ꓡꓳ꓿ 15 ꓬꓲ ꓡꓰ ꓓꓵꓽ ꓙ ꓟꓶ ꓓꓴ ꓬꓰˍ ꓟ ꓐꓰ꓾ ꓢꓲꓽ ꓫꓬ ꓦꓲ ꓗꓪ ꓤ ꓠꓱ ꓤ ꓐꓴ ꓡꓰ꓾ ꓓ-ꓪꓵ ꓬꓲ ꓞꓲꓼ ꓤ ꓡꓯꓹ ꓤ ꓔꓯ ꓫꓱꓸ ꓖꓶ꓾ ꓐꓰ ꓘꓴꓻ ꓔꓬ ꓟ ꓔꓯ꓾ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓟꓳꓻ ꓗꓷ ꓠꓬ꓾ ꓬꓲ ꓪꓽ ꓠꓲꓹ ꓟ ꓦꓶꓻ ꓔꓴ ꓡ ꓢꓲ꓾ 16 ꓬꓲ ꓪꓽ ꓡꓰ ꓬꓰ-ꓢꓴ ꓔꓯ꓾ ꓤ ꓠꓱ ꓤ ꓐꓴ ꓮ ꓡꓲ ꓐꓯ ꓔꓬ ꓟ ꓔꓯ ꓠꓴ ꓑ ꓙꓽˍ ꓡ?꓾ ꓐꓯˍ ꓡꓳ꓿ ꓬꓰ-ꓢꓴ ꓡꓰ꓾ ꓑ ꓙꓽˍ ꓡꓳ꓾ ꓖꓳ ꓡꓱ ꓥ ꓟꓲ ꓞꓳ ꓫꓵꓼ ꓤˍ ꓐꓰ ꓮ ꓚꓵꓹ ꓛꓵꓼ ꓢꓴ ꓟꓷꓽ ꓠꓷꓹ ꓗꓪ ꓐꓰ꓾ ꓠꓴ ꓔꓯ ꓫꓱꓸ ꓖꓶ ꓓꓴ ꓙꓽ ꓖꓶ ꓗꓷꓳ꓾ ꓐꓰ ꓐꓳ ꓔꓸ ꓟ ꓔꓯ ꓠꓴ ꓪꓽ ꓟꓽ ꓵ ꓠꓬꓲˍ ꓡ?꓾ ꓐꓯˍ ꓡꓳ꓿ 17 ꓖꓳ ꓕꓯ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓧꓹ ꓔ ꓬꓰ ꓢꓲ꓾ ꓡꓳ ꓒꓱ ꓗꓪ ꓐꓰ ꓓꓳ ꓙꓰ ꓢꓲ ꓠꓬꓲ ꓐꓱ-ꓕ-ꓠꓲ ꓗꓪ ꓬꓲꓼ ꓔ ꓙꓰˍ ꓡꓳ꓿ 18 ꓗꓸ ꓠꓯꓸ ꓕꓲꓽ ꓠꓯꓼ ꓡꓳ ꓒꓱ ꓗꓪ ꓬꓲꓼ ꓙꓰ ꓔꓬ ꓕꓯ ꓬꓰ-ꓢꓴ ꓦꓰꓼ ꓟꓷꓼˍ ꓡꓳ꓿ 19 ꓙ ꓖꓴ ꓘꓶꓽ ꓗꓪ ꓘꓶꓽ ꓢꓶꓽ ꓜꓲꓻ ꓕꓲ ꓜꓲꓻ ꓟꓳꓻˍ ꓠꓬꓲ꓾ ꓬꓲ ꓠꓬ ꓘꓶꓽ ꓢꓶꓽ ꓜꓲ ꓖꓳ ꓟ ꓬꓲꓸ ꓛꓲ ꓔꓲ ꓗꓪ ꓙꓰˍ ꓟꓲ꓾ ꓬꓲ ꓒꓬꓽ ꓟꓽ ꓥ ꓠꓬ ꓬꓲ ꓢꓶꓽ ꓕꓲ ꓢꓶꓽˍ ꓟꓲ ꓟꓽ ꓟꓳ꓿ ꓖꓳ ꓡꓱ ꓠꓬꓲ ꓬꓲ ꓡꓰ ꓢꓲꓹ ꓜꓲꓻ ꓖꓳ ꓟ ꓔꓯ꓾ ꓕꓱ ꓡꓱ ꓖꓳ ꓑꓳꓸ ꓕꓲ ꓞꓲꓼ ꓢꓶꓹ ꓢꓶ ꓕꓽ ꓓꓱꓼ꓾ ꓐꓯ ꓗꓷ ꓠꓬ ꓘꓶꓽ ꓢꓶꓽ ꓜꓲ ꓖꓳ ꓟ ꓠꓽ ꓞꓼ ꓐꓰ ꓙꓴꓺ ꓡꓰꓳ꓿ 20 ꓖꓳ ꓡꓱ ꓗꓷ ꓡꓰˍ ꓟ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ ꓓꓵꓽ ꓙ ꓟꓶ ꓢꓲ꓾ ꓘꓶꓽ ꓢꓶꓽ ꓜꓲ ꓠꓬ ꓮ ꓡꓲ ꓞꓼ ꓐꓰ ꓙꓴ ꓡꓰˍ ꓡ?꓾ ꓐꓯˍ ꓡꓳ꓿ 21 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓙꓵꓻ ꓠꓲꓹ ꓙꓳ ꓢꓲ ꓟꓽ ꓓꓵꓽ ꓙꓽ ꓟꓬꓽˍ ꓕꓯ ꓠꓽ꓾ ꓘꓶ ꓢꓶꓽ ꓜꓲ ꓔꓯ ꓬꓰ ꓗꓷ ꓟ ꓕꓱ ꓟˍ ꓡꓰ ꓟꓽ ꓞꓲ꓾ ꓪꓽ ꓚꓲ ꓕꓱ ꓕꓲ ꓚꓲ ꓔꓯ꓾ ꓠꓴ ꓕꓱ ꓗꓪ ꓐꓰ ꓙꓵꓺ ꓙꓰ ꓢꓲ ꓬꓲꓻ ꓡꓴꓽ ꓐꓱꓻ ꓗꓪ ꓞꓰ ꓓꓵꓽ ꓡꓰ꓾ ꓐꓯˍ ꓟꓲ ꓒꓬꓱꓼ ꓡ ꓥꓳ꓿ 22 ꓠꓴ ꓪꓽ ꓪꓽ ꓘꓴꓻˍ ꓟ ꓗꓪ ꓮꓸ ꓫꓵ ꓓꓰꓽˍ ꓟꓲ꓾ ꓙꓵꓻˍ ꓠꓬ ꓟꓶˍ ꓥꓳ꓾ ꓐꓯˍ ꓡꓳ꓿ 23 ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓡꓰ ꓢꓲ ꓟꓸ ꓖꓶ ꓔꓬ ꓕꓯ꓾ ꓔꓲ ꓒ ꓪꓴꓸ ꓓꓵ ꓣꓱ ꓢꓴˍ ꓐꓰ꓾ ꓑ ꓫꓬꓼ ꓐꓴ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓬꓲ ꓔꓯ ꓡ ꓢꓲ꓾ ꓠꓴ ꓬꓰˍ ꓟ ꓕꓱ ꓟꓬ ꓫꓵꓽ ꓠꓬ ꓮ ꓡꓲ ꓫꓵꓽ ꓙꓵꓽ ꓪ ꓗꓪ ꓐꓰ ꓬꓰˍ ꓡ? ꓙꓵꓽ ꓪ ꓕꓱ ꓟ ꓮꓽ ꓟ ꓡꓰ ꓠꓴ ꓔꓯ ꓖꓶ ꓡ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 24 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶꓽ ꓢꓲ꓾ ꓠꓴ ꓪꓽ ꓔꓯˍ ꓟꓲ ꓥꓪ ꓕꓲ ꓘꓶꓽ ꓠ ꓠꓬꓲˍ ꓠꓬꓲ꓾ ꓠꓴ ꓪꓽ ꓥꓪ ꓔꓯ ꓒꓳꓹ ꓖꓶ ꓡ ꓕꓯ ꓠꓽ꓾ ꓮ ꓡꓲ ꓫꓵꓽ ꓙꓵꓽ ꓪ ꓗꓪ ꓐꓰ ꓥꓪ ꓕꓱ ꓟꓬ ꓫꓵꓽ ꓬꓰˍ ꓟ꓾ ꓥꓪˍ ꓟꓲ ꓠꓴ ꓪꓽ ꓔꓯ ꓐꓯ ꓖꓶˍ ꓥꓳ꓿ 25 ꓬꓳ-ꓦ ꓡꓰ ꓖꓳ ꓓꓱ ꓔꓲꓹ ꓖꓶˍ ꓟ ꓠꓬ ꓮ ꓡꓲ ꓗꓪ ꓐꓰ ꓥ ꓡ? ꓪꓴ-ꓢ ꓗꓪ ꓐꓰ ꓥ ꓡ? ꓞꓳ ꓤ ꓗꓪ ꓐꓰ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓖꓳ ꓕꓯ ꓬꓲ ꓪꓽ ꓖꓪꓻ ꓙꓱ ꓡꓯꓽ ꓘꓳ ꓢꓲ꓾ ꓣꓳꓽ ꓠꓬ ꓪꓴ-ꓢ ꓗꓪ ꓐꓰ ꓥꓳ꓾ ꓐꓯ ꓖꓶˍ ꓠꓬ ꓬꓲ ꓡꓰ꓾ ꓖꓳ ꓡꓱ ꓥ ꓠꓬ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓟꓽ ꓙꓵꓻ ꓡ?꓾ ꓐꓰ ꓐꓯ ꓡ ꓥꓳ꓿ 26 ꓞꓳ ꓤ ꓗꓪ ꓐꓰ ꓥꓳ꓾ ꓐꓯ ꓖꓶˍ ꓟꓲ꓾ ꓮꓽ ꓙꓵ ꓢꓴ ꓡꓰ ꓬꓳ-ꓦ ꓔꓯ ꓠꓽ ꓟꓷꓽ ꓠꓷꓹ ꓝꓸ ꓢꓴ ꓚꓬꓹ ꓔ ꓠꓬꓲ꓾ ꓣꓳꓽ ꓠꓬ ꓞꓳ ꓜꓴ ꓔꓯ ꓙꓳꓺ ꓓꓴ ꓙꓳˍ ꓡꓳ꓾ ꓐꓯ ꓢꓲ꓾ 27 ꓬꓲ ꓪꓽ ꓡꓰ ꓬꓰ-ꓢꓴ ꓔꓯ꓾ ꓥꓪ ꓠꓴꓽ ꓟꓽ ꓢꓷ꓾ ꓐꓰ ꓒꓳꓹ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓬꓰˍ ꓟ ꓕꓱ ꓟꓬ ꓫꓵꓽˍ ꓟꓲ ꓮ ꓡꓲ ꓫꓵꓽ ꓙꓵꓽ ꓪ ꓗꓪ ꓐꓰ ꓬꓰˍ ꓟ꓾ ꓥꓪˍ ꓟꓲ ꓠꓴ ꓪꓽ ꓔꓯ ꓟꓽ ꓐꓯ ꓖꓶ꓾ ꓐꓯ ꓖꓶˍ ꓡꓳ꓿ 28 ꓠꓴ ꓪꓽ ꓮ ꓡꓲ ꓓꓵꓽ ꓙꓽˍ ꓡ? ꓡ ꓞꓳ ꓕꓲ ꓣꓳ ꓠꓬ ꓤ ꓠꓬꓲꓽ ꓫꓵꓸ ꓙꓳ ꓢꓲ꓾ ꓬꓲ ꓡꓰ ꓤ ꓪꓴꓽ ꓔꓯ꓾ ꓥꓪ ꓤꓽꓳ꓾ ꓠꓬꓲꓸ ꓠꓬꓲ ꓠꓴ ꓠꓬ ꓛꓱꓼ ꓡꓱ ꓐꓱ ꓗꓪ ꓟꓬꓱꓽ ꓬꓰ ꓙꓰ꓾ ꓐꓯ ꓖꓶˍ ꓡꓳ꓿ 29 ꓬꓲ ꓪꓴꓸ ꓕꓯ ꓬꓲ ꓠꓬ꓾ ꓥꓪ ꓟꓽ ꓙꓰ꓾ ꓐꓰ ꓐꓯ ꓗꓷˍ ꓟꓲ꓾ ꓗꓸ ꓠꓯꓸ ꓠꓬ ꓬꓲ ꓓꓵꓽ ꓙ ꓡꓰꓼ ꓡ ꓢꓲ ꓙꓰ ꓗꓷꓳ꓿ 30 ꓝꓮꓲ ꓠꓬꓲꓽ ꓣꓳ ꓕꓲ ꓣꓳ ꓟ ꓔꓯˍ ꓟꓲ ꓬꓲ ꓐꓹ ꓐꓽ ꓡꓰ ꓝꓲ ꓗꓷ ꓠꓬ꓾ ꓐꓹ ꓐꓽꓳ꓾ ꓥꓪ ꓙꓰˍ ꓥꓳ꓾ ꓐꓰ ꓐꓯˍ ꓟꓲ꓾ ꓬꓲ ꓠꓬ ꓟꓽ ꓙꓰ꓿ 31 ꓤ ꓕꓱ ꓠꓬꓲꓽ ꓫꓵꓸ ꓟ ꓬꓲ ꓐꓹ ꓐ ꓠꓲꓹ ꓡꓶꓽ ꓛꓳˍ ꓟ ꓮ ꓡꓲ ꓕꓲ ꓣꓳ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓠꓬ꓾ ꓬꓲ ꓪꓽ ꓡꓰ꓾ ꓬꓲ ꓪꓴꓸ ꓕꓲ ꓣꓳ ꓟ ꓥꓳ꓾ ꓐꓯˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓝꓲꓸ ꓫ ꓢꓴˍ ꓐꓰ ꓖꓳꓻ ꓪꓴꓽ ꓟ ꓠꓽ꓾ ꓪꓴ-ꓢ ꓗꓴꓷꓼ ꓗꓪ ꓠꓴ ꓪꓽ ꓟꓲꓽ ꓕꓯꓽ ꓢꓲ ꓓꓵꓽ ꓡꓰ ꓟꓶˍ ꓥꓳ꓿ 32 ꓮ ꓡꓲꓳ ꓐꓯ ꓠꓬ ꓬꓳ-ꓦ ꓠꓬ ꓠꓴ ꓪꓽ ꓔꓯ ꓔꓱꓹ ꓜꓳꓽˍ ꓟ ꓙ ꓖꓴ ꓟꓸ ꓖꓶ ꓠꓹ ꓟ ꓡꓻˍ ꓟꓲ ꓠꓴ ꓪꓽ ꓠꓽ ꓬꓲ ꓔꓯ ꓟꓽ ꓙꓵ꓿ ꓖꓳ ꓡꓱ ꓥ ꓟꓲ ꓝꓲꓸ ꓫ ꓢꓴˍ ꓐꓰ ꓖꓳ ꓪꓴꓽ ꓟ ꓠꓽ ꓬꓲ ꓔꓯ ꓙꓵꓻˍ ꓡꓳ꓿ ꓖꓳ ꓟ ꓔꓯ ꓠꓴ ꓪꓽ ꓟꓳꓻ ꓗꓷˍ ꓟꓲ꓾ ꓬꓲ ꓔꓯ ꓙꓵꓻ ꓠꓹ ꓟ ꓠꓴ ꓪꓽ ꓟꓽ ꓓꓵꓽ ꓙ ꓒꓳꓹ ꓡꓰꓼ ꓡ꓿ 33 ꓔꓯ ꓥꓳꓽ ꓝꓮꓲ ꓕꓲ ꓟ ꓔꓯ ꓠꓴ ꓪꓽ ꓠ ꓠꓹ꓿ ꓦꓻ ꓟꓲ ꓢꓲ ꓒꓽ ꓕꓲ ꓣꓳ ꓠꓬ ꓛꓱꓼ ꓡꓱ ꓕꓲ ꓐꓱ ꓔꓶ ꓢꓲ꓾ ꓚꓳ ꓡꓳ ꓡꓳ ꓚꓱꓺ ꓢꓲ ꓠꓬꓲ꓾ ꓐꓱ ꓠꓯꓸꓼ ꓗꓪ ꓛꓱꓼ ꓡꓱꓼ ꓢꓶꓽ ꓠꓬꓲꓸ ꓖꓴ ꓚꓴꓸˍ ꓡꓳ꓿ ꓝꓮꓲ ꓡꓳꓸ ꓜꓳꓻ ꓦꓲˍ ꓟꓲ ꓕꓲ ꓦꓲ ꓫꓬꓹ ꓢꓲ꓾ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓑꓯꓹ ꓖꓶꓽ ꓗꓷ ꓠꓬ꓾ ꓠꓱꓸ ꓐꓯꓼ ꓕꓲ ꓟꓵꓽ ꓗꓪ ꓙꓰˍ ꓡꓳ꓿ 34 ꓛꓱꓼ ꓡꓱꓼ ꓢꓶ ꓧꓼ ꓝꓲꓸ ꓛꓲ ꓡ ꓠꓬ ꓬꓲ ꓚꓳ ꓑꓸ ꓐꓴ ꓔꓯ ꓬꓲ ꓟꓶ ꓙꓲꓽ ꓙꓳˍ ꓟ ꓣꓷꓽ ꓫ ꓔꓯꓹ ꓬꓲꓼ ꓡ ꓠꓹ ꓟ꓾ ꓟꓬꓱꓽ ꓬꓰ ꓢꓴ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ 35 ꓖꓳ ꓡꓱ ꓥ ꓟꓲ ꓛꓱꓼ ꓡꓱꓼ ꓐꓱ ꓑꓯꓹ ꓬꓰ ꓢꓴ ꓐꓴ ꓡꓰ ꓬꓲ ꓚꓳ ꓑꓸ ꓐꓴ ꓔꓯ ꓣꓴ ꓢꓲ꓾ ꓕꓲ ꓣꓳ ꓔꓯ ꓠꓬ ꓓꓶꓽ꓾ ꓕꓲ ꓣꓳ ꓔꓯ ꓢꓰꓼ꓾ ꓕꓲ ꓣꓳ ꓔꓯ ꓠꓬ Bꓸ ꓛꓲ ꓡꓰ ꓡꓳꓺˍ ꓡꓳ꓿ 36 ꓝꓮꓲ ꓕꓲ ꓧꓪꓹ ꓬꓲ ꓡꓰ ꓬꓲ ꓚꓳ ꓑꓸ ꓐꓴ ꓧꓶꓸ ꓕꓯˍ ꓟ ꓟꓬ ꓟꓽ ꓞꓲ ꓕꓲ ꓧꓳꓽ ꓔꓯ ꓝꓲ ꓩꓴ ꓗꓷˍ ꓟꓲ꓾ ꓬꓲ ꓪꓽ ꓠꓬ ꓧꓶꓸ ꓕꓯꓽˍ ꓟ ꓡꓰ ꓐꓰ ꓬꓲ ꓪꓽ ꓔꓯ ꓬꓰ ꓖꓶˍ ꓢꓰꓽ ꓡꓳ꓿ 37 ꓗꓸ ꓠꓯꓸ ꓠꓬ꓾ ꓥꓪ ꓮ ꓐꓲ ꓔꓯ ꓠꓽ ꓬꓲ ꓪꓽ ꓙꓳꓺ ꓒꓵꓽˍ ꓥꓳ꓾ ꓓꓵꓽ ꓙ ꓢꓲ꓾ ꓬꓲ ꓤ ꓔꓯ ꓬꓲ ꓪꓽ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ 38 ꓖꓳ ꓡꓱ ꓥ ꓟꓲ ꓛꓱꓼ ꓡꓱ ꓐꓱ ꓑꓯꓹ ꓬꓰ ꓢꓴ ꓐꓴ ꓡꓰ ꓬꓲ ꓤ ꓔꓯ ꓟꓳꓻ ꓗꓷ ꓕꓯ꓾ ꓕꓱ ꓟ ꓠꓬ ꓬꓲ ꓡꓯꓼ ꓪ ꓟꓶ ꓢꓴ ꓥꓳ꓾ ꓡꓯ꓾ ꓣꓳꓽ ꓬꓲ ꓔꓯ ꓢꓰꓼ ꓗꓷ ꓢꓲ꓾ ꓬꓲ ꓡꓯꓼ ꓪ ꓔꓯ ꓦꓴꓻ ꓓꓴ ꓬꓰ ꓡꓯ꓾ ꓐꓰ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ 39 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓔꓯ ꓣꓴ ꓢꓲ ꓐꓱꓻ ꓠꓱ ꓫꓱꓸ ꓟꓸꓼ ꓗꓪ ꓖꓼ ꓦ ꓗꓷ ꓢꓲ ꓢꓰꓼ ꓗꓷꓳ꓿ 40 ꓖꓳ ꓡꓱ ꓠꓬ ꓐꓱ ꓬꓲꓸ ꓢꓲ ꓒꓽ ꓡꓻ ꓕꓯ꓾ ꓬꓲ ꓡꓰ ꓦꓻ ꓟꓲ ꓑꓯꓹ ꓖꓶ ꓔ ꓢꓴ ꓐꓴ ꓔꓯ ꓮ ꓡꓲ ꓬꓰ ꓖꓶ ꓡ ꓥꓳ ꓪ?꓾ ꓐꓰ ꓠ ꓠꓬꓲˍ ꓕꓯ꓾ 41 ꓬꓲ ꓪꓽ ꓡꓰ ꓬꓲ ꓔꓯ꓾ ꓮ ꓡꓲ ꓥ ꓟꓲ ꓞꓳ ꓥꓶ ꓖꓳ ꓕꓲ ꓧꓳꓽ ꓟ ꓔꓯ ꓢꓰꓼ ꓗꓷ ꓢꓲ꓾ ꓛꓱꓼ ꓡꓱꓼ ꓐꓱ ꓠꓬ ꓬꓲ ꓝꓲꓸ ꓛꓲ ꓡ ꓕꓯ ꓬꓲ ꓔꓯ ꓢꓶꓹ ꓢꓶ ꓡꓯꓼ ꓙꓱ ꓖꓶ ꓡ ꓟ ꓠꓱꓸ ꓐꓯꓼ ꓕꓲ ꓧꓳꓽ ꓔꓯ ꓑꓯꓹ ꓖꓶˍ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 42 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓢꓲꓽ ꓫꓬ ꓕꓳ ꓶ ꓗꓪ꓾ ꓦꓲ ꓫꓬꓹ ꓢꓴ ꓡꓰ ꓡꓳ ꓗꓷ ꓟ Bꓸ ꓛꓲ ꓠꓬ꓾ ꓦꓲ ꓚꓰꓺ ꓬꓲ ꓡꓯꓼ ꓗꓪ ꓟ ꓡꓳ ꓓꓰ ꓓꓽ ꓟ ꓒꓬꓱꓼ ꓡꓺꓳ꓿ ꓕꓱ ꓟ ꓠꓬ ꓢꓲ ꓒꓽ ꓡꓰ ꓬꓰˍ ꓟ ꓥ ꓢꓲ꓾ ꓣꓳꓽ ꓡꓳꓸ ꓟꓳꓻ ꓢꓴ ꓮꓽ ꓙꓵ ꓓꓵꓽ ꓙ ꓟꓶ ꓓꓴ ꓥꓳ꓾ ꓐꓰ ꓐꓳ ꓔ ꓟ ꓔꓯ ꓠꓴ ꓪꓽ ꓟꓽ ꓵ ꓠꓬꓲ ꓡ? 43 ꓖꓳ ꓡꓱ ꓠꓬꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓪꓴ-ꓢ ꓗꓴꓷꓼ ꓠꓬ ꓠꓴ ꓪꓽ ꓔꓯˍ ꓐꓰ ꓣꓴꓻ ꓔꓯꓹ ꓙꓰ ꓢꓲ꓾ ꓬꓲ ꓢꓶꓽ ꓓꓱꓼˍ ꓟ ꓞꓳ ꓫꓵꓽ ꓔꓯ ꓖꓶꓽ ꓗꓷˍ ꓥꓳ꓿ 44 Bꓸ ꓛꓲ ꓕꓱ ꓟ ꓕꓯꓽ ꓢꓲ ꓗꓪ ꓡꓱꓸ ꓓꓳꓽ ꓡꓰ ꓢꓴ ꓠꓬ ꓛꓱꓼ ꓡꓰˍ ꓥꓳ꓿ Bꓸ ꓛꓲ ꓕꓱ ꓟ ꓮꓽ ꓟ ꓕꓯꓽ ꓢꓲ ꓗꓪ ꓞꓰꓻ ꓔꓲꓸ ꓡꓰ ꓠꓬ꓾ ꓬꓲ ꓔꓯ ꓔꓲꓸ ꓧꓶꓽ ꓗꓷˍ ꓥꓳ꓾ ꓐꓯˍ ꓡꓳ꓿ 45 ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓽ ꓔꓯꓺ ꓥꓳꓽ ꓕꓱ ꓟꓬ ꓟ ꓔꓯ ꓑ ꓙꓽ ꓗꓷ ꓠꓬ꓾ ꓬꓲ ꓪꓽ ꓔꓯ ꓐꓯ ꓬꓯꓼˍ ꓟ ꓔꓯ ꓡꓳꓸ ꓓꓳ ꓡ ꓡꓳ꓿ 46 ꓬꓲ ꓪꓽ ꓠꓽ ꓬꓰ-ꓢꓴ ꓔꓯ ꓣꓴ ꓠꓲꓹ ꓫꓵˍ ꓟꓲ꓾ ꓡ ꓞꓳ ꓬꓲ ꓜꓴꓻ ꓡꓰ ꓬꓲ ꓔꓯ ꓟꓷꓽ ꓠꓷꓹ ꓝꓸ ꓢꓴ ꓚꓬꓹ ꓔ ꓠꓬꓲ꓾ ꓬꓲ ꓪꓽ ꓔꓯ ꓙꓳꓺˍ ꓟ ꓑꓶ ꓓꓴ ꓬꓲ ꓔꓯ ꓣꓴ ꓟꓽ ꓑꓶꓸ꓿

ꓟ-ꓔꓲ 22

1 ꓬꓰ-ꓢꓴ ꓠꓬ ꓝꓮꓲ ꓔꓯ ꓥꓳꓽ ꓣꓱꓽ ꓢꓲ ꓬꓲ ꓪꓽ ꓔꓯ ꓕꓱ ꓡꓱ ꓐꓯˍ ꓡꓳ꓿ 2 ꓟꓴꓽ ꓗꓪ ꓗꓴꓷꓼ ꓠꓬ꓾ ꓪ ꓔꓲ ꓕꓲ ꓣꓳ ꓡꓰ ꓬꓲ ꓤ ꓐꓱ ꓶ ꓤꓽ ꓟꓶ ꓚꓱꓺˍ ꓟ ꓑꓮꓲ ꓕꓲ ꓟ ꓬꓰˍ ꓟ ꓡꓰ ꓐꓰ ꓗꓹ ꓡꓳ꓿ 3 ꓤꓽ ꓟꓶ ꓚꓱꓺˍ ꓟ ꓑꓮꓲ ꓗꓪ ꓘꓴ ꓔ ꓢꓴ ꓔꓯ ꓘꓴꓻ ꓬꓰ ꓠꓹ ꓟ꓾ ꓬꓲ ꓚꓳ ꓑꓸ ꓐꓴ ꓔꓯ ꓝꓲ ꓩꓴ ꓗꓷ ꓠꓬ꓾ ꓘꓴ ꓔ ꓢꓴ ꓠꓽ ꓡꓻ ꓠꓲꓹ ꓟꓽ ꓫꓵ꓿ 4 ꓖꓳ ꓕꓯ ꓪ ꓔꓲ ꓠꓬ ꓚꓳ ꓑꓸ ꓬꓲ ꓔꓱꓹ ꓬꓲ ꓕꓲ ꓧꓳꓽ ꓔꓯ ꓝꓲ ꓩꓴ ꓗꓷ ꓢꓲ꓾ ꓠꓴ ꓪꓽ ꓠꓬ ꓘꓴꓻ ꓔ ꓢꓴ ꓐꓴ ꓔꓯ꓾ ꓥꓪ ꓑꓮꓲ ꓙꓽ ꓖꓶ ꓓꓳ ꓡꓰꓳ꓿ ꓥꓪ ꓮꓸ ꓠꓬꓲꓽˍ ꓐꓰ ꓞꓶˍ ꓟ ꓙꓱꓽ ꓤˍ ꓟꓲ ꓢꓰꓼ ꓗꓷꓳ꓿ ꓮꓸ ꓫꓵˍ ꓟꓲ ꓙꓽ ꓖꓶ ꓖꓴ ꓡꓰꓳ꓿ ꓠꓴ ꓪꓽ ꓠꓬ ꓤꓽ ꓟꓶ ꓚꓱꓺˍ ꓟ ꓑꓮꓲ ꓗꓪ ꓡꓯ꓾ ꓐꓰ ꓐꓯ ꓖꓶ ꓬꓰ꓾ ꓐꓯˍ ꓡꓳ꓿ 5 ꓖꓳ ꓡꓱ ꓥ ꓟꓲ ꓘꓴꓻ ꓔ ꓢꓴ ꓐꓴ ꓠꓽ ꓟꓽ ꓒꓵꓽ ꓢꓲ꓾ ꓟꓲ ꓚꓱꓹ ꓗꓪ ꓟꓲ ꓙꓰˍ ꓡꓳ꓿ ꓕꓲ ꓣꓳ ꓠꓬ ꓚꓲꓸ ꓛꓬ ꓦ ꓟꓲ ꓗꓪ ꓙꓰˍ ꓡꓳ꓿ ꓕꓲ ꓣꓳ ꓠꓬ ꓶꓻ ꓡꓯꓼ ꓟꓴ ꓙꓰˍ ꓡꓳ꓿ 6 ꓜꓰꓻ ꓡꓰ ꓢꓴ ꓐꓴ ꓠꓬ ꓚꓳ ꓑꓸ ꓐꓴ ꓔꓯ ꓣꓴ ꓢꓲ꓾ ꓫꓸ ꓔꓳ ꓫ ꓒꓯꓼ ꓬꓰ ꓖꓶ ꓢꓲ ꓠꓬꓲ ꓬꓲ ꓪꓽ ꓔꓯ ꓢꓰꓼ ꓗꓷˍ ꓡꓳ꓿ 7 ꓖꓳ ꓕꓯ ꓪ ꓔꓲ ꓠꓽ ꓠꓲꓹ ꓟ ꓦꓶꓻ ꓠꓬꓲ꓾ ꓟꓯꓼ ꓜꓴ ꓝꓲ ꓩꓴ ꓗꓷ ꓢꓲ꓾ ꓖꓳ ꓕꓲ ꓧꓳꓽ ꓟ ꓔꓯ ꓛꓴ ꓛꓰꓹ ꓡꓰ ꓝꓲ ꓢꓲ ꓠꓬꓲ꓾ ꓬꓲ ꓪꓽ ꓡꓳ ꓒꓱ ꓔꓯˍ ꓟꓲ ꓛꓴꓻ ꓗꓷꓳ꓿ 8 ꓖꓳ ꓕꓯ ꓪ ꓔꓲ ꓡꓰ ꓬꓲ ꓚꓳ ꓑꓸ ꓐꓴ ꓔꓯ꓾ ꓤꓽ ꓟꓶ ꓚꓱꓺˍ ꓟ ꓑꓮꓲ ꓠꓬ ꓙꓽ ꓖꓶ ꓓꓳ ꓡꓰꓳ꓾ ꓖꓳ ꓡꓱ ꓥ ꓟꓲ ꓥꓪ ꓡꓰ ꓘꓴ ꓔ ꓢꓴ ꓐꓴ ꓠꓽ ꓜꓽ ꓡ ꓟꓽ ꓒꓵꓽ꓿ 9 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓙꓰ ꓢꓲ꓾ ꓙ ꓖꓴ ꓙ ꓐꓽ ꓗꓪ ꓔꓳꓹ ꓜꓳꓽˍ ꓟ ꓡ ꓞꓳ ꓥ ꓕ ꓑꓳꓸ ꓔꓯ ꓤꓽ ꓟꓶ ꓚꓱꓺˍ ꓟ ꓑꓮꓲꓽ ꓗꓪ ꓘꓴꓻ ꓔꓯꓹ ꓡꓯ꓾ ꓐꓯˍ ꓡꓳ꓿ 10 ꓚꓳ ꓑꓸ ꓖꓳ ꓕꓲ ꓧꓳꓽ ꓠꓬ ꓓꓳ ꓙꓰ ꓢꓲ꓾ ꓔꓳꓹ ꓜꓳꓽˍ ꓟ ꓡ ꓞꓳ ꓥ ꓕ ꓑꓳ꓾ ꓞꓳ ꓥꓶꓺˍ ꓐꓰ ꓞꓳ ꓙꓲꓻ ꓮꓽ ꓙꓵ ꓔꓯ ꓘꓴ ꓜꓲꓼ ꓡ ꓠꓬ꓾ ꓑꓮꓲ ꓬꓰ ꓖꓴ ꓗꓪ ꓪꓰ ꓤ ꓐꓲꓺ ꓡꓰꓳ꓿ 11 ꓪ ꓔꓲ ꓓꓵꓽ ꓡ ꓢꓲ ꓪꓰ ꓤ ꓔꓯ ꓡꓳꓸ ꓠꓬꓲ ꓠꓬ꓾ ꓖꓳ ꓗꓪ ꓑꓮꓲ ꓐꓵ ꓞꓶꓽ ꓟꓽ ꓖꓪꓽ ꓔ ꓟ ꓡ ꓞꓳ ꓕꓲ ꓣꓳ ꓔꓯ ꓟꓳꓻˍ ꓡꓳ꓿ 12 ꓪ ꓔꓲ ꓡꓰ ꓬꓲ ꓔꓯ꓾ ꓗꓪ ꓛꓳꓽꓳ꓾ ꓠꓴ ꓠꓬ ꓑꓮꓲ ꓐꓵ ꓞꓶꓽ ꓟꓽ ꓖꓪꓽ ꓖꓪ ꓕꓱ ꓗꓪ ꓮ ꓡꓲ ꓓꓵꓽ ꓡ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓠꓬ ꓫꓸ ꓕꓱ ꓟꓽ ꓐꓰꓼ ꓡ ꓡ ꓒꓳꓹ ꓖꓶ ꓓꓴ ꓟꓽ ꓙꓳ ꓗꓷ ꓡꓰꓳ꓿ 13 ꓖꓳ ꓕꓯ ꓪ ꓔꓲ ꓠꓬ ꓬꓲ ꓔꓯ ꓣꓱꓽ ꓙ ꓢꓴ ꓐꓴ ꓔꓯ ꓝꓲ ꓢꓲ꓾ ꓬꓲ ꓔꓯ ꓛꓲ ꓛꓵꓼ ꓡꓯꓼ ꓛꓵꓼ ꓢꓲ ꓠꓬꓲ꓾ ꓠꓱ ꓫꓱꓸ ꓟꓸꓼ ꓠꓯ ꓞꓲꓹ ꓟ ꓗꓪ ꓡꓳ ꓩꓴ ꓗꓷ꓿ ꓖꓳ ꓗꓪ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓿ 14 ꓮ ꓡꓲꓳ ꓐꓯ ꓠꓬ ꓘꓴꓻ ꓔ ꓢꓴ ꓠꓬ ꓟꓬꓽˍ ꓟꓲ꓾ ꓢꓲꓺ ꓔ ꓢꓴ ꓠꓽ ꓠꓲꓸˍ ꓡꓳ꓾ ꓐꓯˍ ꓡꓳ꓿ 15 ꓖꓳ ꓕꓯ ꓒ-ꓡꓲ-ꓢꓷ ꓐꓴ ꓓꓳ ꓙꓰ ꓢꓲ꓾ ꓬꓰ-ꓢꓴ ꓬꓲ ꓚꓲꓸ ꓛꓬ ꓐꓯ ꓘꓶꓽ ꓗꓪ ꓐꓰ ꓬꓲ ꓔꓯ ꓮ ꓡꓲ ꓠꓸ ꓣꓴ ꓠꓹ ꓟ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ 16 ꓖꓳ ꓡꓱ ꓢꓲ ꓬꓲ ꓪꓽ ꓡꓰ ꓬꓲ ꓪꓽ ꓢꓲ ꓤ ꓐꓴˍ ꓐꓰ ꓩꓴ-ꓡꓲ ꓕꓲ ꓧꓳꓽ ꓟ ꓡ ꓞꓳ ꓔꓯ ꓬꓲ ꓔꓬ ꓗꓪ ꓝꓲ ꓩꓴ ꓗꓷ ꓢꓲ꓾ ꓟꓸ ꓒꓽꓳ꓾ ꓠꓴ ꓠꓽ ꓞꓳ ꓔꓱꓹ ꓥ ꓟ ꓐꓰ꓾ ꓢꓴ ꓒꓬꓱꓽ ꓔꓯ ꓟꓽ ꓢꓲꓺ ꓢꓲꓺ꓾ ꓔꓱꓹ ꓔꓱꓹꓼ ꓐꓰ ꓪꓴ-ꓢ ꓙ ꓖꓴ ꓟꓸ ꓖꓶ ꓢꓴ ꓥ ꓟ ꓥꓪ ꓠꓴꓽ ꓢꓷˍ ꓡꓳ꓿ 17 ꓖꓳ ꓡꓱ ꓠꓬꓲ ꓠꓴ ꓮ ꓡꓲ ꓓꓵꓽ ꓙꓽˍ ꓟ ꓥꓪ ꓠꓴꓽ ꓔꓯ ꓐꓯ ꓖꓶ ꓡꓯ꓿ ꓢꓲ-ꓢ ꓔꓯ ꓔꓯꓹ ꓒꓵꓽ ꓓꓳ ꓓ ꓡ? ꓓꓳ ꓟꓽ ꓓ ꓡ?꓾ ꓐꓰ ꓠ ꓠꓬꓲ ꓬꓰ ꓝꓲˍ ꓡꓳ꓿ 18 ꓬꓰ-ꓢꓴ ꓠꓽ ꓬꓲ ꓪꓽ ꓥꓶˍ ꓟ ꓚꓴꓽ ꓬꓲꓹ ꓔꓯ ꓢꓷꓸˍ ꓠꓬꓲ ꓬꓲ ꓪꓽ ꓔꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓐꓴꓳ꓾ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓫꓵꓽ ꓠꓬꓲˍ ꓡ? 19 ꓔꓯꓹ ꓒꓵ ꓐꓶꓻ ꓓꓴ ꓓꓲ-ꓠ-ꓣꓲ ꓕꓲ ꓒꓯꓼ ꓥꓪ ꓔꓯ ꓟꓳꓸ ꓖꓶ ꓡꓯ꓾ ꓐꓯ ꓗꓷ ꓠꓬ꓾ ꓬꓲ ꓪꓽ ꓡꓰ ꓬꓲ ꓔꓯ ꓓꓲ-ꓠ-ꓣꓲ ꓕꓲ ꓒꓯꓼ ꓔꓯꓹ ꓖꓶ ꓡ ꓡꓳ꓿ 20 ꓬꓲ ꓡꓰ ꓬꓲ ꓪꓽ ꓔꓯ꓾ ꓞꓳ ꓐꓬꓱꓽˍ ꓐꓰ ꓟꓬꓱꓺ ꓕꓱ ꓟ ꓮ ꓟ ꓔꓯꓸ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 21 ꓖꓳ ꓕꓯ ꓬꓲ ꓪꓽ ꓡꓰ꓾ ꓪ ꓔꓲ ꓢꓲ-ꓢ ꓔꓯꓸ ꓟ ꓥ ꓡꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ꓾ ꓢꓲ-ꓢ ꓔꓯꓸ ꓟ ꓠꓬ ꓢꓲ-ꓢ ꓔꓯ ꓖꓶ꓾ ꓪꓴ-ꓢ ꓔꓯꓸ ꓟ ꓠꓬ ꓪꓴ-ꓢ ꓔꓯ ꓖꓶ꓾ ꓐꓯ ꓖꓶˍ ꓡꓳ꓿ 22 ꓬꓲ ꓪꓽ ꓑ ꓙꓽ ꓗꓷ ꓠꓬ ꓓꓵꓽ ꓙ ꓟꓶ ꓢꓲ ꓬꓲ ꓗꓪ ꓐꓰ ꓙꓰ ꓗꓷꓳ꓿ 23 ꓖꓳ ꓕꓲ ꓠꓬꓲ ꓗꓪ꓾ ꓢꓯꓸ ꓬꓲꓼ ꓡ ꓟ ꓟꓽ ꓙꓳ꓾ ꓐꓯ ꓢꓴ ꓢ-ꓓꓴ-ꓗꓷ ꓐꓴ ꓬꓲ ꓔꓯ ꓡ ꓢꓲ ꓕꓱ ꓡꓱ ꓠ ꓠꓬꓲˍ ꓡꓳ꓿ 24 ꓟꓸ ꓒꓽꓳ꓾ ꓟꓳ-ꓫꓲ ꓡꓰ꓾ ꓡ ꓞꓳ ꓕꓲ ꓣꓳ ꓤ ꓠꓱ ꓟꓽ ꓙꓳ ꓙꓳ ꓫꓵꓻ ꓠꓬ꓾ ꓬꓲ ꓠꓬꓲ ꓤ ꓡꓰ ꓬꓲ ꓟꓺ ꓡꓽ ꓔꓯ ꓫ ꓢꓲ꓾ ꓬꓲ ꓮꓸ ꓬꓲꓼ ꓐꓱ ꓶ ꓬꓲ ꓫꓵꓸ ꓚꓱꓸ ꓖꓶ ꓠ ꓗꓹ ꓡꓳ꓾ ꓐꓰ ꓟꓸ ꓔ ꓡꓳ꓿ 25 ꓧꓶꓸ ꓕꓯ ꓥꓪ ꓠꓴꓽ ꓔꓬ ꓗꓪ ꓤꓽ ꓫꓵꓽ ꓫꓵꓸ ꓙꓳ ꓠꓬꓲꓳ꓿ ꓤ ꓪꓴꓽ ꓠꓬ ꓤ ꓟꓶ ꓧꓪ ꓗꓷ ꓗꓸ ꓠꓯꓸ ꓤ ꓠꓱ ꓟꓽ ꓙꓳ ꓙꓳ ꓫꓵꓻ ꓢꓲ꓾ ꓬꓲ ꓤ ꓟꓶ ꓠꓬ ꓬꓲ ꓠꓬꓲ ꓤ ꓐꓴ ꓔꓯ ꓗꓶ ꓔꓲꓸ ꓬꓰꓳ꓿ 26 ꓖꓳ ꓟ ꓡꓰ ꓐꓰ ꓮ-ꓓꓶˍ ꓐꓰ ꓮ-ꓘꓰˍ ꓟꓲ꓾ ꓕꓲ ꓣꓳ ꓗꓸ ꓠꓯ ꓕꓲ ꓣꓳ꓾ ꓫꓵꓽ ꓫꓵꓸ ꓗꓪ ꓛꓲ ꓬꓲ ꓔꓯ ꓫꓺ ꓢꓲ ꓮꓽ ꓙꓵ ꓫꓵꓳ꓿ 27 ꓬꓲ ꓪꓽ ꓮꓽ ꓙꓵ ꓫꓵꓻ ꓗ ꓠꓯꓸ ꓠꓬ ꓤ ꓟꓶ ꓤˍ ꓟꓲ ꓫꓵꓳ꓿ 28 ꓖꓳ ꓡꓱ ꓠꓬꓲ ꓢꓯꓸ ꓬꓲꓼ ꓡ ꓟ ꓗꓪ꓾ ꓬꓲ ꓠꓬ ꓬꓲ ꓪꓽ ꓫꓵꓽ ꓫꓵꓸ ꓟ ꓗꓪ꓾ ꓮ ꓡꓲ ꓕꓲ ꓣꓳ ꓟ ꓤ ꓟꓶ ꓥ ꓡ? ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓮꓽ ꓙꓵ ꓬꓲ ꓔꓯ ꓫꓺ ꓠꓬꓲꓳ꓾ ꓐꓯˍ ꓡꓳ꓿ 29 ꓬꓰ-ꓢꓴ ꓠꓽ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓥꓳꓽ ꓡꓰˍ ꓟ ꓠꓬ꓾ ꓢꓲꓽ ꓫꓬ ꓕꓳ ꓶˍ ꓐꓰ ꓪꓴ-ꓢ ꓪꓽ ꓠꓬꓲˍ ꓟ ꓔꓯ ꓟꓽ ꓙ ꓜꓲꓼˍ ꓟ ꓗꓪ ꓐꓰ ꓥ ꓡꓳ꓿ 30 ꓮ ꓡꓲꓳ ꓐꓯ ꓠꓬ ꓢꓯꓸ ꓬꓲꓼ ꓡ ꓟ ꓗꓪ꓾ ꓬꓲ ꓪꓽ ꓠꓬ ꓤ ꓟꓶꓻˍ ꓟꓲ ꓟꓽ ꓧꓪ꓾ ꓮꓸ ꓟꓲꓽˍ ꓟꓲ ꓟꓽ ꓩꓴ꓿ ꓬꓲ ꓪꓽ ꓠꓽ ꓟꓴꓽ ꓗꓪ ꓝꓲ ꓓꓴ ꓐꓴˍ ꓡꓰ ꓐꓰ ꓗꓹ ꓥꓳ꓿ 31 ꓫꓵꓻ ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓟꓳꓸ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓐꓯ ꓔ ꓟ ꓔꓯ ꓠꓴ ꓪꓽ ꓟꓽ ꓵ ꓠꓬꓲ ꓡ? 32 ꓬꓲ ꓡꓰ꓾ ꓥꓪ ꓠꓽ ꓮ-ꓐ-ꓡ-ꓦ ꓬꓲ ꓪꓴ-ꓢˍ ꓐꓰ ꓬꓲ-ꓢ ꓬꓲ ꓪꓴ-ꓢˍ ꓐꓰ ꓬ-ꓗꓴ ꓬꓲ ꓪꓴ-ꓢ ꓥ ꓡꓳ꓾ ꓐꓯˍ ꓡꓳ꓿ ꓪꓴ-ꓢ ꓠꓬ ꓫꓵꓻ ꓢꓴ ꓐꓴ ꓪꓴ-ꓢ ꓟꓽ ꓥ꓾ ꓢꓯꓸ ꓔꓬ ꓢꓴ ꓐꓴ ꓪꓴ-ꓢ ꓥ ꓡꓳ꓾ ꓐꓯˍ ꓡꓳ꓿ 33 ꓬꓲ ꓟꓸ ꓖꓶˍ ꓟ ꓔꓯ ꓞꓳ ꓜꓴꓻ ꓐꓴ ꓑ ꓙꓽ ꓗꓷ ꓠꓬ ꓓꓵꓽ ꓙ ꓟꓶꓻ ꓡꓰˍ ꓡꓳ꓿ 34 ꓬꓰ-ꓢꓴ ꓡꓰ ꓢ-ꓓꓴ-ꓗꓷ ꓐꓴ ꓔꓯ ꓐꓯ ꓧꓪꓸ ꓡꓰ ꓟ ꓔꓯ ꓒ-ꓡꓲ-ꓢꓷ ꓐꓴ ꓑ ꓙꓽ ꓗꓷ ꓠꓬ꓾ ꓬꓲ ꓪꓽˍ ꓟꓲ ꓜꓲꓼ ꓡ ꓢꓲ꓾ 35 ꓬꓲ ꓪꓽ ꓗꓪ ꓟ ꓙꓵꓽ ꓗ ꓒ ꓕꓲ ꓣꓳ ꓠꓬ ꓬꓰ-ꓢꓴ ꓔꓯ ꓫꓵꓽ ꓠꓬꓲ ꓠꓹ ꓟ ꓕꓱ ꓡꓱ ꓠ ꓠꓬꓲˍ ꓡꓳ꓿ 36 ꓟꓸ ꓒꓽꓳ꓾ ꓙꓵꓽ ꓗ ꓕꓳ ꓶ ꓗꓪ ꓕꓵꓼ ꓪꓽ ꓮ ꓡꓲ ꓕꓲ ꓚꓱꓹ ꓟ ꓪꓴꓽ ꓓꓰꓺˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 37 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬ ꓕꓲ ꓠꓲꓹ ꓟ ꓡꓱꓸ꓾ ꓕꓲ ꓶꓻ ꓟꓬ ꓡꓱꓸꓼ꓾ ꓕꓲꓽ ꓙꓽ ꓠꓲꓹ ꓡꓱꓸꓼ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓰ ꓐꓯ ꓔ ꓡꓳ꓿ 38 ꓕꓱ ꓟ ꓠꓬ ꓕꓵꓼ ꓪꓽ ꓬꓲ ꓪꓴꓸ ꓕꓲ ꓚꓱꓹ ꓟˍ ꓐꓰ꓾ ꓪꓴꓽ ꓓꓰꓺˍ ꓕꓲ ꓚꓱꓹ ꓟ ꓥꓳ꓿ 39 ꓗ ꓠꓯꓸ ꓕꓲ ꓚꓱꓹ ꓟˍ ꓟꓲ ꓕꓱ ꓟ ꓐꓰ ꓕꓲ ꓡꓰꓹꓼ ꓗꓹ ꓡꓳ꓿ ꓠꓴ ꓠꓬ ꓚꓲꓸ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓠꓴ ꓠꓶꓽ ꓛꓳ ꓕꓲꓺ ꓛꓳ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓯˍ ꓟ ꓕꓱ ꓕꓲꓽ ꓚꓱꓹ ꓥꓳ꓿ 40 ꓕꓵꓼ ꓪꓽ ꓕꓱ ꓠꓬꓲꓽ ꓚꓱꓹ ꓗꓪ꓾ ꓙꓵꓽ ꓗˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓕꓳ ꓶ ꓮꓽ ꓙꓵ ꓡꓱꓸꓼ ꓥꓳꓺ ꓞꓹ ꓡꓳ꓾ ꓐꓯ ꓖꓶˍ ꓡꓳ꓿ 41 ꓒ-ꓡꓲ-ꓢꓷ ꓐꓴ ꓜꓲꓼ ꓡ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ 42 ꓙꓲ-ꓢꓴ ꓖꓳ ꓕꓲ ꓣꓳ ꓔꓯ ꓠꓴ ꓪꓽ ꓮ ꓡꓲ ꓓꓵꓽ ꓙꓽˍ ꓡ? ꓬꓲ ꓠꓬ ꓮꓽ ꓟ ꓞꓲꓼ ꓤ ꓡꓯꓹ ꓤ ꓥ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓡꓰ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 43 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓓ-ꓪꓵ ꓡꓰ ꓬꓲ ꓔꓯ ꓢꓲ ꓒꓽ꓾ ꓘꓴˍ ꓟ ꓮ ꓡꓲ ꓥ ꓡ? 44 ꓮ ꓡꓲꓳ ꓐꓯ ꓠꓬ ꓓ-ꓪꓵ ꓡꓰ꓾ ꓪꓴ-ꓢ ꓡꓰ ꓥꓪ ꓢꓲ ꓒꓽ ꓔꓯ꓾ ꓠꓴ ꓛꓴꓽ ꓙꓳ ꓢꓴ ꓔꓯ ꓥꓪ ꓡꓰ ꓠꓴ ꓛꓲ ꓕꓳꓼ ꓕꓲꓺ ꓟꓽ ꓗꓷ ꓡꓰ ꓝꓲ ꓕ ꓑꓳ꓾ ꓥꓪ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ꓾ ꓐꓰ ꓐꓯˍ ꓡꓳ꓿ 45 ꓓ-ꓪꓵ ꓡꓰ ꓬꓲ ꓔꓯ ꓢꓲ ꓒꓽ ꓘꓴˍ ꓕꓯ ꓠꓽ꓾ ꓬꓲ ꓠꓬ ꓮ ꓡꓲ ꓐꓰ ꓢꓲ ꓬꓲ ꓞꓲꓼ ꓤ ꓡꓯꓹ ꓤ ꓥ ꓢꓰꓽ ꓡ?꓾ ꓐꓯˍ ꓡꓳ꓿ 46 ꓬꓲ ꓪꓽ ꓮꓽ ꓟˍ ꓟꓲ ꓕꓲ ꓘꓶꓽˍ ꓟꓲ ꓒꓳꓹ ꓖꓶ ꓟ ꓐ ꓡ꓿ ꓖꓳ ꓕꓲ ꓠꓬꓲ ꓗꓸ ꓠꓯ ꓮꓽ ꓟˍ ꓟꓲ ꓬꓲ ꓔꓯ ꓮꓸ ꓫꓵ ꓠ ꓠꓬꓲ ꓟꓽ ꓑꓶꓸ꓿

ꓟ-ꓔꓲ 23

1 ꓖꓳ ꓗꓸ ꓠꓯꓸ ꓬꓰ-ꓢꓴ ꓡꓰ ꓞꓳ ꓜꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓫꓸ ꓕꓱ ꓢꓲ꓾ 2 ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ꓾ ꓟꓳ-ꓫꓲ ꓬꓲꓸ ꓛꓲ ꓙꓵꓽ ꓗ ꓒꓶꓻ ꓟꓸ ꓖꓶ ꓢꓴ ꓥ ꓠꓬꓲ꓾ 3 ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓟꓸ ꓖꓶˍ ꓟ ꓮꓽ ꓙꓵ ꓔꓯ ꓠꓴ ꓪꓽ ꓒꓵꓽ ꓛꓳꓻ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓬꓰˍ ꓟ ꓔꓯ ꓕꓽ ꓢꓳꓺ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓐꓯ ꓠꓽ ꓐꓯ ꓢꓲ ꓟꓽ ꓬꓰˍ ꓟ ꓮꓽ ꓟꓬꓹ ꓙꓳˍ ꓡꓳ꓿ 4 ꓬꓲ ꓪꓽ ꓠꓬ ꓡꓲꓽˍ ꓟ ꓐꓰ ꓟꓯꓻ ꓫꓸˍ ꓟ ꓶꓻ ꓫꓬꓹ ꓢꓲ꓾ ꓢꓴ ꓡꓯꓼ ꓒꓶꓻ ꓗꓪ ꓚꓰꓹ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓚꓲꓸ ꓛꓬ ꓠꓽ ꓡꓯꓼ ꓠꓬꓲ ꓕꓲ ꓠꓬꓲˍ ꓟꓲ ꓡꓵꓺ ꓠꓲꓹ ꓟꓽ ꓫꓵ꓿ 5 ꓬꓲ ꓪꓽ ꓬꓰˍ ꓟ ꓮꓽ ꓙꓵꓽ ꓠꓬ ꓢꓴ ꓔꓯ ꓟꓳ ꓝꓲ ꓠꓹ ꓟ ꓬꓰˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓒꓰꓹ ꓐꓳ ꓢꓲ ꓓꓱꓼ ꓔ ꓟ꓾ ꓢꓲꓽ ꓫꓬ ꓕꓳ ꓶ ꓝꓲꓸ ꓗꓶꓺ ꓓꓴ ꓠꓬ ꓫꓬꓹ ꓦꓲꓺˍ ꓡꓳ꓿ ꓐꓵ ꓞꓶꓽ ꓟꓶꓽ ꓬꓲ ꓟꓬꓸˍ ꓟꓲ ꓫꓬꓹ ꓫꓵꓺˍ ꓡꓳ꓿ 6 ꓝꓮꓲ ꓠꓬ ꓑꓮꓲˍ ꓐꓰ ꓜꓲꓼ ꓦꓲ ꓗꓪ ꓞꓳ ꓪꓴꓽ ꓠꓬꓲꓸ ꓠꓸ ꓖꓴ ꓗꓪˍ ꓡꓰꓽ ꓠꓬꓲꓸ ꓠꓸ ꓠꓲꓹ ꓫꓵˍ ꓡꓳ꓿ 7 ꓙꓵꓺ ꓗꓪˍ ꓟꓲ ꓒꓵꓽ ꓗ ꓬꓰ ꓡ ꓟ ꓐꓰ꓾ ꓢꓴꓻ ꓡꓰ꓾ ꓟꓸ ꓒ꓾ ꓐꓰ ꓘꓴ ꓡ ꓟ ꓔꓯ ꓠꓲꓹ ꓫꓵˍ ꓡꓳ꓿ 8 ꓢꓴ ꓡꓰ ꓠꓴ ꓪꓽ ꓔꓯ꓾ ꓟꓸ ꓒ ꓕꓽ ꓘꓴꓻ ꓝꓲ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓟꓸ ꓒ ꓠꓽ ꓕꓲ ꓣꓳˍ ꓡꓰꓽ ꓙꓳˍ ꓡꓳ꓿ ꓠꓴ ꓪꓽ ꓮꓽ ꓙꓵ ꓠꓬ ꓬꓲꓼ ꓤ ꓠꓬꓲ ꓤ ꓥ ꓡꓳ꓿ 9 ꓝꓮꓲ ꓠꓬ ꓟꓲ ꓠꓯ ꓗꓪ ꓠꓱꓸ ꓐꓯꓼ ꓢꓴ ꓔꓯ ꓐꓹ ꓐ ꓕꓽ ꓘꓴ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓪ ꓔꓬ ꓢꓴ ꓖꓳ ꓕꓲ ꓣꓳˍ ꓡꓰꓽ ꓠꓴ ꓪꓽ ꓐꓹ ꓐ ꓥ ꓡꓳ꓿ 10 ꓢꓴ ꓡꓰ ꓠꓴ ꓪꓽ ꓔꓯ꓾ ꓢꓲ ꓒ꓾ ꓕꓽ ꓘꓴ ꓝꓲ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓢꓲ ꓒꓽ ꓠꓽ ꓕꓲ ꓣꓳˍ ꓡꓰ ꓙꓳˍ ꓡꓳ꓿ ꓖꓳ ꓕꓲ ꓣꓳ ꓠꓬ ꓙꓲ-ꓢꓴ ꓥ ꓡꓳ꓿ 11 ꓠꓴ ꓪꓽ ꓗꓳ ꓡꓳ ꓗꓪ ꓪꓴꓽ ꓢꓴ ꓠꓬ꓾ ꓠꓴ ꓪꓽ ꓔꓯ ꓣꓱꓽ ꓙ ꓢꓴ ꓬꓰ ꓠꓯꓹ ꓡꓳ꓿ 12 ꓚꓲꓸ ꓛꓬ ꓔꓯ ꓓꓳꓹ ꓟꓴ ꓢꓴ ꓥ ꓕ ꓑꓳꓸ ꓔꓯ ꓠꓬ ꓱꓺ ꓡꓰ ꓝꓲˍ ꓥꓳ꓿ ꓚꓲꓸ ꓛꓬ ꓙꓻ ꓣꓳꓽ ꓢꓴ ꓔꓯ ꓠꓽ ꓓꓳꓹ ꓟꓴ ꓖꓶˍ ꓥꓳ꓿ 13 ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ꓾ ꓞꓳ ꓤ ꓟꓲꓽ ꓙꓬꓽ ꓗꓪ ꓟꓴꓽ ꓗꓪ ꓗꓴꓷꓼ ꓗ ꓘꓶꓽ ꓚꓵꓸ ꓔ ꓡꓳ꓿ ꓚꓲꓸ ꓛꓬˍ ꓟꓲ ꓟꓽ ꓓꓵ ꓙꓰ꓾ ꓓꓵꓽ ꓙꓰ ꓔꓬ ꓢꓴ ꓔꓯˍ ꓟꓲ ꓠꓴ ꓪꓽ ꓟꓽ ꓓꓵꓽ ꓙꓰ ꓝꓲ꓿ 14ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓟꓶꓽ ꓛꓵꓽ ꓟ ꓐꓴ ꓦꓲ ꓦꓴꓺ ꓜꓽ ꓢꓲ꓾ ꓮꓽ ꓫꓵꓹ ꓫꓵ ꓪꓽ ꓘꓴꓻ ꓗꓶꓸˍ ꓡꓳ꓿ ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓪ ꓜꓲꓻ ꓡꓲꓽˍ ꓟ ꓐꓯꓺ ꓟꓴ ꓘꓶꓽ ꓟꓶˍ ꓥꓳ꓿ 15 ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓙꓵꓽ ꓗ ꓟꓸ ꓒ ꓐꓴˍ ꓐꓰ꓾ ꓒ-ꓡꓲ-ꓢꓷ ꓐꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓢꓲ ꓤꓽ ꓕꓲ ꓣꓳ ꓘꓶꓸ ꓟꓶ ꓠꓹ ꓟ꓾ ꓬꓲꓻ ꓡꓴꓽ ꓐꓱꓻˍ ꓐꓰ ꓟꓵꓽ ꓕꓯꓽ ꓗꓳꓹ ꓕꓯ ꓚꓳꓺ ꓙꓰˍ ꓡꓳ꓿ ꓘꓶꓸ ꓟꓶ ꓡꓰ ꓠꓬ ꓠꓴ ꓪꓽ ꓠꓽ ꓬꓲ ꓔꓯ꓾ ꓠꓴ ꓪꓽ ꓕꓯꓽ ꓢꓲ ꓕꓲ ꓝꓸ ꓛꓬꓼ ꓟꓵꓽ ꓬꓲ ꓤꓽ ꓗꓷ ꓡꓰ ꓝꓲˍ ꓡꓳ꓿ 16 ꓟꓬ ꓔꓶ ꓢꓲ ꓢꓴ ꓔꓯ ꓙ ꓖꓴ ꓧꓳꓽ ꓢꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓡꓰ꓾ ꓮꓽ ꓟ ꓥ ꓟꓲ ꓢꓲꓽ ꓫꓬ ꓦꓲ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓠꓬ ꓮꓸ ꓫꓵ ꓟꓽ ꓛꓵ꓿ ꓖꓳ ꓡꓱ ꓥ ꓟꓲ ꓮꓽ ꓟ ꓡꓰ ꓢꓲꓽ ꓫꓬ ꓦꓲ ꓗꓪ ꓟ ꓫꓵꓺ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓕꓯꓽ ꓠꓽ꓾ ꓬꓲ ꓪꓵꓼ ꓘꓶꓽ ꓡꓰ ꓬꓲ ꓔꓯ ꓞꓳꓹ ꓞꓹ ꓡꓳ꓾ ꓐꓯˍ ꓡꓳ꓿ 17 ꓟꓬ ꓔꓶˍ ꓟ ꓞꓳꓻ ꓙꓲꓽ ꓐꓴꓳ꓾ ꓮ ꓡꓲ ꓕꓲ ꓫꓵꓽ ꓟ ꓟꓬꓽ ꓠꓬꓲ ꓬꓳꓸ ꓚꓲˍ ꓡ? ꓫꓵꓺ ꓥ ꓡ? ꓥ ꓠꓬ꓾ ꓫꓵꓺ ꓔꓯ ꓚꓰꓸ ꓔꓸ ꓟꓶ ꓡꓰ ꓝꓲˍ ꓟ ꓢꓲꓽ ꓫꓬ ꓦꓲ ꓖꓳ ꓟ ꓥ ꓡ? 18 ꓝꓮꓲ ꓠꓴ ꓪꓽ ꓡꓰ꓾ ꓮꓽ ꓟ ꓥ ꓟꓲ ꓔꓲ ꓖꓴ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓠꓬ ꓮꓸ ꓫꓵ ꓟꓽ ꓛꓵ꓿ ꓖꓳ ꓡꓱ ꓥ ꓟꓲ ꓔꓲ ꓖꓴ ꓕꓯꓽ ꓢꓲ ꓗꓪ ꓟ ꓔꓲ ꓓꓴ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓕꓯ ꓠꓽ꓾ ꓬꓲ ꓪꓵꓼ ꓘꓶꓽ ꓡꓰ ꓬꓲ ꓔꓯ ꓞꓳꓹ ꓞꓹ ꓡꓳ꓾ ꓐꓯˍ ꓡꓳ꓿ 19 ꓟꓬ ꓔꓶꓺ ꓢꓴ ꓐꓴꓳ꓾ ꓮ ꓡꓲ ꓕꓲ ꓫꓵꓽ ꓟ ꓟꓬꓽ ꓠꓬꓲ ꓬꓳꓸ ꓚꓲˍ ꓡ? ꓔꓲ ꓓꓴ ꓥ ꓡ? ꓥ ꓠꓬ꓾ ꓔꓲ ꓓꓴ ꓔꓯ ꓚꓰꓸ ꓔꓸ ꓟꓶ ꓡꓰ ꓝꓲˍ ꓟ ꓔꓲ ꓖꓴ ꓥ ꓡ? 20 ꓖꓳ ꓡꓱ ꓠꓬꓲ ꓔꓲ ꓖꓴ ꓔꓯ ꓖꓴ ꓢꓲ ꓪꓵꓼ ꓙꓱꓽ ꓢꓴ ꓠꓬ꓾ ꓔꓲ ꓖꓴˍ ꓐꓰ ꓖꓳ ꓟ ꓕꓯꓽ ꓢꓲ ꓗꓪ ꓟ ꓮꓽ ꓙꓵ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓟ ꓥꓳ꓿ 21 ꓢꓲꓽ ꓫꓬ ꓦꓲ ꓔꓯ ꓖꓴ ꓢꓲ ꓪꓵꓼ ꓙꓱꓽ ꓢꓴˍ ꓟꓲ꓾ ꓢꓲꓽ ꓫꓬ ꓦꓲˍ ꓐꓰ ꓖꓳ ꓗꓪ ꓔꓬ ꓟ ꓪꓴ-ꓢ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓟ ꓥꓳ꓿ 22 ꓟꓴꓽ ꓗꓪ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓠꓬ꓾ ꓪꓴ-ꓢ ꓙꓵꓽ ꓠꓬꓲꓸ ꓕꓲˍ ꓐꓰ ꓕꓯꓽ ꓢꓲ ꓗꓪ ꓠꓬꓲꓸ ꓠꓸ ꓔꓬ ꓢꓴ ꓪꓴ-ꓢ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓟ ꓥꓳ꓿ 23 ꓠꓲꓹ ꓟ ꓠꓬꓲꓽ ꓔꓱꓹ ꓣꓱ ꓢꓴ ꓙꓵꓽ ꓗ ꓟꓸ ꓒˍ ꓐꓰ ꓒ-ꓡꓲ-ꓢꓷ ꓐꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠ꓾ ꓑꓴꓸ ꓧꓳꓺˍ ꓐꓰ ꓠꓸ ꓐꓳꓽ ꓪꓳꓽ ꓤˍ ꓐꓰ ꓠꓸ ꓐꓳ ꓪꓳ ꓓꓽ ꓟ ꓣꓴ ꓢꓲ꓾ ꓞꓲ ꓐꓱꓻ ꓕꓲ ꓐꓱ ꓔꓲ ꓖꓶˍ ꓡꓳ꓿ ꓙꓵꓽ ꓗ ꓗꓪ ꓟꓬꓽ ꓠꓬꓲ ꓒꓵꓽˍ ꓟ꓾ ꓔꓱꓹ ꓜꓳꓽˍ ꓟ ꓐꓰ ꓫꓱꓸ ꓤˍ ꓟ ꓐꓰ ꓦ ꓡꓱ ꓐꓳˍ ꓟ ꓠꓽ ꓠꓴ ꓪꓽ ꓟꓽ ꓬꓰ꓿ ꓕꓱ ꓟꓬ ꓫꓵꓽ ꓟˍ ꓟꓲ ꓠꓱꓸ ꓐꓯꓼ ꓟ ꓐꓰ ꓕꓲ ꓡꓰꓹꓼ ꓬꓰ ꓙꓲꓽ ꓙꓳˍ ꓟ ꓥ ꓡꓳ꓿ 24 ꓟꓬ ꓔꓶ ꓢꓲ ꓙ ꓖꓴ ꓧꓳꓽ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓬꓲꓹ ꓑꓵꓸ ꓤ ꓔꓯ ꓞꓶꓻ ꓓꓳ ꓡ ꓢꓲ꓾ ꓡꓳꓽ ꓕꓳꓺ ꓔꓯ ꓖꓴꓻ ꓓꓵꓽ ꓡꓰˍ ꓡꓳ꓿ 25 ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓙꓵꓽ ꓗ ꓟꓸ ꓒˍ ꓐꓰ ꓒ-ꓡꓲ-ꓢꓷ ꓐꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓡꓴ ꓗꓶꓸˍ ꓐꓰ ꓐꓯꓻ ꓔꓯ ꓬꓲ ꓕꓯꓽ ꓢꓲ ꓗꓪ ꓫꓬꓻ ꓫꓬꓻˍ ꓡꓰꓽ ꓞꓲꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓯꓸꓼ ꓗꓪ ꓠꓽ꓾ ꓚꓲꓸ ꓛꓬ ꓔꓯ ꓙꓵꓽ ꓟꓽ ꓐ ꓡ ꓟ ꓐꓰ ꓢꓴ ꓔꓯ ꓘꓳꓹ ꓜꓽˍ ꓟ ꓐꓲ ꓞꓹ ꓡꓳ꓿ 26 ꓟꓬ ꓔꓶ ꓢꓴ ꓒ-ꓡꓲ-ꓢꓷ ꓐꓴꓳ꓾ ꓡꓴ ꓗꓶˍ ꓐꓰ ꓐꓯꓻ ꓠꓯꓸꓼ ꓗꓪ ꓧꓶꓸ ꓕꓯꓽ ꓞꓲꓽ ꓫꓬꓻ ꓡꓰ ꓝꓲ꓿ ꓖꓳ ꓡꓱ ꓠꓬ ꓕꓯꓽ ꓢꓲ ꓗꓪˍ ꓟꓲ ꓫꓬꓻ ꓫꓬˍ ꓡꓰ ꓒꓬꓱꓼ ꓡ ꓥꓳ꓿ 27 ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓙꓵꓽ ꓗ ꓟꓸ ꓒˍ ꓐꓰ꓾ ꓒ-ꓡꓲ-ꓢꓷ ꓐꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠ ꓕꓯꓽ ꓢꓲ ꓗꓪ ꓡꓳꓸ ꓐꓲ ꓓꓴ Bꓸ ꓘꓴꓽ ꓦꓻ ꓒꓴ ꓟꓰꓺ ꓔ ꓢꓲ꓾ ꓠꓯꓸꓼ ꓗꓪ ꓠꓽ ꓞꓳ ꓫꓵꓻ ꓪꓳꓽ ꓔꓳꓺˍ ꓐꓰ ꓟꓽ ꓫꓬꓻ ꓟ ꓐꓲ ꓞꓹ ꓟ ꓡꓱꓼ ꓜꓴˍ ꓡꓰ ꓐꓰ ꓗꓹ ꓡꓳ꓿ 28 ꓠꓴ ꓪꓽ ꓠꓽ ꓞꓳ ꓤ ꓟꓲꓽ ꓙꓬꓽ ꓗꓪ ꓞꓳ ꓔꓱꓹ ꓒꓬꓱꓽ ꓫꓬˍ ꓡꓳ꓿ ꓠꓴ ꓪꓽ ꓠꓲꓹ ꓟ ꓠꓯꓸꓼ ꓗꓪ ꓠꓽ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽˍ ꓟ ꓐꓰ ꓙꓵꓽ ꓗ ꓔꓯ ꓟꓽ ꓛꓳˍ ꓟ ꓐꓲ ꓞꓹ ꓡꓳ꓿ 29 ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓙꓵꓽ ꓗ ꓟꓸ ꓒˍ ꓐꓰ ꓒ-ꓡꓲ-ꓢꓷ ꓐꓴꓳ꓾ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓱꓼ ꓜꓴ ꓫꓬꓹ ꓜꓶ ꓢꓲ꓾ ꓔꓱꓹ ꓜꓳꓽ ꓢꓴ ꓐꓴ ꓡꓱꓼ ꓜꓴ ꓐꓲꓻ ꓫꓴꓽ ꓠꓬꓲ ꓬꓰ ꓢꓲ꓾ 30 ꓒꓵꓽ ꓒ ꓐꓴ ꓦꓬꓼ ꓠꓬꓲ ꓗꓪ ꓣꓳꓽ ꓔꓬ ꓚꓰꓼ ꓐꓷˍ ꓠꓬ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓔꓯ ꓢꓰꓼˍ ꓟ ꓗꓪ ꓬꓲ ꓪꓽ ꓔꓯ ꓣꓳꓽ ꓟꓽ ꓔꓺ ꓡꓳ ꓫꓵꓽ ꓥꓳ꓾ ꓐꓯˍ ꓡꓳ꓿ 31 ꓠꓴ ꓪꓽ ꓠꓬ ꓕꓱ ꓡꓱ ꓐꓯˍ ꓟ ꓗꓪ ꓐꓰ ꓠꓴ ꓪꓽ ꓠꓽ꓾ ꓟꓷꓽ ꓠꓷꓹ ꓝꓸ ꓢꓴ ꓔꓯ ꓢꓰꓼ ꓢꓴ ꓐꓴ ꓬꓲ ꓪꓽ ꓞꓲꓼ ꓤ ꓡꓯꓹ ꓤ ꓥ ꓟ ꓗꓸ ꓚꓵ ꓬꓰ ꓓꓳ ꓡ ꓟ ꓥ ꓡꓳ꓿ 32 ꓖꓳ ꓡꓱ ꓠꓬ ꓠꓴ ꓪꓽ ꓒꓵꓽ ꓒ ꓐꓴ ꓡꓰ ꓬꓰ ꓪꓴꓸ ꓔꓴ ꓗꓷ ꓟ ꓝꓴꓲ ꓮꓽ ꓙꓵ ꓬꓰ ꓐꓲ ꓡꓰ ꓝꓲ꓿ 33 ꓩꓴˍ ꓡꓰ ꓐꓰ ꓗꓹ ꓢꓴ ꓐꓴꓳ꓾ ꓓꓳꓼ ꓩꓴ ꓬꓲ ꓤꓽ ꓐꓴꓳ꓾ ꓠꓴ ꓪꓽ ꓠꓬ ꓛꓬꓼ ꓟꓵꓽ ꓗꓪ ꓐꓰ ꓮ ꓡꓲ ꓡꓲꓹ ꓗꓷ ꓓꓻ ꓢꓰꓽ? 34 ꓠꓬꓲ ꓠꓹ꓾ ꓥꓪ ꓡꓰ ꓟꓷꓽ ꓠꓷꓹ ꓝꓸ ꓢꓴ ꓐꓴˍ ꓐꓰ꓾ ꓙꓽ ꓜꓲꓼ ꓠꓲꓹ ꓙꓳ ꓢꓴ ꓐꓴˍ ꓐꓰ꓾ ꓙꓵꓽ ꓗ ꓟꓸ ꓒ ꓐꓴ ꓔꓯ ꓠꓴ ꓪꓽ ꓔꓬ ꓗꓪ ꓝꓲ ꓩꓴ ꓡ ꓥꓳ꓿ ꓕꓲ ꓐꓱ ꓔꓯ ꓠꓬ ꓠꓴ ꓪꓽ ꓡꓰ ꓢꓰꓼ ꓗꓷˍ ꓥꓳ꓾ ꓡꓯꓼ ꓐꓳ ꓔꓶꓸ ꓓꓴ ꓗꓪˍ ꓟꓲ ꓕꓯꓼ ꓢꓰꓼˍ ꓥꓳ꓿ ꓝꓮꓲ ꓕꓲ ꓐꓱꓻ ꓔꓯ ꓠꓬ ꓠꓴ ꓪꓽ ꓡꓰ ꓜꓲꓼ ꓦꓲ ꓗꓪ ꓓꓶꓽ ꓢꓲ꓾ ꓕꓱ ꓕꓲ ꓡꓳ ꓒꓱꓻ ꓗꓪ ꓐꓰ ꓖꓳ ꓕꓲꓽ ꓡꓳ ꓒꓱꓻ ꓗꓪ ꓛꓲ ꓗꓸ ꓧꓪˍ ꓥꓳ꓿ 35 ꓖꓳ ꓡꓱ ꓠꓬꓲ ꓟꓲ ꓠꓯ ꓗꓪ ꓔꓱꓹ ꓜꓳꓽ ꓢꓴ ꓐꓴ ꓬꓲ ꓪꓽ ꓫꓵꓽ ꓮꓽ ꓙꓵꓽ꓾ ꓔꓱꓹ ꓜꓳꓽˍ ꓟ ꓮ-ꓐꓱ ꓫꓵꓽ ꓗꓪ ꓐꓰ꓾ ꓔꓲ ꓖꓴˍ ꓐꓰ ꓢꓲꓽ ꓫꓬ ꓦꓲ ꓠꓬꓲꓽ ꓗꓴꓸ ꓚS ꓗꓪ ꓠꓴ ꓪꓽ ꓡꓰ ꓢꓰꓼ ꓗꓷ ꓟ꓾ ꓐꓱ-ꓣ-ꓘꓷ-ꓬ ꓬꓲ ꓤꓽ ꓢ-ꓚꓬ-ꓡꓲ-ꓬ ꓬꓲ ꓫꓵꓽ ꓗꓪ ꓛꓲ ꓟ ꓝꓴꓲ ꓮꓽ ꓙꓵꓽ ꓠꓬ꓾ ꓠꓴ ꓪꓽ ꓕꓯꓽ ꓢꓲ ꓗꓪ ꓬꓯꓼ ꓡ ꓥꓳ꓿ 36 ꓥꓪ ꓠꓴ ꓪꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓛꓬꓻ ꓒꓵꓽ ꓕꓱ ꓟꓬ ꓫꓵꓽ ꓠꓬ ꓕꓱ ꓕꓲꓽ ꓤꓶꓻ ꓢꓴ ꓔꓯ ꓬꓯꓼ ꓡ ꓥꓳ꓿ 37 ꓙꓱ-ꓣꓴ-ꓢ-ꓡꓱꓳ꓾ ꓙꓱ-ꓣꓴ-ꓢ-ꓡꓱꓳ꓾ ꓟꓷꓽ ꓠꓷꓹ ꓝꓸ ꓢꓴ ꓔꓯ ꓢꓰꓼ ꓢꓲ꓾ ꓠꓴ ꓔꓯ ꓝꓲ ꓩꓴ ꓡ ꓢꓴ ꓔꓯ Bꓸ ꓛꓲ ꓡꓰ ꓡꓳ ꓢꓴꓳ꓾ ꓮꓸ Bꓸ ꓟꓺ ꓓꓴ ꓡꓯꓼ ꓠꓯꓸ ꓘꓪ ꓬꓲ ꓤ ꓔꓯ ꓟꓵꓸ ꓖꓶˍ ꓟ ꓡꓰ ꓐꓰ꓾ ꓥꓪ ꓡꓰ ꓠꓴ ꓤ ꓠꓱ ꓐꓴ ꓔꓯ ꓮꓽ ꓟꓬꓹ ꓧꓪ ꓘꓴ ꓜꓲꓼ ꓡ ꓠꓲꓹ ꓫꓵˍ ꓟꓲ ꓠꓴ ꓟꓽ ꓫꓳꓻ꓿ 38 ꓠꓬꓲ ꓠꓹ꓾ ꓮ ꓟꓶ ꓠꓴ ꓪꓽ ꓦꓲ ꓠꓬ ꓠꓴ ꓪꓽ ꓔꓯ ꓬꓲ ꓖꓳꓽ ꓙꓬꓺ ꓝꓶꓺ ꓝꓶ ꓡꓳ ꓒꓰꓹ ꓔ ꓖꓶꓽ ꓬꓰˍ ꓥꓳ꓿ 39 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓢꓲ ꓒꓽ ꓟꓬꓱ ꓗꓪ ꓐꓰ ꓡꓻ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓰ ꓠꓴ ꓪꓽ ꓟꓽ ꓐꓯ ꓕ ꓑꓳ꓾ ꓠꓴ ꓪꓽ ꓥꓪ ꓔꓯ ꓝꓮꓲ ꓟꓳꓻ ꓪ ꓟꓽ ꓓꓻꓳ꓾ ꓐꓯˍ ꓡꓳ꓿

ꓟ-ꓔꓲ 24

1 ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓐꓰ ꓓꓳ ꓙꓰ ꓢꓲ ꓙ ꓖꓴ ꓫꓱꓽ ꓔꓬ ꓕꓯ꓾ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓢꓲꓽ ꓫꓬ ꓦꓲˍ ꓐꓰ ꓚꓳ ꓡꓳ ꓡꓳ ꓗꓪ ꓟ ꓦꓲ ꓬꓲ ꓔꓯ ꓖꓴ ꓟꓸ ꓖꓶˍ ꓐꓰ ꓡꓻ ꓡꓳ꓿ 2 ꓬꓲ ꓠꓽ ꓬꓲ ꓪꓽ ꓔꓯ꓾ ꓕꓱ ꓟꓬ ꓙꓰꓽ ꓟ ꓔꓯ ꓠꓴ ꓪꓽ ꓟꓳꓻˍ ꓡꓳ꓾ ꓟꓽ ꓥ ꓡ? ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓕꓱ ꓗꓪ ꓕꓲ ꓟ ꓕꓯꓽ ꓢꓲ ꓕꓲ ꓟ ꓜꓶꓻ ꓔ ꓟ Bꓸ ꓛꓲ ꓠꓬ꓾ ꓟꓽ ꓒꓬꓹ ꓥꓸ ꓗꓷ ꓟ ꓕꓲ ꓟˍ ꓟꓲ ꓟꓽ ꓙꓳ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 3 ꓬꓲ ꓠꓬ ꓮꓽ-ꓛꓬ-ꓪꓽ-ꓚꓲ ꓗꓪ ꓠꓬꓲꓸ ꓠꓸ ꓔꓬ ꓕꓯ꓾ ꓛꓳꓽ ꓒꓯꓹ ꓐꓴ ꓠꓬ ꓘꓳ ꓫꓱ ꓫꓱˍ ꓬꓲ ꓔꓯ ꓡ ꓢꓲ꓾ ꓕꓱ ꓟꓬ ꓙꓰꓽ ꓟ ꓮ ꓕꓯꓽ ꓗꓷ ꓡꓰˍ ꓥꓳ ꓪ? ꓠꓴ ꓝꓮꓲ ꓡꓻˍ ꓟ ꓦꓬꓼ ꓠꓬꓲˍ ꓐꓰ꓾ ꓕꓱ ꓕꓲ ꓡꓶꓸ ꓡꓳꓹ ꓬꓰ ꓟ ꓝꓲꓸ ꓬꓲ ꓢꓷꓸ ꓡꓰ ꓓꓴ ꓮꓸ ꓫꓵ ꓓꓳ ꓡ ꓠꓯꓹ ꓟ꓾ ꓥꓪ ꓠꓴꓽ ꓔꓯ ꓐꓯ ꓟꓸ ꓖꓶ ꓡꓯ꓾ ꓐꓯˍ ꓡꓳ꓿ 4 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓮꓽ ꓟˍ ꓟꓲ ꓠꓴ ꓪꓽ ꓔꓯ ꓟꓽ ꓧꓳꓽ ꓪꓴꓸ ꓙꓰ ꓠꓹ ꓟ ꓤ ꓟꓳ꓿ 5 ꓮ ꓡꓲꓳ ꓐꓯ ꓠꓬ ꓡ ꓞꓳ ꓮꓽ ꓟꓬꓹ ꓠꓬ ꓥꓪ ꓟꓬꓱꓺ ꓟꓯꓻ ꓢꓲ꓾ ꓥꓪ ꓠꓽ ꓙꓲ-ꓢꓴ ꓥ ꓡꓳ꓾ ꓐꓯ ꓢꓲ ꓠꓬꓲ꓾ ꓡ ꓞꓳ ꓮꓽ ꓟꓬꓹ ꓔꓯ ꓧꓳꓽ ꓪꓴꓸ ꓙꓰˍ ꓥꓳ꓿ 6 ꓢꓰꓼ ꓡꓯꓽ ꓘꓳ ꓢꓯꓼˍ ꓐꓰ ꓢꓰꓼ ꓡꓯꓽ ꓘꓳˍ ꓟ ꓓꓳꓽ ꓠꓴ ꓪꓽ ꓑ ꓙꓽˍ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓟꓽ ꓙꓽ ꓫꓸ ꓠꓹ ꓟ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓙꓰꓽ ꓠ ꓒꓬꓱꓼ ꓡ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓡꓳꓹ ꓬꓰ ꓝꓲꓸ ꓠꓬ ꓟ ꓛꓲ ꓡ ꓢꓰꓽ꓿ 7 ꓞꓳ ꓫꓵꓽ ꓛꓳꓽ ꓞꓳ ꓫꓵꓽ ꓢꓰꓼ ꓡꓯꓽ ꓘꓳ ꓔꓴ ꓡ ꓥꓳ꓿ ꓗꓴꓷꓼ ꓛꓳꓽ ꓗꓴꓷˍ ꓟꓲ ꓒꓳꓹ ꓡꓯꓽ ꓘꓳ ꓔꓴ ꓡ ꓥꓳ꓿ ꓕꓲꓽ ꓖ ꓕꓲ ꓔꓳꓸ ꓦꓰꓼ ꓟꓷꓼ ꓘꓳꓼˍ ꓐꓰ ꓟꓵꓽ ꓓꓵˍ ꓟ ꓓꓳ ꓡ ꓥꓳ꓿ 8 ꓕꓱ ꓟꓬ ꓙꓰ ꓟ ꓠꓬ ꓦꓵꓻ ꓠꓻ ꓜꓲꓽ ꓪꓴꓸ ꓔꓴˍ ꓟˍ ꓡꓰꓽ ꓥ ꓢꓰ ꓡꓳ꓿ 9 ꓖꓳ ꓕꓯ ꓢꓴ ꓡꓰ ꓫꓸ ꓙꓵˍ ꓟ ꓗꓪ ꓠꓴ ꓪꓽ ꓔꓯ ꓡꓯꓼ ꓙꓱ ꓗꓷ ꓢꓲ ꓢꓰꓼ ꓡ ꓥꓳ꓿ ꓥꓪ ꓟꓬꓱꓺ ꓪꓴꓸ ꓠꓬꓲ ꓞꓳ ꓫꓵꓽ ꓞꓳ ꓙꓰꓽ ꓥ ꓕ ꓑꓳꓸ ꓡꓰ ꓠꓴ ꓪꓽ ꓔꓯ ꓠꓲꓹ ꓜꓳ ꓡ ꓥꓳ꓿ 10 ꓖꓳ ꓕꓯ ꓡꓽ ꓞꓳ ꓮꓽ ꓟꓬꓹ ꓒꓳꓹ ꓬꓲꓼ ꓙꓰ ꓢꓲ꓾ ꓬꓲ ꓪꓽ ꓛꓳꓽ ꓬꓲ ꓪꓽ ꓪꓴꓽ ꓜꓽ ꓡꓯꓽ ꓘꓳ ꓢꓲ ꓠꓬꓲ ꓠꓲꓹ ꓜꓳ ꓡꓯꓽ ꓘꓳˍ ꓥꓳ꓿ 11 ꓝꓮꓲ ꓟꓽ ꓔꓱꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓮꓽ ꓟꓬꓹ ꓓꓳ ꓡ ꓢꓲ꓾ ꓡ ꓞꓳ ꓮꓽ ꓟꓬꓹ ꓔꓯ ꓧꓳꓽ ꓪꓴꓸ ꓙꓰˍ ꓥꓳ꓿ 12 ꓟꓽ ꓙꓲ ꓟꓽ ꓜꓳꓽˍ ꓟ ꓬꓰ ꓢꓴ ꓟꓬꓽ ꓡ ꓟ ꓗꓪ ꓐꓰ ꓟꓬꓽ ꓠꓬꓲ ꓕꓲ ꓐꓱ ꓟ ꓠꓵ ꓠꓲꓹ ꓙꓬ ꓡꓰˍ ꓥꓳ꓿ 13 ꓖꓳ ꓡꓱ ꓥ ꓟꓲ ꓡꓳꓹ ꓬꓰˍ ꓗꓪ ꓛꓲ ꓜꓲꓽ ꓔ ꓢꓴ ꓠꓽ ꓚꓬꓴ ꓟꓶˍ ꓥꓳ꓿ 14 ꓞꓳ ꓫꓵꓽ ꓞꓳ ꓙꓰ ꓥ ꓕ ꓑꓳꓸ ꓔꓯ ꓢꓷꓸ ꓙꓺ ꓟꓳ ꓙ ꓓꓴ ꓬꓰ ꓠꓹ ꓟ꓾ ꓟꓴꓽ ꓗꓪ ꓗꓴꓷꓼ ꓶꓼ ꓓꓳ ꓫꓱꓹ ꓓꓳ ꓕꓱ ꓟ ꓠꓬ꓾ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓚ ꓙꓰˍ ꓥꓳ꓿ ꓖꓳ ꓗ ꓠꓯꓸ ꓢꓲˍ ꓡꓰꓽ ꓡꓳꓹ ꓬꓰ ꓝꓲꓸ ꓛꓲ ꓡ ꓥꓳ꓿ 15 ꓖꓳ ꓡꓱ ꓠꓬꓲ ꓟꓷꓽ ꓠꓷꓹ ꓝꓸ ꓢꓴ ꓓ-ꓠꓲ-ꓡꓰ ꓐꓯ ꓔ ꓟ꓾ ꓙꓬ ꓓꓷꓼ ꓓꓷꓼ ꓗꓷ ꓡꓰ ꓝꓲˍ ꓟ ꓠꓲꓹ ꓒꓳꓹ ꓓꓴ ꓖꓳ ꓟ ꓢꓲꓽ ꓫꓬ ꓖꓴ ꓗꓪ ꓦꓰꓼ ꓞꓹ ꓟ ꓔꓯ ꓠꓴ ꓪꓽ ꓟꓳꓻˍ ꓠꓬ꓾ (ꓕꓳ ꓶ ꓕꓱ ꓟ ꓵ ꓢꓴ ꓙꓽ ꓜꓲꓼ ꓔ꓿) 16 ꓬꓴ-ꓔ ꓟꓵꓽ ꓗꓪ ꓔꓬ ꓢꓴ ꓠꓬ ꓪꓽ ꓚꓲ ꓗꓪ ꓛꓰꓹ ꓙꓰ ꓝꓲ꓿ 17 ꓦꓲ ꓪꓴꓸ ꓓꓵ ꓓꓰꓺ ꓗꓪ ꓔꓬ ꓢꓴ ꓠꓬ꓾ ꓬꓲ ꓦꓲ ꓠꓯꓸꓼ ꓗꓪ ꓖꓴꓽ ꓙꓴꓽ ꓣꓴ ꓬꓰ ꓠꓹ ꓟ ꓕꓽ ꓬꓯꓼ ꓡꓰ ꓝꓲ꓿ 18 ꓦꓻ ꓟꓲ ꓦ ꓐꓽ ꓗꓪ ꓔꓬ ꓢꓴˍ ꓟꓲ꓾ ꓐꓵ ꓞꓶ ꓣꓴ ꓬꓰ ꓠꓹ ꓟ ꓕꓽ ꓬꓲꓼ ꓙꓰ ꓝꓲ꓿ 19 ꓦꓬꓼ ꓠꓬꓲ ꓖꓳ ꓟ ꓗꓪ ꓤ ꓠꓱ ꓶꓻ ꓞꓹ ꓢꓴˍ ꓐꓰ ꓮ ꓚꓵꓹ ꓛꓵꓼˍ ꓟ ꓤ ꓠꓱ ꓙꓳ ꓢꓴ ꓠꓽ ꓫꓸ ꓙꓵˍ ꓥꓳ꓿ 20 ꓠꓴ ꓪꓽ ꓛꓰꓹ ꓙꓰˍ ꓟ ꓠꓬ꓾ ꓙꓬ ꓝꓲꓸˍ ꓐꓰ ꓠꓽ ꓦꓬꓼ ꓠꓬꓲ ꓗꓪ ꓟꓽ ꓗꓷ ꓡꓰ ꓠꓹ ꓟ ꓪꓽ ꓘꓴ꓿ 21 ꓮ ꓡꓲꓳ ꓐꓯ ꓠꓬ ꓖꓳ ꓕꓯ ꓠꓽ ꓫ ꓙꓵ ꓟꓷꓼ ꓙꓵˍ ꓟ ꓬꓲ ꓓꓽ ꓟ ꓓꓳ ꓡ ꓥꓳ꓿ ꓟꓵꓽ ꓚꓰꓼ ꓟꓲ ꓚꓰꓼ ꓕ ꓑꓳꓸ ꓮ ꓟꓶ ꓗꓪ ꓛꓲ ꓖꓳ ꓟ ꓡꓰ ꓐꓰ ꓗꓷ ꓡꓰˍ ꓟ ꓟꓽ ꓙꓳ ꓠꓬꓲ꓿ ꓖꓳ ꓗ ꓠꓯꓸˍ ꓟꓲ ꓟꓽ ꓙꓳ ꓡ꓿ 22 ꓦꓬꓼ ꓠꓬꓲ ꓖꓳ ꓟ ꓔꓯ ꓟꓽ ꓠꓲꓸ ꓡꓰ ꓝꓲˍ ꓕꓯ ꓠꓽ꓾ ꓞꓳ ꓤ ꓪꓽ ꓤ ꓮꓽ ꓟˍ ꓟꓲ ꓡꓲꓹ ꓗꓷ ꓟꓽ ꓓ꓿ ꓖꓳ ꓡꓱ ꓥ ꓟꓲ ꓢꓲꓺ ꓔ ꓢꓴ ꓐꓱ ꓶ ꓦꓬꓼ ꓠꓬꓲ ꓖꓳ ꓟ ꓔꓯ ꓠꓲꓸ ꓡꓰ ꓝꓲˍ ꓥꓳ꓿ 23 ꓖꓳ ꓕꓯ ꓮꓽ ꓟ ꓡꓰ ꓠꓴ ꓪꓽ ꓔꓯ꓾ ꓙꓲ-ꓢꓴ ꓠꓬ ꓕꓻˍ ꓔꓬ ꓡꓳ꓾ ꓥ ꓠꓬ꓾ ꓖꓪꓻˍ ꓔꓬ ꓡꓳ꓾ ꓐꓯ ꓡ ꓠꓬ ꓕꓽ ꓙꓵꓻ꓿ 24 ꓮ ꓡꓲꓳ ꓐꓯ ꓠꓬ ꓟꓽ ꓔꓱꓹ ꓟ ꓙꓲ-ꓢꓴ ꓐꓴˍ ꓐꓰ ꓟꓽ ꓔꓱꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓓꓳ ꓡ ꓢꓲ꓾ ꓢꓲꓺ ꓔ ꓢꓴ ꓔꓯˍ ꓟꓲ ꓧꓳꓽ ꓪꓴꓸ ꓙꓰ ꓐ ꓡ ꓐꓷˍ ꓠꓬ ꓧꓳꓽ ꓪꓴꓸ ꓙꓰ ꓠꓹ ꓟ꓾ ꓬꓲ ꓪꓽ ꓡꓰ ꓢꓷꓸ ꓡꓰ ꓓꓴˍ ꓐꓰ ꓓꓵꓽ ꓙꓽ ꓟꓶ ꓓꓴ ꓓꓽ ꓟ ꓬꓰ ꓟꓳꓸ ꓖꓶ ꓡ ꓥꓳ꓿ 25 ꓠ ꓠꓹ꓾ ꓕꓱ ꓟꓬ ꓫꓵ ꓟꓽ ꓒꓬꓱꓼ ꓡ ꓕꓯˍ ꓡꓰ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓟ ꓥꓳ꓿ 26 ꓬꓲ ꓪꓽ ꓡꓰ ꓠꓴ ꓪꓽ ꓔꓯ꓾ ꓙꓲ-ꓢꓴ ꓠꓬ ꓡꓲ ꓛꓲ ꓗꓪ ꓔꓬ ꓡꓳ꓾ ꓐꓯ ꓡ ꓠꓬ ꓕꓽ ꓓꓳ ꓙꓰ꓿ ꓘꓷꓹ ꓖꓳꓼ ꓗꓪ ꓔꓬ ꓡꓳ꓾ ꓐꓯ ꓡ ꓥ ꓟꓲ ꓕꓽ ꓙꓵꓻ꓿ 27 ꓐꓶꓻ ꓓꓳ ꓘꓶꓽ ꓗꓪ ꓟꓲꓽ ꓐꓬꓱꓼ ꓤꓰꓽ ꓡ ꓠꓬ꓾ ꓐꓶꓻ ꓓꓵꓽ ꓘꓶꓽ ꓗꓪ ꓛꓲ ꓡꓳꓸ ꓟꓳꓻˍ ꓟ ꓡꓰ ꓐꓰ꓾ ꓡ-ꓞꓳ-ꓮ-ꓐꓲ ꓡꓻˍ ꓟˍ ꓟꓲ ꓖꓳ ꓟ ꓡꓰ ꓐꓰ ꓗꓹ ꓥꓳ꓿ 28 ꓫꓵꓻ ꓟꓳꓻ ꓮ ꓡꓲ ꓗꓪ ꓓꓹ ꓠꓬ꓾ ꓠꓸ ꓙꓱꓻˍ ꓟꓲ ꓖꓳ ꓗꓪ ꓜꓲꓼ ꓡ ꓥꓳ꓿ 29 ꓦꓬꓼ ꓠꓬꓲ ꓖꓳ ꓟ ꓗꓪ ꓫ ꓙꓵ ꓟꓷꓼ ꓙꓵˍ ꓟ ꓗꓳꓸ ꓗꓷ ꓟꓶꓽ ꓕꓯ ꓟꓲꓽ ꓟꓲ ꓠꓯꓺ ꓡꓰˍ ꓥꓳ꓿ ꓦ ꓐ ꓛꓲˍ ꓟꓲ ꓟꓽ ꓣꓳꓺ ꓡ ꓗꓷ ꓡꓰˍ ꓥꓳ꓿ ꓗꓴ ꓤꓽˍ ꓟꓲ ꓟꓴꓽ ꓗꓪ ꓗꓪ ꓐꓰ ꓞꓰꓻ ꓡꓰˍ ꓥꓳ꓿ ꓟꓵꓽ ꓪꓴꓽ ꓗꓪ ꓙꓳˍ ꓟ ꓮꓽ ꓙꓵˍ ꓟꓲ ꓬꓲ ꓚꓳ ꓚꓱꓹ ꓗꓪ ꓐꓰ ꓧꓶꓸ ꓙꓰˍ ꓥꓳ꓿ 30 ꓖꓳ ꓕꓯ ꓡ-ꓞꓳ-ꓮ-ꓐꓲ ꓬꓲꓸ ꓢꓷꓸ ꓡꓰ ꓓꓴ ꓠꓬ ꓟꓴꓽ ꓗꓪ ꓗꓪ ꓟꓳꓸ ꓖꓶ ꓡ ꓥꓳ꓿ ꓖꓳ ꓕꓯ ꓟꓲ ꓠꓯ ꓗꓪ ꓟ ꓞꓳ ꓫꓵꓽ ꓥ ꓕ ꓑꓳꓸ ꓮꓸ ꓛꓬꓹ ꓙꓱˍ ꓥꓳ꓿ ꓡ-ꓞꓳ-ꓮ-ꓐꓲ ꓠꓬ ꓢꓯꓼ ꓙꓳ ꓪꓽ ꓠꓬꓲˍ ꓟ ꓐꓰ ꓟꓬꓱ ꓓꓳꓽ ꓓꓽ ꓟ ꓐꓰ꓾ ꓟꓴꓽ ꓗꓪ ꓗꓪ ꓟ ꓟꓴ ꓗꓴꓸ ꓜꓶꓽ ꓢꓲ ꓡꓻˍ ꓟ ꓔꓯ ꓬꓲ ꓪꓽ ꓟꓳꓻˍ ꓥꓳ꓿ 31 ꓬꓲ ꓠꓬ ꓟꓴꓽ ꓗꓪ ꓝꓲ ꓓꓴ ꓐꓴ ꓔꓯ ꓝꓲ ꓩꓴ ꓗꓷ ꓢꓲ꓾ ꓟꓴꓽ ꓗꓪ ꓕꓱ ꓕꓲ ꓑꓶꓸ ꓗꓪ ꓐꓰ ꓖꓳ ꓕꓲ ꓑꓶꓸ ꓗꓪ ꓛꓲ꓾ ꓕꓲꓽ ꓟꓲ ꓠꓯ ꓡꓱꓸꓼ ꓗꓪ ꓐꓰ꓾ ꓬꓲ ꓡꓰ ꓢꓲꓺ ꓔ ꓢꓴ ꓔꓯ ꓐꓽ ꓡ ꓢꓯꓼ ꓓꓽ ꓟ ꓡꓰ ꓘꓴ ꓜꓲꓼ ꓡ ꓥꓳ꓿ 32 ꓘꓶꓽ ꓢꓶꓽ ꓜꓲꓻ ꓗꓪ ꓐꓰ ꓔꓯ ꓥꓳꓽ ꓢꓳ꓿ ꓬꓲ ꓡꓯꓼ ꓗꓸ ꓡꓯꓸ ꓢꓲ ꓬꓲ ꓒꓬꓽ ꓠꓱꓽ ꓡ ꓕꓯ꓾ ꓟꓵꓽ ꓫꓱꓺ ꓠꓶꓽ ꓡ ꓟ ꓔꓯ ꓠꓴ ꓪꓽ ꓢꓷꓸˍ ꓡꓳ꓿ 33 ꓖꓳ ꓟ ꓡꓰ ꓐꓰ ꓕꓱ ꓟꓬ ꓙꓰꓽ ꓮꓽ ꓙꓵ ꓔꓯ ꓠꓴ ꓪꓽ ꓟꓳꓻˍ ꓠꓬ꓾ ꓗ ꓘꓶꓽ ꓓꓴꓽ ꓗꓪ ꓙꓲ-ꓢꓴ ꓠꓶꓽ ꓡ ꓟ ꓔꓯˍ ꓟꓲ ꓠꓴ ꓪꓽ ꓢꓷꓸ ꓠꓯꓹ ꓡꓳ꓿ 34 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓕꓱ ꓟꓬ ꓙꓰ ꓮꓽ ꓙꓵ ꓟꓽ ꓒꓬꓱꓼ ꓡ ꓕ ꓑꓳ꓾ ꓕꓱ ꓕꓲ ꓤꓶ ꓟ ꓠꓽ ꓟꓽ ꓡꓳꓹ ꓬꓰ꓿ 35 ꓟꓴꓽ ꓗꓪ ꓟꓲ ꓠꓯ ꓠꓬ ꓡꓳꓹ ꓬꓰˍ ꓥꓳ꓿ ꓥꓪ ꓐꓯ ꓘꓶꓽ ꓠꓽ ꓟꓽ ꓡꓳꓹ ꓬꓰ꓿ 36 ꓖꓳ ꓕꓲ ꓠꓬꓲˍ ꓐꓰ ꓖꓳ ꓕꓲ ꓙꓵꓹ ꓠꓽ ꓮ ꓟˍ ꓟꓲ ꓟꓽ ꓢꓷ꓿ ꓟꓴꓽ ꓗꓪ ꓗꓪ ꓟ ꓝꓲ ꓓꓴ ꓐꓴˍ ꓟꓲ ꓟꓽ ꓢꓷ꓿ ꓮ ꓐꓲˍ ꓟꓲ ꓟꓽ ꓢꓷ꓿ ꓮꓽ ꓐꓽˍ ꓡꓰ ꓢꓷˍ ꓡꓳ꓿ 37 ꓠꓳ-ꓪ ꓦꓬꓼ ꓠꓬꓲ ꓗꓪ ꓮ ꓡꓲ ꓥ ꓠꓬ꓾ ꓡ-ꓞꓳ-ꓮ-ꓐꓲ ꓡ ꓟ ꓦꓬꓼ ꓠꓬꓲ ꓗꓪˍ ꓟꓲ ꓖꓳ ꓡꓱ ꓗꓹ ꓥꓳ꓿ 38 ꓟꓵꓽ ꓟꓽ ꓟꓷꓸ ꓟꓲ ꓟꓽ ꓟꓷꓸ ꓢꓰꓽ ꓟ ꓦꓬꓼ ꓠꓬꓲ ꓗꓪ ꓐꓰ꓾ ꓠꓳ-ꓪ ꓦꓲ ꓡꓲ ꓓꓽ ꓟ ꓗꓪ ꓓꓵꓽ ꓡꓰ ꓟ ꓦꓬꓼ ꓠꓬꓲ ꓗꓪ ꓛꓲ꓾ ꓬꓲ ꓪꓽ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ꓾ ꓤꓽ ꓟꓶꓻ ꓘꓴ ꓠꓬꓲ꓾ ꓮꓸ ꓟꓲꓽ ꓩꓴꓺ ꓠꓬꓲ ꓬꓰ ꓢꓲ꓾ 39 ꓟꓵꓽ ꓟꓷꓸ ꓟꓲ ꓟꓷꓸ ꓡ ꓢꓲ ꓠꓬꓲ ꓬꓲ ꓪꓽ ꓮꓽ ꓙꓵ ꓔꓯ ꓐꓴꓻ ꓔꓯꓹ ꓙꓰ ꓗꓪ ꓛꓲ ꓬꓲ ꓪꓽ ꓟꓽ ꓧꓪꓸ ꓛꓲ꓿ ꓡ-ꓞꓳ-ꓮ-ꓐꓲ ꓡ ꓟ ꓦꓬꓼ ꓠꓬꓲ ꓗꓪˍ ꓟꓲ ꓖꓳ ꓟ ꓡꓰ ꓐꓰ ꓗꓹ ꓥꓳ꓿ 40 ꓦꓬꓼ ꓠꓬꓲ ꓖꓳ ꓟ ꓗꓪ ꓞꓳ ꓑꓸ ꓤ ꓠꓬꓲꓽ ꓣꓳ ꓦꓻ ꓟꓲ ꓗꓪ ꓔꓬ ꓠꓬ꓾ ꓕꓲ ꓣꓳ ꓔꓯ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓠꓽ ꓗꓶ ꓔ ꓬꓰˍ ꓥꓳ꓿ 41 ꓤꓽ ꓟꓶ ꓤ ꓠꓬꓲꓽ ꓣꓳ ꓡꓳꓺ ꓙꓱ ꓖꓳꓻ ꓔꓬ ꓠꓬ꓾ ꓕꓲ ꓣꓳ ꓔꓯ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓗꓶꓺ ꓔ ꓬꓰˍ ꓥꓳ꓿ 42 ꓖꓳ ꓡꓱ ꓠꓬꓲ ꓧꓪꓸ ꓛꓲ ꓔꓬ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓢꓲ ꓒꓽ ꓮ ꓡꓲ ꓕꓲꓽ ꓠꓬꓲ ꓗꓪ ꓛꓲ ꓡ ꓟ ꓠꓴ ꓪꓽ ꓟꓽ ꓢꓷ꓿ 43 ꓘꓴꓽ ꓒ ꓠꓬ ꓢ ꓘꓪ ꓮ ꓡꓲ ꓕꓲ ꓙꓵꓹ ꓗꓪ ꓡꓻˍ ꓟ ꓦꓲ ꓢꓲ ꓒꓽ ꓢꓷˍ ꓕꓯ ꓠ꓾ ꓬꓲ ꓦꓲ ꓗꓪ ꓟꓽ ꓓꓵꓽ ꓡ ꓝꓲ ꓠꓹ ꓟ꓾ ꓬꓲ ꓧꓪꓸ ꓛꓲꓽˍ ꓐꓰ ꓔꓬ ꓡꓳ ꓫꓵꓽ ꓥꓳ꓾ ꓐꓰ ꓠꓴ ꓪꓽ ꓢꓷˍ ꓡꓳ꓿ 44 ꓖꓳ ꓡꓱ ꓠꓬꓲ ꓠꓴ ꓪꓽ ꓙꓽ ꓖꓶꓽ ꓔ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓟꓽ ꓓꓵꓽ ꓙꓽ ꓔ ꓟ ꓖꓳ ꓕꓲ ꓙꓵꓹ ꓗꓪ ꓡ-ꓞꓳ-ꓮ-ꓐꓲ ꓡꓻˍ ꓥꓳ꓿ 45 ꓦꓲ ꓢꓲ ꓒꓽ ꓡꓰ ꓬꓲ ꓦꓲ ꓗꓪ ꓟ ꓡ ꓞꓳ ꓔꓯ ꓙꓵꓽ ꓝꓲ ꓠꓹ ꓟ꓾ ꓟꓬꓱꓽ ꓡꓯꓼ ꓙꓱ ꓔ ꓟ ꓦ ꓡꓱ ꓐꓳˍ ꓟ ꓐꓰ ꓓꓵꓽ ꓙꓽ ꓗꓴˍ ꓟ ꓚꓳ ꓑꓸ ꓮꓽ ꓟ ꓥ ꓡ? ꓦꓲ ꓗꓪ ꓟ ꓚꓳ ꓑꓸ ꓐꓴ ꓔꓯ ꓙꓵꓽ ꓢꓲ꓾ ꓬꓲ ꓪꓽ ꓔꓯ ꓜ ꓜꓽ ꓝꓲꓸ ꓗꓪ ꓜꓻ ꓑꓶꓺ ꓖꓶ ꓜꓽ ꓢꓴ ꓖꓳ ꓟ ꓥꓳ꓿ 46 ꓬꓲ ꓢꓲ ꓒꓽ ꓡꓻˍ ꓕꓯ ꓬꓲ ꓕꓱ ꓡꓱ ꓬꓰ ꓔꓬ ꓟ ꓔꓯ ꓟꓳꓻˍ ꓠꓬ꓾ ꓚꓳ ꓑꓸ ꓖꓳ ꓟ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ꓿ 47 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓦꓲ ꓢꓲ ꓒꓽ ꓠꓬ ꓬꓲ ꓙꓳˍ ꓟ ꓥ ꓕ ꓑꓳꓸ ꓖꓳ ꓕꓲ ꓣꓳ ꓔꓯ ꓙꓵꓽ ꓝꓲˍ ꓥꓳ꓿ 48 ꓖꓳ ꓡꓱ ꓥ ꓟꓲ ꓦ ꓡꓱ ꓟꓽ ꓐꓳ ꓟ ꓚꓳ ꓑꓸ ꓠꓬ ꓬꓲ ꓠꓲꓹ ꓟ ꓗꓪ꓾ ꓥꓪ ꓢꓲ ꓒꓽ ꓠꓲꓹ ꓞ ꓟꓽ ꓡ꓾ ꓐꓰ ꓓꓵꓽ ꓙꓽ ꓢꓲ꓾ 49 ꓚꓳ ꓑꓸ ꓛꓳꓽ ꓒꓯꓹ ꓐꓴ ꓔꓯ ꓓꓶꓽ ꓔꓴ ꓡ ꓢꓲ ꓠꓬꓲ꓾ ꓙꓲꓻ ꓒꓶꓽ ꓬꓲꓼ ꓢꓴˍ ꓐꓰ ꓕꓲ ꓡꓰꓹꓼ꓾ ꓜꓽ ꓠꓬꓲ ꓓꓳꓻ ꓠꓬꓲ ꓬꓰˍ ꓕꓯ ꓠ꓾ 50 ꓬꓲ ꓟꓽ ꓓꓵꓽ ꓙꓽ ꓔ ꓟ ꓦꓬꓼ ꓠꓬꓲˍ ꓐꓰ ꓟꓽ ꓢꓷ ꓟ ꓕꓲ ꓙꓵꓹ ꓗꓪ꓾ ꓚꓳ ꓑꓸ ꓖꓳ ꓟ ꓬꓲ ꓢꓲ ꓒꓽ ꓛꓲ ꓡ ꓢꓲ꓾ 51 ꓬꓲ ꓔꓯ ꓡꓲꓽ ꓡꓲˍ ꓡꓰ ꓟꓸ ꓙꓽ ꓢꓲ ꓠꓬꓲ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱ ꓢꓴˍ ꓐꓰ ꓕꓲ ꓡꓰꓹꓼ ꓐꓱꓺ ꓗꓷˍ ꓥꓳ꓿ ꓖꓳ ꓗꓪ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓿

ꓟ-ꓔꓲ 25

1 ꓦꓬꓼ ꓠꓬꓲ ꓖꓳ ꓟ ꓗꓪ ꓟꓴꓽ ꓗꓪ ꓗꓴꓷꓼ ꓠꓬ꓾ ꓟꓬ ꓡꓴꓻ ꓔꓯꓹ ꓔ ꓢꓲ ꓟꓯꓸ ꓡꓯꓸ ꓒ ꓔꓯ ꓞꓵꓺ ꓙꓰˍ ꓟ ꓤ ꓟꓶ ꓡꓯꓸ ꓞꓲ ꓣꓳˍ ꓡꓰ ꓐꓰ ꓗꓹ ꓡꓳ꓿ 2 ꓬꓲ ꓪꓽ ꓗꓪ ꓟ ꓥꓪꓽ ꓣꓳ ꓠꓬ ꓞꓳ ꓙꓲꓽ ꓥ ꓢꓲ꓾ ꓥꓪꓽ ꓣꓳ ꓠꓽ ꓞꓳ ꓕꓰꓻ ꓥ ꓡꓳ꓿ 3 ꓞꓳ ꓙꓲꓽ ꓐꓴ ꓠꓬ ꓟꓬ ꓡꓴ ꓔꓯꓹ ꓔ ꓥ ꓟꓲ ꓟꓬ ꓞꓶ ꓠꓽ ꓟꓽ ꓔꓯꓹ ꓔ꓿ 4 ꓞꓳ ꓕꓰꓻ ꓐꓴ ꓠꓽ ꓟꓬ ꓡꓴ ꓔꓯꓹ ꓔ ꓢꓲ꓾ ꓟꓬ ꓞꓶꓻˍ ꓟꓲ ꓐꓬꓻ ꓗꓪ ꓧꓳꓽ ꓔꓯꓹ ꓔ ꓡꓳ꓿ 5 ꓟꓯꓸ ꓡꓯꓸ ꓒ ꓡ ꓟꓬ ꓬꓰ ꓠꓬꓲ꓾ ꓬꓲ ꓪꓽ ꓮꓽ ꓙꓵ ꓬꓲꓼ ꓟꓶ ꓕꓳꓹ ꓢꓲ ꓬꓲꓼ ꓟꓶ ꓡꓰꓳ꓿ 6 ꓦꓬꓼ ꓔꓱ ꓫꓵꓺ ꓗꓪ ꓠꓬ꓾ ꓟꓯꓸ ꓡꓯꓸ ꓒ ꓛꓲ ꓡꓺꓳ꓾ ꓓꓳ ꓡ ꓢꓲ ꓬꓲ ꓔꓯ ꓞꓵ ꓬꓰ꓾ ꓐꓰ ꓘꓴꓻˍ ꓟ ꓢꓯꓼ ꓙꓳˍ ꓡꓳ꓿ 7 ꓖꓳ ꓕꓯ ꓤ ꓟꓶ ꓡꓯꓸ ꓮꓽ ꓙꓵ ꓔꓴ ꓢꓲ ꓟꓬ ꓡꓴ ꓚ ꓞꓶꓽˍ ꓡꓳ꓿ 8 ꓞꓳ ꓙꓲꓽ ꓠꓬ ꓞꓳ ꓕꓰꓻ ꓐꓴ ꓔꓯ꓾ ꓠꓴ ꓪꓽ ꓟꓬ ꓞꓶꓻ ꓥꓪ ꓠꓴꓽ ꓔꓯ ꓮ ꓔꓲꓸ ꓤ ꓐꓱꓻ ꓖꓶ ꓡꓯ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓟꓬ ꓡꓴ ꓠꓽ ꓫꓵꓻˍ ꓐꓰ ꓗꓹ ꓡꓳ꓾ ꓐꓯˍ ꓡꓳ꓿ 9 ꓞꓳ ꓕꓰꓻ ꓡꓰ ꓒꓳꓹ ꓖꓶ ꓢꓲ꓾ ꓟꓽ ꓓ꓾ ꓮꓽ ꓧꓪꓹ ꓠꓴ ꓪꓽˍ ꓐꓰ ꓥꓪ ꓠꓴꓽ ꓐꓱ ꓶ ꓣꓱꓽ ꓟꓽ ꓡꓳꓼˍ ꓟꓽ ꓢꓷ꓿ ꓠꓴ ꓪꓽ ꓣꓱꓽ ꓓꓴ ꓠꓬ ꓟꓬ ꓞꓶꓻ ꓪꓴꓽ ꓢꓴ ꓔꓯ ꓪꓴꓻ ꓬꓰ ꓟꓴꓽ꓾ ꓐꓯ ꓖꓶˍ ꓡꓳ꓿ 10 ꓬꓲ ꓪꓽ ꓪꓴꓻ ꓙꓰ ꓕꓯ ꓟꓯꓸ ꓡꓯꓸ ꓒꓽ ꓛꓲ ꓡ ꓗꓷꓳ꓿ ꓙꓽ ꓖꓶ ꓔ ꓢꓴ ꓠꓬ꓾ ꓬꓲˍ ꓐꓰ ꓕꓲ ꓛꓳꓺꓼ ꓤ ꓟꓶꓻ ꓝꓱꓺˍ ꓟ ꓑꓮꓲ ꓗꓪ ꓓꓵꓽ ꓙꓰ ꓢꓲ ꓗ ꓘꓶꓽ ꓚꓵꓸ ꓗꓷꓳ꓿ 11 ꓤ ꓟꓶꓽ ꓡꓯꓸ ꓖꓳ ꓥꓪꓽ ꓣꓳ ꓠꓬ꓾ ꓗꓸ ꓠꓯꓸ ꓢꓲ ꓡ ꓢꓲ꓾ ꓢꓲ ꓒꓽꓳ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓔꓯ ꓗ ꓘꓶꓽ ꓒꓴ ꓖꓶ ꓡꓯ꓾ ꓐꓯˍ ꓡꓳ꓿ 12 ꓖꓳ ꓡꓱ ꓥ ꓟꓲ ꓬꓲ ꓡꓰ꓾ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓔꓯ ꓥꓪ ꓟꓽ ꓢꓷ꓾ ꓐꓰ ꓒꓳꓹ ꓖꓶˍ ꓡꓳ꓿ 13 ꓖꓳ ꓡꓱ ꓠꓬꓲ ꓧꓪꓸ ꓛꓲ ꓔꓬ꓾ ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓡꓻˍ ꓟ ꓬꓲ ꓦꓬꓼ ꓠꓬꓲˍ ꓟꓲ꓾ ꓬꓲ ꓙꓵꓹˍ ꓟꓲ ꓠꓴ ꓪꓽ ꓟꓽ ꓢꓷ꓿ 14 ꓝꓮꓲ ꓟꓴꓽ ꓗꓪ ꓗꓴꓷꓼ ꓠꓬ꓾ ꓡ ꓞꓳ ꓕꓲ ꓣꓳ ꓬꓲ ꓚꓲꓸ ꓛꓬ ꓚꓳ ꓑꓸ ꓐꓴ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓬꓲ ꓖꓴꓽ ꓙꓴꓽ ꓠꓬ ꓬꓲ ꓪꓽ ꓔꓯ ꓡꓯꓼ ꓙꓱ ꓖꓶ ꓢꓲ ꓠꓬꓲ꓾ ꓠꓱꓸ ꓐꓯ ꓕꓲ ꓟꓵꓽ ꓗꓪ ꓙꓰ ꓢꓴˍ ꓡꓰ ꓐꓰ ꓗꓹ ꓡꓳ꓿ 15 ꓬꓲ ꓠꓬ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓬꓰ ꓐ ꓡ ꓟ ꓔꓯ ꓛꓳ ꓢꓲ꓾ ꓕꓲ ꓣꓳ ꓔꓯ ꓒꓴ ꓥꓪꓽ ꓕ-ꓡꓰ-ꓔꓷ꓾ ꓕꓲ ꓣꓳ ꓔꓯ ꓠꓬꓲꓽ ꓕ-ꓡꓰ-ꓔꓷ꓾ ꓕꓲ ꓣꓳ ꓔꓯ ꓕꓲꓽ ꓕ-ꓡꓰ-ꓔꓷ ꓖꓶ ꓢꓲ ꓓꓴꓻ ꓓꓳ ꓙꓰˍ ꓡꓳ꓿ 16 ꓥꓪꓽ ꓕ-ꓡꓰ-ꓔꓷ ꓟꓶ ꓢꓴ ꓖꓳ ꓕꓲ ꓣꓳ ꓠꓬ꓾ ꓞꓼ ꓐꓰ ꓶ ꓡꓯꓼ ꓟꓴ ꓙꓰ ꓢꓲ꓾ ꓬꓲ ꓐꓶꓹ ꓥꓪꓽ ꓕ-ꓡꓰ-ꓔꓷ ꓒꓳꓹ ꓟꓶˍ ꓡꓳ꓿ 17 ꓠꓬꓲꓽ ꓕ-ꓡꓰ-ꓔꓷ ꓟꓶ ꓢꓴˍ ꓟꓲ ꓖꓳ ꓟ ꓡꓰ ꓐꓰ꓾ ꓬꓲ ꓐꓶꓹ ꓠꓬꓲꓽ ꓕ-ꓡꓰ-ꓔꓷ ꓒꓳꓹ ꓟꓶˍ ꓡꓳ꓿ 18 ꓖꓳ ꓡꓱ ꓥ ꓟꓲ ꓕꓲꓽ ꓕ-ꓡꓰ-ꓔꓷˍ ꓡꓰꓽ ꓟꓶ ꓢꓴ ꓖꓳ ꓕꓲ ꓣꓳ ꓠꓽ ꓙꓰ ꓢꓲ꓾ ꓟꓲ ꓘꓴꓻ ꓚꓴꓸ ꓢꓲ ꓬꓲ ꓢꓲ ꓒꓽ ꓒꓴ ꓔꓯ ꓔꓵꓸ ꓗꓷˍ ꓡꓳ꓿ 19 ꓟꓶ ꓤ ꓗ ꓠꓯꓸ ꓚꓳ ꓑꓸ ꓖꓳ ꓕꓲ ꓧꓳꓽ ꓟ ꓬꓲ ꓪꓽ ꓢꓲ ꓒꓽ ꓬꓲꓼ ꓡ ꓢꓲ꓾ ꓬꓲ ꓪꓽˍ ꓐꓰ ꓶꓻ ꓡꓯꓼ ꓢꓪꓸˍ ꓡꓳ꓿ 20 ꓥꓪꓽ ꓕ-ꓡꓰ-ꓔꓷ ꓟꓶ ꓢꓴ ꓖꓳ ꓕꓲ ꓣꓳ ꓠꓬ꓾ ꓬꓲ ꓔꓱꓹ ꓬꓲ ꓥꓪꓽ ꓕ-ꓡꓰ-ꓔꓷ ꓔꓯꓹ ꓡ ꓢꓲ꓾ ꓢꓲ ꓒꓽꓳ꓾ ꓠꓴ ꓠꓬ ꓥꓪ ꓔꓯ ꓒꓴꓻ ꓥꓪꓽ ꓕ-ꓡꓰ-ꓔꓷ ꓡꓯꓼ ꓙꓱ ꓖꓶ ꓔ ꓡꓳ꓿ ꓠꓬꓲ ꓠꓹ꓾ ꓥꓪ ꓠꓬ ꓬꓲ ꓐꓶꓹ ꓥꓪꓽ ꓕ-ꓡꓰ-ꓔꓷ ꓒꓳꓹ ꓟꓶ ꓡꓰꓳ꓾ ꓐꓯˍ ꓡꓳ꓿ 21 ꓖꓳ ꓡꓱ ꓠꓬ ꓬꓲ ꓢꓲ ꓒꓽ ꓡꓰ ꓬꓲ ꓔꓯ꓾ ꓠꓴ ꓬꓰ ꓜꓳꓽ ꓡꓰꓳ꓿ ꓙꓲꓻˍ ꓟ ꓐꓰ ꓦ ꓡꓱ ꓐꓳˍ ꓟ ꓚꓳ ꓑꓸ ꓠꓴ ꓠꓬ ꓕꓱ ꓡꓱ ꓫꓵꓽ ꓟꓬꓱꓽ ꓤ ꓗꓪ ꓦ ꓡꓱ ꓐꓳˍ ꓠꓬꓲ꓾ ꓥꓪ ꓠꓬ ꓠꓴ ꓔꓯ ꓮꓽ ꓟꓬꓹ ꓫꓵꓽ ꓔꓯ ꓙꓵꓽ ꓝꓲˍ ꓥꓳ꓿ ꓠꓴ ꓢꓲ ꓒꓽ ꓗꓹ ꓛꓲ ꓓꓴ ꓗꓪ ꓓꓵꓽ ꓡꓯ꓾ ꓐꓯ ꓖꓶˍ ꓡꓳ꓿ 22 ꓠꓬꓲꓽ ꓕ-ꓡꓰ-ꓔꓷ ꓟꓶ ꓢꓴˍ ꓟꓲ ꓡ ꓢꓲ꓾ ꓢꓲ ꓒꓽꓳ꓾ ꓠꓴ ꓠꓬ ꓥꓪ ꓔꓯ ꓠꓬꓲꓽ ꓕ-ꓡꓰ-ꓔꓷ ꓡꓯꓼ ꓙꓱ ꓖꓶ ꓔ ꓡꓳ꓿ ꓠꓬꓲ ꓠꓹ꓾ ꓥꓪ ꓠꓬ ꓬꓲ ꓐꓶꓹ ꓠꓬꓲꓽ ꓕ-ꓡꓰ-ꓔꓷ ꓒꓳꓹ ꓟꓶ ꓡꓰꓳ꓾ ꓐꓯˍ ꓡꓳ꓿ 23 ꓖꓳ ꓡꓱ ꓠꓬ ꓬꓲ ꓢꓲ ꓒꓽ ꓡꓰ ꓬꓲ ꓔꓯ꓾ ꓠꓴ ꓬꓰ ꓜꓳꓽ ꓡꓰꓳ꓿ ꓙꓲꓻˍ ꓟ ꓐꓰ ꓦ ꓡꓱ ꓐꓳˍ ꓟ ꓚꓳ ꓑꓸ ꓠꓴ ꓠꓬ ꓕꓱ ꓡꓱ ꓫꓵꓽ ꓟꓬꓱꓽ ꓤ ꓗꓪ ꓦ ꓡꓱ ꓐꓳˍ ꓠꓬꓲ꓾ ꓥꓪ ꓠꓬ ꓠꓴ ꓔꓯ ꓮꓽ ꓟꓬꓹ ꓫꓵꓽ ꓔꓯ ꓙꓵꓽ ꓝꓲˍ ꓥꓳ꓿ ꓠꓴ ꓢꓲ ꓒꓽ ꓗꓹ ꓛꓲꓽ ꓓꓴ ꓗꓪ ꓓꓵꓽ ꓡꓯ꓾ ꓐꓯ ꓖꓶˍ ꓡꓳ꓿ 24 ꓕꓲ ꓕ-ꓡꓰ-ꓔꓷ ꓟꓶ ꓢꓴˍ ꓟꓲ ꓡ ꓢꓲ꓾ ꓢꓲ ꓒꓽꓳ꓾ ꓠꓴ ꓠꓽ ꓞꓳ ꓦꓶꓻ ꓥ ꓢꓲ꓾ ꓟꓽ ꓫꓵꓸ ꓔ ꓟ ꓗꓪ ꓶꓼ ꓢꓲ ꓠꓬꓲ꓾ ꓟꓽ ꓓꓳꓽ ꓔ ꓟ ꓗꓪ ꓫꓺˍ ꓟ ꓥꓪ ꓢꓷˍ ꓡꓳ꓿ 25 ꓖꓳ ꓡꓱ ꓠꓬꓲ ꓥꓪ ꓠꓬ ꓠꓴ ꓔꓯ ꓙꓳꓺ ꓠꓬꓲ꓾ ꓠꓴ ꓒꓴ ꓕꓲ ꓕ-ꓡꓰ-ꓔꓷ ꓟ ꓠꓬ ꓟꓲ ꓠꓯ ꓗꓪ ꓔꓵꓸ ꓔ ꓡꓳ꓿ ꓕꓱꓻꓽ꓾ ꓠꓴ ꓔꓯ ꓟ ꓓꓹ ꓢꓰꓽ ꓡꓳ꓾ ꓐꓯˍ ꓡꓳ꓿ 26 ꓖꓳ ꓡꓱ ꓠꓬ ꓬꓲ ꓢꓲ ꓒꓽ ꓡꓰ ꓒꓳꓹ ꓖꓶ ꓢꓲ꓾ ꓥꓶˍ ꓟ ꓐꓰ ꓐꓴꓻˍ ꓟ ꓚꓳ ꓑꓸꓳ꓾ ꓥꓪ ꓠꓬ ꓟꓽ ꓫꓵꓸ ꓔ ꓟ ꓗꓪ ꓶꓼ ꓢꓲ꓾ ꓟꓽ ꓓꓳꓽ ꓔ ꓟ ꓗꓪ ꓫˍ ꓟ ꓠꓴ ꓢꓷˍ ꓠꓬ꓾ 27 ꓥꓪ ꓒꓴ ꓕꓱ ꓟ ꓒꓴ ꓞꓳꓽ ꓦꓲ ꓗꓪ ꓩꓴꓺ ꓔ ꓖꓶ ꓙꓲꓽ ꓙꓳˍ ꓡꓳ꓿ ꓖꓳ ꓡꓱ ꓬꓰ ꓔ ꓐꓷˍ ꓠꓬ ꓥꓪ ꓬꓲꓼ ꓡ ꓕꓯ꓾ ꓥꓪ ꓒꓴ ꓬꓲ ꓗꓪꓺꓫ ꓟꓲ ꓟꓶꓺˍ ꓡꓳ ꓫꓵ ꓥꓳ꓿ 28 ꓖꓳ ꓡꓱ ꓠꓬꓲ ꓒꓴ ꓖꓳ ꓕꓲ ꓕ-ꓡꓰ-ꓔꓷ ꓟ ꓬꓲ ꓔꓯˍ ꓐꓰ ꓣꓴꓻ ꓔꓯꓹ ꓬꓲꓼ ꓡ ꓢꓲ꓾ ꓞꓲꓻ ꓕ-ꓡꓰ-ꓔꓷ ꓙꓳ ꓢꓴ ꓖꓳ ꓕꓲ ꓣꓳ ꓔꓯ ꓖꓶ꓿ 29 ꓮ ꓡꓲꓳ ꓐꓯ ꓠꓬ ꓙꓳ ꓢꓴ ꓥ ꓕ ꓑꓳꓸ ꓔꓯ ꓠꓬ ꓡꓴꓽ ꓖꓶ ꓢꓲ ꓬꓲ ꓠꓽ ꓮꓽ ꓟꓬꓹ ꓙꓳˍ ꓥꓳ꓿ ꓟꓽ ꓙꓳ ꓢꓴ ꓔꓯ ꓠꓽ ꓬꓲ ꓙꓳ ꓞꓹ ꓟˍ ꓟꓲ ꓣꓴ ꓔꓯꓹ ꓙꓰˍ ꓥꓳ꓿ 30 ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓣꓱꓽ ꓟꓽ ꓬꓯꓼ ꓟ ꓚꓳ ꓑꓸ ꓕꓱ ꓕꓲ ꓣꓳ ꓔꓯ꓾ ꓠꓱ ꓫꓱꓸ ꓟꓸꓼ ꓠꓯ ꓞꓲꓹˍ ꓟ ꓗꓪ ꓡꓳ ꓩꓴ ꓗꓷ꓿ ꓖꓳ ꓗꓪ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 31 ꓡ-ꓞꓳ-ꓮ-ꓐꓲ ꓠꓬ ꓟꓬꓱ ꓓꓳꓽ ꓙꓳ ꓙꓳ꓾ ꓟꓴꓽ ꓗꓪ ꓝꓲ ꓓꓴ ꓮꓽ ꓙꓵ ꓬꓲˍ ꓐꓰ ꓬꓯꓼ ꓡ ꓕꓯ꓾ ꓬꓲ ꓠꓬ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓲ꓾ 32 ꓟꓵꓽ ꓗꓳꓹ ꓓꓵ ꓓꓵ ꓞꓳ ꓫꓵꓽ ꓮꓽ ꓙꓵ ꓔꓯ ꓬꓲ ꓟꓲꓽ ꓙꓬꓽ ꓗꓪ ꓘꓴꓻ ꓜꓲꓼ ꓔ ꓥꓳ꓿ ꓬꓲ ꓠꓬ꓾ ꓮ ꓣꓳ ꓡꓳꓸ ꓢꓴ ꓡꓰ ꓮ ꓣꓳˍ ꓐꓰ ꓮ ꓛꓵꓼ ꓔꓯ ꓐꓱꓻˍ ꓟ ꓡꓰ ꓐꓰ꓾ ꓬꓲ ꓪꓽ ꓔꓯ ꓐꓱꓻˍ ꓥꓳ꓿ 33 ꓖꓳ ꓡꓱ ꓢꓲ ꓮ ꓣꓳ ꓔꓯ ꓠꓬ ꓡꓯꓼ ꓙ ꓕꓲ ꓛꓱꓽ ꓗꓪ꓾ ꓮ ꓛꓵꓼ ꓔꓯ ꓠꓬ ꓡꓯꓼ ꓶꓸ ꓕꓲ ꓛꓱꓽ ꓗꓪ ꓔꓬ ꓝꓲˍ ꓥꓳ꓿ 34 ꓖꓳ ꓕꓯ ꓪ ꓔꓲ ꓠꓬ ꓬꓲ ꓡꓯꓼ ꓙ ꓕꓲ ꓛꓱꓽ ꓗꓪ ꓔꓬ ꓢꓴ ꓔꓯ꓾ ꓥꓪ ꓐꓹ ꓐ ꓡꓰ ꓖꓶ ꓡ ꓟ ꓶꓼ ꓤ ꓫꓱꓹ ꓤ ꓟꓶ ꓢꓴ ꓠꓴ ꓪꓽ ꓠꓬ꓾ ꓟꓵꓽ ꓚꓰꓼ ꓟꓲ ꓚꓰꓼ ꓕꓯˍ ꓡꓰ ꓠꓴ ꓪꓽ ꓐꓱ ꓶ ꓙꓽ ꓖꓶ ꓔ ꓟ ꓡꓯꓼ ꓪ ꓗꓴꓷꓼ ꓘꓳ ꓣꓴ ꓡꓯ꓿ 35 ꓮ ꓡꓲꓳ ꓐꓯ ꓠꓬ ꓥꓪ ꓦꓰꓼ ꓟꓷꓼˍ ꓕꓯ ꓠꓴ ꓪꓽ ꓥꓪ ꓔꓯ ꓖꓶ ꓜꓽ ꓡꓺꓳ꓿ ꓥꓪ ꓢꓲꓼˍ ꓕꓯ ꓠꓴ ꓪꓽ ꓥꓪ ꓔꓯ ꓖꓶ ꓓꓳꓻ ꓡꓺꓳ꓿ ꓥꓪ ꓞꓳ ꓬꓯꓼ ꓟꓴˍ ꓕꓯ ꓠꓴ ꓪꓽ ꓥꓪ ꓔꓯ ꓘꓳ ꓣꓴ ꓡꓺꓳ꓿ 36 ꓥꓪ ꓙꓬꓽ ꓡꓯꓽ ꓟ ꓗꓪ ꓠꓴ ꓪꓽ ꓥꓪ ꓔꓯ ꓖꓶ ꓖꓪꓽ ꓡꓺꓳ꓿ ꓥꓪ ꓠꓻˍ ꓕꓯ ꓠꓴ ꓪꓽ ꓥꓪ ꓔꓯ ꓠꓬꓲꓺ ꓙ ꓡꓺꓳ꓿ ꓐꓱ ꓓꓴꓽ ꓗꓪ ꓔꓬ ꓕꓯ ꓠꓴ ꓪꓽ ꓥꓪ ꓔꓯ ꓔꓱꓹ ꓠꓬꓲ ꓡꓺꓳ꓾ ꓐꓰ ꓐꓯˍ ꓥꓳ꓿ 37 ꓖꓳ ꓕꓯ ꓔꓱꓹ ꓜꓳꓽ ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓮ ꓕꓯꓽ ꓠꓴ ꓦꓰꓼ ꓟꓷꓼˍ ꓟ ꓟꓳꓻ ꓢꓲ ꓠꓴ ꓔꓯ ꓖꓶ ꓜꓽ ꓗꓷ ꓡ? ꓠꓴ ꓢꓲꓼˍ ꓟ ꓟꓳꓻ ꓢꓲ ꓠꓴ ꓔꓯ ꓖꓶꓽ ꓓꓳꓻ ꓗꓷ ꓡ? 38 ꓮ ꓕꓯꓽ ꓠꓴ ꓞꓳ ꓬꓯꓼ ꓟꓴˍ ꓟ ꓟꓳꓻ ꓢꓲ꓾ ꓠꓴ ꓔꓯ ꓘꓳ ꓣꓴ ꓗꓷ ꓡ? ꓠꓴ ꓙꓬꓽ ꓡꓯꓽ ꓟ ꓗꓪ ꓠꓴ ꓔꓯ ꓮ ꓕꓯꓽ ꓖꓶ ꓖꓪ ꓗꓷ ꓡ? 39 ꓮ ꓕꓯꓽ ꓠꓴ ꓠꓻ ꓔꓬ꓾ ꓥ ꓠꓬ ꓐꓱ ꓓꓴꓽ ꓗꓪ ꓔꓬ ꓕꓯ꓾ ꓠꓴ ꓔꓯ ꓔꓱꓹ ꓠꓬꓲ ꓗꓷ ꓡ?꓾ ꓐꓰ ꓒꓳꓹ ꓖꓶ ꓡ ꓥꓳ꓿ 40 ꓖꓳ ꓕꓯ ꓪ ꓔꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓗꓳ ꓡꓳ ꓗꓪ ꓮꓸ ꓫꓵ ꓚꓬꓹ ꓟꓽ ꓒꓵꓽˍ ꓟ ꓕꓲ ꓣꓳ ꓔꓯ ꓬꓰ ꓙˍ ꓟ ꓠꓬ ꓥꓪ ꓔꓯ ꓬꓰ ꓙˍ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓥꓳ꓿ 41 ꓖꓳ ꓕꓯ ꓬꓲ ꓠꓬ ꓡꓯꓼ ꓶꓸ ꓕꓲ ꓛꓱꓽ ꓗꓪ ꓔꓬ ꓢꓴ ꓔꓯ꓾ ꓙꓱꓽ ꓔ ꓢꓴ ꓠꓴ ꓪꓽꓳ꓾ ꓥꓪ ꓔꓯˍ ꓐꓰ ꓧꓹ ꓙꓰ ꓢꓲ꓾ ꓠꓲꓽ ꓪ ꓔꓲˍ ꓐꓰ ꓬꓲ ꓝꓲ ꓓꓴ ꓐꓴ ꓐꓱ ꓶ ꓙꓽ ꓖꓶ ꓔ ꓟ꓾ ꓕꓲ ꓞꓲꓼ ꓕꓲ ꓑ ꓟ ꓮꓸ ꓔꓳꓸ ꓗꓪ ꓓꓵꓽ ꓙꓰ꓿ 42 ꓮ ꓡꓲꓳ ꓐꓯ ꓠꓬ ꓥꓪ ꓦꓰꓼ ꓟꓷꓼˍ ꓕꓯ ꓠꓴ ꓪꓽ ꓥꓪ ꓔꓯ ꓟꓽ ꓖꓶ ꓜꓽ ꓡ꓿ ꓥꓪ ꓢꓲꓼˍ ꓕꓯ ꓥꓪ ꓔꓯ ꓟꓽ ꓖꓶ ꓓꓳꓻ ꓡ꓿ 43 ꓥꓪ ꓞꓳ ꓬꓯꓼ ꓟꓴˍ ꓕꓯ ꓠꓴ ꓪꓽ ꓥꓪ ꓔꓯ ꓟꓽ ꓘꓳ ꓣꓴ ꓡ꓾ ꓙꓬꓽ ꓡꓯ ꓟꓴ ꓗꓹ ꓕꓯ ꓠꓴ ꓪꓽ ꓥꓪ ꓔꓯ ꓟꓽ ꓖꓶ ꓖꓪꓽ ꓡ꓿ ꓠꓻ ꓔꓬ ꓕꓯˍ ꓟꓲ꓾ ꓐꓱ ꓓꓴꓽ ꓗꓪ ꓔꓬ ꓕꓯˍ ꓟꓲ꓾ ꓠꓴ ꓪꓽ ꓥꓪ ꓔꓯ ꓟꓽ ꓔꓱꓹ ꓠꓬꓲ ꓡ꓾ ꓐꓰ ꓐꓯˍ ꓥꓳ꓿ 44 ꓖꓳ ꓕꓯ ꓬꓲ ꓪꓽˍ ꓟꓲ ꓕꓱ ꓡꓱ ꓒꓳꓹ ꓖꓶˍ ꓥꓳ꓿ ꓢꓲ ꓒꓽꓳ꓾ ꓥꓪ ꓠꓴ ꓮ ꓕꓯꓽ ꓕꓲ ꓝꓲꓸ ꓗꓪ꓾ ꓠꓴ ꓦꓰꓼ ꓟꓷꓼˍ ꓟ꓾ ꓥ ꓠꓬ ꓢꓲꓼˍ ꓟ꓾ ꓥ ꓠꓬ ꓞꓳ ꓬꓯꓼ ꓟꓴˍ ꓟ꓾ ꓥ ꓠꓬ ꓙꓬꓽ ꓡꓯꓽ ꓟ꓾ ꓥ ꓠꓬ ꓠꓻˍ ꓟ꓾ ꓥ ꓠꓬ ꓐꓱ ꓓꓴꓽ ꓗꓪ ꓔꓬ ꓟ ꓔꓯ ꓟꓳꓻ ꓢꓲ꓾ ꓠꓴ ꓔꓯ ꓟꓽ ꓣꓱꓽ ꓙ ꓬꓰ ꓗꓷ ꓡ?꓾ ꓐꓰ ꓐꓯˍ ꓥꓳ꓿ 45 ꓬꓲ ꓠꓬ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓗꓳ ꓡꓳ ꓗꓪ ꓮꓸ ꓫꓵ ꓚꓬꓹ ꓟꓽ ꓒꓵꓽ ꓟ ꓕꓲ ꓣꓳ ꓔꓯ ꓟꓽ ꓬꓰ ꓙ ꓟ ꓠꓬ꓾ ꓥꓪ ꓔꓯ ꓟꓽ ꓬꓰ ꓙˍ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓥꓳ꓿ 46 ꓖꓳ ꓡꓱ ꓠꓬꓲ ꓕꓱ ꓕꓲ ꓧꓳꓽ ꓟ ꓠꓬ ꓕꓲ ꓞꓲꓼ ꓕꓲ ꓑ ꓛꓬ ꓒꓵꓽ ꓟꓶˍ ꓟ ꓗꓪ ꓓꓵꓽ ꓙꓰˍ ꓥꓳ꓿ ꓔꓱꓹ ꓜꓳꓽˍ ꓟ ꓖꓳ ꓕꓲ ꓧꓳꓽ ꓠꓽ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓗꓪ ꓓꓵꓽ ꓙꓰˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿

ꓟ-ꓔꓲ 26

1 ꓐꓯ ꓘꓶꓽ ꓕꓱ ꓟ ꓬꓰ-ꓢꓴ ꓐꓯ ꓓꓳ ꓡꓰ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ 2 ꓠꓬꓲꓽ ꓠꓬꓲ ꓗꓸ ꓠꓯ ꓠꓬ ꓦꓲ-ꓘꓳ-ꓑꓮꓲ ꓛꓲ ꓡ ꓟ ꓠꓴ ꓪꓽ ꓢꓷˍ ꓡꓳ꓿ ꓡ-ꓞꓳ-ꓮ-ꓐꓲ ꓔꓯ ꓠꓽ ꓕꓯꓼ ꓔꓶꓸ ꓗꓷ ꓠꓹ ꓟ ꓡꓯꓼ ꓙꓱ ꓗꓷˍ ꓥꓳ꓾ ꓐꓯˍ ꓡꓳ꓿ 3 ꓖꓳ ꓕꓯ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓑ ꓫꓬꓼ ꓐꓴ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬ꓾ ꓘꓷ-ꓬ-ꓒ ꓟꓬꓱꓺ ꓔ ꓟ ꓔꓲ ꓒ ꓓꓽ ꓟ ꓡꓽ ꓙꓳ ꓓꓰ ꓗꓪ ꓜꓲꓼ ꓡꓯꓽ ꓘꓳ ꓢꓲ꓾ 4 ꓬꓰ-ꓢꓴ ꓔꓯ ꓘꓳ ꓫꓱ ꓫꓱˍ ꓐꓰ ꓣꓴ ꓢꓲ ꓢꓰꓼ ꓗꓷ ꓠꓹ ꓟ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ 5 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓬ ꓑ ꓫꓬꓼ ꓐꓴ ꓢꓴ ꓔꓴ ꓡ ꓟ ꓔꓯ ꓟꓬꓺ ꓑꓬ ꓠꓬꓲ꓾ ꓑꓮꓲ ꓦꓬꓼ ꓠꓬꓲ ꓗꓪ ꓕꓽ ꓬꓰ ꓡꓯ꓾ ꓐꓰ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ 6 ꓬꓰ-ꓢꓴ ꓠꓬ ꓐꓱ-ꓕ-ꓠꓲ ꓗꓪ꓾ ꓔꓸ ꓟꓼ ꓩꓴ ꓓꓲꓻ ꓠꓬꓲ ꓢꓴ ꓢꓲꓹ-ꓟꓴ ꓦꓲ ꓗꓪ ꓔꓬ ꓕꓯ꓾ 7 ꓒꓴˍ ꓟ ꓡꓳ ꓐꓷ ꓕꓴꓽ ꓗꓪ꓾ ꓮꓽ ꓘꓶꓸ ꓒꓵꓽˍ ꓟ ꓫꓳꓺ ꓠꓱ ꓞꓶ ꓕꓲ ꓕꓴꓽ ꓙꓳ ꓢꓴ ꓤ ꓟꓶ ꓤ ꓕꓲ ꓣꓳ ꓬꓲ ꓔꓯ ꓡ ꓢꓲ꓾ ꓬꓲ ꓜ ꓜˍ ꓐꓰ ꓗꓳꓺ ꓔꓬ ꓕꓯ ꓬꓲ ꓪꓴꓸ ꓓꓵ ꓗꓪ ꓧꓳꓸ ꓕꓲꓽ ꓖꓶˍ ꓡꓳ꓿ 8 ꓖꓳ ꓡꓱ ꓥ ꓟꓲ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ꓾ ꓬꓲ ꓪꓽ ꓠꓲꓹ ꓘꓪꓽ ꓟꓽ ꓫꓵ ꓠꓬꓲ꓾ ꓕꓱ ꓟ ꓮꓸ ꓫꓵ ꓪꓴꓸ ꓠꓬꓲ ꓮꓽ ꓔꓳ ꓒꓬꓹ ꓗꓷˍ ꓡ? 9 ꓫꓳꓺ ꓠꓱ ꓞꓶ ꓕꓱ ꓟ ꓠꓽ꓾ ꓒꓴ ꓮꓽ ꓟꓬꓹ ꓐꓰ ꓪꓴꓽ ꓗꓷ ꓢꓲ ꓞꓳ ꓫꓸ ꓔꓯ ꓖꓶ ꓛꓵˍ ꓡꓳ ꓫꓵꓽ ꓥꓳ꓾ ꓐꓯˍ ꓡꓳ꓿ 10 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓢꓷꓸ ꓡꓰ ꓠꓬ ꓬꓲ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓤ ꓟꓶ ꓤ ꓕꓱ ꓕꓲ ꓣꓳ ꓔꓯ ꓘꓶꓻ ꓡꓶꓽ ꓖꓶˍ ꓡ? ꓬꓲ ꓠꓬ ꓥꓪ ꓔꓯ ꓮꓸ ꓓꓲꓽ ꓙꓲꓻˍ ꓟ ꓟꓬꓱꓽ ꓕꓲ ꓫꓵꓽ ꓬꓰ ꓖꓶꓽ ꓗꓷꓳ꓿ 11 ꓮ ꓡꓲꓳ ꓐꓯ ꓠꓬ ꓞꓳ ꓫꓸ ꓠꓽ ꓮ ꓕꓯꓽˍ ꓟꓲ ꓠꓴ ꓪꓽˍ ꓐꓰ ꓕꓲ ꓪꓺꓼ ꓔꓬ ꓡꓳ꓿ ꓥꓪ ꓠꓽ ꓮ ꓕꓯꓽˍ ꓟꓲ ꓠꓴ ꓪꓽˍ ꓐꓰ ꓕꓲ ꓪꓺꓼ ꓔꓬ ꓡꓳ꓾ ꓟꓽ ꓥ꓿ 12 ꓫꓳꓺ ꓠꓱ ꓞꓶ ꓕꓱ ꓟ ꓬꓲ ꓡꓰ ꓥꓪ ꓔꓯ ꓧꓳꓸ ꓕꓲꓽ ꓖꓶˍ ꓟ ꓠꓬ꓾ ꓥꓪ ꓔꓯ ꓔꓵꓸ ꓠꓹ ꓟ ꓙꓽ ꓖꓶˍ ꓟ ꓥ ꓡꓳ꓿ 13 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓟꓵꓽ ꓗꓳꓹ ꓓꓵ ꓓꓵ ꓶꓼ ꓓꓳꓽ ꓫꓱꓹ ꓓꓳ ꓕꓱ ꓟ ꓮ ꓡꓲ ꓗꓪ ꓚ ꓛꓲ ꓬꓰˍ ꓟꓲ꓾ ꓤ ꓟꓶ ꓤ ꓕꓱ ꓟ ꓔꓯ ꓚꓲꓸ ꓟꓶ ꓓꓴ ꓬꓰ ꓠꓹ ꓟ꓾ ꓬꓲ ꓬꓰˍ ꓟ ꓟꓬꓱꓽˍ ꓟꓲ ꓚ ꓟꓸ ꓖꓶˍ ꓥꓳ꓾ ꓐꓯˍ ꓡꓳ꓿ 14 ꓖꓳ ꓕꓯ ꓞꓲ ꓠꓬꓲꓽ ꓣꓳ ꓗꓪ ꓟ ꓘ-ꓡꓲꓳ ꓒꓽ ꓬꓴ-ꓓ ꓠꓬ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓔꓯ ꓙꓰ ꓢꓲ꓾ 15 ꓥꓪ ꓡꓰ ꓠꓴ ꓪꓽ ꓔꓯ ꓬꓰ-ꓢꓴ ꓡꓯꓼ ꓙꓱ ꓖꓶˍ ꓠꓬ꓾ ꓠꓴ ꓪꓽ ꓥꓪ ꓔꓯ ꓒꓴꓻ ꓮ ꓟꓬ ꓖꓶˍ ꓐꓯˍ ꓡ?꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓔꓯ ꓒꓴ ꓢ ꓞꓲ ꓫꓱ-ꓘꓷ-ꓡꓷ ꓞꓰꓻ ꓖꓶˍ ꓡꓳ꓿ 16 ꓖꓳ ꓗꓸ ꓠꓯꓸ ꓬꓲ ꓠꓬ ꓬꓰ-ꓢꓴ ꓔꓯ ꓮ ꓡꓲ ꓐꓰ ꓬꓲ ꓪꓽ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓖꓶ ꓠꓹ ꓟ ꓬꓲ ꓑꓶꓸ ꓧꓪˍ ꓡꓳ꓿ 17 ꓙꓵ-ꓧꓶ-ꓟ-ꓣꓱ-ꓑꓮꓲ ꓬꓲ ꓪꓴꓸ ꓕꓲ ꓠꓬꓲ ꓗꓪ꓾ ꓛꓳꓽ ꓒꓯꓹ ꓐꓴ ꓠꓬ ꓬꓰ-ꓢꓴ ꓔꓯ ꓡ ꓢꓲ꓾ ꓦꓲ-ꓘꓳ-ꓑꓮꓲ ꓬꓰ ꓠꓹ ꓟ ꓠꓴ ꓡꓰ ꓥꓪ ꓠꓴꓽ ꓔꓯ ꓮ ꓡꓲ ꓗꓪ ꓙꓽ ꓖꓶ ꓝꓲ ꓠꓲꓹ ꓫꓵˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 18 ꓬꓲ ꓡꓰ꓾ ꓡꓳ ꓒꓱ ꓠꓯꓸꓼ ꓗꓪ ꓟ ꓡ ꓞꓳ ꓕꓲ ꓣꓳ ꓔꓯ ꓕꓱ ꓡꓱ ꓐꓯ ꓖꓶ ꓬꓰ꓿ ꓟꓸ ꓒ ꓡꓰ꓾ ꓥꓪ ꓦꓬꓼ ꓠꓬꓲ ꓛꓲ ꓡꓺꓳ꓾ ꓥꓪˍ ꓐꓰ ꓥꓪ ꓛꓳꓽ ꓒꓯꓹ ꓐꓴ ꓠꓬ ꓠꓴ ꓦꓲ ꓗꓪ ꓦꓲ-ꓘꓳ-ꓑꓮꓲ ꓬꓰˍ ꓥꓳ꓾ ꓐꓯ ꓖꓶ꓾ ꓐꓯˍ ꓡꓳ꓿ 19 ꓛꓳꓽ ꓒꓯꓹ ꓐꓴ ꓠꓬ ꓬꓰ-ꓢꓴ ꓐꓯ ꓖꓶˍ ꓟ ꓡꓰ ꓐꓰ ꓬꓰ ꓢꓲ ꓦꓲ-ꓘꓳ-ꓑꓮꓲ ꓬꓰ ꓠꓹ ꓟ ꓙꓽ ꓖꓶˍ ꓡꓳ꓿ 20 ꓟꓶꓼ ꓘꓶꓼ ꓛꓲ ꓡ ꓠꓬ꓾ ꓬꓲ ꓠꓬ ꓬꓲ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳꓺˍ ꓐꓰ ꓜ ꓜꓽ ꓠꓹ ꓟ ꓗꓳꓺ ꓔꓬ ꓡꓳ꓿ 21 ꓬꓲ ꓪꓽ ꓜ ꓜꓽ ꓔꓬ ꓕꓯ ꓬꓰ-ꓢꓴ ꓡꓰ꓾ ꓥꓪ ꓡꓰ ꓠꓴ ꓪꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓗꓪ ꓟ ꓕꓲ ꓣꓳ ꓡꓰ ꓥꓪ ꓔꓯ ꓪꓴꓽ ꓜ ꓗꓷ ꓡ ꓥꓳ꓾ ꓐꓯˍ ꓡꓳ꓿ 22 ꓬꓲ ꓪꓽ ꓠꓽ ꓠꓲꓹ ꓟ ꓮꓽ ꓘꓶꓸ ꓫꓸ ꓢꓲ꓾ ꓕꓲ ꓣꓳ ꓡꓰ ꓕꓲ ꓣꓳ ꓬꓲ ꓔꓯ꓾ ꓢꓲ ꓒꓽꓳ꓾ ꓥꓪ ꓥ ꓡ?꓾ ꓐꓰ ꓠ ꓠꓬꓲ ꓔꓴ ꓡ ꓡꓳ꓿ 23 ꓖꓳ ꓡꓱ ꓠꓬ ꓬꓲ ꓒꓳꓹ ꓖꓶ ꓢꓲ꓾ ꓥꓪˍ ꓐꓰ ꓕꓲ ꓛꓳꓺꓼ ꓐꓯꓻ ꓗꓪ ꓔꓲꓹ ꓜꓽ ꓗꓷ ꓢꓴ ꓖꓳ ꓕꓲ ꓣꓳ ꓡꓰ ꓥꓪ ꓔꓯ ꓪꓴꓽ ꓜꓽ ꓗꓷˍ ꓥꓳ꓿ 24 ꓡ-ꓞꓳ-ꓮ-ꓐꓲ ꓠꓽ ꓕꓳ ꓶ ꓗꓪ ꓬꓲ ꓔꓯ ꓟꓳꓸ ꓐꓳ ꓔ ꓟ ꓡꓰ ꓐꓰ ꓗꓷ ꓡꓰˍ ꓥꓳ꓿ ꓖꓳ ꓡꓱ ꓥ ꓟꓲ ꓡ-ꓞꓳ-ꓮ-ꓐꓲ ꓔꓯ ꓪꓴꓽ ꓜꓽ ꓢꓴ ꓖꓳ ꓕꓲ ꓣꓳ ꓠꓽ ꓫꓸ ꓙꓵˍ ꓥꓳ꓿ ꓖꓳ ꓕꓲ ꓣꓳ ꓟꓽ ꓦꓵꓻ ꓡ ꓗꓷ ꓐꓷˍ ꓠꓬ ꓬꓲ ꓐꓱ ꓶ ꓟꓬꓽ ꓠꓬꓲ ꓙꓲꓻˍ ꓡꓳ ꓫꓵꓽ ꓥꓳ꓾ ꓐꓯˍ ꓡꓳ꓿ 25 ꓬꓲ ꓔꓯ ꓪꓴꓽ ꓜꓽ ꓢꓴ ꓬꓴ-ꓓ ꓡꓰ ꓒꓳꓹ ꓖꓶ ꓢꓲ꓾ ꓟꓸ ꓒꓽꓳ꓾ ꓥꓪ ꓥ ꓡ?꓾ ꓐꓯˍ ꓡꓳ꓿ ꓬꓲ ꓡꓰ꓾ ꓠꓴ ꓐꓯ ꓬꓯꓼ ꓗꓷꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 26 ꓬꓲ ꓪꓽ ꓜꓻ ꓜꓽˍ ꓐꓰ ꓬꓰˍ ꓕꓯ꓾ ꓬꓰ-ꓢꓴ ꓠꓬ ꓑ ꓑ ꓣꓴ ꓢꓲ ꓶꓼ ꓥꓳꓽ ꓙꓱꓽ ꓗꓷ ꓠꓬ꓾ ꓦꓶꓹ ꓢꓲ ꓛꓳꓽ ꓒꓯꓹ ꓐꓴ ꓔꓯ ꓖꓶ ꓢꓲ ꓠꓬꓲ꓾ ꓠꓴ ꓪꓽ ꓣꓴ ꓢꓲ ꓜꓽ꓾ ꓕꓱ ꓟ ꓠꓽ ꓥꓪ ꓖꓳ ꓓꓱ ꓥ ꓡꓳ꓾ ꓐꓯˍ ꓡꓳ꓿ 27 ꓝꓮꓲ ꓬꓲ ꓠꓬ ꓡꓴ ꓗꓶꓸ ꓣꓴ ꓢꓲ ꓫꓸ ꓟꓳ ꓗꓷ ꓠꓬ ꓬꓲ ꓪꓽ ꓔꓯ ꓖꓶ ꓢꓲ ꓠꓬꓲ꓾ ꓕꓱ ꓟ ꓠꓴ ꓪꓽ ꓮꓽ ꓙꓵ ꓢꓴ ꓓꓳꓻ꓿ 28 ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ꓾ ꓝꓴꓲ ꓖꓽ ꓖꓶ ꓠꓹ ꓟ ꓮꓽ ꓟꓬꓹ ꓣꓳ ꓐꓱ ꓶ ꓧꓳꓸ ꓗꓷ ꓟ ꓥꓪ ꓘꓶꓽ ꓫꓵꓽ ꓫꓵꓽ ꓥ ꓡꓳ꓿ 29 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓕꓱ ꓡꓱ ꓖꓳ ꓑꓳꓸ ꓥꓪ ꓠꓬ ꓐꓹ ꓐ ꓗꓴꓷꓼ ꓠꓯꓸꓼ ꓗꓪ ꓠꓴ ꓪꓽˍ ꓐꓰ ꓛꓱꓼ ꓡꓱ ꓢꓶ ꓪꓴꓽ ꓬꓲꓻ ꓬꓲ ꓫꓵꓼ ꓓꓳꓻˍ ꓟ ꓖꓳ ꓕꓲ ꓠꓬꓲ ꓗꓪ ꓛꓲ꓾ ꓛꓱꓼ ꓡꓱ ꓢꓶ ꓪꓴꓽ ꓬꓲꓻ ꓕꓱ ꓟ ꓥꓪ ꓝꓮꓲ ꓟꓽ ꓓꓳꓻꓳ꓾ ꓐꓯˍ ꓡꓳ꓿ 30 ꓬꓲ ꓪꓽ ꓟꓴꓽ ꓖꓪ ꓕꓲ ꓚꓱꓹ ꓖꓪ ꓓꓳ ꓡꓰ ꓠꓬ ꓮꓽ-ꓛꓬ-ꓪꓽ-ꓚꓲ ꓗꓪ ꓓꓳ ꓙꓰˍ ꓡꓳ꓿ 31 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓠꓬꓲꓸ ꓟꓶꓼ ꓘꓶꓼ ꓠꓴ ꓪꓽ ꓮꓽ ꓙꓵ ꓢꓴ ꓥꓪ ꓪꓴꓸ ꓠꓬꓲ ꓡꓱꓸ ꓗꓷˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓥꓪ ꓡꓰ ꓮ ꓣꓳ ꓡꓳꓸ ꓢꓴ ꓔꓯ ꓓꓶꓽ ꓢꓲ꓾ ꓮ ꓣꓳ ꓜꓴꓻ ꓠꓽ ꓧꓹ ꓙꓰ ꓖꓴˍ ꓥꓳ꓾ ꓐꓰ ꓐꓳ ꓔ ꓡꓳ꓿ 32 ꓖꓳ ꓡꓱ ꓥ ꓟꓲ ꓥꓪ ꓢꓯꓸ ꓬꓲꓼ ꓡ ꓗ ꓠꓯ꓾ ꓖ-ꓡꓲ-ꓡꓲ ꓟꓵꓽ ꓗꓪ ꓥꓪ ꓠꓬ ꓠꓴ ꓪꓽ ꓧꓶꓸ ꓕꓯꓽ ꓢꓲ ꓗꓪ ꓙꓰˍ ꓥꓳ꓾ ꓐꓯˍ ꓡꓳ꓿ 33 ꓒꓲ-ꓕꓱ ꓠꓽ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓮꓽ ꓙꓵ ꓢꓴ ꓠꓴ ꓪꓴꓸ ꓠꓬꓲ ꓡꓱꓸ ꓗꓷˍ ꓟꓲ꓾ ꓥꓪ ꓠꓽ ꓮ ꓕꓯꓽˍ ꓟꓲ ꓟꓽ ꓡꓱꓸ ꓙꓰ꓾ ꓐꓯˍ ꓡꓳ꓿ 34 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓬꓲꓸ ꓟꓶꓼ ꓘꓶꓼ ꓮꓸ Bꓸ ꓒ ꓟꓽ ꓐꓵ ꓕꓯˍ ꓡꓰ꓾ ꓠꓴ ꓥꓪ ꓔꓯ ꓟꓽ ꓣꓷꓠꓸ ꓢ ꓧꓪꓹ ꓗꓷ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿ 35 ꓒꓲ-ꓕꓱ ꓠꓽ ꓬꓲ ꓔꓯ꓾ ꓥꓪ ꓠꓬ ꓠꓴˍ ꓐꓰ ꓕꓲ ꓪꓺꓼ ꓫꓵꓻ ꓠ ꓗꓹ ꓟꓲ꓾ ꓠꓴ ꓔꓯ ꓟꓽ ꓣꓷꓠꓸ ꓐꓰ ꓥꓪ ꓟꓽ ꓬꓰ꓾ ꓐꓯˍ ꓡꓳ꓿ ꓛꓳꓽ ꓒꓯꓹ ꓐꓴ ꓮꓽ ꓙꓵˍ ꓟꓲ ꓖꓳ ꓡꓱ ꓐꓯˍ ꓡꓳ꓿ 36 ꓖꓳ ꓕꓯ ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴˍ ꓐꓰ꓾ ꓖꓷ-ꓢꓷ-ꓟ-ꓠꓲ ꓟꓬꓱꓺ ꓔ ꓟ ꓕꓲ ꓔꓳꓸ ꓗꓪ ꓛꓲ ꓬꓰ ꓕꓯ꓾ ꓬꓲ ꓡꓰ ꓬꓲ ꓪꓽ ꓔꓯ꓾ ꓥꓪ ꓖꓪꓻˍ ꓙꓰ ꓢꓲ ꓪꓽ ꓘꓴ ꓔꓬ ꓕꓯ ꓠꓴ ꓪꓽ ꓠꓬ ꓕꓱ ꓗꓪ ꓠꓬꓲꓸ ꓠꓸ꓾ ꓐꓯ ꓖꓶˍ ꓡꓳ꓿ 37 ꓬꓲ ꓠꓬ ꓒꓲ-ꓕꓱˍ ꓐꓰ ꓜꓲ-ꓐꓱ-ꓓꓲ ꓬꓲ ꓮ ꓐꓲ ꓠꓬꓲꓽ ꓫꓵꓸ ꓔꓯ ꓬꓲˍ ꓐꓰ ꓕꓲ ꓛꓳꓺꓼ ꓧꓳꓽ ꓙꓰ ꓢꓲ꓾ ꓠꓲꓹ ꓟ ꓫꓸ ꓠꓬꓲ ꓮꓽ ꓘꓶꓸ ꓓꓵꓽ ꓙꓽ ꓪꓴꓽ ꓧꓶˍ ꓡꓳ꓿ 38 ꓖꓳ ꓡꓱ ꓢꓲ ꓬꓲ ꓡꓰ ꓬꓲ ꓪꓽ ꓔꓯ꓾ ꓥꓪ ꓠꓽ ꓫꓵꓻ ꓠ ꓛꓲ ꓠꓲꓹ ꓟ ꓮꓽ ꓘꓶꓸ ꓫꓸˍ ꓡꓳ꓿ ꓠꓴ ꓪꓽ ꓕꓱ ꓗꓪ ꓔꓬ ꓢꓲ꓾ ꓥꓪˍ ꓐꓰ ꓕꓲ ꓛꓳꓺꓼ ꓧꓪꓸ ꓛꓲꓽ ꓐꓰ ꓡꓳꓺ ꓠꓬꓹ꓾ ꓐꓯˍ ꓡꓳ꓿ 39 ꓬꓲ ꓠꓬ ꓟꓲꓸ ꓙꓬꓽ ꓗꓪ ꓮ ꓔꓲꓸ ꓤ ꓙꓰ ꓢꓲ꓾ ꓟꓳꓼ ꓔ ꓢꓲ ꓠꓬꓲ ꓕꓱ ꓡꓱ ꓪꓽ ꓘꓴˍ ꓡꓳ꓿ ꓥꓪ ꓐꓹ ꓐꓽꓳ꓾ ꓒꓬꓱꓼ ꓡ ꓓꓻˍ ꓠꓬ ꓡꓴ ꓗꓶꓸ ꓕꓱ ꓟ ꓥꓪ ꓔꓯˍ ꓐꓰ ꓗꓳꓸ ꓙꓰ ꓝꓲ꓿ ꓖꓳ ꓡꓱ ꓥ ꓟꓲ ꓥꓪ ꓠꓲꓹ ꓡꓶꓽ ꓟꓽ ꓥ ꓥ꓾ ꓠꓴ ꓠꓲꓹ ꓡꓶꓽ ꓒꓬꓱꓼ ꓡ ꓝꓲ꓾ ꓐꓯˍ ꓡꓳ꓿ 40 ꓛꓳꓽ ꓒꓯꓹ ꓐꓴ ꓔꓬ ꓗꓪ ꓬꓰ-ꓢꓴ ꓬꓲꓼ ꓛꓲ ꓡ ꓢꓲ꓾ ꓬꓲ ꓪꓽ ꓬꓲꓼ ꓟꓶ ꓔꓬ ꓟ ꓔꓯ ꓟꓳꓻ ꓗꓷ ꓠꓬ ꓒꓲ-ꓕꓱ ꓔꓯ꓾ ꓠꓴ ꓪꓽ ꓮ ꓡꓲ ꓥ ꓡ? ꓠꓴ ꓪꓽ ꓠꓬ ꓥꓪˍ ꓐꓰ ꓧꓪꓸ ꓛꓲꓽ ꓛꓲ ꓕꓲ ꓙꓵꓹ ꓤꓽˍ ꓟꓲ ꓡꓳꓺ ꓠꓬꓹ ꓟꓽ ꓘꓴ ꓡ? 41 ꓤꓹ ꓠꓬꓲˍ ꓟ ꓗꓪ ꓠꓴ ꓪꓽ ꓟꓽ ꓓꓵ ꓡꓰ ꓠꓹ ꓟ ꓧꓪꓸ ꓛꓲꓽ ꓐꓰ ꓡꓳ ꓠꓬꓹ ꓢꓲ ꓪꓽ ꓘꓴ꓿ ꓞꓳ ꓦ ꓠꓬ ꓠꓲꓹ ꓫꓵˍ ꓟꓲ ꓖꓳ ꓓꓱ ꓠꓽ ꓢꓯꓼ ꓟꓽ ꓙꓳ꓾ ꓐꓯˍ ꓡꓳ꓿ 42 ꓖꓳ ꓡꓱ ꓠꓬ ꓬꓲ ꓠꓬꓲꓽ ꓧꓪꓹ ꓕꓲ ꓧꓪ ꓙꓰ ꓢꓲ꓾ ꓥꓪ ꓐꓹ ꓐꓽꓳ꓾ ꓡꓴ ꓗꓶꓸ ꓕꓱ ꓟ ꓥꓪ ꓟꓽ ꓓꓳꓻ ꓓꓳ ꓥꓪ ꓔꓯˍ ꓐꓰ ꓗꓳꓸ ꓙꓰ ꓟꓽ ꓠ ꓕꓯ ꓠꓽ꓾ ꓠꓴ ꓠꓲꓹ ꓡꓶꓽ ꓒꓬꓱꓼ ꓡ ꓝꓲ꓾ ꓐꓰ ꓪꓽ ꓘꓴˍ ꓡꓳ꓿ 43 ꓬꓲ ꓝꓮꓲ ꓕꓲ ꓧꓪꓹ ꓡꓻˍ ꓟꓲ ꓬꓲ ꓪꓽ ꓠꓽ ꓟꓬ ꓢꓶ ꓛꓵꓼ ꓠꓬꓲ ꓬꓲꓼ ꓟꓶ ꓔꓬ ꓟ ꓔꓯ ꓟꓳꓻˍ ꓡꓳ꓿ 44 ꓬꓲ ꓠꓬ ꓬꓲ ꓪꓽˍ ꓐꓰ ꓧꓹ ꓗꓷ ꓢꓲ꓾ ꓢ ꓧꓪꓹ ꓕꓲ ꓧꓪ ꓧꓶꓸ ꓕꓯ ꓟ ꓐꓰ ꓕꓲ ꓡꓰꓹꓼ ꓐꓯ ꓢꓲ ꓪꓽ ꓘꓴˍ ꓡꓳ꓿ 45 ꓖꓳ ꓕꓯ ꓬꓲ ꓠꓬ ꓛꓳꓽ ꓒꓯꓹ ꓐꓴ ꓔꓯ ꓡ ꓢꓲ ꓬꓲ ꓪꓽ ꓔꓯ꓾ ꓮ ꓟꓶ ꓠꓴ ꓪꓽ ꓪꓴꓽ ꓧꓶ ꓠꓽ ꓠꓬꓲꓻ꓾ ꓬꓲꓼ ꓟꓶ ꓠꓬꓲꓺ ꓬꓰ ꓔꓬ ꓢꓰꓽ ꓡ? ꓕꓱꓻꓽ꓾ ꓬꓲ ꓙꓵꓹ ꓛꓲ ꓡꓺꓳ꓾ ꓡ-ꓞꓳ-ꓮ-ꓐꓲ ꓔꓯ ꓠꓽ ꓝꓴꓲ ꓙꓳ ꓢꓴ ꓡꓯꓼ ꓒꓯꓹ ꓗꓪ ꓪꓴꓽ ꓜ ꓗꓷꓳ꓿ 46 ꓔꓴ꓾ ꓣꓳꓽ ꓙꓰ ꓡꓯ꓿ ꓠꓬꓲ ꓠꓹ꓾ ꓥꓪ ꓔꓯ ꓪꓴꓽ ꓜꓽ ꓢꓴ ꓠꓽ ꓛꓲ ꓡꓺꓳ꓾ ꓐꓯˍ ꓡꓳ꓿ 47 ꓬꓲ ꓖꓳ ꓡꓱ ꓐꓯ ꓔꓬ ꓢꓰꓽ ꓕꓯ꓾ ꓞꓲ ꓠꓬꓲꓽ ꓣꓳ ꓗꓪ ꓟ ꓬꓴ-ꓓ ꓠꓬ ꓛꓲ ꓡꓺꓳ꓿ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓑ ꓫꓬꓼ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯˍ ꓐꓰ ꓡꓻˍ ꓟ ꓡ ꓞꓳ ꓬꓲ ꓜꓴꓻ ꓓꓽ ꓟˍ ꓟꓲ꓾ ꓮꓸ ꓕꓽ ꓓꓱꓼ ꓠꓬꓲ ꓢꓲꓹ ꓓ ꓔꓯꓹ ꓠꓬꓲ ꓐꓰ ꓬꓲ ꓔꓯ ꓛꓳ ꓡ ꓡꓳ꓿ 48 ꓬꓲ ꓔꓯ ꓪꓴꓽ ꓜꓽ ꓢꓴ ꓬꓴ-ꓓ ꓡꓰ꓾ ꓥꓪ ꓮ ꓡꓲ ꓕꓲ ꓣꓳ ꓔꓯ ꓐꓳꓼ ꓖꓶˍ ꓠꓬ꓾ ꓖꓳ ꓕꓲ ꓣꓳ ꓔꓯ ꓣꓴ꓾ ꓐꓰ ꓬꓲ ꓪꓽ ꓔꓯ ꓢꓷꓸ ꓡꓰ ꓓꓴ ꓐꓯ ꓖꓶ ꓔ ꓡꓳ꓿ 49 ꓖꓳ ꓡꓱ ꓢꓲ ꓬꓲ ꓠꓬ ꓞꓼ ꓐꓰ ꓬꓰ-ꓢꓴ ꓔꓯ ꓡ ꓢꓲ꓾ ꓟꓸ ꓒꓽꓳ꓾ ꓧꓪꓸ ꓧꓪ꓾ ꓐꓯ ꓢꓲ ꓠꓬꓲ ꓬꓲ ꓔꓯ ꓐꓳꓼ ꓖꓶˍ ꓡꓳ꓿ 50 ꓬꓰ-ꓢꓴ ꓡꓰ ꓬꓲ ꓔꓯ꓾ ꓗꓪ ꓛꓳꓽꓳ꓾ ꓠꓴ ꓬꓰˍ ꓐꓰ ꓡꓻˍ ꓟ ꓬꓰ Gꓽ꓾ ꓐꓯ ꓖꓶꓽ ꓗꓷ ꓠꓬ꓾ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ ꓣꓴˍ ꓡꓳ꓿ 51 ꓬꓰ-ꓢꓴˍ ꓐꓰ ꓕꓲ ꓪꓺꓼ ꓔꓬ ꓢꓴ ꓕꓲ ꓣꓳ ꓠꓬ꓾ ꓮꓸ ꓕꓽ ꓖꓳꓻ ꓢꓲ ꓕꓲ ꓒꓬꓱꓺ ꓛꓵꓺ ꓗꓷ ꓠꓬ ꓔꓲ ꓒ ꓓꓽ ꓟ ꓬꓲ ꓚꓳ ꓑꓸ ꓬꓲ ꓠꓸ ꓑꓳ ꓕꓲ ꓐꓽ ꓛꓵꓺ ꓞꓷꓹ ꓗꓷꓳ꓿ 52 ꓬꓰ-ꓢꓴ ꓡꓰ ꓬꓲ ꓔꓯ꓾ ꓮꓸ ꓕꓽ ꓠꓬ ꓬꓲ ꓦꓲ ꓖꓴ ꓗꓪ ꓢꓶꓻ ꓗꓷ꓿ ꓮ ꓡꓲꓳ ꓐꓯ ꓠꓬ ꓮꓸ ꓕꓽ ꓖꓳꓻ ꓢꓴ ꓠꓬ ꓮꓸ ꓕꓽ ꓗꓪ ꓐꓰ ꓫꓵꓻˍ ꓥꓳ꓿ 53 ꓥꓪ ꓐꓹ ꓐ ꓔꓯ ꓥꓪ ꓓꓰꓽˍ ꓠꓬ꓾ ꓬꓲ ꓡꓰ ꓮ ꓟꓶ ꓥꓪ ꓐꓱ ꓶ ꓟꓴꓽ ꓗꓪ ꓝꓲ ꓓꓴ ꓞꓲ ꓠꓬꓲꓽ ꓜꓴꓻ ꓟꓽ ꓞꓲ ꓝꓲ ꓩꓴ ꓡ ꓟꓽ ꓐ ꓡ꓾ ꓐꓰ ꓠꓴ ꓓꓵꓽ ꓙꓽˍ ꓡ? 54 ꓬꓲˍ ꓡꓰ꓾ ꓖꓳ ꓡꓱ ꓬꓰˍ ꓕꓯ ꓠꓽ꓾ ꓢꓲꓽ ꓫꓬ ꓕꓳ ꓶ ꓗꓪ ꓕꓱ ꓡꓱ ꓗꓷ ꓡꓰ ꓠ ꓗꓹ ꓡꓳ ꓫꓵ ꓐꓳ ꓔ ꓟ ꓐꓯ ꓘꓶꓽ ꓮ ꓡꓲ ꓐꓲꓺ ꓡ ꓓ ꓢꓰ?꓾ ꓐꓯˍ ꓡꓳ꓿ 55 ꓖꓳ ꓕꓲ ꓑꓹ ꓗꓪ ꓬꓰ-ꓢꓴ ꓡꓰ ꓞꓳ ꓜꓴ ꓔꓯ꓾ ꓠꓴ ꓪꓽ ꓠꓬ ꓮꓸ ꓕꓽ ꓓꓱꓼ ꓠꓬꓲ꓾ ꓢꓲꓹ ꓓ ꓔꓯꓹ ꓠꓬꓲ ꓐꓰ ꓦꓴꓻ ꓜꓽ ꓢꓴ ꓔꓯˍ ꓡꓰ ꓐꓰ ꓥꓪ ꓔꓯ ꓣꓴꓻ ꓡ ꓡ? ꓥꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲꓽ ꓫꓬ ꓦꓲ ꓠꓯꓸꓼ ꓗꓪ ꓠꓬꓲꓸ ꓠꓸ ꓢꓲ ꓟꓸ ꓖꓶ ꓔꓬ ꓕꓯ ꓠꓴ ꓪꓽ ꓥꓪ ꓔꓯ ꓟꓽ ꓣꓴ ꓡ꓿ 56 ꓕꓱ ꓡꓱ ꓗꓷ ꓡꓰˍ ꓟ ꓮꓽ ꓙꓵ ꓠꓽ꓾ ꓟꓷꓽ ꓠꓷꓹ ꓝꓸ ꓢꓴ ꓕꓳ ꓶ ꓗꓪ ꓐꓳ ꓔ ꓟ ꓐꓲ ꓡ ꓠꓹ ꓟ ꓥꓳ꓾ ꓐꓯˍ ꓡꓳ꓿ ꓖꓳ ꓕꓯ ꓛꓳꓽ ꓒꓯꓹ ꓐꓴ ꓮꓽ ꓙꓵ ꓠꓬ ꓬꓲ ꓔꓯ ꓧꓹ ꓔ ꓬꓰ ꓢꓲ ꓛꓰꓹ ꓙꓰꓳ꓿ 57 ꓬꓰ-ꓢꓴ ꓔꓯ ꓣꓴ ꓗꓷ ꓠꓬ ꓬꓲ ꓪꓽ ꓡꓰ꓾ ꓔꓲ ꓒꓽ ꓓꓽ ꓟ ꓘꓷ-ꓬ-ꓒ ꓔꓬ ꓗꓪ ꓧꓳꓽ ꓙꓰˍ ꓡꓳ꓿ ꓖꓳ ꓗꓪ ꓠꓬ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴˍ ꓟꓲ ꓜꓲꓼ ꓞꓹ ꓡꓳ꓿ 58 ꓒꓲ-ꓕꓱ ꓠꓽ ꓬꓲ ꓗꓸ ꓠꓯ ꓢꓲ ꓶꓽ ꓤ ꓗꓪ ꓛꓳ ꓙꓰ ꓢꓲ꓾ ꓔꓲ ꓒ ꓓꓽ ꓟ ꓡꓽ ꓙꓳ ꓓꓰ ꓗꓪ ꓛꓲ ꓬꓰ ꓠꓬ꓾ ꓠꓯꓸꓼ ꓗꓪ ꓓꓵꓽ ꓡꓰ ꓢꓲ꓾ ꓬꓲ ꓪꓽ ꓡꓰ ꓐꓯꓺ ꓟꓴ ꓮ ꓡꓲ ꓞꓷꓹ ꓗꓷˍ ꓟ ꓢꓷꓸ ꓡꓰ ꓠꓹ ꓟ꓾ ꓡꓳꓸ ꓢꓴ ꓟꓯꓼ ꓤ ꓐꓴˍ ꓐꓰ ꓠꓬꓲꓸ ꓠꓸ ꓔꓬ ꓡꓳ꓿ 59 ꓖꓳ ꓕꓯ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓞꓳ ꓪꓴ ꓞꓳ ꓔꓲ ꓐꓴ ꓕꓲ ꓜꓲꓼ ꓓꓴ ꓡꓱꓸꓼ ꓠꓬ꓾ ꓬꓰ-ꓢꓴ ꓔꓯ ꓔꓳꓹ ꓢꓲ ꓢꓰꓼ ꓗꓷ ꓠꓹ ꓟ꓾ ꓟꓽ ꓔꓱꓹ ꓟ ꓢꓷꓸ ꓙꓺ ꓟꓳ ꓙ ꓢꓴ ꓧꓪꓺˍ ꓡꓳ꓿ 60 ꓟꓽ ꓔꓱꓹ ꓟ ꓢꓷꓸ ꓙ ꓟꓳꓻ ꓙ ꓢꓴ ꓮꓽ ꓟꓬꓹ ꓡ ꓥ ꓟꓲ ꓬꓲ ꓗꓸ ꓚꓵ ꓧꓪ ꓟꓽ ꓟꓶ꓿ ꓗ ꓠꓯꓸ ꓠꓬ ꓡ ꓞꓳ ꓠꓬꓲꓽ ꓣꓳ ꓡ ꓢꓲ꓾ 61 ꓡ ꓞꓳ ꓕꓱ ꓟ ꓠꓬ ꓪꓴ-ꓢ ꓢꓲꓽ ꓫꓬ ꓦꓲ ꓕꓱ ꓟ ꓥꓪ ꓒꓬꓹ ꓗꓷ ꓢꓲ꓾ ꓢ ꓠꓬꓲꓻ ꓟ ꓠꓯꓸꓼ ꓗꓪ ꓫꓬꓹ ꓐ ꓡ ꓡꓳ꓾ ꓐꓰ ꓐꓯ ꓠꓬꓲꓳ꓾ ꓐꓯˍ ꓡꓳ꓿ 62 ꓖꓳ ꓡꓱ ꓠꓬ ꓔꓲ ꓒ ꓓꓽ ꓟ ꓦꓰꓼ ꓔꓴ ꓡ ꓢꓲ ꓬꓰ-ꓢꓴ ꓔꓯ꓾ ꓠꓴ ꓔꓯ ꓓꓰꓺ ꓢꓴ ꓕꓱ ꓕꓲ ꓧꓳꓽ ꓐꓯˍ ꓟ ꓮꓸ ꓫꓵ ꓥ ꓡ? ꓮꓸ ꓫꓵˍ ꓟꓲ ꓟꓽ ꓒꓳꓹ ꓖꓶ ꓖꓶ ꓮ ꓡꓲ ꓗꓹ ꓠꓬꓲ ꓟꓽ ꓪꓳꓹ ꓔꓬ ꓡ?꓾ ꓐꓯˍ ꓡꓳ꓿ 63 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓽ ꓟꓽ ꓪꓳꓹ ꓔꓬ ꓡꓳ꓿ ꓖꓳ ꓡꓱ ꓠꓬ ꓔꓲ ꓒ ꓓꓽ ꓟ ꓡꓰ ꓬꓲ ꓔꓯ꓾ ꓥꓪ ꓠꓬ ꓢꓯꓸ ꓔꓬ ꓟ ꓪꓴ-ꓢ ꓟꓬꓱꓺ ꓗꓪ ꓐꓰ ꓙꓱꓽ ꓘꓶꓽ ꓠꓴ ꓔꓯ ꓶꓻ ꓡꓰ ꓝꓲˍ ꓠꓬꓲ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓙꓲ-ꓢꓴ ꓥ ꓕꓯ ꓠꓽ ꓥꓪ ꓠꓴꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ 64 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓐꓯˍ ꓟ ꓐꓯ ꓬꓯꓼˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓡꓰ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓕꓱ ꓡꓱ ꓖꓳ ꓑꓳ ꓡ-ꓞꓳ-ꓮ-ꓐꓲ ꓠꓽ꓾ ꓪꓽ ꓠꓬꓲ ꓢꓴ ꓬꓲ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ ꓔꓬ ꓟ ꓐꓰ꓾ ꓟꓴꓽ ꓗꓪ ꓗꓪ ꓟ ꓟꓴ ꓗꓴꓸ ꓜꓶꓽ ꓢꓲ ꓡꓻˍ ꓟ ꓔꓯ ꓠꓴ ꓪꓽ ꓟꓳꓻˍ ꓥꓳ꓾ ꓐꓯˍ ꓡꓳ꓿ 65 ꓖꓳ ꓕꓯ ꓔꓲ ꓒ ꓓꓽ ꓟ ꓠꓬ ꓐꓵ ꓞꓶꓽ ꓚꓵꓹ ꓧꓽ ꓗꓷ ꓢꓲ꓾ ꓬꓲ ꓠꓬ ꓐꓯ ꓟꓽ ꓚꓰꓼ ꓟ ꓐꓯˍ ꓡꓳ꓿ ꓣꓳꓽ ꓝꓮꓲ ꓮꓸ ꓫꓵ ꓢꓷꓸ ꓙ ꓟꓳꓻ ꓙ ꓢꓴ ꓣꓱꓽ ꓛꓵˍ ꓢꓰꓽ ꓡ? ꓕꓱꓻꓽ꓾ ꓐꓯ ꓟꓽ ꓚꓰꓼ ꓟ ꓐꓯ ꓘꓶꓽ ꓕꓱ ꓟ ꓮ ꓟꓶ ꓠꓴ ꓪꓽ ꓑ ꓙꓽ ꓗꓷꓳ꓿ 66 ꓠꓴ ꓪꓽ ꓮ ꓡꓲ ꓓꓵꓽ ꓙꓽˍ ꓡ?꓾ ꓐꓯˍ ꓕꓯ꓾ ꓬꓲ ꓪꓽ ꓡꓰ ꓒꓳꓹ ꓖꓶ ꓢꓲ꓾ ꓬꓲ ꓠꓽ ꓫꓵꓻ ꓒꓵꓽˍ ꓡꓳ꓾ ꓐꓯˍ ꓡꓳ꓿ 67 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓒꓬꓱꓽ ꓟꓬ ꓗꓪ ꓟꓷꓽ ꓶꓻ ꓔꓲꓸ ꓧꓳꓽ ꓢꓲ꓾ ꓡꓯꓼ ꓑꓵꓹ ꓡꓰ ꓬꓲ ꓔꓯ ꓓꓶꓽˍ ꓡꓳ꓿ ꓕꓲ ꓐꓱ ꓠꓬ ꓬꓲ ꓔꓯ ꓡꓯꓼ ꓞꓻ ꓓꓶꓽ ꓢꓲ꓾ 68 ꓙꓲ-ꓢꓴꓳ꓾ ꓠꓴ ꓔꓯ ꓓꓶꓽ ꓢꓴ ꓮꓽ ꓟ ꓥ ꓟ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ 69 ꓖꓳ ꓕꓯ ꓒꓲ-ꓕꓱ ꓠꓬ ꓠꓱ ꓫꓱ ꓟꓸꓼ ꓡꓽ ꓙꓳ ꓓꓰꓺ ꓗꓪ ꓠꓬꓲꓸ ꓠꓸ ꓔꓬ ꓡꓳ꓿ ꓖꓳ ꓗꓪ ꓣꓱꓽ ꓙ ꓢꓴ ꓤ ꓟꓶ ꓡꓯꓸ ꓕꓲ ꓣꓳ ꓡ ꓢꓲ ꓬꓲ ꓔꓯ꓾ ꓠꓴˍ ꓟꓲ ꓖ-ꓡꓲ-ꓡꓲ ꓢꓴ ꓬꓰ-ꓢꓴˍ ꓐꓰ ꓔꓬ ꓗꓷꓳ꓾ ꓟꓽ ꓥ ꓡ?꓾ ꓐꓯˍ ꓡꓳ꓿ 70 ꓒꓲ-ꓕꓱ ꓠꓽ ꓮꓽ ꓙꓵ ꓢꓴ ꓟꓲꓽ ꓙꓬꓽ ꓗꓪ ꓟꓽ ꓣꓷꓠꓸ ꓢꓲ꓾ ꓠꓴ ꓮꓸ ꓫꓵ ꓐꓯˍ ꓟ ꓥꓪ ꓟꓽ ꓢꓷ꓾ ꓐꓯˍ ꓡꓳ꓿ 71 ꓬꓲ ꓓꓳ ꓙꓰ ꓢꓲ ꓗ ꓘꓶꓽ ꓒꓰꓼ ꓗꓪ ꓛꓲ ꓬꓰ ꓕꓯ꓾ ꓠꓱꓸ ꓐꓯꓼ ꓣꓱꓽ ꓙ ꓟꓺ ꓕꓲ ꓣꓳ ꓡꓰ ꓒꓲ-ꓕꓱ ꓔꓯ ꓟꓳꓻ ꓡꓰ ꓢꓲ ꓖꓳ ꓗꓪ ꓔꓬ ꓢꓴ ꓔꓯ꓾ ꓕꓱ ꓕꓲ ꓣꓳˍ ꓟꓲ ꓠ-ꓢ-ꓡꓱ ꓢꓴ ꓬꓰ-ꓢꓴˍ ꓐꓰ ꓔꓬ ꓗꓷꓳ꓾ ꓐꓯˍ ꓡꓳ꓿ 72 ꓒꓲ-ꓕꓱ ꓠꓽ ꓟꓽ ꓣꓷꓠꓸ ꓣꓷꓠꓸ ꓙꓱꓽ ꓘꓶꓽ ꓣꓱꓽ ꓢꓲ꓾ ꓡ ꓞꓳ ꓕꓱ ꓕꓲ ꓣꓳ ꓔꓯ ꓥꓪ ꓟꓽ ꓢꓷ꓾ ꓐꓯˍ ꓡꓳ꓿ 73 ꓝꓮꓲ ꓕꓲ ꓑꓹ ꓤ ꓠꓬ ꓖꓳ ꓗꓪ ꓦꓰꓼ ꓞ ꓢꓴ ꓡꓰ ꓒꓲ-ꓕꓱ ꓔꓯ ꓡ ꓢꓲ꓾ ꓠꓴˍ ꓟꓲ ꓚꓵ ꓚꓵ ꓬꓲ ꓪꓽ ꓕꓲ ꓧꓳꓽ ꓟ ꓥꓳ꓾ ꓮ ꓡꓲꓳ ꓐꓯ ꓠꓬ ꓠꓴ ꓫ ꓕꓱ ꓢꓯꓼ ꓗꓪ ꓐꓰ ꓢꓷꓸ ꓡꓰ ꓓꓻˍ ꓡꓳ꓾ ꓐꓯˍ ꓡꓳ꓿ 74 ꓒꓲ-ꓕꓱ ꓠꓽ ꓝꓮꓲ ꓕꓲ ꓧꓪ ꓪꓵꓼ ꓙꓱꓽ ꓢꓲ꓾ ꓡ ꓞꓳ ꓕꓱ ꓟ ꓔꓯ ꓥꓪ ꓟꓽ ꓢꓷ꓾ ꓐꓯˍ ꓡꓳ꓿ ꓖꓳ ꓕꓲ ꓑꓹ ꓗꓪ ꓮꓸ B ꓒꓽ ꓐꓵꓻ ꓡꓺꓳ꓿ 75 ꓖꓳ ꓕꓯ ꓬꓰ-ꓢꓴ ꓡꓰ ꓐꓯˍ ꓟ꓾ ꓮꓸ Bꓸ ꓒ ꓟꓽ ꓐꓵꓻ ꓕꓯ ꓡꓰ ꓠꓴ ꓥꓪ ꓔꓯ ꓟꓽ ꓢꓷꓸ ꓐꓯ ꓢꓲ꓾ ꓢ ꓧꓪꓹ ꓟꓽ ꓣꓷꓠꓸ ꓗꓷ ꓡꓰˍ ꓥꓳ꓾ ꓐꓯˍ ꓟ ꓐꓯ ꓘꓶꓽ ꓔꓯ ꓒꓲ-ꓕꓱ ꓓꓵꓽ ꓙꓽ ꓛꓲ ꓡ ꓠꓬ꓾ ꓬꓲ ꓓꓳ ꓙꓰ ꓢꓲ ꓮꓽ ꓘꓶꓸ ꓥꓴꓻˍ ꓡꓳ꓿

ꓟ-ꓔꓲ 27

1 ꓟꓲꓽ ꓕꓯ ꓙꓲꓻ ꓡ ꓠꓬ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓑ ꓫꓬꓼ ꓐꓴ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓮꓽ ꓙꓵ ꓠꓬ꓾ ꓬꓰ-ꓢꓴ ꓔꓯ ꓢꓰꓼ ꓗꓷ ꓠꓹ ꓟ ꓖꓪ ꓙꓱ ꓞꓷꓹˍ ꓡꓳ꓿ 2 ꓖꓳ ꓡꓱ ꓢꓲ ꓬꓲ ꓪꓽ ꓡꓰ ꓬꓲ ꓔꓯ ꓞꓳꓹ ꓧꓳꓽ ꓙꓰ ꓢꓲ ꓫꓴ ꓙꓵꓽ ꓒ ꓒꓲ-ꓡ ꓔꓯ ꓡꓯꓼ ꓙꓱ ꓗꓷˍ ꓡꓳ꓿ 3 ꓬꓰ-ꓢꓴ ꓔꓯ ꓪꓴꓽ ꓜꓽ ꓢꓴ ꓬꓴ-ꓓ ꓠꓬ꓾ ꓬꓰ-ꓢꓴ ꓔꓯ ꓫꓵ ꓝꓲ ꓠꓹ ꓟ ꓐꓯꓺ ꓟꓴ ꓞꓷꓹ ꓗꓷ ꓟ ꓟꓳꓻ ꓡꓰ ꓕꓯ꓾ ꓬꓲ ꓙꓽ ꓖꓳꓼ ꓡꓰ ꓢꓲ꓾ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ꓾ ꓒꓴ ꓢ ꓞꓲ ꓫꓱ-ꓘꓷ-ꓡꓷ ꓟ ꓔꓯꓹ ꓡꓲꓸ ꓖꓶ ꓡ ꓢꓲ ꓠꓬꓲ꓾ 4 ꓥꓪ ꓠꓬ ꓝꓴꓲ ꓟꓽ ꓙꓳ ꓢꓴ ꓔꓯ ꓪꓴꓽ ꓜꓽ ꓛꓬ ꓗꓷꓳ꓾ ꓐꓯˍ ꓡꓳ꓿ ꓬꓲ ꓪꓽ ꓡꓰ꓾ ꓖꓳ ꓟ ꓥꓪ ꓠꓴꓽˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓙꓳˍ ꓡ? ꓠꓴ ꓶꓻ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 5 ꓖꓳ ꓕꓯ ꓬꓲ ꓠꓬ ꓒꓴ ꓖꓳ ꓟ ꓔꓯ ꓢꓲꓽ ꓫꓬ ꓦꓲ ꓠꓯꓸꓼ ꓗꓪ ꓡꓳꓺ ꓔ ꓬꓰ ꓢꓲ꓾ ꓙꓰ ꓗꓷ ꓠꓬ꓾ ꓬꓲ ꓚꓲꓸ ꓛꓬ ꓬꓲ ꓧꓶꓽ ꓛꓵꓽ ꓫꓵꓻꓳ꓿ 6 ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴ ꓠꓽ ꓒꓴ ꓖꓳ ꓟ ꓖꓳꓺ ꓔꓯꓹ ꓡ ꓢꓲ꓾ ꓒꓴ ꓕꓱ ꓟ ꓠꓽ ꓫꓵꓽ ꓒꓵꓽ ꓥ ꓠꓬꓲ꓾ ꓢꓲꓽ ꓫꓬ ꓦꓲ ꓒꓴ ꓫꓺ ꓖꓴ ꓗꓪ ꓗꓶ ꓟꓽ ꓓ꓾ ꓐꓯˍ ꓡꓳ꓿ 7 ꓬꓲ ꓪꓽ ꓠꓬ ꓖꓪ ꓙꓱ ꓡꓯꓽ ꓘꓳ ꓢꓲ꓾ ꓒꓴ ꓖꓳ ꓟ ꓡꓰ ꓞꓳ ꓬꓯꓼ ꓔꓵꓸ ꓖꓴ ꓬꓰ ꓠꓹ ꓟ꓾ ꓠꓱꓸ ꓑꓴ ꓙꓵ ꓒ ꓦꓻ ꓟꓲ ꓕꓲ ꓡꓯꓼ ꓪꓴꓻˍ ꓡꓳ꓿ 8 ꓖꓳ ꓡꓱ ꓠꓬꓲ ꓦꓻ ꓟꓲ ꓖꓳ ꓕꓲ ꓡꓯꓼ ꓔꓯ ꓮ ꓟꓶ ꓗꓪ ꓛꓲ꓾ ꓫꓵꓽ ꓦꓻ ꓟꓲ꓾ ꓐꓰ ꓘꓴˍ ꓡꓳ꓿ 9 - 10 ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓬꓰ-ꓡꓲ-ꓟꓲ ꓡꓰ꓾ ꓬꓲ-ꓢꓷ-ꓡꓰ ꓡ ꓞꓳ ꓡꓰ ꓐꓯ ꓞꓷꓹ ꓔ ꓟ ꓡ ꓞꓳ ꓒꓵꓽ꓾ ꓒꓴ ꓖꓳ ꓢ ꓞꓲ ꓫꓱ-ꓘꓷ-ꓡꓷ ꓟ ꓬꓲ ꓪꓽ ꓣꓴ ꓢꓲ꓾ ꓢꓲ ꓒꓽ ꓡꓰ ꓥꓪ ꓔꓯ ꓐꓯ ꓟꓸ ꓖꓶ ꓔ ꓟ ꓡꓰ ꓐꓰ꓾ ꓬꓲ ꓪꓽ ꓠꓬ ꓠꓱꓸ ꓑꓴ ꓙꓵ ꓦꓻ ꓟꓲ ꓪꓴꓻˍ ꓡꓳ꓾ ꓐꓯˍ ꓟ ꓐꓲ ꓡ ꓟ ꓥ ꓡꓳ꓿ 11 ꓬꓰ-ꓢꓴ ꓠꓬ ꓫꓴ ꓙꓵꓽ ꓒ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓕꓯ꓾ ꓫꓴ ꓙꓵꓽ ꓒ ꓡꓰ ꓬꓲ ꓔꓯ꓾ ꓠꓴ ꓠꓬ ꓬꓴ-ꓔ ꓡ ꓞꓳ ꓪ ꓔꓲꓸ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓰ-ꓢꓴ ꓡꓰ꓾ ꓠꓴ ꓐꓯˍ ꓟ ꓡꓰ ꓐꓰ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 12 ꓔꓲ ꓒ ꓪꓴꓸ ꓓꓵ ꓣꓱ ꓢꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓡꓰ ꓬꓲ ꓔꓯ ꓓꓰꓺˍ ꓕꓯ꓾ ꓬꓲ ꓮꓸ ꓫꓵˍ ꓟꓲ ꓟꓽ ꓒꓳꓹ ꓖꓶ꓿ 13 ꓖꓳ ꓡꓱ ꓠꓬ ꓒꓲ-ꓡ ꓡꓰ ꓬꓲ ꓔꓯ꓾ ꓬꓲ ꓪꓽ ꓠꓴ ꓔꓯ ꓔꓳꓹ ꓢꓲ ꓕꓱ ꓟꓬ ꓙꓰꓽ ꓓꓰꓺˍ ꓟ ꓠꓴ ꓟꓽ ꓑ ꓙꓽ ꓡ?꓾ ꓐꓯˍ ꓡꓳ꓿ 14 ꓬꓰ-ꓢꓴ ꓠꓽ ꓬꓲ ꓔꓯ ꓕꓲ ꓘꓶꓽˍ ꓟꓲ ꓟꓽ ꓒꓳꓹ ꓖꓶ ꓡ ꓠꓬꓲ꓾ ꓒꓲ-ꓡ ꓠꓬ ꓮꓽ ꓘꓶꓸ ꓓꓵꓽ ꓙꓽ ꓟꓶ ꓡꓰꓳ꓿ 15 ꓕꓲ ꓘꓳꓼ ꓡꓰ ꓕꓲ ꓘꓳꓼ ꓦꓲ-ꓘꓳ-ꓑꓮꓲ ꓗꓪ꓾ ꓐꓱꓺ ꓔꓸ ꓢꓴ ꓮ ꓡꓲ ꓕꓲ ꓣꓳ ꓔꓯ ꓞꓳ ꓜꓴꓻ ꓠꓵˍ ꓠꓬ꓾ ꓫꓴ ꓙꓵꓽ ꓒ ꓡꓰ ꓖꓳ ꓕꓲ ꓣꓳ ꓔꓯ ꓩꓴꓺ ꓗꓷ ꓠꓹ ꓟ ꓬꓲ ꓡꓲꓽ ꓙꓳˍ ꓡꓳ꓿ 16 ꓦꓬꓼ ꓠꓬꓲ ꓖꓳ ꓟ ꓗꓪ ꓟꓽ ꓙꓲꓻˍ ꓟ ꓬꓰˍ ꓟ ꓟꓬꓱꓺ ꓓꓳꓽ ꓙꓳ ꓢꓴ ꓐ-ꓣ-ꓐ꓾ ꓟꓬꓱ ꓔ ꓟ ꓕꓲ ꓣꓳ ꓠꓬ ꓐꓱ ꓓꓴꓽ ꓗꓪ ꓐꓱ ꓔ ꓡꓳ꓿ 17 ꓖꓳ ꓡꓱ ꓠꓬꓲ ꓬꓲ ꓪꓽ ꓜꓲꓼ ꓞꓹ ꓕꓯ ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓥꓪ ꓔꓯ ꓮ ꓡꓲ ꓕꓲ ꓣꓳ ꓟ ꓩꓴꓺ ꓖꓶ ꓝꓲ ꓠꓲꓹ ꓫꓵˍ ꓡ?꓾ ꓐ-ꓣ-ꓐ ꓥ ꓡ?꓾ ꓥ ꓠꓬ ꓙꓲ-ꓢꓴ ꓟꓬꓱ ꓔ ꓟ ꓬꓰ-ꓢꓴ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 18 ꓬꓲ ꓪꓽ ꓠꓽ ꓬꓰ-ꓢꓴ ꓔꓯ ꓟꓬ ꓔꓳꓹ ꓟ ꓪꓴꓸ ꓠꓬꓲ ꓬꓲ ꓔꓯ ꓡꓯꓼ ꓙꓱ ꓖꓶ ꓡ ꓟ ꓔꓯ ꓒꓲ-ꓡ ꓢꓷˍ ꓡꓳ꓿ 19 ꓬꓲ ꓠꓬ ꓐꓯ ꓟꓴ ꓘꓶꓽ ꓖꓴ ꓗꓪ ꓠꓬꓲꓸ ꓠꓸ ꓔꓬ ꓕꓯ꓾ ꓬꓲ ꓤ ꓟꓶ ꓡꓰ ꓡ ꓞꓳ ꓝꓲ ꓩꓴ ꓡ ꓢꓲ꓾ ꓔꓱꓹ ꓜꓳꓽ ꓢꓴ ꓕꓱ ꓕꓲ ꓣꓳ ꓟ ꓫꓵꓽ ꓪꓴꓻ ꓗꓪ ꓠꓴ ꓕꓽ ꓗꓪꓽ ꓫꓵꓽ꓿ ꓮ ꓡꓲꓳ ꓐꓯ ꓠꓬ ꓮꓽ ꓟꓰꓻ ꓢ ꓘꓪ ꓥꓪ ꓬꓲꓼ ꓟꓬ ꓘꓳˍ ꓟ ꓗꓪ꓾ ꓬꓲ ꓪꓴꓸ ꓠꓬꓲ ꓥꓪ ꓮꓽ ꓘꓶꓸ ꓫꓸ ꓙꓵꓻ ꓗꓷꓳ꓾ ꓐꓯ ꓩꓴ ꓡ ꓡꓳ꓿ 20 ꓖꓳ ꓕꓯ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓡꓰ꓾ ꓐ-ꓣ-ꓐ ꓔꓯ ꓩꓴ ꓗꓷ ꓢꓲ ꓬꓰ-ꓢꓴ ꓔꓯ ꓢꓰꓼ ꓗꓷ ꓝꓲ ꓠꓹ ꓟ ꓓꓰꓽ꓾ ꓐꓰ ꓞꓳ ꓜꓴꓻ ꓔꓯ ꓟꓸ ꓒꓬꓹ ꓟꓶ ꓡꓰˍ ꓡꓳ꓿ 21 ꓫꓴ ꓙꓵꓽ ꓒ ꓒꓲ-ꓡ ꓡꓰ꓾ ꓕꓱ ꓠꓬꓲꓽ ꓣꓳ ꓟ ꓠꓴ ꓪꓽ ꓐꓱ ꓶ ꓥꓪ ꓮ ꓡꓲ ꓕꓲ ꓣꓳ ꓩꓴꓺ ꓖꓶ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓡꓰ꓾ ꓐ-ꓣ-ꓐ ꓔꓯ ꓩꓴꓺ ꓗꓷ꓾ ꓐꓰ ꓒꓳꓹ ꓖꓶˍ ꓡꓳ꓿ 22 ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ ꓙꓲ-ꓢꓴ ꓟꓬꓱꓺ ꓔ ꓟ ꓬꓰ-ꓢꓴ ꓔꓯ ꓥꓪ ꓮ ꓡꓲ ꓬꓰ ꓠꓯꓹ ꓡ?꓾ ꓐꓯˍ ꓡꓳ꓿ ꓬꓲ ꓪꓽ ꓮꓽ ꓙꓵ ꓡꓰ꓾ ꓬꓲ ꓔꓯ ꓕꓯꓼ ꓔꓶꓸ ꓗꓷ꓾ ꓐꓰ ꓘꓴˍ ꓡꓳ꓿ 23 ꓬꓲ ꓡꓰ꓾ ꓮꓸ ꓫꓵ ꓪꓴꓸ ꓠꓬꓲꓳ꓾ ꓬꓲ ꓠꓬ ꓟꓽ ꓙꓲ ꓟ ꓮꓸ ꓫꓵ ꓬꓰ ꓠꓬꓲ ꓡ?꓾ ꓐꓯˍ ꓡꓳ꓿ ꓬꓲ ꓪꓽ ꓠꓽ꓾ ꓬꓲ ꓔꓯ ꓕꓯꓼ ꓔꓶꓸ ꓗꓷ꓾ ꓐꓰ ꓪꓻ ꓜꓲ ꓘꓴꓻˍ ꓡꓳ꓿ 24 ꓒꓲ-ꓡ ꓠꓽ꓾ ꓬꓲ ꓪꓽ ꓔꓯ ꓐꓯ ꓧꓪꓸ ꓡꓰ ꓟꓽ ꓓ ꓟ ꓐꓰ꓾ ꓬꓲ ꓪꓽ ꓟꓬꓽ ꓠꓬꓲ ꓢꓴꓺ ꓔꓴ ꓡ ꓟ ꓔꓯ ꓟꓳꓻˍ ꓠꓬꓲ꓾ ꓬꓲ ꓠꓬ ꓬꓲꓻ ꓙꓬ ꓔꓯꓹ ꓡ ꓢꓲ꓾ ꓞꓳ ꓜꓴ ꓟꓲꓽ ꓙꓬ ꓗꓪ ꓡꓯꓼ ꓒꓯꓹ ꓞꓲꓽ ꓢꓲ ꓠꓬꓲ ꓬꓲ ꓪꓽ ꓔꓯ꓾ ꓔꓱꓹ ꓜꓳꓽ ꓢꓴ ꓕꓱ ꓕꓲ ꓣꓳ ꓬꓲ ꓫꓵꓽ ꓠꓬ ꓥꓪ ꓟꓽ ꓟꓯꓻ꓾ ꓠꓴ ꓪꓽ ꓶꓻ ꓥꓳ꓾ ꓐꓯˍ ꓡꓳ꓿ 25 ꓑ ꓫꓬꓼ ꓐꓴ ꓮꓽ ꓙꓵ ꓡꓰ ꓒꓳꓹ ꓖꓶ ꓢꓲ꓾ ꓬꓲ ꓫꓵꓽ ꓠꓬ ꓥꓪ ꓠꓴꓽˍ ꓐꓰ ꓥꓪ ꓠꓴꓽ ꓞꓲꓼ ꓤ ꓡꓯꓹ ꓤ ꓐꓴ ꓕꓯꓽ ꓢꓲ ꓗꓪ ꓓꓹ ꓝꓲ꓾ ꓐꓯˍ ꓡꓳ꓿ 26 ꓖꓳ ꓕꓯ ꓬꓲ ꓠꓬ ꓬꓲ ꓪꓽ ꓐꓱ ꓶ ꓐ-ꓣ-ꓐ ꓔꓯ ꓩꓴ ꓖꓶ ꓢꓲ꓾ ꓬꓰ-ꓢꓴ ꓔꓯ ꓠꓽ ꓓꓶꓽ ꓢꓲ ꓠꓬꓲ ꓕꓯꓼ ꓔꓶꓸ ꓗꓷ ꓠꓹ ꓟ ꓡꓯꓼ ꓙꓱ ꓗꓷˍ ꓡꓳ꓿ 27 ꓖꓳ ꓕꓯ ꓫꓴ ꓙꓵꓽ ꓒ ꓒꓲ-ꓡ ꓬꓲ ꓟꓯꓼ ꓤ ꓐꓴ ꓡꓰ ꓬꓰ-ꓢꓴ ꓔꓯ ꓟꓯꓼ ꓒꓱꓻ ꓗꓪ ꓧꓳꓽ ꓓꓵꓽ ꓙꓰ ꓢꓲ꓾ ꓖꓳ ꓗꓪ ꓟ ꓟꓯꓼ ꓤ ꓐꓴ ꓕꓲ ꓜꓴ ꓡꓱꓸꓼ ꓬꓰ-ꓢꓴ ꓚꓳ ꓡꓳ ꓗꓪ ꓚꓳꓸ ꓞꓹ ꓝꓲˍ ꓡꓳ꓿ 28 ꓬꓲ ꓪꓽ ꓡꓰ ꓬꓰ-ꓢꓴ ꓐꓵ ꓞꓶ ꓡꓵꓸ ꓗꓷ ꓢꓲ꓾ ꓐꓵ ꓞꓶ ꓐꓽ ꓢꓽ ꓠꓲꓺ ꓛꓵꓽ ꓕꓲ ꓘꓳꓹ ꓖꓪꓽ ꓖꓶˍ ꓡꓳ꓿ 29 ꓝꓮꓲ ꓬꓲ ꓪꓽ ꓡꓰ ꓛꓴꓽ ꓪꓴꓸ ꓛꓴꓽ Bꓼ ꓢꓲ ꓬꓲ ꓪꓴꓸ ꓓꓵ ꓗꓪ ꓘꓳꓹ ꓖꓶꓽ ꓗꓷ ꓠꓬ꓾ ꓬꓲ ꓡꓯꓼ ꓙ ꓐ ꓗꓪ ꓬꓲꓻ ꓑꓺ ꓒꓴꓽ ꓓꓻ ꓕꓲ ꓕꓷꓹ ꓣꓴ ꓔ ꓝꓲ ꓢꓲ꓾ ꓬꓲ ꓟꓲꓽ ꓙꓬ ꓗꓪ ꓛꓲ ꓝꓲꓸ ꓖꓶꓽ ꓢꓲ ꓠꓬꓲ ꓬꓲ ꓔꓯ꓾ ꓬꓴ-ꓔ ꓡ ꓞꓳ ꓪ ꓔꓲꓳ꓾ ꓧꓪꓸ ꓧꓪ꓾ ꓐꓰ ꓐꓯ ꓢꓲ꓾ ꓬꓲ ꓔꓯ ꓫꓸ ꓝꓲꓸˍ ꓡꓳ꓿ 30 ꓝꓮꓲ ꓠꓬ ꓬꓲ ꓔꓯ ꓟꓷꓽ ꓶ ꓔꓲꓸ ꓧꓳꓽ ꓢꓲ꓾ ꓬꓲꓻ ꓑꓺ ꓒꓴꓽ ꓓꓻ ꓖꓳ ꓟ ꓡꓰ ꓬꓲ ꓪꓴꓸ ꓓꓵ ꓗꓪ ꓓꓶꓽˍ ꓡꓳ꓿ 31 ꓬꓲ ꓪꓽ ꓬꓲ ꓔꓯ ꓫꓸ ꓝꓲꓸ ꓗꓷ ꓠꓬ꓾ ꓐꓵ ꓞꓶꓽ ꓐꓽ ꓢꓽ ꓡꓵꓸ ꓗꓷ ꓢꓲ꓾ ꓬꓲ ꓚꓲꓸ ꓛꓬ ꓐꓵ ꓞꓶꓽ ꓖꓪꓽ ꓖꓶꓽ ꓢꓲ ꓠꓬꓲ꓾ ꓕꓯꓼ ꓔꓶꓸ ꓗꓷ ꓠꓹ ꓟ ꓧꓳꓽ ꓓꓳ ꓙꓰˍ ꓡꓳ꓿ 32 ꓬꓲ ꓪꓽ ꓓꓳ ꓙꓰ ꓔꓬ ꓕꓯ꓾ ꓢ-ꓡꓲ-ꓠꓲ ꓢꓴ ꓢꓲ-ꓟꓴ ꓔꓯ ꓔꓳꓹ ꓜꓳꓽ ꓢꓲ꓾ ꓬꓲ ꓪꓽ ꓡꓰ ꓬꓲ ꓔꓯ ꓟꓽ ꓓ ꓟꓽ ꓞꓽ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓝꓲˍ ꓡꓳ꓿ 33 ꓬꓲ ꓪꓽ ꓠꓬ ꓪꓴꓸ ꓖꓼ ꓟꓵꓽ ꓟꓬꓱꓺ ꓔ ꓟ ꓖꓳ-ꓡ-ꓖꓳ-ꓕ ꓗꓪ ꓛꓲ ꓬꓰ ꓕꓯ꓾ 34 ꓙꓲꓻ ꓒꓶꓽ ꓗꓪ ꓘꓪꓽˍ ꓟ ꓠꓯ ꓞꓲꓼ ꓦꓱꓹ ꓢꓲ꓾ ꓬꓲ ꓔꓯ ꓖꓶ ꓓꓳꓻˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓢꓳꓽ ꓠꓬꓲ ꓠꓬ ꓟꓽ ꓠꓵꓻ꓿ 35 ꓬꓲ ꓪꓽ ꓠꓬ ꓬꓲ ꓔꓯ ꓕꓯꓼ ꓔꓶꓸ ꓔ ꓢꓲ꓾ ꓬꓲ ꓐꓵ ꓞꓶꓽ ꓔꓯ ꓠꓬ ꓢꓽ ꓫꓱ ꓫꓱꓹ ꓢꓲ ꓐꓱꓻ ꓡꓯꓽ ꓘꓳˍ ꓡꓳ꓿ 36 ꓬꓲ ꓪꓽ ꓠꓬ ꓖꓳ ꓗꓪ ꓠꓬꓲꓸ ꓠꓸ ꓔꓬ ꓢꓲ ꓬꓲ ꓔꓯ ꓡꓳꓸ ꓔꓬ ꓡꓳ꓿ 37 ꓬꓰ-ꓢꓴ ꓪꓴꓸ ꓗꓪ ꓬꓲ ꓪꓽ ꓡꓰ ꓬꓲ ꓔꓯ ꓓꓰꓺ ꓘꓶꓽ ꓐꓳ ꓔ ꓟ ꓠꓬ꓾ ꓕꓱ ꓟ ꓠꓽ ꓬꓴ-ꓔ ꓡ ꓞꓳ ꓪ ꓔꓲ ꓬꓰ-ꓢꓴ ꓥ ꓡꓳ꓾ ꓐꓰ ꓐꓳ ꓔ ꓡꓳ꓿ 38 ꓬꓰ-ꓢꓴ ꓬꓲꓸ ꓡꓯꓼ ꓙ ꓡꓯꓼ ꓶꓸ ꓗꓪ ꓠꓬ꓾ ꓒꓬꓹ ꓜꓽ ꓢꓴ ꓕꓲ ꓛꓱꓽ ꓕꓲ ꓣꓳ ꓕꓯꓼ ꓔꓶꓸ ꓔ ꓡꓳ꓿ 39 ꓫꓱꓽ ꓗꓳꓸ ꓙꓰ ꓢꓴ ꓠꓬ ꓬꓰ-ꓢꓴ ꓔꓯ ꓫꓸ ꓝꓲꓸ ꓠꓬꓲ ꓪꓴꓸ ꓓꓵ ꓶꓹ ꓢꓲ꓾ 40 ꓢꓲꓽ ꓫꓬ ꓦꓲ ꓒꓬꓹ ꓢꓲ ꓢ ꓠꓬꓲ ꓟ ꓠꓯꓸꓼ ꓗꓪ ꓝꓮꓲ ꓫꓬꓹ ꓖꓶ ꓢꓴꓳ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ ꓠꓴ ꓚꓲꓸ ꓛꓬ ꓔꓯ ꓚꓬꓴ ꓢꓲ꓾ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓐꓰ ꓬꓯꓼ ꓡꓯ ꓟꓴꓽ꓾ ꓐꓯˍ ꓡꓳ꓿ 41 ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴˍ ꓟꓲ꓾ ꓖꓳ ꓟ ꓡꓰ ꓐꓰ ꓬꓲ ꓔꓯ꓾ 42 ꓢꓴ ꓢꓯꓼ ꓟꓬ ꓔꓯ ꓠꓽ ꓬꓲ ꓚꓬꓴˍ ꓡꓳ꓿ ꓬꓲ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓠꓽ ꓬꓲ ꓚꓬꓴ ꓟꓽ ꓐ ꓡ꓿ ꓬꓲ ꓠꓬ ꓬꓲ-ꓢꓷ-ꓡꓰ ꓪ ꓔꓲ ꓥ ꓐꓷˍ ꓠꓬ꓾ ꓮ ꓟꓶ ꓡꓯꓼ ꓐꓳ ꓔꓶ ꓓꓴ ꓗꓪ ꓐꓰ ꓬꓯꓼ ꓡ ꓝꓲ꓿ ꓖꓳ ꓡꓱ ꓠꓬ ꓣꓳꓽˍ ꓟꓲ ꓬꓲ ꓔꓯ ꓙꓵꓻˍ ꓥꓳ꓿ 43 ꓬꓲ ꓠꓽ ꓪꓴ-ꓢ ꓔꓯ ꓦ ꓡꓱ ꓢꓲ꓾ ꓥꓪ ꓠꓽ ꓪꓴ-ꓢ ꓬꓲ ꓮ ꓐꓲ ꓥꓳ꓾ ꓐꓰ ꓐꓯ ꓢꓴ ꓥ ꓠꓬꓲ꓾ ꓪꓴ-ꓢ ꓬꓲ ꓔꓯ ꓠꓲꓹ ꓒꓴˍ ꓠꓬ ꓮ ꓟꓶ ꓬꓲ ꓔꓯ ꓚꓬꓴ ꓙ ꓡ ꓝꓲ꓾ ꓐꓰ ꓐꓯ ꓢꓲ ꓬꓰ-ꓢꓴ ꓔꓯ ꓤꓲꓺˍ ꓡꓳ꓿ 44 ꓬꓲˍ ꓐꓰ ꓕꓲ ꓪꓺꓼ ꓕꓯꓼ ꓔꓶꓸ ꓔ ꓟ ꓒꓬꓹ ꓜ ꓢꓴˍ ꓟꓲ꓾ ꓖꓳ ꓟ ꓡꓰ ꓐꓰ ꓬꓲ ꓔꓯ ꓫꓸ ꓝꓲꓸˍ ꓡꓳ꓿ 45 ꓞꓲ ꓠꓬꓲꓽ ꓙꓵꓹ ꓗꓪ ꓐꓰ ꓢ ꓙꓵꓹ ꓗꓪ ꓛꓲ꓾ ꓕꓲ ꓟꓵꓽ ꓡꓱꓸꓼ ꓠꓯ ꓞꓲꓹ ꓡꓰˍ ꓡꓳ꓿ 46 ꓮꓽ ꓡ ꓢ ꓙꓵꓹ ꓗꓪ ꓠꓬ ꓬꓰ-ꓢꓴ ꓢꓯꓼ ꓓꓽ ꓟ ꓡꓰ ꓘꓴꓻ ꓢꓲ꓾ ꓬꓲ-ꓡꓲ꓾ ꓬꓲ-ꓡꓲ꓾ ꓡ-ꓟ-ꓢ-ꓐ-ꓕ-ꓠꓲ꓾ ꓐꓯˍ ꓡꓳ꓿ ꓐꓯ ꓘꓶꓽ ꓕꓱ ꓟ ꓠꓬ꓾ ꓥꓪ ꓪꓴ-ꓢꓻꓳ꓾ ꓥꓪ ꓪꓴ-ꓢꓻꓳ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓒꓰꓻ ꓗꓷˍ ꓡ?꓾ ꓐꓯˍ ꓟ ꓥ ꓡꓳ꓿ 47 ꓖꓳ ꓗꓪ ꓦꓰꓼ ꓞꓹ ꓢꓴ ꓕꓲ ꓐꓱ ꓑ ꓙꓽ ꓗꓷ ꓠꓬ꓾ ꓡ ꓞꓳ ꓕꓱ ꓕꓲ ꓣꓳ ꓠꓬ ꓬꓲ-ꓡꓲ-ꓬ ꓔꓯ ꓘꓴꓻ ꓔꓬ ꓡꓳ꓾ ꓐꓯˍ ꓡꓳ꓿ 48 ꓞꓼ ꓐꓰ ꓬꓲ ꓪꓽ ꓗꓪ ꓟ ꓕꓲ ꓣꓳ ꓡꓰ ꓬꓲꓻ ꓣꓳꓺ ꓟꓵꓺ ꓕꓲ ꓘꓴꓸ ꓔꓷꓹ ꓣꓴ ꓬꓰ ꓢꓲ꓾ ꓬꓲꓻ ꓚꓱꓺ ꓔꓲꓹ ꓐꓲ ꓡꓰ ꓝꓲ ꓢꓲ ꓠꓬꓲ꓾ ꓬꓲꓻ ꓑ ꓒꓴꓽ ꓓ ꓑꓶꓸ ꓗꓪ ꓞꓳꓹ ꓔ ꓢꓲ ꓬꓲ ꓔꓯ ꓖꓶ ꓓꓳꓻˍ ꓡꓳ꓿ 49 ꓠꓱꓸ ꓐꓯ ꓢꓴ ꓠꓬ꓾ ꓥ ꓝꓲ꓾ ꓬꓲ-ꓡꓲ-ꓬ ꓡꓰ ꓬꓲ ꓔꓯ ꓚꓬꓴ ꓡ꓾ ꓟꓽ ꓚꓬꓴ ꓡ꓾ ꓣꓳꓽ ꓡꓳꓸ ꓔ ꓡꓯ꓾ ꓐꓯˍ ꓡꓳ꓿ 50 ꓬꓰ-ꓢꓴ ꓠꓬ ꓝꓮꓲ ꓕꓲ ꓧꓪꓹ ꓢꓯꓼ ꓓꓽ ꓟ ꓡꓰ ꓘꓴꓻ ꓢꓲ꓾ ꓬꓲ ꓦꓻ ꓖꓶꓽ ꓩꓴ ꓗꓷꓳ꓿ 51 ꓖꓳ ꓕꓯ ꓢꓲꓽ ꓫꓬ ꓦꓲ ꓠꓯꓸꓼ ꓗꓪ ꓟ ꓗꓳꓹ ꓛ ꓓꓽ ꓟ ꓠꓬ꓾ ꓕꓯꓽ ꓢꓲ ꓗꓪ ꓐꓰ ꓬꓲ ꓟꓶꓽ ꓗꓪ ꓛꓲ ꓠꓬꓲꓽ ꓐꓶꓽ ꓧꓽ ꓡꓰꓳ꓿ ꓟꓵꓽˍ ꓟꓲ ꓓꓵ ꓡꓺꓳ꓾ ꓡꓳ ꓓꓰ ꓑꓸˍ ꓟꓲ ꓐꓶꓽ ꓡꓰꓳ꓿ 52 ꓡꓱꓼ ꓜꓴˍ ꓟꓲ ꓒꓴ ꓡꓺꓳ꓿ ꓫꓵꓻ ꓗꓷ ꓟ ꓪꓴ-ꓢ ꓦ ꓡꓱ ꓢꓴ ꓐꓴ ꓮꓽ ꓟꓬꓹˍ ꓟꓲ ꓢꓯꓸ ꓬꓲꓼ ꓡꓺꓳ꓿ 53 ꓬꓲ ꓪꓽ ꓠꓬ ꓡꓱꓼ ꓜꓴ ꓗꓪ ꓐꓰ ꓓꓳ ꓡ ꓢꓲ꓾ ꓬꓰ-ꓢꓴ ꓢꓯꓸ ꓬꓲꓼ ꓡ ꓗꓸ ꓠꓯ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓓꓵꓽ ꓙꓰ ꓢꓲ ꓠꓬꓲ꓾ ꓮꓽ ꓟꓬꓹ ꓣꓳ ꓔꓯ ꓟꓳꓸ ꓖꓶˍ ꓡꓳ꓿ 54 ꓟꓯꓼ ꓕꓲ ꓦꓬꓻ ꓙꓵꓽ ꓒˍ ꓐꓰ꓾ ꓬꓲˍ ꓐꓰ ꓕꓲ ꓛꓳꓺꓼ ꓬꓰ-ꓢꓴ ꓔꓯ ꓡꓳꓸ ꓔꓬ ꓢꓴ ꓠꓬ꓾ ꓟꓵꓽ ꓓꓵꓺˍ ꓟ ꓐꓰ ꓖꓳ ꓗꓪ ꓒꓬꓱꓼ ꓡ ꓟ ꓔꓯ ꓟꓳꓻ ꓠꓬ ꓮꓸ ꓓꓲꓽ ꓙꓳꓺ ꓢꓲ꓾ ꓕꓱ ꓟ ꓠꓽ ꓚꓵ ꓚꓵ ꓪꓴ-ꓢ ꓬꓲ ꓮ ꓐꓲ ꓥ ꓐꓷ꓾ ꓐꓯˍ ꓡꓳ꓿ 55 ꓖ-ꓡꓲ-ꓡꓲ ꓗꓪ ꓐꓰ ꓬꓰ-ꓢꓴ ꓔꓯ ꓣꓱꓽ ꓙ ꓠꓹ ꓟ ꓛꓳ ꓡ ꓢꓴ ꓤ ꓟꓶ ꓤ ꓮꓽ ꓟꓬꓹ ꓠꓬ ꓶꓽ ꓤ ꓗꓪ ꓐꓰ ꓡꓳꓸ ꓔꓬ ꓡꓳ꓿ 56 ꓬꓲ ꓪꓽ ꓗꓳ ꓡꓳ ꓗꓪ ꓠꓬ꓾ ꓟ-ꓖ-ꓓ-ꓡꓲ ꓢꓴ ꓟ-ꓡꓲˍ ꓐꓰ ꓬ-ꓗꓴˍ ꓐꓰ ꓬꓳ-ꓢꓷ ꓬꓲ ꓪꓽ ꓟꓹ ꓟ ꓟ-ꓡꓲˍ ꓐꓰ꓾ ꓜꓲ-ꓐꓱ-ꓓꓲ ꓬꓲ ꓮ ꓐꓲ ꓠꓬꓲꓽ ꓫꓵꓸ ꓟ ꓬꓲ ꓪꓽ ꓟꓹ ꓟˍ ꓟꓲ ꓔꓬ ꓡꓳ꓿ 57 ꓟꓰꓻ ꓬꓰˍ ꓕꓯ꓾ ꓮ-ꓡꓲ-ꓟ-ꓕꓲ-ꓬ ꓢꓴ꓾ ꓬꓳ-ꓢꓷ꓾ ꓟꓬꓱ ꓔ ꓟ ꓞꓳ ꓐꓳ ꓕꓲ ꓣꓳ ꓡ ꓡꓳ꓿ ꓬꓲˍ ꓟꓲ ꓬꓰ-ꓢꓴ ꓛꓳ ꓒꓯꓹ ꓥꓳ꓿ 58 ꓬꓲ ꓠꓬ ꓒꓲ-ꓡ ꓔꓯ ꓙꓰ ꓢꓲ꓾ ꓬꓰ-ꓢꓴ ꓫꓵꓻ ꓟꓳꓻ ꓓꓰꓽ ꓬꓰ ꓠꓬ꓾ ꓒꓲ-ꓡ ꓡꓰ ꓬꓲ ꓔꓯ ꓖꓶ ꓠꓹ ꓟ ꓕꓵꓼ ꓪꓽ ꓖꓶˍ ꓡꓳ꓿ 59 ꓬꓳ-ꓢꓷ ꓠꓬ ꓬꓰ-ꓢꓴ ꓫꓵꓻ ꓟꓳꓻ ꓣꓴ ꓢꓲ꓾ ꓫꓬꓻˍ ꓟ ꓪꓰꓻ ꓜꓲꓽ ꓟꓶ ꓟꓳꓻ ꓕꓱꓹ ꓓꓴ ꓡꓰ ꓕꓱꓹ ꓢꓲ ꓠꓬꓲ꓾ 60 Bꓸ ꓗꓪ ꓜꓰꓺ ꓔ ꓟ ꓬꓳ-ꓢꓷ ꓬꓲ ꓚꓲꓸ ꓛꓬ ꓡꓱꓽ ꓘꓴ ꓫꓵꓼ ꓗꓪ ꓗꓶ ꓔ ꓡꓳ꓿ ꓖꓳ ꓡꓱ ꓢꓲ ꓡꓱꓼ ꓜꓴ ꓘꓶꓽ ꓗꓪ Bꓸ ꓛꓲ ꓓꓽ ꓟ ꓕꓲ ꓒꓬꓸ ꓡꓱꓸ ꓚꓵꓸ ꓔꓸ ꓬꓰ ꓢꓲ ꓠꓬꓲ ꓙꓰ ꓗꓷꓳ꓿ 61 ꓟ-ꓖ-ꓓ-ꓡꓲ ꓢꓴ ꓟ-ꓡꓲˍ ꓐꓰ ꓟ-ꓡꓲ ꓠꓱꓸ ꓐꓯꓼ ꓕꓲ ꓣꓳ ꓠꓬ ꓡꓱꓼ ꓜꓴ ꓔꓱꓹ ꓞꓹ ꓟ ꓗꓪ ꓠꓬꓲꓸ ꓠꓸ ꓔꓬ ꓡꓳ꓿ 62 ꓑꓮꓲ ꓙꓽ ꓖꓶꓽˍ ꓟ ꓦꓬꓼ ꓠꓬꓲ ꓗꓸ ꓠꓯꓸ ꓕꓲ ꓠꓬꓲ ꓗꓪ꓾ ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓒꓲ-ꓡ ꓔꓬ ꓗꓪ ꓙꓰ ꓢꓲ꓾ ꓬꓲ ꓪꓽ ꓡꓰ ꓬꓲ ꓔꓯ꓾ 63 ꓞꓳ ꓪꓴꓽꓳ꓾ ꓟꓸ ꓒꓬꓹ ꓢꓴ ꓖꓳ ꓟ ꓢꓯꓸ ꓔꓬ ꓕꓯ꓾ ꓢ ꓠꓬꓲ ꓗꓸ ꓠꓯꓸ ꓥꓪ ꓢꓯꓸ ꓬꓲꓼ ꓡ ꓥꓳ꓾ ꓐꓯˍ ꓟ ꓥꓪ ꓠꓴ ꓓꓵꓽ ꓙꓽ ꓛꓲ ꓡꓺꓳ꓿ 64 ꓖꓳ ꓟ ꓑꓶꓸ ꓓꓴ ꓢ ꓠꓬꓲ ꓗꓪ ꓛꓲ ꓡꓱꓼ ꓜꓴ ꓔꓯ ꓕꓶꓻ ꓡꓰ ꓝꓲ ꓠꓹ ꓟ ꓕꓵꓼ ꓪꓽ ꓖꓶ꓿ ꓟꓽ ꓥ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓡꓻ ꓢꓲ꓾ ꓬꓲ ꓫꓵꓻ ꓟꓳ ꓘꓴꓽ ꓔꓯꓹ ꓙꓰ ꓢꓲ ꓠꓬꓲ꓾ ꓬꓲ ꓠꓽ ꓢꓯꓸ ꓡꓰꓼ ꓡꓺꓳ꓾ ꓐꓰ ꓑ ꓫꓬꓼ ꓐꓴ ꓔꓯ ꓐꓯ ꓖꓶˍ ꓠꓬ꓾ ꓗꓸ ꓠꓯꓸ ꓥꓳꓽ ꓙꓰˍ ꓟ ꓠꓬ ꓧꓶꓸ ꓕꓯꓽ ꓟ ꓢꓶꓸ ꓟꓽ ꓞꓲ ꓡꓲꓽˍ ꓥꓳ꓾ ꓐꓯˍ ꓡꓳ꓿ 65 ꓖꓳ ꓕꓯ ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓦꓴ ꓠꓬꓹ ꓢꓴ ꓟꓯꓼ ꓤ ꓐꓴ ꓔꓯ ꓧꓳꓽ ꓙꓰ ꓢꓲ꓾ ꓠꓴ ꓪꓽ ꓮ ꓡꓲ ꓬꓰ ꓗꓴꓸˍ ꓠꓬ ꓖꓳ ꓡꓱ ꓕꓶꓻ ꓡꓰ ꓝꓲ꓾ ꓐꓯˍ ꓡꓳ꓿ 66 ꓖꓳ ꓡꓱ ꓠꓬ ꓬꓲ ꓪꓽ ꓠꓽ ꓦꓴꓺ ꓠꓬꓹ ꓢꓴ ꓟꓯꓼˍ ꓐꓰ ꓕꓲ ꓛꓳꓺꓼ ꓙꓰ ꓢꓲ꓾ Bꓸ ꓡꓱꓼ ꓜꓴ ꓗꓪ ꓔꓳꓹ ꓠꓷꓼ ꓓꓴ ꓔꓳꓹ ꓠꓷꓼ ꓢꓲ ꓠꓬꓲ ꓕꓶ ꓡꓰ ꓝꓲˍ ꓡꓳ꓿

ꓟ-ꓔꓲ 28

1 ꓠꓽ ꓦꓬꓼ ꓠꓬꓲ ꓗꓳꓸ ꓗꓷ ꓠꓬ꓾ ꓫꓵꓽ ꓠꓬꓲ ꓟ ꓬꓲ ꓪꓴꓸ ꓕꓲ ꓠꓬꓲ ꓟꓲꓽ ꓕꓯ ꓙꓲꓻ ꓡ ꓐꓰ ꓬꓰˍ ꓕꓯ꓾ ꓟ-ꓖ-ꓓ-ꓡꓲ ꓢꓴ ꓟ-ꓡꓲ ꓐꓰ ꓟ-ꓡꓲ ꓠꓱꓸ ꓐꓯꓼ ꓕꓲ ꓣꓳ ꓠꓬ꓾ ꓡꓱꓼ ꓜꓴ ꓗꓪ ꓔꓱꓹ ꓠꓬꓲ ꓡ ꓡꓳ꓿ 2 ꓖꓳ ꓕꓯ ꓞꓼ ꓐꓰ ꓟꓵꓽ ꓮꓽ ꓘꓶꓸ ꓓꓵꓺ ꓡ ꓡꓳ꓿ ꓢꓲ ꓒꓽ ꓬꓲ ꓝꓲ ꓓꓴ ꓠꓬ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓢꓲ꓾ Bꓸ ꓛꓲ ꓡꓱꓸ ꓩꓴ ꓗꓷ ꓢꓲ ꓠꓬꓲ꓾ ꓕꓯꓽ ꓢꓲ ꓗꓪ ꓠꓬꓲꓸ ꓠꓸ ꓔꓬ ꓡꓳ꓿ 3 ꓬꓲ ꓒꓬꓱꓽ ꓠꓬ ꓟꓲꓽ ꓐꓬꓱꓼˍ ꓡꓰ ꓐꓰ ꓗꓹ ꓡꓳ꓿ ꓬꓲ ꓐꓵ ꓞꓶꓽˍ ꓟꓲ ꓪꓽˍ ꓡꓰ ꓐꓰ ꓒꓴ ꓛ ꓛꓹ ꓗꓹ ꓡꓳ꓿ 4 ꓦꓴꓺ ꓠꓬꓹ ꓢꓴ ꓟꓯꓼ ꓠꓬ ꓬꓲ ꓔꓯ ꓙꓳꓺ ꓠꓬꓲ꓾ ꓛꓱꓽ ꓛꓱ ꓢꓲ ꓞꓳ ꓫꓵꓻˍ ꓡꓰ ꓐꓰ ꓗꓷ ꓡꓰꓳ꓿ 5 ꓟꓴꓽ ꓗꓪ ꓝꓲ ꓓꓴ ꓠꓬ ꓤꓽ ꓟꓶꓽ ꓤꓽ ꓐꓴ ꓔꓯ꓾ ꓠꓴ ꓪꓽ ꓕꓽ ꓙꓳꓺ꓿ ꓠꓴ ꓪꓽ ꓠꓬ ꓕꓯꓼ ꓔꓶꓸ ꓗꓷ ꓟ ꓬꓰ-ꓢꓴ ꓔꓯ ꓧꓪˍ ꓟ ꓥꓪ ꓢꓷˍ ꓡꓳ꓿ 6 ꓬꓲ ꓕꓻˍ ꓟꓽ ꓓꓹꓳ꓾ ꓬꓲ ꓠꓽ ꓬꓲ ꓐꓯ ꓗꓷ ꓟ ꓡꓰ ꓐꓰ ꓢꓯꓸ ꓬꓲꓼ ꓡꓺꓳ꓿ ꓢꓲ ꓒꓽ ꓔꓯ ꓗꓶꓺ ꓔ ꓖꓴ ꓗꓪ ꓡꓳꓸ ꓠꓬꓲ ꓡꓯ꓿ 7 ꓖꓳ ꓡꓱ ꓢꓲ ꓠꓴ ꓪꓽ ꓮꓸ ꓟꓲꓸ ꓙꓰ ꓢꓲ ꓠꓬꓲ꓾ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓬꓲ ꓠꓬ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡꓺꓳ꓾ ꓬꓲ ꓠꓽ ꓖ-ꓡꓲ-ꓡꓲ ꓟꓵꓽ ꓗꓪ ꓠꓴ ꓪꓽ ꓟꓲꓽ ꓕꓯꓽ ꓢꓲ ꓙꓰˍ ꓥꓳ꓿ ꓖꓳ ꓗꓪ ꓠꓴ ꓪꓽ ꓬꓲ ꓔꓯ ꓟꓳꓻˍ ꓥꓳ꓾ ꓐꓰ ꓐꓯ ꓖꓶ ꓬꓰ꓿ ꓠ ꓠꓹ꓾ ꓥꓪ ꓠꓴ ꓪꓽ ꓔꓯ ꓐꓯ ꓖꓶꓽ ꓗꓷꓳ꓾ ꓐꓯˍ ꓡꓳ꓿ 8 ꓬꓲ ꓪꓽ ꓠꓬ ꓙꓳꓺˍ ꓟꓲ ꓙꓳꓺ꓾ ꓗꓹˍ ꓟꓲ ꓮꓽ ꓘꓶꓸ ꓗꓹ ꓛꓲ ꓢꓲ꓾ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓐꓯ ꓖꓶ ꓬꓰ ꓠꓹ ꓟ ꓡꓱꓼ ꓜꓴ ꓗꓪ ꓐꓰ ꓮꓸ ꓟꓲꓸ ꓟꓲꓸ ꓔꓷꓹ ꓙꓰˍ ꓡꓳ꓿ 9 ꓖꓳ ꓕꓯ ꓬꓰ-ꓢꓴ ꓠꓬ ꓞꓼ ꓐꓰ ꓬꓲ ꓪꓽ ꓔꓯ ꓜꓲꓻ ꓡ ꓢꓲ ꓒꓵꓽ ꓗꓹ ꓬꓰ ꓖꓶˍ ꓡꓳ꓿ ꓬꓲ ꓪꓽ ꓠꓬ ꓬꓲ ꓔꓯ ꓡꓻ ꓢꓲ ꓬꓲ ꓛꓲ ꓒꓯꓹ ꓗꓪ ꓢꓳꓸ ꓔ ꓢꓲ ꓠꓬꓲ꓾ ꓬꓲ ꓔꓯ ꓪꓴꓸ ꓓꓵ ꓕꓱꓼˍ ꓡꓳ꓿ 10 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓕꓽ ꓙꓳꓺ꓾ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓔꓯ꓾ ꓖ-ꓡꓲ-ꓡꓲ ꓗꓪ ꓙꓰ꓾ ꓖꓳ ꓗꓪ ꓬꓲ ꓪꓽ ꓥꓪ ꓔꓯ ꓟꓳꓻˍ ꓥꓳ꓾ ꓐꓰ ꓐꓯ ꓖꓶ꓾ ꓐꓯˍ ꓡꓳ꓿ 11 ꓤ ꓟꓶ ꓤ ꓐꓴ ꓙꓰ ꓗꓷ ꓕꓯ꓾ ꓦꓴꓺ ꓠꓬꓹ ꓢꓴ ꓟꓯꓼ ꓕꓲ ꓐꓱ ꓠꓽ ꓡꓳ ꓒꓱ ꓗꓪ ꓬꓲꓼ ꓙꓰ ꓢꓲ꓾ ꓖꓳ ꓗꓪ ꓗꓷ ꓡꓰˍ ꓟ ꓫꓵꓽ ꓪꓴ ꓮꓽ ꓙꓵ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓔꓯ ꓐꓯ ꓖꓶˍ ꓡꓳ꓿ 12 ꓔꓲ ꓒ ꓐꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓜꓲꓼ ꓡꓯꓽ ꓘꓳ ꓢꓲ ꓖꓪꓻ ꓙꓱ ꓗꓷ ꓠꓬ꓾ ꓟꓯꓼ ꓤ ꓐꓴ ꓔꓯ ꓒꓴ ꓮꓽ ꓟꓬꓹ ꓖꓶ ꓢꓲ꓾ 13 ꓠꓴ ꓪꓽ ꓠꓬ ꓕꓱ ꓡꓱ ꓐꓯ꓾ ꓢ ꓘꓪ ꓥꓪ ꓠꓴꓽ ꓬꓲꓼ ꓔ ꓔꓬ ꓕꓯ꓾ ꓬꓲ ꓛꓳꓽ ꓒꓯꓹ ꓐꓴ ꓡ ꓢꓲ ꓬꓲ ꓫꓵꓻ ꓟꓳꓻ ꓘꓴꓽ ꓔꓯꓹ ꓙꓰ ꓐꓷ꓾ ꓐꓰ ꓐꓯ꓿ 14 ꓖꓳ ꓡꓱ ꓢꓲ꓾ ꓓꓳꓽ ꓕꓱ ꓟ ꓫꓴ ꓙꓵꓽ ꓒ ꓑ ꓙꓽ ꓡꓰˍ ꓟꓲ꓾ ꓥꓪ ꓠꓴꓽ ꓬꓲ ꓔꓯ ꓘꓶꓸ ꓖꓶ ꓢꓲ ꓠꓴ ꓪꓽ ꓔꓯ ꓮ ꓡꓲ ꓟꓽ ꓗꓷ ꓡꓰ ꓝꓲ꓾ ꓐꓯ ꓖꓶˍ ꓡꓳ꓿ 15 ꓬꓲ ꓪꓽ ꓠꓬ ꓒꓴ ꓘꓳ ꓣꓴ ꓢꓲ꓾ ꓬꓲ ꓪꓽ ꓔꓯ ꓟꓸ ꓔ ꓟ ꓡꓰ ꓐꓰ ꓬꓰˍ ꓡꓳ꓿ ꓐꓯ ꓘꓶꓽ ꓕꓱ ꓟ ꓔꓯ ꓠꓬ ꓠꓬꓲꓸ ꓠꓬꓲ ꓗꓪ ꓛꓲ ꓬꓴ-ꓔ ꓡ ꓞꓳ ꓗꓳ ꓡꓳ ꓗꓪ ꓚ ꓔꓬ ꓡꓳ꓿ 16 ꓖꓳ ꓗꓸ ꓠꓯ ꓛꓳꓽ ꓒꓯꓹ ꓞꓲ ꓕꓲ ꓣꓳ ꓟ ꓠꓽ ꓖ-ꓡꓲ-ꓡꓲ ꓗꓪ ꓓꓵꓽ ꓡꓰ ꓢꓲ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓐꓯ ꓖꓶ ꓔ ꓟ ꓪꓽ ꓚꓲ ꓗꓪ ꓙꓰˍ ꓡꓳ꓿ 17 ꓬꓲ ꓪꓽ ꓬꓲ ꓔꓯ ꓟꓳꓻ ꓗꓷ ꓠꓬ ꓪꓴꓸ ꓓꓵ ꓕꓱꓼˍ ꓡꓳ꓿ ꓖꓳ ꓡꓱ ꓥ ꓟꓲ ꓕꓲ ꓐꓱ ꓠꓽ ꓓꓵꓽ ꓙꓽ ꓟꓬꓽˍ ꓡꓳ꓿ 18 ꓖꓳ ꓡꓱ ꓠꓬ ꓬꓰ-ꓢꓴ ꓬꓲ ꓪꓽ ꓔꓯ ꓡ ꓢꓲ꓾ ꓟꓴꓽ ꓗꓪ ꓟꓲ ꓠꓯ ꓗꓪ ꓟ ꓙꓵꓽ ꓪꓽ ꓮꓽ ꓙꓵ ꓥꓪ ꓔꓯ ꓖꓶ ꓔ ꓡꓳ꓿ 19 ꓖꓳ ꓡꓱ ꓠꓬꓲ ꓠꓴ ꓪꓽ ꓙꓰ ꓢꓲ꓾ ꓞꓳ ꓫꓵꓽ ꓥ ꓕ ꓑꓳꓸ ꓔꓯ ꓢꓲ ꓤꓽ ꓬꓰ ꓝꓲ ꓢꓲ ꓠꓬꓲ꓾ ꓐꓹ ꓐ꓾ ꓮ ꓐꓲ꓾ ꓢꓲ-ꓫꓬ-ꓟ-ꓦ ꓟꓬꓱꓺ ꓗꓪ ꓐꓰ ꓬꓲ ꓪꓽ ꓔꓯ ꓖꓳ ꓓꓱ ꓔꓲꓹ ꓖꓶ꓿ 20 ꓖꓳ ꓡꓱ ꓢꓲ ꓠꓴ ꓪꓽ ꓔꓯ ꓥꓪ ꓕꓵꓼ ꓪꓽ ꓖꓶꓽ ꓗꓷ ꓟ ꓮꓽ ꓙꓵ ꓬꓲ ꓪꓽ ꓛꓳꓻ ꓠꓹ ꓟ ꓟꓸ ꓖꓶ꓿ ꓠ ꓠꓹ꓾ ꓟꓲ ꓠꓯ ꓕꓱ ꓕꓲ ꓡꓶꓸ ꓡꓳꓹ ꓬꓰ ꓗꓪ ꓛꓲ ꓥꓪ ꓠꓬ ꓮ ꓕꓯꓽˍ ꓟꓲ ꓠꓴ ꓪꓽ ꓐꓰ ꓔꓬ ꓥꓳ꓾ ꓐꓯˍ ꓡꓳ꓿

ꓟ-ꓗꓳ 1

1 ꓪꓴ-ꓢ ꓮ ꓐꓲ ꓬꓰ-ꓢꓴ ꓙꓲ-ꓢꓴ ꓶꓼ ꓓꓳ ꓫꓱꓹ ꓓꓳ ꓬꓲ ꓪꓴꓸ ꓔꓴˍ ꓟ꓿ 2 ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓕꓳ ꓶ ꓗꓪ꓾ ꓠꓬꓲ ꓠꓹ꓾ ꓥꓪ ꓡꓰ ꓠꓴ ꓟꓲꓽ ꓕꓯꓽ ꓢꓲ ꓗꓪ ꓥꓪ ꓝꓲ ꓓꓴ ꓝꓲ ꓩꓴ ꓗꓷ ꓢꓲ꓾ ꓬꓲ ꓠꓬ ꓠꓴ ꓙ ꓖꓴ ꓙꓽ ꓖꓶˍ ꓥꓳ꓿ 3 ꓡꓲ ꓛꓲ ꓟꓵꓽ ꓛꓱꓹ ꓗꓪ ꓡꓽ ꓞꓳ ꓕꓲ ꓣꓳ ꓘꓴꓻ ꓔꓬ ꓟ ꓢꓯꓼ ꓠꓬ꓾ ꓢꓲ ꓒꓽ ꓙ ꓖꓴ ꓠꓴ ꓪꓽ ꓙꓽ ꓖꓶ꓿ ꓬꓲ ꓚꓱꓹ ꓔꓱꓹ ꓔꓱꓹꓼ ꓫꓬꓹ꓾ ꓐꓰ ꓐꓳ ꓔ ꓟ ꓡꓰ ꓐꓰ꓾ 4 ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓠꓬ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓡ ꓢꓲ꓾ ꓝꓴꓲ ꓖꓽ ꓖꓶꓽ ꓟꓶ ꓠꓹ ꓟ꓾ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓖꓳ ꓓꓱ ꓔꓲꓹ ꓠꓯꓹ ꓟ ꓟꓸ ꓟꓲꓽ ꓚˍ ꓡꓳ꓿ 5 ꓬꓴ-ꓔ ꓕꓲ ꓟꓵꓽ ꓡꓱꓸꓼ ꓐꓰ ꓙꓱ-ꓣꓴ-ꓢ-ꓡꓱ ꓢꓴ ꓮꓽ ꓙꓵ ꓠꓬ꓾ ꓬꓳ-ꓦ ꓔꓬ ꓗꓪ ꓓꓳ ꓙꓰ ꓢꓲ꓾ ꓝꓴꓲ ꓣꓷꓠꓸ ꓢꓲ ꓠꓬꓲ꓾ ꓬꓲ ꓪꓽ ꓔꓯ ꓬꓳ-ꓦ ꓡꓰ ꓬꓳ-ꓔ ꓬꓲꓽ ꓟ ꓗꓪ ꓖꓳ ꓓꓱ ꓔꓲꓹ ꓖꓶˍ ꓡꓳ꓿ 6 ꓬꓳ-ꓦ ꓠꓬ ꓡꓳꓽ ꓕꓳ ꓟꓵ ꓐꓵ ꓞꓶ ꓖꓪꓽ ꓔ ꓢꓲ꓾ ꓬꓲ ꓙꓴꓽ ꓝꓲꓸ ꓗꓪ ꓧꓪꓽ ꓙꓲ ꓙꓽ ꓧꓷꓹ ꓧꓷꓹ ꓔ ꓢꓲ ꓠꓬꓲ꓾ ꓚ ꓑꓴˍ ꓐꓰ ꓡꓲ ꓛꓲ ꓐꓬꓽ ꓬꓲꓻ ꓜꓽˍ ꓡꓳ꓿ 7 ꓬꓲ ꓠꓬ ꓟꓸ ꓟꓲꓽ ꓚ ꓢꓲ꓾ ꓥꓪ ꓢꓶꓸ ꓟꓽ ꓞꓲ ꓪꓽ ꓠꓬꓲ ꓢꓴ ꓠꓬ ꓥꓪ ꓗꓸ ꓠꓯꓸ ꓢꓲ ꓗꓪ ꓡꓻˍ ꓥꓳ꓿ ꓥꓪ ꓠꓽ ꓖꓳ ꓓꓱ ꓗꓴꓺ ꓢꓲ ꓬꓲ ꓛꓲꓺ ꓠꓲꓺ ꓦꓲ ꓚ ꓒꓶꓻ ꓖꓶ ꓠꓹ ꓟˍ ꓟꓲ ꓟꓽ ꓒꓵ꓿ 8 ꓥꓪ ꓠꓬ ꓠꓴ ꓪꓽ ꓔꓯ ꓬꓲꓻ ꓙꓬ ꓡꓰ ꓖꓳ ꓓꓱ ꓔꓲꓹ ꓖꓶ ꓗꓷꓳ꓿ ꓬꓲ ꓠꓽ ꓠꓴ ꓪꓽ ꓔꓯ ꓢꓲ-ꓫꓬ-ꓟ-ꓦ ꓡꓰ ꓔꓲꓹ ꓖꓶ ꓡ ꓥꓳ꓾ ꓐꓯˍ ꓡꓳ꓿ 9 ꓖꓳ ꓕꓲ ꓝꓲꓸ ꓗꓪ ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵꓽ ꓠ-ꓢ-ꓡꓱ ꓗꓪ ꓐꓰ ꓡꓻ ꓢꓲ꓾ ꓬꓳ-ꓔ ꓬꓲꓽ ꓟ ꓗꓪ ꓬꓳ-ꓦ ꓡꓰ ꓬꓲ ꓔꓯ ꓖꓳ ꓓꓱ ꓔꓲꓹ ꓖꓶˍ ꓡꓳ꓿ 10 ꓬꓲꓻ ꓙꓬ ꓗꓪ ꓐꓰ ꓬꓰ-ꓢꓴ ꓓꓳ ꓡ ꓟꓶꓽ ꓕꓯ ꓟꓴꓽ ꓗꓪ ꓒꓴ ꓡ ꓢꓲ꓾ ꓪꓴ-ꓢ ꓦ ꓠꓬ ꓮꓸ ꓖꓴꓽˍ ꓡꓰ ꓐꓰ ꓬꓲ ꓚꓲꓸ ꓛꓬ ꓕꓯꓽ ꓢꓲ ꓗꓪ ꓥꓳꓽ ꓡ ꓟ ꓔꓯ ꓬꓰ-ꓢꓴ ꓟꓳꓻˍ ꓡꓳ꓿ 11 ꓖꓳ ꓕꓯ ꓟꓴꓽ ꓗꓪ ꓗꓪ ꓐꓰ ꓢꓯꓼ ꓕꓲ ꓟ ꓓꓳ ꓡ ꓢꓲ꓾ ꓠꓴ ꓠꓬ ꓥꓪ ꓠꓲꓹ ꓠꓵˍ ꓟ ꓮ ꓐꓲ ꓥ ꓡꓳ꓿ ꓠꓴ ꓔꓯ ꓥꓪ ꓮꓽ ꓘꓶꓸ ꓠꓲꓹ ꓒꓴˍ ꓡꓳ꓾ ꓐꓯˍ ꓡꓳ꓿ 12 ꓢꓲ-ꓫꓬ-ꓟ-ꓦ ꓡꓰ ꓞꓼ ꓐꓰ ꓬꓰ-ꓢꓴ ꓔꓯ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓙꓰ ꓝꓲˍ ꓡꓳ꓿ 13 ꓬꓲ ꓠꓬ ꓡꓲ ꓛꓲ ꓗꓪ ꓡꓲ ꓞꓲ ꓠꓬꓲ ꓔꓬ ꓕꓯ꓾ ꓢ-ꓓꓯ ꓡꓰ ꓬꓲ ꓔꓯ ꓫꓵꓽ ꓠꓬꓲˍ ꓡꓳ꓿ ꓬꓲ ꓠꓬ ꓬꓲꓸ ꓡꓽ ꓬꓲ ꓗꓳꓸ ꓗꓳ ꓡꓳ ꓗꓪ ꓔꓬ ꓥ ꓟꓲ꓾ ꓟꓴꓽ ꓗꓪ ꓝꓲ ꓓꓴ ꓐꓴ ꓡꓰ ꓬꓲ ꓔꓯ ꓣꓱꓽ ꓙˍ ꓡꓳ꓿ 14 ꓬꓳ-ꓦ ꓔꓯ ꓐꓱꓻ ꓗꓷ ꓗꓸ ꓠꓯꓸ꓾ ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵ ꓗꓪ ꓓꓵꓽ ꓡ ꓢꓲ꓾ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓢꓲ ꓠꓬꓲ꓾ 15 ꓦꓬꓼ ꓠꓬꓲ ꓐꓲ ꓡꓺꓳ꓾ ꓪꓴ-ꓢ ꓗꓴꓷ ꓠꓶꓽ ꓡꓺꓳ꓾ ꓠꓴ ꓪꓽ ꓠꓲꓹ ꓟ ꓡꓶꓸ ꓢꓲ ꓶꓼ ꓓꓳ ꓫꓱꓹ ꓓꓳ ꓔꓯ ꓙꓵꓻ꓾ ꓐꓯˍ ꓡꓳ꓿ 16 ꓖ-ꓡꓲ-ꓡꓲ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓬꓰ-ꓢꓴ ꓫꓱꓽ ꓔꓬ ꓕꓯ꓾ ꓢꓲ-ꓟꓴˍ ꓐꓰ ꓬꓲ ꓠꓬꓲ ꓤ ꓯ-ꓓꓱ-ꓣꓴ ꓠꓬ ꓥꓪꓸ ꓧꓪ ꓢꓴ ꓥ ꓠꓬꓲ꓾ ꓬꓲꓻ ꓡꓴꓽ ꓐꓱ ꓗꓪ ꓥꓪꓸ ꓓꓳꓽ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 17 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓯ ꓛꓳ ꓡꓯ꓾ ꓠꓴ ꓪꓽ ꓔꓯ ꓥꓪ ꓡꓰ ꓡꓽ ꓞꓳ ꓧꓪ ꓟꓶ ꓢꓴ ꓒꓬꓱꓼ ꓡ ꓝꓲˍ ꓥꓳ꓾ ꓐꓯ ꓖꓶˍ ꓡꓳ꓿ 18 ꓖꓳ ꓡꓱ ꓠꓬ ꓬꓲ ꓪꓽ ꓞꓼ ꓐꓰ ꓥꓪꓸ ꓑꓱꓸ ꓗꓶ ꓔꓸ ꓬꓰ ꓢꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ 19 ꓝꓮꓲ ꓕꓲ ꓑꓹ ꓤ ꓙꓰ ꓗꓷ ꓠꓬ꓾ ꓜꓲ-ꓐꓱ-ꓓꓲ ꓬꓲ ꓮ ꓐꓲ ꓬ-ꓗꓴˍ ꓐꓰ ꓬꓲ ꓠꓬꓲ ꓤ ꓬꓳ-ꓦ ꓠꓬ ꓡꓲ ꓗꓪ ꓥꓪꓸ ꓑꓱꓸ ꓑꓱꓺ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 20 ꓖꓳ ꓕꓲꓽ ꓑꓹ ꓗꓪ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓘꓴꓻ ꓗꓷ ꓠꓬ꓾ ꓬꓲ ꓪꓽ ꓠꓽ ꓬꓲ ꓪꓽ ꓐꓹ ꓐ ꓜꓲ-ꓐꓱ-ꓓꓲ ꓔꓯ꓾ ꓡꓲ ꓗꓪ ꓪꓽ ꓗꓴꓸ ꓔ ꓢꓴ ꓐꓴˍ ꓐꓰ ꓔꓲꓹ ꓬꓰ ꓝꓲ ꓢꓲ꓾ ꓬꓰ-ꓢꓴ ꓔꓯ ꓛꓳ ꓙꓰˍ ꓡꓳ꓿ 21 ꓖꓳ ꓗꓸ ꓠꓯꓸ ꓬꓲ ꓪꓽ ꓘ-ꓒꓱ-ꓠꓴ ꓗꓪ ꓛꓲ ꓬꓰˍ ꓡꓳ꓿ ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓜꓲꓼ ꓦꓲ ꓗꓪ ꓓꓵꓽ ꓡꓰ ꓢꓲ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ 22 ꓬꓲ ꓟꓸ ꓖꓶˍ ꓟ ꓠꓬ ꓙꓵꓽ ꓗ ꓟꓸ ꓒ ꓐꓴ ꓡꓰ ꓟꓸ ꓖꓶˍ ꓟ ꓡꓰ ꓐꓰ ꓟꓽ ꓥ ꓥ꓾ ꓙꓵꓽ ꓪ ꓙꓳ ꓙꓳˍ ꓡꓰꓽ ꓟꓸ ꓖꓶˍ ꓠꓬꓲ ꓬꓲ ꓪꓽ ꓓꓵꓽ ꓙ ꓟꓶꓻˍ ꓡꓳ꓿ 23 ꓖꓳ ꓕꓯ ꓬꓲ ꓪꓽ ꓜꓲꓼ ꓦꓲ ꓗꓪ ꓟꓽ ꓫꓬ ꓠꓲꓽ ꓓꓯꓹ ꓟ ꓡꓽ ꓞꓳ ꓕꓲ ꓣꓳ ꓔꓬ ꓢꓲ꓾ ꓘꓴꓻ ꓔꓴ ꓡ ꓢꓲ ꓠꓬꓲ꓾ 24 ꓠ-ꓢ-ꓡꓱ ꓢꓴ ꓬꓰ-ꓢꓴꓳ꓾ ꓥꓪ ꓠꓴꓽ ꓠꓬ ꓠꓴˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓙꓳˍ ꓡ? ꓠꓴ ꓠꓬ ꓥꓪ ꓠꓴꓽ ꓔꓯ ꓟꓶꓽ ꓡꓰ ꓝꓲˍ ꓐꓰ ꓡꓻ ꓟ ꓥ ꓡ? ꓠꓴ ꓮꓽ ꓟ ꓥ ꓟ ꓥꓪ ꓢꓷꓸˍ ꓡꓳ꓿ ꓠꓴ ꓠꓽ ꓪꓴ-ꓢ ꓬꓲ ꓢꓲ ꓚꓲꓸ ꓔ ꓟ ꓖꓳ ꓕꓲ ꓣꓳ ꓟ ꓥꓳ꓾ ꓐꓯˍ ꓡꓳ꓿ 25 ꓬꓰ-ꓢꓴ ꓡꓰ ꓬꓲ ꓔꓯ ꓕꓼ ꓢꓲ꓾ ꓕꓽ ꓪꓳꓹ꓾ ꓬꓲ ꓗꓪ ꓐꓰ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ 26 ꓖꓳ ꓡꓱ ꓠꓬ ꓟꓽ ꓫꓬ ꓠꓲꓽ ꓡꓰ ꓡꓽ ꓞꓳ ꓖꓳ ꓟ ꓔꓯ ꓚꓵꓹ ꓡ ꓝꓲ ꓢꓲ꓾ ꓢꓯꓼ ꓓꓽ ꓟ ꓘꓴꓻ ꓠꓬꓲ ꓐꓰ ꓬꓲ ꓗꓪ ꓐꓰ ꓓꓳ ꓙꓰꓳ꓿ 27 ꓖꓳ ꓕꓯ ꓖꓳ ꓗꓪ ꓔꓬ ꓢꓴ ꓮꓽ ꓙꓵ ꓓꓵꓽ ꓙ ꓟꓶ ꓡꓰ ꓢꓲ꓾ ꓕꓱ ꓟ ꓮꓸ ꓫꓵ ꓥ ꓡ? ꓙꓵꓽ ꓪ ꓙꓳˍ ꓟ ꓟꓸ ꓟꓲꓽ ꓫꓵꓼ ꓕꓲꓽ ꓫꓵꓽ ꓥ ꓐꓷ꓿ ꓠꓲꓽ ꓔꓯˍ ꓟꓲ ꓬꓲ ꓙꓵꓽ ꓪ ꓗꓪ ꓐꓰ ꓝꓲˍ ꓕꓯ ꓬꓲ ꓪꓽ ꓒꓵꓽ ꓛꓳˍ ꓐꓷ꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 28 ꓬꓲ ꓓꓳꓽ ꓕꓱ ꓟ ꓠꓬ ꓖ-ꓡꓲ-ꓡꓲ ꓕꓲ ꓟꓵꓽ ꓡꓱꓸꓼ ꓗꓪ ꓞꓼ ꓐꓰ ꓚ ꓒꓬꓱ ꓙꓰˍ ꓡꓳ꓿ 29 ꓜꓲꓼ ꓦꓲ ꓗꓪ ꓐꓰ ꓬꓲ ꓪꓽ ꓓꓳ ꓡ ꓟꓶꓽ ꓕꓯ꓾ ꓬꓲ ꓪꓽ ꓠꓬ ꓬ-ꓗꓴˍ ꓐꓰ ꓬꓳ-ꓦˍ ꓐꓰ ꓕꓲ ꓛꓳꓺꓼ ꓢꓲ-ꓟꓴˍ ꓐꓰ ꓯ-ꓓꓱ-ꓣꓴ ꓦꓲ ꓗꓪ ꓓꓵꓽ ꓙꓰˍ ꓡꓳ꓿ 30 ꓢꓲ-ꓟꓴ ꓬꓲ ꓟꓹ ꓟ ꓑꓯꓹ ꓠꓽ꓾ ꓖꓳ ꓓꓱ ꓛꓴ ꓞꓓ ꓢꓲ ꓠꓻ ꓓꓳꓽ ꓔꓬ ꓠꓬꓲ꓾ ꓞꓼ ꓐꓰ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ ꓐꓯ ꓖꓶ ꓡ ꓡꓳ꓿ 31 ꓬꓰ-ꓢꓴ ꓡ ꓢꓲ ꓬꓲ ꓡꓯꓼ ꓒꓯꓹ ꓔꓯ ꓣꓴ ꓢꓲ ꓠꓬꓲ ꓖꓳꓻ ꓔꓴ ꓖꓶ ꓗꓷ ꓠꓬ꓾ ꓬꓲ ꓖꓳ ꓓꓱ ꓛꓴ ꓞꓻ ꓟ ꓓꓻ ꓡꓰ ꓢꓲ꓾ ꓬꓲ ꓪꓽ ꓔꓯ ꓣꓱꓽ ꓙˍ ꓡꓳ꓿ 32 ꓟꓶꓼ ꓘꓶꓼ ꓟꓲꓽ ꓟꓲ ꓓꓵꓽ ꓡꓰˍ ꓕꓯ꓾ ꓬꓲ ꓪꓽ ꓡꓰ ꓖꓳ ꓗꓪ ꓔꓬ ꓟ ꓠꓻ ꓢꓴ ꓒꓬꓽ ꓢꓴ ꓮꓽ ꓙꓵˍ ꓐꓰ ꓠꓲꓽ ꓜꓶꓽ ꓞꓹ ꓢꓴ ꓔꓯ ꓬꓲ ꓔꓬ ꓗꓪ ꓧꓳꓽ ꓡ ꓡꓳ꓿ 33 ꓕꓲ ꓡꓳ ꓒꓱ ꓢꓴ ꓮꓽ ꓙꓵ ꓠꓬ ꓗ ꓘꓶꓽ ꓗꓪ ꓜꓲꓼ ꓞꓹ ꓡꓳ꓿ 34 ꓠꓻ ꓫꓵꓽ ꓠꓻ ꓙꓰꓽ ꓠꓻ ꓢꓴ ꓮꓽ ꓟꓬꓹ ꓔꓯ ꓬꓲ ꓡꓰ ꓫꓬꓹ ꓓꓻ ꓡꓰˍ ꓡꓳ꓿ ꓠꓲꓽ ꓮꓽ ꓟꓬꓹ ꓔꓯˍ ꓟꓲ ꓬꓲ ꓖꓼ ꓓꓳ ꓗꓷ ꓢꓲ꓾ ꓠꓲꓽ ꓜꓴ ꓠꓬ ꓬꓲ ꓮꓽ ꓟ ꓥ ꓟ ꓔꓯ ꓢꓷꓸˍ ꓠꓬꓲ ꓬꓲꓸ ꓡꓰ ꓬꓲ ꓪꓽ ꓔꓯ ꓟꓽ ꓫꓸ ꓕꓱ ꓝꓲ꓿ 35 ꓗꓸ ꓠꓯꓸ ꓠꓯꓼ ꓟꓲꓽ ꓕꓯ ꓟꓽ ꓙꓲ ꓡ ꓢꓰ ꓕꓯˍ ꓡꓰ ꓬꓰ-ꓢꓴ ꓔꓴ ꓡ ꓢꓲ꓾ ꓢꓲ ꓡꓲ ꓟ ꓡꓲ ꓛꓲ ꓟꓵꓽ ꓕꓲ ꓔꓳꓸ ꓗꓪ ꓙꓰ ꓢꓲ ꓠꓬꓲ ꓖꓳ ꓗꓪ ꓪꓽ ꓘꓴˍ ꓡꓳ꓿ 36 ꓢꓲ-ꓟꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓲ ꓔꓯ ꓧꓪ ꓡ ꓢꓲ꓾ 37 ꓬꓲ ꓪꓽ ꓬꓲ ꓔꓯ ꓧꓪ ꓟꓶ ꓗꓷ ꓠꓬ꓾ ꓮꓽ ꓙꓵ ꓢꓴ ꓠꓴ ꓔꓯ ꓧꓪ ꓔꓬ ꓡꓳ꓾ ꓐꓯ ꓖꓶˍ ꓡꓳ꓿ 38 ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓱꓸ ꓐꓯꓼ ꓕꓲꓺ ꓞꓹ ꓟ ꓘꓹ ꓗꓪˍ ꓟꓲ ꓟꓸ ꓟꓲꓽ ꓚ ꓟꓸ ꓖꓶ ꓠꓹ ꓟ ꓣꓳ ꓙꓰ ꓡꓯ꓿ ꓮ ꓡꓲꓳ ꓐꓯ ꓠꓬ ꓕꓱ ꓡꓱ ꓬꓰ ꓠꓹ ꓟ ꓥꓪ ꓡ ꓟ ꓥꓳ꓾ ꓐꓯˍ ꓡꓳ꓿ 39 ꓬꓲ ꓠꓬ ꓖ-ꓡꓲ-ꓡꓲ ꓕꓲ ꓟꓵꓽ ꓡꓱꓸꓼ ꓗꓪ ꓟ ꓜꓲꓼ ꓦꓲ ꓗꓪ ꓓꓵꓽ ꓙꓰ ꓢꓲ ꓟꓸ ꓟꓲꓽ ꓚ ꓟꓸ ꓖꓶ ꓠꓬꓲ꓾ ꓠꓲꓽ ꓖꓼ ꓓꓳ ꓠꓬꓲ ꓬꓰˍ ꓡꓳ꓿ 40 ꓔꓸ ꓟꓼ ꓩꓴ ꓓꓲꓻ ꓢꓴ ꓕꓲ ꓣꓳ ꓬꓰ-ꓢꓴ ꓔꓯ ꓡ ꓢꓲ꓾ ꓬꓲ ꓟꓲꓽ ꓙꓬ ꓗꓪ ꓛꓲ ꓝꓲꓸ ꓖꓶꓽ ꓢꓲ ꓠꓬꓲ꓾ ꓠꓴ ꓠꓲꓹ ꓫꓵˍ ꓠꓬ ꓥꓪ ꓔꓯ ꓫꓬꓻ ꓡꓰ ꓝꓲ ꓐ ꓡ ꓡꓳ꓾ ꓐꓰ ꓐꓯˍ ꓡꓳ꓿ 41 ꓬꓰ-ꓢꓴ ꓠꓽ ꓬꓲ ꓔꓯ ꓫꓱꓸ ꓤ ꓠꓬꓲ꓾ ꓬꓲ ꓡꓯꓼ ꓒꓯꓹ ꓛꓱ ꓓꓳ ꓡ ꓢꓲ꓾ ꓬꓲ ꓔꓯ ꓫꓱꓹ ꓖꓶ ꓢꓲ ꓠꓬꓲ ꓾ ꓥꓪ ꓠꓲꓹ ꓫꓵˍ ꓡꓳ꓾ ꓠꓴ ꓫꓬꓻ ꓡꓰ Gꓽ꓾ ꓐꓯ ꓖꓶˍ ꓡꓳ꓿ 42 ꓖꓳ ꓕꓯ ꓖꓳ ꓕꓲ ꓣꓳ ꓔꓸ ꓟꓼ ꓩꓴ ꓓꓲꓻˍ ꓟ ꓬꓲ ꓠꓻ ꓠꓬ ꓞꓼ ꓐꓰ ꓬꓲ ꓔꓯˍ ꓐꓰ ꓓꓳ ꓙꓰ ꓢꓲ ꓬꓲ ꓫꓬꓻ ꓡꓰꓳ꓿ 43 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ ꓡꓲꓽ ꓡꓲˍ ꓡꓰ ꓙꓳꓺ ꓗꓽ ꓖꓶ ꓢꓲ꓾ ꓞꓼ ꓐꓰ ꓙꓰ ꓝꓲ ꓢꓲ ꓠꓬꓲ꓾ 44 ꓮꓽ ꓟ ꓔꓯˍ ꓟꓲ ꓮꓸ ꓫꓵ ꓕꓽ ꓐꓯ ꓖꓶ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓐꓱ ꓶ ꓢꓷꓸ ꓙ ꓟꓳꓻ ꓙ ꓓꓴ ꓬꓰ ꓠꓹ ꓟ꓾ ꓠꓴ ꓖꓳ ꓓꓱ ꓠꓬ ꓔꓲ ꓒꓽ ꓔꓯ ꓟꓳꓸ ꓖꓶ ꓬꓰ ꓢꓲ꓾ ꓠꓴ ꓫꓬꓻ ꓡꓰ ꓟ ꓑꓶꓸ ꓓꓴ꓾ ꓟꓳ-ꓫꓲ ꓡꓰ ꓐꓯ ꓔ ꓬꓰ ꓟ ꓔꓲꓺ ꓓꓴ ꓔꓲꓺ ꓖꓶ ꓬꓰ꓾ ꓐꓯ ꓖꓶˍ ꓡꓳ꓿ 45 ꓖꓳ ꓡꓱ ꓥ ꓟꓲ ꓬꓲ ꓡꓰ ꓓꓳꓽ ꓕꓱ ꓟ ꓕꓲ ꓟꓵꓽ ꓡꓱꓸꓼ ꓚ ꓒꓬꓱ ꓙꓰ ꓠꓬꓲ꓾ ꓬꓰ-ꓢꓴ ꓠꓽ ꓡꓳ ꓒꓱ ꓗꓪ ꓢꓷꓸ ꓢꓷꓸ ꓟꓳꓻ ꓟꓳꓻ ꓓꓵꓽ ꓙꓰ ꓟꓽ ꓠꓺ ꓗꓪ ꓛꓲ ꓗꓷ ꓡꓰꓳ꓿ ꓖꓳ ꓡꓱ ꓠꓬꓲ ꓬꓰ-ꓢꓴ ꓠꓬ ꓡꓽ ꓞꓳ ꓟꓽ ꓟꓬꓽ ꓟ ꓗꓪ ꓙꓵꓺ ꓙꓰ ꓠ ꓗꓷ ꓡꓰˍ ꓡꓳ꓿ ꓖꓳ ꓡꓱ ꓥ ꓟ ꓕꓲ ꓘꓹ ꓡꓰ ꓕꓲ ꓘꓹ ꓗꓪ ꓐꓰ ꓬꓲ ꓔꓯ ꓧꓪ ꓡ ꓢꓴ ꓮꓽ ꓘꓶꓸ ꓟꓬꓽˍ ꓡꓳ꓿

ꓟ-ꓗꓳ 2

1 ꓠꓬꓲꓽ ꓢ ꓠꓬꓲ ꓗꓸ ꓠꓯꓸ ꓬꓰ-ꓢꓴ ꓠꓬ ꓘ-ꓒꓱ-ꓠꓴ ꓗꓪ ꓝꓮꓲ ꓓꓵꓽ ꓡꓰ ꓕꓯ꓾ ꓬꓲ ꓠꓬ ꓦꓲ ꓗꓪ ꓬꓲꓼ ꓛꓲ ꓡꓺꓳ꓾ ꓐꓰ ꓑ ꓫꓬ ꓐꓴ ꓑ ꓙꓽˍ ꓡꓳ꓿ 2 ꓖꓳ ꓡꓱ ꓠꓬꓲ ꓗ ꓘꓶꓽ ꓓꓴꓽ ꓗꓪˍ ꓟꓲ ꓠꓬꓲꓸ ꓠꓸ ꓖꓴ ꓟꓽ ꓙꓳ ꓠ ꓛꓲ꓾ ꓡꓽ ꓞꓳ ꓮꓽ ꓟꓬꓹ ꓜꓲꓼ ꓡ ꓠꓬꓲ꓾ ꓬꓲ ꓡꓰ ꓬꓲ ꓪꓽ ꓔꓯ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ꓿ 3 ꓖꓳ ꓕꓯ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓕꓲ ꓣꓳ ꓔꓯ ꓡꓽ ꓞꓳ ꓡꓲꓸ ꓣꓳ ꓡꓰ ꓑꓱꓸ ꓦ ꓡ ꓡꓳ꓿ 4 ꓞꓳ ꓜꓴ ꓑꓶꓸ ꓓꓴ ꓬꓰ-ꓢꓴ ꓒ ꓕꓲ ꓗꓪ ꓬꓲ ꓪꓽ ꓡ ꓟꓽ ꓠ ꓠꓬꓲ꓾ ꓬꓰ-ꓢꓴ ꓔꓬ ꓟ ꓔꓱꓹ ꓔꓱS ꓗꓪ ꓟ ꓦꓲ ꓪꓴꓸ ꓓꓵ ꓓꓰ ꓔꓯ ꓒꓬꓹ ꓦꓱꓹ ꓗꓷ ꓢꓲ꓾ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓔꓯ ꓬꓲꓸ ꓬꓲꓼ ꓔ ꓔꓬ ꓟ ꓬꓲꓼ ꓖꓴˍ ꓐꓰ ꓩꓴ ꓬꓯꓼ ꓗꓷˍ ꓡꓳ꓿ 5 ꓬꓲ ꓪꓽ ꓙꓵꓻ ꓠꓲꓹ ꓔꓯ ꓬꓰ-ꓢꓴ ꓟꓳꓻ ꓗꓷ ꓠꓬ꓾ ꓛꓲ ꓫꓵ ꓡꓯ ꓫꓵ ꓢꓴ ꓔꓯ꓾ ꓮ ꓐꓲꓳ꓾ ꓠꓴ ꓝꓴꓲ ꓖꓽ ꓖꓶ ꓗꓷꓳ꓾ ꓐꓯ ꓖꓶˍ ꓡꓳ꓿ 6 ꓖꓳ ꓗꓪ ꓠꓬꓲꓸ ꓠꓸ ꓔꓬ ꓟ ꓙꓵꓽ ꓗ ꓟꓸ ꓒ ꓐꓴ ꓕꓲ ꓐꓱ ꓠꓽ ꓬꓲ ꓪꓽ ꓠꓲꓹ ꓟ ꓗꓪ꓾ 7 ꓡ ꓞꓳ ꓕꓱ ꓟ ꓮꓸ ꓫꓵ ꓪꓴꓸ ꓠꓬꓲ ꓕꓱ ꓡꓱ ꓐꓯˍ ꓡ? ꓬꓲ ꓠꓽ ꓐꓯ ꓟꓽ ꓚꓰꓼ ꓟ ꓐꓯˍ ꓡꓳ꓿ ꓪꓴ-ꓢˍ ꓡꓰꓽ ꓟꓽ ꓥ ꓠꓬ ꓝꓴꓲ ꓖꓽ ꓖꓶ ꓐ ꓡ ꓢꓴ ꓟꓽ ꓙꓳ꓾ ꓐꓰ ꓓꓵꓽ ꓙ ꓔꓬ ꓡꓳ꓿ 8 ꓬꓲ ꓪꓽ ꓠꓲꓹ ꓟ ꓗꓪ ꓖꓳ ꓡꓱ ꓓꓵꓽ ꓙ ꓔꓬ ꓟ ꓔꓯ ꓬꓰ-ꓢꓴ ꓠꓲꓹ ꓟ ꓗꓪ ꓞꓼ ꓐꓰ ꓢꓷꓸ ꓡꓰ ꓠꓬꓲ꓾ ꓬꓲ ꓡꓰ ꓬꓲ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓠꓴ ꓪꓽ ꓠꓲꓹ ꓟ ꓗꓪ ꓕꓱ ꓡꓱ ꓓꓵꓽ ꓙ ꓔꓬ ꓡ? 9 ꓛꓲ ꓫꓵ ꓡꓯꓼ ꓫꓵꓻ ꓢꓴ ꓔꓯ꓾ ꓠꓴ ꓝꓴꓲ ꓖꓽ ꓖꓶꓽ ꓗꓷꓳ꓾ ꓐꓯˍ ꓟ꓾ ꓥ ꓠꓬ꓾ ꓔꓴ꓾ ꓠꓴ ꓘꓳꓽ ꓓꓳ ꓔꓯꓹ ꓔ ꓢꓲ ꓙ ꓖꓴ ꓫꓱꓽ꓾ ꓐꓯˍ ꓟ ꓕꓱ ꓠꓬꓲꓽ ꓘꓶ ꓟ꓾ ꓮ ꓡꓲ ꓕꓲ ꓘꓶꓽ ꓐꓯ ꓢꓻˍ ꓡ? 10 ꓡꓽ ꓞꓳ ꓮ ꓐꓲ ꓠꓽ ꓟꓲ ꓠꓯ ꓗꓪ ꓝꓴꓲ ꓖꓽ ꓖꓶ ꓓꓴ ꓙꓵꓽ ꓪ ꓙꓳˍ ꓟ ꓠꓴ ꓪꓽ ꓢꓷꓸ ꓡꓰ ꓠꓹ ꓟ ꓥꓪ ꓕꓱ ꓡꓱ ꓬꓰˍ ꓥꓳ꓾ ꓐꓯ ꓢꓲ꓾ ꓛꓲ ꓫꓵ ꓡꓯꓼ ꓫꓵꓻ ꓢꓴ ꓔꓯ꓾ 11 ꓔꓴ꓾ ꓠꓴ ꓘꓳꓽ ꓓꓳ ꓔꓯꓹ ꓔ ꓢꓲ ꓠꓴ ꓦꓲ ꓗꓪ ꓬꓲꓼ ꓙꓰ꓾ ꓐꓯ ꓖꓶˍ ꓡꓳ꓿ 12 ꓬꓲ ꓠꓬ ꓞꓼ ꓐꓰ ꓔꓴ ꓡ ꓢꓲ꓾ ꓬꓲ ꓘꓳꓽ ꓓꓳꓻ ꓔꓯꓹ ꓔ ꓢꓲ ꓠꓬꓲ꓾ ꓮꓽ ꓙꓵ ꓢꓴ ꓟꓳꓻ ꓟꓳꓻ ꓓꓳ ꓙꓰˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓓꓵꓽ ꓙ ꓟꓶ ꓢꓲ꓾ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓢꓲ ꓠꓬꓲ꓾ ꓕꓱ ꓡꓱ ꓡꓴ ꓫꓵꓽ ꓠꓽ ꓥꓪ ꓠꓴꓽ ꓮ ꓕꓯˍ ꓟꓲ ꓟꓽ ꓟꓳꓻ ꓠꓬꓲ꓾ ꓐꓯˍ ꓡꓳ꓿ 13 ꓬꓰ-ꓢꓴ ꓠꓬ ꓝꓮꓲ ꓕꓲ ꓧꓪꓹ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓓꓳ ꓙꓰˍ ꓕꓯ꓾ ꓞꓳ ꓜꓴ ꓓꓽ ꓟ ꓠꓬ ꓬꓲ ꓔꓬ ꓗꓪ ꓜꓲꓼ ꓡ ꓠꓬꓲ꓾ ꓬꓲ ꓡꓰ ꓬꓲ ꓪꓽ ꓔꓯ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ 14 ꓬꓰ-ꓢꓴ ꓫꓱꓽ ꓗꓳꓸ ꓙꓰ ꓔꓬ ꓕꓯ꓾ ꓮ-ꓡꓱ-ꓒꓲꓹ ꓬꓲ ꓮ ꓐꓲ ꓡꓱ-ꓬꓲ ꓠꓬ ꓝꓲꓸ ꓒꓴꓻ ꓫ ꓖꓴ ꓗꓪ ꓠꓬꓲꓸ ꓠꓸ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓔꓯ ꓛꓳ ꓡꓯ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓡꓱ-ꓬꓲ ꓔꓴ ꓡ ꓢꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ 15 ꓖꓳ ꓗꓸ ꓠꓯꓸ ꓬꓰ-ꓢꓴ ꓠꓬ ꓡꓱ-ꓬꓲ ꓦꓲ ꓗꓪ ꓗꓳꓺ ꓢꓲ ꓜ ꓜꓽ ꓔꓬ ꓕꓯ꓾ ꓝꓲꓸ ꓫ ꓢꓴˍ ꓐꓰ ꓝꓴꓲ ꓙꓳ ꓢꓴ ꓮꓽ ꓟꓬꓹ ꓠꓬ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓕꓲ ꓪꓺꓼ ꓜ ꓜꓽ ꓡ ꓡꓳ꓿ ꓬꓲ ꓪꓽ ꓮꓽ ꓟꓬ ꓣꓳ ꓠꓬ ꓬꓲ ꓔꓯ ꓛꓳ ꓢꓴ ꓐꓴ ꓥ ꓡꓳ꓿ 16 ꓒ-ꓡꓲ-ꓢꓷ ꓐꓴ ꓗꓪ ꓟ ꓙꓵꓽ ꓗ ꓟꓸ ꓒ ꓐꓴ ꓠꓽ꓾ ꓬꓰ-ꓢꓴ ꓠꓬ ꓝꓴꓲ ꓙꓳ ꓢꓴˍ ꓐꓰ ꓝꓲꓸ ꓫ ꓢꓴ ꓐꓴˍ ꓐꓰ ꓕꓲ ꓪꓺꓼ ꓜꓽ ꓔꓬ ꓟ ꓔꓯ ꓟꓳꓻ ꓗꓷ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓬꓲ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓝꓲꓸ ꓫ ꓢꓴˍ ꓐꓰ ꓝꓴꓲ ꓙꓳ ꓢꓴ ꓐꓴˍ ꓐꓰ ꓕꓲ ꓪꓺꓼ ꓜꓽ ꓓꓳꓻ ꓔꓬ ꓡ?꓾ ꓐꓯˍ ꓡꓳ꓿ 17 ꓬꓰ-ꓢꓴ ꓑ ꓙꓽ ꓗꓷ ꓠꓬ ꓬꓲ ꓪꓽ ꓔꓯ꓾ ꓟꓽ ꓠꓻ ꓟꓽ ꓒꓬꓽ ꓢꓴ ꓠꓬ ꓠꓻ ꓫꓬꓹ ꓒ ꓔꓯ ꓣꓱꓽ ꓟꓽ ꓬꓯꓼ꓿ ꓠꓻ ꓢꓴ ꓒꓬꓽ ꓢꓴ ꓠꓽ ꓣꓱꓽ ꓬꓯꓼˍ ꓡꓳ꓿ ꓥꓪ ꓠꓽ ꓔꓱꓹ ꓜꓳꓽ ꓢꓴ ꓔꓯ ꓘꓴꓻˍ ꓐꓰ ꓡꓻ ꓟ ꓟꓽ ꓥ꓿ ꓝꓴꓲ ꓙꓳ ꓢꓴ ꓔꓯ ꓘꓴꓻˍ ꓐꓰ ꓡꓻ ꓟ ꓥ ꓡꓳ꓾ ꓐꓯˍ ꓡꓳ꓿ 18 ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓜꓽ ꓓꓴ ꓚꓲꓸ ꓔꓬ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ ꓡ ꓢꓲ꓾ ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓒ-ꓡꓲ-ꓢꓷ ꓛꓳꓽ ꓒꓯꓹ ꓐꓴ ꓠꓬ ꓜꓽ ꓓꓴ ꓚꓲꓸ ꓔꓬ ꓥ ꓟꓲ꓾ ꓠꓴ ꓛꓳꓽ ꓒꓯꓹ ꓐꓴ ꓠꓽ ꓜꓽ ꓓꓴ ꓟꓽ ꓚꓲꓸ ꓔꓬ꓿ ꓕꓱ ꓟ ꓮꓸ ꓫꓵ ꓪꓴꓸ ꓠꓬꓲ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 19 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓤꓽ ꓟꓶ ꓝꓱꓺ ꓑꓮꓲꓽ ꓗꓪ ꓜꓲꓼ ꓞꓹ ꓟ ꓪꓰ ꓤ ꓐꓴ ꓠꓬ ꓜꓽ ꓓꓴ ꓚꓲꓸ ꓚꓰꓼˍ ꓡ? ꓟꓯꓸ ꓡꓯꓸ ꓒ ꓬꓲ ꓪꓽˍ ꓐꓰ ꓕꓲ ꓪꓺꓼ ꓔꓬ ꓕ ꓑꓳꓸ꓾ ꓬꓲ ꓪꓽ ꓠꓬ ꓜꓽ ꓓꓴ ꓟꓽ ꓚꓲꓸ꓿ 20 ꓖꓳ ꓡꓱ ꓥ ꓟꓲ ꓟꓯꓸ ꓡꓯꓸ ꓒ ꓔꓯ ꓠꓬ꓾ ꓬꓲ ꓪꓽ ꓔꓯˍ ꓐꓰ ꓧꓳꓽ ꓔꓯꓹ ꓙꓰˍ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ ꓖꓳ ꓕꓲ ꓠꓬꓲ ꓗꓪ ꓠꓽ ꓬꓲ ꓪꓽ ꓜꓽ ꓓꓴ ꓚꓲꓸˍ ꓥꓳ꓿ 21 ꓐꓵ ꓞꓶ ꓐꓰꓽ ꓗꓪ ꓟꓶ ꓛ ꓫꓵꓼ ꓡꓰ ꓑꓱꓺ ꓢꓴ ꓟꓽ ꓙꓳ꓿ ꓟꓽ ꓥ ꓠꓬ ꓑꓱ ꓔ ꓟ ꓟꓶ ꓛ ꓫꓵꓼ ꓡꓰ ꓐꓵ ꓞꓶ ꓐꓰꓽ ꓔꓯ ꓟꓬꓽ ꓠꓬꓲ ꓚꓵꓹ ꓧꓽ ꓡꓰˍ ꓥꓳ꓿ 22 ꓝꓮꓲ ꓠꓬ ꓛꓱꓼ ꓡꓱꓼ ꓙꓵ ꓬꓲ ꓫꓵꓼˍ ꓟꓲ ꓧꓪꓽ ꓙꓲ ꓡꓵꓸ ꓐꓰꓽ ꓗꓪ ꓧꓳꓽ ꓢꓴ ꓟꓽ ꓙꓳ꓿ ꓟꓽ ꓥ ꓠꓬ ꓛꓱꓽ ꓡꓱꓼ ꓙꓵꓻ ꓫꓵꓼ ꓡꓰ ꓧꓪꓽ ꓙꓲ ꓡꓵꓸ ꓔꓯ ꓐꓶꓽ ꓡꓰ ꓝꓲ ꓢꓲ꓾ ꓛꓱꓽ ꓡꓱꓼ ꓙꓵꓻˍ ꓟꓲ ꓧꓳꓸ ꓡꓰ꓾ ꓧꓪꓽ ꓙꓲ ꓡꓵꓸˍ ꓟꓲ ꓐꓶꓽ ꓡꓰˍ ꓥꓳ꓿ ꓛꓱꓽ ꓡꓱꓼ ꓙꓵꓻ ꓫꓵꓼ ꓠꓽ ꓧꓪ ꓙꓲ ꓡꓵꓸ ꓫꓵꓼ ꓗꓪ ꓧꓳꓽ ꓓꓴ ꓥ ꓡꓳ꓾ ꓐꓯˍ ꓡꓳ꓿ 23 ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓫꓪꓺ ꓟꓲ ꓗꓪ ꓐꓰ ꓗꓳꓸ ꓙꓰˍ ꓡꓳ꓿ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓕꓱ ꓡꓱ ꓙꓰ ꓕꓱ ꓡꓱ ꓫꓪ ꓠꓱꓺ ꓞꓷꓹ ꓜꓽˍ ꓡꓳ꓿ 24 ꓖꓳ ꓡꓱ ꓠꓬ ꓒ-ꓡꓲ-ꓢꓷ ꓐꓴ ꓡꓰ ꓬꓰ-ꓢꓴ ꓔꓯ꓾ ꓠꓬꓲ ꓠꓹ꓾ ꓠꓽ ꓦꓬꓼ ꓠꓬꓲ ꓗꓪ ꓬꓰ ꓟꓽ ꓓ ꓡꓳ ꓫꓵꓽ ꓬꓲ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓬꓰˍ ꓡ?꓾ ꓐꓯˍ ꓡꓳ꓿ 25 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓓ-ꓪꓵˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓣꓱꓽ ꓛˍ ꓟ ꓐꓰ ꓦꓰꓼ ꓟꓷꓼˍ ꓟ ꓔꓳꓹ ꓜꓳꓽˍ ꓕꓯ ꓬꓲ ꓪꓽ ꓮ ꓡꓲ ꓬꓰ ꓗꓷ ꓟ ꓠꓴ ꓪꓽ ꓟꓽ ꓵꓺ ꓠꓬꓲ ꓡ? 26 ꓮ-ꓐꓱ-ꓬ-ꓕꓱ ꓠꓬ ꓔꓲ ꓒꓽ ꓓꓽ ꓟ ꓣꓱꓽˍ ꓟ ꓦꓬꓼ ꓠꓬꓲ ꓗꓪ꓾ ꓓ-ꓪꓵ ꓠꓬ ꓪꓴ-ꓢ ꓦꓲ ꓗꓪ ꓓꓵꓽ ꓙꓰ ꓢꓲ꓾ ꓔꓲ ꓒꓽ ꓟꓽ ꓥ ꓠꓬ ꓮꓽ ꓟˍ ꓟꓲ ꓜꓽ ꓟꓽ ꓓ ꓟ꓾ ꓲ'ꓺ ꓗꓶ ꓔꓸ ꓟ ꓑ ꓑ ꓜꓽ ꓢꓲ ꓠꓬꓲ꓾ ꓬꓲ ꓛꓳꓽ ꓒꓯꓹ ꓐꓴ ꓔꓯˍ ꓟꓲ ꓖꓶꓽ ꓜꓽˍ ꓡꓳ꓾ ꓐꓰ ꓐꓳ ꓔ ꓟ ꓠꓴ ꓪꓽ ꓟꓽ ꓵꓺ ꓠꓬꓲ ꓡ?꓾ ꓐꓯˍ ꓡꓳ꓿ 27 ꓖꓳ ꓕꓯ ꓬꓲ ꓡꓰ ꓬꓲ ꓪ ꓔꓯ꓾ ꓠꓽ ꓦꓬꓼ ꓠꓬꓲ ꓠꓽ ꓞꓳ ꓤ ꓐꓱ ꓶ ꓬꓰ ꓔ ꓟ ꓥ ꓡꓳ꓿ ꓞꓳ ꓤ ꓠꓬ ꓠꓽ ꓦꓬꓼ ꓠꓬꓲ ꓐꓱ ꓶ ꓚꓰꓼ ꓔ ꓟ ꓟꓽ ꓥ꓿ 28 ꓖꓳ ꓡꓱ ꓠꓬꓲ ꓡ-ꓞꓳ-ꓮ-ꓐꓲ ꓠꓽ꓾ ꓠꓽ ꓦꓬꓼ ꓠꓬꓲꓻ ꓢꓲ ꓒˍ ꓟꓲ ꓥ ꓡꓳ꓾ ꓐꓯ ꓖꓶˍ ꓡꓳ꓿

ꓟ-ꓗꓳ 3

1 ꓬꓰ-ꓢꓴ ꓠꓬ ꓝꓮꓲ ꓕꓲ ꓧꓪꓹ ꓜꓲꓼ ꓦꓲ ꓗꓪ ꓓꓵꓽ ꓡꓰˍ ꓕꓯ꓾ ꓖꓳ ꓗꓪ ꓡꓯꓼ ꓒꓯꓹ ꓕꓲ ꓐ ꓙꓴꓺ ꓡꓰ ꓟ ꓡꓽ ꓞꓳ ꓕꓲ ꓣꓳ ꓔꓬ ꓡꓳ꓿ 2 ꓕꓲ ꓐꓱ ꓠꓬ ꓬꓲ ꓔꓯ ꓓꓰꓺ ꓠꓹ ꓟ꓾ ꓠꓽ ꓦꓬꓼ ꓠꓬꓲꓻ ꓗꓪ ꓖꓳ ꓕꓲ ꓣꓳ ꓔꓯ ꓠꓻ ꓫꓬꓹ ꓖꓶ꓾ ꓟꓽ ꓫꓬꓹ ꓖꓶ꓾ ꓐꓰ ꓬꓲ ꓜꓶ ꓡꓳꓸ ꓔꓬ ꓡꓳ꓿ 3 ꓬꓰ-ꓢꓴ ꓡꓰ꓾ ꓡꓯꓼ ꓒꓯꓹ ꓕꓲ ꓐꓽ ꓙꓴꓺ ꓡꓰ ꓢꓴ ꓖꓳ ꓕꓲ ꓣꓳ ꓔꓯ꓾ ꓦꓰꓼ ꓔꓴ ꓡ ꓢꓲ ꓡꓯꓻ꓾ ꓐꓯ ꓖꓶ ꓢꓲ꓾ 4 ꓬꓲ ꓪꓽ ꓔꓯ꓾ ꓠꓽ ꓦꓬꓼ ꓠꓬꓲ ꓗꓪ꓾ ꓙꓲˍ ꓟ ꓐꓰ ꓟꓽ ꓙꓲˍ ꓟ꓾ ꓢꓯꓼ ꓟꓬ ꓝꓸˍ ꓟ ꓐꓰ ꓢꓰꓼˍ ꓟ꓾ ꓮ ꓡꓲ ꓕꓲ ꓫꓵꓽ ꓬꓰ ꓓꓻ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓠꓽ ꓟꓽ ꓪꓳꓹ ꓔꓬ ꓡꓳ꓿ 5 ꓬꓲ ꓪꓽ ꓠꓲꓹ ꓟ ꓩꓴˍ ꓟ ꓑꓶꓸ ꓓꓴ ꓬꓰ-ꓢꓴ ꓠꓬ ꓠꓲꓹ ꓟ ꓫꓸ ꓠꓬꓲ꓾ ꓦꓶꓻ ꓦꓶˍ ꓡꓰꓽ ꓬꓲ ꓪꓽ ꓔꓯ ꓕꓲꓽ ꓚꓳ ꓡꓳ ꓡꓳꓸ ꓠꓬꓲ ꓗꓷ ꓠꓬ ꓡꓽ ꓞꓳ ꓖꓳ ꓕꓲ ꓣꓳ ꓔꓯ꓾ ꓠꓴ ꓡꓯꓼ ꓒꓯꓹ ꓛꓱ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ ꓬꓲ ꓡꓯꓼ ꓒꓯꓹ ꓛꓱ ꓓꓳ ꓡ ꓠꓬ ꓓꓻ ꓡꓰꓳ꓿ 6 ꓖꓳ ꓡꓱ ꓠꓬ ꓒ-ꓡꓲ-ꓢꓷ ꓐꓴ ꓓꓳ ꓙꓰ ꓢꓲ꓾ ꓬꓰ-ꓢꓴ ꓔꓯ ꓮ ꓡꓲ ꓐꓰ ꓢꓰꓼ ꓠꓹ ꓟ꓾ ꓩꓴ-ꓡꓲ ꓕꓲ ꓧꓳꓽ ꓟ ꓡꓽ ꓞꓳˍ ꓐꓰ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ 7 ꓖꓳ ꓗꓸ ꓠꓯꓸ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓬꓲꓻ ꓡꓴꓽ ꓐꓱ ꓔꓯꓸ ꓟꓳꓸ ꓙꓵꓺ ꓙꓰ ꓠꓬ꓾ ꓖ-ꓡꓲ-ꓡꓲ ꓗꓪ ꓐꓰ ꓡꓻ ꓟ ꓞꓳ ꓜꓴ ꓞꓳ ꓟꓯꓼˍ ꓐꓰ꓾ ꓬꓴ-ꓔ ꓟꓵꓽ ꓢꓴˍ ꓟꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ 8 ꓝꓮꓲ ꓙꓱ-ꓣꓴ-ꓢ-ꓡꓱˍ ꓐꓰ ꓬꓲ-ꓓꓳ-ꓟꓷˍ ꓐꓰ ꓬꓳ-ꓔ ꓬꓲꓽ ꓟ ꓖꓳ ꓐ ꓢꓲ꓾ ꓕꓲ-ꓬˍ ꓐꓰ ꓢꓲ-ꓓꓳ ꓚꓳ ꓡꓳ ꓗꓪ ꓔꓬ ꓢꓴ ꓞꓳ ꓜꓴ ꓞꓳ ꓟꓯꓼ ꓐꓴˍ ꓟꓲ꓾ ꓬꓲ ꓬꓰˍ ꓟ ꓟꓬꓱꓽ ꓔꓯ ꓑ ꓙꓽ ꓢꓲ ꓬꓲ ꓔꓯ ꓡꓻ ꓡꓳ꓿ 9 ꓞꓳ ꓜꓴ ꓡꓰ ꓬꓲ ꓔꓯ ꓟꓽ ꓝꓲꓽ ꓡ ꓠꓹ ꓟ꓾ ꓡꓲꓺ ꓤ ꓕꓲ ꓟ ꓧꓪ ꓔ ꓖꓶ꓾ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓐꓯ ꓖꓶˍ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓡꓽ ꓞꓳ ꓮꓽ ꓟꓬꓹ ꓣꓳ ꓔꓯ ꓫꓬꓹ ꓓꓻ ꓡꓰ ꓠꓬꓲ꓾ ꓠꓻ ꓢꓴ ꓥ ꓕ ꓑꓳꓸ ꓬꓲ ꓔꓯ ꓫꓱꓹ ꓪ ꓠꓹ ꓟ ꓑꓵꓺ ꓡ ꓡꓳ꓿ 11 ꓠꓲꓽ ꓟꓯꓹ ꓢꓴˍ ꓟꓲ ꓬꓲ ꓔꓯ ꓮ ꓕꓯꓽ ꓟꓳꓻ ꓠꓬ ꓖꓳ ꓕꓯꓽ ꓬꓲ ꓟꓲꓽ ꓙꓬꓽ ꓗꓪ ꓟꓳꓼ ꓡ ꓢꓲ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥꓳ꓾ ꓐꓰ ꓘꓴꓻˍ ꓡꓳ꓿ 12 ꓬꓲ ꓮꓽ ꓟ ꓥ ꓟ ꓢꓴ ꓔꓯ ꓕꓽ ꓢꓷꓸ ꓡꓰ ꓝꓲ꓾ ꓐꓰ ꓬꓲ ꓪꓽ ꓔꓯ ꓕꓵꓼ ꓪ ꓖꓶˍ ꓡꓳ꓿ 13 ꓗꓸ ꓠꓯꓸ ꓬꓰ-ꓢꓴ ꓠꓬ ꓪꓽ ꓚꓲ ꓗꓪ ꓓꓯ ꓙꓰ ꓢꓲ꓾ ꓬꓲ ꓘꓴ ꓠꓲꓹ ꓫꓵˍ ꓟ ꓕꓲ ꓧꓳꓽ ꓔꓯ ꓘꓴꓻ ꓗꓷ ꓠꓬ꓾ ꓬꓲ ꓪꓽ ꓬꓲ ꓔꓯ ꓡꓻ ꓡꓳ꓿ 14 ꓬꓲˍ ꓐꓰ ꓕꓲ ꓪꓺꓼ ꓔꓬ ꓠꓹ ꓟ ꓐꓰ꓾ ꓟꓸ ꓟꓲꓽ ꓚ ꓙꓰ ꓝꓲ ꓠꓹ ꓟ ꓡꓽ ꓞꓳ ꓞꓲ ꓠꓬꓲꓽ ꓣꓳ ꓔꓯ ꓢꓲꓺ ꓚꓰꓸ ꓗꓷ ꓠꓬ꓾ ꓬꓲ ꓪꓽ ꓔꓯ꓾ ꓝꓲ ꓓꓴ꓾ ꓐꓰ ꓟꓬꓱꓺ ꓖꓶˍ ꓡꓳ꓿ 15 ꓖꓳ ꓡꓱ ꓢꓲ ꓬꓲ ꓪꓽ ꓔꓯ ꓠꓲꓽ ꓖꓼ ꓓꓳ ꓠꓹ ꓟ ꓙꓵꓽ ꓪꓽˍ ꓟꓲ ꓖꓶˍ ꓡꓳ꓿ 16 ꓬꓲ ꓪꓽ ꓞꓲ ꓠꓬꓲꓽ ꓣꓳ ꓟ ꓟꓬꓱꓺ ꓠꓬ꓾ ꓬꓰ-ꓢꓴ ꓡꓰ ꓒꓲ-ꓕꓱ ꓟꓬꓱꓺ ꓔ ꓟ ꓢꓲ-ꓟꓴ꓾ 17 ꓐꓳ-ꓪ-ꓠꓱ-ꓙꓲ ꓟꓬꓱ ꓔ ꓟ ꓜꓲ-ꓐꓱ-ꓓꓲ ꓬꓲ ꓮ ꓐꓲ ꓬ-ꓗꓴˍ ꓐꓰ ꓬꓲ ꓠꓬꓲ ꓤ ꓬꓳ-ꓦ꓾ (ꓐꓳ-ꓪ-ꓠꓱ-ꓙꓲ ꓐꓯˍ ꓟ ꓠꓬ꓾ ꓟꓴꓽ ꓖꓴꓽ ꓮ ꓐꓲ ꓐꓴ꓾ ꓐꓯˍ ꓟ ꓥꓳ꓿) 18 ꓯ-ꓓꓱ-ꓣꓴ꓾ ꓒꓲ-ꓡꓲ꓾ ꓐ-ꓕꓳ-ꓡꓱ-ꓟꓲ꓾ ꓟ-ꓕꓲ꓾ ꓕꓳ-ꓟ꓾ ꓮ-ꓡꓱ-ꓒꓲꓹ ꓬꓲ ꓮ ꓐꓲ ꓬ-ꓗꓴ꓾ ꓕ-ꓓꓲ-ꓪꓴ꓾ ꓘ-ꓠ ꓢꓴ ꓢꓲ-ꓟꓴˍ ꓐꓰ꓾ 19 ꓬꓰ-ꓢꓴ ꓔꓯ ꓪꓴꓽ ꓜ ꓢꓴ ꓘ-ꓡꓲꓳ ꓢꓴ ꓬꓴ-ꓓꓽ ꓥ ꓡꓳ꓿ 20 ꓖꓳ ꓗꓸ ꓠꓯꓸ ꓬꓰ-ꓢꓴ ꓠꓬ ꓦꓲ ꓕꓲ ꓦꓲ ꓗꓪ ꓓꓵꓽ ꓙꓰ ꓠꓬ꓾ ꓬꓲ ꓪꓽ ꓜꓻˍ ꓟꓲ ꓜꓽ ꓙꓵꓹ ꓟꓽ ꓙꓳ ꓗꓪ ꓛꓲ ꓡꓽ ꓞꓳ ꓬꓲ ꓜꓴ ꓜꓲꓼ ꓡ ꓢꓰ ꓡꓳ꓿ 21 ꓬꓲ ꓫꓵꓽ ꓬꓲ ꓧꓪ ꓐꓴ ꓑ ꓙꓽ ꓡꓰ ꓠꓬ꓾ ꓬꓲ ꓠꓽ ꓪꓴꓸ ꓡꓰꓳ꓾ ꓐꓯ ꓢꓲ꓾ ꓬꓲ ꓔꓯ ꓣꓴˍ ꓐꓰ ꓓꓳ ꓙꓰˍ ꓡꓳ꓿ 22 ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓬꓯꓼ ꓡ ꓟ ꓙꓵꓽ ꓗ ꓟꓸ ꓒ ꓐꓴ ꓠꓬ꓾ ꓬꓲ ꓔꓯ ꓠꓽ ꓐꓲ-ꓜꓲ-ꓐꓷ ꓓꓯꓹ ꓢꓲ꓾ ꓠꓲꓽ ꓪ ꓔꓲ ꓢꓯꓼ ꓗꓪ ꓐꓰ ꓠꓲꓽ ꓖꓼˍ ꓡꓳ꓾ ꓐꓰ ꓐꓯˍ ꓡꓳ꓿ 23 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓔꓯ ꓥꓳꓽ ꓗꓪ ꓐꓰ ꓬꓲ ꓪꓽ ꓔꓯ꓾ ꓢ-ꓓꓯ ꓠꓬ ꓢ-ꓓꓯ ꓔꓯ ꓮ ꓡꓲ ꓖꓼ ꓓꓳ ꓗꓷ ꓗꓴ ꓢꓰꓽ? 24 ꓗꓴꓷ ꓕꓲ ꓗꓴꓷ ꓗꓪ ꓒꓳꓹ ꓡꓯꓽ ꓘꓳˍ ꓟ ꓙꓳˍ ꓠꓬ ꓖꓳ ꓕꓲ ꓗꓴꓷꓼ ꓠꓽ ꓔꓳꓹ ꓞꓹ ꓟꓽ ꓘꓴ꓿ 25 ꓕꓲ ꓦꓲ ꓢꓴ ꓗꓪꓺ ꓡꓯꓽ ꓘꓳˍ ꓟꓲ ꓖꓳ ꓕꓲ ꓦꓲ ꓠꓽ ꓤꓰꓻ ꓞꓹ ꓟꓽ ꓘꓴ꓿ 26 ꓢ-ꓓꓯˍ ꓟꓲ ꓬꓲ ꓚꓲꓸ ꓛꓬˍ ꓐꓰ ꓒꓳꓹ ꓡꓯꓽ ꓘꓳ ꓢꓲ ꓗꓪꓺ ꓞꓹ ꓠꓬ꓾ ꓬꓲ ꓠꓽ ꓔꓳꓹ ꓞꓹ ꓟꓽ ꓘꓴ ꓢꓲ ꓬꓲ ꓑꓶꓸ ꓞꓷꓹ ꓗꓷˍ ꓥꓳ꓿ 27 ꓝꓮꓲ ꓠꓬ꓾ ꓢꓯꓼ ꓙꓳ ꓒ ꓔꓯ ꓧꓶꓸ ꓕꓯ ꓟꓽ ꓞꓳꓹ ꓗꓷ ꓠꓬ꓾ ꓬꓲ ꓦꓲ ꓗꓪ ꓓꓵꓽ ꓙꓰ ꓢꓲ ꓬꓲ ꓖꓴꓽ ꓙꓴꓽ ꓔꓯ ꓦꓴ ꓔꓯꓹ ꓙꓰ ꓐ ꓡ ꓢꓴ ꓟꓽ ꓙꓳ꓿ ꓞꓳꓹ ꓗꓷ ꓗꓸ ꓠꓯꓸ ꓢꓲˍ ꓡꓰꓽ ꓬꓲ ꓖꓴꓽ ꓙꓴꓽ ꓦꓴ ꓔꓯꓹ ꓙꓰ ꓐ ꓡ ꓥꓳ꓿ 28 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓡꓽ ꓞꓳ ꓝꓴꓲ ꓮꓽ ꓙꓵˍ ꓐꓰ ꓟꓽ ꓚꓰꓼ ꓟ ꓙꓱꓽ ꓘꓶꓽ ꓮꓽ ꓙꓵ ꓠꓬ ꓖꓽ ꓖꓶˍ ꓢꓰꓽ ꓥꓳ꓿ 29 ꓖꓳ ꓡꓱ ꓥ ꓟꓲ ꓢꓲ-ꓫꓬ-ꓟ-ꓦ ꓔꓯ ꓟꓽ ꓚꓰꓼ ꓟ ꓙꓱꓽ ꓢꓴ ꓠꓽ ꓖꓽ ꓖꓶˍ ꓟ ꓟꓶ ꓟꓽ ꓓ꓿ ꓬꓲ ꓠꓽ ꓕꓲ ꓞꓲꓼ ꓕꓲ ꓑ ꓟ ꓝꓴꓲ ꓟꓶˍ ꓥꓳ꓾ ꓐꓯˍ ꓡꓳ꓿ 30 ꓬꓲ ꓡꓰ ꓬꓲ ꓪꓽ ꓔꓯ ꓕꓱ ꓡꓱ ꓐꓯ ꓖꓶˍ ꓟ ꓠꓬ꓾ ꓬꓲ ꓔꓯ ꓟꓽ ꓫꓬ ꓠꓲꓽ ꓕꓲ ꓟ ꓓꓯꓹ ꓡꓳ꓾ ꓐꓰ ꓐꓯ ꓢꓴ ꓙꓳˍ ꓠꓬꓲ ꓥ ꓡꓳ꓿ 31 ꓖꓳ ꓕꓯ ꓠꓬ ꓬꓲ ꓟꓹ ꓟ ꓐꓰ ꓬꓲ ꓠꓬꓲ ꓤ ꓐꓴ ꓡ ꓢꓲ꓾ ꓠꓱ ꓫꓱꓸ ꓟꓸꓼ ꓗꓪ ꓦꓰꓼ ꓞ ꓢꓲ ꓠꓬꓲ꓾ ꓬꓲ ꓔꓯ ꓘꓴ ꓬꓰ ꓝꓲˍ ꓡꓳ꓿ 32 ꓬꓲ ꓚꓳ ꓡꓳ ꓗꓪ ꓠꓬ ꓞꓳ ꓜꓴ ꓠꓬꓲꓸ ꓠꓸ ꓔꓬ ꓡꓳ꓿ ꓬꓲ ꓪꓽ ꓠꓬ ꓬꓲ ꓔꓯ꓾ ꓠꓬꓲ ꓠꓹ꓾ ꓠꓴ ꓟꓹ ꓟ ꓐꓰ ꓠꓴ ꓠꓬꓲ ꓤ ꓐꓴ ꓠꓱ ꓫꓱꓸ ꓟꓸꓼ ꓗꓪ ꓠꓴ ꓔꓯ ꓦꓴ ꓠꓬꓹ ꓔꓬ ꓡꓳ꓾ ꓐꓯˍ ꓡꓳ꓿ 33 ꓬꓲ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓟꓹ ꓟ ꓐꓰ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓠꓬ ꓮꓽ ꓟ ꓥ ꓡ?꓾ ꓐꓰ ꓐꓯ ꓗꓷ ꓠꓬ꓾ 34 ꓬꓲ ꓚꓳ ꓡꓳ ꓗꓪ ꓠꓬꓲꓸ ꓠꓸ ꓔꓬ ꓢꓴ ꓐꓴ ꓔꓯ ꓡꓳꓸ ꓢꓲ꓾ ꓠꓬꓲ ꓠꓹ꓾ ꓥꓪ ꓟꓹ ꓟ ꓐꓰ ꓥꓪ ꓬꓲꓼ ꓥꓪ ꓠꓬꓲ ꓐꓴ꓿ 35 ꓮꓽ ꓟ ꓥ ꓟꓲ ꓪꓴ-ꓢ ꓠꓲꓹ ꓡꓶ ꓛꓳ ꓢꓴ ꓖꓳ ꓕꓲ ꓣꓳ ꓠꓽ꓾ ꓥꓪ ꓬꓲꓼ ꓥꓪ ꓠꓬꓲˍ ꓐꓰ ꓮꓸ ꓝꓲ ꓠꓬꓲ ꓟ ꓐꓰ ꓥꓪ ꓟꓹ ꓟ ꓥ ꓡꓳ꓾ ꓐꓯˍ ꓡꓳ꓿

ꓟ-ꓗꓳ 4

1 ꓬꓰ-ꓢꓴ ꓠꓬ ꓝꓮꓲ ꓕꓲ ꓧꓪꓹ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓟꓸ ꓟꓲꓽ ꓟꓸ ꓖꓶˍ ꓢꓰꓽ ꓡꓳ꓿ ꓬꓲ ꓔꓬ ꓗꓪ ꓞꓳ ꓜꓴ ꓞꓳ ꓟꓯꓼ ꓜꓲꓼ ꓡ ꓠꓬꓲ꓾ ꓬꓲ ꓠꓬ ꓬꓲꓻ ꓡꓴꓽ ꓐꓱ ꓗꓪ ꓟ ꓡꓲ ꓗꓪ ꓓꓵꓽ ꓡꓰ ꓢꓲ ꓠꓬꓲꓸ ꓠꓸˍ ꓡꓳ꓿ ꓞꓳ ꓜꓴ ꓮꓽ ꓙꓵ ꓠꓬ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓔꓬ ꓡꓳ꓿ 2 ꓬꓲ ꓠꓬ ꓔꓯ ꓥꓳꓽ ꓗꓪ ꓐꓰ ꓬꓲ ꓪꓽ ꓔꓯ ꓮꓽ ꓟꓬꓹ ꓫꓵꓽ ꓟꓸ ꓖꓶ ꓢꓲ ꓕꓱ ꓡꓱ ꓐꓯˍ ꓡꓳ꓿ 3 ꓠ ꓠꓹ꓾ ꓜꓻ ꓫꓵꓸ ꓫꓵꓸ ꓢꓴ ꓠꓬ ꓜꓻ ꓫꓵꓸ ꓫꓵˍ ꓐꓰ ꓓꓳ ꓙꓰˍ ꓡꓳ꓿ 4 ꓬꓲ ꓫꓵꓸˍ ꓕꓯ꓾ ꓕꓲ ꓐꓱ ꓠꓬ ꓙ ꓖꓴ ꓘꓶꓽ ꓗꓪ ꓞꓰꓻ ꓡꓰ ꓢꓲ ꓠꓬꓹ ꓡꓰ ꓖꓳꓺ ꓜꓽˍ ꓡꓳ꓿ 5 ꓕꓲ ꓐꓱ ꓠꓬ ꓠꓱꓸ ꓦꓱꓽ ꓮꓽ ꓟꓬꓹ ꓟꓽ ꓙꓳ ꓟ Bꓸ ꓒꓲꓽ ꓓꓰ ꓗꓪ ꓞꓰꓻ ꓡꓰˍ ꓡꓳ꓿ ꓠꓱꓸ ꓦꓱꓽ ꓟꓽ ꓠꓯꓸ ꓠꓬꓲ ꓞꓼ ꓐꓰ ꓣꓱꓻ ꓡ ꓥ ꓟꓲ꓾ 6 ꓟꓲꓽ ꓟꓲ ꓓꓳ ꓡ ꓢꓲ ꓞ ꓡ ꓠꓬ꓾ ꓬꓲ ꓚꓰ ꓟꓽ ꓙꓳ ꓠꓬꓲ ꓙꓴꓺ ꓬꓰꓳ꓿ 7 ꓜ ꓫꓵꓸ ꓕꓲ ꓐꓱ ꓠꓬ ꓛꓴꓽ ꓠꓯꓸꓼ ꓗꓪ ꓞꓰ ꓡꓰ ꓢꓲ꓾ ꓛꓴꓽ ꓪꓴꓽ ꓡ ꓢꓲ ꓦꓵꓹ ꓗꓷ ꓠꓬꓲ ꓬꓲ ꓢꓶꓽ ꓟꓽ ꓓꓱꓼ ꓡ꓿ 8 ꓜ ꓫꓵꓸ ꓝꓮꓲ ꓕꓲ ꓐꓱ ꓠꓬ ꓟꓵꓽ ꓙꓲˍ ꓟ ꓗꓪ ꓞꓰ ꓡꓰ ꓢꓲ꓾ ꓪꓴꓽˍ ꓟꓲ ꓪꓴ ꓡ꓾ ꓟꓬꓽˍ ꓟꓲ ꓟꓬꓽ ꓡ ꓢꓲ ꓬꓲ ꓢꓶꓽ ꓓꓱꓼ ꓡ ꓠꓬ꓾ ꓕꓲ ꓙꓳꓻ ꓫꓵꓸ ꓗꓷ ꓟ ꓗꓪ꓾ ꓢ ꓞꓲ ꓙꓳꓻ꓾ ꓛꓳꓼ ꓞꓲ ꓙꓳ꓾ ꓕꓲ ꓦꓬꓻ ꓙꓳꓻ ꓫ ꓟꓶˍ ꓟ ꓙꓳˍ ꓡꓳ꓿ 9 ꓠꓸ ꓑꓳ ꓙꓳ ꓢꓴ ꓠ ꓠꓹ꓾ ꓐꓯˍ ꓡꓳ꓿ 10 ꓬꓲ ꓕꓲ ꓣꓳ ꓔꓵꓸꓼ ꓔꓬ ꓕꓯ꓾ ꓬꓲˍ ꓐꓰ ꓕꓲ ꓪꓺꓼ ꓔꓬ ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓡꓰ ꓔꓯ ꓥꓳꓽ ꓕꓱ ꓟ ꓔꓯꓸ ꓟꓳꓸ ꓬꓲ ꓔꓯ ꓠ ꓠꓬꓲ ꓡ ꓡꓳ꓿ 11 ꓖꓳ ꓡꓱ ꓠꓬ ꓬꓲ ꓡꓰ ꓬꓲ ꓪꓽ ꓔꓯ꓾ ꓪꓴ-ꓢ ꓗꓴꓷ ꓗꓪ ꓟ ꓚꓵ ꓘꓶꓽ ꓠꓬ ꓠꓴ ꓪꓽ ꓔꓯ ꓖꓶ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓠꓱ ꓫꓱꓸ ꓟS ꓗꓪ ꓔꓬ ꓢꓴ ꓔꓯ ꓠꓽ ꓔꓯ ꓥꓳꓽ ꓗꓪ ꓐꓰˍ ꓡꓰꓽ ꓟꓸ ꓖꓶˍ ꓟ ꓟꓶˍ ꓡꓳ꓿ 12 ꓕꓱ ꓟ ꓠꓬ꓾ ꓬꓲ ꓪꓽ ꓠꓽ ꓡꓳꓸ ꓔꓬ ꓥ ꓟꓲ ꓟꓽ ꓡꓳꓸ ꓓꓳ ꓡ ꓠꓹ ꓟ꓾ ꓠ ꓠꓹ ꓔꓬˍ ꓟꓲ ꓟꓽ ꓙꓽ ꓜꓲꓼ ꓡꓰ ꓠꓹ ꓟ꓾ ꓔꓯꓺ ꓥꓳꓽ ꓣꓱꓽˍ ꓟ ꓥꓳ꓿ ꓬꓲ ꓪꓽ ꓡꓳꓸ ꓓꓳ ꓡ ꓢꓲ ꓙꓽ ꓜꓲꓼˍ ꓠꓬ꓾ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓝꓴꓲ ꓖꓽ ꓖꓶ ꓟꓶˍ ꓡꓳ ꓫꓵꓽ ꓥꓳ꓾ ꓐꓯˍ ꓟ ꓐꓲ ꓡ ꓝꓲ ꓠꓹ ꓟ ꓥ ꓡꓳ꓾ ꓐꓯˍ ꓡꓳ꓿ 13 ꓝꓮꓲ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓔꓯ ꓥꓳꓽ ꓕꓱ ꓕꓲ ꓟ ꓠꓴ ꓪꓽ ꓟꓽ ꓙꓽ ꓜꓲꓼ ꓠꓬ꓾ ꓠꓱꓸ ꓐꓯꓼ ꓔꓯ ꓥꓳꓽ ꓠꓴ ꓪꓽ ꓮ ꓡꓲ ꓙꓽ ꓜꓲꓼ ꓐ ꓡ ꓢꓰꓽ꓿ 14 ꓜꓻ ꓫꓵꓸ ꓫꓵ ꓢꓴ ꓠꓬ ꓪꓴ-ꓢ ꓐꓯ ꓘꓶꓽ ꓫꓵꓸˍ ꓡꓳ꓿ 15 ꓙ ꓖꓴ ꓘꓶꓽ ꓗꓪ ꓫꓵꓸ ꓔ ꓟ ꓐꓯ ꓘꓶꓽ ꓠꓽ꓾ ꓬꓲ ꓪꓽ ꓑ ꓙꓽ ꓗꓷ ꓗꓸ ꓠꓯꓸ ꓞꓼ ꓐꓰ ꓢ-ꓓꓯ ꓡ ꓢꓲ ꓬꓲ ꓪꓽ ꓠꓲꓹ ꓟ ꓗꓪ ꓫꓵꓸ ꓔ ꓟ ꓐꓯ ꓘꓶꓽ ꓔꓯ ꓣꓴ ꓦ ꓗꓷˍ ꓟ ꓖꓳ ꓕꓲ ꓧꓳꓽ ꓥ ꓡꓳ꓿ 16 Bꓸ ꓒꓲꓽ ꓓꓰ ꓗꓪ ꓫꓵꓸ ꓔ ꓟ ꓠꓽ꓾ ꓐꓯ ꓘꓶꓽ ꓔꓯ ꓑ ꓙꓽ ꓗꓷ ꓟꓶꓽ ꓕꓯ꓾ ꓠꓲꓹ ꓒꓴ ꓒꓴˍ ꓐꓰ ꓘꓳ ꓣꓴˍ ꓟ ꓕꓲ ꓧꓳꓽ ꓥ ꓡꓳ꓿ 17 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓯS ꓗꓪ ꓬꓲ ꓚꓰ ꓟꓽ ꓙꓳ ꓠꓬꓲ ꓕꓲ ꓑꓹ ꓤˍ ꓡꓰꓽ ꓜꓲꓽˍ ꓡꓳ꓿ ꓬꓲ ꓪꓽ ꓠꓬ ꓐꓯ ꓘꓶꓽ ꓪꓴꓸ ꓠꓬꓲ ꓫꓸ ꓙꓵˍ ꓟ꓾ ꓥ ꓠꓬ ꓗꓸ ꓧꓪˍ ꓟ ꓓꓳ ꓡ ꓕꓯ꓾ ꓞꓼ ꓐꓰ ꓒꓳꓹ ꓬꓲꓼ ꓙꓰˍ ꓡꓳ꓿ 18 ꓝꓮꓲ ꓛꓴꓽ ꓠꓯꓸꓼ ꓗꓪ ꓫꓵꓸ ꓔ ꓕꓲ ꓧꓳꓽ ꓟ ꓠꓽ꓾ ꓬꓲ ꓪꓽ ꓠꓬ ꓐꓯ ꓘꓶꓽ ꓑ ꓙꓽ ꓗꓷˍ ꓟꓲ꓾ 19 ꓟꓲ ꓠꓯ ꓙꓽ ꓫꓸˍ ꓟ ꓐꓰ꓾ ꓒꓴ ꓤ ꓫꓵ ꓤ ꓡꓰ ꓗꓶꓸˍ ꓟ ꓐꓰ꓾ ꓠꓱꓸ ꓐꓯꓼ ꓠꓱꓸ ꓙꓲ ꓔꓯ ꓠꓲꓹ ꓦꓯꓸˍ ꓟ ꓡꓰ ꓐꓯ ꓘꓶꓽ ꓔꓯ ꓩꓵꓹ ꓗꓷ ꓠꓬꓲ꓾ ꓬꓲ ꓢꓶꓽ ꓟꓽ ꓓꓱꓼ ꓡ ꓗꓷ ꓡꓰ ꓕꓲꓽ ꓧꓳꓽ ꓟ ꓥ ꓡꓳ꓿ 20 ꓟꓵꓽ ꓙꓲꓻ ꓗꓪ ꓫꓵꓸ ꓔ ꓕꓲ ꓧꓳꓽ ꓟ ꓠꓽ꓾ ꓐꓯ ꓘꓶꓽ ꓔꓯ ꓑ ꓙꓽ ꓢꓲ ꓘꓳ ꓣꓴ ꓢꓴ ꓥꓳ꓿ ꓕꓱ ꓕꓲ ꓧꓳꓽ ꓟ ꓬꓲ ꓢꓶꓽ ꓓꓱꓼ ꓡ ꓠꓬ꓾ ꓕꓲꓽ ꓙꓳꓻ ꓫꓵꓸ ꓗꓷ ꓟ ꓗꓪ꓾ ꓢ ꓞꓲ ꓙꓳ꓾ ꓛꓳꓼ ꓞꓲ ꓙꓳ꓾ ꓕꓲ ꓦꓬꓻ ꓙꓳꓻ꓾ ꓓꓱꓼˍ ꓟ ꓙꓳˍ ꓡꓳ꓾ ꓐꓯˍ ꓡꓳ꓿ 21 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓕꓱ ꓡꓱ ꓐꓯ ꓖꓶˍ ꓢꓰꓽ ꓡꓳ꓾ ꓟꓬ ꓡꓴꓻ ꓔꓯꓹ ꓡ ꓠꓬ꓾ ꓡꓳꓻ ꓠꓯꓸ ꓘꓪ꓾ ꓥ ꓠꓬ ꓘꓹ ꓛꓽ ꓠꓯꓸ ꓘꓪ ꓗꓶ ꓔꓸ ꓓꓴ ꓥ ꓡ? ꓟꓬ ꓡꓴ ꓕꓲꓺ ꓗꓪ ꓗꓶ ꓔꓸ ꓓꓴ ꓟꓽ ꓥ ꓡ? 22 ꓮ ꓡꓲꓳ ꓐꓯ ꓠꓬ ꓚꓵ ꓔ ꓟ ꓠꓽ ꓟꓽ ꓟꓳꓸ ꓖꓶ ꓡ ꓡꓳ ꓫꓵꓽ ꓟꓽ ꓙꓳ꓿ ꓘꓶꓽ ꓞꓲꓽ ꓔ ꓟˍ ꓟꓲ ꓟꓽ ꓐꓯ ꓓꓳ ꓡ ꓟ ꓟꓽ ꓙꓳ꓿ 23 ꓠꓸ ꓑꓳ ꓙꓳ ꓢꓴ ꓠ ꓠꓹ꓾ ꓐꓯˍ ꓡꓳ꓿ 24 ꓝꓮꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓑ ꓙꓽˍ ꓟ ꓔꓯ ꓬꓲ ꓜꓶ ꓓꓵꓽ ꓙ ꓠꓬꓲ꓿ ꓠꓴ ꓪꓽ ꓙꓳ ꓓꓴ ꓮ ꓡꓲ ꓫꓵꓽ ꓡꓰ ꓢꓴ ꓔꓯ ꓙꓳꓻ ꓖꓶˍ ꓠꓬ꓾ ꓢꓴˍ ꓟꓲ ꓙꓳ ꓓꓴ ꓖꓳ ꓟ ꓡꓰ ꓠꓴ ꓪꓽ ꓔꓯ ꓙꓳꓻ ꓡꓲꓸ ꓖꓶ ꓡ ꓥꓳ꓿ ꓟꓬꓽ ꓠꓬꓲˍ ꓟꓲ ꓠꓴ ꓪꓽ ꓔꓯ ꓖꓶ ꓡ ꓢꓰꓽ ꓥꓳ꓿ 25 ꓮ ꓡꓲꓳ ꓐꓯ ꓠꓬ ꓙꓳ ꓢꓴ ꓔꓯ ꓠꓽ ꓟꓬꓽ ꓠꓬꓲ ꓖꓶ ꓡ ꓢꓰꓽ ꓥꓳ꓿ ꓟꓽ ꓙꓳ ꓢꓴ ꓔꓯ ꓠꓽ ꓬꓲ ꓮ ꓔꓲꓸ ꓤ ꓙꓳˍ ꓟ ꓟꓲ ꓣꓴ ꓔꓯꓹ ꓙꓰˍ ꓥꓳ꓾ ꓐꓯˍ ꓡꓳ꓿ 26 ꓝꓮꓲ ꓬꓰ-ꓢꓴ ꓡꓰ꓾ ꓪꓴ-ꓢ ꓗꓴꓷ ꓠꓬ ꓡꓽ ꓞꓳ ꓕꓲ ꓣꓳ ꓡꓰ ꓟꓲ ꓛꓬ ꓗꓪ ꓜ ꓫꓵꓸ ꓫꓵ ꓔ ꓟ ꓡꓰ ꓐꓰ ꓗꓹ ꓡꓳ꓿ 27 ꓫꓵꓸ ꓢꓴ ꓠꓬ ꓢ ꓘꓪ ꓬꓲꓼ ꓟꓶ ꓢꓲ꓾ ꓟꓳꓼ ꓡꓳ ꓔꓴ ꓡ꓾ ꓐꓰ ꓔꓬ ꓕꓯ꓾ ꓜ ꓫꓵꓸ ꓖꓳ ꓟˍ ꓟꓲ ꓣꓱꓻ ꓡ ꓢꓲ ꓪꓴꓽ ꓡ ꓔꓬ ꓟ꓾ ꓮ ꓡꓲ ꓐꓰ ꓖꓳ ꓡꓱ ꓒꓬꓱꓼ ꓡ ꓟ ꓬꓲ ꓟꓽ ꓢꓷ꓿ 28 ꓜꓽ ꓪꓳꓽ ꓡꓳ ꓪꓳ ꓠꓬ ꓫꓵꓸ ꓗꓷ ꓗꓸ ꓠꓯꓸ꓾ ꓟꓲ ꓠꓯ ꓗꓪ ꓐꓰ ꓬꓲ ꓚꓲꓸ ꓛꓬ ꓣꓱꓻ ꓡ ꓢꓲ꓾ ꓬꓲ ꓪꓴꓸ ꓠꓬ ꓬꓲ ꓡꓯꓸ ꓒꓬꓽ꓾ ꓗꓸ ꓠꓯ ꓠꓬ ꓬꓲ ꓠꓱꓺ꓾ ꓖꓳ ꓗꓸ ꓠꓯꓸ ꓬꓲ ꓠꓱ ꓗꓪ ꓟꓻ ꓔꓰꓹ ꓡꓰ ꓟ ꓬꓲꓸ ꓟ ꓢꓶꓽ ꓙꓳ ꓡ ꓡꓳ꓿ 29 ꓜ ꓪꓳ ꓡꓳ ꓪꓳ ꓟꓲꓺ ꓡ ꓠꓬ ꓜ ꓫ ꓝꓲꓸ ꓛꓲ ꓡ ꓠꓬꓲ꓾ ꓬꓲ ꓠꓬ ꓟꓳꓸ ꓞꓳꓹ ꓣꓱꓽ ꓢꓲ ꓶꓼˍ ꓡꓳ꓾ ꓐꓯˍ ꓡꓳ꓿ 30 ꓝꓮꓲ ꓬꓰ-ꓢꓴ ꓡꓰ꓾ ꓪꓴ-ꓢ ꓗꓴꓷ ꓠꓬ ꓣꓳ ꓮꓸ ꓫꓵ ꓔꓯ ꓔꓯꓺ ꓠꓯꓹ ꓡ? ꓮꓸ ꓫꓵ ꓔꓯꓺ ꓥꓳꓽ ꓡꓰ ꓔꓯꓺ ꓟꓳꓸ ꓖꓶ ꓠꓯꓹ ꓡ? 31 ꓪꓴ-ꓢ ꓗꓴꓷ ꓠꓬ ꓪꓳꓽ ꓒꓲ ꓫꓵꓸ ꓕꓲ ꓢꓶꓽˍ ꓡꓰ ꓐꓰ ꓗꓹ ꓡꓳ꓿ ꓪꓳꓽ ꓒꓲ ꓫꓵꓸ ꓠꓬ ꓟꓲ ꓠꓯ ꓗꓪ ꓟ ꓜ ꓫꓵꓸ ꓡꓳ ꓫꓵꓸ ꓥ ꓕ ꓑꓳꓸ ꓠꓯꓸ ꓘꓪ ꓣꓳꓺˍ ꓟ ꓥꓻ ꓥ ꓟꓲ꓾ 32 ꓫꓵꓸ ꓗꓷ ꓢꓲ ꓣꓱꓻ ꓡ ꓠꓬ ꓪꓳꓽ ꓫꓵꓽ ꓪꓳꓽ ꓙꓰꓽ ꓥ ꓕ ꓑꓳꓸ ꓕꓯꓽ ꓢꓲ ꓪꓴꓽ ꓡ ꓢꓲ꓾ ꓠꓬꓹ ꓤꓽˍ ꓟꓲ ꓬꓲ ꓛꓺ ꓗꓴꓸ ꓗꓪ ꓬꓲ ꓘꓶꓻ ꓘꓶ ꓐ ꓡ ꓠ ꓛꓲ꓾ ꓡꓯꓼ ꓗꓸ ꓓꓽ ꓟ ꓒꓬꓱꓼ ꓡ ꓡꓳ꓾ ꓐꓯˍ ꓡꓳ꓿ 33 ꓬꓲ ꓪꓽ ꓠ ꓠꓹ ꓗꓴ ꓠꓹ ꓟ꓾ ꓬꓲ ꓠꓬ ꓕꓱ ꓡꓱꓳ ꓫꓵꓽ ꓔꓯ ꓥꓳꓽ ꓮꓽ ꓟꓬꓹ ꓡꓰ ꓪꓴ-ꓢꓴ ꓐꓯ ꓘꓶꓽ ꓚ ꓟꓸ ꓖꓶˍ ꓡꓳ꓿ 34 ꓔꓯ ꓥꓳꓽ ꓗꓪ ꓐꓰ ꓟꓽ ꓥ ꓠꓬ ꓬꓲ ꓡꓰ ꓬꓲ ꓪꓽ ꓔꓯ ꓟꓽ ꓚ ꓖꓶ꓿ ꓖꓳ ꓡꓱ ꓥ ꓟꓲ ꓬꓲˍ ꓐꓰ ꓬꓲ ꓛꓳꓽ ꓒꓯꓹ ꓐꓴˍ ꓡꓰꓽ ꓔꓬ ꓕꓯ ꓠꓬ꓾ ꓟꓸ ꓟꓲꓽ ꓮꓽ ꓙꓵ ꓒꓶꓻ ꓟꓸ ꓖꓶˍ ꓡꓳ꓿ 35 ꓖꓳ ꓕꓲ ꓠꓬꓲ ꓟꓰꓻ ꓬꓰ ꓠꓬ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓣꓳ ꓖꓳ ꓐꓽ ꓢꓲ ꓗꓪ ꓙꓰ ꓡꓯ꓾ ꓐꓯˍ ꓡꓳ꓿ 36 ꓖꓳ ꓡꓱ ꓠꓬ ꓬꓲ ꓪꓽ ꓠꓽ ꓞꓳ ꓜꓴ ꓔꓯ ꓧꓹ ꓔ ꓬꓰ ꓢꓲ꓾ ꓬꓰ-ꓢꓴ ꓠꓬꓲꓸ ꓠꓸ ꓔꓬ ꓟ ꓡꓲ ꓖꓳ ꓕꓲ ꓟ ꓗꓪ ꓬꓲ ꓔꓯ ꓬꓲ ꓖꓳ ꓡꓱ ꓧꓳꓽ ꓗꓳꓸ ꓙꓰˍ ꓡꓳ꓿ ꓠꓱꓸ ꓐꓯꓼ ꓡꓲˍ ꓟꓲ ꓛꓳ ꓙꓰˍ ꓡꓳ꓿ 37 ꓖꓳ ꓕꓯ ꓕꓳꓽ ꓥꓳꓽ ꓓꓽ ꓟ ꓙꓱꓼ ꓡ ꓢꓲ ꓬꓲ ꓡꓯꓼ ꓟꓰꓼ ꓓꓶꓽ ꓡ ꓠꓬꓲ꓾ ꓡꓲ ꓗꓪ ꓬꓲꓻ ꓙꓬ ꓓꓵꓽ ꓐꓲꓺ ꓡ ꓔꓬ ꓡꓳ꓿ 38 ꓬꓰ-ꓢꓴ ꓠꓽ ꓡꓲ ꓟꓶꓸ ꓗꓪ ꓪꓴꓸ ꓖꓳꓼ ꓡꓳ ꓖꓳꓼ ꓢꓲ ꓬꓲꓼ ꓟꓶ ꓔꓬ ꓡꓳ꓿ ꓬꓲ ꓪꓽ ꓡꓰ ꓬꓲ ꓔꓯ ꓡꓵꓹ ꓖꓶ ꓢꓲ꓾ ꓟꓸ ꓒꓽꓳ꓾ ꓥꓪ ꓠꓴꓽ ꓫꓵˍ ꓟ ꓔꓯ ꓠꓴ ꓟꓽ ꓗꓳ ꓚꓱ ꓡ?꓾ ꓐꓯ ꓖꓶˍ ꓡꓳ꓿ 39 ꓖꓳ ꓡꓱ ꓠꓬ ꓬꓲ ꓔꓴ ꓡ ꓢꓲ꓾ ꓟꓲꓽ ꓦꓲ ꓔꓯ ꓕꓼ ꓢꓲ ꓠꓬꓲ꓾ ꓬꓲꓻ ꓡꓴ ꓐꓱ ꓔꓯ꓾ ꓢꓲ ꓡꓲ ꓐꓰ ꓠꓽ ꓡꓰ Gꓽ꓾ ꓐꓯ ꓗꓷ ꓠꓬ꓾ ꓢꓲ ꓡꓲ ꓐꓰ ꓗꓷ ꓡꓰꓳ꓿ 40 ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓙꓳꓺˍ ꓡ? ꓠꓴ ꓪꓽ ꓙꓵꓻ ꓠꓲꓹ ꓟꓽ ꓙꓳ ꓢꓰꓽ ꓡ?꓾ ꓐꓯˍ ꓡꓳ꓿ 41 ꓬꓲ ꓪꓽ ꓠꓽ ꓮꓽ ꓘꓶꓸ ꓙꓳꓺ ꓡꓰ ꓢꓲ꓾ ꓟꓲꓽ ꓦꓲˍ ꓐꓰ ꓬꓲꓻ ꓡꓴꓽ ꓐꓱˍ ꓟꓲ ꓬꓲ ꓔꓯ ꓠ ꓡꓳꓹˍ ꓟ ꓕꓱ ꓕꓲ ꓣꓳ ꓠꓬ ꓮꓽ ꓟ ꓥ ꓡ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿

ꓟ-ꓗꓳ 5

1 ꓗꓸ ꓠꓯꓸ ꓬꓲ ꓪꓽ ꓠꓬ ꓬꓲꓻ ꓡꓴꓽ ꓐꓱ ꓖꓳ ꓐꓽ ꓢꓲ꓾ ꓖꓶ-ꓡ-ꓢꓲ-ꓠꓲ ꓢꓴ ꓟꓵꓽ ꓗꓪ ꓛꓲ ꓬꓰˍ ꓡꓳ꓿ 2 ꓡꓲ ꓗꓪ ꓐꓰ ꓬꓰ-ꓢꓴ ꓓꓳ ꓡ ꓟꓶꓽ ꓕꓯ꓾ ꓟꓽ ꓫꓬ ꓠꓲꓽ ꓜꓶꓽ ꓞꓹ ꓟ ꓡ ꓞꓳ ꓕꓲ ꓣꓳ ꓠꓬ ꓡꓱꓼ ꓜꓴ ꓐꓬꓼ ꓗꓪ ꓐꓰ ꓡꓻ ꓢꓲ ꓬꓰ-ꓢꓴ ꓔꓯ ꓜꓲꓻ ꓡ ꓡꓳ꓿ 3 ꓬꓲ ꓔꓬ ꓖꓴ ꓠꓬ ꓡꓱꓼ ꓜꓴ ꓐꓬꓼ ꓗꓪ ꓥ ꓢꓲ꓾ ꓧꓳꓺ ꓫꓱ ꓚ ꓡꓰ ꓞꓳꓹˍ ꓟꓲ ꓬꓲ ꓔꓯ ꓞꓳꓹ ꓧꓪꓸ ꓡꓰ ꓘꓴ ꓢꓴ ꓟꓽ ꓙꓳ꓿ 4 ꓬꓲ ꓔꓯ ꓡꓸ ꓕꓸ ꓕꓯꓼ ꓠꓬꓲ꓾ ꓧꓳꓺ ꓫꓱ ꓚ ꓡꓰ ꓞꓳꓹ ꓠꓬꓲ ꓐꓰ ꓮꓽ ꓟꓬꓹ ꓧꓪꓹ ꓬꓰˍ ꓟꓲ꓾ ꓬꓲ ꓡꓰ ꓡꓸ ꓕꓸ ꓔꓯ ꓘꓳꓹ ꓩꓴ ꓗꓷ ꓢꓲ꓾ ꓧꓳꓺ ꓫꓱ ꓚ ꓔꓯˍ ꓟꓲ ꓚꓵꓹ ꓞꓷꓹ ꓗꓷ ꓝꓲ ꓠꓬꓲ꓾ ꓬꓲ ꓔꓯ ꓞꓳꓹ ꓧꓪꓹ ꓡꓰ ꓘꓴ ꓢꓴ ꓟꓽ ꓙꓳ꓿ 5 ꓬꓲ ꓠꓬ ꓟꓳꓼ ꓡꓳ ꓢ ꓘꓪ ꓮ ꓕꓯꓽˍ ꓟꓲ꓾ ꓡꓱꓼ ꓜꓴ ꓐꓬꓼˍ ꓐꓰ ꓪꓽ ꓚꓲ ꓗꓪ ꓘꓴꓻ ꓔꓬ ꓢꓲ꓾ Bꓸ ꓛꓲ ꓡꓰ ꓚꓲꓸ ꓛꓬ ꓔꓯ ꓶꓺˍ ꓡꓳ꓿ 6 ꓶꓽ ꓤ ꓗꓪ ꓬꓰ-ꓢꓴ ꓔꓯ ꓟꓳꓻ ꓗꓷ ꓠꓬ ꓔꓷꓹ ꓡ ꓢꓲ꓾ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓠꓬꓲ꓾ 7 ꓢꓯꓼ ꓓꓽ ꓟ ꓡꓰ꓾ ꓟꓴꓺ ꓡꓳꓹ ꓬꓰ ꓢꓴ ꓪꓴ-ꓢ ꓮ ꓐꓲ ꓬꓰ-ꓢꓴꓳ꓾ ꓠꓴ ꓠꓬ ꓥꓪ ꓔꓯ ꓮꓸ ꓫꓵ ꓪꓴꓸ ꓠꓬꓲ ꓘꓶꓻ ꓡꓶꓽ ꓡ ꓡ? ꓪꓴ-ꓢ ꓔꓯ ꓖꓴꓺ ꓢꓲ ꓠꓴ ꓔꓯ ꓓꓰꓽˍ ꓠꓬꓲ꓾ ꓥꓪ ꓔꓯ ꓕꓽ ꓫꓸ ꓙꓵ ꓝꓲ ꓡꓯ꓾ ꓐꓯˍ ꓡꓳ꓿ 8 ꓬꓲ ꓕꓱ ꓡꓱ ꓓꓰꓽˍ ꓟ ꓠꓬ ꓬꓰ-ꓢꓴ ꓡꓰ꓾ ꓟꓽ ꓫꓬ ꓠꓲꓽ ꓠꓴ꓾ ꓡꓽ ꓞꓳ ꓕꓱ ꓕꓲ ꓣꓳ ꓗꓪ ꓐꓰ ꓓꓳ ꓡꓯ꓾ ꓐꓰ ꓐꓯ ꓗꓷ ꓠꓬꓲ ꓥꓳ꓿ 9 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓟꓬꓱꓺ ꓮ ꓡꓲ ꓟꓬꓱ ꓔ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓥꓪ ꓠꓴꓽ ꓠꓬ ꓮꓽ ꓟꓬꓹ ꓥ ꓠꓬꓲ ꓥꓪ ꓟꓬꓱ ꓠꓬ꓾ ꓬꓲ-ꓜꓴꓻ꓾ ꓟꓬꓱ ꓔ ꓡꓳ꓾ ꓐꓯˍ ꓡꓳ꓿ 10 ꓖꓳ ꓕꓯ ꓬꓲ ꓪꓽ ꓔꓯ ꓖꓳ ꓕꓲ ꓟꓵ ꓗꓪ ꓐꓰ ꓟꓽ ꓖꓼ ꓓꓳ ꓗꓷ ꓠꓹ ꓟ꓾ ꓬꓲ ꓡꓰ ꓬꓰ-ꓢꓴ ꓔꓯ ꓮꓽ ꓘꓶꓸ ꓓꓰꓽˍ ꓡꓳ꓿ 11 ꓖꓳ ꓕꓯ ꓪꓽ ꓚꓲ ꓗꓪ ꓖ ꓜꓽ ꓔꓬ ꓟ ꓮꓸ ꓪꓯꓼ ꓕꓲ ꓜꓴ ꓓꓽ ꓟ ꓙꓳˍ ꓡꓳ꓿ 12 ꓠꓲꓽ ꓜꓴ ꓡꓰ ꓬꓰ-ꓢꓴ ꓔꓯ꓾ ꓥꓪ ꓠꓴꓽ ꓔꓯ ꓮꓸ ꓪꓯꓼ ꓠꓯꓸꓼ ꓗꓪ ꓓꓵꓽ ꓙꓰ ꓝꓲ ꓡꓯ꓾ ꓐꓰ ꓓꓰꓽˍ ꓡꓳ꓿ 13 ꓬꓰ-ꓢꓴ ꓬꓲ ꓪꓽ ꓔꓯ ꓓꓽ ꓔꓳꓹ ꓗꓷ ꓠꓬ꓾ ꓟꓽ ꓫꓬ ꓠꓲꓽ ꓠꓽ ꓓꓳ ꓡ ꓢꓲ ꓮꓸ ꓪꓯꓼ ꓠꓯꓸꓼ ꓗꓪ ꓓꓵꓽ ꓡꓰꓳ꓿ ꓖꓳ ꓡꓱ ꓢꓲ ꓮꓸ ꓪꓯꓼ ꓠꓬꓲꓽ ꓔꓴ ꓛꓲ ꓟ ꓠꓬ ꓐꓶꓽ ꓘꓶꓽ ꓗꓪ ꓐꓰ ꓔꓷꓹ ꓬꓯꓼ ꓙꓰ ꓢꓲ ꓬꓲꓻ ꓡꓴꓽ ꓐꓱ ꓗꓪ ꓔꓲꓹ ꓫꓵꓳ꓿ 14 ꓖꓳ ꓕꓯ ꓮꓸ ꓪꓯꓼ ꓡꓳꓸ ꓢꓴ ꓠꓬ ꓛꓰꓹ ꓙꓰ ꓢꓲ꓾ ꓡꓳ ꓒꓱˍ ꓐꓰ ꓖꓳ ꓕꓲ ꓟꓵꓽ ꓕꓲ ꓚꓳ ꓡꓳ ꓗꓪ ꓐꓯ ꓖꓶꓽ ꓙꓰ ꓠꓬ꓾ ꓮ ꓡꓲ ꓗꓷ ꓡꓰ ꓟ ꓔꓯ ꓡꓳꓸ ꓠꓬꓲ ꓠꓹ ꓟ ꓡꓽ ꓞꓳ ꓮꓽ ꓟꓬꓹ ꓡ ꓡꓳ꓿ 15 ꓬꓲ ꓪꓽ ꓬꓰ-ꓢꓴ ꓔꓯ ꓛꓲ ꓡ ꓕꓯ꓾ ꓧꓶꓸ ꓕꓯ ꓠꓲꓽ ꓜꓶꓽ ꓞ ꓢꓴ ꓖꓳ ꓕꓲ ꓣꓳ ꓠꓬ ꓐꓵ ꓞꓶ ꓖꓪꓽ ꓔ ꓠꓬꓲ ꓐꓰ ꓠꓲꓹ ꓟ ꓧꓪꓸ ꓛꓲꓽ ꓛꓲ ꓠꓬꓲꓸ ꓠꓸ ꓔꓬ ꓟ ꓔꓯ ꓟꓳꓻ ꓗꓷ ꓠꓬ ꓬꓲ ꓪꓽ ꓙꓳꓺ ꓡꓰˍ ꓡꓳ꓿ 16 ꓧꓶꓸ ꓕꓯ ꓠꓲꓽ ꓜꓶꓽ ꓞ ꓢꓴˍ ꓐꓰ ꓮꓸ ꓪꓯꓼ ꓜꓴ ꓔꓯ ꓮ ꓡꓲ ꓗꓷ ꓡꓰ ꓟ ꓡꓳꓸ ꓟꓳꓻ ꓢꓴ ꓐꓴ ꓡꓰ꓾ ꓔꓱꓹ ꓠꓬꓲ ꓡ ꓢꓴ ꓐꓴ ꓔꓯ ꓫꓵꓽ ꓪꓴꓻ ꓕꓱ ꓟ ꓮꓽ ꓙꓵ ꓐꓯ ꓟꓸ ꓖꓶˍ ꓡꓳ꓿ 17 ꓖꓳ ꓡꓱ ꓠꓬ ꓖꓳ ꓗꓪ ꓔꓬ ꓢꓴ ꓐꓴ ꓡꓰ ꓬꓰ-ꓢꓴ ꓔꓯ ꓬꓲ ꓪꓽ ꓟꓵꓽ ꓗꓪ ꓐꓰ ꓓꓳ ꓙꓰ ꓠꓹ ꓟ ꓓꓰꓽˍ ꓡꓳ꓿ 18 ꓡꓲ ꓗꓪ ꓬꓰ-ꓢꓴ ꓓꓵꓽ ꓡꓰ ꓠꓬ꓾ ꓧꓶꓸ ꓕꓯ ꓠꓲꓽ ꓜꓶꓽ ꓞ ꓢꓴ ꓖꓳ ꓕꓲ ꓣꓳ ꓡꓰ꓾ ꓬꓲ ꓔꓯˍ ꓟꓲ ꓛꓳ ꓙꓰ ꓝꓲ ꓡꓯ꓾ ꓐꓰ ꓓꓰꓽˍ ꓡꓳ꓿ 19 ꓬꓰ-ꓢꓴ ꓠꓬ ꓬꓲ ꓔꓯ ꓟꓽ ꓓꓽ ꓔꓳꓹ ꓔꓳꓹ꓾ ꓠꓴ ꓦꓲ ꓗꓪ ꓠꓴ ꓫꓵꓽ ꓠꓴ ꓧꓪ ꓐꓴ ꓔꓯ ꓙꓰ ꓢꓲ꓾ ꓢꓲ ꓒꓽ ꓡꓰ ꓠꓴ ꓐꓱ ꓶ ꓬꓰ ꓖꓶ ꓗꓷ ꓟ ꓟꓬꓱꓽ ꓮꓺ ꓪꓴꓻ ꓛꓲ ꓥ ꓟ ꓐꓰ꓾ ꓠꓴ ꓔꓯ ꓬꓲ ꓮ ꓡꓲ ꓫꓱꓸ ꓤ ꓡ ꓟ꓾ ꓬꓲ ꓪꓽ ꓔꓯ ꓐꓯ ꓖꓶ ꓬꓰ꓾ ꓐꓯ ꓖꓶˍ ꓡꓳ꓿ 20 ꓖꓳ ꓡꓱ ꓠꓬ ꓬꓲ ꓙꓰ ꓢꓲ꓾ ꓬꓰ-ꓢꓴ ꓡꓰ ꓬꓲ ꓐꓱ ꓶ ꓬꓰ ꓖꓶ ꓗꓷ ꓟ ꓟꓬꓱꓽ ꓮ ꓪꓴꓻ ꓛꓲ ꓥ ꓟ꓾ ꓓꓱ-ꓘꓹ-ꓒꓳ-ꓡꓲ ꓟꓵ ꓗꓪ ꓐꓯ ꓒꓬꓱꓺ ꓙꓰ ꓠꓬ ꓮꓽ ꓙꓵ ꓢꓴ ꓓꓵꓽ ꓙ ꓟꓶ ꓡꓰꓳ꓿ 21 ꓬꓰ-ꓢꓴ ꓠꓬ ꓝꓮꓲ ꓕꓲ ꓧꓪꓹ ꓡꓲ ꓗꓪ ꓐꓰ ꓖꓳ ꓐꓽ ꓢꓲ ꓗꓳꓸ ꓙꓰ ꓢꓲ꓾ ꓬꓲꓻ ꓡꓴ ꓐꓱ ꓘꓶꓽ ꓗꓪ ꓔꓬ ꓕꓯ꓾ ꓞꓳ ꓜꓴ ꓞꓳ ꓟꓯꓼ ꓬꓲ ꓔꓬ ꓗꓪ ꓜꓲꓼ ꓡ ꓡꓳ꓿ 22 ꓙꓰ-ꓣꓴ ꓟꓬꓱ ꓔ ꓟ ꓜꓲꓼ ꓦꓲ ꓙꓵꓽ ꓢꓴ ꓗꓪ ꓟ ꓕꓲ ꓣꓳˍ ꓟꓲ ꓬꓲ ꓔꓯ ꓡ ꓢꓲ꓾ ꓬꓲ ꓟꓲꓽ ꓕꓯꓽ ꓢꓲ ꓗꓪ ꓟꓳꓼ ꓔ ꓢꓲ ꓠꓬꓲ꓾ 23 ꓥꓪ ꓮꓸ ꓟꓲꓽ ꓤ ꓠꓬ ꓫꓵꓻˍ ꓐꓰ ꓗꓹ ꓡꓳ꓿ ꓬꓲ ꓓꓻ ꓡꓰ ꓢꓲ ꓢꓯꓸ ꓔꓬ ꓟꓶ ꓠꓹ ꓟ꓾ ꓠꓴ ꓬꓲ ꓔꓯ ꓡꓯꓼ ꓒꓯꓹ ꓚꓰꓹ ꓖꓶ ꓡꓯ꓾ ꓐꓰ ꓮꓽ ꓘꓶꓸ ꓓꓰꓽˍ ꓡꓳ꓿ 24 ꓖꓳ ꓕꓯ ꓬꓰ-ꓢꓴ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓞꓳ ꓜꓴ ꓞꓳ ꓟꓯꓼˍ ꓟꓲ ꓬꓰ-ꓢꓴ ꓔꓯ ꓛꓳ ꓙꓰ ꓢꓲ ꓬꓲ ꓔꓯ ꓕꓳꓽ ꓡ ꓡꓳ꓿ 25 ꓫꓵꓽ ꓜꓲꓺ ꓓꓳ ꓠꓬꓲ ꓞꓲ ꓠꓬꓲꓽ ꓘꓳꓼ ꓠꓻ ꓔꓬ ꓢꓴ ꓤ ꓟꓶ ꓤ ꓕꓲ ꓣꓳ ꓙꓳˍ ꓡꓳ꓿ 26 ꓠꓻ ꓫꓬꓹ ꓢꓴ ꓮꓽ ꓟꓬꓹ ꓣꓳ ꓡꓯꓼ ꓒꓯꓹ ꓗꓪ ꓫꓸ ꓙꓵˍ ꓟ ꓮꓽ ꓟꓬꓹ ꓜꓲꓽ ꓢꓲ꓾ ꓬꓲ ꓙꓳˍ ꓟ ꓮꓽ ꓙꓵ ꓣꓱꓽ ꓖꓴ ꓡꓰ ꓗꓪ ꓛꓲ ꓠꓻ ꓫꓬꓹ ꓗꓷˍ ꓟꓲ꓾ ꓮꓸ ꓔꓲˍ ꓟꓲ ꓟꓽ ꓓ ꓡꓰ꓾ ꓟꓬꓽ ꓠꓬꓲ ꓠꓻ ꓡ ꓡꓳ꓿ 27 ꓬꓰ-ꓢꓴ ꓓꓳꓽ ꓬꓲ ꓑ ꓙꓽ ꓗꓷ ꓠꓬ꓾ ꓡꓽ ꓞꓳ ꓬꓲ ꓜꓴꓻ ꓗꓳ ꓡꓳ ꓗꓪ ꓬꓰ-ꓢꓴ ꓗꓸ ꓠꓯꓸ ꓢꓲ ꓡ ꓢꓲ ꓬꓲ ꓐꓵ ꓞꓶꓽ ꓔꓯ ꓫꓱꓹ ꓡ ꓡꓳ꓿ 28 ꓮ ꓡꓲꓳ ꓐꓯ ꓠꓬ ꓬꓲ ꓠꓽ꓾ ꓬꓰ-ꓢꓴ ꓬꓲ ꓐꓵ ꓞꓶꓽ ꓟꓶꓽ ꓗꓪˍ ꓡꓰ ꓫꓱꓹ ꓟꓶˍ ꓟꓲ ꓥꓪ ꓠꓽ ꓓꓻ ꓡꓰˍ ꓥꓳ꓾ ꓐꓰ ꓓꓵꓽ ꓙˍ ꓡꓳ꓿ 29 ꓖꓳ ꓕꓯ ꓬꓲ ꓫꓵꓽ ꓓꓳˍ ꓟ ꓞꓼ ꓐꓰ ꓠꓽ ꓡꓰ ꓢꓲ꓾ ꓬꓲ ꓖꓳ ꓓꓱ ꓗꓪ ꓬꓲ ꓠꓻ ꓓꓻ ꓡꓰˍ ꓟ ꓔꓯ ꓬꓲ ꓚꓲꓸ ꓛꓬ ꓚꓬꓹ ꓪ ꓡꓰꓳ꓿ 30 ꓬꓰ-ꓢꓴ ꓠꓬ ꓬꓲ ꓖꓳ ꓓꓱꓽ ꓗꓪ ꓐꓰ ꓪꓽ ꓠꓬꓲˍ ꓟ ꓢꓯꓼ ꓓꓳ ꓙꓰ ꓟ ꓔꓯ ꓞꓼ ꓐꓰ ꓚꓬꓹ ꓪ ꓡꓰ ꓠꓬꓲ꓾ ꓞꓳ ꓜꓴ ꓗꓳ ꓡꓳ ꓗꓪ ꓔꓲꓸ ꓒꓳꓹ ꓢꓲ꓾ ꓮꓽ ꓟ ꓡꓰ ꓥꓪ ꓐꓵ ꓞꓶꓽ ꓗꓪ ꓫꓱꓹ ꓗꓷ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 31 ꓖꓳ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓞꓳ ꓜꓴꓻ ꓞꓳ ꓟꓯꓼ ꓠꓴ ꓔꓯ ꓕꓳꓽ ꓞꓹ ꓟ ꓠꓴ ꓢꓷꓸˍ ꓡꓳ꓿ ꓕꓱ ꓘꓶ ꓟꓬꓽˍ ꓟ ꓞꓳ ꓜꓴꓻ ꓗꓳ ꓡꓳ ꓗꓪ ꓠꓴ ꓔꓯ ꓫꓱꓹ ꓗꓷ ꓢꓴ ꓮꓽ ꓟ ꓥ ꓟ ꓮ ꓡꓲ ꓢꓷꓸ ꓓ ꓢꓰꓽ꓾ ꓐꓯˍ ꓡꓳ꓿ 32 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓽ ꓬꓲ ꓔꓯ ꓫꓱꓹ ꓢꓴ ꓔꓯ ꓢꓷꓸ ꓡꓰ ꓠꓹ ꓟ ꓚꓳ ꓡꓳ ꓡꓳ ꓡꓳꓸ ꓠꓬꓲˍ ꓡꓳ꓿ 33 ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓬꓲ ꓓ ꓡꓰ ꓟ ꓢꓷꓸˍ ꓠꓬꓲ꓾ ꓙꓳꓺ ꓠꓬꓲ ꓛꓱꓽ ꓠꓬꓲ ꓐꓰ ꓬꓲ ꓟꓲꓽ ꓙꓬꓽ ꓗꓪ ꓟꓳꓼ ꓡ ꓢꓲ꓾ ꓮꓽ ꓙꓵ ꓡꓱꓸꓼ ꓔꓱꓹ ꓔꓱꓹꓼ ꓐꓯ ꓖꓶˍ ꓡꓳ꓿ 34 ꓬꓰ-ꓢꓴ ꓡꓰ ꓬꓲ ꓔꓯ꓾ ꓮꓸ ꓟꓲꓽꓳ꓾ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓿ ꓧꓪꓸ ꓧꓪS ꓙꓰ꓿ ꓠꓴ ꓠꓻˍ ꓟ ꓓꓻ ꓡꓰ ꓟꓶ ꓝꓲ꓾ ꓐꓯ ꓖꓶˍ ꓡꓳ꓿ 35 ꓬꓲ ꓖꓳ ꓡꓱ ꓫꓸ ꓕꓱ ꓔꓬ ꓕꓯ꓾ ꓜꓲꓼ ꓦꓲ ꓙꓵꓽ ꓢꓴ ꓙꓰ-ꓣꓴ ꓦꓲ ꓗꓪ ꓐꓰ ꓡꓽ ꓞꓳ ꓕꓲ ꓧꓳꓽ ꓛꓲ ꓡ ꓢꓲ꓾ ꓠꓴ ꓮꓸ ꓟꓲꓽ ꓠꓽ ꓫꓵꓳ꓾ ꓟꓸ ꓒ ꓔꓯ ꓝꓮꓲ ꓕꓽ ꓘꓶꓻ ꓡꓶꓽ꓾ ꓐꓯˍ ꓡꓳ꓿ 36 ꓬꓲ ꓪꓽ ꓐꓯ ꓘꓶꓽ ꓔꓯ ꓬꓰ-ꓢꓴ ꓑ ꓙꓽ ꓗꓷ ꓠꓬ꓾ ꓜꓲꓼ ꓦꓲ ꓙꓵꓽ ꓢꓴ ꓖꓳ ꓕꓲ ꓣꓳ ꓔꓯ꓾ ꓕꓽ ꓙꓳꓺ꓾ ꓙꓵꓻˍ ꓡꓰꓽ ꓙꓵꓻ꓾ ꓐꓯ ꓖꓶˍ ꓡꓳ꓿ 37 ꓬꓲ ꓠꓬ ꓒꓲ-ꓕꓱˍ ꓐꓰ ꓬ-ꓗꓴˍ ꓐꓰ ꓬ-ꓗꓴ ꓬꓲ ꓠꓬꓲ ꓤ ꓬꓳ-ꓦ ꓔꓯˍ ꓡꓰꓽ ꓧꓳꓽ ꓙꓰ ꓢꓲ꓾ 38 ꓜꓲꓼ ꓦꓲ ꓙꓵꓽ ꓢꓴ ꓦꓲ ꓗꓪ ꓬꓲ ꓪꓽ ꓛꓲ ꓡ ꓠꓬ꓾ ꓡꓽ ꓞꓳ ꓢꓴ ꓔꓬ ꓟq ꓐꓰ꓾ ꓥꓴꓻ ꓠꓬꓲ ꓮꓸ ꓛꓬꓺ ꓙꓱꓺ ꓠꓬꓲ ꓬꓰ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 39 ꓬꓲ ꓓꓵꓽ ꓡꓰ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓥꓴꓻ ꓠꓬꓲ ꓢꓴꓺ ꓠꓬꓲ ꓬꓰ ꓔꓬ ꓡ? ꓮꓸ ꓟꓲꓽ ꓤ ꓠꓽ ꓟꓽ ꓫꓵꓻ꓿ ꓬꓲꓼˍ ꓡꓰꓽ ꓬꓲꓼ ꓟꓶ ꓔꓬ ꓡꓳ꓾ ꓐꓯ ꓖꓶˍ ꓡꓳ꓿ 40 ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ ꓪꓽ ꓫꓱꓻˍ ꓡꓳ꓿ ꓖꓳ ꓕꓯ ꓬꓲ ꓡꓰ ꓮꓽ ꓙꓵ ꓢꓴ ꓔꓯ ꓓꓳ ꓙꓰ ꓝꓲ ꓢꓲ꓾ ꓮꓸ ꓟꓲꓽ ꓤ ꓬꓲ ꓐꓹ ꓐ ꓟꓹ ꓟˍ ꓐꓰ ꓬꓲˍ ꓐꓰ ꓕꓲ ꓛꓳꓺꓼ ꓡꓻ ꓢꓴ ꓢ ꓣꓳ ꓔꓯ ꓧꓳꓽ ꓔ ꓢꓲ ꓠꓬꓲ꓾ ꓮꓸ ꓟꓲ ꓤ ꓓꓹ ꓖꓴ ꓗꓪ ꓓꓵꓽ ꓡꓰˍ ꓡꓳ꓿ 41 ꓬꓲ ꓡꓰ ꓮꓸ ꓟꓲꓽ ꓤ ꓡꓯꓼ ꓒꓯꓹ ꓗꓪ ꓣꓴ ꓔ ꓢꓲ꓾ Zꓕ ꓡꓲ ꓕ ꓗꓴ ꓟꓲ꓾X ꓐꓯ ꓖꓶˍ ꓡꓳ꓿ (ꓕꓱ ꓟ ꓠꓬ ꓾ ꓮꓸ ꓟꓲꓽ ꓤꓽꓳ꓾ ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓔꓴꓺ꓾ ꓐꓯˍ ꓟ ꓥ ꓡꓳ꓿) 42 ꓮꓸ ꓟꓲꓽ ꓤ ꓠꓬ ꓞꓼ ꓐꓰ ꓔꓴ ꓡ ꓢꓲ ꓙ ꓖꓴ ꓫꓱꓽˍ ꓡꓳ꓿ ꓮꓸ ꓟꓲ ꓤ ꓠꓬ ꓞꓲ ꓠꓬꓲꓽ ꓘꓳꓼ ꓙꓳˍ ꓡꓳ꓿ ꓕꓱ ꓟ ꓔꓯ ꓟꓳ ꓢꓴ ꓬꓲ ꓪꓽ ꓮꓽ ꓘꓶꓸ ꓓꓵꓽ ꓙ ꓟꓶ ꓡꓰꓳ꓿ 43 ꓬꓰ-ꓢꓴ ꓡꓰ꓾ ꓮꓽ ꓟ ꓔꓯˍ ꓟꓲ ꓕꓽ ꓢꓷꓸ ꓡꓰ ꓝꓲ꓾ ꓐꓰ ꓬꓲ ꓪꓽ ꓔꓯ ꓙꓳꓺ ꓗꓽ ꓖꓶ ꓗꓷ ꓠꓬ꓾ ꓮꓸ ꓟꓲꓽ ꓤ ꓔꓯ ꓜꓽ ꓓꓴ ꓕꓲꓽ ꓫꓵꓽ ꓖꓶ ꓜꓽ꓾ ꓐꓯ ꓖꓶˍ ꓡꓳ꓿

ꓟ-ꓗꓳ 6

1 ꓬꓰ-ꓢꓴ ꓠꓬ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓬꓲ ꓚꓲꓸ ꓛꓬ ꓘꓹ ꓗꓪ ꓛꓲ ꓡ ꓡꓳ꓿ ꓬꓲ ꓛꓳꓽ ꓒꓯꓹ ꓐꓴˍ ꓟꓲ ꓬꓲ ꓔꓯ ꓛꓳ ꓡ ꓡꓳ꓿ 2 ꓠꓽ ꓦꓬꓼ ꓠꓬꓲꓻ ꓗꓪ ꓬꓲ ꓡꓰ ꓜꓲꓼ ꓦꓲ ꓗꓪ ꓟꓸ ꓟꓲꓽ ꓟꓸ ꓖꓶˍ ꓕꓯ꓾ ꓬꓲ ꓔꓯ ꓑ ꓙꓽ ꓢꓲ ꓓꓵꓽ ꓙ ꓟꓶ ꓢꓴ ꓮꓽ ꓟꓬꓹ ꓙꓳˍ ꓡꓳ꓿ ꓬꓲ ꓪꓽ ꓠꓬ꓾ ꓡꓽ ꓞꓳ ꓕꓱ ꓟ ꓠꓽ ꓕꓱ ꓟꓬ ꓙꓰꓽ ꓟ ꓮ ꓡꓲ ꓗꓪ ꓐꓰ ꓟꓶˍ ꓡ? ꓬꓲ ꓔꓯ ꓖꓶ ꓔ ꓟ ꓠꓬ ꓮꓸ ꓫꓵ ꓙꓽ ꓗꓴꓸ ꓠꓲꓹ ꓥ ꓡ? ꓬꓲ ꓬꓰˍ ꓟ ꓪꓽ ꓠꓬꓲˍ ꓟ ꓟꓬꓱꓽ ꓕꓱ ꓟ ꓬꓲ ꓮ ꓡꓲ ꓗꓪ ꓐꓰ ꓟꓶˍ ꓡ? 3 ꓕꓱ ꓟ ꓠꓬ ꓟ-ꓡꓲ ꓬꓲ ꓤ ꓬ-ꓗꓴˍ ꓐꓰ ꓬꓳ-ꓢꓲˍ ꓐꓰ ꓬꓴ-ꓔˍ ꓐꓰ ꓢꓲ-ꓟꓴ ꓬꓲ ꓪꓽ ꓮ ꓬꓲꓼ꓾ ꓢꓲꓹ ꓑꓴꓺ ꓙꓵꓺ ꓒ ꓖꓳ ꓟ ꓟꓽ ꓥ ꓡ? ꓬꓲ ꓠꓬꓲ ꓟ ꓐꓴˍ ꓟꓲ ꓕꓻ ꓣꓳꓽˍ ꓐꓰ ꓕꓲ ꓪꓺꓼ ꓔꓬ ꓡꓳ꓾ ꓟꓽ ꓥ ꓡ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓠꓬ ꓬꓲ ꓔꓯ ꓟꓳꓻ ꓟꓽ ꓟꓵ꓿ 4 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓟꓷꓽ ꓠꓷꓹ ꓝꓸ ꓢꓴ ꓠꓽ ꓚꓲꓸ ꓛꓬ ꓘꓹˍ ꓐꓰ ꓫꓵꓽ ꓤ ꓧꓪ ꓤˍ ꓐꓰ ꓚꓲꓸ ꓛꓬ ꓦꓲ ꓗꓪ ꓟꓽ ꓥ ꓠꓬ꓾ ꓟꓬꓱ ꓓꓳꓽ ꓟꓽ ꓙꓳ ꓟꓽ ꓗꓷ ꓡꓰ꓾ ꓐꓯˍ ꓡꓳ꓿ 5 ꓖꓳ ꓗꓪ ꓞꓳ ꓠꓻ ꓕꓲ ꓐꓱ ꓔꓯ꓾ ꓡꓯꓼ ꓒꓯꓹ ꓚꓰꓹ ꓖꓶ ꓢꓲ ꓫꓬꓹ ꓓꓻ ꓡꓰˍ ꓟ ꓟꓽ ꓥ ꓠꓬ꓾ ꓠꓱꓸ ꓐꓯꓼ ꓪꓽ ꓠꓬꓲˍ ꓟ ꓟꓬꓱꓽ ꓟꓽ ꓬꓰ꓿ 6 ꓬꓲ ꓪꓽ ꓙꓵꓻ ꓠꓲꓹ ꓟꓽ ꓙꓳ ꓟ ꓔꓯ ꓬꓰ-ꓢꓴ ꓓꓵꓽ ꓙ ꓟꓶˍ ꓡꓳ꓿ ꓖꓳ ꓗꓸ ꓠꓯꓸ ꓬꓰ-ꓢꓴ ꓠꓽ ꓕꓲ ꓘꓹ ꓡꓰ ꓕꓲ ꓘ ꓚꓳꓺ ꓙꓰ ꓢꓲ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ 7 ꓬꓰ-ꓢꓴ ꓠꓬ ꓞꓲ ꓠꓬꓲꓽ ꓣꓳ ꓟ ꓔꓯ ꓬꓲ ꓔꓬ ꓗꓪ ꓘꓴ ꓔꓯꓹ ꓡ ꓢꓲ꓾ ꓠꓬꓲꓽ ꓣꓳ ꓠꓬꓲꓽ ꓣꓳ ꓐꓰ ꓝꓲ ꓩꓴ ꓗꓷˍ ꓡꓳ꓿ ꓝꓮꓲ ꓟꓽ ꓫꓬ ꓠꓲꓽ ꓔꓯ ꓙꓵꓽ ꓠꓹ ꓟ ꓙꓵꓽ ꓪˍ ꓟꓲ ꓬꓲ ꓪꓽ ꓔꓯ ꓖꓶˍ ꓡꓳ꓿ 8 ꓬꓲ ꓪꓽ ꓓꓴꓻ ꓓꓳ ꓙꓰˍ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓙꓽ ꓥꓳꓽ ꓟꓽ ꓥ ꓠꓬ ꓮꓸ ꓫꓵ ꓕꓽ ꓔꓯꓹ꓾ ꓜꓽ ꓓꓴˍ ꓟꓲ ꓡꓯꓼ ꓔꓲꓸˍ ꓟꓲ ꓕꓽ ꓟꓯꓻ꓾ ꓒꓴˍ ꓟꓲ ꓕꓽ ꓔꓯꓹ꓿ 9 ꓛꓲ ꓠꓲꓺ ꓠꓽ ꓠꓲ ꓛꓵˍ ꓡꓳ꓿ ꓐꓵ ꓞꓶ ꓠꓬꓲꓽ ꓘꓳꓹ ꓕꓽ ꓖꓪꓽ꓾ ꓐꓰ ꓕꓵꓼ ꓪ ꓖꓶˍ ꓡꓳ꓿ 10 ꓝꓮꓲ ꓬꓲ ꓪꓽ ꓔꓯ꓾ ꓮ ꓡꓲ ꓗꓪ ꓛꓲ ꓬꓰˍ ꓟꓲ ꓦꓲ ꓕꓲ ꓦꓲ ꓗꓪ ꓓꓵꓽ ꓡꓰ ꓠꓬ꓾ ꓖꓳ ꓕꓲ ꓘꓹ ꓗꓪ ꓐꓰ ꓟꓽ ꓓꓳ ꓙꓰ ꓕ ꓑꓳꓸ ꓖꓳ ꓕꓲ ꓦꓲ ꓗꓪ ꓔꓬ꓿ 11 ꓮ ꓡꓲ ꓕꓲ ꓖ ꓗꓪ ꓠꓴ ꓪꓽ ꓔꓯ ꓟꓽ ꓘꓳ ꓣꓴ ꓢꓲ꓾ ꓠꓴ ꓪꓽ ꓔꓯ ꓟꓽ ꓠ ꓠꓹ ꓐꓷˍ ꓠꓬ꓾ ꓖꓳ ꓗꓪ ꓐꓰ ꓠꓴ ꓪꓽ ꓓꓳ ꓙꓰˍ ꓕꓯ꓾ ꓬꓲ ꓪꓽ ꓔꓯ ꓔꓳꓹ ꓢꓲ ꓢꓷꓸ ꓙ ꓟꓳꓻ ꓙ ꓓꓴ ꓬꓰ ꓠꓹ ꓟ꓾ ꓠꓴ ꓪꓽ ꓛꓲ ꓒꓯꓹ ꓗꓪ ꓟ ꓠꓱꓸ ꓦꓱꓽ ꓧꓶꓽ ꓟꓱꓸ ꓞꓰ ꓩꓴ ꓗꓷ꓾ ꓐꓰ ꓐꓯ ꓖꓶˍ ꓡꓳ꓿ 12 ꓖꓳ ꓡꓱ ꓠꓬ ꓬꓲ ꓪꓽ ꓓꓳ ꓙꓰ ꓢꓲ꓾ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓹ ꓟ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ꓿ 13 ꓬꓲ ꓪꓽ ꓡꓰ ꓠꓲꓽ ꓮꓽ ꓟꓬꓹ ꓔꓯ ꓖꓼ ꓓꓳ ꓗꓷˍ ꓡꓳ꓿ ꓠꓻ ꓢꓴ ꓒꓬꓼ ꓢꓴ ꓮꓽ ꓟꓬꓹ ꓔꓯˍ ꓟꓲ ꓮꓽ ꓛꓬ ꓞꓶꓻ ꓟꓰ ꓢꓲ ꓫꓬꓹ ꓓꓻ ꓡꓰˍ ꓡꓳ꓿ 14 ꓬꓰ-ꓢꓴ ꓬꓲ ꓓꓳꓽ ꓠꓬ ꓮ ꓡꓲ ꓗꓪˍ ꓟꓲ ꓚ ꓒꓬꓱ ꓙꓰ ꓠꓬꓲ꓾ ꓪ ꓔꓲ ꓩꓴ-ꓡꓲˍ ꓟꓲ ꓑ ꓙꓽ ꓟꓶˍ ꓡꓳ꓿ ꓕꓲ ꓐꓱ ꓠꓬ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓠꓽ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓲ꓾ ꓪꓽ ꓠꓬꓲˍ ꓟ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓕꓱ ꓟꓬ ꓬꓰ ꓔꓬ ꓟ ꓥꓳ꓾ ꓐꓯˍ ꓡꓳ꓿ 15 ꓕꓲ ꓐꓱ ꓠꓽ꓾ ꓬꓲ ꓠꓬ ꓬꓲ-ꓡꓲ-ꓬ ꓥꓳ꓾ ꓐꓯˍ ꓡꓳ꓿ ꓝꓮꓲ ꓕꓲ ꓐꓱ ꓠꓬ꓾ ꓬꓲ ꓠꓽ ꓮꓽ ꓠꓱ ꓗꓪ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴˍ ꓡꓰ ꓐꓰ ꓗꓹ ꓟ ꓕꓲ ꓣꓳ ꓥꓳ꓾ ꓐꓰ ꓐꓯˍ ꓡꓳ꓿ 16 ꓖꓳ ꓡꓱ ꓥ ꓟꓲ ꓩꓴ-ꓡꓲ ꓑ ꓙꓽˍ ꓕꓯ꓾ ꓥꓪ ꓡꓰ ꓪꓴꓸ ꓓꓵ ꓓꓶꓺ ꓗꓷ ꓢꓴ ꓬꓳ-ꓦ ꓠꓽ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓐꓷ꓾ ꓐꓯ ꓔꓬ ꓡꓳ꓿ 17 ꓮ ꓡꓲꓳ ꓐꓯ ꓠꓬ ꓩꓴ-ꓡꓲ ꓠꓽ ꓬꓲ ꓠꓬꓲ ꓤ ꓤꓽ ꓟꓶꓻ ꓩꓴ-ꓡꓳ-ꓓꓲ ꓔꓯ ꓫˍ ꓟ ꓑꓶꓸ ꓓꓴ꓾ ꓬꓳ-ꓦ ꓡꓰ ꓬꓲ ꓔꓯ꓾ ꓠꓴ ꓠꓬꓲ ꓤꓽ ꓤꓽ ꓟꓶꓻ ꓔꓯ ꓕꓱ ꓡꓱ ꓫˍ ꓟ ꓠꓬ ꓬꓲꓸ ꓡꓲꓽ ꓟ ꓧꓳꓹ꓾ ꓐꓰ ꓐꓯ ꓖꓶ ꓗꓷ ꓠꓬꓲ꓾ ꓩꓴ-ꓡꓲ ꓬꓲ ꓚꓲꓸ ꓛꓬ ꓡꓰ ꓕꓵꓼ ꓪ ꓖꓶ ꓢꓲ ꓬꓳ-ꓦ ꓔꓯ ꓣꓴꓻ ꓐꓱꓻ ꓗꓷ ꓟ ꓥ ꓡꓳ꓿ 19 ꓩꓴ-ꓡꓳ-ꓓꓲ ꓠꓬ ꓬꓳ-ꓦ ꓔꓯ ꓠꓲꓹ ꓟ ꓟꓽ ꓢꓻ ꓠꓬꓲ ꓬꓲ ꓔꓯ ꓢꓰꓼ ꓗꓷ ꓝꓲ ꓠꓲꓹ ꓫꓵˍ ꓟꓲ꓾ ꓬꓲ ꓔꓯ ꓢꓰꓼ ꓟꓽ ꓪ꓿ 20 ꓖꓳ ꓡꓱ ꓥ ꓟꓲ ꓬꓳ-ꓦ ꓠꓽ ꓔꓱꓹ ꓜꓳꓽˍ ꓟ ꓐꓰ ꓢꓲ ꓚꓰꓸ ꓔ ꓢꓴ ꓕꓲ ꓣꓳ ꓥ ꓟ ꓩꓴ-ꓡꓲ ꓢꓷꓸˍ ꓠꓬꓲ꓾ ꓬꓲ ꓔꓯ ꓙꓳꓺ ꓒꓵꓽ ꓢꓲ ꓮ ꓡꓲ ꓟꓽ ꓗꓷ ꓡꓰ ꓝꓲ꓿ ꓬꓳ-ꓦ ꓐꓯ ꓘꓶꓽ ꓔꓯ ꓩꓴ-ꓡꓲ ꓑ ꓙꓽˍ ꓕꓯ ꓬꓲ ꓠꓲꓹ ꓟ ꓗꓪ ꓮꓽ ꓘꓶꓸ ꓓꓵꓽ ꓙ ꓫꓸˍ ꓟꓲ꓾ ꓠꓲꓹ ꓒꓴ ꓒꓴˍ ꓐꓰ ꓬꓲ ꓔꓯ ꓠ ꓠꓹ ꓠꓬꓲꓳ꓿ 21 ꓖ ꓗꓸ ꓠꓯꓸ ꓮꓽ ꓘꓶꓸ ꓗꓸ ꓘꓳꓽˍ ꓟ ꓦꓬꓼ ꓠꓬꓲ ꓕꓲꓽ ꓠꓬꓲ ꓛꓲ ꓡꓺꓳ꓿ ꓖꓳ ꓟ ꓠꓬ ꓩꓴ-ꓡꓲ ꓦꓵꓻ ꓦꓬꓼ ꓠꓬꓲ ꓥ ꓡꓳ꓿ ꓖꓳ ꓕꓲ ꓠꓬꓲ ꓗꓪ ꓬꓲ ꓡꓰ꓾ ꓬꓲ ꓢꓲꓽ ꓒ ꓐꓴˍ ꓐꓰ ꓟꓯꓼ ꓢꓲꓽ ꓒ ꓐꓴˍ ꓐꓰ꓾ ꓖ-ꓡꓲ-ꓡꓲ ꓟꓵ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ ꓜꓻ ꓕꓲ ꓜꓽ ꓘꓴꓻ ꓖꓶꓽ ꓜꓽˍ ꓡꓳ꓿ 22 ꓩꓴ-ꓡꓳ-ꓓꓲ ꓬꓲ ꓮꓸ ꓟꓲꓽ ꓓꓵꓽ ꓙꓰ ꓢꓲ ꓗꓪꓺ ꓛꓰꓹ ꓟꓳꓸ ꓖꓶ ꓠꓬ꓾ ꓩꓴ-ꓡꓲˍ ꓐꓰ ꓬꓲˍ ꓐꓰ ꓕꓲ ꓪꓺꓼ ꓜꓻ ꓜꓽ ꓢꓴ ꓮꓽ ꓙꓵ ꓠꓲꓹ ꓒꓴ ꓡꓰ ꓠꓬꓲ꓾ ꓪ ꓔꓲ ꓡꓰ ꓤ ꓟꓶ ꓡꓯꓸ ꓔꓯ꓾ ꓠꓴ ꓠꓵꓻˍ ꓟ ꓮꓸ ꓫꓵ ꓓꓰꓽˍ ꓟꓲ꓾ ꓠꓴ ꓔꓯ ꓥꓪ ꓖꓶˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ 23 ꓖꓳ ꓟˍ ꓡꓰ ꓟꓽ ꓞꓲ꓾ ꓤ ꓟꓶ ꓡꓯꓸ ꓟꓲꓽ ꓙꓬꓽ ꓗꓪ ꓬꓲ ꓪꓵꓼ ꓢꓲ꓾ ꓠꓴ ꓥꓪ ꓔꓯ ꓮꓸ ꓫꓵ ꓓꓰꓽˍ ꓟꓲ꓾ ꓥꓪ ꓗꓴꓷ ꓕꓲ ꓐꓶꓽ ꓗꓪ ꓛꓲ ꓥ ꓟꓲ꓾ ꓠꓴ ꓔꓯ ꓥꓪ ꓖꓶˍ ꓥꓳ꓾ ꓐꓰ ꓐꓯˍ ꓡꓳ꓿ 24 ꓤ ꓟꓶ ꓡꓯꓸ ꓠꓬ ꓓꓳ ꓙꓰ ꓢꓲ ꓬꓲ ꓟꓹ ꓟ ꓔꓯ꓾ ꓥꓪ ꓮꓸ ꓫꓵ ꓓꓰꓽ ꓬꓰ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓪꓴꓸ ꓓꓵ ꓓꓰꓽ ꓬꓰ꓾ ꓐꓯ ꓖꓶˍ ꓡꓳ꓿ 25 ꓬꓲ ꓠꓬ ꓞꓼ ꓐꓰ ꓪ ꓔꓲ ꓔꓬ ꓗꓪ ꓓꓵꓽ ꓡꓰ ꓢꓲ꓾ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓪꓴꓸ ꓓꓵ ꓓꓶ ꓗꓷ ꓢꓲ꓾ ꓐꓯꓻ ꓗꓪ ꓗꓶ ꓔꓯꓹ ꓖꓶ ꓡ ꓟ ꓔꓯ ꓥꓪ ꓠꓵˍ ꓡꓳ꓾ ꓐꓯ ꓖꓶˍ ꓡꓳ꓿ 26 ꓖꓳ ꓕꓯ ꓪ ꓔꓲ ꓠꓬ ꓮꓽ ꓘꓶꓸ ꓠꓲꓹ ꓟ ꓫꓸˍ ꓟꓲ꓾ ꓬꓲ ꓪꓵꓼ ꓘꓶꓽˍ ꓐꓰ ꓬꓲ ꓡꓰ ꓘꓴꓻ ꓔ ꓟ ꓪꓰ ꓤ ꓐꓴ ꓪꓴꓸ ꓠꓬꓲ ꓟꓽ ꓖꓶ ꓬꓰ ꓟꓽ ꓠ ꓗꓷ ꓡꓰꓳ꓿ 27 ꓖꓳ ꓡꓱ ꓠꓬ ꓞꓼ ꓐꓰ ꓪ ꓔꓲ ꓡꓰ ꓬꓲ ꓟꓯꓼ ꓕꓲ ꓣꓳ ꓔꓯ ꓝꓲ ꓩꓴ ꓗꓷ ꓢꓲ ꓬꓳ-ꓦ ꓪꓴꓸ ꓓꓵ ꓓꓶꓺ ꓔꓯꓹ ꓡ ꓠꓹ ꓟ ꓕꓵꓼ ꓪ ꓖꓶ ꓗꓷ ꓠꓬ꓾ ꓬꓲ ꓠꓽ ꓐꓱꓻ ꓓꓴꓽ ꓗꓪ ꓙꓰ ꓢꓲ꓾ ꓬꓳ-ꓦ ꓪꓴꓸ ꓓꓵ ꓓꓶꓺ ꓗꓷˍ ꓡꓳ꓿ 28 ꓬꓳ-ꓦ ꓪꓴꓸ ꓓꓵ ꓠꓬ ꓐꓯꓻ ꓗꓪ ꓗꓶ ꓔꓯꓹ ꓡ ꓢꓲ ꓤ ꓟꓶ ꓡꓯꓸ ꓔꓯ ꓖꓶ ꓗꓷ ꓠꓬ꓾ ꓬꓲ ꓡꓰ ꓬꓲ ꓟꓹ ꓟ ꓔꓯ ꓔꓯꓹ ꓖꓶ ꓬꓰˍ ꓡꓳ꓿ 29 ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴ ꓑ ꓙꓽ ꓗꓷ ꓠꓬ꓾ ꓬꓲ ꓪꓽ ꓡ ꓢꓲ ꓬꓲ ꓫꓵꓻ ꓟꓳꓻ ꓔꓯꓹ ꓙꓰ ꓢꓲ ꓠꓬꓲ ꓔꓵꓸ ꓬꓰˍ ꓡꓳ꓿ 30 ꓝꓲ ꓓꓴ ꓐꓴ ꓠꓬ ꓬꓰ-ꓢꓴ ꓔꓬ ꓗꓪ ꓜꓲꓼ ꓡ ꓢꓲ꓾ ꓬꓲ ꓪꓽ ꓬꓰ ꓗꓷ ꓟ ꓐꓰ ꓟꓸ ꓟꓲꓽ ꓟꓸ ꓖꓶ ꓗꓷ ꓟ ꓮꓽ ꓙꓵ ꓬꓲ ꓔꓯ ꓐꓯ ꓖꓶˍ ꓡꓳ꓿ 31 ꓖꓳ ꓕꓯ ꓜꓻ ꓜꓽ ꓙꓵꓹ ꓟꓽ ꓙꓳ ꓠ ꓛꓲ ꓙꓰ ꓙꓰ ꓡ ꓡ ꓬꓰ ꓢꓴ ꓟꓬꓽˍ ꓠꓬꓲ꓾ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓣꓳ ꓠꓬ ꓢꓲ ꓡꓲ ꓟ ꓕꓲ ꓖ ꓗꓪ ꓕꓲ ꓑꓹ ꓪꓴꓽ ꓧꓶ ꓠꓽ ꓬꓰ ꓡꓯ꓾ ꓐꓯˍ ꓡꓳ꓿ 32 ꓖꓳ ꓡꓱ ꓠꓬ ꓬꓲ ꓪꓽ ꓡꓲ ꓜꓶꓽ ꓢꓲ꓾ ꓢꓲ ꓡꓲ ꓟ ꓕꓲꓽ ꓖ ꓗꓪ ꓙꓰˍ ꓡꓳ꓿ 33 ꓖꓳ ꓡꓱ ꓥ ꓟꓲ ꓬꓲ ꓪꓽ ꓖꓳ ꓗꓪ ꓐꓰ ꓓꓳ ꓙꓰˍ ꓟ ꓔꓯ ꓟꓳꓻ ꓢꓲ ꓬꓲ ꓪꓽ ꓔꓯ ꓢꓷꓸ ꓢꓴ ꓐꓴ ꓠꓬ꓾ ꓡꓳ ꓒꓱ ꓮꓽ ꓙꓵ ꓗꓪ ꓐꓰ ꓔꓷꓹ ꓙꓰ ꓢꓲ ꓠꓬꓲ ꓬꓲ ꓪꓽ ꓧꓶꓸ ꓕꓯ ꓖꓳ ꓗꓪ ꓛꓲ ꓬꓰˍ ꓡꓳ꓿ 34 ꓬꓰ-ꓢꓴ ꓠꓽ ꓡꓲ ꓗꓪ ꓐꓰ ꓓꓳ ꓡ ꓕꓯ ꓞꓳ ꓜꓴ ꓞꓳ ꓟꓯꓼ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓪꓽ ꓠꓽ ꓡꓳꓸ ꓢꓴ ꓟꓽ ꓙꓳ ꓟ ꓮ ꓣꓳˍ ꓡꓰ ꓐꓰ ꓗꓹ ꓠꓬꓲ꓾ ꓬꓲ ꓠꓬ ꓬꓲ ꓪꓽ ꓔꓯ ꓫꓱꓸ ꓤ ꓢꓲ꓾ ꓟꓸ ꓟꓲꓽ ꓮꓽ ꓟꓬꓹ ꓫꓵꓽ ꓟꓸ ꓖꓶ ꓪꓴꓸ ꓔꓴˍ ꓡꓳ꓿ 35 ꓟꓰꓻ ꓬꓰ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓔꓯ ꓡ ꓢꓲ꓾ ꓕꓱ ꓗꓪ ꓠꓬ ꓡꓲ ꓛꓲ ꓟꓵꓽ ꓖꓳꓽ ꓥ ꓢꓲ ꓟꓰꓻˍ ꓟꓲ ꓟꓰ ꓬꓰꓳ꓿ 36 ꓖꓳ ꓡꓱ ꓠꓬꓲ ꓞꓳ ꓜꓴꓻ ꓔꓯ ꓚꓳ ꓡꓳ ꓗꓪ ꓟ ꓘꓹ ꓗꓪ ꓙꓰ ꓝꓲ ꓢꓲ ꓜꓽ ꓓꓴ ꓕꓲ ꓫꓵꓽ ꓫꓵꓽ ꓪꓴꓻ ꓜꓽ ꓬꓰ ꓝꓲ꓾ ꓐꓯˍ ꓡꓳ꓿ 37 ꓬꓲ ꓠꓽ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓬꓲ ꓪꓽ ꓔꓯ ꓠꓴ ꓪꓽ ꓖꓶꓽ ꓜꓽ ꓟꓴꓽ꓾ ꓐꓯˍ ꓡꓳ꓿ ꓬꓲ ꓪꓽ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓠꓬ ꓓꓲ-ꓠ-ꓣꓲ ꓠꓬꓲꓽ ꓦꓬꓻ ꓒꓯꓼ ꓒꓵꓽ ꓜꓽ ꓓꓴ ꓪꓴꓻ ꓢꓲ ꓬꓲ ꓪꓽ ꓔꓯ ꓕꓲ ꓣꓳ ꓮ ꓔꓲꓸ ꓖꓶꓽ ꓜꓽ ꓠꓯꓹ ꓡ?꓾ ꓐꓯˍ ꓡꓳ꓿ 38 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓑ ꓑ ꓮ ꓟꓬ ꓑꓬ ꓙꓳˍ ꓟ ꓡꓳꓸ ꓠꓬꓲ ꓬꓰ꓾ ꓐꓯˍ ꓡꓳ꓿ ꓬꓲ ꓪꓽ ꓡꓳꓸ ꓠꓬꓲ ꓠꓬ꓾ ꓑ ꓑ ꓥꓪꓽ ꓑꓬ꓾ ꓥꓪꓸ ꓠꓬꓲꓽ ꓟ ꓧꓪ ꓟꓶ ꓠꓬꓲ ꓬꓲ ꓔꓯ ꓐꓯ ꓖꓶˍ ꓡꓳ꓿ 39 ꓖꓳ ꓕꓯ ꓬꓰ-ꓢꓴ ꓡꓰ ꓞꓳ ꓜꓴꓻ ꓔꓯ ꓟꓳꓼ ꓠꓲꓹ ꓛꓵꓼ ꓗꓪ꓾ ꓕꓲ ꓜꓴꓻ ꓕꓲ ꓜꓴꓻ ꓐꓰ ꓠꓬꓲꓸ ꓠꓸ ꓝꓲ ꓠꓹ ꓟ ꓕꓵꓼ ꓪ ꓖꓶˍ ꓡꓳ꓿ 40 ꓖꓳ ꓡꓱ ꓠꓬ ꓬꓲ ꓪꓽ ꓡꓰ꓾ ꓕꓲ ꓜꓴꓻ ꓗꓪ ꓕꓲ ꓦꓬꓻ ꓣꓳ꓾ ꓥ ꓠꓬ ꓥꓪꓽ ꓞꓲ ꓣꓳ꓾ ꓐꓰ ꓠꓬꓲꓸ ꓠꓸ ꓝꓲˍ ꓡꓳ꓿ 41 ꓬꓰ-ꓢꓴ ꓠꓬ ꓑ ꓑ ꓥꓪꓽ ꓑꓬˍ ꓐꓰ ꓥꓪꓸ ꓠꓬꓲꓽ ꓟꓻ ꓟ ꓣꓴ ꓔ ꓢꓲ꓾ ꓟꓴꓽ ꓗꓪ ꓗꓪ ꓡꓳꓸ ꓢꓲ ꓠꓬꓲ ꓶꓼ ꓥꓳꓽ ꓙꓱ ꓗꓷ ꓠꓬ꓾ ꓑ ꓑ ꓦꓶꓹ ꓢꓲ ꓠꓬꓲ ꓮꓽ ꓙꓵ ꓢꓴ ꓔꓯ ꓑꓶ ꓖꓶ ꓜꓽ ꓠꓹ ꓟ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓖꓶˍ ꓡꓳ꓿ ꓥꓪꓸ ꓖꓳ ꓠꓬꓲꓽ ꓟˍ ꓟꓲ ꓮꓽ ꓙꓵ ꓢꓴ ꓔꓯ ꓑꓶꓺ ꓖꓶˍ ꓡꓳ꓿ 42 ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓜꓽ ꓐꓳ ꓡꓰˍ ꓡꓳ꓿ 43 ꓬꓲ ꓪꓽ ꓠꓬ ꓑ ꓑˍ ꓐꓰ ꓥꓪꓸ ꓧꓪꓽ ꓬꓲ ꓧꓶꓽ ꓬꓲ ꓟꓲ ꓞꓲ ꓠꓬꓲꓽ ꓠꓳꓸ ꓘꓴꓽ ꓖꓳ ꓫ ꓟꓶꓻˍ ꓡꓳ꓿ 44 ꓑ ꓑ ꓜꓽ ꓢꓴ ꓠꓬ ꓞꓳ ꓑ ꓤˍ ꓡꓰꓽ ꓥꓪꓽ ꓔꓴ ꓣꓳ ꓙꓳˍ ꓡꓳ꓿ 45 ꓬꓰ-ꓢꓴ ꓠꓬ ꓞꓳ ꓜꓴ ꓔꓯ ꓡꓽ ꓙꓰ ꓝꓲ ꓔꓬ ꓕꓯ꓾ ꓬꓲ ꓠꓬ ꓞꓼ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓡꓲ ꓗꓪ ꓓꓵꓽ ꓡꓰ ꓝꓲ ꓢꓲ꓾ ꓬꓲ ꓪꓽ ꓔꓯ ꓧꓶꓸ ꓕꓯ ꓖꓳ ꓐꓽ ꓢꓲ ꓐꓱ-ꓢꓰ-ꓓ ꓗꓪ ꓙꓰ ꓝꓲˍ ꓡꓳ꓿ 46 ꓬꓲ ꓪꓽˍ ꓐꓰ ꓧꓹ ꓡꓯꓽ ꓘꓳ ꓗꓷ ꓠꓬ ꓗꓸ ꓠꓯ꓾ ꓬꓰ-ꓢꓴ ꓠꓬ ꓪꓽ ꓘꓴ ꓠꓹ ꓟ ꓪꓽ ꓚꓲ ꓗꓪ ꓓꓯ ꓙꓰˍ ꓡꓳ꓿ 47 ꓟꓶꓼ ꓘꓶꓼ ꓛꓲ ꓡ ꓕꓯ ꓡꓲꓺ ꓠꓬ ꓬꓲꓻ ꓡꓴꓽ ꓐꓱ ꓔꓱꓺ ꓦꓲ ꓗꓪ ꓛꓲ ꓬꓰˍ ꓡꓳ꓿ ꓬꓰ-ꓢꓴ ꓠꓽ ꓕꓲ ꓣꓳ ꓔꓵꓸꓼ ꓪꓽ ꓚꓲ ꓗꓪ ꓔꓬ ꓡꓳ꓿ 48 ꓟꓲꓽ ꓦꓲ ꓠꓬ ꓬꓲ ꓪꓽ ꓔꓯ ꓙꓱꓼ ꓔꓳꓹ ꓔꓬ ꓠꓬꓲ ꓡꓲ ꓒꓰꓹ ꓫꓸˍ ꓟ ꓔꓯ ꓬꓰ-ꓢꓴ ꓟꓳꓻ ꓗꓷ ꓠꓬ꓾ ꓠꓯꓼ ꓡꓲ ꓙꓵꓹ ꓛꓲ ꓕꓯ ꓬꓲꓻ ꓡꓴꓽ ꓐꓱ ꓕꓯ ꓢꓲ ꓬꓲ ꓪꓽ ꓔꓬ ꓗꓪ ꓫꓱꓽ ꓡ ꓢꓲ꓾ ꓬꓲ ꓪꓽ ꓔꓯ ꓫꓱꓽ ꓗꓳꓸ ꓙꓰˍ ꓐꓰ ꓬꓰˍ ꓡꓳ꓿ 49 ꓖꓳ ꓡꓱ ꓥ ꓟꓲ ꓬꓲꓻ ꓡꓴꓽ ꓐꓱ ꓕꓯꓽ ꓢꓲ ꓗꓪ ꓬꓲ ꓫꓱꓽ ꓔꓬ ꓟ ꓔꓯ ꓬꓲ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ꓾ ꓫꓵꓻ ꓗꓴꓸ ꓫꓵꓻ ꓦ ꓥ ꓝꓲ ꓞꓹ ꓠꓬꓲ ꓘꓴ ꓔꓴ ꓡ ꓡꓳ꓿ 50 ꓬꓲ ꓪꓽ ꓮꓽ ꓙꓵ ꓬꓲ ꓔꓯ ꓟꓳꓻ ꓗꓷ ꓠꓬꓲ ꓮꓽ ꓘꓶꓸ ꓙꓳꓺ ꓡꓰꓳ꓿ ꓬꓲ ꓠꓽ ꓞꓼ ꓐꓰ ꓬꓲ ꓪꓽ ꓔꓯ ꓫꓸ ꓕꓱ ꓢꓲ꓾ ꓠꓲꓹ ꓪꓴꓽ ꓪꓴꓽ ꓔꓬ꓾ ꓥꓪ ꓥ ꓡꓳ꓾ ꓕꓽ ꓙꓳꓺ꓾ ꓐꓯˍ ꓡꓳ꓿ 51 ꓡꓲ ꓗꓪ ꓬꓰ-ꓢꓴ ꓓꓯ ꓓꓵꓽ ꓡꓰ ꓠꓬ ꓟꓲꓽ ꓦꓲ ꓙꓱꓼ ꓠꓽ ꓡꓰꓳ꓿ ꓖꓳ ꓕꓯ ꓬꓲ ꓪꓽ ꓮꓽ ꓘꓶꓸ ꓓꓵꓽ ꓙ ꓟꓶ ꓡꓰꓳ꓿ 52 ꓮ ꓡꓲꓳ ꓐꓯ ꓠꓬ ꓥꓪꓽ ꓔꓴ ꓣꓳ ꓔꓯ ꓑ ꓑ ꓖꓶ ꓜꓽˍ ꓟ ꓔꓯ ꓬꓲ ꓪꓽ ꓟꓽ ꓙꓽ ꓜꓲꓼ꓿ ꓬꓲ ꓪꓽ ꓠꓲꓹ ꓟ ꓠꓽ ꓔꓯꓽˍ ꓢꓰꓽ ꓡꓳ꓿ 53 ꓬꓲ ꓪꓽ ꓖꓳ ꓐꓽ ꓢꓲ ꓗꓪ ꓛꓲ ꓬꓰ ꓠꓬ꓾ ꓖꓶ-ꓠꓲ-ꓢ-ꓡꓱ ꓟꓵ ꓗꓪ ꓛꓲ ꓬꓰ ꓢꓲ꓾ ꓬꓲꓻ ꓙꓬ ꓘꓶꓽ ꓗꓪ ꓡꓲ ꓞꓳꓹ ꓔ ꓬꓰˍ ꓡꓳ꓿ 54 ꓬꓲ ꓪꓽ ꓠꓬ ꓡꓲ ꓗꓪ ꓐꓰ ꓓꓳ ꓡ ꓕꓯ꓾ ꓑ ꓫꓬꓼ ꓐꓴ ꓞꓼ ꓐꓰ ꓬꓲ ꓔꓯ ꓡꓳꓸ ꓢꓷꓸ ꓡꓰ ꓠꓬꓲ꓾ 55 ꓖꓳ ꓕꓲ ꓟꓵꓽ ꓚꓳ ꓡꓳ ꓗꓪ ꓔꓷꓹ ꓙꓰ ꓢꓲ꓾ ꓠꓻ ꓢꓴ ꓒꓬꓽ ꓢꓴ ꓔꓯ ꓬꓲꓼ ꓖꓴ ꓗꓪ ꓑꓱꓸ ꓔ ꓢꓲ ꓠꓬꓲ꓾ ꓬꓰ-ꓢꓴ ꓮ ꓡꓲ ꓗꓪ ꓔꓬ ꓟ ꓑ ꓙꓽ ꓠꓬ ꓖꓳ ꓗꓪ ꓡꓻˍ ꓡꓳ꓿ 56 ꓬꓲ ꓮ ꓡꓲ ꓗꓪ ꓛꓲ ꓬꓰ ꓠꓬ꓾ ꓡꓳ ꓒꓱ ꓘꓹ ꓒꓱ ꓗꓪ ꓥ ꓟꓲ꓾ ꓘꓹ ꓤ ꓗꓪ ꓥ ꓟꓲ꓾ ꓙ ꓖꓴ ꓙ ꓐꓽ ꓗꓪ ꓥ ꓟꓲ꓾ ꓬꓲ ꓪꓽ ꓠꓬ ꓠꓻ ꓢꓴ ꓒꓬꓽ ꓢꓴ ꓔꓯ ꓙꓵꓺ ꓙ ꓖꓴ ꓗꓪ ꓗꓶ ꓔꓸ ꓢꓲ ꓬꓲ ꓐꓵ ꓞꓶꓽ ꓟꓶꓽ ꓗꓪˍ ꓡꓰꓽ ꓥ ꓟꓲ ꓫꓱꓹ ꓪ ꓠꓹ ꓟ ꓬꓲ ꓔꓯ ꓓꓰꓽˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓔꓯ ꓫꓱꓹ ꓪ ꓢꓴ ꓥ ꓕ ꓑꓳꓸ ꓠꓬ ꓓꓻ ꓡꓰˍ ꓡꓳ꓿

ꓟ-ꓗꓳ 7

1 ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓡꓻ ꓟ ꓒ-ꓡꓲ-ꓢꓷ ꓐꓴˍ ꓐꓰ꓾ ꓙꓵꓽ ꓗ ꓟꓸ ꓒ ꓐꓴ ꓕꓲ ꓐꓱ ꓠꓬ ꓬꓰ-ꓢꓴ ꓔꓬ ꓗꓪ ꓜꓲꓼ ꓡ ꓡꓳ꓿ 2 ꓬꓲ ꓛꓳꓽ ꓒꓯꓹ ꓐꓴ ꓕꓲ ꓐꓱ ꓠꓬ ꓡꓯꓼ ꓒꓯꓹ ꓟꓽ ꓞꓲꓽ ꓞꓲ ꓜꓻ ꓜˍ ꓟ ꓔꓯ ꓬꓲ ꓪꓽ ꓟꓳꓻˍ ꓡꓳ꓿ 3 (ꓮ ꓡꓲꓳ ꓐꓯ ꓠꓬ ꓒ-ꓡꓲ-ꓢꓷ ꓐꓴˍ ꓐꓰ ꓬꓴ-ꓔ ꓡꓽ ꓞꓳ ꓮꓽ ꓙꓵ ꓠꓽ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓡꓲꓽ ꓒꓰꓼ ꓚ ꓢꓲ꓾ ꓡꓯꓼ ꓒꓯꓹ ꓬꓲ ꓜꓶ ꓟꓽ ꓞꓲꓽ ꓠꓬ ꓜꓻ ꓟꓽ ꓜ꓿ 4 ꓙꓵꓺ ꓗꓪ ꓐꓰ ꓬꓲꓼ ꓡ ꓟꓲ ꓖꓳ ꓓꓱ ꓟꓽ ꓞꓲꓽ ꓗꓷ ꓠꓬ ꓜ ꓟꓽ ꓜꓽ꓿ ꓝꓮꓲ ꓡꓴ ꓗꓶˍ ꓐꓰ ꓮꓸ ꓡꓴꓽˍ ꓐꓰ ꓙꓲꓽ ꓐꓰꓻ ꓔꓯ ꓞꓲꓽ ꓠꓯꓹ ꓟ ꓐꓰ꓾ ꓠꓱꓸ ꓐꓯꓼ ꓗ ꓫꓵꓺ ꓮꓽ ꓟꓬꓹ ꓬꓲ ꓪꓽ ꓛꓳˍ ꓢꓰꓽ ꓡꓳ꓿) 5 ꓒ-ꓡꓲ-ꓢꓷ ꓐꓴˍ ꓐꓰ ꓙꓵ ꓗ ꓟꓸ ꓒ ꓐꓴ ꓠꓬ ꓬꓰ-ꓢꓴ ꓔꓯ꓾ ꓠꓴ ꓛꓳꓽ ꓒꓯꓹ ꓐꓴ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓞꓳ ꓪꓴꓽ ꓞꓳ ꓔꓲ ꓐꓴ ꓡꓲꓽ ꓒꓰꓼ ꓟꓽ ꓛꓳ ꓛꓳ꓾ ꓡꓯꓼ ꓒꓯꓹ ꓟꓽ ꓞꓲꓽ ꓞꓲꓽ ꓜꓻ ꓜˍ ꓡ?꓾ ꓐꓰ ꓠꓺ ꓠꓬꓲˍ ꓡꓳ꓿ 6 ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓐꓴꓳ꓾ ꓬꓲ-ꓢ-ꓬ ꓟꓷꓽ ꓠꓷꓹ ꓝꓸ ꓢꓲ ꓠꓴ ꓪꓽ ꓔꓯ ꓟꓳꓸ ꓐꓳ ꓔ ꓟ꓾ ꓑ ꓫꓬꓼ ꓐꓴ ꓠꓬ ꓟꓷꓽ ꓠꓷꓹ ꓗꓴꓹ ꓙꓲˍ ꓡꓰꓽ ꓥꓪ ꓔꓯ ꓒꓵꓽˍ ꓡꓳ꓿ ꓬꓲ ꓪꓽ ꓠꓲꓹ ꓟ ꓠꓽ ꓥꓪ ꓔꓯˍ ꓐꓰ ꓶꓽ ꓤ ꓗꓳꓹ ꓞꓹ ꓡꓳ꓿ 7 ꓬꓲ ꓪꓽ ꓠꓬ ꓞꓳ ꓤ ꓟꓸ ꓘꓶꓽ ꓔꓯ ꓥꓪ ꓕꓵꓼ ꓪ ꓥ ꓟ ꓡꓰ ꓐꓰ ꓚꓬꓹ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪꓽ ꓥꓪ ꓔꓯ ꓪꓴꓸ ꓓꓵ ꓕꓱꓼˍ ꓟ ꓠꓬ ꓬꓲ ꓖꓳꓽ ꓥꓳ꓾ ꓐꓰ ꓐꓯˍ ꓟ ꓠꓬ ꓚꓵ ꓚꓵ ꓠꓴ ꓪꓽ ꓔꓯ ꓐꓯ ꓬꓯꓼˍ ꓡꓳ꓿ 8 ꓠꓴ ꓪꓽ ꓠꓬ ꓪꓴ-ꓢ ꓕꓵꓼ ꓪ ꓔꓯ ꓡꓳꓺ ꓗꓷ ꓢꓲ꓾ ꓞꓳ ꓡꓲꓽ ꓞꓳ ꓒꓰꓼ ꓔꓯˍ ꓡꓰꓽ ꓣꓴꓻ ꓔ ꓡꓳ꓾ ꓐꓯ ꓖꓶˍ ꓡꓳ꓿ 9 ꓝꓮꓲ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓠꓴ ꓪꓽ ꓡꓲꓽ ꓒꓰꓼ ꓔꓯ ꓒꓵꓽ ꓛꓳ ꓠꓹ ꓟ ꓪꓴ-ꓢ ꓕꓵꓼ ꓪ ꓔꓯ ꓠꓽ ꓬꓲ ꓐꓽ ꓗꓪ ꓙꓵꓺ ꓔ ꓗꓴꓸˍ ꓐꓷ꓿ 10 ꓟꓳ-ꓫꓲ ꓡꓰ꓾ ꓠꓴ ꓮꓽ ꓐꓽ ꓮ ꓟ ꓔꓯ ꓒꓵꓽ꓿ ꓮꓽ ꓐꓽ ꓮ ꓟ ꓔꓯ ꓙꓱꓽ ꓢꓴ ꓔꓯ ꓠꓽ ꓚꓵ ꓚꓵ ꓫꓵꓻ ꓝꓲ ꓠ ꓗꓹ ꓡꓳ꓾ ꓐꓯˍ ꓡꓳ꓿ 11 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ꓾ ꓡꓽ ꓞꓳ ꓕꓲ ꓣꓳ ꓬꓲ ꓐꓹ ꓐ ꓟꓹ ꓟ ꓔꓯ꓾ ꓠꓴ ꓔꓯ ꓖꓶꓽ ꓙꓲꓽ ꓙꓳˍ ꓟ ꓠꓬ ꓥꓪ ꓡꓰ ꓪꓴ-ꓢ ꓔꓯ ꓔꓲꓺ ꓖꓶ ꓗꓷꓳ꓾ ꓐꓯˍ ꓕꓯ꓾ 12 ꓬꓲ ꓐꓹ ꓐ ꓟꓹ ꓟ ꓔꓯ ꓝꓮꓲ ꓮꓸ ꓫꓵˍ ꓟꓲ ꓟꓽ ꓬꓰ ꓙ ꓝꓲ꓿ 13 ꓖꓳ ꓡꓱ ꓡꓱ ꓢꓲ ꓠꓴ ꓪꓽ ꓠꓬ ꓒꓵꓽ ꓒꓽ ꓐꓴ ꓗꓪ ꓐꓰ ꓝꓸ ꓩꓴ ꓡ ꓟ ꓡꓲꓽ ꓒꓰꓼ ꓡꓰ꓾ ꓪꓴ-ꓢ ꓐꓯ ꓘꓶꓽ ꓔꓯ ꓖꓳꓽ ꓡꓰ ꓝꓲˍ ꓡꓳ꓿ ꓠꓴ ꓪꓽ ꓠꓬ ꓕꓱ ꓟ ꓡꓰ ꓐꓰ ꓠꓱꓸ ꓐꓯꓼ ꓮꓽ ꓟꓬꓹ ꓫꓵꓽ ꓬꓰˍ ꓢꓰꓽ ꓡꓳ꓾ ꓐꓯˍ ꓡꓳ꓿ 14 ꓖꓳ ꓗꓸ ꓠꓯꓸ ꓬꓰ-ꓢꓴ ꓡꓰ ꓞꓳ ꓜꓴ ꓔꓯ ꓝꓮꓲ ꓘꓴ ꓜꓲꓼ ꓡ ꓢꓲ꓾ ꓠꓴ ꓪꓽ ꓮꓽ ꓙꓵ ꓢꓴ ꓥꓪ ꓔꓯ ꓠ ꓠꓹ ꓢꓲ ꓙꓽ ꓜꓲꓼ ꓔ꓿ 15 ꓠꓱ ꓫꓱꓸ ꓟꓸꓼ ꓗꓪ ꓐꓰ ꓞꓳ ꓤ ꓠꓯꓸꓼ ꓗꓪ ꓓꓵꓽ ꓡꓰˍ ꓟ ꓡꓰ ꓬꓲ ꓔꓯ ꓟꓽ ꓫꓬꓻˍ ꓟ ꓗꓷ ꓡꓰ ꓝꓲ ꓟꓽ ꓗꓴꓸ꓿ ꓞꓳ ꓤ ꓠꓯꓸꓼ ꓗꓪ ꓐꓰ ꓓꓳ ꓡ ꓟ ꓠꓽ ꓬꓲ ꓔꓯ ꓟꓽ ꓫꓬ ꓟꓺ ꓗꓷ ꓡꓰ ꓝꓲ ꓗꓴˍ ꓡꓳ꓿ 16 (ꓠꓸ ꓑꓳ ꓙꓳ ꓢꓴ ꓠ ꓠꓹ꓾ ꓐꓯˍ ꓡꓳ꓿) 17 ꓬꓰ-ꓢꓴ ꓠꓬ ꓞꓳ ꓜꓴˍ ꓐꓰ ꓧꓹ ꓗꓷ ꓢꓲ ꓦꓲ ꓗꓪ ꓓꓵꓽ ꓡꓰˍ ꓕꓯ꓾ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓲ ꓔꓯ ꓔꓯ ꓥꓳꓽ ꓕꓱ ꓟ ꓮꓸ ꓫꓵ ꓔꓯ ꓔꓯˍ ꓟ ꓠ ꓠꓬꓲ ꓡ ꓡꓳ꓿ 18 ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪˍ ꓟꓲ ꓖꓳ ꓘꓶꓻ ꓙꓽ ꓜꓲꓼ ꓠꓲꓹ ꓟꓽ ꓡꓳꓼ ꓢꓰꓽ ꓡ? ꓮꓸ ꓫꓵˍ ꓟꓲ ꓠꓱ ꓫꓱꓸ ꓟꓸꓼ ꓗꓪ ꓐꓰ ꓞꓳ ꓤ ꓠꓯꓸꓼ ꓓꓵꓽ ꓡꓰˍ ꓟ ꓠꓽ꓾ ꓬꓲ ꓔꓯ ꓟꓽ ꓫꓬ ꓟꓺ ꓗꓷ ꓡꓰ ꓝꓲ ꓟꓽ ꓗꓴꓸ ꓟ ꓠꓴ ꓪꓽ ꓟꓽ ꓙꓽ ꓜꓲꓼˍ ꓡ? 19 ꓮ ꓡꓲꓳ ꓐꓯ ꓠꓬ ꓜꓽ ꓓꓵꓽ ꓙꓰ ꓟ ꓖꓳ ꓟ ꓠꓽ ꓬꓲ ꓠꓲꓹ ꓟ ꓗꓪ ꓟꓽ ꓓꓵꓽ ꓡꓰ ꓡꓰ꓾ ꓬꓲ ꓦꓰꓼ ꓛꓲꓽ ꓗꓪˍ ꓡꓰꓽ ꓓꓵꓽ ꓡꓰ ꓢꓲ꓾ ꓠꓱꓺ ꓢꓲꓺ ꓙꓰ ꓖꓴ ꓗꓪ ꓓꓳ ꓙꓰˍ ꓡꓳ꓾ ꓐꓯˍ ꓡꓳ꓿ (ꓬꓲ ꓕꓱ ꓡꓱ ꓐꓯˍ ꓟ ꓠꓬ꓾ ꓜꓽ ꓓꓴ ꓥ ꓕ ꓑꓳꓸ ꓠꓬ ꓫꓬꓻˍ ꓟ ꓥꓳ꓾ ꓐꓯˍ ꓟ ꓥ ꓡꓳ꓿) 20 ꓝꓮꓲ ꓬꓲ ꓡꓰ꓾ ꓞꓳ ꓤ ꓕꓲ ꓣꓳ ꓠꓯꓸꓼ ꓗꓪ ꓐꓰ ꓓꓳ ꓡ ꓟ ꓠꓽ꓾ ꓬꓲ ꓔꓯ ꓟꓽ ꓫꓬ ꓟꓺ ꓗꓷ ꓡꓰ ꓝꓲˍ ꓡꓳ꓿ 21 ꓮ ꓡꓲꓳ ꓐꓯ ꓠꓬ ꓞꓳ ꓤ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓓꓳ ꓡ ꓟ ꓠꓬ꓾ ꓟꓽ ꓙꓲ ꓟ ꓔꓯ ꓓꓵꓽ ꓙˍ ꓟ꓾ ꓟꓽ ꓢꓲ ꓟꓽ ꓫꓬ ꓟ꓾ ꓘꓴꓽ ꓜꓽ ꓠꓯ ꓜꓽˍ ꓟ꓾ ꓞꓳ ꓤ ꓢꓰꓼˍ ꓟ꓾ ꓦꓬꓼ ꓛꓳꓽ ꓧꓪˍ ꓟ꓾ 22 ꓟꓬ ꓠꓯꓺˍ ꓟ꓾ ꓥꓶˍ ꓟ ꓬꓲ ꓫꓵꓽ ꓬꓲ ꓙꓰ꓾ ꓗꓶꓸˍ ꓟ꓾ ꓦꓯꓸ ꓠꓲꓹ ꓙꓵꓽˍ ꓟ꓾ ꓟꓬ ꓦꓯꓸˍ ꓟ꓾ ꓪ ꓕꓱˍ ꓟ꓾ ꓠꓲꓹ ꓘꓹˍ ꓟ꓾ ꓞꓳ ꓙꓲꓽ ꓞꓳ ꓪꓴꓸˍ ꓡꓰ ꓐꓰ ꓬꓰˍ ꓟ꓾ 23 ꓕꓱ ꓟꓬ ꓫꓵꓽ ꓠꓬ ꓞꓳ ꓤ ꓠꓯꓸꓼ ꓗꓪ ꓐꓰ ꓓꓳ ꓡ ꓢꓲ꓾ ꓞꓳ ꓤ ꓔꓯ ꓟꓽ ꓫꓬ ꓟꓺ ꓗꓷ ꓡꓰ ꓝꓲ ꓐ ꓡ ꓡꓳ꓾ ꓐꓯˍ ꓡꓳ꓿ 24 ꓬꓰ-ꓢꓴ ꓠꓬ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓕꓲ-ꓬ ꓐꓰ ꓢꓲ-ꓓꓳ ꓟꓵꓽ ꓗꓪ ꓓꓵꓽ ꓙꓰˍ ꓡꓳ꓿ ꓬꓲ ꓠꓬ ꓦꓲ ꓕꓲ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓮꓽ ꓟ ꓔꓯˍ ꓟꓲ ꓬꓲ ꓔꓬ ꓟ ꓢꓷꓸ ꓡꓰ ꓝꓲ ꓠꓲꓹ ꓟꓽ ꓫꓵ꓿ ꓖꓳ ꓡꓱ ꓥ ꓟꓲ ꓢꓴ ꓟꓽ ꓢꓷꓸ ꓢꓷꓸ ꓬꓲ ꓑꓬ ꓠꓬꓹ ꓟꓽ ꓒꓬꓱꓼ ꓡ꓿ 25 ꓖꓳ ꓗꓪ ꓟꓽ ꓫꓬ ꓠꓲꓽ ꓜꓶꓽ ꓞꓹ ꓟ ꓮꓸ ꓟꓲꓽ ꓕꓲ ꓣꓳ ꓔꓬ ꓡꓳ꓿ ꓖꓳ ꓡꓱ ꓢꓲ ꓮꓸ ꓟꓲꓽ ꓬꓲ ꓟꓹ ꓟ ꓠꓬ ꓬꓰ-ꓢꓴ ꓖꓳ ꓗꓪ ꓛꓲ ꓡ ꓟ ꓑ ꓙꓽ ꓡꓰ ꓟꓶ ꓕꓯ꓾ ꓬꓲ ꓔꓯ ꓡ ꓢꓲ ꓬꓲ ꓟꓲꓽ ꓙꓬꓽ ꓗꓪ ꓟꓳꓼ ꓡ ꓡꓳ꓿ 26 ꓤ ꓟꓶ ꓤ ꓖꓳ ꓟ ꓠꓽ꓾ ꓢꓲ-ꓣꓳ-ꓩꓳ-ꓠꓲ-ꓫꓲ-ꓬ ꓟꓵꓽ ꓗꓪ ꓦꓵꓻ ꓔ ꓟ ꓦꓲ-ꓡꓲ ꓡꓽ ꓞꓳ ꓥ ꓢꓲ꓾ ꓠꓲꓽ ꓖꓳ ꓟ ꓔꓯ ꓬꓲ ꓮꓸ ꓟꓲꓽ ꓗꓪ ꓐꓰ ꓖꓼ ꓓꓳ ꓗꓷ ꓠꓹ ꓟ ꓬꓰ-ꓢꓴ ꓔꓯ ꓟꓽ ꓠꓽ ꓠꓽ ꓓꓰꓽˍ ꓡꓳ꓿ 27 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓤ ꓠꓱ ꓐꓴ ꓜꓽ ꓓꓴ ꓣꓴ ꓢꓲ ꓮꓸ ꓠꓽ ꓔꓯ ꓡꓳꓺ ꓖꓶ ꓜꓽ ꓙꓲꓽ ꓟꓽ ꓙꓳ꓿ ꓤ ꓠꓱ ꓐꓴ ꓔꓯ ꓧꓶꓸ ꓕꓯ ꓜꓽ ꓐꓳ ꓡꓰ ꓝꓲ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ꓿ 28 ꓬꓲ ꓡꓰ ꓬꓰ-ꓢꓴ ꓔꓯ꓾ ꓥ ꓡꓳ꓾ ꓢꓲ ꓒꓽꓳ꓾ ꓖꓳ ꓡꓱ ꓥ ꓟꓲ ꓢꓽ ꓡ ꓠꓯꓸ ꓘꓪ ꓗꓪ ꓔꓬ ꓟ ꓮꓸ ꓠꓽˍ ꓟꓲ ꓤ ꓠꓱ ꓐꓴ ꓡꓰ ꓞꓰꓻ ꓗꓷ ꓟ ꓜ ꓟꓰꓽ ꓠꓽ ꓖꓳ ꓜꓽˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 29 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓕꓱ ꓡꓱ ꓒꓳꓹ ꓖꓶ ꓗꓴˍ ꓠꓬꓲ꓾ ꓙꓰ Gꓽ꓾ ꓠꓲꓽ ꓠꓬ ꓠꓴ ꓮꓸ ꓟꓲ ꓖꓳ ꓓꓱ ꓗꓪ ꓐꓰ ꓓꓳ ꓙꓰꓳ꓾ ꓐꓯ ꓖꓶˍ ꓡꓳ꓿ 30 ꓬꓲ ꓦꓲ ꓗꓪ ꓛꓲ ꓬꓰ ꓠꓬ꓾ ꓠꓲꓽ ꓠꓽ ꓓꓳ ꓙꓰ ꓗꓷ ꓢꓲ ꓤ ꓠꓱ ꓠꓬ ꓬꓲꓼ ꓖꓴ ꓗꓪ ꓬꓲꓼ ꓔ ꓔꓬ ꓟ ꓔꓯ ꓟꓳꓻ ꓡꓰꓳ꓿ 31 ꓖꓳ ꓗꓸ ꓠꓯꓸ ꓬꓰ-ꓢꓴ ꓠꓬ ꓕꓲ-ꓬ ꓟꓵ ꓗꓪ ꓐꓰ ꓓꓳ ꓙꓰ ꓢꓲ꓾ ꓢꓲ-ꓓꓳ ꓟꓵꓽˍ ꓐꓰ ꓓꓱ-ꓘꓹ-ꓒꓳꓹ-ꓡꓲ ꓟꓵ ꓗꓪ ꓐꓰ ꓗꓳꓸ ꓡ ꓢꓲ ꓠꓬꓲ꓾ ꓖ-ꓡꓲ-ꓡꓲ ꓬꓲꓻ ꓡꓴꓽ ꓐꓱ ꓗꓪ ꓛꓲ ꓡ ꓡꓳ꓿ 32 ꓬꓲ ꓪꓽ ꓡꓰ ꓠꓸ ꓐꓳꓽ ꓡꓺ ꓢꓲꓺ ꓢꓴ ꓕꓲ ꓣꓳ ꓬꓰ-ꓢꓴ ꓔꓬ ꓗꓪ ꓧꓳꓽ ꓛꓲ ꓡ ꓢꓲ꓾ ꓬꓲ ꓔꓯ ꓡꓯꓼ ꓒꓯꓹ ꓚꓰꓹ ꓖꓶ ꓡꓯ꓾ ꓐꓰ ꓓꓰꓽˍ ꓡꓳ꓿ 33 ꓬꓰ-ꓢꓴ ꓡꓰ ꓞꓳ ꓜꓴ ꓗꓳ ꓡꓳ ꓗꓪ ꓐꓰ ꓘꓳ ꓫꓱ ꓫꓱˍ ꓗꓪ ꓬꓲ ꓔꓯ ꓧꓳꓽ ꓙꓰ ꓢꓲ꓾ ꓬꓲ ꓠꓸ ꓑꓳ ꓘꓴꓻ ꓗꓪ ꓡꓯꓼ ꓠꓬꓲ ꓫꓱꓹ ꓢꓲ ꓠꓬꓲ꓾ ꓟꓷꓽ ꓶꓻ ꓔꓲꓸ ꓢꓲ ꓬꓲ ꓡ ꓛꓱ ꓗꓪ ꓫꓱꓹ ꓖꓶˍ ꓡꓳ꓿ 34 ꓖꓳ ꓕꓯ ꓟꓴꓽ ꓗꓪ ꓗꓪ ꓡꓳꓸ ꓢꓲ꓾ ꓢꓯꓼ ꓓꓽ ꓟ ꓦ ꓢꓲ ꓠꓬꓲ ꓬꓲ ꓔꓯ꓾ ꓱ-ꓩ-ꓕ꓾ ꓐꓯˍ ꓡꓳ꓿ ꓕꓱ ꓟ ꓠꓬ꓾ ꓒꓴ ꓡꓯ Gꓽ꓾ ꓐꓯˍ ꓟ ꓥ ꓡꓳ꓿ 35 ꓖꓳ ꓡꓱ ꓠꓬ ꓖꓳ ꓕꓲ ꓣꓳ ꓬꓲ ꓠꓸ ꓑꓳ ꓒꓴ ꓡ ꓢꓲ꓾ ꓬꓲ ꓡ ꓛꓱ ꓢꓲꓺ ꓞꓹ ꓟˍ ꓟꓲ ꓐꓶꓻ ꓡ ꓢꓲ ꓠꓬꓲ ꓫꓬꓻ ꓫꓬˍ ꓡꓰꓽ ꓫꓸ ꓕꓱ ꓡ ꓡꓳ꓿ 36 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓮꓽ ꓟ ꓔꓯˍ ꓟꓲ ꓕꓽ ꓐꓯ ꓖꓶ꓾ ꓐꓰ ꓕꓵꓼ ꓪ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓡꓰ ꓬꓲ ꓪꓽ ꓔꓯ ꓟꓬꓽ ꓠꓬꓲ ꓖꓳ ꓡꓱ ꓕꓵꓼ ꓪ ꓖꓶ ꓗꓷ ꓠꓬ꓾ ꓟꓬꓽ ꓠꓬꓲ ꓕꓲ ꓟꓵ ꓕꓲ ꓡꓳꓻ ꓐꓯ ꓒꓬꓱ ꓙꓰˍ ꓡꓳ꓿ 37 ꓞꓳ ꓜꓴꓻ ꓠꓬ ꓓꓵꓽ ꓙ ꓟꓶꓻ ꓖꓴ ꓟꓽ ꓓ ꓡꓰ ꓢꓲ꓾ ꓬꓲ ꓬꓰˍ ꓟ ꓠꓽ ꓮꓽ ꓙꓵ ꓡꓱꓸꓼ ꓜꓳꓽˍ ꓟˍ ꓡꓰꓽ ꓥ ꓐꓷ꓿ ꓠꓸ ꓐꓳꓽ ꓔꓯˍ ꓟꓲ ꓑ ꓙꓽ ꓡ ꓝꓲˍ ꓐꓷ꓾ ꓞꓳ ꓟꓶ ꓔꓯˍ ꓟꓲ ꓫꓸ ꓕꓱ ꓡ ꓝꓲˍ ꓐꓷ꓾ ꓐꓯˍ ꓡꓳ꓿

ꓟ-ꓗꓳ 8

1 ꓦꓬꓼ ꓠꓬꓲ ꓖꓳ ꓟ ꓗꓪ ꓞꓳ ꓜꓴ ꓞꓳ ꓟꓯꓼ ꓝꓮꓲ ꓜꓲꓼ ꓡ ꓢꓲ ꓬꓲ ꓪꓽ ꓜꓽ ꓓꓴ ꓟꓽ ꓙꓳ ꓗꓷ ꓡꓰ ꓠꓬꓲ꓾ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓬꓲ ꓔꓬ ꓗꓪ ꓘꓴ ꓜꓲꓼ ꓡ ꓢꓲ ꓬꓲ ꓪꓽ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ 2 ꓥꓪ ꓠꓬ ꓞꓳ ꓜꓴ ꓕꓱ ꓟ ꓔꓯ ꓫꓱꓸ ꓤˍ ꓡꓳ꓿ ꓬꓲ ꓪꓽ ꓠꓬ ꓥꓪˍ ꓐꓰ ꓕꓲ ꓪꓺꓼ ꓢ ꓠꓬꓲ ꓔꓬ ꓗꓷ ꓠꓬꓲ ꓮꓸ ꓫꓵ ꓜꓽ ꓓꓴ ꓟꓽ ꓙꓳ ꓡꓰꓳ꓿ 3 ꓥꓪ ꓬꓲ ꓪꓽ ꓔꓯ ꓜꓻ ꓟꓽ ꓜ ꓜ ꓦꓲ ꓗꓪ ꓬꓲꓼ ꓙꓰ ꓝꓲˍ ꓠꓬ꓾ ꓙ ꓖꓴ ꓙ ꓐꓽ ꓗꓪ ꓬꓲ ꓪꓽ ꓦꓰꓼ ꓟꓷꓼ ꓦꓰꓼ ꓙꓬ ꓗꓷ ꓡꓰˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓕꓲ ꓐꓱ ꓠꓽ ꓶꓽ ꓤ ꓗꓪ ꓐꓰ ꓡꓻ ꓟ ꓥ ꓡꓳ꓾ ꓐꓯˍ ꓡꓳ꓿ 4 ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓕꓻ ꓡꓲ ꓛꓲ ꓗꓪ ꓡꓽ ꓞꓳ ꓕꓱ ꓟꓬ ꓣꓳ ꓔꓯ ꓜꓽ ꓐꓳ ꓡꓰ ꓝꓲ ꓠꓹ ꓟ꓾ ꓜꓽ ꓓꓴ ꓮ ꓡꓲ ꓗꓪ ꓧꓪ ꓐ ꓡ ꓢꓰ?꓾ ꓐꓯˍ ꓡꓳ꓿ 5 ꓖꓳ ꓡꓱ ꓠꓬ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓑ ꓑ ꓮꓺ ꓟꓬ ꓑꓬ ꓙꓳˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓫꓵꓽ ꓑꓬ ꓙꓳˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 6 ꓖꓳ ꓕꓯ ꓬꓲ ꓡꓰ ꓞꓳ ꓜꓴ ꓔꓯ ꓟꓲ ꓛꓬ ꓗꓪ ꓠꓬꓲꓸ ꓠꓸ ꓠꓹ ꓟ ꓕꓵꓼ ꓪ ꓖꓶˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓡꓰ ꓑ ꓑ ꓖꓳ ꓫꓵꓽ ꓑꓬ ꓣꓴ ꓢꓲ꓾ ꓫꓸ ꓟꓳ ꓗꓷ ꓢꓲ ꓦꓶꓹ ꓗꓷ ꓠꓬ꓾ ꓮꓽ ꓙꓵ ꓢꓴ ꓔꓯ ꓑꓶꓺ ꓖꓶ ꓠꓹ ꓟ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓡꓯꓼ ꓙꓱ ꓗꓷˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓞꓳ ꓜꓴꓻ ꓔꓯ ꓑꓶ ꓖꓶ ꓜꓽˍ ꓡꓳ꓿ 7 ꓥꓪꓸ ꓤꓽˍ ꓟꓲ ꓠꓬꓲꓽ ꓢ ꓟ ꓙꓳˍ ꓡꓳ꓿ ꓬꓲ ꓠꓬ ꓶꓼ ꓥꓳꓽ ꓙꓱꓽ ꓗꓷ ꓢꓲ꓾ ꓖꓳ ꓟˍ ꓟꓲ ꓞꓳ ꓜꓴ ꓔꓯ ꓑꓶ ꓖꓶ ꓜꓽ ꓝꓲˍ ꓡꓳ꓿ 8 ꓖꓳ ꓡꓱ ꓠꓬ ꓬꓲ ꓪꓽ ꓜ ꓐꓳ ꓡꓰ ꓢꓲ꓾ ꓜꓰꓻ ꓡꓰˍ ꓟ ꓬꓲꓸ ꓧꓶꓽ ꓬꓲ ꓟꓲ ꓫꓵꓽ ꓠꓳꓸ ꓘꓴ ꓓꓽ ꓟ ꓖꓳ ꓫ ꓟꓶˍ ꓡꓳ꓿ 9 ꓜꓽ ꓢꓴ ꓠꓬ ꓡꓲ ꓔꓴ ꓛꓲ ꓙꓳˍ ꓡꓳ꓿ ꓖꓳ ꓗꓸ ꓠꓯꓸ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓬꓲꓼ ꓙꓰ ꓝꓲˍ ꓡꓳ꓿ 10 ꓬꓲ ꓠꓬ ꓞꓼ ꓐꓰ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓡꓲ ꓗꓪ ꓓꓵꓽ ꓡꓰ ꓢꓲ꓾ ꓓ-ꓟ-ꓠꓴ-ꓕ ꓟꓵꓽ ꓗꓪ ꓙꓰˍ ꓡꓳ꓿ 11 ꓒ-ꓡꓲ-ꓢꓷ ꓐꓴ ꓠꓬ ꓬꓰ-ꓢꓴ ꓔꓯ ꓡ ꓢꓲ ꓬꓲ ꓔꓯ ꓫꓵꓽ ꓠꓬꓲ ꓠꓹ ꓟ꓾ ꓟꓴꓽ ꓗꓪ ꓗꓪ ꓐꓰ ꓢꓷꓸ ꓡꓰ ꓓꓴ ꓕꓲ ꓟ ꓟꓳꓸ ꓖꓶ ꓡꓯ꓾ ꓐꓰ ꓬꓲ ꓔꓯ ꓓꓰꓽˍ ꓡꓳ꓿ 12 ꓬꓲ ꓠꓽ ꓢꓯꓼ ꓓꓽ ꓟ ꓦ ꓢꓲ꓾ ꓕꓱ ꓕꓲꓽ ꓤꓶꓻ ꓢꓴ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓢꓷꓸ ꓡꓰ ꓓꓴ ꓧꓪˍ ꓡ? ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓕꓱ ꓕꓲ ꓤꓶ ꓢꓴ ꓔꓯ ꓮꓸ ꓫꓵ ꓢꓷꓸ ꓡꓰ ꓓꓴˍ ꓟꓲ ꓟꓽ ꓖꓶ꓾ ꓐꓯˍ ꓡꓳ꓿ 13 ꓖꓳ ꓡꓱ ꓢꓲ ꓬꓲ ꓪꓽˍ ꓐꓰ ꓧꓹ ꓗꓷ ꓠꓬ꓾ ꓡꓲ ꓜꓶꓽ ꓢꓲ ꓝꓮꓲ ꓖꓳ ꓐ ꓢꓲ ꓗꓪ ꓙꓰˍ ꓡꓳ꓿ 14 ꓛꓳꓽ ꓒꓯꓹ ꓐꓴ ꓠꓬ ꓑ ꓑ ꓔꓯꓹ ꓟꓲꓺ ꓡꓰ ꓠꓬꓲ꓾ ꓡꓲ ꓗꓪ ꓠꓬ ꓑ ꓑ ꓕꓲ ꓑꓬˍ ꓡꓰꓽ ꓓꓯꓹ ꓡꓳ꓿ 15 ꓬꓲ ꓠꓬ ꓬꓲ ꓪꓽ ꓔꓯ꓾ ꓧꓪꓸ ꓛꓲꓽ ꓔ꓾ ꓒ-ꓡꓲ-ꓢꓷ ꓐꓴ ꓙꓵꓽ ꓧꓶꓽˍ ꓐꓰ ꓩꓴ-ꓡꓲ ꓙꓵꓽ ꓧꓶꓽ ꓔꓯ ꓤꓻ ꓟꓳ꓾ ꓐꓰ ꓙꓳꓺ ꓗꓽ ꓖꓶˍ ꓡꓳ꓿ 16 ꓖꓳ ꓡꓱ ꓠꓬ ꓬꓲ ꓪꓽ ꓠꓽ꓾ ꓣꓳ ꓠꓬ ꓑ ꓑ ꓟꓽ ꓙꓳ ꓠꓬꓲ ꓬꓲ ꓕꓱ ꓡꓱ ꓐꓯˍ ꓠꓳꓹ꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 17 ꓕꓱ ꓟ ꓔꓯ ꓬꓰ-ꓢꓴ ꓡꓳꓸ ꓓꓳ ꓡ ꓠꓬ ꓬꓲ ꓪꓽ ꓔꓯ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓑ ꓑ ꓟꓽ ꓙꓳ ꓟ ꓔꓯ ꓟꓳꓸ ꓫꓸ ꓕꓱ ꓡꓯꓽ ꓘꓳ ꓔꓬ ꓡ? ꓠꓴ ꓪꓽ ꓮ ꓟꓶ ꓗꓪ ꓛꓲ ꓟꓽ ꓡꓳꓸ ꓓꓳ ꓡ ꓢꓰꓽ ꓡ? ꓟꓽ ꓙꓽ ꓜꓲꓼ ꓢꓰꓽ ꓡ? ꓠꓴ ꓪꓽ ꓠꓲꓹ ꓟ ꓔꓯꓽ ꓡꓰ ꓡ? 18 ꓠꓴ ꓪꓽ ꓠꓬ꓾ ꓟꓬ ꓢꓶꓽ ꓙꓳ ꓢꓲ ꓟꓽ ꓟꓳꓻ ꓡ? ꓠꓸ ꓑꓳ ꓙꓳ ꓢꓲ ꓟꓽ ꓑ ꓙꓽ ꓡ? ꓥꓪ ꓮ ꓡꓲ ꓬꓰ ꓗꓷ ꓟ ꓚꓲꓸ ꓟꓽ ꓟꓶ ꓢꓰꓽ ꓡ? 19 ꓥꓪ ꓡꓰ ꓑ ꓑ ꓖꓳ ꓥꓪꓽ ꓑꓬ ꓟ ꓦꓶꓹ ꓢꓲ ꓡꓽ ꓞꓳ ꓥꓪꓽ ꓔꓴ ꓔꓯ ꓐꓱꓻ ꓖꓶˍ ꓕꓯ꓾ ꓠꓴ ꓪꓽ ꓖꓳ ꓫ ꓟꓶˍ ꓟ ꓬꓲ ꓧꓶꓽ ꓬꓲ ꓟꓲ ꓠꓬ ꓮ ꓟꓬ ꓠꓳꓸ ꓘꓴꓽ ꓖꓳ ꓐꓲ ꓡꓰ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓡꓰ꓾ ꓞꓲ ꓠꓬꓲꓽ ꓠꓳꓸ ꓘꓴꓽ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 20 ꓝꓮꓲ ꓥꓪ ꓡꓰ ꓑ ꓑ ꓖꓳ ꓫꓵꓽ ꓑꓬ ꓟ ꓦꓶꓹ ꓢꓲ ꓡꓽ ꓞꓳ ꓡꓲꓸ ꓔꓴ ꓔꓯ ꓐꓱꓻ ꓖꓶˍ ꓕꓯ꓾ ꓠꓴ ꓪꓽ ꓖꓳꓺ ꓫ ꓟꓶˍ ꓟ ꓬꓲ ꓧꓶꓽ ꓬꓲ ꓟꓲ ꓠꓬ ꓮ ꓟꓬ ꓠꓳꓸ ꓘꓴꓽ ꓖꓳ ꓐꓲ ꓡꓰ ꓡ?꓾ ꓐꓯˍ ꓕꓯ꓾ ꓫꓵꓽ ꓠꓳꓸ ꓘꓴꓽ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 21 ꓖꓳ ꓕꓯ ꓬꓲ ꓡꓰ꓾ ꓠꓴ ꓪꓽ ꓮ ꓟꓶˍ ꓟꓲ ꓟꓽ ꓙꓽ ꓜꓲꓼ ꓢꓰꓽ ꓡ?꓾ ꓐꓯ ꓖꓶˍ ꓡꓳ꓿ 22 ꓬꓲ ꓪꓽ ꓐꓱ-ꓢꓰ-ꓓ ꓗꓪ ꓛꓲ ꓬꓰ ꓠꓬ꓾ ꓢꓴ ꓡꓰ ꓟꓬ ꓔꓶꓺ ꓕꓲ ꓣꓳ ꓧꓳꓽ ꓡ ꓢꓲ꓾ ꓬꓲ ꓔꓯ ꓫꓱꓹ ꓖꓶ ꓠꓹ ꓟ ꓬꓰ-ꓢꓴ ꓔꓯ ꓓꓰꓽˍ ꓡꓳ꓿ 23 ꓬꓰ-ꓢꓴ ꓡꓰ ꓟꓬ ꓔꓶꓺ ꓔꓯ ꓡꓯꓼ ꓒꓯꓹ ꓗꓪ ꓣꓱꓽ ꓢꓲ꓾ ꓘꓹ ꓐꓻ ꓢꓲ ꓗꓪ ꓧꓳꓽ ꓙꓰ ꓢꓲ ꓠꓬꓲ꓾ ꓬꓲ ꓟꓬ ꓢꓶꓽ ꓗꓪ ꓟꓷꓽ ꓶꓻ ꓔꓲꓸ ꓧꓳꓽ ꓢꓲ꓾ ꓡꓯꓼ ꓒꓯꓹ ꓚꓰꓹ ꓖꓶ ꓢꓲ ꓠꓬꓲ꓾ ꓬꓲ ꓔꓯ꓾ ꓠꓴ ꓮꓸ ꓫꓵ ꓟꓳꓻˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 24 ꓬꓲ ꓡꓳꓸ ꓠꓬꓲ ꓢꓲ꓾ ꓥꓪ ꓠꓬ ꓡꓽ ꓞꓳ ꓔꓯ ꓟꓳꓻˍ ꓡꓳ꓿ ꓬꓲ ꓪꓽ ꓠꓬ ꓢꓲꓹ ꓜꓲˍ ꓡꓰ ꓐꓰ ꓗꓹ ꓢꓲ ꓙ ꓖꓴ ꓫꓱꓽ ꓔꓬ ꓟ ꓡꓰ ꓐꓰ ꓗꓹ ꓡꓳ꓾ ꓐꓯˍ ꓡꓳ꓿ 25 ꓬꓰ-ꓢꓴ ꓠꓬ ꓝꓮꓲ ꓕꓲ ꓧꓪꓹ ꓬꓲ ꓟꓬ ꓢꓶꓽ ꓗꓪ ꓡꓯꓼ ꓒꓯꓹ ꓚꓰꓹ ꓖꓶ ꓢꓲ꓾ ꓬꓲ ꓔꓯ ꓡꓳꓸ ꓠꓬꓲ ꓝꓲ ꓠꓬ ꓮꓸ ꓫꓵˍ ꓟꓲ ꓫꓬꓻ ꓫꓬˍ ꓡꓰꓽ ꓟꓳꓻ ꓡꓰꓳ꓿ 26 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬ ꓡꓳ ꓒꓱ ꓗꓪ ꓟꓽ ꓓꓵꓽ ꓙꓰ ꓙꓰ꓾ ꓠꓴ ꓦꓲ ꓗꓪ ꓔꓱꓹ ꓔꓱꓹꓼ ꓐꓰ ꓬꓲꓼ ꓙꓰ꓾ ꓐꓯ ꓖꓶˍ ꓡꓳ꓿ 27 ꓖꓳ ꓡꓱ ꓠꓬ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ꓾ ꓢꓲ-ꓢ-ꓡꓰ ꓒꓲ-ꓡꓲ-ꓒꓲ ꓟꓵꓽ ꓗꓪ ꓟ ꓘꓹ ꓗꓪ ꓓꓵꓽ ꓡꓰˍ ꓡꓳ꓿ ꓙ ꓖꓴ ꓗꓪ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓥꓪ ꓮꓽ ꓟ ꓥ ꓟ ꓢꓴ ꓮ ꓡꓲ ꓐꓯ ꓔꓬ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 28 ꓬꓲ ꓪꓽ ꓡꓰ꓾ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓥꓳ꓾ ꓐꓯ ꓢꓴ ꓙꓳˍ ꓡꓳ꓿ ꓬꓲ-ꓡꓲ-ꓬ ꓥꓳ꓾ ꓐꓯ ꓢꓴˍ ꓟꓲ ꓙꓳˍ ꓡꓳ꓿ ꓠꓱꓸ ꓐꓯꓼ ꓕꓲ ꓐꓱ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓗꓪ ꓟ ꓕꓲ ꓣꓳ ꓥꓳ꓾ ꓐꓯ ꓢꓴˍ ꓟꓲ ꓙꓳˍ ꓡꓳ꓾ ꓐꓯ ꓖꓶˍ ꓡꓳ꓿ 29 ꓬꓲ ꓠꓬ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓮꓽ ꓟ ꓥ ꓟ ꓠꓴ ꓪꓽ ꓡꓲS ꓮ ꓡꓲ ꓓꓵꓽ ꓙˍ ꓡ?꓾ ꓐꓰ ꓠ ꓠꓬꓲ ꓕꓯ꓾ ꓒꓲ-ꓕꓱ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓠꓽ ꓙꓲ-ꓢꓴ ꓖꓳ ꓕꓲ ꓣꓳ ꓟ ꓥꓳ꓾ ꓐꓯˍ ꓖꓶˍ ꓡꓳ꓿ 30 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓬꓲꓸ ꓮꓽ ꓟ ꓥ ꓟ ꓮꓽ ꓟ ꓔꓯˍ ꓟꓲ ꓟꓽ ꓐꓯ ꓖꓶ ꓠꓹ ꓟ ꓬꓲ ꓪꓽ ꓔꓯ ꓙꓳꓺ ꓗꓽ ꓖꓶˍ ꓡꓳ꓿ 31 ꓖꓳ ꓕꓯ ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓡ-ꓞꓳ-ꓮ-ꓐꓲ ꓠꓽ ꓫꓸ ꓙꓵˍ ꓟ ꓮꓽ ꓟꓬꓹ ꓜꓲꓽ ꓢꓲ꓾ ꓞꓳ ꓪꓴꓽ ꓞꓳ ꓔꓲ ꓐꓴˍ ꓐꓰ ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓡꓰ ꓟꓽ ꓘꓳ ꓣꓴˍ ꓟ ꓔꓳꓹ ꓜꓳꓽˍ ꓥꓳ꓿ ꓬꓲ ꓔꓯ ꓢꓰꓼ ꓗꓷ ꓢꓲ ꓢ ꓠꓬꓲ ꓗꓸ ꓠꓯꓸ ꓠꓬ ꓢꓯꓸ ꓬꓲꓼ ꓡ ꓥꓳ꓾ ꓐꓰ ꓟꓸ ꓖꓶ ꓪꓴꓸ ꓔꓴˍ ꓡꓳ꓿ 32 ꓬꓰ-ꓢꓴ ꓡꓰ ꓕꓱ ꓡꓱ ꓫꓬꓽ ꓫꓬꓽˍ ꓡꓰꓽ ꓐꓯ ꓓꓳ ꓡ ꓕꓯ꓾ ꓒꓲ-ꓕꓱ ꓠꓬ ꓬꓲ ꓔꓯ ꓘꓳ ꓫꓱ ꓫꓱˍ ꓗꓪ ꓧꓳꓽ ꓙꓰ ꓢꓲ ꓕꓼ ꓪꓴꓸ ꓔꓴ ꓡ ꓡꓳ꓿ 33 ꓬꓰ-ꓢꓴ ꓠꓽ ꓔꓲꓸ ꓒꓳꓹ ꓢꓲ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓡꓳꓸ ꓔ ꓢꓲ ꓠꓬꓲ꓾ ꓒꓲ-ꓕꓱ ꓔꓯ ꓕꓼ ꓢꓲ꓾ ꓢ-ꓓꓯꓳ꓾ ꓥꓪ ꓔꓯ ꓐꓰ ꓧꓹ ꓙꓰ꓿ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓠꓲꓹ ꓥꓳ ꓥꓳ꓾ ꓞꓳ ꓤ ꓠꓵˍ ꓟ ꓔꓯˍ ꓡꓰꓽ ꓠꓲꓹ ꓥꓳˍ ꓡꓳ꓾ ꓐꓯˍ ꓡꓳ꓿ 34 ꓖꓳ ꓗꓸ ꓠꓯꓸ ꓬꓲ ꓠꓬ ꓞꓳ ꓜꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓘꓴ ꓔꓯꓹ ꓡ ꓢꓲ ꓬꓲ ꓪꓽ ꓔꓯ꓾ ꓮꓽ ꓟ ꓥꓪ ꓔꓯ ꓛꓳꓻ ꓠꓲꓹ ꓫꓵˍ ꓠꓬ꓾ ꓚꓲꓸ ꓛꓬ ꓔꓯ ꓟꓽ ꓗꓹ ꓐꓽ ꓐꓽ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ ꓥꓪ ꓔꓯ ꓛꓳ ꓠꓯꓹ ꓡꓳ꓿ 35 ꓮ ꓡꓲꓳ ꓐꓯ ꓠꓬ ꓮꓽ ꓟˍ ꓟꓲ꓾ ꓬꓲ ꓢꓯꓼ ꓟꓬ ꓔꓯ ꓗꓹ ꓐꓽ ꓢꓴ ꓠꓬ ꓬꓲ ꓢꓯꓼ ꓟꓬ ꓒꓲꓼ ꓬꓰˍ ꓥꓳ꓿ ꓥꓪ ꓐꓱ ꓶˍ ꓐꓰ ꓶꓼ ꓓꓳ ꓫꓱꓹ ꓓꓳ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓟꓽ ꓗꓹ ꓐꓽ ꓢꓴ ꓠꓬ ꓬꓲ ꓢꓯꓼ ꓟꓬ ꓚꓬꓴ ꓟꓶˍ ꓥꓳ꓿ 36 ꓞꓳ ꓤ ꓕꓲ ꓣꓳ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓒꓳꓹ ꓟꓶˍ ꓟꓲ꓾ ꓚꓲꓸ ꓛꓬ ꓢꓯꓼ ꓟꓬ ꓒꓲꓼ ꓬꓰ ꓠꓬ ꓮꓸ ꓫꓵ ꓙꓲ ꓖꓴ ꓙꓳˍ ꓡ? 37 ꓞꓳ ꓤ ꓠꓬ ꓮꓸ ꓫꓵ ꓡꓰ ꓬꓲ ꓚꓲꓸ ꓛꓬ ꓢꓯꓼ ꓟꓬ ꓑ ꓟꓶ ꓓꓻ ꓢꓰꓽ ꓡ? 38 ꓦꓬꓼ ꓛꓳꓽ ꓧꓪˍ ꓟ ꓐꓰ ꓝꓴꓲ ꓬꓰˍ ꓟ ꓕꓱ ꓕꓲ ꓤꓶ ꓗꓪ꓾ ꓥꓪˍ ꓐꓰ ꓥꓪ ꓐꓯ ꓘꓶꓽ ꓔꓯ ꓫꓸ ꓔꓳ ꓓꓴ ꓚꓬꓹ ꓢꓲ ꓟꓽ ꓣꓷꓠ ꓢꓴ ꓔꓯ ꓠꓽ꓾ ꓡ-ꓞꓳ-ꓮ-ꓐꓲ ꓥꓪ ꓐꓹ ꓐ ꓐꓬꓱꓼ ꓡꓱꓼ ꓡꓱ ꓟ ꓠꓯꓸꓼ ꓗꓪ꓾ ꓢꓲꓽ ꓫꓬˍ ꓟ ꓟꓴꓽ ꓗꓪ ꓝꓲ ꓓꓴ ꓐꓴˍ ꓐꓰ ꓬꓯꓼ ꓡ ꓕꓯ꓾ ꓥꓪˍ ꓟꓲ ꓡꓽ ꓞꓳ ꓖꓳ ꓕꓲ ꓣꓳ ꓔꓯ ꓫꓸ ꓔꓳ ꓓꓴ ꓚꓬꓹ ꓢꓲ ꓟꓽ ꓣꓷꓠ꓾ ꓐꓯˍ ꓡꓳ꓿

ꓟ-ꓗꓳ 9

1 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓕꓱ ꓗꓪ ꓦꓰꓼ ꓞꓹ ꓢꓴ ꓕꓲ ꓐꓱꓻ ꓟꓽ ꓫꓵꓻ ꓢꓰꓽ ꓕꓯˍ ꓡꓰ꓾ ꓪꓴ-ꓢ ꓗꓴꓷ ꓢꓯꓼ ꓙꓳ ꓪꓽ ꓠꓬꓲ ꓠꓬꓲˍ ꓡꓰꓽ ꓓꓳ ꓡ ꓟ ꓔꓯ ꓠꓴ ꓪꓽ ꓟꓳꓻˍ ꓥꓳ꓾ ꓐꓯˍ ꓡꓳ꓿ 2 ꓛꓳꓼ ꓠꓬꓲ ꓗꓳꓸ ꓗꓷ ꓠꓬ꓾ ꓬꓰ-ꓢꓴ ꓠꓽ꓾ ꓒꓲ-ꓕꓱˍ ꓐꓰ ꓬ-ꓗꓴˍ ꓐꓰ ꓬꓳ-ꓦ ꓔꓯˍ ꓡꓰꓽ ꓟꓴꓺˍ ꓟ ꓪꓽ ꓚꓲ ꓗꓪ ꓧꓳꓽ ꓓꓯ ꓙꓰ ꓢꓲ꓾ ꓬꓲ ꓠꓬ ꓬꓲ ꓪꓽ ꓒꓬꓱꓽ ꓕꓯꓽ ꓗꓪ ꓬꓲ ꓒꓬꓱꓽ ꓑꓶꓸ ꓡꓰˍ ꓡꓳ꓿ 3 ꓬꓲ ꓐꓵ ꓞꓶꓽ ꓠꓬ ꓐꓬꓱꓼ ꓡꓱꓼ ꓡꓱ ꓗꓹ ꓢꓲ ꓮꓽ ꓘꓶꓸ ꓒꓴˍ ꓡꓳ꓿ ꓟꓲ ꓠꓯ ꓗꓪ ꓟꓶ ꓞꓲꓽ ꓢꓴ ꓮꓽ ꓟˍ ꓟꓲ ꓖꓳ ꓟꓬ ꓒꓴꓻ ꓡꓰ ꓗꓪ ꓛꓲ ꓞꓲꓽ ꓟꓽ ꓐ ꓡ꓿ 4 ꓬꓲ-ꓡꓲ-ꓬ ꓐꓰ ꓟꓳ-ꓫꓲˍ ꓟꓲ ꓬꓲ ꓪꓽ ꓔꓯ ꓟꓳꓸ ꓖꓶ ꓡ ꓢꓲ꓾ ꓬꓲ ꓪꓽ ꓠꓬ ꓬꓰ-ꓢꓴˍ ꓐꓰ ꓫꓸ ꓕꓱ ꓡꓯꓽ ꓘꓳˍ ꓡꓳ꓿ 5 ꓒꓲ-ꓕꓱ ꓡꓰ ꓬꓰ-ꓢꓴ ꓔꓯ꓾ ꓟꓸ ꓒꓽꓳ꓾ ꓕꓱ ꓗꓪ ꓔꓬ ꓟ ꓠꓬ ꓣꓳꓽ ꓐꓱ ꓶ ꓙꓲˍ ꓡꓳ꓿ ꓦꓲ ꓐꓱ ꓢ ꓟ꓾ ꓠꓴ ꓐꓱ ꓶ ꓕꓲ ꓟ꓾ ꓟꓳ-ꓫꓲ ꓐꓱ ꓶ ꓕꓲ ꓟ꓾ ꓬꓲ-ꓡꓲ-ꓬ ꓐꓱ ꓶ ꓕꓲ ꓟ꓾ ꓥꓪ ꓠꓴꓽ ꓔꓯ ꓫꓬꓹ ꓝꓲ ꓡꓯ꓾ ꓐꓯˍ ꓡꓳ꓿ 6 ꓬꓲ ꓕꓱ ꓡꓱ ꓐꓯˍ ꓟ ꓠꓬ꓾ ꓬꓲ ꓪꓽ ꓠꓽ ꓮꓽ ꓘꓶꓸ ꓙꓳ ꓡꓰ ꓢꓲ꓾ ꓒꓲ-ꓕꓱ ꓠꓬ ꓮꓸ ꓫꓵ ꓐꓯ ꓠꓯꓹ ꓡꓳ ꓟꓽ ꓢꓷꓸ ꓗꓷ ꓡꓰ ꓠꓬꓲ ꓥ ꓡꓳ꓿ 7 ꓖꓳ ꓡꓱ ꓠꓬ ꓟꓴ ꓗꓴꓸ ꓕꓲ ꓘꓴꓸ ꓢꓴꓸ ꓡ ꓢꓲ ꓬꓲ ꓪꓽ ꓔꓯ ꓛꓸ ꓡꓰ ꓠꓬ꓾ ꓟꓴ ꓗꓴꓸ ꓠꓯꓸꓼ ꓗꓪ ꓐꓰ ꓢꓯꓼ ꓕꓲ ꓟ ꓓꓳ ꓡ ꓢꓲ꓾ ꓕꓱ ꓟ ꓠꓬ ꓥꓪ ꓠꓲꓹ ꓠꓵˍ ꓟ ꓮ ꓐꓲ ꓥ ꓡꓳ꓾ ꓠꓴ ꓪꓽ ꓬꓲ ꓔꓯ ꓠ ꓠꓹ꓾ ꓐꓯˍ ꓡꓳ꓿ 8 ꓬꓲ ꓪꓽ ꓡꓰ ꓞꓼ ꓐꓰ ꓚꓳ ꓡꓳ ꓗꓪ ꓡꓳꓸ ꓠꓬꓲ ꓠꓬ꓾ ꓬꓰ-ꓢꓴ ꓬꓲ ꓕꓲ ꓣꓳˍ ꓡꓰ ꓟꓽ ꓥ ꓠꓬ ꓠꓱꓸ ꓐꓯꓼ ꓕꓲ ꓣꓳ ꓔꓯˍ ꓟꓲ ꓟ ꓟꓳꓻ꓿ 9 ꓪꓽ ꓚꓲ ꓗꓪ ꓐꓰ ꓬꓲ ꓪꓽ ꓬꓯꓼ ꓡ ꓔꓬ ꓕꓯ ꓬꓰ-ꓢꓴ ꓡꓰ꓾ ꓡ-ꓞꓳ-ꓮ-ꓐꓲ ꓫꓵꓻ ꓗꓪ ꓐꓰ ꓟꓽ ꓢꓯꓸ ꓬꓲꓼ ꓡ ꓕ ꓑꓳꓸ꓾ ꓠꓴ ꓪꓽ ꓟꓳꓻ ꓗꓷ ꓟ ꓮꓽ ꓟ ꓔꓯˍ ꓟꓲ ꓕꓽ ꓐꓯ ꓖꓶ꓾ ꓐꓰ ꓕꓵꓼ ꓪ ꓖꓶˍ ꓡꓳ꓿ 10 ꓫꓵꓻ ꓗꓪ ꓐꓰ ꓟꓽ ꓢꓯꓸ ꓬꓲꓼ ꓡ ꓕ ꓑꓳꓸ꓾ ꓐꓯˍ ꓟ ꓐꓯ ꓘꓶꓽ ꓕꓱ ꓟ ꓬꓲ ꓪꓽ ꓠꓲꓹ ꓟ ꓗꓪ ꓚꓲꓸ ꓔ ꓢꓲ꓾ ꓖꓳ ꓟ ꓮꓸ ꓫꓵ ꓔꓯ ꓐꓯˍ ꓟ ꓬꓲ ꓪꓽ ꓛꓳꓽ ꓬꓲ ꓪꓽ ꓠ ꓠꓬꓲ ꓡꓯꓽ ꓘꓳˍ ꓡꓳ꓿ 11 ꓖꓳ ꓡꓱ ꓢꓲ ꓬꓲ ꓪꓽ ꓡꓰ ꓬꓲ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓙꓵꓽ ꓗ ꓟꓸ ꓒ ꓐꓴ ꓡꓰ꓾ ꓬꓲ-ꓡꓲ-ꓬ ꓧꓶꓸ ꓕꓯ ꓡ ꓠ ꓗꓹ ꓡꓳ꓾ ꓐꓯˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 12 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥ ꓡꓳ꓾ ꓬꓲ-ꓡꓲ-ꓬ ꓠꓽ ꓮꓽ ꓙꓵ ꓡꓱꓸꓼ ꓙꓽ ꓖꓶ ꓠꓹ ꓟ꓾ ꓬꓲ ꓧꓶꓸ ꓕꓯ ꓡ ꓠ ꓗꓹ ꓥ ꓟꓲ꓾ ꓡ-ꓞꓳ-ꓮ-ꓐꓲ ꓠꓽ ꓫꓸ ꓙꓵˍ ꓟ ꓮꓽ ꓟꓬꓹ ꓫꓵꓽ ꓜꓲꓽ ꓢꓲ꓾ ꓟꓽ ꓒꓵꓽ ꓒꓵꓽ ꓬꓰ ꓖꓶ ꓡ ꓟ ꓔꓯˍ ꓟꓲ ꓬꓲ ꓜꓲꓽ ꓠ ꓗꓹ ꓟ꓾ ꓕꓳ ꓶ ꓗꓪ ꓐꓳ ꓔ ꓡꓳ꓾ ꓟꓽ ꓥ ꓡ? 13 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ-ꓡꓲ-ꓬ ꓠꓽ ꓚꓵ ꓚꓵ ꓡ ꓗꓷꓳ꓿ ꓖꓳ ꓡꓱ ꓢꓲ ꓕꓳ ꓶ ꓗꓪ ꓬꓲ ꓔꓯ ꓖꓴ ꓢꓲ ꓐꓳ ꓔ ꓟ ꓡꓰ ꓐꓰ꓾ ꓬꓲ ꓪꓽ ꓡꓰ ꓬꓲ ꓔꓯ ꓮ ꓡꓲ ꓬꓰ ꓠꓲꓹ ꓫꓵˍ ꓠꓬ ꓖꓳ ꓡꓱ ꓬꓰ ꓖꓶ ꓗꓷꓳ꓾ ꓐꓯˍ ꓡꓳ꓿ 14 ꓛꓳꓽ ꓒꓯꓹ ꓐꓴ ꓔꓬ ꓗꓪ ꓬꓲ ꓪꓽ ꓡꓽ ꓛꓲ ꓡ ꓠꓬ꓾ ꓛꓳꓽ ꓒꓯꓹ ꓐꓴ ꓚꓳ ꓡꓳ ꓗꓪ ꓞꓳ ꓜꓴ ꓞꓳ ꓟꓯꓼ ꓔꓬ ꓢꓲ꓾ ꓙꓵꓽ ꓗ ꓟꓸ ꓒ ꓐꓴ ꓕꓲ ꓐꓱ ꓠꓬ ꓛꓳꓽ ꓒꓯꓹ ꓐꓴˍ ꓐꓰ ꓧꓳꓺ ꓡꓯꓽ ꓘꓳ ꓔꓬ ꓟ ꓔꓯ ꓬꓲ ꓪꓽ ꓟꓳꓻˍ ꓡꓳ꓿ 15 ꓞꓳ ꓜꓴ ꓮꓽ ꓙꓵ ꓬꓰ-ꓢꓴ ꓔꓯ ꓟꓳꓻ ꓗꓷ ꓟꓶꓽ ꓕꓯ꓾ ꓮꓽ ꓘꓶꓸ ꓓꓵꓽ ꓙ ꓟꓶ ꓡꓰ ꓠꓬꓲ ꓔꓷꓹ ꓙꓰ ꓢꓲ ꓬꓲ ꓔꓯ ꓒꓵꓽ ꓗ ꓬꓰˍ ꓡꓳ꓿ 16 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓬꓲ ꓪꓽˍ ꓐꓰ ꓮꓸ ꓫꓵ ꓧꓳꓺ ꓡꓯꓽ ꓘꓳ ꓔꓬ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 17 ꓞꓳ ꓜꓴ ꓗꓳ ꓡꓳ ꓗꓪ ꓟ ꓕꓲ ꓣꓳ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓟꓸ ꓒꓽꓳ꓾ ꓥꓪ ꓮ ꓐꓲ ꓔꓯ ꓟꓶꓻ ꓠꓲꓽ ꓕꓲ ꓟ ꓓꓯꓹ ꓠꓬꓲ ꓠꓴ ꓔꓬ ꓗꓪ ꓧꓳꓽ ꓔꓯꓹ ꓡꓺꓳ꓿ 18 ꓬꓲ ꓮ ꓕꓯꓽ ꓚꓵꓹ ꓡ ꓠꓬ ꓖꓳ ꓕꓯ ꓶꓹ ꓐꓱꓽ ꓡꓰ ꓢꓲ꓾ ꓟꓷꓽ ꓶꓻ ꓩꓵꓸˍ ꓟꓲ ꓓꓳ ꓡ ꓢꓲ ꓠꓬꓲ꓾ ꓢꓶꓽ ꓛꓲ ꓶꓼ ꓠꓬꓲ꓾ ꓖꓳ ꓓꓱꓽˍ ꓟꓲ ꓗꓳꓹ ꓡꓰˍ ꓡꓳ꓿ ꓠꓴ ꓛꓳꓽ ꓒꓯꓹ ꓐꓴ ꓔꓯ ꓠꓲꓽ ꓕꓱ ꓟ ꓖꓼ ꓓꓳ ꓙ ꓡꓯ ꓐꓯ ꓖꓶˍ ꓟꓲ꓾ ꓬꓲ ꓪꓽ ꓖꓼ ꓓꓳ ꓗꓷ ꓟꓽ ꓐ ꓡ ꓐꓷ꓾ ꓐꓯˍ ꓡꓳ꓿ 19 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓙꓵꓻ ꓠꓲꓹ ꓟꓽ ꓙꓳ ꓟ ꓕꓲ ꓤꓶ ꓢꓴ ꓐꓴꓳ꓾ ꓥꓪꓻ ꓠꓴ ꓪꓽˍ ꓐꓰ ꓮ ꓡꓲ ꓟꓶ ꓛꓲ ꓔꓬ ꓠꓯꓹ ꓡ? ꓠꓴ ꓪꓽ ꓔꓯ ꓮ ꓡꓲ ꓟꓶ ꓛꓲ ꓜꓲꓽ ꓖꓶ ꓠꓯꓹ ꓡ? ꓮ ꓐꓲ ꓔꓯ ꓥꓪ ꓔꓬ ꓗꓪ ꓧꓳꓽ ꓔꓯꓹ ꓡꓯ꓾ ꓐꓯ ꓖꓶˍ ꓡꓳ꓿ 20 ꓬꓲ ꓪꓽ ꓡꓰ ꓬꓲ ꓔꓯ ꓧꓳꓽ ꓔꓯꓹ ꓡ ꓠꓬ꓾ ꓬꓰ-ꓢꓴ ꓔꓯ ꓟꓳꓻ ꓗꓷ ꓟꓶꓽ ꓕꓯ꓾ ꓠꓲꓽ ꓡꓰ ꓮ ꓐꓲ ꓤ ꓖꓳ ꓓꓱ ꓔꓯ ꓚꓵꓹ ꓡ ꓝꓲ ꓢꓲ꓾ ꓟꓲ ꓛꓬ ꓗꓪ ꓓꓳꓽ ꓡꓰ ꓢꓲ ꓠꓬꓲ꓾ ꓟꓷꓽ ꓶꓻ ꓩꓵꓸ ꓓꓳ ꓠꓬꓲ ꓒꓳꓹ ꓡꓳ ꓒꓳꓹ ꓡꓳ ꓗꓷ ꓡꓰ ꓡꓳ꓿ 21 ꓬꓰ-ꓢꓴ ꓡꓰ ꓬꓲ ꓐꓹ ꓐ ꓔꓯ꓾ ꓬꓲ ꓔꓯ ꓕꓱ ꓡꓱ ꓗꓹ ꓟ ꓮ ꓡꓲ ꓟꓶ ꓛꓲ ꓥ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓐꓹ ꓐ ꓡꓰ꓾ ꓤ ꓠꓱ ꓤ ꓕꓯꓽˍ ꓡꓰ ꓥꓳ꓿ 22 ꓠꓲꓽ ꓠꓬ ꓬꓲ ꓔꓯ ꓫꓵꓻ ꓝꓲ ꓠꓹ ꓟ꓾ ꓮꓸ ꓔꓳꓸ ꓗꓪˍ ꓟꓲ꓾ ꓬꓲꓻ ꓙꓬ ꓗꓪˍ ꓟꓲ꓾ ꓮꓽ ꓟꓬꓹ ꓧꓪꓹ ꓡꓱꓸ ꓓꓵꓽ ꓡꓰ ꓝꓲꓳ꓿ ꓠꓴ ꓮ ꓡꓲ ꓬꓰ ꓐ ꓡ ꓠꓬ ꓥꓪ ꓠꓴꓽ ꓔꓯ ꓫꓱꓸ ꓤ ꓢꓲ ꓬꓰ ꓙ ꓡꓯ꓾ ꓐꓯˍ ꓡꓳ꓿ 23 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ꓾ ꓐ ꓡ ꓠꓬ꓾ ꓐꓰ ꓐꓯˍ ꓡ? ꓙꓵꓻ ꓠꓲꓹ ꓙꓳ ꓢꓴ ꓐꓱ ꓶ ꓠꓬ ꓮꓸ ꓫꓵˍ ꓟꓲ ꓐ ꓡ ꓥꓳ꓾ ꓐꓯ ꓖꓶˍ ꓡꓳ꓿ 24 ꓞꓼ ꓐꓰ ꓤ ꓠꓱ ꓬꓲ ꓐꓹ ꓐ ꓠꓬ꓾ ꓥꓪ ꓙꓵꓻˍ ꓡꓳ꓾ ꓥꓪ ꓙꓵꓻ ꓠꓲꓹ ꓟꓽ ꓡꓳꓼ ꓟ ꓗꓪ ꓠꓴ ꓬꓰ ꓙ ꓡꓯ꓾ ꓐꓰ ꓘꓴˍ ꓡꓳ꓿ 25 ꓡꓽ ꓞꓳ ꓮꓽ ꓟꓬ ꓔꓶꓹ ꓜꓲꓼ ꓡ ꓟ ꓔꓯ ꓬꓰ-ꓢꓴ ꓟꓳꓻ ꓗꓷ ꓠꓬ꓾ ꓬꓲ ꓡꓰ ꓟꓽ ꓫꓬ ꓠꓲꓽ ꓔꓯ ꓕꓼ ꓢꓲ꓾ ꓟꓶꓻ ꓐꓳꓽ ꓠꓲꓽꓳ꓾ ꓠꓴ ꓔꓯ ꓥꓪ ꓕꓵꓼ ꓪ ꓖꓶˍ ꓠꓬꓲ꓾ ꓬꓲ ꓗꓪ ꓐꓰ ꓓꓳ ꓡꓯ꓿ ꓕꓱ ꓡꓱ ꓖꓳ ꓑꓳ ꓬꓲ ꓔꓯ ꓝꓮꓲ ꓕꓽ ꓓꓵ ꓡꓰ꓾ ꓐꓯ ꓖꓶˍ ꓡꓳ꓿ 26 ꓠꓲꓽ ꓠꓬ ꓘꓴꓻ ꓔꓴ ꓡ ꓢꓲ꓾ ꓬꓲ ꓔꓯ ꓮꓽ ꓘꓶꓸ ꓚꓵꓹ ꓢꓲ ꓠꓬꓲ ꓓꓳ ꓙꓰꓳ꓿ ꓮ ꓐꓲ ꓤ ꓠꓬ ꓞꓳ ꓫꓵꓻˍ ꓡꓰ ꓐꓰ ꓗꓷ ꓡꓰ ꓠꓬꓲ꓾ ꓬꓲ ꓪꓽ ꓟꓬꓽ ꓠꓬꓲ ꓕꓲ ꓐꓱ ꓠꓬ꓾ ꓬꓲ ꓠꓽ ꓫꓵꓳ꓾ ꓐꓯˍ ꓡꓳ꓿ 27 ꓬꓰ-ꓢꓴ ꓠꓽ ꓬꓲ ꓡꓯꓼ ꓒꓯꓹ ꓗꓪ ꓣꓴ ꓢꓲ꓾ ꓬꓲ ꓔꓯ ꓖꓳꓻ ꓖꓶ ꓗꓷ ꓠꓬ ꓬꓲ ꓦꓰꓼ ꓔꓴ ꓡꓺꓳ꓿ 28 ꓦꓲ ꓗꓪ ꓬꓰ-ꓢꓴ ꓓꓵꓽ ꓡꓰ ꓠꓬ꓾ ꓬꓲ ꓛꓳꓽ ꓒꓯꓹ ꓐꓴ ꓘꓳ ꓫꓱ ꓫꓱˍ ꓐꓰ ꓬꓲ ꓔꓯ꓾ ꓮ ꓡꓲ ꓗꓷ ꓡꓰ ꓠꓬꓲ ꓥꓪ ꓠꓴꓽ ꓠꓬ ꓠꓲꓽ ꓔꓯ ꓖꓼ ꓓꓳ ꓟꓽ ꓐ ꓡ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 29 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓕꓱ ꓡꓱ ꓡꓳ ꓫꓵꓽ ꓠꓽ꓾ ꓪꓽ ꓘꓴˍ ꓟ ꓗꓪ ꓐꓰ ꓟꓽ ꓥ ꓠꓬ ꓖꓼ ꓓꓳ ꓗꓷ ꓟꓽ ꓐ ꓡ꓾ ꓐꓯ ꓖꓶˍ ꓡꓳ꓿ 30 ꓬꓲ ꓪꓽ ꓠꓬ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓖ-ꓡꓲ-ꓡꓲ ꓟꓵ ꓗꓪ ꓐꓰ ꓗꓳꓸ ꓙꓰˍ ꓡꓳ꓿ ꓬꓰ-ꓢꓴ ꓠꓬ ꓮꓽ ꓟ ꓔꓯˍ ꓟꓲ ꓬꓲ ꓔꓬ ꓖꓴ ꓢꓷꓸ ꓡꓰ ꓝꓲ ꓠꓲꓹ ꓟꓽ ꓫꓵ꓿ 31 ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓟꓸ ꓖꓶ ꓔꓬ ꓢꓲ꓾ ꓡ-ꓞꓳ-ꓮ-ꓐꓲ ꓔꓯ ꓠꓽ ꓞꓳ ꓤ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷˍ ꓥꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓡꓰ ꓬꓲ ꓔꓯ ꓢꓰꓼ ꓗꓷˍ ꓥꓳ꓿ ꓢꓰꓼ ꓗꓷ ꓗꓸ ꓠꓯꓸ ꓢ ꓠꓬꓲ ꓠꓬ ꓢꓯꓸ ꓬꓲꓼ ꓡ ꓥꓳ꓾ ꓐꓰ ꓟꓸ ꓖꓶ ꓡꓳ꓿ 32 ꓖꓳ ꓡꓱ ꓥ ꓟꓲ ꓐꓯ ꓘꓶꓽ ꓕꓱ ꓟ ꓬꓲ ꓪꓽ ꓟꓽ ꓙꓽ ꓜꓲꓼ꓿ ꓬꓲ ꓔꓯ ꓠˍ ꓟꓲ ꓠ ꓠꓬꓲ ꓟꓽ ꓑꓶ꓿ 33 ꓬꓲ ꓪꓽ ꓘꓹ-ꓒꓱ-ꓠꓴ ꓗꓪ ꓛꓲ ꓬꓰ ꓢꓲ꓾ ꓦꓲ ꓠꓯꓸꓼ ꓗꓪ ꓔꓬ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓮꓽ ꓢꓳ ꓙ ꓖꓴ ꓗꓪ ꓠꓴ ꓪꓽ ꓮꓸ ꓫꓵ ꓐꓯ ꓧꓳꓺ ꓡꓯꓽ ꓘꓳˍ ꓡ?꓾ ꓐꓯˍ ꓡꓳ꓿ 34 ꓬꓲ ꓪꓽ ꓠꓽ ꓙ ꓖꓴ ꓗꓪ꓾ ꓬꓲ ꓪꓽ ꓗꓳ ꓡꓳ ꓗꓪ ꓪ ꓜꓲꓻ ꓪꓴꓽˍ ꓟ ꓮꓽ ꓟ ꓥ ꓟ ꓔꓯꓸ ꓟꓳꓸ ꓧꓳꓺ ꓡꓯꓽ ꓘꓳ ꓗꓷ ꓠꓬꓲ ꓟꓽ ꓪꓳꓹ ꓔꓬ ꓡꓳ꓿ 35 ꓖꓳ ꓡꓱ ꓠꓬ ꓬꓲ ꓠꓬꓲꓸ ꓠꓸ ꓢꓲ꓾ ꓬꓲ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓘꓴꓻ ꓢꓲ ꓠꓬꓲ꓾ ꓮꓽ ꓟ ꓓꓽ ꓪꓴꓸ ꓬꓰ ꓠꓲꓹ ꓫꓵˍ ꓠꓬ꓾ ꓓꓽ ꓓꓰꓺˍ ꓐꓰ ꓮꓽ ꓙꓵ ꓢꓴ ꓔꓯ ꓣꓱꓽ ꓙ ꓢꓴ ꓬꓰ ꓠꓯꓹ ꓡꓳ꓾ ꓐꓯˍ ꓡꓳ꓿ 36 ꓬꓲ ꓡꓰ ꓤ ꓠꓱ ꓤ ꓕꓲ ꓣꓳ ꓧꓳꓽ ꓔꓯꓹ ꓡ ꓢꓲ꓾ ꓬꓲ ꓪꓽ ꓗꓳ ꓡꓳ ꓗꓪ ꓦꓰꓼ ꓞ ꓝꓲ ꓢꓲ ꓠꓬꓲ꓾ ꓬꓲ ꓡꓯꓼ ꓖꓳꓼ ꓗꓪ ꓬꓲ ꓔꓯ ꓢꓳꓸ ꓔ ꓢꓲ ꓬꓲ ꓪꓽ ꓔꓯ꓾ 37 ꓮꓽ ꓟ ꓥ ꓟꓲ ꓥꓪ ꓟꓬꓱꓺ ꓗꓪ ꓐꓰ ꓕꓱ ꓡꓱ ꓫꓵ ꓤ ꓠꓱ ꓤ ꓔꓯ ꓘꓳ ꓣꓴˍ ꓠꓬ ꓥꓪ ꓔꓯ ꓘꓳ ꓣꓴˍ ꓟ ꓥ ꓡꓳ꓿ ꓥꓪ ꓔꓯ ꓘꓳ ꓣꓴˍ ꓟ ꓠꓬ ꓥꓪ ꓔꓯ ꓘꓳ ꓣꓴˍ ꓟˍ ꓡꓰꓽ ꓟꓽ ꓞꓲ꓾ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓘꓳ ꓣꓴˍ ꓟ ꓥ ꓡꓳ꓾ ꓐꓯˍ ꓡꓳ꓿ 38 ꓬꓳ-ꓦ ꓡꓰ ꓬꓲ ꓔꓯ꓾ ꓟꓸ ꓒꓽꓳ꓾ ꓡꓽ ꓞꓳ ꓕꓲ ꓣꓳ ꓠꓴ ꓟꓬꓱꓺ ꓗꓪ ꓐꓰ ꓠꓲꓽ ꓖꓼ ꓓꓳ ꓔꓬ ꓟ ꓥꓪ ꓠꓴꓽ ꓟꓳꓻ ꓗꓷꓳ꓿ ꓬꓲ ꓠꓬ ꓣꓳ ꓔꓯ ꓛꓳ ꓢꓴ ꓟꓽ ꓥ ꓠꓬꓲ꓾ ꓥꓪ ꓠꓴꓽ ꓡꓰ ꓬꓲ ꓔꓯ ꓗꓽ ꓗꓷꓳ꓾ ꓐꓯˍ ꓡꓳ꓿ 39 ꓬꓰ-ꓢꓴ ꓡꓰ꓾ ꓬꓲ ꓔꓯ ꓕꓽ ꓗꓽ ꓔ꓿ ꓮ ꓡꓲꓳ ꓐꓯ ꓠꓬ ꓮꓽ ꓟˍ ꓟꓲ ꓥꓪ ꓟꓬꓱꓺ ꓗꓪ ꓐꓰ ꓪꓽ ꓠꓬꓲˍ ꓟ ꓟꓬꓱꓽ ꓬꓰ ꓢꓴ ꓠꓽ꓾ ꓢꓻ ꓢˍ ꓐꓰ ꓥꓪ ꓔꓯ ꓟꓽ ꓙꓲ ꓟ ꓐꓯ ꓟꓽ ꓐ ꓡ꓿ 40 ꓮ ꓡꓲꓳ ꓐꓯ ꓠꓬ ꓣꓳ ꓔꓯ ꓔꓳꓹ ꓢꓴ ꓟꓽ ꓥ ꓠꓬ꓾ ꓣꓳ ꓔꓯ ꓬꓰ ꓙ ꓢꓴ ꓥ ꓡꓳ꓿ 41 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓙꓲ-ꓢꓴ ꓔꓯ ꓟ ꓥ ꓠꓬꓲ꓾ ꓠꓴ ꓪꓽ ꓔꓯ ꓬꓲꓻ ꓙꓬ ꓕꓲ ꓗꓶꓸ ꓖꓶ ꓓꓳ ꓡ ꓢꓴ ꓬꓲ ꓡꓯꓼ ꓫꓴ ꓠꓽ ꓮ ꓡꓲ ꓥ ꓟꓲ ꓟꓽ ꓒꓲꓼ ꓬꓰ꓾ ꓐꓯˍ ꓡꓳ꓿ 42 ꓝꓮꓲ ꓬꓲ ꓡꓰ꓾ ꓮꓽ ꓟ ꓥ ꓟꓲ ꓥꓪ ꓔꓯ ꓙꓵꓻˍ ꓟ ꓤ ꓠꓱ ꓤ ꓕꓱ ꓟꓬ ꓗꓪ ꓟ ꓕꓲ ꓣꓳ ꓔꓯ ꓡꓱꓸ ꓗꓷ ꓝꓲ ꓢꓴ ꓔꓯ ꓠꓬ꓾ ꓬꓲ ꓗꓶꓸ ꓝꓲꓸ ꓗꓪ ꓡꓳ ꓙꓱꓺ ꓓꓽ ꓟ ꓞꓳꓹ ꓔ ꓢꓲ꓾ ꓬꓲꓻ ꓡꓴꓽ ꓐꓱ ꓗꓪ ꓡꓳ ꓧꓳꓽ ꓗꓷˍ ꓟ ꓠꓽ ꓬꓲ ꓐꓱ ꓶ ꓟꓬꓽ ꓠꓬꓲ ꓙꓲˍ ꓡꓳ꓿ 43 ꓠꓴ ꓡꓯꓼ ꓒꓯꓹ ꓕꓲ ꓐꓽ ꓡꓰ ꓠꓴ ꓔꓯ ꓛꓬ ꓡꓰ ꓝꓲˍ ꓠꓬ ꓓꓶꓺ ꓩꓴ ꓗꓷ꓿ ꓢꓯꓼ ꓟꓬ ꓗꓪ ꓡꓯꓼ ꓓꓴꓽ ꓓꓴ ꓟꓴ ꓓꓵꓽ ꓡꓰˍ ꓟ ꓠꓽ꓾ ꓕꓲ ꓞꓲꓼ ꓡꓱꓸꓼ ꓐꓬ ꓞꓹ ꓟ ꓛꓬꓼ ꓟꓵꓽ ꓮꓸ ꓔꓳ ꓗꓪ꓾ ꓠꓴ ꓡꓯꓼ ꓒꓯꓹ ꓠꓬꓲꓽ ꓐ ꓡꓱꓸꓼ ꓠꓳꓽ ꓞꓹ ꓢꓲ ꓓꓵꓽ ꓡꓰˍ ꓟ ꓢꓶꓸ ꓟꓽ ꓞꓲ ꓙꓲˍ ꓡꓳ꓿ 44 ꓛꓬꓼ ꓟꓵꓽ ꓮꓸ ꓔꓳ ꓠꓬ ꓮ ꓕꓯˍ ꓟꓲ ꓟꓽ ꓢꓰꓼ ꓗꓷ꓾ ꓦꓳꓹˍ ꓟꓲ ꓟꓽ ꓫꓵꓻ꓿ 45 ꓠꓴ ꓛꓲ ꓒꓯꓹ ꓕꓲ ꓐꓽ ꓠꓴ ꓔꓯ ꓛꓬ ꓡꓰ ꓝꓲˍ ꓠꓬ ꓓꓶꓺ ꓩꓴ ꓗꓷ꓿ ꓮ ꓡꓲꓳ ꓐꓯ ꓠꓬ ꓢꓯꓼ ꓟꓬ ꓗꓪ ꓛꓲ ꓓꓴꓽ ꓓꓴꓽ ꓟꓴ ꓓꓵꓽ ꓡꓰˍ ꓟ ꓠꓽ꓾ ꓕꓲ ꓞꓲꓼ ꓡꓱꓸꓼ ꓐꓬꓻ ꓞꓹ ꓟ ꓛꓬꓼ ꓟꓵꓽ ꓗꓪ ꓠꓴ ꓛꓲ ꓒꓯꓹ ꓠꓬꓲꓽ ꓐꓽ ꓡꓱꓸꓼ ꓠꓳꓽ ꓞꓹ ꓢꓲ ꓡꓳ ꓧꓳꓽ ꓗꓷˍ ꓟ ꓢꓶꓸ ꓟꓽ ꓞꓲ ꓙꓲˍ ꓡꓳ꓿ 46 ꓛꓬꓼ ꓟꓵꓽ ꓮꓸ ꓔꓳ ꓠꓬ ꓮ ꓕꓯˍ ꓟꓲ ꓟꓽ ꓢꓰꓼ ꓗꓷ꓾ ꓦꓳꓹˍ ꓟꓲ ꓟꓽ ꓫꓵꓻ꓿ 47 ꓠꓴ ꓟꓬ ꓢꓶꓽ ꓕꓲ ꓐꓽ ꓠꓴ ꓔꓯ ꓛꓬ ꓡꓰ ꓝꓲˍ ꓠꓬ ꓗꓳꓸ ꓡꓳ ꓗꓷ꓿ ꓪꓴ-ꓢ ꓗꓴꓷ ꓗꓪ ꓟꓬ ꓔꓲꓸ ꓔꓲꓸ ꓟꓴ ꓓꓵꓽ ꓡꓰˍ ꓟ ꓠꓽ꓾ ꓕꓲ ꓞꓲꓼ ꓡꓱꓸꓼ ꓐꓬꓻ ꓞꓹ ꓟ ꓛꓬꓼ ꓟꓵꓽ ꓗꓪ ꓠꓴ ꓟꓬ ꓢꓶꓽ ꓠꓬꓲꓽ ꓐ ꓡꓱꓸꓼ ꓠꓳꓽ ꓞ ꓢꓲ ꓡꓳ ꓧꓳꓽ ꓗꓷˍ ꓟ ꓢꓶꓸ ꓟꓽ ꓞꓲ ꓙꓲˍ ꓡꓳ꓿ 48 ꓛꓬꓼ ꓟꓵꓽ ꓮꓸ ꓔꓳ ꓠꓬ ꓮ ꓕꓯˍ ꓟꓲ ꓟꓽ ꓢꓰꓼ ꓗꓷ꓾ ꓦꓳꓹˍ ꓟꓲ ꓟꓽ ꓫꓵꓻ꓿ 49 ꓮ ꓡꓲꓳ ꓐꓯ ꓠꓬ ꓮ ꓡꓲ ꓕꓲ ꓣꓳ ꓔꓯˍ ꓟꓲ꓾ ꓞꓼ ꓐꓳ ꓡꓰ ꓯꓺˍ ꓟ ꓡꓰ ꓐꓰ꓾ ꓮꓸ ꓔꓳꓸ ꓡꓰ ꓯꓺ ꓠ ꓗꓷ ꓡꓰˍ ꓥꓳ꓿ 50 ꓞꓼ ꓐꓳ ꓠꓽ ꓙꓲˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓛꓵꓻ ꓢꓯꓼ ꓒꓲꓼ ꓬꓰ ꓠꓬ ꓮ ꓡꓲ ꓐꓰ ꓢꓲ ꓝꓮꓲ ꓛꓵꓻ ꓡ ꓝꓲ ꓠꓯꓹ ꓡ? ꓠꓴ ꓪꓽ ꓠꓯꓸꓼ ꓗꓪ ꓞꓼ ꓐꓳ ꓓꓯꓹ ꓝꓲ ꓢꓲ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓧꓳꓹ ꓡꓯꓽ ꓘꓳ꓾ ꓐꓯˍ ꓡꓳ꓿

ꓟ-ꓗꓳ 10

1 ꓬꓰ-ꓢꓴ ꓠꓬ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓬꓴ-ꓔ ꓟꓵˍ ꓐꓰ ꓬꓳ-ꓔ ꓬꓲꓽ ꓟ ꓖꓳ ꓐꓽ ꓗꓪ ꓛꓲ ꓬꓰ ꓠꓬ꓾ ꓬꓲ ꓔꓬ ꓗꓪ ꓞꓳ ꓜꓴ ꓜꓲꓼ ꓡ ꓡꓳ꓿ ꓖꓳ ꓡꓱ ꓠꓬ ꓬꓲ ꓬꓰ ꓝꓳ ꓡꓰ ꓟ ꓡꓰ ꓐꓰ ꓬꓲ ꓪꓽ ꓔꓯ ꓟꓸ ꓖꓶˍ ꓢꓰꓽ ꓡꓳ꓿ 2 ꓒ-ꓡꓲ-ꓢꓷ ꓐꓴ ꓠꓬ ꓬꓰ-ꓢꓴ ꓔꓯ ꓫꓵꓽ ꓠꓬꓲ ꓠꓹ ꓟ ꓡ ꓢꓲ꓾ ꓞꓳ ꓑ ꓤ ꓠꓬ ꓬꓲ ꓤ ꓟꓶ ꓔꓯ ꓒꓰ ꓗꓷ ꓓ ꓡ?꓾ ꓟꓽ ꓓ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 3 ꓬꓲ ꓠꓬ ꓬꓲ ꓪꓽ ꓔꓯ꓾ ꓟꓳ-ꓫꓲ ꓡꓰ ꓠꓴ ꓪꓽ ꓔꓯ ꓮꓸ ꓫꓵ ꓕꓵꓼ ꓪ ꓖꓶ ꓔ ꓡ?꓾ ꓐꓯˍ ꓡꓳ꓿ 4 ꓖꓳ ꓡꓱ ꓠꓬ ꓬꓲ ꓪꓽ ꓡꓰ꓾ ꓟꓳ-ꓫꓲ ꓠꓽ ꓤ ꓟꓶ ꓒꓰ ꓗꓷˍ ꓟ ꓕꓳ ꓶ ꓐꓳ ꓝꓲ ꓢꓲ ꓒꓰ ꓗꓷ ꓝꓲˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 5 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓲꓹ ꓟ ꓩꓴˍ ꓟ ꓗꓪ ꓐꓰ꓾ ꓬꓲ ꓡꓰ ꓠꓴ ꓪꓽ ꓔꓯ ꓕꓵꓼ ꓪ ꓕꓱ ꓟ ꓐꓳ ꓔ ꓖꓶˍ ꓟ ꓥ ꓡꓳ꓿ 6 ꓖꓳ ꓡꓱ ꓥ ꓟꓲ ꓟꓵ ꓚꓰꓼ ꓟꓲ ꓚꓰꓼˍ ꓕꓯ ꓡꓰ꓾ ꓪꓴ-ꓢ ꓡꓰ ꓞꓳ ꓑ ꓤˍ ꓐꓰ ꓤ ꓟꓶ ꓤ ꓚꓰꓼ ꓔ ꓡꓳ꓿ 7 ꓕꓱ ꓟ ꓪꓴꓸ ꓠꓬꓲ ꓞꓳ ꓑ ꓤ ꓠꓬ ꓬꓲ ꓐꓹ ꓐ ꓟꓹ ꓟˍ ꓐꓰ ꓧꓹ ꓗꓷ ꓢꓲ ꓬꓲ ꓤ ꓟꓶ ꓔꓯ ꓝꓱꓺ ꓡꓰˍ ꓥꓳ꓿ 8 ꓖꓳ ꓡꓱ ꓢꓲ ꓬꓲ ꓪꓽ ꓠꓬꓲꓽ ꓟ ꓠꓬ ꓕꓲ ꓧꓪꓽˍ ꓡꓰꓽ ꓒꓬꓱꓼ ꓬꓰˍ ꓥꓳ꓿ ꓬꓲ ꓪꓽ ꓠꓽ ꓝꓮꓲ ꓠꓬꓲꓽ ꓣꓳ ꓟꓽ ꓥ꓾ ꓕꓲ ꓧꓪꓽˍ ꓡꓰꓽ ꓥ ꓡꓳ꓿ 9 ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓝꓱꓺ ꓔ ꓟ ꓠꓬ꓾ ꓞꓳ ꓤ ꓡꓰ ꓕꓽ ꓧꓹ ꓗꓷ ꓝꓲ꓾ ꓐꓯ ꓖꓶˍ ꓡꓳ꓿ 10 ꓬꓲ ꓪꓽ ꓦꓲ ꓗꓪ ꓬꓲꓼ ꓙꓰ ꓗꓷ ꓠꓬ꓾ ꓛꓳꓽ ꓒꓯꓹ ꓐꓴ ꓡꓰ ꓕꓱ ꓟ ꓔꓯ ꓟꓳꓸ ꓬꓰ-ꓢꓴ ꓔꓯ ꓠ ꓠꓬꓲˍ ꓢꓰꓽ ꓡꓳ꓿ 11 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓮꓽ ꓟ ꓥ ꓟꓲ ꓬꓲ ꓤ ꓟꓶ ꓔꓯ ꓒꓰ ꓗꓷ ꓢꓲ ꓠꓱꓸ ꓐꓯꓼ ꓕꓲ ꓣꓳ ꓫꓺˍ ꓠꓬ꓾ ꓬꓲ ꓤ ꓟꓶ ꓔꓯ ꓪꓴꓸ ꓘꓳꓻ ꓢꓲ ꓦꓬꓼ ꓛꓳꓽ ꓧꓪˍ ꓟ ꓥ ꓡꓳ꓿ 12 ꓤ ꓟꓶ ꓤˍ ꓟꓲ ꓬꓲ ꓤ ꓖꓴ ꓔꓯ ꓒꓰ ꓗꓷ ꓢꓲ ꓠꓱꓸ ꓐꓯꓼ ꓕꓲ ꓣꓳ ꓫꓺˍ ꓠꓬ꓾ ꓬꓲˍ ꓟꓲ ꓦꓬꓼ ꓛꓳꓽ ꓧꓪˍ ꓟ ꓥ ꓡꓳ꓾ ꓐꓯˍ ꓡꓳ꓿ 13 ꓬꓰ-ꓢꓴ ꓡꓰ ꓤ ꓠꓱ ꓤ ꓐꓴ ꓔꓯ ꓫꓱꓹ ꓖꓶ ꓝꓲ ꓠꓹ ꓟ꓾ ꓬꓲ ꓪꓽ ꓡꓰ ꓤ ꓠꓱ ꓐꓴ ꓔꓯ ꓬꓲ ꓔꓬ ꓗꓪ ꓧꓳꓽ ꓡ ꓡꓳ꓿ ꓖꓳ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓪꓽ ꓧꓳꓽ ꓢꓴ ꓔꓯ ꓕꓼˍ ꓡꓳ꓿ 14 ꓖꓳ ꓡꓱ ꓥ ꓟꓲ ꓬꓲ ꓛꓳꓽ ꓒꓯꓹ ꓐꓴ ꓕꓱ ꓡꓱ ꓬꓰˍ ꓟ ꓬꓰ-ꓢꓴ ꓟꓳꓻ ꓗꓷ ꓠꓬ ꓬꓲ ꓠꓲꓹ ꓟ ꓟꓽ ꓢꓻ ꓠꓬꓲ꓾ ꓤ ꓠꓱ ꓤ ꓐꓴ ꓥꓪ ꓔꓯ ꓡ ꓝꓲ꓾ ꓬꓲ ꓪꓽ ꓔꓯ ꓕꓽ ꓗꓽ ꓔ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓗꓴꓷ ꓠꓬ ꓕꓱ ꓡꓱ ꓫꓵꓽ ꓡꓽ ꓞꓳ ꓔꓯꓸ ꓟ ꓥ ꓡꓳ꓿ 15 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓮꓽ ꓟ ꓥ ꓟꓲ ꓤ ꓠꓱ ꓤˍ ꓡꓰ ꓐꓰ ꓪꓴ-ꓢ ꓗꓴꓷ ꓔꓯ ꓟꓽ ꓘꓳ ꓣꓴ ꓠꓬ ꓖꓳ ꓗꓪ ꓓꓵꓽ ꓡꓰ ꓟꓽ ꓓ꓾ ꓐꓯ ꓖꓶˍ ꓡꓳ꓿ 16 ꓖꓳ ꓡꓱ ꓠꓬ ꓬꓲ ꓡꓰ ꓤ ꓠꓱ ꓤ ꓐꓴ ꓔꓯ ꓬꓲꓸ ꓡꓯꓼ ꓖꓳꓼ ꓗꓪ ꓔꓯꓹ ꓔ ꓢꓲ꓾ ꓬꓲ ꓪꓽ ꓕꓯꓽ ꓢꓲ ꓗꓪ ꓬꓲ ꓡꓯꓼ ꓒꓯꓹ ꓚꓰꓹ ꓖꓶ ꓢꓲ ꓠꓬꓲ ꓶꓼ ꓥꓳꓽ ꓙꓱꓽ ꓖꓶˍ ꓡꓳ꓿ 17 ꓬꓰ-ꓢꓴ ꓓꓳ ꓙꓰˍ ꓐꓰ ꓬꓰˍ ꓕꓯ꓾ ꓡꓽ ꓞꓳ ꓕꓲ ꓣꓳ ꓬꓲ ꓔꓬ ꓗꓪ ꓔꓷꓹ ꓡ ꓢꓲ꓾ ꓛꓲ ꓝꓲꓸ ꓖꓶꓽ ꓢꓲ ꓠꓬꓲ꓾ ꓙꓲˍ ꓟ ꓟꓸ ꓒꓽꓳ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ ꓥꓪ ꓮꓸ ꓫꓵ ꓬꓰ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 18 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ꓾ ꓙꓲˍ ꓟ꓾ ꓐꓰ ꓘꓴˍ ꓡ? ꓪꓴ-ꓢ ꓬꓲ ꓕꓲ ꓣꓳˍ ꓡꓰꓽ ꓟꓽ ꓥ ꓠꓬ꓾ ꓙꓲˍ ꓟ ꓠꓱꓸ ꓐꓯꓼ ꓢꓴ ꓟꓽ ꓙꓳ꓿ 19 ꓕꓵꓼ ꓪ ꓗꓪ꓾ ꓞꓳ ꓤ ꓕꓽ ꓢꓰꓼ꓾ ꓦꓬꓼ ꓛꓳꓽ ꓕꓽ ꓧꓪ꓾ ꓕꓽ ꓘꓴꓽ ꓕꓽ ꓠꓯꓺ꓾ ꓟꓽ ꓔꓱꓹ ꓟ ꓢꓷꓸ ꓙ ꓟꓳꓻ ꓙ ꓢꓴ ꓕꓽ ꓬꓰ꓾ ꓕꓽ ꓗꓶꓸ ꓜꓽ꓾ ꓠꓴ ꓮꓽ ꓐ ꓮ ꓟ ꓔꓯ ꓒꓵꓽ꓾ ꓐꓯˍ ꓟ ꓠꓴ ꓢꓷꓸˍ ꓡꓳ꓾ ꓐꓯˍ ꓡꓳ꓿ 20 ꓖꓳ ꓕꓯ ꓬꓲ ꓡꓰ ꓬꓰ-ꓢꓴ ꓔꓯ꓾ ꓟꓸ ꓒꓽꓳ꓾ ꓕꓱ ꓟꓬ ꓙꓰꓽ ꓟ ꓮꓽ ꓙꓵ ꓠꓬ ꓥꓪ ꓤ ꓠꓱ ꓤ ꓕꓯꓽˍ ꓡꓰ ꓛꓳ ꓔꓬ ꓥꓳ꓾ ꓐꓯˍ ꓡꓳ꓿ 21 ꓬꓰ-ꓢꓴ ꓠꓬ ꓠꓵ ꓠꓲꓹ ꓡꓰ ꓬꓲ ꓔꓯ ꓡꓳꓸ ꓔ ꓢꓲ꓾ ꓖꓳ ꓡꓱ ꓥ ꓟꓲ ꓠꓴ ꓠꓽ ꓕꓲ ꓙꓰꓽ ꓛꓺˍ ꓢꓰꓽ ꓡꓳ꓿ ꓙꓰ꓾ ꓠꓴ ꓙꓳˍ ꓟ ꓮꓽ ꓙꓵ ꓪꓴꓽ ꓗꓷ ꓢꓲ ꓞꓳ ꓫꓸ ꓔꓯ ꓖꓶ ꓗꓷ꓿ ꓖꓳ ꓡꓱ ꓠꓬ ꓠꓴ ꓠꓽ ꓟꓴꓽ ꓗꓪ ꓕꓯ ꓢꓲ ꓗꓪ ꓒꓵꓽ ꓶꓽ ꓙꓳˍ ꓥꓳ꓿ ꓖꓳ ꓡꓱ ꓢꓲ ꓥꓪ ꓔꓯ ꓛꓳ ꓡꓯ꓾ ꓐꓯ ꓖꓶˍ ꓡꓳ꓿ 22 ꓡꓽ ꓞꓳ ꓖꓳ ꓟ ꓠꓬ ꓞꓳ ꓐꓳ ꓕꓲ ꓣꓳ ꓥ ꓠꓬꓲ꓾ ꓬꓰ-ꓢꓴ ꓡꓰ ꓐꓯˍ ꓟ ꓔꓯ ꓑ ꓙꓽ ꓗꓷ ꓠꓬ꓾ ꓬꓲ ꓒꓬꓱꓽ ꓑꓶꓸ ꓡꓰ ꓢꓲ ꓠꓲꓹ ꓟ ꓫꓸ ꓫꓸꓼ ꓐꓰ ꓙꓰ ꓗꓷꓳ꓿ 23 ꓬꓰ-ꓢꓴ ꓠꓬ ꓚꓳ ꓡꓳ ꓐꓰ ꓡꓳꓸ ꓢꓲ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓒꓴꓻ ꓙꓳ ꓫꓵꓻ ꓙꓳ ꓢꓴ ꓠꓬ ꓪꓴ-ꓢ ꓗꓴꓷ ꓗꓪ ꓮꓺ ꓘꓶ ꓓꓵꓽ ꓡꓰ ꓫꓸˍ ꓡꓳ ꓟꓻ꓾ ꓐꓯˍ ꓡꓳ꓿ 24 ꓛꓳꓽ ꓒꓯꓹ ꓐꓴ ꓠꓬ ꓬꓲ ꓐꓯ ꓘꓶꓽ ꓔꓯ ꓓꓵꓽ ꓙ ꓟꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓤ ꓠꓱ ꓐꓴꓳ꓾ ꓒꓴ ꓤ ꓫꓵ ꓤ ꓔꓯ ꓦ ꓡꓱ ꓢꓴ ꓠꓽ꓾ ꓪꓴ-ꓢ ꓗꓴꓷ ꓗꓪ ꓓꓵꓽ ꓡꓰ ꓠꓹ ꓟ ꓮꓽ ꓘꓶꓸ ꓫˍ ꓡꓳ꓿ 25 ꓞꓳ ꓐꓳ ꓕꓲ ꓣꓳ ꓪꓴ-ꓢ ꓗꓴꓷꓼ ꓗꓪ ꓓꓵꓽ ꓡꓰ ꓠꓹ ꓟ ꓠꓬ꓾ ꓡꓳꓽ ꓕꓳ ꓕꓲ ꓘꓹ ꓪꓳꓼ ꓠ ꓗꓺ ꓗꓪ ꓙꓻ ꓙꓰ ꓠꓹ ꓟ ꓢꓶꓸ ꓟꓽ ꓞꓲ ꓫꓸˍ ꓡꓳ꓾ ꓐꓯˍ ꓡꓳ꓿ 26 ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓘꓶꓸ ꓓꓵꓽ ꓙ ꓟꓶ ꓡꓰ ꓢꓲ ꓬꓲ ꓔꓯ꓾ ꓖꓳ ꓡꓱ ꓥ ꓠꓬ ꓮꓽ ꓟ ꓢꓯꓼ ꓟꓬ ꓝꓸ ꓟꓶ ꓓ ꓢꓰꓽ꓾ ꓐꓯˍ ꓡꓳ꓿ 27 ꓖꓳ ꓕꓯ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓡꓳꓸ ꓔ ꓢꓲ꓾ ꓞꓳ ꓤ ꓠꓽ ꓬꓰ ꓟꓽ ꓐ ꓡ ꓟꓲ꓾ ꓪꓴ-ꓢ ꓠꓽ ꓐ ꓡ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓬ ꓮꓸ ꓫꓵˍ ꓟꓲ ꓬꓰ ꓐ ꓡ ꓡꓳ꓾ ꓐꓯˍ ꓡꓳ꓿ 28 ꓒꓲ-ꓕꓱ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓠꓬ ꓙꓳˍ ꓟ ꓮꓽ ꓙꓵ ꓗꓶ ꓔꓸ ꓬꓰ ꓢꓲ ꓠꓴ ꓔꓯ ꓛꓳˍ ꓡꓳ꓾ ꓐꓯˍ ꓡꓳ꓿ 29 ꓖꓳ ꓕꓯ ꓬꓰ-ꓢꓴ ꓡꓰ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓥꓪ ꓐꓱ ꓶˍ ꓐꓰ ꓶꓼ ꓓꓳ ꓫꓱꓹ ꓓꓳ ꓐꓱ ꓶ ꓮꓽ ꓟˍ ꓟꓲ꓾ ꓬꓲ ꓦꓲ꓾ ꓥ ꓠꓬ ꓬꓲꓼ ꓤ ꓠꓬꓲ ꓤ꓾ ꓮꓸ ꓝꓲ ꓠꓬꓲ ꓟ꓾ ꓥ ꓠꓬ ꓮꓽ ꓐꓽ ꓮ ꓟ ꓐꓰ ꓤ ꓠꓱ꓾ ꓥ ꓠꓬ ꓦꓻ ꓟꓲ ꓗꓶ ꓔ ꓬꓰ ꓢꓴ ꓠꓬ꓾ 30 ꓮ ꓟꓶ ꓕꓱ ꓕꓲ ꓤꓶ ꓗꓪˍ ꓟꓲ꓾ ꓦꓲꓻ꓾ ꓬꓲꓼ ꓤ ꓠꓬꓲ ꓤ꓾ ꓮꓸ ꓝꓲ ꓠꓬꓲ ꓟ꓾ ꓮ ꓟ꓾ ꓤ ꓠꓱˍ ꓐꓰ ꓦ ꓟꓲˍ ꓟꓲ ꓕꓲ ꓦꓬꓻ ꓝꓸ ꓟꓶˍ ꓥꓳ꓿ ꓗꓸ ꓧꓪ ꓟˍ ꓟꓲ ꓔꓳꓹ ꓜꓳꓽˍ ꓥꓳ꓿ ꓡ ꓠꓹ ꓟ ꓤꓶ ꓗꓪˍ ꓟꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶˍ ꓥꓳ꓿ 31 ꓖꓳ ꓡꓱ ꓥ ꓟꓲ ꓬꓲ ꓪꓴꓸ ꓟ ꓮꓽ ꓟꓬꓹ ꓣꓳ ꓠꓬ꓾ ꓬꓲ ꓟꓶꓽˍ ꓟ ꓗꓷ ꓡꓰˍ ꓥꓳ꓿ ꓬꓲ ꓟꓶꓽˍ ꓟ ꓠꓽ ꓬꓲ ꓪꓴꓸ ꓟ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 32 ꓬꓲ ꓪꓽ ꓠꓬ ꓙꓱ-ꓣꓴ-ꓢ-ꓡꓱ ꓔꓯꓸ ꓟꓳꓸ ꓓꓯ ꓙꓰ ꓔꓬ ꓕꓯ꓾ ꓬꓰ-ꓢꓴ ꓠꓬ ꓬꓲ ꓪꓽ ꓟꓲꓽ ꓕꓯ ꓢꓲ ꓗꓪ ꓙꓰˍ ꓡꓳ꓿ ꓛꓳꓽ ꓒꓯꓹ ꓐꓴ ꓠꓬ ꓓꓵꓽ ꓙ ꓟꓶˍ ꓡꓳ꓿ ꓬꓲ ꓔꓯ ꓛꓳ ꓡ ꓢꓴˍ ꓟꓲ ꓙꓳꓺˍ ꓡꓳ꓿ ꓬꓲ ꓠꓬ ꓞꓲ ꓠꓬꓲꓽ ꓣꓳ ꓟ ꓔꓯ ꓖꓳ ꓫꓬꓺꓼ ꓗꓪ ꓘꓴꓻ ꓔꓯꓹ ꓙꓰ ꓢꓲ꓾ ꓬꓲ ꓔꓯ ꓮ ꓡꓲ ꓗꓷ ꓡꓰ ꓠꓹ ꓟ ꓐꓯ ꓟꓸ ꓖꓶˍ ꓡꓳ꓿ 33 ꓬꓲ ꓡꓰ꓾ ꓮ ꓟꓶ ꓣꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰ ꓔꓬ ꓡꓳ꓿ ꓡ-ꓞꓳ-ꓮ-ꓐꓲ ꓔꓯ ꓠꓽ ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷˍ ꓥꓳ꓿ ꓬꓲ ꓪꓽ ꓠꓬ ꓬꓲ ꓔꓯ ꓫꓵꓻ ꓝꓲ ꓠꓹ ꓟ ꓐꓯ ꓞꓷꓹ ꓢꓲ꓾ ꓐꓶꓽ ꓞꓳ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷˍ ꓥꓳ꓿ 34 ꓬꓲ ꓪꓽ ꓡꓰ ꓬꓲ ꓔꓯ ꓤꓲ ꓢꓲ꓾ ꓟꓷꓽ ꓶꓻ ꓔꓲꓸ ꓧꓳꓽ ꓢꓲ ꓠꓬꓲ꓾ ꓓꓶꓽ ꓢꓲ ꓢꓰꓼ ꓗꓷˍ ꓥꓳ꓿ ꓢ ꓠꓬꓲ ꓗꓸ ꓠꓯꓸ ꓠꓬ ꓬꓲ ꓢꓯꓸ ꓬꓲꓼ ꓡ ꓥꓳ꓾ ꓐꓯˍ ꓡꓳ꓿ 35 ꓜꓲ-ꓐꓱ-ꓓꓰ ꓬꓲ ꓮ ꓐꓲ ꓬ-ꓗꓴˍ ꓐꓰ ꓬꓳ-ꓦ ꓠꓬꓲꓽ ꓫꓵꓸ ꓠꓬ ꓬꓰ-ꓢꓴ ꓔꓯ ꓡ ꓢꓲ꓾ ꓟꓸ ꓒꓽꓳ꓾ ꓥꓪ ꓠꓴꓽ ꓡꓰ ꓠꓴ ꓔꓯ ꓮꓸ ꓫꓵ ꓓꓰꓽˍ ꓠꓬ ꓖꓳ ꓕꓲ ꓫꓵꓽ ꓥꓪ ꓠꓴꓽ ꓔꓯ ꓬꓰ ꓖꓶ ꓡ ꓠꓹ ꓟ ꓠꓲꓹ ꓫꓵˍ ꓡꓳ꓾ ꓐꓯˍ ꓡꓳ꓿ 36 ꓬꓲ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓯ ꓠꓴ ꓪꓽ ꓐꓱ ꓶ ꓮꓸ ꓫꓵ ꓬꓰ ꓝꓲ ꓠꓲꓹ ꓫꓵˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 37 ꓬꓲ ꓪꓽ ꓡꓰ ꓬꓲ ꓔꓯ꓾ ꓐꓬꓱꓼ ꓡꓱꓼ ꓡꓱ ꓟ ꓙꓵꓽ ꓠꓬꓲꓸ ꓕꓲ ꓗꓪ ꓠꓴ ꓠꓬꓲꓸ ꓠꓸ ꓡ ꓕꓯ꓾ ꓥꓪ ꓠꓴꓽ ꓔꓯ ꓠꓴ ꓡꓯꓼ ꓙꓻ ꓕꓲ ꓛꓱꓽ ꓗꓪ ꓕꓲ ꓣꓳ꓾ ꓡꓯꓼ ꓶꓸ ꓕꓲ ꓛꓱꓽ ꓗꓪ ꓕꓲ ꓣꓳ ꓠꓬꓲꓸ ꓠꓸ ꓝꓲ ꓡꓯ꓾ ꓐꓯˍ ꓡꓳ꓿ 38 ꓬꓰ-ꓢꓴ ꓠꓽ ꓬꓲ ꓪꓽ ꓔꓯ꓾ ꓠꓴ ꓪꓽ ꓮꓸ ꓫꓵ ꓓꓰꓽ ꓔꓬ ꓟ ꓠꓴ ꓪꓽ ꓟꓽ ꓢꓷ꓿ ꓥꓪ ꓓꓳꓻˍ ꓟ ꓡꓴ ꓗꓶꓸ ꓠꓴ ꓪꓽ ꓓꓳꓻ ꓐ ꓡ ꓡ? ꓥꓪ ꓔꓯ ꓔꓲꓹˍ ꓟ ꓔꓲꓹ ꓓꓴ ꓗꓪ ꓠꓴ ꓪꓽ ꓔꓲꓹ ꓐ ꓡ ꓡ?꓾ ꓐꓯ ꓖꓶˍ ꓡꓳ꓿ 39 ꓖꓳ ꓕꓯ ꓬꓲ ꓪꓽ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓐ ꓡ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓓꓳˍ ꓟ ꓡꓴ ꓗꓶꓸ ꓠꓽ ꓠꓴ ꓪˍ ꓟꓲ ꓓꓳˍ ꓥꓳ꓿ ꓥꓪ ꓔꓯ ꓔꓲꓹˍ ꓟ ꓔꓲꓹ ꓓꓴ ꓗꓪˍ ꓟꓲ ꓠꓴ ꓪꓽ ꓔꓲꓹ ꓟꓶˍ ꓥꓳ꓿ 40 ꓖꓳ ꓡꓱ ꓥ ꓟꓲ ꓥꓪ ꓡꓯꓼ ꓙ ꓕꓲ ꓛꓱꓽˍ ꓐꓰ ꓡꓯꓼ ꓶꓸ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ ꓠꓹ ꓟ ꓙꓵꓽ ꓪ ꓠꓽ ꓥꓪ ꓖꓶ ꓟꓽ ꓐ ꓡ꓿ ꓮꓽ ꓟ ꓐꓱ ꓶ ꓙꓽ ꓖꓶ ꓔ ꓠꓬ ꓖꓳ ꓟ ꓐꓱ ꓶ ꓥꓳ꓾ ꓐꓯ ꓖꓶˍ ꓡꓳ꓿ 41 ꓕꓱ ꓟ ꓔꓯ ꓠꓱꓸ ꓐꓯꓼ ꓞꓲ ꓣꓳ ꓟ ꓑ ꓙꓽ ꓗꓷ ꓠꓬ꓾ ꓬ-ꓗꓴˍ ꓐꓰ ꓬꓳ-ꓦ ꓔꓯ ꓠꓲꓹ ꓟ ꓦꓶˍ ꓡꓳ꓿ 42 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓘꓴꓻ ꓜꓲꓼ ꓡ ꓢꓲ ꓕꓱ ꓡꓱ ꓐꓯ ꓖꓶˍ ꓡꓳ꓾ ꓐꓶꓽ ꓞꓳ ꓔꓯ ꓙꓵꓽ ꓢꓴ ꓢꓲꓽ ꓒ ꓠꓽ ꓢꓲꓺ ꓤ ꓐꓴ ꓔꓯ ꓙꓵꓽ ꓒꓬꓱꓽ ꓟꓳꓸ ꓖꓶ ꓢꓲ꓾ ꓬꓲ ꓪꓽ ꓞꓳ ꓪꓴꓽ ꓞꓳ ꓔꓲ ꓐꓴˍ ꓟꓲ ꓑ ꓫꓬꓼ ꓐꓴ ꓕꓯꓽ ꓢꓲ ꓗꓪ ꓙꓵꓽ ꓪ ꓣꓱꓽˍ ꓟ ꓠꓴ ꓪꓽ ꓢꓷꓸˍ ꓡꓳ꓿ 43 ꓠꓴ ꓪꓽ ꓠꓽ ꓖꓳ ꓡꓱ ꓬꓰ ꓟꓽ ꓓ꓿ ꓠꓴ ꓪꓽ ꓗꓳ ꓡꓳ ꓗꓪ ꓪꓴꓽˍ ꓟ ꓬꓰ ꓠꓲꓹ ꓫꓵ ꓢꓴ ꓠꓬ ꓣꓱꓽ ꓙ ꓢꓴ ꓬꓰ ꓠꓯꓹ ꓡꓳ꓿ 44 ꓠꓴ ꓪꓽ ꓗꓳ ꓡꓳ ꓗꓪ ꓮꓽ ꓟ ꓪꓴꓸ ꓓꓵ ꓣꓱꓽ ꓢꓴ ꓬꓰ ꓠꓲꓹ ꓫꓵˍ ꓠꓬ ꓮꓽ ꓙꓵ ꓢꓴ ꓚꓳ ꓑꓸ ꓬꓰ ꓠꓯꓹ ꓡꓳ꓿ 45 ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓥꓪˍ ꓟꓲ꓾ ꓢꓴ ꓡꓰ ꓥꓪ ꓔꓯ ꓣꓱꓽ ꓙ ꓝꓲ ꓠꓹ ꓟ ꓡ ꓟ ꓟꓽ ꓥ꓿ ꓢꓴ ꓔꓯ ꓣꓱꓽ ꓙ ꓠꓹ ꓟ ꓐꓰ꓾ ꓥꓪ ꓢꓯꓼ ꓟꓬ ꓡꓰ ꓡꓽ ꓞꓳ ꓮꓽ ꓟꓬꓹ ꓔꓯ ꓫꓴꓹ ꓣꓴ ꓠꓹ ꓟ ꓡ ꓗꓷ ꓟ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ 46 ꓬꓲ ꓪꓽ ꓠꓬ ꓙꓱ-ꓡꓲ-ꓘꓳ ꓗꓪ ꓛꓲ ꓡ ꓢꓲ꓾ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴˍ ꓐꓰ꓾ ꓞꓳ ꓜꓴ ꓞꓳ ꓟꓯꓼ ꓠꓬ ꓙꓱ-ꓡꓲ-ꓘꓳ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓕꓲ-ꓟꓲ-ꓪꓴ ꓬꓲ ꓮ ꓐꓲ꓾ ꓜ ꓓꓰꓽ ꓢꓴ ꓐ-ꓕꓲ-ꓟꓲ-ꓪꓴ ꓟꓬꓱ ꓔ ꓟ ꓟꓬꓺ ꓔꓶꓺ ꓕꓲ ꓣꓳ ꓠꓬ꓾ ꓙ ꓖꓴ ꓘꓶꓽ ꓗꓪ ꓠꓬꓲꓸ ꓠꓸ ꓔꓬ ꓡꓳ꓿ 47 ꓠ-ꓢ-ꓡꓱ ꓢꓴ ꓬꓰ-ꓢꓴ ꓡ ꓔꓬ ꓟ ꓬꓲ ꓢꓷꓸ ꓡꓰ ꓠꓬ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓬꓰ-ꓢꓴꓳ꓾ ꓥꓪ ꓔꓯ ꓫꓱꓸ ꓤ ꓙ ꓡꓯ꓾ ꓐꓰ ꓘꓴˍ ꓡꓳ꓿ 48 ꓡꓽ ꓞꓳ ꓮꓽ ꓟꓬꓹ ꓠꓬ ꓬꓲ ꓔꓯ ꓕꓼ ꓢꓲ꓾ ꓟꓽ ꓪꓳꓹ ꓔꓬ ꓠꓹ ꓟ ꓙꓳꓺ ꓗꓽ ꓖꓶˍ ꓟꓲ꓾ ꓬꓲ ꓠꓽ ꓟꓬꓽ ꓠꓬꓲ ꓮꓽ ꓘꓶꓸ ꓘꓴꓻ ꓢꓲ ꓠꓬꓲ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤꓽꓳ꓾ ꓥꓪ ꓔꓯ ꓫꓱꓸ ꓤ ꓙ ꓡꓯ꓾ ꓐꓰ ꓐꓯˍ ꓡꓳ꓿ 49 ꓖꓳ ꓕꓯ ꓬꓰ-ꓢꓴ ꓦꓰꓼ ꓡꓰ ꓢꓲ꓾ ꓬꓲ ꓔꓯ ꓘꓴꓻ ꓬꓰ꓾ ꓐꓯˍ ꓡꓳ꓿ ꓬꓲ ꓪꓽ ꓠꓬ ꓟꓬ ꓔꓶꓺ ꓔꓯ ꓘꓴꓻ ꓬꓰ ꓢꓲ꓾ ꓠꓴ ꓠꓲꓹ ꓟ ꓪꓳꓽ ꓡꓯꓻ ꓐꓰ ꓔꓬ꓿ ꓔꓴ ꓡꓯ꓾ ꓬꓲ ꓡꓰ ꓠꓴ ꓔꓯ ꓘꓴꓻˍ ꓡꓳ꓾ ꓐꓯ ꓖꓶˍ ꓡꓳ꓿ 50 ꓖꓳ ꓡꓱ ꓠꓬ ꓬꓲ ꓠꓽ ꓔꓷꓹ ꓔꓴ ꓡ ꓢꓲ ꓬꓲ ꓐꓵ ꓞꓶꓽ ꓐꓽ ꓢꓽ ꓶꓹ ꓔꓸ ꓬꓰ ꓢꓲ ꓠꓬꓲ ꓬꓰ-ꓢꓴ ꓔꓬ ꓗꓪ ꓡ ꓡꓳ꓿ 51 ꓬꓰ-ꓢꓴ ꓡꓰ ꓟꓬ ꓔꓶꓺ ꓔꓯ꓾ ꓥꓪ ꓡꓰ ꓠꓴ ꓐꓱ ꓶ ꓮꓸ ꓫꓵ ꓬꓰ ꓖꓶ ꓝꓲ ꓠꓲꓹ ꓫꓵˍ ꓡ?꓾ ꓐꓯˍ ꓕꓯ꓾ ꓟꓸ ꓒꓽꓳ꓾ ꓥꓪ ꓝꓮꓲ ꓠꓬꓲ ꓟꓳꓻ ꓡ ꓠꓲꓹ ꓫꓵˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 52 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓙꓰ ꓛꓵˍ ꓡꓳ꓿ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓ ꓡꓰ ꓝꓲꓳ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓞꓼ ꓐꓰ ꓠꓬꓲ ꓟꓳꓻ ꓡ ꓢꓲ꓾ ꓙ ꓖꓴ ꓗꓪ ꓬꓰ-ꓢꓴ ꓔꓯ ꓛꓳ ꓙꓰˍ ꓡꓳ꓿

ꓟ-ꓗꓳ 11

1 ꓙꓱ-ꓣꓴ-ꓢ-ꓡꓱ ꓗꓪ ꓬꓲ ꓪꓽ ꓠꓶꓽ ꓡ ꓕꓯ꓾ ꓮꓽ-ꓛꓬ-ꓪꓽ-ꓚꓲ ꓗꓪ ꓟ ꓐꓱ-ꓒ-ꓖꓶˍ ꓐꓰ ꓐꓱ-ꓕ-ꓠꓲ ꓗꓪ ꓛꓲ ꓡ ꓠꓬ꓾ ꓬꓰ-ꓢꓴ ꓡꓰ ꓛꓳꓽ ꓒꓯꓹ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷ ꓢꓲ꓾ 2 ꓠꓴ ꓪꓽ ꓠꓬ ꓔꓱꓹ ꓞꓹ ꓟ ꓘꓹ ꓗꓪ ꓓꓵꓽ ꓙꓰ꓿ ꓖꓳ ꓗꓪ ꓒꓻ ꓓꓵꓽ ꓡꓰ ꓟꓶꓽ ꓕꓯ꓾ ꓞꓳ ꓤ ꓮꓽ ꓟˍ ꓟꓲ ꓟꓽ ꓜꓶꓽ ꓠꓬꓲ ꓢꓰꓽ ꓟ ꓕꓳꓽ ꓡ ꓟꓴꓽ ꓤ ꓕꓲ ꓛꓲ ꓞꓳꓹ ꓔ ꓟ ꓠꓴ ꓪꓽ ꓟꓳꓻˍ ꓥꓳ꓿ ꓒꓶꓻ ꓢꓲ ꓢꓲꓺ ꓔꓯꓹ ꓖꓶ ꓡꓯ꓿ 3 ꓮꓽ ꓟ ꓡꓰ ꓠꓴ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓕꓱ ꓡꓱ ꓬꓰˍ ꓡ?꓾ ꓐꓰ ꓐꓯ ꓡ ꓠꓬ꓾ ꓢꓲ ꓒꓽ ꓣꓱꓽ ꓬꓯꓼˍ ꓡꓳ꓾ ꓐꓯ ꓖꓶ꓿ ꓖꓳ ꓡꓱ ꓠꓬ ꓬꓲ ꓡꓰ ꓞꓼ ꓐꓰ ꓕꓱ ꓗꓪ ꓢꓲꓺ ꓡ ꓝꓲˍ ꓥꓳ꓾ ꓐꓯˍ ꓡꓳ꓿ 4 ꓬꓲ ꓪꓽ ꓙꓰ ꓗꓷ ꓠꓬ꓾ ꓘꓹ ꓙ ꓖꓴ ꓐ ꓢꓲꓺ ꓗ ꓘꓶꓽ ꓓꓴꓽ ꓗꓪ꓾ ꓕꓳꓽ ꓡ ꓟꓴꓽ ꓤ ꓕꓲ ꓛꓲ ꓞꓳꓹ ꓔ ꓟ ꓔꓯ ꓟꓳꓻ ꓢꓲ ꓒꓶꓻ ꓔꓬ ꓕꓯ꓾ 5 ꓖꓳ ꓗꓪ ꓦꓰꓼ ꓞꓹ ꓢꓴ ꓕꓲ ꓐꓱ ꓡꓰ ꓬꓲ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓕꓳꓽ ꓡ ꓟꓴꓽ ꓤ ꓔꓯ ꓒꓶꓻˍ ꓡ?꓾ ꓐꓯˍ ꓡꓳ꓿ 6 ꓬꓲ ꓪꓽ ꓠꓬ ꓬꓰ-ꓢꓴ ꓟꓸ ꓔ ꓟ ꓡꓰ ꓐꓰ ꓐꓯ ꓖꓶ ꓗꓷ ꓠꓬ꓾ ꓢꓲꓺ ꓙꓰ ꓝꓲˍ ꓡꓳ꓿ 7 ꓬꓰ-ꓢꓴ ꓔꓬ ꓗꓪ ꓢꓲꓺ ꓛꓲ ꓡ ꓢꓲ꓾ ꓬꓲ ꓪꓽ ꓚꓲꓸ ꓛꓬ ꓐꓵ ꓞꓶꓽ ꓕꓳ ꓡ ꓟꓴ ꓤ ꓕꓯ ꓢꓲ ꓗꓪ ꓘꓳꓽ ꓗꓷ ꓠꓬ ꓬꓰ-ꓢꓴ ꓜꓶꓽˍ ꓡꓳ꓿ 8 ꓡꓽ ꓞꓳ ꓮꓽ ꓟꓬꓹ ꓠꓬ ꓙ ꓖꓴ ꓗꓪ ꓐꓵ ꓞꓶꓽ ꓘꓳꓽ ꓖꓶˍ ꓡꓳ꓿ ꓠꓱꓸ ꓐꓯꓼ ꓢꓴ ꓠꓬ ꓦ ꓟꓲ ꓦ ꓐꓽ ꓗꓪ ꓐꓰ ꓢꓲꓹ ꓒꓬꓽ ꓑꓳ ꓛꓵ ꓔꓯꓹ ꓡ ꓢꓲ ꓙ ꓖꓴ ꓗꓪ ꓘꓳꓽ ꓖꓶˍ ꓡꓳ꓿ 9 ꓟꓲꓽ ꓕꓯꓽ ꓢꓲ ꓗꓪ ꓙꓰ ꓢꓴˍ ꓐꓰ ꓗꓸ ꓠꓯ ꓢꓲ ꓗꓪ ꓛꓳ ꓡ ꓢꓴ ꓠꓬ꓾ ꓪꓴ-ꓢ ꓔꓯ ꓫꓱꓸ ꓖꓶ꓾ ꓢꓲ ꓒꓽ ꓟꓬꓱꓺ ꓗꓪ ꓐꓰ ꓡꓻ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ 10 ꓡꓻ ꓠꓹ ꓟ ꓣꓳ ꓒꓵꓽ ꓒ ꓓ-ꓪꓵ ꓬꓲ ꓗꓴꓷꓼ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓟꓴ ꓡꓳꓹ ꓬꓰ ꓟ ꓪꓴ-ꓢ ꓔꓯ ꓫꓱꓸ ꓖꓶ꓾ ꓐꓰ ꓘꓴˍ ꓡꓳ꓿ 11 ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓛꓲ ꓡ ꓕꓯ꓾ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓚꓳ ꓡꓳ ꓗꓪ ꓙꓳˍ ꓟ ꓮꓽ ꓙꓵ ꓔꓯ ꓡꓳꓸ ꓠꓬꓲˍ ꓡꓳ꓿ ꓖꓳ ꓕꓯ ꓟꓰꓻ ꓬꓰ ꓡ ꓠꓬꓲ꓾ ꓬꓲˍ ꓐꓰ ꓞꓲ ꓠꓬꓲꓽ ꓣꓳ ꓠꓬ ꓐꓱ-ꓕ-ꓠꓲ ꓘꓹ ꓗꓪ ꓙꓰˍ ꓡꓳ꓿ 12 ꓗꓸ ꓠꓯ ꓕꓲ ꓠꓬꓲ ꓬꓲ ꓪꓽ ꓠꓬ ꓐꓱ-ꓕ-ꓠꓲ ꓘꓹ ꓗꓪ ꓐꓰ ꓡꓻ ꓕꓯ꓾ ꓬꓰ-ꓢꓴ ꓦꓰꓼ ꓟꓷꓼˍ ꓡꓳ꓿ 13 ꓶꓽ ꓤ ꓗꓪ ꓬꓲ ꓒꓬꓽ ꓠꓱꓽˍ ꓟ ꓘꓶꓽ ꓢꓶꓽ ꓜꓲ ꓕꓲ ꓜꓲ ꓟꓳꓻ ꓗꓷ ꓠꓬ꓾ ꓬꓲ ꓢꓶꓽ ꓓꓱꓼ ꓟꓽ ꓓꓱꓼ ꓡꓳꓸ ꓠꓬꓲ ꓙꓰˍ ꓡꓳ꓿ ꓖꓳ ꓗꓪ ꓛꓲ ꓬꓰ ꓠꓬ ꓘꓶꓽ ꓢꓶꓽ ꓓꓱꓼ ꓝꓲꓸ ꓟꓽ ꓥ ꓠꓬꓲ꓾ ꓬꓲ ꓒꓬꓽ ꓟꓽ ꓥ ꓠꓬ ꓮꓸ ꓫꓵ ꓟꓽ ꓟꓳꓻ꓿ 14 ꓖꓳ ꓡꓱ ꓠꓬ ꓬꓲ ꓡꓰ ꓢꓲꓹ ꓜꓲ ꓖꓳ ꓟ ꓔꓯ꓾ ꓕꓱ ꓡꓱ ꓖꓳ ꓑꓳ ꓮꓽ ꓟˍ ꓟꓲ ꓠꓴ ꓗꓪ ꓐꓰ ꓢꓶꓹ ꓢꓶꓽ ꓕꓽ ꓟꓶ ꓜꓽ ꓝꓲ꓾ ꓐꓯˍ ꓡꓳ꓿ ꓬꓲ ꓕꓱ ꓡꓱ ꓐꓯˍ ꓟ ꓔꓯ ꓬꓲ ꓛꓳꓽ ꓒꓯꓹ ꓐꓴˍ ꓟꓲ ꓑ ꓙꓽˍ ꓡꓳ꓿ 15 ꓬꓲ ꓪꓽ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓛꓲ ꓡ ꓡꓳ꓿ ꓖꓳ ꓗꓸ ꓠꓯꓸ ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓖꓳ ꓗꓪ ꓶꓻ ꓡꓯꓼ ꓟꓴ ꓔꓬ ꓢꓴ ꓔꓯ ꓖꓼ ꓓꓳ ꓗꓷ ꓢꓲ ꓠꓬꓲ꓾ ꓒꓴ ꓑꓺ ꓢꓴ ꓢꓽ ꓡ ꓐꓰ꓾ ꓮꓸ ꓖꓴꓽ ꓪꓴꓽ ꓢꓴ ꓠꓬꓲꓸ ꓠꓸ ꓖꓴˍ ꓟꓲ ꓥꓸ ꓩꓴ ꓗꓷˍ ꓡꓳ꓿ 16 ꓝꓮꓲ ꓬꓲ ꓠꓬ ꓮꓽ ꓟ ꓔꓯˍ ꓟꓲ ꓢꓲꓽ ꓫꓬ ꓦꓲ ꓗꓪ ꓶꓻ ꓡꓯꓼ ꓖꓴꓽ ꓙꓴꓽ ꓟꓽ ꓔꓯꓹ ꓗꓳꓸ ꓙꓰ ꓝꓲ꓿ 17 ꓬꓲ ꓠꓬ ꓬꓲ ꓪꓽ ꓔꓯ ꓟꓸ ꓖꓶ ꓢꓲ꓾ ꓥꓪ ꓦꓲ ꓔꓯ ꓠꓽ ꓞꓳ ꓫꓵꓽ ꓞꓳ ꓙꓰ ꓐꓱ ꓶ ꓪꓽ ꓘꓴ ꓦꓲ꓾ ꓐꓰ ꓘꓴ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓾ ꓟꓽ ꓥ ꓡ? ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓥꓪ ꓦꓲ ꓔꓯ ꓦꓴꓺ ꓜꓽ ꓢꓴ ꓔꓬ ꓖꓴ ꓒꓬꓱꓼ ꓡ ꓝꓲˍ ꓡꓳ꓾ ꓐꓯˍ ꓡꓳ꓿ 18 ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴ ꓐꓰ ꓙꓵꓽ ꓗ ꓟꓸ ꓒ ꓐꓴ ꓑ ꓙꓽ ꓗꓷ ꓠꓬ꓾ ꓬꓰ-ꓢꓴ ꓔꓯ ꓢꓰꓼ ꓗꓷ ꓠꓹ ꓟ ꓬꓲ ꓚꓱꓹ ꓧꓪˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓟꓸ ꓖꓶˍ ꓟ ꓔꓯ ꓞꓳ ꓜꓴ ꓒꓵꓽ ꓢꓲ ꓓꓵꓽ ꓙ ꓟꓶˍ ꓠꓬꓲ꓾ ꓞꓳ ꓪꓴꓽ ꓐꓴ ꓠꓬ ꓬꓲ ꓔꓯ ꓙꓳꓺˍ ꓡꓳ꓿ 19 ꓟꓰꓻ ꓬꓰ ꓡ ꓠꓬ ꓬꓰ-ꓢꓴˍ ꓐꓰ ꓛꓳꓽ ꓒꓯ ꓐꓴ ꓠꓽ ꓡꓳ ꓒꓱ ꓗꓪ ꓐꓰ ꓓꓳ ꓙꓰˍ ꓡꓳ꓿ 20 ꓗꓸ ꓠꓯꓸ ꓠꓯꓼ ꓬꓲ ꓪꓽ ꓗꓳꓸ ꓙꓰˍ ꓕꓯ꓾ ꓘꓶꓽ ꓢꓶꓽ ꓜꓲ ꓠꓬ ꓬꓲ ꓚꓰ ꓗꓪ ꓐꓰ ꓬꓲ ꓪꓴꓸ ꓓꓵ ꓗꓪ ꓛꓲ ꓙꓴꓺ ꓞꓹ ꓟ ꓔꓯ ꓟꓳꓻˍ ꓡꓳ꓿ 21 ꓒꓲ-ꓕꓱ ꓠꓬ ꓬꓰ-ꓢꓴ ꓡꓰ ꓘꓶꓽ ꓢꓶ ꓜꓲ ꓔꓯ ꓙꓱꓽ ꓗꓷ ꓟ ꓔꓯ ꓓꓵꓽ ꓙ ꓛꓲ ꓡ ꓢꓲ ꓬꓲ ꓔꓯ꓾ ꓟꓸ ꓒꓽꓳ꓾ ꓡꓳꓸ ꓠꓬꓲ꓾ ꓠꓴ ꓡꓰ ꓙꓱꓽ ꓗꓷ ꓟ ꓘꓶꓽ ꓢꓶꓽ ꓜꓲ ꓠꓽ ꓙꓴꓺ ꓡꓰ ꓐꓷ꓾ ꓐꓯˍ ꓡꓳ꓿ 22 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓕꓱ ꓡꓱ ꓒꓳꓹ ꓖꓶˍ ꓡꓳ꓿ ꓪꓴ-ꓢ ꓔꓯ ꓙꓵꓻ꓿ 23 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱS ꓐꓯ ꓖꓶˍ ꓠꓬꓲ꓾ ꓮꓽ ꓟ ꓥ ꓟꓲ ꓪꓽ ꓚꓲ ꓕꓱ ꓕꓲ ꓚꓲ ꓔꓯ꓾ ꓬꓲꓻ ꓡꓴꓽ ꓐꓱ ꓗꓪ ꓚꓵꓸ ꓓꓵꓽ ꓡꓰ ꓐꓯ ꓢꓲ꓾ ꓬꓲ ꓠꓲꓹ ꓟ ꓗꓪ ꓟꓽ ꓓꓵꓽ ꓙ ꓟꓬꓽ ꓟꓬꓽ ꓬꓲ ꓐꓯˍ ꓟ ꓡꓰ ꓐꓰ ꓒꓬꓱꓼ ꓡ ꓥꓳ꓾ ꓐꓰ ꓙꓵꓻˍ ꓕꓯ ꓠꓽ꓾ ꓬꓲ ꓐꓱ ꓶ ꓒꓬꓱꓼ ꓡ ꓥꓳ꓿ 24 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓪꓽ ꓘꓴˍ ꓠꓬ꓾ ꓮꓸ ꓫꓵ ꓓꓰꓽˍ ꓟꓲ꓾ ꓟꓶꓻ ꓡꓰꓳ꓾ ꓐꓰ ꓙꓵꓻˍ ꓠꓬ ꓠꓴ ꓪꓽ ꓟꓶˍ ꓥꓳ꓿ 25 ꓠꓴ ꓪꓽ ꓦꓰꓼ ꓞꓹ ꓢꓲ ꓪꓽ ꓘꓴꓻˍ ꓕꓯ꓾ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐ ꓡꓰ꓾ ꓠꓴ ꓪꓽ ꓛꓬꓻ ꓗꓷ ꓟ ꓖꓽ ꓖꓶ ꓡ ꓠꓹ ꓟ꓾ ꓢꓴ ꓡꓰ ꓠꓴ ꓪꓽ ꓔꓯ ꓛꓬ ꓞꓹ ꓟ ꓙꓳˍ ꓠꓬ ꓬꓲ ꓔꓯ ꓖꓽ ꓖꓶ꓿ 26 ꓢꓴ ꓔꓯ ꓠꓴ ꓪꓽ ꓟꓽ ꓖꓽ ꓖꓶ ꓕꓯ ꓠꓽ꓾ ꓟꓴꓽ ꓗꓪ ꓗꓪ ꓔꓬ ꓟ ꓠꓴ ꓪꓽ ꓐꓹ ꓐˍ ꓟꓲ ꓠꓴ ꓪꓽ ꓛꓬ ꓗꓷ ꓟ ꓟꓽ ꓖꓽ ꓖꓶ ꓡ꓾ ꓐꓯˍ ꓡꓳ꓿ 27 ꓬꓲ ꓪꓽ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓝꓮꓲ ꓛꓲ ꓡ ꓢꓲ꓾ ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓫꓱꓽ ꓚꓳ ꓔꓬ ꓕꓯ꓾ ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴˍ ꓐꓰ꓾ ꓙꓵꓽ ꓗ ꓟꓸ ꓒ ꓐꓴˍ ꓐꓰ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓬꓲ ꓔꓯ ꓡ ꓢꓲ꓾ 28 ꓠꓴ ꓬꓰˍ ꓟ ꓕꓱ ꓟꓬ ꓫꓵꓽ ꓠꓬ꓾ ꓮ ꓡꓲ ꓫꓵꓽ ꓙꓵꓽ ꓪ ꓗꓪ ꓐꓰ ꓬꓰˍ ꓡ? ꓕꓱ ꓟꓬ ꓫꓵꓽ ꓬꓰ ꓠꓹ ꓟ ꓙꓵꓽ ꓪ ꓮꓽ ꓟ ꓡꓰ ꓠꓴ ꓔꓯ ꓖꓶ ꓡ ꓡ?꓾ ꓐꓰ ꓬꓲ ꓔꓯ ꓠ ꓠꓬꓲˍ ꓡꓳ꓿ 29 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯˍ ꓟꓲ ꓥꓪ ꓕꓲ ꓘꓶ ꓠꓺ ꓠꓬꓲˍ ꓠꓬꓲ꓾ ꓥꓪ ꓔꓯ ꓒꓳꓹ ꓖꓶ ꓡꓯ꓿ ꓖꓳ ꓡꓱ ꓠꓬ ꓮ ꓡꓲ ꓫꓵꓽ ꓙꓵꓽ ꓪ ꓗꓪ ꓐꓰ ꓥꓪ ꓕꓱ ꓟꓬ ꓫꓵꓽ ꓬꓰˍ ꓟ꓾ ꓥꓪˍ ꓟꓲ ꓠꓴ ꓪꓽ ꓔꓯ ꓐꓯ ꓖꓶˍ ꓥꓳ꓿ 30 ꓬꓳ-ꓦ ꓖꓳ ꓓꓱ ꓔꓲꓹ ꓟ ꓠꓬ꓾ ꓪꓴ-ꓢ ꓗꓪ ꓐꓰ ꓥ ꓡ? ꓞꓳ ꓤ ꓗꓪ ꓐꓰ ꓥ ꓡ? ꓥꓪ ꓔꓯ ꓒꓳꓹ ꓖꓶ ꓡꓯ꓾ ꓐꓯˍ ꓡꓳ꓿ 31 ꓖꓳ ꓕꓯ ꓬꓲ ꓪꓽ ꓖꓪ ꓙꓱ ꓡꓯꓽ ꓘꓳ ꓢꓲ꓾ ꓪꓴ-ꓢ ꓙꓵꓽ ꓪ ꓗꓪ ꓐꓰ ꓥꓳ꓾ ꓐꓰ ꓣꓳ ꓒꓳꓹ ꓖꓶˍ ꓠꓬ꓾ ꓬꓲ ꓡꓰ ꓣꓳ ꓔꓯ꓾ ꓖꓳ ꓡꓱ ꓥ ꓠꓬ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓟꓽ ꓙꓵꓻ ꓡ?꓾ ꓐꓯ ꓡ ꓥꓳ꓿ 32 ꓞꓳ ꓤ ꓗꓪ ꓐꓰ ꓥꓳ꓾ ꓐꓰ ꓒꓳꓹ ꓖꓶˍ ꓟꓲ꓾ ꓑ ꓫꓬꓼ ꓐꓴ ꓮꓽ ꓙꓵ ꓢꓴ ꓡꓰ ꓬꓳ-ꓦ ꓔꓯ ꓠꓽ ꓚꓵ ꓚꓵ ꓟꓷꓽ ꓠꓷꓹ ꓝꓸ ꓢꓴ ꓚꓬꓹ ꓔ ꓠꓬꓲ꓾ ꓑ ꓫꓬ ꓔꓯ ꓙꓳꓺ ꓓꓴ ꓙꓳˍ ꓡꓳ꓾ ꓐꓯ ꓡꓯꓽ ꓘꓳˍ ꓡꓳ꓿ 33 ꓖꓳ ꓡꓱ ꓠꓬ ꓬꓲ ꓪꓽ ꓡꓰ꓾ ꓥꓪ ꓠꓴꓽ ꓟꓽ ꓢꓷꓸ꓾ ꓐꓰ ꓬꓰ-ꓢꓴ ꓔꓯ ꓒꓳꓹ ꓖꓶˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓬꓰˍ ꓟ ꓕꓱ ꓟꓬ ꓫꓵꓽˍ ꓟꓲ ꓮ ꓡꓲ ꓫꓵꓽ ꓙꓵꓽ ꓪ ꓗꓪ ꓐꓰ ꓬꓰˍ ꓟ꓾ ꓥꓪˍ ꓟꓲ ꓠꓴ ꓪꓽ ꓔꓯ ꓟꓽ ꓐꓯ ꓖꓶ꓾ ꓐꓯˍ ꓡꓳ꓿

ꓟ-ꓗꓳ 12

1 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓔꓯ ꓥꓳꓽ ꓗꓪ ꓐꓰ ꓕꓱ ꓡꓱ ꓐꓯ ꓖꓶ ꓪꓴꓸ ꓔꓴˍ ꓡꓳ꓿ ꓡꓽ ꓞꓳ ꓕꓲ ꓣꓳ ꓠꓬ ꓛꓱꓼ ꓡꓱꓼ ꓕꓲ ꓐꓱ ꓔꓶ ꓢꓲ꓾ ꓚꓳ ꓡꓳ ꓡꓳ ꓐꓱ ꓚꓱꓺ ꓢꓲ ꓠꓬꓲ꓾ ꓛꓱꓼ ꓡꓱꓼ ꓢꓶꓽ ꓠꓬꓲꓸ ꓖꓴ ꓟꓲꓺ ꓘꓴ ꓚꓴꓸ ꓠꓬꓲ꓾ ꓡꓳꓸ ꓜꓳꓻ ꓦꓲꓻ ꓕꓲ ꓦꓲ ꓫꓬꓹ ꓠꓬꓲ ꓬꓰ ꓢꓲ꓾ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓑꓯꓹ ꓖꓶ ꓗꓷ ꓠꓬ ꓬꓲ ꓠꓽ ꓠꓱꓸ ꓐꓯꓼ ꓕꓲ ꓗꓴꓷ ꓗꓪ ꓙꓰˍ ꓡꓳ꓿ 2 ꓛꓱꓼ ꓡꓱꓼ ꓢꓶꓽ ꓫ ꓝꓲ ꓛꓲ ꓡ ꓠꓬ꓾ ꓟꓬꓱꓽ ꓬꓰ ꓢꓴ ꓐꓴ ꓗꓪ ꓐꓰ ꓛꓱꓼ ꓡꓱ ꓢꓶ ꓐꓱꓻ ꓟꓶ ꓡꓰ ꓠꓹ ꓟ꓾ ꓬꓲ ꓚꓳ ꓑꓸ ꓕꓲ ꓣꓳ ꓔꓯ ꓟꓬꓱꓽ ꓬꓰ ꓢꓴ ꓐꓴ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ 3 ꓖꓳ ꓡꓱ ꓥ ꓟꓲ ꓬꓲ ꓪꓽ ꓡꓰ ꓚꓳ ꓑꓸ ꓖꓳ ꓟ ꓔꓯ ꓓꓶꓽ ꓢꓲ ꓬꓲ ꓖꓳꓽ ꓡꓰꓼ ꓙꓰ ꓝꓲˍ ꓡꓳ꓿ 4 ꓚꓳ ꓑꓸ ꓝꓮꓲ ꓕꓲ ꓣꓳ ꓔꓯ ꓬꓲ ꓪꓽ ꓔꓬ ꓗꓪ ꓝꓲ ꓩꓴ ꓗꓷˍ ꓟꓲ꓾ ꓬꓲ ꓪꓽ ꓡꓰ ꓬꓲ ꓪꓴꓸ ꓓꓵ ꓗꓪ ꓠꓻ ꓓꓴꓻ ꓓꓴ ꓡꓰ ꓝꓲ ꓢꓲ꓾ ꓬꓲ ꓔꓯ ꓫꓸ ꓔꓳ ꓫ ꓒꓯꓼ ꓬꓰ ꓖꓶˍ ꓡꓳ꓿ 5 ꓝꓮꓲ ꓕꓲ ꓣꓳ ꓝꓲ ꓩꓴ ꓗꓷˍ ꓟꓲ꓾ ꓬꓲ ꓪꓽ ꓡꓰ ꓬꓲ ꓔꓯ ꓢꓰꓼ ꓗꓷˍ ꓡꓳ꓿ ꓗꓸ ꓠꓯꓸ ꓠꓬ ꓠꓱꓸ ꓐꓯꓼ ꓮꓽ ꓟꓬꓹ ꓣꓳ ꓔꓯ ꓝꓲ ꓩꓴ ꓗꓷˍ ꓟꓲ꓾ ꓬꓲ ꓖꓳ ꓡꓱ ꓕꓲ ꓐꓱ ꓔꓯ ꓠꓬ ꓓꓶꓽ꓾ ꓕꓲ ꓐꓱ ꓔꓯ ꓠꓬ ꓢꓰꓼ ꓗꓷˍ ꓟ ꓙꓳˍ ꓡꓳ꓿ 6 ꓖꓳ ꓗꓸ ꓠꓯ ꓐꓱ ꓢꓲ ꓒ ꓡꓰ ꓠꓲꓹ ꓠꓵˍ ꓟ ꓮ ꓐꓲ ꓔꓯ ꓝꓲ ꓩꓴ ꓗꓷ ꓠꓬ꓾ ꓬꓲ ꓪꓽ ꓠꓽ ꓬꓲ ꓔꓯ ꓒꓵꓽˍ ꓥꓳ꓾ ꓐꓰ ꓓꓵꓽ ꓙ ꓢꓲ꓾ ꓮꓽ ꓙꓵ ꓟ ꓗꓸ ꓠꓯꓸ ꓢꓲ ꓗꓪ ꓠꓬ ꓬꓲ ꓮ ꓐꓲ ꓔꓯ ꓝꓲ ꓩꓴ ꓗꓷˍ ꓡꓳ꓿ 7 ꓖꓳ ꓡꓱ ꓥ ꓟꓲ ꓟꓬꓱꓽ ꓬꓰ ꓢꓴ ꓖꓳ ꓕꓲꓽ ꓧꓳꓽ ꓖꓪ ꓙꓱ ꓡꓯꓽ ꓘꓳ ꓢꓲ꓾ ꓕꓱ ꓟ ꓠꓽ ꓡꓯꓼ ꓪ ꓟꓶ ꓢꓴ ꓥ ꓠꓬꓲ꓾ ꓣꓳ ꓬꓲ ꓔꓯ ꓢꓰꓼ ꓗꓷ ꓠꓬ꓾ ꓬꓲ ꓡꓯꓼ ꓪ ꓠꓽ ꓣꓳ ꓔꓯ ꓟ ꓒꓬꓱꓼ ꓡ ꓥꓳ꓾ ꓐꓯˍ ꓡꓳ꓿ 8 ꓖꓳ ꓡꓱ ꓠꓬ ꓬꓲ ꓔꓯ ꓣꓴ ꓢꓲ ꓢꓰꓼ ꓗꓷ ꓢꓲ ꓠꓬꓲ꓾ ꓐꓱ ꓠꓱ ꓫꓱꓸ ꓗꓪ ꓡꓳ ꓩꓴ ꓗꓷˍ ꓡꓳ꓿ 9 ꓖꓳ ꓡꓱ ꓥ ꓠꓬ ꓐꓱꓻ ꓢꓲ ꓒꓽ ꓮ ꓡꓲ ꓬꓰˍ ꓥꓳ ꓪ? ꓬꓲ ꓡꓻ ꓢꓲ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓢꓰꓼ ꓗꓷ ꓢꓲ ꓠꓬꓲ꓾ ꓐꓱ ꓠꓬ ꓠꓱꓸ ꓐꓯꓼ ꓢꓴ ꓔꓯ ꓖꓶˍ ꓥꓳ꓿ 10 ꓢꓲꓽ ꓫꓬ ꓕꓳ ꓶ ꓗꓪ꓾ ꓦꓲ ꓫꓬꓹ ꓢꓴ ꓡꓰ ꓡꓳꓺ ꓗꓷ ꓟ Bꓸ ꓛꓲ ꓠꓬ꓾ ꓦꓲ ꓚꓰꓺ ꓬꓲ ꓡꓯꓼ ꓗꓪ ꓟ ꓡꓳ ꓓꓰ ꓓꓽ ꓟ ꓒꓬꓱꓼ ꓡꓺꓳ꓿ 11 ꓕꓱ ꓟ ꓠꓬ ꓢꓲ ꓒꓽ ꓡꓰ ꓬꓰˍ ꓟ ꓥ ꓢꓲ꓾ ꓣꓳꓽ ꓡꓳꓸ ꓟꓳꓻ ꓢꓴ ꓮꓽ ꓙꓵ ꓓꓵꓽ ꓙ ꓟꓶ ꓓꓴ ꓥꓳ꓾ ꓐꓰ ꓐꓳ ꓔ ꓟ ꓔꓯ ꓠꓴ ꓪꓽ ꓟꓽ ꓵ ꓠꓬꓲ ꓡ? ꓐꓯˍ ꓡꓳ꓿ 12 ꓞꓳ ꓪꓴꓽ ꓐꓴ ꓠꓬ꓾ ꓔꓯ ꓥꓳꓽ ꓕꓱ ꓟ ꓬꓲ ꓪꓽ ꓔꓯ ꓐꓯ ꓬꓯꓼˍ ꓟ ꓡꓳꓸ ꓓꓳ ꓡ ꓠꓬꓲ꓾ ꓬꓰ-ꓢꓴ ꓔꓯ ꓣꓴ ꓠꓲꓹ ꓫꓵˍ ꓟꓲ꓾ ꓞꓳ ꓜꓴ ꓔꓯ ꓙꓳꓺ ꓠꓬꓲ ꓬꓲ ꓪꓽ ꓠꓬ ꓬꓲ ꓔꓯ ꓧꓹ ꓔ ꓬꓰ ꓢꓲ ꓙꓰ ꓗꓷꓳ꓿ 13 ꓖꓳ ꓗꓸ ꓠꓯꓸ ꓬꓰ-ꓢꓴ ꓔꓯ ꓬꓲ ꓚꓲꓸ ꓛꓬ ꓐꓯ ꓘꓶꓽ ꓗꓪ ꓐꓰ ꓠꓸ ꓟꓶ ꓡꓰ ꓝꓲ ꓠꓹ ꓟ꓾ ꓬꓲ ꓪꓽ ꓡꓰ ꓒ-ꓡꓲ-ꓢꓷ ꓐꓴˍ ꓐꓰ ꓩꓴ-ꓡꓲ ꓕꓲ ꓧꓳꓽ ꓟ ꓡꓽ ꓞꓳ ꓔꓯ ꓬꓲ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ 14 ꓬꓲ ꓪꓽ ꓛꓲ ꓡ ꓠꓬ ꓬꓲ ꓔꓯ꓾ ꓟꓸ ꓒꓽꓳ꓾ ꓠꓴ ꓠꓽ ꓞꓳ ꓔꓱꓹ ꓥ ꓟ ꓐꓰ꓾ ꓮꓽ ꓟ ꓔꓯˍ ꓟꓲ ꓞꓳ ꓒꓬꓱꓽ ꓟꓽ ꓢꓲ ꓢꓲ꓾ ꓔꓱꓹ ꓔꓱꓹꓼ ꓐꓰ ꓪꓴ-ꓢ ꓙ ꓖꓴ ꓟꓸ ꓖꓶˍ ꓟ ꓥꓪ ꓠꓴꓽ ꓢꓷꓸˍ ꓡꓳ꓿ ꓢꓲ-ꓢ ꓔꓯ ꓝꓲꓸ ꓒꓴ ꓓꓳ ꓓ ꓡ?꓾ ꓟꓽ ꓓ ꓡ? 15 ꓥꓪ ꓠꓴꓽ ꓝꓲꓸ ꓒꓴ ꓓꓳ ꓠꓯꓹ ꓡ?꓾ ꓕꓽ ꓓꓳ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓠꓽ ꓬꓲ ꓪꓽ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽˍ ꓟ ꓢꓷꓸˍ ꓠꓬꓲ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓫꓵꓽ ꓠꓬꓲˍ ꓡ? ꓓꓲ-ꓠ-ꓣꓲ ꓕꓲ ꓒꓯꓼ ꓥꓪ ꓔꓯ ꓔꓯꓹ ꓖꓶ ꓡꓯ꓾ ꓐꓯˍ ꓡꓳ꓿ 16 ꓬꓲ ꓪꓽ ꓡꓰ ꓬꓲ ꓔꓯ ꓓꓲ-ꓠ-ꓣꓲ ꓕꓲ ꓒꓯꓼ ꓔꓯꓹ ꓖꓶ ꓡ ꓠꓬ ꓬꓲ ꓡꓰ ꓬꓲ ꓪꓽ ꓔꓯ꓾ ꓞꓳ ꓐꓬꓱꓽˍ ꓐꓰ ꓕꓳ ꓶ ꓝꓳꓹ ꓕꓱ ꓟ ꓮꓽ ꓟ ꓔꓯꓸ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓪꓽ ꓡꓰ꓾ ꓢꓲ-ꓢ ꓔꓯꓸ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 17 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓢꓲ-ꓢ ꓔꓯ ꓟ ꓢꓲ-ꓢ ꓔꓯ ꓖꓶ꓾ ꓪꓴ-ꓢ ꓔꓯ ꓟ ꓪꓴ-ꓢ ꓔꓯ ꓖꓶ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓠꓽ ꓬꓲ ꓔꓯ ꓮꓽ ꓘꓶꓸ ꓓꓵꓽ ꓙ ꓟꓶꓻ ꓡꓰꓳ꓿ 18 ꓖꓳ ꓗꓸ ꓠꓯꓸ꓾ ꓢꓯꓸ ꓬꓲꓼ ꓡ ꓟ ꓟꓽ ꓙꓳ꓾ ꓐꓯ ꓢꓴ ꓢ-ꓓꓴ-ꓗꓷ ꓐꓴ ꓠꓬ ꓬꓰ-ꓢꓴ ꓔꓯ ꓡ ꓢꓲ ꓬꓲ ꓔꓯ ꓕꓱ ꓡꓱ ꓠ ꓠꓬꓲˍ ꓡꓳ꓿ 19 ꓟꓸ ꓒꓽꓳ꓾ ꓟꓳ-ꓫꓲ ꓡꓰ ꓥꓪ ꓠꓴꓽ ꓔꓯ ꓕꓱ ꓡꓱ ꓐꓳ ꓔ ꓖꓶˍ ꓡꓳ꓿ ꓞꓳ ꓑ ꓤ ꓕꓲ ꓣꓳ ꓠꓬ ꓤ ꓟꓶ ꓙꓳ ꓡꓰ ꓗꓸ ꓠꓯꓸ꓾ ꓤ ꓠꓱ ꓟꓽ ꓙꓳ ꓢꓰꓽ ꓕꓯˍ ꓡꓰ ꓫꓵꓻˍ ꓠꓬ꓾ ꓬꓲ ꓠꓬꓲ ꓤ ꓡꓰ ꓬꓲ ꓟꓺ ꓡꓽ ꓔꓯ ꓫ ꓢꓲ꓾ ꓬꓲ ꓮꓸ ꓬꓲꓼ ꓐꓱ ꓶ ꓬꓲ ꓫꓵꓸ ꓚꓱꓸ ꓖꓶ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓿ 20 ꓕꓲ ꓧꓪꓹ ꓙꓳˍ ꓠꓬ ꓤꓽ ꓫꓵꓽ ꓫꓵꓸ ꓙꓳˍ ꓡꓳ꓿ ꓤꓽ ꓪꓴꓽ ꓠꓬ ꓤ ꓟꓶ ꓫ ꓢꓲ꓾ ꓤ ꓠꓱ ꓟꓽ ꓙꓳ ꓙꓳ ꓫꓵꓳ꓿ 21 ꓤꓽ ꓡꓰꓹˍ ꓟꓲ ꓬꓲ ꓔꓯ ꓫ ꓢꓲ꓾ ꓤ ꓠꓱ ꓟꓽ ꓙꓳ ꓙꓳ ꓫꓵꓳ꓿ ꓮꓸ ꓢꓺˍ ꓟꓲ ꓖꓳ ꓡꓱ ꓥꓳ꓿ 22 ꓬꓲ ꓪꓽ ꓫꓵꓽ ꓫꓵꓸ ꓡꓱꓸꓼ ꓤ ꓠꓱ ꓟꓽ ꓙꓳ ꓙꓳ ꓫꓵꓳ꓿ ꓮꓽ ꓙꓵ ꓟ ꓗꓸ ꓠꓯꓸ ꓠꓬ ꓤ ꓟꓶ ꓤˍ ꓟꓲ ꓫꓵꓳ꓿ 23 ꓬꓲ ꓪꓽ ꓫꓵꓽ ꓫꓵꓸ ꓡꓱꓸꓼ ꓤ ꓟꓶ ꓤ ꓖꓳ ꓟ ꓔꓯ ꓫ ꓠꓬꓲꓳ꓿ ꓢꓯꓸ ꓬꓲꓼ ꓡ ꓟ ꓗꓪ꓾ ꓬꓲ ꓠꓬ ꓮ ꓡꓲ ꓕꓲ ꓣꓳ ꓟ ꓤ ꓟꓶꓻ ꓒꓬꓱꓼ ꓡ ꓥꓳ ꓪ?꓾ ꓐꓯˍ ꓡꓳ꓿ 24 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓥꓳꓽ ꓡꓰˍ ꓟ ꓠꓬ꓾ ꓢꓲꓽ ꓫꓬ ꓕꓳ ꓶˍ ꓐꓰ ꓪꓴ-ꓢ ꓪꓽ ꓠꓬꓲˍ ꓟ ꓔꓯ ꓟꓽ ꓢꓷꓸ ꓠꓬꓲ ꓥꓳ꓿ 25 ꓮ ꓡꓲꓳ ꓐꓯ ꓠꓬ ꓫꓵꓻ ꓢꓴ ꓢꓯꓸ ꓬꓲꓼ ꓡ ꓕꓯ꓾ ꓬꓲ ꓪꓽ ꓠꓬ ꓤ ꓟꓶˍ ꓟꓲ ꓟꓽ ꓧꓪ꓾ ꓮꓸ ꓟꓲꓽˍ ꓟꓲ ꓟꓽ ꓩꓴ꓿ ꓬꓲ ꓪꓽ ꓠꓽ ꓟꓴꓽ ꓗꓪ ꓝꓲ ꓓꓴ ꓐꓴˍ ꓡꓰ ꓐꓰ ꓥ ꓡꓳ꓿ 26 ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ ꓔꓯ ꓐꓯˍ ꓠꓬ꓾ ꓟꓳ-ꓫꓲ ꓡꓰ ꓐꓬꓻ ꓞꓹ ꓟ ꓢꓲꓹ ꓑꓳ ꓔꓯꓸ ꓟꓳꓸ ꓐꓳ ꓔ ꓟ ꓖꓳ ꓕꓲ ꓔꓳꓸ ꓗꓪ꓾ ꓪꓴ-ꓢ ꓡꓰ ꓟꓳ-ꓫꓲ ꓔꓯ꓾ ꓥꓪ ꓠꓽ ꓮ-ꓐ-ꓡ-ꓦ ꓬꓲ ꓪꓴ-ꓢˍ ꓐꓰ ꓬꓲ-ꓢ ꓬꓲ ꓪꓴ-ꓢˍ ꓐꓰ ꓬ-ꓗꓴ ꓬꓲ ꓪꓴ-ꓢ ꓥ ꓡꓳ꓾ ꓐꓰ ꓐꓳ ꓔ ꓟ ꓠꓴ ꓪꓽ ꓟꓽ ꓵꓺ ꓠꓬꓲ ꓡ? 27 ꓠꓴ ꓪꓽ ꓠꓬ ꓮꓽ ꓘꓶꓸ ꓓꓵꓽ ꓙ ꓥꓳꓽ ꓡꓰꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓫꓵꓻ ꓢꓴ ꓐꓴ ꓪꓴ-ꓢ ꓟꓽ ꓥ꓾ ꓢꓯꓸ ꓔꓬ ꓢꓴ ꓐꓴ ꓪꓴ-ꓢ ꓥ ꓡꓳ꓾ ꓐꓯ ꓖꓶˍ ꓡꓳ꓿ 28 ꓬꓲ ꓪꓽ ꓧꓳꓺ ꓡꓯꓽ ꓘꓳ ꓔꓬ ꓕꓯ ꓙꓵꓽ ꓗ ꓟꓸ ꓒ ꓕꓲ ꓣꓳ ꓡ ꓢꓲ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓙꓲꓻ ꓙꓲˍ ꓐꓰ ꓒꓳꓹ ꓖꓶˍ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓡꓰ ꓬꓰ-ꓢꓴ ꓔꓯ꓾ ꓪꓴ-ꓢ ꓕꓵꓼ ꓪ ꓮꓽ ꓙꓵ ꓟ ꓗꓪ ꓓꓽ ꓪꓴꓸ ꓠꓬ ꓮ ꓡꓲ ꓕꓲ ꓚꓱꓹ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 29 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓓꓽ ꓪꓴꓸ ꓕꓲ ꓚꓱꓹ ꓠꓬ꓾ ꓬꓲ-ꓢꓷ-ꓡꓰꓼꓳ꓾ ꓠ ꓠꓹ꓿ ꓢꓲ ꓒꓽ ꓣꓳ ꓪꓴ-ꓢ ꓠꓬ ꓕꓲ ꓔꓲꓸˍ ꓡꓰꓽ ꓟ ꓢꓲ ꓒꓽ ꓥ ꓡꓳ꓿ 30 ꓠꓴ ꓠꓬ ꓕꓲ ꓠꓲꓹ ꓟ ꓡꓱꓸꓼ꓾ ꓕꓲ ꓶꓺ ꓟꓬ ꓡꓱꓸꓼ꓾ ꓕꓲ ꓙꓽ ꓠꓲꓹ ꓡꓱꓸꓼ꓾ ꓕꓲ ꓢꓯꓼ ꓡꓱꓸꓼ꓾ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓯˍ ꓟ ꓕꓱ ꓟ ꓠꓬ ꓬꓲ ꓪꓴꓸ ꓕꓲ ꓚꓱꓹ ꓟ ꓥꓳ꓿ 31 ꓠꓬꓲꓽ ꓚꓱꓹ ꓕꓲ ꓚꓱꓹ ꓟ ꓠꓬ꓾ ꓠꓴ ꓚꓲꓸ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓢꓴ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓯˍ ꓟ ꓕꓱ ꓟ ꓥꓳ꓿ ꓕꓱ ꓠꓬꓲꓽ ꓚꓱꓹ ꓕꓯ ꓢꓲ ꓪꓴꓽˍ ꓟ ꓕꓵꓼ ꓪ ꓟꓽ ꓙꓳ꓾ ꓐꓯ ꓖꓶˍ ꓡꓳ꓿ 32 ꓖꓳ ꓡꓱ ꓠꓬ ꓙꓵꓽ ꓗ ꓟꓸ ꓒ ꓡꓰ ꓬꓲ ꓔꓯ꓾ ꓟꓸ ꓒꓽꓳ꓾ ꓠꓴ ꓐꓯ ꓬꓯꓼ ꓗꓷꓳ꓿ ꓬꓲ ꓕꓲ ꓔꓲꓸˍ ꓡꓰꓽ ꓪꓴ-ꓢ ꓥꓳ꓿ ꓬꓲ ꓟꓽ ꓥ ꓠꓬ ꓠꓱꓸ ꓐꓯꓼ ꓪꓴ-ꓢ ꓟꓽ ꓙꓳ꓿ 33 ꓕꓲ ꓠꓲꓹ ꓟ ꓡꓱꓸꓼ꓾ ꓕꓲ ꓙꓽ ꓠꓲꓹ ꓡꓱꓸꓼ꓾ ꓕꓲ ꓢꓯꓼ ꓡꓱꓸꓼ ꓪꓴ-ꓢ ꓔꓯ ꓠꓲꓹ ꓠꓵˍ ꓟ ꓐꓰ꓾ ꓚꓲꓸ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓢꓴ ꓔꓯ ꓠꓲꓹ ꓠꓵˍ ꓟ ꓠꓬ꓾ ꓕꓲ ꓟꓳꓻ ꓡꓱꓸꓼ ꓛꓴꓻ ꓔꓲ ꓖꓶˍ ꓟ ꓐꓰ꓾ ꓢꓰꓼ ꓔꓲ ꓓꓴ ꓥ ꓕ ꓑꓳꓸ ꓕꓯꓽ ꓢꓲ ꓒꓵꓽˍ ꓡꓳ꓾ ꓐꓯˍ ꓡꓳ꓿ 34 ꓬꓲ ꓢꓷꓸ ꓠꓲꓹ ꓙꓳ ꓙꓳˍ ꓐꓰ ꓒꓳꓹ ꓖꓶˍ ꓟ ꓔꓯ ꓬꓰ-ꓢꓴ ꓟꓳꓻ ꓗꓷ ꓠꓬ꓾ ꓠꓴ ꓠꓽ ꓪꓴ-ꓢ ꓗꓴꓷ ꓗꓪ ꓐꓰ ꓶꓽ ꓤꓻ ꓟꓽ ꓗꓷꓹ꓾ ꓐꓯ ꓖꓶˍ ꓡꓳ꓿ ꓖꓳ ꓗꓸ ꓠꓯ ꓮꓽ ꓟˍ ꓟꓲ ꓬꓰ-ꓢꓴ ꓔꓯ ꓮꓸ ꓫꓵ ꓠ ꓠꓬꓲ ꓟꓽ ꓑꓶ꓿ 35 ꓬꓰ-ꓢꓴ ꓡꓰ ꓢꓲꓽ ꓫꓬ ꓦꓲ ꓗꓪ ꓟꓸ ꓟꓲꓽ ꓟꓸ ꓖꓶˍ ꓕꓯ꓾ ꓬꓲ ꓡꓰ ꓬꓲ ꓪꓽ ꓔꓯ ꓕꓱ ꓡꓱ ꓠ ꓠꓬꓲˍ ꓡꓳ꓿ ꓙꓵꓽ ꓗ ꓟꓸ ꓒ ꓐꓴ ꓡꓰ꓾ ꓙꓲ-ꓢꓴ ꓠꓬ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓥ ꓡꓳ꓾ ꓐꓰ ꓐꓯˍ ꓟ ꓮ ꓡꓲ ꓥ ꓡ? 36 ꓓ-ꓪꓵ ꓬꓲ ꓚꓲꓸ ꓛꓬ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ꓾ ꓢꓲ ꓒꓽ ꓡꓰ ꓥꓪ ꓢꓲ ꓒꓽ ꓔꓯ꓾ ꓠꓴ ꓔꓯ ꓛꓴꓽ ꓙꓳ ꓢꓴ ꓐꓴ ꓔꓯ ꓥꓪ ꓡꓰ ꓠꓴ ꓛꓲ ꓕꓳꓼ ꓕꓲꓺ ꓟꓽ ꓗꓷ ꓡꓰ ꓝꓲ ꓕ ꓑꓳꓸ꓾ ꓠꓴ ꓠꓬ ꓥꓪ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ꓾ ꓐꓯˍ ꓡꓳ꓿ 37 ꓓ-ꓪꓵ ꓡꓰ ꓬꓲ ꓔꓯ ꓢꓲ ꓒꓽ ꓘꓴˍ ꓕꓯ ꓠꓽ꓾ ꓬꓲ ꓠꓬ ꓮ ꓡꓲ ꓐꓰ ꓢꓲꓸ ꓬꓲ ꓞꓲꓼ ꓤ ꓡꓯꓹ ꓤ ꓥ ꓢꓰꓽ ꓡ?꓾ ꓐꓯˍ ꓡꓳ꓿ ꓞꓳ ꓜꓴꓻ ꓠꓬ ꓬꓲ ꓔꓯ ꓠꓲꓹ ꓒꓴ ꓒꓴˍ ꓐꓰ ꓠ ꓠꓹˍ ꓡꓳ꓿ 38 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓟꓸ ꓖꓶ ꓢꓲ꓾ ꓙꓵꓽ ꓗ ꓟꓸ ꓒ ꓐꓴ ꓔꓯ ꓤꓻ ꓟꓳ꓿ ꓬꓲ ꓪꓽ ꓠꓬ ꓐꓵ ꓞꓶ ꓐꓽ ꓢꓽ ꓖꓪꓽ ꓢꓲ ꓚꓳꓺ ꓙꓰ ꓠꓲꓹ ꓫꓵˍ ꓡꓳ꓿ ꓝꓮꓲ ꓠꓬ ꓙꓵꓺ ꓗꓪ ꓒꓵꓽ ꓗ ꓬꓰ ꓡ ꓟ ꓐꓰ꓾ 39 ꓜꓲꓼ ꓦꓲꓻˍ ꓐꓰ ꓑꓮꓲꓽ ꓗꓪˍ ꓟꓲ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬꓲꓸ ꓠꓸ ꓖꓴ ꓗꓪˍ ꓡꓰꓽ ꓠꓬꓲꓸ ꓠꓸ ꓠꓲꓹ ꓫꓵˍ ꓡꓳ꓿ 40 ꓬꓲ ꓪꓽ ꓠꓽ ꓟꓶꓽ ꓛꓵꓽ ꓟ ꓐꓴ ꓦꓲ ꓦꓴꓺ ꓜ ꓢꓲ꓾ ꓪꓽ ꓮꓸ ꓫꓵꓹ ꓫꓵꓺ ꓘꓴ ꓗꓶꓸˍ ꓡꓳ꓿ ꓡꓽ ꓞꓳ ꓕꓱ ꓕꓲ ꓧꓳꓽ ꓟ ꓠꓽ ꓪ ꓜꓲ ꓡꓲꓽˍ ꓟ ꓛꓬꓻ ꓒꓵꓽ ꓟꓶˍ ꓥꓳ꓾ ꓐꓯˍ ꓡꓳ꓿ 41 ꓬꓰ-ꓢꓴ ꓠꓬ ꓒꓴ ꓔꓲ ꓖꓴ ꓔꓯꓸ ꓟꓳꓸ ꓒꓳꓹ ꓢꓲ꓾ ꓠꓬꓲꓸ ꓠꓸ ꓔꓬ ꓕꓯ꓾ ꓞꓳ ꓜꓴ ꓠꓬ ꓢꓲꓽ ꓫꓬ ꓦꓲꓻ ꓒꓴ ꓗꓶ ꓖꓴ ꓗꓪ ꓒꓴ ꓮ ꓡꓲ ꓔꓲꓺ ꓡ ꓟ ꓔꓯ ꓡꓳꓸ ꓠꓬꓲ ꓔꓬ ꓡꓳ꓿ ꓞꓳ ꓐꓳ ꓮꓽ ꓟꓬꓹ ꓠꓬ ꓒꓴ ꓮꓽ ꓟꓬꓹ ꓔꓲˍ ꓡꓳ꓿ 42 ꓖꓳ ꓡꓱ ꓥ ꓟꓲ ꓫꓸˍ ꓟ ꓟꓶꓽ ꓛꓵꓽ ꓟ ꓕꓲ ꓣꓳ ꓠꓬ ꓙꓲꓽ ꓒꓬꓸ ꓤ ꓠꓬꓲꓽ ꓒꓬꓸ ꓔꓲꓺˍ ꓡꓳ꓿ 43 ꓬꓲ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓘꓴ ꓔꓯꓹ ꓡ ꓢꓲ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓫꓸˍ ꓟ ꓟꓶꓽ ꓛꓵꓽ ꓟ ꓕꓱ ꓟ ꓠꓽ ꓠꓱꓸ ꓐꓯꓼ ꓮꓽ ꓙꓵ ꓢꓴ ꓟꓬ ꓟꓽ ꓞꓲꓺ ꓒꓴ ꓗꓶ ꓖꓴ ꓗꓪ ꓔꓲ ꓧꓳꓽ ꓗꓷꓳ꓿ 44 ꓮ ꓡꓲꓳ ꓐꓯ ꓠꓬ ꓠꓱꓸ ꓐꓯꓼ ꓢꓴ ꓠꓽ ꓚꓲꓸ ꓛꓬ ꓣꓱꓽ ꓜꓰꓻ ꓡꓰ ꓟ ꓗꓪ ꓐꓰ ꓔꓲ ꓡ ꓡꓳ꓿ ꓬꓲ ꓠꓽ ꓬꓲ ꓫꓸˍ ꓟ ꓗꓪ꓾ ꓬꓲ ꓖꓳ ꓓꓱꓽ ꓦꓵꓻ ꓓꓴ ꓮꓽ ꓙꓵ ꓡꓱꓸꓼ ꓔꓲ ꓗꓷꓳ꓾ ꓐꓯˍ ꓡꓳ꓿

ꓟ-ꓗꓳ 13

1 ꓢꓲꓽ ꓫꓬ ꓦꓲ ꓗꓪ ꓐꓰ ꓬꓰ-ꓢꓴ ꓓꓳ ꓙꓰ ꓔꓬ ꓕꓯ꓾ ꓬꓲ ꓛꓳꓽ ꓒꓯꓹ ꓗꓪ ꓟ ꓕꓲ ꓣꓳ ꓡꓰ ꓬꓲ ꓔꓯ꓾ ꓟꓸ ꓒꓽꓳ꓾ ꓮ ꓘꓶꓻ ꓛꓲ ꓓꓵꓽ ꓙ ꓟꓶ ꓓꓴ Bꓸ ꓛꓲˍ ꓐꓰ ꓮ ꓘꓶꓻ ꓛꓲ ꓐꓲꓻˍ ꓟ ꓦꓲ ꓔꓯ ꓡꓳꓸ ꓠꓬꓲ꓾ ꓐꓯˍ ꓡꓳ꓿ 2 ꓬꓰ-ꓢꓴ ꓡꓰ ꓬꓲ ꓔꓯ꓾ ꓦꓲ ꓓ ꓟ ꓕꓱ ꓟꓬ ꓟ ꓔꓯ ꓠꓴ ꓪꓽ ꓟꓳꓻˍ ꓡ? ꓕꓱ ꓗꓪ ꓕꓲ ꓟ ꓕꓯꓽ ꓢꓲ ꓕꓲ ꓟ ꓜꓶꓻ ꓔ ꓟ Bꓸ ꓛꓲ ꓠꓬ꓾ ꓟꓽ ꓥꓸ ꓗꓷ ꓟ ꓟꓽ ꓙꓳ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 3 ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓔꓯ ꓔꓱꓹ ꓞꓹ ꓟ ꓮꓽ-ꓛꓬ-ꓪꓽ-ꓚꓲ ꓗꓪ ꓠꓬꓲꓸ ꓠꓸ ꓔꓬ ꓕꓯ꓾ ꓒꓲ-ꓕꓱˍ ꓐꓰ ꓬ-ꓗꓴˍ ꓐꓰ ꓬꓳ-ꓦˍ ꓐꓰ ꓯ-ꓓꓱ-ꓣꓴ ꓠꓬ ꓘꓳ ꓫꓱ ꓫꓱꓸˍ ꓬꓲ ꓔꓯ ꓠ ꓠꓬꓲ ꓡ ꓢꓲ꓾ 4 ꓕꓱ ꓟꓬ ꓙꓰꓽ ꓟ ꓮ ꓕꓯꓽ ꓗꓷ ꓡꓰˍ ꓥꓳ ꓪ? ꓕꓱ ꓟꓬ ꓙꓰꓽ ꓟ ꓮꓽ ꓙꓵ ꓗꓷ ꓡꓰˍ ꓐꓰ ꓗꓹ ꓕꓯ ꓮꓸ ꓫꓵ ꓢꓷꓸ ꓡꓰ ꓓꓴ ꓓꓳ ꓡ ꓥꓳ ꓪ? ꓥꓪ ꓠꓴꓽ ꓔꓯ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ 5 ꓬꓰ-ꓢꓴ ꓠꓬ ꓘꓶꓽ ꓒꓴ ꓢꓲ ꓬꓲ ꓪꓽ ꓔꓯ꓾ ꓮꓽ ꓟˍ ꓟꓲ ꓠꓴ ꓪꓽ ꓔꓯ ꓟꓽ ꓧꓳꓽ ꓪꓴꓸ ꓙꓰ ꓠꓹ ꓟ ꓤꓻ ꓟꓳ꓿ 6 ꓡꓽ ꓞꓳ ꓮꓽ ꓟꓬꓹ ꓠꓬ ꓥꓪ ꓟꓬꓱꓺ ꓟꓯꓻ ꓢꓲ꓾ ꓥꓪ ꓠꓬ ꓙꓲ-ꓢꓴ ꓥ ꓡꓳ꓾ ꓐꓯ ꓢꓲ ꓠꓬꓲ꓾ ꓡꓽ ꓞꓳ ꓮꓽ ꓟꓬꓹ ꓔꓯ ꓧꓳꓽ ꓪꓴꓸ ꓙꓰˍ ꓥꓳ꓿ 7 ꓠꓴ ꓪꓽ ꓠꓬ ꓢꓰꓼ ꓡꓯꓽ ꓘꓳˍ ꓟ ꓐꓰ ꓢꓰꓼ ꓡꓯꓽ ꓘꓳˍ ꓟ ꓓꓳꓽ ꓑ ꓙꓽˍ ꓕꓯ ꓕꓽ ꓙꓽ ꓫ꓿ ꓕꓱ ꓟꓬ ꓙꓰꓽ ꓟ ꓠꓽ ꓒꓬꓱꓼ ꓡ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓡꓳꓹ ꓬꓰ ꓝꓲꓸ ꓠꓽ ꓟꓽ ꓛꓲ ꓡ ꓢꓰꓽ꓿ 8 ꓮ ꓡꓲꓳ ꓐꓯ ꓠꓬ ꓞꓳ ꓫꓵꓽ ꓛꓳꓽ ꓞꓳ ꓫꓵ ꓒꓳꓹ ꓡꓯꓽ ꓘꓳ ꓔꓴ ꓡ ꓥꓳ꓿ ꓗꓴꓷꓼ ꓛꓳꓽ ꓗꓴꓷꓼˍ ꓟꓲ ꓒꓳꓹ ꓡꓯꓽ ꓘꓳ ꓔꓴ ꓡ ꓥꓳ꓿ ꓕꓲ ꓖ ꓕꓲ ꓔꓳꓸ ꓟꓵꓽ ꓓꓵ ꓡ ꓥꓳ꓿ ꓦꓰꓼ ꓟꓷꓼ ꓘꓳˍ ꓟꓲ ꓓꓳ ꓡ ꓥꓳ꓿ ꓖꓳ ꓡꓱ ꓥ ꓟꓲ ꓕꓱ ꓟꓬ ꓙꓰꓽ ꓟ ꓠꓽ ꓦꓵꓻ ꓠꓻ ꓜꓲꓽ ꓪꓴꓸ ꓔꓴꓺˍ ꓟˍ ꓡꓰꓽ ꓥ ꓢꓰꓽ ꓡꓳ꓾ ꓐꓯˍ ꓡꓳ꓿ 9 ꓠꓴ ꓪꓽ ꓤꓻ ꓟꓳ꓾ ꓮ ꓡꓲꓳ ꓐꓯ ꓠꓬ ꓢꓴ ꓡꓰ ꓠꓴ ꓪꓽ ꓔꓯ ꓐꓯ ꓟꓴ ꓜꓲꓼ ꓓꓴ ꓗꓪ ꓡꓯꓼ ꓙꓱ ꓗꓷ ꓡ ꓥꓳ꓿ ꓜꓲꓼ ꓦꓲ ꓗꓪˍ ꓟꓲ ꓠꓴ ꓪꓽ ꓔꓯ ꓓꓶꓽ ꓡ ꓥꓳ꓿ ꓝꓮꓲ ꓠꓴ ꓪꓽ ꓠꓬ ꓥꓪ ꓐꓱ ꓶ ꓢꓷꓸ ꓙ ꓟꓳꓻ ꓙ ꓟꓶ ꓠꓹ ꓟ꓾ ꓢꓲꓽ ꓒ ꓓ ꓟ ꓐꓴˍ ꓐꓰ ꓪ ꓔꓲ ꓐꓴ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓠ ꓗꓷ ꓡꓰˍ ꓥꓳ꓿ 10 ꓶꓼ ꓓꓳ ꓫꓱꓹ ꓓꓳ ꓠꓬ꓾ ꓞꓳ ꓫꓵꓽ ꓞꓳ ꓙꓰꓽ ꓥ ꓕ ꓑꓳꓸ ꓔꓯ ꓧꓶꓸ ꓕꓯꓽˍ ꓡꓰ ꓚ ꓛꓲ ꓬꓰ ꓠ ꓗꓹ ꓡꓳ꓿ 11 ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓞꓳꓹ ꓢꓲ ꓐꓯ ꓟꓴ ꓜꓲꓼ ꓓꓴ ꓗꓪ ꓡꓯꓼ ꓙꓱ ꓗꓷˍ ꓕꓯ꓾ ꓠꓴ ꓪꓽ ꓮ ꓡꓲ ꓫꓸ ꓕꓱ ꓠꓯꓹ ꓟ ꓕꓽ ꓙꓽ ꓫꓸ꓿ ꓖꓳ ꓕꓲ ꓝꓲꓸ ꓗꓪ ꓠꓴ ꓪꓽ ꓔꓯ ꓮꓸ ꓫꓵ ꓐꓯ ꓘꓶꓽ ꓖꓶ ꓡ ꓠꓬ ꓖꓳ ꓡꓱ ꓫꓸ ꓕꓱ꓿ ꓮ ꓡꓲꓳ ꓐꓯ ꓠꓬ ꓫꓸ ꓕꓱ ꓢꓴ ꓠꓽ ꓠꓴ ꓪꓽ ꓟꓽ ꓥ꓾ ꓢꓲ-ꓫꓬ-ꓟ-ꓦ ꓥ ꓡꓳ꓿ 12 ꓮꓸ ꓬꓲꓼ ꓡꓰ ꓠꓬꓲꓺ ꓤ ꓔꓯ ꓫꓵꓻ ꓝꓲ ꓠꓹ ꓟ ꓡꓯꓼ ꓙꓱ ꓗꓷˍ ꓥꓳ꓿ ꓐꓹ ꓐꓽˍ ꓟꓲ ꓬꓲ ꓤ ꓠꓱ ꓔꓯ ꓡꓯꓼ ꓙꓱ ꓗꓷˍ ꓥꓳ꓿ ꓤ ꓠꓱ ꓐꓴˍ ꓟꓲ ꓬꓲ ꓪꓽ ꓐꓹ ꓐ ꓟꓹ ꓟ ꓐꓴ ꓔꓯ ꓒꓳꓹ ꓔꓴ ꓡ ꓢꓲ꓾ ꓬꓲ ꓪꓽ ꓔꓯ ꓢꓰꓼ ꓗꓷ ꓠꓹ ꓟ ꓡꓯꓼ ꓙꓱ ꓗꓷˍ ꓥꓳ꓿ 13 ꓥꓪ ꓟꓬꓱ ꓪꓴꓸ ꓠꓬꓲ ꓮꓽ ꓙꓵ ꓢꓴ ꓠꓴ ꓪꓽ ꓔꓯ ꓠꓲꓹ ꓜꓳ ꓡ ꓥꓳ꓿ ꓖꓳ ꓡꓱ ꓥ ꓟꓲ ꓡꓳꓹ ꓬꓰ ꓗꓪ ꓛꓲ ꓜꓲꓽ ꓔ ꓢꓴ ꓠꓽ ꓚꓬꓴ ꓟꓶˍ ꓥꓳ꓾ ꓐꓯˍ ꓡꓳ꓿ 14 ꓖꓳ ꓡꓱ ꓥ ꓟꓲ ꓙꓬꓺ ꓓꓷꓼ ꓓꓷꓼ ꓗꓷ ꓡꓰ ꓝꓲˍ ꓟ ꓠꓲꓹ ꓒꓳꓹ ꓓꓴ ꓖꓳ ꓟ ꓬꓲ ꓦꓰꓼ ꓖꓴ ꓟꓽ ꓥ ꓟ ꓗꓪ ꓦꓰꓼ ꓞꓹ ꓟ ꓔꓯ ꓠꓴ ꓪꓽ ꓟꓳꓻˍ ꓠꓬ꓾ (ꓕꓳ ꓶ ꓕꓱ ꓟ ꓵꓺ ꓢꓴ ꓙꓽ ꓜꓲꓼ ꓔ꓿) ꓬꓴ-ꓔ ꓟꓵꓽ ꓗꓪ ꓔꓬ ꓢꓴ ꓠꓬ ꓪꓽ ꓚꓲ ꓗꓪ ꓛꓰꓹ ꓙꓰ ꓝꓲ꓿ 15 ꓦꓲ ꓪꓴꓸ ꓓꓵ ꓓꓰꓺ ꓗꓪ ꓔꓬ ꓢꓴ ꓠꓬ꓾ ꓦꓲ ꓠꓯꓸꓼ ꓗꓪ ꓖꓴꓽ ꓙꓴꓽ ꓣꓴ ꓬꓰ ꓠꓹ ꓟ ꓕꓽ ꓬꓯꓼ ꓙꓰ ꓝꓲ꓿ 16 ꓦ ꓟꓲ ꓦ ꓐꓽ ꓗꓪ ꓔꓬ ꓢꓴˍ ꓟꓲ꓾ ꓐꓵ ꓞꓶ ꓣꓴ ꓬꓰ ꓠꓹ ꓟ ꓦꓲ ꓗꓪ ꓕꓽ ꓬꓲꓼ ꓙꓰ ꓝꓲ꓿ 17 ꓦꓬꓼ ꓠꓬꓲ ꓖꓳ ꓟ ꓗꓪ꓾ ꓤ ꓠꓱ ꓶꓻ ꓞꓹ ꓢꓴˍ ꓐꓰ ꓮꓽ ꓚꓵꓹ ꓛꓵꓼˍ ꓟ ꓤ ꓠꓱ ꓙꓳ ꓢꓴ ꓠꓽ ꓫꓸ ꓙꓵˍ ꓥꓳ꓿ 18 ꓕꓱ ꓟꓬ ꓙꓰꓽ ꓟ ꓠꓬ ꓙꓬ ꓝꓲꓸ ꓗꓪ ꓟꓽ ꓬꓯꓼ ꓡ ꓠꓹ ꓟ ꓪꓽ ꓘꓴ꓿ 19 ꓮ ꓡꓲꓳ ꓐꓯ ꓠꓬ ꓦꓬꓼ ꓠꓬꓲ ꓖꓳ ꓟ ꓗꓪ ꓠꓽ ꓫꓸ ꓙꓵ ꓟꓷꓼ ꓙꓵˍ ꓟ ꓓꓳ ꓡ ꓥꓳ꓿ ꓪꓴ-ꓢ ꓡꓰ ꓟꓵꓽ ꓚꓰꓼ ꓟꓲ ꓚꓰꓼ ꓗꓷ ꓕ ꓑꓳꓸ ꓮ ꓟꓶ ꓒꓻ ꓛꓲ ꓖꓳ ꓟ ꓡꓰ ꓐꓰ ꓗꓹ ꓟ ꓟꓽ ꓙꓳ ꓠꓬꓲ꓿ ꓖꓳ ꓗꓸ ꓠꓯꓸˍ ꓟꓲ ꓟꓽ ꓙꓳ ꓡꓺꓳ꓿ 20 ꓦꓬꓼ ꓠꓬꓲ ꓖꓳ ꓟ ꓔꓯ ꓢꓲ ꓒꓽ ꓡꓰ ꓟꓽ ꓠꓲꓸ ꓡꓰ ꓝꓲ ꓕꓯ ꓠꓽ꓾ ꓞꓳ ꓤ ꓪꓽ ꓤ ꓮꓽ ꓟˍ ꓟꓲ ꓡꓲꓹ ꓗꓷ ꓟꓽ ꓓ꓿ ꓖꓳ ꓡꓱ ꓥ ꓟꓲ ꓬꓲ ꓡꓰ ꓢꓲꓺ ꓔ ꓢꓴ ꓐꓱ ꓶ꓾ ꓦꓬꓼ ꓠꓬꓲ ꓖꓳ ꓟ ꓔꓯ ꓠꓲꓸ ꓡꓰ ꓝꓲˍ ꓥꓳ꓿ 21 ꓖꓳ ꓕꓯ ꓮꓽ ꓟ ꓡꓰ ꓠꓴ ꓪꓽ ꓔꓯ꓾ ꓕꓱꓻꓽ꓾ ꓙꓲ-ꓢꓴ ꓕꓻ ꓔꓬ ꓡꓳ꓾ ꓖꓳꓻꓼ꓾ ꓖꓪꓻ ꓔꓬ ꓡꓳ꓾ ꓐꓯ ꓡ ꓠꓬ ꓕꓽ ꓙꓵꓻ꓿ 22 ꓮ ꓡꓲꓳ ꓐꓯ ꓠꓬ ꓟꓽ ꓔꓱꓹ ꓟ ꓙꓲ-ꓢꓴ ꓐꓴˍ ꓐꓰ꓾ ꓟꓽ ꓔꓱꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓓꓳ ꓡ ꓢꓲ꓾ ꓢꓲꓺ ꓔ ꓢꓴ ꓔꓯ ꓧꓳꓽ ꓪꓴꓸ ꓙꓰ ꓐ ꓡ ꓐꓷˍ ꓠꓬ ꓧꓳꓽ ꓪꓴꓸ ꓙꓰ ꓠꓹ ꓟ꓾ ꓬꓲ ꓪꓽ ꓡꓰ ꓢꓷꓸ ꓡꓰ ꓓꓴˍ ꓐꓰ ꓓꓵꓽ ꓙ ꓟꓶ ꓓꓴ ꓟꓳꓸ ꓖꓶ ꓡ ꓥꓳ꓿ 23 ꓖꓳ ꓡꓱ ꓠꓬꓲ ꓠꓴ ꓪꓽ ꓤꓻ ꓟꓳ꓿ ꓕꓱꓻꓽ꓾ ꓟꓽ ꓒꓬꓱꓼ ꓡ ꓧꓶꓸ ꓕꓯꓽˍ ꓡꓰ ꓠꓴ ꓪꓽ ꓔꓯ ꓮꓽ ꓙꓵ ꓡꓱꓸꓼ ꓐꓯ ꓔ ꓖꓶˍ ꓟ ꓥꓳ꓾ ꓐꓯˍ ꓡꓳ꓿ 24 ꓫꓸ ꓙꓵ ꓟꓷꓼ ꓙꓵˍ ꓟ ꓦꓬꓼ ꓠꓬꓲ ꓖꓳ ꓟ ꓗꓸ ꓠꓯꓸ꓾ ꓟꓲꓽ ꓟꓲꓻ ꓠꓬ ꓠꓯꓺ ꓡꓰˍ ꓥꓳ꓿ ꓦ ꓐˍ ꓟꓲ ꓟꓽ ꓣꓳ ꓡ ꓗꓷ ꓡꓰˍ ꓥꓳ꓿ 25 ꓗꓴ ꓤˍ ꓟꓲ ꓟꓴꓽ ꓗꓪ ꓗꓪ ꓐꓰ ꓞꓰ ꓡꓰˍ ꓥꓳ꓿ ꓟꓵꓽ ꓪꓴꓽ ꓗꓪ ꓟ ꓗꓴ ꓟ ꓤꓲꓺˍ ꓟꓲ ꓬꓲ ꓚꓳ ꓚꓱꓹ ꓗꓪ ꓐꓰ ꓧꓶꓸ ꓡꓰ ꓖꓴˍ ꓥꓳ꓿ 26 ꓖꓳ ꓕꓯ ꓡ-ꓞꓳ-ꓮ-ꓐꓲ ꓠꓬ꓾ ꓮꓽ ꓘꓶꓸ ꓢꓯꓼ ꓙꓳ ꓪꓽ ꓠꓬꓲˍ ꓟ ꓐꓰ ꓟꓬꓱꓺ ꓓꓳꓽ ꓙꓳ ꓙꓳˍ ꓡꓰ꓾ ꓟꓴ ꓗꓴꓸ ꓜꓶꓽ ꓢꓲ ꓬꓯꓼ ꓡ ꓟ ꓔꓯ ꓬꓲ ꓪꓽ ꓟꓳꓻˍ ꓥꓳ꓿ 27 ꓖꓳ ꓕꓯ ꓬꓲ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓝꓲ ꓩꓴ ꓗꓷ ꓢꓲ꓾ ꓟꓴꓽ ꓗꓪ ꓠꓯꓸ ꓘꓪ꓾ ꓐꓶꓻ ꓓꓳ ꓐꓶꓻ ꓓꓵꓽ꓾ ꓖꓴ ꓪꓴꓸ ꓖꓴ ꓟꓶꓸ꓾ ꓕꓲꓽ ꓟꓲ ꓠꓯ ꓡꓱꓸꓼ ꓗꓪ ꓐꓰ ꓬꓲ ꓡꓰ ꓢꓲꓺ ꓔ ꓢꓴ ꓐꓴ ꓔꓯ ꓘꓴꓻ ꓜꓲꓼ ꓡ ꓥꓳ꓾ ꓐꓯˍ ꓡꓳ꓿ 28 ꓘꓶꓽ ꓢꓶꓽ ꓜꓲ ꓗꓪ ꓐꓰ ꓔꓯ ꓥꓳꓽ ꓢꓳ꓿ ꓬꓲ ꓡꓯꓼ ꓗꓸ ꓡꓯꓸ ꓢꓲ ꓬꓲ ꓒꓬꓽ ꓠꓱꓽ ꓡ ꓕꓯ꓾ ꓟꓵꓽ ꓫꓱ ꓠꓶꓽ ꓡ ꓟ ꓔꓯ ꓠꓴ ꓪꓽ ꓢꓷꓸˍ ꓡꓳ꓿ 29 ꓖꓳ ꓟ ꓡꓰ ꓐꓰ ꓕꓱ ꓟꓬ ꓙꓰꓽ ꓒꓬꓱꓼ ꓡ ꓔꓬ ꓟ ꓔꓯ ꓠꓴ ꓪꓽ ꓟꓳꓻˍ ꓠꓬ꓾ ꓗ ꓘꓶꓽ ꓓꓴꓽ ꓗꓪ ꓬꓦ ꓠꓶꓽ ꓡ ꓔꓬ ꓟ ꓔꓯˍ ꓟꓲ ꓠꓴ ꓪꓽ ꓢꓷꓸ ꓠꓯꓹ ꓡꓳ꓿ 30 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱS ꓐꓯ ꓖꓶˍ ꓠꓬꓲ꓾ ꓕꓱ ꓕꓲ ꓤꓶ ꓟꓽ ꓡꓳꓹ ꓬꓰ ꓕꓯˍ ꓡꓰ ꓕꓱ ꓟꓬ ꓙꓰꓽ ꓮꓽ ꓙꓵ ꓒꓬꓱꓼ ꓡ ꓥꓳ꓿ 31 ꓟꓴꓽ ꓗꓪ ꓟꓲ ꓠꓯ ꓠꓬ ꓡꓳꓹ ꓬꓰˍ ꓥꓳ꓿ ꓥꓪ ꓐꓯ ꓘꓶꓽ ꓠꓽ ꓟꓽ ꓡꓳꓹ ꓬꓰ꓿ 32 ꓖꓳ ꓡꓱ ꓥ ꓟꓲ ꓖꓳ ꓕꓲ ꓠꓬꓲˍ ꓐꓰ ꓖꓳ ꓕꓲ ꓙꓵꓹ ꓠꓽ ꓮꓽ ꓟˍ ꓟꓲ ꓟꓽ ꓢꓷ꓿ ꓟꓴꓽ ꓗꓪ ꓗꓪ ꓟ ꓝꓲ ꓓꓴ ꓐꓴˍ ꓟꓲ ꓟꓽ ꓢꓷ꓿ ꓮ ꓐꓲˍ ꓟꓲ ꓟꓽ ꓢꓷ꓿ ꓮꓽ ꓐꓽˍ ꓡꓰ ꓢꓷꓸˍ ꓡꓳ꓿ 33 ꓠꓴ ꓪꓽ ꓤꓻ ꓟꓳ꓾ ꓧꓪꓸ ꓛꓲꓽ ꓐꓰ ꓔꓬ ꓢꓲ ꓪꓽ ꓘꓴ꓿ ꓮ ꓡꓲꓳ ꓐꓯ ꓠꓬ ꓦꓬꓼ ꓠꓬꓲ ꓖꓳ ꓟ ꓮ ꓕꓯꓽ ꓕꓲ ꓝꓲꓸ ꓥ ꓟ ꓠꓴ ꓪꓽ ꓟꓽ ꓢꓷ꓿ 34 ꓢꓲ ꓒꓽ ꓦꓬꓼ ꓠꓬꓲ ꓛꓲ ꓡ ꓟ ꓠꓬ꓾ ꓡꓽ ꓞꓳ ꓕꓲ ꓣꓳ ꓡꓰ ꓬꓲ ꓚꓳ ꓑꓸ ꓐꓴ ꓔꓯ ꓬꓲ ꓦꓲ ꓡꓯꓼ ꓙꓱ ꓔ ꓬꓰ ꓢꓲ꓾ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓟꓬꓱꓽ ꓐꓱꓻ ꓖꓶ ꓔ ꓬꓰ ꓢꓲ ꓠꓬꓲ꓾ ꓗ ꓘꓶꓽ ꓦꓴ ꓠꓬꓹ ꓢꓴ ꓔꓯˍ ꓟꓲ ꓧꓪꓸ ꓛꓲꓽ ꓛꓲ ꓐꓰ ꓔꓬ ꓠꓹ ꓟ ꓕꓵꓼ ꓪ ꓖꓶ ꓔ ꓬꓰ ꓠꓬ꓾ ꓠꓱꓸ ꓐꓯꓼ ꓕꓲ ꓗꓴꓷ ꓗꓪ ꓕꓲ ꓝꓲꓸ ꓔꓬ ꓬꓰ ꓟˍ ꓡꓰ ꓐꓰ ꓗꓹ ꓡꓳ꓿ 35 ꓖꓳ ꓡꓱ ꓠꓬꓲ ꓧꓪꓸ ꓛꓲꓽ ꓐꓰ ꓔꓬ꓿ ꓮ ꓡꓲꓳ ꓐꓯ ꓠꓬ ꓦꓲ ꓢꓲ ꓒꓽ ꓮ ꓕꓯꓽ ꓕꓲ ꓝꓲꓸ ꓗꓪ ꓛꓲ ꓡ ꓟ ꓠꓴ ꓪꓽ ꓟꓽ ꓢꓷꓸ꓿ ꓟꓶꓼ ꓘꓶꓼ꓾ ꓦꓬꓼ ꓔꓱ ꓫꓵꓺ꓾ ꓥ ꓠꓬ꓾ ꓮꓸ Bꓸ ꓒ ꓐꓵꓻ ꓝꓲꓸ꓾ ꓥ ꓠꓬ꓾ ꓠꓯꓼ ꓝꓲꓸ ꓗꓪ ꓥ ꓟ ꓠꓴ ꓪꓽ ꓟꓽ ꓢꓷ꓿ 36 ꓟꓽ ꓥ ꓠꓬ ꓬꓲ ꓞꓼ ꓐꓰ ꓛꓲ ꓡ ꓢꓲ꓾ ꓠꓴ ꓪꓽ ꓬꓲꓼ ꓟꓶ ꓔꓬ ꓟ ꓔꓯ ꓬꓲ ꓟꓳꓻˍ ꓥꓳ꓿ 37 ꓠꓴ ꓪꓽ ꓔꓯ ꓥꓪ ꓐꓯˍ ꓟ ꓠꓬ ꓮꓽ ꓙꓵ ꓢꓴ ꓔꓯˍ ꓟꓲ ꓐꓯˍ ꓟ ꓥꓳ꓾ ꓧꓪꓸ ꓛꓲꓽ ꓐꓰ ꓔꓬ꓾ ꓐꓯˍ ꓡꓳ꓿

ꓟ-ꓗꓳ 14

1 ꓦꓲ-ꓘꓳ-ꓑꓮꓲˍ ꓐꓰ ꓙꓵꓽ-ꓧꓶ-ꓟ-ꓣꓱ-ꓑꓮꓲꓽ ꓟꓽ ꓛꓲ ꓡ ꓢꓰꓽ ꓟ ꓠꓬꓲꓽ ꓠꓬꓲ ꓙꓳˍ ꓕꓯ꓾ ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓠꓬ꓾ ꓖꓳꓼ ꓠꓲꓹ ꓡꓰ ꓬꓲ ꓔꓯ ꓮ ꓡꓲ ꓐꓰ ꓣꓴ ꓢꓲ ꓢꓰꓼ ꓗꓷ ꓠꓹ ꓟ ꓚꓱꓹ ꓧꓪ ꓔꓬ ꓡꓳ꓿ 2 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓑ ꓫꓬꓼ ꓐꓴ ꓢꓴꓺ ꓔꓴ ꓡ ꓟ ꓔꓯ ꓙꓳꓺ ꓠꓬꓲ꓾ ꓑꓮꓲꓽ ꓦꓬꓼ ꓠꓬꓲ ꓗꓪ ꓠꓬ ꓕꓽ ꓬꓰ ꓡꓯ꓾ ꓐꓰ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ 3 ꓬꓰ-ꓢꓴ ꓠꓬ ꓐꓱ-ꓕ-ꓠꓲ ꓗꓪ ꓔꓬ ꓢꓴ꓾ ꓔꓸ ꓟꓼ ꓩꓴ ꓓꓲꓻ ꓠꓬꓲ ꓟ ꓢꓲ-ꓟꓴ ꓦꓲ ꓗꓪ ꓜ ꓜꓽˍ ꓐꓰ ꓗꓳꓺ ꓔꓬ ꓕꓯ꓾ ꓒꓴˍ ꓟ ꓡꓳ-ꓐꓷ-ꓕꓴꓽ ꓗꓪ ꓮꓽ ꓘꓶꓸ ꓒꓵꓽˍ ꓟ ꓠ-ꓔꓷ ꓫꓳꓺ ꓠꓱ ꓞꓶꓻ ꓕꓲ ꓕꓴꓽ ꓙꓳ ꓢꓴ ꓤ ꓟꓶ ꓤ ꓕꓲ ꓣꓳ ꓡ ꓡꓳ꓿ ꓬꓲ ꓠꓬ ꓡꓳ-ꓐꓷ-ꓕꓴꓽ ꓔꓯ ꓲꓼ' ꓛꓱꓼ ꓗꓷ ꓢꓲ꓾ ꓬꓰ-ꓢꓴ ꓪꓴꓸ ꓓꓵ ꓗꓪ ꓧꓳꓸ ꓕꓲꓽ ꓖꓶˍ ꓡꓳ꓿ 4 ꓖꓳ ꓗꓪ ꓔꓬ ꓢꓴ ꓕꓲ ꓐꓱ ꓠꓽ ꓖꓳ ꓟ ꓔꓯ ꓟꓽ ꓠꓲꓹ ꓒꓴ ꓠꓬꓲ ꓤ ꓟꓶ ꓤ ꓔꓯ꓾ ꓫꓳꓺ ꓠꓱ ꓞꓶꓻ ꓕꓱ ꓟ ꓮꓸ ꓫꓵ ꓪꓴꓸ ꓠꓬꓲ ꓮꓽ ꓔꓳ ꓔꓳ ꓒꓬꓹ ꓗꓷˍ ꓡ? 5 ꓮ ꓡꓲꓳ ꓐꓯ ꓠꓬ ꓫꓳꓺ ꓠꓱ ꓞꓶ ꓕꓱ ꓟ ꓠꓬ꓾ ꓢ ꓦꓬꓻ ꓓꓲ-ꓠ-ꓣꓲ ꓟꓽ ꓞꓲ ꓪꓴꓽ ꓗꓷ ꓢꓲ ꓞꓳ ꓫꓸ ꓔꓯ ꓖꓶˍ ꓠꓬ ꓙꓲˍ ꓡꓳ ꓫꓵꓽ ꓥ ꓡꓳ꓾ ꓐꓯˍ ꓡꓳ꓿ 6 ꓬꓰ-ꓢꓴ ꓡꓰ꓾ ꓬꓲ ꓔꓯ ꓕꓽ ꓘꓶꓻ ꓡꓶꓽ꓿ ꓬꓲ ꓠꓬ ꓥꓪ ꓔꓯ ꓙꓲˍ ꓟ ꓕꓲ ꓫꓵꓽ ꓬꓰ ꓖꓶˍ ꓟ ꓗꓪ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓘꓶꓻ ꓡꓶꓽ ꓖꓶˍ ꓡ? 7 ꓮ ꓡꓲꓳ ꓐꓯ ꓠꓬ ꓞꓳ ꓫꓸ ꓠꓽ ꓮ ꓕꓯˍ ꓟꓲ ꓠꓴ ꓪꓽˍ ꓐꓰ ꓔꓬ ꓡꓳ꓿ ꓠꓴ ꓪꓽ ꓠꓬ ꓬꓲ ꓪꓽ ꓔꓯ ꓙꓲˍ ꓟ ꓮ ꓕꓯꓽ ꓬꓰ ꓖꓶ ꓠꓲꓹ ꓫꓵˍ ꓠꓬ ꓬꓰ ꓖꓶ ꓛꓵˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓽ ꓮ ꓕꓯꓽ ꓟꓲ ꓠꓴ ꓪꓽˍ ꓐꓰ ꓟꓽ ꓔꓬ꓿ 8 ꓬꓲ ꓬꓰ ꓐ ꓡ ꓟ ꓠꓽ ꓬꓲ ꓬꓰ ꓗꓷꓳ꓿ ꓥꓪ ꓔꓯ ꓟꓽ ꓔꓵꓸ ꓧꓶꓸ ꓕꓯˍ ꓡꓰ ꓥꓪ ꓖꓳ ꓓꓱ ꓗꓪ ꓫꓳꓺ ꓠꓱ ꓞꓶ ꓧꓳꓸ ꓕꓲꓽ ꓖꓶꓽ ꓡ ꓟ ꓕꓱ ꓟ ꓠꓬ꓾ ꓥꓪ ꓔꓯ ꓔꓵꓸ ꓠꓹ ꓟ ꓙꓽ ꓖꓶˍ ꓟ ꓥ ꓡꓳ꓿ 9 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓟꓵꓽ ꓗꓳꓹ ꓓꓵ ꓓꓵ ꓶꓼ ꓓꓳꓽ ꓫꓱꓹ ꓓꓳꓽ ꓮ ꓡꓲ ꓗꓪ ꓚ ꓛꓲ ꓬꓰˍ ꓟꓲ꓾ ꓤ ꓟꓶ ꓤ ꓕꓱ ꓟ ꓔꓯ ꓓꓵꓽ ꓙ ꓛꓲ ꓡ ꓓꓴ ꓬꓰ ꓠꓹ ꓟ꓾ ꓬꓲ ꓬꓰ ꓗꓷ ꓟ ꓟꓬꓱꓽˍ ꓟꓲ ꓚ ꓟꓸ ꓖꓶ ꓠ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 10 ꓖꓳ ꓗꓸ ꓠꓯꓸ ꓞꓲ ꓠꓬꓲꓽ ꓣꓳ ꓗꓪ ꓟ ꓘꓹ-ꓡꓲꓳ ꓢꓴ ꓬꓴ-ꓓ ꓠꓬ꓾ ꓬꓰ-ꓢꓴ ꓔꓯ ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷ ꓠꓹ ꓟ ꓙꓰˍ ꓡꓳ꓿ 11 ꓬꓴ-ꓓ ꓐꓯ ꓖꓶˍ ꓟ ꓔꓯ ꓬꓲ ꓪꓽ ꓑ ꓙꓽ ꓗꓷ ꓠꓬ ꓠꓲꓹ ꓒꓴ ꓢꓲ꓾ ꓬꓲ ꓔꓯ ꓒꓴ ꓖꓶꓽ ꓙꓺ ꓟꓳꓺˍ ꓡꓳ꓿ ꓖꓳ ꓡꓱ ꓠꓬꓲ ꓬꓴ-ꓓ ꓠꓬ ꓗꓸ ꓘꓳꓽˍ ꓟ ꓝꓲꓸ ꓗꓪ ꓮ ꓡꓲ ꓐꓰ ꓬꓰ-ꓢꓴ ꓔꓯ ꓬꓲ ꓪꓽ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷ ꓠꓹ ꓟ ꓬꓲ ꓑꓶꓸ ꓧꓪˍ ꓡꓳ꓿ 12 ꓦꓲ-ꓘꓳ-ꓑꓮꓲꓽ ꓬꓰ ꓓꓴ ꓮ ꓣꓳ ꓢꓰꓼˍ ꓟ ꓦꓬꓼ ꓠꓬꓲ꓾ ꓙꓵꓽ ꓧꓶꓽ ꓟꓽ ꓣꓱꓽˍ ꓟ ꓑꓮꓲꓽ ꓬꓲ ꓪꓴꓸ ꓕꓲꓽ ꓠꓬꓲ ꓗꓪ꓾ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓦꓲ-ꓘꓳ-ꓑꓮꓲꓽ ꓬꓰ ꓠꓹ ꓟ ꓠꓴ ꓥꓪ ꓠꓴꓽ ꓔꓯ ꓮ ꓡꓲ ꓗꓪ ꓙꓰ ꓢꓲ ꓙꓽ ꓖꓶ ꓬꓰ ꓝꓲ ꓠꓲꓹ ꓫꓵˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 13 ꓬꓲ ꓡꓰ ꓛꓳꓽ ꓒꓯꓹ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷ ꓢꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓡꓳ ꓒꓱ ꓗꓪ ꓓꓵꓽ ꓙꓰ꓿ ꓖꓳ ꓗꓪ ꓬꓲꓻ ꓙꓬ ꓕꓲ ꓠꓱꓸ ꓐꓰꓻ ꓑꓱꓸ ꓔ ꓟ ꓡꓽ ꓞꓳ ꓕꓲ ꓣꓳ ꓔꓯ ꓠꓴ ꓪꓽ ꓔꓳꓹ ꓜꓳꓽˍ ꓥꓳ꓿ ꓖꓳ ꓕꓯ ꓬꓲ ꓔꓯ ꓛꓳ ꓙꓰ꓿ 14 ꓬꓲ ꓓꓵꓽ ꓡꓰˍ ꓟ ꓦꓲꓻ ꓬꓲ ꓢꓲ ꓒꓽ ꓔꓯ꓾ ꓟꓸ ꓒ ꓡꓰ ꓥꓪˍ ꓐꓰ ꓥꓪ ꓛꓳꓽ ꓒꓯꓹ ꓐꓴ ꓕꓲ ꓪꓺꓼ ꓦꓲ-ꓘꓳ-ꓑꓮꓲꓽ ꓬꓰ ꓠꓹ ꓟ꓾ ꓪꓰ ꓤ ꓗꓳꓹ ꓮ ꓡꓲ ꓗꓪ ꓥ ꓡ?꓾ ꓐꓰ ꓐꓯˍ ꓡꓳ꓾ ꓐꓯ ꓖꓶ꓿ 15 ꓖꓳ ꓡꓱ ꓠꓬ ꓬꓲ ꓡꓰ ꓣꓱꓽ ꓓꓴ ꓟꓴ ꓓꓴ ꓮꓽ ꓙꓵ ꓙꓽ ꓖꓶ ꓔ ꓟ꓾ ꓜꓳꓻ ꓗꓳꓹ ꓓꓽ ꓟ ꓕꓲ ꓗꓳꓹ ꓠꓴ ꓪꓽ ꓔꓯ ꓟꓳꓸ ꓖꓶ ꓡ ꓥꓳ꓿ ꓠꓴ ꓪꓽ ꓠꓬ ꓖꓳ ꓗꓪ ꓣꓳ ꓐꓱ ꓶ ꓙꓽ ꓖꓶ꓾ ꓐꓯˍ ꓡꓳ꓿ 16 ꓖꓳ ꓡꓱ ꓠꓬ ꓛꓳꓽ ꓒꓯꓹ ꓖꓳ ꓠꓬꓲꓽ ꓣꓳ ꓓꓳ ꓙꓰ ꓢꓲ ꓡꓳ ꓒꓱ ꓗꓪ ꓓꓵꓽ ꓡꓰ ꓠꓬ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓐꓯˍ ꓟ ꓡꓰ ꓐꓰ ꓧꓪ ꓟꓳꓻ ꓢꓲ꓾ ꓖꓳ ꓗꓪ ꓦꓲ-ꓘꓳ-ꓑꓮꓲꓽ ꓜꓽ ꓓꓴ ꓙꓽ ꓖꓶˍ ꓡꓳ꓿ 17 ꓟꓶꓼ ꓘꓶꓼ ꓕꓯ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓛꓲ ꓡ ꓡꓳ꓿ 18 ꓬꓲ ꓪꓽ ꓠꓬ ꓗꓳꓺ ꓢꓲ ꓜ ꓜꓽ ꓔꓬ ꓕꓯ ꓬꓰ-ꓢꓴ ꓡꓰ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓥꓪˍ ꓐꓰ ꓕꓲ ꓪꓺꓼ ꓜ ꓜꓽ ꓔꓬ ꓢꓴ ꓠꓴ ꓪꓽ ꓗꓪ ꓟ ꓕꓲ ꓣꓳ ꓡꓰ ꓥꓪ ꓔꓯ ꓪꓴꓽ ꓜ ꓗꓷˍ ꓥꓳ꓾ ꓐꓯˍ ꓡꓳ꓿ 19 ꓬꓲ ꓪꓽ ꓠꓬ ꓠꓲꓹ ꓟ ꓫꓸ ꓔꓴ ꓡ ꓢꓲ ꓕꓲ ꓣꓳ ꓗꓸ ꓠꓯꓸ ꓕꓲ ꓣꓳ꓾ ꓥꓪ ꓥ ꓡ?꓾ ꓥꓪ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 20 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓞꓲ ꓠꓬꓲꓽ ꓣꓳ ꓗꓪ ꓟ꓾ ꓥꓪˍ ꓐꓰ ꓕꓲ ꓐꓯꓻꓼ ꓗꓪ ꓑ ꓑ ꓔꓲꓹ ꓜꓽ ꓢꓴ ꓖꓳ ꓕꓲ ꓣꓳ ꓟ ꓥꓳ꓿ 21 ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓠꓽ ꓕꓳ ꓶ ꓗꓪ ꓐꓳ ꓔ ꓟ ꓡꓰ ꓐꓰ ꓫꓵꓻ ꓠ ꓗꓷ ꓡꓰˍ ꓥꓳ꓿ ꓖꓳ ꓡꓱ ꓥ ꓟꓲ ꓡ-ꓞꓳ-ꓮ-ꓐꓲ ꓔꓯ ꓪꓴꓽ ꓜꓽ ꓢꓴ ꓖꓳ ꓕꓲ ꓣꓳ ꓠꓽ ꓫꓸ ꓙꓵˍ ꓥꓳ꓿ ꓖꓳ ꓕꓲ ꓣꓳ ꓟꓽ ꓦꓵꓻ ꓡ ꓗꓷ ꓐꓷˍ ꓠꓬ ꓬꓲ ꓐꓱ ꓶ ꓟꓬꓽ ꓠꓬꓲ ꓙꓲˍ ꓡꓳ ꓫꓵꓽ ꓥꓳ꓾ ꓐꓯˍ ꓡꓳ꓿ 22 ꓬꓲ ꓪꓽ ꓜ ꓜꓽˍ ꓐꓰ ꓬꓰˍ ꓕꓯ꓾ ꓬꓰ-ꓢꓴ ꓠꓬ ꓑ ꓑ ꓣꓴ ꓢꓲ ꓶꓼ ꓥꓳ ꓙꓱꓽ ꓗꓷ ꓠꓬ꓾ ꓦꓶꓹ ꓗꓷ ꓢꓲ ꓠꓬꓲ ꓬꓲ ꓪꓽ ꓔꓯ ꓖꓶ ꓢꓲ꓾ ꓠꓴ ꓪꓽ ꓣꓴ ꓢꓲ ꓜꓽ꓾ ꓕꓱ ꓟ ꓠꓽ ꓥꓪ ꓖꓳ ꓓꓱ ꓥ ꓡꓳ꓾ ꓐꓯˍ ꓡꓳ꓿ 23 ꓝꓮꓲ ꓬꓲ ꓡꓴꓻ ꓗꓶꓸ ꓣꓴ ꓢꓲ ꓪꓴ-ꓢ ꓔꓯ ꓫꓸ ꓟꓳ ꓗꓷ ꓢꓲ ꓠꓬꓲ꓾ ꓬꓲ ꓪꓽ ꓔꓯ ꓖꓶ ꓗꓷ ꓠꓬ ꓮꓽ ꓙꓵ ꓢꓴ ꓓꓳꓻˍ ꓡꓳ꓿ 24 ꓬꓲ ꓠꓬ ꓬꓲ ꓪꓽ ꓔꓯ꓾ ꓕꓱ ꓟ ꓠꓽ ꓮꓽ ꓟꓬꓹ ꓣꓳ ꓐꓱ ꓶ ꓧꓳꓸ ꓗꓷ ꓟ꓾ ꓥꓪ ꓘꓶꓽ ꓫꓵꓽ ꓫꓵꓽ ꓥ ꓡꓳ꓿ 25 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓕꓱ ꓡꓱ ꓖꓳ ꓑꓳ ꓪꓴ-ꓢ ꓗꓴꓷ ꓠꓯꓸꓼ ꓗꓪ꓾ ꓛꓱꓼ ꓡꓱꓼ ꓢꓶꓽ ꓪꓴꓽ ꓬꓲꓻ ꓬꓲ ꓫꓵꓼ ꓓꓳꓻˍ ꓟ ꓖꓳ ꓕꓲ ꓠꓬꓲ ꓗꓪ ꓛꓲ꓾ ꓛꓱꓼ ꓡꓱ ꓢꓶꓽ ꓪꓴꓽ ꓬꓲꓻ ꓕꓱ ꓟ ꓥꓪ ꓟꓽ ꓓꓳꓻꓳ꓾ ꓐꓯˍ ꓡꓳ꓿ 26 ꓬꓲ ꓪꓽ ꓟꓴꓽ ꓖꓪꓽ ꓕꓲ ꓚꓱꓹ ꓖꓪ ꓓꓳ ꓡꓰ ꓠꓬ꓾ ꓮꓽ-ꓛꓬ-ꓪꓽ-ꓚꓲ ꓗꓪ ꓙꓰˍ ꓡꓳ꓿ 27 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓮꓽ ꓙꓵ ꓢꓴ ꓠꓬ ꓥꓪ ꓑꓶ ꓓꓴ ꓡꓱꓸꓬ ꓥꓳ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓥꓪ ꓡꓰ ꓮ ꓣꓳ ꓡꓳꓸ ꓢꓴ ꓔꓯ ꓓꓶꓽ ꓢꓲ꓾ ꓮ ꓣꓳ ꓠꓽ ꓒꓬꓱꓺ ꓙꓰ ꓖꓴˍ ꓥꓳ꓾ ꓐꓰ ꓐꓳ ꓔ ꓡꓳ꓿ 28 ꓖꓳ ꓡꓱ ꓥ ꓟꓲ ꓥꓪ ꓢꓯꓸ ꓬꓲꓼ ꓡ ꓗꓸ ꓠꓯꓸ꓾ ꓥꓪ ꓠꓬ ꓠꓴ ꓪꓽ ꓟꓲꓸ ꓙꓬꓽ ꓢꓲ ꓖ-ꓡꓲ-ꓡꓲ ꓟꓵꓽ ꓗꓪ ꓙꓰˍ ꓥꓳ꓾ ꓐꓯˍ ꓡꓳ꓿ 29 ꓒꓲ-ꓕꓱ ꓠꓽ ꓬꓲ ꓔꓯ꓾ ꓮꓽ ꓙꓵ ꓢꓴ ꓡꓱꓸ ꓗꓷˍ ꓟꓲ ꓥꓪ ꓠꓽ ꓟꓽ ꓡꓱꓸ ꓗꓷ꓾ ꓐꓯˍ ꓡꓳ꓿ 30 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓬꓲꓸ ꓟꓰ ꓢ ꓘꓪ ꓮꓸ Bꓸ ꓒꓽ ꓠꓬꓲꓽ ꓪꓴꓸ ꓟꓽ ꓐꓵꓻ ꓢꓰꓽ ꓕꓯˍ ꓡꓰ꓾ ꓠꓴ ꓥꓪ ꓔꓯ ꓟꓽ ꓣꓷꓠꓸ ꓢ ꓧꓪꓹ ꓗꓷ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿ 31 ꓖꓳ ꓡꓱ ꓥ ꓟꓲ ꓒꓲ-ꓕꓱ ꓠꓽ ꓟꓬꓽ ꓠꓬꓲ ꓕꓶꓻ ꓕꓶˍ ꓡꓰ꓾ ꓥꓪ ꓠꓬ ꓠꓴˍ ꓐꓰ ꓕꓲ ꓪꓺꓼ ꓫꓵ ꓠ ꓗꓹ ꓟꓲ ꓠꓴ ꓔꓯ ꓟꓽ ꓣꓷꓠꓸ ꓥꓪ ꓟꓽ ꓬꓰ꓾ ꓐꓯˍ ꓡꓳ꓿ ꓠꓱꓸ ꓐꓯꓼ ꓮꓽ ꓙꓵ ꓢꓴˍ ꓟꓲ ꓖꓳ ꓟ ꓡꓰ ꓐꓰ ꓐꓯˍ ꓡꓳ꓿ 32 ꓬꓲ ꓪꓽ ꓠꓬ ꓖꓷ-ꓢꓷ-ꓟ-ꓠꓲ ꓟꓬꓱꓺ ꓔ ꓟ ꓕꓲ ꓔꓳꓸ ꓗꓪ ꓛꓲ ꓬꓰ ꓠꓬ꓾ ꓬꓲ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓥꓪ ꓪꓽ ꓘꓴ ꓓꓳ ꓡꓰ ꓗꓪ ꓛꓲ ꓠꓴ ꓪꓽ ꓕꓱ ꓗꓪ ꓠꓬꓲꓸ ꓠꓸ꓾ ꓐꓯˍ ꓡꓳ꓿ 33 ꓬꓲ ꓠꓬ ꓒꓲ-ꓕꓱˍ ꓐꓰ ꓬ-ꓗꓴˍ ꓐꓰ ꓬꓳ-ꓦ ꓔꓯ ꓬꓲˍ ꓐꓰ ꓕꓲ ꓛꓳꓺꓼ ꓧꓳꓽ ꓙꓰ ꓢꓲ꓾ ꓮꓽ ꓘꓶꓸ ꓠꓲꓹ ꓫꓸ ꓟꓬ ꓫꓸ ꓔꓴ ꓡ ꓡꓳ꓿ 34 ꓬꓲ ꓡꓰ ꓬꓲ ꓪꓽ ꓔꓯ꓾ ꓥꓪ ꓠꓽ ꓫꓵꓻ ꓠ ꓛꓲ ꓠꓲꓹ ꓟ ꓫꓸˍ ꓡꓳ꓿ ꓠꓴ ꓪꓽ ꓕꓱ ꓗꓪ ꓔꓬ ꓢꓲ ꓧꓪꓸ ꓛꓲꓽ ꓐꓰ ꓦꓴ ꓠꓬꓹ꓾ ꓐꓯ ꓖꓶˍ ꓡꓳ꓿ 35 ꓬꓲ ꓠꓬ ꓟꓲꓸ ꓙꓬ ꓢꓲ ꓮꓽ ꓔꓲꓸ ꓤ ꓙꓰ ꓢꓲ꓾ ꓟꓲꓺ ꓛꓬ ꓗꓪ ꓟꓳꓼ ꓔ ꓢꓲ ꓠꓬꓲ꓾ ꓖꓳ ꓕꓲ ꓙꓵꓹ ꓟ ꓬꓲ ꓔꓯˍ ꓐꓰ ꓗꓳꓸ ꓙꓰ ꓐ ꓡ ꓠꓬ ꓗꓳꓸ ꓙꓰ ꓝꓲ꓾ ꓐꓰ ꓪꓽ ꓘꓴˍ ꓡꓳ꓿ 36 ꓬꓲ ꓡꓰ꓾ ꓮꓽ ꓐꓽ ꓐꓹ ꓐꓽꓳ꓾ ꓠꓴ ꓠꓬ ꓮꓸ ꓫꓵˍ ꓟꓲ ꓬꓰ ꓐ ꓡ ꓡꓳ꓿ ꓡꓴ ꓗꓶꓸ ꓕꓱ ꓟ ꓥꓪ ꓔꓯˍ ꓐꓰ ꓣꓴ ꓗꓷ ꓖꓶ꓿ ꓖꓳ ꓡꓱ ꓥ ꓟꓲ ꓥꓪ ꓠꓲꓹ ꓡꓶꓽ ꓕꓽ ꓗꓷ ꓡꓰ ꓝꓲ꓿ ꓠꓴ ꓠꓲꓹ ꓡꓶ ꓒꓬꓱꓼ ꓡ ꓝꓲ꓾ ꓐꓰ ꓓꓰꓽˍ ꓡꓳ꓿ 37 ꓬꓲ ꓡ ꓢꓲ ꓬꓲ ꓪꓽ ꓬꓲꓼ ꓟꓶ ꓔꓬ ꓟ ꓔꓯ ꓟꓳꓻ ꓗꓷ ꓠꓬ ꓒꓲ-ꓕꓱ ꓔꓯ꓾ ꓢꓲ-ꓟꓴꓳ꓾ ꓠꓴ ꓬꓲꓼ ꓟꓶ ꓔꓬ ꓡ? ꓠꓴ ꓧꓪꓸ ꓛꓲꓽ ꓐꓰ ꓕꓲ ꓙꓵꓹ ꓤˍ ꓟꓲ ꓦꓴꓺ ꓠꓬꓹ ꓟꓽ ꓘꓴ ꓡ? 38 ꓫꓵꓽ ꓠꓬꓲˍ ꓟ ꓗꓪ ꓠꓴ ꓪꓽ ꓟꓽ ꓓꓵ ꓡꓰ ꓠꓹ ꓟ꓾ ꓧꓪꓸ ꓛꓲꓽ ꓐꓰ ꓦꓴꓺ ꓠꓬꓹ ꓢꓲ ꓪꓽ ꓘꓴ꓿ ꓞꓳ ꓦ ꓠꓬ ꓠꓲꓹ ꓫꓵˍ ꓟꓲ꓾ ꓧꓪꓽ ꓖꓳ ꓓꓱ ꓠꓽ ꓢꓯꓼ ꓐꓽˍ ꓡꓳ꓾ ꓐꓯˍ ꓡꓳ꓿ 39 ꓖꓳ ꓡꓱ ꓠꓬ ꓬꓲ ꓝꓮꓲ ꓕꓲ ꓧꓪꓹ ꓙꓰ ꓢꓲ꓾ ꓧꓶꓸ ꓕꓯ ꓟ ꓐꓯ ꓘꓶꓽˍ ꓐꓰ ꓕꓲ ꓡꓰꓹꓼ ꓐꓯ ꓢꓲ ꓪꓽ ꓘꓴˍ ꓡꓳ꓿ 40 ꓬꓲ ꓝꓮꓲ ꓕꓲ ꓧꓪꓹ ꓡꓻˍ ꓟꓲ꓾ ꓬꓲ ꓪꓽ ꓠꓽ ꓟꓬ ꓢꓶꓽ ꓒꓴ ꓟꓽ ꓘꓴ ꓠ ꓛꓲ ꓬꓲꓼ ꓟꓶ ꓔꓬ ꓢꓲ꓾ ꓬꓲ ꓔꓯ ꓮ ꓡꓲ ꓒꓳꓹ ꓖꓶ ꓠꓯꓹ ꓟˍ ꓟꓲ ꓟꓽ ꓢꓷ꓿ 41 ꓬꓲ ꓢ ꓧꓪꓹ ꓕꓲ ꓧꓪꓹ ꓡꓻ ꓠꓬ ꓬꓲ ꓪꓽ ꓔꓯ꓾ ꓮ ꓟꓶˍ ꓟꓲ ꓠꓴ ꓪꓽ ꓪꓴꓽ ꓧꓶ ꓠꓽ ꓢꓲ ꓬꓲꓼ ꓟꓶ ꓔꓬ ꓢꓰꓽ ꓡ? ꓡꓳꓼˍ ꓥꓳ꓾ ꓬꓲ ꓙꓵꓹ ꓛꓲ ꓡꓺꓳ꓿ ꓠꓬꓲ ꓠꓹ꓾ ꓡ-ꓞꓳ-ꓮ-ꓐꓲ ꓔꓯ ꓠꓽ ꓝꓴꓲ ꓙꓳ ꓢꓴ ꓡꓯꓼ ꓒꓯꓹ ꓗꓪ ꓪꓴꓽ ꓜꓽ ꓗꓷꓳ꓿ 42 ꓔꓴꓺ꓾ ꓣꓳꓽ ꓙꓰ ꓡꓯ꓿ ꓠꓬꓲ ꓠꓹ꓾ ꓥꓪ ꓔꓯ ꓪꓴꓽ ꓜ ꓢꓴ ꓠꓽ ꓛꓲ ꓡꓺꓳ꓾ ꓐꓯˍ ꓡꓳ꓿ 43 ꓬꓲ ꓖꓳ ꓡꓱ ꓐꓯ ꓔꓬ ꓢꓰ ꓕꓯ꓾ ꓞꓼ ꓐꓰ ꓞꓲ ꓠꓬꓲꓽ ꓣꓳ ꓗꓪ ꓟ ꓬꓴ-ꓓ ꓠꓬ ꓛꓲ ꓡꓺꓳ꓿ ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓡꓰ ꓝꓲ ꓩꓴ ꓡ ꓟ ꓡꓽ ꓞꓳ ꓬꓲ ꓜꓴˍ ꓟꓲ꓾ ꓮꓸ ꓕꓽ ꓓꓱꓼ ꓠꓬꓲ꓾ ꓢꓲꓹ ꓓꓻ ꓔꓯꓹ ꓠꓬꓲ ꓬꓴ-ꓓ ꓔꓯ ꓛꓳ ꓡ ꓡꓳ꓿ 44 ꓬꓲ ꓔꓯ ꓪꓴꓽ ꓜ ꓢꓴ ꓡꓰ ꓬꓲ ꓪꓽ ꓔꓯ ꓢꓷꓸ ꓡꓰ ꓓꓴ ꓕꓲ ꓫꓵꓽ ꓐꓯ ꓖꓶ ꓔꓸ ꓢꓲ꓾ ꓥꓪ ꓮ ꓡꓲ ꓕꓲ ꓣꓳ ꓔꓯ ꓐꓳꓼ ꓖꓶˍ ꓠꓬ ꓖꓳ ꓕꓲ ꓣꓳ ꓥꓳ꓿ ꓬꓲ ꓔꓯ ꓣꓴ ꓢꓲ ꓬꓲ ꓜꓶ ꓧꓳꓽ ꓙꓰ꓾ ꓐꓯ ꓔ ꓡꓳ꓿ 45 ꓬꓴ-ꓓ ꓛꓲ ꓡ ꓟꓶꓽ ꓕꓯ ꓬꓰ-ꓢꓴ ꓔꓯ ꓡꓻ ꓢꓲ꓾ ꓟꓸ ꓒꓽꓳ꓾ ꓐꓯ ꓢꓲ ꓠꓬꓲ ꓬꓲ ꓔꓯ ꓐꓳꓼ ꓖꓶˍ ꓡꓳ꓿ 46 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ ꓣꓴˍ ꓡꓳ꓿ 47 ꓖꓳ ꓗꓪ ꓦꓰꓼ ꓞꓹ ꓢꓴ ꓕꓲ ꓣꓳ ꓠꓬ꓾ ꓮꓸ ꓕꓽ ꓖꓳꓻ ꓢꓲ ꓔꓲ ꓒꓽ ꓓꓽ ꓟ ꓬꓲ ꓚꓳ ꓑꓸ ꓔꓯ ꓕꓲꓽ ꓒꓬꓱꓺ ꓛꓵꓜ ꓗꓷ ꓠꓬ꓾ ꓬꓲ ꓠꓸ ꓑꓳ ꓕꓲ ꓐꓽ ꓛꓵ ꓞꓰꓻ ꓡꓰꓳ꓿ 48 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓽ ꓮꓸ ꓕꓽ ꓓꓱꓼ ꓠꓬꓲ ꓢꓲꓹ ꓓꓻ ꓔꓯꓹ ꓠꓬꓲ ꓐꓰ꓾ ꓦꓴꓺ ꓜ ꓢꓴ ꓔꓯˍ ꓡꓰ ꓐꓰ ꓥꓪ ꓔꓯ ꓣꓴˍ ꓐꓰ ꓓꓳꓺ ꓡ ꓡ? 49 ꓥꓪ ꓕꓲ ꓠꓬꓲ ꓕꓲ ꓠꓬꓲ ꓢꓲꓽ ꓫꓬ ꓦꓲ ꓗꓪ ꓠꓴ ꓪꓽˍ ꓐꓰ ꓕꓲ ꓪꓺꓼ ꓔꓬ ꓢꓲ ꓟꓸ ꓖꓶ ꓔꓬ ꓕꓯ꓾ ꓠꓴ ꓪꓽ ꓥꓪ ꓔꓯ ꓟꓽ ꓣꓴ ꓡ꓿ ꓕꓱ ꓡꓱ ꓗꓷ ꓡꓰˍ ꓟ ꓠꓽ ꓢꓲꓽ ꓫꓬ ꓕꓳ ꓶ ꓗꓪ ꓐꓯˍ ꓟ ꓐꓲ ꓡ ꓠꓹ ꓟ ꓥ ꓡꓳ꓾ ꓐꓯ ꓖꓶˍ ꓡꓳ꓿ 50 ꓖꓳ ꓕꓯ ꓛꓳꓽ ꓒꓯꓹ ꓐꓴ ꓮꓽ ꓙꓵ ꓠꓬ ꓬꓲ ꓔꓯ ꓧꓹ ꓔ ꓬꓰ ꓢꓲ ꓛꓰꓹ ꓙꓰꓳ꓿ 51 ꓪꓰꓻ ꓜꓲꓽ ꓟꓶ ꓕꓲ ꓡꓯꓼˍ ꓡꓰ ꓪꓸ ꓔ ꓟ ꓤ ꓖꓴ ꓡꓯꓸ ꓕꓲ ꓣꓳ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓡꓰ ꓬꓲ ꓔꓯ ꓣꓴˍ ꓕꓯ꓾ 52 ꓬꓲ ꓪꓸ ꓔꓸ ꓟ ꓪꓰꓻ ꓜꓲꓽ ꓟꓶꓺ ꓡꓵꓸ ꓔ ꓬꓰ ꓢꓲ꓾ ꓬꓲ ꓠꓽ ꓙꓬꓽ ꓡꓯꓽ ꓟꓴ ꓛꓰꓹ ꓙꓰˍ ꓡꓳ꓿ 53 ꓬꓲ ꓪꓽ ꓡꓰ ꓬꓰ-ꓢꓴ ꓔꓯ ꓔꓲ ꓒꓽ ꓓꓽ ꓟ ꓔꓬ ꓗꓪ ꓧꓳꓽ ꓙꓰˍ ꓡꓳ꓿ ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴˍ ꓐꓰ꓾ ꓞꓳ ꓪꓴꓽ ꓞꓳ ꓔꓲ ꓐꓴˍ ꓐꓰ꓾ ꓙꓵꓽ ꓗ ꓟꓸ ꓒ ꓐꓴ ꓮꓽ ꓙꓵ ꓠꓬ ꓖꓳ ꓗꓪ ꓜꓲꓼ ꓞꓹ ꓡꓳ꓿ 54 ꓒꓲ-ꓕꓱ ꓠꓬ ꓬꓰ-ꓢꓴ ꓗꓸ ꓠꓯ ꓢꓲ ꓶꓽ ꓤ ꓗꓪ ꓛꓳ ꓙꓰ ꓢꓲ꓾ ꓔꓲ ꓒꓽ ꓓꓽ ꓟ ꓡꓽ ꓙꓳ ꓓꓰ ꓗꓪˍ ꓟꓲ ꓛꓳ ꓓꓵꓽ ꓡꓰ ꓢꓲ ꓠꓬꓲ꓾ ꓢꓲꓽ ꓒ ꓝꓲ ꓓꓴ ꓐꓴˍ ꓐꓰ ꓠꓬꓲꓸ ꓠꓸ ꓢꓲ ꓮꓸ ꓔꓳꓸ ꓗꓳꓺ ꓔꓬ ꓡꓳ꓿ 55 ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴˍ ꓐꓰ꓾ ꓐꓯ ꓟꓴ ꓜꓲꓼ ꓓꓴ ꓕꓲ ꓟ ꓡꓱꓸꓼ ꓠꓬ꓾ ꓬꓰ-ꓢꓴ ꓔꓯ ꓔꓳꓹ ꓢꓲ ꓢꓰꓼ ꓗꓷ ꓠꓹ ꓟ ꓢꓷꓸ ꓙ ꓟꓳꓻ ꓙ ꓓꓴ ꓬꓲ ꓗꓸ ꓚꓵ ꓧꓪꓺˍ ꓟꓲ ꓧꓪ ꓟꓽ ꓟꓶ꓿ 56 ꓡꓽ ꓞꓳ ꓮꓽ ꓟꓬꓹ ꓠꓬ ꓟꓽ ꓔꓱꓹ ꓟ ꓢꓷꓸ ꓙ ꓟꓳꓻ ꓙ ꓢꓲ ꓬꓲ ꓔꓯ ꓓꓰꓺˍ ꓟꓲ꓾ ꓬꓲ ꓪꓽ ꓢꓷꓸ ꓙ ꓟꓳꓻ ꓙ ꓘꓶꓽ ꓟꓽ ꓪꓽ ꓡꓯꓽ ꓘꓳ꓿ 57 ꓖꓳ ꓗꓸ ꓠꓯꓸ ꓠꓱꓸ ꓐꓯꓼ ꓕꓲ ꓧꓳꓽ ꓦꓰꓼ ꓔꓴ ꓡ ꓢꓲ ꓟꓽ ꓔꓱꓹ ꓟ ꓢꓷꓸ ꓙ ꓟꓳꓻ ꓙ ꓘꓶꓽ ꓡꓰ꓾ 58 ꓬꓲ ꓠꓬ ꓡꓯꓼ ꓒꓯꓹ ꓡꓰ ꓫꓬꓹ ꓔ ꓟ ꓢꓲꓽ ꓫꓬ ꓦꓲ ꓕꓱ ꓟ ꓥꓪ ꓒꓬꓹ ꓗꓷ ꓢꓲ꓾ ꓢ ꓠꓬꓲ ꓟ ꓠꓯꓸꓼ ꓗꓪ ꓡꓯꓼ ꓒꓯꓹ ꓡꓰ ꓟꓽ ꓫꓬ ꓔ ꓟ ꓢꓲꓽ ꓫꓬ ꓦꓲ ꓕꓲ ꓦꓲ ꓥꓪ ꓫꓬꓹˍ ꓥꓳ꓾ ꓐꓯˍ ꓟ ꓥꓪ ꓠꓴꓽ ꓑ ꓙꓽ ꓠꓬꓲꓳ꓾ ꓐꓯˍ ꓡꓳ꓿ 59 ꓖꓳ ꓡꓱ ꓐꓯˍ ꓟꓲ ꓬꓲ ꓪꓽ ꓢꓷꓸ ꓙ ꓟꓳꓻ ꓙ ꓘꓶ ꓟꓽ ꓪꓽ ꓡꓯꓽ ꓘꓳ꓿ 60 ꓖꓳ ꓡꓱ ꓠꓬ ꓔꓲ ꓒꓽ ꓓꓽ ꓟ ꓠꓽ ꓞꓳ ꓜꓴ ꓟꓲꓽ ꓙꓬ ꓗꓪ ꓦꓰꓼ ꓔꓴ ꓡ ꓢꓲ ꓬꓰ-ꓢꓴ ꓔꓯ꓾ ꓠꓴ ꓮꓸ ꓫꓵˍ ꓟꓲ ꓟꓽ ꓒꓳꓹ ꓖꓶ ꓡ ꓡ? ꓕꓱ ꓟꓬ ꓣꓳ ꓠꓴ ꓔꓯ ꓔꓳꓹ ꓢꓲ ꓢꓷꓸ ꓙ ꓟꓳꓻ ꓙˍ ꓟ ꓮꓸ ꓫꓵ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 61 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓽ ꓬꓲ ꓔꓯ ꓮꓸ ꓫꓵˍ ꓟꓲ ꓟꓽ ꓒꓳꓹ ꓖꓶ ꓖꓶ ꓟꓽ ꓪꓳꓹ ꓔꓬ ꓡꓳ꓿ ꓔꓲ ꓒꓽ ꓓꓽ ꓟ ꓡꓰ ꓝꓮꓲ ꓬꓲ ꓔꓯ꓾ ꓠꓴ ꓠꓬ ꓶꓼ ꓙꓳ ꓫꓱꓹ ꓙꓳ ꓢꓴ ꓬꓲ ꓮ ꓐꓲ ꓙꓲ-ꓢꓴ ꓖꓳ ꓕꓲ ꓣꓳ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 62 ꓖꓳ ꓕꓯ ꓬꓰ-ꓢꓴ ꓡꓰ꓾ ꓥꓪ ꓥꓳ꓿ ꓡ-ꓞꓳ-ꓮ-ꓐꓲ ꓠꓽ ꓪꓽ ꓠꓬꓲ ꓢꓴ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ ꓔꓬ ꓟ ꓐꓰ꓾ ꓟꓴꓽ ꓗꓪ ꓗꓪ ꓟ ꓟꓴ ꓗꓴꓸ ꓜꓶꓽ ꓢꓲ ꓬꓯꓼ ꓡ ꓟ ꓔꓯ ꓠꓴ ꓪꓽ ꓟꓳꓻˍ ꓥꓳ꓾ ꓐꓯ ꓖꓶˍ ꓡꓳ꓿ 63 ꓖꓳ ꓕꓯ ꓔꓲ ꓒꓽ ꓓꓽ ꓟ ꓠꓬ ꓬꓲ ꓐꓵ ꓞꓶ ꓚꓵꓹ ꓧꓽ ꓗꓷ ꓢꓲ꓾ ꓣꓳꓽ ꓠꓬ ꓠꓱꓸ ꓐꓯꓼ ꓢꓷꓸ ꓙ ꓟꓳꓻ ꓙ ꓢꓴ ꓧꓪ ꓛꓵˍ ꓢꓰꓽ ꓡ? 64 ꓐꓯ ꓟꓽ ꓚꓰꓼ ꓟ ꓐꓯ ꓘꓶꓽ ꓕꓱ ꓟ ꓠꓴ ꓪꓽ ꓑ ꓙꓽ ꓗꓷꓳ꓾ ꓠꓴ ꓪꓽ ꓮ ꓡꓲ ꓓꓵꓽ ꓙˍ ꓡ?꓾ ꓐꓯˍ ꓕꓯ꓾ ꓬꓲ ꓪꓽ ꓮꓽ ꓙꓵ ꓢꓴ ꓠꓬ꓾ ꓬꓲ ꓠꓽ ꓫꓵꓻ ꓒꓵꓽˍ ꓡꓳ꓾ ꓐꓰ ꓐꓯ ꓞꓷꓹˍ ꓡꓳ꓿ 65 ꓬꓲ ꓪꓽ ꓕꓲ ꓐꓱ ꓠꓽ ꓬꓰ-ꓢꓴ ꓔꓯ ꓟꓷꓽ ꓶꓻ ꓔꓲꓸ ꓧꓳꓽ ꓢꓲ꓾ ꓬꓲ ꓒꓬꓱꓽ ꓟꓬ ꓔꓯ ꓑꓲꓸ ꓔ ꓢꓲ ꓠꓬꓲ꓾ ꓡꓯꓼ ꓑꓵꓹ ꓡꓰ ꓬꓲ ꓔꓯ ꓓꓶꓽ ꓢꓲ꓾ ꓟꓷꓽ ꓠꓷꓹ ꓝꓸ ꓟꓴ꓾ ꓐꓯˍ ꓡꓳ꓿ ꓟꓯꓼ ꓒ ꓐꓴˍ ꓟꓲ ꓬꓲ ꓔꓯ ꓡꓯꓼ ꓞ ꓓꓶꓽˍ ꓡꓳ꓿ 66 ꓒꓲ-ꓕꓱ ꓠꓬ ꓙꓪꓻ ꓡꓽ ꓙꓳ ꓓꓰꓺ ꓗꓪ ꓔꓬ ꓕꓯ꓾ ꓔꓲ ꓒ ꓓꓽ ꓟ ꓔꓯ ꓣꓱꓽ ꓙ ꓢꓴ ꓤ ꓟꓶ ꓡꓯꓸ ꓕꓲ ꓣꓳ ꓡ ꓢꓲ꓾ 67 ꓒꓲ-ꓕꓱ ꓮꓸ ꓔꓳ ꓗꓳꓺ ꓔꓬ ꓟ ꓔꓯ ꓟꓳꓻ ꓗꓷ ꓠꓬ ꓬꓲ ꓔꓯ ꓡꓳꓸ ꓔ ꓢꓲ ꓠꓬꓲ꓾ ꓠꓴˍ ꓟꓲ ꓠ-ꓢ-ꓡꓱ ꓢꓴ ꓬꓰ-ꓢꓴˍ ꓐꓰ ꓔꓬ ꓗꓷ ꓢꓴ ꓥꓳ꓾ ꓐꓯˍ ꓡꓳ꓿ 68 ꓬꓲ ꓠꓽ ꓟꓽ ꓣꓷꓠꓸ ꓢꓲ꓾ ꓠꓴ ꓮꓸ ꓫꓵ ꓐꓯˍ ꓟ ꓥꓪ ꓢꓷꓸˍ ꓟꓲ ꓟꓽ ꓢꓷ꓾ ꓙꓽˍ ꓟꓲ ꓟꓽ ꓙꓽ ꓜꓲꓼ꓾ ꓐꓯ ꓢꓲ ꓡꓽ ꓙꓳ ꓓꓰꓺ ꓗꓪ ꓓꓳ ꓙꓰ ꓠꓬ ꓮꓸ Bꓸ ꓒꓽ ꓐꓵꓻ ꓡꓺꓳ꓿ 69 ꓣꓱꓽ ꓙ ꓢꓴ ꓤ ꓟꓶ ꓡꓯꓸ ꓬꓲ ꓔꓯ ꓟꓳꓻ ꓗꓷ ꓠꓬ꓾ ꓝꓮꓲ ꓕꓲ ꓧꓪꓹ ꓚꓳ ꓡꓳ ꓗꓪ ꓦꓰꓼ ꓞꓹ ꓢꓴ ꓔꓯ꓾ ꓕꓱ ꓕꓲ ꓣꓳ ꓟˍ ꓟꓲ ꓬꓲ ꓪꓽ ꓗꓪ ꓟ ꓕꓲ ꓣꓳ ꓥꓳ꓾ ꓐꓰ ꓐꓯˍ ꓢꓰꓽ ꓡꓳ꓿ 70 ꓬꓲ ꓠꓬ ꓝꓮꓲ ꓕꓲ ꓧꓪꓹ ꓟꓽ ꓣꓷꓠꓸ꓿ ꓕꓲ ꓑꓹ ꓤ ꓗꓸ ꓠꓯꓸ ꓖꓳ ꓗꓪ ꓦꓰꓼ ꓞ ꓢꓴ ꓡꓰ ꓒꓲ-ꓕꓱ ꓔꓯ꓾ ꓠꓴ ꓠꓽ ꓚꓵ ꓚꓵ ꓬꓲ ꓪꓽ ꓕꓲ ꓧꓳꓽ ꓗꓪ ꓟ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴˍ ꓟꓲ ꓖ-ꓡꓲ-ꓡꓲ ꓢꓴ ꓥ ꓡꓳ꓾ ꓐꓯˍ ꓡꓳ꓿ 71 ꓒꓲ-ꓕꓱ ꓠꓽ ꓙꓱꓽ ꓠꓬꓲ ꓪꓵꓼ ꓠꓬꓲ ꓬꓰ ꓢꓲ꓾ ꓠꓴ ꓪꓽ ꓐꓯ ꓔꓬ ꓟ ꓡꓽ ꓞꓳ ꓕꓱ ꓟ ꓔꓯ ꓥꓪ ꓟꓽ ꓢꓷ꓾ ꓐꓯˍ ꓡꓳ꓿ 72 ꓖꓳ ꓡꓱ ꓠꓬ ꓞꓼ ꓐꓰ ꓮꓸ Bꓸ ꓒ ꓠꓬꓲꓽ ꓪꓴꓸ ꓕꓲꓽ ꓪꓴꓸ ꓐꓵꓻ ꓡꓺꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ꓾ ꓮꓸ Bꓸ ꓒ ꓠꓬꓲꓽ ꓪꓴꓸ ꓟꓽ ꓐꓵꓻ ꓕꓯˍ ꓡꓰ꓾ ꓠꓴ ꓥꓪ ꓔꓯ ꓟꓽ ꓣꓷꓠꓸ ꓢ ꓧꓪ ꓗꓷ ꓡꓰˍ ꓥꓳ꓾ ꓐꓯˍ ꓟ ꓔꓯ ꓒꓲ-ꓕꓱ ꓓꓵꓽ ꓙ ꓛꓲ ꓡ ꓢꓲ ꓥꓴꓻˍ ꓡꓳ꓿

ꓟ-ꓗꓳ 15

1 ꓟꓲꓽ ꓕꓯꓽ ꓙꓲ ꓡ ꓕꓯ꓾ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ꓾ ꓞꓳ ꓪꓴꓽ ꓞꓳ ꓔꓲ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴˍ ꓐꓰ꓾ ꓐꓯ ꓟꓴ ꓜꓲꓼ ꓓꓴ ꓕꓲꓽ ꓜꓲꓼ ꓓꓴ ꓡꓱꓸꓼ ꓠꓬ ꓞꓽ ꓞ ꓖꓪ ꓙꓱ ꓡꓯꓽ ꓘꓳ ꓢꓲ ꓮꓽ ꓙꓵ ꓧꓳꓹ ꓡꓰ ꓠꓬ꓾ ꓬꓰ-ꓢꓴ ꓔꓯ ꓞꓳꓹ ꓧꓳꓽ ꓙꓰ ꓢꓲ ꓠꓬꓲ꓾ ꓒꓲ-ꓡ ꓔꓯ ꓡꓯꓼ ꓙꓱ ꓗꓷˍ ꓡꓳ꓿ 2 ꓒꓲ-ꓡ ꓡꓰ ꓬꓰ-ꓢꓴ ꓔꓯ꓾ ꓠꓴ ꓠꓬ ꓬꓴ-ꓔ ꓡꓽ ꓞꓳ ꓪ ꓔꓲ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓡꓰ꓾ ꓠꓴ ꓐꓯˍ ꓟ ꓡꓰ ꓐꓰ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 3 ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓟꓲ ꓩꓴ ꓩꓴˍ ꓡꓰꓽ ꓬꓲ ꓔꓯ ꓮꓽ ꓟꓬꓹ ꓙꓰꓽ ꓓꓰꓺˍ ꓡꓳ꓿ 4 ꓒꓲ-ꓡ ꓡꓰ ꓝꓮꓲ ꓬꓲ ꓔꓯ꓾ ꓬꓲ ꓪꓽ ꓡꓰ ꓠꓴ ꓔꓯ ꓕꓱ ꓟꓬ ꓙꓰꓽ ꓓꓰꓺˍ ꓟ ꓔꓯ꓾ ꓠꓴ ꓮꓸ ꓫꓵˍ ꓟꓲ ꓟꓽ ꓒꓳꓹ ꓖꓶˍ ꓡ?꓾ ꓐꓰ ꓠꓺ ꓠꓬꓲˍ ꓡꓳ꓿ 5 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓡꓰ ꓬꓲ ꓔꓯ ꓮꓸ ꓫꓵˍ ꓟꓲ ꓟꓽ ꓒꓳꓹ ꓖꓶ ꓠꓬꓲ ꓒꓲ-ꓡ ꓓꓵꓽ ꓙ ꓟꓶˍ ꓡꓳ꓿ 6 ꓑꓮꓲꓽ ꓬꓰˍ ꓟ ꓦꓬꓼ ꓠꓬꓲ ꓗꓪ꓾ ꓐꓱ ꓔ ꓢꓴ ꓮ ꓡꓲ ꓕꓲ ꓣꓳ ꓔꓯ ꓩꓴ ꓖꓶ ꓠꓹ ꓟ ꓑ ꓫꓬꓼ ꓐꓴ ꓡꓰ ꓓꓰꓽˍ ꓠꓬ꓾ ꓖꓳ ꓕꓲ ꓣꓳ ꓔꓯ ꓒꓲ-ꓡ ꓡꓰ ꓩꓴ ꓖꓶˍ ꓟ ꓬꓲ ꓡꓲꓽ ꓙꓳˍ ꓡꓳ꓿ 7 ꓖꓳ ꓕꓯ ꓒꓳꓹ ꓔꓳꓹ ꓢꓲ ꓞꓳ ꓤ ꓢꓰꓼ ꓢꓴ ꓐꓴˍ ꓐꓰ ꓕꓲ ꓪꓺꓼ ꓐꓱꓺ ꓔ ꓢꓴ꓾ ꓐ-ꓣ-ꓐ ꓟꓬꓱ ꓔ ꓟ ꓡꓽ ꓞꓳ ꓕꓲ ꓣꓳ ꓙꓳˍ ꓡꓳ꓿ 8 ꓞꓳ ꓜꓴ ꓠꓬ ꓒꓲ-ꓡ ꓔꓯ ꓙꓰ ꓢꓲ꓾ ꓬꓲ ꓮ ꓕꓯꓽ ꓕꓯ ꓬꓰ ꓝꓳꓺˍ ꓟ ꓡꓰ ꓐꓰ꓾ ꓐꓱ ꓔ ꓢꓴ ꓕꓲ ꓣꓳ ꓩꓴ ꓖꓶ ꓡ ꓠꓹ ꓟ ꓓꓰꓽ ꓡ ꓡꓳ꓿ 9 ꓖꓳ ꓡꓱ ꓠꓬ ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓐꓱ ꓶ ꓥꓪ ꓡꓰ ꓬꓴ-ꓔ ꓡꓽ ꓞꓳ ꓪ ꓔꓲ ꓖꓳ ꓕꓲ ꓣꓳ ꓩꓴ ꓖꓶˍ ꓟ ꓔꓯ ꓠꓴ ꓪꓽ ꓠꓲꓹ ꓫꓵˍ ꓡ?꓾ ꓐꓯˍ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓠꓬ ꓬꓰ-ꓢꓴ ꓔꓯ ꓟꓬ ꓔꓳꓹˍ ꓠꓬꓲ꓾ ꓬꓲ ꓔꓯ ꓡꓯꓼ ꓙꓱ ꓖꓶ ꓡ ꓗꓷ ꓟ ꓬꓲ ꓢꓷꓸˍ ꓡꓳ꓿ 11 ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓠꓽ꓾ ꓐ-ꓣ-ꓐ ꓔꓯ ꓬꓲ ꓪꓽ ꓐꓱ ꓶ ꓩꓴ ꓖꓶ ꓡ ꓠꓹ ꓟ ꓓꓰꓽ꓾ ꓐꓰ ꓡꓽ ꓞꓳ ꓬꓲ ꓜꓴ ꓔꓯ ꓚꓴꓽ ꓬꓲꓹ ꓖꓶˍ ꓡꓳ꓿ 12 ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ ꓠꓴ ꓪꓽ ꓡꓰ꓾ ꓬꓴ-ꓔ ꓡꓽ ꓞꓳ ꓪ ꓔꓲ꓾ ꓐꓰ ꓘꓴˍ ꓟ ꓖꓳ ꓕꓲ ꓣꓳ ꓔꓯ ꓥꓪ ꓮ ꓡꓲ ꓬꓰ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 13 ꓬꓲ ꓪꓽ ꓡꓰ꓾ ꓬꓲ ꓔꓯ ꓕꓯꓼ ꓔꓶ ꓗꓷ꓾ ꓐꓰ ꓘꓴˍ ꓡꓳ꓿ 14 ꓖꓳ ꓡꓱ ꓠꓬ ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓕꓯꓼ ꓔꓶꓸ ꓗꓷ ꓠꓯꓹ ꓡ?꓾ ꓬꓲ ꓠꓬ ꓟꓽ ꓙꓲ ꓟ ꓮꓸ ꓫꓵ ꓬꓰ ꓠꓬꓲ ꓡ?꓾ ꓐꓰ ꓐꓯˍ ꓟꓲ ꓬꓲ ꓪꓽ ꓠꓽ꓾ ꓬꓲ ꓔꓯ ꓕꓯꓼ ꓔꓶ ꓗꓷ꓾ ꓐꓰ ꓪ ꓜꓲꓻ ꓘꓴˍ ꓡꓳ꓿ 15 ꓒꓲ-ꓡ ꓠꓬ ꓞꓳ ꓜꓴ ꓔꓯ ꓠꓲꓹ ꓘꓪꓽ ꓫꓵ ꓡꓰ ꓝꓲ ꓠꓲꓹ ꓫꓵ ꓠꓬꓲ꓾ ꓬꓲ ꓪꓽ ꓐꓱ ꓶ ꓐ-ꓣ-ꓐ ꓔꓯ ꓩꓴ ꓖꓶ ꓢꓲ꓾ ꓬꓰ-ꓢꓴ ꓔꓯ ꓓꓶꓽ ꓗꓷ ꓠꓬ꓾ ꓕꓯꓼ ꓔꓶ ꓗꓷ ꓠꓹ ꓟ ꓡꓯꓼ ꓙꓱ ꓗꓷˍ ꓡꓳ꓿ 16 ꓖꓳ ꓕꓯ ꓟꓯꓼ ꓤ ꓐꓴ ꓡꓰ꓾ ꓬꓰ-ꓢꓴ ꓔꓯ ꓢꓲꓽ ꓒ ꓙꓻ ꓡꓽ ꓙꓳ ꓓꓰꓺ ꓗꓪ ꓧꓳꓽ ꓓꓵꓽ ꓙꓰ ꓢꓲ꓾ ꓕꓲ ꓟꓯꓼ ꓜꓴ ꓡꓱꓸꓼ ꓔꓯ ꓘꓴ ꓜꓲꓼ ꓡ ꓡꓳ꓿ 17 ꓬꓲ ꓪꓽ ꓠꓬ ꓬꓲ ꓔꓯ ꓐꓵ ꓞꓶ ꓠꓲꓺ ꓛꓵꓽ ꓖꓪꓽ ꓖꓶ ꓢꓲ꓾ ꓛꓴꓽ ꓠ ꓦꓳꓹ Bꓼ ꓢꓲ ꓬꓲ ꓔꓯ ꓘꓳꓹ ꓖꓶˍ ꓡꓳ꓿ 18 ꓖꓳ ꓡꓱ ꓢꓲ ꓬꓲ ꓪꓽ ꓡꓰ ꓬꓲ ꓔꓯ꓾ ꓬꓴ-ꓔ ꓡꓽ ꓞꓳ ꓪ ꓔꓲꓳ꓾ ꓤꓶꓻ ꓙꓳ ꓟꓯ ꓙꓳ ꓝꓲ꓾ ꓐꓰ ꓐꓯ ꓖꓶˍ ꓡꓳ꓿ 19 ꓝꓮꓲ ꓟꓯꓼ ꓤ ꓐꓴ ꓠꓬ ꓢꓲꓹ ꓗꓸ ꓓꓻ ꓡꓰ ꓬꓰ-ꓢꓴ ꓪꓴꓸ ꓓꓵ ꓗꓪ ꓮꓽ ꓟꓬꓹ ꓧꓪꓹ ꓓꓶꓽ ꓢꓲ꓾ ꓬꓲ ꓔꓯ ꓟꓷꓽ ꓶꓻ ꓔꓲꓸ ꓧꓳꓽ ꓢꓲ ꓠꓬꓲ꓾ ꓛꓲ ꓝꓲꓸ ꓖꓶꓽ ꓢꓲ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓠꓬꓲ ꓐꓰ ꓫꓸ ꓚꓲꓸˍ ꓡꓳ꓿ 20 ꓬꓲ ꓪꓽ ꓬꓲ ꓔꓯ ꓤꓲꓺ ꓗꓷ ꓠꓬ꓾ ꓐꓵ ꓞꓶ ꓠꓲꓺ ꓛꓵꓽ ꓡꓵꓸ ꓗꓷ ꓢꓲ꓾ ꓬꓲ ꓚꓲꓸ ꓛꓬ ꓐꓵ ꓞꓶ ꓖꓪꓽ ꓖꓶ ꓢꓲ ꓠꓬꓲ꓾ ꓬꓲ ꓔꓯ ꓕꓯꓼ ꓕꓶꓸ ꓗꓷ ꓠꓹ ꓟ ꓧꓳꓽ ꓓꓳ ꓙꓰˍ ꓡꓳ꓿ 21 ꓖꓳ ꓡꓱ ꓠꓬ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓑꓱꓸ ꓝꓲ ꓠꓹ ꓟ꓾ ꓬꓲ ꓪꓽ ꓡꓰ ꓖꓳ ꓗꓪ ꓗꓳꓸ ꓙꓰ ꓔꓬ ꓟ ꓢ-ꓡꓲ-ꓠꓲ ꓢꓴ ꓢꓲ-ꓟꓴ ꓔꓯ ꓟꓽ ꓓ ꓟꓽ ꓞꓽ ꓛꓳ ꓙꓰ ꓝꓲˍ ꓡꓳ꓿ ꓖꓳ ꓕꓯ ꓬꓲ ꓠꓬ ꓘꓹ ꓤꓽ ꓗꓪ ꓐꓰ ꓬꓲꓼ ꓡ ꓟ ꓥ ꓡꓳ꓿ ꓬꓲ ꓠꓽ ꓬ-ꓡꓲ-ꓢ-ꓓˍ ꓐꓰ ꓣꓴ-ꓩꓴ ꓐꓹ ꓐ ꓥ ꓡꓳ꓿ 22 ꓖꓳ ꓡꓱ ꓢꓲ ꓟꓯꓼ ꓤ ꓐꓴ ꓡꓰ ꓬꓰ-ꓢꓴ ꓔꓯ ꓖꓳ-ꓡ-ꓖꓳ-ꓕ ꓗꓪ ꓧꓳꓽ ꓙꓰˍ ꓡꓳ꓿ (ꓖꓳ-ꓡ-ꓖꓳ-ꓕ ꓐꓯˍ ꓟ ꓠꓬ꓾ ꓪꓴꓸ-ꓖꓼ ꓟꓵꓽ꓾ ꓐꓯˍ ꓟ ꓥ ꓡꓳ꓿) 23 ꓬꓲ ꓪꓽ ꓠꓬ ꓛꓱꓼ ꓡꓱ ꓙꓵꓻ ꓗꓪ ꓟꓴ-ꓬ ꓦꓱꓹ ꓔ ꓢꓲ꓾ ꓬꓰ-ꓢꓴ ꓔꓯ ꓖꓶ ꓓꓳˍ ꓟꓲ ꓬꓲ ꓟꓽ ꓠꓵ꓿ 24 ꓖꓳ ꓡꓱ ꓠꓬ ꓟꓯꓼ ꓤ ꓐꓴ ꓡꓰ ꓬꓲ ꓔꓯ ꓕꓯꓼ ꓔꓶꓸ ꓗꓷ ꓢꓲ꓾ ꓬꓲ ꓐꓵ ꓞꓶ ꓔꓯ ꓠꓬ ꓮꓽ ꓟ ꓮ ꓡꓲ ꓟꓶꓻ ꓠꓹ ꓟ꓾ ꓢꓽ ꓫꓱ ꓫꓱꓹ ꓢꓲ ꓐꓱꓻ ꓡꓯꓽ ꓘꓳˍ ꓡꓳ꓿ 25 ꓬꓲ ꓪꓽ ꓬꓲ ꓔꓯ ꓕꓯꓼ ꓔꓶꓸ ꓗꓷˍ ꓕꓯ ꓠꓯꓼ ꓗꓴ ꓙꓵꓹ ꓥ ꓡꓳ꓿ 26 ꓬꓲ ꓔꓯ ꓓꓰꓺ ꓘꓶꓽ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓪꓴꓸ ꓗꓪ꓾ ꓬꓴ-ꓔ ꓡꓽ ꓞꓳ ꓪ ꓔꓲ꓾ ꓐꓰ ꓐꓳ ꓔ ꓡꓳ꓿ 27 ꓬꓲ ꓪꓽ ꓠꓬ ꓬꓰ-ꓢꓴˍ ꓐꓰ ꓕꓲ ꓛꓳꓺꓼ ꓦꓴꓺ ꓜ ꓢꓴ ꓠꓬꓲꓽ ꓣꓳ ꓔꓯˍ ꓟꓲ꓾ ꓡꓯꓼ ꓙ ꓕꓲ ꓛꓱꓽ ꓗꓪ ꓕꓲ ꓣꓳ꓾ ꓡꓯꓼ ꓶꓸ ꓕꓲ ꓛꓱꓽ ꓗꓪ ꓕꓲ ꓣꓳ ꓕꓯꓼ ꓔꓶꓸ ꓔ ꓡꓳ꓿ 28 ꓕꓱ ꓟ ꓠꓬ ꓢꓲꓽ ꓫꓬ ꓕꓳ ꓶ ꓗꓪ꓾ ꓬꓲ ꓔꓯ ꓠꓬ ꓛꓬꓻ ꓢꓴ ꓥꓳꓽ ꓢꓴ ꓵꓺ ꓟꓬꓱ ꓗꓪ ꓚꓬꓹ ꓗꓷꓳ꓾ ꓐꓰ ꓐꓳ ꓔ ꓟ ꓔꓯ ꓐꓲꓺ ꓡ ꓝꓲ ꓠꓹ ꓟ ꓥ ꓡꓳ꓿ 29 ꓗꓳꓸ ꓙꓰ ꓢꓴ ꓠꓬ ꓬꓲ ꓔꓯ ꓫꓸ ꓚꓲꓸ ꓢꓲ꓾ ꓪꓴꓸ ꓓꓵ ꓶꓹ ꓠꓬꓲ꓾ ꓦꓵꓻꓼ꓾ ꓢꓲꓽ ꓫꓬ ꓦꓲ ꓒꓬꓹ ꓢꓲ ꓢ ꓠꓬꓲ ꓠꓯꓸꓼ ꓗꓪ ꓝꓮꓲ ꓫꓬꓹ ꓢꓴꓳ꓾ 30 ꓠꓴ ꓚꓲꓸ ꓛꓬ ꓔꓯ ꓚꓬꓴ ꓢꓲ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓐꓰ ꓬꓯꓼ ꓡꓯ ꓟꓴꓽ꓾ ꓐꓯˍ ꓡꓳ꓿ 31 ꓔꓲ ꓒꓽ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴˍ ꓟꓲ ꓖꓳ ꓟ ꓡꓰ ꓐꓰ ꓬꓲ ꓔꓯ ꓤꓲꓺ ꓢꓲ꓾ ꓢꓴ ꓔꓯ ꓠꓬ ꓬꓲ ꓚꓬꓴˍ ꓡꓳ꓾ ꓬꓲ ꓚꓲꓸ ꓛꓬ ꓔꓯ ꓠꓽ ꓬꓲ ꓚꓬꓴ ꓟꓽ ꓐ ꓡ꓿ 32 ꓣꓳ ꓡꓳꓸ ꓟꓳꓻ ꓢꓲ ꓙꓵꓻ ꓠꓹ ꓟ꓾ ꓮ ꓟꓶ ꓬꓲ-ꓢꓷ-ꓡꓰ ꓪ ꓔꓲ ꓙꓲ-ꓢꓴ ꓠꓬ꓾ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓐꓰ ꓬꓯꓼ ꓡ ꓝꓲ꓾ ꓐꓰ ꓐꓯˍ ꓡꓳ꓿ ꓬꓲˍ ꓐꓰ ꓕꓲ ꓛꓳꓺꓼ ꓕꓯꓼ ꓔꓶꓸ ꓔꓸ ꓢꓴˍ ꓟꓲ ꓬꓲ ꓔꓯ ꓫꓸ ꓚꓲꓸˍ ꓡꓳ꓿ 33 ꓞꓲ ꓠꓬꓲꓽ ꓙꓵꓹ ꓗꓪ ꓐꓰ ꓢ ꓙꓵꓹ ꓗꓪ ꓛꓲ ꓕꓲ ꓟꓵꓽ ꓡꓱꓸꓼ ꓠꓯ ꓞꓲꓹ ꓡꓰˍ ꓡꓳ꓿ 34 ꓢ ꓙꓵꓹ ꓗꓪ ꓠꓬ ꓬꓰ-ꓢꓴ ꓢꓯꓼ ꓓꓽ ꓟ ꓡꓰ ꓘꓴ ꓢꓲ꓾ ꓬꓲ-ꓡꓳ-ꓬꓲ꓾ ꓬꓲ-ꓡꓳ-ꓬꓲ꓾ ꓡ ꓟ ꓢ ꓐ ꓕ ꓠꓲ?꓾ ꓐꓯˍ ꓡꓳ꓿ ꓕꓱ ꓟ ꓠꓬ꓾ ꓥꓪ ꓪꓴ-ꓢꓻꓳ꓾ ꓥꓪ ꓪꓴ-ꓢꓻꓳ꓾ ꓮꓸ ꓫꓵ ꓪꓴꓸ ꓠꓬꓲ ꓠꓴ ꓥꓪ ꓔꓯ ꓒꓰꓺ ꓗꓷ ꓡ?꓾ ꓐꓯˍ ꓟ ꓥ ꓡꓳ꓿ 35 ꓖꓳ ꓗꓪ ꓦꓰꓼ ꓞꓹ ꓢꓴ ꓕꓲ ꓐꓱ ꓑ ꓙꓽˍ ꓠꓬ꓾ ꓠ ꓠꓹ꓾ ꓬꓲ ꓠꓽ ꓬꓲ-ꓡꓲ-ꓬ ꓔꓯ ꓘꓴ ꓔꓬ ꓡꓳ꓾ ꓐꓯˍ ꓡꓳ꓿ 36 ꓖꓳ ꓡꓱ ꓠꓬ ꓕꓲ ꓣꓳ ꓔꓷꓹ ꓙꓰ ꓢꓲ꓾ ꓬꓲꓻ ꓣꓳꓺ ꓟꓵꓺ ꓕꓲ ꓘꓴꓸ ꓗꓪ ꓬꓲꓻ ꓚꓱꓺ ꓔꓲꓹ ꓐꓲ ꓡ ꓢꓲ ꓠꓬꓲ꓾ ꓬꓲꓻ ꓑ ꓒꓴꓽ ꓓꓻ ꓑꓶꓸ ꓗꓪ ꓞꓳꓹ ꓔ ꓢꓲ ꓬꓲ ꓔꓯ ꓖꓶꓽ ꓓꓳ ꓗꓷ ꓠꓬ꓾ ꓬꓲ ꓡꓰ꓾ ꓮ ꓟꓶ ꓥ ꓝꓲ꓾ ꓬꓲ-ꓡꓲ-ꓬ ꓡꓻ ꓢꓲ ꓬꓲ ꓔꓯ ꓣꓴ ꓬꓯꓼ ꓡ ꓟꓽ ꓣꓴ ꓬꓯꓼ ꓡ꓾ ꓣꓳ ꓡꓳꓸ ꓔꓸ ꓡꓯ꓾ ꓐꓯˍ ꓡꓳ꓿ 37 ꓖꓳ ꓡꓱ ꓠꓬ ꓬꓰ-ꓢꓴ ꓢꓯꓼ ꓓꓽ ꓟ ꓡꓰ ꓘꓴ ꓢꓲ꓾ ꓬꓲ ꓢꓯꓼ ꓟꓬ ꓞꓷꓹ ꓗꓷꓳ꓿ 38 ꓖꓳ ꓕꓯ ꓢꓲꓽ ꓫꓬ ꓦꓲ ꓠꓯꓸꓼ ꓗꓪ ꓟ ꓗꓳꓹ ꓛ ꓠꓬ꓾ ꓕꓯꓽ ꓢꓲ ꓗꓪ ꓐꓰ ꓬꓲ ꓟꓶꓽ ꓗꓪ ꓛꓲ ꓠꓬꓲꓽ ꓐꓶꓽ ꓧꓽ ꓡꓰˍ ꓡꓳ꓿ 39 ꓡꓯꓼ ꓐꓳ ꓔꓶꓸ ꓓꓴ ꓟꓲꓽ ꓕꓯꓽ ꓗꓪ ꓦꓰꓼ ꓞꓹ ꓟ ꓟꓯꓼ ꓕꓲ ꓦꓬꓻ ꓙꓵꓽ ꓒ ꓠꓬ꓾ ꓬꓰ-ꓢꓴ ꓖꓳ ꓡꓱ ꓘꓴꓻ ꓢꓲ ꓬꓲ ꓢꓯꓼ ꓟꓬ ꓞꓷꓹ ꓗꓷ ꓟ ꓔꓯ ꓟꓳꓻˍ ꓕꓯ꓾ ꓡꓽ ꓞꓳ ꓕꓱ ꓟ ꓠꓽ꓾ ꓚꓵ ꓚꓵ ꓪꓴ-ꓢ ꓮ ꓐꓲ ꓥ ꓐꓷ꓾ ꓐꓯˍ ꓡꓳ꓿ 40 ꓶꓽ ꓤꓻ ꓗꓪ ꓐꓰ ꓡꓳꓸ ꓔꓬ ꓟ ꓤ ꓟꓶ ꓤˍ ꓟꓲ ꓕꓲ ꓧꓳꓽ ꓙꓳˍ ꓡꓳ꓿ ꓬꓲ ꓪꓽ ꓗꓳ ꓡꓳ ꓗꓪ ꓠꓬ ꓟ-ꓖ-ꓓ-ꓡꓲ ꓢꓴ ꓟ-ꓡꓲˍ ꓐꓰ꓾ ꓬ-ꓗꓴ ꓣꓳꓺˍ ꓕꓲ ꓣꓳ ꓟ ꓐꓰ ꓬꓳ-ꓢꓲ ꓬꓲ ꓪꓽ ꓟꓹ ꓟ ꓟ-ꓡꓲˍ ꓐꓰ ꓢ-ꓡꓳ-ꓟꓲ ꓔꓬ ꓡꓳ꓿ 41 ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵ ꓗꓪ ꓔꓬ ꓕꓯ꓾ ꓬꓲ ꓪꓽ ꓠꓬ ꓬꓲ ꓔꓯ ꓛꓳ ꓙꓰ ꓢꓲ ꓣꓱꓽ ꓙ ꓠꓬꓲꓳ꓿ ꓝꓮꓲ ꓬꓰ-ꓢꓴˍ ꓐꓰ ꓕꓲ ꓪꓺꓼ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓡ ꓟ꓾ ꓠꓱꓸ ꓐꓯꓼ ꓤ ꓟꓶ ꓤ ꓮꓽ ꓟꓬꓹˍ ꓟꓲ ꓖꓳ ꓗꓪ ꓡꓳꓸ ꓔꓬ ꓡꓳ꓿ 42 ꓟꓰꓻ ꓬꓰ ꓠꓬ꓾ ꓙꓽ ꓖꓶꓽˍ ꓟ ꓦꓬꓼ ꓠꓬꓲ꓾ ꓠꓽ ꓦꓬꓼ ꓠꓬꓲ ꓧꓶꓸ ꓕꓯ ꓕꓲ ꓠꓬꓲ ꓗꓪ꓾ 43 ꓖꓪ ꓙꓱ ꓜꓴꓻ ꓗꓪ ꓟ ꓞꓳ ꓪꓴꓽ ꓮ-ꓡꓲ-ꓟ-ꓕꓲ-ꓬ ꓢꓴ ꓬꓳ-ꓢꓷ ꓛꓲ ꓡ ꓡꓳ꓿ ꓬꓲ ꓠꓬ ꓪꓴ-ꓢ ꓗꓴꓷꓼ ꓛꓲ ꓡ ꓠꓹ ꓟ ꓔꓯ ꓡꓳꓸ ꓔꓬ ꓢꓴ ꓥꓳ꓿ ꓬꓲ ꓠꓬ ꓟꓽ ꓙꓳꓺ ꓙꓳꓺ ꓒꓲ-ꓡ ꓔꓯ ꓙꓰ ꓢꓲ ꓬꓰ-ꓢꓴ ꓫꓵꓻ ꓟꓳꓻ ꓓꓰꓽ ꓬꓰˍ ꓡꓳ꓿ 44 ꓬꓰ-ꓢꓴ ꓫꓵꓻꓳ꓾ ꓐꓰ ꓒꓲ-ꓡ ꓑ ꓙꓽ ꓗꓷ ꓠꓬ ꓓꓵꓽ ꓙ ꓟꓶ ꓡꓰ ꓢꓲ꓾ ꓟꓯꓼ ꓕꓲ ꓦꓬꓻ ꓙꓵꓽ ꓒ ꓔꓯ ꓘꓴꓻ ꓔꓯꓹ ꓡ ꓢꓲ ꓠꓬꓲ꓾ ꓬꓲ ꓫꓵꓻ ꓗꓷ ꓟ ꓮ ꓡꓲ ꓟꓶ ꓛꓲ ꓙꓳˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 45 ꓟꓯꓼ ꓢꓲꓽ ꓒ ꓡꓰ ꓬꓰ-ꓢꓴ ꓚꓵ ꓚꓵ ꓫꓵꓻꓳ꓾ ꓐꓰ ꓬꓲ ꓔꓯ ꓐꓯ ꓖꓶ ꓗꓷ ꓠꓬ ꓬꓳ-ꓢꓷ ꓔꓯ ꓫꓵꓻ ꓟꓳꓻ ꓡꓯꓼ ꓙꓱ ꓗꓷˍ ꓡꓳ꓿ 46 ꓬꓳ-ꓢꓷ ꓠꓬ ꓪꓰꓻ ꓜꓲ ꓟꓶꓻ ꓪꓴꓻ ꓔꓯꓹ ꓡ ꓢꓲ꓾ ꓬꓰ-ꓢꓴ ꓖꓳ ꓓꓱ ꓔꓯ ꓣꓴ ꓬꓯꓼ ꓗꓷ ꓢꓲ ꓠꓬꓲ꓾ ꓟꓳꓻ ꓕꓱꓹ ꓓꓴ ꓪꓰꓻ ꓜꓲꓽ ꓟꓶꓻ ꓡꓰ ꓕꓱꓹ ꓢꓲ꓾ Bꓸ ꓗꓪ ꓜꓰꓺ ꓔ ꓟ ꓡꓱꓽ ꓘꓴ ꓗꓪ ꓗꓶ ꓔ ꓢꓲ ꓠꓬꓲ꓾ Bꓸ ꓛꓲ ꓕꓲ ꓒꓬꓸ ꓡꓰ ꓙꓵꓺ ꓚꓵꓸ ꓔ ꓡꓳ꓿ 47 ꓟ-ꓖ-ꓓ-ꓡꓲ ꓢꓴ ꓟ-ꓡꓲˍ ꓐꓰ꓾ ꓬꓳ-ꓢꓲ ꓬꓲꓸ ꓟꓹ ꓟ ꓟ-ꓡꓲˍ ꓟꓲ꓾ ꓬꓲ ꓔꓯ ꓮ ꓡꓲ ꓗꓪ ꓗꓶ ꓔ ꓟ ꓔꓯ ꓔꓱꓹ ꓠꓬꓲ ꓔꓬ ꓡꓳ꓿

ꓟ-ꓗꓳ 16

1 ꓠꓽ ꓦꓬꓼ ꓠꓬꓲ ꓗꓳꓸ ꓗꓷ ꓠꓬ꓾ ꓟ-ꓖ-ꓓ-ꓡꓲ ꓢꓴ ꓟ-ꓡꓲˍ ꓐꓰ꓾ ꓬ-ꓗꓴ ꓬꓲ ꓟꓹ ꓟ ꓟ-ꓡꓲˍ ꓐꓰ ꓢ-ꓡꓳ-ꓟꓲ ꓠꓬ꓾ ꓬꓰ-ꓢꓴ ꓫꓵꓻ ꓟꓳꓻ ꓗꓪ ꓟꓰꓺ ꓖꓶ ꓠꓹ ꓟ ꓫꓳꓺ ꓠꓱˍ ꓟ ꓠꓯꓺ ꓞꓲꓼ ꓧꓶꓽ ꓪꓴꓻ ꓔꓯꓹ ꓡ ꓢꓲ꓾ 2 ꓫꓵꓽ ꓠꓬꓲ ꓟ ꓬꓲ ꓪꓴꓸ ꓕꓲꓽ ꓠꓬꓲ ꓠꓯꓼ ꓠꓯꓼ ꓟꓲꓽ ꓟꓲꓻ ꓓꓳ ꓡ ꓕꓯ ꓡꓱꓽ ꓜꓴ ꓗꓪ ꓙꓰˍ ꓡꓳ꓿ 3 ꓖꓳ ꓕꓯ ꓬꓲ ꓪꓽ ꓫꓸ ꓕꓱ ꓡꓯꓽ ꓘꓳ ꓢꓲ꓾ ꓡꓱꓽ ꓜꓴ ꓓꓵꓽ ꓒꓰꓼ ꓗꓪ ꓟ Bꓸ ꓛꓲ ꓔꓯ ꓮꓽ ꓟ ꓡꓰ ꓣꓳ ꓐꓱ ꓶ ꓙꓵꓺ ꓩꓴ ꓗꓷ ꓙ ꓡ ꓢꓰꓽ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 4 ꓖꓳ ꓡꓱ ꓥ ꓟꓲ ꓬꓲ ꓪꓽ ꓡꓳꓸ ꓠꓬꓲˍ ꓠꓬ꓾ ꓮ ꓘꓶꓸ ꓪꓴꓽˍ ꓟ Bꓸ ꓛꓲ ꓖꓳ ꓟ ꓠꓽ ꓙꓵꓺ ꓩꓴ ꓗꓷ ꓔ ꓟ ꓔꓯ ꓟꓳꓻ ꓡꓰꓳ꓿ 5 ꓡꓱꓽ ꓜꓴ ꓗꓪ ꓬꓲ ꓪꓽ ꓓꓵꓽ ꓡꓰ ꓕꓯ꓾ ꓡꓯꓼ ꓙ ꓕꓲ ꓛꓱꓽ ꓗꓪ ꓒꓴ ꓛꓹ ꓟ ꓐꓵ ꓞꓶꓽ ꓐꓽ ꓢꓽ ꓖꓪꓽ ꓔ ꓟ꓾ ꓤ ꓖꓴ ꓡꓯꓸ ꓕꓲ ꓣꓳ ꓠꓬꓲꓸ ꓠꓸ ꓔꓬ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓪꓽ ꓓꓵꓽ ꓙ ꓟꓶ ꓡꓰꓳ꓿ 6 ꓬꓲ ꓡꓰ ꓬꓲ ꓪꓽ ꓔꓯ꓾ ꓕꓽ ꓓꓵꓽ ꓙ ꓟꓶ꓿ ꓠꓴ ꓪꓽ ꓠꓬ ꓕꓯꓼ ꓢꓰꓼ ꓗꓷ ꓟ ꓠ-ꓢ-ꓡꓱ ꓢꓴ ꓬꓰ-ꓢꓴ ꓔꓯ ꓧꓪˍ ꓟ ꓥꓪ ꓢꓷꓸˍ ꓡꓳ꓿ ꓬꓲ ꓠꓽ ꓢꓯꓸ ꓬꓲꓼ ꓡꓺꓳ꓿ ꓬꓲ ꓫꓵꓻ ꓟꓳꓻ ꓝꓳꓺ ꓖꓴ ꓗꓪ ꓡꓳꓸ ꓠꓬꓲ꓾ ꓬꓲ ꓠꓽ ꓕꓱ ꓗꓪ ꓟꓽ ꓔꓬꓳ꓿ 7 ꓠꓴ ꓪꓽ ꓙꓰ ꓢꓲ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓒꓲ-ꓕꓱ ꓔꓯ꓾ ꓬꓲ ꓠꓬ ꓖ-ꓡꓲ-ꓡꓲ ꓟꓵꓽ ꓗꓪ ꓠꓴ ꓪꓽ ꓟꓲꓽ ꓕꓯꓽ ꓢꓲ ꓙꓰˍ ꓥꓳ꓿ ꓬꓲ ꓠꓴ ꓪꓽ ꓔꓯ ꓐꓯ ꓔ ꓟ ꓡꓰ ꓐꓰ ꓖꓳ ꓗꓪ ꓠꓴ ꓪꓽ ꓬꓲ ꓔꓯ ꓟꓳꓻˍ ꓥꓳ꓾ ꓐꓰ ꓐꓯ ꓖꓶ ꓬꓰ꓾ ꓐꓯˍ ꓡꓳ꓿ 8 ꓬꓲ ꓪꓽ ꓠꓬ ꓛꓱꓽ ꓛꓱꓽ ꓠꓬꓲ ꓐꓰ ꓡꓱꓽ ꓜꓴ ꓗꓪ ꓐꓰ ꓔꓷꓹ ꓛꓰꓹ ꓙꓰˍ ꓡꓳ꓿ ꓬꓲ ꓪꓽ ꓠꓽ ꓙꓳꓺ ꓠꓬꓲ ꓮꓽ ꓟ ꓔꓯˍ ꓟꓲ ꓮꓸ ꓫꓵ ꓟꓽ ꓐꓯ ꓖꓶ꓿ 9 ꓠꓽ ꓦꓬꓼ ꓠꓬꓲ ꓗꓸ ꓠꓯꓸ ꓕꓲ ꓠꓬꓲ ꓠꓯꓼ ꓠꓯꓼ ꓕꓯ ꓬꓰ-ꓢꓴ ꓢꓯꓸ ꓬꓲꓼ ꓡ ꓠꓬ꓾ ꓬꓲ ꓡꓰ ꓠꓲꓽ ꓫꓵꓽ ꓟ ꓖꓼ ꓓꓳ ꓗꓷ ꓟ꓾ ꓟ-ꓖ-ꓓ-ꓡꓲ ꓢꓴ ꓟ-ꓡꓲ ꓔꓯ ꓧꓶꓸ ꓕꓯ ꓬꓲ ꓖꓳ ꓓꓱ ꓟꓳꓸ ꓖꓶꓽˍ ꓡꓳ꓿ 10 ꓟ-ꓡꓲ ꓠꓬ ꓬꓰ-ꓢꓴ ꓔꓯ ꓛꓳꓻ ꓠꓬꓲ ꓗꓷ ꓢꓴ ꓐꓴ ꓔꓯ ꓓꓳꓽ ꓕꓱ ꓟ ꓐꓯ ꓖꓶ ꓬꓰˍ ꓡꓳ꓿ ꓬꓲ ꓪꓽ ꓠꓬ ꓠꓲꓹ ꓟ ꓫꓸ ꓠꓬꓲ ꓥꓴꓻ ꓔꓬ ꓢꓲ꓾ 11 ꓬꓲ ꓢꓯꓸ ꓬꓲꓼ ꓡ ꓗꓷ ꓟ ꓐꓰ꓾ ꓟ-ꓡꓲ ꓡꓰ ꓬꓲ ꓔꓯ ꓟꓳꓻ ꓗꓷ ꓟ ꓐꓯ ꓖꓶˍ ꓟꓲ ꓬꓲ ꓪꓽ ꓟꓽ ꓙꓵꓻ꓿ 12 ꓖꓳ ꓗꓸ ꓠꓯꓸ꓾ ꓬꓲ ꓪꓽ ꓗꓪ ꓟ ꓠꓬꓲꓽ ꓣꓳ ꓙ ꓖꓴ ꓤ ꓗꓪ ꓙꓰ ꓔꓬ ꓕꓯ꓾ ꓬꓰ-ꓢꓴ ꓠꓬ ꓬꓲ ꓔꓱꓹ ꓬꓲ ꓕꓲ ꓒꓬꓱꓽ ꓶꓻ ꓔ ꓢꓲ꓾ ꓬꓲ ꓪꓽ ꓔꓯ ꓟꓳꓸ ꓖꓶˍ ꓡꓳ꓿ 13 ꓬꓲ ꓪꓽ ꓙꓰ ꓢꓲ ꓛꓳꓽ ꓒꓯꓹ ꓐꓴ ꓔꓯ ꓐꓯ ꓖꓶ ꓠꓬ꓾ ꓬꓲ ꓪꓽ ꓔꓯˍ ꓟꓲ ꓬꓲ ꓪꓽ ꓟꓽ ꓙꓵꓻ꓿ 14 ꓖꓳ ꓗꓸ ꓠꓯꓸ ꓞꓲ ꓕꓲ ꓣꓳ ꓟ ꓔꓯ꓾ ꓬꓲ ꓪꓽ ꓜꓻ ꓜꓽˍ ꓐꓰ ꓗꓳꓺ ꓔꓬ ꓕꓯ ꓬꓲ ꓟꓳꓸ ꓖꓶ ꓢꓲ꓾ ꓬꓲ ꓢꓯꓸ ꓡ ꓟ ꓓꓳꓽ ꓐꓯ ꓖꓶ ꓡ ꓢꓴ ꓐꓴ ꓔꓯ ꓬꓲ ꓪꓽ ꓟꓽ ꓙꓵꓻ ꓙꓵꓻ ꓠꓲꓹ ꓟ ꓩꓴˍ ꓠꓬꓲ꓾ ꓬꓲ ꓡꓰ ꓬꓲ ꓪꓽ ꓔꓯ ꓕꓼˍ ꓡꓳ꓿ 15 ꓬꓲ ꓠꓬ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓟꓵꓽ ꓗꓳꓹ ꓓꓵ ꓓꓵꓽ ꓙꓰ ꓢꓲ꓾ ꓞꓳ ꓫꓵꓽ ꓞꓳ ꓙꓰꓽ ꓥ ꓕ ꓑꓳꓸ ꓔꓯ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ꓿ 16 ꓙꓵꓻ ꓢꓲ ꓖꓳ ꓓꓱ ꓔꓲꓹ ꓟꓶ ꓢꓴ ꓠꓽ ꓢꓯꓼ ꓟꓬ ꓝ ꓟꓶˍ ꓥꓳ꓿ ꓟꓽ ꓙꓵꓻ ꓢꓴ ꓠꓽ ꓛꓬꓻ ꓒꓵꓽ ꓟꓶˍ ꓥꓳ꓿ 17 ꓙꓵꓻ ꓢꓴ ꓔꓯ ꓠꓽ ꓢꓷꓸ ꓡꓰ ꓓꓴ ꓕꓱ ꓟꓬ ꓙꓰꓽ ꓛꓳ ꓡ ꓥꓳ꓿ ꓬꓲ ꓪꓽ ꓠꓬ ꓥꓪ ꓟꓬꓱ ꓗꓪ ꓐꓰ ꓠꓲꓽ ꓖꓼˍ ꓥꓳ꓿ ꓬꓲ ꓪꓽ ꓠꓬ ꓥꓳꓽ ꓬꓲ ꓫꓵꓼ ꓫꓸ ꓕꓱˍ ꓥꓳ꓿ 18 ꓩꓴꓺ ꓔꓯˍ ꓟꓲ ꓬꓲ ꓪꓽ ꓣꓴˍ ꓥꓳ꓿ ꓬꓲ ꓪꓽ ꓮ ꓡꓲ ꓫꓵꓽ ꓓꓳꓼ ꓓꓳꓻ ꓪˍ ꓟꓲ ꓮ ꓡꓲ ꓟꓽ ꓗꓷ ꓡꓰ꓿ ꓬꓲ ꓪꓽ ꓡꓰ ꓠꓻ ꓢꓴ ꓒꓬꓼ ꓢꓴ ꓔꓯ ꓡꓯꓼ ꓒꓯꓹ ꓚꓰꓹ ꓖꓶˍ ꓠꓬ ꓓꓻ ꓡꓰˍ ꓥꓳ꓾ ꓐꓯˍ ꓡꓳ꓿ 19 ꓢꓲ ꓒꓽ ꓬꓰ-ꓢꓴ ꓬꓲ ꓪꓽ ꓔꓯ ꓫꓸ ꓕꓱ ꓓꓳ ꓡꓰ ꓠꓬ꓾ ꓬꓲ ꓔꓯ ꓟꓴꓽ ꓗꓪ ꓗꓪ ꓔꓯꓹ ꓓꓯ ꓙꓰ ꓢꓲ꓾ ꓪꓴ-ꓢ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ ꓡꓰꓳ꓿ 20 ꓖꓳ ꓡꓱ ꓠꓬ ꓬꓲ ꓪꓽ ꓓꓳ ꓙꓰ ꓢꓲ꓾ ꓮ ꓡꓲ ꓗꓪˍ ꓟꓲ ꓟꓸ ꓟꓲꓽ ꓚ ꓟꓸ ꓖꓶꓽ ꓙꓰˍ ꓡꓳ꓿ ꓢꓲ ꓒꓽ ꓠꓬ ꓬꓲ ꓪꓽ ꓐꓰ ꓕꓲ ꓪꓺꓼ ꓟꓬꓱꓽ ꓬꓰ ꓢꓲ꓾ ꓬꓲ ꓪꓽ ꓚ ꓟꓸ ꓖꓶˍ ꓟ ꓐꓯ ꓘꓶꓽ ꓔꓯ ꓢꓷꓸ ꓡꓰ ꓓꓴ ꓛꓳ ꓩꓴ ꓡ ꓟ ꓗꓪ ꓐꓰ ꓗꓸ ꓚꓵ ꓬꓰ ꓢꓲ꓾ ꓕꓶꓻ ꓡꓰ ꓝꓲˍ ꓡꓳ꓿

ꓡꓴ-ꓗ 1

1 ꓞꓳ ꓪꓴꓽ ꓕꓲ-ꓬ-ꓒꓲ-ꓡꓳꓽꓳ꓾ ꓥꓪ ꓠꓴꓽ ꓗꓳ ꓡꓳ ꓗꓪ ꓒꓬꓱꓼ ꓡ ꓗꓷ ꓟ ꓫꓵꓽ ꓪꓴ ꓔꓯ ꓟꓳꓸ ꓕꓳ ꓶ ꓐꓳ ꓢꓴ ꓮꓽ ꓟꓬꓹ ꓙꓳˍ ꓡꓳ꓿ 2 ꓬꓲ ꓪꓽ ꓠꓬ ꓬꓲ ꓪꓴꓸ ꓗꓪ ꓐꓰ ꓚꓲꓸ ꓛꓬ ꓟꓬ ꓢꓶꓽ ꓡꓰ ꓡꓳꓸ ꓟꓳ ꓢꓲ꓾ ꓓꓳꓽ ꓕꓱ ꓟ ꓚ ꓒꓬꓱ ꓙꓰ ꓢꓴ ꓐꓴ ꓡꓰ ꓐꓯ ꓖꓶ ꓡ ꓟ ꓡꓰ ꓐꓰ ꓐꓳ ꓚꓲꓸ ꓔ ꓟ ꓥ ꓡꓳ꓿ 3 - 4 ꓥꓪˍ ꓟꓲ ꓖꓳ ꓟ ꓡꓰ ꓐꓰ ꓕꓱ ꓟꓬ ꓫꓵ ꓮꓽ ꓙꓵ ꓔꓯ ꓬꓲ ꓪꓴꓸ ꓗꓪ ꓐꓰ ꓬꓲ ꓜꓶꓻ ꓚꓵꓸ ꓚ ꓟꓶ ꓢꓲ꓾ ꓠꓴ ꓔꓯ ꓟꓸ ꓖꓶ ꓗꓷ ꓟ ꓐꓯ ꓘꓶꓽ ꓠꓬ ꓚꓵ ꓚꓵ ꓔꓱꓹ ꓟ ꓐꓯ ꓘꓶ ꓥꓳ꓾ ꓐꓰ ꓠꓴ ꓢꓷꓸ ꓡꓰ ꓠꓹ ꓟ꓾ ꓬꓲ ꓤꓽ ꓟꓽ ꓠꓬꓲꓽ ꓙꓳꓻ ꓙꓳ ꓠꓴ ꓔꓯ ꓐꓳ ꓖꓶꓽˍ ꓠꓬ ꓙꓲˍ ꓡꓳ꓾ ꓓꓵꓽ ꓙ ꓢꓲ꓾ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ 5 ꓩꓴ-ꓡꓲ ꓠꓬ ꓬꓴ-ꓔ ꓪ ꓔꓲꓸ ꓣꓱꓽ ꓔꓬ ꓕꓯ꓾ ꓬ-ꓑꓲ-ꓬ ꓜꓴꓻ ꓗꓪ ꓢ-ꓚꓬ-ꓡꓲ-ꓬ ꓟꓬꓱꓺ ꓔ ꓟ ꓔꓲ ꓒ ꓕꓲ ꓣꓳ ꓔꓬ ꓡꓳ꓿ ꓬꓲ ꓤ ꓟꓶ ꓠꓬ ꓯ-ꓣꓷ ꓬꓲ ꓞꓲꓼ ꓤ ꓡꓯꓹ ꓤ ꓕꓲ ꓣꓳ ꓥ ꓢꓲ꓾ ꓬꓲ ꓟꓬꓱꓺ ꓠꓬ ꓬꓲ-ꓡꓲ-ꓫ-ꓑꓷꓽ ꓥ ꓡꓳ꓿ 6 ꓬꓲ ꓪꓽ ꓠꓬꓲꓽ ꓣꓳ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓔꓱꓹ ꓜꓳꓽ ꓢꓴ ꓥ ꓢꓲ꓾ ꓢꓲ ꓒꓽ ꓕꓵꓼ ꓪꓽˍ ꓐꓰ ꓙꓵꓽ ꓚꓱꓹ ꓮꓽ ꓙꓵ ꓔꓯ ꓬꓲ ꓜꓶꓻ ꓚ ꓔꓬ ꓢꓴ ꓥꓳ꓿ 7 ꓬꓲ-ꓡꓲ-ꓫ-ꓑꓷ ꓠꓽ ꓞꓳ ꓡꓱꓽ ꓟꓺ ꓥ ꓠꓬꓲ꓾ ꓬꓲ ꓪꓽ ꓠꓬꓲꓽ ꓣꓳ ꓠꓬ ꓟꓳꓽ ꓡꓰˍ ꓟꓲ ꓤ ꓠꓱ ꓟꓽ ꓙꓳ꓿ 8 ꓢ-ꓚꓬ-ꓡꓲ-ꓬ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓔꓲ ꓒ ꓟꓬꓱꓽ ꓬꓰ ꓠꓹ ꓟ ꓑ ꓝꓲꓸ ꓚꓳ ꓛꓲ ꓡ ꓢꓲ ꓟꓬꓱꓽ ꓣꓱꓽ ꓔꓬ ꓕꓯ꓾ 9 ꓔꓲ ꓒ ꓬꓰˍ ꓟ ꓗ ꓫꓵꓺˍ ꓡꓰ ꓐꓰ ꓢꓽ ꓫꓱ ꓫꓱꓹ ꓗꓷ ꓠꓬ꓾ ꓢꓲ ꓒꓽ ꓦꓲ ꓗꓪ ꓫꓳꓸ ꓛꓴ ꓢꓴ ꓬꓰ ꓠꓹ ꓟ ꓢ-ꓚꓬ-ꓡꓲ-ꓬ ꓔꓯ ꓟꓶꓽ ꓡ ꓠꓬꓲ꓾ ꓬꓲ ꓠꓽ ꓢꓲꓽ ꓫꓬ ꓦꓲ ꓗꓪ ꓫꓳꓸ ꓛꓴˍ ꓡꓳ꓿ 10 ꓫꓳꓸ ꓛꓴ ꓝꓲꓸ ꓗꓪ ꓑ ꓫꓬꓼ ꓬꓲ ꓜꓴ ꓠꓬ ꓠꓱ ꓫꓱ ꓟꓸꓼ ꓗꓪ ꓪꓽ ꓘꓴ ꓔꓬ ꓡꓳ꓿ 11 ꓖꓳ ꓕꓯ ꓢꓲ ꓒꓽ ꓝꓲ ꓓꓴ ꓕꓲ ꓣꓳ ꓫꓳꓸ ꓛꓴ ꓖꓴ ꓡꓯꓼ ꓙ ꓕꓲ ꓛꓱꓽ ꓗꓪ ꓦꓰꓼ ꓡ ꓟ ꓔꓯ ꓬꓲ ꓟꓳˍ ꓡꓳ꓿ 12 ꓖꓳ ꓟ ꓔꓯ ꓢ-ꓚꓬ-ꓡꓲ-ꓬ ꓟꓳꓻ ꓗꓷ ꓠꓬ ꓦꓲꓸ ꓡꓰ ꓢꓲ ꓙꓳꓺ ꓡꓰꓳ꓿ 13 ꓖꓳ ꓕꓯ ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓔꓯ꓾ ꓢ-ꓚꓬ-ꓡꓲ-ꓬꓼꓳ꓾ ꓕꓽ ꓙꓳ꓿ ꓠꓴ ꓓꓰꓽˍ ꓟ ꓔꓯ ꓪꓴ-ꓢ ꓑ ꓙꓽ ꓗꓷꓳ꓿ ꓠꓴ ꓤ ꓟꓶꓻ ꓬꓲ-ꓡꓲ-ꓫ-ꓑꓷ ꓠꓬ ꓠꓴ ꓐꓱ ꓶ ꓤꓽ ꓕꓲ ꓣꓳ ꓦꓵꓻ ꓡ ꓥꓳ꓿ ꓬꓲ ꓔꓯ꓾ ꓬꓳ-ꓦ꓾ ꓟꓬꓱꓺ ꓖꓶ ꓠ ꓗꓹ ꓡꓳ꓿ 14 ꓠꓴ ꓠꓽ ꓠꓲꓹ ꓒꓴ ꓗ ꓛꓲˍ ꓟ ꓟꓶˍ ꓥꓳ꓿ ꓠꓱꓸ ꓐꓯꓼ ꓢꓴˍ ꓟꓲ ꓬꓲ ꓦꓵꓻ ꓡ ꓟ ꓑꓶꓸ ꓓꓴ ꓗꓹ ꓛꓲꓽ ꓢꓴ ꓮꓽ ꓟꓬꓹ ꓙꓳˍ ꓥꓳ꓿ 15 ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓢꓲ ꓒꓽ ꓒꓬꓱꓽ ꓕꓯ ꓗꓪ ꓪꓴꓽˍ ꓟ ꓒꓬꓱꓼ ꓡ ꓥꓳ꓿ ꓙꓵꓻ ꓪꓴꓸ ꓙꓵꓻ ꓐꓬꓱ ꓥ ꓟꓲ ꓬꓲ ꓟꓽ ꓓꓳ꓿ ꓬꓲ ꓠꓬ ꓬꓲ ꓟꓹ ꓟ ꓤꓽ ꓘꓶꓻ ꓗꓪ ꓓꓯꓹ ꓕꓯˍ ꓡꓰ ꓢꓲ-ꓫꓬ-ꓟ-ꓦ ꓐꓲ ꓞꓹ ꓥꓳ꓿ 16 ꓬꓲ ꓡꓰ ꓬꓲ-ꓢꓷ-ꓡꓰ ꓡꓽ ꓞꓳ ꓮꓽ ꓟꓬꓹ ꓔꓯ ꓘꓶꓸ ꓟꓶ ꓢꓲ꓾ ꓬꓲ ꓪꓽ ꓢꓲ ꓒꓽ ꓪꓴ-ꓢ ꓔꓯ ꓟꓳꓸ ꓒꓳꓹ ꓬꓲꓼ ꓡ ꓝꓲˍ ꓥꓳ꓿ 17 ꓬꓲ ꓠꓬ ꓬꓲ-ꓡꓲ-ꓬˍ ꓡꓰ ꓐꓰ ꓠꓲꓹ ꓡꓱꓻ ꓢꓲ ꓪꓽ ꓠꓬꓲ ꓠꓬꓲˍ ꓡꓰꓽ ꓢꓲ ꓒꓽ ꓐꓱ ꓶ ꓙꓻ ꓪꓴꓸ ꓕꓴꓸ ꓢꓴ ꓬꓰˍ ꓥꓳ꓿ ꓢꓲ ꓒꓽ ꓬꓲ ꓑ ꓫꓬꓼ ꓕꓲ ꓫꓵꓽ ꓙꓽ ꓖꓶ ꓟꓶꓻ ꓡꓰ ꓝꓲ ꓠꓹ ꓟ꓾ ꓬꓲ ꓡꓰ ꓐꓹ ꓐˍ ꓐꓰ ꓤ ꓠꓱ ꓐꓴ ꓔꓯ ꓧꓳꓹ ꓡꓯꓽ ꓘꓳ ꓡꓰ ꓝꓲˍ ꓥꓳ꓿ ꓟꓽ ꓠ ꓡꓳꓹ ꓢꓴ ꓐꓴ ꓔꓯˍ ꓟꓲ ꓔꓱꓹ ꓜꓳꓽ ꓢꓴ ꓐꓴ ꓙꓽ ꓗꓴꓸ ꓠꓲꓹ ꓔꓯꓸ ꓟꓳꓸ ꓒꓳꓹ ꓬꓲꓼ ꓡ ꓝꓲˍ ꓥꓳ꓾ ꓐꓯˍ ꓡꓳ꓿ 18 ꓖꓳ ꓕꓯ ꓢ-ꓚꓬ-ꓡꓲ-ꓬ ꓡꓰ ꓟꓴꓽ ꓗꓪ ꓝꓲ ꓓꓴ ꓔꓯ꓾ ꓕꓱ ꓟ ꓚꓵ ꓚꓵ ꓒꓬꓱꓼ ꓡ ꓟ ꓥꓪ ꓮ ꓡꓲ ꓢꓷꓸ ꓓ ꓢꓰꓽ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓟꓳꓽ ꓡꓰꓳ꓿ ꓥꓪ ꓤ ꓟꓶˍ ꓟꓲ ꓞꓲꓼ ꓪꓴꓽ ꓡꓰꓳ꓾ ꓐꓯˍ ꓡꓳ꓿ 19 ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓔꓯ꓾ ꓥꓪ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓢꓴ ꓚꓬ-ꓑꓷ-ꓡꓰ ꓥ ꓢꓲ꓾ ꓠꓴ ꓔꓯ ꓙꓲˍ ꓟ ꓓꓳꓽ ꓐꓯ ꓖꓶ ꓠꓹ ꓟ ꓝꓲ ꓩꓴ ꓡ ꓟ ꓥꓳ꓿ 20 ꓠ ꓠꓹ꓾ ꓥꓪ ꓐꓯ ꓘꓶꓽ ꓔꓯ ꓠꓴ ꓟꓽ ꓙꓵꓻ ꓠꓬꓲ ꓕꓱ ꓟꓬ ꓙꓰꓽ ꓟꓽ ꓒꓬꓱꓼ ꓡ ꓕ ꓑꓳꓸ꓾ ꓠꓴ ꓠꓽ ꓞꓳ ꓟꓶꓻˍ ꓡꓰ ꓐꓰ ꓫꓸ ꓕꓱ ꓟꓽ ꓐꓰꓼ ꓡ ꓗꓷ ꓡꓰˍ ꓥꓳ꓿ ꓦꓬꓼ ꓠꓬꓲ ꓛꓲ ꓡ ꓠꓬ ꓥꓪ ꓐꓯ ꓘꓶꓽ ꓐꓲ ꓡ ꓥꓳ꓾ ꓐꓯˍ ꓡꓳ꓿ 21 ꓑ ꓫꓬꓼ ꓐꓴ ꓠꓬ ꓢ-ꓚꓬ-ꓡꓲ-ꓬ ꓔꓯ ꓦꓴ ꓠꓬꓹ ꓔꓬ ꓢꓲ꓾ ꓬꓲ ꓠꓬ ꓢꓲꓽ ꓫꓬ ꓦꓲ ꓠꓯꓸꓼ ꓗꓪ ꓟꓶꓻ ꓤ ꓪꓽ ꓐꓶꓽ ꓡꓰ ꓠꓬꓲ ꓬꓲ ꓪꓽ ꓓꓵꓽ ꓙꓽ ꓟꓶˍ ꓡꓳ꓿ 22 ꓬꓲ ꓓꓳ ꓡ ꓕꓯ ꓬꓲ ꓪꓽ ꓔꓯ ꓫꓸ ꓕꓱ ꓟꓽ ꓐꓰꓼ ꓡ ꓠꓬꓲ꓾ ꓟꓶꓻ ꓥꓳꓽ ꓡꓵꓺ ꓖꓶ ꓡ ꓟ ꓔꓯ ꓬꓲ ꓪꓽ ꓟꓳꓻˍ ꓕꓯ꓾ ꓬꓲ ꓠꓬ ꓪꓴ-ꓢ ꓦꓲ ꓗꓪ ꓦ ꓐꓬꓱꓽ ꓕꓲ ꓫꓵꓽ ꓟꓳꓻ ꓗꓷꓳ꓾ ꓐꓰ ꓬꓲ ꓪꓽ ꓡꓳꓸ ꓓꓳ ꓡ ꓡꓳ꓿ 23 ꓢꓲꓽ ꓫꓬ ꓦꓲ ꓗꓪ ꓬꓲ ꓟꓬꓱꓽ ꓬꓰˍ ꓟ ꓦꓬꓼ ꓠꓬꓲ ꓐꓲ ꓡꓰ ꓠꓬ꓾ ꓢ-ꓚꓬ-ꓡꓲ-ꓬ ꓠꓽ ꓬꓲ ꓦꓲ ꓗꓪ ꓬꓲꓼ ꓙꓰˍ ꓡꓳ꓿ 24 ꓖꓳ ꓗꓸ ꓠꓯ ꓬꓲ ꓤꓽ ꓟꓶ ꓬꓲ-ꓡꓲ-ꓫ-ꓑꓷ ꓖꓳ ꓓꓱꓽ ꓗꓪ ꓤ ꓠꓱ ꓶꓻ ꓡꓰ ꓕꓯ꓾ ꓬꓲ-ꓡꓲ-ꓫ-ꓑꓷ ꓠꓬ ꓦ ꓐ ꓥꓪꓽ ꓟ ꓑꓬꓺ ꓔꓬ ꓢꓲ꓾ 25 ꓢꓲ ꓒꓽ ꓠꓬ ꓥꓪ ꓔꓯ ꓠꓬꓲ ꓙ ꓡꓺꓳ꓿ ꓬꓲ ꓣꓱꓽ ꓛꓰ ꓥꓪ ꓔꓯ ꓟꓳꓸ ꓖꓶ ꓡ ꓢꓲ ꓞꓳ ꓤ ꓗꓳ ꓡꓳ ꓗꓪ ꓐꓰ ꓥꓪ ꓫꓸ ꓔꓳ ꓓꓴ ꓔꓯ ꓣꓴꓻ ꓦ ꓗꓷꓳ꓾ ꓐꓯˍ ꓡꓳ꓿ 26 ꓦꓻ ꓐ ꓛꓳꓼ ꓟ ꓗꓸ ꓠꓯ꓾ ꓪꓴ-ꓢ ꓡꓰ ꓟꓴꓽ ꓗꓪ ꓝꓲ ꓓꓴ ꓚꓬ-ꓑꓷ-ꓡꓰꓼ ꓔꓯ꓾ ꓖ-ꓡꓲ-ꓡꓲ ꓟꓵꓽ ꓠ-ꓢ-ꓡꓱ ꓟꓬꓱ ꓔ ꓟ ꓡꓳ ꓒꓱ ꓗꓪ꓾ 27 ꓟ-ꓡꓲ ꓟꓬꓱ ꓔ ꓟ ꓤ ꓟꓶ ꓡꓯꓸ ꓚꓵꓺ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ ꓟ-ꓡꓲ ꓠꓬ ꓬꓳ-ꓢꓷ ꓟꓬꓱ ꓔ ꓟ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓕꓲ ꓣꓳ ꓔꓯ ꓠꓲꓹ ꓒꓴ ꓔ ꓟ ꓥ ꓡꓳ꓿ 28 ꓟꓴꓽ ꓗꓪ ꓝꓲ ꓓꓴ ꓠꓬ ꓟ-ꓡꓲ ꓔꓬ ꓗꓪ ꓓꓵꓽ ꓡꓰ ꓢꓲ꓾ ꓣꓱꓽ ꓛꓰ ꓟꓶ ꓢꓴꓳ꓾ ꓧꓪꓸ ꓧꓪ꓾ ꓢꓲ ꓒꓽ ꓠꓴˍ ꓐꓰ ꓕꓲꓽ ꓪꓺꓼ ꓔꓬ ꓡꓳ꓾ ꓐꓯˍ ꓡꓳ꓿ 29 ꓒꓵꓽ ꓗ ꓐꓯ ꓘꓶꓽ ꓕꓱ ꓟ ꓔꓯ ꓟ-ꓡꓲ ꓮꓽ ꓘꓶꓸ ꓓꓵꓽ ꓙ ꓟꓶ ꓡꓰ ꓢꓲ꓾ ꓐꓯ ꓘꓶꓽ ꓕꓱ ꓟ ꓮꓸ ꓫꓵ ꓔꓯ ꓐꓯˍ ꓟꓽ ꓢꓷ꓾ ꓐꓰ ꓓꓵꓽ ꓙ ꓫꓸ ꓔꓬ ꓡꓳ꓿ 30 ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓔꓯ꓾ ꓟ-ꓡꓲꓹꓳ꓾ ꓕꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓪꓴ-ꓢ ꓟꓲꓽ ꓙꓬ ꓗꓪ ꓣꓱꓽ ꓛꓰ ꓟꓶ ꓗꓷꓳ꓿ 31 ꓠꓴ ꓠꓬ ꓤ ꓠꓱ ꓶꓻ ꓡꓰ ꓢꓲ ꓤ ꓕꓲ ꓣꓳ ꓦꓵ ꓡ ꓥꓳ꓿ ꓬꓲ ꓔꓯ꓾ ꓬꓰ-ꓢꓴ꓾ ꓟꓬꓱꓺ ꓖꓶ ꓠ ꓗꓹ ꓡꓳ꓿ 32 ꓬꓲ ꓠꓬ ꓪꓴꓽˍ ꓟ ꓒꓬꓱꓼ ꓡ ꓥꓳ꓿ ꓬꓲ ꓔꓯ ꓠꓬ꓾ ꓟꓴꓺ ꓡꓳꓹ ꓬꓰ ꓢꓴ ꓬꓲ ꓮ ꓐꓲ꓾ ꓘꓴˍ ꓥꓳ꓿ ꓢꓲ ꓒꓽ ꓪꓴ-ꓢ ꓡꓰ ꓬꓲ ꓒꓵꓽ ꓒ ꓓ-ꓪꓵ ꓙꓵꓽ ꓠꓬꓲꓸ ꓕꓲꓺ ꓬꓲ ꓔꓯ ꓖꓶˍ ꓥꓳ꓿ 33 ꓖꓳ ꓡꓱ ꓢꓲ ꓬꓲ ꓠꓬ ꓕꓲ ꓞꓲꓼ ꓕꓲ ꓑ ꓬ-ꓗꓴ ꓞꓲꓼ ꓤ ꓡꓯꓹ ꓤ ꓐꓴ ꓪ ꓔꓲꓸ ꓣꓱꓽ ꓡ ꓥꓳ꓿ ꓬꓲ ꓗꓴꓷꓼ ꓠꓬ ꓮ ꓕꓯˍ ꓟꓲ ꓟꓽ ꓡꓳꓹ ꓬꓰ꓾ ꓐꓯˍ ꓡꓳ꓿ 34 ꓟ-ꓡꓲ ꓡꓰ ꓟꓴꓽ ꓗꓪ ꓝꓲ ꓓꓴ ꓔꓯ꓾ ꓥꓪ ꓠꓬ ꓤ ꓟꓶ ꓡꓯꓸ ꓚꓵ ꓥ ꓠꓬꓲ꓾ ꓕꓱ ꓟ ꓮ ꓡꓲ ꓒꓬꓱꓼ ꓡ ꓓ ꓢꓰꓽ?꓾ ꓐꓯ ꓖꓶˍ ꓕꓯ꓾ 35 ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓔꓯ꓾ ꓢꓲ-ꓫꓬ-ꓟ-ꓦ ꓠꓬ ꓠꓴ ꓔꓯ ꓬꓯꓼ ꓡ ꓢꓲ꓾ ꓟꓴꓺ ꓡꓳꓹ ꓬꓰ ꓢꓴ ꓬꓲ ꓪꓽ ꓠꓬꓲˍ ꓟ ꓡꓰ ꓠꓴ ꓔꓯ ꓑꓲꓸ ꓡꓰˍ ꓥꓳ꓿ ꓖꓳ ꓡꓱ ꓠꓬꓲ ꓠꓴ ꓦꓵꓻ ꓠꓹ ꓟ ꓢꓲꓽ ꓫꓬˍ ꓟ ꓤ ꓠꓱ ꓖꓳ ꓟ ꓔꓯ ꓠꓬ꓾ ꓪꓴ-ꓢ ꓮ ꓐꓲ꓾ ꓘꓴˍ ꓥꓳ꓿ 36 ꓠ ꓠꓹ꓾ ꓠꓴ ꓫꓵꓽ ꓠꓴ ꓧꓪ ꓬꓲ-ꓡꓲ-ꓫ-ꓑꓷ ꓠꓬ ꓞꓲꓼ ꓪꓴꓽ ꓡꓰˍ ꓟꓲ꓾ ꓬꓲ ꓠꓬ ꓤ ꓕꓲ ꓣꓳ ꓶꓻ ꓞꓹ ꓡꓳ꓿ ꓧꓶꓸ ꓕꓯꓽ ꓢꓴ ꓡꓰ ꓬꓲ ꓔꓯ꓾ ꓞꓳ ꓡꓱꓽ ꓟꓺ꓾ ꓐꓰ ꓘꓴˍ ꓟꓲ꓾ ꓬꓲ ꓖꓳ ꓓꓱꓽ ꓡꓲꓽˍ ꓟ ꓮ ꓟꓶ ꓦ ꓐ ꓛꓳꓼ ꓟ ꓙꓳˍ ꓡꓳ꓿ 37 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓬꓰ ꓟꓽ ꓐ ꓡ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ꓾ ꓐꓯˍ ꓡꓳ꓿ 38 ꓟ-ꓡꓲ ꓡꓰ꓾ ꓥꓪ ꓠꓬ ꓢꓲ ꓒꓽ ꓚꓳꓺ ꓟ ꓥꓳ꓿ ꓠꓴ ꓐꓯˍ ꓟ ꓡꓰ ꓐꓰ ꓥꓪ ꓖꓳ ꓓꓱꓽ ꓗꓪ ꓒꓬꓱꓼ ꓡ ꓝꓲ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓟꓴꓽ ꓗꓪ ꓝꓲ ꓓꓴ ꓬꓲ ꓔꓯˍ ꓐꓰ ꓧꓹ ꓙꓰꓳ꓿ 39 ꓖꓳ ꓗꓸ ꓠꓯꓸ ꓟ-ꓡꓲ ꓠꓬ ꓞꓼ ꓐꓰ ꓪꓽ ꓚꓲ ꓟꓵꓽ ꓗꓪ ꓟ ꓬꓴ-ꓔ ꓡꓳ ꓒꓱ ꓕꓲ ꓟ ꓗꓪ ꓙꓰ ꓛꓲ ꓬꓰ ꓠꓬ꓾ 40 ꓢ-ꓚꓬ-ꓡꓲ-ꓬ ꓦꓲ ꓗꓪ ꓓꓵꓽ ꓡꓰ ꓢꓲ ꓬꓲ-ꓡꓲ-ꓫ-ꓑꓷ ꓔꓯ ꓒꓵꓽ ꓗ ꓬꓰˍ ꓡꓳ꓿ 41 ꓟ-ꓡꓲ ꓒꓵꓽ ꓗ ꓬꓰˍ ꓟ ꓔꓯ ꓬꓲ-ꓡꓲ-ꓫ-ꓑꓷ ꓑ ꓙꓽ ꓗꓷ ꓟꓶꓽ ꓕꓯ꓾ ꓬꓲ ꓔꓯ ꓶꓻ ꓞꓹ ꓟ ꓤ ꓠꓱ ꓠꓬ ꓤ ꓘꓶ ꓗꓪ ꓔꓷꓹ ꓡꓵꓺ ꓡ ꓡꓳ꓿ ꓖꓳ ꓕꓯ ꓬꓲ-ꓡꓲ-ꓫ-ꓑꓷ ꓔꓯ ꓢꓲ-ꓫꓬ-ꓟ-ꓦ ꓐꓲ ꓡꓰ ꓢꓲ꓾ 42 ꓢꓯꓼ ꓓꓽ ꓟ ꓡꓰ꓾ ꓤ ꓟꓶ ꓤ ꓮꓽ ꓙꓵ ꓟ ꓗꓪ ꓶꓼ ꓙꓳ ꓫꓱꓹ ꓙꓳ ꓢꓴ ꓠꓬ ꓠꓴ ꓥ ꓡꓳ꓿ ꓠꓴ ꓖꓳ ꓓꓱꓽ ꓗꓪ ꓶꓻ ꓞꓹ ꓟˍ ꓟꓲ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ 43 ꓥꓪ ꓢꓲ ꓒꓽ ꓬꓲ ꓟꓹ ꓟ ꓥꓪ ꓔꓯ ꓔꓱꓹ ꓠꓬꓲ ꓡ ꓟ ꓠꓬ꓾ ꓥꓪ ꓮ ꓡꓲ ꓘꓳꓻ ꓣꓴ ꓒꓵꓽ ꓢꓰꓽ꓿ 44 ꓠꓴ ꓒꓵꓽ ꓗ ꓐꓯ ꓘꓶꓽ ꓥꓪ ꓑ ꓙꓽ ꓗꓷ ꓟꓶꓽ ꓕꓯ꓾ ꓥꓪ ꓤꓽ ꓘꓶꓻ ꓗꓪ ꓓꓯꓹ ꓟ ꓤ ꓠꓱ ꓠꓬ ꓗꓹ ꓛꓲ ꓠꓬꓲ ꓔꓷꓹ ꓡꓵꓺ ꓡꓺꓳ꓿ 45 ꓢꓲ ꓒꓽ ꓬꓲ ꓔꓯ ꓐꓯ ꓗꓷ ꓟ ꓮꓽ ꓙꓵ ꓐꓲ ꓡ ꓥꓳ꓾ ꓐꓰ ꓙꓵꓻ ꓢꓴ ꓤ ꓟꓶ ꓤꓽ ꓠꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯˍ ꓡꓳ꓿ 46 ꓖꓳ ꓕꓯ ꓟ-ꓡꓲ ꓠꓬ ꓕꓱ ꓡꓱ ꓐꓯˍ ꓡꓳ꓾ ꓥꓪ ꓶꓻ ꓟꓬ ꓠꓬ ꓢꓲ ꓒꓽ ꓔꓯ ꓫꓱꓸ ꓖꓶ ꓔꓬ ꓡꓳ꓿ 47 ꓥꓪ ꓦˍ ꓟꓲ ꓪꓴ-ꓢ ꓥꓪ ꓚꓬꓴ ꓢꓲ ꓒꓽ ꓠꓯꓸꓼ ꓗꓪ ꓗꓹ ꓛꓲꓽ ꓔꓬ ꓡꓳ꓿ 48 ꓮ ꓡꓲꓳ ꓐꓯ ꓠꓬ ꓮꓸ ꓫꓵ ꓟꓽ ꓒꓵꓽ ꓟ ꓬꓲ ꓚꓳ ꓟꓺ ꓥꓪ ꓔꓯ ꓬꓲ ꓟꓳꓻ ꓟꓵ ꓡꓺꓳ꓿ ꓕꓱ ꓡꓱ ꓖꓳ ꓑꓳꓸ ꓕꓲ ꓤꓶꓻ ꓡꓰ ꓕꓲ ꓤꓶꓻ ꓢꓴ ꓡꓰ ꓥꓪ ꓔꓯ꓾ ꓶꓼ ꓙꓳ ꓫꓱꓹ ꓙꓳ ꓢꓴ꓾ ꓐꓰ ꓘꓴˍ ꓥꓳ꓿ 49 ꓮ ꓡꓲꓳ ꓐꓯ ꓠꓬ ꓪꓽ ꓠꓬꓲˍ ꓟ ꓖꓳ ꓕꓲ ꓣꓳ ꓡꓰ ꓥꓪ ꓐꓱ ꓶ ꓟꓬꓱꓽ ꓓꓽ ꓟ ꓬꓰ ꓖꓶ ꓡꓺꓳ꓿ ꓬꓲ ꓟꓬꓱ ꓠꓬ ꓢꓲꓽ ꓫꓬˍ ꓡꓳ꓿ 50 ꓬꓲ ꓔꓯ ꓙꓳ ꓒꓵꓽ ꓢꓴ ꓕꓲ ꓤꓶꓻ ꓡꓰ ꓕꓲ ꓤꓶꓻ ꓢꓴ ꓔꓯ ꓬꓲ ꓫꓱꓸ ꓤ ꓠꓲꓹ ꓟꓳꓸ ꓖꓶˍ ꓥꓳ꓿ 51 ꓬꓲ ꓡꓯꓼ ꓪꓵꓽ ꓡꓰ ꓪꓽ ꓠꓬꓲˍ ꓟ ꓟꓬꓱꓽ ꓬꓰ ꓗꓷꓳ꓿ ꓠꓲꓹ ꓘꓹ ꓢꓴ ꓔꓯˍ ꓟꓲ ꓬꓲ ꓡꓰ ꓖꓼ ꓒꓬꓱ ꓩꓴ ꓗꓷꓳ꓿ 52 ꓬꓲ ꓠꓬ ꓙꓵꓽ ꓪ ꓙꓳ ꓢꓴ ꓔꓯ ꓙꓵꓽ ꓠꓬꓲꓸ ꓕꓲꓺ ꓗꓪ ꓐꓰ ꓣꓴꓻ ꓞꓰꓻ ꓗꓷ ꓢꓲ꓾ ꓙꓻ ꓣꓳꓽˍ ꓟ ꓡꓽ ꓞꓳ ꓔꓯ ꓓꓳꓹ ꓟꓴ ꓖꓶˍ ꓡꓳ꓿ 53 ꓦꓰꓼ ꓟꓷꓼ ꓢꓴ ꓔꓯ ꓠꓬ ꓟꓲꓻˍ ꓟ ꓜꓽ ꓓꓴ ꓡꓰ ꓐꓳ ꓡꓰ ꓝꓲ ꓢꓲ꓾ ꓞꓳ ꓐꓳ ꓔꓯ ꓠꓬ ꓬꓲ ꓖꓳꓽ ꓬꓲꓼ ꓙꓰ ꓝꓲˍ ꓡꓳ꓿ 54 ꓣꓳꓽ ꓒꓵꓽ ꓒ ꓐꓴ ꓔꓯ ꓙ ꓟꓳ ꓔ ꓟ ꓡꓰ ꓐꓰ꓾ ꓬꓲ ꓠꓬ ꓬꓲ ꓚꓳ ꓑꓸ ꓬꓲ-ꓢꓷ-ꓡꓰ ꓔꓯ ꓬꓰ ꓙ ꓡꓺꓳ꓿ 55 ꓮ-ꓐ-ꓡ-ꓦˍ ꓐꓰ ꓬꓲ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓕꓲ ꓞꓲꓼ ꓕꓲ ꓑ ꓬꓲ ꓫꓱꓸ ꓤ ꓠꓲꓹ ꓟꓳꓸ ꓖꓶꓽ ꓗꓷꓳ꓾ ꓐꓯˍ ꓡꓳ꓿ 56 ꓟ-ꓡꓲ ꓠꓬ ꓬꓲ-ꓡꓲ-ꓫ-ꓑꓷˍ ꓐꓰ ꓦꓻ ꓐ ꓢ ꓟ ꓛꓲ ꓔꓬ ꓗꓷ ꓠꓬ꓾ ꓬꓲ ꓦꓲ ꓗꓪ ꓬꓲꓼ ꓙꓰˍ ꓡꓳ꓿ 57 ꓬꓲ-ꓡꓲ-ꓫ-ꓑꓷ ꓤ ꓠꓱ ꓦꓵꓻ ꓝꓲꓸ ꓛꓲ ꓡ ꓠꓬ ꓤꓽ ꓕꓲ ꓣꓳ ꓦꓵꓻ ꓡ ꓡꓳ꓿ 58 ꓢꓲ ꓒꓽ ꓬꓲ ꓔꓯ ꓮꓺ ꓘꓶꓻ ꓛꓲ ꓫꓱꓸ ꓤˍ ꓟ ꓔꓯ ꓠꓶꓽ ꓛꓳ ꓕꓲ ꓛꓳꓺˍ ꓐꓰ ꓬꓲ ꓫꓵꓽ ꓬꓲ ꓧꓪ ꓑ ꓙꓽ ꓗꓷ ꓠꓬ꓾ ꓬꓲ ꓪꓽˍ ꓟꓲ ꓬꓲˍ ꓐꓰ ꓕꓲꓽ ꓪꓺꓼ ꓗꓹ ꓛꓲˍ ꓡꓳ꓿ 59 ꓦꓰꓼ ꓠꓬꓲ ꓕꓲ ꓠꓬꓲ ꓗꓪ꓾ ꓬꓲ ꓪꓽ ꓠꓬ ꓤ ꓠꓱ ꓤ ꓔꓯ ꓶꓺˍ ꓟ ꓗ ꓫꓵ ꓬꓰ ꓖꓶˍ ꓐꓰ ꓡꓻ ꓢꓲ꓾ ꓬꓲ ꓐꓹ ꓐ ꓔꓯˍ ꓡꓰ ꓐꓰ ꓬꓲ ꓔꓯˍ ꓟꓲ꓾ ꓢ-ꓚꓬ-ꓡꓲ-ꓬ꓾ ꓐꓰ ꓟꓬꓱꓺ ꓖꓶ ꓠꓲꓹ ꓫꓵˍ ꓡꓳ꓿ 60 ꓖꓳ ꓡꓱ ꓥ ꓟꓲ ꓬꓲ ꓟꓹ ꓟ ꓡꓰ꓾ ꓟꓽ ꓥ꓾ ꓬꓲ ꓔꓯ꓾ ꓬꓳ-ꓦ꓾ ꓟꓬꓱꓺ ꓖꓶ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ꓿ 61 ꓬꓲ ꓪꓽ ꓡꓰ ꓬꓲ ꓔꓯ꓾ ꓠꓴ ꓫꓵꓽ ꓠꓴ ꓧꓪ ꓗꓳ ꓡꓳ ꓗꓪ ꓖꓳ ꓡꓱ ꓟꓬꓱꓺ ꓔ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓾ ꓐꓯˍ ꓡꓳ꓿ 62 ꓬꓲ ꓪꓽ ꓡꓰ ꓬꓲ ꓐꓹ ꓐ ꓔꓯ ꓟꓶꓻ ꓥꓳꓽ ꓡꓵꓹ ꓢꓲ꓾ ꓬꓲ ꓔꓯ ꓮ ꓡꓲ ꓟꓬꓱꓺ ꓖꓶ ꓠꓲꓹ ꓫꓵˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 63 ꓬꓲ ꓠꓬ ꓕꓳ ꓶ ꓐꓳ ꓒꓬꓸ ꓧꓪ ꓢꓲ꓾ ꓬꓲ ꓟꓬꓱꓺ ꓠꓬ ꓬꓳ-ꓦ ꓥ ꓡꓳ꓾ ꓐꓰ ꓐꓳ ꓓꓳ ꓡ ꓠꓬꓲ꓾ ꓬꓲ ꓪꓽ ꓮꓽ ꓙꓵ ꓢꓴ ꓓꓵꓽ ꓙ ꓟꓶꓻ ꓡꓰꓳ꓿ 64 ꓖꓳ ꓕꓯ ꓞꓼ ꓐꓰ ꓢ-ꓚꓬ-ꓡꓲ-ꓬ ꓬꓲ ꓟꓷꓽ ꓠꓷꓹ ꓒꓴ ꓡ ꓢꓲ꓾ ꓡ ꓛꓱꓺˍ ꓟꓲ ꓐꓶꓻ ꓡ ꓢꓲ ꓠꓬꓲ꓾ ꓪꓴ-ꓢ ꓔꓯ ꓫꓱꓸ ꓖꓶ ꓟ ꓥꓳꓽ ꓫꓸ ꓕꓱ ꓓꓳ ꓡ ꓡꓳ꓿ 65 ꓖꓳ ꓕꓯ ꓘꓹ ꓪꓳꓽ ꓡꓳ ꓛꓳꓽ ꓢꓴ ꓮꓽ ꓙꓵ ꓓꓵꓽ ꓙ ꓟꓶ ꓡꓰ ꓢꓲ꓾ ꓓꓳꓽ ꓕꓱ ꓟ ꓠꓬ ꓬꓴ-ꓔ ꓪꓽ ꓚꓲ ꓟꓵꓽ ꓮꓽ ꓙꓵ ꓗꓪ ꓚ ꓒꓬꓱ ꓙꓰˍ ꓡꓳ꓿ 66 ꓓꓳꓽ ꓕꓱ ꓟ ꓔꓯ ꓑ ꓙꓽ ꓢꓴ ꓮꓽ ꓙꓵ ꓠꓬ꓾ ꓢꓲ ꓒꓽ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓡꓯꓼ ꓒꓯꓹ ꓠꓽ ꓤ ꓠꓱ ꓤ ꓕꓱ ꓕꓲ ꓣꓳˍ ꓐꓰ ꓓꓹ ꓠꓬꓲ꓾ ꓤ ꓠꓱ ꓕꓱ ꓟ ꓠꓬ ꓮ ꓡꓲ ꓡꓴ ꓫꓵꓽ ꓕꓲ ꓣꓳ ꓒꓬꓱꓼ ꓡ ꓥꓳ ꓪ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 67 ꓖꓳ ꓡꓱ ꓠꓬ ꓬꓲ ꓐꓹ ꓐ ꓢ-ꓚꓬ-ꓡꓲ-ꓬ ꓔꓯ ꓢꓲ-ꓫꓬ-ꓟ-ꓦ ꓐꓲ ꓡꓰ ꓢꓲ꓾ ꓟꓷꓽ ꓠꓷꓹ ꓝꓸ ꓢꓲ ꓠꓬꓲ ꓕꓱ ꓡꓱ ꓐꓯ ꓓꓳ ꓡ ꓡꓳ꓿ 68 ꓬꓲ-ꓢꓷ-ꓡꓰ ꓣꓳ ꓢꓲ ꓒꓽ ꓪꓴ-ꓢ ꓔꓯ ꓫꓱꓸ ꓖꓶ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓬꓲ ꓑ ꓫꓬꓼ ꓐꓴ ꓔꓯ ꓔꓱꓹ ꓠꓬꓲ ꓡ ꓢꓲ꓾ ꓬꓲ ꓪꓽ ꓐꓱ ꓶ ꓫꓴꓹ ꓣꓴˍ ꓟ ꓟꓬꓱꓽ ꓬꓰ ꓗꓷꓳ꓿ 69 ꓬꓲ ꓚꓳ ꓑꓸ ꓓ-ꓪꓵ ꓦꓲ ꓗꓪ ꓣꓳ ꓐꓱ ꓶ ꓪꓽ ꓠꓬꓲˍ ꓟ ꓚꓬꓴ ꓢꓲ ꓒꓽ ꓕꓲ ꓣꓳ ꓓꓳ ꓡ ꓝꓲꓳ꓿ 70 ꓕꓱ ꓟ ꓠꓬ ꓮꓽ ꓠꓱ ꓕꓯ ꓢꓲ ꓒꓽ ꓬꓲ ꓢꓲ ꓚꓰꓸ ꓔꓸ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓗꓪ ꓐꓰ ꓬꓲ ꓐꓯ ꓗꓷ ꓟ ꓡꓰ ꓐꓰ꓾ 71 ꓣꓳ ꓔꓯ ꓛꓴꓽ ꓙꓳ ꓢꓴ ꓡꓯꓼ ꓒꓯꓹ ꓗꓪ ꓐꓰ ꓚꓬꓴ ꓓꓳ ꓡ ꓠꓹ ꓟ ꓐꓰ꓾ ꓣꓳ ꓔꓯ ꓠꓲꓹ ꓜꓳ ꓢꓴ ꓡꓯꓼ ꓒꓯꓹ ꓗꓪ ꓐꓰ ꓫꓴꓹ ꓓꓳ ꓡ ꓠꓹ ꓟ꓾ 72 ꓝꓮꓲ ꓣꓳ ꓒꓵꓽ ꓒ ꓐꓴ ꓔꓯ ꓫꓱꓸ ꓤ ꓠꓲꓹ ꓟꓳꓸ ꓖꓶ ꓢꓲ꓾ ꓬꓲ ꓢꓲꓽ ꓫꓬˍ ꓟ ꓘꓶꓽ ꓫꓵꓽ ꓔꓯ ꓓꓵꓽ ꓙ ꓛꓲ ꓡ ꓠꓹ ꓟ꓾ 73 ꓣꓳ ꓒꓵꓽ ꓒ ꓮ-ꓐ-ꓡ-ꓦ ꓔꓯ ꓪꓵꓼ ꓘꓶꓽ ꓗꓪ ꓐꓰ ꓙ ꓟꓳ ꓔ ꓟ ꓡꓰ ꓐꓰ꓾ 74 - 75 ꓛꓴꓽ ꓙꓳ ꓢꓴ ꓡꓯꓼ ꓒꓯꓹ ꓗꓪ ꓐꓰ ꓣꓳ ꓔꓯ ꓚꓬꓴ ꓓꓳ ꓡ ꓢꓲ꓾ ꓙꓳ ꓓꓴ ꓟꓽ ꓙꓳ ꓙꓳ꓾ ꓣꓳ ꓢꓯꓸ ꓔꓬ ꓟ ꓦꓬꓼ ꓠꓬꓲ ꓥ ꓕ ꓑꓳꓸ ꓗꓪ ꓣꓳꓽ ꓔꓯ ꓢꓲ ꓚꓰꓸ ꓔ ꓟ ꓐꓰ ꓔꓱꓹ ꓜꓳꓽˍ ꓟ ꓠꓯꓸꓼ ꓗꓪ ꓬꓲ ꓔꓯ ꓣꓱꓽ ꓙ ꓐ ꓡ ꓠꓹ ꓟ ꓥ ꓡꓳ꓿ 76 ꓤ ꓠꓱ ꓤꓽꓳ꓾ ꓠꓴ ꓔꓯ ꓠꓽ ꓟꓴꓺ ꓡꓳꓹ ꓬꓰ ꓢꓴ ꓬꓲ ꓟꓷꓽ ꓠꓷꓹ ꓝꓸ ꓢꓴ꓾ ꓐꓰ ꓘꓴˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓢꓲ ꓒꓽ ꓙ ꓖꓴ ꓙꓽ ꓖꓶ ꓠꓹ ꓟ ꓬꓲ ꓟꓲꓽ ꓕꓯꓽ ꓢꓲ ꓗꓪ ꓙꓰˍ ꓥꓳ꓿ 77 ꓠꓴ ꓠꓬ ꓪꓴ-ꓢ ꓬꓲ ꓑ ꓫꓬꓼ ꓐꓴ ꓔꓯ꓾ ꓝꓴꓲ ꓖꓽ ꓖꓶ ꓟꓶˍ ꓟ ꓗꓪ ꓐꓰ ꓢꓯꓼ ꓟꓬ ꓝꓸˍ ꓟ ꓣꓱꓽ ꓛꓰ ꓔꓯ ꓢꓷꓸ ꓡꓰ ꓝꓲˍ ꓥꓳ꓿ 78 ꓣꓳ ꓪꓴ-ꓢ ꓬꓲ ꓠꓲꓹ ꓙꓽ ꓟꓬ ꓗꓳˍ ꓟ ꓗꓪ ꓐꓰ꓾ ꓟꓴꓽ ꓗꓪ ꓟꓲꓽ ꓟꓲ ꓓꓳ ꓡ ꓢꓲ ꓣꓳ ꓔꓯ ꓡꓬꓸ ꓖꓶ ꓡ ꓡꓳ꓿ 79 ꓕꓱ ꓟ ꓠꓬ꓾ ꓠꓯ ꓞꓲꓹˍ ꓟ ꓐꓰ ꓫꓵꓻ ꓶꓻ ꓥꓳꓽ ꓗꓪ ꓠꓬꓲ ꓠꓸ ꓔꓬ ꓢꓴ ꓐꓴ ꓔꓯ ꓡꓬꓸ ꓖꓶ ꓢꓲ꓾ ꓣꓳ ꓛꓲ ꓒꓯꓹ ꓔꓯ ꓢꓲ ꓡꓲˍ ꓟ ꓙ ꓖꓴ ꓗꓪ ꓧꓳꓽ ꓟꓳꓸ ꓖꓶ ꓠꓹ ꓟ ꓥ ꓡꓳ꓾ ꓐꓯˍ ꓡꓳ꓿ 80 ꓤ ꓠꓱ ꓤ ꓠꓬ ꓡꓯꓽ ꓫꓵ ꓪꓴꓽ ꓡ ꓢꓲ ꓦ ꓢꓯꓼ ꓙꓳ ꓡ ꓡꓳ꓿ ꓬꓲ-ꓢꓷ-ꓡꓰ ꓡꓽ ꓞꓳ ꓔꓯꓺ ꓟꓳꓸ ꓖꓶˍ ꓟ ꓦꓬꓼ ꓠꓬꓲ ꓟꓽ ꓛꓲ ꓡ ꓕ ꓑꓳꓸ꓾ ꓬꓲ ꓠꓬ ꓡꓲ ꓛꓲ ꓗꓪ ꓔꓬ ꓡꓳ꓿

ꓡꓴ-ꓗ 2

1 ꓦꓬꓼ ꓠꓬꓲ ꓖꓳ ꓟ ꓗꓪ ꓢꓲ-ꓢ ꓮ-ꓗꓴ-ꓢꓶ-ꓔꓴ ꓡꓰ ꓙꓵꓽˍ ꓟ ꓟꓵꓽ ꓮꓽ ꓙꓵ ꓗꓪ ꓔꓬ ꓢꓴ ꓵ ꓟꓬꓱ ꓐꓳ ꓠ ꓗꓹ ꓡꓳ꓾ ꓐꓰ ꓕꓵꓼ ꓪꓽ ꓖꓶ ꓩꓴ ꓗꓷˍ ꓡꓳ꓿ 2 ꓞꓳ ꓤ ꓵ ꓟꓬꓱ ꓐꓳˍ ꓟ ꓕꓱ ꓟ ꓠꓬ꓾ ꓚꓲ-ꓡꓲ-ꓠꓴꓽ ꓠꓬ ꓫꓲ-ꓡꓲ-ꓬ ꓟꓵꓽ ꓢꓲꓽ ꓒ ꓣꓱꓽˍ ꓕꓯ꓾ ꓬꓲ ꓪꓴꓸ ꓕꓲ ꓧꓪꓹ ꓐꓳˍ ꓟ ꓥ ꓡꓳ꓿ 3 ꓮꓽ ꓙꓵ ꓢꓴ ꓠꓬ ꓟꓬꓱ ꓐꓳ ꓠꓹ ꓟ꓾ ꓮꓽ ꓟ ꓡꓳ ꓒꓱ ꓗꓪ ꓮꓽ ꓟ ꓙꓰˍ ꓡꓳ꓿ 4 ꓬꓳ-ꓢꓷˍ ꓟꓲ ꓓ-ꓪꓵ ꓕꓲ ꓪꓳꓼ ꓢꓴ ꓥ ꓠꓬꓲ꓾ ꓖ-ꓡꓲ-ꓡꓲ ꓟꓵꓽ ꓠ-ꓢ-ꓡꓱ ꓡꓳ ꓒꓱ ꓗꓪ ꓐꓰ꓾ ꓬꓴ-ꓔ ꓟꓵꓽ ꓓ-ꓪꓵ ꓡꓳ ꓒꓱ ꓐꓱ-ꓡꓱ-ꓦꓱ ꓗꓪ ꓓꓯ ꓙꓰˍ ꓡꓳ꓿ 5 ꓬꓲˍ ꓐꓰ ꓬꓲ ꓔꓯ ꓖꓶ ꓔ ꓟ ꓟ-ꓡꓲˍ ꓟꓲ ꓟꓬꓱ ꓐꓳˍ ꓐꓰ ꓙꓰˍ ꓡꓳ꓿ ꓖꓳ ꓕꓯ ꓟ-ꓡꓲ ꓠꓬ ꓖꓳ ꓓꓱꓽ ꓡꓲꓽ ꓢꓲ꓾ 6 ꓬꓲ ꓪꓽ ꓖꓳ ꓗꓪ ꓔꓬ ꓕꓯ꓾ ꓟ-ꓡꓲ ꓬꓲ ꓤ ꓠꓱ ꓦꓵˍ ꓟ ꓦꓬꓼ ꓠꓬꓲ ꓛꓲ ꓡ ꓡꓳ꓿ 7 ꓬꓲ ꓠꓬ ꓤꓽ ꓪꓴꓽ ꓕꓲ ꓣꓳ ꓦꓵꓻ ꓡ ꓕꓯ꓾ ꓮ ꓑꓱꓺ ꓡꓰ ꓕꓱꓹ ꓢꓲ꓾ ꓪꓰ ꓤꓽ ꓦꓲ ꓗꓪ ꓬꓲ ꓪꓽ ꓐꓱ ꓶ ꓔꓬ ꓖꓴ ꓟꓽ ꓙꓳ ꓠꓬꓲ꓾ ꓙꓱꓽ ꓤ ꓡꓴꓻ ꓕꓴ ꓗꓪ ꓫꓵꓸ ꓔ ꓡꓳ꓿ 8 ꓖꓳ ꓕꓯ ꓖꓳ ꓕꓲ ꓟꓵꓽ ꓗꓪ ꓮ ꓣꓳ ꓡꓳꓸ ꓢꓴ ꓠꓬ ꓡꓲ ꓛꓲ ꓗꓪ꓾ ꓢ ꓘꓪ ꓕꓯ ꓮ ꓣꓳ ꓜꓴꓻ ꓔꓯ ꓦꓴꓺ ꓠꓬꓹ ꓔꓬ ꓡꓳ꓿ 9 ꓢꓲ ꓒꓽ ꓝꓲ ꓓꓴ ꓕꓲ ꓣꓳ ꓠꓬ ꓬꓲ ꓪꓽ ꓒꓻ ꓕꓲ ꓗꓪ ꓦꓰꓼ ꓡ ꓢꓲ꓾ ꓢꓲ ꓒꓽ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓬꓲ ꓪꓽ ꓚꓳ ꓡꓳ ꓗꓪ ꓡꓬꓸ ꓡ ꓠꓬꓲ ꓬꓲ ꓪꓽ ꓮꓽ ꓘꓶꓸ ꓙꓳˍ ꓡꓳ꓿ 10 ꓖꓳ ꓡꓱ ꓠꓬ ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓪꓽ ꓔꓯ꓾ ꓕꓽ ꓙꓳ꓾ ꓠ ꓠꓹ꓾ ꓥꓪ ꓠꓬ ꓞꓳ ꓫꓵꓽ ꓮꓽ ꓙꓵ ꓐꓱ ꓶ ꓮꓽ ꓘꓶꓸ ꓗꓹ ꓛꓲˍ ꓟ ꓓꓳꓽ ꓠꓴ ꓪꓽ ꓔꓯ ꓐꓯ ꓖꓶ ꓡ ꓟ ꓥꓳ꓿ 11 ꓮ ꓡꓲꓳ ꓐꓯ ꓠꓬ ꓠꓬꓲꓸ ꓠꓬꓲ ꓓ-ꓪꓵ ꓡꓳ ꓒꓱ ꓗꓪ꓾ ꓠꓴ ꓪꓽ ꓐꓱ ꓶ ꓚꓬꓴ ꓢꓲ ꓒꓽ ꓕꓲ ꓣꓳ ꓦꓵꓻ ꓔ ꓡꓳ꓿ ꓬꓲ ꓠꓬ ꓢꓲ ꓒꓽ ꓙꓲ-ꓢꓴ ꓥ ꓡꓳ꓿ 12 ꓖꓳ ꓟ ꓢꓷꓸ ꓡꓰ ꓓꓴ ꓠꓬ꓾ ꓮꓸ ꓑꓱ ꓡꓰ ꓕꓱꓹ ꓢꓲ ꓡꓴꓻ ꓕꓴ ꓗꓪ ꓫꓵꓸ ꓔ ꓟ ꓞꓳ ꓫꓵꓼ ꓤꓽ ꓕꓲ ꓣꓳ ꓠꓴ ꓪꓽ ꓟꓳˍ ꓥꓳ꓾ ꓐꓯˍ ꓡꓳ꓿ 13 ꓖꓳ ꓕꓯ ꓞꓼ ꓐꓰ ꓟꓴꓽ ꓗꓪ ꓝꓲ ꓓꓴ ꓬꓲ ꓜꓴꓻ ꓠꓬ ꓝꓲ ꓓꓴ ꓖꓳ ꓕꓲ ꓣꓳˍ ꓐꓰ ꓕꓲ ꓛꓳꓺꓼ ꓦꓰꓼ ꓡ ꓢꓲ꓾ ꓪꓴ-ꓢ ꓔꓯ ꓫꓱꓸ ꓖꓶ ꓢꓲ ꓠꓬꓲ꓾ 14 ꓟꓴ ꓡꓳꓹ ꓗꓪ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ꓾ ꓟꓲ ꓠꓯ ꓗꓪ ꓬꓲ ꓠꓲꓹ ꓒꓴˍ ꓟ ꓞꓳ ꓤ ꓔꓯ ꓢꓲ ꓡꓲ ꓟ ꓟꓶꓻ ꓝꓲ꓾ ꓐꓯˍ ꓡꓳ꓿ 15 ꓟꓴꓽ ꓗꓪ ꓝꓲ ꓓꓴ ꓐꓴ ꓬꓲ ꓪꓽ ꓔꓯ ꓧꓹ ꓗꓷ ꓢꓲ ꓟꓴꓽ ꓗꓪ ꓗꓪ ꓓꓯ ꓙꓰ ꓗꓸ ꓠꓯꓸ ꓮ ꓣꓳ ꓡꓳꓸ ꓢꓴ ꓐꓴ ꓠꓽ꓾ ꓮ ꓟꓶ ꓣꓳꓽ ꓠꓬ ꓢꓲ ꓒꓽ ꓣꓳ ꓔꓯ ꓟꓸ ꓖꓶ ꓡ ꓟ ꓐꓯ ꓘꓶꓽ ꓒꓬꓱꓼ ꓡ ꓗꓷ ꓟ ꓔꓯ ꓡꓳꓸ ꓠꓬꓲ ꓠꓹ ꓟ꓾ ꓐꓱ-ꓡꓱ-ꓦꓱ ꓗꓪ ꓙꓰ ꓡꓯ꓾ ꓐꓯ ꓡꓯꓽ ꓘꓳˍ ꓡꓳ꓿ 16 ꓬꓲ ꓪꓽ ꓖꓳ ꓗꓪ ꓠꓲꓹ ꓞ ꓙꓰ ꓗꓷ ꓠꓬ꓾ ꓟ-ꓡꓲˍ ꓐꓰ ꓬꓳ-ꓢꓷˍ ꓐꓰ ꓡꓴꓻ ꓕꓴ ꓗꓪ ꓫꓵꓸ ꓔ ꓟ ꓞꓳ ꓫꓵꓼ ꓤꓽ ꓔꓯ ꓧꓪ ꓟꓶˍ ꓡꓳ꓿ 17 ꓬꓲ ꓪꓽ ꓬꓲ ꓔꓯ ꓟꓳꓻ ꓗꓷ ꓠꓬ꓾ ꓤ ꓠꓱ ꓤ ꓔꓯ ꓖꓴ ꓢꓲ ꓬꓲ ꓪꓽ ꓔꓯ ꓐꓯ ꓖꓶ ꓡ ꓟ ꓐꓯ ꓘꓶꓽ ꓖꓳ ꓟ ꓐꓯ ꓐꓯ ꓒꓬꓱ ꓙꓰˍ ꓡꓳ꓿ 18 ꓖꓳ ꓕꓯ ꓮ ꓣꓳ ꓡꓳꓸ ꓢꓴ ꓐꓴ ꓡꓰ ꓐꓯˍ ꓟ ꓔꓯ ꓑ ꓙꓽ ꓢꓴ ꓮꓽ ꓙꓵ ꓓꓵꓽ ꓙ ꓟꓶ ꓡꓰˍ ꓡꓳ꓿ 19 ꓖꓳ ꓡꓱ ꓥ ꓟꓲ ꓟ-ꓡꓲ ꓠꓬ ꓐꓯ ꓘꓶꓽ ꓕꓱ ꓟꓬ ꓟ ꓔꓯ ꓬꓲ ꓠꓲꓹ ꓟ ꓗꓪ ꓗꓶ ꓔꓸ ꓢꓲ ꓓꓵꓽ ꓙ ꓠꓬꓲ ꓔꓬ ꓡꓳ꓿ 20 ꓮ ꓣꓳ ꓡꓳꓸ ꓢꓴ ꓐꓴ ꓠꓬ ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓪꓽ ꓔꓯ ꓐꓯ ꓖꓶ ꓡ ꓟ ꓡꓰ ꓐꓰ꓾ ꓑˍ ꓟꓲ ꓑꓺ ꓙꓽ ꓢꓲ ꓟꓳˍ ꓟꓲ ꓟꓳꓻ ꓗꓷ ꓠꓬꓲ꓾ ꓬꓲ ꓪꓽ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓬꓲ ꓫꓱꓸ ꓖꓶ ꓠꓬꓲ ꓐꓰ ꓬꓲꓼ ꓙꓰˍ ꓡꓳ꓿ 21 ꓦꓰꓼ ꓠꓬꓲ ꓕꓲ ꓠꓬꓲ ꓗꓪ꓾ ꓤ ꓠꓱ ꓤ ꓔꓯ ꓶꓺˍ ꓟ ꓗ ꓫꓵꓺ ꓬꓰˍ ꓟ ꓦꓬꓼ ꓠꓬꓲ ꓐꓲꓺ ꓡ ꓠꓬ꓾ ꓧꓶꓸ ꓕꓯ ꓬꓲ ꓟꓹ ꓟ ꓖꓳ ꓓꓱꓽ ꓗꓪ ꓟꓽ ꓶꓻ ꓡꓰ ꓢꓰ ꓕꓯˍ ꓡꓰ ꓟꓴꓽ ꓗꓪ ꓝꓲ ꓓꓴ ꓡꓰ ꓐꓯ ꓖꓶ ꓡ ꓟ ꓡꓰ ꓐꓰ꓾ ꓬꓲ ꓔꓯ꓾ ꓬꓰ-ꓢꓴ꓾ ꓟꓬꓱꓺ ꓖꓶˍ ꓡꓳ꓿ 22 ꓟꓳ-ꓫꓲ ꓙꓵꓽ ꓗ ꓔꓯ ꓛꓳ ꓢꓲ꓾ ꓢꓲꓽ ꓫꓬ ꓡꓰ ꓝꓲˍ ꓟ ꓦꓬꓼ ꓠꓬꓲ ꓐꓲ ꓡ ꓕꓯ꓾ ꓬꓲ ꓪꓽ ꓠꓬ ꓤ ꓠꓱ ꓤ ꓔꓯ ꓟꓯꓻ ꓔ ꓢꓲ꓾ ꓪꓴ-ꓢ ꓔꓯ ꓔꓲ ꓚꓰꓸ ꓖꓶ ꓠꓹ ꓟ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰˍ ꓡꓳ꓿ 23 (ꓮ ꓡꓲꓳ ꓐꓯˍ ꓠꓬ ꓢꓲ ꓒꓽ ꓙꓵꓽ ꓗ ꓗꓪ꓾ ꓬꓲ ꓪꓴꓸ ꓦꓵꓻ ꓟꓶˍ ꓟ ꓤꓽ ꓪꓴꓽ ꓮ ꓡꓲ ꓕꓲ ꓣꓳˍ ꓟꓲ ꓢꓲ ꓒꓽ ꓔꓯ ꓔꓲ ꓚꓰꓸ ꓖꓶ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓿) 24 ꓬꓲ ꓪꓽ ꓠꓬ ꓢꓲ ꓒꓽ ꓙꓵꓽ ꓗ ꓗꓪ꓾ ꓮꓸ ꓖꓴꓽ ꓕꓲ ꓜꓱꓻ꓾ ꓥ ꓠꓬ ꓓꓱꓽ ꓑꓶ ꓤꓽ ꓠꓬꓲꓽ ꓟ꓾ ꓐꓯ ꓔ ꓟ ꓡꓰ ꓐꓰ ꓪꓴ-ꓢ ꓔꓯ ꓔꓲ ꓖꓶ ꓬꓰˍ ꓡꓳ꓿ 25 ꓖꓳ ꓕꓯ ꓙꓱ-ꓣꓴ-ꓢ-ꓡꓱ ꓗꓪ ꓢꓲ-ꓟꓰ ꓟꓬꓱ ꓔ ꓢꓴ ꓕꓲ ꓣꓳ ꓔꓬ ꓡꓳ꓿ ꓕꓱ ꓕꓲ ꓣꓳ ꓠꓬ ꓔꓱꓹ ꓜꓳꓽˍ ꓟ ꓐꓰ ꓠꓲꓹ ꓒꓵꓽ ꓠꓲꓹ ꓡꓱ ꓢꓴ ꓥ ꓢꓲ꓾ ꓬꓲ-ꓢꓷ-ꓡꓰ ꓔꓯ ꓠꓲꓹ ꓗꓴꓺ ꓖꓶ ꓡ ꓢꓴ ꓔꓯ ꓦꓴ ꓠꓬꓹ ꓔꓬ ꓢꓴ ꓥ ꓢꓲ ꓠꓬꓲ꓾ ꓢꓲ-ꓫꓬ-ꓟ-ꓦˍ ꓟꓲ ꓬꓲˍ ꓐꓰ ꓔꓬ ꓡꓳ꓿ 26 ꓢꓲ ꓒꓽ ꓬꓲ ꓙꓲ-ꓢꓴ ꓔꓯ ꓟꓽ ꓟꓳꓻ ꓕ ꓑꓳꓸ ꓠꓴ ꓠꓬ ꓟꓽ ꓫꓵ ꓡ꓾ ꓐꓰ ꓢꓲ-ꓫꓬ-ꓟ-ꓦ ꓡꓰ ꓬꓲ ꓔꓯ ꓟꓳꓸ ꓖꓶ ꓔ ꓟ ꓥ ꓡꓳ꓿ 27 ꓢꓲ-ꓫꓬ-ꓟ-ꓦ ꓡꓰ ꓬꓲ ꓔꓯ ꓬꓲꓼ ꓠꓬꓲꓸ ꓖꓶꓽˍ ꓟ ꓔꓯ ꓛꓳ ꓢꓲ꓾ ꓬꓲ ꓠꓬ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓡꓰˍ ꓡꓳ꓿ ꓬꓰ-ꓢꓴ ꓬꓲ ꓐꓹ ꓐ ꓟꓹ ꓟ ꓠꓬ꓾ ꓙꓵꓽ ꓗ ꓗꓪ ꓟ ꓗ ꓫꓵ ꓐꓯˍ ꓟ ꓡꓰ ꓐꓰ ꓬꓰ ꓠꓹ ꓟ ꓤ ꓠꓱ ꓤ ꓔꓯ ꓔꓯꓹ ꓓꓵꓽ ꓡ ꓕꓯ꓾ 28 ꓢꓲ-ꓟꓰ ꓠꓬ ꓬꓰ-ꓢꓴ ꓔꓯ ꓬꓲ ꓡꓯꓼ ꓖꓳꓼ ꓗꓪ ꓔꓯꓹ ꓔ ꓢꓲ꓾ ꓪꓴ-ꓢ ꓔꓯ ꓫꓱꓸ ꓖꓶ ꓢꓲ ꓠꓬꓲ꓾ 29 ꓢꓲ ꓒꓽꓳ꓾ ꓠꓴ ꓐꓯˍ ꓟ ꓡꓰ ꓐꓰ꓾ ꓮ ꓟꓶ ꓠꓴ ꓚꓳ ꓑꓸ ꓥꓪ ꓔꓯ ꓧꓪꓸ ꓧꓪˍ ꓐꓰ ꓙꓰ ꓝꓲ ꓡꓯ꓿ 30 - 31 ꓠꓴ ꓡꓰ ꓞꓳ ꓫꓵꓽ ꓐꓴ ꓟꓲꓽ ꓕꓯꓽ ꓗꓪ ꓙꓽ ꓖꓶ ꓔ ꓟ꓾ ꓠꓴ ꓫꓴꓹ ꓣꓴˍ ꓟ ꓣꓱꓽ ꓛꓰ ꓔꓯ ꓥꓪ ꓟꓳꓻ ꓪ ꓡꓰꓳ꓿ 32 ꓬꓲ ꓠꓬ ꓐꓶꓽ ꓞꓳ ꓔꓯ ꓡꓬꓸ ꓖꓶˍ ꓟ ꓠꓬꓲ ꓟꓳꓻ ꓓꓴ ꓥ ꓢꓲ꓾ ꓠꓴ ꓑ ꓫꓬꓼ ꓬꓲ-ꓢꓷ-ꓡꓰ ꓐꓴ ꓟꓬꓱ ꓓꓳꓽ ꓥ ꓡꓳ꓾ ꓐꓯˍ ꓡꓳ꓿ 33 ꓖꓳ ꓡꓱ ꓠꓬ ꓬꓰ-ꓢꓴ ꓔꓯ ꓖꓴꓻˍ ꓟ ꓐꓯ ꓘꓶꓽ ꓕꓱ ꓟ ꓗꓪ ꓐꓰ꓾ ꓬꓲ ꓐꓹ ꓐ ꓟꓹ ꓟ ꓓꓵꓽ ꓙꓽ ꓟꓶˍ ꓡꓳ꓿ 34 ꓢꓲ-ꓟꓰ ꓡꓰ ꓬꓲ ꓪꓽ ꓔꓯ ꓶꓼ ꓥꓳꓽ ꓙꓱ ꓖꓶ ꓢꓲ ꓬꓲ ꓟꓹ ꓟ ꓟ-ꓡꓲ ꓔꓯ꓾ ꓠ ꓠꓹ꓾ ꓤ ꓠꓱ ꓕꓱ ꓟ ꓠꓬ ꓬꓲ-ꓢꓷ-ꓡꓰ ꓮꓽ ꓟꓬꓹ ꓣꓳ ꓔꓯ ꓚꓬꓴ ꓟꓶꓻ ꓝꓲ ꓠꓹ ꓟ ꓐꓰ꓾ ꓝꓮꓲ ꓮꓽ ꓟꓬꓹ ꓣꓳ ꓔꓯ ꓡꓱꓸ ꓗꓷ ꓝꓲ ꓠꓹ ꓟ ꓪꓴ-ꓢ ꓡꓰ ꓢꓲ ꓚꓰꓸ ꓔ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓽ ꓢꓴ ꓡꓰ ꓐꓯ ꓔꓳꓹ ꓡ ꓠꓯꓹ ꓟ ꓢꓷꓸ ꓡꓰ ꓓꓴ ꓒꓬꓱꓼ ꓡ ꓥꓳ꓿ 35 ꓝꓮꓲ ꓠꓬ ꓮꓽ ꓟꓬꓹ ꓣꓳ ꓓꓵꓽ ꓙˍ ꓟ ꓔꓯꓺ ꓟꓳꓸ ꓖꓶ ꓓꓳ ꓡ ꓝꓲ ꓠꓹ ꓟ꓾ ꓪꓴ-ꓢ ꓡꓰ ꓢꓲ ꓚꓰꓸ ꓔ ꓢꓴ ꓥ ꓡꓳ꓿ ꓠꓴ ꓚꓲꓸ ꓛꓬ ꓠꓲꓹ ꓟ ꓔꓯˍ ꓟꓲ ꓬꓲ ꓑꓶꓸ ꓓꓴ ꓮꓸ ꓕꓽ ꓪꓴꓸ ꓒꓲꓹ ꓡꓰ ꓗꓸ ꓙ ꓙꓰˍ ꓟ ꓡꓰ ꓐꓰ꓾ ꓗꓸ ꓬꓯꓼ ꓡ ꓥꓳ꓾ ꓐꓯˍ ꓡꓳ꓿ 36 ꓝꓮꓲ ꓬꓹ-ꓫꓱ ꓕꓲ ꓪꓳꓼ ꓢꓴ ꓩ-ꓠꓴ-ꓡꓲ ꓬꓲ ꓮꓸ ꓟꓲꓽ꓾ ꓟꓷꓽ ꓠꓷꓹ ꓝꓸ ꓟ ꓬꓹ-ꓠ ꓟꓬꓱ ꓔ ꓟ ꓞꓳ ꓟꓳꓽ ꓟꓺ ꓕꓲ ꓣꓳ ꓔꓬ ꓡꓳ꓿ ꓬꓲ ꓔꓯ ꓝꓱꓺ ꓗꓷ ꓗꓸ ꓠꓯꓸ ꓫꓵꓽ ꓘꓳꓼ ꓕꓲ ꓘꓳ ꓗꓪ ꓬꓲ ꓤꓽ ꓖꓴ ꓫꓵꓻ ꓢꓲ꓾ 37 ꓬꓲ ꓠꓬ ꓦꓰꓼ ꓞꓲ ꓡꓲ ꓘꓳꓼ ꓐꓲꓺ ꓡ ꓟ ꓟꓶꓽ ꓛꓵꓽ ꓟ ꓟꓳꓽ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓽ ꓮ ꓕꓯˍ ꓟꓲ ꓢꓲꓽ ꓫꓬ ꓦꓲ ꓗꓪ ꓐꓰ ꓟꓽ ꓓꓳ ꓙꓰ ꓙꓰ꓾ ꓜꓽ ꓓꓴ ꓚꓲꓸˍ ꓟ ꓐꓰ ꓪꓽ ꓘꓴˍ ꓟ ꓡꓰ ꓟꓳꓼ ꓡꓳ ꓢ ꓘꓪ ꓪꓴ-ꓢ ꓔꓯ ꓣꓱꓽ ꓙˍ ꓡꓳ꓿ 38 ꓖꓳ ꓕꓲ ꓙꓵꓹ ꓗꓪ ꓬꓲˍ ꓟꓲ ꓬꓲ ꓪꓽ ꓔꓬ ꓗꓪ ꓡ ꓢꓲ꓾ ꓪꓴ-ꓢ ꓔꓯ ꓫꓸ ꓟꓳ ꓢꓲ ꓠꓬꓲ꓾ ꓤ ꓠꓱ ꓤ ꓔꓯ ꓖꓴ ꓢꓲ꓾ ꓙꓱ-ꓣꓴ-ꓢ-ꓡꓱ ꓔꓯ ꓫꓴꓹ ꓣꓴ ꓡ ꓟ ꓔꓯ ꓡꓳꓸ ꓔꓬ ꓢꓴ ꓮꓽ ꓙꓵ ꓔꓯ ꓐꓯ ꓟꓸ ꓖꓶˍ ꓡꓳ꓿ 39 ꓬꓳ-ꓢꓷˍ ꓐꓰ ꓟ-ꓡꓲ ꓠꓬ ꓢꓲ ꓒꓽ ꓙꓵꓽ ꓗ ꓗꓪ ꓐꓯ ꓔ ꓟ ꓮꓽ ꓙꓵ ꓬꓰ ꓓꓳ ꓡꓰ ꓕꓯ꓾ ꓖ-ꓡꓲ-ꓡꓲ ꓟꓵ ꓬꓲ ꓪꓽ ꓚꓲꓸ ꓛꓬ ꓡꓳ ꓒꓱ ꓠ-ꓢ-ꓡꓱ ꓗꓪ ꓬꓲꓼ ꓙꓰˍ ꓡꓳ꓿ 40 ꓤ ꓠꓱ ꓤ ꓠꓬ ꓪꓴꓽ ꓡ ꓢꓲ ꓢꓯꓼ ꓙꓳ ꓡ ꓡꓳ꓿ ꓙꓽ ꓜꓲꓼ ꓠꓲꓹˍ ꓟꓲ ꓟꓬꓽ ꓡ ꓢꓲ꓾ ꓪꓴ-ꓢ ꓣꓱꓽ ꓛꓰ ꓬꓲ ꓔꓯ ꓛꓳ ꓞꓹ ꓡꓳ꓿ 41 ꓕꓲ ꓘꓳꓼ ꓡꓰ ꓕꓲ ꓘꓳꓼ ꓦꓲ-ꓘꓳ-ꓑꓮꓲ ꓬꓰˍ ꓕꓯ꓾ ꓬꓰ-ꓢꓴ ꓬꓲ ꓐꓹ ꓐ ꓟꓹ ꓟ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓡꓳ꓿ 42 ꓬꓲ ꓞꓲ ꓠꓬꓲꓽ ꓘꓳꓼ ꓐꓲ ꓡ ꓕꓯˍ ꓟꓲ꓾ ꓬꓲ ꓪꓽ ꓠꓬ ꓬꓲ ꓖꓳ ꓡꓱ ꓑꓮꓲꓽ ꓗꓪ ꓙꓰˍ ꓡꓳ꓿ 43 ꓑꓮꓲꓽ ꓬꓰ ꓓꓳ ꓡꓰ ꓢꓲ ꓬꓲ ꓪꓽ ꓬꓲꓼ ꓙꓰˍ ꓕꓯ꓾ ꓤꓽ ꓖꓴ ꓡꓯꓸ ꓤ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓔꓲꓹ ꓬꓰˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓐꓹ ꓐ ꓟꓹ ꓟ ꓠꓽ ꓟꓽ ꓢꓷꓸ꓿ 44 ꓬꓲ ꓪꓽ ꓠꓬ ꓬꓰ-ꓢꓴ ꓠꓽ ꓕꓲ ꓛꓳꓺꓼ ꓐꓰ ꓫꓱꓽ ꓢꓴ ꓗꓳ ꓡꓳ ꓗꓪ ꓙꓰ ꓔꓬ ꓡꓳ꓾ ꓐꓰ ꓓꓵꓽ ꓙ ꓢꓲ ꓕꓲ ꓠꓬꓲ ꓙ ꓖꓴ ꓫꓱꓽ ꓗꓷ ꓠꓬ꓾ ꓬꓲ ꓪꓽ ꓫꓵꓽ ꓤ ꓧꓪ ꓤˍ ꓐꓰ ꓢꓷꓸˍ ꓟ ꓡꓽ ꓞꓳ ꓗꓳ ꓡꓳ ꓗꓪ ꓬꓲ ꓔꓯ ꓧꓪ ꓠꓬꓲˍ ꓟꓲ꓾ 45 ꓧꓪ ꓟꓽ ꓟꓳꓻ ꓠꓬꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓡꓽ ꓙꓰ ꓢꓲ ꓬꓲ ꓔꓯ ꓧꓪ ꓬꓰˍ ꓡꓳ꓿ 46 ꓢ ꓠꓬꓲ ꓧꓪ ꓗꓷ ꓠꓬ ꓬꓲ ꓠꓽ ꓢꓲꓽ ꓫꓬ ꓦꓲ ꓠꓯꓸꓼ ꓗꓪ꓾ ꓟꓸ ꓒꓽ ꓐꓴˍ ꓐꓰ ꓕꓲꓽ ꓪꓺꓼ ꓠꓬꓲꓸ ꓠꓸ ꓔꓬ ꓢꓲ꓾ ꓬꓲ ꓪꓽ ꓔꓯ ꓠ ꓠꓹ ꓠꓬꓲ꓾ ꓝꓮꓲ ꓬꓲ ꓪꓽ ꓔꓯ ꓠ ꓠꓬꓲꓺ ꓠꓬꓲ ꓐꓰ ꓬꓰ ꓔꓬ ꓟ ꓗꓪ ꓬꓲ ꓔꓯ ꓧꓪ ꓟꓶˍ ꓡꓳ꓿ 47 ꓬꓲ ꓔꓯ ꓑ ꓙꓽ ꓢꓴ ꓮꓽ ꓙꓵ ꓠꓬ ꓬꓲ ꓙꓽ ꓜꓲꓼˍ ꓟ ꓐꓰ ꓬꓲ ꓒꓳꓹ ꓖꓶ ꓘꓶꓽ ꓔꓯ ꓓꓵꓽ ꓙ ꓟꓶˍ ꓡꓳ꓿ 48 ꓬꓲ ꓐꓹ ꓐ ꓟꓹ ꓟ ꓬꓲ ꓔꓯ ꓟꓳꓻ ꓗꓷ ꓠꓬ ꓓꓵꓽ ꓙ ꓟꓶ ꓢꓲ꓾ ꓬꓲ ꓟꓹ ꓟ ꓡꓰ ꓬꓲ ꓔꓯ꓾ ꓥꓪ ꓤꓽꓳ꓾ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓠꓴꓽ ꓔꓯ ꓕꓱ ꓡꓱ ꓬꓰ ꓖꓶˍ ꓡ? ꓠꓴ ꓐꓹ ꓐˍ ꓐꓰ ꓥꓪ ꓠꓬ ꓠꓴ ꓐꓱ ꓶ ꓙꓽ ꓫꓸ ꓠꓬꓲ ꓐꓰ ꓠꓴ ꓔꓯ ꓧꓪ ꓗꓷꓳ꓾ ꓐꓯˍ ꓡꓳ꓿ 49 ꓬꓲ ꓡꓰ꓾ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓧꓪˍ ꓡ? ꓥꓪ ꓠꓬ ꓥꓪ ꓐꓹ ꓐ ꓟꓬꓱꓽ ꓬꓰ ꓠ ꓗꓹ ꓟ ꓠꓴ ꓪꓽ ꓟꓽ ꓢꓷ ꓡ?꓾ ꓐꓯˍ ꓡꓳ꓿ 50 ꓖꓳ ꓡꓱ ꓥ ꓟꓲ ꓬꓲ ꓐꓯˍ ꓟ ꓐꓯ ꓘꓶꓽ ꓕꓱ ꓟ ꓔꓯ ꓬꓲ ꓪꓽ ꓟꓽ ꓙꓽ ꓜꓲꓼ꓿ 51 ꓖꓳ ꓗꓸ ꓠꓯꓸ ꓬꓲ ꓠꓬ ꓬꓲ ꓪꓽˍ ꓐꓰ ꓕꓲ ꓛꓳꓺꓼ ꓠ-ꓢ-ꓡꓱ ꓗꓪ ꓬꓯꓼ ꓙꓰ ꓢꓲ꓾ ꓬꓲ ꓪꓽ ꓙꓵꓽˍ ꓟ ꓔꓯ ꓛꓳˍ ꓡꓳ꓿ ꓬꓲ ꓟꓹ ꓟ ꓠꓽ ꓐꓯ ꓘꓶꓽ ꓕꓱ ꓟꓬ ꓟ ꓮ ꓙꓵꓽ ꓬꓲ ꓠꓲꓹ ꓟ ꓗꓪ ꓚꓲꓸ ꓔ ꓡꓳ꓿ 52 ꓬꓰ-ꓢꓴ ꓠꓬ ꓙꓽ ꓜꓲꓼ ꓠꓲꓹˍ ꓐꓰ ꓬꓲ ꓖꓳ ꓓꓱꓽˍ ꓐꓰ꓾ ꓪꓴ-ꓢˍ ꓐꓰ ꓞꓳ ꓤ ꓬꓲ ꓔꓯ ꓠꓲꓹ ꓒꓴˍ ꓟ ꓮ ꓙꓵꓽ ꓗꓪ ꓪꓴꓽ ꓡ ꓡꓳ꓿

ꓡꓴ-ꓗ 3

1 ꓢꓲ-ꓢ ꓕꓲ-ꓐꓲ-ꓡꓴ ꓪ ꓔꓲꓸ ꓣꓱꓽˍ ꓟ ꓞꓲ ꓥꓪꓽ ꓘꓳꓼ ꓕꓲ ꓘꓳꓼ ꓗꓪ꓾ ꓒ-ꓕꓲ-ꓢꓶ ꓒꓲꓹ-ꓡꓽ ꓠꓬ ꓬꓴ-ꓔ ꓫꓴ ꓙꓵꓽ ꓒ ꓓꓽ ꓟ ꓣꓱˍ ꓡꓳ꓿ ꓩꓴ-ꓡꓲ ꓠꓬ ꓖ-ꓡꓲ-ꓡꓲ ꓫꓴ ꓙꓵꓽ ꓢꓴ ꓣꓱˍ ꓡꓳ꓿ ꓬꓲ ꓠꓬꓲ ꓤꓽ ꓒꓲ-ꓡꓲ ꓠꓬ ꓬꓲ-ꓕꓴ-ꓡꓲ-ꓬ ꓫꓴˍ ꓐꓰ ꓕꓷ-ꓡ-ꓘꓳ-ꓠꓲ ꓟꓵꓽ ꓗꓪ ꓫꓴ ꓙꓵꓽ ꓢꓴ ꓣꓱˍ ꓡꓳ꓿ 2 ꓝꓮꓲ ꓡꓲ-ꓢ-ꓠꓰ ꓠꓬ ꓬ-ꓑꓲ-ꓡꓲ-ꓠꓲ ꓗꓪ ꓫꓴꓺ ꓙꓵꓽ ꓢꓴ ꓣꓱꓽˍ ꓡꓳ꓿ ꓮ-ꓠꓯ-ꓢꓲˍ ꓐꓰ ꓘꓷꓹ-ꓬ-ꓒ ꓠꓬ ꓔꓲ ꓒ ꓓꓽ ꓟ ꓣꓱꓽˍ ꓡꓳ꓿ ꓦꓬꓼ ꓠꓬꓲ ꓖꓳ ꓟ ꓗꓪ ꓢ-ꓚꓬ-ꓡꓲ-ꓬ ꓬꓲ ꓤ ꓬꓳ-ꓦ ꓔꓯ ꓡꓲ ꓛꓲ ꓗꓪ ꓪꓴ-ꓢ ꓐꓯ ꓘꓶꓽ ꓛꓲ ꓡ ꓡꓳ꓿ 3 ꓬꓳ-ꓦ ꓠꓬ ꓝꓴꓲ ꓖꓽ ꓖꓶ ꓟꓶ ꓠꓹ ꓟ꓾ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓖꓳ ꓓꓱꓽ ꓔꓲꓹˍ ꓟ ꓟꓸ ꓟꓲ ꓚ ꓟꓸ ꓖꓶˍ ꓐꓰ꓾ ꓬꓳ-ꓔ ꓬꓲꓽ ꓟ ꓚꓳ ꓡꓳ ꓗꓪ ꓟ ꓟꓵꓽ ꓗꓪ ꓡ ꓡꓳ꓿ 4 ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓕꓳ ꓶ ꓗꓪ꓾ ꓡꓲ ꓛꓲ ꓗꓪ ꓡꓽ ꓞꓳ ꓕꓲ ꓣꓳ ꓘꓴꓻ ꓔꓬ ꓟ ꓢꓯꓼ ꓠꓬ꓾ ꓢꓲ ꓒꓽ ꓙ ꓖꓴ ꓠꓴ ꓪꓽ ꓙꓽ ꓖꓶ꓾ ꓬꓲ ꓚꓱꓹ ꓔꓱꓹ ꓔꓱꓹꓼ ꓐꓰ ꓫꓬꓹ꓿ 5 ꓡꓳꓻ ꓘꓴꓽ ꓥ ꓕ ꓑꓳꓸ ꓔꓯ ꓡꓴꓽ ꓐꓲ ꓡ ꓝꓲ ꓢꓲ꓾ ꓪꓽ ꓡꓴꓸ ꓪꓽ ꓔꓺ ꓮꓽ ꓙꓵ ꓔꓯ ꓱ' ꓡꓰ ꓝꓲˍ ꓥꓳ꓿ ꓖꓳꓼ ꓖꓳꓼ ꓧꓶꓸ ꓧꓶ ꓟ ꓔꓯ ꓔꓱꓹ ꓡꓰ ꓝꓲ ꓢꓲ꓾ ꓟꓴ ꓟꓴ ꓱꓺ ꓱ ꓟ ꓙ ꓖꓴ ꓠꓬ ꓓꓰ ꓓꓰˍ ꓡꓰꓽ ꓒꓬꓱꓼ ꓡ ꓥꓳ꓿ 6 ꓞꓳ ꓫꓵꓽ ꓥ ꓕ ꓑꓳꓸ ꓠꓬ ꓪꓴ-ꓢ ꓬꓲ ꓢꓯꓼ ꓟꓬ ꓝꓸ ꓟ ꓣꓱꓽ ꓛꓰ ꓔꓯ ꓟꓳꓻ ꓪˍ ꓥꓳ꓾ ꓐꓰ ꓐꓳ ꓔ ꓟ ꓐꓯ ꓘꓶˍ ꓡꓰ ꓐꓰ ꓒꓬꓱꓼ ꓡ ꓟ ꓥꓳ꓿ 7 ꓬꓳ-ꓦ ꓡꓰ꓾ ꓖꓳ ꓓꓱꓽ ꓔꓲꓹ ꓟꓶꓻ ꓡꓰ ꓠꓹ ꓟ ꓬꓲ ꓔꓯ ꓡ ꓢꓴ ꓞꓳ ꓜꓴꓻ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓾ ꓓꓳꓼ ꓩꓴ ꓬꓲ ꓤ ꓐꓴꓳ꓾ ꓡ ꓠꓹ ꓟ ꓠꓲꓹ ꓟ ꓦꓶˍ ꓟ ꓔꓯˍ ꓐꓰ ꓛꓰꓹ ꓙꓰ ꓠꓹ ꓟ꓾ ꓮꓽ ꓟ ꓡꓰ ꓠꓴ ꓪꓽ ꓔꓯ ꓬꓲꓼ ꓠꓬꓲꓸ ꓖꓶˍ ꓡ? 8 ꓓꓵꓽ ꓙ ꓒꓳꓹ ꓬꓲꓼ ꓡ ꓟ ꓔꓯ ꓪꓽˍ ꓟ ꓟꓬꓱꓽ ꓬꓰ ꓓꓳ ꓡꓯ꓿ ꓠꓴ ꓪꓽ ꓠꓬ꓾ ꓣꓳ ꓒꓵꓽ ꓒ ꓠꓽ ꓮ-ꓐ-ꓡ-ꓦ ꓥ ꓡꓳ꓾ ꓕꓽ ꓐꓯ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓪꓴ-ꓢ ꓠꓬ Bꓸ ꓛꓲ ꓕꓱ ꓟꓬ ꓟ ꓔꓯ꓾ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓒꓬꓱꓼ ꓡ ꓝꓲ ꓐ ꓡ ꓡꓳ꓿ 9 ꓮꓸ ꓞꓳꓹ ꓠꓬ ꓮ ꓟꓶꓺˍ ꓡꓰ ꓢꓲꓹ ꓜꓲꓻ ꓬꓲ ꓚꓰꓺ ꓗꓪ ꓟꓳꓸ ꓞꓹ ꓡꓳ꓿ ꓙꓲˍ ꓟ ꓢꓶꓹ ꓢꓶꓽ ꓟꓽ ꓓꓱꓼˍ ꓟ ꓢꓲꓹ ꓜꓲꓻ ꓮꓽ ꓙꓵ ꓘꓷꓹ ꓩꓴ ꓗꓷ ꓢꓲ꓾ ꓮꓸ ꓔꓳꓸ ꓗꓪ ꓡꓳ ꓧꓳꓽ ꓗꓷˍ ꓥꓳ꓾ ꓐꓯ ꓖꓶˍ ꓡꓳ꓿ 10 ꓞꓳ ꓜꓴꓻ ꓡꓰ ꓬꓲ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓠꓴꓽ ꓮ ꓡꓲ ꓬꓰ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 11 ꓬꓳ-ꓦ ꓡꓰ ꓬꓲ ꓪꓽ ꓔꓯ꓾ ꓐꓵ ꓞꓶꓽ ꓠꓬꓲꓽ ꓘꓳꓹ ꓙꓳ ꓢꓴ ꓠꓬ ꓟꓽ ꓙꓳ ꓢꓴ ꓔꓯ ꓐꓱꓻ ꓖꓶ꓿ ꓜꓽ ꓓꓴ ꓙꓳ ꓢꓴˍ ꓟꓲ ꓟꓽ ꓙꓳ ꓢꓴ ꓔꓯ ꓖꓶ ꓜꓽ꓾ ꓐꓰ ꓒꓳꓹ ꓖꓶˍ ꓡꓳ꓿ 12 ꓝꓲꓸ ꓫ ꓢꓴˍ ꓟꓲ ꓖꓳ ꓓꓱꓽ ꓔꓲꓹ ꓟꓶ ꓠꓹ ꓟ ꓡ ꓢꓲ꓾ ꓟꓸ ꓒꓽꓳ꓾ ꓥꓪ ꓠꓴꓽ ꓮ ꓡꓲ ꓬꓰ ꓠ ꓗꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 13 ꓬꓳ-ꓦ ꓡꓰ꓾ ꓠꓴ ꓪˍ ꓟꓲ ꓐꓯ ꓞꓷꓹ ꓔ ꓟ ꓕꓯꓽ ꓢꓲ ꓕꓽ ꓧꓪ꓾ ꓐꓯ ꓖꓶˍ ꓡꓳ꓿ 14 ꓟꓯꓼ ꓤˍ ꓟꓲ ꓬꓲ ꓔꓯ꓾ ꓥꓪ ꓠꓴꓽ ꓡꓲS꓾ ꓮ ꓡꓲ ꓬꓰ ꓠ ꓗꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓳ-ꓦ ꓡꓰ꓾ ꓢꓴ ꓔꓯ ꓜꓲꓽ ꓜꓲ ꓑꓰꓹ ꓑꓰ ꓕꓽ ꓬꓰ꓿ ꓢꓴ ꓔꓯ ꓮꓽ ꓔꓳ ꓕꓽ ꓓꓰꓺ꓿ ꓠꓴ ꓪꓽ ꓟꓶˍ ꓟ ꓪꓽ ꓒꓵꓽ ꓔꓯ ꓠꓲꓹ ꓘꓪꓽ ꓫꓵ꓾ ꓐꓯ ꓖꓶˍ ꓡꓳ꓿ 15 ꓑ ꓫꓬꓼ ꓐꓴ ꓠꓬ ꓙꓲ-ꓢꓴ ꓡ ꓠꓹ ꓟ ꓔꓯ ꓦꓴ ꓠꓬꓹ ꓔꓬ ꓟ ꓥ ꓠꓬꓲ꓾ ꓮꓽ ꓙꓵ ꓢꓴ ꓠꓲꓹ ꓟ ꓗꓪ꓾ ꓬꓳ-ꓦ ꓠꓬ ꓙꓲ-ꓢꓴ ꓖꓳ ꓕꓲ ꓣꓳ ꓥ ꓟꓽ ꓥ꓾ ꓐꓰ ꓓꓵꓽ ꓙ ꓠꓬꓲ ꓔꓬ ꓡꓳ꓿ 16 ꓬꓳ-ꓦ ꓡꓰ ꓬꓲ ꓪꓽ ꓮꓽ ꓙꓵ ꓢꓴ ꓔꓯ꓾ ꓥꓪ ꓠꓽ ꓠꓴ ꓪꓽ ꓔꓯ ꓬꓲꓻ ꓙꓬ ꓗꓪ ꓖꓳ ꓓꓱꓽ ꓔꓲꓹ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓢꓶꓸ ꓟꓽ ꓞꓲ ꓪꓽ ꓠꓬꓲˍ ꓟ ꓕꓲ ꓣꓳ ꓡꓻ ꓥꓳ꓿ ꓥꓪ ꓠꓬ ꓬꓲ ꓛꓲꓺ ꓠꓲ ꓦꓲ ꓚ ꓒꓶꓻ ꓖꓶ ꓠꓹ ꓟˍ ꓟꓲ ꓟꓽ ꓒꓵꓽ꓿ ꓬꓲ ꓠꓽ ꓢꓲ-ꓫꓬ-ꓟ-ꓦˍ ꓐꓰ ꓮꓸ ꓔꓳꓸ ꓡꓰ ꓠꓴ ꓪꓽ ꓔꓯ ꓔꓲꓹ ꓖꓶ ꓡ ꓥꓳ꓿ 17 ꓬꓲ ꓡꓯꓼ ꓒꓯꓹ ꓗꓪ ꓪꓺ ꓟ ꓔꓯꓹ ꓔ ꓢꓲ꓾ ꓫꓪ ꓓꓶꓽ ꓓꓰ ꓔꓯ ꓫꓬꓻ ꓡꓰ ꓝꓲˍ ꓥꓳ꓿ ꓫꓪ ꓠꓬ ꓫꓪ ꓗꓹ ꓗꓪ ꓫꓺ ꓔ ꓥꓳ꓿ ꓬꓲ ꓒꓲꓻ ꓠꓽ ꓟꓽ ꓫꓵꓻ ꓮ ꓔꓳꓸ ꓗꓪ ꓛꓴꓻ ꓗꓷˍ ꓥꓳ꓾ ꓐꓯˍ ꓡꓳ꓿ 18 ꓬꓳ-ꓦ ꓠꓬ ꓶꓼ ꓓꓳ ꓫꓱꓹ ꓓꓳ ꓟꓸ ꓟꓲꓽ ꓚ ꓟꓸ ꓖꓶˍ ꓟ ꓐꓰ ꓕꓲ ꓛꓳꓺꓼ꓾ ꓠꓱꓸ ꓐꓯ ꓐꓯ ꓘꓶꓽ ꓮꓽ ꓟꓬꓹ ꓡꓰ ꓑ ꓫꓬꓼ ꓐꓴ ꓔꓯ ꓘꓶꓸ ꓖꓶˍ ꓡꓳ꓿ 19 ꓖꓳ ꓡꓱ ꓥ ꓟꓲ ꓫꓴꓺ ꓙꓵꓽ ꓒ ꓩꓴ-ꓡꓲ ꓠꓬ ꓬꓲ ꓠꓬꓲ ꓤ ꓒꓲ-ꓡꓲ ꓤ ꓟꓶꓻ ꓩꓴ-ꓡꓳ-ꓓꓲ ꓔꓯ ꓫˍ ꓟ ꓐꓰ꓾ ꓬꓲ ꓬꓰˍ ꓟ ꓥꓶˍ ꓟ ꓠꓱꓸ ꓐꓯꓼ ꓟꓬꓱꓽ ꓮꓽ ꓙꓵ ꓑꓶꓸ ꓓꓴ꓾ ꓬꓳ-ꓦ ꓡꓰ ꓬꓲ ꓔꓯ ꓕꓼˍ ꓠꓬꓲ꓾ 20 ꓬꓳ-ꓦ ꓔꓯ ꓐꓱ ꓓꓴꓽ ꓗꓪ ꓐꓱ ꓗꓷˍ ꓟ ꓕꓱ ꓕꓲ ꓫꓵˍ ꓟꓲ ꓬꓰ ꓡꓴꓽ ꓡ ꓡꓳ꓿ 21 ꓑ ꓫꓬꓼ ꓐꓴ ꓔꓯ ꓖꓳ ꓓꓱꓽ ꓔꓲꓹ ꓖꓶ ꓔꓬ ꓟ ꓗꓪ꓾ ꓬꓰ-ꓢꓴˍ ꓟꓲ ꓖꓳ ꓓꓱꓽ ꓔꓲꓹ ꓟꓶꓻ ꓡꓰˍ ꓡꓳ꓿ ꓖꓳ ꓡꓱ ꓢꓲ꓾ ꓬꓲ ꓪꓽ ꓘꓴ ꓔꓬ ꓕꓯ ꓟꓴꓽ ꓗꓪ ꓒꓴ ꓡ ꓢꓲ ꓠꓬꓲ꓾ 22 ꓢꓲ-ꓫꓬ-ꓟ-ꓦ ꓠꓬ ꓮꓸ ꓖꓴꓽˍ ꓡꓰ ꓐꓰ ꓬꓲ ꓔꓯ ꓥꓳꓽ ꓡ ꓡꓳ꓿ ꓖꓳ ꓕꓯ ꓟꓴꓽ ꓗꓪ ꓗꓪ ꓐꓰ ꓢꓯꓼ ꓕꓲ ꓟ ꓓꓳ ꓡ ꓢꓲ꓾ ꓠꓴ ꓠꓬ ꓥꓪ ꓠꓲꓹ ꓠꓵˍ ꓟ ꓮ ꓐꓲ ꓥ ꓡꓳ꓿ ꓠꓴ ꓔꓯ ꓥꓪ ꓮꓽ ꓘꓶꓸ ꓠꓲꓹ ꓒꓴˍ ꓡꓳ꓾ ꓐꓯˍ ꓡꓳ꓿ 23 ꓬꓰ-ꓢꓴ ꓟꓸ ꓟꓲꓽ ꓟꓸ ꓪꓴꓸ ꓔꓴˍ ꓕꓯ꓾ ꓬꓲ ꓠꓬ ꓢ ꓞꓲ ꓘꓳꓼ ꓖꓼ ꓡꓯꓼ ꓖꓼ ꓙꓲ ꓙꓳˍ ꓡꓳ꓿ ꓢꓴ ꓠꓬ꓾ ꓬꓲ ꓠꓽ ꓬꓳ-ꓢꓷ ꓬꓲ ꓤ ꓥꓳ꓾ ꓓꓵꓽ ꓙˍ ꓡꓳ꓿ ꓬꓳ-ꓢꓷ ꓠꓬ ꓫꓲ-ꓡꓲꓽ ꓬꓲ ꓤ ꓥꓳ꓿ 24 ꓫꓲ-ꓡꓲꓽ ꓠꓬ ꓟ-ꓕꓲ-ꓕ ꓬꓲ ꓤ ꓥꓳ꓿ ꓟ-ꓕꓲ-ꓕ ꓠꓬ ꓡꓱ-ꓬꓲ ꓬꓲ ꓤ ꓥꓳ꓿ ꓡꓱ-ꓬꓲ ꓠꓬ ꓟꓷꓽ-ꓚꓲ ꓬꓲ ꓤ ꓥꓳ꓿ ꓟꓷꓽ-ꓚꓲ ꓠꓬ ꓙ-ꓠ ꓬꓲ ꓤ ꓥꓳ꓿ ꓙ-ꓠ ꓠꓬ ꓬꓳ-ꓢꓷ ꓬꓲ ꓤ ꓥꓳ꓿ 25 ꓬꓳ-ꓢꓷ ꓠꓬ ꓟ-ꓕ-ꓕꓲ-ꓬ ꓬꓲ ꓤ ꓥꓳ꓿ ꓟ-ꓕ-ꓕꓲ-ꓬ ꓠꓬ ꓮ-ꓟꓳ-ꓢꓲ ꓬꓲ ꓤ ꓥꓳ꓿ ꓮ-ꓟꓳ-ꓢꓲ ꓠꓬ ꓠꓰ-ꓬꓴ-ꓟꓷ ꓬꓲ ꓤ ꓥꓳ꓿ ꓠꓰ-ꓬꓴ-ꓟꓷ ꓠꓬ ꓬꓲ-ꓢꓶ-ꓡꓲ ꓬꓲ ꓤ ꓥꓳ꓿ ꓬꓲ-ꓢꓶ-ꓡꓲ ꓠꓬ ꓠꓺ-ꓖꓷ ꓬꓲ ꓤ ꓥꓳ꓿ 26 ꓠ-ꓖꓷ ꓠꓬ ꓟ-ꓬ ꓬꓲ ꓤ ꓥꓳ꓿ ꓟ-ꓬ ꓠꓬ ꓟ-ꓕ-ꓕꓲ-ꓬ ꓬꓲ ꓤ ꓥꓳ꓿ ꓟ-ꓕ-ꓕꓲ-ꓬ ꓠꓬ ꓢꓲ-ꓟꓲꓽ ꓬꓲ ꓤ ꓥꓳ꓿ ꓢꓲ-ꓟꓲ ꓠꓬ ꓬꓳ-ꓢꓷ-ꓘꓷ ꓬꓲ ꓤ ꓥꓳ꓿ ꓬꓳ-ꓢꓷ-ꓘꓷ ꓠꓬ ꓙꓳ-ꓓ ꓬꓲ ꓤ ꓥꓳ꓿ 27 ꓙꓳ-ꓓ ꓠꓬ ꓬꓳ-ꓬ-ꓠ ꓬꓲ ꓤ ꓥꓳ꓿ ꓬꓳ-ꓬ-ꓠ ꓠꓬ ꓡꓲ-ꓢ ꓬꓲ ꓤ ꓥꓳ꓿ ꓡꓲ-ꓢ ꓠꓬ ꓢꓳ-ꓡꓳ-ꓑ-ꓑꓷꓽ ꓬꓲ ꓤ ꓥꓳ꓿ ꓢꓳ-ꓡꓳ-ꓑ-ꓑꓷ ꓠꓬ ꓢ-ꓡ-ꓕꓰ ꓬꓲ ꓤ ꓥꓳ꓿ ꓢ-ꓡ-ꓕꓰ ꓠꓬ ꓠꓰ-ꓡꓲ ꓬꓲ ꓤ ꓥꓳ꓿ 28 ꓠꓰ-ꓡꓲ ꓠꓬ ꓟꓷ-ꓚꓲꓺ ꓬꓲ ꓤ ꓥꓳ꓿ ꓟꓷ-ꓚꓲ ꓠꓬ ꓬ-ꓔꓲ ꓬꓲ ꓤ ꓥꓳ꓿ ꓬ-ꓔꓲꓺ ꓠꓬ ꓗꓳ-ꓢꓽ ꓬꓲ ꓤ ꓥꓳ꓿ ꓗꓳ-ꓢ ꓠꓬ ꓬꓲ-ꓟꓳ-ꓓꓽ ꓬꓲ ꓤ ꓥꓳ꓿ ꓬꓲ-ꓟꓳ-ꓓ ꓠꓬ ꓱ-ꓣ ꓬꓲ ꓤ ꓥꓳ꓿ 29 ꓱ-ꓣ ꓠꓬ ꓬꓳ-ꓫꓴ ꓬꓲ ꓤ ꓥꓳ꓿ ꓬꓳ-ꓫꓴ ꓠꓬ ꓬꓲ-ꓡꓲ-ꓰ-ꓜꓷ ꓬꓲ ꓤ ꓥꓳ꓿ ꓬꓲ-ꓡꓲ-ꓰ-ꓜꓷ ꓠꓬ ꓬꓳ-ꓡꓲꓽ ꓬꓲ ꓤ ꓥꓳ꓿ ꓬꓳ-ꓡꓲꓽ ꓠꓬ ꓟ-ꓕꓲ-ꓕ ꓬꓲ ꓤ ꓥꓳ꓿ ꓟ-ꓕꓲ-ꓕ ꓠꓬ ꓡꓱ-ꓬꓲ ꓬꓲ ꓤ ꓥꓳ꓿ 30 ꓡꓱ-ꓬꓲ ꓠꓬ ꓢꓲ-ꓟꓰ ꓬꓲ ꓤ ꓥꓳ꓿ ꓢꓲ-ꓟꓰ ꓠꓬ ꓬꓴ-ꓔ ꓬꓲ ꓤ ꓥꓳ꓿ ꓬꓴ-ꓔ ꓠꓬ ꓬꓳ-ꓢꓷ ꓬꓲ ꓤ ꓥꓳ꓿ ꓬꓳ-ꓢꓷ ꓠꓬ ꓬꓳ-ꓠ-ꓟꓴ ꓬꓲ ꓤ ꓥꓳ꓿ ꓬꓳ-ꓠ-ꓟꓴ ꓠꓬ ꓬꓲ-ꓡꓲ-ꓬ-ꓘꓷ ꓬꓲ ꓤ ꓥꓳ꓿ 31 ꓬꓲ-ꓡꓲ-ꓬ-ꓘꓷ ꓠꓬ ꓟꓲ-ꓡꓳ-ꓬ ꓬꓲ ꓤ ꓥꓳ꓿ ꓟꓲ-ꓡꓳ-ꓬ ꓠꓬ ꓟꓱ-ꓠꓽ ꓬꓲ ꓤ ꓥꓳ꓿ ꓟꓱ-ꓠ ꓠꓬ ꓟ-ꓓ-ꓕ ꓬꓲ ꓤ ꓥꓳ꓿ ꓟ-ꓓ-ꓕ ꓠꓬ ꓠ-ꓔ-ꓠ ꓬꓲ ꓤ ꓥꓳ꓿ ꓠ-ꓔ-ꓠ ꓠꓬ ꓓ-ꓪꓵ ꓬꓲ ꓤ ꓥꓳ꓿ 32 ꓓ-ꓪꓵ ꓠꓬ ꓬꓰ-ꓫꓲ ꓬꓲ ꓤ ꓥꓳ꓿ ꓬꓰ-ꓫꓲ ꓠꓬ ꓳ-ꓐꓷ ꓬꓲ ꓤ ꓥꓳ꓿ ꓳ-ꓐꓷ ꓠꓬ ꓐꓳ-ꓮ-ꓢꓶ ꓬꓲ ꓤ ꓥꓳ꓿ ꓐꓳ-ꓮ-ꓢꓶ ꓠꓬ ꓢ-ꓟꓱ ꓬꓲ ꓤ ꓥꓳ꓿ ꓢ-ꓟꓱ ꓠꓬ ꓠ-ꓢꓷ ꓬꓲ ꓤ ꓥꓳ꓿ 33 ꓠ-ꓢꓷ ꓠꓬ ꓬ-ꓟꓲ-ꓠ-ꓓ ꓬꓲ ꓤ ꓥꓳ꓿ ꓬ-ꓟꓲ-ꓠ-ꓓ ꓠꓬ ꓮ-ꓣ-ꓟꓷ ꓬꓲ ꓤ ꓥꓳ꓿ ꓮ-ꓣ-ꓟꓷ ꓠꓬ ꓧꓷ-ꓞꓷ-ꓠꓳ ꓬꓲ ꓤ ꓥꓳ꓿ ꓧꓷ-ꓞꓷ-ꓠꓳ ꓠꓬ ꓩ-ꓡꓷ-ꓢꓶ ꓬꓲ ꓤ ꓥꓳ꓿ ꓩ-ꓡꓷ-ꓢꓶ ꓠꓬ ꓬꓴ-ꓔ ꓬꓲ ꓤ ꓥꓳ꓿ 34 ꓬꓴ-ꓔ ꓠꓬ ꓬ-ꓗꓴ ꓬꓲ ꓤ ꓥꓳ꓿ ꓬ-ꓗꓴ ꓠꓬ ꓬꓲ-ꓢ ꓬꓲ ꓤ ꓥꓳ꓿ ꓬꓲ-ꓢ ꓠꓬ ꓮ-ꓐ-ꓡ-ꓦ ꓬꓲ ꓤ ꓥꓳ꓿ ꓮ-ꓐ-ꓡ-ꓦ ꓠꓬ ꓕ-ꓣ ꓬꓲ ꓤ ꓥꓳ꓿ ꓕ-ꓣ ꓠꓬ ꓠ-ꓧꓳ ꓬꓲ ꓤ ꓥꓳ꓿ 35 ꓠ-ꓧꓳ ꓠꓬ ꓢꓲ-ꓣꓴ ꓬꓲ ꓤ ꓥꓳ꓿ ꓢꓲ-ꓣꓴ ꓠꓬ ꓣ-ꓪꓴ ꓬꓲ ꓤ ꓥꓳ꓿ ꓣ-ꓪꓴ ꓠꓬ ꓩꓽ-ꓡꓷꓽ ꓬꓲ ꓤ ꓥꓳ꓿ ꓩ-ꓡꓷ ꓠꓬ ꓫꓲ-ꓑꓷꓽ ꓬꓲ ꓤ ꓥꓳ꓿ ꓫꓲ-ꓑꓷ ꓠꓬ ꓫ-ꓡ ꓬꓲ ꓤ ꓥꓳ꓿ 36 ꓫ-ꓡ ꓠꓬ ꓗꓷ-ꓠꓽ ꓬꓲ ꓤ ꓥꓳ꓿ ꓗꓷ-ꓠ ꓠꓬ ꓬ-ꓩ-ꓫ-ꓓ ꓬꓲ ꓤ ꓥꓳ꓿ ꓬ-ꓩ-ꓫ-ꓓ ꓠꓬ ꓫꓱ-ꓟꓷ ꓬꓲ ꓤ ꓥꓳ꓿ ꓫꓱ-ꓟꓷ ꓠꓬ ꓠꓳ-ꓪ ꓬꓲ ꓤ ꓥꓳ꓿ ꓠꓳ-ꓪ ꓠꓬ ꓡ-ꓟꓷꓽ ꓬꓲ ꓤ ꓥꓳ꓿ 37 ꓡ-ꓟꓷ ꓠꓬ ꓟ-ꓕꓴ-ꓢ-ꓡ ꓬꓲ ꓤ ꓥꓳ꓿ ꓟ-ꓕꓴ-ꓢ-ꓡ ꓠꓬ ꓬꓲꓼ-ꓠꓽ ꓬꓲ ꓤ ꓥꓳ꓿ ꓬꓲ-ꓠ ꓠꓬ ꓬ-ꓡꓰꓼ ꓬꓲ ꓤ ꓥꓳ꓿ ꓬ-ꓡꓰ ꓠꓬ ꓟꓯ-ꓧꓷ-ꓡꓰ-ꓡꓷ ꓬꓲ ꓤ ꓥꓳ꓿ ꓟꓯ-ꓧꓷ-ꓡꓰ-ꓡꓷ ꓠꓬ ꓗꓷ-ꓠ ꓬꓲ ꓤ ꓥꓳ꓿ 38 ꓗꓷ-ꓠ ꓠꓬ ꓬꓲ-ꓠꓳ-ꓢꓲ ꓬꓲ ꓤ ꓥꓳ꓿ ꓬꓲ-ꓠꓳ-ꓢꓲ ꓠꓬ ꓢꓷ-ꓕꓱ ꓬꓲ ꓤ ꓥꓳ꓿ ꓢꓷ-ꓕꓱ ꓠꓬ ꓮꓸ-ꓓꓯꓽ ꓬꓲ ꓤ ꓥꓳ꓿ ꓮ-ꓓꓯ ꓠꓬ ꓪꓴ-ꓢ ꓬꓲ ꓤ ꓥꓳ꓿

ꓡꓴ-ꓗ 4

1 ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓐꓲ ꓞꓹ ꓢꓲ꓾ ꓬꓳ-ꓔ ꓬꓲꓽ ꓟ ꓗꓪ ꓐꓰ ꓬꓲꓼ ꓡ ꓗꓸ ꓠꓯ꓾ ꓢꓲ-ꓫꓬ-ꓟ-ꓦ ꓡꓰ ꓬꓲ ꓔꓯ ꓡꓲ ꓛꓲ ꓗꓪ ꓡꓲ ꓞꓲ ꓠꓬꓲ ꓧꓳꓽ ꓔꓬ ꓕꓯ꓾ 2 ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓫꓵꓽ ꓠꓬꓲˍ ꓡꓳ꓿ ꓬꓰ-ꓢꓴ ꓠꓬ ꓟꓽ ꓜꓽ ꓟꓽ ꓓꓳꓻ ꓡꓲ ꓞꓲ ꓦꓬꓼ ꓡꓲ ꓞꓲ ꓠꓬꓲ ꓔꓬ ꓗꓷ ꓠꓬ ꓦꓰ ꓟꓷꓼˍ ꓡꓳ꓿ 3 ꓖꓳ ꓕꓯ ꓠꓲꓽ ꓪ ꓔꓲꓸ ꓡꓰ ꓬꓰ-ꓢꓴ ꓔꓯ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ꓾ Bꓸ ꓛꓲ ꓕꓱ ꓕꓲ ꓘꓴꓸ ꓔꓯ ꓑ ꓑ ꓒꓬꓱꓼ ꓡ ꓠꓹ ꓟ ꓕꓵꓼ ꓪꓽ ꓖꓶ ꓟꓴꓽ꓾ ꓐꓯˍ ꓡꓳ꓿ 4 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶꓽ ꓢꓲ꓾ ꓞꓳ ꓤꓽ ꓠꓬ ꓜꓽ ꓓꓴ ꓗꓪ ꓐꓰˍ ꓡꓰꓽ ꓢꓯꓸ ꓔꓬ ꓟ ꓟꓽ ꓥ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ 5 ꓖꓳ ꓡꓱ ꓠꓬ ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓟꓴˍ ꓟ ꓕꓲ ꓖ ꓗꓪ ꓧꓳꓽ ꓓꓯ ꓙꓰ ꓢꓲ꓾ ꓟꓵꓽ ꓗꓳꓹ ꓓꓵ ꓓꓵ ꓟ ꓗꓴꓷꓼ ꓮꓽ ꓙꓵ ꓡꓱꓸꓼ ꓬꓲ ꓔꓯ ꓕꓲ ꓑꓹ ꓤ ꓖꓴ ꓟꓸ ꓖꓶ ꓢꓲ ꓠꓬꓲ꓾ 6 ꓙꓵꓽ ꓪˍ ꓐꓰ ꓟꓬꓱꓺ ꓓꓳꓽ ꓕꓱ ꓟ ꓮꓽ ꓙꓵ ꓥꓪ ꓡꓰ ꓠꓴ ꓔꓯ ꓖꓶˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ ꓥꓪ ꓔꓯ ꓡꓯꓼ ꓙꓱ ꓖꓶꓽ ꓔ ꓟ ꓥ ꓠꓬꓲ꓾ ꓥꓪ ꓮꓽ ꓟ ꓔꓯ ꓖꓶ ꓠꓲꓹ ꓫꓵˍ ꓟꓲ ꓖꓶ ꓓꓻˍ ꓟ ꓥ ꓡꓳ꓿ 7 ꓖꓳ ꓡꓱ ꓠꓬꓲ ꓠꓴ ꓥꓪ ꓔꓯ ꓪꓴꓸ ꓓꓵ ꓕꓱꓼˍ ꓠꓬ꓾ ꓕꓱ ꓟ ꓮꓽ ꓙꓵ ꓠꓴ ꓔꓯꓸ ꓟ ꓒꓬꓱꓼ ꓡ ꓥꓳ꓾ ꓐꓯˍ ꓡꓳ꓿ 8 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓠꓬ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓬꓲ ꓔꓯˍ ꓡꓰꓽ ꓣꓱꓽ ꓙ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ 9 ꓖꓳ ꓡꓱ ꓠꓬ ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓧꓳꓽ ꓙꓰ ꓢꓲ꓾ ꓢꓲꓽ ꓫꓬ ꓦꓲ ꓟꓴ ꓓꓰꓺˍ ꓟ ꓕꓲ ꓔꓳꓸ ꓗꓪ ꓦꓰꓼ ꓔꓬ ꓝꓲ ꓢꓲ ꓠꓬꓲ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ ꓕꓱ ꓗꓪ ꓐꓰ ꓔꓷꓹ ꓬꓯꓼ ꓙꓰ꓿ 10 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓢꓲ ꓒꓽ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓠꓴ ꓐꓱ ꓶ ꓕꓵꓼ ꓪꓽ ꓖꓶ ꓢꓲ꓾ ꓠꓴ ꓔꓯ ꓔ ꓙ ꓝꓲˍ ꓥꓳ꓿ 11 ꓝꓮꓲ꓾ ꓠꓴ ꓛꓲ ꓒꓯꓹ ꓠꓬ Bꓸ ꓛꓲ ꓗꓪ ꓟꓽ ꓕꓯꓼ ꓡꓰ ꓠꓹ ꓟ ꓬꓲ ꓪꓽ ꓡꓯꓼ ꓒꓯꓹ ꓡꓰ ꓠꓴ ꓔꓯ ꓓꓽ ꓔꓸ ꓖꓶˍ ꓥꓳ꓾ ꓐꓰ ꓐꓳ ꓔ ꓡꓳ꓾ ꓐꓯˍ ꓡꓳ꓿ 12 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓴ ꓫꓵꓽ ꓠꓬꓲ ꓟꓽ ꓓ꓾ ꓐꓰ ꓕꓳ ꓶ ꓗꓪ ꓓꓯꓹ ꓡꓳ꓾ ꓐꓯ ꓖꓶˍ ꓡꓳ꓿ 13 ꓠꓲꓽ ꓪ ꓔꓲꓸ ꓬꓲ ꓫꓵꓽ ꓠꓬꓲ ꓖꓴ ꓡꓰ ꓠꓬ꓾ ꓬꓰ-ꓢꓴ ꓔꓯꓸˍ ꓐꓰ ꓕꓲ ꓝꓲꓸ ꓤ ꓧꓹ ꓙꓰˍ ꓡꓳ꓿ 14 ꓖꓳ ꓕꓯ ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓪꓽ ꓠꓬꓲˍ ꓟ ꓐꓲ ꓞ ꓢꓲ꓾ ꓖ-ꓡꓲ-ꓡꓲ ꓟꓵꓽ ꓗꓪ ꓬꓲꓼ ꓙꓰˍ ꓡꓳ꓿ ꓬꓲ ꓓꓳꓽ ꓠꓬ ꓚꓳ ꓡꓳ ꓟ ꓟꓵꓽ ꓮꓽ ꓙꓵ ꓗꓪ ꓐꓯ ꓒꓬꓱ ꓙꓰˍ ꓡꓳ꓿ 15 ꓬꓲ ꓠꓬ ꓬꓲ ꓪꓽ ꓜꓲꓼ ꓦꓲ ꓮꓽ ꓙꓵ ꓗꓪ ꓟꓸ ꓟꓲꓽ ꓟꓸ ꓖꓶ ꓢꓲ꓾ ꓮꓽ ꓙꓵ ꓢꓴ ꓬꓲ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ 16 ꓬꓰ-ꓢꓴ ꓠꓬ ꓬꓲ ꓪꓴꓽ ꓡ ꓟ ꓟꓵꓽ ꓠ-ꓢ-ꓡꓱ ꓗꓪ ꓛꓲ ꓡ ꓢꓲ꓾ ꓬꓲ ꓬꓰ ꓝꓳꓺ ꓡꓰ ꓟ ꓡꓰ ꓐꓰ ꓠꓽ ꓦꓬꓼ ꓠꓬꓲ ꓕꓯ ꓜꓲꓼ ꓦꓲ ꓗꓪ ꓓꓵꓽ ꓙꓰ ꓢꓲ ꓠꓬꓲ꓾ ꓢꓲꓽ ꓫꓬ ꓕꓳ ꓶ ꓵ ꓠꓹ ꓟ ꓦꓰꓼ ꓔꓴ ꓡ ꓡꓳ꓿ 17 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓕꓳ ꓶ ꓡꓲꓺ ꓬꓲ ꓔꓯ ꓖꓶ ꓢꓲ꓾ ꓬꓲ ꓡꓰ ꓒꓶꓺ ꓗꓷ ꓠꓬ꓾ 18 ꓢꓲ ꓒꓽ ꓬꓲ ꓦ ꓠꓬ ꓥꓪ ꓔꓯ ꓥꓳꓽ ꓞꓹ ꓡꓳ꓿ ꓮ ꓡꓲꓳ ꓐꓯ ꓠꓬ꓾ ꓞꓳ ꓫꓸ ꓔꓯ ꓶꓼ ꓓꓳ ꓫꓱꓹ ꓓꓳꓽ ꓚ ꓟꓸ ꓖꓶ ꓠꓹ ꓟ ꓬꓲ ꓡꓰ ꓥꓪ ꓔꓯ ꓟꓰꓺ ꓞꓶ ꓡꓰ ꓟꓰꓺ ꓗꓷꓳ꓿ ꓪꓳꓽ ꓞ ꓢꓴ ꓔꓯ ꓩꓴ ꓗꓷˍ ꓟ ꓓꓳꓽ ꓚ ꓟꓸ ꓠꓹ ꓟ꓾ ꓟꓬ ꓔꓶ ꓢꓴ ꓐꓴ ꓠꓬꓲ ꓟꓳꓻ ꓡ ꓠꓹ ꓟ꓾ ꓠꓬꓲꓸ ꓬꓯꓼ ꓢꓴ ꓔꓯ ꓩꓴ ꓗꓷ ꓟ ꓟꓶ ꓝꓲ ꓠꓹ ꓟ ꓐꓰ꓾ 19 ꓢꓲ ꓒꓽ ꓡꓰ ꓞꓳ ꓤ ꓔꓯ ꓘꓳꓻ ꓣꓴˍ ꓟ ꓘꓳꓼ ꓚ ꓟꓸ ꓖꓶ ꓠꓹ ꓟ꓾ ꓬꓲ ꓥꓪ ꓔꓯ ꓝꓲ ꓩꓴ ꓡꓺꓳ꓾ ꓐꓰ ꓐꓳ ꓔ ꓟ ꓕꓲ ꓔꓳꓸ ꓧꓪ ꓟꓶˍ ꓡꓳ꓿ 20 ꓬꓲ ꓡꓰ ꓕꓳ ꓶ ꓡꓲ ꓔꓯ ꓡꓲꓺ ꓗꓷ ꓢꓲ꓾ ꓜꓲꓼ ꓦꓲ ꓗꓪ ꓟ ꓕꓳ ꓶ ꓫ ꓢꓴ ꓔꓯ ꓡꓲꓸ ꓖꓶ ꓢꓲ ꓠꓬꓲ ꓠꓬꓲꓸ ꓠꓸ ꓗꓷ ꓠꓬ꓾ ꓜꓲꓼ ꓦꓲ ꓗꓪ ꓔꓬ ꓢꓴ ꓮꓽ ꓙꓵ ꓬꓲ ꓔꓯ ꓜꓲꓽ ꓜꓲˍ ꓡꓰꓽ ꓡꓳꓸ ꓔꓬ ꓡꓳ꓿ 21 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓐꓯ ꓘꓶꓽ ꓕꓱ ꓟ ꓠꓬ ꓠꓬꓲꓸ ꓠꓬꓲ ꓠꓴ ꓪꓽ ꓑ ꓙꓽˍ ꓟ ꓗꓪ ꓐꓲ ꓡꓰꓳ꓾ ꓐꓯ ꓖꓶˍ ꓡꓳ꓿ 22 ꓖꓳ ꓕꓯ ꓮꓽ ꓙꓵ ꓢꓴ ꓠꓬ ꓬꓲ ꓔꓯ ꓓꓳꓹ ꓟꓴ ꓢꓲ꓾ ꓬꓲ ꓡꓰ ꓐꓯ ꓓꓳ ꓡ ꓟ ꓣꓱꓽ ꓛꓰ ꓙꓳˍ ꓟ ꓐꓯ ꓘꓶꓽ ꓔꓯ ꓓꓵꓽ ꓙ ꓟꓶ ꓢꓲ ꓠꓬꓲ꓾ ꓕꓱ ꓕꓲ ꓣꓳ ꓠꓬ ꓬꓳ-ꓢꓷ ꓬꓲ ꓤ ꓟꓽ ꓥ ꓡ?꓾ ꓐꓯˍ ꓡꓳ꓿ 23 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ꓾ ꓠꓻ ꓫꓬꓹ ꓒꓽꓳ꓾ ꓠꓴ ꓚꓲꓸ ꓛꓬ ꓠꓻ ꓠꓴ ꓫꓬꓹ꓾ ꓐꓯˍ ꓟ ꓥꓳꓽ ꓜꓱ ꓕꓱ ꓟ ꓐꓰ꓾ ꓥꓪ ꓠꓴꓽ ꓑ ꓙꓽ ꓗꓷ ꓟ꓾ ꓘ-ꓒꓱ-ꓠꓴ ꓗꓪ ꓠꓴ ꓬꓰ ꓗꓷ ꓟ ꓟꓬꓱꓽ ꓮꓽ ꓙꓵ ꓕꓻ ꓠꓴ ꓟꓵꓽ ꓠꓴ ꓡꓳꓻ ꓗꓪˍ ꓟꓲ ꓬꓰ꓾ ꓐꓰ ꓮ ꓡꓲ ꓥ ꓟꓲ ꓥꓪ ꓔꓯ ꓐꓯ ꓡ ꓥꓳ꓾ ꓐꓯˍ ꓡꓳ꓿ 24 ꓝꓮꓲ ꓬꓲ ꓡꓰ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓟꓷꓽ ꓠꓷꓹ ꓝꓸ ꓢꓴ ꓮꓽ ꓟ ꓔꓯˍ ꓟꓲ ꓬꓲ ꓚꓲꓸ ꓛꓬ ꓟꓵꓽ ꓗꓪ ꓘꓳꓻ ꓣꓴˍ ꓟ ꓟꓽ ꓙꓳ꓿ 25 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ-ꓡꓲ-ꓬ ꓔꓬ ꓟ ꓦꓬꓼ ꓠꓬꓲ ꓗꓪ꓾ ꓢ ꓘꓳꓼ ꓐꓶꓽ ꓟꓶꓽ ꓦ ꓟꓽ ꓦ ꓗꓷ ꓡꓰ ꓢꓲ꓾ ꓕꓲ ꓟꓵꓽ ꓡꓱꓸꓼ ꓗꓪ ꓦꓰꓼ ꓟꓷꓼ ꓘꓳꓼ ꓓꓽ ꓟ ꓓꓳˍ ꓕꓯ꓾ ꓬꓲ-ꓢꓷ-ꓡꓰ ꓟꓵꓽ ꓗꓪ ꓟꓶꓽ ꓛꓵꓽ ꓟ ꓮꓽ ꓟꓬꓹ ꓙꓳˍ ꓡꓳ꓿ 26 ꓖꓳ ꓡꓱ ꓥ ꓟꓲ ꓢꓲ-ꓓꓳ ꓟꓵꓽ ꓢ-ꓡꓷ-ꓩ ꓡꓳ ꓒꓱ ꓗꓪ ꓟ ꓟꓶꓽ ꓛꓵꓽ ꓟ ꓕꓲ ꓣꓳ ꓔꓯˍ ꓡꓰꓽ ꓟ ꓥ ꓠꓬ꓾ ꓬꓲ ꓪꓽ ꓖꓳ ꓟꓬ ꓟ ꓮꓽ ꓟ ꓔꓬ ꓗꓪˍ ꓟꓲ ꓬꓲ-ꓡꓲ-ꓬ ꓔꓯ ꓟꓽ ꓝꓲ ꓩꓴ ꓗꓷ꓿ 27 ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓡꓲ-ꓫ ꓔꓬ ꓕꓯ꓾ ꓬꓲ-ꓢꓷ-ꓡꓰ ꓟꓵꓽ ꓗꓪ ꓔꓸ ꓟꓼ ꓩꓴ ꓓꓲ ꓢꓴ ꓮꓽ ꓟꓬꓹ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓫꓲ-ꓡꓲ-ꓬꓼ ꓢꓴ ꓠꓰ-ꓬ-ꓟꓷꓽ ꓟꓽ ꓥ ꓠꓬ꓾ ꓠꓱꓸ ꓐꓯ ꓕꓲ ꓣꓳˍ ꓟꓲ ꓟꓽ ꓫꓬꓻ ꓡꓰ꓾ ꓐꓯˍ ꓡꓳ꓿ 28 ꓜꓲꓼ ꓦꓲ ꓗꓪ ꓟ ꓡꓽ ꓞꓳ ꓮꓽ ꓙꓵ ꓐꓯ ꓘꓶꓽ ꓕꓱ ꓟ ꓑ ꓙꓽ ꓗꓷ ꓠꓬ꓾ ꓠꓲꓹ ꓟ ꓮꓽ ꓘꓶꓸ ꓦꓶꓻ ꓠꓬꓲ꓾ 29 ꓔꓴ ꓡ ꓢꓲ꓾ ꓬꓲ ꓔꓯ ꓡꓳ ꓒꓱ ꓗꓪ ꓐꓰ ꓖꓼ ꓓꓳ ꓩꓴ ꓗꓷ ꓢꓲ ꓠꓬꓲ꓾ ꓬꓲ ꓪꓽ ꓡꓳ ꓒꓱ ꓜꓶꓻ ꓔ ꓖꓴ ꓪꓽ ꓡꓵꓸ ꓘꓶꓽ ꓗꓪ ꓧꓳꓽ ꓙꓰ ꓢꓲ꓾ ꓬꓲ ꓔꓯ ꓓꓱꓽ ꓞꓰꓻ ꓩꓴ ꓗꓷˍ ꓐꓰ ꓬꓰˍ ꓡꓳ꓿ 30 ꓖꓳ ꓡꓱ ꓥ ꓟꓲ ꓬꓲ ꓠꓽ ꓬꓲ ꓪꓽ ꓗꓳ ꓡꓳ ꓗꓪ ꓐꓰ ꓗꓳꓸ ꓙꓰ ꓢꓲ ꓙꓰ ꓗꓷꓳ꓿ 31 ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵꓽ ꓘꓹ-ꓒꓱ-ꓠꓴ ꓟꓬꓱꓺ ꓔ ꓟ ꓡꓳ ꓒꓱ ꓗꓪ ꓬꓯꓼ ꓡ ꓡꓳ꓿ ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓬꓲ ꓪꓽ ꓔꓯ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ 32 ꓬꓲ ꓟꓸ ꓖꓶˍ ꓟ ꓔꓯ ꓬꓲ ꓪꓽ ꓓꓵꓽ ꓙ ꓟꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓐꓯ ꓘꓶ ꓠꓽ ꓙꓵꓽ ꓪ ꓙꓳˍ ꓡꓳ꓿ 33 ꓜꓲꓼ ꓦꓲ ꓠꓯꓸꓼ ꓗꓪ ꓟꓽ ꓫꓬ ꓠꓲꓽ ꓓꓯꓹ ꓟ ꓞꓳ ꓑꓸ ꓤ ꓕꓲ ꓣꓳ ꓔꓬ ꓡꓳ꓿ ꓠꓲꓽ ꓠꓬ ꓢꓯꓼ ꓓꓽ ꓟ ꓡꓰ ꓘꓴꓻ ꓢꓲ꓾ 34 ꓠ-ꓢ-ꓡꓱ ꓢꓴ ꓬꓰ-ꓢꓴꓳ꓾ ꓠꓴ ꓠꓬ ꓥꓪ ꓠꓴꓽˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓙꓳˍ ꓡ? ꓥꓪ ꓠꓴꓽ ꓔꓯ ꓟꓶꓽ ꓬꓰ ꓝꓲˍ ꓐꓰ ꓡꓻ ꓡ? ꓠꓴ ꓮꓽ ꓟ ꓥ ꓟ ꓥꓪ ꓢꓷꓸˍ ꓡꓳ꓿ ꓠꓴ ꓠꓽ ꓪꓴ-ꓢ ꓬꓲ ꓢꓲꓽ ꓫꓬ ꓢꓴ ꓖꓳꓻ ꓕꓲ ꓣꓳ ꓟ ꓥꓳ꓾ ꓐꓯˍ ꓡꓳ꓿ 35 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ ꓕꓼ ꓢꓲ꓾ ꓕꓽ ꓪꓳꓹ꓾ ꓬꓲ ꓔꓯˍ ꓐꓰ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓠꓲꓽ ꓡꓰ ꓮꓽ ꓙꓵ ꓢꓴ ꓟꓳꓻ ꓟꓳꓻ ꓡꓰꓽ ꓖꓳ ꓕꓲ ꓣꓳ ꓔꓯ ꓚꓵꓹ ꓓꓳꓽ ꓗꓷ ꓢꓲ꓾ ꓬꓲ ꓔꓯˍ ꓐꓰ ꓓꓳ ꓡ ꓡꓳ꓿ ꓡꓽ ꓞꓳ ꓖꓳ ꓕꓲ ꓣꓳ ꓠꓽ ꓮ ꓡꓲˍ ꓟꓲ ꓟꓽ ꓗꓷ ꓡꓰ꓿ 36 ꓖꓳ ꓡꓱ ꓠꓬ ꓮꓽ ꓙꓵ ꓢꓴ ꓓꓵꓽ ꓙ ꓟꓶ ꓡꓰ ꓢꓲ꓾ ꓟꓽ ꓫꓬ ꓠꓲꓽ ꓔꓯˍ ꓟꓲ ꓬꓲ ꓙꓵꓽ ꓪˍ ꓐꓰ ꓪꓽ ꓠꓬꓲˍ ꓟ ꓡꓰ ꓕꓵꓼ ꓪꓽ ꓖꓶꓽ ꓗꓷ ꓠꓬ ꓓꓳ ꓙꓰˍ ꓟ ꓕꓱ ꓟ ꓠꓬ꓾ ꓮ ꓡꓲ ꓡꓳ ꓫꓵꓽ ꓟꓸ ꓟꓲꓽ ꓥ ꓡ?꓾ ꓐꓰ ꓠ ꓠꓬꓲ ꓡꓯꓽ ꓘꓳˍ ꓡꓳ꓿ 37 ꓖꓳ ꓡꓱ ꓢꓲ ꓬꓰ-ꓢꓴ ꓬꓲ ꓓꓳꓽ ꓠꓬ ꓚꓳ ꓡꓳ ꓟ ꓟꓵꓽ ꓮꓽ ꓙꓵ ꓗꓪ ꓚ ꓒꓬꓱ ꓙꓰˍ ꓡꓳ꓿ 38 ꓬꓰ-ꓢꓴ ꓠꓬ ꓜꓲꓼ ꓦꓲ ꓗꓪ ꓐꓰ ꓓꓳ ꓙꓰ ꓢꓲ꓾ ꓢꓲ-ꓟꓴ ꓦꓲ ꓗꓪ ꓓꓵꓽ ꓡꓰˍ ꓡꓳ꓿ ꓢꓲ-ꓟꓴ ꓟꓹ ꓟ ꓑꓯꓹ ꓠꓬ ꓖꓳ ꓓꓱꓽ ꓮꓽ ꓘꓶꓸ ꓛꓴ ꓞꓻ ꓢꓲ ꓠꓻ ꓔꓬ ꓠꓬꓲ꓾ ꓬꓲ ꓪꓽ ꓠꓬ ꓬꓲ ꓐꓱ ꓶ ꓬꓰ-ꓢꓴ ꓔꓯ ꓓꓰꓽˍ ꓡꓳ꓿ 39 ꓬꓰ-ꓢꓴ ꓠꓬ ꓬꓲ ꓒꓻ ꓕꓲ ꓗꓪ ꓦꓰꓼ ꓞ ꓢꓲ꓾ ꓬꓲ ꓖꓳ ꓓꓱꓽ ꓮꓽ ꓘꓶꓸ ꓞꓻ ꓢꓲ ꓠꓻˍ ꓟ ꓔꓯ ꓕꓼ ꓗꓷ ꓠꓬ ꓓꓻ ꓡꓰꓳ꓿ ꓖꓳ ꓡꓱ ꓠꓬ ꓬꓲ ꓞꓼ ꓐꓰ ꓔꓴ ꓡ ꓢꓲ ꓬꓲ ꓪꓽ ꓔꓯ ꓜ ꓫꓬꓹ ꓖꓶ ꓜꓽˍ ꓡꓳ꓿ 40 ꓟꓲꓽ ꓟꓲ ꓓꓵꓽ ꓡꓰˍ ꓕꓯ꓾ ꓠꓻ ꓫꓵꓽ ꓠꓻ ꓙꓰ ꓠ ꓢꓴ ꓮꓽ ꓙꓵ ꓔꓯ ꓬꓲ ꓪꓽ ꓡꓰ ꓬꓲ ꓔꓬ ꓗꓪ ꓧꓳꓽ ꓡ ꓠꓬ꓾ ꓬꓰ-ꓢꓴ ꓡꓰ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓡꓯꓼ ꓒꓯꓹ ꓚꓰꓹ ꓖꓶ ꓢꓲ ꓫꓬꓹ ꓓꓻ ꓡꓰ ꓝꓲˍ ꓡꓳ꓿ 41 ꓝꓮꓲ ꓠꓬ ꓮꓽ ꓟꓬꓹ ꓣꓳ ꓖꓳ ꓓꓱꓽ ꓗꓪ ꓐꓰ ꓠꓲꓽ ꓓꓳ ꓡ ꓢꓲ꓾ ꓠꓴ ꓠꓬ ꓪꓴ-ꓢ ꓬꓲ ꓮ ꓐꓲ ꓥꓳ꓾ ꓐꓰ ꓘꓴˍ ꓡꓳ꓿ ꓠꓲꓽ ꓠꓬ꓾ ꓬꓲ ꓠꓽ ꓙꓲ-ꓢꓴ ꓥ ꓟ ꓢꓷꓸˍ ꓠꓬꓲ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓕꓼ ꓢꓲ ꓟꓽ ꓫꓸ ꓕꓱ ꓝꓲ꓿ 42 ꓟꓲꓽ ꓕꓯꓽ ꓙꓲ ꓡ ꓕꓯ꓾ ꓬꓰ-ꓢꓴ ꓠꓬ ꓡꓲ ꓛꓲ ꓟꓵꓽ ꓕꓲ ꓔꓳꓸ ꓗꓪ ꓓꓳ ꓙꓰˍ ꓡꓳ꓿ ꓖꓳ ꓡꓱ ꓠꓬ ꓞꓳ ꓜꓴ ꓡꓰ ꓬꓲ ꓔꓯ ꓧꓪ ꓢꓲ ꓧꓪ ꓟꓶ ꓗꓷ ꓠꓬ꓾ ꓬꓲ ꓪꓽˍ ꓐꓰ ꓟꓽ ꓧꓹ ꓙꓰ ꓠꓹ ꓟ ꓬꓲ ꓔꓯ ꓗꓽ ꓔꓸˍ ꓐꓰ ꓬꓰˍ ꓡꓳ꓿ 43 ꓬꓲ ꓠꓽ ꓬꓲ ꓪꓽ ꓔꓯ꓾ ꓥꓪ ꓠꓬ ꓠꓱꓸ ꓐꓯꓼ ꓡꓳ ꓒꓱ ꓗꓪˍ ꓟꓲ ꓪꓴ-ꓢ ꓗꓴꓷꓼ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶꓽ ꓠ ꓗꓹ ꓡꓳ꓿ ꓕꓱ ꓡꓱ ꓬꓰ ꓠꓹ ꓟ ꓥꓪ ꓔꓯ ꓝꓲ ꓩꓴ ꓡ ꓟ ꓥ ꓡꓳ꓾ ꓐꓯˍ ꓡꓳ꓿ 44 ꓖꓳ ꓡꓱ ꓢꓲ ꓬꓰ-ꓢꓴ ꓠꓬ ꓬꓴ-ꓔ ꓟꓵꓽˍ ꓐꓰ ꓖ-ꓡꓲ-ꓡꓲ ꓟꓵꓽ ꓗꓪ ꓟ ꓜꓲꓼ ꓦꓲ ꓮꓽ ꓟꓬꓹ ꓗꓪ ꓡꓯꓼ ꓫꓵ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ꓿

ꓡꓴ-ꓗ 5

1 ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓐꓲ ꓞꓹ ꓢꓲ꓾ ꓬꓳ-ꓔ ꓬꓲꓽ ꓟ ꓗꓪ ꓐꓰ ꓬꓲꓼ ꓡ ꓗꓸ ꓠꓯ꓾ ꓢꓲ-ꓫꓬ-ꓟ-ꓦ ꓡꓰ ꓬꓲ ꓔꓯ ꓡꓲ ꓛꓲ ꓗꓪ ꓡꓲ ꓞꓲ ꓠꓬꓲ ꓧꓳꓽ ꓔꓬ ꓕꓯ꓾ 2 ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓫꓵꓽ ꓠꓬꓲˍ ꓡꓳ꓿ ꓬꓰ-ꓢꓴ ꓠꓬ ꓟꓽ ꓜꓽ ꓟꓽ ꓓꓳꓻ ꓡꓲ ꓞꓲ ꓦꓬꓼ ꓡꓲ ꓞꓲ ꓠꓬꓲ ꓔꓬ ꓗꓷ ꓠꓬ ꓦꓰ ꓟꓷꓼˍ ꓡꓳ꓿ 3 ꓖꓳ ꓕꓯ ꓠꓲꓽ ꓪ ꓔꓲꓸ ꓡꓰ ꓬꓰ-ꓢꓴ ꓔꓯ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ꓾ Bꓸ ꓛꓲ ꓕꓱ ꓕꓲ ꓘꓴꓸ ꓔꓯ ꓑ ꓑ ꓒꓬꓱꓼ ꓡ ꓠꓹ ꓟ ꓕꓵꓼ ꓪꓽ ꓖꓶ ꓟꓴꓽ꓾ ꓐꓯˍ ꓡꓳ꓿ 4 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶꓽ ꓢꓲ꓾ ꓞꓳ ꓤꓽ ꓠꓬ ꓜꓽ ꓓꓴ ꓗꓪ ꓐꓰˍ ꓡꓰꓽ ꓢꓯꓸ ꓔꓬ ꓟ ꓟꓽ ꓥ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ 5 ꓖꓳ ꓡꓱ ꓠꓬ ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓟꓴˍ ꓟ ꓕꓲ ꓖ ꓗꓪ ꓧꓳꓽ ꓓꓯ ꓙꓰ ꓢꓲ꓾ ꓟꓵꓽ ꓗꓳꓹ ꓓꓵ ꓓꓵ ꓟ ꓗꓴꓷꓼ ꓮꓽ ꓙꓵ ꓡꓱꓸꓼ ꓬꓲ ꓔꓯ ꓕꓲ ꓑꓹ ꓤ ꓖꓴ ꓟꓸ ꓖꓶ ꓢꓲ ꓠꓬꓲ꓾ 6 ꓙꓵꓽ ꓪˍ ꓐꓰ ꓟꓬꓱꓺ ꓓꓳꓽ ꓕꓱ ꓟ ꓮꓽ ꓙꓵ ꓥꓪ ꓡꓰ ꓠꓴ ꓔꓯ ꓖꓶˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ ꓥꓪ ꓔꓯ ꓡꓯꓼ ꓙꓱ ꓖꓶꓽ ꓔ ꓟ ꓥ ꓠꓬꓲ꓾ ꓥꓪ ꓮꓽ ꓟ ꓔꓯ ꓖꓶ ꓠꓲꓹ ꓫꓵˍ ꓟꓲ ꓖꓶ ꓓꓻˍ ꓟ ꓥ ꓡꓳ꓿ 7 ꓖꓳ ꓡꓱ ꓠꓬꓲ ꓠꓴ ꓥꓪ ꓔꓯ ꓪꓴꓸ ꓓꓵ ꓕꓱꓼˍ ꓠꓬ꓾ ꓕꓱ ꓟ ꓮꓽ ꓙꓵ ꓠꓴ ꓔꓯꓸ ꓟ ꓒꓬꓱꓼ ꓡ ꓥꓳ꓾ ꓐꓯˍ ꓡꓳ꓿ 8 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓠꓬ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓬꓲ ꓔꓯˍ ꓡꓰꓽ ꓣꓱꓽ ꓙ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ 9 ꓖꓳ ꓡꓱ ꓠꓬ ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓧꓳꓽ ꓙꓰ ꓢꓲ꓾ ꓢꓲꓽ ꓫꓬ ꓦꓲ ꓟꓴ ꓓꓰꓺˍ ꓟ ꓕꓲ ꓔꓳꓸ ꓗꓪ ꓦꓰꓼ ꓔꓬ ꓝꓲ ꓢꓲ ꓠꓬꓲ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ ꓕꓱ ꓗꓪ ꓐꓰ ꓔꓷꓹ ꓬꓯꓼ ꓙꓰ꓿ 10 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓢꓲ ꓒꓽ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓠꓴ ꓐꓱ ꓶ ꓕꓵꓼ ꓪꓽ ꓖꓶ ꓢꓲ꓾ ꓠꓴ ꓔꓯ ꓔ ꓙ ꓝꓲˍ ꓥꓳ꓿ 11 ꓝꓮꓲ꓾ ꓠꓴ ꓛꓲ ꓒꓯꓹ ꓠꓬ Bꓸ ꓛꓲ ꓗꓪ ꓟꓽ ꓕꓯꓼ ꓡꓰ ꓠꓹ ꓟ ꓬꓲ ꓪꓽ ꓡꓯꓼ ꓒꓯꓹ ꓡꓰ ꓠꓴ ꓔꓯ ꓓꓽ ꓔꓸ ꓖꓶˍ ꓥꓳ꓾ ꓐꓰ ꓐꓳ ꓔ ꓡꓳ꓾ ꓐꓯˍ ꓡꓳ꓿ 12 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓴ ꓫꓵꓽ ꓠꓬꓲ ꓟꓽ ꓓ꓾ ꓐꓰ ꓕꓳ ꓶ ꓗꓪ ꓓꓯꓹ ꓡꓳ꓾ ꓐꓯ ꓖꓶˍ ꓡꓳ꓿ 13 ꓠꓲꓽ ꓪ ꓔꓲꓸ ꓬꓲ ꓫꓵꓽ ꓠꓬꓲ ꓖꓴ ꓡꓰ ꓠꓬ꓾ ꓬꓰ-ꓢꓴ ꓔꓯꓸˍ ꓐꓰ ꓕꓲ ꓝꓲꓸ ꓤ ꓧꓹ ꓙꓰˍ ꓡꓳ꓿ 14 ꓖꓳ ꓕꓯ ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓪꓽ ꓠꓬꓲˍ ꓟ ꓐꓲ ꓞ ꓢꓲ꓾ ꓖ-ꓡꓲ-ꓡꓲ ꓟꓵꓽ ꓗꓪ ꓬꓲꓼ ꓙꓰˍ ꓡꓳ꓿ ꓬꓲ ꓓꓳꓽ ꓠꓬ ꓚꓳ ꓡꓳ ꓟ ꓟꓵꓽ ꓮꓽ ꓙꓵ ꓗꓪ ꓐꓯ ꓒꓬꓱ ꓙꓰˍ ꓡꓳ꓿ 15 ꓬꓲ ꓠꓬ ꓬꓲ ꓪꓽ ꓜꓲꓼ ꓦꓲ ꓮꓽ ꓙꓵ ꓗꓪ ꓟꓸ ꓟꓲꓽ ꓟꓸ ꓖꓶ ꓢꓲ꓾ ꓮꓽ ꓙꓵ ꓢꓴ ꓬꓲ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ 16 ꓬꓰ-ꓢꓴ ꓠꓬ ꓬꓲ ꓪꓴꓽ ꓡ ꓟ ꓟꓵꓽ ꓠ-ꓢ-ꓡꓱ ꓗꓪ ꓛꓲ ꓡ ꓢꓲ꓾ ꓬꓲ ꓬꓰ ꓝꓳꓺ ꓡꓰ ꓟ ꓡꓰ ꓐꓰ ꓠꓽ ꓦꓬꓼ ꓠꓬꓲ ꓕꓯ ꓜꓲꓼ ꓦꓲ ꓗꓪ ꓓꓵꓽ ꓙꓰ ꓢꓲ ꓠꓬꓲ꓾ ꓢꓲꓽ ꓫꓬ ꓕꓳ ꓶ ꓵ ꓠꓹ ꓟ ꓦꓰꓼ ꓔꓴ ꓡ ꓡꓳ꓿ 17 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓕꓳ ꓶ ꓡꓲꓺ ꓬꓲ ꓔꓯ ꓖꓶ ꓢꓲ꓾ ꓬꓲ ꓡꓰ ꓒꓶꓺ ꓗꓷ ꓠꓬ꓾ 18 ꓢꓲ ꓒꓽ ꓬꓲ ꓦ ꓠꓬ ꓥꓪ ꓔꓯ ꓥꓳꓽ ꓞꓹ ꓡꓳ꓿ ꓮ ꓡꓲꓳ ꓐꓯ ꓠꓬ꓾ ꓞꓳ ꓫꓸ ꓔꓯ ꓶꓼ ꓓꓳ ꓫꓱꓹ ꓓꓳꓽ ꓚ ꓟꓸ ꓖꓶ ꓠꓹ ꓟ ꓬꓲ ꓡꓰ ꓥꓪ ꓔꓯ ꓟꓰꓺ ꓞꓶ ꓡꓰ ꓟꓰꓺ ꓗꓷꓳ꓿ ꓪꓳꓽ ꓞ ꓢꓴ ꓔꓯ ꓩꓴ ꓗꓷˍ ꓟ ꓓꓳꓽ ꓚ ꓟꓸ ꓠꓹ ꓟ꓾ ꓟꓬ ꓔꓶ ꓢꓴ ꓐꓴ ꓠꓬꓲ ꓟꓳꓻ ꓡ ꓠꓹ ꓟ꓾ ꓠꓬꓲꓸ ꓬꓯꓼ ꓢꓴ ꓔꓯ ꓩꓴ ꓗꓷ ꓟ ꓟꓶ ꓝꓲ ꓠꓹ ꓟ ꓐꓰ꓾ 19 ꓢꓲ ꓒꓽ ꓡꓰ ꓞꓳ ꓤ ꓔꓯ ꓘꓳꓻ ꓣꓴˍ ꓟ ꓘꓳꓼ ꓚ ꓟꓸ ꓖꓶ ꓠꓹ ꓟ꓾ ꓬꓲ ꓥꓪ ꓔꓯ ꓝꓲ ꓩꓴ ꓡꓺꓳ꓾ ꓐꓰ ꓐꓳ ꓔ ꓟ ꓕꓲ ꓔꓳꓸ ꓧꓪ ꓟꓶˍ ꓡꓳ꓿ 20 ꓬꓲ ꓡꓰ ꓕꓳ ꓶ ꓡꓲ ꓔꓯ ꓡꓲꓺ ꓗꓷ ꓢꓲ꓾ ꓜꓲꓼ ꓦꓲ ꓗꓪ ꓟ ꓕꓳ ꓶ ꓫ ꓢꓴ ꓔꓯ ꓡꓲꓸ ꓖꓶ ꓢꓲ ꓠꓬꓲ ꓠꓬꓲꓸ ꓠꓸ ꓗꓷ ꓠꓬ꓾ ꓜꓲꓼ ꓦꓲ ꓗꓪ ꓔꓬ ꓢꓴ ꓮꓽ ꓙꓵ ꓬꓲ ꓔꓯ ꓜꓲꓽ ꓜꓲˍ ꓡꓰꓽ ꓡꓳꓸ ꓔꓬ ꓡꓳ꓿ 21 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓐꓯ ꓘꓶꓽ ꓕꓱ ꓟ ꓠꓬ ꓠꓬꓲꓸ ꓠꓬꓲ ꓠꓴ ꓪꓽ ꓑ ꓙꓽˍ ꓟ ꓗꓪ ꓐꓲ ꓡꓰꓳ꓾ ꓐꓯ ꓖꓶˍ ꓡꓳ꓿ 22 ꓖꓳ ꓕꓯ ꓮꓽ ꓙꓵ ꓢꓴ ꓠꓬ ꓬꓲ ꓔꓯ ꓓꓳꓹ ꓟꓴ ꓢꓲ꓾ ꓬꓲ ꓡꓰ ꓐꓯ ꓓꓳ ꓡ ꓟ ꓣꓱꓽ ꓛꓰ ꓙꓳˍ ꓟ ꓐꓯ ꓘꓶꓽ ꓔꓯ ꓓꓵꓽ ꓙ ꓟꓶ ꓢꓲ ꓠꓬꓲ꓾ ꓕꓱ ꓕꓲ ꓣꓳ ꓠꓬ ꓬꓳ-ꓢꓷ ꓬꓲ ꓤ ꓟꓽ ꓥ ꓡ?꓾ ꓐꓯˍ ꓡꓳ꓿ 23 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ꓾ ꓠꓻ ꓫꓬꓹ ꓒꓽꓳ꓾ ꓠꓴ ꓚꓲꓸ ꓛꓬ ꓠꓻ ꓠꓴ ꓫꓬꓹ꓾ ꓐꓯˍ ꓟ ꓥꓳꓽ ꓜꓱ ꓕꓱ ꓟ ꓐꓰ꓾ ꓥꓪ ꓠꓴꓽ ꓑ ꓙꓽ ꓗꓷ ꓟ꓾ ꓘ-ꓒꓱ-ꓠꓴ ꓗꓪ ꓠꓴ ꓬꓰ ꓗꓷ ꓟ ꓟꓬꓱꓽ ꓮꓽ ꓙꓵ ꓕꓻ ꓠꓴ ꓟꓵꓽ ꓠꓴ ꓡꓳꓻ ꓗꓪˍ ꓟꓲ ꓬꓰ꓾ ꓐꓰ ꓮ ꓡꓲ ꓥ ꓟꓲ ꓥꓪ ꓔꓯ ꓐꓯ ꓡ ꓥꓳ꓾ ꓐꓯˍ ꓡꓳ꓿ 24 ꓝꓮꓲ ꓬꓲ ꓡꓰ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓟꓷꓽ ꓠꓷꓹ ꓝꓸ ꓢꓴ ꓮꓽ ꓟ ꓔꓯˍ ꓟꓲ ꓬꓲ ꓚꓲꓸ ꓛꓬ ꓟꓵꓽ ꓗꓪ ꓘꓳꓻ ꓣꓴˍ ꓟ ꓟꓽ ꓙꓳ꓿ 25 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ-ꓡꓲ-ꓬ ꓔꓬ ꓟ ꓦꓬꓼ ꓠꓬꓲ ꓗꓪ꓾ ꓢ ꓘꓳꓼ ꓐꓶꓽ ꓟꓶꓽ ꓦ ꓟꓽ ꓦ ꓗꓷ ꓡꓰ ꓢꓲ꓾ ꓕꓲ ꓟꓵꓽ ꓡꓱꓸꓼ ꓗꓪ ꓦꓰꓼ ꓟꓷꓼ ꓘꓳꓼ ꓓꓽ ꓟ ꓓꓳˍ ꓕꓯ꓾ ꓬꓲ-ꓢꓷ-ꓡꓰ ꓟꓵꓽ ꓗꓪ ꓟꓶꓽ ꓛꓵꓽ ꓟ ꓮꓽ ꓟꓬꓹ ꓙꓳˍ ꓡꓳ꓿ 26 ꓖꓳ ꓡꓱ ꓥ ꓟꓲ ꓢꓲ-ꓓꓳ ꓟꓵꓽ ꓢ-ꓡꓷ-ꓩ ꓡꓳ ꓒꓱ ꓗꓪ ꓟ ꓟꓶꓽ ꓛꓵꓽ ꓟ ꓕꓲ ꓣꓳ ꓔꓯˍ ꓡꓰꓽ ꓟ ꓥ ꓠꓬ꓾ ꓬꓲ ꓪꓽ ꓖꓳ ꓟꓬ ꓟ ꓮꓽ ꓟ ꓔꓬ ꓗꓪˍ ꓟꓲ ꓬꓲ-ꓡꓲ-ꓬ ꓔꓯ ꓟꓽ ꓝꓲ ꓩꓴ ꓗꓷ꓿ 27 ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓡꓲ-ꓫ ꓔꓬ ꓕꓯ꓾ ꓬꓲ-ꓢꓷ-ꓡꓰ ꓟꓵꓽ ꓗꓪ ꓔꓸ ꓟꓼ ꓩꓴ ꓓꓲ ꓢꓴ ꓮꓽ ꓟꓬꓹ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓫꓲ-ꓡꓲ-ꓬꓼ ꓢꓴ ꓠꓰ-ꓬ-ꓟꓷꓽ ꓟꓽ ꓥ ꓠꓬ꓾ ꓠꓱꓸ ꓐꓯ ꓕꓲ ꓣꓳˍ ꓟꓲ ꓟꓽ ꓫꓬꓻ ꓡꓰ꓾ ꓐꓯˍ ꓡꓳ꓿ 28 ꓜꓲꓼ ꓦꓲ ꓗꓪ ꓟ ꓡꓽ ꓞꓳ ꓮꓽ ꓙꓵ ꓐꓯ ꓘꓶꓽ ꓕꓱ ꓟ ꓑ ꓙꓽ ꓗꓷ ꓠꓬ꓾ ꓠꓲꓹ ꓟ ꓮꓽ ꓘꓶꓸ ꓦꓶꓻ ꓠꓬꓲ꓾ 29 ꓔꓴ ꓡ ꓢꓲ꓾ ꓬꓲ ꓔꓯ ꓡꓳ ꓒꓱ ꓗꓪ ꓐꓰ ꓖꓼ ꓓꓳ ꓩꓴ ꓗꓷ ꓢꓲ ꓠꓬꓲ꓾ ꓬꓲ ꓪꓽ ꓡꓳ ꓒꓱ ꓜꓶꓻ ꓔ ꓖꓴ ꓪꓽ ꓡꓵꓸ ꓘꓶꓽ ꓗꓪ ꓧꓳꓽ ꓙꓰ ꓢꓲ꓾ ꓬꓲ ꓔꓯ ꓓꓱꓽ ꓞꓰꓻ ꓩꓴ ꓗꓷˍ ꓐꓰ ꓬꓰˍ ꓡꓳ꓿ 30 ꓖꓳ ꓡꓱ ꓥ ꓟꓲ ꓬꓲ ꓠꓽ ꓬꓲ ꓪꓽ ꓗꓳ ꓡꓳ ꓗꓪ ꓐꓰ ꓗꓳꓸ ꓙꓰ ꓢꓲ ꓙꓰ ꓗꓷꓳ꓿ 31 ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵꓽ ꓘꓹ-ꓒꓱ-ꓠꓴ ꓟꓬꓱꓺ ꓔ ꓟ ꓡꓳ ꓒꓱ ꓗꓪ ꓬꓯꓼ ꓡ ꓡꓳ꓿ ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓬꓲ ꓪꓽ ꓔꓯ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ 32 ꓬꓲ ꓟꓸ ꓖꓶˍ ꓟ ꓔꓯ ꓬꓲ ꓪꓽ ꓓꓵꓽ ꓙ ꓟꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓐꓯ ꓘꓶ ꓠꓽ ꓙꓵꓽ ꓪ ꓙꓳˍ ꓡꓳ꓿ 33 ꓜꓲꓼ ꓦꓲ ꓠꓯꓸꓼ ꓗꓪ ꓟꓽ ꓫꓬ ꓠꓲꓽ ꓓꓯꓹ ꓟ ꓞꓳ ꓑꓸ ꓤ ꓕꓲ ꓣꓳ ꓔꓬ ꓡꓳ꓿ ꓠꓲꓽ ꓠꓬ ꓢꓯꓼ ꓓꓽ ꓟ ꓡꓰ ꓘꓴꓻ ꓢꓲ꓾ 34 ꓠ-ꓢ-ꓡꓱ ꓢꓴ ꓬꓰ-ꓢꓴꓳ꓾ ꓠꓴ ꓠꓬ ꓥꓪ ꓠꓴꓽˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓙꓳˍ ꓡ? ꓥꓪ ꓠꓴꓽ ꓔꓯ ꓟꓶꓽ ꓬꓰ ꓝꓲˍ ꓐꓰ ꓡꓻ ꓡ? ꓠꓴ ꓮꓽ ꓟ ꓥ ꓟ ꓥꓪ ꓢꓷꓸˍ ꓡꓳ꓿ ꓠꓴ ꓠꓽ ꓪꓴ-ꓢ ꓬꓲ ꓢꓲꓽ ꓫꓬ ꓢꓴ ꓖꓳꓻ ꓕꓲ ꓣꓳ ꓟ ꓥꓳ꓾ ꓐꓯˍ ꓡꓳ꓿ 35 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ ꓕꓼ ꓢꓲ꓾ ꓕꓽ ꓪꓳꓹ꓾ ꓬꓲ ꓔꓯˍ ꓐꓰ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓠꓲꓽ ꓡꓰ ꓮꓽ ꓙꓵ ꓢꓴ ꓟꓳꓻ ꓟꓳꓻ ꓡꓰꓽ ꓖꓳ ꓕꓲ ꓣꓳ ꓔꓯ ꓚꓵꓹ ꓓꓳꓽ ꓗꓷ ꓢꓲ꓾ ꓬꓲ ꓔꓯˍ ꓐꓰ ꓓꓳ ꓡ ꓡꓳ꓿ ꓡꓽ ꓞꓳ ꓖꓳ ꓕꓲ ꓣꓳ ꓠꓽ ꓮ ꓡꓲˍ ꓟꓲ ꓟꓽ ꓗꓷ ꓡꓰ꓿ 36 ꓖꓳ ꓡꓱ ꓠꓬ ꓮꓽ ꓙꓵ ꓢꓴ ꓓꓵꓽ ꓙ ꓟꓶ ꓡꓰ ꓢꓲ꓾ ꓟꓽ ꓫꓬ ꓠꓲꓽ ꓔꓯˍ ꓟꓲ ꓬꓲ ꓙꓵꓽ ꓪˍ ꓐꓰ ꓪꓽ ꓠꓬꓲˍ ꓟ ꓡꓰ ꓕꓵꓼ ꓪꓽ ꓖꓶꓽ ꓗꓷ ꓠꓬ ꓓꓳ ꓙꓰˍ ꓟ ꓕꓱ ꓟ ꓠꓬ꓾ ꓮ ꓡꓲ ꓡꓳ ꓫꓵꓽ ꓟꓸ ꓟꓲꓽ ꓥ ꓡ?꓾ ꓐꓰ ꓠ ꓠꓬꓲ ꓡꓯꓽ ꓘꓳˍ ꓡꓳ꓿ 37 ꓖꓳ ꓡꓱ ꓢꓲ ꓬꓰ-ꓢꓴ ꓬꓲ ꓓꓳꓽ ꓠꓬ ꓚꓳ ꓡꓳ ꓟ ꓟꓵꓽ ꓮꓽ ꓙꓵ ꓗꓪ ꓚ ꓒꓬꓱ ꓙꓰˍ ꓡꓳ꓿ 38 ꓬꓰ-ꓢꓴ ꓠꓬ ꓜꓲꓼ ꓦꓲ ꓗꓪ ꓐꓰ ꓓꓳ ꓙꓰ ꓢꓲ꓾ ꓢꓲ-ꓟꓴ ꓦꓲ ꓗꓪ ꓓꓵꓽ ꓡꓰˍ ꓡꓳ꓿ ꓢꓲ-ꓟꓴ ꓟꓹ ꓟ ꓑꓯꓹ ꓠꓬ ꓖꓳ ꓓꓱꓽ ꓮꓽ ꓘꓶꓸ ꓛꓴ ꓞꓻ ꓢꓲ ꓠꓻ ꓔꓬ ꓠꓬꓲ꓾ ꓬꓲ ꓪꓽ ꓠꓬ ꓬꓲ ꓐꓱ ꓶ ꓬꓰ-ꓢꓴ ꓔꓯ ꓓꓰꓽˍ ꓡꓳ꓿ 39 ꓬꓰ-ꓢꓴ ꓠꓬ ꓬꓲ ꓒꓻ ꓕꓲ ꓗꓪ ꓦꓰꓼ ꓞ ꓢꓲ꓾ ꓬꓲ ꓖꓳ ꓓꓱꓽ ꓮꓽ ꓘꓶꓸ ꓞꓻ ꓢꓲ ꓠꓻˍ ꓟ ꓔꓯ ꓕꓼ ꓗꓷ ꓠꓬ ꓓꓻ ꓡꓰꓳ꓿ ꓖꓳ ꓡꓱ ꓠꓬ ꓬꓲ ꓞꓼ ꓐꓰ ꓔꓴ ꓡ ꓢꓲ ꓬꓲ ꓪꓽ ꓔꓯ ꓜ ꓫꓬꓹ ꓖꓶ ꓜꓽˍ ꓡꓳ꓿ 40 ꓟꓲꓽ ꓟꓲ ꓓꓵꓽ ꓡꓰˍ ꓕꓯ꓾ ꓠꓻ ꓫꓵꓽ ꓠꓻ ꓙꓰ ꓠ ꓢꓴ ꓮꓽ ꓙꓵ ꓔꓯ ꓬꓲ ꓪꓽ ꓡꓰ ꓬꓲ ꓔꓬ ꓗꓪ ꓧꓳꓽ ꓡ ꓠꓬ꓾ ꓬꓰ-ꓢꓴ ꓡꓰ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓡꓯꓼ ꓒꓯꓹ ꓚꓰꓹ ꓖꓶ ꓢꓲ ꓫꓬꓹ ꓓꓻ ꓡꓰ ꓝꓲˍ ꓡꓳ꓿ 41 ꓝꓮꓲ ꓠꓬ ꓮꓽ ꓟꓬꓹ ꓣꓳ ꓖꓳ ꓓꓱꓽ ꓗꓪ ꓐꓰ ꓠꓲꓽ ꓓꓳ ꓡ ꓢꓲ꓾ ꓠꓴ ꓠꓬ ꓪꓴ-ꓢ ꓬꓲ ꓮ ꓐꓲ ꓥꓳ꓾ ꓐꓰ ꓘꓴˍ ꓡꓳ꓿ ꓠꓲꓽ ꓠꓬ꓾ ꓬꓲ ꓠꓽ ꓙꓲ-ꓢꓴ ꓥ ꓟ ꓢꓷꓸˍ ꓠꓬꓲ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓕꓼ ꓢꓲ ꓟꓽ ꓫꓸ ꓕꓱ ꓝꓲ꓿ 42 ꓟꓲꓽ ꓕꓯꓽ ꓙꓲ ꓡ ꓕꓯ꓾ ꓬꓰ-ꓢꓴ ꓠꓬ ꓡꓲ ꓛꓲ ꓟꓵꓽ ꓕꓲ ꓔꓳꓸ ꓗꓪ ꓓꓳ ꓙꓰˍ ꓡꓳ꓿ ꓖꓳ ꓡꓱ ꓠꓬ ꓞꓳ ꓜꓴ ꓡꓰ ꓬꓲ ꓔꓯ ꓧꓪ ꓢꓲ ꓧꓪ ꓟꓶ ꓗꓷ ꓠꓬ꓾ ꓬꓲ ꓪꓽˍ ꓐꓰ ꓟꓽ ꓧꓹ ꓙꓰ ꓠꓹ ꓟ ꓬꓲ ꓔꓯ ꓗꓽ ꓔꓸˍ ꓐꓰ ꓬꓰˍ ꓡꓳ꓿ 43 ꓬꓲ ꓠꓽ ꓬꓲ ꓪꓽ ꓔꓯ꓾ ꓥꓪ ꓠꓬ ꓠꓱꓸ ꓐꓯꓼ ꓡꓳ ꓒꓱ ꓗꓪˍ ꓟꓲ ꓪꓴ-ꓢ ꓗꓴꓷꓼ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶꓽ ꓠ ꓗꓹ ꓡꓳ꓿ ꓕꓱ ꓡꓱ ꓬꓰ ꓠꓹ ꓟ ꓥꓪ ꓔꓯ ꓝꓲ ꓩꓴ ꓡ ꓟ ꓥ ꓡꓳ꓾ ꓐꓯˍ ꓡꓳ꓿ 44 ꓖꓳ ꓡꓱ ꓢꓲ ꓬꓰ-ꓢꓴ ꓠꓬ ꓬꓴ-ꓔ ꓟꓵꓽˍ ꓐꓰ ꓖ-ꓡꓲ-ꓡꓲ ꓟꓵꓽ ꓗꓪ ꓟ ꓜꓲꓼ ꓦꓲ ꓮꓽ ꓟꓬꓹ ꓗꓪ ꓡꓯꓼ ꓫꓵ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ꓿

ꓡꓴ-ꓗ 6

1 ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓐꓲ ꓞꓹ ꓢꓲ꓾ ꓬꓳ-ꓔ ꓬꓲꓽ ꓟ ꓗꓪ ꓐꓰ ꓬꓲꓼ ꓡ ꓗꓸ ꓠꓯ꓾ ꓢꓲ-ꓫꓬ-ꓟ-ꓦ ꓡꓰ ꓬꓲ ꓔꓯ ꓡꓲ ꓛꓲ ꓗꓪ ꓡꓲ ꓞꓲ ꓠꓬꓲ ꓧꓳꓽ ꓔꓬ ꓕꓯ꓾ 2 ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓫꓵꓽ ꓠꓬꓲˍ ꓡꓳ꓿ ꓬꓰ-ꓢꓴ ꓠꓬ ꓟꓽ ꓜꓽ ꓟꓽ ꓓꓳꓻ ꓡꓲ ꓞꓲ ꓦꓬꓼ ꓡꓲ ꓞꓲ ꓠꓬꓲ ꓔꓬ ꓗꓷ ꓠꓬ ꓦꓰ ꓟꓷꓼˍ ꓡꓳ꓿ 3 ꓖꓳ ꓕꓯ ꓠꓲꓽ ꓪ ꓔꓲꓸ ꓡꓰ ꓬꓰ-ꓢꓴ ꓔꓯ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ꓾ Bꓸ ꓛꓲ ꓕꓱ ꓕꓲ ꓘꓴꓸ ꓔꓯ ꓑ ꓑ ꓒꓬꓱꓼ ꓡ ꓠꓹ ꓟ ꓕꓵꓼ ꓪꓽ ꓖꓶ ꓟꓴꓽ꓾ ꓐꓯˍ ꓡꓳ꓿ 4 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶꓽ ꓢꓲ꓾ ꓞꓳ ꓤꓽ ꓠꓬ ꓜꓽ ꓓꓴ ꓗꓪ ꓐꓰˍ ꓡꓰꓽ ꓢꓯꓸ ꓔꓬ ꓟ ꓟꓽ ꓥ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ 5 ꓖꓳ ꓡꓱ ꓠꓬ ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓟꓴˍ ꓟ ꓕꓲ ꓖ ꓗꓪ ꓧꓳꓽ ꓓꓯ ꓙꓰ ꓢꓲ꓾ ꓟꓵꓽ ꓗꓳꓹ ꓓꓵ ꓓꓵ ꓟ ꓗꓴꓷꓼ ꓮꓽ ꓙꓵ ꓡꓱꓸꓼ ꓬꓲ ꓔꓯ ꓕꓲ ꓑꓹ ꓤ ꓖꓴ ꓟꓸ ꓖꓶ ꓢꓲ ꓠꓬꓲ꓾ 6 ꓙꓵꓽ ꓪˍ ꓐꓰ ꓟꓬꓱꓺ ꓓꓳꓽ ꓕꓱ ꓟ ꓮꓽ ꓙꓵ ꓥꓪ ꓡꓰ ꓠꓴ ꓔꓯ ꓖꓶˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ ꓥꓪ ꓔꓯ ꓡꓯꓼ ꓙꓱ ꓖꓶꓽ ꓔ ꓟ ꓥ ꓠꓬꓲ꓾ ꓥꓪ ꓮꓽ ꓟ ꓔꓯ ꓖꓶ ꓠꓲꓹ ꓫꓵˍ ꓟꓲ ꓖꓶ ꓓꓻˍ ꓟ ꓥ ꓡꓳ꓿ 7 ꓖꓳ ꓡꓱ ꓠꓬꓲ ꓠꓴ ꓥꓪ ꓔꓯ ꓪꓴꓸ ꓓꓵ ꓕꓱꓼˍ ꓠꓬ꓾ ꓕꓱ ꓟ ꓮꓽ ꓙꓵ ꓠꓴ ꓔꓯꓸ ꓟ ꓒꓬꓱꓼ ꓡ ꓥꓳ꓾ ꓐꓯˍ ꓡꓳ꓿ 8 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓠꓬ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓬꓲ ꓔꓯˍ ꓡꓰꓽ ꓣꓱꓽ ꓙ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ 9 ꓖꓳ ꓡꓱ ꓠꓬ ꓠꓲꓽ ꓪ ꓔꓲꓸ ꓡꓰ ꓬꓲ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓧꓳꓽ ꓙꓰ ꓢꓲ꓾ ꓢꓲꓽ ꓫꓬ ꓦꓲ ꓟꓴ ꓓꓰꓺˍ ꓟ ꓕꓲ ꓔꓳꓸ ꓗꓪ ꓦꓰꓼ ꓔꓬ ꓝꓲ ꓢꓲ ꓠꓬꓲ꓾ ꓠꓴ ꓠꓬ ꓪꓴ-ꓢ ꓮ ꓐꓲ ꓥ ꓕꓯ ꓠꓽ ꓕꓱ ꓗꓪ ꓐꓰ ꓔꓷꓹ ꓬꓯꓼ ꓙꓰ꓿ 10 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓢꓲ ꓒꓽ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓠꓴ ꓐꓱ ꓶ ꓕꓵꓼ ꓪꓽ ꓖꓶ ꓢꓲ꓾ ꓠꓴ ꓔꓯ ꓔ ꓙ ꓝꓲˍ ꓥꓳ꓿ 11 ꓝꓮꓲ꓾ ꓠꓴ ꓛꓲ ꓒꓯꓹ ꓠꓬ Bꓸ ꓛꓲ ꓗꓪ ꓟꓽ ꓕꓯꓼ ꓡꓰ ꓠꓹ ꓟ ꓬꓲ ꓪꓽ ꓡꓯꓼ ꓒꓯꓹ ꓡꓰ ꓠꓴ ꓔꓯ ꓓꓽ ꓔꓸ ꓖꓶˍ ꓥꓳ꓾ ꓐꓰ ꓐꓳ ꓔ ꓡꓳ꓾ ꓐꓯˍ ꓡꓳ꓿ 12 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓴ ꓫꓵꓽ ꓠꓬꓲ ꓟꓽ ꓓ꓾ ꓐꓰ ꓕꓳ ꓶ ꓗꓪ ꓓꓯꓹ ꓡꓳ꓾ ꓐꓯ ꓖꓶˍ ꓡꓳ꓿ 13 ꓠꓲꓽ ꓪ ꓔꓲꓸ ꓬꓲ ꓫꓵꓽ ꓠꓬꓲ ꓖꓴ ꓡꓰ ꓠꓬ꓾ ꓬꓰ-ꓢꓴ ꓔꓯꓸˍ ꓐꓰ ꓕꓲ ꓝꓲꓸ ꓤ ꓧꓹ ꓙꓰˍ ꓡꓳ꓿ 14 ꓖꓳ ꓕꓯ ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓪꓽ ꓠꓬꓲˍ ꓟ ꓐꓲ ꓞ ꓢꓲ꓾ ꓖ-ꓡꓲ-ꓡꓲ ꓟꓵꓽ ꓗꓪ ꓬꓲꓼ ꓙꓰˍ ꓡꓳ꓿ ꓬꓲ ꓓꓳꓽ ꓠꓬ ꓚꓳ ꓡꓳ ꓟ ꓟꓵꓽ ꓮꓽ ꓙꓵ ꓗꓪ ꓐꓯ ꓒꓬꓱ ꓙꓰˍ ꓡꓳ꓿ 15 ꓬꓲ ꓠꓬ ꓬꓲ ꓪꓽ ꓜꓲꓼ ꓦꓲ ꓮꓽ ꓙꓵ ꓗꓪ ꓟꓸ ꓟꓲꓽ ꓟꓸ ꓖꓶ ꓢꓲ꓾ ꓮꓽ ꓙꓵ ꓢꓴ ꓬꓲ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ 16 ꓬꓰ-ꓢꓴ ꓠꓬ ꓬꓲ ꓪꓴꓽ ꓡ ꓟ ꓟꓵꓽ ꓠ-ꓢ-ꓡꓱ ꓗꓪ ꓛꓲ ꓡ ꓢꓲ꓾ ꓬꓲ ꓬꓰ ꓝꓳꓺ ꓡꓰ ꓟ ꓡꓰ ꓐꓰ ꓠꓽ ꓦꓬꓼ ꓠꓬꓲ ꓕꓯ ꓜꓲꓼ ꓦꓲ ꓗꓪ ꓓꓵꓽ ꓙꓰ ꓢꓲ ꓠꓬꓲ꓾ ꓢꓲꓽ ꓫꓬ ꓕꓳ ꓶ ꓵ ꓠꓹ ꓟ ꓦꓰꓼ ꓔꓴ ꓡ ꓡꓳ꓿ 17 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓕꓳ ꓶ ꓡꓲꓺ ꓬꓲ ꓔꓯ ꓖꓶ ꓢꓲ꓾ ꓬꓲ ꓡꓰ ꓒꓶꓺ ꓗꓷ ꓠꓬ꓾ 18 ꓢꓲ ꓒꓽ ꓬꓲ ꓦ ꓠꓬ ꓥꓪ ꓔꓯ ꓥꓳꓽ ꓞꓹ ꓡꓳ꓿ ꓮ ꓡꓲꓳ ꓐꓯ ꓠꓬ꓾ ꓞꓳ ꓫꓸ ꓔꓯ ꓶꓼ ꓓꓳ ꓫꓱꓹ ꓓꓳꓽ ꓚ ꓟꓸ ꓖꓶ ꓠꓹ ꓟ ꓬꓲ ꓡꓰ ꓥꓪ ꓔꓯ ꓟꓰꓺ ꓞꓶ ꓡꓰ ꓟꓰꓺ ꓗꓷꓳ꓿ ꓪꓳꓽ ꓞ ꓢꓴ ꓔꓯ ꓩꓴ ꓗꓷˍ ꓟ ꓓꓳꓽ ꓚ ꓟꓸ ꓠꓹ ꓟ꓾ ꓟꓬ ꓔꓶ ꓢꓴ ꓐꓴ ꓠꓬꓲ ꓟꓳꓻ ꓡ ꓠꓹ ꓟ꓾ ꓠꓬꓲꓸ ꓬꓯꓼ ꓢꓴ ꓔꓯ ꓩꓴ ꓗꓷ ꓟ ꓟꓶ ꓝꓲ ꓠꓹ ꓟ ꓐꓰ꓾ 19 ꓢꓲ ꓒꓽ ꓡꓰ ꓞꓳ ꓤ ꓔꓯ ꓘꓳꓻ ꓣꓴˍ ꓟ ꓘꓳꓼ ꓚ ꓟꓸ ꓖꓶ ꓠꓹ ꓟ꓾ ꓬꓲ ꓥꓪ ꓔꓯ ꓝꓲ ꓩꓴ ꓡꓺꓳ꓾ ꓐꓰ ꓐꓳ ꓔ ꓟ ꓕꓲ ꓔꓳꓸ ꓧꓪ ꓟꓶˍ ꓡꓳ꓿ 20 ꓬꓲ ꓡꓰ ꓕꓳ ꓶ ꓡꓲ ꓔꓯ ꓡꓲꓺ ꓗꓷ ꓢꓲ꓾ ꓜꓲꓼ ꓦꓲ ꓗꓪ ꓟ ꓕꓳ ꓶ ꓫ ꓢꓴ ꓔꓯ ꓡꓲꓸ ꓖꓶ ꓢꓲ ꓠꓬꓲ ꓠꓬꓲꓸ ꓠꓸ ꓗꓷ ꓠꓬ꓾ ꓜꓲꓼ ꓦꓲ ꓗꓪ ꓔꓬ ꓢꓴ ꓮꓽ ꓙꓵ ꓬꓲ ꓔꓯ ꓜꓲꓽ ꓜꓲˍ ꓡꓰꓽ ꓡꓳꓸ ꓔꓬ ꓡꓳ꓿ 21 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓐꓯ ꓘꓶꓽ ꓕꓱ ꓟ ꓠꓬ ꓠꓬꓲꓸ ꓠꓬꓲ ꓠꓴ ꓪꓽ ꓑ ꓙꓽˍ ꓟ ꓗꓪ ꓐꓲ ꓡꓰꓳ꓾ ꓐꓯ ꓖꓶˍ ꓡꓳ꓿ 22 ꓖꓳ ꓕꓯ ꓮꓽ ꓙꓵ ꓢꓴ ꓠꓬ ꓬꓲ ꓔꓯ ꓓꓳꓹ ꓟꓴ ꓢꓲ꓾ ꓬꓲ ꓡꓰ ꓐꓯ ꓓꓳ ꓡ ꓟ ꓣꓱꓽ ꓛꓰ ꓙꓳˍ ꓟ ꓐꓯ ꓘꓶꓽ ꓔꓯ ꓓꓵꓽ ꓙ ꓟꓶ ꓢꓲ ꓠꓬꓲ꓾ ꓕꓱ ꓕꓲ ꓣꓳ ꓠꓬ ꓬꓳ-ꓢꓷ ꓬꓲ ꓤ ꓟꓽ ꓥ ꓡ?꓾ ꓐꓯˍ ꓡꓳ꓿ 23 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ꓾ ꓠꓻ ꓫꓬꓹ ꓒꓽꓳ꓾ ꓠꓴ ꓚꓲꓸ ꓛꓬ ꓠꓻ ꓠꓴ ꓫꓬꓹ꓾ ꓐꓯˍ ꓟ ꓥꓳꓽ ꓜꓱ ꓕꓱ ꓟ ꓐꓰ꓾ ꓥꓪ ꓠꓴꓽ ꓑ ꓙꓽ ꓗꓷ ꓟ꓾ ꓘ-ꓒꓱ-ꓠꓴ ꓗꓪ ꓠꓴ ꓬꓰ ꓗꓷ ꓟ ꓟꓬꓱꓽ ꓮꓽ ꓙꓵ ꓕꓻ ꓠꓴ ꓟꓵꓽ ꓠꓴ ꓡꓳꓻ ꓗꓪˍ ꓟꓲ ꓬꓰ꓾ ꓐꓰ ꓮ ꓡꓲ ꓥ ꓟꓲ ꓥꓪ ꓔꓯ ꓐꓯ ꓡ ꓥꓳ꓾ ꓐꓯˍ ꓡꓳ꓿ 24 ꓝꓮꓲ ꓬꓲ ꓡꓰ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓟꓷꓽ ꓠꓷꓹ ꓝꓸ ꓢꓴ ꓮꓽ ꓟ ꓔꓯˍ ꓟꓲ ꓬꓲ ꓚꓲꓸ ꓛꓬ ꓟꓵꓽ ꓗꓪ ꓘꓳꓻ ꓣꓴˍ ꓟ ꓟꓽ ꓙꓳ꓿ 25 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ-ꓡꓲ-ꓬ ꓔꓬ ꓟ ꓦꓬꓼ ꓠꓬꓲ ꓗꓪ꓾ ꓢ ꓘꓳꓼ ꓐꓶꓽ ꓟꓶꓽ ꓦ ꓟꓽ ꓦ ꓗꓷ ꓡꓰ ꓢꓲ꓾ ꓕꓲ ꓟꓵꓽ ꓡꓱꓸꓼ ꓗꓪ ꓦꓰꓼ ꓟꓷꓼ ꓘꓳꓼ ꓓꓽ ꓟ ꓓꓳˍ ꓕꓯ꓾ ꓬꓲ-ꓢꓷ-ꓡꓰ ꓟꓵꓽ ꓗꓪ ꓟꓶꓽ ꓛꓵꓽ ꓟ ꓮꓽ ꓟꓬꓹ ꓙꓳˍ ꓡꓳ꓿ 26 ꓖꓳ ꓡꓱ ꓥ ꓟꓲ ꓢꓲ-ꓓꓳ ꓟꓵꓽ ꓢ-ꓡꓷ-ꓩ ꓡꓳ ꓒꓱ ꓗꓪ ꓟ ꓟꓶꓽ ꓛꓵꓽ ꓟ ꓕꓲ ꓣꓳ ꓔꓯˍ ꓡꓰꓽ ꓟ ꓥ ꓠꓬ꓾ ꓬꓲ ꓪꓽ ꓖꓳ ꓟꓬ ꓟ ꓮꓽ ꓟ ꓔꓬ ꓗꓪˍ ꓟꓲ ꓬꓲ-ꓡꓲ-ꓬ ꓔꓯ ꓟꓽ ꓝꓲ ꓩꓴ ꓗꓷ꓿ 27 ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓡꓲ-ꓫ ꓔꓬ ꓕꓯ꓾ ꓬꓲ-ꓢꓷ-ꓡꓰ ꓟꓵꓽ ꓗꓪ ꓔꓸ ꓟꓼ ꓩꓴ ꓓꓲ ꓢꓴ ꓮꓽ ꓟꓬꓹ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓫꓲ-ꓡꓲ-ꓬꓼ ꓢꓴ ꓠꓰ-ꓬ-ꓟꓷꓽ ꓟꓽ ꓥ ꓠꓬ꓾ ꓠꓱꓸ ꓐꓯ ꓕꓲ ꓣꓳˍ ꓟꓲ ꓟꓽ ꓫꓬꓻ ꓡꓰ꓾ ꓐꓯˍ ꓡꓳ꓿ 28 ꓜꓲꓼ ꓦꓲ ꓗꓪ ꓟ ꓡꓽ ꓞꓳ ꓮꓽ ꓙꓵ ꓐꓯ ꓘꓶꓽ ꓕꓱ ꓟ ꓑ ꓙꓽ ꓗꓷ ꓠꓬ꓾ ꓠꓲꓹ ꓟ ꓮꓽ ꓘꓶꓸ ꓦꓶꓻ ꓠꓬꓲ꓾ 29 ꓔꓴ ꓡ ꓢꓲ꓾ ꓬꓲ ꓔꓯ ꓡꓳ ꓒꓱ ꓗꓪ ꓐꓰ ꓖꓼ ꓓꓳ ꓩꓴ ꓗꓷ ꓢꓲ ꓠꓬꓲ꓾ ꓬꓲ ꓪꓽ ꓡꓳ ꓒꓱ ꓜꓶꓻ ꓔ ꓖꓴ ꓪꓽ ꓡꓵꓸ ꓘꓶꓽ ꓗꓪ ꓧꓳꓽ ꓙꓰ ꓢꓲ꓾ ꓬꓲ ꓔꓯ ꓓꓱꓽ ꓞꓰꓻ ꓩꓴ ꓗꓷˍ ꓐꓰ ꓬꓰˍ ꓡꓳ꓿ 30 ꓖꓳ ꓡꓱ ꓥ ꓟꓲ ꓬꓲ ꓠꓽ ꓬꓲ ꓪꓽ ꓗꓳ ꓡꓳ ꓗꓪ ꓐꓰ ꓗꓳꓸ ꓙꓰ ꓢꓲ ꓙꓰ ꓗꓷꓳ꓿ 31 ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵꓽ ꓘꓹ-ꓒꓱ-ꓠꓴ ꓟꓬꓱꓺ ꓔ ꓟ ꓡꓳ ꓒꓱ ꓗꓪ ꓬꓯꓼ ꓡ ꓡꓳ꓿ ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓬꓲ ꓪꓽ ꓔꓯ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ 32 ꓬꓲ ꓟꓸ ꓖꓶˍ ꓟ ꓔꓯ ꓬꓲ ꓪꓽ ꓓꓵꓽ ꓙ ꓟꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓐꓯ ꓘꓶ ꓠꓽ ꓙꓵꓽ ꓪ ꓙꓳˍ ꓡꓳ꓿ 33 ꓜꓲꓼ ꓦꓲ ꓠꓯꓸꓼ ꓗꓪ ꓟꓽ ꓫꓬ ꓠꓲꓽ ꓓꓯꓹ ꓟ ꓞꓳ ꓑꓸ ꓤ ꓕꓲ ꓣꓳ ꓔꓬ ꓡꓳ꓿ ꓠꓲꓽ ꓠꓬ ꓢꓯꓼ ꓓꓽ ꓟ ꓡꓰ ꓘꓴꓻ ꓢꓲ꓾ 34 ꓠ-ꓢ-ꓡꓱ ꓢꓴ ꓬꓰ-ꓢꓴꓳ꓾ ꓠꓴ ꓠꓬ ꓥꓪ ꓠꓴꓽˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓙꓳˍ ꓡ? ꓥꓪ ꓠꓴꓽ ꓔꓯ ꓟꓶꓽ ꓬꓰ ꓝꓲˍ ꓐꓰ ꓡꓻ ꓡ? ꓠꓴ ꓮꓽ ꓟ ꓥ ꓟ ꓥꓪ ꓢꓷꓸˍ ꓡꓳ꓿ ꓠꓴ ꓠꓽ ꓪꓴ-ꓢ ꓬꓲ ꓢꓲꓽ ꓫꓬ ꓢꓴ ꓖꓳꓻ ꓕꓲ ꓣꓳ ꓟ ꓥꓳ꓾ ꓐꓯˍ ꓡꓳ꓿ 35 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ ꓕꓼ ꓢꓲ꓾ ꓕꓽ ꓪꓳꓹ꓾ ꓬꓲ ꓔꓯˍ ꓐꓰ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓠꓲꓽ ꓡꓰ ꓮꓽ ꓙꓵ ꓢꓴ ꓟꓳꓻ ꓟꓳꓻ ꓡꓰꓽ ꓖꓳ ꓕꓲ ꓣꓳ ꓔꓯ ꓚꓵꓹ ꓓꓳꓽ ꓗꓷ ꓢꓲ꓾ ꓬꓲ ꓔꓯˍ ꓐꓰ ꓓꓳ ꓡ ꓡꓳ꓿ ꓡꓽ ꓞꓳ ꓖꓳ ꓕꓲ ꓣꓳ ꓠꓽ ꓮ ꓡꓲˍ ꓟꓲ ꓟꓽ ꓗꓷ ꓡꓰ꓿ 36 ꓖꓳ ꓡꓱ ꓠꓬ ꓮꓽ ꓙꓵ ꓢꓴ ꓓꓵꓽ ꓙ ꓟꓶ ꓡꓰ ꓢꓲ꓾ ꓟꓽ ꓫꓬ ꓠꓲꓽ ꓔꓯˍ ꓟꓲ ꓬꓲ ꓙꓵꓽ ꓪˍ ꓐꓰ ꓪꓽ ꓠꓬꓲˍ ꓟ ꓡꓰ ꓕꓵꓼ ꓪꓽ ꓖꓶꓽ ꓗꓷ ꓠꓬ ꓓꓳ ꓙꓰˍ ꓟ ꓕꓱ ꓟ ꓠꓬ꓾ ꓮ ꓡꓲ ꓡꓳ ꓫꓵꓽ ꓟꓸ ꓟꓲꓽ ꓥ ꓡ?꓾ ꓐꓰ ꓠ ꓠꓬꓲ ꓡꓯꓽ ꓘꓳˍ ꓡꓳ꓿ 37 ꓖꓳ ꓡꓱ ꓢꓲ ꓬꓰ-ꓢꓴ ꓬꓲ ꓓꓳꓽ ꓠꓬ ꓚꓳ ꓡꓳ ꓟ ꓟꓵꓽ ꓮꓽ ꓙꓵ ꓗꓪ ꓚ ꓒꓬꓱ ꓙꓰˍ ꓡꓳ꓿ 38 ꓬꓰ-ꓢꓴ ꓠꓬ ꓜꓲꓼ ꓦꓲ ꓗꓪ ꓐꓰ ꓓꓳ ꓙꓰ ꓢꓲ꓾ ꓢꓲ-ꓟꓴ ꓦꓲ ꓗꓪ ꓓꓵꓽ ꓡꓰˍ ꓡꓳ꓿ ꓢꓲ-ꓟꓴ ꓟꓹ ꓟ ꓑꓯꓹ ꓠꓬ ꓖꓳ ꓓꓱꓽ ꓮꓽ ꓘꓶꓸ ꓛꓴ ꓞꓻ ꓢꓲ ꓠꓻ ꓔꓬ ꓠꓬꓲ꓾ ꓬꓲ ꓪꓽ ꓠꓬ ꓬꓲ ꓐꓱ ꓶ ꓬꓰ-ꓢꓴ ꓔꓯ ꓓꓰꓽˍ ꓡꓳ꓿ 39 ꓬꓰ-ꓢꓴ ꓠꓬ ꓬꓲ ꓒꓻ ꓕꓲ ꓗꓪ ꓦꓰꓼ ꓞ ꓢꓲ꓾ ꓬꓲ ꓖꓳ ꓓꓱꓽ ꓮꓽ ꓘꓶꓸ ꓞꓻ ꓢꓲ ꓠꓻˍ ꓟ ꓔꓯ ꓕꓼ ꓗꓷ ꓠꓬ ꓓꓻ ꓡꓰꓳ꓿ ꓖꓳ ꓡꓱ ꓠꓬ ꓬꓲ ꓞꓼ ꓐꓰ ꓔꓴ ꓡ ꓢꓲ ꓬꓲ ꓪꓽ ꓔꓯ ꓜ ꓫꓬꓹ ꓖꓶ ꓜꓽˍ ꓡꓳ꓿ 40 ꓟꓲꓽ ꓟꓲ ꓓꓵꓽ ꓡꓰˍ ꓕꓯ꓾ ꓠꓻ ꓫꓵꓽ ꓠꓻ ꓙꓰ ꓠ ꓢꓴ ꓮꓽ ꓙꓵ ꓔꓯ ꓬꓲ ꓪꓽ ꓡꓰ ꓬꓲ ꓔꓬ ꓗꓪ ꓧꓳꓽ ꓡ ꓠꓬ꓾ ꓬꓰ-ꓢꓴ ꓡꓰ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓡꓯꓼ ꓒꓯꓹ ꓚꓰꓹ ꓖꓶ ꓢꓲ ꓫꓬꓹ ꓓꓻ ꓡꓰ ꓝꓲˍ ꓡꓳ꓿ 41 ꓝꓮꓲ ꓠꓬ ꓮꓽ ꓟꓬꓹ ꓣꓳ ꓖꓳ ꓓꓱꓽ ꓗꓪ ꓐꓰ ꓠꓲꓽ ꓓꓳ ꓡ ꓢꓲ꓾ ꓠꓴ ꓠꓬ ꓪꓴ-ꓢ ꓬꓲ ꓮ ꓐꓲ ꓥꓳ꓾ ꓐꓰ ꓘꓴˍ ꓡꓳ꓿ ꓠꓲꓽ ꓠꓬ꓾ ꓬꓲ ꓠꓽ ꓙꓲ-ꓢꓴ ꓥ ꓟ ꓢꓷꓸˍ ꓠꓬꓲ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓕꓼ ꓢꓲ ꓟꓽ ꓫꓸ ꓕꓱ ꓝꓲ꓿ 42 ꓟꓲꓽ ꓕꓯꓽ ꓙꓲ ꓡ ꓕꓯ꓾ ꓬꓰ-ꓢꓴ ꓠꓬ ꓡꓲ ꓛꓲ ꓟꓵꓽ ꓕꓲ ꓔꓳꓸ ꓗꓪ ꓓꓳ ꓙꓰˍ ꓡꓳ꓿ ꓖꓳ ꓡꓱ ꓠꓬ ꓞꓳ ꓜꓴ ꓡꓰ ꓬꓲ ꓔꓯ ꓧꓪ ꓢꓲ ꓧꓪ ꓟꓶ ꓗꓷ ꓠꓬ꓾ ꓬꓲ ꓪꓽˍ ꓐꓰ ꓟꓽ ꓧꓹ ꓙꓰ ꓠꓹ ꓟ ꓬꓲ ꓔꓯ ꓗꓽ ꓔꓸˍ ꓐꓰ ꓬꓰˍ ꓡꓳ꓿ 43 ꓬꓲ ꓠꓽ ꓬꓲ ꓪꓽ ꓔꓯ꓾ ꓥꓪ ꓠꓬ ꓠꓱꓸ ꓐꓯꓼ ꓡꓳ ꓒꓱ ꓗꓪˍ ꓟꓲ ꓪꓴ-ꓢ ꓗꓴꓷꓼ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶꓽ ꓠ ꓗꓹ ꓡꓳ꓿ ꓕꓱ ꓡꓱ ꓬꓰ ꓠꓹ ꓟ ꓥꓪ ꓔꓯ ꓝꓲ ꓩꓴ ꓡ ꓟ ꓥ ꓡꓳ꓾ ꓐꓯˍ ꓡꓳ꓿ 44 ꓖꓳ ꓡꓱ ꓢꓲ ꓬꓰ-ꓢꓴ ꓠꓬ ꓬꓴ-ꓔ ꓟꓵꓽˍ ꓐꓰ ꓖ-ꓡꓲ-ꓡꓲ ꓟꓵꓽ ꓗꓪ ꓟ ꓜꓲꓼ ꓦꓲ ꓮꓽ ꓟꓬꓹ ꓗꓪ ꓡꓯꓼ ꓫꓵ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ꓿

ꓡꓴ-ꓗ 7

1 ꓬꓰ-ꓢꓴ ꓠꓬ ꓑ ꓫꓬꓼ ꓐꓴ ꓑ ꓙꓽˍ ꓟ ꓗꓪ ꓬꓲ ꓐꓯ ꓘꓶꓽ ꓕꓱ ꓟ ꓮꓽ ꓙꓵ ꓚ ꓓꓳ ꓡꓰ ꓠꓬ꓾ ꓘ-ꓒꓱ-ꓠꓴ ꓡꓳ ꓒꓱ ꓗꓪ ꓙꓰˍ ꓡꓳ꓿ 2 ꓖꓳ ꓗꓪ ꓔꓬ ꓟ ꓟꓯꓼ ꓕꓲ ꓦꓬꓻ ꓙꓵꓽ ꓒ ꓬꓲ ꓮꓽ ꓘꓶꓸ ꓠꓲꓹ ꓠꓵˍ ꓟ ꓚꓳ ꓑꓸ ꓕꓲ ꓣꓳ ꓠꓬ꓾ ꓠꓻ ꓢꓲ ꓮꓽ ꓡꓻ ꓫꓵꓻˍ ꓐꓰ ꓗꓹ ꓡꓳ꓿ 3 ꓬꓰ-ꓢꓴ ꓓꓳꓽ ꓬꓲ ꓑ ꓙꓽˍ ꓠꓬ꓾ ꓬꓴ-ꓔ ꓡꓽ ꓞꓳ ꓗꓪ ꓟ ꓞꓳ ꓪꓴꓽ ꓕꓲ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷ ꓢꓲ꓾ ꓬꓲ ꓚꓳ ꓑꓸ ꓔꓯ ꓠ ꓫꓬꓹ ꓖꓶ ꓡ ꓠꓹ ꓟ ꓬꓰ-ꓢꓴ ꓔꓯ ꓓꓰꓽ ꓬꓰ ꓝꓲˍ ꓡꓳ꓿ 4 ꓬꓰ-ꓢꓴ ꓔꓬ ꓗꓪ ꓬꓲ ꓪꓽ ꓛꓲ ꓡ ꓠꓬ꓾ ꓬꓲ ꓪꓽ ꓬꓲ ꓔꓯ ꓟꓽ ꓪ ꓟꓽ ꓞꓽ ꓓꓰꓽ ꓢꓲ꓾ ꓠꓴ ꓬꓲ ꓔꓯ ꓬꓰ ꓙ ꓐ ꓡ ꓠꓬ ꓮꓽ ꓘꓶꓸ ꓙꓲˍ ꓥꓳ꓿ ꓬꓲ ꓠꓽ ꓠꓴ ꓡꓰ ꓬꓰ ꓙˍ ꓟ ꓕꓱ ꓟ ꓟꓶꓻ ꓒꓵꓽˍ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓣꓳ ꓫꓵꓽ ꓔꓯ ꓠꓲꓹ ꓠꓵ ꓢꓲ꓾ ꓥꓪ ꓠꓴꓽ ꓐꓱ ꓶ ꓜꓲꓼ ꓦꓲ ꓫꓬꓹ ꓖꓶ ꓢꓴ ꓥ ꓡꓳ꓾ ꓐꓯˍ ꓡꓳ꓿ 6 ꓖꓳ ꓡꓱ ꓠꓬ ꓬꓰ-ꓢꓴ ꓬꓲ ꓪꓽ ꓔꓯ ꓛꓳ ꓙꓰ ꓢꓲ꓾ ꓟꓯꓼ ꓢꓲꓽ ꓒ ꓖꓳ ꓕꓲ ꓣꓳ ꓦꓲ ꓒ ꓕꓲꓺꓼ ꓗꓪ ꓛꓲ ꓬꓰ ꓕꓯ꓾ ꓟꓯꓼ ꓢꓲꓽ ꓒ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓝꓲ ꓩꓴ ꓗꓷ ꓢꓲ ꓬꓰ-ꓢꓴ ꓔꓯ ꓕꓱ ꓡꓱ ꓐꓯ ꓬꓰ ꓝꓲˍ ꓡꓳ꓿ ꓢꓲ ꓒꓽꓳ꓾ ꓥꓪ ꓠꓬ ꓟꓽ ꓒꓵꓽ ꓢꓴ ꓥ ꓠꓬꓲ꓾ ꓪꓴꓽ ꓧꓶ ꓪꓴꓽ ꓡꓰꓽ ꓥꓪ ꓦꓲ ꓗꓪ ꓓꓵꓽ ꓡ ꓝꓲ ꓠꓲꓹ ꓟꓽ ꓫꓵ꓿ 7 ꓥꓪ ꓚꓲꓸ ꓛꓬꓽˍ ꓟꓲ ꓠꓴ ꓔꓬ ꓗꓪ ꓡ ꓟꓽ ꓒꓵꓽ ꓠꓬꓲ ꓟꓽ ꓡ ꓟ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓐꓯ ꓘꓶꓽ ꓕꓲ ꓘꓶꓽˍ ꓗꓪ ꓐꓰ ꓥꓪ ꓔꓯ ꓣꓱꓽ ꓙ ꓢꓴ ꓠꓽ ꓓꓻ ꓡꓰˍ ꓥꓳ꓿ 8 ꓮ ꓡꓲꓳ ꓐꓯ ꓠꓬ ꓥꓪˍ ꓟꓲ ꓢꓴ ꓙꓵꓽ ꓪ ꓠꓯꓸ ꓘꓪ ꓔꓬ ꓢꓴ ꓥ ꓡꓳ꓿ ꓥꓪ ꓠꓯꓸ ꓘꓪˍ ꓟꓲ ꓟꓯꓼ ꓤ ꓙꓳˍ ꓡꓳ꓿ ꓥꓪ ꓡꓰ ꓕꓱ ꓕꓲ ꓣꓳ ꓔꓯ ꓙꓰ꓾ ꓐꓯˍ ꓠꓬ ꓬꓲ ꓠꓽ ꓙꓰˍ ꓥꓳ꓿ ꓖꓳ ꓕꓲ ꓣꓳ ꓔꓯ ꓡꓯ꓾ ꓐꓯˍ ꓠꓬ ꓬꓲ ꓠꓽ ꓡꓻ ꓥꓳ꓿ ꓥꓪ ꓚꓳ ꓑꓸ ꓔꓯ꓾ ꓠꓴ ꓕꓱ ꓟ ꓬꓰ꓾ ꓐꓯˍ ꓠꓬ ꓬꓲ ꓠꓽ ꓥꓪ ꓐꓯˍ ꓟ ꓡꓰ ꓐꓰ ꓬꓰˍ ꓥꓳ꓾ ꓐꓰ ꓐꓯ ꓬꓰ ꓝꓲˍ ꓡꓳ꓿ 9 ꓐꓯ ꓘꓶꓽ ꓕꓱ ꓟ ꓔꓯ ꓬꓰ-ꓢꓴ ꓑ ꓙꓽ ꓗꓷ ꓠꓬ ꓓꓵꓽ ꓙꓽ ꓟꓶꓻ ꓡꓰ ꓠꓬꓲ ꓔꓲꓸ ꓒꓳꓹ ꓢꓲ꓾ ꓬꓲ ꓔꓯ ꓛꓳ ꓡ ꓢꓴ ꓬꓲ ꓜꓴ ꓔꓯ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ-ꓢꓷ-ꓡꓰ ꓐꓴ ꓗꓳ ꓡꓳ ꓗꓪˍ ꓟꓲ ꓙꓵꓻ ꓠꓲꓹ ꓕꓱ ꓘꓶ ꓛꓲ ꓪꓴꓽˍ ꓟ ꓥꓪ ꓟꓽ ꓔꓳꓹ ꓜꓳꓽ ꓠꓬꓲ꓾ ꓐꓯˍ ꓡꓳ꓿ 10 ꓖꓳ ꓗꓸ ꓠꓯꓸ ꓟꓯꓼ ꓢꓲꓽ ꓒ ꓡꓰ ꓝꓲ ꓩꓴ ꓡ ꓟ ꓖꓳ ꓕꓲ ꓧꓳꓽ ꓠꓬ ꓦꓲ ꓗꓪ ꓬꓲꓼ ꓛꓲ ꓬꓰ ꓕꓯ꓾ ꓚꓳ ꓑꓸ ꓓ ꓡꓰ ꓟ ꓔꓯ ꓟꓳꓻ ꓡꓰꓳ꓿ 11 ꓖꓳ ꓗꓸ ꓠꓯꓸ ꓟꓶꓻ ꓤ ꓟꓽ ꓗꓷ ꓡꓰ ꓕꓯ ꓬꓰ-ꓢꓴ ꓠꓬ ꓠ-ꓬꓰ ꓟꓬꓱ ꓔ ꓟ ꓡꓳ ꓒꓱ ꓕꓲ ꓟ ꓗꓪ ꓙꓰˍ ꓡꓳ꓿ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓞꓳ ꓜꓴ ꓓ ꓟˍ ꓟꓲ ꓬꓲ ꓔꓯ ꓛꓳꓻ ꓙꓰˍ ꓡꓳ꓿ 12 ꓬꓲ ꓪꓽ ꓠꓬ ꓡꓳ ꓒꓱ ꓗ ꓘꓶꓽ ꓗꓪ ꓓꓵꓽ ꓙꓰˍ ꓐꓰ ꓬꓰˍ ꓕꓯ꓾ ꓟꓶꓽ ꓛꓵꓽ ꓟ ꓬꓲ ꓤꓽ ꓔꓲꓸ ꓫꓵꓻ ꓟꓳ ꓔꓯ ꓢꓴ ꓡꓰ ꓑꓱꓸ ꓓꓳ ꓡ ꓟ ꓬꓲ ꓪꓽ ꓟꓳꓻˍ ꓡꓳ꓿ ꓟꓶꓽ ꓛꓵꓽ ꓟ ꓖꓳ ꓟ ꓔꓯ ꓡꓳ ꓒꓱꓻ ꓗꓪ ꓐꓰ ꓛꓳ ꓡ ꓢꓴˍ ꓟꓲ ꓮꓽ ꓟꓬꓹ ꓙꓳˍ ꓡꓳ꓿ 13 ꓢꓲ ꓒꓽ ꓡꓰ ꓟꓶꓽ ꓛꓵꓽ ꓟ ꓔꓯ ꓟꓳꓻ ꓗꓷ ꓠꓬ ꓬꓲ ꓔꓯ ꓫꓱꓸ ꓤ ꓢꓲ꓾ ꓕꓽ ꓥꓴ꓾ ꓐꓯ ꓖꓶˍ ꓡꓳ꓿ 14 ꓖꓳ ꓕꓯ ꓬꓰ-ꓢꓴ ꓠꓬ ꓒ ꓕꓲ ꓗꓪ ꓡ ꓢꓲ ꓖꓴꓽ ꓔꓯ ꓫꓱꓹ ꓗꓷ ꓠꓬ꓾ ꓫꓵꓻ ꓟꓳ ꓑꓱꓸ ꓢꓴ ꓐꓴ ꓦꓰꓼ ꓡꓰˍ ꓡꓳ꓿ ꓖꓳ ꓕꓯ ꓬꓲ ꓡꓰ꓾ ꓤꓽ ꓖꓴ ꓡꓯꓸꓳ꓾ ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓔꓴ ꓡꓯ꓾ ꓐꓯˍ ꓡꓳ꓿ 15 ꓖꓳ ꓡꓱ ꓠꓬ ꓞꓳ ꓫꓵꓻ ꓖꓳ ꓟ ꓠꓬꓲꓸ ꓠꓸ ꓡ ꓢꓲ ꓫꓸ ꓕꓱꓻ ꓡ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓟꓹ ꓟ ꓔꓯ ꓡꓯꓼ ꓙꓱ ꓖꓶˍ ꓡꓳ꓿ 16 ꓮꓽ ꓙꓵ ꓢꓴ ꓠꓬ ꓓꓵꓽ ꓙ ꓟꓶ ꓠꓬꓲ ꓙꓳꓺ ꓠꓬꓲ ꓗꓷ ꓡꓰ ꓢꓲ꓾ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓢꓲ ꓠꓬꓲ꓾ ꓟꓷꓽ ꓠꓷꓹ ꓝꓸ ꓢꓴ ꓓꓽ ꓟ ꓕꓲ ꓣꓳ ꓣꓳꓽ ꓗꓳ ꓡꓳ ꓗꓪ ꓓꓳ ꓡꓺꓳ꓾ ꓪꓴ-ꓢ ꓠꓽ ꓬꓲ ꓑ ꓫꓬꓼ ꓐꓴ ꓔꓯ ꓔꓱꓹ ꓠꓬꓲ ꓡꓺꓳ꓾ ꓐꓯˍ ꓡꓳ꓿ 17 ꓓꓳꓽ ꓕꓱ ꓟ ꓠꓬ ꓬꓴ-ꓔ ꓟꓵꓽ ꓮꓽ ꓙꓵˍ ꓐꓰ ꓚꓳ ꓡꓳ ꓟ ꓟꓵꓽ ꓗꓪ ꓐꓯ ꓒꓬꓱ ꓙꓰˍ ꓡꓳ꓿ 18 ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴ ꓡꓰ꓾ ꓕꓱ ꓟꓬ ꓙꓰꓽ ꓟ ꓮꓽ ꓙꓵ ꓬꓳ-ꓦ ꓔꓯ ꓐꓯ ꓟꓸ ꓖꓶˍ ꓡꓳ꓿ 19 ꓖꓳ ꓕꓯ ꓬꓳ-ꓦ ꓡꓰ ꓬꓲ ꓛꓳꓽ ꓒꓯꓹ ꓠꓬꓲꓽ ꓣꓳ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓢꓲ ꓒꓽ ꓔꓬ ꓗꓪ ꓝꓲ ꓩꓴ ꓗꓷ ꓢꓲ ꓠꓬꓲ꓾ ꓡ ꓠꓹ ꓟ ꓖꓳ ꓕꓲ ꓣꓳ ꓠꓬ ꓠꓴ ꓥ ꓡ? ꓥ ꓠꓬ ꓥꓪ ꓠꓴꓽ ꓠꓽ ꓠꓱꓸ ꓐꓯꓼ ꓕꓲ ꓣꓳ ꓔꓯ ꓡꓳ ꓠꓬꓹ ꓠꓯꓹ ꓢꓰꓽ ꓡ?꓾ ꓐꓰ ꓠ ꓠꓬꓲ ꓬꓰ ꓝꓲˍ ꓡꓳ꓿ 20 ꓡꓽ ꓞꓳ ꓖꓳ ꓠꓬꓲꓽ ꓣꓳ ꓬꓰ-ꓢꓴ ꓔꓬ ꓗꓪ ꓛꓲ ꓬꓰ ꓠꓬ꓾ ꓖꓳ ꓓꓱꓽ ꓔꓲꓹ ꓖꓶ ꓢꓴ ꓬꓳ-ꓦ ꓡꓰ ꓥꓪ ꓠꓴꓽ ꓔꓯ ꓠꓴ ꓔꓬ ꓗꓪ ꓝꓲ ꓩꓴ ꓡ ꓢꓲ꓾ ꓡ ꓠꓹ ꓟ ꓖꓳ ꓕꓲ ꓣꓳ ꓠꓬ ꓠꓴ ꓥ ꓡ? ꓥ ꓠꓬ ꓥꓪ ꓠꓴꓽ ꓠꓽ ꓠꓱꓸ ꓐꓯꓼ ꓕꓲ ꓣꓳ ꓔꓯ ꓡꓳ ꓠꓬꓹ ꓠꓯꓹ ꓢꓰꓽ ꓡ?꓾ ꓐꓰ ꓠ ꓠꓬꓲ ꓡ ꓝꓲˍ ꓡꓳ꓾ ꓐꓯ ꓖꓶˍ ꓡꓳ꓿ 21 ꓖꓳ ꓕꓲ ꓙꓵꓹ ꓗꓪ꓾ ꓬꓲ ꓡꓰ ꓠꓻ ꓢꓴ ꓒꓬꓽ ꓢꓴ ꓮꓽ ꓟꓬꓹˍ ꓐꓰ꓾ ꓥꓶˍ ꓟ ꓠꓲꓽ ꓜꓶꓽ ꓞꓹ ꓢꓴ ꓮꓽ ꓟꓬꓹ ꓔꓯ ꓫꓬꓹ ꓖꓶ ꓔꓬ ꓡꓳ꓿ ꓝꓮꓲ ꓟꓬ ꓔꓶ ꓢꓴ ꓮꓽ ꓟꓬꓹ ꓣꓳ ꓔꓯˍ ꓟꓲ ꓠꓬꓲ ꓟꓳꓻ ꓡ ꓝꓲˍ ꓡꓳ꓿ 22 ꓖꓳ ꓗꓸ ꓠꓯꓸ ꓬꓲ ꓠꓬ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓙꓰ ꓢꓲ ꓠꓴ ꓪꓽ ꓡꓳꓸ ꓟꓳꓻˍ ꓟ ꓐꓰ ꓑ ꓙꓽ ꓗꓷ ꓟ꓾ ꓟꓬ ꓔꓶ ꓠꓬꓲ ꓟꓳꓻ ꓡ ꓟ꓾ ꓛꓲꓺ ꓫꓳꓸ ꓙ ꓖꓴ ꓫꓱꓽ ꓙꓰˍ ꓟ꓾ ꓔꓸ ꓟꓼ ꓩꓴ ꓓꓲꓻ ꓢꓴ ꓫꓬꓻ ꓡꓰˍ ꓟ꓾ ꓠꓸ ꓐꓳꓽ ꓑ ꓙꓽ ꓡ ꓟ꓾ ꓞꓳ ꓫꓵ ꓢꓯꓸ ꓬꓲꓼ ꓡ ꓟ꓾ ꓞꓳ ꓫꓸ ꓔꓯ ꓶꓼ ꓓꓳ ꓫꓱꓹ ꓓꓳꓽ ꓚ ꓟꓸ ꓖꓶˍ ꓟ ꓮꓽ ꓙꓵ ꓬꓳ-ꓦ ꓔꓯ ꓐꓯ ꓖꓶ ꓬꓰ꓿ 23 ꓥꓪ ꓪꓴꓸ ꓠꓬꓲ ꓡꓱꓸ ꓗꓷ ꓓꓴ ꓟꓽ ꓙꓳ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ꓾ ꓐꓯ ꓖꓶˍ ꓡꓳ꓿ 24 ꓬꓳ-ꓦ ꓬꓲ ꓝꓲ ꓓꓴ ꓐꓴ ꓙꓰ ꓗꓷ ꓗꓸ ꓠꓯ꓾ ꓬꓰ-ꓢꓴ ꓡꓰ ꓬꓳ-ꓦ ꓔꓯ ꓟꓳꓸ ꓫꓸ ꓕꓱ ꓢꓲ ꓞꓳ ꓜꓴꓻ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ ꓠꓴ ꓪꓽ ꓠꓬ ꓮꓸ ꓫꓵ ꓔꓯ ꓡꓳꓸ ꓠꓬꓲ ꓠꓹ ꓟ ꓡꓲ ꓛꓲ ꓗꓪ ꓓꓳ ꓙꓰˍ ꓡ? ꓟꓲꓽ ꓦꓲ ꓡꓰ ꓙꓱꓼ ꓡꓵꓺ ꓔꓬ ꓟ ꓬꓲꓻ ꓑ ꓒꓴꓽ ꓓꓻ ꓔꓯ ꓡꓳꓸ ꓠꓬꓲ ꓠꓹ ꓟ ꓙꓰˍ ꓡ? 25 ꓠꓴ ꓪꓽ ꓮꓸ ꓫꓵ ꓔꓯ ꓟꓳꓻ ꓠꓹ ꓟ ꓓꓳ ꓙꓰˍ ꓡ? ꓠꓴꓽ ꓡꓯꓻ ꓡꓯ ꓟ ꓐꓯ ꓞꓶꓽ ꓖꓪꓽ ꓔ ꓢꓴ ꓔꓯ ꓟꓳꓻ ꓠꓹ ꓟ ꓙꓰˍ ꓡ? ꓠ ꓠꓹ꓾ ꓒꓵꓽ ꓘꓹ ꓟ ꓐꓵ ꓞꓶꓽ ꓡꓰ ꓐꓲꓻ ꓫꓴꓽ ꓔ ꓢꓲ ꓜꓽ ꓢ ꓔꓬ ꓢ ꓢꓴ ꓠꓬ ꓪ ꓔꓲꓸ ꓙ ꓗꓪ ꓔꓬ ꓡꓳ꓿ 26 ꓠꓴ ꓪꓽ ꓠꓬ ꓮꓸ ꓫꓵ ꓔꓯ ꓟꓳꓻ ꓠꓹ ꓟ ꓓꓳ ꓙꓰˍ ꓡ? ꓟꓷꓽ ꓠꓷꓹ ꓝꓸ ꓢꓴ ꓔꓯ ꓟꓳꓻ ꓠꓹ ꓟ ꓥ ꓡ? ꓠꓴ ꓪꓽ ꓔꓯ ꓥꓪ ꓐꓯ ꓖꓶꓽˍ ꓠꓬꓲ꓾ ꓥ ꓡꓳ꓾ ꓬꓳ-ꓦ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓕꓯꓽ ꓢꓲ ꓮꓽ ꓘꓶꓸ ꓪꓴꓽˍ ꓡꓳ꓿ 27 ꓕꓳ ꓶ ꓗꓪ ꓐꓳ ꓔ ꓟ꓾ ꓠꓬꓲ ꓠꓹ꓾ ꓥꓪ ꓡꓰ ꓠꓴ ꓟꓲꓽ ꓙꓬꓽ ꓗꓪ ꓥꓪ ꓝꓲ ꓓꓴ ꓝꓲ ꓩꓴ ꓗꓷ ꓢꓲ꓾ ꓬꓲ ꓠꓬ ꓠꓴ ꓟꓲꓽ ꓕꓯꓽ ꓢꓲ ꓗꓪ ꓠꓴ ꓙ ꓖꓴ ꓙꓽ ꓖꓶꓽˍ ꓥꓳ꓾ ꓐꓯˍ ꓟ ꓠꓬ ꓕꓱ ꓕꓲ ꓣꓳ ꓔꓯ ꓐꓯˍ ꓟ ꓥ ꓡꓳ꓿ 28 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓤꓽ ꓟꓶ ꓤꓽ ꓡꓰ ꓦꓵꓻ ꓔ ꓢꓴ ꓗꓳ ꓡꓳ ꓗꓪ꓾ ꓬꓳ-ꓦ ꓕꓯꓽ ꓢꓲ ꓪꓴꓽˍ ꓟ ꓕꓲ ꓣꓳˍ ꓟꓲ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓗꓴꓷꓼ ꓠꓯꓸꓼ ꓗꓪ ꓣꓳꓺ ꓓꓰˍ ꓟ ꓠꓬ꓾ ꓬꓲ ꓕꓯꓽ ꓢꓲ ꓪꓴꓽˍ ꓢꓰ ꓡꓳ꓾ ꓐꓯ ꓖꓶˍ ꓡꓳ꓿ 29 ꓬꓳ-ꓦ ꓡꓰ ꓖꓳ ꓓꓱꓽ ꓔꓲꓹ ꓖꓶ ꓟꓶꓻ ꓡꓰ ꓟ ꓑ ꓫꓬꓼ ꓐꓴˍ ꓐꓰ ꓝꓲꓸ ꓫ ꓢꓴ ꓐꓴ ꓠꓬ꓾ ꓬꓰ-ꓢꓴ ꓡꓰ ꓐꓯˍ ꓟ ꓐꓯ ꓘꓶꓽ ꓕꓱ ꓟ ꓔꓯ ꓑ ꓙꓽˍ ꓕꓯ꓾ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ ꓔꓯ ꓣꓷꓠꓸˍ ꓡꓳ꓿ 30 ꓖꓳ ꓡꓱ ꓥ ꓟꓲ ꓒ-ꓡꓲ-ꓢꓷ ꓐꓴ ꓐꓰ ꓙꓵ ꓗ ꓟꓸ ꓒꓽ ꓐꓴ ꓠꓬ꓾ ꓬꓳ-ꓦ ꓖꓳ ꓓꓱꓽ ꓔꓲꓹ ꓟ ꓔꓯ ꓟꓽ ꓘꓳꓻ ꓣꓴ ꓟ ꓪꓴꓸ ꓠꓬꓲ꓾ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓘꓳꓻ ꓣꓴ ꓢꓴ ꓗꓷ ꓡꓰꓳ꓿ 31 ꓝꓮꓲ ꓬꓰ-ꓢꓴ ꓡꓰ꓾ ꓕꓱ ꓡꓱ ꓥ ꓠꓬ ꓕꓱ ꓕꓲ ꓤꓶꓻ ꓟ ꓡꓽ ꓞꓳ ꓔꓯ ꓥꓪ ꓮꓸ ꓫꓵ ꓡꓰ ꓔꓯꓺ ꓠꓯꓹ ꓡ? ꓬꓲ ꓪꓽ ꓠꓬ ꓮꓸ ꓫꓵ ꓡꓰ ꓐꓰ ꓗꓹ ꓡ? 32 ꓬꓲ ꓪꓽ ꓠꓽ ꓙꓵꓺ ꓗꓪ ꓠꓬꓲꓸ ꓠꓸ ꓢꓲ꓾ ꓬꓲ ꓪꓽ ꓛꓳꓽ ꓬꓲ ꓪꓽ ꓘꓴꓻ ꓡꓯꓽ ꓘꓳ ꓢꓲ ꓠꓬꓲ꓾ ꓥꓪ ꓠꓴꓽ ꓠꓬ ꓠꓴ ꓪꓽ ꓔꓯ ꓙꓵꓽ ꓡꓵꓽ ꓟꓵ ꓖꓶˍ ꓟꓲ꓾ ꓠꓴ ꓪꓽ ꓗꓪꓺ ꓟꓽ ꓛꓰꓹ ꓡ꓿ ꓥꓪ ꓠꓴꓽ ꓠꓬ ꓮꓸ ꓛꓬꓹ ꓙꓱˍ ꓟꓲ꓾ ꓠꓴ ꓪꓽ ꓟꓽ ꓥꓴꓻ ꓡ꓾ ꓐꓰ ꓐꓯ ꓡꓯꓽ ꓘꓳ ꓔꓬ ꓟ ꓤ ꓠꓱ ꓤ ꓐꓴˍ ꓡꓰ ꓐꓰ ꓗꓹ ꓡꓳ꓿ 33 ꓮ ꓡꓲꓳ ꓐꓯ ꓠꓬ ꓖꓳ ꓓꓱꓽ ꓔꓲꓹ ꓖꓶ ꓢꓴ ꓬꓳ-ꓦ ꓠꓬ꓾ ꓜꓽ ꓓꓴ ꓚꓲꓸ ꓠꓬꓲ꓾ ꓛꓱꓼ ꓡꓱ ꓙꓵꓻˍ ꓟꓲ ꓟꓽ ꓓꓳ ꓓꓳ ꓡ ꓠꓬ꓾ ꓠꓴ ꓪꓽ ꓠꓽ ꓬꓲ ꓔꓯ ꓠꓲꓽ ꓕꓲ ꓟ ꓓꓯꓹ ꓡꓳ꓾ ꓐꓯˍ ꓡꓳ꓿ 34 ꓡ-ꓞꓳ-ꓮ-ꓐꓲ ꓠꓽ ꓜꓽ ꓠꓬꓲ ꓓꓳꓻ ꓠꓬꓲ ꓐꓰ ꓡꓻ ꓠꓬ꓾ ꓠꓴ ꓪꓽ ꓠꓬ ꓬꓲ ꓔꓯ꓾ ꓬꓲ ꓠꓽ ꓜꓽ ꓓꓴˍ ꓐꓰ ꓛꓱꓼ ꓡꓱ ꓙꓵꓻ ꓗꓪꓸ ꓢꓴ꓾ ꓝꓲꓸ ꓫ ꓢꓴˍ ꓐꓰ ꓝꓴꓲ ꓙꓳ ꓢꓴ ꓐꓴ ꓗꓪ ꓛꓳꓽ ꓥ ꓡꓳ꓾ ꓐꓰ ꓐꓯˍ ꓡꓳ꓿ 35 ꓖꓳ ꓡꓱ ꓥ ꓟꓲ ꓙꓽ ꓗꓴꓸ ꓠꓲꓹ ꓠꓬ ꓜꓳꓽˍ ꓟ ꓥ ꓟ꓾ ꓙꓽ ꓗꓴꓸ ꓠꓲꓹ ꓬꓲ ꓤ ꓐꓴ ꓡꓰ ꓟꓳꓸ ꓖꓶ ꓓꓳ ꓡ ꓡꓳ꓾ ꓐꓯˍ ꓡꓳ꓿ 36 ꓒ-ꓡꓲ-ꓢꓷ ꓡꓽ ꓞꓳ ꓕꓲ ꓣꓳ ꓠꓬ꓾ ꓬꓰ-ꓢꓴ ꓔꓯ ꓬꓲˍ ꓐꓰ ꓕꓲꓽ ꓪꓺꓼ ꓜ ꓜꓽ ꓡꓯ꓾ ꓐꓰ ꓘꓴˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓒ-ꓡꓲ-ꓢꓷ ꓦꓲ ꓗꓪ ꓓꓵꓽ ꓙꓰ ꓢꓲ ꓜ ꓜꓽˍ ꓐꓰ ꓗꓳꓺ ꓔꓬ ꓡꓳ꓿ 37 ꓖꓳ ꓕꓯ ꓡꓳ ꓒꓱ ꓖꓳ ꓟ ꓗꓪ ꓝꓴꓲ ꓬꓰ ꓢꓴ ꓤ ꓟꓶ ꓤ ꓕꓲ ꓣꓳ ꓠꓬ꓾ ꓒ-ꓡꓲ-ꓢꓷ ꓡꓽ ꓞꓳ ꓦꓲ ꓗꓪ ꓬꓰ-ꓢꓴ ꓜ ꓜꓽˍ ꓐꓰ ꓗꓳꓺ ꓔꓬ ꓟ ꓢꓷꓸ ꓡꓰ ꓠꓬ꓾ ꓒꓴꓻˍ ꓟ ꓡꓳ ꓐꓷ ꓕꓴꓽ ꓗꓪ ꓫꓳꓺ ꓠꓱꓻ ꓞꓶ ꓕꓲ ꓕꓴꓽ ꓔꓯꓹ ꓡ ꓢꓲ꓾ 38 ꓬꓲ ꓗꓸ ꓠꓯꓸ ꓢꓲ ꓬꓲ ꓛꓲ ꓒꓯꓹ ꓒ ꓕꓲ ꓗꓪ ꓦꓰꓼ ꓞ ꓢꓲ꓾ ꓬꓲ ꓟꓬ ꓐꓲ ꓡꓰ ꓬꓰ-ꓢꓴ ꓛꓲ ꓒꓯꓹ ꓔꓯ ꓒꓼ ꓡꓰ ꓗꓪ ꓛꓲ ꓥꓴꓻ ꓢꓲ ꓠꓬꓲ꓾ ꓬꓲ ꓪꓴꓸ ꓞꓱꓻ ꓡꓰ ꓫꓵꓹ ꓖꓶˍ ꓡꓳ꓿ ꓝꓮꓲ ꓠꓬ ꓬꓲ ꓛꓲ ꓒꓯꓹ ꓗꓪ ꓟꓽ ꓠꓽ ꓠ ꓐꓳꓼ ꓖꓶ ꓢꓲ ꓫꓳ ꓠꓱ ꓞꓶ ꓟꓰ ꓖꓶˍ ꓡꓳ꓿ 39 ꓬꓰ-ꓢꓴ ꓔꓯ ꓘꓴꓻ ꓢꓴ ꓒ-ꓡꓲ-ꓢꓷ ꓡꓽ ꓞꓳ ꓡꓰ ꓖꓳ ꓟ ꓔꓯ ꓟꓳꓻ ꓗꓷ ꓕꓯ꓾ ꓡꓽ ꓞꓳ ꓕꓱ ꓕꓲ ꓣꓳ ꓟ ꓟꓷꓽ ꓠꓷꓹ ꓝꓸ ꓢꓴ ꓥ ꓐꓷˍ ꓠꓬ꓾ ꓬꓲ ꓔꓯ ꓫꓱꓹ ꓢꓴ ꓮꓽ ꓟ ꓥ ꓟ ꓐꓰ꓾ ꓮ ꓡꓲ ꓡꓳ ꓫꓵꓽ ꓤ ꓟꓶ ꓤ ꓥ ꓟ ꓢꓷꓸˍ ꓡꓳ ꓫꓵꓽ ꓥꓳ꓿ ꓮ ꓡꓲꓳ ꓐꓯ ꓠꓬ ꓤ ꓟꓶ ꓤ ꓕꓱ ꓕꓲ ꓣꓳ ꓠꓽ ꓝꓴꓲ ꓬꓰ ꓢꓴ ꓥ ꓡꓳ꓾ ꓐꓰ ꓓꓵꓽ ꓙ ꓔꓬ ꓡꓳ꓿ 40 ꓬꓰ-ꓢꓴ ꓡꓰ ꓬꓲ ꓔꓯ꓾ ꓢꓲ-ꓟꓴꓽꓳ꓾ ꓠꓴ ꓔꓯ ꓥꓪ ꓐꓯ ꓖꓶꓽ ꓓꓴ ꓕꓲ ꓫꓵꓽ ꓙꓳˍ ꓡꓳ꓾ ꓐꓯ ꓖꓶˍ ꓕꓯ꓾ ꓬꓲ ꓡꓰ꓾ ꓟꓸ ꓒꓽꓳ꓾ ꓐꓯ ꓟꓴꓽ꓾ ꓐꓯˍ ꓡꓳ꓿ 41 ꓬꓰ-ꓢꓴ ꓡꓰ꓾ ꓶꓻ ꓡꓯꓼ ꓢꓲ ꓒꓽ ꓕꓲ ꓣꓳ ꓠꓬ꓾ ꓬꓲ ꓔꓯ ꓶꓻ ꓡꓯꓼ ꓐꓵ ꓢꓴ ꓠꓬꓲꓽ ꓣꓳ ꓙꓳˍ ꓡꓳ꓿ ꓕꓲ ꓣꓳ ꓠꓬ ꓓꓲ-ꓠ-ꓣꓲ ꓥꓪꓽ ꓦꓬ ꓒꓯꓼ ꓐꓵˍ ꓡꓳ꓿ ꓠꓱꓸ ꓐꓯꓼ ꓕꓲ ꓣꓳ ꓠꓬ ꓓꓲ-ꓠ-ꓣꓲ ꓥꓪꓽ ꓞꓲ ꓒꓯꓼ ꓐꓵˍ ꓡꓳ꓿ 42 ꓬꓲ ꓪꓽ ꓠꓬ ꓬꓲ ꓔꓯ ꓡꓲꓸ ꓖꓶ ꓓꓴ ꓟꓽ ꓙꓳ ꓠꓬꓲ꓾ ꓠꓬꓲꓽ ꓣꓳ ꓡꓱꓸꓼ ꓔꓯ ꓖꓽ ꓖꓶ ꓗꓷꓳ꓿ ꓡꓽ ꓞꓳ ꓕꓱ ꓠꓬꓲꓽ ꓣꓳ ꓟ ꓗꓪ ꓬꓲ ꓔꓯ ꓮ ꓡꓲ ꓕꓲ ꓣꓳ ꓟꓬꓽ ꓠꓬꓲ ꓠꓲꓹ ꓠꓵˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 43 ꓢꓲ-ꓟꓴ ꓒꓳꓹ ꓖꓶ ꓢꓲ꓾ ꓥꓪ ꓓꓵꓽ ꓙˍ ꓠꓬ ꓟꓬꓽ ꓠꓬꓲ ꓖꓽ ꓖꓶ ꓟꓶˍ ꓟ ꓖꓳ ꓕꓲ ꓣꓳ ꓥ ꓓꓴꓺꓳ꓾ ꓐꓯˍ ꓡꓳ꓿ ꓬꓰ-ꓢꓴ ꓡꓰ꓾ ꓠꓴ ꓐꓯ ꓬꓯꓼˍ ꓡꓳ꓾ ꓐꓯ ꓖꓶˍ ꓡꓳ꓿ 44 ꓬꓰ-ꓢꓴ ꓠꓬ ꓤꓽ ꓟꓶ ꓤ ꓔꓯ ꓟꓳꓸ ꓒꓳꓹ ꓢꓲ꓾ ꓢꓲ-ꓟꓴ ꓔꓯ꓾ ꓤ ꓟꓶ ꓤ ꓕꓱ ꓕꓲ ꓣꓳ ꓔꓯ ꓠꓴ ꓟꓳꓻˍ ꓡ? ꓠꓴ ꓦꓲ ꓗꓪ ꓥꓪ ꓓꓵꓽ ꓡ ꓕꓯ꓾ ꓠꓴ ꓠꓬ ꓥꓪ ꓔꓯ ꓛꓲ ꓒꓯꓹ ꓞꓲꓽ ꓓꓴ ꓬꓲꓻ ꓙꓬ ꓟꓽ ꓖꓶ ꓡ꓿ ꓤ ꓟꓶ ꓤ ꓕꓱ ꓕꓲ ꓣꓳ ꓠꓽ꓾ ꓬꓲ ꓟꓬ ꓐꓲ ꓡꓰ ꓥꓪ ꓛꓲ ꓒꓯꓹ ꓔꓯ ꓒꓼ ꓡꓰ ꓝꓲ ꓢꓲ꓾ ꓬꓲ ꓪꓴꓸ ꓞꓱꓻ ꓡꓰ ꓫꓵꓹ ꓖꓶ ꓡꓺꓳ꓿ 45 ꓠꓴ ꓠꓬ ꓥꓪ ꓔꓯ ꓟꓽ ꓐꓳꓼ ꓖꓶ ꓡ꓿ ꓤꓽ ꓟꓶ ꓤ ꓕꓱ ꓕꓲ ꓣꓳ ꓠꓽ꓾ ꓥꓪ ꓓꓵꓽ ꓡ ꓗꓸ ꓠꓯꓸ ꓟꓽ ꓠꓽ ꓠ ꓥꓪ ꓛꓲ ꓒꓯꓹ ꓗꓪ ꓐꓳꓼ ꓖꓶ ꓡꓺꓳ꓿ 46 ꓠꓴ ꓠꓬ ꓥꓪ ꓪꓴꓸ ꓓꓵ ꓗꓪ ꓮꓽ ꓛꓬ ꓞꓶ ꓟꓽ ꓟꓰ ꓖꓶ ꓡ꓿ ꓤ ꓟꓶ ꓤ ꓕꓱ ꓕꓲ ꓣꓳ ꓠꓽ꓾ ꓫꓳ ꓠꓱ ꓞꓶ ꓡꓰ ꓥꓪ ꓛꓲ ꓒꓯꓹ ꓔꓯ ꓟꓰ ꓖꓶ ꓡꓺꓳ꓿ 47 ꓖꓳ ꓡꓱ ꓠꓬꓲ ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ ꓮꓽ ꓘꓶꓸ ꓠꓲꓹ ꓠꓵˍ ꓠꓬꓲ ꓬꓲ ꓝꓴꓲ ꓮꓽ ꓟꓬꓹ ꓔꓯ ꓖꓽ ꓖꓶ ꓟꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓔꓲꓸ ꓤꓽˍ ꓡꓰ ꓖꓽ ꓖꓶ ꓗꓷ ꓟ ꓖꓳ ꓕꓲ ꓣꓳ ꓠꓬ ꓮ ꓔꓲꓸ ꓤˍ ꓡꓰ ꓠꓲꓹ ꓠꓵˍ ꓡꓳ꓾ ꓐꓯ ꓖꓶˍ ꓡꓳ꓿ 48 ꓖꓳ ꓡꓱ ꓢꓲ ꓬꓰ-ꓢꓴ ꓡꓰ ꓤ ꓟꓶ ꓤ ꓔꓯ꓾ ꓠꓴ ꓝꓴꓲ ꓖꓽ ꓖꓶ ꓗꓷꓳ꓾ ꓐꓯ ꓖꓶˍ ꓡꓳ꓿ 49 ꓖꓳ ꓡꓱ ꓠꓬ ꓬꓲꓸˍ ꓐꓰ ꓕꓲꓽ ꓪꓺꓼ ꓜ ꓜꓽˍ ꓐꓰ ꓗꓳꓺ ꓔꓬ ꓢꓴ ꓬꓲ ꓪꓽ ꓛꓳꓽ ꓬꓲ ꓪ꓾ ꓝꓴꓲˍ ꓟꓲ ꓖꓽ ꓖꓶ ꓐ ꓡ ꓢꓴ ꓕꓱ ꓕꓲ ꓣꓳ ꓠꓬ ꓮꓽ ꓟ ꓥ ꓡ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 50 ꓬꓲ ꓠꓬ ꓤ ꓟꓶ ꓤ ꓔꓯ꓾ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓚꓬꓴ ꓗꓷꓳ꓿ ꓧꓪꓸ ꓧꓪꓸꓽ ꓙꓰ꓾ ꓐꓯ ꓖꓶˍ ꓡꓳ꓿

ꓡꓴ-ꓗ 8

1 ꓖꓳ ꓗꓸ ꓠꓯꓸ ꓮꓽ ꓟꓬꓹ ꓠꓬꓲ ꓟꓽ ꓥ ꓠꓬ꓾ ꓬꓰ-ꓢꓴ ꓠꓽ ꓬꓲ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳˍ ꓐꓰ ꓕꓲꓽ ꓪꓺꓼ ꓡꓳ ꓒꓱ ꓘꓹ ꓒꓱ ꓗꓪ ꓚꓳ ꓙꓰ ꓢꓲ꓾ ꓪꓴ-ꓢ ꓗꓴꓷꓼ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓬꓰˍ ꓡꓳ꓿ 2 ꓧꓶꓸ ꓕꓯ ꓟꓽ ꓫꓬꓻ ꓠꓲꓽ ꓜꓶꓽ ꓞꓹ ꓢꓴˍ ꓐꓰ ꓬꓲ ꓡꓰ ꓠꓻ ꓒꓬꓽ ꓫꓬꓹ ꓓꓻ ꓡꓰ ꓟ ꓤ ꓟꓶ ꓤ ꓕꓲ ꓧꓳꓽˍ ꓟꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓬꓲ ꓖꓳ ꓓꓱꓽ ꓗꓪ ꓐꓰ ꓬꓰ-ꓢꓴ ꓡꓰ ꓠꓲꓽ ꓫꓵꓽ ꓟ ꓖꓼ ꓓꓳ ꓗꓷ ꓟ꓾ ꓟ-ꓖ-ꓓ-ꓡꓲ ꓢꓴ ꓟ-ꓡꓲˍ ꓐꓰ꓾ 3 ꓩꓴ-ꓡꓲ ꓦꓲ ꓙꓵꓽ ꓢꓴ ꓘꓴ-ꓢ ꓬꓲ ꓤ ꓟꓶ ꓬꓳ-ꓦ-ꓠˍ ꓐꓰ ꓢꓴ-ꓢ-ꓠˍ ꓐꓰ ꓠꓱꓸ ꓐꓯꓼ ꓤ ꓟꓶ ꓤ ꓮꓽ ꓟꓬꓹ ꓣꓳ ꓠꓬ꓾ ꓚꓲꓸ ꓛꓬ ꓒꓴ ꓤ ꓫꓵ ꓤ ꓣꓱꓽ ꓢꓲ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓣꓱꓽ ꓙˍ ꓡꓳ꓿ 4 ꓕꓲ ꓡꓳ ꓒꓱ ꓡꓰ ꓕꓲ ꓡꓳ ꓒꓱ ꓗꓪ ꓐꓰ ꓞꓳ ꓜꓴ ꓞꓳ ꓟꓯꓼ ꓠꓬ ꓬꓰ-ꓢꓴ ꓔꓬ ꓗꓪ ꓜꓲꓼ ꓡ ꓕꓯ꓾ ꓬꓲ ꓠꓬ ꓔꓯ ꓥꓳꓽ ꓗꓪ ꓐꓰ ꓬꓲ ꓪꓽ ꓔꓯ ꓕꓱ ꓡꓱ ꓟꓸ ꓖꓶˍ ꓡꓳ꓿ 5 ꓜꓻ ꓫꓵꓸ ꓫꓵꓸ ꓢꓴ ꓕꓲ ꓣꓳ ꓠꓬ ꓜꓻ ꓫꓵꓸ ꓫꓵꓸˍ ꓐꓰ ꓓꓳ ꓙꓰˍ ꓡꓳ꓿ ꓬꓲ ꓫꓵꓸˍ ꓕꓯ ꓕꓲ ꓐꓱꓻ ꓠꓬ ꓙ ꓖꓴ ꓘꓶꓽ ꓗꓪ ꓞꓰꓻ ꓡꓰ ꓢꓲ꓾ ꓞꓳ ꓤ ꓡꓰ ꓕꓳꓼ ꓗꓷ ꓢꓲ ꓠꓬꓲ ꓟꓵꓽ ꓪꓴꓽ ꓗꓪ ꓟ ꓠꓬꓹ ꓡꓰ ꓖꓳꓺ ꓜꓽˍ ꓡꓳ꓿ 6 ꓕꓲ ꓐꓱ ꓠꓬ ꓡꓳ ꓓꓰ ꓑꓸ ꓕꓯꓽ ꓢꓲ ꓗꓪ ꓞꓰꓻ ꓡꓰ ꓢꓲ꓾ ꓠꓱꓺ ꓠꓱˍ ꓐꓰ ꓟꓽ ꓗꓹ ꓠꓬꓲ꓾ ꓣꓱꓻ ꓡ ꓟꓶꓽ ꓕꓯꓽ ꓙꓴꓺ ꓡꓰˍ ꓡꓳ꓿ 7 ꓕꓲ ꓐꓱ ꓠꓬ ꓛꓴꓽ ꓐꓬꓼ ꓗꓪ ꓞꓰꓻ ꓡꓰ ꓢꓲ꓾ ꓛꓴꓽ ꓠꓬ ꓜꓻˍ ꓐꓰ ꓕꓲꓽ ꓡꓰꓹꓼ ꓪꓴꓽ ꓡ ꓢꓲ ꓠꓬꓲ ꓜ ꓔꓯ ꓦꓵꓹ ꓡꓰˍ ꓡꓳ꓿ 8 ꓕꓲ ꓐꓱ ꓠꓬ ꓟꓵꓽ ꓙꓲˍ ꓟ ꓗꓪ ꓞꓰꓻ ꓡꓰ ꓢꓲ꓾ ꓪꓴꓽˍ ꓟꓲ ꓪꓴ ꓡ꓾ ꓬꓲ ꓢꓶꓽˍ ꓟꓲ ꓕꓲ ꓦꓬꓻ ꓩꓴꓸ ꓓꓱꓼˍ ꓡꓳ꓾ ꓐꓯˍ ꓡꓳ꓿ ꓕꓱ ꓟꓬ ꓫꓵꓽ ꓐꓯ ꓗꓷ ꓠꓬ꓾ ꓬꓰ-ꓢꓴ ꓡꓰ ꓘꓴꓻ ꓢꓲ꓾ ꓠꓸ ꓑꓳ ꓙꓳ ꓢꓴ ꓠ ꓠꓹ꓾ ꓐꓯˍ ꓡꓳ꓿ 9 ꓬꓲ ꓛꓳꓽ ꓒꓯꓹ ꓐꓴ ꓡꓰ꓾ ꓔꓯ ꓥꓳꓽ ꓕꓱ ꓟ ꓮꓸ ꓫꓵ ꓔꓯ ꓐꓯˍ ꓡ?꓾ ꓐꓰ ꓬꓲ ꓔꓯ ꓠ ꓠꓬꓲˍ ꓡꓳ꓿ 10 ꓖꓳ ꓕꓯ ꓬꓲ ꓡꓰ꓾ ꓪꓴ-ꓢ ꓗꓴꓷꓼ ꓗꓪ ꓟ ꓚꓵꓺ ꓘꓶ ꓢꓷꓸ ꓡꓰ ꓠꓹ ꓟ ꓠꓴ ꓪꓽ ꓔꓯ ꓖꓶ ꓔ ꓡꓳ꓿ ꓠꓱꓸ ꓐꓯꓼ ꓢꓴ ꓔꓯ ꓠꓽ꓾ ꓬꓲ ꓪꓽ ꓟꓳꓻˍ ꓟꓲ ꓟꓽ ꓡꓳꓸ ꓓꓳ ꓡ ꓝꓲ꓾ ꓑ ꓙꓽˍ ꓟꓲ ꓟꓽ ꓙꓽ ꓜꓲꓼ ꓝꓲ ꓠꓹ ꓟ꓾ ꓔꓯ ꓥꓳꓽ ꓗꓪ ꓐꓰ ꓐꓯ ꓖꓶꓽˍ ꓟ ꓥ ꓡꓳ꓿ 11 ꓔꓯ ꓥꓳꓽ ꓕꓱ ꓟ ꓠꓬ ꓕꓱ ꓡꓱ ꓥꓳ꓿ ꓜꓻ ꓫꓵꓸ ꓠꓬ ꓪꓴ-ꓢ ꓐꓯ ꓘꓶꓽ ꓥ ꓡꓳ꓿ 12 ꓙ ꓖꓴ ꓘꓶꓽ ꓗꓪ ꓟ ꓠꓬ꓾ ꓑ ꓙꓽ ꓗꓷ ꓥ ꓟꓲ ꓬꓲ ꓪꓽ ꓠꓬ ꓟꓽ ꓙꓵꓻ ꓢꓲ ꓟꓽ ꓚꓬꓴ ꓟꓶ ꓠꓹ ꓟ꓾ ꓠꓲꓽ ꓡꓰ ꓬꓲ ꓪꓽ ꓠꓲꓹ ꓟ ꓗꓪ ꓐꓰ ꓐꓯ ꓘꓶꓽ ꓔꓯ ꓣꓴ ꓦ ꓗꓷ ꓢꓴ ꓐꓴ ꓥ ꓡꓳ꓿ 13 ꓡꓳ ꓓꓰ ꓑꓸ ꓕꓯꓽ ꓢꓲ ꓗꓪ ꓟ ꓠꓽ꓾ ꓐꓯ ꓘꓶꓽ ꓑ ꓙꓽˍ ꓕꓯ ꓠꓲꓹ ꓒꓴ ꓒꓴˍ ꓐꓰ ꓘꓳꓻ ꓣꓴˍ ꓟ ꓕꓲ ꓧꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓲꓹ ꓟ ꓗꓪ ꓬꓲ ꓚꓰ ꓟꓽ ꓕꓶ ꓡꓰ ꓠꓬꓲ ꓕꓲ ꓑꓹ ꓤꓽˍ ꓡꓰꓽ ꓙꓵꓻ ꓢꓲ꓾ ꓫꓵꓽ ꓠꓬꓲˍ ꓟ ꓔꓳꓹ ꓜꓳꓽˍ ꓕꓯ ꓒꓳꓹ ꓬꓲꓼ ꓙꓰˍ ꓡꓳ꓿ 14 ꓛꓴꓽ ꓠꓯꓸꓼ ꓗꓪ ꓞꓰꓻ ꓡꓰ ꓟ ꓠꓬ꓾ ꓐꓯ ꓘꓶꓽ ꓑ ꓙꓽ ꓗꓷ ꓗꓸ ꓠꓯ꓾ ꓕꓱ ꓕꓲ ꓤꓶꓻ ꓗꓪ ꓟ ꓙꓽ ꓫꓸ ꓓꓴˍ ꓐꓰ꓾ ꓒꓴ ꓤ ꓫꓵ ꓤˍ ꓐꓰ꓾ ꓟꓲ ꓠꓯ ꓗꓹ ꓛꓲꓽ ꓓꓴ ꓡꓰ ꓦꓵꓹ ꓗꓷ ꓠꓬꓲ꓾ ꓬꓲ ꓢꓶ ꓓꓱꓼˍ ꓟꓲ ꓟꓽ ꓟꓻ ꓡ ꓟ ꓕꓲ ꓧꓳꓽ ꓟ ꓥ ꓡꓳ꓿ 15 ꓟꓵꓽ ꓙꓲꓻ ꓗꓪ ꓟ ꓠꓽ꓾ ꓬꓲ ꓪ ꓠꓬ ꓐꓯ ꓘꓶꓽ ꓑ ꓙꓽ ꓗꓷ ꓢꓲ꓾ ꓔꓱꓹ ꓟ ꓐꓰ ꓙꓲˍ ꓟ ꓠꓲꓹ ꓟ ꓡꓰ ꓐꓯ ꓘꓶꓽ ꓔꓯ ꓘꓳꓻ ꓣꓴ ꓔ ꓢꓲ ꓠꓬꓲ꓾ ꓜꓲꓽ ꓘꓴ ꓠꓲꓹ ꓡꓰ ꓬꓲ ꓢꓶꓽ ꓓꓱꓼˍ ꓟ ꓕꓲ ꓧꓳꓽ ꓥꓳ꓿ 16 ꓮꓽ ꓟ ꓥ ꓟꓲ ꓟꓬ ꓡꓴꓻ ꓟꓬ ꓗꓷ ꓠꓬ꓾ ꓡꓴꓻ ꓕꓲ ꓫꓵꓽ ꓡꓰ ꓝꓴꓸ ꓔ꓾ ꓥ ꓠꓬ ꓘꓹ ꓛꓽ ꓠꓯꓸ ꓘꓪ ꓗꓶ ꓔꓸ ꓢꓴ ꓟꓽ ꓙꓳ꓿ ꓦꓲ ꓗꓪ ꓓꓵꓽ ꓡ ꓢꓴ ꓔꓯ ꓠꓬꓲ ꓟꓳꓻ ꓝꓲ ꓠꓹ ꓟ ꓟꓬ ꓡꓴꓻ ꓕꓲ ꓗꓪ ꓗꓶ ꓔꓸ ꓠ ꓗꓹ ꓟ ꓥꓳ꓿ 17 ꓮ ꓡꓲꓳ ꓐꓯ ꓠꓬ ꓚꓵꓺ ꓔ ꓟ ꓮꓸ ꓫꓵˍ ꓟꓲ ꓟꓳꓸ ꓖꓶ ꓡ ꓥꓳ꓿ ꓘꓶꓽ ꓛꓵꓽ ꓔ ꓟˍ ꓟꓲ ꓐꓯ ꓓꓳ ꓡ ꓢꓲ ꓢꓷꓸ ꓡꓰˍ ꓥꓳ꓿ 18 ꓖꓳ ꓡꓱ ꓠꓬꓲ ꓥꓪ ꓐꓯˍ ꓟ ꓔꓯ ꓮ ꓡꓲ ꓠ ꓠꓹ ꓠꓯꓹ ꓟ ꓠꓴ ꓪꓽ ꓤ ꓟꓳ ꓢꓲ ꓧꓪꓸ ꓛꓲꓽ ꓔ꓿ ꓮ ꓡꓲꓳ ꓐꓯ ꓠꓬ ꓙꓳꓻ ꓢꓴ ꓔꓯ ꓠꓽ ꓡꓴꓽ ꓖꓶ ꓡ ꓢꓰꓽ ꓥꓳ꓿ ꓟꓽ ꓙꓳ ꓢꓴ ꓔꓯ ꓠꓽ꓾ ꓬꓲ ꓙꓳˍ ꓡꓳ ꓐꓰ ꓓꓵꓽ ꓙ ꓔ ꓟˍ ꓟꓲ꓾ ꓬꓲ ꓔꓯꓺˍ ꓐꓰ ꓣꓴ ꓔꓯꓹ ꓙꓰˍ ꓥꓳ꓾ ꓐꓯˍ ꓡꓳ꓿ 19 ꓖꓳ ꓕꓯ ꓬꓰ-ꓢꓴ ꓬꓲ ꓟꓹ ꓟ ꓐꓰ ꓬꓲ ꓠꓬꓲ ꓤ ꓐꓴ ꓬꓲ ꓔꓯ ꓡ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓞꓳ ꓜꓴꓻ ꓑꓶꓸ ꓓꓴ ꓬꓲ ꓒꓻ ꓕꓲ ꓗꓪ ꓡ ꓟꓽ ꓠ꓿ 20 ꓢꓴ ꓡꓰ ꓬꓰ-ꓢꓴ ꓔꓯ꓾ ꓠꓴ ꓟꓹ ꓟ ꓐꓰ ꓠꓴ ꓠꓬꓲ ꓤ ꓐꓴ ꓠꓱ ꓫꓱ ꓟS ꓗꓪ ꓦꓰꓼ ꓞ ꓢꓲ ꓠꓴ ꓔꓯ ꓟꓳꓻ ꓠꓲꓹ ꓫꓵˍ ꓙꓳꓽ꓾ ꓐꓯ ꓖꓶˍ ꓡꓳ꓿ 21 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓪꓴ-ꓢ ꓐꓯ ꓘꓶꓽ ꓑ ꓙꓽ ꓢꓲ ꓛꓳ ꓬꓰ ꓢꓴ ꓠꓬ꓾ ꓥꓪ ꓟꓹ ꓟˍ ꓐꓰ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓥꓳ꓾ ꓐꓯ ꓖꓶˍ ꓡꓳ꓿ 22 ꓕꓲ ꓠꓬꓲ ꓙꓳˍ ꓠꓬ꓾ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓣꓳꓽ ꓠꓬ ꓬꓲꓻ ꓡꓴꓽ ꓐꓱ ꓖꓳ ꓐꓽ ꓢꓲ ꓙꓰ ꓡꓯ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓬꓲ ꓪꓽ ꓡꓲꓺ ꓗꓪ ꓓꓵꓽ ꓡꓰ ꓢꓲ ꓙꓰˍ ꓡꓳ꓿ 23 ꓬꓲ ꓪꓽ ꓙꓰ ꓔꓬ ꓕꓯ ꓬꓰ-ꓢꓴ ꓠꓽ ꓬꓲꓼ ꓟꓶꓺ ꓡꓰꓳ꓿ ꓬꓲꓻ ꓡꓴ ꓐꓱ ꓗꓪ ꓕꓳꓽ ꓥꓳ ꓓꓽ ꓟ ꓙꓱꓼ ꓔꓴ ꓡ ꓢꓲ꓾ ꓡꓲ ꓗꓪ ꓬꓲꓻ ꓙꓬ ꓐꓲꓺ ꓡꓺˍ ꓐꓰ ꓗꓹ ꓠꓬꓲ꓾ ꓬꓲ ꓪꓽ ꓐꓱ ꓶ ꓮꓽ ꓘꓶꓸ ꓙꓲꓻ ꓣꓴꓽ ꓓꓴ ꓒꓬꓱꓼ ꓡ ꓡꓳ꓿ 24 ꓬꓲ ꓪꓽ ꓠꓬ ꓬꓰ-ꓢꓴ ꓔꓯ ꓡ ꓢꓲ ꓬꓲ ꓔꓯ ꓡꓵꓹ ꓖꓶ ꓢꓲ ꓠꓬꓲ꓾ ꓟꓸ ꓒꓽꓳ꓾ ꓟꓸ ꓒꓽꓳ꓾ ꓣꓳꓽ ꓠꓽ ꓫꓵꓻ ꓡ ꓓꓴ ꓬꓰꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓧꓪꓸ ꓛꓲꓽ ꓡ ꓢꓲ꓾ ꓕꓳꓽ ꓥꓳˍ ꓐꓰ ꓬꓲꓻ ꓡꓯꓼ ꓟꓰ ꓐꓵꓻ ꓔꓬ ꓟ ꓔꓯ ꓕꓼ ꓗꓷ ꓠꓬ꓾ ꓟꓲꓽ ꓦꓲˍ ꓐꓰ ꓬꓲꓻ ꓡꓯ ꓟꓰ ꓠꓬ ꓠꓽ ꓡꓰ ꓢꓲ ꓠꓬꓲ ꓢꓲ ꓡꓲ ꓗꓷ ꓡꓰꓳ꓿ 25 ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓙꓵꓻ ꓠꓲꓹ ꓮ ꓡꓲ ꓗꓪ ꓓꓯꓹ ꓡ?꓾ ꓐꓯˍ ꓡꓳ꓿ ꓬꓲ ꓪꓽ ꓠꓽ ꓙꓳꓺ ꓠꓬꓲ ꓓꓵꓽ ꓙ ꓟꓶ ꓠꓬꓲ ꓗꓷ ꓡꓰ ꓢꓲ꓾ ꓕꓳꓽ ꓥꓳˍ ꓐꓰ ꓬꓲꓻ ꓙꓬˍ ꓟꓲ ꓬꓲ ꓕꓵꓼ ꓪꓽ ꓔꓯ ꓒꓵꓽ ꓛꓳˍ ꓟ ꓕꓱ ꓟ ꓠꓬ ꓮꓽ ꓟ ꓥ ꓡ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 26 ꓬꓲ ꓪꓽ ꓠꓬ ꓡꓲ ꓜꓶꓽ ꓢꓲ ꓖ-ꓡꓲ-ꓡꓲˍ ꓐꓰ ꓔꓱꓹ ꓞꓹ ꓟ꓾ ꓖꓶ-ꓡ-ꓢꓲ-ꓠꓲ ꓢꓴ ꓟꓵꓽ ꓗꓪ ꓛꓲ ꓬꓰˍ ꓡꓳ꓿ 27 ꓬꓰ-ꓢꓴ ꓠꓬ ꓡꓲꓺ ꓗꓪ ꓐꓰ ꓬꓯꓼ ꓡ ꓢꓲ ꓬꓲꓻ ꓡꓴ ꓐꓱ ꓘꓶꓽ ꓗꓪ ꓓꓳ ꓙꓰˍ ꓕꓯ꓾ ꓡꓳ ꓒꓱ ꓗꓪ ꓐꓰ ꓠꓲꓽ ꓜꓶꓽ ꓞꓹ ꓟ ꓡꓽ ꓞꓳ ꓕꓲ ꓣꓳ ꓬꓲ ꓔꓯ ꓡ ꓡꓳ꓿ ꓡꓽ ꓞꓳ ꓕꓱ ꓕꓲ ꓣꓳ ꓠꓬ ꓐꓵ ꓞꓶꓽ ꓟꓽ ꓖꓪ ꓟ ꓟꓶꓻ ꓤ ꓥ ꓢꓲ꓾ ꓦꓲ ꓗꓪˍ ꓟꓲ ꓟꓽ ꓔꓬ꓾ ꓡꓱ ꓜꓴ ꓐꓬꓼ ꓗꓪˍ ꓡꓰꓽ ꓔꓬ ꓡꓳ꓿ 28 ꓬꓰ-ꓢꓴ ꓔꓯ ꓬꓲ ꓟꓳꓻ ꓗꓷ ꓠꓬ ꓘꓴ ꓔꓴ ꓡ ꓢꓲ꓾ ꓬꓲ ꓟꓲꓽ ꓙꓬ ꓗꓪ ꓟꓳꓼ ꓡꓰ ꓢꓲ ꓠꓬꓲ ꓢꓯꓼ ꓓꓽ ꓟ ꓡꓰ꓾ ꓟꓴ ꓡꓳꓹ ꓬꓰ ꓟ ꓪꓴ-ꓢ ꓮ ꓐꓲ ꓬꓰ-ꓢꓴꓳ꓾ ꓥꓪ ꓠꓬ ꓠꓴˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓙꓳˍ ꓡ? ꓥꓪ ꓔꓯ ꓕꓽ ꓫꓸ ꓙꓵꓻ ꓝꓲ ꓡꓯ꓾ ꓐꓰ ꓠꓴ ꓔꓯ ꓥꓪ ꓓꓰꓽˍ ꓥꓳ꓾ ꓐꓯˍ ꓡꓳ꓿ 29 ꓕꓱ ꓟ ꓠꓬ ꓬꓰ-ꓢꓴ ꓡꓰ ꓟꓽ ꓫꓬꓻ ꓠꓲꓽ ꓔꓯ꓾ ꓕꓱ ꓕꓲ ꓣꓳ ꓔꓯˍ ꓐꓰ ꓓꓳ ꓡꓯ꓾ ꓐꓰ ꓕꓵꓼ ꓪꓽ ꓖꓶˍ ꓠꓬꓲ ꓥ ꓡꓳ꓿ ꓧꓶꓸ ꓕꓯ ꓠꓬ ꓠꓲꓽ ꓕꓱ ꓟ ꓡꓰ ꓖꓳ ꓕꓲ ꓣꓳ ꓔꓯ ꓮꓽ ꓟꓬꓹ ꓧꓪꓹ ꓚꓵꓹˍ ꓠꓬꓲ꓾ ꓢꓴ ꓠꓬ ꓬꓲ ꓔꓯ ꓧꓳꓻ ꓫꓱ ꓚ ꓡꓰ ꓞꓳꓹ ꓠꓬꓲ꓾ ꓡꓸ ꓕꓸ ꓕꓯꓼ ꓠꓬꓲ ꓬꓰ ꓢꓲ꓾ ꓬꓲ ꓔꓯ ꓦꓴ ꓠꓬꓹ ꓠꓬꓲꓳ꓿ ꓖꓳ ꓡꓱ ꓥ ꓟꓲ ꓞꓳꓹ ꓚ ꓔꓯ ꓚꓵꓹ ꓞꓷꓹ ꓗꓷ ꓢꓲ꓾ ꓠꓲꓽ ꓡꓰ ꓬꓲ ꓔꓯ ꓡꓲ ꓛꓲ ꓗꓪ ꓖꓼ ꓦ ꓔ ꓡꓳ꓿ 30 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓟꓬꓱꓺ ꓮ ꓡꓲ ꓟꓬꓱ ꓔ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓥꓪ ꓟꓬꓱꓺ ꓠꓬ꓾ ꓬꓲ ꓜꓴꓻ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ ꓬꓲ ꓠꓯS ꓗꓪ ꓓꓵꓽ ꓞꓹ ꓟ ꓠꓲꓽ ꓠꓽ ꓟꓬꓽˍ ꓠꓬꓲ ꓖꓳ ꓡꓱ ꓐꓯˍ ꓟ ꓥ ꓡꓳ꓿ 31 ꓠꓲꓽ ꓜꓴ ꓡꓰ ꓬꓲ ꓪꓽ ꓔꓯ ꓫꓵꓻ ꓓꓴꓽ ꓗꓪ ꓬꓯꓼ ꓙꓰˍ ꓟ ꓕꓵꓼ ꓪꓽ ꓟꓽ ꓖꓶ ꓡ ꓠꓹ ꓟ꓾ ꓬꓰ-ꓢꓴ ꓔꓯ ꓓꓰꓽˍ ꓡꓳ꓿ 32 ꓖꓳ ꓕꓯ ꓪꓽ ꓚꓲ ꓗꓪ ꓖꓺ ꓜꓽ ꓔꓬ ꓟ ꓮ ꓪꓯꓼ ꓕꓲ ꓜꓴꓻ ꓓꓽ ꓟ ꓙꓳˍ ꓠꓬꓲ꓾ ꓠꓲꓽ ꓜꓴ ꓠꓬ ꓮ ꓪꓯꓼ ꓠꓯꓸꓼ ꓗꓪ ꓓꓵꓽ ꓙꓰ ꓠꓹ ꓟ ꓬꓰ-ꓢꓴ ꓔꓯ ꓓꓰꓽˍ ꓕꓯ꓾ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓓꓽ ꓔꓳꓹˍ ꓡꓳ꓿ 33 ꓠꓲꓽ ꓠꓬ ꓡꓽ ꓞꓳ ꓔꓯˍ ꓐꓰ ꓓꓳ ꓡ ꓢꓲ ꓮ ꓪꓯꓼ ꓜꓴꓻ ꓠꓯꓸꓼ ꓗꓪ ꓓꓵꓽ ꓡꓰˍ ꓡꓳ꓿ ꓖꓳ ꓕꓯ ꓮ ꓪꓯꓼ ꓜꓴꓻ ꓠꓬ ꓐꓶ ꓘꓶꓽ ꓗꓪ ꓐꓰ ꓬꓲꓻ ꓡꓴ ꓐꓱ ꓗꓪ ꓔꓷꓹ ꓬꓯꓼ ꓙꓰ ꓢꓲ ꓔꓲꓹ ꓫꓵꓻ ꓖꓴꓳ꓿ 34 ꓕꓱ ꓡꓱ ꓗꓷ ꓡꓰˍ ꓟ ꓔꓯ ꓮ ꓪꓯꓼ ꓡꓳꓸ ꓢꓴ ꓟꓳꓻ ꓗꓷ ꓠꓬ ꓛꓰꓹ ꓙꓰ ꓢꓲ꓾ ꓡꓳ ꓒꓱˍ ꓐꓰ ꓚꓳ ꓡꓳ ꓗꓪ ꓟ ꓘꓹ ꓒꓱ ꓗꓪ ꓐꓯ ꓒꓬꓱ ꓙꓰˍ ꓡꓳ꓿ 35 ꓖꓳ ꓕꓯ ꓮꓽ ꓙꓵ ꓢꓴ ꓠꓬ ꓮ ꓡꓲ ꓗꓷ ꓡꓰ ꓟ ꓔꓯ ꓡꓳꓸ ꓠꓬꓲ ꓠꓹ ꓟ ꓓꓳ ꓡ ꓢꓲ꓾ ꓬꓰ-ꓢꓴ ꓔꓬ ꓗꓪ ꓛꓲ ꓡ ꓠꓬ꓾ ꓠꓲꓽ ꓓꓳ ꓙꓰ ꓗꓷ ꓟ ꓡꓽ ꓞꓳ ꓖꓳ ꓕꓲ ꓣꓳ ꓠꓽ ꓐꓵꓻ ꓞꓶ ꓖꓪꓽ ꓔ ꓢꓲ꓾ ꓠꓲꓹ ꓟ ꓧꓪꓸ ꓛꓲꓽ ꓛꓲ ꓐꓰ ꓬꓰ-ꓢꓴ ꓒ ꓕꓲ ꓗꓪ ꓠꓬꓲꓸ ꓠꓸ ꓔꓬ ꓟ ꓔꓯ ꓡꓳꓸ ꓟꓳꓻ ꓡꓳ꓿ ꓖꓳ ꓕꓯ ꓬꓲ ꓪꓽ ꓙꓳꓺ ꓡꓰˍ ꓡꓳ꓿ 36 ꓖꓳ ꓡꓱ ꓢꓲ ꓠꓲꓽ ꓜꓶꓽ ꓞꓹ ꓢꓴ ꓠꓬ ꓮ ꓡꓲ ꓐꓰ ꓓꓻ ꓡꓰ ꓟꓶˍ ꓟ ꓔꓯ ꓟꓳꓻ ꓗꓷ ꓢꓴ ꓐꓴ ꓡꓰ꓾ ꓮ ꓡꓲ ꓥ ꓟ ꓮꓽ ꓙꓵ ꓬꓲ ꓪꓽ ꓔꓯ ꓐꓯ ꓟꓸ ꓖꓶˍ ꓡꓳ꓿ 37 ꓖꓶ-ꓡ-ꓢꓲ-ꓠꓲ ꓟꓵ ꓚꓳ ꓡꓳ ꓢꓴ ꓮꓽ ꓙꓵ ꓠꓬ ꓮꓽ ꓘꓶꓸ ꓙꓳ ꓡꓰ ꓢꓲ꓾ ꓬꓰ-ꓢꓴ ꓔꓯ ꓖꓳ ꓕꓲ ꓟꓵꓽ ꓗꓪ ꓐꓰ ꓓꓳ ꓙꓰ ꓠꓹ ꓟ ꓓꓰꓽˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓠꓬ ꓡꓲꓺ ꓗꓪ ꓓꓵꓽ ꓙꓰ ꓢꓲ ꓬꓲꓼ ꓙꓰꓳ꓿ 38 ꓠꓲꓽ ꓓꓳ ꓙꓰ ꓟ ꓡꓽ ꓞꓳ ꓖꓳ ꓕꓲ ꓣꓳ ꓠ꓾ ꓬꓰ-ꓢꓴˍ ꓐꓰ ꓕꓲꓽ ꓪꓺꓼ ꓔꓬ ꓟꓶ ꓠꓹ ꓟ ꓬꓲ ꓔꓯ ꓓꓰꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓡꓰ ꓬꓲ ꓔꓯ꓾ 39 ꓠꓴ ꓦꓲ ꓗꓪ ꓬꓲꓼ ꓙꓰ ꓢꓲ꓾ ꓪꓴ-ꓢ ꓡꓰ ꓠꓴ ꓐꓱ ꓶ ꓬꓰ ꓖꓶˍ ꓟ ꓟꓬꓱꓽ ꓮ ꓪꓴꓻ ꓛꓲ ꓥ ꓟ ꓢꓴ ꓔꓯ ꓐꓯ ꓟꓸ ꓖꓶꓽ ꓬꓰ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓙꓰ ꓢꓲ꓾ ꓬꓰ-ꓢꓴ ꓡꓰ ꓬꓲ ꓐꓱ ꓶ ꓬꓰ ꓖꓶꓽˍ ꓟ ꓟꓬꓱꓽ ꓮ ꓪꓴꓻ ꓛꓲ ꓥ ꓟ꓾ ꓕꓲ ꓡꓳ ꓒꓱ ꓡꓱꓸꓼ ꓗꓪ ꓐꓯ ꓒꓬꓱ ꓙꓰˍ ꓡꓳ꓿ 40 ꓞꓳ ꓜꓴ ꓠꓬ ꓬꓰ-ꓢꓴ ꓛꓲ ꓡ ꓟ ꓔꓯ ꓦꓴ ꓠꓬꓹ ꓔꓬ ꓢꓲ꓾ ꓬꓲ ꓬꓲꓼ ꓡ ꓕꓯ ꓬꓲ ꓔꓯ ꓘꓳꓻ ꓣꓴˍ ꓡꓳ꓿ 41 ꓖꓳ ꓕꓯ ꓙꓰ-ꓣꓴ꓾ ꓟꓬꓱ ꓔ ꓟ ꓜꓲꓼ ꓦꓲ ꓙꓵꓽ ꓢꓴ ꓕꓲ ꓣꓳ ꓡ ꓢꓲ꓾ ꓬꓰ-ꓢꓴ ꓟꓲꓽ ꓙꓬ ꓗꓪ ꓟꓳꓼ ꓡꓰ ꓢꓲ ꓠꓬꓲ꓾ ꓬꓰ-ꓢꓴ ꓔꓯ ꓬꓲ ꓦꓲ ꓗꓪ ꓡ ꓠꓹ ꓟ ꓓꓰꓽˍ ꓡꓳ꓿ 42 ꓮ ꓡꓲꓳ ꓐꓯ ꓠꓬ ꓞꓲ ꓠꓬꓲꓽ ꓘꓳꓼ ꓛꓲ ꓙꓳˍ ꓟ ꓬꓲ ꓮꓸ ꓟꓲꓽ ꓟꓶꓽ ꓔꓲꓸ ꓠꓬ ꓫꓵꓻˍ ꓐꓰ ꓗꓹ ꓡꓳ꓿ ꓬꓰ-ꓢꓴ ꓖꓳ ꓗꓪ ꓙꓰ ꓔꓬ ꓕꓯ ꓡꓽ ꓞꓳ ꓬꓲ ꓜꓴꓻ ꓬꓲ ꓔꓯ ꓝꓲꓽ ꓡ ꓡꓳ꓿ 43 ꓖꓳ ꓕꓯ ꓫꓵꓽ ꓜꓲꓺ ꓓꓳ ꓠꓬꓲ ꓞꓲ ꓠꓬꓲ ꓘꓳꓼ ꓠꓻ ꓔꓬ ꓟ ꓤ ꓟꓶ ꓤ ꓕꓲ ꓣꓳ ꓙꓳˍ ꓡꓳ꓿ ꓬꓲ ꓙꓳꓻˍ ꓟ ꓮꓽ ꓙꓵ ꓠꓻ ꓫꓬꓹ ꓒꓵꓽ ꓣꓱꓽ ꓖꓴ ꓡꓰˍ ꓟꓲ꓾ ꓫꓬꓹ ꓓꓻ ꓡꓰ ꓐ ꓡ ꓢꓴ ꓟꓽ ꓙꓳ꓿ 44 ꓬꓲ ꓠꓬ ꓬꓰ-ꓢꓴ ꓗꓸ ꓠꓯꓸ ꓢꓲ ꓗꓪ ꓡ ꓢꓲ ꓬꓲ ꓐꓵ ꓞꓶꓽ ꓟꓶꓽ ꓗꓪ ꓫꓱꓹ ꓗꓷ ꓠꓬ꓾ ꓫꓵꓽ ꓜꓲꓺ ꓓꓳˍ ꓟ ꓞꓼ ꓐꓰ ꓠꓽ ꓡꓰꓳ꓿ 45 ꓖꓳ ꓕꓯ ꓬꓰ-ꓢꓴ ꓡꓰ꓾ ꓥꓪ ꓔꓯ ꓫꓱꓹ ꓢꓴ ꓮꓽ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓮꓽ ꓙꓵ ꓢꓴ ꓡꓰ ꓟꓽ ꓢꓷ꓾ ꓐꓰ ꓐꓯˍ ꓕꓯ꓾ ꓒꓲ-ꓕꓱˍ ꓐꓰ ꓖꓳ ꓗꓪ ꓕꓲ ꓛꓳꓺꓼ ꓙꓰ ꓔꓬ ꓢꓴ ꓐꓴ ꓡꓰ꓾ ꓟꓸ ꓒꓽꓳ꓾ ꓞꓳ ꓜꓴ ꓞꓳ ꓟꓯꓼ ꓠꓴ ꓔꓯ ꓕꓳꓽ ꓔꓬ ꓝꓲꓽ ꓔꓬ ꓠꓬꓲ꓾ ꓮꓽ ꓟ ꓡꓰ ꓠꓴ ꓐꓵ ꓞꓶꓽ ꓗꓪ ꓫꓱꓹ ꓗꓷ ꓟ ꓢꓷꓸ ꓟꓽ ꓐ ꓡ꓾ ꓐꓯ ꓖꓶˍ ꓡꓳ꓿ 46 ꓬꓰ-ꓢꓴ ꓡꓰ꓾ ꓥꓪ ꓔꓯ ꓫꓱꓹ ꓢꓴ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓖꓳ ꓓꓱꓽ ꓗꓪ ꓐꓰ ꓪꓽ ꓠꓬꓲˍ ꓟ ꓓꓳ ꓙꓰˍ ꓟ ꓥꓪ ꓚꓬꓹ ꓪˍ ꓡꓳ꓾ ꓐꓯˍ ꓡꓳ꓿ 47 ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓫꓵꓽ ꓪꓴ ꓕꓱ ꓟ ꓔꓯ ꓑꓲꓸ ꓔ ꓟꓽ ꓐ ꓡ ꓟ ꓢꓷꓸ ꓡꓰ ꓠꓬꓲ꓾ ꓙꓳꓺ ꓠꓬꓲ ꓛꓱꓽ ꓠꓬꓲ ꓬꓰ-ꓢꓴ ꓟꓲꓽ ꓙꓬ ꓗꓪ ꓟꓳꓼ ꓡ ꓢꓲ꓾ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓫꓱꓹ ꓗꓷ ꓟ ꓐꓰ꓾ ꓞꓼ ꓐꓰ ꓮ ꓡꓲ ꓓꓻ ꓡꓰ ꓟ꓾ ꓞꓳ ꓜꓴꓻ ꓟꓲꓽ ꓙꓬ ꓗꓪ ꓐꓯ ꓓꓳ ꓡ ꓡꓳ꓿ 48 ꓬꓰ-ꓢꓴ ꓡꓰ ꓬꓲ ꓔꓯ꓾ ꓮꓸ ꓟꓲꓽꓳ꓾ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓾ ꓧꓪꓸ ꓧꓪꓸˍ ꓙꓰ꓾ ꓐꓯ ꓖꓶˍ ꓡꓳ꓿ 49 ꓬꓲ ꓖꓳ ꓡꓱ ꓫꓸ ꓕꓱ ꓔꓬ ꓕꓯ꓾ ꓜꓲꓼ ꓦꓲ ꓙꓵꓽ ꓢꓴ ꓦꓲ ꓗꓪ ꓐꓰ ꓕꓲ ꓣꓳ ꓡ ꓢꓲ꓾ ꓠꓴ ꓮꓸ ꓟꓲꓽ ꓠꓽ ꓫꓵꓻꓳ꓿ ꓟꓸ ꓒ ꓔꓯ ꓝꓮꓲ ꓕꓽ ꓘꓶꓻ ꓡꓶꓽ꓾ ꓐꓯˍ ꓡꓳ꓿ 50 ꓬꓰ-ꓢꓴ ꓑ ꓙꓽ ꓗꓷ ꓠꓬ ꓬꓲ ꓔꓯ꓾ ꓕꓽ ꓙꓳꓺ꓿ ꓙꓵꓻˍ ꓡꓰꓽ ꓙꓵˍ ꓠꓬ ꓠꓴ ꓮꓸ ꓟꓲꓽ ꓠꓽ ꓓꓻ ꓡꓰ ꓟꓶˍ ꓥꓳ꓾ ꓐꓯ ꓖꓶˍ ꓡꓳ꓿ 51 ꓦꓲ ꓗꓪ ꓛꓲ ꓬꓰ ꓕꓯ꓾ ꓒꓲ-ꓕꓱˍ ꓐꓰ ꓬꓳ-ꓦˍ ꓐꓰ ꓬ-ꓗꓴˍ ꓐꓰ ꓮꓸ ꓟꓲꓽ ꓖꓳ ꓟ ꓬꓲ ꓐꓹ ꓐ ꓟꓹ ꓟ ꓟꓽ ꓥ ꓠꓬ꓾ ꓠꓱꓸ ꓐꓯꓼ ꓮꓽ ꓟ ꓔꓯˍ ꓟꓲ ꓬꓲ ꓔꓯ ꓟꓽ ꓛꓳ ꓓꓵꓽ ꓙꓰ ꓝꓲ꓿ 52 ꓮꓽ ꓙꓵ ꓢꓴ ꓠꓬ ꓮꓸ ꓟꓲꓽ ꓤꓽ ꓐꓱ ꓶ ꓥꓴꓻ ꓠꓬꓲ ꓮꓸ ꓛꓬꓹ ꓙꓱ ꓠꓬꓲ ꓬꓰ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓡꓰ ꓬꓲ ꓪꓽ ꓔꓯ꓾ ꓕꓽ ꓥꓴ꓾ ꓬꓲ ꓠꓽ ꓟꓽ ꓫꓵ꓾ ꓬꓲꓼˍ ꓡꓰ ꓬꓲꓼ ꓟꓶ ꓔꓬ ꓡꓳ꓾ ꓐꓯ ꓖꓶˍ ꓡꓳ꓿ 53 ꓖꓳ ꓡꓱ ꓥ ꓟꓲ ꓮꓸ ꓟꓲ ꓤ ꓚꓵ ꓚꓵ ꓫꓵꓻ ꓗꓷ ꓟ ꓔꓯ ꓬꓲ ꓪꓽ ꓢꓷꓸˍ ꓠꓬꓲ꓾ ꓬꓲ ꓪꓽ ꓠꓽ ꓬꓲ ꓔꓯ ꓤꓲꓺˍ ꓡꓳ꓿ 54 ꓬꓲ ꓠꓽ ꓮꓸ ꓟꓲ ꓤ ꓡꓯꓼ ꓒꓯꓹ ꓗꓪ ꓣꓴ ꓔ ꓢꓲ꓾ ꓮꓸ ꓟꓲ ꓤꓽꓳ꓾ ꓔꓴ ꓡꓯ꓾ ꓐꓰ ꓘꓴˍ ꓡꓳ꓿ 55 ꓖꓳ ꓕꓯ ꓮꓸ ꓟꓲꓽ ꓤꓽ ꓬꓲ ꓦꓻ ꓠꓬ ꓬꓲ ꓔꓯ ꓬꓲꓼ ꓡ ꓢꓲ ꓞꓼ ꓐꓰ ꓔꓴ ꓡꓺꓳ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓬꓲ ꓔꓯ ꓜꓽ ꓓꓴ ꓕꓲ ꓫꓵꓽ ꓖꓶ ꓜꓽ꓾ ꓐꓰ ꓕꓵꓼ ꓪꓽ ꓖꓶˍ ꓡꓳ꓿ 56 ꓬꓲ ꓐꓹ ꓐ ꓟꓹ ꓟ ꓠꓬ ꓓꓵꓽ ꓙ ꓟꓶꓻ ꓡꓰꓳ꓿ ꓬꓲ ꓠꓽ ꓬꓲ ꓪꓽ ꓔꓯ꓾ ꓖꓳ ꓗꓪ ꓮ ꓡꓲ ꓗꓷ ꓡꓰ ꓟ ꓮꓽ ꓟ ꓔꓯˍ ꓟꓲ ꓟꓽ ꓐꓯ ꓖꓶ ꓠꓹ ꓟ ꓕꓵꓼ ꓪꓽ ꓖꓶˍ ꓡꓳ꓿

ꓡꓴ-ꓗ 9

1 ꓬꓰ-ꓢꓴ ꓠꓬ ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓘꓴ ꓜꓲꓼ ꓡ ꓢꓲ꓾ ꓠꓻ ꓒꓬꓼ ꓮꓽ ꓙꓵ ꓔꓯ ꓫꓬꓹ ꓓꓻ ꓡꓰ ꓘꓴˍ ꓟ ꓪꓽ ꓠꓬꓲˍ ꓟ ꓐꓰ꓾ ꓠꓲꓽ ꓥ ꓕ ꓑꓳꓸ ꓔꓯ ꓧꓪꓸ ꓡꓰˍ ꓟ ꓙꓵꓽ ꓪ ꓬꓲ ꓪꓽ ꓔꓯ ꓖꓶˍ ꓡꓳ꓿ 2 ꓪꓴ-ꓢ ꓗꓴꓷꓼ ꓬꓲ ꓓꓳꓽ ꓐꓯ ꓒꓬꓱ ꓙꓰ ꓠꓹ ꓟ ꓐꓰ꓾ ꓠꓻ ꓢꓴ ꓒꓬꓽ ꓢꓴ ꓔꓯ ꓫꓬꓹ ꓖꓶ ꓠꓹ ꓟ ꓬꓲ ꓡꓰ ꓬꓲ ꓪꓽ ꓔꓯ ꓝꓲ ꓩꓴ ꓗꓷˍ ꓡꓳ꓿ 3 ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓓꓴꓻ ꓓꓳ ꓙꓰˍ ꓕꓯ꓾ ꓙꓽ ꓥꓳˍ ꓟꓲ꓾ ꓡꓯꓼ ꓔꓲꓸˍ ꓟꓲ꓾ ꓜꓽ ꓓꓴˍ ꓟꓲ꓾ ꓒꓴˍ ꓟꓲ ꓕꓽ ꓔꓯꓹ꓿ ꓐꓵ ꓞꓶꓽˍ ꓟꓲ ꓠꓬꓲꓽ ꓘꓳꓹ ꓕꓽ ꓔꓯꓹ꓿ 4 ꓮ ꓡꓲ ꓕꓲ ꓦꓲ ꓗꓪ ꓓꓵꓽ ꓙꓰˍ ꓟꓲ꓾ ꓖꓳ ꓗꓪ ꓐꓰ ꓟꓽ ꓓꓳ ꓙꓰ ꓕ ꓑꓳꓸ ꓖꓳ ꓕꓲ ꓦꓲ ꓗꓪ ꓔꓬ꓿ 5 ꓠꓴ ꓪꓽ ꓔꓯ ꓟꓽ ꓘꓳꓻ ꓣꓴ ꓡ ꓠꓬ꓾ ꓡꓳ ꓒꓱ ꓖꓳ ꓟ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓬꓲ ꓪꓽ ꓔꓯ ꓔꓳꓹˍ ꓟ ꓢꓷꓸ ꓙ ꓟꓳ ꓙ ꓓꓴ ꓬꓰ ꓠꓹ ꓟ꓾ ꓠꓴ ꓪꓽ ꓛꓲ ꓒꓯꓹ ꓗꓪ ꓟ ꓠꓱꓸ ꓦꓱꓽ ꓧꓶꓽ ꓟꓱꓸ ꓞꓰ ꓩꓴ ꓗꓷ꓾ ꓐꓯˍ ꓡꓳ꓿ 6 ꓖꓳ ꓡꓱ ꓠꓬ ꓬꓲ ꓪꓽ ꓙꓰ ꓢꓲ꓾ ꓕꓲ ꓘꓹ ꓕꓲ ꓘꓹ ꓗꓪ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓢꓲ ꓠꓬꓲ꓾ ꓮ ꓡꓲ ꓗꓪˍ ꓟꓲ ꓠꓻ ꓫꓬꓹ ꓖꓶˍ ꓡꓳ꓿ 7 ꓬꓰ-ꓢꓴ ꓬꓰ ꓗꓷ ꓟ ꓮꓽ ꓙꓵ ꓫꓴ ꓙꓵꓽ ꓒ ꓩꓴ-ꓡꓲ ꓑ ꓙꓽˍ ꓠꓬ꓾ ꓬꓲ ꓮꓽ ꓘꓶꓸ ꓓꓵꓽ ꓙ ꓟꓬꓽˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓕꓲ ꓐꓱ ꓠꓽ꓾ ꓕꓱ ꓟ ꓠꓬ ꓬꓳ-ꓦ ꓫꓵꓻ ꓗꓪ ꓐꓰ ꓢꓯ ꓬꓲꓼ ꓡ ꓟ ꓥꓳ꓾ ꓐꓯ ꓢꓴ ꓙꓳˍ ꓡꓳ꓿ 8 ꓕꓲ ꓐꓱ ꓠꓬ꓾ ꓬꓲ-ꓡꓲ-ꓬ ꓟꓳꓸ ꓖꓶ ꓡ ꓟ ꓥꓳ꓾ ꓐꓯ ꓢꓴˍ ꓟꓲ ꓙꓳˍ ꓡꓳ꓿ ꓝꓮꓲ ꓕꓲ ꓐꓱ ꓠꓬ꓾ ꓮꓽ ꓠꓱ ꓟ ꓟꓷꓽ ꓠꓷꓹ ꓝꓸ ꓢꓴ ꓕꓲ ꓣꓳ ꓢꓯꓸ ꓬꓲꓼ ꓡ ꓟ ꓥꓳ꓾ ꓐꓯ ꓢꓴˍ ꓟꓲ ꓙꓳˍ ꓡꓳ꓿ 9 ꓩꓴ-ꓡꓲ ꓠꓬ꓾ ꓬꓳ-ꓦ ꓔꓯ ꓠꓽ ꓥꓪ ꓡꓰ ꓪꓴꓸ ꓓꓵ ꓓꓶ ꓗꓷꓳ꓿ ꓖꓳ ꓡꓱ ꓠꓬꓲ꓾ ꓥꓪ ꓑ ꓙꓽˍ ꓟ ꓕꓱ ꓟꓬ ꓫꓵꓽ ꓬꓰ ꓔꓬ ꓢꓴ ꓠꓬ ꓮꓽ ꓟ ꓥ?꓾ ꓐꓯ ꓢꓲ ꓬꓲ ꓔꓯ ꓟꓳꓻ ꓠꓹ ꓟ ꓬꓲ ꓚꓱꓹ ꓧꓪˍ ꓡꓳ꓿ 10 ꓝꓲ ꓓꓴ ꓐꓴ ꓬꓲꓼ ꓡ ꓕꓯ꓾ ꓬꓲ ꓪꓽ ꓬꓰ ꓗꓷˍ ꓟ ꓮꓽ ꓙꓵ ꓬꓰ-ꓢꓴ ꓔꓯ ꓐꓯ ꓖꓶˍ ꓡꓳ꓿ ꓬꓲ ꓠꓬ ꓬꓲ ꓪꓽ ꓔꓯ ꓧꓳꓽ ꓙꓰ ꓢꓲ꓾ ꓘꓳ ꓫꓱ ꓫꓱꓺꓼ ꓐꓰ ꓐꓱ-ꓢꓰ-ꓓ ꓟꓬꓱꓺ ꓔ ꓟ ꓡꓳ ꓒꓱ ꓗꓪ ꓙꓵꓺ ꓙꓰˍ ꓡꓳ꓿ 11 ꓖꓳ ꓡꓱ ꓥ ꓟꓲ ꓞꓳ ꓜꓴ ꓐꓴ ꓢꓷꓸ ꓡꓰ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓘꓳꓻ ꓣꓴ ꓢꓲ꓾ ꓪꓴ-ꓢ ꓗꓴꓷꓼ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ꓿ ꓠꓻ ꓫꓬꓹ ꓖꓶ ꓠꓯꓹ ꓟ ꓔꓯˍ ꓟꓲ ꓫꓬꓹ ꓖꓶˍ ꓡꓳ꓿ 12 ꓟꓲꓽ ꓟꓲ ꓓꓵꓽ ꓡꓰˍ ꓐꓰ ꓗꓹ ꓕꓯ ꓞꓲ ꓠꓬꓲꓽ ꓣꓳ ꓟ ꓬꓲ ꓔꓯ ꓡ ꓢꓲ꓾ ꓕꓱ ꓗꓪ ꓠꓬ ꓡꓲ ꓛꓲ ꓥ ꓠꓬꓲ꓾ ꓞꓳ ꓜꓴꓻ ꓐꓴ ꓔꓯ ꓠꓬ ꓚꓳ ꓡꓳ ꓟ ꓡꓳ ꓒꓱ ꓘꓹ ꓒꓱ ꓗꓪ ꓬꓲꓼ ꓔꓸ ꓖꓴꓺˍ ꓐꓰ ꓜꓽ ꓓꓴ ꓧꓪ ꓙꓰ ꓠꓹ ꓟ ꓙꓰ ꓝꓲ꓾ ꓐꓯˍ ꓡꓳ꓿ 13 ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓬꓲ ꓪꓽ ꓔꓯ ꓠꓴ ꓪꓽ ꓖꓶ ꓜꓽ꓾ ꓐꓯ ꓖꓶˍ ꓡꓳ꓿ ꓬꓲ ꓪꓽ ꓡꓰ꓾ ꓥꓪ ꓠꓴꓽ ꓠꓬ ꓡꓽ ꓞꓳ ꓕꓱ ꓟꓬ ꓟ ꓐꓱ ꓶ ꓜꓽ ꓓꓴ ꓟꓽ ꓪꓴꓻ ꓙꓰ ꓠꓬ꓾ ꓕꓱ ꓗꓪ ꓠꓽ ꓑ ꓑ ꓥꓪꓽ ꓑꓬˍ ꓐꓰ ꓥꓪꓸ ꓠꓬꓲꓽ ꓟˍ ꓡꓰꓽ ꓙꓳˍ ꓡꓳ꓾ ꓐꓯˍ ꓡꓳ꓿ 14 (ꓮ ꓡꓲꓳ ꓐꓯˍ ꓠꓬ꓾ ꓖꓳ ꓗꓪ ꓞꓳ ꓑꓸ ꓤˍ ꓡꓰꓽ ꓥꓪꓽ ꓔꓴ ꓣꓳ ꓛꓲ ꓙꓳˍ ꓡꓳ꓿) ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓬꓲ ꓪꓽ ꓔꓯ ꓕꓲ ꓜꓴ ꓟ ꓥꓪꓽ ꓞꓲ ꓣꓳ ꓛꓲ꓾ ꓕꓲ ꓜꓴ ꓕꓲ ꓜꓴ ꓐꓰ ꓠꓬꓲꓸ ꓠꓸ ꓝꓲ꓾ ꓐꓯˍ ꓠꓬꓲ꓾ 15 ꓬꓲ ꓪꓽ ꓡꓰ ꓞꓳ ꓜꓴꓻ ꓔꓯ ꓬꓲ ꓖꓳ ꓡꓱ ꓠꓬꓲꓸ ꓠꓸ ꓝꓲˍ ꓡꓳ꓿ 16 ꓬꓲ ꓠꓬ ꓑ ꓑ ꓖꓳ ꓥꓪꓽ ꓑꓬˍ ꓐꓰ ꓥꓪꓸ ꓠꓬꓲꓽ ꓟꓻ ꓟ ꓣꓴ ꓔꓸ ꓢꓲ꓾ ꓟꓴꓽ ꓗꓪ ꓗꓪ ꓡꓳꓸ ꓢꓲ ꓠꓬꓲ꓾ ꓶꓼ ꓥꓳꓽ ꓙꓱꓽ ꓖꓶꓽ ꓗꓷ ꓠꓬ ꓦꓶꓹ ꓗꓷ ꓢꓲ꓾ ꓞꓳ ꓜꓴ ꓔꓯ ꓑꓶ ꓖꓶ ꓠꓹ ꓟ ꓛꓳꓽ ꓒꓯꓹ ꓐꓴ ꓔꓯ ꓖꓶˍ ꓡꓳ꓿ 17 ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓜꓽ ꓐꓳ ꓡꓰˍ ꓡꓳ꓿ ꓜꓰꓻ ꓡꓰˍ ꓟ ꓬꓲ ꓧꓶꓽ ꓬꓲ ꓟꓲ ꓠꓬ ꓛꓳꓽ ꓒꓯꓹ ꓐꓴ ꓡꓰ ꓞꓲ ꓠꓬꓲꓽ ꓠꓳꓸ ꓘꓴꓽ ꓖꓳ ꓫ ꓟꓶˍ ꓡꓳ꓿ 18 ꓕꓲ ꓧꓪꓹ ꓙꓳˍ ꓠꓬ ꓬꓰ-ꓢꓴ ꓬꓲ ꓕꓲ ꓣꓳ ꓔꓵꓸꓼ ꓪꓽ ꓘꓴ ꓔꓬ ꓢꓲ꓾ ꓛꓳꓽ ꓒꓯꓹ ꓐꓴˍ ꓟꓲ ꓬꓲˍ ꓐꓰ ꓕꓲꓽ ꓪꓺꓼ ꓔꓬ ꓕꓯ꓾ ꓬꓲ ꓡꓰ ꓬꓲ ꓪꓽ ꓔꓯ꓾ ꓥꓪ ꓮꓽ ꓟ ꓥ ꓟ ꓞꓳ ꓜꓴꓻ ꓮ ꓡꓲ ꓐꓯˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 19 ꓬꓲ ꓪꓽ ꓡꓰ꓾ ꓖꓳ ꓓꓱꓽ ꓔꓲꓹ ꓖꓶ ꓢꓴ ꓬꓳ-ꓦ ꓥ ꓡꓳ꓾ ꓐꓯ ꓢꓴ ꓙꓳˍ ꓡꓳ꓿ ꓬꓲ-ꓡꓲ-ꓬ ꓥ ꓡꓳ꓾ ꓐꓯ ꓢꓴˍ ꓟꓲ ꓙꓳˍ ꓡꓳ꓿ ꓮꓽ ꓠꓱ ꓟ ꓟꓷꓽ ꓠꓷꓹ ꓝꓸ ꓢꓴ ꓗꓪ ꓟ ꓕꓲ ꓣꓳ ꓢꓯꓸ ꓬꓲꓼ ꓡ ꓟ ꓥꓳ꓾ ꓐꓯ ꓢꓴˍ ꓟꓲ ꓙꓳˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 20 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓮꓽ ꓟ ꓥ ꓟ ꓠꓴ ꓪꓽ ꓡꓲS ꓮ ꓡꓲ ꓐꓯˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓒꓲ-ꓕꓱ ꓡꓰ ꓒꓳꓹ ꓖꓶꓽ ꓢꓲ꓾ ꓠꓴ ꓠꓽ ꓪꓴ-ꓢ ꓬꓲ ꓙꓲ-ꓢꓴ ꓖꓳ ꓕꓲ ꓣꓳ ꓟ ꓥꓳ꓾ ꓐꓯ ꓖꓶˍ ꓡꓳ꓿ 21 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓕꓱ ꓟ ꓮꓽ ꓟ ꓔꓯˍ ꓟꓲ ꓟꓽ ꓐꓯ ꓟꓸ ꓖꓶꓽ ꓠꓹ ꓟ ꓙꓳ ꓗꓽ ꓖꓶˍ ꓡꓳ꓿ 22 ꓝꓮꓲ ꓬꓲ ꓡꓰ꓾ ꓡ-ꓞꓳ-ꓮ-ꓐꓲ ꓥꓪ ꓠꓬ ꓫꓸ ꓙꓵˍ ꓟ ꓮꓽ ꓟꓬꓹ ꓜꓲꓽ ꓗꓷ ꓗꓸ ꓠꓯ꓾ ꓞꓳ ꓪꓴꓽ ꓞꓳ ꓔꓲ ꓐꓴˍ ꓐꓰ꓾ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ꓾ ꓙꓵ ꓗ ꓟꓸ ꓒ ꓐꓴ ꓡꓰ ꓟꓽ ꓘꓳꓻ ꓣꓴ ꓢꓲ ꓢꓰꓼ ꓗꓷˍ ꓥꓳ꓿ ꓖꓳ ꓗꓸ ꓠꓯꓸ ꓢ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓢꓯꓸ ꓬꓲꓼ ꓡ ꓥꓳ꓾ ꓐꓯ ꓖꓶˍ ꓡꓳ꓿ 23 ꓖꓳ ꓡꓱ ꓢꓲ ꓬꓲ ꓡꓰ ꓮꓽ ꓙꓵ ꓢꓴ ꓔꓯ꓾ ꓮꓽ ꓟ ꓥꓪ ꓔꓯ ꓛꓳ ꓠꓲꓹ ꓫꓵˍ ꓠꓬ꓾ ꓚꓲꓸ ꓛꓬ ꓔꓯ ꓟꓽ ꓗꓹ ꓐꓽ ꓐꓽ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ ꓠꓬꓲ ꓥꓪ ꓔꓯ ꓛꓳ ꓠꓯꓹ ꓡꓳ꓿ 24 ꓮ ꓡꓲꓳ ꓐꓯ ꓠꓬ ꓮꓽ ꓟˍ ꓟꓲ ꓬꓲ ꓚꓲꓸ ꓛꓬ ꓢꓯꓼ ꓟꓬ ꓚꓬꓴ ꓠꓲꓹ ꓫꓵˍ ꓠꓬ ꓬꓲ ꓢꓯꓼ ꓟꓬ ꓒꓲꓼ ꓬꓰˍ ꓥꓳ꓿ ꓥꓪ ꓐꓱ ꓶ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓟꓽ ꓗꓹ ꓐꓽ ꓢꓴ ꓠꓬ ꓢꓯꓼ ꓟꓬ ꓟꓶˍ ꓥꓳ꓿ 25 ꓞꓳ ꓤ ꓕꓲ ꓣꓳ ꓠꓬ ꓟꓵ ꓗꓳꓹ ꓓꓵ ꓓꓵ ꓮꓽ ꓙꓵ ꓒꓳꓹ ꓟꓶˍ ꓟꓲ꓾ ꓚꓲꓸ ꓛꓬ ꓢꓯꓼ ꓟꓬ ꓒꓲꓼ ꓬꓰ꓾ ꓥ ꓠꓬ ꓚꓲꓸ ꓛꓬ ꓢꓯꓼ ꓟꓬ ꓐꓶꓻ ꓗꓷ ꓠꓬ꓾ ꓮꓸ ꓫꓵ ꓙꓲ ꓖꓴ ꓙꓳˍ ꓡ? 26 ꓮꓽ ꓟˍ ꓟꓲ ꓥꓪˍ ꓐꓰ ꓥꓪ ꓐꓯ ꓘꓶꓽ ꓑꓶꓸ ꓓꓴ ꓫꓸ ꓔꓳˍ ꓕꓯ ꓠꓽ꓾ ꓡ-ꓞꓳ-ꓮ-ꓐꓲ ꓥꓪ ꓐꓬꓱꓼ ꓡꓱꓼ ꓡꓱˍ ꓟ ꓐꓰ꓾ ꓐꓹ ꓐˍ ꓐꓰ ꓢꓲꓽ ꓫꓬꓻ ꓟ ꓟꓴꓽ ꓗꓪ ꓝꓲ ꓓꓴ ꓐꓬꓱꓼ ꓡꓱꓼ ꓡꓱˍ ꓟ ꓠꓯꓸꓼ ꓗꓪ ꓬꓯꓼ ꓡ ꓕꓯ꓾ ꓡꓽ ꓞꓳ ꓖꓳ ꓕꓲ ꓣꓳ ꓔꓯˍ ꓟꓲ ꓫꓸ ꓔꓳ ꓓꓴ ꓚꓬꓹ ꓥꓳ꓿ 27 ꓠꓴ ꓪꓽ ꓔꓯ ꓥꓪ ꓐꓯ ꓖꓶꓽˍ ꓠꓬꓲ꓾ ꓕꓱ ꓗꓪ ꓦꓰꓼ ꓞꓹ ꓢꓴ ꓕꓲ ꓐꓱ ꓠꓬ ꓪꓴ-ꓢ ꓗꓴꓷꓼ ꓔꓯ ꓟꓽ ꓟꓳꓻ ꓕ ꓑꓳꓸ꓾ ꓮ ꓡꓲ ꓥ ꓟꓲ ꓟꓽ ꓫꓵꓻ꓾ ꓐꓯˍ ꓡꓳ꓿ 28 ꓕꓱ ꓡꓱ ꓐꓯ ꓗꓷ ꓗꓸ ꓠꓯꓸ ꓮꓽ ꓡ ꓦꓰꓼ ꓠꓬꓲ ꓛꓲ ꓗꓪ꓾ ꓬꓲ ꓠꓬ ꓒꓲ-ꓕꓱˍ ꓐꓰ ꓬꓳ-ꓦˍ ꓐꓰ ꓬ-ꓗꓴ ꓔꓯ ꓧꓳꓽ ꓔ ꓢꓲ꓾ ꓪꓽ ꓘꓴ ꓠꓹ ꓟ ꓪꓽ ꓚꓲ ꓗꓪ ꓓꓯ ꓙꓰˍ ꓡꓳ꓿ 29 ꓬꓰ-ꓢꓴ ꓪꓽ ꓘꓴ ꓔꓬ ꓕꓯ ꓬꓲ ꓠꓬ ꓐꓬꓱꓼ ꓡꓱꓼ ꓡꓱ ꓑꓶꓸ ꓡꓰ ꓢꓲ꓾ ꓬꓲ ꓐꓵ ꓞꓶꓽ ꓠꓬ ꓒꓴ ꓛꓹ ꓛ ꓗꓷ ꓡꓰˍ ꓡꓳ꓿ 30 ꓟꓳ-ꓫꓲˍ ꓐꓰ ꓬꓲ-ꓡꓲ-ꓬ ꓠꓬ ꓐꓬꓱꓼ ꓡꓱꓼ ꓡꓱ ꓟ ꓠꓯꓸꓼ ꓗꓪ ꓬꓰ-ꓢꓴˍ ꓐꓰ ꓦꓰꓼ ꓞ ꓢꓲ꓾ 31 ꓬꓲ ꓪꓽ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓬꓰ-ꓢꓴ ꓫꓵꓻ ꓠ ꓗꓹ ꓟ ꓫꓵꓽ ꓪꓴꓻ ꓔꓯ ꓟꓳꓸ ꓫꓸ ꓕꓱ ꓡꓯꓽ ꓘꓳ ꓔꓬ ꓡꓳ꓿ 32 ꓒꓲ-ꓕꓱˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓲꓼ ꓟꓶ ꓕꓳꓹˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓫꓬꓽ ꓫꓬ ꓧꓪꓸ ꓛꓲꓽ ꓡ ꓕꓯ꓾ ꓬꓰ-ꓢꓴ ꓬꓲ ꓐꓬꓱꓼ ꓡꓱꓼ ꓡꓱˍ ꓟ ꓐꓰ꓾ ꓬꓲˍ ꓐꓰ ꓦꓰꓼ ꓞꓹ ꓟ ꓡꓽ ꓞꓳ ꓖꓳ ꓠꓬꓲꓽ ꓣꓳ ꓔꓯ ꓟꓳꓻ ꓡꓰꓳ꓿ 33 ꓡꓽ ꓞꓳ ꓖꓳ ꓠꓬꓲꓽ ꓣꓳ ꓠꓬ ꓬꓰ-ꓢꓴ ꓔꓯ ꓧꓹ ꓗꓷˍ ꓐꓰ ꓬꓰˍ ꓕꓯ ꓒꓲ-ꓕꓱ ꓡꓰ꓾ ꓟꓸ ꓒꓽꓳ꓾ ꓕꓱ ꓗꓪ ꓔꓬ ꓠꓬ ꓣꓳ ꓐꓱ ꓶ ꓙꓲꓻˍ ꓡꓳ꓿ ꓥꓪ ꓠꓴꓽ ꓔꓯ ꓦꓲ ꓐꓱꓻ ꓢ ꓟ ꓫꓬꓹ ꓝꓲ ꓡꓯ꓿ ꓠꓴ ꓐꓱ ꓶ ꓕꓲ ꓟ꓾ ꓟꓳ-ꓫꓲ ꓐꓱ ꓶ ꓕꓲ ꓟ꓾ ꓬꓲ-ꓡꓲ-ꓬ ꓐꓱ ꓶ ꓕꓲ ꓟ ꓫꓬꓹ ꓝꓲ ꓡꓯ꓾ ꓐꓯˍ ꓡꓳ꓿ (ꓒꓲ-ꓕꓱ ꓠꓬ ꓬꓲ ꓮꓸ ꓫꓵ ꓐꓯ ꓔꓬ ꓟ ꓬꓲ ꓟꓽ ꓢꓷꓸ꓿) 34 ꓕꓱ ꓡꓱ ꓫꓸ ꓕꓱ ꓔꓬ ꓕꓯ꓾ ꓟꓴ ꓗꓴꓸ ꓕꓲ ꓘꓴꓸ ꓢꓴꓸ ꓡ ꓢꓲ ꓬꓲ ꓪꓽ ꓔꓯ ꓛꓸ ꓡꓰˍ ꓡꓳ꓿ ꓟꓴ ꓗꓴꓸ ꓛꓸ ꓡ ꓠꓬꓲ ꓬꓲ ꓪꓽ ꓙꓳꓺˍ ꓡꓳ꓿ 35 ꓖꓳ ꓕꓯ ꓟꓴ ꓗꓴꓸ ꓗꓪ ꓐꓰ ꓢꓯꓼ ꓓꓳ ꓡ ꓢꓲ꓾ ꓕꓱ ꓟ ꓠꓬ ꓥꓪ ꓮ ꓐꓲ꓾ ꓥꓪ ꓡꓰ ꓢꓲ ꓔ ꓢꓴ ꓥ ꓡꓳ꓿ ꓠꓴ ꓪꓽ ꓬꓲ ꓔꓯ ꓠ ꓠꓹ꓾ ꓐꓯˍ ꓡꓳ꓿ 36 ꓫꓸ ꓕꓱ ꓢꓯꓼ ꓖꓳ ꓟ ꓠꓽ ꓡꓰ ꓠꓬ ꓬꓰ-ꓢꓴ ꓕꓲ ꓣꓳ ꓔꓯˍ ꓡꓰꓽ ꓟꓳꓻˍ ꓡꓳ꓿ ꓦꓬꓼ ꓠꓬꓲ ꓖꓳ ꓟ ꓗꓪ ꓬꓲ ꓪꓽ ꓡꓳꓸ ꓟꓳꓻˍ ꓟ ꓮꓽ ꓟ ꓔꓯˍ ꓟꓲ ꓟꓽ ꓐꓯ ꓖꓶ ꓖꓶ ꓟꓽ ꓪꓳꓹ ꓔꓬ ꓡꓳ꓿ 37 ꓗꓸ ꓠꓯꓸ ꓕꓲ ꓠꓬꓲ ꓪꓽ ꓚꓲ ꓗꓪ ꓐꓰ ꓬꓲ ꓪꓽ ꓬꓯꓼ ꓡ ꓕꓯ꓾ ꓞꓳ ꓜꓴ ꓓꓽ ꓟ ꓠꓬ ꓬꓰ-ꓢꓴ ꓔꓯ ꓞꓵꓺ ꓡ ꓡꓳ꓿ 38 ꓡꓽ ꓞꓳ ꓬꓲ ꓜꓴꓻ ꓗꓪ ꓟ ꓕꓲ ꓣꓳ ꓠꓬ ꓘꓴꓻ ꓔꓴ ꓡ ꓢꓲ꓾ ꓟꓸ ꓒꓽꓳ꓾ ꓥꓪ ꓤꓽ ꓔꓲꓸ ꓔꓯ ꓡꓳꓸ ꓠꓬꓲ ꓙ ꓡ ꓠꓹ ꓟ ꓠꓴ ꓔꓯ ꓥꓪ ꓓꓰꓽˍ ꓥꓳ꓿ 39 ꓠꓲꓽ ꓡꓰ ꓬꓲ ꓔꓯ ꓣꓴ ꓡ ꓠꓬ꓾ ꓬꓲ ꓠꓽ ꓞꓼ ꓐꓰ ꓘꓴ ꓔꓴ ꓡ ꓢꓲ꓾ ꓟꓷꓽ ꓶꓻ ꓩꓵꓸ ꓓꓳ ꓡ ꓗꓪ ꓛꓲ ꓚꓵꓹˍ ꓡꓳ꓿ ꓠꓲꓽ ꓠꓬ ꓬꓲ ꓔꓯˍ ꓐꓰ ꓧꓹ ꓙꓰ ꓟꓽ ꓫꓳ ꓠꓬꓲ ꓬꓲ ꓠꓽ ꓮꓽ ꓘꓶꓸ ꓔꓬ ꓫꓸˍ ꓡꓳ꓿ 40 ꓥꓪ ꓡꓰ ꓠꓴ ꓛꓳꓽ ꓒꓯꓹ ꓐꓴ ꓔꓯ ꓠꓲꓽ ꓕꓱ ꓟ ꓖꓼ ꓓꓳ ꓙ ꓡ ꓠꓹ ꓟ ꓓꓰꓽ ꓗꓷˍ ꓟꓲ꓾ ꓬꓲ ꓪꓽ ꓠꓽ ꓖꓼ ꓓꓳ ꓗꓷ ꓟꓽ ꓐ ꓡ ꓐꓷ꓾ ꓐꓯˍ ꓡꓳ꓿ 41 ꓬꓰ-ꓢꓴ ꓡꓰ ꓒꓳꓹ ꓖꓶꓽ ꓢꓲ꓾ ꓙꓵꓻ ꓠꓲꓹ ꓟꓽ ꓙꓳˍ ꓟ ꓐꓰ ꓟꓸ ꓟꓽ ꓠ ꓟ ꓕꓲ ꓤꓶꓻ ꓢꓴꓳ꓾ ꓥꓪ ꓠꓬ ꓠꓴ ꓪꓽˍ ꓐꓰ ꓮ ꓡꓲ ꓟꓶ ꓛꓲ ꓔꓬ ꓢꓲ ꓜꓲꓽ ꓖꓶꓽ ꓠꓯꓹ ꓡ? ꓠꓴ ꓮ ꓐꓲ ꓔꓯ ꓕꓱ ꓗꓪ ꓧꓳꓽ ꓔꓯꓹ ꓡꓯ꓾ ꓐꓯ ꓖꓶˍ ꓡꓳ꓿ 42 ꓮ ꓐꓲ ꓤꓽ ꓧꓳꓽ ꓡ ꓔꓬ ꓕꓯ꓾ ꓠꓲꓽ ꓡꓰ ꓬꓲ ꓔꓯ ꓟꓲ ꓛꓬ ꓗꓪ ꓚꓵꓹ ꓓꓳꓽ ꓡꓰ ꓝꓲˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓟꓽ ꓫꓬ ꓠꓲꓽ ꓔꓯ ꓕꓼ ꓢꓲ꓾ ꓤ ꓠꓱ ꓤ ꓔꓯ ꓫꓬꓹ ꓓꓻ ꓡꓰ ꓝꓲ ꓢꓲ ꓠꓬꓲ ꓬꓲ ꓐꓹ ꓐ ꓔꓯ ꓡꓯꓼ ꓙꓱ ꓖꓶˍ ꓡꓳ꓿ 43 ꓖꓳ ꓡꓱ ꓠꓬꓲ ꓮꓽ ꓙꓵ ꓢꓴ ꓠꓬ ꓟꓴ ꓡꓳꓹ ꓬꓰ ꓟ ꓪꓴ-ꓢ ꓪꓽ ꓠꓬꓲˍ ꓟ ꓔꓯ ꓓꓵꓽ ꓙ ꓟꓶꓻˍ ꓡꓳ꓿ ꓬꓲ ꓪꓽ ꓮꓽ ꓙꓵ ꓢꓴ ꓬꓰ-ꓢꓴ ꓬꓰˍ ꓟ ꓟꓬꓱꓽ ꓔꓯ ꓓꓵꓽ ꓙ ꓟꓶꓻ ꓔꓬ ꓕꓯ꓾ ꓬꓲ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ 44 ꓡ-ꓞꓳ-ꓮ-ꓐꓲ ꓔꓯ ꓠꓽ ꓞꓳ ꓤ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷˍ ꓥꓳ꓾ ꓐꓯ ꓘꓶꓽ ꓕꓱ ꓟꓬ ꓟ ꓠꓬ ꓠꓴ ꓪꓽ ꓠꓸ ꓑꓳ ꓗꓪ ꓓꓵꓽ ꓡꓰ ꓝꓲ꓾ ꓐꓯˍ ꓡꓳ꓿ 45 ꓖꓳ ꓡꓱ ꓥ ꓟꓲ ꓐꓯ ꓘꓶꓽ ꓕꓱ ꓟ ꓔꓯ ꓬꓲ ꓪꓽ ꓗꓪ ꓐꓰ ꓚꓵꓺ ꓔ ꓠꓬꓲ ꓬꓲ ꓪꓽ ꓟꓽ ꓙꓽ ꓜꓲꓼ꓿ ꓐꓯ ꓘꓶꓽ ꓕꓱ ꓟ ꓮꓸ ꓫꓵ ꓔꓯ ꓐꓯˍ ꓟˍ ꓟꓲ ꓬꓲ ꓪꓽ ꓠ ꓠꓬꓲ ꓟꓽ ꓑꓶꓸ꓿ 46 ꓛꓳꓽ ꓒꓯꓹ ꓐꓴ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓮꓽ ꓟ ꓪ ꓜꓲ ꓪꓴꓽˍ ꓟ ꓒꓬꓱꓼ ꓡ ꓥꓳ ꓪ?꓾ ꓐꓰ ꓧꓳꓺ ꓡꓯꓽ ꓘꓳ ꓔꓴ ꓡ ꓡꓳ꓿ 47 ꓬꓰ-ꓢꓴ ꓠꓽ ꓬꓲ ꓪꓽ ꓓꓵꓽ ꓙˍ ꓟ ꓔꓯ ꓢꓷꓸˍ ꓠꓬꓲ꓾ ꓤ ꓠꓱ ꓤ ꓕꓲ ꓣꓳ ꓧꓳꓽ ꓔꓯꓹ ꓡ ꓢꓲ꓾ ꓬꓲ ꓒ ꓕꓲ ꓗꓪ ꓦꓰꓼ ꓞꓹ ꓝꓲ ꓢꓲ ꓠꓬꓲ ꓬꓲ ꓪꓽ ꓔꓯ꓾ 48 ꓮꓽ ꓟ ꓥ ꓟꓲ ꓥꓪ ꓟꓬꓱ ꓗꓪ ꓐꓰ ꓤ ꓠꓱ ꓤ ꓕꓱ ꓟ ꓔꓯ ꓘꓳꓻ ꓣꓴˍ ꓠꓬ ꓥꓪ ꓔꓯ ꓘꓳꓻ ꓣꓴˍ ꓟ ꓥ ꓡꓳ꓿ ꓮꓽ ꓟ ꓥ ꓟꓲ ꓥꓪ ꓔꓯ ꓘꓳꓻ ꓣꓴˍ ꓠꓬ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓘꓳꓻ ꓣꓴˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓓꓽ ꓓꓰꓺ ꓬꓰ ꓢꓴ ꓠꓬ ꓓꓽ ꓪꓴꓸ ꓥꓳ꓾ ꓐꓯ ꓖꓶˍ ꓡꓳ꓿ 49 ꓬꓳ-ꓦ ꓡꓰ꓾ ꓢꓲ ꓒꓽꓳ꓾ ꓠꓴ ꓟꓬꓱ ꓗꓪ ꓐꓰ ꓠꓲꓽ ꓖꓼ ꓓꓳ ꓔꓬ ꓟ ꓕꓲ ꓣꓳ ꓔꓯ ꓥꓪ ꓠꓴꓽ ꓟꓳꓻ ꓗꓷꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓽ ꓣꓳꓽ ꓗꓪ ꓟ ꓕꓲ ꓣꓳ ꓟꓽ ꓥ ꓠꓬꓲ꓾ ꓬꓲ ꓔꓯ ꓥꓪ ꓠꓴꓽ ꓗꓽ ꓔ ꓡꓳ꓾ ꓐꓯˍ ꓡꓳ꓿ 50 ꓬꓰ-ꓢꓴ ꓡꓰ꓾ ꓬꓲ ꓔꓯ ꓕꓽ ꓗꓽ ꓔ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓔꓳꓹ ꓢꓴ ꓟꓽ ꓥ ꓠꓬ꓾ ꓠꓴ ꓪꓽ ꓔꓯ ꓬꓰ ꓙ ꓢꓴ ꓥ ꓡꓳ꓾ ꓐꓯ ꓖꓶˍ ꓡꓳ꓿ 51 ꓬꓰ-ꓢꓴ ꓟꓴꓽ ꓗꓪ ꓗꓪ ꓓꓯ ꓙꓰ ꓠꓹ ꓟ ꓦꓬꓼ ꓠꓬꓲ ꓠꓶꓽ ꓡ ꓠꓬ꓾ ꓬꓰ-ꓢꓴ ꓠꓽ ꓙꓱ-ꓣꓴ-ꓢ-ꓡꓱ ꓗꓪ ꓙꓰ ꓠꓹ ꓟ ꓓꓵꓽ ꓙ ꓞꓷꓹˍ ꓡꓳ꓿ 52 ꓖꓳ ꓡꓱ ꓢꓲ ꓬꓲ ꓡꓰ ꓬꓲ ꓟꓲꓽ ꓕꓯꓽ ꓢꓲ ꓗꓪ ꓓꓳꓽ ꓜꓳꓻ ꓢꓴ ꓝꓲ ꓩꓴ ꓗꓷˍ ꓡꓳ꓿ ꓬꓲ ꓪꓽ ꓠꓬ ꓬꓲ ꓐꓱ ꓶ ꓕꓲ ꓫꓵꓽ ꓫꓵ ꓙꓽ ꓖꓶ ꓠꓹ ꓟ꓾ ꓢ-ꓟ-ꓡꓲ ꓘꓹ ꓕꓲ ꓘꓹ ꓗꓪ ꓓꓵꓽ ꓡꓰˍ ꓡꓳ꓿ 53 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓔꓯ ꓟꓳꓸ ꓙꓰˍ ꓟ ꓥ ꓠꓬꓲ꓾ ꓬꓲ ꓪꓽ ꓠꓬ ꓬꓲ ꓔꓯ ꓟꓽ ꓘꓳꓻ ꓣꓴ꓿ 54 ꓬꓲ ꓛꓳꓽ ꓒꓯꓹ ꓬ-ꓗꓴˍ ꓐꓰ ꓬꓳ-ꓦ ꓖꓳ ꓟ ꓔꓯ ꓟꓳꓻˍ ꓕꓯ ꓬꓲ ꓪꓽ ꓡꓰ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓬꓲ-ꓡꓲ-ꓬ ꓬꓰ ꓗꓷ ꓟ ꓡꓰ ꓐꓰ꓾ ꓟꓴꓽ ꓗꓪ ꓗꓪ ꓐꓰ ꓮ ꓔꓳꓸ ꓬꓯꓼ ꓡ ꓝꓲ ꓢꓲ ꓬꓲ ꓪꓽ ꓔꓯ ꓛꓴꓻ ꓖꓴ ꓡꓰ ꓝꓲˍ ꓟ ꓔꓯ ꓠꓴ ꓠꓲꓹ ꓒꓴˍ ꓡ?꓾ ꓐꓯˍ ꓡꓳ꓿ 55 ꓬꓲ ꓠꓽ ꓔꓲꓸ ꓒꓳꓹ ꓢꓲ꓾ ꓬꓲ ꓪꓽ ꓔꓯ ꓕꓼ ꓢꓲ ꓠꓬꓲ꓾ ꓠꓴ ꓪꓽ ꓠꓲꓹ ꓟ ꓮ ꓡꓲ ꓗꓹ ꓟ ꓠꓴ ꓪꓽ ꓟꓽ ꓢꓷ꓿ 56 ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓠꓽ꓾ ꓡꓽ ꓞꓳ ꓢꓯꓼ ꓟꓬ ꓔꓯ ꓟꓶꓽ ꓬꓰ ꓝꓲ ꓠꓹ ꓟ ꓡ ꓟ ꓟꓽ ꓥ꓿ ꓡꓽ ꓞꓳ ꓢꓯꓼ ꓟꓬ ꓔꓯ ꓚꓬꓴ ꓠꓹ ꓟ ꓡ ꓟ ꓥ ꓡꓳ꓾ ꓐꓯˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓠꓬ ꓠꓱꓸ ꓐꓯ ꓕꓲ ꓘꓹ ꓗꓪ ꓙꓰˍ ꓡꓳ꓿ 57 ꓬꓲ ꓪꓽ ꓙ ꓖꓴ ꓗꓪ ꓫꓱꓽ ꓔꓬ ꓕꓯ ꓡꓽ ꓞꓳ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ꓾ ꓠꓴ ꓮ ꓡꓲ ꓗꓪ ꓙꓰˍ ꓟꓲ ꓥꓪ ꓠꓽ ꓠꓴ ꓔꓯ ꓛꓳ ꓙꓰˍ ꓥꓳ꓾ ꓐꓯˍ ꓡꓳ꓿ 58 ꓬꓰ-ꓢꓴ ꓡꓰ ꓬꓲ ꓔꓯ꓾ ꓪꓴꓸ ꓓꓵꓽ ꓠꓬ ꓬꓲ ꓘꓴꓻ ꓙꓳˍ ꓡꓳ꓿ ꓟꓵꓽ ꓪꓴꓽ ꓗꓪ ꓟ ꓠꓬꓹ ꓤˍ ꓟꓲ ꓬꓲ ꓘꓶꓻ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓡ-ꓞꓳ-ꓮ-ꓐꓲ ꓠꓽ ꓪꓴꓸ ꓓꓵ ꓗꓳꓺ ꓖꓴˍ ꓟꓲ ꓟꓽ ꓙꓳ꓾ ꓐꓯ ꓖꓶˍ ꓡꓳ꓿ 59 ꓬꓲ ꓡꓰ ꓝꓮꓲ ꓕꓲ ꓣꓳ ꓔꓯ꓾ ꓥꓪ ꓔꓯ ꓛꓳ ꓡꓯ꓾ ꓐꓯ ꓖꓶˍ ꓕꓯ꓾ ꓬꓲ ꓠꓬ꓾ ꓢꓲ ꓒꓽꓳ꓾ ꓥꓪ ꓐꓹ ꓐ ꓫꓵꓻ ꓟꓳꓻ ꓔꓯ ꓧꓶꓸ ꓕꓯ ꓔꓵꓸ ꓬꓰ ꓝꓲ ꓡꓯ꓾ ꓐꓯˍ ꓡꓳ꓿ 60 ꓬꓲ ꓠꓽ ꓬꓲ ꓔꓯ꓾ ꓞꓳ ꓫꓵꓻ ꓔꓯ ꓠꓬ ꓫꓵꓻ ꓞꓹ ꓢꓴ ꓐꓴ ꓡꓰ ꓔꓵꓸ ꓝꓲ꓿ ꓠꓴ ꓠꓽ ꓪꓴ-ꓢ ꓗꓴꓷꓼ ꓚ ꓒꓬꓱ ꓙꓰ꓾ ꓐꓯ ꓖꓶˍ ꓡꓳ꓿ 61 ꓝꓮꓲ ꓕꓲ ꓣꓳˍ ꓟꓲ ꓬꓲ ꓔꓯ꓾ ꓢꓲ ꓒꓽꓳ꓾ ꓥꓪ ꓠꓬ ꓠꓴ ꓔꓯ ꓛꓳ ꓙꓰˍ ꓥꓳ꓿ ꓖꓳ ꓡꓱ ꓥ ꓟꓲ ꓥꓪ ꓦꓲ ꓗꓪ ꓔꓬ ꓢꓴ ꓔꓯ ꓧꓶꓸ ꓕꓯ ꓒꓵꓽ ꓗ ꓬꓰ ꓔ ꓬꓰ ꓝꓲ ꓡꓯ꓾ ꓐꓯˍ ꓡꓳ꓿ 62 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ꓾ ꓦ ꓟꓲ ꓟꓽ ꓓꓴ ꓢꓲꓹ ꓖꓳꓼ ꓣꓴ ꓔ ꓢꓲ ꓔꓲꓸ ꓒꓳꓹ ꓡꓳꓸ ꓢꓴ ꓮꓽ ꓟˍ ꓟꓲ꓾ ꓪꓴ-ꓢ ꓗꓴꓷꓼ ꓗꓪ ꓣꓱꓽ ꓙ ꓠꓹ ꓟ ꓟꓽ ꓒꓵꓽ꓾ ꓐꓯ ꓖꓶˍ ꓡꓳ꓿

ꓡꓴ-ꓗ 10

1 ꓕꓱ ꓟꓬ ꓫꓵꓽ ꓗꓸ ꓠꓯ꓾ ꓢꓲ ꓒꓽ ꓡꓰ ꓠꓱꓸ ꓐꓯꓼ ꓫꓵꓽ ꓞꓲ ꓣꓳ ꓢꓲ ꓚꓰꓸ ꓗꓷ ꓢꓲ꓾ ꓬꓲ ꓚꓲꓸ ꓛꓬ ꓙꓰˍ ꓐꓰ ꓬꓰˍ ꓟ ꓟꓵꓽ ꓕꓲ ꓡꓳ ꓒꓱ ꓡꓰ ꓕꓲ ꓡꓳ ꓒꓱ ꓗꓪ꓾ ꓬꓲ ꓪꓽ ꓔꓯ ꓠꓬꓲꓽ ꓣꓳ ꓠꓬꓲꓽ ꓣꓳ ꓐꓰ ꓬꓲ ꓟꓲꓽ ꓕꓯꓽ ꓢꓲ ꓝꓲ ꓩꓴ ꓗꓷˍ ꓡꓳ꓿ 2 ꓬꓲ ꓠꓬ ꓬꓲ ꓪꓽ ꓔꓯ꓾ ꓫꓺ ꓠꓯꓹ ꓟ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓚꓵ ꓚꓵ ꓟꓬꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓟꓬꓱꓽ ꓬꓰ ꓢꓴ ꓠꓽ ꓠꓲꓸˍ ꓡꓳ꓿ ꓖꓳ ꓡꓱ ꓠꓬꓲ ꓜꓻ ꓫ ꓢꓲ ꓒꓽ ꓡꓰ ꓜꓽ ꓪꓳꓽ ꓡꓳ ꓪꓳꓽ ꓫ ꓢꓴ ꓝꓲ ꓩꓴ ꓗꓷ ꓠꓹ ꓟ ꓬꓲ ꓔꓯ ꓓꓰꓽ꓿ 3 ꓠꓴ ꓪꓽ ꓙꓰ Gꓽ꓿ ꓠ ꓠꓹ꓾ ꓪꓰꓻ ꓕꓳꓹ ꓜꓴꓻ ꓔꓬ ꓗꓪ ꓮ ꓣꓳ ꓤ ꓔꓯ ꓝꓲ ꓩꓴˍ ꓟ ꓡꓰ ꓐꓰ꓾ ꓥꓪ ꓡꓰ ꓠꓴ ꓪꓽ ꓔꓯ ꓝꓲ ꓩꓴ ꓗꓷˍ ꓟ ꓥ ꓡꓳ꓿ 4 ꓠꓴ ꓪꓽ ꓠꓬ ꓒꓴ ꓗꓶ ꓓꓴ ꓕꓽ ꓔꓯꓹ꓿ ꓡꓯꓼ ꓔꓲꓸˍ ꓟꓲ꓾ ꓛꓲ ꓠꓲˍ ꓟꓲ ꓕꓽ ꓔꓯꓹ꓿ ꓙ ꓖꓴ ꓗꓪ ꓮꓽ ꓟ ꓔꓯˍ ꓟꓲ ꓒꓵꓽ ꓗ ꓕꓽ ꓬꓰ꓿ 5 ꓮ ꓡꓲ ꓕꓲ ꓦꓲ ꓗꓪ ꓓꓵꓽ ꓡꓰˍ ꓟꓲ꓾ ꓖꓳ ꓕꓲ ꓦꓲ ꓗꓪ ꓢꓲ ꓡꓲ ꓟ ꓙꓳ ꓡ ꓝꓲ꓾ ꓐꓰ ꓧꓶꓸ ꓕꓯ ꓐꓯ ꓖꓶ꓿ 6 ꓖꓳ ꓡꓱ ꓢꓲ ꓢꓲ ꓡꓲ ꓟ ꓟꓶꓻ ꓒꓵꓽ ꓢꓴ ꓖꓳ ꓗꓪ ꓔꓬ ꓠꓬ꓾ ꓠꓴ ꓪꓽ ꓓꓰꓽˍ ꓟ ꓢꓲ ꓡꓲ ꓟ ꓠꓬ ꓖꓳ ꓕꓲ ꓦꓲ ꓗꓪ ꓬꓯꓼ ꓡ ꓥꓳ꓿ ꓟꓽ ꓥ ꓠꓬ ꓠꓴ ꓪꓽ ꓔꓯꓺ ꓬꓲꓼ ꓡ ꓥꓳ꓿ 7 ꓖꓳ ꓕꓲ ꓦꓲ ꓗꓪ ꓔꓬ ꓢꓲ ꓬꓲ ꓪꓽ ꓮꓸ ꓫꓵ ꓖꓶ ꓡ ꓠꓬ ꓖꓳ ꓫꓵꓽ ꓜꓽ ꓓꓳꓻ꓿ ꓮ ꓡꓲꓳ ꓐꓯ ꓠꓬ ꓪꓽ ꓤꓽ ꓠꓬ ꓪꓽ ꓒꓵꓽ ꓟꓶꓻ ꓒꓵꓽˍ ꓡꓳ꓿ ꓕꓱ ꓕꓲ ꓦꓲ ꓗꓪ ꓐꓰ ꓖꓳ ꓕꓲ ꓦꓲ ꓗꓪ ꓕꓽ ꓚꓵꓸ ꓙꓰ꓿ 8 ꓮ ꓡꓲ ꓕꓲ ꓡꓳ ꓒꓱ ꓗꓪ ꓓꓵꓽ ꓙꓰˍ ꓟꓲ꓾ ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓘꓳꓻ ꓣꓴ ꓢꓲ꓾ ꓮꓸ ꓫꓵ ꓖꓶ ꓡ ꓠꓬ ꓖꓳ ꓫꓵꓽ ꓜ꓿ 9 ꓖꓳ ꓗꓪ ꓟ ꓞꓳ ꓠꓻ ꓔꓯ ꓫꓬꓹ ꓖꓶ ꓢꓲ꓾ ꓪꓴ-ꓢ ꓗꓴꓷꓼ ꓠꓬ ꓠꓴ ꓪꓽ ꓔꓯ ꓠꓶꓽ ꓡꓺꓳ꓾ ꓐꓯ ꓖꓶ꓿ 10 ꓮ ꓡꓲ ꓕꓲ ꓡꓳ ꓒꓱ ꓗꓪ ꓠꓴ ꓪꓽ ꓔꓯ ꓟꓽ ꓘꓳꓻ ꓣꓴ ꓡ ꓠꓬ꓾ ꓡꓳ ꓒꓱ ꓙ ꓖꓴ ꓗꓪ ꓓꓳ ꓙꓰ ꓢꓲ ꓬꓲ ꓪꓽ ꓔꓯ꓾ 11 ꓥꓪ ꓠꓴꓽ ꓛꓲ ꓒꓯꓹ ꓗꓪ ꓠꓷꓼ ꓞꓹ ꓟ ꓠꓴ ꓪꓽ ꓡꓳ ꓒꓱ ꓗꓪ ꓟ ꓠꓱꓸ ꓦꓱꓼ ꓧꓶꓽˍ ꓟꓲ꓾ ꓠꓴ ꓪꓽ ꓔꓯ ꓔꓳꓹ ꓢꓲ ꓢꓷꓸ ꓙ ꓟꓳ ꓙ ꓓꓴ ꓬꓰ ꓠꓹ ꓟ꓾ ꓥꓪ ꓠꓴꓽ ꓠꓬ ꓠꓴ ꓪꓽ ꓟꓲꓽ ꓙꓬ ꓗꓪ ꓟꓱꓸ ꓦꓻ ꓗꓷˍ ꓥꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓗꓴꓷꓼ ꓠꓶꓽ ꓡ ꓟ ꓔꓯ ꓠꓽ ꓠꓴ ꓪꓽ ꓚꓵ ꓚꓵ ꓢꓷꓸ ꓠꓯꓹ ꓡꓳ꓾ ꓐꓯ ꓖꓶ꓿ 12 ꓠꓴ ꓪꓽ ꓔꓯ ꓥꓪ ꓐꓯ ꓖꓶꓽˍ ꓠꓬꓲ꓾ ꓦꓬꓼ ꓠꓬꓲ ꓖꓳ ꓟ ꓗꓪ ꓡꓳ ꓒꓱ ꓖꓳ ꓕꓲ ꓟ ꓔꓯ ꓗꓷ ꓡꓰ ꓠꓹ ꓟ ꓠꓬ꓾ ꓢꓳ-ꓓꓳ-ꓟ ꓔꓯ ꓗꓷ ꓡꓰ ꓠꓹ ꓟ ꓢꓶꓸ ꓟ ꓞꓲ ꓡꓲꓽˍ ꓥꓳ꓾ ꓐꓯˍ ꓡꓳ꓿ 13 ꓗꓳ-ꓡ-ꓢꓲꓳ꓾ ꓠꓴ ꓠꓽ ꓫꓸ ꓙꓵˍ ꓥꓳ꓿ ꓐꓱ-ꓢꓰ-ꓓꓽꓳ꓾ ꓠꓴ ꓠꓽ ꓟꓷꓼ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓬꓰ ꓗꓷ ꓟ ꓪꓽ ꓠꓬꓲˍ ꓟ ꓟꓬꓱꓽ ꓖꓳ ꓟꓬ ꓟ ꓔꓯ꓾ ꓕꓲ-ꓬˍ ꓐꓰ ꓢꓲ-ꓓꓳ ꓗꓪ ꓬꓰ ꓗꓷ ꓐꓷˍ ꓠꓬ꓾ ꓬꓲ ꓪꓽ ꓠꓬ ꓧꓶꓸ ꓕꓯˍ ꓡꓰ ꓓꓸ ꓖꓶꓸ ꓟꓶ ꓪꓸ ꓠꓬꓲ꓾ ꓘꓴꓽ ꓦꓻ ꓗꓪ ꓠꓬꓲꓸ ꓠꓸ ꓠꓬꓲ ꓐꓰ ꓓꓵꓽ ꓙ ꓒꓳꓹ ꓬꓲꓼ ꓡ ꓡꓳ ꓫꓵꓽ ꓥ ꓡꓳ꓿ 14 ꓐꓯ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓠꓴ ꓪꓽ ꓔꓯ ꓗꓷ ꓡꓰ ꓠꓹ ꓟ ꓠꓬ꓾ ꓕꓲ-ꓬˍ ꓐꓰ ꓢꓲ-ꓓꓳ ꓔꓯ ꓗꓷ ꓡꓰ ꓠꓹ ꓟ ꓢꓶꓸ ꓟꓽ ꓞꓲ ꓡꓲꓽˍ ꓥꓳ꓿ 15 ꓘ-ꓒꓱ-ꓠꓴꓳ꓾ ꓠꓴ ꓔꓯ ꓠꓬ ꓟꓴꓽ ꓗꓪ ꓟꓴꓺ ꓛꓲ ꓓꓳꓹ ꓟꓴ ꓗꓷ ꓝꓲ ꓠꓲꓹ ꓫꓵˍ ꓡ? ꓟꓽ ꓥ꓿ ꓠꓴ ꓔꓯ ꓠꓽ ꓟꓸ ꓟꓲ ꓟꓵꓽ ꓗꓪ ꓣꓴꓻ ꓬꓯꓼ ꓗꓷˍ ꓥꓳ꓿ 16 ꓠꓴ ꓪꓽ ꓔꓯ ꓠ ꓠꓹ ꓢꓴ ꓠꓬ ꓥꓪ ꓔꓯ ꓠ ꓠꓹ ꓟ ꓥ ꓡꓳ꓿ ꓠꓴ ꓪꓽ ꓔꓯ ꓟꓽ ꓠ ꓠꓹ ꓢꓴ ꓠꓬ ꓥꓪ ꓔꓯ ꓟꓽ ꓘꓳꓻ ꓣꓴꓻˍ ꓟ ꓥ ꓡꓳ꓿ ꓥꓪ ꓔꓯ ꓟꓽ ꓘꓳꓻ ꓣꓴ ꓢꓴ ꓠꓬ ꓥꓪ ꓔꓯ ꓝꓲꓺ ꓩꓴ ꓡ ꓢꓴ ꓔꓯ ꓟꓽ ꓘꓳꓻ ꓣꓴꓻˍ ꓟ ꓥ ꓡꓳ꓾ ꓐꓯˍ ꓡꓳ꓿ 17 ꓖꓳ ꓫꓵꓽ ꓞꓲ ꓣꓳ ꓟ ꓠꓬ ꓠꓲꓹ ꓒꓴ ꓒꓴ ꓐꓰ ꓬꓲꓼ ꓡ ꓢꓲ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓠꓴ ꓟꓬꓱ ꓗꓪ ꓐꓰ ꓠꓲꓽˍ ꓟꓲ ꓥꓪ ꓠꓴꓽ ꓙꓵꓽˍ ꓟ ꓔꓯ ꓛꓳˍ ꓡꓳ꓾ ꓐꓯˍ ꓡꓳ꓿ 18 ꓖꓳ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓢ-ꓓꓯ ꓠꓬ ꓟꓲꓽ ꓐꓬꓱꓼ ꓤꓰꓽˍ ꓟ ꓡꓰ ꓐꓰ ꓟꓴꓽ ꓗꓪ ꓗꓪ ꓐꓰ ꓞꓰ ꓬꓯꓼ ꓡ ꓟ ꓔꓯ ꓥꓪ ꓟꓳꓻ ꓗꓷꓳ꓿ 19 ꓠ ꓠꓹ꓾ ꓩꓴˍ ꓐꓰ ꓟꓲꓻ ꓙꓱꓼ ꓔꓯ ꓕꓳꓼ ꓠꓹ ꓟ ꓐꓰ ꓛꓴꓽ ꓙꓳ ꓢꓴ ꓪꓽ ꓠꓬꓲˍ ꓟ ꓮꓽ ꓙꓵ ꓔꓯ ꓧꓪꓸ ꓡꓰ ꓓꓴ ꓙꓵꓽ ꓪ ꓠꓬ ꓥꓪ ꓡꓰ ꓠꓴ ꓪꓽ ꓔꓯ ꓖꓶ ꓔ ꓡꓳ꓿ ꓮꓸ ꓫꓵ ꓡꓰ ꓥ ꓟꓲ ꓠꓴ ꓪꓽ ꓔꓯ ꓠꓻ ꓡꓰ ꓝꓲ ꓟꓽ ꓐ ꓡ꓿ 20 ꓖꓳ ꓡꓱ ꓥ ꓟꓲ ꓠꓲꓽ ꓠꓬ ꓠꓴ ꓪꓽ ꓙꓵꓽˍ ꓟ ꓔꓯ ꓛꓳˍ ꓟ ꓪꓴꓸ ꓠꓬꓲ ꓕꓽ ꓠꓲꓹ ꓒꓴ꓿ ꓠꓴ ꓪꓽ ꓟꓬꓱ ꓠꓽ ꓟꓴꓽ ꓗꓪ ꓗꓪ ꓐꓳ ꓔ ꓟ ꓪꓴꓸ ꓠꓬꓲ ꓠꓲꓹ ꓒꓴ꓾ ꓐꓯ ꓖꓶˍ ꓡꓳ꓿ 21 ꓖꓳ ꓕꓲ ꓙꓵꓹ ꓗꓪ ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓮꓽ ꓘꓶꓸ ꓗꓹ ꓛꓲ ꓠꓬꓲ꓾ ꓐꓹ ꓐꓽꓳ꓾ ꓟꓴꓽ ꓗꓪ ꓟꓲ ꓠꓯ ꓢꓲ ꓒꓽꓳ꓾ ꓠꓴ ꓔꓯ ꓫꓸ ꓟꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓕꓱ ꓟꓬ ꓫꓵꓽ ꓟ꓾ ꓢꓷꓸ ꓠꓲꓹ ꓙꓳ ꓢꓴˍ ꓐꓰ ꓙꓽ ꓜꓲꓼ ꓢꓴ ꓔꓯˍ ꓐꓰ ꓚꓵꓺ ꓔ ꓢꓲ ꓞꓳ ꓫꓵꓼ ꓤ ꓔꓯ ꓟꓳꓸ ꓖꓶˍ ꓡꓳ꓿ ꓥ ꓡꓳ꓾ ꓐꓹ ꓐꓽꓳ꓾ ꓕꓱ ꓟ ꓠꓽ ꓠꓴ ꓠꓲꓹ ꓒꓴˍ ꓟ ꓥ ꓡꓳ꓿ 22 ꓙꓳꓻˍ ꓟ ꓥ ꓕ ꓑꓳꓸ ꓠꓬ ꓐꓹ ꓐ ꓡꓰ ꓥꓪ ꓔꓯ ꓡꓯꓼ ꓙꓱ ꓖꓶ ꓔ ꓟ ꓥ ꓡꓳ꓿ ꓐꓹ ꓐ ꓟꓽ ꓥ ꓠꓬ꓾ ꓮ ꓐꓲ ꓮꓽ ꓟ ꓥ ꓟ ꓢꓷꓸ ꓢꓴ ꓟꓽ ꓙꓳ꓿ ꓝꓮꓲ ꓮ ꓐꓲˍ ꓐꓰ ꓮ ꓐꓲ ꓡꓰ ꓟꓳꓸ ꓖꓶ ꓔ ꓢꓴ ꓟꓽ ꓥ ꓠꓬ꓾ ꓐꓹ ꓐ ꓮꓽ ꓟ ꓥ ꓟ ꓢꓷꓸ ꓢꓴ ꓟꓽ ꓙꓳ꓾ ꓐꓯˍ ꓡꓳ꓿ 23 ꓖꓳ ꓡꓱ ꓠꓬ ꓬꓰ-ꓢꓴ ꓔꓲꓸ ꓒꓳꓹ ꓢꓲ꓾ ꓘꓳ ꓫꓱ ꓫꓱꓺꓼ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓠꓴ ꓪꓽ ꓡꓰ ꓡꓳꓸ ꓟꓳꓻˍ ꓟ ꓕꓱ ꓟꓬ ꓫꓵꓽ ꓔꓯ ꓟꓳꓻˍ ꓟ ꓟꓬ ꓢꓶꓽ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ 24 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓟꓷꓽ ꓠꓷꓹ ꓝꓸ ꓢꓴˍ ꓐꓰ ꓪ ꓔꓲꓸ ꓮꓽ ꓟꓬꓹ ꓠꓬ꓾ ꓠꓴ ꓪꓽ ꓡꓳꓸ ꓟꓳꓻˍ ꓟ ꓔꓯ ꓟꓳꓻ ꓠꓲꓹ ꓫꓵˍ ꓟꓲ꓾ ꓟꓳꓻ ꓟꓽ ꓪ꓿ ꓠꓴ ꓪꓽ ꓑ ꓙꓽˍ ꓟ ꓔꓯ ꓑ ꓙꓽ ꓠꓲꓹ ꓫꓵˍ ꓟꓲ꓾ ꓑ ꓙꓽ ꓟꓽ ꓪ꓾ ꓐꓯˍ ꓡꓳ꓿ 25 ꓕꓲ ꓧꓪꓹ ꓙꓳˍ ꓠꓬ꓾ ꓙꓵꓽ ꓗ ꓒ ꓕꓲ ꓣꓳ ꓬꓰ-ꓢꓴ ꓔꓯ ꓫꓵꓽ ꓠꓬꓲˍ ꓐꓰ ꓦꓰꓼ ꓡ ꓢꓲ꓾ ꓟꓸ ꓒꓽꓳ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓥꓪ ꓮ ꓡꓲ ꓬꓰ ꓠꓯꓹ ꓡ?꓾ ꓐꓯˍ ꓡꓳ꓿ 26 ꓬꓰ-ꓢꓴ ꓡꓰ ꓬꓲ ꓔꓯ꓾ ꓙꓵꓽ ꓗ ꓕꓳ ꓶ ꓗꓪ ꓮ ꓡꓲ ꓐꓳ ꓔ ꓡ?꓾ ꓠꓴ ꓮ ꓡꓲ ꓵ ꓟꓶˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 27 ꓬꓲ ꓒꓳꓹ ꓖꓶ ꓢꓲ꓾ ꓠꓴ ꓠꓬ ꓕꓲ ꓠꓲꓹ ꓟ ꓡꓱꓸꓼ꓾ ꓕꓲ ꓶꓻ ꓟꓬ ꓡꓱꓸꓼ꓾ ꓕꓲ ꓢꓯꓼ ꓡꓱS꓾ ꓕꓲ ꓙꓽ ꓠꓲꓹ ꓡꓱꓸꓼ꓾ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓿ ꓝꓮꓲ꓾ ꓠꓴ ꓚꓲꓸ ꓛꓬ ꓔꓯ ꓠꓲꓹ ꓠꓵꓻˍ ꓟ ꓡꓰ ꓐꓰ꓾ ꓠꓴ ꓠꓶꓽ ꓛꓳ ꓕꓲꓺ ꓛꓳ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 28 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓒꓳꓹ ꓖꓶ ꓬꓯꓼˍ ꓡꓳ꓿ ꓠꓴ ꓕꓱ ꓡꓱ ꓬꓰˍ ꓕꓯ ꓠꓽ ꓢꓯꓸ ꓔꓬ ꓪˍ ꓥꓳ꓾ ꓐꓯ ꓖꓶˍ ꓡꓳ꓿ 29 ꓖꓳ ꓡꓱ ꓥ ꓟꓲ ꓙꓵꓽ ꓗ ꓒꓽ ꓖꓳ ꓟ ꓠꓬ ꓚꓲꓸ ꓛꓬ ꓠꓽ ꓔꓱꓹ ꓜꓳꓽ ꓢꓴ ꓥ ꓟ ꓟꓳꓸ ꓖꓶ ꓠꓲꓹ ꓫꓵˍ ꓠꓬꓲ꓾ ꓬꓰ-ꓢꓴ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓠꓶꓽ ꓛꓳ ꓕꓲꓺ ꓛꓳ ꓮꓽ ꓟ ꓥ ꓡ?꓾ ꓠ ꓠꓬꓲˍ ꓡꓳ꓿ 30 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓡꓽ ꓞꓳ ꓕꓲ ꓣꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓙꓱ-ꓡꓲ-ꓘꓳ ꓗꓪ ꓬꓯꓼ ꓙꓰˍ ꓕꓯ꓾ ꓬꓲ ꓠꓬ ꓒꓬꓹ ꓜꓽ ꓢꓴ ꓕꓲ ꓧꓳꓽ ꓔꓯ ꓔꓳꓹ ꓜꓳˍ ꓡꓳ꓿ ꓬꓲ ꓪꓽ ꓡꓰ ꓬꓲ ꓖꓴꓽ ꓙꓴꓽ ꓮꓽ ꓙꓵ ꓦꓴꓻ ꓗꓷ ꓢꓲ꓾ ꓬꓲ ꓔꓯ ꓔꓲꓸ ꓢꓲ ꓠꓬꓲ꓾ ꓟꓻ ꓫꓵꓻ ꓟꓻ ꓢꓯꓸ ꓡꓳꓺ ꓔ ꓬꓰ ꓢꓲ ꓙꓰ ꓗꓷꓳ꓿ 31 ꓖꓳ ꓕꓯ ꓙ ꓖꓴ ꓖꓳ ꓕꓲ ꓚꓱꓹ ꓗꓪ ꓔꓲ ꓒ ꓕꓲ ꓣꓳ ꓬꓯꓼ ꓡ ꓢꓲ꓾ ꓬꓲ ꓔꓯ ꓟꓳꓻ ꓗꓷ ꓠꓬ ꓖꓳꓻ ꓫꓬꓺꓼ ꓗꓪ ꓐꓰ ꓗꓳꓸ ꓙꓰˍ ꓡꓳ꓿ 32 ꓝꓮꓲ ꓡꓱ-ꓬꓲ ꓡꓽ ꓞꓳ ꓕꓲ ꓣꓳˍ ꓟꓲ ꓖꓳ ꓕꓲ ꓔꓳꓸ ꓗꓪ ꓛꓲ ꓡ ꓢꓲ ꓬꓲ ꓔꓯ ꓡꓳꓸ ꓟꓳꓻˍ ꓠꓬ꓾ ꓮꓽ ꓢꓳꓻ ꓕꓲ ꓣꓳ ꓟ ꓡꓰ ꓐꓰ ꓖꓳꓻ ꓫꓬꓺꓼ ꓗꓪ ꓐꓰ ꓗꓳꓸ ꓙꓰˍ ꓡꓳ꓿ 33 ꓖꓳ ꓡꓱ ꓥ ꓟꓲ ꓓꓴꓻ ꓓꓳ ꓢꓴ ꓢ-ꓟ-ꓡꓲ ꓡꓽ ꓞꓳ ꓕꓲ ꓣꓳ ꓖꓳ ꓗꓪ ꓛꓲ ꓡ ꓢꓲ ꓬꓲ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓔꓯ ꓫꓱꓸ ꓤ ꓔꓴ ꓡ ꓡꓳ꓿ 34 ꓬꓲ ꓠꓬ ꓬꓲ ꓔꓯ ꓡ ꓢꓲ꓾ ꓬꓲ ꓠꓻ ꓓꓴ ꓗꓪ ꓮꓽ ꓛꓬꓽ ꓞꓶˍ ꓐꓰ ꓛꓱꓼ ꓡꓱꓼ ꓙꓵ ꓟꓰꓺ ꓖꓶ ꓢꓲ ꓠꓬꓲ ꓬꓲ ꓜꓶꓻ ꓕꓱꓹ ꓖꓶˍ ꓡꓳ꓿ ꓝꓮꓲ ꓠꓬ ꓬꓲ ꓚꓲꓸ ꓛꓬ ꓕꓳ-ꓡ-ꓟꓴꓽ ꓕꓯꓽ ꓢꓲ ꓜꓶꓽ ꓝꓲ ꓢꓲ꓾ ꓪꓰꓻ ꓤ ꓦꓲ ꓗꓪ ꓧꓳꓽ ꓔꓯꓹ ꓙꓰ ꓢꓲ ꓠꓬꓲ ꓬꓲ ꓔꓯ ꓣꓱꓽ ꓙˍ ꓡꓳ꓿ 35 ꓗꓸ ꓠꓯꓸ ꓕꓲ ꓠꓬꓲ ꓠꓬ꓾ ꓓꓲ-ꓠ-ꓣꓲ ꓠꓬꓲꓽ ꓒꓯꓼ ꓣꓴ ꓓꓳ ꓡ ꓢꓲ ꓪꓰꓻ ꓤ ꓦꓲ ꓢꓲ ꓒꓽ ꓔꓯ ꓖꓶ ꓢꓲ ꓠꓬꓲ꓾ ꓠꓴ ꓬꓲ ꓔꓯ ꓡꓳꓸ ꓙ ꓠꓬꓲ ꓙ꓿ ꓕꓱ ꓟ ꓕꓯꓽ ꓢꓲ ꓬꓲ ꓑꓶꓸ ꓓꓴ ꓠꓴ ꓮꓸ ꓫꓵ ꓣꓱꓽ ꓗꓷˍ ꓟꓲ꓾ ꓥꓪ ꓬꓲꓼ ꓡ ꓕꓯ ꓠꓴ ꓔꓯ ꓚꓱꓹ ꓖꓶˍ ꓥꓳ꓾ ꓐꓯ ꓖꓶˍ ꓡꓳ꓿ 36 ꓠꓴ ꓓꓵꓽ ꓙ ꓠꓬꓲ꓾ ꓡꓽ ꓞꓳ ꓕꓱ ꓢ ꓣꓳ ꓟ ꓗꓪ ꓐꓰ ꓒꓬꓹ ꓜ ꓢꓴ ꓔꓯ ꓔꓳꓹ ꓜꓳ ꓢꓴ ꓬꓲ ꓠꓶꓽ ꓛꓳ ꓕꓲꓺ ꓛꓳ ꓒꓬꓱꓼ ꓡ ꓟ ꓠꓬ ꓮ ꓡꓲ ꓕꓲ ꓣꓳ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 37 ꓙꓵꓽ ꓗ ꓒ ꓡꓰ꓾ ꓬꓲ ꓔꓯ ꓫꓱꓸ ꓤ ꓢꓴ ꓖꓳ ꓕꓲ ꓣꓳ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴˍ ꓟꓲ ꓖꓳ ꓕꓲ ꓣꓳ ꓟ ꓡꓰ ꓐꓰ ꓬꓰ ꓙꓰ꓾ ꓐꓯ ꓖꓶˍ ꓡꓳ꓿ 38 ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓘꓹ ꓕꓲ ꓘꓹ ꓗꓪ ꓫꓱꓽ ꓛꓲ ꓬꓰˍ ꓡꓳ꓿ ꓖꓳ ꓗꓪ꓾ ꓟ-ꓕ ꓟꓬꓱ ꓔ ꓟ ꓤ ꓟꓶ ꓤ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ ꓬꓲ ꓦꓲ ꓗꓪ ꓘꓳꓻ ꓣꓴˍ ꓡꓳ꓿ 39 ꓟ-ꓕ ꓬꓲ ꓠꓬꓲ ꓟ꓾ ꓟ-ꓡꓲ꓾ ꓟꓬꓱ ꓔ ꓢꓴ ꓕꓲ ꓣꓳ ꓠꓬ ꓬꓰ-ꓢꓴ ꓟꓲꓽ ꓙꓬ ꓢꓲ ꓗꓪ ꓠꓬꓲꓸ ꓠꓸ ꓢꓲ ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓡꓳ꓿ 40 ꓖꓳ ꓡꓱ ꓥ ꓟꓲ ꓟ-ꓕ ꓠꓽ ꓟꓬꓱꓽ ꓟꓬꓽˍ ꓟ ꓗꓪ ꓐꓰ ꓠꓲꓹ ꓟ ꓢꓴꓺ ꓔꓴ ꓡ ꓠꓬꓲ ꓬꓰ-ꓢꓴ ꓔꓯ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓬꓲ ꓟ ꓠꓬ ꓥꓪ ꓕꓲ ꓣꓳ ꓔꓯˍ ꓡꓰ ꓣꓱꓽ ꓙ ꓟꓬꓱꓽ ꓣꓱꓽ ꓔꓬ ꓝꓲˍ ꓟ꓾ ꓠꓴꓻ ꓥꓪ ꓔꓯ ꓟꓽ ꓫꓱꓸ ꓤˍ ꓡ? ꓬꓲ ꓥꓪ ꓔꓯ ꓬꓰ ꓙ ꓡ ꓠꓹ ꓟ ꓐꓯ ꓖꓶ꓾ ꓐꓯˍ ꓡꓳ꓿ 41 ꓢꓲ ꓒꓽ ꓠꓽ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓟ-ꓕꓺꓳ꓾ ꓟ-ꓕꓺꓳ꓾ ꓠꓴ ꓠꓬ ꓟꓬꓱꓽ ꓮꓽ ꓟꓬꓹ ꓫꓵꓽ ꓟ ꓪꓴꓸ ꓠꓬꓲ ꓙꓽ ꓫꓸ ꓔꓬ ꓐꓷ꓿ 42 ꓖꓳ ꓡꓱ ꓥ ꓟꓲ ꓟꓽ ꓙꓳ ꓟꓽ ꓓ ꓟ ꓠꓽ ꓕꓲ ꓫꓵꓽˍ ꓡꓰ ꓙꓳˍ ꓡꓳ꓿ ꓟ-ꓡꓲ ꓠꓬ ꓟꓬꓽ ꓠꓬꓲ ꓙꓲˍ ꓟ ꓖꓳ ꓕꓲ ꓐꓱꓻ ꓔꓯ ꓢꓲ ꓣꓴ ꓗꓷ ꓠꓬꓲ꓾ ꓬꓲ ꓔꓯˍ ꓐꓰ ꓣꓴ ꓔꓯꓹ ꓙꓰ ꓟꓽ ꓓ꓾ ꓐꓯ ꓖꓶˍ ꓡꓳ꓿

ꓡꓴ-ꓗ 11

1 ꓕꓲ ꓠꓬꓲ ꓙꓳˍ ꓠꓬ꓾ ꓬꓰ-ꓢꓴ ꓠꓽ ꓟꓵꓽ ꓕꓲ ꓖ ꓗꓪ ꓪꓽ ꓘꓴ ꓔꓬ ꓢꓲ꓾ ꓪꓽ ꓘꓴ ꓓꓳ ꓡꓰ ꓠꓬ ꓬꓲ ꓛꓳꓽ ꓒꓯꓹ ꓗꓪ ꓟ ꓕꓲ ꓣꓳ ꓡꓰ꓾ ꓢꓲ ꓒꓽꓳ꓾ ꓬꓳ-ꓦ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓪꓽ ꓘꓴ ꓟꓸ ꓖꓶˍ ꓟ ꓡꓰ ꓐꓰ꓾ ꓥꓪ ꓠꓴꓽ ꓔꓯˍ ꓟꓲ ꓪꓽ ꓘꓴ ꓟꓸ ꓖꓶ ꓡꓯ꓾ ꓐꓯˍ ꓡꓳ꓿ 2 ꓖꓳ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓪꓽ ꓘꓴˍ ꓕꓯ ꓕꓱ ꓡꓱ ꓐꓯ꓿ ꓟꓴꓽ ꓗꓪ ꓕꓯ ꓢꓲ ꓗꓪ ꓔꓬ ꓟ ꓥꓪ ꓠꓴꓽ ꓐꓹ ꓐꓽꓳ꓾ ꓠꓴ ꓢꓲꓽ ꓫꓬˍ ꓟ ꓟꓬꓱꓺ ꓔꓯ ꓒꓵꓽ ꓗꓴꓸ ꓝꓲ꓿ ꓠꓴ ꓗꓴꓷꓼ ꓓꓳ ꓡ ꓝꓲ꓿ ꓟꓴꓽ ꓗꓪ ꓕꓯ ꓢꓲ ꓗꓪ ꓠꓴ ꓠꓲꓹ ꓡꓶ ꓒꓬꓱ ꓡ ꓟ ꓡꓰ ꓐꓰ꓾ ꓟꓲ ꓠꓯ ꓕꓯ ꓢꓲ ꓗꓪˍ ꓟꓲ ꓒꓬꓱ ꓡ ꓝꓲ꓿ 3 ꓕꓲ ꓠꓬꓲ ꓐꓱ ꓶ ꓕꓲ ꓠꓬꓲ ꓥꓪ ꓠꓴꓽ ꓣꓱꓽ ꓬꓯꓼˍ ꓟ ꓜꓽ ꓓꓴ꓾ ꓠꓴ ꓡꓰ ꓥꓪ ꓠꓴꓽ ꓔꓯ ꓖꓶ ꓜꓽ ꓡꓯ꓿ 4 ꓥꓪ ꓠꓴꓽ ꓔꓯ ꓛꓬꓻ ꓡ ꓢꓴ ꓮꓽ ꓙꓵ ꓔꓯ ꓥꓪ ꓠꓴꓽ ꓖꓽ ꓖꓶˍ ꓟ ꓡꓰ ꓐꓰ꓾ ꓠꓴ ꓡꓰ ꓥꓪ ꓠꓴꓽ ꓝꓴꓲ ꓖꓽ ꓖꓶ ꓡꓯ꓿ ꓫꓵꓽ ꓠꓬꓲˍ ꓟ ꓗꓪ ꓥꓪ ꓠꓴꓽ ꓔꓯ ꓕꓽ ꓧꓳꓽ ꓓꓵꓽ ꓙꓰ꓾ ꓥꓶ ꓟ ꓗꓪ ꓐꓰ ꓠꓽ ꓥꓪ ꓠꓴ ꓔꓯ ꓚꓬꓴ ꓓꓳ ꓖꓶ ꓡꓯ꓾ ꓐꓰ ꓪꓽ ꓘꓴ꓾ ꓐꓯˍ ꓡꓳ꓿ 5 ꓬꓰ-ꓢꓴ ꓡꓰ ꓝꓮꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓗꓪ ꓟ ꓕꓲ ꓣꓳ ꓠꓬ ꓬꓲ ꓗꓪ ꓛꓳꓽ ꓕꓲ ꓣꓳ ꓔꓯ ꓦꓬꓼ ꓔꓱꓺ ꓫꓵ ꓗꓪ ꓙꓰ ꓢꓲ꓾ ꓗꓪ ꓛꓳꓽꓳ꓾ ꓥꓪ ꓔꓯ ꓑ ꓑ ꓢ ꓑꓬ ꓛꓵꓽ ꓖꓶꓽ ꓡꓯ꓿ 6 ꓮ ꓡꓲꓳ ꓐꓯ ꓠꓬ ꓥꓪ ꓗꓪ ꓛꓳꓽ ꓕꓲ ꓣꓳ ꓥꓪ ꓦꓲ ꓗꓪ ꓛꓲ ꓡ ꓢꓲ꓾ ꓥꓪ ꓬꓲ ꓔꓯ ꓮꓸ ꓫꓵ ꓖꓶ ꓜꓽ ꓓꓴ ꓟꓽ ꓙꓳ ꓡꓰꓳ꓾ ꓐꓯ ꓖꓶ ꓐꓷˍ ꓠꓬ꓾ 7 ꓬꓲ ꓠꓽ ꓦꓲ ꓠꓯꓸꓼ ꓗꓪ ꓐꓰ ꓒꓳꓹ ꓖꓶ ꓢꓲ꓾ ꓥꓪ ꓔꓯ ꓕꓽ ꓘꓶꓻ ꓡꓶ ꓡꓯ꓿ ꓮ ꓟꓶ ꓠꓽ ꓗ ꓘꓶꓽ ꓚꓵꓸ ꓗꓷꓳ꓿ ꓤ ꓠꓱ ꓐꓴˍ ꓟꓲ ꓬꓲꓼ ꓖꓴ ꓗꓪ ꓥꓪˍ ꓐꓰ ꓕꓲꓽ ꓪꓺꓼ ꓬꓲꓼ ꓔ ꓔꓬ ꓡꓳ꓿ ꓠꓴ ꓔꓯ ꓑ ꓑ ꓧꓪ ꓖꓶ ꓠꓹ ꓟ ꓥꓪ ꓔꓴ ꓡ ꓟꓽ ꓠꓺ꓾ ꓐꓯ ꓖꓶˍ ꓥꓳ꓿ 8 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ ꓪꓴꓸ ꓕꓯ ꓬꓲ ꓟꓽ ꓔꓴ ꓡ ꓥ ꓟꓲ꓾ ꓡꓽ ꓞꓳ ꓖꓳ ꓕꓲ ꓣꓳ ꓡꓰ ꓬꓲ ꓗꓪ ꓛꓳꓽ ꓔꓯ ꓟꓽ ꓟꓶ ꓟꓽ ꓞꓽ ꓓꓰꓽ ꓐꓷˍ ꓠꓬ꓾ ꓬꓲ ꓔꓴ ꓡ ꓢꓲ ꓬꓲ ꓮꓸ ꓫꓵ ꓣꓱꓽ ꓬꓯꓼˍ ꓟꓲ ꓖꓶˍ ꓥꓳ꓿ 9 ꓥꓪ ꓝꓮꓲ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓓꓰꓽ꓾ ꓖꓳ ꓡꓱ ꓠꓬ ꓠꓴ ꓪꓽ ꓔꓯ ꓖꓶ ꓡ ꓥꓳ꓿ ꓧꓪ꓾ ꓖꓳ ꓡꓱ ꓠꓬ ꓠꓴ ꓪꓽ ꓧꓪ ꓟꓶˍ ꓥꓳ꓿ ꓗ ꓘꓶꓽ ꓲ'ꓼ꓾ ꓖꓳ ꓡꓱ ꓠꓬ ꓠꓴ ꓪꓽ ꓔꓯ ꓒꓴ ꓖꓶ ꓡ ꓥꓳ꓿ 10 ꓮ ꓡꓲꓳ ꓐꓯ ꓠꓬ ꓓꓰꓽ ꓢꓴ ꓠꓬ ꓓꓰꓽ ꓟꓶˍ ꓥꓳ꓿ ꓧꓪ ꓢꓴˍ ꓟꓲ ꓧꓪ ꓟꓶˍ ꓥꓳ꓿ ꓗ ꓘꓶꓽ ꓲ'ꓼ ꓢꓴ ꓔꓯ ꓠꓬ ꓒꓴ ꓖꓶ ꓡ ꓥꓳ꓿ 11 ꓠꓴ ꓪꓽ ꓗꓳ ꓡꓳ ꓗꓪ ꓐꓹ ꓐ ꓣꓱꓽ ꓢꓴ ꓕꓲ ꓣꓳ ꓔꓯ꓾ ꓬꓲ ꓤ ꓡꓰ ꓑ ꓑ ꓓꓰꓽ ꓡ ꓠꓬ꓾ Bꓸ ꓛꓲ ꓖꓶ ꓢꓴ ꓙꓳˍ ꓡ? ꓥꓪꓸ ꓓꓰꓽˍ ꓠꓬ꓾ ꓥꓪꓸ ꓪꓴꓸ ꓙꓴꓽ ꓩꓴꓻ ꓣꓴ ꓖꓶ ꓢꓴ ꓙꓳˍ ꓡ? 12 ꓮꓸ Bꓸ ꓩꓴ ꓓꓰꓽˍ ꓠꓬ꓾ ꓟꓲ ꓙꓱꓼ ꓖꓶ ꓢꓴ ꓙꓳˍ ꓡ? 13 ꓠꓴ ꓪꓽ ꓠꓬ ꓥꓶˍ ꓟ ꓡꓽ ꓞꓳ ꓥꓻ ꓥ ꓟꓲ꓾ ꓠꓴ ꓪꓽ ꓤ ꓠꓱ ꓐꓴ ꓔꓯ ꓙꓲꓻˍ ꓟ ꓖꓴꓽ ꓙꓴꓽ ꓖꓶ ꓠꓹ ꓟ ꓢꓷꓸˍ ꓠꓬ꓾ ꓟꓴꓽ ꓗꓪ ꓗꓪ ꓟ ꓠꓴ ꓪꓽ ꓐꓹ ꓐ ꓠꓽ ꓬꓲ ꓔꓯ ꓓꓰꓽ ꓢꓴ ꓔꓯ ꓠꓴ ꓪꓽ ꓢꓶꓸ ꓟꓽ ꓞꓲ ꓢꓲ-ꓫꓬ-ꓟ-ꓦ ꓖꓶ ꓡ ꓥꓳ꓾ ꓟꓽ ꓥ ꓡ?꓾ ꓐꓯˍ ꓡꓳ꓿ 14 ꓕꓲ ꓠꓬꓲ ꓙꓳˍ ꓠꓬ ꓬꓰ-ꓢꓴ ꓡꓰ ꓞꓳꓻ ꓟꓶ ꓕꓲ ꓣꓳ ꓗꓪ ꓐꓰ ꓟꓶꓻ ꓠꓲꓽ ꓕꓲ ꓟ ꓖꓼ ꓓꓳ ꓗꓷ ꓠꓬ꓾ ꓞꓳ ꓟꓶꓻ ꓖꓳ ꓟ ꓫꓸ ꓕꓱ ꓡ ꓠꓬꓲ ꓞꓳ ꓜꓴ ꓠꓽ ꓓꓵꓽ ꓙ ꓟꓶꓻ ꓡꓰꓳ꓿ 15 ꓖꓳ ꓡꓱ ꓥ ꓟꓲ ꓬꓲ ꓪꓽ ꓕꓲ ꓐꓱ ꓠꓬ꓾ ꓬꓲ ꓠꓽ ꓠꓲꓽ ꓪ ꓔꓲꓸ ꓐꓲ-ꓜꓲ-ꓐꓷ ꓢꓯꓼ ꓗꓪ ꓐꓰ ꓠꓲꓽ ꓖꓼˍ ꓡꓳ꓾ ꓐꓯˍ ꓡꓳ꓿ 16 ꓝꓮꓲ ꓕꓲ ꓐꓱ ꓠꓬ ꓬꓰ-ꓢꓴ ꓔꓯ ꓫꓵꓽ ꓠꓬꓲ ꓢꓲ꓾ ꓟꓴꓽ ꓗꓪ ꓗꓪ ꓐꓰ ꓥꓪ ꓠꓴꓽ ꓔꓯ ꓢꓷꓸ ꓡꓰ ꓓꓴ ꓕꓲ ꓟ ꓟꓳꓸ ꓖꓶ ꓡꓯ꓾ ꓐꓯˍ ꓡꓳ꓿ 17 ꓬꓲ ꓠꓽ ꓬꓲ ꓪꓽ ꓓꓵꓽ ꓙ ꓔꓬ ꓟ ꓔꓯ ꓢꓷꓸˍ ꓠꓬꓲ ꓬꓲ ꓪꓽ ꓔꓯ꓾ ꓮ ꓡꓲ ꓕꓲ ꓗꓴꓷꓼˍ ꓟꓲ ꓬꓲ ꓗꓪꓺ ꓗꓪ ꓡꓰ ꓢꓲ ꓒꓳꓹ ꓡꓯꓽ ꓘꓳˍ ꓠꓬ ꓐꓬꓺ ꓡꓰˍ ꓥꓳ꓿ ꓮ ꓡꓲ ꓕꓲ ꓦꓲ ꓢꓴˍ ꓟꓲ ꓚꓲꓸ ꓛꓬ ꓕꓲ ꓦꓲ ꓢꓴˍ ꓐꓰ ꓔꓳꓹ ꓡꓯꓽ ꓘꓳˍ ꓠꓬ ꓤꓰꓻ ꓞꓹ ꓟꓽ ꓘꓴꓻ꓿ 18 ꓢ-ꓓꓯ ꓠꓬ ꓚꓲꓸ ꓛꓬˍ ꓐꓰ ꓒꓳꓹ ꓡꓯꓽ ꓘꓳˍ ꓕꓯ ꓠꓽ ꓬꓲ ꓗꓴꓷꓼ ꓮ ꓡꓲ ꓐꓰ ꓔꓳꓹ ꓞꓹ ꓘꓴ ꓢꓰꓽ꓿ ꓠꓴ ꓪꓽ ꓠꓽ ꓥꓪ ꓔꓯ ꓐꓲ-ꓜꓲ-ꓐꓷ ꓢꓯꓼ ꓗꓪ ꓐꓰ ꓠꓲꓽ ꓖꓼˍ ꓡꓳ꓾ ꓐꓯˍ ꓡꓳ꓿ 19 ꓥꓪ ꓠꓬ ꓐꓲ-ꓜꓲ-ꓐꓷ ꓢꓯꓼ ꓗꓪ ꓐꓰ ꓠꓲꓽ ꓖꓼˍ ꓕꓯ ꓠꓽ꓾ ꓠꓴ ꓪꓽ ꓮ ꓐꓲ ꓐꓴ ꓠꓲꓽ ꓖꓼˍ ꓟ ꓠꓬ꓾ ꓮꓽ ꓟ ꓢꓯꓼ ꓗꓪ ꓐꓰ ꓥ ꓡ? ꓖꓳ ꓡꓱ ꓠꓬꓲ ꓬꓲ ꓪꓽ ꓠꓬ ꓠꓴ ꓪꓽ ꓔꓯ ꓐꓯ ꓞꓷꓹ ꓢꓴ ꓬꓰˍ ꓥꓳ꓿ 20 ꓖꓳ ꓡꓱ ꓥ ꓟꓲ ꓥꓪ ꓠꓬ ꓪꓴ-ꓢ ꓢꓯꓼ ꓗꓪ ꓐꓰ ꓠꓲꓽ ꓖꓼˍ ꓟ ꓥ ꓕꓯ ꓠꓽ꓾ ꓪꓴ-ꓢ ꓗꓴꓷꓼ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓬꓯꓼ ꓡ ꓟ ꓥ ꓡꓳ꓿ 21 ꓢꓯꓼ ꓙꓳ ꓒ ꓠꓬ ꓟꓯꓼ ꓶꓻ ꓤ ꓔꓯꓹ ꓔ ꓠꓬꓲ ꓐꓰ꓾ ꓬꓲ ꓚꓲꓸ ꓛꓬ ꓦꓲ ꓔꓯ ꓦꓴ ꓠꓬꓹ ꓔ ꓠꓬ꓾ ꓬꓲ ꓙꓳˍ ꓟ ꓮ ꓙꓵˍ ꓟꓲ ꓮꓸ ꓫꓵ ꓟꓽ ꓘꓳ ꓟꓽ ꓟꓳꓻ ꓓꓹ ꓥꓳ꓿ 22 ꓖꓳ ꓡꓱ ꓥ ꓟꓲ ꓬꓲ ꓢꓶꓸ ꓟꓽ ꓞꓲ ꓢꓯꓼ ꓙꓳˍ ꓟ ꓕꓲ ꓣꓳ ꓡ ꓢꓲ ꓬꓲ ꓔꓯ ꓓꓶꓽ ꓧꓪꓸ ꓡꓰˍ ꓕꓯ ꓠꓽ꓾ ꓬꓲ ꓦ ꓡꓱ ꓔ ꓟ ꓟꓯꓼ ꓶꓻ ꓤ ꓮꓽ ꓙꓵ ꓦꓴ ꓔꓯꓹ ꓙꓰ ꓢꓲ꓾ ꓬꓲ ꓖꓴꓽ ꓙꓴꓽ ꓔꓯˍ ꓟꓲ ꓬꓲ ꓪꓽ ꓐꓱ ꓡꓯꓽ ꓘꓳˍ ꓥꓳ꓿ 23 ꓥꓪ ꓔꓯ ꓟꓽ ꓛꓳ ꓢꓴ ꓠꓬ ꓥꓪ ꓔꓯ ꓔꓳꓹ ꓢꓴ ꓥ ꓡꓳ꓿ ꓥꓪˍ ꓐꓰ ꓫ ꓜꓲꓼ ꓢꓴ ꓟꓽ ꓥ ꓠꓬ ꓒꓬꓱꓺ ꓙꓰ ꓝꓲ ꓢꓴ ꓥ ꓡꓳ꓾ ꓐꓯˍ ꓡꓳ꓿ 24 ꓝꓮꓲ ꓬꓰ-ꓢꓴ ꓡꓰ꓾ ꓟꓽ ꓫꓬ ꓠꓲꓽ ꓠꓬ ꓡꓽ ꓞꓳ ꓖꓳ ꓓꓱꓽ ꓗꓪ ꓐꓰ ꓓꓳ ꓙꓰ ꓗꓸ ꓠꓯ꓾ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓗꓳꓸ ꓙꓰ ꓢꓲ ꓠꓽ ꓖꓴ ꓧꓪ ꓟꓽ ꓟꓶ ꓠꓬꓲ ꓬꓲ ꓠꓬ꓾ ꓥꓪ ꓠꓽ ꓥꓪ ꓓꓳ ꓡ ꓖꓴ ꓦꓲ ꓗꓪ ꓬꓲꓼ ꓙꓰˍ ꓥꓳ꓾ ꓐꓯˍ ꓡꓳ꓿ 25 ꓬꓲ ꓡꓽ ꓛꓲ ꓡ ꓠꓬ ꓦꓲ ꓫꓬꓻ ꓫꓬꓻˍ ꓡꓰꓽ ꓫꓵꓹ ꓗꓷ ꓢꓲ꓾ ꓐꓲꓻ ꓐꓲˍ ꓡꓰꓽ ꓫꓬꓹ ꓔ ꓟ ꓔꓯ ꓟꓳꓻˍ ꓡꓳ꓿ 26 ꓖꓳ ꓡꓱ ꓠꓬ ꓬꓲ ꓙꓰ ꓢꓲ꓾ ꓬꓲ ꓢꓶꓸ ꓟꓽ ꓞꓲ ꓥꓶˍ ꓟ ꓠꓲꓽ ꓫꓵꓽ ꓟ ꓧꓳꓽ ꓔꓯꓹ ꓡ ꓢꓲ ꓠꓬꓲ꓾ ꓬꓲ ꓪꓽ ꓮꓽ ꓙꓵ ꓓꓵ ꓡꓰ ꓢꓲ ꓖꓳ ꓗꓪ ꓔꓬ ꓡ ꓡꓳ꓿ ꓖꓳ ꓡꓱ ꓠꓬꓲ ꓡꓽ ꓞꓳ ꓖꓳ ꓕꓲ ꓣꓳ ꓔꓯ ꓗꓸ ꓠꓯꓸ ꓗꓷ ꓡꓰˍ ꓟ ꓠꓬ꓾ ꓧꓶꓸ ꓕꓯ ꓟ ꓢꓶꓸ ꓟꓽ ꓞꓲ ꓡꓲꓽˍ ꓡꓳ꓾ ꓐꓯˍ ꓡꓳ꓿ 27 ꓬꓰ-ꓢꓴ ꓠꓬ ꓐꓯ ꓘꓶꓽ ꓕꓱ ꓟꓬ ꓟ ꓐꓯ ꓔꓬ ꓕꓯ꓾ ꓞꓳ ꓜꓴꓻ ꓗꓪ ꓟ ꓤ ꓟꓶ ꓤ ꓕꓲ ꓣꓳ ꓠꓬ ꓢꓯꓼ ꓓꓽ ꓟ ꓡꓰ ꓬꓲ ꓔꓯ꓾ ꓠꓴ ꓔꓯ ꓟꓯꓻ ꓗꓷ ꓟ ꓤꓽ ꓘꓶꓻˍ ꓐꓰ ꓠꓴ ꓛꓵꓼ ꓗꓷ ꓟ ꓮꓽ ꓚꓵꓹ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯˍ ꓡꓳ꓿ 28 ꓬꓰ-ꓢꓴ ꓡꓰ꓾ ꓥꓳ꓾ ꓖꓳ ꓡꓱ ꓥ ꓟꓲ ꓪꓴ-ꓢ ꓐꓯ ꓘꓶꓽ ꓑ ꓙꓽ ꓢꓲ ꓒꓵꓽ ꓛꓳ ꓢꓴ ꓠꓽ꓾ ꓟꓬꓽ ꓠꓬꓲ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯ ꓖꓶˍ ꓡꓳ꓿ 29 ꓞꓳ ꓜꓴꓻ ꓜꓲꓼ ꓡ ꓕꓯ ꓬꓰ-ꓢꓴ ꓘꓶꓽ ꓒꓴ ꓢꓲ꓾ ꓕꓱ ꓕꓲ ꓤꓶꓻ ꓟ ꓠꓬ ꓥꓶˍ ꓟ ꓕꓲ ꓤꓶꓻ ꓥ ꓢꓲ꓾ ꓬꓲ ꓪꓽ ꓠꓬ ꓢꓷꓸ ꓡꓰ ꓓꓴ ꓧꓪˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓳ-ꓠ ꓢꓷꓸ ꓡꓰ ꓓꓴ ꓟꓽ ꓥ ꓠꓬ꓾ ꓬꓲ ꓪꓽ ꓔꓯ ꓠꓱꓸ ꓐꓯ ꓮꓸ ꓫꓵ ꓢꓷꓸ ꓡꓰ ꓓꓴ ꓟꓽ ꓟꓳꓸ ꓖꓶ꓿ 30 ꓬꓳ-ꓠ ꓠꓬ ꓠꓲ-ꓠꓲ-ꓪꓱ ꓢꓴ ꓐꓱ ꓶ ꓢꓷꓸ ꓡꓰ ꓓꓴ ꓒꓬꓱꓼ ꓡ ꓗꓷ ꓟ ꓡꓰ ꓐꓰ꓾ ꓡ-ꓞꓳ-ꓮ-ꓐꓲˍ ꓟꓲ ꓕꓱ ꓕꓲ ꓤꓶꓻ ꓢꓴ ꓐꓱ ꓶ ꓢꓷꓸ ꓡꓰ ꓓꓴ ꓒꓬꓱꓼ ꓡ ꓥꓳ꓿ 31 ꓐꓯ ꓟꓴ ꓘꓶꓽˍ ꓕꓯ꓾ ꓖꓴ ꓟꓶꓸ ꓔꓯ ꓟꓳꓸ ꓟ ꓪ ꓔꓲꓸ ꓟ ꓠꓬ ꓕꓱ ꓕꓲ ꓤꓶꓻ ꓢꓴˍ ꓐꓰ ꓕꓲꓽ ꓪꓺꓼ ꓦꓰꓼ ꓔꓴ ꓡ ꓢꓲ ꓬꓲ ꓪꓽ ꓔꓯ ꓐꓯ ꓞꓷꓹˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓢꓳ-ꓡꓳ-ꓟꓳ ꓙꓽ ꓜꓲꓼ ꓠꓲꓹ ꓙꓳˍ ꓟ ꓐꓯ ꓘꓶꓽ ꓔꓯ ꓠ ꓠꓹ ꓠꓹ ꓟ ꓟꓲ ꓠꓯ ꓑꓶꓸ ꓗꓪ ꓐꓰ ꓡꓻ ꓡꓳ꓿ ꓠꓬꓲ ꓠꓹ꓾ ꓢꓳ-ꓡꓳ-ꓟꓳ ꓕꓯꓽ ꓢꓲ ꓪꓴꓽˍ ꓟ ꓕꓲ ꓣꓳ ꓕꓱ ꓗꓪ ꓔꓬ ꓡꓳ꓿ 32 ꓐꓯ ꓟꓴ ꓘꓶˍ ꓕꓯ꓾ ꓠꓲ-ꓠꓲ-ꓪꓱ ꓢꓴ ꓠꓬ ꓔꓴ ꓡ ꓢꓲ ꓕꓱ ꓕꓲ ꓤꓶꓻ ꓟ ꓡꓽ ꓞꓳ ꓔꓯ ꓐꓯ ꓞꓷꓹˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ꓾ ꓬꓳ-ꓠ ꓡꓰ ꓚ ꓟꓸ ꓖꓶˍ ꓟ ꓔꓯ ꓠ ꓠꓹ ꓢꓲ ꓓꓵꓽ ꓙ ꓒꓳꓹ ꓬꓲꓼ ꓡꓺꓳ꓿ ꓠꓬꓲ ꓠꓹ꓾ ꓬꓳ-ꓠ ꓕꓯꓽ ꓢꓲ ꓪꓴꓽˍ ꓟ ꓕꓲ ꓣꓳ ꓕꓱ ꓗꓪ ꓔꓬ ꓡꓳ꓾ ꓐꓯˍ ꓡꓳ꓿ 33 ꓝꓮꓲ ꓬꓲ ꓡꓰ꓾ ꓮꓽ ꓟˍ ꓟꓲ ꓟꓬ ꓡꓴꓻ ꓟꓬ ꓢꓲ꓾ ꓟꓲꓻ ꓘꓴ ꓗꓪ ꓗꓶ ꓔ꓾ ꓥ ꓠꓬ ꓐꓽ ꓕꓴꓽ ꓡꓰ ꓝꓴꓸ ꓔ ꓢꓴ ꓟꓽ ꓙꓳ꓿ ꓓꓵꓽ ꓡ ꓢꓴ ꓐꓴ ꓔꓯ ꓠꓬꓲ ꓟꓳꓻ ꓝꓲ ꓠꓹ ꓟ ꓟꓬ ꓡꓴ ꓕꓲꓺ ꓗꓪ ꓗꓶ ꓔꓸ ꓥꓳ꓿ 34 ꓟꓬ ꓢꓶꓽ ꓠꓬ ꓖꓳ ꓓꓱꓽ ꓗꓪ ꓟ ꓟꓬ ꓡꓴ ꓥ ꓡꓳ꓿ ꓠꓴ ꓟꓬ ꓢꓶꓽ ꓫꓬꓻ ꓫꓬꓻˍ ꓡꓰꓽ ꓗꓹ ꓕꓯ ꓠꓽ꓾ ꓕꓲ ꓖꓳ ꓓꓱꓽ ꓡꓱꓸꓼ ꓠꓬꓲ ꓟꓳꓻ ꓓꓴ ꓐꓲ ꓞꓹ ꓥꓳ꓿ ꓖꓳ ꓡꓱ ꓥ ꓟꓲ ꓟꓬ ꓢꓶꓽ ꓶꓻ ꓡꓰ ꓕꓯ ꓠꓽ꓾ ꓕꓲ ꓖꓳ ꓓꓱꓽ ꓡꓱꓸꓼ ꓠꓯ ꓞꓲꓹ ꓠꓯ ꓕꓳꓽ ꓗꓷ ꓡꓰˍ ꓡꓳ꓿ 35 ꓠꓴ ꓠꓯꓸꓼ ꓗꓪ ꓟ ꓠꓬꓲ ꓟꓳꓻ ꓓꓴ ꓟꓽ ꓠꓯ ꓞꓲꓹ ꓡꓰ ꓠꓹ ꓟ ꓤ ꓟꓳ꓿ 36 ꓖꓳ ꓡꓱ ꓠꓬꓲ ꓠꓴ ꓕꓲ ꓖꓳ ꓓꓱꓽ ꓡꓱꓸꓼ ꓠꓬꓲ ꓟꓳꓻ ꓓꓴ ꓐꓲ ꓞꓹ ꓢꓲ꓾ ꓠꓯ ꓞꓲꓹ ꓟ ꓮ ꓔꓲꓸˍ ꓟꓲ ꓟꓽ ꓙꓳ ꓕꓯ ꓠꓽ꓾ ꓮꓽ ꓘꓶꓸ ꓡꓬꓸˍ ꓟ ꓟꓬ ꓡꓴꓻ ꓡꓰ ꓠꓴ ꓔꓯ ꓣꓳꓺ ꓖꓶˍ ꓟ ꓡꓰ ꓐꓰ꓾ ꓕꓲ ꓖꓳ ꓓꓱꓽ ꓡꓱꓸꓼ ꓠꓬꓲ ꓟꓳꓻ ꓓꓴ ꓙꓳˍ ꓥꓳ꓾ ꓐꓯˍ ꓡꓳ꓿ 37 ꓬꓰ-ꓢꓴ ꓫꓸ ꓕꓱ ꓓꓳ ꓡꓰ ꓕꓯ꓾ ꓒ-ꓡꓲ-ꓢꓷ ꓕꓲ ꓣꓳ ꓡꓰ ꓬꓲ ꓔꓯ ꓜ ꓜꓽ ꓡꓯ꓾ ꓐꓰ ꓘꓴˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓓꓵꓽ ꓡꓰ ꓢꓲ ꓜ ꓜꓽˍ ꓐꓰ ꓠꓬꓲꓸ ꓠꓸˍ ꓡꓳ꓿ 38 ꓜꓻ ꓟꓽ ꓜꓽ ꓧꓶꓸ ꓕꓯꓽ ꓬꓰ-ꓢꓴ ꓡꓯꓼ ꓒꓯꓹ ꓟꓽ ꓞꓲꓽˍ ꓟ ꓔꓯ ꓒ-ꓡꓲ-ꓢꓷ ꓖꓳ ꓕꓲ ꓣꓳ ꓟꓳꓻ ꓗꓷ ꓠꓬ ꓓꓵꓽ ꓙꓽ ꓟꓶˍ ꓡꓳ꓿ 39 ꓖꓳ ꓕꓯ ꓢꓲ ꓒꓽ ꓡꓰ꓾ ꓮ ꓟꓶ ꓠꓴ ꓪꓽ ꓒ-ꓡꓲ-ꓢꓷ ꓐꓴ ꓠꓬ꓾ ꓡꓴꓻ ꓗꓶˍ ꓐꓰ ꓐꓯꓻ ꓕꓯꓽ ꓢꓲ ꓕꓲ ꓒꓳꓹ ꓔꓯ ꓫꓬꓻ ꓫꓬˍ ꓡꓰ ꓞꓲꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓯꓸꓼ ꓗꓪ ꓠꓽ꓾ ꓢꓴ ꓔꓯ ꓜꓲꓻ ꓞꓳꓹ ꓜꓽˍ ꓟ ꓐꓰ ꓥꓶˍ ꓟ ꓐꓲ ꓞꓹ ꓡꓳ꓿ 40 ꓞꓳ ꓙꓲꓽ ꓐꓴꓳ꓾ ꓕꓯꓽ ꓢꓲ ꓗꓪ ꓟ ꓔꓯ ꓚꓰꓼ ꓢꓴ ꓡꓰ ꓠꓯꓸꓼ ꓗꓪ ꓟˍ ꓟꓲ ꓚꓰꓼ ꓔ ꓡꓳ ꓟꓽ ꓥ ꓡ? 41 ꓠꓴ ꓪꓽ ꓠꓬ ꓫꓸ ꓢꓴ ꓔꓯ ꓓꓰꓽ ꓖꓶˍ ꓕꓯ꓾ ꓠꓯꓸꓼ ꓗꓪ ꓟ ꓠꓲꓹ ꓙꓽ ꓟꓬ ꓗꓳˍ ꓟ ꓡꓰ ꓖꓶ꓿ ꓖꓳ ꓡꓱ ꓠꓬ ꓠꓴ ꓪꓽ ꓐꓱ ꓶ ꓮꓸ ꓫꓵˍ ꓟꓲ ꓫꓬꓻˍ ꓟ ꓒꓬꓱꓼ ꓡ ꓥꓳ꓿ 42 ꓒ-ꓡꓲ-ꓢꓷ ꓐꓴꓳ꓾ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓑꓴꓸ ꓧꓳꓺˍ ꓐꓰ ꓠꓸ ꓐꓳꓽ ꓪꓳꓽˍ ꓐꓰ ꓪꓳꓽ ꓫꓵꓽ ꓪꓳꓽ ꓙꓰꓽ ꓞꓲ ꓐꓱ ꓕꓲ ꓐꓱ ꓪꓴ-ꓢ ꓔꓯ ꓔꓲ ꓖꓶꓽˍ ꓡꓳ꓿ ꓕꓱ ꓟꓬ ꓫꓵꓽ ꓟ ꓠꓴ ꓪꓽ ꓬꓰ ꓙꓲꓽ ꓙꓳˍ ꓡꓳ ꓫꓵꓽ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓔꓱꓹ ꓜꓳˍ ꓟ ꓐꓰ ꓠꓵꓻ ꓠꓲꓹ ꓔꓯ ꓠꓽ ꓠꓴ ꓪꓽ ꓡꓳꓸ ꓘꓳꓻ ꓗꓷꓳ꓿ ꓕꓱ ꓟ ꓔꓯˍ ꓟꓲ ꓠꓴ ꓪꓽ ꓧꓪꓸ ꓛꓲꓽ ꓢꓲ ꓒꓵꓽ ꓛꓳ ꓠꓯꓹ ꓡꓳ ꓫꓵꓽ ꓥ ꓡꓳ꓿ 43 ꓒ-ꓡꓲ-ꓢꓷ ꓐꓴꓳ꓾ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ꓾ ꓜꓲꓼ ꓦꓲ ꓗꓪ ꓞꓳ ꓪꓴꓽ ꓞꓳ ꓔꓲ ꓠꓬꓲꓸ ꓠꓸ ꓖꓴˍ ꓐꓰ ꓙꓵꓺ ꓗꓪ ꓢꓴ ꓡꓰ ꓒꓵꓽ ꓗ ꓬꓰ ꓡ ꓟ ꓔꓯ ꓠꓲꓹ ꓫꓵˍ ꓡꓳ꓿ 44 ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ꓾ ꓕꓯꓽ ꓢꓲ ꓗꓪ ꓫꓱꓽ ꓗꓳꓸ ꓙꓰ ꓢꓴ ꓐꓴ ꓡꓰ ꓡꓳꓸ ꓟꓽ ꓓꓳ ꓡ ꓟ꓾ ꓚꓵꓺ ꓞꓹ ꓟ ꓡꓱꓼ ꓜꓴˍ ꓡꓰ ꓐꓰ ꓗꓹ ꓡꓳ꓾ ꓐꓯˍ ꓡꓳ꓿ 45 ꓙꓵꓽ ꓗ ꓒ ꓐꓴ ꓗꓪ ꓟ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ꓾ ꓟꓸ ꓒꓽꓳ꓾ ꓠꓴ ꓕꓱ ꓡꓱ ꓐꓯˍ ꓟ ꓠꓬ ꓥꓪ ꓠꓴꓽ ꓔꓯˍ ꓟꓲ ꓕꓼ ꓬꓯꓼˍ ꓡꓳ꓾ ꓐꓯˍ ꓡꓳ꓿ 46 ꓬꓰ-ꓢꓴ ꓡꓰ꓾ ꓙꓵꓽ ꓗ ꓒ ꓐꓴ ꓠꓴ ꓪꓽˍ ꓟꓲ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓢꓴ ꓔꓯ ꓫꓸˍ ꓟ ꓶꓻ ꓟꓯ ꓝꓲ ꓢꓲ꓾ ꓠꓴ ꓪꓽ ꓚꓲꓸ ꓛꓬ ꓠꓽ ꓶꓻ ꓟꓯꓻ ꓙ ꓠꓹ ꓟ ꓡꓯꓼ ꓠꓬꓲ ꓕꓲ ꓠꓬꓲˍ ꓟꓲ ꓡꓵꓺ ꓠꓲꓹ ꓟꓽ ꓫꓵ꓿ 47 ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓒꓵꓽ ꓒ ꓐꓴ ꓡꓰ ꓢꓰꓼ ꓗꓷ ꓟ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓱꓼ ꓜꓴ ꓔꓯ ꓠꓴ ꓪꓽ ꓫꓬꓹ ꓜꓶꓻˍ ꓡꓳ꓿ 48 ꓖꓳ ꓡꓱ ꓠꓬꓲ꓾ ꓠꓴ ꓪꓽ ꓠꓬ ꓠꓴ ꓪꓽ ꓒꓵꓽ ꓒ ꓐꓴ ꓡꓰ ꓢꓰꓼ ꓗꓷ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓱꓼ ꓜꓴ ꓔꓯ ꓫꓬꓹ ꓜꓶꓻˍ ꓟ ꓠꓬ꓾ ꓬꓲ ꓪꓽ ꓡꓰ ꓬꓰ ꓗꓷ ꓟ ꓔꓯ ꓢꓷꓸ ꓙ ꓟꓳ ꓙˍ ꓟ ꓐꓰ ꓓꓽ ꓔꓳꓹˍ ꓟ ꓥ ꓡꓳ꓿ 49 ꓖꓳ ꓡꓱ ꓠꓬꓲ ꓪꓴ-ꓢ ꓬꓲ ꓙ ꓗꓴꓸ ꓠꓲꓹ ꓡꓰ ꓫꓸ ꓕꓱ ꓗꓷ ꓢꓲ꓾ ꓥꓪ ꓠꓽ ꓬꓲ ꓪꓽ ꓔꓯ ꓟꓷꓽ ꓠꓷꓹ ꓝꓸ ꓢꓴ ꓐꓰ ꓝꓲ ꓓꓴ ꓝꓲ ꓩꓴ ꓗꓷˍ ꓥꓳ꓿ ꓬꓲ ꓪꓽ ꓡꓰ ꓕꓲ ꓐꓱ ꓔꓯ ꓢꓰꓼ ꓗꓷˍ ꓥꓳ꓾ ꓕꓲ ꓐꓱ ꓔꓯ ꓠꓽ ꓗꓸ ꓧꓪˍ ꓥꓳ꓾ ꓐꓯˍ ꓡꓳ꓿ 50 - 51 ꓖꓳ ꓟ ꓑꓶꓸ ꓓꓴ ꓟꓵꓽ ꓔꓶꓺ ꓟꓲ ꓔꓶ ꓕ ꓑꓳꓸ꓾ ꓮ-ꓐꓱ ꓬꓲ ꓫꓵꓽ ꓗꓪ ꓐꓰ ꓔꓲ ꓖꓴˍ ꓐꓰ ꓢꓲꓽ ꓫꓬ ꓦꓲ ꓠꓬꓲꓽ ꓗꓴꓸ ꓚꓸꓼ ꓗꓪ ꓫꓵꓻ ꓗꓷ ꓢꓴ ꓢ-ꓚꓬ-ꓡꓲ-ꓬ ꓬꓲ ꓫꓵꓽ ꓗꓪ ꓛꓲ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓫꓵꓽ ꓔꓯ ꓧꓳꓸ ꓡꓰ ꓝꓲ ꓟ ꓝꓴꓲ ꓠꓬ ꓕꓱ ꓕꓲ ꓤꓶꓻ ꓢꓴ ꓔꓯ ꓟꓯꓻ ꓝꓲˍ ꓥꓳ꓿ ꓥ ꓡꓳ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶꓽˍ ꓠꓬꓲ꓾ ꓕꓱ ꓕꓲ ꓤꓶꓻ ꓢꓴ ꓔꓯ ꓟꓯꓻ ꓝꓲˍ ꓥꓳ꓿ 52 ꓙꓵꓽ ꓗ ꓒ ꓐꓴꓳ꓾ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓡꓰ ꓢꓷꓸ ꓠꓲꓹ ꓜꓳ ꓜꓴꓻ ꓔꓯꓹ ꓙꓰ ꓢꓲ꓾ ꓠꓴ ꓪꓽ ꓚꓲꓸ ꓛꓬ ꓠꓽ ꓟꓽ ꓓꓵꓽ ꓙꓰ꓾ ꓓꓵꓽ ꓙꓰˍ ꓐꓰ ꓬꓰ ꓔꓬ ꓢꓴ ꓔꓯˍ ꓟꓲ ꓠꓴ ꓪꓽ ꓗꓽ ꓔ ꓡꓳ꓾ ꓐꓯˍ ꓡꓳ꓿ 53 ꓬꓰ-ꓢꓴ ꓖꓳ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓬꓰ-ꓢꓴˍ ꓐꓰ ꓦꓶ ꓦꓶˍ ꓡꓰ ꓧꓳꓺ ꓡꓯꓽ ꓘꓳ ꓡ ꓢꓲ꓾ ꓬꓲ ꓔꓯ ꓮꓽ ꓟꓬ ꓫꓵ ꓜꓲꓻ ꓜꓲ ꓟꓵꓺ ꓟꓵ ꓠ ꓠꓬꓲ ꓢꓲ ꓠꓬꓲ꓾ 54 ꓬꓲ ꓐꓯ ꓘꓶꓽ ꓗꓪ ꓐꓰ ꓬꓲ ꓔꓯ ꓠꓸ ꓣꓴ ꓠꓹ ꓟ ꓢꓯꓼ ꓕꓵꓼˍ ꓡꓳ꓿

ꓡꓴ-ꓗ 12

1 ꓖꓳ ꓕꓲ ꓝꓲꓸ ꓗꓪ ꓞꓳ ꓜꓴꓻ ꓕꓳꓼ ꓡꓯꓽ ꓘꓳ ꓠ ꓛꓲ꓾ ꓬꓲ ꓔꓴꓺ ꓬꓲ ꓟꓶꓽ ꓜꓲꓼ ꓡꓯꓽ ꓘꓳˍ ꓕꓯ꓾ ꓬꓰ-ꓢꓴ ꓠꓬ ꓘꓶ ꓒꓴ ꓢꓲ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓧꓶꓸ ꓕꓯ꓾ ꓠꓴ ꓪꓽ ꓠꓬ ꓒ-ꓡꓲ-ꓢꓷ ꓐꓴ ꓠꓲꓹ ꓟ ꓠꓬꓲꓽ ꓔꓱꓹ ꓣꓱˍ ꓟ ꓙꓵꓽ ꓧꓶꓽ ꓔꓯ ꓤ ꓟꓳ꓿ 2 ꓑꓲꓸ ꓔꓸ ꓟ ꓮꓸ ꓫꓵˍ ꓟꓲ ꓟꓽ ꓟꓳꓸ ꓖꓶ ꓡ ꓟ ꓟꓽ ꓙꓳ꓿ ꓚꓵꓺ ꓔ ꓟˍ ꓟꓲ ꓢꓴ ꓟꓽ ꓢꓷꓸ ꓡꓰ ꓟ ꓟꓽ ꓙꓳ꓿ 3 ꓠꓴ ꓪꓽ ꓡꓰ ꓘꓳ ꓫꓱ ꓫꓱꓺꓼ ꓠꓯ ꓞꓲꓹ ꓗꓪ ꓐꓯˍ ꓟ ꓮꓸ ꓫꓵ ꓥ ꓟꓲ꓾ ꓫꓬꓽ ꓫꓬ ꓗꓪ ꓢꓴꓻ ꓑ ꓙꓽ ꓡꓰˍ ꓥꓳ꓿ ꓘꓷꓹ ꓖꓳꓼ ꓠꓯꓸꓼ ꓗꓪ ꓒꓽ ꓛꓽˍ ꓟ ꓠꓬ꓾ ꓦꓲ ꓪꓴꓸ ꓓꓰꓺ ꓗꓪ ꓐꓰ ꓢꓴ ꓡꓰ ꓚ ꓓꓳ ꓙꓰˍ ꓥꓳ꓿ 4 ꓥꓪ ꓗꓪ ꓛꓳꓽ ꓐꓴꓳ꓾ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓖꓳ ꓓꓱꓽ ꓔꓯ ꓢꓰꓼ ꓡ ꓗꓸ ꓠꓯ ꓝꓮꓲ ꓮꓸ ꓫꓵ ꓬꓰ ꓟꓽ ꓐ ꓡ ꓢꓴ ꓔꓯ ꓕꓽ ꓙꓳ꓿ 5 ꓠꓴ ꓪꓽ ꓙꓳꓺ ꓠꓯꓹ ꓟ ꓮꓽ ꓟ ꓥ ꓟ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓢꓰꓼ ꓗꓷ ꓗꓸ ꓠꓯꓸ ꓛꓬꓼ ꓟꓵꓽ ꓗꓪ ꓡꓳ ꓧꓳꓽ ꓠꓹ ꓟ ꓙꓵꓽ ꓪ ꓙꓳꓻ ꓢꓴ ꓔꓯ ꓙꓳꓺ꓿ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ ꓔꓯ ꓠꓽ ꓚꓵ ꓚꓵ ꓙꓳꓺ ꓠ ꓗꓹ ꓡꓳ꓿ 6 ꓠꓬꓹ ꓛꓬꓼ ꓡꓯꓼ ꓥꓪꓽ ꓟ ꓠꓬ꓾ ꓙꓲꓽ ꓒꓬꓸ ꓠꓬꓲꓽ ꓒꓬꓸ ꓐꓰ ꓪꓴꓽˍ ꓡꓳ ꓟꓽ ꓥ ꓡ? ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓟꓲ ꓡꓰˍ ꓟ ꓕꓲ ꓟˍ ꓟꓲ ꓟꓽ ꓙꓳ꓿ 7 ꓠꓴ ꓪꓽ ꓪꓴꓸ ꓞꓱꓻˍ ꓟꓲ ꓮꓽ ꓙꓵ ꓵ ꓔ ꓠꓬꓲ ꓙꓳꓺ ꓟꓽ ꓛꓵ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓠꓬꓹ ꓛꓬꓼ ꓡꓯꓼ ꓮꓽ ꓟꓬꓹ ꓟ ꓢꓶꓸ ꓟꓽ ꓞꓲ ꓒꓵꓽˍ ꓡꓳ꓿ 8 ꓠꓴ ꓪꓽ ꓔꓯ ꓥꓪ ꓐꓯ ꓖꓶꓽˍ ꓠꓬꓲ꓾ ꓞꓳ ꓤ ꓟꓲꓽ ꓙꓬ ꓗꓪ ꓥꓪ ꓔꓯ ꓣꓷꓠꓸ ꓢꓴ ꓮ ꓡꓲ ꓕꓲ ꓣꓳ ꓔꓯˍ ꓟꓲ꓾ ꓪꓴ-ꓢ ꓬꓲ ꓟꓴꓽ ꓗꓪ ꓝꓲ ꓓꓴ ꓐꓴ ꓟꓲꓽ ꓙꓬ ꓗꓪ꓾ ꓡ-ꓞꓳ-ꓮ-ꓐꓲˍ ꓟꓲ ꓬꓲ ꓔꓯ ꓣꓷꓠˍ ꓥꓳ꓿ 9 ꓞꓳ ꓤ ꓟꓲ ꓙꓬ ꓗꓪ ꓥꓪ ꓔꓯ ꓟꓽ ꓣꓷꓠꓸ ꓢꓴ ꓔꓯ ꓠꓽ꓾ ꓪꓴ-ꓢ ꓬꓲ ꓟꓴꓽ ꓗꓪ ꓝꓲ ꓓꓴ ꓐꓴ ꓟꓲꓽ ꓙꓬ ꓗꓪ ꓥꓪˍ ꓟꓲ ꓬꓲ ꓔꓯ ꓟꓽ ꓣꓷꓠꓸ꓿ 10 ꓡ-ꓞꓳ-ꓮ-ꓐꓲ ꓔꓯ ꓔꓳꓹˍ ꓟ ꓥꓳꓽ ꓫꓸ ꓕꓱ ꓢꓴ ꓔꓯ ꓠꓬ ꓖꓽ ꓖꓶˍ ꓢꓰꓽ ꓥꓳ꓿ ꓖꓳ ꓡꓱ ꓥ ꓟꓲ ꓢꓲ-ꓫꓬ-ꓟ-ꓦ ꓔꓯ ꓛꓬˍ ꓟ ꓥꓳꓽ ꓫꓸ ꓕꓱ ꓢꓴ ꓔꓯ ꓠꓽ ꓟꓽ ꓖꓽ ꓖꓶ꓿ 11 ꓢꓴꓻ ꓡꓰ ꓠꓴ ꓪꓽ ꓔꓯ ꓜꓲꓼ ꓦꓲ ꓗꓪ꓾ ꓢꓲꓽ ꓒ ꓐꓴˍ ꓐꓰ ꓙꓵꓽ ꓪ ꓙꓳ ꓢꓴ ꓟꓲꓽ ꓙꓬ ꓗꓪ ꓧꓳꓽ ꓛꓲ ꓬꓰˍ ꓠꓬ꓾ ꓮ ꓡꓲ ꓒꓳꓹ ꓖꓶ ꓠꓯꓹ ꓟ ꓐꓰ ꓮꓸ ꓫꓵ ꓐꓯ ꓠꓯꓹ ꓟ ꓕꓽ ꓙꓽ ꓫꓸ꓿ 12 ꓮ ꓡꓲꓳ ꓐꓯ ꓠꓬ ꓖꓳ ꓕꓲ ꓙꓵꓹ ꓗꓪ ꓠꓴ ꓪꓽ ꓐꓯ ꓠꓯꓹ ꓟ ꓠꓽ꓾ ꓢꓲ-ꓫꓬ-ꓟ-ꓦ ꓡꓰ ꓠꓴ ꓪꓽ ꓔꓯ ꓟꓸ ꓖꓶ ꓡ ꓥꓳ꓾ ꓐꓯˍ ꓡꓳ꓿ 13 ꓞꓳ ꓜꓴꓻ ꓗꓪ ꓟ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ꓾ ꓟꓸ ꓒꓽꓳ꓾ ꓥꓪ ꓔꓯ ꓡꓯꓼ ꓪ ꓐꓱꓻ ꓖꓶ ꓡ ꓠꓹ ꓟ ꓥꓪ ꓮ ꓬꓲꓼ ꓔꓯ ꓐꓯ ꓖꓶ ꓙ꓾ ꓐꓯˍ ꓡꓳ꓿ 14 ꓬꓰ-ꓢꓴ ꓠꓬ ꓬꓲ ꓔꓯ꓾ ꓞꓳ ꓤꓽꓳ꓾ ꓮꓽ ꓟ ꓡꓰ ꓥꓪ ꓔꓯ ꓠꓴ ꓪꓽ ꓐꓯ ꓟꓴ ꓞꓷꓹ ꓢꓴ ꓢꓲꓽ ꓒˍ ꓐꓰ ꓡꓯꓼ ꓪ ꓐꓱ ꓖꓶꓽ ꓢꓴ ꓣꓱꓽ ꓝꓲˍ ꓡ?꓾ ꓐꓯ ꓖꓶˍ ꓡꓳ꓿ 15 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓠꓲꓹ ꓦꓯꓸˍ ꓟ ꓮꓽ ꓙꓵ ꓔꓯ ꓧꓪꓸ ꓛꓲꓽ ꓐꓰ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓞꓳ ꓤ ꓠꓽ ꓬꓲ ꓖꓴꓽ ꓙꓴ ꓮꓽ ꓟꓬꓹ ꓙꓳˍ ꓟ ꓗꓪ ꓐꓰ ꓢꓯꓸ ꓔꓬ ꓟꓶˍ ꓟ ꓟꓽ ꓥ꓾ ꓐꓯˍ ꓡꓳ꓿ 16 ꓬꓲ ꓠꓬ ꓔꓯ ꓥꓳꓽ ꓕꓲ ꓟ ꓣꓱꓽ ꓢꓲ ꓬꓲ ꓪꓽ ꓔꓯ꓾ ꓞꓳ ꓐꓳ ꓕꓲ ꓣꓳ ꓠꓬ ꓬꓲ ꓦꓻ ꓟꓲ ꓗꓪ ꓜ ꓪꓳꓽ ꓡꓳ ꓪꓳꓽ ꓮꓽ ꓟꓬꓹ ꓫ ꓟꓶˍ ꓡꓳ꓿ 17 ꓖꓳ ꓡꓱ ꓠꓬ ꓬꓲ ꓠꓽ꓾ ꓥꓪ ꓜꓽ ꓫꓵꓽ ꓜꓽ ꓙꓰꓽ ꓗꓶ ꓖꓴ ꓟꓽ ꓡꓳꓼ ꓠꓬꓲ ꓮ ꓡꓲ ꓬꓰ ꓢꓰ꓾ ꓐꓰ ꓓꓵꓽ ꓙˍ ꓡꓳ꓿ 18 ꓝꓮꓲ ꓬꓲ ꓡꓰ꓾ ꓥꓪ ꓠꓽ ꓕꓱ ꓡꓱ ꓬꓰˍ ꓥꓳ꓾ ꓥꓪ ꓜ ꓗꓹ ꓕꓱ ꓟꓬ ꓟ ꓒꓬꓹ ꓗꓷ ꓢꓲ ꓪ ꓜꓲ ꓪꓴꓽˍ ꓟ ꓜ ꓗꓹ ꓫꓬꓹ ꓢꓲ ꓠꓬꓲ꓾ ꓖꓳ ꓗꓪ ꓥꓪ ꓜꓽ ꓫꓵ ꓜ ꓙꓰˍ ꓐꓰ ꓖꓴꓽ ꓙꓴ ꓫ ꓗꓶ ꓔꓸ ꓥꓳ꓿ 19 ꓖꓳ ꓗꓸ ꓠꓯꓸ ꓥꓪ ꓠꓬ ꓥꓪ ꓶꓻ ꓟꓬ ꓔꓯ꓾ ꓶꓻ ꓟꓬꓺꓳ꓾ ꓠꓴ ꓐꓱ ꓶ ꓮꓽ ꓟꓬꓹ ꓘꓳꓼ ꓣꓱꓽ ꓓꓴ ꓮꓽ ꓟꓬꓹ ꓫ ꓗꓶ ꓔꓸꓳ꓿ ꓖꓳ ꓡꓱ ꓠꓬꓲ ꓠꓴ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ ꓠꓲꓹ ꓒꓴ ꓒꓴ ꓐꓰ ꓙꓳꓻ ꓢꓻ ꓔꓬ꓾ ꓐꓯ ꓖꓶˍ ꓥꓳ꓾ ꓐꓯˍ ꓡꓳ꓿ 20 ꓖꓳ ꓡꓱ ꓥ ꓟꓲ ꓪꓴ-ꓢ ꓠꓽ ꓬꓲ ꓔꓯ꓾ ꓞꓳ ꓙꓲꓽꓳ꓾ ꓠꓬꓲꓸ ꓟꓶꓼ ꓘꓶꓼ ꓠꓴ ꓶꓻ ꓟꓬ ꓔꓯ ꓥꓪ ꓧꓪ ꓡ ꓥꓳ꓿ ꓖꓳ ꓡꓱ ꓠꓬ ꓠꓴ ꓡꓰ ꓙꓽ ꓖꓶ ꓔ ꓟ꓾ ꓮꓽ ꓟ ꓔꓯ ꓟ ꓗꓷ ꓡꓰˍ ꓥꓳ ꓪ?꓾ ꓐꓰ ꓐꓯ ꓖꓶˍ ꓡꓳ꓿ 21 ꓚꓲꓸ ꓛꓬ ꓐꓱ ꓶˍ ꓡꓰꓽ ꓒꓵꓽ ꓶꓽ ꓫ ꓗꓶ ꓔꓸ ꓢꓲ꓾ ꓪꓴ-ꓢ ꓔꓯ ꓟꓳꓸ ꓟꓽ ꓐꓳ ꓟ ꓡꓽ ꓞꓳ ꓠꓬ ꓬꓲ ꓕꓱ ꓡꓱ ꓗꓹ ꓡꓳ꓾ ꓐꓯˍ ꓡꓳ꓿ 22 ꓖꓳ ꓗꓸ ꓠꓯꓸ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓕꓱ ꓟ ꓪꓴꓸ ꓠꓬꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓢꓯꓼ ꓟꓬ ꓪꓴꓸ ꓠꓬꓲ ꓮꓸ ꓫꓵ ꓜꓽ ꓠꓯꓹ ꓟ ꓐꓰ꓾ ꓖꓳ ꓓꓱꓽ ꓪꓴꓸ ꓠꓬꓲ ꓮꓸ ꓫꓵ ꓖꓪꓽ ꓠꓯꓹ ꓟ ꓕꓽ ꓙꓽ ꓫꓸ꓿ 23 ꓮ ꓡꓲꓳ ꓐꓯ ꓠꓬ ꓢꓯꓼ ꓟꓬ ꓠꓽ ꓜꓽ ꓓꓴ ꓢꓶꓸ ꓟꓽ ꓞꓲ ꓒꓵꓽˍ ꓡꓳ꓿ ꓖꓳ ꓓꓱꓽˍ ꓟꓲ ꓖꓪꓽ ꓓꓴ ꓢꓶꓸ ꓟꓽ ꓞꓲ ꓒꓵꓽˍ ꓡꓳ꓿ 24 ꓮꓸ ꓠꓯꓺ ꓔꓯ ꓓꓵꓽ ꓙ ꓠꓬꓲ꓿ ꓬꓲ ꓪꓽ ꓠꓽ ꓫꓵꓸˍ ꓟꓲ ꓟꓽ ꓫꓵꓸ꓾ ꓫˍ ꓟꓲ ꓟꓽ ꓫ꓿ ꓜꓻ ꓗꓹˍ ꓟꓲ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓠꓽ ꓬꓲ ꓪꓽ ꓔꓯ ꓦꓵꓻ ꓙ ꓔꓬ ꓡꓳ꓿ ꓠꓴ ꓪꓽ ꓠꓬ ꓠꓬꓹ ꓕꓯꓽ ꓢꓲ ꓮꓽ ꓘꓶꓸ ꓒꓵꓽˍ ꓡꓳ꓿ 25 ꓠꓴ ꓪꓽ ꓮ ꓡꓲ ꓕꓲ ꓣꓳ ꓙꓽ ꓫˍ ꓟ ꓗꓪ ꓐꓰ ꓚꓲꓸ ꓛꓬ ꓤꓶ ꓔꓯ ꓕꓲ ꓙꓵꓹ ꓫꓵꓺ ꓡ ꓝꓲ ꓗꓴꓸˍ ꓡ? 26 ꓮꓸ ꓓꓲꓽ ꓣꓳˍ ꓟ ꓕꓱ ꓡꓱ ꓫꓵꓽˍ ꓟꓲ ꓠꓴ ꓪꓽ ꓬꓰ ꓟꓽ ꓐ ꓡ ꓠꓬ꓾ ꓠꓱꓸ ꓐꓯ ꓑꓶꓸ ꓓꓴ ꓮꓸ ꓫꓵ ꓪꓴꓸ ꓠꓬꓲ ꓙꓽ ꓫ ꓢꓰꓽ ꓡ? 27 ꓬꓲꓹ ꓫꓵ ꓪꓰ ꓮ ꓡꓲ ꓐꓰ ꓪꓴꓽ ꓡ ꓟ ꓔꓯ ꓓꓵꓽ ꓙ ꓠꓬꓲ꓿ ꓬꓲ ꓠꓽ ꓢꓯꓼˍ ꓟꓲ ꓟꓽ ꓢꓯꓼ ꓕꓵꓼ꓾ ꓛꓲ ꓤꓽˍ ꓟꓲ ꓟꓽ ꓑꓴꓺ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓢꓳ-ꓡꓳ-ꓟꓳ ꓟꓬꓱ ꓓꓳꓽ ꓮꓽ ꓘꓶꓸ ꓙꓳꓻˍ ꓟ ꓦꓬꓼ ꓠꓬꓲ ꓗꓪˍ ꓟꓲ꓾ ꓕꓱ ꓡꓱ ꓡꓴ ꓫꓵꓽ ꓢꓲꓹ ꓪꓰ ꓕꓲ ꓛꓵꓹˍ ꓡꓰ ꓐꓰ ꓟꓽ ꓪ ꓖꓪꓽ ꓠꓬꓲ꓿ 28 ꓙꓵꓻ ꓠꓲꓹ ꓣꓳ ꓢꓴ ꓐꓴꓳ꓾ ꓡꓲ ꓛꓲ ꓗꓪ ꓟ ꓟꓳꓼ ꓤ ꓫꓵꓸ ꓤ ꓠꓬ꓾ ꓠꓬꓲꓸ ꓠꓬꓲ ꓕꓲ ꓠꓬꓲ ꓓꓹ ꓢꓲ ꓢꓸ ꓖꓶ ꓕꓲ ꓠꓬꓲ ꓠꓬ ꓮ ꓔꓳꓸ ꓗꓪ ꓡꓳ ꓧꓳꓽ ꓗꓷ ꓓꓴ ꓥꓻ ꓥ ꓟꓲ꓾ ꓪꓴ-ꓢ ꓡꓰ ꓕꓱ ꓡꓱ ꓫꓵꓽ ꓖꓶ ꓖꓪꓽˍ ꓠꓬ꓾ ꓠꓴ ꓪꓽ ꓔꓯ ꓪ ꓜꓲ ꓖꓶ ꓖꓪꓽ ꓡ ꓥꓳ꓾ ꓟꓽ ꓥ ꓡ? 29 ꓠꓴ ꓪꓽ ꓠꓬ ꓮꓸ ꓫꓵ ꓜꓽ ꓮꓸ ꓫꓵ ꓓꓳꓻ ꓠꓯꓹ ꓟ ꓔꓯ ꓕꓽ ꓠꓲꓹ ꓥꓳ꓿ ꓙꓽˍ ꓟꓲ ꓕꓽ ꓙꓽ ꓫꓸ꓿ 30 ꓐꓶꓽ ꓞꓳ ꓐꓴ ꓠꓽ ꓕꓱ ꓟꓬ ꓫꓵꓽ ꓔꓯ ꓠꓲꓹ ꓥꓳ ꓢꓲ ꓙꓽ ꓫꓸˍ ꓡꓳ꓿ ꓖꓴꓽ ꓙꓴꓽ ꓕꓱ ꓟꓬ ꓟ ꓠꓴ ꓪꓽ ꓣꓱꓽ ꓬꓯꓼˍ ꓟ ꓠꓴ ꓪꓽ ꓐꓹ ꓐ ꓢꓷꓸˍ ꓠꓬꓲ ꓕꓽ ꓙꓽ ꓫꓸ꓿ 31 ꓠꓴ ꓪꓽ ꓠꓽ ꓬꓲ ꓗꓴꓷꓼ ꓔꓯ ꓧꓪ꓿ ꓖꓳ ꓡꓱ ꓠꓬ ꓖꓴꓽ ꓙꓴ ꓕꓱ ꓟꓬ ꓟ ꓠꓴ ꓪꓽ ꓔꓯ ꓡꓴꓽ ꓖꓶ ꓡ ꓥꓳ꓿ 32 ꓮ ꓣꓳ ꓜꓴ ꓤꓽꓳ꓾ ꓕꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓐꓹ ꓐ ꓠꓽ ꓬꓲ ꓗꓴꓷꓼ ꓠꓴ ꓪꓽ ꓔꓯ ꓖꓶ ꓠꓲꓹ ꓒꓴˍ ꓡꓳ꓿ 33 ꓠꓴ ꓪꓽ ꓙꓳˍ ꓟ ꓪꓴꓽ ꓗꓷ ꓢꓲ ꓞꓳ ꓫꓸ ꓔꓯ ꓖꓶ꓿ ꓠꓴ ꓪꓽ ꓚꓲꓸ ꓛꓬ ꓐꓱ ꓶ ꓐꓰꓽ ꓡꓰ ꓟꓽ ꓓ ꓟ ꓒꓴꓻ ꓗꓶ ꓓꓴ ꓙꓽ ꓖꓶ ꓔ꓿ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓣꓱꓽ ꓖꓴ ꓟꓽ ꓓ ꓠ ꓛꓲ ꓒꓵꓽ ꓶꓽ ꓫ ꓗꓶ ꓔ꓿ ꓖꓳ ꓗꓪ ꓠꓬ ꓞꓳ ꓘꓴꓽˍ ꓟꓲ ꓟꓽ ꓘꓴꓽ ꓡ꓿ ꓧꓪꓽ ꓟꓵ ꓐꓴꓽ ꓡꓴꓹˍ ꓟꓲ ꓟꓽ ꓜꓰꓼ ꓡ꓿ 34 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓒꓵꓽ ꓶꓽ ꓮ ꓡꓲ ꓗꓪ ꓓꓹ ꓠꓬ꓾ ꓠꓴ ꓪꓽ ꓠꓲꓹ ꓟˍ ꓟꓲ ꓖꓳ ꓗꓪ ꓓꓹ ꓥꓳ꓾ ꓐꓯˍ ꓡꓳ꓿ 35 ꓝꓮꓲ ꓬꓲ ꓡꓰ꓾ ꓠꓴ ꓪꓽ ꓠꓬ ꓙꓽ ꓧꓷꓹ ꓧꓷ ꓔ ꓢꓲ ꓟꓬ ꓡꓴˍ ꓟꓲ ꓟꓬ ꓔꓸ꓿ 36 ꓖꓳ ꓡꓱ ꓢꓲ ꓠꓴ ꓪꓽ ꓠꓬ꓾ ꓤ ꓟꓶꓻ ꓝꓱˍ ꓟ ꓑꓮꓲꓽ ꓗꓪ ꓐꓰ ꓬꓲꓼ ꓡ ꓟ ꓢꓲ ꓒꓽ ꓔꓯ ꓡꓳꓸ ꓔꓬ ꓟ ꓚꓳ ꓑꓸˍ ꓡꓰ ꓐꓰ꓾ ꓬꓲ ꓡꓰꓼ ꓡ ꓢꓲ ꓗ ꓘꓶꓽ ꓲ'ꓼ ꓡ ꓠꓬ꓾ ꓠꓴ ꓪꓽ ꓞꓼ ꓐꓰ ꓬꓲ ꓔꓯ ꓗ ꓘꓶꓽ ꓒꓴ ꓖꓶ ꓪ ꓠꓹ ꓟ ꓙꓽ ꓖꓶ ꓔ꓿ 37 ꓢꓲ ꓒꓽ ꓡꓻ ꓕꓯ ꓧꓪꓸ ꓛꓲꓽˍ ꓐꓰ ꓔꓬ ꓟ ꓚꓳ ꓑꓸ ꓐꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ꓿ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓬꓲ ꓠꓬ ꓚꓳ ꓑꓸ ꓔꓯ ꓜ ꓜꓽ ꓠꓹ ꓟ ꓗꓳꓺ ꓔ ꓝꓲ ꓢꓲ꓾ ꓬꓲ ꓚꓲꓸ ꓛꓬ ꓠꓬ ꓙꓽ ꓧꓷꓹ ꓧꓷꓹ ꓢꓲ ꓠꓬꓲ ꓬꓲ ꓪꓽ ꓔꓯ ꓑꓶꓺ ꓖꓶ ꓜꓽ ꓡ ꓥꓳ꓿ 38 ꓬꓲ ꓠꓬ ꓢ ꓘꓪ ꓔꓱ ꓫꓵ꓾ ꓥ ꓠꓬ ꓠꓯꓼ ꓝꓲꓸ ꓗꓪ ꓡꓻˍ ꓟꓲ꓾ ꓕꓱ ꓡꓱ ꓧꓪ ꓛꓲꓽ ꓐꓰ ꓦꓴ ꓠꓬꓹ ꓔꓬ ꓟ ꓚꓳ ꓑꓸ ꓐꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ꓿ 39 ꓦꓲ ꓢꓲ ꓒꓽ ꓠꓬ ꓘꓴꓽ ꓒ ꓮ ꓡꓲ ꓕꓲ ꓙꓵꓹ ꓗꓪ ꓡꓻˍ ꓟ ꓢꓷꓸˍ ꓕꓯ ꓠꓽ꓾ ꓬꓲ ꓠꓬ ꓧꓪꓸ ꓛꓲꓽ ꓐꓰ ꓔꓬ ꓢꓲ ꓬꓲ ꓦꓲ ꓗꓪ ꓘꓴꓽ ꓒ ꓟꓽ ꓓꓵꓽ ꓡ ꓝꓲ ꓡꓳ ꓫꓵꓽ ꓥꓳ꓾ ꓐꓰ ꓠꓴ ꓪꓽ ꓢꓷꓸ ꓔ꓿ 40 ꓠꓴ ꓪꓽˍ ꓟꓲ ꓙꓽ ꓖꓶ ꓔ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓓꓵꓽ ꓙ ꓟꓽ ꓓꓵꓽ ꓙ ꓔ ꓟ ꓕꓲ ꓙꓵꓹ ꓗꓪ ꓡ-ꓞꓳ-ꓮ-ꓐꓲ ꓡꓻˍ ꓥꓳ꓾ ꓐꓯˍ ꓡꓳ꓿ 41 ꓒꓲ-ꓕꓱ ꓡꓰ꓾ ꓢꓲ ꓒꓽꓳ꓾ ꓔꓯ ꓥꓳꓽ ꓕꓱ ꓟ ꓠꓬ ꓥꓪ ꓠꓴꓽ ꓔꓯˍ ꓡꓰꓽ ꓐꓯˍ ꓟ ꓥ ꓡ? ꓥ ꓠꓬ ꓮꓽ ꓙꓵ ꓢꓴ ꓔꓯˍ ꓟꓲ ꓐꓯ ꓬꓯꓼˍ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 42 ꓢꓲ ꓒꓽ ꓡꓰ ꓒꓳꓹ ꓖꓶ ꓢꓲ꓾ ꓦ ꓡꓱ ꓐꓳˍ ꓟ ꓐꓰ ꓢꓷꓸ ꓠꓲꓹ ꓙꓳˍ ꓟ ꓦꓲ ꓙꓵꓽ ꓢꓴ ꓠꓬ ꓮꓽ ꓟ ꓥ ꓡ? ꓦꓲ ꓢꓲ ꓒꓽ ꓡꓰ ꓙꓵꓽ ꓪ ꓡꓯꓼ ꓙꓱ ꓔ ꓢꓲ꓾ ꓦꓲ ꓗꓪ ꓔꓬ ꓢꓴ ꓔꓯ ꓬꓲ ꓖ ꓙꓳ ꓙꓳˍ ꓡꓰꓽ ꓬꓲ ꓙꓵꓹ ꓔꓯ ꓛꓳ ꓢꓲ ꓜꓽ ꓓꓴ ꓐꓱꓻ ꓖꓶ ꓜꓽ ꓢꓴ ꓖꓳ ꓟ ꓥ ꓡꓳ꓿ 43 ꓢꓲ ꓒꓽ ꓛꓲ ꓡ ꓕꓯ꓾ ꓬꓲ ꓚꓳ ꓑꓸ ꓕꓱ ꓡꓱ ꓬꓰ ꓔꓬ ꓟ ꓔꓯ ꓟꓳꓻˍ ꓠꓬ꓾ ꓚꓳ ꓑꓸ ꓖꓳ ꓟ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ꓿ 44 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓬꓲ ꓔꓯ ꓠꓽ ꓬꓲ ꓢꓲ ꓒꓽ ꓙꓳˍ ꓟ ꓥ ꓕ ꓑꓳꓸ ꓔꓯ ꓙꓵꓽ ꓝꓲˍ ꓥꓳ 45 ꓖꓳ ꓡꓱ ꓥ ꓟꓲ ꓚꓳ ꓑꓸ ꓖꓳ ꓟ ꓠꓬ꓾ ꓥꓪ ꓢꓲ ꓒꓽ ꓠꓽ ꓠꓲꓹ ꓞ ꓟꓽ ꓡꓻ꓾ ꓐꓰ ꓓꓵꓽ ꓙ ꓢꓲ꓾ ꓚꓳ ꓑꓸ ꓚꓳ ꓟ ꓐꓴ ꓔꓯ ꓓꓶꓽ ꓢꓲ ꓠꓬꓲ꓾ ꓚꓲꓸ ꓛꓬ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ ꓙꓲꓻ ꓒꓶꓽ ꓬꓲꓼ ꓠꓬꓲ ꓬꓰˍ ꓕꓯ ꓠꓽ꓾ 46 ꓬꓲ ꓟꓽ ꓡꓳꓸ ꓔꓬ ꓟ ꓦꓬꓼ ꓠꓬꓲˍ ꓐꓰ ꓬꓲ ꓟꓽ ꓢꓷꓸ ꓟ ꓕꓲ ꓙꓵꓹ ꓗꓪ ꓬꓲ ꓢꓲ ꓒꓽ ꓛꓲ ꓡ ꓢꓲ꓾ ꓬꓲ ꓔꓯ ꓛꓬꓻ ꓒꓵꓽ ꓡꓲꓽ ꓡꓲˍ ꓡꓰ ꓖꓶ ꓢꓲ ꓠꓬꓲ꓾ ꓟꓽ ꓒꓵꓽ ꓛꓳ ꓢꓴ ꓐꓴ ꓐꓱ ꓶ ꓝꓰꓺ ꓔ ꓖꓴ ꓗꓪ ꓖꓼ ꓦ ꓗꓷˍ ꓥꓳ꓿ 47 ꓬꓲ ꓢꓲ ꓒꓽ ꓠꓲꓹ ꓡꓶꓽ ꓔꓯ ꓢꓷꓸˍ ꓥ ꓟꓲ꓾ ꓙꓽˍ ꓟꓲ ꓟꓽ ꓙꓽ ꓖꓶ꓾ ꓬꓲ ꓢꓲ ꓒꓽ ꓠꓲꓹ ꓡꓶꓽ ꓔꓯˍ ꓟꓲ ꓟꓽ ꓛꓳꓻ ꓟ ꓚꓳ ꓑꓸ ꓖꓳ ꓕꓲ ꓣꓳ ꓔꓯ ꓮꓽ ꓘꓶꓸ ꓓꓶꓽˍ ꓥꓳ꓿ 48 ꓖꓳ ꓡꓱ ꓥ ꓟꓲ ꓬꓲ ꓢꓲ ꓒꓽ ꓠꓲꓹ ꓡꓶꓽ ꓔꓯ ꓟꓽ ꓙꓽ ꓜꓲꓼ ꓢꓲ ꓛꓬꓻ ꓡꓰ ꓢꓴ ꓔꓯ ꓓꓶꓽ ꓠ ꓗꓷ ꓡꓰ ꓐꓷˍ ꓠꓬ꓾ ꓬꓲ ꓔꓯ ꓠꓽ ꓡꓳꓻ ꓡꓳꓻ ꓤꓽˍ ꓡꓰ ꓓꓶꓽˍ ꓥꓳ꓿ ꓟꓬꓽ ꓠꓬꓲ ꓖꓶ ꓔ ꓢꓴ ꓔꓯ ꓠꓬ ꓟꓬꓽ ꓠꓬꓲ ꓧꓪ ꓡ ꓥꓳ꓿ ꓟꓬꓽ ꓠꓬꓲ ꓡꓯꓼ ꓙꓱ ꓔ ꓢꓴ ꓔꓯ ꓠꓬ ꓟꓬꓽ ꓠꓬꓲ ꓔꓯꓸ ꓡ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ 49 ꓥꓪ ꓠꓬ ꓟꓲ ꓠꓯ ꓗꓪ ꓮꓸ ꓔꓳ ꓔꓯꓹ ꓧꓳꓽˍ ꓐꓰ ꓡꓻ ꓟ ꓥ ꓢꓲ꓾ ꓮ ꓟꓶˍ ꓡꓰ ꓐꓬꓻ ꓔꓴ ꓡ ꓕꓯ ꓠꓽ ꓥꓪ ꓮꓽ ꓘꓶꓸ ꓠꓲꓹ ꓒꓴˍ ꓡꓳ ꓫꓵꓽ ꓥ ꓡꓳ꓿ 50 ꓖꓳ ꓡꓱ ꓥ ꓟꓲ ꓥꓪ ꓔꓯ ꓔꓲꓹ ꓠꓯꓹ ꓟ ꓔꓲꓹ ꓓꓴ ꓕꓲ ꓫꓵꓽ ꓔꓯ ꓥꓪ ꓗꓳꓸ ꓬꓯꓼ ꓠ ꓗꓹ ꓢꓰꓽ ꓡꓳ꓿ ꓕꓱ ꓟ ꓟꓽ ꓒꓬꓱꓼ ꓡ ꓕ ꓑꓳꓸ ꓥꓪ ꓔꓯ ꓮꓽ ꓘꓶꓸ ꓠꓬꓲꓸ ꓞꓹ ꓡꓳ꓿ 51 ꓥꓪ ꓡꓻ ꓟ ꓠꓬ ꓟꓲ ꓠꓯ ꓔꓯ ꓢꓲ ꓡꓲ ꓡꓰ ꓝꓲ ꓠꓹ ꓟ ꓥꓳ꓾ ꓐꓰ ꓓꓵꓽ ꓙˍ ꓡ? ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓟꓽ ꓥ꓿ ꓥꓪ ꓠꓬ ꓢꓴ ꓔꓯ ꓐꓱꓻ ꓡꓯꓽ ꓘꓳ ꓝꓲ ꓠꓹ ꓟ ꓡ ꓟ ꓥ ꓡꓳ꓿ 52 ꓮ ꓡꓲꓳ ꓐꓯ ꓠꓬ ꓕꓱ ꓡꓱ ꓖꓳ ꓑꓳ꓾ ꓕꓲ ꓦꓲ ꓡꓽ ꓞꓳ ꓥꓪꓽ ꓣꓳ ꓙꓳˍ ꓠꓬ꓾ ꓢ ꓣꓳ ꓟ ꓐꓰ ꓠꓬꓲꓽ ꓣꓳ ꓟ ꓔꓳꓹ ꓡꓯꓽ ꓘꓳˍ ꓟ ꓗꓷ ꓡꓰˍ ꓥꓳ꓿ 53 ꓐꓹ ꓐˍ ꓐꓰ ꓮ ꓐꓲ ꓔꓳꓹ ꓡꓯꓽ ꓘꓳˍ ꓟ꓾ ꓟꓹ ꓟˍ ꓐꓰ ꓮꓸ ꓟꓲꓽ ꓔꓳꓹ ꓡꓯꓽ ꓘꓳˍ ꓟ꓾ ꓟꓹ ꓟ ꓑꓯꓹˍ ꓐꓰ ꓛꓲꓼ ꓟ ꓔꓳꓹ ꓡꓯꓽ ꓘꓳˍ ꓟ ꓙꓳˍ ꓥꓳ꓾ ꓐꓯˍ ꓡꓳ꓿ 54 ꓝꓮꓲ ꓬꓲ ꓡꓰ ꓞꓳ ꓜꓴꓻ ꓔꓯ꓾ ꓐꓶ ꓓꓵꓽ ꓘꓶꓽ ꓗꓪ ꓟꓴ ꓗꓴꓸ ꓕꓲ ꓘꓴꓸ ꓢꓴꓸ ꓡ ꓟ ꓔꓯ ꓟꓳꓻˍ ꓕꓯ ꓠꓴ ꓪꓽ ꓠꓽ꓾ ꓟꓶꓽ ꓦ ꓕꓲ ꓜꓴꓽ ꓦ ꓡ ꓥꓳ꓾ ꓐꓯˍ ꓡꓳ꓿ ꓖꓳ ꓕꓯ ꓬꓲ ꓖꓳ ꓡꓱ ꓒꓬꓱꓼ ꓡ ꓡꓳ꓿ 55 ꓖꓴ ꓟꓶꓸ ꓟꓲꓽ ꓦꓲ ꓙꓱꓼˍ ꓟ ꓔꓯ ꓟꓳꓻˍ ꓠꓬ ꓠꓴ ꓪꓽ ꓠꓽ꓾ ꓮꓽ ꓘꓶꓸ ꓞꓻ ꓡ ꓥꓳ꓾ ꓐꓯ ꓗꓴꓸˍ ꓡꓳ꓿ ꓖꓳ ꓗꓸ ꓠꓯꓸ ꓬꓲ ꓖꓳ ꓡꓱ ꓗꓷ ꓡꓰˍ ꓡꓳ꓿ 56 ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓟꓴꓽ ꓗꓪˍ ꓐꓰ ꓟꓲ ꓠꓯ ꓔꓯ ꓦꓰꓽ ꓗꓴˍ ꓠꓬ꓾ ꓦꓬꓼ ꓠꓬꓲ ꓕꓱ ꓟ ꓔꓯ ꓦꓰꓽ ꓠꓯꓹ ꓟ ꓠꓴ ꓪꓽ ꓮ ꓡꓲ ꓗꓷ ꓡꓰ ꓠꓬꓲ ꓟꓽ ꓢꓷꓸ ꓡ? 57 ꓠꓴ ꓪꓽ ꓠꓬ ꓮꓸ ꓫꓵ ꓪꓴꓸ ꓠꓬꓲ꓾ ꓮ ꓡꓲ ꓕꓲ ꓫꓵꓽ ꓜꓳꓽ ꓟꓽ ꓜꓳ꓾ ꓐꓰ ꓚꓲꓸ ꓛꓬ ꓟꓽ ꓐꓯ ꓞꓷꓹˍ ꓡ? 58 ꓠꓴ ꓔꓯ ꓗꓳꓹ ꓢꓴˍ ꓐꓰ ꓕꓲ ꓛꓳꓺꓼ ꓢꓲꓽ ꓒ ꓔꓬ ꓗꓪ ꓙꓰ ꓔꓬ ꓕꓯ꓾ ꓠꓴ ꓠꓬ ꓬꓲˍ ꓐꓰ ꓧꓳꓹ ꓡꓯꓽ ꓘꓳ ꓡꓰ ꓠꓹ ꓟ ꓢꓯꓼ ꓕꓵꓼ꓿ ꓟꓽ ꓥ ꓠꓬ ꓬꓲ ꓡꓰ ꓠꓴ ꓔꓯ ꓢꓲꓽ ꓒ ꓟꓲꓽ ꓙꓬꓽ ꓗꓪ ꓖꓳꓻ ꓛꓲ ꓬꓰ ꓢꓲ꓾ ꓢꓲꓽ ꓒ ꓡꓰ ꓠꓴ ꓔꓯ ꓐꓱ ꓓꓴꓽ ꓙꓵꓽ ꓒ ꓔꓯ ꓡꓯꓼ ꓙꓱ ꓗꓷ ꓢꓲ ꓠꓬꓲ꓾ ꓠꓴ ꓔꓯ ꓐꓱ ꓓꓴꓽ ꓗꓪ ꓐꓱ ꓗꓷˍ ꓥꓳ꓿ 59 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓐꓶꓻ ꓟꓽ ꓖꓴ ꓟ ꓙꓲꓽ ꓒꓬꓸ ꓕꓲ ꓒꓬꓸ ꓤꓽˍ ꓡꓰ ꓛˍ ꓟꓲ ꓖꓳ ꓗꓪ ꓐꓰ ꓠꓴ ꓓꓳ ꓡ ꓟꓽ ꓓ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿

ꓡꓴ-ꓗ 13

1 ꓖꓳ ꓕꓲ ꓝꓲꓸ ꓗꓪ ꓡꓽ ꓞꓳ ꓕꓲ ꓐꓱ ꓡꓰ ꓬꓰ-ꓢꓴ ꓔꓯ ꓡ ꓢꓲ꓾ ꓒꓲ-ꓡ ꓠꓬ ꓮ ꓡꓲ ꓐꓰ ꓖ-ꓡꓲ-ꓡꓲ ꓢꓴ ꓬꓲ ꓪ ꓔꓲ ꓓꓴ ꓗꓪ ꓬꓲ ꓪꓽ ꓚꓲꓸ ꓚꓬꓽ ꓫꓵꓽ ꓦꓱꓹ ꓡꓰ ꓝꓲˍ ꓟ ꓫꓵꓽ ꓪꓴ ꓖꓳ ꓟ ꓐꓯ ꓖꓶ ꓡ ꓢꓴ ꓙꓳˍ ꓡꓳ꓿ 2 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓖ-ꓡꓲ-ꓡꓲ ꓢꓴ ꓖꓳ ꓕꓲ ꓧꓳꓽ ꓔꓯ ꓕꓱ ꓡꓱ ꓔꓳꓹ ꓜꓳꓽ ꓗꓷˍ ꓠꓬꓲ꓾ ꓬꓲ ꓪꓽ ꓠꓽ ꓖ-ꓡꓲ-ꓡꓲ ꓢꓴ ꓮꓽ ꓙꓵ ꓕꓯꓽ ꓢꓲ ꓝꓴꓲ ꓙꓳ ꓢꓴ ꓥꓳ꓾ ꓐꓰ ꓠꓴ ꓪꓽ ꓓꓵꓽ ꓙˍ ꓡ? 3 ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓠꓬꓲ꓾ ꓟꓽ ꓥ꓿ ꓠꓴ ꓪꓽˍ ꓟꓲ ꓟꓽ ꓓꓵꓽ ꓙ ꓒꓳꓹ ꓬꓲꓼ ꓡ ꓕꓯ ꓠꓽ ꓮꓽ ꓙꓵ ꓢꓴ ꓖꓳ ꓟ ꓡꓰ ꓐꓰ ꓟꓶꓽ ꓬꓰˍ ꓥꓳ꓿ 4 ꓥ ꓠꓬ ꓢꓲ-ꓡꓳ ꓗꓪ ꓟ ꓟꓵꓽ ꓔꓳꓹ ꓤꓶꓻ ꓐꓱꓽ ꓡꓰ ꓕꓯ ꓔꓲꓸ ꓫꓵꓻ ꓢꓴ ꓞꓲ ꓦꓰꓼ ꓣꓳ ꓟ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴ ꓮꓽ ꓙꓵ ꓕꓯꓽ ꓢꓲ ꓝꓴꓲ ꓙꓳ ꓢꓴ ꓥꓳ꓾ ꓐꓰ ꓠꓴ ꓪꓽ ꓓꓵꓽ ꓙˍ ꓡ? 5 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓟꓽ ꓥ꓿ ꓠꓴ ꓪꓽˍ ꓟꓲ ꓟꓽ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓬ ꓮꓽ ꓙꓵ ꓢꓴ ꓖꓳ ꓟ ꓡꓰ ꓐꓰ ꓟꓶꓽ ꓬꓰˍ ꓥꓳ꓾ ꓐꓯˍ ꓡꓳ꓿ 6 ꓬꓲ ꓠꓬ ꓔꓯ ꓥꓳꓽ ꓗꓪ ꓐꓰ ꓟꓸ ꓪꓴꓸ ꓔꓴ ꓢꓲ ꓕꓰ ꓡꓱ ꓐꓯˍ ꓡꓳ꓾ ꓡꓽ ꓞꓳ ꓕꓲ ꓣꓳ ꓠꓬ ꓬꓲ ꓛꓱꓼ ꓡꓱꓼ ꓐꓱ ꓗꓪ ꓘꓶꓽ ꓢꓶꓽ ꓕꓲ ꓜꓲ ꓔꓶ ꓔ ꓡꓳ꓿ ꓬꓲ ꓠꓬ ꓢꓶꓹ ꓢꓶ ꓧꓼ ꓠꓹ ꓟ ꓢꓲꓹ ꓜꓲ ꓛꓲ ꓔꓲ ꓗꓪ ꓡꓻ ꓕꓯ ꓢꓶꓹ ꓢꓶꓽ ꓕꓲ ꓢꓶꓽˍ ꓟꓲ ꓧꓪ ꓟꓽ ꓟꓶ꓿ 7 ꓖꓳ ꓡꓱ ꓠꓬ ꓬꓲ ꓡꓰ ꓐꓱ ꓡꓳꓸ ꓢꓴ ꓔꓯ꓾ ꓠꓬꓲ ꓠꓹ꓾ ꓥꓪ ꓠꓬ ꓢꓶꓹ ꓢꓶꓽ ꓧꓪ ꓟꓶ ꓠꓹ ꓟ꓾ ꓕꓱ ꓢ ꓘꓳꓼ ꓘꓶꓽ ꓢꓶ ꓕꓱ ꓕꓲ ꓜꓲ ꓛꓲ ꓔꓲ ꓗꓪ ꓡꓻˍ ꓟꓲ꓾ ꓬꓲ ꓢꓶꓽ ꓧꓪ ꓟꓽ ꓟꓶ꓿ ꓮꓸ ꓫꓵ ꓪꓴꓸ ꓠꓬꓲ ꓟꓵꓽ ꓒꓬꓹ ꓟꓲ ꓒꓬꓹ ꓕꓱ ꓡꓱ ꓣꓱꓻ ꓞꓹ ꓝꓲ ꓠꓯꓹ ꓡ? ꓘꓷꓹ ꓩꓴ ꓗꓷ Gꓽ꓾ ꓐꓯˍ ꓡꓳ꓿ 8 ꓬꓲ ꓡꓰ ꓒꓳꓹ ꓖꓶ ꓢꓲ꓾ ꓢꓲ ꓒꓽꓳ꓾ ꓞꓲ ꓠꓲꓹ ꓕꓲ ꓘꓳꓼ ꓝꓰꓺ ꓔ ꓢꓰꓽ꓿ ꓥꓪ ꓠꓬ ꓚꓳ ꓡꓳ ꓡꓳ ꓘꓪꓺ ꓢꓲ ꓛꓲꓸ ꓧꓳꓽ ꓖꓶˍ ꓥꓳ꓿ 9 ꓠꓯꓸ ꓦꓯꓼ ꓬꓲ ꓢꓶꓽ ꓓꓱꓼ ꓡ ꓠꓬ ꓙꓲˍ ꓥꓳ꓿ ꓟꓽ ꓓꓱꓼ ꓡ ꓠꓬ ꓖꓳ ꓕꓯꓽ ꓢꓲ ꓘꓷꓹ ꓩꓴ ꓗꓷ ꓛꓵˍ ꓡꓳ꓾ ꓐꓯ ꓖꓶˍ ꓡꓳ꓾ ꓐꓰ ꓐꓯˍ ꓡꓳ꓿ 10 ꓠꓽ ꓦꓬꓼ ꓠꓬꓲ ꓗꓪ ꓬꓰ-ꓢꓴ ꓠꓬ ꓜꓲꓼ ꓦꓲ ꓕꓲ ꓦꓲ ꓗꓪ ꓟꓸ ꓟꓲꓽ ꓟꓸ ꓔꓬ ꓕꓯ꓾ 11 ꓖꓳ ꓗꓪ ꓠꓲꓽ ꓡꓰ ꓞꓲ ꓦꓰꓼ ꓘꓳꓼ ꓘꓶꓻ ꓡꓶꓽ ꓢꓲ꓾ ꓙꓴꓽ ꓝꓲꓸ ꓗꓴꓺ ꓡꓰ ꓢꓲ ꓠꓬꓲ꓾ ꓮ ꓡꓲˍ ꓟꓲ ꓔꓱꓹ ꓔꓱꓹꓼ ꓐꓰ ꓦꓰꓼ ꓟꓽ ꓠ ꓟ ꓤꓽ ꓟꓶ ꓤ ꓕꓲ ꓣꓳ ꓔꓬ ꓡꓳ꓿ 12 ꓬꓰ-ꓢꓴ ꓡꓳꓸ ꓟꓳꓻ ꓗꓷ ꓠꓬ ꓬꓲ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓤ ꓟꓶ ꓤꓽꓳ꓾ ꓠꓻ ꓓꓴ ꓕꓱ ꓟ ꓗꓪ ꓐꓰ ꓠꓴ ꓔꓯ ꓩꓴ ꓗꓷꓳ꓾ ꓐꓯ ꓖꓶˍ ꓡꓳ꓿ 13 ꓖꓳ ꓡꓱ ꓢꓲ ꓬꓰ-ꓢꓴ ꓬꓲ ꓡꓯꓼ ꓒꓯꓹ ꓠꓬꓲ ꓐꓽ ꓬꓲ ꓕꓯꓽ ꓢꓲ ꓗꓪ ꓚꓰꓹ ꓗꓷ ꓠꓬ꓾ ꓞꓼ ꓐꓰ ꓬꓲ ꓙꓴꓽ ꓝꓲꓸ ꓔꓱꓹ ꓡꓰ ꓠꓬꓲ꓾ ꓬꓲ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ 14 ꓜꓲꓼ ꓦꓲ ꓙꓵꓽ ꓒ ꓠꓬ ꓠꓽ ꓦꓬꓼ ꓠꓬꓲ ꓗꓪ ꓬꓰ-ꓢꓴ ꓠꓻ ꓫꓬꓹˍ ꓟ ꓪꓴꓸ ꓠꓬꓲ ꓠꓲꓹ ꓟ ꓦꓶ ꓢꓲ ꓖꓳ ꓗꓪ ꓜꓲꓼ ꓞꓹ ꓢꓴ ꓐꓴ ꓔꓯ꓾ ꓟꓬꓱꓽ ꓬꓰ ꓓꓻˍ ꓟ ꓛꓳꓼ ꓠꓬꓲ ꓙꓳˍ ꓡꓳ꓿ ꓖꓳ ꓛꓳꓼ ꓠꓬꓲ ꓗꓪ ꓠꓻ ꓫꓬꓹ ꓡ ꓛꓵˍ ꓡꓳ꓿ ꓠꓽ ꓦꓬꓼ ꓠꓬꓲ ꓗꓪ ꓠꓽ ꓕꓽ ꓡꓯ꓾ ꓐꓯˍ ꓡꓳ꓿ 15 ꓖꓳ ꓕꓯ ꓢꓲ ꓒꓽ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓐꓴꓳ꓾ ꓠꓴ ꓪꓽ ꓮꓽ ꓟ ꓥ ꓟꓲ ꓠꓽ ꓦꓬꓼ ꓠꓬꓲ ꓗꓪ ꓙꓱꓽ ꓤ ꓐꓱ ꓗꓪ ꓐꓰ ꓮꓸ ꓠꓬꓲˍ ꓐꓰ ꓕꓳꓽ ꓡ ꓟꓴꓽ ꓔꓯ ꓒꓶꓻ ꓢꓲ꓾ ꓬꓲꓻ ꓙꓬ ꓓꓳꓻ ꓖꓴ ꓗꓪ ꓢꓲ ꓙꓰˍ ꓡꓳ꓾ ꓟꓽ ꓥ ꓡ? 16 ꓖꓳ ꓡꓱ ꓥ ꓠꓬ ꓢ-ꓓꓯ ꓡꓰ ꓕꓱ ꓞꓲ ꓦꓰꓼ ꓘꓳꓼ ꓞꓳꓹ ꓔ ꓟ꓾ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ꓾ ꓤ ꓟꓶ ꓤ ꓕꓱ ꓟ ꓔꓯ꓾ ꓠꓽ ꓦꓬꓼ ꓠꓬꓲ ꓗꓪˍ ꓟꓲ ꓬꓲ ꓔꓯ ꓞꓳꓹ ꓔ ꓟ ꓞꓳꓹ ꓚ ꓗꓪ ꓐꓰ ꓒꓶꓻ ꓖꓶ ꓠꓯꓹ ꓡꓳ ꓟꓽ ꓥ ꓡ?꓾ ꓐꓯˍ ꓡꓳ꓿ 17 ꓬꓲ ꓕꓱ ꓡꓱ ꓐꓯ ꓗꓷ ꓠꓬ ꓬꓲ ꓔꓯ ꓔꓳꓹ ꓢꓴ ꓮꓽ ꓙꓵ ꓫꓸ ꓔꓳ ꓡꓰꓳ꓿ ꓖꓳ ꓡꓱ ꓢꓲ ꓬꓲ ꓬꓰˍ ꓟ ꓓꓵꓽ ꓙ ꓟꓶ ꓓꓴ ꓮꓽ ꓙꓵ ꓑꓶꓸ ꓓꓴ ꓑ ꓫꓬꓼ ꓐꓴ ꓠꓽ ꓗꓹ ꓛꓲˍ ꓡꓳ꓿ 18 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓪꓴ-ꓢ ꓗꓴꓷꓼ ꓠꓬ ꓮꓸ ꓫꓵˍ ꓡꓰ ꓐꓰ ꓗꓹ ꓡ? ꓥꓪ ꓠꓬ ꓮꓸ ꓫꓵ ꓕꓲ ꓫꓵꓽ ꓔꓯ ꓔꓯꓺ ꓠꓯꓹ ꓡ? 19 ꓪꓴ-ꓢ ꓗꓴꓷꓼ ꓠꓬ ꓪꓳꓽ ꓒꓲꓻ ꓫꓵꓸ ꓕꓲ ꓢꓶꓽˍ ꓡꓰ ꓐꓰ ꓗꓹ ꓡꓳ꓿ ꓕꓱ ꓟ ꓔꓯ ꓡꓽ ꓞꓳ ꓕꓲ ꓣꓳ ꓡꓰ ꓚꓲꓸ ꓛꓬ ꓪꓳꓽ ꓐꓱ ꓗꓪ ꓫꓵꓸ ꓔ ꓠꓬ ꓪꓴꓽ ꓡ ꓢꓲ꓾ ꓢꓲꓹ ꓜꓲꓻ ꓕꓲ ꓜꓲ ꓒꓬꓱꓼ ꓡ ꓡꓳ꓿ ꓖꓳ ꓕꓯ ꓟꓵꓽ ꓪꓴꓽ ꓗꓪ ꓟ ꓠꓬꓹ ꓤˍ ꓟꓲ ꓬꓲ ꓡꓯꓼ ꓗꓸ ꓗꓪ ꓬꓲ ꓘꓶꓻ ꓘꓶꓻ ꓡ ꓡꓳ꓾ ꓐꓯˍ ꓡꓳ꓿ 20 ꓝꓮꓲ ꓠꓬ ꓬꓲ ꓡꓰ꓾ ꓥꓪ ꓠꓬ ꓮꓸ ꓫꓵ ꓕꓲ ꓫꓵꓽ ꓡꓰ ꓪꓴ-ꓢ ꓗꓴꓷꓼ ꓔꓯ ꓔꓯꓺ ꓠꓯꓹ ꓡ? 21 ꓟꓴꓽ ꓗꓪ ꓗꓴꓷꓼ ꓠꓬ ꓤ ꓟꓶ ꓤ ꓕꓲ ꓣꓳ ꓡꓰ ꓫꓪꓺ ꓧꓶꓽ ꓮꓽ ꓙꓵ ꓡꓱꓸꓼ ꓙꓵꓽ ꓡ ꓗꓪ ꓛꓲ꓾ ꓫꓪ ꓧꓶ ꓢ ꓙꓳꓻ ꓠꓯꓸꓼ ꓗꓪ ꓚꓵꓺ ꓔ ꓟ ꓙꓵꓽ ꓧꓶꓽˍ ꓡꓰ ꓐꓰ ꓗ ꓡꓳ꓾ ꓐꓯˍ ꓡꓳ꓿ 22 ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓕꓯ꓾ ꓬꓲ ꓗꓳꓸ ꓬꓯꓼˍ ꓟ ꓡꓳꓻ ꓒꓱ ꓘꓹ ꓒꓱ ꓗꓪ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ 23 ꓡꓽ ꓞꓳ ꓕꓲ ꓣꓳ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓢꓯꓼ ꓟꓬ ꓝꓸ ꓟꓶ ꓢꓴ ꓠꓬ ꓠꓲꓸˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 24 ꓖꓳ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓣꓳꓺˍ ꓟ ꓗ ꓘꓶꓽ ꓗꓪ ꓓꓵ ꓡꓰ ꓠꓹ ꓟ ꓢꓯꓼ ꓕꓵꓼ꓿ ꓮ ꓡꓲꓳ ꓐꓯ ꓠꓬ ꓢꓹ ꓖꓪ ꓓꓵꓽ ꓙꓰ ꓠꓲꓹ ꓫꓵˍ ꓟꓲ ꓓꓵꓽ ꓙꓰ ꓟꓽ ꓪ ꓢꓴ ꓮꓽ ꓟꓬꓹ ꓙꓳˍ ꓥꓳ꓿ 25 ꓦꓲ ꓢꓲ ꓒꓽ ꓔꓴ ꓡ ꓢꓲ ꓗ ꓘꓶꓽ ꓚꓵꓸ ꓗꓷ ꓠꓬ꓾ ꓠꓴ ꓪꓽ ꓠꓽ ꓠꓱ ꓫꓱꓸ ꓟS ꓗꓪ ꓦꓰꓼ ꓞ ꓢꓲ ꓠꓬꓲ꓾ ꓗ ꓘꓶꓽ ꓲ'ꓼ ꓔꓴ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓔꓯ ꓗ ꓘꓶꓽ ꓒꓴ ꓖꓶ ꓡꓯ꓾ ꓐꓯˍ ꓟꓲ꓾ ꓠꓴ ꓪꓽ ꓔꓯ ꓥꓪ ꓟꓽ ꓢꓷ꓾ ꓠꓴ ꓪꓽ ꓮ ꓡꓲ ꓗꓪ ꓐꓰ ꓡꓻ ꓟˍ ꓟꓲ ꓥꓪ ꓟꓽ ꓢꓷ꓾ ꓐꓰ ꓒꓳꓹ ꓖꓶ ꓡ ꓥꓳ꓿ 26 ꓖꓳ ꓕꓯ ꓠꓴ ꓪꓽ ꓠꓬ꓾ ꓥꓪ ꓠꓴꓽ ꓠꓽ ꓠꓴ ꓟꓲꓽ ꓙꓬ ꓗꓪ ꓜꓽ ꓠꓬꓲ ꓓꓳꓻ ꓠꓬꓲ ꓬꓰ ꓠꓬꓲꓳ꓿ ꓠꓴˍ ꓟꓲ ꓥꓪ ꓠꓴꓽ ꓔꓯ ꓙꓵꓺ ꓗꓪ ꓟꓸ ꓟꓲꓽ ꓟꓸ ꓖꓶ ꓡ ꓠꓬꓲꓳ꓾ ꓐꓰ ꓐꓯˍ ꓥꓳ꓿ 27 ꓖꓳ ꓡꓱ ꓥ ꓟꓲ ꓬꓲ ꓡꓰ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓮ ꓡꓲ ꓗꓪ ꓐꓰ ꓡꓻˍ ꓟ ꓥꓪ ꓟꓽ ꓢꓷ꓿ ꓟꓽ ꓙꓲ ꓟꓽ ꓜꓳꓽ ꓟ ꓬꓰ ꓢꓴ ꓠꓴ ꓪꓽ ꓮꓽ ꓙꓵ ꓠꓬ ꓥꓪ ꓔꓯˍ ꓐꓰ ꓧꓹ ꓙꓰ Gꓽ꓾ ꓐꓰ ꓐꓯ ꓖꓶ ꓡ ꓥꓳ꓿ 28 ꓠꓴ ꓪꓽ ꓠꓬ ꓮ-ꓐ-ꓡ-ꓦˍ ꓐꓰ ꓬꓲ-ꓢˍ ꓐꓰ ꓬ-ꓗꓴˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓮ ꓙꓵ꓾ ꓪꓴ-ꓢ ꓗꓴꓷꓼ ꓗꓪ ꓔꓬ ꓟ ꓔꓯ ꓡꓳꓸ ꓟꓳꓻ ꓢꓲ꓾ ꓠꓴ ꓪꓽ ꓔꓯ ꓠꓽ ꓠꓱ ꓫꓱꓸ ꓟS ꓗꓪ ꓖꓼ ꓓꓳ ꓗꓷˍ ꓕꓯ꓾ ꓥꓴꓻ ꓠꓬꓲ ꓢꓶꓽ ꓛꓲꓽ ꓠꓬꓲ ꓗꓷ ꓡꓰˍ ꓥꓳ꓿ 29 ꓐꓶꓽ ꓓꓳ ꓐꓶ ꓓꓵꓽˍ ꓐꓰ꓾ ꓖꓴ ꓪꓴꓸ ꓖꓴ ꓟꓶꓸ ꓗꓪ ꓐꓰ ꓡꓽ ꓞꓳ ꓜꓲꓼ ꓡ ꓢꓲ꓾ ꓪꓴ-ꓢ ꓗꓴꓷꓼ ꓜꓻ ꓫꓳꓻˍ ꓟ ꓗꓪ ꓠꓬꓲꓸ ꓠꓸ ꓡ ꓥꓳ꓿ 30 ꓠ ꓠꓹ꓾ ꓟꓲꓸ ꓙꓬꓽ ꓢꓲ ꓢꓴ ꓕꓲ ꓐꓱ ꓠꓬ ꓗꓸ ꓠꓯꓸ ꓢꓲ ꓗꓷ ꓡꓰˍ ꓥꓳ꓿ ꓗꓸ ꓠꓯꓸ ꓢꓲ ꓢꓴ ꓕꓲ ꓐꓱ ꓠꓽ ꓟꓲꓸ ꓙꓬꓽ ꓢꓲ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 31 ꓖꓳ ꓕꓲ ꓙꓵꓹ ꓗꓪ꓾ ꓒ-ꓡꓲ-ꓢꓷ ꓡꓽ ꓞꓳ ꓕꓲ ꓐꓱ ꓬꓰ-ꓢꓴ ꓔꓯ ꓡ ꓢꓲ꓾ ꓠꓴ ꓕꓱ ꓗꓪ ꓐꓰ ꓓꓳ ꓙꓰ Gꓽ꓾ ꓮ ꓡꓲꓳ ꓐꓯ ꓠꓬ ꓩꓴ-ꓡꓲ ꓠꓽ ꓠꓴ ꓔꓯ ꓢꓰꓼ ꓠꓲꓹ ꓫꓵˍ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ 32 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓙꓰ ꓢꓲ ꓪꓰ ꓕꓳꓹ ꓖꓳ ꓟ ꓔꓯ ꓕꓱ ꓡꓱ ꓐꓯ ꓖꓶ ꓬꓰ꓿ ꓠꓬꓲꓸ ꓠꓬꓲˍ ꓐꓰ ꓢꓸ ꓖꓶ ꓥꓪ ꓠꓬ ꓠꓲꓽ ꓖꓼ ꓠꓬꓲ ꓠꓻ ꓫꓬꓹ ꓠꓬꓲ ꓬꓰˍ ꓥꓳ꓿ ꓢ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓥꓪ ꓟꓬꓱꓽ ꓬꓰ ꓓꓳ ꓡꓰˍ ꓥꓳ꓾ ꓐꓯ ꓖꓶ꓿ 33 ꓖꓳ ꓡꓱ ꓥ ꓟꓲ ꓠꓬꓲꓸ ꓠꓬꓲˍ ꓐꓰ ꓢꓸ ꓖꓶꓺˍ ꓐꓰ ꓪꓻ ꓠꓬꓲ ꓠꓬ ꓥꓪ ꓠꓽ ꓟꓲꓸ ꓙꓬꓽ ꓙꓰ ꓠ ꓗꓹ ꓢꓰꓽ ꓡꓳ꓿ ꓮ ꓡꓲꓳ ꓐꓯ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓟꓽ ꓥ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓕꓲ ꓣꓳ ꓫꓵꓻ ꓟꓽ ꓓ ꓡꓳ ꓫꓵ ꓥ ꓡꓳ꓿ 34 ꓳ꓾ ꓙꓱ-ꓣꓴ-ꓢ-ꓡꓱꓳ꓾ ꓙꓱ-ꓣꓴ-ꓢ-ꓡꓱꓳ꓾ ꓟꓷꓽ ꓠꓷꓹ ꓝꓸ ꓢꓴ ꓔꓯ ꓢꓰꓼ ꓢꓲ꓾ ꓠꓴ ꓔꓬ ꓗꓪ ꓝꓲ ꓩꓴ ꓡ ꓢꓴ ꓔꓯ Bꓸ ꓛꓲ ꓡꓰ ꓡꓳ ꓢꓴꓳ꓾ ꓮꓸ Bꓸ ꓟ ꓓꓴ ꓡꓯꓼ ꓡꓰ ꓬꓲ ꓤꓽ ꓔꓯ ꓟꓵꓸ ꓖꓶˍ ꓟ ꓡꓰ ꓐꓰ꓾ ꓥꓪ ꓡꓰ ꓠꓴ ꓤ ꓠꓱ ꓐꓴ ꓔꓯ ꓘꓴ ꓜꓲꓼ ꓡ ꓠꓹ ꓟ ꓮꓽ ꓟꓬꓹ ꓧꓪ ꓬꓰ ꓗꓷˍ ꓟꓲ꓾ ꓠꓴ ꓪꓽ ꓡ ꓟꓽ ꓫꓳ꓿ 35 ꓖꓳ ꓡꓱ ꓠꓬꓲ ꓠꓴ ꓪꓽ ꓦꓲ ꓠꓬ ꓙꓬ ꓓꓷꓼ ꓓꓷꓼ ꓡꓳ ꓒꓰꓹ ꓔ ꓓꓴ ꓗꓷ ꓡꓰˍ ꓥꓳ꓿ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓢꓲ ꓒꓽ ꓟꓬꓱꓺ ꓗꓪ ꓐꓰ ꓡꓻ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓰ ꓠꓴ ꓪꓽ ꓟꓽ ꓐꓯ ꓕꓻ ꓑꓳ꓾ ꓠꓴ ꓪꓽ ꓥꓪ ꓔꓯ ꓝꓮꓲ ꓟꓽ ꓟꓳꓻꓳ꓾ ꓐꓯˍ ꓡꓳ꓿

ꓡꓴ-ꓗ 14

1 ꓠꓽ ꓦꓬꓼ ꓠꓬꓲ ꓗꓪ ꓬꓰ-ꓢꓴ ꓠꓬ ꓒ-ꓡꓲ-ꓢꓷ ꓐꓴ ꓗꓪ ꓟ ꓙꓵꓽ ꓢꓴ ꓕꓲ ꓣꓳ ꓦꓲ ꓗꓪ ꓜ ꓜꓽˍ ꓐꓰ ꓓꓵꓽ ꓡꓰˍ ꓡꓳ꓿ ꓬꓲ ꓪꓽ ꓠꓬ ꓬꓲ ꓔꓯ ꓬꓲ ꓜꓶꓻ ꓕꓺ ꓡꓳꓸ ꓔꓬ ꓡꓳ꓿ 2 ꓖꓳ ꓕꓯ ꓬꓲ ꓟꓲꓽ ꓙꓬ ꓗꓪ ꓖꓳ ꓓꓱꓽ ꓒꓱꓼ ꓢꓲ ꓠꓻ ꓢꓴ ꓕꓲ ꓣꓳ ꓔꓬ ꓡꓳ꓿ 3 ꓬꓰ-ꓢꓴ ꓡꓰ ꓙꓵꓽ ꓗ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓔꓯ꓾ ꓠꓽ ꓦꓬꓼ ꓠꓬꓲ ꓗꓪ ꓠꓻ ꓫꓬ ꓓꓻ ꓡ? ꓟꓽ ꓓ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 4 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓬꓲ ꓔꓯ ꓟꓽ ꓒꓳꓹ ꓖꓶ ꓖꓶ ꓟꓽ ꓪꓳꓹ ꓔꓬ ꓡꓳ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓖꓳ ꓓꓱꓽ ꓒꓱꓼ ꓢꓴ ꓔꓯ ꓖꓳꓻ ꓔꓴ ꓢꓲ ꓠꓻ ꓫꓬꓹ ꓖꓶ ꓗꓷ ꓠꓬ ꓬꓲꓼ ꓙꓰ ꓝꓲˍ ꓡꓳ꓿ 5 ꓖꓳ ꓡꓱ ꓢꓲ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓗꓳ ꓡꓳ ꓗꓪ꓾ ꓮꓽ ꓟ ꓕꓳꓽ ꓡ ꓟꓴ ꓕꓲ ꓘꓹ꓾ ꓥ ꓠꓬ ꓮ ꓠꓬꓲꓽ ꓕꓲ ꓘꓹ꓾ ꓠ ꓦꓬꓼ ꓠꓬꓲ ꓕꓯ ꓟꓲꓻ ꓘꓴꓻ ꓗꓪ ꓞꓰꓻ ꓓꓵꓽ ꓡꓰ ꓠꓬ ꓞꓼ ꓐꓰ ꓟꓽ ꓚꓵꓹ ꓓꓯꓺ ꓡ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 6 ꓬꓲ ꓪꓽ ꓠꓽ ꓮꓸ ꓫꓵ ꓒꓳꓹ ꓖꓶ ꓓꓴ ꓟꓽ ꓙꓳ ꓗꓷ ꓡꓰꓳ꓿ 7 ꓪꓰ ꓤ ꓐꓴ ꓠꓬ ꓞꓳ ꓪꓴꓽ ꓠꓬꓲꓸ ꓠꓸ ꓖꓴ ꓔꓯ ꓢꓲ ꓣꓴꓻˍ ꓟ ꓔꓯ ꓬꓰ-ꓢꓴ ꓟꓳꓻˍ ꓕꓯ꓾ ꓔꓯ ꓥꓳꓽ ꓡꓰ ꓬꓲ ꓪꓽ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ 8 ꓠꓴ ꓪꓽ ꓔꓯ ꓤ ꓟꓶꓻ ꓝꓱ ꓑꓮꓲꓽ ꓗꓪ ꓢꓴ ꓡꓰ ꓘꓴꓻ ꓡ ꓕꓯ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬꓲꓸ ꓠꓸ ꓖꓴ ꓗꓪ ꓕꓽ ꓠꓬꓲꓸ ꓠꓸ ꓬꓰ꓿ ꓟꓽ ꓥ ꓠꓬ ꓦꓲ ꓢꓲ ꓒꓽ ꓡꓰ ꓠꓴ ꓢꓶꓸ ꓟꓽ ꓞꓲ ꓒꓵꓽˍ ꓟ ꓕꓲ ꓣꓳ ꓘꓴ ꓔ ꓟ ꓙꓳ ꓢꓲ꓾ 9 ꓠꓴˍ ꓐꓰ ꓖꓳ ꓕꓲ ꓣꓳ ꓔꓯ ꓘꓴ ꓢꓴ ꓡ ꓢꓲ ꓠꓴ ꓔꓯ꓾ ꓕꓱ ꓕꓲ ꓣꓳ ꓔꓯ ꓠꓬꓲꓸ ꓠꓸ ꓖꓴ ꓙꓵ ꓖꓶ ꓟꓴꓽ꓾ ꓐꓰ ꓐꓯ ꓡ ꓠꓬ꓾ ꓠꓴ ꓠꓽ ꓟꓽ ꓒꓵꓽ ꓟ ꓠꓬꓲꓸ ꓠꓸ ꓖꓴ ꓗꓪ ꓫꓸ ꓔꓳ ꓔꓳˍ ꓐꓰ ꓬꓯꓼ ꓙꓰ ꓠ ꓗꓷ ꓡꓰˍ ꓥꓳ꓿ 10 ꓢꓴ ꓡꓰ ꓠꓴ ꓔꓯ ꓘꓴ ꓡ ꓕꓯ꓾ ꓟꓽ ꓒꓵˍ ꓟ ꓠꓬꓲꓸ ꓠꓸ ꓖꓴ ꓗꓪ ꓧꓶꓸ ꓕꓯꓽ ꓠꓬꓲꓸ ꓠꓸ꓿ ꓖꓳ ꓡꓱ ꓠꓬ ꓠꓴ ꓔꓯ ꓘꓴ ꓢꓴ ꓛꓲ ꓡ ꓕꓯ꓾ ꓗꓪ ꓛꓳꓽꓳ꓾ ꓖꓼ ꓑꓳꓸ ꓟꓴˍ ꓟ ꓗꓪ ꓠꓬꓲꓸ ꓠꓸ ꓡꓯ꓾ ꓐꓰ ꓠꓴ ꓔꓯ ꓐꓯ ꓖꓶ ꓡ ꓥꓳ꓿ ꓖꓳ ꓕꓯ ꓠꓴˍ ꓐꓰ ꓕꓲꓽ ꓪꓺꓼ ꓜ ꓜꓽˍ ꓐꓰ ꓠꓬꓲꓸ ꓠꓸ ꓔꓬ ꓢꓴ ꓮꓽ ꓙꓵ ꓟꓲꓽ ꓙꓬ ꓗꓪ ꓠꓴ ꓠꓬ ꓟꓬꓱ ꓓꓳꓽ ꓙꓳˍ ꓥꓳ꓿ 11 ꓮ ꓡꓲꓳ ꓐꓯ ꓠꓬ ꓬꓲ ꓚꓲꓸ ꓛꓬ ꓔꓯ ꓓꓳꓹ ꓟꓴ ꓢꓴ ꓥ ꓕ ꓑꓳꓸ ꓠꓬ ꓱ'ꓺ ꓡꓰˍ ꓥꓳ꓿ ꓚꓲꓸ ꓛꓬ ꓔꓯ ꓙꓻ ꓣꓳꓽ ꓡꓰ ꓝꓲ ꓢꓴ ꓠꓽ ꓓꓳꓹ ꓟꓴˍ ꓟ ꓟꓶˍ ꓥꓳ꓾ ꓐꓯˍ ꓡꓳ꓿ 12 ꓖꓳ ꓗꓸ ꓠꓯꓸ ꓬꓰ-ꓢꓴ ꓡꓰ ꓬꓲ ꓔꓯ ꓘꓴ ꓢꓴ ꓦꓲ ꓢꓲ ꓒꓽ ꓔꓯ꓾ ꓠꓴ ꓠꓬ ꓢꓴꓻ ꓔꓯ ꓜ ꓘꓴꓻ ꓖꓶ ꓜꓽˍ ꓕꓯ꓾ ꓥ ꓠꓬ ꓟꓶꓼ ꓘꓶꓼ ꓜ ꓫꓬꓹ ꓖꓶ ꓜꓽ ꓕꓯ꓾ ꓠꓴ ꓗꓪ ꓛꓳꓽ ꓐꓴ ꓔꓯ ꓥ ꓟꓲ꓾ ꓠꓴ ꓬꓲꓼ ꓠꓴ ꓠꓬꓲ ꓐꓴ ꓔꓯ ꓥ ꓟꓲ꓾ ꓠꓴ ꓫꓵꓽ ꓠꓴ ꓧꓪ ꓐꓴ ꓔꓯ ꓥ ꓟꓲ꓾ ꓜꓽ ꓓꓴ ꓓꓳꓻ ꓓꓴ ꓙꓳˍ ꓟ ꓠꓶꓽ ꓛꓳ ꓕꓲꓺ ꓛꓳ ꓐꓴ ꓔꓯˍ ꓟꓲ ꓕꓽ ꓘꓴ꓿ ꓟꓽ ꓥ ꓠꓬ ꓬꓲ ꓪꓽˍ ꓟꓲ ꓠꓴ ꓔꓯ ꓘꓴꓻ ꓚꓱꓹ ꓖꓶ ꓜꓽ ꓡ ꓥꓳ꓿ 13 ꓠꓴ ꓜꓻ ꓕꓲ ꓜ ꓫꓳꓺˍ ꓕꓯ꓾ ꓞꓳ ꓫꓸˍ ꓐꓰ ꓛꓲ ꓐꓬ ꓡꓯꓼ ꓐꓬ ꓢꓴˍ ꓐꓰ꓾ ꓛꓲꓺ ꓫꓳˍ ꓐꓰ ꓟꓬ ꓔꓶ ꓔꓯ ꓘꓴ ꓖꓶ ꓜꓽ꓿ 14 ꓬꓲ ꓪꓽ ꓠꓽ ꓠꓴ ꓔꓯ ꓮꓸ ꓫꓵ ꓡꓲꓸ ꓖꓶꓽ ꓓꓴ ꓟꓽ ꓙꓳ ꓠꓬꓲ꓾ ꓠꓴ ꓠꓬ ꓶꓼ ꓤ ꓫꓱꓹ ꓤ ꓟꓶ ꓢꓲ꓾ ꓔꓱꓹ ꓜꓳꓽ ꓢꓴ ꓐꓴ ꓢꓯꓸ ꓬꓲꓼ ꓡ ꓕꓯ ꓠꓴ ꓔꓯ ꓡꓲꓸ ꓖꓶ ꓡ ꓥꓳ꓾ ꓐꓯˍ ꓡꓳ꓿ 15 ꓬꓲˍ ꓐꓰ ꓕꓲꓽ ꓪꓺꓼ ꓜ ꓜꓽˍ ꓐꓰ ꓗꓳ ꓔꓬ ꓢꓴ ꓪꓰ ꓤ ꓕꓲ ꓣꓳ ꓕꓱ ꓟ ꓔꓯ ꓑ ꓙꓽ ꓠꓬ ꓬꓲ ꓡꓰ ꓬꓰ-ꓢꓴ ꓔꓯ꓾ ꓪꓴ-ꓢ ꓗꓴꓷꓼ ꓗꓪ ꓟ ꓜꓻ ꓫꓳ ꓑꓮꓲꓽ ꓗꓪ ꓜ ꓜꓽ ꓟꓶ ꓢꓴ ꓠꓬ ꓮꓽ ꓘꓶꓸ ꓶꓼ ꓙꓳ ꓫꓱꓹ ꓙꓳˍ ꓥꓳ꓾ ꓐꓯˍ ꓡꓳ꓿ 16 ꓬꓰ-ꓢꓴ ꓠꓽ ꓬꓲ ꓔꓯ꓾ ꓡꓽ ꓞꓳ ꓕꓲ ꓣꓳ ꓠꓬ ꓜ ꓓꓽ ꓟ ꓕꓲ ꓜꓽ ꓫꓬꓹ ꓢꓲ ꓪꓰ ꓤ ꓮꓽ ꓟꓬꓹ ꓘꓴˍ ꓡꓳ꓿ 17 ꓜ ꓜꓽ ꓝꓲꓸ ꓛꓲ ꓡ ꓠꓬ ꓬꓲ ꓚꓳ ꓑꓸ ꓔꓯ ꓝꓲ ꓩꓴ ꓗꓷ ꓢꓲ꓾ ꓬꓲ ꓡꓰ ꓘꓴ ꓔ ꓟ ꓪꓰ ꓤ ꓔꓯ꓾ ꓡꓯ Gꓽ꓾ ꓮ ꓟꓶ ꓠꓬ ꓮꓸ ꓫꓵˍ ꓟꓲ ꓙꓽ ꓖꓶ ꓖꓴꓻ ꓡꓰꓳ꓾ ꓐꓰ ꓐꓯ ꓖꓶ ꓬꓰ ꓝꓲˍ ꓡꓳ꓿ 18 ꓖꓳ ꓡꓱ ꓥ ꓟꓲ ꓬꓲ ꓪꓽ ꓮꓽ ꓙꓵ ꓠꓽ ꓕꓲ ꓣꓳ ꓗꓸ ꓠꓯꓸ ꓕꓲ ꓣꓳ ꓢꓸ ꓬꓰꓽ ꓔꓴ ꓡ ꓢꓲ꓾ ꓬꓲ ꓪꓴꓸ ꓕꓲ ꓣꓳ ꓠꓬ꓾ ꓥꓪ ꓦꓻ ꓟꓲ ꓕꓲ ꓡꓯꓼ ꓪꓴꓻ ꓔꓸ ꓠꓬꓲ ꓡꓳꓸ ꓠꓬꓲ ꓙꓰ ꓠ ꓗꓹ ꓡꓳ꓿ ꓮ ꓡꓲ ꓟꓽ ꓬꓰꓳ꓾ ꓖꓽ ꓖꓶ ꓡꓯ꓾ ꓐꓯˍ ꓡꓳ꓿ 19 ꓝꓮꓲ ꓕꓲ ꓣꓳ ꓠꓬ꓾ ꓥꓪ ꓮꓸ ꓠꓬꓲꓽ ꓥꓪꓽ ꓝꓱꓺ ꓪꓴꓻ ꓗꓷ ꓠꓬꓲ꓾ ꓥꓪ ꓤꓹ ꓫꓵꓽ ꓠꓬꓲ ꓙꓰ ꓠꓲꓹ ꓫꓵˍ ꓡꓳ꓿ ꓥꓪ ꓔꓯ ꓖꓽ ꓖꓶ ꓡꓯ꓾ ꓐꓯˍ ꓡꓳ꓿ 20 ꓠꓱꓸ ꓐꓯꓼ ꓕꓲ ꓣꓳ ꓠꓬ꓾ ꓥꓪ ꓤꓽ ꓟꓶ ꓘꓴꓻ ꓗꓷ ꓠꓬꓲ ꓡ ꓟꓽ ꓐ ꓡꓺꓳ꓾ ꓐꓯˍ ꓡꓳ꓿ 21 ꓚꓳ ꓑꓸ ꓖꓳ ꓟ ꓬꓲꓼ ꓡ ꓢꓲ ꓕꓱ ꓟ ꓮꓽ ꓙꓵ ꓬꓲ ꓢꓲ ꓒꓽ ꓔꓯ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓢꓲ ꓒꓽ ꓠꓲꓹ ꓟ ꓦꓶꓻ ꓢꓲ ꓬꓲ ꓚꓳ ꓑꓸ ꓔꓯ꓾ ꓡꓳ ꓒꓱ ꓗꓪ ꓟ ꓙ ꓖꓴ ꓓꓽ ꓟ ꓐꓰ ꓙ ꓧꓹ ꓤ ꓗꓪ ꓮꓸ ꓟꓲꓸ ꓓꓳ ꓙꓰ ꓢꓲ꓾ ꓞꓳ ꓫꓸˍ ꓐꓰ ꓛꓲꓺ ꓐꓬ ꓡꓯꓼ ꓐꓬ ꓢꓴˍ ꓐꓰ꓾ ꓟꓬ ꓔꓶꓺˍ ꓐꓰ ꓛꓲ ꓫꓳꓸ ꓔꓯ ꓧꓳꓽ ꓓꓵꓽ ꓡꓯ꓾ ꓐꓯ ꓖꓶˍ ꓡꓳ꓿ 22 ꓖꓳ ꓗꓸ ꓠꓯꓸ ꓚꓳ ꓑꓸ ꓡꓰ꓾ ꓢꓲ ꓒꓽꓳ꓾ ꓠꓴ ꓡꓰ ꓕꓵꓼ ꓪꓽ ꓖꓶˍ ꓟ ꓮꓽ ꓙꓵ ꓬꓰ ꓓꓳ ꓡꓰꓳ꓿ ꓖꓳ ꓡꓱ ꓥ ꓟꓲ ꓔꓬ ꓖꓴ ꓙꓳˍ ꓢꓰꓽ ꓡꓳ꓾ ꓐꓯˍ ꓡꓳ꓿ 23 ꓢꓲ ꓒꓽ ꓠꓬ ꓚꓳ ꓑꓸ ꓖꓳ ꓟ ꓔꓯ꓾ ꓥꓪ ꓦꓲ ꓗꓪ ꓔꓬ ꓐꓲ ꓡꓰ ꓠꓹ ꓟ꓾ ꓙ ꓖꓴ ꓙ ꓐꓽ ꓗꓪ ꓙꓰ ꓢꓲ꓾ ꓡꓽ ꓞꓳ ꓔꓯ ꓟꓽ ꓓ ꓟꓽ ꓞꓽ ꓧꓳꓽ ꓓꓵ ꓡꓯ꓾ ꓐꓯˍ ꓡꓳ꓿ 24 ꓮ ꓡꓲꓳ ꓐꓯ ꓠꓬ ꓥꓪ ꓠꓴ ꓪꓽ ꓔꓯ ꓐꓯ ꓖꓶꓽˍ ꓠꓬꓲ꓾ ꓧꓶꓸ ꓕꓯ ꓘꓴ ꓔ ꓟ ꓡꓽ ꓞꓳ ꓮ ꓡꓲ ꓕꓲ ꓣꓳ ꓔꓯˍ ꓟꓲ꓾ ꓥꓪ ꓟꓶꓼ ꓘꓶꓼ ꓜ ꓔꓯ ꓟꓽ ꓢꓳꓽ ꓠꓬꓲ ꓝꓲ꓾ ꓐꓯˍ ꓡꓳ꓾ ꓐꓰ ꓬꓰ-ꓢꓴ ꓡꓰ ꓐꓯ ꓖꓶˍ ꓡꓳ꓿ 25 ꓞꓳ ꓜꓴ ꓓꓽ ꓟ ꓬꓰ-ꓢꓴ ꓔꓯ ꓛꓳ ꓙꓰ ꓔꓬ ꓕꓯ꓾ ꓬꓲ ꓔꓲꓸ ꓒꓳꓹ ꓢꓲ ꓬꓲ ꓪꓽ ꓔꓯ꓾ 26 ꓮꓽ ꓟ ꓥꓪ ꓔꓯ ꓡꓻˍ ꓠꓬ꓾ ꓬꓲ ꓚꓲꓸ ꓛꓬ ꓐꓹ ꓐ ꓟꓹ ꓟˍ ꓐꓰ꓾ ꓤꓽ ꓟꓶ ꓤ ꓠꓱˍ ꓐꓰ꓾ ꓬꓲꓼ ꓤ ꓠꓬꓲ ꓤˍ ꓐꓰ꓾ ꓮꓸ ꓝꓲ ꓠꓬꓲ ꓟˍ ꓐꓰ꓾ ꓬꓲ ꓚꓲꓸ ꓛꓬ ꓔꓯ ꓠꓲꓹ ꓠꓵˍ ꓟ ꓢꓶꓸ ꓟ ꓞꓲ ꓥꓪ ꓔꓯ ꓟꓽ ꓠꓲꓹ ꓠꓵ ꓕꓯ ꓠꓽ꓾ ꓥꓪ ꓛꓳꓽ ꓒꓯꓹ ꓬꓰ ꓟꓽ ꓒꓬꓱꓼ ꓡ꓿ 27 ꓝꓮꓲ ꓮꓽ ꓟ ꓥ ꓟꓲ ꓬꓲ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓢꓲ ꓥꓪ ꓔꓯ ꓟꓽ ꓛꓳ ꓠꓬ꓾ ꓥꓪ ꓛꓳꓽ ꓒꓯꓹ ꓬꓰ ꓟꓽ ꓒꓬꓱꓼ ꓡ꓿ 28 ꓠꓴ ꓪꓽ ꓮ ꓡꓲ ꓕꓲ ꓣꓳ ꓞꓳꓽ ꓦꓲ ꓔꓳꓹ ꓠꓲꓹ ꓫꓵˍ ꓠꓬ꓾ ꓫꓬꓹ ꓓꓳ ꓡꓰ ꓠꓹ ꓟ ꓫꓬꓹ ꓒꓵꓽ ꓙꓳ ꓟꓽ ꓙꓳ ꓐꓰ꓾ ꓧꓶꓸ ꓕꓯ ꓡꓰ ꓠꓬꓲꓸ ꓠꓸ ꓢꓲ ꓟꓽ ꓢꓪꓸ ꓠꓬꓲ ꓡ? 29 ꓟꓽ ꓥ ꓠꓬ ꓦꓲ ꓚꓰ ꓜꓶꓻ ꓗꓷˍ ꓟꓲ ꓫꓬꓹ ꓓꓳ ꓡꓰ ꓟꓽ ꓘꓴ ꓠꓬ꓾ ꓡꓳꓸ ꓟꓳꓻ ꓢꓴ ꓮꓽ ꓙꓵ ꓬꓲ ꓔꓯ ꓤꓲꓺ ꓢꓲ꓾ 30 ꓡꓽ ꓞꓳ ꓕꓱ ꓕꓲ ꓣꓳ ꓠꓬ ꓦꓲ ꓫꓬꓹ ꓪꓴꓸ ꓔꓴ ꓗꓷˍ ꓟꓲ ꓫꓬꓹ ꓓꓳ ꓡꓰ ꓟꓽ ꓘꓴ꓾ ꓐꓰ ꓐꓯ ꓡ ꓥꓳ꓿ 31 ꓝꓮꓲ ꓪ ꓔꓲꓸ ꓕꓲ ꓣꓳ ꓠꓬ ꓬꓲ ꓟꓯꓼ ꓕꓲ ꓟꓶꓽ ꓣꓳ ꓧꓳꓽ ꓔ ꓢꓲ꓾ ꓠꓱꓸ ꓐꓯꓼ ꓪ ꓔꓲꓸ ꓔꓯ ꓢꓰꓼ ꓡꓯꓽ ꓘꓳ ꓠꓹ ꓟ ꓓꓳ ꓙꓰˍ ꓐꓷˍ ꓠꓬ꓾ ꓬꓲ ꓔꓯ ꓔꓳꓹ ꓡ ꓢꓴ ꓟꓯꓼ ꓠꓬꓲꓽ ꓟꓶꓽ ꓣꓳ ꓔꓯ ꓔꓳꓹ ꓜꓳˍ ꓕꓯ꓾ ꓧꓪꓸ ꓘꓴꓻ ꓧꓪꓸ ꓟꓽ ꓘꓴ ꓐꓰ ꓬꓲ ꓧꓶꓸ ꓕꓯˍ ꓡꓰ ꓠꓬꓲꓸ ꓠꓸ ꓢꓲ ꓚꓬꓹ ꓠꓬꓲˍ ꓥꓳ꓾ ꓟꓽ ꓥ ꓡ? 32 ꓧꓪꓸ ꓟꓽ ꓘꓴ ꓠꓸꓼ ꓗꓹ ꓕꓯ ꓠꓽ꓾ ꓬꓲ ꓔꓯ ꓔꓳꓹ ꓡ ꓢꓴ ꓖꓳ ꓕꓲ ꓣꓳ ꓶꓽ ꓤꓻ ꓔꓬ ꓢꓰ ꓕꓯˍ ꓡꓰ꓾ ꓝꓲ ꓓꓴ ꓝꓲ ꓩꓴ ꓗꓷ ꓢꓲ ꓬꓲˍ ꓐꓰ ꓧꓳꓹ ꓡꓯꓽ ꓘꓳ ꓡꓰ ꓠꓹ ꓟ ꓓꓰꓽ ꓬꓰ ꓝꓲˍ ꓥꓳ꓿ 33 ꓖꓳ ꓟ ꓡꓰ ꓐꓰ ꓠꓴ ꓪꓽ ꓮ ꓡꓲ ꓕꓲ ꓣꓳˍ ꓟꓲ꓾ ꓬꓲ ꓙꓳˍ ꓟ ꓮꓽ ꓙꓵ ꓔꓯ ꓟꓽ ꓡꓳ ꓒꓰꓹ ꓕꓯ ꓠꓽ꓾ ꓥꓪ ꓛꓳꓽ ꓒꓯꓹ ꓬꓰ ꓟꓽ ꓒꓬꓱꓼ ꓡ꓿ 34 ꓠ ꓠꓹ꓾ ꓞꓼ ꓐꓳ ꓠꓽ ꓙꓲˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓛꓵꓻ ꓢꓯꓼ ꓒꓲꓼ ꓬꓰ ꓠꓬ ꓮꓸ ꓫꓵ ꓕꓲ ꓫꓵ ꓡꓰ ꓝꓮꓲ ꓛꓵꓻ ꓡ ꓝꓲ ꓠꓯꓹ ꓢꓰꓽ ꓡ? 35 ꓦꓻ ꓟꓲ ꓗꓪ ꓥ ꓟꓲ꓾ ꓛꓲꓸ ꓑꓱꓺ ꓗꓪ ꓥ ꓟꓲ ꓣꓱꓽ ꓟꓽ ꓬꓯꓼ꓿ ꓠꓱ ꓫꓱ ꓟꓸꓼ ꓗꓪ ꓡꓳ ꓩꓴ ꓗꓷ ꓓꓴˍ ꓡꓰꓽ ꓥꓳ꓿ ꓠꓸ ꓑꓳ ꓙꓳ ꓢꓴ ꓠ ꓠꓹ꓾ ꓐꓯˍ ꓡꓳ꓿

ꓡꓴ-ꓗ 15

1 ꓝꓲꓸ ꓫ ꓢꓴˍ ꓐꓰ ꓝꓴꓲ ꓙꓳ ꓢꓴ ꓐꓴ ꓠꓬ꓾ ꓬꓰ-ꓢꓴ ꓟꓸ ꓟꓲꓽ ꓚˍ ꓟ ꓔꓯ ꓠ ꓠꓹ ꓠꓹ ꓟ ꓮꓽ ꓙꓵ ꓜꓲꓼ ꓡ ꓡꓳ꓿ 2 ꓖꓳ ꓡꓱ ꓠꓬ ꓒ-ꓡꓲ-ꓢꓷ ꓐꓴ ꓐꓰ ꓙꓵꓽ ꓗ ꓟꓸ ꓒꓽ ꓐꓴ ꓠꓬ꓾ ꓬꓰ-ꓢꓴ ꓕꓱ ꓕꓲ ꓣꓳ ꓠꓽ ꓝꓴꓲ ꓙꓳ ꓢꓴ ꓔꓯ ꓘꓳꓻ ꓣꓴ ꓢꓲ꓾ ꓬꓲ ꓪꓽ ꓐꓰ ꓕꓲꓽ ꓪꓺꓼ ꓜ ꓜꓽˍ ꓡꓳ꓾ ꓐꓰ ꓱ'ꓽ ꓠꓱꓽˍ ꓡꓳ꓿ 3 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓔꓯꓺ ꓥꓳꓽ ꓕꓱ ꓡꓱ ꓕꓲ ꓟ ꓐꓯ ꓖꓶˍ ꓡꓳ꓿ 4 ꓠꓴ ꓪꓽ ꓗꓪ ꓟ ꓡꓽ ꓞꓳ ꓕꓲ ꓣꓳ꓾ ꓮ ꓣꓳ ꓕꓲ ꓦꓬꓻ ꓟ ꓙꓳ ꓢꓲ ꓕꓲ ꓟ ꓒꓲꓼ ꓬꓰ ꓐꓷˍ ꓠꓬ꓾ ꓗꓴꓺ ꓞꓲ ꓗꓴ ꓟ ꓔꓯ ꓡꓲ ꓛꓲ ꓗꓪ ꓗꓶ ꓔꓸ ꓬꓰ ꓢꓲ꓾ ꓒꓲꓼ ꓬꓰ ꓟ ꓖꓳ ꓕꓲ ꓟ ꓔꓯ ꓟꓽ ꓧꓪ ꓟꓶ ꓕ ꓑꓳꓸ ꓧꓪ ꓙꓰˍ ꓡꓳ ꓟꓽ ꓥ ꓡ? 5 ꓧꓪ ꓟꓶ ꓗꓷ ꓠꓬ ꓬꓲ ꓠꓽ ꓮ ꓣꓳ ꓔꓯ ꓡꓯꓼ ꓒꓶ ꓗꓪ ꓑꓱꓸ ꓔ ꓢꓲ ꓗꓹ ꓛꓲꓽˍ ꓥꓳ꓿ 6 ꓖꓳ ꓡꓱ ꓢꓲ ꓬꓲ ꓦꓲ ꓗꓪ ꓬꓲꓼ ꓛꓲ ꓡ ꓠꓬ ꓬꓲ ꓗꓪ ꓛꓳꓽˍ ꓐꓰ ꓠꓶꓽ ꓛꓳ ꓕꓲꓺ ꓛꓳ ꓐꓴ ꓔꓯ ꓘꓴꓻ ꓜꓲꓼ ꓡ ꓢꓲ ꓠꓬꓲ꓾ ꓥꓪ ꓮ ꓣꓳ ꓒꓲꓼ ꓬꓰ ꓟ ꓠꓬ ꓧꓪ ꓟꓶ ꓡꓰꓳ꓿ ꓖꓳ ꓡꓱ ꓠꓬꓲ ꓥꓪˍ ꓐꓰ ꓕꓲꓽ ꓡꓰꓹꓼ ꓗꓹ ꓛꓲ ꓡꓯ꓾ ꓐꓰ ꓐꓯˍ ꓥꓳ꓿ 7 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓖꓳ ꓟ ꓡꓰ ꓐꓰ ꓝꓴꓲ ꓙꓳ ꓢꓴ ꓕꓲ ꓣꓳ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓬ꓾ ꓒꓳꓹ ꓬꓲꓼ ꓡ ꓟꓽ ꓛꓵ ꓟ ꓔꓱꓹ ꓜꓳꓽ ꓢꓴ ꓗꓴꓺ ꓞꓲ ꓗꓴ ꓣꓳ ꓟ ꓑꓶꓸ ꓓꓴ ꓢꓶꓸ ꓟꓽ ꓞꓲ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓗꓹ ꓛꓲˍ ꓟ ꓙꓳˍ ꓥꓳ꓾ ꓐꓯˍ ꓡꓳ꓿ 8 ꓝꓮꓲ ꓬꓲ ꓡꓰ꓾ ꓤ ꓟꓶ ꓤ ꓕꓲ ꓣꓳ ꓠꓽ ꓓ-ꓘꓷ-ꓟ ꓒꓴ ꓒꓯꓼ ꓞꓲ ꓒꓯꓼ ꓙꓳ ꓢꓲ ꓕꓲ ꓒꓯꓼ ꓒꓲꓼ ꓬꓰ ꓐꓷˍ ꓠꓬ꓾ ꓟꓬꓺ ꓡꓴ ꓟꓬ ꓔ ꓢꓲ ꓦꓲ ꓫꓵꓹ ꓢꓲ ꓠꓬꓲ꓾ ꓟꓽ ꓧꓪ ꓟꓳꓻ ꓕ ꓑꓳꓸ ꓬꓲ ꓜꓶꓻ ꓐꓰ ꓟꓽ ꓧꓪˍ ꓡ? 9 ꓬꓲ ꓧꓪ ꓟꓳꓻ ꓗꓷ ꓠꓬ꓾ ꓬꓲ ꓗꓪ ꓛꓳˍ ꓐꓰ ꓠꓶꓽ ꓛꓳ ꓕꓲꓺ ꓛꓳ ꓐꓴ ꓔꓯ ꓘꓴ ꓜꓲꓼ ꓡ ꓢꓲ꓾ ꓥꓪ ꓒꓴ ꓒꓲꓼ ꓬꓰ ꓟ ꓖꓳ ꓕꓲ ꓒꓯꓼ ꓠꓬ ꓧꓪ ꓟꓳꓻ ꓡꓰꓳ꓿ ꓖꓳ ꓡꓱ ꓠꓬꓲ ꓥꓪˍ ꓐꓰ ꓕꓲꓽ ꓡꓰꓹꓼ ꓗꓹ ꓛꓲ ꓡꓯ꓾ ꓐꓯˍ ꓥꓳ꓿ 10 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓖꓳ ꓟ ꓡꓰ ꓐꓰ ꓝꓴꓲ ꓙꓳ ꓢꓴ ꓕꓲ ꓣꓳ ꓓꓵꓽ ꓙ ꓒꓳꓹ ꓬꓲ ꓡ ꓠꓬ꓾ ꓪꓴ-ꓢ ꓬꓲ ꓝꓲ ꓓꓴ ꓐꓴ ꓗꓳ ꓡꓳ ꓗꓪ ꓬꓲ ꓑꓶꓸ ꓓꓴ ꓗꓹ ꓛꓲˍ ꓟ ꓙꓳˍ ꓥꓳ꓾ ꓐꓯˍ ꓡꓳ꓿ 11 ꓝꓮꓲ ꓬꓰ-ꓢꓴ ꓡꓰ꓾ ꓡꓽ ꓞꓳ ꓕꓲ ꓣꓳ ꓠꓬ ꓤ ꓠꓬꓲꓽ ꓫꓵꓸ ꓙꓳˍ ꓡꓳ꓿ 12 ꓤꓽ ꓣꓳꓺ ꓠꓬ ꓬꓲ ꓐꓹ ꓐ ꓔꓯ꓾ ꓐꓹ ꓐꓽꓳ꓾ ꓥꓪ ꓟꓶ ꓙꓲꓽ ꓙꓳˍ ꓟ ꓡꓯꓼ ꓪ ꓥꓪ ꓔꓯ ꓐꓱꓻ ꓖꓶ ꓡꓯ꓾ ꓐꓯˍ ꓠꓬꓲ꓾ ꓬꓲ ꓐꓹ ꓐ ꓡꓰ ꓬꓲ ꓪꓽ ꓠꓬꓲꓽ ꓫꓵꓸ ꓔꓯ ꓡꓯꓼ ꓪ ꓐꓱ ꓖꓶˍ ꓡꓳ꓿ 13 ꓖꓳ ꓗꓸ ꓠꓯꓸ ꓮꓽ ꓟꓬꓹ ꓠꓬꓲ ꓟꓽ ꓗꓷ ꓡꓰ ꓠꓬ꓾ ꓤꓽ ꓣꓳꓺ ꓠꓽ ꓬꓲ ꓙꓳˍ ꓟ ꓖꓴꓽ ꓙꓴꓽ ꓮꓽ ꓙꓵ ꓔꓯꓹ ꓔ ꓢꓲ꓾ ꓶꓽ ꓤ ꓟ ꓟꓵꓽ ꓗꓪ ꓓꓴꓻ ꓓꓳ ꓙꓰˍ ꓡꓳ꓿ ꓬꓲ ꓠꓬ ꓢꓴ ꓟꓵꓽ ꓗꓪ ꓞꓳ ꓡꓽ ꓞꓳ ꓗ ꓡ ꓬꓰ ꓢꓲ ꓬꓲ ꓡꓯꓼ ꓪ ꓮꓽ ꓔꓳ ꓒꓬꓹˍ ꓡꓳ꓿ 14 ꓬꓲ ꓙꓳꓻˍ ꓟ ꓮꓽ ꓙꓵ ꓒꓬꓹ ꓖꓴ ꓡꓰ ꓠꓬ꓾ ꓖꓳ ꓕꓲ ꓟꓵꓽ ꓗꓪ ꓦꓰꓼ ꓟꓷꓼ ꓘꓳꓼ ꓓꓽ ꓟ ꓓꓳ ꓡ ꓠꓬꓲ꓾ ꓫꓸˍ ꓟ ꓟꓷꓼˍ ꓟ ꓔꓳꓹ ꓜꓳꓽˍ ꓡꓳ꓿ 15 ꓖꓳ ꓡꓱ ꓠꓬ ꓬꓲ ꓠꓽ ꓖꓳ ꓕꓲ ꓟꓵ ꓗꓪ ꓟ ꓑ ꓫꓬꓼ ꓕꓲ ꓣꓳ ꓔꓯ ꓔꓺ ꓔꓬ ꓙꓰˍ ꓕꓯ꓾ ꓬꓲ ꓔꓯ ꓦ ꓟꓲ ꓗꓪ ꓮꓸ ꓪꓯꓼ ꓡꓳꓸ ꓢꓴ ꓬꓰ ꓝꓲˍ ꓡꓳ꓿ 16 ꓬꓲ ꓠꓬ ꓮꓸ ꓪꓯꓼ ꓜꓽˍ ꓟ ꓮ ꓠꓳ ꓗꓴꓹ ꓙꓲ ꓜꓽ ꓐꓳ ꓡꓰ ꓝꓲ ꓠꓲꓹ ꓫꓵˍ ꓟꓲ꓾ ꓬꓲ ꓔꓯ ꓖꓶ ꓜꓽ ꓢꓴ ꓟꓽ ꓙꓳ꓿ 17 ꓖꓳ ꓡꓱ ꓥ ꓟꓲ ꓕꓲ ꓠꓬꓲ ꓙꓳˍ ꓠꓬ ꓬꓲ ꓓꓵꓽ ꓙ ꓧꓪꓸ ꓛꓲꓽ ꓡ ꓢꓲ꓾ ꓥꓪ ꓐꓹ ꓐ ꓪꓽ ꓤꓽ ꓮꓽ ꓟꓬꓹ ꓠꓬ ꓜꓽ ꓜꓰ ꓓꓳꓻ ꓜꓰ ꓜꓰꓻ ꓡꓰ ꓢꓲ꓾ ꓥꓪ ꓠꓽ ꓕꓱ ꓗꓪ ꓦꓰꓼ ꓟꓷꓼ ꓫꓵꓻˍ ꓐꓰ ꓗꓹ ꓡꓳ꓿ 18 ꓥꓪ ꓠꓬ ꓥꓪ ꓐꓹ ꓐ ꓔꓯ ꓙꓰ ꓢꓲ ꓬꓲ ꓔꓯ꓾ ꓐꓹ ꓐꓽꓳ꓾ ꓥꓪ ꓠꓬ ꓪꓴ-ꓢ ꓔꓯˍ ꓟꓲ ꓛꓬꓻ ꓡꓰꓳ꓾ ꓠꓴ ꓔꓯˍ ꓟꓲ ꓛꓬꓻ ꓡꓰꓳ꓿ 19 ꓕꓱ ꓡꓱ ꓖꓳ ꓑꓳ ꓥꓪ ꓔꓯ ꓠꓽ ꓠꓴ ꓤꓽ ꓘꓴꓻ ꓟꓽ ꓒꓵꓽꓳ꓿ ꓥꓪ ꓔꓯ ꓠꓬ ꓠꓴ ꓪꓽ ꓤ ꓕꓲ ꓣꓳˍ ꓡꓰ ꓐꓰ ꓚꓬꓹ ꓖꓶ ꓡꓯ꓾ ꓐꓰ ꓐꓯ ꓖꓶ ꓓꓴ ꓥꓳ꓾ ꓐꓰ ꓓꓵꓽ ꓙˍ ꓡꓳ꓿ 20 ꓖꓳ ꓡꓱ ꓠꓬ ꓬꓲ ꓔꓴ ꓡ ꓢꓲ ꓬꓲ ꓐꓹ ꓐ ꓔꓯ ꓙꓰˍ ꓡꓳ꓿ ꓬꓲ ꓐꓹ ꓐ ꓠꓬ ꓬꓲ ꓤꓽ ꓶꓽ ꓤꓻˍ ꓗꓪ ꓡ ꓔꓬ ꓢꓰꓽ ꓕꓯˍ ꓡꓰ ꓬꓲ ꓔꓯ ꓡꓳꓸ ꓟꓳꓻ ꓠꓬ꓾ ꓬꓲ ꓔꓯ ꓫꓱꓸ ꓤ ꓠꓬꓲ ꓔꓷꓹ ꓙꓰ ꓢꓲ꓾ ꓬꓲ ꓗꓶꓸ ꓝꓲ ꓗꓪ ꓢꓳꓸ ꓔ ꓢꓲ ꓠꓬꓲ ꓐꓳꓼ ꓖꓶꓽˍ ꓡꓳ꓿ 21 ꓬꓲ ꓤꓽ ꓠꓬ꓾ ꓐꓹ ꓐꓽꓳ꓾ ꓥꓪ ꓠꓬ ꓪꓴ-ꓢ ꓔꓯˍ ꓟꓲ ꓛꓬꓻ ꓡꓰꓳ꓿ ꓠꓴ ꓔꓯˍ ꓟꓲ ꓛꓬꓻ ꓡꓰꓳ꓿ ꓕꓱ ꓡꓱ ꓖꓳ ꓑꓳꓸ ꓥꓪ ꓔꓯ ꓠꓽ ꓠꓴ ꓤ ꓘꓴꓻ ꓟꓽ ꓒꓵꓽꓳ꓾ ꓐꓯˍ ꓡꓳ꓿ 22 ꓬꓲ ꓐꓹ ꓐ ꓠꓽ ꓬꓲ ꓚꓳ ꓑꓸ ꓐꓴ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ ꓮꓸ ꓓꓲ ꓙꓲˍ ꓟ ꓐꓵ ꓞꓶꓽ ꓐꓽ ꓢ ꓮꓸ ꓟꓲꓸ ꓟꓲꓸ ꓔꓯꓹ ꓡ ꓢꓲ ꓬꓲ ꓔꓯ ꓖꓶ ꓖꓪꓽ꓿ ꓬꓲ ꓡꓯꓼ ꓠꓬꓲ ꓗꓪ ꓡꓯꓼ ꓠꓬꓲ ꓗꓷꓹ ꓔꓱꓸ ꓖꓶ꓿ ꓬꓲ ꓛꓲ ꓒꓯꓹ ꓗꓪ ꓛꓲꓺ ꓠꓲ ꓠꓲꓺ ꓖꓶ꓿ 23 ꓝꓮꓲ ꓬꓽ ꓔ ꓟ ꓮꓸ ꓠꓬꓲꓽ ꓤ ꓢꓲ ꓔꓯꓹ ꓡ ꓢꓲ ꓢꓰꓼ꓿ ꓖꓳ ꓡꓱ ꓢꓲ ꓣꓳꓽ ꓠꓬ ꓜꓽ ꓠꓬꓲ ꓠꓲꓹ ꓒꓴ ꓠꓬꓲ ꓬꓰ ꓡꓯ꓿ 24 ꓮ ꓡꓲꓳ ꓐꓯ ꓠꓬ ꓥꓪ ꓤꓽ ꓕꓱ ꓟ ꓠꓽ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓟ ꓥꓳ꓾ ꓒꓲꓼ ꓬꓰ ꓢꓲ ꓧꓪ ꓟꓶ ꓟ ꓥꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓗꓹ ꓛꓲ ꓠꓬꓲ ꓑꓮꓲꓽ ꓬꓰˍ ꓡꓳ꓿ 25 ꓖꓳ ꓕꓯ ꓤ ꓪꓴꓽ ꓠꓬ ꓦ ꓟꓲ ꓗꓪ ꓔꓬ ꓢꓰꓽ ꓡꓳ꓿ ꓬꓲ ꓬꓲꓼ ꓡ ꓢꓲ ꓦꓲ ꓒ ꓕꓲ ꓗꓪ ꓛꓲ ꓡ ꓕꓯ꓾ ꓠ ꓢꓻ ꓡꓴꓺˍ ꓐꓰ ꓗꓪ ꓛꓰꓹ ꓢꓯꓼ ꓔꓯ ꓑ ꓙꓽˍ ꓠꓬꓲ꓾ 26 ꓚꓳ ꓑꓸ ꓕꓲ ꓣꓳ ꓔꓯ ꓘꓴ ꓔꓯꓹ ꓡ ꓢꓲ꓾ ꓕꓱ ꓟ ꓮꓸ ꓫꓵ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 27 ꓖꓳ ꓕꓯ ꓚꓳ ꓑꓸ ꓡꓰ꓾ ꓠꓴ ꓠꓬꓲ ꓤꓽ ꓬꓲꓼ ꓡꓺꓳ꓿ ꓬꓲ ꓔꓯ ꓮꓸ ꓫꓵ ꓟꓽ ꓘꓳ ꓟꓽ ꓟꓳ ꓘꓳꓻ ꓣꓴ ꓟꓶˍ ꓠꓬꓲ꓾ ꓠꓴ ꓐꓹ ꓐ ꓡꓰ ꓬꓽ ꓔ ꓟ ꓮꓸ ꓠꓬꓲꓽ ꓤ ꓢꓰꓼ ꓗꓷꓳ꓾ ꓐꓯ ꓖꓶˍ ꓡꓳ꓿ 28 ꓖꓳ ꓕꓯ ꓤꓽ ꓪꓴꓽ ꓠꓽ ꓠꓲꓹ ꓟ ꓦꓶꓻ ꓢꓲ ꓦꓲ ꓗꓪ ꓓꓵꓽ ꓙꓰ ꓟꓽ ꓫꓳ ꓠꓬꓲ꓾ ꓬꓲ ꓐꓹ ꓐ ꓓꓳ ꓡ ꓢꓲ ꓬꓲ ꓔꓯ ꓘꓶꓸ ꓖꓶˍ ꓡꓳ꓿ 29 ꓖꓳ ꓡꓱ ꓥ ꓟꓲ ꓬꓲ ꓠꓽ ꓬꓲ ꓐꓹ ꓐ ꓔꓯ꓾ ꓠꓬꓲ ꓠꓹ꓾ ꓥꓪ ꓠꓬ ꓠꓴ ꓔꓯ ꓕꓱ ꓟꓬ ꓘꓳꓼ ꓣꓱꓽ ꓙ ꓗꓷ ꓢꓲ ꓮ ꓕꓯꓽˍ ꓟꓲ ꓠꓴ ꓕꓵꓼ ꓪꓽ ꓔꓯ ꓟꓽ ꓛꓬꓻ ꓡꓰ ꓠꓬꓲ꓿ ꓖꓳ ꓡꓱ ꓥ ꓟꓲ ꓥꓪ ꓛꓳꓽ ꓒꓯꓹ ꓐꓴˍ ꓐꓰ ꓠꓲꓹ ꓒꓴ ꓠꓹ ꓟ꓾ ꓠꓴ ꓠꓬ ꓥꓪ ꓔꓯ ꓮꓸ ꓛꓵꓼ ꓤ ꓕꓲ ꓟˍ ꓟꓲ ꓟꓽ ꓖꓶ ꓡ ꓠꓬꓲ꓿ 30 ꓖꓳ ꓡꓱ ꓥ ꓟꓲ ꓖꓳ ꓪꓴꓽ ꓟ ꓐꓴ ꓔꓯ ꓛꓳꓻ ꓢꓲ ꓠꓴ ꓡꓯꓼ ꓪ ꓒꓬꓹ ꓖꓴ ꓡꓰ ꓢꓴ꓾ ꓠꓴ ꓤ ꓕꓱ ꓟ ꓛꓲ ꓡ ꓠꓬ꓾ ꓠꓴ ꓠꓽ ꓬꓽ ꓔ ꓟ ꓮꓸ ꓠꓬꓲꓽ ꓤ ꓢꓰꓼ ꓖꓶˍ ꓡꓳ꓾ ꓐꓯˍ ꓡꓳ꓿ 31 ꓖꓳ ꓡꓱ ꓠꓬ ꓬꓲ ꓐꓹ ꓐ ꓡꓰ ꓬꓲ ꓔꓯ꓾ ꓥꓪ ꓤꓽꓳ꓾ ꓠꓴ ꓠꓬ ꓮ ꓕꓯꓽˍ ꓟꓲ ꓥꓪˍ ꓐꓰ ꓕꓲꓽ ꓪꓺꓼ ꓔꓬ ꓢꓲ꓾ ꓥꓪ ꓙꓳꓻˍ ꓟ ꓥ ꓕ ꓑꓳꓸˍ ꓟꓲ ꓠꓴ ꓔꓯꓸ ꓟ ꓥꓳ꓿ 32 ꓠꓴ ꓠꓬꓲ ꓤꓽ ꓕꓱ ꓟ ꓠꓽ꓾ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓟ ꓥꓳ꓾ ꓒꓲꓼ ꓬꓰ ꓢꓲ ꓧꓪ ꓟꓶ ꓟ ꓥꓳ꓿ ꓖꓳ ꓡꓱ ꓠꓬꓲ ꓣꓳꓽ ꓠꓽ ꓠꓲꓹ ꓒꓴ ꓗꓹ ꓛꓲ ꓠꓬꓲ ꓬꓰ ꓙꓲꓽ ꓙꓳˍ ꓡꓳ꓾ ꓐꓯ ꓖꓶˍ ꓡꓳ꓾ ꓐꓯˍ ꓡꓳ꓿

ꓡꓴ-ꓗ 16

1 ꓬꓰ-ꓢꓴ ꓠꓬ ꓛꓳꓽ ꓒꓯꓹ ꓐꓴ ꓔꓯ ꓕꓱ ꓡꓱ ꓐꓯˍ ꓢꓰ ꓡꓳ꓿ ꓞꓳ ꓐꓳ ꓕꓲ ꓣꓳ ꓠꓬ ꓦꓲ ꓙꓵꓽ ꓢꓴ ꓕꓲ ꓣꓳ ꓙꓳˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓬꓲ ꓢꓲ ꓒꓽ ꓖꓴꓽ ꓙꓴꓽ ꓮꓽ ꓔꓳ ꓒꓬꓹ ꓔꓬ ꓡꓳ꓾ ꓐꓰ ꓬꓲ ꓔꓯ ꓓꓰꓺ ꓢꓴ ꓙꓳˍ ꓡꓳ꓿ 2 ꓖꓳ ꓡꓱ ꓠꓬꓲ ꓬꓲ ꓢꓲ ꓒꓽ ꓡꓰ ꓬꓲ ꓔꓯ ꓘꓴ ꓔꓯꓹ ꓡ ꓢꓲ꓾ ꓠꓴ ꓔꓯ ꓟꓳꓸ ꓥꓪ ꓑ ꓙꓽˍ ꓟ ꓕꓱ ꓟ ꓠꓬ ꓮ ꓡꓲ ꓥꓳ ꓪ? ꓠꓴ ꓡꓰ ꓙꓵꓽ ꓔꓬ ꓟ ꓶꓻ ꓡꓯꓼ ꓢꓪ' ꓟꓸ ꓖꓶ ꓡꓯ꓿ ꓕꓱ ꓡꓱ ꓖꓳ ꓑꓳ ꓠꓴ ꓠꓽ ꓥꓪ ꓦꓲ ꓙꓵꓽ ꓢꓴ ꓬꓰ ꓟꓽ ꓓ꓾ ꓐꓯ ꓖꓶˍ ꓡꓳ꓿ 3 ꓦꓲ ꓙꓵꓽ ꓢꓴ ꓠꓬ ꓬꓲ ꓠꓲꓹ ꓟ ꓗꓪ꓾ ꓥꓪ ꓢꓲ ꓒꓽ ꓡꓰ ꓥꓪ ꓔꓯ ꓦꓲ ꓙꓵꓽ ꓢꓴ ꓟꓽ ꓬꓰ ꓝꓲ ꓡ ꓠꓬ ꓥꓪ ꓮ ꓡꓲ ꓬꓰ ꓓꓳꓺꓽ? ꓦ ꓟꓲ ꓘꓪˍ ꓐꓯꓺꓽ꓾ ꓢꓯꓼ ꓟꓽ ꓙꓳ꓿ ꓜꓻ ꓓꓰꓽˍ ꓐꓯꓺꓽ꓾ ꓫꓸ ꓔꓳ꓿ 4 ꓥꓪ ꓔꓯ ꓦꓲ ꓙꓵꓽˍ ꓟ ꓟꓬꓱꓽ ꓕꓱ ꓟ ꓠꓽ ꓡꓰ ꓝꓲˍ ꓕꓯ꓾ ꓢꓴꓻ ꓡꓰ ꓬꓲ ꓪꓽ ꓦꓲ ꓗꓪ ꓥꓪ ꓔꓯ ꓘꓳꓻ ꓣꓴ ꓡ ꓠꓹ ꓟ ꓥꓪ ꓮ ꓡꓲ ꓬꓰ ꓠꓯꓹ ꓟ ꓥꓪ ꓢꓷꓸ ꓡꓰꓳ꓾ ꓐꓰ ꓓꓵꓽ ꓙˍ ꓡꓳ꓿ 5 ꓖꓳ ꓡꓱ ꓠꓬ ꓬꓲ ꓢꓲ ꓒꓽ ꓔꓯ ꓶꓻ ꓡꓯꓼ ꓐꓵ ꓞꓹ ꓢꓴ ꓐꓴ ꓕꓲ ꓣꓳ ꓗꓸ ꓠꓯꓸ ꓕꓲ ꓣꓳ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓬꓲ ꓪꓴꓸ ꓕꓲ ꓣꓳ ꓔꓯ꓾ ꓠꓴ ꓠꓬ ꓥꓪ ꓢꓲ ꓒꓽ ꓔꓯ ꓮ ꓟꓬ ꓐꓵ ꓞꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 6 ꓬꓲ ꓡꓰ꓾ ꓮꓽ ꓛꓬꓽ ꓞꓶ ꓕꓲ ꓦꓬ ꓬꓲꓻ ꓪꓴ ꓐꓵꓻˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ ꓦꓲ ꓙꓵꓽ ꓢꓴ ꓡꓰ ꓬꓲ ꓔꓯ꓾ ꓠꓴ ꓶꓻ ꓡꓯꓼ ꓕꓳ ꓶ ꓮꓸ ꓟꓲꓸ ꓣꓴ ꓢꓲ꓾ ꓥꓪꓽ ꓞꓲꓻ ꓬꓲꓻ ꓪꓴ꓾ ꓐꓰ ꓐꓳ꓾ ꓐꓯ ꓖꓶˍ ꓡꓳ꓿ 7 ꓝꓮꓲ ꓕꓲ ꓣꓳ ꓔꓯ꓾ ꓠꓴ ꓮ ꓟꓬ ꓛꓲ ꓐꓵˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓠꓽ ꓫꓪ ꓕꓲ ꓦꓬ ꓙꓳꓻ ꓐꓵˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ ꓦꓲ ꓙꓵꓽ ꓢꓴ ꓡꓰ꓾ ꓠꓴ ꓶꓻ ꓡꓯꓼ ꓕꓳ ꓶ ꓣꓴ ꓢꓲ꓾ ꓦꓰꓼ ꓞꓲ ꓙꓳꓻ꓾ ꓐꓰ ꓐꓳ꓾ ꓐꓯ ꓖꓶˍ ꓡꓳ꓿ 8 ꓟꓽ ꓔꓱꓹ ꓟ ꓦꓲ ꓙꓵꓽ ꓢꓴ ꓔꓯ ꓬꓲ ꓢꓲ ꓒꓽ ꓡꓰ꓾ ꓠꓴ ꓠꓬ ꓚꓴꓽ ꓬꓲꓹ ꓙꓳ ꓙꓳˍ ꓡꓰꓽ ꓬꓰ ꓗꓴꓸ ꓐꓷ꓾ ꓐꓯ ꓖꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓤ ꓠꓱ ꓐꓴ ꓠꓽ꓾ ꓠꓬꓲꓺ ꓟꓳꓻ ꓓꓴ ꓤ ꓠꓱ ꓐꓴ ꓢꓶꓸ ꓟꓽ ꓞꓲ ꓚꓴꓽ ꓬꓲꓹ ꓣꓱꓽ ꓗꓴˍ ꓡꓳ꓿ 9 ꓥꓪ ꓝꓮꓲ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓒꓴ ꓤꓽ ꓫꓵ ꓤ ꓔꓯ ꓦ ꓡꓱ ꓟꓽ ꓓ ꓟ ꓦꓬꓼ ꓠꓬꓲ ꓛꓲ ꓡ ꓕꓯ꓾ ꓕꓲ ꓞꓲꓼ ꓕꓲ ꓑ ꓟ ꓦꓲ ꓗꓪ ꓠꓴ ꓪꓽ ꓔꓯ ꓘꓳꓻ ꓣꓴ ꓖꓶ ꓡ ꓝꓲ ꓠꓹ ꓟ꓾ ꓟꓽ ꓙꓲ ꓟꓽ ꓜꓳꓽˍ ꓟ ꓒꓴ ꓤ ꓫꓵ ꓤ ꓡꓰ ꓗꓪ ꓛꓳꓽ ꓑꓺ꓿ 10 ꓡꓽ ꓞꓳ ꓕꓲ ꓣꓳ ꓠꓽ ꓬꓲ ꓧꓶꓸ ꓤ ꓗꓪ ꓦ ꓡꓱ ꓐꓳˍ ꓠꓬ꓾ ꓬꓲ ꓓꓽ ꓟ ꓗꓪˍ ꓟꓲ ꓦ ꓡꓱ ꓐꓳˍ ꓥꓳ꓿ ꓬꓲ ꓧꓶꓸ ꓤ ꓗꓪ ꓟꓽ ꓔꓱꓹ ꓠꓬ ꓬꓲ ꓓꓽ ꓟ ꓗꓪˍ ꓟꓲ ꓟꓽ ꓔꓱꓹ꓿ 11 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓟꓲ ꓠꓯ ꓒꓴ ꓤ ꓫꓵ ꓤ ꓣꓱꓽˍ ꓟ ꓗꓪ ꓦ ꓡꓱ ꓟꓽ ꓐꓳ ꓕꓯ ꓠꓽ꓾ ꓔꓱꓹˍ ꓟ ꓒꓵꓽ ꓶ ꓠꓬ ꓮꓽ ꓟ ꓡꓰ ꓠꓴ ꓪꓽ ꓔꓯ ꓡꓯꓼ ꓙꓱ ꓖꓶ ꓡ ꓢꓰꓽ꓿ 12 ꓠꓴ ꓪꓽ ꓠꓬ ꓢꓴ ꓖꓴꓽ ꓙꓴꓽ ꓗꓪ ꓦ ꓡꓱ ꓟꓽ ꓐꓳ ꓕꓯ ꓠꓽ꓾ ꓠꓴ ꓪꓽ ꓚꓲꓸ ꓛꓬ ꓶꓽ ꓬꓰ ꓠꓹ ꓟ ꓮꓽ ꓟ ꓡꓰ ꓠꓴ ꓪꓽ ꓔꓯ ꓖꓶ ꓡ ꓥꓳ ꓪ? 13 ꓚꓳ ꓑꓸ ꓕꓲ ꓣꓳ ꓠꓬ ꓢꓲ ꓒꓽ ꓠꓬꓲꓽ ꓣꓳ ꓔꓯ ꓣꓱꓽ ꓙ ꓟꓽ ꓐ ꓡ꓿ ꓬꓲ ꓠꓬ ꓕꓱ ꓕꓲ ꓣꓳ ꓔꓯ ꓠꓲꓹ ꓜꓳ ꓢꓲ꓾ ꓖꓳ ꓕꓲ ꓣꓳ ꓔꓯ ꓠꓲꓹ ꓠꓵˍ ꓥꓳ꓿ ꓥ ꓠꓬ꓾ ꓕꓱ ꓕꓲ ꓣꓳ ꓔꓯ ꓒꓵꓽ ꓢꓲ꓾ ꓖꓳ ꓕꓲ ꓣꓳ ꓔꓯ ꓟꓽ ꓒꓵ ꓐꓰ ꓗꓹ ꓥꓳ꓿ ꓠꓴ ꓪꓽ ꓠꓬ ꓪꓴ-ꓢ ꓔꓯˍ ꓟꓲ ꓣꓱꓽ ꓙ꓾ ꓒꓴ ꓤ ꓫꓵ ꓤ ꓔꓯˍ ꓟꓲ ꓣꓱꓽ ꓙ꓾ ꓐꓰ ꓬꓰ ꓟꓽ ꓒꓬꓱꓼ ꓡ꓾ ꓐꓯˍ ꓡꓳ꓿ 14 ꓒ-ꓡꓲ-ꓢꓷ ꓐꓴ ꓠꓬ ꓒꓴ ꓔꓯ ꓠꓲꓹ ꓦꓯꓸ ꓢꓴ ꓥ ꓠꓬꓲ꓾ ꓕꓱ ꓟꓬ ꓫꓵꓽ ꓑ ꓙꓽ ꓗꓷ ꓠꓬ ꓬꓰ-ꓢꓴ ꓔꓯ ꓤꓲꓻ ꓢꓲ ꓪꓽ ꓫꓱˍ ꓡꓳ꓿ 15 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓞꓳ ꓤ ꓟꓲꓽ ꓙꓬꓽ ꓗꓪ ꓚꓲꓸ ꓛꓬ ꓠꓽ ꓔꓱꓹ ꓜꓳꓽ ꓢꓴ ꓥ ꓟ ꓟꓳꓸ ꓖꓶ ꓢꓴ ꓐꓴ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓲꓹ ꓟ ꓔꓯ ꓪꓴ-ꓢ ꓢꓷꓸˍ ꓡꓳ꓿ ꓞꓳ ꓤ ꓡꓰ ꓓꓳꓹ ꓟꓴˍ ꓟ ꓠꓬ ꓪꓴ-ꓢ ꓒꓬꓱꓽ ꓕꓯ ꓗꓪ ꓠꓲꓹ ꓒꓳꓹ ꓓꓴ ꓥ ꓡꓳ꓿ 16 ꓙꓵꓽ ꓗ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓟꓸ ꓟꓲꓽ ꓠꓬ ꓬꓳ-ꓦ ꓗꓪ ꓛꓲˍ ꓡꓰꓽ ꓚˍ ꓡꓳ꓿ ꓖꓳ ꓕꓲ ꓝꓲꓸ ꓕ ꓑꓳꓸ ꓠꓽ ꓪꓴ-ꓢ ꓗꓴꓷꓼ ꓶꓼ ꓓꓳ ꓫꓱꓹ ꓓꓳ ꓚ ꓓꓳ ꓙꓰ ꓢꓲ꓾ ꓮꓽ ꓟˍ ꓟꓲ ꓜꓲꓽ ꓜꓲ ꓑꓰꓹ ꓑꓰ ꓑꓵꓺ ꓓꓵꓽ ꓙꓰˍ ꓡꓳ꓿ 17 ꓙꓵꓽ ꓗ ꓕꓳ ꓶ ꓗꓪ ꓕꓲ ꓝꓳꓹ ꓖꓳꓽ ꓡꓰ ꓠꓹ ꓟ ꓠꓬ꓾ ꓟꓴꓽ ꓗꓪ ꓟꓲ ꓠꓯ ꓟꓽ ꓙꓳ ꓗꓷ ꓡꓰ ꓠꓹ ꓟ ꓢꓶꓸ ꓟꓽ ꓞꓲ ꓫꓸˍ ꓡꓳ꓿ 18 ꓬꓲ ꓤ ꓟꓶ ꓔꓯ ꓡꓳ ꓗꓷ ꓢꓲ ꓬꓲ ꓔꓱꓹ ꓬꓲ ꓕꓲ ꓣꓳ ꓫ ꓢꓴ ꓮꓽ ꓟ ꓥ ꓟꓲ ꓦꓬꓽ ꓛꓳ ꓧꓪˍ ꓟ ꓝꓴꓲ ꓬꓰˍ ꓟ ꓥ ꓡꓳ꓿ ꓡꓳ ꓗꓷˍ ꓟ ꓤ ꓟꓶꓻ ꓔꓯ ꓫ ꓢꓴˍ ꓟꓲ ꓦꓬꓽ ꓛꓳꓽ ꓧꓪˍ ꓟ ꓝꓴꓲ ꓬꓰˍ ꓟ ꓥꓳ꓿ 19 ꓮ ꓠꓱ ꓕꓯ ꓞꓳ ꓐꓳ ꓕꓲ ꓣꓳ ꓙꓳˍ ꓡꓳ꓿ ꓬꓲ ꓠꓬ ꓠꓲꓺ ꓛꓵꓽ ꓟ ꓟꓶˍ ꓐꓰ ꓪꓰꓻ ꓜꓲꓽ ꓟꓶ ꓐꓵ ꓞꓶꓽ ꓖꓪꓽ ꓢꓲ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓐꓳ ꓓꓳ ꓐꓳ ꓜꓽ ꓢꓻ ꓔꓬ ꓢˍ ꓡꓳ꓿ 20 ꓝꓮꓲ ꓠꓬ ꓕꓲ ꓖꓳ ꓕꓲ ꓓꓱꓽ ꓐꓶ ꓠꓽ ꓚꓲꓸ ꓓꓲˍ ꓟ꓾ ꓡ-ꓢ-ꓣꓴ ꓟꓬꓱ ꓔ ꓟ ꓜ ꓓꓰꓽ ꓢꓴ ꓕꓲ ꓣꓳ ꓔꓯ ꓠꓬ꓾ ꓞꓳ ꓐꓳ ꓖꓳ ꓕꓲ ꓣꓳ ꓗ ꓘꓶꓽ ꓓꓴꓽ ꓗꓪ ꓧꓳꓽ ꓔ ꓢꓲ ꓖꓳ ꓗꓪ ꓓꓳꓽ ꓞꓹ ꓝꓲˍ ꓡꓳ꓿ 21 ꓖꓳ ꓡꓱ ꓢꓲ ꓬꓲ ꓠꓬ ꓞꓳ ꓐꓳ ꓢꓽ ꓡ ꓗꓪ ꓐꓰ ꓞꓰ ꓡꓰˍ ꓟ ꓜ ꓟꓰꓽ ꓜꓽ ꓟꓶꓻ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ ꓮꓸ ꓠꓽˍ ꓟꓲ ꓬꓲ ꓐꓶꓻ ꓠꓻ ꓔꓯ ꓡꓷꓼ ꓡ ꓡꓳ꓿ 22 ꓖꓳ ꓗꓸ ꓠꓯꓸ ꓜ ꓓꓰꓽ ꓢꓴ ꓖꓳ ꓕꓲ ꓣꓳ ꓫꓵꓻ ꓢꓲ꓾ ꓟꓴꓽ ꓗꓪ ꓝꓲ ꓓꓴ ꓐꓴ ꓡꓰ ꓬꓲ ꓔꓯ ꓮ-ꓐ-ꓡ-ꓦ ꓳ' ꓟꓶ ꓗꓪ ꓧꓳꓽ ꓛꓲ ꓬꓰˍ ꓡꓳ꓿ ꓞꓳ ꓐꓳˍ ꓟꓲ ꓫꓵꓻ ꓢꓲ ꓔꓵꓸ ꓗꓷꓳ꓿ 23 ꓬꓲ ꓠꓬ ꓟꓸ ꓟꓲ ꓟꓵꓽ ꓮꓽ ꓘꓶꓸ ꓫꓸ ꓙꓵˍ ꓟ ꓗꓪ ꓔꓬ ꓢꓲ ꓡꓳꓸ ꓠꓬꓲ ꓠꓬ꓾ ꓶꓽ ꓤ ꓗꓪ ꓮ-ꓐ-ꓡ-ꓦˍ ꓐꓰ ꓬꓲ ꓳ' ꓟꓶꓽ ꓗꓪ ꓡ-ꓢ-ꓣꓴ ꓔꓬ ꓟ ꓔꓯ ꓟꓳꓻˍ ꓡꓳ꓿ 24 ꓬꓲ ꓠꓬ ꓘꓴ ꓢꓲ꓾ ꓒꓵꓽ ꓒ ꓮ-ꓐ-ꓡ-ꓦꓺꓳ꓾ ꓥꓪ ꓔꓯ ꓫꓱꓸ ꓤ ꓙ ꓡꓯ꓿ ꓡ-ꓢ-ꓣꓴ ꓬꓲ ꓡꓯꓼ ꓠꓬꓲ ꓪꓴꓸ ꓓꓵ ꓠꓬ ꓬꓲꓻ ꓙꓬ ꓗꓪ ꓔꓲꓹ ꓢꓲ꓾ ꓥꓪ ꓡ ꓛꓱꓺ ꓗꓪ ꓠꓱꓽ ꓖꓶ ꓡ ꓝꓲ꓿ ꓥꓪ ꓠꓬ ꓮꓸ ꓔꓳꓸ ꓡ ꓡꓱ ꓕꓱ ꓟ ꓗꓪ ꓫꓸ ꓙꓵ ꓠꓬꓲ ꓟꓽ ꓓꓻꓳ꓾ ꓐꓯˍ ꓡꓳ꓿ 25 ꓖꓳ ꓕꓯ ꓮ-ꓐ-ꓡ-ꓦ ꓡꓰ꓾ ꓤꓽꓳ꓾ ꓠꓴ ꓢꓯꓸ ꓔꓬ ꓕꓯ ꓠꓴ ꓠꓬ ꓙꓳꓻ ꓢ ꓔꓬ ꓢ ꓟ ꓦꓬꓼ ꓠꓬꓲ ꓗꓳꓸ ꓪ ꓢꓲ꓾ ꓡ-ꓢ-ꓣꓴ ꓠꓬ ꓫꓸ ꓙꓵꓻ ꓟꓷꓼ ꓙꓵˍ ꓟ ꓔꓯ ꓓꓵꓽ ꓙ ꓔ꓿ ꓮ ꓟꓶ ꓬꓲ ꓠꓽ ꓕꓱ ꓗꓪ ꓠꓲꓹ ꓟ ꓗꓴꓺ ꓖꓶˍ ꓟ ꓟꓶˍ ꓡꓳ꓿ ꓠꓴ ꓠꓽ ꓮꓽ ꓘꓶꓸ ꓫꓸ ꓙꓵ ꓔꓬ ꓡꓳ꓿ 26 ꓝꓮꓲ ꓣꓳꓽ ꓠꓬꓲꓽ ꓗꓴꓸ ꓚꓸꓼ ꓗꓪ ꓠꓬ ꓡꓳ ꓘꓴꓽ ꓓꓽ ꓟ ꓕꓲ ꓟ ꓗꓷꓹ ꓞꓹ ꓠꓬꓲ꓾ ꓕꓻ ꓐꓽ ꓗꓪ ꓐꓰ ꓖꓳ ꓐꓽ ꓢꓲ ꓠꓴ ꓪꓽ ꓔꓬ ꓗꓪ ꓙꓰ ꓠꓲꓹ ꓫꓵ ꓢꓴ ꓙꓳˍ ꓟꓲ ꓙꓰ ꓟꓽ ꓐ ꓡ꓿ ꓖꓳꓻ ꓐꓽ ꓢꓲ ꓗꓪ ꓐꓰ ꓕꓻ ꓐꓽ ꓗꓪ ꓡ ꓠꓲꓹ ꓫꓵ ꓢꓴ ꓙꓳˍ ꓟꓲ ꓡ ꓟꓽ ꓐ ꓡ꓾ ꓐꓯ ꓖꓶˍ ꓡꓳ꓿ 27 ꓞꓳ ꓐꓳ ꓡꓰ꓾ ꓒꓵꓽ ꓒꓽꓳ꓾ ꓖꓳ ꓡꓱ ꓥ ꓠꓬ ꓡ-ꓢ-ꓣꓴ ꓔꓯ ꓥꓪ ꓐꓹ ꓐ ꓦꓲ ꓗꓪ ꓝꓲ ꓩꓴ ꓗꓷ꓾ ꓐꓰ ꓠꓴ ꓔꓯ ꓥꓪ ꓓꓰꓽˍ ꓥꓳ꓿ 28 ꓮ ꓡꓲꓳ ꓐꓯ ꓠꓬ ꓥꓪ ꓬꓲꓼ ꓥꓪ ꓠꓬꓲ ꓥꓪꓽ ꓣꓳ ꓙꓳˍ ꓡꓳ꓿ ꓬꓲ ꓪꓽ ꓔꓯ ꓫꓸ ꓙꓵˍ ꓟ ꓟꓵꓽ ꓕꓱ ꓟ ꓗꓪ ꓟꓽ ꓡ ꓠꓹ ꓟ ꓙꓳꓺ ꓗꓽ ꓖꓶ ꓬꓰ ꓝꓲ꓾ ꓐꓯˍ ꓡꓳ꓿ 29 ꓮ-ꓐ-ꓡ-ꓦ ꓡꓰ꓾ ꓬꓲ ꓪꓽ ꓠꓬ ꓟꓳ-ꓫꓲˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓐꓯ ꓘꓶ ꓙꓳˍ ꓡꓳ꓿ ꓠꓴ ꓬꓲꓼ ꓠꓬꓲ ꓐꓴ ꓠꓬ ꓬꓲ ꓪꓽ ꓔꓯ ꓠ ꓠꓹ ꓝꓲ꓾ ꓐꓯ ꓖꓶˍ ꓡꓳ꓿ 30 ꓬꓲ ꓡꓰ꓾ ꓒꓵꓽ ꓒ ꓮ-ꓐ-ꓡ-ꓦꓺꓳ꓾ ꓟꓽ ꓥ꓿ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓴ ꓕꓲ ꓣꓳ ꓬꓲ ꓪꓽ ꓔꓯ ꓙꓰˍ ꓕꓯ ꓠꓽ꓾ ꓬꓲ ꓪꓽ ꓓꓵꓽ ꓙ ꓒꓳꓹ ꓬꓲꓼ ꓡ ꓥꓳ꓾ ꓐꓯˍ ꓡꓳ꓿ 31 ꓮ-ꓐ-ꓡ-ꓦ ꓡꓰ ꓬꓲ ꓔꓯ꓾ ꓟꓳ-ꓫꓲˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓔꓯ ꓬꓲ ꓪꓽ ꓟꓽ ꓠ ꓠꓹ ꓕꓯ ꓠꓽ꓾ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓴ ꓕꓲ ꓣꓳ ꓝꓲ ꓩꓴ ꓗꓷˍ ꓟꓲ ꓬꓲ ꓪꓽ ꓟꓽ ꓠ ꓠꓹ ꓡ꓾ ꓐꓯ ꓖꓶˍ ꓡꓳ꓿

ꓡꓴ-ꓗ 17

1 ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓡꓱꓸ ꓗꓷˍ ꓟ ꓬꓲ ꓑꓶꓸ ꓟꓽ ꓙꓳ ꓟꓽ ꓗꓷ ꓡꓰ꓿ ꓖꓳ ꓡꓱ ꓥ ꓟꓲ ꓢꓴ ꓔꓯ ꓡꓱꓸ ꓗꓷ ꓝꓲ ꓢꓴ ꓠꓽ ꓫꓸ ꓙꓵˍ ꓥꓳ꓿ 2 ꓤ ꓠꓱ ꓤ ꓕꓱ ꓟꓬ ꓗꓪ ꓟ ꓕꓲ ꓣꓳ ꓔꓯ ꓡꓱꓸ ꓗꓷ ꓝꓲ ꓢꓴ ꓔꓯ ꓠꓬ꓾ ꓬꓲ ꓗꓶꓸ ꓝꓲꓸ ꓗꓪ ꓡꓳ ꓙꓱꓻ ꓞꓳꓹ ꓔ ꓢꓲ꓾ ꓬꓲꓻ ꓡꓴꓽ ꓐꓱ ꓗꓪ ꓡꓳ ꓧꓳꓽ ꓗꓷˍ ꓟ ꓠꓽ ꓬꓲ ꓐꓱ ꓶ ꓟꓬꓽ ꓠꓬꓲ ꓙꓲˍ ꓡꓳ꓿ 3 ꓠꓴ ꓪꓽ ꓤ ꓟꓳ꓿ ꓠꓴ ꓬꓲꓼ ꓠꓴ ꓠꓬꓲ ꓝꓴꓲ ꓬꓰˍ ꓠꓬ ꓬꓲ ꓔꓯ ꓕꓼ꓿ ꓬꓲ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓬ ꓬꓲ ꓔꓯ ꓖꓽ ꓖꓶ꓿ 4 ꓕꓲ ꓠꓬꓲ ꓠꓯS ꓗꓪ ꓠꓴ ꓔꓯ ꓫꓵꓽ ꓧꓪꓹ ꓛꓬ ꓡ ꓢꓲ꓾ ꓫꓵꓽ ꓧꓪ ꓒꓳꓹ ꓬꓲꓼ ꓡ ꓢꓲ ꓠꓬꓲ꓾ ꓥꓪ ꓠꓲꓹ ꓟ ꓡꓶꓸˍ ꓥꓳ꓾ ꓐꓯˍ ꓠꓬ꓾ ꓠꓴ ꓬꓲ ꓔꓯ ꓖꓽ ꓖꓶ ꓠ ꓗꓹ ꓡꓳ꓾ ꓐꓯˍ ꓡꓳ꓿ 5 ꓝꓲ ꓓꓴ ꓐꓴ ꓡꓰ ꓢꓲ ꓒꓽ ꓔꓯ꓾ ꓥꓪ ꓠꓴꓽ ꓙꓵꓻ ꓠꓲꓹ ꓪꓴꓽ ꓡ ꓝꓲ꓾ ꓐꓰ ꓓꓰꓽˍ ꓡꓳ꓿ 6 ꓢꓲ ꓒꓽ ꓡꓰ꓾ ꓠꓴ ꓪꓽ ꓙꓵꓻ ꓠꓲꓹ ꓠꓬ ꓪꓳꓽ ꓒꓲꓻ ꓫꓵꓸ ꓕꓲ ꓢꓶꓽ ꓪꓴꓻ ꓛꓲ ꓤ ꓙꓳˍ ꓕꓯ ꓠꓽ꓾ ꓐꓵꓽ ꓜ ꓜꓲꓻ ꓕꓱ ꓕꓲ ꓜꓲ ꓔꓯ꓾ ꓠꓴ ꓚꓰꓺ ꓗꓪ ꓐꓰ ꓚꓵꓹ ꓑꓶꓺ ꓡ ꓢꓲ ꓬꓲꓻ ꓡꓴ ꓐꓱ ꓗꓪ ꓔꓶꓺ ꓬꓰ Gꓽ꓾ ꓐꓯˍ ꓟꓲ ꓠꓴ ꓪꓽ ꓔꓯ ꓠ ꓠꓹˍ ꓥꓳ꓾ ꓐꓯˍ ꓡꓳ꓿ 7 ꓠꓴ ꓪꓽ ꓗꓪ ꓟ ꓕꓲ ꓣꓳ ꓠꓬ ꓚꓳ ꓑꓸ ꓙꓳ ꓢꓲ꓾ ꓚꓳ ꓑꓸ ꓠꓬ ꓦꓻ ꓟꓲ ꓟꓽ꓾ ꓥ ꓠꓬ ꓮ ꓣꓳ ꓡꓳꓸ ꓢꓲ ꓬꓲꓼ ꓡ ꓠꓬ꓾ ꓮꓽ ꓟ ꓡꓰ ꓬꓲ ꓔꓯ꓾ ꓮꓸ ꓟꓲꓸ ꓗꓳꓺ ꓢꓲ ꓜ ꓜꓽ ꓡꓯ꓾ ꓐꓰ ꓐꓯ ꓖꓶ ꓢꓴ ꓙꓳˍ ꓥꓳ ꓪ? 8 ꓪꓻ ꓜꓲ ꓠꓴ ꓠꓽ ꓬꓲ ꓔꓯ꓾ ꓙꓽ ꓧꓷꓹ ꓧꓷꓹ ꓢꓲ ꓥꓪ ꓔꓯ ꓟꓶꓼ ꓘꓶꓼ ꓜꓻ ꓫꓬꓹ ꓖꓶ ꓜꓽ ꓡꓯ꓿ ꓥꓪ ꓜꓽ ꓐꓳ ꓓꓳꓻ ꓐꓳ ꓡꓰ ꓕꓯꓽ ꓢꓲˍ ꓡꓰ ꓠꓴ ꓜꓽ ꓓꓳ ꓛꓵˍ ꓡꓳ꓾ ꓐꓰ ꓐꓯˍ ꓥꓳ꓾ ꓟꓽ ꓥ ꓡ? 9 ꓬꓲ ꓚꓳ ꓑꓸ ꓠꓬ ꓬꓲ ꓢꓲ ꓒꓽ ꓡꓰ ꓝꓲ ꓔ ꓟ ꓮꓽ ꓙꓵ ꓬꓰ ꓓꓳ ꓡꓰˍ ꓟꓲ꓾ ꓬꓲ ꓢꓲ ꓒꓽ ꓠꓬ ꓬꓲ ꓔꓯ ꓫꓸ ꓟꓳ꓾ ꓟꓽ ꓐꓯ꓿ 10 ꓖꓳ ꓟ ꓡꓰ ꓐꓰ ꓠꓴ ꓪꓽ ꓔꓯ ꓝꓲ ꓔ ꓟ ꓮꓽ ꓙꓵ ꓬꓰ ꓓꓳ ꓡꓰˍ ꓟꓲ ꓠꓴ ꓪꓽ ꓠꓽ꓾ ꓥꓪ ꓠꓴꓽ ꓠꓬ ꓟꓽ ꓒꓵ ꓟ ꓚꓳ ꓑꓸ ꓐꓴ ꓥꓳ꓿ ꓥꓪ ꓠꓴꓽ ꓬꓰ ꓗꓷ ꓟ ꓠꓬ ꓥꓪ ꓠꓴꓽ ꓬꓰ ꓙꓲꓽ ꓙꓳˍ ꓡꓳ ꓫꓵꓽˍ ꓡꓰꓽ ꓥꓳ꓾ ꓐꓰ ꓐꓯ ꓠ ꓗꓹ ꓡꓳ꓾ ꓐꓯˍ ꓡꓳ꓿ 11 ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓕꓯ꓾ ꓢ-ꓟ-ꓡꓲˍ ꓐꓰ ꓖ-ꓡꓲ-ꓡꓲ ꓟꓵꓽ ꓠꓬꓲꓽ ꓗꓴꓸ ꓚS ꓗꓪ ꓗꓳꓸ ꓬꓯꓼˍ ꓡꓳ꓿ 12 ꓖꓳ ꓡꓱ ꓢꓲ ꓘꓹ ꓕꓲ ꓘꓹ ꓗꓪ ꓓꓵꓽ ꓙꓰ ꓔꓬ ꓕꓯ꓾ ꓔꓸ ꓟꓼ ꓩꓴ ꓓꓲꓻ ꓢꓴ ꓞꓲ ꓣꓳ ꓬꓲ ꓔꓯ ꓔꓳꓹ ꓜꓳꓽˍ ꓡꓳ꓿ ꓬꓲ ꓪꓽ ꓠꓬ ꓶꓽ ꓤ ꓗꓪ ꓦꓰꓼ ꓞ ꓢꓲ꓾ 13 ꓢꓯꓼ ꓓꓽ ꓟ ꓡꓰ꓾ ꓟꓸ ꓒ ꓬꓰ-ꓢꓴꓳ꓾ ꓥꓪ ꓠꓴꓽ ꓔꓯ ꓫꓱꓸ ꓤ ꓡꓯ꓾ ꓐꓯˍ ꓡꓳ꓿ 14 ꓬꓲ ꓪꓽ ꓔꓯ ꓬꓰ-ꓢꓴ ꓡꓳꓸ ꓟꓳꓻ ꓗꓷ ꓠꓬ꓾ ꓬꓲ ꓡꓰ꓾ ꓔꓲ ꓒ ꓐꓴ ꓔꓯ ꓠꓴ ꓪꓽ ꓖꓳ ꓓꓱꓽ ꓟꓳꓸ ꓖꓶ ꓬꓰ꓾ ꓐꓯ ꓖꓶˍ ꓡꓳ꓿ ꓬꓲ ꓪꓽ ꓬꓲ ꓖꓳ ꓡꓱ ꓙꓰ ꓔꓬ ꓕꓯ ꓔꓸ ꓟꓼ ꓩꓴ ꓠꓽ ꓫꓬꓻ ꓡꓰꓳ꓿ 15 ꓬꓲ ꓪꓽ ꓗꓪ ꓟ ꓕꓲ ꓣꓳ ꓠꓬ ꓬꓲ ꓓꓻ ꓡꓰˍ ꓟ ꓔꓯ ꓟꓳꓻˍ ꓕꓯ ꓚꓱꓹ ꓬꓲꓼ ꓡ ꓢꓲ꓾ ꓢꓯꓼ ꓓꓽ ꓟ ꓡꓰ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓢꓲ ꓠꓬꓲ꓾ 16 ꓬꓰ-ꓢꓴ ꓟꓲꓽ ꓙꓬ ꓗꓪ ꓟꓳꓼ ꓡꓰ ꓢꓲ ꓬꓲ ꓔꓯ ꓫꓸ ꓟꓳˍ ꓡꓳ꓿ ꓕꓱ ꓕꓲ ꓣꓳ ꓠꓬ ꓢ-ꓟ-ꓡꓲ ꓡꓽ ꓞꓳ ꓥ ꓡꓳ꓿ 17 ꓬꓰ-ꓢꓴ ꓡꓰ꓾ ꓓꓻ ꓡꓰ ꓢꓴ ꓠꓬ ꓞꓲ ꓣꓳ ꓟꓽ ꓥ ꓡ? ꓠꓱꓸ ꓐꓯꓼ ꓗꓴꓸ ꓣꓳ ꓟ ꓮ ꓡꓲ ꓗꓪ ꓙꓰ ꓗꓷ ꓡ? 18 ꓐꓶꓽ ꓞꓳ ꓕꓱ ꓕꓲ ꓣꓳ ꓟꓽ ꓥ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ ꓚꓱꓹ ꓬꓲꓼ ꓡ ꓢꓴ ꓟꓽ ꓙꓳ ꓡ?꓾ ꓐꓯˍ ꓡꓳ꓿ 19 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓔꓴ ꓢꓲ ꓙꓰ Gꓽ꓿ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓾ ꓐꓯ ꓖꓶˍ ꓡꓳ꓿ 20 ꓕꓲ ꓧꓪꓹ ꓙꓳˍ ꓠꓬ ꓒ-ꓡꓲ-ꓢꓷ ꓐꓴ ꓡꓰ꓾ ꓪꓴ-ꓢ ꓗꓴꓷꓼ ꓮ ꓕꓯꓽ ꓕꓲ ꓝꓲꓸ ꓗꓪ ꓛꓲ ꓡ ꓥꓳ ꓪ?꓾ ꓐꓰ ꓠ ꓠꓬꓲ ꓡ ꓠꓬꓲ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓪꓴ-ꓢ ꓗꓴꓷꓼ ꓛꓲ ꓡ ꓟ ꓠꓬ ꓟꓬ ꓢꓶꓽ ꓡꓰ ꓟꓳꓻ ꓓꓻ ꓡꓳ ꓫꓵ ꓟꓽ ꓥ꓿ 21 ꓢꓴ ꓡꓰ꓾ ꓠꓬꓲ ꓠꓹ꓾ ꓕꓱ ꓗꓪ ꓥ ꓡꓳ꓾ ꓥ ꓠꓬ ꓖꓳ ꓗꓪ ꓥ ꓡꓳ꓾ ꓐꓰˍ ꓟꓲ ꓟꓽ ꓐꓯ ꓖꓶ ꓡ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓗꓴꓷꓼ ꓠꓽ ꓠꓴ ꓪꓽ ꓗꓳ ꓡꓳ ꓗꓪ ꓓꓹ ꓡꓳ꓾ ꓐꓯ ꓖꓶˍ ꓡꓳ꓿ 22 ꓝꓮꓲ ꓠꓬ ꓬꓲ ꓡꓰ ꓛꓳꓽ ꓒꓯꓹ ꓐꓴ ꓔꓯ꓾ ꓠꓴ ꓪꓽ ꓠꓬ ꓡ-ꓞꓳ-ꓮ-ꓐꓲ ꓬꓲ ꓦꓬꓼ ꓠꓬꓲ ꓕꓲ ꓠꓬꓲꓻ ꓤꓼ ꓔꓯ ꓟꓳꓻ ꓠꓲꓹ ꓫꓵˍ ꓟꓲ ꓟꓳꓻ ꓪ ꓟꓽ ꓓ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ 23 ꓖꓳ ꓕꓯ ꓢꓴ ꓡꓰ ꓠꓴ ꓪꓽ ꓔꓯ꓾ ꓠꓬꓲ ꓠꓹ꓾ ꓖꓳ ꓗꓪ ꓥꓳ꓾ ꓥ ꓠꓬ ꓕꓱ ꓗꓪ ꓥꓳ꓾ ꓐꓰ ꓐꓯ ꓡ ꓥ ꓟꓲ꓾ ꓠꓴ ꓪꓽ ꓕꓽ ꓓꓳ ꓙꓰ꓿ ꓬꓲ ꓪꓽ ꓔꓯ ꓛꓳꓻˍ ꓟꓲ ꓕꓽ ꓛꓳ ꓙꓰ꓿ 24 ꓮ ꓡꓲꓳ ꓐꓯ ꓠꓬ ꓡ-ꓞꓳ-ꓮ-ꓐꓲ ꓬꓯꓼ ꓡ ꓟ ꓦꓬꓼ ꓠꓬꓲ ꓗꓪ ꓠꓬ꓾ ꓟꓴꓽ ꓗꓪ ꓕ ꓑꓳꓸ ꓕꓲ ꓛꓱꓽ ꓗꓪ ꓟꓲꓽ ꓐꓬꓱꓼ ꓤꓰꓽ ꓡ ꓟꓶꓽ ꓕꓯ꓾ ꓖꓳ ꓑꓳꓸ ꓕꓲ ꓛꓱꓽ ꓗꓪ ꓡꓬꓸ ꓛꓲ ꓬꓰˍ ꓟ ꓡꓰ ꓐꓰ ꓗꓹ ꓥꓳ꓿ 25 ꓖꓳ ꓡꓱ ꓥ ꓟꓲ ꓡ-ꓞꓳ-ꓮ-ꓐꓲ ꓠꓬ꓾ ꓫꓸ ꓙꓵˍ ꓟ ꓮꓽ ꓟꓬꓹ ꓫꓵꓽ ꓜꓲꓽ ꓢꓲ꓾ ꓕꓱ ꓕꓲ ꓤꓶꓻ ꓟ ꓡꓽ ꓞꓳ ꓡꓰ ꓟꓽ ꓘꓳꓻ ꓣꓴ ꓡ ꓟ ꓧꓶꓸ ꓕꓯ ꓗꓳꓸ ꓪˍ ꓥꓳ꓿ 26 ꓠꓳ-ꓪ ꓦꓬꓼ ꓠꓬꓲ ꓗꓪ ꓮ ꓡꓲ ꓥ ꓠꓬ ꓡ-ꓞꓳ-ꓮ-ꓐꓲ ꓦꓬꓼ ꓠꓬꓲ ꓗꓪˍ ꓟꓲ ꓖꓳ ꓡꓱ ꓗꓹ ꓥꓳ꓿ 27 ꓠꓳ-ꓪ ꓦꓲ ꓡꓲ ꓗꓪ ꓓꓵꓽ ꓡꓰ ꓕꓲ ꓠꓬꓲ ꓗꓪ ꓛꓲ꓾ ꓬꓲ ꓪꓽ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ꓾ ꓤꓽ ꓟꓶꓻ ꓘꓴ ꓠꓬꓲ ꓮꓸ ꓟꓲꓽ ꓩꓴ ꓠꓬꓲ ꓬꓰ ꓔꓬ ꓟ ꓗꓪ ꓟꓵ ꓟꓷꓸ ꓡ ꓢꓲ꓾ ꓬꓲ ꓪꓽ ꓮꓽ ꓙꓵ ꓔꓯ ꓔꓲꓹ ꓫꓵꓻ ꓝꓲˍ ꓡꓳ꓿ 28 ꓡꓳ-ꓔꓷꓽ ꓦꓬꓼ ꓠꓬꓲ ꓗꓪˍ ꓟꓲ ꓖꓳ ꓟ ꓡꓰ ꓐꓰ꓾ ꓬꓲ ꓪꓽ ꓠꓬ ꓜꓽ ꓠꓬꓲ ꓓꓳ ꓠꓬꓲ꓾ ꓪꓴꓽ ꓠꓬꓲ ꓪꓴꓻ ꓠꓬꓲ꓾ ꓓꓳꓽ ꓠꓬꓲ ꓫꓵꓸ ꓠꓬꓲ꓾ ꓦꓲ ꓫꓬꓹ ꓠꓬꓲ ꓬꓰˍ ꓡꓳ꓿ 29 ꓖꓳ ꓡꓱ ꓥ ꓟꓲ ꓡꓳ-ꓔꓷ ꓠꓬ ꓢꓳ-ꓓꓳ-ꓟ ꓗꓪ ꓐꓰ ꓓꓳ ꓡ ꓕꓲ ꓠꓬꓲ ꓗꓪ꓾ ꓟꓴꓽ ꓗꓪ ꓗꓪ ꓐꓰ ꓮꓸ ꓔꓳꓸˍ ꓐꓰ ꓡꓳ ꓐꓺ ꓦ ꓩꓴ ꓡ ꓢꓲ꓾ ꓬꓲ ꓪꓽ ꓮꓽ ꓙꓵ ꓔꓯ ꓛꓴ ꓛꓰꓹ ꓡꓰ ꓝꓲꓳ꓿ 30 ꓡ-ꓞꓳ-ꓮ-ꓐꓲ ꓟꓳꓸ ꓖꓶ ꓡ ꓟ ꓦꓬꓼ ꓠꓬꓲ ꓗꓪˍ ꓟꓲ ꓖꓳ ꓟ ꓡꓰ ꓐꓰ ꓗꓷ ꓡꓰˍ ꓥꓳ꓿ 31 ꓖꓳ ꓕꓲ ꓠꓬꓲ ꓗꓪ ꓦꓲ ꓪꓴꓸ ꓓꓵ ꓓꓰꓺ ꓗꓪ ꓔꓬ ꓢꓴ ꓠꓬ꓾ ꓦꓲ ꓠꓯꓸꓼ ꓗꓪ ꓟ ꓖꓴꓽ ꓙꓴꓽ ꓣꓴ ꓠꓹ ꓟ ꓕꓽ ꓬꓯꓼ ꓙꓰ꓿ ꓦꓻ ꓟꓲ ꓦ ꓐꓽ ꓗꓪ ꓔꓬ ꓢꓴˍ ꓟꓲ ꓦꓲ ꓗꓪ ꓕꓽ ꓬꓲꓼ ꓙꓰ꓿ 32 ꓡꓳ-ꓔꓷ ꓤ ꓟꓶ ꓮ ꓡꓲ ꓗꓷ ꓡꓰ ꓟ ꓔꓯ ꓧꓪꓸ ꓛꓲꓽ ꓔ꓿ 33 ꓚꓲꓸ ꓛꓬ ꓢꓯꓼ ꓟꓬ ꓚꓬꓴ ꓠꓲꓹ ꓫꓵ ꓢꓴ ꓠꓬ ꓬꓲ ꓢꓯꓼ ꓟꓬ ꓒꓲꓼ ꓬꓰˍ ꓥꓳ꓿ ꓬꓲ ꓢꓯꓼ ꓟꓬ ꓔꓯ ꓟꓽ ꓗꓹ ꓐꓽ ꓢꓴ ꓠꓬ꓾ ꓚꓲꓸ ꓛꓬ ꓢꓯꓼ ꓟꓬ ꓚꓬꓴ ꓟꓶˍ ꓥꓳ꓿ 34 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓖꓳ ꓕꓲ ꓦꓬꓼ ꓗꓪ ꓬꓲꓼ ꓖꓴ ꓗꓪ ꓡꓽ ꓞꓳ ꓠꓬꓲꓽ ꓣꓳ ꓔꓬ ꓕꓯ꓾ ꓕꓲ ꓣꓳ ꓔꓯ ꓧꓳꓽ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓗꓶ ꓔꓸ ꓬꓰˍ ꓥꓳ꓿ 35 ꓤ ꓟꓶ ꓤ ꓠꓬꓲꓽ ꓣꓳ ꓡꓳ ꓙꓱꓺ ꓖꓳꓻ ꓔꓬ ꓠꓬ꓾ ꓕꓲ ꓣꓳ ꓔꓯ ꓧꓳꓽ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓗꓶ ꓔꓸ ꓬꓰˍ ꓥꓳ꓿ 36ꓡꓽ ꓞꓳ ꓠꓬꓲꓽ ꓣꓳ ꓦꓻ ꓟꓲ ꓗꓪ ꓔꓬ ꓠꓬ꓾ ꓕꓲ ꓣꓳ ꓔꓯ ꓧꓳꓽ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓗꓶ ꓔꓸ ꓬꓰˍ ꓥꓳ꓾ ꓐꓯˍ ꓡꓳ꓿ 37 ꓖꓳ ꓡꓱ ꓠꓬ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓕꓱ ꓟ ꓮ ꓡꓲ ꓗꓪ ꓗꓷ ꓡꓰˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓡꓰ ꓬꓲ ꓪꓽ ꓔꓯ꓾ ꓫꓵꓻ ꓟꓳꓻ ꓮ ꓡꓲ ꓗꓪ ꓓꓹ ꓠꓬ꓾ ꓠꓸ ꓙꓱꓻˍ ꓟꓲ ꓖꓳ ꓗꓪ ꓜꓲꓼ ꓡ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿

ꓡꓴ-ꓗ 18

1 ꓬꓲ ꓪꓽ ꓠꓬ ꓮ ꓕꓯꓽˍ ꓟꓲ ꓠꓲꓹ ꓟ ꓟꓽ ꓙꓬ ꓡꓰ ꓡꓰ ꓪꓽ ꓘꓴ ꓠꓹ ꓟ꓾ ꓬꓰ-ꓢꓴ ꓡꓰ ꓔꓯ ꓥꓳꓽ ꓕꓱ ꓡꓱ ꓕꓲ ꓟ ꓐꓯ ꓖꓶˍ ꓡꓳ꓿ 2 ꓡꓳ ꓒꓱ ꓕꓲ ꓟ ꓗꓪ ꓪꓴ-ꓢ ꓔꓯˍ ꓟꓲ ꓟꓽ ꓙꓳ꓾ ꓡꓽ ꓞꓳ ꓔꓯˍ ꓟꓲ ꓟꓽ ꓒꓵꓽ ꓟ ꓐꓯ ꓟꓴ ꓫꓬꓹ ꓒꓽ ꓕꓲ ꓣꓳ ꓔꓬ ꓡꓳ꓿ 3 ꓝꓮꓲ ꓡꓳ ꓒꓱ ꓖꓳ ꓕꓲ ꓟ ꓗꓪ ꓟꓶꓽ ꓛꓵꓽ ꓟˍ ꓟꓲ ꓕꓲ ꓣꓳ ꓔꓬ ꓡꓳ꓿ ꓬꓲ ꓠꓬ ꓮ ꓕꓯꓽˍ ꓟꓲ ꓢꓲꓽ ꓒ ꓖꓳ ꓕꓲ ꓣꓳ ꓔꓯ ꓙꓰ ꓢꓲ꓾ ꓥꓪ ꓔꓯ ꓔꓳꓹ ꓢꓴ ꓐꓴˍ ꓐꓰ ꓥꓪ ꓠꓬꓲꓽ ꓗꓴꓸ ꓚꓸꓼ ꓗꓪ ꓐꓯ ꓟꓴ ꓫꓬꓹ ꓖꓶ ꓡꓯ꓾ ꓐꓰ ꓓꓰꓽˍ ꓡꓳ꓿ 4 ꓬꓲ ꓪꓴꓸ ꓕꓯꓽ ꓐꓯ ꓟꓴ ꓫꓬ ꓒ ꓠꓬ ꓬꓰ ꓙ ꓠꓲꓹ ꓟꓽ ꓫꓵ꓿ ꓖꓳ ꓡꓱ ꓥ ꓟꓲ ꓗꓸ ꓠꓯꓸ ꓠꓬ ꓬꓲ ꓠꓽ꓾ ꓥꓪ ꓠꓬ ꓪꓴ-ꓢ ꓔꓯˍ ꓟꓲ ꓟꓽ ꓙꓳ꓾ ꓞꓳ ꓤ ꓔꓯˍ ꓟꓲ ꓟꓽ ꓒꓵꓽ ꓢꓴ ꓥꓻ ꓥˍ ꓟꓲ꓾ 5 ꓟꓶꓽ ꓛꓵꓽ ꓟ ꓕꓱ ꓕꓲ ꓣꓳ ꓡꓰ ꓥꓪ ꓔꓯ ꓘꓶꓻ ꓡꓶꓽ ꓔꓬ ꓠꓬꓲ꓾ ꓥꓪ ꓡꓰ ꓬꓲ ꓐꓱ ꓶ ꓐꓯ ꓟꓴ ꓫꓬꓹ ꓖꓶˍ ꓥꓳ꓿ ꓟꓽ ꓥ ꓠꓬ ꓬꓲ ꓟꓽ ꓠꓽ ꓠꓽ ꓡ ꓔꓬ ꓟ ꓗꓪ ꓐꓰ ꓥꓪ ꓪꓴꓽ ꓧꓶ ꓓꓴ ꓗꓷ ꓡꓰˍ ꓥꓳ꓾ ꓐꓰ ꓓꓵꓽ ꓙˍ ꓡꓳ꓾ ꓐꓯˍ ꓡꓳ꓿ 6 ꓝꓮꓲ ꓢꓲ ꓒꓽ ꓡꓰ꓾ ꓟꓽ ꓙꓲꓻ ꓟꓽ ꓜꓳꓽ ꓟ ꓐꓯ ꓟꓴ ꓫꓬꓹ ꓒ ꓖꓳ ꓟ ꓐꓯˍ ꓟ ꓔꓯ ꓚꓲꓸ ꓔ꓿ 7 ꓪꓴ-ꓢ ꓠꓽ ꓟꓳꓼ ꓡꓳ ꓢ ꓘꓪ ꓬꓲ ꓔꓯ ꓓꓰꓽ ꓔꓬ ꓟ ꓢꓲꓺ ꓔ ꓢꓴ ꓐꓴ ꓐꓱ ꓶ ꓪ ꓜꓲ ꓠꓲꓹ ꓞ ꓔꓱꓹ ꓜꓳꓽˍ ꓟ ꓐꓯ ꓟꓴ ꓞꓷꓹ ꓖꓶ ꓡ ꓥꓳ꓾ ꓟꓽ ꓥ ꓡ? 8 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ ꓠꓬ ꓬꓲ ꓪꓽ ꓔꓯ ꓮꓸ ꓟꓲꓸ ꓟꓲ ꓔꓱꓹ ꓜꓳꓽˍ ꓟ ꓐꓯ ꓟꓴ ꓞꓷꓹ ꓖꓶˍ ꓥꓳ꓿ ꓖꓳ ꓡꓱ ꓥ ꓟꓲ ꓡ-ꓞꓳ-ꓮ-ꓐꓲ ꓡꓻ ꓕꓯ꓾ ꓟꓲ ꓠꓯ ꓗꓪ ꓙꓵꓻ ꓠꓲꓹ ꓧꓪ ꓟꓶˍ ꓥꓳ ꓪ?꓾ ꓐꓯˍ ꓡꓳ꓿ 9 ꓚꓲꓸ ꓛꓬ ꓔꓱꓹ ꓜꓳꓽˍ ꓟ ꓔꓯ ꓦ ꓡꓱ ꓢꓲ꓾ ꓢꓴ ꓔꓯ ꓟꓳꓻ ꓟꓽ ꓟꓵꓺ ꓢꓴ ꓔꓯ꓾ ꓬꓰ-ꓢꓴ ꓠꓬ ꓔꓯ ꓥꓳꓽ ꓡꓰ ꓕꓱ ꓡꓱ ꓐꓯˍ ꓢꓰꓽ ꓡꓳ꓿ 10 ꓡꓽ ꓞꓳ ꓠꓬꓲꓽ ꓣꓳ ꓠꓬ ꓪꓽ ꓘꓴ ꓠꓹ ꓟ ꓢꓲꓽ ꓫꓬ ꓦꓲ ꓗꓪ ꓓꓯ ꓙꓰˍ ꓡꓳ꓿ ꓕꓲ ꓣꓳ ꓠꓬ ꓒ-ꓡꓲ-ꓢꓷ ꓥ ꓢꓲ꓾ ꓕꓲ ꓣꓳ ꓠꓽ ꓝꓲꓸ ꓫ ꓢꓴ ꓥ ꓡꓳ꓿ 11 ꓒ-ꓡꓲ-ꓢꓷ ꓠꓽ ꓦꓰꓼ ꓞꓹ ꓢꓲ꓾ ꓚꓲꓸ ꓛꓬ ꓔꓯ ꓟꓳꓸ ꓕꓱ ꓡꓱ ꓪꓽ ꓘꓴˍ ꓡꓳ꓿ ꓪꓴ-ꓢꓺꓳ꓾ ꓥꓪ ꓠꓽ ꓠꓱꓸ ꓐꓯ ꓢꓴˍ ꓡꓰ ꓐꓰ ꓢꓴ ꓔꓯ ꓘꓳꓹ ꓜꓽ ꓢꓴ ꓟꓽ ꓥ꓿ ꓟꓽ ꓔꓱꓹ ꓢꓴˍ ꓟꓲ ꓟꓽ ꓥ꓿ ꓦꓬꓽ ꓛꓳꓽ ꓧꓪ ꓢꓴˍ ꓟꓲ ꓟꓽ ꓥ꓿ ꓝꓮꓲ ꓝꓲꓸ ꓫ ꓢꓴ ꓕꓱ ꓕꓲ ꓣꓳ ꓡꓰ ꓐꓰˍ ꓟꓲ ꓟꓽ ꓗꓹ ꓠꓬꓲ ꓠꓴ ꓔꓯ ꓫꓸ ꓟꓳ꓿ 12 ꓥꓪ ꓠꓬ ꓕꓲ ꓠꓽ ꓗꓪ ꓜꓽ ꓓꓴ ꓠꓬꓲꓽ ꓧꓪ ꓚꓲꓸˍ ꓡꓳ꓿ ꓥꓪ ꓟꓶˍ ꓟ ꓮꓽ ꓙꓵ ꓗꓪ ꓐꓰ ꓞꓲꓻ ꓐꓱ ꓕꓲ ꓐꓱ ꓠꓴ ꓔꓯ ꓡꓲꓸ ꓖꓶˍ ꓡꓳ꓾ ꓐꓯˍ ꓡꓳ꓿ 13 ꓝꓲꓸ ꓫ ꓢꓴ ꓠꓽ ꓶꓽ ꓤ ꓗꓪ ꓦꓰꓼ ꓞꓹ ꓢꓲ꓾ ꓟꓴꓽ ꓗꓪ ꓗꓪ ꓡꓳꓸ ꓟꓽ ꓑꓶꓸ ꓑꓶ ꓳ' ꓟꓶꓽ ꓓꓶꓽ ꓢꓲ꓾ ꓪꓴ-ꓢꓺꓳ꓾ ꓝꓴꓲ ꓙꓳ ꓢꓴ ꓥꓪ ꓔꓯ ꓫꓱꓸ ꓤ ꓙ ꓡꓯ꓾ ꓐꓯˍ ꓡꓳ꓿ 14 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓝꓲꓸ ꓫ ꓢꓴ ꓖꓳ ꓕꓲ ꓣꓳ ꓠꓬ ꓒ-ꓡꓲ-ꓢꓷ ꓖꓳ ꓕꓲ ꓣꓳ ꓢꓶꓸ ꓟ ꓞꓲ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓢꓲ ꓬꓲ ꓦꓲ ꓗꓪ ꓬꓲꓼ ꓙꓰ ꓪˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓚꓲꓸ ꓛꓬ ꓔꓯ ꓓꓳꓹ ꓟꓴ ꓢꓴ ꓥ ꓕ ꓑꓳꓸ ꓔꓯ ꓠꓬ ꓱ'ꓺ ꓡꓰ ꓝꓲˍ ꓥꓳ꓿ ꓚꓲꓸ ꓛꓬ ꓙꓻ ꓣꓳꓽ ꓢꓴ ꓔꓯ ꓠꓽ ꓓꓳꓹ ꓟꓴ ꓖꓶˍ ꓥꓳ꓾ ꓐꓯˍ ꓡꓳ꓿ 15 ꓤ ꓠꓱ ꓤ ꓐꓴ ꓔꓯ ꓬꓰ-ꓢꓴ ꓡꓰ ꓫꓱꓹ ꓖꓶ ꓡ ꓠꓹ ꓟ꓾ ꓡꓽ ꓞꓳ ꓕꓲ ꓐꓱ ꓡꓰ ꓬꓲ ꓪꓽ ꓤ ꓠꓱ ꓤ ꓐꓴ ꓔꓯ ꓬꓲ ꓔꓬ ꓗꓪ ꓧꓳꓽ ꓡ ꓡꓳ꓿ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ ꓬꓲ ꓪꓽ ꓔꓯ ꓕꓼˍ ꓡꓳ꓿ 16 ꓬꓰ-ꓢꓴ ꓠꓽ ꓛꓳ ꓒꓯꓹ ꓐꓴ ꓔꓯ ꓘꓴ ꓔꓯꓹ ꓡ ꓢꓲ꓾ ꓤ ꓠꓱ ꓤ ꓐꓴ ꓥꓪ ꓔꓯ ꓡ ꓝꓲ꓿ ꓬꓲ ꓪꓽ ꓔꓯ ꓕꓽ ꓗꓽ ꓔ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓗꓴꓷꓼ ꓠꓬ ꓕꓱ ꓡꓱ ꓫꓵꓽ ꓡꓽ ꓞꓳ ꓔꓯ ꓟ ꓥ ꓡꓳ꓿ 17 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶꓽˍ ꓠꓬꓲ꓾ ꓮꓽ ꓟ ꓥ ꓟꓲ ꓤ ꓠꓱ ꓤ ꓡꓰ ꓪꓴ-ꓢ ꓗꓴꓷꓼ ꓔꓯ ꓘꓳꓻ ꓣꓴˍ ꓟ ꓡꓰ ꓐꓰ ꓟꓽ ꓘꓳꓻ ꓣꓴ ꓢꓴ ꓠꓬ꓾ ꓮ ꓡꓲ ꓥ ꓟꓲ ꓖꓳ ꓗꓪ ꓓꓵ ꓡꓰ ꓟꓽ ꓓ꓾ ꓐꓯˍ ꓡꓳ꓿ 18 ꓢꓲꓽ ꓒ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ꓾ ꓙꓲˍ ꓟ ꓟꓸ ꓒꓽꓳ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ ꓥꓪ ꓮꓸ ꓫꓵ ꓬꓰ ꓠꓯꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 19 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ꓾ ꓙꓲˍ ꓟ꓾ ꓐꓰ ꓘꓴˍ ꓡ? ꓪꓴ-ꓢ ꓕꓲ ꓣꓳˍ ꓡꓰꓽ ꓟ ꓥ ꓠꓬ꓾ ꓙꓲˍ ꓟ ꓠꓱꓸ ꓐꓯꓼ ꓢꓴ ꓟꓽ ꓙꓳ꓿ 20 ꓕꓵꓼ ꓪꓽ ꓞꓲꓻ ꓙꓰꓽ ꓗꓪ꓾ ꓦꓬꓽ ꓛꓳꓽ ꓕꓽ ꓧꓪ꓾ ꓞꓳ ꓤ ꓕꓽ ꓢꓰꓼ꓾ ꓕꓽ ꓘꓴ ꓕꓽ ꓠꓯ꓾ ꓟꓽ ꓔꓱꓹ ꓟ ꓢꓷꓸ ꓙ ꓟꓳ ꓙ ꓢꓴ ꓕꓽ ꓬꓰ꓾ ꓠꓴ ꓮꓽ ꓐꓽ ꓮ ꓟ ꓔꓯ ꓒꓵꓽ꓾ ꓐꓯˍ ꓟ ꓠꓴ ꓢꓷꓸˍ ꓡꓳ꓾ ꓐꓯ ꓖꓶˍ ꓡꓳ꓿ 21 ꓖꓳ ꓡꓱ ꓠꓬ ꓬꓲ ꓡꓰ꓾ ꓕꓱ ꓟꓬ ꓙꓰꓽ ꓟ ꓮꓽ ꓙꓵ ꓠꓬ ꓥꓪ ꓞꓲꓼ ꓣꓳˍ ꓕꓯˍ ꓡꓰ ꓛꓳ ꓔꓬ ꓥꓳ꓾ ꓐꓯˍ ꓡꓳ꓿ 22 ꓬꓰ-ꓢꓴ ꓑ ꓙꓽ ꓗꓷ ꓠꓬ ꓬꓲ ꓔꓯ꓾ ꓖꓳ ꓡꓱ ꓥ ꓟꓲ ꓠꓴ ꓠꓽ ꓕꓲ ꓙꓰꓽ ꓛˍ ꓢꓰꓽ ꓡꓳ꓿ ꓠꓴ ꓙꓳˍ ꓟ ꓮꓽ ꓙꓵ ꓪꓴꓽ ꓗꓷ ꓢꓲ ꓞꓳ ꓫꓸ ꓔꓯ ꓐꓱꓻ ꓖꓶ꓿ ꓖꓳ ꓡꓱ ꓠꓬ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓠꓴ ꓠꓽ ꓒꓵꓽ ꓶꓼ ꓙꓳˍ ꓥꓳ꓿ ꓖꓳ ꓡꓱ ꓢꓲ ꓥꓪ ꓔꓯ ꓛꓳ ꓡꓯ꓾ ꓐꓯ ꓖꓶˍ ꓡꓳ꓿ 23 ꓡꓽ ꓞꓳ ꓖꓳ ꓟ ꓠꓬ ꓞꓳ ꓐꓳ ꓓꓽ ꓟ ꓕꓲ ꓣꓳ ꓥ ꓠꓬꓲ꓾ ꓕꓱ ꓟꓬ ꓙꓰꓽ ꓑ ꓙꓽ ꓗꓷ ꓠꓬ ꓬꓲ ꓠꓲꓹ ꓟ ꓮꓽ ꓘꓶꓸ ꓫꓸ ꓡꓰꓳ꓿ 24 ꓖꓳ ꓕꓯ ꓬꓰ-ꓢꓴ ꓠꓬ ꓬꓲ ꓔꓯ ꓡꓳꓸ ꓔ ꓢꓲ꓾ ꓒꓴꓻ ꓙꓳ ꓫꓵꓻ ꓙꓳ ꓢꓴ ꓠꓬ꓾ ꓪꓴ-ꓢ ꓗꓴꓷꓼ ꓗꓪ ꓓꓵꓽ ꓡꓰ ꓠꓹ ꓟ ꓠꓽ ꓮꓺ ꓘꓶꓻ ꓫꓸˍ ꓡꓳ ꓟꓻ꓿ 25 ꓞꓳ ꓐꓳ ꓕꓲ ꓣꓳ ꓪꓴ-ꓢ ꓗꓴꓷꓼ ꓗꓪ ꓓꓵꓽ ꓙꓰ ꓠꓹ ꓟ ꓠꓬ꓾ ꓡꓳꓽ ꓕꓳ ꓕꓲ ꓘꓹ ꓪꓳꓼ ꓠꓺ ꓗ ꓗꓪ ꓙ ꓙꓰ ꓠꓹ ꓟ ꓢꓶꓸ ꓟꓽ ꓞꓲ ꓫꓸˍ ꓡꓳ꓾ ꓐꓯˍ ꓡꓳ꓿ 26 ꓑ ꓙꓽ ꓢꓴ ꓡꓰ꓾ ꓖꓳ ꓡꓱ ꓥ ꓠꓬ ꓮꓽ ꓟ ꓚꓬꓴ ꓟꓶ ꓓ ꓢꓰꓽ꓾ ꓐꓯˍ ꓕꓯ꓾ 27 ꓬꓰ-ꓢꓴ ꓡꓰ꓾ ꓞꓳ ꓤ ꓟꓽ ꓐ ꓡ ꓟ ꓠꓬ ꓪꓴ-ꓢ ꓠꓽ ꓐ ꓡ ꓡꓳ꓾ ꓐꓯˍ ꓡꓳ꓿ 28 ꓖꓳ ꓡꓱ ꓠꓬ ꓒꓲ-ꓕꓱ ꓡꓰ꓾ ꓟꓸ ꓒꓽꓳ꓾ ꓥꓪ ꓠꓴꓽ ꓠꓽ ꓚꓲꓸ ꓛꓬ ꓔꓯ ꓟ ꓮꓽ ꓙꓵ ꓗꓶ ꓔꓸ ꓬꓰ ꓢꓲ ꓠꓴ ꓔꓯ ꓛꓳˍ ꓡꓳ꓾ ꓐꓯˍ ꓡꓳ꓿ 29 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓪꓴ-ꓢ ꓗꓴꓷꓼ ꓐꓱ ꓶ ꓬꓲ ꓦꓲ꓾ ꓥ ꓠꓬ ꓤꓽ ꓟꓶ꓾ ꓥ ꓠꓬ ꓬꓲ ꓤ ꓠꓬꓲ ꓤ꓾ ꓥ ꓠꓬ ꓮꓽ ꓐꓽ ꓮ ꓟ꓾ ꓥ ꓠꓬ ꓤ ꓠꓱ ꓐꓴ ꓔꓯ ꓗꓶ ꓔꓸ ꓬꓰ ꓢꓴ ꓠꓬ꓾ 30 ꓕꓱ ꓕꓲ ꓤꓶꓻ ꓗꓪˍ ꓟꓲ ꓮꓽ ꓟꓬꓹ ꓝꓸ ꓘꓳ ꓣꓴ ꓟꓶ ꓢꓲ꓾ ꓡ ꓠꓹ ꓟ ꓤꓶ ꓗꓪˍ ꓟꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶˍ ꓥꓳ꓾ ꓐꓯˍ ꓡꓳ꓿ 31 ꓬꓰ-ꓢꓴ ꓠꓬ ꓞꓲ ꓠꓬꓲꓽ ꓣꓳ ꓔꓯ ꓬꓲ ꓔꓱꓹ ꓬꓲ ꓕꓲ ꓖ ꓗꓪ ꓧꓳꓽ ꓙꓰ ꓢꓲ꓾ ꓠ ꓠꓹ꓾ ꓣꓳꓽ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰ ꓔꓬ ꓟ ꓥꓳ꓿ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓰ ꓡ-ꓞꓳ-ꓮ-ꓐꓲ ꓔꓯ ꓟꓳꓸ ꓐꓳ ꓔ ꓟ ꓮꓽ ꓙꓵ ꓠꓬ ꓒꓬꓱꓼ ꓡ ꓥꓳ꓿ 32 ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓠꓽ ꓐꓶꓽ ꓞꓳ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷˍ ꓥꓳ꓿ ꓢꓴ ꓡꓰ ꓬꓲ ꓔꓯ ꓤꓲꓺ ꓢꓲ꓾ ꓫꓸ ꓔꓳ ꓫ ꓒꓯꓼ ꓬꓰ ꓖꓶ ꓡ ꓢꓲ ꓠꓬꓲ꓾ ꓟꓶꓽ ꓶꓻ ꓔꓲꓸ ꓧꓳꓽˍ ꓥꓳ꓿ 33 ꓝꓮꓲ ꓠꓬ ꓬꓲ ꓪꓽ ꓡꓰ ꓬꓲ ꓔꓯ ꓓꓶꓽ ꓢꓲ ꓢꓰꓼ ꓗꓷˍ ꓥꓳ꓿ ꓖꓳ ꓡꓱ ꓥ ꓟꓲ ꓢ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓬꓲ ꓢꓯꓸ ꓬꓲꓼ ꓡ ꓥꓳ꓾ ꓐꓯ ꓖꓶˍ ꓡꓳ꓿ 34 ꓕꓱ ꓟꓬ ꓙꓰꓽ ꓟ ꓠꓬ ꓛꓳꓽ ꓒꓯꓹ ꓐꓴ ꓕꓲ ꓫꓵꓽˍ ꓟꓲ ꓟꓽ ꓙꓽ ꓜꓲꓼ꓿ ꓐꓯ ꓘꓶꓽ ꓕꓱ ꓟ ꓬꓲ ꓪꓽ ꓔꓯˍ ꓐꓰ ꓚꓵꓺ ꓔ ꓟ ꓥ ꓠꓬꓲ꓾ ꓬꓲ ꓮꓸ ꓫꓵ ꓔꓯ ꓐꓯ ꓔꓬ ꓟ ꓬꓲ ꓪꓽ ꓟꓽ ꓢꓷ꓿ 35 ꓬꓰ-ꓢꓴ ꓠꓬ ꓙꓱ-ꓡꓲ-ꓘꓳ ꓡꓳ ꓒꓱ ꓗꓪ ꓠꓶꓽ ꓡ ꓕꓯ꓾ ꓟꓬ ꓔꓶ ꓕꓲ ꓣꓳ ꓠꓬ ꓙ ꓖꓴ ꓘꓶꓽ ꓗꓪ ꓠꓬꓲꓸ ꓠꓸ ꓢꓲ ꓜꓻ ꓓꓰꓽ ꓔꓬ ꓡꓳ꓿ 36 ꓞꓳ ꓜꓴ ꓗꓳꓸ ꓙꓰ ꓔꓬ ꓟ ꓔꓯ ꓬꓲ ꓑ ꓙꓽˍ ꓠꓬ꓾ ꓕꓱ ꓟ ꓮꓸ ꓫꓵ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 37 ꓬꓲ ꓪꓽ ꓡꓰ꓾ ꓠ-ꓢ-ꓡꓱ ꓢꓴ ꓬꓰ-ꓢꓴ ꓗꓳꓸ ꓙꓰ ꓔꓬ ꓡꓳ꓾ ꓐꓰ ꓐꓯ ꓖꓶꓽ ꓗꓷ ꓠꓬ ꓬꓲ ꓘꓴꓻ ꓔꓴ ꓡ ꓢꓲ꓾ 38 ꓓ-ꓪꓵ ꓞꓲꓼ ꓤ ꓡꓯꓹ ꓤ ꓬꓰ-ꓢꓴꓳ꓾ ꓥꓪ ꓔꓯ ꓫꓱꓸ ꓤ ꓡꓯ꓾ ꓐꓯˍ ꓡꓳ꓿ 39 ꓟꓲꓽ ꓕꓯꓽ ꓢꓲ ꓗꓪ ꓙꓰ ꓔꓬ ꓢꓴ ꓐꓴ ꓡꓰ ꓖꓳ ꓡꓱ ꓟꓽ ꓘꓴ ꓠꓹ ꓟ ꓬꓲ ꓔꓯ ꓕꓼˍ ꓟꓲ꓾ ꓬꓲ ꓠꓬ ꓪ ꓜꓲ ꓘꓴꓻ ꓢꓲ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤꓽꓳ꓾ ꓥꓪ ꓔꓯ ꓫꓱꓸ ꓤ ꓡꓯ꓾ ꓐꓯˍ ꓡꓳ꓿ 40 ꓖꓳ ꓕꓯ ꓬꓰ-ꓢꓴ ꓦꓰꓼ ꓡꓰ ꓢꓲ꓾ ꓬꓲ ꓔꓯ ꓬꓲ ꓔꓬ ꓗꓪ ꓧꓳꓽ ꓡ ꓠꓹ ꓟ ꓕꓵꓼ ꓪꓽ ꓖꓶˍ ꓡꓳ꓿ ꓬꓲ ꓛꓲ ꓡ ꓠꓬ ꓬꓲ ꓔꓯ꓾ 41 ꓥꓪ ꓡꓰ ꓠꓴ ꓐꓱ ꓶ ꓮꓸ ꓫꓵ ꓬꓰ ꓖꓶ ꓝꓲ ꓠꓲꓹ ꓫꓵˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓡꓰ꓾ ꓢꓲ ꓒꓽꓳ꓾ ꓥꓪ ꓝꓮꓲ ꓠꓬꓲ ꓟꓳꓻ ꓡ ꓠꓲꓹ ꓫꓵˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 42 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬꓲ ꓟꓳꓻ Gꓽ꓿ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓾ ꓐꓯ ꓖꓶˍ ꓡꓳ꓿ 43 ꓖꓳ ꓡꓱ ꓠꓬ ꓞꓼ ꓐꓰ ꓬꓲ ꓠꓬꓲ ꓟꓳꓻ ꓡ ꓢꓲ꓾ ꓬꓰ-ꓢꓴ ꓔꓯ ꓛꓳꓻ ꓙꓰ ꓢꓲ ꓠꓬꓲ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ ꓖꓳ ꓟ ꓔꓯ ꓞꓳ ꓜꓴꓻ ꓟꓳꓻ ꓗꓷ ꓠꓬ ꓬꓲ ꓪꓽˍ ꓟꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓡꓳ꓿

ꓡꓴ-ꓗ 19

1 ꓬꓰ-ꓢꓴ ꓠꓬ ꓙꓱ-ꓡꓲ-ꓘꓳ ꓡꓳ ꓒꓱ ꓗꓪ ꓓꓵꓽ ꓡꓰ ꓢꓲ ꓗꓳꓸ ꓙꓰ ꓔꓬ ꓕꓯ꓾ 2 ꓝꓲꓸ ꓫ ꓢꓴ ꓪꓴꓸ ꓓꓵ ꓣꓱꓽ ꓒ꓾ ꓢ-ꓘꓰ-ꓬꓴ ꓟꓬꓱ ꓔ ꓟ ꓞꓳ ꓐꓳ ꓕꓲ ꓣꓳ ꓖꓳ ꓗꓪ ꓔꓬ ꓡꓳ꓿ 3 ꓬꓲ ꓠꓬ ꓬꓰ-ꓢꓴ ꓮꓽ ꓟ ꓥ ꓟ ꓡꓳꓸ ꓠꓬꓲ ꓠꓲꓹ ꓫꓵˍ ꓟꓲ꓾ ꓬꓲ ꓠꓽ ꓞꓳ ꓔꓰꓼ ꓡꓰꓼ ꓥ ꓢꓲ꓾ ꓞꓳ ꓜꓴꓻ ꓡꓰ ꓬꓲ ꓔꓯ ꓛꓸ ꓞꓹ ꓠꓬꓲ꓾ ꓬꓰ-ꓢꓴ ꓔꓯ ꓟꓽ ꓟꓳ꓿ 4 ꓖꓳ ꓡꓱ ꓠꓬꓲ ꓬꓰ-ꓢꓴ ꓔꓯ ꓡꓳꓸ ꓠꓬꓲ ꓠꓹ ꓟ ꓬꓲ ꓠꓬ ꓟꓲꓽ ꓕꓯꓽ ꓢꓲ ꓔꓷꓹ ꓙꓰ ꓢꓲ꓾ ꓬꓰ-ꓢꓴ ꓗꓳꓸ ꓬꓯꓼ ꓠ ꓗꓹ ꓟ ꓚꓱꓹ ꓗꓪ ꓟ ꓐꓵꓽ ꓜꓻ ꓜꓲꓻ ꓕꓲ ꓜꓲ ꓗꓪ ꓓꓯ ꓙꓰˍ ꓡꓳ꓿ 5 ꓬꓰ-ꓢꓴ ꓖꓳ ꓗꓪ ꓛꓲ ꓡ ꓠꓬ ꓖꓽ ꓑꓳꓸ ꓬꓲ ꓔꓯ ꓡꓳꓸ ꓢꓲ꓾ ꓢ-ꓘꓰ-ꓬꓴꓳ꓾ ꓮꓸ ꓟꓲꓸ ꓬꓯꓼ ꓡꓯ꓿ ꓮ ꓡꓲꓳ ꓐꓯ ꓠꓬ ꓠꓬꓲꓸ ꓠꓬꓲ ꓥꓪ ꓠꓬ ꓠꓴ ꓦꓲ ꓗꓪ ꓔꓬ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ꓿ 6 ꓖꓳ ꓡꓱ ꓠꓬ ꓬꓲ ꓮꓸ ꓟꓲꓸ ꓟꓲꓸ ꓬꓯꓼ ꓡ ꓢꓲ꓾ ꓠꓲꓹ ꓒꓴ ꓒꓴˍ ꓐꓰ ꓬꓰ-ꓢꓴ ꓔꓯ ꓘꓳꓻ ꓣꓴˍ ꓡꓳ꓿ 7 ꓬꓲ ꓪꓽ ꓮꓽ ꓙꓵ ꓖꓳ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓠꓽ ꓝꓴꓲ ꓙꓳ ꓢꓴ ꓦꓲ ꓗꓪ ꓪꓰ ꓤ ꓟꓴ ꓙꓰꓳ꓾ ꓐꓰ ꓱ'ꓽ ꓠꓱꓽˍ ꓡꓳ꓿ 8 ꓢ-ꓘꓰ-ꓬꓴ ꓠꓬ ꓦꓰꓼ ꓞꓹ ꓢꓲ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓥꓪ ꓙꓳˍ ꓟ ꓖꓴꓽ ꓙꓴꓽ ꓠꓬ ꓞꓳ ꓫꓸ ꓔꓯ ꓕꓲ ꓐꓶꓽ ꓐꓱꓻ ꓖꓶˍ ꓥꓳ꓿ ꓝꓮꓲ ꓠꓬ ꓥꓪ ꓮꓽ ꓟ ꓔꓯ ꓘꓳꓹ ꓜ ꓗꓷ ꓐꓷˍ ꓟꓲ ꓬꓲ ꓔꓯ ꓡꓲ ꓩꓴꓸ ꓡꓲꓸ ꓖꓶˍ ꓥꓳ꓾ ꓐꓯˍ ꓡꓳ꓿ 9 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓢꓯꓼ ꓟꓬ ꓝˍ ꓟ ꓣꓱꓽ ꓛꓰꓽ ꓠꓬ ꓠꓬꓲꓸ ꓠꓬꓲ ꓕꓱ ꓕꓲ ꓦꓲ ꓗꓪ ꓛꓲ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓬꓲˍ ꓟꓲ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓡꓳ꓿ 10 ꓡ-ꓞꓳ-ꓮ-ꓐꓲ ꓠꓽ ꓒꓲꓼ ꓬꓰ ꓟ ꓡꓽ ꓞꓳ ꓔꓯ ꓧꓪ ꓢꓲ ꓚꓬꓴˍ ꓐꓰ ꓡꓻ ꓟ ꓥ ꓡꓳ꓾ ꓐꓯˍ ꓡꓳ꓿ 11 ꓑ ꓫꓬꓼ ꓐꓴ ꓠꓬ ꓬꓰ-ꓢꓴ ꓔꓯ ꓕꓱ ꓡꓱ ꓠ ꓠꓹ ꓕꓱ ꓡꓱ꓾ ꓙꓱ-ꓣꓴ-ꓢ-ꓡꓱ ꓒ ꓕꓲ ꓗꓪ ꓫꓱꓽ ꓛꓲ ꓬꓰˍ ꓕꓯ꓾ ꓪꓴ-ꓢ ꓗꓴꓷꓼ ꓞꓼ ꓐꓰ ꓓꓳ ꓡ ꓥꓳ꓾ ꓐꓰ ꓬꓲ ꓪꓽ ꓓꓵꓽ ꓙꓽˍ ꓟ ꓪꓴꓸ ꓠꓬꓲ꓾ ꓬꓰ-ꓢꓴ ꓡꓰ ꓔꓯ ꓥꓳꓽ ꓕꓲ ꓟ ꓕꓱ ꓡꓱ ꓐꓯ ꓖꓶˍ ꓡꓳ꓿ 12 ꓢꓲꓽ ꓒ ꓕꓲ ꓣꓳ ꓠꓬ꓾ ꓪ ꓔꓲꓸ ꓙꓵꓽ ꓪꓽ ꓟꓶ ꓡꓰ ꓠꓹ ꓟ꓾ ꓶꓽ ꓤ ꓟ ꓟꓵ ꓗꓪ ꓕꓲ ꓝꓲꓸ ꓤ ꓙꓰˍ ꓐꓰ ꓬꓰˍ ꓡꓳ꓿ 13 ꓬꓲ ꓟꓽ ꓙꓰ ꓢꓰ ꓕꓯ꓾ ꓬꓲ ꓚꓳ ꓑꓸ ꓞꓲꓻ ꓣꓳ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓬꓲ ꓪꓽ ꓔꓯ ꓒꓴ ꓕꓲ ꓣꓳ ꓕꓲ ꓟꓲ-ꓠ ꓖꓶ ꓢꓲ ꓠꓬꓲ꓾ ꓥꓪ ꓟꓽ ꓬꓲꓼ ꓡ ꓕ ꓑꓳꓸ ꓕꓱ ꓟ ꓡꓰ ꓶꓻ ꓡꓯꓼ ꓟꓴ꓾ ꓐꓯ ꓖꓶˍ ꓡꓳ꓿ 14 ꓬꓲ ꓑ ꓫꓬꓼ ꓐꓴ ꓠꓽ ꓬꓲ ꓔꓯ ꓠꓲꓹ ꓜꓳ ꓢꓲ꓾ ꓬꓲ ꓗꓸ ꓠꓯꓸ ꓢꓲ ꓗꓪ ꓝꓲ ꓓꓴ ꓕꓲ ꓧꓳꓽ ꓝꓲ ꓩꓴ ꓗꓷ ꓢꓲ ꓠꓬꓲ꓾ ꓥꓪ ꓠꓴꓽ ꓠꓬ ꓕꓱ ꓕꓲ ꓣꓳ ꓔꓯ ꓥꓪ ꓠꓴꓽ ꓪ ꓔꓲꓸ ꓣꓱꓽ ꓝꓲ ꓠꓲꓹ ꓟꓽ ꓫꓵ꓾ ꓐꓰ ꓐꓯ ꓖꓶ ꓙꓰ ꓝꓲˍ ꓡꓳ꓿ 15 ꓖꓳ ꓡꓱ ꓥ ꓟꓲ ꓬꓲ ꓪꓻ ꓔꓲ ꓙꓵꓽ ꓪꓽ ꓟꓶ ꓡꓰ ꓢꓲ ꓬꓲꓼ ꓡ ꓕꓯ꓾ ꓶ ꓡꓯꓼ ꓟꓴˍ ꓟ ꓗꓪ ꓐꓰ ꓮ ꓟꓬ ꓛꓲ ꓒꓳꓹ ꓟꓶˍ ꓟ ꓢꓷ ꓡꓰ ꓠꓹ ꓟ꓾ ꓬꓲ ꓡꓰ ꓒꓴ ꓡꓯꓼ ꓙꓱ ꓔ ꓟ ꓚꓳ ꓑꓸ ꓐꓴ ꓔꓯ ꓘꓴ ꓔꓯꓹ ꓡ ꓝꓲˍ ꓡꓳ꓿ 16 ꓬꓲ ꓪꓴꓸ ꓕꓲ ꓣꓳ ꓠꓬ ꓬꓲ ꓟꓲꓽ ꓙꓬꓽ ꓗꓪ ꓡ ꓢꓲ ꓬꓲ ꓔꓯ꓾ ꓢꓲ ꓒꓽꓳ꓾ ꓠꓴ ꓒꓴ ꓕꓲ ꓟꓲ-ꓠ ꓟ ꓠꓬ꓾ ꓝꓮꓲ ꓞꓲ ꓟꓲ-ꓠ ꓒꓳꓹ ꓟꓶ ꓡꓰꓳ꓾ ꓐꓯˍ ꓡꓳ꓿ 17 ꓖꓳ ꓡꓱ ꓠꓬ ꓬꓲ ꓡꓰ ꓬꓲ ꓔꓯ꓾ ꓮꓽ ꓘꓶꓸ ꓙꓲˍ ꓥꓳ꓿ ꓙꓲˍ ꓟ ꓚꓳ ꓑꓸ ꓠꓴ ꓠꓬ ꓮꓸ ꓓꓲꓽ ꓣꓳˍ ꓟ ꓫꓵꓽ ꓪꓴ ꓗꓪ ꓦ ꓡꓱ ꓐꓳˍ ꓠꓬꓲ꓾ ꓠꓴ ꓔꓯ ꓡꓳ ꓒꓱ ꓞꓲ ꓟ ꓙꓵꓽ ꓝꓲˍ ꓥꓳ꓾ ꓐꓯ ꓖꓶˍ ꓡꓳ꓿ 18 ꓠꓬꓲꓽ ꓣꓳ ꓕꓲ ꓣꓳ ꓟˍ ꓟꓲ ꓡ ꓢꓲ꓾ ꓢꓲ ꓒꓽꓳ꓾ ꓠꓴ ꓒꓴ ꓕꓲ ꓟꓲ-ꓠ ꓟ ꓠꓬ ꓝꓮꓲ ꓥꓪꓽ ꓟꓲ-ꓠ ꓒꓳꓹ ꓟꓶꓻ ꓡꓰꓳ꓾ ꓐꓯˍ ꓡꓳ꓿ 19 ꓬꓲ ꓡꓰ ꓬꓲ ꓔꓯ꓾ ꓠꓴ ꓔꓯˍ ꓟꓲ ꓡꓳ ꓒꓱ ꓥꓪꓽ ꓟ ꓙꓵꓽ ꓝꓲˍ ꓥꓳ꓾ ꓐꓯ ꓖꓶˍ ꓡꓳ꓿ 20 ꓝꓮꓲ ꓕꓲ ꓣꓳ ꓡ ꓢꓲ ꓬꓲ ꓔꓯ꓾ ꓢꓲ ꓒꓽꓳ꓾ ꓠꓬꓲ ꓠꓹ꓾ ꓠꓴ ꓒꓴ ꓖꓳ ꓕꓲ ꓟꓲ-ꓠ ꓟ ꓠꓬ ꓕꓱ ꓗꓪ ꓓꓹ ꓢꓰꓽ ꓡꓳ꓿ ꓥꓪ ꓠꓽ ꓟꓶ ꓛ ꓡꓰ ꓕꓱꓹ ꓢꓲ ꓗꓶ ꓔꓸ ꓡꓳ꓿ 21 ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓞꓳ ꓦꓶꓻ ꓥ ꓠꓬꓲ ꓠꓴ ꓔꓯ ꓥꓪ ꓙꓳˍ ꓡꓳ꓿ ꓠꓴ ꓠꓽ ꓟꓽ ꓩꓴ ꓔ ꓟ ꓗꓪˍ ꓟꓲ ꓣꓴ ꓬꓰ ꓢꓲ꓾ ꓟꓽ ꓫꓵꓸ ꓔ ꓗꓪˍ ꓟꓲ ꓫ ꓬꓰˍ ꓡꓳ꓾ ꓐꓯˍ ꓡꓳ꓿ 22 ꓬꓲ ꓡꓰ ꓬꓲ ꓔꓯ꓾ ꓙꓲ ꓖꓴ ꓟꓽ ꓙꓳˍ ꓟ ꓚꓳ ꓑꓸꓳ꓾ ꓠꓴ ꓚꓲꓸ ꓛꓬ ꓐꓯ ꓘꓶꓽ ꓗꓪ ꓐꓰ ꓠꓴ ꓔꓯ ꓥꓪ ꓐꓯ ꓟꓴ ꓞꓷꓹˍ ꓥꓳ꓿ ꓥꓪ ꓠꓽ ꓞꓳ ꓦꓶ ꓥ ꓢꓲ ꓟꓽ ꓩꓴ ꓔ ꓗꓪˍ ꓟꓲ ꓣꓴ ꓢꓴ ꓥ ꓢꓲ꓾ ꓟꓽ ꓫꓵꓸ ꓔ ꓗꓪˍ ꓟꓲ ꓫ ꓬꓰ ꓢꓴ ꓥ ꓟ ꓠꓴ ꓢꓷꓸˍ ꓠꓬ꓾ 23 ꓥꓪ ꓬꓲꓼ ꓡꓻ ꓕꓯ ꓒꓴ ꓬꓲ ꓐꓵꓽ ꓟꓶ ꓠꓹ ꓟ꓾ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓒꓴ ꓔꓯ ꓒꓴ ꓞꓳꓽ ꓦꓲ ꓗꓪ ꓟꓽ ꓗꓶ ꓔꓸ ꓡ?꓾ ꓐꓯˍ ꓡꓳ꓿ 24 ꓖꓳ ꓡꓱ ꓢꓲ ꓪ ꓔꓲꓸ ꓡꓰ ꓖꓳ ꓗꓪ ꓦꓰꓼ ꓞ ꓢꓴ ꓔꓯ꓾ ꓬꓲ ꓙꓳˍ ꓟ ꓒꓴ ꓕꓱ ꓕꓲ ꓟꓲ-ꓠ ꓟ ꓬꓲ ꓔꓯˍ ꓐꓰ ꓣꓴ ꓗꓷ ꓢꓲ꓾ ꓞꓲ ꓟꓲ-ꓠ ꓙꓳ ꓢꓴ ꓖꓳ ꓕꓲ ꓣꓳ ꓔꓯ ꓖꓶ꓾ ꓐꓯˍ ꓡꓳ꓿ 25 ꓬꓲ ꓪꓽ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓬꓲ ꓠꓽ ꓞꓲ ꓟꓲ-ꓠ ꓙꓳˍ ꓡꓳ꓾ ꓐꓯˍ ꓕꓯ꓾ 26 ꓪ ꓔꓲꓸ ꓡꓰ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓙꓳꓻ ꓢꓴ ꓥ ꓕ ꓑꓳꓸ ꓔꓯ ꓠꓬ ꓡꓴꓽ ꓖꓶˍ ꓢꓰꓽ ꓥꓳ꓿ ꓟꓽ ꓙꓳ ꓢꓴ ꓔꓯ ꓠꓽ ꓬꓲ ꓮ ꓔꓲꓸ ꓤ ꓙꓳˍ ꓟˍ ꓟꓲ ꓬꓲ ꓔꓯˍ ꓐꓰ ꓣꓴ ꓔꓯꓹ ꓙꓰˍ ꓥꓳ꓿ 27 ꓥꓪ ꓔꓯ ꓬꓲ ꓪꓽ ꓪ ꓔꓲꓸ ꓣꓱꓽ ꓝꓲ ꓠꓲꓹ ꓟꓽ ꓫꓵ ꓢꓴ꓾ ꓛꓴꓽ ꓙꓳ ꓢꓴ ꓕꓱ ꓕꓲ ꓧꓳꓽ ꓟ ꓔꓯ ꓖꓳꓻ ꓔꓯꓹ ꓡ ꓢꓲ꓾ ꓥꓪ ꓟꓲꓽ ꓙꓬ ꓗꓪ ꓢꓰꓼ ꓗꓷ꓾ ꓐꓯˍ ꓥꓳ꓾ ꓐꓯˍ ꓡꓳ꓿ 28 ꓬꓰ-ꓢꓴ ꓕꓱ ꓡꓱ ꓐꓯ ꓓꓳ ꓡꓰ ꓠꓬ꓾ ꓡꓯꓽ ꓫꓵ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰˍ ꓡꓳ꓿ 29 ꓬꓲ ꓠꓬ ꓐꓱ-ꓒ-ꓖꓶˍ ꓐꓰ ꓐꓱ-ꓕ-ꓠꓲ ꓗꓪ ꓠꓶꓽ ꓡꓰ ꓢꓲ꓾ ꓮꓽ ꓛꓬꓽ꓾ ꓟꓬꓱ ꓔ ꓟ ꓪꓽ ꓚꓲ ꓗꓪ ꓛꓲ ꓡ ꓠꓬ꓾ ꓬꓲ ꓡꓰ ꓛꓳꓽ ꓒꓯꓹ ꓠꓬꓲꓽ ꓣꓳ ꓔꓯ ꓕꓱ ꓡꓱ ꓐꓯ ꓢꓲ ꓝꓲ ꓩꓴ ꓗꓷˍ ꓡꓳ꓿ 30 ꓠꓴ ꓪꓽ ꓔꓯ ꓔꓱꓹ ꓞꓹ ꓟ ꓘꓹ ꓗꓪ ꓓꓵꓽ ꓙꓰ꓿ ꓠꓴ ꓪꓽ ꓖꓳ ꓗꓪ ꓓꓵꓽ ꓡꓰ ꓕꓯ꓾ ꓞꓳ ꓤꓽ ꓮꓽ ꓟˍ ꓟꓲ ꓟꓽ ꓜꓶꓽ ꓠꓬꓲ ꓢꓰꓽ ꓟ ꓕꓳꓽ ꓡ ꓟꓴꓽ ꓤ ꓕꓲ ꓛꓲ ꓞꓳꓹ ꓔ ꓟ ꓔꓯ ꓠꓴ ꓪꓽ ꓟꓳꓻˍ ꓥꓳ꓿ ꓖꓳ ꓟ ꓒꓶ ꓢꓲ ꓢꓲꓺ ꓔꓯꓹ ꓖꓶ ꓡꓯ꓿ 31 ꓮꓽ ꓟ ꓡꓰ ꓠꓴ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓕꓳꓽ ꓡ ꓟꓴ ꓔꓯ ꓒꓶˍ ꓡ?꓾ ꓐꓰ ꓠ ꓠꓬꓲ ꓡ ꓠꓬ꓾ ꓢꓲ ꓒꓽ ꓣꓱꓽ ꓬꓯꓼˍ ꓡꓳ꓾ ꓐꓰ ꓒꓳꓹ ꓖꓶ꓾ ꓐꓯˍ ꓡꓳ꓿ 32 ꓝꓲ ꓘꓶꓽ ꓟꓶ ꓢꓴ ꓐꓴ ꓙꓰ ꓗꓷ ꓠꓬ꓾ ꓬꓰ-ꓢꓴ ꓬꓲ ꓪꓽ ꓔꓯ ꓐꓯˍ ꓟ ꓡꓰ ꓐꓰ ꓕꓳꓽ ꓡ ꓟꓴꓽ ꓔꓯ ꓧꓪ ꓟꓶˍ ꓡꓳ꓿ 33 ꓬꓲ ꓪꓽ ꓠꓬ ꓕꓳꓽ ꓡ ꓟꓴꓽ ꓤ ꓔꓯ ꓒꓶ ꓔꓬ ꓕꓯ ꓬꓲ ꓢꓲ ꓒꓽ ꓐꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓕꓳꓽ ꓡ ꓟꓴ ꓤ ꓔꓯ ꓒꓶˍ ꓡ?꓾ ꓠ ꓠꓬꓲˍ ꓡꓳ꓿ 34 ꓬꓲ ꓪꓽ ꓡꓰ꓾ ꓢꓲ ꓒꓽ ꓣꓱꓽ ꓬꓯꓼˍ ꓡꓳ꓾ ꓐꓯ ꓖꓶˍ ꓡꓳ꓿ 35 ꓬꓰ-ꓢꓴ ꓔꓬ ꓗꓪ ꓢꓲꓺ ꓛꓲ ꓡ ꓠꓬ꓾ ꓕꓳꓽ ꓡ ꓟꓴ ꓤ ꓕꓯꓽ ꓢꓲ ꓗꓪ ꓬꓲ ꓪꓽ ꓚꓲꓸ ꓛꓬ ꓐꓵ ꓞꓶꓽ ꓘꓳꓽ ꓖꓶ ꓢꓲ ꓬꓰ-ꓢꓴ ꓔꓯ ꓜꓶꓽ ꓝꓲˍ ꓡꓳ꓿ 36 ꓬꓲ ꓜꓶꓽ ꓙꓰ ꓔꓬ ꓕꓯ꓾ ꓑ ꓫꓬꓼ ꓐꓴ ꓠꓬ ꓙ ꓖꓴ ꓗꓪ ꓐꓵ ꓞꓶꓽ ꓘꓳꓽ ꓖꓶˍ ꓡꓳ꓿ 37 ꓬꓲ ꓮ-ꓛꓬ ꓪꓽ ꓚꓲ ꓔꓯꓹ ꓗꓪ ꓬꓯꓼ ꓙꓰ ꓔꓬ ꓕꓯ꓾ ꓛꓳꓽ ꓒꓯꓹ ꓬꓲ ꓜꓴ ꓬꓲ ꓟꓯꓼ ꓠꓬ ꓬꓲ ꓪꓽ ꓟꓳꓻ ꓗꓷ ꓟ ꓪꓽ ꓠꓬꓲˍ ꓟ ꓟꓬꓱꓽ ꓑꓶ ꓓꓴ ꓗꓹ ꓛꓲ ꓔꓴ ꓡ ꓢꓲ꓾ ꓢꓯꓼ ꓓꓽ ꓟ ꓡꓰ ꓪꓴ-ꓢ ꓔꓯ ꓫꓱꓸ ꓖꓶ ꓢꓲ ꓠꓬꓲ꓾ 38 ꓢꓲ ꓒꓽ ꓟꓬꓱ ꓗꓪ ꓐꓰ ꓡꓻ ꓟ ꓪ ꓔꓲꓸ ꓔꓯ ꓶꓼ ꓙꓳ ꓫꓱꓹ ꓙꓳ ꓝꓲ꓿ ꓟꓴꓽ ꓗꓪ ꓗꓪ ꓢꓲ ꓡꓲ ꓟ ꓙꓳ ꓢꓲ꓾ ꓟꓴ ꓡꓳꓹ ꓗꓪ ꓟꓬꓱ ꓓꓳꓽ ꓙꓳ ꓝꓲ꓾ ꓐꓯˍ ꓡꓳ꓿ 39 ꓞꓳ ꓜꓴ ꓗꓪ ꓟ ꓒ-ꓡꓲ-ꓢꓷ ꓐꓴ ꓕꓲ ꓐꓱ ꓠꓬ ꓬꓲ ꓔꓯ꓾ ꓟꓸ ꓒꓽꓳ꓾ ꓠꓴ ꓛꓳꓽ ꓒꓯꓹ ꓐꓴ ꓔꓯ ꓕꓼ ꓢꓲ ꓟꓽ ꓪꓳꓹ ꓔꓬ ꓝꓲ꓾ ꓐꓯˍ ꓡꓳ꓿ 40 ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ ꓪꓽ ꓟꓽ ꓪꓳꓹ ꓐꓰ ꓔꓬ ꓕꓯ ꓠꓽ꓾ Bꓸ ꓛꓲ ꓕꓱ ꓟꓬ ꓟ ꓘꓴꓻ ꓔꓴ ꓡ ꓥꓳ꓾ ꓐꓯˍ ꓡꓳ꓿ 41 ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓛꓲ ꓡꓺˍ ꓐꓰ ꓬꓰˍ ꓕꓯ꓾ ꓡꓳ ꓒꓱ ꓔꓯ ꓟꓳꓻ ꓗꓷ ꓠꓬ꓾ ꓡꓳ ꓒꓱ ꓐꓱ ꓶ ꓥꓴ ꓢꓲ꓾ 42 ꓠꓬꓲꓸ ꓠꓬꓲ ꓠꓴ ꓔꓯ ꓢꓲ ꓡꓲ ꓟ ꓔꓯꓹ ꓖꓶ ꓡ ꓢꓴ ꓔꓯ ꓠꓴ ꓢꓷꓸˍ ꓕꓯ ꓠꓽ ꓙꓲˍ ꓡꓳ ꓫꓵꓽ ꓥ ꓡꓳ꓿ ꓮ ꓟꓶ ꓠꓽ ꓠꓴ ꓟꓬ ꓢꓶꓽ ꓔꓯˍ ꓐꓰ ꓚꓵꓺ ꓔ ꓡꓳ꓿ 43 ꓡꓻ ꓠꓹ ꓟ ꓦꓬꓼ ꓠꓬꓲ ꓗꓪ ꓠꓽ ꓠꓴ ꓔꓯ ꓛꓴꓽ ꓙꓳ ꓢꓴ ꓐꓴ ꓡꓰ ꓠꓴ ꓚꓳ ꓡꓳ ꓗꓪ ꓧꓪꓸ ꓒꓱꓻ ꓜꓶꓻ ꓢꓲ ꓠꓬꓲ꓾ ꓡꓲ ꓛꓱꓽ ꓚꓳ ꓡꓳ ꓗꓪ ꓠꓴ ꓔꓯ ꓗꓽ ꓚꓳꓸ ꓔ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ 44 ꓪꓴ-ꓢ ꓡꓰ ꓠꓴ ꓔꓯ ꓔꓱꓹ ꓠꓬꓲ ꓡ ꓟ ꓦꓬꓼ ꓠꓬꓲ ꓔꓯ ꓠꓴ ꓟꓽ ꓡꓳꓸ ꓓꓳ ꓡ ꓠꓬꓲ꓾ ꓠꓴˍ ꓐꓰ ꓠꓴ ꓚꓬꓹ ꓠꓯꓸꓼ ꓗꓪ ꓟ ꓤ ꓠꓱ ꓐꓴ ꓔꓯ ꓠꓬ ꓟꓲ ꓠꓯ ꓗꓪ ꓙꓱꓼ ꓗꓷˍ ꓥꓳ꓿ ꓠꓴ ꓔꓯ ꓜꓶꓻ ꓔ ꓟ Bꓸ ꓒꓬꓸˍ ꓟꓲ ꓟꓽ ꓥꓸ ꓦ ꓗꓷ ꓟ ꓕꓲ ꓒꓬꓸˍ ꓟꓲ ꓟꓽ ꓙꓳ ꓗꓷ ꓡꓰˍ ꓥꓳ꓾ ꓐꓯˍ ꓡꓳ꓿ 45 ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓖꓳ ꓗꓪ ꓪꓴꓽ ꓔꓬ ꓪꓴꓻ ꓔꓬ ꓢꓴ ꓔꓯ ꓖꓼ ꓓꓳ ꓗꓷ ꓢꓲ ꓠꓬꓲ ꓬꓲ ꓪꓽ ꓔꓯ꓾ 46 ꓥꓪ ꓦꓲ ꓠꓽ ꓪꓽ ꓘꓴ ꓦꓲ ꓬꓰ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓥꓪ ꓦꓲ ꓔꓯ ꓦꓴꓺ ꓜꓽ ꓢꓴ ꓬꓲ ꓘꓶꓻ ꓒꓬꓱꓼ ꓡ ꓝꓲˍ ꓡꓳ꓾ ꓐꓯˍ ꓡꓳ꓿ 47 ꓬꓰ-ꓢꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲꓽ ꓫꓬ ꓦꓲ ꓗꓪ ꓟꓸ ꓟꓲꓽ ꓟˍ ꓡꓳ꓿ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴˍ ꓐꓰ꓾ ꓑ ꓫꓬꓼ ꓗꓪ ꓟ ꓞꓳ ꓪꓴꓽ ꓐꓴ ꓠꓬ ꓬꓲ ꓔꓯ ꓢꓰꓼ ꓠꓹ ꓟ ꓚꓱꓹ ꓧꓪˍ ꓡꓳ꓿ 48 ꓖꓳ ꓡꓱ ꓥ ꓟꓲ ꓑ ꓫꓬꓼ ꓐꓴ ꓠꓬ ꓬꓰ-ꓢꓴ ꓐꓯ ꓘꓶꓽ ꓔꓯ ꓘꓳꓻ ꓣꓴ ꓢꓴˍ ꓡꓰꓽ ꓥ ꓠꓬꓲ꓾ ꓬꓲ ꓔꓯ ꓢꓰꓼ ꓑꓶꓸ ꓧꓪ ꓟꓽ ꓟꓶ꓿

ꓡꓴ-ꓗ 20

1 ꓕꓲ ꓠꓬꓲ ꓙꓳˍ ꓠꓬ꓾ ꓢꓲꓽ ꓫꓬ ꓦꓲ ꓗꓪ ꓑ ꓫꓬꓼ ꓐꓴ ꓔꓯ ꓬꓰ-ꓢꓴ ꓡꓰ ꓶꓼ ꓓꓳ ꓫꓱꓹ ꓓꓳꓽ ꓚ ꓖꓶ ꓢꓲ ꓟꓸ ꓟꓲꓽ ꓟꓸ ꓖꓶ ꓔꓬ ꓕꓯ꓾ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴˍ ꓐꓰ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬ ꓬꓲ ꓔꓯ ꓡ ꓢꓲ꓾ 2 ꓠꓴ ꓬꓰˍ ꓟ ꓕꓱ ꓟꓬ ꓫꓵꓽ ꓠꓬ ꓮ ꓡꓲ ꓫꓵꓽ ꓙꓵꓽ ꓪꓽ ꓗꓪ ꓐꓰ ꓬꓰˍ ꓡ? ꓠꓴ ꓔꓯ ꓙꓵꓽ ꓪ ꓕꓱ ꓟ ꓖꓶꓽ ꓢꓴ ꓮꓽ ꓟ ꓥ ꓡ? ꓥꓪ ꓠꓴꓽ ꓔꓯ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ 3 ꓖꓳ ꓡꓱ ꓠꓬ ꓬꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯˍ ꓟꓲ ꓥꓪ ꓕꓲ ꓘꓶꓽ ꓠ ꓠꓬꓲˍ ꓠꓬꓲ꓾ ꓥꓪ ꓔꓯ ꓒꓳꓹ ꓖꓶ ꓡꓯ꓿ 4 ꓬꓳ-ꓦ ꓖꓳ ꓓꓱꓽ ꓔꓲꓹ ꓖꓶˍ ꓟ ꓠꓬ ꓪꓴ-ꓢ ꓗꓪ ꓐꓰ ꓥ ꓡ? ꓞꓳ ꓤ ꓗꓪ ꓐꓰ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 5 ꓖꓳ ꓡꓱ ꓠꓬ ꓬꓲ ꓪꓽ ꓖꓪꓻ ꓙꓱ ꓡꓯꓽ ꓘꓳ ꓢꓲ꓾ ꓪꓴ-ꓢ ꓗꓪ ꓐꓰ ꓥꓳ꓾ ꓐꓰ ꓣꓳꓽ ꓐꓯˍ ꓠꓬ꓾ ꓬꓲ ꓡꓰ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓟꓽ ꓙꓵꓻ ꓡ?꓾ ꓐꓯ ꓡ ꓥꓳ꓿ 6 ꓞꓳ ꓤꓽ ꓗꓪ ꓐꓰ ꓥꓳ꓾ ꓐꓯˍ ꓟꓲ꓾ ꓬꓳ-ꓦ ꓠꓽ ꓟꓷꓽ ꓠꓷꓹ ꓝꓸ ꓢꓴ ꓥ ꓟ ꓑ ꓫꓬꓼ ꓐꓴ ꓙꓵꓻˍ ꓠꓬꓲ꓾ ꓣꓳꓽ ꓔꓯ Bꓸ ꓛꓲ ꓡꓳ ꓢꓰꓼ ꓡ ꓥꓳ꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 7 ꓖꓳ ꓡꓱ ꓠꓬꓲ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ꓾ ꓮ ꓡꓲ ꓗꓪ ꓐꓰ ꓡꓻ ꓟ ꓥꓪ ꓠꓴꓽ ꓟꓽ ꓢꓷ꓾ ꓐꓰ ꓒꓳꓹ ꓖꓶˍ ꓡꓳ꓿ 8 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓬꓰˍ ꓟ ꓕꓱ ꓟꓬ ꓫꓵꓽˍ ꓟꓲ ꓮ ꓡꓲ ꓫꓵꓽ ꓙꓵꓽ ꓪ ꓗꓪ ꓐꓰ ꓬꓰˍ ꓟ꓾ ꓥꓪˍ ꓟꓲ ꓠꓴ ꓪꓽ ꓔꓯ ꓟꓽ ꓐꓯ ꓖꓶ꓾ ꓐꓯ ꓖꓶˍ ꓡꓳ꓿ 9 ꓬꓲ ꓠꓬ ꓔꓯ ꓥꓳꓽ ꓡꓰ ꓑ ꓫꓬꓼ ꓐꓴ ꓔꓯ ꓕꓱ ꓡꓱ ꓐꓯ ꓖꓶˍ ꓢꓰꓽ ꓡꓳ꓿ ꓡꓽ ꓞꓳ ꓕꓲ ꓣꓳ ꓠꓬ ꓛꓱꓼ ꓡꓱꓼ ꓕꓲ ꓐꓱ ꓔꓶ ꓢꓲ꓾ ꓟꓬꓱꓽ ꓬꓰ ꓜꓽ ꓢꓴ ꓔꓯ ꓑꓯꓹ ꓖꓶ ꓢꓲ ꓠꓬꓲ꓾ ꓠꓱꓸ ꓐꓯꓼ ꓕꓲ ꓗꓴꓷꓼ ꓗꓪ ꓟꓶꓻ ꓤ ꓙꓰˍ ꓡꓳ꓿ 10 ꓬꓲ ꓢꓶ ꓧꓼ ꓝꓲꓸ ꓛꓲ ꓡ ꓠꓬ ꓐꓱ ꓗꓪ ꓟ ꓢꓶꓹ ꓢꓶ ꓡꓯꓼ ꓙꓱ ꓖꓶ ꓡ ꓠꓹ ꓟ꓾ ꓬꓲ ꓚꓳꓺ ꓑ ꓕꓲ ꓣꓳ ꓔꓯ ꓟꓬꓱꓽ ꓬꓰ ꓜ ꓢꓴ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ ꓖꓳ ꓡꓱ ꓥ ꓟꓲ ꓟꓬꓱꓽ ꓬꓰ ꓜ ꓢꓴ ꓠꓽ ꓬꓲ ꓔꓯ ꓓꓶꓽ ꓢꓲ꓾ ꓬꓲ ꓖꓳꓽ ꓬꓲꓼ ꓙꓰ ꓝꓲˍ ꓡꓳ꓿ 11 ꓬꓲ ꓡꓰ ꓚꓳ ꓑꓸ ꓝꓮꓲ ꓕꓲ ꓣꓳ ꓝꓲ ꓩꓴ ꓗꓷˍ ꓡꓳ꓿ ꓬꓲ ꓔꓯˍ ꓟꓲ ꓬꓲ ꓪꓽ ꓡꓰ ꓓꓶꓽ ꓢꓲ ꓫꓸ ꓔꓳ ꓫꓸ ꓒꓯꓼ ꓬꓰ ꓖꓶ ꓢꓲ ꓠꓬꓲ꓾ ꓬꓲ ꓖꓳꓽ ꓬꓲꓼ ꓙꓰ ꓝꓲˍ ꓡꓳ꓿ 12 ꓝꓮꓲ ꓠꓬ ꓢ ꓣꓳ ꓕꓲ ꓣꓳ ꓔꓯ ꓝꓲꓺ ꓩꓴ ꓗꓷˍ ꓡꓳ꓿ ꓬꓲ ꓔꓯˍ ꓟꓲ ꓬꓲ ꓪꓽ ꓡꓰ ꓠꓻ ꓓꓴ ꓓꓴ ꓡꓰ ꓝꓲ ꓢꓲ ꓖꓼ ꓓꓳ ꓩꓴ ꓗꓷˍ ꓡꓳ꓿ 13 ꓖꓳ ꓕꓯ ꓐꓱ ꓢꓲ ꓒꓽ ꓠꓬ꓾ ꓥꓪ ꓮ ꓡꓲ ꓬꓰ ꓠꓯꓹ ꓡ? ꓮꓽ ꓧꓪꓹ ꓥꓪ ꓠꓲꓹ ꓠꓵˍ ꓟ ꓮ ꓐꓲ ꓔꓯ ꓝꓲ ꓩꓴ ꓗꓷˍ ꓠꓬ ꓬꓲ ꓪꓽ ꓠꓬ ꓬꓲ ꓔꓯ ꓒꓵꓽˍ ꓟꓽ ꓢꓷ꓾ ꓐꓯ ꓢꓲ꓾ ꓬꓲ ꓮ ꓐꓲ ꓔꓯ ꓝꓲ ꓩꓴ ꓗꓷˍ ꓡꓳ꓿ 14 ꓟꓬꓱꓽ ꓬꓰ ꓜꓽ ꓢꓴ ꓠꓽ ꓬꓲ ꓔꓯ ꓟꓳꓻ ꓗꓷ ꓠꓬ ꓬꓲ ꓪꓽ ꓛꓳ ꓬꓲ ꓪꓽ ꓖꓪ ꓙꓱ ꓡꓯꓽ ꓘꓳ ꓢꓲ꓾ ꓕꓱ ꓟ ꓠꓽ ꓡꓯꓼ ꓪ ꓟꓶ ꓢꓴ ꓖꓳ ꓕꓲ ꓣꓳ ꓥ ꓡꓳ꓿ ꓡꓯꓼ ꓪ ꓠꓬ ꓣꓳ ꓔꓯꓸ ꓟ ꓒꓬꓱꓼ ꓡ ꓝꓲ ꓠꓹ ꓟ ꓣꓳ ꓬꓲ ꓔꓯ ꓢꓰꓼ ꓗꓷ ꓡꓯ꓾ ꓐꓯ ꓢꓲ꓾ 15 ꓬꓲ ꓪꓽ ꓡꓰ ꓬꓲ ꓔꓯ ꓐꓱ ꓠꓱ ꓫꓱꓸ ꓟS ꓗꓪ ꓖꓼ ꓓꓳ ꓗꓷ ꓢꓲ ꓢꓰꓼ ꓗꓷˍ ꓡꓳ꓿ ꓖꓳ ꓡꓱ ꓠꓬ ꓐꓱ ꓢꓲ ꓒꓽ ꓡꓰ ꓬꓲ ꓪꓽ ꓔꓯ ꓮ ꓡꓲ ꓬꓰ ꓖꓶ ꓡ ꓥꓳ ꓪ? 16 ꓬꓲ ꓠꓬ ꓡ ꓢꓲ ꓟꓬꓱꓽ ꓬꓰ ꓜ ꓢꓴ ꓕꓱ ꓕꓲ ꓧꓳꓽ ꓔꓯ ꓛꓴꓻ ꓛꓰꓹ ꓡꓰ ꓝꓲ ꓢꓲ ꓠꓬꓲ꓾ ꓐꓱ ꓠꓬ ꓠꓱꓸ ꓐꓯꓼ ꓢꓴ ꓔꓯ ꓖꓶꓽ ꓗꓷˍ ꓥꓳ꓾ ꓐꓯˍ ꓡꓳ꓿ ꓕꓱ ꓟ ꓔꓯ ꓑ ꓫꓬꓽ ꓐꓴ ꓑ ꓙꓽ ꓗꓷ ꓠꓬ꓾ ꓖꓳ ꓡꓱ ꓠꓽ ꓕꓽ ꓗꓷ ꓡꓰ ꓝꓲ ꓟꓻ꓾ ꓐꓯˍ ꓡꓳ꓿ 17 ꓬꓰ-ꓢꓴ ꓠꓽ ꓬꓲ ꓪꓽ ꓔꓯ ꓡꓳꓸ ꓔꓸ ꓢꓲ꓾ ꓖꓳ ꓡꓱ ꓥ ꓠꓬ ꓕꓳ ꓶ ꓗꓪ꓾ ꓦꓲ ꓫꓬꓹ ꓢꓴ ꓡꓰ ꓡꓳ ꓗꓷ ꓟ Bꓸ ꓛꓲ ꓠꓬ꓾ ꓦꓲ ꓚꓰ ꓬꓲ ꓡꓯꓼ ꓗꓪ ꓟ ꓡꓳ ꓓꓰ ꓓꓽ ꓟ ꓒꓬꓱꓼ ꓡꓺꓳ꓾ ꓐꓰ ꓐꓳ ꓔ ꓟ ꓠꓬ ꓮ ꓡꓲ ꓥꓳ ꓪ? 18 Bꓸ ꓛꓲ ꓖꓳ ꓟ ꓕꓯꓽ ꓢꓲ ꓗꓪ ꓡꓱꓸ ꓗꓷ ꓢꓴ ꓠꓬ ꓛꓱꓼ ꓡꓰˍ ꓥꓳ꓿ Bꓸ ꓛꓲ ꓖꓳ ꓟ ꓞꓰ ꓔꓲꓸ ꓬꓯꓼ ꓡꓰ ꓢꓴˍ ꓟꓲ ꓧꓶꓽ ꓡꓰˍ ꓥꓳ꓾ ꓐꓯˍ ꓡꓳ꓿ 19 ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓠꓬ꓾ ꓔꓯ ꓥꓳꓽ ꓕꓱ ꓕꓲ ꓟ ꓬꓲ ꓪꓽ ꓔꓯ ꓐꓯ ꓬꓯꓼˍ ꓟ ꓡꓳꓸ ꓓꓳ ꓡ ꓠꓬꓲ꓾ ꓖꓳ ꓕꓲ ꓙꓵꓹ ꓗꓪ ꓬꓲ ꓔꓯ ꓣꓴ ꓠꓲꓹ ꓫꓵˍ ꓟꓲ ꓑ ꓫꓬꓼ ꓐꓴ ꓔꓯ ꓙꓳꓺˍ ꓡꓳ꓿ 20 ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ ꓡꓳꓸ ꓠꓬꓲ ꓔꓬ ꓢꓲ꓾ ꓐꓯ ꓘꓶꓽ ꓝꓲꓸ ꓣꓴꓻ ꓢꓲ ꓠꓬꓲ꓾ ꓬꓲ ꓔꓯ ꓢꓲꓽ ꓒ ꓓꓽ ꓟ ꓙꓵꓽ ꓪꓽ ꓗꓪ ꓡꓯꓼ ꓙꓱ ꓗꓷ ꓠꓹ ꓟ꓾ ꓕꓺ ꓠꓬꓲ ꓢꓴ ꓐꓴ ꓔꓯ ꓔꓱꓹ ꓜꓳꓽ ꓢꓴ ꓒꓬꓱꓽ ꓫꓬꓹ ꓝꓲ ꓢꓲ ꓝꓲꓺ ꓩꓴ ꓗꓷˍ ꓡꓳ꓿ 21 ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ꓾ ꓟꓸ ꓒꓽꓳ꓾ ꓠꓴ ꓡꓰ ꓚˍ ꓟ ꓐꓰ ꓟꓸ ꓖꓶˍ ꓟ ꓮꓽ ꓙꓵ ꓠꓬ ꓔꓱꓹˍ ꓟ ꓥ ꓟ ꓐꓰ꓾ ꓠꓴ ꓠꓬ ꓞꓳ ꓤꓽ ꓒꓬꓱꓽ ꓔꓯ ꓟꓽ ꓢꓲꓺ ꓢꓲ꓾ ꓔꓱꓹ ꓔꓱꓹꓼ ꓐꓰ ꓪꓴ-ꓢ ꓙ ꓖꓴ ꓟꓸ ꓖꓶˍ ꓟ ꓥꓪ ꓠꓴꓽ ꓢꓷꓸˍ ꓡꓳ꓿ 22 ꓥꓪ ꓠꓴꓽ ꓠꓬ ꓣꓳ-ꓟ ꓪ ꓔꓲꓸ ꓢꓲ-ꓢ ꓔꓯ ꓔꓯꓹ ꓒꓵꓽ ꓐꓶꓻ ꓓꓻ ꓡ? ꓟꓽ ꓓ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 23 ꓬꓲ ꓠꓽ ꓬꓲ ꓪꓽ ꓖꓳꓼ ꓠꓲꓹ ꓔꓯ ꓡꓳꓸ ꓓꓳ ꓡ ꓠꓬꓲ꓾ 24 ꓓꓲ-ꓠ-ꓣꓲ ꓒꓴ ꓕꓲ ꓒꓯꓼ ꓥꓪ ꓔꓯ ꓟꓳꓸ ꓖꓶ ꓡꓯ꓿ ꓞꓳ ꓐꓬꓱꓽˍ ꓐꓰ ꓕꓳ ꓶ ꓝꓳꓹ ꓕꓱ ꓟ ꓮꓽ ꓟ ꓔꓯ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓡꓰ꓾ ꓢꓲ-ꓢ ꓔꓯ ꓟ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 25 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓢꓲ-ꓢ ꓔꓯ ꓟ ꓢꓲ-ꓢ ꓔꓯ ꓖꓶ꓾ ꓪꓴ-ꓢ ꓔꓯ ꓟ ꓪꓴ-ꓢ ꓔꓯ ꓖꓶ꓾ ꓐꓯ ꓖꓶˍ ꓡꓳ꓿ 26 ꓖꓳ ꓡꓱ ꓠꓬꓲ ꓬꓲ ꓪꓽ ꓡꓰ ꓑ ꓫꓬꓼ ꓐꓴ ꓟꓲꓽ ꓙꓬ ꓗꓪ ꓐꓯ ꓘꓶꓽ ꓝꓲꓸ ꓣꓴ ꓟꓽ ꓐ ꓡ꓿ ꓝꓮꓲ ꓠꓬ ꓬꓲ ꓒꓳꓹ ꓖꓶˍ ꓟ ꓔꓯ ꓬꓲ ꓪꓽ ꓓꓵꓽ ꓙ ꓟꓶ ꓢꓲ ꓟꓽ ꓪꓳꓹ ꓐꓰ ꓔꓬ ꓡꓳ꓿ 27 ꓖꓳ ꓗꓸ ꓠꓯꓸ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓟ ꓟꓽ ꓙꓳ꓾ ꓐꓯ ꓢꓴ ꓢ-ꓓꓴ-ꓗꓷ ꓐꓴ ꓕꓲ ꓐꓱ ꓡ ꓢꓲ ꓬꓰ-ꓢꓴ ꓔꓯ꓾ 28 ꓟꓽ ꓒꓽꓳ꓾ ꓟꓳ-ꓫꓲ ꓡꓰ ꓥꓪ ꓠꓴꓽ ꓔꓯ꓾ ꓡꓽ ꓞꓳ ꓕꓲ ꓣꓳ ꓠꓬ ꓤꓽ ꓟꓶ ꓙꓳꓻ ꓢꓲ ꓤ ꓠꓱ ꓟꓽ ꓙꓳꓻ ꓙꓳ ꓫꓵꓻ ꓠꓬ꓾ ꓬꓲ ꓠꓬꓲ ꓤꓽ ꓡꓰ ꓬꓲ ꓟ ꓡꓽ ꓔꓯ ꓫ ꓢꓲ꓾ ꓬꓲ ꓮ ꓬꓲꓼ ꓐꓱ ꓶ ꓬꓲ ꓫꓵꓸ ꓦꓵꓻ ꓖꓶ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓬꓰ ꓟ ꓙꓳˍ ꓡꓳ꓿ 29 ꓕꓲ ꓧꓪꓹ ꓙꓳˍ ꓠꓬ ꓤꓽ ꓫꓵꓽ ꓫꓵꓸ ꓙꓳˍ ꓡꓳ꓿ ꓤꓽ ꓪꓴꓽ ꓠꓬ ꓤꓽ ꓟꓶ ꓫ ꓢꓲ ꓤ ꓠꓱ ꓟꓽ ꓙꓳ ꓙꓳ ꓫꓵꓻꓳ꓿ 30 - 31 ꓮ-ꓓꓶˍ ꓟꓲ꓾ ꓮ-ꓘꓰˍ ꓟꓲ ꓬꓲ ꓔꓯ ꓫˍ ꓡꓳ꓿ ꓬꓲ ꓪꓽ ꓫꓵꓽ ꓫꓵꓸ ꓮꓽ ꓙꓵ ꓬꓲ ꓖꓳ ꓡꓱ ꓤ ꓠꓱ ꓟꓽ ꓙꓳ ꓙꓳ ꓫꓵꓳ꓿ 32 ꓖꓳ ꓗꓸ ꓠꓯꓸ ꓠꓬ ꓤ ꓟꓶ ꓤˍ ꓟꓲ ꓫꓵꓻꓳ꓿ 33 ꓖꓳ ꓡꓱ ꓠꓬ ꓢꓯꓸ ꓬꓲꓼ ꓡ ꓟ ꓗꓪ꓾ ꓬꓲ ꓠꓬ ꓬꓲ ꓪꓽ ꓮ ꓡꓲ ꓕꓲ ꓣꓳ ꓟ ꓤ ꓟꓶ ꓒꓬꓱꓼ ꓡ ꓥꓳ ꓪ? ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓫꓵꓽ ꓫꓵꓸ ꓡꓱꓸꓼ ꓬꓲ ꓔꓯ ꓫ ꓠꓬꓲꓳ꓾ ꓐꓯˍ ꓡꓳ꓿ 34 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓕꓱ ꓕꓲ ꓡꓶꓸ ꓢꓴ ꓠꓬ ꓤ ꓟꓶꓻ ꓘꓴ ꓠꓬꓲ꓾ ꓮꓸ ꓟꓲꓽ ꓩꓴ ꓠꓬꓲ ꓬꓰˍ ꓡꓳ꓿ 35 ꓖꓳ ꓡꓱ ꓥ ꓟꓲ ꓡ ꓠꓹ ꓟ ꓕꓲ ꓡꓶꓸˍ ꓐꓰ꓾ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓟ ꓟꓶꓻ ꓒꓵꓽ ꓢꓴ ꓠꓽ꓾ ꓤ ꓟꓶˍ ꓟꓲ ꓟꓽ ꓘꓴ꓾ ꓮꓸ ꓟꓲˍ ꓟꓲ ꓟꓽ ꓩꓴ꓿ 36 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓪꓴ-ꓢ ꓤꓽ ꓐꓴ ꓥ ꓢꓲ꓾ ꓢꓯꓸ ꓬꓲꓼ ꓡ ꓟ ꓔꓯ ꓑꓯꓹ ꓟꓶ ꓢꓴ ꓐꓴ ꓥ ꓢꓲ ꓠꓬꓲ꓾ ꓟꓴꓽ ꓗꓪ ꓝꓲ ꓓꓴ ꓐꓴˍ ꓡꓰ ꓐꓰ ꓗꓹ ꓠꓬꓲ ꓫꓵꓻ ꓟꓽ ꓓ꓿ 37 ꓮ ꓔꓳꓸ ꓐꓬꓻ ꓔꓬ ꓟ ꓢꓲꓹ ꓑꓳ ꓔꓯꓸ ꓟꓳꓸ ꓐꓳ ꓔ ꓟ ꓖꓳ ꓕꓲ ꓔꓳꓸ ꓗꓪ꓾ ꓟꓳ-ꓫꓲˍ ꓟꓲ ꓢꓲ ꓒꓽ ꓔꓯ꓾ ꓮ-ꓐ-ꓡ-ꓦ ꓬꓲ ꓪꓴ-ꓢ꓾ ꓬꓲ-ꓢ ꓬꓲ ꓪꓴ-ꓢ꓾ ꓬ-ꓗꓴ ꓬꓲ ꓪꓴ-ꓢ꓾ ꓐꓰ ꓘꓴ ꓢꓲ ꓫꓵꓻ ꓢꓴ ꓢꓯꓸ ꓬꓲꓼ ꓡ ꓠꓯꓹ ꓟ ꓔꓯꓸ ꓟꓳꓸ ꓐꓯ ꓔ ꓡꓳ꓿ 38 ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓫꓵꓻ ꓢꓴ ꓐꓴ ꓪꓴ-ꓢ ꓟꓽ ꓥ꓿ ꓢꓯꓸ ꓔꓬ ꓢꓴ ꓐꓴ ꓬꓲ ꓪꓽ ꓪꓴ-ꓢ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓔꓯꓸ ꓟꓳꓸ ꓠꓽ ꓮꓽ ꓙꓵ ꓡꓱꓸꓼ ꓢꓯꓸ ꓞꓹ ꓟ ꓥ ꓡꓳ꓾ ꓐꓯˍ ꓡꓳ꓿ 39 ꓙꓵꓽ ꓗ ꓟꓸ ꓒ ꓐꓴ ꓕꓲ ꓐꓱꓻ ꓡꓰ ꓒꓳꓹ ꓖꓶ ꓢꓲ꓾ ꓟꓸ ꓒꓽꓳ꓾ ꓠꓴ ꓐꓯ ꓬꓯꓼˍ ꓡꓳ꓾ ꓐꓯˍ ꓡꓳ꓿ 40 ꓖꓳ ꓗꓸ ꓠꓯꓸ ꓬꓲ ꓪꓽ ꓬꓲ ꓔꓯ ꓮꓸ ꓫꓵˍ ꓟꓲ ꓠ ꓠꓬꓲ ꓟꓽ ꓑꓶ꓿ 41 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓢꓴ ꓡꓰ ꓙꓲ-ꓢꓴ ꓠꓬ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓥ ꓡꓳ꓾ ꓐꓯˍ ꓟ ꓠꓬ ꓮ ꓡꓲ ꓥ ꓡ? 42 - 43 ꓮ ꓡꓲꓳ ꓐꓯ ꓠꓬ ꓟꓴꓽ ꓖꓪ ꓕꓳ ꓶ ꓗꓪ꓾ ꓓ-ꓪꓵ ꓬꓲ ꓚꓲꓸ ꓛꓬ ꓡꓰ꓾ ꓢꓲ ꓒꓽ ꓡꓰ ꓥꓪ ꓢꓲ ꓒꓽ ꓔꓯ꓾ ꓥꓪ ꓡꓰ ꓠꓴ ꓔꓯ ꓛꓴꓽ ꓙꓳ ꓢꓴ ꓔꓯ ꓠꓴ ꓛꓲ ꓕꓳꓼ ꓕꓲꓺ ꓟꓽ ꓗꓷ ꓡꓰ ꓝꓲ ꓕ ꓑꓳꓸ ꓥꓪ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ꓾ ꓐꓯ ꓔ ꓡꓳ꓿ 44 ꓓ-ꓪꓵ ꓡꓰ ꓬꓲ ꓔꓯ ꓢꓲ ꓒꓽ ꓘꓴˍ ꓠꓬ꓾ ꓬꓲ ꓠꓬ ꓮ ꓡꓲ ꓐꓰ ꓢꓲ ꓬꓲ ꓞꓲꓼ ꓤ ꓡꓯꓹ ꓤ ꓥ ꓢꓰꓽ ꓡ?꓾ ꓐꓰ ꓬꓲ ꓪꓽ ꓔꓯ ꓠ ꓠꓬꓲˍ ꓡꓳ꓿ 45 ꓑ ꓫꓬꓼ ꓐꓴ ꓑ ꓙꓽˍ ꓟ ꓗꓪ ꓬꓲ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ 46 ꓙꓵꓽ ꓗ ꓟꓸ ꓒ ꓐꓴ ꓔꓯ ꓤ ꓟꓳ꓿ ꓬꓲ ꓪꓽ ꓠꓬ ꓐꓵ ꓞꓶꓽ ꓐꓽ ꓢꓽ ꓖꓪꓽ ꓢꓲ ꓚꓳ ꓙꓰ ꓠꓲꓹ ꓫꓵˍ ꓡꓳ꓿ ꓝꓮꓲ ꓠꓬ ꓙꓵꓺ ꓗꓪ ꓒꓵꓽ ꓗ ꓬꓰ ꓡ ꓟ ꓐꓰ꓾ ꓜꓲꓼ ꓦꓲˍ ꓐꓰ ꓑꓮꓲꓽ ꓗꓪ ꓞꓳ ꓪꓴꓽ ꓠꓬꓲꓸ ꓠꓸ ꓖꓴ ꓗꓪˍ ꓡꓰꓽ ꓠꓬꓲꓸ ꓠꓸ ꓠꓲꓹ ꓫꓵˍ ꓡꓳ꓿ 47 ꓬꓲ ꓪꓽ ꓠꓽ ꓟꓶꓽ ꓛꓵꓽ ꓟ ꓐꓴ ꓖꓴꓽ ꓙꓴꓽ ꓦꓴꓻ ꓜꓽ ꓢꓲ꓾ ꓪꓽ ꓮꓽ ꓫꓵꓹ ꓫꓵ ꓘꓴ ꓗꓶꓸˍ ꓡꓳ꓿ ꓡꓽ ꓞꓳ ꓕꓱ ꓕꓲ ꓧꓳꓽ ꓟ ꓠꓽ ꓮꓽ ꓘꓶꓸ ꓡꓲꓽˍ ꓟ ꓛꓬꓻ ꓒꓵꓽ ꓟꓶˍ ꓥꓳ꓾ ꓐꓯˍ ꓡꓳ꓿

ꓡꓴ-ꓗ 21

1 ꓬꓰ-ꓢꓴ ꓡꓳꓸ ꓠꓬꓲ ꓠꓬ꓾ ꓒꓴ ꓗꓶ ꓖꓴ ꓗꓪ ꓔꓲ ꓖꓶ ꓓꓴ ꓡꓯꓼ ꓫꓴ ꓔꓲ ꓔꓬ ꓟ ꓞꓳ ꓐꓳ ꓐꓴ ꓔꓯ ꓟꓳꓻˍ ꓡꓳ꓿ 2 ꓫꓸˍ ꓟ ꓟꓶꓽ ꓛꓵꓽ ꓟ ꓕꓲ ꓣꓳˍ ꓟꓲ ꓙꓲꓽ ꓒꓬꓸ ꓤ ꓠꓬꓲꓽ ꓒꓬꓸ ꓔꓲꓺ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 3 ꓖꓳ ꓡꓱ ꓠꓬ ꓬꓲ ꓡꓰ꓾ ꓥꓪ ꓠꓴ ꓪꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓫꓸˍ ꓟ ꓟꓶꓽ ꓛꓵꓽ ꓟ ꓕꓱ ꓟ ꓠꓽ ꓮꓽ ꓙꓵ ꓢꓴ ꓟꓬ ꓟꓽ ꓞꓲ ꓔꓲˍ ꓡꓳ꓿ 4 ꓮ ꓡꓲꓳ ꓐꓯ ꓠꓬ ꓠꓱꓸ ꓐꓯꓼ ꓢꓴ ꓮꓽ ꓙꓵ ꓠꓽ꓾ ꓚꓲꓸ ꓛꓬ ꓣꓱꓽ ꓜꓰ ꓡꓰˍ ꓟ ꓗꓪ ꓐꓰ ꓔꓲ ꓖꓶ ꓓꓴ ꓔꓲˍ ꓡꓳ꓿ ꓟꓶꓽ ꓛꓵꓽ ꓟ ꓕꓱ ꓟ ꓠꓽ ꓬꓲ ꓫꓸˍ ꓟ ꓗꓪ ꓚꓲꓸ ꓛꓬ ꓖꓳ ꓓꓱꓽ ꓦꓵꓻ ꓓꓴ ꓮꓽ ꓙꓵ ꓡꓱꓸꓼ ꓔꓲ ꓗꓷꓳ꓾ ꓐꓯˍ ꓡꓳ꓿ 5 ꓛꓳꓽ ꓒꓯꓹ ꓐꓴ ꓕꓲ ꓐꓱꓻ ꓠꓬ꓾ ꓢꓲꓽ ꓫꓬ ꓦꓲˍ ꓐꓰ꓾ ꓖꓳ ꓗꓪ ꓮꓽ ꓘꓶꓸ ꓐꓲꓻˍ ꓟ Bꓸ ꓛꓲˍ ꓐꓰ꓾ ꓔꓲ ꓖꓶ ꓡ ꓟ ꓖꓴꓽ ꓙꓴ ꓡꓰ ꓐꓲꓻ ꓫꓴꓽ ꓔ ꓟ ꓔꓯ ꓖꓴ ꓢꓲ ꓫꓸ ꓕꓱ ꓡꓯꓽ ꓘꓳ ꓔꓬ ꓕꓯ꓾ 6 ꓬꓰ-ꓢꓴ ꓡꓰ꓾ ꓠꓴ ꓪꓽ ꓡꓳꓸ ꓟꓳꓻˍ ꓟ꓾ ꓕꓱ ꓗꓪ ꓕꓲ ꓟ ꓕꓯꓽ ꓢꓲ ꓕꓲ ꓟ ꓜꓶꓻ ꓔ ꓟ Bꓸ ꓛꓲ ꓠꓬ ꓟꓽ ꓥꓸ ꓦ ꓟ ꓟꓽ ꓙꓳ ꓗꓷ ꓡꓰˍ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓾ ꓐꓯˍ ꓡꓳ꓿ 7 ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ ꓠ ꓠꓬꓲ ꓢꓲ꓾ ꓟꓸ ꓒꓽꓳ꓾ ꓕꓱ ꓟꓬ ꓙꓰꓽ ꓟ ꓮ ꓕꓯꓽ ꓗꓷ ꓡꓰˍ ꓥꓳ ꓪ? ꓕꓱ ꓟꓬ ꓙꓰꓽ ꓛꓲ ꓡꓺˍ ꓐꓯˍ ꓕꓯ ꓮꓸ ꓫꓵ ꓢꓷꓸ ꓡꓰ ꓓꓴ ꓓꓳ ꓡ ꓥꓳ ꓪ?꓾ ꓐꓰ ꓠ ꓠꓬꓲˍ ꓡꓳ꓿ 8 ꓬꓰ-ꓢꓴ ꓡꓰ꓾ ꓢꓴ ꓠꓴ ꓪꓽ ꓔꓯ ꓟꓽ ꓧꓳꓽ ꓪꓴꓸ ꓙꓰ ꓠꓹ ꓟ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓢ ꓖꓪ ꓠꓽ ꓡꓽ ꓞꓳ ꓮꓽ ꓟꓬꓹ ꓥꓪ ꓟꓬꓱ ꓟꓯꓻ ꓢꓲ꓾ ꓥꓪ ꓠꓬ ꓙꓲ-ꓢꓴ ꓥ ꓡꓳ꓾ ꓐꓰ ꓐꓯ ꓡ ꓥꓳ꓿ ꓝꓮꓲ ꓠꓬ ꓦꓬꓼ ꓠꓬꓲ ꓛꓲ ꓡꓺꓳ꓾ ꓐꓯ ꓡ ꓥꓳ꓿ ꓠꓴ ꓪꓽ ꓠꓬ ꓬꓲ ꓪꓽ ꓔꓯ ꓕꓽ ꓛꓳ꓿ 9 ꓢꓰꓼ ꓡꓯꓽ ꓘꓳˍ ꓟ ꓐꓰ ꓢꓴꓺˍ ꓟ ꓓꓳꓽ ꓬꓲ ꓫꓵꓽ ꓬꓲ ꓙꓰ ꓠꓴ ꓪꓽ ꓑ ꓙꓽˍ ꓕꓯ ꓕꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓙꓰ ꓟ ꓠ ꓧꓶꓸ ꓕꓯ ꓡꓰ ꓒꓬꓱꓼ ꓡ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓡꓳꓹ ꓬꓰ ꓝꓲꓸ ꓠꓬ ꓞꓼ ꓐꓰ ꓟꓽ ꓛꓲ ꓡ ꓢꓰ꓾ ꓐꓯˍ ꓡꓳ꓿ 10 ꓝꓮꓲ ꓬꓲ ꓡꓰ꓾ ꓞꓳ ꓫꓵꓽ ꓛꓳꓽ ꓞꓳ ꓫꓵꓽ ꓒꓳꓹ ꓡꓯꓽ ꓘꓳ ꓔꓴ ꓡ ꓥꓳ꓿ ꓗꓴꓷꓼ ꓛꓳ ꓗꓴꓷˍ ꓟꓲ ꓓꓶꓽ ꓡꓯꓽ ꓘꓳ ꓔꓴ ꓡ ꓥꓳ꓿ 11 ꓟꓵꓽˍ ꓟꓲ ꓮꓽ ꓘꓶꓸ ꓓꓵꓺ ꓡ ꓥꓳ꓿ ꓕꓲ ꓖ ꓕꓲ ꓔꓳꓸ ꓦꓰꓼ ꓟꓷ ꓘꓳꓼˍ ꓐꓰ ꓠꓻ ꓓꓱꓽˍ ꓟꓲ ꓓꓳ ꓡ ꓥꓳ꓿ ꓝꓮꓲ ꓠꓬ ꓟꓴꓽ ꓗꓪ ꓗꓪ ꓐꓰ ꓟꓬ ꓑꓬꓺ ꓓꓴˍ ꓐꓰ ꓢꓷꓸ ꓡꓰ ꓓꓴ ꓬꓲ ꓓꓽ ꓟ ꓟꓳꓸ ꓖꓶ ꓡ ꓥꓳ꓿ 12 ꓕꓱ ꓟꓬ ꓙꓰꓽ ꓟ ꓟꓽ ꓛꓲ ꓡ ꓕꓯˍ ꓡꓰ꓾ ꓢꓴ ꓠꓬ ꓠꓴ ꓪꓽ ꓔꓯ ꓣꓴ ꓡ ꓥꓳ꓿ ꓝꓮꓲ ꓠꓴ ꓪꓽ ꓔꓯ ꓗꓸ ꓧꓪ ꓢꓲ ꓜꓲꓼ ꓦꓲˍ ꓐꓰ ꓐꓱꓻ ꓓꓴꓽ ꓗꓪ ꓡꓯꓼ ꓙꓱ ꓗꓷ ꓢꓲ ꓠꓬꓲ꓾ ꓥꓪ ꓟꓬꓱ ꓪꓴꓸ ꓠꓬꓲ ꓠꓴ ꓪꓽ ꓔꓯ ꓪ ꓔꓲꓸ ꓐꓴˍ ꓐꓰ ꓢꓲꓽ ꓒ ꓓꓽ ꓟ ꓐꓴ ꓟꓲ ꓙꓬꓽ ꓗꓪ ꓧꓳꓽ ꓛꓲ ꓬꓰˍ ꓥꓳ꓿ 13 ꓕꓱ ꓟ ꓠꓽ ꓠꓴ ꓪꓽ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓠꓹ ꓟ ꓬꓲ ꓙꓵꓹ ꓗꓷ ꓡꓰˍ ꓥꓳ꓿ 14 ꓖꓳ ꓕꓯ ꓮ ꓡꓲ ꓐꓰ ꓒꓳꓹ ꓖꓶ ꓠꓯꓹ ꓟ ꓧꓶꓸ ꓕꓯˍ ꓡꓰ ꓟꓽ ꓙꓽ ꓖꓶ ꓠꓹ ꓟ ꓓꓵꓽ ꓙ ꓞꓷꓹ ꓔ꓿ 15 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓛꓴꓽ ꓙꓳ ꓢꓴ ꓮ ꓡꓲ ꓕꓲ ꓣꓳˍ ꓟꓲ ꓗꓽ ꓔ ꓟꓽ ꓘꓴꓻ ꓟ ꓐꓰ꓾ ꓐꓯ ꓧꓪꓸ ꓡꓰ ꓟꓽ ꓓ ꓟ ꓐꓯ ꓙꓺˍ ꓐꓰ꓾ ꓙꓽ ꓗꓴ ꓠꓲꓹ ꓠꓴ ꓪꓽ ꓔꓯ ꓥꓪ ꓖꓶˍ ꓥꓳ꓿ 16 ꓠꓴ ꓪꓽ ꓐꓹ ꓐ ꓟꓹ ꓟ꓾ ꓬꓲꓼ ꓤ ꓠꓬꓲ ꓤ꓾ ꓫꓵꓽ ꓤ ꓧꓪ ꓤˍ ꓐꓰ ꓛꓳꓽ ꓒꓯꓹ ꓐꓴ ꓡꓰ ꓠꓴ ꓪꓽ ꓔꓯ ꓡꓯꓼ ꓙꓱ ꓗꓷ ꓡ ꓥꓳ꓿ ꓕꓲ ꓐꓱ ꓔꓯ ꓠꓬ ꓬꓲ ꓪꓽ ꓡꓰ ꓫꓵꓻ ꓝꓲˍ ꓥꓳ꓿ 17 ꓥꓪ ꓟꓬꓱ ꓪꓴꓸ ꓠꓬꓲ ꓮꓽ ꓙꓵ ꓢꓴ ꓠꓴ ꓪꓽ ꓔꓯ ꓠꓲꓹ ꓜꓳ ꓡ ꓥꓳ꓿ 18 ꓖꓳ ꓡꓱ ꓥ ꓟꓲ ꓠꓴ ꓪꓽ ꓪꓴꓸ ꓞꓱꓻ ꓕꓲ ꓚˍ ꓟꓲ ꓟꓽ ꓒꓲꓼ ꓬꓰ꓿ 19 ꓠꓴ ꓪꓽ ꓜꓲꓽ ꓘꓴꓻˍ ꓠꓬ ꓢꓯꓼ ꓟꓬ ꓟꓶˍ ꓥꓳ꓿ 20 ꓙꓱ-ꓣꓴ-ꓢ-ꓡꓱ ꓔꓯ ꓟꓯꓼ ꓜꓴ ꓡꓰ ꓗꓽ ꓚꓳꓸ ꓔ ꓟ ꓠꓴ ꓪꓽ ꓟꓳꓻˍ ꓕꓯꓽ꓾ ꓙꓱ-ꓣꓴ-ꓢ-ꓡꓱ ꓐꓬꓺ ꓡꓰˍ ꓟ ꓦꓬꓼ ꓠꓬꓲ ꓠꓶꓽ ꓡ ꓟ ꓔꓯ ꓠꓴ ꓪꓽ ꓢꓷꓸ ꓔ꓿ 21 ꓖꓳ ꓕꓯ ꓬꓴ-ꓔ ꓟꓵꓽ ꓗꓪ ꓔꓬ ꓢꓴ ꓠꓬ ꓪꓽ ꓚꓲ ꓗꓪ ꓛꓰꓹ ꓙꓰ ꓝꓲ꓿ ꓡꓳ ꓒꓱ ꓗꓪ ꓔꓬ ꓢꓴ ꓠꓬ ꓓꓳ ꓙꓰ ꓝꓲ꓿ ꓦ ꓟꓲ ꓦ ꓐꓽ ꓗꓪ ꓔꓬ ꓢꓴ ꓔꓯˍ ꓟꓲ ꓡꓳ ꓒꓱ ꓗꓪ ꓕꓽ ꓓꓵꓽ ꓡꓰ ꓝꓲ꓿ 22 ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ꓾ ꓕꓳ ꓶ ꓗꓪ ꓐꓳ ꓔ ꓟ ꓮꓽ ꓙꓵ ꓐꓲ ꓡ ꓝꓲ ꓠꓹ ꓟ ꓪꓽ ꓛꓴ ꓚꓱꓹˍ ꓟ ꓦꓬꓼ ꓠꓬꓲ ꓥ ꓡꓳ꓿ 23 ꓦꓬꓼ ꓠꓬꓲ ꓖꓳ ꓟ ꓗꓪ ꓤ ꓠꓱ ꓶꓻ ꓞꓹ ꓢꓴˍ ꓐꓰ ꓮꓽ ꓚꓵꓹ ꓛꓵꓼˍ ꓟ ꓤ ꓠꓱ ꓙꓳ ꓢꓴ ꓠ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓟꓵꓽ ꓕꓱ ꓟ ꓗꓪ ꓫꓸ ꓙꓵ ꓟꓷꓼ ꓙꓵˍ ꓟ ꓬꓲ ꓓꓽ ꓟ ꓙꓳˍ ꓥꓳ꓿ ꓦꓶꓻ ꓠꓲꓹˍ ꓟꓲ ꓑ ꓫꓬꓼ ꓐꓴ ꓕꓱ ꓕꓷ ꓕꓯꓽ ꓢꓲ ꓗꓪ ꓬꓯꓼ ꓡ ꓥꓳ꓿ 24 ꓬꓲ ꓪꓽ ꓠꓬ ꓮꓸ ꓕꓽ ꓘꓶꓽ ꓗꓪ ꓓꓳꓽ ꓡꓰˍ ꓥꓳ꓿ ꓝꓮꓲ ꓠꓬ ꓞꓳ ꓫꓵꓽ ꓟꓵ ꓥ ꓕ ꓑꓳꓸ ꓗꓪ ꓡꓳꓽ ꓔꓯꓹ ꓙꓰˍ ꓥꓳ꓿ ꓖꓳ ꓡꓱ ꓢꓲ ꓐꓶꓽ ꓞꓳ ꓦꓬꓼ ꓠꓬꓲ ꓐꓲ ꓡ ꓗꓪ ꓛꓲ꓾ ꓙꓱ-ꓣꓴ-ꓢ-ꓡꓱ ꓠꓬ ꓐꓶꓽ ꓞꓳ ꓐꓴ ꓛꓲ ꓕꓳꓼ ꓓꓰ ꓗꓷ ꓡꓰ ꓥꓳ꓿ 25 ꓝꓮꓲ ꓠꓬ ꓟꓲꓽ ꓟꓲ ꓦ ꓐ ꓗꓴ ꓤꓽ ꓗꓪ ꓢꓷꓸ ꓡꓰ ꓓꓴ ꓟꓳꓸ ꓖꓶ ꓡ ꓥꓳ꓿ ꓟꓲ ꓠꓯ ꓗꓪ ꓟ ꓗꓴꓷꓼ ꓐꓴˍ ꓟꓲ꓾ ꓬꓲꓻ ꓡꓴꓽ ꓐꓱ ꓓꓽ ꓟ ꓗꓪ ꓬꓲꓻ ꓡꓯꓼ ꓟꓰ ꓟꓶꓻˍ ꓟ ꓢꓯꓼ ꓗꓪ ꓐꓰ ꓓꓵꓽ ꓙ ꓟꓬꓽ ꓢꓲ ꓙꓳꓺ ꓫꓸ ꓔꓬ ꓫˍ ꓥꓳ꓿ 26 ꓝꓮꓲ ꓞꓳ ꓤ ꓠꓬ ꓟꓲ ꓠꓯ ꓗꓪ ꓗꓷ ꓡꓰ ꓠꓹ ꓟ ꓔꓯ ꓓꓵꓽ ꓙ ꓫꓸ ꓢꓲ ꓧꓪꓸ ꓛꓲꓽ ꓧꓪꓸ ꓟꓽ ꓛꓲ ꓗꓷ ꓡꓰˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓪꓽ ꓠꓬꓲˍ ꓟ ꓠꓬ ꓬꓲ ꓚꓳ ꓚꓱꓹ ꓗꓪ ꓐꓰ ꓧꓶꓸ ꓡꓰˍ ꓥꓳ꓿ 27 ꓖꓳ ꓕꓯ ꓡ-ꓞꓳ-ꓮ-ꓐꓲ ꓠꓬ ꓢꓯꓼ ꓙꓳ ꓪꓽ ꓠꓬꓲˍ ꓟ ꓐꓰ꓾ ꓟꓬꓱ ꓓꓳꓽ ꓓꓽ ꓟ ꓙꓳ ꓙꓳˍ ꓡꓰꓽ ꓟꓴꓺ ꓗꓴꓸ ꓠꓯꓸꓼ ꓗꓪ ꓡꓻˍ ꓟ ꓔꓯ ꓬꓲ ꓪꓽ ꓟꓳꓻˍ ꓥꓳ꓿ 28 ꓕꓱ ꓟꓬ ꓫꓵꓽ ꓒꓬꓱꓼ ꓡ ꓪꓴꓸ ꓔꓴˍ ꓕꓯ꓾ ꓠꓴ ꓪꓽ ꓔꓯ ꓫꓴꓹ ꓣꓴ ꓦꓬꓼ ꓠꓬꓲ ꓠꓶꓽ ꓡ ꓟ ꓥ ꓠꓬꓲ꓾ ꓠꓲꓹ ꓒꓴ ꓢꓲ ꓠꓲꓹ ꓪꓴꓽ ꓪꓴꓽ ꓡꓳꓸ ꓔꓬ꓾ ꓐꓯˍ ꓡꓳ꓿ 29 ꓬꓲ ꓠꓬ ꓝꓮꓲ ꓔꓯ ꓥꓳꓽ ꓡꓰ ꓬꓲ ꓪꓽ ꓔꓯ꓾ ꓘꓶꓽ ꓢꓶ ꓜꓲˍ ꓐꓰ ꓢꓲꓹ ꓜꓲ ꓡꓳ ꓜꓲ ꓮꓽ ꓙꓵ ꓔꓯ ꓡꓳꓸ ꓠꓬꓲ꓿ 30 ꓬꓲ ꓒꓬꓽ ꓠꓱꓽ ꓡ ꓟ ꓔꓯ ꓠꓴ ꓪꓽ ꓟꓳꓻˍ ꓠꓬ ꓟꓵꓽ ꓫꓱꓺ ꓠꓶꓽ ꓡ ꓟ ꓠꓴ ꓪꓽ ꓢꓷꓸˍ ꓡꓳ꓿ 31 ꓖꓳ ꓡꓱ ꓠꓬꓲ ꓕꓱ ꓟꓬ ꓙꓰꓽ ꓒꓬꓱ ꓡ ꓔꓬ ꓟ ꓔꓯ ꓠꓴ ꓪꓽ ꓟꓳꓻˍ ꓠꓬ꓾ ꓪꓴ-ꓢ ꓗꓴꓷꓼ ꓠꓶꓽ ꓡ ꓟ ꓔꓯˍ ꓟꓲ ꓢꓷꓸ ꓔ꓿ 32 ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓕꓱ ꓕꓲ ꓤꓶꓻ ꓟꓽ ꓡꓳꓹ ꓬꓰ ꓕꓯˍ ꓡꓰ ꓕꓱ ꓟꓬ ꓟ ꓮꓽ ꓙꓵ ꓒꓬꓱꓼ ꓡ ꓥꓳ꓿ 33 ꓟꓴꓽ ꓗꓪ ꓟꓲ ꓠꓯ ꓠꓬ ꓡꓳꓹ ꓬꓰˍ ꓥꓳ꓿ ꓥꓪ ꓐꓯ ꓘꓶꓽ ꓠꓽ ꓟꓽ ꓡꓳꓹ ꓬꓰ꓾ ꓐꓯˍ ꓡꓳ꓿ 34 ꓝꓮꓲ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓜꓽ ꓓꓴ ꓗꓪꓸˍ ꓟ ꓐꓰ ꓙꓲꓻ ꓒꓶ ꓬꓲꓼˍ ꓟ ꓐꓰ꓾ ꓕꓱ ꓕꓲ ꓤꓶꓻ ꓟ ꓙꓽ ꓫꓸ ꓓꓴ ꓡꓰ ꓠꓴ ꓪꓽ ꓠꓲꓹ ꓟ ꓔꓯ ꓪꓴꓽ ꓧꓶ ꓡꓰ ꓝꓲ ꓢꓲ ꓠꓬꓲ꓾ ꓦꓬꓼ ꓠꓬꓲ ꓖꓳ ꓟ ꓡꓰ ꓠꓴ ꓪꓽ ꓔꓯ ꓞꓼ ꓐꓰ ꓪꓺ ꓕꓲ ꓪꓳꓽˍ ꓡꓰ ꓐꓰ ꓟꓽ ꓪꓴꓻ ꓡꓰ ꓝꓲ ꓠꓹ ꓟ ꓤ ꓟꓳ꓿ 35 ꓮ ꓡꓲꓳ ꓐꓯ ꓠꓬ ꓖꓳ ꓕꓲ ꓠꓬꓲ ꓠꓽ ꓟꓵ ꓗꓳꓹ ꓓꓵ ꓓꓵ ꓗꓪ ꓔꓬ ꓢꓴ ꓥ ꓕ ꓑꓳꓸ ꓔꓯ ꓬꓯꓼ ꓡ ꓥꓳ꓿ 36 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓬ ꓡ ꓠꓹ ꓟ ꓕꓱ ꓟꓬ ꓫꓵꓽ ꓟ ꓔꓯˍ ꓐꓰ ꓡꓲꓹ ꓗꓷ ꓐ ꓡ ꓠꓹ ꓟ ꓪꓽ ꓘꓴ꓿ ꓝꓮꓲ ꓠꓬ ꓡ-ꓞꓳ-ꓮ-ꓐꓲ ꓟꓲ ꓙꓬ ꓗꓪ ꓦꓰꓼ ꓞ ꓟꓶ ꓠꓹ ꓟ꓾ ꓮ ꓕꓯˍ ꓟꓲ ꓧꓪꓸ ꓛꓲꓽ ꓐꓰ ꓔꓬ ꓢꓲ ꓪꓽ ꓘꓴ꓾ ꓐꓯˍ ꓡꓳ꓿ 37 ꓬꓰ-ꓢꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲꓽ ꓫꓬ ꓦꓲ ꓗꓪ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ ꓝꓮꓲ ꓠꓬ ꓕꓲ ꓟꓶꓼ ꓘꓶꓼ ꓡꓰ ꓕꓲ ꓟꓶꓼ ꓘꓶꓼ ꓓꓳ ꓙꓰ ꓢꓲ꓾ ꓮ-ꓛꓬ꓾ ꓟꓬꓱꓺ ꓔ ꓟ ꓪꓽ ꓚꓲ ꓗꓪ ꓬꓲꓼ ꓔ ꓙꓰˍ ꓡꓳ꓿ 38 ꓑ ꓫꓬꓼ ꓐꓴ ꓠꓬ ꓬꓲ ꓚꓺˍ ꓟ ꓟꓸ ꓟꓲꓽ ꓔꓯ ꓠ ꓠꓹ ꓠꓹ ꓟ꓾ ꓠꓯꓼ ꓠꓯꓼ ꓕꓯˍ ꓡꓰ ꓢꓲꓽ ꓫꓬ ꓦꓲ ꓗꓪ ꓜꓲꓼ ꓡ ꓡꓳ꓿

ꓡꓴ-ꓗ 22

1 ꓦꓲ-ꓘꓳ-ꓑꓮꓲ꓾ ꓟꓬꓱꓺ ꓔ ꓟ ꓙꓵ-ꓧꓶ-ꓟ-ꓣꓱ-ꓑꓮꓲ ꓠꓶꓽ ꓡ ꓕꓯ꓾ 2 ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓠꓬ꓾ ꓬꓰ-ꓢꓴ ꓔꓯ ꓮ ꓡꓲ ꓐꓰ ꓢꓰꓼ ꓠꓹ ꓟ ꓬꓲ ꓚꓱꓹ ꓧꓪ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓑ ꓫꓬꓼ ꓐꓴ ꓔꓯ ꓙꓳꓺˍ ꓡꓳ꓿ 3 ꓖꓳ ꓕꓯ ꓢ-ꓓꓯ ꓠꓬ ꓞꓲ ꓠꓬꓲꓽ ꓣꓳ ꓗꓪ ꓟ꓾ ꓘ-ꓡꓲꓳ ꓢꓴ ꓬꓴ-ꓓ ꓠꓲꓹ ꓟ ꓗꓪ ꓓꓵꓽ ꓡꓰˍ ꓡꓳ꓿ 4 ꓖꓳ ꓡꓱ ꓢꓲ ꓬꓲ ꓠꓬ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓢꓲꓽ ꓫꓬ ꓦꓲ ꓙꓵꓽ ꓒ ꓐꓴ ꓔꓯ ꓙꓰ ꓢꓲ꓾ ꓬꓰ-ꓢꓴ ꓔꓯ ꓬꓲ ꓪꓽ ꓡꓯꓼ ꓒꓯꓹ ꓗꓪ ꓮ ꓡꓲ ꓐꓰ ꓡꓯꓼ ꓙꓱ ꓖꓶ ꓠꓹ ꓟ ꓖꓪ ꓙꓱˍ ꓡꓳ꓿ 5 ꓬꓲ ꓪꓽ ꓠꓬ ꓠꓲꓹ ꓒꓴ ꓢꓲ ꓬꓲ ꓔꓯ ꓒꓴ ꓖꓶꓽ ꓙ ꓟꓳˍ ꓡꓳ꓿ 6 ꓖꓳ ꓡꓱ ꓠꓬ ꓬꓲ ꓓꓽ ꓔꓳꓹ ꓢꓲ ꓞꓳ ꓜꓴ ꓟꓽ ꓔꓬ ꓗꓪ꓾ ꓬꓰ-ꓢꓴ ꓔꓯ ꓬꓲ ꓪꓽ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷ ꓠꓹ ꓟ ꓬꓲ ꓑꓶ ꓧꓪˍ ꓡꓳ꓿ 7 ꓦꓲ-ꓘꓳ-ꓑꓮꓲ ꓗꓪ ꓔꓲ ꓓꓴ ꓮ ꓣꓳ ꓤ ꓢꓰꓼ ꓔꓲ ꓖꓶ ꓠꓯꓹ ꓟ ꓐꓰ꓾ ꓙꓵꓽ-ꓧꓶ-ꓟ-ꓣꓱ-ꓟ ꓑ ꓑ ꓦꓬꓼ ꓠꓬꓲ ꓛꓲ ꓡ ꓡꓳ꓿ 8 ꓖꓳ ꓕꓯ ꓬꓰ-ꓢꓴ ꓡꓰ ꓒꓲ-ꓕꓱˍ ꓐꓰ ꓬꓳ-ꓦ ꓔꓯ ꓝꓲ ꓩꓴ ꓗꓷ ꓢꓲ ꓬꓲ ꓪꓽ ꓔꓯ꓾ ꓣꓳ ꓜꓽ ꓠꓹ ꓟ ꓦꓲ-ꓘꓳ-ꓑꓮꓲ ꓠꓴ ꓪꓽ ꓙꓽ ꓖꓶ ꓬꓰ꓾ ꓐꓯ ꓖꓶˍ ꓡꓳ꓿ 9 ꓬꓲ ꓪꓽ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓔꓯ ꓮ ꓡꓲ ꓗꓪ ꓙꓽ ꓖꓶ ꓝꓲ ꓠꓲꓹ ꓫꓵˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ 10 ꓬꓲ ꓡꓰ ꓬꓲ ꓪꓽ ꓔꓯ꓾ ꓠ ꓠꓹ꓾ ꓡꓳ ꓒꓱ ꓗꓪ ꓠꓴ ꓪꓽ ꓓꓵꓽ ꓡꓰ ꓠꓬ꓾ ꓬꓲꓻ ꓙꓬ ꓕꓲ ꓠꓱꓸ ꓐꓰꓻ ꓑꓱꓸ ꓔ ꓟ ꓡꓽ ꓞꓳ ꓕꓲ ꓣꓳ ꓔꓯ ꓔꓳꓹ ꓜꓳꓽˍ ꓥꓳ꓿ ꓬꓲ ꓓꓵꓽ ꓙꓰˍ ꓟ ꓖꓳ ꓕꓲ ꓦꓲ ꓗꓪ ꓬꓲ ꓔꓯ ꓛꓳ ꓓꓵꓽ ꓙꓰ꓿ 11 ꓖꓳ ꓡꓱ ꓢꓲ ꓦꓲ ꓢꓲ ꓒꓽ ꓔꓯ꓾ ꓟꓸ ꓒ ꓡꓰ ꓠꓴ ꓔꓯ꓾ ꓥꓪˍ ꓐꓰ ꓥꓪ ꓛꓳꓽ ꓒꓯꓹ ꓐꓴ ꓕꓲꓽ ꓪꓺꓼ ꓦꓲ-ꓘꓳ-ꓑꓮꓲ ꓜꓽ ꓠꓹ ꓟ꓾ ꓪꓰ ꓤ ꓗꓳꓹ ꓮ ꓡꓲ ꓗꓪ ꓥ ꓡ?꓾ ꓐꓰ ꓠ ꓠꓬꓲ ꓩꓴ ꓡ ꓡꓳ꓾ ꓐꓯ ꓖꓶ꓿ 12 ꓖꓳ ꓡꓱ ꓠꓬ ꓬꓲ ꓡꓰ ꓣꓱꓽ ꓓꓴ ꓟꓴ ꓓꓴ ꓮꓽ ꓙꓵ ꓗꓶ ꓔꓸ ꓟ꓾ ꓬꓲ ꓓꓽ ꓟ ꓮꓽ ꓟꓴꓻ ꓕꓲ ꓗꓳꓹ ꓠꓴ ꓪꓽ ꓔꓯ ꓟꓳꓸ ꓖꓶ ꓡ ꓥꓳ꓿ ꓠꓴ ꓪꓽ ꓖꓳ ꓗꓪ ꓙꓽ ꓖꓶꓽ꓾ ꓐꓯˍ ꓡꓳ꓿ 13 ꓬꓲ ꓪꓽ ꓙꓰ ꓗꓷ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓐꓯˍ ꓟ ꓡꓰ ꓐꓰ ꓟꓳꓻ ꓡꓰ ꓢꓲ꓾ ꓦꓲ-ꓘꓳ-ꓑꓮꓲ ꓜꓽ ꓓꓴ ꓙꓽ ꓖꓶˍ ꓡꓳ꓿ 14 ꓬꓲ ꓙꓵꓹ ꓛꓲ ꓡ ꓕꓯ ꓬꓰ-ꓢꓴˍ ꓐꓰ ꓝꓲ ꓓꓴ ꓐꓴ ꓕꓲꓽ ꓪꓺꓼ ꓗꓳꓺ ꓔꓬ ꓡꓳ꓿ 15 ꓬꓲ ꓡꓰ ꓬꓲ ꓪꓽ ꓔꓯ꓾ ꓥꓪ ꓟꓽ ꓫꓸ ꓙꓵꓻ ꓕꓯˍ ꓡꓰ꓾ ꓦꓲ-ꓘꓳ-ꓑꓮꓲ ꓕꓱ ꓟ ꓠꓴ ꓪꓽˍ ꓐꓰ ꓕꓲꓽ ꓪꓺꓼ ꓮꓽ ꓘꓶꓸ ꓜꓽ ꓠꓲꓹ ꓫꓵˍ ꓡꓳ꓿ 16 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓪꓴ-ꓢ ꓗꓴꓷꓼ ꓠꓯꓸꓼ ꓗꓪ ꓦꓲ-ꓘꓳ-ꓑꓮꓲ ꓬꓲ ꓔꓶꓺ ꓙꓱꓼ ꓟꓽ ꓐꓲ ꓡ ꓕ ꓑꓳꓸ꓾ ꓕꓱ ꓟ ꓔꓯ ꓥꓪ ꓝꓮꓲ ꓟꓽ ꓜꓽꓳ꓾ ꓐꓯˍ ꓡꓳ꓿ 17 ꓬꓲ ꓠꓬ ꓡꓴ ꓗꓶꓸ ꓣꓴ ꓢꓲ ꓫꓸ ꓟꓳ ꓗꓷ ꓠꓬ꓾ ꓕꓱ ꓟ ꓠꓴ ꓪꓽ ꓣꓴ ꓢꓲ ꓮꓽ ꓙꓵ ꓢꓴ ꓐꓱꓻ ꓓꓳ꓿ 18 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓕꓱ ꓡꓱ ꓖꓳ ꓑꓳ ꓪꓴ-ꓢ ꓗꓴꓷꓼ ꓛꓲ ꓡ ꓗꓪ ꓛꓲ꓾ ꓛꓱꓼ ꓡꓱꓼ ꓢꓶ ꓪꓴꓽ ꓬꓲꓻ ꓥꓪ ꓝꓮꓲ ꓟꓽ ꓓꓳꓻꓳ꓾ ꓐꓯˍ ꓡꓳ꓿ 19 ꓖꓳ ꓗꓸ ꓠꓯꓸ ꓬꓰ-ꓢꓴ ꓠꓬ ꓑ ꓑ ꓣꓴ ꓢꓲ ꓫꓸ ꓟꓳ ꓗꓷ ꓠꓬ꓾ ꓦꓶꓹ ꓢꓲ꓾ ꓬꓲ ꓪꓽ ꓔꓯ ꓖꓶ ꓢꓲ ꓠꓬꓲ꓾ ꓕꓱ ꓟ ꓠꓽ ꓠꓴ ꓪꓽ ꓐꓱ ꓶ ꓖꓶꓽ ꓗꓷ ꓟ ꓥꓪ ꓖꓳ ꓓꓱꓽ ꓥ ꓡꓳ꓿ ꓠꓴ ꓪꓽ ꓥꓪ ꓔꓯ ꓓꓵꓽ ꓙ ꓛꓲ ꓡ ꓠꓹ ꓟ ꓕꓱ ꓡꓱ ꓬꓰ꓾ ꓐꓯˍ ꓡꓳ꓿ 20 ꓜ ꓜꓽ ꓗꓷ ꓗꓸ ꓠꓯꓸˍ ꓟꓲ ꓖꓳ ꓟ ꓡꓰ ꓐꓰ ꓡꓴ ꓗꓶꓸ ꓣꓴ ꓢꓲ꓾ ꓡꓴꓻ ꓗꓶ ꓕꓱ ꓟ ꓠꓬ ꓠꓴ ꓪꓽ ꓐꓱ ꓶ ꓧꓳꓸ ꓗꓷ ꓟ ꓥꓪ ꓫꓵꓽ ꓡꓰ ꓬꓰ ꓔ ꓟ ꓘꓶꓽ ꓫꓵꓽ ꓫꓵꓼ ꓥ ꓡꓳ꓿ 21 ꓠꓬꓲ ꓠꓹ꓾ ꓥꓪ ꓔꓯ ꓪꓴꓽ ꓜ ꓢꓴ ꓠꓬ ꓥꓪˍ ꓐꓰ ꓕꓲ ꓪꓺꓼ ꓜꓻ ꓜꓽ ꓢꓽ ꓡ ꓗꓪ ꓗꓳꓺ ꓔꓬ ꓡꓳ꓿ 22 ꓡ-ꓞꓳ-ꓮ-ꓐꓲ ꓠꓽ ꓝꓰꓹ ꓔ ꓟ ꓡꓰ ꓐꓰ ꓚꓵ ꓚꓵ ꓙꓰ ꓠ ꓗꓷ ꓡꓰˍ ꓥꓳ꓿ ꓖꓳ ꓡꓱ ꓥ ꓟꓲ ꓬꓲ ꓔꓯ ꓪꓴꓽ ꓜꓽ ꓢꓴ ꓖꓳ ꓕꓲ ꓣꓳ ꓠꓽ ꓫꓸ ꓙꓵˍ ꓥꓳ꓾ ꓐꓯˍ ꓡꓳ꓿ 23 ꓖꓳ ꓡꓱ ꓢꓲ ꓬꓲ ꓪꓽ ꓗꓳ ꓡꓳ ꓗꓪ ꓕꓱ ꓡꓱ ꓬꓰ ꓡ ꓠꓯꓹ ꓟ ꓮ ꓡꓲ ꓕꓲ ꓣꓳ ꓥ ꓟ ꓠ ꓠꓬꓲ ꓡꓯꓽ ꓘꓳ ꓔꓴ ꓡ ꓡꓳ꓿ 24 ꓛꓳꓽ ꓒꓯꓹ ꓐꓴ ꓗꓳ ꓡꓳ ꓗꓪ꓾ ꓬꓲ ꓪꓽ ꓮ ꓡꓲ ꓕꓲ ꓣꓳ ꓪ ꓜꓲ ꓪꓴꓽ ꓟꓽ ꓪꓴꓽ ꓐꓰ ꓧꓳꓺ ꓡꓯꓽ ꓘꓳ ꓔꓴ ꓡ ꓡꓳ꓿ 25 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓐꓶꓽ ꓞꓳ ꓪ ꓔꓲꓸ ꓐꓴ ꓠꓬ ꓬꓲ ꓪꓽ ꓑ ꓫꓬꓼ ꓐꓴ ꓔꓯ ꓙꓵꓽ ꓒꓬꓱꓽ ꓟꓳꓸ ꓖꓶˍ ꓡꓳ꓿ ꓝꓮꓲ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓠꓬ꓾ ꓢꓲꓽ ꓒ꓾ ꓐꓰ ꓘꓴˍ ꓡꓳ꓿ 26 ꓠꓴ ꓪꓽ ꓠꓽ ꓖꓳ ꓡꓱ ꓬꓰ ꓓꓴ ꓟꓽ ꓥ꓿ ꓠꓴ ꓪꓽ ꓗꓳ ꓡꓳ ꓗꓪ ꓪꓴꓽ ꓢꓴ ꓠꓽ ꓞꓲꓼ ꓣꓳ ꓢꓴˍ ꓡꓰ ꓐꓰ ꓬꓰ ꓠꓯꓹ ꓡꓳ꓿ ꓪꓴꓸ ꓓꓵ ꓣꓱꓽ ꓢꓴˍ ꓟꓲ ꓣꓱꓽ ꓙ ꓢꓴˍ ꓡꓰ ꓐꓰ ꓬꓰ ꓠꓯꓹ ꓡꓳ꓿ 27 ꓜ ꓜꓽ ꓖꓴ ꓗꓪ ꓗꓳ ꓔꓬ ꓢꓴˍ ꓐꓰ ꓣꓱꓽ ꓙ ꓔꓬ ꓢꓴ ꓠꓬ꓾ ꓮꓽ ꓟ ꓪꓴꓽˍ ꓡ? ꓜ ꓜꓽ ꓖꓴ ꓗꓪ ꓗꓳ ꓔꓬ ꓢꓴ ꓪꓴꓽˍ ꓡꓳ ꓟꓽ ꓥ ꓡ? ꓖꓳ ꓡꓱ ꓥ ꓟꓲ ꓥꓪ ꓠꓽ ꓠꓴ ꓪꓽ ꓗꓳ ꓡꓳ ꓗꓪ ꓣꓱꓽ ꓙ ꓢꓴˍ ꓡꓰ ꓐꓰ ꓬꓰˍ ꓡꓳ꓿ 28 ꓥꓪ ꓔꓯ ꓤꓹ ꓠꓬꓲˍ ꓟ ꓗꓪ ꓮ ꓕꓯˍ ꓟꓲ ꓥꓪˍ ꓐꓰ ꓕꓲꓽ ꓪꓺꓼ ꓔꓬ ꓗꓷ ꓢꓴ ꓠꓽ ꓠꓴ ꓪꓽ ꓥꓳ꓿ 29 - 30 ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓥꓪ ꓗꓴꓷꓼ ꓠꓯꓸꓼ ꓗꓪ꓾ ꓥꓪ ꓢꓽ ꓡ ꓗꓪ ꓟꓶ ꓜꓽ ꓟꓶ ꓓꓳꓻ ꓠꓹ ꓟ꓾ ꓥꓪ ꓐꓹ ꓐ ꓥꓪ ꓔꓯ ꓖꓶ ꓙ ꓟꓳˍ ꓟ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪꓽ ꓔꓯ ꓗꓴꓷꓼ ꓕꓲ ꓟ ꓖꓶˍ ꓥꓳ꓿ ꓠꓴ ꓪꓽ ꓠꓬ ꓙꓵꓽ ꓠꓬꓲꓸ ꓕꓲꓺ ꓗꓪ ꓠꓬꓲꓸ ꓠꓸ ꓢꓲ꓾ ꓬꓲ-ꓢꓷ-ꓡꓰ ꓞꓲ ꓠꓬꓲꓽ ꓪꓳꓼ ꓔꓯ ꓐꓯ ꓟꓴ ꓘꓶꓽˍ ꓥꓳ꓿ 31 ꓢꓲ-ꓟꓴꓽꓳ꓾ ꓢꓲ-ꓟꓴꓽꓳ꓾ ꓠꓬꓲ ꓠꓹ꓾ ꓢ-ꓓꓯ ꓠꓬ ꓠꓴ ꓔꓯ ꓫꓪꓺˍ ꓡꓰ ꓐꓰ ꓥꓳꓽ ꓪꓺ ꓡꓰ ꓝꓲ ꓠꓹ ꓟ ꓓꓰꓽ ꓗꓷꓳ꓿ 32 ꓖꓳ ꓡꓱ ꓥ ꓟꓲ ꓠꓴ ꓙꓵꓻ ꓠꓲꓹ ꓟꓽ ꓐꓬꓺ ꓡꓰ ꓠꓹ ꓟ ꓥꓪ ꓠꓬ ꓠꓴ ꓐꓱ ꓶ ꓪꓽ ꓘꓴ ꓗꓷꓳ꓿ ꓖꓳ ꓡꓱ ꓢꓲ ꓠꓴ ꓒꓳꓹ ꓬꓲꓼ ꓡ ꓗꓸ ꓠꓯ ꓠꓴ ꓬꓲꓼ ꓠꓴ ꓠꓬꓲ ꓐꓴ ꓔꓯ ꓕꓶꓻ ꓡꓰ ꓝꓲ꓾ ꓐꓯˍ ꓡꓳ꓿ 33 ꓒꓲ-ꓕꓱ ꓡꓰ꓾ ꓢꓲ ꓒꓽꓳ꓾ ꓐꓱ ꓓꓴꓽ ꓗꓪ ꓥ ꓟꓲ꓾ ꓫꓵꓻ ꓖꓴ ꓗꓪ ꓥ ꓟꓲ꓾ ꓥꓪ ꓠꓽ ꓠꓴ ꓔꓯ ꓛꓳ ꓙꓰ ꓠꓹ ꓟ ꓙꓽ ꓖꓶ ꓔ ꓡꓳ꓾ ꓐꓯˍ ꓡꓳ꓿ 34 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓒꓲ-ꓕꓱꓳ꓾ ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓠꓬꓲꓸ ꓟꓰ ꓮꓸ Bꓸ ꓒ ꓟꓽ ꓐꓵꓻ ꓕꓯˍ ꓡꓰ꓾ ꓠꓴ ꓥꓪ ꓔꓯ ꓢꓷꓸˍ ꓟ ꓟꓽ ꓣꓷꓠ ꓢ ꓧꓪꓹ ꓗꓷ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿ 35 ꓖꓳ ꓗꓸ ꓠꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓡꓰ ꓒꓴ ꓗꓶ ꓓꓴˍ ꓐꓰ ꓡꓯꓼ ꓔꓲꓸˍ ꓐꓰ ꓛꓲ ꓠꓲꓺ ꓟꓽ ꓙꓳ ꓙꓳ ꓝꓲꓺ ꓩꓴ ꓗꓷˍ ꓕꓯ꓾ ꓠꓴ ꓪꓽ ꓠꓬ ꓟꓽ ꓡꓳꓼ ꓗꓷ ꓡꓰ ꓡ?꓾ ꓐꓰ ꓠ ꓠꓬꓲˍ ꓕꓯ ꓬꓲ ꓪꓽ ꓡꓰ꓾ ꓟꓽ ꓗꓷ ꓡꓰ꓾ ꓐꓰ ꓒꓳꓹ ꓖꓶˍ ꓡꓳ꓿ 36 ꓖꓳ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓮ ꓟꓶ ꓠꓽ ꓒꓴ ꓗꓶ ꓓꓴ ꓙꓳ ꓢꓴ ꓠꓬ ꓔꓯꓹ ꓔ꓿ ꓡꓯ ꓔꓲꓸ ꓙꓳ ꓢꓴˍ ꓟꓲ ꓓꓱꓼ ꓔ꓿ ꓮꓸ ꓕꓽ ꓟꓽ ꓙꓳ ꓢꓴ ꓠꓬ ꓐꓵ ꓞꓶꓽ ꓪꓴꓽ ꓢꓲ ꓮꓸ ꓕꓽ ꓪꓴꓻ ꓬꓰ꓿ 37 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓕꓳ ꓶ ꓗꓪ꓾ ꓬꓲ ꓔꓯ ꓠꓬ ꓛꓬꓻ ꓢꓴ ꓥꓳꓽ ꓢꓴ ꓗꓪ ꓟ ꓚꓬꓹ ꓗꓷꓳ꓾ ꓐꓰ ꓐꓳ ꓔ ꓟ ꓕꓱ ꓕꓲ ꓘꓶꓽ ꓠꓬ ꓥꓪ ꓖꓳ ꓓꓱꓽ ꓗꓪ ꓐꓲ ꓡ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓔꓯ ꓖꓴ ꓔ ꓟ ꓠꓽ ꓐꓲ ꓡ ꓠ ꓗꓹ ꓥꓳ꓾ ꓐꓯˍ ꓡꓳ꓿ 38 ꓬꓲ ꓪꓽ ꓡꓰ꓾ ꓢꓲ ꓒꓽꓳ꓾ ꓠꓬꓲ ꓠꓹ꓾ ꓕꓱ ꓗꓪ ꓮꓸ ꓕꓽ ꓠꓬꓲꓽ ꓛꓲ ꓓꓹ ꓡꓳ꓾ ꓐꓯˍ ꓕꓯ꓾ ꓬꓰ-ꓢꓴ ꓡꓰ꓾ ꓡꓳꓼˍ ꓥꓳ꓾ ꓐꓯ ꓖꓶˍ ꓡꓳ꓿ 39 ꓖꓳ ꓡꓱ ꓠꓬ ꓬꓲ ꓓꓳ ꓙꓰ ꓢꓲ꓾ ꓬꓲ ꓬꓰ ꓝꓳꓺ ꓡꓰˍ ꓟ ꓡꓰ ꓐꓰ ꓮ-ꓛꓬ ꓪꓽ ꓚꓲ ꓗꓪ ꓙꓰˍ ꓡꓳ꓿ ꓛꓳꓽ ꓒꓯꓹ ꓐꓴˍ ꓟꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ 40 ꓖꓳ ꓕꓲ ꓖ ꓗꓪ ꓛꓲ ꓬꓰ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓫꓵꓽ ꓠꓬꓲˍ ꓟ ꓗꓪ ꓠꓴ ꓪꓽ ꓟ ꓓꓵꓽ ꓡꓰ ꓠꓹ ꓟ ꓪꓽ ꓘꓴ꓾ ꓐꓯ ꓖꓶˍ ꓡꓳ꓿ 41 ꓬꓰ-ꓢꓴ ꓠꓬ ꓬꓲ ꓪꓽˍ ꓐꓰ Bꓸ ꓛꓲ ꓕꓲ ꓡꓳ ꓶꓻ ꓛꓲ ꓧꓹ ꓙꓰ ꓢꓲ꓾ ꓛꓲ ꓝꓲꓸ ꓖꓶ ꓢꓲ ꓠꓬꓲ ꓕꓱ ꓡꓱ ꓪꓽ ꓘꓴˍ ꓡꓳ꓿ 42 ꓐꓹ ꓐꓽꓳ꓾ ꓠꓴ ꓠꓲꓹ ꓫꓵˍ ꓠꓬ ꓡꓴ ꓗꓶꓸ ꓕꓱ ꓟ ꓥꓪ ꓔꓯˍ ꓐꓰ ꓣꓴꓻ ꓗꓷ ꓖꓶ꓿ ꓖꓳ ꓡꓱ ꓥ ꓟꓲ ꓥꓪ ꓠꓲꓹ ꓡꓶꓽ ꓕꓽ ꓒꓬꓱꓼ ꓡ ꓝꓲ꓾ ꓠꓴ ꓠꓲꓹ ꓡꓶꓽ ꓒꓬꓱꓼ ꓡ ꓝꓲ꓾ ꓐꓯˍ ꓡꓳ꓿ 43 ꓖꓳ ꓡꓱ ꓠꓬ ꓟꓴꓽ ꓗꓪ ꓗꓪ ꓐꓰ ꓝꓲ ꓓꓴ ꓕꓲ ꓣꓳ ꓟꓳꓸ ꓖꓶ ꓡ ꓢꓲ ꓬꓲ ꓔꓯ ꓢꓯꓼ ꓙꓳ ꓡ ꓝꓲˍ ꓡꓳ꓿ 44 ꓬꓰ-ꓢꓴ ꓠꓬ ꓠꓲꓹ ꓟ ꓮꓽ ꓘꓶꓸ ꓫˍ ꓟꓲ꓾ ꓟꓬꓽ ꓠꓬꓲ ꓠꓲꓹ ꓟ ꓡꓱꓻ ꓡꓱˍ ꓡꓰꓽ ꓪꓽ ꓘꓴˍ ꓡꓳ꓿ ꓖꓳ ꓕꓯ ꓬꓲ ꓚꓵꓸ ꓠꓬ ꓫꓵꓽ ꓝꓯꓹˍ ꓡꓰ ꓐꓰ ꓟꓲ ꓛꓬ ꓗꓪ ꓜꓯꓺ ꓙꓰˍ ꓡꓳ꓿ 45 ꓪꓽ ꓘꓴˍ ꓟ ꓗꓪ ꓐꓰ ꓔꓴ ꓡ ꓢꓲ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓙꓰˍ ꓠꓬ꓾ ꓬꓲ ꓪꓽ ꓠꓽ ꓠꓲꓹ ꓫ ꓟꓬ ꓫˍ ꓟ ꓗꓪ ꓐꓰ ꓪꓴꓽ ꓧꓶꓻ ꓢꓲ ꓬꓲꓼ ꓟꓶ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 46 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓬꓲꓼ ꓟꓶ ꓔꓬ ꓡ? ꓫꓵꓽ ꓠꓬꓲˍ ꓟ ꓗꓪ ꓠꓴ ꓪꓽ ꓟꓽ ꓓꓵ ꓡꓰ ꓠꓹ ꓟ꓾ ꓔꓴ ꓢꓲ ꓪꓽ ꓘꓴ꓾ ꓐꓯˍ ꓡꓳ꓿ 47 ꓬꓲ ꓖꓳ ꓡꓱ ꓐꓯ ꓔꓬ ꓕꓯ ꓞꓳ ꓜꓴꓻ ꓓꓽ ꓟ ꓕꓲ ꓜꓴ ꓛꓲ ꓡꓺꓳ꓿ ꓞꓲ ꓠꓬꓲꓽ ꓣꓳ ꓗꓪ ꓟ ꓬꓴ-ꓓ ꓟꓬꓱ ꓔ ꓢꓴ ꓠꓬ꓾ ꓬꓲ ꓪꓽ ꓟꓲꓽ ꓕꓯꓽ ꓢꓲ ꓗꓪ ꓡ ꓢꓲ ꓬꓰ-ꓢꓴ ꓔꓯ ꓐꓳꓼ ꓖꓶ ꓠꓹ ꓟ ꓕꓲꓺ ꓡ ꓡꓳ꓿ 48 ꓬꓰ-ꓢꓴ ꓠꓽ ꓬꓲ ꓔꓯ ꓬꓴ-ꓓꓽꓳ꓾ ꓠꓴ ꓠꓬ ꓐꓳꓼˍ ꓟ ꓡꓰ ꓡ-ꓞꓳ-ꓮ-ꓐꓲ ꓔꓯ ꓪꓴꓽ ꓜꓽˍ ꓡ?꓾ ꓐꓯˍ ꓡꓳ꓿ 49 ꓮ ꓡꓲ ꓒꓬꓱꓼ ꓡ ꓔꓬ ꓟ ꓔꓯ ꓬꓲ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓮ ꓕꓽ ꓡꓰ ꓛꓵꓺ ꓠꓯꓹ ꓡ?꓾ ꓐꓯˍ ꓡꓳ꓿ 50 ꓛꓳꓽ ꓒꓯꓹ ꓗꓪ ꓟ ꓕꓲ ꓣꓳ ꓡꓰ꓾ ꓔꓲ ꓒ ꓓꓽ ꓟ ꓬꓲ ꓚꓳ ꓑꓸ ꓔꓯ ꓕꓲ ꓒꓬꓱꓺ ꓛꓵꓺ ꓗꓷ ꓠꓬ꓾ ꓬꓲ ꓠꓸ ꓙ ꓐꓽ ꓛꓵꓺ ꓞꓰꓻ ꓡꓰꓳ꓿ 51 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓕꓱ ꓡꓱ ꓬꓰˍ ꓟ ꓠꓽ ꓗꓷ꓾ ꓐꓯˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓡꓰ ꓖꓳ ꓕꓲ ꓣꓳ ꓬꓲ ꓠꓸ ꓑꓳ ꓗꓪ ꓫꓱꓹ ꓖꓶ ꓢꓲ ꓫꓬꓹ ꓓꓻ ꓡꓰ ꓝꓲˍ ꓡꓳ꓿ 52 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ ꓡꓻ ꓢꓴ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴˍ ꓐꓰ꓾ ꓢꓲꓽ ꓫꓬ ꓦꓲ ꓙꓵꓽ ꓒ ꓐꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ꓾ ꓠꓴ ꓪꓽ ꓠꓬ ꓮꓸ ꓕꓽ ꓓꓱꓼ ꓠꓬꓲ꓾ ꓢꓲꓹ ꓓꓻ ꓔꓯꓹ ꓠꓬꓲ꓾ ꓦꓴꓺ ꓜꓽ ꓢꓴ ꓔꓯˍ ꓡꓰ ꓐꓰ ꓥꓪ ꓔꓯ ꓡꓻˍ ꓡ? 53 ꓥꓪ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓢꓲꓽ ꓫꓬ ꓦꓲ ꓗꓪ ꓠꓴ ꓪꓽˍ ꓐꓰ ꓕꓲꓽ ꓪꓺꓼ ꓔꓬ ꓕꓯ꓾ ꓠꓴ ꓪꓽ ꓥꓪ ꓔꓯ ꓟꓽ ꓣꓴ ꓡ꓿ ꓕꓱ ꓟ ꓠꓽ ꓠꓴ ꓪꓽ ꓡꓯꓼ ꓡꓵ ꓠꓹ ꓟ꓾ ꓠꓯ ꓞꓲꓹ ꓟ ꓙꓵꓽ ꓪ ꓣꓱꓽ ꓙꓵꓹ ꓥꓳ꓾ ꓐꓯˍ ꓡꓳ꓿ 54 ꓬꓲ ꓪꓽ ꓠꓬ ꓬꓰ-ꓢꓴ ꓔꓯ ꓣꓴ ꓢꓲ꓾ ꓬꓲ ꓔꓯ ꓔꓲ ꓒ ꓓꓽ ꓟ ꓦꓲ ꓗꓪ ꓧꓳꓽ ꓛꓲ ꓬꓰˍ ꓡꓳ꓿ ꓒꓲ-ꓕꓱ ꓠꓽ ꓬꓲ ꓗꓸ ꓠꓯ ꓢꓲ ꓶꓽ ꓤꓻ ꓗꓪ ꓛꓳ ꓙꓰˍ ꓡꓳ꓿ 55 ꓬꓲ ꓪꓽ ꓕꓲ ꓐꓱ ꓠꓬ ꓡꓽ ꓙꓳꓻ ꓓꓰ ꓔꓱꓺ ꓦꓲ ꓗꓪ ꓮꓸ ꓔꓳꓸ ꓝꓲ ꓢꓲ ꓕꓲꓽ ꓪꓺꓼ ꓐꓰ ꓠꓬꓲꓸ ꓠꓸ ꓔꓬ ꓕꓯ꓾ ꓒꓲ-ꓕꓱˍ ꓟꓲ ꓬꓲ ꓪꓽ ꓗꓳ ꓡꓳ ꓗꓪ ꓠꓬꓲꓸ ꓠꓸ ꓡ ꓡꓳ꓿ 56 ꓖꓳ ꓕꓯ ꓣꓱꓽ ꓙ ꓢꓴ ꓤ ꓟꓶ ꓤ ꓕꓲ ꓣꓳ ꓠꓬ꓾ ꓮꓸ ꓔꓳ ꓡꓬꓸˍ ꓟ ꓗꓪ ꓒꓲ-ꓕꓱ ꓠꓬꓲꓸ ꓠꓸ ꓔꓬ ꓟ ꓔꓯ ꓟꓳꓻ ꓗꓷ ꓠꓬ꓾ ꓜꓲꓽ ꓜꓲ ꓬꓲ ꓔꓯ ꓡꓳꓸ ꓔ ꓢꓲ꓾ ꓕꓱ ꓕꓲ ꓣꓳˍ ꓟꓲ ꓬꓰ-ꓢꓴˍ ꓐꓰ ꓕꓲꓽ ꓪꓺꓼ ꓔꓬ ꓗꓷ ꓢꓴ ꓥꓳ꓾ ꓐꓯˍ ꓡꓳ꓿ 57 ꓒꓲ-ꓕꓱ ꓠꓽ ꓟꓽ ꓣꓷꓠꓸ ꓢꓲ꓾ ꓤ ꓟꓶ ꓤꓽꓳ꓾ ꓥꓪ ꓬꓲ ꓔꓯ ꓟꓽ ꓢꓷ꓾ ꓐꓯ ꓖꓶˍ ꓡꓳ꓿ 58 ꓟꓶꓻ ꓤ ꓟꓽ ꓗꓷ ꓡꓰ ꓠꓬ ꓝꓮꓲ ꓕꓲ ꓣꓳ ꓬꓲ ꓔꓯ ꓟꓳꓻ ꓢꓲ꓾ ꓠꓴˍ ꓟꓲ ꓬꓲ ꓪꓽ ꓕꓲ ꓧꓳꓽ ꓗꓪ ꓟ ꓥꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓒꓲ-ꓕꓱ ꓡꓰ꓾ ꓥꓪ ꓟꓽ ꓥ꓾ ꓐꓰ ꓒꓳꓹ ꓖꓶˍ ꓡꓳ꓿ 59 ꓮꓽ ꓡꓻ ꓕꓲ ꓙꓵꓹ ꓛꓲ ꓗꓳꓸ ꓙꓰ ꓠꓬ ꓝꓮꓲ ꓕꓲ ꓣꓳ ꓡꓰ꓾ ꓬꓲˍ ꓟꓲ ꓚꓵ ꓚꓵ ꓬꓰ-ꓢꓴˍ ꓐꓰ ꓕꓲꓽ ꓪꓺꓼ ꓔꓬ ꓗꓷ ꓢꓴ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓖ-ꓡꓲ-ꓡꓲ ꓢꓴ ꓥ ꓡꓳ꓾ ꓐꓯˍ ꓡꓳ꓿ 60 ꓖꓳ ꓡꓱ ꓥ ꓟꓲ ꓒꓲ-ꓕꓱ ꓠꓬ꓾ ꓡꓽ ꓞꓳꓻꓳ꓾ ꓠꓴ ꓮꓸ ꓫꓵ ꓐꓯ ꓔꓬ ꓟ ꓥꓪ ꓟꓽ ꓢꓷ꓾ ꓐꓯ ꓖꓶˍ ꓡꓳ꓿ ꓬꓲ ꓖꓳ ꓡꓱ ꓫꓸ ꓕꓱ ꓔꓬ ꓕꓯ꓾ ꓞꓼ ꓐꓰ ꓮꓸ Bꓸ ꓒ ꓐꓵꓻ ꓡꓺꓳ꓿ 61 ꓖꓳ ꓕꓯ ꓢꓲ ꓒꓽ ꓔꓲꓸ ꓒꓳꓹ ꓡ ꓢꓲ ꓒꓲ-ꓕꓱ ꓔꓯ ꓡꓳꓸˍ ꓡꓳ꓿ ꓖꓳ ꓡꓱ ꓢꓲ ꓢꓲ ꓒꓽ ꓡꓰ ꓬꓲ ꓔꓯ ꓐꓯ ꓗꓷ ꓟ ꓐꓯ ꓘꓶ꓾ ꓠꓬꓲꓸ ꓟꓰ ꓮꓸ Bꓸ ꓒ ꓟꓽ ꓐꓵꓻ ꓕꓯˍ ꓡꓰ꓾ ꓠꓴ ꓥꓪ ꓔꓯ ꓟꓽ ꓢꓷꓸ ꓐꓯˍ ꓟ ꓢ ꓧꓪꓹ ꓗꓷ ꓡꓰˍ ꓥꓳ꓾ ꓐꓯˍ ꓟ ꓔꓯ ꓒꓲ-ꓕꓱ ꓓꓵꓽ ꓙ ꓛꓲ ꓡ ꓡꓳ꓿ 62 ꓖꓳ ꓕꓯ ꓬꓲ ꓓꓳ ꓙꓰ ꓢꓲ ꓮꓽ ꓘꓶꓸ ꓥꓴꓻˍ ꓡꓳ꓿ 63 ꓬꓰ-ꓢꓴ ꓔꓯ ꓦꓴ ꓠꓬꓹ ꓢꓴ ꓐꓴ ꓡꓰ ꓬꓲ ꓔꓯ ꓤꓲꓺ ꓢꓲ ꓓꓶꓽˍ ꓡꓳ꓿ 64 ꓬꓲ ꓟꓬ ꓢꓶꓽ ꓗꓪˍ ꓟꓲ ꓟꓶ ꓛꓺ ꓡꓰ ꓧꓷꓹ ꓔ ꓢꓲ꓾ ꓬꓲ ꓔꓯ ꓓꓶꓽ ꓢꓲ ꓠꓬꓲ꓾ ꓠꓴ ꓔꓯ ꓓꓶꓽ ꓢꓴ ꓮꓽ ꓟ ꓥ ꓡ?꓾ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ 65 ꓬꓲ ꓪꓽ ꓠꓬ ꓠꓱꓸ ꓐꓯ ꓮꓽ ꓟꓬꓹ ꓫꓵꓽ ꓐꓯ ꓢꓲ ꓬꓲ ꓔꓯ ꓤꓲꓺ ꓠꓬꓲ꓾ ꓟꓽ ꓚꓰꓼ ꓟ ꓙꓱꓽ ꓠꓬꓲ ꓬꓰˍ ꓡꓳ꓿ 66 ꓟꓲꓽ ꓕꓯꓽ ꓙꓲ ꓡ ꓕꓯ꓾ ꓑ ꓫꓬꓼ ꓐꓴ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓜꓲꓼ ꓓꓴ ꓗꓪ꓾ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓜꓲꓼ ꓡꓯꓽ ꓘꓳ ꓢꓲ꓾ ꓜꓲꓼ ꓓꓴ ꓖꓳ ꓟ ꓗꓪ ꓬꓰ-ꓢꓴ ꓔꓯ ꓧꓳꓽ ꓔꓯꓹ ꓙꓰ ꓢꓲ ꓠꓬꓲ ꓬꓲ ꓔꓯ꓾ 67 ꓠꓴ ꓠꓬ ꓙꓲ-ꓢꓴ ꓖꓳ ꓕꓲ ꓣꓳ ꓟ ꓥ ꓠꓬ꓾ ꓥꓪ ꓠꓴꓽ ꓔꓯ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ ꓬꓲ ꓠꓽ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓟꓲ ꓠꓴ ꓪꓽ ꓟꓽ ꓙꓵꓻ ꓡ꓿ 68 ꓠꓴ ꓪꓽ ꓔꓯ ꓥꓪ ꓠꓺ ꓠꓬꓲˍ ꓟꓲ ꓠꓴ ꓪꓽ ꓟꓽ ꓒꓳꓹ ꓖꓶ ꓡ꓿ 69 ꓕꓱ ꓡꓱ ꓖꓳ ꓑꓳ ꓡ-ꓞꓳ-ꓮ-ꓐꓲ ꓠꓽ ꓪꓴ-ꓢ ꓪꓽ ꓠꓬꓲˍ ꓟ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠˍ ꓥꓳ꓾ ꓐꓯˍ ꓡꓳ꓿ 70 ꓬꓲ ꓪꓽ ꓮꓽ ꓙꓵ ꓢꓴ ꓡꓰ꓾ ꓖꓳ ꓡꓱ ꓥ ꓠꓬ ꓠꓴ ꓠꓽ ꓪꓴ-ꓢ ꓮ ꓐꓲ ꓥ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓰ-ꓢꓴ ꓡꓰ꓾ ꓥꓳ꓾ ꓠꓴ ꓪꓽ ꓐꓯ ꓬꓯꓼ ꓗꓷꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 71 ꓖꓳ ꓕꓯ ꓬꓲ ꓪꓽ ꓠꓬ꓾ ꓣꓳ ꓝꓮꓲ ꓮꓸ ꓫꓵ ꓢꓷꓸ ꓙ ꓟꓳ ꓙ ꓓꓴ ꓣꓱꓽ ꓛꓵˍ ꓢꓰꓽ ꓡ? ꓬꓲ ꓚꓲꓸ ꓛꓬ ꓟꓷꓽ ꓠꓷꓹ ꓡꓰ ꓐꓯˍ ꓟ ꓣꓳ ꓑ ꓙꓽ ꓗꓷꓳ꓾ ꓐꓯˍ ꓡꓳ꓿

ꓡꓴ-ꓗ 23

1 ꓖꓳ ꓕꓯ ꓮꓽ ꓙꓵ ꓢꓴ ꓔꓴ ꓢꓲ ꓬꓰ-ꓢꓴ ꓔꓯ ꓒꓲ-ꓡ ꓟꓲ ꓙꓬ ꓗꓪ ꓧꓳꓽ ꓙꓰˍ ꓡꓳ꓿ 2 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ ꓓꓰꓺ ꓪꓴꓸ ꓔꓴ ꓢꓲ꓾ ꓡꓽ ꓞꓳ ꓕꓱ ꓕꓲ ꓣꓳ ꓠꓬ ꓣꓳ ꓑ ꓫꓬꓼ ꓐꓴ ꓔꓯ ꓟꓸ ꓒꓬꓹˍ ꓟ ꓐꓰ꓾ ꓢꓲ-ꓢ ꓔꓯ ꓔꓯꓹ ꓒꓵꓽ ꓟꓽ ꓐꓶꓻ ꓝꓲ ꓠꓹ ꓟ ꓗꓽ ꓔ ꓟ ꓐꓰ꓾ ꓬꓲ ꓚꓲꓸ ꓛꓬ ꓠꓬ ꓙꓲ-ꓢꓴ ꓥ ꓢꓲ꓾ ꓪ ꓔꓲꓸ ꓥ ꓡꓳ꓾ ꓐꓰ ꓐꓯ ꓔꓬ ꓟ ꓥꓪ ꓠꓴꓽ ꓑ ꓙꓽ ꓗꓷꓳ꓾ ꓐꓯˍ ꓡꓳ꓿ 3 ꓖꓳ ꓕꓯ ꓒꓲ-ꓡ ꓡꓰ ꓬꓰ-ꓢꓴ ꓔꓯ꓾ ꓠꓴ ꓠꓬ ꓬꓴ-ꓔ ꓡꓽ ꓞꓳ ꓪ ꓔꓲꓸ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ꓾ ꓠꓴ ꓐꓯˍ ꓟ ꓡꓰ ꓐꓰ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 4 ꓒꓲ-ꓡ ꓡꓰ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓞꓳ ꓜꓴꓻ ꓔꓯ꓾ ꓡꓽ ꓞꓳ ꓕꓱ ꓕꓲ ꓣꓳ ꓔꓯ ꓮꓸ ꓫꓵ ꓝꓴꓲˍ ꓟꓲ ꓥꓪ ꓧꓪ ꓟꓽ ꓟꓶ꓾ ꓐꓯ ꓖꓶˍ ꓡꓳ꓿ 5 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓬ ꓪ ꓜꓲ ꓢꓯꓼ ꓕꓵꓼ ꓢꓲ꓾ ꓬꓲ ꓠꓽ ꓖ-ꓡꓲ-ꓡꓲ ꓗꓪ ꓐꓰ ꓕꓱ ꓗꓪ ꓛꓲ꓾ ꓬꓴ-ꓔ ꓕꓲ ꓟꓵꓽ ꓡꓱꓸꓼ ꓗꓪ ꓟꓸ ꓢꓲ꓾ ꓑ ꓫꓬꓼ ꓐꓴ ꓔꓯ ꓡꓵꓹ ꓢꓴˍ ꓡꓳ꓾ ꓐꓰ ꓓꓰꓺˍ ꓡꓳ꓿ 6 ꓒꓲ-ꓡ ꓑ ꓙꓽ ꓗꓷ ꓠꓬ꓾ ꓕꓱ ꓕꓲ ꓣꓳ ꓠꓬ ꓖ-ꓡꓲ-ꓡꓲ ꓢꓴ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 7 ꓬꓰ-ꓢꓴ ꓠꓬ ꓩꓴ-ꓡꓲ ꓡꓰ ꓙꓵꓽˍ ꓟ ꓖ-ꓡꓲ-ꓡꓲ ꓟꓵꓽ ꓢꓴ ꓥ ꓟ ꓒꓲ-ꓡ ꓢꓷꓸ ꓡꓰ ꓠꓬ꓾ ꓦꓬꓼ ꓠꓬꓲ ꓖꓳ ꓟ ꓗꓪ ꓩꓴ-ꓡꓲˍ ꓟꓲ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓠꓬꓲ꓾ ꓬꓰ-ꓢꓴ ꓔꓯ ꓩꓴ-ꓡꓲ ꓔꓬ ꓗꓪ ꓧꓳꓽ ꓙꓰ ꓝꓲˍ ꓡꓳ꓿ 8 ꓩꓴ-ꓡꓲ ꓠꓽ ꓬꓰ-ꓢꓴ ꓓꓳꓽ ꓑ ꓙꓽ ꓢꓲ ꓬꓲ ꓔꓯ ꓟꓳꓻ ꓠꓲꓹ ꓫꓵˍ ꓟ ꓟꓶꓻ ꓤ ꓥ ꓠꓬꓲ꓾ ꓬꓰ-ꓢꓴ ꓔꓯ ꓟꓳꓻ ꓗꓷ ꓠꓬ ꓮꓽ ꓘꓶꓸ ꓠꓲꓹ ꓒꓴˍ ꓡꓳ꓿ ꓬꓲ ꓠꓬ ꓬꓰ-ꓢꓴ ꓡꓰ ꓓꓵꓽ ꓙ ꓟꓶ ꓓꓴ ꓕꓲ ꓫꓵꓽ ꓬꓰˍ ꓟ ꓔꓯ ꓟꓳꓻ ꓠꓹ ꓟ ꓥꓳ ꓡꓳꓸ ꓔꓬ ꓡꓳ꓿ 9 ꓖꓳ ꓡꓱ ꓢꓲ ꓩꓴ-ꓡꓲ ꓠꓬ ꓬꓰ-ꓢꓴ ꓔꓯ ꓮꓽ ꓟꓬꓹ ꓫꓵꓽ ꓟꓰꓹ ꓠ ꓠꓬꓲˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓽ ꓕꓲ ꓘꓶꓽˍ ꓟꓲ ꓟꓽ ꓒꓳꓹ ꓖꓶ꓿ 10 ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓠꓬ ꓦꓰꓼ ꓔ ꓢꓲ ꓬꓲ ꓔꓯ ꓮꓽ ꓘꓶꓸ ꓓꓰꓺˍ ꓡꓳ꓿ 11 ꓩꓴ-ꓡꓲˍ ꓐꓰ ꓬꓲ ꓟꓯꓼ ꓤ ꓐꓴ ꓠꓬ꓾ ꓬꓰ-ꓢꓴ ꓔꓯ ꓟꓽ ꓒꓵꓽ ꓒꓵ ꓬꓰ ꓢꓲ ꓬꓲ ꓔꓯ ꓤꓲꓺ ꓢꓲ ꓠꓬꓲ꓾ ꓮꓽ ꓘꓶꓸ ꓐꓲꓻˍ ꓟ ꓐꓵ ꓞꓶꓽ ꓐꓽ ꓢꓽ ꓕꓲ ꓘꓳꓹ ꓗꓪꓸ ꓖꓶꓽ ꓗꓷ ꓠꓬ꓾ ꓒꓲ-ꓡ ꓔꓯ ꓧꓳꓽ ꓡꓲꓸ ꓖꓶ ꓙꓰˍ ꓡꓳ꓿ 12 ꓧꓶꓸ ꓕꓯ ꓩꓴ-ꓡꓲˍ ꓐꓰ ꓒꓲ-ꓡ ꓠꓬ ꓛꓴꓽ ꓙꓳ ꓡꓯꓽ ꓘꓳˍ ꓟꓲ꓾ ꓖꓳ ꓕꓲ ꓠꓬꓲ ꓗꓪ ꓐꓰ ꓠꓽ ꓛꓳꓽ ꓒꓯꓹ ꓒꓬꓱꓼ ꓡꓺꓳ꓿ 13 ꓒꓲ-ꓡ ꓡꓰ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ꓾ ꓢꓲꓽ ꓒ ꓐꓴˍ ꓐꓰ ꓑ ꓫꓬꓼ ꓐꓴ ꓔꓯ ꓘꓴ ꓜꓲꓼ ꓡ ꓢꓲ꓾ 14 ꓕꓱ ꓕꓲ ꓣꓳ ꓠꓬ ꓑ ꓫꓬꓼ ꓐꓴ ꓔꓯ ꓟꓸ ꓒꓬꓹ ꓢꓴ ꓥꓳ꓾ ꓐꓰ ꓓꓰꓺ ꓢꓲ꓾ ꓠꓴ ꓪꓽ ꓡꓰ ꓬꓲ ꓔꓯ ꓥꓪ ꓔꓬ ꓗꓪ ꓧꓳꓽ ꓡ ꓟ ꓥꓳ꓿ ꓠ ꓠꓹ꓾ ꓠꓴ ꓪꓽ ꓡꓰ ꓡꓽ ꓞꓳ ꓕꓱ ꓕꓲ ꓣꓳ ꓔꓯ ꓓꓰꓺˍ ꓟ ꓖꓳ ꓟꓬ ꓫꓵꓽ ꓟ꓾ ꓠꓴ ꓪꓽ ꓟꓲꓽ ꓙꓬ ꓗꓪ ꓥꓪ ꓡꓰ ꓬꓲ ꓔꓯ ꓟꓰꓹ ꓠ ꓠꓬꓲ ꓗꓷˍ ꓟꓲ ꓮꓸ ꓫꓵ ꓝꓴꓲ ꓧꓪ ꓟꓽ ꓟꓶ꓿ 15 ꓩꓴ-ꓡꓲˍ ꓟꓲ ꓮꓸ ꓫꓵ ꓝꓴꓲ ꓧꓪ ꓟꓽ ꓟꓶ ꓠꓬꓲ ꓬꓲ ꓔꓯ ꓣꓳ ꓔꓬ ꓗꓪ ꓧꓳꓽ ꓡꓲꓸ ꓡ ꓝꓲꓳ꓿ ꓠ ꓠꓹ꓾ ꓬꓲ ꓠꓽ ꓫꓵꓻ ꓙꓲꓽ ꓙꓳˍ ꓟ ꓮꓸ ꓫꓵˍ ꓟꓲ ꓟꓽ ꓬꓰ ꓠꓬꓲ ꓐꓷ꓿ 16 ꓖꓳ ꓡꓱ ꓠꓬꓲ ꓥꓪ ꓬꓲ ꓔꓯ ꓟꓸ ꓙꓽ ꓢꓲ ꓩꓴ ꓗꓷˍ ꓥꓳ꓾ ꓐꓯˍ ꓡꓳ꓿ 17 ꓕꓲ ꓘꓳꓼ ꓡꓰ ꓕꓲ ꓘꓳꓼ ꓑꓮꓲꓽ ꓕꓱ ꓟ ꓗꓪ꓾ ꓒꓲ-ꓡ ꓡꓰ ꓐꓱ ꓔ ꓢꓴ ꓗꓪ ꓐꓰ ꓕꓲ ꓣꓳ ꓬꓲ ꓪꓽ ꓐꓱ ꓶ ꓩꓴ ꓖꓶˍ ꓟ ꓬꓲ ꓡꓲꓽ ꓙꓳˍ ꓡꓳ꓿ 18 ꓖꓳ ꓡꓱ ꓥ ꓟꓲ ꓬꓲ ꓪꓽ ꓮꓽ ꓙꓵ ꓠꓽ ꓕꓲ ꓢꓯꓼˍ ꓐꓰ ꓘꓴ ꓢꓲ꓾ ꓡꓽ ꓞꓳ ꓕꓱ ꓕꓲ ꓣꓳ ꓔꓯ ꓢꓰꓼ ꓗꓷ꓾ ꓥꓪ ꓠꓴꓽ ꓐꓱ ꓶ ꓠꓬ ꓐ-ꓣ-ꓐ ꓔꓯ ꓩꓴ ꓖꓶ ꓡꓯ꓾ ꓐꓯˍ ꓡꓳ꓿ 19 (ꓐ-ꓣ-ꓐ ꓕꓱ ꓕꓲ ꓣꓳ ꓠꓬ ꓡꓳ ꓒꓱ ꓠꓯꓸꓼ ꓗꓪ ꓢꓴ ꓔꓴ ꓡ ꓝꓲˍ ꓟ ꓐꓰ꓾ ꓡꓽ ꓞꓳ ꓔꓯ ꓢꓰꓼˍ ꓟ ꓑꓶꓸ ꓓꓴ ꓐꓱꓻ ꓓꓴꓽ ꓗꓪ ꓐꓱꓻ ꓔ ꓢꓴ ꓥ ꓡꓳ꓿) 20 ꓒꓲ-ꓡ ꓠꓬ ꓬꓰ-ꓢꓴ ꓔꓯ ꓩꓴ ꓗꓷ ꓠꓲꓹ ꓫꓵˍ ꓠꓬꓲ꓾ ꓬꓲ ꓪꓽ ꓔꓯ ꓝꓮꓲ ꓕꓲ ꓧꓪꓹ ꓖꓳ ꓡꓱ ꓐꓯ ꓖꓶˍ ꓡꓳ꓿ 21 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓬ꓾ ꓬꓲ ꓔꓯ ꓕꓯꓼ ꓔꓶꓸ ꓗꓷ꓾ ꓕꓯꓼ ꓔꓶꓸ ꓗꓷ꓾ ꓐꓰ ꓘꓴˍ ꓡꓳ꓿ 22 ꓒꓲ-ꓡ ꓠꓬ ꓢ ꓧꓪꓹ ꓕꓲ ꓧꓪꓹ ꓬꓲ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓕꓯꓼ ꓔꓶꓸ ꓠꓯꓹ ꓡ? ꓡꓽ ꓞꓳ ꓕꓱ ꓕꓲ ꓣꓳ ꓠꓬ ꓟꓽ ꓙꓲ ꓟ ꓮꓸ ꓫꓵ ꓬꓰ ꓠꓬꓲ ꓡ? ꓬꓲ ꓫꓵꓻ ꓙꓲꓽ ꓙꓳˍ ꓟ ꓝꓴꓲ ꓮꓸ ꓫꓵˍ ꓟꓲ ꓥꓪ ꓧꓪ ꓟꓽ ꓟꓶ꓿ ꓖꓳ ꓡꓱ ꓠꓬꓲ ꓥꓪ ꓬꓲ ꓔꓯ ꓟꓸ ꓙꓽ ꓢꓲ ꓩꓴ ꓗꓷˍ ꓥꓳ꓾ ꓐꓯˍ ꓡꓳ꓿ 23 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓬꓰ-ꓢꓴ ꓔꓯ ꓕꓯꓼ ꓔꓶꓸ ꓗꓷ ꓠꓹ ꓟ ꓢꓯꓼ ꓓꓽ ꓟ ꓡꓰ ꓓꓰꓽ ꓢꓲ꓾ ꓬꓲ ꓪꓽ ꓘꓴꓻ ꓢꓯꓼ ꓡꓰ ꓬꓲ ꓔꓯ ꓧꓪꓸ ꓡꓰ ꓝꓲˍ ꓡꓳ꓿ 24 ꓖꓳ ꓕꓯ ꓒꓲ-ꓡ ꓠꓬ ꓬꓲ ꓪꓽ ꓓꓰꓽˍ ꓟ ꓡꓰ ꓐꓰ ꓐꓯ ꓞꓷꓹ ꓗꓷˍ ꓡꓳ꓿ 25 ꓖꓳ ꓡꓱ ꓠꓬ ꓢꓴꓺ ꓔꓴ ꓡ ꓝꓲˍ ꓟ ꓐꓰ ꓡꓽ ꓞꓳ ꓔꓯ ꓢꓰꓼˍ ꓟ ꓑꓶꓸ ꓓꓴ ꓐꓱ ꓔ ꓢꓴ ꓖꓳ ꓕꓲ ꓣꓳ ꓔꓯ ꓬꓲ ꓩꓴ ꓗꓷ ꓢꓲ꓾ ꓬꓰ-ꓢꓴ ꓔꓯ ꓠꓽ ꓬꓲ ꓪꓽ ꓠꓲꓹ ꓡꓶꓽ ꓬꓰ ꓠꓹ ꓟ ꓬꓲ ꓪꓽ ꓔꓯ ꓡꓯꓼ ꓙꓱ ꓖꓶꓽˍ ꓡꓳ꓿ 26 ꓬꓰ-ꓢꓴ ꓔꓯ ꓧꓳꓽ ꓓꓳ ꓙꓰˍ ꓕꓯ꓾ ꓘꓹ ꓤ ꓗꓪ ꓐꓰ ꓡꓻ ꓔꓬ ꓟ꓾ ꓢ-ꓡꓲ-ꓠꓲ ꓢꓴ ꓢꓲ-ꓟꓴ ꓕꓲ ꓣꓳ ꓔꓯ ꓬꓲ ꓪꓽ ꓡꓰ ꓣꓴ ꓢꓲ꓾ ꓬꓲ ꓕꓯꓽ ꓢꓲ ꓗꓪ ꓡꓯꓼ ꓐꓳ ꓔꓶꓸ ꓓꓴ ꓚꓰꓹ ꓗꓷ ꓠꓬ꓾ ꓬꓰ-ꓢꓴ ꓗꓸ ꓠꓯ ꓢꓲ ꓑꓱꓸ ꓙꓰ ꓝꓲˍ ꓡꓳ꓿ 27 ꓑ ꓫꓬꓼ ꓐꓴ ꓬꓲ ꓜꓴ ꓓꓽ ꓟˍ ꓟꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓝꓮꓲ ꓤꓽ ꓟꓶ ꓤ ꓮꓽ ꓟꓬꓹ ꓠꓬ꓾ ꓬꓲ ꓐꓱ ꓶ ꓮꓸ ꓛꓬꓹ ꓙꓱ ꓠꓬꓲ ꓥꓴꓻ ꓠꓬꓲ ꓐꓰ ꓛꓳ ꓙꓰˍ ꓡꓳ꓿ 28 ꓖꓳ ꓡꓱ ꓠꓬ ꓬꓰ-ꓢꓴ ꓔꓲꓸ ꓒꓳꓹ ꓢꓲ ꓬꓲ ꓪꓽ ꓔꓯ꓾ ꓙꓱ-ꓣꓴ-ꓢ-ꓡꓱ ꓮꓸ ꓟꓲꓽ ꓐꓴꓳ꓾ ꓥꓪ ꓐꓱ ꓶ ꓕꓽ ꓥꓴ꓿ ꓠꓴ ꓪꓽ ꓚꓲꓸ ꓛꓬˍ ꓐꓰ ꓠꓴ ꓪꓽ ꓤ ꓠꓱ ꓐꓴ ꓐꓱ ꓶ ꓥꓴ꓿ 29 ꓠ ꓠꓹ꓾ ꓞꓳ ꓡꓱꓽ ꓟ ꓐꓰ ꓤ ꓠꓱ ꓟꓽ ꓦꓵ ꓠꓬꓲ ꓢꓴˍ ꓐꓰ꓾ ꓮ ꓚꓵꓹ ꓟꓽ ꓖꓶ ꓛꓵꓼ ꓠꓬꓲ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯˍ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ 30 ꓖꓳ ꓕꓯ꓾ ꓬꓲ ꓪꓽ ꓠꓬ ꓪꓽ ꓙꓵꓽˍ ꓐꓰ ꓪꓽ ꓚꓲ ꓔꓯ꓾ ꓥꓪ ꓠꓴꓽ ꓔꓯ ꓐꓱꓽ ꓔꓲꓸ ꓡꓯ꓾ ꓥꓪ ꓠꓴꓽ ꓔꓯ ꓑꓲꓸ ꓖꓶ ꓡꓯ꓾ ꓐꓰ ꓐꓯˍ ꓥꓳ꓿ 31 ꓢꓲꓹ ꓜꓲ ꓠꓲꓹ ꓛꓲꓼˍ ꓟ ꓝꓲ ꓗꓪ ꓬꓲ ꓪ ꓡꓰ ꓕꓱ ꓡꓱ ꓬꓰˍ ꓕꓯ ꓠꓬ꓾ ꓢꓲꓹ ꓜꓲꓻ ꓙꓴꓺ ꓡꓰ ꓟ ꓝꓲꓸ ꓗꓪ ꓠꓽ ꓮ ꓡꓲ ꓗꓷ ꓡꓰˍ ꓥꓳ ꓪ? ꓐꓯˍ ꓡꓳ꓿ 32 ꓛꓬꓻ ꓢꓴ ꓠꓬꓲꓽ ꓣꓳ ꓔꓯˍ ꓟꓲ ꓢꓰꓼ ꓗꓷ ꓠꓹ ꓟ꓾ ꓬꓰ-ꓢꓴˍ ꓐꓰ ꓕꓲ ꓛꓳꓺꓼ ꓧꓳꓽ ꓙꓰˍ ꓡꓳ꓿ 33 ꓪꓴ-ꓖꓽ꓾ ꓐꓰ ꓐꓯˍ ꓟ ꓟꓵꓽ ꓕꓲ ꓔꓳꓸ ꓗꓪ ꓬꓲ ꓪꓽ ꓛꓲ ꓬꓰ ꓠꓬ꓾ ꓖꓳ ꓗꓪ ꓬꓰ-ꓢꓴ ꓔꓯ ꓕꓯꓼ ꓔꓶꓸ ꓗꓷˍ ꓡꓳ꓿ ꓛꓬꓻ ꓢꓴ ꓠꓬꓲꓽ ꓣꓳ ꓔꓯˍ ꓟꓲ꓾ ꓬꓰ-ꓢꓴ ꓡꓯꓼ ꓙ ꓕꓲ ꓛꓱꓽ ꓗꓪ ꓕꓲ ꓣꓳ꓾ ꓡꓯꓼ ꓶꓸ ꓕꓲ ꓛꓱꓽ ꓗꓪ ꓕꓲ ꓣꓳ ꓕꓯꓼ ꓔꓶꓸ ꓗꓷˍ ꓡꓳ꓿ 34 ꓖꓳ ꓕꓯ ꓬꓰ-ꓢꓴ ꓡꓰ꓾ ꓐꓹ ꓐꓽꓳ꓾ ꓬꓲ ꓪꓽ ꓮꓸ ꓫꓵ ꓬꓰ ꓔꓬ ꓟ ꓬꓲ ꓪꓽ ꓟꓽ ꓢꓷ꓿ ꓬꓲ ꓪꓽ ꓔꓯ ꓝꓴꓲ ꓖꓽ ꓖꓶ꓾ ꓐꓯˍ ꓡꓳ꓿ ꓬꓲ ꓐꓵ ꓞꓶꓽ ꓔꓯ ꓠꓬ ꓬꓲ ꓪꓽ ꓐꓱꓻ ꓡꓯꓽ ꓘꓳ ꓠꓹ ꓟ ꓢꓽ ꓫꓱ ꓫꓱꓹˍ ꓡꓳ꓿ 35 ꓑ ꓫꓬꓼ ꓐꓴ ꓠꓬ ꓖꓳ ꓗꓪ ꓦꓰꓼ ꓢꓲ ꓡꓳꓸ ꓔꓬ ꓡꓳ꓿ ꓢꓲꓽ ꓒ ꓐꓴˍ ꓟꓲ ꓬꓲ ꓔꓯ ꓪꓽ ꓫꓱ ꓢꓲ꓾ ꓢꓴ ꓢꓯꓼ ꓟꓬ ꓔꓯ ꓠꓽ ꓬꓲ ꓚꓬꓴˍ ꓡꓳ꓿ ꓬꓲ ꓠꓬ ꓪꓴ-ꓢ ꓡꓰ ꓢꓲ ꓔ ꓟ ꓙꓲ-ꓢꓴ ꓥ ꓐꓷˍ ꓠꓬ ꓬꓲ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓚꓬꓴ ꓝꓲ꓾ ꓐꓯˍ ꓡꓳ꓿ 36 ꓟꓯꓼ ꓤ ꓐꓴˍ ꓟꓲ ꓬꓲ ꓔꓯ ꓤꓲꓺ ꓢꓲ꓾ ꓬꓲꓻ ꓚꓱꓺ ꓔꓯꓹ ꓖꓶ ꓡ ꓢꓲ ꓠꓬꓲ꓾ 37 ꓠꓴ ꓠꓬ ꓬꓴ-ꓔ ꓡꓽ ꓞꓳ ꓪ ꓔꓲꓸ ꓥ ꓐꓷˍ ꓠꓬ꓾ ꓠꓴ ꓚꓲꓸ ꓛꓬ ꓔꓯ ꓚꓬꓴ ꓟꓴ꓾ ꓐꓯˍ ꓡꓳ꓿ 38 ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓪꓴꓸ ꓗꓪ ꓕꓳ ꓶ ꓐꓳ ꓢꓲ꓾ ꓕꓱ ꓕꓲ ꓣꓳ ꓠꓬ ꓬꓴ-ꓔ ꓡꓽ ꓞꓳ ꓪ ꓔꓲꓸ ꓥ ꓡꓳ꓾ ꓐꓰ ꓐꓳ ꓔ ꓡꓳ꓿ 39 ꓖꓳ ꓗꓪ ꓥꓳꓺ ꓞꓹ ꓟ ꓛꓬꓻ ꓢꓴ ꓕꓲ ꓣꓳ ꓠꓬ ꓬꓲ ꓔꓯ ꓫꓸ ꓝꓲꓸ ꓢꓲ꓾ ꓠꓴ ꓠꓬ ꓙꓲ-ꓢꓴ ꓟꓽ ꓥ ꓡ? ꓠꓴ ꓚꓲꓸ ꓛꓬˍ ꓐꓰ ꓥꓪ ꓠꓴꓽ ꓔꓯ ꓚꓬꓴ ꓡꓯ ꓟꓴꓽ꓾ ꓐꓯˍ ꓡꓳ꓿ 40 ꓛꓬꓻ ꓢꓴ ꓠꓱꓸ ꓐꓯ ꓕꓲ ꓣꓳ ꓟ ꓠꓬ ꓬꓲ ꓔꓯ ꓕꓼ ꓢꓲ꓾ ꓣꓳꓽ ꓠꓽ ꓛꓬ ꓒꓵꓽ ꓕꓲꓽ ꓡꓰꓹꓼ ꓟꓶ ꓢꓴ ꓥ ꓢꓲ꓾ ꓪꓴ-ꓢ ꓔꓯ ꓠꓴ ꓟꓽ ꓙꓳ ꓡ? ꓣꓳꓽ ꓠꓽ꓾ ꓣꓳꓽ ꓬꓰ ꓗꓷ ꓟ ꓐꓰ ꓕꓲꓽ ꓡꓰꓹꓼ꓾ ꓔꓱꓹ ꓜꓳꓽˍ ꓟ ꓐꓯ ꓟꓴ ꓬꓲ ꓛꓬꓻ ꓒꓵꓽ ꓟꓶ ꓙꓲꓽ ꓙꓳ ꓢꓴ ꓥꓳ꓿ 41 ꓖꓳ ꓡꓱ ꓥ ꓟꓲ ꓡꓽ ꓞꓳ ꓕꓱ ꓕꓲ ꓣꓳ ꓠꓽ ꓟꓽ ꓙꓲ ꓟ ꓮꓸ ꓫꓵˍ ꓟꓲ ꓟꓽ ꓬꓰ ꓠꓬꓲ꓾ ꓐꓯ ꓖꓶˍ ꓡꓳ꓿ 42 ꓖꓳ ꓡꓱ ꓢꓲ ꓬꓲ ꓡꓰ꓾ ꓬꓰ-ꓢꓴꓳ꓾ ꓠꓴ ꓪꓽ ꓔꓲ ꓣꓱꓽ ꓡ ꓕꓯ ꓥꓪ ꓔꓯ ꓕꓽ ꓟꓲ ꓡꓰ ꓝꓲ꓾ ꓐꓯˍ ꓡꓳ꓿ 43 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓬꓲꓸ ꓠꓬꓲ ꓠꓴ ꓠꓬ ꓥꓪˍ ꓐꓰ ꓕꓲꓽ ꓪꓺꓼ ꓒꓺ-ꓣ-ꓓꓲ ꓗꓪ ꓔꓬ ꓟꓶˍ ꓥꓳ꓾ ꓐꓯˍ ꓡꓳ꓿ 44 ꓖꓳ ꓕꓯ ꓠꓬ ꓮꓽ ꓡ ꓞꓲ ꓠꓬꓲꓽ ꓙꓵꓹ ꓛꓲ ꓙꓳˍ ꓡꓳ꓿ ꓖꓳ ꓡꓱ ꓠꓬ ꓢ ꓙꓵꓹ ꓗꓪ ꓛꓲ꓾ ꓕꓲ ꓟꓵꓽ ꓡꓱꓸꓼ ꓠꓯ ꓞꓲꓹ ꓞꓲ ꓗꓷ ꓡꓰꓳ꓿ 45 ꓟꓲꓽ ꓟꓲˍ ꓟꓲ ꓠꓯ ꓞꓲꓹ ꓡꓰꓳ꓿ ꓢꓲꓽ ꓫꓬ ꓦꓲ ꓠꓯꓸꓼ ꓗꓪ ꓔꓶꓸ ꓔ ꓟ ꓗꓳꓹ ꓛ ꓓꓽ ꓟˍ ꓟꓲ ꓠꓬꓲꓽ ꓐꓶꓽ ꓧꓽ ꓡꓰꓳ꓿ 46 ꓬꓰ-ꓢꓴ ꓠꓬ ꓢꓯꓼ ꓓꓽ ꓟ ꓡꓰ ꓘꓴ ꓢꓲ꓾ ꓐꓹ ꓐꓽꓳ꓾ ꓥꓪ ꓦꓻ ꓠꓬ ꓠꓴ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓖꓶˍ ꓥꓳ꓾ ꓐꓯˍ ꓡꓳ꓿ ꓕꓱ ꓡꓱ ꓐꓯ ꓗꓷ ꓠꓬ ꓬꓲ ꓢꓯꓼ ꓟꓬ ꓞꓷꓹ ꓗꓷꓳ꓿ 47 ꓕꓱ ꓡꓱ ꓗꓷ ꓡꓰˍ ꓟ ꓔꓯ ꓟꓯꓼ ꓕꓲ ꓦꓬꓻ ꓙꓵꓽ ꓒ ꓟꓳꓻ ꓗꓷ ꓠꓬ꓾ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓢꓲ꓾ ꓕꓱ ꓟ ꓠꓽ ꓚꓵ ꓚꓵ ꓔꓱꓹ ꓜꓳꓽ ꓢꓴ ꓕꓲ ꓣꓳ ꓥ ꓐꓷ꓾ ꓐꓯˍ ꓡꓳ꓿ 48 ꓡꓳꓸ ꓠꓬꓲˍ ꓐꓰ ꓜꓲꓼ ꓡ ꓢꓴ ꓬꓲ ꓜꓴꓻ ꓮꓽ ꓙꓵ ꓡꓰ ꓕꓱ ꓡꓱ ꓗꓷ ꓡꓰ ꓟ ꓔꓯ ꓟꓳꓻ ꓗꓷ ꓠꓬ꓾ ꓠꓲꓹ ꓟꓺ ꓫꓸ ꓢꓲ ꓳ' ꓟꓶꓽ ꓓꓶꓽ ꓠꓬꓲ ꓬꓲꓼ ꓙꓰˍ ꓡꓳ꓿ 49 ꓝꓮꓲ ꓬꓲˍ ꓐꓰ ꓢꓷꓸ ꓡꓯꓽ ꓘꓳ ꓢꓴ ꓮꓽ ꓙꓵˍ ꓐꓰ꓾ ꓖ-ꓡꓲ-ꓡꓲ ꓗꓪ ꓐꓰ ꓬꓲ ꓔꓯ ꓛꓳ ꓡ ꓟ ꓤ ꓟꓶ ꓤ ꓐꓴˍ ꓟꓲ꓾ ꓶꓽ ꓤ ꓗꓪ ꓦꓰꓼ ꓔꓬ ꓢꓲ ꓕꓱ ꓟꓬ ꓙꓰꓽ ꓟ ꓔꓯ ꓟꓳꓻˍ ꓡꓳ꓿ 50 ꓖꓳ ꓕꓯ ꓞꓳ ꓪꓴꓽ ꓞꓳ ꓔꓲ ꓐꓴ ꓗꓪ ꓟ꓾ ꓞꓳ ꓙꓲꓻˍ ꓐꓰ ꓔꓱꓹ ꓜꓳꓽ ꓢꓴ꓾ ꓬꓳ-ꓢꓷ ꓟꓬꓱꓺ ꓔ ꓢꓴ ꓕꓲ ꓣꓳ ꓙꓳˍ ꓡꓳ꓿ 51 ꓬꓲ ꓠꓽ ꓬꓴ-ꓔ ꓟꓵꓽ ꓮ-ꓡꓲ-ꓟ-ꓕꓲ-ꓬꓼ ꓡꓳ ꓒꓱ ꓢꓴ ꓥ ꓢꓲ꓾ ꓪꓴ-ꓢ ꓗꓴꓷꓼ ꓛꓲ ꓡ ꓟ ꓔꓯ ꓦꓴꓻ ꓠꓬꓹ ꓔꓬ ꓢꓴ ꓥ ꓡꓳ꓿ (ꓬꓲ ꓠꓽ ꓠꓱꓸ ꓐꓯꓼ ꓢꓴ ꓖꓪ ꓙꓱ ꓞꓷꓹˍ ꓟ ꓐꓰ ꓬꓰ ꓗꓷ ꓟ ꓔꓯ ꓟꓽ ꓪꓽ꓿) 52 ꓕꓱ ꓕꓲ ꓣꓳ ꓠꓬ ꓒꓲ-ꓡ ꓔꓯ ꓙꓰ ꓢꓲ ꓬꓰ-ꓢꓴ ꓫꓵꓻ ꓟꓳ ꓓꓰꓽ ꓬꓰˍ ꓡꓳ꓿ 53 ꓖꓳ ꓡꓱ ꓠꓬ ꓬꓲ ꓫꓵꓻ ꓟꓳ ꓣꓴ ꓬꓯꓼ ꓗꓷ ꓢꓲ꓾ ꓪꓰꓻ ꓜꓲꓽ ꓟꓶ ꓟꓳꓻ ꓕꓱꓹ ꓓꓴ ꓡꓰ ꓕꓱꓹ ꓢꓲ ꓠꓬꓲ꓾ Bꓸ ꓗꓪ ꓜꓰꓺ ꓔ ꓟ ꓡꓱꓽ ꓘꓴ ꓫꓵꓼ ꓗꓪ ꓬꓰ-ꓢꓴ ꓔꓯ ꓗꓶ ꓔꓸ ꓡꓳ꓿ 54 ꓖꓳ ꓕꓲ ꓠꓬꓲ ꓠꓬ ꓙ-ꓖꓶ-ꓟ-ꓦꓬ-ꓠꓬꓲ ꓥ ꓢꓲ꓾ ꓠꓽ ꓦꓬꓼ ꓠꓬꓲˍ ꓟꓲ ꓠꓶꓽ ꓡ ꓡꓳ꓿ 55 ꓖ-ꓡꓲ-ꓡꓲ ꓗꓪ ꓐꓰ ꓬꓰ-ꓢꓴ ꓔꓯ ꓛꓳꓻ ꓡ ꓢꓴ ꓤꓽ ꓟꓶ ꓤ ꓐꓴ ꓠꓬ ꓗꓸ ꓠꓯ ꓢꓲ ꓛꓳ ꓙꓰ ꓢꓲ꓾ ꓡꓱ ꓜꓴˍ ꓐꓰ ꓬꓲ ꓫꓵꓻ ꓟꓳ ꓮ ꓡꓲ ꓐꓰ ꓗꓶ ꓗꓷˍ ꓟ ꓔꓯ ꓟꓳꓻˍ ꓡꓳ꓿ 56 ꓖꓳ ꓡꓱ ꓠꓬ ꓬꓲ ꓪꓽ ꓬꓲꓼ ꓙꓰ ꓢꓲ꓾ ꓫꓳ ꓠꓱ ꓧꓶꓽˍ ꓐꓰ ꓟꓰ ꓞꓶꓻ ꓙꓽ ꓖꓶˍ ꓡꓳ꓿ ꓬꓲˍ ꓡꓰ꓾ ꓬꓲ ꓪꓽ ꓠꓬ ꓪꓴ-ꓢ ꓕꓵꓼ ꓪꓽ ꓔꓯ ꓛꓳ ꓢꓲ ꓠꓽ ꓦꓬꓼ ꓠꓬꓲ ꓗꓪ ꓠꓽˍ ꓡꓳ꓿

ꓡꓴ-ꓗ 24

1 ꓫꓵꓽ ꓠꓬꓲ ꓟ ꓬꓲ ꓪꓴꓸ ꓕꓲ ꓠꓬꓲ ꓟꓲꓽ ꓕꓯꓽ ꓙꓲ ꓡ ꓕꓯ꓾ ꓤ ꓟꓶ ꓤ ꓐꓴ ꓠꓬ ꓬꓲ ꓪꓽ ꓡꓰ ꓙꓽ ꓖꓶ ꓔ ꓟ ꓫꓳ ꓠꓱꓻ ꓓꓴ ꓔꓯꓹ ꓔ ꓢꓲ ꓡꓱ ꓜꓴ ꓗꓪ ꓙꓰˍ ꓡꓳ꓿ 2 ꓖꓳ ꓗꓪ ꓛꓲ ꓬꓰ ꓠꓬ ꓡꓱ ꓜꓴ ꓗ ꓘꓶꓽ ꓒꓴ ꓞꓹ ꓟ ꓔꓯ ꓬꓲ ꓪꓽ ꓟꓳꓻˍ ꓡꓳ꓿ 3 ꓖꓳ ꓡꓱ ꓥ ꓟꓲ ꓡꓱꓼ ꓜꓴ ꓗꓪ ꓬꓲ ꓪꓽ ꓓꓵꓽ ꓡꓰ ꓠꓬ꓾ ꓢꓲ ꓒꓽ ꓬꓰ-ꓢꓴ ꓫꓵꓻ ꓟꓳ ꓔꓯ ꓟꓽ ꓟꓳꓻ꓿ 4 ꓬꓲ ꓪꓽ ꓠꓬ ꓖꓳ ꓟ ꓔꓯ ꓓꓵꓽ ꓙ ꓟꓬꓽ ꓔꓬ ꓕꓯ꓾ ꓐꓵ ꓞꓶꓽ ꓐꓬꓱꓼ ꓡꓱꓼ ꓡꓱ ꓖꓪꓽ ꓔ ꓟ ꓡꓽ ꓞꓳ ꓠꓬꓲꓽ ꓣꓳ ꓞꓼ ꓐꓰ ꓬꓲ ꓪꓽ ꓒꓻ ꓕꓲ ꓗꓪ ꓦꓰꓼ ꓡ ꓡꓳ꓿ 5 ꓖꓳ ꓕꓯ ꓤ ꓟꓶ ꓤ ꓐꓴ ꓦꓲꓸ ꓡꓰ ꓢꓲ ꓟꓲ ꓛꓬꓺ ꓗꓪ ꓟꓳꓼ ꓡꓰ ꓠꓬ꓾ ꓖꓳ ꓠꓬꓲꓽ ꓣꓳ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓢꓯꓸ ꓬꓲꓼ ꓡ ꓗꓷ ꓢꓴ ꓖꓳ ꓕꓲ ꓣꓳ ꓔꓯ ꓡꓱꓼ ꓜꓴ ꓗꓪ ꓧꓪ ꓡꓻ ꓡ? 6 ꓬꓲ ꓕꓻ ꓟꓽ ꓔꓬꓳ꓾ ꓬꓲ ꓠꓽ ꓢꓯꓸ ꓬꓲꓼ ꓡꓺꓳ꓿ ꓬꓲ ꓠꓬ ꓖ-ꓡꓲ-ꓡꓲ ꓗꓪ ꓔꓬ ꓢꓰꓽ ꓕꓯˍ ꓡꓰꓻ꓾ ꓠꓴ ꓪꓽ ꓔꓯ ꓐꓯ ꓖꓶꓽ ꓗꓷ ꓟ ꓔꓯ ꓓꓵꓽ ꓙ ꓔ꓿ 7 ꓬꓲ ꓡꓰ꓾ ꓡ-ꓞꓳ-ꓮ-ꓐꓲ ꓔꓯ ꓠꓽ ꓝꓴꓲ ꓙꓳ ꓢꓴ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷ ꓢꓲ꓾ ꓢ ꓠꓬꓲ ꓕꓲ ꓠꓬꓲ ꓗꓪ ꓢꓯꓸ ꓬꓲꓼ ꓡ ꓥꓳ꓾ ꓐꓰ ꓠꓴ ꓪꓽ ꓔꓯ ꓐꓯ ꓖꓶꓽ ꓗꓷꓳ꓾ ꓐꓯˍ ꓡꓳ꓿ 8 ꓖꓳ ꓡꓱ ꓠꓬ ꓬꓰ-ꓢꓴ ꓐꓯ ꓗꓷ ꓟ ꓐꓯ ꓘꓶꓽ ꓔꓯ ꓬꓲ ꓪꓽ ꓓꓵꓽ ꓙ ꓛꓲ ꓡ ꓢꓲ꓾ 9 ꓡꓱꓼ ꓜꓴ ꓗꓪ ꓐꓰ ꓬꓲꓼ ꓙꓰ ꓢꓲ ꓠꓬꓲ꓾ ꓕꓱ ꓟꓬ ꓙꓰꓽ ꓟ ꓮꓽ ꓙꓵ ꓠꓬ ꓞꓲ ꓕꓲ ꓣꓳ ꓟ ꓐꓰ ꓠꓱꓸ ꓐꓯ ꓢꓴ ꓔꓯ ꓐꓯ ꓖꓶˍ ꓡꓳ꓿ 10 ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓖꓶ ꓢꓴ ꓠꓬ꓾ ꓟ-ꓖ-ꓓ-ꓡꓲ ꓢꓴ ꓟ-ꓡꓲˍ ꓐꓰ ꓬꓳ-ꓦ-ꓠˍ ꓐꓰ ꓬ-ꓗꓴ ꓬꓲ ꓟꓹ ꓟ ꓟ-ꓡꓲˍ ꓐꓰ ꓬꓲ ꓪꓽˍ ꓐꓰ ꓕꓲꓽ ꓪꓺꓼ ꓔꓬ ꓟ ꓠꓱꓸ ꓐꓯꓼ ꓤ ꓟꓶ ꓤ ꓐꓴ ꓥ ꓡꓳ꓿ 11 ꓝꓲ ꓓꓴ ꓐꓴ ꓠꓽ ꓐꓯ ꓘꓶꓽ ꓕꓱ ꓟꓬ ꓟ ꓠꓬ ꓘꓶꓽ ꓖꓳꓽ ꓥ ꓡꓳ꓾ ꓓꓵꓽ ꓙ ꓢꓲ ꓟꓽ ꓙꓵꓻ꓿ 12 ꓖꓳ ꓡꓱ ꓥ ꓟꓲ ꓒꓲ-ꓕꓱ ꓠꓬ ꓡꓱ ꓜꓴ ꓗꓪ ꓔꓷꓹ ꓙꓰ ꓢꓲ꓾ ꓡꓱꓽ ꓘꓴ ꓠꓯꓸꓼ ꓗꓪ ꓡꓳꓸ ꓠꓬꓲ ꓠꓬ꓾ ꓪꓰ ꓜꓲꓽ ꓟꓶ ꓟꓳꓻ ꓕꓱꓹ ꓓꓴˍ ꓡꓰꓽ ꓓꓹ ꓟ ꓔꓯ ꓟꓳꓻˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓦꓲ ꓗꓪ ꓬꓲꓼ ꓙꓰ ꓢꓲ ꓒꓬꓱꓼ ꓡ ꓗꓷ ꓟ ꓫꓵꓽ ꓪꓴꓻ ꓔꓯ ꓓꓵꓽ ꓙ ꓟꓶꓻ ꓔꓬ ꓡꓳ꓿ 13 ꓖꓳ ꓕꓲ ꓠꓬꓲ ꓗꓪ ꓬꓲ ꓪꓽ ꓗꓪ ꓟ ꓠꓬꓲꓽ ꓣꓳ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓡꓳ ꓔ ꓫꓵꓽ ꓕꓷꓹ ꓛꓲ ꓗꓳꓹ ꓞꓹ ꓟ꓾ ꓬꓲ-ꓟ-ꓪꓴ-ꓢꓶ ꓟꓬꓱ ꓔ ꓟ ꓘꓹ ꓕꓲ ꓘꓹ ꓗꓪ ꓙꓰ ꓔꓬ ꓢꓲ꓾ 14 ꓬꓲ ꓪꓽ ꓠꓬ ꓒꓬꓱꓼ ꓡ ꓗꓷ ꓟ ꓕꓱ ꓟꓬ ꓙꓰꓽ ꓟ ꓔꓯ ꓟꓳꓸ ꓫꓸ ꓕꓱ ꓡꓯꓽ ꓘꓳˍ ꓡꓳ꓿ 15 ꓬꓲ ꓪꓽ ꓖꓳ ꓡꓱ ꓫꓸ ꓕꓱ ꓢꓲ ꓠ ꓠꓬꓲ ꓡꓯꓽ ꓘꓳ ꓔꓬ ꓕꓯ꓾ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓠꓶꓽ ꓡ ꓢꓲ꓾ ꓬꓲ ꓪꓽˍ ꓐꓰ ꓕꓲ ꓛꓳꓺꓼ ꓫꓱꓽ ꓡ ꓡꓳ꓿ 16 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓡꓰ ꓬꓲ ꓥ ꓟ ꓬꓲ ꓪꓽ ꓔꓯ ꓟꓽ ꓡꓳꓸ ꓓꓳ ꓡ ꓝꓲ꓿ 17 ꓬꓰ-ꓢꓴ ꓠꓬ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓡꓯꓼ ꓫꓵ ꓫꓱꓽ ꓡꓯꓼ ꓫꓵ ꓮꓸ ꓫꓵ ꓚ ꓡꓯꓽ ꓘꓳ ꓔꓬ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓪꓽ ꓠꓽ ꓠꓲꓹ ꓟꓺ ꓫꓸ ꓫꓸꓼ ꓐꓰ ꓦꓰꓼ ꓡꓰ ꓢꓲ꓾ 18 ꓬꓲ ꓪꓽ ꓠꓬꓲꓽ ꓣꓳ ꓗꓪ ꓟ ꓘꓹ-ꓡꓳ-ꓒꓺ ꓟꓬꓱ ꓔ ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓪꓰꓺ ꓤ ꓟꓴ ꓔꓬ ꓢꓴ ꓥ ꓠꓬꓲ꓾ ꓗꓳꓸ ꓡ ꓟ ꓠꓬꓲꓽ ꓢ ꓠꓬꓲ ꓠꓯS ꓗꓪ ꓖꓳ ꓗꓪ ꓮ ꓡꓲ ꓗꓷ ꓡꓰ ꓟ ꓔꓯ ꓟꓽ ꓢꓷ ꓢꓰꓽ ꓡ?꓾ ꓐꓯˍ ꓡꓳ꓿ 19 ꓬꓰ-ꓢꓴ ꓡꓰ꓾ ꓮꓸ ꓫꓵ ꓗꓷ ꓡꓰ ꓡ?꓾ ꓐꓰ ꓐꓯˍ ꓕꓯ꓾ ꓬꓲ ꓪꓽ ꓡꓰ ꓬꓲ ꓔꓯ꓾ ꓠ-ꓢ-ꓡꓱ ꓢꓴ ꓬꓰ-ꓢꓴ ꓔꓯ ꓐꓯˍ ꓟ ꓥꓳ꓿ ꓬꓲ ꓠꓽ ꓟꓷꓽ ꓠꓷꓹ ꓝꓸ ꓢꓴ ꓥ ꓢꓲ꓾ ꓪꓴ-ꓢˍ ꓐꓰ ꓑ ꓫꓬꓼ ꓐꓴ ꓟꓲꓽ ꓙꓬ ꓗꓪ꓾ ꓬꓰˍ ꓟ ꓐꓰ ꓐꓯˍ ꓟ ꓗꓪ ꓪꓽ ꓠꓬꓲˍ ꓟ ꓕꓲ ꓣꓳ ꓥꓳ꓿ 20 ꓖꓳ ꓡꓱ ꓥ ꓟꓲ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓥꓪ ꓠꓴꓽ ꓢꓲꓽ ꓒ ꓐꓴ ꓡꓰ꓾ ꓫꓵꓻ ꓝꓴꓲ ꓐꓯ ꓞꓷꓹ ꓢꓲ ꓬꓲ ꓔꓯ ꓕꓯꓼ ꓔꓶꓸ ꓗꓷꓳ꓿ 21 ꓬꓲ ꓠꓽ ꓬꓲ-ꓢꓷ-ꓡꓰ ꓔꓯ ꓫꓴꓹ ꓣꓴ ꓢꓴ ꓥꓳ꓾ ꓐꓰ ꓥꓪ ꓠꓴꓽ ꓥꓳ ꓡꓳꓸ ꓔ ꓟ ꓥꓳ꓿ ꓕꓱ ꓟꓬ ꓫꓵꓽ ꓗꓷ ꓡꓰ ꓗꓸ ꓠꓯ ꓮ ꓟꓶ ꓠꓬ ꓢ ꓠꓬꓲ ꓙꓳ ꓡꓰꓳ꓿ 22 ꓝꓮꓲ ꓠꓬ ꓥꓪ ꓠꓴꓽ ꓕꓲ ꓧꓳꓽ ꓗꓪ ꓟ ꓤ ꓟꓶ ꓤ ꓕꓲ ꓐꓱ ꓡꓰ ꓥꓪ ꓠꓴꓽ ꓔꓯ ꓓꓵꓽ ꓙꓽ ꓟꓶ ꓡꓰ ꓝꓲˍ ꓡꓳ꓿ ꓬꓲ ꓪꓽ ꓠꓯꓼ ꓠꓯꓼ ꓡꓱꓽ ꓜꓴ ꓗꓪ ꓙꓰ ꓠꓬ꓾ 23 ꓬꓲ ꓫꓵꓻ ꓟꓳ ꓔꓯ ꓟꓽ ꓟꓳꓻ ꓠꓬꓲ ꓬꓲ ꓪꓽ ꓬꓲꓼ ꓡ ꓢꓲ꓾ ꓟꓴꓽ ꓗꓪ ꓝꓲ ꓓꓴ ꓐꓴ ꓡꓰ ꓬꓲ ꓢꓯꓸ ꓔꓬ ꓡꓳ꓾ ꓐꓯˍ ꓟ ꓦ ꓐꓬꓱꓽ ꓟꓳꓻ ꓗꓷꓳ꓾ ꓐꓰ ꓥꓪ ꓠꓴꓽ ꓔꓯ ꓐꓯ ꓖꓶ ꓡꓺꓳ꓿ 24 ꓖꓳ ꓡꓱ ꓢꓲ ꓥꓪ ꓠꓴˍ ꓐꓰ ꓕꓲꓽ ꓪꓺꓼ ꓔꓬ ꓢꓴ ꓕꓲ ꓐꓱ ꓠꓬ ꓡꓱꓽ ꓜꓴ ꓗꓪ ꓙꓰ ꓢꓲ ꓔꓱꓹ ꓠꓬꓲ ꓬꓰ ꓕꓯ꓾ ꓤ ꓟꓶ ꓤ ꓐꓴ ꓐꓯˍ ꓟ ꓡꓰ ꓐꓰ ꓡꓳꓸ ꓟꓳꓻˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓔꓯ ꓠꓽ ꓟꓽ ꓟꓳꓻ ꓙꓳꓽ꓾ ꓐꓯˍ ꓡꓳ꓿ 25 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓰ ꓐꓯ ꓗꓷ ꓟ ꓮꓽ ꓙꓵ ꓔꓯ ꓙꓵꓻ ꓡꓯꓽ ꓢꓴ ꓞꓳ ꓙꓲꓽ ꓐꓴꓳ꓾ 26 ꓙꓲ-ꓢꓴ ꓠꓬ ꓫꓸ ꓙꓵˍ ꓟ ꓕꓱ ꓟꓬ ꓫꓵꓽ ꓜꓲꓽ ꓢꓲ꓾ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓟꓬꓱꓺ ꓓꓳꓽ ꓗꓪ ꓓꓵꓽ ꓡꓰ ꓠ ꓗꓹ ꓡꓳ ꓟꓽ ꓥ ꓡ?꓾ ꓐꓯ ꓖꓶˍ ꓡꓳ꓿ 27 ꓖꓳ ꓡꓱ ꓠꓬ ꓟꓳ-ꓫꓲ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓟꓷꓽ ꓠꓷꓹ ꓝꓸ ꓢꓴ ꓮ ꓙꓵˍ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓬꓲ ꓚꓲꓸ ꓛꓬ ꓔꓯꓸ ꓟꓳꓸ ꓐꓯ ꓬꓯꓼˍ ꓟ ꓮꓽ ꓙꓵ ꓬꓲ ꓪꓽ ꓔꓯ ꓒꓶ ꓟꓸ ꓖꓶˍ ꓡꓳ꓿ 28 ꓬꓲ ꓪꓽ ꓙꓰˍ ꓟ ꓘꓹ ꓗꓪ ꓛꓲ ꓬꓰ ꓠꓬ꓾ ꓬꓰ-ꓢꓴ ꓠꓽ ꓡꓯꓽ ꓫꓵ ꓟꓲꓸ ꓙꓬꓽ ꓙꓰˍ ꓐꓰ ꓬꓰˍ ꓡꓳ꓿ 29 ꓖꓳ ꓡꓱ ꓥ ꓟꓲ ꓬꓲ ꓪꓽ ꓡꓰ ꓬꓲ ꓔꓯ ꓜꓲꓽ ꓜꓲ ꓓꓰꓽ ꓢꓲ꓾ ꓮ ꓟꓶ ꓠꓬ ꓟꓶꓼ ꓘꓶꓼ ꓝꓲꓸ ꓛꓲ ꓡ ꓢꓲ ꓟꓰꓻ ꓬꓰꓳ꓿ ꓥꓪ ꓠꓴꓽˍ ꓐꓰ ꓔꓲꓹ ꓬꓰ ꓡꓯ꓾ ꓐꓯˍ ꓠꓬꓲ꓾ ꓬꓰ-ꓢꓴ ꓠꓬ ꓬꓲ ꓪꓽˍ ꓐꓰ ꓔꓲꓹ ꓬꓰ ꓠꓹ ꓟ ꓓꓵꓽ ꓡꓰˍ ꓡꓳ꓿ 30 ꓬꓲ ꓠꓬ ꓬꓲ ꓪꓽˍ ꓐꓰ ꓕꓲꓽ ꓪꓺꓼ ꓜ ꓜˍ ꓐꓰ ꓗꓳꓺ ꓔꓬ ꓕꓯ꓾ ꓬꓰ-ꓢꓴ ꓡꓰ ꓑ ꓑ ꓣꓴ ꓢꓲ ꓶꓼ ꓥꓳ ꓙꓱꓽ ꓢꓲ ꓠꓬꓲ꓾ ꓦꓶꓹ ꓢꓲ ꓬꓲ ꓪꓽ ꓔꓯ ꓖꓶˍ ꓡꓳ꓿ 31 ꓖꓳ ꓕꓯ ꓬꓲ ꓪꓽ ꓬꓲ ꓔꓯ ꓡꓳꓸ ꓢꓷ ꓡꓰ ꓠꓬ꓾ ꓞꓼ ꓐꓰ ꓬꓲ ꓔꓯ ꓟꓽ ꓟꓳꓻ ꓗꓷ ꓡꓰꓳ꓿ 32 ꓖꓳ ꓕꓯ ꓬꓲ ꓪꓽ ꓠꓬ ꓕꓲ ꓣꓳ ꓛꓳ ꓕꓲ ꓣꓳ꓾ ꓙ ꓖꓴ ꓗꓪ ꓬꓲ ꓣꓳꓽˍ ꓐꓰ ꓫꓸ ꓕꓱ ꓢꓲ꓾ ꓣꓳ ꓔꓯ ꓢꓲꓽ ꓫꓬ ꓕꓳ ꓶ ꓒꓶꓻ ꓟꓸ ꓖꓶ ꓡ ꓕꓯ꓾ ꓣꓳꓽ ꓠꓲꓹ ꓟ ꓗꓪ ꓡꓱꓻ ꓡꓰˍ ꓐꓰ ꓗꓹ ꓛꓲꓽˍ ꓟ ꓐꓲ ꓡꓰꓳ꓾ ꓟꓽ ꓥ ꓡ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 33 ꓬꓲ ꓖꓳ ꓕꓲ ꓙꓵꓹ ꓗꓪ ꓬꓲ ꓪꓽ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰ ꓢꓲ꓾ ꓞꓲ ꓕꓲ ꓣꓳ ꓟˍ ꓐꓰ꓾ ꓬꓲ ꓪꓽˍ ꓐꓰ ꓕꓲꓽ ꓪꓺꓼ ꓖꓳ ꓗꓪ ꓜꓲꓼ ꓞꓹ ꓢꓴ ꓐꓴ ꓔꓯ ꓧꓪ ꓟꓳꓻ ꓡꓰˍ ꓡꓳ꓿ 34 ꓖꓳ ꓗꓪ ꓔꓬ ꓢꓴ ꓐꓴ ꓠꓬ꓾ ꓢꓲ ꓒꓽ ꓚꓵ ꓚꓵ ꓢꓯꓸ ꓬꓲꓼ ꓡ ꓢꓲ꓾ ꓢꓲ-ꓟꓴ ꓔꓯ ꓟꓳꓸ ꓖꓶ ꓡꓺꓳ꓾ ꓐꓰ ꓐꓯ ꓔꓬ ꓡꓳ꓿ 35 ꓖꓳ ꓡꓱ ꓢꓲ ꓬꓲ ꓪꓽ ꓠꓬꓲꓽ ꓣꓳ ꓥ ꓟꓲ꓾ ꓙ ꓖꓴ ꓗꓪ ꓮ ꓡꓲ ꓔꓳꓹ ꓜꓳˍ ꓟ ꓐꓰ꓾ ꓑ ꓑ ꓦꓶꓹˍ ꓟ ꓗꓪ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ ꓮ ꓡꓲ ꓡꓳꓸ ꓢꓷ ꓡꓰˍ ꓟ ꓮꓽ ꓙꓵ ꓚ ꓟꓸ ꓖꓶꓽˍ ꓡꓳ꓿ 36 ꓬꓲ ꓪꓽ ꓖꓳ ꓡꓱ ꓫꓸ ꓕꓱ ꓔꓬ ꓕꓯ꓾ ꓬꓰ-ꓢꓴ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓦꓰꓼ ꓡ ꓢꓲ꓾ ꓠꓴ ꓪꓽ ꓢꓲ ꓡꓲ ꓟ ꓟꓶꓻ ꓝꓲ꓾ ꓐꓯˍ ꓡꓳ꓿ 37 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠ꓾ ꓫꓵꓻ ꓗꓴꓸ ꓫꓵꓻ ꓦ ꓥ ꓡꓳ꓾ ꓓꓵꓽ ꓙ ꓢꓲ ꓮꓽ ꓘꓶꓸ ꓙꓳꓺ ꓡꓰˍ ꓡꓳ꓿ 38 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓓꓵꓽ ꓙ ꓫꓸˍ ꓡ? ꓠꓴ ꓪꓽ ꓠꓲꓹ ꓟ ꓗꓪ ꓮ ꓡꓲ ꓗꓷ ꓡꓰ ꓠꓬꓲ ꓕꓱ ꓡꓱ ꓓꓵꓽ ꓙ ꓟꓬꓽˍ ꓡ? 39 ꓥꓪ ꓡꓯꓼ ꓒꓯꓹˍ ꓐꓰ ꓥꓪ ꓛꓲ ꓒꓯꓹ ꓗꓪ ꓡꓳꓸ ꓠꓬꓲ꓿ ꓥꓪ ꓥ ꓡꓳ꓿ ꓥꓪ ꓔꓯ ꓫꓱꓹ ꓠꓬꓲ ꓡꓯ꓿ ꓫꓵꓻ ꓗꓴꓸ ꓫꓵ ꓦ ꓠꓽ ꓧꓪꓽˍ ꓐꓰ ꓪꓳꓽ ꓔꓳ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓽ ꓙꓳˍ ꓡꓳ꓾ ꓐꓯˍ ꓡꓳ꓿ 40 ꓕꓱ ꓡꓱ ꓐꓯ ꓗꓷ ꓠꓬ꓾ ꓬꓲ ꓡꓯꓼ ꓒꓯꓹ ꓛꓲ ꓒꓯꓹ ꓬꓲ ꓪꓽ ꓔꓯ ꓟꓳꓸ ꓖꓶˍ ꓡꓳ꓿ 41 ꓬꓲ ꓪꓽ ꓠꓬ ꓗꓹ ꓛꓲ ꓟꓬꓽ ꓡꓰ ꓢꓲ ꓓꓵꓽ ꓙ ꓟꓶ ꓔꓬ ꓕꓯ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓕꓱ ꓗꓪ ꓜꓽ ꓓꓴ ꓕꓲ ꓫꓵꓽ ꓙꓳˍ ꓡ?꓾ ꓐꓯˍ ꓡꓳ꓿ 42 ꓖꓳ ꓕꓯ ꓬꓲ ꓪꓽ ꓬꓲ ꓔꓯ ꓥꓪꓸ ꓛꓴ ꓕꓲ ꓙꓱꓼˍ ꓐꓰ ꓐꓬꓽ ꓕꓲ ꓛꓱ ꓖꓶꓽˍ ꓡꓳ꓿ 43 ꓖꓳ ꓡꓱ ꓠꓬ ꓬꓲ ꓣꓴ ꓢꓲ ꓬꓲ ꓪꓽ ꓟꓲꓽ ꓙꓬ ꓗꓪ ꓜꓽˍ ꓡꓳ꓿ 44 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓧꓶ ꓕꓯ ꓥꓪ ꓠꓴꓻ ꓪˍ ꓐꓰ ꓔꓬ ꓢꓰ ꓕꓯ꓾ ꓟꓳ-ꓫꓲ ꓙꓵꓽ ꓗ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓕꓳ ꓶˍ ꓐꓰ ꓟꓴꓽ ꓖꓪ ꓕꓳ ꓶ ꓗꓪ꓾ ꓥꓪ ꓔꓯ ꓐꓯ ꓬꓯꓼˍ ꓟ ꓐꓯ ꓘꓶꓽ ꓠꓬ ꓮꓽ ꓙꓵ ꓐꓲ ꓡ ꓠ ꓗꓹ ꓡꓳ꓾ ꓐꓰ ꓥꓪ ꓐꓯ ꓗꓷ ꓟ ꓠꓬ ꓕꓱ ꓟ ꓥ ꓡꓳ꓾ ꓐꓯˍ ꓡꓳ꓿ 45 ꓖꓳ ꓡꓱ ꓢꓲ ꓢꓲꓽ ꓫꓬ ꓕꓳ ꓶ ꓔꓯ ꓙꓽ ꓜꓲꓼ ꓡꓰ ꓠꓹ ꓟ꓾ ꓬꓲ ꓡꓰ ꓬꓲ ꓪꓽ ꓙꓽ ꓠꓲꓹ ꓒꓴ ꓖꓶˍ ꓡꓳ꓿ 46 ꓝꓮꓲ ꓬꓲ ꓡꓰ ꓬꓲ ꓪꓽ ꓔꓯ꓾ ꓙꓲ-ꓢꓴ ꓠꓽ ꓫꓸ ꓙꓵ ꓠ ꓗꓹ ꓟ ꓐꓰ꓾ ꓢ ꓠꓬꓲ ꓕꓲ ꓠꓬꓲ ꓠꓬ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓠ ꓗꓹ ꓟ ꓐꓰ꓾ 47 ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓝꓴꓲ ꓖꓽ ꓖꓶ ꓟꓶˍ ꓟ ꓟꓸ ꓟꓲꓽ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓬꓲ ꓟꓬꓱꓺ ꓗꓪ ꓐꓰ ꓞꓳ ꓫꓵꓽ ꓞꓳ ꓙꓰ ꓮꓽ ꓙꓵ ꓔꓯ ꓚ ꓖꓶ ꓠ ꓗꓹ ꓟ꓾ ꓕꓳ ꓶ ꓗꓪ ꓐꓳ ꓔ ꓡꓳ꓿ 48 ꓠꓴ ꓪꓽ ꓠꓬ ꓕꓱ ꓟꓬ ꓙꓰꓽ ꓟ ꓔꓯ ꓢꓷꓸ ꓙ ꓟꓳ ꓙ ꓢꓴ ꓥ ꓡꓳ꓿ 49 ꓠ ꓠꓹ꓾ ꓥꓪ ꓐꓹ ꓐ ꓡꓰ ꓖꓶꓽ ꓙ ꓟꓳˍ ꓟ ꓦꓻ ꓠꓬ꓾ ꓥꓪ ꓡꓰ ꓠꓴ ꓪꓽ ꓔꓯ ꓝꓲ ꓩꓴ ꓡ ꓥꓳ꓿ ꓖꓳ ꓡꓱ ꓥ ꓟꓲ ꓕꓯꓽ ꓢꓲ ꓗꓪ ꓐꓰ ꓡꓻˍ ꓟ ꓪꓽ ꓠꓬꓲˍ ꓟ ꓟꓽ ꓟꓶ ꓕ ꓑꓳꓸ꓾ ꓡꓳ ꓒꓱ ꓗꓪ ꓦꓴ ꓠꓬꓹ ꓔꓬ꓾ ꓐꓯˍ ꓡꓳ꓿ 50 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓐꓱ-ꓕ-ꓠꓲ ꓒ ꓕꓲ ꓗꓪ ꓧꓳꓽ ꓛꓲ ꓬꓰ ꓠꓬ꓾ ꓡꓯꓼ ꓒꓯꓹ ꓛꓱ ꓢꓲ ꓬꓲ ꓪꓽ ꓔꓯ ꓶꓼ ꓥꓳꓽ ꓙꓱꓽ ꓖꓶˍ ꓡꓳ꓿ 51 ꓬꓲ ꓖꓳ ꓡꓱ ꓶꓼ ꓥꓳꓽ ꓙꓱꓽ ꓖꓶ ꓔꓬ ꓕꓯ꓾ ꓬꓰ-ꓢꓴ ꓠꓬ ꓬꓲ ꓪꓽ ꓔꓯꓸˍ ꓐꓰ ꓧꓹ ꓗꓷ ꓢꓲ ꓟꓴꓽ ꓗꓪ ꓗꓪ ꓓꓯ ꓙꓰꓳ꓿ 52 ꓛꓳꓽ ꓒꓯꓹ ꓐꓴ ꓠꓬ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓠꓲꓹ ꓒꓴ ꓒꓴˍ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰˍ ꓡꓳ꓿ 53 ꓬꓲ ꓪꓽ ꓠꓬ ꓮ ꓕꓯˍ ꓟꓲ ꓢꓲꓽ ꓫꓬ ꓦꓲ ꓗꓪ ꓔꓬ ꓢꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓡꓳ꓿

ꓬꓳ-ꓦ 1

1 ꓬꓲ ꓚꓰ ꓬꓲ ꓪꓴꓸ ꓕꓯˍ ꓡꓰ ꓐꓯ-ꓘꓶ ꓙꓳ ꓔꓬ ꓡꓳ꓿ ꓐꓯ-ꓘꓶ ꓠꓬ ꓪꓴ-ꓢˍ ꓐꓰ ꓕꓲ ꓪꓺꓼ ꓙꓳ ꓔꓬ ꓢꓲ꓾ ꓐꓯ-ꓘꓶ ꓠꓬ ꓪꓴ-ꓢ ꓥ ꓡꓳ꓿ 2 ꓐꓯ-ꓘꓶ ꓕꓱ ꓟ ꓠꓬ ꓬꓲ ꓚꓰ ꓬꓲ ꓪꓴꓸ ꓗꓪ ꓪꓴ-ꓢˍ ꓐꓰ ꓕꓲ ꓪꓺꓼ ꓙꓳ ꓔꓬ ꓟ ꓥ ꓡꓳ꓿ 3 ꓙꓳˍ ꓟ ꓥ ꓕ ꓑꓳ ꓠꓬ ꓬꓲ ꓡꓰ ꓚꓰꓼ ꓔ ꓟ ꓥ ꓢꓲ꓾ ꓚꓰꓼ ꓗꓷ ꓟ ꓥ ꓕ ꓑꓳ ꓗꓪ ꓬꓲ ꓟꓽ ꓚꓰꓼ ꓔ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ꓿ 4 ꓬꓲ ꓠꓯS ꓗꓪ ꓠꓬ ꓢꓯꓼ ꓟꓬ ꓙꓳ ꓢꓲ꓾ ꓢꓯꓼ ꓟꓬ ꓕꓱ ꓟ ꓠꓬ ꓞꓳ ꓤ ꓠꓬꓲ ꓟꓳ ꓓꓴ ꓥ ꓡꓳ꓿ 5 ꓖꓳ ꓡꓱ ꓢꓲ ꓠꓬꓲ ꓟꓳ ꓓꓴ ꓠꓬ ꓠꓯ ꓞꓲꓹ ꓟ ꓗꓪ ꓣꓳ ꓡ ꓕꓯ꓾ ꓠꓯ ꓞꓲꓹ ꓟ ꓠꓬ ꓠꓬꓲ ꓟꓳ ꓓꓴ ꓔꓯ ꓧꓪꓸ ꓡꓰ ꓟꓽ ꓘꓴꓻ꓿ 6 ꓪꓴ-ꓢ ꓡꓰ ꓝꓲꓺ ꓩꓴ ꓡ ꓟ ꓡ ꓞꓳ ꓕꓲ ꓣꓳ ꓛꓲ ꓡꓺꓳ꓿ ꓬꓲ ꓟꓬꓱ ꓠꓬ ꓬꓳ-ꓦ ꓥ ꓡꓳ꓿ 7 ꓞꓳ ꓤ ꓮꓽ ꓙꓵ ꓠꓬ ꓬꓲ ꓗꓪ ꓐꓰ ꓙꓵꓻ ꓡ ꓠꓹ ꓟ꓾ ꓬꓲ ꓠꓬ ꓠꓬꓲ ꓟꓳ ꓓꓴ ꓖꓳ ꓟ ꓐꓱ ꓶ ꓢꓷ ꓙ ꓟꓳ ꓙˍ ꓐꓰ ꓡꓻ ꓟ ꓥ ꓡꓳ꓿ 8 ꓬꓲ ꓠꓬ ꓠꓬꓲ ꓟꓳ ꓓꓴ ꓖꓳ ꓟ ꓠꓽ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓠꓬꓲ ꓟꓳ ꓓꓴ ꓖꓳ ꓟ ꓐꓱ ꓶ ꓢꓷꓸ ꓙ ꓟꓳ ꓙ ꓠꓹ ꓟ ꓡ ꓟ ꓥ ꓡꓳ꓿ 9 ꓞꓳ ꓤ ꓥ ꓕ ꓑꓳ ꓔꓯ ꓡꓬꓸ ꓖꓶˍ ꓟ ꓠꓬꓲ ꓟꓳ ꓓꓴ ꓚꓵꓺ ꓠꓬ ꓟꓲ ꓠꓯ ꓗꓪ ꓛꓲ ꓡꓺꓳ꓿ 10 ꓬꓲ ꓠꓬ ꓟꓲ ꓠꓯ ꓗꓪ ꓔꓬ ꓗꓷ ꓢꓲ꓾ ꓟꓲ ꓠꓯ ꓠꓬ ꓬꓲ ꓡꓰ ꓚꓰꓼ ꓔ ꓟ ꓥ ꓥˍ ꓟꓲ꓾ ꓟꓲ ꓠꓯ ꓞꓳ ꓤ ꓠꓽ ꓬꓲ ꓔꓯ ꓟꓽ ꓢꓷ꓿ 11 ꓬꓲ ꓠꓽ ꓬꓲ ꓚꓲꓸ ꓛꓬ ꓡ ꓞꓳ ꓔꓯ ꓡꓻˍ ꓟꓲ꓾ ꓬꓲ ꓚꓲꓸ ꓛꓬ ꓡ ꓞꓳ ꓠꓬ ꓬꓲ ꓔꓯ ꓟꓽ ꓘꓳ ꓣꓴ꓿ 12 ꓖꓳ ꓡꓱ ꓥ ꓟꓲ ꓬꓲ ꓟꓬꓱꓺ ꓔꓯ ꓙꓵꓻ ꓢꓲ꓾ ꓬꓲ ꓔꓯ ꓘꓳ ꓣꓴ ꓢꓴ ꓥ ꓕ ꓑꓳꓸ ꓠꓬ ꓪꓴ-ꓢ ꓤ ꓠꓱ ꓒꓬꓱꓼ ꓡ ꓓꓻ ꓟ ꓙꓵꓽ ꓪ ꓬꓲꓸ ꓬꓲ ꓪꓽ ꓔꓯ ꓖꓶˍ ꓡꓳ꓿ 13 ꓪꓴ-ꓢ ꓤ ꓠꓱ ꓒꓬꓱꓼ ꓡ ꓟ ꓠꓬ ꓫꓵꓽ ꓙꓳ ꓧꓪꓽ ꓙꓳ ꓢꓴ ꓡꓰ ꓦꓵꓻ ꓔ ꓟ ꓗꓪ ꓐꓰ ꓟꓽ ꓥ꓿ ꓞꓳ ꓤ ꓠꓲꓹ ꓡꓶꓽ꓾ ꓥ ꓠꓬ ꓧꓪꓽ ꓖꓳ ꓓꓱ ꓠꓲꓹ ꓡꓶꓽ ꓡꓰ ꓦꓵꓻ ꓔ ꓟ ꓗꓪ ꓐꓰˍ ꓟꓲ ꓟꓽ ꓥ꓿ ꓪꓴ-ꓢ ꓡꓰ ꓦꓵꓻ ꓟꓶˍ ꓟ ꓗꓪ ꓐꓰˍ ꓡꓰꓽ ꓥ ꓡꓳ꓿ 14 ꓐꓯ-ꓘꓶ ꓠꓬ ꓧꓪ ꓖꓳ ꓓꓱ ꓒꓬꓱꓼ ꓡ ꓢꓲ꓾ ꓥꓪ ꓠꓴꓽˍ ꓐꓰ ꓕꓲ ꓪꓺꓼ ꓔꓬ ꓗꓷꓳ꓿ ꓖꓳ ꓡꓱ ꓢꓲ ꓬꓲ ꓐꓬꓱꓼ ꓡꓱꓼ ꓟ ꓟꓬꓱ ꓓꓳꓽ ꓔꓯˍ ꓟꓲ ꓥꓪ ꓠꓴꓽ ꓟꓳ ꓠꓬꓲꓳ꓿ ꓖꓳ ꓟ ꓠꓬ ꓣꓱꓽ ꓛꓰꓽˍ ꓐꓰ ꓔꓱꓹˍ ꓟ ꓐꓲ ꓞꓹ ꓟ ꓐꓹ ꓐ ꓪꓴ-ꓢ ꓬꓲ ꓤ ꓔꓲꓸ ꓐꓬꓱꓼ ꓡꓱꓼ ꓟ ꓟꓬꓱ ꓓꓳꓽ ꓥ ꓡꓳ꓿ 15 ꓬꓳ-ꓦ ꓠꓬ ꓬꓲ ꓔꓯ ꓟꓳꓸ ꓢꓷꓸ ꓙ ꓟꓳ ꓙ ꓢꓲ꓾ ꓥꓪ ꓗꓸ ꓠꓯꓸ ꓢꓲ ꓗꓪ ꓡ ꓢꓴ ꓬꓲ ꓠꓬ ꓥꓪ ꓕꓯꓽ ꓢꓲ ꓪꓴꓽˍ ꓟ ꓥ ꓡꓳ꓾ ꓐꓰ ꓧꓶꓸ ꓕꓯ ꓥꓪ ꓐꓯ ꓗꓷ ꓟ ꓠꓬ ꓕꓱ ꓕꓲ ꓣꓳ ꓔꓯ ꓐꓯˍ ꓟ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓟꓽ ꓙꓳ ꓕꓯˍ ꓡꓰ ꓬꓲ ꓙꓳ ꓔꓬ ꓡꓳ꓾ ꓐꓯˍ ꓡꓳ꓿ 16 ꓮ ꓡꓲꓳ ꓐꓯ ꓠꓬ ꓬꓲ ꓐꓲ ꓞꓹ ꓟ ꓗꓪ ꓐꓰ ꓣꓳ ꓐꓴ ꓠꓬ ꓣꓱꓽ ꓛꓰꓽ ꓕꓯꓽ ꓢꓲ ꓣꓱꓽ ꓛꓰꓽ ꓟꓶ ꓗꓷꓳ꓿ 17 ꓮ ꓡꓲꓳ ꓐꓯ ꓠꓬ ꓙꓵꓽ ꓗ ꓠꓬ ꓟꓳ-ꓫꓲ ꓗꓪ ꓐꓰ ꓖꓶ ꓡ ꓟ ꓥ ꓡꓳ꓿ ꓣꓱꓽ ꓛꓰˍ ꓐꓰ ꓔꓱꓹ ꓚꓵˍ ꓟ ꓠꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓡꓻˍ ꓟ ꓥ ꓡꓳ꓿ 18 ꓪꓴ-ꓢ ꓔꓯ ꓟꓳꓻ ꓠꓬꓲ ꓢꓴ ꓮ ꓕꓯˍ ꓟꓲ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓐꓹ ꓐ ꓳ' ꓟꓶꓽ ꓗꓪ ꓟ ꓤ ꓔꓲꓸ ꓪꓴ-ꓢ ꓡꓰ꓾ ꓐꓹ ꓐ ꓬꓲ ꓮ ꓡꓲ ꓗꓹ ꓟ ꓟꓳꓸ ꓖꓶ ꓓꓳ ꓡꓺꓳ꓿ 19 ꓬꓴ-ꓔ ꓡ ꓞꓳ ꓐꓴ ꓡꓰ ꓙꓱ-ꓣꓴ-ꓢ-ꓡꓱ ꓗꓪ ꓐꓰ꓾ ꓔꓲ ꓒ ꓐꓴˍ ꓐꓰ ꓡꓱ-ꓬꓲ ꓡ ꓞꓳ ꓐꓴ ꓔꓯ ꓬꓳ-ꓦ ꓔꓬ ꓗꓪ ꓝꓲ ꓩꓴ ꓡ ꓢꓲ꓾ ꓠꓴ ꓮꓽ ꓟ ꓥ ꓡ? ꓐꓰ ꓬꓲ ꓔꓯ ꓠ ꓠꓬꓲˍ ꓕꓯ꓾ ꓬꓳ-ꓦ ꓬꓲ ꓢꓷꓸ ꓙ ꓟꓳ ꓙ ꓘꓶꓽ ꓠꓬ ꓕꓱ ꓡꓱ ꓥꓳ꓿ 20 ꓬꓳ-ꓦ ꓡꓰ ꓔꓱꓹ ꓔꓱꓹꓼ ꓐꓰ ꓒꓳꓹ ꓖꓶ ꓢꓲ꓾ ꓥꓪ ꓠꓽ ꓙꓲ-ꓢꓴ ꓟꓽ ꓥ꓾ ꓐꓰ ꓐꓯˍ ꓡꓳ꓿ 21 ꓬꓲ ꓪꓽ ꓡꓰ꓾ ꓖꓳ ꓡꓱ ꓥ ꓠꓬ ꓠꓴ ꓮꓽ ꓟ ꓥ ꓡ? ꓬꓲ-ꓡꓲ-ꓬ ꓥ ꓡ?꓾ ꓐꓯˍ ꓕꓯ꓾ ꓬꓲ ꓡꓰ ꓟꓽ ꓥ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓥ ꓠꓬ ꓠꓴ ꓠꓽ ꓟꓷꓽ ꓠꓷꓹ ꓝꓸ ꓢꓴ ꓖꓳ ꓕꓲ ꓣꓳ ꓥ ꓡ? ꓐꓰ ꓠ ꓠꓬꓲˍ ꓟꓲ꓾ ꓟꓽ ꓥ꓾ ꓐꓰ ꓒꓳꓹ ꓖꓶˍ ꓡꓳ꓿ 22 ꓖꓳ ꓡꓱ ꓠꓬꓲ ꓬꓲ ꓪꓽ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓔꓯ ꓝꓲ ꓩꓴ ꓡ ꓢꓴ ꓔꓯ ꓕꓲ ꓘꓶꓽ ꓐꓯ ꓒꓳꓹ ꓖꓶ ꓓꓴ ꓙꓳ ꓠꓹ ꓟ꓾ ꓠꓴ ꓠꓬ ꓮꓽ ꓟ ꓥ ꓡ? ꓠꓴ ꓚꓲꓸ ꓛꓬ ꓔꓯ ꓠꓴ ꓮ ꓡꓲ ꓘꓴˍ ꓡ? ꓐꓰ ꓠ ꓠꓬꓲˍ ꓡꓳ꓿ 23 ꓖꓳ ꓕꓯ ꓬꓳ-ꓦ ꓡꓰ꓾ ꓥꓪ ꓠꓽ ꓟꓷꓽ ꓠꓷꓹ ꓝ ꓢꓴ ꓬꓲ-ꓢ-ꓬ ꓐꓯˍ ꓟ ꓡꓰ ꓐꓰ꓾ ꓢꓲ ꓒ ꓙ ꓖꓴ ꓠꓴ ꓪꓽ ꓔꓱꓹ ꓔꓱꓹꓼ ꓐꓰ ꓫꓬꓹ꓾ ꓐꓰ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓡ ꓞꓳ ꓕꓲ ꓣꓳ ꓘꓴ ꓔꓬ ꓟ ꓢꓯꓼ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 24 ꓒ-ꓡꓲ-ꓢꓷ ꓐꓴ ꓡꓰ ꓬꓲ ꓔꓯ ꓠ ꓠꓬꓲ ꓠꓹ ꓟ ꓝꓲ ꓩꓴ ꓡ ꓢꓴ ꓐꓴ ꓡꓰ꓾ 25 ꓠꓴ ꓠꓬ ꓙꓲ-ꓢꓴˍ ꓟꓲ ꓟꓽ ꓥ꓾ ꓬꓲ-ꓡꓲ-ꓬˍ ꓟꓲ ꓟꓽ ꓥ꓾ ꓟꓷꓽ ꓠꓷꓹ ꓝꓸ ꓢꓴ ꓖꓳ ꓕꓲ ꓣꓳˍ ꓟꓲ ꓟꓽ ꓥ ꓠꓬ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓖꓳ ꓓꓱ ꓔꓲꓹ ꓖꓶˍ ꓡ? ꓐꓰ ꓠ ꓠꓬꓲˍ ꓡꓳ꓿ 26 ꓬꓳ-ꓦ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓠꓬ ꓬꓲꓻ ꓙꓬ ꓡꓰ ꓖꓳ ꓓꓱ ꓔꓲꓹ ꓖꓶˍ ꓡꓳ꓿ ꓠꓴ ꓪꓽ ꓟꓽ ꓢꓷꓸ ꓟ ꓕꓲ ꓣꓳ ꓠꓽ ꓠꓴ ꓪꓽ ꓗꓳ ꓡꓳ ꓗꓪ ꓦꓰꓼ ꓞꓹ ꓡꓳ꓿ 27 ꓬꓲ ꓠꓬ ꓥꓪ ꓗꓸ ꓠꓯꓸ ꓢꓲ ꓗꓪ ꓡ ꓢꓴ ꓥ ꓢꓲ꓾ ꓥꓪ ꓠꓬ ꓬꓲ ꓛꓲ ꓠꓲ ꓦꓲꓻ ꓚ ꓒꓶꓻ ꓖꓶ ꓠꓹ ꓟˍ ꓟꓲ ꓟꓽ ꓒꓵꓽ꓾ ꓐꓯ ꓖꓶˍ ꓡꓳ꓿ 28 ꓕꓱ ꓟꓬ ꓙꓰ ꓟ ꓠꓬ ꓬꓳ-ꓔ ꓬꓲꓽ ꓟ ꓖꓳ ꓐꓽ ꓢꓲ ꓟ ꓐꓱ-ꓕ-ꓠꓲ꓾ ꓬꓳ-ꓦ ꓖꓳ ꓓꓱ ꓔꓲꓹ ꓖꓶ ꓖꓴ ꓗꓪ ꓗꓷ ꓡꓰˍ ꓟ ꓥ ꓡꓳ꓿ 29 ꓗꓸ ꓠꓯꓸ ꓕꓲ ꓠꓬꓲ ꓗꓪ ꓬꓰ-ꓢꓴ ꓬꓲ ꓔꓯ ꓡ ꓟ ꓬꓳ-ꓦ ꓟꓳ ꓗꓷ ꓠꓬ꓾ ꓠꓬꓲ ꓠꓹ꓾ ꓪꓴ-ꓢ ꓬꓲ ꓮ ꓣꓳ ꓤ꓾ ꓟꓲ ꓠꓯ ꓗꓪ ꓟ ꓝꓴꓲ ꓣꓴ ꓦ ꓗꓷ ꓢꓴ ꓠꓬ ꓬꓲ ꓥ ꓡꓳ꓿ 30 ꓥꓪ ꓗꓸ ꓠꓯꓸ ꓢꓲ ꓗꓪ ꓡ ꓞꓳ ꓕꓲ ꓣꓳ ꓡꓻˍ ꓥꓳ꓾ ꓬꓲ ꓠꓽ ꓥꓪ ꓕꓯꓽ ꓢꓲ ꓪꓴꓽˍ ꓟ ꓥ ꓡꓳ꓾ ꓐꓰ ꓧꓶꓸ ꓕꓯ ꓥꓪ ꓐꓯ ꓗꓷ ꓟ ꓠꓬ ꓕꓱ ꓕꓲ ꓣꓳ ꓟ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓟꓽ ꓙꓳꓻ ꓕꓯˍ ꓡꓰ ꓬꓲ ꓙꓳ ꓔꓬ ꓡꓳ꓿ 31 ꓧꓶꓸ ꓕꓯ ꓥꓪ ꓬꓲ ꓔꓯ ꓟꓽ ꓢꓷ꓿ ꓖꓳ ꓡꓱ ꓥ ꓟꓲ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓬꓲ ꓟꓳꓸ ꓖꓶ ꓡ ꓠꓹ ꓟ꓾ ꓥꓪ ꓠꓬ ꓬꓲꓻ ꓙꓬ ꓡꓰ ꓖꓳ ꓓꓱ ꓔꓲꓹ ꓖꓶ ꓠꓹ ꓟ ꓡꓻ ꓡꓳ꓾ ꓐꓯˍ ꓡꓳ꓿ 32 ꓬꓳ-ꓦ ꓡꓰ꓾ ꓢꓲ-ꓫꓬ-ꓟ-ꓦ ꓠꓬ ꓮꓸ ꓖꓴꓽˍ ꓡꓰ ꓐꓰ꓾ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓢꓲ ꓬꓲ ꓕꓯꓽ ꓢꓲ ꓗꓪ ꓥꓳꓽ ꓡ ꓟ ꓔꓯ ꓥꓪ ꓟꓳˍ ꓡꓳ꓾ ꓐꓰ ꓢꓷꓸ ꓙ ꓟꓳ ꓙ ꓡꓳ꓿ 33 ꓧꓶ ꓕꓯ ꓥꓪ ꓬꓲ ꓔꓯ ꓟꓽ ꓢꓷˍ ꓟꓲ꓾ ꓥꓪ ꓔꓯ ꓬꓲꓻ ꓙꓬ ꓡꓰ ꓔꓲꓹ ꓖꓶ ꓠꓹ ꓟ ꓝꓲ ꓩꓴ ꓡ ꓢꓴ ꓖꓳ ꓕꓲ ꓣꓳ ꓡꓰ ꓥꓪ ꓔꓯ꓾ ꓮꓽ ꓟ ꓕꓯ ꓢꓲ ꓗꓪ ꓢꓲ-ꓫꓬ-ꓟ-ꓦ ꓬꓯꓼ ꓡ ꓟ ꓔꓯ ꓠꓴ ꓟꓳˍ ꓠꓬ꓾ ꓖꓳ ꓕꓲ ꓣꓳ ꓠꓽ ꓢꓲ-ꓫꓬ-ꓟ-ꓦ ꓡꓰ ꓖꓳ ꓓꓱ ꓔꓲꓹ ꓖꓶ ꓢꓴ ꓥꓳ꓾ ꓐꓰ ꓐꓯ ꓖꓶ ꓡꓺꓳ꓿ 34 ꓕꓱ ꓟ ꓔꓯ ꓥꓪ ꓟꓳ ꓗꓷ ꓠꓬꓲ꓾ ꓕꓱ ꓕꓲ ꓣꓳ ꓠꓽ ꓪꓴ-ꓢ ꓮ ꓐꓲ ꓥꓳ꓾ ꓐꓰ ꓥꓪ ꓢꓷꓸ ꓙ ꓟꓳ ꓙˍ ꓟ ꓥꓳ꓾ ꓐꓯ ꓡꓳ꓿ 35 ꓗꓸ ꓠꓯꓸ ꓕꓲ ꓠꓬꓲ ꓗꓪ ꓬꓳ-ꓦ ꓠꓬ ꓬꓲ ꓛꓳꓽ ꓒꓯꓹ ꓠꓬꓲꓽ ꓣꓳˍ ꓐꓰ ꓦꓰꓼ ꓞꓹ ꓢꓲ꓾ 36 ꓬꓰ-ꓢꓴ ꓙ ꓖꓴ ꓫꓱꓽ ꓗꓳꓸ ꓙꓰˍ ꓟ ꓔꓯ ꓡꓳꓸ ꓟꓳ ꓠꓬ ꓬꓲ ꓡꓰ꓾ ꓠꓬꓲ ꓠꓹ꓾ ꓪꓴ-ꓢ ꓬꓲ ꓮ ꓣꓳ ꓤ꓾ ꓐꓯˍ ꓡꓳ꓿ 37 ꓬꓲ ꓐꓯˍ ꓟ ꓔꓯ ꓛꓳꓽ ꓒꓯꓹ ꓖꓳ ꓠꓬꓲꓽ ꓣꓳ ꓑ ꓙꓽ ꓗꓷ ꓠꓬ ꓬꓰ-ꓢꓴ ꓔꓯ ꓛꓳ ꓙꓰˍ ꓡꓳ꓿ 38 ꓬꓰ-ꓢꓴ ꓔꓲꓸ ꓒꓳꓹ ꓢꓲ ꓬꓲ ꓪꓽ ꓛꓳꓻ ꓡ ꓟ ꓔꓯ ꓟꓳ ꓗꓷ ꓠꓬ꓾ ꓠꓴ ꓪꓽ ꓮꓸ ꓫꓵ ꓧꓪˍ ꓡ?꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ꓾ ꓟꓸ ꓒꓽꓳ꓾ ꓠꓴ ꓮ ꓡꓲ ꓗꓪ ꓔꓬ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 39 ꓬꓲ ꓡꓰ ꓬꓲ ꓪꓽ ꓔꓯ꓾ ꓡꓯ꓾ ꓖꓳ ꓡꓱ ꓠꓬ ꓠꓴ ꓪꓽ ꓢꓷꓸ ꓡꓰˍ ꓥꓳ꓾ ꓐꓯ ꓖꓶ ꓗꓷ ꓠꓬ꓾ ꓬꓲ ꓪꓽ ꓡ ꓢꓲ ꓬꓲ ꓔꓬ ꓖꓴ ꓔꓯ ꓢꓷꓸ ꓡꓰꓳ꓿ ꓖꓳ ꓕꓲ ꓠꓬꓲ ꓗꓪ ꓬꓲ ꓪꓽ ꓠꓬ ꓬꓰ-ꓢꓴˍ ꓐꓰ ꓕꓲ ꓪꓺꓼ ꓔꓬ ꓡꓳ꓿ ꓖꓳ ꓕꓯ ꓠꓬ ꓟꓶꓼ ꓘꓶꓼ ꓡꓲ ꓙꓵꓹ ꓛꓲ ꓥ ꓡꓳ꓿ 40 ꓬꓳ-ꓦ ꓡꓰ ꓐꓯ ꓗꓷ ꓟ ꓔꓯ ꓑ ꓙꓽ ꓢꓲ ꓬꓰ-ꓢꓴ ꓔꓯ ꓛꓳ ꓙꓰˍ ꓟ ꓖꓳ ꓠꓬꓲꓽ ꓣꓳ ꓗꓪ ꓟ ꓕꓲ ꓣꓳ ꓠꓬ꓾ ꓢꓲ-ꓟꓴ ꓒꓲ-ꓕꓱ ꓬꓲ ꓠꓬꓲ ꓤ ꓯ-ꓓꓱ-ꓣꓴ ꓥ ꓡꓳ꓿ 41 ꓬꓲ ꓠꓬ ꓬꓲ ꓮ ꓬꓲꓼ ꓢꓲ-ꓟꓴ ꓔꓯ ꓧꓶꓸ ꓕꓯ ꓧꓪ ꓟꓶ ꓢꓲ ꓬꓲ ꓔꓯ꓾ ꓥꓪ ꓠꓴꓽ ꓠꓽ ꓟꓲ-ꓢ-ꓬ ꓔꓯ ꓧꓪ ꓟꓶ ꓡꓰꓳ꓾ ꓐꓯ ꓖꓶˍ ꓡꓳ꓿ (ꓟꓲ-ꓢ-ꓬ ꓐꓯˍ ꓟ ꓠꓬ꓾ ꓙꓲ-ꓢꓴ ꓐꓯˍ ꓟ ꓥ ꓡꓳ꓿) 42 ꓬꓲ ꓡꓰ ꓬꓲ ꓮ ꓬꓲꓼ ꓢꓲ-ꓟꓴ ꓔꓯ ꓬꓰ-ꓢꓴ ꓔꓬ ꓗꓪ ꓧꓳꓽ ꓡ ꓡꓳ꓿ ꓬꓰ-ꓢꓴ ꓬꓲ ꓔꓯ ꓡꓳꓸ ꓔ ꓢꓲ꓾ ꓠꓴ ꓠꓬ ꓬꓳ-ꓦ ꓮ ꓐꓲ ꓢꓲ-ꓟꓴ ꓥ ꓡꓳ꓿ ꓠꓴ ꓔꓯ ꓠꓬ ꓗꓷ-ꓒ ꓟꓬꓱꓺ ꓖꓶˍ ꓥꓳ꓾ ꓐꓯˍ ꓡꓳ꓿ (ꓗꓷ-ꓒ ꓐꓯˍ ꓟ ꓠꓬ꓾ ꓒꓲ-ꓕꓱ꓾ ꓐꓯˍ ꓟ ꓥ ꓡꓳ꓿) 43 ꓗꓸ ꓠꓯꓸ ꓕꓲ ꓠꓬꓲ ꓗꓪ ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓗꓪ ꓙꓰ ꓠꓹ ꓟ ꓚꓴꓽ ꓬꓲꓹ ꓓꓶꓽ ꓗꓷ ꓢꓲ꓾ ꓒꓲ-ꓡꓲ ꓔꓯ ꓟꓳꓻ ꓗꓷ ꓠꓬ꓾ ꓥꓪ ꓔꓯ ꓛꓳ ꓡꓯ꓾ ꓐꓯ ꓖꓶˍ ꓡꓳ꓿ 44 ꓒꓲ-ꓡꓲ ꓠꓽ ꓐꓱ-ꓢꓰ-ꓓ ꓢꓴ ꓥ ꓢꓲ꓾ ꓯ-ꓓꓱ-ꓣꓴˍ ꓐꓰ ꓒꓲ-ꓕꓱˍ ꓐꓰ ꓕꓲ ꓡꓳ ꓒꓱˍ ꓢꓴ ꓥꓳ꓿ 45 ꓒꓲ-ꓡꓲ ꓠꓬ ꓠ-ꓕ-ꓠꓰ ꓔꓯ ꓧꓪ ꓟꓶ ꓢꓲ꓾ ꓟꓳ-ꓫꓲ ꓡꓰ ꓙꓵꓽ ꓗ ꓕꓳ ꓶ ꓗꓪ ꓐꓳ ꓔ ꓟ ꓐꓰ꓾ ꓟꓷꓽ ꓠꓷꓹ ꓝ ꓢꓴ ꓕꓳ ꓶ ꓗꓪ ꓐꓳ ꓔ ꓟ꓾ ꓬꓳ-ꓢꓷ ꓬꓲ ꓮ ꓐꓲ꓾ ꓠ-ꓢ-ꓡꓱ ꓢꓴ ꓬꓰ-ꓢꓴ ꓔꓯ ꓥꓪ ꓠꓴꓽ ꓧꓪ ꓟꓶ ꓡꓰꓳ꓾ ꓐꓯˍ ꓡꓳ꓿ 46 ꓠ-ꓕ-ꓠꓰ ꓡꓰ ꓬꓲ ꓔꓯ꓾ ꓠ-ꓢ-ꓡꓱ ꓗꓪ ꓐꓰ ꓙꓲꓻˍ ꓟ ꓮꓸ ꓫꓵ ꓓꓳ ꓡ ꓐ ꓡ ꓢꓰꓽ꓾ ꓐꓯˍ ꓡꓳ꓿ ꓖꓳ ꓕꓯ ꓒꓲ-ꓡꓲ ꓡꓰ ꓬꓲ ꓔꓯ꓾ ꓡꓳꓸ ꓠꓬꓲ ꓡꓯ ꓟꓴ꓾ ꓐꓯ ꓖꓶˍ ꓡꓳ꓿ 47 ꓠ-ꓕ-ꓠꓰ ꓬꓲ ꓔꓯ ꓡꓻˍ ꓟ ꓔꓯ ꓬꓰ-ꓢꓴ ꓟꓳ ꓗꓷ ꓠꓬ ꓬꓲ ꓔꓯ ꓖꓴ ꓢꓲ꓾ ꓠꓬꓲ ꓠꓹ꓾ ꓖꓳꓼ ꓠꓲꓹ ꓟꓽ ꓙꓳ ꓟ ꓬꓲ-ꓢꓷ-ꓡꓰ ꓡ ꓞꓳ ꓚꓵꓺ ꓕꓲ ꓣꓳ꓾ ꓐꓯˍ ꓡꓳ꓿ 48 ꓠ-ꓕ-ꓠꓰ ꓡꓰ ꓬꓲ ꓔꓯ꓾ ꓠꓴ ꓮ ꓡꓲ ꓐꓰ ꓥꓪ ꓔꓯ ꓢꓷˍ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓰ-ꓢꓴ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓒꓲ-ꓡꓲ ꓠꓴ ꓔꓯ ꓟꓽ ꓘꓴ ꓢꓰꓽ ꓕꓯ꓾ ꓠꓴ ꓠꓬ ꓘꓶꓽ ꓢꓶꓽ ꓜꓲ ꓠꓯꓸ ꓘꓪ ꓔꓬ ꓕꓯˍ ꓡꓰ ꓠꓴ ꓔꓯ ꓥꓪ ꓟꓳꓻ ꓗꓷꓳ꓾ ꓐꓯ ꓖꓶˍ ꓡꓳ꓿ 49 ꓠ-ꓕ-ꓠꓰ ꓡꓰ ꓟꓸ ꓒꓽꓳ꓾ ꓠꓴ ꓠꓽ ꓪꓴ-ꓢ ꓮ ꓐꓲ꓾ ꓬꓲ-ꓢꓷ-ꓡꓰ ꓪ ꓔꓲ ꓥ ꓡꓳ꓾ ꓐꓯˍ ꓡꓳ꓿ 50 ꓬꓰ-ꓢꓴ ꓬꓲ ꓔꓯ꓾ ꓘꓶꓽ ꓢꓶ ꓜꓲ ꓠꓯꓸ ꓘꓪ ꓔꓬ ꓕꓯˍ ꓡꓰ ꓠꓴ ꓔꓯ ꓥꓪ ꓟꓳꓻ ꓗꓷꓳ꓾ ꓐꓯˍ ꓟ ꓗꓪ ꓐꓰ ꓠꓴ ꓙꓵꓻˍ ꓡ? ꓕꓱ ꓟ ꓕꓯꓽ ꓢꓲ ꓪꓴꓽˍ ꓡꓳ ꓫꓵ ꓠꓴ ꓟꓳˍ ꓢꓰꓽ ꓥꓳ꓾ ꓐꓯ ꓖꓶˍ ꓡꓳ꓿ 51 ꓝꓮꓲ ꓬꓰ-ꓢꓴ ꓡꓰ꓾ ꓥꓪ ꓔꓱ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓟꓴꓽ ꓗꓪ ꓒꓴ ꓡ ꓟ ꓐꓰ ꓪꓴ-ꓢ ꓬꓲ ꓝꓲ ꓓꓴ ꓐꓴ ꓠꓬ꓾ ꓡ-ꓞꓳ-ꓮ-ꓐꓲ ꓕꓯꓽ ꓢꓲ ꓗꓪ ꓓꓯ ꓓꓯ ꓬꓯꓼ ꓬꓯꓼ ꓬꓰ ꓔꓬ ꓟ ꓔꓯ ꓠꓴ ꓪꓽ ꓟꓳˍ ꓥꓳ꓾ ꓐꓯˍ ꓡꓳ꓿

ꓬꓳ-ꓦ 2

1 ꓢ ꓠꓬꓲ ꓕꓲ ꓠꓬꓲ ꓗꓪ꓾ ꓖ-ꓡꓲ-ꓡꓲ ꓟꓵꓽ ꓘꓹ-ꓠ ꓘꓹ ꓗꓪ꓾ ꓤ ꓟꓶꓻ ꓝꓱꓺ ꓑꓮꓲ ꓕꓲ ꓟ ꓙꓳˍ ꓡꓳ꓿ ꓬꓰ-ꓢꓴ ꓬꓲ ꓟꓹ ꓟˍ ꓟꓲ ꓖꓳ ꓗꓪ ꓔꓬ ꓡꓳ꓿ 2 ꓤ ꓟꓶꓻ ꓝꓱꓺ ꓑꓮꓲ ꓗꓪ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓔꓯˍ ꓟꓲ ꓘꓴ ꓔ ꓡꓳ꓿ 3 ꓖꓳ ꓡꓱ ꓢꓲ ꓛꓱꓼ ꓡꓱꓼ ꓙꓵꓻ ꓓꓳ ꓖꓴ ꓡꓰ ꓕꓯ꓾ ꓬꓰ-ꓢꓴ ꓬꓲ ꓟꓹ ꓟ ꓡꓰ ꓬꓲ ꓔꓯ꓾ ꓬꓲ ꓪꓽ ꓛꓱꓼ ꓡꓱ ꓙꓵꓻ ꓟꓽ ꓙꓳ ꓡꓰꓳ꓾ ꓐꓯ ꓖꓶˍ ꓡꓳ꓿ 4 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓤ ꓟꓶ ꓤꓽꓳ꓾ ꓖꓳ ꓟ ꓠꓴˍ ꓐꓰ ꓮꓸ ꓫꓵ ꓗꓴꓸ ꓙꓲ ꓙꓳˍ ꓡ? ꓥꓪ ꓙꓵꓹ ꓟꓽ ꓛꓲ ꓡ ꓢꓰ꓾ ꓐꓯˍ ꓡꓳ꓿ 5 ꓬꓲ ꓟꓹ ꓟ ꓡꓰ ꓣꓱꓽ ꓢꓴ ꓟꓴ ꓢꓴ ꓐꓴ ꓔꓯ꓾ ꓬꓲ ꓡꓰ ꓠꓴ ꓪꓽ ꓔꓯ ꓮ ꓡꓲ ꓐꓯ ꓖꓶ ꓡ ꓠꓬ ꓖꓳ ꓡꓱ ꓬꓰ꓾ ꓐꓯ ꓖꓶˍ ꓡꓳ꓿ 6 ꓬꓴ-ꓔ ꓡ ꓞꓳ ꓞꓲꓽ ꓟ ꓡꓯꓹ ꓟ ꓗꓺ ꓫꓵ ꓛꓳˍ ꓕꓯ ꓣꓱꓽˍ ꓟ ꓬꓲꓻ ꓪꓴ ꓖꓳ ꓕꓲ ꓫꓵꓽ ꓛꓳꓼ ꓟ ꓖꓳ ꓗꓪ ꓗꓶ ꓔꓸ ꓡꓳ꓿ ꓬꓲꓻ ꓪꓴ ꓕꓲ ꓟ ꓗꓪ ꓠꓬ ꓠꓬꓲꓽ ꓢ ꓡꓳꓻ ꓗꓶ ꓓꓲˍ ꓡꓳ꓿ 7 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓬꓲꓻ ꓪꓴ ꓖꓳ ꓟ ꓗꓪ ꓬꓲꓻ ꓙꓬ ꓧꓳꓽ ꓐꓲ ꓡꓰ ꓝꓲ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲꓻ ꓙꓬ ꓧꓳꓽ ꓐꓲ ꓡꓰ ꓝꓲˍ ꓡꓳ꓿ 8 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓮ ꓟꓶ ꓠꓬ ꓱꓹ ꓢꓲ ꓑꓮꓲꓽ ꓙꓵꓽ ꓒ ꓔꓯ ꓔꓯꓹ ꓖꓶ ꓬꓰ꓾ ꓐꓯˍ ꓕꓯ꓾ ꓬꓲ ꓪꓽ ꓖꓳ ꓡꓱ ꓬꓰˍ ꓡꓳ꓿ 9 ꓛꓱꓼ ꓡꓱ ꓙꓵꓻ ꓒꓬꓱꓼ ꓡ ꓗꓷ ꓟ ꓬꓲꓻ ꓙꓬ ꓖꓳ ꓟ ꓔꓯ ꓑꓮꓲꓽ ꓙꓵꓽ ꓒ ꓡꓰ ꓢꓳꓽ ꓠꓬꓲˍ ꓟꓲ꓾ ꓮ ꓡꓲ ꓗꓪ ꓐꓰ ꓧꓪ ꓔꓸ ꓟ ꓬꓲ ꓟꓽ ꓢꓷ꓿ (ꓖꓳ ꓡꓱ ꓥ ꓟꓲ ꓬꓲꓻ ꓙꓬ ꓱꓹ ꓢꓴ꓾ ꓣꓱꓽ ꓙ ꓢꓴ ꓐꓴ ꓠꓽ ꓢꓷˍ ꓡꓳ꓿) ꓖꓳ ꓕꓯ ꓑꓮꓲ ꓙꓵꓽ ꓒ ꓠꓬ ꓟꓯꓸ ꓡꓯꓸ ꓒ ꓔꓯ ꓘꓴꓻ ꓔꓯꓹ ꓡ ꓢꓲ꓾ 10 ꓮꓽ ꓟ ꓥ ꓟꓲ ꓙꓲꓻˍ ꓟ ꓛꓱꓼ ꓡꓱꓼ ꓙꓵꓻ ꓧꓶꓸ ꓕꓯ ꓑꓶ ꓖꓶ ꓓꓳˍ ꓡꓳ꓿ ꓙꓲˍ ꓟ ꓛꓱꓼ ꓡꓱ ꓙꓵꓻ ꓓꓳ ꓐꓳ ꓡꓰ ꓕꓯ ꓢꓲꓸˍ ꓡꓰꓽ ꓖꓳꓻ ꓘꓶꓸ ꓟꓽ ꓙꓲ ꓟ ꓑꓶ ꓖꓶ ꓓꓳˍ ꓡꓳ꓿ ꓠꓴ ꓠꓽ ꓙꓲˍ ꓟ ꓛꓱꓼ ꓡꓱ ꓙꓵꓻ ꓔꓯ ꓮ ꓟꓶ ꓗꓪ ꓛꓲ ꓗꓶ ꓔ ꓐꓷ꓾ ꓐꓯˍ ꓡꓳ꓿ 11 ꓬꓰ-ꓢꓴ ꓡꓰ ꓢꓷꓸ ꓡꓰ ꓓꓴ ꓬꓰ ꓪꓴꓸ ꓔꓴˍ ꓟ ꓕꓱ ꓟ ꓠꓬ꓾ ꓖ-ꓡꓲ-ꓡꓲ ꓟꓵ ꓘꓹ-ꓠ ꓘꓹ ꓗꓪ ꓥ ꓢꓲ꓾ ꓬꓲ ꓟꓬꓱ ꓓꓳꓽ ꓟꓳꓸ ꓖꓶˍ ꓟ ꓗꓪ ꓐꓰ꓾ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓔꓯ ꓙꓵꓻˍ ꓡꓳ꓿ 12 ꓖꓳ ꓗꓸ ꓠꓯꓸ ꓬꓰ-ꓢꓴˍ ꓐꓰ ꓬꓲ ꓟꓹ ꓟ ꓐꓰ ꓬꓲ ꓠꓬꓲ ꓤ ꓐꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ꓾ ꓘ-ꓒꓱ-ꓠꓴ ꓗꓪ ꓬꓯꓼ ꓙꓰˍ ꓡꓳ꓿ ꓬꓲ ꓪꓽ ꓠꓬ ꓖꓳ ꓗꓪ ꓟꓶ ꓤ ꓟꓽ ꓔꓬ꓿ 13 ꓖꓳ ꓕꓯ ꓬꓴ-ꓔ ꓡ ꓞꓳ ꓦꓲ-ꓘꓳ-ꓑꓮꓲ ꓠꓶꓽ ꓡ ꓠꓬꓲ꓾ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰˍ ꓡꓳ꓿ 14 ꓢꓲꓽ ꓫꓬ ꓦꓲ ꓗꓪ꓾ ꓮꓸ ꓠꓬꓲꓽˍ ꓐꓰ ꓮ ꓣꓳˍ ꓐꓰ ꓓꓱꓽ ꓑꓶ ꓪꓴꓽ ꓢꓴˍ ꓐꓰ꓾ ꓒꓴꓻ ꓑ ꓢꓴ ꓠꓬꓲꓸ ꓠꓸ ꓔꓬ ꓟ ꓔꓯ ꓬꓲ ꓟꓳˍ ꓡꓳ꓿ 15 ꓬꓲ ꓠꓬ ꓦꓲ ꓚ ꓡꓰ ꓒꓲꓹ ꓓꓴ ꓕꓲ ꓟ ꓫꓬꓹ ꓢꓲ꓾ ꓬꓲ ꓪꓽ ꓮꓽ ꓙꓵˍ ꓐꓰ꓾ ꓮ ꓣꓳˍ ꓐꓰ ꓮꓸ ꓠꓬꓲꓽ ꓮꓽ ꓙꓵ ꓔꓯ ꓢꓲꓽ ꓫꓬ ꓦꓲ ꓗꓪ ꓐꓰ ꓖꓼ ꓓꓳ ꓗꓷˍ ꓡꓳ꓿ ꓒꓴꓻ ꓑ ꓢꓴ ꓒꓴˍ ꓟꓲ ꓣꓴ ꓧꓳꓸ ꓗꓷ ꓢꓲ꓾ ꓬꓲ ꓪꓽ ꓢꓽ ꓡ ꓥ ꓟꓲ ꓥꓸ ꓦ ꓗꓷˍ ꓡꓳ꓿ 16 ꓓꓱꓽ ꓑꓶ ꓪꓴꓽ ꓢꓴ ꓐꓴ ꓔꓯˍ ꓟꓲ ꓬꓲ ꓡꓰ꓾ ꓕꓱ ꓡꓱ ꓫꓵꓽ ꓕꓱ ꓗꓪ ꓐꓰ ꓔꓯꓹ ꓙꓰ꓿ ꓠꓴ ꓪꓽ ꓠꓬ ꓮ ꓡꓲ ꓗꓹ ꓠꓬꓲ ꓥꓪ ꓐꓹ ꓐ ꓦꓲ ꓔꓯ ꓶꓻ ꓡꓯꓼ ꓟꓴ ꓖꓴ ꓒꓬꓱꓼ ꓡꓰ ꓝꓲˍ ꓡ?꓾ ꓐꓯˍ ꓡꓳ꓿ 17 ꓖꓳ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓕꓳ ꓶ ꓗꓪ꓾ ꓠꓴ ꓦꓲ ꓐꓱ ꓶ ꓠꓲꓹ ꓟ ꓡꓱꓻˍ ꓟ ꓡꓰ ꓥꓪ ꓔꓯ ꓖꓴꓻ ꓓꓵꓽ ꓡꓰˍ ꓥꓳ꓾ ꓐꓰ ꓐꓳ ꓔ ꓟ ꓔꓯ ꓓꓵꓽ ꓙꓽ ꓛꓲ ꓡ ꓡꓳ꓿ 18 ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓐꓴ ꓡꓰ ꓬꓲ ꓔꓯ꓾ ꓠꓴ ꓕꓱ ꓟꓬ ꓙꓰꓽ ꓬꓰ ꓠꓹ ꓟ ꓙꓵꓽ ꓪ ꓙꓳˍ ꓟ ꓥꓪ ꓠꓴꓽ ꓢꓷ ꓡꓰ ꓠꓹ ꓟ꓾ ꓮ ꓡꓲ ꓡꓳ ꓫꓵꓽ ꓓꓵꓽ ꓙꓽ ꓟꓶ ꓓꓴ ꓟꓬꓱꓽ ꓬꓰ ꓟꓳꓸ ꓖꓶˍ ꓐꓯˍ ꓡ? ꓐꓰ ꓠ ꓠꓬꓲˍ ꓡꓳ꓿ 19 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓢꓲꓽ ꓫꓬ ꓦꓲ ꓕꓱ ꓟ ꓒꓬꓹ ꓗꓷ ꓢꓲ꓾ ꓢ ꓠꓬꓲ ꓟ ꓠꓯꓸꓼ ꓗꓪ ꓥꓪ ꓫꓬꓹ ꓔꓳꓹ ꓗꓷˍ ꓥꓳ꓾ ꓐꓯ ꓖꓶˍ ꓡꓳ꓿ 20 ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓡꓰ꓾ ꓢꓲꓽ ꓫꓬ ꓦꓲ ꓕꓱ ꓟ ꓠꓬ ꓡꓲ ꓞꓲ ꓛꓳꓼ ꓘꓳꓼ ꓫꓬꓹ ꓗꓷ ꓕꓯ ꓢꓲꓸ ꓫꓬꓹ ꓓꓳ ꓡꓰ ꓟ ꓥ ꓡꓳ꓿ ꓠꓴ ꓠꓽ ꓮ ꓡꓲ ꓐꓰ ꓢ ꓠꓬꓲ ꓟ ꓠꓯꓸꓼ ꓗꓪ ꓫꓬꓹ ꓔꓳꓹ ꓗꓷˍ ꓐꓯˍ ꓡ?꓾ ꓐꓯˍ ꓡꓳ꓿ 21 ꓖꓳ ꓡꓱ ꓥ ꓟꓲ ꓬꓲ ꓐꓯˍ ꓟ ꓢꓲꓽ ꓫꓬ ꓦꓲ ꓠꓬ ꓬꓲ ꓖꓳ ꓓꓱꓽ ꓔꓯ ꓐꓯˍ ꓟ ꓥ ꓡꓳ꓿ 22 ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲˍ ꓕꓯ꓾ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓲ ꓐꓯ ꓘꓶꓽ ꓕꓱ ꓟ ꓔꓯ ꓓꓵꓽ ꓙꓽ ꓛꓲ ꓡ ꓢꓲ꓾ ꓢꓲꓽ ꓫꓬ ꓕꓳ ꓶˍ ꓐꓰ ꓬꓰ-ꓢꓴ ꓐꓯ ꓗꓷ ꓟ ꓔꓯ ꓬꓲ ꓪꓽ ꓙꓵꓻˍ ꓡꓳ꓿ 23 ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓦꓲ-ꓘꓳ-ꓑꓮꓲ ꓬꓰ ꓔꓬ ꓕꓯ꓾ ꓡ ꓞꓳ ꓮꓽ ꓟꓬꓹ ꓠꓬ ꓬꓲ ꓬꓰˍ ꓟ ꓢꓷꓸ ꓡꓰ ꓓꓴ ꓔꓯ ꓟꓳˍ ꓠꓬꓲ ꓬꓲ ꓔꓯ ꓙꓵˍ ꓡꓳ꓿ 24 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓬ ꓞꓳ ꓤ ꓮꓽ ꓙꓵ ꓔꓯ ꓢꓷˍ ꓠꓬꓲ꓾ ꓬꓲ ꓚꓲꓸ ꓛꓬ ꓬꓲ ꓪꓽ ꓔꓯ ꓡꓯꓼ ꓙꓱ ꓠꓹ ꓟ ꓦ ꓡꓱ ꓟꓽ ꓐꓳ꓿ 25 ꓞꓳ ꓤ ꓠꓲꓹ ꓟ ꓠꓯꓸꓼ ꓗꓪ ꓮꓸ ꓫꓵ ꓓꓯꓹ ꓟ ꓬꓲ ꓢꓷˍ ꓠꓬꓲ꓾ ꓞꓳ ꓤ ꓡꓰ ꓬꓲ ꓔꓯ ꓐꓯ ꓖꓶ ꓟꓽ ꓛꓵ꓿

ꓬꓳ-ꓦ 3

1 ꓒ-ꓡꓲ-ꓢꓷ ꓡ ꓞꓳ꓾ ꓠꓲ-ꓘꓳ-ꓓꓲ-ꓟꓴ ꓟꓬꓱ ꓔ ꓟ ꓬꓴ-ꓔ ꓡ ꓞꓳ ꓔꓯ ꓙꓵꓽ ꓢꓴ ꓗꓪ ꓟ ꓕꓲ ꓣꓳ ꓙꓳˍ ꓡꓳ꓿ 2 ꓖꓳ ꓕꓲ ꓣꓳ ꓠꓬ ꓢ ꓘꓪ ꓕꓯ ꓬꓰ-ꓢꓴ ꓔꓯ ꓡ ꓢꓲ꓾ ꓟꓸ ꓒꓽꓳ꓾ ꓠꓴ ꓠꓽ ꓪꓴ-ꓢ ꓗꓪ ꓐꓰ ꓡꓻ ꓟ ꓟꓸ ꓒ ꓕꓲ ꓣꓳ ꓥ ꓟ ꓥꓪ ꓠꓴꓽ ꓢꓷˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓬꓰˍ ꓟ ꓢꓷꓸ ꓡꓰ ꓓꓴ ꓕꓱ ꓟꓬ ꓙꓰꓽ ꓟ꓾ ꓪꓴ-ꓢ ꓬꓲˍ ꓐꓰ ꓟꓽ ꓔꓬ ꓕꓯ ꓠꓽ ꓮ ꓟˍ ꓟꓲ ꓬꓰ ꓟꓽ ꓐ ꓡ꓾ ꓐꓯˍ ꓡꓳ꓿ 3 ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓔꓱꓹ ꓔꓱꓹꓼ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓫꓬꓹ ꓦꓵ ꓔ ꓢꓴꓓ ꓟꓽ ꓥ ꓠꓬ꓾ ꓮ ꓟˍ ꓟꓲ ꓪꓴ-ꓢ ꓗꓴꓷꓼ ꓔꓯ ꓟꓳꓻ ꓟꓽ ꓓ꓾ ꓐꓯ ꓖꓶˍ ꓡꓳ꓿ 4 ꓠꓲ-ꓘꓳ-ꓓꓲ-ꓟꓴ ꓡꓰ ꓬꓲ ꓔꓯ꓾ ꓡ ꓞꓳ ꓕꓲ ꓣꓳ ꓟꓳꓽ ꓡꓰ ꓗꓸ ꓠꓯꓸ ꓮ ꓡꓲ ꓐꓰ ꓝꓮꓲ ꓦꓵꓻ ꓐ ꓡ ꓓ ꓢꓰ꓿ ꓬꓲ ꓟꓹ ꓟ ꓤ ꓘꓶꓻ ꓗꓪ ꓝꓮꓲ ꓕꓲ ꓧꓪ ꓓꓵꓽ ꓡꓰ ꓢꓲ ꓦꓵ ꓐ ꓡ ꓢꓰ ꓡ? ꓐꓰ ꓠ ꓠꓬꓲˍ ꓡꓳ꓿ 5 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓔꓱꓹ ꓔꓱꓹꓼ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓮꓽ ꓟ ꓥ ꓟꓲ ꓬꓲꓻ ꓙꓬˍ ꓐꓰ ꓦꓻ ꓡꓰ ꓦꓵ ꓔ ꓟ ꓟꓽ ꓥ ꓠꓬ ꓪꓴ-ꓢ ꓗꓴꓷ ꓗꓪ ꓓꓵꓽ ꓡꓰ ꓟꓽ ꓓ꓿ 6 ꓧꓪꓽ ꓡꓰ ꓦꓵ ꓔ ꓟ ꓠꓬ ꓧꓪꓽ ꓥ ꓡꓳ꓾ ꓦ ꓡꓰ ꓦꓵ ꓔ ꓟ ꓠꓽ ꓦ ꓥ ꓡꓳ꓿ 7 ꓥꓪ ꓡꓰ ꓠꓴ ꓔꓯ꓾ ꓠꓴ ꓠꓽ ꓫꓬꓹ ꓦꓵꓻ ꓠ ꓗꓹ ꓢꓰꓽ ꓡꓳ꓾ ꓐꓰ ꓐꓯ ꓖꓶˍ ꓟ ꓔꓯ ꓕꓽ ꓓꓵꓽ ꓙꓽ ꓟꓶꓻ꓿ 8 ꓟꓲꓽ ꓦꓲ ꓠꓬ ꓮ ꓡꓲ ꓗꓪ ꓙꓱꓼ ꓠꓲꓹ ꓫꓵˍ ꓠꓬ ꓙꓱꓼˍ ꓡꓳ꓿ ꓬꓲ ꓢꓯꓼ ꓠꓴ ꓑ ꓙꓽˍ ꓟꓲ꓾ ꓮ ꓡꓲ ꓗꓪ ꓐꓰ ꓡꓻˍ ꓟ ꓐꓰ ꓮ ꓡꓲ ꓗꓪ ꓙꓰˍ ꓟ ꓠꓴ ꓟꓽ ꓢꓷ꓿ ꓦ ꓡꓰ ꓦꓵ ꓔ ꓢꓴ ꓥ ꓕ ꓑꓳ ꓠꓬ ꓖꓳ ꓡꓱ ꓗꓹ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ 9 ꓠꓲ-ꓘꓳ-ꓓꓲ-ꓟꓴ ꓡꓰ ꓬꓰ-ꓢꓴ ꓔꓯ꓾ ꓕꓱ ꓟꓬ ꓙꓰꓽ ꓠꓬ ꓮ ꓡꓲ ꓒꓬꓱꓼ ꓡ ꓓ ꓢꓰ꓾ ꓐꓰ ꓠ ꓠꓬꓲˍ ꓕꓯ꓾ 10 ꓬꓰ-ꓢꓴ ꓡꓰ꓾ ꓠꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓟꓸ ꓒ ꓥ ꓢꓲ ꓕꓱ ꓟꓬ ꓙꓰꓽ ꓟ ꓟꓽ ꓙ ꓜꓲꓼ ꓢꓰ ꓡ? 11 ꓥꓪ ꓔꓱꓹ ꓔꓱꓸꓼ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓠꓴꓽ ꓢꓷˍ ꓟ ꓥꓪ ꓠꓴꓽ ꓫꓸ ꓕꓱ ꓢꓲ꓾ ꓥꓪ ꓠꓴꓽ ꓟꓳ ꓠꓬꓲˍ ꓟ ꓔꓯ ꓥꓪ ꓠꓴꓽ ꓢꓷꓸ ꓙ ꓟꓳ ꓙˍ ꓟꓲ꓾ ꓥꓪ ꓠꓴꓽ ꓢꓷꓸ ꓙ ꓟꓳ ꓙˍ ꓟ ꓔꓯ ꓠꓴ ꓪꓽ ꓟꓽ ꓘꓳ ꓣꓴ꓿ 12 ꓥꓪ ꓡꓰ ꓠꓴ ꓪꓽ ꓔꓯ ꓟꓲ ꓠꓯ ꓗꓪ ꓟ ꓫꓵꓽ ꓪꓴꓻ ꓐꓯ ꓖꓶˍ ꓕꓯ ꓠꓴ ꓪꓽ ꓟꓽ ꓙꓵꓻ ꓠꓬ꓾ ꓟꓴꓽ ꓗꓪ ꓗꓪ ꓟ ꓫꓵꓽ ꓪꓴ ꓐꓯ ꓖꓶ ꓐꓷˍ ꓟꓲ ꓠꓴ ꓪꓽ ꓮ ꓡꓲ ꓙꓵꓻ ꓗꓴꓸ ꓢꓰ꓿ 13 ꓟꓴꓽ ꓗꓪ ꓗꓪ ꓔꓬ ꓢꓲ꓾ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓢꓴ ꓡ-ꓞꓳ-ꓮ-ꓐꓲ ꓟꓽ ꓥ ꓠꓬ꓾ ꓟꓴꓽ ꓗꓪ ꓕꓯ ꓢꓲ ꓗꓪ ꓮ ꓟˍ ꓟꓲ ꓟꓽ ꓓꓯ ꓙꓰ ꓠꓬꓲ꓿ 14 - 15 ꓬꓲ ꓔꓯ ꓙꓵꓻ ꓢꓴ ꓮꓽ ꓟ ꓥ ꓟꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠ ꓟ꓾ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓟꓳ-ꓫꓲ ꓡꓰ ꓩꓴ ꓔꓯ ꓔꓳꓹ ꓔꓴ ꓗꓷ ꓟ ꓡꓰ ꓐꓰ꓾ ꓡ-ꓞꓳ-ꓮ-ꓐꓲ ꓔꓯˍ ꓟꓲ ꓔꓳꓹ ꓔꓴ ꓗꓷ ꓠ ꓗꓹ ꓥꓳ꓿ 16 ꓮꓽ ꓟ ꓥ ꓟꓲ ꓬꓲ ꓔꓯ ꓙꓵꓻˍ ꓠꓬ ꓟꓽ ꓟꓶꓽ ꓡꓰ ꓢꓲ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ꓾ ꓪꓴ-ꓢ ꓠꓬ ꓬꓲ ꓤ ꓔꓲꓸ ꓖꓶ ꓗꓷ ꓗꓪ ꓛꓲ꓾ ꓟꓲ ꓠꓯ ꓞꓳ ꓤ ꓔꓯ ꓠꓲꓹ ꓠꓵˍ ꓡꓳ꓿ 17 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓬꓲ ꓮ ꓐꓲ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡ ꓟ ꓠꓬ꓾ ꓟꓲ ꓠꓯ ꓞꓳ ꓤ ꓔꓯ ꓐꓯ ꓟꓴ ꓘꓶꓽ ꓠꓹ ꓟ ꓟꓽ ꓥ꓿ ꓬꓲ ꓗꓪ ꓐꓰ ꓟꓲ ꓠꓯ ꓞꓳ ꓤ ꓢꓯꓼ ꓟꓬ ꓝꓸ ꓟꓶ ꓡꓰ ꓠꓹ ꓟ ꓥ ꓡꓳ꓿ 18 ꓬꓲ ꓔꓯ ꓙꓵꓻ ꓢꓴ ꓔꓯ ꓠꓬ ꓐꓯ ꓟꓴ ꓟꓽ ꓘꓶꓽ꓿ ꓟꓽ ꓙꓵꓻ ꓢꓴ ꓔꓯ ꓠꓽ꓾ ꓪꓴ-ꓢ ꓤ ꓔꓲꓸ ꓔꓯ ꓟꓽ ꓙꓵꓻ ꓠꓬꓲ꓾ ꓮ ꓟꓶˍ ꓡꓰ ꓐꓯ ꓟꓴ ꓘꓶꓽ ꓗꓷꓳ꓿ 19 ꓐꓯ ꓟꓴ ꓠꓬ ꓕꓱ ꓟ ꓥ ꓡꓳ꓾ ꓠꓬꓲ ꓟꓳ ꓓꓴ ꓠꓬ ꓟꓲ ꓠꓯ ꓗꓪ ꓡ ꓗꓷꓳ꓿ ꓖꓳ ꓡꓱ ꓥ ꓟꓲ ꓞꓳ ꓤ ꓠꓬ ꓥꓶˍ ꓟ ꓟꓬꓱꓽ ꓬꓰ ꓢꓴ ꓥ ꓠꓬꓲ꓾ ꓠꓬꓲ ꓟꓳ ꓓꓴ ꓔꓯ ꓠꓵꓻˍ ꓟ ꓢꓶꓸ ꓟꓽ ꓞꓲ ꓠꓯ ꓞꓲꓹ ꓟ ꓔꓯ ꓠꓵˍ ꓡꓳ꓿ 20 ꓮ ꓡꓲꓳ ꓐꓯ ꓠꓬ ꓥꓶˍ ꓟ ꓬꓰ ꓢꓴ ꓮꓽ ꓟ ꓥ ꓟꓲ ꓠꓬꓲ ꓟꓳ ꓓꓴ ꓔꓯ ꓠꓲꓹ ꓜꓳ ꓢꓲ꓾ ꓬꓲ ꓥꓶˍ ꓟ ꓬꓰˍ ꓟ ꓔꓯ ꓖꓴ ꓟꓳꓸ ꓖꓶ ꓡ ꓟ ꓔꓯ ꓗꓳꓺ ꓚꓱ ꓠꓬꓲ꓾ ꓠꓬꓲ ꓟꓳ ꓓꓴ ꓔꓯ ꓟꓽ ꓡ꓿ 21 ꓔꓱꓹˍ ꓟ ꓬꓰ ꓢꓴ ꓠꓽ ꓬꓲ ꓬꓰˍ ꓟ ꓟꓬꓱꓽ ꓠꓬ ꓪꓴ-ꓢ ꓔꓯ ꓒꓵꓽ ꓛꓳˍ ꓟ ꓗꓪ ꓐꓰ ꓥ ꓟ ꓫꓬꓽ ꓫꓬꓽˍ ꓡꓰ ꓟꓳꓸ ꓖꓶ ꓪ ꓠꓹ ꓟ꓾ ꓠꓬꓲ ꓟꓳ ꓓꓴ ꓔꓯ ꓡ ꓡꓳ꓾ ꓐꓯˍ ꓡꓳ꓿ 22 ꓕꓱ ꓟꓬ ꓫꓵꓽ ꓗꓸ ꓠꓯꓸ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓴ-ꓔ ꓟꓵꓽ ꓗꓪ ꓓꓵꓽ ꓙꓰ ꓢꓲ꓾ ꓬꓰ-ꓢꓴ ꓠꓬ ꓬꓲ ꓪꓽˍ ꓐꓰ ꓕꓲ ꓝꓲꓸ ꓔꓬ ꓢꓲ ꓠꓬꓲ ꓖꓳ ꓓꓱ ꓔꓲꓹ ꓖꓶˍ ꓡꓳ꓿ 23 ꓬꓳ-ꓦˍ ꓟꓲ ꓢ-ꓡꓲ-ꓟꓲ ꓡꓳ ꓒꓱ ꓒ ꓕꓲ ꓬꓲ-ꓠꓳꓽ ꓗꓪ ꓖꓳ ꓓꓱ ꓔꓲꓹ ꓖꓶ ꓔꓬ ꓡꓳ꓿ ꓮ ꓡꓲꓳ ꓐꓯ ꓠꓬ ꓖꓳ ꓗꓪ ꓬꓲꓻ ꓙꓬ ꓮꓽ ꓟꓬꓹ ꓙꓳˍ ꓠꓬꓲ꓾ ꓑ ꓫꓬꓼ ꓐꓴ ꓠꓬ ꓖꓳ ꓓꓱ ꓔꓲꓹ ꓟꓶ ꓠꓹ ꓟ ꓬꓲ ꓔꓯ ꓡ ꓡꓳ꓿ 24 ꓕꓱ ꓟ ꓠꓬ ꓬꓳ-ꓦ ꓔꓯ ꓐꓱ ꓓꓴ ꓗꓪ ꓟꓽ ꓐꓱ ꓗꓷ ꓢꓰꓽ ꓕꓯ ꓥ ꓡꓳ꓿ 25 ꓖꓳ ꓕꓯ ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴ ꓠꓬ꓾ ꓞꓲꓽˍ ꓟ ꓡꓯꓹˍ ꓟ ꓗ ꓫꓵ ꓑꓶꓸ ꓓꓴ ꓬꓴ-ꓔ ꓡ ꓞꓳ ꓕꓲ ꓣꓳˍ ꓐꓰ ꓧꓳꓺ ꓡꓯꓽ ꓘꓳ ꓔꓴ ꓡ ꓡꓳ꓿ 26 ꓬꓲ ꓪꓽ ꓠꓬ ꓬꓳ-ꓦ ꓔꓯ ꓡ ꓢꓲ꓾ ꓟꓸ ꓒꓽꓳ꓾ ꓬꓳ-ꓔ ꓬꓲꓽ ꓟ ꓖꓳ ꓐꓽ ꓢꓲ ꓗꓪ ꓠꓴˍ ꓐꓰ ꓔꓬ ꓗꓷ ꓢꓲ꓾ ꓠꓴ ꓡꓰ ꓬꓲ ꓐꓱ ꓶ ꓢꓷꓸ ꓙ ꓟꓳꓻ ꓙ ꓗꓷ ꓢꓴ ꓖꓳ ꓕꓲ ꓣꓳ ꓠꓬ ꓖꓳ ꓓꓱ ꓔꓲꓹ ꓖꓶ ꓔꓬ ꓠꓬꓲ꓾ ꓮꓽ ꓙꓵ ꓢꓴ ꓠꓬ ꓬꓲ ꓔꓬ ꓗꓪ ꓙꓰˍ ꓡꓳ꓾ ꓐꓯˍ ꓡꓳ꓿ 27 ꓬꓳ-ꓦ ꓡꓰ ꓒꓳꓹ ꓖꓶ ꓢꓲ꓾ ꓮꓽ ꓟˍ ꓟꓲ ꓟꓴꓽ ꓗꓪ ꓗꓪ ꓐꓰ ꓖꓶ ꓔ ꓟ ꓡꓰꓽ ꓟꓶ ꓓꓻ ꓡꓳ꓿ 28 ꓥꓪ ꓠꓬ ꓙꓲ-ꓢꓴ ꓖꓳ ꓟ ꓟꓽ ꓥ꓿ ꓥꓪ ꓠꓽ ꓬꓲ ꓟꓲꓽ ꓕꓯ ꓗꓪ ꓝꓲ ꓩꓴ ꓔ ꓢꓴ ꓥꓳ꓾ ꓐꓰ ꓥꓪ ꓐꓯˍ ꓟ ꓠꓴ ꓪꓽ ꓑ ꓙꓽ ꓗꓷ ꓠꓬꓲ꓾ ꓕꓱ ꓟ ꓐꓱ ꓶ ꓠꓴ ꓪꓽ ꓢꓷꓸ ꓙ ꓟꓳ ꓙ ꓐ ꓡ ꓡꓳ꓿ 29 ꓟꓯꓸ ꓡꓯꓸ ꓟ ꓠꓬ ꓟꓯꓸ ꓡꓯꓸ ꓒ ꓔꓯ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓟꓯꓸ ꓡꓯꓸ ꓒ ꓬꓲ ꓗꓪ ꓛꓳꓽ ꓠꓬ ꓦꓰꓼ ꓞ ꓢꓲ꓾ ꓟꓯꓸ ꓡꓯꓸ ꓒ ꓢꓯꓼ ꓑ ꓙꓽˍ ꓟ ꓗꓪ ꓐꓰ ꓮꓽ ꓘꓶ ꓗꓹ ꓛꓲˍ ꓡꓳ꓿ ꓖꓳ ꓟ ꓡꓰ ꓐꓰ ꓥꓪ ꓗꓹ ꓛꓲˍ ꓟ ꓐꓲ ꓡꓰꓳ꓿ 30 ꓬꓲ ꓠꓬ ꓪꓴꓽ ꓡ ꓠ ꓗꓹ ꓡꓳ꓿ ꓥꓪ ꓠꓽ ꓣꓳꓺ ꓡꓰ ꓠ ꓗꓹ ꓡꓳ꓿ 31 ꓕꓯꓽ ꓢꓲ ꓗꓪ ꓐꓰ ꓡꓻ ꓢꓴ ꓠꓬ ꓮꓽ ꓙꓵ ꓕꓯ ꓢꓲ ꓗꓪ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓐꓰ ꓡꓻ ꓢꓴ ꓠꓽ ꓟꓲ ꓠꓯ ꓗꓪ ꓟ ꓥ ꓢꓲ꓾ ꓬꓲ ꓫꓸ ꓕꓱˍ ꓟ ꓟꓲ ꓟꓲ ꓠꓯ ꓗꓪ ꓟ ꓥ ꓡꓳ꓿ ꓟꓴꓽ ꓗꓪ ꓗꓪ ꓐꓰ ꓡꓻ ꓢꓴ ꓠ꓾ ꓮꓽ ꓙꓵ ꓕꓯꓽ ꓢꓲ ꓗꓪ ꓟ ꓥꓳ꓿ 32 ꓖꓳ ꓡꓱ ꓢꓲ ꓬꓲ ꓟꓳꓻ ꓠꓬꓲˍ ꓟ ꓐꓰ ꓑ ꓙꓽ ꓠꓬꓲˍ ꓟ ꓔꓯ ꓬꓲ ꓢꓷꓸ ꓙ ꓟꓳ ꓙˍ ꓟꓲ ꓬꓲ ꓪꓽ ꓟꓽ ꓘꓳ ꓣꓴ꓿ 33 ꓖꓳ ꓡꓱ ꓥ ꓟꓲ ꓬꓲ ꓢꓷꓸ ꓙ ꓟꓳ ꓙˍ ꓟ ꓔꓯ ꓘꓳ ꓣꓴ ꓢꓴ ꓠꓬ꓾ ꓪꓴ-ꓢ ꓠꓽ ꓔꓱꓹˍ ꓟ ꓥ ꓟ ꓬꓲ ꓗꓸ ꓚꓵ ꓔꓳꓹ ꓠꓷꓼˍ ꓟ ꓥ ꓡꓳ꓿ 34 ꓪꓴ-ꓢ ꓡꓰ ꓝꓲ ꓩꓴ ꓔ ꓟ ꓖꓳ ꓕꓲ ꓣꓳ ꓔꓯ ꓠꓬ ꓙꓳꓻ ꓖꓴ ꓟꓽ ꓓ ꓓ ꓢꓲ-ꓫꓬ-ꓟ-ꓦ ꓖꓶ ꓔ ꓠꓬꓲ꓾ ꓬꓲ ꓠꓽ ꓪꓴ-ꓢ ꓐꓯ ꓘꓶ ꓫꓸ ꓕꓱˍ ꓡꓳ꓿ 35 ꓐꓹ ꓐ ꓠꓬ ꓮ ꓐꓲ ꓔꓯ ꓠꓲꓹ ꓠꓵ ꓢꓲ꓾ ꓙꓳˍ ꓟ ꓥ ꓕ ꓑꓳ ꓬꓲ ꓔꓯ ꓡꓯꓼ ꓙꓱ ꓖꓶ ꓔ ꓡꓳ꓿ 36 ꓮ ꓐꓲ ꓔꓯ ꓙꓵꓻ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳˍ ꓡꓳ꓿ ꓮ ꓐꓲ ꓔꓯ ꓟꓽ ꓠꓻ ꓡꓳꓹ ꓢꓴ ꓠꓽ ꓢꓯꓼ ꓟꓬ ꓔꓯ ꓟꓳꓻ ꓟꓽ ꓓ꓿ ꓪꓴ-ꓢ ꓦꓶ ꓠꓲꓹ ꓠꓽ ꓬꓲ ꓕꓯ ꓢꓲ ꓗꓪ ꓚꓰꓹ ꓓꓻˍ ꓡꓳ꓾ ꓐꓯˍ ꓡꓳ꓿

ꓬꓳ-ꓦ 4

1 ꓬꓰ-ꓢꓴ ꓠꓬ ꓬꓳ-ꓦ ꓢꓶꓸ ꓟꓽ ꓞꓲ ꓛꓳꓽ ꓒꓯꓹ ꓧꓪ ꓟꓶ ꓢꓲ꓾ ꓬꓲ ꓪꓽ ꓔꓯ ꓖꓳ ꓓꓱ ꓔꓲꓹ ꓖꓶ ꓔꓬ ꓟ ꓒ-ꓡꓲ-ꓢꓷ ꓐꓴ ꓑ ꓙꓽ ꓗꓷꓳ꓾ ꓐꓰ ꓢꓲ ꓒ ꓢꓷꓸ ꓡꓰˍ ꓡꓳ꓿ 2 (ꓬꓰ-ꓢꓴ ꓬꓲ ꓚꓲꓸ ꓛꓬ ꓠꓽ ꓖꓳ ꓓꓱꓽ ꓟꓽ ꓔꓲꓹ ꓖꓶ꓿ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓔꓲꓹ ꓖꓶ ꓝꓲˍ ꓡꓳ꓿) 3 ꓖꓳ ꓕꓯ ꓬꓲ ꓠꓬ ꓬꓴ-ꓔꓹ ꓟꓵꓽ ꓗꓪ ꓐꓰ ꓓꓳ ꓙꓰ ꓢꓲ꓾ ꓝꓮꓲ ꓕꓲ ꓧꓪ ꓖ-ꓡꓲ-ꓡꓲ ꓗꓪ ꓓꓵꓽ ꓙꓰˍ ꓡꓳ꓿ 4 ꓬꓰ-ꓢꓴ ꓠꓬ ꓢ-ꓟ-ꓡꓲ ꓟꓵ ꓗꓪ ꓗꓳꓸ ꓙꓰ ꓠ ꓗꓹ ꓠꓬꓲ꓾ 5 ꓬꓲ ꓠꓬ ꓬ-ꓗꓴ ꓡꓰ ꓬꓲ ꓤ ꓬꓳ-ꓢꓷ ꓔꓯ ꓖꓶ ꓗꓷ ꓟ ꓦꓻ ꓟꓲ ꓖꓳ ꓕꓲ ꓡꓯꓼ ꓒ ꓕꓲ ꓗꓪ ꓟ꓾ ꓢꓲ-ꓛꓬ꓾ ꓟꓬꓱ ꓔ ꓟ ꓢ-ꓟ-ꓡꓲ ꓡꓳ ꓒꓱ ꓗꓪ ꓛꓲ ꓡ ꓡꓳ꓿ 6 ꓖꓳ ꓗꓪ ꓠꓬ ꓬ-ꓗꓴ ꓬꓲꓻ ꓙꓬ ꓘꓴꓻ ꓕꓲ ꓘꓴꓻ ꓙꓳˍ ꓡꓳ꓿ ꓬꓰ-ꓢꓴ ꓠꓬ ꓙ ꓖꓴ ꓫꓱꓽ ꓪꓴꓽ ꓧꓶ ꓠꓬꓲ꓾ ꓬꓲꓻ ꓙꓬ ꓘꓴꓻ ꓒ ꓕꓲ ꓗꓪ ꓠꓬꓲꓸ ꓠꓸˍ ꓡꓳ꓿ ꓖꓳ ꓕꓯ ꓮꓽ ꓡ ꓟꓳꓼ ꓡꓳ ꓥ ꓡꓳ꓿ 7 ꓢ-ꓟ-ꓡꓲ ꓤ ꓟꓶ ꓤ ꓕꓲ ꓣꓳ ꓠꓬ ꓬꓲꓻ ꓙꓬ ꓚꓵꓹˍ ꓐꓰ ꓡꓻ ꓕꓯ꓾ ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓔꓯ ꓬꓲꓻ ꓙꓬ ꓖꓶ ꓓꓳꓻ ꓡꓯ꓾ ꓐꓯ ꓖꓶˍ ꓡꓳ꓿ 8 (ꓖꓳ ꓕꓲ ꓝꓲꓸ ꓗꓪ꓾ ꓬꓲ ꓛꓳꓽ ꓒꓯꓹ ꓐꓴ ꓠꓽ ꓡꓳ ꓒꓱꓻ ꓗꓪ ꓜꓽ ꓓꓴ ꓪꓴꓻ ꓙꓰ ꓗꓷꓳ꓿) 9 ꓢ-ꓟ-ꓡꓲ ꓤ ꓟꓶ ꓤ ꓡꓰ ꓬꓰ-ꓢꓴ ꓔꓯ꓾ ꓠꓴ ꓠꓬ ꓬꓴ-ꓔ ꓡ ꓞꓳ ꓥ ꓢꓲ꓾ ꓮ ꓡꓲ ꓗꓷ ꓡꓰ ꓠꓬꓲ ꓢ-ꓟ-ꓡꓲ ꓤ ꓟꓶ ꓤ ꓥꓪ ꓔꓯ ꓬꓲꓻ ꓙꓬ ꓧꓪ ꓓꓳ ꓡꓻˍ ꓡ?꓾ ꓐꓯˍ ꓡꓳ꓿ (ꓮ ꓡꓲꓳ ꓐꓯˍ ꓠꓬ ꓬꓴ-ꓔ ꓡ ꓞꓳ ꓠꓬ ꓢ-ꓟ-ꓡꓲ ꓡ ꓞꓳˍ ꓐꓰ ꓙꓻ ꓡꓯꓽ ꓘꓳ ꓟꓽ ꓚꓰꓼ꓿) 10 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓪꓴ-ꓢ ꓡꓯꓼ ꓫꓴ ꓐꓰ꓾ ꓥꓪ ꓔꓯ ꓬꓲꓻ ꓙꓬ ꓖꓶ ꓓꓳ ꓡꓯ꓾ ꓐꓰ ꓠꓴ ꓔꓯ ꓓꓰꓽ ꓢꓴ ꓮꓽ ꓟ ꓥ ꓟ ꓠꓴ ꓢꓷꓸ ꓢꓲ ꓠꓴ ꓬꓲ ꓔꓯ ꓓꓰꓽˍ ꓠꓬ꓾ ꓬꓲ ꓡꓰ ꓠꓴ ꓔꓯ ꓬꓲꓻ ꓙꓬ ꓬꓲꓸ ꓢꓯꓸ ꓖꓶ ꓡ ꓡꓳ ꓫꓵꓽ ꓥꓳ꓾ ꓐꓯ ꓖꓶˍ ꓡꓳ꓿ 11 ꓤ ꓟꓶ ꓤ ꓡꓰ ꓬꓲ ꓔꓯ꓾ ꓞꓳꓻ ꓔꓲꓳ꓾ ꓠꓴ ꓠꓬ ꓬꓲꓻ ꓙꓬ ꓚꓵꓹ ꓓꓴˍ ꓟꓲ ꓟꓽ ꓙꓳ꓾ ꓬꓲꓻ ꓙꓬ ꓘꓴˍ ꓟꓲ ꓠꓯꓸˍ ꓡꓳ꓿ ꓠꓴ ꓠꓬ ꓬꓲꓻ ꓙꓬ ꓬꓲ ꓢꓯꓸ ꓮ ꓡꓲ ꓗꓪ ꓐꓰ ꓧꓪ ꓟꓶˍ ꓥꓳ ꓪ? 12 ꓠꓴ ꓠꓬ ꓥꓪ ꓠꓴꓽ ꓔꓯ ꓬꓲꓻ ꓙꓬ ꓘꓴꓻ ꓖꓶ ꓢꓴ ꓥꓪ ꓠꓴꓽ ꓒꓵꓽ ꓒ ꓬ-ꓗꓴ ꓕꓯ ꓢꓲ ꓪꓴꓽˍ ꓡ? ꓖꓳ ꓕꓯ ꓬꓲ ꓚꓲꓸ ꓛꓬˍ ꓐꓰ ꓬꓲ ꓤꓽ ꓐꓴˍ ꓐꓰ ꓬꓲ ꓙꓱ ꓤˍ ꓟꓲ ꓕꓱ ꓗꓪ ꓬꓲꓻ ꓙꓬ ꓓꓳ ꓠꓬꓲꓳ꓾ ꓐꓯˍ ꓡꓳ꓿ 13 ꓬꓰ-ꓢꓴ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓬꓲꓻ ꓙꓬ ꓕꓱ ꓟ ꓓꓳꓻ ꓢꓴ ꓮ ꓟˍ ꓟꓲ ꓢꓲꓼ ꓡ ꓢꓰꓽ ꓥꓳ꓿ 14 ꓥꓪ ꓡꓰ ꓖꓶ ꓓꓳˍ ꓟ ꓬꓲꓻ ꓙꓬ ꓓꓳꓻ ꓢꓴ ꓠꓽ ꓕꓲ ꓞꓲꓼ ꓟꓽ ꓢꓲꓼ ꓡ꓿ ꓥꓪ ꓬꓲ ꓔꓯ ꓖꓶꓽ ꓓꓳˍ ꓟ ꓬꓲꓻ ꓙꓬ ꓠꓽ꓾ ꓬꓲ ꓠꓯꓸꓼ ꓗꓪ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓗꓪ ꓛꓲ ꓝꓴꓺ ꓔꓴ ꓡ ꓟ ꓬꓲꓻ ꓝꓳꓹ ꓟꓶ ꓒꓬꓱꓼ ꓡ ꓥꓳ꓾ ꓐꓯˍ ꓡꓳ꓿ 15 ꓤ ꓟꓶ ꓤ ꓡꓰ ꓬꓲ ꓔꓯ꓾ ꓞꓳ ꓔꓲꓳ꓾ ꓥꓪ ꓬꓲꓻ ꓙꓬ ꓟꓽ ꓢꓲꓼ ꓡ ꓠꓹ ꓟ ꓐꓰ꓾ ꓕꓱ ꓶꓻ ꓛꓲ ꓗꓪ ꓬꓲꓻ ꓙꓬ ꓚꓵꓹ ꓡ ꓟꓽ ꓛꓵ ꓠꓹ ꓟ꓾ ꓬꓲꓻ ꓙꓬ ꓕꓱ ꓟ ꓥꓪ ꓔꓯ ꓖꓶ ꓓꓳ ꓡꓯ꓾ ꓐꓯˍ ꓡꓳ꓿ 16 ꓬꓰ-ꓢꓴ ꓡꓰ ꓬꓲ ꓔꓯ꓾ ꓙꓰ꓾ ꓠꓴ ꓤ ꓖꓴ ꓔꓯ ꓕꓱ ꓗꓪ ꓘꓴ ꓔꓯꓹ ꓡꓯ꓾ ꓐꓯ ꓖꓶˍ ꓡꓳ꓿ 17 ꓤ ꓟꓶ ꓤ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓤ ꓖꓴ ꓟꓽ ꓙꓳ꓾ ꓐꓯˍ ꓕꓯ꓾ ꓬꓰ-ꓢꓴ ꓡꓰ꓾ ꓥꓪ ꓤ ꓖꓴ ꓟꓽ ꓙꓳ꓾ ꓐꓰ ꓠꓴ ꓐꓯˍ ꓟ ꓠꓬ ꓐꓯ ꓬꓯꓼˍ ꓡꓳ꓿ 18 ꓮ ꓡꓲꓳ ꓐꓯ ꓠꓬ ꓠꓴ ꓤ ꓖꓴ ꓥꓪꓽ ꓣꓳ ꓙꓳ ꓠꓬꓲˍ ꓟꓲ꓾ ꓮ ꓟꓶ ꓠꓴˍ ꓐꓰ ꓔꓬ ꓟ ꓠꓽ ꓠꓴ ꓤ ꓖꓴ ꓟꓽ ꓥ꓿ ꓕꓱ ꓟ ꓠꓽ ꓠꓴ ꓔꓱꓹ ꓔꓱꓹꓼ ꓐꓯ ꓬꓯꓼ ꓗꓷꓳ꓾ ꓐꓯ ꓖꓶˍ ꓡꓳ꓿ 19 ꓤ ꓟꓶ ꓤ ꓡꓰ ꓬꓲ ꓔꓯ꓾ ꓞꓳ ꓔꓲꓳ꓾ ꓠꓴ ꓠꓽ ꓟꓷꓽ ꓠꓷꓹ ꓝꓸ ꓢꓴ ꓥ ꓟ ꓥꓪ ꓡꓳꓸ ꓓꓳ ꓡꓺꓳ꓿ 20 ꓥꓪ ꓠꓴꓽ ꓒꓵꓽ ꓒ ꓐꓴ ꓠꓬ ꓪ ꓚꓲ ꓕꓱ ꓟ ꓗꓪ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓗꓷꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓬꓴ-ꓔ ꓡ ꓞꓳ ꓐꓯˍ ꓠꓬ꓾ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓖꓴ ꓠꓽ ꓙꓱ-ꓣꓴ-ꓢ-ꓡꓱ ꓗꓪ ꓥ ꓡꓳ꓾ ꓐꓯˍ ꓡꓳ꓾ ꓐꓯ ꓖꓶˍ ꓡꓳ꓿ 21 ꓬꓰ-ꓢꓴ ꓡꓰ ꓬꓲ ꓔꓯ꓾ ꓤ ꓟꓶ ꓤꓽꓳ꓾ ꓥꓪ ꓐꓯ ꓖꓶˍ ꓠꓬꓲ꓾ ꓐꓼ ꓐꓽ ꓔꓯ ꓪꓴꓸ ꓓꓵ ꓕꓱˍ ꓟ ꓠꓬ ꓪ ꓚꓲ ꓕꓱ ꓟ ꓗꓪˍ ꓟꓲ ꓟꓽ ꓥ꓾ ꓙꓱ-ꓣꓴ-ꓢ-ꓡꓱ ꓗꓪˍ ꓟꓲ ꓟꓽ ꓥ ꓟ ꓬꓲ ꓙꓵꓹ ꓛꓲ ꓡ ꓥꓳ꓿ 22 ꓠꓴ ꓪꓽ ꓠꓬ ꓠꓴ ꓪꓽ ꓟꓽ ꓢꓷꓸ ꓟ ꓔꓯ ꓪꓴꓸ ꓓꓵ ꓕꓱꓼˍ ꓡꓳ꓿ ꓥꓪ ꓠꓴꓽ ꓠꓽ ꓥꓪ ꓠꓴꓽ ꓢꓷꓸˍ ꓟ ꓔꓯ ꓪꓴꓸ ꓓꓵ ꓕꓱꓼˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓢꓯꓼ ꓟꓬ ꓝꓸˍ ꓟ ꓠꓽ ꓬꓴ-ꓔ ꓡ ꓞꓳ ꓗꓪ ꓐꓰ ꓪꓴꓸ ꓔꓴˍ ꓟ ꓥ ꓡꓳ꓿ 23 ꓐꓹ ꓐ ꓔꓯ ꓔꓱꓹ ꓔꓱꓹꓼ ꓐꓰ ꓪꓴꓸ ꓓꓵ ꓕꓱ ꓢꓴ ꓠ꓾ ꓦˍ ꓐꓰ ꓔꓱꓹˍ ꓟ ꓡꓰ ꓪꓴꓸ ꓓꓵ ꓕꓱꓼˍ ꓟ ꓬꓲ ꓙꓵꓹ ꓛꓲ ꓡ ꓥꓳ꓿ ꓮ ꓟꓶˍ ꓟꓲ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓐꓹ ꓐ ꓠꓽ꓾ ꓬꓲ ꓔꓯ ꓕꓱ ꓡꓱ ꓪꓴꓸ ꓓꓵ ꓕꓱꓼ ꓡ ꓢꓴ ꓔꓯ ꓧꓪˍ ꓡꓳ꓿ 24 ꓪꓴ-ꓢ ꓠꓬ ꓦꓻ ꓥ ꓠꓬꓲ꓾ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓠꓬ ꓦˍ ꓐꓰ ꓔꓱꓹˍ ꓟ ꓡꓰ ꓪꓴꓸ ꓓꓵ ꓕꓱꓼ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ꓿ 25 ꓤ ꓟꓶ ꓤ ꓡꓰ ꓬꓲ ꓔꓯ꓾ ꓙꓲ-ꓢꓴ ꓟꓬꓱ ꓔ ꓟ ꓟꓲ-ꓢ-ꓬ ꓡ ꓠꓹ ꓟ ꓥꓪ ꓢꓷˍ ꓡꓳ꓿ ꓬꓲ ꓛꓲ ꓡ ꓕꓯ ꓬꓲ ꓡꓰ ꓥꓪ ꓠꓴꓽ ꓔꓯ ꓮꓽ ꓙꓵ ꓡꓱꓸꓼ ꓐꓯ ꓟꓸ ꓖꓶ ꓡ ꓥꓳ꓾ ꓐꓯˍ ꓡꓳ꓿ 26 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴˍ ꓐꓰ ꓫꓸ ꓕꓱ ꓔꓬ ꓢꓴ ꓥꓪ ꓠꓬ ꓟꓲ-ꓢ-ꓬ ꓖꓳ ꓕꓲ ꓣꓳ ꓟ ꓥ ꓡꓳ꓾ ꓐꓯ ꓖꓶˍ ꓡꓳ꓿ 27 ꓬꓲ ꓖꓳ ꓡꓱ ꓐꓯ ꓔꓬ ꓕꓯ꓾ ꓬꓲ ꓛꓳꓽ ꓒꓯꓹ ꓐꓴ ꓡꓽ ꓛꓲ ꓡ ꓢꓲ꓾ ꓬꓰ-ꓢꓴ ꓠꓬ ꓤ ꓟꓶ ꓤ ꓕꓲ ꓣꓳˍ ꓐꓰ ꓫꓸ ꓕꓱ ꓔꓬ ꓟ ꓔꓯ ꓬꓲ ꓪꓽ ꓓꓵꓽ ꓙꓽ ꓟꓶˍ ꓡꓳ꓿ ꓖꓳ ꓡꓱ ꓥ ꓟꓲ꓾ ꓮꓽ ꓟˍ ꓟꓲ ꓬꓲ ꓔꓯ꓾ ꓠꓴ ꓮꓸ ꓫꓵ ꓠꓵˍ ꓡ? ꓥ ꓠꓬ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓤ ꓟꓶ ꓤˍ ꓐꓰ ꓫꓸ ꓕꓱ ꓔꓬ ꓡ?꓾ ꓐꓰ ꓟꓽ ꓠ ꓠꓬꓲ꓿ 28 ꓤ ꓟꓶ ꓤ ꓠꓬ ꓬꓲꓸ ꓬꓲꓻ ꓪꓴ ꓖꓳ ꓗꓪ ꓗꓶ ꓔ ꓬꓰ ꓢꓲ꓾ ꓡꓳ ꓒꓱ ꓗꓪ ꓙꓰ ꓢꓲ ꓠꓬꓲ ꓖꓳ ꓗꓪ ꓟ ꓡ ꓞꓳ ꓔꓯ꓾ 29 ꓥꓪ ꓬꓰ ꓗꓷˍ ꓟ ꓮꓽ ꓙꓵ ꓡꓱꓸꓼ ꓥꓪ ꓔꓯ ꓐꓯ ꓖꓶ ꓡ ꓟ ꓡ ꓞꓳ ꓕꓲ ꓣꓳ ꓔꓯ ꓡꓳꓸ ꓠꓬꓲ ꓙꓰ ꓡꓯ꓾ ꓕꓱ ꓕꓲ ꓣꓳ ꓠꓬ ꓙꓲ-ꓢꓴ ꓥ ꓟꓽ ꓢꓷ꓾ ꓐꓯˍ ꓡꓳ꓿ 30 ꓖꓳ ꓕꓯ ꓬꓲ ꓪꓽ ꓠꓬ ꓡꓳ ꓒꓱ ꓗꓪ ꓐꓰ ꓓꓳ ꓡ ꓢꓲ ꓬꓰ-ꓢꓴ ꓔꓯ ꓡ ꓡꓳ꓿ 31 ꓖꓳ ꓕꓲ ꓙꓵꓹ ꓗꓪ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓰ-ꓢꓴ ꓔꓯ꓾ ꓟꓸ ꓒꓽꓳ꓾ ꓜ ꓜꓽ ꓡꓯ꓾ ꓐꓰ ꓘꓴˍ ꓡꓳ꓿ 32 ꓖꓳ ꓡꓱ ꓥ ꓟꓲ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓟꓽ ꓢꓷꓸ ꓟ ꓜꓽ ꓓꓴ ꓥꓪ ꓙꓳˍ ꓡꓳ꓾ ꓐꓯ ꓖꓶˍ ꓡꓳ꓿ 33 ꓛꓳꓽ ꓒꓯꓹ ꓐꓴ ꓠꓬ꓾ ꓮꓽ ꓟ ꓡꓰ ꓬꓲ ꓔꓯ ꓜꓽ ꓓꓴ ꓔꓯꓹ ꓖꓶ ꓡ ꓗꓷ ꓥ ꓢꓷ? ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 34 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓯ ꓝꓲ ꓩꓴ ꓡ ꓢꓴ ꓬꓲ ꓠꓲꓹ ꓡꓶ ꓬꓰˍ ꓟ ꓐꓰ꓾ ꓬꓲ ꓟꓬꓱꓽ ꓬꓰ ꓓꓳ ꓡꓰ ꓝꓲ ꓠꓹ ꓟ ꓠꓬ ꓥꓪ ꓜꓽ ꓓꓴ ꓥ ꓡꓳ꓿ 35 ꓝꓮꓲ ꓦ ꓐ ꓡꓲ ꓟ ꓠꓬ ꓜꓻ ꓫ ꓝꓲꓸ ꓛꓲ ꓡ ꓥꓳ꓾ ꓐꓰ ꓠꓴ ꓪꓽ ꓟꓽ ꓐꓯ ꓡ? ꓠ ꓠꓹ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓦ ꓟꓲ ꓗꓪ ꓮ ꓟꓶˍ ꓡꓰ ꓜꓻ ꓫ ꓓꓹ ꓟ ꓔꓯ ꓠꓴ ꓪꓽ ꓡꓳꓸ ꓠꓬꓲ꓿ 36 ꓫꓵꓸ ꓢꓴˍ ꓐꓰ ꓶꓼ ꓢꓴ ꓠꓬ ꓕꓲ ꓡꓰꓹꓼ ꓐꓰ ꓗ ꓛꓲ ꓠꓹ ꓟ꓾ ꓶꓼ ꓢꓴ ꓠꓬ ꓪꓽ ꓒꓵꓽ ꓟꓶ ꓢꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓐꓱ ꓶ ꓬꓲ ꓢꓶꓽ ꓫ ꓟꓶˍ ꓡꓳ꓿ 37 ꓕꓲ ꓣꓳ ꓫꓵꓸ ꓢꓲ꓾ ꓠꓱꓸ ꓐꓯꓼ ꓕꓲ ꓣꓳ ꓶꓼˍ ꓡꓳ꓾ ꓐꓯˍ ꓟ ꓥꓳꓽ ꓜꓱ ꓕꓱ ꓟ ꓠꓬ ꓔꓱꓹˍ ꓟ ꓥ ꓡꓳ꓿ 38 ꓠꓴ ꓪꓽ ꓟꓽ ꓢꓯꓼ ꓕꓵꓼ ꓔ ꓟ ꓗꓪ ꓶꓼ ꓝꓲ ꓠꓹ ꓟ ꓥꓪ ꓡꓰ ꓠꓴ ꓪꓽ ꓔꓯ ꓝꓲ ꓩꓴ ꓗꓷˍ ꓡꓳ꓿ ꓠꓱꓸ ꓐꓯꓼ ꓢꓴ ꓢꓯꓼ ꓕꓵꓼ ꓔ ꓟ ꓗꓪ ꓠꓴ ꓪꓽ ꓫ ꓟꓶˍ ꓟ ꓥ ꓡꓳ꓾ ꓐꓯˍ ꓡꓳ꓿ 39 ꓤꓽ ꓟꓶ ꓤ ꓡꓰ꓾ ꓥꓪ ꓬꓰ ꓗꓷ ꓟ ꓮꓽ ꓙꓵ ꓡꓱꓸꓼ ꓬꓲ ꓡꓰ ꓐꓯ ꓖꓶ ꓡꓺꓳ꓾ ꓐꓰ ꓢꓷ ꓙ ꓟꓳ ꓙˍ ꓟ ꓗꓪ ꓐꓰ꓾ ꓖꓳ ꓕꓲ ꓡꓳ ꓒꓱ ꓗꓪ ꓟ ꓢ-ꓟ-ꓡꓲ ꓡ ꓞꓳ ꓮꓽ ꓟꓬꓹ ꓠꓬ ꓬꓰ-ꓢꓴ ꓔꓯ ꓙꓵˍ ꓡꓳ꓿ 40 ꓢ-ꓟ-ꓡꓲ ꓡ ꓞꓳ ꓬꓲ ꓔꓯ ꓛꓲ ꓡ ꓠꓬ꓾ ꓬꓲ ꓪˍ ꓐꓰ ꓔꓬ ꓠꓹ ꓟ ꓬꓰ-ꓢꓴ ꓔꓯ ꓓꓰꓽˍ ꓠꓬꓲ꓾ ꓬꓲ ꓠꓬ ꓖꓳ ꓗꓪ ꓠꓬꓲꓽ ꓠꓬꓲꓻ ꓔꓬ ꓡꓳ꓿ 41 ꓝꓮꓲ ꓠꓬ ꓬꓲ ꓐꓯ ꓘꓶꓽ ꓗꓪ ꓐꓰ ꓠꓱꓸ ꓐꓯꓼ ꓮꓽ ꓟꓬꓹ ꓣꓳ ꓙꓵˍ ꓢꓰꓽ ꓡꓳ꓿ 42 ꓬꓲ ꓪꓽ ꓠꓬ ꓤ ꓟꓶ ꓤ ꓔꓯ꓾ ꓮ ꓟꓶ ꓥꓪ ꓠꓴꓽ ꓙꓵꓻˍ ꓟ ꓠꓬ ꓠꓴ ꓐꓯˍ ꓟ ꓗꓪ ꓐꓰˍ ꓡꓰ ꓠꓽ ꓟꓽ ꓥ꓿ ꓥꓪ ꓠꓴꓽ ꓚꓲꓸ ꓛꓬ ꓑ ꓙꓽ ꓢꓲ꓾ ꓕꓱ ꓟ ꓠꓬ ꓚꓵ ꓚꓵ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓢꓴ ꓢꓲ ꓒ ꓥ ꓟ ꓥꓪ ꓠꓴꓽ ꓢꓷꓸ ꓡꓰ ꓠꓬꓲ ꓙꓵˍ ꓟ ꓥꓳ꓾ ꓐꓯˍ ꓡꓳ꓿ 43 ꓠꓬꓲꓽ ꓠꓬꓲ ꓗꓸ ꓠꓯꓸ ꓬꓲ ꓠꓬ ꓖ-ꓡꓲ-ꓡꓲ ꓟꓵꓽ ꓗꓪ ꓓꓵꓽ ꓙꓰˍ ꓡꓳ꓿ 44 ꓬꓰ-ꓢꓴ ꓡꓰ꓾ ꓟꓷꓽ ꓠꓷꓹ ꓝꓸ ꓢꓴ ꓔꓯ ꓠꓬ ꓚꓲꓸ ꓛꓬ ꓟꓵꓽ ꓗꓪ ꓞꓳ ꓒꓵꓽ ꓡ ꓟ ꓟꓽ ꓙꓳ꓾ ꓐꓰ ꓧꓶꓸ ꓕꓯˍ ꓡꓰ ꓢꓷꓸ ꓙ ꓟꓳ ꓙ ꓗꓷꓳ꓿ 45 ꓖ-ꓡꓲ-ꓡꓲ ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓑꓮꓲ ꓬꓰˍ ꓕꓯ꓾ ꓬꓲ ꓪꓽˍ ꓟꓲ ꓑꓮꓲ ꓗꓪ ꓙꓰ ꓢꓲ꓾ ꓬꓰ-ꓢꓴ ꓬꓰˍ ꓟ ꓮꓽ ꓙꓵ ꓔꓯ ꓟꓳ ꓗꓷ ꓠꓬꓲ꓾ ꓬꓲ ꓛꓲ ꓡ ꓕꓯ ꓬꓲ ꓔꓯ ꓘꓳ ꓣꓴˍ ꓡꓳ꓿ 46 ꓬꓰ-ꓢꓴ ꓠꓬ ꓬꓲ ꓡꓰ ꓬꓲꓻ ꓙꓬ ꓔꓯ ꓛꓱꓼ ꓡꓱꓼ ꓙꓵꓻ ꓒꓬꓱꓼ ꓡ ꓝꓲ ꓖꓴ꓾ ꓖ-ꓡꓲ-ꓡꓲ ꓟꓵꓽ ꓘꓹ-ꓠ ꓘꓹ ꓗꓪ ꓝꓮꓲ ꓕꓲ ꓧꓪꓹ ꓛꓲ ꓡ ꓢꓰꓽ ꓡꓳ꓿ ꓖꓳ ꓕꓯ ꓘ-ꓒꓱ-ꓠꓴ ꓗꓪ ꓔꓬ ꓟ ꓢꓲꓽ ꓒ ꓕꓲ ꓣꓳ ꓬꓲ ꓤ ꓠꓬ ꓠꓻ ꓔꓬ ꓡꓳ꓿ 47 ꓬꓰ-ꓢꓴ ꓠꓬ ꓬꓴ-ꓔ ꓟꓵꓽ ꓗꓪ ꓐꓰ ꓓꓳ ꓡ ꓢꓲ꓾ ꓖ-ꓡꓲ-ꓡꓲ ꓟꓵꓽ ꓗꓪ ꓓꓵꓽ ꓡ ꓟ ꓓꓳꓽ ꓬꓲ ꓑ ꓙꓽ ꓗꓷ ꓠꓬ꓾ ꓬꓲ ꓤ ꓫꓵꓻˍ ꓐꓰ ꓗꓹ ꓠꓬꓲ ꓬꓲ ꓔꓯ ꓙꓰ ꓢꓲ꓾ ꓥꓪ ꓤꓽ ꓔꓯ ꓫꓬꓹ ꓓꓻ ꓡꓰ ꓝꓲ ꓠꓹ ꓟ ꓬꓯꓼ ꓙꓰ ꓡꓯ꓾ ꓐꓰ ꓓꓰꓽˍ ꓡꓳ꓿ 48 ꓬꓰ-ꓢꓴ ꓡꓰ ꓬꓲ ꓔꓯ꓾ ꓢꓷ ꓡꓰ ꓓꓴˍ ꓐꓰ ꓓꓵꓽ ꓙꓽ ꓟꓶ ꓓꓴ ꓟꓽ ꓟꓳ ꓠꓬ꓾ ꓮ ꓡꓲ ꓥ ꓟꓲ ꓠꓴ ꓪꓽ ꓟꓽ ꓙꓵꓻ꓾ ꓐꓯ ꓖꓶˍ ꓡꓳ꓿ 49 ꓢꓲꓽ ꓒ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓥꓪ ꓤ ꓟꓽ ꓫꓵꓻ ꓕꓯ ꓡꓰ ꓬꓯꓼ ꓙꓰ ꓡꓯ꓾ ꓐꓯˍ ꓕꓯ꓾ 50 ꓬꓰ-ꓢꓴ ꓡꓰ꓾ ꓠꓴ ꓬꓲꓼ ꓙꓰ꓾ ꓠꓴ ꓤ ꓠꓬ ꓢꓯꓸ ꓔꓬ ꓥꓳ꓾ ꓐꓯ ꓖꓶˍ ꓡꓳ꓿ ꓡ ꓞꓳ ꓖꓳ ꓕꓲ ꓣꓳ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ ꓐꓯˍ ꓟ ꓔꓯ ꓙꓵꓻ ꓢꓲ ꓬꓲꓼ ꓙꓰˍ ꓡꓳ꓿ 51 ꓬꓲꓸ ꓬꓲꓼ ꓙꓰ ꓔꓬ ꓕꓯ ꓬꓲ ꓚꓳ ꓑꓸ ꓐꓴ ꓬꓲ ꓔꓯ ꓞꓵ ꓡ ꓢꓲ꓾ ꓠꓴ ꓤꓽ ꓠꓬ ꓓꓻ ꓡꓰꓳ꓾ ꓐꓰ ꓐꓯ ꓖꓶ ꓡ ꓡꓳ꓿ 52 ꓬꓲ ꓮ ꓡꓲ ꓕꓲ ꓙꓵꓹ ꓗꓪ ꓓꓻ ꓡꓰ ꓪꓴꓸ ꓔꓴˍ ꓡ?꓾ ꓐꓰ ꓬꓲ ꓪꓽ ꓔꓯ ꓠ ꓠꓬꓲ ꓠꓬ꓾ ꓮꓽ ꓟꓰꓻ ꓟꓳꓼ ꓡꓳ ꓗꓸ ꓠꓯꓸ ꓕꓲ ꓙꓵꓹ ꓗꓪ ꓬꓲ ꓖꓳ ꓓꓱꓽ ꓞꓻˍ ꓟ ꓫꓱꓺ ꓡꓰꓳ꓾ ꓐꓯ ꓖꓶˍ ꓡꓳ꓿ 53 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ꓾ ꓠꓴ ꓤ ꓢꓯꓸ ꓔꓬ ꓥꓳ꓾ ꓐꓯˍ ꓕꓯ꓾ ꓬꓲ ꓖꓳ ꓕꓲ ꓙꓵꓹ ꓥ ꓟ ꓬꓲ ꓐꓹ ꓐ ꓢꓷꓸ ꓡꓰꓳ꓿ ꓖꓳ ꓡꓱ ꓠꓬ ꓬꓲ ꓚꓲꓸ ꓛꓬˍ ꓐꓰ ꓬꓲ ꓕꓲ ꓦꓲ ꓢꓴ ꓮꓽ ꓙꓵ ꓬꓰ-ꓢꓴ ꓔꓯ ꓙꓵꓻˍ ꓡꓳ꓿ 54 ꓕꓱ ꓟ ꓠꓬ ꓬꓴ-ꓔ ꓟꓵ ꓗꓪ ꓐꓰ ꓓꓳ ꓡ ꓢꓲ ꓖ-ꓡꓲ-ꓡꓲ ꓟꓵꓽ ꓗꓪ ꓓꓵꓽ ꓡ ꓗꓸ ꓠꓯꓸ꓾ ꓬꓰ-ꓢꓴ ꓬꓰˍ ꓟ ꓢꓷꓸ ꓡꓰ ꓓꓴ ꓠꓬꓲꓽ ꓧꓪꓹ ꓕꓲ ꓧꓪꓹ ꓟ ꓥ ꓡꓳ꓿

ꓬꓳ-ꓦ 5

1 ꓕꓱ ꓟꓬ ꓙꓰꓽ ꓗꓸ ꓠꓯꓸ ꓬꓴ-ꓔ ꓡ ꓞꓳ ꓑꓮꓲ ꓕꓲ ꓟ ꓙꓳˍ ꓠꓬꓲ꓾ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰˍ ꓡꓳ꓿ 2 ꓙꓱ-ꓣꓴ-ꓢ-ꓡꓱ ꓗꓪ ꓟ ꓮ-ꓣꓳ-ꓗ-ꓘꓶ ꓐꓻ ꓢꓲ ꓗꓪ꓾ ꓦꓲ-ꓐꓱ-ꓣꓴ ꓥꓳꓽ ꓡꓰ ꓐꓱ-ꓢꓰ-ꓓ꓾ ꓐꓯˍ ꓟ ꓛꓸ ꓗꓴꓸ ꓦꓲꓻ ꓥꓪꓽ ꓟ ꓙꓳˍ ꓟ ꓬꓲꓻ ꓐꓱ ꓕꓲ ꓐꓱ ꓙꓳˍ ꓡꓳ꓿ 3 ꓛꓸ ꓗꓴꓸ ꓦꓲ ꓖꓳ ꓟ ꓗꓪ ꓠꓻ ꓢꓴ ꓒꓬꓽ ꓢꓴ꓾ ꓟꓬ ꓔꓶˍ ꓐꓰ ꓛꓲ ꓫꓳꓸˍ ꓐꓰ ꓛꓲ ꓫꓵꓻ ꓡꓯꓼ ꓫꓵ ꓢꓴ ꓮꓽ ꓟꓬꓹ ꓬꓲꓼ ꓔ ꓔꓬ ꓡꓳ꓿ (ꓬꓲ ꓪꓽ ꓠꓬ ꓬꓲꓻ ꓙꓬ ꓡꓵ ꓡ ꓟ ꓔꓯ ꓡꓳ ꓠꓬꓹ ꓔꓬ ꓡꓳ꓿ 4 ꓮ ꓡꓲꓳ ꓐꓯ ꓠꓬ ꓬꓲ ꓝꓲꓸ ꓚꓳꓺ ꓛꓲ ꓡ ꓕꓯ꓾ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓬꓯꓼ ꓡ ꓢꓲ꓾ ꓬꓲꓻ ꓐꓱ ꓗꓪ ꓓꓵꓽ ꓡꓰ ꓢꓲ ꓠꓬꓲ ꓬꓲꓻ ꓙꓬ ꓔꓯ ꓶꓹ ꓡꓵꓺ ꓡ ꓝꓲˍ ꓡꓳ꓿ ꓖꓳ ꓕꓯ ꓮꓽ ꓟ ꓬꓲ ꓪꓴꓸ ꓓꓵꓽ ꓡꓰ ꓪˍ ꓠꓬ꓾ ꓬꓲꓸ ꓠꓻ ꓮ ꓡꓲ ꓫꓵꓽ ꓙꓳˍ ꓟꓲ ꓓꓻ ꓡꓰˍ ꓡꓳ꓿) 5 ꓖꓳ ꓗꓪ ꓢ ꓞꓲ ꓦꓰꓼ ꓘꓳꓼ ꓠꓻ ꓗꓷ ꓟ ꓡ ꓞꓳ ꓕꓲ ꓣꓳ ꓔꓬ ꓡꓳ꓿ 6 ꓬꓰ-ꓢꓴ ꓡꓰ ꓡ ꓞꓳ ꓖꓳ ꓟ ꓬꓲꓼ ꓔ ꓔꓬ ꓟ ꓐꓰ꓾ ꓬꓲꓸ ꓟꓶ ꓤ ꓠꓻ ꓗꓷ ꓟ ꓔꓯ ꓢꓷꓸ ꓡꓰ ꓠꓬ꓾ ꓠꓴ ꓓꓻ ꓡꓰ ꓠꓲꓹ ꓫꓵ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 7 ꓞꓳ ꓠꓻ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓞꓳ ꓔꓲꓳ꓾ ꓬꓲꓻ ꓙꓬ ꓶꓹ ꓡꓵ ꓡ ꓕꓯ꓾ ꓥꓪ ꓔꓯ ꓬꓲꓻ ꓐꓱ ꓗꓪ ꓧꓳꓽ ꓓꓵꓽ ꓡꓰ ꓢꓴ ꓟꓽ ꓙꓳ꓿ ꓥꓪ ꓓꓵꓽ ꓡꓰ ꓠꓹ ꓟ ꓬꓯꓼ ꓙꓰˍ ꓟꓲ꓾ ꓥꓪ ꓟꓲꓽ ꓕꓯ ꓢꓲ ꓗꓪ ꓢꓴ ꓧꓶꓸ ꓕꓯ ꓓꓵꓽ ꓡꓰˍ ꓡꓳ꓾ ꓐꓯˍ ꓡꓳ꓿ 8 ꓬꓰ-ꓢꓴ ꓡꓰ꓾ ꓔꓴ꓾ ꓠꓴ ꓘꓳꓽ ꓓꓳꓻ ꓔꓯꓹ ꓔ ꓢꓲ ꓫꓱꓽ ꓙꓰ꓾ ꓐꓯ ꓖꓶˍ ꓕꓯ꓾ 9 ꓡ ꓞꓳ ꓖꓳ ꓟ ꓞꓼ ꓐꓰ ꓓꓻ ꓡꓰ ꓢꓲ꓾ ꓬꓲ ꓘꓳꓽ ꓓꓳꓻ ꓔꓯꓹ ꓔ ꓢꓲ ꓠꓬꓲ ꓫꓱꓽ ꓙꓰˍ ꓡꓳ꓿ ꓖꓳ ꓕꓲ ꓠꓬꓲ ꓠꓬ ꓠꓽ ꓦꓬꓼ ꓠꓬꓲ ꓥ ꓡꓳ꓿ 10 ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓡꓰ ꓓꓻ ꓡꓰ ꓢꓴ ꓖꓳ ꓕꓲ ꓣꓳ ꓔꓯ꓾ ꓠꓬꓲꓸ ꓠꓬꓲ ꓠꓬ ꓠꓽ ꓦꓬꓼ ꓠꓬꓲ ꓥ ꓠꓬꓲ꓾ ꓙꓵꓽ ꓗ ꓔꓯꓸ ꓟꓳ ꓐꓯˍ ꓠꓬ ꓠꓴ ꓘꓳꓽ ꓓꓳ ꓔꓯꓹ ꓟꓽ ꓓ꓾ ꓐꓯˍ ꓡꓳ꓿ 11 ꓖꓳ ꓡꓱ ꓥ ꓟꓲ ꓬꓲ ꓡꓰ꓾ ꓥꓪ ꓔꓯ ꓓꓻ ꓡꓰ ꓝꓲ ꓢꓴ ꓖꓳ ꓕꓲ ꓣꓳ ꓡꓰ꓾ ꓠꓴ ꓘꓳꓽ ꓓꓳ ꓔꓯꓹ ꓔ ꓢꓲ ꓫꓱꓽ ꓙꓰ꓾ ꓐꓯ ꓖꓶ ꓡꓺꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 12 ꓬꓲ ꓪꓽ ꓡꓰ꓾ ꓠꓴ ꓔꓯ ꓘꓳꓽ ꓓꓳ ꓔꓯꓹ ꓔ ꓢꓲ ꓙ ꓖꓴ ꓫꓱꓽ ꓙꓰ꓾ ꓐꓯ ꓢꓴ ꓮꓽ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 13 ꓖꓳ ꓡꓱ ꓥ ꓟꓲ ꓖꓳ ꓕꓲ ꓔꓳꓸ ꓗꓪ ꓡ ꓞꓳ ꓬꓲ ꓜꓴ ꓔꓬ ꓢꓰꓽ ꓕꓯ꓾ ꓬꓰ-ꓢꓴ ꓠꓬ ꓙꓵꓺ ꓙꓰ ꓗꓷ ꓠꓬꓲ꓾ ꓬꓲ ꓔꓯ ꓓꓻ ꓡꓰ ꓝꓲ ꓢꓴ ꓮꓽ ꓟ ꓥ ꓟ ꓬꓲꓸ ꓟꓽ ꓢꓷꓸ꓿ 14 ꓖꓳ ꓗꓸ ꓠꓯꓸ ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓬꓲ ꓔꓯ ꓔꓳꓹ ꓜꓳ ꓢꓲ꓾ ꓠ ꓠꓹ꓾ ꓮ ꓟꓶ ꓠꓴ ꓠꓽ ꓓꓻ ꓡꓰꓳ꓿ ꓕꓱ ꓟ ꓕꓯ ꓢꓲ ꓟꓽ ꓙꓲ ꓟ ꓠꓴ ꓔꓯ ꓟꓽ ꓗꓷ ꓡꓰ ꓠꓹ ꓟ꓾ ꓕꓱ ꓡꓱ ꓖꓳ ꓑꓳ ꓝꓴꓲ ꓕꓽ ꓬꓰ꓾ ꓐꓯ ꓖꓶˍ ꓡꓳ꓿ 15 ꓡ ꓞꓳ ꓖꓳ ꓟ ꓓꓳ ꓙꓰ ꓢꓲ꓾ ꓬꓲ ꓔꓯ ꓫꓬꓹ ꓓꓻ ꓡꓰ ꓢꓴ ꓠꓬ ꓬꓰ-ꓢꓴ ꓥ ꓟ ꓬꓴ-ꓔ ꓡ ꓞꓳ ꓔꓯ ꓐꓯ ꓖꓶ ꓬꓰˍ ꓡꓳ꓿ 16 ꓠꓽ ꓦꓬꓼ ꓠꓬꓲ ꓗꓪ ꓬꓲ ꓕꓱ ꓟꓬ ꓙꓰꓽ ꓬꓰˍ ꓠꓬꓲ꓾ ꓬꓴ-ꓔ ꓡ ꓞꓳ ꓠꓬ ꓬꓰ-ꓢꓴ ꓔꓯ ꓗꓸ ꓧꓪˍ ꓡꓳ꓿ 17 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓐꓹ ꓐ ꓠꓬ ꓮ ꓟꓶ ꓗꓪ ꓛꓲ ꓟꓬꓱꓽ ꓬꓰ ꓔꓬ ꓠꓬꓲ ꓥꓪˍ ꓟꓲ ꓟꓬꓱꓽ ꓬꓰˍ ꓡꓳ꓾ ꓐꓯ ꓖꓶˍ ꓡꓳ꓿ 18 ꓬꓴ-ꓔ ꓡ ꓞꓳ ꓡꓲꓽ ꓗꓪ ꓠꓽ ꓦꓬꓼ ꓠꓬꓲ ꓔꓯ ꓛꓬ ꓗꓷ ꓟˍ ꓡꓰ ꓟꓽ ꓞꓲ꓾ ꓬꓰ-ꓢꓴ ꓠꓬ ꓪꓴ-ꓢ ꓔꓯˍ ꓟꓲ ꓬꓲ ꓐꓹ ꓐ ꓘꓴ ꓢꓲ꓾ ꓚꓲꓸ ꓛꓬ ꓔꓯ ꓪꓴ-ꓢˍ ꓐꓰ ꓔꓱ ꓪꓴꓸꓼ ꓗꓷ ꓡꓰ ꓝꓲˍ ꓠꓬꓲ꓾ ꓬꓴ-ꓔ ꓡ ꓞꓳ ꓠꓬ ꓬꓲ ꓔꓯ ꓢꓰꓼ ꓠ ꓟ ꓬꓲ ꓚꓱꓹ ꓧꓪˍ ꓡꓳ꓿ 19 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓐꓹ ꓐ ꓬꓰˍ ꓟ ꓔꓯ ꓮ ꓐꓲ ꓟꓳꓻˍ ꓡꓳ ꓫꓵ ꓟꓽ ꓥ ꓠꓬ꓾ ꓮ ꓐꓲ ꓚꓲꓸ ꓛꓬ ꓠꓬ ꓮꓸ ꓫꓵˍ ꓟꓲ ꓬꓰ ꓟꓽ ꓐ ꓡ꓿ ꓮ ꓡꓲꓳ ꓐꓯ ꓠꓬ ꓐꓹ ꓐ ꓮ ꓡꓲ ꓬꓰˍ ꓠꓬ ꓮ ꓐꓲˍ ꓟꓲ ꓖꓳ ꓟ ꓡꓰ ꓐꓰ ꓬꓰˍ ꓡꓳ꓿ 20 ꓐꓹ ꓐ ꓠꓽ ꓮ ꓐꓲ ꓔꓯ ꓠꓲꓹ ꓠꓵˍ ꓠꓬꓲ꓾ ꓬꓲ ꓬꓰˍ ꓟ ꓮꓽ ꓙꓵ ꓡꓱꓸꓼ ꓮ ꓐꓲ ꓔꓯ ꓟꓳꓸ ꓖꓶˍ ꓡꓳ꓿ ꓠꓴ ꓪꓽ ꓓꓵꓽ ꓙꓽ ꓟꓶ ꓡꓰ ꓠꓹ ꓟ ꓕꓱ ꓟ ꓕꓯ ꓢꓲ ꓪꓴꓽˍ ꓟ ꓟꓬꓱꓽˍ ꓟꓲ ꓬꓲ ꓔꓯ ꓟꓳꓸ ꓖꓶ ꓡ ꓥꓳ꓿ 21 ꓐꓹ ꓐ ꓡꓰ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓲ ꓬꓲ ꓪꓽ ꓔꓯ ꓢꓯꓼ ꓟꓬ ꓖꓶˍ ꓟ ꓡꓰ ꓐꓰ꓾ ꓮ ꓐꓲˍ ꓟꓲ ꓮ ꓡꓲ ꓕꓲ ꓣꓳ ꓔꓯ ꓢꓯꓼ ꓟꓬ ꓖꓶ ꓠꓲꓹ ꓫꓵˍ ꓠꓬ ꓖꓶˍ ꓡꓳ꓿ 22 ꓐꓹ ꓐ ꓠꓬ ꓮꓽ ꓟ ꓔꓯˍ ꓟꓲ ꓐꓯ ꓟꓴ ꓟꓽ ꓘꓶꓽ꓿ ꓖꓳ ꓡꓱ ꓥ ꓟꓲ ꓐꓯ ꓟꓴ ꓘꓶꓽˍ ꓟ ꓙꓵꓽ ꓪ ꓮꓽ ꓙꓵ ꓡꓱS ꓮ ꓐꓲ ꓔꓯ ꓖꓶ ꓔ ꓡꓳ꓿ 23 ꓕꓱ ꓟ ꓠꓬ ꓬꓲ ꓪꓽ ꓠꓽ ꓐꓹ ꓐ ꓔꓯ ꓒꓵꓽˍ ꓟ ꓡꓰ ꓐꓰ ꓮ ꓐꓲ ꓔꓯˍ ꓟꓲ ꓒꓵꓽ ꓠꓹ ꓟ ꓥ ꓡꓳ꓿ ꓮ ꓐꓲ ꓔꓯ ꓟꓽ ꓒꓵꓽ ꓢꓴ ꓠꓬ ꓬꓲ ꓔꓯ ꓝꓲ ꓩꓴ ꓡ ꓢꓴ ꓐꓹ ꓐ ꓔꓯ ꓟꓽ ꓒꓵꓽ ꓟ ꓥ ꓡꓳ꓿ 24 ꓥꓪ ꓔꓱ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓐꓯ ꓘꓶ ꓠ ꓠꓹ ꓢꓲ꓾ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓙꓵꓻ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳꓻ ꓢꓲ꓾ ꓬꓲ ꓔꓯ ꓐꓯ ꓟꓴ ꓟꓽ ꓘꓶꓽ꓿ ꓬꓲꓸ ꓠꓽ ꓫꓵꓻˍ ꓟ ꓔꓯ ꓗꓳꓸ ꓙꓰ ꓢꓲ ꓢꓯꓼ ꓟꓬ ꓗꓪ ꓓꓵꓽ ꓡꓰ ꓟꓶˍ ꓟ ꓥꓳ꓿ 25 ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓫꓵꓻ ꓢꓴ ꓠꓬ ꓪꓴ-ꓢ ꓮ ꓐꓲ ꓢꓯꓼ ꓑ ꓙꓽˍ ꓟ ꓬꓲ ꓙꓵꓹ ꓛꓲ ꓡ ꓥꓳ꓿ ꓮ ꓟꓶˍ ꓟꓲ ꓥ ꓡꓳ꓿ ꓬꓲ ꓢꓯꓼ ꓔꓯ ꓑ ꓙꓽ ꓢꓴ ꓠꓬ ꓢꓯꓸ ꓡ ꓥꓳ꓿ 26 ꓮ ꓡꓲꓳ ꓐꓯ ꓠꓬ ꓐꓹ ꓐ ꓬꓲ ꓚꓲꓸ ꓛꓬ ꓢꓯꓼ ꓟꓬ ꓙꓳˍ ꓟ ꓡꓰ ꓐꓰ꓾ ꓮ ꓐꓲˍ ꓟꓲ ꓢꓯꓼ ꓟꓬ ꓙꓳ ꓠꓹ ꓟ ꓐꓹ ꓐ ꓡꓰ ꓬꓲ ꓔꓯ ꓖꓶ ꓔ ꓡꓳ꓿ 27 ꓝꓮꓲ ꓬꓲ ꓠꓬ ꓡ-ꓞꓳ-ꓮ-ꓐꓲ ꓥ ꓠꓬꓲ꓾ ꓪꓴ-ꓢ ꓡꓰ ꓐꓯ ꓟꓴ ꓘꓶꓽ ꓠꓹ ꓟ ꓙꓵꓽ ꓪ ꓬꓲ ꓔꓯ ꓖꓶ ꓔ ꓡꓳ꓿ 28 ꓕꓱ ꓟ ꓔꓯ ꓕꓽ ꓓꓵꓽ ꓙꓽ ꓟꓶ꓿ ꓮ ꓡꓲꓳ ꓐꓯ ꓠꓬ ꓡꓱꓼ ꓜꓴ ꓠꓯꓸꓼ ꓗꓪ ꓓꓯꓹ ꓢꓴ ꓮꓽ ꓙꓵˍ ꓟꓲ ꓬꓲ ꓢꓯꓼ ꓑ ꓙꓽ ꓢꓲ ꓓꓳ ꓡ ꓟ ꓬꓲ ꓙꓵꓹ ꓛꓲ ꓡ ꓥꓳ꓿ 29 ꓙꓲˍ ꓟ ꓬꓰ ꓗꓷ ꓢꓴ ꓠꓬ ꓢꓯꓼ ꓟꓬ ꓟꓶ ꓠꓹ ꓟ ꓢꓯꓸ ꓡ ꓥꓳ꓿ ꓥꓶˍ ꓟ ꓬꓰ ꓗꓷ ꓢꓴ ꓠꓽ ꓐꓯ ꓟꓴ ꓘꓶꓽ ꓟꓶ ꓠꓹ ꓟ ꓢꓯꓸ ꓬꓲꓼ ꓡ ꓥꓳ꓿ 30 ꓥꓪ ꓚꓲꓸ ꓛꓬ ꓙꓵꓽ ꓪ ꓗꓪ ꓐꓰ ꓮꓸ ꓫꓵˍ ꓟꓲ ꓬꓰ ꓟꓽ ꓐ ꓡ꓿ ꓐꓹ ꓐ ꓡꓰ ꓥꓪ ꓔꓯ ꓮ ꓡꓲ ꓐꓯ ꓖꓶ ꓡ ꓠꓬ ꓥꓪ ꓬꓲ ꓖꓳ ꓡꓱ ꓐꓯ ꓞꓷꓹˍ ꓡꓳ꓿ ꓥꓪ ꓠꓬ ꓥꓪ ꓚꓲꓸ ꓛꓬ ꓠꓲꓹ ꓡꓶ ꓟꓽ ꓛꓳ ꓛꓳ꓾ ꓥꓪ ꓔꓯ ꓝꓲ ꓩꓴ ꓡ ꓢꓴ ꓠꓲꓹ ꓡꓶ ꓛꓳˍ ꓠꓬꓲ꓾ ꓥꓪ ꓐꓯ ꓞꓷꓹˍ ꓟ ꓐꓯ ꓟꓴ ꓠꓬ ꓔꓱꓹ ꓜꓳˍ ꓟ ꓥ ꓡꓳ꓿ 31 ꓥꓪ ꓠꓬ ꓚꓲꓸ ꓛꓬ ꓐꓱ ꓶ ꓢꓷꓸ ꓙ ꓟꓳ ꓙ ꓐꓷˍ ꓠꓬ꓾ ꓥꓪ ꓢꓷ ꓙ ꓟꓳ ꓙˍ ꓟ ꓠꓬ ꓟꓽ ꓔꓱꓹ꓿ 32 ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓠꓬ ꓬꓲ ꓔꓱꓹ ꓬꓲ ꓕꓲ ꓣꓳ ꓙꓳˍ ꓡꓳ꓿ ꓬꓲ ꓥꓪ ꓐꓱ ꓶ ꓢꓷ ꓙ ꓟꓳ ꓙˍ ꓟ ꓠꓬ ꓔꓱꓹˍ ꓟ ꓥ ꓟ ꓥꓪ ꓢꓷˍ ꓡꓳ꓿ 33 ꓠꓴ ꓪꓽ ꓡꓰ ꓬꓳ-ꓦ ꓔꓯ ꓠ ꓠꓬꓲ ꓩꓴ ꓕꓯ꓾ ꓬꓲ ꓠꓬ ꓔꓱꓹˍ ꓟ ꓐꓱ ꓶ ꓢꓷꓸ ꓙ ꓟꓳ ꓙ ꓗꓷꓳ꓿ 34 ꓥꓪ ꓕꓱ ꓡꓱ ꓐꓯˍ ꓟ ꓠꓬ ꓞꓳ ꓤ ꓢꓷꓸ ꓙ ꓟꓳ ꓙ ꓓꓴ ꓔꓯ ꓥꓪ ꓣꓱꓽ ꓬꓯꓼˍ ꓠꓬꓲ ꓐꓯˍ ꓟ ꓟꓽ ꓥ꓿ ꓠꓴ ꓪꓽ ꓚꓬꓴ ꓟꓶ ꓠꓹ ꓟ ꓥ ꓡꓳ꓿ 35 ꓬꓳ-ꓦ ꓠꓬ ꓟꓬ ꓡꓴ ꓕꓲꓽ ꓟ ꓡꓰ ꓐꓰ ꓡꓬꓸ ꓗꓷ ꓢꓲ꓾ ꓠꓴ ꓪꓽˍ ꓟꓲ ꓬꓲ ꓠꓬꓲ ꓟꓳ ꓓꓴ ꓗꓪ ꓕꓲ ꓝꓲꓸ ꓤ ꓗꓹ ꓛꓲ ꓗꓷꓳ꓿ 36 ꓖꓳ ꓡꓱ ꓥ ꓟꓲ ꓬꓳ-ꓦ ꓡꓰ ꓢꓷꓸ ꓙ ꓟꓳ ꓙ ꓗꓷ ꓟ ꓕꓯꓽ ꓢꓲ ꓪꓴꓽˍ ꓟ ꓢꓷꓸ ꓙ ꓟꓳ ꓙ ꓓꓴ ꓥꓪ ꓙꓳˍ ꓡꓳ꓿ ꓕꓱ ꓟ ꓠꓬ ꓐꓹ ꓐ ꓡꓰ ꓥꓪ ꓔꓯ ꓖꓶ ꓔ ꓟ ꓟꓬꓱꓽ ꓥꓪ ꓬꓰ ꓐꓲ ꓡꓰ ꓠꓹ ꓟ ꓥ ꓢꓲ꓾ ꓬꓲ ꓟꓬꓱꓽ ꓥꓪ ꓬꓰˍ ꓟ ꓠꓬ ꓐꓹ ꓐ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓬꓲꓸ ꓗꓸ ꓚꓵ ꓥ ꓡꓳ꓿ 37 ꓥꓪ ꓔꓯ ꓝꓲ ꓩꓴ ꓡ ꓢꓴ ꓐꓹ ꓐˍ ꓟꓲ꓾ ꓥꓪ ꓐꓱ ꓶ ꓢꓷ ꓙ ꓟꓳ ꓙˍ ꓡꓳ꓿ ꓬꓲ ꓢꓯꓼ ꓔꓯ ꓠꓴ ꓪꓽ ꓮ ꓕꓯˍ ꓟꓲ ꓟꓽ ꓑ ꓙꓽ ꓠꓬꓲ꓿ ꓬꓲ ꓒꓬꓱꓽ ꓔꓯˍ ꓟꓲ ꓠꓴ ꓪꓽ ꓟꓽ ꓟꓳ ꓠꓬꓲ꓿ 38 ꓬꓲ ꓐꓯ ꓘꓶꓽˍ ꓟꓲ ꓠꓴ ꓪꓽ ꓠꓲꓹ ꓟ ꓗꓪ ꓟꓽ ꓓꓯꓹ ꓠꓬꓲ꓾ ꓬꓲ ꓡꓰ ꓝꓲ ꓩꓴ ꓡ ꓢꓴ ꓔꓯˍ ꓟꓲ ꓠꓴ ꓪꓽ ꓟꓽ ꓙꓵꓻ꓿ 39 ꓠꓴ ꓪꓽ ꓠꓬ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳˍ ꓡꓳ꓾ ꓐꓰ ꓓꓵꓽ ꓙꓽ ꓢꓲ ꓖꓳ ꓗꓪ ꓬꓲ ꓜꓶ ꓧꓪ ꓟꓰꓹ ꓠꓬꓲˍ ꓟ ꓬꓰˍ ꓡꓳ꓿ ꓕꓳ ꓶ ꓖꓳ ꓟꓬ ꓟ ꓠꓽ ꓥꓪ ꓐꓱ ꓶ ꓢꓷ ꓙ ꓟꓳ ꓙ ꓟˍ ꓡꓰꓽ ꓥ ꓡꓳ꓿ 40 ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ ꓠꓴ ꓪꓽ ꓠꓽ ꓥꓪ ꓔꓯ ꓡ ꓟꓽ ꓫꓳ꓿ 41 ꓥꓪ ꓠꓬ ꓞꓳ ꓤ ꓡꓰ ꓟꓬꓱ ꓓꓳꓽ ꓖꓶ ꓡ ꓟ ꓔꓯ ꓧꓪ ꓔꓬ ꓟ ꓟꓽ ꓥ꓿ 42 ꓖꓳ ꓡꓱ ꓥ ꓟꓲ ꓠꓴ ꓪꓽ ꓮ ꓡꓲ ꓗꓹ ꓟ꓾ ꓪꓴ-ꓢ ꓠꓵꓻ ꓠꓲꓹ ꓠꓬ ꓠꓴ ꓪꓽ ꓠꓯꓸꓼ ꓗꓪ ꓟꓽ ꓓꓯꓹ ꓟ ꓥꓪ ꓢꓷˍ ꓡꓳ꓿ 43 ꓥꓪ ꓠꓬ ꓥꓪ ꓐꓹ ꓐ ꓟꓬꓱꓺ ꓗꓪ ꓐꓰ ꓡꓻ ꓥ ꓟꓲ꓾ ꓠꓴ ꓪꓽ ꓥꓪ ꓔꓯ ꓟꓽ ꓘꓳ ꓣꓴ꓿ ꓠꓱꓸ ꓐꓯꓼ ꓢꓴ ꓕꓲ ꓣꓳ ꓬꓲ ꓚꓲꓸ ꓛꓬ ꓟꓬꓱꓺ ꓗꓪ ꓐꓰ ꓡꓻ ꓐꓷˍ ꓠꓬ꓾ ꓠꓴ ꓪꓽ ꓠꓽ ꓬꓲ ꓔꓯ ꓘꓳ ꓣꓴˍ ꓥꓳ꓿ 44 ꓠꓴ ꓪꓽ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓟꓬꓱ ꓓꓳꓽ ꓖꓶ ꓡꓯꓽ ꓘꓳˍ ꓟ ꓔꓯˍ ꓡꓰ ꓧꓪ ꓢꓲ꓾ ꓕꓲ ꓔꓲꓸˍ ꓡꓰ ꓟ ꓪꓴ-ꓢ ꓡꓰ ꓖꓶ ꓡ ꓠꓯꓹ ꓟ ꓟꓬꓱ ꓓꓳꓽ ꓔꓯ ꓟꓽ ꓧꓪ ꓠꓬ꓾ ꓠꓴ ꓪꓽ ꓮ ꓡꓲ ꓐꓰ ꓢꓲꓸ ꓥꓪ ꓔꓯ ꓙꓵꓻ ꓐ ꓡ ꓢꓰꓽ꓿ 45 ꓥꓪ ꓠꓬ ꓐꓹ ꓐ ꓟꓲꓽ ꓙꓬ ꓗꓪ ꓠꓴ ꓪꓽ ꓔꓯ ꓗꓳꓹ ꓬꓰˍ ꓥꓳ꓾ ꓕꓽ ꓓꓵꓽ ꓙꓽ꓿ ꓠꓴ ꓪꓽ ꓔꓯ ꓗꓳꓹ ꓢꓴ ꓠꓬ ꓬꓲ ꓔꓱꓹ ꓬꓲ ꓕꓲ ꓣꓳ ꓙꓳˍ ꓡꓳ꓿ ꓖꓳ ꓕꓲ ꓣꓳ ꓟ ꓠꓬ ꓠꓴ ꓪꓽ ꓥꓳ ꓡꓳꓸ ꓗꓷ ꓢꓴ ꓟꓳ-ꓫꓲ ꓥ ꓡꓳ꓿ 46 ꓟꓳ-ꓫꓲ ꓠꓬ ꓥꓪ ꓔꓯ ꓖꓴ ꓢꓲ ꓐꓳ ꓗꓷ ꓠꓬꓲ꓾ ꓠꓴ ꓪꓽ ꓟꓳ-ꓫꓲ ꓔꓯ ꓙꓵꓻˍ ꓕꓯ ꓠꓽ ꓥꓪ ꓔꓯˍ ꓟꓲ ꓙꓵꓻˍ ꓡꓳ ꓫꓵ ꓥ ꓡꓳ꓿ 47 ꓖꓳ ꓡꓱ ꓥ ꓟꓲ ꓬꓲ ꓐꓳ ꓔ ꓟ ꓔꓯ ꓠꓴ ꓪꓽ ꓟꓽ ꓙꓵꓻ ꓠꓬ꓾ ꓥꓪ ꓐꓯ ꓘꓶ ꓔꓯ ꓠꓴ ꓪꓽ ꓮ ꓡꓲ ꓙꓵꓻ ꓐ ꓡ ꓢꓰ꓾ ꓐꓯˍ ꓡꓳ꓿

ꓬꓳ-ꓦ 6

1 ꓕꓱ ꓟꓬ ꓙꓰꓽ ꓗꓸ ꓠꓯꓸ ꓬꓰ-ꓢꓴ ꓠꓬ꓾ ꓕꓲ-ꓐꓲ-ꓡꓲ-ꓬ ꓐꓰˍ ꓟꓲ ꓟꓬꓱ ꓔ ꓟ꓾ ꓖ-ꓡꓲ-ꓡꓲ ꓬꓲꓻ ꓡꓴ ꓐꓱ ꓖꓳ ꓐꓽ ꓢꓲ ꓗꓪ ꓙꓰˍ ꓡꓳ꓿ 2 ꓠꓻ ꓢꓴ ꓒꓬꓽ ꓢꓴ ꓔꓯ ꓬꓲ ꓡꓰ ꓓꓻ ꓡꓰ ꓝꓲˍ ꓟ ꓢꓷꓸ ꓡꓰ ꓓꓴ ꓔꓯ ꓬꓲ ꓪꓽ ꓟꓳˍ ꓠꓬꓲ꓾ ꓞꓳ ꓜꓴ ꓓꓽ ꓟ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ 3 ꓬꓰ-ꓢꓴ ꓠꓬ ꓪ ꓚꓲ ꓗꓪ ꓓꓯ ꓙꓰ ꓢꓲ꓾ ꓖꓳ ꓗꓪ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓠꓬꓲꓸ ꓠˍ ꓡꓳ꓿ 4 ꓖꓳ ꓕꓯ ꓠꓽ ꓬꓴ-ꓔ ꓡ ꓞꓳ ꓐꓴ ꓦꓲ-ꓘꓳ-ꓑꓮꓲ ꓦꓬꓼ ꓠꓬꓲ ꓠꓶꓽ ꓡ ꓡꓳ꓿ 5 ꓬꓰ-ꓢꓴ ꓠꓬ ꓞꓳ ꓜꓴ ꓞꓳ ꓟꓯꓼ ꓬꓲ ꓔꓯ ꓡꓻˍ ꓟ ꓔꓯ ꓟꓳˍ ꓕꓯ ꓒꓲ-ꓡꓲ ꓔꓯ꓾ ꓕꓱ ꓟꓬ ꓣꓳ ꓜꓽ ꓓꓴ ꓣꓳ ꓮ ꓡꓲ ꓗꓪ ꓪꓴꓻ ꓬꓰ ꓠꓯꓹ ꓡ?꓾ ꓐꓯˍ ꓡꓳ꓿ 6 ꓬꓲ ꓕꓱ ꓡꓱ ꓐꓯˍ ꓟ ꓠꓬ ꓒꓲ-ꓡꓲ ꓔꓯ ꓤꓹ ꓠꓬꓲˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓮ ꓡꓲ ꓬꓰ ꓠꓹ ꓟ ꓬꓲ ꓚꓲꓸ ꓛꓬ ꓠꓽ ꓢꓷˍ ꓡꓳ꓿ 7 ꓖꓳ ꓕꓯ ꓒꓲ-ꓡꓲ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓣꓳ ꓠꓬ ꓒꓴ ꓠꓬꓲꓽ ꓦꓬ ꓓꓲ-ꓠ-ꓣꓲ ꓒꓵꓽ ꓑ ꓑ ꓪꓴꓻ ꓬꓰˍ ꓟꓲ꓾ ꓕꓲ ꓣꓳ ꓮ ꓔꓲꓸˍ ꓟꓲ ꓜꓽ ꓪ ꓟꓽ ꓓ꓾ ꓐꓯˍ ꓡꓳ꓿ 8 ꓬꓲ ꓛꓳꓽ ꓒꓯꓹ ꓗꓪ ꓟ ꓕꓲ ꓣꓳ꓾ ꓢꓲ-ꓟꓴ ꓒꓲ-ꓕꓱ ꓬꓲ ꓠꓬꓲ ꓤꓽ ꓯ-ꓓꓱ-ꓣꓴ ꓡꓰ ꓬꓰ-ꓢꓴ ꓔꓯ꓾ 9 ꓤꓴ ꓑ ꓑ ꓥꓪꓽ ꓘꓴꓸˍ ꓐꓰ ꓥꓪꓸ ꓠꓬꓲꓽ ꓟ ꓙꓳˍ ꓟ ꓮ ꓐꓲ ꓤ ꓕꓲ ꓣꓳ ꓕꓻ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓡ ꓞꓳ ꓕꓱ ꓟꓬ ꓟ ꓗꓪ ꓖꓳ ꓟ ꓮ ꓡꓲ ꓜꓽ ꓟꓵꓺ ꓢꓰꓽ꓾ ꓐꓯˍ ꓡꓳ꓿ 10 ꓬꓰ-ꓢꓴ ꓡꓰ꓾ ꓞꓳ ꓜꓴꓻ ꓔꓯ ꓠꓬꓲꓸ ꓠꓸ ꓝꓲ꓾ ꓐꓯˍ ꓡꓳ꓿ ꓖꓳ ꓗꓪ ꓞꓳ ꓑꓸ ꓤ ꓠꓬ ꓥꓪꓽ ꓔꓴ ꓣꓳ ꓛꓲ ꓙꓳ ꓢꓲ꓾ ꓖꓳ ꓕꓲ ꓔꓳꓸ ꓗꓪ ꓟꓳꓼ ꓮꓽ ꓟꓬꓹ ꓙꓳˍ ꓠꓬꓲ ꓬꓲ ꓪꓽ ꓖꓳ ꓗꓪ ꓠꓬꓲꓸ ꓠꓸˍ ꓡꓳ꓿ 11 ꓬꓰ-ꓢꓴ ꓡꓰ ꓑ ꓑ ꓖꓳ ꓟ ꓣꓴ ꓢꓲ ꓫ ꓟꓳ ꓗꓷ ꓠꓬ꓾ ꓠꓬꓲꓸ ꓠꓸ ꓔꓬ ꓢꓴ ꓔꓯ ꓬꓲ ꓪꓽ ꓮ ꓡꓲ ꓠꓵˍ ꓠꓬ ꓖꓳ ꓡꓱ ꓑꓶ ꓖꓶ ꓜꓽˍ ꓡꓳ꓿ ꓖꓳ ꓟ ꓡꓰ ꓐꓰ ꓥꓪꓸˍ ꓟꓲ ꓬꓲ ꓖꓳ ꓡꓱ ꓑꓶ ꓖꓶ ꓜꓽˍ ꓡꓳ꓿ 12 ꓬꓲ ꓪꓽ ꓜꓽ ꓐꓳ ꓡꓰ ꓠꓬ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓮꓸ ꓫꓵˍ ꓟꓲ ꓟꓽ ꓑ ꓒꓲꓼ ꓬꓰ ꓠꓹ ꓟ꓾ ꓜꓽ ꓜꓰꓻ ꓡꓰˍ ꓟ ꓬꓲ ꓧꓶꓽ ꓬꓲ ꓟꓲ ꓖꓳ ꓫꓺ ꓗꓷ꓾ ꓐꓯˍ ꓡꓳ꓿ 13 ꓖꓳ ꓡꓱ ꓠꓬ ꓜꓽ ꓜꓰ ꓡꓰˍ ꓟ ꓤꓴꓻ ꓑ ꓑ ꓥꓪꓽ ꓘꓴꓸ ꓟ ꓬꓲ ꓧꓶꓽ ꓬꓲ ꓟꓲ ꓬꓲ ꓪꓽ ꓖꓳ ꓫ ꓗꓷ ꓠꓬ꓾ ꓞꓲ ꓠꓬꓲꓽ ꓠꓳꓸ ꓘꓴꓽ ꓗꓶ ꓐꓲ ꓡꓰꓳ꓿ 14 ꓬꓲ ꓬꓰˍ ꓟ ꓢꓷꓸ ꓡꓰ ꓓꓴ ꓔꓯ ꓡ ꓞꓳ ꓬꓲ ꓜꓴ ꓟꓳ ꓗꓷ ꓠꓬ꓾ ꓕꓱ ꓟ ꓠꓽ ꓚꓵ ꓚꓵ ꓟꓲ ꓠꓯ ꓗꓪ ꓡ ꓠꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓖꓳ ꓕꓲ ꓣꓳ ꓥ ꓡꓳ꓾ ꓐꓯˍ ꓡꓳ꓿ 15 ꓖꓳ ꓡꓱ ꓢꓲ ꓬꓲ ꓪꓽ ꓬꓲ ꓔꓯ ꓟꓽ ꓓ ꓟ ꓞꓽ ꓪ ꓔꓲ ꓣꓱ ꓝꓲˍ ꓐꓰ ꓬꓰˍ ꓟ ꓔꓯ ꓬꓰ-ꓢꓴ ꓡꓳꓸ ꓓꓳ ꓡ ꓠꓬ꓾ ꓝꓮꓲ ꓕꓲ ꓧꓪꓹ ꓬꓲ ꓕꓲ ꓣꓳ ꓔꓵꓸꓼ ꓪꓽ ꓚꓲ ꓗꓪ ꓙꓵꓺ ꓙꓰˍ ꓡꓳ꓿ 16 ꓟꓶꓼ ꓘꓶ ꓝꓲꓸ ꓛꓲ ꓡ ꓕꓯ꓾ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓲꓻ ꓡꓴꓽ ꓐꓱ ꓗꓪ ꓬꓯꓼ ꓙꓰ ꓢꓲ꓾ 17 ꓡꓲ ꓗꓪ ꓓꓵꓽ ꓡꓰ ꓢꓲ ꓠꓬꓲ꓾ ꓬꓲꓻ ꓡꓴꓽ ꓐꓱ ꓖꓳ ꓐꓽ ꓢꓲ ꓘ-ꓒꓱ-ꓠꓴ ꓗꓪ ꓙꓰˍ ꓡꓳ꓿ ꓖꓳ ꓕꓯ ꓟꓰꓻ ꓬꓰ ꓢꓲ ꓠꓯ ꓞꓲꓹ ꓡꓰˍ ꓟꓲ꓾ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓟꓽ ꓛꓲ ꓡ ꓢꓰ꓿ 18 ꓟꓲ ꓦꓲ ꓓꓽ ꓟ ꓙꓱꓼˍ ꓠꓬꓲ꓾ ꓬꓲꓻ ꓡꓴꓽ ꓐꓱ ꓗꓪ ꓬꓲꓻ ꓡꓯꓼ ꓟꓰꓼ ꓔꓴ ꓡ ꓡꓳ꓿ 19 ꓬꓲ ꓪꓽ ꓠꓬ ꓡꓳ ꓔ ꓢ ꓕꓷꓹ ꓡꓲ ꓕꓷꓹ ꓛꓲ ꓡꓲ ꓗꓴꓸ ꓙꓰ ꓗꓷ ꓠꓬ꓾ ꓬꓰ-ꓢꓴ ꓠꓬ ꓬꓲꓻ ꓡꓴꓽ ꓐꓱ ꓕꓯ ꓢꓲ ꓗꓪ ꓫꓱꓽ ꓡ ꓢꓲ꓾ ꓡꓲ ꓒ ꓕꓲꓺꓼ ꓗꓪ ꓠꓶꓽ ꓡ ꓟ ꓔꓯ ꓟꓳˍ ꓠꓬꓲ ꓬꓲ ꓪꓽ ꓙꓳꓺˍ ꓡꓳ꓿ 20 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓥ ꓡꓳ꓾ ꓕꓽ ꓙꓳ꓾ ꓐꓯ ꓖꓶˍ ꓡꓳ꓿ 21 ꓖꓳ ꓕꓯ ꓬꓲ ꓪꓽ ꓡꓰ ꓠꓲꓹ ꓒꓴ ꓒꓴˍ ꓐꓰ ꓬꓲ ꓔꓯ ꓡꓲ ꓠꓯꓸꓼ ꓗꓪ ꓞꓵ ꓓꓵꓽ ꓡꓰ ꓠꓬ꓾ ꓡꓲ ꓠꓽ ꓞꓼ ꓐꓰ ꓬꓲ ꓪꓽ ꓙꓰˍ ꓟ ꓟꓵꓽ ꓗꓪ ꓛꓲ ꓬꓰꓳ꓿ 22 ꓗꓸ ꓠꓯꓸ ꓕꓲ ꓠꓬꓲ ꓗꓪ ꓬꓲꓻ ꓡꓴꓽ ꓐꓱ ꓖꓳ ꓐꓽ ꓢꓲ ꓔꓲꓹ ꓬꓰˍ ꓟ ꓞꓳ ꓜꓴ ꓠꓬ ꓖꓳ ꓗꓪ ꓡꓲ ꓤ ꓕꓲ ꓟˍ ꓡꓰꓽ ꓓꓹ ꓟ ꓡꓳꓸ ꓓꓳ ꓡ ꓡꓳ꓿ ꓖꓳ ꓗꓪ ꓠꓱꓸ ꓐꓯꓼ ꓡꓲ ꓟꓽ ꓙꓳ ꓟ ꓐꓰ꓾ ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓡꓲ ꓗꓪ ꓟꓽ ꓓꓵ ꓡꓰ ꓡꓰ꓾ ꓬꓲ ꓛꓳꓽ ꓒꓯꓹ ꓐꓴˍ ꓡꓰꓽ ꓙꓰ ꓗꓷ ꓟ ꓔꓯˍ ꓟꓲ ꓬꓲ ꓪꓽ ꓢꓷꓸˍ ꓡꓳ꓿ 23 ꓖꓳ ꓡꓱ ꓥ ꓟꓲ ꓢꓲ ꓒ ꓡꓰ ꓫꓸ ꓟꓳ ꓗꓷ ꓢꓲ ꓑ ꓑ ꓑꓶ ꓖꓶ ꓜ ꓖꓴ ꓒ ꓕꓲ ꓗꓪ꓾ ꓕꓲ-ꓐꓲ-ꓡꓲ-ꓬ ꓗꓪ ꓐꓰ ꓠꓱꓸ ꓐꓯꓼ ꓡꓲ ꓠꓬꓲꓽ ꓢ ꓟ ꓡꓻˍ ꓡꓳ꓿ 24 ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓖꓳ ꓗꓪ ꓟꓽ ꓔꓬ ꓟ ꓔꓯ ꓞꓳ ꓜꓴ ꓟꓳꓻ ꓗꓷ ꓠꓬ꓾ ꓬꓲ ꓪꓽ ꓠꓽ ꓡꓲ ꓖꓳ ꓟ ꓗꓪ ꓓꓵꓽ ꓡꓰ ꓢꓲ꓾ ꓘ-ꓒꓱ-ꓠꓴ ꓗꓪ ꓡ ꓢꓲ ꓠꓬꓲ ꓬꓰ-ꓢꓴ ꓔꓯ ꓧꓪ ꓡ ꓡꓳ꓿ 25 ꓬꓲꓻ ꓡꓴꓽ ꓐꓱ ꓖꓳ ꓐ ꓢꓲ ꓗꓪ ꓬꓲ ꓔꓯ ꓧꓪ ꓟꓶ ꓗꓷ ꓠꓬ꓾ ꓟꓸ ꓒꓽꓳ꓾ ꓠꓴ ꓕꓻ ꓮ ꓕꓯˍ ꓡꓰ ꓛꓲ ꓡ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 26 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓥꓪ ꓔꓯ ꓧꓪ ꓡ ꓟ ꓠꓬ꓾ ꓢꓷꓸ ꓡꓰ ꓓꓴ ꓟꓳꓻ ꓗꓷ ꓠꓬꓲ ꓠꓽ ꓟꓽ ꓥ꓾ ꓑ ꓑ ꓜꓽ ꓐꓳ ꓡꓰ ꓠꓬꓲ ꓥ ꓡꓳ꓿ 27 ꓐꓬ ꓡꓰ ꓓꓻˍ ꓟ ꓜꓽ ꓓꓴ ꓑꓶꓸ ꓓꓴˍ ꓡꓰꓽ ꓕꓽ ꓢꓯꓼ ꓕꓵꓼ꓿ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓗꓪ ꓛꓲ ꓓꓹ ꓘꓴˍ ꓟ꓾ ꓡ-ꓞꓳ-ꓮ-ꓐꓲ ꓡꓰ ꓠꓴ ꓪꓽ ꓔꓯ ꓖꓶ ꓡ ꓠꓯꓹ ꓟ ꓜꓽ ꓓꓴ ꓔꓯ ꓧꓪ ꓢꓯꓼ ꓕꓵꓼ꓿ ꓮ ꓡꓲꓳ ꓐꓯ ꓠꓬ ꓐꓹ ꓐ ꓪꓴ-ꓢ ꓡꓰ ꓬꓲ ꓕꓯꓽ ꓢꓲ ꓗꓪ ꓓꓽ ꓔꓳꓹˍ ꓟ ꓔꓳꓹ ꓠꓷꓼ ꓓꓴ ꓔꓳꓹ ꓠꓷꓼ ꓗꓷꓳ꓾ ꓐꓯˍ ꓡꓳ꓿ 28 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓔꓯ꓾ ꓪꓴ-ꓢ ꓟꓬꓱꓽ ꓬꓰ ꓠꓹ ꓟ ꓥꓪ ꓠꓴꓽ ꓮꓸ ꓫꓵ ꓬꓰ ꓠ ꓗꓹ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 29 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓬꓰ ꓠꓯꓹ ꓟ ꓪꓴ-ꓢ ꓟꓬꓱꓽ ꓠꓬ꓾ ꓬꓲ ꓡꓰ ꓝꓲ ꓩꓴ ꓔ ꓢꓴ ꓖꓳ ꓕꓲ ꓣꓳ ꓔꓯ ꓠꓴ ꓪꓽ ꓙꓵꓻ ꓠꓯꓹ ꓟ ꓕꓱ ꓟ ꓥ ꓡꓳ꓾ ꓐꓯ ꓖꓶˍ ꓡꓳ꓿ 30 ꓖꓳ ꓡꓱ ꓠꓬꓲ ꓬꓲ ꓪꓽ ꓡꓰ ꓬꓲ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓠꓴꓽ ꓟꓳꓻ ꓢꓲ ꓠꓴ ꓔꓯ ꓙꓵꓻ ꓠꓹ ꓟ꓾ ꓠꓴ ꓮꓸ ꓫꓵ ꓢꓷꓸ ꓡꓰ ꓓꓴ ꓬꓰˍ ꓐꓯˍ ꓡ? ꓠꓴ ꓮꓸ ꓫꓵ ꓟꓬꓱꓽ ꓬꓰˍ ꓥꓳ ꓪ? 31 ꓕꓳ ꓶ ꓗꓪ꓾ ꓬꓲ ꓡꓰ ꓬꓲ ꓪꓽ ꓔꓯ ꓟꓴꓽ ꓗꓪ ꓗꓪ ꓐꓰ ꓜꓽ ꓓꓴ ꓖꓶ ꓜꓽˍ ꓗꓷꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ꓾ ꓥꓪ ꓠꓴ ꓒꓵꓽ ꓒ ꓐꓴ ꓠꓬ ꓡꓲ ꓛꓲ ꓗꓪ ꓟ-ꓠ ꓑ ꓑ ꓜꓽ ꓗꓷꓳ꓾ ꓐꓯˍ ꓡꓳ꓿ 32 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓔꓯ ꓟꓴꓽ ꓗꓪ ꓗꓪ ꓐꓰ ꓑ ꓑ ꓖꓶ ꓢꓴ ꓠꓬ ꓟꓳ-ꓫꓲ ꓟꓽ ꓥ꓿ ꓠꓴ ꓪꓽ ꓔꓯ ꓟꓴꓽ ꓗꓪ ꓗꓪ ꓐꓰ ꓜꓽ ꓓꓴ ꓚꓵꓺ ꓖꓶ ꓢꓴ ꓠꓽ ꓥꓪ ꓐꓹ ꓐ ꓥ ꓡꓳ꓿ 33 ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓢꓲ꓾ ꓟꓲ ꓠꓯ ꓞꓳ ꓤ ꓔꓯ ꓢꓯꓼ ꓟꓬ ꓖꓶ ꓢꓴ ꓖꓳ ꓕꓲ ꓣꓳ ꓠꓬ ꓪꓴ-ꓢ ꓬꓲ ꓑ ꓑ ꓥ ꓡꓳ꓾ ꓐꓯˍ ꓡꓳ꓿ 34 ꓖꓳ ꓡꓱ ꓠꓬ ꓬꓲ ꓪꓽ ꓡꓰ꓾ ꓢꓲ ꓒꓽꓳ꓾ ꓑ ꓑ ꓕꓱ ꓟ ꓥꓪ ꓠꓴꓽ ꓔꓯ ꓕꓲ ꓞꓲꓼ ꓖꓶ ꓜꓽ ꓡꓯ꓾ ꓐꓯˍ ꓡꓳ꓿ 35 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓠꓬ ꓢꓯꓼ ꓟꓬ ꓑ ꓑ ꓥꓳ꓿ ꓥꓪ ꓔꓯ ꓡ ꓢꓴ ꓠꓬ ꓟꓽ ꓦꓰꓼ ꓟꓷꓼ ꓡ꓿ ꓥꓪ ꓔꓯ ꓙꓵꓻ ꓢꓴˍ ꓟꓲ ꓕꓲ ꓞꓲ ꓟꓽ ꓢꓲꓼ ꓡ꓿ 36 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓗꓷ ꓟ ꓡꓰ ꓐꓰ꓾ ꓠꓴ ꓪꓽ ꓥꓪ ꓔꓯ ꓟꓳˍ ꓟꓲ ꓟꓽ ꓙꓵꓻ꓿ 37 ꓐꓹ ꓐ ꓡꓰ ꓥꓪ ꓔꓯ ꓖꓶ ꓡ ꓢꓴ ꓮꓽ ꓙꓵ ꓠꓬ ꓥꓪ ꓔꓯ ꓡꓻˍ ꓥꓳ꓿ ꓥꓪ ꓔꓯ ꓡ ꓢꓴ ꓔꓯ ꓠꓬ ꓮ ꓡꓲ ꓥ ꓟꓲ ꓥꓪ ꓟꓽ ꓡꓳ ꓗꓷ꓿ 38 ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓪ ꓐꓰ ꓥꓪ ꓬꓯꓼ ꓡ ꓟ ꓠꓬ꓾ ꓥꓪ ꓚꓲꓸ ꓛꓬ ꓠꓲꓹ ꓡꓶ ꓬꓰ ꓠꓹ ꓟ ꓟꓽ ꓥ꓿ ꓥꓪ ꓔꓯ ꓝꓲ ꓩꓴ ꓡ ꓢꓴ ꓬꓲ ꓠꓲꓹ ꓡꓶꓽ ꓬꓰ ꓠꓹ ꓟ ꓥ ꓡꓳ꓿ 39 ꓥꓪ ꓔꓯ ꓝꓲ ꓩꓴ ꓡ ꓢꓴ ꓬꓲ ꓠꓲꓹ ꓡꓶ ꓠꓬ꓾ ꓬꓲ ꓡꓰ ꓥꓪ ꓔꓯ ꓖꓶ ꓔ ꓟ ꓮꓽ ꓙꓵ꓾ ꓕꓲ ꓣꓳˍ ꓟꓲ ꓟꓽ ꓒꓲꓼ ꓬꓰ ꓝꓲ ꓝꓲ꓾ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓬꓲ ꓪꓽ ꓔꓯ ꓢꓯꓸ ꓬꓲꓼ ꓡ ꓝꓲ ꓠꓹ ꓟ ꓥ ꓡꓳ꓿ 40 ꓮ ꓡꓲꓳ ꓐꓯ ꓠꓬ ꓮ ꓐꓲ ꓔꓯ ꓡꓳꓸ ꓟꓳꓻ ꓢꓲ ꓬꓲ ꓔꓯ ꓙꓵꓻ ꓢꓴ ꓥ ꓕ ꓑꓳ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ ꓕꓱ ꓟ ꓠꓬ ꓥꓪ ꓐꓹ ꓐ ꓠꓲꓹ ꓡꓶ ꓥ ꓡꓳ꓿ ꓖꓳ ꓡꓱ ꓢꓲ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓥꓪ ꓬꓲ ꓔꓯ ꓢꓯꓸ ꓬꓲꓼ ꓡ ꓝꓲˍ ꓥꓳ꓾ ꓐꓯˍ ꓡꓳ꓿ 41 ꓬꓲ ꓡꓰ꓾ ꓥꓪ ꓠꓽ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓥ ꓡꓳ꓾ ꓐꓯˍ ꓟ ꓑꓶꓸ ꓓꓴ ꓬꓴ-ꓔ ꓡ ꓞꓳ ꓠꓬ ꓬꓲ ꓔꓯ ꓱ'ꓽ ꓠꓱꓽˍ ꓡꓳ꓿ 42 ꓖꓳ ꓡꓱ ꓢꓲ ꓬꓲ ꓪꓽ ꓡꓰ꓾ ꓬꓰ-ꓢꓴ ꓕꓱ ꓕꓲ ꓣꓳ ꓬꓲ ꓐꓹ ꓐ ꓟꓹ ꓟ ꓔꓯ ꓥꓪ ꓠꓴꓽ ꓢꓷˍ ꓡꓳ꓿ ꓬꓲ ꓠꓬ ꓬꓳ-ꓢꓷ ꓬꓲ ꓤꓽ ꓟꓽ ꓥ ꓡ? ꓮ ꓟꓶ ꓬꓲ ꓮ ꓡꓲ ꓗꓷ ꓡꓰ ꓠꓬꓲ꓾ ꓥꓪ ꓠꓽ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓥꓳ꓾ ꓐꓯˍ ꓡ?꓾ ꓐꓯˍ ꓡꓳ꓿ 43 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓕꓽ ꓱ'ꓽ ꓠꓱꓽ꓿ 44 ꓥꓪ ꓔꓯ ꓝꓲ ꓩꓴ ꓡ ꓢꓴ ꓐꓹ ꓐ ꓡꓰ ꓟꓽ ꓚꓵꓹ ꓧꓳꓽ ꓡ ꓠꓬ꓾ ꓮꓽ ꓟˍ ꓟꓲ ꓥꓪ ꓔꓯ ꓡ ꓟꓽ ꓐ ꓡ꓿ ꓥꓪ ꓔꓯ ꓡ ꓢꓴ ꓔꓯ ꓠꓬ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓥꓪ ꓡꓰ ꓢꓯꓸ ꓬꓲꓼ ꓡ ꓝꓲˍ ꓥꓳ꓿ 45 ꓟꓷꓽ ꓠꓷꓹ ꓝꓸ ꓢꓴ ꓕꓳ ꓶ ꓗꓪ꓾ ꓬꓲ ꓪꓽ ꓮꓽ ꓙꓵ ꓠꓬ ꓪꓴ-ꓢ ꓡꓰ ꓟꓸ ꓔ ꓟ ꓗꓷ ꓡꓰˍ ꓥꓳ꓾ ꓐꓰ ꓐꓳ ꓔ ꓡꓳ꓿ ꓐꓹ ꓐ ꓔꓯ ꓑ ꓙꓽ ꓢꓲ ꓢꓳ ꓟꓶ ꓢꓴ ꓥ ꓕ ꓑꓳꓸ ꓠꓬ ꓥꓪ ꓔꓯ ꓡꓻˍ ꓥꓳ꓿ 46 ꓪꓴ-ꓢ ꓔꓯˍ ꓐꓰ ꓡꓻ ꓢꓴ ꓖꓳ ꓕꓲ ꓣꓳ ꓟꓽ ꓥ ꓠꓬ꓾ ꓬꓲ ꓔꓯ ꓟꓳꓻ ꓠꓬꓲ ꓢꓴ ꓟꓽ ꓙꓳ꓿ ꓥꓪ ꓠꓽ ꓐꓹ ꓐ ꓔꓯ ꓟꓳꓻ ꓠꓬꓲꓳ꓿ 47 ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓙꓵꓻ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳˍ ꓡꓳ꓿ 48 ꓥꓪ ꓠꓽ ꓢꓯꓼ ꓟꓬ ꓑ ꓑ ꓥ ꓡꓳ꓿ 49 ꓠꓴ ꓪꓽ ꓒꓵꓽ ꓒ ꓐꓴ ꓠꓬ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓟ-ꓠ ꓑ ꓑ ꓜꓽ ꓢꓲ ꓫꓵꓻꓳ꓿ 50 ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓕꓱ ꓟ ꓜꓽ ꓢꓴ ꓠꓬ ꓟꓽ ꓫꓵꓻ ꓡ꓿ 51 ꓥꓪ ꓠꓽ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓬꓲ ꓢꓯꓸ ꓥ ꓡꓳ꓿ ꓑ ꓑ ꓕꓱ ꓟ ꓜꓽ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓥꓳ꓿ ꓝꓮꓲ ꓠꓬ ꓟꓲ ꓠꓯ ꓡ ꓞꓳ ꓢꓯꓼ ꓟꓬ ꓐꓱ ꓶ꓾ ꓥꓪ ꓖꓶ ꓠꓹ ꓟ ꓑ ꓑ ꓠꓬ꓾ ꓥꓪ ꓧꓪꓽ ꓥ ꓡꓳ꓾ ꓐꓯˍ ꓡꓳ꓿ 52 ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓠꓬ꓾ ꓡ ꓞꓳ ꓕꓱ ꓟ ꓮ ꓡꓲ ꓐꓰ ꓢꓲꓸ ꓥꓪ ꓠꓴꓽ ꓔꓯ ꓬꓲ ꓧꓪꓽ ꓖꓶ ꓜꓽˍ ꓐꓯˍ ꓡ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 53 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓡ-ꓞꓳ-ꓮ-ꓐꓲ ꓬꓲꓸ ꓧꓪꓽ ꓟꓽ ꓜ ꓬꓲꓸ ꓫꓵꓽ ꓟꓽ ꓓꓳꓻ ꓠꓬ꓾ ꓠꓴ ꓪꓽ ꓠꓯꓸꓼ ꓗꓪ ꓢꓯꓼ ꓟꓬ ꓟꓽ ꓓꓯꓹ꓿ 54 ꓥꓪ ꓧꓪꓽ ꓜ ꓢꓲ ꓥꓪ ꓫꓵꓽ ꓓꓳ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳˍ ꓡꓳ꓿ ꓝꓮꓲ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓥꓪ ꓬꓲ ꓔꓯ ꓢꓯꓸ ꓬꓲꓼ ꓡ ꓝꓲˍ ꓥꓳ꓿ 55 ꓮ ꓡꓲꓳ ꓐꓯ ꓠꓬ ꓥꓪ ꓧꓪꓽ ꓠꓬ ꓜ ꓓꓴ ꓚꓵꓺ ꓥ ꓡꓳ꓿ ꓥꓪ ꓫꓵꓽˍ ꓟꓲ ꓓꓳꓻ ꓓꓴ ꓚꓵꓺ ꓥ ꓡꓳ꓿ 56 ꓥꓪ ꓧꓪꓽ ꓜ ꓢꓲ ꓥꓪ ꓫꓵꓽ ꓓꓳ ꓢꓴ ꓬꓲ ꓠꓬ ꓥꓪ ꓠꓯꓸꓼ ꓗꓪ ꓢꓯꓸ ꓔꓬ ꓟꓶ ꓢꓲ꓾ ꓥꓪˍ ꓟꓲ ꓬꓲ ꓠꓯꓸꓼ ꓗꓪ ꓔꓬ ꓡꓳ꓿ 57 ꓢꓯꓸ ꓔꓬ ꓟ ꓐꓹ ꓐ ꓡꓰ ꓥꓪ ꓔꓯ ꓝꓲ ꓩꓴ ꓡ ꓢꓲ꓾ ꓐꓹ ꓐ ꓗꓪ ꓐꓰ ꓥꓪˍ ꓟꓲ ꓢꓯꓸ ꓔꓬ ꓟ ꓡꓰ ꓐꓰ꓾ ꓥꓪ ꓔꓯ ꓜꓽ ꓢꓴˍ ꓟꓲ ꓥꓪ ꓗꓪ ꓐꓰ ꓢꓯꓸ ꓔꓬ ꓥꓳ꓿ 58 ꓕꓱ ꓟ ꓠꓽ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓥ ꓡꓳ꓿ ꓒꓵꓽ ꓒ ꓐꓴ ꓜ ꓗꓷ ꓟ ꓑ ꓑˍ ꓡꓰ ꓐꓰ ꓟꓽ ꓗꓹ꓿ ꓬꓲ ꓪꓽ ꓠꓽ ꓫꓵꓻꓳ꓿ ꓑ ꓑ ꓕꓱ ꓟ ꓜ ꓢꓴ ꓠꓽ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓥꓳ꓾ ꓐꓯˍ ꓡꓳ꓿ 59 ꓕꓱ ꓟꓬ ꓙꓰꓽ ꓠꓬ ꓬꓰ-ꓢꓴ ꓘ-ꓒꓱ-ꓠꓴ ꓜꓲꓼ ꓦꓲ ꓗꓪ ꓟꓸ ꓟꓲ ꓟꓸ ꓔꓬ ꓕꓯ ꓐꓯ ꓗꓷ ꓟ ꓥ ꓡꓳ꓿ 60 ꓖꓳ ꓡꓱ ꓠꓬꓲ ꓬꓲ ꓛꓳꓽ ꓒꓯꓹ ꓮꓽ ꓟꓬ ꓣꓳ ꓕꓱ ꓟ ꓔꓯ ꓑ ꓙꓽˍ ꓠꓬ꓾ ꓕꓱ ꓟ ꓠꓽ ꓙ ꓜꓲꓼ ꓫꓸˍ ꓟ ꓟꓸ ꓟꓲꓽ ꓥ ꓡꓳ꓾ ꓮꓽ ꓟ ꓘꓳ ꓣꓴ ꓐ ꓡ ꓢꓰ꓾ ꓐꓯˍ ꓡꓳ꓿ 61 ꓬꓲ ꓛꓳꓽ ꓒꓯꓹ ꓐꓴ ꓕꓱ ꓟ ꓔꓯꓸ ꓟꓳꓸ ꓚ ꓡꓯꓽ ꓘꓳ ꓔꓬ ꓟ ꓔꓯ ꓬꓰ-ꓢꓴ ꓢꓷˍ ꓠꓬꓲ꓾ ꓥꓪ ꓐꓯ ꓘꓶ ꓕꓱ ꓟ ꓡꓰ ꓠꓴ ꓪꓽ ꓔꓯ ꓡꓱꓸ ꓗꓷ ꓝꓲˍ ꓡ? 62 ꓡ-ꓞꓳ-ꓮ-ꓐꓲ ꓬꓲ ꓧꓶꓸ ꓕꓯ ꓔꓬ ꓖꓴ ꓗꓪ ꓓꓯ ꓙꓰˍ ꓟ ꓔꓯ ꓠꓴ ꓪꓽ ꓟꓳ ꓐꓷˍ ꓠꓬ ꓠꓴ ꓪꓽ ꓮ ꓡꓲ ꓗꓷ ꓡꓰˍ ꓥꓳ ꓪ? 63 ꓢꓯꓼ ꓟꓬ ꓖꓶ ꓢꓴ ꓠꓬ ꓪꓴ-ꓢ ꓦ ꓥ ꓡꓳ꓾ ꓧꓪꓽ ꓖꓳ ꓓꓱꓽ ꓠꓽ ꓟꓽ ꓐ ꓡ꓿ ꓥꓪ ꓡꓰ ꓠꓴ ꓪꓽ ꓔꓯ ꓐꓯ ꓖꓶˍ ꓟ ꓐꓯ ꓘꓶ ꓠꓬ ꓦˍ ꓐꓰ ꓢꓯꓼ ꓟꓬ ꓥ ꓡꓳ꓿ 64 ꓖꓳ ꓡꓱ ꓥ ꓟꓲ ꓠꓴ ꓪꓽ ꓟꓽ ꓙꓵꓻ ꓢꓴ ꓕꓲ ꓐꓱ ꓙꓳˍ ꓡꓳ꓾ ꓐꓯˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓟꓽ ꓙꓵꓻ ꓢꓴ ꓮꓽ ꓟ ꓥ ꓟ ꓐꓰ꓾ ꓬꓲ ꓔꓯ ꓪꓴꓽ ꓜ ꓗꓷ ꓠꓹ ꓟ ꓮ ꓡꓲ ꓕꓲ ꓣꓳ ꓥ ꓟ꓾ ꓬꓲ ꓪꓴꓸ ꓕꓯˍ ꓡꓰ ꓬꓰ-ꓢꓴ ꓢꓷˍ ꓡꓳ꓿ 65 ꓝꓮꓲ ꓬꓲ ꓡꓰ꓾ ꓕꓱ ꓟ ꓑꓶ ꓓꓴ ꓥꓪ ꓡꓰ꓾ ꓥꓪ ꓐꓹ ꓐ ꓡꓰ ꓚꓵꓹ ꓧꓳꓽ ꓡ ꓟ ꓟꓽ ꓥ ꓠꓬ꓾ ꓮ ꓟˍ ꓟꓲ ꓥꓪ ꓔꓯ ꓡꓻ ꓟꓽ ꓐ ꓡ꓾ ꓐꓰ ꓠꓴ ꓪꓽ ꓔꓯ ꓐꓯ ꓖꓶ ꓗꓷꓳ꓾ ꓐꓯˍ ꓡꓳ꓿ 66 ꓕꓱ ꓟ ꓑꓶ ꓓꓴ ꓬꓲ ꓛꓳꓽ ꓒꓯꓹ ꓐꓴ ꓮꓽ ꓟꓬꓹ ꓣꓳ ꓒꓳꓹ ꓙꓰ ꓢꓲ ꓬꓲ ꓔꓯ ꓝꓮꓲ ꓟꓽ ꓛꓳ꓿ 67 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓞꓲ ꓠꓬꓲꓽ ꓣꓳ ꓔꓯ꓾ ꓠꓴ ꓪꓽˍ ꓟꓲ ꓧꓹ ꓙꓰ ꓠꓲꓹ ꓫꓵˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 68 ꓢꓲ-ꓟꓴ ꓒꓲ-ꓕꓱ ꓒꓳꓹ ꓖꓶ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓮꓽ ꓟ ꓔꓯ ꓙꓰ ꓢꓰ꓿ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓐꓯ ꓘꓶ ꓠꓬ ꓠꓴ ꓔꓯˍ ꓡꓰꓽ ꓙꓳˍ ꓡꓳ꓿ 69 ꓠꓴ ꓠꓬ ꓪꓴ-ꓢ ꓬꓲ ꓢꓲꓽ ꓫꓬ ꓢꓴ ꓖꓳ ꓕꓲ ꓣꓳ ꓥ ꓟ ꓥꓪ ꓠꓴꓽ ꓙꓵꓻˍ ꓟꓲ ꓙꓵꓻ ꓗꓷꓳ꓾ ꓢꓷˍ ꓟꓲ ꓢꓷꓸ ꓡꓰꓳ꓾ ꓐꓯˍ ꓡꓳ꓿ 70 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓞꓲ ꓠꓬꓲꓽ ꓣꓳ ꓟ ꓠꓬ ꓥꓪ ꓡꓰ ꓢꓲ ꓔ ꓟ ꓥ ꓥ ꓟꓲ꓾ ꓠꓴ ꓪꓽ ꓗꓳ ꓡꓳ ꓗꓪ ꓟ ꓕꓲ ꓣꓳ ꓠꓽ ꓠꓲꓽ ꓥ ꓡꓳ꓾ ꓐꓯˍ ꓡꓳ꓿ 71 ꓕꓱ ꓟ ꓠꓬ ꓘꓹ-ꓡꓲꓳ ꓢꓲ-ꓟꓴ ꓬꓲ ꓤ ꓬꓴ-ꓓ ꓔꓯ ꓐꓯˍ ꓟ ꓥ ꓡꓳ꓿ ꓬꓲ ꓠꓽ ꓞꓲ ꓠꓬꓲꓽ ꓣꓳ ꓗꓪ ꓟ ꓕꓲ ꓣꓳ ꓥ ꓢꓲ꓾ ꓗꓸ ꓠꓯꓸ ꓠꓬ ꓬꓰ-ꓢꓴ ꓔꓯ ꓪꓴꓽ ꓜ ꓢꓴ ꓥ ꓡꓳ꓿

ꓬꓳ-ꓦ 7

1 ꓕꓱ ꓟꓬ ꓙꓰꓽ ꓗꓸ ꓠꓯꓸ ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵꓽ ꓗꓪ ꓚꓳ ꓙꓰˍ ꓡꓳ꓿ ꓬꓴ-ꓔ ꓡ ꓞꓳ ꓠꓬ ꓬꓲ ꓔꓯ ꓢꓰꓼ ꓠꓹ ꓟ ꓚꓱꓹ ꓧꓪˍ ꓠꓬꓲ꓾ ꓬꓲ ꓠꓬ ꓬꓴ-ꓔ ꓟꓵꓽ ꓗꓪ ꓚꓳ ꓙꓰ ꓠꓲꓹ ꓟꓽ ꓫꓵ꓿ 2 ꓖꓳ ꓕꓯ ꓬꓴ-ꓔ ꓡ ꓞꓳ ꓦꓲ-ꓐꓱ-ꓑꓮꓲ ꓛꓲ ꓡꓺˍ ꓐꓰ ꓗꓹ ꓡꓳ꓿ 3 ꓖꓳ ꓡꓱ ꓠꓬꓲ ꓬꓲꓸ ꓠꓬꓲ ꓤ ꓐꓴ ꓡꓰ ꓬꓲ ꓔꓯ꓾ ꓠꓴ ꓛꓳꓽ ꓒꓯꓹ ꓐꓴˍ ꓟꓲ ꓠꓴ ꓬꓰˍ ꓟ ꓟꓬꓱꓽ ꓔꓯ ꓟꓳꓻ ꓠ ꓟ꓾ ꓕꓱ ꓗꓪ ꓐꓰ ꓓꓳ ꓙꓰ ꓢꓲ ꓬꓴ-ꓔ ꓟꓵꓽ ꓗꓪ ꓓꓵꓽ ꓙꓰ꓿ 4 ꓮ ꓡꓲꓳ ꓐꓯ ꓠꓬ ꓚꓲꓸ ꓛꓬ ꓟꓬꓱ ꓓꓳꓽ ꓒꓬꓱ ꓙꓰ ꓝꓲ ꓠꓲꓹ ꓫꓵ ꓢꓴ ꓠꓬ꓾ ꓮꓸ ꓫꓵˍ ꓟꓲ ꓘꓳ ꓫꓱ ꓫꓱˍ ꓗꓪ ꓟꓽ ꓬꓰ꓿ ꓠꓴ ꓕꓱ ꓟꓬ ꓫꓵꓽ ꓬꓰˍ ꓟ꓾ ꓡ ꓞꓳ ꓮꓽ ꓙꓵ ꓔꓯ ꓟꓳꓸ ꓖꓶꓽ ꓟꓴꓽ꓾ ꓐꓯˍ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓬꓲ ꓚꓲꓸ ꓛꓬ ꓠꓬꓲ ꓤ ꓐꓴˍ ꓟꓲ ꓬꓲ ꓔꓯ ꓟꓽ ꓙꓵꓻ꓿ 6 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓙꓵꓹ ꓟꓽ ꓛꓲ ꓡ ꓢꓰꓽ꓿ ꓠꓴ ꓪꓽ ꓙꓵꓹ ꓠꓽ ꓮ ꓕꓯˍ ꓟꓲ ꓥꓳ꓿ 7 ꓟꓲ ꓠꓯ ꓞꓳ ꓤ ꓠꓬ ꓠꓴ ꓪꓽ ꓔꓯ ꓠꓲꓹ ꓜꓳ ꓟꓽ ꓗꓴꓸ꓿ ꓬꓲ ꓪꓽ ꓬꓰˍ ꓟ ꓠꓬ ꓥꓶꓺˍ ꓟ ꓥ ꓟ ꓥꓪ ꓡꓰ ꓖꓴ ꓟꓳꓸ ꓖꓶˍ ꓠꓬꓲ꓾ ꓥꓪ ꓔꓯ ꓠꓽ ꓠꓲꓹ ꓜꓳˍ ꓡꓳ꓿ 8 ꓠꓴ ꓪꓽ ꓠꓬ ꓑꓮꓲ ꓬꓰˍ ꓟ ꓗꓪ ꓓꓯ ꓙꓰ꓿ ꓬꓲ ꓙꓵꓹ ꓟꓽ ꓐꓲ ꓡ ꓢꓰꓽ ꓠꓬꓲ ꓥꓪ ꓠꓬ ꓑꓮꓲ ꓗꓪ ꓟꓽ ꓓꓯ ꓙꓰ ꓢꓰ꓾ ꓐꓯ ꓖꓶˍ ꓡꓳ꓿ 9 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓕꓱ ꓟꓬ ꓙꓰꓽ ꓐꓯ ꓖꓶ ꓗꓷ ꓠꓬ꓾ ꓬꓲ ꓠꓽ ꓖ-ꓡꓲ-ꓡꓲ ꓟꓵꓽ ꓗꓪ ꓔꓲꓹ ꓬꓰˍ ꓡꓳ꓿ 10 ꓖꓳ ꓡꓱ ꓥ ꓟꓲ ꓬꓲ ꓠꓬꓲ ꓤ ꓐꓴ ꓑꓮꓲ ꓗꓪ ꓓꓯ ꓙꓰ ꓗꓸ ꓠꓯꓸ꓾ ꓬꓲˍ ꓟꓲ ꓘꓳ ꓫꓱ ꓫꓱˍ ꓐꓰ ꓑꓮꓲ ꓗꓪ ꓓꓯ ꓙꓰˍ ꓡꓳ꓿ 11 ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓠꓬ ꓑꓮꓲ ꓗꓪ ꓬꓲ ꓔꓯ ꓧꓪ ꓢꓲ꓾ ꓬꓲ ꓮ ꓡꓲ ꓗꓪ ꓔꓬ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 12 ꓞꓳ ꓜꓴꓻ ꓗꓳ ꓡꓳ ꓗꓪ ꓬꓲ ꓔꓯ ꓟꓳꓸ ꓒꓽ ꓛꓽ ꓡꓯꓽ ꓘꓳ ꓢꓲ꓾ ꓕꓲ ꓐꓱ ꓠꓬ ꓬꓲ ꓠꓽ ꓞꓳ ꓙꓲꓻ ꓥ ꓡꓳ꓾ ꓐꓯˍ ꓡꓳ꓿ ꓠꓱꓸ ꓐꓯꓼ ꓕꓲ ꓐꓱ ꓠꓽ꓾ ꓟꓽ ꓥ꓾ ꓬꓲ ꓠꓬ ꓑ ꓫꓬꓼ ꓐꓴ ꓔꓯ ꓧꓳꓽ ꓪꓴꓸ ꓢꓴ ꓥ ꓡꓳ꓾ ꓐꓯˍ ꓡꓳ꓿ 13 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓬ ꓬꓴ-ꓔ ꓡ ꓞꓳ ꓔꓯ ꓙꓳꓺˍ ꓠꓬꓲ꓾ ꓫꓬꓽ ꓫꓬꓽ ꓗꓪ ꓮ ꓟˍ ꓟꓲ ꓬꓲ ꓓꓳꓽ ꓟꓽ ꓚ꓿ 14 ꓑꓮꓲ ꓬꓰˍ ꓟ ꓦꓬꓼ ꓠꓬꓲ ꓔꓱꓺ ꓫꓵ ꓗꓪ ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓓꓯ ꓙꓰ ꓢꓲ ꓟꓸ ꓟꓲꓽ ꓟꓸˍ ꓡꓳ꓿ 15 ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓓꓵꓽ ꓙ ꓟꓶ ꓢꓲ꓾ ꓡ ꓞꓳ ꓕꓱ ꓟ ꓠꓬ ꓕꓳ ꓶ ꓮ ꓕꓯˍ ꓟꓲ ꓟꓽ ꓢꓳ ꓠꓬꓲ ꓟ꓾ ꓮ ꓡꓲ ꓐꓰ ꓢꓲ ꓕꓱ ꓟꓬ ꓙꓽ ꓜꓲꓼˍ ꓡ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 16 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓟꓸ ꓖꓶˍ ꓟ ꓟꓸ ꓟꓲ ꓠꓬ ꓥꓪ ꓚꓲꓸ ꓛꓬ ꓔꓯꓸ ꓟ ꓟꓽ ꓥ꓿ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯꓸ ꓟ ꓥ ꓡꓳ꓿ 17 ꓮꓽ ꓟ ꓥ ꓟꓲ ꓪꓴ-ꓢ ꓠꓲꓹ ꓡꓶ ꓬꓰ ꓠꓲꓹ ꓫꓵ ꓢꓴ ꓠꓬ꓾ ꓟꓸ ꓟꓲ ꓕꓱ ꓟ ꓪꓴ-ꓢ ꓔꓯꓺˍ ꓐꓰ ꓡꓻˍ ꓟ ꓥ ꓟꓽ ꓥ꓾ ꓥ ꓠꓬ ꓥꓪ ꓚꓲꓸ ꓛꓬ ꓗꓪ ꓐꓰ ꓫꓸ ꓕꓱˍ ꓟ ꓥ ꓟꓽ ꓥ꓾ ꓐꓰ ꓬꓲ ꓢꓷꓸ ꓡꓰˍ ꓥꓳ꓿ 18 ꓬꓲ ꓚꓲꓸ ꓛꓬ ꓗꓪ ꓐꓰ ꓫꓸ ꓕꓱ ꓢꓴ ꓠꓬ ꓚꓲꓸ ꓛꓬ ꓟꓬꓱ ꓓꓳꓽ ꓧꓪˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓔꓯ ꓝꓲ ꓩꓴ ꓡ ꓢꓴ ꓟꓬꓱ ꓓꓳꓽ ꓔꓯ ꓧꓪ ꓢꓴ ꓖꓳ ꓕꓲ ꓣꓳ ꓠꓽ꓾ ꓔꓱꓹˍ ꓟ ꓥ ꓢꓲ꓾ ꓟꓽ ꓔꓱꓹˍ ꓟ ꓮꓸ ꓫꓵꓽˍ ꓟꓲ ꓬꓲ ꓠꓯꓸꓼ ꓗꓪ ꓟꓽ ꓓꓯꓹ꓿ 19 ꓟꓳ-ꓫꓲ ꓡꓰ ꓠꓴ ꓪꓽ ꓔꓯ ꓙꓵꓽ ꓗ ꓖꓶ ꓔ ꓡꓳ ꓟꓽ ꓥ ꓡ? ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓬ ꓙꓵꓽ ꓗ ꓔꓯ ꓛꓳꓻ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓿ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓢꓰꓼ ꓠꓹ ꓟ ꓚꓱꓹ ꓧꓪˍ ꓡ?꓾ ꓐꓯˍ ꓡꓳ꓿ 20 ꓞꓳ ꓜꓴꓻ ꓡꓰ ꓒꓳꓹ ꓖꓶ ꓢꓲ꓾ ꓠꓴ ꓔꓯ ꓠꓽ ꓠꓲꓽ ꓕꓲ ꓟ ꓓꓯꓹ ꓡꓳ꓿ ꓮꓽ ꓟ ꓠꓴ ꓔꓯ ꓢꓰꓼ ꓠ ꓟ ꓚꓱꓹ ꓧꓪˍ ꓡ?꓾ ꓐꓯˍ ꓡꓳ꓿ 21 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓟꓬꓱꓽ ꓕꓲ ꓫꓵ ꓬꓰˍ ꓠꓬ꓾ ꓠꓴ ꓪꓽ ꓮꓽ ꓙꓵ ꓠꓽ ꓟꓬꓱꓽ ꓖꓳ ꓟ ꓑꓶ ꓓꓴ ꓓꓵꓽ ꓙꓽ ꓟꓶˍ ꓡꓳ꓿ 22 ꓟꓳ-ꓫꓲ ꓡꓰ ꓠꓴ ꓪꓽ ꓔꓯ ꓶˍ ꓟ ꓗ ꓫꓵ ꓖꓶ ꓔ ꓡꓳ꓿ (ꓬꓲˍ ꓡꓰ꓾ ꓗ ꓫꓵ ꓖꓳ ꓟ ꓠꓬ ꓟꓳ-ꓫꓲ ꓔꓯˍ ꓐꓰ ꓡꓻ ꓟ ꓟꓽ ꓥ꓾ ꓒꓵꓽ ꓒ ꓐꓴ ꓔꓯˍ ꓐꓰ ꓡꓻ ꓟ ꓥ ꓡꓳ꓿) ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓠꓽ ꓦꓬꓼ ꓠꓬꓲ ꓗꓪ ꓡ ꓞꓳ ꓔꓯ ꓶˍ ꓟ ꓗ ꓫꓵ ꓬꓰ ꓖꓶˍ ꓡꓳ꓿ 23 ꓟꓳ-ꓫꓲ ꓙꓵꓽ ꓗ ꓔꓯ ꓟꓽ ꓛꓬ ꓡꓰ ꓝꓲ ꓠ ꓟ꓾ ꓠ ꓦꓬꓼ ꓠꓬꓲ ꓗꓪ ꓡ ꓞꓳ ꓕꓲ ꓣꓳ ꓔꓯ ꓶˍ ꓟ ꓗ ꓫꓵ ꓬꓰ ꓖꓶ ꓓꓹ ꓠꓬ꓾ ꓠ ꓦꓬꓼ ꓠꓬꓲ ꓗꓪ꓾ ꓥꓪ ꓡꓰ ꓡ ꓞꓳ ꓕꓲ ꓣꓳ ꓔꓯ ꓕꓲ ꓖꓳ ꓓꓱ ꓡꓱꓸꓼ ꓓꓻ ꓡꓰ ꓝꓲˍ ꓟ ꓔꓯ꓾ ꓠꓴ ꓪꓽ ꓮ ꓫꓵ ꓑꓶ ꓓꓴ ꓥꓪ ꓔꓯ ꓠꓲꓹ ꓟ ꓦꓶˍ ꓡ? 24 ꓠꓴ ꓪꓽ ꓠꓬ ꓕꓯ ꓢꓲ ꓗꓪ ꓟꓳꓻ ꓓꓻ ꓡꓳ ꓫꓵꓽ ꓗꓪ ꓐꓰˍ ꓡꓰꓽ ꓐꓯ ꓟꓴ ꓕꓽ ꓞꓷꓹ꓿ ꓔꓱꓹ ꓜꓳꓽˍ ꓟ ꓡꓰ ꓐꓯ ꓟꓴ ꓞꓷꓹ꓾ ꓐꓯ ꓖꓶˍ ꓡꓳ꓿ 25 ꓖꓳ ꓕꓯ ꓙꓱ-ꓣꓴ-ꓢ-ꓡꓱ ꓢꓴ ꓕꓲ ꓐꓱ ꓡꓰ꓾ ꓬꓲ ꓪꓽ ꓢꓰꓼ ꓠ ꓟ ꓚꓱꓹ ꓧꓪˍ ꓟ ꓠꓬ ꓕꓱ ꓕꓲ ꓣꓳ ꓟꓽ ꓥ ꓡ? 26 ꓮ ꓟꓶ ꓬꓲ ꓠ ꓫꓬꓽ ꓫꓬꓽ ꓗꓪ ꓫꓸ ꓕꓱˍ ꓟꓲ꓾ ꓬꓲ ꓪꓽ ꓬꓲ ꓔꓯ ꓮꓸ ꓫꓵˍ ꓟꓲ ꓟꓽ ꓐꓯ꓿ ꓕꓱ ꓕꓲ ꓣꓳ ꓠꓬ ꓙꓲ-ꓢꓴ ꓥ ꓟ ꓢꓲꓽ ꓒ ꓐꓴ ꓚꓵ ꓚꓵ ꓢꓷˍ ꓠꓳꓹ꓿ 27 ꓖꓳ ꓡꓱ ꓥ ꓟꓲ ꓕꓱ ꓕꓲ ꓣꓳ ꓮ ꓡꓲ ꓗꓪ ꓐꓰ ꓡꓻ ꓟ ꓣꓳ ꓢꓷˍ ꓡꓳ꓿ ꓙꓲ-ꓢꓴ ꓛꓲ ꓡ ꓕꓯ ꓠꓽ꓾ ꓬꓲ ꓮ ꓡꓲ ꓗꓪ ꓐꓰ ꓡꓻ ꓟ ꓮ ꓟˍ ꓟꓲ ꓟꓽ ꓢꓷ꓾ ꓐꓰ ꓐꓯ ꓡꓯ ꓘꓳˍ ꓡꓳ꓿ 28 ꓖꓳ ꓕꓯ ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓠꓯꓸꓼ ꓗꓪ ꓢꓯꓼ ꓓ ꓟ ꓡꓰ ꓟꓸ ꓟꓲ ꓚ ꓢꓲ꓾ ꓥꓪ ꓮꓽ ꓟ ꓥ ꓟ ꓐꓰ ꓥꓪ ꓮ ꓡꓲ ꓗꓪ ꓐꓰ ꓡꓻ ꓟ ꓠꓴ ꓪꓽ ꓢꓷˍ ꓡꓳ꓿ ꓥꓪ ꓠꓬ ꓥꓪ ꓚꓲꓸ ꓛꓬ ꓠꓲꓹ ꓡꓶ ꓗꓪ ꓐꓰ ꓡꓻ ꓟ ꓟꓽ ꓥ꓿ ꓥꓪ ꓔꓯ ꓝꓲ ꓩꓴ ꓡ ꓢꓴ ꓠꓽ ꓔꓱꓹˍ ꓟ ꓥ ꓢꓲ꓾ ꓬꓲ ꓔꓯ ꓠꓴ ꓪꓽ ꓟꓽ ꓢꓷ꓿ 29 ꓖꓳ ꓡꓱ ꓥ ꓟꓲ ꓥꓪ ꓠꓽ ꓬꓲ ꓗꓪ ꓐꓰ ꓡꓻ ꓟ ꓥ ꓢꓲ꓾ ꓬꓲ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓥ ꓠꓬꓲ꓾ ꓥꓪ ꓠꓽ ꓬꓲ ꓔꓯ ꓢꓷˍ ꓡꓳ꓾ ꓐꓯˍ ꓡꓳ꓿ 30 ꓖꓳ ꓕꓯ ꓬꓲ ꓪꓽ ꓠꓬ ꓬꓰ-ꓢꓴ ꓔꓯ ꓣꓴ ꓠꓹ ꓟ ꓚꓱꓹ ꓧꓪˍ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓝꓰꓹ ꓔ ꓟ ꓬꓲ ꓝꓲꓸ ꓟꓽ ꓛꓲ ꓡ ꓢꓰ ꓠꓬꓲ꓾ ꓮꓽ ꓟˍ ꓟꓲ ꓬꓲ ꓔꓯ ꓣꓴ ꓟꓽ ꓠ꓿ 31 ꓑ ꓫꓬꓼ ꓐꓴ ꓗꓳ ꓡꓳ ꓗꓪ ꓮꓽ ꓟꓬꓹ ꓣꓳ ꓬꓲ ꓔꓯ ꓙꓵꓻ ꓢꓲ꓾ ꓙꓲ-ꓢꓴ ꓡꓻˍ ꓕꓯ ꓕꓱ ꓕꓲ ꓣꓳ ꓬꓰˍ ꓟ ꓢꓷꓸ ꓡꓰ ꓓꓴ ꓟꓬ ꓟꓽ ꓞꓲ ꓬꓰ ꓡꓺˍ ꓢꓰ ꓡ?꓾ ꓐꓯˍ ꓡꓳ꓿ 32 ꓞꓳ ꓜꓴꓻ ꓠꓬ ꓬꓲ ꓔꓯ ꓖꓴ ꓢꓲ ꓖꓳ ꓡꓱ ꓒꓽ ꓛꓽ ꓡꓯꓽ ꓘꓳ ꓔꓬ ꓟ ꓔꓯ ꓒ-ꓡꓲ-ꓢꓷ ꓐꓴ ꓑ ꓙꓽ ꓗꓷ ꓠꓬ꓾ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓡꓰ ꓬꓲ ꓔꓯ ꓣꓴ ꓠꓹ ꓟ ꓢꓲꓽ ꓒ ꓝꓲ ꓓꓴ ꓐꓴ ꓝꓲ ꓩꓴ ꓗꓷˍ ꓡꓳ꓿ 33 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ꓾ ꓥꓪ ꓝꓮꓲ ꓕꓲ ꓑ ꓤˍ ꓡꓰꓽ ꓠꓴ ꓪꓽˍ ꓐꓰ ꓔꓬ ꓢꓲ꓾ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓬꓲꓼ ꓙꓰˍ ꓥꓳ꓿ 34 ꓠꓴ ꓪꓽ ꓠꓬ ꓥꓪ ꓔꓯ ꓧꓪˍ ꓟꓲ ꓧꓪ ꓟꓶ ꓟꓽ ꓘꓴꓻ꓿ ꓥꓪ ꓔꓬ ꓗꓪˍ ꓟꓲ ꓠꓴ ꓪꓽ ꓡ ꓟꓽ ꓐ ꓡ꓾ ꓐꓯˍ ꓡꓳ꓿ 35 ꓖꓳ ꓕꓯ ꓬꓴ-ꓔ ꓡ ꓞꓳ ꓐꓴ ꓠꓬ꓾ ꓡ ꓞꓳ ꓕꓱ ꓟ ꓠꓬ ꓣꓳ ꓬꓲ ꓔꓯ ꓧꓪ ꓟꓶ ꓟꓽ ꓘꓴ ꓠ ꓛꓲ ꓮ ꓡꓲ ꓗꓪ ꓙꓰˍ ꓐꓰ ꓬꓰˍ ꓡ? ꓬꓲ ꓠꓬ ꓦꓲ-ꓡꓲ ꓡ ꓞꓳ ꓧꓹ ꓒꓬꓱ ꓙꓰ ꓢꓴ ꓕꓲ ꓧꓳꓽ ꓟ ꓔꓯ ꓙꓰ ꓢꓲ ꓬꓲ ꓪꓽ ꓔꓯ ꓟꓸˍ ꓐꓯˍ ꓡ? 36 ꓬꓲ ꓡꓰ꓾ ꓠꓴ ꓪꓽ ꓥꓪ ꓔꓯ ꓧꓪˍ ꓟꓲ ꓧꓪ ꓟꓶ ꓟꓽ ꓘꓴ꓾ ꓥꓪ ꓔꓬ ꓗꓪˍ ꓟꓲ ꓠꓴ ꓪꓽ ꓡ ꓟꓽ ꓐ ꓡ꓾ ꓐꓯˍ ꓟ ꓠꓬ ꓮꓸ ꓫꓵ ꓔꓯ ꓐꓯˍ ꓡ? ꓐꓰ ꓠ ꓠꓬꓲ ꓡꓯꓽ ꓘꓳˍ ꓡꓳ꓿ 37 ꓑꓮꓲ ꓬꓰˍ ꓟ ꓦꓬꓼ ꓠꓬꓲ ꓓꓽ ꓟ ꓡꓳꓹ ꓬꓰ ꓟ ꓕꓲ ꓠꓬꓲ ꓗꓪ꓾ ꓬꓰ-ꓢꓴ ꓦꓰꓼ ꓞꓹ ꓢꓲ ꓢꓯꓼ ꓓꓽ ꓟ ꓡꓰ꓾ ꓮꓽ ꓟ ꓥ ꓟꓲ ꓢꓲꓼˍ ꓠꓬ ꓥꓪ ꓔꓯ ꓧꓪ ꓓꓳꓻ ꓡꓯ꓿ 38 ꓥꓪ ꓔꓯ ꓙꓵꓻ ꓢꓴ ꓠꓬ ꓪꓴ-ꓢ ꓕꓳ ꓶ ꓗꓪ ꓐꓯˍ ꓟ ꓡꓰ ꓐꓰ꓾ ꓬꓲ ꓠꓯꓸꓼ ꓗꓪ ꓐꓰ ꓬꓲꓻ ꓙꓬ ꓬꓲ ꓢꓯꓸ ꓬꓲꓻ ꓓꓳ ꓡ ꓥꓳ꓾ ꓐꓯˍ ꓡꓳ꓿ 39 ꓬꓲ ꓕꓱ ꓡꓱ ꓐꓯˍ ꓟ ꓠꓬ꓾ ꓬꓲ ꓔꓯ ꓙꓵꓻ ꓢꓴ ꓐꓴ ꓟꓶ ꓠꓹ ꓟ ꓢꓲ-ꓫꓬ-ꓟ-ꓦ ꓔꓯ ꓐꓯˍ ꓟ ꓥ ꓡꓳ꓿ ꓖꓳ ꓕꓲ ꓝꓲꓸ ꓗꓪ ꓬꓰ-ꓢꓴ ꓠꓬ ꓟꓬꓱ ꓓꓳꓽ ꓟꓽ ꓟꓶ ꓢꓰꓽ ꓠꓬꓲ ꓢꓲ-ꓫꓬ-ꓟ-ꓦ ꓟꓽ ꓬꓯꓼ ꓡ ꓢꓰ꓿ 40 ꓖꓳ ꓡꓱ ꓠꓬꓲ ꓑ ꓫꓬꓼ ꓐꓴ ꓕꓲ ꓐꓱ ꓐꓯ ꓘꓶ ꓕꓱ ꓟ ꓑ ꓙꓽˍ ꓠꓬ꓾ ꓕꓱ ꓟ ꓠꓽ ꓚꓵ ꓚꓵ ꓟꓷꓽ ꓠꓷꓹ ꓝꓸ ꓢꓴ ꓖꓳ ꓕꓲ ꓣꓳ ꓟ ꓥ ꓡꓳ꓾ ꓐꓯˍ ꓡꓳ꓿ 41 ꓕꓲ ꓐꓱ ꓠꓬ꓾ ꓕꓱ ꓟ ꓠꓽ ꓙꓲ-ꓢꓴ ꓖꓳ ꓕꓲ ꓣꓳ ꓥ ꓡꓳ꓾ ꓐꓯˍ ꓡꓳ꓿ ꓕꓲ ꓐꓱ ꓠꓽ ꓮ ꓡꓲ ꓥ ꓢꓰ꓾ ꓙꓲ-ꓢꓴ ꓠꓬ ꓖ-ꓡꓲ-ꓡꓲ ꓗꓪ ꓐꓰ ꓓꓳ ꓡ ꓡꓳ ꓟꓽ ꓥ꓿ 42 ꓪꓴ-ꓢ ꓕꓳ ꓶ ꓗꓪ꓾ ꓙꓲ-ꓢꓴ ꓠꓬ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓥ ꓢꓲ꓾ ꓓ-ꓪꓵ ꓔꓬ ꓗꓷ ꓟ ꓐꓱ-ꓡꓱ-ꓦꓱ ꓗꓪ ꓐꓰ ꓓꓳ ꓡ ꓥꓳ꓾ ꓐꓯˍ ꓡꓳ ꓟꓽ ꓥ ꓡ?꓾ ꓐꓯˍ ꓡꓳ꓿ 43 ꓖꓳ ꓡꓱ ꓠꓬꓲ ꓬꓰ-ꓢꓴ ꓑꓶ ꓓꓴ ꓞꓳ ꓜꓴꓻ ꓗꓳ ꓡꓳ ꓗꓪ ꓬꓲ ꓗꓪꓺ ꓗꓪ ꓡꓰˍ ꓡꓳ꓿ 44 ꓬꓲ ꓪꓽ ꓕꓲ ꓐꓱ ꓠꓬ ꓬꓲ ꓔꓯ ꓣꓴ ꓠꓲꓹ ꓫꓵˍ ꓟꓲ꓾ ꓮꓽ ꓟˍ ꓟꓲ ꓟꓽ ꓡꓯꓼ ꓡꓵ꓿ 45 ꓢꓲꓽ ꓒ ꓝꓲ ꓓꓴ ꓐꓴ ꓠꓬ꓾ ꓔꓲ ꓒ ꓪꓴꓸ ꓓꓵ ꓣꓱ ꓢꓴˍ ꓐꓰ ꓒ-ꓡꓲ-ꓢꓷ ꓐꓴ ꓔꓬ ꓗꓪ ꓬꓲꓼ ꓛꓲ ꓬꓰˍ ꓕꓯ꓾ ꓠꓴ ꓪꓽ ꓮ ꓡꓲ ꓗꓷ ꓡꓰ ꓠꓬꓲ ꓬꓲ ꓔꓯ ꓟꓽ ꓣꓴ ꓔꓯꓹ ꓡ ꓡ? ꓐꓰ ꓠ ꓠꓬꓲˍ ꓡꓳ꓿ 46 ꓢꓲꓽ ꓒ ꓝꓲ ꓓꓴ ꓐꓴ ꓡꓰ ꓒꓳꓹ ꓖꓶ ꓢꓲ꓾ ꓮꓽ ꓟˍ ꓟꓲ ꓕꓱ ꓕꓲ ꓣꓳˍ ꓡꓰ ꓐꓰ ꓟꓽ ꓫꓸ ꓕꓱ ꓠꓬꓲ꓾ ꓐꓯ ꓖꓶˍ ꓡꓳ꓿ 47 ꓖꓳ ꓡꓱ ꓠꓬꓲ ꓒ-ꓡꓲ-ꓢꓷ ꓐꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓔꓯˍ ꓟꓲ ꓬꓲ ꓡꓰ ꓧꓳꓽ ꓪꓴꓸ ꓙꓰ ꓗꓷ ꓡ? 48 ꓢꓲꓽ ꓒ ꓐꓴ ꓗꓳ ꓡꓳ ꓗꓪ꓾ ꓥ ꓠꓬ ꓒ-ꓡꓲ-ꓢꓷ ꓐꓴ ꓗꓳ ꓡꓳ ꓗꓪ ꓬꓲ ꓔꓯ ꓙꓵꓻ ꓢꓴ ꓙꓳˍ ꓡ? 49 ꓙꓵꓽ ꓗ ꓔꓯ ꓟꓽ ꓢꓷꓸˍ ꓟ ꓞꓳ ꓜꓴꓻ ꓕꓱ ꓟ ꓠ ꓙꓱꓽ ꓔ ꓟ ꓥ ꓡꓳ꓾ ꓐꓯˍ ꓡꓳ꓿ 50 ꓬꓲ ꓪꓽ ꓗꓪ ꓟ ꓕꓲ ꓣꓳ꓾ ꓧꓶ ꓕꓯ ꓬꓰ-ꓢꓴ ꓔꓯ ꓡ ꓠꓬꓲ ꓟ ꓠꓲ-ꓘꓳ-ꓓꓲ-ꓟꓴ ꓡꓰ ꓬꓲ ꓪꓽ ꓔꓯ꓾ 51 ꓡ ꓞꓳ ꓕꓲ ꓣꓳ ꓬꓲ ꓐꓯˍ ꓟ ꓔꓯ ꓧꓶꓸ ꓕꓯ ꓠ ꓠꓹ ꓠꓬꓲ ꓢꓲ꓾ ꓬꓲ ꓬꓰˍ ꓟ ꓔꓯ ꓢꓷꓸ ꓡꓰ ꓗꓸ ꓠꓯꓸ ꓟꓽ ꓥ ꓠꓬ꓾ ꓬꓲ ꓔꓯ ꓐꓯ ꓞꓷꓹ ꓟꓽ ꓓ ꓟ ꓙꓵꓽ ꓗ ꓙꓳˍ ꓡꓳ ꓟꓽ ꓥ ꓡ?꓾ ꓐꓯ ꓖꓶˍ ꓡꓳ꓿ 52 ꓬꓲ ꓪꓽ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓠꓴˍ ꓟꓲ ꓖ-ꓡꓲ-ꓡꓲ ꓢꓴ ꓥ ꓡ? ꓕꓳ ꓶ ꓗꓪ ꓠꓴ ꓧꓪ ꓟꓰꓹ ꓠꓬꓲ ꓐꓷˍ ꓠꓬ꓾ ꓖ-ꓡꓲ-ꓡꓲ ꓗꓪ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓟꓽ ꓓꓳ ꓡ꓾ ꓐꓰ ꓠꓴ ꓢꓷꓸ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿ 53 ꓖꓳ ꓗꓸ ꓠꓯꓸ ꓬꓲ ꓪꓽ ꓠꓬ ꓮꓽ ꓟ ꓦꓲ ꓗꓪ ꓮꓽ ꓟ ꓬꓲꓼ ꓙꓰˍ ꓡꓳ꓿

ꓬꓳ-ꓦ 8

1 ꓬꓰ-ꓢꓴ ꓠꓽ ꓮ-ꓛꓬ ꓪꓽ ꓚꓲ ꓗꓪ ꓙꓰˍ ꓡꓳ꓿ 2 ꓗꓸ ꓠꓯꓸ ꓠꓯꓼ ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓝꓮꓲ ꓕꓲ ꓧꓪ ꓓꓵꓽ ꓡꓰ ꓕꓯ꓾ ꓑ ꓫꓬꓼ ꓐꓴ ꓮꓽ ꓙꓵ ꓬꓲ ꓔꓯ ꓡ ꓡꓳ꓿ ꓖꓳ ꓡꓱ ꓠꓬ ꓬꓲ ꓠꓬꓲꓸ ꓠꓸ ꓢꓲ ꓬꓲ ꓪꓽ ꓔꓯ ꓟꓸ ꓟꓲ ꓟꓸ ꓖꓶˍ ꓡꓳ꓿ 3 ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ꓾ ꓦꓬꓼ ꓛꓳꓽ ꓬꓰ ꓔꓬ ꓟ ꓗꓪ ꓣꓴ ꓟꓶˍ ꓟ ꓤ ꓟꓶ ꓤ ꓕꓲ ꓣꓳ ꓧꓳꓽ ꓔꓯꓹ ꓡ ꓢꓲ꓾ ꓞꓳ ꓜꓴꓻ ꓗꓳ ꓡꓳ ꓗꓪ ꓦꓰꓼ ꓔꓬ ꓝꓲ ꓢꓲ ꓠꓬꓲ꓾ 4 ꓟꓸ ꓒꓽꓳ꓾ ꓤꓽ ꓟꓶ ꓤ ꓕꓱ ꓟ ꓠꓬ ꓦꓬꓼ ꓛꓳꓽ ꓬꓰ ꓔꓬ ꓟ ꓗꓪ ꓣꓴ ꓔ ꓟ ꓥ ꓡꓳ꓿ 5 ꓙꓵꓽ ꓗ ꓗꓪ ꓠꓬ ꓟꓳ-ꓫꓲ ꓡꓰ ꓕꓱ ꓡꓱ ꓫꓵꓽ ꓤꓽ ꓟꓶ ꓤ ꓔꓯ Bꓸ ꓛꓲ ꓡꓰ ꓡꓳ ꓢꓰꓼ꓾ ꓐꓰ ꓥꓪ ꓠꓴꓽ ꓔꓯ ꓕꓵꓼ ꓪ ꓖꓶ ꓔ ꓡꓳ꓿ ꓠꓴ ꓠꓬ ꓮꓸ ꓫꓵꓽ ꓐꓯ ꓓꓴ ꓙꓳˍ ꓡ? ꓐꓰ ꓠ ꓠꓬꓲˍ ꓡꓳ꓿ 6 ꓬꓲ ꓪꓽ ꓕꓱ ꓡꓱ ꓐꓯˍ ꓟ ꓠꓬ꓾ ꓬꓲ ꓔꓯ ꓓꓰꓺ ꓖꓴ ꓧꓪ ꓟꓶ ꓠꓹ ꓟ ꓫꓵꓽ ꓠꓬꓲˍ ꓟ ꓥ ꓡꓳ꓿ ꓬꓰ-ꓢꓴ ꓠꓽ ꓗꓴꓺ ꓗꓴ ꓟꓴ ꓬꓰ ꓢꓲ꓾ ꓬꓲ ꓡꓯꓼ ꓠꓬꓲ ꓡꓰ ꓟꓲ ꓛꓬ ꓗꓪ ꓐꓳˍ ꓡꓳ꓿ 7 ꓖꓳ ꓡꓱ ꓥ ꓟꓲ ꓬꓲ ꓪꓽ ꓬꓲ ꓔꓯ ꓟꓽ ꓠꓽ ꓠꓽ ꓠ ꓠꓬꓲ ꓔꓬ ꓠꓬꓲ꓾ ꓬꓰ-ꓢꓴ ꓦꓰꓼ ꓔꓴ ꓡ ꓢꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓗꓳ ꓡꓳ ꓗꓪ ꓝꓴꓲ ꓟꓽ ꓙꓳ ꓢꓴ ꓕꓲ ꓣꓳ ꓙꓳ ꓐꓷˍ ꓠꓬ ꓬꓲ ꓧꓶꓸ ꓕꓯ ꓬꓲ ꓔꓯ Bꓸ ꓛꓲ ꓡꓳ ꓝꓲ꓾ ꓐꓯ ꓖꓶˍ ꓡꓳ꓿ 8 ꓬꓲ ꓝꓮꓲ ꓗꓴꓺ ꓗꓴ ꓟꓴ ꓬꓰ ꓢꓲ꓾ ꓡꓯꓼ ꓠꓬꓲ ꓡꓰ ꓟꓲ ꓛꓬ ꓗꓪ ꓐꓳˍ ꓢꓰꓽ ꓡꓳ꓿ 9 ꓐꓯ ꓘꓶ ꓕꓱ ꓟ ꓬꓲ ꓪꓽ ꓑ ꓙꓽ ꓗꓷ ꓠꓬ꓾ ꓞꓲꓼ ꓪꓴꓽˍ ꓟ ꓗꓪ ꓐꓰ ꓪꓴꓸ ꓔꓴ ꓢꓲꓠ ꓕꓲ ꓣꓳ ꓗꓸ ꓠꓯꓸ ꓕꓲ ꓣꓳ ꓓꓳ ꓙꓰˍ ꓡꓳ꓿ ꓬꓲꓸ ꓟꓶꓽ ꓗꓪ ꓠꓬ ꓬꓰ-ꓢꓴ ꓕꓲ ꓣꓳˍ ꓡꓰꓽ ꓜꓰꓻ ꓡꓰ ꓢꓲ꓾ ꓤ ꓟꓶ ꓤˍ ꓟꓲ ꓖꓳ ꓗꓪ ꓦꓰꓼ ꓔꓬ ꓢꓰ ꓡꓳ꓿ 10 ꓖꓳ ꓕꓯ ꓬꓰ-ꓢꓴ ꓦꓰꓼ ꓔꓴ ꓡ ꓢꓲ꓾ ꓤꓽ ꓟꓶ ꓤꓽꓳ꓾ ꓬꓲ ꓪꓽ ꓮ ꓡꓲ ꓗꓪ ꓙꓰ ꓗꓷ ꓡ? ꓠꓴ ꓔꓯ ꓝꓴꓲ ꓐꓯ ꓞꓷꓹ ꓢꓴ ꓮ ꓟˍ ꓟꓲ ꓟꓽ ꓙꓳ ꓡ? ꓐꓰ ꓠ ꓠꓬꓲˍ ꓡꓳ꓿ 11 ꓖꓳ ꓕꓯ ꓬꓲ ꓡꓰ꓾ ꓢꓲ ꓒꓽꓳ꓾ ꓕꓲ ꓣꓳˍ ꓟꓲ ꓟꓽ ꓙꓳ꓾ ꓐꓰ ꓒꓳꓹ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓥꓪˍ ꓟꓲ ꓠꓴ ꓔꓯ ꓟꓽ ꓐꓯ ꓞꓷꓹ꓿ ꓙꓰ Gꓽ꓿ ꓖꓳ ꓡꓱ ꓢꓲ ꓕꓱ ꓡꓱ ꓖꓳ ꓑꓳ ꓝꓴꓲ ꓕꓽ ꓬꓰ꓾ ꓐꓯ ꓖꓶˍ ꓡꓳ꓿ 12 ꓬꓰ-ꓢꓴ ꓠꓬ ꓑ ꓫꓬꓼ ꓐꓴ ꓔꓯ ꓝꓮꓲ ꓫꓸ ꓕꓱ ꓢꓲ꓾ ꓥꓪ ꓠꓽ ꓟꓲ ꓠꓯ ꓠꓬꓲ ꓟꓳ ꓓꓴ ꓥ ꓡꓳ꓿ ꓥꓪ ꓔꓯ ꓛꓳ ꓢꓴ ꓠꓬ ꓢꓯꓼ ꓟꓬ ꓠꓬꓲ ꓟꓳ ꓓꓴ ꓙꓳˍ ꓠꓬꓲ꓾ ꓠꓯ ꓞꓲꓹ ꓟ ꓗꓪ ꓫꓱꓽ ꓟꓽ ꓛꓵ꓾ ꓐꓯˍ ꓡꓳ꓿ 13 ꓖꓳ ꓡꓱ ꓠꓬꓲ ꓒ-ꓡꓲ-ꓢꓷ ꓐꓴ ꓡꓰ ꓬꓲ ꓔꓯ꓾ ꓠꓴ ꓠꓬ ꓠꓴ ꓚꓲꓸ ꓛꓬ ꓐꓱ ꓶ ꓢꓷꓸ ꓙ ꓟꓳ ꓙˍ ꓠꓬꓲ꓾ ꓠꓴ ꓢꓷ ꓙ ꓟꓳ ꓙˍ ꓟ ꓠꓬ ꓟꓽ ꓔꓱꓹ꓾ ꓐꓯˍ ꓡꓳ꓿ 14 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓠꓬ ꓥꓪ ꓚꓲꓸ ꓛꓬ ꓐꓱ ꓶ ꓢꓷ ꓙ ꓟꓳ ꓙˍ ꓟꓲ꓾ ꓥꓪ ꓢꓷ ꓙ ꓟꓳ ꓙˍ ꓟ ꓠꓽ ꓔꓱꓹˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓮ ꓡꓲ ꓗꓪ ꓐꓰ ꓡꓻ ꓟ ꓐꓰ꓾ ꓥꓪ ꓮ ꓡꓲ ꓗꓪ ꓙꓰˍ ꓟ ꓥꓪ ꓢꓷˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓥꓪ ꓮ ꓡꓲ ꓗꓪ ꓐꓰ ꓡꓻ ꓟ ꓐꓰ꓾ ꓥꓪ ꓮ ꓡꓲ ꓗꓪ ꓙꓰˍ ꓟ ꓟꓽ ꓢꓷ꓿ 15 ꓠꓴ ꓪꓽ ꓠꓬ ꓞꓳ ꓚꓱꓹ ꓪꓽ ꓚꓱꓹ ꓔꓯ ꓛꓳ ꓢꓲ ꓙꓽ ꓘꓶꓽˍ ꓡꓳ꓿ ꓥꓪ ꓠꓽ ꓮꓽ ꓟ ꓔꓯˍ ꓟꓲ ꓟꓽ ꓙꓽ ꓘꓶ꓿ 16 ꓥꓪ ꓙꓽ ꓘꓶꓽ ꓐꓷˍ ꓟꓲ ꓥꓪ ꓙꓽ ꓘꓶˍ ꓟ ꓠꓬ ꓔꓱꓹˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓕꓲ ꓣꓳ ꓔꓵꓸꓼˍ ꓡꓰꓽ ꓟꓽ ꓥ꓿ ꓥꓪ ꓔꓯ ꓝꓲ ꓩꓴ ꓡ ꓢꓴ ꓐꓹ ꓐ ꓠꓬ ꓥꓪˍ ꓐꓰ ꓔꓬ ꓡꓳ꓿ 17 ꓠꓴ ꓪꓽ ꓙꓵꓽ ꓗ ꓗꓪˍ ꓟꓲ꓾ ꓡ ꓞꓳ ꓠꓬꓲꓽ ꓣꓳ ꓡꓰ ꓢꓷ ꓙ ꓟꓳ ꓙˍ ꓟ ꓐꓯ ꓘꓶ ꓠꓬ ꓔꓱꓹˍ ꓡꓳ꓾ ꓐꓰ ꓐꓳ ꓔ ꓡꓳ꓿ 18 ꓥꓪ ꓠꓬ ꓚꓲꓸ ꓛꓬ ꓐꓱ ꓶ ꓢꓷꓸ ꓙ ꓟꓳ ꓙ ꓢꓲ꓾ ꓥꓪ ꓔꓯ ꓝꓲ ꓩꓴ ꓡ ꓟ ꓐꓹ ꓐˍ ꓟꓲ ꓥꓪ ꓐꓱ ꓶ ꓢꓷ ꓙ ꓟꓳ ꓙˍ ꓡꓳ꓾ ꓐꓯˍ ꓡꓳ꓿ 19 ꓖꓳ ꓕꓯ ꓬꓲ ꓪꓽ ꓡꓰ ꓬꓲ ꓔꓯ꓾ ꓠꓴ ꓐꓹ ꓐ ꓮ ꓡꓲ ꓗꓪ ꓔꓬ ꓡ? ꓐꓰ ꓠ ꓠꓬꓲˍ ꓡꓳ꓿ ꓬꓰ-ꓢꓴ ꓒꓳꓹ ꓖꓶ ꓢꓲ꓾ ꓥꓪ ꓔꓯˍ ꓟꓲ꓾ ꓥꓪ ꓐꓹ ꓐ ꓔꓯˍ ꓟꓲ ꓠꓴ ꓪꓽ ꓟꓽ ꓢꓷ꓿ ꓠꓴ ꓪꓽ ꓥꓪ ꓔꓯ ꓢꓷˍ ꓕꓯ ꓠ꓾ ꓥꓪ ꓐꓹ ꓐ ꓔꓯˍ ꓟꓲ ꓢꓷˍ ꓡꓳ ꓫꓵꓽ ꓥꓳ꓾ ꓐꓯ ꓖꓶˍ ꓡꓳ꓿ 20 ꓐꓯ ꓘꓶ ꓕꓱ ꓟꓬ ꓟ ꓠꓬ꓾ ꓢꓲꓽ ꓫꓬ ꓦꓲ ꓗꓪ ꓬꓲ ꓟꓸ ꓟꓲ ꓟꓸˍ ꓕꓯ꓾ ꓒꓴ ꓗꓶ ꓖꓴ ꓕꓲ ꓔꓳꓸ ꓗꓪ ꓐꓯˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲꓸ ꓝꓲꓸ ꓟꓽ ꓛꓲ ꓡ ꓢꓰ ꓠꓬꓲ ꓬꓲ ꓔꓯ ꓮ ꓟˍ ꓟꓲ ꓣꓴ ꓟꓽ ꓠ꓿ 21 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓝꓮꓲ ꓕꓲ ꓧꓪ꓾ ꓥꓪ ꓠꓽ ꓙꓰˍ ꓥꓳ꓿ ꓠꓴ ꓪꓽ ꓠꓬ ꓥꓪ ꓔꓯ ꓧꓪ ꓡ ꓥꓳ꓿ ꓖꓳ ꓡꓱ ꓢꓲ ꓠꓴ ꓪꓽ ꓝꓴꓲ ꓗꓪ ꓠꓴ ꓪꓽ ꓫꓵˍ ꓥꓳ꓿ ꓥꓪ ꓙꓰˍ ꓟ ꓗꓪ ꓠꓴ ꓪꓽ ꓡ ꓟꓽ ꓐ ꓡ꓾ ꓐꓯˍ ꓡꓳ꓿ 22 ꓖꓳ ꓕꓯ ꓬꓴ-ꓔ ꓡ ꓞꓳ ꓡꓰ꓾ ꓥꓪ ꓙꓰˍ ꓟ ꓗꓪ ꓠꓴ ꓪꓽ ꓡ ꓟꓽ ꓐ ꓡ꓾ ꓐꓰ ꓬꓲ ꓐꓯˍ ꓟ ꓕꓱ ꓟ ꓠꓬ꓾ ꓬꓲ ꓚꓲꓸ ꓛꓬ ꓔꓯ ꓬꓲ ꓢꓰꓼˍ ꓐꓰ ꓬꓰˍ ꓠꓬꓲ ꓐꓯˍ ꓟꓽ ꓥ ꓡ?꓾ ꓐꓯˍ ꓡꓳ꓿ 23 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓠꓯꓸ ꓘꓪ ꓗꓪ ꓐꓰ ꓡꓻ ꓟ ꓥ ꓢꓲ꓾ ꓥꓪ ꓠꓽ ꓕꓯ ꓢꓲ ꓗꓪ ꓐꓰ ꓡꓻ ꓟ ꓥ ꓡꓳ꓿ ꓠꓴ ꓪꓽ ꓠꓬ ꓟꓲ ꓠꓯ ꓕꓱ ꓟ ꓗꓪ ꓟ ꓥ ꓡꓳ꓿ ꓥꓪ ꓠꓽ ꓟꓲ ꓠꓯ ꓕꓱ ꓟ ꓗꓪ ꓟ ꓟꓽ ꓥ꓿ 24 ꓖꓳ ꓡꓱ ꓠꓬꓲ ꓥꓪ ꓡꓰ ꓠꓴ ꓪꓽ ꓔꓯ꓾ ꓠꓴ ꓪꓽ ꓝꓴꓲ ꓗꓪ ꓠꓴ ꓪꓽ ꓫꓵˍ ꓥꓳ꓾ ꓐꓯˍ ꓟ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓙꓲ-ꓢꓴ ꓖꓳ ꓕꓲ ꓣꓳ ꓥ ꓟ ꓠꓴ ꓪꓽ ꓟꓽ ꓙꓵꓻ ꓠꓬ꓾ ꓠꓴ ꓪꓽ ꓝꓴꓲ ꓗꓪ ꓠꓴ ꓪꓽ ꓫꓵˍ ꓥꓳ꓾ ꓐꓯ ꓖꓶˍ ꓡꓳ꓿ 25 ꓖꓳ ꓕꓯ ꓬꓲ ꓪꓽ ꓬꓲ ꓔꓯ꓾ ꓠꓴ ꓠꓬ ꓮꓽ ꓟ ꓥ ꓡ? ꓐꓰ ꓠ ꓠꓬꓲˍ ꓡꓳ꓿ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓠꓬ ꓬꓲ ꓪꓴꓸ ꓕꓯˍ ꓡꓰ ꓠꓴ ꓪꓽ ꓔꓯ ꓐꓯ ꓖꓶ ꓗꓷ ꓟ ꓖꓳ ꓕꓲ ꓣꓳ ꓟ ꓥꓳ꓿ 26 ꓥꓪ ꓠꓬ ꓠꓴ ꓪꓽ ꓔꓯ ꓟꓳꓸ ꓐꓯ ꓓꓴˍ ꓐꓰ ꓐꓯ ꓟꓴ ꓞꓷꓹ ꓓꓴ ꓮꓽ ꓟꓬꓹ ꓫꓵꓽ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓔꓯ ꓝꓲ ꓩꓴ ꓡ ꓢꓴ ꓠꓽ ꓔꓱꓹˍ ꓟ ꓥ ꓢꓲ꓾ ꓥꓪ ꓬꓲ ꓔꓯꓺˍ ꓐꓰ ꓑ ꓙꓽˍ ꓟ ꓠꓬ ꓟꓲ ꓠꓯ ꓡ ꓞꓳ ꓔꓯ ꓥꓪ ꓐꓯ ꓟꓸ ꓖꓶˍ ꓡꓳ꓾ ꓐꓯˍ ꓡꓳ꓿ 27 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓬ ꓬꓲ ꓐꓹ ꓐ ꓔꓯ ꓖꓴ ꓢꓲ ꓐꓯˍ ꓟ ꓔꓯ ꓬꓲ ꓪꓽ ꓟꓽ ꓙꓽ ꓜꓲꓼ꓿ 28 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ꓾ ꓡ-ꓞꓳ-ꓮ-ꓐꓲ ꓔꓯ ꓠꓴ ꓪꓽ ꓔꓳꓹ ꓔꓴ ꓗꓷˍ ꓕꓯ ꓢꓲꓸˍ ꓡꓰ꓾ ꓥꓪ ꓮꓽ ꓟ ꓥ ꓟ ꓐꓰ꓾ ꓥꓪ ꓚꓲꓸ ꓛꓬ ꓥꓪ ꓮꓸ ꓫꓵˍ ꓟꓲ ꓟꓽ ꓬꓰ ꓟ ꓐꓰ꓾ ꓐꓹ ꓐ ꓥꓪ ꓔꓯ ꓮ ꓡꓲ ꓟꓸ ꓖꓶ ꓡ ꓠꓬ ꓖꓳ ꓡꓱ ꓫꓸ ꓕꓱˍ ꓟ ꓠꓴ ꓪꓽ ꓢꓷꓸ ꓡꓰˍ ꓥꓳ꓿ 29 ꓥꓪ ꓔꓯ ꓝꓲ ꓩꓴ ꓡ ꓢꓴ ꓠꓬ ꓥꓪˍ ꓐꓰ ꓔꓬ ꓡꓳ꓿ ꓥꓪ ꓕꓲ ꓣꓳ ꓔꓯꓺˍ ꓡꓰꓽ ꓬꓲ ꓟꓽ ꓡꓳ ꓔꓸ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓲꓹ ꓒꓴˍ ꓟ ꓥꓪ ꓮ ꓕꓯˍ ꓟꓲ ꓬꓰˍ ꓡꓳ꓾ ꓐꓯˍ ꓡꓳ꓿ 30 ꓕꓱ ꓟꓬ ꓫꓵꓽ ꓬꓲ ꓐꓯ ꓔꓬ ꓕꓯ꓾ ꓡ ꓞꓳ ꓮꓽ ꓟꓬꓹ ꓬꓲ ꓔꓯ ꓙꓵꓻ ꓡ ꓡꓳ꓿ 31 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ꓾ ꓬꓲ ꓔꓯ ꓙꓵˍ ꓟ ꓬꓴ-ꓔ ꓡ ꓞꓳ ꓖꓳ ꓕꓲ ꓧꓳꓽ ꓔꓯ꓾ ꓥꓪ ꓐꓯ ꓘꓶ ꓔꓯ ꓠꓴ ꓪꓽ ꓮ ꓕꓯˍ ꓟꓲ ꓒꓵꓽ ꓛꓳˍ ꓠꓬ꓾ ꓠꓴ ꓪꓽ ꓠꓽ ꓚꓵ ꓚꓵ ꓥꓪ ꓛꓳꓽ ꓒꓯꓹ ꓥꓳ꓿ 32 ꓖꓳ ꓡꓱ ꓢꓲ ꓔꓱꓹ ꓚꓵˍ ꓟ ꓔꓯ ꓠꓴ ꓪꓽ ꓢꓷꓸ ꓡꓰ ꓢꓲ꓾ ꓔꓱꓹ ꓚꓵˍ ꓟ ꓖꓳ ꓟ ꓡꓰ ꓠꓴ ꓪꓽ ꓔꓯ ꓩꓴ ꓗꓷ ꓖꓶ ꓡ ꓥꓳ꓾ ꓐꓯˍ ꓡꓳ꓿ 33 ꓬꓲ ꓪꓽ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓠꓴꓽ ꓠꓬ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓢꓲ꓾ ꓮ ꓕꓯˍ ꓟꓲ ꓮꓽ ꓟ ꓚꓳ ꓑꓸ ꓟꓽ ꓬꓰ ꓠꓬꓲ꓿ ꓠꓴ ꓠꓬ ꓮ ꓡꓲ ꓗꓹ ꓠꓬꓲ꓾ ꓠꓴ ꓪꓽ ꓔꓯ ꓩꓴ ꓗꓷˍ ꓟ ꓟꓶ ꓡꓰ ꓝꓲˍ ꓥꓳ꓾ ꓐꓯˍ ꓡ? ꓐꓰ ꓠ ꓠꓬꓲˍ ꓡꓳ꓿ 34 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓝꓴꓲ ꓬꓰ ꓢꓴ ꓥ ꓕ ꓑꓳ ꓠꓬ ꓝꓴꓲ ꓚꓳ ꓑꓸ ꓥ ꓡꓳ꓿ 35 ꓚꓳ ꓑꓸ ꓠꓬ ꓕꓶꓻˍ ꓟ ꓔꓬ ꓖꓴ ꓦꓲ ꓟꓽ ꓙꓳ꓿ ꓮ ꓐꓲ ꓠꓽ ꓕꓲ ꓞꓲꓼ ꓡꓱꓸꓼ ꓦꓲ ꓗꓪ ꓔꓬ ꓡꓳ꓿ 36 ꓖꓳ ꓡꓱ ꓠꓬꓲ ꓮ ꓐꓲ ꓡꓰ ꓠꓴ ꓪꓽ ꓔꓯ ꓩꓴ ꓗꓷ ꓖꓶˍ ꓠꓬ꓾ ꓠꓴ ꓪꓽ ꓠꓽ ꓚꓵ ꓚꓵ ꓩꓴ ꓗꓷˍ ꓟ ꓟꓶˍ ꓥꓳ꓿ 37 ꓠꓴ ꓪꓽ ꓠꓬ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓟ ꓥꓪ ꓢꓷˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓯꓸꓼ ꓗꓪ ꓥꓪ ꓐꓯ ꓘꓶ ꓓꓯꓹ ꓖꓴ ꓟꓽ ꓙꓳ ꓠꓬꓲ꓾ ꓠꓴ ꓪꓽ ꓠꓽ ꓥꓪ ꓔꓯ ꓢꓰꓼ ꓠꓹ ꓟ ꓚꓱꓹ ꓧꓪˍ ꓡꓳ꓿ 38 ꓐꓹ ꓐˍ ꓐꓰ ꓕꓲ ꓪꓺꓼ ꓔꓬ ꓕꓯ ꓥꓪ ꓟꓳ ꓠꓬꓲˍ ꓟ ꓥꓪ ꓠꓴ ꓪꓽ ꓔꓯ ꓐꓯ ꓖꓶˍ ꓡꓳ꓿ ꓠꓴ ꓪꓽˍ ꓟꓲ ꓠꓴ ꓪꓽ ꓐꓹ ꓐ ꓔꓯˍ ꓐꓰ ꓑ ꓙꓽˍ ꓟ ꓠꓴ ꓪꓽ ꓬꓰˍ ꓡꓳ꓾ ꓐꓯ ꓖꓶˍ ꓡꓳ꓿ 39 ꓬꓲ ꓪꓽ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓠꓴꓽ ꓐꓹ ꓐ ꓠꓽ ꓮ-ꓐ-ꓡ-ꓦ ꓥ ꓡꓳ꓾ ꓐꓯˍ ꓡꓳ꓿ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓕꓯ ꓠꓽ꓾ ꓮ-ꓐ-ꓡ-ꓦ ꓬꓰ ꓗꓷ ꓟ ꓟꓬꓱꓽ ꓠꓴ ꓪꓽˍ ꓟꓲ ꓬꓰˍ ꓡꓳ ꓫꓵꓽ ꓥꓳ꓿ 40 ꓖꓳ ꓡꓱ ꓥ ꓟꓲ ꓮ ꓟꓶ ꓠꓴ ꓪꓽ ꓠꓬ ꓪꓴ-ꓢ ꓔꓯˍ ꓐꓰ ꓔꓱꓹˍ ꓟ ꓑ ꓙꓽ ꓗꓷ ꓢꓲ꓾ ꓠꓴ ꓪꓽ ꓔꓯ ꓐꓯ ꓖꓶ ꓡ ꓢꓴ ꓥꓪ ꓔꓯ ꓢꓰꓼ ꓠꓹ ꓟ ꓚꓱꓹ ꓧꓪˍ ꓡꓳ꓿ ꓮ-ꓐ-ꓡ-ꓦ ꓠꓽ ꓕꓱ ꓡꓱ ꓟꓽ ꓬꓰ ꓠꓬꓲ꓿ 41 ꓠꓴ ꓪꓽ ꓠꓽ ꓠꓴ ꓪꓽ ꓐꓹ ꓐ ꓬꓰˍ ꓟ ꓟꓬꓱꓽ ꓬꓰ ꓔꓬ ꓡꓳ꓾ ꓐꓯ ꓖꓶˍ ꓡꓳ꓿ ꓬꓲ ꓪꓽ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓠꓬ ꓓꓲꓽ ꓤꓽ ꓟ ꓥ꓿ ꓥꓪ ꓠꓴꓽ ꓐꓹ ꓐ ꓠꓽ ꓪꓴ-ꓢ ꓕꓲ ꓣꓳˍ ꓡꓰꓽ ꓥ ꓡꓳ꓾ ꓐꓯˍ ꓡꓳ꓿ 42 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓪꓴ-ꓢ ꓠꓴ ꓪꓽ ꓐꓹ ꓐ ꓥ ꓕꓯ ꓠꓽ꓾ ꓠꓴ ꓪꓽ ꓥꓪ ꓔꓯ ꓠꓲꓹ ꓠꓵˍ ꓡꓳ ꓫꓵꓽ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓪꓴ-ꓢ ꓔꓯˍ ꓐꓰ ꓓꓳ ꓡ ꓟ ꓥ ꓡꓳ꓿ ꓥꓪ ꓚꓲꓸ ꓛꓬ ꓙꓵꓽ ꓪ ꓗꓪ ꓐꓰ ꓡꓻ ꓟ ꓟꓽ ꓥ꓿ ꓬꓲ ꓡꓰ ꓝꓲ ꓩꓴ ꓡ ꓟ ꓥ ꓡꓳ꓿ 43 ꓠꓴ ꓪꓽ ꓮ ꓡꓲ ꓗꓷ ꓡꓰ ꓠꓬꓲ ꓥꓪ ꓐꓯˍ ꓟ ꓔꓯ ꓟꓽ ꓙ ꓜꓲꓼˍ ꓡ? ꓕꓱ ꓟ ꓠꓬ ꓠꓴ ꓪꓽ ꓠꓽ ꓥꓪ ꓐꓯ ꓘꓶ ꓔꓯ ꓠ ꓠꓹ ꓟꓽ ꓫꓳ ꓠꓬꓲ ꓥꓳ꓿ 44 ꓠꓴ ꓪꓽ ꓠꓬ ꓠꓴ ꓪꓽ ꓐꓹ ꓐ ꓠꓲꓽ ꓪ ꓔꓲ ꓔꓯ ꓟ ꓥ ꓢꓲ꓾ ꓠꓴ ꓪꓽ ꓐꓹ ꓐ ꓦꓯꓸ ꓠꓲꓹ ꓙꓵˍ ꓟ ꓠꓴ ꓪꓽ ꓬꓰ ꓠꓲꓹ ꓫꓵˍ ꓡꓳ꓿ ꓬꓲ ꓠꓽ ꓬꓲ ꓚꓰ ꓬꓲ ꓪꓴꓸ ꓕꓯˍ ꓡꓰ ꓞꓳ ꓤ ꓢꓰꓼ ꓢꓴ ꓥ ꓢꓲ꓾ ꓬꓲ ꓠꓯꓸꓼ ꓗꓪ ꓔꓱꓹ ꓚꓵˍ ꓟ ꓟꓽ ꓓꓯꓹ ꓠꓬꓲ꓾ ꓬꓲ ꓠꓬ ꓔꓱꓹˍ ꓟ ꓬꓰ ꓟꓽ ꓐ ꓡ꓿ ꓬꓲ ꓠꓬ ꓗꓶꓸ ꓒꓽ ꓥ ꓢꓲ꓾ ꓗꓶꓸ ꓢꓴ ꓐꓴ ꓐꓹ ꓐ ꓥ ꓠꓬꓲ꓾ ꓬꓲ ꓫꓸ ꓕꓱˍ ꓟꓲ ꓗꓶꓸ ꓥꓳꓽ ꓫꓸ ꓕꓱ ꓓꓳ ꓡ ꓡꓳ꓿ 45 ꓖꓳ ꓡꓱ ꓥ ꓟꓲ ꓥꓪ ꓠꓽ ꓔꓱꓹ ꓘꓶꓽ ꓫꓸ ꓕꓱˍ ꓠꓬꓲ꓾ ꓠꓴ ꓪꓽ ꓥꓪ ꓔꓯ ꓟꓽ ꓙꓵꓻ꓿ 46 ꓠꓴ ꓪꓽ ꓗꓪ ꓟ ꓮ ꓡꓲ ꓕꓲ ꓣꓳ ꓡꓰ ꓥꓪ ꓔꓯ ꓝꓴꓲ ꓐꓯ ꓞꓷꓹˍ ꓐꓯˍ ꓡ? ꓥꓪ ꓡꓰ ꓔꓱꓹ ꓚꓵˍ ꓟ ꓫꓸ ꓕꓱˍ ꓠꓬ꓾ ꓠꓴ ꓪꓽ ꓮ ꓡꓲ ꓗꓷ ꓡꓰ ꓠꓬꓲ ꓥꓪ ꓔꓯ ꓟꓽ ꓙꓵꓻˍ ꓡ? 47 ꓪꓴ-ꓢ ꓡ ꓞꓳ ꓠꓬ ꓪꓴ-ꓢ ꓐꓯ ꓘꓶ ꓔꓯ ꓠ ꓠꓹˍ ꓡꓳ꓿ ꓠꓴ ꓪꓽ ꓠꓬ ꓪꓴ-ꓢ ꓡ ꓞꓳ ꓟꓽ ꓥ ꓠꓬꓲ ꓬꓲ ꓐꓯ ꓘꓶ ꓔꓯ ꓟꓽ ꓠ ꓠꓹ꓾ ꓐꓯˍ ꓡꓳ꓿ 48 ꓬꓴ-ꓔ ꓡ ꓞꓳ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓠꓽ ꓢ-ꓟ-ꓡꓲ ꓡ ꓞꓳ ꓥ ꓢꓲ꓾ ꓠꓴ ꓔꓯ ꓠꓲꓽ ꓕꓲ ꓟ ꓓꓯꓹˍ ꓡꓳ꓾ ꓐꓰ ꓥꓪ ꓠꓴꓽ ꓐꓯˍ ꓟ ꓠꓬ ꓐꓯ ꓬꓯꓼˍ ꓡꓳ꓾ ꓟꓽ ꓥ ꓡ?꓾ ꓐꓯ ꓖꓶˍ ꓡꓳ꓿ 49 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓔꓯ ꓠꓲꓽ ꓟꓽ ꓓꓯꓹ꓿ ꓥꓪ ꓠꓬ ꓐꓹ ꓐ ꓔꓯ ꓒꓵꓽˍ ꓡꓳ꓿ ꓠꓴ ꓪꓽ ꓠꓽ ꓥꓪ ꓔꓯ ꓟꓽ ꓒꓵ꓿ 50 ꓥꓪ ꓠꓽ ꓚꓲꓸ ꓛꓬ ꓟꓬꓱ ꓓꓳꓽ ꓟꓽ ꓧꓪ꓿ ꓥꓪ ꓐꓱ ꓶ ꓟꓬꓱ ꓓꓳꓽ ꓧꓪ ꓖꓶꓽ ꓡ ꓢꓴ ꓕꓲ ꓣꓳ ꓔꓬ ꓢꓲ꓾ ꓬꓲ ꓠꓬ ꓐꓯ ꓟꓴ ꓘꓶꓽ ꓢꓴ ꓥ ꓡꓳ꓿ 51 ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓮꓽ ꓟˍ ꓟꓲ ꓥꓪ ꓐꓯ ꓘꓶ ꓔꓯ ꓒꓵꓽ ꓛꓳˍ ꓠꓬ꓾ ꓬꓲ ꓠꓽ ꓕꓲ ꓞꓲꓼ ꓕꓲ ꓑ ꓟꓽ ꓫꓵ꓾ ꓐꓯˍ ꓡꓳ꓿ 52 ꓬꓴ-ꓔ ꓡ ꓞꓳ ꓡꓰ ꓬꓲ ꓔꓯ꓾ ꓮ ꓟꓶ ꓠꓽ ꓠꓴ ꓔꓯ ꓠꓲꓽ ꓕꓲ ꓟ ꓓꓯꓹ ꓟ ꓥꓪ ꓠꓴꓽ ꓚꓵ ꓚꓵ ꓢꓷꓸ ꓡꓰꓳ꓿ ꓮ-ꓐ-ꓡ-ꓦˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓠꓬ ꓫꓵꓻꓳ꓿ ꓖꓳ ꓡꓱ ꓥ ꓟꓲ ꓠꓴ ꓠꓽ꓾ ꓮꓽ ꓟˍ ꓟꓲ ꓥꓪ ꓐꓯ ꓘꓶ ꓒꓵꓽ ꓛꓳˍ ꓠꓬ꓾ ꓕꓲ ꓞꓲꓼ ꓕꓲ ꓑ ꓟꓽ ꓫꓵꓻ ꓡ꓾ ꓐꓯˍ ꓡꓳ꓿ 53 ꓠꓴ ꓠꓬ ꓫꓵꓻ ꓗꓷ ꓟ ꓥꓪ ꓠꓴꓽ ꓒꓵꓽ ꓒ ꓮ-ꓐ-ꓡ-ꓦ ꓕꓯ ꓢꓲ ꓪꓴꓽˍ ꓡ? ꓟꓷꓽ ꓠꓷꓹ ꓝꓸ ꓢꓴ ꓐꓴˍ ꓟꓲ ꓫꓵꓻꓳ꓿ ꓠꓴ ꓠꓬ ꓠꓴ ꓚꓲꓸ ꓛꓬ ꓔꓯ ꓮ ꓡꓲ ꓡꓴ ꓫꓵ ꓡ ꓞꓳ ꓚꓬꓹˍ ꓡ? ꓐꓰ ꓠ ꓠꓬꓲˍ ꓡꓳ꓿ 54 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓚꓲꓸ ꓛꓬ ꓔꓯ ꓥꓪ ꓟꓬꓱ ꓓꓳꓽ ꓖꓶ ꓐꓷˍ ꓠꓬ꓾ ꓟꓬꓱ ꓓꓳꓽ ꓖꓳ ꓟ ꓠꓽ ꓮꓸ ꓫꓵ ꓟꓽ ꓒꓵꓽ꓿ ꓥꓪ ꓔꓯ ꓟꓬꓱꓺ ꓓꓳꓽ ꓖꓶ ꓢꓴ ꓠꓬ ꓥꓪ ꓐꓹ ꓐ ꓥ ꓡꓳ꓿ ꓠꓴ ꓪꓽ ꓠꓬ ꓬꓲ ꓔꓯ ꓖꓴꓺ ꓢꓲ꓾ ꓬꓲ ꓠꓬ ꓥꓪ ꓠꓴꓽ ꓪꓴ-ꓢ ꓥ ꓡꓳ꓾ ꓐꓰ ꓐꓯˍ ꓟꓲ꓾ 55 ꓠꓴ ꓪꓽ ꓠꓬ ꓬꓲ ꓔꓯ ꓟꓽ ꓢꓷ꓿ ꓥꓪ ꓠꓽ ꓬꓲ ꓔꓯ ꓢꓷˍ ꓡꓳ꓿ ꓥꓪ ꓬꓲ ꓔꓯ ꓟꓽ ꓢꓷ ꓐꓯ ꓐꓷˍ ꓠꓬ꓾ ꓥꓪ ꓠꓽ ꓠꓴ ꓪꓽˍ ꓡꓰ ꓐꓰ ꓞꓳ ꓗꓶꓸ ꓒꓬꓱꓼ ꓡ ꓥꓳ꓿ ꓥꓪ ꓠꓽ ꓬꓲ ꓔꓯ ꓢꓷ ꓢꓲ ꓬꓲ ꓐꓯ ꓘꓶ ꓔꓯ ꓒꓵꓽ ꓛꓳˍ ꓡꓳ꓿ 56 ꓠꓴ ꓪꓽ ꓒꓵꓽ ꓒ ꓮ-ꓐ-ꓡ-ꓦ ꓠꓬ꓾ ꓥꓪ ꓦꓬꓼ ꓠꓬꓲ ꓟꓳꓻ ꓪ ꓠ ꓟ ꓔꓯ ꓠꓲꓹ ꓒꓴ ꓢꓲ꓾ ꓬꓲ ꓟꓳ ꓗꓷ ꓠꓬ ꓗꓹ ꓛꓲˍ ꓡꓳ꓾ ꓐꓯˍ ꓡꓳ꓿ 57 ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓡꓰ ꓬꓲ ꓔꓯ꓾ ꓠꓴ ꓠꓬ ꓥꓪꓽ ꓞꓲ ꓘꓳꓼˍ ꓟꓲ ꓟꓽ ꓙꓳ ꓢꓰꓽ ꓢꓲ꓾ ꓮ-ꓐ-ꓡ-ꓦ ꓔꓯ ꓠꓴ ꓟꓳꓻ ꓠꓬꓲ ꓡ?꓾ ꓐꓯˍ ꓡꓳ꓿ 58 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓮ-ꓐ-ꓡ-ꓦ ꓟꓽ ꓦꓵꓻ ꓡ ꓢꓰꓽ ꓕꓯ ꓡꓰ ꓥꓪ ꓙꓳꓻ ꓔꓬ ꓡꓳ꓾ ꓐꓯ ꓖꓶˍ ꓡꓳ꓿ 59 ꓖꓳ ꓡꓱ ꓠꓬꓲ ꓬꓲ ꓪꓽ ꓬꓲ ꓔꓯ ꓡꓳ ꓠꓹ ꓟ Bꓸ ꓛꓲ ꓖꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓬ ꓑꓬꓺ ꓙꓰ ꓢꓲ꓾ ꓢꓲꓽ ꓫꓬ ꓦꓲ ꓗꓪ ꓐꓰ ꓓꓳ ꓙꓰˍ ꓡꓳ꓿

ꓬꓳ-ꓦ 9

1 ꓬꓰ-ꓢꓴ ꓗꓳꓸ ꓙꓰ ꓔꓬ ꓕꓯ꓾ ꓦꓵꓻˍ ꓕꓯ ꓡꓰ ꓟꓬ ꓔꓶˍ ꓟ ꓡ ꓞꓳ ꓕꓲ ꓣꓳ ꓔꓯ ꓬꓲ ꓟꓳˍ ꓡꓳ꓿ 2 ꓖꓳ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓟꓸ ꓒꓽꓳ꓾ ꓡ ꓞꓳ ꓕꓱ ꓕꓲ ꓣꓳ ꓠꓬ ꓦꓵˍ ꓕꓯ ꓡꓰ ꓟꓬ ꓔꓶˍ ꓟ꓾ ꓮꓽ ꓟ ꓝꓴꓲ ꓑꓶꓸ ꓓꓴ ꓥ ꓡ? ꓬꓲ ꓝꓴꓲ ꓑꓶꓸ ꓓꓴ ꓥ ꓡ? ꓥ ꓠꓬ꓾ ꓬꓲ ꓐꓹ ꓐ ꓟꓹ ꓟ ꓐꓴ ꓝꓴꓲ ꓑꓶꓸ ꓓꓴ ꓥ ꓡ? ꓐꓰ ꓠ ꓠꓬꓲˍ ꓡꓳ꓿ 3 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓡ ꓞꓳ ꓕꓱ ꓟ ꓡꓰ ꓝꓴꓲ ꓬꓰˍ ꓟ ꓑꓶꓸ ꓓꓴ ꓟꓽ ꓥ꓾ ꓬꓲ ꓐꓹ ꓐ ꓟꓹ ꓟ ꓐꓴ ꓝꓴꓲ ꓑꓶꓸ ꓓꓴˍ ꓟꓲ ꓟꓽ ꓥ꓿ ꓬꓲ ꓖꓳ ꓓꓱ ꓗꓪ ꓐꓰ ꓪꓴ-ꓢ ꓟꓬꓱꓽ ꓟꓳꓸ ꓖꓶ ꓓꓳ ꓡ ꓠꓹ ꓟ ꓥ ꓡꓳ꓿ 4 ꓟꓽ ꓟꓰ ꓬꓰ ꓕꓯˍ ꓡꓰ ꓥꓪ ꓔꓯ ꓝꓲ ꓩꓴ ꓡ ꓢꓴ ꓟꓬꓱꓽ ꓣꓳ ꓬꓰ ꓠ ꓗꓹ ꓡꓳ꓿ ꓮꓽ ꓟˍ ꓟꓲ ꓟꓬꓱꓽ ꓬꓰ ꓟꓽ ꓐ ꓡ ꓟ ꓢ ꓘꓪ ꓛꓲ ꓡ ꓥꓳ꓿ 5 ꓥꓪ ꓟꓲ ꓠꓯ ꓗꓪ ꓔꓬ ꓕꓯ ꓥꓪ ꓠꓬ ꓟꓲ ꓠꓯ ꓠꓬꓲ ꓟꓳ ꓓꓴ ꓥ ꓡꓳ꓾ ꓐꓯˍ ꓡꓳ꓿ 6 ꓬꓲ ꓖꓳ ꓡꓱ ꓐꓯ ꓗꓷ ꓠꓬ ꓟꓲ ꓛꓬ ꓗꓪ ꓟꓷꓽ ꓶꓻ ꓔꓲꓸ ꓧꓳꓽ ꓢꓲ꓾ ꓟꓷꓽ ꓶꓻ ꓖꓳ ꓟ ꓡꓰ ꓠꓱꓸ ꓦꓱꓽ ꓒꓼ ꓡꓼ ꓦꓱꓹ ꓗꓷ ꓢꓲ ꓠꓬꓲ꓾ ꓟꓬ ꓔꓶ ꓢꓴ ꓟꓬ ꓢꓶꓽ ꓗꓪ ꓟꓰ ꓖꓶˍ ꓡꓳ꓿ 7 ꓖꓳ ꓡꓱ ꓢꓲ ꓬꓲ ꓔꓯ꓾ ꓢꓲ-ꓡꓳ ꓬꓲꓻ ꓐꓱ ꓗꓪ ꓞꓲꓽ ꓬꓰ꓾ ꓐꓯ ꓖꓶˍ ꓡꓳ꓿ (ꓢꓲ-ꓡꓳ ꓐꓯˍ ꓟ ꓠꓬ꓾ ꓝꓲ ꓩꓴ ꓔ ꓟ꓾ ꓐꓯˍ ꓟ ꓥꓳ꓿) ꓖꓳ ꓕꓯ ꓬꓲ ꓙꓰ ꓢꓲ ꓞꓲꓽ ꓗꓷ ꓠꓬ꓾ ꓠꓬꓲ ꓟꓳ ꓡ ꓢꓲ ꓬꓲꓼ ꓡꓺꓳ꓿ 8 ꓖꓳ ꓡꓱ ꓠꓬꓲ ꓬꓲ ꓠꓶꓽ ꓛꓳ ꓕꓲ ꓛꓳꓺˍ ꓐꓰ꓾ ꓬꓲ ꓠꓬ ꓧꓶꓸ ꓕꓯꓽ ꓜ ꓓꓰꓽ ꓢꓴ ꓥ ꓟ ꓟꓳꓻ ꓠꓬꓲ ꓢꓴ ꓠꓬ꓾ ꓕꓱ ꓟ ꓠꓬ ꓜ ꓓꓰꓽ ꓜꓽ ꓢꓴ ꓖꓳ ꓕꓲ ꓣꓳ ꓟꓽ ꓥ ꓡ?꓾ ꓐꓯˍ ꓡꓳ꓿ 9 ꓕꓲ ꓐꓱ ꓠꓬ꓾ ꓬꓲ ꓥ ꓡꓳ꓾ ꓐꓯˍ ꓡꓳ꓿ ꓠꓱꓸ ꓐꓯꓼ ꓕꓲ ꓐꓱ ꓠꓬ꓾ ꓟꓽ ꓥ꓾ ꓬꓲ ꓒꓬꓱꓽ ꓶꓻˍ ꓟ ꓕꓲ ꓣꓳ ꓥ ꓡꓳ꓾ ꓐꓯˍ ꓡꓳ꓿ ꓖꓳ ꓕꓯ ꓬꓲ ꓡꓰ꓾ ꓥꓪ ꓠꓬ ꓟꓬ ꓔꓶ ꓖꓳ ꓕꓲ ꓣꓳ ꓟ ꓥꓳ꓾ ꓐꓯ ꓖꓶˍ ꓡꓳ꓿ 10 ꓖꓳ ꓡꓱ ꓠꓬꓲ ꓬꓲ ꓪꓽ ꓡꓰ ꓬꓲ ꓔꓯ꓾ ꓠꓴ ꓟꓬ ꓢꓶ ꓮ ꓡꓲ ꓐꓰ ꓠꓬꓲ ꓟꓳ ꓡ ꓡ? ꓐꓰ ꓠ ꓠꓬꓲˍ ꓕꓯ꓾ 11 ꓬꓲ ꓡꓰ ꓒꓳꓹ ꓖꓶ ꓢꓲ꓾ ꓬꓰ-ꓢꓴ꓾ ꓐꓰ ꓐꓯˍ ꓟ ꓖꓳ ꓕꓲ ꓣꓳ ꓡꓰ ꓠꓱꓸ ꓦꓱ ꓒꓼ ꓡꓼ ꓬꓰ ꓢꓲ ꓥꓪ ꓟꓬ ꓢꓶꓽ ꓗꓪ ꓟꓰ ꓖꓶ ꓡ ꓢꓲ ꓠꓬꓲ꓾ ꓢꓲ-ꓡꓳ ꓬꓲꓻ ꓐꓱ ꓗꓪ ꓞꓲꓽ ꓬꓰ꓾ ꓐꓯ ꓖꓶ ꓡ ꓠꓬꓲ꓾ ꓥꓪ ꓞꓲꓽ ꓗꓷ ꓠꓬ ꓠꓬꓲ ꓟꓳ ꓡꓺꓳ꓾ ꓐꓯ ꓖꓶˍ ꓡꓳ꓿ 12 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓔꓯ꓾ ꓬꓲ ꓮ ꓡꓲ ꓗꓪ ꓔꓬ ꓡ?꓾ ꓐꓯˍ ꓕꓯ꓾ ꓬꓲ ꓡꓰ꓾ ꓥꓪ ꓟꓽ ꓢꓷ꓾ ꓐꓯˍ ꓡꓳ꓿ 13 ꓬꓲ ꓪꓽ ꓡꓰ ꓧꓶ ꓕꓯ ꓟꓬ ꓔꓶ ꓢꓴ ꓖꓳ ꓕꓲ ꓣꓳ ꓔꓯ ꓒ-ꓡꓲ-ꓢꓷ ꓐꓴ ꓔꓬ ꓗꓪ ꓧꓳꓽ ꓙꓰˍ ꓡꓳ꓿ 14 ꓬꓰ-ꓢꓴ ꓡꓰ ꓠꓱꓸ ꓦꓱ ꓒꓼ ꓡꓼ ꓟꓰ ꓖꓶ ꓢꓲ ꓬꓲ ꓔꓯ ꓠꓬꓲ ꓟꓳ ꓡ ꓝꓲˍ ꓟ ꓖꓳ ꓕꓲ ꓠꓬꓲ ꓠꓬ ꓠꓽ ꓦꓬꓼ ꓠꓬꓲ ꓥ ꓡꓳ꓿ 15 ꓖꓳ ꓡꓱ ꓠꓬꓲ ꓒ-ꓡꓲ-ꓢꓷ ꓐꓴˍ ꓟꓲ꓾ ꓬꓲ ꓮ ꓡꓲ ꓐꓰ ꓠꓬꓲ ꓟꓳ ꓡ ꓟ ꓔꓯ ꓠ ꓠꓬꓲˍ ꓢꓰ ꓡꓳ꓿ ꓬꓲ ꓠꓬ ꓬꓲ ꓪꓽ ꓔꓯ꓾ ꓬꓰ-ꓢꓴ ꓡꓰ ꓥꓪ ꓟꓬ ꓢꓶꓽ ꓗꓪ ꓠꓱꓸ ꓦꓱ ꓒꓼ ꓡꓼ ꓟꓰ ꓖꓶ ꓡ ꓢꓲ꓾ ꓥꓪ ꓞꓲꓽ ꓗꓷ ꓠꓬ ꓠꓬꓲ ꓟꓳ ꓡꓺꓳ꓾ ꓐꓯˍ ꓡꓳ꓿ 16 ꓖꓳ ꓡꓱ ꓠꓬꓲ ꓒ-ꓡꓲ-ꓢꓷ ꓐꓴ ꓕꓲ ꓐꓱ ꓠꓬ꓾ ꓡ ꓞꓳ ꓕꓱ ꓟ ꓠꓬ꓾ ꓠꓽ ꓦꓬꓼ ꓠꓬꓲ ꓔꓯ ꓟꓽ ꓒꓵ ꓠꓬꓲ꓾ ꓪꓴ-ꓢ ꓔꓯˍ ꓐꓰ ꓡꓻ ꓟ ꓟꓽ ꓥ꓾ ꓐꓯˍ ꓡꓳ꓿ ꓠꓱꓸ ꓐꓯꓼ ꓕꓲ ꓐꓱ ꓠꓽ꓾ ꓝꓴꓲ ꓙꓳˍ ꓟ ꓡ ꓞꓳ ꓠꓬ ꓕꓱ ꓘꓶ ꓛꓲ ꓪꓴꓽˍ ꓟ ꓢꓷꓸ ꓡꓰ ꓓꓴ ꓮ ꓡꓲ ꓬꓰ ꓐ ꓡ ꓢꓰꓽ꓾ ꓐꓰ ꓐꓯ ꓢꓲ꓾ ꓗꓪꓺ ꓡꓯꓽ ꓘꓳ ꓔꓴ ꓡ ꓡꓳ꓿ 17 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓟꓬ ꓔꓶ ꓔꓯ꓾ ꓠꓴ ꓐꓯˍ ꓠꓬ ꓬꓰ-ꓢꓴ ꓡꓰ ꓠꓴ ꓔꓯ ꓠꓬꓲ ꓟꓳ ꓡ ꓝꓲꓳ꓾ ꓐꓯ ꓗꓷꓳ꓿ ꓖꓳ ꓡꓱ ꓠꓬ ꓬꓲ ꓮꓽ ꓟ ꓥ ꓡꓳ ꓐꓰ ꓠꓴ ꓓꓵꓽ ꓙꓽˍ ꓡ?꓾ ꓐꓰ ꓬꓲ ꓔꓯ ꓝꓮꓲ ꓕꓲ ꓧꓪꓹ ꓠ ꓠꓬꓲˍ ꓡꓳ꓿ ꓬꓲ ꓡꓰ꓾ ꓬꓲ ꓠꓽ ꓟꓷꓽ ꓠꓷꓹ ꓝꓸ ꓢꓴ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 18 ꓬꓲ ꓠꓽ ꓧꓶꓸ ꓕꓯ ꓟꓬ ꓔꓶ ꓢꓴ ꓥ ꓢꓲ꓾ ꓠꓬꓲꓺ ꓟꓳ ꓡ ꓟ ꓔꓯ ꓬꓴ-ꓔ ꓡ ꓞꓳ ꓟꓽ ꓙꓵꓻ ꓠꓬꓲ꓾ ꓠꓬꓲ ꓟꓳ ꓡ ꓢꓴ ꓬꓲ ꓐꓹ ꓐ ꓟꓹ ꓟ ꓔꓯ ꓘꓴ ꓔꓯꓹ ꓡ ꓢꓲ ꓠꓬꓲ꓾ 19 ꓦꓵˍ ꓕꓯ ꓡꓰ ꓟꓬ ꓔꓶˍ ꓟ ꓕꓱ ꓕꓲ ꓣꓳ ꓠꓬ ꓠꓴ ꓪꓽ ꓮ ꓐꓲ ꓥ ꓡ? ꓮ ꓟꓶ ꓠꓬ ꓬꓲ ꓮ ꓡꓲ ꓐꓰ ꓢꓲꓸ ꓠꓬꓲ ꓟꓳꓻ ꓡ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 20 ꓬꓲ ꓐꓹ ꓐ ꓟꓹ ꓟ ꓡꓰ ꓒꓳꓹ ꓖꓶ ꓢꓲ꓾ ꓕꓱ ꓟ ꓠꓬ ꓥꓪ ꓠꓴꓽ ꓮ ꓐꓲ ꓥ ꓟ ꓥꓪ ꓠꓴꓽ ꓢꓷꓸˍ ꓡꓳ꓿ ꓝꓮꓲ ꓬꓲ ꓠꓬ ꓦꓵˍ ꓕꓯꓽ ꓡꓰ ꓟꓬ ꓔꓶˍ ꓟˍ ꓟꓲ ꓥꓪ ꓠꓴꓽ ꓢꓷꓸˍ ꓡꓳ꓿ 21 ꓖꓳ ꓡꓱ ꓥ ꓟꓲ ꓮ ꓟꓶ ꓬꓲ ꓮ ꓡꓲ ꓐꓰ ꓠꓬꓲ ꓟꓳ ꓡ ꓟ ꓥꓪ ꓠꓴꓽ ꓟꓽ ꓢꓷꓸ꓿ ꓮꓽ ꓟ ꓡꓰ ꓬꓲ ꓔꓯ ꓠꓬꓲ ꓟꓳ ꓡ ꓝꓲ ꓟˍ ꓟꓲ ꓥꓪ ꓠꓴ ꓟꓽ ꓢꓷ꓿ ꓠꓴ ꓪꓽ ꓬꓲ ꓔꓯ ꓠ ꓠꓬꓲ ꓛꓵˍ ꓡꓳ꓿ ꓬꓲ ꓠꓬ ꓞꓲꓼ ꓪꓴꓽ ꓡꓰ ꓢꓴ ꓥ ꓠꓬꓲ ꓬꓲ ꓚꓲꓸ ꓛꓬ ꓐꓱ ꓶ ꓬꓲ ꓫꓸ ꓕꓱ ꓡ ꓥꓳ꓾ ꓐꓯˍ ꓡꓳ꓿ 22 ꓬꓲ ꓐꓹ ꓐ ꓟꓹ ꓟ ꓐꓴ ꓕꓱ ꓡꓱ ꓐꓯˍ ꓟ ꓠꓬ꓾ ꓬꓴ-ꓔ ꓡ ꓞꓳ ꓔꓯ ꓙꓳꓺˍ ꓠꓬꓲ ꓥ ꓡꓳ꓿ ꓬꓰ-ꓢꓴ ꓠꓽ ꓙꓲ-ꓢꓴ ꓥ ꓡꓳ꓾ ꓐꓰ ꓣꓷꓠꓸ ꓢꓴ ꓮꓽ ꓟ ꓔꓯˍ ꓟꓲ꓾ ꓜꓲꓼ ꓦꓲ ꓗꓪ ꓐꓰ ꓖꓼ ꓓꓳ ꓗꓷ ꓠꓯꓹ ꓡꓳ꓾ ꓐꓰ ꓬꓴ-ꓔ ꓡ ꓞꓳ ꓧꓶꓸ ꓕꓯˍ ꓡꓰ ꓖꓪ ꓙꓱ ꓞꓷꓹ ꓔ ꓠꓬꓲ꓾ 23 ꓬꓲ ꓐꓹ ꓐ ꓟꓹ ꓟ ꓐꓴ ꓡꓰ꓾ ꓬꓲ ꓠꓬ ꓞꓲꓼ ꓪꓴꓽ ꓡꓰ ꓢꓴ ꓥꓳ꓾ ꓬꓲ ꓔꓯ ꓠ ꓠꓬꓲ ꓛꓵˍ ꓡꓳ꓾ ꓐꓯˍ ꓟ ꓥ ꓡꓳ꓿ 24 ꓖꓳ ꓡꓱ ꓠꓬ ꓧꓶ ꓕꓯ ꓟꓬ ꓔꓶ ꓢꓴ ꓔꓯ꓾ ꓬꓲ ꓪꓽ ꓡꓰ ꓠꓬꓲꓽ ꓧꓪꓹ ꓕꓲ ꓧꓪꓹ ꓘꓴꓻ ꓔꓯꓹ ꓡ ꓢꓲ꓾ ꓠꓴ ꓠꓬ ꓪꓴ-ꓢ ꓔꓯˍ ꓡꓰꓽ ꓟꓬꓱ ꓓꓳꓽ ꓖꓶ꓿ ꓡꓽ ꓞꓳ ꓕꓱ ꓕꓲ ꓣꓳ ꓠꓽ ꓝꓴꓲ ꓙꓳ ꓢꓴ ꓥ ꓟ ꓥꓪ ꓠꓴꓽ ꓢꓷˍ ꓡꓳ꓾ ꓐꓯˍ ꓡꓳ꓿ 25 ꓖꓳ ꓕꓯ ꓬꓲ ꓡꓰ ꓒꓳꓹ ꓖꓶ ꓢꓲ꓾ ꓬꓲ ꓠꓬ ꓝꓴꓲ ꓙꓳ ꓢꓴ ꓥ ꓟꓽ ꓥ ꓥꓪ ꓟꓽ ꓢꓷ꓿ ꓧꓶꓸ ꓕꓯ ꓥꓪ ꓠꓬ ꓟꓬ ꓔꓶ ꓢꓴ ꓥ ꓢꓲ꓾ ꓮ ꓟꓶ ꓥꓪ ꓠꓬꓲ ꓟꓳ ꓡ ꓟ ꓕꓱ ꓕꓲ ꓫꓵ ꓡꓰꓽ ꓥꓪ ꓢꓷꓸˍ ꓡꓳ꓾ ꓐꓯ ꓖꓶˍ ꓡꓳ꓿ 26 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓔꓯ꓾ ꓬꓲ ꓡꓰ ꓠꓴ ꓔꓯ ꓮ ꓡꓲ ꓬꓰ ꓢꓲ ꓠꓬꓲ ꓟꓳ ꓡ ꓝꓲˍ ꓡ? ꓐꓰ ꓠ ꓠꓬꓲˍ ꓕꓯ꓾ 27 ꓬꓲ ꓡꓰ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓗꓷˍ ꓟꓲ ꓠꓴ ꓪꓽ ꓟꓽ ꓠ ꓠꓹ꓿ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓝꓮꓲ ꓕꓲ ꓧꓪꓹ ꓠ ꓠꓬꓲˍ ꓢꓰꓽ ꓡ? ꓠꓴ ꓪꓽˍ ꓟꓲ ꓬꓲ ꓛꓳꓽ ꓒꓯꓹ ꓬꓰ ꓙꓰ ꓠꓲꓹ ꓫꓵˍ ꓡ?꓾ ꓐꓯˍ ꓡꓳ꓿ 28 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓔꓯ ꓙꓱꓽ ꓕꓼ ꓢꓲ꓾ ꓠꓴ ꓠꓬ ꓬꓲ ꓢꓲꓺ ꓤ ꓥꓳ꓿ ꓥꓪ ꓠꓴꓽ ꓠꓽ ꓟꓳ-ꓫꓲ ꓢꓲꓺ ꓤ ꓐꓴ ꓥ ꓡꓳ꓿ 29 ꓪꓴ-ꓢ ꓠꓬ ꓟꓳ-ꓫꓲ ꓔꓯ ꓫꓸ ꓕꓱ ꓗꓷ ꓟ ꓥꓪ ꓠꓴꓽ ꓢꓷˍ ꓡꓳ꓿ ꓖꓳ ꓡꓱ ꓥ ꓟꓲ ꓡ ꓞꓳ ꓕꓱ ꓟ ꓬꓲ ꓮ ꓡꓲ ꓗꓪ ꓐꓰ ꓡꓻ ꓟ ꓥꓪ ꓠꓴꓽ ꓟꓽ ꓢꓷ꓾ ꓐꓯˍ ꓡꓳ꓿ 30 ꓡ ꓞꓳ ꓖꓳ ꓟ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓬꓲ ꓡꓰ ꓥꓪ ꓟꓬ ꓢꓶꓽ ꓒꓴ ꓖꓶ ꓡ ꓟꓲ꓾ ꓬꓲ ꓮ ꓡꓲ ꓗꓪ ꓐꓰ ꓡꓻ ꓟ ꓠꓴ ꓪꓽ ꓟꓽ ꓢꓷꓸ ꓟ ꓕꓱ ꓟ ꓠꓽ ꓓꓵꓽ ꓙꓽ ꓟꓶ ꓓꓴ ꓥꓳ꓿ 31 ꓝꓴꓲ ꓙꓳ ꓢꓴ ꓔꓯ ꓠꓬ ꓪꓴ-ꓢ ꓟꓽ ꓠ ꓠꓹ ꓟ ꓣꓳꓽ ꓢꓷˍ ꓡꓳ꓿ ꓮꓽ ꓟ ꓥ ꓟꓲ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓬꓰ ꓢꓲ꓾ ꓬꓲ ꓠꓲꓹ ꓡꓶꓽ ꓛꓳ ꓢꓴ ꓔꓯ ꓠꓽ ꓬꓲ ꓠ ꓠꓹˍ ꓡꓳ꓿ 32 ꓟꓵꓽ ꓚꓰꓼ ꓟꓲ ꓚꓰꓼ ꓕ ꓑꓳ꓾ ꓮ ꓟˍ ꓟꓲ ꓦꓵˍ ꓕꓯ ꓡꓰ ꓟꓬ ꓔꓶ ꓢꓴ ꓔꓯ ꓟꓬ ꓢꓶꓽ ꓒꓴ ꓖꓶˍ ꓟ ꓮ ꓕꓯˍ ꓟꓲ ꓟꓽ ꓑ ꓙꓽ ꓠꓬꓲ꓿ 33 ꓡ ꓞꓳ ꓕꓱ ꓟ ꓠꓬ ꓪꓴ-ꓢ ꓔꓯˍ ꓐꓰ ꓡꓻ ꓟ ꓟꓽ ꓥ ꓕꓯ ꓠꓽ꓾ ꓬꓲ ꓮꓸ ꓫꓵꓽˍ ꓟꓲ ꓬꓰ ꓟꓽ ꓐ ꓡ꓾ ꓐꓯ ꓖꓶˍ ꓡꓳ꓿ 34 ꓬꓲ ꓪꓽ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓠꓽ ꓝꓴꓲ ꓠꓯꓸꓼ ꓗꓪ ꓦꓵꓻ ꓔ ꓟ ꓥ ꓢꓲ꓾ ꓥꓪ ꓠꓴꓽ ꓔꓯ ꓟꓸ ꓖꓶˍ ꓐꓰ ꓬꓰˍ ꓡ?꓾ ꓐꓯ ꓢꓲ ꓠꓬꓲ꓾ ꓬꓲ ꓔꓯ ꓖꓼ ꓓꓳ ꓗꓷˍ ꓡꓳ꓿ 35 ꓬꓲ ꓪꓽ ꓡꓰ ꓬꓲ ꓔꓯ ꓖꓼ ꓓꓳ ꓗꓷ ꓟ ꓬꓰ-ꓢꓴ ꓑ ꓙꓽ ꓢꓲ꓾ ꓬꓲ ꓔꓯ ꓧꓪ ꓟꓶ ꓠꓬ ꓬꓰ-ꓢꓴ ꓡꓰ꓾ ꓠꓴ ꓠꓬ ꓡ ꓞꓳ ꓮ ꓐꓲ ꓔꓯ ꓙꓵꓻˍ ꓡ? ꓐꓰ ꓠ ꓠꓬꓲˍ ꓡꓳ꓿ 36 ꓬꓲ ꓒꓳꓹ ꓖꓶ ꓢꓲ꓾ ꓟꓸ ꓒꓽꓳ꓾ ꓬꓲ ꓮꓽ ꓟ ꓥ ꓠꓬꓲ ꓥꓪ ꓬꓲ ꓔꓯ ꓙꓵꓻ ꓠꓯꓹ ꓡ?꓾ ꓐꓯˍ ꓡꓳ꓿ 37 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓬꓲ ꓔꓯ ꓟꓳˍ ꓟꓲ ꓟꓳ ꓠꓬꓲꓳ꓾ ꓠꓴˍ ꓐꓰ ꓮ ꓟꓶ ꓫꓸ ꓕꓱ ꓔꓬ ꓢꓴˍ ꓟꓲ ꓬꓲ ꓥꓳ꓾ ꓐꓯ ꓖꓶˍ ꓡꓳ꓿ 38 ꓖꓳ ꓡꓱ ꓠꓬ ꓬꓲ ꓡꓰ꓾ ꓢꓲ ꓒꓽꓳ꓾ ꓥꓪ ꓙꓵꓻˍ ꓡꓳ꓾ ꓐꓯ ꓢꓲ ꓬꓲ ꓔꓯ ꓪꓴꓸ ꓓꓵ ꓕꓱꓼˍ ꓡꓳ꓿ 39 ꓬꓰ-ꓢꓴ ꓡꓰ꓾ ꓟꓲ ꓠꓯ ꓗꓪ ꓥꓪ ꓡꓻ ꓟ ꓠꓬ ꓟꓬ ꓔꓶ ꓢꓴ ꓠꓬꓲ ꓟꓳ ꓡ ꓠꓹ ꓟ꓾ ꓠꓬꓲ ꓟꓳ ꓢꓴ ꓠꓬ ꓟꓬ ꓔꓶ ꓡꓰ ꓠꓹ ꓟ꓾ ꓐꓯ ꓟꓴ ꓘꓶꓽˍ ꓐꓰ ꓡꓻ ꓟ ꓥꓳ꓾ ꓐꓯˍ ꓡꓳ꓿ 40 ꓬꓲˍ ꓐꓰ ꓔꓬ ꓟ ꓒ-ꓡꓲ-ꓢꓷ ꓐꓴ ꓕꓲ ꓐꓱ ꓕꓱ ꓟꓬ ꓫꓵꓽ ꓑ ꓙꓽ ꓠꓬ꓾ ꓥꓪ ꓠꓴꓽˍ ꓟꓲ ꓟꓬ ꓔꓶ ꓢꓴ ꓥ ꓡ?꓾ ꓐꓰ ꓬꓲ ꓔꓯ ꓠ ꓠꓬꓲˍ ꓡꓳ꓿ 41 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓟꓬ ꓔꓶ ꓢꓴ ꓥ ꓕꓯ ꓠꓽ ꓠꓴ ꓪꓽ ꓝꓴꓲ ꓟꓽ ꓙꓳˍ ꓡꓳ ꓫꓵꓽ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓬ꓾ ꓥꓪ ꓠꓴꓽ ꓠꓬꓲ ꓟꓳˍ ꓡꓳ꓾ ꓐꓯˍ ꓟ ꓗꓪ ꓐꓰ ꓠꓴ ꓪꓽ ꓝꓴꓲ ꓠꓽ ꓓꓹ ꓢꓰꓽ ꓡꓳ꓾ ꓐꓯ ꓖꓶˍ ꓡꓳ꓿

ꓬꓳ-ꓦ 10

1 ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓗ ꓘꓶꓽ ꓗꓪ ꓐꓰ ꓓꓵ ꓡꓰˍ ꓟ ꓟꓽ ꓥ ꓥ꓾ ꓬꓲ ꓔꓱꓹ ꓬꓲ ꓕꓲ ꓚꓱꓹ ꓗꓪ ꓐꓰ ꓮ ꓣꓳ ꓐꓱ ꓗꓪ ꓓꓯ ꓙꓰ ꓢꓴ ꓠꓬ꓾ ꓘꓴꓽ ꓒˍ ꓐꓰ ꓒꓬꓹ ꓜ ꓢꓴ ꓥ ꓡꓳ꓿ 2 ꓗ ꓘꓶꓽ ꓗꓪ ꓐꓰ ꓓꓵꓽ ꓡꓰ ꓢꓴ ꓠꓽ ꓮ ꓣꓳ ꓡꓳꓸ ꓒꓽ ꓥ ꓡꓳ꓿ 3 ꓗ ꓘꓶꓽ ꓦꓴ ꓠꓬꓹ ꓢꓴ ꓠꓬ ꓬꓲ ꓔꓯ ꓗ ꓘꓶꓽ ꓒꓴ ꓖꓶ ꓢꓲ꓾ ꓮ ꓣꓳˍ ꓟꓲ ꓬꓲ ꓢꓯꓼ ꓔꓯ ꓠ ꓠˍ ꓡꓳ꓿ ꓬꓲ ꓠꓬ ꓬꓲ ꓮ ꓣꓳ ꓔꓯ ꓟꓬꓱ ꓘꓴꓻ ꓢꓲ ꓧꓳꓽ ꓓꓳ ꓙꓰˍ ꓡꓳ꓿ 4 ꓬꓲ ꓮ ꓣꓳ ꓠꓬ ꓬꓲ ꓢꓯꓼ ꓔꓯ ꓢꓷˍ ꓠꓬꓲ꓾ ꓬꓲ ꓮ ꓣꓳ ꓮꓽ ꓙꓵ ꓔꓯ ꓧꓳꓽ ꓓꓳ ꓙꓰ ꓢꓲ ꓟꓲꓽ ꓕꓯꓽ ꓢꓲ ꓙꓰˍ ꓕꓯ꓾ ꓬꓲ ꓪꓽ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ 5 ꓠꓱꓸ ꓐꓯꓼ ꓢꓴ ꓢꓯꓼ ꓔꓯ ꓠꓽ ꓬꓲ ꓪꓽ ꓟꓽ ꓢꓷꓸ ꓠꓬꓲ꓾ ꓬꓲ ꓪꓽ ꓔꓯˍ ꓐꓰ ꓛꓰꓹ ꓙꓰˍ ꓥꓳ꓾ ꓐꓯˍ ꓡꓳ꓿ 6 ꓬꓰ-ꓢꓴ ꓡꓰ ꓔꓯꓺ ꓥꓳꓽ ꓕꓱ ꓟ ꓬꓲ ꓪꓽ ꓔꓯ ꓐꓯ ꓖꓶˍ ꓟꓲ꓾ ꓬꓲ ꓪꓽ ꓔꓯ ꓐꓯ ꓖꓶˍ ꓟ ꓮꓸ ꓫꓵ ꓥ ꓟ ꓬꓲ ꓪꓽ ꓟꓽ ꓙꓽ ꓜꓲꓼ꓿ 7 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓝꓮꓲ ꓕꓲ ꓧꓪ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓠꓽ ꓮ ꓣꓳ ꓗ ꓘꓶꓽ ꓥꓳ꓿ 8 ꓥꓪ ꓟꓽ ꓡ ꓕꓯˍ ꓡꓰ ꓡ ꓢꓴ ꓮꓽ ꓙꓵ ꓠꓬ ꓘꓴꓽ ꓒˍ ꓐꓰ ꓒꓬꓹ ꓜ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓣꓳ ꓠꓬ ꓬꓲ ꓪꓽ ꓔꓯ ꓟꓽ ꓠ ꓠꓹ꓿ 9 ꓥꓪ ꓠꓽ ꓗ ꓘꓶꓽ ꓥ ꓡꓳ꓿ ꓮꓽ ꓟ ꓥ ꓟꓲ ꓥꓪ ꓗꓪ ꓐꓰ ꓓꓵꓽ ꓡ ꓠꓬ ꓬꓲ ꓢꓯꓼ ꓟꓬ ꓝꓸ ꓟꓶ ꓢꓲ꓾ ꓬꓲ ꓓꓵꓽ ꓓꓵꓽ ꓓꓳ ꓓꓳ ꓬꓰ ꓢꓲ ꓠꓬꓲ꓾ ꓫꓵꓸ ꓖ ꓜꓽ ꓖꓴ ꓧꓪ ꓟꓶˍ ꓥꓳ꓿ 10 ꓘꓴꓽ ꓒ ꓠꓽ ꓘꓴꓽ ꓠꓹ ꓟ ꓐꓰ ꓢꓰꓼ ꓠꓹ ꓟ ꓐꓰ ꓐꓬ ꓡꓰ ꓝꓲ ꓠꓹ ꓟ ꓟꓽ ꓥ ꓠꓬ ꓬꓲ ꓟꓽ ꓡ꓿ ꓥꓪ ꓠꓽ ꓞꓳ ꓤ ꓔꓯ ꓢꓯꓼ ꓟꓬ ꓟꓶ ꓝꓲ ꓠꓹ ꓟ ꓐꓰ꓾ ꓢꓯꓼ ꓟꓬ ꓒꓻ ꓐꓲꓺ ꓒ ꓡꓶꓽ ꓙꓳ ꓝꓲ ꓠꓹ ꓟ ꓡ ꓟ ꓥ ꓡꓳ꓿ 11 ꓥꓪ ꓠꓽ ꓙꓲˍ ꓟ ꓮ ꓣꓳ ꓡꓳꓸ ꓒ ꓥ ꓡꓳ꓿ ꓙꓲˍ ꓟ ꓮ ꓣꓳ ꓡꓳꓸ ꓒ ꓠꓬ꓾ ꓮ ꓣꓳ ꓐꓱ ꓶ ꓬꓲ ꓢꓯꓼ ꓟꓬ ꓖꓶˍ ꓡꓳ꓿ 12 ꓪꓽ ꓤꓽ ꓠꓽ ꓮ ꓣꓳ ꓡꓳꓸ ꓢꓴ ꓚꓵ ꓟꓽ ꓥ꓿ ꓮ ꓣꓳˍ ꓟꓲ ꓬꓲ ꓔꓯꓸ ꓟ ꓟꓽ ꓥ ꓠꓬꓲ ꓪꓰ ꓕꓳꓹ ꓡꓻˍ ꓟ ꓔꓯ ꓟꓳꓻ ꓗꓷ ꓠꓬ꓾ ꓮ ꓣꓳ ꓔꓯ ꓡꓳꓺ ꓔ ꓬꓰ ꓢꓲ ꓛꓰꓹ ꓙꓰˍ ꓡꓳ꓿ ꓖꓳ ꓕꓯ ꓪꓰ ꓕꓳꓹ ꓠꓬ ꓮ ꓣꓳ ꓔꓯ ꓜꓲꓽ ꓜꓲꓽ ꓣꓴ ꓢꓲ ꓖꓼ ꓒꓬꓱ ꓗꓷˍ ꓡꓳ꓿ 13 ꓬꓲ ꓠꓬ ꓪꓽ ꓤ ꓥ ꓢꓲ꓾ ꓮ ꓣꓳ ꓔꓯ ꓟꓽ ꓠꓲꓹ ꓥꓳ ꓠꓬꓲ ꓛꓰꓹ ꓙꓰˍ ꓡꓳ꓿ 14 ꓥꓪ ꓠꓽ ꓙꓲˍ ꓟ ꓮ ꓣꓳ ꓡꓳꓸ ꓢꓴ ꓥ ꓡꓳ꓿ ꓐꓹ ꓐ ꓥꓪ ꓔꓯ ꓢꓷ ꓢꓲ ꓥꓪˍ ꓟꓲ ꓐꓹ ꓐ ꓔꓯ ꓢꓷˍ ꓟ ꓡꓰ ꓐꓰ꓾ 15 ꓥꓪ ꓮ ꓣꓳ ꓔꓯ ꓥꓪ ꓢꓷˍ ꓡꓳ꓿ ꓥꓪ ꓮ ꓣꓳˍ ꓟꓲ ꓥꓪ ꓔꓯ ꓢꓷˍ ꓡꓳ꓿ ꓖꓳ ꓡꓱ ꓢꓲ ꓥꓪ ꓠꓬ ꓮ ꓣꓳ ꓐꓱ ꓶ ꓥꓪ ꓢꓯꓼ ꓟꓬ ꓖꓶˍ ꓡꓳ꓿ 16 ꓕꓱ ꓕꓲ ꓐꓱꓺ ꓗꓪ ꓟ ꓟꓽ ꓥ ꓟ ꓠꓱꓸ ꓐꓯꓼ ꓮ ꓣꓳˍ ꓟꓲ ꓥꓪ ꓙꓳˍ ꓢꓰꓽ ꓡꓳ꓿ ꓬꓲ ꓪꓽ ꓔꓯˍ ꓟꓲ ꓥꓪ ꓧꓳꓽ ꓔꓯꓹ ꓡ ꓠ ꓗꓹ ꓡꓳ꓿ ꓥꓪ ꓢꓯꓼ ꓔꓯ ꓬꓲ ꓪꓽ ꓠ ꓠꓹ ꓢꓲ꓾ ꓬꓲ ꓪꓽ ꓠꓬ ꓕꓲ ꓜꓴˍ ꓡꓰ ꓒꓬꓱꓼ ꓡ ꓢꓲ ꓠꓬꓲ꓾ ꓮ ꓣꓳ ꓡꓳꓸ ꓢꓴˍ ꓟꓲ ꓕꓲ ꓣꓳˍ ꓡꓰꓽ ꓗꓷ ꓡꓰˍ ꓥꓳ꓿ 17 ꓥꓪ ꓢꓯꓼ ꓟꓬ ꓝꓮꓲ ꓕꓲ ꓧꓪꓹ ꓔꓯꓹ ꓬꓲꓼ ꓡ ꓠꓹ ꓟ꓾ ꓥꓪ ꓢꓯꓼ ꓟꓬ ꓖꓶ ꓠꓲꓹ ꓒꓴˍ ꓠꓬꓲ꓾ ꓐꓹ ꓐ ꓠꓬ ꓥꓪ ꓔꓯ ꓠꓲꓹ ꓠꓵˍ ꓡꓳ꓿ 18 ꓥꓪ ꓚꓲꓸ ꓛꓬ ꓡꓰ ꓟꓽ ꓡꓯꓼ ꓙꓱ ꓖꓶ ꓠꓬ꓾ ꓥꓪ ꓢꓯꓼ ꓟꓬ ꓔꓯ ꓣꓴ ꓔꓯꓹ ꓙꓰ ꓐ ꓡ ꓢꓴ ꓟꓽ ꓙꓳ꓿ ꓡꓯꓼ ꓙꓱ ꓖꓶ ꓠꓹ ꓟ ꓙꓵꓽ ꓪꓽ ꓥꓪ ꓔꓯ ꓙꓳˍ ꓡꓳ꓿ ꓝꓮꓲ ꓔꓯꓹ ꓬꓲꓼ ꓡ ꓠꓹ ꓟ ꓙꓵꓽ ꓪꓽˍ ꓟꓲ ꓥꓪ ꓙꓳˍ ꓡꓳ꓿ ꓕꓵꓼ ꓪ ꓕꓱ ꓟ ꓠꓬ ꓥꓪ ꓐꓹ ꓐ ꓔꓯˍ ꓐꓰ ꓟꓶˍ ꓟ ꓥ ꓡꓳ꓾ ꓐꓯˍ ꓡꓳ꓿ 19 ꓐꓯ ꓘꓶ ꓕꓱ ꓟ ꓗꓪ ꓐꓰ꓾ ꓬꓴ-ꓔ ꓡ ꓞꓳ ꓠꓬ ꓝꓮꓲ ꓕꓲ ꓧꓪꓹ ꓬꓲ ꓗꓪꓺ ꓗꓪ ꓡꓰˍ ꓡꓳ꓿ 20 ꓬꓲ ꓪꓽ ꓮꓽ ꓟꓬꓹ ꓕꓲ ꓐꓱ ꓠꓬ꓾ ꓬꓲ ꓔꓯ ꓠꓲꓽ ꓕꓲ ꓟ ꓓꓯꓹ ꓢꓲ ꓪꓴꓸˍ ꓡꓳ꓿ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓠ ꓠˍ ꓡ?꓾ ꓐꓯˍ ꓡꓳ꓿ 21 ꓠꓱꓸ ꓐꓯꓼ ꓕꓲ ꓐꓱ ꓠꓬ꓾ ꓐꓯ ꓘꓶ ꓕꓱ ꓟ ꓠꓽ ꓠꓲꓽ ꓪꓴꓸ ꓢꓴ ꓐꓯ ꓘꓶ ꓟꓽ ꓥ꓿ ꓠꓲꓽ ꓠꓬ ꓟꓬ ꓔꓶ ꓔꓯ ꓠꓬꓲ ꓟꓳ ꓡ ꓝꓲ ꓟꓽ ꓐ ꓡ꓾ ꓐꓯˍ ꓡꓳ꓿ 22 ꓖꓳ ꓕꓯ ꓙꓱ-ꓣꓴ-ꓢ-ꓡꓱ ꓗꓪ ꓔꓲ-ꓚꓰꓸ-ꓑꓮꓲꓬꓰˍ ꓟ ꓝꓲꓸ ꓥ ꓢꓲ ꓟꓵꓽ ꓞꓴꓽ ꓥ ꓡꓳ꓿ 23 ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓟ ꓢꓳ-ꓡꓳ-ꓟꓳ ꓡꓽ ꓦꓲ ꓘꓶꓽ ꓗꓪ ꓫꓱꓽ ꓚꓳ ꓔꓬ ꓕꓯ꓾ 24 ꓬꓴ-ꓔ ꓡ ꓞꓳ ꓠꓬ ꓬꓲ ꓚꓳ ꓡꓳ ꓗꓪ ꓜꓲꓼ ꓡ ꓢꓲ ꓬꓲ ꓔꓯ꓾ ꓠꓴ ꓠꓬ ꓥꓪ ꓠꓴꓽ ꓔꓯ ꓮ ꓡꓲ ꓟꓶ ꓛꓲ ꓓꓵꓽ ꓙ ꓟꓬꓽ ꓔꓬ ꓝꓲˍ ꓐꓯˍ ꓡ? ꓙꓲ-ꓢꓴ ꓖꓳ ꓕꓲ ꓣꓳ ꓟ ꓠꓴ ꓥ ꓠꓬ ꓥꓪ ꓠꓴꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ 25 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓗꓷˍ ꓟꓲ ꓠꓴ ꓪꓽ ꓟꓽ ꓙꓵꓻ꓿ ꓥꓪ ꓐꓹ ꓐ ꓟꓬꓱ ꓗꓪ ꓐꓰ ꓥꓪ ꓬꓰˍ ꓟ ꓟꓬꓱꓽ ꓡꓰ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙˍ ꓡꓳ꓿ 26 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓬ ꓥꓪ ꓮ ꓣꓳ ꓗꓪ ꓟ ꓟꓽ ꓥ ꓠꓬꓲ ꓟꓽ ꓙꓵꓻ꓿ 27 ꓥꓪ ꓮ ꓣꓳ ꓠꓬ ꓥꓪ ꓢꓯꓼ ꓔꓯ ꓠ ꓠꓹ ꓗꓴˍ ꓡꓳ꓿ ꓥꓪˍ ꓟꓲ ꓬꓲ ꓪꓽ ꓔꓯ ꓢꓷꓸ ꓢꓲ꓾ ꓬꓲ ꓪꓽˍ ꓟꓲ ꓥꓪ ꓔꓯ ꓛꓳ ꓡ ꓡꓳ꓿ 28 ꓥꓪ ꓡꓰ ꓬꓲ ꓪꓽ ꓔꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶ ꓢꓲ꓾ ꓬꓲ ꓪꓽ ꓠꓬ ꓮ ꓕꓯˍ ꓟꓲ ꓟꓽ ꓟꓶꓽ ꓬꓰ ꓢꓲ ꓠꓬꓲ꓾ ꓮ ꓟˍ ꓟꓲ ꓥꓪ ꓡꓯꓼ ꓒꓯꓹ ꓗꓪ ꓐꓰ ꓬꓲ ꓪꓽ ꓔꓯ ꓦꓴ ꓔꓯꓹ ꓙꓰ ꓟꓽ ꓐ ꓡ꓿ 29 ꓥꓪ ꓔꓯ ꓬꓲ ꓪꓽ ꓡꓯꓼ ꓙꓱ ꓖꓶ ꓡ ꓢꓴ ꓥꓪ ꓐꓹ ꓐ ꓠꓬ ꓮꓽ ꓙꓵ ꓕꓯꓽ ꓢꓲ ꓪꓴꓽˍ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓮ ꓟˍ ꓟꓲ ꓐꓹ ꓐ ꓡꓯꓼ ꓒꓯꓹ ꓗꓪ ꓐꓰ ꓬꓲ ꓪꓽ ꓔꓯ ꓦꓴ ꓔꓯꓹ ꓙꓰ ꓟꓽ ꓐ ꓡ꓿ 30 ꓥꓪˍ ꓐꓰ ꓐꓹ ꓐ ꓠꓬ ꓕꓲ ꓣꓳˍ ꓡꓰꓽ ꓥꓳ꓾ ꓐꓯˍ ꓡꓳ꓿ 31 ꓖꓳ ꓕꓯ ꓬꓴ-ꓔ ꓡ ꓞꓳ ꓠꓬ ꓝꓮꓲ ꓬꓲ ꓔꓯ ꓡꓳꓺ ꓠꓹ ꓟ Bꓸ ꓛꓲ ꓖꓳˍ ꓡꓳ꓿ 32 ꓬꓰ-ꓢꓴ ꓠꓽ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓐꓹ ꓐ ꓗꓪ ꓐꓰ ꓙꓲˍ ꓟ ꓟꓬꓱꓽ ꓮꓽ ꓟꓬꓹ ꓠꓴ ꓪꓽ ꓔꓯ ꓥꓪ ꓟꓳꓸ ꓖꓶ ꓗꓷꓳ꓿ ꓟꓬꓱꓽ ꓮ ꓡꓲ ꓕꓲ ꓫꓵ ꓟ ꓑꓶꓸ ꓓꓴ ꓠꓴ ꓪꓽ ꓥꓪ ꓔꓯ Bꓸ ꓛꓲ ꓡꓳˍ ꓐꓯˍ ꓡ? ꓐꓰ ꓐꓯ ꓖꓶˍ ꓕꓯ꓾ 33 ꓬꓴ-ꓔ ꓡ ꓞꓳ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓙꓲˍ ꓟ ꓟꓬꓱꓽ ꓑꓶꓸ ꓓꓴ ꓥꓪ ꓠꓴꓽ ꓠꓴ ꓔꓯ Bꓸ ꓛꓲ ꓡꓳˍ ꓐꓰ ꓬꓰˍ ꓟ ꓟꓽ ꓥ꓿ ꓠꓴ ꓠꓬ ꓐꓯ ꓟꓽ ꓚꓰꓼ ꓟ ꓐꓯˍ ꓟ ꓐꓰ꓾ ꓝꓮꓲ ꓠꓴ ꓠꓬ ꓡ ꓞꓳ ꓥ ꓢꓲ ꓚꓲꓸ ꓛꓬ ꓔꓯ ꓪꓴ-ꓢ ꓥ ꓡꓳ꓾ ꓐꓯˍ ꓠꓬꓲ ꓠꓴ ꓔꓯ Bꓸ ꓛꓲ ꓡꓳˍ ꓐꓰ ꓬꓰˍ ꓟ ꓥ ꓡꓳ꓾ ꓐꓯ ꓖꓶˍ ꓡꓳ꓿ 34 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓙꓵꓽ ꓗ ꓕꓳ ꓶ ꓗꓪ꓾ ꓥꓪ ꓡꓰ ꓠꓴ ꓪꓽ ꓔꓯ꓾ ꓢꓲꓺ ꓐꓴ꓾ ꓘꓴˍ ꓡꓳ꓾ ꓐꓰ ꓐꓳ ꓔ ꓡꓳ ꓟꓽ ꓥ ꓡ? 35 ꓢꓲꓽ ꓫꓬ ꓕꓳ ꓶ ꓠꓽ ꓬꓲ ꓖꓳꓽ ꓗꓷ ꓡꓰ ꓟꓽ ꓓ ꓟ ꓣꓳꓽ ꓢꓷˍ ꓡꓳ꓿ ꓪꓴ-ꓢ ꓐꓯ ꓘꓶꓽ ꓟꓶꓺ ꓗꓷ ꓢꓴ ꓐꓴ ꓔꓯ ꓬꓲ ꓡꓰ꓾ ꓢꓲꓺ ꓐꓴ꓾ ꓘꓴˍ ꓠꓬ꓾ 36 ꓐꓹ ꓐ ꓡꓰ ꓢꓲ ꓚꓰꓸ ꓢꓲ ꓟꓲ ꓠꓯ ꓗꓪ ꓝꓲ ꓩꓴ ꓡ ꓢꓴ ꓥꓪ ꓡꓰ꓾ ꓥꓪ ꓠꓽ ꓪꓴ-ꓢ ꓮ ꓐꓲ ꓥ ꓡꓳ꓾ ꓐꓯˍ ꓠꓬꓲ ꓠꓴ ꓪꓽ ꓠꓽ ꓐꓯ ꓟꓽ ꓚꓰꓼ ꓟ ꓐꓯˍ ꓡꓳ꓾ ꓐꓰ ꓐꓯˍ ꓡ? 37 ꓥꓪ ꓐꓹ ꓐ ꓟꓬꓱꓽ ꓥꓪ ꓟꓽ ꓬꓰˍ ꓠꓬ ꓥꓪ ꓔꓯ ꓕ ꓙꓵꓻ꓿ 38 ꓖꓳ ꓡꓱ ꓥ ꓟꓲ ꓥꓪ ꓬꓲ ꓟꓬꓱꓽ ꓬꓰˍ ꓕꓯ ꓠ꓾ ꓠꓴ ꓪꓽ ꓥꓪ ꓔꓯ ꓟꓽ ꓙꓵˍ ꓟꓲ꓾ ꓐꓹ ꓐ ꓥꓪ ꓠꓯꓸꓼ ꓔꓬ ꓟ ꓐꓰ ꓥꓪˍ ꓟꓲ ꓐꓹ ꓐ ꓠꓯꓸꓼ ꓔꓬ ꓟ ꓠꓴ ꓪꓽ ꓢꓷꓸ ꓡꓰ ꓢꓲ ꓙꓽ ꓜꓲꓼ ꓡꓰ ꓠꓹ ꓟ꓾ ꓓꓵꓽ ꓙꓽ ꓟꓶ ꓓꓴ ꓟꓬꓱꓽ ꓕꓱ ꓟꓬ ꓟ ꓔꓯ ꓙꓵꓻ ꓟꓴꓽ꓾ ꓐꓯˍ ꓡꓳ꓿ 39 ꓬꓲ ꓪꓽ ꓠꓬ ꓝꓮꓲ ꓬꓲ ꓔꓯ ꓣꓴ ꓠꓹ ꓟ ꓚꓱꓹ ꓧꓪˍ ꓟꓲ꓾ ꓬꓰ-ꓢꓴ ꓠꓽ ꓬꓲ ꓪꓽ ꓔꓯˍ ꓐꓰ ꓓꓳ ꓙꓰꓳ꓿ 40 ꓬꓲ ꓠꓬ ꓬꓳ-ꓔ ꓬꓲꓽ ꓟ ꓖꓳ ꓐ ꓢꓲ꓾ ꓬꓳ-ꓦ ꓡꓰ ꓬꓲ ꓪꓴꓸ ꓖꓳ ꓓꓱ ꓔꓲꓹ ꓖꓶ ꓖꓴ ꓗꓪ ꓝꓮꓲ ꓙꓰ ꓢꓲ ꓖꓳ ꓗꓪ ꓔꓬ ꓬꓰˍ ꓡꓳ꓿ 41 ꓖꓳ ꓗꓪ ꓡ ꓞꓳ ꓮꓽ ꓟꓬꓹ ꓠꓬ ꓬꓲ ꓔꓯ ꓡ ꓡꓳ꓿ ꓬꓲ ꓪꓽ ꓠꓬ꓾ ꓬꓳ-ꓦ ꓠꓽ ꓓꓵꓽ ꓙ ꓟꓶˍ ꓟ ꓢꓷꓸ ꓡꓰ ꓓꓴ ꓮꓸ ꓫꓵ ꓟꓽ ꓬꓰ ꓠꓬꓲˍ ꓟꓲ꓾ ꓬꓲ ꓡꓰ ꓡ ꓞꓳ ꓕꓱ ꓕꓲ ꓣꓳ ꓔꓯ ꓖꓴꓺ ꓢꓲ ꓐꓯˍ ꓟ ꓮꓽ ꓙꓵ ꓡꓱꓸꓼ ꓠꓬ ꓔꓱꓹˍ ꓟ ꓥ ꓡꓳ꓾ ꓐꓰ ꓐꓯˍ ꓡꓳ꓿ 42 ꓖꓳ ꓗꓪ ꓡ ꓞꓳ ꓮꓽ ꓟꓬꓹ ꓬꓰ-ꓢꓴ ꓔꓯ ꓙꓵꓻˍ ꓡꓳ꓿

ꓬꓳ-ꓦ 11

1 ꓖꓳ ꓕꓯ ꓟ-ꓡꓲˍ ꓐꓰ ꓬꓲ ꓮꓸ ꓝꓲ ꓟ-ꓕ ꓔꓬ ꓟ ꓐꓱ-ꓕ-ꓠꓲ ꓘꓹ ꓗꓪ꓾ ꓡ-ꓢ-ꓣꓴ ꓠꓬ ꓠꓻ ꓔꓬ ꓡꓳ꓿ 2 ꓟ-ꓡꓲ ꓕꓱ ꓕꓲ ꓣꓳ ꓠꓬ꓾ ꓢꓲ ꓒ ꓔꓯ ꓫꓳꓻ ꓠꓱꓺ ꓞꓶꓻ ꓟꓰ ꓖꓶ ꓢꓲ꓾ ꓬꓲ ꓛꓲ ꓒꓯꓹ ꓗꓪ ꓬꓲ ꓪꓴꓸ ꓞꓱꓻ ꓡꓰ ꓫꓵꓹ ꓖꓶ ꓢꓴ ꓖꓳ ꓕꓲ ꓣꓳ ꓥ ꓡꓳ꓿ ꓠꓻ ꓔꓬ ꓟ ꓡ-ꓢ-ꓣꓴ ꓠꓬ ꓬꓲ ꓠꓬꓲ ꓤ ꓥ ꓡꓳ꓿ 3 ꓖꓳ ꓡꓱ ꓠꓬꓲ ꓬꓰ-ꓢꓴ ꓔꓬ ꓗꓪ ꓬꓲ ꓮ ꓝꓲ ꓐꓴ ꓡꓰ ꓢꓴ ꓔꓯ ꓝꓲ ꓢꓲ꓾ ꓢꓲ ꓒꓽꓳ꓾ ꓠꓴ ꓠꓲꓹ ꓠꓵˍ ꓟ ꓡ-ꓢ-ꓣꓴ ꓠꓬ ꓠꓻ ꓔꓬ ꓡꓳ꓾ ꓐꓰ ꓐꓯ ꓖꓶ ꓙꓰ ꓝꓲˍ ꓡꓳ꓿ 4 ꓬꓰ-ꓢꓴ ꓕꓱ ꓟ ꓔꓯ ꓑ ꓙꓽˍ ꓕꓯ ꓬꓲ ꓡꓰ꓾ ꓠꓻ ꓕꓱ ꓟ ꓠꓬ ꓫꓵꓻ ꓠꓻ ꓟꓽ ꓥ꓿ ꓪꓴ-ꓢ ꓟꓬꓱ ꓓꓳꓽˍ ꓐꓰ ꓪꓴ-ꓢ ꓮ ꓐꓲ ꓟꓬꓱ ꓓꓳꓽ ꓓꓳ ꓡ ꓠꓹ ꓟ ꓥ ꓡꓳ꓾ ꓐꓯˍ ꓡꓳ꓿ 5 ꓬꓰ-ꓢꓴ ꓠꓬ ꓟ-ꓕˍ ꓐꓰ ꓬꓲ ꓠꓬꓲ ꓟˍ ꓐꓰ ꓡ-ꓢ-ꓣꓴ ꓔꓯ ꓠꓲꓹ ꓠꓵˍ ꓡꓳ꓿ 6 ꓖꓳ ꓡꓱ ꓢꓲ ꓡ-ꓢ-ꓣꓴ ꓠꓻ ꓔꓬ ꓟ ꓔꓯ ꓑ ꓙꓽ ꓗꓷˍ ꓟꓲ꓾ ꓬꓰ-ꓢꓴ ꓠꓽ ꓬꓲ ꓖꓳ ꓗꓪ ꓠꓬꓲꓽ ꓠꓬꓲ ꓔꓬ ꓢꓰꓽ ꓡꓳ꓿ 7 ꓖꓳ ꓗꓸ ꓠꓯꓸ ꓠꓬ ꓬꓲ ꓡꓰ ꓛꓳꓽ ꓒꓯꓹ ꓐꓴ ꓔꓯ꓾ ꓬꓴ-ꓔ ꓟꓵꓽ ꓗꓪ ꓣꓳ ꓝꓮꓲ ꓕꓲ ꓧꓪꓹ ꓙꓰ ꓡꓯ꓾ ꓐꓯˍ ꓡꓳ꓿ 8 ꓬꓲ ꓛꓳꓽ ꓒꓯꓹ ꓐꓴ ꓡꓰ꓾ ꓟꓸ ꓒꓽꓳ꓾ ꓮꓽ ꓟꓰꓻ ꓫꓵ ꓟꓰꓻ ꓢꓲꓸˍ ꓡꓰꓽ ꓬꓴ-ꓔ ꓡ ꓞꓳ ꓡꓰ ꓠꓴ ꓔꓯ Bꓸ ꓛꓲ ꓡꓳˍ ꓐꓰ ꓬꓰ ꓗꓷ ꓟ꓾ ꓠꓴ ꓖꓳ ꓗꓪ ꓝꓮꓲ ꓕꓲ ꓧꓪꓹ ꓙꓰˍ ꓐꓯˍ ꓡ? ꓐꓰ ꓐꓯ ꓖꓶˍ ꓡꓳ꓿ 9 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓕꓲ ꓠꓬꓲ ꓗꓪ ꓞꓲ ꓠꓬꓲꓽ ꓙꓵꓹ ꓙꓳˍ ꓡꓳ ꓟꓽ ꓥ ꓡ? ꓮꓽ ꓟ ꓥ ꓟꓲ ꓟꓳꓼ ꓡꓳ ꓕꓯ ꓙ ꓖꓴ ꓫꓱꓽˍ ꓠꓬ꓾ ꓟꓲ ꓠꓯ ꓕꓱ ꓟ ꓗꓪ ꓟ ꓠꓬꓲ ꓟꓳ ꓓꓴ ꓗꓪ ꓐꓰ ꓠꓬꓲ ꓟꓳˍ ꓠꓬꓲ ꓟꓽ ꓛꓲ ꓕꓲꓽ ꓡꓰ꓿ 10 ꓖꓳ ꓡꓱ ꓥ ꓟꓲ ꓢ ꓘꓪ ꓕꓯ ꓮꓽ ꓟ ꓙ ꓖꓴ ꓫꓱꓽ ꓐꓷˍ ꓠꓬ꓾ ꓠꓬꓲ ꓟꓳꓻ ꓓꓴ ꓟꓽ ꓙꓳ ꓠꓬꓲ ꓬꓲ ꓠꓽ ꓛꓲ ꓕꓲꓽ ꓡꓰˍ ꓥꓳ꓾ ꓐꓯˍ ꓡꓳ꓿ 11 ꓕꓱ ꓟꓬ ꓙꓰꓽ ꓟ ꓬꓰ-ꓢꓴ ꓐꓯ ꓗꓷ ꓠꓬ ꓬꓲ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓣꓳ ꓗꓪ ꓛꓳꓽ ꓡ-ꓢ-ꓣꓴ ꓠꓬ ꓬꓲꓼ ꓟꓶ ꓔꓬ ꓡꓳ꓿ ꓥꓪ ꓠꓽ ꓬꓲ ꓔꓯ ꓧꓪꓸ ꓛꓲꓽ ꓡ ꓝꓲ ꓠꓹ ꓟ ꓙꓰˍ ꓥꓳ꓾ ꓐꓯˍ ꓡꓳ꓿ 12 ꓖꓳ ꓡꓱ ꓠꓬꓲ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓬꓲ ꓬꓲꓼ ꓟꓶ ꓔꓬ ꓕꓯ ꓠ ꓬꓲ ꓚꓲꓸ ꓛꓬ ꓧꓪꓸ ꓛꓲꓽ ꓡ ꓗꓴˍ ꓥꓳ꓾ ꓐꓯ ꓖꓶˍ ꓡꓳ꓿ 13 ꓬꓰ-ꓢꓴ ꓠꓬ ꓡ-ꓢ-ꓣꓴ ꓫꓵꓻ ꓟ ꓔꓯ ꓐꓯˍ ꓟꓲ꓾ ꓬꓲ ꓪꓽ ꓠꓽ ꓮ ꓕꓯ ꓟꓴ ꓕꓯ ꓬꓲꓼ ꓟꓶˍ ꓟ ꓔꓯ ꓐꓯˍ ꓡꓳ꓾ ꓓꓵꓽ ꓙꓽˍ ꓡꓳ꓿ 14 ꓖꓳ ꓟ ꓑꓶ ꓓꓴ ꓬꓰ-ꓢꓴ ꓬꓲ ꓪꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶ ꓢꓲ꓾ ꓡ-ꓢ-ꓣꓴ ꓠꓽ ꓫꓵꓻꓳ꓿ 15 ꓥꓪ ꓖꓳ ꓗꓪ ꓔꓬ ꓟꓽ ꓪ ꓡꓰ ꓟ ꓠꓬ꓾ ꓠꓴ ꓪꓽ ꓙꓵꓻ ꓠꓲꓹ ꓪꓴꓽ ꓡ ꓠꓹ ꓟ ꓥ ꓠꓬꓲ ꓥꓪ ꓠꓲꓹ ꓒꓴˍ ꓡꓳ꓿ ꓮ ꓟꓶ ꓣꓳ ꓬꓲ ꓔꓯ ꓙꓰ ꓡꓯ꓾ ꓐꓯˍ ꓡꓳ꓿ 16 ꓖꓳ ꓡꓱ ꓠꓬ ꓤꓽ ꓜꓱꓻ ꓐꓯˍ ꓟ ꓕꓳ-ꓟ ꓡꓰ ꓛꓳꓽ ꓒꓯꓹ ꓐꓴ ꓔꓯ꓾ ꓣꓳꓽˍ ꓟꓲ ꓬꓲˍ ꓐꓰ ꓕꓲ ꓛꓳꓺꓼ ꓫꓵꓻ ꓠꓹ ꓟ ꓙꓰ ꓡꓯ꓾ ꓐꓯˍ ꓡꓳ꓿ 17 ꓬꓰ-ꓢꓴ ꓖꓳ ꓗꓪ ꓛꓲ ꓬꓰ ꓕꓯ꓾ ꓡ-ꓢ-ꓣꓴ ꓠꓽ ꓡꓱꓼ ꓜꓴ ꓗꓪ ꓔꓵꓸ ꓗꓷ ꓟ ꓡꓲ ꓠꓬꓲ ꓙꓳˍ ꓟ ꓬꓲ ꓢꓷꓸ ꓡꓰꓳ꓿ 18 ꓐꓱ-ꓕ-ꓠꓲ ꓠꓬ ꓙꓱ-ꓣꓴ-ꓢ-ꓡꓱ ꓒ ꓕꓲꓺꓼ ꓗꓪ ꓥ ꓢꓲ꓾ ꓮꓽ ꓡ ꓡꓳ ꓔ ꓠꓬꓲꓽ ꓕꓷꓹ ꓛꓲꓺ ꓗꓷꓹ ꓞꓹ ꓡꓳ꓿ 19 ꓟ-ꓕ ꓐꓰ ꓟ-ꓡꓲ ꓬꓲ ꓪꓽ ꓠꓬꓲ ꓤ ꓫꓵꓻ ꓟ ꓑꓶ ꓓꓴ꓾ ꓬꓴ-ꓔ ꓡ ꓞꓳ ꓮꓽ ꓟꓬꓹ ꓠꓬ ꓬꓲ ꓪꓽ ꓔꓯ ꓠꓲꓹ ꓟ ꓗꓴ ꓖꓶ ꓠꓹ ꓟ ꓡ ꓡꓳ꓿ 20 ꓬꓰ-ꓢꓴ ꓡꓻˍ ꓟ ꓔꓯ ꓟ-ꓕ ꓑ ꓙꓽ ꓠꓬ ꓬꓲ ꓓꓳ ꓙꓰ ꓢꓲ ꓞꓵ ꓬꓰˍ ꓡꓳ꓿ ꓟ-ꓡꓲ ꓠꓽ ꓦꓲ ꓗꓪ ꓠꓬꓲꓸ ꓠꓸ ꓔꓬ ꓢꓰꓽ ꓡꓳ꓿ 21 ꓖꓳ ꓡꓱ ꓢꓲ ꓟ-ꓕ ꓡꓰ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓠꓴ ꓕꓻ ꓔꓬ ꓐꓷˍ ꓠꓬ ꓥꓪ ꓠꓬꓲ ꓤ ꓟꓽ ꓫꓵꓻ ꓡꓳ ꓫꓵꓽ ꓥꓳ꓿ 22 ꓖꓳ ꓡꓱ ꓢꓲ ꓮ ꓟꓶˍ ꓟꓲ ꓪꓴ-ꓢ ꓔꓯ ꓠꓴ ꓮꓸ ꓫꓵ ꓓꓰꓽˍ ꓟꓲ ꓪꓴ-ꓢ ꓡꓰ ꓠꓴ ꓔꓯ ꓖꓶ ꓡ ꓟ ꓥꓪ ꓢꓷˍ ꓡꓳ꓾ ꓐꓯˍ ꓡꓳ꓿ 23 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬꓲ ꓤ ꓠꓬ ꓢꓯꓸ ꓬꓲꓼ ꓡ ꓢꓰ ꓥꓳ꓾ ꓐꓯ ꓖꓶˍ ꓡꓳ꓿ 24 ꓟ-ꓕ ꓡꓰ ꓬꓲ ꓔꓯ꓾ ꓥꓳ꓾ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓬꓲ ꓝꓮꓲ ꓢꓯꓸ ꓬꓲꓼ ꓡ ꓟ ꓥꓪ ꓢꓷˍ ꓡꓳ꓾ ꓐꓯˍ ꓕꓯ꓾ 25 ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓠꓽ ꓢꓯꓸ ꓬꓲꓼ ꓡ ꓟ ꓐꓰ ꓢꓯꓼ ꓟꓬ ꓥ ꓡꓳ꓿ ꓥꓪ ꓔꓯ ꓙꓵꓻ ꓢꓴ ꓠꓬ ꓫꓵꓻˍ ꓟꓲ ꓢꓯꓸ ꓬꓲꓼ ꓡ ꓢꓰꓽ ꓥꓳ꓿ 26 ꓢꓯꓸ ꓔꓬ ꓢꓲ ꓥꓪ ꓔꓯ ꓙꓵꓻ ꓢꓴ ꓥ ꓕ ꓑꓳ ꓠꓬ ꓕꓲ ꓞꓲꓼ ꓟꓽ ꓫꓵ꓿ ꓕꓱ ꓟ ꓔꓯ ꓠꓴ ꓙꓵꓻˍ ꓡ?꓾ ꓐꓯˍ ꓡꓳ꓿ 27 ꓟ-ꓕ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓥ ꓡꓳ꓾ ꓠꓴ ꓠꓽ ꓟꓲ ꓠꓯ ꓗꓪ ꓡ ꓠꓹ ꓟ ꓪꓴ-ꓢ ꓮ ꓐꓲ ꓙꓲ-ꓢꓴ ꓖꓳ ꓕꓲ ꓣꓳ ꓥ ꓟ ꓥꓪ ꓙꓵꓻ ꓗꓷꓳ꓾ ꓐꓯˍ ꓡꓳ꓿ 28 ꓕꓱ ꓡꓱ ꓐꓯ ꓗꓷ ꓠꓬ ꓬꓲ ꓬꓲꓼ ꓙꓰ ꓢꓲ꓾ ꓘꓳ ꓫꓱ ꓫꓱˍ ꓬꓲ ꓠꓬꓲ ꓟ ꓟ-ꓡꓲ ꓔꓯ꓾ ꓟꓸ ꓒ ꓖꓪꓻˍ ꓔꓬ ꓢꓲ ꓠꓴ ꓔꓯ ꓘꓴꓻˍ ꓡꓳ꓾ ꓐꓯ ꓖꓶˍ ꓡꓳ꓿ 29 ꓕꓱ ꓟ ꓔꓯ ꓟ-ꓡꓲ ꓑ ꓙꓽ ꓗꓷ ꓠꓬ ꓠꓲꓹ ꓞ ꓔꓴ ꓢꓲ ꓬꓰ-ꓢꓴ ꓔꓬ ꓗꓪ ꓙꓰˍ ꓡꓳ꓿ 30 ꓬꓰ-ꓢꓴ ꓠꓬ ꓘꓹ ꓗꓪ ꓟꓽ ꓓꓵꓽ ꓡꓰ ꓡꓰ꓾ ꓟ-ꓕ ꓡꓰ ꓬꓲ ꓔꓯ ꓞꓵ ꓡ ꓖꓴ ꓗꓪ ꓔꓬ ꓢꓰꓽ ꓡꓳ꓿ 31 ꓖꓳ ꓕꓯ ꓬꓲˍ ꓐꓰ ꓦꓲ ꓗꓪ ꓔꓬ ꓢꓲ ꓬꓲ ꓔꓯ ꓠꓲꓹ ꓟ ꓗꓴ ꓖꓶ ꓔꓬ ꓢꓴ ꓬꓴ-ꓔ ꓡ ꓞꓳ ꓐꓴ ꓠꓬ꓾ ꓟ-ꓡꓲ ꓠꓲꓹ ꓞ ꓔꓴ ꓢꓲ ꓓꓳ ꓙꓰˍ ꓟ ꓔꓯ ꓟꓳ ꓗꓷ ꓕꓯ꓾ ꓬꓲ ꓠꓽ ꓡꓱꓼ ꓜꓴ ꓗꓪ ꓮꓸ ꓛꓬꓹ ꓙꓱ ꓠ ꓟ ꓓꓳ ꓙꓰˍ ꓡꓳ꓾ ꓓꓵꓽ ꓙꓽ ꓠꓬꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ 32 ꓬꓰ-ꓢꓴ ꓔꓬ ꓗꓪ ꓟ-ꓡꓲ ꓛꓲ ꓡ ꓢꓲ ꓬꓲ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓟꓲꓽ ꓙꓬ ꓗꓪ ꓟꓳꓼ ꓡꓰ ꓢꓲ꓾ ꓢꓲ ꓒꓽꓳ꓾ ꓠꓴ ꓕꓻ ꓔꓬ ꓐꓷˍ ꓠꓬ ꓥꓪ ꓠꓬꓲ ꓤꓽ ꓠꓽ ꓟꓽ ꓫꓵ ꓡꓳ ꓫꓵꓽ ꓥꓳ꓾ ꓐꓯˍ ꓡꓳ꓿ 33 ꓟ-ꓡꓲ ꓥꓴꓻˍ ꓟ ꓐꓰ ꓬꓲ ꓔꓯ ꓛꓳ ꓡ ꓢꓴ ꓬꓴ-ꓔ ꓡ ꓞꓳ ꓥꓴꓻˍ ꓟ ꓔꓯ ꓬꓰ-ꓢꓴ ꓟꓳ ꓗꓷ ꓠꓬ꓾ ꓬꓲˍ ꓟꓲ ꓠꓲꓹ ꓟ ꓮꓽ ꓘꓶꓸ ꓫꓸ ꓢꓲ꓾ 34 ꓠꓴ ꓪꓽ ꓬꓲ ꓔꓯ ꓮ ꓡꓲ ꓗꓪ ꓗꓶ ꓔ ꓡ? ꓐꓰ ꓠ ꓠꓬꓲˍ ꓕꓯ꓾ ꓢꓲ ꓒꓽꓳ꓾ ꓡꓳꓸ ꓠꓬꓲ ꓡꓯ꓾ ꓐꓰ ꓒꓳꓹ ꓖꓶˍ ꓡꓳ꓿ 35 ꓖꓳ ꓕꓯ ꓬꓰ-ꓢꓴ ꓟꓬ ꓐꓰ ꓓꓳˍ ꓡꓳ꓿ 36 ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓡꓰ꓾ ꓬꓲ ꓠꓬ ꓬꓲ ꓔꓯ ꓮ ꓘꓶꓻ ꓛꓲ ꓠꓲꓹ ꓠꓵˍ ꓟ ꓔꓯ ꓠꓬꓲꓺ ꓠꓹ꓾ ꓐꓯˍ ꓡꓳ꓿ 37 ꓖꓳ ꓡꓱ ꓥ ꓟꓲ ꓬꓲ ꓪꓽ ꓕꓲ ꓐꓱ ꓠꓬ꓾ ꓟꓬ ꓔꓶ ꓔꓯ ꓠꓬꓲ ꓟꓳ ꓡ ꓝꓲ ꓢꓴ ꓕꓱ ꓕꓲ ꓣꓳ ꓠꓬ꓾ ꓡ-ꓢ-ꓣꓴ ꓔꓯˍ ꓟꓲ ꓟꓽ ꓫꓵꓻ ꓠꓹ ꓟ ꓬꓰ ꓟꓽ ꓐ ꓡ ꓮ ꓡꓲ ꓗꓷ ꓡꓰ ꓡ?꓾ ꓐꓯˍ ꓡꓳ꓿ 38 ꓬꓰ-ꓢꓴ ꓠꓬ ꓝꓮꓲ ꓠꓲꓹ ꓟ ꓮꓽ ꓘꓶꓸ ꓫꓸ ꓠꓬꓲ ꓐꓰ ꓡꓱꓼ ꓜꓴ ꓗꓪ ꓙꓰˍ ꓡꓳ꓿ ꓡꓱꓼ ꓜꓴ ꓖꓳ ꓟ ꓠꓬ Bꓸ ꓘꓴꓻ ꓥ ꓢꓲ꓾ ꓬꓲ ꓘꓶꓽ ꓗꓪ ꓠꓬ Bꓸ ꓛꓲ ꓕꓲ ꓒꓬꓸ ꓫꓱꓺ ꓔ ꓡꓳ꓿ 39 ꓬꓰ-ꓢꓴ ꓡꓰ꓾ Bꓸ ꓛꓲ ꓔꓯ ꓣꓴ ꓩꓴ ꓗꓷ꓾ ꓐꓯˍ ꓡꓳ꓿ ꓫꓵꓻ ꓢꓴ ꓬꓲ ꓮꓸ ꓝꓲ ꓟ-ꓕ ꓡꓰ꓾ ꓢꓲ ꓒꓽꓳ꓾ ꓬꓲ ꓫꓵꓻ ꓗꓷ ꓟ ꓡꓲ ꓠꓬꓲ ꓗꓷ ꓡꓰ ꓠꓬꓲ꓾ ꓮ ꓟꓶ ꓠꓽ ꓬꓲ ꓫꓵꓻ ꓟꓳꓻ ꓛꓱꓽ ꓠꓱˍ ꓥꓳ꓾ ꓐꓯ ꓖꓶˍ ꓕꓯ꓾ 40 ꓬꓰ-ꓢꓴ ꓡꓰ꓾ ꓠꓴ ꓙꓵꓻˍ ꓠꓬ ꓪꓴ-ꓢ ꓟꓬꓱ ꓓꓳꓽ ꓔꓯ ꓠꓴ ꓟꓳˍ ꓥꓳ꓾ ꓐꓰ ꓠꓴ ꓔꓯ ꓥꓪ ꓐꓯ ꓖꓶ ꓗꓷꓳ ꓟꓽ ꓥ ꓡ? ꓐꓰ ꓒꓳꓹ ꓖꓶˍ ꓡꓳ꓿ 41 ꓖꓳ ꓕꓯ ꓬꓲ ꓪꓽ ꓡꓰ Bꓸ ꓛꓲ ꓣꓴ ꓦ ꓗꓷ ꓠꓬ꓾ ꓬꓰ-ꓢꓴ ꓠꓽ ꓟꓴꓽ ꓗꓪ ꓗꓪ ꓡꓳꓸ ꓔ ꓢꓲ꓾ ꓐꓹ ꓐꓽꓳ꓾ ꓠꓴ ꓥꓪ ꓔꓯ ꓠ ꓠꓹ ꓗꓷ ꓠꓬꓲ ꓠꓴ ꓔꓯ ꓫ ꓟꓳ꓿ 42 ꓠꓴ ꓮ ꓕꓯˍ ꓟꓲ ꓥꓪ ꓔꓯ ꓠ ꓠꓹ ꓟ ꓥꓪ ꓢꓷˍ ꓡꓳ꓿ ꓖꓳ ꓡꓱ ꓥ ꓟꓲ ꓚꓳ ꓡꓳ ꓗꓪ ꓦꓰꓼ ꓞꓹ ꓟ ꓡ ꓞꓳ ꓬꓲ ꓜꓴ ꓠꓬ ꓠꓴ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓔꓯ ꓬꓲ ꓪꓽ ꓙꓵꓻ ꓠꓹ ꓟ ꓥꓪ ꓕꓱ ꓡꓱ ꓐꓯˍ ꓟ ꓥꓳ꓾ ꓐꓯˍ ꓡꓳ꓿ 43 ꓬꓲ ꓖꓳ ꓡꓱ ꓐꓯ ꓗꓷ ꓠꓬ꓾ ꓢꓯꓼ ꓓꓽ ꓟ ꓡꓰ꓾ ꓡ-ꓢ-ꓣꓴꓳ꓾ ꓓꓳ ꓡꓯ꓾ ꓐꓰ ꓘꓴˍ ꓡꓳ꓿ 44 ꓫꓵꓻ ꓗꓷ ꓟ ꓡ-ꓢ-ꓣꓴ ꓠꓬ ꓛꓲ ꓒꓯꓹ ꓡꓯꓼ ꓒꓯꓹ ꓗꓪ ꓟꓶ ꓛ ꓡꓲ ꓞ ꓢꓲ ꓓꓳ ꓡ ꓡꓳ꓿ ꓬꓲ ꓒꓬꓱꓽ ꓟꓬ ꓗꓪˍ ꓟꓲ ꓟꓶ ꓛ ꓡꓲ ꓔ ꓡꓳ꓿ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓡꓲꓺ ꓔ ꓟ ꓟꓶ ꓛ ꓒꓶꓻ ꓖꓶ ꓢꓲ ꓬꓲ ꓔꓯ ꓙꓰ ꓝꓲ꓾ ꓐꓯ ꓖꓶˍ ꓡꓳ꓿ 45 ꓖꓳ ꓡꓱ ꓠꓬꓲ ꓟ-ꓡꓲ ꓔꓬ ꓗꓪ ꓡ ꓢꓴ ꓬꓴ-ꓔ ꓡ ꓞꓳ ꓮꓽ ꓟꓬꓹ ꓠꓬ꓾ ꓬꓰ-ꓢꓴ ꓬꓰˍ ꓟ ꓔꓯ ꓟꓳ ꓗꓷ ꓕꓯ ꓬꓲ ꓔꓯ ꓙꓵˍ ꓡꓳ꓿ 46 ꓖꓳ ꓡꓱ ꓥ ꓟꓲ ꓬꓲ ꓪꓽ ꓕꓲ ꓐꓱ ꓠꓬ ꓒ-ꓡꓲ-ꓢꓷ ꓐꓴ ꓔꓯ ꓙꓰ ꓢꓲ꓾ ꓬꓰ-ꓢꓴ ꓬꓰ ꓗꓷ ꓟ ꓬꓲ ꓪꓽ ꓔꓯ ꓐꓯ ꓟꓸ ꓖꓶˍ ꓡꓳ꓿ 47 ꓖꓳ ꓡꓱ ꓠꓬꓲ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓕꓲ ꓟ ꓬꓰ ꓢꓲ꓾ ꓣꓳ ꓮ ꓡꓲ ꓬꓰ ꓠꓯꓹ ꓡ? ꓡ ꓞꓳ ꓕꓱ ꓟ ꓡꓰ ꓢꓷꓸ ꓡꓰ ꓓꓴ ꓮꓽ ꓟꓬꓹ ꓬꓰ ꓗꓷꓳ꓿ 48 ꓬꓲ ꓔꓯ ꓬꓲ ꓙꓵꓽ ꓬꓲ ꓟꓴ ꓩꓴ ꓔ ꓕꓯ ꓠꓽ꓾ ꓮꓽ ꓙꓵ ꓢꓴ ꓬꓲ ꓔꓯ ꓙꓵꓻˍ ꓥꓳ꓿ ꓖꓳ ꓡꓱ ꓠꓬ ꓣꓳ-ꓟ ꓡ ꓞꓳ ꓡ ꓢꓲ ꓣꓳꓽ ꓔꓬ ꓖꓴˍ ꓐꓰ ꓣꓳ ꓟꓵꓽ ꓔꓯˍ ꓟꓲ ꓦꓴꓻ ꓔꓯꓹ ꓙꓰˍ ꓥꓳ꓾ ꓐꓯˍ ꓡꓳ꓿ 49 ꓖꓳ ꓡꓱ ꓥ ꓟꓲ ꓬꓲ ꓪꓽ ꓗꓪ ꓟ ꓘꓷ-ꓬ-ꓒ ꓕꓲ ꓣꓳ ꓠꓬ꓾ ꓖꓳ ꓕꓲ ꓘꓳꓼ ꓗꓪ ꓔꓲ ꓒ ꓓꓽ ꓟ ꓣꓱꓽ ꓢꓴ ꓥ ꓢꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓮꓸ ꓫꓵˍ ꓟꓲ ꓟꓽ ꓢꓷ꓿ 50 ꓣꓳ ꓕꓲ ꓫꓵꓽ ꓟ ꓡ ꓞꓳ ꓮꓽ ꓙꓵ ꓟꓽ ꓟꓶꓽ ꓬꓰ ꓠꓹ ꓟ꓾ ꓡ ꓞꓳ ꓕꓲ ꓣꓳ ꓑ ꓫꓬꓼ ꓐꓴ ꓐꓱ ꓶ ꓫꓵꓻˍ ꓟ ꓠꓬ꓾ ꓠꓴ ꓪꓽ ꓐꓱ ꓶ ꓙꓲ ꓖꓴ ꓙꓳˍ ꓟ ꓠꓴ ꓪꓽ ꓟꓽ ꓙ ꓜꓲꓼ ꓡ?꓾ ꓐꓯˍ ꓡꓳ꓿ 51 ꓬꓲ ꓕꓱ ꓡꓱ ꓐꓯˍ ꓟ ꓠꓬ꓾ ꓬꓲ ꓚꓲꓸ ꓛꓬ ꓗꓪ ꓐꓰ ꓐꓯˍ ꓟ ꓟꓽ ꓥ꓿ ꓖꓳ ꓕꓲ ꓘꓳꓼ ꓗꓪ ꓬꓲ ꓠꓽ ꓔꓲ ꓒ ꓓꓽ ꓟ ꓣꓱ ꓢꓴ ꓥ ꓠꓬꓲ꓾ ꓬꓴ-ꓔ ꓕꓲ ꓫꓵꓽ ꓟ ꓡ ꓞꓳ ꓐꓱ ꓶ ꓬꓰ-ꓢꓴ ꓫꓵꓻ ꓠꓹ ꓟ ꓬꓲ ꓟꓷꓽ ꓠꓷꓹ ꓝꓸ ꓟ ꓥ ꓡꓳ꓿ 52 ꓬꓴ-ꓔ ꓡ ꓞꓳ ꓕꓲ ꓫꓵꓽ ꓟ ꓐꓱ ꓶˍ ꓡꓰꓽ ꓟꓽ ꓞꓲ꓾ ꓕꓲ ꓟꓵꓽ ꓕꓲ ꓟꓵ ꓗꓪ ꓧꓹ ꓒꓬꓱꓺ ꓙꓰ ꓟ ꓪꓴ-ꓢ ꓤ ꓠꓱ ꓐꓴ ꓔꓯˍ ꓟꓲ ꓕꓲ ꓜꓴˍ ꓐꓰ ꓜꓲꓼ ꓡ ꓝꓲ ꓠꓹ ꓟ ꓥ ꓡꓳ꓿ 53 ꓖꓳ ꓡꓱ ꓠꓬꓲ ꓬꓲ ꓪꓽ ꓠꓬ ꓖꓳ ꓕꓲ ꓠꓬꓲ ꓗꓪ ꓐꓰ ꓬꓰ-ꓢꓴ ꓔꓯ ꓢꓰꓼ ꓗꓷ ꓠꓹ ꓟ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ 54 ꓖꓳ ꓡꓱ ꓠꓬꓲ ꓬꓰ-ꓢꓴ ꓠꓬ ꓬꓴ-ꓔ ꓡ ꓞꓳ ꓐꓴ ꓗꓳ ꓡꓳ ꓗꓪ ꓒꓴ ꓒꓴ ꓡꓯꓽ ꓡꓯꓽ ꓝꓮꓲ ꓟꓽ ꓚꓳ ꓙꓰ꓿ ꓬꓲ ꓠꓽ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓡꓲ ꓛꓲ ꓒ ꓕꓲꓺꓼ ꓗꓪ꓾ ꓬꓲ-ꓒ-ꓡꓲ ꓟꓬꓱ ꓔ ꓟ ꓡꓳ ꓒꓱ ꓗꓪ ꓓꓵꓽ ꓡꓰ ꓢꓲ ꓠꓬꓲ꓾ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓖꓳ ꓗꓪ ꓔꓬ ꓬꓰˍ ꓡꓳ꓿ 55 ꓖꓳ ꓕꓯ ꓠꓬ ꓬꓴ-ꓔ ꓡ ꓞꓳ ꓦꓲ-ꓘꓳ-ꓑꓮꓲ ꓬꓰˍ ꓟ ꓦꓬꓼ ꓠꓬꓲ ꓠꓶꓽ ꓡ ꓡꓳ꓿ ꓦꓲ-ꓘꓳ-ꓑꓮꓲ ꓟꓽ ꓬꓰ ꓕꓯˍ ꓡꓰ ꓡ ꓞꓳ ꓮꓽ ꓟꓬꓹ ꓠꓬ꓾ ꓬꓲ ꓪꓽ ꓖꓳ ꓓꓱ ꓔꓯ ꓫꓬꓻ ꓡꓰ ꓝꓲˍ ꓟ ꓗ ꓫꓵ ꓔꓯ ꓛꓳ ꓠꓹ ꓟ꓾ ꓟꓵꓽ ꓤ ꓘꓹ ꓤ ꓗꓪ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰˍ ꓡꓳ꓿ 56 ꓖꓳ ꓡꓱ ꓠꓬꓲ ꓬꓲ ꓪꓽ ꓠꓬ ꓬꓰ-ꓢꓴ ꓔꓯ ꓧꓪ ꓢꓲ꓾ ꓢꓲꓽ ꓫꓬ ꓦꓲ ꓗꓪ ꓬꓲ ꓪꓽ ꓕꓲ ꓣꓳ ꓛꓳ ꓕꓲ ꓣꓳ꓾ ꓠꓴ ꓪꓽ ꓮ ꓡꓲ ꓓꓵꓽ ꓙꓽˍ ꓡ? ꓑꓮꓲ ꓬꓰˍ ꓟ ꓗꓪ ꓬꓲ ꓟꓽ ꓡ ꓥˍ ꓢꓷ?꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 57 ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓬꓲ ꓔꓯ ꓣꓴ ꓟꓶ ꓠꓹ ꓟ꓾ ꓬꓲ ꓮ ꓡꓲ ꓗꓪ ꓔꓬ ꓟ ꓮꓽ ꓟ ꓢꓷˍ ꓟꓲ ꓐꓯ ꓖꓶ ꓡ ꓠ ꓗꓹ ꓡꓳ꓾ ꓐꓰ ꓕꓵꓼ ꓪ ꓖꓶˍ ꓡꓳ꓿

ꓬꓳ-ꓦ 12

1 ꓬꓰ-ꓢꓴ ꓠꓬ ꓦꓲ-ꓘꓳ-ꓑꓮꓲ ꓟꓽ ꓬꓰ ꓛꓳꓼ ꓠꓬꓲ ꓧꓶꓸ ꓕꓯˍ ꓡꓰ꓾ ꓬꓲ ꓡꓰ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓢꓴ ꓡ-ꓢ-ꓣꓴ ꓔꓬ ꓟ ꓐꓱ-ꓕ-ꓠꓲ ꓗꓪ ꓛꓲ ꓡ ꓡꓳ꓿ 2 ꓬꓲ ꓪꓽ ꓖꓳ ꓗꓪ ꓬꓲ ꓔꓯ ꓟꓶꓼ ꓘꓶꓼ ꓜ ꓫꓬꓹ ꓖꓶ ꓜꓽ ꓢꓲ꓾ ꓟ-ꓕ ꓡꓰ ꓣꓱ ꓙˍ ꓡꓳ꓿ ꓬꓲˍ ꓐꓰ ꓕꓲ ꓪꓺꓼ ꓜ ꓜꓽˍ ꓐꓰ ꓗꓳꓺ ꓔꓬ ꓢꓴ ꓐꓴ ꓗꓳ ꓡꓳ ꓗꓪ ꓡ-ꓢ-ꓣꓴˍ ꓟꓲ ꓗꓳꓺ ꓔꓬ ꓡꓳ꓿ 3 ꓟ-ꓡꓲ ꓠꓬ ꓮꓽ ꓘꓶꓸ ꓒꓵˍ ꓟ ꓠ-ꓔꓷꓺ ꓫꓳ ꓠꓱꓺ ꓞꓶꓻ ꓚꓵꓺ ꓞꓲ ꓠꓬꓲꓽ ꓡꓳꓽ ꓣꓴ ꓢꓲ꓾ ꓬꓰ-ꓢꓴ ꓛꓲ ꓒꓯꓹ ꓗꓪ ꓟꓰ ꓖꓶ ꓢꓲ ꓠꓬꓲ꓾ ꓬꓲ ꓪꓴꓸ ꓞꓱꓻ ꓡꓰ ꓫꓵꓹ ꓖꓶˍ ꓡꓳ꓿ ꓖꓳ ꓡꓱ ꓢꓲ ꓦꓲ ꓗꓪ ꓠꓬ ꓫꓳ ꓠꓱ ꓞꓶꓻ ꓐꓵꓽˍ ꓡꓰ ꓐꓲ ꓡꓰˍ ꓡꓳ꓿ 4 ꓖꓳ ꓡꓱ ꓥ ꓟꓲ ꓬꓲ ꓔꓯ ꓪꓴꓽ ꓜꓽ ꓗꓷ ꓠꓹ ꓟ ꓬꓲ ꓛꓳꓽ ꓒꓯꓹ ꓘ-ꓡꓲꓳ ꓬꓴ-ꓓ ꓡꓰ꓾ 5 ꓫꓳ ꓠꓱꓺ ꓞꓶꓻ ꓕꓱ ꓟ ꓮꓸ ꓫꓵ ꓪꓴꓸ ꓠꓬꓲ ꓓꓲ-ꓠ-ꓣꓲꓴ ꓢ ꓦꓬ ꓒꓯꓼ ꓐꓰ ꓪꓴꓽ ꓢꓲ ꓞꓳ ꓫꓸ ꓔꓯ ꓟꓽ ꓖꓶˍ ꓡ?꓾ ꓐꓯˍ ꓡꓳ꓿ 6 ꓬꓲ ꓕꓱ ꓡꓱ ꓐꓯˍ ꓟ ꓠꓬ꓾ ꓞꓳ ꓫ ꓔꓯ ꓙꓽ ꓗꓳ ꓠꓬꓲ ꓟꓽ ꓥ꓿ ꓬꓲ ꓠꓽ ꓒꓴ ꓗꓶꓺ ꓓꓴ ꓫ ꓢꓴ ꓥ ꓢꓲ꓾ ꓖꓳ ꓗꓪ ꓗꓶ ꓔ ꓟ ꓔꓯ ꓬꓲ ꓘꓴꓽ ꓜꓽ ꓝꓳ ꓡꓰ ꓠꓬꓲ ꓥ ꓡꓳ꓿ 7 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ꓾ ꓬꓲ ꓔꓯ ꓕꓽ ꓘꓶꓻ ꓡꓶꓽ꓿ ꓥꓪ ꓔꓯ ꓔꓵꓸˍ ꓟ ꓦꓬꓼ ꓠꓬꓲ ꓐꓱ ꓶ ꓫꓳ ꓠꓱ ꓞꓶꓻ ꓕꓱ ꓟ ꓬꓲ ꓫ ꓔ ꓟ ꓥ ꓡꓳ꓿ 8 ꓞꓳ ꓫꓸ ꓠꓬ ꓮ ꓕꓯˍ ꓟꓲ ꓠꓴ ꓪꓽˍ ꓐꓰ ꓔꓬ ꓡꓳ꓿ ꓥꓪ ꓠꓽ ꓮ ꓕꓯꓽ ꓟꓴ ꓕꓯꓽ ꓠꓴ ꓪꓽˍ ꓐꓰ ꓔꓬ ꓡꓳ ꓟꓽ ꓥ꓾ ꓐꓯˍ ꓡꓳ꓿ 9 ꓬꓰ-ꓢꓴ ꓖꓳ ꓗꓪ ꓔꓬ ꓟ ꓔꓯ ꓬꓴ-ꓔ ꓡ ꓞꓳ ꓕꓲ ꓜꓴ ꓓꓽ ꓟ ꓢꓷꓸ ꓡꓰ ꓠꓬ ꓬꓲ ꓪˍ ꓟꓲ ꓡ ꓡꓳ꓿ ꓬꓲ ꓪꓽ ꓠꓬ ꓬꓰ-ꓢꓴ ꓔꓯ ꓟꓳ ꓠꓹ ꓟ ꓡꓰꓽ ꓟꓽ ꓞꓲ꓾ ꓬꓲ ꓡꓰ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓟ꓾ ꓡ-ꓢ-ꓣꓴ ꓔꓯˍ ꓟꓲ ꓟꓳ ꓠꓹ ꓟ ꓡ ꓟ ꓥ ꓡꓳ꓿ 10 ꓖꓳ ꓡꓱ ꓥ ꓟꓲ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴ ꓠꓬ꓾ ꓡ-ꓢ-ꓣꓴ ꓔꓯˍ ꓟꓲ ꓢꓰꓼ ꓗꓷ ꓠꓹ ꓟ ꓖꓪ ꓙꓱ ꓡꓯꓽ ꓘꓳˍ ꓡꓳ꓿ 11 ꓮ ꓡꓲꓳ ꓐꓯ ꓠꓬ ꓡ-ꓢ-ꓣꓴ ꓑꓶ ꓓꓴ꓾ ꓬꓴ-ꓔ ꓡ ꓞꓳ ꓮꓽ ꓟꓬꓹ ꓠꓬ ꓬꓲ ꓪꓽ ꓗꓪ ꓐꓰ ꓧꓹ ꓙꓰ ꓢꓲ ꓬꓰ-ꓢꓴ ꓔꓯ ꓙꓵꓻˍ ꓡꓳ꓿ 12 ꓗꓸ ꓠꓯꓸ ꓕꓲ ꓠꓬꓲ ꓑꓮꓲꓽ ꓗꓪ ꓜꓲꓼ ꓡ ꓢꓴ ꓞꓳ ꓜꓴ ꓞꓳ ꓟꓯꓼ ꓠꓬ꓾ ꓬꓰ-ꓢꓴ ꓙꓱ-ꓣꓴ-ꓢ-ꓡꓱ ꓗꓪ ꓡꓻˍ ꓟ ꓑ ꓙꓽˍ ꓕꓯ꓾ 13 ꓙꓲꓻ ꓫꓴꓽ ꓡꓯ ꓗꓸ ꓔꓯꓹ ꓔ ꓢꓲ꓾ ꓬꓲ ꓔꓯ ꓞꓵˍ ꓐꓰ ꓓꓳ ꓙꓰ ꓢꓲ ꓠꓬꓲ꓾ ꓪꓴ-ꓢ ꓔꓯ ꓫꓱꓸ ꓖꓶ꓾ ꓢꓲ ꓒ ꓟꓬꓱ ꓗꓪ ꓐꓰ ꓡꓻˍ ꓟ ꓬꓲ-ꓢꓷ-ꓡꓰ ꓪ ꓔꓲ ꓠꓬ ꓶꓼ ꓙꓳ ꓫꓱꓹ ꓙꓳˍ ꓝꓲ꓾ ꓐꓰ ꓘꓴˍ ꓡꓳ꓿ 14 ꓬꓰ-ꓢꓴ ꓠꓬ ꓕꓳꓽ ꓡ ꓟꓴꓽ ꓤ ꓕꓲ ꓛꓲ ꓧꓪ ꓟꓶ ꓠꓬꓲ ꓜꓶꓽ ꓔ ꓡꓳ꓿ ꓕꓱ ꓟ ꓠꓬ ꓕꓳ ꓶ ꓗꓪ꓾ 15 ꓜꓲ-ꓬꓴ ꓮꓸ ꓟꓲꓽꓳ꓾ ꓕꓽ ꓙꓳ꓿ ꓠꓬꓲ ꓠꓹ꓾ ꓠꓴ ꓪꓽ ꓔꓲꓸ ꓠꓬ ꓕꓳꓽ ꓡ ꓟꓴ ꓤ ꓕꓲ ꓛꓲ ꓜꓶꓽ ꓢꓲ ꓡ ꓡꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 16 ꓬꓲ ꓪꓴꓸ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓕꓱ ꓟꓬ ꓙꓰꓽ ꓔꓯ ꓟꓽ ꓙ ꓜꓲꓼ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓟꓬꓱ ꓓꓳꓽ ꓟꓶ ꓡꓰ ꓗꓷ ꓗꓸ ꓠꓯꓸ ꓠꓬ꓾ ꓐꓳ ꓔ ꓟ ꓕꓱ ꓟꓬ ꓙꓰꓽ ꓠꓽ ꓬꓲ ꓔꓯ ꓖꓴ ꓔ ꓟ ꓥ ꓟ ꓐꓰ꓾ ꓬꓲ ꓔꓯ ꓕꓱ ꓟꓬ ꓫꓵꓽ ꓬꓰ ꓖꓶˍ ꓟ ꓔꓯˍ ꓟꓲ ꓬꓲ ꓪꓽ ꓙ ꓜꓲꓼ ꓡꓰˍ ꓡꓳ꓿ 17 ꓖꓳ ꓡꓱ ꓠꓬꓲ ꓡ-ꓢ-ꓣꓴ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓢꓲ꓾ ꓡꓱꓼ ꓜꓴ ꓗꓪ ꓐꓰ ꓘꓴꓻ ꓓꓳ ꓡ ꓕꓯ꓾ ꓬꓰ-ꓢꓴˍ ꓐꓰ ꓔꓬ ꓟ ꓞꓳ ꓜꓴ ꓞꓳ ꓟꓯꓼ ꓠꓬ꓾ ꓬꓰ-ꓢꓴ ꓬꓰ ꓗꓷ ꓟ ꓔꓯꓸ ꓟꓳꓸ ꓢꓷꓸ ꓙ ꓟꓳ ꓙˍ ꓡꓳ꓿ 18 ꓞꓳ ꓜꓴ ꓞꓳ ꓟꓯꓼ ꓡꓰ ꓬꓰ-ꓢꓴ ꓔꓯ ꓞꓵ ꓡ ꓟ ꓠꓬ꓾ ꓬꓲ ꓡꓰ ꓢꓷꓸ ꓡꓰ ꓓꓴ ꓕꓱ ꓟ ꓬꓰ ꓗꓷ ꓟ ꓔꓯ ꓬꓲ ꓪꓽ ꓑ ꓙꓽ ꓗꓷ ꓠꓬꓲ ꓥ ꓡꓳ꓿ 19 ꓖꓳ ꓡꓱ ꓠꓬꓲ ꓒ-ꓡꓲ-ꓢꓷ ꓐꓴ ꓠꓬ꓾ ꓣꓳ ꓮ ꓡꓲ ꓬꓰ ꓟꓽ ꓐ ꓡꓺꓳ꓿ ꓠꓴ ꓪꓽ ꓡꓳꓸ ꓠꓬꓲ꓾ ꓕꓲ ꓟꓵꓽ ꓕꓲ ꓡꓳꓻ ꓢꓴ ꓬꓲ ꓔꓯ ꓛꓳ ꓙꓰꓳ꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 20 ꓑꓮꓲ ꓬꓰˍ ꓟ ꓦꓬꓼ ꓠꓬꓲ ꓗꓪ ꓪꓴꓸ ꓓꓵ ꓕꓱꓼˍ ꓐꓰ ꓓꓯ ꓙꓰ ꓢꓴ ꓗꓳ ꓡꓳ ꓗꓪ꓾ ꓦꓲ-ꓡꓲ ꓡ ꓞꓳ ꓕꓲ ꓐꓱ ꓙꓳˍ ꓡꓳ꓿ 21 ꓕꓱ ꓕꓲ ꓧꓳꓽ ꓟ ꓠꓬ ꓖ-ꓡꓲ-ꓡꓲ ꓟꓵ ꓗꓪ ꓟ ꓐꓱ-ꓢꓰ-ꓓ ꓢꓴ ꓒꓲ-ꓡꓲ ꓔꓯ ꓡ ꓢꓲ꓾ ꓟꓸ ꓒꓽꓳ꓾ ꓥꓪ ꓠꓴꓽ ꓠꓬ ꓬꓰ-ꓢꓴ ꓔꓯ ꓟꓳ ꓠꓲꓹ ꓫꓵˍ ꓡꓳ꓾ ꓐꓯˍ ꓡꓳ꓿ 22 ꓖꓳ ꓕꓯ ꓒꓲ-ꓡꓲ ꓠꓬ ꓯ-ꓓꓱ-ꓣꓴ ꓔꓯ ꓐꓯ ꓖꓶ ꓙꓰˍ ꓡꓳ꓿ ꓯ-ꓓꓱ-ꓣꓴ ꓠꓬ ꓒꓲ-ꓡꓲˍ ꓐꓰ ꓕꓲ ꓛꓳꓺꓼ ꓡꓻ ꓢꓲ꓾ ꓬꓰ-ꓢꓴ ꓔꓯ ꓐꓯ ꓖꓶˍ ꓡꓳ꓿ 23 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓡ-ꓞꓳ-ꓮ-ꓐꓲ ꓟꓬꓱ ꓓꓳꓽ ꓟꓶ ꓠꓹ ꓟ ꓬꓲ ꓙꓵꓹ ꓛꓲ ꓡꓺꓳ꓿ 24 ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓫꓪꓺ ꓫꓵꓸ ꓕꓲ ꓢꓶꓽ ꓠꓬ ꓟꓲ ꓠꓯ ꓠꓯꓸꓼ ꓞꓰꓻ ꓓꓵꓽ ꓡꓰ ꓢꓲ ꓟꓽ ꓫꓵꓻ ꓠꓬ꓾ ꓬꓲ ꓕꓲ ꓢꓶꓽˍ ꓡꓰꓽ ꓓꓹ ꓡꓳ꓿ ꓖꓳ ꓡꓱ ꓥ ꓟꓲ ꓫꓪ ꓫꓵꓸ ꓖꓳ ꓟ ꓫꓵꓻ ꓕꓯ ꓠꓽ ꓬꓲ ꓢꓶꓽ ꓮꓽ ꓟꓬꓹ ꓓꓱꓼ ꓡ ꓡꓳ꓿ 25 ꓚꓲꓸ ꓛꓬ ꓢꓯꓼ ꓟꓬ ꓔꓯ ꓗꓹ ꓐꓽ ꓢꓴ ꓠꓬ꓾ ꓢꓯꓼ ꓟꓬ ꓒꓲꓼ ꓬꓰˍ ꓥꓳ꓿ ꓟꓲ ꓠꓯ ꓕꓱ ꓟ ꓗꓪ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓟꓽ ꓗꓹ ꓐꓽ ꓢꓴ ꓠꓬ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓫ ꓔ ꓟꓶˍ ꓥꓳ꓿ 26 ꓥꓪ ꓔꓯ ꓣꓱꓽ ꓙ ꓠꓲꓹ ꓫꓵ ꓢꓴ ꓮꓽ ꓟˍ ꓟꓲ ꓥꓪ ꓔꓯ ꓛꓳ ꓡ ꓝꓲ꓿ ꓥꓪ ꓮ ꓡꓲ ꓗꓪ ꓔꓬ ꓠꓬ꓾ ꓥꓪ ꓔꓯ ꓣꓱꓽ ꓙ ꓢꓴˍ ꓟꓲ ꓖꓳ ꓗꓪ ꓔꓬ ꓟꓶˍ ꓥꓳ꓿ ꓮꓽ ꓟ ꓥ ꓟꓲ ꓥꓪ ꓔꓯ ꓣꓱꓽ ꓙˍ ꓠꓬ ꓐꓹ ꓐ ꓬꓲ ꓔꓯ ꓒꓵꓽˍ ꓥꓳ꓿ 27 ꓮ ꓟꓶ ꓥꓪ ꓠꓲꓹ ꓙꓽ ꓫꓸˍ ꓡꓳ꓿ ꓐꓹ ꓐꓽꓳ꓾ ꓕꓱ ꓕꓲ ꓙꓵꓹ ꓗꓪ ꓐꓰ ꓥꓪ ꓔꓯ ꓚꓬꓴ ꓓꓳ ꓡꓯ꓾ ꓐꓯ ꓠꓯꓹ ꓡ? ꓖꓳ ꓡꓱ ꓥ ꓟꓲ ꓕꓱ ꓕꓲ ꓙꓵꓹ ꓑꓶ ꓓꓴ ꓥꓪ ꓡ ꓟ ꓥ ꓡꓳ꓿ 28 ꓐ ꓐꓽꓳ꓾ ꓠꓴ ꓟꓬꓱ ꓓꓳꓽ ꓓꓳ ꓡ ꓝꓲ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬꓲ ꓟꓴꓽ ꓗꓪ ꓗꓪ ꓐꓰ ꓢꓯꓼ ꓕꓲ ꓟ ꓓꓳ ꓡ ꓢꓲ꓾ ꓥꓪ ꓟꓬꓱ ꓓꓳꓽ ꓓꓳ ꓡ ꓝꓲꓳ꓾ ꓝꓮꓲ ꓓꓳ ꓡ ꓝꓲˍ ꓢꓰꓽ ꓥꓳ꓾ ꓐꓯˍ ꓡꓳ꓿ 29 ꓬꓲ ꓒ ꓕꓲ ꓗꓪ ꓦꓰꓼ ꓞ ꓢꓲ ꓢꓯꓼ ꓖꓳ ꓟ ꓑ ꓙꓽˍ ꓟ ꓞꓳ ꓜꓴ ꓠꓬ꓾ ꓟꓴꓽ ꓖꓴ ꓟꓶˍ ꓡꓳ꓾ ꓐꓯˍ ꓡꓳ꓿ ꓠꓱꓸ ꓐꓯꓼ ꓕꓲ ꓐꓱ ꓠꓽ꓾ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓬꓲ ꓔꓯ ꓫꓸ ꓕꓱ ꓩꓴ ꓡ ꓡꓳ꓾ ꓐꓯˍ ꓡꓳ꓿ 30 ꓬꓰ-ꓢꓴ ꓡꓰ꓾ ꓢꓯꓼ ꓕꓱ ꓟ ꓠꓽ ꓥꓪ ꓐꓱ ꓶ ꓡꓻˍ ꓟ ꓟꓽ ꓥ꓾ ꓠꓴ ꓪꓽ ꓐꓱ ꓶ ꓥ ꓡꓳ꓿ 31 ꓮ ꓟꓶ ꓠꓬ ꓟꓲ ꓠꓯ ꓕꓱ ꓟ ꓔꓯ ꓐꓯ ꓟꓴ ꓘꓶꓽ ꓙꓵꓹ ꓥ ꓡꓳ꓿ ꓮ ꓟꓶ ꓠꓬ ꓟꓲ ꓠꓯ ꓕꓱ ꓟ ꓬꓲ ꓢꓲꓽ ꓒ ꓔꓯ ꓖꓼ ꓓꓳ ꓗꓷˍ ꓥꓳ꓿ 32 ꓖꓳ ꓡꓱ ꓢꓲ ꓥꓪ ꓔꓯ ꓟꓲ ꓠꓯ ꓗꓪ ꓐꓰ ꓔꓳꓹ ꓔꓴ ꓗꓷ ꓠꓬ꓾ ꓥꓪ ꓡꓰ ꓥꓪ ꓔꓬ ꓗꓪ ꓮꓽ ꓙꓵ ꓢꓴ ꓔꓯ ꓚꓵꓹ ꓧꓳꓽ ꓡ ꓥꓳ꓾ ꓐꓯˍ ꓡꓳ꓿ 33 ꓬꓰ-ꓢꓴ ꓕꓱ ꓡꓱ ꓐꓯˍ ꓟ ꓠꓬ꓾ ꓬꓲ ꓮ ꓡꓲ ꓐꓰ ꓫꓵꓻ ꓠꓹ ꓟ ꓐꓯ ꓟꓳꓸ ꓖꓶˍ ꓟ ꓥ ꓡꓳ꓿ 34 ꓖꓳ ꓡꓱ ꓠꓬꓲ ꓞꓳ ꓜꓴꓻ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓙꓲ-ꓢꓴ ꓠꓽ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓥꓳ꓾ ꓐꓰ ꓙꓵꓽ ꓗ ꓕꓳ ꓶ ꓗꓪ ꓐꓰ ꓥꓪ ꓠꓴꓽ ꓢꓷꓸˍ ꓡꓳ꓿ ꓠꓴ ꓠꓬ ꓮ ꓡꓲ ꓗꓹ ꓠꓬꓲ꓾ ꓡ-ꓞꓳ-ꓮ-ꓐꓲ ꓔꓯ ꓔꓳꓹ ꓔꓴ ꓗꓷ ꓠ ꓗꓹ ꓡꓳ꓾ ꓐꓰ ꓐꓯˍ ꓡ? ꓡ-ꓞꓳ-ꓮ-ꓐꓲ ꓕꓱ ꓟ ꓮꓽ ꓟ ꓥ ꓡ?꓾ ꓐꓯˍ ꓡꓳ꓿ 35 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓬꓲ ꓟꓳ ꓓꓴ ꓠꓬ ꓠꓴ ꓪꓽˍ ꓐꓰ ꓕꓲ ꓑꓹ ꓤ ꓔꓬ ꓢꓰꓽ ꓡꓳ꓿ ꓠꓯ ꓞꓲꓹ ꓟ ꓠꓴ ꓪꓽ ꓔꓯ ꓟꓽ ꓖꓼ ꓟꓶ ꓠꓹ ꓟ꓾ ꓠꓬꓲ ꓟꓳ ꓓꓴ ꓠꓴ ꓪꓽˍ ꓐꓰ ꓔꓬ ꓕꓯˍ ꓡꓰ ꓙ ꓖꓴ ꓫꓱꓽ꓿ ꓠꓯ ꓞꓲꓹ ꓟ ꓗꓪ ꓫꓱꓽ ꓢꓴ ꓠꓬ ꓮ ꓡꓲ ꓔꓯꓸ ꓟꓳꓸ ꓙꓰˍ ꓟ ꓬꓲ ꓟꓽ ꓢꓷ꓿ 36 ꓠꓴ ꓪꓽ ꓠꓬ ꓠꓬꓲ ꓟꓳ ꓓꓴ ꓬꓲ ꓤ ꓠꓱ ꓒꓬꓱꓼ ꓡ ꓠꓹ ꓟ꓾ ꓠꓬꓲ ꓟꓳ ꓓꓴ ꓙꓳˍ ꓕꓯ ꓡꓰ ꓠꓬꓲ ꓟꓳ ꓓꓴ ꓔꓯ ꓙꓵꓻ꓾ ꓐꓯˍ ꓡꓳ꓿ ꓬꓰ-ꓢꓴ ꓕꓱ ꓟꓬ ꓙꓰꓽ ꓐꓯ ꓗꓷ ꓠꓬ꓾ ꓬꓲ ꓪꓽ ꓗꓪ ꓐꓰ ꓑꓬꓺ ꓙꓰˍ ꓡꓳ꓿ 37 ꓬꓰ-ꓢꓴ ꓠꓬ ꓬꓲ ꓪꓽ ꓒꓬꓱꓽ ꓕꓯ ꓗꓪ ꓓꓵꓽ ꓙ ꓟꓶˍ ꓟ ꓢꓷꓸ ꓡꓰ ꓓꓴ ꓕꓱ ꓟꓬ ꓬꓰ ꓖꓶˍ ꓟꓲ꓾ ꓬꓲ ꓪꓽ ꓠꓬ ꓬꓲ ꓔꓯ ꓙꓵꓻ ꓟꓽ ꓫꓳꓻ꓿ 38 ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓡꓰ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓚˍ ꓟ ꓓꓳꓽ ꓔꓯ ꓮꓽ ꓟ ꓙꓵꓻˍ ꓡ? ꓢꓲ ꓒ ꓬꓲ ꓪꓽ ꓠꓬꓲˍ ꓟ ꓡꓯꓼ ꓪꓵꓼ ꓮꓽ ꓟ ꓔꓯ ꓟꓳꓸ ꓖꓶ ꓡ ꓠꓬꓲˍ ꓡ?꓾ ꓐꓯˍ ꓟ ꓔꓯ ꓐꓲ ꓡ ꓝꓲ ꓠꓹ ꓟ ꓥ ꓡꓳ꓿ 39 ꓕꓱ ꓟ ꓑꓶ ꓓꓴ ꓬꓲ ꓪꓽ ꓙꓵꓻ ꓟꓽ ꓐ ꓡ꓿ ꓝꓮꓲ ꓬꓲ-ꓢ-ꓬ ꓡꓰ꓾ 40 ꓪꓴ-ꓢ ꓡꓰ ꓬꓲ ꓪꓽ ꓡꓳꓸ ꓟꓽ ꓓꓳ ꓡ ꓠꓹ ꓟ ꓟꓬ ꓢꓶ ꓔꓶꓺ ꓡꓰ ꓝꓲꓳ꓾ ꓬꓲ ꓪꓽ ꓟꓽ ꓙ ꓜꓲꓼ ꓠꓹ ꓟ ꓠꓲꓹ ꓟ ꓔꓯꓽ ꓡꓰ ꓝꓲꓳ꓿ ꓟꓽ ꓥ ꓠꓬ ꓬꓲ ꓪꓽ ꓟꓬ ꓢꓶꓽ ꓡꓳꓸ ꓟꓳ ꓢꓲ꓾ ꓠꓲꓹ ꓟ ꓗꓪ ꓙꓽ ꓜꓲꓼ ꓡꓰ ꓢꓲ ꓠꓬꓲ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓬ꓾ ꓥꓪ ꓡꓰ ꓬꓲ ꓪꓽ ꓔꓯ ꓫꓬꓹ ꓓꓻ ꓡꓰ ꓝꓲˍ ꓡꓳ ꓫꓵꓽ ꓥꓳ꓾ ꓐꓰ ꓐꓯˍ ꓡꓳ꓿ 41 ꓬꓲ-ꓢ-ꓬ ꓠꓬ ꓬꓲ ꓟꓬꓱꓺ ꓓꓳꓽ ꓟꓳꓻ ꓗꓷ ꓠꓬꓲ ꓬꓲ ꓔꓯ ꓖꓴꓺ ꓢꓲ ꓕꓱ ꓟꓬ ꓙꓰꓽ ꓐꓯ ꓗꓷ ꓟ ꓥꓳ꓿ 42 ꓖꓳ ꓡꓱ ꓥ ꓟꓲ ꓢꓲꓽ ꓒ ꓐꓴ ꓗꓪ ꓟ ꓡ ꓞꓳˍ ꓮꓽ ꓟꓬꓹ ꓣꓳ ꓠꓬ ꓬꓲ ꓔꓯ ꓙꓵˍ ꓡꓳ꓿ ꓬꓲˍ ꓡꓰ ꓒ-ꓡꓲ-ꓢꓷ ꓐꓴ ꓔꓯ ꓙꓳꓺ ꓢꓲ꓾ ꓜꓲꓼ ꓦꓲ ꓗꓪ ꓐꓰ ꓖꓼ ꓓꓳ ꓗꓷ ꓡ ꓟ ꓔꓯ ꓗꓳꓺ ꓚꓱ ꓠꓬꓲ꓾ ꓬꓲ ꓪꓽ ꓠꓬ ꓬꓲ ꓔꓯ ꓙꓵꓻ ꓢꓴ ꓥ ꓟ ꓟꓽ ꓣꓷꓠꓸ꓿ 43 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓪꓴ-ꓢ ꓡꓰ ꓫꓱꓸ ꓖꓶ ꓡ ꓟ ꓔꓯ ꓠꓵˍ ꓟ ꓢꓶꓸ ꓟꓽ ꓞꓲ꓾ ꓞꓳ ꓤ ꓡꓰ ꓫꓱꓸ ꓖꓶ ꓡ ꓟ ꓔꓯ ꓠꓵˍ ꓡꓳ꓿ 44 ꓖꓳ ꓡꓱ ꓠꓬ ꓬꓰ-ꓢꓴ ꓘꓴꓻ ꓢꓲ ꓕꓱ ꓡꓱ ꓐꓯˍ ꓡꓳ꓿ ꓥꓪ ꓔꓯ ꓙꓵꓻ ꓢꓴ ꓠꓬ ꓥꓪ ꓔꓯ ꓙꓵꓻˍ ꓟ ꓟꓽ ꓥ꓾ ꓥꓪ ꓔꓯ ꓝꓲ ꓩꓴ ꓡ ꓢꓴ ꓖꓳ ꓕꓲ ꓣꓳ ꓔꓯ ꓙꓵꓻˍ ꓟ ꓥ ꓡꓳ꓿ 45 ꓥꓪ ꓔꓯ ꓟꓳ ꓢꓴˍ ꓟꓲ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓟꓳˍ ꓟ ꓥꓳ꓿ 46 ꓥꓪ ꓔꓯ ꓙꓵꓻ ꓢꓴ ꓮꓽ ꓟˍ ꓟꓲ ꓠꓯ ꓞꓲꓹ ꓟ ꓗꓪ ꓔꓬ ꓟꓽ ꓛꓵ ꓠꓹ ꓟ꓾ ꓥꓪ ꓠꓬ ꓠꓬꓲ ꓟꓳ ꓓꓴˍ ꓡꓰ ꓐꓰ ꓟꓲ ꓠꓯ ꓗꓪ ꓡ ꓟ ꓥ ꓡꓳ꓿ 47 ꓮꓽ ꓟ ꓥ ꓟꓲ ꓥꓪ ꓐꓯ ꓘꓶ ꓑ ꓙꓽ ꓢꓲ ꓟꓽ ꓒꓵꓽ ꓛꓳ ꓠꓬ꓾ ꓥꓪ ꓬꓲ ꓔꓯ ꓐꓯ ꓟꓴ ꓟꓽ ꓘꓶꓽ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓟꓲ ꓠꓯ ꓡ ꓞꓳ ꓔꓯ ꓐꓯ ꓟꓴ ꓘꓶꓽˍ ꓐꓰ ꓡꓻ ꓟ ꓟꓽ ꓥ꓿ ꓬꓲ ꓪꓽ ꓔꓯ ꓢꓯꓼ ꓟꓬ ꓝ ꓖꓶˍ ꓐꓰ ꓡꓻ ꓟ ꓥ ꓡꓳ꓿ 48 ꓥꓪˍ ꓐꓰ ꓥꓪ ꓐꓯ ꓘꓶ ꓔꓯ ꓟꓽ ꓘꓳ ꓣꓴ ꓢꓴ ꓔꓯ ꓐꓯ ꓟꓴ ꓘꓶꓽ ꓢꓴ ꓕꓲ ꓣꓳ ꓙꓳˍ ꓡꓳ꓿ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ꓾ ꓥꓪ ꓐꓯˍ ꓟ ꓐꓯ ꓘꓶꓽ ꓖꓳ ꓟ ꓡꓰ ꓬꓲ ꓪꓽ ꓔꓯ ꓐꓯ ꓟꓴ ꓘꓶꓽˍ ꓥꓳ꓿ 49 ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓚꓲꓸ ꓛꓬ ꓗꓪ ꓐꓰ ꓫꓸ ꓕꓱˍ ꓟ ꓟꓽ ꓥ꓿ ꓥꓪ ꓔꓯ ꓝꓲ ꓩꓴ ꓡ ꓢꓴ ꓐꓹ ꓐ ꓡꓰ꓾ ꓥꓪ ꓮꓸ ꓫꓵ ꓐꓯ ꓠꓯꓹ ꓟ ꓐꓰ꓾ ꓥꓪ ꓮꓸ ꓫꓵ ꓫꓸ ꓕꓱ ꓠꓯꓹ ꓟ ꓥꓪ ꓔꓯ ꓕꓵꓼ ꓪ ꓖꓶ ꓔ ꓡꓳ꓿ 50 ꓬꓲ ꓕꓵꓼ ꓪ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓥ ꓟ ꓥꓪ ꓢꓷˍ ꓡꓳ꓿ ꓖꓳ ꓡꓱ ꓠꓬꓲ ꓥꓪ ꓠꓽ ꓐꓹ ꓐ ꓡꓰ ꓥꓪ ꓔꓯ ꓐꓯ ꓖꓶ ꓡ ꓟˍ ꓡꓰꓽ ꓥꓪ ꓫꓸ ꓕꓱˍ ꓡꓳ꓾ ꓐꓯˍ ꓡꓳ꓿

ꓬꓳ-ꓦ 13

1 ꓦꓲ-ꓘꓳ-ꓑꓮꓲ ꓟꓽ ꓬꓰ ꓧꓶꓸ ꓕꓯˍ ꓡꓰ꓾ ꓬꓰ-ꓢꓴ ꓠꓬ ꓟꓲ ꓠꓯ ꓗꓪ ꓐꓰ ꓓꓳ ꓙꓰ ꓢꓲ꓾ ꓐꓹ ꓐ ꓔꓯ ꓙꓰ ꓠꓹ ꓟ ꓬꓲ ꓙꓵꓹ ꓛꓲ ꓡ ꓟ ꓢꓷꓸ ꓠꓬꓲ꓾ ꓟꓲ ꓠꓯ ꓗꓪ ꓟ ꓬꓲ ꓚꓲꓸ ꓛꓬ ꓡ ꓞꓳ ꓔꓯ ꓬꓲ ꓠꓲꓹ ꓠꓵ ꓢꓲ꓾ ꓡꓳꓹ ꓬꓰ ꓗꓪ ꓛꓲ ꓬꓲ ꓡꓰ ꓬꓲ ꓪꓽ ꓔꓯ ꓮ ꓘꓶ ꓛꓲ ꓠꓲꓹ ꓠꓵˍ ꓟ ꓟꓳꓸ ꓖꓶˍ ꓡꓳ꓿ 2 ꓠꓲꓽ ꓪ ꓔꓲ ꓡꓰ ꓢꓲ-ꓟꓴ ꓬꓲ ꓤ ꓘ-ꓡꓲꓳ ꓬꓴ-ꓓ ꓠꓲꓹ ꓟ ꓗꓪ꓾ ꓬꓰ-ꓢꓴ ꓔꓯ ꓪꓴꓽ ꓜꓽ ꓗꓷ ꓠ ꓟ ꓚꓴꓽ ꓬꓲꓹ ꓧꓶꓸ ꓕꓯˍ ꓡꓰ ꓧꓳꓽ ꓔ ꓠꓬꓲ꓾ ꓟꓶꓼ ꓘꓶꓼ ꓜ ꓜꓽ ꓔꓬ ꓕꓯ ꓬꓰ-ꓢꓴ ꓠꓬ꓾ 3 ꓐꓹ ꓐ ꓡꓰ ꓙꓳˍ ꓟ ꓥ ꓕ ꓑꓳꓸ ꓬꓲ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓔ ꓟ ꓐꓰ꓾ ꓬꓲ ꓠꓬ ꓪꓴ-ꓢ ꓔꓯꓺˍ ꓐꓰ ꓓꓳ ꓡ ꓟ ꓥ ꓢꓲ꓾ ꓪꓴ-ꓢ ꓔꓯ ꓬꓲꓼ ꓙꓰ ꓠ ꓗꓹ ꓟ ꓢꓷˍ ꓠꓬꓲ꓾ 4 ꓟꓶꓼ ꓘꓶꓼ ꓜ ꓜꓽˍ ꓟ ꓗꓪ ꓐꓰ ꓔꓴ ꓡ ꓢꓲ꓾ ꓬꓲ ꓐꓵ ꓞꓶꓽ ꓡꓵꓸ ꓗꓷ ꓢꓲ ꓠꓬꓲ꓾ ꓟꓶ ꓛ ꓕꓲ ꓡꓯꓼ ꓣꓴ ꓢꓲ ꓬꓲ ꓙꓴꓽ ꓝꓲꓸ ꓗꓪ ꓧꓷꓹˍ ꓡꓳ꓿ 5 ꓬꓲ ꓠꓬ ꓐꓯꓻ ꓗꓪ ꓬꓲꓻ ꓙꓬ ꓧꓳꓽ ꓢꓲ꓾ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓛꓲ ꓒꓯꓹ ꓞꓲꓽ ꓖꓶ ꓢꓲ ꓠꓬꓲ꓾ ꓬꓲ ꓧꓷꓹ ꓔ ꓟ ꓟꓶ ꓛ ꓖꓳ ꓟ ꓡꓰ ꓫꓵꓹ ꓖꓶˍ ꓡꓳ꓿ 6 ꓢꓲ-ꓟꓴ ꓒꓲ-ꓕꓱ ꓔꓯ ꓛꓲ ꓡ ꓠꓬ ꓬꓲ ꓡꓰ꓾ ꓢꓲ ꓒꓽꓳ꓾ ꓠꓴ ꓠꓬ ꓥꓪ ꓛꓲ ꓒꓯꓹ ꓞꓲꓽ ꓖꓶˍ ꓐꓯˍ ꓡ?꓾ ꓐꓯˍ ꓡꓳ꓿ 7 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓮꓸ ꓫꓵꓽ ꓬꓰˍ ꓟ ꓮ ꓟꓶ ꓠꓴ ꓟꓽ ꓢꓷ꓿ ꓖꓳ ꓡꓱ ꓥ ꓟꓲ ꓗꓸ ꓠꓯꓸ ꓠꓬ ꓠꓴ ꓙ ꓜꓲꓼ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿ 8 ꓒꓲ-ꓕꓱ ꓡꓰ ꓬꓲ ꓔꓯ꓾ ꓮ ꓡꓲ ꓥ ꓟꓲ ꓠꓴ ꓔꓯ ꓠꓬ ꓥꓪ ꓛꓲ ꓒꓯꓹ ꓟꓽ ꓞꓲꓽ ꓝꓲ꓾ ꓐꓯˍ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓡꓰ ꓠꓴ ꓔꓯ ꓟꓽ ꓞꓲ ꓖꓶ ꓠꓬ꓾ ꓥꓪˍ ꓐꓰ ꓠꓴ ꓠꓬ ꓮꓸ ꓫꓵ ꓗꓴꓸ ꓙꓲꓽ ꓟꓽ ꓙꓳ ꓗꓷ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿ 9 ꓖꓳ ꓕꓯ ꓢꓲ-ꓟꓴ ꓒꓲ-ꓕꓱ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓖꓳ ꓡꓱ ꓥ ꓠꓬ ꓥꓪ ꓛꓲ ꓒꓯˍ ꓡꓰ ꓟꓽ ꓞꓲ꓾ ꓥꓪ ꓡꓯ ꓒꓯˍ ꓟꓲ ꓥꓪ ꓪꓴꓸ ꓓꓵˍ ꓟꓲ ꓞꓲꓽ ꓖꓶ ꓡꓯ꓾ ꓐꓯˍ ꓡꓳ꓿ 10 ꓬꓰ-ꓢꓴ ꓡꓰ ꓬꓲ ꓔꓯ꓾ ꓖꓳ ꓓꓱ ꓞꓲꓽ ꓔ ꓢꓴ ꓠꓬ꓾ ꓛꓲ ꓒꓯꓹ ꓞꓲꓽ ꓗꓷ ꓕꓯ ꓕꓲ ꓖꓳ ꓓꓱ ꓡꓱꓸꓼ ꓫꓬꓻ ꓡꓰˍ ꓥꓳ꓿ ꓠꓴ ꓪꓽ ꓗꓳ ꓡꓳ ꓗꓪ ꓟ ꓕꓲ ꓣꓳˍ ꓡꓰꓽ ꓟꓽ ꓥ ꓠꓬ ꓮꓽ ꓙꓵ ꓢꓴ ꓫꓬꓻˍ ꓡꓳ꓾ ꓐꓯˍ ꓡꓳ꓿ 11 ꓬꓲ ꓔꓯ ꓪꓴꓽ ꓜꓽ ꓗꓷ ꓠꓹ ꓟ ꓖꓳ ꓕꓲ ꓣꓳ ꓔꓯ ꓬꓲ ꓢꓷˍ ꓠꓬꓲ꓾ ꓠꓴ ꓪꓽ ꓗꓳ ꓡꓳ ꓗꓪ ꓕꓲ ꓣꓳˍ ꓡꓰꓽ ꓟꓽ ꓥ ꓠꓬ ꓮꓽ ꓙꓵ ꓢꓴ ꓫꓬꓻˍ ꓡꓳ꓾ ꓐꓯˍ ꓟ ꓥ ꓡꓳ꓿ 12 ꓬꓰ-ꓢꓴ ꓡꓰ ꓬꓲ ꓪꓽ ꓛꓲ ꓒꓯꓹ ꓞꓲꓽ ꓗꓷ ꓗꓸ ꓠꓯꓸ꓾ ꓬꓲ ꓐꓵ ꓞꓶ ꓖꓪꓽ ꓢꓲ ꓠꓬꓲꓸ ꓠꓸ ꓗꓷ ꓠꓬ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓮꓸ ꓫꓵ ꓬꓰ ꓖꓶ ꓗꓷ ꓟ ꓠꓴ ꓪꓽ ꓢꓷˍ ꓡ? 13 ꓠꓴ ꓪꓽ ꓠꓬ ꓥꓪ ꓔꓯ꓾ ꓟꓸ ꓒˍ ꓐꓰ ꓢꓲ ꓒ ꓘꓴˍ ꓡꓳ꓿ ꓠꓴ ꓪꓽ ꓖꓳ ꓡꓱ ꓘꓴˍ ꓟ ꓠꓽ ꓘꓴ ꓬꓯꓼˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓖꓳ ꓡꓱ ꓥꓳ꓿ 14 ꓥꓪ ꓠꓬ ꓟꓸ ꓒˍ ꓐꓰ ꓢꓲ ꓒ ꓥ ꓢꓲ꓾ ꓠꓴ ꓪꓽ ꓛꓲ ꓒꓯꓹ ꓞꓲꓽ ꓖꓶˍ ꓠꓬ꓾ ꓠꓴ ꓪꓽˍ ꓟꓲ ꓛꓲ ꓒꓯꓹ ꓞꓲꓽ ꓖꓶ ꓡꓯꓽ ꓘꓳ ꓠꓯꓹ ꓡꓳ꓿ 15 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓥꓪ ꓬꓰ ꓖꓶˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓬꓰ ꓠꓹ ꓟ꓾ ꓥꓪ ꓡꓰ ꓠꓴ ꓪꓽ ꓐꓱ ꓶ ꓔꓯꓺ ꓢꓳ ꓓꓴ ꓬꓰ ꓟꓳꓸ ꓖꓶˍ ꓟ ꓥ ꓡꓳ꓿ 16 ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓚꓳ ꓑꓸ ꓠꓬ ꓬꓲ ꓢꓲ ꓒ ꓕꓯ ꓢꓲ ꓟꓽ ꓪꓴꓽ꓿ ꓝꓲ ꓓꓴˍ ꓟꓲ ꓬꓲ ꓔꓯ ꓝꓲ ꓢꓴ ꓕꓯ ꓢꓲ ꓟꓽ ꓪꓴꓽ꓿ 17 ꓕꓱ ꓟꓬ ꓙꓰꓽ ꓠꓴ ꓪꓽ ꓢꓷꓸ ꓢꓲ ꓬꓰˍ ꓠꓬ ꓶꓼ ꓙꓳ ꓫꓱꓹ ꓙꓳˍ ꓥꓳ꓿ 18 ꓠꓴ ꓪꓽ ꓮꓽ ꓙꓵ ꓡꓱꓸꓼ ꓔꓯ ꓐꓯˍ ꓟ ꓠꓽ ꓟꓽ ꓥ꓿ ꓥꓪ ꓡꓰ ꓢꓲ ꓔ ꓢꓴ ꓔꓯ ꓥꓪ ꓢꓷˍ ꓡꓳ꓿ ꓖꓳ ꓡꓱ ꓥ ꓟꓲ ꓢꓲꓽ ꓫꓬ ꓕꓳ ꓶ ꓗꓪ꓾ ꓥꓪ ꓜ ꓜꓽ ꓢꓴ ꓥꓪ ꓗꓪ ꓛꓳꓽ ꓬꓲ ꓛꓲ ꓟꓶ ꓓꓴ ꓡꓰ ꓥꓪ ꓔꓯ ꓑꓰꓹ ꓡ ꓡꓳ꓾ ꓐꓰ ꓐꓳ ꓔ ꓟ ꓐꓲ ꓡ ꓠꓹ ꓟ ꓥ ꓡꓳ꓿ 19 ꓖꓳ ꓡꓱ ꓗꓷ ꓡꓰ ꓕꓯ꓾ ꓥꓪ ꓠꓽ ꓙꓲ-ꓢꓴ ꓥ ꓟ ꓠꓴ ꓪꓽ ꓙꓵꓻ ꓠꓹ ꓟ꓾ ꓟꓽ ꓒꓬꓱꓼ ꓡ ꓕꓯˍ ꓡꓰ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓟ ꓥ ꓡꓳ꓿ 20 ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓡꓰ ꓝꓲ ꓩꓴ ꓗꓷ ꓢꓴ ꓔꓯ ꓘꓳ ꓣꓴ ꓢꓴ ꓠꓽ ꓥꓪ ꓔꓯ ꓘꓳ ꓣꓴˍ ꓟ ꓥ ꓡꓳ꓿ ꓥꓪ ꓔꓯ ꓘꓳ ꓣꓴ ꓢꓴ ꓠꓬ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓘꓳ ꓣꓴˍ ꓟ ꓥ ꓡꓳ꓾ ꓐꓯˍ ꓡꓳ꓿ 21 ꓬꓰ-ꓢꓴ ꓕꓱ ꓡꓱ ꓐꓯ ꓗꓷ ꓠꓬ꓾ ꓬꓲ ꓠꓲꓹ ꓙꓽ ꓫꓸ ꓠꓬꓲ ꓐꓰ ꓢꓷꓸ ꓙ ꓟꓳ ꓙ ꓢꓲ꓾ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓗꓪ ꓟ ꓕꓲ ꓣꓳ ꓡꓰ ꓥꓪ ꓔꓯ ꓪꓴꓽ ꓜꓽ ꓗꓷˍ ꓥꓳ꓾ ꓐꓯˍ ꓡꓳ꓿ 22 ꓛꓳꓽ ꓒꓯꓹ ꓐꓴ ꓠꓬ ꓬꓲ ꓮꓽ ꓟ ꓔꓯ ꓐꓯˍ ꓡꓳ ꓟꓽ ꓢꓷ ꓠꓬꓲ ꓡꓳꓸ ꓡꓯꓼ ꓘꓳˍ ꓡꓳ꓿ 23 ꓖꓳ ꓕꓯ ꓬꓰ-ꓢꓴ ꓠꓲꓹ ꓠꓵˍ ꓟ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓠꓬ ꓬꓰ-ꓢꓴ ꓒ ꓕꓲꓺꓼ ꓗꓪ ꓗꓳꓺ ꓔꓬ ꓡꓳ꓿ 24 ꓖꓳ ꓡꓱ ꓠꓬꓲ ꓢꓲ-ꓟꓴ ꓒꓲ-ꓕꓱ ꓡꓰ ꓬꓲ ꓔꓯ ꓟꓶꓻ ꓥꓳꓽ ꓡꓵ ꓢꓲ꓾ ꓬꓲ ꓮꓽ ꓟ ꓔꓯ ꓐꓯˍ ꓟ ꓥꓪ ꓠꓴꓽ ꓔꓯ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ 25 ꓬꓲ ꓠꓬ ꓬꓲ ꓖꓳ ꓡꓱ ꓬꓰ-ꓢꓴ ꓒ ꓕꓲꓺꓼ ꓗꓪ ꓗꓳꓺ ꓞ ꓢꓲ꓾ ꓢꓲ ꓒꓽꓳ꓾ ꓮꓽ ꓟ ꓥ ꓡ? ꓐꓰ ꓠ ꓠꓬꓲˍ ꓡꓳ꓿ 26 ꓖꓳ ꓡꓱ ꓠꓬ ꓬꓰ-ꓢꓴ ꓒꓳꓹ ꓖꓶ ꓢꓲ꓾ ꓥꓪ ꓡꓰ ꓑ ꓑ ꓕꓲ ꓘꓶ ꓜꓽ ꓓꓴ ꓔꓲꓹ ꓢꓲ꓾ ꓮꓽ ꓟ ꓔꓯ ꓖꓶ ꓜꓽˍ ꓠꓬ ꓖꓳ ꓟ ꓥꓳ꓾ ꓐꓯ ꓢꓲ꓾ ꓬꓲ ꓡꓰ ꓑ ꓑ ꓮ ꓔꓲꓸ ꓤ ꓔꓲꓹ ꓗꓷ ꓠꓬ꓾ ꓘ-ꓡꓲꓳ ꓢꓲ-ꓟꓴ ꓬꓲ ꓤ ꓬꓴ-ꓓ ꓔꓯ ꓖꓶˍ ꓡꓳ꓿ 27 ꓑ ꓑ ꓖꓳ ꓟ ꓬꓴ-ꓓ ꓣꓴ ꓜꓽ ꓗꓷ ꓠꓬ ꓢ-ꓓꓯ ꓬꓲ ꓔꓯ ꓓꓵꓽ ꓡꓰꓳ꓿ ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓮꓸ ꓫꓵ ꓬꓰˍ ꓐꓯ ꓠꓬ ꓮꓸ ꓟꓲꓸ ꓬꓰ꓾ ꓐꓯ ꓖꓶˍ ꓡꓳ꓿ 28 ꓬꓰ-ꓢꓴ ꓡꓰ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓕꓱ ꓡꓱ ꓐꓯˍ ꓟ ꓔꓯ꓾ ꓜ ꓜꓽˍ ꓐꓰ ꓗꓳꓺ ꓔꓬ ꓢꓴ ꓕꓲ ꓣꓳˍ ꓟꓲ ꓟꓽ ꓢꓷ꓿ 29 ꓬꓴ-ꓓ ꓠꓽ ꓒꓴ ꓫ ꓢꓴ ꓥ ꓠꓬꓲ꓾ ꓑꓮꓲ ꓬꓰˍ ꓟ ꓗꓪ ꓣꓱꓽ ꓬꓯꓼˍ ꓟ ꓖꓴꓽ ꓙꓴꓽ ꓪꓴꓻ ꓬꓰ ꓠꓹ ꓟ꓾ ꓥ ꓠꓬ ꓞꓳ ꓫꓸ ꓔꓯ ꓕꓲ ꓫꓵꓽ ꓖꓶ ꓠꓹ ꓟ꓾ ꓬꓰ-ꓢꓴ ꓡꓰ ꓬꓲ ꓔꓯ ꓐꓯ ꓖꓶˍ ꓟ ꓥ ꓡꓳ꓾ ꓐꓰ ꓓꓵꓽ ꓙꓽ ꓢꓴ ꓕꓲ ꓐꓱ ꓙꓳˍ ꓡꓳ꓿ 30 ꓖꓳ ꓡꓱ ꓠꓬ ꓑ ꓑ ꓖꓳ ꓟ ꓬꓲ ꓣꓴ ꓟꓶ ꓡꓰ ꓗꓸ ꓠꓯꓸ ꓬꓲ ꓞꓼ ꓐꓰ ꓓꓳ ꓙꓰˍ ꓡꓳ꓿ ꓖꓳ ꓕꓯ ꓠꓬ ꓢ ꓘꓪ ꓥ ꓡꓳ꓿ 31 ꓬꓲ ꓓꓳ ꓙꓰ ꓗꓸ ꓠꓯꓸ ꓬꓰ-ꓢꓴ ꓡꓰ꓾ ꓮ ꓟꓶ ꓡ-ꓞꓳ-ꓮ-ꓐꓲ ꓟꓬꓱ ꓓꓳꓽ ꓓꓳ ꓡꓺꓳ꓿ ꓪꓴ-ꓢˍ ꓟꓲ ꓬꓲ ꓗꓪ ꓐꓰ ꓟꓬꓱ ꓓꓳꓽ ꓟꓶˍ ꓥꓳ꓿ 32 ꓪꓴ-ꓢ ꓠꓬ ꓡ-ꓞꓳ-ꓮ-ꓐꓲ ꓗꓪ ꓐꓰ ꓟꓬꓱ ꓓꓳꓽ ꓟꓶ ꓐꓷˍ ꓠꓬ꓾ ꓪꓴ-ꓢ ꓡꓰ ꓬꓲ ꓔꓯˍ ꓟꓲ ꓟꓬꓱ ꓓꓳꓽ ꓖꓶˍ ꓥꓳ꓿ ꓠꓲꓹ ꓞ ꓬꓲ ꓔꓯ ꓟꓬꓱ ꓓꓳꓽ ꓖꓶ ꓡ ꓥꓳ꓿ 33 ꓤ ꓠꓱ ꓤ ꓐꓴꓳ꓾ ꓥꓪ ꓠꓬ ꓠꓴ ꓪꓽˍ ꓐꓰ ꓕꓲ ꓑꓹ ꓤ ꓡꓰꓽ ꓔꓬ ꓥꓳ꓿ ꓠꓴ ꓪꓽ ꓥꓪ ꓔꓯ ꓧꓪˍ ꓥꓳ꓿ ꓥꓪ ꓙꓰˍ ꓟ ꓗꓪ ꓠꓴ ꓪꓽ ꓙꓰ ꓟꓽ ꓐ ꓡ꓾ ꓐꓰ ꓬꓴ-ꓔ ꓡ ꓞꓳ ꓔꓯ ꓥꓪ ꓐꓯ ꓗꓷ ꓟ ꓡꓰ ꓐꓰ꓾ ꓮ ꓟꓶ ꓠꓴ ꓪꓽ ꓔꓯˍ ꓟꓲ ꓥꓪ ꓐꓯˍ ꓥꓳ꓿ 34 ꓠꓴ ꓪꓽ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ꓾ ꓕꓵꓼ ꓪ ꓬꓲ ꓫꓵꓼ ꓕꓲ ꓘꓶꓽ ꓠꓴ ꓪꓽ ꓔꓯ ꓥꓪ ꓖꓶˍ ꓥꓳ꓿ ꓠꓴ ꓪꓽ ꓔꓯ ꓥꓪ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓠꓲꓹ ꓠꓵ ꓡꓯꓽ ꓘꓳ꓿ 35 ꓠꓴ ꓪꓽ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳˍ ꓠꓬ꓾ ꓕꓱ ꓟ ꓗꓪ ꓐꓰ ꓠꓴ ꓪꓽ ꓠꓽ ꓥꓪ ꓢꓲꓺ ꓤ ꓥ ꓟ ꓞꓳ ꓤ ꓮꓽ ꓙꓵ ꓢꓷꓸ ꓡꓰˍ ꓥꓳ꓾ ꓐꓯˍ ꓡꓳ꓿ 36 ꓢꓲ-ꓟꓴ ꓒꓲ-ꓕꓱ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓠꓴ ꓮ ꓡꓲ ꓗꓪ ꓙꓰˍ ꓐꓯˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓙꓰˍ ꓟ ꓗꓪ ꓠꓬ ꓮ ꓟꓶ ꓠꓴ ꓥꓪ ꓔꓯ ꓛꓳꓻ ꓙꓰ ꓟꓽ ꓐ ꓡ꓿ ꓖꓳ ꓡꓱ ꓥ ꓟꓲ ꓗꓸ ꓠꓯꓸ ꓠꓬ ꓠꓴ ꓛꓳꓻ ꓡ ꓥꓳ꓾ ꓐꓯ ꓖꓶˍ ꓡꓳ꓿ 37 ꓒꓲ-ꓕꓱ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓮ ꓡꓲ ꓗꓷ ꓡꓰ ꓠꓬꓲ ꓮ ꓟꓶ ꓠꓴ ꓔꓯ ꓥꓪ ꓛꓳ ꓙꓰ ꓟꓽ ꓐ ꓡ ꓡ? ꓠꓴ ꓐꓱ ꓶ ꓥꓪ ꓢꓯꓼ ꓟꓬˍ ꓟꓲ ꓖꓶ ꓠꓲꓹ ꓫꓵˍ ꓡꓳ ꓫꓵꓽ ꓥꓳ꓾ ꓐꓯˍ ꓡꓳ꓿ 38 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓐꓱ ꓶ ꓠꓴ ꓢꓯꓼ ꓟꓬ ꓖꓶꓽ ꓗꓷˍ ꓐꓯˍ ꓡ? ꓥꓪ ꓔꓱꓹ ꓔꓱꓹꓼ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓮꓸ Bꓸ ꓒꓽ ꓟꓽ ꓐꓵ ꓢꓰ ꓕꓯˍ ꓡꓰ꓾ ꓠꓴ ꓥꓪ ꓔꓯ ꓟꓽ ꓣꓷꓠꓸ ꓟ ꓢ ꓧꓪꓹ ꓗꓷ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿

ꓬꓳ-ꓦ 14

1 ꓠꓴ ꓪꓽ ꓠꓲꓹ ꓟ ꓕꓽ ꓙꓽ ꓫ꓾ ꓪꓴ-ꓢ ꓔꓯ ꓙꓵꓻ꓾ ꓥꓪ ꓔꓯˍ ꓟꓲ ꓙꓵꓻ꓿ 2 ꓥꓪ ꓐꓹ ꓐ ꓦꓲ ꓗꓪ ꓠꓬ ꓔꓬ ꓖꓴ ꓮꓽ ꓟꓬꓹ ꓙꓳˍ ꓡꓳ꓿ ꓬꓲ ꓖꓳ ꓡꓱ ꓔꓬ ꓖꓴ ꓟꓽ ꓙꓳˍ ꓕꓯ ꓠꓽ꓾ ꓠꓴ ꓪꓽ ꓔꓯ ꓥꓪ ꓧꓶꓸ ꓕꓯˍ ꓡꓰ ꓐꓯ ꓖꓶˍ ꓡꓳ ꓫꓵꓽ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓠꓴ ꓪꓽ ꓐꓱ ꓶ ꓔꓬ ꓖꓴ ꓫꓬꓹ ꓖꓶˍ ꓐꓰ ꓙꓰˍ ꓟ ꓥ ꓡꓳ꓿ 3 ꓥꓪ ꓙꓰ ꓢꓲ ꓠꓴ ꓪꓽ ꓐꓱ ꓶ ꓔꓬ ꓖꓴ ꓫꓬꓹ ꓓꓳ ꓡꓰ ꓠꓬ꓾ ꓥꓪ ꓝꓮꓲ ꓕꓲ ꓧꓪꓹ ꓡ ꓢꓲ꓾ ꓠꓴ ꓪꓽ ꓔꓯ ꓘꓳ ꓣꓴ ꓢꓲ ꓠꓬꓲ꓾ ꓥꓪ ꓮ ꓡꓲ ꓗꓪ ꓔꓬ ꓠꓬ ꓠꓴ ꓪꓽ ꓟꓲ ꓖꓳ ꓗꓪ ꓔꓬ ꓟꓶˍ ꓥꓳ꓿ 4 ꓥꓪ ꓔꓬ ꓖꓴ ꓗꓪ ꓛꓲ ꓬꓰˍ ꓟ ꓙ ꓖꓴ ꓠꓴ ꓪꓽ ꓢꓷˍ ꓡꓳ꓾ ꓐꓯˍ ꓡꓳ꓿ 5 ꓕꓳ-ꓟ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓠꓴ ꓮ ꓡꓲ ꓗꓪ ꓙꓰˍ ꓟ ꓥꓪ ꓠꓴꓽ ꓟꓽ ꓢꓷꓸ꓿ ꓙ ꓖꓴˍ ꓟꓲ ꓥꓪ ꓠꓴꓽ ꓟꓽ ꓢꓷ꓾ ꓐꓯˍ ꓡꓳ꓿ 6 ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓠꓽ ꓙ ꓖꓴˍ ꓐꓰ ꓔꓱꓹ ꓚꓵˍ ꓟ ꓐꓰ ꓢꓯꓼ ꓟꓬ ꓥ ꓡꓳ꓿ ꓥꓪ ꓗꓪ ꓐꓰ ꓟꓽ ꓥ ꓠꓬ ꓐꓹ ꓐ ꓔꓯ ꓡ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓿ 7 ꓠꓴ ꓪꓽ ꓠꓬ ꓥꓪ ꓔꓯ ꓢꓷꓸˍ ꓠꓬꓲ꓾ ꓥꓪ ꓐꓹ ꓐ ꓔꓯˍ ꓟꓲ ꓠꓴ ꓪꓽ ꓢꓷꓸ ꓡꓰˍ ꓥꓳ꓿ ꓕꓱ ꓡꓱ ꓖꓳ ꓑꓳ ꓠꓴ ꓪꓽ ꓬꓲ ꓔꓯ ꓢꓷˍ ꓟꓲ ꓢꓷˍ ꓡꓳ꓾ ꓟꓳˍ ꓟꓲ ꓟꓳ ꓠꓬꓲꓳ꓾ ꓐꓯˍ ꓡꓳ꓿ 8 ꓒꓲ-ꓡꓲ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓐꓹ ꓐ ꓥꓪ ꓠꓴꓽ ꓔꓯ ꓟꓳꓸ ꓖꓶ ꓡꓯ꓿ ꓖꓳ ꓡꓱ ꓠꓬ ꓥꓪ ꓠꓴꓽ ꓠꓽ ꓠꓲꓹ ꓘꓪꓽ ꓫꓵˍ ꓥꓳ꓾ ꓐꓯˍ ꓡꓳ꓿ 9 ꓬꓰ-ꓢꓴ ꓡꓰ ꓬꓲ ꓔꓯ꓾ ꓒꓲ-ꓡꓲꓳ꓾ ꓥꓪ ꓠꓬ ꓠꓴˍ ꓐꓰ ꓕꓱ ꓟꓶ ꓛꓲ ꓔꓬ ꓗꓷˍ ꓟꓲ ꓠꓴ ꓥꓪ ꓔꓯ ꓟꓽ ꓢꓷ ꓢꓰ ꓡ? ꓥꓪ ꓔꓯ ꓟꓳꓻ ꓠꓬꓲ ꓢꓴ ꓠꓬ ꓐꓹ ꓐ ꓔꓯ ꓟꓳ ꓠꓬꓲˍ ꓟ ꓥ ꓡꓳ꓿ ꓠꓴ ꓮ ꓡꓲ ꓗꓹ ꓠꓬꓲ ꓐꓹ ꓐ ꓥꓪ ꓠꓴꓽ ꓔꓯ ꓟꓳꓸ ꓖꓶ ꓡꓯ꓾ ꓐꓯˍ ꓢꓰꓽ ꓡ?꓾ ꓐꓯ ꓖꓶˍ ꓡꓳ꓿ 10 ꓥꓪ ꓠꓬ ꓐꓹ ꓐ ꓠꓯꓸꓼ ꓗꓪ ꓔꓬ ꓟ ꓐꓰ꓾ ꓐꓹ ꓐ ꓠꓬ ꓥꓪ ꓠꓯꓸꓼ ꓗꓪ ꓔꓬ ꓟ ꓔꓯ ꓠꓴ ꓟꓽ ꓙꓵꓻˍ ꓡ? ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓟ ꓐꓯ ꓘꓶ ꓠꓬ ꓥꓪ ꓚꓲꓸ ꓛꓬ ꓗꓪ ꓐꓰˍ ꓡꓰ ꓐꓯˍ ꓟ ꓟꓽ ꓥ꓾ ꓥꓪ ꓠꓯꓸꓼ ꓗꓪ ꓢꓯꓸ ꓔꓬ ꓟ ꓐꓹ ꓐ ꓡꓰ ꓬꓲ ꓟꓬꓱꓽ ꓬꓲ ꓬꓰˍ ꓟ ꓥ ꓡꓳ꓿ 11 ꓥꓪ ꓠꓽ ꓐꓹ ꓐ ꓠꓯꓸꓼ ꓗꓪ ꓔꓬ ꓟ ꓐꓰ꓾ ꓐꓹ ꓐ ꓠꓬ ꓥꓪ ꓠꓯꓸꓼ ꓗꓪ ꓔꓬ ꓡꓳ꓾ ꓐꓰ ꓥꓪ ꓡꓰ ꓠꓴ ꓪꓽ ꓔꓯ ꓐꓯ ꓖꓶ ꓗꓷ ꓟ ꓔꓯ ꓙꓵꓻ꓿ ꓟꓽ ꓥ ꓠꓬ ꓥꓪ ꓬꓰ ꓗꓷ ꓟ ꓟꓬꓱꓽ ꓖꓳ ꓟꓬ ꓫꓵꓽ ꓑꓶ ꓓꓴ ꓥꓪ ꓔꓯ ꓙꓵꓻ꓿ 12 ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓔꓯ ꓙꓵꓻ ꓢꓴ ꓠꓬ꓾ ꓥꓪ ꓬꓰˍ ꓟ ꓟꓬꓱꓽ ꓬꓲˍ ꓟꓲ ꓬꓰˍ ꓥꓳ꓿ ꓕꓱ ꓟ ꓕꓯ ꓢꓲ ꓪꓴꓽˍ ꓟ ꓟꓬꓱꓽˍ ꓟꓲ ꓬꓲ ꓬꓰˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓐꓹ ꓐ ꓔꓯ ꓥꓪ ꓙꓰˍ ꓥꓳ꓿ 13 ꓐꓹ ꓐ ꓠꓬ ꓮ ꓐꓲ ꓗꓪ ꓐꓰ ꓟꓬꓱ ꓓꓳꓽ ꓟꓶ ꓠꓹ ꓟ꓾ ꓥꓪ ꓟꓬꓱꓺ ꓗꓪ ꓐꓰ ꓠꓴ ꓪꓽ ꓮꓸ ꓫꓵ ꓓꓰꓽˍ ꓟꓲ ꓖꓳ ꓟ ꓥꓪ ꓬꓰˍ ꓥꓳ꓿ 14 ꓥꓪ ꓟꓬꓱꓺ ꓗꓪ ꓐꓰ ꓠꓴ ꓪꓽ ꓓꓰꓽˍ ꓟ ꓮꓸ ꓫꓵꓽˍ ꓟꓲ ꓥꓪ ꓬꓰˍ ꓥꓳ꓿ 15 ꓠꓴ ꓪꓽ ꓥꓪ ꓔꓯ ꓠꓲꓹ ꓠꓵˍ ꓠꓬ꓾ ꓥꓪ ꓕꓵꓼ ꓪ ꓠꓴ ꓪꓽ ꓒꓵꓽ ꓛꓳˍ ꓥꓳ꓿ 16 ꓖꓳ ꓡꓱ ꓢꓲ ꓐꓹ ꓐ ꓡꓰ ꓠꓲꓹ ꓗꓴꓺ ꓖꓶ ꓢꓴ ꓬꓲ ꓔꓱꓹ ꓬꓲ ꓕꓲ ꓣꓳ ꓠꓴ ꓪꓽ ꓔꓯ ꓖꓶ ꓡ ꓠꓹ ꓟ ꓥꓪ ꓡꓰ ꓬꓲ ꓔꓯ ꓓꓰꓽˍ ꓥꓳ꓿ ꓬꓲ ꓠꓬ ꓠꓴ ꓪꓽˍ ꓐꓰ ꓕꓲ ꓞꓲꓼ ꓕꓲ ꓑ ꓔꓬ ꓥꓳ꓿ 17 ꓬꓲ ꓠꓽ ꓔꓱꓹ ꓚꓵˍ ꓟ ꓦ ꓥ ꓡꓳ꓿ ꓟꓲ ꓠꓯ ꓠꓬ ꓬꓲ ꓔꓯ ꓟꓳˍ ꓟꓲ ꓟꓽ ꓟꓳ꓾ ꓢꓷꓸˍ ꓟꓲ ꓟꓽ ꓢꓷꓸ ꓠꓬꓲ ꓬꓲ ꓔꓯ ꓘꓳ ꓣꓴ ꓟꓽ ꓐ ꓡ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓬꓲ ꓔꓯ ꓢꓷˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓮ ꓟꓶ ꓠꓴ ꓪꓽˍ ꓐꓰ ꓔꓬ ꓢꓲ꓾ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓡꓻˍ ꓥꓳ꓿ 18 ꓥꓪ ꓡꓰ ꓠꓴ ꓪꓽ ꓔꓯ ꓤꓽ ꓛꓵꓽ ꓟꓽ ꓓꓳ ꓔꓲꓹ ꓬꓰ ꓝꓲ꓿ ꓥꓪ ꓠꓬ ꓠꓴ ꓪꓽ ꓔꓯ ꓡꓻˍ ꓢꓰꓽ ꓥꓳ꓿ 19 ꓕꓲ ꓑ ꓤ ꓠꓬ ꓟꓲ ꓠꓯ ꓥꓪ ꓔꓯ ꓝꓮꓲ ꓟꓽ ꓟꓳ ꓗꓷ ꓡꓰˍ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓥꓪ ꓔꓯ ꓟꓳˍ ꓥꓳ꓿ ꓥꓪ ꓢꓯꓸ ꓔꓬ ꓟ ꓗꓪ ꓐꓰ ꓠꓴ ꓪꓽˍ ꓟꓲ ꓢꓯꓸ ꓔꓬ ꓪˍ ꓥꓳ꓿ 20 ꓖꓳ ꓕꓲ ꓠꓬꓲ ꓗꓪ ꓠꓬ꓾ ꓐꓹ ꓐ ꓠꓯꓸꓼ ꓗꓪ ꓥꓪ ꓔꓬ ꓟ ꓐꓰ꓾ ꓥꓪ ꓠꓯꓸꓼ ꓗꓪ ꓠꓴ ꓪꓽ ꓔꓬ ꓟ ꓐꓰ꓾ ꓠꓴ ꓪꓽ ꓠꓯꓸꓼ ꓗꓪ ꓥꓪ ꓔꓬ ꓟ ꓠꓴ ꓪꓽ ꓢꓷꓸ ꓡꓰˍ ꓥꓳ꓿ 21 ꓥꓪ ꓕꓵꓼ ꓪ ꓔꓯ ꓘꓳ ꓣꓴ ꓢꓲꓸ ꓒꓵꓽ ꓛꓳ ꓢꓴ ꓠꓬ꓾ ꓥꓪ ꓔꓯ ꓠꓲꓹ ꓠꓵ ꓢꓴ ꓥ ꓡꓳ꓿ ꓥꓪ ꓔꓯ ꓠꓲꓹ ꓠꓵ ꓢꓴ ꓔꓯ ꓠꓬ ꓥꓪ ꓐꓹ ꓐ ꓡꓰ ꓬꓲ ꓔꓯ ꓠꓲꓹ ꓠꓵˍ ꓥꓳ꓿ ꓥꓪˍ ꓟꓲ ꓬꓲ ꓔꓯ ꓠꓲꓹ ꓠꓵ ꓢꓲ꓾ ꓥꓪ ꓚꓲꓸ ꓛꓬ ꓬꓲ ꓔꓯ ꓟꓳꓸ ꓖꓶˍ ꓥꓳ꓾ ꓐꓯˍ ꓡꓳ꓿ 22 ꓘ-ꓡꓲꓳ ꓒ ꓟꓽ ꓥ ꓟ ꓬꓴ-ꓓ ꓡꓰ ꓬꓲ ꓔꓯ꓾ ꓢꓲ ꓒꓽꓳ꓾ ꓮ ꓡꓲ ꓗꓷ ꓡꓰ ꓠꓬꓲ ꓠꓴ ꓥꓪ ꓠꓴꓽ ꓔꓯ ꓟꓳꓸ ꓖꓶ ꓢꓲ꓾ ꓟꓲ ꓠꓯ ꓔꓯ ꓟꓽ ꓟꓳꓸ ꓖꓶ ꓡ? ꓐꓰ ꓠ ꓠꓬꓲˍ ꓡꓳ꓿ 23 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓮꓽ ꓟ ꓥ ꓟꓲ ꓥꓪ ꓔꓯ ꓠꓲꓹ ꓠꓵ ꓢꓴ ꓠꓬ ꓥꓪ ꓐꓯ ꓘꓶ ꓒꓵꓽ ꓛꓳˍ ꓥꓳ꓿ ꓥꓪ ꓐꓹ ꓐˍ ꓟꓲ ꓬꓲ ꓔꓯ ꓠꓲꓹ ꓠꓵ ꓢꓲ꓾ ꓥꓪ ꓠꓴꓽ ꓠꓬ ꓬꓲ ꓔꓯ ꓡ ꓢꓲ ꓠꓬꓲ ꓬꓲꓸˍ ꓐꓰ ꓔꓬ ꓡ ꓥꓳ꓿ 24 ꓥꓪ ꓔꓯ ꓟꓽ ꓠꓲꓹ ꓠꓵ ꓢꓴ ꓠꓬ ꓥꓪ ꓐꓯ ꓘꓶ ꓟꓽ ꓒꓵꓽ ꓛꓳ꓿ ꓠꓴ ꓪꓽ ꓑ ꓙꓽˍ ꓟ ꓐꓯ ꓘꓶ ꓠꓬ ꓥꓪ ꓚꓲꓸ ꓛꓬ ꓔꓯꓸ ꓟ ꓟꓽ ꓥ꓿ ꓥꓪ ꓔꓯ ꓝꓲ ꓩꓴ ꓡ ꓢꓴ ꓐꓹ ꓐ ꓐꓯ ꓘꓶꓽ ꓥ ꓡꓳ꓿ 25 ꓕꓱ ꓟꓬ ꓙꓰꓽ ꓟ ꓠꓬ꓾ ꓠꓴ ꓪꓽˍ ꓐꓰ ꓔꓬ ꓕꓯˍ ꓡꓰ ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓗꓷꓳ꓿ 26 ꓖꓳ ꓡꓱ ꓥ ꓟꓲ ꓐꓹ ꓐ ꓡꓰ ꓥꓪ ꓟꓬꓱꓺ ꓗꓪ ꓐꓰ ꓝꓲ ꓩꓴ ꓡ ꓠ ꓟ꓾ ꓠꓲꓹ ꓟ ꓗꓴ ꓖꓶ ꓢꓴ ꓢꓲ-ꓫꓬ-ꓟ-ꓦ ꓡꓰ ꓠꓴ ꓪꓽ ꓔꓯ ꓮꓽ ꓙꓵ ꓡꓱꓸꓼ ꓟꓸ ꓖꓶ ꓡ ꓢꓲ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓟ ꓮꓽ ꓙꓵ ꓓꓵꓽ ꓙ ꓛꓲ ꓡ ꓝꓲˍ ꓥꓳ꓿ 27 ꓠꓴ ꓪꓽ ꓔꓯ ꓥꓪ ꓢꓲ ꓡꓲ ꓟ ꓖꓶ ꓔ ꓬꓰˍ ꓥꓳ꓿ ꓥꓪ ꓢꓲ ꓡꓲ ꓟ ꓠꓴ ꓪꓽ ꓔꓯ ꓖꓶˍ ꓥꓳ꓿ ꓠꓴ ꓪꓽ ꓔꓯ ꓥꓪ ꓖꓶˍ ꓟ ꓢꓲ ꓡꓲ ꓟ ꓠꓬ ꓟꓲ ꓠꓯ ꓡꓰ ꓖꓶˍ ꓟ ꓢꓲ ꓡꓲ ꓟ ꓡꓰ ꓐꓰ ꓟꓽ ꓗꓹ꓿ ꓠꓴ ꓪꓽ ꓠꓲꓹ ꓟ ꓕꓽ ꓙꓽ ꓫ꓾ ꓙꓳꓺˍ ꓟꓲ ꓕꓽ ꓙꓳꓺ꓿ 28 ꓥꓪ ꓡꓰ ꓠꓴ ꓪꓽ ꓔꓯ꓾ ꓥꓪ ꓠꓽ ꓙꓰˍ ꓥꓳ꓾ ꓐꓯˍ ꓟ ꓐꓰ꓾ ꓠꓴ ꓪꓽ ꓔꓯ ꓥꓪ ꓡꓻˍ ꓥꓳ꓾ ꓐꓯˍ ꓟ ꓠꓴ ꓪꓽ ꓑ ꓙꓽ ꓗꓷꓳ꓿ ꓠꓴ ꓪꓽ ꓥꓪ ꓔꓯ ꓠꓲꓹ ꓠꓵˍ ꓕꓯ ꓠ꓾ ꓐꓹ ꓐ ꓔꓯ ꓥꓪ ꓙꓰˍ ꓟ ꓑꓶꓸ ꓓꓴ ꓠꓴ ꓪꓽ ꓠꓲꓹ ꓒꓴˍ ꓡꓳ ꓫꓵꓽ ꓥꓳ꓿ ꓮ ꓡꓲꓳ ꓐꓯ ꓠꓬ ꓐꓹ ꓐ ꓠꓽ ꓥꓪ ꓕꓯ ꓢꓲ ꓪꓴꓽˍ ꓡꓳ꓿ 29 ꓖꓳ ꓡꓱ ꓠꓬꓲ ꓕꓱ ꓟ ꓗꓷ ꓡꓰˍ ꓕꓯ ꓠꓴ ꓪꓽ ꓙꓵꓻ ꓠꓹ ꓟ꓾ ꓮ ꓟꓶ ꓟꓽ ꓗꓷ ꓡꓰ ꓢꓰꓽ ꓕꓯˍ ꓡꓰ꓾ ꓠꓴ ꓪꓽ ꓔꓯ ꓥꓪ ꓡꓰ ꓐꓯ ꓔ ꓖꓶˍ ꓥꓳ꓿ 30 ꓕꓱ ꓡꓱ ꓖꓳ ꓑꓳꓸ ꓠꓴ ꓪꓽ ꓔꓯ ꓥꓪ ꓟꓶ ꓤ ꓟꓽ ꓫꓸ ꓕꓱꓳ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓕꓱ ꓟ ꓬꓲ ꓢꓲ ꓒ ꓡꓻˍ ꓥꓳ꓿ ꓬꓲ ꓠꓬ ꓥꓪ ꓕꓯ ꓢꓲ ꓗꓪ ꓮꓸ ꓫꓵ ꓙꓵꓽ ꓪ ꓟꓽ ꓙꓳ꓿ 31 ꓖꓳ ꓡꓱ ꓥ ꓟꓲ ꓥꓪ ꓠꓬ ꓐꓹ ꓐ ꓔꓯ ꓠꓲꓹ ꓠꓵˍ ꓟ ꓐꓰ꓾ ꓐꓹ ꓐ ꓡꓰ ꓥꓪ ꓔꓯ ꓕꓵꓼ ꓪ ꓖꓶ ꓔ ꓟ ꓐꓰ ꓕꓲ ꓡꓰꓹꓼ ꓥꓪ ꓬꓰˍ ꓟ ꓔꓯ ꓟꓲ ꓠꓯ ꓢꓷ ꓡꓰ ꓠꓹ ꓟ ꓐꓱ ꓶ ꓥ ꓡꓳ꓿ ꓔꓴ꓾ ꓣꓳ ꓙꓰ ꓡꓯ꓾ ꓐꓯˍ ꓡꓳ꓿

ꓬꓳ-ꓦ 15

1 ꓥꓪ ꓠꓽ ꓛꓱꓼ ꓡꓱꓼ ꓚ ꓚꓵꓺ ꓥ ꓡꓳ꓿ ꓥꓪ ꓐꓹ ꓐ ꓠꓬ ꓐꓱ ꓫꓬꓹ ꓡꓲꓸ ꓢꓴ ꓥ ꓡꓳ꓿ 2 ꓥꓪ ꓔꓯ ꓠꓳꓽ ꓞꓹ ꓢꓲ ꓬꓲ ꓢꓶꓽ ꓟꓽ ꓓꓱꓼˍ ꓟ ꓡꓯꓼ ꓗꓸ ꓥ ꓕ ꓑꓳ ꓔꓯ ꓬꓲ ꓧꓳꓽ ꓩꓴ ꓗꓷˍ ꓥꓳ꓿ ꓬꓲ ꓢꓶꓽ ꓓꓱꓼˍ ꓟ ꓥ ꓕ ꓑꓳꓸ ꓔꓯ ꓠꓬ꓾ ꓬꓲ ꓢꓶꓽ ꓟꓬꓽ ꓠꓬꓲ ꓓꓱꓼ ꓡ ꓠꓹ ꓟ ꓬꓲ ꓫꓬꓹ ꓡꓲꓸ ꓖꓶˍ ꓥꓳ꓿ 3 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓟ ꓐꓯ ꓘꓶ ꓗꓪ ꓐꓰ ꓮ ꓟꓶˍ ꓡꓰꓻ ꓠꓴ ꓪꓽ ꓢꓲꓽ ꓫꓬ ꓡꓰꓳ꓿ 4 ꓠꓴ ꓪꓽ ꓥꓪ ꓠꓯꓸꓼ ꓗꓪ ꓔꓬ꓿ ꓥꓪˍ ꓟꓲ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓥꓳ꓿ ꓬꓲ ꓚ ꓗꓪ ꓟꓽ ꓠꓳꓽ ꓞ ꓟ ꓡꓯꓼ ꓗꓸ ꓠꓬ ꓬꓲ ꓢꓶꓽ ꓓꓱꓼ ꓡ ꓟꓽ ꓗꓴ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓥꓪ ꓠꓯꓸꓼ ꓗꓪ ꓟꓽ ꓔꓬ ꓠꓬ ꓬꓲ ꓢꓶ ꓓꓱꓼ ꓡ ꓟꓽ ꓗꓴꓸ꓿ 5 ꓥꓪ ꓠꓬ ꓛꓱꓼ ꓡꓱꓼ ꓚ ꓥ ꓡꓳ꓿ ꓠꓴ ꓪꓽ ꓠꓽ ꓬꓲ ꓡꓯꓼ ꓗꓸ ꓥ ꓡꓳ꓿ ꓥꓪ ꓠꓯꓸꓼ ꓗꓪ ꓔꓬ ꓢꓲ ꓥꓪ ꓠꓬ ꓬꓲ ꓠꓯꓸꓼ ꓗꓪ ꓔꓬ ꓟ ꓖꓳ ꓕꓲ ꓣꓳ ꓠꓬ ꓬꓲ ꓢꓶꓽ ꓮꓽ ꓟꓬꓹ ꓓꓱꓼˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓔꓯ ꓟꓽ ꓠꓳꓽ ꓞꓹ ꓠꓬ ꓠꓴ ꓪꓽ ꓮꓸ ꓫꓵˍ ꓟꓲ ꓬꓰ ꓟꓽ ꓐ ꓡ꓿ 6 ꓮꓽ ꓟ ꓥ ꓟꓲ ꓥꓪ ꓠꓯꓸꓼ ꓗꓪ ꓟꓽ ꓔꓬ ꓕꓯ ꓠꓽ꓾ ꓢꓲꓹ ꓡꓯꓼ ꓗꓸ ꓔꓯˍ ꓡꓰ ꓐꓰ ꓬꓲ ꓔꓯ ꓡꓳ ꓗꓷ ꓢꓲ ꓙꓴꓺ ꓬꓰˍ ꓥꓳ꓿ ꓖꓳ ꓡꓱ ꓢꓲ ꓢꓴ ꓡꓰ ꓖꓳ ꓟ ꓔꓯ ꓖꓳꓺ ꓢꓲ꓾ ꓮꓸ ꓔꓳꓸ ꓗꓪ ꓡꓳ ꓧꓳꓽ ꓗꓷ ꓠꓬ ꓛꓴ ꓐꓬꓻ ꓡꓰˍ ꓥꓳ꓿ 7 ꓠꓴ ꓪꓽ ꓥꓪ ꓠꓯꓸꓼ ꓗꓪ ꓔꓬ ꓢꓲ꓾ ꓥꓪ ꓐꓯ ꓘꓶ ꓠꓴ ꓪꓽ ꓠꓯꓸꓼ ꓗꓪ ꓓꓯꓹ ꓠꓬ꓾ ꓠꓴ ꓪꓽ ꓠꓵˍ ꓟ ꓮꓸ ꓫꓵ ꓓꓰꓽˍ ꓟꓲ ꓠꓴ ꓪꓽ ꓔꓯ ꓖꓶ ꓡ ꓥꓳ꓿ 8 ꓠꓴ ꓪꓽ ꓬꓲ ꓢꓶꓽ ꓮꓽ ꓟꓬꓹ ꓓꓱꓼˍ ꓟ ꓗꓪ ꓐꓰ ꓥꓪ ꓐꓹ ꓐ ꓟꓬꓱ ꓓꓳꓽ ꓟꓶˍ ꓥꓳ꓿ ꓖꓳ ꓟ ꓗꓪ ꓐꓰ ꓠꓴ ꓪꓽ ꓠꓬ ꓥꓪ ꓢꓲ ꓤ ꓥ ꓟ ꓟꓳꓸ ꓖꓶ ꓓꓳ ꓡ ꓥꓳ꓿ 9 ꓐꓹ ꓐ ꓥꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪꓽ ꓔꓯ ꓠꓲꓹ ꓠꓵˍ ꓡꓳ꓿ ꓥꓪ ꓠꓵ ꓠꓲꓹ ꓠꓯꓸꓼ ꓗꓪ ꓠꓴ ꓪꓽ ꓔꓬ꓿ 10 ꓐꓹ ꓐ ꓕꓵꓼ ꓪ ꓔꓯ ꓥꓪ ꓒꓵꓽ ꓛꓳ ꓢꓲ ꓬꓲ ꓠꓵ ꓠꓲꓹ ꓗꓪ ꓔꓬ ꓟ ꓡꓰ ꓐꓰ꓾ ꓥꓪ ꓕꓵꓼ ꓪꓽ ꓔꓯ ꓠꓴ ꓪꓽ ꓒꓵꓽ ꓛꓳˍ ꓠꓬ꓾ ꓥꓪ ꓠꓵ ꓠꓲꓹ ꓠꓯꓸꓼ ꓗꓪ ꓠꓴ ꓪꓽ ꓔꓬ ꓟꓶˍ ꓥꓳ꓿ 11 ꓥꓪ ꓗꓹ ꓛꓲ ꓠꓲꓹ ꓠꓴ ꓪꓽ ꓠꓯꓸꓼ ꓗꓪ ꓓꓯꓹ ꓢꓲ꓾ ꓠꓴ ꓪꓽ ꓗ ꓛꓲ ꓠꓲꓹ ꓐꓲ ꓡ ꓝꓲ ꓠꓹ ꓟ꓾ ꓠꓴ ꓪꓽ ꓔꓯ ꓥꓪ ꓕꓱ ꓟꓬ ꓙꓰꓽ ꓐꓯ ꓖꓶˍ ꓟ ꓥꓳ꓿ 12 ꓠꓴ ꓪꓽ ꓔꓯ ꓥꓪ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ ꓕꓱ ꓟ ꓠꓬ ꓥꓪ ꓕꓵꓼ ꓪ ꓥ ꓡꓳ꓿ 13 ꓡ ꓞꓳ ꓕꓲ ꓣꓳ ꓠꓬ ꓬꓲ ꓗꓪ ꓛꓳꓽ ꓐꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷˍ ꓟ ꓕꓱ ꓟ ꓕꓯ ꓢꓲ ꓪꓴꓽˍ ꓟ ꓠꓵ ꓠꓲꓹ ꓮꓽ ꓟˍ ꓟꓲ ꓟꓽ ꓙꓳ꓿ 14 ꓥꓪ ꓡꓰ ꓠꓴ ꓪꓽ ꓔꓯ ꓕꓵꓼ ꓪ ꓖꓶˍ ꓟ ꓠꓴ ꓪꓽ ꓒꓵꓽ ꓛꓳˍ ꓠꓬ꓾ ꓠꓴ ꓪꓽ ꓠꓽ ꓥꓪ ꓗꓪ ꓛꓳꓽ ꓐꓴ ꓥꓳ꓿ 15 ꓥꓪ ꓠꓬ ꓕꓱ ꓡꓱ ꓖꓳ ꓑꓳ ꓠꓴ ꓪꓽ ꓔꓯ ꓚꓳ ꓑꓸ ꓟꓽ ꓘꓴ꓿ ꓮ ꓡꓲꓳ ꓐꓯ ꓠꓬ ꓚꓳ ꓑꓸ ꓠꓽ ꓬꓲ ꓢꓲ ꓒ ꓮꓸ ꓫꓵ ꓬꓰˍ ꓟ ꓬꓲ ꓟꓽ ꓢꓷ꓿ ꓥꓪ ꓠꓬ ꓠꓴ ꓪꓽ ꓔꓯ ꓗꓪ ꓛꓳꓽ ꓘꓴˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓐꓹ ꓐ ꓗꓪ ꓐꓰ ꓥꓪ ꓑ ꓙꓽˍ ꓟ ꓮꓽ ꓙꓵ ꓥꓪ ꓡꓰ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲꓳ꓿ 16 ꓠꓴ ꓪꓽ ꓡꓰ ꓥꓪ ꓔꓯ ꓢꓲ ꓔ ꓟ ꓟꓽ ꓥ꓿ ꓥꓪ ꓡꓰ ꓠꓴ ꓪꓽ ꓔꓯ ꓢꓲ ꓔ ꓟ ꓥ ꓡꓳ꓿ ꓠꓴ ꓪꓽ ꓙꓰ ꓢꓲ ꓐꓬ ꓡꓰ ꓛꓵꓽ ꓡꓰ ꓟꓽ ꓓ ꓟ ꓬꓲ ꓢꓶꓽ ꓓꓱꓼ ꓠꓹ ꓟ꓾ ꓥꓪ ꓡꓰ ꓠꓴ ꓪꓽ ꓔꓯ ꓢꓲ ꓔ ꓡꓳ꓿ ꓖꓳ ꓡꓱ ꓢꓲ ꓠꓴ ꓪꓽ ꓥꓪ ꓟꓬꓱꓺ ꓗꓪ ꓐꓰ ꓐꓹ ꓐ ꓔꓯ ꓮꓸ ꓫꓵ ꓓꓰꓽˍ ꓟꓲ꓾ ꓬꓲ ꓡꓰ ꓠꓴ ꓪꓽ ꓔꓯ ꓖꓶ ꓡ ꓥꓳ꓿ 17 ꓠꓴ ꓪꓽ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ꓾ ꓥꓪ ꓡꓰ ꓠꓴ ꓪꓽ ꓔꓯ ꓕꓵꓼ ꓪ ꓖꓶˍ ꓡꓳ꓿ 18 ꓟꓲ ꓠꓯ ꓡꓰ ꓠꓴ ꓪꓽ ꓔꓯ ꓠꓲꓹ ꓜꓳˍ ꓠꓬ꓾ ꓠꓴ ꓪꓽ ꓔꓯ ꓟꓽ ꓠꓲꓹ ꓜꓳ ꓕꓯ ꓡꓰ ꓥꓪ ꓔꓯ ꓠꓲꓹ ꓜꓳˍ ꓟ ꓠꓴ ꓪꓽ ꓢꓷˍ ꓡꓳ꓿ 19 ꓠꓴ ꓪꓽ ꓠꓬ ꓟꓲ ꓠꓯ ꓗꓪ ꓟ ꓥ ꓕꓯ ꓠꓽ꓾ ꓟꓲ ꓠꓯ ꓠꓬ ꓚꓲꓸ ꓛꓬ ꓡ ꓞꓳ ꓔꓯ ꓬꓲ ꓠꓲꓹ ꓠꓵˍ ꓥꓳ꓿ ꓠꓴ ꓪꓽ ꓠꓽ ꓟꓲ ꓠꓯ ꓗꓪ ꓟ ꓟꓽ ꓥ ꓠꓬꓲ꓾ ꓝꓮꓲ ꓥꓪ ꓡꓰ ꓠꓴ ꓪꓽ ꓔꓯ ꓟꓲ ꓠꓯ ꓗꓪ ꓐꓰ ꓢꓲ ꓔ ꓠꓬꓲ꓾ ꓟꓲ ꓠꓯ ꓠꓬ ꓠꓴ ꓪꓽ ꓔꓯ ꓠꓲꓹ ꓜꓳˍ ꓡꓳ꓿ 20 ꓚꓳ ꓑꓸ ꓠꓬ ꓬꓲ ꓢꓲ ꓒ ꓕꓯ ꓢꓲ ꓟꓽ ꓪꓴꓽ꓾ ꓐꓰ ꓥꓪ ꓡꓰ ꓠꓴ ꓪꓽ ꓔꓯ ꓐꓯ ꓖꓶ ꓗꓷ ꓟ ꓔꓯ ꓚꓲꓸ ꓔ꓿ ꓬꓲ ꓪꓽ ꓥꓪ ꓔꓯ ꓗꓸ ꓧꓪˍ ꓠꓬ ꓠꓴ ꓪꓽ ꓔꓯˍ ꓟꓲ ꓗꓸ ꓧꓪˍ ꓥꓳ꓿ ꓬꓲ ꓪꓽ ꓥꓪ ꓐꓯ ꓘꓶ ꓒꓵꓽ ꓛꓳˍ ꓠꓬ ꓠꓴ ꓪꓽ ꓐꓯ ꓘꓶˍ ꓟꓲ ꓒꓵꓽ ꓛꓳˍ ꓥꓳ꓿ 21 ꓖꓳ ꓡꓱ ꓠꓬꓲ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓬꓲ ꓪꓽ ꓟꓽ ꓢꓷ ꓠꓬꓲ꓾ ꓥꓪ ꓟꓬꓱ ꓑꓶꓸ ꓓꓴ ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓕꓱ ꓟꓬ ꓫꓵꓽ ꓬꓰ ꓖꓶ ꓡ ꓥꓳ꓿ 22 ꓥꓪ ꓟꓽ ꓡ ꓢꓲ ꓬꓲ ꓪꓽ ꓔꓯ ꓟꓽ ꓐꓯ ꓖꓶ ꓗꓷ ꓐꓷˍ ꓠꓬ ꓬꓲ ꓪꓽ ꓝꓴꓲ ꓟꓽ ꓙꓳˍ ꓡꓳ ꓫꓵꓽ ꓥ ꓡꓳ꓿ ꓮ ꓟꓶ ꓠꓽ ꓬꓲ ꓪꓽ ꓝꓴꓲ ꓐꓱ ꓶ ꓢꓸ ꓬꓰꓽ ꓓꓴ ꓟꓽ ꓙꓳꓻꓳ꓿ 23 ꓥꓪ ꓔꓯ ꓠꓲꓹ ꓜꓳ ꓢꓴ ꓠꓬ꓾ ꓥꓪ ꓐꓹ ꓐ ꓔꓯˍ ꓟꓲ ꓠꓲꓹ ꓜꓳˍ ꓡꓳ꓿ 24 ꓮꓽ ꓟˍ ꓟꓲ ꓟꓽ ꓬꓰ ꓠꓬꓲ ꓟ ꓟꓬꓱꓽ ꓥꓪ ꓬꓲ ꓪꓽ ꓗꓳ ꓡꓳ ꓗꓪ ꓟꓽ ꓬꓰ ꓗꓷ ꓐꓷˍ ꓠꓬ ꓬꓲ ꓪꓽ ꓝꓴꓲ ꓟꓽ ꓙꓳˍ ꓡꓳ ꓫꓵ ꓥ ꓡꓳ꓿ ꓮ ꓟꓶ ꓠꓽ ꓬꓲ ꓪꓽ ꓥꓪ ꓔꓯˍ ꓟꓲ꓾ ꓥꓪ ꓐꓹ ꓐ ꓔꓯˍ ꓟꓲ꓾ ꓟꓳꓻ ꓟꓲ ꓟꓳ ꓠꓬꓲꓳ꓾ ꓠꓲꓹˍ ꓟꓲ ꓠꓲꓹ ꓜꓳ ꓠꓬꓲꓳ꓿ 25 ꓖꓳ ꓡꓱ ꓥ ꓟꓲ ꓕꓱ ꓟ ꓠꓬ꓾ ꓬꓲ ꓪꓽ ꓙꓵꓽ ꓗ ꓕꓳ ꓶ ꓗꓪ꓾ ꓬꓲ ꓑꓶꓸ ꓟꓽ ꓙꓳ ꓟ ꓗꓪ ꓬꓲ ꓪꓽ ꓥꓪ ꓔꓯ ꓠꓲꓹ ꓜꓳˍ ꓡꓳ꓾ ꓐꓯˍ ꓟ ꓐꓲ ꓡ ꓝꓲ ꓠꓹ ꓟ ꓥ ꓡꓳ꓿ 26 ꓖꓳ ꓡꓱ ꓥ ꓟꓲ ꓐꓹ ꓐ ꓗꓪ ꓐꓰ ꓓꓳ ꓡ ꓟ ꓐꓰ꓾ ꓬꓲ ꓗꓪ ꓐꓰ ꓥꓪ ꓡꓰ ꓠꓴ ꓪꓽ ꓔꓬ ꓗꓪ ꓝꓲ ꓩꓴ ꓡ ꓠꓹ ꓟ꓾ ꓠꓲꓹ ꓗꓴ ꓖꓶ ꓢꓴ ꓔꓱꓹ ꓚꓵˍ ꓟ ꓦꓻ ꓖꓳ ꓟ ꓛꓲ ꓡ ꓕꓯ ꓬꓲ ꓠꓽ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙˍ ꓥꓳ꓿ 27 ꓠꓴ ꓪꓽˍ ꓟꓲ ꓬꓲ ꓪꓴꓸ ꓕꓯˍ ꓡꓰ ꓥꓪˍ ꓐꓰ ꓕꓲ ꓪꓺꓼ ꓔꓬ ꓠꓬꓲ ꓢꓷꓸ ꓙ ꓟꓳ ꓙˍ ꓥꓳ꓿

ꓬꓳ-ꓦ 16

1 ꓥꓪ ꓡꓰ ꓠꓴ ꓪꓽ ꓔꓯ ꓕꓱ ꓟꓬ ꓙꓰꓽ ꓐꓯ ꓖꓶˍ ꓟ ꓠꓬ꓾ ꓠꓴ ꓪꓽ ꓠꓲꓹ ꓟ ꓙꓬ ꓡꓰ ꓢꓲ ꓟꓽ ꓡꓵ ꓗꓷ ꓠꓹ ꓟ ꓥ ꓡꓳ꓿ 2 ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓢꓲꓽ ꓫꓬ ꓦꓲ ꓗꓪ ꓐꓰ ꓖꓼ ꓓꓳ ꓗꓷ ꓡ ꓥꓳ꓿ ꓠꓴ ꓪꓽ ꓔꓯ ꓢꓰꓼ ꓢꓴ ꓮꓽ ꓟˍ ꓟꓲ꓾ ꓬꓲ ꓠ ꓪꓴ-ꓢ ꓔꓯ ꓣꓱꓽ ꓙ ꓔꓬ ꓟ ꓥꓳ꓾ ꓐꓰ ꓓꓵꓽ ꓙˍ ꓟ ꓬꓲ ꓙꓵꓹ ꓛꓲ ꓡ ꓥꓳ꓿ 3 ꓬꓲ ꓪꓽ ꓠꓬ ꓐꓹ ꓐˍ ꓐꓰ ꓥꓪ ꓔꓯ ꓟꓽ ꓢꓷ ꓟ ꓗꓪ ꓐꓰ ꓠꓴ ꓪꓽ ꓔꓯ ꓕꓱ ꓟꓬ ꓙꓰꓽ ꓬꓰ ꓖꓶ ꓡ ꓥꓳ꓿ 4 ꓥꓪ ꓡꓰ ꓠꓴ ꓪꓽ ꓔꓯ ꓕꓱ ꓟꓬ ꓙꓰꓽ ꓐꓯ ꓖꓶˍ ꓟ ꓠꓬ ꓬꓲ ꓪꓽ ꓙꓵꓹ ꓛꓲ ꓡ ꓕꓯ꓾ ꓥꓪ ꓡꓰ ꓠꓴ ꓪꓽ ꓔꓯ ꓬꓲ ꓪꓽ ꓙ ꓖꓴ ꓐꓯ ꓖꓶˍ ꓟ ꓔꓯ ꓠꓴ ꓪꓽ ꓓꓵꓽ ꓙꓽ ꓛꓲ ꓡ ꓠꓹ ꓟ ꓥ ꓡꓳ꓿ ꓕꓱ ꓟꓬ ꓙꓰꓽ ꓟ ꓠꓴ ꓪꓽ ꓔꓯ ꓥꓪ ꓬꓲ ꓪꓴꓸ ꓕꓯˍ ꓡꓰ ꓟꓽ ꓐꓯ ꓖꓶˍ ꓟ ꓠꓬ꓾ ꓥꓪ ꓠꓽ ꓠꓴ ꓪꓽˍ ꓐꓰ ꓔꓬ ꓢꓰꓽ ꓠꓬꓲ ꓥ ꓡꓳ꓿ 5 ꓮ ꓟꓶ ꓥꓪ ꓠꓬ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓙꓰˍ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓮꓽ ꓟˍ ꓟꓲ꓾ ꓠꓴ ꓮ ꓡꓲ ꓗꓪ ꓙꓰˍ ꓡ? ꓐꓰ ꓥꓪ ꓔꓯ ꓟꓽ ꓠ ꓠꓬꓲ ꓡ꓿ 6 ꓥꓪ ꓡꓰ ꓠꓴ ꓪꓽ ꓔꓯ ꓕꓱ ꓟꓬ ꓙꓰꓽ ꓐꓯ ꓖꓶˍ ꓟ ꓗꓪ ꓐꓰ꓾ ꓠꓴ ꓪꓽ ꓠꓲꓹ ꓟ ꓗꓪ ꓠꓲꓹ ꓫ ꓟꓬ ꓫ ꓟ ꓐꓲ ꓡꓰꓳ꓿ 7 ꓖꓳ ꓡꓱ ꓥ ꓟꓲ ꓥꓪ ꓡꓰ ꓠꓴ ꓪꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓥꓪ ꓙꓰˍ ꓟ ꓠꓬ ꓠꓴ ꓪꓽ ꓐꓱ ꓶ ꓟꓬꓽ ꓠꓬꓲ ꓙꓲˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓟꓽ ꓙꓰ ꓠꓬ꓾ ꓠꓲꓹ ꓟ ꓗꓴ ꓖꓶ ꓢꓴ ꓠꓴ ꓪꓽ ꓔꓯ ꓟꓽ ꓡ꓿ ꓖꓳ ꓡꓱ ꓥ ꓟꓲ ꓥꓪ ꓙꓰˍ ꓠꓬ ꓠꓴ ꓪꓽ ꓔꓬ ꓗꓪ ꓥꓪ ꓬꓲ ꓔꓯ ꓝꓲ ꓩꓴ ꓡ ꓥꓳ꓿ 8 ꓬꓲ ꓛꓲ ꓡ ꓕꓯ ꓬꓲ ꓡꓰ ꓝꓴꓲˍ ꓐꓰ ꓔꓱꓹ ꓜꓳꓽˍ ꓟ ꓐꓰ ꓐꓯ ꓟꓴ ꓘꓶꓽˍ ꓟ ꓔꓯ ꓖꓴ ꓟꓳꓸ ꓖꓶ ꓢꓲ꓾ ꓟꓲ ꓠꓯ ꓔꓯ ꓟꓸ ꓧꓪꓸ ꓛꓲꓽ ꓡ ꓝꓲˍ ꓥꓳ꓿ 9 ꓝꓴꓲ ꓔꓯꓸ ꓟꓳꓸ ꓖꓴ ꓟꓳꓸ ꓖꓶˍ ꓟ ꓠꓬ꓾ ꓬꓲ ꓪꓽ ꓥꓪ ꓔꓯ ꓟꓽ ꓙꓵꓻ ꓟ ꓑꓶꓸ ꓓꓴ ꓥ ꓡꓳ꓿ 10 ꓔꓱꓹ ꓜꓳꓽˍ ꓟ ꓔꓯꓸ ꓟꓳꓸ ꓖꓴ ꓟꓳꓸ ꓖꓶˍ ꓟ ꓠꓬ꓾ ꓐꓹ ꓐ ꓔꓯ ꓥꓪ ꓙꓰ ꓢꓲ꓾ ꓠꓴ ꓪꓽ ꓥꓪ ꓔꓯ ꓝꓮꓲ ꓟꓽ ꓟꓳꓻ ꓗꓷ ꓡꓰˍ ꓟ ꓑꓶꓸ ꓓꓴ ꓥ ꓡꓳ꓿ 11 ꓐꓯ ꓟꓴ ꓘꓶꓽˍ ꓟ ꓔꓯꓸ ꓟꓳꓸ ꓖꓴ ꓟꓳꓸ ꓖꓶꓽˍ ꓟ ꓠꓬ꓾ ꓟꓲ ꓠꓯ ꓕꓱ ꓟ ꓬꓲ ꓢꓲ ꓒ ꓔꓯ ꓐꓯ ꓟꓴ ꓘꓶꓽ ꓗꓷ ꓟ ꓑꓶꓸ ꓓꓴ ꓥ ꓡꓳ꓿ 12 ꓥꓪ ꓠꓴ ꓪꓽ ꓔꓯ ꓐꓯ ꓖꓶ ꓓꓴ ꓮꓽ ꓟꓬꓹ ꓙꓳˍ ꓟꓲ꓾ ꓮ ꓟꓶ ꓠꓴ ꓪꓽ ꓟꓯꓻ ꓟꓽ ꓘꓴ꓿ 13 ꓖꓳ ꓡꓱ ꓥ ꓟꓲ ꓔꓱꓹ ꓚꓵˍ ꓟ ꓦ ꓖꓳ ꓟ ꓛꓲ ꓡ ꓕꓯ ꓠꓬ꓾ ꓔꓱꓹˍ ꓟ ꓮꓽ ꓙꓵ ꓗꓪ ꓬꓲ ꓡꓰ ꓠꓴ ꓪꓽ ꓔꓯ ꓧꓳꓽ ꓙꓰ ꓡ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓚꓲꓸ ꓛꓬ ꓠꓲꓹ ꓡꓶꓽ ꓗꓪ ꓐꓰ ꓟꓽ ꓫꓸ ꓕꓱ꓿ ꓬꓲ ꓮ ꓡꓲ ꓑ ꓙꓽˍ ꓠꓬ ꓖꓳ ꓡꓱ ꓫꓸ ꓕꓱ ꓢꓲ꓾ ꓒꓬꓱꓼ ꓡ ꓠꓹ ꓟ ꓫꓵꓽ ꓪꓴꓻˍ ꓟꓲ ꓠꓴ ꓪꓽ ꓔꓯ ꓟꓳꓸ ꓖꓶ ꓡ ꓥꓳ꓿ 14 ꓬꓲ ꓠꓬ ꓥꓪ ꓔꓯ ꓟ ꓣꓴꓻ ꓢꓲ ꓠꓴ ꓪꓽ ꓔꓯ ꓐꓯ ꓟꓳꓸ ꓖꓶ ꓡ ꓓꓴ ꓥ ꓠꓬꓲ꓾ ꓬꓲ ꓠꓽ ꓥꓪ ꓔꓯ ꓟꓬꓱ ꓓꓳꓽ ꓖꓶˍ ꓥꓳ꓿ 15 ꓐꓹ ꓐ ꓙꓳˍ ꓟ ꓮꓽ ꓙꓵ ꓠꓬ ꓥꓪ ꓔꓯ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓥꓪ ꓡꓰ꓾ ꓬꓲ ꓠꓬ ꓥꓪ ꓔꓯ ꓟ ꓣꓴ ꓢꓲ ꓠꓴ ꓪꓽ ꓔꓯ ꓐꓯ ꓟꓳꓸ ꓖꓶ ꓡ ꓓꓴ ꓥꓳ꓾ ꓐꓰ꓾ ꓐꓯˍ ꓟ ꓥ ꓡꓳ꓿ 16 ꓕꓲ ꓑꓹ ꓤ ꓠꓬ ꓠꓴ ꓪꓽ ꓥꓪ ꓔꓯ ꓟꓽ ꓟꓳ ꓗꓷ ꓡꓰˍ ꓥꓳ꓿ ꓝꓮꓲ ꓕꓲ ꓑꓹ ꓤˍ ꓠꓬ ꓠꓴ ꓪꓽ ꓥꓪ ꓔꓯ ꓟꓳˍ ꓥꓳ꓾ ꓐꓯˍ ꓡꓳ꓿ 17 ꓖꓳ ꓡꓱ ꓠꓬꓲ ꓬꓲ ꓛꓳꓽ ꓒꓯꓹ ꓕꓲ ꓐꓱ ꓠꓬ꓾ ꓕꓲ ꓑꓹ ꓤ ꓠꓬ ꓠꓴ ꓪꓽ ꓥꓪ ꓔꓯ ꓟꓽ ꓟꓳ꓾ ꓝꓮꓲ ꓕꓲ ꓑꓹ ꓤ ꓠꓬ ꓠꓴ ꓪꓽ ꓥꓪ ꓔꓯ ꓟꓳˍ ꓥꓳ꓾ ꓝꓮꓲ ꓠꓬ ꓐꓹ ꓐ ꓔꓯ ꓥꓪ ꓙꓰˍ ꓟ ꓑꓶ ꓓꓴ ꓥ ꓡꓳ꓾ ꓐꓰ ꓬꓲꓸ ꓣꓳ ꓔꓯ ꓐꓯ ꓖꓶ ꓡ ꓟ ꓕꓱ ꓟ ꓠꓬ ꓮꓸ ꓫꓵ ꓔꓯ ꓐꓯˍ ꓡ? 18 ꓬꓲ ꓡꓰ ꓕꓲ ꓑꓹ ꓤ ꓐꓯ ꓟ ꓕꓱ ꓟ ꓠꓬ ꓮꓸ ꓫꓵ ꓔꓯ ꓐꓯˍ ꓡ? ꓬꓲ ꓮꓸ ꓫꓵ ꓐꓯˍ ꓟ ꓣꓳ ꓟꓽ ꓢꓷ꓾ ꓐꓰ ꓡꓯꓽ ꓫꓵ ꓐꓯ ꓡꓯꓼ ꓘꓳˍ ꓡꓳ꓿ 19 ꓬꓲ ꓪꓽ ꓬꓲ ꓔꓯ ꓠ ꓠꓬꓲ ꓠꓲꓹ ꓫꓵˍ ꓟ ꓔꓯ ꓬꓰ-ꓢꓴ ꓡꓳꓸ ꓓꓳ ꓡ ꓠꓬ꓾ ꓥꓪ ꓡꓰ꓾ ꓕꓲ ꓑꓹ ꓤ ꓠꓬ ꓠꓴ ꓪꓽ ꓥꓪ ꓔꓯ ꓟꓽ ꓟꓳ ꓗꓷ ꓡꓰˍ ꓥꓳ꓾ ꓝꓮꓲ ꓕꓲ ꓑꓹ ꓤ ꓠꓬ ꓠꓴ ꓪꓽ ꓥꓪ ꓔꓯ ꓟꓳˍ ꓥꓳ꓾ ꓐꓰ ꓐꓯ ꓗꓷ ꓠꓬꓲ꓾ ꓠꓴ ꓪꓽ ꓛꓳꓽ ꓠꓴ ꓪꓽ ꓠ ꓠꓬꓲ ꓡꓯꓽ ꓘꓳˍ ꓡ? 20 ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓮꓸ ꓛꓬ ꓙꓱ ꓢꓲ ꓥꓴˍ ꓥꓳ꓿ ꓖꓳ ꓡꓱ ꓥ ꓟꓲ ꓟꓲ ꓠꓯ ꓠꓽ ꓗꓹ ꓛꓲˍ ꓥꓳ꓿ ꓠꓴ ꓪꓽ ꓠꓬ ꓠꓲꓹ ꓟ ꓫˍ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓲꓹ ꓟ ꓫˍ ꓟ ꓠꓬ ꓗꓹ ꓛꓲ ꓓꓴ ꓒꓬꓱꓼ ꓡ ꓥꓳ꓿ 21 ꓤꓽ ꓟꓶ ꓤ ꓤ ꓠꓱ ꓦꓵ ꓙꓵꓹ ꓛꓲ ꓡ ꓕꓯ꓾ ꓦꓵ ꓠꓻ ꓜꓲꓽ ꓢꓲ ꓠꓲꓹ ꓫꓸ ꓟꓬ ꓫꓸ ꓟ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓤ ꓠꓱ ꓦꓵ ꓗꓷ ꓠꓬ ꓟꓲ ꓠꓯ ꓗꓪ ꓤ ꓠꓱ ꓕꓲ ꓣꓳ ꓦꓵ ꓡ ꓟ ꓗꓪ ꓐꓰ ꓗꓹ ꓛꓲ ꓠꓬꓲ꓾ ꓫꓸ ꓙꓵˍ ꓟ ꓔꓯ ꓬꓲ ꓝꓮꓲ ꓚꓲꓸ ꓟꓽ ꓟꓶ꓿ 22 ꓖꓳ ꓡꓱ ꓠꓬꓲ ꓠꓴ ꓪꓽˍ ꓟꓲ ꓠꓲꓹ ꓫ ꓟꓬ ꓫˍ ꓟ ꓙꓳˍ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓝꓮꓲ ꓟꓳˍ ꓕꓯ ꓠꓴ ꓪꓽ ꓠꓽ ꓗ ꓛꓲˍ ꓥꓳ꓿ ꓠꓴ ꓪꓽ ꓗ ꓛꓲ ꓠꓲꓹ ꓔꓯ ꓠꓬ ꓮꓽ ꓟˍ ꓟꓲ ꓣꓴ ꓔꓯꓹ ꓙꓰ ꓟꓽ ꓐ ꓡ꓿ 23 ꓖꓳ ꓕꓲ ꓠꓬꓲ ꓗꓪ ꓠꓴ ꓪꓽ ꓥꓪ ꓔꓯ ꓮꓸ ꓫꓵˍ ꓟꓲ ꓠ ꓠꓬꓲ ꓟꓽ ꓛꓵꓳ꓿ ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓟꓬꓱꓺ ꓗꓪ ꓐꓰ ꓐꓹ ꓐ ꓔꓯ ꓠꓴ ꓪꓽ ꓮꓸ ꓫꓵ ꓓꓰꓽˍ ꓟꓲ ꓠꓴ ꓪꓽ ꓔꓯ ꓖꓶ ꓡ ꓥꓳ꓿ 24 ꓮ ꓟꓶ ꓗꓪ ꓛꓲ ꓠꓴ ꓪꓽ ꓠꓬ ꓥꓪ ꓟꓬꓱꓺ ꓗꓪ ꓐꓰ ꓮꓸ ꓫꓵˍ ꓟꓲ ꓟꓽ ꓓꓰ ꓠꓬꓲ ꓢꓰꓽ꓿ ꓠꓴ ꓪꓽ ꓗꓹ ꓛꓲ ꓠꓲꓹ ꓐꓲ ꓡ ꓠꓹ ꓟ ꓓꓰꓽ꓿ ꓖꓳ ꓡꓱ ꓠꓬ ꓠꓴ ꓪꓽ ꓟꓶˍ ꓥꓳ꓿ 25 ꓕꓱ ꓟꓬ ꓙꓰꓽ ꓟ ꓠꓬ ꓔꓯꓺ ꓥꓳꓽ ꓗꓪ ꓐꓰ ꓥꓪ ꓡꓰ ꓠꓴ ꓪꓽ ꓔꓯ ꓐꓯ ꓖꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓬ ꓠꓴ ꓪꓽ ꓔꓯ ꓔꓯꓺ ꓥꓳꓽ ꓗꓪ ꓐꓰ ꓝꓮꓲ ꓟꓽ ꓐꓯ ꓐꓯ꓾ ꓐꓹ ꓐ ꓔꓯꓸ ꓟꓳ ꓖꓴ ꓢꓲ ꓠꓴ ꓪꓽ ꓔꓯ ꓫꓬꓽ ꓫꓬ ꓡꓰ ꓐꓯ ꓖꓶˍ ꓟ ꓬꓲ ꓙꓵꓹ ꓛꓲ ꓡ ꓥꓳ꓿ 26 ꓖꓳ ꓕꓲ ꓠꓬꓲ ꓗꓪ ꓠꓴ ꓪꓽ ꓠꓬ ꓥꓪ ꓟꓬꓱ ꓗꓪ ꓐꓰ ꓓꓰꓽˍ ꓥꓳ꓿ ꓥꓪ ꓠꓬ ꓠꓴ ꓪꓽ ꓐꓱ ꓶ ꓐꓹ ꓐ ꓔꓯ ꓓꓰꓽ ꓙˍ ꓥꓳ꓾ ꓐꓰ ꓐꓯˍ ꓟ ꓟꓽ ꓥ꓿ 27 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓥꓪ ꓔꓯ ꓠꓲꓹ ꓠꓵ ꓢꓲ꓾ ꓥꓪ ꓠꓬ ꓐꓹ ꓐ ꓔꓯꓺˍ ꓐꓰ ꓓꓳ ꓡ ꓟ ꓔꓯ ꓠꓴ ꓪꓽ ꓙꓵˍ ꓠꓬꓲ꓾ ꓐꓹ ꓐ ꓬꓲ ꓚꓲꓸ ꓛꓬ ꓡꓰ ꓠꓴ ꓪꓽ ꓔꓯ ꓠꓲꓹ ꓠꓵˍ ꓠꓬꓲ ꓥ ꓡꓳ꓿ 28 ꓥꓪ ꓠꓬ ꓐꓹ ꓐ ꓔꓯꓺˍ ꓐꓰ ꓓꓳ ꓡ ꓢꓲ ꓟꓲ ꓠꓯ ꓗꓪ ꓡꓻꓳ꓿ ꓝꓮꓲ ꓠꓬ ꓟꓲ ꓠꓯ ꓔꓯ ꓥꓪ ꓧꓹ ꓗꓷ ꓢꓲ ꓐꓹ ꓐ ꓔꓯ ꓙꓰˍ ꓥꓳ꓾ ꓐꓯˍ ꓡꓳ꓿ 29 ꓬꓲ ꓛꓳꓽ ꓒꓯꓹ ꓐꓴ ꓡꓰ꓾ ꓮ ꓟꓶ ꓠ ꓠꓴ ꓔꓯꓺ ꓥꓳꓽ ꓗꓪ ꓐꓰ ꓟꓽ ꓫꓸ ꓕꓱ꓾ ꓫꓬꓽ ꓫꓬˍ ꓐꓰ ꓫꓸ ꓕꓱˍ ꓡꓳ꓿ 30 ꓠꓴ ꓠꓬ ꓮꓽ ꓙꓵ ꓡꓱꓸꓼ ꓢꓷꓸ ꓖꓴˍ ꓟ ꓐꓰ꓾ ꓠꓴ ꓔꓯ ꓮꓽ ꓟˍ ꓟꓲ ꓟꓰꓹ ꓠ ꓠꓬꓲ ꓟꓽ ꓛꓵ ꓟ ꓥꓪ ꓠꓴꓽ ꓢꓷꓸ ꓢꓲ꓾ ꓠꓴ ꓠꓽ ꓪꓴ-ꓢ ꓔꓯꓺˍ ꓐꓰ ꓡꓻ ꓢꓴ ꓥ ꓟ ꓥꓪ ꓠꓴꓽ ꓙꓵꓻˍ ꓡꓳ꓾ ꓐꓯˍ ꓡꓳ꓿ 31 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓮ ꓟꓶ ꓠꓴ ꓪꓽ ꓙꓵˍ ꓡ? 32 ꓠ ꓠꓹ꓾ ꓠꓴ ꓪꓽ ꓠꓬ ꓟꓲꓺ ꓔꓬ ꓖꓴ ꓗꓪ ꓟꓲꓺ ꓧꓹ ꓒꓬꓱꓺ ꓙꓰ ꓢꓲ꓾ ꓥꓪ ꓕꓲ ꓣꓳ ꓔꓯˍ ꓡꓰꓽ ꓡꓳ ꓔ ꓬꓰˍ ꓟ ꓬꓲ ꓙꓵꓹ ꓛꓲ ꓡ ꓥꓳ꓾ ꓮ ꓟꓶˍ ꓡꓰ ꓛꓲ ꓡꓺꓳ꓿ ꓖꓳ ꓡꓱ ꓥ ꓟꓲ ꓐꓹ ꓐ ꓠꓬ ꓥꓪˍ ꓐꓰ ꓕꓲ ꓪꓺꓼ ꓔꓬ ꓠꓬꓲ꓾ ꓥꓪ ꓠꓽ ꓕꓲ ꓣꓳ ꓔꓵꓸꓼ ꓟꓽ ꓥ꓿ 33 ꓠꓴ ꓪꓽ ꓔꓯ ꓥꓪ ꓠꓯꓸꓼ ꓗꓪ ꓢꓲ ꓡꓲ ꓟ ꓟꓶ ꓝꓲ ꓠꓹ ꓟ ꓥꓪ ꓡꓰ ꓠꓴ ꓪꓽ ꓔꓯ ꓕꓱ ꓟꓬ ꓙꓰꓽ ꓐꓯ ꓖꓶˍ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓠꓬ ꓠꓴ ꓪꓽ ꓫꓸ ꓙꓵˍ ꓟ ꓔꓳꓹ ꓜꓳꓽˍ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓲꓹ ꓪꓴꓽ ꓪꓴ ꓡꓰ ꓔꓬ꓿ ꓥꓪ ꓡꓰ ꓟꓲ ꓠꓯ ꓔꓯ ꓧꓪꓸ ꓡꓰꓳ꓾ ꓐꓯˍ ꓡꓳ꓿

ꓬꓳ-ꓦ 17

1 ꓬꓰ-ꓢꓴ ꓡꓰ ꓕꓱ ꓟꓬ ꓙꓰꓽ ꓐꓯ ꓗꓷ ꓠꓬ꓾ ꓟꓴꓽ ꓗꓪ ꓔꓯ ꓟꓳꓸ ꓡꓳꓸ ꓢꓲ ꓕꓱ ꓡꓱ ꓐꓯˍ ꓡꓳ꓿ ꓐꓹ ꓐꓽꓳ꓾ ꓬꓲ ꓙꓵꓹ ꓛꓲ ꓡꓺꓳ꓿ ꓮ ꓐꓲ ꓠꓬ ꓠꓴ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ꓾ ꓠꓴ ꓮ ꓐꓲ ꓔꓯ ꓟꓬꓱ ꓓꓳꓽ ꓖꓶ ꓡꓯ꓿ 2 ꓮ ꓡꓲꓳ ꓐꓯ ꓠꓬ ꓠꓴ ꓡꓰ ꓬꓲ ꓔꓯ ꓖꓶ ꓔ ꓢꓴ ꓮꓽ ꓙꓵ ꓔꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶ ꓠꓹ ꓟ꓾ ꓠꓴ ꓠꓬ ꓡ ꓞꓳ ꓮꓽ ꓙꓵ ꓟ ꓕꓯꓽ ꓢꓲ ꓗꓪ ꓬꓲ ꓔꓯ ꓙꓵ ꓪꓽ ꓖꓶ ꓗꓷꓳ꓿ 3 ꓔꓱꓹˍ ꓟ ꓪꓴ-ꓢ ꓕꓲ ꓣꓳˍ ꓡꓰꓽ ꓙꓳˍ ꓟ ꓐꓰ꓾ ꓠꓴꓻˍ ꓐꓰ ꓠꓴꓻ ꓡꓰ ꓝꓲ ꓩꓴ ꓔ ꓟ ꓬꓰ-ꓢꓴ ꓙꓲ-ꓢꓴ ꓔꓯ ꓢꓷˍ ꓟ ꓕꓱ ꓟ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓥ ꓡꓳ꓿ 4 ꓠꓴ ꓡꓰ ꓥꓪ ꓔꓯ ꓖꓶ ꓔ ꓟ ꓟꓬꓱꓽ ꓬꓰ ꓓꓳ ꓡꓰ ꓠꓬꓲ꓾ ꓥꓪ ꓠꓬ ꓟꓲ ꓠꓯ ꓗꓪ ꓠꓴ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ 5 ꓖꓳ ꓡꓱ ꓠꓬꓲ ꓐꓹ ꓐꓽꓳ꓾ ꓟꓲ ꓠꓯ ꓟꓽ ꓙꓳ ꓕꓯˍ ꓡꓰ꓾ ꓠꓴˍ ꓐꓰ ꓕꓲ ꓡꓰꓹꓼ ꓥꓪ ꓙꓳˍ ꓟ ꓟꓬꓱ ꓓꓳꓽ ꓕꓱ ꓟ꓾ ꓮ ꓟꓶ ꓠꓴ ꓟꓲꓽ ꓙꓬ ꓗꓪ ꓥꓪ ꓔꓯ ꓖꓶ ꓡꓯ꓿ 6 ꓠꓴ ꓡꓰ ꓟꓲ ꓠꓯ ꓗꓪ ꓐꓰ ꓥꓪ ꓔꓯ ꓖꓶ ꓔ ꓟ ꓡ ꓞꓳ ꓔꓯ ꓥꓪ ꓡꓰ ꓠꓴ ꓟꓬꓱꓺ ꓟꓳꓸ ꓖꓶ ꓗꓷꓳ꓿ ꓬꓲ ꓪꓽ ꓠꓬ ꓠꓴ ꓔꓯ ꓟ ꓥ ꓢꓲ꓾ ꓠꓴ ꓡꓰ ꓥꓪ ꓔꓯ ꓖꓶ ꓔ ꓟ ꓥ ꓢꓲ ꓠꓬꓲ꓾ ꓠꓴ ꓐꓯ ꓘꓶ ꓔꓯ ꓬꓲ ꓪꓽ ꓒꓵꓽ ꓛꓳ ꓗꓷꓳ꓿ 7 ꓥꓪ ꓔꓯ ꓖꓶ ꓔ ꓟ ꓮꓽ ꓙꓵ ꓠꓬ ꓠꓴ ꓗꓪ ꓐꓰ ꓥ ꓟ ꓮ ꓟꓶ ꓬꓲ ꓪꓽ ꓢꓷꓸ ꓡꓰꓳ꓿ 8 ꓮ ꓡꓲꓳ ꓐꓯ ꓠꓬ ꓠꓴ ꓡꓰ ꓥꓪ ꓔꓯ ꓖꓶꓽ ꓔ ꓟ ꓐꓯ ꓘꓶ ꓠꓬ ꓥꓪ ꓡꓰ ꓬꓲ ꓪꓽ ꓔꓯ ꓖꓶ ꓗꓷꓳ꓿ ꓬꓲ ꓪˍ ꓟꓲ ꓘꓳ ꓣꓴ ꓢꓲ꓾ ꓥꓪ ꓠꓬ ꓠꓴ ꓔꓯ ꓐꓰ ꓓꓳ ꓡ ꓢꓴ ꓥ ꓟ ꓬꓲ ꓪꓽ ꓚꓵ ꓚꓵ ꓢꓷꓸ ꓡꓰ ꓢꓲ ꓠꓬꓲ꓾ ꓠꓴ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓔꓯˍ ꓟꓲ ꓬꓲ ꓪꓽ ꓙꓵꓻ ꓗꓷꓳ꓿ 9 ꓥꓪ ꓠꓬ ꓬꓲ ꓪꓽ ꓐꓱ ꓶ ꓓꓰꓽˍ ꓡꓳ꓿ ꓟꓲ ꓠꓯ ꓐꓱ ꓶ ꓠꓽ ꓥꓪ ꓟꓽ ꓓꓰꓽ꓿ ꓠꓴ ꓡꓰ ꓥꓪ ꓔꓯ ꓖꓶ ꓔ ꓢꓴ ꓐꓱ ꓶˍ ꓡꓰꓽ ꓓꓰꓽˍ ꓥꓳ꓿ ꓮ ꓡꓲꓳ ꓐꓯˍ ꓠꓬ ꓬꓲ ꓪꓽ ꓠꓽ ꓠꓴ ꓔꓯ ꓟ ꓥ ꓡꓳ꓿ 10 ꓥꓪ ꓔꓯ ꓟ ꓮꓽ ꓙꓵ ꓠꓬ ꓠꓴ ꓔꓯ ꓟ ꓥꓳ꓿ ꓠꓴ ꓔꓯ ꓟˍ ꓟꓲ ꓥꓪ ꓔꓯ ꓟ ꓥꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓗꓪ ꓐꓰ ꓥꓪ ꓟꓬꓱ ꓓꓳꓽ ꓟꓶˍ ꓡꓳ꓿ 11 ꓕꓱ ꓡꓱ ꓖꓳ ꓑꓳ ꓥꓪ ꓠꓬ ꓟꓲ ꓠꓯ ꓗꓪ ꓟꓽ ꓔꓬ ꓔꓬ ꓠꓴ ꓔꓯ ꓡꓻˍ ꓥꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓟꓲ ꓠꓯ ꓗꓪ ꓔꓬ ꓢꓰꓽ ꓡꓳ꓿ ꓢꓲꓽ ꓫꓬ ꓟ ꓐꓹ ꓐꓽꓳ꓾ ꓣꓳ ꓕꓲ ꓟˍ ꓡꓰꓽ ꓥ ꓟ ꓡꓰ ꓐꓰ꓾ ꓠꓴ ꓡꓰ ꓥꓪ ꓔꓯ ꓖꓶ ꓔ ꓢꓴ ꓐꓴˍ ꓟꓲ ꓕꓲ ꓟˍ ꓡꓰꓽ ꓒꓬꓱꓼ ꓡ ꓠꓹ ꓟ꓾ ꓠꓴ ꓡꓰ ꓥꓪ ꓔꓯ ꓖꓶ ꓔ ꓟ ꓠꓴ ꓟꓬꓱ ꓗꓪ ꓐꓰ ꓬꓲ ꓪꓽ ꓔꓯ ꓫ ꓙ꓿ 12 ꓥꓪ ꓠꓬ ꓠꓴ ꓡꓰ ꓥꓪ ꓔꓯ ꓖꓶꓽ ꓡ ꓢꓴ ꓐꓴˍ ꓐꓰ ꓕꓲ ꓪꓺꓼ ꓔꓬ ꓕꓯ꓾ ꓠꓴ ꓖꓶ ꓡ ꓟ ꓟꓬꓱꓺ ꓗꓪ ꓐꓰ ꓬꓲ ꓪꓽ ꓔꓯ ꓠꓬꓲ ꓙ ꓔ ꓙ ꓗꓷꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓟ ꓐꓯ ꓘꓶ ꓐꓲ ꓡ ꓠꓹ ꓟ꓾ ꓟꓶꓽ ꓬꓰˍ ꓟ ꓤꓽ ꓖꓳ ꓕꓲ ꓣꓳ ꓟꓽ ꓥ ꓠꓬ ꓬꓲ ꓪꓽ ꓕꓲ ꓣꓳˍ ꓟꓲ ꓟꓽ ꓒꓲꓼ ꓬꓰ꓿ 13 ꓮ ꓟꓶ ꓠꓽ ꓠꓴ ꓔꓯ ꓥꓪ ꓡꓻˍ ꓥꓳ꓿ ꓖꓳ ꓡꓱ ꓢꓲ ꓟꓲ ꓠꓯ ꓗꓪ ꓥꓪ ꓔꓬ ꓢꓰꓽ ꓕꓯ ꓕꓱ ꓟꓬ ꓙꓰꓽ ꓐꓯˍ ꓟ ꓠꓬ꓾ ꓥꓪ ꓗꓹ ꓛꓲ ꓠꓲꓹ ꓬꓲ ꓪꓽ ꓠꓯꓸꓼ ꓗꓪ ꓐꓲ ꓡꓰ ꓝꓲ ꓠꓹ ꓟ ꓥ ꓡꓳ꓿ 14 ꓥꓪ ꓡꓰ ꓠꓴ ꓐꓯ ꓘꓶ ꓬꓲ ꓪꓽ ꓔꓯ ꓖꓶ ꓔ ꓡꓳ꓿ ꓥꓪ ꓠꓬ ꓟꓲ ꓠꓯ ꓗꓪ ꓟ ꓟꓽ ꓥ ꓟ ꓡꓰ ꓐꓰ꓾ ꓬꓲ ꓪˍ ꓟꓲ ꓟꓲ ꓠꓯ ꓗꓪ ꓟ ꓟꓽ ꓥ ꓠꓬꓲ꓾ ꓟꓲ ꓠꓯ ꓠꓬ ꓬꓲ ꓪꓽ ꓔꓯ ꓠꓲꓹ ꓜꓳˍ ꓡꓳ꓿ 15 ꓠꓴ ꓬꓲ ꓪꓽ ꓔꓯ ꓟꓲ ꓠꓯ ꓗꓪ ꓐꓰ ꓣꓴ ꓓꓳ ꓗꓷ ꓠꓹ ꓟ ꓥꓪ ꓟꓽ ꓓꓰꓽ꓿ ꓥꓶˍ ꓟ ꓖꓳ ꓕꓲ ꓣꓳ ꓔꓯˍ ꓐꓰ ꓬꓲ ꓪꓽ ꓔꓯ ꓫ ꓙ ꓠꓹ ꓟ ꓓꓰꓽˍ ꓥꓳ꓿ 16 ꓥꓪ ꓠꓬ ꓟꓲ ꓠꓯ ꓗꓪ ꓟ ꓟꓽ ꓥ ꓟ ꓡꓰ ꓐꓰ꓾ ꓬꓲ ꓪꓽˍ ꓟꓲ ꓟꓲ ꓠꓯ ꓗꓪ ꓟ ꓟꓽ ꓥ꓿ 17 ꓠꓴ ꓔꓱꓹ ꓚꓵˍ ꓟ ꓡꓰ ꓬꓲ ꓪꓽ ꓔꓯ ꓢꓲ ꓚꓰꓸ ꓗꓷ꓿ ꓮ ꓡꓲꓳ ꓐꓯ ꓠꓬ ꓠꓴ ꓐꓯ ꓘꓶ ꓠꓽ ꓔꓱꓹ ꓚꓵˍ ꓟ ꓥ ꓡꓳ꓿ 18 ꓠꓴ ꓥꓪ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡ ꓟ ꓡꓰ ꓐꓰ꓾ ꓥꓪˍ ꓟꓲ ꓬꓲ ꓪꓽ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓗꓷꓳ꓿ 19 ꓬꓲ ꓪꓽ ꓠꓬ ꓔꓱꓹ ꓚꓵˍ ꓟ ꓐꓱ ꓶ ꓢꓲ ꓚꓰꓸ ꓟꓶ ꓡꓰ ꓠꓹ ꓟ꓾ ꓥꓪˍ ꓟꓲ ꓚꓲꓸ ꓛꓬ ꓔꓯ ꓠꓴ ꓐꓱ ꓶ ꓚꓰꓸ ꓗꓷꓳ꓿ 20 ꓕꓱ ꓕꓲ ꓧꓳꓽ ꓟ ꓐꓱ ꓶˍ ꓡꓰꓽ ꓥꓪ ꓓꓰꓽˍ ꓟ ꓟꓽ ꓥ꓾ ꓬꓲ ꓪꓽ ꓐꓯ ꓘꓶ ꓗꓪ ꓐꓰ ꓥꓪ ꓔꓯ ꓙꓵꓻ ꓢꓴ ꓐꓴ ꓐꓱ ꓶˍ ꓟꓲ ꓓꓰꓽˍ ꓥꓳ꓿ 21 ꓠꓴ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓔꓯ ꓟꓲ ꓠꓯ ꓡꓰ ꓙꓵꓻ ꓡ ꓠꓹ ꓟ꓾ ꓬꓲ ꓪꓽ ꓮꓽ ꓙꓵ ꓠꓬ ꓕꓲ ꓟˍ ꓡꓰꓽ ꓒꓬꓱꓼ ꓡ ꓢꓲ꓾ ꓐꓹ ꓐ ꓠꓴ ꓥꓪ ꓠꓯꓸꓼ ꓗꓪ ꓔꓬ ꓢꓲ ꓥꓪˍ ꓟꓲ ꓠꓴ ꓠꓯꓸꓼ ꓗꓪ ꓔꓬ ꓟ ꓡꓰ ꓐꓰ꓾ ꓬꓲ ꓪꓽˍ ꓟꓲ ꓣꓳ ꓠꓯꓸꓼ ꓗꓪ ꓔꓬ ꓟꓶ ꓠꓹ ꓟ ꓥꓪ ꓓꓰꓽˍ ꓥꓳ꓿ 22 ꓖꓳ ꓡꓱ ꓢꓲ ꓣꓳꓽ ꓕꓲ ꓟˍ ꓡꓰꓽ ꓥ ꓟ ꓡꓰ ꓐꓰ꓾ ꓬꓲ ꓪꓽˍ ꓟꓲ ꓕꓲ ꓟˍ ꓡꓰꓽ ꓒꓬꓱꓼ ꓡ ꓠꓹ ꓟ꓾ ꓠꓴ ꓡꓰ ꓥꓪ ꓔꓯ ꓖꓶ ꓔ ꓟ ꓟꓬꓱꓺ ꓓꓳꓽ ꓠꓬ ꓥꓪ ꓬꓲ ꓪꓽ ꓔꓯ ꓖꓶ ꓔ ꓡꓳ꓿ 23 ꓠꓴ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓐꓰ꓾ ꓠꓴ ꓥꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓬꓲ ꓪꓽ ꓔꓯˍ ꓟꓲ ꓠꓴ ꓠꓲꓹ ꓠꓵˍ ꓟ ꓔꓯ ꓟꓲ ꓠꓯ ꓢꓷꓸ ꓡꓰ ꓠꓹ ꓟ꓾ ꓥꓪ ꓠꓬ ꓬꓲ ꓪꓽ ꓠꓯꓸꓼ ꓗꓪ ꓔꓬ ꓢꓲ꓾ ꓠꓴꓻˍ ꓟꓲ ꓥꓪ ꓠꓯꓸꓼ ꓗꓪ ꓔꓬ ꓢꓲ ꓠꓬꓲ꓾ ꓬꓲ ꓪꓽˍ ꓟꓲ ꓕꓲ ꓠꓲꓹ ꓟˍ ꓗꓷ ꓡꓰˍ ꓟ ꓗꓪ ꓐꓰ ꓜꓳꓽ ꓓꓰ ꓡꓰ ꓠꓹ ꓟ꓾ ꓠꓴ ꓡꓰ ꓥꓪ ꓔꓯ ꓖꓶ ꓔ ꓟ ꓥꓪ ꓟꓬꓱꓺ ꓓꓳꓽ ꓠꓬ ꓬꓲ ꓪꓽ ꓔꓯ ꓖꓶ ꓔ ꓡꓳ꓿ 24 ꓐꓹ ꓐꓽꓳ꓾ ꓠꓴ ꓡꓰ ꓥꓪ ꓔꓯ ꓖꓶ ꓡ ꓢꓴ ꓐꓴˍ ꓟꓲ꓾ ꓠꓴ ꓥꓪ ꓔꓯ ꓖꓶ ꓔ ꓟ ꓟꓬꓱ ꓓꓳꓽ ꓔꓯ ꓡꓳꓸ ꓟꓳ ꓠꓹ ꓟ ꓐꓰ꓾ ꓥꓪ ꓔꓬ ꓟ ꓗꓪ ꓬꓲ ꓪˍ ꓟꓲ ꓔꓬ ꓪ ꓠꓹ ꓟ ꓥꓪ ꓠꓲꓹ ꓫꓵˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓵ ꓟꓽ ꓚꓰꓼ ꓟꓲ ꓟꓽ ꓚꓰꓼ ꓕꓯˍ ꓡꓰ ꓠꓴ ꓥꓪ ꓔꓯ ꓠꓲꓹ ꓠꓵˍ ꓡꓳ꓿ 25 ꓔꓱꓹ ꓜꓳꓽˍ ꓟ ꓐꓹ ꓐꓽꓳ꓾ ꓟꓲ ꓠꓯ ꓠꓬ ꓠꓴ ꓔꓯ ꓟꓽ ꓢꓷˍ ꓟꓲ ꓥꓪ ꓠꓽ ꓠꓴ ꓔꓯ ꓢꓷˍ ꓡꓳ꓿ ꓕꓱ ꓕꓲ ꓧꓳꓽ ꓟˍ ꓟꓲ ꓠꓴ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓔꓯ ꓢꓷˍ ꓡꓳ꓿ 26 ꓠꓴ ꓥꓪ ꓔꓯ ꓠꓵˍ ꓟ ꓠꓵꓻ ꓠꓲꓹ ꓬꓲ ꓪꓽ ꓠꓯꓸꓼ ꓗꓪ ꓓꓯꓹ ꓠꓹ ꓟ ꓐꓰ꓾ ꓥꓪˍ ꓟꓲ ꓬꓲ ꓪꓽ ꓠꓯꓸꓼ ꓗꓪ ꓔꓬ ꓠꓹ ꓟ꓾ ꓠꓴ ꓟꓬꓱꓺ ꓔꓯ ꓥꓪ ꓡꓰ ꓬꓲ ꓪꓽ ꓔꓯ ꓢꓷꓸ ꓡꓰ ꓝꓲꓳ꓿ ꓝꓮꓲ ꓡꓯꓽ ꓫꓵ ꓢꓷ ꓡꓰ ꓝꓲˍ ꓢꓰꓽ ꓥꓳ꓾ ꓐꓯˍ ꓡꓳ꓿

ꓬꓳ-ꓦ 18

1 ꓐꓯ ꓘꓶ ꓕꓱ ꓟꓬ ꓟ ꓬꓰ-ꓢꓴ ꓐꓯ ꓗꓷ ꓠꓬ꓾ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓕꓲ ꓛꓳꓺꓼ ꓘꓷ-ꓓꓲ-ꓣꓴ ꓡꓳꓻ ꓗꓸ ꓖꓳ ꓐꓽ ꓢꓲ ꓗꓪ ꓗꓳꓸ ꓙꓰ ꓢꓲ꓾ ꓬꓲˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓐꓱꓺ ꓕꓲ ꓐꓱ ꓗꓪ ꓓꓵꓽ ꓡꓰˍ ꓡꓳ꓿ 2 ꓬꓰ-ꓢꓴ ꓠꓽ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓖꓳ ꓗꓪ ꓮ ꓕꓯꓽ ꓟꓴ ꓕꓯꓽ ꓜꓲꓼ ꓡꓯꓽ ꓘꓳ ꓝꓳ ꓠꓬꓲ꓾ ꓬꓲ ꓔꓯ ꓪꓴꓽ ꓜꓽ ꓢꓴ ꓬꓴ-ꓓˍ ꓟꓲ ꓖꓳ ꓕꓲ ꓔꓳꓸ ꓔꓯ ꓢꓷˍ ꓡꓳ꓿ 3 ꓖꓳ ꓕꓯ ꓬꓴ-ꓓ ꓠꓬ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓗꓪ ꓐꓰ꓾ ꓢꓲꓽ ꓒ ꓝꓲ ꓓꓴˍ ꓐꓰ ꓟꓯꓼ ꓤ ꓕꓲ ꓧꓳꓽ ꓟꓶ ꓡꓰˍ ꓡꓳ꓿ ꓬꓲ ꓪ ꓠꓬ ꓟꓬ ꓡꓴˍ ꓐꓰ ꓮꓸ ꓔꓳ ꓧꓷꓹˍ ꓐꓰ ꓟꓯꓼ ꓶꓻ ꓔꓯꓹ ꓔ ꓢꓲ ꓖꓳ ꓗꓪ ꓡꓻˍ ꓡꓳ꓿ 4 ꓬꓰ-ꓢꓴ ꓠꓬ ꓬꓲ ꓚꓲꓸ ꓛꓬ ꓔꓯ ꓮ ꓡꓲ ꓗꓷ ꓡꓰ ꓠꓹ ꓟ ꓮꓽ ꓙꓵ ꓢꓷˍ ꓠꓬꓲ꓾ ꓓꓳ ꓙꓰ ꓢꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓮꓽ ꓟ ꓔꓯ ꓧꓪˍ ꓡ? ꓐꓰ ꓠ ꓠꓬꓲˍ ꓡꓳ꓿ 5 ꓬꓲ ꓪꓽ ꓡꓰ꓾ ꓠ-ꓢ-ꓡꓱ ꓢꓴ ꓬꓰ-ꓢꓴ ꓔꓯ ꓧꓪˍ ꓡꓳ꓾ ꓐꓰ ꓒꓳꓹ ꓖꓶˍ ꓕꓯ꓾ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓖꓳ ꓕꓲ ꓣꓳ ꓠꓬ ꓥꓪ ꓥ ꓡꓳ꓾ ꓐꓯ ꓖꓶˍ ꓡꓳ꓿ ꓬꓲ ꓔꓯ ꓪꓴꓽ ꓜ ꓢꓴ ꓬꓴ-ꓓˍ ꓟꓲ ꓬꓲ ꓪˍ ꓐꓰ ꓦꓰꓼ ꓞꓹ ꓡꓳ꓿ 6 ꓖꓳ ꓡꓱ ꓢꓲ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓖꓳ ꓕꓲ ꓣꓳ ꓠꓬ ꓥꓪ ꓥ ꓡꓳ꓾ ꓐꓰ ꓐꓯˍ ꓕꓯ꓾ ꓬꓲ ꓪꓽ ꓟꓰꓹ ꓟꓰꓹ ꓢꓲ ꓡꓽ ꓙꓰ ꓢꓲ ꓟꓲ ꓛꓬ ꓗꓪ ꓓꓳꓽ ꓡꓰˍ ꓡꓳ꓿ 7 ꓖꓳ ꓡꓱ ꓠꓬ ꓬꓲ ꓝꓮꓲ ꓕꓲ ꓧꓪꓹ ꓬꓲ ꓪꓽ ꓔꓯ꓾ ꓠꓴ ꓪꓽ ꓮꓽ ꓟ ꓔꓯ ꓧꓪˍ ꓡ? ꓐꓰ ꓠ ꓠꓬꓲˍ ꓕꓯ ꓬꓲ ꓪꓽ ꓡꓰ꓾ ꓠ-ꓢ-ꓡꓱ ꓢꓴ ꓬꓰ-ꓢꓴ ꓔꓯ ꓧꓪˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 8 ꓬꓰ-ꓢꓴ ꓡꓰ꓾ ꓥꓪ ꓥ ꓡꓳ꓾ ꓐꓰ ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓗꓷꓳ꓿ ꓠꓴ ꓪꓽ ꓥꓪ ꓔꓯ ꓧꓪˍ ꓟ ꓥ ꓠꓬ꓾ ꓕꓱ ꓕꓲ ꓧꓳꓽ ꓟ ꓔꓯ ꓙꓰ ꓝꓲ꓾ ꓐꓰ ꓐꓯ ꓖꓶˍ ꓡꓳ꓿ 9 ꓕꓱ ꓟ ꓠꓬ ꓬꓲ ꓡꓰ꓾ ꓠꓴ ꓡꓰ ꓥꓪ ꓔꓯ ꓖꓶ ꓔ ꓟ ꓕꓲ ꓣꓳˍ ꓟꓲ ꓟꓽ ꓒꓲꓼ ꓬꓰ꓾ ꓐꓰ ꓐꓯ ꓗꓷ ꓟ ꓐꓲ ꓡ ꓝꓲ ꓠꓹ ꓟ ꓥ ꓡꓳ꓿ 10 ꓢꓲ-ꓟꓴ ꓒꓲ-ꓕꓱ ꓠꓬ ꓮꓸ ꓕꓽ ꓕꓲ ꓛꓲ ꓓꓱꓼ ꓔ ꓠꓬꓲ꓾ ꓚꓵꓹ ꓢꓲ ꓔꓲ ꓒ ꓓꓽ ꓟ ꓚꓳ ꓑꓸ ꓟ-ꓡ-ꓚꓲ ꓔꓯ ꓕꓲ ꓛꓵꓺ ꓛꓵ ꓗꓷ ꓠꓬ꓾ ꓬꓲ ꓠꓸ ꓙ ꓐꓽ ꓔꓯ ꓛꓵꓺ ꓞꓷꓹ ꓗꓷꓳ꓿ 11 ꓖꓳ ꓡꓱ ꓠꓬꓲ ꓬꓰ-ꓢꓴ ꓡꓰ ꓒꓲ-ꓕꓱ ꓔꓯ꓾ ꓮꓸ ꓕꓽ ꓠꓬ ꓬꓲ ꓑꓬꓹ ꓖꓴ ꓗꓪ ꓢꓶꓻ ꓗꓷ꓿ ꓐꓹ ꓐ ꓡꓰ ꓥꓪ ꓔꓯ ꓖꓶ ꓡ ꓟ ꓡꓴ ꓗꓶꓸ ꓥꓪ ꓕꓽ ꓓꓳꓻ ꓠꓯꓹ ꓡ?꓾ ꓐꓯˍ ꓡꓳ꓿ 12 ꓖꓳ ꓡꓱ ꓠꓬ ꓟꓯꓼ ꓤ ꓖꓳ ꓕꓲ ꓧꓳˍ ꓐꓰ ꓟꓯꓼ ꓕꓲ ꓔꓴ ꓙꓵꓽ ꓒˍ ꓐꓰ꓾ ꓬꓴ-ꓔ ꓡ ꓞꓳ ꓝꓲ ꓓꓴ ꓐꓴ ꓡꓰ ꓬꓰ-ꓢꓴ ꓔꓯ ꓣꓴ ꓞꓳꓹ ꓢꓲ꓾ 13 ꓮ-ꓠꓯ-ꓢꓲ ꓔꓬ ꓗꓪ ꓧꓶꓸ ꓕꓯ ꓧꓳꓽ ꓙꓰˍ ꓡꓳ꓿ ꓬꓲ ꓠꓬ ꓖꓳ ꓕꓲ ꓘꓳꓼ ꓗꓪ ꓔꓲ ꓒ ꓓꓽ ꓟ ꓣꓱ ꓢꓴ ꓘꓷ-ꓬ-ꓒ ꓬꓲ ꓐꓹ ꓐ ꓑꓯꓹ ꓥ ꓡꓳ꓿ 14 ꓘꓷ-ꓬ-ꓒ ꓠꓬ꓾ ꓑ ꓫꓬꓼ ꓐꓴ ꓐꓱ ꓶ ꓡ ꓞꓳ ꓕꓲ ꓣꓳ ꓫꓵꓻ ꓙˍ ꓟ ꓙꓲˍ ꓡꓳ꓾ ꓐꓰ ꓬꓴ-ꓔ ꓡ ꓞꓳ ꓔꓯ ꓖꓪꓻ ꓙꓱꓻ ꓖꓶ ꓢꓴ ꓥ ꓡꓳ꓿ 15 ꓢꓲ-ꓟꓴ ꓒꓲ-ꓕꓱˍ ꓐꓰ ꓛꓳꓽ ꓒꓯꓹ ꓝꓮꓲ ꓕꓲ ꓣꓳ ꓠꓬ ꓬꓰ-ꓢꓴ ꓗꓸ ꓠꓯꓸ ꓛꓳ ꓙꓰˍ ꓡꓳ꓿ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓔꓯ ꓠꓬ ꓔꓲꓺ ꓒ ꓓꓽ ꓟ ꓡꓰ ꓢꓷˍ ꓠꓬꓲ꓾ ꓬꓰ-ꓢꓴˍ ꓐꓰ ꓕꓲ ꓛꓳꓺꓼ ꓔꓲꓺ ꓒ ꓓꓽ ꓟ ꓡꓽ ꓙꓳ ꓓꓰ ꓗꓪ ꓓꓵꓽ ꓡꓰˍ ꓡꓳ꓿ 16 ꓒꓲ-ꓕꓱ ꓠꓽ ꓠꓱ ꓫꓱꓸ ꓟꓸꓼ ꓗꓺ ꓘꓶ ꓗꓪ ꓦꓰꓼ ꓞꓹ ꓠꓬꓲ꓾ ꓔꓲꓺ ꓒ ꓓꓽ ꓟ ꓡꓰ ꓢꓷꓸˍ ꓟ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓓꓳ ꓙꓰ ꓢꓲ꓾ ꓗꓺ ꓘꓶ ꓦꓴ ꓠꓬꓹ ꓢꓴ ꓤ ꓟꓶꓽ ꓤ ꓔꓯ ꓓꓰꓽ ꓢꓲ ꓠꓬꓲ ꓒꓲ-ꓕꓱ ꓔꓯ ꓧꓳꓽ ꓓꓵ ꓡꓰˍ ꓡꓳ꓿ 17 ꓗ ꓘꓶꓽ ꓦꓴ ꓠꓬꓹ ꓢꓴ ꓤ ꓟꓶꓽ ꓡꓯꓸ ꓤ ꓡꓰ ꓒꓲ-ꓕꓱ ꓔꓯ꓾ ꓠꓴˍ ꓟꓲ ꓡ ꓞꓳ ꓕꓱ ꓕꓲ ꓣꓳ ꓛꓳꓽ ꓒꓯꓹ ꓥ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓲ ꓡꓰ꓾ ꓟꓽ ꓥ꓾ ꓐꓰ ꓒꓳꓹ ꓖꓶˍ ꓡꓳ꓿ 18 ꓖꓳ ꓕꓯ ꓚꓳ ꓑꓸ ꓐꓴˍ ꓐꓰ ꓢꓲꓽ ꓒ ꓝꓲ ꓓꓴ ꓐꓴ ꓠꓬ꓾ ꓙꓬˍ ꓟ ꓑꓶꓸ ꓓꓴ ꓝꓶꓸ ꓢꓷꓼ ꓡꓰ ꓮꓸ ꓔꓳꓸ ꓝꓲ ꓢꓲ ꓖꓳ ꓗꓪ ꓦꓰꓼ ꓞ ꓢꓲ ꓠꓬꓲ ꓮ ꓔꓳꓸ ꓗꓳꓺ ꓔꓬ ꓡꓳ꓿ ꓒꓲ-ꓕꓱˍ ꓟꓲ ꓬꓲ ꓪˍ ꓐꓰ ꓦꓰꓼ ꓞꓹ ꓢꓲ ꓮ ꓔꓳꓸ ꓗꓳ ꓔꓬ ꓡꓳ꓿ 19 ꓖꓳ ꓡꓱ ꓠꓬ ꓔꓲ ꓒ ꓓꓽ ꓟ ꓡꓰ꓾ ꓬꓰ-ꓢꓴ ꓛꓳꓽ ꓒꓯꓹ ꓐꓴˍ ꓐꓰ ꓬꓲ ꓟꓸ ꓖꓶˍ ꓟ ꓟꓸ ꓟꓲ ꓔꓯ ꓖꓴꓺ ꓢꓲ ꓬꓰ-ꓢꓴ ꓔꓯ ꓠ ꓠꓬꓲˍ ꓡꓳ꓿ 20 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓠꓬ ꓟꓲ ꓠꓯ ꓞꓳ ꓤ ꓔꓯ ꓫꓬꓽ ꓫꓬꓽ ꓗꓪ ꓫꓸ ꓕꓱ ꓗꓷꓳ꓿ ꓬꓴ-ꓔ ꓡ ꓞꓳ ꓮꓽ ꓙꓵ ꓜꓲꓼ ꓖꓴ ꓜꓲꓼ ꓦꓲˍ ꓐꓰ ꓢꓲꓽ ꓫꓬ ꓦꓲ ꓗꓪ ꓥꓪ ꓮ ꓕꓯˍ ꓟꓲ ꓟꓸ ꓟꓲ ꓟꓸ ꓖꓶ ꓗꓷꓳ꓿ ꓘꓳ ꓫꓱ ꓫꓱˍ ꓗꓪ ꓥꓪ ꓮꓸ ꓫꓵˍ ꓟꓲ ꓟꓽ ꓐꓯ ꓠꓬꓲ꓿ 21 ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓠ ꓠꓬꓲˍ ꓡ? ꓥꓪ ꓮꓸ ꓫꓵ ꓐꓯ ꓗꓷ ꓟ ꓑ ꓙꓽ ꓢꓴ ꓔꓯ ꓠ ꓠꓬꓲ ꓬꓰ꓿ ꓥꓪ ꓐꓯ ꓗꓷ ꓟ ꓮꓽ ꓙꓵ ꓬꓲ ꓪꓽ ꓢꓷˍ ꓡꓳ꓾ ꓐꓯˍ ꓡꓳ꓿ 22 ꓬꓲ ꓕꓱ ꓡꓱ ꓐꓯ ꓗꓷ ꓠꓬ ꓬꓲ ꓒ ꓕꓲ ꓗꓪ ꓦꓰꓼ ꓞꓹ ꓟ ꓢꓲꓽ ꓒ ꓝꓲ ꓓꓴ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ ꓐꓽ ꓚꓹ ꓫꓷꓹ ꓢꓲ꓾ ꓔꓲ ꓒ ꓓꓽ ꓟ ꓔꓯ ꓠꓴ ꓕꓱ ꓡꓱ ꓒꓳꓹ ꓖꓶ ꓓ ꓡ?꓾ ꓐꓯˍ ꓡꓳ꓿ 23 ꓬꓰ-ꓢꓴ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓥꓪ ꓫꓸ ꓕꓱ ꓛꓬꓻ ꓗꓷ ꓐꓷˍ ꓠꓬ꓾ ꓛꓬꓻˍ ꓟ ꓖꓴ ꓟꓳꓸ ꓖꓶ ꓡꓯ꓿ ꓥꓪ ꓫꓸ ꓕꓱ ꓜꓳꓽˍ ꓠꓬ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓓꓶꓽˍ ꓡ?꓾ ꓐꓯˍ ꓡꓳ꓿ 24 ꓖꓳ ꓡꓱ ꓠꓬ ꓮ-ꓠꓯ-ꓢꓲ ꓡꓰ ꓬꓲ ꓔꓯ ꓖꓳ ꓡꓱ ꓞꓳꓹ ꓓꓹ ꓝꓲ ꓢꓲ꓾ ꓔꓲ ꓒ ꓓꓽ ꓟ ꓘꓷ-ꓬ-ꓒ ꓔꓬ ꓗꓪ ꓧꓳꓽ ꓙꓰ ꓝꓲˍ ꓡꓳ꓿ 25 ꓢꓲ-ꓟꓴ ꓒꓲ-ꓕꓱ ꓠꓽ ꓦꓰꓼ ꓞꓹ ꓢꓲ ꓮꓸ ꓔꓳꓸ ꓗꓳ ꓔꓬ ꓢꓰꓽ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓔꓯ꓾ ꓠꓴˍ ꓟꓲ ꓬꓲ ꓛꓳꓽ ꓒꓯꓹ ꓗꓪ ꓟ ꓕꓲ ꓣꓳ ꓥꓳ꓾ ꓟꓽ ꓥ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓲ ꓠꓬ ꓟꓽ ꓣꓷꓠꓸ ꓢꓲ꓾ ꓥꓪ ꓟꓽ ꓥ꓾ ꓐꓰ ꓒꓳꓹ ꓖꓶˍ ꓡꓳ꓿ 26 ꓒꓲ-ꓕꓱ ꓡꓰ ꓠꓸ ꓑꓳ ꓛꓵꓺ ꓞꓷꓹ ꓗꓷ ꓢꓴ꓾ ꓔꓲ ꓒ ꓓꓽ ꓟ ꓬꓲ ꓚꓳ ꓑꓸ ꓖꓳ ꓕꓲ ꓣꓳ ꓬꓲ ꓫꓵꓽ ꓬꓲ ꓧꓪ ꓡꓰ ꓒꓲ-ꓕꓱ ꓔꓯ꓾ ꓐꓱꓺ ꓗꓪ ꓬꓲˍ ꓐꓰ ꓔꓬ ꓕꓯ ꓠꓴ ꓔꓯ ꓥꓪ ꓟꓳꓻ ꓗꓷꓳ ꓟꓽ ꓥ ꓡ?꓾ ꓐꓯˍ ꓡꓳ꓿ 27 ꓒꓲ-ꓕꓱ ꓠꓬ ꓝꓮꓲ ꓕꓲ ꓧꓪꓹ ꓟꓽ ꓣꓷꓠꓸ꓿ ꓖꓳ ꓕꓯ ꓞꓼ ꓐꓰ ꓮꓸ B ꓒꓽ ꓐꓵꓻ ꓡꓺꓳ꓿ 28 ꓖꓳ ꓡꓱ ꓠꓬꓲ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ ꓘꓷ-ꓬ-ꓒ ꓔꓬ ꓖꓴ ꓗꓪ ꓐꓰ꓾ ꓣꓳ-ꓟ ꓢꓲꓽ ꓒ ꓓꓽ ꓟ ꓐꓯ ꓟꓴ ꓘꓶꓽ ꓖꓴ ꓦꓲ ꓗꓪ ꓧꓳꓽ ꓓꓵꓽ ꓡꓰˍ ꓡꓳ꓿ ꓖꓳ ꓕꓯ ꓠꓬ ꓠꓯꓼ ꓠꓯꓼ ꓥ ꓡꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓚꓲꓸ ꓛꓬ ꓠꓬ ꓟꓽ ꓫꓬ ꓟ ꓟꓽ ꓠꓷꓼ ꓡꓰ ꓡꓰ ꓦꓲ-ꓘꓳ-ꓑꓮꓲ ꓜꓽ ꓪ ꓠꓹ ꓟ꓾ ꓢꓲꓽ ꓒ ꓓꓽ ꓟ ꓐꓯ ꓟꓴ ꓘꓶꓽ ꓖꓴ ꓦꓲ ꓗꓪ ꓟꓽ ꓓꓵ ꓡꓰ꓿ 29 ꓖꓳ ꓡꓱ ꓠꓬꓲ ꓒꓲ-ꓡ ꓠꓬ ꓬꓲ ꓪꓽ ꓔꓬ ꓗꓪ ꓓꓳ ꓡ ꓢꓲ꓾ ꓡ ꓞꓳ ꓕꓱ ꓟ ꓔꓯ ꓠꓴ ꓪꓽ ꓮꓸ ꓫꓵ ꓓꓰꓺ ꓓꓴ ꓙꓳˍ ꓡ? ꓐꓰ ꓠ ꓠꓬꓲˍ ꓕꓯ꓾ 30 ꓬꓲ ꓪꓽ ꓡꓰ꓾ ꓡ ꓞꓳ ꓕꓱ ꓟ ꓠꓬ ꓟꓽ ꓙꓲ ꓟ ꓬꓰ ꓢꓴ ꓟꓽ ꓥ ꓠꓬ ꓥꓪ ꓠꓴꓽ ꓡꓰ ꓠꓴ ꓔꓯ ꓟꓽ ꓡꓯꓼ ꓙꓱ ꓡ ꓡꓳ ꓫꓵꓽ ꓥꓳ꓾ ꓐꓯ ꓖꓶˍ ꓡꓳ꓿ 31 ꓖꓳ ꓡꓱ ꓠꓬꓲ ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓚꓲꓸ ꓛꓬ ꓬꓲ ꓔꓯ ꓧꓳꓽ ꓙꓰ ꓢꓲ꓾ ꓠꓴ ꓪꓽ ꓙꓵꓽ ꓗ ꓔꓯ ꓛꓳ ꓢꓲ ꓠꓬꓲ ꓬꓲ ꓔꓯ ꓐꓯ ꓟꓴ ꓘꓶꓽ ꓬꓰ꓾ ꓐꓯ ꓖꓶˍ ꓡꓳ꓿ ꓬꓴ-ꓔ ꓡ ꓞꓳ ꓐꓴ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓠꓬ ꓮꓸ ꓫꓵ ꓡ ꓞꓳ ꓔꓯˍ ꓟꓲ ꓢꓰꓼ ꓠꓹ ꓟ ꓙꓵꓽ ꓪ ꓟꓽ ꓙꓳ꓾ ꓐꓯˍ ꓡꓳ꓿ 32 ꓕꓱ ꓟ ꓠꓬ ꓬꓰ-ꓢꓴ ꓬꓲ ꓮ ꓡꓲ ꓐꓰ ꓫꓵꓻ ꓠꓯꓹ ꓟ ꓐꓯ ꓗꓷ ꓟ ꓐꓯ ꓘꓶꓽ ꓔꓯ ꓐꓲ ꓡ ꓝꓲ ꓠꓹ ꓟ ꓥ ꓡꓳ꓿ 33 ꓖꓳ ꓡꓱ ꓠꓬ ꓒꓲ-ꓡ ꓝꓮꓲ ꓕꓲ ꓧꓪꓹ ꓐꓯ ꓟꓴ ꓘꓶꓽ ꓖꓴ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓬꓰ-ꓢꓴ ꓔꓯ ꓘꓴ ꓔꓯꓹ ꓡ ꓢꓲ ꓠꓬꓲ꓾ ꓠꓴ ꓠꓬ ꓬꓴ-ꓔ ꓡ ꓞꓳ ꓪ ꓔꓲ ꓥ ꓡ? ꓐꓰ ꓠ ꓠꓬꓲˍ ꓡꓳ꓿ 34 ꓬꓰ-ꓢꓴ ꓒꓳꓹ ꓖꓶ ꓢꓲ꓾ ꓕꓱ ꓟ ꓠꓬ ꓠꓴ ꓚꓲꓸ ꓛꓬ ꓗꓪ ꓐꓰ ꓐꓯˍ ꓟ ꓥ ꓡ? ꓥ ꓠꓬ ꓢꓴ ꓡꓰ ꓥꓪ ꓔꓯ ꓚꓺ ꓢꓲ ꓠꓴ ꓔꓯ ꓐꓯ ꓖꓶ ꓡ ꓟ ꓥ ꓡ?꓾ ꓐꓯˍ ꓡꓳ꓿ 35 ꓒꓲ-ꓡ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓠꓬ ꓬꓴ-ꓔ ꓡ ꓞꓳ ꓥ ꓡ? ꓠꓴ ꓔꓯ ꓠꓬ ꓠꓴ ꓕꓲ ꓫꓵꓽ ꓟ ꓡ ꓞꓳˍ ꓐꓰ꓾ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓡꓰ ꓥꓪ ꓔꓯ ꓡꓯꓼ ꓙꓱ ꓖꓶ ꓡ ꓡꓳ꓿ ꓠꓴ ꓮꓸ ꓫꓵ ꓬꓰ ꓗꓷ ꓡ?꓾ ꓐꓯˍ ꓡꓳ꓿ 36 ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓗꓴꓷꓼ ꓠꓬ ꓟꓲ ꓠꓯ ꓕꓱ ꓟ ꓗꓪ ꓟ ꓟꓽ ꓥ꓿ ꓟꓲ ꓠꓯ ꓕꓱ ꓟ ꓗꓪ ꓟ ꓥ ꓕꓯ ꓠꓽ꓾ ꓥꓪ ꓔꓯ ꓬꓴ-ꓔ ꓡ ꓞꓳ ꓡꓯꓼ ꓒꓯꓹ ꓗꓪ ꓟꓽ ꓡꓯꓼ ꓙꓱ ꓗꓷ ꓠꓹ ꓟ꓾ ꓥꓪ ꓝꓲ ꓓꓴ ꓐꓴ ꓡꓰ ꓟꓯꓼ ꓓꓶꓽ ꓡ ꓡꓳ ꓫꓵꓽ ꓥꓳ꓿ ꓖꓳ ꓡꓱ ꓥ ꓟꓲ ꓥꓪ ꓗꓴꓷꓼ ꓠꓬ ꓟꓲ ꓠꓯ ꓕꓱ ꓟ ꓗꓪ ꓟ ꓟꓽ ꓥ꓾ ꓐꓯˍ ꓡꓳ꓿ 37 ꓖꓳ ꓕꓯ ꓒꓲ-ꓡ ꓡꓰ ꓬꓲ ꓔꓯ꓾ ꓖꓳ ꓡꓱ ꓥ ꓠꓬ ꓠꓴ ꓠꓽ ꓪ ꓔꓲ ꓥ ꓡ? ꓐꓰ ꓠ ꓠꓬꓲˍ ꓡꓳ꓿ ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓠꓬ ꓪ ꓔꓲ ꓥ ꓟ ꓠꓴ ꓐꓯ ꓬꓯꓼ ꓗꓷꓳ꓿ ꓥꓪ ꓠꓬ ꓕꓱ ꓟ ꓑꓶ ꓓꓴ ꓟꓲ ꓠꓯ ꓗꓪ ꓓꓵꓽ ꓡ ꓢꓲ꓾ ꓔꓱꓹ ꓚꓵˍ ꓟ ꓐꓱ ꓶ ꓢꓷꓸ ꓙ ꓟꓳ ꓙ ꓠꓹ ꓟ ꓥꓪ ꓔꓯ ꓦꓵꓻ ꓔ ꓟ ꓥꓳ꓿ ꓔꓱꓹ ꓚꓵˍ ꓟ ꓗꓪ ꓟ ꓡ ꓞꓳ ꓥ ꓕ ꓑꓳ ꓠꓬ ꓥꓪ ꓐꓯ ꓘꓶ ꓔꓯ ꓠ ꓠꓹ ꓡꓳ꓾ ꓐꓯˍ ꓡꓳ꓿ 38 ꓒꓲ-ꓡ ꓡꓰ ꓬꓲ ꓔꓯ꓾ ꓔꓱꓹ ꓚꓵˍ ꓟ ꓠꓬ ꓮꓸ ꓫꓵ ꓥ ꓡ?꓾ ꓐꓰ ꓠ ꓠꓬꓲ ꓗꓷ ꓠꓬ꓾ ꓬꓴ-ꓔ ꓡ ꓞꓳ ꓔꓬ ꓗꓪ ꓝꓮꓲ ꓕꓲ ꓧꓪ ꓓꓳ ꓙꓰ ꓢꓲ ꓬꓲ ꓪꓽ ꓔꓯ꓾ ꓥꓪ ꓠꓬ ꓬꓲ ꓔꓯꓸ ꓟꓳ ꓮꓸ ꓫꓵ ꓛꓬ ꓖꓴˍ ꓟꓲ ꓧꓪ ꓟꓽ ꓟꓶ꓿ 39 ꓦꓲ-ꓘꓳ-ꓑꓮꓲ ꓗꓪ꓾ ꓥꓪ ꓡꓰ ꓠꓴ ꓪꓽ ꓔꓯ ꓡ ꓞꓳ ꓕꓲ ꓣꓳ ꓩꓴ ꓖꓶ ꓠꓹ ꓟ ꓠꓴ ꓪꓽ ꓬꓲ ꓡꓲꓽ ꓙꓳˍ ꓡꓳ꓿ ꓖꓳ ꓡꓱ ꓠꓬꓲ ꓥꓪ ꓡꓰ ꓠꓴ ꓪꓽ ꓐꓱ ꓶ ꓬꓴ-ꓔ ꓡ ꓞꓳ ꓪ ꓔꓲ ꓕꓱ ꓕꓲ ꓣꓳ ꓩꓴ ꓖꓶˍ ꓟ ꓔꓯ ꓠꓴ ꓪꓽ ꓠꓲꓹ ꓫꓵˍ ꓡ? ꓐꓰ ꓠ ꓠꓬꓲˍ ꓡꓳ꓿ 40 ꓖꓳ ꓕꓯ ꓬꓲ ꓪꓽ ꓝꓮꓲ ꓘꓴꓻ ꓔꓴ ꓡ ꓢꓲ꓾ ꓕꓱ ꓕꓲ ꓣꓳ ꓠꓬ ꓟꓽ ꓥ꓾ ꓐ-ꓣ-ꓐ ꓔꓯ ꓩꓴ ꓖꓶ ꓡꓯ꓾ ꓐꓯˍ ꓡꓳ꓿ ꓐ-ꓣ-ꓐ ꓠꓽ ꓦꓴ ꓜꓽ ꓒꓬꓹ ꓜꓽ ꓢꓴ ꓥ ꓡꓳ꓿

ꓬꓳ-ꓦ 19

1 ꓖꓳ ꓕꓯ ꓒꓲ-ꓡ ꓡꓰ ꓬꓰ-ꓢꓴ ꓔꓯ ꓣꓴ ꓢꓲ ꓓꓶꓽ ꓝꓲˍ ꓡꓳ꓿ 2 ꓟꓯꓼ ꓤ ꓐꓴ ꓡꓰ ꓛꓴꓽ ꓪꓴꓸ ꓛꓴꓽ Bꓼ ꓢꓲ꓾ ꓬꓲ ꓪꓴꓸ ꓓꓵ ꓗꓪ ꓘꓳꓹ ꓖꓶ ꓢꓲ ꓠꓬꓲ꓾ ꓐꓵ ꓞꓶ ꓠꓲꓺ ꓛꓵꓽ ꓪꓸ ꓖꓶˍ ꓡꓳ꓿ 3 ꓬꓲ ꓪꓽ ꓠꓬ ꓬꓲ ꓔꓯ ꓡ ꓢꓲ꓾ ꓬꓴ-ꓔ ꓡ ꓞꓳ ꓪ ꓔꓲꓸꓳ꓾ ꓤꓶ ꓙꓳ ꓟꓯ ꓙꓳ ꓝꓲ꓾ ꓐꓰ ꓮꓽ ꓟꓬ ꓐꓯ ꓢꓲ ꓬꓲ ꓔꓯ ꓡꓯꓼ ꓞꓻ ꓓꓶꓽˍ ꓡꓳ꓿ 4 ꓖꓳ ꓡꓱ ꓠꓬ ꓒꓲ-ꓡ ꓝꓮꓲ ꓕꓲ ꓧꓪ ꓓꓳ ꓙꓰ ꓢꓲ ꓬꓲ ꓪꓽ ꓔꓯ꓾ ꓠ ꓠꓹ꓾ ꓬꓲ ꓔꓯ ꓝꓴꓲ ꓓꓰꓺ ꓠꓹ ꓟ ꓬꓲ ꓑꓶꓸ ꓮꓸ ꓫꓵˍ ꓟꓲ ꓥꓪ ꓧꓪ ꓟꓽ ꓟꓶ ꓟ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲ ꓠꓹ ꓟ꓾ ꓠꓴ ꓪꓽ ꓔꓬ ꓗꓪ ꓥꓪ ꓡꓰ ꓬꓲ ꓔꓯ ꓧꓳꓽ ꓡ ꓥꓳ꓾ ꓐꓯˍ ꓡꓳ꓿ 5 ꓖꓳ ꓡꓱ ꓠꓬ ꓬꓰ-ꓢꓴ ꓠꓽ ꓛꓴꓽ ꓪꓴꓸ ꓛꓴꓽ ꓘꓳꓹ ꓔ ꓢꓲ꓾ ꓐꓵ ꓞꓶ ꓠꓲꓺ ꓛꓵꓽ ꓪꓸ ꓔ ꓢꓲ ꓠꓬꓲ ꓓꓳ ꓡ ꓡꓳ꓿ ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓡ ꓞꓳ ꓕꓱ ꓟ ꓔꓯ ꓠꓬꓲ ꓠꓹ꓾ ꓐꓯˍ ꓡꓳ꓿ 6 ꓖꓳ ꓡꓱ ꓠꓬ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓢꓲꓽ ꓒ ꓝꓲ ꓓꓴ ꓐꓴ ꓬꓲ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓔꓯ ꓕꓯꓼ ꓔꓶꓸ ꓗꓷ꓾ ꓕꓯꓼ ꓔꓶ ꓗꓷ꓾ ꓐꓰ ꓘꓴˍ ꓡꓳ꓿ ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓚꓲꓸ ꓛꓬ ꓬꓲ ꓔꓯ ꓣꓴ ꓢꓲ ꓕꓯꓼ ꓔꓶ ꓗꓷ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓬꓲ ꓔꓯ ꓝꓴꓲ ꓓꓰꓻ ꓠꓹ ꓟ ꓮꓸ ꓫꓵ ꓑꓶꓸˍ ꓟꓲ ꓧꓪ ꓟꓽ ꓟꓶ꓾ ꓐꓯ ꓖꓶˍ ꓡꓳ꓿ 7 ꓬꓴ-ꓔ ꓡ ꓞꓳ ꓐꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓠꓴꓽ ꓙꓵꓽ ꓗ ꓕꓲ ꓚꓱꓹ ꓙꓳˍ ꓡꓳ꓿ ꓙꓵꓽ ꓗ ꓖꓳ ꓕꓲ ꓚꓱꓹ ꓟ ꓗꓪ ꓐꓰ ꓬꓲ ꓠꓽ ꓫꓵ ꓠꓯꓹ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓬꓲ ꓚꓲꓸ ꓛꓬ ꓔꓯ ꓪꓴ-ꓢ ꓮ ꓐꓲ ꓚꓬꓹˍ ꓡꓳ꓾ ꓐꓯˍ ꓡꓳ꓿ 8 ꓐꓯ ꓘꓶ ꓕꓱ ꓟ ꓔꓯ ꓒꓲ-ꓡ ꓑ ꓙꓽ ꓗꓷ ꓠꓬ ꓪꓻ ꓜꓲ ꓙꓳꓺ ꓡꓰꓳ꓿ 9 ꓖꓳ ꓡꓱ ꓠꓬ ꓬꓲ ꓝꓮꓲ ꓕꓲ ꓧꓪꓹ ꓐꓯ ꓟꓴ ꓘꓶꓽ ꓖꓴ ꓦꓲ ꓗꓪ ꓓꓵꓽ ꓡꓰ ꓢꓲ ꓬꓰ-ꓢꓴ ꓔꓯ꓾ ꓠꓴ ꓠꓬ ꓮ ꓡꓲ ꓗꓪ ꓐꓰ ꓡꓻ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓰ-ꓢꓴ ꓠꓽ ꓬꓲ ꓔꓯ ꓕꓲ ꓘꓶꓽˍ ꓟꓲ ꓟꓽ ꓒꓳꓹ ꓖꓶ꓿ 10 ꓖꓳ ꓡꓱ ꓠꓬꓲ ꓒꓲ-ꓡ ꓡꓰ ꓬꓲ ꓔꓯ꓾ ꓠꓴ ꓠꓬ ꓥꓪ ꓔꓯ ꓮ ꓡꓲ ꓗꓹ ꓠꓬꓲ ꓟꓽ ꓫꓸ ꓕꓱ ꓡ ꓡ? ꓥꓪ ꓠꓽ ꓠꓴ ꓔꓯ ꓩꓴ ꓗꓷ ꓠꓹ ꓟ ꓐꓰ꓾ ꓠꓴ ꓔꓯ ꓕꓯꓼ ꓔꓶꓸ ꓗꓷ ꓠꓹ ꓟ ꓙꓵꓽ ꓪ ꓙꓳˍ ꓟ ꓠꓴ ꓟꓽ ꓢꓷꓸ ꓡ?꓾ ꓐꓯˍ ꓡꓳ꓿ 11 ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓟꓴꓽ ꓗꓪ ꓗꓪ ꓐꓰ ꓠꓴ ꓔꓯ ꓖꓶ ꓔ ꓟ ꓙꓵꓽ ꓪ ꓟꓽ ꓥ ꓠꓬ꓾ ꓥꓪ ꓕꓯꓽ ꓢꓲ ꓗꓪ ꓠꓴ ꓮꓸ ꓫꓵ ꓙꓵꓽ ꓪ ꓟꓽ ꓙꓳ꓿ ꓖꓳ ꓡꓱ ꓠꓬꓲ ꓥꓪ ꓔꓯ ꓣꓴ ꓢꓲ꓾ ꓠꓴ ꓔꓯ ꓡꓯꓼ ꓙꓱ ꓖꓶ ꓢꓴ ꓝꓴꓲ ꓠꓽ ꓪꓻ ꓜꓲ ꓪꓴꓽˍ ꓡꓳ꓾ ꓐꓯ ꓖꓶˍ ꓡꓳ꓿ 12 ꓕꓱ ꓡꓱ ꓐꓯˍ ꓟ ꓗꓪ ꓐꓰ ꓒꓲ-ꓡ ꓬꓲ ꓔꓯ ꓩꓴ ꓗꓷ ꓠꓹ ꓟ ꓚꓱꓹ ꓧꓪˍ ꓟꓲ꓾ ꓬꓴ-ꓔ ꓡ ꓞꓳ ꓐꓴ ꓘꓴ ꓔꓴ ꓡ ꓢꓲ꓾ ꓡ ꓞꓳ ꓕꓱ ꓟ ꓔꓯ ꓠꓴ ꓩꓴ ꓗꓷ ꓐꓷˍ ꓠꓬ꓾ ꓠꓴ ꓠꓽ ꓢꓲ-ꓢ ꓛꓳꓽ ꓒꓯꓹ ꓟꓽ ꓥ꓿ ꓮꓽ ꓟˍ ꓟꓲ ꓬꓰ-ꓢꓴ ꓕꓱ ꓕꓲ ꓣꓳˍ ꓡꓰ ꓐꓰ ꓚꓲꓸ ꓛꓬ ꓔꓯ ꓪ ꓔꓲ ꓒꓬꓱꓼ ꓡ ꓝꓲ ꓢꓴ ꓠꓬ꓾ ꓢꓲ-ꓢ ꓔꓯ ꓒꓳꓹ ꓢꓴ ꓥ ꓡꓳ꓾ ꓐꓯˍ ꓡꓳ꓿ 13 ꓐꓯ ꓘꓶ ꓕꓱ ꓟ ꓒꓲ-ꓡ ꓑ ꓙꓽˍ ꓕꓯ꓾ ꓬꓰ-ꓢꓴ ꓔꓯ ꓧꓳꓽ ꓓꓳ ꓡ ꓢꓲ꓾ Bꓸ-ꓘꓳꓽ-ꓓꓰ꓾ ꓐꓯˍ ꓟ ꓕꓲ ꓔꓳꓸ ꓗꓪ ꓟ ꓐꓯ ꓟꓴ ꓘꓶꓽ ꓕꓲꓺ ꓗꓪ ꓠꓬꓲꓸ ꓠˍ ꓡꓳ꓿ (ꓦꓲ-ꓐꓱ-ꓣꓴ ꓥꓳꓽ ꓗꓪ ꓖꓳ ꓕꓲ ꓔꓳꓸ ꓔꓯ꓾ ꓖ-ꓐ-ꓕ꓾ ꓘꓴˍ ꓡꓳ꓿) 14 ꓖꓳ ꓕꓲ ꓠꓬꓲ ꓠꓬ ꓦꓲ-ꓘꓳ-ꓑꓮꓲ ꓙꓽ ꓖꓶˍ ꓟ ꓦꓬꓼ ꓠꓬꓲ ꓥ ꓢꓲ꓾ ꓮꓽ ꓡ ꓛꓳꓼ ꓙꓵꓹ ꓛꓲ ꓗꓪ ꓥ ꓡꓳ꓿ ꓖꓳ ꓡꓱ ꓠꓬ ꓒꓲ-ꓡ ꓡꓰ ꓬꓴ-ꓔ ꓡ ꓞꓳ ꓐꓴ ꓔꓯ꓾ ꓠꓬꓲ ꓠꓹ꓾ ꓠꓴ ꓪꓽ ꓪ ꓔꓲ꓾ ꓐꓯ ꓖꓶˍ ꓡꓳ꓿ 15 ꓖꓳ ꓡꓱ ꓠꓬ ꓬꓲ ꓪꓽ ꓡꓰ꓾ ꓬꓲ ꓔꓯ ꓢꓰꓼ ꓗꓷ꓾ ꓬꓲ ꓔꓯ ꓕꓯꓼ ꓔꓶꓸ ꓗꓷ꓾ ꓐꓰ ꓘꓴˍ ꓡꓳ꓿ ꓒꓲ-ꓡ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓪ ꓔꓲ ꓔꓯ ꓥꓪ ꓡꓰ ꓕꓯꓼ ꓔꓶꓸ ꓗꓷ ꓠꓯꓹ ꓡ?꓾ ꓐꓯ ꓖꓶˍ ꓕꓯ꓾ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴ ꓒꓳꓹ ꓖꓶ ꓢꓲ꓾ ꓢꓲ-ꓢ ꓟꓽ ꓥ ꓠꓬ ꓥꓪ ꓠꓴꓽ ꓪ ꓔꓲ ꓠꓱꓸ ꓐꓯꓼ ꓟꓽ ꓙꓳ꓾ ꓐꓯˍ ꓡꓳ꓿ 16 ꓖꓳ ꓕꓯ ꓒꓲ-ꓡ ꓡꓰ ꓬꓰ-ꓢꓴ ꓔꓯ ꓕꓯꓼ ꓔꓶꓸ ꓗꓷ ꓠꓹ ꓟ ꓬꓲ ꓪꓽ ꓔꓯ ꓡꓯꓼ ꓙꓱ ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ ꓧꓳꓽ ꓙꓰˍ ꓡꓳ꓿ 17 ꓬꓰ-ꓢꓴ ꓠꓬ ꓬꓲ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ꓾ ꓪꓴꓸ-ꓖꓽ-ꓟꓵ꓾ ꓐꓯˍ ꓟ ꓕꓲ ꓔꓳꓸ ꓗꓪ ꓛꓲ ꓬꓰˍ ꓡꓳ꓿ (ꓟꓵꓽ ꓖꓳ ꓕꓲ ꓔꓳꓸ ꓔꓯ ꓦꓲ-ꓐꓱ-ꓣꓴ ꓥꓳꓽ ꓡꓰ ꓖꓳ-ꓡ-ꓖꓳ-ꓕ꓾ ꓐꓯˍ ꓡꓳ꓿) 18 ꓖꓳ ꓗꓪ ꓬꓲ ꓪꓽ ꓡꓰ ꓬꓲ ꓔꓯ ꓠꓱꓸ ꓐꓯꓼ ꓠꓬꓲꓽ ꓣꓳˍ ꓐꓰ ꓕꓲ ꓪꓺꓼ ꓕꓯꓼ ꓔꓶꓸ ꓗꓷˍ ꓡꓳ꓿ ꓠꓱꓸ ꓐꓯꓼ ꓢꓴ ꓠꓬ ꓕꓲ ꓛꓱꓽ ꓕꓲ ꓣꓳ꓾ ꓬꓰ-ꓢꓴ ꓔꓯ ꓠꓬ ꓠꓬꓲꓽ ꓗꓴꓸ ꓚꓸꓼ ꓗꓪ ꓕꓯꓼ ꓔꓶꓸ ꓔ ꓡꓳ꓿ 19 ꓒꓲ-ꓡ ꓡꓰ ꓐꓳ ꓒꓬꓸ ꓕꓲ ꓒꓬꓸ ꓗꓪ꓾ ꓠ-ꓢ-ꓡꓱ ꓢꓴ ꓬꓰ-ꓢꓴ꓾ ꓬꓴ-ꓔ ꓡ ꓞꓳ ꓪ ꓔꓲ꓾ ꓐꓰ ꓐꓳ ꓔ ꓢꓲ꓾ ꓡꓯꓼ ꓐꓳ ꓔꓶꓸ ꓓꓴ ꓪꓴꓸ ꓗꓪ ꓕꓯꓼ ꓠꓷꓼ ꓔ ꓡꓳ꓿ 20 ꓐꓳ ꓒꓬꓸ ꓖꓳ ꓟ ꓗꓪ ꓦꓲ-ꓐꓱ-ꓣꓴ ꓥꓳꓽ꓾ ꓣꓳ-ꓟ ꓥꓳꓽˍ ꓐꓰ ꓦꓲ-ꓡꓲ ꓥꓳꓽ ꓡꓰ ꓐꓳ ꓔ ꓡꓳ꓿ ꓬꓰ-ꓢꓴ ꓔꓯ ꓕꓯꓼ ꓔꓶꓸ ꓖꓴ ꓠꓬ ꓡꓳ ꓒꓱ ꓒ ꓕꓲꓺꓼ ꓗꓪ ꓥ ꓠꓬꓲ꓾ ꓖꓳ ꓗꓪ ꓐꓳ ꓔ ꓟ ꓔꓯ ꓬꓴ-ꓔ ꓡ ꓞꓳ ꓮꓽ ꓟꓬꓹ ꓡꓰ ꓵ ꓟꓶˍ ꓡꓳ꓿ 21 ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓗꓪ ꓟ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴ ꓡꓰ ꓒꓲ-ꓡ ꓔꓯ꓾ ꓬꓴ-ꓔ ꓡ ꓞꓳ ꓪ ꓔꓲ꓾ ꓐꓰ ꓕꓽ ꓐꓳ꓾ ꓬꓲ ꓡꓰ꓾ ꓥꓪ ꓠꓽ ꓬꓴ-ꓔ ꓡ ꓞꓳ ꓪ ꓔꓲ ꓥ ꓡꓳ꓾ ꓐꓯ ꓡꓳ꓾ ꓐꓰ ꓐꓳ꓾ ꓐꓯˍ ꓡꓳ꓿ 22 ꓒꓲ-ꓡ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓮ ꓡꓲ ꓐꓳ ꓔ ꓠꓬ ꓖꓳ ꓡꓱ ꓥꓳ꓾ ꓐꓯ ꓖꓶˍ ꓡꓳ꓿ 23 ꓟꓯꓼ ꓤ ꓐꓴ ꓡꓰ ꓬꓰ-ꓢꓴ ꓔꓯ ꓕꓯꓼ ꓔꓶꓸ ꓗꓷ ꓗꓸ ꓠꓯꓸ꓾ ꓬꓲ ꓐꓵ ꓞꓶ ꓕꓯꓽ ꓢꓲ ꓕꓲꓽ ꓘꓳꓹ ꓟ ꓣꓴ ꓢꓲ꓾ ꓡꓲ ꓡꓯꓼ ꓐꓰ ꓞꓶꓽ ꓗꓷ ꓢꓲ ꓠꓬꓲ ꓟꓯꓼ ꓤ ꓕꓲ ꓣꓳ ꓔꓯ ꓕꓲ ꓡꓯꓼ ꓖꓶˍ ꓡꓳ꓿ ꓠꓯꓸꓼ ꓗꓪ ꓕꓲꓽ ꓘꓳꓹ ꓟ ꓔꓯˍ ꓟꓲ ꓬꓲ ꓪꓽ ꓣꓴˍ ꓡꓳ꓿ ꓠꓯꓸꓼ ꓖꓳ ꓕꓲꓽ ꓘꓳꓹ ꓟ ꓠꓬ ꓒꓱꓻ ꓘꓶꓽ ꓗꓪ ꓐꓰ ꓬꓲ ꓟꓶꓽ ꓗꓪ ꓛꓲ ꓙꓲꓼ ꓚꓱꓹ ꓟꓽ ꓙꓳ ꓙꓳ ꓛꓵꓽ ꓔ ꓟ ꓥ ꓡꓳ꓿ 24 ꓖꓳ ꓡꓱ ꓠꓬꓲ ꓬꓲ ꓪꓽ ꓠꓬ꓾ ꓐꓵ ꓞꓶꓽ ꓕꓱ ꓟ ꓔꓯ ꓣꓳ ꓕꓽ ꓚꓵꓹ ꓧꓽ ꓗꓷ ꓡꓯ꓿ ꓮꓽ ꓟ ꓐꓱ ꓶ ꓥ ꓟ ꓢꓷꓸ ꓡꓰ ꓠꓹ ꓟ ꓢꓽ ꓫꓱ ꓫꓱꓹ ꓡꓯ꓾ ꓐꓯ ꓡꓯꓽ ꓘꓳˍ ꓡꓳ꓿ ꓕꓱ ꓟ ꓠꓬ ꓢꓲꓽ ꓫꓬ ꓕꓳ ꓶ ꓗꓪ꓾ ꓥꓪ ꓐꓵ ꓞꓶꓽ ꓔꓯ ꓠꓬ ꓬꓲ ꓪꓽ ꓐꓱ ꓡꓯꓽ ꓘꓳˍ ꓡꓳ꓿ ꓥꓪ ꓖꓪꓽ ꓓꓴ ꓔꓯˍ ꓟꓲ ꓬꓲ ꓪꓽ ꓢꓽ ꓫꓱꓺ ꓫꓱꓹˍ ꓡꓳ꓾ ꓐꓰ ꓐꓯ ꓔ ꓟ ꓐꓲꓺ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓟꓯꓼ ꓤ ꓐꓴ ꓠꓬ ꓬꓲ ꓖꓳ ꓡꓱ ꓬꓰˍ ꓡꓳ꓿ 25 ꓬꓲ ꓟꓹ ꓟˍ ꓐꓰ ꓬꓲ ꓟꓹ ꓟ ꓠꓬꓲ ꓟ꓾ ꓘꓹ-ꓡꓳ-ꓒ ꓤꓽ ꓟꓶꓻ ꓟ-ꓡꓲ ꓐꓰ ꓟ-ꓖ-ꓓ-ꓡꓲ ꓢꓴ ꓟ-ꓡꓲ ꓠꓬ꓾ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓒ ꓕꓲꓺꓼ ꓗꓪ ꓦꓰꓼ ꓔꓬ ꓡꓳ꓿ 26 ꓬꓲ ꓟꓹ ꓟ ꓐꓰ ꓬꓲ ꓠꓲꓹ ꓠꓵˍ ꓟ ꓛꓳꓽ ꓒꓯꓹ ꓒ ꓕꓲ ꓗꓪ ꓦꓰꓼ ꓞꓹ ꓟ ꓔꓯ ꓬꓰ-ꓢꓴ ꓟꓳ ꓗꓷ ꓠꓬ꓾ ꓬꓲ ꓡꓰ ꓬꓲ ꓟꓹ ꓟ ꓔꓯ꓾ ꓤ ꓟꓶ ꓤꓽꓳ꓾ ꓠꓬꓲ ꓠꓹ꓾ ꓠꓴ ꓮ ꓐꓲ꓾ ꓐꓯˍ ꓡꓳ꓿ 27 ꓝꓮꓲ ꓬꓲ ꓡꓰ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓔꓯ꓾ ꓠꓬꓲ ꓠꓹ꓾ ꓠꓴ ꓟꓹ ꓟ꓾ ꓐꓯ ꓖꓶˍ ꓡꓳ꓿ ꓖꓳ ꓕꓲ ꓙꓵꓹ ꓗꓪ ꓐꓰ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓡꓰ ꓬꓲ ꓟꓹ ꓟ ꓔꓯ ꓬꓲ ꓚꓲꓸ ꓛꓬ ꓦꓲ ꓗꓪ ꓧꓳꓽ ꓙꓰ ꓢꓲ ꓖꓳ ꓗꓪ ꓔꓬ ꓝꓲˍ ꓡꓳ꓿ 28 ꓬꓰ-ꓢꓴ ꓠꓬ ꓬꓲ ꓟꓬꓱꓽ ꓮꓽ ꓙꓵ ꓬꓰ ꓓꓳ ꓡꓰ ꓟ ꓢꓷˍ ꓠꓬꓲ꓾ ꓢꓲꓽ ꓫꓬ ꓕꓳ ꓶ ꓗꓪ ꓟ ꓐꓯ ꓘꓶ ꓐꓲ ꓡ ꓝꓲ ꓠꓹ ꓟ꓾ ꓬꓲ ꓡꓰ꓾ ꓥꓪ ꓬꓲꓻ ꓙꓬ ꓢꓲꓼˍ ꓡꓳ꓾ ꓐꓯˍ ꓡꓳ꓿ 29 ꓖꓳ ꓗꓪ ꓬꓲꓻ ꓚꓱꓺ ꓒ ꓐꓲꓺꓼ ꓓꓯꓹ ꓟ ꓡꓴꓻ ꓕꓲ ꓟ ꓙꓳˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲꓻ ꓣꓳꓺ ꓟꓵꓺ ꓕꓲ ꓘꓴꓸ ꓮꓸ ꓠꓬꓲꓽ ꓛꓲ ꓝꓲꓸ ꓟꓳꓼ ꓓꓻ ꓗꓪ ꓞꓳꓹ ꓢꓲ꓾ ꓬꓲꓻ ꓚꓱ ꓔꓲꓹ ꓐꓲ ꓡꓰ ꓝꓲ ꓢꓲ ꓠꓬꓲ ꓬꓲ ꓔꓯ ꓖꓶ ꓓꓳˍ ꓡꓳ꓿ 30 ꓬꓲꓻ ꓚꓱꓺ ꓖꓳ ꓟ ꓬꓰ-ꓢꓴ ꓓꓳꓻ ꓟꓶ ꓗꓷ ꓠꓬ꓾ ꓬꓰ ꓓꓳ ꓡꓰꓳ꓾ ꓐꓯ ꓢꓲ꓾ ꓬꓲ ꓪꓴꓸ ꓓꓵ ꓝꓴꓸ ꓡꓴꓽ ꓟꓴ ꓗꓷ ꓡꓰ ꓠꓬ ꓬꓲ ꓢꓯꓼ ꓟꓬ ꓞꓷꓹ ꓗꓷꓳ꓿ 31 ꓖꓳ ꓗꓸ ꓠꓯꓸ ꓕꓲ ꓠꓬꓲ ꓠꓬ꓾ ꓬꓴ-ꓔ ꓡ ꓞꓳ ꓐꓴ ꓠꓽ ꓦꓬꓼ ꓠꓬꓲ ꓥ ꓠꓬꓲ꓾ ꓠꓽ ꓦꓬꓼ ꓠꓬꓲ ꓗꓪ ꓫꓵꓻ ꓟꓳ ꓔꓯ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓟꓽ ꓥꓳ ꓞꓹ ꓝꓲ ꓠꓹ ꓟ꓾ ꓬꓲ ꓪꓽ ꓛꓲ ꓒꓯꓹ ꓲ'ꓼ ꓘꓳꓹ ꓗꓷ ꓢꓲ ꓣꓴ ꓬꓯꓼ ꓗꓷ ꓝꓲ꓾ ꓐꓰ ꓒꓲ-ꓡ ꓔꓯ ꓓꓰꓽˍ ꓡꓳ꓿ 32 ꓖꓳ ꓡꓱ ꓠꓬꓲ ꓟꓯꓼ ꓤ ꓐꓴ ꓡ ꓢꓲ꓾ ꓬꓰ-ꓢꓴˍ ꓐꓰ ꓕꓲ ꓪꓺꓼ ꓕꓯꓼ ꓔꓶꓸ ꓔ ꓢꓴ꓾ ꓬꓲ ꓪꓴꓸ ꓕꓲ ꓣꓳ ꓟˍ ꓐꓰ ꓠꓱꓸ ꓐꓯꓼ ꓕꓲ ꓣꓳ ꓟ ꓛꓲ ꓒꓯꓹ ꓔꓯ ꓲ'ꓼ ꓘꓳꓹ ꓗꓷˍ ꓡꓳ꓿ 33 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓔꓯ ꓚꓳꓺ ꓛꓲ ꓡ ꓢꓲ ꓬꓲ ꓫꓵꓻ ꓞꓹ ꓟ ꓔꓯ ꓟꓳ ꓗꓷ ꓠꓬ꓾ ꓬꓲ ꓛꓲ ꓒꓯꓹ ꓟꓽ ꓲ'ꓼ ꓘꓳꓹ ꓗꓷ꓿ 34 ꓖꓳ ꓡꓱ ꓥ ꓟꓲ ꓟꓯꓼ ꓤ ꓕꓲ ꓣꓳ ꓠꓬ ꓐꓽ ꓥꓷꓹ ꓡꓰ ꓬꓲ ꓙꓳꓽ ꓐꓬ ꓗꓪ ꓗꓸ ꓗꓷ ꓠꓬ꓾ ꓞꓼ ꓐꓰ ꓫꓵꓽˍ ꓐꓰ ꓬꓲꓻ ꓙꓬ ꓓꓳ ꓡ ꓡꓳ꓿ 35 ꓕꓱ ꓟ ꓔꓯ ꓟꓳꓻ ꓗꓷ ꓢꓴ ꓗꓪ ꓟ ꓕꓲ ꓣꓳ ꓡꓰ ꓢꓷꓸ ꓙ ꓟꓳ ꓙ ꓢꓲ꓾ ꓠꓴ ꓪꓽˍ ꓟꓲ ꓙꓵꓻ ꓠ ꓟ꓾ ꓬꓲ ꓢꓷꓸ ꓙ ꓟꓳ ꓙˍ ꓟ ꓠꓬ ꓔꓱꓹˍ ꓟ ꓥ ꓡꓳ꓾ ꓐꓰ ꓬꓲ ꓢꓷˍ ꓡꓳ꓿ 36 ꓕꓱ ꓟꓬ ꓙꓰꓽ ꓗꓷ ꓡꓰˍ ꓟ ꓠꓬ꓾ ꓬꓲ ꓪꓳꓼ ꓔꓳ ꓕꓲ ꓕꓳꓸˍ ꓟꓲ ꓟꓽ ꓘꓳꓹ ꓡꓰ꓾ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓯ ꓔ ꓟ ꓐꓲ ꓡꓰˍ ꓟ ꓥ ꓡꓳ꓿ 37 ꓝꓮꓲ ꓢꓲꓽ ꓫꓬ ꓕꓳ ꓶ ꓠꓱꓸ ꓐꓯꓼ ꓕꓲ ꓝꓲꓸ ꓗꓪ꓾ ꓬꓲ ꓪꓽ ꓡꓰ ꓗꓸ ꓗꓷ ꓢꓴ ꓕꓲ ꓣꓳ ꓟ ꓔꓯ ꓬꓲ ꓪꓽ ꓡꓳꓸ ꓠꓬꓲˍ ꓥꓳ꓾ ꓐꓰ ꓐꓯˍ ꓢꓰꓽ ꓡꓳ꓿ 38 ꓕꓱ ꓟꓬ ꓙꓰꓽ ꓗꓸ ꓠꓯꓸ꓾ ꓬꓴ-ꓔ ꓡ ꓞꓳ ꓔꓯ ꓙꓳꓺˍ ꓟ ꓗꓪ ꓐꓰ ꓘꓳ ꓫꓱ ꓫꓱˍ ꓗꓪ ꓬꓰ-ꓢꓴ ꓔꓯ ꓛꓳ ꓔꓬ ꓢꓴ꓾ ꓮ-ꓡꓲ-ꓟ-ꓕꓲ-ꓬ ꓢꓴ ꓬꓳ-ꓢꓷ ꓠꓬ꓾ ꓬꓰ-ꓢꓴ ꓫꓵꓻ ꓟꓳ ꓔꓯꓹ ꓙꓰ ꓠꓹ ꓟ ꓒꓲ-ꓡ ꓔꓯ ꓓꓰꓽˍ ꓡꓳ꓿ ꓒꓲ-ꓡ ꓬꓲ ꓔꓯ ꓓꓽ ꓔꓳˍ ꓠꓬꓲ꓾ ꓬꓲ ꓡꓻ ꓢꓲ ꓬꓰ-ꓢꓴ ꓫꓵꓻ ꓟꓳ ꓔꓯꓹ ꓙꓰˍ ꓡꓳ꓿ 39 ꓧꓶꓸ ꓕꓯ ꓢ ꓘꓪ ꓕꓯ ꓬꓰ-ꓢꓴ ꓔꓯ ꓡ ꓢꓴ ꓠꓲ-ꓘꓳ-ꓓꓲ-ꓟꓴˍ ꓟꓲ꓾ ꓟꓴꓻ-ꓬꓻˍ ꓐꓰ ꓮ-ꓡꓳ ꓦꓱꓹ ꓔ ꓟ ꓫꓳ ꓠꓱ ꓧꓶꓽ ꓢ ꓞꓲ ꓕꓱꓹ ꓛꓲ ꓔꓯꓹ ꓔ ꓢꓲ ꓡꓻˍ ꓡꓳ꓿ 40 ꓬꓲ ꓪꓽ ꓡꓰ ꓬꓰ-ꓢꓴ ꓫꓵꓻ ꓟꓳ ꓣꓴ ꓢꓲ꓾ ꓬꓴ-ꓔ ꓡ ꓞꓳ ꓔꓵꓸ ꓟ ꓬꓲ ꓡꓲꓽ ꓔꓯ ꓛꓳ ꓢꓲ ꓠꓬꓲ꓾ ꓫꓳ ꓠꓱꓺ ꓟ ꓠꓯ ꓞꓲꓼ ꓧꓶꓽ ꓐꓰ ꓪꓰꓻ ꓜꓲꓽ ꓟꓶꓺ ꓟꓳꓻ ꓕꓱꓹ ꓓꓴ ꓡꓰ ꓕꓱꓹˍ ꓡꓳ꓿ 41 ꓬꓰ-ꓢꓴ ꓔꓯ ꓕꓯꓼ ꓔꓶꓸ ꓖꓴ ꓗꓪ ꓠꓬ ꓐꓱ ꓕꓲ ꓡꓯꓼ ꓙꓳˍ ꓡꓳ꓿ ꓐꓱ ꓠꓯꓸꓼ ꓗꓪ ꓠꓬ ꓧꓶꓸ ꓕꓯ ꓮꓽ ꓟ ꓔꓯˍ ꓟꓲ ꓟꓽ ꓗꓶ ꓠꓬꓲ ꓟ Bꓸ ꓡꓱꓼ ꓜꓴ ꓬꓲ ꓫꓵꓼ ꓕꓲ ꓟ ꓙꓳˍ ꓡꓳ꓿ 42 ꓗꓸ ꓠꓯꓸ ꓕꓲ ꓠꓬꓲ ꓠꓬ ꓬꓴ-ꓔ ꓡ ꓞꓳ ꓠꓽ ꓦꓬꓼ ꓠꓬꓲ ꓥ ꓢꓲ꓾ ꓡꓱꓼ ꓜꓴˍ ꓟꓲ ꓒ ꓕꓲ ꓗꓪ ꓥ ꓠꓬꓲ꓾ ꓬꓲ ꓪꓽ ꓡꓰ ꓬꓰ-ꓢꓴ ꓫꓵꓻ ꓟꓳ ꓔꓯ ꓖꓳ ꓗꓪ ꓗꓶ ꓔ ꓡꓳ꓿

ꓬꓳ-ꓦ 20

1 ꓫꓵꓽ ꓠꓬꓲ ꓟ ꓬꓲ ꓪꓴꓸ ꓕꓲ ꓠꓬꓲ ꓠꓯꓼ ꓠꓯꓼ ꓠꓬꓲ ꓟꓽ ꓟꓳ ꓢꓰꓽ ꓕꓯˍ ꓡꓰ꓾ ꓟ-ꓖ-ꓓ-ꓡꓲ ꓢꓴ ꓟ-ꓡꓲ ꓠꓬ ꓡꓱꓼ ꓜꓴ ꓗꓪ ꓡ ꓢꓲ꓾ ꓡꓱꓼ ꓜꓴ ꓗꓪ ꓫꓱꓺ ꓔ ꓟ Bꓸ ꓛꓲ ꓡꓱꓸ ꓒꓴ ꓞꓹ ꓟ ꓔꓯ ꓟꓳꓻ ꓡꓰꓳ꓿ 2 ꓖꓳ ꓡꓱ ꓠꓬꓲ ꓬꓲ ꓠꓬ ꓢꓲ-ꓟꓴ ꓒꓲ-ꓕꓱˍ ꓐꓰ ꓬꓰ-ꓢꓴ ꓠꓲꓹ ꓠꓵˍ ꓟ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓔꓬ ꓗꓪ ꓔꓷꓹ ꓡ ꓢꓲ꓾ ꓬꓲ ꓡꓰ꓾ ꓢꓲ ꓒ ꓔꓯ ꓡꓱꓼ ꓜꓴ ꓗꓪ ꓐꓰ ꓢꓴ ꓡꓰ ꓔꓯꓹ ꓙꓰ ꓢꓲ꓾ ꓮ ꓡꓲ ꓗꓪ ꓗꓶ ꓔ ꓬꓰ ꓟ ꓥꓪ ꓠꓴꓽ ꓟꓽ ꓢꓷꓳ꓾ ꓐꓰ ꓐꓯ ꓖꓶˍ ꓡꓳ꓿ 3 ꓖꓳ ꓡꓱ ꓠꓬꓲ ꓒꓲ-ꓕꓱˍ ꓐꓰ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓠꓬ ꓡꓱꓼ ꓜꓴ ꓗꓪ ꓙꓰˍ ꓡꓳ꓿ 4 ꓬꓲ ꓪꓽ ꓠꓬꓲꓽ ꓣꓳ ꓕꓲ ꓛꓳꓺꓼ ꓐꓰ ꓔꓷꓹ ꓙꓰ ꓕꓯ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓠꓬ꓾ ꓒꓲ-ꓕꓱ ꓔꓯ ꓔꓷꓹ ꓧꓪꓸ ꓡꓰ ꓢꓲ ꓬꓲ ꓧꓶꓸ ꓕꓯ ꓡꓱꓼ ꓜꓴ ꓗꓪ ꓛꓲ ꓬꓰˍ ꓡꓳ꓿ 5 ꓬꓲ ꓠꓬ ꓖꓳ ꓓꓱ ꓗꓴꓺ ꓢꓲ ꓠꓯꓸꓼ ꓗꓪ ꓡꓳꓸ ꓠꓬꓲ ꓠꓬ꓾ ꓪꓰꓻ ꓜꓲꓽ ꓟꓶ ꓟꓳꓻ ꓕꓱꓹ ꓓꓴ ꓖꓳ ꓗꓪ ꓓꓹ ꓟ ꓔꓯ ꓟꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓠꓯꓸꓼ ꓗꓪ ꓟꓽ ꓓꓵꓽ ꓡꓰ꓿ 6 ꓢꓲ-ꓟꓴ ꓒꓲ-ꓕꓱ ꓠꓬ ꓬꓲ ꓗꓸ ꓠꓯꓸ ꓢꓲ ꓗꓪ ꓔꓷꓹ ꓛꓲ ꓡ ꓢꓲ ꓡꓱꓼ ꓜꓴ ꓗꓪ ꓓꓵꓽ ꓡꓰˍ ꓡꓳ꓿ ꓖꓳ ꓡꓱ ꓢꓲ ꓪꓰꓻ ꓜꓲꓽ ꓟꓶ ꓟꓳꓻ ꓕꓱꓹ ꓓꓴ ꓖꓳ ꓗꓪ ꓓꓹ ꓟ ꓐꓰ꓾ 7 ꓬꓰ-ꓢꓴ ꓪꓴꓸ ꓓꓵ ꓗꓪ ꓡꓲꓺ ꓖꓶꓽ ꓗꓷ ꓟ ꓟꓶ ꓛꓺ ꓠꓬ ꓪꓰꓻ ꓜꓲꓽ ꓟꓶ ꓟꓳꓻ ꓕꓱꓹ ꓓꓴˍ ꓐꓰ ꓕꓲ ꓪꓺꓼ ꓟꓽ ꓓꓹ ꓓ꓾ ꓬꓲ ꓔꓱꓹ ꓬꓲ ꓕꓲ ꓔꓳꓸ ꓗꓪ ꓡꓲꓺ ꓗꓶ ꓔ ꓟ ꓔꓯ ꓟꓳˍ ꓡꓳ꓿ 8 ꓖꓳ ꓕꓯ ꓡꓱꓼ ꓜꓴ ꓗꓪ ꓬꓲ ꓪꓴꓸ ꓛꓲ ꓬꓰ ꓟ ꓛꓳꓽ ꓒꓯꓹ ꓖꓳ ꓕꓲ ꓣꓳˍ ꓟꓲ ꓓꓵꓽ ꓡꓰ ꓠꓬ ꓟꓳꓻ ꓡꓰ ꓢꓲ ꓙꓵꓻˍ ꓡꓳ꓿ 9 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓽ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓠ ꓗꓹ ꓡꓳ꓾ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓔꓯ ꓬꓲ ꓪꓽ ꓟꓽ ꓙ ꓜꓲꓼ ꓢꓰꓽ꓿ 10 ꓖꓳ ꓗꓸ ꓠꓯꓸ ꓛꓳꓽ ꓒꓯꓹ ꓐꓴ ꓠꓬ ꓬꓲ ꓪꓽ ꓔꓬ ꓖꓴ ꓦꓲ ꓗꓪ ꓬꓲꓼ ꓙꓰˍ ꓡꓳ꓿ 11 ꓖꓳ ꓡꓱ ꓥ ꓟꓲ ꓟ-ꓡꓲ ꓠꓬ ꓡꓱꓼ ꓜꓴ ꓠꓱ ꓫꓱ ꓟꓸꓼ ꓗꓪ ꓦꓰꓼ ꓞ ꓢꓲ ꓥꓴꓻ ꓔꓬ ꓡꓳ꓿ ꓖꓳ ꓡꓱ ꓥꓴꓻ ꓖꓳ ꓡꓱ ꓖꓳ ꓓꓱ ꓗꓴꓺ ꓢꓲ ꓡꓱꓼ ꓜꓴ ꓠꓯꓸꓼ ꓗꓪ ꓡꓳꓸ ꓠꓬꓲ ꓠꓬ꓾ 12 ꓧꓶꓸ ꓕꓯ ꓬꓰ-ꓢꓴ ꓫꓵꓻ ꓟꓳ ꓗꓶ ꓔ ꓖꓴ ꓗꓪ꓾ ꓐꓵ ꓞꓶ ꓒꓴ ꓖꓪꓽ ꓔ ꓟ ꓟꓴꓽ ꓗꓪ ꓝꓲ ꓓꓴ ꓠꓬꓲꓽ ꓣꓳ ꓟꓳ ꓢꓲ꓾ ꓕꓲ ꓣꓳ ꓠꓬ ꓪꓴꓸ ꓓꓵ ꓕꓲ ꓑꓶꓸ ꓗꓪ꓾ ꓕꓲ ꓣꓳ ꓠꓬ ꓛꓲ ꓟꓶ ꓓꓴ ꓕꓲ ꓑꓶꓸ ꓗꓪ ꓠꓬꓲꓸ ꓠꓸ ꓔꓬ ꓟ ꓔꓯ ꓬꓲ ꓟꓳˍ ꓡꓳ꓿ 13 ꓬꓲ ꓪꓽ ꓡꓰ ꓟ-ꓡꓲ ꓔꓯ꓾ ꓤ ꓟꓶ ꓤꓽꓳ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓥꓴˍ ꓡ?꓾ ꓐꓯˍ ꓕꓯ꓾ ꓥꓪ ꓢꓲ ꓒ ꓔꓯ ꓬꓲ ꓪꓽ ꓔꓯꓹ ꓙꓰ ꓢꓲ꓾ ꓮ ꓡꓲ ꓗꓪ ꓗꓶ ꓔ ꓟ ꓥꓪ ꓟꓽ ꓢꓷ ꓠꓬꓲ ꓥꓴˍ ꓡꓳ꓾ ꓐꓯ ꓖꓶˍ ꓡꓳ꓿ 14 ꓬꓲ ꓕꓱ ꓡꓱ ꓐꓯ ꓗꓷ ꓢꓲ ꓔꓲꓸ ꓒꓳꓹ ꓗꓷ ꓠꓬ꓾ ꓬꓰ-ꓢꓴ ꓦꓰꓼ ꓞꓹ ꓟ ꓔꓯ ꓟꓳꓻ ꓡꓰꓳ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓥ ꓟ ꓬꓲ ꓟꓽ ꓢꓷ꓿ 15 ꓬꓰ-ꓢꓴ ꓡꓰ꓾ ꓤ ꓟꓶ ꓤꓽꓳ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓥꓴˍ ꓡ? ꓠꓴ ꓮꓽ ꓟ ꓔꓯ ꓧꓪˍ ꓡ?꓾ ꓐꓯˍ ꓡꓳ꓿ ꓟ-ꓡꓲ ꓠꓬ ꓖꓳ ꓕꓲ ꓣꓳ ꓠꓽ ꓐꓱ ꓦꓴ ꓠꓬꓹ ꓢꓴ ꓥ ꓡꓳ ꓓꓵꓽ ꓙ ꓠꓬꓲ꓾ ꓬꓲ ꓔꓯ꓾ ꓞꓳ ꓔꓲꓳ꓾ ꓠꓴ ꓬꓲ ꓔꓯ ꓕꓱ ꓗꓪ ꓐꓰ ꓔꓯꓹ ꓙꓰ ꓗꓷ ꓐꓷˍ ꓠꓬ꓾ ꓮ ꓡꓲ ꓗꓪ ꓗꓶ ꓔ ꓟ ꓥꓪ ꓔꓯ ꓐꓯ ꓖꓶ ꓡꓯ꓾ ꓥꓪ ꓠꓬ ꓬꓲ ꓔꓯ ꓔꓯꓹ ꓙꓰ ꓠꓲꓹ ꓫꓵˍ ꓡꓳ꓾ ꓐꓯˍ ꓡꓳ꓿ 16 ꓬꓰ-ꓢꓴ ꓡꓰ ꓬꓲ ꓔꓯ꓾ ꓟ-ꓡꓲꓳ꓾ ꓐꓯ ꓖꓶ ꓗꓷ ꓠꓬ꓾ ꓬꓲ ꓔꓲꓸ ꓒꓳꓹ ꓢꓲ ꓦꓲ-ꓐꓱ-ꓣꓴ ꓥꓳꓽ ꓡꓰ꓾ ꓣ-ꓐꓳ-ꓠꓲ꓾ ꓐꓯˍ ꓡꓳ꓿ (ꓕꓱ ꓟ ꓠꓬ꓾ ꓟꓸ ꓒ꓾ ꓐꓯˍ ꓟ ꓥꓳ꓿) 17 ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓔꓯ ꓕꓽ ꓣꓴꓻ ꓔ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓐꓹ ꓐ ꓔꓯ ꓟꓽ ꓓꓯ ꓙꓰ ꓢꓰꓽ꓿ ꓖꓳ ꓡꓱ ꓥ ꓟꓲ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓔꓯ ꓙꓰ ꓢꓲ꓾ ꓥꓪ ꓐꓹ ꓐˍ ꓐꓰ ꓠꓴ ꓪꓽ ꓐꓹ ꓐ꓾ ꓥꓪ ꓪꓴ-ꓢˍ ꓐꓰ ꓠꓴ ꓪꓽ ꓪꓴ-ꓢ ꓔꓯ ꓥꓪ ꓓꓯ ꓙꓰˍ ꓥꓳ꓾ ꓐꓰ ꓬꓲ ꓪꓽ ꓔꓯ ꓐꓯ ꓖꓶ ꓬꓰ꓾ ꓐꓯˍ ꓡꓳ꓿ 18 ꓟ-ꓖ-ꓓ-ꓡꓲ ꓢꓴ ꓟ-ꓡꓲ ꓙꓰ ꓢꓲ ꓛꓳꓽ ꓒꓯꓹ ꓐꓴ ꓔꓯ꓾ ꓢꓲ ꓒ ꓔꓯ ꓥꓪ ꓟꓳꓻ ꓗꓷꓳ꓾ ꓐꓯ ꓖꓶ ꓢꓲ꓾ ꓬꓰ-ꓢꓴ ꓡꓰ ꓬꓲ ꓔꓯ ꓐꓯ ꓖꓶ ꓡ ꓟ ꓮꓽ ꓙꓵ ꓬꓲ ꓪꓽ ꓔꓯ ꓐꓯ ꓖꓶˍ ꓡꓳ꓿ 19 ꓫꓵꓽ ꓠꓬꓲ ꓟ ꓬꓲꓸ ꓪꓴꓸ ꓕꓲ ꓠꓬꓲ ꓟꓶꓼ ꓘꓶꓼ ꓝꓲꓸ ꓗꓪ꓾ ꓛꓳꓽ ꓒꓯꓹ ꓐꓴ ꓠꓬ ꓬꓴ-ꓔ ꓡ ꓞꓳ ꓔꓯ ꓙꓳꓺ ꓠꓬꓲ ꓗ ꓘꓶꓽ ꓗꓺ ꓔ ꓢꓲ ꓔꓬ ꓕꓯ꓾ ꓬꓰ-ꓢꓴ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓦꓰꓼ ꓡ ꓢꓲ꓾ ꓠꓴ ꓪꓽ ꓢꓲ ꓡꓲ ꓟ ꓟꓶ ꓝꓲ꓾ ꓐꓯˍ ꓡꓳ꓿ 20 ꓬꓲ ꓕꓱ ꓡꓱ ꓐꓯ ꓗꓷ ꓠꓬ꓾ ꓬꓲ ꓡꓯ ꓒꓯˍ ꓐꓰ ꓬꓲ ꓙꓳꓽ ꓐꓬ ꓬꓲ ꓪꓽ ꓔꓯ ꓟꓳꓸ ꓖꓶˍ ꓡꓳ꓿ ꓛꓳꓽ ꓒꓯꓹ ꓐꓴ ꓠꓬ ꓢꓲ ꓒ ꓔꓯ ꓟꓳꓻ ꓗꓷ ꓠꓬꓲ ꓮꓽ ꓘꓶꓸ ꓗꓹ ꓛꓲˍ ꓡꓳ꓿ 21 ꓬꓰ-ꓢꓴ ꓡꓰ ꓝꓮꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓢꓲ ꓡꓲ ꓟ ꓟꓶ ꓝꓲ꓾ ꓐꓹ ꓐ ꓡꓰ ꓥꓪ ꓔꓯ ꓝꓲ ꓩꓴ ꓡ ꓟ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪꓽ ꓔꓯ ꓝꓲ ꓩꓴ ꓗꓷˍ ꓥꓳ꓾ ꓐꓯˍ ꓡꓳ꓿ 22 ꓬꓲ ꓕꓱ ꓡꓱ ꓐꓯ ꓗꓷ ꓠꓬ ꓬꓲ ꓪꓽ ꓔꓯ ꓢꓯꓼ ꓦ ꓧꓳꓽ ꓖꓶ ꓢꓲ꓾ ꓢꓲ-ꓫꓬ-ꓟ-ꓦ ꓠꓴ ꓪꓽ ꓟꓶ ꓝꓲ꓿ 23 ꓠꓴ ꓪꓽ ꓡꓰ ꓮꓽ ꓟ ꓔꓯ ꓝꓴꓲ ꓖꓽ ꓖꓶˍ ꓠꓬ꓾ ꓬꓲ ꓝꓴꓲ ꓫꓬꓻ ꓡꓰ ꓝꓲˍ ꓥꓳ꓿ ꓠꓴ ꓪꓽ ꓡꓰ ꓮꓽ ꓟ ꓝꓴꓲ ꓝꓰꓺ ꓔ ꓠꓬ꓾ ꓬꓲ ꓝꓴꓲ ꓟꓯꓻ ꓞꓹ ꓥꓳ꓾ ꓐꓯˍ ꓡꓳ꓿ 24 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓖꓳ ꓗꓪ ꓡ ꓕꓲ ꓑꓹ ꓗꓪ꓾ ꓞꓲ ꓠꓬꓲꓽ ꓣꓳ ꓗꓪ ꓟ ꓕꓲ ꓣꓳ꓾ ꓤ ꓜꓱꓻ꓾ ꓐꓯˍ ꓟ ꓕꓳ-ꓟ ꓠꓬ ꓬꓲ ꓪꓽˍ ꓐꓰ ꓕꓲ ꓪꓺꓼ ꓟꓽ ꓔꓬ꓿ 25 ꓖꓳ ꓡꓱ ꓠꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓠꓬ ꓢꓲ ꓒ ꓔꓯ ꓟꓳꓻ ꓗꓷꓳ꓾ ꓐꓯ ꓖꓶˍ ꓡꓳ꓿ ꓬꓲ ꓠꓽ ꓬꓲ ꓪꓽ ꓔꓯ꓾ ꓬꓲ ꓡꓯꓼ ꓒꓯꓹ ꓗꓪ ꓧꓳ ꓝꓲ ꓕꓯꓼ ꓗꓷ ꓟ ꓠꓻ ꓓꓴ ꓔꓯ ꓥꓪ ꓟꓳꓻ ꓢꓲ꓾ ꓬꓲ ꓠꓻ ꓓꓴ ꓗꓪ ꓥꓪ ꓡꓯꓼ ꓠꓬꓲ ꓟꓽ ꓫꓱꓹ ꓟꓶ ꓕ ꓑꓳ꓾ ꓝꓮꓲ ꓬꓲ ꓙꓳꓽ ꓐꓬ ꓗꓪ ꓠꓻ ꓓꓴ ꓔꓯˍ ꓟꓲ ꓥꓪ ꓡꓯꓼ ꓒꓯꓹ ꓟꓽ ꓫꓱꓹ ꓟꓶ ꓠꓬ꓾ ꓥꓪ ꓟꓽ ꓙꓵꓻ꓾ ꓐꓯˍ ꓡꓳ꓿ 26 ꓖꓳ ꓗꓸ ꓠꓯꓸ ꓦꓰꓼ ꓠꓬꓲ ꓗꓪ ꓬꓲ ꓛꓳꓽ ꓒꓯꓹ ꓐꓴ ꓝꓮꓲ ꓕꓲ ꓧꓪ ꓦꓲ ꓗꓪ ꓔꓬ ꓕꓯ꓾ ꓕꓳ-ꓟˍ ꓟꓲ ꓬꓲ ꓪˍ ꓐꓰ ꓕꓲ ꓪꓺꓼ ꓔꓬ ꓢꓲ꓾ ꓗ ꓘꓶꓽˍ ꓟꓲ ꓗꓺ ꓔ ꓕꓯ꓾ ꓬꓰ-ꓢꓴ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓦꓰꓼ ꓡ ꓢꓲ꓾ ꓠꓴ ꓪꓽ ꓢꓲ ꓡꓲ ꓟ ꓟꓶ ꓝꓲ꓾ ꓐꓯˍ ꓡꓳ꓿ 27 ꓖꓳ ꓡꓱ ꓢꓲ ꓬꓲ ꓡꓰ ꓕꓳ-ꓟ ꓔꓯ꓾ ꓠꓴ ꓡꓯꓼ ꓠꓬꓲ ꓡꓰ ꓥꓪ ꓡꓯꓼ ꓒꓯꓹ ꓔꓯ ꓡꓷꓹ ꓠꓬꓲ ꓡꓯ꓿ ꓝꓮꓲ ꓠꓴ ꓡꓯꓼ ꓒꓯꓹ ꓛꓱꓺ ꓢꓲ꓾ ꓥꓪ ꓙꓳꓽ ꓐꓬ ꓗꓪ ꓫꓱꓹ ꓠꓬꓲ ꓢꓲ ꓙꓵꓻ꓿ ꓙꓵꓻ ꓠꓲꓹ ꓟꓽ ꓙꓳ ꓕꓽ ꓬꓰ꓾ ꓐꓯˍ ꓡꓳ꓿ 28 ꓕꓳ-ꓟ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓢꓲ ꓒˍ ꓐꓰ ꓥꓪ ꓪꓴ-ꓢꓺꓳ꓾ ꓐꓯˍ ꓡꓳ꓿ 29 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬ ꓥꓪ ꓔꓯ ꓟꓳꓻˍ ꓠꓬꓲ ꓙꓵꓻˍ ꓟ ꓥ ꓡ? ꓟꓽ ꓟꓳꓻ ꓠꓬꓲˍ ꓟꓲ ꓙꓵꓻ ꓢꓴ ꓠ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯˍ ꓡꓳ꓿ 30 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓒꓬꓱꓽ ꓕꓯ ꓗꓪ꓾ ꓕꓳ ꓶ ꓕꓱ ꓕꓲ ꓑꓷꓠ ꓗꓪ ꓟꓽ ꓐꓳ ꓔ ꓟ ꓠꓱꓸ ꓐꓯꓼ ꓢꓷꓸ ꓡꓰ ꓓꓴ ꓮꓽ ꓟꓬꓹ ꓬꓰˍ ꓡꓳ꓿ 31 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓬ ꓪꓴ-ꓢ ꓮ ꓐꓲ ꓙꓲ-ꓢꓴ ꓥ ꓟ ꓠꓴ ꓪꓽ ꓙꓵꓻ ꓠꓹ ꓟ ꓐꓰ꓾ ꓙꓵꓻ ꓢꓲ ꓬꓲ ꓟꓬꓱꓺ ꓗꓪ ꓐꓰ ꓠꓴ ꓪꓽ ꓢꓯꓼ ꓟꓬ ꓟꓶ ꓠꓹ ꓟ ꓕꓱ ꓟꓬ ꓫꓵꓽ ꓐꓳ ꓔ ꓟ ꓥ ꓡꓳ꓿

ꓬꓳ-ꓦ 21

1 ꓕꓱ ꓟꓬ ꓫꓵꓽ ꓗꓸ ꓠꓯꓸ ꓬꓰ-ꓢꓴ ꓠꓬ ꓕꓲ-ꓐꓲ-ꓡꓲ-ꓬ ꓬꓲꓻ ꓡꓴꓽ ꓐꓱ ꓗꓪ ꓛꓳꓽ ꓒꓯꓹ ꓐꓴ ꓔꓯ ꓟꓳꓸ ꓖꓶˍ ꓢꓰꓽ ꓡꓳ꓿ ꓬꓲ ꓟꓳꓸ ꓖꓶˍ ꓟ ꓠꓬ ꓕꓱ ꓡꓱ ꓥ ꓡꓳ꓿ 2 ꓢꓲ-ꓟꓴ ꓒꓲ-ꓕꓱˍ ꓐꓰ꓾ ꓤꓽ ꓜꓱꓻ ꓟꓬꓱ ꓔ ꓟ ꓕꓳ-ꓟ ꓐꓰ꓾ ꓖ-ꓡꓲ-ꓡꓲ ꓟꓵꓽ ꓗꓪ ꓟ ꓘ-ꓠ ꓢꓴ ꓠ-ꓕ-ꓠꓰˍ ꓐꓰ ꓜꓲ-ꓐꓱ-ꓓꓲ ꓬꓲ ꓤ ꓐꓴˍ ꓐꓰ꓾ ꓠꓱꓸ ꓐꓯꓼ ꓛꓳꓽ ꓒꓯꓹ ꓝꓮꓲ ꓠꓬꓲꓽ ꓣꓳˍ ꓐꓰ ꓕꓲ ꓪꓺꓼ ꓔꓬ ꓕꓯ꓾ 3 ꓢꓲ-ꓟꓴ ꓒꓲ-ꓕꓱ ꓡꓰ ꓬꓲ ꓪꓽ ꓔꓯ꓾ ꓥꓪ ꓠꓽ ꓥꓪꓸ ꓓꓳꓽ ꓙꓰˍ ꓥꓳ꓾ ꓐꓯˍ ꓡꓳ꓿ ꓬꓲ ꓪꓽ ꓡꓰ꓾ ꓥꓪ ꓠꓴꓽˍ ꓟꓲ ꓠꓴˍ ꓐꓰ ꓕꓲ ꓛꓳꓺꓼ ꓙꓰˍ ꓥꓳ꓾ ꓐꓯ ꓢꓲ꓾ ꓬꓲ ꓪꓽ ꓠꓬ ꓡꓲ ꓗꓪ ꓓꓵꓽ ꓡꓰˍ ꓡꓳ꓿ ꓖꓳ ꓕꓲ ꓦꓬꓼ ꓗꓪ ꓬꓲ ꓪꓽ ꓮꓸ ꓫꓵˍ ꓟꓲ ꓓꓳꓽ ꓟ ꓟꓶ꓿ 4 ꓟꓲꓽ ꓕꓯ ꓙꓲ ꓡ ꓕꓯ꓾ ꓬꓰ-ꓢꓴ ꓠꓬ ꓬꓲꓻ ꓙꓬ ꓘꓶꓽ ꓗꓪ ꓦꓰꓼ ꓞꓹ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓥ ꓟ ꓛꓳꓽ ꓒꓯꓹ ꓐꓴ ꓠꓽ ꓟꓽ ꓢꓷ꓿ 5 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓛꓳꓽ ꓒꓯꓹ ꓐꓴꓳ꓾ ꓠꓴ ꓪꓽ ꓜꓽ ꓓꓴ ꓟꓽ ꓙꓳ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓡꓰ ꓟꓽ ꓙꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 6 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓡꓲ ꓡꓯꓼ ꓙ ꓕꓲ ꓛꓱꓽ ꓗꓪ ꓥꓪꓸ ꓑꓱꓸ ꓡꓳ ꓧꓳꓽ ꓗꓷ꓾ ꓖꓳ ꓡꓱ ꓠꓬ ꓠꓴ ꓪꓽ ꓥꓪꓸ ꓓꓳꓽ ꓟꓶˍ ꓥꓳ꓾ ꓐꓯˍ ꓡꓳ꓿ ꓬꓲ ꓪꓽ ꓖꓳ ꓡꓱ ꓬꓰ ꓗꓷ ꓠꓬ ꓥꓪꓸ ꓑꓱꓸ ꓔꓯ ꓚꓵꓹ ꓓꓯ ꓡ ꓟꓽ ꓘꓴ ꓠ ꓛꓲ ꓥꓪꓸ ꓮꓽ ꓟꓬꓹ ꓓꓳꓽ ꓟꓶ ꓡꓰꓳ꓿ 7 ꓖꓳ ꓡꓱ ꓠꓬ ꓬꓰ-ꓢꓴ ꓠꓲꓹ ꓠꓵˍ ꓟ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓡꓰ ꓒꓲ-ꓕꓱ ꓔꓯ꓾ ꓕꓱ ꓟ ꓠꓬ ꓢꓲ ꓒ ꓥ ꓡꓳ꓾ ꓐꓯ ꓖꓶˍ ꓡꓳ꓿ ꓢꓲ-ꓟꓴ ꓒꓲ-ꓕꓱ ꓠꓬ ꓬꓲꓸ ꓙꓬꓽ ꓡꓯꓽ ꓟꓴ ꓗꓹ ꓠꓬꓲ꓾ ꓢꓲ ꓒ ꓥ ꓟ ꓑ ꓙꓽˍ ꓕꓯ ꓬꓲ ꓐꓵ ꓞꓶ ꓪꓸ ꓔ ꓢꓲ꓾ ꓬꓲꓻ ꓡꓴ ꓐꓱ ꓗꓪ ꓔꓷꓹ ꓓꓵꓽ ꓡꓰˍ ꓡꓳ꓿ 8 ꓠꓱꓸ ꓐꓯꓼ ꓛꓳꓽ ꓒꓯꓹ ꓐꓴ ꓠꓬ ꓡꓲ ꓤ ꓗꓪ ꓐꓰ ꓥꓪꓸ ꓒ ꓐꓲꓺꓼ ꓓꓯꓹ ꓟ ꓥꓪꓸ ꓑꓱꓸ ꓖꓳ ꓟ ꓖꓳ ꓩꓴ ꓡ ꓡꓳ꓿ ꓥꓪꓸ ꓑꓱꓸ ꓠꓬ ꓬꓲꓻ ꓙꓬ ꓘꓶꓽ ꓗꓪ ꓐꓰ ꓶꓽ ꓤ ꓟꓽ ꓗꓳꓹ꓾ ꓮ ꓡ ꓠꓬꓲ ꓦꓬ ꓛꓬꓹ ꓛꓲˍ ꓡꓰꓽ ꓗꓳꓹ ꓞꓹ ꓡꓳ꓿ 9 ꓬꓲ ꓪꓽ ꓬꓲꓻ ꓙꓬ ꓘꓶꓽ ꓗꓪ ꓓꓯ ꓡ ꓕꓯ꓾ ꓖꓳ ꓗꓪ ꓝꓶꓸ ꓢꓷꓼ ꓮ ꓔꓳꓸˍ ꓐꓰ꓾ ꓮ ꓔꓳꓸ ꓗꓪ ꓥꓪꓸ ꓚꓰꓹ ꓞꓹ ꓟˍ ꓐꓰ꓾ ꓐꓰ ꓑ ꓑ ꓔꓯ ꓟꓳˍ ꓡꓳ꓿ 10 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓮ ꓟꓶ ꓠꓴ ꓪꓽ ꓣꓴ ꓟꓶˍ ꓟ ꓥꓪꓸ ꓮ ꓔꓲꓸ ꓤ ꓔꓯꓹ ꓖꓶ ꓡꓯ꓾ ꓐꓯˍ ꓡꓳ꓿ 11 ꓢꓲ-ꓟꓴ ꓒꓲ-ꓕꓱ ꓠꓽ ꓡꓲ ꓗꓪ ꓓꓵꓽ ꓙꓰ ꓢꓲ꓾ ꓥꓪꓸ ꓓꓽ ꓟ ꓕꓲ ꓦꓬ ꓥꓪ ꓞꓲ ꓢ ꓟꓻ ꓒ ꓐꓲꓺꓼ ꓓꓯꓹ ꓟ ꓥꓪꓸ ꓑꓱꓸ ꓔꓯ ꓬꓲꓻ ꓙꓬ ꓘꓶꓽ ꓗꓪ ꓖꓳ ꓓꓯ ꓡ ꓡꓳ꓿ ꓖꓳ ꓟꓬ ꓛꓲ ꓓꓯꓹ ꓥ ꓟꓲ ꓥꓪꓸ ꓑꓱꓸ ꓟꓽ ꓧꓽ ꓡꓰ꓿ 12 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓠꓯꓼ ꓜꓻ ꓜꓽ ꓡꓯ꓾ ꓐꓯˍ ꓡꓳ꓿ ꓢꓲ ꓒ ꓥ ꓟ ꓬꓲ ꓪꓽ ꓢꓷˍ ꓠꓬꓲ꓾ ꓠꓴ ꓮꓽ ꓟ ꓥ ꓡ? ꓐꓰ ꓛꓳꓽ ꓒꓯꓹ ꓐꓴ ꓮ ꓟˍ ꓟꓲ ꓬꓲ ꓔꓯ ꓠ ꓠꓬꓲ ꓟꓽ ꓑꓶꓸ꓿ 13 ꓖꓳ ꓡꓱ ꓠꓬ ꓬꓰ-ꓢꓴ ꓡ ꓢꓲ꓾ ꓑ ꓑˍ ꓐꓰ ꓥꓪꓸ ꓣꓴ ꓢꓲ ꓠꓬꓲ ꓬꓲ ꓪꓽ ꓔꓯ ꓖꓶˍ ꓡꓳ꓿ 14 ꓕꓱ ꓟ ꓠꓬ ꓬꓰ-ꓢꓴ ꓫꓵꓻ ꓗꓪ ꓐꓰ ꓢꓯꓸ ꓬꓲ ꓡ ꓗꓸ ꓠꓯꓸ꓾ ꓛꓳꓽ ꓒꓯꓹ ꓐꓴ ꓔꓯ ꓟꓳꓸ ꓖꓶˍ ꓟ ꓢ ꓧꓪꓹ ꓕꓲ ꓧꓪ ꓟ ꓥ ꓡꓳ꓿ 15 ꓬꓲ ꓪꓽ ꓠꓯꓼ ꓜꓻ ꓜꓽ ꓗꓷ ꓠꓬ꓾ ꓬꓰ-ꓢꓴ ꓡꓰ ꓢꓲ-ꓟꓴ ꓒꓲ-ꓕꓱ ꓔꓯ꓾ ꓬꓳ-ꓦ ꓬꓲ ꓮ ꓐꓲ ꓢꓲ-ꓟꓴꓳ꓾ ꓕꓱ ꓟꓬ ꓟ ꓕꓯ ꓢꓲ ꓠꓴ ꓥꓪ ꓔꓯ ꓠꓲꓹ ꓠꓵˍ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓲ ꓡꓰ꓾ ꓥꓳ꓾ ꓢꓲ ꓒꓽꓳ꓾ ꓠꓴ ꓔꓯ ꓥꓪ ꓙꓽˍ ꓟ ꓠꓴ ꓢꓷˍ ꓡꓳ꓾ ꓐꓯˍ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓮ ꓣꓳ ꓔꓯ ꓚꓸ ꓖꓶ꓾ ꓐꓯˍ ꓡꓳ꓿ 16 ꓗꓸ ꓠꓯꓸ ꓕꓲ ꓧꓪꓹ ꓬꓰ-ꓢꓴ ꓡꓰ꓾ ꓬꓳ-ꓦ ꓬꓲ ꓮ ꓐꓲ ꓢꓲ-ꓟꓴ ꓠꓴ ꓥꓪ ꓔꓯ ꓠꓲꓹ ꓠꓵˍ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓲ ꓡꓰ ꓥ ꓡꓳ꓾ ꓢꓲ ꓒꓽꓳ꓾ ꓠꓴ ꓔꓯ ꓥꓪ ꓙꓽˍ ꓟ ꓠꓴ ꓢꓷꓸˍ ꓡꓳ꓾ ꓐꓯˍ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓮ ꓣꓳ ꓐꓴ ꓔꓯ ꓡꓳꓸ ꓙ꓾ ꓐꓯˍ ꓡꓳ꓿ 17 ꓢ ꓧꓪꓹ ꓕꓲ ꓧꓪꓹ ꓬꓰ-ꓢꓴ ꓡꓰ꓾ ꓬꓳ-ꓦ ꓬꓲ ꓮ ꓐꓲ ꓢꓲ-ꓟꓴ ꓠꓴ ꓥꓪ ꓔꓯ ꓙꓽˍ ꓡ?꓾ ꓐꓯˍ ꓡꓳ꓿ ꓬꓰ-ꓢꓴ ꓡꓰ꓾ ꓠꓴ ꓥꓪ ꓔꓯ ꓠꓲꓹ ꓠꓵˍ ꓡ?꓾ ꓐꓰ ꓢ ꓧꓪ ꓠ ꓠꓬꓲˍ ꓟ ꓗꓪ ꓐꓰ ꓒꓲ-ꓕꓱ ꓠꓲꓹ ꓟ ꓫꓸ ꓡꓰ ꓠꓬꓲ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓮꓸ ꓫꓵˍ ꓟꓲ ꓠꓴ ꓢꓷˍ ꓡꓳ꓿ ꓠꓴ ꓔꓯ ꓥꓪ ꓙꓽˍ ꓟ ꓠꓴ ꓢꓷˍ ꓡꓳ꓾ ꓐꓯ ꓖꓶˍ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓮ ꓣꓳ ꓔꓯ ꓚꓸ ꓖꓶ꓾ ꓐꓯˍ ꓡꓳ꓿ 18 ꓥꓪ ꓔꓱꓹ ꓔꓱꓹꓼ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓞꓲꓼ ꓣꓳˍ ꓕꓯ ꓠꓴ ꓚꓲꓸ ꓛꓬ ꓙꓽ ꓧꓷꓹ ꓧꓷꓹ ꓢꓲ ꓮ ꓡꓲ ꓗꓪ ꓙꓰ ꓠꓲꓹ ꓫꓵˍ ꓠꓬ ꓖꓳ ꓗꓪ ꓙꓰˍ ꓡꓳ꓿ ꓠꓴ ꓟꓳꓽ ꓡꓰ ꓕꓯ ꓠꓽ꓾ ꓠꓴ ꓔꓯ ꓡꓯꓼ ꓒꓯꓹ ꓛꓱ ꓝꓲ ꓢꓲ꓾ ꓢꓴ ꓡꓰ ꓠꓴ ꓔꓯ ꓙꓽ ꓧꓷꓹ ꓧꓷꓹ ꓖꓶ ꓢꓲ ꓠꓬꓲ꓾ ꓠꓴ ꓙꓰ ꓠꓲꓹ ꓟꓽ ꓫꓵ ꓟ ꓗꓪ ꓠꓴ ꓔꓯ ꓧꓳꓽ ꓙꓰ ꓡ ꓥꓳ꓾ ꓐꓯˍ ꓡꓳ꓿ 19 ꓬꓰ-ꓢꓴ ꓕꓱ ꓡꓱ ꓐꓯˍ ꓟ ꓠꓬ꓾ ꓒꓲ-ꓕꓱ ꓮ ꓡꓲ ꓐꓰ ꓫꓵꓻ ꓢꓲ꓾ ꓪꓴ-ꓢ ꓟꓬꓱ ꓓꓳꓽ ꓓꓳ ꓡ ꓠꓹ ꓟ ꓐꓯ ꓟꓳꓸ ꓖꓶˍ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓬꓲ ꓕꓱ ꓡꓱ ꓐꓯ ꓗꓷ ꓠꓬ꓾ ꓒꓲ-ꓕꓱ ꓔꓯ꓾ ꓥꓪ ꓔꓯ ꓛꓳ ꓡꓯ꓾ ꓐꓯˍ ꓡꓳ꓿ 20 ꓒꓲ-ꓕꓱ ꓔꓲꓸ ꓒꓳꓹ ꓗꓷ ꓠꓬ ꓬꓰ-ꓢꓴ ꓠꓲꓹ ꓠꓵˍ ꓟ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓛꓳ ꓫꓱꓽ ꓡ ꓔꓬ ꓟ ꓔꓯ ꓟꓳˍ ꓡꓳ꓿ (ꓛꓳ ꓒꓯꓹ ꓖꓳ ꓕꓲ ꓣꓳ ꓠꓬ꓾ ꓟꓶꓼ ꓘꓶꓼ ꓜꓻ ꓜꓽˍ ꓕꓯ ꓬꓰ-ꓢꓴ ꓒ ꓕꓲꓺꓼ ꓗꓪ ꓗꓳꓺ ꓞ ꓢꓲ꓾ ꓢꓲ ꓒꓽꓳ꓾ ꓠꓴ ꓔꓯ ꓪꓴꓽ ꓜꓽ ꓢꓴ ꓮꓽ ꓟ ꓥ ꓡ? ꓐꓰ ꓠ ꓠꓬꓲ ꓢꓴ ꓥ ꓡꓳ꓿) 21 ꓒꓲ-ꓕꓱ ꓬꓲ ꓔꓯ ꓟꓳ ꓗꓷ ꓠꓬ꓾ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓬꓲ ꓠꓬ ꓮ ꓡꓲ ꓥ ꓡ?꓾ ꓐꓯˍ ꓡꓳ꓿ 22 ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓬꓲꓼ ꓡꓺˍ ꓗꓪ ꓛꓲ ꓥꓪ ꓬꓲ ꓔꓯ ꓢꓯꓸ ꓔꓬ ꓝꓲ ꓠꓲꓹ ꓫꓵ ꓐꓷˍ ꓟꓲ꓾ ꓖꓳ ꓟ ꓠꓴ ꓮꓸ ꓫꓵ ꓗꓴꓸ ꓙꓲꓽ ꓟꓽ ꓙꓳ꓾ ꓥꓪ ꓔꓯ ꓛꓳ ꓡꓯ꓾ ꓐꓯ ꓖꓶˍ ꓡꓳ꓿ 23 ꓖꓳ ꓡꓱ ꓠꓬꓲ ꓛꓳꓽ ꓒꓯꓹ ꓖꓳ ꓕꓲ ꓣꓳ ꓠꓬ ꓟꓽ ꓫꓵꓻ ꓡ꓾ ꓐꓰ ꓬꓲꓼ ꓤ ꓠꓬꓲ ꓤ ꓐꓴ ꓗꓳ ꓡꓳ ꓗꓪ ꓚ ꓓꓳ ꓙꓰˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓡꓰ꓾ ꓬꓲ ꓠꓽ ꓟꓽ ꓫꓵꓻ ꓡ꓾ ꓐꓰ ꓟꓽ ꓐꓯ꓿ ꓥꓪ ꓛꓲ ꓡ ꓗꓪ ꓛꓲ ꓥꓪ ꓬꓲ ꓔꓯ ꓔꓬ ꓝꓲ ꓠꓲꓹ ꓫꓵ ꓐꓷˍ ꓟꓲ ꓠꓴˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓟꓽ ꓙꓳ꓾ ꓐꓰˍ ꓡꓰꓽ ꓐꓯˍ ꓡꓳ꓿ 24 ꓕꓱ ꓟꓬ ꓫꓵꓽ ꓢꓷꓸ ꓙ ꓟꓳ ꓙ ꓢꓲ꓾ ꓕꓳ ꓶ ꓐꓳ ꓢꓴ ꓠꓬ ꓛꓳꓽ ꓒꓯꓹ ꓕꓱ ꓕꓲ ꓣꓳ ꓟ ꓥꓳ꓿ ꓖꓳ ꓡꓱ ꓢꓲ ꓬꓲ ꓢꓷ ꓙ ꓟꓳ ꓙˍ ꓟ ꓠꓬ ꓔꓱꓹˍ ꓟ ꓥ ꓟ ꓥꓪ ꓠꓴꓽ ꓢꓷˍ ꓡꓳ꓿ 25 ꓬꓰ-ꓢꓴ ꓡꓰ ꓬꓰ ꓗꓷ ꓟ ꓠꓱꓸ ꓐꓯꓼˍ ꓟꓲ ꓮꓽ ꓟꓬꓹ ꓙꓳˍ ꓢꓰꓽ ꓡꓳ꓿ ꓖꓳ ꓟꓬ ꓟ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓮꓽ ꓙꓵ ꓐꓳ ꓗꓷ ꓐꓷˍ ꓠꓬ꓾ ꓐꓳ ꓔ ꓟ ꓕꓳ ꓶ ꓠꓽ ꓟꓲ ꓠꓯ ꓗꓪˍ ꓟꓲ ꓗꓶꓺ ꓟꓽ ꓓꓲꓻ꓾ ꓐꓰ ꓥꓪ ꓓꓵꓽ ꓙꓽˍ ꓡꓳ꓿ ꓕꓱ ꓗꓪ ꓟꓵꓽ ꓐꓬꓱꓽ ꓕꓲ ꓟ ꓗꓶ ꓓꓴ ꓥ ꓡꓳ꓿

ꓝꓲ-ꓓꓴ 1

1 ꓕꓲ-ꓬ-ꓒꓲ-ꓡꓳꓽꓳ꓾ ꓥꓪ ꓡꓰ ꓕꓳ ꓶ ꓬꓲ ꓪꓴꓸ ꓕꓲ ꓑꓷꓠ ꓗꓪ꓾ ꓬꓰ-ꓢꓴ ꓟꓬꓱꓽ ꓬꓰ ꓪꓴꓸ ꓔꓴˍ ꓟ ꓗꓪ ꓐꓰ꓾ ꓬꓲ ꓔꓯ ꓔꓯꓹ ꓓꓯ ꓙꓰˍ ꓟ ꓦꓬꓼ ꓠꓬꓲ ꓗꓪ ꓛꓲ꓾ 2 ꓬꓲ ꓬꓰ ꓗꓷ ꓟ ꓐꓰ ꓟꓸ ꓗꓷ ꓟ ꓮꓽ ꓙꓵ ꓐꓳ ꓗꓷꓳ꓿ ꓬꓲ ꓔꓯ ꓟꓽ ꓔꓯꓹ ꓓꓯ ꓙꓰ ꓢꓰꓽ ꓕꓯ꓾ ꓬꓲ ꓠꓬ ꓬꓲ ꓡꓰ ꓢꓲ ꓔ ꓟ ꓝꓲ ꓓꓴ ꓐꓴ ꓔꓯ ꓢꓲ-ꓫꓬ-ꓟ-ꓦ ꓗꓪ ꓐꓰ ꓕꓵꓼ ꓪ ꓖꓶ ꓔ ꓬꓰˍ ꓡꓳ꓿ 3 ꓬꓲ ꓫꓸ ꓙꓵꓻ ꓢꓲ ꓫꓵꓻ ꓗꓪ ꓐꓰ ꓢꓯꓸ ꓬꓲ ꓡ ꓗꓸ ꓠꓯꓸ ꓡꓲ ꓞꓲ ꓠꓬꓲ ꓟ ꓠꓯꓸꓼ ꓗꓪ꓾ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓧꓳꓺ ꓟꓽ ꓠꓺ ꓟ ꓗꓸ ꓚꓵ ꓙꓳꓻ ꓙꓳˍ ꓡꓰꓽ ꓮꓽ ꓟꓬꓹ ꓧꓪꓹ ꓬꓲ ꓖꓳ ꓓꓱ ꓟꓳꓸ ꓖꓶ ꓢꓲ꓾ ꓪꓴ-ꓢ ꓗꓴꓷ ꓟꓸ ꓟꓲ ꓟꓸ ꓖꓶˍ ꓡꓳ꓿ 4 ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓔꓬ ꓢꓰꓽ ꓕꓯ ꓬꓲ ꓪꓽ ꓔꓯ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓕꓽ ꓓꓳ ꓙꓰ꓾ ꓥꓪ ꓐꓯ ꓔ ꓖꓶˍ ꓟ꓾ ꓥꓪ ꓐꓹ ꓐ ꓖꓶ ꓙ ꓟꓳˍ ꓟ ꓡꓯꓼ ꓫꓴ ꓔꓯ ꓡꓳ ꓠꓬꓹ ꓔꓬ꓿ 5 ꓬꓳ-ꓦ ꓠꓽ ꓬꓲꓻ ꓙꓬ ꓡꓰ ꓖꓳ ꓓꓱ ꓔꓲꓹ ꓖꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓮꓽ ꓟꓬꓹ ꓠꓬꓲ ꓟꓽ ꓗꓷ ꓡꓰ ꓠꓬ ꓠꓴ ꓪꓽ ꓠꓽ ꓢꓲ-ꓫꓬ-ꓟ-ꓦ ꓡꓰ ꓔꓲꓹ ꓖꓶ ꓡ ꓟ ꓟꓶˍ ꓥꓳ꓾ ꓐꓯˍ ꓡꓳ꓿ 6 ꓬꓲ ꓪꓽ ꓕꓲ ꓪꓺꓼ ꓐꓰ ꓜꓲꓼ ꓡꓯ ꓘꓳˍ ꓕꓯ ꓬꓲ ꓪꓽ ꓡꓰ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓠꓴ ꓠꓬ ꓬꓲ-ꓢꓷ-ꓡꓰ ꓗꓴꓷꓼ ꓔꓯ ꓮ ꓟꓶ ꓫꓬꓹ ꓔꓶˍ ꓥꓳ ꓪ? ꓐꓰ ꓠ ꓠꓬꓲˍ ꓡꓳ꓿ 7 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓐꓹ ꓐ ꓬꓲ ꓚꓲ ꓛꓬ ꓙꓵꓽ ꓪ ꓡꓰ ꓝꓰꓹ ꓔ ꓟ ꓝꓲꓸˍ ꓐꓰ ꓦꓬꓼ ꓠꓬꓲ ꓔꓯ ꓠꓴ ꓪꓽ ꓢꓷꓸ ꓟꓽ ꓛꓵ꓿ 8 ꓖꓳ ꓡꓱ ꓥ ꓟꓲ ꓢꓲ-ꓫꓬ-ꓟ-ꓦ ꓠꓴ ꓪꓽ ꓔꓯ ꓬꓯꓼ ꓡ ꓕꓯ꓾ ꓠꓴ ꓪꓽ ꓠꓽ ꓪꓽ ꓠꓬꓲˍ ꓟ ꓟꓶˍ ꓥꓳ꓿ ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓙꓱ-ꓣꓴ-ꓢ-ꓡꓱ ꓗꓪˍ ꓟꓲ꓾ ꓬꓴ-ꓔ ꓟꓵꓽ ꓮꓽ ꓙꓵ ꓗꓪˍ ꓟꓲ꓾ ꓢ-ꓟ-ꓡꓲ ꓗꓪˍ ꓟꓲ꓾ ꓟꓲ ꓠꓯ ꓑꓶꓸ ꓗꓪ ꓛꓲ ꓥ ꓟꓲ꓾ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓬꓰˍ ꓥꓳ꓾ ꓐꓯˍ ꓡꓳ꓿ 9 ꓬꓲ ꓕꓱ ꓟꓬ ꓙꓰꓽ ꓐꓯ ꓗꓷ ꓠꓬ ꓬꓲ ꓪꓽ ꓟꓳꓻ ꓟꓳˍ ꓡꓰꓽ ꓬꓲ ꓔꓯ ꓛꓵꓽ ꓓꓯ ꓙꓰ ꓢꓲ꓾ ꓟꓴ ꓗꓴꓸ ꓡꓰ ꓬꓲ ꓔꓯ ꓕꓱꓹ ꓓꓯ ꓙꓰ ꓠꓬ ꓟꓽ ꓟꓳꓻ ꓗꓷ ꓡꓰꓳ꓿ 10 ꓬꓲ ꓓꓯ ꓙꓰ ꓔꓬ ꓟ ꓔꓯ ꓝꓲ ꓓꓴ ꓐꓴ ꓟꓴꓽ ꓗꓪ ꓗꓪ ꓟꓬꓺ ꓔꓱꓹ ꓡꓳꓸ ꓔꓬ ꓕꓯ꓾ ꓐꓵ ꓞꓶ ꓒꓴ ꓖꓪꓽ ꓔ ꓟ ꓡ ꓞꓳ ꓠꓬꓲꓽ ꓣꓳ ꓬꓲ ꓪꓽ ꓒ ꓕꓲꓺꓼ ꓗꓪ ꓦꓰꓼ ꓡ ꓢꓲ꓾ 11 ꓖ-ꓡꓲ-ꓡꓲ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓕꓱ ꓡꓱ ꓦꓰꓼ ꓞ ꓢꓲ ꓟꓴꓽ ꓗꓪ ꓗꓪ ꓡꓳꓸ ꓔꓬ ꓡ? ꓠꓴ ꓪꓽ ꓗꓳ ꓡꓳ ꓗꓪ ꓐꓰ ꓟꓴꓽ ꓗꓪ ꓗꓪ ꓛꓵꓽ ꓔꓯꓹ ꓙꓰ ꓟ ꓬꓰ-ꓢꓴ ꓕꓱ ꓕꓲ ꓣꓳ ꓠꓬ꓾ ꓬꓲ ꓔꓯ ꓟꓴꓽ ꓗꓪ ꓗꓪ ꓛꓵꓽ ꓔꓯꓹ ꓙꓰ ꓟ ꓔꓯ ꓠꓴ ꓪꓽ ꓟꓳꓻ ꓟ ꓡꓰ ꓐꓰ꓾ ꓝꓮꓲ ꓕꓲ ꓧꓪꓹ ꓬꓯꓼ ꓡ ꓢꓰꓽ ꓥꓳ꓾ ꓐꓯˍ ꓡꓳ꓿ 12 ꓖꓳ ꓕꓯ ꓬꓲ ꓪꓽ ꓠꓬ꓾ ꓮꓽ-ꓛꓬ꓾ ꓟꓬꓱ ꓔ ꓟ ꓪꓽ ꓚꓲ ꓗꓪ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰˍ ꓡꓳ꓿ ꓪ ꓚꓲ ꓖꓳ ꓟ ꓠꓬ ꓙꓱ-ꓣꓴ-ꓢ-ꓡꓱ ꓔꓯ ꓠꓶꓽ ꓞꓹ ꓢꓲ꓾ ꓡꓳ ꓔ ꓕꓲ ꓐꓶꓽ ꓕꓷꓹ ꓛꓲ ꓗꓳꓹ ꓞꓹ ꓡꓳ꓿ 13 ꓝꓲ ꓓꓴ ꓐꓴ ꓡꓳ ꓒꓱ ꓗꓪ ꓛꓲ ꓬꓰ ꓠꓬ ꓬꓲ ꓪꓽ ꓔꓬ ꓖꓴ ꓜꓳꓻ ꓗꓳꓹ ꓗꓪ ꓓꓯ ꓙꓰˍ ꓡꓳ꓿ ꓖꓳ ꓗꓪ ꓠꓬ ꓒꓲ-ꓕꓱ꓾ ꓬꓳ-ꓦ꓾ ꓬ-ꓗꓴ꓾ ꓯ-ꓓꓱ-ꓣꓴ꓾ ꓒꓲ-ꓡꓲ꓾ ꓕꓳ-ꓟ꓾ ꓐ-ꓕꓳ-ꓡꓱ-ꓟꓲ꓾ ꓟ-ꓕꓲ꓾ ꓮ-ꓡꓱ-ꓒꓲ ꓬꓲ ꓤ ꓬ-ꓗꓴ꓾ ꓠꓲꓹ ꓡꓱ ꓢꓴ ꓢꓲ-ꓟꓴ ꓐꓰ ꓬ-ꓗꓴ ꓬꓲ ꓤ ꓬꓴ-ꓔ ꓬꓲ ꓪꓽ ꓮꓽ ꓙꓵ ꓔꓬ ꓢꓲ꓾ 14 ꓤꓽ ꓟꓶ ꓤ ꓕꓲ ꓐꓱꓻ ꓐꓰ ꓬꓰ-ꓢꓴ ꓬꓲ ꓟꓹ ꓟ ꓟ-ꓡꓲˍ ꓐꓰ꓾ ꓬꓲ ꓠꓬꓲ ꓤ ꓐꓴ ꓮꓽ ꓙꓵ ꓠꓬ ꓕꓲ ꓠꓲꓹ ꓕꓲ ꓪꓽ ꓟꓽ ꓠꓽ ꓠ ꓪꓽ ꓘꓴˍ ꓡꓳ꓿ 15 ꓖꓳ ꓗꓸ ꓠꓯꓸ ꓮꓽ ꓡ ꓕꓲ ꓦꓬꓻ ꓠꓬꓲꓽ ꓞꓲ ꓣꓳ ꓛꓲ ꓜꓲꓼ ꓞꓹ ꓕꓯ꓾ ꓒꓲ-ꓕꓱ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓦꓰꓼ ꓔꓴ ꓡ ꓢꓲ ꓕꓱ ꓡꓱ ꓐꓯˍ ꓡꓳ꓿ 16 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓧꓶꓸ ꓕꓯ ꓢꓲ-ꓫꓬ-ꓟ-ꓦ ꓡꓰ ꓓ-ꓪꓵ ꓗꓪ ꓐꓰ꓾ ꓬꓰ-ꓢꓴ ꓔꓯ ꓣꓴꓻ ꓡ ꓢꓴ ꓔꓯ ꓙ ꓖꓴ ꓧꓳꓽ ꓟꓸ ꓖꓶ ꓢꓴ ꓬꓴ-ꓓ ꓔꓯ ꓖꓴ ꓢꓲ ꓐꓯ ꓔ ꓟ꓾ ꓢꓲꓽ ꓫꓬ ꓕꓳ ꓶ ꓗꓪ ꓓꓯꓹ ꓟ ꓐꓯ ꓘꓶ ꓠꓬ ꓐꓲ ꓡ ꓠ ꓗꓷ ꓡꓰꓳ꓿ 17 ꓬꓲ ꓔꓯˍ ꓟꓲ ꓥꓪ ꓠꓴꓽ ꓗꓪ ꓟ ꓕꓲ ꓣꓳ ꓚꓬꓹ ꓗꓷ ꓢꓲ꓾ ꓣꓱꓽ ꓙ ꓟ ꓟꓬꓱꓽ ꓕꓱ ꓟ ꓗꓪ ꓬꓲˍ ꓟꓲ ꓕꓲ ꓣꓷꓽ ꓑꓯꓹ ꓟꓶ ꓗꓷꓳ꓾ ꓐꓯˍ ꓡꓳ꓿ 18 (ꓖꓳ ꓡꓱ ꓥ ꓟꓲ ꓬꓴ-ꓓ ꓠꓬ ꓬꓲ ꓥꓶˍ ꓟ ꓟꓬꓱꓽ ꓬꓰ ꓟ ꓬꓲ ꓒꓵꓽ ꓡꓰ ꓦ ꓟꓲ ꓕꓲ ꓡꓯꓼ ꓪꓴꓻ ꓟꓶ ꓢꓲ꓾ ꓖꓳ ꓗꓪ ꓬꓲ ꓪꓴꓸ ꓔꓲꓸ ꓑ ꓞꓰꓻ ꓡꓰ ꓢꓲ ꓠꓬꓲ꓾ ꓦꓰꓼ ꓛꓲ ꓐꓶꓽ ꓡꓰ ꓢꓲ ꓬꓲ ꓪꓴꓻ ꓮꓽ ꓙꓵ ꓓꓳ ꓡꓺꓳ꓿ 19 ꓕꓱ ꓟ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴ ꓮꓽ ꓙꓵ ꓢꓷ ꓡꓰ ꓠꓬ꓾ ꓦ ꓟꓲ ꓖꓳ ꓕꓲ ꓡꓯꓼ ꓔꓯ ꓬꓲ ꓪꓽ ꓥꓳꓽ ꓡꓰ꓾ ꓮ-ꓘꓷ-ꓓ-ꓟ꓾ ꓟꓬꓱ ꓖꓶˍ ꓡꓳ꓿ ꓮ-ꓘꓷ-ꓓ-ꓟ꓾ ꓐꓯ ꓟ ꓠꓬ꓾ ꓫꓵꓽ ꓦ ꓟꓲ꓾ ꓐꓯˍ ꓟ ꓥ ꓡꓳ꓿) 20 ꓝꓮꓲ ꓒꓲ-ꓕꓱ ꓡꓰ꓾ ꓮ ꓡꓲꓳ ꓐꓯ ꓠꓬ ꓟꓴ ꓖꓪ ꓕꓳ ꓶ ꓗꓪ꓾ ꓬꓲ ꓔꓬ ꓖꓴ ꓠꓬ ꓖꓳꓽ ꓡꓰ ꓝꓲ꓾ ꓮꓽ ꓟ ꓔꓯˍ ꓟꓲ ꓖꓳ ꓗꓪ ꓕꓽ ꓔꓬ ꓝꓲ꓾ ꓐꓰ ꓐꓳ ꓔ ꓡꓳ꓿ ꓝꓮꓲ ꓠꓬ꓾ ꓬꓲ ꓟꓬꓱꓽ ꓐꓬꓱꓼ ꓘꓶ ꓠꓬ ꓠꓱꓸ ꓐꓯꓼ ꓕꓲ ꓣꓳ ꓔꓯ ꓣꓱ ꓝꓲ꓾ ꓐꓰ ꓐꓳ ꓔ ꓢꓰꓽ ꓡꓳ꓿ 21 - 22 ꓖꓳ ꓡꓱ ꓠꓬꓲ ꓬꓳ-ꓦ ꓡꓰ ꓖꓳ ꓓꓱ ꓔꓲꓹ ꓖꓶˍ ꓟ ꓦꓬꓼ ꓠꓬꓲ ꓗꓪ ꓐꓰ꓾ ꓬꓰ-ꓢꓴ ꓔꓯ ꓔꓯꓹ ꓓꓯ ꓙꓰˍ ꓟ ꓦꓬꓼ ꓠꓬꓲ ꓗꓪ ꓛꓲ꓾ ꓢꓲ ꓒ ꓬꓰ-ꓢꓴ ꓣꓳꓽ ꓗꓳ ꓡꓳ ꓗꓪ ꓚꓳ ꓔꓬ ꓕꓯ꓾ ꓮ ꓕꓯˍ ꓟꓲ ꓥꓪ ꓠꓴꓽ ꓔꓯ ꓛꓳꓻ ꓠꓬꓲ ꓢꓴ ꓕꓲ ꓣꓳ ꓔꓯ꓾ ꓥꓪ ꓠꓴꓽˍ ꓐꓰ ꓕꓲ ꓛꓳꓺꓼ ꓢꓲ ꓒ ꓢꓯꓸ ꓬꓲꓼ ꓡ ꓗꓷ ꓟ ꓔꓯ ꓢꓷꓸ ꓙ ꓟꓳ ꓙ ꓢꓴ ꓬꓰ ꓠꓹ ꓟ ꓢꓲꓺ ꓠ ꓗꓹ ꓡꓳ꓾ ꓐꓯˍ ꓡꓳ꓿ 23 ꓖꓳ ꓡꓱ ꓢꓲ ꓬꓲ ꓪꓽ ꓡꓰ꓾ ꓬꓴ-ꓢꓲ-ꓓꓴ꓾ ꓥ ꓠꓬ ꓐ-ꓢ-ꓐ ꓟꓬꓱ ꓔ ꓟ ꓬꓳ-ꓢꓷˍ ꓐꓰ꓾ ꓟ-ꓕꓲ-ꓬ꓾ ꓕꓱ ꓠꓬꓲꓽ ꓣꓳ ꓟ ꓗꓪ ꓐꓰ ꓕꓲ ꓣꓳ ꓢꓲꓺ ꓠꓹ ꓟ ꓐꓯ ꓞꓷꓹˍ ꓡꓳ꓿ 24 - 25 ꓖꓳ ꓕꓯ ꓬꓲ ꓪꓽ ꓪꓽ ꓘꓴ ꓢꓲ꓾ ꓢꓲ ꓒꓽꓳ꓾ ꓞꓳ ꓤ ꓠꓲꓹ ꓟ ꓮꓽ ꓙꓵ ꓔꓯ ꓢꓷꓸ ꓢꓴꓳ꓾ ꓬꓴ-ꓓ ꓠꓬ ꓬꓲ ꓙꓰ ꓠ ꓗꓹ ꓟ ꓗꓪ ꓙꓰ ꓗꓷꓳ꓿ ꓬꓲ ꓡꓰ ꓡꓳ ꓔ ꓬꓰ ꓟ ꓝꓲ ꓓꓴˍ ꓐꓰ ꓣꓱꓽ ꓙ ꓟꓬꓱꓽ ꓔꓯ ꓣꓱꓽ ꓡ ꓠꓹ ꓟ꓾ ꓡ ꓞꓳ ꓕꓱ ꓠꓬꓲꓽ ꓣꓳ ꓗꓪ ꓐꓰ ꓠꓴ ꓡꓰ ꓢꓲ ꓔ ꓢꓴ ꓮ ꓡꓲ ꓕꓲ ꓣꓳ ꓥ ꓟ ꓥꓪ ꓠꓴꓽ ꓔꓯ ꓟꓳꓸ ꓖꓶ ꓡꓯ꓾ ꓐꓯˍ ꓡꓳ꓿ 26 ꓖꓳ ꓡꓱ ꓢꓲ ꓬꓲ ꓪꓽ ꓠꓬꓲꓽ ꓣꓳ ꓐꓱ ꓶ ꓢꓽ ꓫꓱ ꓫꓱꓹ ꓗꓷ ꓠꓬ꓾ ꓟ-ꓕꓲ-ꓬ ꓔꓯ ꓟꓶꓽ ꓡ ꓠꓬꓲ꓾ ꓬꓲ ꓠꓬ ꓝꓲ ꓓꓴ ꓞꓲ ꓕꓲ ꓣꓳ ꓟ ꓗꓪ ꓔꓹ ꓓꓵꓽ ꓡꓰˍ ꓡꓳ꓿

ꓝꓲ-ꓓꓴ 2

1 ꓥꓪꓽ-ꓞꓲ-ꓠꓬꓲ-ꓑꓮꓲ ꓦꓬꓼ ꓠꓬꓲ ꓛꓲ ꓡ ꓕꓯ꓾ ꓬꓲ ꓪꓽ ꓮꓽ ꓙꓵ ꓠꓬ ꓕꓲ ꓖꓺꓼ ꓗꓪ ꓜꓲꓼ ꓔꓬ ꓡꓳ꓿ 2 ꓖꓳ ꓕꓯ ꓞꓼ ꓐꓰ ꓟꓲꓽ ꓦꓲ ꓓ ꓟ ꓙꓱꓼ ꓡ ꓟ ꓡꓰ ꓐꓰ꓾ ꓟꓴꓽ ꓗꓪ ꓗꓪ ꓐꓰ ꓢꓯꓼ ꓕꓲ ꓟ ꓬꓯꓼ ꓡ ꓢꓲ꓾ ꓬꓲ ꓪꓽ ꓠꓬꓲꓸ ꓠꓸ ꓔꓬ ꓟ ꓦꓲ ꓗꓪ ꓐꓲ ꓡꓰˍ ꓡꓳ꓿ 3 ꓡ ꓛꓱꓺ ꓡꓰ ꓐꓰ ꓗꓹ ꓟ ꓮꓸ ꓔꓳꓸ ꓡ ꓡꓱˍ ꓟꓲ ꓬꓲ ꓪꓽ ꓔꓯ ꓟꓳꓸ ꓖꓶ ꓡ ꓢꓲ꓾ ꓗꓪꓺ ꓒꓬꓱ ꓙꓰ ꓢꓲ ꓠꓬꓲ꓾ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓥꓳꓽ ꓡ ꓡꓳ꓿ 4 ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓔꓯ ꓢꓲ-ꓫꓬ-ꓟ-ꓦ ꓐꓲ ꓡꓰ ꓢꓲ꓾ ꓢꓲ-ꓫꓬ-ꓟ-ꓦ ꓡꓰ ꓬꓲ ꓪꓽ ꓔꓯ ꓮ ꓡꓲ ꓐꓯ ꓝꓲˍ ꓠꓬ꓾ ꓬꓲ ꓖꓳ ꓡꓱ ꓠꓱꓸ ꓐꓯꓼ ꓥꓳꓽ ꓫꓸ ꓕꓱ ꓔꓴ ꓡ ꓡꓳ꓿ 5 ꓖꓳ ꓕꓯ ꓟꓵ ꓕꓯꓽ ꓗꓳꓹ ꓕꓯꓽ ꓗꓪ ꓐꓰ ꓡꓻ ꓟ꓾ ꓠꓲꓹ ꓒꓵꓽ ꓠꓲꓹ ꓡꓱꓻ ꓟ ꓬꓴ-ꓔ ꓡ ꓞꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓜꓲꓼ ꓞꓹ ꓡꓳ꓿ 6 ꓢꓯꓼ ꓕꓱ ꓟ ꓔꓯ ꓑ ꓙꓽˍ ꓕꓯ ꓡ ꓞꓳ ꓬꓲ ꓜꓴ ꓜꓲꓼ ꓡ ꓢꓲ꓾ ꓝꓲ ꓓꓴ ꓐꓴ ꓡꓰ ꓫ ꓕꓱˍ ꓟ ꓔꓯ ꓮꓽ ꓟ ꓚꓲ ꓛꓬ ꓥꓳꓽ ꓗꓪ ꓮꓽ ꓟ ꓑ ꓙꓽˍ ꓠꓬꓲ꓾ ꓬꓲ ꓪꓽ ꓠꓬ ꓓꓵꓽ ꓙ ꓮ'ꓺ ꓡꓰꓳ꓿ 7 ꓬꓲ ꓪꓽ ꓮꓽ ꓙꓵ ꓠꓬ ꓓꓵꓽ ꓙ ꓟꓶ ꓢꓲ꓾ ꓕꓱ ꓗꓪ ꓫ ꓕꓱ ꓔꓬ ꓢꓴ ꓮꓽ ꓙꓵ ꓠꓬ ꓖ-ꓡꓲ-ꓡꓲ ꓢꓴ ꓟꓽ ꓥ ꓡ? 8 ꓮ ꓡꓲ ꓗꓷ ꓡꓰ ꓠꓬꓲ ꓬꓲ ꓪꓽ ꓟꓸ ꓟꓲ ꓚˍ ꓟ ꓔꓯ ꓣꓳ ꓮꓽ ꓟ ꓚꓲ ꓛꓬ ꓥꓳꓽ ꓗꓪ ꓮꓽ ꓟ ꓑ ꓙꓽˍ ꓡ? 9 ꓒ-ꓕꓲ-ꓬ ꓢꓴ꓾ ꓟꓲ-ꓓꓲ ꓢꓴ꓾ ꓬꓲ-ꓡꓽ-ꓟꓷꓽ ꓢꓴ꓾ ꓟꓲ-ꓢꓳ-ꓒꓳ-ꓔ-ꓟꓲ ꓟꓵꓽ ꓗꓪ ꓔꓬ ꓢꓴ꓾ ꓬꓴ-ꓔ ꓟꓵˍ ꓐꓰ ꓚꓬ-ꓑꓷ-ꓓꓳ-ꓚꓬ ꓢꓴ꓾ ꓒ-ꓠꓷ-ꓕꓴ ꓢꓴ꓾ ꓮ-ꓢꓲ-ꓬ ꓢꓴ꓾ 10 ꓩ-ꓡꓴ-ꓚꓲ-ꓬ ꓢꓴ꓾ ꓒ-ꓩꓴ-ꓡꓲ-ꓬ ꓢꓴ꓾ ꓬꓲ-ꓙꓲ ꓟꓵ ꓗꓪ ꓔꓬ ꓢꓴˍ ꓐꓰ ꓢ-ꓡꓲ-ꓠꓲ ꓡꓳ ꓒꓱ ꓒꓻ ꓕꓲꓺꓼ ꓗꓪ ꓟ ꓡꓲ-ꓑꓲꓸ-ꓬꓼ ꓢꓴ꓾ ꓣꓳ-ꓟ ꓟꓵꓽ ꓗꓪ ꓐꓰ ꓡꓻˍ ꓟ ꓪꓰ ꓤ ꓬꓴ-ꓔ ꓡ ꓞꓳˍ ꓐꓰ ꓬꓴ-ꓔ ꓢꓳ ꓗꓪ ꓓꓵꓽ ꓡꓰ ꓢꓴ꓾ 11 ꓗꓷ-ꓡꓲ-ꓔꓲ ꓢꓴˍ ꓐꓰ ꓬꓹ-ꓡꓽ-ꓑꓷ ꓢꓴ ꓣꓳꓽ ꓮꓽ ꓙꓵ ꓠꓬ꓾ ꓪꓴ-ꓢ ꓪ ꓠꓬꓲˍ ꓟ ꓟꓬꓱꓽ ꓬꓲ ꓓꓳꓽ ꓚˍ ꓟ ꓔꓯ ꓣꓳꓽ ꓚꓲ ꓛꓬ ꓥꓳꓽ ꓡꓰ ꓑ ꓙꓽ ꓪ ꓡꓰꓳ꓾ ꓐꓯˍ ꓡꓳ꓿ 12 ꓖꓳ ꓡꓱ ꓠꓬ ꓬꓲ ꓪꓽ ꓮꓽ ꓙꓵ ꓢꓴ ꓮꓽ ꓘꓶꓸ ꓓꓵꓽ ꓙ ꓟꓶ ꓢꓲ꓾ ꓕꓱ ꓟ ꓮꓸ ꓫꓵ ꓢꓷꓸ ꓡꓰ ꓓꓴ ꓥ ꓡ? ꓐꓰ ꓠ ꓠꓬꓲ ꓡꓯ ꓘꓳˍ ꓡꓳ꓿ 13 ꓖꓳ ꓡꓱ ꓥ ꓟꓲ ꓕꓲ ꓐꓱ ꓠꓽ ꓬꓲ ꓪꓽ ꓔꓯ ꓤꓲ ꓢꓲ꓾ ꓬꓲ ꓪꓽ ꓠꓽ ꓙꓵꓻ ꓫꓵꓼ ꓓꓳ ꓬꓲꓼ ꓡꓰꓳ꓾ ꓐꓯˍ ꓡꓳ꓿ 14 ꓒꓲ-ꓕꓱ ꓠꓬ ꓞꓲ ꓕꓲ ꓣꓳ ꓟ ꓐꓰ ꓦꓰꓼ ꓞ ꓢꓲ ꓢꓯꓼ ꓓꓽ ꓟ ꓡꓰ꓾ ꓬꓴ-ꓔ ꓡ ꓞꓳˍ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴ ꓐꓴꓳ꓾ ꓕꓱ ꓟ ꓠꓴ ꓪꓽ ꓔꓯ ꓥꓪ ꓒꓶ ꓟꓸ ꓖꓶˍ ꓠꓬꓲ꓾ ꓠ ꓠꓹ꓿ 15 ꓮ ꓟꓶ ꓠꓬ ꓠꓯꓼ ꓗꓴ ꓙꓵꓹˍ ꓡꓰꓽ ꓥ ꓢꓰꓽ ꓠꓬꓲ꓾ ꓠꓴ ꓪꓽ ꓓꓵꓽ ꓙꓽˍ ꓟ ꓡꓰ ꓐꓰ ꓕꓱ ꓕꓲ ꓜꓴꓻ ꓟ ꓠꓬ ꓙꓲꓻ ꓒꓶꓽ ꓬꓲꓼˍ ꓟ ꓟꓽ ꓥ꓿ 16 ꓕꓱ ꓟ ꓠꓬ ꓟꓷ ꓠꓷꓹ ꓝꓸ ꓢꓴ ꓬꓳ-ꓶ ꓡꓰ ꓐꓯ ꓔ ꓟ ꓐꓲꓺ ꓡ ꓟ ꓥ ꓡꓳ꓿ ꓬꓲ ꓐꓯˍ ꓟ ꓠꓬ ꓪꓴ-ꓢ ꓡꓰ꓾ 17 ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓠꓬ꓾ ꓞꓳ ꓫꓵꓽ ꓥ ꓕ ꓑꓳꓸ ꓔꓯ ꓥꓪ ꓦ ꓧꓳꓸ ꓧꓳꓽ ꓖꓶˍ ꓥꓳ꓿ ꓖꓳ ꓡꓱ ꓠꓬ ꓠꓴ ꓪꓽ ꓮ ꓐꓲ ꓮ ꓟꓲꓽ ꓐꓴ ꓟꓷ ꓠꓷꓹ ꓝꓸˍ ꓥꓳ꓿ ꓠꓴ ꓪꓽ ꓤ ꓖꓴ ꓡꓯꓸ ꓐꓴ ꓠꓬ ꓦ ꓐꓬꓱꓽ ꓟꓳ ꓢꓲ꓾ ꓞꓳ ꓟꓳꓽ ꓐꓴˍ ꓟꓲ ꓬꓲꓼ ꓟꓬ ꓘꓳˍ ꓥꓳ꓿ 18 ꓖꓳ ꓕꓯ ꓥꓪ ꓚꓳ ꓑꓸ ꓚꓳ ꓟ ꓐꓴ ꓔꓯˍ ꓟꓲ ꓥꓪ ꓦ ꓧꓳꓸ ꓧꓳꓽ ꓖꓶ ꓢꓲ꓾ ꓬꓲ ꓪꓽ ꓠꓽ ꓟꓷ ꓠꓷꓹ ꓝꓸˍ ꓥꓳ꓿ 19 ꓟꓵꓽ ꓪꓴꓽ ꓗꓪ ꓠꓬ ꓥꓪ ꓡꓰ ꓓꓵꓽ ꓙ ꓟꓶ ꓓꓴ ꓟꓳꓸ ꓖꓶ ꓢꓲ꓾ ꓟꓲ ꓠꓯ ꓗꓪˍ ꓟꓲ ꓢꓷ ꓡꓰ ꓓꓴ ꓟꓳꓸ ꓖꓶ ꓢꓲ ꓠꓬꓲ꓾ ꓫꓵꓽˍ ꓐꓰ ꓮ ꓔꓳꓸˍ ꓐꓰ ꓟꓴꓽ ꓘꓴꓽ ꓓꓳˍ ꓥꓳ꓿ 20 ꓐꓬꓱꓼ ꓡꓱꓼ ꓡꓱꓼ ꓟ ꓢꓲ ꓒ ꓦꓬꓼ ꓠꓬꓲ ꓓꓽ ꓟ ꓟꓽ ꓛꓲ ꓡ ꓧꓶꓸ ꓕꓯ꓾ ꓟꓲꓽ ꓟꓲꓻ ꓠꓬ ꓠꓯꓺ ꓡꓰ ꓢꓲ ꓦ ꓐ ꓠꓬ ꓫꓵꓽ ꓑꓶꓸ ꓡꓰˍ ꓥꓳ꓿ 21 ꓖꓳ ꓕꓯ ꓠꓬ ꓢꓲ ꓒ ꓟꓬꓱꓺ ꓔꓯ ꓘꓴ ꓢꓴ ꓮꓽ ꓟ ꓥ ꓟꓲ ꓚꓬꓴ ꓟꓶˍ ꓥꓳ꓾ ꓐꓰ ꓐꓯˍ ꓡꓳ꓿ 22 ꓬꓲ-ꓢꓷ-ꓡꓰ ꓡ ꓞꓳ ꓐꓴꓳ꓾ ꓐꓯ ꓘꓶ ꓕꓱ ꓟ ꓔꓯ ꓠ ꓠꓹ꓿ ꓪꓴ-ꓢ ꓠꓬ ꓠ-ꓢ-ꓡꓱ ꓢꓴ ꓬꓰ-ꓢꓴ ꓗꓪ ꓐꓰ꓾ ꓠꓴ ꓪꓽ ꓗꓳ ꓡꓳ ꓗꓪ ꓪꓽ ꓠꓬꓲˍ ꓟ ꓟꓬꓱꓽˍ ꓐꓰ ꓓꓵꓽ ꓙ ꓟꓶ ꓓꓴˍ ꓐꓰ ꓢꓷꓸ ꓡꓰ ꓓꓴ ꓬꓰ ꓢꓲ꓾ ꓬꓰ-ꓢꓴ ꓠꓬ ꓪꓴ-ꓢ ꓔꓯ ꓐꓰ ꓡꓻ ꓢꓴ ꓥ ꓟ ꓟꓳꓸ ꓖꓶ ꓡ ꓟ ꓕꓱ ꓟ ꓠꓴ ꓪꓽˍ ꓟꓲ ꓢꓷˍ ꓡꓳ꓿ 23 ꓪꓴ-ꓢ ꓡꓰ ꓧꓶꓸ ꓕꓯˍ ꓡꓰ ꓝꓰꓹ ꓔ ꓟ ꓡꓰ ꓐꓰ꓾ ꓬꓰ-ꓢꓴ ꓔꓯ ꓠꓬ ꓠꓴ ꓪꓽ ꓡꓰ ꓪꓴ-ꓢ ꓔꓯ ꓟꓽ ꓢꓷꓸ ꓢꓴ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷ ꓢꓲ ꓬꓲ ꓔꓯ ꓕꓯꓼ ꓢꓰꓼ ꓗꓷ ꓝꓲꓳ꓿ 24 ꓖꓳ ꓡꓱ ꓥ ꓟꓲ ꓫꓵꓻ ꓟ ꓡꓰ ꓬꓲ ꓔꓯ ꓧꓪꓸ ꓡꓰ ꓟꓽ ꓘꓴꓻ ꓠꓬꓲ꓾ ꓫꓵꓻˍ ꓟ ꓠꓻ ꓫꓸ ꓓꓴ ꓔꓯ ꓪꓴ-ꓢ ꓡꓰ ꓒꓶꓻ ꓩꓴ ꓗꓷ ꓢꓲ꓾ ꓬꓰ-ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲꓳ꓿ 25 ꓮ ꓡꓲꓳ ꓐꓯ ꓠꓬ ꓓ-ꓪꓵ ꓡꓰ ꓬꓲ ꓔꓯ ꓖꓴ ꓢꓲ꓾ ꓢꓲ ꓒ ꓠꓬ ꓮ ꓕꓯˍ ꓟꓲ ꓥꓪ ꓒꓬꓱꓽ ꓕꓯꓽ ꓗꓪ ꓔꓬ ꓟ ꓥꓪ ꓟꓳꓻ ꓗꓷꓳ꓿ ꓥꓪ ꓔꓯ ꓟꓽ ꓶꓹ ꓡꓵ ꓡꓰ ꓝꓲ ꓠꓹ ꓟ꓾ ꓬꓲ ꓠꓬ ꓥꓪ ꓡꓯꓼ ꓙ ꓕꓲ ꓛꓱꓽ ꓗꓪ ꓔꓬ ꓡꓳ꓿ 26 ꓖꓳ ꓡꓱ ꓠꓬꓲ ꓥꓪ ꓠꓲꓹ ꓟ ꓠꓬ ꓗꓹ ꓛꓲ ꓢꓲ ꓥꓪ ꓡ ꓛꓱ ꓡꓰ ꓠꓲꓹ ꓒꓴ ꓘꓶꓽ ꓐꓯ ꓓꓳ ꓡ ꓡꓳ꓿ ꓥꓪ ꓧꓪꓽ ꓖꓳ ꓓꓱˍ ꓟꓲ ꓥꓳ ꓡꓳꓸ ꓔ ꓓꓴ ꓠꓯꓸꓼ ꓔꓬ ꓟꓶˍ ꓥꓳ꓿ 27 ꓮ ꓡꓲꓳ ꓐꓯ ꓠꓬ ꓥꓪ ꓶꓻ ꓟꓬ ꓔꓯ ꓠꓴ ꓡꓰ ꓟꓸ ꓟꓲ ꓟꓵꓽ ꓗꓪ ꓟꓽ ꓡꓳ ꓒꓰꓹ꓿ ꓠꓴ ꓢꓲꓽ ꓫꓬ ꓢꓴ ꓔꓯˍ ꓟꓲ ꓟꓽ ꓛꓵꓽ ꓡꓰ ꓝꓲ꓿ 28 ꓠꓴ ꓡꓰ ꓥꓪ ꓔꓯ ꓢꓯꓼ ꓟꓬ ꓙ ꓖꓴ ꓢꓷꓸ ꓡꓰ ꓝꓲꓳ꓿ ꓠꓴ ꓒꓬꓱꓽ ꓕꓯꓽ ꓗꓪ ꓥꓪ ꓔꓯ ꓠꓲꓹ ꓒꓴˍ ꓟ ꓐꓲ ꓡ ꓝꓲˍ ꓥꓳ꓾ ꓐꓯˍ ꓡꓳ꓿ 29 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓒꓵ ꓒ ꓓ-ꓪꓵ ꓔꓯ ꓟꓳ꓾ ꓥꓪ ꓠꓲꓹ ꓪꓴꓽ ꓪꓴˍ ꓡꓰ ꓠꓴ ꓪꓽ ꓔꓯ ꓐꓯ ꓖꓶ ꓛꓵˍ ꓡꓳ꓿ ꓬꓲ ꓠꓬ ꓫꓵꓻ ꓢꓲ ꓔꓵꓸ ꓗꓷꓳ꓿ ꓬꓲ ꓡꓱꓽ ꓜꓴˍ ꓟꓲ ꓠꓬꓲꓸ ꓠꓬꓲ ꓗꓪ ꓛꓲ ꓣꓳ ꓔꓬ ꓖꓴ ꓗꓪ ꓓꓹ ꓢꓰꓽ ꓡꓳ꓿ 30 ꓬꓲ ꓠꓽ ꓟꓷ ꓠꓷꓹ ꓝꓸ ꓢꓴ ꓕꓲ ꓣꓳ ꓥ ꓢꓲ꓾ ꓬꓲ ꓞꓲꓼ ꓤ ꓡꓯꓹ ꓤ ꓗꓪ ꓟ ꓕꓲ ꓣꓳ ꓔꓯ ꓪ ꓔꓲ ꓒꓬꓱꓼ ꓡ ꓝꓲˍ ꓥꓳ꓾ ꓐꓰ ꓪꓴ-ꓢ ꓡꓰ ꓪꓵꓼ ꓗꓷ ꓟ ꓔꓯ ꓬꓲ ꓢꓷꓸˍ ꓠꓬꓲ꓾ 31 ꓒꓵꓽ ꓒ ꓓ-ꓪꓵ ꓡꓰ ꓙꓲ-ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓖꓴ ꓢꓲ꓾ ꓬꓲ ꓔꓯ ꓠꓬ ꓟꓸ ꓟꓲ ꓟꓵꓽ ꓗꓪ ꓟꓽ ꓡꓳ ꓒꓰꓹ꓾ ꓬꓲ ꓧꓪ ꓖꓳ ꓓꓱˍ ꓟꓲ ꓟꓽ ꓛꓵꓽ ꓡꓰ꓾ ꓐꓰ ꓐꓯ ꓗꓷꓳ꓿ 32 ꓬꓰ-ꓢꓴ ꓕꓱ ꓕꓲ ꓣꓳ ꓔꓯ ꓠꓬ ꓪꓴ-ꓢ ꓡꓰ ꓢꓯꓸ ꓬꓲꓼ ꓡ ꓝꓲꓳ꓿ ꓥꓪ ꓠꓴꓽ ꓮꓽ ꓙꓵ ꓠꓬ ꓕꓱ ꓟ ꓔꓯ ꓢꓷꓸ ꓙ ꓟꓳ ꓙ ꓢꓴ ꓥ ꓡꓳ꓿ 33 ꓬꓲ ꓔꓯ ꓠꓽ ꓪꓴ-ꓢ ꓡꓯꓼ ꓙ ꓗꓪ ꓓꓳꓹ ꓟꓴ ꓗꓷ ꓢꓲ꓾ ꓐꓹ ꓐ ꓡꓰ ꓙ ꓟꓳ ꓔ ꓟ ꓢꓲ-ꓫꓬ-ꓟ-ꓦ ꓬꓲ ꓟꓶ ꓗꓷ ꓠꓬꓲ꓾ ꓮ ꓟꓶ ꓠꓴ ꓪꓽ ꓟꓳꓻˍ ꓟ ꓐꓰ ꓑ ꓙꓽˍ ꓟ ꓕꓱ ꓟ ꓠꓬ ꓬꓲ ꓡꓰ ꓧꓳꓸ ꓖꓶ ꓩꓴ ꓡ ꓟ ꓦ ꓥ ꓡꓳ꓿ 34 ꓓ-ꓪꓵ ꓠꓬ ꓟꓴꓽ ꓗꓪ ꓗꓪ ꓟꓽ ꓓꓯ ꓙꓰ ꓠꓬꓲ꓿ ꓖꓳ ꓡꓱ ꓥ ꓟꓲ ꓬꓲ ꓡꓰ꓾ 35 ꓢꓲ ꓒ ꓡꓰ ꓥꓪ ꓢꓲ ꓒ ꓔꓯ꓾ ꓠꓴˍ ꓐꓰ ꓛꓴꓽ ꓙꓳ ꓡꓯꓽ ꓘꓳ ꓢꓴ ꓐꓴ ꓔꓯ ꓥꓪ ꓡꓰ ꓠꓴ ꓛꓲ ꓕꓳꓼ ꓕꓲ ꓟꓽ ꓗꓷ ꓡꓰ ꓝꓲ ꓕ ꓑꓳ꓾ ꓠꓴ ꓠꓬ ꓥꓪ ꓡꓯꓼ ꓙ ꓕꓲ ꓛꓱ ꓗꓪ ꓠꓬꓲꓸ ꓠꓸ꓾ ꓐꓯ ꓗꓷꓳ꓾ ꓐꓯˍ ꓡꓳ꓿ 36 ꓖꓳ ꓡꓱ ꓠꓬꓲ ꓠꓴ ꓪꓽ ꓡꓰ ꓕꓯꓼ ꓔꓶ ꓗꓷ ꓟ ꓬꓰ-ꓢꓴ ꓕꓱ ꓕꓲ ꓣꓳ ꓔꓯ꓾ ꓪꓴ-ꓢ ꓡꓰ ꓢꓲ ꓒˍ ꓐꓰ ꓙꓲ-ꓢꓴ ꓒꓬꓱꓼ ꓡ ꓝꓲ ꓗꓷ ꓟ ꓕꓱ ꓟ꓾ ꓬꓲ-ꓢꓷ-ꓡꓰ ꓕꓲ ꓪꓳꓼ ꓡꓱꓸꓼ ꓚꓵ ꓚꓵ ꓢꓷꓸ ꓠꓯꓹ ꓡꓳ꓾ ꓐꓯˍ ꓡꓳ꓿ 37 ꓕꓱ ꓟ ꓔꓯ ꓬꓲ ꓪꓽ ꓑ ꓙꓽˍ ꓕꓯ ꓬꓲ ꓪꓽ ꓠꓲꓹ ꓟ ꓗꓪ ꓗꓸ ꓬꓯꓼ ꓡꓰ ꓢꓲ꓾ ꓒꓲ-ꓕꓱˍ ꓐꓰ ꓠꓱꓸ ꓐꓯꓼ ꓝꓲ ꓓꓴ ꓐꓴ ꓔꓯ꓾ ꓮꓸ ꓬꓲꓼ ꓐꓴꓳ꓾ ꓖꓳ ꓡꓱ ꓥ ꓠꓬ ꓥꓪ ꓠꓴꓽ ꓮ ꓡꓲ ꓬꓰ ꓠꓯꓹ ꓡ?꓾ ꓐꓯˍ ꓡꓳ꓿ 38 ꓒꓲ-ꓕꓱ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ꓾ ꓝꓴꓲ ꓖꓽ ꓖꓶ ꓟꓶ ꓠꓹ ꓟ ꓙꓲ-ꓢꓴ ꓬꓰ-ꓢꓴ ꓟꓬꓱ ꓗꓪ ꓐꓰ ꓖꓳ ꓓꓱ ꓔꓲꓹ ꓠ ꓗꓹ ꓡꓳ꓿ ꓖꓳ ꓡꓱ ꓠꓬ ꓡꓯꓼ ꓫꓴ ꓢꓲ-ꓫꓬ-ꓟ-ꓦ ꓠꓴ ꓪꓽ ꓟꓶˍ ꓥꓳ꓿ 39 ꓮ ꓡꓲꓳ ꓐꓯ ꓠꓬ ꓙ ꓟꓳ ꓘꓶꓽ ꓕꓱ ꓟ ꓠꓬ ꓠꓴ ꓪꓽˍ ꓐꓰ ꓠꓴ ꓪꓽ ꓤ ꓠꓱ ꓐꓴ ꓐꓱ ꓶˍ ꓐꓰ꓾ ꓶꓽ ꓤ ꓗꓪ ꓔꓬ ꓢꓴ ꓮꓽ ꓙꓵ ꓐꓱ ꓶˍ ꓐꓰ꓾ ꓢꓲ ꓒ ꓣꓳ ꓪꓴ-ꓢ ꓡꓰ ꓘꓴꓻ ꓜꓲꓼ ꓡ ꓠꓹ ꓟ ꓥ ꓕ ꓑꓳ ꓐꓱ ꓶˍ ꓟꓲ ꓥ ꓡꓳ꓾ ꓐꓯˍ ꓡꓳ꓿ 40 ꓝꓮꓲ ꓬꓲ ꓠꓬ ꓠꓱꓸ ꓐꓯꓼ ꓮꓽ ꓟꓬꓹ ꓘꓶꓽ ꓡꓰ ꓢꓷꓸ ꓙ ꓟꓳ ꓙ ꓢꓲ꓾ ꓥꓶꓺˍ ꓟ ꓤꓶ ꓕꓱ ꓟ ꓗꓪ ꓐꓰ ꓡꓲꓹ ꓗꓷ ꓟꓶ ꓢꓲ ꓠꓴ ꓪꓽ ꓚꓬꓴ ꓟꓶ ꓡꓰ ꓝꓲ꓾ ꓐꓰ ꓘꓶꓸ ꓖꓶˍ ꓡꓳ꓿ 41 ꓖꓳ ꓕꓯ ꓬꓲ ꓐꓯ ꓘꓶ ꓔꓯ ꓘꓳ ꓣꓴ ꓢꓴ ꓔꓯ ꓠꓬ ꓖꓳ ꓓꓱ ꓔꓲꓹ ꓖꓶ ꓢꓲ꓾ ꓖꓳ ꓕꓲ ꓠꓬꓲ ꓗꓪ ꓙꓵꓻ ꓢꓴ ꓐꓴ ꓔꓯꓺ ꓬꓲ ꓐꓶꓹ ꓢ ꓔꓴ ꓣꓳ ꓛꓲ ꓡꓴꓽ ꓖꓶ ꓡ ꓡꓳ꓿ 42 ꓬꓲ ꓪꓽ ꓠꓬ ꓝꓲ ꓓꓴ ꓐꓴ ꓟꓸ ꓖꓶˍ ꓟ ꓐꓰ꓾ ꓕꓲ ꓠꓲꓹ ꓕꓲ ꓪꓽ ꓬꓰˍ ꓟ ꓐꓰ꓾ ꓑ ꓑ ꓦꓶˍ ꓟ ꓐꓰ ꓪꓽ ꓘꓴˍ ꓟ ꓗꓪ ꓬꓲ ꓑꓶꓸ ꓟꓽ ꓞꓷꓹ ꓕꓶꓻ ꓕꓶ ꓡꓰ ꓬꓰˍ ꓡꓳ꓿ 43 ꓝꓮꓲ ꓝꓲ ꓓꓴ ꓐꓴ ꓡꓰ ꓓꓵꓽ ꓙ ꓟꓶ ꓓꓴˍ ꓐꓰ ꓢꓷ ꓡꓰ ꓓꓴ ꓮꓽ ꓟꓬꓹ ꓬꓰˍ ꓠꓬꓲ꓾ ꓬꓲ ꓪꓽ ꓮꓽ ꓙꓵ ꓢꓴ ꓓꓵꓽ ꓙ ꓟꓶˍ ꓡꓳ꓿ 44 ꓙꓵꓻ ꓢꓴ ꓐꓴ ꓮꓽ ꓙꓵ ꓠꓬ ꓕꓲ ꓪꓺꓼ ꓔꓬ ꓢꓲ꓾ ꓬꓲ ꓪꓽ ꓙꓳˍ ꓟ ꓮꓽ ꓙꓵ ꓕꓲ ꓡꓰꓹꓼ ꓣꓱꓽˍ ꓡꓳ꓿ 45 ꓬꓲ ꓪꓽ ꓠꓬ ꓬꓲ ꓪꓽ ꓙꓳˍ ꓟ ꓠꓲꓹ ꓫꓬꓸ ꓡꓯꓼ ꓪ ꓪꓴꓽ ꓗꓷ ꓢꓲ꓾ ꓮꓽ ꓟ ꓮ ꓡꓲ ꓣꓱꓽ ꓬꓯꓼˍ ꓠꓬ ꓖꓳ ꓡꓱ ꓐꓱꓻ ꓖꓶ ꓡꓯ ꓘꓳˍ ꓡꓳ꓿ 46 ꓝꓮꓲ ꓬꓲ ꓪꓽ ꓠꓬ ꓠꓲꓹ ꓡꓱꓻ ꓡꓱˍ ꓡꓰꓽ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲꓽ ꓫꓬ ꓦꓲ ꓗꓪ ꓜꓲꓼ ꓡꓯ ꓘꓳ ꓢꓲ꓾ ꓬꓲ ꓪꓽ ꓦꓲ ꓗꓪˍ ꓟꓲ ꓑ ꓑ ꓦꓶꓹ ꓢꓲ ꓠꓬꓲ꓾ ꓠꓲꓹ ꓒꓴˍ ꓟ ꓐꓰ ꓠꓲꓹ ꓔꓱ ꓠꓲꓹ ꓓꓰˍ ꓟ ꓠꓲꓹ ꓟ ꓡꓰ ꓕꓲ ꓪꓺꓼ ꓜꓽ ꓓꓳ ꓢꓲ ꓠꓬꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓡꓳ꓿ 47 ꓑ ꓫꓬꓼ ꓐꓴˍ ꓟꓲ ꓙꓵꓻ ꓢꓴ ꓐꓴ ꓔꓯ ꓠꓲꓹ ꓒꓴˍ ꓡꓳ꓿ ꓢꓯꓼ ꓟꓬ ꓝꓸ ꓟꓶ ꓢꓴˍ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲ ꓒ ꓡꓰ ꓡꓴꓽ ꓖꓶ ꓡꓺˍ ꓡꓳ꓿

ꓝꓲ-ꓓꓴ 3

1 ꓟꓳꓼ ꓡꓳ ꓗ ꓠꓯꓸ ꓢ ꓙꓵꓹ ꓗꓪ ꓟ ꓪꓽ ꓘꓴ ꓙꓵꓹ ꓗꓪ ꓒꓲ-ꓕꓱˍ ꓐꓰ ꓬꓳ-ꓦ ꓠꓬ ꓢꓲꓽ ꓫꓬ ꓦꓲ ꓗꓪ ꓓꓯ ꓙꓰˍ ꓡꓳ꓿ 2 ꓦꓵ ꓡ ꓕꓯꓽˍ ꓡꓰ ꓛꓲ ꓫꓳꓸ ꓢꓴ ꓕꓲ ꓣꓳ ꓔꓯ ꓢꓴꓻ ꓡꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓖꓳ ꓗꓪ ꓑꓱꓸ ꓡ ꓢꓲ꓾ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓙꓰ ꓢꓴ ꓔꓯ ꓒꓴꓻ ꓓꓰꓽ ꓝꓲ ꓠꓹ ꓟ꓾ ꓐꓲꓻˍ ꓟ꓾ ꓐꓰ ꓟꓬꓱ ꓔ ꓟ ꓗ ꓘꓶꓽ ꓗꓪ ꓗꓶ ꓔ ꓡꓳ꓿ 3 ꓒꓲ-ꓕꓱˍ ꓐꓰ ꓬꓳ-ꓦ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓙꓰˍ ꓟ ꓔꓯ ꓬꓲ ꓟꓳꓻ ꓗꓷ ꓠꓬ ꓫꓱꓸ ꓤ ꓓꓴ ꓖꓶ ꓡ ꓠꓹ ꓟ ꓓꓰꓽˍ ꓡꓳ꓿ 4 ꓒꓲ-ꓕꓱˍ ꓐꓰ ꓬꓳ-ꓦ ꓠꓬ ꓬꓲ ꓔꓯ ꓟꓬ ꓔꓱꓹ ꓡꓳꓸ ꓢꓲ꓾ ꓥꓪ ꓠꓴꓽ ꓔꓯ ꓡꓳꓸ ꓠꓬꓲ ꓡꓯ꓾ ꓐꓯ ꓖꓶˍ ꓡꓳ꓿ 5 ꓬꓲ ꓠꓽ ꓕꓲ ꓫꓵꓽ ꓫꓵꓽ ꓖꓶ ꓡ ꓥꓳ꓾ ꓓꓵꓽ ꓙ ꓢꓲ ꓬꓲ ꓪꓽ ꓔꓯ ꓬꓲ ꓜꓶ ꓐꓰ ꓡꓳꓸ ꓔꓬ ꓡꓳ꓿ 6 ꓖꓳ ꓕꓯ ꓒꓲ-ꓕꓱ ꓡꓰ꓾ ꓒꓴꓻˍ ꓐꓰ ꓫꓵꓺ ꓠꓽ ꓥꓪ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓥꓪ ꓙꓳˍ ꓟ ꓠꓴ ꓔꓯ ꓥꓪ ꓖꓶˍ ꓥꓳ꓿ ꓠ-ꓢ-ꓡꓱ ꓢꓴ ꓬꓰ-ꓢꓴ ꓙꓲ-ꓢꓴ ꓟꓬꓱ ꓗꓪ ꓐꓰ ꓔꓴ ꓢꓲ ꓙ ꓖꓴ ꓫꓱꓽ ꓙꓰ꓾ ꓐꓯ ꓖꓶˍ ꓡꓳ꓿ 7 ꓖꓳ ꓕꓯ ꓬꓲ ꓡꓯꓼ ꓙꓻ ꓐꓽ ꓗꓪ ꓣꓱꓽ ꓢꓲ ꓬꓲ ꓔꓯ ꓖꓳꓻ ꓔꓴ ꓗꓷ ꓠꓬ꓾ ꓞꓼ ꓐꓰ ꓬꓲ ꓛꓲ ꓒꓯꓹˍ ꓐꓰ ꓛꓲ ꓑꓬ ꓝꓲꓸ ꓢꓯꓼ ꓙꓳ ꓡ ꓢꓲ꓾ 8 ꓦꓰꓼ ꓔꓴ ꓡ ꓢꓲ ꓠꓬꓲ ꓙ ꓖꓴ ꓫꓱꓽ ꓪꓴꓸ ꓔꓴˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓔꓷꓹ ꓔꓴ ꓡ ꓢꓲ ꓙ ꓖꓴ ꓫꓱꓽ ꓢꓲ ꓠꓬꓲ꓾ ꓪꓴ-ꓢ ꓔꓯ ꓫꓱꓸ ꓖꓶ ꓠꓬꓲ ꓐꓰ ꓬꓲ ꓪꓽˍ ꓐꓰ ꓕꓲ ꓛꓳꓺꓼ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓡꓰˍ ꓡꓳ꓿ 9 ꓞꓳ ꓜꓴꓻ ꓮꓽ ꓙꓵˍ ꓟꓲ꓾ ꓛꓲ ꓫꓳꓸ ꓖꓳ ꓟ ꓙ ꓖꓴ ꓫꓱꓽ ꓢꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓟ ꓔꓯ ꓟꓳꓻ ꓡꓰꓳ꓿ 10 ꓞꓳ ꓜꓴꓻ ꓠꓬ꓾ ꓢꓲꓽ ꓫꓬ ꓦꓲ ꓐꓲꓻˍ ꓟ ꓗ ꓘꓶꓽ ꓗꓪ ꓠꓬꓲꓸ ꓠꓸ ꓢꓲ ꓜꓻ ꓓꓰꓽ ꓢꓴ ꓖꓳ ꓕꓲ ꓣꓳ ꓓꓻ ꓡꓰ ꓟ ꓔꓯ ꓟꓳꓻ ꓗꓷ ꓠꓬ꓾ ꓮꓽ ꓘꓶꓸ ꓓꓵꓽ ꓙ ꓟꓶ ꓡꓰꓳ꓿ 11 ꓓꓻ ꓡꓰ ꓢꓴ ꓖꓳ ꓕꓲ ꓣꓳ ꓠꓬ ꓒꓲ-ꓕꓱˍ ꓐꓰ ꓬꓳ-ꓦ ꓔꓯ ꓪꓳꓺ ꓔ ꓢꓲ ꓔꓬ ꓕꓯ꓾ ꓑ ꓫꓬꓼ ꓐꓴ ꓮꓽ ꓙꓵ ꓠꓬ ꓓꓵꓽ ꓙ ꓟꓶ ꓠꓬꓲ ꓢꓳ-ꓡꓳ-ꓟꓳ ꓛ ꓗꓴꓸ ꓦꓲ ꓗꓪ ꓬꓲ ꓪꓽ ꓔꓯ ꓔꓷꓹ ꓜꓲꓼ ꓡ ꓡꓳ꓿ 12 ꓞꓳ ꓜꓴꓻ ꓔꓯ ꓒꓲ-ꓕꓱ ꓟꓳꓻ ꓗꓷ ꓠꓬ ꓬꓲ ꓪꓽ ꓔꓯ꓾ ꓬꓲ-ꓢꓷ-ꓡꓰ ꓡ ꓞꓳ ꓐꓴꓳ꓾ ꓕꓱ ꓟ ꓔꓯ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓓꓵꓽ ꓙ ꓟꓶˍ ꓡ? ꓥꓪ ꓠꓴꓽ ꓚꓲ ꓛꓬ ꓪꓽ ꓠꓬꓲˍ ꓟ ꓐꓰ ꓥꓪ ꓠꓴꓽ ꓠꓲꓹ ꓒꓵꓽ ꓠꓲꓹ ꓡꓱˍ ꓟ ꓡꓰ ꓬꓲ ꓔꓯ ꓫꓱꓽ ꓙꓰ ꓝꓲˍ ꓟ ꓡꓰ ꓐꓰ꓾ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓠꓴ ꓔꓯ ꓟꓬ ꓔꓱꓹ ꓡꓳꓸ ꓡ ꓡ? 13 ꓮ-ꓐ-ꓡ-ꓦ꓾ ꓬꓲ-ꓢˍ ꓐꓰ ꓬ-ꓗꓴ ꓬꓲ ꓪꓽ ꓪꓴ-ꓢ꓾ ꓣꓳ ꓒꓵꓽ ꓒ ꓐꓴ ꓪꓴ-ꓢ ꓡꓰ ꓓꓳꓹ ꓟꓴ ꓔ ꓟ ꓬꓲ ꓔꓯ ꓣꓱꓽ ꓙ ꓢꓴ ꓬꓰ-ꓢꓴ ꓔꓯ꓾ ꓒꓲ-ꓡ ꓡꓰ ꓩꓴ ꓗꓷ ꓠꓹ ꓟ ꓚꓴꓽ ꓬꓲꓹ ꓓꓶꓽ ꓚꓵ ꓡꓰˍ ꓟꓲ꓾ ꓠꓴ ꓪꓽ ꓠꓬ ꓬꓲ ꓔꓯ ꓟꓽ ꓘꓳ ꓣꓴ ꓢꓲ ꓢꓰꓼ ꓗꓷ ꓠꓹ ꓟ ꓡꓯꓼ ꓙꓱ ꓗꓷꓳ꓿ 14 ꓠꓴ ꓪꓽ ꓠꓬ ꓢꓲꓽ ꓫꓬˍ ꓟ ꓐꓰ ꓔꓱꓹ ꓜꓳꓽ ꓢꓴ ꓖꓳ ꓕꓲ ꓣꓳ ꓔꓯ ꓟꓽ ꓠꓵ ꓠꓵꓻ꓾ ꓠꓴ ꓪꓽ ꓐꓱ ꓶ ꓞꓳ ꓢꓰꓼ ꓒꓽ ꓕꓲ ꓣꓳ ꓔꓯ ꓩꓴ ꓖꓶ ꓡ ꓠꓹ ꓟ ꓓꓰꓽ ꓢꓲ ꓠꓬꓲ꓾ 15 ꓢꓯꓼ ꓟꓬ ꓢꓲ ꓒ ꓔꓯ ꓠꓽ ꓠꓴ ꓪꓽ ꓡꓰ ꓢꓰꓼ ꓗꓷꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯ ꓬꓲꓼ ꓡ ꓝꓲꓳ꓿ ꓥꓪ ꓠꓴ ꓠꓬ ꓕꓱ ꓟ ꓔꓯ ꓢꓷꓸ ꓙ ꓟꓳ ꓙ ꓢꓴ ꓥ ꓡꓳ꓿ 16 ꓠꓴ ꓪꓽ ꓢꓷꓸˍ ꓟ ꓛꓲ ꓫꓳꓸ ꓕꓱ ꓕꓲ ꓣꓳ ꓠꓬ ꓬꓰ-ꓢꓴ ꓟꓬꓱ ꓔꓯ ꓪꓽ ꓪꓴꓽ ꓘꓳꓻˍ ꓠꓬꓲ꓾ ꓬꓲ ꓟꓬꓱꓺ ꓗꓪ ꓐꓰ ꓬꓲ ꓔꓯ ꓓꓻ ꓡꓰ ꓝꓲꓳ꓿ ꓬꓲ ꓖꓶ ꓡ ꓟ ꓙꓵꓻ ꓠꓲꓹ ꓑꓶꓸ ꓓꓴ ꓠꓴ ꓪꓽ ꓮꓽ ꓙꓵ ꓢꓴ ꓟꓲꓽ ꓙꓬꓽ ꓗꓪ ꓕꓱ ꓕꓲ ꓣꓳ ꓠꓬ ꓬꓲ ꓜꓶ ꓓꓻ ꓡꓰꓳ꓿ 17 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽˍ ꓐꓰ ꓠꓴ ꓠꓴ ꓪꓽ ꓔꓯ ꓙꓵꓽ ꓢꓴ ꓐꓴ ꓠꓬ꓾ ꓟꓽ ꓢꓷꓸ ꓟ ꓗꓪ ꓐꓰ ꓖꓳ ꓡꓱ ꓬꓰ ꓗꓷ ꓟ ꓥꓪ ꓢꓷˍ ꓡꓳ꓿ 18 ꓪꓴ-ꓢ ꓠꓬ ꓧꓶꓸ ꓕꓯˍ ꓡꓰ ꓟꓷ ꓠꓷꓹ ꓝꓸ ꓢꓴ ꓐꓴ ꓗꓪ ꓐꓰ꓾ ꓬꓲ ꓙꓲ-ꓢꓴ ꓖꓳ ꓕꓲ ꓣꓳ ꓠꓽ ꓫꓸ ꓙꓵ ꓠꓯꓹ ꓟ ꓐꓯ ꓟꓳꓸ ꓖꓶˍ ꓟ ꓔꓯ ꓬꓲ ꓡꓰ ꓕꓱ ꓡꓱ ꓐꓲ ꓡ ꓝꓲˍ ꓟ ꓥ ꓡꓳ꓿ 19 ꓠꓴ ꓪꓽ ꓝꓴꓲ ꓫꓵꓹ ꓦ ꓟꓶ ꓠꓹ ꓟ꓾ ꓠꓲꓹ ꓟ ꓡꓶꓸ ꓢꓲ ꓪꓴ-ꓢ ꓔꓯꓸ ꓟꓳꓸ ꓓꓵꓽ ꓙ ꓒꓳꓹ ꓬꓲꓼ ꓡꓯ꓿ ꓖꓳ ꓡꓱ ꓠꓬ ꓢꓲ ꓒ ꓗꓪ ꓐꓰ ꓠꓴ ꓪꓽ ꓔꓯ ꓢꓰꓺ ꓡꓰ ꓝꓲˍ ꓟ ꓬꓲ ꓙꓵꓹ ꓛꓲ ꓡ ꓥꓳ꓿ 20 ꓝꓮꓲ ꓠꓴ ꓪꓽ ꓐꓱ ꓶ ꓝꓰꓹ ꓔ ꓟ ꓙꓲ-ꓢꓴ ꓬꓰ-ꓢꓴˍ ꓟꓲ ꓠꓴ ꓪꓽ ꓔꓯ ꓝꓲ ꓩꓴ ꓡ ꓥꓳ꓿ 21 ꓮꓽ ꓠꓱ ꓕꓯˍ ꓡꓰ ꓪꓴ-ꓢ ꓡꓰ ꓢꓲ ꓚꓰꓸ ꓔ ꓟ ꓟꓷꓽ ꓠꓷꓹ ꓝꓸ ꓢꓴ ꓗꓪ ꓐꓰ ꓐꓯ ꓔ ꓟ ꓔꓯ ꓛꓳꓻ ꓢꓲ꓾ ꓙꓳˍ ꓟ ꓥ ꓕ ꓑꓳ ꓫꓬꓹ ꓔꓶꓺˍ ꓟ ꓝꓲꓸ ꓗꓪ ꓛꓲ꓾ ꓬꓰ-ꓢꓴ ꓠꓬ ꓟꓴꓽ ꓗꓪ ꓗꓪ ꓔꓬ ꓠ ꓗꓹ ꓢꓰꓽ ꓡꓳ꓿ 22 ꓮ ꓡꓲꓳ ꓐꓯ ꓠꓬ ꓟꓳ-ꓫꓲˍ ꓟꓲ ꓕꓱ ꓡꓱ ꓐꓯ ꓗꓷꓳ꓾ ꓣꓳ ꓕꓲ ꓫꓵꓽ ꓢꓴ ꓗꓪ ꓐꓰ ꓢꓲ ꓒ ꓪꓴ-ꓢ ꓡꓰ꓾ ꓥꓪˍ ꓡꓰ ꓐꓰ ꓟꓷ ꓠꓷꓹ ꓝꓸ ꓢꓴ ꓕꓲ ꓣꓳ ꓠꓴ ꓪꓽ ꓐꓱ ꓶ ꓓꓳ ꓡ ꓝꓲˍ ꓥꓳ꓿ ꓬꓲ ꓡꓰ ꓠꓴ ꓪꓽ ꓔꓯ ꓐꓯ ꓖꓶ ꓡ ꓟ ꓮꓽ ꓙꓵ ꓔꓯ ꓠꓴ ꓪꓽ ꓒꓵꓽ ꓛꓳꓻ ꓠ ꓗꓹ ꓡꓳ꓿ 23 ꓟꓷ ꓠꓷꓹ ꓝꓸ ꓢꓴ ꓖꓳ ꓕꓲ ꓣꓳ ꓔꓯ ꓟꓽ ꓠ ꓡꓳꓹ ꓢꓴ ꓮꓽ ꓟ ꓔꓯˍ ꓟꓲ ꓪꓴ-ꓢ ꓑ ꓫꓬꓼ ꓐꓴ ꓗꓳ ꓡꓳ ꓗꓪ ꓐꓰ ꓛꓴ ꓛꓰꓹ ꓡꓰ ꓝꓲˍ ꓥꓳ꓾ ꓐꓰ ꓐꓯ ꓗꓷꓳ꓿ 24 ꓝꓮꓲ ꓢ-ꓟꓴ-ꓬꓰˍ ꓐꓰ ꓬꓲ ꓗꓸ ꓠꓯ ꓢꓲ ꓗꓪ ꓟ ꓟꓷ ꓠꓷꓹ ꓝꓸ ꓢꓴ ꓮꓽ ꓙꓵˍ ꓟꓲ꓾ ꓦꓬꓼ ꓠꓬꓲ ꓕꓱ ꓟ ꓔꓯ ꓖꓴ ꓢꓲ ꓚ ꓟꓸ ꓖꓶ ꓗꓷꓳ꓿ 25 ꓠꓴ ꓪꓽ ꓠꓬ ꓟꓷ ꓠꓷꓹ ꓝꓸ ꓢꓴ ꓞꓲꓼ ꓤ ꓡꓯꓹ ꓤ ꓥ ꓢꓲ꓾ ꓪꓴ-ꓢ ꓡꓰ ꓠꓴ ꓪꓽ ꓒꓵꓽ ꓒ ꓐꓴˍ ꓐꓰ ꓬꓰ ꓔ ꓟ ꓘꓶꓽ ꓫꓵꓽ ꓡꓯꓼ ꓪ ꓟꓶ ꓢꓴ ꓥ ꓡꓳ꓿ ꓘꓶꓽ ꓫꓵꓽ ꓗꓪ ꓠꓬ ꓮ-ꓐ-ꓡ-ꓦ ꓔꓯ꓾ ꓠꓴ ꓞꓲꓼ ꓤ ꓡꓯꓹ ꓤ ꓕꓲ ꓣꓳ ꓗꓪ ꓐꓰ ꓟꓲ ꓠꓯ ꓗꓪ ꓟ ꓞꓳ ꓫꓵꓽ ꓞꓳ ꓙꓰꓽ ꓠꓬ꓾ ꓶꓼ ꓤ ꓫꓱꓹ ꓤ ꓟꓶˍ ꓥꓳ꓾ ꓐꓰ ꓐꓯ ꓗꓷꓳ꓿ 26 ꓠꓴ ꓪꓽ ꓮꓽ ꓟˍ ꓟꓲ ꓥꓶˍ ꓟ ꓚꓱꓹ ꓗꓪ ꓐꓰ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓬ꓾ ꓠꓴ ꓪꓽ ꓔꓯ ꓶꓼ ꓤ ꓫꓱꓹ ꓤ ꓖꓶ ꓠꓹ ꓟ꓾ ꓪꓴ-ꓢ ꓡꓰ ꓬꓲ ꓔꓯ ꓣꓱꓽ ꓙ ꓢꓴ ꓓꓳ ꓡ ꓝꓲ ꓢꓲ ꓠꓬꓲ꓾ ꓠꓴ ꓪꓽ ꓔꓬ ꓗꓪ ꓧꓶꓸ ꓕꓯ ꓝꓲ ꓩꓴ ꓡꓺꓳ꓾ ꓐꓯˍ ꓡꓳ꓿

ꓝꓲ-ꓓꓴ 4

1 ꓒꓲ-ꓕꓱ ꓐꓰ ꓬꓳ-ꓦ ꓡꓰ ꓑ ꓫꓬꓼ ꓐꓴ ꓔꓯ ꓚ ꓟꓸ ꓖꓶ ꓔꓬ ꓕꓯ꓾ ꓔꓲ ꓒ ꓐꓴ ꓐꓰ ꓢꓲꓽ ꓫꓬ ꓦꓲ ꓙꓵꓽ ꓢꓴ ꓐꓰ ꓢ-ꓓꓴ-ꓗꓷ ꓐꓴ ꓠꓬ ꓬꓲ ꓪꓽ ꓔꓬ ꓗꓪ ꓡ ꓡꓳ꓿ 2 ꓝꓲ ꓓꓴ ꓐꓴ ꓡꓰ ꓑ ꓫꓬꓼ ꓐꓴ ꓔꓯ꓾ ꓬꓰ-ꓢꓴ ꓠꓯꓸꓼ ꓗꓪ ꓫꓵꓻ ꓢꓴ ꓢꓯꓸ ꓬꓲꓼ ꓡ ꓟ ꓟꓸ ꓟꓲ ꓚ ꓟꓸ ꓖꓶ ꓔꓬ ꓠꓬꓲ ꓬꓲ ꓪꓽ ꓠꓲꓹ ꓟ ꓮꓽ ꓘꓶꓸ ꓦꓶꓻ ꓢꓲ꓾ 3 ꓬꓲ ꓪꓽ ꓡꓰ ꓒꓲ-ꓕꓱ ꓐꓰ ꓬꓳ-ꓦ ꓔꓯ ꓣꓴ ꓞꓳꓹ ꓗꓷ ꓠꓬ ꓟꓰꓻ ꓬꓰ ꓠꓬꓲ꓾ ꓗꓸ ꓠꓯ ꓕꓲ ꓠꓬꓲ ꓗꓪ ꓛꓲ ꓐꓱ ꓗꓷˍ ꓡꓳ꓿ 4 ꓖꓳ ꓡꓱ ꓥ ꓟꓲ ꓬꓲ ꓪꓽ ꓟꓸ ꓖꓶˍ ꓟ ꓔꓯ ꓑ ꓙꓽ ꓢꓲ ꓦ ꓡꓱ ꓡ ꓢꓴ ꓞꓳ ꓑ ꓤꓽˍ ꓡꓰ ꓮꓽ ꓡ ꓥꓪꓽ ꓔꓴ ꓣꓳ ꓛꓲ ꓙꓳˍ ꓡꓳ꓿ 5 ꓗꓸ ꓠꓯꓸ ꓕꓲ ꓠꓬꓲ ꓗꓪ ꓙꓵꓽ ꓢꓴ ꓐꓴˍ ꓐꓰ ꓞꓳ ꓪꓴ ꓞꓳ ꓔꓲ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓜꓲꓼ ꓡꓯ ꓘꓳˍ ꓡꓳ꓿ 6 ꓔꓲ ꓒ ꓓꓽ ꓟ ꓮ-ꓠꓯ-ꓢꓲˍ ꓐꓰ꓾ ꓘꓷꓹ-ꓬ-ꓒˍ ꓐꓰ꓾ ꓬꓳ-ꓦˍ ꓐꓰ꓾ ꓬ-ꓡꓲ-ꓢ-ꓓˍ ꓐꓰ꓾ ꓠꓱꓸ ꓐꓯꓼ ꓔꓲ ꓒꓽ ꓬꓲ ꓫꓵꓽ ꓬꓲ ꓧꓪ ꓐꓴˍ ꓟꓲ ꓖꓳ ꓗꓪ ꓔꓬ ꓡꓳ꓿ 7 ꓖꓳ ꓕꓯ ꓬꓲ ꓪꓽ ꓡꓰ ꓒꓲ-ꓕꓱˍ ꓐꓰ ꓬꓳ-ꓦ ꓔꓯ ꓬꓲ ꓪꓽ ꓔꓬ ꓗꓪ ꓘꓴ ꓔꓯꓹ ꓡ ꓢꓲ꓾ ꓠꓴ ꓪꓽ ꓠꓬ ꓮꓸ ꓫꓵꓽ ꓪꓽ ꓠꓬꓲˍ ꓟ ꓢꓯꓼˍ ꓐꓰ꓾ ꓮꓽ ꓟ ꓟꓬꓱꓺ ꓗꓪ ꓐꓰ ꓕꓱ ꓡꓱ ꓬꓰˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 8 ꓒꓲ-ꓕꓱ ꓠꓬ ꓢꓲ-ꓫꓬ-ꓟ-ꓦ ꓐꓲ ꓞꓹ ꓢꓲ ꓬꓲ ꓪꓽ ꓔꓯ꓾ ꓑ ꓫꓬꓼ ꓐꓴ ꓔꓯ ꓙꓵꓽ ꓢꓴ ꓐꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴꓳ꓾ 9 ꓛꓲ ꓫꓳꓸ ꓢꓴ ꓕꓲ ꓣꓳ ꓔꓯ ꓫꓱꓸ ꓤ ꓢꓲ ꓙꓲˍ ꓟ ꓬꓰ ꓖꓶ ꓢꓲ ꓠꓬꓲ꓾ ꓬꓲ ꓮ ꓡꓲ ꓐꓰ ꓫꓬꓹ ꓓꓻ ꓡꓰ ꓟ ꓔꓯꓸ ꓟꓳꓸ ꓠꓬꓲꓸ ꓠꓬꓲ ꓠꓴ ꓪꓽ ꓡꓰ ꓥꓪ ꓠꓴꓽ ꓔꓯ ꓟꓰꓹ ꓠ ꓠꓬꓲ ꓠꓲꓹ ꓫꓵ ꓐꓷˍ ꓠꓬ꓾ 10 ꓠꓴ ꓪꓽ ꓡꓰ ꓕꓯꓼ ꓔꓶꓸ ꓗꓷ ꓢꓲ ꓪꓴ-ꓢ ꓡꓰ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓟ꓾ ꓠ-ꓢ-ꓡꓱ ꓢꓴ ꓬꓰ-ꓢꓴ ꓙꓲ-ꓢꓴ ꓟꓬꓱꓺ ꓗꓪ ꓐꓰ ꓡꓽ ꓞꓳ ꓕꓱ ꓕꓲ ꓣꓳ ꓠꓬ ꓬꓲ ꓜꓶ ꓓꓻ ꓡꓰ ꓢꓲ꓾ ꓕꓻ ꓠꓴ ꓪꓽ ꓟꓲꓽ ꓙꓬ ꓗꓪ ꓦꓰꓼ ꓔꓬ ꓟ ꓥꓳ꓾ ꓐꓰ ꓠꓴ ꓪˍ ꓐꓰ ꓬꓲ-ꓢꓷ-ꓡꓰ ꓐꓴ ꓮꓽ ꓙꓵ ꓢꓷꓸ ꓠꓯꓹ ꓡꓳ꓿ 11 ꓬꓲ ꓠꓬ꓾ ꓦꓲ ꓫꓬ ꓢꓴ ꓠꓴ ꓪꓽ ꓡꓰ ꓒꓰ ꓗꓷ ꓟ Bꓸ ꓛꓲ ꓥ ꓢꓲ꓾ ꓦꓲ ꓚꓰ ꓬꓲ ꓡꓯꓼ ꓗꓪ ꓟ ꓡꓳ ꓓꓰ ꓓꓽ ꓟ ꓒꓬꓱꓼ ꓡ ꓟ ꓥꓳ꓿ 12 ꓬꓰ-ꓢꓴ ꓗꓪ ꓐꓰ ꓟꓽ ꓥ ꓠꓬ ꓢꓯꓼ ꓟꓬ ꓝꓸ ꓟꓶˍ ꓟ ꓚꓱꓹ ꓟꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓠꓯꓸ ꓘꓪ ꓞꓳ ꓤ ꓗꓳ ꓡꓳ ꓗꓪ꓾ ꓣꓳ ꓢꓯꓼ ꓟꓬ ꓝꓸ ꓟꓶ ꓠꓹ ꓟ ꓠꓱꓸ ꓐꓯꓼ ꓮꓸ ꓫꓵ ꓟꓬꓱꓺ ꓟꓽ ꓖꓶ ꓔ꓾ ꓐꓯ ꓖꓶˍ ꓡꓳ꓿ 13 ꓒꓲ-ꓕꓱˍ ꓐꓰ ꓬꓳ-ꓦ ꓠꓲꓹ ꓪꓴꓽˍ ꓟ ꓐꓰ꓾ ꓬꓲ ꓪꓽ ꓠꓽ ꓕꓳ ꓶ ꓟꓽ ꓢꓳ ꓠꓬꓲ ꓢꓴ ꓥ ꓟ ꓡꓳꓸ ꓓꓳ ꓡ ꓠꓬ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓓꓵꓽ ꓙ ꓟꓶ ꓢꓲ꓾ ꓬꓲ ꓪꓽ ꓠꓬ ꓬꓰ-ꓢꓴˍ ꓐꓰ ꓕꓲ ꓪꓺꓼ ꓔꓬ ꓗꓷ ꓢꓴ ꓥ ꓟ ꓡꓳꓸ ꓢꓷꓸ ꓡꓰˍ ꓡꓳ꓿ 14 ꓫꓬꓹ ꓓꓻ ꓡꓰ ꓢꓴ ꓖꓳ ꓕꓲ ꓣꓳˍ ꓟꓲ ꓝꓲ-ꓓꓴ ꓐꓴˍ ꓐꓰ ꓕꓲ ꓪꓺꓼ ꓦꓰꓼ ꓞꓹ ꓟ ꓔꓯ ꓟꓳꓻˍ ꓠꓬꓲ꓾ ꓬꓲ ꓪꓽ ꓠꓽ ꓮꓸ ꓫꓵꓽ ꓧꓳꓺ ꓓꓴ ꓟꓽ ꓙꓳ꓿ 15 ꓖꓳ ꓡꓱ ꓠꓬꓲ ꓒꓲ-ꓕꓱˍ ꓐꓰ ꓬꓳ-ꓦ ꓔꓯ ꓐꓯ ꓟꓴ ꓜꓲꓼ ꓓꓴ ꓗꓪ ꓐꓰ ꓓꓳ ꓙꓰ ꓠꓹ ꓟ ꓕꓵꓼ ꓪ ꓖꓶ ꓗꓷ ꓠꓬ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓖꓪ ꓙꓱ ꓡꓯ ꓘꓳ ꓢꓲ꓾ 16 ꓬꓲ ꓪꓽ ꓔꓯ ꓣꓳ ꓮ ꓡꓲ ꓬꓰ ꓖꓶ ꓠꓯꓹ ꓡ? ꓬꓲ ꓪꓽ ꓡꓰ ꓓꓵꓽ ꓙ ꓟꓶˍ ꓟ ꓢꓷꓸ ꓡꓰ ꓓꓴ ꓕꓱ ꓟ ꓚꓵ ꓚꓵ ꓬꓰ ꓗꓷ ꓟ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴ ꓮꓽ ꓙꓵ ꓢꓷꓸˍ ꓠꓬꓲ꓾ ꓣꓳˍ ꓟꓲ꓾ ꓟꓽ ꓥ꓾ ꓐꓯ ꓟꓽ ꓠ ꓗꓷ ꓡꓰꓳ꓿ 17 ꓖꓳ ꓡꓱ ꓥ ꓟꓲ ꓑ ꓫꓬꓼ ꓗꓳ ꓡꓳ ꓗꓪ ꓬꓲ ꓐꓶꓹ ꓟꓽ ꓚ ꓒꓬꓱ ꓙꓰ ꓝꓲ ꓠꓹ ꓟ꓾ ꓕꓱ ꓡꓱ ꓖꓳ ꓑꓳ ꓬꓰ-ꓢꓴ ꓟꓬꓱ ꓗꓪ ꓐꓰ ꓮꓸ ꓫꓵꓽ ꓡ ꓞꓳ ꓔꓯˍ ꓟꓲ ꓕꓽ ꓚ ꓟꓸ ꓖꓶ꓾ ꓐꓰ ꓣꓳ ꓬꓲ ꓪꓽ ꓔꓯ ꓙꓳ ꓗꓽ ꓖꓶ ꓠꓯꓹ ꓡꓳ꓾ ꓐꓰ ꓖꓪ ꓙꓱ ꓪꓽ ꓡꓰˍ ꓡꓳ꓿ 18 ꓖꓳ ꓡꓱ ꓠꓬ ꓬꓲ ꓪꓽ ꓔꓯ ꓘꓴ ꓔꓯꓹ ꓡ ꓢꓲ꓾ ꓬꓰ-ꓢꓴ ꓟꓬꓱ ꓗꓪ ꓐꓰ ꓮꓸ ꓫꓵꓽˍ ꓟꓲ ꓐꓯ ꓟꓽ ꓓ꓾ ꓟꓸ ꓟꓲꓽˍ ꓟꓲ ꓟꓸ ꓟꓽ ꓓ꓾ ꓐꓰ ꓕꓵꓼ ꓪ ꓖꓶˍ ꓡꓳ꓿ 19 ꓖꓳ ꓡꓱ ꓥ ꓟꓲ ꓒꓲ-ꓕꓱˍ ꓐꓰ ꓬꓳ-ꓦ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓐꓯˍ ꓟ ꓔꓯ ꓠ ꓠꓹ ꓢꓲ ꓪꓴ-ꓢ ꓔꓯ ꓟꓽ ꓒꓵꓽ ꓛꓳ ꓠꓬ꓾ ꓪꓴ-ꓢ ꓟꓲꓽ ꓙꓬ ꓗꓪ ꓜꓳꓽ ꓟꓽ ꓜꓳꓽ꓾ ꓠꓴ ꓪꓽ ꓓꓵꓽ ꓙ ꓠꓬꓲ꓿ 20 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓟꓳꓻ ꓗꓷ ꓟ ꓐꓰ ꓑ ꓙꓽ ꓗꓷ ꓟ ꓠꓬ ꓥꓪ ꓠꓴꓽ ꓟꓽ ꓐꓯ ꓟꓽ ꓓ꓾ ꓐꓯ ꓖꓶˍ ꓡꓳ꓿ 21 ꓠꓻ ꓢꓴ ꓓꓻ ꓡꓰˍ ꓟ ꓑꓶꓸ ꓓꓴ ꓑ ꓫꓬꓼ ꓐꓴ ꓠꓬ ꓪꓴ-ꓢ ꓔꓯ ꓫꓱꓸ ꓖꓶ ꓔꓬ ꓠꓬꓲ꓾ ꓞꓳ ꓪꓴꓽ ꓐꓴ ꓠꓽ ꓬꓲ ꓪꓽ ꓔꓯ ꓛꓬ ꓒꓵꓽ ꓖꓶ ꓚꓱꓹ ꓧꓪ ꓟꓽ ꓟꓶ꓿ ꓖꓳ ꓡꓱ ꓠꓬꓲ꓾ ꓬꓲ ꓪꓽ ꓔꓯ ꓝꓮꓲ ꓚꓳꓹ ꓖꓶ ꓗꓷ ꓠꓬ ꓩꓴ ꓗꓷꓳ꓿ 22 ꓓꓵꓽ ꓙ ꓟꓶ ꓟꓶˍ ꓡꓰꓽ ꓫꓬꓹ ꓓꓻ ꓡꓰ ꓟ ꓡ ꓞꓳ ꓖꓳ ꓕꓲ ꓣꓳ ꓠꓬ ꓡꓲ ꓞꓲ ꓘꓳꓼ ꓟꓽ ꓞꓲ ꓙꓳˍ ꓡꓳ꓿ 23 ꓒꓲ-ꓕꓱˍ ꓐꓰ ꓬꓳ-ꓦ ꓔꓯ ꓩꓴ ꓗꓷ ꓠꓬ꓾ ꓬꓲ ꓪꓽ ꓛꓳꓽ ꓒꓯꓹ ꓐꓴ ꓔꓬ ꓗꓪ ꓙꓰ ꓢꓲ꓾ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴˍ ꓐꓰ ꓞꓳ ꓪꓴ ꓞꓳ ꓔꓲ ꓐꓴ ꓡꓰ ꓬꓲ ꓪꓽ ꓔꓯ ꓐꓯ ꓖꓶ ꓡ ꓟ ꓮꓽ ꓙꓵ ꓐꓯ ꓟꓸ ꓖꓶˍ ꓡꓳ꓿ 24 ꓬꓲ ꓪꓽ ꓑ ꓙꓽ ꓗꓷ ꓠꓬ ꓕꓲ ꓠꓲꓹ ꓟˍ ꓡꓰꓽ ꓪꓴ-ꓢ ꓔꓯ ꓘꓴ ꓢꓲ꓾ ꓟꓴꓽ ꓗꓪˍ ꓐꓰ ꓟꓲ ꓠꓯꓹ ꓐꓰ ꓬꓲꓻ ꓡꓴꓽ ꓐꓱˍ ꓐꓰ꓾ ꓖꓳ ꓠꓯꓸꓼ ꓗꓪ ꓔꓬ ꓟ ꓥ ꓕ ꓑꓳ ꓔꓯ ꓚꓰꓼ ꓢꓴ ꓢꓲ ꓒꓽꓳ꓾ 25 ꓠꓴ ꓠꓬ ꓢꓲ-ꓫꓬ-ꓟ-ꓦˍ ꓐꓰ꓾ ꓠꓴ ꓔꓯ ꓣꓱꓽ ꓙ ꓢꓴ ꓥꓪ ꓠꓴꓽ ꓒꓵꓽ ꓒ ꓓ-ꓪꓵ ꓟꓷ ꓠꓷꓹ ꓗꓪ ꓐꓰ꓾ ꓞꓳ ꓫꓵꓽ ꓐꓴ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓪꓳꓹ ꓔꓴ ꓡ ꓡ? ꓑ ꓫꓬꓼ ꓐꓴ ꓠꓬ ꓮꓸ ꓫꓵ ꓑꓶꓸ ꓓꓴ ꓚꓴꓽ ꓬꓲꓹ ꓖꓳꓽ ꓓꓶꓽˍ ꓡ? 26 ꓢꓲ ꓒˍ ꓐꓰ ꓬꓲ ꓡꓰ ꓟꓰ ꓞꓶ ꓟꓰ ꓔ ꓢꓴ ꓔꓯ ꓔꓳꓹ ꓠ ꓟ꓾ ꓟꓲ ꓠꓯ ꓗꓪ ꓟ ꓪ ꓔꓲ ꓐꓴ ꓦꓰꓼ ꓔ ꓢꓲ ꓙꓽ ꓖꓶ ꓔꓬ ꓡꓳ꓿ ꓢꓲꓽ ꓒ ꓐꓴˍ ꓟꓲ ꓜꓲꓼ ꓞꓹ ꓡꓳ꓾ ꓐꓰ ꓐꓯ ꓗꓷꓳ꓿ 27 ꓮ ꓡꓲꓳ ꓐꓯˍ ꓠꓬ꓾ ꓠꓴ ꓡꓰ ꓟꓰ ꓞꓶ ꓟꓰ ꓔ ꓟ꓾ ꓠꓴ ꓢꓲꓽ ꓫꓬˍ ꓟ ꓣꓱꓽ ꓙ ꓢꓴ ꓬꓰ-ꓢꓴ ꓔꓯ ꓔꓳꓹ ꓠꓹ ꓟ꓾ ꓩꓴ-ꓡꓲˍ ꓐꓰ ꓒ-ꓕꓲ-ꓢꓶ ꓒꓲ-ꓡˍ ꓐꓰ꓾ ꓐꓶ ꓞꓳ ꓐꓴˍ ꓐꓰ ꓬꓲ-ꓢꓷ-ꓡꓰ ꓑ ꓫꓬꓼ ꓐꓴ ꓠꓬ ꓡꓳ ꓒꓱ ꓕꓱ ꓟ ꓗꓪ ꓚꓵ ꓚꓵ ꓜꓲꓼ ꓡꓯ ꓘꓳ ꓗꓷꓳ꓿ 28 ꓕꓱ ꓟ ꓠꓬ ꓠꓴ ꓠꓲꓹ ꓡꓶꓽ ꓡꓰ ꓝꓰꓹ ꓔ ꓟ ꓔꓯ ꓬꓰ ꓒꓬꓱꓼ ꓡ ꓝꓲ ꓠꓹ ꓟ ꓥ ꓡꓳ꓿ 29 ꓢꓲ ꓒꓽꓳ꓾ ꓮ ꓟꓶ ꓬꓲ ꓪꓽ ꓡꓰ ꓥꓪ ꓠꓴꓽ ꓔꓯ ꓕꓱ ꓡꓱ ꓚꓳꓹ ꓖꓶ ꓡ ꓥ ꓟꓲ꓾ ꓠꓴ ꓐꓯ ꓘꓶ ꓔꓯ ꓠꓲꓹ ꓪꓴꓽ ꓪꓴˍ ꓡꓰ ꓚ ꓟꓸ ꓖꓶ ꓠꓹ ꓟ ꓠꓴ ꓚꓳ ꓑꓸ ꓐꓴ ꓥꓪ ꓠꓴꓽ ꓔꓯ ꓬꓰ ꓙ ꓡꓯ꓿ 30 ꓠꓻ ꓟ ꓒꓬꓽˍ ꓟ ꓔꓯ ꓫꓬꓹ ꓓꓻ ꓡꓰ ꓠꓹ ꓟ ꓠꓴ ꓡꓯꓼ ꓒꓯꓹ ꓛꓱ ꓓꓳ ꓡ ꓢꓲ꓾ ꓠꓴ ꓢꓲꓽ ꓫꓬˍ ꓟ ꓣꓱꓽ ꓙ ꓢꓴ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓢꓷꓸ ꓡꓰ ꓓꓴˍ ꓐꓰ ꓓꓵꓽ ꓙ ꓟꓶ ꓓꓴ ꓬꓰ ꓓꓳ ꓡꓯ꓾ ꓐꓯˍ ꓡꓳ꓿ 31 ꓬꓲ ꓪꓽ ꓕꓱ ꓡꓱ ꓪꓽ ꓘꓴ ꓗꓷ ꓠꓬ ꓬꓲ ꓪꓽ ꓜꓲꓼ ꓞꓹ ꓖꓴ ꓓꓵꓺ ꓡꓰˍ ꓡꓳ꓿ ꓬꓲ ꓪꓽ ꓮꓽ ꓙꓵ ꓢꓴ ꓔꓯ ꓢꓲ-ꓫꓬ-ꓟ-ꓦ ꓐꓲ ꓡꓰ ꓢꓲ꓾ ꓠꓲꓹ ꓪꓴꓽ ꓪꓴˍ ꓡꓰꓽ ꓪꓴ-ꓢ ꓐꓯ ꓘꓶ ꓚ ꓙꓰˍ ꓡꓳ꓿ 32 ꓙꓵꓻ ꓢꓴ ꓐꓴ ꓮꓽ ꓙꓵ ꓠꓬ ꓕꓲ ꓠꓲꓹ ꓕꓲ ꓪꓽ ꓗꓷ ꓡꓰ ꓢꓲ꓾ ꓬꓲ ꓪꓽ ꓙꓳˍ ꓟ ꓖꓴꓽ ꓙꓴꓽ ꓮꓸ ꓫꓵˍ ꓟꓲ ꓚꓲ ꓛꓬ ꓔꓯ ꓟ ꓟꓽ ꓚꓬꓹ ꓚꓬꓹ ꓑꓯꓹ ꓡꓯ ꓘꓳˍ ꓡꓳ꓿ 33 ꓝꓲ ꓓꓴ ꓐꓴ ꓠꓬ ꓪꓽ ꓠꓬꓲꓻ ꓠꓬꓲˍ ꓡꓰꓽ ꓢꓲ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓔꓯ ꓢꓷ ꓙ ꓟꓳ ꓙˍ ꓠꓬꓲ꓾ ꓬꓲ ꓪꓽ ꓮꓽ ꓙꓵ ꓢꓴ ꓠꓬ ꓪꓴ-ꓢ ꓣꓱꓽ ꓛꓰꓽ ꓓꓽ ꓟ ꓟꓶˍ ꓡꓳ꓿ 34 ꓬꓲ ꓪꓽ ꓗꓳ ꓡꓳ ꓗꓪ ꓣꓱꓽ ꓟꓽ ꓡꓳꓼ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓿ ꓮ ꓡꓲꓳ ꓐꓯˍ ꓠꓬ ꓦ ꓟꓲˍ ꓐꓰ ꓦꓲ ꓙꓳ ꓢꓴ ꓐꓴ ꓠꓬ ꓪꓴꓽ ꓗꓷ ꓢꓲ꓾ ꓪꓴꓽ ꓟꓶˍ ꓟ ꓒꓴ ꓠꓬ꓾ 35 ꓝꓲ ꓓꓴ ꓐꓴ ꓔꓯ ꓡꓯꓼ ꓙꓱ ꓖꓶ ꓡ ꓢꓲ ꓠꓬꓲ꓾ ꓮꓽ ꓟ ꓮ ꓡꓲ ꓣꓱꓽ ꓬꓯꓼˍ ꓠꓬ ꓖꓳ ꓡꓱ ꓐꓱꓻ ꓖꓶˍ ꓡꓳ꓿ 36 ꓝꓲ ꓓꓴ ꓐꓴ ꓡꓰ ꓐ-ꓠ-ꓐ ꓟꓬꓱꓺ ꓖꓶ ꓗꓷ ꓟ꓾ ꓢ-ꓑꓴ-ꓣ ꓟꓵꓽ ꓢꓴ꓾ ꓡꓱ-ꓬꓲ ꓡ ꓞꓳ ꓬꓳ-ꓢꓷˍ ꓟꓲ꓾ 37 ꓬꓲ ꓦ ꓟꓲ ꓕꓲ ꓡꓯꓼ ꓙꓳˍ ꓟˍ ꓟꓲ ꓪꓴꓽ ꓗꓷ ꓢꓲ꓾ ꓬꓲ ꓒꓵꓽ ꓠꓬ ꓝꓲ ꓓꓴ ꓐꓴ ꓔꓯ ꓡꓯꓼ ꓙꓱ ꓖꓶ ꓡ ꓡꓳ꓿ (ꓐ-ꓠ-ꓐ꓾ ꓐꓯˍ ꓟ ꓠꓬ꓾ ꓠꓲꓹ ꓗꓴꓺ ꓖꓶˍ ꓟ ꓤ꓾ ꓐꓯˍ ꓟ ꓥ ꓡꓳ꓿)

ꓝꓲ-ꓓꓴ 5

1 ꓮ-ꓠ-ꓠꓲ-ꓬꓼ ꓟꓬꓱ ꓔ ꓟ ꓡ ꓞꓳ ꓕꓲ ꓣꓳˍ ꓐꓰ ꓬꓲ ꓤ ꓟꓶꓻ ꓢ-ꓒꓲ-ꓡ ꓥ ꓟꓲ꓾ ꓦ ꓟꓲ ꓕꓲ ꓡꓯꓼ ꓪꓴꓽ ꓗꓷ ꓢꓲ꓾ 2 ꓬꓲ ꓒꓵꓽ ꓕꓲ ꓐꓱ ꓠꓬ ꓚꓲ ꓛꓬ ꓐꓱ ꓶ ꓝꓰ ꓔ ꓢꓲ ꓠꓬꓲ꓾ ꓕꓲ ꓐꓱ ꓠꓬ ꓝꓲ ꓓꓴ ꓐꓴ ꓔꓯ ꓡꓯꓼ ꓙꓱ ꓖꓶ ꓡ ꓡꓳ꓿ ꓕꓱ ꓟ ꓔꓯ ꓬꓲ ꓤ ꓟꓶˍ ꓟꓲ ꓢꓷˍ ꓡꓳ꓿ 3 ꓖꓳ ꓕꓯ ꓒꓲ-ꓕꓱ ꓡꓰ꓾ ꓮ-ꓠ-ꓠꓲ-ꓬꓼꓳ꓾ ꓢꓲ-ꓫꓬ-ꓟ-ꓦ ꓔꓯ ꓗꓶꓸ ꓢꓲ ꓦ ꓟꓲ ꓬꓲ ꓒꓵꓽ ꓕꓲ ꓐꓱ ꓝꓰꓺ ꓔ ꓝꓲˍ ꓐꓰ꓾ ꓮ ꓡꓲ ꓗꓷ ꓡꓰ ꓠꓬꓲ ꓢ-ꓓꓯ ꓔꓯ ꓠꓴ ꓠꓲꓹ ꓟ ꓗꓪ ꓓꓵꓽ ꓡꓰ ꓝꓲ ꓡ? 4 ꓟꓽ ꓪꓴꓽ ꓗꓷ ꓢꓰꓽ ꓕꓯ ꓦ ꓟꓲ ꓠꓬ ꓠꓴ ꓔꓯ ꓟ ꓥ ꓢꓲ꓾ ꓪꓴꓽ ꓗꓷ ꓗꓸ ꓠꓯ ꓦ ꓟꓲ ꓒꓵꓽˍ ꓟꓲ ꓠꓴ ꓔꓯꓸ ꓟ ꓥꓳ꓾ ꓟꓽ ꓥ ꓡ? ꓮꓸ ꓫꓵ ꓪꓴꓸ ꓠꓬꓲ ꓠꓴ ꓕꓱ ꓡꓱ ꓬꓰˍ ꓡ? ꓠꓴ ꓠꓽ ꓞꓳ ꓤ ꓔꓯ ꓗꓶꓸˍ ꓟ ꓟꓽ ꓥ꓾ ꓪꓴ-ꓢ ꓔꓯ ꓗꓶꓸˍ ꓟ ꓥ ꓡꓳ꓾ ꓐꓯ ꓖꓶˍ ꓡꓳ꓿ 5 ꓐꓯ ꓘꓶ ꓕꓱ ꓟ ꓔꓯ ꓮ-ꓠ-ꓠꓲ-ꓬꓼ ꓑ ꓙꓽ ꓗꓷ ꓠꓬ꓾ ꓑꓺ ꓙꓰ ꓢꓲ ꓫꓵꓻꓳ꓿ ꓕꓱ ꓟ ꓔꓯ ꓑ ꓙꓽ ꓢꓴ ꓮꓽ ꓙꓵˍ ꓟꓲ ꓮꓽ ꓘꓶꓸ ꓙꓳꓺ ꓡꓰꓳ꓿ 6 ꓖꓳ ꓡꓱ ꓠꓬ ꓤ ꓖꓴ ꓡꓯꓸ ꓐꓴ ꓡ ꓢꓲ ꓬꓲ ꓫꓵꓻ ꓟꓳ ꓔꓯ ꓕꓱꓹ ꓑꓱꓸ ꓔꓯꓹ ꓙꓰ ꓢꓲ ꓔꓵꓸ ꓗꓷˍ ꓡꓳ꓿ 7 ꓮꓽ ꓡ ꓢ ꓙꓵꓹ ꓗꓸ ꓠꓯ꓾ ꓬꓲ ꓤ ꓟꓶꓻ ꓠꓬ ꓬꓲ ꓤꓽ ꓖꓴ ꓔꓯ ꓮ ꓡꓲ ꓗꓷ ꓡꓰ ꓟ ꓟꓽ ꓢꓷꓸ ꓢꓷꓸ ꓓꓵꓽ ꓡ ꓡꓳ꓿ 8 ꓖꓳ ꓡꓱ ꓠꓬ ꓒꓲ-ꓕꓱ ꓡꓰ ꓬꓲ ꓔꓯ꓾ ꓠꓴ ꓪꓽ ꓦ ꓟꓲ ꓬꓲ ꓒꓵꓽ ꓬꓲ ꓖꓳꓻ ꓟꓬˍ ꓡꓰꓽ ꓪꓴꓽ ꓟꓶ ꓡ? ꓥꓪ ꓔꓯ ꓐꓯ ꓖꓶ ꓡꓯ꓾ ꓐꓰ ꓐꓯˍ ꓕꓯ꓾ ꓥꓳ꓾ ꓬꓲ ꓖꓳ ꓟꓬ ꓡꓰꓽ ꓥꓳ꓾ ꓐꓯ ꓖꓶˍ ꓡꓳ꓿ 9 ꓒꓲ-ꓕꓱ ꓡꓰ ꓬꓲ ꓔꓯ꓾ ꓠꓴ ꓪꓽ ꓠꓬ ꓢꓲ ꓒ ꓬꓲ ꓦꓻ ꓔꓯ ꓤꓹ ꓠꓬꓲ ꓠꓹ ꓟ꓾ ꓮ ꓡꓲ ꓕꓱ ꓡꓱ ꓖꓪ ꓙꓱ ꓧꓳꓹ ꓡꓰ ꓡ? ꓠꓬꓲ ꓠꓹ꓾ ꓠꓴ ꓤꓽ ꓖꓴꓻ ꓔꓯ ꓔꓵꓸ ꓢꓴ ꓐꓴ ꓠꓬ ꓗ ꓘꓶꓽ ꓓꓴꓽ ꓗꓪ ꓝꓮꓲ ꓕꓳꓼ ꓛꓲ ꓡꓺꓳ꓿ ꓠꓴ ꓔꓯˍ ꓟꓲ ꓑꓱꓸ ꓓꓳ ꓙꓰˍ ꓥꓳ꓾ ꓐꓯ ꓖꓶˍ ꓡꓳ꓿ 10 ꓖꓳ ꓕꓯ ꓬꓲˍ ꓟꓲ ꓞꓼ ꓐꓰ ꓒꓲ-ꓕꓱ ꓟꓲꓽ ꓙꓬꓽ ꓗꓪ ꓑꓺ ꓙꓰ ꓢꓲ ꓫꓵꓻꓳ꓿ ꓤ ꓖꓴꓽ ꓡꓯꓸ ꓐꓴ ꓓꓵꓽ ꓡ ꓢꓲ ꓬꓲ ꓫꓵꓻ ꓟ ꓟꓳꓻ ꓗꓷ ꓠꓬ꓾ ꓬꓲ ꓔꓯˍ ꓟꓲ ꓑꓱꓸ ꓓꓳ ꓙꓰ ꓢꓲ ꓠꓬꓲ ꓬꓲ ꓤ ꓖꓴꓻ ꓒ ꓕꓲꓺꓼ ꓗꓪ ꓔꓵꓸ ꓗꓷˍ ꓡꓳ꓿ 11 ꓘꓴ ꓜꓲ ꓞꓳ ꓮꓽ ꓙꓵˍ ꓐꓰ ꓫꓵꓽ ꓪꓴ ꓕꓱ ꓟ ꓔꓯ ꓑ ꓙꓽ ꓢꓴ ꓮꓽ ꓙꓵ ꓠꓬ ꓮꓽ ꓘꓶꓸ ꓙꓳꓺ ꓡꓰˍ ꓡꓳ꓿ 12 ꓑ ꓫꓬꓼ ꓐꓴ ꓗꓳ ꓡꓳ ꓗꓪ꓾ ꓝꓲ ꓓꓴ ꓐꓴ ꓡꓰ ꓢꓷꓸ ꓡꓰ ꓓꓴˍ ꓐꓰ ꓓꓵꓽ ꓙ ꓟꓶ ꓓꓴ ꓮꓽ ꓟꓬꓹ ꓬꓰˍ ꓡꓳ꓿ ꓙꓵꓻ ꓢꓴ ꓐꓴ ꓮꓽ ꓙꓵ ꓠꓬ ꓕꓲ ꓠꓲꓹ ꓕꓲ ꓪꓽˍ ꓡꓰꓽ ꓢꓳ-ꓡꓳ-ꓟꓳ ꓛꓺ ꓗꓴꓸ ꓦꓲ ꓗꓪ ꓜꓲꓼ ꓡꓯ ꓘꓳˍ ꓡꓳ꓿ 13 ꓙꓵꓻ ꓢꓴ ꓐꓴ ꓔꓯ ꓑ ꓫꓬꓼ ꓐꓴ ꓡꓰ ꓠꓬꓲ ꓒꓵꓽˍ ꓟꓲ꓾ ꓠꓱꓸ ꓐꓯꓼ ꓢꓴ ꓠꓬ ꓮꓽ ꓟˍ ꓟꓲ ꓬꓲ ꓪꓽ ꓔꓯ ꓔꓹ ꓓꓵꓽ ꓡꓰ ꓟꓽ ꓑꓶꓸ꓿ 14 ꓖꓳ ꓡꓱ ꓥ ꓟꓲ ꓢꓲ ꓒ ꓔꓯ ꓙꓵꓻ ꓢꓴ ꓞꓳ ꓑ ꓤˍ ꓐꓰ ꓤꓽ ꓟꓶꓽ ꓤ ꓬꓲ ꓜꓴ ꓠꓬ ꓡꓯꓽ ꓫꓵ ꓟꓬꓽ ꓡ ꓡꓳ꓿ 15 ꓖꓳ ꓡꓱ ꓠꓬꓲ ꓒꓲ-ꓕꓱ ꓫꓱꓽ ꓗꓳꓸ ꓡ ꓕꓯ꓾ ꓠꓻ ꓢꓴ ꓐꓴ ꓔꓯ ꓟꓽ ꓫꓱꓹ ꓪ ꓐꓯˍ ꓟꓲ ꓬꓲ ꓶꓻ ꓥꓳꓽ ꓡꓰ ꓛꓸ ꓬꓯꓼ ꓡꓰ ꓝꓲ ꓠꓹ ꓟ꓾ ꓙ ꓖꓴ ꓗꓪ ꓑꓱꓸ ꓓꓳ ꓙꓰ ꓢꓲ ꓘꓹ ꓛꓽˍ ꓐꓰ ꓘꓳꓽ ꓓꓳꓻ ꓗꓪ ꓗꓶ ꓔ ꓡꓳ꓿ 16 ꓙꓱ-ꓣꓴ-ꓢ-ꓡꓱ ꓚꓳ ꓡꓳ ꓗꓪ ꓟ ꓡꓳ ꓒꓱ ꓗꓪ ꓐꓰˍ ꓟꓲ ꓡ ꓞꓳ ꓬꓲ ꓜꓴ ꓜꓲꓼ ꓡ ꓢꓲ꓾ ꓠꓻ ꓢꓴ ꓒꓬꓽ ꓢꓴˍ ꓐꓰ ꓟꓽ ꓫꓬ ꓠꓲꓽ ꓡꓰ ꓘꓶꓻ ꓡꓶꓽˍ ꓟ ꓡ ꓞꓳ ꓔꓯ ꓧꓳꓽ ꓔꓯꓹ ꓡ ꓠꓬ꓾ ꓬꓲ ꓪꓽ ꓮꓽ ꓙꓵ ꓔꓯ ꓫꓬꓹ ꓓꓻ ꓡꓰˍ ꓡꓳ꓿ 17 ꓖꓳ ꓡꓱ ꓥ ꓟꓲ ꓔꓲ ꓒ ꓓꓽ ꓟ ꓐꓰ ꓬꓲˍ ꓐꓰ ꓔꓬ ꓟ ꓢ-ꓓꓴ-ꓗꓷ ꓕꓲ ꓧꓳꓽ ꓟ ꓠꓬ ꓟꓬ ꓦꓯꓸˍ ꓟ ꓐꓲꓺ ꓞꓹ ꓠꓬꓲ꓾ 18 ꓝꓲ ꓓꓴ ꓐꓴ ꓔꓯ ꓣꓴ ꓢꓲ ꓛꓬꓻ ꓢꓴ ꓥꓳꓽ ꓢꓴ ꓔꓯ ꓐꓱ ꓖꓴ ꓗꓪ ꓐꓱ ꓗꓷˍ ꓡꓳ꓿ 19 ꓖꓳ ꓡꓱ ꓥ ꓟꓲ ꓢꓲ ꓒ ꓬꓲ ꓝꓲ ꓓꓴ ꓕꓲ ꓣꓳ ꓡꓰ꓾ ꓢ ꓘꓪ ꓕꓯ ꓐꓱ ꓓꓴꓽ ꓗ ꓘꓶꓽ ꓒꓴ ꓗꓷ ꓢꓲ꓾ ꓬꓲ ꓪꓽ ꓔꓯ ꓧꓳꓽ ꓓꓳ ꓙꓰ ꓢꓲ ꓠꓬꓲ꓾ 20 ꓠꓴ ꓪꓽ ꓠꓬ ꓢꓲꓽ ꓫꓬꓻ ꓦꓲ ꓗꓪ ꓙꓰ ꓢꓲ꓾ ꓢꓯꓼ ꓟꓬ ꓚꓱꓹ ꓐꓯ ꓘꓶ ꓕꓱ ꓟ ꓮꓽ ꓙꓵ ꓑ ꓫꓬꓼ ꓐꓴ ꓔꓯ ꓐꓯ ꓟꓸ ꓖꓶ ꓬꓰ꓾ ꓐꓯ ꓖꓶˍ ꓡꓳ꓿ 21 ꓬꓲ ꓪꓽ ꓠꓬ ꓟꓲꓽ ꓕꓯ ꓙꓲ ꓡ ꓕꓯ ꓢꓲꓽ ꓫꓬ ꓦꓲ ꓗꓪ ꓙꓰ ꓢꓲ꓾ ꓬꓲ ꓪꓽ ꓔꓯ ꓐꓯ ꓖꓶ ꓡ ꓟ ꓡꓰ ꓐꓰ ꓟꓸ ꓟꓲ ꓟꓸ ꓖꓶˍ ꓡꓳ꓿ ꓖꓳ ꓕꓯ ꓔꓲ ꓒ ꓓꓽ ꓟ ꓐꓰ ꓬꓲ ꓔꓯ ꓛꓳꓻ ꓢꓴ ꓐꓴ ꓛꓲ ꓡ ꓠꓬ꓾ ꓐꓯ ꓟꓴ ꓜꓲꓼ ꓓꓴ ꓗꓪ ꓬꓲ-ꓢꓷ-ꓡꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ ꓘꓴ ꓜꓲꓼ ꓡ ꓢꓲ꓾ ꓝꓲ ꓓꓴ ꓐꓴ ꓔꓯ ꓧꓳꓽ ꓓꓳ ꓡ ꓠꓹ ꓟ ꓐꓱ ꓓꓴꓽ ꓗꓪ ꓡ ꓞꓳ ꓝꓲꓺ ꓩꓴ ꓗꓷˍ ꓡꓳ꓿ 22 ꓖꓳ ꓡꓱ ꓥ ꓟꓲ ꓢꓲꓽ ꓒ ꓐꓴ ꓠꓬ ꓐꓱ ꓓꓴꓽ ꓗꓪ ꓬꓲ ꓪꓽ ꓔꓯ ꓧꓪ ꓟꓽ ꓟꓳ ꓠꓬꓲ ꓬꓲꓼ ꓙꓰ ꓢꓲ꓾ 23 ꓐꓱ ꓓꓴꓽ ꓠꓬ ꓕꓶꓻ ꓕꓶˍ ꓡꓰꓽ ꓢꓳꓺ ꓔ ꓟ ꓐꓰ꓾ ꓦꓴ ꓠꓬꓹ ꓢꓴˍ ꓟꓲ ꓗ ꓘꓶꓽ ꓗꓪ ꓦꓰꓼ ꓞꓹ ꓟ ꓔꓯ ꓥꓪ ꓠꓴ ꓟꓳꓻ ꓗꓷꓳ꓿ ꓖꓳ ꓡꓱ ꓥ ꓟꓲ ꓒꓴ ꓗꓷ ꓠꓬ ꓠꓯꓸꓼ ꓗꓪ ꓡ ꓞꓳ ꓕꓲ ꓣꓳˍ ꓟꓲ ꓟꓽ ꓟꓳ꓾ ꓐꓯˍ ꓡꓳ꓿ 24 ꓐꓯ ꓘꓶꓽ ꓕꓱ ꓟ ꓔꓯ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓐꓰ ꓢꓲꓽ ꓫꓬ ꓦꓲ ꓡꓳꓸ ꓟꓯꓼ ꓔꓯ ꓙꓵꓽ ꓢꓴ ꓡꓰ ꓑ ꓙꓽ ꓗꓷ ꓠꓬ꓾ ꓫꓵꓽ ꓪꓴ ꓕꓱ ꓟ ꓮ ꓡꓲ ꓒꓬꓱꓼ ꓡ ꓥ ꓢꓷ?꓾ ꓐꓰ ꓮꓽ ꓘꓶꓸ ꓓꓵꓽ ꓙ ꓟꓬꓽˍ ꓡꓳ꓿ 25 ꓖꓳ ꓕꓯ ꓡ ꓞꓳ ꓕꓲ ꓣꓳ ꓡ ꓢꓲ ꓬꓲ ꓪꓽ ꓔꓯ꓾ ꓕꓱꓻꓽ꓾ ꓠꓴ ꓪꓽ ꓡꓰ ꓐꓱ ꓓꓴꓽ ꓗꓪ ꓐꓱꓺ ꓗꓷ ꓢꓴ ꓐꓴ ꓠꓬ꓾ ꓢꓲꓽ ꓫꓬ ꓦꓲ ꓗꓪ ꓦꓰꓼ ꓞꓹ ꓢꓲ ꓑ ꓫꓬꓼ ꓐꓴ ꓔꓯ ꓟꓸ ꓖꓶ ꓔꓬ ꓡꓳ꓾ ꓐꓰ ꓐꓯ ꓖꓶ ꓡ ꓡꓳ꓿ 26 ꓖꓳ ꓡꓱ ꓠꓬ ꓟꓯꓼ ꓢꓲꓽ ꓒꓽˍ ꓐꓰ ꓬꓲ ꓟꓯꓼ ꓤ ꓐꓴ ꓙꓰ ꓢꓲ ꓬꓲ ꓪꓽ ꓔꓯ ꓧꓳꓽ ꓡ ꓡꓳ꓿ (ꓬꓲ ꓪꓽ ꓠꓬ ꓑ ꓫꓬꓼ ꓐꓴ ꓡꓰ Bꓸ ꓛꓲ ꓡꓳꓺ ꓡ ꓟ ꓔꓯ ꓙꓳꓺ ꓠꓬꓲ ꓝꓲ ꓓꓴ ꓐꓴ ꓔꓯ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰ ꓟꓽ ꓑꓶꓸ꓿) 27 ꓬꓲ ꓪꓽ ꓡꓰ ꓝꓲ ꓓꓴ ꓐꓴ ꓔꓯ ꓧꓳꓽ ꓛꓲ ꓡ ꓠꓬ꓾ ꓐꓯ ꓟꓴ ꓜꓲꓼ ꓓꓴ ꓗꓪ ꓦꓰꓼ ꓔ ꓝꓲ ꓢꓲ ꓔꓲ ꓒ ꓓꓽ ꓟ ꓡꓰ ꓬꓲ ꓪꓽ ꓔꓯ꓾ 28 ꓟꓬꓱꓺ ꓕꓱ ꓟ ꓗꓪ ꓐꓰ ꓟꓸ ꓟꓲ ꓟꓽ ꓟꓸ ꓠꓹ ꓟ꓾ ꓥꓪ ꓠꓴꓽ ꓠꓬ ꓠꓴ ꓪꓽ ꓔꓯ ꓕꓵꓼ ꓪꓽ ꓡꓲꓽ ꓡꓲˍ ꓡꓰꓽ ꓖꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓡ ꓞꓳ ꓕꓱ ꓕꓲ ꓣꓳ ꓫꓵꓻ ꓝꓴꓲ ꓠꓬ ꓥꓪ ꓠꓴꓽ ꓔꓯ ꓟꓯꓻ ꓝꓲ ꓠꓹ ꓟ꓾ ꓙꓱ-ꓣꓴ-ꓢ-ꓡꓱ ꓕꓲ ꓡꓳ ꓒꓱ ꓡꓱS ꓗꓪ ꓟꓸ ꓟꓲ ꓕꓱ ꓟ ꓟꓸ ꓐꓲ ꓡꓰ ꓝꓲˍ ꓡꓳ꓾ ꓐꓯˍ ꓡꓳ꓿ 29 ꓖꓳ ꓡꓱ ꓥ ꓟꓲ ꓒꓲ-ꓕꓱˍ ꓐꓰ ꓝꓲ ꓓꓴ ꓐꓴ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓠꓴꓽ ꓠꓬ ꓞꓳ ꓤ ꓔꓯ ꓢꓶꓸ ꓟꓽ ꓞꓲ ꓪꓴ-ꓢ ꓔꓯ ꓒꓵꓽ ꓛꓳ ꓠ ꓗꓹ ꓡꓳ꓿ 30 ꓠꓴ ꓪꓽ ꓡꓰ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓢꓰꓼ ꓗꓷ ꓟ ꓬꓰ-ꓢꓴ ꓔꓯ꓾ ꓣꓳ ꓒꓵꓽ ꓒ ꓐꓴ ꓪꓴ-ꓢ ꓡꓰ ꓢꓯꓸ ꓬꓲꓼ ꓡ ꓝꓲꓳ꓿ 31 ꓬꓲ ꓔꓯ ꓠꓬ ꓪ ꓔꓲˍ ꓐꓰ ꓚꓬꓴꓸ ꓢꓲ ꓒ ꓣꓱꓽ ꓝꓲ ꓢꓲ꓾ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓓꓵꓽ ꓙ ꓒꓳꓹ ꓬꓲꓼ ꓡ ꓝꓲ ꓠꓹ ꓟ ꓐꓰ ꓝꓴꓲ ꓖꓽ ꓖꓶꓽ ꓢꓴ ꓬꓰ ꓠꓹ ꓟ꓾ ꓪꓴ-ꓢ ꓡꓰ ꓬꓲ ꓡꓯꓼ ꓙ ꓗꓪ ꓓꓳꓹ ꓟꓴ ꓗꓷꓳ꓿ 32 ꓥꓪ ꓠꓴ ꓠꓬ ꓕꓱ ꓟ ꓔꓯ ꓢꓷꓸ ꓙ ꓟꓳ ꓙ ꓢꓴ ꓥ ꓡꓳ꓿ ꓪꓴ-ꓢ ꓔꓯ ꓒꓵꓽ ꓛꓳ ꓢꓴ ꓔꓯ ꓖꓶˍ ꓟ ꓢꓲ-ꓫꓬ-ꓟ-ꓦˍ ꓟꓲ ꓕꓱ ꓟ ꓔꓯ ꓢꓷꓸ ꓙ ꓟꓳ ꓙ ꓢꓴ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ 33 ꓐꓯ ꓘꓶ ꓕꓱ ꓟ ꓔꓯ ꓑ ꓙꓽˍ ꓕꓯ ꓬꓲ ꓪꓽ ꓠꓲꓹ ꓟ ꓮꓽ ꓘꓶꓸ ꓦꓶꓻ ꓢꓲ꓾ ꓝꓲ ꓓꓴ ꓐꓴ ꓔꓯ ꓢꓰꓼ ꓠꓲꓹ ꓫꓵˍ ꓡꓳ꓿ 34 ꓖꓳ ꓡꓱ ꓥ ꓟꓲ ꓑ ꓫꓬꓼ ꓮꓽ ꓙꓵ ꓡꓰ ꓞꓳ ꓒꓵꓽˍ ꓟ꓾ ꓖ-ꓟ-ꓡꓲ-ꓬ꓾ ꓟꓬꓱ ꓔ ꓟ ꓒ-ꓡꓲ-ꓢꓷ ꓙꓵꓽ ꓗ ꓟꓸ ꓒ ꓕꓲ ꓣꓳ ꓠꓬ ꓐꓯ ꓟꓴ ꓜꓲꓼ ꓓꓴ ꓗꓪ ꓦꓰꓼ ꓔꓴ ꓡ ꓢꓲ꓾ ꓝꓲ ꓓꓴ ꓐꓴ ꓔꓯ ꓕꓲ ꓑꓹ ꓤ ꓓꓳ ꓙꓰ ꓝꓲ꓾ ꓐꓰ ꓕꓵꓼ ꓪ ꓖꓶˍ ꓡꓳ꓿ 35 ꓖꓳ ꓡꓱ ꓢꓲ ꓬꓲ ꓡꓰ ꓕꓲ ꓜꓲꓼ ꓓꓴ ꓡꓱꓸꓼ ꓔꓯ꓾ ꓬꓲ-ꓢꓷ-ꓡꓰ ꓡ ꓞꓳ ꓐꓴꓳ꓾ ꓡ ꓞꓳ ꓕꓱ ꓕꓷ ꓔꓯ ꓠꓴ ꓪꓽ ꓮ ꓡꓲ ꓬꓰ ꓖꓶꓽˍ ꓐꓰ ꓬꓰˍ ꓟ ꓗꓪ ꓬꓲ ꓜꓶ ꓤ ꓟꓳ꓿ 36 ꓮ ꓡꓲꓳ ꓐꓯ ꓠꓬ ꓮꓽ ꓠꓲꓹ ꓫꓵ ꓠꓲꓹ ꓕꓯ꓾ ꓕꓷ-ꓬꓴ-ꓓ꓾ ꓟꓬꓱ ꓔ ꓢꓴ ꓕꓲ ꓣꓳ ꓓꓳ ꓡ ꓢꓲ꓾ ꓬꓲ ꓠꓬ ꓞꓳ ꓔꓲ ꓕꓲ ꓣꓳ ꓥꓳ꓾ ꓐꓰ ꓐꓯˍ ꓟ ꓗꓪ ꓐꓰ ꓡꓽ ꓞꓳ ꓡꓲ ꓦꓬꓻ ꓣꓳ ꓛꓲ ꓬꓲ ꓔꓯ ꓛꓳ ꓙꓰꓳ꓿ ꓖꓳ ꓗꓸ ꓠꓯꓸ ꓬꓲ ꓔꓯ ꓢꓰꓼ ꓗꓷ ꓠꓬ꓾ ꓬꓲ ꓔꓯ ꓛꓳ ꓢꓴ ꓮꓽ ꓙꓵ ꓧꓹ ꓙꓰ ꓖꓴ ꓢꓲ ꓮꓸ ꓫꓵˍ ꓟꓲ ꓬꓰ ꓟꓽ ꓒꓬꓱꓼ ꓡ꓿ 37 ꓖꓳ ꓗꓸ ꓠꓯꓸ ꓞꓳ ꓟꓬꓱꓺ ꓐꓳˍ ꓟ ꓦꓬꓼ ꓠꓬꓲ ꓗꓪ꓾ ꓖ-ꓡꓲ-ꓡꓲ ꓢꓴ ꓬꓴ-ꓔ ꓟꓬꓱꓺ ꓔ ꓟ ꓕꓲ ꓣꓳ ꓓꓳ ꓡ ꓢꓲ ꓑ ꓫꓬꓼ ꓐꓴ ꓕꓲ ꓐꓱ ꓔꓯ ꓗꓶꓸ ꓧꓳꓽ ꓙꓰꓳ꓿ ꓬꓲˍ ꓟꓲ ꓟꓶꓽ ꓬꓰ ꓢꓲ ꓬꓲ ꓔꓯ ꓛꓳ ꓢꓴ ꓮꓽ ꓙꓵˍ ꓟꓲ ꓧꓹ ꓙꓰ ꓖꓴꓻꓳ꓿ 38 ꓮ ꓟꓶ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓡ ꓞꓳ ꓕꓱ ꓕꓷ ꓔꓯ ꓮꓸ ꓫꓵꓽ ꓟꓽ ꓬꓰ ꓬꓰ ꓩꓴ ꓗꓷ꓿ ꓬꓲ ꓪꓽ ꓚꓴꓽ ꓬꓲꓹˍ ꓐꓰ ꓟꓬꓱꓽ ꓕꓱ ꓟ꓾ ꓞꓳ ꓤ ꓗꓪ ꓐꓰ ꓡꓻˍ ꓟ ꓥ ꓐꓷˍ ꓠꓬ ꓐꓬ ꓡꓰˍ ꓥꓳ꓿ 39 ꓖꓳ ꓡꓱ ꓥ ꓟꓲ ꓪꓴ-ꓢ ꓔꓯˍ ꓐꓰ ꓡꓻˍ ꓟ ꓥ ꓕꓯ ꓠ꓾ ꓠꓴ ꓪꓽ ꓡꓰ ꓬꓲ ꓪꓽ ꓔꓯ ꓐꓬ ꓡꓰ ꓝꓲ ꓟꓽ ꓐ ꓡ꓿ ꓮꓽ ꓧꓪꓹ ꓪꓴ-ꓢ ꓔꓯˍ ꓟꓲ ꓔꓳꓹ ꓬꓯꓼˍ ꓟ ꓒꓬꓱꓼ ꓡ ꓟꓽ ꓢꓷ꓾ ꓐꓰ ꓐꓯ ꓖꓶˍ ꓡꓳ꓿ 40 ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬ ꓬꓲ ꓔꓯ ꓠ ꓠꓹ ꓢꓲ꓾ ꓝꓲ ꓓꓴ ꓐꓴ ꓔꓯ ꓘꓴ ꓔꓯꓹ ꓡ ꓢꓲ ꓠꓬꓲ꓾ ꓬꓲ ꓪꓽ ꓔꓯ ꓓꓶꓽ ꓗꓷ ꓠꓬ꓾ ꓬꓰ-ꓢꓴ ꓟꓬꓱ ꓗꓪ ꓐꓰ ꓟꓸ ꓟꓲꓽ ꓝꓮꓲ ꓟꓽ ꓚ ꓠꓹ ꓟ ꓕꓵꓼ ꓪ ꓖꓶ ꓢꓲ ꓩꓴ ꓗꓷˍ ꓡꓳ꓿ 41 ꓝꓲ ꓓꓴ ꓐꓴ ꓠꓬ ꓬꓰ-ꓢꓴ ꓟꓬꓱ ꓑꓶꓸ ꓓꓴ ꓫꓸ ꓔꓳ ꓟꓶˍ ꓟ ꓠꓽ ꓒꓵꓽˍ ꓟ ꓕꓲ ꓫꓵꓽ ꓚꓬꓹ ꓔ ꓢꓲ꓾ ꓗꓹ ꓛꓲ ꓠꓬꓲ ꓐꓰ ꓐꓯ ꓟꓴ ꓜꓲꓼ ꓓꓴ ꓗꓪ ꓐꓰ ꓓꓳ ꓙꓰˍ ꓡꓳ꓿ 42 ꓬꓲ ꓪꓽ ꓠꓬ ꓕꓲ ꓠꓬꓲ ꓗꓸ ꓠꓯ ꓕꓲ ꓠꓬꓲ ꓢꓲꓽ ꓫꓬ ꓦꓲ ꓗꓪˍ ꓟꓲ꓾ ꓕꓲ ꓦꓲ ꓡꓰ ꓕꓲ ꓦꓲ ꓗꓪˍ ꓟꓲ꓾ ꓬꓰ-ꓢꓴ ꓠꓬ ꓙꓲ-ꓢꓴ ꓥ ꓟ ꓟꓸ ꓟꓲ ꓡꓯꓽ ꓫꓵ ꓚ ꓟꓸ ꓖꓶˍ ꓡꓳ꓿

ꓝꓲ-ꓓꓴ 6

1 ꓢꓲ ꓤ ꓐꓴ ꓟꓬꓽ ꓡ ꓕꓯ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓓꓴ ꓐꓱꓻ ꓖꓶˍ ꓟ ꓟꓬꓱꓽ ꓗꓪ꓾ ꓦꓲ-ꓡꓲ ꓟꓶꓽ ꓛꓵꓽ ꓟ ꓐꓴ ꓔꓯ ꓡꓳꓸ ꓘꓳꓻ ꓗꓷ ꓠꓬꓲ꓾ ꓦꓲ-ꓡꓲ ꓥꓳꓽ ꓫ ꓕꓱˍ ꓟ ꓬꓴ-ꓔ ꓡ ꓞꓳ ꓐꓴ ꓠꓬ ꓦꓲ-ꓐꓱ-ꓣꓴ ꓡ ꓞꓳ ꓔꓯ ꓱ'ꓽ ꓠꓱꓽ ꓔꓴ ꓡ ꓡꓳ꓿ 2 ꓖꓳ ꓕꓯ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓟ ꓡꓰ ꓢꓲ ꓤ ꓐꓴ ꓮꓽ ꓙꓵ ꓔꓯ ꓘꓴ ꓜꓲꓼ ꓡ ꓢꓲ꓾ ꓥꓪ ꓠꓴꓽ ꓠꓬ ꓪꓴ-ꓢ ꓐꓯ ꓘꓶ ꓔꓯ ꓡꓳꓺ ꓔ ꓢꓲ꓾ ꓜꓻ ꓢꓽ ꓡ ꓗꓪ ꓣꓱꓽ ꓙ ꓙꓲꓽ ꓟꓽ ꓙꓳ꓿ 3 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓴꓽ ꓡꓰ ꓟꓬꓱꓽ ꓐꓬꓱꓽ ꓘꓶ ꓕꓱ ꓟ ꓡꓯꓼ ꓙꓱ ꓖꓶ ꓠꓹ ꓟ꓾ ꓠꓴ ꓪꓽ ꓗꓳ ꓡꓳ ꓗꓪ ꓐꓰ ꓙꓲˍ ꓟ ꓟꓬꓱ ꓓꓳꓽ ꓙꓳ ꓢꓲ꓾ ꓢꓲ-ꓫꓬ-ꓟ-ꓦ ꓐꓰ ꓙꓽ ꓗꓴꓸ ꓠꓲꓹ ꓐꓲ ꓞꓹ ꓟ ꓡ ꓞꓳ ꓫꓵꓽ ꓣꓳ ꓢꓲ ꓓꓳ ꓡꓯ꓿ 4 ꓥꓪ ꓠꓴ ꓠꓽ ꓪꓽ ꓘꓴˍ ꓟ ꓐꓰ ꓪꓴ-ꓢ ꓐꓯ ꓘꓶ ꓟꓸ ꓖꓶˍ ꓟ ꓟꓬꓱꓽ ꓗꓪˍ ꓡꓰꓽ ꓢꓯꓼ ꓕꓵꓼ ꓓꓴ ꓥꓳ꓾ ꓐꓯˍ ꓡꓳ꓿ 5 ꓬꓲ ꓪꓽ ꓮꓽ ꓙꓵ ꓠꓬ ꓐꓯ ꓘꓶ ꓕꓱ ꓟ ꓔꓯ ꓠꓲꓹ ꓒꓴ ꓢꓲ꓾ ꓙꓵꓻ ꓠꓲꓹˍ ꓐꓰ ꓢꓲ-ꓫꓬ-ꓟ-ꓦ ꓐꓲ ꓞꓹ ꓢꓴ ꓢꓶ-ꓕꓲ-ꓩ ꓕꓲ ꓣꓳ꓾ ꓝꓮꓲ ꓒꓲ-ꓡꓲˍ ꓐꓰ ꓑꓷ-ꓡꓳ-ꓗꓳˍ ꓐꓰ ꓟꓲ-ꓚꓬ-ꓠˍ ꓐꓰ ꓕꓲ-ꓟꓳ-ꓠˍ ꓐꓰ ꓒ-ꓟꓲ-ꓠˍ ꓐꓰ ꓬꓴ-ꓔ ꓢꓳ ꓗꓪ ꓓꓵꓽ ꓡ ꓗꓷ ꓟ ꓮ-ꓕꓲ-ꓬ ꓢꓴ ꓠꓲ-ꓗꓳ-ꓡ ꓔꓯ ꓢꓲꓺ ꓓꓳ ꓡ ꓡꓳ꓿ 6 ꓬꓲ ꓪꓽ ꓔꓯ ꓝꓲ ꓓꓴ ꓐꓴ ꓟꓲꓽ ꓙꓬ ꓗꓪ ꓦꓰꓼ ꓞ ꓝꓲ ꓢꓲ꓾ ꓝꓲ ꓓꓴ ꓐꓴ ꓡꓰ ꓪꓽ ꓘꓴ ꓢꓲ ꓠꓬꓲ ꓡꓯꓼ ꓒꓯꓹ ꓚꓰꓹ ꓖꓶˍ ꓡꓳ꓿ 7 ꓪꓴ-ꓢ ꓐꓯ ꓘꓶ ꓠꓬ ꓡꓯꓽ ꓫꓵ ꓒꓬꓱꓺ ꓙꓰ ꓢꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓢꓲ ꓤ ꓐꓴ ꓮꓽ ꓘꓶꓸ ꓟꓬꓽ ꓡ ꓡꓳ꓿ ꓔꓲ ꓒ ꓐꓴ ꓮꓽ ꓟꓬꓹˍ ꓟꓲ ꓙꓵꓻ ꓚꓱꓹ ꓕꓱ ꓟ ꓔꓯ ꓛꓳꓻ ꓠꓺ ꓡꓳˍ ꓡꓳ꓿ 8 ꓪꓴ-ꓢ ꓣꓱꓽ ꓛꓰꓽ ꓡꓯꓼ ꓫꓴˍ ꓐꓰ ꓪ ꓠꓬꓲˍ ꓟ ꓐꓲ ꓞ ꓢꓴ ꓢꓶ-ꓕꓲ-ꓩ ꓠꓬ꓾ ꓑ ꓫꓬꓼ ꓐꓴ ꓗꓳ ꓡꓳ ꓗꓪ ꓓꓵꓽ ꓙ ꓟꓶ ꓓꓴˍ ꓐꓰ ꓢꓷꓸ ꓡꓰ ꓓꓴ ꓓꓽ ꓟ ꓬꓰˍ ꓡꓳ꓿ 9 ꓖꓳ ꓡꓱ ꓥ ꓟꓲ ꓚꓳ-ꓪꓴꓸ-ꓜꓲꓼ-ꓦꓲ ꓗꓪ ꓟ ꓕꓲ ꓐꓱˍ ꓐꓰ ꓢ-ꓡꓲ-ꓠꓲ ꓢꓴ ꓠꓬ ꓬ-ꓡꓲ-ꓢ-ꓓ ꓢꓴˍ ꓐꓰ ꓚꓲ-ꓡꓲ-ꓚꓬ ꓢꓴ ꓐꓰ ꓮ-ꓢꓲ-ꓬ ꓢꓴ ꓕꓲ ꓐꓱ ꓠꓬ ꓢꓶ-ꓕꓲ-ꓩˍ ꓐꓰ ꓧꓳꓺ ꓡꓯ ꓘꓳ ꓡ ꓡꓳ꓿ 10 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓬ ꓬꓲ ꓢꓷ ꓠꓲꓹˍ ꓐꓰ ꓢꓲ-ꓫꓬ-ꓟ-ꓦ ꓗꓪ ꓐꓰ ꓫ ꓕꓱˍ ꓟ ꓔꓯ ꓧꓳꓺ ꓧꓪꓸ ꓡꓰ ꓟꓽ ꓘꓴ꓿ 11 ꓖꓳ ꓕꓯ ꓬꓲ ꓪꓽ ꓡꓰ ꓘꓳꓺ ꓫꓱ ꓫꓱˍ ꓗꓪ ꓡ ꓞꓳ ꓕꓲ ꓧꓳꓽ ꓔꓯ ꓟꓸ ꓒꓬꓹ ꓢꓲ꓾ ꓢꓶ-ꓕꓲ-ꓩ ꓠꓬ ꓟꓳ-ꓫꓲˍ ꓐꓰ ꓪꓴ-ꓢ ꓔꓯ ꓔꓳꓹ ꓢꓲ ꓐꓯ ꓟꓽ ꓚꓰꓼ ꓡꓳ ꓫꓵꓽ ꓐꓯˍ ꓟ ꓥꓪ ꓠꓴꓽ ꓑ ꓙꓽ ꓗꓷꓳ꓾ ꓐꓰ ꓐꓯ ꓝꓲˍ ꓡꓳ꓿ 12 ꓝꓮꓲ ꓠꓬ ꓬꓲ ꓪꓽ ꓡꓰ ꓑ ꓫꓬꓼ ꓐꓴˍ ꓐꓰ ꓞꓳ ꓪꓴ ꓞꓳ ꓔꓲ ꓐꓴˍ ꓐꓰ ꓙꓵꓽ ꓗ ꓟꓸ ꓒ ꓐꓴ ꓔꓯ ꓡꓵꓹ ꓢꓴ ꓢꓲ꓾ ꓬꓲ ꓔꓯ ꓣꓴ ꓢꓲ ꓠꓬꓲ꓾ ꓐꓯ ꓟꓴ ꓜꓲ ꓓꓴ ꓓꓽ ꓟ ꓗꓪ ꓖꓳꓻ ꓧꓳꓽ ꓙꓰˍ ꓡꓳ꓿ 13 ꓟꓽ ꓔꓱꓹ ꓟ ꓢꓷꓸ ꓙ ꓟꓳ ꓙ ꓢꓴˍ ꓟꓲ ꓧꓪ ꓔ ꓢꓲ꓾ ꓡ ꓞꓳ ꓕꓱ ꓕꓲ ꓣꓳ ꓟ ꓠꓬ ꓢꓲꓽ ꓫꓬ ꓖꓴ ꓕꓱ ꓟˍ ꓐꓰ ꓙꓵꓽ ꓗ ꓔꓯ ꓒꓳꓹˍ ꓟ ꓐꓯ ꓘꓶ ꓟꓽ ꓠꓽ ꓠ ꓐꓯ ꓔꓬ ꓡꓳ꓿ 14 ꓠ-ꓢ-ꓡꓱ ꓢꓴ ꓬꓰ-ꓢꓴ ꓕꓱ ꓟ ꓡꓰ꓾ ꓕꓱ ꓕꓲ ꓔꓳꓸ ꓔꓯ ꓐꓬ ꓡꓰ ꓝꓲ ꓢꓲ꓾ ꓟꓳ-ꓫꓲ ꓡꓰ ꓣꓳ ꓔꓯ ꓖꓶ ꓔ ꓟ ꓗ ꓫꓵ ꓔꓯ ꓡꓶꓸ ꓗꓷˍ ꓥꓳ꓾ ꓐꓯˍ ꓟ ꓥꓪ ꓠꓴꓽ ꓑ ꓙꓽ ꓗꓷꓳ꓾ ꓐꓰ ꓐꓯ ꓝꓲˍ ꓡꓳ꓿ 15 ꓐꓯ ꓟꓴ ꓜꓲꓼ ꓓꓴ ꓓꓽ ꓟ ꓗꓪ ꓠꓬꓲꓸ ꓠꓸ ꓢꓴ ꓮꓽ ꓙꓵ ꓢꓶ-ꓕꓲ-ꓩ ꓔꓯ ꓟꓬ ꓔꓱꓹ ꓡꓳꓸ ꓠꓬꓲ ꓠꓬ꓾ ꓬꓲ ꓒꓬꓱꓽ ꓟꓬ ꓠꓽ ꓟꓴꓽ ꓗꓪ ꓝꓲ ꓓꓴ ꓒꓬꓱꓽ ꓟꓬˍ ꓡꓰ ꓐꓰ ꓗꓹ ꓟ ꓔꓯ ꓟꓳˍ ꓡꓳ꓿

ꓝꓲ-ꓓꓴ 7

1 ꓖꓳ ꓕꓯ ꓔꓲ ꓒ ꓓꓽ ꓟ ꓡꓰ꓾ ꓕꓱ ꓟꓬ ꓫꓵꓽ ꓠꓬ ꓚꓵ ꓚꓵ ꓥ ꓡ? ꓐꓰ ꓠ ꓠꓬꓲˍ ꓡꓳ꓿ 2 ꓢꓶ-ꓕꓲ-ꓩ ꓡꓰ꓾ ꓬꓲ ꓤ ꓠꓬꓲ ꓤˍ ꓐꓰ ꓮꓽ ꓐꓽ ꓐꓴꓳ꓾ ꓠ ꓠꓹ꓿ ꓣꓳ ꓒꓵ ꓒ ꓮ-ꓐ-ꓡ-ꓦ ꓠꓬ ꓧ-ꓣ-ꓠ ꓗꓪ ꓟꓽ ꓚꓵꓸ ꓙꓰ ꓢꓰꓽ ꓧꓶꓸ ꓕꓯ꓾ ꓟꓲ-ꓢꓳ-ꓒꓳ-ꓔ-ꓟꓲ ꓟꓵ ꓗꓪ ꓔꓬ ꓢꓰꓽ ꓕꓯˍ ꓡꓰ ꓐꓬꓱꓼ ꓡꓱꓼ ꓡꓱ ꓟ ꓪꓴ-ꓢ ꓠꓬ ꓬꓲ ꓔꓯ ꓟꓳꓸ ꓖꓶ ꓡ ꓢꓲ꓾ 3 ꓠꓴ ꓟꓵꓽˍ ꓐꓰ ꓠꓴ ꓫꓵꓽ ꓠꓴ ꓧꓪ ꓔꓯ ꓧꓹ ꓔ ꓬꓰ ꓢꓲ꓾ ꓠꓴ ꓔꓯ ꓥꓪ ꓡꓰ ꓟꓸ ꓖꓶ ꓠꓹ ꓟ ꓟꓵꓽ ꓗꓪ ꓙꓰ꓾ ꓐꓯ ꓖꓶˍ ꓡꓳ꓿ 4 ꓖꓳ ꓡꓱ ꓠꓬꓲ ꓬꓲ ꓠꓬ ꓚꓬ-ꓡꓷ-ꓔꓲ ꓟꓵꓽ ꓗꓪ ꓐꓰ ꓓꓳ ꓡ ꓢꓲ꓾ ꓧ-ꓣ-ꓠ ꓡꓳ ꓒꓱ ꓗꓪ ꓔꓬ ꓬꓰˍ ꓡꓳ꓿ ꓬꓲ ꓐꓹ ꓐ ꓫꓵꓻ ꓗꓸ ꓠꓯꓸ ꓠꓬ ꓖꓳ ꓗꓪ ꓐꓰ ꓮ ꓟꓶ ꓣꓳꓽ ꓔꓬ ꓟ ꓕꓱ ꓕꓲ ꓟꓵ ꓗꓪ ꓪꓴ-ꓢ ꓡꓰ ꓬꓲ ꓔꓯ ꓚꓵꓸ ꓡ ꓝꓲꓳ꓿ 5 ꓕꓱ ꓗꓪ ꓠꓬ ꓪꓴ-ꓢ ꓡꓰ ꓬꓲ ꓔꓯ ꓮꓸ ꓫꓵ ꓡꓯꓼ ꓪ ꓟꓽ ꓖꓶ꓿ ꓟꓵꓽ ꓕꓲ ꓔꓳꓸ ꓤˍ ꓟꓲ ꓟꓽ ꓖꓶ꓿ ꓖꓳ ꓡꓱ ꓥ ꓟꓲ ꓮ-ꓐ-ꓡ-ꓦ ꓬꓲ ꓤ ꓟꓽ ꓙꓳ ꓕꓯˍ ꓡꓰ ꓪꓴ-ꓢ ꓡꓰ ꓮ-ꓐ-ꓡ-ꓦ ꓔꓯ꓾ ꓠꓴˍ ꓐꓰ ꓠꓴ ꓞꓲꓼ ꓤ ꓡꓯꓹ ꓤ ꓐꓴ ꓠꓬ ꓗꓸ ꓠꓯꓸ ꓟ ꓦꓬꓼ ꓠꓬꓲ ꓗꓪ ꓡꓯꓼ ꓪ ꓟꓵꓽ ꓟꓶˍ ꓥꓳ꓾ ꓐꓰ ꓙ ꓟꓳ ꓘꓶꓽ ꓖꓶˍ ꓡꓳ꓿ 6 ꓪꓴ-ꓢ ꓡꓰ ꓬꓲ ꓔꓯ꓾ ꓠꓴ ꓞꓲꓼ ꓤ ꓡꓯꓹ ꓤ ꓐꓴ ꓠꓬ ꓐꓶꓽ ꓟꓵ ꓗꓪ ꓞꓳ ꓬꓯꓼ ꓟꓴ ꓠ ꓗꓷ ꓡꓰ ꓢꓲ꓾ ꓢꓴ ꓡꓰ ꓬꓲ ꓪꓽ ꓔꓯ ꓚꓳ ꓑꓸ ꓡꓲ ꓦꓬ ꓘꓳꓼ ꓬꓰ ꓝꓲ ꓢꓲ ꓠꓬꓲ ꓘꓶꓻ ꓙꓵˍ ꓥꓳ꓿ 7 ꓖꓳ ꓡꓱ ꓥ ꓟꓲ ꓬꓲ ꓪꓽ ꓔꓯ ꓚꓳ ꓑꓸ ꓬꓰ ꓝꓲ ꓢꓴ ꓞꓳ ꓫꓵꓽ ꓔꓯ ꓥꓪ ꓡꓰ ꓛꓬꓻ ꓒꓵꓽ ꓖꓶˍ ꓥꓳ꓿ ꓖꓳ ꓗꓸ ꓠꓯꓸ ꓬꓲ ꓪꓽ ꓠꓬ ꓖꓳ ꓕꓲ ꓟꓵ ꓗꓪ ꓐꓰ ꓓꓳ ꓡ ꓢꓲ꓾ ꓕꓱ ꓗꓪ ꓥꓪ ꓔꓯ ꓣꓱ ꓙˍ ꓥꓳ꓾ ꓐꓯ ꓖꓶˍ ꓡꓳ꓿ 8 ꓖꓳ ꓡꓱ ꓢꓲ ꓪꓴ-ꓢ ꓡꓰ ꓬꓲ ꓔꓯ꓾ ꓶꓺˍ ꓟ ꓗ ꓫꓵ ꓙꓳˍ ꓟ ꓘꓶꓽ ꓫꓵꓽ ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ-ꓢ ꓔꓯ ꓦꓵꓻ ꓟꓶ ꓗꓷ ꓠꓬ ꓦꓰꓼ ꓠꓬꓲ ꓕꓲ ꓠꓬꓲ ꓗꓪ ꓮ-ꓐ-ꓡ-ꓦ ꓡꓰ ꓬꓲ ꓔꓯ ꓶˍ ꓟ ꓗ ꓫꓵ ꓬꓰ ꓖꓶˍ ꓡꓳ꓿ ꓬꓲ-ꓢ ꓠꓬ ꓬꓲ ꓤ ꓬ-ꓗꓴ ꓔꓯ ꓶˍ ꓟ ꓗ ꓫꓵ ꓬꓰ ꓖꓶˍ ꓡꓳ꓿ ꓬ-ꓗꓴ ꓠꓬ ꓣꓳꓽ ꓒꓵ ꓒ ꓝꓳꓹ ꓟꓶ ꓞꓲ ꓠꓬꓲꓽ ꓣꓳ ꓟ ꓔꓯ ꓶˍ ꓟ ꓗ ꓫꓵ ꓬꓰ ꓖꓶˍ ꓡꓳ꓿ 9 ꓣꓳ ꓒꓵꓽ ꓒ ꓬ-ꓗꓴ ꓬꓲ ꓤ ꓐꓴ ꓠꓬ ꓬꓲ ꓪꓽ ꓠꓬꓲ ꓤ ꓬꓳ-ꓢꓷ ꓔꓯ ꓟꓬ ꓦꓯꓸˍ ꓠꓬꓲ꓾ ꓬꓲ ꓔꓯ ꓬꓲ-ꓙꓲ ꓟꓵꓽ ꓗꓪ ꓪꓴꓽ ꓩꓴ ꓗꓷꓳ꓿ 10 ꓖꓳ ꓡꓱ ꓥ ꓟꓲ ꓪꓴ-ꓢ ꓠꓽ ꓬꓲˍ ꓐꓰ ꓔꓬ ꓢꓲ꓾ ꓫꓸ ꓙꓵˍ ꓟ ꓮꓽ ꓙꓵ ꓗꓪ ꓐꓰ ꓬꓲ ꓔꓯ ꓚꓬꓴ ꓓꓳ ꓡ ꓢꓲ ꓠꓬꓲ꓾ ꓬꓲ-ꓙꓲ ꓪ ꓔꓲ ꓩ-ꓣꓳ ꓟꓲꓽ ꓙꓬ ꓗꓪ ꓬꓲ ꓔꓯ ꓣꓱꓽ ꓛꓰꓽˍ ꓐꓰ ꓙꓽ ꓗꓴꓸ ꓠꓲꓹ ꓟꓶ ꓡꓰ ꓝꓲˍ ꓡꓳ꓿ ꓝꓮꓲ ꓠꓬ ꓩ-ꓣꓳ ꓡꓰ ꓬꓲ ꓔꓯ ꓬꓲ-ꓙꓲ ꓗꓴꓷˍ ꓐꓰ ꓬꓲ ꓦꓲ ꓮꓽ ꓙꓵ ꓡꓱꓸꓼ ꓔꓯ ꓙꓵꓽ ꓢꓴ ꓓꓽ ꓠꓬꓲꓻ ꓒ ꓣꓱ ꓝꓲˍ ꓡꓳ꓿ 11 ꓖꓳ ꓕꓯ ꓬꓲ-ꓙꓲ ꓟꓵꓽˍ ꓐꓰ ꓘꓷ-ꓠ ꓕꓲ ꓟꓵꓽ ꓡꓱꓸꓼ ꓗꓪ ꓦꓰꓼ ꓟꓷꓼ ꓘꓳˍ ꓐꓰ ꓫꓸ ꓙꓵˍ ꓟ ꓬꓲ ꓓꓽ ꓟ ꓓꓳ ꓡ ꓢꓲ꓾ ꓣꓳ ꓒꓵꓽ ꓒ ꓐꓴ ꓠꓬ ꓜ ꓓꓴ ꓧꓪ ꓖꓴ ꓟꓽ ꓙꓳ ꓗꓷ ꓡꓰꓳ꓿ 12 ꓖꓳ ꓡꓱ ꓥ ꓟꓲ ꓬꓲ-ꓙꓲ ꓟꓵꓽ ꓗꓪ ꓜꓻ ꓙꓳˍ ꓟ ꓔꓯ ꓬ-ꓗꓴ ꓑ ꓙꓽ ꓗꓷ ꓠꓬ꓾ ꓬꓲ ꓡꓰ ꓣꓳ ꓒꓵꓽ ꓒ ꓐꓴ ꓔꓯ ꓖꓳ ꓗꓪ ꓬꓲ ꓪꓴꓸ ꓕꓲ ꓧꓪꓹ ꓝꓲ ꓩꓴ ꓗꓷˍ ꓡꓳ꓿ 13 ꓠꓬꓲꓽ ꓧꓪꓹ ꓕꓲ ꓧꓪꓹ ꓜꓽ ꓓꓴ ꓧꓪ ꓙꓰˍ ꓕꓯ꓾ ꓬꓳ-ꓢꓷ ꓡꓰ ꓬꓲ ꓬꓲꓼ ꓬꓲ ꓠꓬꓲ ꓐꓴ ꓔꓯ ꓬꓲ ꓮꓽ ꓟ ꓥ ꓟ ꓢꓷꓸ ꓡꓰ ꓝꓲꓳ꓿ ꓖꓳ ꓕꓯ ꓬꓳ-ꓢꓷ ꓬꓲ ꓫꓵꓽ ꓬꓲ ꓧꓪ ꓐꓴ ꓔꓯ ꓪ ꓔꓲ ꓩ-ꓣꓳˍ ꓟꓲ ꓢꓷꓸ ꓡꓰꓳ꓿ 14 ꓖꓳ ꓗ ꓠꓯꓸ ꓬꓳ-ꓢꓷ ꓡꓰ ꓡ ꓞꓳ ꓝꓲ ꓩꓴ ꓗꓷ ꓢꓲ꓾ ꓬꓲ ꓐꓹ ꓐ ꓬ-ꓗꓴ ꓐꓰ ꓬꓲ ꓕꓲ ꓦꓲ ꓢꓴ ꓫꓵꓽ ꓞꓲ ꓥꓪꓽ ꓣꓳ ꓟ ꓮꓽ ꓙꓵ ꓔꓯ ꓘꓴꓻ ꓔꓯꓹ ꓡ ꓡꓳ꓿ 15 ꓖꓳ ꓡꓱ ꓠꓬꓲ ꓬ-ꓗꓴ ꓠꓬ ꓬꓲ-ꓙꓲ ꓟꓵ ꓗꓪ ꓬꓯꓼ ꓙꓰ ꓢꓲ꓾ ꓬꓲˍ ꓐꓰ ꓣꓳ ꓒꓵꓽ ꓒ ꓐꓴ ꓠꓬ ꓖꓳ ꓗꓪ ꓫꓵꓻꓳ꓿ 16 ꓖꓳ ꓗꓸ ꓠꓯꓸ ꓬꓲ ꓪꓽ ꓫꓵꓻ ꓟꓳ ꓔꓯ ꓫꓱ-ꓘꓷ-ꓟꓷ ꓗꓪ ꓔꓯꓹ ꓙꓰ ꓢꓲ꓾ ꓖꓳ ꓗꓪ ꓮ-ꓐ-ꓡ-ꓦ ꓡꓰ ꓧ-ꓟꓳꓽ ꓬꓲ ꓤ ꓐꓴ ꓗꓪ ꓐꓰ ꓒꓴ ꓡꓰ ꓪꓴꓻ ꓔ ꓟ ꓡꓱꓼ ꓜꓴ ꓗꓪ ꓗꓶ ꓔ ꓡꓳ꓿ 17 ꓪꓴ-ꓢ ꓡꓰ ꓮ-ꓐ-ꓡ-ꓦ ꓔꓯ ꓪꓵꓼ ꓔ ꓟ ꓙ ꓟꓳ ꓘꓶꓽ ꓐꓲ ꓡ ꓟ ꓦꓬꓼ ꓠꓬꓲ ꓠꓶꓽ ꓡ ꓗꓪ ꓛꓲ꓾ ꓑ ꓫꓬꓼ ꓐꓴ ꓠꓬ ꓬꓲ-ꓙꓲ ꓟꓵꓽ ꓗꓪ ꓟꓬꓽ ꓡ ꓐꓶꓹ ꓡ ꓡꓳ꓿ 18 ꓖꓳ ꓗꓸ ꓠꓯꓸ ꓬꓳ-ꓢꓷ ꓔꓯ ꓟꓽ ꓢꓷꓸ ꓟ ꓬꓲ-ꓙꓲ ꓪ ꓔꓲ ꓕꓲ ꓣꓳ ꓓꓳ ꓡꓺꓳ꓿ 19 ꓖꓳ ꓕꓲ ꓣꓳ ꓠꓬ ꓣꓳ ꓕꓲ ꓫꓵꓽ ꓟ ꓔꓯ ꓖꓳꓼ ꓠꓲꓹ ꓬꓰ ꓖꓶ ꓢꓲ꓾ ꓣꓳ ꓒꓵꓽ ꓒ ꓐꓴ ꓔꓯ ꓘꓶꓻ ꓙꓵ ꓢꓲ ꓠꓬꓲ꓾ ꓬꓲ ꓪꓽ ꓞꓳ ꓫꓵꓼ ꓤ ꓐꓴ ꓔꓯ ꓫꓵꓻ ꓝꓲ ꓠꓹ ꓟ ꓡꓳꓺ ꓗꓷ ꓝꓲˍ ꓡꓳ꓿ 20 ꓖꓳ ꓕꓲ ꓝꓲꓸ ꓗꓪ ꓟꓳ-ꓫꓲ ꓦꓵ ꓡꓺꓳ꓿ ꓬꓲ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓮꓽ ꓘꓶꓸ ꓖꓪꓺ ꓜꓳꓽˍ ꓟ ꓞꓳ ꓫꓵꓼ ꓤ ꓕꓲ ꓣꓳ ꓥ ꓡꓳ꓿ ꓬꓲ ꓔꓯ ꓬꓲ ꓐꓹ ꓐ ꓦꓲ ꓗꓪ ꓦ ꓐ ꓢ ꓟ ꓦꓵꓻ ꓔ ꓡꓳ꓿ 21 ꓖꓳ ꓗꓸ ꓠꓯꓸ ꓬꓲ ꓔꓯ ꓡꓳ ꓗꓷˍ ꓕꓯ꓾ ꓩ-ꓣꓳ ꓮꓸ ꓟꓲꓽ ꓡꓰ ꓖꓳꓺ ꓔꓯꓹ ꓙꓰ ꓢꓲ ꓬꓲ ꓚꓲ ꓛꓬ ꓤ ꓪꓴꓸ ꓙꓴꓽ ꓫꓳꓺ ꓔ ꓡꓳ꓿ 22 ꓟꓳ-ꓫꓲ ꓠꓬ ꓬꓲ-ꓙꓲ ꓡ ꓞꓳ ꓢꓷꓸ ꓠꓲꓹ ꓮꓽ ꓙꓵ ꓟ ꓗꓪ ꓢꓳ ꓟꓶ ꓡꓰ ꓢꓲ꓾ ꓐꓯ ꓙꓻ ꓙꓳ ꓢꓴˍ ꓐꓰ꓾ ꓬꓰˍ ꓟ ꓟꓬꓱꓽ ꓗꓪ ꓓꓻ ꓒꓽ ꓕꓲ ꓣꓳ ꓒꓬꓱꓼ ꓡꓺꓳ꓿ 23 ꓬꓲ ꓡꓲ ꓞꓲ ꓘꓳꓼ ꓙꓳˍ ꓕꓯ꓾ ꓬꓲ ꓬꓲꓼ ꓬꓲ ꓠꓬꓲ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓔꓱꓹ ꓠꓬꓲ ꓙꓰ ꓠꓹ ꓟ ꓓꓳ ꓙꓰ ꓠꓬ꓾ 24 ꓕꓲ ꓣꓳ ꓘꓶꓻ ꓙꓵ ꓟꓶ ꓔꓬ ꓟ ꓔꓯ ꓬꓲ ꓟꓳꓻ ꓗꓷꓳ꓿ ꓬꓲ-ꓙꓲ ꓡ ꓞꓳ ꓡꓰ ꓘꓶꓻ ꓙꓵ ꓔꓬ ꓟ ꓬꓲ-ꓢꓷ-ꓡꓰ ꓖꓳ ꓕꓲ ꓣꓳ ꓐꓱ ꓶ ꓪꓽ ꓛꓴꓽ ꓚꓱꓹ ꓙ ꓢꓲ ꓬꓲ-ꓙꓲ ꓡ ꓞꓳ ꓔꓯ ꓟꓳ-ꓫꓲ ꓡꓰ ꓓꓶꓽ ꓢꓰꓼ ꓗꓷꓳ꓿ 25 ꓪꓴ-ꓢ ꓠꓬ ꓟꓳ-ꓫꓲ ꓔꓯ ꓣꓱꓽ ꓢꓲ꓾ ꓬꓲ ꓬꓲꓼ ꓬꓲ ꓠꓬꓲ ꓐꓴ ꓔꓯ ꓚꓬꓴ ꓡ ꓟ ꓔꓯ ꓬꓲ-ꓢꓷ-ꓡꓰ ꓐꓴ ꓙ ꓜꓲꓼˍ ꓥꓳ꓾ ꓐꓰ ꓟꓳ-ꓫꓲ ꓓꓵꓽ ꓙˍ ꓟꓲ꓾ ꓬꓲ ꓪꓽ ꓟꓽ ꓙ ꓜꓲꓼ꓿ 26 ꓗꓸ ꓠꓯꓸ ꓕꓲ ꓠꓬꓲ ꓗꓪ ꓬꓲ-ꓢꓷ-ꓡꓰ ꓡ ꓞꓳ ꓠꓬꓲꓽ ꓣꓳ ꓓꓶꓽ ꓡꓯ ꓘꓳ ꓔꓬ ꓟ ꓔꓯ ꓬꓲ ꓔꓳꓹ ꓜꓳˍ ꓡꓳ꓿ ꓟꓳ-ꓫꓲ ꓠꓬ ꓬꓲ ꓪꓽ ꓔꓯ ꓧꓳꓹ ꓡꓯ ꓘꓳ ꓝꓲ ꓠꓲꓹ ꓫꓵ ꓠꓬꓲ꓾ ꓮꓸ ꓬꓲꓼ ꓐꓴꓳ꓾ ꓠꓴ ꓪꓽ ꓠꓬ ꓬꓲꓼ ꓤ ꓠꓬꓲ ꓤ ꓥ ꓡꓳ꓿ ꓮꓸ ꓫꓵ ꓪꓴꓸ ꓠꓬꓲ ꓓꓶꓽ ꓡꓯ ꓘꓳˍ ꓡ?꓾ ꓐꓰ ꓐꓯ ꓖꓶˍ ꓡꓳ꓿ 27 ꓖꓳ ꓡꓱ ꓥ ꓟꓲ ꓬꓲ ꓛꓳꓽ ꓒꓯꓹ ꓔꓯ ꓘꓶꓻ ꓙꓵ ꓔꓬ ꓢꓴ ꓖꓳ ꓕꓲ ꓣꓳ ꓡꓰ ꓟꓳ-ꓫꓲ ꓔꓯ ꓓꓱꓽ ꓩꓴ ꓗꓷ ꓢꓲ꓾ ꓮꓽ ꓟ ꓡꓰ ꓠꓴ ꓔꓯ ꓥꓪ ꓠꓴꓽ ꓕꓯ ꓢꓲ ꓗꓪ ꓢꓲꓽ ꓒˍ ꓐꓰ ꓐꓯ ꓟꓴ ꓘꓶꓽ ꓢꓴ ꓣꓱ ꓝꓲˍ ꓡ? 28 ꓮꓽ ꓠꓬꓲ ꓕꓲ ꓠꓬꓲ ꓬꓲ-ꓙꓲ ꓡ ꓞꓳ ꓔꓯ ꓢꓰꓼ ꓗꓷ ꓟ ꓡꓰ ꓐꓰ꓾ ꓠꓴ ꓠꓬ ꓥꓪ ꓔꓯ ꓢꓰꓼˍ ꓐꓯˍ ꓡ?꓾ ꓐꓯˍ ꓡꓳ꓿ 29 ꓐꓯ ꓘꓶ ꓕꓱ ꓟ ꓪꓴꓸ ꓠꓬꓲ꓾ ꓟꓳ-ꓫꓲ ꓛꓰꓹ ꓙꓰ ꓢꓲ꓾ ꓟ-ꓓꓲ-ꓬ ꓟꓵꓽ ꓗꓪ ꓞꓳ ꓬꓯꓼ ꓟꓴ ꓢꓴ ꓕꓲ ꓣꓳ ꓒꓬꓱꓼ ꓡ ꓢꓲ ꓠꓬꓲ꓾ ꓖꓳ ꓗꓪ ꓬꓲ ꓤ ꓠꓬꓲꓽ ꓫꓵꓸ ꓙꓳ ꓡꓰꓳ꓿ 30 ꓡꓲ ꓞꓲ ꓘꓳꓼ ꓐꓲ ꓡꓰ ꓠꓬ꓾ ꓢꓲ-ꓠ ꓪꓽ ꓚꓲ ꓒ ꓕꓲꓺꓼ ꓗꓪ ꓟ ꓡꓲ ꓛꓲ ꓗꓪ ꓢꓲꓹ ꓑꓳ ꓠꓯꓸꓼ ꓮ ꓔꓳꓸ ꓡ ꓡꓱ ꓗꓪ꓾ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓬꓲ ꓔꓯ ꓟꓳꓸ ꓖꓶ ꓡ ꓡꓳ꓿ 31 ꓖꓳ ꓟ ꓔꓯ ꓟꓳ-ꓫꓲ ꓟꓳˍ ꓕꓯ ꓓꓵꓽ ꓙ ꓮ'ꓺ ꓡꓰꓳ꓿ ꓡꓳꓸ ꓠꓬꓲ ꓠꓹ ꓟ ꓒ ꓕꓲꓺꓼ ꓗꓪ ꓙꓰ ꓠꓬ ꓢꓲ ꓒ ꓡꓰ ꓬꓲ ꓔꓯ꓾ 32 ꓥꓪ ꓠꓬ ꓠꓴ ꓒꓵꓽ ꓒ ꓐꓴ ꓪꓴ-ꓢ꓾ ꓮ-ꓐ-ꓡ-ꓦˍ ꓐꓰ ꓬꓲ-ꓢˍ ꓐꓰ ꓬ-ꓗꓴ ꓬꓲ ꓪꓽ ꓪꓴ-ꓢ ꓥ ꓡꓳ꓾ ꓐꓯˍ ꓟ ꓑ ꓙꓽ ꓠꓬ꓾ ꓟꓳ-ꓫꓲ ꓛꓱꓽ ꓛꓱꓽ ꓡꓰ ꓢꓲ ꓡꓳꓸ ꓟꓽ ꓑꓶꓸ ꓗꓷ ꓡꓰꓳ꓿ 33 ꓖꓳ ꓡꓱ ꓥ ꓟꓲ ꓢꓲ ꓒ ꓡꓰ ꓬꓲ ꓔꓯ꓾ ꓠꓴ ꓛꓲ ꓠꓲ ꓡꓵꓸ ꓦ ꓗꓷ꓿ ꓮ ꓡꓲꓳ ꓐꓯ ꓠꓬ ꓠꓴ ꓦꓰꓼ ꓞ ꓖꓴ ꓕꓱ ꓟ ꓠꓽ ꓢꓲ ꓚꓰꓸ ꓔ ꓟ ꓟꓵꓽ ꓕꓲ ꓔꓳꓸ ꓥ ꓡꓳ꓿ 34 ꓬꓲ-ꓙꓲ ꓟꓵꓽ ꓗꓪ ꓔꓬ ꓟ ꓥꓪ ꓑ ꓫꓬꓼ ꓐꓴ ꓫꓸ ꓙꓵˍ ꓟ ꓔꓯ ꓥꓪ ꓚꓵ ꓚꓵ ꓟꓳꓻ ꓗꓷꓳ꓿ ꓬꓲ ꓪꓽ ꓠꓻ ꓪꓴꓽˍ ꓟ ꓢꓯꓼˍ ꓟꓲ ꓥꓪ ꓑ ꓙꓽ ꓗꓷꓳ꓿ ꓖꓳ ꓡꓱ ꓠꓬꓲ ꓥꓪ ꓬꓲ ꓪꓽ ꓔꓯ ꓚꓬꓴ ꓠ ꓟ ꓬꓯꓼ ꓡ ꓟ ꓥ ꓡꓳ꓿ ꓡꓯ꓾ ꓠꓴ ꓔꓯ ꓥꓪ ꓡꓰ ꓬꓲ-ꓙꓲ ꓟꓵꓽ ꓗꓪ ꓝꓲ ꓩꓴ ꓗꓷˍ ꓥꓳ꓾ ꓐꓯ ꓖꓶˍ ꓡꓳ꓿ 35 ꓬꓲ ꓪꓽ ꓡꓰ ꓟꓽ ꓒꓵꓽ ꓢꓲ꓾ ꓮꓽ ꓟ ꓡꓰ ꓠꓴ ꓔꓯ ꓥꓪ ꓠꓴ ꓢꓲꓽ ꓒˍ ꓐꓰ ꓐꓯ ꓟꓴ ꓘꓶꓽ ꓢꓴ ꓣꓱ ꓝꓲˍ ꓡ? ꓐꓰ ꓐꓯ ꓗꓷ ꓟ ꓟꓳ-ꓫꓲ ꓕꓱ ꓕꓲ ꓣꓳ ꓔꓯ꓾ ꓪꓴ-ꓢ ꓠꓽ ꓢꓲꓹ ꓑꓳ ꓠꓯꓸꓼ ꓗꓪ ꓬꓲ ꓔꓯ ꓟꓳꓸ ꓖꓶ ꓡ ꓟ ꓟꓴꓽ ꓗꓪ ꓝꓲ ꓓꓴ ꓗꓪ ꓐꓰ꓾ ꓬꓲ-ꓢꓷ-ꓡꓰ ꓐꓴ ꓔꓯ ꓧꓳꓽ ꓢꓴˍ ꓐꓰ ꓫꓴꓹ ꓣꓴ ꓢꓴ ꓬꓰ ꓝꓲ ꓠꓹ ꓟ ꓢꓲ ꓚꓰꓸ ꓗꓷꓳ꓿ 36 ꓬꓲ ꓡꓰ ꓬꓲ ꓪꓽ ꓔꓯ ꓧꓳꓽ ꓓꓳ ꓡ ꓢꓲ꓾ ꓬꓲ-ꓙꓲ ꓟꓵꓽ ꓗꓪ ꓥ ꓟꓲ꓾ ꓬꓲꓻ ꓡꓴꓽ ꓐꓱ ꓠꓲꓺ ꓗꓪ ꓥ ꓟꓲ꓾ ꓡꓲ ꓛꓲ ꓗꓪ ꓔꓬ ꓟ ꓡꓲ ꓞꓲ ꓘꓳꓼ ꓗꓪ ꓥ ꓟꓲ꓾ ꓓꓵꓽ ꓙ ꓟꓶ ꓓꓴˍ ꓐꓰ ꓢꓷꓸ ꓡꓰ ꓓꓴ ꓬꓰ ꓗꓷꓳ꓿ 37 ꓬꓲ-ꓢꓷ-ꓡꓰ ꓡ ꓞꓳ ꓔꓯ꓾ ꓠꓴ ꓪꓽ ꓗꓳ ꓡꓳ ꓗꓪ ꓐꓰ ꓥꓪˍ ꓡꓰ ꓐꓰ ꓟꓷ ꓠꓷꓹ ꓝꓸ ꓢꓴ ꓕꓲ ꓣꓳ ꓪꓴ-ꓢ ꓡꓰ ꓠꓴ ꓪꓽ ꓐꓱ ꓶ ꓓꓳ ꓡ ꓝꓲˍ ꓥꓳ꓾ ꓐꓯ ꓖꓶ ꓢꓴ ꓠꓬ ꓟꓳ-ꓫꓲ ꓕꓱ ꓕꓲ ꓣꓳ ꓥ ꓡꓳ꓿ 38 ꓟꓳ-ꓫꓲ ꓠꓬ ꓡꓲ ꓛꓲ ꓗꓪ ꓬꓲ-ꓢꓷ-ꓡꓰ ꓑ ꓫꓬꓼ ꓐꓴˍ ꓐꓰ ꓕꓲ ꓪꓺꓼ ꓔꓬ ꓗꓷꓳ꓿ ꓝꓮꓲ ꓠꓬ ꓢꓲ-ꓠ ꓪꓽ ꓚꓲ ꓗꓪ ꓬꓲ ꓔꓯ ꓫ ꓕꓱ ꓗꓷ ꓟ ꓟꓴꓽ ꓗꓪ ꓝꓲ ꓓꓴˍ ꓐꓰ꓾ ꓝꓮꓲ ꓣꓳ ꓒꓵꓽ ꓒ ꓐꓴˍ ꓐꓰˍ ꓟꓲ ꓕꓲ ꓪꓺꓼ ꓔꓬ ꓗꓷ ꓢꓲ꓾ ꓣꓳ ꓔꓯ ꓖꓶ ꓡ ꓠꓹ ꓟ ꓢꓯꓸˍ ꓟ ꓐꓯ ꓘꓶ ꓟꓶ ꓗꓷ ꓢꓴ ꓠꓬ ꓟꓳ-ꓫꓲ ꓥꓳ꓿ 39 ꓖꓳ ꓡꓱ ꓥ ꓟꓲ ꓣꓳ ꓒꓵꓽ ꓒꓽ ꓐꓴ ꓠꓬ ꓬꓲ ꓔꓯ ꓟꓽ ꓒꓵꓽ ꓒꓵꓽ꓾ ꓬꓲ ꓪꓽ ꓠꓬ ꓬꓲ-ꓙꓲ ꓟꓵꓽ ꓗꓪ ꓡꓽ ꓬꓲꓼ ꓙꓰ ꓠꓹ ꓟ ꓠꓲꓹ ꓥꓳꓺ ꓢꓲ ꓯ-ꓣꓷ ꓔꓯ꓾ 40 ꓥꓪ ꓠꓴꓽ ꓔꓯ ꓧꓳꓽ ꓢꓴ ꓢꓲꓺ ꓐꓬꓱꓽ ꓫꓬꓹ ꓖꓶ ꓡꓯ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓔꓯ ꓬꓲ-ꓙꓲ ꓟꓵꓽ ꓗꓪ ꓐꓰ ꓧꓳꓽ ꓓꓳ ꓡ ꓢꓴ꓾ ꓟꓳ-ꓫꓲ ꓕꓱ ꓕꓲ ꓣꓳ ꓠꓽ ꓮ ꓡꓲ ꓗꓷ ꓡꓰ ꓟ ꓥꓪ ꓠꓴ ꓟꓽ ꓢꓷꓳ꓾ ꓐꓯˍ ꓡꓳ꓿ 41 ꓖꓳ ꓡꓱ ꓢꓲ ꓬꓲ ꓪꓽ ꓡꓰ ꓮ ꓠꓬꓲꓽ ꓤ ꓢꓲꓺ ꓐꓬꓱꓽ ꓕꓲ ꓘꓹ ꓫꓬꓹ ꓢꓲ꓾ ꓬꓲ ꓪꓽ ꓡꓯꓼ ꓒꓯꓹ ꓡꓰ ꓫꓬꓹ ꓔ ꓟ ꓢꓲꓺ ꓐꓬꓱꓽ ꓖꓳ ꓟ ꓔꓯ ꓠꓲꓹ ꓒꓴ ꓢꓲ ꓠꓬꓲ ꓔꓲ ꓓꓴ ꓛꓴ ꓔꓲ ꓖꓶˍ ꓡꓳ꓿ 42 ꓪꓴ-ꓢ ꓠꓽ ꓬꓲ ꓪꓽ ꓔꓯˍ ꓐꓰ ꓒꓬꓱꓽ ꓒꓳꓹ ꓗꓷ ꓢꓲ꓾ ꓟꓴꓽ ꓗꓪ ꓗꓪ ꓟ ꓗꓴ ꓤ ꓔꓯ ꓣꓱꓽ ꓙ ꓝꓲ ꓠꓹ ꓟ꓾ ꓬꓲ ꓪꓽ ꓔꓯ ꓡꓳ ꓔ ꓬꓰˍ ꓡꓳ꓿ ꓕꓱ ꓟ ꓠꓬ ꓟꓷ ꓠꓷꓹ ꓝꓸ ꓢꓴ ꓕꓳ ꓶ ꓗꓪ꓾ ꓬꓲ-ꓢꓷ-ꓡꓰꓳ꓾ ꓡꓲ ꓛꓲ ꓗꓪ ꓠꓴ ꓪꓽ ꓡꓰ ꓡꓲ ꓞꓲ ꓘꓳꓼ ꓢꓰꓼ ꓔꓲ ꓓꓴˍ ꓐꓰ ꓔꓲ ꓓꓴ ꓔꓲ ꓖꓶ ꓗꓷ ꓟ ꓠꓬ ꓥꓪ ꓔꓯ ꓔꓲ ꓖꓶˍ ꓟ ꓟꓽ ꓥ꓿ 43 ꓠꓴ ꓪꓽ ꓠꓽ ꓠꓴ ꓪꓽ ꓪꓴꓸ ꓓꓵ ꓕꓱꓼˍ ꓐꓰ ꓫꓬ ꓔ ꓟ ꓢꓲꓺ ꓐꓬꓱꓽ꓾ ꓟꓳ-ꓡꓳ ꓬꓲ ꓦꓲ ꓐꓱˍ ꓐꓰ ꓣ-ꓩ-ꓠ ꓢꓲꓺ ꓬꓲ ꓗꓴ ꓤ ꓔꓯ ꓓꓳꓹ ꓟꓴꓺ ꓗꓷ ꓟ ꓥꓳ꓿ ꓖꓳ ꓡꓱ ꓠꓬꓲ ꓥꓪ ꓠꓬ ꓠꓴ ꓪꓽ ꓔꓯ ꓐ-ꓐꓲ-ꓡꓶ ꓐꓻ ꓢꓲ ꓗꓪ ꓡꓳꓽ ꓔꓯꓹ ꓙꓰ ꓝꓲˍ ꓥꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 44 ꓣꓳ ꓒꓵꓽ ꓒ ꓐꓴ ꓠꓬ ꓡꓲ ꓛꓲ ꓗꓪ ꓟ ꓢꓷꓸ ꓙ ꓟꓳ ꓙ ꓓꓴ ꓦꓲ ꓐꓱ ꓙꓳˍ ꓡꓳ꓿ ꓖꓳ ꓟ ꓠꓬ ꓟꓳ-ꓫꓲ ꓔꓯ ꓪꓴ-ꓢ ꓡꓰ ꓟꓳꓸ ꓖꓶˍ ꓟ ꓔꓯꓺ ꓐꓬꓱꓽˍ ꓡꓰ ꓐꓰ ꓫꓬꓹ ꓔ ꓟ ꓥ ꓡꓳ꓿ 45 ꓦꓲ ꓐꓱ ꓖꓳ ꓟ ꓔꓯ ꓣꓳ ꓒꓵꓽ ꓒ ꓐꓴ ꓟꓶ ꓡꓰ ꓢꓲ꓾ ꓬꓳ-ꓫꓴ ꓡꓰ ꓙꓵꓽˍ ꓟ ꓦꓬꓼ ꓠꓬꓲ ꓗꓪ ꓪꓴ-ꓢ ꓡꓰ ꓬꓲ ꓪꓽ ꓟꓲꓽ ꓙꓬ ꓗꓪ ꓐꓰ ꓐꓶ ꓞꓳ ꓐꓴ ꓔꓯ ꓖꓼ ꓓꓳ ꓗꓷ ꓢꓲ꓾ ꓦꓲ ꓐꓱ ꓖꓳ ꓟ ꓔꓯ ꓡꓯꓼ ꓪ ꓟꓵꓽ ꓗꓪ ꓔꓯꓹ ꓓꓵꓽ ꓡꓰˍ ꓡꓳ꓿ ꓖꓳ ꓡꓱ ꓢꓲ ꓓ-ꓪꓵ ꓦꓬꓼ ꓠꓬꓲ ꓗꓪ ꓛꓲ ꓖꓳ ꓗꓪ ꓓꓹ ꓡꓳ꓿ 46 ꓓ-ꓪꓵ ꓠꓬ ꓪꓴ-ꓢ ꓣꓱꓽ ꓛꓰꓽ ꓟꓶ ꓗꓷ ꓠꓬꓲ꓾ ꓬ-ꓗꓴ ꓬꓲ ꓪꓴ-ꓢ ꓐꓱ ꓶ ꓔꓬ ꓖꓴ ꓦꓲ ꓕꓲ ꓦꓲ ꓫꓬꓹ ꓠꓹ ꓟ ꓓꓰꓽ ꓟꓶ ꓡꓰꓳ꓿ 47 ꓖꓳ ꓡꓱ ꓥ ꓟꓲ ꓪꓴ-ꓢ ꓐꓱ ꓶ ꓦꓲ ꓫꓬꓹ ꓢꓴ ꓠꓬ ꓢꓳ-ꓡꓳ-ꓟꓳ ꓥ ꓡꓳ꓿ 48 ꓟꓴ-ꓡꓳꓹ-ꓬꓰ-ꓢꓴ ꓠꓽ ꓞꓳ ꓤ ꓡꓯꓼ ꓒꓯꓹ ꓡꓰ ꓫꓬꓹ ꓔ ꓟ ꓦꓲ ꓗꓪ ꓟꓽ ꓔꓬ꓿ ꓟꓷ ꓠꓷꓹ ꓝꓸ ꓢꓴ ꓐꓯ ꓗꓷ ꓟ ꓡꓰ ꓐꓰ ꓢꓲ ꓒ ꓡꓰ꓾ 49 ꓟꓴꓽ ꓗꓪ ꓠꓬ ꓥꓪ ꓙꓵꓽ ꓠꓬꓲꓸ ꓕꓲ ꓥ ꓢꓲ꓾ ꓟꓲ ꓠꓯ ꓠꓬ ꓥꓪ ꓛꓲ ꓕꓳꓼ ꓕꓲ ꓥ ꓡꓳ꓿ ꓠꓴ ꓪꓽ ꓡꓰ ꓥꓪ ꓐꓱ ꓶ ꓮ ꓡꓲ ꓡꓴ ꓫꓵꓽ ꓦꓲ ꓫꓬꓹ ꓖꓶˍ ꓐꓯˍ ꓡ? ꓥꓪ ꓪꓴꓽ ꓧꓶ ꓠꓽ ꓖꓴ ꓮ ꓡꓲ ꓕꓲ ꓔꓳꓸ ꓗꓪ ꓥ ꓡ? 50 ꓙꓳˍ ꓟ ꓮꓽ ꓙꓵ ꓠꓬ ꓥꓪ ꓡꓰ ꓚꓰꓼ ꓔꓸ ꓟ ꓟꓽ ꓥ ꓡ?꓾ ꓐꓰ ꓐꓯ ꓗꓷꓳ꓿ 51 ꓪꓴꓸ ꓟꓽ ꓠ ꓢꓲ ꓠꓲꓹ ꓟ ꓩꓴ ꓢꓴˍ ꓐꓰ ꓠꓸ ꓑꓳ ꓐꓳꓽ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓠꓴ ꓪꓽ ꓒꓵꓽ ꓒ ꓐꓴ ꓬꓰˍ ꓟ ꓡꓰ ꓐꓰ ꓬꓰ ꓢꓲ꓾ ꓮ ꓕꓯˍ ꓟꓲ ꓢꓲ-ꓫꓬ-ꓟ-ꓦ ꓔꓯ ꓔꓳꓹˍ ꓡꓳ꓿ 52 ꓠꓴ ꓪꓽ ꓒꓵꓽ ꓒ ꓐꓴ ꓡꓰ ꓟꓽ ꓗꓸ ꓧꓪ ꓗꓷ ꓟ ꓟꓷ ꓠꓷꓹ ꓝꓸ ꓢꓴ ꓮ ꓡꓲ ꓕꓲ ꓣꓳ ꓥ ꓡ? ꓔꓱꓹ ꓜꓳꓽ ꓢꓴ ꓖꓳ ꓕꓲ ꓣꓳ ꓡ ꓠꓹ ꓟ ꓐꓯ ꓖꓶ ꓡ ꓢꓴ ꓐꓴ ꓔꓯˍ ꓟꓲ ꓬꓲ ꓪꓽ ꓡꓰ ꓢꓰꓼ ꓗꓷꓳ꓿ ꓮ ꓟꓶ ꓠꓴ ꓪꓽ ꓠꓬ ꓔꓱꓹ ꓜꓳꓽ ꓢꓴ ꓖꓳ ꓕꓲ ꓣꓳ ꓔꓯ ꓪꓴꓽ ꓜꓽ ꓢꓴˍ ꓐꓰ ꓢꓰꓼ ꓢꓴ ꓒꓬꓱꓼ ꓡꓺꓳ꓿ 53 ꓟꓴꓽ ꓗꓪ ꓝꓲ ꓓꓴ ꓐꓴ ꓡꓰ ꓚ ꓖꓶꓽ ꓡ ꓟ ꓙꓵꓽ ꓗ ꓟꓶ ꓡꓰ ꓢꓲ ꓟꓽ ꓒꓵꓽ ꓛꓳ ꓢꓴˍ ꓟꓲ ꓠꓴ ꓪꓽ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ 54 ꓐꓯ ꓟꓴ ꓜꓲꓼ ꓓꓴ ꓗꓪ ꓠꓬꓲꓸ ꓠꓸ ꓔꓬ ꓢꓴ ꓐꓴ ꓕꓱ ꓟ ꓔꓯ ꓑ ꓙꓽ ꓗꓷ ꓠꓬ꓾ ꓢꓶ-ꓕꓲ-ꓩ ꓔꓯ ꓮꓽ ꓘꓶꓸ ꓠꓲꓹ ꓟ ꓦꓶꓻ ꓢꓲ ꓢꓶꓽ ꓛꓲ ꓶꓼˍ ꓡꓳ꓿ 55 ꓖꓳ ꓡꓱ ꓥ ꓟꓲ ꓢꓶ-ꓕꓲ-ꓩ ꓠꓽ ꓢꓲ-ꓫꓬ-ꓟ-ꓦ ꓐꓲ ꓞꓹ ꓠꓬꓲˍ ꓐꓰ ꓟꓴꓽ ꓗꓪ ꓗꓪ ꓟꓬ ꓔꓱꓹ ꓡꓳꓸ ꓢꓲ꓾ ꓪꓴ-ꓢ ꓬꓲ ꓐꓬꓱꓼ ꓡꓱ ꓡꓱ ꓟ ꓐꓰ ꓬꓰ-ꓢꓴ ꓠꓬ ꓪꓴ-ꓢ ꓡꓯꓼ ꓙ ꓗꓪ ꓦꓰꓼ ꓞꓹ ꓟ ꓔꓯ ꓟꓳˍ ꓡꓳ꓿ 56 ꓖꓳ ꓡꓱ ꓠꓬ ꓬꓲ ꓡꓰ꓾ ꓠꓬꓲ ꓠ꓾ ꓟꓴꓽ ꓗꓪ ꓒꓴ ꓡ ꓟ ꓐꓰ ꓡ-ꓞꓳ-ꓮ-ꓐꓲ ꓠꓬ ꓪꓴ-ꓢ ꓡꓯꓼ ꓙ ꓗꓪ ꓦꓰꓼ ꓞꓹ ꓟ ꓔꓯ ꓥꓪ ꓟꓳˍ ꓡꓳ꓾ ꓐꓯˍ ꓡꓳ꓿ 57 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓡꓯꓼ ꓒꓯꓹ ꓡꓰ ꓠꓸ ꓑꓳ ꓛꓵꓽ ꓔ ꓢꓲ꓾ ꓘꓴꓻ ꓔꓴ ꓡ ꓢꓲ ꓠꓬꓲ ꓕꓲ ꓛꓳꓺꓼ ꓐꓰ ꓢꓶ-ꓕꓲ-ꓩ ꓔꓯ ꓔꓷꓹ ꓣꓴ ꓡ ꓡꓳ꓿ 58 ꓬꓲ ꓪꓽ ꓡꓰ ꓬꓲ ꓔꓯ ꓡꓳ ꓒꓱ ꓠꓱ ꓫꓱꓸ ꓟꓸꓼ ꓗꓪ ꓓꓱꓽ ꓩꓴ ꓗꓷ ꓠꓬ Bꓸ ꓛꓲ ꓡꓰ ꓡꓳꓺˍ ꓡꓳ꓿ ꓢꓷꓸ ꓙ ꓟꓳ ꓙ ꓢꓴ ꓬꓲ ꓪꓽ ꓐꓵ ꓞꓶ ꓔꓯ ꓠꓬ꓾ ꓢꓳ-ꓡꓳ꓾ ꓐꓰ ꓟꓬꓱꓺ ꓔ ꓟ ꓤ ꓖꓴ ꓡꓯꓸ ꓕꓲ ꓣꓳ ꓔꓯ ꓦꓴ ꓠꓬꓹ ꓔꓬ ꓝꓲˍ ꓡꓳ꓿ 59 ꓬꓲ ꓪꓽ ꓡꓰ ꓢꓶ-ꓕꓲ-ꓩ ꓔꓯ Bꓸ ꓛꓲ ꓡꓳ ꓔꓬ ꓕꓯ꓾ ꓢꓶ-ꓕꓲ-ꓩ ꓠꓬ ꓢꓲ ꓒ ꓔꓯ ꓘꓴ ꓢꓲ꓾ ꓢꓲ ꓒ ꓬꓰ-ꓢꓴꓳ꓾ ꓥꓪ ꓦ ꓔꓯ ꓘꓳ ꓣꓴ ꓡꓯ꓾ ꓐꓰ ꓓꓰꓽˍ ꓡꓳ꓿ 60 ꓖꓳ ꓡꓱ ꓠꓬ ꓬꓲ ꓛꓲ ꓝꓲꓸ ꓖꓶ ꓢꓲ꓾ ꓢꓯꓼ ꓓꓽ ꓟ ꓡꓰ ꓘꓴ ꓢꓲ ꓠꓬꓲ꓾ ꓢꓲ ꓒꓽꓳ꓾ ꓝꓴꓲ ꓕꓱ ꓟ ꓠꓬ ꓬꓲ ꓪꓽ ꓔꓯ ꓕꓽ ꓟꓯ ꓝꓲ꓾ ꓐꓯ ꓗꓷ ꓠꓬ ꓬꓲ ꓢꓯꓼ ꓟꓬ ꓞꓷꓹ ꓗꓷꓳ꓿

ꓝꓲ-ꓓꓴ 8

1 ꓢꓶ-ꓕꓲ-ꓩ ꓔꓯ ꓢꓰꓼ ꓠꓹ ꓟ ꓢꓳ-ꓡꓳˍ ꓟꓲ ꓓꓽ ꓔꓳˍ ꓡꓳ꓿ ꓖꓳ ꓕꓲ ꓠꓬꓲ ꓗꓪ ꓙꓱ-ꓣꓴ-ꓢ-ꓡꓱ ꓗꓪ ꓟ ꓘꓴ ꓜꓲꓼ ꓞꓳ ꓐꓴ ꓔꓯ ꓗꓸ ꓧꓪˍ ꓟ ꓬꓲ ꓓꓽ ꓟ ꓓꓳ ꓡ ꓢꓲ꓾ ꓝꓲ ꓓꓴ ꓐꓴ ꓟꓽ ꓥ ꓢꓴ ꓮꓽ ꓙꓵ ꓠꓬ ꓬꓴ-ꓔˍ ꓐꓰ ꓢ-ꓟ-ꓡꓲ ꓕꓲ ꓟꓵ ꓡꓱꓸꓼ ꓗꓪ ꓧꓹ ꓒꓬꓱ ꓙꓰˍ ꓡꓳ꓿ 2 ꓠꓲꓹ ꓒꓵꓽ ꓠꓲꓹ ꓡꓱ ꓢꓴ ꓐꓴ ꓡꓰ ꓢꓶ-ꓕꓲ-ꓩ ꓔꓯ ꓔꓵꓸ ꓬꓰ ꓢꓲ꓾ ꓬꓲ ꓑꓶꓸ ꓓꓴ ꓮꓸ ꓘꓶ ꓠꓲꓹ ꓥꓴˍ ꓡꓳ꓿ 3 ꓢꓳ-ꓡꓳ ꓠꓬ ꓘꓴ ꓜꓲꓼ ꓞꓳ ꓔꓯ ꓒꓬꓹ ꓠ ꓟ꓾ ꓕꓲ ꓦꓲ ꓡꓰ ꓕꓲ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓞꓳ ꓑ ꓤˍ ꓐꓰ ꓤꓽ ꓟꓶ ꓤ ꓔꓯ ꓖꓳꓻ ꓧꓳꓽ ꓙꓰ ꓢꓲ ꓠꓬꓲ ꓐꓱ ꓓꓴꓽ ꓗꓪ ꓐꓱ ꓗꓷˍ ꓡꓳ꓿ 4 ꓧꓹ ꓒꓬꓱ ꓙꓰ ꓢꓴ ꓐꓴ ꓠꓬ ꓬꓲ ꓪꓽ ꓛꓲ ꓬꓰˍ ꓟ ꓟꓵꓽ ꓗꓪ ꓶꓼ ꓓꓳ ꓫꓱꓹ ꓓꓳꓽ ꓚ ꓟꓸ ꓖꓶˍ ꓡꓳ꓿ 5 ꓒꓲ-ꓡꓲˍ ꓟꓲ ꓢ-ꓟ-ꓡꓲ ꓡꓳ ꓒꓱ ꓗꓪ ꓬꓯꓼ ꓙꓰ ꓢꓲ ꓙꓲ-ꓢꓴ ꓠꓬ ꓟꓲ-ꓢ-ꓬ ꓥꓳ꓾ ꓐꓰ ꓚ ꓟꓸ ꓖꓶˍ ꓡꓳ꓿ 6 ꓞꓳ ꓜꓴꓻ ꓞꓳ ꓟꓯꓼ ꓠꓬ ꓒꓲ-ꓡꓲ ꓐꓯˍ ꓟ ꓔꓯ ꓑ ꓙꓽ ꓢꓲ꓾ ꓬꓲ ꓬꓰˍ ꓟ ꓢꓷꓸ ꓡꓰ ꓓꓴ ꓔꓯ ꓟꓳˍ ꓕꓯ꓾ ꓕꓲ ꓠꓲꓹ ꓟˍ ꓡꓰꓽ ꓒꓲ-ꓡꓲ ꓐꓯˍ ꓟ ꓔꓯ ꓬꓲ ꓜꓶ ꓠ ꓠꓹ ꓡꓳ꓿ 7 ꓟꓽ ꓫꓬ ꓠꓲꓽ ꓜꓶꓽ ꓞꓹ ꓢꓴ ꓮꓽ ꓟꓬꓹ ꓣꓳ ꓗꓪ ꓐꓰ꓾ ꓠꓲꓽ ꓠꓬ ꓢꓯꓼ ꓓꓽ ꓟ ꓘꓴꓻ ꓠꓬꓲ ꓐꓰ ꓓꓳꓺ ꓡ ꓡꓳ꓿ ꓛꓲ ꓫꓵꓻ ꓡꓯꓼ ꓫꓵꓻ ꓢꓴˍ ꓐꓰ ꓛꓲ ꓫꓳꓸ ꓮꓽ ꓟꓬꓹ ꓣꓳ ꓔꓯˍ ꓟꓲ ꓫꓬꓹ ꓓꓻ ꓡꓰ ꓠꓬꓲ꓾ 8 ꓖꓳ ꓕꓲ ꓡꓳ ꓒꓱ ꓗꓪ ꓗꓹ ꓛꓲˍ ꓟ ꓮꓽ ꓟꓬꓹ ꓙꓳˍ ꓡꓳ꓿ 9 ꓡꓳ ꓒꓱ ꓖꓳ ꓟ ꓗꓪ꓾ ꓢꓲ-ꓟꓴ꓾ ꓟꓬꓱ ꓔ ꓟ ꓥꓺ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓔꓬ ꓡꓳ꓿ ꓬꓲ ꓠꓬ ꓚꓲ ꓛꓬ ꓔꓯ ꓓꓻ ꓒ ꓓꓽ ꓟ ꓥꓳ꓾ ꓐꓰ ꓓꓳꓹ ꓟꓴ ꓢꓲ ꓢ-ꓟ-ꓡꓲ ꓡ ꓞꓳ ꓔꓯ ꓓꓵꓽ ꓙ ꓮ' ꓡꓰ ꓝꓲˍ ꓡꓳ꓿ 10 ꓬꓲ ꓪꓽ ꓠꓬ ꓪꓴꓽ ꓪꓴꓽ ꓣꓳ ꓣꓳ ꓮꓽ ꓙꓵ ꓬꓲ ꓔꓯ ꓠ ꓠꓹ ꓢꓲ꓾ ꓡ ꓞꓳ ꓕꓱ ꓟ ꓠꓽ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓓꓽ ꓟ ꓥ ꓡꓳ꓾ ꓐꓯˍ ꓡꓳ꓿ 11 ꓢꓲ-ꓟꓴ ꓡꓰ ꓥꓺ ꓟꓬꓱꓽ ꓗꓪ ꓐꓰ ꓬꓲ ꓪꓽ ꓔꓯ ꓟꓶ ꓤ ꓓꓵꓽ ꓙ ꓮ' ꓡꓰ ꓝꓲ ꓠꓬꓲ ꓬꓲ ꓔꓯ ꓠ ꓠꓹˍ ꓡꓳ꓿ 12 ꓖꓳ ꓡꓱ ꓥ ꓟꓲ ꓒꓲ-ꓡꓲ ꓚ ꓟꓸ ꓖꓶˍ ꓟ ꓪꓴ-ꓢ ꓗꓴꓷ ꓶꓼ ꓓꓳ ꓫꓱꓹ ꓓꓳˍ ꓐꓰ꓾ ꓬꓰ-ꓢꓴ ꓙꓲ-ꓢꓴ ꓬꓲ ꓟꓬꓱꓺ ꓔꓯ ꓬꓲ ꓪꓽ ꓙꓵꓻˍ ꓕꓯ꓾ ꓞꓳ ꓑ ꓤˍ ꓟꓲ ꓤꓽ ꓟꓶ ꓤˍ ꓟꓲ ꓖꓳ ꓓꓱꓽ ꓔꓲꓹ ꓟꓶˍ ꓡꓳ꓿ 13 ꓢꓲ-ꓟꓴˍ ꓟꓲ ꓙꓵꓻ ꓢꓲ ꓖꓳ ꓓꓱ ꓔꓲꓹ ꓗꓷ ꓠꓬ ꓒꓲ-ꓡꓲˍ ꓐꓰ ꓔꓬ ꓢꓲ꓾ ꓢꓷꓸ ꓡꓰ ꓓꓴˍ ꓐꓰ ꓪꓽ ꓠꓬꓲˍ ꓟ ꓟꓬꓱꓽ ꓓꓽ ꓟ ꓔꓯ ꓟꓳˍ ꓠꓬꓲ ꓬꓲ ꓓꓵꓽ ꓙ ꓟꓶˍ ꓡꓳ꓿ 14 ꓢ-ꓟ-ꓡꓲ ꓢꓴ ꓠꓬ ꓪꓴ-ꓢ ꓐꓯ ꓘꓶ ꓔꓯ ꓘꓳ ꓣꓴ ꓗꓷ ꓟ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓝꓲ ꓓꓴ ꓐꓴ ꓑ ꓙꓽˍ ꓕꓯ꓾ ꓬꓲ ꓪꓽ ꓡꓰ ꓒꓲ-ꓕꓱˍ ꓐꓰ ꓬꓳ-ꓦ ꓔꓯ ꓢ-ꓟ-ꓡꓲ ꓟꓵꓽ ꓗꓪ ꓝꓲ ꓩꓴ ꓗꓷˍ ꓡꓳ꓿ 15 ꓬꓲ ꓪꓽ ꓖꓳ ꓗꓪ ꓛꓲ ꓬꓰ ꓠꓬ꓾ ꓢꓲ ꓤ ꓐꓴ ꓢꓲ-ꓫꓬ-ꓟ-ꓦ ꓟꓶ ꓠꓹ ꓟ ꓬꓲ ꓪꓽ ꓐꓱ ꓶ ꓪꓽ ꓘꓴ ꓖꓶˍ ꓡꓳ꓿ 16 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓢꓲ ꓒ ꓬꓰ-ꓢꓴ ꓟꓬꓱ ꓗꓪ ꓐꓰ ꓖꓳ ꓓꓱ ꓔꓲꓹ ꓟꓶ ꓕꓲ ꓖꓺꓼ ꓡꓰꓽ ꓥ ꓢꓲ꓾ ꓮꓽ ꓟ ꓕꓯꓽ ꓢꓲ ꓗꓪˍ ꓟꓲ ꓢꓲ-ꓫꓬ-ꓟ-ꓦ ꓟꓽ ꓬꓯꓼ ꓡꓰ ꓢꓰꓽ꓿ 17 ꓒꓲ-ꓕꓱˍ ꓐꓰ ꓬꓳ-ꓦ ꓡꓰ ꓬꓲ ꓪꓽ ꓕꓯ ꓢꓲ ꓗꓪ ꓡꓯꓼ ꓒꓯꓹ ꓚꓰꓹ ꓖꓶ ꓗꓷ ꓠꓬ꓾ ꓬꓲ ꓪꓽ ꓠꓽ ꓢꓲ-ꓫꓬ-ꓟ-ꓦ ꓟꓶ ꓡꓰꓳ꓿ 18 ꓝꓲ ꓓꓴ ꓐꓴ ꓡꓯꓼ ꓒꓯꓹ ꓚꓰꓹˍ ꓟ ꓗꓪ ꓐꓰ ꓢꓲ-ꓫꓬ-ꓟ-ꓦ ꓖꓶ ꓡ ꓟ ꓔꓯ ꓢꓲ-ꓟꓴ ꓟꓳꓻ ꓗꓷ ꓠꓬ꓾ ꓝꓲ ꓓꓴ ꓐꓴ ꓔꓯ ꓒꓴ ꓖꓶ ꓢꓲ꓾ 19 ꓥꓪ ꓡꓰ ꓮꓽ ꓟ ꓔꓯ ꓡꓯꓼ ꓒꓯꓹ ꓚꓰꓹ ꓖꓶˍ ꓠꓬ꓾ ꓢꓲ-ꓫꓬ-ꓟ-ꓦ ꓬꓲ ꓟꓶꓻ ꓠꓹ ꓟ꓾ ꓪꓽ ꓠꓬꓲˍ ꓟ ꓕꓱ ꓟ ꓥꓪ ꓔꓯˍ ꓟꓲ ꓖꓶ ꓡꓯ꓾ ꓐꓯˍ ꓡꓳ꓿ 20 ꓖꓳ ꓕꓯ ꓒꓲ-ꓕꓱ ꓡꓰ ꓬꓲ ꓔꓯ꓾ ꓠꓴ ꓠꓬ ꓒꓴ ꓗꓪ ꓐꓰ ꓪꓴ-ꓢ ꓬꓲ ꓡꓯꓼ ꓫꓴ ꓪꓴꓻ ꓟꓶ ꓓꓻ ꓥꓳ꓾ ꓐꓰ ꓓꓵꓽ ꓙˍ ꓠꓬꓲ꓾ ꓠꓴ ꓒꓴ ꓠꓬ ꓠꓴˍ ꓐꓰ ꓕꓲ ꓛꓳꓺꓼ ꓟꓶꓽ ꓡꓰ ꓝꓲ꓿ 21 ꓪꓴ-ꓢ ꓟꓲꓽ ꓙꓬ ꓗꓪ ꓠꓴ ꓠꓲꓹ ꓟ ꓟꓽ ꓔꓱꓹ ꓠꓬꓲ꓾ ꓣꓱꓽ ꓙ ꓟꓬꓱꓽ ꓕꓱ ꓟ ꓗꓪ ꓠꓴ ꓟꓶꓺ ꓠꓹ ꓟ ꓣꓷꓽ ꓟ ꓙꓳ꓿ 22 ꓟꓽ ꓙꓲˍ ꓟ ꓕꓱ ꓟ ꓗꓪ ꓐꓰ ꓠꓴ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓪꓴ-ꓢ ꓔꓯ ꓪꓽ ꓘꓴˍ ꓠꓬ꓾ ꓠꓴ ꓠꓲꓹ ꓟ ꓗꓪ ꓕꓱ ꓡꓱ ꓓꓵꓽ ꓙˍ ꓟ ꓔꓯ ꓖꓽ ꓖꓶ ꓡꓺˍ ꓟꓽ ꓢꓷ꓿ 23 ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓘꓪꓽˍ ꓟ ꓐꓲ ꓞꓹ ꓢꓴ ꓥ ꓢꓲ꓾ ꓝꓴꓲ ꓡꓰ ꓞꓳꓹ ꓞꓹ ꓢꓴ ꓥ ꓟ ꓔꓯ ꓥꓪ ꓡꓳꓸ ꓓꓳ ꓡ ꓡꓳ꓾ ꓐꓯ ꓖꓶˍ ꓡꓳ꓿ 24 ꓢꓲ-ꓟꓴ ꓡꓰ ꓒꓳꓹ ꓖꓶ ꓢꓲ꓾ ꓠꓴ ꓐꓯˍ ꓟ ꓕꓱ ꓟ꓾ ꓕꓲ ꓫꓵꓽˍ ꓟꓲ ꓥꓪ ꓔꓯ ꓟꓽ ꓗꓷ ꓡꓰ ꓠꓹ ꓟ ꓥꓪ ꓐꓱ ꓶ ꓢꓲ ꓒ ꓔꓯ ꓪꓽ ꓘꓴ ꓙ꓾ ꓐꓯˍ ꓡꓳ꓿ 25 ꓒꓲ-ꓕꓱˍ ꓐꓰ ꓬꓳ-ꓦ ꓠꓬ ꓖꓳ ꓗꓪ ꓢꓷꓸ ꓙ ꓟꓳ ꓙ ꓢꓲ꓾ ꓢꓲ ꓒ ꓐꓯ ꓘꓶꓽ ꓟꓸ ꓖꓶ ꓗꓷ ꓠꓬ꓾ ꓢ-ꓟ-ꓡꓲ ꓡ ꓞꓳ ꓮꓽ ꓟꓬꓹ ꓘꓹ ꓗꓪ ꓶꓼ ꓓꓳ ꓫꓱꓹ ꓓꓳ ꓕꓱ ꓡꓱ ꓚ ꓟꓸ ꓕꓱ ꓡꓱ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰˍ ꓡꓳ꓿ 26 ꓖꓳ ꓕꓯ ꓢꓲ ꓒ ꓬꓲ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓠꓬ ꓒꓲ-ꓡꓲ ꓔꓯ ꓫ ꓕꓱ ꓡ ꓢꓲ꓾ ꓔꓴꓺ꓾ ꓖꓴ ꓟꓶꓸ ꓔꓯ ꓟꓳꓸ ꓙꓰ ꓢꓲ ꓠꓬꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓖꓷ-ꓢ ꓗꓪ ꓬꓯꓼ ꓙꓰˍ ꓟ ꓡꓲ ꓛꓲ ꓙ ꓖꓴ ꓗꓪ ꓙꓰ꓾ ꓐꓯ ꓖꓶ ꓡ ꓡꓳ꓿ 27 ꓖꓳ ꓡꓱ ꓠꓬ ꓬꓲ ꓙꓽ ꓖꓶ ꓢꓲ ꓙꓰ ꓠꓬ꓾ ꓠꓬꓲ ꓠꓹ꓾ ꓬꓲ-ꓕꓲ-ꓬ-ꓑꓷꓽ ꓪ ꓔꓲ ꓟꓺ ꓘꓷ-ꓠ-ꓓ-ꓢꓲ ꓬꓲ ꓒꓵꓽ ꓶꓽ ꓮꓽ ꓙꓵ ꓔꓯ ꓙꓵꓽ ꓢꓴ ꓬꓲ-ꓕꓲ-ꓬꓹ-ꓑꓷ ꓞꓳ ꓠꓸ ꓕꓲ ꓣꓳ ꓔꓯ ꓙꓻ ꓖꓴ ꓗꓪ ꓔꓳꓹ ꓜꓳꓽˍ ꓡꓳ꓿ ꓬꓲ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓪꓴꓸ ꓓꓵ ꓕꓱꓼˍ ꓐꓰ ꓡꓻ ꓗꓷ ꓟ ꓥ ꓢꓲ꓾ 28 ꓬꓲ ꓬꓲꓼ ꓙꓰˍ ꓕꓯ ꓮꓸ ꓟꓴ ꓖꓽ ꓡꓲꓽ ꓗꓪ ꓠꓬꓲꓸ ꓠꓸ ꓢꓲ ꓠꓬꓲ꓾ ꓟꓷ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓕꓳ ꓶ ꓵ ꓔꓬ ꓡꓳ꓿ 29 ꓢꓲ-ꓫꓬ-ꓟ-ꓦ ꓡꓰ ꓒꓲ-ꓡꓲ ꓔꓯ꓾ ꓮꓸ ꓟꓴ ꓖꓽ ꓡꓲꓽ ꓖꓳ ꓟ ꓒ ꓕꓲꓺꓼ ꓗꓪ ꓠꓶꓽ ꓙꓰ꓾ ꓐꓰ ꓐꓯ ꓖꓶˍ ꓡꓳ꓿ 30 ꓒꓲ-ꓡꓲ ꓖꓳ ꓗꓪ ꓔꓷꓹ ꓛꓲ ꓬꓰˍ ꓕꓯ꓾ ꓟꓷ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓕꓳ ꓶ ꓵ ꓔꓬ ꓟ ꓔꓯ ꓬꓲ ꓑ ꓙꓽ ꓠꓬ꓾ ꓠꓴ ꓵ ꓔꓬ ꓟ ꓔꓯ ꓠꓴ ꓙꓽ ꓜꓲꓼˍ ꓡ? ꓐꓰ ꓠ ꓠꓬꓲˍ ꓡꓳ꓿ 31 ꓬꓲ ꓡꓰ꓾ ꓥꓪ ꓔꓯ ꓒꓶꓻ ꓟꓸ ꓖꓶ ꓢꓴ ꓟꓽ ꓙꓳ ꓠꓬ ꓥꓪ ꓮ ꓡꓲ ꓙꓽ ꓜꓲꓼ ꓐ ꓡ ꓢꓰꓽ꓾ ꓐꓯˍ ꓡꓳ꓿ ꓖꓳ ꓕꓯ ꓬꓲ ꓠꓬ ꓒꓲ-ꓡꓲ ꓔꓯ꓾ ꓮꓸ ꓟꓴꓽ ꓖꓽ ꓡꓲ ꓗꓪ ꓓꓯ ꓡ ꓢꓲ ꓬꓲˍ ꓐꓰ ꓕꓲ ꓪꓺꓼ ꓠꓬꓲꓸ ꓠꓸ ꓠꓹ ꓟ ꓓꓰꓽˍ ꓡꓳ꓿ 32 ꓬꓲ-ꓕꓲ-ꓬ-ꓑꓷ ꓞꓳ ꓠꓸ ꓵ ꓔꓬ ꓟ ꓕꓳ ꓶ ꓖꓳ ꓕꓲ ꓖ ꓠꓬ꓾ ꓬꓲ ꓔꓯ ꓠꓬ ꓮ ꓣꓳˍ ꓡꓰ ꓐꓰ ꓢꓰꓼ ꓖꓴ ꓗꓪ ꓢꓲ ꓙꓰꓳ꓿ ꓮ ꓣꓳ ꓠꓬ ꓟꓵ ꓞꓶꓽ ꓢꓴ ꓟꓲꓽ ꓙꓬ ꓗꓪ ꓢꓯꓼ ꓟꓽ ꓟꓶꓻ ꓟ ꓡꓰ ꓐꓰ꓾ ꓬꓲ ꓥ ꓟꓲ ꓟꓷ ꓠꓷꓹ ꓟꓽ ꓧꓽ꓿ 33 ꓬꓲ ꓔꓯ ꓫꓸ ꓔꓳ ꓫꓸ ꓒꓯꓼ ꓬꓰ ꓖꓶˍ ꓟ ꓝꓲꓸ ꓗꓪ꓾ ꓢꓴ ꓡꓰ ꓬꓲ ꓔꓯ ꓔꓱꓹ ꓜꓳꓽˍ ꓟ ꓐꓯ ꓟꓴ ꓟꓽ ꓘꓶ ꓖꓶ꓿ ꓬꓲ ꓢꓯꓼ ꓟꓬ ꓔꓯ ꓠꓬ ꓟꓲ ꓠꓯ ꓗꓪ ꓐꓰ ꓣꓴꓻ ꓔꓯꓹ ꓙꓰ ꓠꓬꓲ꓾ ꓬꓲ ꓞꓲꓼ ꓤ ꓡꓯꓹ ꓤ ꓚ ꓟꓲꓽ ꓮꓽ ꓟ ꓚ ꓗꓴꓸ ꓢꓰꓽ꓾ ꓐꓰ ꓐꓳ ꓔ ꓟ ꓕꓲ ꓖ ꓗꓪ ꓥ ꓡꓳ꓿ 34 ꓒꓵꓽ ꓶꓽ ꓙꓵꓽ ꓒ ꓞꓳ ꓠꓸ ꓡꓰ ꓒꓲ-ꓡꓲ ꓔꓯ꓾ ꓟꓷ ꓠꓷꓹ ꓝꓸ ꓢꓴ ꓡꓰ ꓐꓯˍ ꓟ ꓕꓱ ꓟ ꓠꓬ ꓮꓽ ꓟ ꓔꓯ ꓖꓴ ꓔ ꓡ? ꓬꓲ ꓚꓲ ꓛꓬ ꓔꓯ ꓖꓴˍ ꓟ ꓥ ꓡ? ꓥ ꓠꓬ ꓠꓱꓸ ꓐꓯꓼ ꓢꓴ ꓔꓯ ꓖꓴˍ ꓟ ꓥ ꓡ? ꓥꓪ ꓔꓯ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ 35 ꓖꓳ ꓕꓯ ꓒꓲ-ꓡꓲ ꓠꓬ ꓘꓶꓽ ꓒꓴ ꓢꓲ꓾ ꓕꓳ ꓶ ꓖꓳ ꓕꓲ ꓖ ꓗꓪ ꓐꓰ ꓪꓴꓸ ꓔꓴ ꓢꓲ ꓠꓬꓲ꓾ ꓬꓲ ꓔꓯ ꓬꓰ-ꓢꓴ ꓟꓸ ꓟꓲ ꓚ ꓟꓸ ꓖꓶˍ ꓡꓳ꓿ 36 ꓬꓲ ꓪꓽ ꓙ ꓖꓴ ꓗꓪ ꓙꓰ ꓔꓬ ꓕꓯ꓾ ꓬꓲꓻ ꓙꓬ ꓙꓳˍ ꓟ ꓕꓲ ꓔꓳꓸ ꓗꓪ ꓛꓲ ꓬꓰ ꓠꓬ꓾ ꓒꓵꓽ ꓶ ꓙꓵꓽ ꓒ ꓞꓳ ꓠꓸ ꓡꓰ꓾ ꓕꓱꓻꓽ꓾ ꓬꓲꓻ ꓙꓬ꓾ ꓥꓪ ꓖꓳ ꓓꓱ ꓔꓲꓹ ꓠꓹ ꓟ ꓗꓪ ꓮꓸ ꓫꓵꓽ ꓗꓽ ꓔ ꓓꓴ ꓙꓳˍ ꓡ?꓾ ꓐꓯˍ ꓡꓳ꓿ 37 ꓒꓲ-ꓡꓲ ꓡꓰ꓾ ꓠꓴ ꓕꓲ ꓠꓲꓹ ꓟ ꓡꓱꓸꓼ ꓙꓵꓻˍ ꓠꓬ ꓓꓻ ꓥꓳ꓾ ꓐꓯ ꓖꓶˍ ꓡꓳ꓿ ꓬꓲ ꓒꓳꓹ ꓖꓶ ꓢꓲ꓾ ꓙꓲ-ꓢꓴ ꓬꓰ-ꓢꓴ ꓠꓬ ꓪꓴ-ꓢ ꓮ ꓐꓲ ꓥ ꓟ ꓥꓪ ꓙꓵˍ ꓡꓳ꓾ ꓐꓯˍ ꓡꓳ꓿ 38 ꓖꓳ ꓡꓱ ꓠꓬ ꓮꓸ ꓟꓴ ꓖꓽ ꓡꓲꓽ ꓔꓯ ꓠꓽ ꓡꓰ ꓝꓲ ꓠꓹ ꓟ ꓬꓲ ꓕꓵꓼ ꓪ ꓖꓶ ꓢꓲ꓾ ꓒꓲ-ꓡꓲ ꓐꓰ ꓒꓵꓽ ꓶꓽ ꓙꓵꓽ ꓒ ꓞꓳ ꓠꓸ ꓬꓲ ꓪꓽ ꓠꓬꓲꓽ ꓣꓳ ꓠꓬ ꓬꓲꓻ ꓙꓬ ꓠꓯꓸꓼ ꓗꓪ ꓬꓯꓼ ꓙꓰ ꓢꓲ ꓠꓬꓲ ꓒꓲ-ꓡꓲ ꓡꓰ ꓬꓲ ꓔꓯ ꓖꓳ ꓓꓱ ꓔꓲꓹ ꓖꓶˍ ꓡꓳ꓿ 39 ꓬꓲ ꓪꓽ ꓬꓲꓻ ꓙꓬ ꓗꓪ ꓐꓰ ꓓꓯ ꓡ ꓕꓯ꓾ ꓢꓲ ꓒ ꓬꓲ ꓦ ꓡꓰ ꓒꓲ-ꓡꓲ ꓔꓯ ꓞꓼ ꓐꓰ ꓔꓯꓹ ꓙꓰ ꓠꓬꓲ꓾ ꓒꓵꓽ ꓶꓽ ꓙꓵꓽ ꓒ ꓞꓳ ꓠꓸ ꓠꓬ ꓬꓲ ꓔꓯ ꓝꓮꓲ ꓟꓽ ꓟꓳꓻ ꓗꓷ ꓡꓰꓳ꓿ ꓒꓵꓽ ꓶ ꓙꓵ ꓒ ꓬꓲ ꓠꓽ ꓠꓲꓹ ꓒꓴ ꓗꓹ ꓛꓲ ꓠꓬꓲˍ ꓐꓰ ꓓꓴꓻ ꓓꓳ ꓝꓸ ꓙꓰˍ ꓡꓳ꓿ 40 ꓒꓲ-ꓡꓲ ꓠꓽ ꓬ-ꓢꓳꓽ-ꓔꓴ ꓡꓳ ꓒꓱ ꓗꓪ ꓛꓲ ꓬꓰ ꓢꓲ꓾ ꓖꓳ ꓕꓲ ꓟꓵꓽ ꓗꓪ ꓚꓳ ꓙꓰ ꓠꓬ꓾ ꓢꓲ-ꓢ-ꓡꓰ ꓗꓪ ꓛꓲ꓾ ꓡꓳ ꓒꓱ ꓮꓽ ꓙꓵ ꓟ ꓗꓪ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶˍ ꓡꓳ꓿

ꓝꓲ-ꓓꓴ 9

1 ꓢꓳ-ꓡꓳ ꓠꓬ ꓬꓲ ꓖꓳ ꓡꓱ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓚꓳꓹ ꓖꓶˍ ꓟ ꓐꓰ ꓢꓰꓼ ꓠꓹ ꓟ ꓐꓯ ꓢꓲ꓾ ꓔꓲ ꓒ ꓓꓽ ꓟ ꓔꓯ ꓙꓰ ꓢꓲ ꓠꓬꓲ꓾ 2 ꓔ-ꓟ-ꓢꓷ ꓗꓪ ꓟ ꓜꓲꓼ ꓦꓲ ꓗꓪ ꓞꓳ ꓑꓸ ꓤˍ ꓟꓲ꓾ ꓤꓽ ꓟꓶ ꓤˍ ꓟꓲ꓾ ꓙꓵꓻ ꓚꓱꓹ ꓕꓱ ꓟ ꓔꓯ ꓚ ꓢꓴ ꓧꓪ ꓟꓶ ꓗꓷ ꓠꓬ꓾ ꓞꓳꓹ ꓢꓲ ꓙꓱ-ꓣꓴ-ꓢ-ꓡꓱ ꓗꓪ ꓧꓳꓽ ꓔꓯꓹ ꓡ ꓠꓹ ꓟ ꓕꓵꓼ ꓪ ꓕꓳ ꓶ ꓓꓰꓽˍ ꓡꓳ꓿ 3 ꓢꓳ-ꓡꓳ ꓙꓰ ꓢꓲ ꓔ-ꓟ-ꓢꓷ ꓒ ꓕꓲ ꓗꓪ ꓛꓲ ꓬꓰ ꓠꓬ꓾ ꓞꓼ ꓐꓰ ꓟꓴꓽ ꓗꓪ ꓗꓪ ꓐꓰ ꓠꓬꓲ ꓟꓳꓻ ꓓꓴ ꓬꓲ ꓚꓳ ꓡꓳ ꓗꓪ ꓤꓰꓽ ꓩꓴ ꓡ ꓡꓳ꓿ 4 ꓟꓲ ꓛꓬ ꓗꓪ ꓬꓲ ꓓꓳꓽ ꓡꓰ ꓠꓬ ꓬꓲ ꓔꓯ꓾ ꓢꓳ-ꓡꓳꓺꓳ꓾ ꓢꓳ-ꓡꓳꓺꓳ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓗꓸ ꓧꓪˍ ꓡ? ꓐꓰ ꓐꓯˍ ꓟ ꓢꓯꓼ ꓑ ꓙꓽˍ ꓡꓳ꓿ 5 ꓖꓳ ꓡꓱ ꓠꓬ ꓬꓲ ꓡꓰ꓾ ꓢꓲ ꓒꓽꓳ꓾ ꓠꓴ ꓮꓽ ꓟ ꓥ ꓡ?꓾ ꓐꓰ ꓠ ꓠꓬꓲ ꓗꓷ ꓠꓬ꓾ ꓥꓪ ꓠꓬ ꓠꓴ ꓡꓰ ꓗꓸ ꓧꓪ ꓔꓬ ꓟ ꓬꓰ-ꓢꓴ ꓥ ꓡꓳ꓿ 6 ꓔꓴ ꓢꓲ ꓡꓳ ꓒꓱ ꓗꓪ ꓓꓵꓽ ꓙꓰ꓿ ꓠꓴ ꓮ ꓡꓲ ꓬꓰ ꓠ ꓗꓹ ꓟ ꓠꓴ ꓔꓯ ꓐꓯ ꓖꓶ ꓡ ꓢꓴ ꓙꓳˍ ꓥꓳ꓾ ꓐꓯ ꓖꓶˍ ꓡꓳ꓿ 7 ꓬꓲˍ ꓐꓰ ꓕꓲ ꓛꓳꓺꓼ ꓫꓱꓽ ꓢꓴ ꓠꓬ ꓢꓯꓼ ꓔꓯ ꓑ ꓙꓽˍ ꓟꓲ꓾ ꓮꓸ ꓫꓵˍ ꓟꓲ ꓟꓽ ꓟꓳ ꓠꓬꓲ꓾ ꓫꓸ ꓕꓱ ꓟꓽ ꓐꓰꓼ ꓡ ꓡ ꓐꓰ ꓦꓰꓼ ꓡꓰˍ ꓡꓳ꓿ 8 ꓢꓳ-ꓡꓳ ꓠꓽ ꓟꓲ ꓛꓬ ꓗꓪ ꓐꓰ ꓔꓴ ꓡ ꓢꓲ ꓟꓬ ꓢꓶꓽ ꓒꓴ ꓠꓬꓲ ꓠꓬ꓾ ꓮ ꓔꓲꓸˍ ꓟꓲ ꓠꓬꓲ ꓟꓽ ꓟꓳ ꓠꓬꓲ꓾ ꓢꓴ ꓡꓰ ꓬꓲ ꓡꓯꓼ ꓒꓯꓹ ꓗꓪ ꓖꓳꓻ ꓢꓲ ꓔ-ꓟ-ꓢꓷ ꓗꓪ ꓧꓳꓽ ꓛꓲ ꓬꓰˍ ꓡꓳ꓿ 9 ꓖꓳ ꓗꓪ ꓬꓲ ꓠꓬ ꓠꓬꓲ ꓟꓽ ꓟꓳꓻ ꓟꓳ꓾ ꓟꓽ ꓜꓽ ꓟꓽ ꓓꓳꓻ ꓢ ꓠꓬꓲ ꓔꓬ ꓡꓳ꓿ 10 ꓖꓳ ꓕꓯ ꓔ-ꓟ-ꓢꓷ ꓗꓪ꓾ ꓮ-ꓠ-ꓠꓲ-ꓬ ꓟꓬꓱ ꓔ ꓟ ꓢꓲ ꓤ ꓕꓲ ꓣꓳ ꓔꓬ ꓡꓳ꓿ ꓦ ꓐꓬꓱꓽ ꓗꓪ ꓢꓲ ꓒ ꓡꓰ ꓬꓲ ꓔꓯ꓾ ꓮ-ꓠ-ꓠꓲ-ꓬꓼꓳ꓾ ꓐꓯˍ ꓕꓯ꓾ ꓬꓲ ꓡꓰ꓾ ꓢꓲ ꓒꓽꓳ꓾ ꓥꓪ ꓕꓻ ꓔꓬ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 11 ꓢꓲ ꓒ ꓡꓰ ꓬꓲ ꓔꓯ꓾ ꓔꓴ ꓢꓲ꓾ ꓔꓱꓹˍ ꓟ꓾ ꓐꓰ ꓟꓬꓱꓺ ꓔ ꓟ ꓙ ꓖꓴ ꓗꓪ ꓙꓰ ꓢꓲ ꓬꓴ-ꓔ ꓦꓲ ꓗꓪ ꓕ-ꓢꓴꓽ ꓢꓴ ꓢꓳ-ꓡꓳ ꓟꓬꓱ ꓔ ꓟ ꓕꓲ ꓣꓳ ꓔꓯ ꓧꓪ ꓠ ꓠꓬꓲ ꓬꓰ꓿ ꓬꓲ ꓠꓽ ꓖꓳ ꓗꓪ ꓪꓽ ꓘꓴ ꓔꓬ ꓡꓳ꓿ 12 ꓬꓲ ꓔꓯ ꓠꓬꓲ ꓟꓳ ꓡ ꓝꓲ ꓠꓹ ꓟ꓾ ꓮ-ꓠ-ꓠꓲ-ꓬ ꓟꓬꓱ ꓔ ꓟ ꓕꓲ ꓣꓳ ꓓꓵꓽ ꓡ ꓢꓲ꓾ ꓬꓲ ꓕꓯꓽ ꓢꓲ ꓗꓪ ꓡꓯꓼ ꓒꓯꓹ ꓚꓰꓹ ꓡ ꓟ ꓦ ꓐꓬꓱꓽ ꓟꓳꓻ ꓗꓷꓳ꓾ ꓐꓯˍ ꓡꓳ꓿ 13 ꓮ-ꓠ-ꓠꓲ-ꓬ ꓡꓰ꓾ ꓢꓲ ꓒꓽꓳ꓾ ꓡ ꓞꓳ ꓕꓱ ꓕꓲ ꓣꓳ ꓡꓰ ꓙꓱ-ꓣꓴ-ꓢ-ꓡꓱ ꓗꓪ ꓟ ꓠꓴ ꓔꓯ ꓦ ꓡꓱ ꓢꓴ ꓐꓴ ꓔꓯ ꓥꓶˍ ꓟ ꓮ ꓡꓲ ꓛꓲ ꓬꓰ ꓖꓶ ꓗꓷ ꓟ꓾ ꓮꓽ ꓟꓬꓹ ꓣꓳ ꓗꓪ ꓐꓰ ꓥꓪ ꓑ ꓙꓽ ꓗꓷꓳ꓿ 14 ꓕꓱ ꓗꓪˍ ꓟꓲ ꓠꓴ ꓟꓬꓱꓺ ꓔꓯ ꓦ ꓡꓱ ꓢꓴ ꓥ ꓕ ꓑꓳ ꓔꓯ ꓞꓳꓹ ꓠ ꓟ꓾ ꓬꓲ ꓠꓬ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓗꓪ ꓐꓰ ꓙꓵꓽ ꓪ ꓙꓳˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 15 ꓖꓳ ꓡꓱ ꓥ ꓟꓲ ꓢꓲ ꓒ ꓡꓰ ꓬꓲ ꓔꓯ꓾ ꓠꓴ ꓙꓰ꓾ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓞꓳ ꓫꓵꓽ ꓐꓴˍ ꓐꓰ ꓪ ꓔꓲ ꓐꓴˍ ꓐꓰ꓾ ꓬꓲ-ꓢꓷ-ꓡꓰ ꓡ ꓞꓳ ꓟꓲꓽ ꓙꓬ ꓗꓪ ꓥꓪ ꓟꓬꓱꓺ ꓚ ꓟꓸ ꓖꓶ ꓢꓴ ꓬꓰ ꓠꓹ ꓟ꓾ ꓥꓪ ꓡꓰ ꓢꓲꓺ ꓔ ꓟ ꓡꓴꓻ ꓥ ꓡꓳ꓿ 16 ꓥꓪ ꓟꓬꓱꓺ ꓑꓶꓸ ꓓꓴ ꓬꓲ ꓮ ꓟꓬ ꓛꓲ ꓫꓸ ꓙꓵ ꓠ ꓗꓹ ꓟ ꓥꓪ ꓬꓲ ꓔꓯ ꓟꓳꓸ ꓖꓶˍ ꓥꓳ꓾ ꓐꓯˍ ꓡꓳ꓿ 17 ꓖꓳ ꓕꓯ ꓮ-ꓠ-ꓠꓲ-ꓬ ꓙꓰ ꓢꓲ ꓦꓲ ꓗꓪ ꓓꓵꓽ ꓡꓰ ꓠꓬ꓾ ꓬꓲ ꓕꓯꓽ ꓢꓲ ꓗꓪ ꓡꓯꓼ ꓒꓯꓹ ꓚꓰꓹ ꓖꓶ ꓢꓲ꓾ ꓮ ꓬꓲꓼ ꓢꓳ-ꓡꓳꓺꓳ꓾ ꓠꓴ ꓠꓬꓲ ꓟꓳꓻ ꓡ ꓢꓲ ꓢꓲ-ꓫꓬ-ꓟ-ꓦ ꓐꓲ ꓡꓰ ꓠ ꓟ꓾ ꓠꓴ ꓡꓻˍ ꓟ ꓙ ꓖꓴ ꓗꓪ ꓠꓴ ꓔꓯ ꓟꓳꓸ ꓖꓶ ꓡ ꓢꓴ ꓢꓲ ꓒ ꓬꓰ-ꓢꓴ ꓡꓰ ꓥꓪ ꓔꓯ ꓝꓲ ꓩꓴ ꓡ ꓡꓳ꓾ ꓐꓯ ꓖꓶˍ ꓡꓳ꓿ 18 ꓖꓳ ꓕꓯ ꓞꓼ ꓐꓰ ꓬꓲ ꓟꓬ ꓢꓶꓽ ꓗꓪ ꓐꓰ ꓬꓲ ꓓꓵꓼˍ ꓡꓰ ꓐꓰ ꓗꓹ ꓟ ꓕꓲ ꓫꓵꓽ ꓞꓰ ꓡꓰ ꓠꓬ꓾ ꓬꓲ ꓝꓮꓲ ꓠꓬꓲ ꓟꓳꓻ ꓡꓺꓳ꓿ ꓖꓳ ꓡꓱ ꓠꓬ ꓬꓲ ꓔꓴ ꓡ ꓢꓲ꓾ ꓖꓳ ꓓꓱ ꓔꓲꓹ ꓟꓶ ꓢꓲ ꓠꓬꓲ꓾ ꓜꓻ ꓜꓽ ꓗꓷ ꓠꓬ ꓢꓯꓼ ꓙꓳ ꓡ ꓡꓳ꓿ 19 ꓬꓲ ꓠꓽ ꓔ-ꓟ-ꓢꓷ ꓗꓪ ꓟ ꓢꓲ ꓤ ꓐꓴˍ ꓐꓰ ꓮꓽ ꓟꓬꓹ ꓠꓬꓲ ꓔꓬ ꓢꓲ꓾ 20 ꓜꓲꓼ ꓦꓲ ꓮꓽ ꓙꓵ ꓟ ꓗꓪ꓾ ꓬꓰ-ꓢꓴ ꓠꓽ ꓪꓴ-ꓢ ꓮ ꓐꓲ ꓥꓳ꓾ ꓐꓰ ꓟꓸ ꓖꓶˍ ꓡꓳ꓿ 21 ꓬꓲ ꓔꓯ ꓑ ꓙꓽ ꓢꓴ ꓮꓽ ꓙꓵ ꓠꓬ ꓓꓵꓽ ꓙ ꓟꓶ ꓢꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓬꓰ-ꓢꓴ ꓟꓬꓱꓺ ꓔꓯ ꓣꓷꓠꓸ ꓢꓴ ꓐꓴ ꓔꓯ ꓢꓰꓼ ꓢꓴ ꓠꓬ ꓕꓱ ꓕꓲ ꓣꓳ ꓟꓽ ꓥ ꓡ? ꓖꓳ ꓟˍ ꓡꓰ ꓟꓽ ꓞꓲ꓾ ꓬꓲ ꓠꓬ ꓬꓲ ꓪꓽ ꓔꓯ ꓞꓳꓹ ꓢꓲ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓟꓲꓽ ꓙꓬ ꓗꓪ ꓧꓳꓽ ꓙꓰ ꓠ ꓟ ꓕꓱ ꓗꓪ ꓡꓻ ꓟ ꓟꓽ ꓥ ꓡ? ꓐꓰ ꓐꓯ ꓡꓯ ꓘꓳˍ ꓡꓳ꓿ 22 ꓖꓳ ꓡꓱ ꓥ ꓟꓲ ꓢꓳ-ꓡꓳ ꓠꓬ ꓟꓬꓽ ꓠꓬꓲ ꓟꓸ ꓟꓲ ꓚ ꓪꓽ ꓠꓬꓲ ꓡ ꓢꓲ꓾ ꓔ-ꓟ-ꓢꓷ ꓗꓪ ꓔꓬ ꓟ ꓬꓴ-ꓔ ꓡ ꓞꓳ ꓔꓯ꓾ ꓬꓰ-ꓢꓴ ꓕꓱ ꓕꓲ ꓣꓳ ꓠꓬ ꓚꓵ ꓚꓵ ꓙꓲ-ꓢꓴ ꓥ ꓟ ꓬꓲꓸ ꓗꓸ ꓚꓵ ꓙꓳ ꓙꓳ ꓟꓸ ꓖꓶˍ ꓡꓳ꓿ 23 ꓮꓽ ꓟꓬꓹ ꓠꓬꓲ ꓗꓸ ꓠꓯꓸ ꓬꓴ-ꓔ ꓡ ꓞꓳ ꓠꓬ ꓬꓲ ꓔꓯ ꓢꓰꓼ ꓠꓹ ꓟ ꓖꓪ ꓙꓱ ꓡꓯ ꓘꓳˍ ꓡꓳ꓿ 24 ꓖꓳ ꓡꓱ ꓥ ꓟꓲ ꓬꓲ ꓪꓽ ꓚꓴꓽ ꓬꓲꓹ ꓔꓯ ꓢꓳ-ꓡꓳ ꓢꓷꓸ ꓡꓰˍ ꓡꓳ꓿ ꓬꓴ-ꓔ ꓡ ꓞꓳ ꓐꓴ ꓠꓬ ꓢꓳ-ꓡꓳ ꓔꓯ ꓢꓰꓼ ꓟꓶ ꓠ ꓟ꓾ ꓡꓳ ꓒꓱ ꓗ ꓘꓶꓽ ꓮꓽ ꓙꓵ ꓗꓪ ꓟꓳꓼ ꓡꓳ ꓢ ꓘꓪ ꓦꓴꓺ ꓠꓬꓹ ꓡꓳ꓿ 25 ꓖꓳ ꓡꓱ ꓥ ꓟꓲ ꓬꓲ ꓢꓲ ꓤ ꓐꓴ ꓡꓰ ꓢ ꓘꓪ ꓕꓯ ꓬꓲ ꓔꓯ꓾ ꓘꓹ ꓕꓴ ꓗꓪ ꓗꓶ ꓢꓲ ꓠꓬꓲ ꓡꓳ ꓒꓱ ꓚꓬꓹ ꓗꓪ ꓐꓰ ꓠꓱꓸ ꓫꓱꓸ ꓗꓪ ꓩꓴ ꓬꓯꓼ ꓗꓷˍ ꓡꓳ꓿ 26 ꓬꓲ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓛꓲ ꓬꓰ ꓢꓲ꓾ ꓢꓲ ꓤ ꓐꓴˍ ꓐꓰ ꓙꓻ ꓡꓯ ꓘꓳˍ ꓐꓰ ꓬꓰˍ ꓕꓯ꓾ ꓬꓲ ꓪꓽ ꓮꓽ ꓙꓵ ꓢꓳ-ꓡꓳ ꓔꓯ ꓙꓳꓺ ꓠꓬꓲ꓾ ꓬꓲ ꓠꓬ ꓢꓲ ꓤ ꓥ ꓟ ꓬꓲ ꓪꓽ ꓟꓽ ꓙꓵꓻ꓿ 27 ꓖꓳ ꓡꓱ ꓥ ꓟꓲ ꓐ-ꓠ-ꓐ ꓠꓬ ꓬꓲ ꓔꓯ ꓘꓳ ꓣꓴ ꓢꓲ꓾ ꓝꓲ ꓓꓴ ꓐꓴ ꓔꓬ ꓗꓪ ꓧꓳꓽ ꓙꓰ ꓢꓲ ꓠꓬꓲ꓾ ꓙ ꓖꓴ ꓗꓪ ꓢꓳ-ꓡꓳ ꓮ ꓡꓲ ꓐꓰ ꓢꓲ ꓒ ꓔꓯ ꓟꓳꓻ ꓗꓷ ꓟ ꓐꓰ꓾ ꓢꓲ ꓒ ꓡꓰ ꓬꓲ ꓔꓯ ꓫꓸ ꓕꓱ ꓡ ꓟ ꓐꓰ꓾ ꓔ-ꓟ-ꓢꓷ ꓗꓪ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓬꓲ ꓮ ꓡꓲ ꓠꓲꓹ ꓪꓴꓽ ꓪꓴˍ ꓡꓰ ꓟꓸ ꓟꓲ ꓚ ꓗꓷ ꓟ꓾ ꓬꓲ ꓪꓽ ꓔꓯ ꓐꓯ ꓟꓸ ꓖꓶˍ ꓡꓳ꓿ 28 ꓖꓳ ꓡꓱ ꓠꓬꓲ ꓢꓳ-ꓡꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓬꓲ ꓪˍ ꓐꓰ ꓔꓬ ꓢꓲ꓾ ꓓꓵꓽ ꓓꓵꓽ ꓓꓳ ꓓꓳ ꓬꓰ ꓢꓲ ꓠꓬꓲ꓾ ꓢꓲ ꓒ ꓟꓬꓱ ꓗꓪ ꓐꓰ ꓠꓲꓹ ꓪꓴꓽ ꓪꓴˍ ꓡꓰ ꓟꓸ ꓟꓲ ꓚˍ ꓡꓳ꓿ 29 ꓬꓲ ꓠꓬ ꓦꓲ-ꓡꓲ ꓥꓳꓽ ꓫ ꓕꓱ ꓢꓴ ꓬꓴ-ꓔ ꓡ ꓞꓳˍ ꓐꓰ ꓧꓳꓺ ꓡꓯ ꓘꓳˍ ꓕꓯ꓾ ꓬꓲ ꓪꓽ ꓠꓽ ꓬꓲ ꓔꓯ ꓢꓰꓼˍ ꓐꓰ ꓬꓰˍ ꓡꓳ꓿ 30 ꓖꓳ ꓟ ꓔꓯ ꓬꓲꓼ ꓤ ꓠꓬꓲ ꓤ ꓐꓴ ꓢꓷ ꓡꓰ ꓠꓬ꓾ ꓢꓲ-ꓢ-ꓡꓰ ꓡꓳ ꓒꓱ ꓗꓪ ꓬꓲ ꓔꓯ ꓧꓳꓽ ꓬꓯꓼ ꓙꓰ ꓢꓲ꓾ ꓕ-ꓢꓴꓽ ꓗꓪ ꓝꓲ ꓩꓴ ꓗꓷˍ ꓡꓳ꓿ 31 ꓖꓳ ꓕꓯ ꓬꓴ-ꓔ ꓟꓵˍ ꓐꓰ ꓖ-ꓡꓲ-ꓡꓲ ꓟꓵˍ ꓐꓰ ꓢ-ꓟ-ꓡꓲ ꓟꓵꓽ ꓗꓪ ꓟ ꓘꓴ ꓜꓲ ꓞꓳ ꓮꓽ ꓙꓵ ꓡꓱꓸꓼ ꓗꓪ ꓢꓲ ꓡꓲ ꓟ ꓙꓳ ꓢꓲ꓾ ꓢꓯꓼ ꓙꓳ ꓡ ꓢꓲ ꓠꓬꓲ꓾ ꓢꓲ ꓒ ꓔꓯ ꓙꓳ ꓒꓵꓽˍ ꓟ ꓐꓰ꓾ ꓢꓲ-ꓫꓬ-ꓟ-ꓦ ꓠꓲꓹ ꓟ ꓗꓴꓺ ꓖꓶˍ ꓟ ꓗꓪ ꓞꓳ ꓙꓳ ꓔꓬ ꓠꓬꓲ꓾ ꓙꓵꓻ ꓢꓴ ꓐꓴ ꓟꓬꓽ ꓡ ꓡꓳ꓿ 32 ꓒꓲ-ꓕꓱ ꓠꓬ ꓕꓲ ꓟꓵꓽ ꓕꓲ ꓟꓵꓽ ꓚꓳ ꓙꓰ ꓢꓲ꓾ ꓡꓲ-ꓓ ꓗꓪ ꓟ ꓪꓴ-ꓢ ꓦ ꓡꓱ ꓢꓴ ꓔꓬ ꓗꓪˍ ꓟꓲ ꓬꓯꓼ ꓛꓲ ꓬꓰˍ ꓡꓳ꓿ 33 ꓖꓳ ꓗꓪ ꓛꓲ ꓫꓵꓻ ꓡꓯꓼ ꓫꓵꓻ ꓢꓲ ꓬꓲꓼ ꓖꓴ ꓗꓪ ꓦꓰꓼ ꓘꓳꓼ ꓓꓳꓽ ꓞꓹ ꓟ꓾ ꓬꓲ-ꓠꓲ-ꓬ ꓟꓬꓱ ꓔ ꓢꓴ ꓕꓲ ꓣꓳ ꓔꓯ ꓬꓲ ꓟꓳˍ ꓡꓳ꓿ 34 ꓒꓲ-ꓕꓱ ꓡꓰ꓾ ꓬꓲ-ꓠꓲ-ꓬꓼꓳ꓾ ꓬꓰ-ꓢꓴ ꓙꓲ-ꓢꓴ ꓡꓰ ꓠꓴ ꓔꓯ ꓓꓻ ꓡꓰ ꓝꓲˍ ꓡꓳ꓾ ꓔꓴ ꓢꓲ ꓠꓴ ꓬꓲꓼ ꓖꓴ ꓫꓬꓹ꓾ ꓐꓰ ꓐꓯ ꓖꓶ ꓗꓷ ꓠꓬ꓾ ꓬꓲ ꓞꓼ ꓐꓰ ꓔꓴ ꓡꓺꓳ꓿ 35 ꓡꓲ-ꓓˍ ꓐꓰ ꓫ-ꓣꓷ-ꓠ ꓗꓪ ꓔꓬ ꓢꓴ ꓮꓽ ꓙꓵ ꓬꓲ ꓔꓯ ꓟꓳꓻ ꓗꓷ ꓠꓬ꓾ ꓢꓲ ꓒ ꓔꓯ ꓦ ꓡꓱ ꓡ ꓡꓳ꓿ 36 ꓖꓳ ꓕꓯ ꓬꓳ-ꓒ ꓗꓪ ꓕꓯ-ꓐꓲ-ꓕꓽ ꓟꓬꓱ ꓔ ꓟ ꓙꓵꓻ ꓢꓴ ꓤꓽ ꓟꓶ ꓤ ꓕꓲ ꓣꓳ ꓙꓳˍ ꓡꓳ꓿ (ꓦꓲ-ꓡꓲ ꓥꓳꓽ ꓗꓪ ꓬꓲ ꓔꓯ ꓓꓳ-ꓣ-ꓘꓷ꓾ ꓐꓰ ꓘꓴˍ ꓡꓳ꓿) ꓤꓽ ꓟꓶ ꓤ ꓕꓱ ꓕꓲ ꓣꓳ ꓠꓬ ꓮ ꓕꓯˍ ꓟꓲ ꓙꓲˍ ꓟ ꓟꓬꓱꓽ ꓬꓰ ꓢꓲ ꓞꓳ ꓫꓸ ꓔꓯ ꓬꓰ ꓙ ꓢꓴ ꓥ ꓡꓳ꓿ 37 ꓖꓳ ꓕꓲ ꓝꓲꓸ ꓗꓪ ꓬꓲ ꓠꓻ ꓢꓲ ꓫꓵꓻꓳ꓿ ꓬꓲ ꓪꓽ ꓡꓰ ꓬꓲ ꓫꓵꓻ ꓟꓳ ꓔꓯ ꓞꓲꓽ ꓗꓷ ꓠꓬ꓾ ꓜꓳꓻ ꓗꓳꓹ ꓗꓪ ꓝꓳꓺ ꓔ ꓡꓳ꓿ 38 ꓡꓲ-ꓓ ꓠꓬ ꓬꓳꓹ-ꓒ ꓔꓯ ꓠꓶꓽ ꓞꓹ ꓠꓬꓲ꓾ ꓒꓲ-ꓕꓱ ꓖꓳ ꓗꓪ ꓔꓬ ꓟ ꓔꓯ ꓢꓲ ꓤ ꓐꓴ ꓑ ꓙꓽ ꓗꓷ ꓠꓬ꓾ ꓡ ꓞꓳ ꓠꓬꓲꓽ ꓣꓳ ꓝꓲ ꓩꓴ ꓢꓲ꓾ ꓥꓪ ꓠꓴꓽ ꓔꓬ ꓗꓪ ꓠꓲꓹ ꓞ ꓡꓯ꓾ ꓕꓽ ꓟꓬ ꓬꓰ ꓝꓲ꓾ ꓐꓰ ꓓꓰꓽˍ ꓡꓳ꓿ 39 ꓒꓲ-ꓕꓱ ꓠꓬ ꓬꓲ ꓪꓽ ꓔꓯ ꓛꓳ ꓙꓰ ꓢꓲ ꓖꓳ ꓗꓪ ꓛꓲ ꓬꓰ ꓠꓬ꓾ ꓬꓲ ꓪꓽ ꓡꓰ ꓬꓲ ꓔꓯ ꓜꓳꓻ ꓗꓳꓹ ꓗꓪ ꓧꓳꓽ ꓓꓯ ꓙꓰˍ ꓡꓳ꓿ ꓟꓶꓽ ꓛꓵꓽ ꓟ ꓐꓴ ꓠꓬ ꓒꓲ-ꓕꓱ ꓒ ꓕꓲꓺꓼ ꓗꓪ ꓦꓰꓼ ꓡ ꓢꓲ ꓥꓴꓻ ꓠꓬꓲˍ ꓐꓰ꓾ ꓓꓳ-ꓣ-ꓘꓷ ꓟꓽ ꓫꓵ ꓢꓰ ꓕꓯ ꓬꓲ ꓡꓰ ꓙꓲꓼ ꓔ ꓟ ꓐꓵ ꓞꓶꓽˍ ꓐꓰ ꓶꓼ ꓖꓪꓽ ꓬꓲ ꓔꓯ ꓟꓸ ꓖꓶˍ ꓡꓳ꓿ 40 ꓒꓲ-ꓕꓱ ꓠꓽ ꓬꓲ ꓪꓽ ꓮꓽ ꓙꓵ ꓢꓴ ꓔꓯ ꓓꓳ ꓙꓰ ꓝꓲ ꓢꓲ꓾ ꓛꓲ ꓝꓲꓸ ꓖꓶꓽ ꓢꓲ ꓠꓬꓲ ꓪꓽ ꓘꓴ ꓗꓷ ꓠꓬ꓾ ꓫꓵꓻ ꓟꓳꓻ ꓔꓯ ꓟꓳꓸ ꓒꓳꓹ ꓢꓲ꓾ ꓕꓯ-ꓐꓲ-ꓕꓽꓳ꓾ ꓔꓴ ꓡꓯ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓟꓬ ꓢꓶꓽ ꓒꓴ ꓡ ꓢꓲ꓾ ꓒꓲ-ꓕꓱ ꓔꓯ ꓟꓳꓻ ꓗꓷ ꓠꓬ꓾ ꓠꓬꓲꓸ ꓠꓸ ꓔꓴ ꓡ ꓡꓳ꓿ 41 ꓒꓲ-ꓕꓱ ꓠꓬ ꓡꓯꓼ ꓒꓯꓹ ꓛꓱ ꓢꓲ ꓬꓲ ꓔꓯ ꓖꓳꓻ ꓔꓴ ꓖꓶˍ ꓡꓳ꓿ ꓖꓳ ꓕꓯ ꓒꓲ-ꓕꓱ ꓡꓰ ꓦ ꓡꓱ ꓢꓴ ꓐꓴˍ ꓐꓰ ꓟꓶꓽ ꓛꓵꓽ ꓟ ꓐꓴ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓢꓯꓸ ꓢꓯꓸˍ ꓡꓰꓽ ꓬꓲ ꓪꓽ ꓔꓯ ꓡꓯꓼ ꓙꓱ ꓖꓶˍ ꓡꓳ꓿ 42 ꓕꓱ ꓟ ꓔꓯ ꓬꓳꓹ-ꓒ ꓕꓲ ꓡꓳ ꓒꓱ ꓡꓱꓸꓼ ꓗꓪ ꓢꓷꓸ ꓡꓰ ꓠꓬ꓾ ꓮꓽ ꓟꓬꓹ ꓣꓳ ꓢꓲ ꓒ ꓔꓯ ꓙꓵꓻˍ ꓡꓳ꓿ 43 ꓖꓳ ꓗꓸ ꓠꓯꓸ ꓒꓲ-ꓕꓱ ꓠꓬ꓾ ꓬꓳꓹ-ꓒ ꓗꓪ ꓧꓪꓽ ꓙꓲꓻ ꓑꓴ ꓙꓵ ꓒꓽ ꓢꓲ-ꓟꓴˍ ꓐꓰ ꓮꓽ ꓟꓬꓹ ꓠꓬꓲ ꓔꓬ ꓗꓷꓳ꓿

ꓝꓲ-ꓓꓴ 10

1 ꓖꓳ ꓕꓯ ꓢꓲ-ꓢ-ꓡꓰ ꓡꓳ ꓒꓱ ꓗꓪ꓾ ꓬꓲ-ꓔ-ꓡꓲ ꓟꓯꓼ ꓜꓴ ꓗꓪ ꓟ ꓟꓯꓼ ꓕꓲ ꓦꓬ ꓙꓵꓽ ꓒ꓾ ꓘꓳ-ꓠꓲ-ꓡꓲ-ꓬꓴ ꓟꓬꓱ ꓔ ꓟ ꓟꓯꓼ ꓢꓲꓽ ꓒꓽ ꓕꓲ ꓣꓳ ꓔꓬ ꓡꓳ꓿ 2 ꓬꓲˍ ꓐꓰ ꓬꓲ ꓕꓲ ꓦꓲ ꓢꓴ ꓮꓽ ꓙꓵ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓴ ꓥ ꓠꓬꓲ꓾ ꓫꓸˍ ꓟ ꓑ ꓫꓬꓼ ꓐꓴ ꓔꓯ ꓬꓰ ꓙ ꓔꓳꓹ ꓙ ꓢꓲ꓾ ꓪꓴ-ꓢ ꓔꓯ ꓟꓽ ꓠ ꓠꓽ ꓪꓽ ꓘꓴ ꓔꓬ ꓢꓴ ꓥꓳ꓿ 3 ꓕꓲ ꓠꓬꓲ ꓙꓳˍ ꓠꓬ ꓮꓽ ꓡ ꓟꓳꓼ ꓡꓳ ꓗꓸ ꓠꓯꓸ ꓢ ꓙꓵꓹ ꓗꓪ꓾ ꓫꓬꓽ ꓫꓬꓽ ꓡꓰ ꓦ ꓐꓬꓱꓽ ꓗꓪ ꓐꓰ ꓪꓴ-ꓢ ꓬꓲ ꓟꓴꓽ ꓗꓪ ꓝꓲ ꓓꓴ ꓠꓬ ꓬꓲ ꓔꓬ ꓗꓪ ꓡ ꓢꓲ꓾ ꓘꓳ-ꓠꓲ-ꓡꓲ-ꓬꓴꓳ꓾ ꓐꓯ ꓡ ꓟ ꓔꓯ ꓬꓲ ꓟꓳˍ ꓡꓳ꓿ 4 ꓘꓳ-ꓠꓲ-ꓡꓲ-ꓬꓴ ꓠꓬ ꓙꓳꓺ ꓠꓬꓲ ꓬꓲ ꓔꓯ ꓟꓬ ꓔꓱꓹ ꓡꓳꓸ ꓢꓲ꓾ ꓢꓲ ꓒꓽꓳ꓾ ꓮꓸ ꓫꓵ ꓥ ꓡ? ꓐꓰ ꓠ ꓠꓬꓲˍ ꓕꓯ꓾ ꓟꓴꓽ ꓗꓪ ꓝꓲ ꓓꓴ ꓡꓰ꓾ ꓠꓴ ꓪꓽ ꓘꓴ ꓘꓶꓽˍ ꓐꓰ ꓠꓴ ꓬꓰ ꓗꓷ ꓟ ꓙꓲˍ ꓟ ꓟꓬꓱꓽ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓓꓯ ꓛꓲ ꓬꓰꓳ꓿ ꓬꓲ ꓠꓬ ꓖꓳ ꓟ ꓔꓯ ꓮꓽ ꓘꓶꓸ ꓠꓲꓹ ꓒꓴˍ ꓡꓳ꓿ 5 ꓮ ꓟꓶ ꓬꓳꓹ-ꓒ ꓗꓪ ꓡ ꓞꓳ ꓝꓲ ꓩꓴ ꓗꓷ ꓢꓲ꓾ ꓒꓲ-ꓕꓱ ꓟꓬꓱ ꓔ ꓟ ꓢꓲ-ꓟꓴ ꓔꓯ ꓧꓳꓽ ꓔꓯꓹ ꓡꓯ꓿ 6 ꓬꓲ ꓠꓬ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓔꓬ ꓟ ꓧꓪꓽ ꓙꓲꓻ ꓑꓴꓺ ꓙꓵꓻ ꓒ ꓢꓲ-ꓟꓴ ꓦꓲ ꓗꓪ ꓔꓬ ꓡꓳ꓾ ꓐꓯˍ ꓡꓳ꓿ 7 ꓬꓲ ꓔꓯ ꓫꓸ ꓕꓱˍ ꓟ ꓟꓴꓽ ꓗꓪ ꓝꓲ ꓓꓴ ꓙꓰ ꓗꓷ ꓠꓬ꓾ ꓬꓲ ꓦꓲ ꓗꓪ ꓣꓱꓽ ꓙ ꓢꓴ ꓠꓬꓲꓽ ꓣꓳˍ ꓐꓰ ꓮ ꓕꓯˍ ꓟꓲ ꓬꓲ ꓔꓯ ꓦꓴꓺ ꓠꓬꓹ ꓟ ꓠꓲꓹ ꓒꓵꓽ ꓠꓲꓹ ꓡꓱ ꓢꓴ ꓟꓯꓼ ꓤ ꓕꓲ ꓣꓳ ꓔꓯ ꓘꓴ ꓔꓯꓹ ꓡ ꓢꓲ꓾ 8 ꓕꓱ ꓟ ꓮꓽ ꓙꓵ ꓬꓲ ꓪꓽ ꓔꓯ ꓐꓯ ꓟꓸ ꓖꓶ ꓗꓷ ꓠꓬ꓾ ꓬꓳꓹ-ꓒ ꓗꓪ ꓝꓲ ꓩꓴ ꓗꓷˍ ꓡꓳ꓿ 9 ꓗꓸ ꓠꓯꓸ ꓕꓲ ꓠꓬꓲ ꓮꓽ ꓡ ꓟꓳꓼ ꓡꓳ ꓔꓱꓺ ꓫꓵ ꓗꓪ ꓘꓳ-ꓠꓲ-ꓡꓲ-ꓬꓴ ꓡꓰ ꓝꓲ ꓩꓴ ꓗꓷ ꓢꓴ ꓐꓴ ꓠꓬ ꓡꓳ ꓒꓱ ꓒ ꓕꓲꓺꓼ ꓗꓪ ꓛꓲ ꓬꓰˍ ꓕꓯ꓾ ꓒꓲ-ꓕꓱ ꓠꓬ ꓪꓽ ꓘꓴ ꓠꓹ ꓟ ꓦꓲ ꓪꓴꓸ ꓓꓵ ꓓꓰꓺ ꓗꓪ ꓓꓯ ꓙꓰˍ ꓡꓳ꓿ 10 ꓬꓲ ꓠꓬ ꓦꓰꓼ ꓟꓷꓼ ꓠꓬꓲ꓾ ꓢꓴ ꓡꓰ ꓬꓲ ꓐꓱ ꓶ ꓜꓽ ꓓꓴ ꓫꓬꓹ ꓖꓶ ꓔꓬ ꓕꓯ꓾ ꓬꓲ ꓠꓬ ꓟꓯꓹ ꓟꓯꓹ ꓟꓴ ꓗꓷ ꓡꓰ ꓢꓲ꓾ 11 ꓟꓴꓽ ꓗꓪ ꓒꓴ ꓡ ꓟ ꓐꓰ꓾ ꓬꓲꓹ ꓐꓵ ꓓꓽ ꓟ ꓡꓰ ꓐꓰ ꓗꓹ ꓟ ꓕꓲ ꓘꓳꓹ ꓠꓬ꓾ ꓬꓲ ꓡꓯꓼ ꓡꓲ ꓡꓯꓼ ꓗꓪ ꓚꓵꓹ ꓔ ꓢꓲ꓾ ꓟꓲ ꓠꓯ ꓗꓪ ꓩꓴ ꓬꓯꓼ ꓡ ꓟ ꓔꓯ ꓬꓲ ꓟꓳˍ ꓡꓳ꓿ 12 ꓬꓲꓹ ꓐꓵ ꓖꓳ ꓟ ꓠꓯꓸꓼ ꓗꓪ ꓠꓬ꓾ ꓟꓲ ꓠꓯ ꓗꓪ ꓛꓲ ꓒꓯꓹ ꓡꓲ ꓐꓽ ꓙꓳˍ ꓟ ꓦꓵꓻ ꓙꓱ ꓠꓲꓸ ꓙꓱ ꓬꓲ ꓫꓵꓽ ꓬꓲ ꓙꓰꓽˍ ꓐꓰ꓾ ꓐꓶꓽ ꓓꓲꓻ ꓡꓯꓹ ꓓꓲꓻ ꓥ ꓕ ꓑꓳˍ ꓐꓰ꓾ ꓟꓵꓽ ꓪꓴꓽ ꓗꓪ ꓟ ꓠꓬꓹ ꓤ ꓙꓱꓻ ꓤ ꓓꓯꓹ ꓡꓳ꓿ 13 ꓖꓳ ꓡꓱ ꓢꓲ ꓫ ꓕꓱꓻ ꓢꓯꓼ ꓕꓲ ꓟ ꓡꓰ ꓬꓲ ꓔꓯ꓾ ꓒꓲ-ꓕꓱꓳ꓾ ꓔꓴ ꓢꓲ꓾ ꓢꓰꓼ ꓜꓽ꓾ ꓐꓯˍ ꓡꓳ꓿ 14 ꓒꓲ-ꓕꓱ ꓡꓰ꓾ ꓢꓲ ꓒꓽꓳ꓾ ꓟꓽ ꓓ꓿ ꓮ ꓡꓲꓳ ꓐꓯ ꓠꓬ ꓠꓲꓹ ꓒꓳꓹˍ ꓟ ꓐꓰ ꓟꓽ ꓫꓬ ꓟ ꓮꓸ ꓫꓵˍ ꓟꓲ ꓥꓪ ꓟꓽ ꓜ ꓠꓬꓲ꓾ ꓐꓯ ꓖꓶˍ ꓡꓳ꓿ 15 ꓖꓳ ꓕꓯ ꓬꓲ ꓔꓯ ꓝꓮꓲ ꓫꓸ ꓕꓱ ꓡ ꓢꓲ꓾ ꓪꓴ-ꓢ ꓡꓰ ꓢꓲꓽ ꓫꓬ ꓡꓰ ꓝꓲ ꓗꓷ ꓟ ꓔꓯ ꓠꓲꓹ ꓒꓳꓹ ꓓꓴ ꓕꓽ ꓚꓬꓹ꓾ ꓐꓯˍ ꓡꓳ꓿ 16 ꓕꓱ ꓡꓱ ꓢ ꓧꓪꓹ ꓗꓷ ꓡꓰ ꓠꓬ꓾ ꓖꓳ ꓟ ꓔꓯ ꓞꓼ ꓐꓰ ꓟꓴꓽ ꓗꓪ ꓗꓪ ꓔꓯꓹ ꓓꓯ ꓙꓰꓳ꓿ 17 ꓒꓲ-ꓕꓱ ꓠꓬ ꓬꓲ ꓟꓳꓻ ꓗꓷ ꓟ ꓦ ꓐꓬꓱꓽ ꓖꓳ ꓟ ꓮꓸ ꓫꓵꓽ ꓥ ꓢꓷ? ꓐꓰ ꓓꓵꓽ ꓙ ꓫꓸ ꓔꓬ ꓕꓯ꓾ ꓠꓬꓲ ꓠꓹ꓾ ꓘꓳ-ꓠꓲ-ꓡꓲ-ꓬꓴ ꓡꓰ ꓝꓲ ꓩꓴ ꓡ ꓢꓴ ꓠꓬ ꓢꓲ-ꓟꓴ ꓦꓲ ꓮ ꓡꓲ ꓕꓲ ꓦꓲ ꓥ ꓟ ꓠꓺ ꓠꓬꓲ ꓟꓶ ꓢꓲ꓾ ꓗ ꓘꓶꓽ ꓓꓴꓽ ꓗꓪ ꓦꓰꓼ ꓞ ꓢꓲ ꓠꓬꓲ꓾ 18 ꓒꓲ-ꓕꓱ ꓟꓬꓱ ꓔ ꓟ ꓢꓲ-ꓟꓴ ꓕꓱ ꓗꓪ ꓔꓬ ꓡ? ꓐꓰ ꓘꓴˍ ꓡꓳ꓿ 19 ꓒꓲ-ꓕꓱ ꓠꓬ ꓦ ꓐꓬꓱꓽ ꓔꓯ ꓓꓵꓽ ꓙ ꓠꓬꓲ ꓔꓬ ꓕꓯ꓾ ꓢꓲ-ꓫꓬ-ꓟ-ꓦ ꓡꓰ ꓬꓲ ꓔꓯ꓾ ꓡ ꓞꓳ ꓢ ꓣꓳ ꓠꓴ ꓔꓯ ꓧꓪ ꓡ ꓡꓳ꓿ 20 ꓬꓲ ꓪꓽ ꓠꓬ ꓪꓴ-ꓢ ꓡꓰ ꓝꓲ ꓩꓴ ꓡ ꓢꓴ ꓥ ꓠꓬꓲ꓾ ꓠꓴ ꓬꓯꓼ ꓙꓰ ꓢꓲ ꓟꓽ ꓓꓵꓽ ꓙ ꓟꓬꓽ ꓟꓬ ꓬꓲ ꓪꓽ ꓔꓯ ꓛꓳ ꓙꓰ꓾ ꓐꓯˍ ꓡꓳ꓿ 21 ꓖꓳ ꓕꓯ ꓒꓲ-ꓕꓱ ꓬꓯꓼ ꓙꓰ ꓢꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓡꓰ ꓧꓪꓺ ꓔꓬ ꓢꓴ ꓠꓬ ꓥꓪ ꓥꓳ꓿ ꓠꓴ ꓪꓽ ꓮꓸ ꓫꓵ ꓐꓯ ꓓꓴ ꓙꓳˍ ꓡ? ꓐꓯ ꓖꓶˍ ꓡꓳ꓿ 22 ꓬꓲ ꓪꓽ ꓡꓰ꓾ ꓥꓪ ꓠꓴꓽ ꓔꓯ ꓠꓬ ꓟꓯꓼ ꓙꓵꓽ ꓒ ꓘꓳ-ꓠꓲ-ꓡꓲ-ꓬꓴ ꓡꓰ ꓝꓲ ꓩꓴ ꓡ ꓟ ꓥꓳ꓿ ꓬꓲ ꓠꓬ ꓔꓱꓹ ꓜꓳꓽˍ ꓟ ꓪꓴ-ꓢ ꓔꓯ ꓙꓳ ꓒꓵꓽ ꓢꓴ ꓥ ꓢꓲ꓾ ꓬꓴ-ꓔ ꓡ ꓞꓳ ꓐꓴˍ ꓟꓲ ꓞꓳ ꓒꓵꓽ ꓔꓬ ꓟ ꓞꓳ ꓪꓴꓽ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓠꓴ ꓔꓯ ꓬꓲ ꓦꓲ ꓗꓪ ꓘꓴꓻ ꓔꓯꓹ ꓡ ꓢꓲ ꓟꓸ ꓟꓲ ꓟꓸ ꓖꓶ ꓡ ꓝꓲ ꓠꓹ ꓟ꓾ ꓪꓴ-ꓢ ꓬꓲ ꓢꓲꓽ ꓫꓬˍ ꓟ ꓝꓲ ꓓꓴ ꓕꓲ ꓣꓳ ꓡꓰ ꓬꓲ ꓔꓯ ꓐꓯ ꓖꓶ ꓗꓷ ꓠꓬꓲ꓾ ꓬꓲ ꓡꓰ ꓥꓪ ꓠꓴꓽ ꓔꓯ ꓠꓴ ꓔꓬ ꓗꓪ ꓝꓲ ꓩꓴ ꓡ ꓟ ꓥꓳ꓾ ꓐꓯ ꓖꓶˍ ꓡꓳ꓿ 23 ꓖꓳ ꓕꓯ ꓒꓲ-ꓕꓱ ꓡꓰ ꓬꓲ ꓪꓽ ꓔꓯ ꓘꓳ ꓣꓴ ꓢꓲ ꓕꓲ ꓦꓬꓼ ꓔꓬ ꓝꓲˍ ꓡꓳ꓿ ꓗꓸ ꓠꓯꓸ ꓕꓲ ꓠꓬꓲ ꓠꓬ ꓬꓳ-ꓒ ꓢꓴ ꓬꓲꓼ ꓤ ꓠꓬꓲ ꓤ ꓕꓲ ꓐꓱˍ ꓐꓰ ꓒꓲ-ꓕꓱ ꓠꓬ ꓬꓲ ꓪꓽ ꓔꓯ ꓛꓳ ꓙꓰˍ ꓡꓳ꓿ 24 ꓖꓳ ꓗꓸ ꓠꓯꓸ ꓕꓲ ꓠꓬꓲ ꓬꓲ ꓪꓽ ꓠꓬ ꓢꓲ-ꓢ-ꓡꓰ ꓡꓳ ꓒꓱ ꓗꓪ ꓛꓲ ꓬꓰˍ ꓡꓳ꓿ ꓘꓳ-ꓠꓲ-ꓡꓲ-ꓬꓴ ꓠꓬ ꓬꓲ ꓫꓵꓽ ꓬꓲ ꓧꓪ ꓐꓴˍ ꓐꓰ ꓬꓲ ꓠꓶꓽ ꓛꓳ ꓕꓲ ꓛꓳ ꓐꓴ ꓔꓯ ꓘꓴ ꓜꓲꓼ ꓔ ꓢꓲ ꓬꓲ ꓪꓽ ꓔꓯ ꓡꓳ ꓠꓬꓹ ꓔꓬ ꓡꓳ꓿ 25 ꓒꓲ-ꓕꓱ ꓛꓲ ꓬꓰ ꓠꓬ ꓘꓳ-ꓠꓲ-ꓡꓲ-ꓬꓴ ꓡꓰ ꓬꓲ ꓔꓯ ꓞꓵ ꓡ ꓢꓲ꓾ ꓬꓲ ꓟꓲꓽ ꓙꓬꓽ ꓗꓪ ꓟꓳꓼ ꓡꓰ ꓢꓲ ꓠꓬꓲ ꓪꓴꓸ ꓓꓵ ꓕꓱꓼˍ ꓡꓳ꓿ 26 ꓖꓳ ꓡꓱ ꓥ ꓟꓲ ꓒꓲ-ꓕꓱ ꓡꓰ ꓬꓲ ꓔꓯ ꓖꓳꓻ ꓔꓴ ꓖꓶ ꓢꓲ꓾ ꓔꓴ꓾ ꓥꓪˍ ꓟꓲ ꓞꓳ ꓤˍ ꓡꓰꓽ ꓥ ꓡꓳ꓾ ꓐꓯ ꓖꓶˍ ꓡꓳ꓿ 27 ꓒꓲ-ꓕꓱ ꓕꓱ ꓡꓱ ꓫꓸ ꓕꓱ ꓕꓱ ꓡꓱ ꓦꓲ ꓗꓪ ꓓꓵꓽ ꓡꓰ ꓠꓬ꓾ ꓡ ꓞꓳ ꓮꓽ ꓟꓬꓹ ꓣꓳ ꓜꓲꓼ ꓞꓹ ꓟ ꓔꓯ ꓟꓳˍ ꓡꓳ꓿ 28 ꓖꓳ ꓕꓯ ꓒꓲ-ꓕꓱ ꓡꓰ ꓬꓲ ꓪꓽ ꓔꓯ꓾ ꓬꓴ-ꓔ ꓡ ꓞꓳ ꓠꓬ ꓠꓱꓸ ꓐꓯꓼ ꓞꓳ ꓫꓵꓽ ꓔꓯ ꓙ ꓡꓯ ꓘꓳˍ ꓟ ꓐꓰ ꓗꓹ ꓙꓰˍ ꓟ ꓠꓬ꓾ ꓙꓵꓽ ꓗ ꓔꓯ ꓛꓬˍ ꓟ ꓥ ꓟ ꓠꓴ ꓪˍ ꓟꓲ ꓢꓷˍ ꓡꓳ꓿ ꓖꓳ ꓡꓱ ꓥ ꓟꓲ ꓮꓸ ꓫꓵ ꓡ ꓞꓳ ꓔꓯˍ ꓟꓲ꓾ ꓠꓲꓹ ꓒꓳꓹˍ ꓟ ꓐꓰ ꓟꓽ ꓫꓬ ꓟ ꓕꓽ ꓚꓬꓹ ꓠꓯꓹ ꓟ ꓪꓴ-ꓢ ꓡꓰ ꓥꓪ ꓔꓯ ꓟꓳꓸ ꓖꓶ ꓡꓺꓳ꓿ 29 ꓖꓳ ꓡꓱ ꓠꓬꓲ ꓠꓴ ꓡꓰ ꓥꓪ ꓔꓯ ꓘꓴ ꓡ ꓕꓯ꓾ ꓥꓪ ꓠꓬ ꓟꓽ ꓢꓸ ꓬꓰꓽ ꓬꓰꓽ ꓡꓻꓳ꓿ ꓠꓴ ꓪꓽ ꓮꓸ ꓫꓵ ꓑꓶꓸ ꓓꓴ ꓥꓪ ꓔꓯ ꓘꓴˍ ꓡ? ꓐꓰ ꓐꓯ ꓖꓶˍ ꓡꓳ꓿ 30 ꓘꓳ-ꓠꓲ-ꓡꓲ-ꓬꓴ ꓡꓰ꓾ ꓧꓶꓸ ꓕꓯ ꓡꓲꓸ ꓠꓬꓲ꓾ ꓮ ꓡ ꓕꓱ ꓕꓲ ꓙꓵꓹ ꓗꓪ꓾ ꓥꓪ ꓦꓲ ꓗꓪ ꓢ ꓙꓵꓹ ꓕꓯ ꓟ ꓪꓽ ꓘꓴ ꓜꓲꓼ ꓓꓴ ꓬꓰ ꓔꓬ ꓕꓯ꓾ ꓞꓼ ꓐꓰ ꓐꓬꓱꓼ ꓡꓱꓼˍ ꓟ ꓐꓵ ꓞꓶ ꓖꓪꓽ ꓔ ꓟ ꓡ ꓞꓳ ꓕꓲ ꓣꓳ ꓥꓪ ꓟꓲꓽ ꓙꓬ ꓗꓪ ꓦꓰꓼ ꓡ ꓢꓲ꓾ 31 ꓘꓳ-ꓠꓲ-ꓡꓲ-ꓬꓴꓳ꓾ ꓪꓴ-ꓢ ꓠꓬ ꓠꓴ ꓪꓽ ꓘꓴˍ ꓟ ꓔꓯ ꓑ ꓙꓽ ꓗꓷ ꓢꓲ꓾ ꓠꓴ ꓡꓰ ꓞꓳ ꓫꓸ ꓐꓴ ꓔꓯ ꓬꓰ ꓙ ꓔꓳꓹ ꓙ ꓗꓷ ꓟ ꓔꓯˍ ꓟꓲ ꓬꓲ ꓟꓽ ꓟꓲ ꓡꓰ꓿ 32 ꓖꓳ ꓡꓱ ꓠꓬꓲ ꓬꓳꓹ-ꓒ ꓗꓪ ꓡ ꓞꓳ ꓝꓲ ꓩꓴ ꓗꓷ ꓢꓲ꓾ ꓒꓲ-ꓕꓱ ꓟꓬꓱ ꓔ ꓟ ꓢꓲ-ꓟꓴ ꓔꓯ ꓘꓴ ꓔꓯꓹ ꓡꓯ꓿ ꓬꓲ ꓠꓬ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓟ ꓧꓪꓽ ꓙꓲ ꓑꓴꓺ ꓙꓵꓺ ꓒꓽ ꓢꓲ-ꓟꓴ ꓦꓲ ꓗꓪ ꓔꓬ ꓡꓳ꓾ ꓐꓯ ꓖꓶ ꓡꓺꓳ꓿ 33 ꓖꓳ ꓡꓱ ꓠꓬꓲ ꓥꓪ ꓡꓰ ꓞꓼ ꓐꓰ ꓠꓴ ꓔꓬ ꓗꓪ ꓡ ꓞꓳ ꓝꓲ ꓩꓴ ꓡ ꓟ ꓥꓳ꓿ ꓠꓴ ꓕꓱ ꓡꓱ ꓡ ꓠꓬꓲ ꓫ ꓟꓳ꓿ ꓮ ꓟꓶ ꓢꓲ ꓒ ꓡꓰ ꓠꓴ ꓔꓯ ꓕꓵꓼ ꓪ ꓖꓶˍ ꓟ ꓮꓽ ꓙꓵ ꓔꓯ ꓠ ꓠꓹ ꓠꓹ ꓟ꓾ ꓥꓪ ꓠꓴ ꓮꓽ ꓙꓵ ꓕꓻ ꓪꓴ-ꓢ ꓟꓲꓽ ꓙꓬ ꓗꓪ ꓜꓲꓼ ꓞꓹ ꓡꓳ꓾ ꓐꓯˍ ꓡꓳ꓿ 34 ꓖꓳ ꓡꓱ ꓠꓬ ꓒꓲ-ꓕꓱ ꓘꓶꓽ ꓒꓴ ꓢꓲ꓾ ꓪꓴ-ꓢ ꓠꓬ ꓞꓳ ꓒꓬꓱꓽ ꓢꓲ ꓢꓴ ꓟꓽ ꓥ ꓟ ꓥꓪ ꓚꓵ ꓚꓵ ꓢꓷꓸ ꓡꓰꓳ꓿ 35 ꓞꓳ ꓫꓵꓽ ꓮ ꓡꓲ ꓕꓲ ꓫꓵꓽˍ ꓟꓲ ꓬꓲ ꓔꓯ ꓙꓳꓺ ꓒꓵꓽ ꓢꓲ꓾ ꓔꓱꓹˍ ꓟ ꓬꓰ ꓢꓴ ꓔꓯ ꓠꓽ ꓬꓲ ꓘꓳꓻ ꓣꓴˍ ꓡꓳ꓿ 36 ꓬꓰ-ꓢꓴ ꓙꓲ-ꓢꓴ ꓠꓽ ꓙꓳˍ ꓟ ꓥ ꓕ ꓑꓳ ꓬꓲ ꓢꓲ ꓒ ꓥ ꓡꓳ꓿ ꓪꓴ-ꓢ ꓠꓬ ꓬꓲ ꓗꓪ ꓐꓰ ꓢꓲ ꓡꓲ ꓟ ꓶꓼ ꓓꓳ ꓫꓱꓹ ꓓꓳ ꓐꓯ ꓘꓶ ꓕꓱ ꓟ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓖꓶ ꓩꓴ ꓡꓺꓳ꓿ 37 ꓬꓳ-ꓦ ꓡꓰ ꓖꓳ ꓓꓱ ꓔꓲꓹˍ ꓟ ꓟꓸ ꓟꓲ ꓚ ꓟꓸ ꓖꓶ ꓗꓷ ꓗ ꓠꓯ꓾ ꓖ-ꓡꓲ-ꓡꓲ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓬꓴ-ꓔ ꓕꓲ ꓟꓵꓽ ꓡꓱꓸꓼ ꓗꓪ ꓮ ꓡꓲ ꓒꓬꓱꓼ ꓡ ꓗꓷ ꓟ ꓔꓯ ꓠꓴ ꓪˍ ꓟꓲ ꓢꓷˍ ꓡꓳ꓿ 38 ꓢꓲ-ꓫꓬ-ꓟ-ꓦˍ ꓐꓰ ꓪ ꓠꓬꓲˍ ꓟ ꓡꓰ꓾ ꓪꓴ-ꓢ ꓠꓬ ꓮ ꓡꓲ ꓐꓰ ꓠ-ꓢ-ꓡꓱ ꓢꓴ ꓬꓰ-ꓢꓴ ꓔꓯ ꓟꓰ ꓞꓶꓻ ꓟꓰ ꓖꓶ ꓗꓷ ꓟ ꓐꓰ꓾ ꓪꓴ-ꓢ ꓠꓬ ꓬꓲˍ ꓐꓰ ꓔꓬ ꓠꓬꓲ ꓬꓲ ꓠꓬ ꓙꓲˍ ꓟ ꓬꓰ ꓠꓹ ꓟ ꓮ ꓡꓲ ꓐꓰ ꓚꓳ ꓙꓰ ꓢꓲ꓾ ꓠꓲꓽ ꓪ ꓔꓲ ꓡꓰ ꓠꓬꓲꓸ ꓔ ꓟ ꓡ ꓞꓳ ꓮꓽ ꓙꓵ ꓔꓯ ꓓꓻ ꓡꓰ ꓝꓲˍ ꓟ ꓠꓴ ꓪꓽ ꓢꓷˍ ꓡꓳ꓿ 39 ꓬꓴ-ꓔ ꓟꓵˍ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓬꓲ ꓬꓰ ꓗꓷ ꓟ ꓮꓽ ꓙꓵ ꓔꓯ ꓢꓷꓺ ꓙ ꓟꓳ ꓙ ꓢꓴ ꓠꓬ ꓥꓪ ꓠꓴꓽ ꓥꓳ꓿ ꓬꓲ ꓪꓽ ꓡꓰ ꓬꓲ ꓔꓯ ꓡꓯꓼ ꓐꓳ ꓔꓶ ꓓꓴ ꓗꓪ ꓕꓯꓼ ꓢꓰꓼ ꓗꓷꓳ꓿ 40 ꓖꓳ ꓡꓱ ꓥ ꓟꓲ ꓢ ꓠꓬꓲ ꓕꓲ ꓠꓬꓲ ꓗꓪ ꓪꓴ-ꓢ ꓡꓰ ꓬꓲ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓲ ꓬꓲ ꓖꓳ ꓓꓱꓽ ꓟꓳꓸ ꓖꓶ ꓡꓺꓳ꓿ 41 ꓑ ꓫꓬꓼ ꓐꓴ ꓮꓽ ꓙꓵ ꓔꓯ ꓟꓳꓸ ꓖꓶˍ ꓟ ꓠꓬ ꓟꓽ ꓥ꓿ ꓪꓴ-ꓢ ꓡꓰ ꓢꓲ ꓔ ꓟ ꓢꓷꓸ ꓙ ꓟꓳ ꓙ ꓢꓴ ꓐꓴˍ ꓐꓰ꓾ ꓬꓲ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓗꓷ ꓗꓸ ꓠꓯꓸ ꓬꓲꓸˍ ꓐꓰ ꓕꓲ ꓪꓺꓼ ꓔꓬ ꓗꓷ ꓢꓲ ꓜꓽ ꓓꓳꓻ ꓗꓷ ꓢꓴ ꓐꓴ꓾ ꓥꓪ ꓠꓴꓽ ꓔꓯ ꓬꓲ ꓖꓳ ꓓꓱꓽ ꓟꓳꓸ ꓖꓶ ꓡꓺꓳ꓿ 42 ꓪꓴ-ꓢ ꓡꓰ ꓕꓱ ꓕꓲ ꓣꓳ ꓔꓯ꓾ ꓞꓳ ꓢꓯꓸˍ ꓐꓰ ꓞꓳ ꓫꓵꓻ ꓔꓯ ꓐꓯ ꓟꓴ ꓘꓶꓽ ꓢꓴ ꓬꓰ ꓝꓲ ꓠꓹ ꓟ ꓢꓲ ꓚꓰꓸ ꓔ ꓟ ꓥ ꓟ꓾ ꓑ ꓫꓬꓼ ꓐꓴ ꓔꓯ ꓚ ꓟꓸ ꓖꓶ ꓢꓲ ꓢꓷꓸ ꓙ ꓟꓳ ꓙ ꓠ ꓟ꓾ ꓬꓲ ꓥꓪ ꓠꓴꓽ ꓔꓯ ꓕꓵꓼ ꓪ ꓖꓶ ꓔ ꓡꓳ꓿ 43 ꓬꓲ ꓔꓯ ꓙꓵꓻ ꓢꓴ ꓮꓽ ꓙꓵ ꓠꓬ ꓬꓲ ꓟꓬꓱ ꓗꓪ ꓐꓰ ꓝꓴꓲ ꓖꓽ ꓖꓶꓽ ꓟꓶˍ ꓟ꓾ ꓟꓷ ꓠꓷꓹ ꓝ ꓢꓴ ꓐꓴ ꓮꓽ ꓙꓵ ꓡꓰ ꓢꓷꓸ ꓙ ꓟꓳ ꓙ ꓗꓷꓳ꓾ ꓐꓯˍ ꓡꓳ꓿ 44 ꓒꓲ-ꓕꓱ ꓕꓱ ꓡꓱ ꓐꓯ ꓔꓬ ꓢꓰꓽ ꓕꓯ꓾ ꓬꓲ ꓐꓯ ꓘꓶ ꓔꓯ ꓠ ꓠꓹ ꓢꓴ ꓮꓽ ꓙꓵ ꓔꓯ ꓢꓲ-ꓫꓬ-ꓟ-ꓦ ꓬꓯꓼ ꓡ ꓡꓳ꓿ 45 ꓬꓳ-ꓒ ꓗꓪ ꓐꓰ ꓒꓲ-ꓕꓱ ꓔꓯ ꓛꓳ ꓡ ꓢꓴ꓾ ꓶꓺˍ ꓟ ꓗ ꓫꓵ ꓟꓶꓻ ꓔ ꓟ ꓙꓵꓻ ꓢꓴ ꓐꓴ ꓠꓬ꓾ ꓪꓴ-ꓢ ꓡꓰ ꓐꓶ ꓞꓳ ꓐꓴ ꓔꓯˍ ꓟꓲ ꓡꓯꓼ ꓫꓴ ꓢꓲ-ꓫꓬ-ꓟ-ꓦ ꓖꓶ ꓩꓴ ꓡ ꓠꓬꓲ ꓓꓵꓽ ꓙ ꓟꓶˍ ꓡꓳ꓿ 46 ꓮ ꓡꓲꓳ ꓐꓯ ꓠꓬ ꓐꓶ ꓞꓳ ꓐꓴ ꓥꓳꓽ ꓫꓵꓽ ꓥꓳꓽ ꓙꓰ ꓫꓸ ꓕꓱ ꓢꓲ꓾ ꓪꓴ-ꓢ ꓔꓯ ꓫꓱꓸ ꓖꓶˍ ꓟ ꓔꓯ ꓬꓲ ꓪꓽ ꓑ ꓙꓽˍ ꓡꓳ꓿ ꓖꓳ ꓕꓯ ꓒꓲ-ꓕꓱ ꓡꓰ꓾ 47 ꓣꓳˍ ꓐꓰ ꓕꓲ ꓡꓰꓹꓼ ꓢꓲ-ꓫꓬ-ꓟ-ꓦ ꓟꓶ ꓢꓴ ꓕꓱ ꓕꓲ ꓧꓳꓽ ꓔꓯ꓾ ꓬꓲꓻ ꓙꓬ ꓗꓪ ꓖꓳ ꓓꓱ ꓔꓲꓹ ꓖꓶ ꓟꓽ ꓓ꓾ ꓐꓰ ꓮꓽ ꓟ ꓐꓯ ꓑꓶꓸˍ ꓡ?꓾ ꓐꓰ ꓐꓯ ꓗꓷ ꓠꓬ꓾ 48 ꓬꓰ-ꓢꓴ ꓙꓲ-ꓢꓴ ꓟꓬꓱ ꓗꓪ ꓐꓰ ꓬꓲ ꓪꓽ ꓔꓯ ꓖꓳ ꓓꓱ ꓔꓲꓹ ꓖꓶ ꓝꓲ ꓠꓹ ꓟ ꓕꓵꓼ ꓪ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓒꓲ-ꓕꓱ ꓔꓯ ꓠꓬꓲꓽ ꓢ ꓠꓬꓲ ꓔꓬ ꓡꓯ ꓢꓰ꓾ ꓐꓰ ꓓꓰꓽˍ ꓡꓳ꓿

ꓝꓲ-ꓓꓴ 11

1 ꓖꓳ ꓕꓯ ꓝꓲ ꓓꓴ ꓐꓴˍ ꓐꓰ ꓬꓴ-ꓔ ꓟꓵꓽ ꓗꓪ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴ ꓠꓬ꓾ ꓐꓶ ꓞꓳ ꓐꓴˍ ꓟꓲ ꓪꓴ-ꓢ ꓐꓯ ꓘꓶꓽ ꓔꓯ ꓘꓳ ꓣꓴˍ ꓟ ꓓꓳꓽ ꓑ ꓙꓽˍ ꓡꓳ꓿ 2 ꓒꓲ-ꓕꓱ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓛꓲ ꓬꓰ ꓕꓯ꓾ ꓶꓺ ꓔ ꓢꓴ ꓕꓲ ꓧꓳꓽ ꓠꓬ ꓬꓲˍ ꓐꓰ ꓧꓳꓺ ꓡꓯꓽ ꓘꓳ ꓡ ꓢꓲ꓾ 3 ꓠꓴ ꓠꓬ ꓶˍ ꓟ ꓗ ꓫꓵ ꓟꓽ ꓟꓶ ꓢꓴ ꓦꓲ ꓗꓪ ꓓꓵꓽ ꓙꓰ ꓢꓲ꓾ ꓬꓲ ꓪˍ ꓐꓰ ꓜ ꓜꓽˍ ꓡꓳ꓾ ꓐꓰ ꓐꓯˍ ꓡꓳ꓿ 4 ꓖꓳ ꓕꓯ ꓒꓲ-ꓕꓱ ꓡꓰ ꓬꓲ ꓪꓽ ꓔꓯ ꓬꓲ ꓪꓴꓸ ꓗꓪ ꓐꓰ ꓤꓽ ꓟꓽ ꓠꓬꓲꓽ ꓚ ꓟꓸ ꓖꓶ ꓢꓲ꓾ 5 ꓥꓪ ꓠꓬ ꓬꓳꓹ-ꓒ ꓡꓳ ꓒꓱ ꓗꓪ ꓪꓽ ꓘꓴ ꓔꓬ ꓕꓯ꓾ ꓟꓯꓹ ꓟꓯꓹ ꓟꓴꓻ ꓗꓪ ꓦ ꓐꓬꓱꓽ ꓕꓲ ꓟ ꓟꓳ ꓢꓲ꓾ ꓟꓴꓽ ꓗꓪ ꓗꓪ ꓐꓰ ꓬꓲꓹ ꓐꓵ ꓓꓽ ꓟ ꓡꓰ ꓐꓰ ꓗꓹ ꓟ ꓕꓲ ꓘꓳꓹ꓾ ꓬꓲꓸ ꓡꓯꓼ ꓡꓲ ꓡꓯꓼ ꓗꓪ ꓚꓵꓹ ꓔ ꓢꓲ ꓩꓴ ꓬꓯꓼ ꓡ ꓟ ꓔꓯ ꓥꓪ ꓟꓳꓻ ꓗꓷꓳ꓿ 6 ꓥꓪ ꓖꓳ ꓟ ꓔꓯ ꓬꓲ ꓜꓶ ꓡꓳꓸ ꓠꓬꓲ ꓠꓬ꓾ ꓟꓲ ꓠꓯ ꓗꓪ ꓟ ꓛꓲ ꓒꓯꓹ ꓡꓲ ꓐꓽ ꓙꓳˍ ꓟ ꓦꓵ ꓙꓱꓽ ꓠꓲꓸ ꓙꓱꓽ ꓬꓲ ꓫꓵꓽ ꓬꓲ ꓙꓰꓽˍ ꓐꓰ꓾ ꓐꓶꓽ ꓓꓲꓻ ꓡꓯꓹ ꓓꓲꓻˍ ꓐꓰ ꓟꓵꓽ ꓪꓴꓽ ꓗꓪ ꓟ ꓠꓬꓹ ꓤ ꓙꓱꓻ ꓤ ꓔꓯ ꓟꓳˍ ꓡꓳ꓿ 7 ꓝꓮꓲ ꓠꓬ ꓫ ꓕꓱˍ ꓟ ꓢꓯꓼ ꓡꓰ ꓥꓪ ꓔꓯ꓾ ꓒꓲ-ꓕꓱꓳ꓾ ꓔꓴ ꓢꓲ꓾ ꓢꓰꓼ ꓜꓽ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 8 ꓖꓳ ꓡꓱ ꓥ ꓟꓲ ꓥꓪ ꓡꓰ꓾ ꓢꓲ ꓒꓽꓳ꓾ ꓟꓽ ꓓ꓾ ꓮ ꓡꓲꓳ ꓐꓯ ꓠꓬ ꓠꓲꓹ ꓒꓳꓹˍ ꓟ ꓐꓰ ꓟꓽ ꓫꓬˍ ꓟ ꓮꓸ ꓫꓵˍ ꓟꓲ ꓥꓪ ꓟꓽ ꓜꓽ ꓠꓬꓲ꓾ ꓐꓯ ꓖꓶꓳ꓿ 9 ꓗꓸ ꓠꓯꓸ ꓕꓲ ꓧꓪꓹ ꓟꓴꓽ ꓗꓪ ꓗꓪ ꓐꓰ ꓥꓪ ꓔꓯ꓾ ꓪꓴ-ꓢ ꓡꓰ ꓢꓲꓽ ꓫꓬ ꓡꓰ ꓝꓲˍ ꓟ ꓔꓯ ꓠꓴ ꓡꓰ ꓠꓲꓹ ꓒꓳꓹ ꓓꓴ ꓕꓽ ꓚꓬꓹ꓾ ꓐꓯ ꓖꓶ ꓡꓺꓳ꓿ 10 ꓕꓱ ꓡꓱ ꓢ ꓧꓪ ꓗꓷ ꓡꓰ ꓠꓬ꓾ ꓮꓽ ꓙꓵ ꓡꓱꓸꓼ ꓟꓴꓽ ꓗꓪ ꓗꓪ ꓚꓵꓹ ꓓꓯ ꓙꓰꓳ꓿ 11 ꓖꓳ ꓕꓲ ꓑꓹ ꓗꓪ ꓢꓲ-ꓢ-ꓡꓰ ꓗꓪ ꓐꓰ ꓥꓪ ꓔꓬ ꓗꓪ ꓝꓲꓺ ꓩꓴ ꓡ ꓟ ꓡ ꓞꓳ ꓢ ꓣꓳ ꓠꓬ꓾ ꓥꓪ ꓠꓴꓽ ꓔꓬ ꓟ ꓦꓲ ꓟꓲꓽ ꓕꓯꓽ ꓗꓪ ꓛꓲ ꓡ ꓐꓷ꓿ 12 ꓖꓳ ꓕꓯ ꓢꓲ-ꓫꓬ-ꓟ-ꓦ ꓡꓰ ꓥꓪ ꓔꓯ ꓟꓽ ꓓꓵꓽ ꓙ ꓟꓬꓽ ꓟꓬꓽ ꓬꓲ ꓪꓽ ꓔꓯ ꓛꓳ ꓙꓰ ꓠꓹ ꓟ ꓐꓯ ꓖꓶ ꓡꓺꓳ꓿ ꓝꓮꓲ ꓬꓲꓼ ꓤ ꓠꓬꓲ ꓤ ꓕꓱ ꓛꓳꓼ ꓣꓳˍ ꓟꓲ ꓥꓪ ꓔꓯ ꓛꓳ ꓙꓰ ꓢꓲ꓾ ꓥꓪ ꓠꓴꓽ ꓠꓬ ꓘꓳ-ꓠꓲ-ꓡꓲ-ꓬꓴ ꓦꓲ ꓗꓪ ꓓꓵꓽ ꓙꓰꓳ꓿ 13 ꓖꓳ ꓡꓱ ꓠꓬ ꓘꓳ-ꓠꓲ-ꓡꓲ-ꓬꓴ ꓡꓰ ꓥꓪ ꓠꓴ ꓔꓯ꓾ ꓟꓴꓽ ꓗꓪ ꓝꓲ ꓓꓴ ꓦꓰꓼ ꓡ ꓟ ꓔꓯ ꓬꓲ ꓟꓳꓻ ꓗꓷ ꓟ ꓐꓰ꓾ ꓬꓳ-ꓒ ꓗꓪ ꓒꓲ-ꓕꓱ ꓟꓬꓱ ꓔ ꓟ ꓢꓲ-ꓟꓴ ꓔꓯ ꓘꓴꓻ ꓬꓰ ꓝꓲ ꓠꓹ ꓟ ꓬꓲ ꓔꓯ ꓐꓯ ꓖꓶ ꓡ ꓟ ꓐꓰ꓾ 14 ꓬꓲˍ ꓐꓰ ꓬꓲ ꓕꓲ ꓦꓲ ꓡ ꓞꓳ ꓮꓽ ꓙꓵ ꓔꓯ ꓥꓪ ꓡꓰ ꓢꓯꓼ ꓟꓬ ꓟꓶˍ ꓟ ꓐꓯ ꓘꓶ ꓐꓯ ꓖꓶ ꓡ ꓥꓳ꓾ ꓐꓯˍ ꓟ ꓦ ꓐꓬꓱꓽ ꓮ ꓡꓲ ꓟꓳꓻ ꓗꓷ ꓟ ꓥꓪ ꓠꓴꓽ ꓔꓯ ꓐꓯ ꓖꓶ ꓡ ꓡꓳ꓿ 15 ꓖꓳ ꓡꓱ ꓢꓲ ꓥꓪ ꓟꓸ ꓟꓲ ꓚ ꓪꓴꓸ ꓔꓴˍ ꓕꓯ꓾ ꓧꓶꓸ ꓕꓯ ꓣꓳꓽ ꓔꓯ ꓢꓲ-ꓫꓬ-ꓟ-ꓦ ꓬꓯꓼ ꓡ ꓗꓷ ꓟ ꓡꓰ ꓐꓰ꓾ ꓬꓲ ꓪꓽ ꓔꓯˍ ꓟꓲ ꓬꓯꓼ ꓡꓺꓳ꓿ 16 ꓖꓳ ꓕꓯ ꓢꓲ ꓒ ꓡꓰ꓾ ꓬꓳ-ꓦ ꓠꓽ ꓬꓲꓻ ꓙꓬ ꓡꓰ ꓖꓳ ꓓꓱ ꓔꓲꓹ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓠꓽ ꓢꓲ-ꓫꓬ-ꓟ-ꓦ ꓡꓰ ꓔꓲꓹ ꓖꓶ ꓡ ꓟ ꓟꓶˍ ꓥꓳ꓾ ꓐꓯˍ ꓟ ꓐꓯ ꓘꓶ ꓔꓯ ꓥꓪ ꓓꓵꓽ ꓙ ꓛꓲ ꓡꓺꓳ꓿ 17 ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓔꓯ ꓣꓳ ꓙꓵꓻˍ ꓕꓯ꓾ ꓪꓴ-ꓢ ꓡꓰ ꓣꓳ ꓔꓯ ꓡꓯꓼ ꓫꓴ ꓖꓶˍ ꓟ ꓡꓰ ꓐꓰ ꓬꓲ ꓪꓽ ꓔꓯˍ ꓟꓲ ꓖꓶˍ ꓠꓬ꓾ ꓥꓪ ꓮꓽ ꓟ ꓥ ꓠꓬꓲ ꓪꓴ-ꓢ ꓔꓯ ꓗꓽ ꓔ ꓠꓯꓹ ꓡ? ꓐꓯˍ ꓡꓳ꓿ 18 ꓕꓱ ꓟ ꓔꓯ ꓬꓲ ꓪꓽ ꓑ ꓙꓽˍ ꓕꓯ꓾ ꓬꓲ ꓪꓽ ꓐꓯ ꓓꓴ ꓟꓽ ꓙꓳ ꓡꓰ ꓠꓬꓲ꓾ ꓪꓴ-ꓢ ꓔꓯ ꓫꓱꓸ ꓖꓶ ꓢꓲ꓾ ꓖꓳ ꓡꓱ ꓥ ꓠꓬ ꓪꓴ-ꓢ ꓡꓰ ꓐꓶꓽ ꓞꓳ ꓔꓯˍ ꓟꓲ ꓠꓲꓹ ꓟ ꓡꓶꓸ ꓢꓲ ꓢꓯꓼ ꓟꓬ ꓟꓶ ꓝꓲ ꓠꓹ ꓟ ꓬꓲ ꓚꓱꓹ ꓫꓬꓹ ꓖꓶˍ ꓐꓷ꓾ ꓐꓯˍ ꓡꓳ꓿ 19 ꓖꓳ ꓕꓯ ꓢꓶ-ꓕꓲ-ꓩ ꓔꓯ ꓢꓰꓼˍ ꓕꓲ ꓝꓲꓸ ꓗꓪ ꓘꓶꓻ ꓙꓵ ꓟꓶˍ ꓟ ꓑꓶ ꓓꓴ ꓧꓹ ꓒꓬꓱ ꓙꓰ ꓢꓴ ꓠꓬ꓾ ꓩꓳ-ꓠꓲ-ꓫꓲ-ꓬˍ ꓐꓰ ꓢ-ꓑꓴ-ꓣˍ ꓐꓰ ꓮ-ꓕꓲ-ꓬ ꓗꓪ ꓛꓲ ꓬꓰ ꓢꓲ꓾ ꓬꓴ-ꓔ ꓡ ꓞꓳ ꓔꓯˍ ꓡꓰꓽ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶˍ ꓡꓳ꓿ 20 ꓖꓳ ꓡꓱ ꓥ ꓟꓲ ꓬꓲ ꓪꓽ ꓗꓳ ꓡꓳ ꓗꓪ ꓟ ꓢ-ꓑꓴ-ꓣˍ ꓐꓰ ꓢ-ꓡꓲ-ꓠꓲ ꓡ ꓞꓳ ꓠꓬ ꓮ-ꓕꓲ-ꓬ ꓗꓪ ꓛꓲ ꓡ ꓕꓯ꓾ ꓦꓲ-ꓡꓲ ꓡꓽ ꓞꓳ ꓐꓴˍ ꓐꓰ ꓙꓻ ꓡꓯ ꓘꓳ ꓢꓲ꓾ ꓬꓲ ꓪꓽ ꓔꓯˍ ꓟꓲ ꓢꓲ ꓒ ꓬꓰ-ꓢꓴ ꓟꓸ ꓟꓲ ꓚ ꓟꓸ ꓖꓶˍ ꓡꓳ꓿ 21 ꓢꓲ ꓒ ꓠꓬ ꓬꓲ ꓪˍ ꓐꓰ ꓕꓲ ꓪꓺꓼ ꓔꓬ ꓢꓲ ꓬꓰ ꓙˍ ꓠꓬꓲ꓾ ꓮꓽ ꓟꓬꓹ ꓣꓳ ꓙꓵꓻ ꓢꓲ ꓓꓵꓽ ꓙ ꓒꓳꓹ ꓬꓲꓼ ꓡ ꓡꓳ꓿ 22 ꓓꓳꓽ ꓕꓱ ꓟ ꓙꓱ-ꓣꓴ-ꓢ-ꓡꓱ ꓗꓪ ꓟ ꓘꓴ ꓜꓲꓼ ꓞꓳ ꓐꓴ ꓑ ꓙꓽ ꓗꓷ ꓠꓬ꓾ ꓬꓲ ꓪꓽ ꓡꓰ ꓐ-ꓠ-ꓐ ꓔꓯ ꓮ-ꓕꓲ-ꓬ ꓗꓪ ꓝꓲ ꓩꓴ ꓗꓷˍ ꓡꓳ꓿ 23 ꓬꓲ ꓛꓲ ꓡ ꓢꓲ ꓪꓴ-ꓢ ꓣꓱꓽ ꓛꓰꓽ ꓛꓳ ꓞꓹˍ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓗꓹ ꓛꓲ ꓢꓲ ꓬꓲ ꓪꓽ ꓮꓽ ꓙꓵ ꓢꓴ ꓔꓯ ꓕꓶꓻ ꓕꓶˍ ꓡꓰ ꓢꓲ ꓒ ꓔꓯ ꓦ ꓡꓱ ꓠꓹ ꓟ ꓘꓶꓸ ꓖꓶˍ ꓡꓳ꓿ 24 ꓐ-ꓠ-ꓐ ꓠꓽ ꓞꓳ ꓙꓲꓻ ꓥ ꓢꓲ꓾ ꓢꓲ-ꓫꓬ-ꓟ-ꓦˍ ꓐꓰ ꓙꓵꓻ ꓠꓲꓹ ꓐꓲ ꓞꓹ ꓢꓴ ꓥ ꓡꓳ꓿ ꓖꓳ ꓡꓱ ꓢꓲ ꓡꓽ ꓞꓳ ꓮꓽ ꓟꓬ ꓣꓳ ꓢꓲ ꓒ ꓔꓯ ꓦ ꓡꓱ ꓡ ꓡꓳ꓿ 25 ꓖꓳ ꓗꓸ ꓠꓯꓸ ꓢꓳ-ꓡꓳ ꓔꓯ ꓧꓪ ꓬꓰ ꓠ ꓟ꓾ ꓐ-ꓠ-ꓐ ꓠꓬ ꓕ-ꓢꓴ ꓡꓳ ꓒꓱ ꓗꓪ ꓙꓰˍ ꓡꓳ꓿ 26 ꓬꓲ ꓔꓯ ꓧꓪ ꓟꓶ ꓡꓰ ꓠꓬ꓾ ꓮ-ꓕꓲ-ꓬ ꓗꓪ ꓧꓳꓽ ꓬꓲꓼ ꓡ ꓢꓲ꓾ ꓬꓲ ꓪꓽ ꓖꓳ ꓗꓪ ꓕꓲ ꓘꓳꓼ ꓚꓳ ꓡꓳ ꓘꓴ ꓜꓲ ꓞꓳˍ ꓐꓰ ꓜꓲꓼ ꓡꓯ ꓘꓳ ꓢꓲ ꓠꓬꓲ꓾ ꓞꓳ ꓜꓴ ꓮꓽ ꓟꓬ ꓔꓯ ꓟꓸ ꓖꓶˍ ꓡꓳ꓿ ꓦ ꓡꓱ ꓢꓴ ꓐꓴ ꓔꓯ꓾ ꓙꓲ-ꓢꓴ ꓢꓲ ꓤ꓾ ꓐꓰ ꓘꓴꓻ ꓪꓴꓸ ꓔꓴˍ ꓟ ꓠꓬ ꓮ-ꓕꓲ-ꓬ ꓗꓪ ꓥ ꓡꓳ꓿ 27 ꓦꓬꓼ ꓠꓬꓲ ꓖꓳ ꓟ ꓗꓪ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓟꓷ ꓠꓷꓹ ꓝꓸ ꓢꓴ ꓕꓲ ꓐꓱ ꓠꓬ꓾ ꓮ-ꓕꓲ-ꓬ ꓗꓪ ꓙꓰˍ ꓡꓳ꓿ 28 ꓬꓲ ꓪꓽ ꓗꓪ ꓟ ꓯ-ꓖ-ꓑꓴ ꓟꓬꓱ ꓔ ꓢꓴ ꓕꓲ ꓣꓳ ꓦꓰꓼ ꓔꓴ ꓡ ꓢꓲ꓾ ꓟꓵ ꓗꓳꓹ ꓓꓵ ꓓꓵ ꓗꓪ ꓦꓰꓼ ꓟꓷꓼ ꓘꓳꓼ ꓓꓽ ꓟ ꓓꓳ ꓡ ꓥꓳ꓾ ꓐꓰ ꓢꓲ-ꓫꓬ-ꓟ-ꓦ ꓗꓪ ꓐꓰ ꓐꓯ ꓓꓳ ꓡ ꓡꓳ꓿ (ꓕꓱ ꓟ ꓠꓬ ꓪ ꓔꓲ ꓗꓷ-ꓡꓷ-ꓔꓲ-ꓬꓴ ꓦꓬꓼ ꓠꓬꓲ ꓗꓪ ꓒꓬꓱꓼ ꓡꓺꓳ꓿) 29 ꓢꓲ ꓤ ꓐꓴ ꓮꓽ ꓟ ꓢꓯꓼ ꓮ ꓡꓲ ꓙꓳˍ ꓠꓬ ꓮ ꓡꓲ ꓬꓴ-ꓔ ꓟꓵꓽ ꓗꓪ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓬꓰ ꓙ ꓓꓴ ꓒꓴ ꓖꓶ ꓩꓴ ꓗꓷ ꓠꓹ ꓟ ꓚꓴꓽ ꓬꓲꓹ ꓓꓶꓽ ꓞꓷꓹ ꓗꓷ ꓠꓬ꓾ 30 ꓒꓴ ꓜꓲ ꓡꓯꓼ ꓘꓳ ꓢꓲ ꓐ-ꓠ-ꓐˍ ꓐꓰ ꓢꓳ-ꓡꓳ ꓡꓯꓼ ꓒꓯꓹ ꓗꓪ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ ꓡꓯꓼ ꓘꓪ ꓩꓴ ꓗꓷˍ ꓡꓳ꓿

ꓝꓲ-ꓓꓴ 12

1 ꓮꓽ ꓡ ꓖꓳ ꓕꓲ ꓝꓲꓸ ꓗꓪ ꓪ ꓔꓲ ꓩꓴ-ꓡꓲ ꓠꓬ꓾ ꓘꓴ ꓜꓲ ꓞꓳ ꓗꓪ ꓟ ꓕꓲ ꓐꓱ ꓔꓯ ꓘꓶꓻ ꓙꓵ ꓠꓹ ꓟ ꓡꓯꓼ ꓡꓵˍ ꓡꓳ꓿ 2 ꓖꓳ ꓡꓱ ꓢꓲ ꓬꓲ ꓠꓬ ꓮꓸ ꓕꓽ ꓡꓰ ꓬꓳ-ꓦ ꓬꓲ ꓮ ꓬꓲꓼ ꓬ-ꓗꓴ ꓔꓯ ꓢꓰꓼ ꓗꓷˍ ꓡꓳ꓿ 3 ꓬꓲ ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓬꓴ-ꓔ ꓡ ꓞꓳ ꓠꓲꓹ ꓒꓴˍ ꓟ ꓬꓲ ꓢꓷꓸ ꓡꓰ ꓠꓬꓲ꓾ ꓒꓲ-ꓕꓱ ꓔꓯˍ ꓟꓲ ꓣꓴ ꓬꓰˍ ꓡꓳ꓿ ꓖꓳ ꓕꓯ ꓠꓬ ꓙꓵꓽ-ꓧꓶ-ꓟꓽ-ꓣꓱ-ꓑꓮꓲ ꓦꓬꓼ ꓠꓬꓲ ꓥ ꓡꓳ꓿ 4 ꓬꓲ ꓡꓰ ꓒꓲ-ꓕꓱ ꓔꓯ ꓐꓱ ꓓꓴꓽ ꓗꓪ ꓣꓴꓻ ꓐꓱ ꓔ ꓢꓲ꓾ ꓦꓴ ꓠꓬꓹ ꓢꓴ ꓟꓯꓼ ꓤ ꓡꓲ ꓣꓳ ꓙꓳˍ ꓟ ꓑꓺ ꓜꓴꓻ ꓡꓲ ꓜꓴ ꓔꓯ ꓡꓯꓼ ꓙꓱ ꓗꓷˍ ꓡꓳ꓿ ꓖꓳ ꓡꓱ ꓢꓲ ꓦꓲ-ꓘꓳ-ꓑꓮꓲ ꓬꓰ ꓓꓳ ꓡꓰ ꓗꓸ ꓠꓯ ꓑ ꓫꓬꓼ ꓐꓴ ꓟꓲꓽ ꓙꓬ ꓗꓪ ꓬꓲ ꓔꓯ ꓐꓯ ꓟꓴ ꓘꓶꓽ ꓠꓹ ꓟ ꓧꓳꓽ ꓓꓳ ꓡꓺˍ ꓐꓰ ꓓꓵꓽ ꓙˍ ꓡꓳ꓿ 5 ꓒꓲ-ꓕꓱ ꓔꓯ ꓠꓬ ꓬꓲ ꓖꓳ ꓡꓱ ꓐꓱ ꓓꓴꓽ ꓗꓪ ꓐꓱ ꓔ ꓥ ꓟꓲ꓾ ꓘꓴ ꓜꓲ ꓞꓳ ꓐꓴ ꓠꓽ ꓠꓲꓹ ꓡꓱꓻ ꓡꓱˍ ꓡꓰ ꓬꓲ ꓐꓱ ꓶ ꓪꓴ-ꓢ ꓔꓯ ꓪꓽ ꓘꓴˍ ꓡꓳ꓿ 6 ꓩꓴ-ꓡꓲ ꓡꓰ ꓬꓲ ꓔꓯ ꓧꓳꓽ ꓓꓳ ꓡ ꓐꓰ ꓬꓰˍ ꓟ ꓧꓶꓸ ꓕꓯ ꓕꓲ ꓦꓬꓼ ꓗꓪ꓾ ꓒꓲ-ꓕꓱ ꓔꓯ ꓠꓬ ꓧꓳꓻ ꓫꓱ ꓚ ꓠꓬꓲꓽ ꓚꓱꓹ ꓡꓰ ꓞꓳꓹ ꓔ ꓢꓲ꓾ ꓟꓯꓼ ꓤ ꓠꓬꓲꓽ ꓣꓳ ꓠꓬꓲꓽ ꓗꓴ ꓚꓸꓼ ꓗꓪ ꓬꓲꓼ ꓟꓶ ꓔꓬ ꓝꓲˍ ꓡꓳ꓿ ꓐꓱ ꓓꓴꓽ ꓗ ꓘꓶꓽ ꓗꓪˍ ꓟꓲ ꓟꓯꓼ ꓤ ꓐꓴ ꓦꓴꓺ ꓠꓬꓹ ꓔꓬ ꓡꓳ꓿ 7 ꓞꓼ ꓐꓰ ꓢꓲ ꓒ ꓬꓲ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓠꓬ ꓒꓲ-ꓕꓱ ꓒ ꓕꓲꓺꓼ ꓗꓪ ꓦꓰꓼ ꓡ ꓢꓲ꓾ ꓐꓱ ꓓꓴꓽ ꓗꓳꓹ ꓗꓪ ꓠꓬꓲ ꓟꓳ ꓓꓴ ꓣꓳꓺ ꓖꓶ ꓡ ꓡꓳ꓿ ꓬꓲ ꓡꓰ ꓒꓲ-ꓕꓱ ꓔꓯ ꓡꓵꓹ ꓖꓶ ꓢꓲ ꓠꓬꓲ꓾ ꓮꓸ ꓟꓲꓸ ꓔꓴ꓾ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓒꓲ-ꓕꓱ ꓡꓯꓼ ꓒꓯꓹ ꓗꓪ ꓞꓳꓹ ꓔ ꓟ ꓧꓳꓻ ꓫꓱ ꓚ ꓞꓰꓻ ꓡꓰˍ ꓡꓳ꓿ 8 ꓖꓳ ꓡꓱ ꓢꓲ ꓟꓴꓽ ꓗꓪ ꓝꓲ ꓓꓴ ꓡꓰ ꓬꓲ ꓔꓯ꓾ ꓠꓴ ꓙꓽ ꓧꓷꓹ ꓧꓷꓹ ꓢꓲ ꓛꓲꓺ ꓠꓲꓺ ꓦꓲ ꓚ ꓞꓳꓹ꓾ ꓐꓯˍ ꓡꓳ꓿ ꓒꓲ-ꓕꓱ ꓬꓲ ꓖꓳ ꓡꓱ ꓬꓰ ꓗꓷ ꓠꓬ ꓟꓴꓽ ꓗꓪ ꓝꓲ ꓓꓴ ꓡꓰ꓾ ꓠꓴ ꓐꓵ ꓞꓶ ꓓꓽ ꓟ ꓪꓸ ꓔꓸ ꓢꓲ ꓥꓪ ꓔꓯ ꓛꓳ ꓡꓯ꓾ ꓐꓯˍ ꓡꓳ꓿ 9 ꓖꓳ ꓡꓱ ꓠꓬ ꓒꓲ-ꓕꓱ ꓠꓽ ꓬꓲ ꓔꓯ ꓛꓳ ꓓꓳ ꓙꓰˍ ꓡꓳ꓿ ꓟꓴꓽ ꓗꓪ ꓝꓲ ꓓꓴ ꓬꓰ ꓗꓷ ꓟ ꓠꓬ ꓚꓵꓺ ꓚꓵ ꓥ ꓟ ꓬꓲ ꓟꓽ ꓢꓷ ꓠꓬꓲ꓾ ꓬꓲ ꓠꓽ ꓦ ꓐꓬꓱꓽ ꓟꓳˍ ꓡꓳ꓾ ꓓꓵꓽ ꓙˍ ꓡꓳ꓿ 10 ꓦꓴ ꓠꓬꓹ ꓢꓴ ꓬꓲ ꓪꓴꓸ ꓕꓲ ꓜꓴꓻ ꓟ ꓐꓰ ꓠꓬꓲꓽ ꓜꓴꓻ ꓕꓲ ꓜꓴꓻ ꓟ ꓔꓯ ꓗꓳꓸ ꓙꓰ ꓠꓬ꓾ ꓡꓳ ꓒꓱ ꓗꓪ ꓓꓵꓽ ꓡꓰˍ ꓟ ꓧꓳꓻ ꓗ ꓘꓶꓽ ꓗꓪ ꓛꓲ ꓬꓰˍ ꓡꓳ꓿ ꓖꓳ ꓕꓯ ꓗ ꓘꓶꓽ ꓖꓳ ꓟ ꓠꓬ ꓬꓲ ꓪꓽ ꓐꓱ ꓶ ꓬꓲꓸ ꓔꓱꓹ ꓬꓲꓸ ꓒꓴ ꓡ ꓡꓳ꓿ ꓬꓲ ꓪꓽ ꓓꓳ ꓙꓰ ꓢꓲ ꓙ ꓖꓴ ꓕꓲ ꓚꓱꓹ ꓫꓱꓽ ꓗꓳꓸ ꓙꓰ ꓠꓬ꓾ ꓟꓴꓽ ꓗꓪ ꓝꓲ ꓓꓴ ꓠꓽ ꓞꓼ ꓐꓰ ꓬꓲ ꓔꓯˍ ꓐꓰ ꓧꓹ ꓙꓰꓳ꓿ 11 ꓒꓲ-ꓕꓱ ꓚꓬꓹ ꓪ ꓡꓰ ꓠꓬ꓾ ꓢꓲ ꓒ ꓠꓬ ꓬꓲ ꓝꓲ ꓓꓴ ꓔꓯ ꓝꓲ ꓩꓴ ꓡ ꓢꓲ꓾ ꓩꓴ-ꓡꓲ ꓡꓯꓼ ꓒꓯꓹ ꓗꓪ ꓐꓰ ꓥ ꓟꓲ꓾ ꓥꓪ ꓔꓯ ꓟꓽ ꓙꓲ ꓟ ꓗꓷ ꓡꓰˍ ꓟ ꓔꓯ ꓥꓳ ꓡꓳꓸ ꓔꓬ ꓟ ꓬꓴ-ꓔ ꓑ ꓫꓬꓼ ꓐꓴ ꓮꓽ ꓙꓵ ꓗꓪ ꓐꓰ ꓥ ꓟꓲ꓾ ꓥꓪ ꓔꓯ ꓚꓬꓴ ꓓꓳ ꓡ ꓟ ꓮ ꓟꓶ ꓥꓪ ꓚꓵ ꓚꓵ ꓢꓷꓸ ꓡꓰꓳ꓾ ꓐꓯˍ ꓡꓳ꓿ 12 ꓖꓳ ꓡꓱ ꓢꓲ ꓕꓱ ꓟ ꓬꓲ ꓚꓬꓹ ꓪ ꓡꓰ ꓠꓬ꓾ ꓟ-ꓘꓳ ꓟꓬꓱ ꓔ ꓟ ꓬꓳ-ꓦ ꓬꓲ ꓟꓹ ꓟ ꓟ-ꓡꓲ ꓦꓲ ꓗꓪ ꓙꓰˍ ꓡꓳ꓿ ꓖꓳ ꓗꓪ ꓬꓲ ꓪꓽ ꓮꓽ ꓟꓬꓹ ꓣꓳ ꓜꓲꓼ ꓞꓹ ꓢꓲ ꓪꓽ ꓘꓴ ꓔꓬ ꓡꓳ꓿ 13 ꓒꓲ-ꓕꓱ ꓡꓰ ꓠꓱ ꓫꓱꓸ ꓟꓸꓼ ꓦꓲ ꓚꓬꓹ ꓗ ꓘꓶꓽ ꓗꓪ ꓲ'ꓼ ꓗꓷ ꓠꓬ꓾ ꓣꓳ-ꓓ ꓟꓬꓱ ꓔ ꓟ ꓣꓱꓽ ꓙ ꓢꓴ ꓤ ꓟꓶ ꓡꓯꓸ ꓤ ꓕꓲ ꓣꓳ ꓡꓳꓸ ꓠꓬꓲ ꓡ ꓡꓳ꓿ 14 ꓒꓲ-ꓕꓱ ꓢꓯꓼ ꓥ ꓟ ꓬꓲ ꓚꓬꓹ ꓪ ꓡꓰ ꓠꓬ ꓗꓹ ꓛꓲ ꓠꓬꓲ꓾ ꓗ ꓘꓶꓽ ꓟꓽ ꓒꓴ ꓒꓴ ꓔꓷꓹ ꓬꓲꓼ ꓙꓰ ꓢꓲ꓾ ꓒꓲ-ꓕꓱ ꓠꓬ ꓚꓬꓹ ꓗ ꓘꓶꓽ ꓠꓱ ꓫꓱꓸ ꓟꓸꓼ ꓗꓪ ꓦꓰꓼ ꓞꓹ ꓡꓳ꓾ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓐꓯ ꓖꓶˍ ꓡꓳ꓿ 15 ꓖꓳ ꓡꓱ ꓠꓬ ꓬꓲ ꓪꓽ ꓡꓰ꓾ ꓠꓴ ꓪꓴꓸˍ ꓡꓳ꓾ ꓐꓯ ꓖꓶˍ ꓕꓯ꓾ ꓬꓲ ꓠꓽ ꓬꓲ ꓪꓽ ꓔꓯ꓾ ꓚꓵ ꓚꓵ ꓥꓳ꓾ ꓐꓰ ꓮꓽ ꓘꓶ ꓐꓯˍ ꓡꓳ꓿ ꓖꓳ ꓕꓯ ꓬꓲ ꓪꓽ ꓡꓰ꓾ ꓒꓲ-ꓕꓱ ꓬꓲ ꓟꓴꓽ ꓗꓪ ꓝꓲ ꓓꓴ ꓥꓻˍ ꓟꓽ ꓢꓷ? ꓐꓯˍ ꓡꓳ꓿ 16 ꓖꓳ ꓡꓱ ꓥ ꓟꓲ ꓒꓲ-ꓕꓱ ꓠꓽ ꓗ ꓘꓶꓽ ꓗꓪ ꓟꓽ ꓠ ꓠꓽ ꓲ'ꓼ ꓔꓬ ꓠꓬꓲ ꓗ ꓘꓶꓽ ꓒꓴ ꓖꓶ ꓗꓷ ꓠꓬ꓾ ꓬꓲ ꓪꓽ ꓬꓲ ꓔꓯ ꓟꓳꓻ ꓡꓰ ꓢꓲ ꓓꓵꓽ ꓙ ꓮ' ꓡꓰꓳ꓿ 17 ꓒꓲ-ꓕꓱ ꓠꓽ ꓬꓲ ꓪꓽ ꓔꓯ ꓟꓽ ꓪꓳꓹ ꓔꓬ꓾ ꓐꓰ ꓡꓯꓼ ꓒꓯꓹ ꓶꓹ ꓖꓶ ꓢꓲ꓾ ꓢꓲ ꓒ ꓡꓰ ꓬꓲ ꓔꓯ ꓐꓱ ꓓꓴꓽ ꓗꓪ ꓐꓰ ꓮ ꓡꓲ ꓧꓳꓽ ꓓꓳ ꓡ ꓟ ꓐꓯ ꓟꓸ ꓖꓶˍ ꓡꓳ꓿ ꓝꓮꓲ ꓬꓲ ꓡꓰ꓾ ꓫꓵꓽ ꓪꓴ ꓕꓱ ꓟ ꓬ-ꓗꓴˍ ꓐꓰ ꓬꓲꓼ ꓤ ꓠꓬꓲ ꓤ ꓐꓴ ꓔꓯˍ ꓟꓲ ꓐꓯ ꓖꓶ ꓬꓰ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓓꓳ ꓙꓰ ꓢꓲ ꓠꓱꓸ ꓐꓯꓼ ꓕꓲ ꓖ ꓗꓪ ꓙꓰˍ ꓡꓳ꓿ 18 ꓟꓲꓽ ꓕꓯ ꓙꓲ ꓡ ꓠꓬ꓾ ꓒꓲ-ꓕꓱ ꓮ ꓡꓲ ꓗꓪ ꓙꓰ ꓗꓷ ꓟ ꓟꓽ ꓢꓷ ꓠꓬꓲ꓾ ꓟꓯꓼ ꓤ ꓐꓴ ꓗꓳ ꓡꓳ ꓗꓪ ꓮꓽ ꓘꓶꓸ ꓢꓴ ꓔꓴ ꓡ ꓡꓳ꓿ 19 ꓩꓴ-ꓡꓲ ꓡꓰ ꓧꓪ ꓬꓰ ꓝꓲˍ ꓟꓲ ꓒꓲ-ꓕꓱ ꓔꓯ ꓧꓪ ꓟꓽ ꓟꓳ ꓠꓬ꓾ ꓦꓴ ꓠꓬꓹ ꓢꓴ ꓐꓴ ꓔꓯ ꓟꓰꓹ ꓠ ꓠꓬꓲ ꓢꓲ ꓬꓲ ꓪꓽ ꓔꓯ ꓢꓰꓼ ꓗꓷ ꓠꓹ ꓟ ꓕꓵꓼ ꓪ ꓖꓶˍ ꓡꓳ꓿ ꓖꓳ ꓗꓸ ꓠꓯꓸ ꓩꓴ-ꓡꓲ ꓠꓽ ꓬꓴ-ꓔ ꓟꓵꓽ ꓗꓪ ꓐꓰ ꓢꓲ-ꓢ-ꓡꓰ ꓗꓪ ꓙꓰ ꓢꓲ ꓖꓳ ꓗꓪ ꓕꓲ ꓝꓲꓸ ꓔꓬ ꓬꓰˍ ꓡꓳ꓿ 20 ꓖꓳ ꓕꓯ ꓩꓴ-ꓡꓲ ꓠꓬ ꓕꓲ-ꓬˍ ꓐꓰ ꓢꓲ-ꓓꓳ ꓗꓪ ꓔꓬ ꓢꓴ ꓔꓯ ꓮꓽ ꓘꓶꓸ ꓠꓲꓹ ꓟ ꓦꓶꓻ ꓠꓬꓲ꓾ ꓖꓳ ꓗꓪ ꓔꓬ ꓢꓴ ꓐꓴ ꓡꓰ ꓪ ꓔꓲ ꓙꓻ ꓙꓵꓽ ꓢꓴ ꓑꓷ-ꓡ-ꓢꓶ-ꓔꓴ ꓔꓯ ꓖꓪ ꓙꓱ ꓢꓲ꓾ ꓪ ꓔꓲ ꓔꓯ ꓖꓶꓻ ꓬꓲꓽ ꓡ ꓡꓳ꓿ ꓮ ꓡꓲꓳ ꓐꓯˍ ꓠꓬ ꓕꓲ-ꓬˍ ꓐꓰ ꓢꓲ-ꓓꓳ ꓢꓴ ꓠꓬ ꓩꓴ-ꓡꓲ ꓙꓵꓽˍ ꓟ ꓟꓵꓽ ꓗꓪ ꓐꓰ ꓜꓻ ꓪꓴꓻ ꓜꓽ ꓔꓬ ꓢꓴ ꓥ ꓠꓬꓲ꓾ ꓩꓴ-ꓡꓲˍ ꓐꓰ ꓧꓳꓹ ꓡꓰ ꓠꓲꓹ ꓫꓵˍ ꓡꓳ꓿ 21 ꓝꓰꓹ ꓔ ꓟ ꓦꓬꓼ ꓠꓬꓲ ꓗꓪ꓾ ꓩꓴ-ꓡꓲ ꓠꓬ ꓪ ꓔꓲ ꓐꓵ ꓞꓶ ꓖꓪꓽ ꓔꓸ ꓢꓲ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓲ ꓠꓬꓲ ꓑ ꓫꓬꓼ ꓐꓴ ꓔꓯ ꓫꓸ ꓕꓱˍ ꓡꓳ꓿ 22 ꓖꓳ ꓕꓯ ꓑ ꓫꓬꓼ ꓐꓴ ꓘꓴ ꓢꓲ꓾ ꓕꓱ ꓟ ꓠꓽ ꓢꓲꓺ ꓬꓲꓸ ꓢꓯꓼ ꓥ ꓡꓳ꓾ ꓞꓳ ꓤ ꓢꓯꓼ ꓟꓽ ꓥ꓾ ꓐꓯˍ ꓡꓳ꓿ 23 ꓩꓴ-ꓡꓲ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓟꓽ ꓖꓶ ꓠꓬꓲ꓾ ꓢꓲ ꓒ ꓬꓲ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓡꓰ ꓞꓼ ꓐꓰ ꓬꓲ ꓔꓯ ꓓꓶꓽ ꓗꓷ ꓠꓬ꓾ ꓐꓶꓽ ꓓꓲꓻ ꓡꓰ ꓬꓲ ꓔꓯ ꓜꓽ ꓗꓷ ꓢꓲ ꓫꓵꓻꓳ꓿ 24 ꓖꓳ ꓡꓱ ꓥ ꓟꓲ ꓪꓴ-ꓢ ꓐꓯ ꓘꓶ ꓠꓽ ꓡꓯꓼ ꓫꓵ ꓒꓬꓱ ꓙꓰ ꓢꓲ ꓦ ꓡꓱ ꓢꓴ ꓟꓬꓽ ꓡ ꓡꓳ꓿ 25 ꓐ-ꓠ-ꓐˍ ꓐꓰ ꓢꓳ-ꓡꓳ ꓠꓬ ꓬꓰ ꓙˍ ꓟ ꓟꓬꓱꓽ ꓖꓳ ꓟ ꓬꓰ ꓓꓳ ꓡꓰ ꓕꓯ꓾ ꓟ-ꓘꓳ ꓟꓬꓱꓺ ꓔ ꓟ ꓬꓳ-ꓦ ꓔꓯ ꓧꓳꓽ ꓔ ꓢꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓬꓲꓼ ꓙꓰˍ ꓡꓳ꓿

ꓝꓲ-ꓓꓴ 13

1 ꓖꓳ ꓕꓯ ꓮ-ꓕꓲ-ꓬ ꓘꓴ ꓜꓲ ꓞꓳ ꓗꓪ ꓟꓷ ꓠꓷꓹ ꓝꓸ ꓢꓴ ꓐꓰ ꓟꓸ ꓒ ꓙꓳˍ ꓡꓳ꓿ ꓐ-ꓠ-ꓐ ꓐꓰ꓾ ꓞꓳ-ꓠꓯꓺ-ꓒ ꓐꓰ ꓟꓬꓱ ꓔ ꓟ ꓢꓲ-ꓟꓰ ꓐꓰ ꓢ-ꓡꓲ-ꓠꓲ ꓢꓴ ꓡꓴ-ꓘꓷ-ꓬꓴ ꓐꓰ꓾ ꓫꓴ ꓙꓵꓽ ꓒꓽ ꓩꓴ-ꓡꓲ ꓬꓲꓸ ꓠꓬꓲ ꓤ ꓟꓯꓸ ꓟ-ꓠꓰ-ꓬ ꓐꓰ ꓢꓳ-ꓡꓳ꓾ ꓕꓱ ꓟꓬ ꓣꓳ ꓥ ꓡꓳ꓿ 2 ꓬꓲ ꓪꓽ ꓠꓬ ꓜ ꓓꓴ ꓚꓲꓸ ꓢꓲ ꓪꓽ ꓘꓴ ꓔꓬ ꓕꓯ꓾ ꓢꓲ-ꓫꓬ-ꓟ-ꓦ ꓡꓰ꓾ ꓐ-ꓠ-ꓐ ꓐꓰ ꓢꓳ-ꓡꓳ ꓠꓬ꓾ ꓥꓪ ꓡꓰ ꓬꓲ ꓪꓽ ꓐꓱ ꓶ ꓝꓰꓹ ꓔ ꓟ ꓟꓬꓱꓽ ꓬꓰ ꓠꓹ ꓟ ꓥꓪ ꓔꓯ ꓚꓰꓸ ꓖꓶ ꓡꓯ꓾ ꓐꓯˍ ꓡꓳ꓿ 3 ꓖꓳ ꓕꓯ ꓬꓲ ꓪꓽ ꓠꓬ ꓜ ꓓꓴ ꓚꓲꓸ ꓢꓲ ꓪꓽ ꓘꓴ ꓢꓲ ꓠꓬꓲ꓾ ꓬꓲ ꓪꓽ ꓕꓯ ꓢꓲ ꓗꓪ ꓡꓯꓼ ꓒꓯꓹ ꓚꓰꓹ ꓖꓶ ꓗꓷ ꓠꓬ ꓝꓲ ꓩꓴ ꓗꓷꓳ꓿ 4 ꓢꓲ-ꓫꓬ-ꓟ-ꓦ ꓡꓰ ꓐ-ꓠ-ꓐ ꓐꓰ ꓢꓳ-ꓡꓳ ꓔꓯ ꓝꓲ ꓩꓴ ꓗꓷ ꓠꓬ꓾ ꓬꓲ ꓪꓽ ꓠꓽ ꓢꓶ-ꓡꓴ-ꓚꓲ ꓗꓪ ꓬꓯꓼ ꓙꓰ ꓢꓲ꓾ ꓖꓳ ꓗꓪ ꓐꓰ ꓡꓲ ꓜꓶꓽ ꓢꓲ ꓠꓬꓲ ꓢ-ꓑꓴ-ꓣ ꓗꓪ ꓙꓰˍ ꓡꓳ꓿ 5 ꓢ-ꓡ-ꓟꓲ ꓗꓪ ꓛꓲ ꓬꓰ ꓠꓬ꓾ ꓬꓲ ꓪꓽ ꓡꓰ ꓬꓴ-ꓔ ꓡ ꓞꓳ ꓜꓲꓼ ꓦꓲ ꓮꓽ ꓙꓵ ꓗꓪ ꓪꓴ-ꓢ ꓐꓯ ꓘꓶꓽ ꓚ ꓟꓸ ꓖꓶˍ ꓡꓳ꓿ ꓬꓳ-ꓦˍ ꓟꓲ ꓬꓲ ꓪꓽ ꓔꓯ ꓬꓰ ꓙ ꓢꓴ ꓬꓰˍ ꓡꓳ꓿ 6 ꓬꓲ ꓪꓽ ꓠꓬ ꓬꓲꓻ ꓗꓳ ꓡꓳ ꓖꓳ ꓕꓲ ꓟꓵꓽ ꓡꓱꓸꓼ ꓫꓱꓽ ꓙꓻ ꓙꓰ ꓢꓲ ꓒ-ꓩꓴ ꓗꓪ ꓛꓲ ꓬꓰ ꓠꓬ꓾ ꓟꓽ ꓔꓱꓹ ꓟ ꓟꓷ ꓠꓷꓹ ꓝꓸ ꓢꓴˍ ꓐꓰ ꓥ ꓟꓬꓱꓽ ꓬꓰ ꓒ꓾ ꓐ-ꓬꓰ-ꓢꓴ ꓟꓬꓱ ꓔ ꓟ ꓬꓴ-ꓔ ꓡ ꓞꓳ ꓕꓲ ꓣꓳ ꓔꓯ ꓔꓳꓹ ꓜꓳˍ ꓡꓳ꓿ 7 ꓬꓲ ꓠꓬ ꓫꓴ ꓙꓵꓽ ꓒ ꓢꓷ-ꓖꓷ-ꓬꓴ-ꓒꓳ-ꓡꓳˍ ꓐꓰ ꓔꓬ ꓡꓳ꓿ ꓢꓷ-ꓖꓷ-ꓬꓴ-ꓒꓳ-ꓡꓳ ꓠꓬ ꓙꓽ ꓜꓲꓼ ꓢꓴ ꓥ ꓢꓲ꓾ ꓪꓴ-ꓢ ꓐꓯ ꓘꓶ ꓠ ꓠꓹ ꓠꓲꓹ ꓫꓵˍ ꓠꓬꓲ꓾ ꓐ-ꓠ-ꓐˍ ꓐꓰ ꓢꓳ-ꓡꓳ ꓔꓯ ꓘꓴ ꓔꓯꓹ ꓡ ꓡꓳ꓿ 8 ꓖꓳ ꓡꓱ ꓥ ꓟꓲ ꓥꓺ ꓟꓬꓱꓽ ꓬꓰ ꓒ ꓬꓲ-ꓡꓲ-ꓟ ꓡꓰ ꓬꓲ ꓪꓽ ꓔꓯ ꓗꓽ ꓔ ꓢꓲ꓾ ꓙꓵꓻ ꓚꓱꓹ ꓗꓪ ꓐꓰ ꓫꓴ ꓙꓵꓽ ꓒ ꓔꓯ ꓧꓹ ꓙꓰ ꓝꓲ ꓠꓲꓹ ꓫꓵˍ ꓡꓳ꓿ (ꓬꓲ-ꓡꓲ-ꓟ ꓐꓯˍ ꓟ ꓠꓬ꓾ ꓥꓺ ꓟꓬꓱꓽ ꓬꓰ ꓒ ꓐꓯˍ ꓟ ꓥ ꓢꓲ꓾ ꓐ-ꓬꓰ-ꓢꓴ ꓖꓳ ꓕꓲ ꓣꓳ ꓟ ꓥꓳ꓿) 9 ꓖꓳ ꓡꓱ ꓥ ꓟꓲ꓾ ꓒꓳ-ꓡꓳ꓾ ꓐꓰˍ ꓟꓲ ꓘꓴˍ ꓟ ꓢꓳ-ꓡꓳ ꓠꓬ꓾ ꓢꓲ-ꓫꓬ-ꓟ-ꓦ ꓐꓲ ꓞꓹ ꓢꓲ꓾ ꓟꓬ ꓔꓱꓹ ꓐꓰ ꓬꓲ-ꓡꓲ-ꓟ ꓔꓯ ꓡꓳꓸ ꓢꓲ ꓠꓬꓲ꓾ 10 ꓖꓳꓼ ꓠꓲꓹˍ ꓐꓰ ꓥꓶꓺˍ ꓟ ꓮꓽ ꓙꓵ ꓐꓲ ꓞꓹ ꓟ꓾ ꓠꓲꓽ ꓪ ꓔꓲ ꓬꓲ ꓤ꓾ ꓔꓱꓹ ꓜꓳꓽˍ ꓟ ꓥ ꓕ ꓑꓳ ꓔꓯ ꓔꓳꓹ ꓢꓴꓳ꓾ ꓢꓲ ꓒ ꓬꓲ ꓔꓱꓹ ꓟ ꓙ ꓖꓴ ꓔꓯ ꓖꓳꓼ ꓡꓰ ꓧꓶꓸ ꓡꓰ ꓝꓲˍ ꓟ ꓠꓴ ꓟꓽ ꓠꓽ ꓗꓷ ꓡ? 11 ꓠ ꓠꓹ꓾ ꓮ ꓟꓶ ꓢꓲ ꓒ ꓬꓲ ꓡꓯꓼ ꓒꓯꓹ ꓠꓬ ꓠꓴ ꓕꓯ ꓢꓲ ꓗꓪ ꓓꓹ ꓡꓳ꓿ ꓠꓴ ꓠꓬ ꓟꓬ ꓔꓶꓺ ꓡꓰ ꓢꓲ꓾ ꓠꓬꓲ ꓟꓽ ꓟꓳ ꓕꓲ ꓝꓲꓸ ꓗꓷ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓞꓼ ꓐꓰ ꓠꓯ ꓞꓲꓹ ꓠꓯ ꓕꓳꓽ ꓟ ꓡꓰ ꓬꓲ ꓟꓬ ꓢꓶꓽ ꓔꓯ ꓛꓸ ꓡꓰ ꓢꓲ꓾ ꓬꓲ ꓔꓯ ꓖꓳꓻ ꓖꓶ ꓙ ꓢꓴ ꓧꓪꓺ ꓠ ꓗꓷ ꓡꓰꓳ꓿ 12 ꓕꓱ ꓡꓱ ꓗꓷ ꓡꓰˍ ꓟ ꓔꓯ ꓫꓴ ꓙꓵꓽ ꓒ ꓟꓳꓻ ꓗꓷ ꓠꓬ ꓬꓲ ꓙꓵˍ ꓡꓳ꓿ ꓬꓲ ꓠꓽ ꓢꓲ ꓒ ꓔꓯꓸ ꓟꓳꓸ ꓟꓸ ꓖꓶˍ ꓟꓸ ꓟꓲꓽ ꓔꓯ ꓓꓵꓽ ꓟꓶˍ ꓡꓳ꓿ 13 ꓒꓳ-ꓡꓳˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓒ-ꓩꓴ ꓗꓪ ꓐꓰ ꓡꓲ ꓜꓶꓽ ꓢꓲ ꓒ-ꓩꓴ-ꓡꓲ-ꓬ ꓟꓵꓽ ꓗꓪ ꓟ ꓒꓱ-ꓗ ꓗꓪ ꓛꓲ ꓬꓰˍ ꓡꓳ꓿ ꓖꓳ ꓗꓪ ꓬꓳ-ꓦ ꓠꓬ ꓬꓲ ꓪˍ ꓐꓰ ꓧꓹ ꓗꓷ ꓢꓲ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰˍ ꓡꓳ꓿ 14 ꓬꓲ ꓪꓽ ꓠꓽ ꓒꓱ-ꓗ ꓗꓪ ꓐꓰ ꓗꓳꓸ ꓙꓰ ꓢꓲ꓾ ꓑꓲ-ꓫꓲ-ꓔꓲ ꓟꓵꓽ ꓗꓪ ꓟ ꓮ-ꓕꓲ-ꓬ ꓗꓪ ꓛꓲ ꓬꓰ ꓠꓬ꓾ ꓠꓽ ꓦꓬꓼ ꓠꓬꓲ ꓕꓯ ꓜꓲꓼ ꓦꓲ ꓗꓪ ꓓꓵꓽ ꓙꓰ ꓢꓲ ꓠꓬꓲꓸ ꓠꓸˍ ꓡꓳ꓿ 15 ꓙꓵꓽ ꓗ ꓐꓰ ꓟꓷ ꓠꓷꓹ ꓝꓸ ꓢꓴ ꓕꓳ ꓶ ꓵ ꓗꓷ ꓗ ꓠꓯ꓾ ꓜꓲꓼ ꓦꓲ ꓙꓵꓽ ꓢꓴ ꓐꓴ ꓡꓰ ꓬꓲ ꓪꓽ ꓔꓯ꓾ ꓮ ꓬꓲꓼ ꓐꓴꓳ꓾ ꓑ ꓫꓬꓼ ꓐꓴ ꓔꓯ ꓢꓯꓼ ꓖꓶ ꓓꓴ ꓐꓯ ꓘꓶ ꓙꓳˍ ꓠꓬ ꓐꓯ ꓖꓶ ꓡꓯ꓾ ꓐꓰ ꓓꓰꓽˍ ꓡꓳ꓿ 16 ꓖꓳ ꓡꓱ ꓠꓬ ꓒꓳ-ꓡꓳ ꓔꓴ ꓢꓲ꓾ ꓡꓯꓼ ꓒꓯꓹ ꓶꓹ ꓢꓲ ꓠꓬꓲ ꓕꓱ ꓡꓱ ꓐꓯˍ ꓡꓳ꓾ ꓬꓲ-ꓢꓷ-ꓡꓰ ꓡ ꓞꓳˍ ꓐꓰ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓴ ꓐꓴꓳ꓾ ꓠ ꓠꓹ꓿ 17 ꓬꓲ-ꓢꓷ-ꓡꓰ ꓐꓴ ꓪꓴ-ꓢ ꓡꓰ ꓣꓳ ꓒꓵꓽ ꓒ ꓐꓴ ꓔꓯ ꓢꓲ ꓔ ꓢꓲ꓾ ꓬꓲ-ꓙꓲ ꓟꓵꓽ ꓗꓪ ꓞꓳ ꓬꓯꓼ ꓟꓴ ꓔꓬ ꓕꓯ꓾ ꓬꓲ ꓪꓽ ꓔꓯ ꓞꓳ ꓪꓳꓼ ꓓꓽ ꓟ ꓒꓬꓱꓼ ꓡ ꓝꓲ ꓢꓲ ꓠꓬꓲ꓾ ꓪꓽ ꓠꓬꓲˍ ꓟ ꓡꓯꓼ ꓒꓯꓹ ꓡꓰ ꓬꓲ ꓪꓽ ꓔꓯ ꓧꓳꓽ ꓓꓳ ꓡ ꓡꓳ꓿ 18 ꓝꓮꓲ ꓠꓬ ꓬꓲ ꓡꓰ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓬꓲ ꓪꓽ ꓔꓯ ꓮꓽ ꓡ ꓡꓲ ꓞꓲ ꓘꓳꓼ ꓛꓲ ꓦꓵꓻ ꓙ ꓜꓲꓽ ꓙ ꓗꓷꓳ꓿ 19 ꓘꓷ-ꓠ ꓟꓵ ꓗꓪ ꓟ ꓞꓳ ꓫꓵꓽ ꓫꓵꓽ ꓫꓵꓽ ꓔꓯ ꓛꓴ ꓛꓰꓹ ꓡꓰ ꓝꓲ ꓗ ꓠꓯ꓾ ꓡꓯꓼ ꓪ ꓬꓰ ꓠꓹ ꓟ꓾ ꓟꓵꓽ ꓖꓳ ꓟ ꓠꓬ ꓬꓲ-ꓢꓷ-ꓡꓰ ꓔꓯ ꓖꓶˍ ꓡꓳ꓿ 20 ꓖꓳ ꓗꓸ ꓠꓯꓸ ꓮ ꓡ ꓡꓲ ꓦꓬꓻ ꓥꓪꓽ ꓞꓲ ꓘꓳꓼ꓾ ꓟꓷ ꓠꓷꓹ ꓝꓸ ꓢꓴ ꓢ-ꓟꓴ-ꓬꓰ ꓦꓬꓼ ꓠꓬꓲ ꓗꓪ ꓛꓲ꓾ ꓬꓲ ꓪꓽ ꓔꓯ ꓐꓯ ꓟꓴ ꓫꓬꓹ ꓒ ꓖꓶˍ ꓡꓳ꓿ 21 ꓖꓳ ꓗꓸ ꓠꓯꓸ ꓬꓲ ꓪꓽ ꓡꓰ ꓪ ꓔꓲ ꓕꓲ ꓣꓳ ꓓꓰꓽˍ ꓕꓯ꓾ ꓪꓴ-ꓢ ꓡꓰ ꓐꓰ-ꓠꓬ-ꓟꓲ ꓕꓲ ꓪꓳꓼ ꓢꓴ꓾ ꓙꓲ-ꓢꓶ ꓬꓲ ꓤ ꓢꓳ-ꓡꓳ ꓔꓯ ꓬꓲ ꓪꓽ ꓐꓱ ꓶ ꓪ ꓔꓲ ꓡꓲ ꓞꓲ ꓘꓳꓼ ꓣꓱꓽ ꓝꓲˍ ꓡꓳ꓿ 22 ꓪꓴ-ꓢ ꓡꓰ ꓬꓲ ꓔꓯ ꓣꓴ ꓞꓰꓻ ꓗꓷ ꓠꓬ꓾ ꓓ-ꓪꓵ ꓔꓯ ꓬꓲ ꓪꓽ ꓪ ꓔꓲ ꓣꓱ ꓝꓲˍ ꓡꓳ꓿ ꓪꓴ-ꓢ ꓠꓬ ꓓ-ꓪꓵ ꓔꓯ ꓖꓴ ꓢꓲ꓾ ꓬꓲ ꓔꓯꓸ ꓟꓳꓸ ꓢꓷ ꓙ ꓟꓳ ꓙ ꓢꓲ ꓠꓬꓲ꓾ ꓥꓪ ꓠꓲꓹ ꓟ ꓔꓯ ꓛꓳ ꓠꓲꓹ ꓒꓴ ꓢꓴ꓾ ꓬꓰ-ꓫꓲ ꓬꓲ ꓤꓽ ꓓ-ꓪꓵ ꓕꓲ ꓣꓳ ꓔꓯ ꓥꓪ ꓧꓪ ꓟꓶ ꓡꓰꓳ꓾ ꓬꓲ ꓠꓬ ꓥꓪ ꓠꓲꓹ ꓫꓵˍ ꓟ ꓮꓽ ꓙꓵ ꓬꓰ ꓡ ꓥꓳ꓾ ꓐꓰ ꓐꓯˍ ꓗꓷꓳ꓿ 23 ꓪꓴ-ꓢ ꓠꓬ ꓬꓲ ꓙ ꓟꓳ ꓘꓶꓽ ꓔꓯ ꓛꓳ ꓢꓲ꓾ ꓡ ꓞꓳ ꓕꓱ ꓕꓲ ꓣꓳ ꓬꓲ ꓞꓲꓼ ꓤ ꓡꓯꓹ ꓤ ꓗꓪ ꓐꓰ꓾ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓚꓬꓴ ꓢꓲ ꓒ ꓬꓰ-ꓢꓴ ꓖꓶ ꓩꓴ ꓡꓺꓳ꓿ 24 ꓬꓲ ꓟꓽ ꓓꓳ ꓡ ꓕꓯˍ ꓡꓰ꓾ ꓬꓳ-ꓦ ꓠꓬ ꓬꓲ-ꓢꓷ-ꓡꓰ ꓑ ꓫꓬꓼ ꓐꓴ ꓔꓯ꓾ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ꓾ ꓖꓳ ꓓꓱ ꓔꓲꓹˍ ꓟ ꓟꓸ ꓟꓲ ꓚ ꓟꓸ ꓖꓶˍ ꓡꓳ꓿ 25 ꓬꓳ-ꓦ ꓦꓬꓼ ꓠꓬꓲ ꓖꓴ ꓡꓰˍ ꓐꓰ ꓗꓹ ꓕꓯ ꓬꓲ ꓡꓰ꓾ ꓥꓪ ꓮꓽ ꓟ ꓥ ꓟ ꓠꓴ ꓪꓽ ꓮ ꓡꓲ ꓓꓵꓽ ꓙˍ ꓡ? ꓥꓪ ꓠꓽ ꓙꓲ-ꓢꓴ ꓖꓳ ꓕꓲ ꓣꓳ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓥꓪ ꓗ ꓠꓯꓸ ꓢꓲ ꓗꓪ ꓕꓲ ꓣꓳ ꓡꓻˍ ꓥꓳ꓿ ꓥꓪ ꓠꓽ ꓬꓲ ꓛꓲ ꓠꓲ ꓦꓲ ꓚ ꓒꓶꓻ ꓖꓶ ꓠꓹ ꓟˍ ꓟꓲ ꓟꓽ ꓒꓵꓽ꓾ ꓐꓰ ꓐꓯ ꓗꓷꓳ꓿ 26 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓐꓴˍ ꓐꓰ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓴ ꓐꓴꓳ꓾ ꓢꓯꓼ ꓟꓬ ꓐꓯ ꓘꓶ ꓕꓱ ꓟ ꓠꓬ ꓣꓳ ꓔꓯ ꓦ ꓖꓶ ꓩꓴ ꓡꓺꓳ꓿ 27 ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴˍ ꓐꓰ ꓬꓲ ꓪꓽ ꓢꓲꓽ ꓒ ꓐꓴ ꓠꓬ ꓙꓲ-ꓢꓴ ꓔꓯ ꓟꓽ ꓢꓷꓸ ꓢꓲ꓾ ꓕꓲ ꓠꓽ ꓡꓰ ꓕꓲ ꓠꓽ ꓵˍ ꓟ ꓟꓷ ꓠꓷꓹ ꓝꓸ ꓢꓴ ꓐꓯ ꓘꓶ ꓔꓯˍ ꓟꓲ ꓟꓽ ꓙ ꓜꓲꓼ ꓢꓲ ꓠꓬꓲ꓾ ꓬꓲ ꓔꓯ ꓝꓴꓲ ꓓꓰꓺ ꓘꓶꓽ ꓐꓯ ꓞꓷꓹˍ ꓟ ꓗꓪ ꓐꓰ ꓟꓷ ꓠꓷꓹ ꓝꓸ ꓢꓴ ꓐꓯ ꓘꓶ ꓔꓯ ꓐꓲ ꓡꓰ ꓝꓲꓳ꓿ 28 ꓬꓲ ꓫꓵꓻ ꓒꓵꓽˍ ꓟ ꓝꓴꓲ ꓮꓸ ꓫꓵꓽ ꓟꓽ ꓧꓪ ꓟꓶˍ ꓟꓲ꓾ ꓬꓲ ꓔꓯ ꓢꓰꓼ ꓗꓷ ꓠꓹ ꓟ ꓒꓲ-ꓡ ꓔꓯ ꓓꓰꓽˍ ꓡꓳ꓿ 29 ꓬꓲ ꓔꓯ ꓖꓴꓺ ꓢꓲ ꓐꓳ ꓔ ꓟ ꓮꓽ ꓙꓵ ꓔꓯ ꓬꓲ ꓪꓽ ꓡꓰ ꓬꓰ ꓐꓲ ꓡꓰ ꓝꓲ ꓗꓸ ꓠꓯ꓾ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓐꓰ ꓬꓲ ꓔꓯ ꓣꓴ ꓬꓯꓼ ꓗꓷ ꓢꓲ ꓡꓱꓼ ꓜꓴ ꓗꓪ ꓔꓵꓸ ꓗꓷꓳ꓿ 30 ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲꓳ꓿ 31 ꓖꓳ ꓡꓱ ꓢꓲ ꓖ-ꓡꓲ-ꓡꓲ ꓗꓪ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓬꓲ ꓔꓯ ꓛꓳ ꓓꓯ ꓡ ꓢꓴ ꓐꓴ ꓔꓯ ꓬꓲ ꓮꓽ ꓟꓬꓹ ꓠꓬꓲ ꓟꓳꓸ ꓖꓶˍ ꓡꓳ꓿ ꓮ ꓟꓶ ꓬꓲ ꓪꓽ ꓠꓬ ꓬꓲ-ꓢꓷ-ꓡꓰ ꓑ ꓫꓬꓼ ꓐꓴ ꓔꓯ ꓬꓲ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓬꓰ ꓔꓬ ꓡꓳ꓿ 32 ꓥꓪ ꓠꓴꓽ ꓠꓬ ꓣꓳ ꓒꓵꓽ ꓒ ꓐꓴ ꓔꓯ ꓙ ꓟꓳ ꓔ ꓟ ꓶꓼ ꓓꓳ ꓫꓱꓹ ꓓꓳ ꓟꓸ ꓟꓲ ꓠꓴ ꓪꓽ ꓔꓯ ꓚ ꓟꓸ ꓖꓶ ꓡ ꓟ ꓥ ꓡꓳ꓿ 33 ꓕꓱ ꓟ ꓠꓬ ꓟꓴ ꓖꓪ ꓕꓳ ꓶ ꓠꓬꓲꓽ ꓚꓱꓹ ꓕꓲ ꓚꓱꓹ ꓗꓪ꓾ ꓠꓴ ꓠꓬ ꓥꓪ ꓮ ꓐꓲ ꓥ ꓡꓳ꓿ ꓠꓬꓲꓸ ꓠꓬꓲ ꓥꓪ ꓠꓬ ꓠꓴ ꓐꓹ ꓐ ꓒꓬꓱꓼ ꓡꓺꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ꓾ ꓪꓴ-ꓢ ꓡꓰ ꓬꓰ-ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓲ꓾ ꓣꓳ ꓒꓵꓽ ꓒ ꓐꓴ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓙ ꓟꓳ ꓔ ꓟ ꓔꓯ ꓐꓲ ꓡꓰ ꓝꓲꓳ꓿ 34 ꓝꓮꓲ ꓕꓱ ꓡꓱ ꓖꓳ ꓑꓳꓸ ꓛꓵꓽ ꓡꓰˍ ꓟ ꓗꓪ ꓟꓽ ꓬꓲꓼ ꓙꓰ ꓠꓹ ꓟ꓾ ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲˍ ꓟ ꓔꓯ ꓖꓴ ꓢꓲ ꓪꓴ-ꓢ ꓡꓰ꓾ ꓓ-ꓪꓵ ꓔꓯ ꓙ ꓟꓳ ꓔ ꓟ ꓡꓰ ꓐꓰ꓾ ꓢꓲꓽ ꓫꓬꓻˍ ꓟ ꓐꓰ ꓦ ꓡꓱ ꓐꓳˍ ꓟ ꓶꓼ ꓤ ꓫꓱꓹ ꓤ ꓠꓬ ꓥꓪ ꓡꓰ ꓠꓴꓻ ꓔꓯ ꓖꓶꓽˍ ꓥꓳ꓾ ꓐꓯˍ ꓡꓳ꓿ 35 ꓝꓮꓲ ꓠꓱꓸ ꓐꓯꓼ ꓕꓲ ꓚꓱꓹ ꓗꓪˍ ꓟꓲ꓾ ꓠꓴ ꓠꓬ ꓠꓴ ꓢꓲꓽ ꓫꓬ ꓢꓴ ꓖꓳ ꓕꓲ ꓣꓳ ꓔꓯ ꓟꓽ ꓛꓵꓽ ꓡꓰ ꓝꓲ꓾ ꓐꓯˍ ꓡꓳ꓿ 36 ꓓ-ꓪꓵ ꓠꓬ ꓪꓴ-ꓢ ꓟꓸ ꓖꓶ ꓔ ꓟ ꓔꓯ ꓛꓳꓻ ꓢꓲ꓾ ꓬꓲ ꓕꓲ ꓤꓶ ꓟ ꓡ ꓞꓳ ꓔꓯ ꓣꓱꓽ ꓙ ꓗꓷ ꓗꓸ ꓠꓯꓸ ꓫꓵꓻ ꓢꓲ ꓠꓬꓲ꓾ ꓬꓲ ꓒꓵꓽ ꓒ ꓐꓴˍ ꓐꓰ ꓕꓲ ꓪꓺꓼ ꓔꓵꓸ ꓗꓷ ꓢꓲ ꓛꓵꓽ ꓡꓰꓳ꓿ 37 ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓢꓯꓸ ꓬꓲꓼ ꓡ ꓝꓲˍ ꓟ ꓖꓳ ꓕꓲ ꓣꓳ ꓠꓬ ꓟꓽ ꓛꓵꓽ ꓡꓰ꓿ 38 ꓖꓳ ꓡꓱ ꓠꓬꓲ ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓝꓴꓲ ꓖꓽ ꓖꓶˍ ꓟ ꓠꓬ ꓬꓰ-ꓢꓴ ꓗꓪ ꓐꓰ ꓥ ꓟ ꓠꓴ ꓪꓽ ꓢꓷꓸ ꓠꓹ ꓟ꓾ ꓠꓴ ꓪ ꓔꓯ ꓐꓯ ꓟꓸ ꓖꓶˍ ꓟ ꓥ ꓡꓳ꓿ 39 ꓟꓳ-ꓫꓲ ꓙꓵꓽ ꓗ ꓡꓰ ꓠꓴ ꓪꓽ ꓔꓯ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓟꓽ ꓐ ꓡ ꓟ ꓮꓽ ꓙꓵ ꓗꓪ꓾ ꓬꓰ-ꓢꓴ ꓕꓱ ꓕꓲ ꓣꓳ ꓔꓯ ꓙꓵꓻˍ ꓟ ꓗꓪ ꓐꓰ ꓮꓽ ꓟ ꓔꓯˍ ꓟꓲ ꓔꓱꓹ ꓜꓳꓽ ꓢꓴ ꓚꓬꓹ ꓖꓶˍ ꓟ ꓟꓶ ꓓꓻˍ ꓡꓳ꓿ 40 ꓖꓳ ꓡꓱ ꓠꓬꓲ ꓟꓷ ꓠꓷꓹ ꓝꓸ ꓢꓴ ꓕꓳ ꓶ ꓗꓪ ꓐꓳ ꓔ ꓟ ꓠꓬ ꓠꓴ ꓪꓽ ꓔꓯ ꓟꓽ ꓗꓷ ꓡꓰ ꓠꓹ ꓟ ꓤ ꓟꓳ꓿ 41 ꓢꓲ ꓒ ꓡꓰ꓾ ꓤꓲꓺ ꓢꓴ ꓐꓴꓳ꓾ ꓠꓬꓲ ꓠꓹ꓾ ꓓꓵꓽ ꓙ ꓟꓶ ꓢꓲ ꓫꓵꓻ Gꓽ꓿ ꓮ ꓡꓲꓳ ꓐꓯ ꓠꓬ ꓥꓪ ꓡꓰ ꓠꓴ ꓪꓽ ꓦꓬꓼ ꓠꓬꓲ ꓗꓪ ꓟꓬꓱꓽ ꓕꓲ ꓫꓵ ꓬꓰ ꓔꓬ ꓟ ꓔꓯ꓾ ꓢꓴꓻ ꓡꓰ ꓠꓴ ꓪꓽ ꓔꓯ ꓐꓯ ꓖꓶ ꓡꓺˍ ꓟꓲ꓾ ꓠꓴ ꓪꓽ ꓠꓽ ꓙꓵꓻ ꓡ ꓓꓴ ꓟꓽ ꓥ꓾ ꓐꓰ ꓐꓯ ꓗꓷꓳ꓿ 42 ꓒꓳ-ꓡꓳˍ ꓐꓰ ꓐ-ꓠ-ꓐ ꓠꓬ ꓜꓲꓼ ꓦꓲ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓖꓳ ꓗꓪ ꓜꓲꓼ ꓡ ꓢꓴ ꓡꓰ ꓐꓯ ꓘꓶ ꓕꓱ ꓟ ꓢꓸ ꓖꓶ ꓕꓲ ꓠꓽ ꓗꓪ ꓝꓮꓲ ꓟꓸ ꓖꓶ ꓡ ꓠ ꓟ ꓓꓰꓽˍ ꓡꓳ꓿ 43 ꓜꓲꓼ ꓞ ꓢꓴ ꓐꓴ ꓧꓹ ꓡꓯ ꓘꓳ ꓗꓷ ꓠꓬ꓾ ꓬꓴ-ꓔ ꓡ ꓞꓳˍ ꓐꓰ ꓬꓴ-ꓔ ꓢꓳ ꓗꓪ ꓓꓵꓽ ꓡꓰˍ ꓟ ꓪꓴ-ꓢ ꓔꓯ ꓙꓳ ꓒꓵꓽ ꓢꓴ ꓮꓽ ꓟꓬꓹ ꓣꓳ ꓠꓬ꓾ ꓒꓳ-ꓡꓳˍ ꓐꓰ ꓐ-ꓠ-ꓐ ꓔꓯ ꓛꓳ ꓙꓰˍ ꓡꓳ꓿ ꓬꓲ ꓪꓽ ꓠꓬꓲꓽ ꓣꓳ ꓡꓰ ꓬꓲ ꓪꓽ ꓔꓯ ꓪꓴ-ꓢ ꓣꓱꓽ ꓛꓰꓽ ꓠꓯꓸꓼ ꓗꓪ ꓮ ꓕꓯˍ ꓟꓲ ꓕꓶꓻ ꓕꓶˍ ꓡꓰꓽ ꓞꓳꓻ ꓙꓳ ꓔꓬ ꓠꓹ ꓟ ꓘꓶꓸ ꓖꓶˍ ꓡꓳ꓿ 44 ꓗꓸ ꓠꓯꓸ ꓕꓲ ꓠꓽ ꓗꓪ ꓮꓽ ꓡ ꓕꓲ ꓡꓳ ꓒꓱ ꓡꓱꓸꓼ ꓪꓴ-ꓢ ꓐꓯ ꓘꓶ ꓠ ꓠꓹˍ ꓐꓰ ꓜꓲꓼ ꓡ ꓡꓳ꓿ 45 ꓖꓳ ꓡꓱ ꓥ ꓟꓲ ꓞꓳ ꓜꓴꓻ ꓔꓯ ꓬꓴ-ꓔ ꓡ ꓞꓳ ꓟꓳꓻ ꓗꓷ ꓠꓬ ꓟꓬ ꓦꓯꓸˍ ꓟ ꓐꓲ ꓡꓰ ꓢꓲ꓾ ꓒꓳ-ꓡꓳ ꓐꓯˍ ꓟ ꓔꓯ ꓔꓳꓹ ꓢꓲ ꓠꓬꓲ꓾ ꓤꓲ ꓠꓬꓲ ꓕꓼ ꓠꓬꓲ ꓬꓰˍ ꓡꓳ꓿ 46 ꓒꓳ-ꓡꓳˍ ꓐꓰ ꓐ-ꓠ-ꓐ ꓠꓬ ꓠꓲꓹ ꓪꓴꓽ ꓪꓴˍ ꓡꓰꓽ ꓫ ꓕꓱ ꓢꓲ꓾ ꓪꓴ-ꓢ ꓐꓯ ꓘꓶ ꓠꓬ ꓠꓴ ꓪꓽ ꓔꓯ ꓧꓶꓸ ꓕꓯ ꓐꓯ ꓟꓸ ꓖꓶ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓟꓽ ꓘꓳ ꓣꓴˍ ꓟ ꓗꓪ ꓐꓰ ꓚꓲ ꓛꓬ ꓔꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓟꓽ ꓒꓵꓽ ꓟ ꓚꓬꓹ ꓔ ꓟ ꓡꓰ ꓐꓰ ꓗꓷ ꓡꓰ ꓝꓲˍ ꓠꓬꓲ꓾ ꓮ ꓟꓶ ꓥꓪ ꓠꓴꓽ ꓠꓬ ꓐꓶꓽ ꓞꓳ ꓔꓯ ꓟꓸ ꓙꓰˍ ꓥꓳ꓿ 47 ꓮ ꓡꓲꓳ ꓐꓯ ꓠꓬ ꓢꓲ ꓒ ꓡꓰ ꓥꓪ ꓠꓴꓽ ꓔꓯ ꓕꓵꓼ ꓪ ꓖꓶ ꓡ ꓢꓲ꓾ ꓟꓲ ꓠꓯ ꓑꓶꓸ ꓗꓪ ꓛꓲ ꓚꓬꓴˍ ꓟ ꓣꓱꓽ ꓛꓰ ꓚ ꓟꓸ ꓖꓶ ꓠꓹ ꓟ꓾ ꓥꓪ ꓡꓰ ꓠꓴ ꓔꓯ ꓐꓶꓽ ꓞꓳ ꓠꓬꓲ ꓟꓳ ꓓꓴ ꓬꓰ ꓝꓲˍ ꓐꓰ ꓢꓲ ꓚꓰꓸ ꓗꓷꓳ꓾ ꓐꓰ ꓐꓯ ꓖꓶ ꓡꓺꓳ꓾ ꓐꓯˍ ꓡꓳ꓿ 48 ꓕꓱ ꓟ ꓔꓯ ꓐꓶꓽ ꓞꓳ ꓐꓴ ꓑ ꓙ ꓗꓷ ꓠꓬ ꓠꓲꓹ ꓒꓴ ꓢꓲ꓾ ꓪꓴ-ꓢ ꓐꓯ ꓘꓶ ꓔꓯ ꓒꓵꓽ ꓢꓲ ꓠꓬꓲ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ ꓝꓰꓹ ꓔ ꓢꓴ ꓥ ꓕ ꓑꓳ ꓠꓬ ꓙꓵꓻˍ ꓡꓳ꓿ 49 ꓢꓲ ꓒ ꓐꓯ ꓘꓶ ꓠꓬ ꓖꓳ ꓕꓲ ꓟꓵ ꓡꓱꓸꓼ ꓗꓪ ꓟꓸ ꓒꓬꓱ ꓙꓰˍ ꓡꓳ꓿ 50 ꓖꓳ ꓡꓱ ꓥ ꓟꓲ ꓬꓴ-ꓔ ꓡ ꓞꓳ ꓡꓰ ꓪꓴ-ꓢ ꓔꓯ ꓙꓳ ꓒꓵꓽ ꓢꓴ꓾ ꓞꓳ ꓔꓲ ꓟꓺ ꓐꓴˍ ꓐꓰ꓾ ꓡꓳ ꓒꓱ ꓗꓪ ꓟ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓔꓯ ꓡꓵꓹ ꓢꓴ ꓢꓲ꓾ ꓒꓳ-ꓡꓳˍ ꓐꓰ ꓐ-ꓠ-ꓐ ꓔꓯ ꓗꓸ ꓧꓪ ꓝꓲ ꓢꓲ ꓠꓬꓲ꓾ ꓬꓲ ꓪꓽ ꓔꓯ ꓖꓳ ꓕꓲ ꓟꓵꓽ ꓗꓪ ꓐꓰ ꓖꓼ ꓓꓳ ꓗꓷˍ ꓡꓳ꓿ 51 ꓖꓳ ꓡꓱ ꓠꓬ ꓬꓲ ꓪꓽ ꓠꓬꓲꓽ ꓣꓳ ꓡꓰ ꓛꓲ ꓒꓯꓹ ꓗꓪ ꓠꓷꓼ ꓞꓹ ꓟ ꓠꓱꓸ ꓦꓱꓽ ꓧꓶꓽ ꓟꓱꓸ ꓞꓰ ꓩꓴ ꓗꓷ ꓢꓲ꓾ ꓬꓲ-ꓗꓳ-ꓠꓰ ꓡꓳ ꓒꓱ ꓗꓪ ꓙꓰˍ ꓡꓳ꓿ 52 ꓢꓲ ꓤ ꓐꓴ ꓠꓬ ꓗꓹ ꓛꓲꓽˍ ꓟ ꓐꓰ ꓢꓲ-ꓫꓬ-ꓟ-ꓦ ꓐꓲ ꓞꓹ ꓡꓳ꓿

ꓝꓲ-ꓓꓴ 14

1 ꓬꓲ-ꓗꓳ-ꓠꓰ ꓗꓪˍ ꓟꓲ ꓒꓳ-ꓡꓳˍ ꓐꓰ ꓐ-ꓠ-ꓐ ꓠꓬ ꓬꓴ-ꓔ ꓡ ꓞꓳ ꓜꓲꓼ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓪꓽ ꓠꓬꓲ ꓠꓬꓲˍ ꓡꓰ ꓟꓸ ꓟꓲ ꓚ ꓟꓸ ꓖꓶˍ ꓠꓬꓲ꓾ ꓬꓴ-ꓔ ꓡ ꓞꓳˍ ꓐꓰ ꓐꓶ ꓞꓳ ꓬꓲ ꓜꓴ ꓓꓽ ꓟ ꓠꓬ ꓬꓰ-ꓢꓴ ꓔꓯ ꓙꓵꓻ ꓡ ꓡꓳ꓿ 2 ꓖꓳ ꓡꓱ ꓥ ꓟꓲ ꓟꓽ ꓙꓵꓻ ꓢꓴ ꓬꓴ-ꓔ ꓡ ꓞꓳ ꓐꓴ ꓡꓰ꓾ ꓐꓶ ꓞꓳ ꓠꓲꓹ ꓟ ꓔꓯ ꓢꓴ ꓔꓴ ꓡ ꓝꓲ ꓢꓲ꓾ ꓙꓵꓻˍ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠꓲꓹ ꓜꓳ ꓝꓲˍ ꓡꓳ꓿ 3 ꓒꓳ-ꓡꓳˍ ꓐꓰ ꓐ-ꓠ-ꓐ ꓠꓬ ꓖꓳ ꓗꓪ ꓟꓶ ꓤ ꓔꓬ ꓢꓲ꓾ ꓪꓴ-ꓢ ꓔꓯ ꓪꓽ ꓪꓴꓽ ꓘꓳꓹ ꓢꓲ ꓠꓬꓲ ꓠꓲꓹ ꓪꓴꓽ ꓪꓴꓽˍ ꓡꓰꓽ ꓐꓯ ꓘꓶ ꓚ ꓟꓸ ꓖꓶˍ ꓡꓳ꓿ ꓬꓲ ꓪꓽ ꓡꓰ ꓚ ꓟꓸ ꓖꓶ ꓔꓬ ꓟ ꓪꓴ-ꓢ ꓣꓱꓽ ꓛꓰꓽ ꓐꓯ ꓘꓶ ꓠꓬ ꓔꓱꓹˍ ꓟ ꓥ ꓟ ꓬꓲ ꓗꓸ ꓚꓵ ꓬꓰ ꓠꓹ ꓟ꓾ ꓢꓲ ꓒ ꓡꓰ ꓬꓲ ꓪꓽ ꓗꓪ ꓐꓰ ꓢꓷꓸ ꓡꓰ ꓓꓴˍ ꓐꓰ ꓓꓵꓽ ꓙ ꓟꓶ ꓓꓴ ꓬꓰ ꓟꓳꓸ ꓖꓶˍ ꓡꓳ꓿ 4 ꓖꓳ ꓡꓱ ꓥ ꓟꓲ ꓡꓳ ꓒꓱ ꓗꓪ ꓟ ꓞꓳ ꓜꓴ ꓠꓬ ꓠꓬꓲꓽ ꓗꓪꓺ ꓗꓪ ꓡꓰ ꓢꓲ꓾ ꓕꓲ ꓐꓱ ꓠꓬ ꓬꓴ-ꓔ ꓡ ꓞꓳ ꓔꓯ ꓪꓽ ꓢꓲ ꓠꓬꓲ꓾ ꓕꓲ ꓐꓱ ꓠꓬ ꓝꓲ ꓓꓴ ꓐꓴ ꓔꓯ ꓪꓽ ꓡꓰˍ ꓡꓳ꓿ 5 ꓐꓶꓽ ꓞꓳˍ ꓐꓰ ꓬꓴ-ꓔ ꓡ ꓞꓳˍ ꓐꓰ ꓬꓲ ꓪꓽ ꓔꓯ ꓙꓵꓽ ꓢꓴ ꓐꓴ ꓡꓰ ꓝꓲ ꓓꓴ ꓐꓴ ꓔꓯ ꓫꓸ ꓔꓳ ꓫꓸ ꓒꓯꓼ ꓬꓰ ꓖꓶ ꓠꓹ ꓟ ꓐꓰ꓾ Bꓸ ꓛꓲ ꓡꓳꓺˍ ꓐꓰ ꓬꓰˍ ꓟ ꓔꓯ꓾ 6 ꓝꓲ ꓓꓴ ꓐꓴ ꓢꓷꓸ ꓡꓰ ꓠꓬ꓾ ꓡꓲ-ꓘꓳ-ꓠꓲ-ꓬ ꓟꓵꓽ ꓗꓪ ꓟ ꓡꓴ-ꓢꓶ-ꓔꓷꓼˍ ꓐꓰ ꓔꓷ-ꓑꓲ ꓡꓳ ꓒꓱ ꓗꓪ ꓛꓰꓹ ꓙꓰ ꓢꓲ꓾ ꓚꓳ ꓡꓳ ꓡꓳ ꓟ ꓟꓵꓽ ꓗꓪ ꓚꓳ ꓙꓰ ꓢꓲ ꓠꓬꓲ꓾ 7 ꓬꓲ ꓪꓽ ꓡꓰ ꓖꓳ ꓗꓪ ꓶꓼ ꓓꓳ ꓫꓱꓹ ꓓꓳ ꓟꓸ ꓖꓶˍ ꓡꓳ꓿ 8 ꓡꓴ-ꓢꓶ-ꓔꓷꓼ ꓗꓪ꓾ ꓦꓵꓻˍ ꓕꓯˍ ꓡꓰ ꓛꓲ ꓫꓵꓻ ꓢꓲ ꓛꓲ ꓒꓯꓹ ꓢꓯꓼ ꓟꓽ ꓙꓳ ꓠꓬꓲ꓾ ꓮ ꓕꓯˍ ꓟꓲ ꓙ ꓖꓴ ꓟꓽ ꓫꓱꓽ ꓠꓬꓲ ꓢꓴ ꓕꓲ ꓣꓳ ꓔꓬ ꓡꓳ꓿ 9 ꓬꓲ ꓠꓬ ꓒꓳ-ꓡꓳ ꓐꓯ ꓟꓸ ꓖꓶˍ ꓟ ꓔꓯ ꓠ ꓠꓹ ꓡꓳ꓿ ꓒꓳ-ꓡꓳ ꓡꓰ ꓬꓲ ꓔꓯ ꓟꓬ ꓔꓱꓹ ꓡꓳꓸ ꓠꓬꓲ ꓠꓬ꓾ ꓫꓬꓹ ꓓꓻ ꓡꓰ ꓠꓹ ꓟ ꓙꓵꓻ ꓠꓲꓹ ꓙꓳˍ ꓟ ꓡꓳꓸ ꓓꓳ ꓡ ꓠꓬꓲ꓾ 10 ꓢꓯꓼ ꓓꓽ ꓟ ꓡꓰ꓾ ꓦꓰꓼ ꓔꓴ ꓡꓯ꓾ ꓐꓰ ꓘꓴ ꓖꓶ ꓗꓷ ꓠꓬ꓾ ꓬꓲ ꓔꓷꓹ ꓔꓴ ꓡ ꓢꓲ ꓫꓱꓽ ꓙꓰˍ ꓡꓳ꓿ 11 ꓒꓳ-ꓡꓳ ꓕꓱ ꓡꓱ ꓬꓰˍ ꓟ ꓔꓯ ꓞꓳ ꓜꓴ ꓟꓳꓻˍ ꓕꓯ꓾ ꓡꓲ-ꓘꓳ-ꓠꓲ-ꓬ ꓥꓳꓽ ꓡꓰ ꓘꓴ ꓢꓲ꓾ ꓢꓲꓺ ꓐꓴ ꓠꓬ ꓞꓳ ꓤ ꓒꓬꓱꓽ ꓶꓻ ꓔ ꓢꓲ ꓣꓳ ꓗꓳ ꓡꓳ ꓗꓪ ꓬꓯꓼ ꓡ ꓐꓷ꓾ ꓐꓯˍ ꓡꓳ꓿ 12 ꓐ-ꓠ-ꓐ ꓔꓯ ꓬꓲ ꓪꓽ ꓡꓰ꓾ ꓤꓲ-ꓣꓴ꓾ ꓐꓰ ꓘꓴꓻ ꓢꓲ꓾ ꓒꓳ-ꓡꓳ ꓠꓬ ꓐꓯ ꓙ ꓙꓳ ꓢꓴ ꓥ ꓠꓬꓲ꓾ ꓬꓲ ꓔꓯ꓾ ꓧꓷ-ꓟꓲ꓾ ꓐꓰ ꓘꓴˍ ꓡꓳ꓿ 13 ꓝꓮꓲ ꓡꓳ ꓒꓱ ꓠꓱ ꓫꓱ ꓟꓸꓼ ꓗꓪ ꓤꓲ-ꓣꓴ ꓢꓲꓺ ꓦꓲꓻ ꓗꓪ ꓟ ꓔꓲ ꓒ ꓠꓬ꓾ ꓡꓳ ꓒꓱ ꓗ ꓘꓶꓽ ꓓꓴꓽ ꓗꓪ ꓮ ꓠꓬꓲꓽ ꓑꓸ ꓢꓲꓺ ꓠꓬꓲ꓾ ꓢꓲꓹ ꓪꓰ ꓪꓳꓽ ꓡꓯꓻ ꓔꓯꓹ ꓠꓬꓲ ꓡ ꓢꓲ꓾ ꓞꓳ ꓜꓴˍ ꓐꓰ ꓕꓲ ꓛꓳꓺꓼ ꓬꓲ ꓪꓽ ꓠꓬꓲꓽ ꓣꓳ ꓔꓯ ꓔꓲ ꓖꓶˍ ꓐꓰ ꓬꓰˍ ꓡꓳ꓿ 14 ꓖꓳ ꓡꓱ ꓥ ꓟꓲ ꓝꓲ ꓓꓴ ꓐ-ꓠ-ꓐˍ ꓐꓰ ꓒꓳ-ꓡꓳ ꓑ ꓙꓽ ꓗꓷ ꓠꓬ꓾ ꓐꓵ ꓞꓶ ꓚꓵꓹ ꓧꓽ ꓗꓷ ꓢꓲ꓾ ꓡ ꓞꓳ ꓬꓲ ꓜꓴ ꓗꓳ ꓡꓳ ꓗꓪ ꓔꓷꓹ ꓓꓵꓽ ꓙꓰ ꓢꓲ ꓠꓬꓲ꓾ 15 ꓮꓸ ꓬꓲꓼ ꓐꓴꓳ꓾ ꓠꓴ ꓪꓽ ꓮꓸ ꓫꓵꓽ ꓪꓴꓸ ꓠꓬꓲ ꓕꓱ ꓡꓱ ꓬꓰˍ ꓡ? ꓥꓪ ꓠꓴꓽˍ ꓟꓲ ꓠꓴ ꓪˍ ꓐꓰ ꓕꓲ ꓡꓰꓹꓼ ꓞꓳ ꓤˍ ꓡꓰꓽ ꓥ ꓡꓳ꓿ ꓠꓴ ꓪꓽ ꓠꓬ ꓕꓱ ꓡꓱ ꓫꓵꓽ ꓦ ꓡꓱ ꓚꓱꓹ ꓬꓲ ꓖꓳꓽ ꓔꓯ ꓧꓹ ꓗꓷ ꓢꓲ꓾ ꓢꓯꓸ ꓔꓬ ꓟ ꓪꓴ-ꓢ ꓔꓯ ꓟꓳꓸ ꓒꓳꓹ ꓬꓲꓼ ꓡ ꓠꓹ ꓟ꓾ ꓠꓴ ꓪꓽ ꓔꓯ ꓶꓼ ꓓꓳ ꓫꓱꓹ ꓓꓳ ꓐꓯ ꓟꓸ ꓖꓶ ꓡ ꓟ ꓥꓳ꓿ ꓬꓲ ꓠꓬ ꓟꓴꓽ ꓗꓪˍ ꓐꓰ ꓟꓲ ꓠꓯꓺˍ ꓐꓰ ꓬꓲꓻ ꓡꓴꓽ ꓐꓱˍ ꓐꓰ꓾ ꓖꓳ ꓗꓪ ꓙꓳˍ ꓟ ꓮꓽ ꓙꓵ ꓔꓯ ꓚꓰꓼ ꓢꓴ ꓥꓳ꓿ 16 ꓗꓳꓸ ꓗꓷ ꓟ ꓤꓶ ꓗꓪ ꓠꓬ ꓐꓶꓽ ꓞꓳ ꓮꓽ ꓙꓵ ꓔꓯ꓾ ꓪꓴ-ꓢ ꓡꓰ ꓬꓲ ꓪꓽ ꓚꓲ ꓛꓬ ꓚꓱꓹ ꓗꓪ ꓚ ꓠꓹ ꓟ ꓩꓴ ꓔ ꓡꓳ꓿ 17 ꓖꓳ ꓡꓱ ꓥ ꓟꓲ ꓬꓲ ꓠꓬ ꓙꓲˍ ꓟ ꓬꓰ ꓢꓲ꓾ ꓬꓲ ꓢꓯꓸ ꓔꓬ ꓟ ꓗꓸ ꓚꓵ ꓮ ꓕꓯˍ ꓟꓲ ꓟꓳꓸ ꓖꓶ ꓡ ꓡꓳ꓿ ꓬꓲ ꓡꓰ ꓟꓴꓽ ꓗꓪ ꓗꓪ ꓐꓰ ꓠꓴ ꓪꓽ ꓔꓯ ꓟꓶ ꓦˍ ꓐꓰ ꓜꓻ ꓟꓻ ꓡ ꓟ ꓟꓵꓽ ꓘꓳꓼ ꓖꓶ ꓢꓲ ꓠꓬꓲ꓾ ꓠꓴ ꓪꓽ ꓔꓯ ꓜꓽ ꓓꓴˍ ꓐꓰ ꓠꓲꓹ ꓟ ꓗꓪ ꓠꓲꓹ ꓒꓴˍ ꓟ ꓡꓰ ꓐꓳ ꓡꓰ ꓝꓲˍ ꓟ ꓗꓪ ꓐꓰ꓾ ꓬꓲ ꓚꓲꓸ ꓛꓬ ꓐꓱ ꓶ ꓢꓷꓸ ꓙ ꓟꓳ ꓙ ꓓꓴ ꓟꓽ ꓙꓳ ꓟꓽ ꓗꓷ ꓡꓰ ꓝꓲꓺ ꓠꓬꓲꓺ꓾ ꓐꓯˍ ꓡꓳ꓿ 18 ꓕꓱ ꓡꓱ ꓐꓯ ꓖꓶˍ ꓟꓲ꓾ ꓞꓳ ꓜꓴꓻ ꓐꓴ ꓔꓲ ꓖꓶ ꓡ ꓐꓰ ꓬꓰˍ ꓟ ꓔꓯ ꓮꓽ ꓡꓻ ꓗꓽ ꓧꓪꓸ ꓟꓽ ꓘꓴꓻ ꓗꓷ ꓡꓰˍ ꓡꓳ꓿ 19 ꓖꓳ ꓕꓯ ꓮ-ꓕꓲ-ꓬꓼ ꓐꓰ ꓬꓲ-ꓗꓳ-ꓠꓰ ꓡꓳ ꓒꓱ ꓗꓪ ꓐꓰ ꓡꓻ ꓟ ꓬꓴ-ꓔ ꓡ ꓞꓳ ꓡꓰ ꓞꓳ ꓜꓴ ꓔꓯ ꓟꓸ ꓒꓬꓹ ꓟꓶ ꓡꓰˍ ꓡꓳ꓿ ꓖꓳ ꓕꓯ ꓬꓲ ꓪꓽ ꓡꓰ ꓒꓳ-ꓡꓳ ꓔꓯ Bꓸ ꓛꓲ ꓡꓰ ꓡꓳ ꓢꓲ꓾ ꓬꓲ ꓠꓬ ꓫꓵꓻꓳ꓾ ꓐꓰ ꓓꓵꓽ ꓙˍ ꓠꓬꓲ꓾ ꓡꓳ ꓒꓱ ꓗꓪ ꓐꓰ ꓖꓳꓻ ꓓꓳ ꓙꓰˍ ꓡꓳ꓿ 20 ꓖꓳ ꓡꓱ ꓥ ꓟꓲ ꓢꓲ ꓤ ꓐꓴ ꓬꓲ ꓚꓳ ꓡꓳ ꓗꓪ ꓜꓲꓼ ꓡ ꓠꓬ꓾ ꓬꓲ ꓔꓴ ꓡ ꓢꓲ ꓡꓳ ꓒꓱ ꓗꓪ ꓓꓵꓽ ꓙꓰˍ ꓡꓳ꓿ ꓗꓸ ꓠꓯꓸ ꓕꓲ ꓠꓬꓲ ꓗꓪ ꓠꓬ ꓐ-ꓠ-ꓐˍ ꓐꓰ ꓕꓲ ꓛꓳꓺꓼ ꓔꓷ-ꓑꓲꓹ ꓡꓳ ꓒꓱ ꓗꓪ ꓙꓰˍ ꓡꓳ꓿ 21 ꓡꓳ ꓒꓱ ꓖꓳ ꓟ ꓗꓪ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓢꓲ꓾ ꓮꓽ ꓟꓬꓹ ꓣꓳ ꓔꓯ ꓢꓲ ꓤ ꓒꓬꓱꓼ ꓡ ꓝꓲ ꓗꓷ ꓠꓬ꓾ ꓬꓲ ꓪꓽ ꓠꓬ ꓡꓴ-ꓢꓶ-ꓔꓷꓼˍ ꓐꓰ ꓬꓲ-ꓗꓳ-ꓠꓰˍ ꓐꓰ ꓮ-ꓕꓲ-ꓬꓼ ꓗꓪ ꓬꓲꓼ ꓙꓰˍ ꓡꓳ꓿ 22 ꓖꓳ ꓗꓪ ꓬꓲ ꓪꓽ ꓡꓰ ꓢꓲ ꓤ ꓐꓴ ꓔꓯ ꓙꓵꓻ ꓚꓱꓹ ꓗꓪ ꓕꓶꓻ ꓡꓰ ꓝꓲ ꓠꓹ ꓟ ꓢꓯꓼ ꓖꓶꓽ ꓢꓲ꓾ ꓣꓳ ꓠꓽ ꓫꓸ ꓙꓵ ꓓꓴ ꓮꓽ ꓟꓬꓹ ꓫꓵ ꓜꓲꓽ ꓢꓲ ꓪꓴ-ꓢ ꓗꓴꓷꓼ ꓗꓪ ꓓꓵꓽ ꓙꓰ ꓠ ꓗꓹ ꓡꓳ꓾ ꓐꓰ ꓟꓸ ꓖꓶˍ ꓡꓳ꓿ 23 ꓝꓮꓲ ꓬꓲ ꓪꓽ ꓡꓰ ꓘꓴ ꓜꓲꓼ ꓞꓳ ꓮꓽ ꓙꓵ ꓗꓪ ꓟꓬꓱꓽ ꓡꓳꓸ ꓢꓴ ꓐꓴ ꓢꓲ ꓚꓰꓸ ꓢꓲ꓾ ꓜꓽ ꓓꓴ ꓚꓲ ꓢꓲ ꓠꓬꓲ ꓪꓽ ꓘꓴ ꓗꓷ ꓠꓬ꓾ ꓬꓲ ꓪꓽ ꓙꓵꓻ ꓗꓷ ꓟ ꓢꓲ ꓒ ꓔꓯ ꓡꓯꓼ ꓙꓱ ꓖꓶˍ ꓡꓳ꓿ 24 ꓖꓳ ꓗꓸ ꓠꓯꓸ ꓬꓲ ꓪꓽ ꓠꓬ ꓑꓲ-ꓫꓲ-ꓔꓲ ꓟꓵ ꓗꓳꓸ ꓙ ꓙꓰ ꓢꓲ ꓒ-ꓩꓴ-ꓡꓲ-ꓬꓼ ꓟꓵ ꓗꓪ ꓛꓲ ꓬꓰˍ ꓡꓳ꓿ 25 ꓒꓱ-ꓗ ꓗꓪ ꓐꓯ ꓘꓶ ꓚ ꓟꓸ ꓖꓶ ꓗꓷ ꓠꓬ꓾ ꓬꓲ ꓪꓽ ꓠꓽ ꓬ-ꓔ-ꓡ ꓡꓳ ꓒꓱ ꓗꓪ ꓬꓯꓼ ꓙꓰˍ ꓡꓳ꓿ 26 ꓖꓳ ꓗꓪ ꓐꓰ ꓡꓲ ꓜꓶꓽ ꓢꓲ꓾ ꓮ-ꓕꓲ-ꓬ ꓡꓳ ꓒꓱ ꓗꓪ ꓬꓲꓼ ꓙꓰˍ ꓡꓳ꓿ ꓮ-ꓕꓲ-ꓬ ꓡꓳ ꓒꓱ ꓠꓬ꓾ ꓪꓴ-ꓢ ꓣꓱꓽ ꓛꓰ ꓟꓬꓱꓽ ꓕꓱ ꓟ ꓬꓰ ꓝꓲ ꓠꓹ ꓟ ꓪꓴꓸ ꓔꓴ ꓖꓴ ꓥ ꓢꓲ꓾ ꓒꓳ-ꓡꓳˍ ꓐꓰ ꓐ-ꓠ-ꓐ ꓔꓯ ꓟꓬꓱꓽ ꓕꓱ ꓟ ꓬꓰ ꓐꓲ ꓡꓰ ꓠꓹ ꓟ ꓡꓯꓼ ꓙꓱ ꓖꓴ ꓥ ꓡꓳ꓿ 27 ꓬꓲ ꓪꓽ ꓖꓳ ꓗꓪ ꓛꓲ ꓬꓰ ꓕꓯ꓾ ꓘꓴ ꓜꓲꓼ ꓞꓳ ꓐꓴ ꓔꓯ ꓘꓴ ꓜꓲꓼ ꓡ ꓢꓲ꓾ ꓪꓴ-ꓢ ꓡꓰ ꓬꓲ ꓪꓽ ꓗꓪ ꓐꓰ ꓬꓰ ꓗꓷ ꓟ ꓟꓬꓱꓽˍ ꓐꓰ꓾ ꓬꓲ ꓡꓰ ꓐꓶꓽ ꓞꓳ ꓔꓯ ꓙꓵꓻ ꓠꓲꓹ ꓗ ꓘꓶꓽ ꓮ ꓡꓲ ꓒꓴ ꓖꓶ ꓗꓷ ꓟ ꓮꓽ ꓙꓵ ꓬꓲ ꓪꓽ ꓔꓯ ꓐꓯ ꓟꓸ ꓖꓶˍ ꓡꓳ꓿ 28 ꓖꓳ ꓡꓱ ꓢꓲ ꓬꓲ ꓪꓽ ꓠꓬꓲꓽ ꓣꓳ ꓠꓬ ꓢꓲ ꓤ ꓐꓴˍ ꓐꓰ ꓖꓳ ꓗꓪ ꓟꓶ ꓤ ꓔꓬ ꓡꓳ꓿

ꓝꓲ-ꓓꓴ 15

1 ꓬꓴ-ꓔ ꓟꓵꓽ ꓗꓪ ꓐꓰ ꓮ-ꓕꓲ-ꓬ ꓗꓪ ꓡ ꓞꓳ ꓕꓲ ꓧꓳꓽ ꓬꓯꓼ ꓡ ꓢꓲ ꓖꓳ ꓗꓪ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ꓾ ꓟꓳ-ꓫꓲ ꓙꓵꓽ ꓗ ꓔꓯ ꓛꓳ ꓢꓲ ꓶˍ ꓟ ꓗ ꓫꓵ ꓟꓽ ꓟꓶ ꓢꓴ ꓠꓴ ꓪꓽ ꓠꓬ ꓢꓯꓼ ꓟꓬ ꓝꓸ ꓟꓶ ꓟꓽ ꓓ꓾ ꓐꓰ ꓟꓸ ꓖꓶˍ ꓡꓳ꓿ 2 ꓒꓳ-ꓡꓳˍ ꓐꓰ ꓐ-ꓠ-ꓐ ꓠꓬ ꓬꓲ ꓪˍ ꓐꓰ ꓮꓽ ꓘꓶꓸ ꓧꓳꓺ ꓡꓯ ꓘꓳˍ ꓡꓳ꓿ ꓖꓳ ꓕꓯ ꓬꓲꓼ ꓤ ꓠꓬꓲ ꓤ ꓐꓴ ꓡꓰ꓾ ꓒꓳ-ꓡꓳˍ ꓐꓰ ꓐ-ꓠ-ꓐˍ ꓐꓰ ꓠꓱꓸ ꓐꓯꓼ ꓢꓲ ꓤ ꓕꓲ ꓐꓱ ꓔꓯ ꓫꓵꓽ ꓪꓴ ꓕꓱ ꓟ ꓑꓶꓸ ꓓꓴ꓾ ꓙꓱ-ꓣꓴ-ꓢ-ꓡꓱ ꓗꓪ ꓟ ꓝꓲ ꓓꓴ ꓐꓴˍ ꓐꓰ ꓟꓬꓱꓽ ꓡꓳꓸ ꓢꓴ ꓐꓴ ꓔꓬ ꓗꓪ ꓓꓯ ꓙꓰ ꓢꓲ ꓫꓵꓽ ꓪꓴ ꓕꓱ ꓟ ꓔꓯꓸ ꓟꓳ ꓖꓪ ꓙꓱꓽ ꓠꓹ ꓟ ꓓꓵꓽ ꓙ ꓞꓷꓹ ꓗꓷˍ ꓡꓳ꓿ 3 ꓘꓴ ꓜꓲ ꓞꓳ ꓡꓰ ꓬꓲ ꓪꓽ ꓔꓯ ꓝꓲ ꓩꓴ ꓗꓷ ꓟ ꓡꓰ ꓐꓰ ꓙꓰ ꓢꓲ꓾ ꓩꓳ-ꓠꓲ-ꓫꓬ-ꓬˍ ꓐꓰ ꓢ-ꓟ-ꓡꓲ ꓟꓵ ꓗꓪ ꓗꓳꓸ ꓙꓰ ꓢꓲ ꓠꓬꓲ ꓐꓶ ꓞꓳ ꓒꓳꓹ ꓬꓲꓼ ꓡ ꓟ ꓓꓳꓽ ꓐꓯ ꓟꓸ ꓖꓶˍ ꓟ ꓗꓪ ꓐꓰ꓾ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓮꓽ ꓘꓶꓸ ꓗꓹ ꓛꓲ ꓡꓰ ꓝꓲˍ ꓡꓳ꓿ 4 ꓙꓱ-ꓣꓴ-ꓢ-ꓡꓱ ꓗꓪ ꓛꓲ ꓡ ꓕꓯ꓾ ꓘꓴ ꓜꓲ ꓞꓳˍ ꓐꓰ ꓝꓲ ꓓꓴ ꓐꓴˍ ꓐꓰ ꓟꓬꓱꓽ ꓡꓳꓸ ꓢꓴ ꓐꓴ ꓡꓰ ꓬꓲ ꓪꓽ ꓔꓯ ꓘꓳ ꓣꓴˍ ꓡꓳ꓿ ꓖꓳ ꓕꓯ ꓪꓴ-ꓢ ꓡꓰ ꓬꓲ ꓟꓬꓱꓽ ꓗꓪ ꓬꓲ ꓪꓽ ꓔꓯ ꓮ ꓡꓲ ꓣꓱꓽ ꓗꓷ ꓟ ꓮꓽ ꓙꓵ ꓐꓯ ꓟꓸ ꓖꓶˍ ꓡꓳ꓿ 5 ꓖꓳ ꓡꓱ ꓥ ꓟꓲ ꓒ-ꓡꓲ-ꓢꓷ ꓜꓴ ꓗꓪ ꓟ ꓙꓵꓻ ꓢꓴ ꓕꓲ ꓐꓱ ꓦꓰꓼ ꓔꓴ ꓡ ꓢꓲ꓾ ꓐꓶꓽ ꓞꓳ ꓐꓴ ꓔꓯˍ ꓟꓲ ꓶꓺˍ ꓟ ꓗ ꓫꓵ ꓛꓳ ꓝꓲ ꓢꓲ꓾ ꓟꓳ-ꓫꓲ ꓙꓵꓽ ꓗ ꓔꓯ ꓒꓵꓽ ꓛꓳ ꓠꓹ ꓟ ꓕꓵꓼ ꓪ ꓖꓶ ꓠ ꓗꓹ ꓡꓳ꓾ ꓐꓯˍ ꓡꓳ꓿ 6 ꓖꓳ ꓡꓱ ꓠꓬꓲ ꓝꓲ ꓓꓴ ꓐꓴˍ ꓐꓰ ꓟꓬꓱꓽ ꓡꓳꓸ ꓢꓴ ꓐꓴ ꓠꓬ ꓫꓵꓽ ꓪꓴꓻ ꓕꓱ ꓟ ꓔꓯ ꓖꓪ ꓙꓱ ꓠꓹ ꓟ ꓜꓲꓼ ꓡꓯ ꓘꓳˍ ꓡꓳ꓿ 7 ꓟꓶ ꓤ ꓧꓳꓺ ꓡꓯ ꓘꓳ ꓗꓷ ꓠꓬ ꓒꓲ-ꓕꓱ ꓔꓴ ꓡ ꓢꓲ ꓬꓲ ꓪꓽ ꓔꓯ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓐꓶꓽ ꓞꓳ ꓠꓬ ꓥꓪ ꓟꓷ ꓠꓷꓹ ꓗꓪ ꓐꓰ ꓶꓼ ꓓꓳ ꓫꓱꓹ ꓓꓳ ꓑ ꓙꓽ ꓢꓲ ꓙꓵꓻ ꓠꓹ ꓟ꓾ ꓬꓲ ꓪꓴꓸ ꓕꓯˍ ꓡꓰ ꓠꓴ ꓪꓽ ꓗꓳ ꓡꓳ ꓗꓪ ꓐꓰ ꓪꓴ-ꓢ ꓡꓰ ꓥꓪ ꓔꓯ ꓢꓲ ꓓꓳ ꓡ ꓟ ꓠꓴ ꓪꓽ ꓢꓷˍ ꓡꓳ꓿ 8 ꓡ ꓞꓳ ꓠꓲꓹ ꓟ ꓔꓯ ꓢꓷꓸ ꓢꓴ ꓪꓴ-ꓢ ꓠꓬ꓾ ꓬꓲ ꓪꓽ ꓔꓯˍ ꓟꓲ ꓣꓳ ꓔꓯˍ ꓡꓰ ꓐꓰ ꓢꓲ-ꓫꓬ-ꓟ-ꓦ ꓖꓶ ꓢꓲ꓾ ꓬꓲ ꓪꓽ ꓔꓯ ꓬꓲ ꓘꓳ ꓣꓴˍ ꓟ ꓗꓸ ꓚꓵ ꓬꓰ ꓗꓷꓳ꓿ 9 ꓬꓲ ꓠꓬ ꓣꓳ ꓠꓬꓲꓽ ꓫꓵꓽ ꓟ ꓔꓯ ꓟꓽ ꓦꓰꓽ ꓦꓰꓽ꓾ ꓙꓵꓻ ꓠꓲꓹ ꓑꓶꓸ ꓓꓴ ꓬꓲ ꓪꓽ ꓠꓲꓹ ꓟ ꓔꓯˍ ꓟꓲ ꓢꓲꓽ ꓫꓬꓻ ꓡꓰ ꓝꓲꓳ꓿ 10 ꓮ ꓟꓶ ꓠꓴ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓪꓴ-ꓢ ꓔꓯ ꓤꓹ ꓠꓬꓲ ꓢꓲ꓾ ꓣꓳ ꓒꓵ ꓒ ꓐꓴ ꓥ ꓟꓲ ꓣꓳ ꓥ ꓟꓲ꓾ ꓟꓯꓻ ꓟꓽ ꓘꓴ ꓟ ꓡꓽ ꓡꓰ ꓢꓲ ꓤ ꓐꓴ ꓗꓶꓸ ꓝꓲꓸ ꓗꓪ ꓚꓰꓹ ꓖꓶˍ ꓐꓰ ꓬꓰˍ ꓡ? ꓕꓱ ꓡꓱ ꓠꓽ ꓬꓰ ꓓꓴ ꓟꓽ ꓥ꓿ 11 ꓣꓳˍ ꓟꓲ ꓬꓲ ꓪˍ ꓐꓰ ꓕꓲ ꓡꓰꓹꓼ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰꓽ ꓗꓪ ꓐꓰ ꓢꓯꓼ ꓟꓬ ꓟꓶˍ ꓟ ꓔꓯ ꓙꓵꓻˍ ꓟ ꓥ ꓡꓳ꓾ ꓐꓯ ꓖꓶˍ ꓡꓳ꓿ 12 ꓖꓳ ꓡꓱ ꓠꓬ ꓕꓲ ꓜꓲꓼ ꓓꓴ ꓡꓱꓸꓼ ꓟꓽ ꓪꓳꓹ ꓔꓬ ꓢꓲ꓾ ꓬꓲ ꓪꓽ ꓠꓬ ꓐ-ꓠ-ꓐˍ ꓐꓰ ꓒꓳ-ꓡꓳ ꓡꓰ꓾ ꓬꓲ ꓪꓽ ꓔꓯ ꓪꓴ-ꓢ ꓡꓰ ꓣꓱ ꓢꓲ꓾ ꓐꓶꓽ ꓞꓳ ꓗꓳ ꓡꓳ ꓗꓪ ꓢꓷꓸ ꓡꓰ ꓓꓴˍ ꓐꓰ ꓓꓵꓽ ꓙ ꓟꓶ ꓓꓴ ꓮ ꓡꓲ ꓬꓰ ꓗꓷ ꓟ ꓓꓳꓽ ꓚ ꓟꓸ ꓖꓶˍ ꓟ ꓔꓯ ꓠ ꓠꓹˍ ꓡꓳ꓿ 13 ꓐ-ꓠ-ꓐˍ ꓐꓰ ꓒꓳ-ꓡꓳ ꓡꓰ ꓚ ꓟꓸ ꓓꓳ ꓡꓰ ꓠꓬ ꓬ-ꓗꓴ ꓔꓴ ꓡ ꓢꓲ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓔꓯ ꓠ ꓠꓹ꓿ 14 ꓪꓴ-ꓢ ꓠꓬ ꓬꓲ ꓟꓬꓱꓺ ꓐꓱ ꓶ ꓐꓶꓽ ꓞꓳ ꓗꓪ ꓐꓰ ꓑ ꓫꓬꓼ ꓕꓲ ꓫꓵꓽ ꓢꓲ ꓓꓳ ꓡ ꓠꓹ ꓟ꓾ ꓬꓲ ꓮ ꓡꓲ ꓐꓰ ꓬꓲ ꓪꓽ ꓔꓯ ꓫꓱꓸ ꓤ ꓠꓲꓹ ꓟꓳꓸ ꓖꓶ ꓗꓷ ꓟ꓾ ꓮ ꓟꓶ ꓢꓲ-ꓟꓴ ꓡꓰ ꓐꓯ ꓟꓸ ꓖꓶ ꓡꓺꓳ꓿ 15 ꓕꓱ ꓟ ꓠꓬ ꓟꓷ ꓠꓷꓹ ꓝꓸ ꓢꓴ ꓐꓯ ꓘꓶˍ ꓐꓰ ꓪꓽ ꓡꓯ ꓘꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ 16 ꓕꓱ ꓟꓬ ꓙꓰꓽ ꓗꓸ ꓠꓯꓸ ꓥꓪ ꓬꓲꓼ ꓡ ꓢꓲ꓾ ꓐꓱꓽ ꓙꓰ ꓗꓷ ꓟ ꓓ-ꓪꓵ ꓬꓲ ꓦꓲ ꓔꓯ ꓥꓪ ꓝꓮꓲ ꓫꓬꓹˍ ꓥꓳ꓿ ꓟꓰꓹ ꓙꓰ ꓗꓷ ꓟ ꓔꓯ ꓥꓪ ꓝꓮꓲ ꓫꓬꓹ ꓔꓳꓹˍ ꓥꓳ꓿ 17 ꓕꓱ ꓟ ꓠꓬ ꓠꓱꓸ ꓐꓯꓼ ꓞꓳ ꓫꓵꓽ ꓐꓴˍ ꓟꓲ ꓥꓪ ꓔꓯ ꓧꓪ ꓡ ꓠꓹ ꓟ ꓥ ꓡꓳ꓿ ꓥꓪ ꓟꓬꓱꓺ ꓟꓬꓱ ꓔ ꓟ ꓐꓶꓽ ꓞꓳ ꓐꓴˍ ꓟꓲ ꓥꓪ ꓔꓯ ꓧꓪ ꓡ ꓠꓹ ꓟ ꓥ ꓡꓳ꓿ 18 ꓐꓯ ꓘꓶꓽ ꓕꓱ ꓟ ꓠꓬ ꓮꓽ ꓠꓱ ꓕꓯˍ ꓡꓰ ꓕꓱ ꓟꓬ ꓫꓵꓽ ꓟꓳꓸ ꓖꓶ ꓡ ꓢꓴ ꓢꓲ ꓒ ꓡꓰ ꓐꓯ ꓔ ꓟ ꓥ ꓡꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 19 ꓖꓳ ꓡꓱ ꓠꓬꓲ ꓥꓪ ꓓꓵꓽ ꓙˍ ꓠꓬ꓾ ꓪꓴ-ꓢ ꓔꓯ ꓒꓳꓹ ꓬꓲꓼ ꓡ ꓟ ꓐꓶ ꓞꓳ ꓐꓴ ꓔꓯ ꓣꓳ ꓡꓰ ꓕꓽ ꓘꓶꓻ ꓡꓶ ꓠꓯꓹ ꓡꓳ꓾ ꓐꓰ ꓓꓵꓽ ꓙˍ ꓡꓳ꓿ 20 ꓖꓳ ꓡꓱ ꓥ ꓟꓲ ꓠꓲꓽ ꓐꓬꓱꓽ ꓢꓲꓺ ꓐꓬꓱꓽ ꓔꓯ ꓔꓲ ꓖꓶ ꓗꓷ ꓢꓲ ꓟꓽ ꓫꓬꓻ ꓗꓷ ꓡꓰ ꓟ ꓜꓽ ꓓꓴ ꓔꓯ ꓟꓽ ꓕꓲꓺ ꓡꓰ ꓠꓹ ꓟ ꓐꓰ꓾ ꓟꓽ ꓢꓲꓽ ꓟꓽ ꓫꓬ ꓟ ꓟꓽ ꓬꓰ ꓠꓹ ꓟ ꓐꓰ꓾ ꓧꓶꓽ ꓛꓵꓽ ꓫꓵꓻ ꓟ ꓧꓪꓽˍ ꓐꓰ꓾ ꓫꓵꓽ ꓔꓯ ꓚꓲꓸ ꓠꓹ ꓟ꓾ ꓣꓳ ꓡꓰ ꓬꓲ ꓪꓽ ꓔꓯ ꓕꓳ ꓶ ꓐꓳ ꓖꓶ ꓠꓯꓹ ꓡꓳ꓿ 21 ꓮ ꓡꓲꓳ ꓐꓯ ꓠꓬ ꓮꓽ ꓠꓱ ꓕꓯ ꓟ ꓤꓶ ꓗꓪ ꓐꓰ ꓮ ꓡꓲ ꓕꓲ ꓡꓳ ꓒꓱ ꓗꓪ ꓥ ꓟꓲ꓾ ꓟꓳ-ꓫꓲ ꓕꓳ ꓶ ꓵ ꓟꓸ ꓖꓶ ꓢꓴ ꓙꓳ ꓢꓲ꓾ ꓠꓽ ꓦꓬꓼ ꓠꓬꓲ ꓮ ꓡꓲ ꓕꓲ ꓟ ꓗꓪ ꓥ ꓟꓲ ꓜꓲꓼ ꓦꓲ ꓗꓪ ꓵ ꓢꓲ ꓢꓷꓸ ꓔꓬ ꓟ ꓥꓳ꓾ ꓐꓯˍ ꓡꓳ꓿ 22 ꓖꓳ ꓕꓯ ꓝꓲ ꓓꓴ ꓐꓴˍ ꓐꓰ ꓟꓬꓱꓽ ꓡꓳꓸ ꓢꓴ ꓐꓴˍ ꓐꓰ ꓕꓲ ꓘꓴ ꓜꓲ ꓞꓳ ꓡꓱꓸꓼ ꓡꓰ꓾ ꓬꓲ ꓪꓽ ꓗꓳ ꓡꓳ ꓗꓪ ꓐꓰ ꓡꓽ ꓞꓳ ꓢꓲ ꓓꓳ ꓡ ꓢꓲ꓾ ꓒꓳ-ꓡꓳˍ ꓐꓰ ꓐ-ꓠ-ꓐˍ ꓐꓰ ꓕꓲ ꓛꓳꓺꓼ ꓮ-ꓕꓲ-ꓬꓼ ꓡꓳ ꓒꓱ ꓗꓪ ꓝꓲ ꓩꓴ ꓗꓷ ꓠꓬ ꓙꓲˍ ꓡꓳ꓾ ꓐꓰ ꓓꓵꓽ ꓙ ꓡꓳ꓿ ꓛꓳ ꓙꓰ ꓠꓹ ꓟ ꓡꓽ ꓞꓳ ꓠꓬ꓾ ꓬꓲꓼ ꓤ ꓠꓬꓲ ꓤ ꓗꓳ ꓡꓳ ꓗꓪ ꓧꓳꓽ ꓪꓴꓸ ꓟꓴ ꓢꓴ ꓐ-ꓢ-ꓐ ꓟꓬꓱ ꓔ ꓟ ꓬꓴ-ꓔˍ ꓐꓰ ꓫꓲ-ꓡ ꓔꓯ ꓢꓲ ꓓꓳ ꓡ ꓡꓳ꓿ 23 ꓬꓲ ꓪꓽ ꓡꓰ ꓐꓳ ꓩꓴ ꓗꓷˍ ꓟ ꓕꓳ ꓶ ꓗꓪ ꓕꓱ ꓡꓱ ꓐꓯ ꓔ ꓡꓳ꓿ ꓝꓲ ꓓꓴ ꓐꓴˍ ꓐꓰ ꓟꓬꓱꓽ ꓡꓳꓸ ꓢꓴ ꓐꓴˍ ꓐꓰ ꓠꓴ ꓪꓽ ꓬꓲꓼ ꓤ ꓠꓬꓲ ꓤ ꓐꓴ ꓡꓰ꓾ ꓮ-ꓕꓲ-ꓬˍ ꓐꓰ ꓫꓲ-ꓡꓲ-ꓬˍ ꓐꓰ ꓚꓲ-ꓡꓲ-ꓚꓬ ꓗꓪ ꓔꓬ ꓟ ꓐꓶ ꓞꓳ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓒꓵꓽ ꓗ ꓬꓰ ꓩꓴ ꓡ ꓥꓳ꓿ 24 ꓕꓱ ꓗꓪ ꓐꓰ ꓡꓻ ꓗꓷ ꓢꓴ ꓕꓲ ꓐꓱ ꓠꓬ꓾ ꓥꓪ ꓠꓴꓽ ꓕꓵꓼ ꓘꓶ ꓟꓽ ꓙꓳ ꓙꓳ ꓬꓲ ꓪꓽ ꓐꓯ ꓘꓶ ꓗꓪ ꓐꓰ ꓠꓴ ꓪꓽ ꓔꓯ ꓘꓶꓻ ꓡꓶꓽ ꓡꓰ ꓝꓲ ꓢꓲ ꓠꓲꓹ ꓟ ꓫꓸ ꓡꓰ ꓝꓲˍ ꓟ ꓔꓯ ꓥꓪ ꓠꓴꓽ ꓑ ꓙꓽ ꓗꓷ ꓠꓬꓲ꓾ 25 ꓥꓪ ꓠꓴꓽ ꓪꓽ ꓡꓯ ꓘꓳ ꓢꓲ꓾ ꓠꓲꓹ ꓠꓵˍ ꓟ ꓐ-ꓠ-ꓐˍ ꓐꓰ ꓒꓳ-ꓡꓳˍ ꓐꓰ ꓕꓲ ꓛꓳꓺꓼ꓾ ꓥꓪ ꓠꓴꓽ ꓡꓰ ꓢꓲ ꓔ ꓟ ꓡ ꓞꓳ ꓔꓯ ꓠꓴ ꓪꓽ ꓔꓬ ꓗꓪ ꓝꓲ ꓩꓴ ꓡ ꓠꓬ ꓙꓲˍ ꓡꓳ꓾ ꓓꓵꓽ ꓙˍ ꓡꓳ꓿ 26 ꓐ-ꓠ-ꓐˍ ꓐꓰ ꓒꓳ-ꓡꓳ ꓕꓱ ꓠꓬꓲꓽ ꓣꓳ ꓠꓬ꓾ ꓣꓳ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓟꓬꓱꓺ ꓐꓱ ꓶ ꓫꓵꓻ ꓗꓳ ꓑꓵ ꓗꓷ ꓢꓴ ꓥꓳ꓿ 27 ꓖꓳ ꓡꓱ ꓠꓬꓲ ꓥꓪ ꓠꓴꓽ ꓡꓰ ꓬꓴ-ꓔˍ ꓐꓰ ꓫꓲ-ꓡ ꓔꓯ ꓝꓲ ꓩꓴ ꓡ ꓢꓲ꓾ ꓬꓲ ꓪꓽ ꓚꓲ ꓛꓬ ꓟꓷ ꓠꓷꓹ ꓗꓪ ꓐꓰˍ ꓟꓲ ꓕꓱ ꓟ ꓡꓰ ꓐꓰ ꓠꓴ ꓪꓽ ꓔꓯ ꓐꓯ ꓖꓶ ꓡ ꓥꓳ꓿ 28 ꓢꓲ-ꓫꓬ-ꓟ-ꓦˍ ꓐꓰ ꓥꓪ ꓠꓴꓽ ꓠꓬ꓾ ꓟꓽ ꓟꓯꓻ ꓟꓽ ꓓ ꓟ ꓶꓻ ꓟꓽ ꓥ ꓠꓬ ꓠꓱꓸ ꓐꓯꓼ ꓡꓲꓽˍ ꓟ ꓶꓻ ꓠꓴ ꓪꓽ ꓔꓯ ꓟꓽ ꓟꓯꓻ ꓝꓲ ꓠꓬ ꓙꓲˍ ꓡꓳ꓾ ꓓꓵꓽ ꓙˍ ꓡꓳ꓿ 29 ꓠꓴ ꓪꓽ ꓚꓲꓸ ꓠꓯꓹ ꓟ ꓠꓬ꓾ ꓠꓲꓽ ꓐꓬꓱꓽ ꓔꓯ ꓔꓲ ꓗꓷ ꓟ ꓧꓪꓽˍ ꓐꓰ꓾ ꓫꓵꓽˍ ꓐꓰ꓾ ꓧꓶꓽ ꓛꓵꓽ ꓫꓵꓻ ꓟ ꓧꓪꓽˍ ꓐꓰ ꓟꓽ ꓢꓲꓽ ꓟꓽ ꓫꓬ ꓟ꓾ ꓕꓱ ꓟꓬ ꓫꓵꓽ ꓥꓳ꓿ ꓕꓱ ꓟꓬ ꓫꓵꓽ ꓔꓯ ꓠꓴ ꓪꓽ ꓤ ꓟꓳˍ ꓠꓬ ꓠꓴ ꓪꓽ ꓐꓱ ꓶ ꓙꓲˍ ꓡꓳ꓿ ꓧꓪꓸ ꓧꓪ ꓔꓬ꓾ ꓐꓰ ꓐꓯ ꓔ ꓡꓳ꓿ 30 ꓬꓲ ꓪꓽ ꓔꓯ ꓝꓲ ꓩꓴ ꓗꓷ ꓢꓲ ꓮ-ꓕꓲ-ꓬꓼ ꓗꓪ ꓛꓲ ꓬꓰ ꓠꓬ꓾ ꓖꓳ ꓗꓪ ꓟ ꓘꓴ ꓜꓲ ꓞꓳ ꓔꓯ ꓘꓴ ꓜꓲꓼ ꓢꓲ꓾ ꓕꓳ ꓶ ꓡꓯꓼ ꓫꓴ ꓖꓳ ꓟ ꓡꓯꓼ ꓙꓱ ꓖꓶˍ ꓡꓳ꓿ 31 ꓬꓲ ꓪꓽ ꓵ ꓗꓷ ꓠꓬ ꓠꓲꓹ ꓗꓴ ꓟꓶ ꓠꓬꓲ ꓮꓽ ꓘꓶꓸ ꓗꓹ ꓛꓲˍ ꓡꓳ꓿ 32 ꓬꓴ-ꓔˍ ꓐꓰ ꓫꓲ-ꓡˍ ꓟꓲ ꓟꓷ ꓠꓷꓹ ꓝꓸ ꓢꓴ ꓥ ꓠꓬꓲ꓾ ꓐꓯ ꓘꓶ ꓮꓽ ꓟꓬꓹ ꓡꓰ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓢꓯꓼ ꓖꓶ ꓢꓲ ꓠꓲꓹ ꓟ ꓡꓱꓻ ꓡ ꓝꓲˍ ꓡꓳ꓿ 33 ꓖꓳ ꓗꓪ ꓮꓽ ꓟꓬꓹ ꓠꓬꓲ ꓔꓬ ꓗꓷ ꓠꓬ꓾ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓬꓲ ꓪꓽ ꓔꓯ ꓝꓲ ꓩꓴ ꓡ ꓢꓴ ꓔꓬ ꓗꓪ ꓧꓪꓸ ꓧꓪ ꓬꓲꓼ ꓙꓰ ꓝꓲˍ ꓡꓳ꓿ 34 ꓖꓳ ꓡꓱ ꓥ ꓟꓲ ꓫꓲ-ꓡ ꓠꓬ ꓖꓳ ꓗꓪ ꓔꓲꓹ ꓬꓰ ꓠꓬ ꓙꓲˍ ꓡꓳ꓾ ꓓꓵꓽ ꓙˍ ꓡꓳ꓿ 35 ꓒꓳ-ꓡꓳˍ ꓐꓰ ꓐ-ꓠ-ꓐ ꓠꓽ ꓮ-ꓕꓲ-ꓬ ꓗꓪ ꓔꓬ ꓢꓲ꓾ ꓠꓱꓸ ꓐꓯꓼ ꓢꓴ ꓮꓽ ꓟꓬꓹ ꓣꓳˍ ꓐꓰ ꓕꓲ ꓛꓳꓺꓼ ꓢꓲ ꓒ ꓐꓯ ꓘꓶ ꓚ ꓟꓸ ꓖꓶˍ ꓡꓳ꓿ 36 ꓖꓳ ꓗ ꓠꓯꓸ ꓠꓬ ꓒꓳ-ꓡꓳ ꓡꓰ ꓐ-ꓠ-ꓐ ꓔꓯ꓾ ꓮ ꓟꓶ ꓣꓳ ꓡꓰꓼ ꓙꓰ ꓢꓲ ꓣꓳ ꓧꓶꓸ ꓕꓯ ꓢꓲ ꓒ ꓐꓯ ꓘꓶ ꓚ ꓟꓸ ꓖꓶ ꓗꓷ ꓟ ꓡꓳ ꓒꓱ ꓮꓽ ꓙꓵ ꓗꓪ꓾ ꓬꓲꓼ ꓤ ꓠꓬꓲ ꓤ ꓐꓴ ꓮ ꓡꓲ ꓞꓳ ꓙꓳ ꓔꓬ ꓟ ꓔꓯ ꓔꓱꓹ ꓠꓬꓲ ꓙꓰ ꓡꓯ꓾ ꓐꓯˍ ꓡꓳ꓿ 37 ꓐ-ꓠ-ꓐ ꓠꓬ ꓟ-ꓘꓳ ꓟꓬꓱ ꓔ ꓟ ꓬꓳ-ꓦ ꓔꓯˍ ꓟꓲ ꓧꓳꓽ ꓙꓰ ꓠꓲꓹ ꓫꓵˍ ꓡꓳ꓿ 38 ꓖꓳ ꓡꓱ ꓥ ꓟꓲ ꓒꓳ-ꓡꓳ ꓠꓬ꓾ ꓒ-ꓩꓴ-ꓡꓲ-ꓬ ꓟꓵꓽ ꓗꓪ ꓬꓲ ꓪꓽ ꓔꓯ ꓧꓹ ꓔ ꓬꓰ ꓢꓲ ꓟꓬꓱꓽ ꓬꓰˍ ꓟ ꓗꓪ ꓛꓳꓻ ꓙꓰ ꓟꓽ ꓫꓳ ꓢꓴ ꓟ-ꓘꓳ ꓔꓯ ꓧꓳꓽ ꓙꓰˍ ꓠꓬ ꓟꓽ ꓙꓲ꓾ ꓐꓰ ꓓꓵꓽ ꓙˍ ꓡꓳ꓿ 39 ꓖꓳ ꓡꓱ ꓠꓬꓲ ꓬꓲ ꓪꓽ ꓠꓬꓲꓽ ꓣꓳ ꓮꓽ ꓘꓶꓸ ꓧꓳꓺ ꓡꓯ ꓘꓳ ꓢꓲ ꓧꓹ ꓡꓯ ꓘꓳ ꓗꓷ ꓠꓬ꓾ ꓐ-ꓠ-ꓐ ꓠꓽ ꓟ-ꓘꓳ ꓔꓯ ꓧꓳꓽ ꓔ ꓢꓲ꓾ ꓡꓲ ꓜꓶꓽ ꓢꓲ ꓠꓬꓲ ꓢ-ꓑꓴ-ꓣ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓙꓰˍ ꓡꓳ꓿ 40 ꓒꓳ-ꓡꓳ ꓠꓽ ꓫꓲ-ꓡ ꓔꓯ ꓢꓲꓺ ꓓꓳ ꓡ ꓢꓲ꓾ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓪꓴ-ꓢ ꓣꓱꓽ ꓛꓰꓽ ꓟꓬꓱꓽ ꓗꓪ ꓡꓯꓼ ꓙꓱ ꓖꓶ ꓗꓷ ꓠꓬ ꓓꓳ ꓙꓰˍ ꓡꓳ꓿ 41 ꓒꓳ-ꓡꓳ ꓠꓬ ꓫꓲ-ꓡꓲ-ꓬˍ ꓐꓰ ꓚꓲ-ꓡꓲ-ꓚꓬ ꓟꓵꓽ ꓗꓪ ꓚꓳ ꓙꓰ ꓢꓲ꓾ ꓘꓴ ꓜꓲ ꓞꓳ ꓔꓯ ꓕꓶꓻ ꓡꓰ ꓝꓲˍ ꓡꓳ꓿

ꓝꓲ-ꓓꓴ 16

1 ꓒꓳ-ꓡꓳ ꓠꓬ ꓔꓷ-ꓑꓲꓹˍ ꓐꓰ ꓡꓴ-ꓢꓶ-ꓔꓷꓼ ꓡꓳ ꓒꓱ ꓗꓪˍ ꓟꓲ ꓚꓳ ꓛꓲ ꓬꓰˍ ꓡꓳ꓿ ꓖꓳ ꓗꓪ ꓕꓲ-ꓟꓳ-ꓕꓲ-ꓪꓴ ꓟꓬꓱ ꓔ ꓟ ꓢꓲ ꓤ ꓕꓲ ꓣꓳ ꓔꓬ ꓡꓳ꓿ ꓬꓲ ꓟꓹ ꓟ ꓠꓬ ꓢꓲ ꓒ ꓔꓯ ꓙꓵꓻˍ ꓟ ꓬꓴ-ꓔ ꓤꓽ ꓟꓶ ꓤꓽ ꓥ ꓢꓲ꓾ ꓬꓲ ꓐꓹ ꓐ ꓠ ꓦꓲ-ꓡꓲ ꓡ ꓞꓳ ꓥ ꓡꓳ꓿ 2 ꓡꓴ-ꓢꓶ-ꓔꓷꓽˍ ꓐꓰ ꓬꓲ-ꓗꓳ-ꓠꓰ ꓗꓪ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴˍ ꓟꓲ꓾ ꓕꓲ-ꓟꓳ-ꓕꓲ-ꓪꓴ ꓠꓽ ꓞꓳ ꓙꓲꓻ ꓥꓳ꓾ ꓐꓰ ꓢꓷꓸ ꓙ ꓟꓳ ꓙˍ ꓡꓳ꓿ 3 ꓒꓳ-ꓡꓳ ꓠꓬ ꓬꓲˍ ꓐꓰ ꓕꓲ ꓛꓳꓺꓼ ꓕꓲ-ꓟꓳ-ꓕꓲ-ꓪꓴ ꓔꓯ ꓧꓳꓽ ꓙꓰ ꓠꓲꓹ ꓫꓵ ꓠꓬꓲ꓾ ꓖꓳ ꓕꓲ ꓟꓵꓽ ꓗꓪ ꓔꓬ ꓟ ꓬꓴ-ꓔ ꓡ ꓞꓳ ꓑꓶꓸ ꓓꓴ꓾ ꓬꓲ ꓔꓯ ꓶˍ ꓟ ꓗ ꓫꓵ ꓬꓰ ꓖꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓐꓹ ꓐ ꓠꓽ ꓦꓲ-ꓡꓲ ꓡ ꓞꓳ ꓥ ꓟ ꓬꓲ ꓪꓽ ꓮꓽ ꓙꓵ ꓢꓷˍ ꓡꓳ꓿ 4 ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓝꓲ ꓓꓴ ꓐꓴˍ ꓐꓰ꓾ ꓟꓬꓱꓽ ꓡꓳꓸ ꓢꓴ ꓐꓴ ꓡꓰ ꓖꓪ ꓙꓱ ꓔ ꓟ ꓗꓺ ꓫꓵ ꓔꓯ ꓛꓳ ꓝꓲ ꓠꓹ ꓟ꓾ ꓬꓲ ꓪꓽ ꓠꓬ ꓕꓲ ꓡꓳ ꓒꓱ ꓡꓰ ꓕꓲ ꓡꓳ ꓒꓱ ꓗꓪ ꓚꓳ ꓙꓰ ꓢꓲ꓾ ꓦ ꓡꓱ ꓢꓴ ꓐꓴ ꓔꓯ ꓗꓺ ꓫꓵ ꓖꓳ ꓟ ꓡꓯꓼ ꓙꓱ ꓖꓶˍ ꓡꓳ꓿ 5 ꓖꓳ ꓡꓱ ꓠꓬꓲ ꓘꓴ ꓜꓲ ꓞꓳ ꓠꓬ ꓙꓵꓻ ꓠꓲꓹ ꓢꓯꓼ ꓙꓳ ꓡ ꓢꓲ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓦ ꓡꓱ ꓢꓴ ꓟꓬꓽ ꓡ ꓡꓳ꓿ 6 ꓢꓲ-ꓫꓬ-ꓟ-ꓦ ꓡꓰ ꓬꓲ ꓪꓽ ꓔꓯ ꓮ-ꓢꓲ-ꓬ ꓟꓵꓽ ꓗꓪ ꓪꓴ-ꓢ ꓐꓯ ꓘꓶ ꓟꓽ ꓚ ꓙꓰ ꓝꓲ ꓠꓬꓲ꓾ ꓬꓲ ꓪꓽ ꓠꓬ ꓩ-ꓡꓴ-ꓚꓲ-ꓬ ꓟꓵˍ ꓐꓰ ꓖ-ꓡ-ꓕꓲ-ꓬ ꓟꓵꓽ ꓗꓪ ꓗꓳꓸ ꓙꓻ ꓙꓰ ꓢꓲ꓾ 7 ꓟꓰ-ꓫꓲ-ꓬ ꓟꓵ ꓫꓸ ꓗ ꓗꓪ ꓛꓲ ꓬꓰ ꓠꓬ꓾ ꓑꓲ-ꓕꓴ-ꓠꓲ-ꓬ ꓟꓵ ꓗꓪ ꓓꓵꓽ ꓙꓰˍ ꓐꓰ ꓬꓰˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓬꓲ ꓦ ꓡꓰ ꓬꓲ ꓪꓽ ꓔꓯ ꓟꓽ ꓙꓰ ꓝꓲ ꓠꓬꓲ꓾ 8 ꓬꓲ ꓪꓽ ꓠꓬ ꓟꓰ-ꓫꓲ-ꓬ ꓟꓵ ꓗꓪ ꓗꓳꓸ ꓙꓰ ꓢꓲ꓾ ꓕꓷ-ꓡꓳ-ꓬ ꓡꓳ ꓒꓱ ꓗꓪ ꓬꓯꓼ ꓡ ꓡꓳ꓿ 9 ꓖꓳ ꓕꓲ ꓦꓬꓼ ꓢ ꓘꓪ ꓕꓯ ꓒꓳ-ꓡꓳ ꓔꓯ ꓦ ꓐꓬꓱꓽ ꓕꓲ ꓟ ꓟꓳꓸ ꓖꓶ ꓡ ꓡꓳ꓿ ꓦ ꓐꓬꓱꓽ ꓖꓳ ꓟ ꓗꓪ꓾ ꓟ-ꓢꓲ-ꓓꓳ ꓡ ꓞꓳ ꓕꓲ ꓣꓳ ꓦꓰꓼ ꓞ ꓢꓲ ꓒꓳ-ꓡꓳ ꓔꓯ꓾ ꓟ-ꓢꓲ-ꓓꓳ ꓗꓪ ꓗꓳꓸ ꓡ ꓢꓲ ꓥꓪ ꓠꓴꓽ ꓔꓯ ꓬꓰ ꓙ ꓡꓯ꓾ ꓐꓰ ꓓꓰꓽˍ ꓟ ꓟꓳˍ ꓡꓳ꓿ 10 ꓬꓲ ꓠꓬ ꓦ ꓐꓬꓱꓽ ꓟꓳꓻ ꓗꓷ ꓗ ꓠꓯ꓾ ꓪꓴ-ꓢ ꓡꓰ ꓟ-ꓢꓲ-ꓓꓳ ꓢꓴ ꓔꓯ ꓶꓼ ꓓꓳ ꓫꓱꓹ ꓓꓳ ꓟꓸ ꓖꓶ ꓠꓹ ꓟ꓾ ꓥꓪ ꓠꓴꓽ ꓔꓯ ꓘꓴˍ ꓡꓳ꓾ ꓓꓵꓽ ꓙˍ ꓠꓬꓲ꓾ ꓖꓳ ꓗꓪ ꓙꓰˍ ꓐꓰ ꓬꓰˍ ꓡꓳ꓿ 11 ꓖꓳ ꓡꓱ ꓠꓬꓲ ꓥꓪ ꓠꓴꓽ ꓠꓬ ꓕꓷ-ꓡꓳ-ꓬ ꓗꓪ ꓐꓰ ꓡꓲ ꓜꓶꓽ ꓢꓲ꓾ ꓢ-ꓟꓳ-ꓕꓷ-ꓡ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓔꓱꓹ ꓔꓱꓹꓼ ꓐꓰ ꓙꓰꓳ꓿ ꓗꓸ ꓠꓯꓸ ꓕꓲ ꓠꓬꓲ ꓠꓬ ꓠꓲ-ꓬ-ꓑꓳ-ꓢꓶ ꓡꓳ ꓒꓱ ꓗꓪ ꓛꓲ ꓬꓰꓳ꓿ 12 ꓝꓮꓲ ꓖꓳ ꓗꓪ ꓐꓰ ꓒꓲ-ꓡꓲ-ꓒꓲ ꓗꓪ ꓛꓲ ꓬꓰꓳ꓿ ꓕꓱ ꓟ ꓠꓬ ꓟ-ꓢꓲ-ꓓꓳ ꓟꓵꓽ ꓗꓪ ꓟ ꓡꓳ ꓒꓱ ꓓꓽ ꓟ ꓕꓲ ꓟ ꓥ ꓢꓲ꓾ ꓣꓳ-ꓟ ꓙꓵꓽˍ ꓟ ꓠꓯꓸ ꓘꓪ ꓓꓹ ꓟ ꓡꓳ ꓒꓱ ꓥ ꓡꓳ꓿ ꓖꓳ ꓗꓪ ꓥꓪ ꓠꓴ ꓠꓬꓲꓽ ꓢ ꓠꓬꓲ ꓔꓬ ꓗꓷꓳ꓿ 13 ꓠꓽ ꓦꓬꓼ ꓠꓬꓲ ꓗꓪ ꓥꓪ ꓠꓴꓽ ꓠꓬ꓾ ꓪꓽ ꓘꓴ ꓜꓲꓼ ꓖꓴ ꓕꓲ ꓖ ꓙꓳˍ ꓥꓳ꓾ ꓓꓵꓽ ꓙ ꓢꓲ꓾ ꓡꓳ ꓒꓱ ꓗꓪ ꓐꓰ ꓓꓳ ꓙꓰ ꓢꓲ ꓠꓬꓲ ꓠꓯ ꓬꓲꓻ ꓘꓶꓽ ꓔꓯꓸ ꓟꓳꓸ ꓙꓰꓳ꓿ ꓥꓪ ꓠꓴꓽ ꓠꓬ ꓖꓳ ꓗꓪ ꓠꓬꓲꓸ ꓠꓸ ꓢꓲ꓾ ꓜꓲꓼ ꓡ ꓟ ꓤꓽ ꓟꓶ ꓤ ꓐꓴ ꓔꓯ ꓟꓸ ꓟꓲ ꓚ ꓟꓸ ꓖꓶꓽꓳ꓿ 14 ꓟꓸ ꓟꓲ ꓠ ꓠꓹ ꓢꓴ ꓗꓳ ꓡꓳ ꓗꓪ꓾ ꓕꓷ-ꓬ-ꓕꓷ-ꓡꓽ ꓡꓳ ꓒꓱ ꓗꓪ ꓐꓰ ꓡꓻ ꓟ꓾ ꓪꓴ-ꓢ ꓔꓯ ꓦ ꓡꓱˍ ꓟ꓾ ꓠꓲꓺ ꓛꓵꓽ ꓟ ꓟꓶꓺ ꓪꓴꓽ ꓢꓴ꓾ ꓡꓱ-ꓔꓲ-ꓬ ꓟꓬꓱ ꓔ ꓟ ꓤꓽ ꓟꓶ ꓤ ꓕꓲ ꓣꓳ ꓔꓬ ꓡꓳ꓿ ꓢꓲ ꓒ ꓡꓰ ꓬꓲ ꓔꓯ ꓠꓲꓹ ꓟ ꓒꓴ ꓖꓶˍ ꓠꓬꓲ ꓒꓳ-ꓡꓳ ꓐꓯˍ ꓟ ꓔꓯ ꓬꓲ ꓜꓶ ꓠ ꓠꓹ ꓡꓳ꓿ 15 ꓬꓲꓸˍ ꓐꓰ ꓬꓲ ꓕꓲ ꓦꓲ ꓢꓴ ꓖꓳ ꓓꓱ ꓔꓲꓹ ꓟꓶ ꓗꓷ ꓠꓬ꓾ ꓬꓲ ꓡꓰ ꓥꓪ ꓠꓴꓽ ꓔꓯ꓾ ꓥꓪ ꓠꓬ ꓢꓲ ꓒ ꓠꓯꓸꓼ ꓗꓪ ꓙꓵꓻ ꓠꓲꓹ ꓙꓳˍ ꓟ ꓠꓴ ꓪꓽ ꓚꓬꓹ ꓔ ꓠꓬ꓾ ꓥꓪ ꓦꓲ ꓗꓪ ꓔꓬ ꓡꓯ꓾ ꓐꓰ ꓟꓽ ꓓ ꓟꓽ ꓞ ꓓꓰꓽˍ ꓠꓬꓲ꓾ ꓥꓪ ꓠꓴ ꓠꓬ ꓬꓲ ꓦꓲ ꓗꓪ ꓔꓬ ꓗꓷꓳ꓿ 16 ꓕꓲ ꓠꓬꓲ ꓙꓳˍ ꓠꓬ꓾ ꓪꓽ ꓘꓴ ꓖꓴ ꓗꓪ ꓥꓪ ꓠꓴ ꓙꓰ ꓔꓬ ꓕꓯ꓾ ꓓꓽ ꓫꓵ ꓠꓲꓽ ꓓꓯꓹ ꓢꓲ ꓓꓽ ꓫꓵ ꓟꓬꓱꓽ ꓬꓰˍ ꓟ ꓗꓪ ꓐꓰ ꓬꓲ ꓢꓲ ꓒ ꓔꓯ ꓒꓴ ꓮꓽ ꓟꓬꓹ ꓧꓪ ꓟꓶ ꓡꓰ ꓝꓲˍ ꓟ ꓤ ꓟꓶ ꓡꓯꓸ ꓕꓲ ꓣꓳ ꓥꓪ ꓠꓴꓽ ꓔꓯ ꓔꓳꓹ ꓜꓳꓽˍ ꓡꓳ꓿ 17 ꓬꓲ ꓠꓬ ꓒꓳ-ꓡꓳˍ ꓐꓰ ꓥꓪ ꓠꓴꓽ ꓔꓯ ꓛꓳ ꓡ ꓢꓲ꓾ ꓡ ꓞꓳ ꓕꓱ ꓕꓷ ꓠꓬ ꓟꓴ ꓡꓳꓹ ꓬꓰ ꓢꓴ ꓪꓴ-ꓢ ꓬꓲ ꓚꓳ ꓑꓸ ꓐꓴ ꓥ ꓢꓲ꓾ ꓠꓴ ꓪꓽ ꓔꓯ ꓢꓯꓼ ꓟꓬ ꓟꓶ ꓠꓹ ꓟ ꓙ ꓖꓴ ꓐꓯ ꓟꓸ ꓖꓶ ꓢꓴ ꓥꓳ꓾ ꓐꓰ ꓘꓴˍ ꓡꓳ꓿ 18 ꓬꓲ ꓠꓬ ꓕꓱ ꓡꓱ ꓮꓽ ꓟꓬꓹ ꓠꓬꓲ ꓬꓰˍ ꓟ ꓗꓪ ꓐꓰ ꓒꓳ-ꓡꓳ ꓮꓽ ꓘꓶꓸ ꓠꓲꓹ ꓜꓲ ꓡ ꓠꓬꓲ ꓔꓲꓸ ꓒꓳꓹ ꓢꓲ ꓠꓲꓽ ꓔꓯ꓾ ꓥꓪ ꓠꓬ ꓬꓰ-ꓢꓴ ꓙꓲ-ꓢꓴ ꓟꓬꓱꓺ ꓗꓪ ꓐꓰ ꓠꓴ ꓔꓯ ꓕꓵꓼ ꓪ ꓖꓶˍ ꓠꓬꓲ꓾ ꓠꓴ ꓬꓲ ꓔꓯˍ ꓐꓰ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓠꓲꓽ ꓠꓽ ꓬꓲ ꓖꓳ ꓕꓲ ꓑꓹ ꓗꓪ ꓓꓳ ꓡꓺꓳ꓿ 19 ꓖꓳ ꓡꓱ ꓥ ꓟꓲ ꓤ ꓟꓶ ꓡꓯꓸ ꓖꓳ ꓟ ꓬꓲ ꓢꓲ ꓒ ꓐꓴ ꓠꓬ꓾ ꓬꓲ ꓪꓽ ꓒꓴꓻ ꓧꓪ ꓚꓱꓹ ꓐꓬ ꓡꓰˍ ꓟ ꓔꓯ ꓟꓳꓻ ꓗꓷ ꓠꓬꓲ꓾ ꓬꓲ ꓪꓽ ꓡꓰ ꓒꓳ-ꓡꓳˍ ꓐꓰ ꓫꓲ-ꓡ ꓔꓯ ꓣꓴ ꓢꓲ꓾ ꓢꓲꓽ ꓒ ꓐꓴ ꓔꓬ ꓗꓪ ꓖꓳꓻ ꓛꓲ ꓬꓰ ꓠꓬ꓾ 20 ꓕꓱ ꓕꓲ ꓧꓳꓽ ꓟ ꓠꓬ ꓬꓴ-ꓔ ꓡ ꓞꓳ ꓥ ꓢꓲ꓾ ꓣꓳ ꓡꓳ ꓒꓱ ꓗꓪ ꓮꓽ ꓘꓶꓸ ꓘꓶꓻ ꓡꓶꓽ ꓔꓬ ꓡꓳ꓿ 21 ꓬꓲ ꓪꓽ ꓠꓬ ꓣꓳꓽ ꓣꓳ-ꓟ ꓡ ꓞꓳ ꓘꓳꓻ ꓣꓴ ꓟꓽ ꓓ ꓟ ꓐꓰ ꓛꓳˍ ꓟꓲ ꓛꓳ ꓟꓽ ꓓ ꓟ ꓗ ꓫꓵ ꓟꓸ ꓖꓶ ꓔꓬ ꓡꓳ꓾ ꓐꓯˍ ꓡꓳ꓿ 22 ꓞꓳ ꓜꓴꓻ ꓠꓬ ꓕꓲ ꓢꓯꓼˍ ꓐꓰ ꓝꓲ ꓓꓴ ꓐꓴ ꓔꓯ ꓒꓳꓹ ꓔꓴ ꓡ ꓕꓯ꓾ ꓢꓲꓽ ꓒ ꓐꓴ ꓡꓰ ꓝꓲ ꓓꓴ ꓐꓴ ꓐꓵ ꓞꓶꓽ ꓚꓵꓹ ꓡꓵꓸ ꓗꓷ ꓢꓲ ꓓꓶꓽ ꓠꓹ ꓟ ꓕꓵꓼ ꓪ ꓖꓶˍ ꓡꓳ꓿ 23 ꓬꓲ ꓪꓽ ꓔꓯ ꓮꓽ ꓘꓶꓸ ꓓꓶꓽ ꓗꓷ ꓗꓸ ꓠꓯꓸ ꓐꓱ ꓓꓴꓽ ꓗꓪ ꓐꓱ ꓗꓷ ꓢꓲ꓾ ꓬꓲ ꓜꓶ ꓦꓴꓺ ꓠꓬꓹ ꓠꓹ ꓟ ꓐꓱ ꓓꓴꓽ ꓙꓵꓽ ꓢꓴ ꓔꓯ ꓕꓵꓼ ꓪ ꓖꓶˍ ꓡꓳ꓿ 24 ꓕꓵꓼ ꓪ ꓕꓱ ꓟ ꓟꓶ ꓡꓰ ꓠꓬ꓾ ꓐꓱ ꓓꓴꓽ ꓙꓵꓽ ꓢꓴ ꓡꓰ ꓬꓲ ꓪꓽ ꓔꓯ ꓐꓱ ꓓꓴꓽ ꓠꓯꓸꓼ ꓕꓲ ꓗꓳꓹ ꓗꓪ ꓐꓱ ꓗꓷ ꓢꓲ꓾ ꓬꓲ ꓪꓽ ꓛꓲ ꓒꓯꓹ ꓗꓪˍ ꓟꓲ ꓕꓶꓻ ꓕꓶˍ ꓡꓰꓽ ꓡꓸ ꓕꓸ ꓕꓯꓼˍ ꓡꓳ꓿ 25 ꓮꓽ ꓡ ꓦꓬꓼ ꓔꓱ ꓫꓵ ꓗꓪ ꓒꓳ-ꓡꓳˍ ꓐꓰ ꓫꓲ-ꓡ ꓠꓬ ꓪꓽ ꓘꓴ ꓢꓲ ꓪꓴ-ꓢ ꓔꓯ ꓫꓱꓸ ꓖꓶ ꓓꓴ ꓟꓴꓽ ꓖꓪꓽ ꓖꓪ ꓔꓬ ꓕꓯ꓾ ꓠꓱꓸ ꓐꓯꓼ ꓐꓱ ꓔ ꓢꓴ ꓐꓴˍ ꓟꓲ ꓬꓲ ꓪꓽ ꓔꓯ ꓠ ꓠꓹ ꓔꓬ ꓡꓳ꓿ 26 ꓖꓳ ꓕꓯ ꓞꓼ ꓐꓰ ꓟꓵꓽ ꓮꓽ ꓘꓶꓸ ꓓꓵꓺ ꓡ ꓢꓲ꓾ ꓐꓱ ꓓꓴꓽ ꓦꓲ ꓚꓰ ꓶꓹ ꓡꓰ ꓢꓲ ꓠꓬꓲ꓾ ꓗꓺ ꓘꓶ ꓮꓽ ꓙꓵˍ ꓟꓲ ꓞꓼ ꓐꓰ ꓒꓴ ꓡ ꓢꓲ꓾ ꓐꓱ ꓔ ꓢꓴ ꓞꓳꓹ ꓚ ꓮꓽ ꓙꓵ ꓡꓱꓸꓼ ꓐꓶꓻ ꓡꓰꓳ꓿ 27 ꓐꓱ ꓓꓴꓽ ꓙꓵꓽ ꓢꓴ ꓧꓪꓸ ꓛꓲꓽ ꓡ ꓢꓲ꓾ ꓐꓱ ꓓꓴ ꓗ ꓘꓶꓽ ꓒꓴ ꓞꓹ ꓟ ꓔꓯ ꓟꓳꓻ ꓗꓷ ꓠꓬ꓾ ꓐꓱ ꓔ ꓢꓴ ꓛꓰꓹ ꓙꓰꓳ꓾ ꓐꓰ ꓓꓵꓽ ꓙˍ ꓠꓬꓲ꓾ ꓬꓲ ꓮ ꓕꓽ ꓚꓵꓹ ꓓꓳ ꓡ ꓢꓲ ꓚꓲꓸ ꓛꓬ ꓔꓯ ꓗꓸ ꓢꓰꓼˍ ꓐꓰ ꓬꓰˍ ꓡꓳ꓿ 28 ꓖꓳ ꓡꓱ ꓥ ꓟꓲ ꓒꓳ-ꓡꓳ ꓠꓽ ꓢꓯꓼ ꓓꓽ ꓟ ꓡꓰ꓾ ꓠꓴ ꓚꓲꓸ ꓛꓬ ꓔꓯ ꓮ ꓡꓲ ꓕꓽ ꓬꓰ꓾ ꓥꓪ ꓠꓴꓽ ꓮꓽ ꓙꓵ ꓕꓻ ꓔꓬ ꓡꓳ꓾ ꓐꓯ ꓖꓶˍ ꓡꓳ꓿ 29 ꓖꓳ ꓕꓯ ꓐꓱ ꓓꓴꓽ ꓙꓵꓽ ꓢꓴ ꓠꓬ꓾ ꓮ ꓔꓳꓸ ꓟꓬ ꓖꓶꓽ ꓡꓯ꓾ ꓐꓰ ꓘꓴꓻ ꓗꓷ ꓠꓬ꓾ ꓙꓳꓺ ꓠꓬꓲ ꓛꓱꓽ ꓠꓬꓲ ꓔꓷꓹ ꓓꓵꓽ ꓙꓰ ꓢꓲ꓾ ꓒꓳ-ꓡꓳˍ ꓐꓰ ꓫꓲ-ꓡ ꓟꓲꓽ ꓙꓬ ꓗꓪ ꓟꓳꓼ ꓡꓰ ꓢꓲ ꓠꓬꓲ꓾ 30 ꓬꓲ ꓪꓽ ꓔꓯ ꓧꓳꓽ ꓓꓳ ꓡ ꓢꓲ꓾ ꓮ ꓬꓲꓼ ꓐꓴꓳ꓾ ꓢꓯꓼ ꓟꓬ ꓝꓸ ꓟꓶ ꓠꓹ ꓟ ꓥꓪ ꓮ ꓡꓲ ꓬꓰ ꓠ ꓗꓹ ꓡ? ꓐꓯˍ ꓡꓳ꓿ 31 ꓬꓲ ꓪꓽ ꓡꓰ꓾ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ꓾ ꓖꓳ ꓡꓱ ꓠꓬ ꓠꓴˍ ꓐꓰ ꓠꓴ ꓕꓲ ꓦꓲ ꓢꓴ ꓢꓯꓼ ꓟꓬ ꓝꓸ ꓟꓶˍ ꓥꓳ꓾ ꓐꓯ ꓖꓶˍ ꓡꓳ꓿ 32 ꓖꓳ ꓕꓯ ꓝꓲ ꓓꓴ ꓐꓴ ꓡꓰ ꓬꓲˍ ꓐꓰ ꓬꓲ ꓕꓲ ꓦꓲ ꓢꓴ ꓮꓽ ꓙꓵ ꓔꓯ ꓢꓲ ꓒ ꓐꓯ ꓘꓶ ꓟꓸ ꓖꓶˍ ꓡꓳ꓿ 33 ꓢ ꓘꓪ ꓬꓲ ꓖꓳ ꓕꓲ ꓙꓵꓹ ꓗꓪ꓾ ꓐꓱ ꓓꓴꓽ ꓙꓵꓽ ꓢꓴ ꓡꓰ ꓬꓲ ꓪꓽ ꓠꓻ ꓓꓴ ꓞꓲꓽ ꓖꓶˍ ꓡꓳ꓿ ꓖꓳ ꓗ ꓠꓯꓸ ꓞꓼ ꓐꓰ ꓬꓲˍ ꓐꓰ ꓬꓲ ꓕꓲ ꓦꓲ ꓢꓴ ꓮꓽ ꓙꓵ ꓖꓳ ꓓꓱ ꓔꓲꓹ ꓟꓶˍ ꓡꓳ꓿ 34 ꓖꓳ ꓡꓱ ꓠꓬ ꓬꓲ ꓪꓽ ꓔꓯ ꓬꓲ ꓦꓲ ꓗꓪ ꓧꓳꓽ ꓓꓵꓽ ꓙꓰ ꓢꓲ ꓜꓻ ꓖꓶꓽ ꓜꓽ ꓢꓲ ꓠꓬꓲ꓾ ꓬꓲˍ ꓐꓰ ꓬꓲ ꓕꓲ ꓦꓲ ꓢꓴ ꓮꓽ ꓙꓵ ꓪꓴ-ꓢ ꓔꓯ ꓙꓵꓻ ꓗꓷ ꓠꓬꓲ ꓮꓽ ꓘꓶꓸ ꓗꓹ ꓛꓲˍ ꓡꓳ꓿ 35 ꓟꓲꓽ ꓕꓯ ꓙꓲ ꓡ ꓠꓬ ꓢꓲꓽ ꓒ ꓐꓴ ꓡꓰ ꓟꓯꓼ ꓤ ꓐꓴ ꓔꓯ ꓝꓲ ꓩꓴ ꓡ ꓢꓲ꓾ ꓡ ꓞꓳ ꓖꓳ ꓠꓬꓲꓽ ꓣꓳ ꓔꓯ ꓩꓴ ꓗꓷ꓾ ꓐꓰ ꓐꓯ ꓖꓶ ꓝꓲˍ ꓡꓳ꓿ 36 ꓖꓳ ꓕꓯ ꓐꓱ ꓓꓴꓽ ꓙꓵꓽ ꓢꓴ ꓡꓰ ꓒꓳ-ꓡꓳ ꓔꓯ꓾ ꓢꓲꓽ ꓒ ꓐꓴ ꓠꓴ ꓪꓽ ꓔꓯ ꓩꓴ ꓗꓷ ꓠꓹ ꓟ ꓡ ꓞꓳ ꓝꓲ ꓩꓴ ꓡ ꓠꓬꓲ꓾ ꓮ ꓟꓶ ꓠꓴ ꓪꓽ ꓓꓳ ꓡ ꓢꓲ꓾ ꓧꓪꓸ ꓧꓪˍ ꓙꓰ꓾ ꓐꓯ ꓖꓶˍ ꓡꓳ꓿ 37 ꓖꓳ ꓡꓱ ꓥ ꓟꓲ ꓒꓳ-ꓡꓳ ꓡꓰ ꓢꓲꓽ ꓒ ꓟꓯ ꓤ ꓐꓴ ꓔꓯ꓾ ꓥꓪ ꓠꓴꓽ ꓠꓬ ꓣꓳ-ꓟ ꓡ ꓞꓳ ꓥꓻ ꓥˍ ꓟꓲ꓾ ꓓꓰꓺ ꓘꓶꓽ ꓟꓽ ꓐꓯ ꓞꓷꓹ ꓕꓯˍ ꓡꓰ ꓮꓽ ꓙꓵ ꓢꓴ ꓟꓲꓽ ꓙꓬ ꓗꓪ ꓥꓪ ꓠꓴꓽ ꓔꓯ ꓓꓶꓽ ꓢꓲ ꓐꓱ ꓗꓷꓳ꓿ ꓮ ꓟꓶ ꓬꓲ ꓪꓽ ꓠꓬ ꓥꓪ ꓠꓴꓽ ꓔꓯ ꓘꓳ ꓫꓱ ꓫꓱˍ ꓩꓴ ꓗꓷˍ ꓐꓰ ꓬꓰˍ ꓡ? ꓕꓱ ꓡꓱ ꓬꓰ ꓟꓽ ꓓ꓿ ꓢꓲꓽ ꓒ ꓐꓴ ꓬꓲ ꓪꓽ ꓚꓲ ꓛꓬ ꓡ ꓢꓲ ꓥꓪ ꓠꓴꓽ ꓔꓯ ꓧꓳꓽ ꓓꓳ ꓙꓰ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ꓿ 38 ꓖꓳ ꓡꓱ ꓠꓬ ꓟꓯꓼ ꓤ ꓐꓴ ꓡꓰ ꓐꓯ ꓘꓶ ꓕꓱ ꓟ ꓢꓲꓽ ꓒ ꓐꓴ ꓔꓯ ꓐꓯ ꓖꓶ ꓬꓰ ꓠꓬ꓾ ꓒꓳ-ꓡꓳˍ ꓐꓰ ꓫꓲ-ꓡ ꓠꓽ ꓣꓳ-ꓟ ꓑ ꓫꓬꓼ ꓥ ꓟ ꓢꓷꓸ ꓡꓰ ꓠꓬꓲ ꓙꓳꓺ ꓡꓰˍ ꓡꓳ꓿ 39 ꓖꓳ ꓕꓯ ꓢꓲꓽ ꓒ ꓐꓴ ꓡ ꓢꓲ ꓬꓲ ꓪꓽ ꓔꓯ ꓖꓶꓻ ꓬꓲꓽ ꓢꓲ ꓠꓬꓲ꓾ ꓐꓱ ꓓꓴꓽ ꓗꓪ ꓐꓰ ꓧꓳꓽ ꓓꓳ ꓡ ꓠꓬ꓾ ꓡꓳ ꓒꓱ ꓗꓪ ꓐꓰ ꓓꓳ ꓙꓰ ꓠꓹ ꓟ ꓬꓲ ꓪꓽ ꓔꓯ ꓓꓰꓽˍ ꓡꓳ꓿ 40 ꓬꓲ ꓪꓽ ꓐꓱ ꓓꓴꓽ ꓗꓪ ꓐꓰ ꓓꓳ ꓙꓰ ꓠꓬ꓾ ꓡꓱ-ꓔꓲ-ꓬꓼ ꓦꓲ ꓗꓪ ꓓꓵꓽ ꓡꓰ ꓢꓲ꓾ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠꓲꓹ ꓟ ꓗꓴ ꓖꓶ ꓗꓷ ꓠꓬ꓾ ꓖꓳ ꓗꓪ ꓐꓰ ꓓꓳ ꓙꓰˍ ꓡꓳ꓿

ꓝꓲ-ꓓꓴ 17

1 ꓬꓲ ꓪꓽ ꓠꓬ ꓬ-ꓩꓷ-ꓑꓳ-ꓡꓲˍ ꓐꓰ ꓬ-ꓑꓳ-ꓡꓳ-ꓠꓲ-ꓬ ꓡꓳ ꓒꓱ ꓗꓪ ꓗꓳꓸ ꓙꓻ ꓙꓰ ꓢꓲ꓾ ꓕꓰ-ꓢ-ꓡꓳ-ꓠꓲ-ꓬ ꓗꓪ ꓛꓲ ꓬꓰˍ ꓡꓳ꓿ ꓖꓳ ꓗꓪ ꓬꓴ-ꓔ ꓡ ꓞꓳ ꓜꓲꓼ ꓦꓲ ꓕꓲ ꓦꓲ ꓙꓳˍ ꓡꓳ꓿ 2 ꓒꓳ-ꓡꓳ ꓠꓬ ꓬꓲ ꓬꓰ ꓝꓳ ꓡꓰ ꓟ ꓡꓰ ꓐꓰ ꓬꓲ ꓪꓽ ꓜꓲꓼ ꓦꓲ ꓗꓪ ꓙꓰ ꓢꓲ꓾ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓬꓲ ꓪꓽ ꓔꓯ ꓠꓽ ꓦꓬꓼ ꓠꓬꓲ ꓢ ꓟ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ꓿ 3 ꓬꓲ ꓡꓰ꓾ ꓙꓲ-ꓢꓴ ꓠꓽ ꓫꓸ ꓙꓵ ꓢꓲ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓠ ꓗꓹ ꓟ ꓟꓸ ꓟꓲ ꓬꓲ ꓗꓸ ꓚꓵˍ ꓟꓲ ꓬꓲ ꓪꓽ ꓔꓯ ꓒꓶ ꓟꓸ ꓖꓶ ꓢꓲ꓾ ꓠꓴ ꓪꓽ ꓔꓯ ꓥꓪ ꓐꓯ ꓟꓸ ꓖꓶˍ ꓟ ꓬꓰ-ꓢꓴ ꓕꓱ ꓕꓲ ꓣꓳ ꓠꓬ ꓙꓲ-ꓢꓴ ꓖꓳ ꓟ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ 4 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓴ-ꓔ ꓡ ꓞꓳ ꓕꓲ ꓐꓱ ꓔꓯ ꓘꓶꓸ ꓟꓶ ꓡꓰ ꓢꓲ꓾ ꓪꓴ-ꓢ ꓔꓯ ꓙꓳ ꓒꓵꓽˍ ꓟ ꓦꓲ-ꓡꓲ ꓡ ꓞꓳ ꓬꓲ ꓜꓴˍ ꓐꓰ꓾ ꓞꓳ ꓔꓲ ꓟ ꓮꓽ ꓟꓬꓹ ꓠꓬ ꓒꓳ-ꓡꓳˍ ꓐꓰ ꓫꓲ-ꓡ ꓔꓯ ꓔ ꓡ ꓡꓳ꓿ 5 ꓖꓳ ꓡꓱ ꓥ ꓟꓲ ꓬꓴ-ꓔ ꓡ ꓞꓳ ꓕꓲ ꓐꓱ ꓠꓬ ꓟꓬ ꓦꓯꓸ ꓔꓴ ꓡ ꓠꓬꓲ꓾ ꓟꓽ ꓙꓲꓻ ꓟ ꓡ ꓞꓳ ꓕꓲ ꓐꓱ ꓔꓯ ꓘꓴꓻ ꓜꓲꓼ ꓡ ꓢꓲ꓾ ꓡꓳ ꓒꓱ ꓗꓪ ꓔꓬ ꓢꓴ ꓔꓯ ꓢꓴ ꓔꓴ ꓡ ꓝꓲˍ ꓡꓳ꓿ ꓬꓲ ꓪꓽ ꓠꓬ ꓬ-ꓢꓳ-ꓠ ꓦꓲ ꓗꓪ ꓑꓵ ꓓꓵꓽ ꓙꓰ ꓢꓲ꓾ ꓒꓳ-ꓡꓳˍ ꓐꓰ ꓫꓲ-ꓡ ꓔꓯ ꓑ ꓫꓬꓼ ꓐꓴ ꓔꓬ ꓗꓪ ꓧꓳꓽ ꓓꓳ ꓡ ꓠꓹ ꓟ ꓧꓪˍ ꓡꓳ꓿ 6 ꓬꓲ ꓪꓽ ꓔꓯ ꓧꓪ ꓟꓽ ꓟꓶ ꓠꓬ꓾ ꓬ-ꓢꓳ-ꓠˍ ꓐꓰ ꓬꓲꓼ ꓤ ꓠꓬꓲ ꓤ ꓐꓴ ꓕꓲ ꓐꓱ ꓔꓯ ꓡꓳ ꓒꓱ ꓢꓲꓽ ꓒ ꓐꓴ ꓟꓲꓽ ꓙꓬ ꓗꓪ ꓖꓳꓻ ꓙꓰ ꓢꓲ꓾ ꓟꓲ ꓠꓯ ꓔꓯ ꓪꓴꓸ ꓔꓲꓸ ꓑ ꓡꓰ ꓝꓲ ꓢꓴ ꓐꓴ ꓠꓬ ꓕꓻˍ ꓟꓲ ꓛꓲ ꓡꓺꓳ꓿ 7 ꓬ-ꓢꓳ-ꓠ ꓥ ꓟꓲ ꓬꓲ ꓪꓽ ꓔꓯ ꓬꓲ ꓦꓲ ꓗꓪ ꓘꓳꓻ ꓣꓴ ꓗꓷꓳ꓿ ꓬꓲ ꓪꓽ ꓮꓽ ꓙꓵ ꓠꓬ ꓢꓲ-ꓢ ꓙꓵꓽ ꓗ ꓔꓯ ꓒꓳꓹ ꓢꓲ꓾ ꓬꓰ-ꓢꓴ ꓟꓬꓱꓺ ꓔ ꓟ ꓪ ꓔꓲ ꓬꓲ ꓔꓱꓹ ꓬꓲ ꓕꓲ ꓣꓳ ꓙꓳˍ ꓡꓳ꓾ ꓐꓯ ꓢꓴ ꓥꓳ꓾ ꓐꓰ ꓘꓴˍ ꓡꓳ꓿ 8 ꓡ ꓞꓳ ꓬꓲ ꓜꓴˍ ꓐꓰ ꓡꓳ ꓒꓱ ꓢꓲꓽ ꓒ ꓐꓴ ꓕꓱ ꓟ ꓔꓯ ꓑ ꓙꓽ ꓠꓬ ꓢꓴ ꓔꓴ ꓡ ꓠꓬꓲ꓾ 9 ꓬꓲ ꓪꓽ ꓡꓰ ꓬ-ꓢꓳ-ꓠˍ ꓐꓰ ꓠꓱꓸ ꓐꓯꓼ ꓢꓴ ꓗꓪ ꓐꓰ ꓑꓮꓳꓽ ꓒꓵꓽ ꓣꓴꓻ ꓗꓷ ꓠꓬ ꓬꓲ ꓪꓽ ꓔꓯ ꓩꓴ ꓗꓷˍ ꓡꓳ꓿ 10 ꓟꓰꓻ ꓬꓰ ꓕꓯ꓾ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓒꓳ-ꓡꓳˍ ꓐꓰ ꓫꓲ-ꓡ ꓔꓯ ꓞꓼ ꓐꓰ ꓐꓲ-ꓡꓲ-ꓬꓼ ꓡꓳ ꓒꓱ ꓗꓪ ꓙꓰ ꓝꓲˍ ꓡꓳ꓿ ꓖꓳ ꓗꓪ ꓛꓲ ꓬꓰ ꓠꓬ ꓬꓴ-ꓔ ꓡ ꓞꓳ ꓜꓲꓼ ꓦꓲ ꓗꓪ ꓓꓵꓽ ꓙꓰˍ ꓡꓳ꓿ 11 ꓕꓱ ꓕꓲ ꓟꓵꓽ ꓗꓪ ꓟ ꓡ ꓞꓳ ꓠꓬ ꓕꓰ-ꓢ-ꓡꓳ-ꓠꓲ-ꓬ ꓢꓴ ꓕꓯꓽ ꓢꓲ ꓘꓶꓸ ꓢꓻˍ ꓡꓳ꓿ ꓬꓲ ꓪꓽ ꓠꓽ ꓠꓲꓹ ꓡꓱ ꓡꓱˍ ꓡꓰꓽ ꓐꓯ ꓘꓶ ꓔꓯ ꓘꓳꓻ ꓣꓴ ꓢꓲ꓾ ꓬꓲ ꓪꓽ ꓑ ꓙꓽ ꓟꓶˍ ꓟ ꓟꓸ ꓟꓲꓽ ꓠꓬ ꓜꓳꓽ ꓟ ꓜꓳꓽ ꓢꓷꓸ ꓡꓰ ꓠꓹ ꓟ꓾ ꓕꓲ ꓠꓬꓲ ꓕꓲ ꓠꓬꓲ ꓪꓴ-ꓢ ꓕꓳ ꓶ ꓗꓪ ꓧꓪ ꓟꓰꓹ ꓠꓬꓲ ꓢꓲ ꓔꓯꓺ ꓠꓬꓲˍ ꓡꓳ꓿ 12 ꓖꓳ ꓡꓱ ꓠꓬꓲ ꓬꓲ ꓪꓽ ꓗꓳ ꓡꓳ ꓗꓪ ꓬꓰ-ꓢꓴ ꓔꓯ ꓙꓵꓻ ꓢꓴ ꓟꓬꓽ ꓡ ꓢꓲ꓾ ꓦꓲ-ꓡꓲ ꓞꓳ ꓔꓲ ꓟ ꓐꓴˍ ꓐꓰ ꓞꓳ ꓑ ꓤ ꓐꓴˍ ꓟꓲ ꓮꓽ ꓟꓬꓹ ꓦ ꓡꓱ ꓡ ꓡꓳ꓿ 13 ꓒꓳ-ꓡꓳ ꓠꓬ ꓐꓲ-ꓡꓲ-ꓬ ꓗꓪˍ ꓟꓲ ꓪꓴ-ꓢ ꓐꓯ ꓘꓶ ꓟꓸ ꓖꓶˍ ꓟ ꓔꓯ ꓕꓰ-ꓢ-ꓡꓳ-ꓠꓲ-ꓬ ꓗꓪ ꓟ ꓬꓴ-ꓔ ꓡ ꓞꓳ ꓢꓷꓸ ꓡꓰ ꓠꓬ꓾ ꓖꓳ ꓗꓪˍ ꓟꓲ ꓬꓲ ꓪꓽ ꓡ ꓢꓲ꓾ ꓞꓳ ꓜꓴꓻ ꓔꓯ ꓢꓴ ꓔꓴ ꓡ ꓝꓲ ꓢꓲ ꓠꓬꓲ ꓘꓶꓻ ꓡꓶꓽ ꓡꓰ ꓝꓲˍ ꓡꓳ꓿ 14 ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓒꓳ-ꓡꓳ ꓔꓯ ꓞꓼ ꓐꓰ ꓬꓲꓻ ꓡꓴ ꓐꓱ ꓘꓶꓽ ꓗꓪ ꓝꓲ ꓩꓴ ꓗꓷˍ ꓡꓳ꓿ ꓫꓲ-ꓡˍ ꓐꓰ ꓕꓲ-ꓟꓳ-ꓕꓲ-ꓪꓴ ꓠꓽ ꓐꓲ-ꓡꓲ-ꓬ ꓗꓪ ꓔꓲꓹ ꓬꓰˍ ꓡꓳ꓿ 15 ꓒꓳ-ꓡꓳ ꓔꓯ ꓧꓳꓽ ꓦ ꓢꓴ ꓡꓰ ꓬꓲ ꓔꓯ ꓬ-ꓕꓰ-ꓠ ꓡꓳ ꓒꓱ ꓗꓪ ꓧꓳꓽ ꓛꓲ ꓬꓰ ꓢꓲ꓾ ꓫꓲ-ꓡˍ ꓐꓰ ꓕꓲ-ꓟꓳ-ꓕꓲ-ꓪꓴ ꓔꓯ ꓒꓳ-ꓡꓳ ꓔꓬ ꓗꓪ ꓮꓸ ꓟꓲꓸ ꓡ ꓠꓹ ꓟ ꓒꓳ-ꓡꓳ ꓗꓪ ꓐꓰ ꓬꓲ ꓪꓽ ꓕꓵꓼ ꓪ ꓟꓶ ꓗꓷ ꓠꓬ ꓡꓽ ꓬꓲꓼ ꓙꓰˍ ꓡꓳ꓿ 16 ꓒꓳ-ꓡꓳ ꓠꓬ ꓬ-ꓕꓰ-ꓠ ꓗꓪ ꓫꓲ-ꓡˍ ꓐꓰ ꓕꓲ-ꓟꓳ-ꓕꓲ-ꓪꓴ ꓔꓯ ꓡꓳ ꓠꓬꓹ ꓔꓬ ꓕꓯ꓾ ꓡꓳ ꓒꓱ ꓗꓪ ꓠꓲꓽ ꓐꓬꓱꓽ ꓐꓲ ꓓꓹ ꓟ ꓔꓯ ꓟꓳˍ ꓠꓬꓲ ꓬꓲ ꓠꓲꓹ ꓟ ꓫˍ ꓡꓳ꓿ 17 ꓖꓳ ꓡꓱ ꓠꓬꓲ ꓬꓲ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓲꓼ ꓦꓲ ꓗꓪ꓾ ꓬꓴ-ꓔ ꓡ ꓞꓳˍ ꓐꓰ ꓪꓴ-ꓢ ꓔꓯ ꓙꓳ ꓒꓵꓽ ꓢꓴ ꓦꓲ-ꓡꓲ ꓡ ꓞꓳˍ ꓐꓰ꓾ ꓙꓵꓻ ꓗꓪ ꓬꓲ ꓔꓯ ꓔꓳꓹ ꓜꓳꓽˍ ꓟ ꓡ ꓞꓳˍ ꓐꓰ ꓧꓳꓺ ꓡꓯ ꓘꓳˍ ꓡꓳ꓿ 18 ꓬꓲ-ꓒꓲ-ꓗꓴ-ꓡꓳ ꓢꓳꓺ ꓐꓰ ꓢꓷ-ꓔꓳ-ꓬ ꓢꓳꓺ ꓗꓪ ꓟ ꓢꓷꓸ ꓠꓲꓹ ꓢꓳꓺ ꓒꓽ ꓕꓲ ꓧꓳꓽˍ ꓟꓲ ꓬꓲ ꓔꓯ ꓧꓳꓺ ꓡꓯꓼ ꓘꓳ ꓡ ꓡꓳ꓿ ꓒꓳ-ꓡꓳ ꓡꓰ ꓬꓰ-ꓢꓴ ꓐꓰ ꓬꓲ ꓢꓯꓸ ꓬꓲꓼ ꓡ ꓟ ꓟꓸ ꓟꓲ ꓚ ꓟꓸ ꓖꓶˍ ꓟ ꓑꓶꓸ ꓓꓴ꓾ ꓕꓲ ꓐꓱ ꓡꓰ꓾ ꓘꓶꓽ ꓖꓳꓽ ꓫ ꓕꓱ ꓢꓴ ꓕꓱ ꓕꓲ ꓣꓳ ꓮꓸ ꓫꓵ ꓐꓯ ꓓꓴ ꓙꓳˍ ꓡ? ꓐꓯˍ ꓡꓳ꓿ ꓠꓱꓸ ꓐꓯꓼ ꓕꓲ ꓐꓱ ꓠꓬ꓾ ꓬꓲ ꓠꓽ ꓐꓶꓽ ꓒ ꓢꓲꓺ ꓙ ꓖꓴ ꓐꓯ ꓟꓸ ꓖꓶ ꓢꓴ ꓡꓰ ꓐꓰ ꓗꓹ ꓡꓳ꓾ ꓐꓯˍ ꓡꓳ꓿ 19 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲ ꓔꓯ ꓣꓴ ꓢꓲ ꓐꓯ ꓟꓴ ꓫꓬꓹ ꓔꓶꓸ ꓬ-ꓡꓲ-ꓪꓳ-ꓑ-ꓗꓴ ꓗꓪ ꓧꓳꓽ ꓙꓰ ꓢꓲ ꓠꓬꓲ꓾ ꓠꓴ ꓚˍ ꓟ ꓟꓸ ꓟꓲ ꓫꓵꓼ ꓕꓱ ꓟ ꓠꓬ ꓥꓪ ꓠꓴˍ ꓟꓲ ꓢꓷꓸ ꓓꓻˍ ꓡ? 20 ꓓꓵꓽ ꓙ ꓟꓶ ꓓꓴ ꓓꓳꓽ ꓕꓱ ꓟꓬ ꓫꓵꓽ ꓠꓴ ꓡꓰ ꓥꓪ ꓠꓴꓽ ꓔꓯ ꓚ ꓛꓲ ꓡ ꓠꓬꓲ꓾ ꓕꓱ ꓟ ꓮꓸ ꓫꓵꓽ ꓥ ꓟ ꓥꓪ ꓠꓴꓽˍ ꓟꓲ ꓢꓷꓸ ꓠꓲꓹ ꓫꓵˍ ꓡꓳ꓾ ꓐꓯˍ ꓡꓳ꓿ 21 (ꓬ-ꓕꓰ-ꓠ ꓢꓴ ꓮꓽ ꓙꓵˍ ꓐꓰ ꓖꓳ ꓗꓪ ꓞꓳ ꓬꓯꓼ ꓟꓴ ꓔꓬ ꓢꓴ ꓠꓬ꓾ ꓠꓱꓸ ꓐꓯꓼ ꓮꓸ ꓫꓵ ꓟꓽ ꓬꓰ ꓬꓰ꓾ ꓓꓳꓽ ꓫꓵꓼ ꓕꓲ ꓫꓵꓽ ꓫꓵꓽ ꓚ ꓢꓲ ꓠ ꓠꓹ ꓟˍ ꓡꓰꓽ ꓬꓰ ꓢꓴ ꓐꓴ ꓥꓳ꓿) 22 ꓒꓳ-ꓡꓳ ꓠꓬ ꓐꓯ ꓟꓴ ꓫꓬꓹ ꓔꓶꓸ ꓬꓹ-ꓡꓲ-ꓪꓳ-ꓑ-ꓗꓴ ꓔꓱ ꓦꓲ ꓗꓪ ꓦꓰꓼ ꓞ ꓢꓲ꓾ ꓬ-ꓕꓰ-ꓠ ꓡ ꓞꓳ ꓐꓴꓳ꓾ ꓠꓴ ꓪꓽ ꓠꓬ ꓮꓸ ꓫꓵ ꓗꓪˍ ꓟꓲ ꓪꓴꓸ ꓓꓵ ꓕꓱꓼ ꓚꓱꓹ ꓔꓯ ꓟꓳꓸ ꓮꓽ ꓘꓶꓸ ꓠꓲꓹ ꓟ ꓡꓱˍ ꓟ ꓥꓪ ꓡꓳꓸ ꓓꓳ ꓡꓺꓳ꓿ 23 ꓮ ꓡꓲꓳ ꓐꓯ ꓠꓬ ꓥꓪ ꓚꓳ ꓙꓰ ꓢꓲ ꓠꓴ ꓪꓽ ꓪꓴꓸ ꓓꓵ ꓕꓱꓼ ꓓꓴ ꓔꓯ ꓡꓳꓸ ꓠꓬꓲ ꓠꓬ ꓔꓲ ꓖꓴ ꓕꓲ ꓟ ꓗꓪ꓾ ꓟꓽ ꓢꓷꓸ ꓟ ꓢꓲꓺ ꓐꓱ ꓶ꓾ ꓐꓰ ꓐꓳ ꓔ ꓟ ꓥꓪ ꓟꓳˍ ꓡꓳ꓿ ꓠꓴ ꓪꓽ ꓟꓽ ꓢꓷꓸ ꓢꓷꓸ ꓪꓴꓸ ꓓꓵ ꓕꓱꓼ ꓔꓬ ꓢꓴ ꓖꓳ ꓟ ꓔꓯꓸ ꓟꓳꓸ ꓮ ꓟꓶ ꓠꓴ ꓪꓽ ꓔꓯ ꓥꓪ ꓐꓯ ꓟꓳꓸ ꓖꓶˍ ꓠꓬꓲ꓿ 24 ꓟꓲ ꓠꓯꓺˍ ꓐꓰ ꓟꓲ ꓠꓯ ꓗꓪ ꓙꓳˍ ꓟ ꓥ ꓕ ꓑꓳ ꓔꓯ ꓚꓰꓼ ꓢꓴ ꓪꓴ-ꓢ ꓠꓬ꓾ ꓟꓴꓽ ꓗꓪ ꓟꓲ ꓠꓯ ꓢꓲ ꓒ ꓥ ꓠꓬꓲ꓾ ꓡꓯꓼ ꓒꓯꓹ ꓡꓰ ꓫꓬꓹ ꓔ ꓟ ꓢꓲꓺ ꓦꓲ ꓗꓪ ꓬꓲ ꓟꓽ ꓔꓬ꓿ 25 ꓬꓲ ꓕꓲ ꓫꓵꓽ ꓣꓱꓽ ꓛˍ ꓟ ꓡꓰ ꓐꓰ꓾ ꓞꓳ ꓤ ꓡꓯꓼ ꓒꓯꓹ ꓡꓰ ꓬꓲ ꓔꓯ ꓬꓰ ꓙ ꓠ ꓗꓹ ꓟ ꓟꓽ ꓥ꓿ ꓬꓲ ꓠꓽ ꓞꓳ ꓤ ꓥ ꓕ ꓑꓳ ꓔꓯ ꓢꓯꓼ ꓟꓬˍ ꓐꓰ ꓦ ꓓꓴ ꓢꓯꓼˍ ꓐꓰ ꓮꓸ ꓫꓵˍ ꓟꓲ ꓖꓶ ꓢꓴ ꓥꓳ꓿ 26 ꓖꓳ ꓡꓱ ꓢꓲ ꓬꓲ ꓡꓰ ꓡ ꓞꓳ ꓕꓲ ꓣꓳˍ ꓗꓪ ꓐꓰ ꓞꓳ ꓫꓵꓽ ꓞꓳ ꓙꓰ ꓙꓳ ꓡ ꓝꓲ ꓢꓲ꓾ ꓟꓵꓽ ꓕꓯ ꓗꓳꓹ ꓕꓯ ꓗꓪ ꓔꓬ ꓝꓲ ꓢꓲ ꓠꓬꓲ꓾ ꓗꓴꓷꓼ ꓜꓴ ꓐꓴ ꓔꓴ ꓡ ꓝꓲꓸˍ ꓐꓰ ꓐꓬ ꓡꓰ ꓝꓲꓸ ꓝꓰꓹ ꓢꓲ꓾ ꓬꓲ ꓪꓽ ꓟꓵꓽ ꓫꓸ ꓗ ꓐꓯ ꓞꓷꓹ ꓔ ꓡꓳ꓿ 27 ꓪꓴ-ꓢ ꓡꓰ ꓕꓱ ꓡꓱ ꓬꓰˍ ꓟ ꓠꓬ꓾ ꓟꓲ ꓠꓯ ꓞꓳ ꓤ ꓠꓬ ꓬꓲ ꓔꓯ ꓧꓪ ꓟꓶ ꓡꓰ ꓠꓹ ꓟ ꓥ ꓢꓲ꓾ ꓮꓽ ꓧꓪꓹ ꓬꓲ ꓔꓯ ꓫꓱꓹ ꓢꓲ ꓧꓪ ꓟꓶ ꓠꓹ ꓟ ꓐꓱ ꓶ ꓥ ꓡꓳ꓿ ꓬꓲ ꓠꓽ ꓣꓳ ꓮꓺ ꓡꓲ ꓕꓲ ꓣꓳ ꓔꓯ ꓐꓰˍ ꓟꓲ ꓶꓽ ꓤ ꓟꓽ ꓗꓷꓹ꓿ 28 ꓮ ꓡꓲꓳ ꓐꓯ ꓠꓬ ꓣꓳ ꓢꓯꓸ ꓔꓬ ꓟ ꓐꓰ ꓡꓵꓺ ꓔꓬ ꓟ ꓐꓰ ꓙꓳꓻ ꓔꓬ ꓟ ꓮꓽ ꓙꓵ ꓠꓬ ꓬꓲ ꓗꓪ ꓐꓰ ꓥ ꓡꓳ꓿ ꓕꓱ ꓟ ꓠꓬ ꓠꓴ ꓪꓽ ꓥꓳꓽ ꓜꓱ ꓫꓬꓹ ꓢꓴ ꓕꓲ ꓐꓱ ꓡꓰ꓾ ꓣꓳˍ ꓟꓲ ꓬꓲ ꓤ ꓠꓱ ꓐꓴ ꓥ ꓡꓳ꓾ ꓐꓯˍ ꓟ ꓡꓰ ꓐꓰ ꓥꓳ꓿ 29 ꓣꓳ ꓠꓬ ꓪꓴ-ꓢ ꓬꓲ ꓤ ꓬꓲ ꓠꓱ ꓐꓴ ꓥ ꓠꓬꓲ꓾ ꓪꓴ-ꓢ ꓠꓬ ꓞꓳ ꓤ ꓡꓯꓼ ꓟꓬꓱꓽˍ ꓐꓰ ꓠꓲꓹ ꓟ ꓗꓪ ꓓꓵꓽ ꓙ ꓓꓳ ꓡ ꓢꓲ ꓜꓰꓺ ꓔ ꓟ꓾ ꓫꓵꓺˍ ꓐꓰ ꓒꓴˍ ꓐꓰ Bꓸ ꓛꓲˍ ꓡꓰ ꓐꓰ ꓗꓹ ꓡꓳ꓾ ꓐꓰ ꓓꓵꓽ ꓙ ꓟꓽ ꓓ꓿ 30 ꓞꓳ ꓤ ꓟꓽ ꓢꓷꓸ ꓟ ꓦꓬꓼ ꓠꓬꓲ ꓔꓯ ꓠꓬ ꓪꓴ-ꓢ ꓡꓳꓸ ꓘꓳꓻ ꓙꓰ ꓝꓲ ꓢꓲ ꓛꓬꓻ ꓒꓵꓽ ꓟ ꓖꓶ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓠꓽ ꓮ ꓡꓲ ꓗꓪ ꓔꓬ ꓢꓴˍ ꓟꓲ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓹ ꓟ ꓬꓲ ꓕꓵꓼ ꓪ ꓖꓶ ꓗꓷꓳ꓿ 31 ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓢꓲ ꓔ ꓢꓴ ꓖꓳ ꓕꓲ ꓣꓳ ꓗꓪ ꓐꓰ꓾ ꓔꓱꓹ ꓜꓳꓽˍ ꓟ ꓡꓰ ꓟꓲ ꓠꓯ ꓔꓯ ꓐꓯ ꓟꓴ ꓞꓷꓹ ꓠ ꓟ ꓦꓬꓼ ꓠꓬꓲ ꓕꓲ ꓠꓬꓲ ꓝꓰꓹ ꓔ ꓡꓳ꓿ ꓕꓱ ꓡꓱ ꓬꓰ ꓠꓹ ꓟ ꓗꓸ ꓚꓵ ꓠꓬ ꓬꓲ ꓡꓰ ꓢꓲ ꓔ ꓢꓴ ꓖꓳ ꓕꓲ ꓣꓳ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲˍ ꓟ ꓕꓱ ꓟ ꓥꓳ꓾ ꓐꓯ ꓖꓶˍ ꓡꓳ꓿ 32 ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓟ ꓟꓸ ꓟꓲꓽ ꓔꓯ ꓑ ꓙꓽ ꓗꓷ ꓕꓯ꓾ ꓕꓲ ꓐꓱ ꓠꓬ ꓪꓽ ꓫꓱꓹˍ ꓡꓳ꓿ ꓖꓳ ꓡꓱ ꓥ ꓟꓲ ꓕꓲ ꓐꓱ ꓠꓬ꓾ ꓠꓴ ꓟꓸ ꓖꓶꓽˍ ꓟ ꓕꓱ ꓟ ꓔꓯ ꓥꓪ ꓠꓴꓽ ꓝꓮꓲ ꓕꓲ ꓧꓪꓹ ꓠ ꓠꓹ ꓠꓲꓹ ꓫꓵˍ ꓡꓳ꓾ ꓐꓯˍ ꓡꓳ꓿ 33 ꓖꓳ ꓕꓯ ꓒꓳ-ꓡꓳ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓐꓰ ꓓꓳ ꓙꓰˍ ꓡꓳ꓿ 34 ꓬꓲˍ ꓡꓰ꓾ ꓬꓰ-ꓢꓴ ꓔꓯ ꓦ ꓡꓱ ꓡ ꓢꓲ ꓒꓳ-ꓡꓳ ꓔꓯ ꓔꓺ ꓡ ꓢꓴ ꓕꓲ ꓐꓱꓻ ꓙꓳˍ ꓡꓳ꓿ ꓬꓲ ꓪꓽ ꓗꓳ ꓡꓳ ꓗꓪ ꓠꓬ꓾ ꓐꓯ ꓟꓴ ꓫꓬꓹ ꓔꓶꓸ ꓬ-ꓡꓲ-ꓪꓳ-ꓑ-ꓗꓴ ꓗꓪ ꓟ ꓔꓲ-ꓬꓴ-ꓠꓲ-ꓢꓶ ꓞꓳ ꓪꓴꓽ ꓕꓲ ꓣꓳˍ ꓐꓰ ꓓ-ꓟ-ꓡꓲ ꓟꓬꓱ ꓔ ꓟ ꓤꓽ ꓟꓶ ꓤ ꓕꓲ ꓣꓳˍ ꓐꓰ꓾ ꓠꓱꓸ ꓐꓯꓼ ꓢꓴˍ ꓟꓲ ꓥ ꓡꓳ꓿

ꓝꓲ-ꓓꓴ 18

1 ꓖꓳ ꓗꓸ ꓠꓯꓸ ꓒꓳ-ꓡꓳ ꓠꓬ ꓬ-ꓕꓰ-ꓠ ꓡꓳ ꓒꓱ ꓗꓪ ꓐꓰ ꓓꓳ ꓙꓰ ꓢꓲ꓾ ꓘꓳ-ꓡꓱ-ꓕꓴ ꓡꓳ ꓒꓱ ꓗꓪ ꓙꓰˍ ꓡꓳ꓿ 2 ꓖꓳ ꓗꓪ ꓬꓹ-ꓚꓲ-ꓡꓽ ꓟꓬꓱ ꓔ ꓟ ꓬꓴ-ꓔ ꓡ ꓞꓳ ꓕꓲ ꓣꓳ ꓔꓯ ꓔꓳꓹ ꓜꓳˍ ꓡꓳ꓿ ꓬꓲ ꓠꓬ ꓒ-ꓠꓷ-ꓕꓴ ꓟꓵꓽ ꓗꓪ ꓦꓵꓻ ꓔ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓕꓲ ꓝꓲ ꓗꓪ ꓪ ꓔꓲ ꓗꓷ-ꓡꓳ-ꓔꓲ-ꓬꓴꓼ ꓡꓰ꓾ ꓬꓴ-ꓔ ꓡ ꓞꓳ ꓮꓽ ꓙꓵ ꓔꓯ ꓣꓳ-ꓟ ꓗꓪ ꓐꓰ ꓓꓳ ꓙꓰ ꓠꓹ ꓟ ꓕꓵꓼ ꓪ ꓖꓶ ꓗꓷ ꓠꓬꓲ꓾ ꓬꓹ-ꓚꓲ-ꓡꓽ ꓠꓬ ꓬꓲ ꓤ ꓟꓶꓻ ꓑꓷ-ꓚꓲ-ꓡˍ ꓐꓰ ꓕꓲ ꓛꓳꓺꓼ ꓬꓲ-ꓔ-ꓡꓲ ꓗꓪ ꓐꓰ ꓘꓳ-ꓡꓱ-ꓕꓴ ꓗꓪ ꓛꓲ ꓡ ꓟ ꓟꓶ ꓤ ꓟꓽ ꓥ ꓢꓰꓽ꓿ 3 ꓒꓳ-ꓡꓳ ꓠꓬ ꓬꓲ ꓪꓽ ꓔꓯ ꓔꓱꓹ ꓠꓬꓲ ꓙꓰ ꓢꓲ꓾ ꓬꓲˍ ꓐꓰ ꓬꓲ ꓪꓽ ꓡꓯꓼ ꓟꓬꓱꓽ ꓕꓲ ꓫꓵꓽˍ ꓡꓰꓽ ꓥ ꓠꓬꓲ꓾ ꓬꓲ ꓪˍ ꓐꓰ ꓔꓬ ꓢꓲ ꓟꓶ ꓔꓶꓸ ꓦꓲ ꓫꓬꓹˍ ꓡꓳ꓿ 4 ꓒꓳ-ꓡꓳ ꓠꓬ ꓕꓲ ꓠꓽ ꓡꓰ ꓕꓲ ꓠꓽ ꓜꓲꓼ ꓦꓲ ꓗꓪ ꓟꓸ ꓟꓲ ꓚ ꓖꓶ ꓢꓲ꓾ ꓬꓴ-ꓔ ꓡ ꓞꓳˍ ꓐꓰ ꓦꓲ-ꓡꓲ ꓡ ꓞꓳ ꓔꓯ ꓘꓶꓸ ꓖꓶˍ ꓡꓳ꓿ 5 ꓖꓳ ꓡꓱ ꓥ ꓟꓲ ꓫꓲ-ꓡˍ ꓐꓰ ꓕꓲ-ꓟꓳ-ꓕꓲ-ꓪꓴꓽ ꓟ-ꓢꓲ-ꓓꓳ ꓗꓪ ꓐꓰ ꓛꓲ ꓡ ꓗꓷ ꓠꓬ꓾ ꓒꓳ-ꓡꓳ ꓠꓽ ꓠꓱꓸ ꓐꓯꓼ ꓮꓸ ꓫꓵꓽ ꓟꓽ ꓬꓰ ꓬꓰ ꓕꓲ ꓠꓲꓹ ꓟˍ ꓡꓰꓽ ꓬꓴ-ꓔ ꓡ ꓞꓳ ꓔꓯ ꓐꓯ ꓘꓶ ꓚ ꓟꓸ ꓖꓶ ꓢꓲ꓾ ꓬꓰ-ꓢꓴ ꓠꓽ ꓙꓲ-ꓢꓴ ꓥꓳ꓾ ꓐꓰ ꓢꓷ ꓙ ꓟꓳ ꓙˍ ꓡꓳ꓿ 6 ꓖꓳ ꓡꓱ ꓥ ꓟꓲ ꓬꓴ-ꓔ ꓡ ꓞꓳ ꓐꓴ ꓬꓲ ꓔꓯ ꓔꓳꓹ ꓢꓲ ꓟꓽ ꓙꓲ ꓟ ꓐꓯˍ ꓕꓯ꓾ ꓒꓳ-ꓡꓳ ꓠꓬ ꓐꓵ ꓞꓶ ꓟꓱꓸ ꓢꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓟꓽ ꓚꓬꓴ ꓟꓶ ꓠꓬ꓾ ꓥꓪ ꓙꓵꓻ ꓟꓽ ꓙꓳ꓿ ꓠꓴ ꓪꓽ ꓫꓵꓽ ꓠꓬ ꓠꓴ ꓪꓽ ꓚꓲ ꓛꓬ ꓪꓴꓸ ꓓꓵ ꓗꓪ ꓓꓹ ꓝꓲ꓿ ꓕꓱ ꓡꓱ ꓖꓳ ꓑꓳ ꓥꓪ ꓠꓬ ꓐꓶꓽ ꓞꓳ ꓔꓯ ꓟꓸ ꓙꓰˍ ꓥꓳ꓾ ꓐꓯ ꓖꓶˍ ꓡꓳ꓿ 7 ꓖꓳ ꓡꓱ ꓠꓬ ꓬꓲ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓴ꓾ ꓕꓲ-ꓔꓳꓼ-ꓬꓴ-ꓢꓶ-ꓓꓴ ꓟꓬꓱ ꓔ ꓟ ꓡ ꓞꓳ ꓕꓲ ꓣꓳ ꓦꓲ ꓗꓪ ꓙꓰˍ ꓡꓳ꓿ ꓬꓲ ꓦꓲ ꓠꓬ ꓜꓲꓼ ꓦꓲ ꓒ ꓕꓲꓺꓼ ꓗꓪ ꓥ ꓡꓳ꓿ 8 ꓖꓳ ꓡꓱ ꓠꓬ ꓜꓲꓼ ꓦꓲ ꓙꓵꓽ ꓢꓴ ꓚꓲ-ꓢꓶ-ꓑꓴˍ ꓐꓰ ꓬꓲ ꓕꓲ ꓦꓲ ꓡꓱꓸꓼ ꓢꓲ ꓒ ꓔꓯ ꓙꓵꓻˍ ꓡꓳ꓿ ꓶꓼ ꓓꓳ ꓫꓱꓹ ꓓꓳ ꓑ ꓙꓽ ꓟꓶꓽ ꓕꓯ ꓘꓳ-ꓡꓱ-ꓕꓴ ꓢꓴˍ ꓟꓲ ꓬꓰ-ꓢꓴ ꓔꓯ ꓮꓽ ꓟꓬꓹ ꓣꓳ ꓙꓵꓻ ꓡ ꓢꓲ ꓖꓳ ꓓꓱ ꓔꓲꓹ ꓟꓶˍ ꓡꓳ꓿ 9 ꓢ ꓘꓪ ꓕꓯꓽ ꓦ ꓐꓬꓱꓽ ꓗꓪ ꓐꓰ ꓢꓲ ꓒ ꓡꓰ ꓒꓳ-ꓡꓳ ꓔꓯ꓾ ꓕꓽ ꓙꓳꓺ꓾ ꓡꓯꓼ ꓫꓵ ꓚ ꓟꓸ ꓖꓶ꓾ ꓟꓽ ꓪꓳꓹ ꓕꓽ ꓔꓬ꓿ 10 ꓥꓪ ꓠꓬ ꓠꓴˍ ꓐꓰ ꓔꓬ ꓠꓬꓲ ꓮꓽ ꓟˍ ꓟꓲ ꓠꓴ ꓔꓯ ꓟꓽ ꓡꓯꓼ ꓡꓵ ꓡ꓿ ꓮ ꓡꓲꓳ ꓐꓯ ꓠꓬ ꓡꓳ ꓒꓱ ꓕꓱ ꓟ ꓗꓪ ꓥꓪ ꓑ ꓫꓬꓼ ꓮꓽ ꓟꓬꓹ ꓔꓬ ꓡꓳ꓾ ꓐꓯˍ ꓡꓳ꓿ 11 ꓖꓳ ꓡꓱ ꓠꓬꓲ ꓒꓳ-ꓡꓳ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓕꓲ ꓘꓳꓼ ꓐꓶꓽ ꓔꓬ ꓢꓲ ꓪꓴ-ꓢ ꓐꓯ ꓘꓶꓽ ꓟꓸ ꓖꓶˍ ꓡꓳ꓿ 12 ꓖ-ꓡꓲ-ꓪꓴ ꓠꓬ ꓮ-ꓘꓷ-ꓬ ꓫꓴ ꓙꓵꓽ ꓒ ꓣꓱꓽ ꓔꓬ ꓕꓯ꓾ ꓬꓴ-ꓔ ꓡ ꓞꓳ ꓠꓬ ꓕꓲ ꓠꓲꓹ ꓟˍ ꓡꓰꓽ ꓒꓳ-ꓡꓳ ꓔꓯ ꓒꓳꓹ ꓔꓴ ꓡ ꓢꓲ꓾ ꓬꓲ ꓔꓯ ꓐꓯ ꓟꓴ ꓘꓶꓽ ꓖꓴ ꓗꓪ ꓧꓳꓽ ꓙꓰ ꓢꓲ ꓠꓬꓲ꓾ 13 ꓡ ꓞꓳ ꓕꓱ ꓕꓲ ꓣꓳ ꓠꓬ ꓟꓳ-ꓫꓲ ꓙꓵꓽ ꓗ ꓔꓯ ꓔꓳꓹ ꓢꓲ꓾ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓚꓱꓹ ꓬꓲ ꓔꓱꓹ ꓬꓲ ꓕꓲ ꓚꓱꓹ ꓟꓸˍ ꓡꓳ꓾ ꓐꓯˍ ꓡꓳ꓿ 14 ꓖꓳ ꓡꓱ ꓥ ꓟꓲ ꓒꓳ-ꓡꓳ ꓟꓷ ꓠꓷꓹ ꓒꓴ ꓢꓲ ꓫꓸ ꓕꓱˍ ꓐꓰ ꓬꓰˍ ꓕꓯ꓾ ꓖ-ꓡꓲ-ꓪꓴ ꓡꓰ ꓬꓴ-ꓔ ꓡ ꓞꓳ ꓔꓯ꓾ ꓬꓴ-ꓔ ꓡ ꓞꓳ ꓐꓴꓳ꓾ ꓕꓱ ꓟ ꓠꓬ ꓛꓬꓻ ꓖꓴ ꓥꓳꓽ ꓖꓴˍ ꓐꓰ ꓥꓶˍ ꓟ ꓕꓲ ꓫꓵꓽ ꓥ ꓕꓯ ꓠꓽ꓾ ꓥꓪ ꓜꓲꓽ ꓢꓲ ꓠꓴ ꓪꓽ ꓔꓯ ꓠ ꓠꓹ ꓙꓲꓽ ꓙꓳˍ ꓡꓳ꓿ 15 ꓖꓳ ꓡꓱ ꓥ ꓟꓲ ꓕꓱ ꓟ ꓠꓽ ꓐꓯ ꓘꓶꓽˍ ꓐꓰ ꓟꓬꓱꓺˍ ꓐꓰ ꓠꓴ ꓪꓽ ꓙꓵꓽ ꓗ ꓗꓪ ꓐꓰ ꓧꓳꓺ ꓡꓯꓽ ꓘꓳ ꓓꓴ ꓥ ꓠꓬꓲ꓾ ꓫꓵꓽ ꓪꓴꓻ ꓕꓱ ꓟ ꓠꓬ ꓠꓴ ꓪꓽ ꓚꓲ ꓛꓬ ꓫꓬꓹ꓿ ꓥꓪ ꓠꓬ ꓕꓱ ꓡꓱ ꓫꓵ ꓗꓪ ꓐꓯ ꓟꓴ ꓫꓬꓹ ꓢꓴ ꓬꓰ ꓠꓲꓹ ꓟꓽ ꓫꓵ꓾ ꓐꓯ ꓖꓶ ꓢꓲ꓾ 16 ꓬꓲ ꓡꓰ ꓬꓲ ꓪꓽ ꓔꓯ ꓐꓯ ꓟꓴ ꓘꓶꓽ ꓖꓴ ꓗꓪ ꓐꓰ ꓖꓼ ꓓꓳ ꓗꓷˍ ꓡꓳ꓿ 17 ꓖꓳ ꓕꓯ ꓬꓲ ꓪꓽ ꓮꓽ ꓙꓵ ꓢꓴ ꓡꓰ ꓜꓲꓼ ꓦꓲ ꓙꓵꓽ ꓢꓴ ꓢꓳ-ꓕꓲ-ꓠꓲ ꓔꓯ ꓣꓴ ꓔ ꓢꓲ꓾ ꓐꓯ ꓟꓴ ꓘꓶꓽ ꓖꓴ ꓟꓲꓽ ꓕꓯ ꓗꓪ ꓬꓲ ꓔꓯ ꓓꓶꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓟꓬ ꓫꓵꓽ ꓔꓯ ꓖ-ꓡꓲ-ꓪꓴ ꓠꓬ ꓮꓸ ꓫꓵꓽˍ ꓟꓲ ꓟꓽ ꓚꓬꓹ꓿ 18 ꓖꓳ ꓗꓸ ꓠꓯꓸ ꓒꓳ-ꓡꓳ ꓠꓬ ꓘꓳ-ꓡꓱ-ꓕꓴ ꓗꓪ ꓝꓮꓲ ꓮꓽ ꓟꓬꓹ ꓠꓬꓲ ꓔꓬ ꓗꓷ ꓠꓬ꓾ ꓬꓲꓼ ꓤ ꓠꓬꓲ ꓤ ꓐꓴˍ ꓐꓰ ꓧꓹ ꓡꓯ ꓘꓳ ꓢꓲ ꓠꓬꓲ꓾ ꓖꓳ ꓗꓪ ꓐꓰ ꓡꓲ ꓜꓶꓽ ꓢꓲ ꓫꓲ-ꓡꓲ-ꓬ ꓗꓪ ꓙꓰˍ ꓡꓳ꓿ ꓑꓷ-ꓚꓲ-ꓡˍ ꓐꓰ ꓬꓹ-ꓚꓲ-ꓡꓽˍ ꓟꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓬꓲ ꓟꓽ ꓙꓰ ꓢꓰꓽ ꓕꓯˍ ꓡꓰ ꓪꓵꓼ ꓗꓷˍ ꓟ ꓪꓵꓼ ꓘꓶꓽ ꓔꓯ ꓛꓳ ꓢꓲ꓾ ꓚꓰ-ꓗꓷ-ꓡꓲꓼ ꓡꓳ ꓒꓱ ꓗꓪ ꓬꓲ ꓪꓴꓸ ꓞꓱ ꓞꓶꓽˍ ꓡꓳ 19 ꓬꓲ-ꓩꓴ-ꓢꓳ ꓗꓪ ꓛꓲ ꓬꓰ ꓠꓬ꓾ ꓬꓲ ꓡꓰ ꓑꓷ-ꓚꓲ-ꓡˍ ꓐꓰ ꓬꓹ-ꓚꓲ-ꓡꓽ ꓔꓯ ꓔꓲꓹ ꓬꓰ ꓝꓲ ꓢꓲ꓾ ꓬꓲ ꓚꓲ ꓛꓬ ꓠꓽ ꓜꓲꓼ ꓦꓲ ꓗꓪ ꓓꓵꓽ ꓙꓰ ꓢꓲ ꓠꓬꓲ꓾ ꓬꓴ-ꓔ ꓡ ꓞꓳˍ ꓐꓰ ꓟꓸ ꓟꓲꓽ ꓚꓱꓹ ꓗꓪ ꓧꓳꓺ ꓡꓯ ꓘꓳˍ ꓡꓳ꓿ 20 ꓬꓲ ꓪꓽ ꓠꓬ ꓬꓲ ꓔꓯ ꓝꓮꓲ ꓡꓯꓼ ꓫꓵ ꓔꓬ ꓠꓹ ꓟ ꓓꓰꓽˍ ꓟꓲ ꓬꓲ ꓟꓽ ꓓꓽ ꓔꓳꓹ꓿ 21 ꓬꓲ ꓠꓽ ꓬꓲ ꓪˍ ꓐꓰ ꓧꓹ ꓡꓯ ꓘꓳˍ ꓕꓯ꓾ ꓪꓴ-ꓢ ꓠꓲꓹ ꓡꓶꓽ ꓥ ꓠꓬ꓾ ꓠꓴ ꓪꓽ ꓔꓯ ꓥꓪ ꓬꓲꓼ ꓡ ꓢꓰꓽ ꓥꓳ꓾ ꓐꓯ ꓖꓶ ꓗꓷ ꓠꓬ꓾ ꓡꓲ ꓜꓶꓽ ꓢꓲ ꓬꓲ-ꓩꓴ-ꓢꓳ ꓗꓪ ꓐꓰ ꓓꓳ ꓙꓰˍ ꓡꓳ꓿ 22 ꓢꓲ-ꓢ-ꓡꓰ ꓡꓳ ꓒꓱ ꓗꓪ ꓛꓲ ꓬꓰ ꓠꓬ ꓬꓲ ꓓꓯ ꓙꓰ ꓢꓲ꓾ ꓘꓴ ꓜꓲ ꓞꓳ ꓔꓯ ꓒꓵꓽ ꓗ ꓬꓰ ꓗꓷ ꓠꓬ꓾ ꓮ-ꓕꓲ-ꓬ ꓗꓪ ꓬꓯꓼ ꓙꓰˍ ꓡꓳ꓿ 23 ꓖꓳ ꓗꓪ ꓕꓲ ꓝꓲꓸ ꓔꓬ ꓗꓷ ꓠꓬ꓾ ꓖ-ꓡ-ꓕꓲ-ꓬꓼˍ ꓐꓰ ꓩ-ꓡꓴ-ꓚꓲ-ꓬꓼ ꓟꓵ ꓗꓪ ꓚꓳ ꓙꓰ ꓢꓲ꓾ ꓢꓲ ꓤ ꓐꓴ ꓮꓽ ꓙꓵ ꓔꓯ ꓢꓯꓼ ꓖꓶ ꓢꓲ ꓕꓶꓻ ꓡꓰ ꓝꓲˍ ꓡꓳ꓿ 24 ꓬ-ꓡꓲ-ꓢ-ꓓ ꓡꓳ ꓒꓱ ꓗꓪ ꓦꓵꓻ ꓔ ꓢꓴ꓾ ꓬꓹ-ꓑꓳ-ꓡꓳ ꓟꓬꓱ ꓔ ꓟ ꓬꓴ-ꓔ ꓡ ꓞꓳ ꓕꓲ ꓣꓳ ꓠꓬ꓾ ꓬꓲ-ꓩꓴ-ꓢꓳ ꓡꓳ ꓒꓱ ꓗꓪ ꓡ ꓡꓳ꓿ ꓬꓲ ꓠꓬ ꓐꓯ ꓙꓻ ꓙꓳ ꓢꓲ ꓪꓴ-ꓢ ꓕꓳ ꓶ ꓮꓽ ꓘꓶꓸ ꓢꓷꓸ ꓢꓴ ꓥ ꓡꓳ꓿ 25 ꓬꓲ ꓠꓬ ꓢꓲ ꓒ ꓙ ꓖꓴ ꓗꓪ ꓢꓳ ꓟꓶ ꓔ ꓢꓴ ꓥ ꓠꓬꓲ꓾ ꓐꓯ ꓥꓳꓽ ꓐꓯ ꓛꓬ ꓡꓰˍ ꓟ ꓟꓽ ꓙꓳ ꓙꓳ ꓠꓲꓹ ꓡꓱꓻ ꓡꓱˍ ꓡꓰ ꓬꓰ-ꓢꓴ ꓟꓸ ꓟꓲ ꓟꓸ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓬꓳ-ꓦ ꓖꓳ ꓓꓱ ꓔꓲꓹˍ ꓟ ꓔꓯˍ ꓡꓰꓽ ꓢꓷꓸˍ ꓡꓳ꓿ 26 ꓬꓲ ꓠꓬ ꓠꓲꓹ ꓪꓴꓽ ꓪꓴꓽˍ ꓐꓰ ꓜꓲꓼ ꓦꓲ ꓗꓪ ꓟꓸ ꓟꓲ ꓚ ꓪꓴ ꓔꓴˍ ꓡꓳ꓿ ꓑꓷ-ꓚꓲ-ꓡˍ ꓐꓰ ꓬꓹ-ꓚꓲ-ꓡꓽ ꓬꓲ ꓔꓯ ꓑ ꓙꓽ ꓗꓷ ꓠꓬ꓾ ꓬꓲ ꓪꓽ ꓔꓬ ꓗꓪ ꓬꓲ ꓔꓯ ꓧꓳꓽ ꓔꓯꓹ ꓙꓰ ꓢꓲ꓾ ꓪꓴ-ꓢ ꓙ ꓖꓴ ꓟꓬꓽ ꓠꓬꓲ ꓜꓲꓻ ꓜꓲˍ ꓡꓰ ꓬꓲ ꓔꓯ ꓒꓶꓻ ꓟꓸ ꓖꓶˍ ꓡꓳ꓿ 27 ꓬ-ꓑꓳ-ꓡꓳ ꓠꓬ ꓮ-ꓘꓷ-ꓬꓼ ꓗꓪ ꓙꓰˍ ꓐꓰ ꓬꓰˍ ꓕꓯ꓾ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓬꓲ ꓔꓯ ꓢꓯꓼ ꓖꓶ ꓢꓲ꓾ ꓮ-ꓘꓷ-ꓬ ꓗꓪ ꓟ ꓢꓲ ꓤ ꓐꓴ ꓡꓰ ꓬꓲ ꓔꓯ ꓘꓳꓻ ꓣꓴ ꓠꓹ ꓟ ꓕꓳ ꓶ ꓡꓯꓼ ꓫꓴ ꓐꓳ ꓖꓶˍ ꓡꓳ꓿ ꓬꓲ ꓖꓳ ꓗꓪ ꓛꓲ ꓬꓰ ꓠꓬ꓾ ꓪꓴ-ꓢ ꓣꓱꓽ ꓛꓰꓽ ꓗꓪ ꓐꓰ ꓦ ꓡꓱ ꓡ ꓢꓴ ꓐꓴ ꓔꓯ ꓬꓲ ꓮꓽ ꓘꓶꓸ ꓬꓰ ꓙ ꓪ ꓡꓰˍ ꓡꓳ꓿ 28 ꓮ ꓡꓲꓳ ꓐꓯˍ ꓠꓬ ꓮꓽ ꓙꓵ ꓢꓴ ꓟꓲꓽ ꓙꓬ ꓗꓪ ꓬꓲ ꓠꓬ ꓪꓽ ꓠꓬꓲ ꓠꓬꓲˍ ꓡꓰꓽ ꓬꓴ-ꓔ ꓡ ꓞꓳ ꓔꓯ ꓐꓯ ꓧꓪꓸ ꓡꓰ ꓢꓲ꓾ ꓢꓲꓽ ꓫꓬ ꓕꓳ ꓶ ꓗꓪ ꓐꓰ꓾ ꓬꓰ-ꓢꓴ ꓠꓽ ꓟꓲ-ꓢ-ꓬ ꓥ ꓟ ꓐꓯ ꓟꓳꓸ ꓖꓶˍ ꓡꓳ꓿

ꓝꓲ-ꓓꓴ 19

1 ꓬꓹ-ꓑꓳ-ꓡꓳ ꓠꓬ ꓘꓳ-ꓡꓱ-ꓕꓴ ꓗꓪ ꓔꓬ ꓕꓯ꓾ ꓒꓳ-ꓡꓳ ꓠꓬ ꓖꓽ ꓑꓳꓸ ꓟ ꓟꓵꓽ ꓗꓪ ꓗꓳꓸ ꓙ ꓙꓰ ꓢꓲ ꓬꓲ-ꓩꓴ-ꓢꓳ ꓗꓪ ꓛꓲ ꓬꓰ ꓠꓬ ꓢꓲ ꓤ ꓕꓲ ꓧꓳꓽ ꓔꓯ ꓔꓳꓹ ꓜꓳˍ ꓡꓳ꓿ 2 ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓙꓵꓻˍ ꓕꓯ ꓢꓲ-ꓫꓬ-ꓟ-ꓦ ꓟꓶ ꓗꓷ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓲ ꓪꓽ ꓡꓰ꓾ ꓟꓽ ꓟꓶ꓾ ꓢꓲ-ꓫꓬ-ꓟ-ꓦ ꓙꓳˍ ꓟˍ ꓟꓲ ꓥꓪ ꓠꓴ ꓟꓽ ꓑ ꓙꓽ ꓠꓬꓲ꓾ ꓐꓰ ꓒꓳꓹ ꓖꓶˍ ꓡꓳ꓿ 3 ꓒꓳ-ꓡꓳ ꓡꓰ꓾ ꓖꓳ ꓡꓱ ꓥ ꓠꓬ ꓠꓴ ꓪꓽ ꓖꓳ ꓓꓱ ꓔꓲꓹˍ ꓟ ꓮ ꓡꓲ ꓕꓲ ꓫꓵꓽ ꓔꓲꓹ ꓟꓶ ꓗꓷˍ ꓡ? ꓐꓰ ꓠ ꓠꓬꓲ ꓠꓬ꓾ ꓬꓳ-ꓦ ꓡꓰ ꓔꓲꓹ ꓖꓶˍ ꓟ ꓖꓳ ꓕꓲ ꓫꓵꓽ ꓟꓶ ꓗꓷꓳ꓾ ꓐꓯˍ ꓡꓳ꓿ 4 ꓒꓳ-ꓡꓳ ꓡꓰ꓾ ꓬꓳ-ꓦ ꓔꓲꓹ ꓖꓶˍ ꓟ ꓠꓬ ꓓꓵꓽ ꓙ ꓒꓳꓹ ꓬꓲꓼ ꓡ ꓟ ꓢꓷꓸ ꓡꓰ ꓓꓴ ꓖꓳ ꓓꓱ ꓔꓲꓹ ꓖꓶˍ ꓟ ꓥ ꓢꓲ꓾ ꓬꓲ ꓗꓸ ꓠꓯ ꓢꓲ ꓗꓪ ꓡ ꓗꓷ ꓢꓴ ꓬꓰ-ꓢꓴ ꓔꓯ ꓙꓵꓻ ꓠ ꓗꓹ ꓡꓳ꓾ ꓐꓰ ꓬꓲ ꓪꓽ ꓔꓯ ꓟꓸ ꓖꓶˍ ꓡꓳ꓿ 5 ꓕꓱ ꓟ ꓔꓯ ꓬꓲ ꓪꓽ ꓑ ꓙꓽ ꓗꓷ ꓠꓬ ꓢꓲ ꓒ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓖꓳ ꓓꓱ ꓔꓲꓹ ꓟꓶˍ ꓡꓳ꓿ 6 ꓒꓳ-ꓡꓳ ꓡꓰ ꓬꓲ ꓪꓽ ꓕꓯꓽ ꓢꓲ ꓗꓪ ꓡꓯꓼ ꓒꓯꓹ ꓚꓰꓹ ꓖꓶ ꓗꓷ ꓠꓬ꓾ ꓢꓲ-ꓫꓬ-ꓟ-ꓦ ꓬꓲ ꓪꓽ ꓔꓯ ꓬꓯꓼ ꓡ ꓢꓲ꓾ ꓬꓲ ꓪꓽ ꓠꓽ ꓥꓳ ꓫꓵꓽ ꓥꓳꓽ ꓙꓰ ꓫꓸ ꓕꓱ ꓔꓴ ꓡ ꓢꓲ ꓟꓷ ꓠꓷꓹ ꓝꓸˍ ꓡꓳ꓿ 7 ꓬꓲ ꓪꓽ ꓮꓽ ꓙꓵ ꓠꓬ ꓞꓳ ꓑ ꓤ ꓞꓲ ꓠꓬꓲꓽ ꓣꓳ ꓛꓲ ꓙꓳˍ ꓡꓳ꓿ 8 ꓒꓳ-ꓡꓳ ꓠꓬ ꓜꓲꓼ ꓦꓲ ꓗꓪ ꓠꓲꓹ ꓪꓴꓽ ꓪꓴˍ ꓡꓰ ꓦ ꓐ ꓢ ꓟ ꓪꓴ-ꓢ ꓗꓴꓷ ꓚ ꓟꓸ ꓖꓶ ꓢꓲ ꓘꓶꓸ ꓖꓶˍ ꓡꓳ꓿ 9 ꓖꓳ ꓡꓱ ꓥ ꓟꓲ ꓕꓲ ꓐꓱ ꓠꓬ ꓠꓲꓹ ꓟ ꓩꓴꓻ ꓠꓬꓲ ꓟꓽ ꓙꓵꓻ ꓢꓲ ꓡ ꓞꓳ ꓬꓲ ꓜꓴ ꓟꓲꓽ ꓙꓬ ꓗꓪ ꓪꓴ-ꓢ ꓙ ꓖꓴ ꓕꓱ ꓟ ꓔꓯ ꓝꓯꓼ ꓡꓯꓼ ꓡ ꓕꓯ꓾ ꓒꓳ-ꓡꓳ ꓠꓬ ꓬꓲ ꓪˍ ꓐꓰ ꓧꓹ ꓗꓷ ꓢꓲ꓾ ꓢꓲ ꓤ ꓐꓴ ꓔꓯˍ ꓟꓲ ꓬꓲ ꓪꓽ ꓔꓯˍ ꓐꓰ ꓚꓰꓸ ꓓꓳ ꓡ ꓢꓲ ꓠꓬꓲ꓾ ꓕꓲ-ꓣ-ꓠꓴ ꓢꓳ ꓦꓲ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓸ ꓟꓲ ꓚ ꓟꓸ ꓖꓶˍ ꓡꓳ꓿ 10 ꓒꓳ-ꓡꓳ ꓡꓰ ꓕꓱ ꓡꓱ ꓠꓬꓲꓽ ꓘꓳꓼ ꓬꓰ ꓗꓷ ꓠꓬꓲ꓾ ꓮ-ꓢꓲ-ꓬ ꓗꓪ ꓔꓬ ꓢꓴ ꓮꓽ ꓙꓵ ꓠꓬ꓾ ꓬꓴ-ꓔ ꓡ ꓞꓳ ꓥ ꓟꓲ꓾ ꓦꓲ-ꓡꓲ ꓡ ꓞꓳ ꓥ ꓟꓲ ꓢꓲ ꓒ ꓐꓯ ꓘꓶ ꓑ ꓙꓽ ꓪ ꓡꓰˍ ꓡꓳ꓿ 11 ꓪꓴ-ꓢ ꓡꓰ ꓒꓳ-ꓡꓳ ꓗꓪ ꓐꓰ꓾ ꓮ ꓕꓯ ꓟꓴ ꓕꓯ ꓬꓰˍ ꓟ ꓢꓶꓸ ꓟꓽ ꓞꓲ ꓪ ꓠꓬꓲˍ ꓟ ꓟꓬꓱꓽ ꓬꓰ ꓢꓲ꓾ 12 ꓒꓳ-ꓡꓳ ꓖꓳ ꓓꓱ ꓗꓪ ꓐꓰ ꓡꓯꓽ ꓫꓵꓹ ꓛꓺ꓾ ꓥ ꓠꓬ ꓚꓲꓸ ꓑꓶꓺ ꓔꓯꓹ ꓙꓰ ꓢꓲ ꓠꓻ ꓢꓴ ꓒꓬꓽ ꓢꓴ ꓔꓯ ꓚꓰꓹ ꓖꓶ ꓗꓷ ꓠꓬ꓾ ꓠꓻ ꓒꓬꓽ ꓓꓻ ꓡꓰ ꓢꓲ ꓠꓬꓲ꓾ ꓥꓶˍ ꓟ ꓠꓲꓽˍ ꓟꓲ ꓓꓳ ꓙꓰˍ ꓡꓳ꓿ 13 ꓟꓵꓽ ꓚꓳ ꓒ ꓬꓴ-ꓔ ꓡ ꓞꓳ ꓠꓲꓽ ꓖꓼ ꓒ ꓕꓲ ꓐꓱˍ ꓟꓲ ꓠꓲꓽ ꓜꓶꓽ ꓞꓹ ꓟ ꓡ ꓞꓳ ꓔꓯ ꓬꓲ ꓪꓽ ꓓ ꓬꓲ ꓪꓽ꓾ ꓢꓲ ꓒ ꓬꓰ-ꓢꓴ ꓟꓬꓱ ꓣꓱꓽ ꓢꓲ ꓕꓱ ꓡꓱ ꓐꓯˍ ꓡꓳ꓾ ꓒꓳ-ꓡꓳ ꓟꓸ ꓖꓶˍ ꓟ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓠꓴ ꓪꓽ ꓓꓳ ꓙꓰ꓾ ꓐꓰ ꓕꓵꓼ ꓪ ꓖꓶˍ ꓥꓳ꓾ ꓐꓰ ꓐꓯˍ ꓡꓳ꓿ 14 ꓬꓴ-ꓔ ꓡ ꓞꓳ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓢꓶ-ꓚꓲ-ꓪ ꓬꓲ ꓤ ꓫꓵꓽ ꓫꓵꓸ ꓟ ꓥ ꓟꓲ ꓖꓳ ꓡꓱ ꓬꓰˍ ꓡꓳ꓿ 15 ꓕꓲ ꓠꓬꓲ ꓙꓳˍ ꓠꓬ ꓥꓶˍ ꓟ ꓠꓲꓽ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓬꓰ-ꓢꓴ ꓔꓯ ꓥꓪ ꓢꓷˍ ꓡꓳ꓿ ꓒꓳ-ꓡꓳ ꓔꓯˍ ꓟꓲ ꓥꓪ ꓢꓷˍ ꓡꓳ꓿ ꓠꓴ ꓪꓽ ꓠꓽ ꓮꓽ ꓟ ꓥ ꓡ?꓾ ꓐꓯˍ ꓡꓳ꓿ 16 ꓖꓳ ꓕꓯ ꓥꓶˍ ꓟ ꓠꓲꓽ ꓜꓶꓽ ꓞꓹ ꓟ ꓡ ꓞꓳ ꓖꓳ ꓕꓲ ꓣꓳ ꓠꓬ ꓔꓷꓹ ꓡ ꓢꓲ ꓬꓲ ꓪꓽ ꓔꓯ ꓣꓴꓻ ꓶꓸ ꓧꓪꓸ ꓡꓰˍ ꓡꓳ꓿ ꓬꓲ ꓪꓽ ꓠꓬ ꓠꓻ ꓡꓰ ꓢꓲ꓾ ꓐꓵ ꓞꓶꓽˍ ꓟꓲ ꓧꓽ ꓡꓰ ꓢꓲ ꓠꓬꓲ ꓖꓳ ꓕꓲ ꓦꓲ ꓗꓪ ꓐꓰ ꓙꓬꓽ ꓡꓯꓽ ꓟꓴ ꓛꓰꓹ ꓓꓳ ꓙꓰˍ ꓡꓳ꓿ 17 ꓬꓲ-ꓩꓴ-ꓢꓳ ꓗꓪ ꓔꓬ ꓢꓴ ꓮꓽ ꓙꓵ꓾ ꓬꓴ-ꓔ ꓡ ꓞꓳ ꓥ ꓟꓲ ꓦꓲ-ꓡꓲ ꓡ ꓞꓳ ꓥ ꓟꓲ꓾ ꓕꓱ ꓟ ꓔꓯ ꓢꓷꓸ ꓡꓰ ꓠꓬ ꓙꓳꓺ ꓡꓰ ꓢꓲ꓾ ꓢꓲ ꓒ ꓬꓰ-ꓢꓴ ꓬꓲ ꓟꓬꓱꓺ ꓔꓯ ꓓꓳꓹ ꓟꓴˍ ꓡꓳ꓿ 18 ꓙꓵꓻ ꓢꓴ ꓮꓽ ꓟꓬꓹ ꓣꓳˍ ꓟꓲ ꓡ ꓢꓲ꓾ ꓞꓳ ꓜꓴ ꓟꓲꓽ ꓙꓬ ꓗꓪ ꓬꓲ ꓪꓽ ꓛꓬ ꓖꓴ ꓣꓷꓠꓸ ꓓꓳ ꓡ ꓡꓳ꓿ 19 ꓥꓺ ꓟꓬꓱꓽ ꓬꓰ ꓢꓴ ꓮꓽ ꓟꓬꓹ ꓣꓳ ꓠꓬ꓾ ꓬꓲ ꓪꓽ ꓥꓺ ꓟꓬꓱꓽ ꓕꓳ ꓶ ꓔꓯꓹ ꓡ ꓢꓲ ꓮꓽ ꓙꓵ ꓢꓴ ꓒꓬꓱꓽ ꓕꓯ ꓗꓪ ꓛꓴꓻ ꓗꓷˍ ꓡꓳ꓿ ꓖꓳ ꓟ ꓬꓲ ꓒꓵꓽ ꓢꓪꓸ ꓠꓬꓲ ꓠꓬ꓾ ꓓ-ꓘꓷ-ꓟ ꓥꓪꓽ ꓟꓶꓽ ꓒꓯꓼ ꓛꓲ ꓥ ꓡꓳ꓿ 20 ꓖꓳ ꓡꓱ ꓠꓬꓲ ꓢꓲ ꓒ ꓐꓯ ꓘꓶ ꓠꓬ ꓡꓯꓽ ꓫꓵ ꓢꓯꓼ ꓙꓳ ꓪꓽ ꓠꓬꓲ ꓠꓬꓲˍ ꓡꓰ ꓒꓬꓱꓺ ꓙꓰˍ ꓡꓳ꓿ 21 ꓕꓱ ꓟꓬ ꓫꓵ ꓗ ꓠꓯ꓾ ꓒꓳ-ꓡꓳ ꓠꓬ ꓟ-ꓢꓲ-ꓓꓳˍ ꓐꓰ ꓮ-ꓘꓷ-ꓬ ꓗꓪ ꓐꓰ ꓙꓻ ꓙꓰ ꓢꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓙꓰ ꓠꓹ ꓟ ꓚꓴꓽ ꓬꓲꓹ ꓓꓶꓽ ꓚꓵ ꓡꓰ ꓠꓬꓲ꓾ ꓥꓪ ꓖꓳ ꓗꓪ ꓛꓲ ꓬꓰ ꓗ ꓠꓯ꓾ ꓣꓳ-ꓟ ꓗꓪˍ ꓟꓲ ꓙꓰ ꓠ ꓗꓹ ꓡꓳ꓾ ꓐꓯ ꓢꓲ꓾ 22 ꓬꓲ ꓔꓯ ꓣꓱꓽ ꓙ ꓢꓴ ꓕꓲ-ꓟꓳ-ꓕꓲ-ꓪꓴˍ ꓐꓰ ꓬꓲ-ꓣ-ꓔꓴ ꓬꓲ ꓪꓽ ꓠꓬꓲꓽ ꓣꓳ ꓔꓯ ꓟ-ꓢꓲ-ꓓꓳ ꓗꓪ ꓝꓲ ꓩꓴ ꓗꓷ ꓠꓬ꓾ ꓬꓲ ꓠꓽ ꓮ-ꓢꓲ-ꓬ ꓗꓪ ꓕꓲ ꓝꓲꓸ ꓔꓬ ꓢꓰꓽ ꓡꓳ꓿ 23 ꓖꓳ ꓕꓲ ꓝꓲꓸ ꓗꓪ ꓪꓴ-ꓢ ꓙ ꓖꓴ ꓕꓱ ꓟ ꓑꓶ ꓓꓴ ꓬꓲ-ꓩꓴ-ꓢꓳ ꓗꓪ ꓢꓴ ꓔꓴ ꓡ ꓟ ꓬꓲꓸ ꓓꓽ ꓟ ꓙꓳˍ ꓡꓳ꓿ 24 ꓮ ꓡꓲꓳ ꓐꓯ ꓠꓬ ꓔꓲ-ꓟꓲ-ꓕꓲ-ꓪꓴ ꓟꓬꓱ ꓔ ꓟ ꓒꓴꓻ ꓓꓶꓽ ꓒ ꓕꓲ ꓣꓳ ꓠꓬ꓾ ꓮ-ꓔꓲ-ꓟꓲ ꓢꓲꓺ ꓟꓺ ꓐꓬꓱꓽ ꓐꓱ ꓶ ꓫꓬꓹ ꓔ ꓟ ꓦꓲꓻ ꓔꓯ ꓔꓯꓺ ꓢꓲ꓾ ꓒꓴ ꓦꓲꓻ ꓤ ꓫꓬꓹ ꓪꓴꓽˍ ꓟ ꓗꓪ ꓐꓰ ꓟꓬꓱꓽ ꓣꓱꓽ ꓢꓴ ꓐꓴ ꓔꓯ ꓐꓳꓻ ꓡ ꓝꓲˍ ꓡꓳ꓿ 25 ꓬꓲ ꓠꓬ ꓬꓲˍ ꓐꓰ ꓕꓲ ꓡꓰꓹꓼ ꓡꓯꓼ ꓟꓬꓱꓽ ꓬꓰ ꓢꓴ ꓔꓯ ꓘꓴ ꓜꓲꓼ ꓡ ꓢꓲ꓾ ꓮ ꓬꓲꓼ ꓐꓴꓳ꓾ ꓡꓯꓼ ꓟꓬꓱꓽ ꓕꓱ ꓟ ꓗꓪ ꓐꓰ ꓣꓳ ꓐꓳꓻ ꓡ ꓟ ꓠꓴ ꓪꓽ ꓢꓷˍ ꓡꓳ꓿ 26 ꓖꓳ ꓡꓱ ꓥ ꓟꓲ ꓒꓳ-ꓡꓳ ꓕꓱ ꓕꓲ ꓣꓳ ꓠꓬ ꓬꓲ-ꓩꓴ-ꓢꓳ ꓗꓪˍ ꓡꓰ ꓟꓽ ꓞꓲ꓾ ꓮꓽ ꓡ ꓮ-ꓢꓲ-ꓬ ꓕꓲ ꓟꓵꓽ ꓡꓱꓸꓼ ꓗꓪ꓾ ꓡꓯꓼ ꓒꓯꓹ ꓡꓰ ꓫꓬꓹ ꓔ ꓟ ꓢꓲꓺ ꓠꓬ ꓢꓲꓺ ꓚꓵ ꓟꓽ ꓥ꓾ ꓐꓯ ꓢꓲ꓾ ꓡ ꓞꓳ ꓮꓽ ꓟꓬꓹ ꓔꓯ ꓘꓶꓸ ꓟꓶ ꓢꓲ ꓠꓬꓲ ꓒꓳꓹ ꓬꓲꓼ ꓙꓰ ꓝꓲˍ ꓟ꓾ ꓠꓴ ꓪꓽ ꓑˍ ꓟꓲ ꓑ ꓙꓽ ꓗꓷꓳ꓾ ꓟꓳꓻˍ ꓟꓲ ꓟꓳꓻ ꓗꓷꓳ꓿ 27 ꓮ ꓟꓶ ꓠꓬ ꓣꓳ ꓡꓯꓼ ꓟꓬꓱꓽ ꓕꓱ ꓟ ꓔꓯ ꓢꓴ ꓟꓳꓻ ꓟꓽ ꓟꓵꓺ ꓗꓷ ꓡꓰˍ ꓟˍ ꓡꓰ ꓟꓽ ꓞꓲ꓾ ꓢꓲꓺ ꓟꓺ ꓓꓽ ꓟ ꓮ-ꓔꓲ-ꓟꓲ ꓔꓯ ꓪꓴꓸ ꓓꓵ ꓕꓱꓼ ꓖꓴ ꓦꓲ ꓔꓯˍ ꓟꓲ ꓟꓳꓻ ꓟꓽ ꓟꓵ ꓗꓷ ꓡꓰˍ ꓟ ꓡꓰ ꓐꓰ꓾ ꓮ-ꓢꓲ-ꓬ ꓕꓲ ꓟꓵꓽ ꓡꓱꓸꓼˍ ꓐꓰ ꓟꓵꓽ ꓕꓯ ꓗꓳꓹ ꓕꓯ ꓪꓴꓸ ꓓꓵ ꓕꓱˍ ꓟ꓾ ꓢꓲꓺ ꓟ ꓐꓬꓱꓽ ꓓꓽ ꓟ ꓬꓲ ꓟꓬꓱ ꓓꓳꓽˍ ꓟꓲ ꓐꓬ ꓡꓰˍ ꓥꓳ꓾ ꓐꓯˍ ꓡꓳ꓿ 28 ꓐꓯ ꓘꓶ ꓕꓱ ꓟ ꓬꓲ ꓪꓽ ꓑ ꓙꓽ ꓗꓷ ꓠꓬ ꓠꓲꓹ ꓟ ꓦꓶ ꓡ ꓢꓲ꓾ ꓬꓲ-ꓩꓴ-ꓢꓳ ꓗꓪ ꓟ ꓮ-ꓔꓲ-ꓟꓲ ꓠꓬ ꓪꓴꓽˍ ꓟ ꓥ ꓡꓳ꓾ ꓐꓰ ꓘꓴˍ ꓡꓳ꓿ 29 ꓖꓳ ꓕꓯ ꓕꓲ ꓡꓳ ꓒꓱ ꓡꓱꓸꓼ ꓗꓪ ꓐꓵꓻ ꓢꓴˍ ꓟ ꓐꓲ ꓡꓰ ꓢꓲ꓾ ꓬꓲ ꓪꓽ ꓠꓬ ꓕꓲ ꓠꓲꓹ ꓕꓲ ꓪꓺꓼ ꓐꓰ ꓒꓳ-ꓡꓳ ꓓꓴꓻ ꓓꓳ ꓛꓳ ꓒꓯꓹ꓾ ꓟ-ꓢꓲ-ꓓꓳ ꓢꓴ ꓗꓷ-ꓬꓴˍ ꓐꓰ ꓬ-ꓡꓲ-ꓓ-ꓗꓴ ꓔꓯ ꓣꓴ ꓢꓲ ꓠꓬꓲ꓾ ꓜꓲꓼ ꓖꓴ ꓓꓰ ꓗꓪ ꓖꓳꓻ ꓙꓰˍ ꓡꓳ꓿ 30 ꓒꓳ-ꓡꓳ ꓠꓬ ꓞꓳ ꓜꓴꓻ ꓢꓴ ꓔꓬ ꓟ ꓗꓪ ꓓꓵꓽ ꓙꓰ ꓠꓲꓹ ꓫꓵˍ ꓟꓲ꓾ ꓢꓲ ꓤ ꓐꓴ ꓡꓰ ꓬꓲ ꓔꓯ ꓟꓽ ꓙꓰ ꓝꓲ꓿ 31 ꓮ-ꓢꓲ-ꓬ ꓢꓲꓽ ꓒ ꓐꓴ ꓕꓲ ꓐꓱ ꓠꓬ ꓒꓳ-ꓡꓳ ꓛꓳꓽ ꓒꓯꓹ ꓐꓴ ꓥ ꓠꓬꓲ꓾ ꓡ ꓞꓳ ꓝꓲ ꓩꓴ ꓗꓷ ꓢꓲ꓾ ꓬꓲ ꓔꓯ ꓜꓲꓼ ꓖꓴ ꓓꓰ ꓗꓪ ꓕꓽ ꓙꓰ꓾ ꓐꓰ ꓡꓯꓽ ꓫꓵ ꓐꓯ ꓖꓶ ꓬꓰ ꓝꓲˍ ꓡꓳ꓿ 32 ꓜꓲꓼ ꓡ ꓢꓴ ꓠꓬ ꓮꓽ ꓘꓶꓸ ꓐꓵꓻ ꓔꓴ ꓡ ꓢꓲ꓾ ꓕꓲ ꓧꓳꓽ ꓕꓲ ꓫꓵꓽ ꓘꓴꓻ ꓔꓬ ꓟ ꓗꓪ ꓐꓰ ꓬꓲ ꓪꓽ ꓟꓬꓽ ꓠꓬꓲ ꓕꓲ ꓐꓱ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓖꓳ ꓗꓪ ꓜꓲꓼ ꓡ ꓟˍ ꓟꓲ ꓟꓽ ꓢꓷꓸ ꓗꓷ ꓡꓰꓳ꓿ 33 ꓖꓳ ꓡꓱ ꓠꓬ ꓬꓴ-ꓔ ꓡ ꓞꓳ ꓡꓰ ꓬ-ꓡꓲ-ꓢ-ꓓ ꓔꓯ ꓞꓳ ꓜꓴꓻ ꓟꓲꓽ ꓕꓯ ꓢꓲ ꓗꓪ ꓦꓰꓼ ꓞ ꓝꓲˍ ꓕꓯ꓾ ꓕꓲ ꓐꓱ ꓠꓬ ꓢꓴ ꓡꓺˍ ꓟ ꓠꓽ ꓬꓲ ꓪꓴꓸ ꓠꓬꓲ ꓥꓳ꓾ ꓓꓵꓽ ꓙˍ ꓡꓳ꓿ ꓬ-ꓡꓲ-ꓢ-ꓓ ꓠꓬ ꓖꓳ ꓗꓪ ꓜꓲꓼ ꓞꓹ ꓟ ꓞꓳ ꓜꓴꓻ ꓟꓲꓽ ꓙꓬ ꓗꓪ ꓒꓶꓻ ꓔꓳꓹ ꓘꓶꓽ ꓫꓸ ꓕꓱ ꓠꓲꓹ ꓫꓵ ꓠꓬꓲ꓾ ꓢꓲ ꓡꓲ ꓔꓬ ꓠꓹ ꓟ ꓬꓲ ꓡꓯꓼ ꓒꓯꓹ ꓶꓹ ꓖꓶˍ ꓡꓳ꓿ 34 ꓖꓳ ꓡꓱ ꓥ ꓟꓲ ꓬꓲ ꓠꓬ ꓬꓴ-ꓔ ꓡ ꓞꓳ ꓥ ꓟ ꓔꓯ ꓬꓲ ꓪꓽ ꓡꓳꓸ ꓓꓳ ꓡ ꓕꓯ꓾ ꓬꓲ ꓪꓽ ꓠꓬ ꓮꓽ ꓡ ꓠꓬꓲꓽ ꓙꓵꓹ ꓛꓲ꓾ ꓬꓲ-ꓩꓴ-ꓢꓳ ꓗꓪ ꓟ ꓮ-ꓔꓲ-ꓟꓲ ꓠꓬ ꓪꓴꓽˍ ꓟ ꓥ ꓡꓳ꓾ ꓐꓰ ꓘꓴˍ ꓡꓳ꓿ 35 ꓖꓳ ꓗꓸ ꓠꓯꓸ ꓡꓳ ꓒꓱ ꓐꓱ ꓶ ꓕꓳ ꓶ ꓐꓳ ꓢꓴ ꓡꓰ ꓡ ꓞꓳ ꓬꓲ ꓜꓴ ꓔꓯ ꓟꓽ ꓪꓳꓹ ꓪꓳꓹ ꓔꓬ ꓝꓲ ꓢꓲ꓾ ꓬꓲ-ꓩꓴ-ꓢꓳ ꓢꓴꓳ꓾ ꓬꓲ-ꓩꓴ-ꓢꓳ ꓡꓳ ꓒꓱ ꓠꓬ ꓮ-ꓔꓲ-ꓟꓲ ꓢꓲꓺ ꓟꓺ ꓓꓽ ꓟ ꓔꓯ ꓪꓴꓸ ꓓꓵ ꓕꓱꓼ ꓖꓴ ꓦꓲˍ ꓐꓰ꓾ ꓟꓵꓽ ꓪꓴꓽ ꓗꓪ ꓐꓰ ꓞꓰ ꓬꓯꓼ ꓡ ꓟ ꓢꓲꓺ ꓐꓬꓱꓽ ꓓꓹ ꓖꓴ ꓥ ꓟ꓾ ꓟꓽ ꓢꓷ ꓢꓴ ꓙꓳˍ ꓡ? 36 ꓕꓱ ꓟꓬ ꓙꓰꓽ ꓟ ꓔꓯ ꓮꓽ ꓟˍ ꓟꓲ ꓢꓷꓸˍ ꓠꓬꓲ ꓠꓴ ꓪꓽ ꓠꓬ ꓟꓽ ꓪꓳꓹ ꓔꓬ ꓢꓲ ꓜꓲꓽ ꓜꓲ ꓑꓰꓹ ꓑꓰ ꓮꓸ ꓫꓵ ꓕꓽ ꓬꓰ꓿ 37 ꓠꓴ ꓪꓽ ꓡꓰ ꓣꓴ ꓔꓯꓹ ꓡ ꓢꓴ ꓐꓴ ꓠꓬ ꓢꓲꓺ ꓦꓲ ꓗꓪ ꓘꓴꓽ ꓢꓴˍ ꓟꓲ ꓟꓽ ꓥ꓾ ꓣꓳꓽ ꓢꓲꓺ ꓟ ꓔꓯ ꓙꓱꓽ ꓢꓴˍ ꓟꓲ ꓟꓽ ꓥ꓿ 38 ꓔꓲ-ꓟꓲ-ꓕꓲ-ꓪꓴꓽˍ ꓐꓰ ꓬꓲ ꓔꓯ ꓛꓳ ꓡ ꓟ ꓡꓯꓼ ꓟꓬꓱꓽ ꓬꓰ ꓢꓴ ꓐꓴ ꓡꓰ ꓗꓳꓹ ꓠꓲꓹ ꓫꓵˍ ꓟ ꓙꓳˍ ꓠꓬ꓾ ꓐꓯ ꓟꓴ ꓘꓶꓽ ꓖꓴˍ ꓐꓰ ꓐꓯ ꓟꓴ ꓘꓶꓽ ꓢꓲꓽ ꓒ ꓙꓳˍ ꓡꓳ꓿ ꓖꓳ ꓗꓪ ꓗꓳꓹ ꓡꓯ ꓘꓳ ꓛꓵˍ ꓡꓳ꓿ 39 ꓠꓴ ꓪꓽ ꓠꓱꓸ ꓐꓯꓼ ꓠ ꓠꓬꓲ ꓓꓴ ꓙꓳˍ ꓠꓬ꓾ ꓙꓵꓽ ꓗ ꓔꓯ ꓛꓳ ꓢꓲ ꓮ ꓕꓯ ꓟꓴ ꓕꓯ ꓟ ꓜꓲꓼ ꓡꓯ ꓘꓳ ꓖꓴ ꓗꓪ ꓐꓯ ꓞꓷꓹ ꓛꓵˍ ꓡꓳ꓿ 40 ꓠꓬꓲꓸ ꓠꓬꓲ ꓐꓵꓻ ꓢꓴ ꓔꓴ ꓡ ꓟ ꓕꓱ ꓟ ꓠꓬ꓾ ꓬꓲ ꓚꓱꓹ ꓟꓽ ꓚ ꓚ ꓢꓴ ꓔꓴ ꓡ ꓟ ꓕꓲ ꓫꓵ ꓥ ꓠꓬꓲ꓾ ꓢꓴ ꓡꓰ ꓣꓳ ꓕꓱ ꓡꓱ ꓜꓲꓼ ꓡꓯ ꓘꓳˍ ꓟ ꓔꓯ ꓚꓵꓸ ꓚ ꓡ ꓐꓷˍ ꓠꓬ ꓣꓳ ꓮꓸ ꓫꓵꓽ ꓒꓳꓹ ꓖꓶ ꓓꓴ ꓟꓽ ꓙꓳ ꓗꓷ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿ 41 ꓬꓲ ꓕꓱ ꓡꓱ ꓐꓯ ꓗꓷ ꓠꓬ ꓜꓲꓼ ꓞ ꓢꓴ ꓔꓯ ꓓꓳ ꓙꓰ ꓝꓲˍ ꓡꓳ꓿

ꓝꓲ-ꓓꓴ 20

1 ꓐꓵꓻ ꓢꓴˍ ꓟ ꓠꓽ ꓡꓰ ꓠꓬ꓾ ꓒꓳ-ꓡꓳ ꓡꓰ ꓢꓲ ꓤ ꓐꓴ ꓔꓯ ꓘꓴꓻ ꓜꓲꓼ ꓡ ꓢꓲ꓾ ꓬꓲ ꓪꓽ ꓔꓯ ꓢꓯꓼ ꓖꓶ ꓗꓷ ꓠꓬ꓾ ꓟ-ꓢꓲ-ꓓꓳ ꓗꓪ ꓙꓰˍ ꓡꓳ꓿ 2 ꓬꓲ ꓠꓬ ꓖꓳ ꓕꓲ ꓟꓵꓽ ꓗꓪ ꓫꓱꓽ ꓙꓻ ꓙꓰ ꓢꓲ꓾ ꓘꓴ ꓜꓲ ꓞꓳ ꓔꓯ ꓢꓯꓼ ꓖꓶ ꓘꓶꓽ ꓮꓽ ꓟꓬꓹ ꓐꓯ ꓗꓷ ꓠꓬ ꓦꓲ-ꓡꓲ ꓟꓵꓽ ꓗꓪ ꓙꓰ ꓛꓲ ꓬꓰˍ ꓡꓳ꓿ 3 ꓖꓳ ꓗꓪ ꓦ ꓐ ꓢ ꓟ ꓔꓬ ꓡꓳ꓿ ꓖꓳ ꓗꓪ ꓐꓰ ꓡꓲ ꓜꓶꓽ ꓢꓲ ꓫꓲ-ꓡꓲ-ꓬ ꓗꓪ ꓙꓰˍ ꓐꓰ ꓬꓰˍ ꓕꓯ꓾ ꓬꓴ-ꓔ ꓡ ꓞꓳ ꓡꓰ ꓬꓲ ꓔꓯ ꓗꓸ ꓧꓪ ꓠꓹ ꓟ ꓚꓴꓽ ꓬꓲꓹ ꓓꓶꓽˍ ꓟ ꓢꓷꓸ ꓡꓰ ꓠꓬꓲ꓾ ꓟ-ꓢꓲ-ꓓꓳ ꓟꓵꓽ ꓗꓪ ꓐꓰ ꓚꓳ ꓬꓲꓼ ꓙꓰ ꓠꓹ ꓟ ꓓꓵꓽ ꓙ ꓞꓷꓹ ꓗꓷˍ ꓡꓳ꓿ 4 ꓖꓳ ꓡꓱ ꓠꓬ ꓐꓲ-ꓡꓲ-ꓬꓼ ꓢꓴ ꓑꓲꓽ-ꓡꓳꓽ-ꓢꓶ ꓬꓲ ꓤ ꓢꓳ-ꓑ-ꓕꓷˍ ꓐꓰ꓾ ꓕꓰ-ꓢ-ꓡꓳ-ꓠꓲ-ꓬ ꓢꓴ ꓬ-ꓡꓲ-ꓓ-ꓗꓴˍ ꓐꓰ ꓫꓲ-ꓗꓳ-ꓔꓴˍ ꓐꓰ꓾ ꓔꓷ-ꓑꓲꓹ ꓢꓴ ꓗꓷ-ꓬꓴˍ ꓐꓰ ꓕꓲ-ꓟꓳ-ꓕꓲ-ꓪꓴꓽˍ ꓐꓰ ꓮ-ꓢꓲ-ꓬ ꓢꓴ ꓕꓲ-ꓚꓲ-ꓗꓴˍ ꓐꓰ ꓕꓷ-ꓡꓳ-ꓩꓴ-ꓟꓴ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ 5 ꓕꓱ ꓟꓬ ꓣꓳ ꓟ ꓠꓬ ꓧꓶꓸ ꓕꓯ ꓙꓰ ꓢꓲ꓾ ꓕꓷ-ꓡꓳ-ꓬ ꓗꓪ ꓥꓪ ꓠꓴꓽ ꓔꓯ ꓡꓳ ꓠꓬꓹ ꓔꓬ ꓡꓳ꓿ 6 ꓙꓵ-ꓧꓶ-ꓟꓽ-ꓣꓱ-ꓑꓮꓲ ꓦꓬꓼ ꓠꓬꓲ ꓗꓳꓸ ꓗꓷ ꓗ ꓠꓯ꓾ ꓥꓪ ꓠꓴꓽ ꓠꓬ ꓒꓲ-ꓡꓲ-ꓒꓲ ꓗꓪ ꓐꓰ ꓡꓲ ꓜꓶꓽ ꓢꓲ ꓥꓪꓽ ꓠꓬꓲ ꓙꓰ ꓗꓷ ꓠꓬ꓾ ꓥꓪ ꓠꓴꓽ ꓔꓯ ꓡꓳ ꓠꓬꓹ ꓢꓴ ꓐꓴ ꓔꓬ ꓟ ꓕꓷ-ꓡꓳ-ꓬ ꓗꓪ ꓛꓲ ꓬꓰ ꓢꓲ꓾ ꓖꓳ ꓗꓪ ꓫꓵꓽ ꓠꓬꓲ ꓔꓬ ꓗꓷꓳ꓿ 7 ꓫꓵꓽ ꓠꓬꓲ ꓟ ꓬꓲ ꓪꓴꓸ ꓕꓲ ꓠꓬꓲ ꓗꓪ ꓥꓪ ꓠꓴꓽ ꓠꓬ ꓑ ꓑ ꓦꓶꓹ ꓠ ꓟ ꓜꓲꓼ ꓡꓯ ꓘꓳˍ ꓕꓯ꓾ ꓒꓳ-ꓡꓳ ꓠꓬ ꓗꓸ ꓠꓯꓸ ꓕꓲ ꓠꓬꓲ ꓠꓯꓼ ꓗꓪ ꓙ ꓫꓱꓽ ꓙꓰˍ ꓐꓰ ꓬꓰˍ ꓠꓬꓲ꓾ ꓬꓲ ꓠꓬ ꓬꓲ ꓪꓽ ꓔꓯ ꓦꓬꓼ ꓔꓱꓺ ꓫꓵ ꓗꓪ ꓛꓲ ꓟꓸ ꓟꓲ ꓟꓸ ꓖꓶˍ ꓡꓳ꓿ 8 ꓥꓪ ꓠꓴꓽ ꓜꓲꓼ ꓡꓯ ꓘꓳ ꓖꓴ ꓜꓳꓻ ꓗꓳꓹ ꓗꓪ ꓠꓬ ꓟꓬ ꓡꓴ ꓮꓽ ꓟꓬꓹ ꓟ ꓙꓳˍ ꓡꓳ꓿ 9 ꓖꓳ ꓕꓯ ꓠꓬꓲ ꓟꓳ ꓓꓴ ꓗ ꓘꓶꓽ ꓗꓪ ꓬꓴ-ꓕꓲ-ꓘꓴ ꓟꓬꓱ ꓔ ꓟ ꓤ ꓖꓴꓽ ꓡꓯꓸ ꓤ ꓕꓲ ꓣꓳ ꓠꓬꓲꓸ ꓠꓸ ꓔꓬ ꓡꓳ꓿ ꓬꓲ ꓠꓽ ꓒꓳ-ꓡꓳ ꓡꓰ ꓟꓸ ꓟꓲ ꓡꓯꓽ ꓫꓵ ꓚ ꓔꓬ ꓕꓯ ꓬꓲꓼ ꓟꓶ ꓡꓰ ꓢꓲ꓾ ꓦꓲ ꓢ ꓔꓱꓹ ꓗꓪ ꓐꓰ ꓞꓰꓻ ꓡꓰ ꓢꓲ ꓠꓬꓲ ꓫꓵꓻꓳ꓿ 10 ꓖꓳ ꓕꓯ ꓒꓳ-ꓡꓳ ꓬꓯꓼ ꓙꓰ ꓢꓲ ꓬꓲ ꓖꓳ ꓓꓱ ꓗꓪ ꓢꓳꓸ ꓔ ꓢꓲ ꓠꓬꓲ꓾ ꓠꓴ ꓪꓽ ꓕꓽ ꓙ ꓫꓸ꓾ ꓬꓲ ꓢꓯꓼ ꓟꓬ ꓠꓬ ꓬꓲ ꓠꓯS ꓗꓪ ꓓꓯꓹ ꓢꓰꓽ ꓡꓳ꓾ ꓐꓯˍ ꓡꓳ꓿ 11 ꓖꓳ ꓗꓸ ꓠꓯꓸ ꓒꓳ-ꓡꓳ ꓓꓯ ꓙꓰ ꓢꓲ ꓑ ꓑ ꓦꓶꓹ ꓢꓲ ꓠꓬꓲ ꓜꓽ ꓗꓷ ꓠꓬ꓾ ꓟꓲ ꓕꓯ ꓙꓲ ꓡ ꓗꓪ ꓛꓲ ꓬꓲ ꓪꓽˍ ꓐꓰ ꓫꓸ ꓕꓱ ꓢꓲ ꓙꓰ ꓗꓷꓳ꓿ 12 ꓬꓲ ꓪꓽ ꓡꓰ ꓤ ꓖꓴ ꓡꓯꓸ ꓤ ꓖꓳ ꓕꓲ ꓣꓳ ꓔꓯ ꓢꓯꓸ ꓢꓯꓸˍ ꓡꓰꓽ ꓦꓲꓻ ꓗꓪ ꓧꓳꓽ ꓬꓲꓼ ꓙꓰ ꓪˍ ꓠꓬꓲ꓾ ꓠꓲꓹ ꓟ ꓗꓴ ꓖꓶˍ ꓟ ꓬꓲ ꓓꓽ ꓟ ꓟꓶˍ ꓡꓳ꓿ 13 ꓒꓳ-ꓡꓳ ꓬꓲ ꓚꓲ ꓛꓬ ꓠꓬ ꓙ ꓖꓴ ꓫꓱꓽ ꓙꓰ ꓠꓹ ꓟ ꓚꓴꓽ ꓬꓲꓹ ꓓꓶꓽ ꓔ ꓠꓬꓲ꓾ ꓥꓪ ꓠꓴꓽ ꓠꓽ ꓡꓲ ꓗꓪ ꓐꓰ ꓧꓶꓸ ꓕꓯ ꓬꓹ-ꓫꓳꓺ ꓗꓪ ꓙꓰ ꓢꓲ꓾ ꓖꓳ ꓗꓪ ꓒꓳ-ꓡꓳ ꓔꓯ ꓡꓲ ꓗꓪ ꓞꓵꓺ ꓓꓵ ꓡꓺˍ ꓐꓰ ꓓꓵꓽ ꓙˍ ꓡꓳ꓿ 14 ꓬꓹ-ꓫꓳ ꓗꓪ ꓥꓪ ꓠꓴꓽ ꓬꓲꓸ ꓔꓯ ꓜꓲꓻ ꓡꓯ ꓘꓳˍ ꓕꓯ꓾ ꓬꓲ ꓔꓯ ꓡꓲ ꓗꓪ ꓞꓵꓺ ꓓꓵꓽ ꓡꓰ ꓢꓲ꓾ ꓟꓲ-ꓕꓶ-ꓡꓲ-ꓠꓲ ꓗꓪ ꓙꓰꓳ꓿ 15 ꓖꓳ ꓗꓪ ꓐꓰ ꓗꓸ ꓠꓯꓸ ꓕꓲ ꓠꓬꓲ ꓥꓪ ꓠꓴꓽ ꓠꓬ ꓚꓲ-ꓬꓼ ꓬꓲꓻ ꓗꓳ ꓡꓳ ꓟꓵꓽ ꓒꓳꓹ ꓞꓹ ꓗꓪ ꓛꓲ ꓬꓰꓳ꓿ ꓖꓳ ꓗꓸ ꓠꓯꓸ ꓕꓲ ꓠꓬꓲ ꓠꓬ ꓢ-ꓟꓳ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓛꓲ ꓬꓰꓳ꓿ ꓝꓮꓲ ꓗꓸ ꓠꓯꓸ ꓕꓲ ꓠꓬꓲ ꓥꓪ ꓠꓴꓽ ꓠꓬ ꓟꓲ-ꓡꓲ-ꓔꓴ ꓡꓳ ꓒꓱ ꓗꓪ ꓛꓲ ꓬꓰꓳ꓿ 16 ꓒꓳ-ꓡꓳ ꓠꓽ ꓮ-ꓢꓲ-ꓬ ꓗꓪ ꓟꓶ ꓤ ꓔꓬ ꓟꓽ ꓛꓵ ꓠꓹ ꓟ꓾ ꓬꓲ-ꓩꓴ-ꓢꓳ ꓡꓳ ꓒꓱ ꓗꓪ ꓟꓽ ꓚꓳ ꓚꓳ ꓡꓲ ꓜꓶꓽ ꓙꓻ ꓙꓰ ꓝꓲ ꓢꓲ꓾ ꓐ ꓡ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓥꓪꓽ ꓞꓲ ꓠꓬꓲ ꓑꓮꓲ ꓦꓬꓼ ꓠꓬꓲ ꓬꓰˍ ꓟ ꓔꓯ ꓖꓼ ꓟꓶ ꓡꓰ ꓝꓲˍ ꓐꓰ ꓚꓴꓽ ꓬꓲꓹ ꓓꓶꓽ ꓚꓵ ꓡꓰˍ ꓡꓳ꓿ 17 ꓖꓳ ꓡꓱ ꓠꓬꓲ ꓬꓲ ꓠꓬ ꓟꓲ-ꓡꓲ-ꓔꓴ ꓗꓪ ꓐꓰ ꓬꓲ-ꓩꓴ-ꓢꓳ ꓗꓪ ꓡ ꓞꓳ ꓝꓲ ꓩꓴ ꓗꓷ ꓢꓲ꓾ ꓘꓴ ꓜꓲ ꓞꓳ ꓗꓪ ꓟ ꓟꓬꓱꓽ ꓡꓳꓸ ꓢꓴ ꓐꓴ ꓔꓯ ꓘꓴꓻ ꓔꓯꓹ ꓡ ꓡꓳ꓿ 18 ꓬꓲ ꓪꓽ ꓛꓲ ꓡ ꓠꓬ ꓬꓲ ꓡꓰ ꓬꓲ ꓪꓽ ꓔꓯ꓾ ꓮ-ꓢꓲ-ꓬ ꓗꓪ ꓬꓲꓸ ꓪꓴꓸ ꓛꓲ ꓡ ꓕꓲ ꓠꓬꓲ ꓗꓪ ꓐꓰ ꓠꓴ ꓪꓽ ꓗꓳ ꓡꓳ ꓗꓪ ꓥꓪ ꓮ ꓡꓲ ꓐꓰ ꓞꓳꓻ ꓙꓳ ꓗꓷ ꓟ ꓠꓴ ꓪꓽ ꓢꓷˍ ꓡꓳ꓿ 19 ꓬꓴ-ꓔ ꓡ ꓞꓳ ꓡꓰ ꓪ ꓕꓴꓻ ꓢꓲ ꓥꓪ ꓔꓯ ꓜꓲꓽ ꓜꓲꓽˍ ꓡꓰ ꓤꓹ ꓠꓬꓲˍ ꓟꓲ꓾ ꓥꓪ ꓠ ꓮꓸ ꓫꓵꓽ ꓗꓪˍ ꓟꓲ ꓙꓻ ꓣꓳꓽ ꓢꓲ꓾ ꓟꓬ ꓐꓲ ꓓꓳꓺ ꓠꓬꓲ ꓐꓰ ꓢꓲ ꓒ ꓔꓯ ꓣꓱꓽ ꓙ ꓗꓷ ꓟˍ ꓟꓲ ꓠꓴ ꓪꓽ ꓢꓷꓸˍ ꓡꓳ꓿ 20 ꓝꓮꓲ ꓠꓴ ꓪꓽ ꓐꓱ ꓶ ꓙꓲ ꓖꓴ ꓙꓳˍ ꓟ ꓮ ꓡꓲ ꓕꓲ ꓫꓵꓽ ꓔꓯˍ ꓟꓲ ꓟꓽ ꓚꓵ ꓔꓸ ꓔ꓾ ꓮꓽ ꓙꓵ ꓢꓴ ꓟꓲꓽ ꓙꓬ ꓗꓪˍ ꓟꓲ꓾ ꓕꓲ ꓦꓲꓻ ꓕꓲ ꓦꓲ ꓗꓪˍ ꓟꓲ꓾ ꓥꓪ ꓮ ꓡꓲ ꓟꓸ ꓖꓶ ꓗꓷ ꓟ ꓠꓴ ꓪꓽ ꓢꓷˍ ꓡꓳ꓿ 21 ꓥꓪ ꓠꓬ ꓬꓴ-ꓔ ꓡ ꓞꓳ ꓔꓯˍ ꓟꓲ꓾ ꓦꓲ-ꓡꓲ ꓡ ꓞꓳ ꓔꓯˍ ꓟꓲ꓾ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓠ ꓗꓹ ꓟ ꓟꓸ ꓟꓲ ꓦ ꓡꓱ ꓐꓳ ꓐꓳˍ ꓡꓰꓽ ꓟꓸ ꓖꓶ ꓗꓷꓳ꓿ 22 ꓠ ꓠꓹ꓾ ꓮ ꓟꓶ ꓥꓪ ꓠꓬ ꓢꓲ-ꓫꓬ-ꓟ-ꓦ ꓡꓰ ꓠꓬꓲꓸ ꓞꓹ ꓟ ꓠꓯS ꓗꓪ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓥꓳ꓿ ꓖꓳ ꓗꓪ ꓥꓪ ꓔꓯ ꓮ ꓡꓲ ꓗꓷ ꓡꓰˍ ꓟ ꓥꓪ ꓟꓽ ꓢꓷꓸ꓿ 23 ꓞꓳꓹ ꓚˍ ꓐꓰ ꓫꓸ ꓙꓵˍ ꓟ ꓠꓬ ꓥꓪ ꓔꓯ ꓦꓴꓺ ꓠꓬꓹ ꓔꓬ ꓡꓳ꓾ ꓐꓰ ꓢꓲ-ꓫꓬ-ꓟ-ꓦ ꓡꓰ ꓕꓲ ꓡꓳ ꓒꓱ ꓡꓰ ꓕꓲ ꓡꓳ ꓒꓱ ꓗꓪ ꓬꓲꓼ ꓠꓬꓲꓸ ꓖꓶ ꓡ ꓟ ꓔꓯˍ ꓡꓰꓽ ꓥꓪ ꓢꓷˍ ꓡꓳ꓿ 24 ꓖꓳ ꓡꓱ ꓥ ꓟꓲ ꓥꓪ ꓙ ꓖꓴ ꓫꓱꓽ ꓓꓳ ꓡꓰ ꓠꓹ ꓟ ꓐꓰ꓾ ꓢꓲ ꓒ ꓬꓰ-ꓢꓴ ꓔꓯˍ ꓐꓰ ꓥꓪ ꓟꓶˍ ꓟ ꓪꓴ-ꓢ ꓣꓱꓽ ꓛꓰꓽ ꓶꓼ ꓓꓳꓽ ꓫꓱꓹ ꓓꓳ ꓐꓱ ꓶ ꓢꓷꓸ ꓙ ꓟꓳ ꓙˍ ꓟ ꓟꓬꓱꓽ ꓬꓰ ꓓꓳ ꓡꓰ ꓠꓹ ꓟ꓾ ꓥꓪ ꓢꓯꓼ ꓟꓬ ꓔꓯ ꓠꓬ ꓥꓪ ꓚꓲ ꓛꓬ ꓐꓱ ꓶ ꓒꓵꓽˍ ꓟ ꓕꓲ ꓫꓵꓽˍ ꓟꓲ ꓟꓽ ꓚꓬꓹ꓿ 25 ꓠ ꓠꓹ꓾ ꓧꓶꓸ ꓕꓯ ꓥꓪ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓚꓳꓺ ꓗꓷ ꓢꓲ ꓪꓴ-ꓢ ꓗꓴꓷ ꓚ ꓟꓸ ꓖꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓕꓱ ꓡꓱ ꓖꓳ ꓑꓳꓸ ꓠꓴ ꓪꓽ ꓠꓬ ꓥꓪ ꓒꓬꓱꓽ ꓔꓯ ꓝꓮꓲ ꓟꓽ ꓟꓳ ꓡꓺꓳ꓾ ꓐꓰ ꓮ ꓟꓶ ꓥꓪ ꓢꓷˍ ꓡꓳ꓿ 26 ꓖꓳ ꓡꓱ ꓠꓬꓲ ꓠꓴ ꓪꓽ ꓮ ꓡꓲ ꓕꓲ ꓣꓳ ꓒꓲꓼ ꓬꓰˍ ꓟꓲ꓾ ꓥꓪ ꓙꓵꓻ ꓟꓽ ꓙꓳ꓾ ꓐꓰ ꓠꓬꓲꓸ ꓠꓬꓲ ꓠꓴ ꓪꓽ ꓒꓬꓱꓽ ꓕꓯ ꓗꓪ ꓥꓪ ꓐꓯˍ ꓥꓳ꓿ 27 ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓟꓽ ꓟꓬ ꓑꓬ ꓑꓬ ꓠꓴ ꓪꓽ ꓔꓯ ꓪꓴ-ꓢ ꓠꓲꓹ ꓡꓶ ꓮꓽ ꓙꓵ ꓟꓸ ꓖꓶ ꓗꓷꓳ꓿ 28 ꓢꓲ-ꓫꓬ-ꓟ-ꓦ ꓡꓰ ꓠꓴ ꓪꓽ ꓔꓯ ꓟꓬꓱꓽ ꓡꓳꓸ ꓢꓴ ꓒꓬꓱꓼ ꓡ ꓝꓲˍ ꓟ ꓗꓪ꓾ ꓬꓲ ꓚꓲ ꓛꓬ ꓫꓵꓽ ꓡꓰ ꓪꓴꓻ ꓔ ꓟ ꓪꓴ-ꓢ ꓘꓴ ꓜꓲ ꓞꓳ ꓔꓯ ꓡꓳꓸ ꓙ ꓔ ꓙ꓿ ꓠꓴ ꓪꓽ ꓚꓲ ꓛꓬˍ ꓐꓰ ꓕꓲ ꓜꓴꓻ ꓡꓱꓸꓼ ꓐꓱ ꓶ ꓤ ꓟꓳ꓿ 29 ꓥꓪ ꓙꓰ ꓗꓷ ꓗ ꓠꓯ꓾ ꓮ ꓣꓳ ꓜꓴꓻ ꓔꓯ ꓟꓽ ꓫꓱꓸ ꓤꓼˍ ꓟ꓾ ꓥꓶꓻˍ ꓟ ꓪꓰꓻ ꓕꓳꓹ ꓠꓴ ꓪꓽ ꓗꓳꓺ ꓡꓳ ꓗꓪ ꓓꓵꓽ ꓡ ꓥꓳ꓾ ꓐꓰ ꓥꓪ ꓢꓷˍ ꓡꓳ꓿ 30 ꓠꓴ ꓪꓽ ꓗꓳꓺ ꓡꓳ ꓗꓪ ꓐꓰˍ ꓟꓲ꓾ ꓢꓲ ꓤ ꓐꓴ ꓔꓯ ꓔꓱꓹˍ ꓟ ꓔꓯˍ ꓐꓰ ꓧꓶꓸ ꓙꓰ ꓝꓲ ꓢꓲ꓾ ꓐꓱꓻ ꓓꓳ ꓙꓰ ꓠꓹ ꓟ ꓟꓸ ꓒꓬꓹ ꓢꓴ ꓔꓴ ꓡ ꓥꓳ꓿ 31 ꓖꓳ ꓡꓱ ꓠꓬꓲ ꓥꓪ ꓡꓰ ꓠꓴ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓙꓳ ꓗꓽ ꓖꓶ ꓢꓲ꓾ ꓟꓳꓼ ꓡꓳ ꓢ ꓘꓪ ꓟꓬ ꓐꓲ ꓓꓳ ꓠꓬꓲ ꓐꓰ꓾ ꓟꓽ ꓠꓽ ꓠ ꓢ ꓘꓳꓼ ꓘꓶꓸ ꓖꓶ ꓗꓷ ꓟ ꓔꓯ ꓧꓪꓸ ꓛꓲꓽ ꓢꓲ ꓓꓵꓽ ꓙ ꓔꓸ꓿ 32 ꓮ ꓟꓶ ꓥꓪ ꓡꓰ ꓠꓴ ꓪꓽ ꓔꓯ ꓪꓴ-ꓢˍ ꓐꓰ ꓬꓲ ꓣꓱꓽ ꓛꓰꓽ ꓐꓯ ꓘꓶꓽ ꓗꓪ ꓡꓯꓼ ꓙꓱ ꓗꓷˍ ꓥꓳ꓿ ꓬꓲ ꓣꓱꓽ ꓛꓰꓽ ꓐꓯ ꓘꓶ ꓕꓱ ꓟ ꓡꓰ ꓠꓴ ꓪꓽ ꓔꓯ ꓫꓬꓹ ꓔꓳꓹ ꓖꓶ ꓢꓲ꓾ ꓢꓲ ꓚꓰꓸ ꓔ ꓢꓴ ꓐꓴ ꓮꓽ ꓙꓵˍ ꓐꓰ ꓕꓲ ꓪꓺꓼ ꓠꓴ ꓪꓽ ꓔꓯ ꓡꓯꓼ ꓪ ꓖꓶ ꓡ ꓝꓲ꓿ 33 ꓥꓪ ꓠꓬ ꓢꓴ ꓒꓴˍ ꓐꓰ ꓫꓵꓺˍ ꓐꓰ ꓖꓪꓽ ꓓꓴ ꓔꓯ ꓟꓽ ꓠꓲꓹ ꓦꓯꓸ ꓠꓬꓲ꓿ 34 ꓥꓪ ꓚꓲ ꓛꓬˍ ꓐꓰ ꓥꓪ ꓛꓳꓽ ꓒꓯꓹ ꓐꓴ ꓣꓱꓽ ꓬꓯꓼˍ ꓟ ꓗꓪ꓾ ꓥꓪ ꓡꓯꓼ ꓒꓯꓹ ꓕꓱ ꓠꓬꓲꓽ ꓐ ꓡꓰ ꓟꓬꓱꓽ ꓬꓰ ꓢꓲ ꓣꓱꓽ ꓙ ꓗꓷ ꓟ ꓠꓴ ꓪꓽ ꓢꓷˍ ꓡꓳ꓿ 35 ꓠꓴ ꓪꓽ ꓠꓬ ꓕꓱ ꓡꓱ ꓢꓯꓼ ꓕꓵꓼ ꓢꓲ ꓢꓯꓼ ꓐꓽ ꓢꓴ ꓔꓯ ꓬꓰ ꓙˍ ꓕꓯ꓾ ꓢꓴꓻ ꓔꓯ ꓖꓶꓽˍ ꓟ ꓠꓬ ꓘꓳ ꓣꓴ ꓟꓶꓻˍ ꓟ ꓢꓶꓸ ꓟꓽ ꓞꓲ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓗꓷ ꓟ ꓐꓯ ꓘꓶꓽ ꓔꓯ ꓓꓵꓽ ꓙ ꓛꓲ ꓡ ꓠꓹ ꓟ꓾ ꓥꓪ ꓠꓬ ꓮꓸ ꓫꓵꓽ ꓗꓪˍ ꓟꓲ ꓠꓴ ꓪꓽ ꓔꓯꓺ ꓢꓳ ꓓꓴ ꓬꓰ ꓗꓷꓳ꓾ ꓐꓯˍ ꓡꓳ꓿ 36 ꓬꓲ ꓖꓳ ꓡꓱ ꓐꓯ ꓓꓳ ꓡꓰ ꓠꓬ ꓛꓲ ꓝꓲꓸ ꓖꓶꓽ ꓢꓲ ꓬꓲ ꓪꓽ ꓮꓽ ꓙꓵ ꓢꓴˍ ꓐꓰ ꓪꓽ ꓘꓴˍ ꓡꓳ꓿ 37 ꓖꓳ ꓡꓱ ꓠꓬ ꓬꓲ ꓪꓽ ꓥꓴꓻ ꓢꓲ ꓒꓳ-ꓡꓳ ꓔꓯ ꓢꓳꓸ ꓔꓸ ꓢꓲ ꓠꓬꓲ ꓐꓳꓼ ꓖꓶˍ ꓡꓳ꓿ 38 ꓒꓳ-ꓡꓳ ꓡꓰ ꓐꓯˍ ꓟ꓾ ꓬꓲ ꓒꓬꓱꓽ ꓔꓯ ꓬꓲ ꓪꓽ ꓝꓮꓲ ꓕꓲ ꓧꓪꓹ ꓟꓽ ꓟꓳ ꓡꓺꓳ꓾ ꓐꓯˍ ꓟ ꓖꓳ ꓕꓲ ꓘꓶꓽ ꓗꓪ ꓐꓰ ꓬꓲ ꓪꓽ ꓟꓬꓽ ꓠꓬꓲ ꓠꓲꓹ ꓟ ꓫˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓡꓲ ꓗꓪ ꓛꓲ ꓬꓲ ꓔꓯ ꓧꓳꓽ ꓦ ꓙꓰˍ ꓡꓳ꓿

ꓝꓲ-ꓓꓴ 21

1 ꓥꓪ ꓠꓴꓽ ꓬꓲ ꓪˍ ꓐꓰ ꓧꓹ ꓡꓯ ꓘꓳ ꓗꓷ ꓠꓬ꓾ ꓡꓲ ꓜꓶꓽ ꓢꓲ ꓔꓱꓹ ꓔꓱꓹꓼ ꓗꓳ-ꓢ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓙꓰꓳ꓿ ꓗꓸ ꓠꓯꓸ ꓕꓲ ꓠꓬꓲ ꓠꓬ ꓣꓳ-ꓢꓲ ꓡꓳ ꓒꓱ ꓗꓪ ꓛꓲ ꓬꓰꓳ꓿ ꓖꓳ ꓗꓪ ꓐꓰ ꓒ-ꓔ-ꓡ ꓡꓳ ꓒꓱ ꓗꓪ ꓙꓰꓳ꓿ 2 ꓖꓳ ꓡꓱ ꓢꓲ ꓩꓳ-ꓠꓲ-ꓫꓲ-ꓬ ꓟꓵꓽ ꓗꓪ ꓗꓳꓸ ꓙꓰˍ ꓐꓰ ꓬꓰˍ ꓟ ꓡꓲ ꓕꓲ ꓟ ꓧꓪ ꓟꓶ ꓠꓬꓲ꓾ ꓥꓪ ꓠꓴꓽ ꓠꓬ ꓖꓳ ꓟ ꓗꓪ ꓜꓶꓽ ꓙꓰꓳ꓿ 3 ꓢ-ꓑꓴ-ꓣ ꓬꓲꓻ ꓗꓳ ꓡꓳ ꓟꓵꓽ ꓔꓯ ꓡꓳꓸ ꓟꓳ ꓢꓲ ꓖꓴꓻ ꓟꓶꓸ ꓔꓯꓸ ꓟꓳ ꓗꓳꓸ ꓙꓰ ꓠꓬ꓾ ꓫꓲ-ꓡꓲ-ꓬ ꓟꓵ ꓔꓯꓸ ꓟꓳꓸ ꓙꓰ ꓢꓲ꓾ ꓡꓲ ꓗꓪ ꓟ ꓖꓴꓽ ꓙꓴ ꓔꓯ ꓕꓲ-ꓬ ꓡꓳ ꓒꓱ ꓗꓪ ꓣꓴ ꓓꓳ ꓡ ꓠ ꓗꓹ ꓠꓬꓲ ꓖꓳ ꓗꓪ ꓬꓯꓼ ꓙꓰꓳ꓿ 4 ꓖꓳ ꓗꓪ ꓢꓲ ꓤ ꓐꓴ ꓔꓯ ꓧꓪ ꓟꓶ ꓠꓬ꓾ ꓥꓪ ꓠꓴꓽ ꓬꓲ ꓪꓽˍ ꓐꓰ ꓫꓵꓽ ꓠꓬꓲ ꓔꓬ ꓗꓷꓳ꓿ ꓬꓲ ꓪꓽ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓒꓳ-ꓡꓳ ꓔꓯ꓾ ꓙꓱ-ꓣꓴ-ꓢ-ꓡꓱ ꓗꓪ ꓟꓽ ꓓꓯ ꓙꓰ ꓠꓹ ꓟ ꓘꓶꓸ ꓖꓶˍ ꓡꓳ꓿ 5 ꓡꓲ ꓓꓳ ꓙꓰˍ ꓟ ꓦꓬꓼ ꓠꓬꓲ ꓛꓲ ꓡ ꓢꓲ ꓥꓪ ꓠꓴꓽ ꓖꓳ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓬꓲ ꓪˍ ꓐꓰ ꓬꓲ ꓪꓽ ꓤꓽ ꓟꓶꓻ ꓤ ꓠꓱ ꓐꓴ ꓮꓽ ꓙꓵ ꓡꓰ ꓡꓳ ꓒꓱ ꓠꓱ ꓫꓱ ꓟꓸꓼ ꓗꓪ ꓛꓲ ꓧꓳꓽ ꓦ ꓙꓰ ꓡꓺꓳ꓿ ꓥꓪ ꓠꓴ ꓠꓬ ꓬꓲꓻ ꓡꓴ ꓐꓱ ꓘꓶꓽ ꓗꓪ ꓛꓲ ꓝꓲꓸ ꓖꓶ ꓢꓲ ꓪꓽ ꓘꓴ ꓗꓷ ꓠꓬ꓾ 6 ꓧꓪꓸ ꓧꓪ꓾ ꓐꓯ ꓡꓯ ꓘꓳ ꓢꓲ꓾ ꓡꓲ ꓗꓪ ꓥꓪ ꓠꓴꓽ ꓓꓵꓽ ꓡꓰ ꓠꓬ ꓬꓲ ꓪꓽ ꓠꓽ ꓦꓲ ꓗꓪ ꓬꓲꓼ ꓙꓰꓳ꓿ 7 ꓥꓪ ꓠꓴꓽ ꓠꓽ ꓕꓲ-ꓬ ꓗꓪ ꓐꓰ ꓡꓲ ꓜꓶꓽ ꓙꓰ ꓠꓬ꓾ ꓕꓳ-ꓡꓲ-ꓟꓰ-ꓪꓴꓽ ꓘꓹ ꓒꓱ ꓗꓪ ꓛꓲ ꓬꓰꓳ꓿ ꓖꓳ ꓗꓪ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓒꓵꓽ ꓗ ꓬꓰ ꓢꓲ꓾ ꓖꓳ ꓗꓪ ꓬꓲ ꓪˍ ꓐꓰ ꓕꓲ ꓠꓬꓲ ꓔꓬ ꓗꓷꓳ꓿ 8 ꓗꓸ ꓠꓯꓸ ꓕꓲ ꓠꓬꓲ ꓥꓪ ꓠꓴꓽ ꓠꓬ ꓢꓲ-ꓢ-ꓡꓰ ꓗꓪ ꓛꓲ ꓬꓰ ꓢꓲ꓾ ꓶꓼ ꓓꓳ ꓫꓱꓹ ꓓꓳ ꓟꓸ ꓒ ꓒꓲ-ꓡꓲ ꓦꓲ ꓗꓪ ꓓꓵꓽ ꓙꓰꓳ꓿ ꓬꓲ ꓠꓬ ꓟꓬꓱꓽ ꓙ ꓒ ꓫꓵꓽ ꓣꓳ ꓗꓪ ꓟ ꓕꓲ ꓣꓳ ꓥ ꓡꓳ꓿ 9 ꓕꓱ ꓕꓲ ꓣꓳ ꓠꓬ ꓟꓷꓽ ꓠꓷꓹ ꓝꓸˍ ꓟ ꓮꓸ ꓟꓲ ꓤ ꓟꓶ ꓡꓯꓸ ꓡꓲꓸ ꓣꓳ ꓙꓳˍ ꓡꓳ꓿ 10 ꓥꓪ ꓠꓴ ꓖꓳ ꓗꓪ ꓮꓽ ꓟꓬꓹ ꓠꓬꓲ ꓔꓬ ꓗꓷ ꓠꓬ꓾ ꓯ-ꓖ-ꓑꓴ ꓟꓬꓱ ꓔ ꓟ ꓟꓷꓽ ꓠꓷꓹ ꓝꓸ ꓢꓴ ꓕꓲ ꓣꓳ ꓬꓴ-ꓔ ꓟꓵꓽ ꓗꓪ ꓐꓰ ꓬꓯꓼ ꓡ ꓡꓳ꓿ 11 ꓬꓲ ꓠꓬ ꓥꓪ ꓠꓴꓽ ꓔꓯ ꓡ ꓢꓲ꓾ ꓒꓳ-ꓡꓳ ꓙꓽ ꓧꓷꓹ ꓣꓴ ꓢꓲ ꓠꓬꓲ꓾ ꓬꓲ ꓚꓲ ꓛꓬ ꓛꓲ ꓒꓯꓹ ꓡꓯꓼ ꓒꓯꓹ ꓗꓪ ꓞꓳꓹ ꓢꓲ꓾ ꓕꓱ ꓟ ꓡꓰ ꓐꓰ ꓙꓽ ꓧꓷꓹ ꓕꓱ ꓕꓲ ꓚꓱꓹ ꓬꓲ ꓢꓲ ꓒ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓬꓴ-ꓔ ꓡ ꓞꓳ ꓡꓰ ꓞꓳꓹ ꓢꓲ꓾ ꓐꓶ ꓞꓳ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷˍ ꓥꓳ꓾ ꓐꓰ ꓢꓲ-ꓫꓬ-ꓟ-ꓦ ꓡꓰ ꓐꓯˍ ꓡꓳ꓾ ꓐꓰ ꓐꓯˍ ꓡꓳ꓿ 12 ꓕꓱ ꓟ ꓑ ꓙꓽ ꓗꓷ ꓠꓬ꓾ ꓥꓪ ꓠꓴˍ ꓐꓰ ꓖꓳ ꓗꓪ ꓔꓬ ꓢꓴ ꓐꓴ ꓡꓰ ꓒꓳ-ꓡꓳ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓟꓽ ꓓꓯ ꓙꓰ ꓠꓹ ꓟ ꓮꓽ ꓘꓶꓸ ꓓꓰꓽ ꓗꓷꓳ꓿ 13 ꓖꓳ ꓕꓯ ꓒꓳ-ꓡꓳ ꓡꓰ꓾ ꓮꓸ ꓫꓵ ꓪꓴꓸ ꓠꓬꓲ ꓠꓴ ꓪꓽ ꓥꓴꓻ ꓢꓲ ꓥꓪ ꓔꓯ ꓠꓲꓹ ꓟ ꓫꓸ ꓡꓰ ꓝꓲˍ ꓡ? ꓢꓲ ꓒ ꓬꓰ-ꓢꓴ ꓟꓬꓱ ꓐꓱ ꓶ ꓥꓪ ꓔꓯ ꓞꓳꓹˍ ꓟˍ ꓡꓰ ꓟꓽ ꓞꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓫꓵꓻ ꓠꓹ ꓟˍ ꓟꓲ ꓥꓪ ꓙꓽ ꓖꓶ ꓔ ꓡꓳ꓾ ꓐꓯ ꓖꓶ ꓡꓺꓳ꓿ 14 ꓥꓪ ꓠꓴꓽ ꓠꓬ ꓬꓲ ꓔꓯ ꓘꓶꓸ ꓧꓪꓸ ꓡꓰ ꓟꓽ ꓘꓴꓻ ꓠꓬꓲ꓾ ꓢꓲ ꓒ ꓠꓲꓹ ꓡꓶꓽ ꓒꓬꓱꓼ ꓡ ꓝꓲ꓾ ꓐꓯ ꓢꓲ꓾ ꓠꓽ ꓗꓷꓳ꓿ 15 ꓖꓳ ꓗꓸ ꓠꓯꓸ ꓥꓪ ꓠꓴꓽ ꓶꓻ ꓖꓴ ꓢꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰꓳ꓿ 16 ꓢꓲ-ꓢ-ꓡꓰ ꓗꓪ ꓔꓬ ꓟ ꓢꓲ ꓤ ꓐꓴ ꓕꓲ ꓐꓱˍ ꓟꓲ ꓥꓪ ꓠꓴ ꓔꓯ ꓛꓳ ꓙꓰ ꓡ ꓢꓲ꓾ ꓬꓰ-ꓢꓴ ꓔꓯ ꓟꓶ ꓤ ꓦ ꓡꓱ ꓗꓷ ꓟ꓾ ꓢ-ꓑꓴ-ꓣ ꓢꓴ ꓠ-ꓢꓳ-ꓠ ꓦꓲ ꓗꓪ ꓬꓲˍ ꓐꓰ ꓔꓬ ꓠ ꓟ ꓧꓳꓽ ꓙꓰ ꓡꓺꓳ꓿ 17 ꓙꓱ-ꓣꓴ-ꓢ-ꓡꓱ ꓗꓪ ꓛꓲ ꓡ ꓠꓬ꓾ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓥꓪ ꓠꓴꓽ ꓔꓯ ꓠꓲꓹ ꓒꓴ ꓒꓴˍ ꓐꓰ ꓘꓳ ꓣꓴ ꓡꓺꓳ꓿ 18 ꓗꓸ ꓠꓯꓸ ꓕꓲ ꓠꓬꓲ ꓒꓳ-ꓡꓳˍ ꓐꓰ ꓥꓪ ꓠꓴꓽ ꓠꓬ ꓬ-ꓗꓴ ꓔꓬ ꓗꓪ ꓔꓱꓹ ꓠꓬꓲ ꓙꓰꓳ꓿ ꓖꓳ ꓗꓪ ꓟꓬꓱꓽ ꓡꓳꓸ ꓢꓴ ꓐꓴ ꓮꓽ ꓙꓵˍ ꓟꓲ ꓜꓲꓼ ꓞꓹ ꓡꓳ꓿ 19 ꓒꓳ-ꓡꓳ ꓡꓰ ꓬꓲ ꓪꓽ ꓔꓯ ꓒꓵꓽ ꓗ ꓬꓰ ꓗꓷ ꓠꓬ꓾ ꓬꓲ ꓬꓰˍ ꓟ ꓟꓬꓱꓽ ꓗꓪ ꓐꓰ ꓪꓴ-ꓢ ꓡꓰ ꓐꓶꓽ ꓞꓳ ꓗꓳ ꓡꓳ ꓗꓪ ꓬꓰ ꓗꓷ ꓟ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓐꓯ ꓟꓸ ꓖꓶˍ ꓡꓳ꓿ 20 ꓖꓳ ꓟ ꓬꓲ ꓪꓽ ꓑ ꓙꓽ ꓗꓷ ꓠꓬ ꓪꓴ-ꓢ ꓔꓯ ꓫꓱꓸ ꓖꓶ ꓢꓲ꓾ ꓮ ꓬꓲꓼꓳ꓾ ꓬꓴ-ꓔ ꓡ ꓞꓳ ꓗꓳ ꓡꓳ ꓗꓪ ꓙꓵꓻ ꓢꓴ ꓬꓲ ꓔꓴ ꓬꓲ ꓟꓶꓽ ꓣꓳ ꓙꓳ ꓢꓲ꓾ ꓬꓲ ꓪꓽ ꓮꓽ ꓙꓵ ꓠꓬ ꓙꓵꓽ ꓗ ꓔꓯꓸ ꓟꓳꓸ ꓠꓲꓹ ꓟ ꓡꓱꓻ ꓢꓴ ꓥ ꓟ ꓠꓴ ꓪꓽ ꓢꓷˍ ꓡꓳ꓿ 21 ꓖꓳ ꓡꓱ ꓢꓲ ꓠꓴ ꓠꓬ ꓐꓶꓽ ꓞꓳ ꓗꓳ ꓡꓳ ꓗꓪ ꓔꓬ ꓟ ꓬꓴ-ꓔ ꓡ ꓞꓳ ꓐꓴ ꓮꓽ ꓙꓵ ꓔꓯ꓾ ꓟꓳ-ꓫꓲ ꓔꓯ ꓡꓳꓺ ꓦ ꓗꓷ ꓠꓹ ꓟ ꓐꓰ꓾ ꓬꓲ ꓪꓽ ꓤ ꓠꓱ ꓤ ꓐꓴ ꓔꓯ ꓶˍ ꓟ ꓗ ꓫꓵ ꓟꓽ ꓬꓰ ꓬꓰ ꓣꓳꓽ ꓗ ꓫꓵ ꓔꓯˍ ꓟꓲ ꓡꓳ ꓗꓷ ꓠꓹ ꓟ ꓟꓸ ꓖꓶˍ ꓡꓳ꓾ ꓐꓰ ꓠꓴ ꓔꓯ ꓚ ꓢꓴ ꓙꓳˍ ꓡꓳ꓿ 22 ꓖꓳ ꓡꓱ ꓥ ꓠꓬ ꓮ ꓟꓶ ꓣꓳ ꓮ ꓡꓲ ꓬꓰ ꓠꓯꓹ ꓡ? ꓠꓴ ꓡ ꓗꓷ ꓟ ꓠꓬ ꓮ ꓡꓲ ꓗꓹ ꓟꓲ ꓬꓲ ꓪꓽ ꓑ ꓙꓽ ꓡꓰˍ ꓥꓳ꓿ 23 ꓖꓳ ꓡꓱ ꓠꓬꓲ ꓮ ꓟꓶ ꓠꓴ ꓠꓬ ꓕꓱ ꓡꓱ ꓬꓰ꓿ ꓥꓪ ꓠꓴꓽ ꓗꓳ ꓡꓳ ꓗꓪ ꓪꓵꓼ ꓔ ꓟ ꓡ ꓞꓳ ꓡꓲꓸ ꓣꓳ ꓔꓬ ꓡꓳ꓿ 24 ꓬꓲ ꓪꓽ ꓔꓯ ꓧꓳꓽ ꓔ ꓢꓲ꓾ ꓠꓴ ꓚꓲ ꓛꓬ ꓔꓯˍ ꓟꓲ ꓬꓲ ꓪꓽ ꓔꓯˍ ꓟꓲ ꓢꓲꓽ ꓫꓬ ꓡꓰ ꓝꓲ ꓢꓲ꓾ ꓬꓲ ꓪꓽ ꓪꓴꓸ ꓓꓵ ꓛꓳꓹ ꓒꓵꓽ ꓠꓬ ꓠꓴ ꓓꓳ꓿ ꓖꓳ ꓡꓱ ꓠꓬ ꓠꓴ ꓔꓯ ꓚˍ ꓟ ꓕꓱ ꓟꓬ ꓫꓵꓽ ꓠꓬ ꓚꓵ ꓚꓵ ꓟꓽ ꓥ ꓟ ꓐꓰ꓾ ꓠꓴ ꓠꓽ ꓣꓳꓽ ꓗ ꓫꓵˍ ꓐꓰ ꓙꓵꓽ ꓗ ꓔꓯ ꓒꓵꓽ ꓛꓳˍ ꓟ ꓬꓲ ꓪꓽ ꓮꓽ ꓙꓵ ꓢꓷꓸ ꓡꓰˍ ꓥꓳ꓿ 25 ꓖꓳ ꓡꓱ ꓥ ꓟꓲ ꓢꓲ ꓒ ꓔꓯ ꓙꓵꓻˍ ꓟ ꓐꓶ ꓞꓳ ꓐꓴ ꓔꓯ ꓠꓬ꓾ ꓠꓲꓽ ꓐꓬꓱꓽ ꓔꓯ ꓔꓲ ꓗꓷ ꓟ ꓐꓰ꓾ ꓫꓵꓽˍ ꓐꓰ ꓧꓶꓽ ꓛꓵꓽ ꓫꓵ ꓟ ꓧꓪꓽˍ ꓐꓰ꓾ ꓟꓽ ꓢꓲ ꓟꓽ ꓫꓬ ꓟ ꓔꓯ ꓚꓲꓸ ꓠꓹ ꓟ꓾ ꓥꓪ ꓠꓴ ꓐꓯ ꓞꓷꓹ ꓢꓲ꓾ ꓕꓳ ꓶ ꓐꓳ ꓩꓴ ꓗꓷꓳ꓾ ꓐꓯˍ ꓡꓳ꓿ 26 ꓖꓳ ꓗꓸ ꓠꓯꓸ ꓕꓲ ꓠꓬꓲ ꓒꓳ-ꓡꓳ ꓠꓬ ꓖꓳ ꓡꓲꓸ ꓣꓳˍ ꓐꓰ ꓕꓲ ꓛꓳꓺꓼ ꓢꓲꓽ ꓫꓬ ꓡꓰˍ ꓟ ꓗ ꓫꓵ ꓬꓰ ꓢꓲ꓾ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓙꓰ ꓢꓲ ꓠꓬꓲ꓾ ꓢꓲꓽ ꓫꓬ ꓡꓰ ꓝꓲˍ ꓟ ꓦꓬꓼ ꓠꓬꓲ ꓮ ꓕꓯ ꓐꓲ ꓡ ꓟ ꓐꓰ꓾ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓐꓱ ꓶ ꓔꓲ ꓓꓴ ꓙꓽ ꓖꓶ ꓝꓲ ꓠꓹ ꓟ ꓔꓲ ꓒ ꓔꓯ ꓐꓯ ꓖꓶ ꓬꓰˍ ꓡꓳ꓿ 27 ꓫꓵꓽ ꓠꓬꓲ ꓮꓽ ꓡ ꓡꓳꓹ ꓬꓰ ꓕꓯ꓾ ꓮ-ꓢꓲ-ꓬ ꓗꓪ ꓐꓰ ꓡꓻ ꓟ ꓬꓴ-ꓔ ꓡ ꓞꓳ ꓕꓲ ꓐꓱ ꓡꓰ ꓢꓲꓽ ꓫꓬ ꓦꓲ ꓗꓪ ꓒꓳ-ꓡꓳ ꓔꓬ ꓟ ꓔꓯ ꓟꓳˍ ꓕꓯ꓾ ꓬꓲ ꓪꓽ ꓡꓰ ꓞꓳ ꓜꓴꓻ ꓔꓯ ꓡꓵꓹ ꓢꓴ ꓢꓲ ꓒꓳ-ꓡꓳ ꓔꓯ ꓣꓴ ꓢꓲ ꓠꓬꓲ꓾ 28 ꓬꓲ-ꓢꓷ-ꓡꓰ ꓡ ꓞꓳ ꓐꓴꓳ꓾ ꓬꓰ ꓙ ꓡꓯ꓿ ꓡ ꓞꓳ ꓕꓱ ꓕꓲ ꓣꓳ ꓠꓽ ꓮ ꓡꓲ ꓗꓪˍ ꓟꓲ ꓬꓲ-ꓢꓷ-ꓡꓰ ꓡ ꓞꓳˍ ꓐꓰ꓾ ꓟꓳ-ꓫꓲ ꓙꓵꓽ ꓗˍ ꓐꓰ ꓢꓲꓽ ꓫꓬ ꓦꓲ ꓔꓯ ꓒꓳꓹ ꓔꓳꓹˍ ꓟ ꓟꓸ ꓟꓲꓽ ꓟꓸ ꓖꓶ ꓢꓴ ꓥ ꓡꓳ꓿ ꓝꓮꓲ ꓬꓲ ꓠꓬ ꓦꓲ-ꓡꓲ ꓡ ꓞꓳ ꓔꓯ ꓢꓲꓽ ꓫꓬ ꓦꓲ ꓗꓪ ꓧꓳꓽ ꓓꓵ ꓡ ꓢꓲ꓾ ꓢꓲꓽ ꓫꓬˍ ꓟ ꓕꓱ ꓕꓲ ꓖꓺ ꓔꓯ ꓟꓽ ꓫꓬꓻ ꓟ ꓗꓷ ꓡꓰ ꓝꓲꓳ꓾ ꓐꓰ ꓘꓴˍ ꓡꓳ꓿ 29 (ꓕꓱ ꓟ ꓠꓬ ꓬꓲ-ꓩꓴ-ꓢꓳ ꓢꓴ ꓕꓷ-ꓡꓳ-ꓩꓴ-ꓟꓴ ꓠꓽ꓾ ꓒꓳ-ꓡꓳˍ ꓐꓰ ꓕꓲ ꓪꓺꓼ ꓡꓳ ꓒꓱ ꓗꓪ ꓔꓬ ꓟ ꓔꓯ ꓬꓲ ꓪꓽ ꓟꓳꓻ ꓗꓷ ꓢꓲ꓾ ꓒꓳ-ꓡꓳ ꓡꓰ ꓬꓲ ꓔꓯ ꓢꓲꓽ ꓫꓬ ꓦꓲ ꓗꓪ ꓧꓳꓽ ꓓꓵ ꓡꓰ ꓝꓲꓳ꓾ ꓐꓰ ꓓꓵꓽ ꓙ ꓠꓬꓲ ꓬꓲ ꓪꓽ ꓕꓱ ꓡꓱ ꓐꓯˍ ꓟ ꓥꓳ꓿) 30 ꓖꓳ ꓕꓯ ꓕꓲ ꓡꓳ ꓒꓱ ꓡꓱꓸꓼ ꓢꓴ ꓔꓴ ꓡ ꓢꓲ꓾ ꓑ ꓫꓬꓼ ꓐꓴ ꓔꓷꓹ ꓜꓲꓼ ꓡ ꓢꓲ ꓠꓬꓲ ꓒꓳ-ꓡꓳ ꓔꓯ ꓣꓴ ꓢꓲ꓾ ꓢꓲꓽ ꓫꓬ ꓦꓲ ꓗꓪ ꓐꓰ ꓖꓳꓻ ꓓꓳ ꓡ ꓠꓬ ꓞꓼ ꓐꓰ ꓗ ꓘꓶꓽ ꓚꓵꓸ ꓗꓷˍ ꓡꓳ꓿ 31 ꓬꓲ ꓪꓽ ꓡꓰ ꓬꓲ ꓔꓯ ꓢꓰꓼˍ ꓐꓰ ꓬꓰ ꓔꓬ ꓕꓯ ꓟꓯꓼ ꓕꓲ ꓔꓴ ꓙꓵꓽ ꓒ ꓔꓯ꓾ ꓙꓱ-ꓣꓴ-ꓢ-ꓡꓱ ꓕꓲ ꓡꓳ ꓒꓱ ꓡꓱꓸꓼ ꓢꓴ ꓔꓬ ꓟ ꓓꓳꓽ ꓐꓯ ꓖꓶ ꓙꓰ ꓢꓴ ꓙꓳˍ ꓡꓳ꓿ 32 ꓖꓳ ꓡꓱ ꓠꓬ ꓞꓼ ꓐꓰ ꓬꓲ ꓟꓯꓼ ꓕꓲ ꓦꓬꓻ ꓙꓵꓽ ꓢꓴ ꓐꓴˍ ꓐꓰ ꓟꓯꓼ ꓤ ꓐꓴ ꓔꓯ ꓧꓳꓽ ꓔ ꓢꓲ ꓬꓲ ꓪꓽ ꓔꓬ ꓗꓪ ꓔꓷꓹ ꓬꓯꓼ ꓙꓰˍ ꓡꓳ꓿ ꓢꓴ ꓔꓬꓹ ꓟ ꓑ ꓫꓬꓼ ꓐꓴ ꓡꓰ ꓟꓯꓼ ꓕꓲ ꓔꓴ ꓙꓵꓽ ꓒˍ ꓐꓰ ꓟꓯꓼ ꓤ ꓐꓴ ꓔꓯ ꓟꓳꓻ ꓗꓷ ꓠꓬ꓾ ꓒꓳ-ꓡꓳ ꓔꓯ ꓓꓶꓽˍ ꓟ ꓠꓽ ꓗꓷˍ ꓡꓳ꓿ 33 ꓟꓯꓼ ꓕꓲ ꓔꓴ ꓙꓵꓽ ꓒ ꓡꓰ꓾ ꓒꓳ-ꓡꓳ ꓔꓯ ꓣꓴ ꓢꓲ ꓧꓳꓻ ꓫꓱ ꓚ ꓠꓬꓲꓽ ꓚꓱꓹ ꓡꓰ ꓞꓳꓹ ꓠ ꓟ ꓕꓵꓼ ꓪ ꓖꓶˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓮꓽ ꓟ ꓥ ꓟ ꓐꓰ ꓬꓲ ꓮꓸ ꓫꓵ ꓬꓰ ꓗꓷ ꓟ ꓠ ꓠꓬꓲˍ ꓡꓳ꓿ 34 ꓞꓳ ꓜꓴ ꓠꓬ ꓕꓲ ꓧꓳꓽ ꓕꓲ ꓫꓵꓽ ꓘꓴ ꓢꓲ ꓮꓽ ꓘꓶꓸ ꓢꓴ ꓔꓬ ꓟ ꓗꓪ ꓐꓰ꓾ ꓬꓲ ꓠꓬ ꓫꓵꓽ ꓪꓴꓻ ꓟꓰꓹ ꓠ ꓠꓬꓲ ꓟꓶ ꓟꓽ ꓓ ꓠꓬꓲ꓾ ꓒꓳ-ꓡꓳ ꓔꓯ ꓟꓯꓼ ꓙꓻ ꓗꓪ ꓧꓳꓽ ꓙꓰ ꓠ ꓟ ꓕꓵꓼ ꓪ ꓖꓶˍ ꓡꓳ꓿ 35 ꓒꓳ-ꓡꓳ ꓠꓬ ꓟꓯꓼ ꓙ ꓗꓪ ꓟ ꓓꓯꓺ ꓙꓱꓻ ꓗꓪ ꓛꓲ ꓬꓰ ꓕꓯ꓾ ꓡ ꓞꓳ ꓬꓲ ꓜꓴꓻ ꓕꓳꓽ ꓡ ꓠꓬꓲ ꓬꓲ ꓔꓯ ꓟꓯꓼ ꓤ ꓐꓴ ꓡꓰ ꓑꓱꓸ ꓔꓯꓹ ꓙꓰ ꓠ ꓗꓷ ꓡꓰˍ ꓡꓳ꓿ 36 ꓖꓳ ꓡꓱ ꓢꓲ ꓞꓳ ꓜꓴꓻ ꓠꓬ ꓒꓳ-ꓡꓳ ꓔꓯ ꓖꓼ ꓡ ꓢꓲ꓾ ꓬꓲ ꓔꓯ ꓢꓰꓼ ꓩꓴ ꓗꓷ꓾ ꓐꓰ ꓘꓴˍ ꓡꓳ꓿ 37 ꓒꓳ-ꓡꓳ ꓔꓯ ꓟꓯꓼ ꓙ ꓗꓪ ꓧꓳꓽ ꓓꓵꓽ ꓙꓰˍ ꓐꓰ ꓬꓰˍ ꓕꓯ ꓬꓲ ꓡꓰ ꓟꓯꓼ ꓕꓲ ꓔꓴ ꓙꓵꓽ ꓒ ꓔꓯ꓾ ꓠꓴꓻ ꓔꓯ ꓥꓪ ꓕꓲ ꓘꓶ ꓫꓸ ꓕꓱ ꓓꓻˍ ꓡ? ꓐꓰ ꓠ ꓠꓬꓲˍ ꓡꓳ꓿ ꓟꓯꓼ ꓢꓲꓽ ꓒ ꓡꓰ ꓒꓳ-ꓡꓳ ꓔꓯ꓾ ꓠꓴ ꓦꓲ-ꓡꓲ ꓥꓳꓽ ꓢꓷˍ ꓡ? 38 ꓮꓽ ꓠꓬꓲꓻ ꓟꓶ ꓤ ꓟꓽ ꓥ ꓕꓯ꓾ ꓡ ꓞꓳ ꓢꓰꓼ ꓢꓴ ꓡꓲꓸ ꓔꓴ ꓣꓳ ꓔꓯ ꓒꓳꓹ ꓔꓳꓹ ꓠꓹ ꓟ ꓢꓴ ꓔꓴ ꓡ ꓝꓲ ꓢꓲ꓾ ꓡꓲ ꓛꓲ ꓗꓪ ꓧꓳꓽ ꓙꓰ ꓢꓴ ꓬꓲ-ꓙꓲ ꓡ ꓞꓳ ꓖꓳ ꓕꓲ ꓣꓳ ꓠꓬ ꓠꓴ ꓟꓽ ꓥ ꓡ? ꓐꓰ ꓠ ꓠꓬꓲˍ ꓡꓳ꓿ 39 ꓖꓳ ꓕꓯ ꓒꓳ-ꓡꓳ ꓡꓰ꓾ ꓥꓪ ꓠꓬ ꓚꓲ-ꓡꓲ-ꓚꓬ ꓟꓵ ꓕ-ꓢꓴꓽ ꓡꓳ ꓒꓱ ꓗꓪ ꓦꓵꓻ ꓔ ꓟ ꓬꓴ-ꓔ ꓡ ꓞꓳ ꓥ ꓡꓳ꓿ ꓕ-ꓢꓴꓽ ꓡꓳ ꓒꓱ ꓠꓬ ꓟꓬꓱ ꓓꓳꓽ ꓙꓳˍ ꓟ ꓡꓳ ꓒꓱ ꓥꓳ꓿ ꓖꓳ ꓡꓱ ꓠꓬꓲ ꓑ ꓫꓬꓼ ꓐꓴ ꓔꓯ ꓫ ꓕꓱ ꓠꓹ ꓟ ꓥꓪ ꓔꓯ ꓕꓵꓼ ꓪ ꓖꓶ ꓡꓯ꓾ ꓐꓰ ꓠꓴ ꓔꓯ ꓥꓪ ꓓꓰꓽˍ ꓥꓳ꓾ ꓐꓯˍ ꓡꓳ꓿ 40 ꓟꓯꓼ ꓢꓲꓽ ꓒ ꓬꓲ ꓔꓯ ꓓꓽ ꓔꓳꓹ ꓗꓷ ꓠꓬ꓾ ꓒꓳ-ꓡꓳ ꓠꓽ ꓓꓯꓺ ꓙꓱ ꓗꓪ ꓦꓰꓼ ꓞ ꓢꓲ ꓑ ꓫꓬꓼ ꓐꓴ ꓔꓯ ꓡꓯꓼ ꓒꓯꓹ ꓶꓹ ꓖꓶ ꓢꓲ ꓠꓬꓲ꓾ ꓬꓲ ꓪꓽ ꓢꓲ ꓡꓲ ꓐꓰ ꓗꓷ ꓡꓰ ꓠꓬ꓾ ꓦꓲ-ꓐꓱ-ꓣꓴ ꓥꓳꓽ ꓡꓰ ꓬꓲ ꓪꓽ ꓔꓯ ꓕꓱ ꓡꓱ ꓐꓯˍ ꓡꓳ꓾

ꓝꓲ-ꓓꓴ 22

1 ꓬꓲꓼ ꓤ ꓠꓬꓲ ꓤˍ ꓐꓰ ꓮꓽ ꓐꓽ ꓐꓴꓳ꓾ ꓮ ꓟꓶ ꓥꓪ ꓒꓶꓻ ꓔꓳꓹ ꓘꓶꓽ ꓔꓯ ꓠꓴ ꓪꓽ ꓠ ꓠꓹ꓾ ꓐꓯˍ ꓡꓳ꓿ 2 ꓒꓳ-ꓡꓳ ꓡꓰ ꓬꓲ ꓪꓽ ꓔꓯ ꓦꓲ-ꓐꓱ-ꓣꓴ ꓥꓳꓽ ꓗꓪ ꓫ ꓕꓱ ꓔꓬ ꓟ ꓔꓯ ꓑ ꓙꓽ ꓗꓷ ꓠꓬ ꓧꓶꓸ ꓕꓯ ꓢꓶꓸ ꓟꓽ ꓞꓲ ꓢꓲ ꓡꓲ ꓐꓰ ꓗꓷ ꓡꓰꓳ꓿ ꓖꓳ ꓕꓯ ꓒꓳ-ꓡꓳ ꓡꓰ꓾ 3 ꓥꓪ ꓠꓬ ꓚꓲ-ꓡꓲ-ꓚꓬ ꓟꓵ ꓕ-ꓢꓴꓽ ꓗꓪ ꓦꓵ ꓔ ꓟ ꓬꓴ-ꓔ ꓡ ꓞꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓕꓱ ꓟ ꓗꓪ ꓖ-ꓟ-ꓡꓲ-ꓬ ꓡꓯꓼ ꓒꓯꓹ ꓗꓪ ꓣꓳ ꓒꓵꓽ ꓒ ꓐꓴ ꓙꓵꓽ ꓗ ꓮꓽ ꓙꓵ ꓢꓳꓺ ꓟꓶ ꓡꓰ ꓢꓲ꓾ ꓠꓬꓲꓸ ꓠꓬꓲ ꓠꓴ ꓪꓽ ꓮꓽ ꓙꓵ ꓢꓴˍ ꓡꓰ ꓐꓰ ꓪꓴ-ꓢ ꓐꓱ ꓶ ꓠꓲꓹ ꓟ ꓡꓱꓻ ꓢꓴ ꓥ ꓡꓳ꓿ 4 ꓥꓪ ꓡꓰ ꓕꓱ ꓕꓲ ꓚꓱꓹ ꓚ ꓢꓴ ꓔꓯ ꓫꓵꓻ ꓝꓲ ꓠ ꓛꓲ ꓗꓸ ꓧꓪ ꓗꓷꓳ꓿ ꓞꓳ ꓑ ꓤ ꓔꓯ ꓥ ꓟꓲ꓾ ꓤꓽ ꓟꓶ ꓤ ꓔꓯ ꓥ ꓟꓲ꓾ ꓞꓳꓹ ꓢꓲ ꓐꓱ ꓓꓴꓽ ꓗꓪ ꓐꓱ ꓗꓷꓳ꓿ 5 ꓔꓲ ꓒ ꓓꓽ ꓟ ꓐꓰ ꓞꓳ ꓪꓴꓽ ꓞꓳ ꓔꓲ ꓕꓲ ꓜꓲꓼ ꓓꓴ ꓡꓱꓸꓼ ꓠꓬ ꓥꓪ ꓐꓱ ꓶ ꓕꓱ ꓟ ꓔꓯ ꓟꓳꓸ ꓢꓷꓸ ꓙ ꓟꓳ ꓙ ꓐ ꓡ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓡꓰ ꓔ-ꓟ-ꓢꓷ ꓗꓪ ꓔꓬ ꓟ ꓬꓴ-ꓔ ꓡ ꓞꓳ ꓐꓴ ꓔꓯ ꓐꓳˍ ꓟ ꓕꓵꓼ ꓪ ꓕꓳ ꓶ ꓥꓪ ꓟꓶ ꓗꓷ ꓠꓬ꓾ ꓥꓪ ꓠꓽ ꓖꓳ ꓗꓪ ꓟ ꓢꓲ ꓤ ꓐꓴ ꓔꓯ ꓞꓳꓹ ꓢꓲ꓾ ꓕꓻ ꓙꓱ-ꓣꓴ-ꓢ-ꓡꓱ ꓗꓪ ꓧꓳꓽ ꓔꓯꓹ ꓡ ꓢꓲ ꓠꓬꓲ ꓬꓲ ꓪꓽ ꓔꓯ ꓛꓬ ꓒꓵꓽ ꓖꓶ ꓝꓲ ꓠꓹ ꓟ ꓔ-ꓟ-ꓢꓷ ꓗꓪ ꓙꓰꓳ꓿ 6 ꓔ-ꓟ-ꓢꓷ ꓗꓪ ꓥꓪ ꓛꓲ ꓬꓰˍ ꓐꓰ ꓗꓹ ꓕꓯ꓾ ꓮꓽ ꓡ ꓟꓳꓼ ꓡꓳ ꓔꓱ ꓫꓵ ꓗꓪ ꓞꓼ ꓐꓰ ꓟꓴꓽ ꓗꓪ ꓗꓪ ꓐꓰ ꓠꓬꓲ ꓟꓳ ꓓꓴ ꓓꓽ ꓟ ꓥꓪ ꓚꓳ ꓡꓳ ꓗꓪ ꓤꓰꓽ ꓩꓴ ꓡꓺꓳ꓿ 7 ꓖꓳ ꓕꓯ ꓥꓪ ꓟꓲ ꓛꓬ ꓗꓪ ꓓꓳꓽ ꓡꓰ ꓠꓬ꓾ ꓢꓳ-ꓡꓳꓺꓳ꓾ ꓢꓳ-ꓡꓳꓺꓳ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓗꓸ ꓧꓪꓺˍ ꓡ? ꓐꓰ ꓐꓯˍ ꓟ ꓢꓯꓼ ꓥꓪ ꓑ ꓙꓽˍ ꓡꓳ꓿ 8 ꓥꓪ ꓡꓰ꓾ ꓢꓲ ꓒꓽꓳ꓾ ꓠꓴ ꓮꓽ ꓟ ꓥ ꓡ?꓾ ꓐꓰ ꓠ ꓠꓬꓲ ꓗꓷ ꓠꓬ꓾ ꓥꓪ ꓠꓬ ꓠꓴ ꓡꓰ ꓗꓸ ꓧꓪ ꓔꓬ ꓟ ꓠ-ꓢ-ꓡꓱ ꓢꓴ ꓬꓰ-ꓢꓴ ꓥ ꓡꓳ꓾ ꓐꓰ ꓒꓳꓹ ꓖꓶ ꓡꓺꓳ꓿ 9 ꓖꓳ ꓕꓯ ꓥꓪˍ ꓐꓰ ꓕꓲ ꓪꓺꓼ ꓔꓬ ꓢꓴ ꓐꓴ ꓠꓬ ꓠꓬꓲ ꓟꓳ ꓓꓴ ꓔꓯ ꓟꓳˍ ꓟꓲ꓾ ꓥꓪ ꓔꓯ ꓫꓸ ꓕꓱ ꓢꓴ ꓢꓯꓼ ꓔꓯ ꓠꓽ ꓬꓲ ꓪꓽ ꓟꓽ ꓙꓽ ꓜꓲꓼ꓿ 10 ꓖꓳ ꓡꓱ ꓠꓬ ꓥꓪ ꓡꓰ꓾ ꓢꓲ ꓒꓽꓳ꓾ ꓥꓪ ꓮꓸ ꓫꓵꓽ ꓬꓰ ꓠꓯꓹ ꓡ? ꓐꓯˍ ꓕꓯ꓾ ꓢꓲ ꓒ ꓡꓰ ꓥꓪ ꓔꓯ꓾ ꓔꓴꓺ ꓢꓲ ꓔ-ꓟ-ꓢꓷ ꓗꓪ ꓓꓵꓽ ꓙꓰ꓿ ꓖꓳ ꓗꓪ ꓠꓴ ꓔꓯ ꓬꓰ ꓝꓲˍ ꓐꓰ ꓝꓰꓹ ꓔ ꓟ ꓮꓽ ꓙꓵ ꓡꓱꓸꓼ ꓐꓯ ꓖꓶ ꓡ ꓥꓳ꓾ ꓐꓯˍ ꓡꓳ꓿ 11 ꓠꓬꓲ ꓟꓳ ꓓꓴ ꓐꓬꓱꓼ ꓡꓱꓼˍ ꓟ ꓗꓪ ꓐꓰ ꓥꓪ ꓠꓬꓲ ꓟꓽ ꓟꓳꓻ ꓗꓷ ꓡꓰ ꓠꓬꓲ꓾ ꓥꓪ ꓛꓳꓽ ꓒꓯꓹ ꓐꓴ ꓡꓰ ꓥꓪ ꓔꓯ ꓖꓳꓻ ꓔ ꓢꓲ ꓔ-ꓟ-ꓢꓷ ꓗꓪ ꓧꓳꓽ ꓙꓰ ꓡꓺꓳ꓿ 12 ꓖꓳ ꓗꓪ ꓠꓬ ꓙꓵꓽ ꓗ ꓔꓯ ꓛꓳ ꓢꓲ ꓠꓲꓹ ꓒꓵꓽ ꓠꓲꓹ ꓡꓱ ꓢꓴ꓾ ꓬꓴ-ꓔ ꓡ ꓞꓳ ꓮꓽ ꓙꓵ ꓢꓴ ꓡꓰ ꓞꓳ ꓒꓵꓽˍ ꓟ꓾ ꓮ-ꓠ-ꓠꓲ-ꓬ ꓟꓬꓱ ꓔ ꓢꓴ ꓕꓲ ꓣꓳ ꓔꓬ ꓡꓳ꓿ 13 ꓬꓲ ꓠꓬ ꓥꓪ ꓒ ꓕꓲꓺꓼ ꓗꓪ ꓦꓰꓼ ꓡ ꓢꓲ꓾ ꓮꓸ ꓬꓲꓼ ꓢꓳ-ꓡꓳꓺꓳ꓾ ꓠꓴ ꓟꓬ ꓢꓶꓽ ꓠꓬꓲ ꓟꓳ ꓡ ꓝꓲ꓾ ꓐꓯ ꓗꓷ ꓠꓬ ꓬꓲ ꓖꓳ ꓕꓲ ꓑꓹ ꓗꓪ ꓥꓪ ꓠꓬꓲ ꓟꓳ ꓡ ꓢꓲ ꓬꓲ ꓔꓯ ꓟꓳꓻ ꓡꓰꓳ꓿ 14 ꓖꓳ ꓕꓯ ꓮ-ꓠ-ꓠꓲ-ꓬ ꓡꓰ꓾ ꓪꓴ-ꓢ ꓠꓲꓹ ꓡꓶꓽ ꓔꓯ ꓢꓷꓸ ꓡꓰ ꓠꓹ ꓟ ꓐꓰ꓾ ꓔꓱꓹ ꓜꓳꓽˍ ꓟ ꓖꓳ ꓕꓲ ꓣꓳ ꓔꓯ ꓟꓳꓻ ꓠꓹ ꓟ꓾ ꓝꓮꓲ ꓬꓲ ꓟꓷ ꓠꓷꓹ ꓗꓪ ꓐꓰ ꓐꓯ ꓓꓳ ꓡ ꓟ ꓐꓯ ꓘꓶ ꓔꓯ ꓠꓴ ꓑ ꓙꓽ ꓟꓶ ꓡꓰ ꓠꓹ ꓟ꓾ ꓣꓳ ꓒꓵꓽ ꓒ ꓐꓴ ꓬꓲ ꓪꓽ ꓪꓴ-ꓢ ꓡꓰ ꓠꓴ ꓔꓯ ꓢꓲ ꓚꓰꓸ ꓗꓷꓳ꓿ 15 ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓬꓲ ꓐꓱ ꓶ ꓞꓳ ꓤ ꓮꓽ ꓙꓵ ꓒꓬꓱꓽ ꓕꓯ ꓗꓪ꓾ ꓠꓴ ꓟꓳˍ ꓟ ꓐꓰ ꓑ ꓙꓽˍ ꓟ ꓔꓯ ꓟꓳꓸ ꓢꓷꓸ ꓙ ꓟꓳ ꓙ ꓢꓴ ꓬꓰˍ ꓥꓳ꓿ 16 ꓮ ꓟꓶ ꓠꓴ ꓮꓸ ꓫꓵꓽ ꓪꓴꓸ ꓠꓬꓲ ꓦꓽ ꓔꓬ ꓡ? ꓔꓴ꓾ ꓖꓳ ꓓꓱ ꓔꓲꓹ ꓢꓲ꓾ ꓠꓴ ꓝꓴꓲ ꓞꓲꓽ ꓫꓬꓻ ꓡꓰ ꓟꓶ ꓠꓹ ꓟ꓾ ꓢꓲ ꓒ ꓟꓬꓱ ꓔꓯ ꓘꓴ ꓓꓰꓽ꓾ ꓐꓯ ꓖꓶ ꓡꓺꓳ꓿ 17 ꓖꓳ ꓗꓸ ꓠꓯꓸ ꓥꓪ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓡ ꓢꓲ꓾ ꓢꓲꓽ ꓫꓬ ꓦꓲ ꓗꓪ ꓪꓽ ꓘꓴ ꓔꓬ ꓕꓯ꓾ ꓟꓯꓹ ꓟꓯꓹ ꓟꓴ ꓗꓷ ꓡꓰ ꓢꓲ ꓠꓬꓲ꓾ 18 ꓢꓲ ꓒ ꓡꓰ ꓥꓪ ꓔꓯ ꓫꓸ ꓕꓱ ꓡ ꓟ ꓔꓯ ꓥꓪ ꓟꓳˍ ꓡꓳ꓿ ꓬꓲ ꓡꓰ ꓥꓪ ꓔꓯ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓮꓸ ꓟꓲꓸ ꓓꓳ ꓙꓰ꓿ ꓮ ꓡꓲꓳ ꓐꓯ ꓠꓬ ꓠꓴ ꓡꓰ ꓥꓪ ꓔꓯꓸ ꓟꓳ ꓢꓷꓸ ꓙ ꓟꓳ ꓙˍ ꓟ ꓔꓯ ꓬꓲ ꓪꓽ ꓟꓽ ꓘꓳ ꓣꓴ ꓡ꓾ ꓐꓯ ꓖꓶ ꓡꓺꓳ꓿ 19 ꓖꓳ ꓡꓱ ꓠꓬ ꓥꓪ ꓡꓰ꓾ ꓢꓲ ꓒꓽꓳ꓾ ꓠꓴ ꓔꓯ ꓙꓵꓻ ꓢꓴ ꓔꓯ ꓥꓪ ꓡꓰ ꓐꓱ ꓓꓴꓽ ꓗꓪ ꓐꓱ ꓗꓷ ꓢꓲ꓾ ꓜꓲꓼ ꓦꓲ ꓥ ꓕ ꓑꓳ ꓗꓪ ꓬꓲ ꓪꓽ ꓔꓯ ꓓꓶꓽ ꓗꓷ ꓟ ꓬꓲ ꓪꓽ ꓢꓷˍ ꓡꓳ꓿ 20 ꓠꓴ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓢꓶ-ꓕꓲ-ꓩ ꓔꓯ ꓢꓰꓼ ꓗꓷˍ ꓕꓯ꓾ ꓥꓪˍ ꓟꓲ ꓒ ꓕꓲꓺꓼ ꓗꓪ ꓦꓰꓼ ꓞꓹ ꓢꓲ ꓓꓽ ꓔꓳꓹ ꓢꓲ ꓠꓬꓲ꓾ ꓬꓲ ꓔꓯ ꓢꓰꓼ ꓢꓴ ꓐꓵ ꓞꓶꓽ ꓔꓯ ꓥꓪ ꓦꓴꓺ ꓠꓬꓹ ꓗꓷꓳ꓾ ꓐꓯ ꓖꓶꓽꓳ꓿ 21 ꓖꓳ ꓕꓯ ꓢꓲ ꓒ ꓡꓰ꓾ ꓙꓰ꓾ ꓮ ꓡꓲꓳ ꓐꓯ ꓠꓬ ꓥꓪ ꓡꓰ ꓠꓴ ꓔꓯ ꓶꓽ ꓤ ꓗꓪ ꓔꓬ ꓟ ꓐꓶꓽ ꓞꓳ ꓐꓴ ꓔꓯ ꓝꓲ ꓩꓴ ꓗꓷˍ ꓥꓳ꓾ ꓐꓯ ꓖꓶ ꓡꓺꓳ꓾ ꓐꓯˍ ꓡꓳ꓿ 22 ꓬꓲ ꓪꓽ ꓠꓬ ꓒꓳ-ꓡꓳ ꓡꓰ ꓕꓱ ꓕꓲ ꓘꓶꓽ ꓐꓯ ꓓꓳ ꓡꓰ ꓗꓪ ꓛꓲ ꓠ ꓠꓹ ꓔꓬ ꓥ ꓟꓲ꓾ ꓖꓳ ꓗꓸ ꓠꓯꓸ ꓬꓲ ꓪꓽ ꓠꓽ ꓢꓯꓼ ꓓꓽ ꓟ ꓡꓰ ꓘꓴ ꓢꓲ꓾ ꓕꓱ ꓡꓱ ꓫꓵꓽ ꓡ ꓞꓳ ꓔꓯ ꓟꓲ ꓠꓯ ꓗꓪ ꓕꓽ ꓔꓬ ꓝꓲ꓾ ꓬꓲ ꓠꓽ ꓢꓯꓸ ꓔꓬ ꓟꓽ ꓒꓵꓽ꓾ ꓐꓯˍ ꓡꓳ꓿ 23 ꓖꓳ ꓡꓱ ꓠꓬ ꓬꓲ ꓪꓽ ꓘꓴꓻ ꓢꓲ ꓐꓵ ꓞꓶꓽ ꓡꓵꓸ ꓡꓳ ꓗꓷ ꓢꓲ ꓠꓬꓲ꓾ ꓠꓱꓸ ꓦꓱꓽ ꓧꓶꓺ ꓠꓬꓲ ꓬꓰ ꓔꓬ ꓕꓯ꓾ 24 ꓟꓯꓼ ꓕꓲ ꓔꓴ ꓙꓵꓽ ꓒ ꓡꓰ ꓒꓳ-ꓡꓳ ꓔꓯ ꓟꓯꓼ ꓙ ꓗꓪ ꓧꓳꓽ ꓓꓵꓽ ꓙꓰ ꓠꓹ ꓟ ꓕꓵꓼ ꓪ ꓖꓶ ꓢꓲ꓾ ꓬꓲ ꓪꓽ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓖꓳ ꓡꓱ ꓘꓴˍ ꓟ ꓢꓷꓸ ꓡꓰ ꓠꓹ ꓟ꓾ ꓬꓲ ꓔꓯ ꓓꓶꓽ ꓢꓲ ꓟꓰꓹ ꓠ ꓠꓬꓲˍ ꓐꓰ ꓬꓰˍ ꓡꓳ꓿ 25 ꓬꓲ ꓔꓯ ꓓꓶꓽ ꓠꓹ ꓟ ꓧꓪꓽ ꓙꓲꓻ ꓚ ꓡꓰ ꓞꓳꓹ ꓗꓷ ꓠꓬ꓾ ꓒꓳ-ꓡꓳ ꓡꓰ ꓒ ꓕꓲꓺꓼ ꓗꓪ ꓦꓰꓼ ꓞꓹ ꓟ ꓟꓯꓼ ꓕꓲ ꓦꓬ ꓙꓵꓽ ꓒ ꓔꓯ꓾ ꓓꓰꓺ ꓘꓶꓽ ꓟꓽ ꓐꓯ ꓞꓷꓹ ꓞꓷꓹ ꓣꓳ-ꓟ ꓡ ꓞꓳ ꓔꓯ ꓓꓶꓽˍ ꓟ ꓗ ꓫꓵ ꓙꓳˍ ꓡ?꓾ ꓐꓰ ꓐꓯ ꓖꓶˍ ꓡꓳ꓿ 26 ꓟꓯꓼ ꓕꓲ ꓦꓬ ꓙꓵꓽ ꓒ ꓕꓱ ꓟ ꓔꓯ ꓑ ꓙꓽ ꓗꓷ ꓠꓬ ꓟꓯꓼ ꓕꓲ ꓔꓴ ꓙꓵꓽ ꓒ ꓔꓯ ꓙꓰ ꓢꓲ꓾ ꓠꓴ ꓮꓸ ꓫꓵ ꓬꓰˍ ꓐꓰ ꓬꓰˍ ꓡ? ꓡ ꓞꓳ ꓕꓱ ꓕꓲ ꓣꓳ ꓠꓬ ꓣꓳ-ꓟ ꓡ ꓞꓳ ꓥ ꓐꓷ꓾ ꓐꓯ ꓖꓶˍ ꓡꓳ꓿ 27 ꓖꓳ ꓡꓱ ꓠꓬ ꓟꓯꓼ ꓕꓲ ꓔꓴ ꓙꓵꓽ ꓒ ꓡ ꓢꓲ ꓒꓳ-ꓡꓳ ꓔꓯ꓾ ꓠꓴ ꓠꓬ ꓣꓳ-ꓟ ꓡ ꓞꓳ ꓥ ꓡ? ꓥꓪ ꓔꓯ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿ ꓒꓳ-ꓡꓳ ꓡꓰ꓾ ꓥ ꓡꓳ꓾ ꓐꓯ ꓖꓶˍ ꓡꓳ꓿ 28 ꓖꓳ ꓕꓯ ꓟꓯꓼ ꓕꓲ ꓔꓴ ꓙꓵꓽ ꓒ ꓡꓰ꓾ ꓥꓪ ꓠꓬ ꓣꓳ-ꓟ ꓡ ꓞꓳ ꓚꓬꓹ ꓟꓶ ꓠꓹ ꓟ ꓒꓴ ꓮꓽ ꓟꓬꓹ ꓓꓳꓺ ꓗꓷꓳ꓾ ꓐꓯˍ ꓡꓳ꓿ ꓒꓳ-ꓡꓳ ꓡꓰ꓾ ꓥꓪ ꓠꓽ ꓦꓵˍ ꓕꓯ ꓡꓰ ꓣꓳ-ꓟ ꓡ ꓞꓳ ꓥ ꓡꓳ꓾ ꓐꓯ ꓖꓶˍ ꓡꓳ꓿ 29 ꓖꓳ ꓕꓯ ꓬꓲ ꓔꓯ ꓟꓰꓹ ꓠ ꓠꓬꓲˍ ꓐꓰ ꓬꓰ ꓔꓬ ꓢꓴ ꓡꓰ ꓒꓳ-ꓡꓳ ꓔꓯ ꓞꓼ ꓐꓰ ꓩꓴ ꓗꓷˍ ꓡꓳ꓿ ꓒꓳ-ꓡꓳ ꓠꓽ ꓣꓳ-ꓟ ꓡ ꓞꓳ ꓥ ꓟ ꓟꓯꓼ ꓕꓲ ꓔꓴ ꓙꓵꓽ ꓒ ꓢꓷꓸ ꓗꓷ ꓠꓬ꓾ ꓬꓲ ꓔꓯ ꓧꓳꓻ ꓚ ꓡꓰ ꓞꓳꓹ ꓗꓷ ꓟ ꓑꓶꓸ ꓓꓴ ꓬꓲ ꓙꓳꓺ ꓡꓰˍ ꓡꓳ꓿ 30 ꓗꓸ ꓠꓯꓸ ꓕꓲ ꓠꓬꓲ ꓠꓬ ꓬꓴ-ꓔ ꓡ ꓞꓳ ꓡꓰ ꓮꓸ ꓫꓵꓽ ꓪꓴꓸ ꓠꓬꓲ ꓒꓳ-ꓡꓳ ꓔꓯ ꓗꓳꓹˍ ꓟ ꓔꓯ ꓟꓳꓸ ꓟꓯꓼ ꓢꓲꓽ ꓒ ꓓꓽ ꓟ ꓜꓲꓺ ꓜꓲ ꓡꓰ ꓢꓷꓸ ꓠꓲꓹ ꓫꓵˍ ꓠꓬꓲ꓾ ꓬꓲ ꓡꓰ ꓒꓳ-ꓡꓳ ꓔꓯ ꓩꓴ ꓗꓷ ꓢꓲ꓾ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓐꓯ ꓟꓴ ꓜꓲꓼ ꓓꓴ ꓓꓽ ꓟ ꓕꓲ ꓜꓲꓼ ꓓꓴ ꓡꓱꓸꓼ ꓜꓲꓼ ꓡ ꓠꓹ ꓟ ꓕꓵꓼ ꓪꓽ ꓖꓶˍ ꓡꓳ꓿ ꓒꓳ-ꓡꓳ ꓔꓯˍ ꓟꓲ ꓧꓳꓽ ꓬꓯꓼ ꓡ ꓢꓲ ꓬꓲ ꓪꓽ ꓟꓲꓽ ꓙꓬ ꓗꓪ ꓦꓰꓼ ꓔꓬ ꓝꓲˍ ꓡꓳ꓿

ꓝꓲ-ꓓꓴ 23

1 ꓖꓳ ꓡꓱ ꓠꓬꓲ ꓒꓳ-ꓡꓳ ꓠꓬ ꓬꓴ-ꓔ ꓐꓯ ꓟꓴ ꓜꓲꓼ ꓓꓴ ꓓꓽ ꓟ ꓞꓳ ꓪꓴꓽ ꓐꓴ ꓔꓯ ꓟꓬ ꓔꓱꓹ ꓡꓳꓸ ꓔ ꓢꓲ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓬ ꓠꓬꓲꓸ ꓠꓬꓲ ꓗꓪ ꓛꓲ ꓪꓴ-ꓢ ꓟꓲꓽ ꓙꓬ ꓗꓪ ꓙꓲˍ ꓟ ꓦꓰꓽ ꓠꓲꓹ ꓡꓰ ꓞꓳꓻ ꓙꓳ ꓗꓷꓳ꓾ ꓐꓯ ꓖꓶˍ ꓡꓳ꓿ 2 ꓖꓳ ꓕꓯ ꓔꓲ ꓒ ꓓꓽ ꓟ ꓮ-ꓠ-ꓠꓲ-ꓬ ꓡꓰ꓾ ꓒꓳ-ꓡꓳ ꓟꓷ ꓠꓷꓹ ꓗꓪ ꓓꓶꓽ ꓠꓹ ꓟ꓾ ꓒ ꓕꓲꓺꓼ ꓗꓪ ꓦꓰꓼ ꓞ ꓢꓴ ꓔꓯ ꓕꓵꓼ ꓪ ꓖꓶˍ ꓡꓳ꓿ 3 ꓒꓳ-ꓡꓳ ꓡꓰ ꓬꓲ ꓔꓯ꓾ Bꓸ ꓘꓴꓽ ꓦ ꓟꓰ ꓔꓸ ꓟ ꓘꓷꓹ ꓛꓲ ꓠꓴꓳ꓾ ꓠꓴ ꓠꓬ ꓙꓵꓽ ꓗ ꓔꓯ ꓛꓳ ꓢꓲ ꓥꓪ ꓔꓯ ꓐꓯ ꓟꓴ ꓘꓶꓽ ꓠꓹ ꓟ ꓠꓬꓲꓸ ꓠꓸ ꓔꓬ ꓢꓲ꓾ ꓙꓵꓽ ꓗ ꓔꓯ ꓟꓽ ꓛꓳ ꓛꓳ ꓥꓪ ꓔꓯ ꓓꓶꓽ ꓠꓹ ꓟ ꓕꓵꓼ ꓪ ꓖꓶˍ ꓡ? ꓠꓴ ꓔꓯˍ ꓟꓲ ꓪꓴ-ꓢ ꓡꓰ ꓓꓶꓽ ꓡ ꓥꓳ꓾ ꓐꓯ ꓖꓶˍ ꓡꓳ꓿ 4 ꓖꓳ ꓡꓱ ꓠꓬ ꓒ ꓕꓲꓺꓼ ꓗꓪ ꓦꓰꓼ ꓞ ꓢꓴ ꓡꓰ꓾ ꓪꓴ-ꓢ ꓔꓲ ꓒ ꓓꓽ ꓟ ꓔꓯ ꓠꓴ ꓕꓱ ꓡꓱ ꓕꓼ ꓙꓲꓽ ꓟ ꓙꓳ꓾ ꓐꓯˍ ꓡꓳ꓿ 5 ꓖꓳ ꓕꓯ ꓒꓳ-ꓡꓳ ꓡꓰ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓲ ꓠꓬ ꓔꓲ ꓒ ꓓꓽ ꓟ ꓥ ꓟ ꓥꓪ ꓟꓽ ꓢꓷ꓿ ꓕꓳ ꓶ ꓗꓪ꓾ ꓚꓲ ꓛꓬ ꓫꓵꓽ ꓔꓯ ꓙꓵꓽ ꓢꓴ ꓔꓯ ꓠꓴ ꓟꓽ ꓙꓲꓻ ꓟ ꓫꓸ ꓕꓱ ꓟꓽ ꓓ꓾ ꓐꓰ ꓐꓳ ꓔ ꓡꓳ꓾ ꓐꓯ ꓖꓶˍ ꓡꓳ꓿ 6 ꓖꓳ ꓗꓪ ꓜꓲꓼ ꓞ ꓢꓴ ꓕꓲ ꓐꓱ ꓠꓬ ꓢ-ꓓꓴ-ꓗꓷ ꓐꓴ ꓥ ꓢꓲ꓾ ꓕꓲ ꓐꓱ ꓠꓬ ꓒ-ꓡꓲ-ꓢꓷ ꓐꓴ ꓥ ꓟ ꓔꓯ ꓒꓳ-ꓡꓳ ꓡꓳꓸ ꓓꓳ ꓡ ꓠꓬ꓾ ꓬꓲ ꓡꓰ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓬ ꓒ-ꓡꓲ-ꓢꓷ ꓡ ꓞꓳ ꓬꓲ ꓤ ꓥ ꓢꓲ꓾ ꓒ-ꓡꓲ-ꓢꓷ ꓚꓵꓺ ꓥ ꓡꓳ꓿ ꓮ ꓟꓶ ꓥꓪ ꓔꓯ ꓛꓬ ꓖꓴ ꓓꓰˍ ꓟ ꓠꓬ꓾ ꓞꓳ ꓫꓵꓻ ꓢꓯꓸ ꓬꓲꓼ ꓡ ꓟ ꓥꓳ ꓡꓳꓸ ꓓꓴ ꓑꓶꓸ ꓓꓴ ꓥ ꓡꓳ꓾ ꓐꓰ ꓜꓲꓼ ꓓꓴ ꓗꓪ ꓘꓴˍ ꓡꓳ꓿ 7 ꓬꓲ ꓡꓰ ꓖꓳ ꓡꓱ ꓐꓯ ꓗꓷ ꓠꓬ꓾ ꓒ-ꓡꓲ-ꓢꓷ ꓐꓴˍ ꓐꓰ ꓢ-ꓓꓴ-ꓗꓷ ꓐꓴ ꓧꓳꓺ ꓡꓯꓼ ꓘꓳ ꓔꓴ ꓡ ꓢꓲ ꓠꓬꓲꓽ ꓗꓪꓺ ꓗꓪ ꓡꓰˍ ꓡꓳ꓿ 8 ꓮ ꓡꓲꓳ ꓐꓯ ꓠꓬ ꓢ-ꓓꓴ-ꓗꓷ ꓐꓴ ꓠ꓾ ꓢꓯꓸ ꓬꓲꓼ ꓡ ꓟ ꓐꓰ ꓟꓴꓽ ꓗꓪ ꓝꓲ ꓓꓴˍ ꓐꓰ ꓦꓻ ꓙꓳˍ ꓟ ꓔꓯ ꓟꓽ ꓙꓵꓻ꓿ ꓒ-ꓡꓲ-ꓢꓷ ꓐꓴ ꓠꓽ ꓙꓵꓻˍ ꓡꓳ꓿ 9 ꓖꓳ ꓕꓯ ꓮꓽ ꓘꓶꓸ ꓢꓴ ꓔꓴ ꓡ ꓢꓲ꓾ ꓒ-ꓡꓲ-ꓢꓷ ꓗꓪ ꓟ ꓙꓵꓽ ꓗ ꓟꓸ ꓒ ꓐꓴ ꓕꓲ ꓐꓱ ꓠꓬ ꓢ-ꓓꓴ-ꓗꓷ ꓐꓴˍ ꓐꓰ ꓐꓯ ꓔꓳꓹ ꓡꓯꓼ ꓘꓳ ꓢꓲ ꓠꓬꓲ꓾ ꓡ ꓞꓳ ꓕꓱ ꓕꓲ ꓣꓳ ꓔꓯ ꓥꓪ ꓠꓴ ꓮꓸ ꓫꓵ ꓛꓬꓻ ꓖꓴ ꓧꓪ ꓟꓽ ꓟꓳ꓿ ꓬꓲ ꓠꓽ ꓦ ꓕꓲ ꓫꓵꓽ꓾ ꓥ ꓠꓬ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓬꓲ ꓔꓯ ꓫ ꓕꓱ ꓗꓷ ꓐꓷˍ ꓟꓲ ꓮꓸ ꓫꓵ ꓟꓽ ꓛꓵ꓾ ꓐꓯˍ ꓡꓳ꓿ 10 ꓬꓲ ꓪꓽ ꓮꓽ ꓘꓶꓸ ꓐꓯ ꓡꓯꓽ ꓘꓳ ꓔꓴ ꓡ ꓕꓯ ꓬꓲ ꓪꓽ ꓡꓰ ꓒꓳ-ꓡꓳ ꓔꓯ ꓚꓵꓹ ꓧꓽ ꓗꓷˍ ꓟ ꓔꓯ ꓟꓯꓼ ꓢꓲꓽ ꓒ ꓓꓽ ꓟ ꓗꓳꓺ ꓚꓱˍ ꓠꓬꓲ꓾ ꓟꓯꓼ ꓤ ꓔꓯ ꓬꓯꓼ ꓙꓰ ꓝꓲ ꓢꓲ ꓬꓲ ꓪꓽ ꓗꓳ ꓡꓳ ꓗꓪ ꓐꓰ ꓒꓳ-ꓡꓳ ꓔꓯ ꓟꓽ ꓓ ꓟꓽ ꓞꓽ ꓧꓳꓽ ꓓꓳ ꓡ ꓝꓲ ꓢꓲ ꓠꓬꓲ꓾ ꓟꓯꓼ ꓙꓻ ꓗꓪ ꓧꓳꓽ ꓓꓵꓽ ꓡꓰ ꓠꓹ ꓟ ꓕꓵꓼ ꓪ ꓖꓶˍ ꓡꓳ꓿ 11 ꓢ ꓘꓪ ꓖꓳ ꓕꓲ ꓟꓶꓽ ꓘꓶꓼ ꓗꓪ ꓢꓲ ꓒ ꓠꓬ ꓒꓳ-ꓡꓳ ꓒ ꓕꓲ ꓗꓪ ꓦꓰꓼ ꓡ ꓢꓲ꓾ ꓠꓲꓹ ꓪꓴꓽ ꓪꓴˍ ꓡꓰ ꓔꓬ꓾ ꓠꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓗꓷ ꓟ ꓡꓰ ꓐꓰ꓾ ꓣꓳ-ꓟ ꓗꓪˍ ꓟꓲ ꓢꓷꓸ ꓙ ꓟꓳ ꓙ ꓠ ꓗꓹ ꓥꓳ꓾ ꓐꓯˍ ꓡꓳ꓿ 12 ꓟꓲꓽ ꓕꓯ ꓙꓲꓻ ꓡ ꓠꓬ ꓬꓴ-ꓔ ꓡ ꓞꓳ ꓕꓲ ꓜꓴ ꓜꓲꓼ ꓡꓯ ꓘꓳ ꓢꓲ꓾ ꓒꓳ-ꓡꓳ ꓔꓯ ꓟꓽ ꓢꓰꓼ ꓟꓶ ꓕ ꓑꓳ ꓟꓽ ꓜꓽ ꓟꓽ ꓓꓳ꓾ ꓐꓰ ꓪꓵꓼ ꓙꓱꓽˍ ꓡꓳ꓿ 13 ꓕꓱ ꓡꓱ ꓪꓵꓼ ꓙꓱꓽ ꓢꓴ ꓠꓬ ꓡꓲ ꓞꓲ ꓣꓳ ꓟꓽ ꓞꓲ ꓙꓳˍ ꓡꓳ꓿ 14 ꓬꓲ ꓪꓽ ꓠꓬ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴˍ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ ꓡ ꓢꓲ꓾ ꓥꓪ ꓠꓴ ꓠꓬ ꓒꓳ-ꓡꓳ ꓔꓯ ꓟꓽ ꓢꓰꓼ ꓪ ꓕ ꓑꓳ ꓮꓸ ꓫꓵˍ ꓟꓲ ꓟꓽ ꓜ꓾ ꓐꓰ ꓕꓶꓻ ꓕꓶˍ ꓡꓰ ꓪꓵꓼ ꓙꓱꓽ ꓗꓷꓳ꓿ 15 ꓖꓳ ꓡꓱ ꓠꓬꓲ ꓮ ꓟꓶ ꓠꓴ ꓪˍ ꓐꓰ ꓐꓯ ꓟꓴ ꓜꓲ ꓓꓴ ꓓꓽ ꓟ ꓠꓬ꓾ ꓒꓳ-ꓡꓳ ꓔꓯ ꓝꓮꓲ ꓜꓲꓻ ꓜꓲ ꓟꓵ ꓟꓵ ꓟꓰꓹ ꓠ ꓠꓬꓲ ꓓꓴ ꓬꓰˍ ꓟ ꓡꓰ ꓐꓰ ꓬꓰ ꓢꓲ꓾ ꓠꓴ ꓪꓽ ꓔꓬ ꓗꓪ ꓧꓳꓽ ꓬꓯꓼ ꓡ ꓠꓹ ꓟ ꓟꓯꓼ ꓕꓲ ꓔꓴ ꓙꓵꓽ ꓒ ꓔꓯ ꓐꓯ ꓖꓶ꓿ ꓥꓪ ꓠꓴꓽ ꓠꓬ ꓬꓲ ꓟꓽ ꓛꓲ ꓡ ꓢꓰꓽ ꓕꓯˍ ꓡꓰ ꓬꓲ ꓔꓯ ꓢꓰꓼ ꓠ ꓟ ꓙꓽ ꓖꓶ ꓔ ꓡꓳ꓾ ꓐꓯˍ ꓡꓳ꓿ 16 ꓖꓳ ꓡꓱ ꓥ ꓟꓲ ꓒꓳ-ꓡꓳ ꓬꓲ ꓢꓸ ꓤ ꓡꓰ꓾ ꓬꓲ ꓪꓽ ꓚꓴꓽ ꓬꓲꓹ ꓕꓱ ꓟ ꓔꓯ ꓑ ꓙꓽ ꓗꓷ ꓠꓬꓲ꓾ ꓟꓯꓼ ꓙ ꓗꓪ ꓙꓰ ꓢꓲ ꓒꓳ-ꓡꓳ ꓔꓯ ꓐꓯ ꓖꓶ ꓬꓰˍ ꓡꓳ꓿ 17 ꓒꓳ-ꓡꓳ ꓠꓬ ꓟꓯꓼ ꓕꓲ ꓦꓬꓻ ꓙꓵꓽ ꓒ ꓕꓲ ꓣꓳ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓤ ꓖꓴ ꓡꓯꓸ ꓕꓱ ꓕꓲ ꓣꓳ ꓠꓬ ꓟꓯ ꓕꓲ ꓔꓴ ꓙꓵꓽ ꓒ ꓔꓯ ꓫ ꓕꓱ ꓓꓴ ꓕꓲ ꓘꓶꓽ ꓙꓳˍ ꓡꓳ꓿ ꓬꓲ ꓔꓯ ꓬꓲ ꓔꓬ ꓗꓪ ꓧꓳꓽ ꓙꓰ꓾ ꓐꓯ ꓖꓶˍ ꓡꓳ꓿ 18 ꓖꓳ ꓡꓱ ꓠꓬ ꓟꓯꓼ ꓕꓲ ꓦꓬ ꓙꓵꓽ ꓒ ꓡꓰ ꓤ ꓖꓴ ꓡꓯꓸ ꓔꓯ ꓟꓯꓼ ꓕꓲ ꓔꓴ ꓙꓵꓽ ꓒ ꓔꓬ ꓗꓪ ꓧꓳꓽ ꓙꓰ ꓢꓲ꓾ ꓐꓱ ꓔ ꓢꓴ ꓒꓳ-ꓡꓳ ꓡꓰ ꓥꓪ ꓔꓯ ꓘꓴ ꓢꓲ꓾ ꓤ ꓖꓴ ꓡꓯꓸ ꓕꓱ ꓕꓲ ꓣꓳ ꓔꓯ ꓠꓴ ꓔꓬ ꓗꓪ ꓧꓳꓽ ꓡ ꓠꓹ ꓟ ꓥꓪ ꓔꓯ ꓓꓰꓽˍ ꓡꓳ꓿ ꓬꓲ ꓠꓬ ꓠꓴ ꓔꓯ ꓐꓯ ꓖꓶ ꓓꓴ ꓕꓲ ꓫꓵ ꓙꓳˍ ꓥ ꓙꓳꓽ꓾ ꓐꓯ ꓖꓶˍ ꓡꓳ꓿ 19 ꓟꓯꓼ ꓕꓲ ꓔꓴ ꓙꓵꓽ ꓒ ꓠꓬ ꓤ ꓖꓴ ꓡꓯꓸ ꓖꓳ ꓟ ꓡꓯꓼ ꓒꓯꓹ ꓗꓪ ꓖꓳꓻ ꓔ ꓢꓲ ꓬꓲ ꓔꓯ ꓘꓳ ꓫꓱ ꓫꓱˍ ꓗꓪ ꓧꓳꓽ ꓙꓰ ꓢꓲ ꓠꓬꓲ꓾ ꓠꓴ ꓥꓪ ꓔꓯ ꓐꓯ ꓖꓶ ꓓꓴ ꓮꓸ ꓫꓵꓽ ꓙꓳˍ ꓡ? ꓐꓰ ꓠ ꓠꓬꓲˍ ꓡꓳ꓿ 20 ꓖꓳ ꓕꓯ ꓤ ꓖꓴ ꓡꓯꓸ ꓡꓰ꓾ ꓬꓴ-ꓔ ꓡ ꓞꓳ ꓠꓬ ꓒꓳ-ꓡꓳ ꓔꓯ ꓜꓲꓻ ꓜꓲ ꓟꓵ ꓟꓵ ꓟꓰꓹ ꓠ ꓠꓬꓲ ꓓꓴ ꓬꓰˍ ꓟ ꓡꓰ ꓐꓰ ꓬꓰ ꓢꓲ꓾ ꓢꓸ ꓖꓶ ꓕꓲ ꓠꓬꓲ ꓬꓲ ꓔꓯ ꓐꓯ ꓟꓴ ꓜꓲꓼ ꓓꓴ ꓗꓪ ꓧꓳꓽ ꓡꓯ꓾ ꓐꓰ ꓠꓴ ꓔꓯ ꓓꓰꓽ ꓠꓹ ꓟ ꓖꓪ ꓙꓱ ꓧꓳꓹ ꓡꓰꓳ꓿ 21 ꓠꓴ ꓬꓲ ꓪꓽ ꓔꓯ ꓕꓽ ꓠ ꓠꓹ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠ꓾ ꓒꓳ-ꓡꓳ ꓔꓯ ꓟꓽ ꓢꓰꓼ ꓪ ꓕ ꓑꓳ ꓟꓽ ꓜꓽ ꓟꓽ ꓓꓳꓻ꓾ ꓐꓰ ꓪꓵꓼ ꓙꓱꓽ ꓗꓷ ꓟ ꓡ ꓞꓳ ꓡꓲ ꓞꓲ ꓣꓳ ꓟꓽ ꓞꓲ ꓐꓻ ꓞꓹ ꓢꓲ꓾ ꓬꓲ ꓔꓯ ꓢꓰꓼ ꓠꓹ ꓟ ꓙꓽ ꓖꓶ ꓔ ꓢꓲ ꓠꓬꓲ꓾ ꓮ ꓟꓶ ꓬꓲ ꓪꓽ ꓠꓬ ꓠꓴ ꓡꓰ ꓒꓳ-ꓡꓳ ꓔꓯ ꓜꓲꓼ ꓓꓴ ꓗꓪ ꓝꓲ ꓩꓴ ꓡ ꓟ ꓔꓯˍ ꓡꓰꓽ ꓦꓴ ꓠꓬꓹ ꓔꓬ ꓡꓳ꓾ ꓐꓯ ꓖꓶˍ ꓡꓳ꓿ 22 ꓖꓳ ꓕꓯ ꓟꓯꓼ ꓕꓲ ꓔꓴ ꓙꓵꓽ ꓒ ꓡꓰ ꓤ ꓖꓴ ꓡꓯꓸ ꓔꓯ꓾ ꓠꓴ ꓡꓰ ꓮ ꓟꓶ ꓥꓪ ꓔꓯ ꓐꓯ ꓖꓶ ꓡ ꓟ ꓕꓱ ꓟ ꓠꓱꓸ ꓐꓯꓼ ꓮꓽ ꓟ ꓔꓯˍ ꓟꓲ ꓕꓽ ꓢꓷꓸ ꓡꓰ ꓝꓲ꓾ ꓐꓯ ꓖꓶ ꓢꓲ ꓬꓲꓼ ꓙꓰ ꓝꓲˍ ꓡꓳ꓿ 23 ꓖꓳ ꓡꓱ ꓠꓬ ꓟꓯꓼ ꓢꓲꓽ ꓒ ꓓꓽ ꓟ ꓡꓰ ꓟꓯꓼ ꓕꓲ ꓦꓬ ꓙꓵꓽ ꓒ ꓠꓬꓲꓽ ꓣꓳ ꓘꓴ ꓔꓯꓹ ꓡ ꓢꓲ꓾ ꓢ ꓘꓪ ꓗꓴ ꓙꓵꓹ ꓗꓪ ꓢꓲ-ꓢ-ꓡꓰ ꓡꓳ ꓒꓱ ꓗꓪ ꓙꓰ ꓠꓹ ꓟ ꓟꓯꓼ ꓠꓬꓲꓽ ꓦꓬ ꓣꓳ꓾ ꓮꓸ ꓟꓴꓽ ꓜꓶ ꓟꓯꓼ ꓫꓵꓽ ꓞꓲ ꓣꓳ꓾ ꓐꓽ ꓥꓷꓹ ꓔꓯꓹ ꓟꓯꓼ ꓠꓬꓲꓽ ꓦꓬ ꓣꓳˍ ꓐꓰ꓾ 24 ꓒꓳ-ꓡꓳ ꓔꓯ ꓜꓶꓽ ꓝꓲ ꓠꓹ ꓟ ꓮꓸ ꓟꓴꓽˍ ꓟꓲ ꓙꓽ ꓖꓶ ꓢꓲ꓾ ꓬꓲ ꓔꓯ ꓢꓲꓽ ꓒ ꓒꓲ-ꓡꓲ-ꓫꓲ ꓔꓬ ꓗꓪ ꓧꓪꓸ ꓧꓪ ꓧꓳꓽ ꓛꓲ ꓬꓰ ꓝꓲ꓾ ꓐꓰ ꓕꓵꓼ ꓪ ꓖꓶˍ ꓡꓳ꓿ 25 ꓟꓯꓼ ꓕꓲ ꓔꓴ ꓙꓵꓽ ꓒ ꓡꓰ ꓕꓳ ꓶ ꓡꓯꓼ ꓫꓴ ꓕꓱ ꓡꓱ ꓕꓲ ꓚꓴꓸ ꓐꓳˍ ꓡꓳ꓾ 26 ꓗꓷ-ꓡꓳ-ꓔꓲ-ꓬꓴꓼ ꓡꓲ-ꓫꓲ-ꓬ ꓥꓪ ꓡꓰ꓾ ꓢꓲꓽ ꓒ ꓓꓽ ꓟ ꓫꓴ ꓙꓵꓽ ꓒꓽ ꓒꓲ-ꓡꓲ-ꓫꓲ ꓔꓯ ꓒꓵꓽ ꓗ ꓬꓰ ꓩꓴ ꓡ ꓥꓳ꓿ 27 ꓬꓴ-ꓔ ꓡ ꓞꓳ ꓡꓰ ꓡ ꓞꓳ ꓕꓱ ꓕꓲ ꓣꓳ ꓔꓯ ꓣꓴ ꓢꓲ ꓢꓰꓼˍ ꓐꓰ ꓬꓰˍ ꓕꓯ꓾ ꓬꓲ ꓠꓬ ꓣꓳ-ꓟ ꓡ ꓞꓳ ꓥ ꓟ ꓥꓪ ꓢꓷꓸ ꓗꓷ ꓠꓬ꓾ ꓥꓪ ꓡꓰ ꓟꓯꓼ ꓤ ꓝꓲ ꓩꓴ ꓗꓷ ꓢꓲ ꓬꓲ ꓔꓯ ꓚꓬꓴ ꓓꓳ ꓡꓺꓳ꓿ 28 ꓖꓳ ꓡꓱ ꓢꓲ ꓬꓲ ꓪꓽ ꓡꓰ ꓬꓲ ꓔꓯ ꓮꓸ ꓫꓵ ꓪꓴꓸ ꓠꓬꓲ ꓗꓳꓹˍ ꓟ ꓥꓪ ꓢꓷꓸ ꓠꓲꓹ ꓫꓵ ꓠꓬꓲ꓾ ꓬꓲ ꓔꓯ ꓬꓲ ꓪꓽ ꓐꓯ ꓟꓴ ꓜꓲ ꓓꓴ ꓓꓽ ꓟ ꓗꓪ ꓧꓳꓽ ꓬꓯꓼ ꓙꓰꓳ꓿ 29 ꓬꓲ ꓔꓯ ꓗꓳꓹˍ ꓟ ꓠꓬ꓾ ꓬꓲ ꓪꓽ ꓙꓵꓽ ꓗ ꓗꓪ ꓧꓳꓺ ꓡꓯ ꓘꓳˍ ꓟ ꓗꓪ ꓐꓰ ꓥ ꓢꓲ꓾ ꓫꓵꓻ ꓒꓵˍ ꓟ ꓐꓰ ꓞꓳꓹ ꓒꓵˍ ꓟ ꓛꓬ ꓖꓴ ꓟꓽ ꓙꓳ ꓟ ꓥꓪ ꓢꓷꓸ ꓡꓰꓳ꓿ 30 ꓖꓳ ꓡꓱ ꓥ ꓟꓲ ꓕꓱ ꓕꓲ ꓣꓳ ꓔꓯ ꓥꓶˍ ꓟ ꓗꓷ ꓡꓰ ꓝꓲ ꓠꓹ ꓟ ꓚꓴꓽ ꓬꓲꓹ ꓓꓶꓽ ꓢꓴ ꓙꓳˍ ꓟ ꓥꓪ ꓔꓯ ꓐꓯ ꓖꓶ ꓡ ꓢꓴ ꓙꓳˍ ꓠꓬꓲ꓾ ꓬꓲ ꓔꓯ ꓞꓼ ꓐꓰ ꓠꓴ ꓔꓬ ꓗꓪ ꓝꓲ ꓩꓴ ꓡ ꓥꓳ꓿ ꓬꓲ ꓔꓯ ꓗꓳꓹ ꓢꓴ ꓔꓯˍ ꓟꓲ ꓠꓴ ꓟꓲꓽ ꓙꓬ ꓗꓪ ꓗꓳꓹ ꓬꓰ ꓠꓹ ꓟ ꓥꓪ ꓕꓵꓼ ꓪ ꓖꓶ ꓗꓷꓳ꓾ ꓧꓪꓸ ꓧꓪ ꓔꓬ꓾ ꓐꓰ ꓐꓳ ꓩꓴ ꓗꓷˍ ꓡꓳ꓿ 31 ꓕꓵꓼ ꓪ ꓙꓳˍ ꓟ ꓡꓰ ꓐꓰ ꓢ ꓘꓪ ꓕꓯ ꓟꓯꓼ ꓤ ꓐꓴ ꓡꓰ ꓒꓳ-ꓡꓳ ꓔꓯ ꓮ-ꓕꓲ-ꓒ-ꓔꓲ ꓗꓪ ꓧꓳꓽ ꓛꓲ ꓬꓰˍ ꓡꓳ꓿ 32 ꓗꓸ ꓠꓯꓸ ꓕꓲ ꓠꓬꓲ ꓠꓬ꓾ ꓮꓸ ꓟꓴꓽ ꓜꓶꓽ ꓟꓯꓼ ꓐꓴ ꓔꓯ ꓒꓳ-ꓡꓳˍ ꓐꓰ ꓕꓲ ꓛꓳꓺꓼ ꓙꓰ ꓝꓲ ꓢꓲ꓾ ꓛꓲ ꓒꓯꓹ ꓟꓯꓼ ꓕꓲ ꓐꓱ ꓠꓬ ꓟꓯꓼ ꓙꓻ ꓗꓪ ꓬꓲꓼ ꓙꓰˍ ꓡꓳ꓿ 33 ꓬꓲ ꓪꓽ ꓠꓬ ꓢꓲ-ꓢ-ꓡꓰ ꓡꓳ ꓒꓱ ꓗꓪ ꓛꓲ ꓬꓰ ꓕꓯ꓾ ꓒꓳ-ꓡꓳˍ ꓐꓰ ꓕꓳ ꓶ ꓡꓯꓼ ꓫꓴ ꓠꓬ ꓢꓲꓽ ꓒ ꓓꓽ ꓟ ꓔꓯ ꓡꓯꓼ ꓙꓱ ꓗꓷˍ ꓡꓳ꓿ 34 ꓢꓲꓽ ꓒ ꓓꓽ ꓟ ꓠꓬ ꓕꓳ ꓶ ꓖꓳ ꓟ ꓵ ꓗꓷ ꓗ ꓠꓯ꓾ ꓒꓳ-ꓡꓳ ꓔꓯ ꓬꓲ ꓮ ꓡꓲ ꓕꓲ ꓫꓴꓻ ꓗꓪ ꓔꓬ ꓢꓴ ꓥ ꓟ ꓠ ꓠꓬꓲ ꓢꓲ꓾ ꓚꓲ-ꓡꓲ-ꓚꓬ ꓢꓴ ꓥ ꓟ ꓢꓷ ꓡꓰ ꓠꓬ꓾ 35 ꓠꓴ ꓔꓯ ꓗꓳꓹ ꓢꓴ ꓐꓴ ꓛꓲ ꓡ ꓕꓯ ꓥꓪ ꓡꓰ ꓠꓴ ꓫꓵꓽ ꓪꓴꓻ ꓔꓯ ꓜꓲ ꓜꓲ ꓟꓵ ꓟꓵ ꓠ ꓠꓹ ꓖꓶ ꓛꓵˍ ꓡꓳ꓾ ꓐꓯ ꓢꓲ꓾ ꓪ ꓔꓲ ꓩꓴ-ꓡꓲ ꓙꓻ ꓗꓪ ꓬꓲ ꓔꓯ ꓐꓱ ꓔ ꓠꓹ ꓟ ꓕꓵꓼ ꓪ ꓖꓶˍ ꓡꓳ꓿

ꓝꓲ-ꓓꓴ 24

1 ꓥꓪꓽ ꓠꓬꓲ ꓗꓳꓸ ꓗꓷ ꓗꓸ ꓠꓯꓸ ꓔꓲ ꓒ ꓓꓽ ꓟ ꓮ-ꓠ-ꓠꓲ-ꓬ ꓠꓬ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓕꓲ ꓐꓱˍ ꓐꓰ ꓐꓯ ꓟꓴ ꓒꓽ ꓕꓰ-ꓕꓴ-ꓡꓳꓽˍ ꓐꓰ ꓕꓲ ꓛꓳꓺꓼ ꓬꓯꓼ ꓡ ꓢꓲ꓾ ꓢꓲꓽ ꓒ ꓓꓽ ꓟ ꓟꓲꓽ ꓙꓬ ꓗꓪ ꓒꓳ-ꓡꓳ ꓔꓯ ꓗꓳꓹˍ ꓡꓳ꓿ 2 ꓒꓳ-ꓡꓳ ꓔꓯ ꓘꓴ ꓔꓯꓹ ꓡ ꓠꓬ꓾ ꓕꓰ-ꓕꓴ-ꓡꓳꓽ ꓡꓰ ꓬꓲ ꓔꓯ ꓗꓳꓹ ꓢꓲ꓾ ꓞꓳ ꓪꓴꓽ ꓓꓽ ꓟ ꓒꓲ-ꓡꓲ-ꓫꓲꓺꓳ꓾ ꓠꓴ ꓗꓪ ꓐꓰ ꓥꓪ ꓠꓴꓽ ꓠꓬ ꓢꓲ ꓡꓲ ꓡꓲ ꓔꓬ ꓪ ꓢꓲ꓾ ꓕꓱ ꓕꓲ ꓫꓴ ꓗꓪ ꓟꓽ ꓙꓲ ꓟꓽ ꓜꓳ ꓟ ꓔꓯˍ ꓟꓲ ꓠꓴ ꓡꓰ ꓫꓬꓹ ꓔꓱꓹ ꓗꓷ ꓠꓬꓲ꓾ 3 ꓥꓪ ꓠꓴꓽ ꓠꓬ ꓮ ꓡꓲ ꓗꓪˍ ꓟꓲ ꓕꓱ ꓟ ꓔꓯ ꓘꓳ ꓣꓴ ꓢꓲ꓾ ꓠꓴ ꓔꓯ ꓮꓽ ꓘꓶꓸ ꓫ ꓟꓳ ꓔꓬ ꓥꓳ꓿ 4 ꓠꓴ ꓔꓯ ꓥꓪ ꓠꓴꓽ ꓮꓽ ꓘꓶꓸ ꓘꓶꓻ ꓡꓶꓽ ꓠꓲꓹ ꓟ ꓫꓵ꓿ ꓖꓳ ꓡꓱ ꓠꓬꓲ ꓠꓴ ꓠꓲꓹ ꓟ ꓦꓲꓺ ꓢꓲ ꓥꓪ ꓠꓴ ꓔꓯ ꓠꓬꓲꓽ ꓢ ꓘꓶꓽ ꓤ ꓠ ꓠꓹ ꓖꓶ ꓡꓯ꓾ ꓐꓰ ꓓꓰꓽˍ ꓥꓳ꓿ 5 ꓡ ꓞꓳ ꓕꓱ ꓟ ꓠꓬ ꓠꓻ ꓓꓱꓽˍ ꓡꓰ ꓐꓰ ꓗꓹ ꓢꓲ꓾ ꓮ ꓡꓲ ꓗꓪˍ ꓟꓲ ꓬꓴ-ꓔ ꓡ ꓞꓳ ꓔꓯ ꓡꓵꓹ ꓢꓴ ꓢꓲ ꓒꓳꓹ ꓔꓴ ꓡ ꓝꓲ ꓢꓴ ꓥ ꓡꓳ꓿ ꓬꓲ ꓠꓬ ꓠ-ꓢ-ꓡꓱ ꓢꓴ ꓕꓲ ꓜꓴꓻ ꓟ ꓬꓲ ꓪꓴꓸ ꓓꓵ ꓥ ꓟ ꓥꓪ ꓠꓴꓽ ꓢꓷꓸ ꓡꓰꓳ꓿ 6 ꓕꓱ ꓟ ꓕꓯ ꓢꓲ꓾ ꓬꓲ ꓠꓬ ꓢꓲꓽ ꓫꓬ ꓦꓲ ꓔꓯˍ ꓟꓲ ꓟꓽ ꓒꓵꓽ ꓢꓲ ꓟꓽ ꓫꓬ ꓗꓷ ꓡꓰ ꓝꓲˍ ꓠꓬꓲ꓾ ꓬꓲ ꓔꓯ ꓥꓪ ꓠꓴꓽ ꓣꓴ ꓔ ꓢꓲ ꓥꓪ ꓠꓴꓽ ꓙꓵꓽ ꓗ ꓗꓪ ꓐꓰ ꓐꓯ ꓟꓴ ꓞꓷꓹ ꓠꓹ ꓟ ꓓꓵꓽ ꓙ ꓗꓷꓳ꓿ 7 ꓖꓳ ꓡꓱ ꓥ ꓟꓲ ꓟꓯꓼ ꓕꓲ ꓔꓴ ꓙꓵꓽ ꓒ ꓡꓲ-ꓫꓲ-ꓬꓼ ꓡ ꓢꓲ꓾ ꓥꓪ ꓠꓴ ꓡꓯꓼ ꓒꓯꓹ ꓗꓪ ꓐꓰ ꓜꓲꓽ ꓜꓲꓽ ꓑꓲꓹ ꓑꓲ ꓬꓲ ꓔꓯ ꓦꓴꓺ ꓔꓯꓹ ꓙꓰ ꓢꓲ ꓠꓬꓲ꓾ 8 ꓬꓲ ꓔꓯ ꓗꓳꓹ ꓢꓴ ꓥꓪ ꓠꓴꓽ ꓔꓯˍ ꓟꓲ ꓠꓴ ꓟꓲꓽ ꓙꓬ ꓗꓪ ꓡ ꓠꓹ ꓟ ꓕꓵꓼ ꓪ ꓖꓶ ꓡꓺꓳ꓿ ꓡ ꓞꓳ ꓕꓱ ꓕꓲ ꓣꓳ ꓔꓯ ꓠꓴ ꓟꓰꓹ ꓠ ꓠꓬꓲˍ ꓠꓬ꓾ ꓥꓪ ꓠꓴ ꓬꓲ ꓔꓯ ꓗꓳꓹˍ ꓟ ꓮꓸ ꓫꓵꓽ ꓑꓶꓸ ꓓꓴ ꓥ ꓟ ꓮꓽ ꓙꓵ ꓢꓷꓸ ꓐ ꓡ ꓥꓳ꓾ ꓐꓯˍ ꓡꓳ꓿ 9 ꓬꓴ-ꓔ ꓡ ꓞꓳ ꓐꓴˍ ꓟꓲ ꓐꓯ ꓘꓶ ꓕꓱ ꓟ ꓔꓯ ꓓꓽ ꓔꓳꓹ ꓢꓲ꓾ ꓕꓱ ꓟꓬ ꓫꓵꓽ ꓠꓬ ꓚꓵ ꓚꓵ ꓥꓳ꓾ ꓐꓯˍ ꓡꓳ꓿ 10 ꓖꓳ ꓗꓸ ꓠꓯꓸ ꓢꓲꓽ ꓒ ꓓꓽ ꓟ ꓡꓰ ꓒꓳ-ꓡꓳ ꓔꓯ ꓫ ꓕꓱ ꓠꓹ ꓟ ꓕꓵꓼ ꓪ ꓖꓶ ꓗꓷ ꓠꓬ ꓬꓲ ꓫ ꓕꓱ ꓡ ꓢꓲ ꓕꓱ ꓡꓱ ꓐꓯˍ ꓡꓳ꓿ ꓠꓴ ꓠꓬ ꓕꓱ ꓕꓲ ꓟꓵꓽ ꓗꓪ ꓟ ꓐꓯ ꓟꓴ ꓞꓷꓹ ꓢꓲꓽ ꓒ ꓮꓽ ꓟꓬꓹ ꓘꓳꓼ ꓣꓱ ꓗꓷ ꓟ ꓥꓪ ꓢꓷˍ ꓠꓬꓲ꓾ ꓥꓪ ꓚꓲ ꓛꓬ ꓐꓱ ꓶ ꓒꓶꓻ ꓔꓳꓹ ꓘꓶꓽ ꓠꓲꓹ ꓒꓴ ꓒꓴˍ ꓐꓰ ꓫ ꓕꓱˍ ꓥꓳ꓿ 11 ꓥꓪ ꓠꓽ ꓙꓱ-ꓣꓴ-ꓢ-ꓡꓱ ꓗꓪ ꓪꓴꓸ ꓓꓵ ꓕꓱꓼ ꓠꓹ ꓟ ꓓꓯ ꓙꓰ ꓗ ꓠꓯ꓾ ꓞꓲ ꓠꓬꓲꓽ ꓠꓬꓲ ꓛꓲˍ ꓡꓰꓽ ꓙꓳˍ ꓟ꓾ ꓠꓱꓸ ꓐꓯꓼ ꓢꓴ ꓔꓯ ꓠꓴ ꓠ ꓠꓬꓲˍ ꓠꓬ ꓢꓷꓸ ꓡꓰ ꓓꓻˍ ꓡꓳ꓿ 12 ꓢꓲꓽ ꓫꓬ ꓦꓲ ꓗꓪˍ ꓟꓲ꓾ ꓜꓲꓼ ꓦꓲ ꓗꓪˍ ꓟꓲ꓾ ꓡꓳ ꓒꓱ ꓗꓪˍ ꓟꓲ꓾ ꓥꓪ ꓡꓰ ꓮꓽ ꓟ ꓔꓯ ꓧꓳꓺ ꓡꓯ ꓘꓳˍ ꓟ꓾ ꓥ ꓠꓬ ꓞꓳ ꓜꓴ ꓔꓯ ꓡꓵꓹ ꓢꓴ ꓡ ꓝꓲˍ ꓟ꓾ ꓮꓽ ꓟˍ ꓟꓲ ꓟꓽ ꓟꓳ ꓠꓬꓲ꓿ 13 ꓮ ꓟꓶ ꓥꓪ ꓔꓯ ꓗꓳꓹˍ ꓟ ꓔꓯ ꓟꓳꓸ ꓬꓲ ꓪꓽ ꓡꓰ ꓠꓴ ꓔꓯ ꓗꓸ ꓚꓵ ꓟꓳꓸ ꓖꓶ ꓟꓽ ꓐ ꓡ꓿ 14 ꓖꓳ ꓡꓱ ꓥ ꓟꓲ ꓙꓵꓽ ꓗ ꓐꓰ ꓟꓷ ꓠꓷꓹ ꓝꓸ ꓢꓴ ꓕꓳ ꓶ ꓗꓪ ꓐꓳ ꓔ ꓟ ꓮꓽ ꓙꓵ ꓔꓯ ꓥꓪ ꓙꓵꓻ ꓢꓲ꓾ ꓬꓲ ꓪꓽ ꓡꓰ꓾ ꓧꓹ ꓙꓰˍ ꓟ ꓢꓳ꓾ ꓐꓰ ꓘꓴˍ ꓟ ꓙꓵꓻ ꓚꓱꓹ ꓗꓪ꓾ ꓥꓪ ꓒꓵꓽ ꓒ ꓐꓴ ꓪꓴ-ꓢ ꓔꓯ ꓥꓪ ꓣꓱꓽ ꓙ ꓔꓬ ꓟ ꓕꓱ ꓟ ꓠꓬ꓾ ꓠꓴ ꓔꓯ ꓥꓪ ꓣꓷꓠꓸ ꓛꓵˍ ꓡꓳ꓿ 15 ꓥꓪ ꓠꓬ ꓕꓱ ꓕꓲ ꓧꓳꓽ ꓥꓳ ꓡꓳꓸˍ ꓟ ꓡꓰ ꓐꓰ ꓪꓴ-ꓢ ꓔꓯ ꓥꓳ ꓡꓳꓸ ꓢꓲ꓾ ꓔꓱꓹ ꓜꓳꓽ ꓢꓴˍ ꓟꓲ꓾ ꓥꓶꓺˍ ꓟ ꓡ ꓞꓳˍ ꓟꓲ ꓢꓯꓸ ꓬꓲꓼ ꓡ ꓟ ꓔꓯ ꓙꓵˍ ꓡꓳ꓿ 16 ꓖꓳ ꓡꓱ ꓠꓬꓲ ꓥꓪˍ ꓟꓲ ꓪꓴ-ꓢˍ ꓐꓰ ꓞꓳ ꓤ ꓟꓲꓽ ꓙꓬ ꓗꓪ꓾ ꓓꓰ ꓖꓴ ꓟꓽ ꓙꓳˍ ꓟ ꓦꓰꓽ ꓠꓲꓹ ꓙꓳ ꓠꓹ ꓟ ꓮ ꓕꓯˍ ꓟꓲ ꓢꓯꓼ ꓕꓵ ꓔꓬ ꓟ ꓥꓳ꓿ 17 ꓥꓪ ꓟꓽ ꓔꓬ ꓟ ꓮꓽ ꓟꓬ ꓘꓳꓼ ꓗꓳꓸ ꓗꓷ ꓗ ꓠꓯ꓾ ꓥꓪ ꓠꓬ ꓥꓪ ꓕꓲ ꓫꓵꓽ ꓢꓴ ꓔꓯ ꓬꓰ ꓙ ꓓꓴ ꓒꓴ ꓔꓯꓹ ꓖꓶ ꓡ ꓠꓹ ꓟ ꓐꓰ꓾ ꓪꓴ-ꓢ ꓔꓯ ꓔꓲ ꓖꓶ ꓠꓹ ꓟ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓡ ꓕꓯ꓾ 18 ꓥꓪ ꓠꓬ ꓢꓲꓽ ꓫꓬ ꓦꓲ ꓗꓪ ꓢꓲꓽ ꓫꓬ ꓡꓰˍ ꓟ ꓟꓬꓱꓽ ꓬꓰ ꓔꓬ ꓟ ꓔꓯ ꓬꓲ ꓪꓽ ꓟꓳˍ ꓡꓳ꓿ ꓖꓳ ꓗꓪ ꓞꓳ ꓜꓴꓻ ꓟꓽ ꓔꓬ꓿ ꓢꓴ ꓓꓴ ꓙꓴꓽ ꓓꓴ ꓮꓸ ꓫꓵꓽˍ ꓟꓲ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓮ-ꓢꓲ-ꓬ ꓗꓪ ꓐꓰ ꓡꓻ ꓟ ꓬꓴ-ꓔ ꓡ ꓞꓳ ꓕꓲ ꓧꓳꓽ ꓔꓬ ꓡꓳ꓿ 19 ꓬꓲ ꓪꓽ ꓥꓪ ꓔꓯ ꓓꓰꓺ ꓓꓴ ꓙꓳˍ ꓕꓯ ꓠꓽ꓾ ꓠꓴ ꓟꓲꓽ ꓙꓬ ꓗꓪ ꓡ ꓢꓲ ꓗꓳꓹ ꓠꓯꓹ ꓡꓳ ꓫꓵꓽ ꓥ ꓡꓳ꓿ 20 ꓟꓽ ꓥ ꓠꓬ ꓐꓯ-ꓟꓴ-ꓜꓲ-ꓓꓴ ꓟꓲꓽ ꓙꓬ ꓗꓪ ꓥꓪ ꓦꓰꓼ ꓞꓹ ꓕꓯ꓾ ꓕꓱ ꓕꓲ ꓧꓳꓽ ꓟ ꓡꓰ ꓥꓪ ꓛꓬ ꓖꓴ ꓮꓸ ꓫꓵ ꓧꓪ ꓟꓶˍ ꓠꓬ ꓐꓯ ꓓꓳ ꓡ ꓙꓲꓽ ꓙꓳˍ ꓡꓳ꓿ 21 ꓐꓯ-ꓟꓴ-ꓜꓲ-ꓓꓴ ꓟꓲꓽ ꓙꓬ ꓗꓪ ꓦꓰ ꓞꓹ ꓕꓯ ꓥꓪ ꓡꓰ꓾ ꓠꓬꓲꓸ ꓠꓬꓲ ꓠꓴ ꓪꓽ ꓟꓲꓽ ꓙꓬ ꓗꓪ ꓥꓪ ꓔꓯ ꓓꓰꓺˍ ꓟ ꓠꓬ꓾ ꓞꓳ ꓫꓵꓻ ꓢꓯꓸ ꓬꓲꓼ ꓡ ꓥꓳ꓾ ꓐꓰ ꓥꓪ ꓙꓵꓻˍ ꓟ ꓑꓶꓸ ꓓꓴ ꓥꓳ꓾ ꓐꓰ ꓐꓯ ꓗꓷ ꓟ ꓕꓱ ꓟˍ ꓡꓰꓽ ꓥꓳ꓾ ꓐꓯ ꓖꓶˍ ꓡꓳ꓿ 22 ꓒꓲ-ꓡꓲ-ꓫꓲ ꓠꓬ ꓙꓵꓻ ꓚꓱꓹ ꓕꓱ ꓟ ꓔꓯ ꓜꓲꓻ ꓜꓲ ꓟꓵ ꓟꓵ ꓢꓷˍ ꓠꓬꓲ꓾ ꓬꓲ ꓡꓰ ꓐꓯ ꓟꓴ ꓫꓬꓹ ꓦꓬꓼ ꓠꓬꓲ ꓔꓯ ꓙꓵꓺ ꓩꓴ ꓗꓷ ꓢꓲ꓾ ꓟꓯꓼ ꓕꓲ ꓔꓴ ꓙꓵꓽ ꓒ ꓡꓲ-ꓫꓲ-ꓬꓼ ꓬꓯꓼ ꓡ ꓕꓯ ꓠꓴ ꓪ ꓐꓯ ꓟꓴ ꓞꓷꓹ ꓓꓴ ꓥꓳ꓾ ꓐꓯˍ ꓡꓳ꓿ 23 ꓬꓲ ꓡꓰ ꓒꓳ-ꓡꓳ ꓔꓯ ꓟꓯꓼ ꓤ ꓐꓴ ꓡꓰ ꓡꓳꓸ ꓔꓬ ꓝꓲ ꓢꓲ꓾ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓔꓯ ꓣꓱꓽ ꓙ ꓡ ꓐꓷˍ ꓠꓬ ꓕꓽ ꓗꓽ꓾ ꓐꓰ ꓟꓯꓼ ꓕꓲ ꓦꓬ ꓙꓵꓽ ꓒ ꓔꓯ ꓕꓵꓼ ꓪ ꓖꓶˍ ꓡꓳ꓿ 24 ꓠꓬꓲꓽ ꓢ ꓠꓬꓲ ꓗꓳꓸ ꓗꓷ ꓗꓸ ꓠꓯꓸ ꓒꓲ-ꓡꓲ-ꓫꓲ ꓠꓬ꓾ ꓬꓲ ꓤ ꓟꓶ ꓬꓴ-ꓔ ꓟ ꓕꓴ-ꓫꓲ-ꓡꓽˍ ꓐꓰ ꓡꓻ ꓢꓲ꓾ ꓒꓳ-ꓡꓳ ꓔꓯ ꓘꓴ ꓔꓯꓹ ꓡ ꓝꓲ ꓢꓲ ꓠꓬꓲ꓾ ꓙꓲ-ꓢꓴ ꓬꓰ-ꓢꓴ ꓔꓯ ꓙꓵꓻˍ ꓟ ꓟꓸ ꓟꓲ ꓚˍ ꓟ ꓔꓯ ꓠ ꓠꓹ ꓡꓳ꓿ 25 ꓒꓳ-ꓡꓳ ꓡꓰ꓾ ꓔꓱꓹ ꓜꓳꓽˍ ꓟ ꓐꓰ ꓚꓲ ꓛꓬ ꓔꓯ ꓙꓵꓽ ꓘꓴˍ ꓟ ꓐꓰ꓾ ꓡ ꓠꓹ ꓟ ꓐꓯ ꓟꓴ ꓘꓶꓽˍ ꓟ ꓟꓸ ꓟꓲ ꓚ ꓟꓸ ꓖꓶ ꓔꓬ ꓕꓯ ꓒꓲ-ꓡꓲ-ꓫꓲ ꓠꓽ ꓙꓳꓺ ꓡꓰ ꓢꓲ꓾ ꓮ ꓟꓶ ꓠꓬ ꓠꓴ ꓙꓰ Gꓽ꓾ ꓥꓪ ꓡꓯꓽ ꓕꓱꓼ ꓡ ꓕꓯ ꓠꓴ ꓔꓯ ꓝꓮꓲ ꓘꓴ ꓡ ꓥꓳ꓾ ꓐꓯ ꓖꓶˍ ꓡꓳ꓿ 26 ꓝꓮꓲ ꓬꓲ ꓠꓬ ꓒꓳ-ꓡꓳ ꓡꓰ ꓘꓶꓽ ꓕꓴꓸ ꓒꓴ ꓖꓶ ꓡ ꓟ ꓔꓯ ꓥꓳꓺ ꓡꓳꓸˍ ꓠꓬꓲ꓾ ꓬꓲ ꓔꓯ ꓮꓽ ꓟꓬꓹ ꓧꓪꓹ ꓘꓴ ꓔꓯꓹ ꓡ ꓢꓲ ꓫ ꓕꓱ ꓡꓯ ꓘꓳˍ ꓡꓳ꓿ 27 ꓠꓬꓲꓽ ꓘꓳꓼ ꓐꓲ ꓡ ꓠꓬ꓾ ꓒꓳ-ꓗꓷ-ꓬꓴꓼ ꓒꓲ-ꓢꓶ-ꓔꓴꓽ ꓠꓬ ꓒꓲ-ꓡꓲ-ꓫꓲ ꓬꓲꓸ ꓛꓲ ꓟꓬꓱꓽ ꓣꓱꓽ ꓝꓸ ꓡ ꓡꓳ꓿ ꓒꓲ-ꓡꓲ-ꓫꓲ ꓠꓬ ꓬꓴ-ꓔ ꓡ ꓞꓳ ꓔꓯ ꓠꓲꓹ ꓒꓴ ꓡꓰ ꓝꓲ ꓠꓲꓹ ꓫꓵˍ ꓠꓬꓲ꓾ ꓒꓳ-ꓡꓳ ꓔꓯ ꓠꓽ ꓐꓱ ꓞꓹ ꓔꓲꓹ ꓬꓰ ꓝꓲˍ ꓢꓰꓽ ꓡꓳ꓿

ꓝꓲ-ꓓꓴ 25

1 ꓒꓲ-ꓢꓶ-ꓔꓴꓽ ꓠꓬ ꓖꓳ ꓕꓲ ꓟꓵꓽ ꓗꓪ ꓛꓲ ꓬꓰ ꓗꓸ ꓠꓯ ꓢ ꓠꓬꓲ ꓕꓯ꓾ ꓢꓲ-ꓢ-ꓡꓰ ꓗꓪ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰˍ ꓡꓳ꓿ 2 ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴˍ ꓐꓰ ꓬꓴ-ꓔ ꓞꓳ ꓪꓴꓽ ꓞꓳ ꓔꓲ ꓐꓴ ꓡꓰ ꓒꓳ-ꓡꓳ ꓔꓯ ꓗꓳꓹ ꓢꓲ꓾ 3 ꓬꓲ ꓔꓯ ꓙ ꓖꓴ ꓗꓪ ꓘꓴꓽ ꓢꓰꓼ ꓗꓷ ꓠꓹ ꓟ ꓚꓴꓽ ꓬꓲꓹ ꓓꓶꓽ ꓢꓲ ꓠꓬꓲ꓾ ꓒꓳ-ꓡꓳ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓡ ꓝꓲ꓾ ꓐꓰ ꓓꓰꓽˍ ꓡꓳ꓿ 4 ꓖꓳ ꓡꓱ ꓥ ꓟꓲ ꓒꓲ-ꓢꓶ-ꓔꓴ ꓡꓰ꓾ ꓒꓳ-ꓡꓳ ꓔꓯ ꓠꓬ ꓢꓲ-ꓢ-ꓡꓰ ꓗꓪ ꓪꓳꓽ ꓔ ꓟ ꓐꓰ꓾ ꓟꓶ ꓤ ꓟꓽ ꓥ ꓠꓬ ꓬꓲ ꓚꓲ ꓛꓬˍ ꓟꓲ ꓖꓳ ꓗꓪ ꓙꓰ ꓠ ꓗꓹ ꓟ ꓬꓲ ꓪꓽ ꓔꓯ ꓐꓯ ꓖꓶˍ ꓡꓳ꓿ 5 ꓝꓮꓲ ꓬꓲ ꓡꓰ꓾ ꓠꓴ ꓪꓽ ꓗꓳ ꓡꓳ ꓗꓪ ꓞꓳ ꓪꓴꓽ ꓐꓴˍ ꓟꓲ ꓥꓪ ꓔꓯ ꓛꓳ ꓬꓯꓼ ꓙꓰ ꓢꓲ꓾ ꓒꓳ-ꓡꓳ ꓮꓸ ꓫꓵ ꓛꓬ ꓖꓴ ꓙꓳˍ ꓠꓬ ꓬꓲ ꓪꓽ ꓬꓲ ꓔꓯ ꓗꓳꓹ ꓝꓲ ꓛꓵˍ ꓡꓳ꓾ ꓐꓯ ꓖꓶˍ ꓡꓳ꓿ 6 ꓒꓲ-ꓢꓶ-ꓔꓴ ꓠꓽ ꓬꓲ ꓪˍ ꓐꓰ ꓮꓽ ꓡ ꓞꓲ ꓠꓬꓲꓻ ꓛꓲ ꓔꓬ ꓗꓷ ꓠꓬ ꓢꓲ-ꓢ-ꓡꓰ ꓗꓪ ꓬꓯꓼ ꓙꓰˍ ꓡꓳ꓿ ꓗꓸ ꓠꓯ ꓕꓲ ꓠꓬꓲ ꓗꓪ ꓬꓲ ꓠꓬ ꓐꓯ ꓟꓴ ꓘꓶꓽ ꓕꓲꓺ ꓗꓪ ꓠꓬꓲꓸ ꓠꓸ ꓢꓲ꓾ ꓒꓳ-ꓡꓳ ꓔꓯ ꓧꓳꓽ ꓔꓯꓹ ꓡ ꓠꓹ ꓟ ꓕꓵꓼ ꓪ ꓖꓶˍ ꓡꓳ꓿ 7 ꓒꓳ-ꓡꓳ ꓡ ꓗꓷ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓬꓯꓼ ꓡ ꓟ ꓬꓴ-ꓔ ꓡ ꓞꓳ ꓐꓴ ꓠꓬ ꓬꓲ ꓚꓳ ꓡꓳ ꓗꓪ ꓦꓰꓼ ꓞ ꓢꓲ꓾ ꓗꓸ ꓚꓵ ꓟꓽ ꓙꓳ ꓙꓳ꓾ ꓡꓲꓽˍ ꓟ ꓓꓰꓺ ꓘꓶꓽ ꓮꓽ ꓟꓬꓹ ꓡꓰ ꓬꓲ ꓔꓯ ꓗꓳꓹˍ ꓡꓳ꓿ 8 ꓒꓳ-ꓡꓳ ꓡꓰ꓾ ꓥꓪ ꓠꓬ ꓬꓴ-ꓔ ꓡ ꓞꓳ ꓙꓵꓽ ꓗ ꓔꓯˍ ꓟꓲ꓾ ꓢꓲꓽ ꓫꓬ ꓦꓲ ꓔꓯˍ ꓟꓲ꓾ ꓢꓲ-ꓢ ꓔꓯˍ ꓟꓲ꓾ ꓮꓸ ꓔꓲˍ ꓟꓲ ꓟꓽ ꓛꓬ ꓡꓰ ꓠꓬꓲ꓾ ꓐꓰ ꓐꓯˍ ꓡꓳ꓿ 9 ꓒꓲ-ꓢꓶ-ꓔꓴ ꓠꓬ ꓬꓴ-ꓔ ꓡ ꓞꓳ ꓔꓯ ꓠꓲꓹ ꓒꓴ ꓡꓰ ꓝꓲ ꓠꓲꓹ ꓫꓵˍ ꓠꓬꓲ ꓒꓳ-ꓡꓳ ꓔꓯ꓾ ꓠꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰ ꓢꓲ꓾ ꓠꓴ ꓐꓯ ꓟꓴ ꓕꓱ ꓟ ꓥꓪ ꓡꓰ ꓖꓳ ꓗꓪ ꓫꓬꓹ ꓖꓶˍ ꓠꓬ ꓓꓻ ꓡ? ꓐꓯˍ ꓡꓳ꓿ 10 ꓖꓳ ꓡꓱ ꓥ ꓟꓲ ꓒꓳ-ꓡꓳ ꓡꓰ꓾ ꓥꓪ ꓠꓬ ꓢꓲ-ꓢ ꓐꓯ ꓟꓴ ꓘꓶꓽ ꓕꓲꓺ ꓟꓲꓽ ꓙꓬ ꓗꓪ ꓮ ꓟꓶ ꓦꓰꓼ ꓞꓹ ꓡꓳ꓿ ꓥꓪ ꓔꓯ ꓐꓯ ꓟꓴ ꓘꓶꓽ ꓠꓯꓹ ꓟ ꓠꓬ ꓕꓱ ꓕꓲ ꓔꓳꓸ ꓗꓪ ꓥ ꓡꓳ꓿ ꓥꓪ ꓠꓬ ꓬꓴ-ꓔ ꓡ ꓞꓳ ꓔꓯ ꓮꓸ ꓫꓵꓽ ꓟꓽ ꓛꓬ ꓠꓬꓲ ꓟ ꓠꓴˍ ꓟꓲ ꓬꓲ ꓜꓶ ꓢꓷˍ ꓡꓳ꓿ 11 ꓥꓪ ꓠꓬ ꓛꓬꓻ ꓒ ꓥ ꓢꓲ ꓫꓵꓻ ꓒꓵꓽˍ ꓟ ꓛꓬꓻ ꓖꓴ ꓙꓳˍ ꓕꓯ ꓠꓽ꓾ ꓫꓵꓻ ꓠꓹ ꓟ ꓥꓪ ꓟꓽ ꓢꓸ ꓬꓰꓽ꓿ ꓖꓳ ꓡꓱ ꓥ ꓟꓲ ꓕꓱ ꓕꓲ ꓧꓳꓽ ꓥꓪ ꓔꓯ ꓗꓳꓹˍ ꓟ ꓗꓪ ꓔꓱꓹ ꓟ ꓕꓲ ꓫꓵˍ ꓟꓲ ꓟꓽ ꓙꓳˍ ꓕꓯ ꓠꓽ꓾ ꓮꓽ ꓟˍ ꓟꓲ ꓥꓪ ꓔꓯ ꓬꓲ ꓪꓽ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓖꓶ ꓟꓽ ꓓ꓿ ꓥꓪ ꓠꓬ ꓢꓲ-ꓢ ꓔꓯ ꓓꓰꓽˍ ꓥꓳ꓾ ꓐꓯˍ ꓡꓳ꓿ 12 ꓒꓲ-ꓢꓶ-ꓔꓴˍ ꓐꓰ ꓬꓲ ꓔꓯ ꓚꓴꓽ ꓬꓲꓹ ꓖꓶ ꓢꓴ ꓐꓴ ꓖꓪ ꓙꓱ ꓡꓯ ꓘꓳ ꓗꓷ ꓠꓬ꓾ ꓠꓴ ꓠꓬ ꓢꓲ-ꓢ ꓔꓯ ꓓꓰꓽ ꓗꓷ ꓠꓬꓲ ꓢꓲ-ꓢ ꓔꓯ ꓙꓰ ꓠ ꓗꓷ ꓡꓰˍ ꓥꓳ꓾ ꓐꓯ ꓖꓶˍ ꓡꓳ꓿ 13 ꓥꓪꓽ ꓛꓳꓼ ꓠꓬꓲ ꓗꓳꓸ ꓙꓰ ꓠꓬ ꓪ ꓔꓲ ꓮ-ꓖꓷ-ꓡꓲ-ꓒˍ ꓐꓰ ꓐꓷ-ꓠꓲ-ꓢꓲ ꓠꓬ ꓢꓲ-ꓢ-ꓡꓰ ꓗꓪ ꓛꓲ ꓬꓰ ꓢꓲ ꓒꓲ-ꓢꓶ-ꓔꓴꓽ ꓔꓯ ꓒꓵꓽ ꓗ ꓬꓰˍ ꓡꓳ꓿ 14 ꓬꓲ ꓪꓽ ꓖꓳ ꓗꓪ ꓮꓽ ꓟꓬꓹ ꓠꓬꓲ ꓔꓬ ꓕꓯ꓾ ꓒꓲ-ꓢꓶ-ꓔꓴ ꓡꓰ ꓪ ꓔꓲ ꓔꓯ ꓒꓳ-ꓡꓳ ꓬꓲ ꓫꓵꓽ ꓪꓴꓻ ꓜꓲꓻ ꓜꓲ ꓟꓵ ꓟꓵ ꓕꓱ ꓡꓱ ꓐꓯ ꓖꓶˍ ꓡꓳ꓿ ꓒꓲ-ꓡꓲ-ꓫꓲ ꓡꓰ ꓐꓱ ꓞꓹ ꓬꓰ ꓝꓲ ꓟ ꓡ ꓞꓳ ꓕꓲ ꓣꓳ ꓕꓱ ꓗꓪ ꓔꓬ ꓡꓳ꓿ 15 ꓥꓪ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓕꓯ꓾ ꓬꓴ-ꓔ ꓡ ꓞꓳ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴˍ ꓐꓰ ꓞꓳ ꓪꓴ ꓞꓳ ꓔꓲ ꓐꓴ ꓡꓰ ꓬꓲ ꓔꓯ ꓗꓳꓹ ꓢꓲ꓾ ꓬꓲ ꓔꓯ ꓝꓴꓲ ꓓꓰ ꓘꓶꓽ ꓐꓯ ꓞꓷꓹ ꓠꓹ ꓟ ꓥꓪ ꓔꓯ ꓓꓰꓽ ꓡꓺꓳ꓿ 16 ꓥꓪ ꓡꓰ ꓬꓲ ꓪꓽ ꓔꓯ꓾ ꓮꓸ ꓫꓵꓽ ꓓꓰꓺ ꓔ ꓟ ꓡ ꓞꓳ ꓥ ꓟꓲ꓾ ꓬꓲ ꓔꓯ ꓓꓰꓺ ꓢꓴˍ ꓐꓰ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳꓻ ꓡꓯ ꓘꓳ ꓢꓲ꓾ ꓬꓲ ꓚꓲ ꓛꓬ ꓒꓶꓻ ꓔꓳꓹ ꓘꓶꓽ ꓟꓽ ꓫꓸ ꓕꓱ ꓝꓲ ꓝꓲ ꓡꓯꓼ ꓙꓱ ꓖꓶˍ ꓟ ꓠꓬ ꓣꓳ-ꓟ ꓗ ꓫꓵ ꓔꓯ ꓟꓽ ꓧꓳꓹ꓾ ꓐꓰ ꓒꓳꓹ ꓖꓶꓽꓳ꓿ 17 ꓖꓳ ꓡꓱ ꓢꓲ ꓬꓲ ꓪꓽ ꓕꓱ ꓗꓪ ꓜꓲꓼ ꓡ ꓗꓷ ꓠꓬ ꓟꓽ ꓪꓽ ꓐꓶꓽ ꓡꓰ ꓝꓲ ꓝꓲ꓾ ꓗꓸ ꓠꓯꓸ ꓕꓲ ꓠꓬꓲ ꓥꓪ ꓠꓬ ꓐꓯ ꓟꓴ ꓕꓲ ꓗꓪ ꓠꓬꓲꓸ ꓠꓸ ꓢꓲ꓾ ꓡ ꓞꓳ ꓖꓳ ꓕꓲ ꓣꓳ ꓔꓯ ꓧꓳꓽ ꓔꓯꓹ ꓡ ꓠꓹ ꓟ ꓕꓵꓼ ꓪ ꓖꓶ ꓗꓷꓳ꓿ 18 ꓬꓲ ꓔꓯ ꓗꓳꓹ ꓢꓴ ꓐꓴ ꓗꓳꓹ ꓘꓶꓽ ꓔꓯ ꓠ ꓠꓹ ꓗꓷ ꓠꓬ꓾ ꓥꓪ ꓓꓵꓽ ꓙˍ ꓟ ꓟꓬꓺ ꓛꓲ ꓥꓶꓺˍ ꓟ ꓫꓵꓽ ꓪꓴ ꓟꓽ ꓥ ꓐꓷ꓿ 19 ꓬꓲ ꓪꓽ ꓦ ꓡꓱ ꓚꓱꓹ ꓗꓪ꓾ ꓬꓰ-ꓢꓴ꓾ ꓐꓰ ꓟꓬꓱ ꓔ ꓟ ꓕꓲ ꓣꓳ ꓫꓵꓻ ꓗꓷ ꓟ ꓫꓵꓽ ꓪꓴ ꓔꓯꓸ ꓟꓳ꓾ ꓒꓳ-ꓡꓳ ꓠꓬ ꓬꓰ-ꓢꓴ ꓢꓯꓸ ꓔꓬ ꓡꓳ꓾ ꓐꓰ ꓕꓶꓻ ꓕꓶˍ ꓡꓰ ꓙꓵꓻˍ ꓟ ꓗꓪ ꓐꓰ ꓐꓯ ꓡꓯ ꓘꓳ ꓓꓴ ꓠꓬꓲꓽ ꓢ ꓫꓵꓽ ꓙꓳ ꓡꓰ ꓟ ꓥ ꓐꓷ꓿ 20 ꓥꓪ ꓠꓬ ꓕꓱ ꓟꓬ ꓫꓵꓽ ꓔꓯ ꓮ ꓡꓲ ꓟꓰꓹ ꓠꓬꓲ ꓠꓯꓹ ꓟ ꓓꓵꓽ ꓙ ꓟꓽ ꓗꓴꓸ ꓠꓬꓲ ꓒꓳ-ꓡꓳ ꓔꓯ꓾ ꓠꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰ ꓢꓲ ꓐꓯ ꓟꓴ ꓕꓱ ꓟ ꓖꓳ ꓗꓪ ꓞꓷꓹ ꓠꓲꓹ ꓫꓵˍ ꓡ? ꓐꓰ ꓠ ꓠꓬꓲ ꓗꓷꓳ꓿ 21 ꓖꓳ ꓡꓱ ꓥ ꓟꓲ ꓒꓳ-ꓡꓳ ꓠꓬ ꓢꓲ-ꓢ ꓡꓰ ꓐꓯ ꓞꓷꓹ ꓖꓶ ꓡ ꓠꓹ ꓟ ꓐꓱ ꓓꓴꓽ ꓗꓪ ꓔꓲꓹ ꓬꓰ ꓝꓲ ꓡꓯ꓾ ꓐꓰ ꓓꓰꓽˍ ꓠꓬꓲ꓾ ꓬꓲ ꓔꓯ ꓢꓲ-ꓢ ꓔꓬ ꓗꓪ ꓧꓳꓽ ꓙꓰˍ ꓗꓪ ꓛꓲ ꓐꓱ ꓓꓴꓽ ꓗꓪ ꓔꓬ ꓝꓲ ꓠꓹ ꓟ ꓥꓪ ꓡꓰ ꓕꓵꓼ ꓪ ꓖꓶ ꓗꓷꓳ꓾ ꓐꓯˍ ꓡꓳ꓿ 22 ꓮ-ꓖꓷ-ꓡꓲ-ꓒ ꓡꓰ ꓒꓲ-ꓢꓶ-ꓔꓴ ꓔꓯ꓾ ꓥꓪˍ ꓟꓲ ꓡ ꓞꓳ ꓕꓱ ꓕꓲ ꓣꓳ ꓔꓯ ꓠ ꓠꓹ ꓠꓲꓹ ꓫꓵˍ ꓡꓳ꓾ ꓐꓯˍ ꓠꓬꓲ꓾ ꓒꓲ-ꓢꓶ-ꓔꓴ ꓡꓰ꓾ ꓢꓸ ꓖꓶ ꓕꓲ ꓠꓬꓲ ꓠꓴ ꓬꓲ ꓔꓯ ꓠ ꓠꓹ ꓛꓵˍ ꓡꓳ꓾ ꓐꓯ ꓖꓶˍ ꓡꓳ꓿ 23 ꓖꓳ ꓡꓱ ꓠꓬꓲ ꓗꓸ ꓠꓯ ꓕꓲ ꓠꓬꓲ꓾ ꓮ-ꓖꓷ-ꓡꓲ-ꓒ ꓐꓰ ꓐꓷ-ꓠꓲ-ꓢꓲ ꓠꓬ꓾ ꓳ'ꓸ ꓠꓬꓲ ꓠꓬꓲˍ ꓡꓰ ꓡ ꓢꓲ꓾ ꓬꓲ ꓪꓽˍ ꓐꓰ ꓟꓯꓼ ꓕꓲ ꓔꓴ ꓙꓵꓽ ꓒ ꓐꓴˍ ꓐꓰ꓾ ꓡꓳ ꓒꓱ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬ ꓐꓯ ꓟꓴ ꓫꓬꓹ ꓖꓴ ꓗꓪ ꓓꓵꓽ ꓙꓰ ꓗ ꓠꓯ꓾ ꓒꓲ-ꓢꓶ-ꓔꓴ ꓡꓰ ꓕꓵꓼ ꓪ ꓖꓶ ꓗꓷ ꓠꓬ ꓒꓳ-ꓡꓳ ꓔꓯ ꓧꓳꓽ ꓓꓵꓽ ꓡ ꓡꓳ꓿ 24 ꓖꓳ ꓕꓯ ꓒꓲ-ꓢꓶ-ꓔꓴ ꓡꓰ꓾ ꓪ ꓔꓲ ꓮ-ꓖꓷ-ꓡꓲ-ꓒˍ ꓐꓰ ꓕꓱ ꓗꓪ ꓜꓲꓼ ꓔꓬ ꓢꓴ ꓐꓴꓳ꓾ ꓕꓱ ꓕꓲ ꓣꓳ ꓔꓯ ꓠꓴ ꓪꓽ ꓡꓳꓸ ꓠꓬꓲ꓿ ꓙꓱ-ꓣꓴ-ꓢ-ꓡꓱ ꓗꓪˍ ꓟꓲ꓾ ꓕꓱ ꓗꓪˍ ꓟꓲ꓾ ꓬꓴ-ꓔ ꓞꓳ ꓜꓴꓻ ꓐꓴ ꓡꓰ ꓥꓪ ꓔꓯ ꓮꓽ ꓘꓶꓸ ꓓꓰꓽ ꓢꓲ꓾ ꓬꓲ ꓔꓯ ꓝꓮꓲ ꓕꓽ ꓢꓯꓸ ꓔꓬ ꓝꓲ꓾ ꓐꓰ ꓐꓯˍ ꓡꓳ꓿ 25 ꓖꓳ ꓡꓱ ꓥ ꓟꓲ ꓥꓪ ꓠꓬ ꓬꓲ ꓫꓵꓻ ꓒꓵꓽˍ ꓟ ꓝꓴꓲ ꓕꓲ ꓫꓵꓽˍ ꓟꓲ ꓧꓪ ꓟꓽ ꓟꓶ꓿ ꓝꓮꓲ ꓬꓲ ꓚꓲ ꓛꓬ ꓡꓰ ꓪ ꓔꓲ ꓔꓯ ꓓꓰꓽ ꓗꓷ ꓠꓬꓲ꓾ ꓥꓪ ꓬꓲ ꓔꓯ ꓙꓰ ꓝꓲ ꓠꓹ ꓟ ꓓꓵꓽ ꓙ ꓞꓷꓹ ꓗꓷꓳ꓿ 26 ꓖꓳ ꓡꓱ ꓥ ꓟꓲ ꓡ ꓞꓳ ꓕꓱ ꓕꓲ ꓣꓳ ꓔꓯ ꓟꓳꓸ ꓥꓪ ꓢꓲꓽ ꓒ ꓢꓲ-ꓢ ꓔꓯ ꓐꓳ ꓖꓶ ꓓꓴ ꓕꓶꓻˍ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ꓿ ꓖꓳ ꓡꓱ ꓠꓬꓲ ꓠꓴ ꓪꓽ ꓬꓲ ꓔꓯ ꓟꓰꓹ ꓠ ꓠꓬꓲ ꓗꓷ ꓗꓸ ꓠꓯ꓾ ꓥꓪ ꓐꓳ ꓖꓶꓽ ꓓꓴ ꓕꓲ ꓫꓵꓽ ꓙꓳ ꓠꓹ ꓟ꓾ ꓬꓲ ꓔꓯ ꓠꓴ ꓪꓽ ꓟꓲꓽ ꓙꓬ ꓗꓪ ꓧꓳꓽ ꓡ ꓥꓳ꓿ ꓪ ꓔꓲ ꓮ-ꓖꓷ-ꓡꓲ-ꓒꓻꓳ꓾ ꓟꓬꓽ ꓠꓬꓲ ꓠꓴ ꓟꓲꓽ ꓙꓬ ꓗꓪ ꓧꓳꓽ ꓡꓺˍ ꓟ ꓥ ꓡꓳ꓿ 27 ꓮ ꓡꓲꓳ ꓐꓯ ꓠꓬ ꓐꓱ ꓔ ꓢꓴ ꓕꓲ ꓣꓳ ꓔꓯ ꓬꓲ ꓓꓰ ꓘꓶꓽ ꓟꓽ ꓖꓴꓺ ꓖꓴ ꓧꓳꓽ ꓦ ꓬꓰˍ ꓟ ꓠꓬ ꓬꓲꓸ ꓡꓲꓽ ꓟꓽ ꓧꓳꓹ꓾ ꓐꓰ ꓓꓵꓽ ꓙˍ ꓡꓳ꓾ ꓐꓯˍ ꓡꓳ꓿

ꓝꓲ-ꓓꓴ 26

1 ꓮ-ꓖꓷ-ꓡꓲ-ꓒ ꓡꓰ ꓒꓳ-ꓡꓳ ꓔꓯ꓾ ꓠꓴ ꓚꓲ ꓛꓬ ꓐꓱ ꓶ ꓠꓴ ꓫꓸ ꓕꓱ ꓛꓵˍ ꓡꓳ꓾ ꓐꓯ ꓖꓶ ꓗꓷ ꓠꓬ꓾ ꓒꓳ-ꓡꓳ ꓡꓯꓼ ꓒꓯꓹ ꓛꓱ ꓢꓲ ꓒꓶꓻ ꓔꓳꓹ ꓘꓶꓽ ꓕꓱ ꓡꓱ ꓫ ꓕꓱ ꓪꓴꓸ ꓔꓴˍ ꓡꓳ꓿ 2 ꓪ ꓔꓲ ꓮ-ꓖꓷ-ꓡꓲ-ꓒꓻꓳ꓾ ꓠꓬꓲꓸ ꓠꓬꓲ ꓥꓪ ꓠꓬ ꓠꓴ ꓟꓲꓽ ꓙꓬ ꓗꓪ ꓦꓰꓼ ꓞ ꓢꓲ꓾ ꓬꓴ-ꓔ ꓡ ꓞꓳ ꓡꓰ ꓥꓪ ꓔꓯ ꓗꓳꓹˍ ꓟ ꓮꓽ ꓙꓵ ꓑꓶꓸ ꓓꓴ꓾ ꓥꓪ ꓒꓶꓻ ꓔꓳꓹ ꓘꓶꓽ ꓫꓸ ꓕꓱ ꓪˍ ꓠꓬꓲ꓾ ꓥꓪ ꓠꓬ ꓥꓪ ꓚꓲ ꓛꓬ ꓔꓯ ꓶꓼ ꓛꓳ ꓢꓴ ꓚꓬꓹ ꓡꓳ꓿ 3 ꓥꓪ ꓕꓱ ꓡꓱ ꓚꓲ ꓛꓬ ꓔꓯ ꓶꓼ ꓛꓳ ꓢꓴ ꓚꓬꓹ ꓟ ꓠꓬ꓾ ꓬꓴ-ꓔ ꓡ ꓞꓳ ꓡꓲꓽ ꓒꓰꓼˍ ꓐꓰ ꓬꓲ ꓪꓽ ꓧꓳꓺ ꓡꓯꓼ ꓘꓳˍ ꓟ ꓚꓱꓹ ꓮꓽ ꓙꓵ ꓠꓴ ꓢꓷꓸ ꓖꓴˍ ꓟ ꓗꓪ ꓐꓰ ꓥ ꓡꓳ꓿ ꓖꓳ ꓡꓱ ꓠꓬꓲ ꓠꓴ ꓠꓲꓹ ꓟ ꓫꓵ ꓢꓲ ꓥꓪ ꓔꓯ ꓠ ꓠꓹ ꓖꓶ ꓡꓯ꓾ ꓐꓰ ꓠꓴ ꓔꓯ ꓓꓰꓽˍ ꓥꓳ꓿ 4 ꓥꓪ ꓠꓬ ꓬꓲꓸ ꓪꓴꓸ ꓕꓯˍ ꓡꓰ꓾ ꓙꓱ-ꓣꓴ-ꓢ-ꓡꓱˍ ꓐꓰ ꓥꓪ ꓕꓲ ꓫꓵꓽ ꓟ ꓡ ꓞꓳ ꓗꓳ ꓡꓳ ꓗꓪ ꓮ ꓡꓲ ꓐꓰ ꓞꓳ ꓙꓳ ꓗꓷ ꓟ ꓠꓬ ꓬꓴ-ꓔ ꓡ ꓞꓳ ꓐꓴ ꓮꓽ ꓙꓵ ꓢꓷˍ ꓡꓳ꓿ 5 ꓬꓲ ꓪꓽ ꓢꓷꓸ ꓙ ꓟꓳ ꓙ ꓢꓴ ꓬꓰ ꓫꓳ ꓐꓷˍ ꓠꓬ꓾ ꓬꓲ ꓪꓴꓸ ꓕꓯ ꓥꓪ ꓠꓬ ꓥꓪ ꓠꓴꓽ ꓦ ꓡꓱ ꓚꓱꓹ ꓗꓪ ꓮꓽ ꓘꓶꓸ ꓦ ꓡꓱ ꓔꓰꓹˍ ꓟ ꓒ-ꓡꓲ-ꓢꓷ ꓡ ꓞꓳ ꓬꓰ ꓗꓷ ꓟ ꓬꓲ ꓪꓽ ꓢꓷꓸˍ ꓡꓳ꓿ 6 ꓮ ꓟꓶ ꓐꓯ ꓟꓴ ꓘꓶꓽ ꓕꓲ ꓕꓱ ꓟ ꓗꓪ ꓥꓪ ꓦꓰꓼ ꓞꓹ ꓟ ꓠꓬ꓾ ꓪꓴ-ꓢ ꓡꓰ ꓥꓪ ꓠꓴꓽ ꓒꓵꓽ ꓒ ꓐꓴ ꓔꓯ ꓖꓶ ꓙ ꓟꓳˍ ꓟ ꓔꓯ ꓥꓪ ꓥꓳ ꓡꓳꓸ ꓔꓬ ꓠꓬꓲ ꓥ ꓡꓳ꓿ 7 ꓥꓪ ꓠꓴꓽ ꓞꓲ ꓠꓬꓲꓽ ꓪꓳꓼ ꓠꓬ ꓠꓲꓹ ꓟ ꓡꓱꓻ ꓡꓱˍ ꓐꓰ ꓪꓴ-ꓢ ꓔꓯ ꓟꓳꓼ ꓡꓳ ꓢ ꓘꓪ ꓣꓱꓽ ꓙ ꓢꓲ꓾ ꓙ ꓟꓳ ꓘꓶ ꓕꓱ ꓟ ꓟꓶ ꓠꓹ ꓟ ꓔꓯ ꓥꓳ ꓡꓳꓸ ꓗꓷ ꓟ ꓥ ꓡꓳ꓿ ꓪ ꓔꓲꓸ ꓮ-ꓖꓷ-ꓡꓲ-ꓒꓻꓳ꓾ ꓥꓳ ꓡꓳꓸ ꓓꓴ ꓕꓱ ꓟ ꓑꓶ ꓓꓴ ꓬꓴ-ꓔ ꓡ ꓞꓳ ꓡꓰ ꓥꓪ ꓔꓯ ꓗꓳꓹˍ ꓟ ꓥ ꓡꓳ꓿ 8 ꓪꓴ-ꓢ ꓡꓰ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ ꓔꓯ꓾ ꓠꓴ ꓪꓽ ꓮꓸ ꓫꓵꓽ ꓪꓴꓸ ꓠꓬꓲ ꓙꓵꓻ ꓟꓽ ꓓ꓾ ꓐꓰ ꓓꓵꓽ ꓙˍ ꓡ? 9 ꓧꓶꓸ ꓕꓯ ꓥꓪ ꓥ ꓟꓲ ꓠ-ꓢ-ꓡꓱ ꓢꓴ ꓬꓰ-ꓢꓴ ꓟꓬꓱꓺ ꓔꓯ ꓔꓳꓹ ꓠꓹ ꓟ꓾ ꓜꓲꓽ ꓜꓲ ꓑꓰꓹ ꓑꓰꓹ ꓮꓽ ꓟꓬꓹ ꓫꓵꓽ ꓬꓰ ꓓꓴ ꓓꓵꓽ ꓙ ꓗꓷꓳ꓿ 10 ꓥꓪ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴ ꓔꓯˍ ꓐꓰ ꓙꓵꓽ ꓪ ꓟꓶ ꓗꓷ ꓠꓬ꓾ ꓦ ꓡꓱ ꓢꓴ ꓮꓽ ꓟꓬꓹ ꓣꓳ ꓔꓯ ꓐꓱ ꓓꓴꓽ ꓗꓪ ꓐꓱ ꓗꓷ ꓟˍ ꓡꓰ ꓟꓽ ꓞꓲ꓾ ꓬꓲ ꓪꓽ ꓔꓯ ꓢꓰꓼ ꓠꓹ ꓟˍ ꓟꓲ ꓓꓽ ꓔꓳꓹ ꓗꓷꓳ꓿ 11 ꓜꓲꓼ ꓦꓲ ꓮꓽ ꓙꓵ ꓗꓪ ꓥꓪ ꓬꓲ ꓪꓽ ꓔꓯ ꓮꓽ ꓟꓬꓹ ꓧꓪ ꓟꓸ ꓙꓽ ꓢꓲ꓾ ꓬꓰ-ꓢꓴ ꓔꓯ ꓙꓵꓻˍ ꓟ ꓚꓱꓹ ꓔꓯ ꓟꓽ ꓣꓷꓠꓸ ꓝꓲ ꓠꓹ ꓟ ꓬꓲ ꓪꓽ ꓔꓯ ꓟꓻ ꓫꓵꓻ ꓟꓻ ꓢꓯꓸ ꓘꓶꓻ ꓙꓵ ꓠꓬꓲꓳ꓿ ꓥꓪ ꓠꓬ ꓮꓽ ꓘꓶꓸ ꓠꓲꓹ ꓟ ꓦꓶꓻ ꓪꓴꓸˍ ꓟ ꓗꓪ ꓐꓰ꓾ ꓐꓶ ꓞꓳ ꓡꓳ ꓒꓱ ꓗꓪ ꓛꓲˍ ꓟꓲ ꓬꓲ ꓪꓽ ꓔꓯ ꓧꓪ ꓢꓲ ꓘꓶꓻ ꓙꓵ ꓗꓷꓳ꓿ 12 ꓔꓲ ꓒ ꓪꓴꓸ ꓓꓵ ꓣꓱ ꓢꓴ ꓐꓴ ꓙꓵꓽ ꓪꓽˍ ꓐꓰ ꓝꓲꓺ ꓘꓶꓽ ꓔꓯꓹ ꓔ ꓢꓲ꓾ ꓥꓪ ꓬꓲ ꓖꓳ ꓡꓱ ꓔ-ꓟ-ꓢꓷ ꓗꓪ ꓙꓰ ꓔꓬ ꓕꓯ꓾ 13 ꓪ ꓔꓲꓸꓳ꓾ ꓟꓳꓼ ꓡꓳ ꓕꓯ ꓙ ꓖꓴ ꓗꓪ ꓥꓪˍ ꓐꓰ ꓥꓪ ꓔꓯ ꓛꓳ ꓙꓰ ꓢꓴ ꓐꓴ ꓚꓳ ꓡꓳ ꓗꓪ꓾ ꓟꓲꓽ ꓟꓲ ꓢꓶꓸ ꓟꓽ ꓞꓲ ꓐꓬꓱꓽ ꓡꓱꓼˍ ꓟ ꓠꓬꓲ ꓟꓳ ꓓꓴ ꓠꓬ ꓟꓴꓽ ꓗꓪ ꓗꓪ ꓐꓰ ꓥꓪ ꓔꓯ ꓤꓰꓽ ꓩꓴ ꓡꓺꓳ꓿ 14 ꓥꓪ ꓠꓴꓽ ꓮꓽ ꓙꓵ ꓟꓲ ꓛꓬ ꓗꓪ ꓓꓳꓽ ꓡꓰ ꓠꓬ꓾ ꓥꓪ ꓔꓯ ꓦꓲ-ꓐꓱ-ꓣꓴ ꓥꓳꓽ ꓡꓰ꓾ ꓢꓳ-ꓡꓳꓺꓳ꓾ ꓢꓳ-ꓡꓳꓺꓳ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓗꓸ ꓧꓪꓺˍ ꓡ? ꓗꓸ ꓓꓴ ꓔꓯ ꓠꓴ ꓑꓰꓹˍ ꓟ ꓠꓬ ꓠꓴ ꓚꓲ ꓛꓬ ꓫꓸ ꓓꓴ ꓥꓳ꓾ ꓐꓯ ꓖꓶ ꓡ ꓟ ꓢꓯꓼ ꓑ ꓙꓽꓳ꓿ 15 ꓥꓪ ꓡꓰ꓾ ꓢꓲ ꓒꓽꓳ꓾ ꓠꓴ ꓮꓽ ꓟ ꓥ ꓡ?꓾ ꓐꓰ ꓠ ꓠꓬꓲ ꓕꓯ꓾ ꓬꓲ ꓡꓰ ꓥꓪ ꓔꓯ꓾ ꓥꓪ ꓠꓬ ꓠꓴ ꓡꓰ ꓗꓸ ꓧꓪ ꓔꓬ ꓟ ꓬꓰ-ꓢꓴ ꓥꓳ꓿ 16 ꓠꓴ ꓔꓴ ꓢꓲ ꓦꓰꓼ ꓔ꓿ ꓮ ꓡꓲꓳ ꓐꓯ ꓠꓬ ꓠꓴ ꓟꓳꓻ ꓠꓬꓲˍ ꓟˍ ꓐꓰ ꓢꓹ ꓖꓪ ꓥꓪ ꓡꓰ ꓠꓴ ꓔꓯ ꓟꓳꓸ ꓖꓶ ꓠꓹ ꓟ ꓮꓽ ꓙꓵ ꓔꓯꓸ ꓟꓳꓸ꓾ ꓢꓷꓸ ꓙ ꓟꓳ ꓙ ꓢꓴˍ ꓐꓰ ꓥꓪ ꓛꓳ ꓑ ꓬꓰ ꓝꓲ ꓠꓹ ꓟ ꓥꓪ ꓡꓰ ꓠꓴ ꓔꓯ ꓢꓲ ꓚꓰꓸ ꓗꓷ ꓢꓲ꓾ ꓥꓪ ꓖꓳ ꓓꓱ ꓠꓴ ꓔꓯ ꓟꓳꓸ ꓖꓶˍ ꓟ ꓥ ꓡꓳ꓿ 17 ꓥꓪ ꓠꓬ ꓠꓴ ꓔꓯ ꓐꓶꓽ ꓞꓳ ꓔꓬ ꓗꓪ ꓝꓲ ꓩꓴ ꓗꓷ ꓥꓳ꓿ ꓠꓴ ꓚꓲꓸ ꓛꓬ ꓞꓳ ꓫꓵ ꓐꓴ ꓡꓯ ꓒꓯꓹ ꓗꓪ ꓐꓰ ꓥ ꓟꓲ ꓐꓶ ꓞꓳ ꓐꓴ ꓡꓯꓼ ꓒꓯꓹ ꓗꓪ ꓐꓰˍ ꓟꓲ꓾ ꓥꓪ ꓡꓰ ꓠꓴ ꓔꓯ ꓚꓬꓴ ꓓꓳ ꓡ ꓥꓳ꓿ 18 ꓥꓪ ꓡꓰ ꓠꓴ ꓔꓯ ꓬꓲ ꓪꓽ ꓔꓬ ꓗꓪ ꓝꓲ ꓩꓴ ꓗꓷˍ ꓟ ꓠꓬ꓾ ꓠꓴ ꓡꓰ ꓬꓲ ꓪꓽ ꓟꓬ ꓢꓶꓽ ꓒꓴ ꓖꓶ ꓢꓲ꓾ ꓬꓲ ꓪꓽ ꓠꓬ ꓠꓯ ꓞꓲꓹˍ ꓟ ꓗꓪ ꓐꓰ ꓠꓬꓲ ꓟꓳꓻ ꓓꓴ ꓗꓪ ꓒꓳꓹ ꓬꓲꓼ ꓡ ꓠꓹ ꓟ ꓐꓰ꓾ ꓢ-ꓓꓯ ꓙꓵꓽ ꓪ ꓠꓬꓲˍ ꓟ ꓗꓪ ꓐꓰ ꓪꓴ-ꓢ ꓔꓯ ꓒꓳꓹ ꓬꓲꓼ ꓡ ꓢꓲ꓾ ꓖꓳ ꓟ ꓗꓪ ꓐꓰ ꓬꓲ ꓪꓽ ꓝꓴꓲ ꓖꓽ ꓖꓶ ꓟꓶ ꓢꓲ ꓠꓬꓲ ꓥꓪ ꓔꓯ ꓙꓵꓻˍ ꓟ ꓗꓪ ꓐꓰ ꓢꓲ ꓚꓰꓸ ꓔ ꓢꓴ ꓐꓴ ꓗꓳ ꓡꓳ ꓗꓪ ꓡꓯꓼ ꓪ ꓟꓶ ꓠꓹ ꓟ꓾ ꓥꓪ ꓡꓰ ꓠꓴ ꓔꓯ ꓝꓲ ꓩꓴˍ ꓟ ꓥ ꓡꓳ꓾ ꓐꓯ ꓖꓶˍ ꓡꓺꓳ꓿ 19 ꓪ ꓔꓲ ꓮ-ꓖꓷ-ꓡꓲ-ꓒꓻꓳ꓾ ꓖꓳ ꓟ ꓑꓶ ꓓꓴ ꓥꓪ ꓠꓽ꓾ ꓟꓴꓽ ꓗꓪ ꓗꓪ ꓐꓰ ꓟꓳꓸ ꓖꓶ ꓡ ꓟ ꓦ ꓐꓬꓱ ꓔꓯ ꓟꓽ ꓒꓵ ꓛꓳ ꓬꓰ ꓟꓽ ꓑꓶꓸ ꓗꓷ ꓡꓰꓳ꓿ 20 ꓬꓲ ꓪꓴꓸ ꓕꓯ ꓠꓬ ꓔ-ꓟ-ꓢꓷ ꓗꓪ꓾ ꓗꓸ ꓠꓯꓸ ꓠꓬ ꓙꓱ-ꓣꓴ-ꓢ-ꓡꓱˍ ꓐꓰ ꓬꓴ-ꓔ ꓟꓵꓽ ꓮꓽ ꓙꓵˍ ꓐꓰ ꓐꓶ ꓞꓳ ꓔꓯˍ ꓟꓲ꓾ ꓪꓴ-ꓢ ꓔꓯ ꓓꓵꓽ ꓙ ꓒꓳꓹ ꓬꓲꓼ ꓡ ꓟ ꓐꓰ꓾ ꓠꓲꓹ ꓟ ꓡꓶꓸˍ ꓟ ꓔꓯ ꓧꓳꓹˍ ꓟ ꓟꓬꓱꓽ ꓬꓰ ꓠꓹ ꓟ꓾ ꓥꓪ ꓬꓲ ꓪꓽ ꓔꓯ ꓐꓯ ꓟꓸ ꓖꓶ ꓗꓷꓳ꓿ 21 ꓢꓲꓽ ꓫꓬ ꓦꓲ ꓗꓪ ꓬꓴ-ꓔ ꓡ ꓞꓳ ꓡꓰ ꓥꓪ ꓔꓯ ꓣꓴ ꓢꓲ ꓢꓰꓼˍ ꓐꓰ ꓬꓰˍ ꓟ ꓠꓬ ꓕꓱ ꓟ ꓑꓶꓸ ꓓꓴ ꓥ ꓡꓳ꓿ 22 ꓖꓳ ꓡꓱ ꓥ ꓟꓲ ꓪꓴ-ꓢ ꓥꓪ ꓔꓯ ꓬꓰ ꓙ ꓠꓬꓲ꓾ ꓠꓬꓲꓸ ꓠꓬꓲ ꓗꓪ ꓛꓲ ꓥꓪ ꓦꓰꓼ ꓞꓹ ꓪ ꓢꓲ꓾ ꓪꓴꓽ ꓪꓴ ꓣꓳ ꓣꓳ ꓟꓲꓽ ꓙꓬ ꓗꓪ ꓠꓱꓸ ꓐꓯꓼ ꓮꓸ ꓫꓵꓽ ꓟꓽ ꓐꓯ ꓐꓯ꓾ ꓟꓷ ꓠꓷꓹ ꓝꓸ ꓢꓴ ꓐꓴˍ ꓐꓰ ꓟꓳ-ꓫꓲ ꓡꓰ꓾ 23 ꓙꓲ-ꓢꓴ ꓠꓽ ꓫꓸ ꓙꓵ ꓠ ꓗꓹ ꓟ ꓐꓰ꓾ ꓬꓲ ꓠꓬ ꓫꓵꓻ ꓗꓪ ꓐꓰ ꓬꓲ ꓪꓴꓸ ꓢꓯꓸ ꓬꓲꓼ ꓡ ꓢꓴ ꓥ ꓠꓬꓲ꓾ ꓬꓲ ꓡꓰ ꓬꓲ ꓑ ꓫꓬꓼ ꓐꓴˍ ꓐꓰ ꓐꓶ ꓞꓳ ꓐꓴ ꓔꓯ ꓠꓬꓲ ꓟꓳ ꓓꓴ ꓟꓸ ꓟꓲ ꓚ ꓟꓸ ꓖꓶ ꓡ ꓥꓳ꓾ ꓐꓰ ꓐꓯ ꓗꓷˍ ꓟ ꓕꓱ ꓟ ꓔꓯ ꓥꓪ ꓢꓷꓸ ꓙ ꓟꓳ ꓙˍ ꓥꓳ꓾ ꓐꓯˍ ꓡꓳ꓿ 24 ꓒꓳ-ꓡꓳ ꓬꓲ ꓒꓶꓻ ꓔꓳꓹ ꓘꓶꓽ ꓖꓳ ꓡꓱ ꓐꓯ ꓔꓬ ꓕꓯ꓾ ꓒꓲ-ꓢꓶ-ꓔꓴ ꓠꓬ ꓢꓯꓼ ꓓꓽ ꓟ ꓡꓰ꓾ ꓒꓳ-ꓡꓳꓺꓳ꓾ ꓠꓴ ꓪꓴꓸˍ ꓡꓳ꓿ ꓠꓴ ꓠꓽ ꓕꓳ ꓶ ꓢꓳ ꓟꓬꓽ ꓡꓰ ꓠꓬꓲ ꓞꓳ ꓪꓴꓸ ꓒꓬꓱꓼ ꓡ ꓐꓷ꓾ ꓐꓯˍ ꓡꓳ꓿ 25 ꓒꓳ-ꓡꓳ ꓡꓰ꓾ ꓞꓳ ꓪꓴꓽ ꓒꓲ-ꓢꓶ-ꓔꓴꓽꓳ꓾ ꓥꓪ ꓟꓽ ꓪꓴꓸ꓿ ꓥꓪ ꓠꓬ ꓞꓳ ꓢꓲꓽ ꓥꓳꓽˍ ꓐꓰ ꓔꓱꓹ ꓘꓶꓽ ꓫꓸ ꓕꓱˍ ꓟ ꓥ ꓡꓳ꓿ 26 ꓕꓱ ꓟꓬ ꓫꓵꓽ ꓔꓯ ꓪ ꓔꓲ ꓠꓴˍ ꓟꓲ ꓢꓷꓸˍ ꓠꓬꓲ꓾ ꓥꓪ ꓠꓬ ꓠꓲꓹ ꓪꓴꓽ ꓪꓴꓽˍ ꓡꓰꓽ ꓠꓴ ꓔꓯ ꓫ ꓕꓱˍ ꓟ ꓥꓳ꓿ ꓫꓵꓽ ꓪꓴꓻ ꓕꓱ ꓟ ꓠꓬ ꓠꓴ ꓔꓯꓸˍ ꓐꓰ ꓚꓵꓺ ꓞꓹ ꓟ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓫꓵꓽ ꓟ ꓠꓽ ꓬꓲ ꓗꓴꓺ ꓬꓲ ꓡꓯꓼ ꓗꓪ ꓒꓬꓱꓼ ꓡ ꓗꓷ ꓟ ꓫꓵꓽ ꓪꓴꓻ ꓟꓽ ꓥ꓿ 27 ꓪ ꓔꓲ ꓮ-ꓖꓷ-ꓡꓲ-ꓒꓻꓳ꓾ ꓟꓷ ꓠꓷꓹ ꓝꓸ ꓢꓴ ꓔꓯ ꓠꓴ ꓙꓵˍ ꓡ? ꓠꓴ ꓙꓵˍ ꓟ ꓥꓪ ꓢꓷꓸˍ ꓡꓳ꓾ ꓐꓯˍ ꓡꓳ꓿ 28 ꓮ-ꓖꓷ-ꓡꓲ-ꓒ ꓡꓰ ꓒꓳ-ꓡꓳ ꓔꓯ꓾ ꓠꓴ ꓠꓬ ꓥꓪ ꓔꓯ ꓕꓲ ꓑꓹ ꓤ ꓘꓶꓸ ꓖꓶˍ ꓟ ꓗꓪ ꓐꓰ ꓙꓲ-ꓢꓴ ꓢꓲ ꓤ ꓒꓬꓱꓼ ꓡ ꓝꓲ ꓠꓲꓹ ꓫꓵˍ ꓠꓳꓹ꓾ ꓐꓯˍ ꓡꓳ꓿ 29 ꓖꓳ ꓡꓱ ꓠꓬ ꓒꓳ-ꓡꓳ ꓡꓰ꓾ ꓕꓲ ꓑꓹ ꓤ ꓡꓰ ꓘꓶꓸˍ ꓟ ꓗꓪ ꓐꓰˍ ꓟꓲ꓾ ꓟꓶ ꓫꓵꓺ ꓫꓵ ꓗꓪ ꓐꓰˍ ꓟꓲ꓾ ꓠꓴˍ ꓐꓰ ꓠꓬꓲꓸ ꓠꓬꓲ ꓥꓪ ꓔꓯ ꓑ ꓙꓽ ꓢꓴ ꓮꓽ ꓙꓵ ꓔꓯ꓾ ꓥꓪ ꓔꓯ ꓞꓳꓹ ꓞꓹ ꓟ ꓞꓳꓹ ꓚ ꓕꓱ ꓕꓲ ꓫꓵꓽ ꓟꓽ ꓥ ꓠꓬ꓾ ꓥꓪˍ ꓡꓰ ꓐꓰ ꓒꓬꓱꓼ ꓡ ꓠꓹ ꓟ ꓥꓪ ꓪꓴ-ꓢ ꓔꓯ ꓓꓰꓽˍ ꓡꓳ꓾ ꓐꓯˍ ꓡꓳ꓿ 30 ꓖꓳ ꓡꓱ ꓠꓬ ꓪ ꓔꓲˍ ꓐꓰ ꓢꓲꓽ ꓒ ꓓꓽ ꓟ ꓐꓰ ꓐꓷ-ꓠꓲ-ꓢꓲˍ ꓐꓰ꓾ ꓬꓲ ꓪˍ ꓐꓰ ꓕꓲ ꓪꓺꓼ ꓠꓬꓲꓸ ꓠꓸ ꓢꓴ ꓐꓴ ꓠꓬ ꓓꓳ ꓙꓰ ꓢꓲ꓾ 31 ꓕꓱ ꓕꓲ ꓣꓳ ꓠꓬ ꓫꓵꓻ ꓒꓵꓽˍ ꓟ ꓐꓰ꓾ ꓞꓳꓹ ꓒꓵꓽˍ ꓟ ꓝꓴꓲ ꓮꓸ ꓫꓵꓽ ꓟꓽ ꓙꓳ ꓐꓷ꓾ ꓐꓰ ꓐꓯ ꓡꓯ ꓘꓳˍ ꓡꓳ꓿ 32 ꓖꓳ ꓡꓱ ꓠꓬ ꓮ-ꓖꓷ-ꓡꓲ-ꓒ ꓡꓰ ꓒꓲ-ꓢꓶ-ꓔꓴ ꓔꓯ꓾ ꓕꓱ ꓕꓲ ꓣꓳ ꓡꓰ ꓢꓲ-ꓢ ꓔꓯ ꓟꓽ ꓓꓰꓽ ꓗꓷ ꓐꓷˍ ꓕꓯ ꓠꓽ꓾ ꓬꓲ ꓔꓯ ꓩꓴ ꓗꓷ ꓛꓵˍ ꓡꓳ ꓫꓵ ꓥ ꓡꓳ꓾ ꓐꓯˍ ꓡꓳ꓿

ꓝꓲ-ꓓꓴ 27

1 ꓡꓲ ꓜꓶꓽ ꓢꓲ ꓥꓪ ꓠꓴꓽ ꓔꓯ ꓬꓲ-ꓔ-ꓡꓲ ꓗꓪ ꓙꓰ ꓝꓲ ꓠꓹ ꓟ ꓬꓲ ꓪꓽ ꓓꓵꓽ ꓙ ꓞꓷꓹ ꓗꓷ ꓠꓬ꓾ ꓒꓳ-ꓡꓳˍ ꓐꓰ ꓠꓱꓸ ꓐꓯꓼ ꓐꓱ ꓔ ꓢꓴ ꓕꓲ ꓧꓳꓽ ꓔꓯ ꓮ-ꓗꓴ-ꓢꓶ-ꓔꓴ ꓟꓯꓼ ꓜꓴ ꓗꓪ ꓟ꓾ ꓬꓴ-ꓡꓲ-ꓪꓴ ꓟꓬꓱ ꓔ ꓟ ꓟꓯꓼ ꓕꓲ ꓦꓬ ꓙꓵꓽ ꓒ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓖꓶˍ ꓡꓳ꓿ 2 ꓖꓳ ꓡꓱ ꓠꓬ ꓮ-ꓢꓲ-ꓬ ꓟꓵꓽ ꓘꓶꓽ ꓗꓪ ꓟ ꓡꓲ ꓠꓽ ꓖꓴ ꓕꓲ ꓟ ꓡꓰ ꓕꓲ ꓟ ꓗꓪ ꓙꓰˍ ꓐꓰ ꓬꓰˍ ꓟ꓾ ꓬ-ꓓ-ꓟꓲ-ꓕꓲ ꓗꓪ ꓟ ꓡꓲ ꓕꓲ ꓟ ꓗꓪ ꓥꓪ ꓠꓴꓽ ꓜꓶꓽ ꓙꓰꓳ꓿ ꓟ-ꓢꓲ-ꓓꓳ ꓟꓵ ꓕꓰ-ꓢ-ꓡꓳ-ꓠꓲ-ꓬꓼ ꓢꓴ ꓬ-ꓡꓲ-ꓓ-ꓗꓴˍ ꓟꓲ ꓥꓪ ꓠꓴꓽˍ ꓐꓰ ꓙꓰˍ ꓡꓳ꓿ 3 ꓗꓸ ꓠꓯ ꓕꓲ ꓠꓬꓲ ꓥꓪ ꓠꓴꓽ ꓠꓬ ꓢꓲ-ꓓꓳ ꓡꓳ ꓒꓱ ꓗꓪ ꓛꓲ ꓬꓰꓳ꓿ ꓖꓳ ꓕꓯ ꓬꓴ-ꓡꓲ-ꓪꓴ ꓠꓬ ꓒꓳ-ꓡꓳ ꓔꓯ ꓠꓲꓹ ꓟ ꓙꓲꓻ ꓠꓬꓲ꓾ ꓬꓲ ꓛꓳꓽ ꓒꓯꓹ ꓐꓴ ꓔꓬ ꓗꓪ ꓙꓰ ꓝꓲ ꓢꓲ ꓬꓲ ꓔꓯ ꓣꓱꓽ ꓙ ꓝꓲˍ ꓡꓳ꓿ 4 ꓖꓳ ꓗꓪ ꓐꓰ ꓡꓯ ꓫꓵ ꓡꓲ ꓜꓶꓽ ꓙꓰ ꓠꓬ ꓟꓲꓽ ꓦꓲ ꓟꓽ ꓛꓳ ꓠꓬꓲ꓾ ꓢ-ꓑꓴ-ꓣ ꓬꓲꓻ ꓗꓳ ꓡꓳ ꓟꓵ ꓛꓸ ꓞꓹ ꓟ ꓗꓪ ꓛꓲ ꓬꓰꓳ꓿ 5 ꓥꓪ ꓠꓴꓽ ꓠꓬ ꓡꓲ ꓜꓶꓽ ꓢꓲ ꓚꓲ-ꓡꓲ-ꓚꓬˍ ꓐꓰ ꓒ-ꓩꓴ-ꓡꓲ-ꓬꓼ ꓔꓱꓹ ꓞꓹ ꓟ ꓬꓲꓻ ꓡꓴ ꓐꓱ ꓗꓳꓸ ꓙꓰ ꓗꓷ ꓠꓬ꓾ ꓡꓱ-ꓚꓬ ꓟꓵꓽ ꓟꓲ-ꓡ ꓡꓳ ꓒꓱ ꓗꓪ ꓛꓲ ꓬꓰꓳ꓿ 6 ꓖꓳ ꓗꓪ ꓟꓯꓼ ꓕꓲ ꓦꓬ ꓙꓵꓽ ꓒ ꓡꓰ ꓬꓲ-ꓔ-ꓡꓲ ꓗꓪ ꓙꓰˍ ꓐꓰ ꓬꓰˍ ꓟ ꓬ-ꓡꓲ-ꓢ-ꓓ ꓢꓴ ꓡꓲ ꓕꓲ ꓟ ꓧꓪ ꓟꓶ ꓡꓰ ꓠꓬ꓾ ꓥꓪ ꓠꓴ ꓔꓯ ꓡꓲ ꓖꓳ ꓟ ꓗꓪ ꓜꓶꓽ ꓙꓰ ꓝꓲˍ ꓡꓳ꓿ 7 ꓖꓳ ꓡꓱ ꓢꓲ ꓥꓪ ꓠꓴꓽ ꓠꓬ ꓡꓲ ꓗꓪ ꓮꓽ ꓟꓬꓹ ꓠꓬꓲ ꓮ ꓤ ꓤˍ ꓐꓰ ꓙꓰ ꓢꓲ꓾ ꓫꓸ ꓫˍ ꓐꓰ ꓗꓷ-ꓠꓲ-ꓢꓶ ꓒꓳꓹ ꓞꓹ ꓗꓪ ꓛꓲ ꓬꓰ ꓕꓯ꓾ ꓥꓪ ꓠꓴꓽ ꓙꓰ ꓠꓯꓹ ꓟ ꓔꓯꓸ ꓟꓳꓸ ꓟꓲꓽ ꓦꓲ ꓟꓽ ꓙꓱꓼ ꓠꓬꓲ꓾ ꓗꓷ-ꓡꓲ-ꓔꓲ ꓛꓸ ꓞꓹ ꓟ ꓐꓰ ꓢ-ꓟꓳ-ꓠꓲ ꓒꓳꓹ ꓞꓹ ꓗꓪ ꓙꓰꓳ꓿ 8 ꓥꓪ ꓠꓴ ꓠꓬ ꓬꓲꓻ ꓡꓴꓽ ꓐꓱ ꓘꓶ ꓚ ꓚˍ ꓗꓪ ꓫꓸ ꓫˍ ꓐꓰ ꓙꓰ ꓢꓲ꓾ ꓐꓲꓻ-ꓟ-ꓬꓲ-ꓡꓯꓼ-ꓚꓵꓹ꓾ ꓟꓬꓱ ꓔ ꓟ ꓕꓲ ꓔꓳꓸ ꓗꓪ ꓛꓲ ꓬꓰꓳ꓿ ꓖꓳ ꓟ ꓒ ꓕꓲꓺꓼ ꓗꓪ ꓠꓬ ꓡꓲ-ꓫꓲ-ꓬ ꓡꓳ ꓒꓱ ꓥ ꓡꓳ꓿ 9 ꓟꓶ ꓤ ꓪꓽ ꓐꓶ ꓡꓰ ꓟ ꓗꓪ ꓐꓰ꓾ ꓜꓽ ꓓꓴ ꓚꓲˍ ꓟ ꓦꓬꓼ ꓠꓬꓲˍ ꓟꓲ ꓗꓳꓸ ꓗꓷ ꓠꓬꓲ꓾ ꓡꓲ ꓜꓶꓽˍ ꓟ ꓠꓬ ꓙꓲ ꓣꓴ ꓓꓴ ꓙꓳˍ ꓟ ꓝꓲꓸ ꓥ ꓟ ꓑꓶꓸ ꓓꓴ꓾ ꓒꓳ-ꓡꓳ ꓡꓰ ꓬꓲ ꓪꓽ ꓔꓯ ꓘꓶꓸ ꓢꓲ꓾ 10 ꓮ ꓬꓲꓼ ꓐꓴꓳ꓾ ꓮ ꓟꓶ ꓡꓲ ꓜꓶꓽˍ ꓠꓬ ꓡꓲˍ ꓐꓰ ꓖꓴꓽ ꓙꓴ ꓐꓬ ꓡꓰ ꓟˍ ꓡꓰꓽ ꓟ ꓞꓲ꓾ ꓣꓳ ꓢꓯꓼ ꓟꓬˍ ꓟꓲ ꓒꓲꓼ ꓬꓰˍ ꓥꓳ꓾ ꓐꓰ ꓥꓪ ꓡꓳꓸ ꓓꓳ ꓡꓺꓳ꓾ ꓐꓯˍ ꓡꓳ꓿ 11 ꓖꓳ ꓡꓱ ꓥ ꓟꓲ ꓟꓯꓼ ꓕꓲ ꓦꓬꓻ ꓙꓵꓽ ꓒ ꓠꓽ ꓒꓳ-ꓡꓳ ꓔꓯ ꓢꓶꓸ ꓟꓽ ꓞꓲ꓾ ꓡꓲ ꓙꓵꓽ ꓒˍ ꓐꓰ ꓡꓲ ꓢꓲ ꓒ ꓔꓯ ꓠ ꓠꓹ ꓡꓳ꓿ 12 ꓬꓲꓻ ꓡꓯꓼ ꓚꓵꓹ ꓖꓳ ꓟ ꓗꓪ ꓙꓬꓺ ꓝꓲꓸ ꓗꓳꓸ ꓟꓽ ꓙꓲ ꓠꓬꓲ꓾ ꓟꓬꓽ ꓠꓬꓲ ꓕꓲ ꓐꓱ ꓟ ꓠꓬ ꓖꓳ ꓗꓪ ꓐꓰ ꓡꓲ ꓜꓶ ꓢꓲ꓾ ꓮ ꓡꓲ ꓥ ꓟꓲ ꓒꓲ-ꓠꓲ-ꓚꓲ ꓗꓪ ꓙꓰ ꓛꓲ ꓬꓰ ꓐ ꓡ ꓠꓬ ꓖꓳ ꓗꓪ ꓙꓬꓺ ꓝꓲꓸ ꓗꓳꓸ ꓠꓹ ꓟ ꓚꓴꓽ ꓬꓲꓹ ꓓꓶꓽˍ ꓡꓳ꓿ ꓒꓲ-ꓠꓲ-ꓚꓲ ꓠꓬ ꓗꓷ-ꓡꓲ-ꓔꓲ ꓗꓪ ꓟ ꓬꓲꓻ ꓡꓯꓼ ꓚꓵꓹ ꓥ ꓢꓲ꓾ ꓖꓴ ꓪꓴꓸ ꓐꓶꓽ ꓓꓵ ꓢꓲˍ ꓐꓰ ꓖꓴ ꓟꓶꓸ ꓐꓶꓽ ꓓꓵ ꓢꓲ ꓔꓯꓸ ꓟꓳꓸ ꓒꓳꓹ ꓞꓹ ꓡꓳ꓿ 13 ꓖꓳ ꓗ ꓠꓯꓸ ꓖꓴ ꓟꓶꓸ ꓟꓲꓽ ꓦꓲ ꓮ ꓤꓺꓼ ꓐꓰ ꓙꓱꓼ ꓡ ꓠꓬ꓾ ꓜꓳꓽ ꓡꓰꓳ꓾ ꓓꓵꓽ ꓙ ꓢꓲ꓾ ꓬꓲ ꓪꓽ ꓡꓰ ꓡꓲ ꓚꓵꓹ ꓓꓴ ꓚꓵꓹ ꓓꓯ ꓡ ꓠꓬ ꓗꓷ-ꓡꓲ-ꓔꓲ ꓒ ꓕꓲꓺˍ ꓟ ꓬꓲꓻ ꓙꓬ ꓘꓶꓽ ꓚ ꓚꓺꓼ ꓗꓪ ꓙꓰꓳ꓿ 14 ꓟꓶ ꓤ ꓟꓽ ꓥ ꓠꓬ ꓕꓳꓽ ꓥꓳ ꓓꓽ ꓟ ꓙꓱꓼ ꓡꓺꓳ꓿ ꓕꓳꓽ ꓥꓳ ꓖꓳ ꓟ ꓔꓯ ꓠꓬ꓾ ꓖꓴ ꓪꓴꓸ ꓐꓶꓽ ꓓꓳ ꓟꓲꓽ ꓦꓲ꓾ ꓐꓰ ꓘꓴˍ ꓡꓳ꓿ 15 ꓕꓳ ꓥꓳꓽ ꓡꓰ ꓡꓲ ꓔꓯ ꓓꓶꓽ ꓡ ꓕꓯ꓾ ꓟꓲ ꓦꓲ ꓔꓯ ꓧꓪꓸ ꓟꓽ ꓘꓴ ꓠꓬꓲ꓾ ꓥꓪ ꓠꓴꓽ ꓡꓰ ꓡꓲ ꓔꓯ ꓩꓴ ꓗꓷ ꓢꓲ ꓙꓱꓼ ꓔꓯꓹ ꓙꓰ ꓝꓲꓳ꓿ 16 ꓘꓳ-ꓓ ꓐꓯˍ ꓟ ꓬꓲꓻ ꓗꓳ ꓡꓳ ꓟꓵꓽ ꓤꓽ ꓕꓲ ꓟ ꓛꓸ ꓞꓹ ꓟ ꓗꓪ ꓙꓱꓼ ꓔꓯꓹ ꓛꓲ ꓬꓰ ꓠꓬ꓾ ꓮꓽ ꓘꓶꓸ ꓫꓸ ꓫꓸꓼ ꓐꓰ ꓚꓬꓴ ꓙ ꓓꓴ ꓡꓲ ꓤ ꓔꓯ ꓣꓴ ꓕꓶꓻ ꓡꓰꓳ꓿ 17 ꓬꓲ ꓪꓽ ꓡꓰ ꓡꓲ ꓤ ꓔꓯ ꓚꓵꓹ ꓓꓯ ꓡ ꓗꓷ ꓠꓬ꓾ ꓡꓲ ꓓꓽ ꓟ ꓔꓯ ꓟꓲ ꓦꓲ ꓚ ꓡꓰ ꓡꓲ ꓓꓳꓻ ꓚꓳ ꓡꓳ ꓗꓪ ꓧꓷꓹ ꓛꓵꓼˍ ꓡꓳ꓿ ꓢ-ꓱ-ꓓꓲ ꓧꓶꓽ ꓚꓲ ꓕꓯ ꓢꓲ ꓗꓪ ꓙꓱꓼ ꓚꓰꓹ ꓡꓰˍ ꓟ ꓔꓯ ꓙꓳꓺ ꓠꓬꓲ꓾ ꓡꓲ ꓕꓯ ꓢꓲ ꓗꓪ ꓟꓶ ꓛꓺ ꓔꓶꓸ ꓔ ꓟ ꓔꓯ ꓣꓴ ꓬꓯꓼ ꓗꓷ ꓢꓲ ꓙꓱꓼ ꓙꓰ ꓝꓲꓳ꓿ 18 ꓗꓸ ꓠꓯꓸ ꓕꓲ ꓠꓬꓲ ꓠꓬ꓾ ꓕꓳꓽ ꓥꓳꓽ ꓓꓽ ꓟ ꓡꓰ ꓥꓪ ꓠꓴꓽ ꓔꓯ ꓮꓽ ꓘꓶꓸ ꓙꓱꓼ ꓔꓯꓹ ꓙꓰˍ ꓠꓬꓲ꓾ ꓬꓲ ꓪꓽ ꓡꓰ ꓡꓲ ꓗꓪ ꓟ ꓶꓻ ꓡꓯꓼ ꓟꓴ ꓙꓰꓽ ꓡꓳꓺ ꓦ ꓗꓷ ꓪꓴꓸ ꓔꓴˍ ꓡꓳ꓿ 19 ꓢ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓬꓲ ꓪꓽ ꓚꓲꓸ ꓛꓬ ꓡꓯꓽ ꓒꓯ ꓡꓰ ꓡꓲ ꓗꓪ ꓟ ꓣꓱꓽ ꓓꓴ ꓟꓴ ꓓꓴ ꓶ ꓤ ꓔꓯ ꓡꓳꓺ ꓦ ꓗꓷˍ ꓡꓳ꓿ 20 ꓟꓲꓽ ꓟꓲ ꓥ ꓟꓲ꓾ ꓗꓴ ꓤ ꓥ ꓟꓲ ꓟꓽ ꓣꓳꓺ ꓖꓶ ꓡ ꓟ ꓮꓽ ꓟꓬꓹ ꓠꓬꓲ ꓗꓷ ꓡꓰ ꓢꓲ꓾ ꓕꓳꓽ ꓥꓳ ꓓꓶꓽ ꓡ ꓟˍ ꓟꓲ ꓟꓽ ꓠꓽ ꓗꓷ ꓠꓬꓲ꓾ ꓚꓬꓴ ꓟꓶ ꓠꓹ ꓟ ꓥꓳ ꓡꓳꓸ ꓓꓴ ꓟꓽ ꓙꓳ ꓗꓷ ꓡꓰꓳ꓿ 21 ꓬꓲ ꓪꓽ ꓜꓻ ꓟꓽ ꓜꓽˍ ꓟ ꓟꓶꓺ ꓤ ꓗꓷ ꓡꓰ ꓠꓬ꓾ ꓒꓳ-ꓡꓳ ꓓꓳ ꓡ ꓢꓲ꓾ ꓬꓲ ꓪꓽ ꓗꓳ ꓡꓳ ꓗꓪ ꓦꓰꓼ ꓢꓲ ꓬꓲ ꓡꓰ꓾ ꓮꓸ ꓬꓲꓼ ꓐꓴꓳ꓾ ꓐꓬ ꓡꓰˍ ꓟ ꓐꓰ ꓑ ꓒꓲꓼ ꓗꓷˍ ꓟ ꓕꓱ ꓟꓬ ꓟ ꓠꓴ ꓪ ꓔꓯ ꓟꓽ ꓗꓷ ꓡꓰ ꓠꓹ ꓟ꓾ ꓖꓳ ꓕꓯ ꓠꓴ ꓪꓽ ꓥꓪ ꓔꓯ ꓠ ꓠꓹ ꓢꓲ꓾ ꓗꓷ-ꓡꓲ-ꓔꓲ ꓗꓪ ꓐꓰ ꓕꓽ ꓓꓳ ꓡ ꓠꓯꓹ ꓡꓳ ꓫꓵꓽ ꓥ ꓡꓳ꓿ 22 ꓖꓳ ꓡꓱ ꓥ ꓟꓲ ꓮ ꓟꓶ ꓥꓪ ꓠꓴꓻ ꓪꓽ ꓔꓯ ꓠꓲꓹ ꓟ ꓪꓳꓽ ꓡꓯꓻ ꓐꓰ ꓔꓬ ꓠꓹ ꓟ ꓘꓶꓸ ꓖꓶˍ ꓥꓳ꓿ ꓠꓴ ꓪꓽ ꓗꓳ ꓡꓳ ꓗꓪ ꓕꓲ ꓣꓳˍ ꓟꓲ ꓟꓽ ꓟꓶ ꓡꓰ꓾ ꓡꓲ ꓠꓽ ꓐꓬ ꓡꓰˍ ꓥꓳ꓿ 23 ꓮ ꓡꓲꓳ ꓐꓯ ꓠꓬ꓾ ꓮꓽ ꓟꓰꓻ ꓢ ꓘꓪ ꓕꓯ ꓥꓪ ꓣꓱꓽ ꓙ ꓔꓬ ꓟ ꓪꓴ-ꓢ ꓬꓲ ꓝꓲ ꓓꓴ ꓕꓲ ꓣꓳ ꓥꓪ ꓒ ꓕꓲꓺꓼ ꓗꓪ ꓦꓰꓼ ꓡ ꓡꓳ꓿ ꓬꓲ ꓡꓰ ꓬꓲ ꓚꓳ ꓑꓸ ꓥꓪ ꓔꓯ꓾ 24 ꓒꓳ-ꓡꓳꓽꓳ꓾ ꓕꓽ ꓙꓳꓺ꓾ ꓠꓴ ꓠꓬ ꓢꓲ-ꓢ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓠ ꓗꓹ ꓡꓳ꓿ ꓠꓬꓲ ꓠꓹ꓾ ꓠꓴˍ ꓐꓰ ꓕꓲ ꓛꓳꓺꓼ ꓡꓲ ꓜꓶꓽ ꓢꓴ ꓮꓽ ꓙꓵ ꓔꓯˍ ꓟꓲ ꓪꓴ-ꓢ ꓡꓰ ꓫꓱꓸ ꓤ ꓢꓲ ꓠꓴ ꓔꓯ ꓖꓶ ꓔ ꓡꓳ꓾ ꓐꓰ ꓐꓯ ꓖꓶ ꓡꓺꓳ꓿ 25 ꓖꓳ ꓡꓱ ꓠꓬꓲ ꓮ ꓬꓲꓼ ꓐꓴꓳ꓾ ꓠꓲꓹ ꓪꓴꓽ ꓪꓴꓽˍ ꓐꓰ ꓔꓬ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓥꓪ ꓔꓯ ꓮ ꓡꓲ ꓐꓯ ꓖꓶ ꓡ ꓠꓬ ꓖꓳ ꓡꓱ ꓒꓬꓱꓼ ꓡ ꓥꓳ꓾ ꓐꓰ ꓥꓪ ꓙꓵˍ ꓡꓳ꓿ 26 ꓖꓳ ꓡꓱ ꓥ ꓟꓲ ꓣꓳ ꓠꓽ ꓬꓲꓻ ꓗꓳ ꓡꓳ ꓕꓲ ꓟ ꓗꓪ ꓔꓷꓹ ꓕꓯꓼ ꓡꓰˍ ꓠ ꓗꓹ ꓡꓳ꓾ ꓐꓯˍ ꓡꓳ꓿ 27 ꓞꓲ ꓡꓲ ꓦꓬꓼ ꓕꓲ ꓦꓬꓼ ꓗꓪ꓾ ꓥꓪ ꓠꓴꓽ ꓠꓬ ꓬ-ꓔꓲ-ꓬ ꓬꓲꓻ ꓡꓴ ꓐꓱ ꓗꓪ ꓙꓱꓼ ꓐꓴꓻ ꓙꓰ ꓔꓬ ꓕꓯ꓾ ꓮꓽ ꓡ ꓦꓬꓼ ꓔꓱ ꓫꓵ ꓗꓪ ꓡꓲ ꓗꓴꓸ ꓒ ꓐꓴ ꓠꓬ ꓟꓵꓽ ꓕꓲ ꓟꓵ ꓗꓪ ꓕꓲꓺ ꓡꓰˍ ꓐꓰ ꓗꓹ ꓡꓳ꓾ ꓓꓵꓽ ꓙˍ ꓠꓬꓲ꓾ 28 ꓬꓲꓻ ꓙꓬ ꓠꓯꓸˍ ꓟ ꓔꓯ ꓔꓯꓺ ꓠꓬꓲ ꓠꓬ ꓠꓬꓲꓽ ꓞꓲ ꓐꓳꓺ ꓙꓳˍ ꓡꓳ꓿ ꓕꓲ ꓑꓹ ꓤ ꓗꓸ ꓠꓯꓸ ꓝꓮꓲ ꓔꓯꓺ ꓠꓬꓲ ꓠꓬ ꓞꓲ ꓥꓪꓽ ꓐꓳꓺ ꓙꓳˍ ꓡꓳ꓿ 29 ꓬꓲꓻ ꓙꓬ ꓘꓶꓽ Bꓸ ꓐꓬꓼ ꓗꓪ ꓙꓲꓽ ꓕꓯꓼ ꓡꓰˍ ꓟ ꓔꓯ ꓙꓳꓺ ꓠꓬꓲ꓾ ꓬꓲ ꓪꓽ ꓡꓰ ꓡꓲ ꓚꓵꓹ ꓓꓴ ꓡꓲꓸ ꓟ ꓡꓲ ꓟꓶꓸ ꓗꓪ ꓐꓰ ꓩꓴ ꓬꓯꓼ ꓗꓷ ꓢꓲ꓾ ꓟꓲꓽ ꓕꓯ ꓙꓲꓻ ꓡ ꓟ ꓔꓯ ꓡꓳꓸ ꓔꓬ ꓡꓳ꓿ 30 ꓡꓲ ꓗꓴꓸ ꓒ ꓐꓴ ꓠꓬ ꓡꓲ ꓗꓪ ꓐꓰ ꓛꓰꓹ ꓙꓰ ꓠꓲꓹ ꓫꓵˍ ꓠꓬꓲ꓾ ꓡꓲ ꓚꓵꓹ ꓓꓴ ꓔꓯ ꓡꓲ ꓪꓴꓸ ꓓꓵ ꓗꓪ ꓐꓰ ꓩꓴ ꓬꓯꓼ ꓗꓷˍ ꓟ ꓡꓰ ꓐꓰ ꓬꓰ ꓗꓶꓸ ꓖꓶ ꓢꓲ꓾ ꓡꓲ ꓤ ꓔꓯ ꓬꓲꓻ ꓡꓴ ꓐꓱ ꓗꓪ ꓩꓴ ꓬꓯꓼ ꓗꓷˍ ꓕꓯ꓾ 31 ꓒꓳ-ꓡꓳ ꓡꓰ ꓟꓯꓼ ꓕꓲ ꓦꓬꓻ ꓙꓵꓽ ꓒˍ ꓐꓰ ꓟꓯꓼ ꓤ ꓐꓴ ꓔꓯ꓾ ꓕꓱ ꓕꓲ ꓧꓳꓽ ꓡꓲꓺ ꓗꓪ ꓟꓽ ꓔꓬ ꓠꓬ ꓠꓴ ꓪꓽ ꓡꓲꓹ ꓗꓷ ꓟꓽ ꓓ꓾ ꓐꓯ ꓖꓶˍ ꓡꓳ꓿ 32 ꓖꓳ ꓕꓯ ꓟꓯꓼ ꓤ ꓐꓴ ꓡꓰ ꓡꓲ ꓤ ꓦꓲ ꓚ ꓓꓶꓺ ꓞꓷꓹ ꓗꓷ ꓢꓲ ꓞꓰꓻ ꓡꓰ ꓝꓲˍ ꓡꓳ꓿ 33 ꓟꓲꓽ ꓕꓯ ꓙꓲ ꓡꓺˍ ꓐꓰ ꓗꓹ ꓕꓯ꓾ ꓒꓳ-ꓡꓳ ꓡꓰ ꓬꓲ ꓪꓽ ꓮꓽ ꓙꓵ ꓜ ꓜꓽ ꓠꓹ ꓟ ꓘꓶꓸ ꓖꓶ ꓢꓲ꓾ ꓠꓴ ꓪꓽ ꓙꓽ ꓫꓸ ꓢꓲ ꓙꓲꓻ ꓣꓴꓽ ꓔꓬ ꓠꓬꓲ꓾ ꓮꓸ ꓫꓵꓽˍ ꓟꓲ ꓟꓽ ꓜꓽ ꓜ ꓔꓬ ꓗꓷ ꓟ꓾ ꓠꓬꓲꓸ ꓠꓬꓲ ꓞꓲ ꓡꓲꓸ ꓠꓬꓲ ꓙꓳꓻ ꓡꓺꓳ꓿ 34 ꓖꓳ ꓡꓱ ꓠꓬꓲ ꓠꓴ ꓪꓽ ꓟꓽ ꓫꓵꓻ ꓡ ꓠꓹ ꓟ꓾ ꓜꓻ ꓮ ꓔꓲꓸ ꓤ ꓜꓽ꓾ ꓐꓰ ꓥꓪ ꓠꓴ ꓪꓽ ꓔꓯ ꓘꓶꓸ ꓖꓶˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓮ ꓡꓲ ꓕꓲ ꓣꓳ ꓪꓴꓸ ꓞꓱꓻ ꓕꓲ ꓚˍ ꓟꓲ ꓟꓽ ꓒꓲꓼ ꓬꓰ꓾ ꓐꓯ ꓖꓶˍ ꓡꓳ꓿ 35 ꓕꓱ ꓡꓱ ꓐꓯ ꓗꓷ ꓠꓬ꓾ ꓒꓳ-ꓡꓳ ꓡꓰ ꓑ ꓑ ꓣꓴ ꓢꓲ ꓮꓽ ꓙꓵ ꓢꓴ ꓟꓲꓽ ꓙꓬ ꓗꓪ ꓪꓴ-ꓢ ꓔꓯ ꓫꓸ ꓟꓳ ꓗꓷ ꓠꓬ꓾ ꓦꓶꓹ ꓢꓲ ꓜꓽ ꓪꓴꓸ ꓔꓴˍ ꓡꓳ꓿ 36 ꓖꓳ ꓕꓯ ꓮꓽ ꓙꓵ ꓢꓴ ꓠꓲꓹ ꓟ ꓗꓴ ꓖꓶ ꓟꓶ ꓡꓰ ꓢꓲ ꓬꓲ ꓪꓽˍ ꓟꓲ ꓜꓽˍ ꓡꓳ꓿ 37 ꓡꓲ ꓗꓪ ꓔꓬ ꓢꓴ ꓮꓽ ꓙꓵ ꓠꓬ ꓠꓬꓲꓽ ꓦꓬ ꓫꓵꓽ ꓞꓲ ꓛꓳꓼ ꓣꓳ ꓙꓳˍ ꓡꓳ꓿ 38 ꓬꓲ ꓪꓽ ꓜꓽ ꓐꓳ ꓡꓰ ꓠꓬ ꓡꓲ ꓔꓯ ꓡꓳꓻ ꓡꓰ ꓝꓲ ꓠꓹ ꓟ ꓡꓲ ꓗꓪ ꓓꓯꓹ ꓟ ꓫꓪ ꓔꓯ ꓬꓲꓻ ꓡꓴ ꓐꓱ ꓗꓪ ꓡꓳ ꓧꓳꓽ ꓗꓷˍ ꓡꓳ꓿ 39 ꓟꓲꓽ ꓕꓯ ꓙꓲ ꓡ ꓠꓬ ꓖꓳ ꓕꓲ ꓟꓵꓽ ꓔꓯ ꓬꓲ ꓪꓽ ꓟꓽ ꓢꓷ꓿ ꓖꓳ ꓡꓱ ꓥ ꓟꓲ ꓬꓲ ꓘꓶꓽ ꓗꓪ ꓧꓶ ꓚꓲ ꓐꓬꓼ ꓙꓳˍ ꓟ ꓬꓲꓻ ꓡꓯꓼ ꓚꓵꓹ ꓕꓲ ꓟ ꓟꓳˍ ꓠꓬꓲ꓾ ꓡꓲ ꓔꓯ ꓖꓳ ꓗꓪ ꓛꓲ ꓬꓰ ꓝꓲ ꓐꓻ ꓡ ꓠꓬ ꓖꓳ ꓗꓪ ꓠꓽ ꓬꓰ ꓠꓹ ꓟ ꓓꓵꓽ ꓙ ꓢꓲ꓾ 40 ꓡꓲ ꓚꓵꓹ ꓓꓴ ꓓꓶ ꓞꓶꓹ ꓗꓷ ꓢꓲ ꓠꓬꓲ ꓬꓲꓻ ꓡꓴꓽ ꓐꓱ ꓗꓪ ꓡꓳꓺ ꓔ ꓬꓰˍ ꓡꓳ꓿ ꓝꓮꓲ ꓠꓬ ꓡꓲ ꓚꓳꓺ ꓒꓬꓸ ꓞꓳꓹ ꓚ ꓔꓯˍ ꓟꓲ ꓒꓶ ꓗꓷ ꓢꓲ꓾ ꓟꓲꓽ ꓦꓲ ꓙꓱꓼ ꓬꓯꓼ ꓠꓹ ꓟ ꓟꓲꓽ ꓕꓯꓽ ꓢꓲ ꓗꓪ ꓟ ꓟꓶꓺ ꓛ ꓖꓳ ꓕꓲ ꓡꓯꓼ ꓔꓯ ꓚꓵꓹ ꓔꓶꓸ ꓗꓷ ꓠꓬ꓾ ꓡꓲ ꓔꓯ ꓧꓶꓽ ꓚꓲ ꓐꓬꓼ ꓔꓯꓸ ꓟꓳꓸ ꓙꓰˍ ꓡꓳ꓿ 41 ꓖꓳ ꓡꓱ ꓥ ꓟꓲ ꓬꓲꓻ ꓐꓱ ꓠꓬꓲꓽ ꓟ ꓝꓱꓺ ꓡꓰˍ ꓟ ꓕꓲ ꓔꓳꓸ ꓗꓪ ꓛꓲ ꓬꓰ ꓠꓬ꓾ ꓡꓲ ꓠꓬ ꓧꓶꓽ ꓚꓲ ꓗꓪ ꓔꓷꓹ ꓕꓯꓼ ꓗꓷ ꓢꓲ꓾ ꓡꓲ ꓪꓴꓸ ꓓꓵ ꓠꓬ ꓧꓶꓽ ꓚꓲ ꓐꓬꓼ ꓗꓪ ꓙꓲꓽ ꓞꓳꓹ ꓡꓰ ꓠꓬꓲ꓾ ꓡꓵꓺ ꓟꓽ ꓓ ꓐꓰ ꓗꓷ ꓡꓰ ꓢꓲ꓾ ꓬꓲꓻ ꓡꓯ ꓟꓰꓼ ꓓꓶꓽˍ ꓠꓬꓲ ꓡꓲ ꓟꓶꓸ ꓐꓬ ꓡꓰˍ ꓐꓰ ꓗꓹ ꓡꓳ꓿ 42 ꓟꓯꓼ ꓤ ꓐꓴ ꓠꓬ꓾ ꓐꓱ ꓔ ꓢꓴ ꓐꓴ ꓬꓲꓻ ꓙꓬ ꓢꓸ ꓢꓲ ꓛꓰꓹ ꓙꓰˍ ꓟ ꓔꓯ ꓙꓳꓺ ꓠꓬꓲ꓾ ꓬꓲ ꓪꓽ ꓔꓯ ꓢꓰꓼ ꓠꓯꓹ ꓡꓳ꓾ ꓐꓰ ꓚꓴꓽ ꓬꓲꓹ ꓓꓶꓽˍ ꓡꓳ꓿ 43 ꓖꓳ ꓡꓱ ꓥ ꓟꓲ ꓟꓯꓼ ꓕꓲ ꓦꓬꓻ ꓙꓵꓽ ꓢꓲꓽ ꓒ ꓠꓬ ꓒꓳ-ꓡꓳ ꓔꓯ ꓚꓬꓴ ꓠꓲꓹ ꓫꓵˍ ꓠꓬꓲ꓾ ꓬꓲ ꓪꓽ ꓬꓰ ꓠꓲꓹ ꓫꓵˍ ꓟ ꓔꓯ ꓗꓽ ꓔ ꓢꓲ꓾ ꓬꓲꓻ ꓙꓬ ꓢꓸ ꓗꓴꓸ ꓢꓴ ꓮꓽ ꓟˍ ꓟꓲ ꓬꓲꓻ ꓙꓬ ꓗꓪ ꓔꓷꓹ ꓬꓯꓼ ꓙꓰ ꓢꓲ ꓠꓬꓲ꓾ ꓟꓵꓽ ꓖꓳ ꓟ ꓗꓪ ꓢꓸ ꓙꓰ꓾ ꓐꓰ ꓕꓵꓼ ꓪ ꓖꓶˍ ꓡꓳ꓿ 44 ꓠꓱꓸ ꓐꓯꓼ ꓢꓴ ꓔꓯ ꓠꓬ ꓢꓲꓹ ꓒꓬꓸˍ ꓐꓰ ꓡꓲ ꓗꓪ ꓟ ꓖꓴꓽ ꓙꓴꓽ ꓣꓱꓽ ꓢꓲ꓾ ꓟꓵꓽ ꓖꓳ ꓟ ꓬꓲꓻ ꓙꓬ ꓘꓶꓽ ꓗꓪ ꓢꓸ ꓙꓰ ꓠꓹ ꓟ ꓕꓵꓼ ꓪ ꓖꓶˍ ꓡꓳ꓿ ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓬꓲ ꓪꓽ ꓮꓽ ꓙꓵ ꓢꓴ ꓬꓲꓻ ꓙꓬ ꓘꓶꓽ ꓗꓪ ꓧꓪꓸ ꓧꓪꓸ ꓛꓲ ꓬꓰꓳ꓿

ꓝꓲ-ꓓꓴ 28

1 ꓥꓪ ꓠꓴ ꓧꓪꓸ ꓧꓪ ꓗꓳꓸ ꓡꓳꓹ ꓡ ꓠꓬ꓾ ꓬꓲꓻ ꓗꓳ ꓡꓳ ꓟꓵ ꓖꓳ ꓕꓲ ꓟ ꓠꓽ ꓟꓲ-ꓡꓲ-ꓕ ꓥ ꓟ ꓢꓷꓸ ꓡꓰꓳ꓿ 2 ꓖꓳ ꓗꓪ ꓔꓬ ꓢꓴ ꓐꓴ ꓡꓰ ꓥꓪ ꓠꓴꓽ ꓔꓯ ꓙꓲˍ ꓟ ꓮꓽ ꓘꓶ ꓬꓰ ꓖꓶ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓟꓶ ꓦ ꓦ ꓢꓲ ꓙꓬˍ ꓟ ꓑꓶꓸ ꓓꓴ꓾ ꓬꓲ ꓪ ꓠꓬ ꓮꓸ ꓔꓳꓸ ꓝꓲꓺ ꓗꓳꓺ ꓠꓬꓲ ꓐꓰ ꓥꓪ ꓠꓴꓽ ꓮꓽ ꓙꓵ ꓢꓴ ꓔꓯ ꓘꓳ ꓣꓴ ꓡꓺꓳ꓿ 3 ꓒꓳ-ꓡꓳ ꓠꓽ ꓢꓲꓹ ꓕꓲ ꓧꓷꓹ ꓖꓳꓺ ꓔꓯꓹ ꓡ ꓢꓲ ꓮꓸ ꓔꓳ ꓗꓪ ꓛꓴ ꓗꓷ ꓠꓬ꓾ ꓮꓸ ꓔꓳꓸ ꓞꓻˍ ꓟ ꓑꓶꓸ ꓓꓴ ꓓꓳꓼ ꓩꓴ ꓕꓲ ꓟ ꓓꓳ ꓡ ꓢꓲ ꓬꓲ ꓡꓯꓼ ꓒꓯꓹ ꓗꓪ ꓕꓳꓹ ꓘꓳꓼ ꓞꓹ ꓡꓳ꓿ 4 ꓖꓳ ꓗꓪ ꓔꓬ ꓢꓴ ꓐꓴ ꓠꓬ ꓩꓴ ꓖꓳ ꓟ ꓬꓲ ꓔꓯ ꓕꓳꓹ ꓘꓳꓼ ꓞꓹ ꓟ ꓔꓯ ꓟꓳꓻ ꓗꓷ ꓕꓯ꓾ ꓡ ꓞꓳ ꓕꓱ ꓕꓲ ꓣꓳ ꓠꓬ ꓞꓳ ꓢꓰꓼ ꓒ ꓥ ꓠꓳꓹ꓾ ꓬꓲꓻ ꓡꓴ ꓐꓱ ꓗꓪ ꓐꓰ ꓡꓲꓹ ꓗꓷˍ ꓟꓲ꓾ ꓔꓱꓹ ꓜꓳꓽˍ ꓟ ꓐꓯ ꓟꓴ ꓡꓰ ꓬꓲ ꓔꓯ ꓫꓵꓻ ꓝꓲ ꓓꓴ ꓥ ꓠꓳꓹ꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ 5 ꓖꓳ ꓡꓱ ꓥ ꓟꓲ ꓬꓲ ꓡꓰ ꓩꓴ ꓔꓯ ꓮꓸ ꓔꓳꓸ ꓗꓪ ꓶꓹ ꓞꓰ ꓗꓷ ꓠꓬ꓾ ꓬꓲ ꓔꓯ ꓮ ꓡꓲˍ ꓟꓲ ꓟꓽ ꓗꓷ ꓡꓰ꓿ 6 ꓬꓲ ꓪꓽ ꓠꓬ ꓬꓲ ꓡꓯꓼ ꓒꓯꓹ ꓳ'ꓺ ꓡ꓾ ꓥ ꓠꓬ ꓐꓱꓽ ꓙꓰ ꓢꓲ ꓞꓼ ꓐꓰ ꓫꓵꓻˍ ꓥꓳ꓾ ꓐꓰ ꓡꓳꓸ ꓔꓬ ꓡꓳ꓿ ꓬꓲ ꓪꓽ ꓟꓶ ꓤ ꓡꓳꓸ ꓔꓬ ꓥ ꓟꓲ ꓬꓲ ꓮ ꓡꓲ ꓟꓽ ꓗꓷ ꓡꓰ ꓟ ꓔꓯ ꓡꓳꓸ ꓟꓳꓻ ꓠꓬ꓾ ꓬꓲ ꓪꓽ ꓓꓵꓽ ꓙˍ ꓟ ꓡꓶꓸ ꓗꓷ ꓢꓲ꓾ ꓬꓲ ꓠꓽ ꓢꓲꓺ ꓥ ꓐꓷ꓾ ꓐꓯˍ ꓡꓳ꓿ 7 ꓖꓳ ꓕꓲ ꓖ ꓒꓻ ꓕꓲ ꓗꓪ ꓠꓬ ꓬꓲꓻ ꓗꓳ ꓡꓳ ꓟꓵꓽ ꓪꓴꓸ ꓓꓵ ꓣꓱ ꓢꓴ ꓑ-ꓑꓷ-ꓡꓴꓽ ꓟꓬꓱ ꓔ ꓢꓴ ꓬꓲ ꓬꓰ ꓟꓲ ꓕꓲ ꓡꓯꓼ ꓙꓳˍ ꓡꓳ꓿ ꓬꓲ ꓡꓰ ꓥꓪ ꓠꓴꓽ ꓔꓯ ꓠꓲꓹ ꓡꓳ ꓡꓳˍ ꓡꓰꓽ ꓘꓳ ꓣꓴ ꓢꓲ꓾ ꓖꓳ ꓗꓪ ꓢ ꓠꓬꓲ ꓔꓬ ꓝꓲ ꓡꓺꓳ꓿ 8 ꓖꓳ ꓕꓯ ꓑ-ꓑꓷ-ꓡꓴ ꓬꓲ ꓐꓹ ꓐ ꓠꓬ ꓖꓳ ꓓꓱ ꓞꓻ ꓢꓲ ꓦꓰꓼ ꓟ ꓧꓳꓹ ꓠꓬꓲˍ ꓐꓰ ꓠꓻ ꓓꓳꓽ ꓞꓹ ꓡꓳ꓿ ꓒꓳ-ꓡꓳ ꓠꓬ ꓬꓲ ꓔꓬ ꓗꓪ ꓙꓰ ꓢꓲ꓾ ꓪꓽ ꓘꓴ ꓖꓶ ꓢꓲ ꓠꓬꓲ꓾ ꓬꓲ ꓖꓳ ꓓꓱꓽ ꓗꓪ ꓡꓯꓼ ꓒꓯꓹ ꓚꓰꓹ ꓖꓶ ꓗꓷ ꓠꓬ ꓓꓻ ꓡꓰꓳ꓿ 9 ꓖꓳ ꓗꓸ ꓠꓯꓸ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓔꓬ ꓟ ꓠꓱꓸ ꓐꓯꓼ ꓠꓻ ꓢꓴˍ ꓟꓲ ꓠꓻ ꓫꓬꓹ ꓡ ꓢꓲ ꓫꓬꓹ ꓓꓻ ꓡꓰˍ ꓡꓳ꓿ 10 ꓬꓲ ꓪꓽ ꓠꓬ ꓥꓪ ꓠꓴꓽ ꓔꓯ ꓞꓳ ꓒꓵꓽ ꓢꓲ ꓡꓯꓼ ꓫꓴ ꓮꓽ ꓟꓬꓹ ꓖꓶ ꓡꓺꓳ꓿ ꓝꓮꓲ ꓖꓳ ꓗꓪ ꓐꓰ ꓥꓪ ꓠꓴ ꓡꓲ ꓜꓶꓽ ꓢꓲ ꓙꓰˍ ꓐꓰ ꓬꓰˍ ꓕꓯˍ ꓟꓲ꓾ ꓥꓪ ꓠꓴ ꓣꓱꓽ ꓬꓯꓼˍ ꓟ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓖꓶ ꓡꓺꓳ꓿ 11 ꓦ ꓐ ꓢ ꓟ ꓗꓳꓸ ꓗꓷ ꓠꓬ ꓬꓲꓻ ꓗꓳ ꓡꓳ ꓟꓵ ꓖꓳ ꓟ ꓗꓪ ꓙꓬꓺ ꓝꓲꓸ ꓗꓳꓸ ꓔꓬ ꓟ ꓬ-ꓡꓲ-ꓢ-ꓓ ꓢꓴ ꓡꓲ ꓕꓲ ꓟ ꓗꓪ ꓜꓶꓽ ꓢꓲ ꓔꓴ ꓙꓰꓳ꓿ ꓡꓲ ꓖꓳ ꓟ ꓔꓯ ꓠꓬ꓾ ꓤꓽ ꓜꓱꓻ ꓢꓲꓺ꓾ ꓐꓰ ꓟꓬꓱ ꓔ ꓡꓳ꓿ 12 ꓥꓪ ꓠꓴꓽ ꓠꓬ ꓫꓲ-ꓡ-ꓗꓴ ꓗꓪ ꓛꓲ ꓡ ꓕꓯ꓾ ꓖꓳ ꓗꓪ ꓢ ꓠꓬꓲ ꓔꓬ ꓗꓷꓳ꓿ 13 ꓖꓳ ꓗꓪ ꓐꓰ ꓥꓪ ꓠꓴꓽ ꓝꓮꓲ ꓙꓰ ꓢꓲ ꓡꓲ-ꓚꓲ-ꓳ ꓗꓪ ꓛꓲ ꓬꓰꓳ꓿ ꓗ ꓠꓯꓸ ꓕꓲ ꓠꓬꓲ ꓠꓬ ꓖꓴ ꓟꓶꓸ ꓗꓪ ꓐꓰ ꓟꓲꓽ ꓦꓲ ꓙꓱꓼ ꓡ ꓠꓬꓲ꓾ ꓠꓬꓲꓽ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓒꓴ-ꓕꓲ-ꓬꓴ-ꓡꓲ ꓗꓪ ꓛꓲ ꓬꓰꓳ꓿ 14 ꓖꓳ ꓗꓪ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓪˍ ꓐꓰ ꓫꓵꓽ ꓠꓬꓲ ꓔꓬ ꓠꓹ ꓟ ꓥꓪ ꓠꓴ ꓔꓯ ꓓꓰꓽˍ ꓡꓺꓳ꓿ ꓖꓳ ꓗ ꓠꓯꓸ ꓥꓪ ꓠꓴ ꓠꓬ ꓣꓳ-ꓟ ꓡꓳ ꓒꓱ ꓗꓪ ꓛꓲ ꓬꓰꓳ꓿ 15 ꓣꓳ-ꓟ ꓗꓪ ꓟ ꓬꓲꓼ ꓤ ꓠꓬꓲ ꓤ ꓐꓴ ꓥꓪ ꓠꓴ ꓡꓻ ꓟ ꓓꓳꓽ ꓑ ꓙꓽ ꓗꓷ ꓠꓬ꓾ ꓬꓹ-ꓑꓲ-ꓪꓴ ꓙꓵꓺˍ ꓐꓰ ꓦꓲ-ꓢ-ꓟ꓾ ꓟꓬꓱ ꓔ ꓟ ꓪꓰ ꓤ ꓦꓲ ꓗꓪ ꓛꓲ ꓥꓪ ꓠꓴ ꓔꓯ ꓞꓵꓺ ꓡ ꓡꓳ꓿ ꓒꓳ-ꓡꓳ ꓬꓲ ꓪꓽ ꓔꓯ ꓟꓳꓻ ꓗꓷ ꓠꓬ ꓪꓴ-ꓢ ꓔꓯ ꓫꓸ ꓟꓳ ꓢꓲ ꓠꓲꓹ ꓪꓴꓽ ꓡ ꓡꓳ꓿ 16 ꓥꓪ ꓠꓴ ꓣꓳ-ꓟ ꓡꓳ ꓒꓱ ꓗꓪ ꓓꓵꓽ ꓙꓰ ꓠꓬ꓾ ꓬꓲ ꓪꓽ ꓡꓰ ꓒꓳ-ꓡꓳ ꓔꓯ ꓦꓴ ꓠꓬꓹ ꓢꓴ ꓟꓯꓼ ꓕꓲ ꓣꓳˍ ꓐꓰ ꓬꓲ ꓔꓱꓹ ꓬꓲ ꓕꓲ ꓖꓺ ꓗꓪ ꓔꓬ ꓝꓲˍ ꓡꓳ꓿ 17 ꓢ ꓠꓬꓲ ꓗꓳꓸ ꓗꓷ ꓠꓬ꓾ ꓒꓳ-ꓡꓳ ꓡꓰ ꓬꓴ-ꓔ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ ꓘꓴ ꓜꓲꓼ ꓡ ꓢꓲ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓬ ꓣꓳ ꓞꓳ ꓫꓵꓽˍ ꓐꓰ ꓒꓵꓽ ꓒ ꓐꓴ ꓗ ꓫꓵ ꓔꓯ ꓟꓽ ꓛꓬꓻ ꓗꓷˍ ꓟꓲ꓾ ꓥꓪ ꓔꓯ ꓐꓱ ꓗꓷ ꓢꓲ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓣꓳ-ꓟ ꓡ ꓞꓳ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷ ꓡꓺꓳ꓿ 18 ꓬꓲ ꓪꓽ ꓥꓪ ꓔꓯ ꓟꓰꓹ ꓠ ꓠꓬꓲ ꓗꓷ ꓠꓬ꓾ ꓥꓪ ꓠꓽ ꓫꓵꓻ ꓒꓵꓽˍ ꓟ ꓝꓴꓲ ꓟꓽ ꓙꓳ ꓠꓬꓲ ꓥꓪ ꓔꓯ ꓩꓴ ꓗꓷ ꓠꓲꓹ ꓫꓵˍ ꓡꓳ꓿ 19 ꓖꓳ ꓡꓱ ꓥ ꓟꓲ ꓬꓴ-ꓔ ꓡ ꓞꓳ ꓐꓴ ꓟꓽ ꓫꓳ ꓢꓲ꓾ ꓥꓪ ꓮ ꓡꓲ ꓬꓰ ꓟꓽ ꓠ ꓠꓬꓲ ꓢꓲ-ꓢ ꓔꓯ ꓓꓰꓽ ꓠ ꓗꓷ ꓡꓰꓳ꓿ ꓥꓪ ꓚꓲ ꓛꓬ ꓕꓲ ꓫꓵ ꓟ ꓡ ꓞꓳ ꓔꓯ ꓓꓰꓺ ꓓꓴ ꓙꓳˍ ꓠꓬꓲ ꓠꓽ ꓟꓽ ꓥ꓿ 20 ꓖꓳ ꓡꓱ ꓠꓬꓲ ꓥꓪ ꓠꓬ ꓠꓴ ꓪꓽ ꓔꓯ ꓜꓲꓻ ꓡꓯ ꓘꓳ ꓢꓲ ꓫ ꓕꓱ ꓠꓹ ꓟ ꓘꓴˍ ꓟ ꓥꓳ꓿ ꓥꓪ ꓔꓯ ꓧꓳꓻ ꓫꓱ ꓚ ꓕꓱ ꓟ ꓡꓰ ꓞꓳꓹ ꓔ ꓟ ꓠꓬ ꓬꓲ-ꓢꓷ-ꓡꓰ ꓐꓴ ꓥꓳ ꓡꓳꓸ ꓓꓴ ꓪꓴꓸ ꓠꓬꓲ ꓥꓳ꓾ ꓐꓯˍ ꓡꓳ꓿ 21 ꓬꓲ ꓪꓽ ꓡꓰ ꓬꓲ ꓔꓯ꓾ ꓬꓴ-ꓔ ꓟꓵꓽ ꓗꓪ ꓐꓰ ꓠꓴ ꓔꓯ ꓟꓳꓸ ꓐꓳˍ ꓟ ꓕꓳ ꓶ ꓡꓯꓼ ꓫꓴ ꓥꓪ ꓠꓴ ꓟꓽ ꓣꓴ ꓟꓶ꓿ ꓝꓮꓲ ꓖꓳ ꓗꓪ ꓐꓰ ꓡꓻ ꓟ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓠꓴ ꓔꓯ ꓟꓳꓸ ꓟꓽ ꓙꓲ ꓟ ꓓꓳꓽ ꓚˍ ꓟ ꓮꓸ ꓫꓵꓽˍ ꓟꓲ ꓟꓽ ꓑ ꓙ꓿ 22 ꓖꓳ ꓡꓱ ꓥ ꓟꓲ ꓠꓴ ꓔꓺ ꓞꓹ ꓟ ꓕꓱ ꓕꓲ ꓢꓳꓺ ꓔꓯ ꓮ ꓡꓲ ꓗꓪ ꓔꓬ ꓢꓴˍ ꓟꓲ ꓐꓯ ꓔꓳꓹ ꓔꓬ ꓟ ꓔꓯ ꓥꓪ ꓠꓴ ꓢꓷˍ ꓠꓬꓲ꓾ ꓠꓴ ꓮ ꓡꓲ ꓓꓵꓽ ꓙˍ ꓟ ꓥꓪ ꓠꓴꓽ ꓠ ꓠꓹ ꓠꓲꓹ ꓫꓵˍ ꓡꓳ꓾ ꓐꓯˍ ꓡꓳ꓿ 23 ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓒꓳ-ꓡꓳ ꓔꓯ ꓦꓬꓼ ꓠꓬꓲ ꓕꓲ ꓟ ꓝꓰꓹ ꓗꓷ ꓠꓬ꓾ ꓬꓲ ꓔꓬ ꓟ ꓦꓲ ꓗꓪ ꓮꓽ ꓟꓬꓹ ꓣꓳ ꓬꓲ ꓔꓯ ꓡ ꓡꓳ꓿ ꓖꓳ ꓕꓯ ꓠꓯꓼ ꓗꓪ ꓐꓰ ꓟꓶꓼ ꓘꓶꓼ ꓗꓪ ꓛꓲ ꓒꓳ-ꓡꓳ ꓡꓰ ꓬꓲ ꓪꓽ ꓔꓯ ꓒꓶꓻ ꓟꓸ ꓖꓶ ꓢꓲ꓾ ꓪꓴ-ꓢ ꓗꓴꓷ ꓐꓱ ꓶ ꓢꓷꓸ ꓙ ꓟꓳ ꓙ ꓢꓲ ꓠꓬꓲ꓾ ꓟꓳ-ꓫꓲ ꓙꓵꓽ ꓗ ꓐꓰ ꓟꓷ ꓠꓷꓹ ꓝꓸ ꓢꓴ ꓕꓳ ꓶ ꓗꓪ ꓬꓰ-ꓢꓴ ꓔꓯ ꓟꓳꓸ ꓐꓯ ꓔ ꓟ ꓟꓸ ꓟꓲ ꓗꓪ ꓐꓰ ꓬꓲ ꓪꓽ ꓔꓯ ꓘꓶꓸ ꓖꓶˍ ꓡꓳ꓿ 24 ꓬꓲ ꓐꓯˍ ꓟ ꓔꓯ ꓙꓵꓻ ꓢꓴ ꓕꓲ ꓐꓱ ꓙꓳˍ ꓟꓲ꓾ ꓕꓲ ꓐꓱ ꓠꓽ ꓟꓽ ꓙꓵꓻ꓿ 25 ꓬꓲ ꓪꓽ ꓛꓳꓽ ꓬꓲ ꓪꓽ ꓟꓽ ꓧꓳꓹ ꓡꓯ ꓘꓳ ꓗꓷ ꓡꓰ ꓠꓬ꓾ ꓒꓳ-ꓡꓳ ꓡꓰ ꓕꓱ ꓡꓱ ꓐꓯ ꓖꓶˍ ꓡꓳ꓿ ꓢꓲ-ꓫꓬ-ꓟ-ꓦ ꓡꓰ ꓟꓷ ꓠꓷꓹ ꓝꓸ ꓢꓴ ꓬꓲ-ꓢ-ꓬ ꓗꓪ ꓐꓰ ꓠꓴ ꓪꓽ ꓒꓵꓽ ꓒ ꓐꓴ ꓔꓯ ꓐꓯˍ ꓟ ꓠꓬ ꓐꓯ ꓬꓯꓼˍ ꓡꓳ꓿ 26 ꓬꓲ ꓡꓰ꓾ ꓑ ꓫꓬꓼ ꓕꓱ ꓟ ꓔꓯ ꓠꓴ ꓙꓰ ꓢꓲ ꓕꓱ ꓡꓱ ꓐꓯ ꓖꓶ꓿ ꓠꓴ ꓪꓽ ꓑ ꓠꓽ ꓑ ꓙꓽ ꓢꓲ ꓮ ꓡꓲ ꓥ ꓟꓲ ꓟꓽ ꓙ ꓜꓲꓼ꓿ ꓡꓳꓸ ꓠꓽ ꓡꓳꓸ ꓟꓳ ꓢꓲ ꓮ ꓡꓲ ꓥ ꓟꓲ ꓟꓽ ꓡꓳꓸ ꓓꓳ ꓡ꓿ 27 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓲꓹ ꓟ ꓠꓬ ꓔꓯꓽ ꓡꓰ ꓢꓲ꓾ ꓬꓲ ꓪꓽ ꓠꓸ ꓑꓳˍ ꓟꓲ ꓡꓲꓽ ꓡꓰꓳ꓿ ꓬꓲ ꓪꓽ ꓟꓬ ꓢꓶꓽˍ ꓟꓲ ꓞꓲꓹ ꓞꓹ ꓡꓳ꓿ ꓟꓽ ꓥ ꓠꓬ ꓬꓲ ꓪꓽ ꓡꓳꓸ ꓟꓳ ꓢꓲ꓾ ꓑ ꓙꓽ ꓡꓰ ꓢꓲ ꓠꓬꓲ꓾ ꓙꓽ ꓜꓲꓼ ꓡꓰ ꓢꓲ ꓥꓪ ꓔꓯ ꓒꓳꓹ ꓬꓲꓼ ꓡ ꓠꓬ꓾ ꓥꓪ ꓬꓲ ꓪꓽ ꓔꓯ ꓫꓬꓹ ꓓꓻ ꓡꓰ ꓝꓲˍ ꓡꓳ ꓫꓵꓽ ꓥꓳ꓾ ꓐꓯ ꓖꓶ꓾ ꓐꓰ ꓐꓯˍ ꓡꓳ꓿ 28 ꓖꓳ ꓡꓱ ꓠꓬꓲ ꓪꓴ-ꓢ ꓬꓲ ꓢꓯꓼ ꓟꓬ ꓝꓸ ꓟ ꓣꓱꓽ ꓛꓰꓽ ꓕꓱ ꓟ ꓠꓬ꓾ ꓐꓶꓽ ꓞꓳ ꓔꓯ ꓖꓶ ꓩꓴ ꓗꓷˍ ꓟ ꓠꓴ ꓪꓽ ꓢꓷꓸ ꓠ ꓗꓹ ꓡꓳ꓿ ꓬꓲ ꓪꓽ ꓠꓬ ꓘꓳ ꓣꓴˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ 29 ꓒꓳ-ꓡꓳ ꓡꓰ ꓕꓱ ꓡꓱ ꓐꓯ ꓗꓷ ꓠꓬ ꓬꓴ-ꓔ ꓡ ꓞꓳ ꓐꓴ ꓬꓲ ꓪꓽ ꓛꓳꓽ ꓬꓲ ꓪꓽ ꓮꓽ ꓘꓶꓸ ꓧꓳꓺ ꓡꓯꓽ ꓘꓳ ꓢꓲ ꓙꓰ ꓗꓷꓳ꓿ 30 ꓒꓳ-ꓡꓳ ꓠꓬ ꓬꓲ ꓚꓲ ꓛꓬ ꓒꓴ ꓐꓶꓻ ꓢꓲ ꓥꓪꓸ ꓔ ꓟ ꓦꓲ ꓗꓪ ꓠꓬꓲꓽ ꓘꓳꓼ ꓔꓬ ꓡꓳ꓿ ꓬꓲ ꓔꓬ ꓗꓪ ꓡ ꓢꓴ ꓮꓽ ꓙꓵ ꓔꓯ ꓘꓳ ꓣꓴ ꓢꓲ꓾ 31 ꓠꓲꓹ ꓪꓴꓽ ꓪꓴˍ ꓡꓰ ꓮꓸ ꓫꓵ ꓗꓽ ꓔꓸ ꓓꓴ ꓟꓽ ꓙꓳ ꓙꓳ꓾ ꓪꓴ-ꓢ ꓗꓴꓷꓼˍ ꓐꓰ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓙ ꓖꓴ ꓟꓸ ꓖꓶˍ ꓡꓳ꓿

ꓣꓳ-ꓟ 1

1 ꓬꓰ-ꓢꓴ ꓙꓲ-ꓢꓴ ꓬꓲ ꓚꓳ ꓑꓸ ꓒꓳ-ꓡꓳ ꓥꓪ ꓠꓬ ꓝꓲ ꓓꓴ ꓬꓰ ꓠꓹ ꓟ ꓘꓴꓻ ꓔ ꓟ ꓥ ꓢꓲ꓾ ꓪꓴ-ꓢ ꓶ ꓓꓳꓽ ꓫꓱꓹ ꓓꓳꓽ ꓐꓱ ꓶ ꓢꓲ ꓚꓰꓸ ꓔ ꓟ ꓥ ꓡꓳ꓿ 2 ꓶ ꓓꓳꓽ ꓫꓱꓹ ꓓꓳ ꓕꓱ ꓟ ꓠꓬ꓾ ꓧꓶ ꓕꓯ ꓪꓴ-ꓢ ꓬꓲ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓗꓪ ꓐꓰ꓾ ꓢꓲꓽ ꓫꓬ ꓕꓳ ꓶ ꓗꓪ ꓖꓶ ꓙ ꓟꓳˍ ꓟ ꓬꓲ ꓮ ꓐꓲ ꓔꓯ ꓐꓯˍ ꓟ ꓥ ꓡꓳ꓿ 3 ꓟꓲ ꓠꓯ ꓧꓪꓽ ꓖꓳ ꓓꓱꓽ ꓕꓲ ꓒꓳꓹ ꓗꓪ ꓐꓯˍ ꓠꓬ꓾ ꓬꓰ-ꓢꓴ ꓠꓽ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓥ ꓡꓳ꓿ 4 ꓢꓲꓽ ꓢꓲ ꓫꓬ ꓫꓬ ꓟ ꓦ ꓕꓲ ꓒꓳꓹ ꓗꓪ ꓠꓽ ꓠꓬꓲ꓾ ꓬꓲ ꓠꓽ ꓪꓽ ꓠꓬꓲ ꓠꓬꓲˍ ꓡꓰꓽ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓴ ꓥ ꓠꓬꓲ꓾ ꓪꓴ-ꓢ ꓬꓲ ꓮ ꓐꓲ ꓥ ꓟ ꓟꓳꓸ ꓖꓶ ꓡ ꓢꓴ꓾ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓥ ꓡꓳ꓿ 5 ꓞꓳ ꓫꓵꓽ ꓞꓳ ꓙꓰꓽ ꓮꓽ ꓙꓵ ꓠꓬ ꓬꓰ-ꓢꓴ ꓔꓯ ꓙꓵꓻ ꓢꓲ ꓬꓲ ꓔꓯ ꓒꓵꓽ ꓛꓳ ꓝꓲ ꓠꓹ ꓟ꓾ ꓥꓪ ꓠꓬ ꓬꓲ ꓝꓲ ꓓꓴ ꓟꓬꓱꓽ ꓬꓰ ꓢꓲ ꓶꓼ ꓓꓳ ꓫꓱꓹ ꓓꓳ ꓐꓯ ꓒꓬꓱ ꓙꓰ ꓠꓹ ꓟ ꓬꓲ ꓗꓪ ꓐꓰ ꓣꓱꓽ ꓛꓰ ꓟꓶ ꓗꓷꓳ꓿ 6 ꓠꓴ ꓪꓽˍ ꓟꓲ ꓬꓰ-ꓢꓴ ꓙꓲ-ꓢꓴ ꓔꓯꓸ ꓟ ꓒꓬꓱꓼ ꓡ ꓝꓲ ꓠꓹ ꓟ ꓪꓴ-ꓢ ꓡꓰ ꓘꓴ ꓔ ꓢꓴ ꓐꓴ ꓗꓪ ꓟ ꓥ ꓡꓳ꓿ 7 ꓪꓴ-ꓢ ꓡꓰ ꓠꓲꓹ ꓠꓵ ꓔ ꓢꓲ꓾ ꓢꓲ ꓚꓲꓸ ꓔ ꓟ ꓬꓲ ꓔꓯ ꓦ ꓡꓱ ꓢꓴ ꓬꓰ ꓝꓲˍ ꓐꓰ ꓘꓴ ꓔ ꓟ꓾ ꓣꓳ-ꓟ ꓗꓪ ꓔꓬ ꓢꓴ ꓐꓴ ꓠꓴ ꓪꓽ ꓮꓽ ꓙꓵ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓣꓳ ꓐꓹ ꓐ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 8 ꓬꓲ ꓪꓴꓸ ꓕꓲ ꓫꓵꓽ ꓠꓬ꓾ ꓠꓴ ꓪꓽ ꓙꓵꓻ ꓠꓲꓹ ꓬꓲꓸ ꓓꓳꓽ ꓟꓵꓽ ꓗꓳꓹ ꓓꓵ ꓓꓵ ꓚ ꓒꓬꓱ ꓙꓰ ꓔꓬ ꓠꓬꓲ꓾ ꓥꓪ ꓠꓬ ꓠꓴ ꓪꓽ ꓮꓽ ꓙꓵ ꓢꓴ ꓑꓶ ꓓꓴ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓥꓪ ꓪꓴ-ꓢ ꓔꓯ ꓫ ꓟꓳˍ ꓡꓳ꓿ 9 ꓕꓲ ꓠꓲꓹ ꓕꓲ ꓢꓯꓼˍ ꓡꓰꓽ ꓬꓲ ꓮ ꓐꓲ ꓶꓼ ꓓꓳ ꓫꓱꓹ ꓓꓳ ꓟꓬꓱꓽ ꓗꓪ ꓥꓪ ꓡꓰ ꓣꓱꓽ ꓙ ꓔꓬ ꓟ ꓪꓴ-ꓢ ꓠꓬ꓾ ꓥꓪ ꓪꓽ ꓘꓴˍ ꓕꓯ ꓟꓽ ꓠꓽ ꓠꓽ ꓠꓴ ꓪꓽ ꓟꓬꓱ ꓞꓶˍ ꓟ ꓔꓯ ꓢꓷꓸ ꓙ ꓟꓳ ꓙ ꓢꓴ ꓥ ꓡꓳ꓿ 10 ꓪꓴ-ꓢ ꓠꓲꓹ ꓡꓶ ꓥ ꓠꓬ ꓥꓪ ꓠꓽ ꓠꓴ ꓪꓽ ꓔꓬ ꓗꓪ ꓡ ꓪ ꓠꓹ ꓟˍ ꓟꓲ ꓶ ꓓꓰꓽ ꓪꓽ ꓘꓴ ꓔꓬ ꓥꓳ꓿ 11 ꓮ ꓡꓲꓳ ꓐꓯ ꓠꓬ ꓥꓪ ꓡꓰ ꓠꓴ ꓪꓽ ꓔꓯ ꓦ ꓡꓯꓼ ꓫꓴ ꓐꓱꓻ ꓖꓶ ꓢꓲ ꓕꓶꓻ ꓡꓰ ꓝꓲ ꓠꓹ ꓟ꓾ ꓠꓴ ꓪꓽ ꓔꓯ ꓮꓽ ꓘꓶꓸ ꓟꓳꓻ ꓡꓯꓼ ꓘꓳ ꓠꓲꓹ ꓫꓵˍ ꓡꓳ꓿ 12 ꓥꓪ ꓕꓱ ꓡꓱ ꓐꓯˍ ꓟ ꓠꓬ꓾ ꓣꓳ ꓠꓽ ꓙꓵꓻ ꓠꓲꓹ ꓗꓪ ꓕꓶꓻ ꓡꓰ ꓠꓹ ꓟ ꓕꓲ ꓣꓳ ꓛꓳꓽ ꓕꓲ ꓣꓳ ꓢꓯꓼ ꓖꓶꓽ ꓡꓯ ꓘꓳ ꓟꓶ ꓠꓹ ꓟ ꓥ ꓡꓳ꓿ 13 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓬ ꓠꓱꓸ ꓐꓯꓼ ꓐꓶꓽ ꓞꓳ ꓐꓴ ꓗꓳ ꓡꓳ ꓗꓪ ꓢꓲ ꓤ ꓬꓰ ꓢꓴ ꓘꓶꓸ ꓟꓶˍ ꓟ ꓡꓰ ꓐꓰ ꓠꓴ ꓪꓽ ꓗꓳ ꓡꓳ ꓗꓪˍ ꓟꓲ ꓢꓲ ꓤ ꓬꓰ ꓢꓴ ꓘꓶꓸ ꓟꓶ ꓡꓰ ꓠꓹ ꓟ꓾ ꓥꓪ ꓠꓬ ꓠꓴ ꓪꓽ ꓔꓯ ꓡ ꓠꓹ ꓟ ꓚꓴꓽ ꓬꓲꓹ ꓮꓽ ꓟꓬꓹ ꓧꓪ ꓓꓶꓽ ꓗꓷˍ ꓟꓲ꓾ ꓮ ꓟꓶ ꓗꓪ ꓛꓲ ꓗꓽ ꓔ ꓓꓴ ꓙꓳˍ ꓟ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 14 ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓦꓲ-ꓡꓲ ꓡ ꓞꓳ ꓔꓯ ꓥ ꓟꓲ꓾ ꓐꓶꓽ ꓒ ꓔꓯ ꓥ ꓟꓲ꓾ ꓙ ꓜꓲꓼ ꓢꓴ ꓔꓯ ꓥ ꓟꓲ꓾ ꓞꓳ ꓙꓲꓽ ꓔꓯ ꓥ ꓟꓲ ꓶꓼ ꓓꓳ ꓫꓱꓹ ꓓꓳ ꓶꓻ ꓡꓯꓼ ꓐꓵ ꓞꓹ ꓢꓴ ꓥ ꓠꓬꓲ꓾ 15 ꓥꓪ ꓠꓬ ꓠꓴ ꓪꓽ ꓣꓳ-ꓟ ꓗꓪ ꓔꓬ ꓢꓴ ꓔꓯˍ ꓟꓲ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓠꓹ ꓟ ꓮꓽ ꓘꓶꓸ ꓠꓲꓹ ꓡꓱꓻˍ ꓡꓳ꓿ 16 ꓶꓼ ꓓꓳ ꓫꓱꓹ ꓓꓳ ꓑꓶꓸ ꓓꓴ ꓥꓪ ꓟꓽ ꓫꓸ ꓔꓳ꓿ ꓮ ꓡꓲꓳ ꓐꓯ ꓠꓬ ꓶꓼ ꓓꓳ ꓫꓱꓹ ꓓꓳ ꓠꓽ꓾ ꓙꓵꓻ ꓢꓴ ꓥ ꓕ ꓑꓳꓸ ꓔꓯ ꓚꓬꓴ ꓠꓹ ꓟ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓥ ꓡꓳ꓿ ꓬꓲ ꓪꓴꓸ ꓠꓬ ꓬꓴ-ꓔ ꓡ ꓞꓳ ꓔꓯ꓾ ꓗꓸ ꓠꓯꓸ ꓠꓬ ꓦꓲ-ꓡꓲ ꓡ ꓞꓳ ꓔꓯˍ ꓟꓲ ꓚꓬꓴ ꓠꓹ ꓟ ꓥ ꓡꓳ꓿ 17 ꓮ ꓡꓲꓳ ꓐꓯ ꓠꓬ ꓶꓼ ꓓꓳ ꓫꓱꓹ ꓓꓳ ꓕꓱ ꓟ ꓗꓪ ꓐꓰ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ ꓟꓳꓸ ꓖꓶꓽ ꓔ ꓡꓳ꓿ ꓔꓱꓹ ꓜꓳꓽˍ ꓟ ꓕꓱ ꓟ ꓠꓬ꓾ ꓬꓲ ꓪꓴꓸ ꓗꓪ ꓐꓰ ꓡꓳꓹ ꓬꓰ ꓗꓪ ꓛꓲ ꓙꓵꓻ ꓠꓲꓹ ꓗꓪ ꓐꓰ ꓟꓶꓻˍ ꓟ ꓥ ꓡꓳ꓿ ꓕꓱ ꓟ ꓠꓬ ꓕꓳ ꓶ ꓗꓪ꓾ ꓔꓱꓹ ꓜꓳꓽ ꓢꓴ ꓠꓽ ꓙꓵꓻ ꓠꓲꓹ ꓗꓪ ꓐꓰ ꓢꓯꓸ ꓔꓬ ꓟꓶˍ ꓥꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 18 ꓥꓶˍ ꓟ ꓐꓰ ꓟꓽ ꓙꓲ ꓟꓽ ꓜꓳꓽˍ ꓟ ꓟꓬꓱꓽ ꓡꓰ ꓔꓱꓹ ꓚꓵˍ ꓟ ꓔꓯ ꓗꓽ ꓔ ꓢꓴ ꓮꓽ ꓙꓵ ꓔꓯ ꓔꓳꓹ ꓠ ꓟ꓾ ꓪꓴ-ꓢ ꓦꓶ ꓠꓲꓹ ꓠꓽ ꓟꓴꓽ ꓗꓪ ꓗꓪ ꓐꓰ ꓟꓳꓸ ꓖꓶ ꓓꓳ ꓡꓺꓳ꓿ 19 ꓮ ꓡꓲꓳ ꓐꓯ ꓠꓬ ꓞꓳ ꓤ ꓡꓰ ꓪꓴ-ꓢ ꓔꓯ ꓟꓳꓸ ꓢꓷꓸ ꓐ ꓡ ꓡꓳ ꓫꓵꓽ ꓮꓽ ꓙꓵ ꓠꓬ ꓪꓴ-ꓢ ꓡꓰ ꓬꓲ ꓪꓽ ꓔꓯ ꓟꓳꓸ ꓖꓶ ꓔ ꓠꓬꓲ꓾ ꓬꓲ ꓪꓽ ꓟꓲꓽ ꓙꓬ ꓗꓪ ꓫꓬꓽ ꓫꓬˍ ꓡꓰꓽ ꓟꓳꓻ ꓞꓹ ꓡꓳ꓿ 20 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓕꓲ ꓞꓲꓼ ꓕꓲ ꓑ ꓪ ꓠꓬꓲˍ ꓟ ꓐꓰ ꓬꓲ ꓢꓲ ꓠꓲꓹ ꓔꓯ ꓟꓳꓻ ꓟꓽ ꓓ ꓥ ꓟꓲ꓾ ꓟꓵꓽ ꓚꓰꓼ ꓟꓲ ꓚꓰꓼ ꓕ ꓑꓳꓸ ꓬꓲ ꓡꓰ ꓚꓰꓼ ꓔ ꓡꓳ ꓫꓵ ꓗꓪ ꓐꓰ ꓫꓬꓽ ꓫꓬˍ ꓡꓰꓽ ꓟꓳꓻ ꓞꓹ ꓠꓬꓲ꓾ ꓬꓲ ꓪꓽ ꓢꓸ ꓬꓰꓽ ꓓꓴ ꓟꓽ ꓙꓳ꓿ 21 ꓬꓲ ꓪꓽ ꓠꓬ ꓪꓴ-ꓢ ꓔꓯ ꓢꓷˍ ꓟꓲ꓾ ꓬꓲ ꓔꓯ ꓪꓴ-ꓢ ꓥ ꓟ ꓡꓰ ꓐꓰ ꓟꓬꓱ ꓓꓳꓽ ꓟꓽ ꓖꓶ꓾ ꓫˍ ꓟꓲ ꓟꓽ ꓫꓸ ꓟꓳ꓿ ꓬꓲ ꓪꓽ ꓠꓬ ꓬꓲ ꓖꓳꓽ ꓔꓯ ꓓꓵꓽ ꓙꓽ ꓢꓲ꓾ ꓬꓲ ꓪꓽ ꓙꓲꓽˍ ꓟ ꓠꓲꓹ ꓟˍ ꓟꓲ ꓠꓯ ꓞꓲꓹ ꓡꓰꓳ꓿ 22 ꓬꓲ ꓪꓽ ꓠꓽ ꓚꓲꓸ ꓛꓬ ꓔꓯ ꓙꓽ ꓗꓴꓸ ꓠꓲꓹ ꓙꓳ ꓢꓴ ꓚꓬꓹ ꓔ ꓥ ꓟꓲ ꓞꓳ ꓙꓲꓽ ꓒꓬꓱꓼ ꓡ ꓢꓲ꓾ 23 ꓕꓲ ꓞꓲꓼ ꓕꓲ ꓑ ꓙꓳ ꓔꓬ ꓟ ꓪꓴ-ꓢ ꓟꓬꓱ ꓓꓳꓽ ꓬꓲ ꓛꓲ ꓐꓬꓱꓽ ꓫꓬꓹ ꓢꓲ꓾ ꓐꓬ ꓡꓰ ꓓꓻˍ ꓟ ꓞꓳ ꓤ ꓪ ꓤˍ ꓐꓰ꓾ ꓠꓬꓹ ꓤ ꓙꓱꓻ ꓤˍ ꓐꓰ꓾ ꓛꓲ ꓒꓯꓹ ꓡꓲ ꓐꓽ ꓙꓳˍ ꓟ ꓦꓵ ꓙꓱꓽ ꓠꓲꓸ ꓙꓱꓽˍ ꓐꓰ ꓐꓶꓽ ꓓꓲ ꓡꓯꓹ ꓓꓲˍ ꓡꓰ ꓐꓰ ꓐꓬꓱꓽ ꓫꓬꓹˍ ꓡꓳ꓿ 24 ꓖꓳ ꓡꓱ ꓠꓬꓲ ꓬꓲ ꓪꓽ ꓔꓯ ꓠꓬ ꓚꓲꓸ ꓛꓬ ꓦꓯꓸ ꓠꓲꓹ ꓙꓵꓽˍ ꓟ ꓠꓲꓹ ꓟ ꓗꓪ ꓕꓲ ꓣꓳ ꓛꓳ ꓕꓲ ꓣꓳ ꓖꓳ ꓓꓱꓽ ꓔꓯ ꓟꓽ ꓒꓵ ꓟꓽ ꓚꓬ ꓬꓰ ꓝꓲ ꓠꓹ ꓟ꓾ ꓪꓴ-ꓢ ꓡꓰ ꓬꓲ ꓪꓽ ꓔꓯ ꓟꓽ ꓫꓬꓻ ꓟꓽ ꓖꓼ ꓗꓪ ꓡꓯꓼ ꓙꓱ ꓗꓷꓳ꓿ 25 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓡꓰ ꓪꓴ-ꓢ ꓬꓲ ꓔꓱꓹ ꓚꓵˍ ꓟ ꓔꓯ ꓠꓬ ꓗꓶꓸˍ ꓟ ꓑ ꓗꓷ ꓢꓲ꓾ ꓚꓰꓼ ꓢꓴ ꓔꓯ ꓠꓽ ꓪꓴꓸ ꓓꓵ ꓟꓽ ꓕꓱꓼ ꓕꓱ꓾ ꓚꓰꓼ ꓔ ꓡꓳ ꓫꓵꓽ ꓔꓯ ꓪꓴꓸ ꓓꓵ ꓕꓱꓼˍ ꓡꓳ꓿ ꓚꓰꓼ ꓢꓴ ꓔꓯ ꓢꓲꓸˍ ꓡꓰ ꓕꓲ ꓞꓲꓼ ꓕꓲ ꓑ ꓫꓱꓸ ꓖꓶ ꓙꓲꓽ ꓙꓳˍ ꓡꓳ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ 26 ꓕꓱ ꓟ ꓗꓪ ꓐꓰ ꓪꓴ-ꓢ ꓠꓬ ꓬꓲ ꓪꓽ ꓔꓯ ꓟꓽ ꓫꓬ ꓟꓽ ꓖꓼ ꓟ ꓦꓯꓸ ꓠꓲꓹ ꓙꓵˍ ꓟ ꓗꓪ ꓡꓯꓼ ꓙꓱ ꓩꓴ ꓗꓷꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓤꓽ ꓟꓶ ꓤ ꓐꓴˍ ꓟꓲ꓾ ꓬꓰ ꓚꓰꓼ ꓡꓳ ꓫꓵꓽ ꓔꓯ ꓬꓰ ꓟꓽ ꓚꓰꓼ ꓡꓳ ꓫꓵꓽ ꓡꓰ ꓑ ꓗꓷˍ ꓡꓳ꓿ 27 ꓖꓳ ꓟ ꓡꓰ ꓐꓰ ꓞꓳ ꓑ ꓤ ꓐꓴˍ ꓟꓲ꓾ ꓤꓽ ꓟꓶ ꓤ ꓐꓴˍ ꓐꓰ ꓔꓬ ꓚꓰꓼ ꓟ ꓬꓲ ꓡꓲꓽ ꓔꓯ ꓧꓹ ꓗꓷ ꓢꓲ꓾ ꓦꓯꓸ ꓠꓲꓹ ꓙꓵꓽˍ ꓟ ꓡꓰ ꓛꓴꓻ ꓞ ꓢꓲ ꓠꓬꓲ꓾ ꓤꓽ ꓛꓳ ꓤꓽ ꓬꓰ ꓟꓽ ꓚꓰꓼ ꓡꓳ ꓫꓵꓽ ꓬꓰˍ ꓠꓬꓲ ꓬꓲ ꓪꓽ ꓖꓳ ꓓꓱ ꓗꓪ ꓟꓶꓺ ꓙꓲꓽ ꓙꓳˍ ꓟ ꓛꓬ ꓒꓵꓽ ꓟꓶ ꓡꓰꓳ꓿ 28 ꓬꓲ ꓪꓽ ꓠꓬ ꓪꓴ-ꓢ ꓔꓯ ꓬꓲ ꓪꓽ ꓪꓴ-ꓢ ꓟꓽ ꓣꓷꓠꓸ ꓠꓬꓲ꓾ ꓪꓴ-ꓢˍ ꓟꓲ ꓬꓲ ꓪꓽ ꓔꓯ ꓠꓵꓻ ꓟꓽ ꓓ ꓡꓳ ꓫꓵ ꓔꓯ ꓓꓵꓽ ꓙꓽ ꓔꓬ ꓝꓲ ꓠꓹ ꓟ ꓐꓰ꓾ ꓬꓰ ꓟꓽ ꓚꓰꓼ ꓡꓳ ꓫꓵꓽ ꓬꓰ ꓠꓹ ꓟ ꓗꓪ ꓡꓯꓼ ꓙꓱ ꓗꓷꓳ꓿ 29 ꓬꓲ ꓪꓽ ꓠꓬ ꓟꓽ ꓙꓲ ꓟꓽ ꓜꓳꓽ ꓟ ꓮꓽ ꓙꓵˍ ꓐꓰ꓾ ꓥꓶˍ ꓟ꓾ ꓠꓲꓹ ꓦꓯˍ ꓟ꓾ ꓮꓸ ꓓꓲꓽ ꓟꓽ ꓙꓲ ꓟ꓾ ꓟꓬ ꓦꓯꓸˍ ꓟ꓾ ꓞꓳ ꓤ ꓢꓰꓼˍ ꓟ꓾ ꓑꓱꓹ ꓡꓯ ꓘꓳˍ ꓟ꓾ ꓗꓶꓸˍ ꓟ꓾ ꓢꓴ ꓔꓯ ꓠꓻ ꓡꓰ ꓝꓲˍ ꓟ ꓐꓰ ꓢꓴ ꓘꓽ ꓚˍ ꓟ ꓐꓲ ꓞ ꓢꓴ ꓥ ꓡꓳ꓿ 30 ꓝꓮꓲ ꓬꓲ ꓪꓽ ꓠꓬ ꓢꓴ ꓟꓬꓱ ꓓꓳꓽ ꓒꓬꓹ ꓠꓹ ꓟ ꓪ ꓕꓱ ꓢꓴ꓾ ꓪꓴ-ꓢ ꓔꓯ ꓠꓲꓹ ꓜꓳ ꓢꓴ꓾ ꓞꓳ ꓟꓽ ꓒꓵꓽ ꓢꓴ꓾ ꓢꓴ ꓔꓯ ꓟꓳꓻ ꓟꓽ ꓟꓵ ꓢꓴ꓾ ꓘꓶ ꓘꓹ ꓠꓲꓹ ꓘꓹ ꓢꓴ꓾ ꓟꓽ ꓙꓲˍ ꓟ ꓚꓰꓼ ꓓꓳ ꓡ ꓢꓴ꓾ ꓮ ꓐꓽ ꓮ ꓟ ꓔꓯ ꓟꓽ ꓒꓵꓽ ꓛꓳ ꓢꓴ꓾ 31 ꓦꓰꓽ ꓠꓲꓹ ꓟꓽ ꓙꓳ ꓢꓴ꓾ ꓦ ꓡꓱ ꓐꓳ ꓟꓽ ꓓ ꓢꓴ꓾ ꓢꓴ ꓔꓯ ꓟꓽ ꓙ ꓗꓳ ꓢꓴ꓾ ꓫꓱꓸ ꓤ ꓠꓲꓹ ꓟꓽ ꓙꓳ ꓢꓴ ꓥ ꓡꓳ꓿ 32 ꓕꓱ ꓡꓱ ꓬꓰ ꓢꓴ ꓠꓬ ꓫꓵꓻ ꓠ ꓗ ꓡꓳ꓾ ꓐꓰ ꓪꓴ-ꓢ ꓕꓵꓼ ꓪ ꓙꓳˍ ꓟ ꓔꓯ ꓬꓲ ꓪꓽ ꓢꓷˍ ꓟꓲ꓾ ꓬꓲ ꓪꓽ ꓚꓲꓸ ꓛꓬ ꓖꓳ ꓡꓱ ꓬꓰˍ ꓟ ꓡꓰꓽ ꓟꓽ ꓞꓲ꓾ ꓖꓳ ꓡꓱ ꓬꓰ ꓢꓴ ꓔꓯˍ ꓟꓲ ꓓꓽ ꓔꓳꓹˍ ꓡꓳ꓿

ꓣꓳ-ꓟ 2

1 ꓖꓳ ꓡꓱ ꓠꓬꓲ ꓢꓴ ꓔꓯ ꓙꓽ ꓘꓶꓽ ꓢꓴꓳ꓾ ꓠꓴ ꓠꓬ ꓮ ꓡꓲ ꓡꓴ ꓫꓵꓽ ꓡ ꓞꓳ ꓥ ꓟꓲ ꓢꓸ ꓬꓰꓽ ꓓꓴ ꓟꓽ ꓙꓳ꓿ ꓠꓴˍ ꓟꓲ ꓬꓲ ꓪꓽˍ ꓐꓰ ꓕꓲ ꓡꓰꓹꓼ ꓬꓰˍ ꓠꓬꓲ꓾ ꓠꓴ ꓡꓰ ꓢꓴ ꓔꓯ ꓙꓽ ꓘꓶꓽˍ ꓟ ꓗꓪ ꓠꓴ ꓚꓲꓸ ꓛꓬ ꓔꓯˍ ꓟꓲ ꓝꓴꓲ ꓐꓯ ꓞꓷꓹˍ ꓟ ꓥ ꓡꓳ꓿ 2 ꓪꓴ-ꓢ ꓡꓰ ꓕꓱ ꓡꓱ ꓫꓵꓽ ꓬꓰ ꓢꓴ ꓔꓯ ꓐꓯ ꓟꓴ ꓘꓶꓽˍ ꓟ ꓠꓬ꓾ ꓔꓱꓹ ꓚꓵˍ ꓟ ꓔꓯ ꓛꓳ ꓢꓲ ꓘꓶꓽˍ ꓠꓬꓲ꓾ ꓔꓱꓹ ꓜꓳꓽˍ ꓟ ꓥ ꓟ ꓣꓳ ꓢꓷˍ ꓡꓳ꓿ 3 ꓞꓳ ꓤꓽꓳ꓾ ꓠꓴ ꓚꓲꓸ ꓛꓬˍ ꓟꓲ ꓕꓱ ꓡꓱ ꓬꓰ ꓢꓲ ꓕꓱ ꓡꓱ ꓫꓵꓽ ꓬꓰ ꓢꓴ ꓔꓯ ꓙꓽ ꓘꓶˍ ꓠꓬ꓾ ꓪꓴ-ꓢ ꓐꓯꓺ ꓟꓴꓺ ꓗꓪ ꓐꓰ ꓡꓲꓹ ꓗꓷ ꓐ ꓡ ꓥꓳ꓾ ꓓꓵꓽ ꓙˍ ꓡ? 4 ꓥ ꓠꓬ꓾ ꓪꓴ-ꓢ ꓬꓲ ꓠꓲꓹ ꓟ ꓙꓲˍ ꓟ ꓡꓰ ꓠꓴ ꓔꓯ ꓓꓵꓽ ꓙ ꓒꓳꓹ ꓬꓲꓼ ꓡ ꓝꓲ ꓠꓹ ꓟ ꓧꓳꓽ ꓔꓬ ꓟ ꓠꓴ ꓟꓽ ꓢꓷꓸ ꓢꓲ꓾ ꓪꓴ-ꓢ ꓬꓲ ꓠꓲꓹ ꓟ ꓙꓲˍ ꓟ ꓐꓰ꓾ ꓜꓲꓽ ꓘꓴ ꓠꓲꓹˍ ꓐꓰ꓾ ꓠꓲꓹ ꓟ ꓫꓵꓺˍ ꓟ ꓐꓳ ꓞꓹ ꓟ ꓔꓯ ꓠꓴ ꓟꓳꓻ ꓟꓽ ꓟꓵ ꓡ? 5 ꓠꓴ ꓠꓽ ꓠꓲꓹ ꓟ ꓩꓴꓻ ꓢꓲ ꓠꓲꓹ ꓟ ꓟꓽ ꓡꓶꓸ ꓟ ꓑꓶ ꓓꓴ꓾ ꓪꓴ-ꓢ ꓦꓶꓻ ꓠꓲꓹˍ ꓐꓰ ꓬꓲ ꓔꓱꓹ ꓜꓳꓽˍ ꓟ ꓐꓯ ꓟꓴ ꓟꓳꓸ ꓖꓶ ꓡ ꓟ ꓦꓬꓼ ꓠꓬꓲ ꓗꓪ ꓛꓲ꓾ ꓠꓴ ꓚꓲꓸ ꓛꓬ ꓐꓱ ꓶ ꓦꓶꓻ ꓠꓲꓹ ꓫꓺ ꓒꓵꓹ ꓔ ꓟ ꓥ ꓡꓳ꓿ 6 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓮꓽ ꓟ ꓔꓯˍ ꓟꓲ ꓬꓲ ꓬꓰˍ ꓟ ꓡꓰ ꓐꓰ ꓚꓱꓹ ꓖꓶ ꓡ ꓥꓳ꓿ 7 ꓮꓽ ꓟˍ ꓟꓲ ꓙꓲˍ ꓟ ꓬꓰˍ ꓟ ꓗꓪ ꓕꓶꓻ ꓕꓶˍ ꓡꓰꓽ ꓬꓰ ꓢꓲ꓾ ꓪꓴ-ꓢ ꓬꓲ ꓟꓬꓱ ꓓꓳꓽˍ ꓐꓰ ꓞꓳ ꓒꓵꓽˍ ꓟ ꓐꓰ꓾ ꓟꓽ ꓐꓬ ꓟꓽ ꓛꓵꓽ ꓡꓰ ꓟ ꓧꓪ ꓢꓴ ꓔꓯ ꓠꓬ꓾ ꓬꓲ ꓡꓰ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶ ꓡ ꓥꓳ꓿ 8 ꓖꓳ ꓡꓱ ꓥ ꓟꓲ ꓮꓽ ꓟ ꓚꓲꓸ ꓛꓬ ꓙꓲꓻ ꓖꓴˍ ꓡꓰꓽ ꓧꓪ ꓢꓲ ꓔꓱꓹ ꓚꓵˍ ꓟ ꓔꓯ ꓟꓽ ꓒꓵꓽ ꓛꓳ ꓛꓳ꓾ ꓟꓽ ꓙꓲ ꓟꓽ ꓜꓳꓽ ꓟ ꓔꓯ ꓒꓵꓽ ꓛꓳ ꓢꓴ ꓔꓯ ꓠꓽ꓾ ꓦꓶ ꓠꓲꓹˍ ꓐꓰ ꓠꓲꓹ ꓛꓰꓹˍ ꓟ ꓟꓳꓸ ꓖꓶ ꓡ ꓥꓳ꓿ 9 ꓟꓽ ꓙꓲ ꓟ ꓬꓰ ꓢꓴ ꓮꓽ ꓙꓵ ꓔꓯ ꓠꓬ ꓫꓸ ꓙꓵ ꓟꓷꓼ ꓙꓵ ꓓꓴˍ ꓐꓰ ꓠꓲꓹ ꓫꓸ ꓟꓬ ꓫꓸ ꓓꓴ ꓖꓶ ꓡ ꓥꓳ꓿ ꓬꓲ ꓪꓴꓸ ꓠꓬ ꓬꓴ-ꓔ ꓡ ꓞꓳ ꓔꓯ꓾ ꓗꓸ ꓠꓯꓸ ꓠꓬ ꓦꓲ-ꓡꓲ ꓡ ꓞꓳ ꓔꓯˍ ꓟꓲ ꓖꓶ ꓡ ꓥꓳ꓿ 10 ꓙꓲˍ ꓟ ꓬꓰ ꓢꓴ ꓥ ꓕ ꓑꓳꓸ ꓔꓯ ꓠꓽ ꓟꓬꓱ ꓓꓳꓽˍ ꓐꓰ꓾ ꓞꓳ ꓒꓵꓽˍ ꓟ ꓐꓰ꓾ ꓢꓲ ꓡꓲ ꓟ ꓖꓶ ꓡ ꓥꓳ꓿ ꓬꓲ ꓪꓴꓸ ꓠꓬ ꓬꓴ-ꓔ ꓡ ꓞꓳ ꓔꓯ꓾ ꓗꓸ ꓠꓯꓸ ꓠꓬ ꓦꓲ-ꓡꓲ ꓡ ꓞꓳ ꓔꓯˍ ꓟꓲ ꓖꓶ ꓡ ꓥꓳ꓿ 11 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓞꓳ ꓤ ꓒꓬꓱꓽ ꓔꓯ ꓟꓽ ꓢꓲ꓿ 12 ꓙꓵꓽ ꓗ ꓟꓽ ꓙꓳ ꓙꓳ ꓝꓴꓲ ꓬꓰ ꓢꓴ ꓥ ꓕ ꓑꓳꓸ ꓠꓬ꓾ ꓙꓵꓽ ꓗ ꓟꓽ ꓙꓳ ꓙꓳ ꓟꓶꓽ ꓬꓰˍ ꓥꓳ꓿ ꓙꓵꓽ ꓗꓸ ꓠꓯꓸ ꓘꓪ ꓝꓴꓲ ꓬꓰ ꓢꓴ ꓮꓽ ꓙꓵ ꓔꓯˍ ꓟꓲ ꓙꓵꓽ ꓗ ꓗꓪ ꓐꓰ ꓐꓯ ꓟꓴ ꓞꓷꓹˍ ꓥꓳ꓿ 13 ꓮ ꓡꓲꓳ ꓐꓯˍ ꓠꓬ ꓙꓵꓽ ꓗ ꓔꓯ ꓑ ꓙꓽ ꓕꓲ ꓖꓺꓼ ꓪꓴ-ꓢ ꓡꓰ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓡ ꓟ ꓟꓽ ꓥ꓿ ꓙꓵꓽ ꓗ ꓔꓯ ꓛꓳ ꓢꓴ ꓔꓯ ꓢꓲꓸˍ ꓡꓰꓽ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓡ ꓟ ꓥ ꓡꓳ꓿ 14 ꓮ ꓡꓲꓳ ꓐꓯ ꓠꓬ ꓙꓵꓽ ꓗ ꓟꓽ ꓙꓳ ꓢꓴ ꓐꓶꓽ ꓞꓳ ꓬꓲ ꓪꓽ ꓚꓲꓸ ꓛꓬ ꓚꓰꓺ ꓠꓲꓹ ꓗꓪ ꓐꓰ ꓙꓵꓽ ꓗ ꓗꓪ ꓐꓯˍ ꓟ ꓡꓰ ꓐꓰ ꓛꓳˍ ꓕꓯ ꓠꓽ꓾ ꓬꓲ ꓪꓽ ꓠꓬ ꓙꓵꓽ ꓗ ꓟꓽ ꓙꓳ ꓥ ꓟꓲ꓾ ꓬꓲ ꓪꓽ ꓚꓰꓺ ꓠꓲꓹ ꓠꓬ ꓬꓲ ꓪꓽ ꓚꓲꓸ ꓛꓬ ꓙꓵꓽ ꓗ ꓒꓬꓱꓼ ꓡ ꓟ ꓥ ꓡꓳ꓿ 15 ꓕꓱ ꓟ ꓗꓪ ꓐꓰ ꓬꓲ ꓪꓽ ꓠꓲꓹ ꓟ ꓗꓪ ꓙꓳˍ ꓟ ꓙꓵꓽ ꓗ ꓟꓬꓱꓽ ꓔꓯꓺ ꓟꓳꓸ ꓖꓶ ꓓꓳ ꓡ ꓢꓲ꓾ ꓬꓲ ꓪꓽ ꓦꓰꓽ ꓠꓲꓹˍ ꓟꓲ ꓖꓳ ꓟ ꓔꓯ ꓢꓷꓸ ꓙ ꓟꓳ ꓙ ꓢꓲ ꓠꓬꓲ꓾ ꓬꓲ ꓪꓽ ꓠꓲꓹ ꓟ ꓡꓰ ꓬꓲ ꓪꓽ ꓔꓯ ꓛꓬꓻ ꓖꓴ ꓓꓰꓺ꓾ ꓥ ꓠꓬ ꓓꓽ ꓔꓳꓹˍ ꓥꓳ꓿ 16 ꓕꓱ ꓟꓬ ꓫꓵꓽ ꓠꓬ ꓥꓪ ꓡꓰ ꓚ ꓔꓬ ꓟ ꓶꓼ ꓓꓳ ꓫꓱꓹ ꓓꓳ ꓗꓪ ꓐꓯ ꓔ ꓟ ꓡꓰ ꓐꓰ꓾ ꓪꓴ-ꓢ ꓡꓰ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓞꓳ ꓤ ꓠꓲꓹ ꓟ ꓗꓪ ꓚꓵ ꓔ ꓟ ꓔꓯˍ ꓟꓲ ꓐꓯ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓟꓳꓸ ꓖꓶ ꓓꓳ ꓡ ꓥꓳ꓿ 17 ꓖꓳ ꓡꓱ ꓥ ꓟꓲ ꓠꓴ ꓠꓬ ꓬꓴ-ꓔ ꓡ ꓞꓳ ꓟꓬꓱ ꓟꓯꓻ ꓔ ꓢꓲ꓾ ꓙꓵꓽ ꓗ ꓔꓯ ꓦ ꓡꓱ ꓢꓲ ꓠꓬꓲ꓾ ꓪꓴ-ꓢˍ ꓐꓰ ꓙ ꓡꓯꓽ ꓘꓳˍ ꓟ ꓗꓪ ꓘꓶꓽ ꓘꓹ ꓢꓴ ꓥ ꓢꓲ꓾ 18 ꓙꓵꓽ ꓗ ꓗꓪ ꓐꓰˍ ꓟꓲ ꓟꓸ ꓔ ꓟ ꓕꓲ ꓣꓳ ꓥ ꓠꓬꓲ꓾ ꓬꓲ ꓠꓲꓹ ꓡꓶꓽ ꓔꓯ ꓢꓷꓸ ꓢꓲ ꓙꓲˍ ꓟ ꓔꓯˍ ꓟꓲ ꓒꓯꓽ ꓦꓰꓽ ꓗꓴꓸ ꓢꓴ ꓥ ꓡꓳ ꓐꓰ ꓐꓯ ꓢꓲ ꓠꓬꓲ꓾ 19 ꓠꓴ ꓚꓲꓸ ꓛꓬ ꓠꓬ ꓟꓬ ꓔꓶꓺ ꓔꓯ ꓙ ꓖꓴ ꓧꓳꓽ ꓢꓴˍ ꓐꓰ꓾ ꓠꓯ ꓞꓲꓹ ꓟ ꓗꓪ ꓔꓬ ꓢꓴ ꓔꓯ ꓡꓬꓸ ꓖꓶ ꓢꓴ ꓥ ꓟ ꓐꓰ꓾ 20 ꓙꓵꓽ ꓗ ꓗꓪ ꓟ ꓢꓷꓸ ꓠꓲꓹˍ ꓐꓰ ꓔꓱꓹˍ ꓟ ꓒꓬꓱꓽ ꓙꓳ ꓢꓴˍ ꓟꓲ ꓥ ꓡꓳ ꓐꓯ ꓢꓲ꓾ ꓞꓳ ꓙꓲꓽˍ ꓐꓰ ꓤ ꓠꓱ ꓤ ꓟꓸ ꓒ ꓥ ꓡꓳ꓾ ꓐꓰ ꓚꓲꓸ ꓛꓬ ꓔꓯ ꓦ ꓡꓱ ꓐꓳˍ ꓕꓯ ꓠꓽ꓾ 21 ꓢꓴ ꓔꓯ ꓟꓸ ꓖꓶ ꓢꓴ ꓠꓴꓳ꓾ ꓚꓲꓸ ꓛꓬ ꓔꓯ ꓟꓽ ꓟꓸ ꓡ? ꓘꓴꓽ ꓟꓽ ꓓ ꓐꓰ ꓚ ꓟꓸ ꓖꓶ ꓢꓴꓳ꓾ ꓠꓴ ꓘꓴꓽˍ ꓢꓰꓽ ꓡ? 22 ꓦꓬꓽ ꓛꓳꓽ ꓧꓪ ꓟꓽ ꓓ ꓐꓯ ꓢꓴꓳ꓾ ꓠꓴ ꓠꓬ ꓦꓬꓽ ꓛꓳꓽ ꓧꓪꓺˍ ꓡ? ꓠꓲꓽ ꓐꓬꓱꓽ ꓔꓯ ꓠꓲꓹ ꓜꓳ ꓢꓴꓳ꓾ ꓠꓴ ꓠꓬ ꓠꓲꓽ ꓦꓲ ꓗꓪ ꓘꓴꓽˍ ꓡ? 23 ꓪꓴ-ꓢ ꓙꓵꓽ ꓗ ꓑꓶꓸ ꓓꓴ ꓘꓶꓽ ꓘ ꓢꓴꓳ꓾ ꓙꓵꓽ ꓗ ꓔꓯ ꓛꓬꓻ ꓢꓲ ꓪꓴ-ꓢ ꓔꓯ ꓟꓽ ꓒꓵꓽ ꓒꓵꓽ ꓬꓰˍ ꓡ? 24 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓪꓴ-ꓢ ꓟꓬꓱꓺ ꓔꓯ ꓠꓽ ꓠꓴ ꓪꓽ ꓑꓶ ꓓꓴ ꓐꓶꓽ ꓞꓳ ꓗꓳ ꓡꓳ ꓗꓪ ꓙꓱꓽ ꓪ ꓡꓰꓳ꓾ ꓐꓰ ꓐꓳ ꓔ ꓡꓳ꓿ 25 ꓮ ꓡꓲꓳ ꓐꓯ ꓠꓬ ꓙꓵꓽ ꓗ ꓔꓯ ꓠꓴ ꓛꓳˍ ꓕꓯ ꓠꓽ꓾ ꓶˍ ꓟ ꓗ ꓫꓵ ꓠꓬ ꓚꓵ ꓚꓵ ꓙꓲꓻ ꓖꓴ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓠꓬ ꓙꓵꓽ ꓗ ꓔꓯ ꓛꓬꓻ ꓢꓴ ꓥ ꓕꓯ ꓠꓽ꓾ ꓠꓴ ꓶˍ ꓟ ꓗ ꓫꓵ ꓟꓶˍ ꓟ ꓠꓬ ꓟꓽ ꓶ ꓔ ꓟ ꓐꓰ ꓕꓲ ꓡꓰꓹꓼ ꓥꓳ꓿ 26 ꓖꓳ ꓡꓱ ꓠꓬꓲ ꓟꓽ ꓶ ꓔ ꓢꓴ ꓕꓲ ꓣꓳ ꓙꓵꓽ ꓗ ꓬꓲ ꓕꓵꓼ ꓪ ꓔꓯ ꓒꓵꓽ ꓛꓳ ꓐꓷˍ ꓠꓬ꓾ ꓬꓲ ꓟꓽ ꓶ ꓔ ꓥ ꓟꓲ ꓶ ꓔ ꓢꓴ ꓚꓬꓹ ꓖꓶˍ ꓥꓳ꓾ ꓟꓽ ꓥ ꓡ? 27 ꓝꓮꓲ ꓧꓪꓽ ꓖꓳ ꓓꓱꓽ ꓗꓪ ꓶˍ ꓟ ꓗ ꓫꓵ ꓟꓽ ꓟꓶ ꓟ ꓐꓶꓽ ꓞꓳ ꓕꓲ ꓣꓳ ꓙꓵꓽ ꓗ ꓔꓯ ꓛꓳꓻˍ ꓐꓷˍ ꓠꓬ꓾ ꓶˍ ꓟ ꓗ ꓫꓵ ꓙꓳ ꓢꓲ ꓐꓳ ꓔ ꓟ ꓙꓵꓽ ꓗ ꓔꓯ ꓛꓬ ꓢꓴ ꓬꓴ-ꓔ ꓡ ꓞꓳ ꓐꓴ ꓠꓴ ꓪꓽ ꓔꓯ ꓬꓲ ꓡꓰ ꓐꓯ ꓞꓷꓹ ꓡ ꓥꓳ꓾ ꓟꓽ ꓥ ꓡ? 28 ꓮ ꓡꓲꓳ ꓐꓯ ꓠꓬ ꓕꓯꓽ ꓢꓲ ꓗꓪˍ ꓡꓰ ꓬꓴ-ꓔ ꓡ ꓞꓳ ꓬꓰ ꓢꓴ ꓠ ꓬꓴ-ꓔ ꓡ ꓞꓳ ꓚꓵꓺ ꓟꓽ ꓥ꓿ ꓧꓪꓽ ꓖꓳ ꓓꓱꓽ ꓗꓪ ꓶꓺˍ ꓟˍ ꓟꓲ ꓶꓺˍ ꓟ ꓗ ꓫꓵ ꓚꓵꓺ ꓟꓽ ꓥ꓿ 29 ꓬꓴ-ꓔ ꓡ ꓞꓳ ꓚꓵꓺ ꓠꓽ꓾ ꓠꓲꓹ ꓟ ꓠꓯꓸꓼ ꓗꓪ ꓣꓱꓽ ꓢꓴ ꓖꓳ ꓕꓲ ꓣꓳ ꓥ ꓡꓳ꓿ ꓬꓲ ꓶ ꓔ ꓟˍ ꓟꓲ ꓕꓳ ꓶ ꓗꓪ ꓐꓳ ꓔ ꓟ ꓙꓵꓽ ꓗ ꓔꓯ ꓛꓳˍ ꓟ ꓐꓰ ꓟꓳꓻ ꓞꓹ ꓟ ꓗꓪ ꓟꓽ ꓥ꓿ ꓠꓲꓹ ꓟ ꓠꓯꓸꓼ ꓗꓪ ꓪꓴ-ꓢ ꓦ ꓡꓰ ꓶꓺ ꓔ ꓟ ꓗꓪ ꓐꓰ ꓥ ꓡꓳ꓿ ꓬꓲ ꓔꓯ ꓫꓱꓸ ꓖꓶ ꓓꓴˍ ꓟꓲ ꓞꓳ ꓤ ꓗꓪ ꓐꓰ ꓡꓻˍ ꓟ ꓟꓽ ꓥ꓿ ꓪꓴ-ꓢ ꓗꓪ ꓐꓰ ꓡꓻˍ ꓟ ꓥ ꓡꓳ꓿

ꓣꓳ-ꓟ 3

1 ꓖꓳ ꓡꓱ ꓥ ꓕꓯ ꓠꓽ ꓬꓴ-ꓔ ꓡ ꓞꓳ ꓠꓬ ꓮꓸ ꓫꓵ ꓧꓪꓸ ꓡꓰ ꓓꓴ ꓙꓳˍ ꓡ? ꓶꓺˍ ꓟ ꓗ ꓫꓵˍ ꓟꓲ ꓮꓸ ꓫꓵꓽ ꓙꓲ ꓖꓴ ꓙꓳˍ ꓡ? 2 ꓮꓽ ꓟꓬꓹ ꓙꓳˍ ꓡꓳ꓿ ꓬꓲ ꓪꓴꓸ ꓕꓲ ꓫꓵꓽ ꓠꓬ ꓪꓴ-ꓢ ꓐꓯ ꓘꓶ ꓠꓽ ꓬꓴ-ꓔ ꓡ ꓞꓳ ꓔꓯ ꓡꓯꓼ ꓙꓱ ꓔ ꓟ ꓥ ꓡꓳ꓿ 3 ꓖꓳ ꓡꓱ ꓥ ꓟꓲ ꓬꓲ ꓪꓽ ꓕꓲ ꓐꓱ ꓙꓵꓻ ꓠꓲꓹ ꓟꓽ ꓙꓳ ꓠꓬ ꓮ ꓡꓲ ꓗꓷ ꓡꓰˍ ꓡ? ꓬꓲ ꓪꓽ ꓙꓵꓻ ꓠꓲꓹ ꓟꓽ ꓙꓳ ꓟ ꓡꓰ ꓪꓴ-ꓢ ꓦ ꓡꓱ ꓐꓳˍ ꓟ ꓔꓯ ꓖꓳꓽ ꓡꓰ ꓝꓲˍ ꓡ? 4 ꓮ ꓡꓲ ꓥ ꓟꓲ ꓖꓳ ꓡꓱ ꓠꓽ ꓟꓽ ꓥ꓿ ꓞꓳ ꓤ ꓮꓽ ꓙꓵ ꓠꓬ ꓞꓳ ꓗꓶꓸ ꓒꓬꓱꓼ ꓡ ꓖꓴˍ ꓟꓲ ꓪꓴ-ꓢ ꓠꓽ ꓔꓱꓹˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓠꓴ ꓐꓯ ꓘꓶꓽ ꓠꓬ ꓔꓱꓹ ꓜꓳꓽˍ ꓟ ꓥ ꓟ ꓡꓳꓸ ꓓꓳ ꓡ ꓢꓲ꓾ ꓐꓯ ꓟꓴ ꓞꓷꓹˍ ꓕꓯ ꓠꓴ ꓧꓪꓸ ꓡꓰˍ ꓥꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 5 ꓖꓳ ꓡꓱ ꓥ ꓟꓲ ꓣꓳ ꓟꓽ ꓔꓱꓹ ꓟꓽ ꓜꓳꓽ ꓟ ꓡꓰ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ ꓔꓯ ꓟꓰꓹ ꓟꓳꓸ ꓖꓶ ꓓꓳ ꓡ ꓐꓷˍ ꓠꓬ꓾ ꓣꓳ ꓮ ꓡꓲ ꓐꓯ ꓠꓯꓹ ꓡ? ꓪꓴ-ꓢ ꓡꓰ ꓣꓳ ꓔꓯ ꓛꓬꓺ ꓒꓵꓽ ꓖꓶ ꓡ ꓕꓯ ꓬꓲ ꓠꓬ ꓟꓽ ꓔꓱꓹ ꓜꓳꓽ ꓢꓴ ꓥ ꓡ? (ꓥꓪ ꓠꓬ ꓞꓳ ꓤ ꓫ ꓕꓱ ꓚꓱꓹ ꓔꓯ ꓛꓳ ꓢꓲ ꓫꓸ ꓕꓱ ꓔꓬ ꓟ ꓥꓳ꓿) 6 ꓖꓳ ꓡꓱ ꓠꓽ ꓟꓽ ꓥ꓿ ꓪꓴ-ꓢ ꓠꓬ ꓟꓽ ꓔꓱꓹ ꓟꓽ ꓜꓳꓽ ꓢꓴ ꓥ ꓕꓯ ꓠꓽ꓾ ꓬꓲ ꓮ ꓡꓲ ꓐꓰ ꓢꓲ ꓔꓱꓹ ꓜꓳꓽˍ ꓟ ꓡꓰ ꓟꓲ ꓠꓯ ꓡ ꓞꓳ ꓔꓯ ꓐꓯ ꓟꓴ ꓘꓶꓽ ꓐ ꓡ ꓢꓰꓽ꓿ 7 ꓮꓽ ꓧꓪꓹ ꓕꓲ ꓣꓳ ꓣꓳ ꓠꓬ꓾ ꓥꓪ ꓗꓶꓸˍ ꓟ ꓗꓪ ꓐꓰ ꓪꓴ-ꓢ ꓔꓱꓹ ꓚꓵˍ ꓟ ꓬꓲ ꓟꓬꓱ ꓓꓳꓽ ꓟꓬꓽ ꓠꓬꓲ ꓟꓳꓸ ꓖꓶ ꓓꓳ ꓡ ꓕꓯ ꓠꓽ꓾ ꓥꓪ ꓔꓯ ꓮꓸ ꓫꓵ ꓑꓶ ꓓꓴ ꓝꓴꓲ ꓙꓳ ꓢꓴ ꓔꓯˍ ꓡꓰ ꓐꓰ ꓐꓯ ꓟꓴ ꓘꓶꓽˍ ꓢꓰꓽ ꓡ?꓾ ꓐꓰ ꓐꓯ ꓢꓴ ꓙꓳˍ ꓟꓽ ꓢꓷ꓿ 8 ꓝꓮꓲ ꓠꓬ ꓙꓲˍ ꓟ ꓒꓬꓱꓼ ꓡ ꓝꓲ ꓠꓹ ꓟ ꓣꓳ ꓥꓶˍ ꓟ ꓬꓰ ꓡꓯ꓾ ꓐꓰ ꓮꓸ ꓫꓵ ꓪꓴꓸ ꓠꓬꓲ ꓟꓽ ꓐꓯˍ ꓡ? (ꓢꓴ ꓡꓰ ꓥꓪ ꓠꓴ ꓘꓽ ꓚ ꓢꓲ ꓥꓪ ꓠꓴꓽ ꓠꓬ ꓖꓳ ꓡꓱ ꓐꓯˍ ꓡꓳ꓾ ꓐꓰ ꓐꓯ ꓢꓴ ꓙꓳˍ ꓡꓳ꓿) ꓥꓪ ꓠꓴꓽ ꓔꓯ ꓖꓳ ꓡꓱ ꓚ ꓢꓴ ꓐꓴ ꓠꓬ ꓬꓲ ꓪꓽ ꓟꓶ ꓙꓲꓽ ꓙꓳˍ ꓟ ꓛꓬ ꓒꓵꓽ ꓟꓶˍ ꓥꓳ꓿ 9 ꓖꓳ ꓡꓱ ꓠꓬ ꓮ ꓡꓲ ꓥ ꓡ? ꓣꓳ ꓬꓴ-ꓔ ꓡ ꓞꓳ ꓐꓴ ꓠꓬ ꓐꓶꓽ ꓞꓳ ꓕꓯꓽ ꓢꓲ ꓙꓲˍ ꓡ? ꓮ ꓡꓲˍ ꓟꓲ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓡ ꓞꓳ ꓮꓽ ꓙꓵ꓾ ꓬꓴ-ꓔ ꓡ ꓞꓳ ꓥ ꓟꓲ꓾ ꓦꓲ-ꓡꓲ ꓡ ꓞꓳ ꓥ ꓟꓲ꓾ ꓝꓴꓲ ꓙꓵꓽ ꓪꓽ ꓠꓬꓲꓻˍ ꓟ ꓠꓯꓸ ꓘꓪ ꓔꓬ ꓡꓳ꓾ ꓐꓰ ꓧꓶꓸ ꓕꓯˍ ꓡꓰ ꓥꓪ ꓠꓴꓽ ꓒꓶ ꓟꓸ ꓖꓶ ꓗꓷꓳ꓿ 10 ꓕꓳ ꓶ ꓗꓪ꓾ ꓔꓱꓹ ꓜꓳꓽ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓿ 11 ꓙꓽ ꓜꓲꓼ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓾ ꓪꓴ-ꓢ ꓔꓯ ꓧꓪ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓿ 12 ꓬꓲ ꓪꓽ ꓮꓽ ꓙꓵ ꓠꓬ ꓪꓴ-ꓢ ꓔꓯˍ ꓐꓰ ꓧꓹ ꓙꓰ ꓖꓴ ꓢꓲ ꓕꓲ ꓡꓰꓹꓼ ꓐꓰ ꓣꓱꓽ ꓟꓽ ꓬꓯꓼˍ ꓟ ꓒꓬꓱꓼ ꓡꓺꓳ꓿ ꓙꓲˍ ꓟ ꓬꓰ ꓢꓴ ꓟꓽ ꓙꓳ꓾ ꓕꓲ ꓣꓳˍ ꓟꓲ ꓟꓽ ꓙꓳ꓿ 13 ꓬꓲ ꓪꓽ ꓛꓴꓽ ꓐꓰꓻ ꓠꓬ ꓒꓴꓺ ꓞꓹ ꓟ ꓡꓱꓼ ꓜꓴ ꓥ ꓡꓳ꓿ ꓬꓲ ꓪꓽ ꓡ ꓛꓱ ꓠꓬ ꓗꓶꓸˍ ꓟ ꓣꓱꓽˍ ꓡꓳ꓿ ꓬꓲ ꓪꓽ ꓟꓷꓽ ꓠꓷꓹ ꓗꓴꓹ ꓙꓲ ꓗꓪˍ ꓟꓲ ꓩꓴ ꓓꓳꓼ ꓓꓯꓹ ꓡꓳ꓿ 14 ꓬꓲ ꓪꓽ ꓟꓷꓽ ꓠꓷꓹ ꓗꓪ ꓠꓬ ꓙꓱꓽˍ ꓟ ꓐꓰ ꓘꓪꓽˍ ꓟ ꓐꓲ ꓞꓹ ꓡꓳ꓿ 15 ꓞꓳ ꓤ ꓔꓯ ꓢꓰꓼ ꓢꓲ ꓫꓵꓽ ꓓꓳ ꓡꓰ ꓝꓲ ꓠꓹ ꓟ ꓬꓲ ꓪꓽ ꓛꓲ ꓒꓯꓹ ꓢꓰꓺˍ ꓡꓳ꓿ 16 ꓬꓲ ꓪꓽ ꓙ ꓖꓴ ꓗꓪ ꓠꓬ ꓐꓬ ꓡꓰ ꓓꓴˍ ꓐꓰ ꓫꓸ ꓙꓵ ꓓꓴ ꓓꓻˍ ꓡꓳ꓿ 17 ꓢꓲ ꓡꓲ ꓟ ꓙ ꓖꓴ ꓔꓯ ꓬꓲ ꓪꓽ ꓮ ꓕꓯˍ ꓟꓲ ꓟꓽ ꓢꓷꓸ ꓠꓬꓲ꓿ 18 ꓬꓲ ꓪꓽ ꓟꓬ ꓢꓶ ꓟꓲꓽ ꓙꓬ ꓗꓪ ꓪꓴ-ꓢ ꓔꓯ ꓙꓳ ꓒꓵꓽˍ ꓟ ꓠꓲꓹ ꓟ ꓟꓽ ꓙꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 19 ꓖꓳ ꓡꓱ ꓠꓬ ꓙꓵꓽ ꓗ ꓗꓪ ꓐꓯ ꓔ ꓟ ꓮ ꓡꓲ ꓕꓲ ꓫꓵꓽˍ ꓟꓲ ꓙꓵꓽ ꓗꓸ ꓠꓯꓸ ꓘꓪ ꓔꓬ ꓢꓴ ꓔꓯ ꓐꓯ ꓬꓯꓼˍ ꓟ ꓥ ꓢꓲ꓾ ꓟꓷꓽ ꓠꓷꓹ ꓮꓽ ꓙꓵ ꓔꓯ ꓛꓵꓽ ꓔꓸ ꓠꓹ ꓟ ꓐꓰ꓾ ꓟꓲ ꓠꓯ ꓡ ꓞꓳ ꓮꓽ ꓙꓵ ꓠꓬ ꓪꓴ-ꓢ ꓐꓯ ꓟꓴꓺ ꓗꓪ ꓓꓵꓽ ꓡꓰ ꓠꓹ ꓟ ꓥ ꓟ ꓣꓳ ꓢꓷˍ ꓡꓳ꓿ 20 ꓖꓳ ꓡꓱ ꓠꓬꓲ ꓙꓵꓽ ꓗ ꓠꓬ ꓞꓳ ꓤ ꓝꓴꓲ ꓔꓯ ꓡꓳꓸ ꓢꓷꓸ ꓡꓰ ꓝꓲ ꓓꓴˍ ꓡꓰꓽ ꓥ ꓠꓬꓲ꓾ ꓮꓽ ꓟˍ ꓟꓲ ꓙꓵꓽ ꓗ ꓟꓬꓱꓽ ꓬꓰˍ ꓟ ꓗꓪ ꓐꓰ ꓪꓴ-ꓢ ꓟꓲꓽ ꓙꓬꓽ ꓗꓪ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓟꓽ ꓓ꓿ 21 ꓖꓳ ꓡꓱ ꓥ ꓟꓲ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓠꓬ ꓙꓵꓽ ꓗ ꓗꓪ ꓐꓰ ꓟꓽ ꓥ ꓟ꓾ ꓙꓵꓽ ꓗꓺˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓕꓳ ꓶ ꓡꓰ ꓢꓷꓸ ꓙ ꓟꓳ ꓙ ꓗꓷꓳ꓿ 22 ꓪꓴ-ꓢ ꓡꓰ ꓔꓱꓹ ꓜꓳꓽˍ ꓟ ꓚꓬꓹ ꓖꓶꓽˍ ꓟ ꓕꓱ ꓟ ꓠꓬ ꓬꓰ-ꓢꓴ ꓙꓲ-ꓢꓴ ꓔꓯ ꓙꓵꓻˍ ꓟ ꓗꓪ ꓐꓰ꓾ ꓐꓱꓻ ꓓꓴ ꓒꓯꓽ ꓓꓴ ꓟꓽ ꓙꓳ ꓙꓳ꓾ ꓙꓵꓻ ꓢꓴ ꓮꓽ ꓙꓵ ꓔꓯ ꓖꓶꓽ ꓡ ꓟ ꓥ ꓡꓳ꓿ 23 ꓮ ꓡꓲꓳ ꓐꓯ ꓠꓬ ꓮꓽ ꓙꓵ ꓢꓴ ꓝꓴꓲ ꓬꓰ ꓗꓷ ꓠꓬꓲ꓾ ꓪꓴ-ꓢ ꓟꓬꓱ ꓓꓳꓽ ꓔꓯ ꓡꓯꓼ ꓟꓽ ꓛꓲ ꓗꓷ ꓡꓰꓳ꓿ 24 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓟ ꓫꓴꓹ ꓣꓴˍ ꓟ ꓡꓰ꓾ ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓣꓳ ꓔꓯ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰ ꓝꓲꓳ꓿ 25 ꓪꓴ-ꓢ ꓠꓬ ꓠꓲꓹ ꓟ ꓫꓵˍ ꓟ ꓗꓪ ꓐꓰ ꓧꓶꓸ ꓕꓯ ꓬꓰ ꓗꓷ ꓟ ꓝꓴꓲ ꓔꓯ ꓟꓽ ꓐꓯ ꓞꓷꓹ ꓞꓷꓹ ꓠꓲꓹ ꓟ ꓦꓲꓺ ꓖꓶꓡ ꓢꓲ꓾ ꓬꓲ ꓔꓱꓹ ꓜꓳꓽˍ ꓟ ꓟꓳꓸ ꓖꓶ ꓓꓳ ꓡ ꓠꓹ ꓟ꓾ ꓬꓰ-ꓢꓴ ꓬꓲ ꓫꓵꓽ ꓗꓪ ꓐꓰ ꓝꓴꓲ ꓖꓽ ꓖꓶ ꓟꓶˍ ꓟ ꓔꓯ ꓙꓵꓻ ꓢꓴ ꓐꓴ ꓐꓱ ꓶ꓾ ꓬꓲ ꓡꓰ ꓦꓶ ꓠꓽ ꓡꓰ ꓟ ꓔꓲ ꓓꓴ ꓬꓰ ꓠꓹ ꓟ ꓬꓰ-ꓢꓴ ꓔꓯ ꓢꓲ ꓚꓰꓸ ꓗꓷꓳ꓿ 26 ꓕꓱ ꓟ ꓠꓬ ꓮ ꓟꓶˍ ꓟꓲ ꓪꓴ-ꓢ ꓠꓽ ꓔꓱꓹ ꓜꓳꓽ ꓢꓴ ꓥ ꓟ ꓐꓰ꓾ ꓬꓰ-ꓢꓴ ꓔꓯ ꓙꓵꓻ ꓢꓴ ꓔꓯ ꓠꓬ ꓬꓲ ꓡꓰ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓢꓴ ꓥ ꓟ ꓟꓳꓸ ꓖꓶ ꓓꓳ ꓡ ꓠꓹ ꓟ ꓥ ꓡꓳ꓿ 27 ꓖꓳ ꓡꓱ ꓥ ꓠꓬ ꓣꓳ ꓘꓶ ꓘꓹ ꓓꓴ ꓮꓸ ꓫꓵꓽ ꓙꓳˍ ꓡ? ꓘꓶ ꓘꓹ ꓓꓴ ꓟꓽ ꓙꓳ꓿ ꓙꓵꓽ ꓗ ꓟꓬꓱꓽ ꓬꓰˍ ꓟ ꓗꓪ ꓐꓰ ꓣꓳ ꓠꓬ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓥ ꓡ? ꓟꓽ ꓥ꓿ ꓙꓵꓻ ꓠꓲꓹ ꓗꓪ ꓐꓰˍ ꓡꓰꓽ ꓥ ꓡꓳ꓿ 28 ꓖꓳ ꓡꓱ ꓠꓬꓲ ꓥꓪ ꓠꓴꓽ ꓠꓬ ꓞꓳ ꓤ ꓠꓽ ꓙꓵꓽ ꓗ ꓔꓯ ꓒꓵꓽ ꓛꓳˍ ꓟ ꓗꓪ ꓐꓰ ꓟꓽ ꓥ ꓥ꓾ ꓙꓵꓻ ꓠꓲꓹ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓡꓳ꓾ ꓐꓰ ꓙꓵꓻˍ ꓡꓳ꓿ 29 ꓪꓴ-ꓢ ꓠꓬ ꓬꓴ-ꓔ ꓡ ꓞꓳ ꓪꓴ-ꓢˍ ꓡꓰꓽ ꓥ ꓡ? ꓐꓶꓽ ꓞꓳ ꓪꓴ-ꓢˍ ꓟꓲ ꓥꓳ꓾ ꓟꓽ ꓥ ꓡ? 30 ꓶˍ ꓟ ꓗ ꓫꓵ ꓟꓶ ꓢꓴ ꓔꓯˍ ꓟꓲ꓾ ꓟꓽ ꓟꓶ ꓢꓴ ꓔꓯˍ ꓟꓲ꓾ ꓙꓵꓻ ꓠꓲꓹ ꓑꓶꓸ ꓓꓴ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓡ ꓢꓴ ꓠꓬ ꓪꓴ-ꓢ ꓬꓲ ꓕꓲ ꓣꓳˍ ꓡꓰ ꓥ ꓡꓳ꓿ 31 ꓖꓳ ꓡꓱ ꓥ ꓠꓬ ꓣꓳ ꓠꓽ ꓙꓵꓻ ꓠꓲꓹ ꓟꓸ ꓟꓲꓽ ꓕꓱ ꓟ ꓡꓰ ꓙꓵꓽ ꓗ ꓔꓯ ꓖꓳꓽ ꓡꓰ ꓝꓲˍ ꓡ? ꓖꓳ ꓡꓱ ꓠꓽ ꓟꓽ ꓥ꓿ ꓣꓳ ꓠꓬ ꓙꓵꓽ ꓗ ꓔꓯ ꓟꓬꓽ ꓠꓬꓲ ꓕꓶꓻ ꓡꓰ ꓝꓲˍ ꓟ ꓥ ꓡꓳ꓿

ꓣꓳ-ꓟ 4

1 ꓖꓳ ꓡꓱ ꓠꓬ ꓧꓪꓽ ꓖꓳ ꓓꓱꓽ ꓗꓪ ꓟ ꓣꓳ ꓒꓵꓽ ꓒ ꓮ-ꓐ-ꓡ-ꓦ ꓔꓯ ꓟꓳꓸ ꓣꓳ ꓮ ꓡꓲ ꓐꓯ ꓠꓯꓹ ꓡ? 2 ꓮ-ꓐ-ꓡ-ꓦ ꓠꓬ ꓟꓬꓱꓽ ꓬꓰ ꓢꓯꓼ ꓕꓵꓼˍ ꓟ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰˍ ꓟ ꓥ ꓐꓷˍ ꓠꓬ ꓘꓶꓽ ꓘꓹ ꓓꓴ ꓙꓳˍ ꓡꓳ ꓫꓵꓽ ꓥꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓟꓲꓽ ꓙꓬ ꓗꓪ ꓠꓽ ꓘꓶꓽ ꓘꓹ ꓓꓴ ꓟꓽ ꓙꓳ꓿ 3 ꓮ ꓡꓲꓳ ꓐꓯ ꓠꓬ ꓢꓲꓽ ꓫꓬ ꓕꓳ ꓶ ꓗꓪ ꓮ ꓡꓲ ꓐꓯ ꓔ ꓡ? ꓮ-ꓐ-ꓡ-ꓦ ꓠꓬ ꓪꓴ-ꓢ ꓔꓯ ꓙꓵꓻ ꓗꓷ ꓠꓬꓲ꓾ ꓙꓵꓻ ꓠꓲꓹ ꓕꓱ ꓟ ꓑꓶꓸ ꓓꓴ ꓬꓲ ꓔꓯ ꓔꓱꓹ ꓜꓳꓽˍ ꓟ ꓚꓬ ꓖꓶ ꓗꓷꓳ꓾ ꓐꓰ ꓐꓯ ꓔ ꓡꓳ꓾ ꓟꓽ ꓥ ꓡ? 4 ꓟꓬꓱꓽ ꓬꓰ ꓢꓴ ꓟꓶˍ ꓟ ꓪ ꓒꓵꓽ ꓠꓽ ꓡꓯꓼ ꓫꓴ ꓟꓽ ꓥ꓾ ꓟꓶ ꓙꓲꓽ ꓙꓳˍ ꓠꓬꓲ ꓟꓶˍ ꓟ ꓥ ꓡꓳ꓿ 5 ꓖꓳ ꓡꓱ ꓥ ꓟꓲ ꓟꓬꓱꓽ ꓬꓰ ꓢꓯꓼ ꓕꓵꓼˍ ꓟ ꓗꓪ ꓐꓰ ꓟꓽ ꓥ ꓥ꓾ ꓙꓵꓻ ꓠꓲꓹ ꓑꓶꓸ ꓓꓴ ꓝꓴꓲ ꓙꓳ ꓢꓴ ꓔꓯ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓢꓴ ꓪꓴ-ꓢ ꓔꓯ ꓙꓵꓻ ꓢꓴ ꓔꓯ ꓠꓬ꓾ ꓬꓲ ꓙꓵꓻ ꓠꓲꓹ ꓑꓶ ꓓꓴ ꓪꓴ-ꓢ ꓡꓰ ꓔꓱꓹ ꓜꓳꓽˍ ꓟ ꓚꓬꓹ ꓖꓶˍ ꓡꓳ꓿ 6 ꓓ-ꓪꓵˍ ꓟꓲ ꓟꓬꓱꓽ ꓬꓰ ꓢꓯꓼ ꓕꓵꓼˍ ꓟ ꓗꓪ ꓐꓰ ꓟꓽ ꓥ ꓥ꓾ ꓪꓴ-ꓢ ꓡꓰ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓟꓶˍ ꓟ ꓡ ꓞꓳ ꓠꓬ ꓶꓼ ꓙꓳ ꓫꓱꓹ ꓙꓳ ꓡꓳ꓾ ꓐꓯˍ ꓡꓳ꓿ 7 ꓬꓲ ꓐꓯˍ ꓟ ꓠꓬ꓾ ꓛꓬ ꓖꓴ ꓖꓽ ꓖꓶ ꓟꓶ ꓢꓴˍ ꓐꓰ꓾ ꓝꓴꓲ ꓫꓵꓹ ꓦ ꓟꓶ ꓢꓴ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ 8 ꓢꓲ ꓒꓽ ꓡꓰ ꓝꓴꓲ ꓓꓰꓺ ꓘꓶ ꓐꓯ ꓞꓷꓹˍ ꓟ ꓟꓽ ꓟꓶ ꓢꓴˍ ꓟꓲ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯˍ ꓡꓳ꓿ 9 ꓖꓳ ꓡꓱ ꓥ ꓠꓬ ꓶꓼ ꓤ ꓫꓱꓹ ꓤ ꓕꓱ ꓟ ꓠꓬ꓾ ꓶˍ ꓟ ꓗ ꓫꓵ ꓟꓶ ꓢꓴ ꓐꓱ ꓶˍ ꓡꓰꓽ ꓥ ꓡ? ꓥ ꓠꓬ ꓟꓽ ꓶ ꓟꓶ ꓢꓴ ꓐꓱ ꓶˍ ꓟꓲ ꓥ ꓡ? ꓮ-ꓐ-ꓡ-ꓦ ꓔꓯ ꓠꓬ ꓬꓲ ꓙꓵꓻ ꓠꓲꓹ ꓑꓶꓸ ꓓꓴ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓗꓷꓳ꓾ ꓐꓰ ꓣꓳ ꓐꓯ ꓗꓷꓳ꓿ 10 ꓖꓳ ꓡꓱ ꓚꓬꓹ ꓟꓶ ꓟ ꓠꓬ ꓶ ꓟꓶ ꓡꓰ ꓗꓸ ꓠꓯꓸ ꓥ ꓡ? ꓥ ꓠꓬ ꓟꓽ ꓶ ꓢꓰꓽ ꓕꓯ ꓥ ꓡ? ꓶ ꓟꓶ ꓗꓷ ꓗꓸ ꓠꓯꓸ ꓟꓽ ꓥ꓾ ꓟꓽ ꓶ ꓟꓶ ꓢꓰꓽ ꓕꓯˍ ꓡꓰ ꓥ ꓡꓳ꓿ 11 ꓮ ꓡꓲꓳ ꓐꓯ ꓠꓬ ꓮ-ꓐ-ꓡ-ꓦ ꓠꓬ ꓟꓽ ꓶ ꓟꓶ ꓢꓰꓽ ꓕꓯˍ ꓡꓰ꓾ ꓬꓲ ꓙꓵꓻ ꓠꓲꓹ ꓑꓶꓸ ꓓꓴ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓗꓷ ꓟ ꓬꓲ ꓢꓷꓸ ꓡꓰ ꓓꓴˍ ꓐꓰ ꓔꓳꓹ ꓠꓷꓼ ꓓꓴ ꓬꓰ ꓠꓹ ꓟ꓾ ꓬꓲ ꓠꓬ ꓶˍ ꓟ ꓗ ꓫꓵ ꓟꓶˍ ꓡꓳ꓿ ꓕꓱ ꓟ ꓠꓬ ꓮ-ꓐ-ꓡ-ꓦ ꓠꓽ ꓶˍ ꓟ ꓗꓪ ꓐꓰ ꓟꓽ ꓥ ꓥ꓾ ꓙꓵꓻ ꓠꓲꓹ ꓑꓶꓸ ꓓꓴ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓢꓴ ꓮꓽ ꓙꓵ ꓟ ꓐꓹ ꓐ ꓒꓬꓱꓼ ꓡ ꓠꓹ ꓟ ꓥ ꓡꓳ꓿ 12 ꓬꓲ ꓠꓬ ꓶ ꓟꓶ ꓢꓴ ꓐꓴ ꓐꓹ ꓐ ꓥ ꓟˍ ꓡꓰ ꓟꓽ ꓞꓲ꓾ ꓬꓲ ꓟꓽ ꓶ ꓟꓶ ꓢꓰꓽ ꓕꓯˍ ꓡꓰ ꓬꓲˍ ꓡꓰ ꓐꓰ ꓙꓵꓻ ꓠꓲꓹ ꓚꓱꓹ ꓗꓪ ꓚ ꓗꓷ ꓢꓴ ꓐꓴ ꓬꓲ ꓪꓽ ꓐꓹ ꓐˍ ꓟꓲ ꓥꓳ꓿ 13 ꓟꓲ ꓠꓯ ꓕꓱ ꓟ ꓠꓬ꓾ ꓮ-ꓐ-ꓡ-ꓦˍ ꓐꓰ ꓬꓲ ꓞꓲꓼ ꓤ ꓡꓯ ꓤ ꓐꓴ ꓡꓯꓼ ꓪ ꓒꓬꓱꓼ ꓡ ꓠꓹ ꓟ ꓙ ꓟꓳ ꓘꓶꓽ ꓠꓬ꓾ ꓙꓵꓽ ꓗ ꓔꓯ ꓛꓳˍ ꓟ ꓗꓪ ꓐꓰ ꓟꓶꓺˍ ꓟꓽ ꓥ꓿ ꓙꓵꓻ ꓠꓲꓹ ꓑꓶ ꓓꓴ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓗꓪ ꓐꓰ ꓟꓶˍ ꓟ ꓥ ꓡꓳ꓿ 14 ꓙꓵꓽ ꓗ ꓔꓯ ꓛꓳ ꓢꓴ ꓐꓴˍ ꓡꓰꓽ ꓡꓯꓼ ꓪ ꓟꓶˍ ꓕꓯ ꓠꓽ꓾ ꓙꓵꓻ ꓠꓲꓹ ꓠꓬ ꓬꓲ ꓖꓳꓽ ꓒꓬꓱꓼ ꓡ ꓢꓲ꓾ ꓙ ꓟꓳ ꓘꓶˍ ꓟꓲ ꓮ ꓔꓳ ꓗꓷ ꓡꓰˍ ꓥꓳ꓿ 15 ꓮ ꓡꓲꓳ ꓐꓯ ꓠꓬ ꓙꓵꓽ ꓗ ꓔꓯ ꓠꓽ ꓦꓶꓻ ꓠꓲꓹ ꓛꓳ ꓞꓹ ꓡꓳ꓿ ꓖꓳ ꓡꓱ ꓥ ꓟꓲ ꓙꓵꓽ ꓗ ꓟꓽ ꓙꓳ ꓠꓬ ꓛꓬ ꓖꓴ ꓙꓳ ꓟꓽ ꓠꓺ꓿ 16 ꓖꓳ ꓡꓱ ꓠꓬꓲ ꓡꓯꓼ ꓪ ꓟꓶˍ ꓟ ꓙ ꓟꓳ ꓘꓶꓽ ꓠꓬ ꓣꓱꓽ ꓛꓰ ꓗꓪ ꓐꓰ ꓙꓵꓻ ꓠꓲꓹ ꓑꓶ ꓓꓴ ꓥ ꓢꓲ꓾ ꓙꓵꓽ ꓗ ꓔꓯ ꓛꓳ ꓢꓴ ꓐꓱ ꓶˍ ꓡꓰ ꓟꓽ ꓞꓲ꓾ ꓣꓳ ꓒꓵꓽ ꓒ ꓮ-ꓐ-ꓡ-ꓦ ꓙꓵꓻ ꓠꓲꓹ ꓚꓱꓹ ꓗꓪ ꓚ ꓢꓲ ꓞꓳ ꓙꓳ ꓢꓴ ꓮꓽ ꓙꓵ ꓐꓱ ꓶˍ ꓟꓲ ꓥ ꓡꓳ꓿ ꓬꓲ ꓠꓬ ꓣꓳꓽ ꓮꓽ ꓙꓵ ꓟ ꓐꓹ ꓐ ꓥ ꓡꓳ꓿ 17 (ꓕꓱ ꓟ ꓠꓬ ꓕꓳ ꓶ ꓗꓪ꓾ ꓥꓪ ꓠꓬ ꓠꓴ ꓔꓯ ꓞꓳ ꓫꓵꓽ ꓮꓽ ꓟꓬꓹ ꓫꓵꓽ ꓟ ꓐꓹ ꓐ ꓒꓬꓱꓼ ꓡ ꓝꓲꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥꓳ꓿) ꓫꓵꓻ ꓢꓴ ꓔꓯ ꓢꓯꓸ ꓡ ꓝꓲ ꓢꓲ꓾ ꓟꓽ ꓙꓳ ꓢꓰꓽ ꓟ ꓔꓯ ꓙꓳꓻ ꓡ ꓝꓲ ꓢꓴ ꓪꓴ-ꓢ ꓔꓯ ꓮ-ꓐ-ꓡ-ꓦ ꓙꓵꓻ ꓗꓷꓳ꓿ 18 ꓖꓳ ꓡꓱ ꓠꓬꓲ ꓬꓲ ꓔꓯ꓾ ꓠꓴ ꓞꓲꓼ ꓤ ꓡꓯꓹ ꓤ ꓐꓴ ꓠꓬ ꓟꓬꓽˍ ꓥꓳ꓾ ꓐꓯ ꓔꓸ ꓟ ꓡꓰ ꓐꓰ꓾ ꓬꓲ ꓠꓽ ꓥꓳ ꓡꓳꓸ ꓓꓴ ꓟꓽ ꓙꓳ ꓟ ꓗꓪ ꓥꓳ ꓡꓳꓸ ꓗꓷ ꓢꓲ ꓙꓵꓻ ꓗꓷ ꓠꓬꓲ꓾ ꓞꓳ ꓫꓵꓽ ꓮꓽ ꓟꓬꓹ ꓟ ꓐꓹ ꓐ ꓒꓬꓱꓼ ꓡꓺꓳ꓿ 19 ꓬꓲ ꓠꓬ ꓮꓽ ꓡ ꓕꓲ ꓦꓬ ꓘꓳꓼ ꓛꓲ ꓙꓳ ꓢꓲ꓾ ꓚꓲꓸ ꓛꓬ ꓖꓳ ꓓꓱ ꓠꓬ ꓫꓵꓻ ꓞꓹ ꓟ ꓡꓰ ꓐꓰ ꓗꓹ ꓟ ꓐꓰ꓾ ꓢ-ꓣ ꓤ ꓘꓶꓻ ꓫꓵꓻ ꓞꓹ ꓟ ꓔꓯ ꓓꓵꓽ ꓙꓽ ꓛꓲˍ ꓟꓲ꓾ ꓬꓲ ꓙꓵꓻ ꓠꓲꓹ ꓟꓽ ꓣꓳ ꓡꓰ꓿ 20 ꓬꓲ ꓠꓽ ꓪꓴ-ꓢ ꓙ ꓟꓳ ꓘꓶ ꓔꓯ ꓟꓽ ꓓꓵꓽ ꓙꓽ ꓟꓬꓽ ꓟꓬꓽ꓾ ꓙꓵꓻ ꓠꓲꓹ ꓢꓯꓼ ꓙꓳ ꓡ ꓢꓲ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ 21 ꓝꓮꓲ꓾ ꓪꓴ-ꓢ ꓡꓰ ꓙ ꓟꓳ ꓔ ꓟ ꓠꓬ ꓪꓴ-ꓢ ꓬꓰ ꓐ ꓡ ꓥꓳ꓾ ꓐꓰ ꓬꓲ ꓦ ꓡꓱ ꓐꓳˍ ꓡꓳ꓿ 22 ꓖꓳ ꓡꓱ ꓠꓬꓲ ꓬꓲ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰꓳ꓿ 23 ꓬꓲ ꓔꓯ ꓠꓬ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰ ꓝꓲꓳ꓾ ꓐꓯˍ ꓟ ꓠꓬ ꓬꓲ ꓐꓱ ꓶ ꓐꓳ ꓔ ꓟˍ ꓡꓰꓽ ꓟꓽ ꓞꓲ꓾ 24 ꓢꓲ ꓒꓽ ꓬꓰ-ꓢꓴ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓢꓴ ꓪꓴ-ꓢ ꓔꓯ ꓙꓵꓻ ꓢꓴ ꓐꓴ ꓣꓳ ꓮꓽ ꓙꓵ ꓔꓯˍ ꓟꓲ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰ ꓝꓲˍ ꓥꓳ꓿ 25 ꓣꓳ ꓔꓯ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰ ꓢꓴ ꓒꓬꓱꓼ ꓡ ꓝꓲ ꓠꓹ ꓟ꓾ ꓣꓳ ꓝꓴꓲ ꓑꓶꓸ ꓓꓴ ꓬꓰ-ꓢꓴ ꓔꓯ ꓫꓵꓻ ꓝꓲ ꓢꓲ ꓢꓯꓸ ꓬꓲꓼ ꓡ ꓝꓲꓳ꓿

ꓣꓳ-ꓟ 5

1 ꓖꓳ ꓡꓱ ꓠꓬꓲ ꓣꓳ ꓠꓬ ꓙꓵꓻ ꓠꓲꓹ ꓑꓶꓸ ꓓꓴ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰ ꓠꓬꓲ꓾ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓪꓴ-ꓢˍ ꓐꓰ ꓧꓳꓹ ꓡꓯ ꓘꓳˍ ꓟ ꓟꓶ ꓡꓰꓳ꓿ 2 ꓝꓮꓲ ꓠꓬ ꓬꓰ-ꓢꓴ ꓗꓪ ꓐꓰ ꓙꓵꓻ ꓠꓲꓹ ꓑꓶ ꓓꓴ ꓮ ꓟꓶ ꓣꓳ ꓔꓬ ꓟ ꓣꓱꓽ ꓛꓰ ꓗꓪ ꓓꓵꓽ ꓡꓰ ꓟꓶ ꓢꓲ꓾ ꓪꓴ-ꓢ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓔꓯ ꓥꓳ ꓡꓳꓸ ꓔꓬ ꓠꓬꓲ ꓗꓹ ꓛꓲꓽˍ ꓡꓳ꓿ 3 ꓕꓱ ꓟˍ ꓡꓰ ꓟꓽ ꓞꓲ꓾ ꓫꓸ ꓙꓵˍ ꓟ ꓗꓪ ꓐꓰ ꓜꓲꓽ ꓘꓴꓻ ꓠꓲꓹ ꓓꓳ ꓡ ꓟ ꓣꓳ ꓢꓷˍ ꓠꓬꓲ꓾ ꓣꓳ ꓠꓬ ꓫꓸ ꓙꓵˍ ꓟ ꓗꓪˍ ꓟꓲ ꓗꓹ ꓛꓲꓽˍ ꓡꓳ꓿ 4 ꓜꓲꓽ ꓘꓴ ꓠꓲꓹ ꓡꓰ ꓤꓹ ꓟꓶˍ ꓟ ꓓꓳ ꓡ ꓝꓲ ꓢꓲ꓾ ꓤꓹ ꓟꓶˍ ꓟ ꓡꓰ ꓥꓳ ꓡꓳꓸ ꓓꓴ ꓓꓳ ꓡ ꓝꓲˍ ꓡꓳ꓿ 5 ꓪꓴ-ꓢ ꓠꓵꓻ ꓠꓲꓹ ꓠꓬ ꓬꓲ ꓡꓰ ꓣꓳ ꓔꓯ ꓖꓶ ꓡ ꓟ ꓢꓲ-ꓫꓬ-ꓟ-ꓦ ꓗꓪ ꓐꓰ꓾ ꓣꓳ ꓠꓲꓹ ꓟ ꓗꓪ ꓧꓳꓸ ꓧꓳꓽ ꓖꓶ ꓡ ꓠꓬꓲ꓾ ꓥꓳ ꓡꓳꓸ ꓓꓴ ꓡꓰ ꓣꓳ ꓔꓯ ꓟꓽ ꓫꓸ ꓔꓳ ꓡꓰ ꓝꓲ꓿ 6 ꓮ ꓡꓲꓳ ꓐꓯ ꓠꓬ ꓣꓳ ꓮꓸ ꓫꓵꓽ ꓥꓳ ꓡꓳꓸ ꓓꓴ ꓟꓽ ꓙꓳ ꓕꓯ꓾ ꓙꓲ-ꓢꓴ ꓠꓬ ꓝꓰꓹ ꓔ ꓟ ꓝꓲꓸ ꓗꓪ ꓪꓴ-ꓢ ꓔꓯ ꓠꓲꓹ ꓟꓽ ꓒꓵꓽ ꓢꓴ ꓠꓲꓹ ꓟꓽ ꓡꓱ ꓢꓴ ꓐꓱ ꓶ ꓫꓵꓻ ꓙ ꓗꓷꓳ꓿ 7 ꓔꓱꓹ ꓜꓳꓽ ꓢꓴ ꓐꓱ ꓶ ꓫꓵꓻ ꓙ ꓢꓴ ꓠꓬ ꓮꓽ ꓡ ꓟꓽ ꓙꓳ꓿ ꓮꓽ ꓧꓪꓹ ꓞꓳ ꓙꓲꓻ ꓐꓱ ꓶ ꓫꓵꓻ ꓙ ꓑꓶꓸ ꓢꓴ ꓕꓲ ꓣꓳ ꓣꓳ ꓙꓳˍ ꓟꓽ ꓢꓷꓸ꓿ 8 ꓖꓳ ꓡꓱ ꓥ ꓟꓲ ꓣꓳ ꓝꓴꓲ ꓙꓳ ꓢꓴ ꓬꓰ ꓔꓬ ꓕꓯˍ ꓡꓰ ꓙꓲ-ꓢꓴ ꓣꓳ ꓐꓱ ꓶ ꓫꓵꓻ ꓙ ꓗꓷ ꓟ ꓗꓪ ꓐꓰ꓾ ꓪꓴ-ꓢ ꓣꓳ ꓔꓯ ꓠꓲꓹ ꓠꓵˍ ꓟ ꓟꓳꓸ ꓖꓶ ꓓꓳ ꓡ ꓡꓳ꓿ 9 ꓬꓰ-ꓢꓴ ꓬꓲ ꓫꓵꓽ ꓗꓪ ꓐꓰ ꓣꓳ ꓔꓯ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰ ꓝꓲ ꓠꓬꓲ꓾ ꓪꓴ-ꓢ ꓦꓶꓻ ꓠꓲꓹ ꓗꓪ ꓐꓰ ꓡꓲꓹ ꓗꓷ ꓠꓹ ꓟ꓾ ꓬꓲ ꓠꓯꓸꓼ ꓗꓪ ꓣꓳ ꓪ ꓜꓲ ꓚꓬꓴ ꓟꓶˍ ꓥꓳ꓿ 10 ꓣꓳ ꓪꓴ-ꓢ ꓔꓯ ꓛꓴꓽ ꓙꓳ ꓢꓴ ꓬꓰ ꓔꓬ ꓕꓯˍ ꓡꓰ꓾ ꓬꓲ ꓮ ꓐꓲ ꓫꓵꓻ ꓟ ꓗꓪ ꓐꓰ ꓣꓳ ꓠꓬ ꓬꓲˍ ꓐꓰ ꓧꓳꓹ ꓡꓰ ꓟ ꓟꓶ ꓗꓷ ꓕꓯ ꓠꓽ꓾ ꓣꓳꓽ ꓮ ꓟꓶ ꓧꓳꓹ ꓡꓰ ꓟ ꓑꓶ ꓓꓴ꓾ ꓬꓲ ꓢꓯꓸ ꓔꓬ ꓟ ꓗꓪ ꓐꓰ ꓣꓳꓽ ꓪ ꓜꓲ ꓚꓬꓴ ꓟꓶˍ ꓥꓳ꓿ 11 ꓖꓳ ꓡꓱ ꓠꓬꓲ ꓣꓳ ꓔꓯ ꓧꓳꓹ ꓡꓰ ꓟ ꓟꓶ ꓝꓲ ꓢꓴ ꓣꓳꓽ ꓢꓲ ꓒꓽ ꓙꓲ-ꓢꓴ ꓬꓰ-ꓢꓴ ꓗꓪ ꓐꓰ ꓪꓴ-ꓢ ꓠꓯꓸꓼ ꓗꓪ ꓣꓳ ꓗꓹ ꓛꓲꓽˍ ꓡꓳ꓿ 12 ꓖꓳ ꓡꓱ ꓠꓬꓲ꓾ ꓝꓴꓲ ꓠꓬ ꓞꓳ ꓤ ꓕꓲ ꓣꓳ ꓗꓪ ꓐꓰ ꓟꓲ ꓠꓯ ꓗꓪ ꓓꓵꓽ ꓡ ꓢꓲ꓾ ꓫꓵꓻˍ ꓟ ꓠꓬ ꓝꓴꓲ ꓑꓶꓸ ꓓꓴ ꓙꓳꓻ ꓡ ꓟ ꓥꓳ꓿ ꓖꓳ ꓡꓱ ꓢꓲ ꓮꓽ ꓙꓵ ꓢꓴ ꓝꓴꓲ ꓬꓰ ꓗꓷ ꓠꓬꓲ꓾ ꓫꓵꓻˍ ꓟ ꓠꓬ ꓞꓳ ꓤ ꓮꓽ ꓙꓵ ꓔꓯ ꓬꓯꓼ ꓡꓺꓳ꓿ 13 ꓙꓵꓽ ꓗ ꓟꓽ ꓙꓳ ꓕꓯˍ ꓡꓰ ꓝꓴꓲ ꓠꓬ ꓟꓲ ꓠꓯ ꓗꓪ ꓙꓳˍ ꓟꓲ꓾ ꓙꓵꓽ ꓗ ꓟꓽ ꓙꓳ ꓕꓯ ꓠꓬ ꓝꓴꓲ ꓔꓯ ꓟꓽ ꓐꓳ ꓚꓲꓸ ꓔ꓿ 14 ꓖꓳ ꓡꓱ ꓥ ꓟꓲ ꓫꓵꓻˍ ꓟ ꓡꓰ ꓮ-ꓓꓯ ꓗꓪ ꓐꓰ ꓟꓳ-ꓫꓲ ꓗꓪ ꓛꓲ ꓙꓵꓽ ꓗꓷꓳ꓿ ꓮ-ꓓꓯ ꓛꓬ ꓖꓴˍ ꓡꓰ ꓐꓰ ꓗꓹ ꓡꓳ ꓫꓵꓽ ꓝꓴꓲ ꓟꓽ ꓬꓰ ꓢꓴ ꓔꓯˍ ꓟꓲ ꓙꓵꓽ ꓗꓷꓳ꓿ ꓮ-ꓓꓯ ꓠꓬ ꓗꓸ ꓠꓯ ꓢꓲ ꓡ ꓠꓹ ꓟ ꓖꓳ ꓕꓲ ꓣꓳ ꓬꓲ ꓶꓻ ꓥꓳꓽ ꓥ ꓡꓳ꓿ 15 ꓖꓳ ꓡꓱ ꓥ ꓟꓲ ꓪꓴ-ꓢ ꓣꓱꓽ ꓛꓰ ꓡꓯꓽ ꓫꓴ ꓠꓬ ꓮ-ꓓꓯ ꓛꓬ ꓖꓴ ꓥꓳꓽ ꓖꓴˍ ꓡꓰ ꓐꓰ ꓟꓽ ꓗꓹ꓿ ꓮ ꓡꓲꓳ ꓐꓯ ꓠꓬ ꓛꓬ ꓢꓴ ꓕꓲ ꓣꓳ ꓗꓪ ꓐꓰ ꓮꓽ ꓟꓬꓹ ꓣꓳ ꓫꓵꓻ ꓠ ꓗꓷ ꓡꓰˍ ꓟꓲ꓾ ꓪꓴ-ꓢ ꓣꓱꓽ ꓛꓰ ꓠꓬ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓖꓳ ꓟ ꓢꓶꓸ ꓟꓽ ꓞꓲ ꓮꓽ ꓟꓬꓹ ꓣꓳ ꓐꓱ ꓶ ꓐꓲ ꓡꓶꓽ ꓡꓰˍ ꓡꓳ꓿ 16 ꓝꓮꓲ ꓪꓴ-ꓢ ꓣꓱꓽ ꓛꓰ ꓡꓯꓼ ꓫꓴ ꓠꓬ ꓝꓴꓲ ꓬꓰ ꓗꓷ ꓢꓴ ꓖꓳ ꓕꓲ ꓣꓳ ꓛꓬ ꓖꓴ ꓥꓳꓽ ꓖꓴˍ ꓡꓰ ꓐꓰ ꓟꓽ ꓗꓹ꓿ ꓡ ꓞꓳ ꓕꓲ ꓣꓳ ꓝꓴꓲ ꓬꓰ ꓗꓷ ꓠꓬꓲ ꓮꓽ ꓙꓵ ꓢꓴ ꓔꓯ ꓝꓴꓲ ꓐꓯ ꓞꓷꓹ ꓠ ꓗꓷ ꓡꓰˍ ꓟꓲ꓾ ꓪꓴ-ꓢ ꓣꓱꓽ ꓛꓰ ꓡꓯꓼ ꓫꓴ ꓡꓰ ꓝꓴꓲ ꓮꓽ ꓟꓬꓹ ꓔꓯ ꓖꓽ ꓖꓶꓽ ꓢꓲ꓾ ꓔꓱꓹ ꓜꓳꓽˍ ꓟ ꓚꓬꓹ ꓖꓶˍ ꓟ ꓙꓳ ꓡꓰꓳ꓿ 17 ꓕꓲ ꓣꓳ ꓛꓬ ꓗꓷ ꓟ ꓑꓶꓸ ꓓꓴ꓾ ꓫꓵꓻˍ ꓟ ꓠꓬ ꓬꓲ ꓗꓪ ꓐꓰ ꓞꓳ ꓤ ꓔꓯ ꓙꓵꓽ ꓗꓷˍ ꓟꓲ꓾ ꓐꓲ ꓡꓶꓽ ꓡꓰ ꓟ ꓣꓱꓽ ꓛꓰ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓡꓯꓼ ꓫꓴ ꓟꓶ ꓢꓴ ꓐꓴ ꓠꓬ꓾ ꓬꓰ-ꓢꓴ ꓙꓲ-ꓢꓴ ꓕꓱ ꓕꓲ ꓣꓳ ꓗꓪ ꓐꓰ ꓢꓯꓼ ꓟꓬ ꓗꓪ ꓖꓳ ꓟ ꓢꓶꓸ ꓟꓽ ꓞꓲ ꓙꓵꓽ ꓪˍ ꓥꓳ꓿ 18 ꓖꓳ ꓡꓱ ꓠꓬꓲ ꓛꓬ ꓖꓴ ꓕꓲ ꓟˍ ꓛꓬ ꓗꓷ ꓟ ꓗꓪ ꓐꓰ ꓝꓴꓲ ꓐꓯ ꓞꓷꓹˍ ꓟ ꓠꓬ ꓞꓳ ꓤ ꓮꓽ ꓙꓵ ꓔꓯ ꓬꓯꓼ ꓡ ꓟ ꓡꓰ ꓐꓰ꓾ ꓔꓱꓹ ꓜꓳꓽˍ ꓟ ꓟꓬꓱꓽ ꓕꓲ ꓫꓵꓽ ꓬꓰ ꓗꓷ ꓟ ꓗꓪ ꓐꓰˍ ꓟꓲ꓾ ꓞꓳ ꓤ ꓮꓽ ꓙꓵ ꓠꓬ ꓪꓴ-ꓢˍ ꓐꓰ ꓧꓳꓹ ꓡꓰ ꓢꓲ ꓔꓱꓹ ꓜꓳꓽˍ ꓟ ꓚꓬ ꓟꓶ ꓠꓹ ꓟ ꓚꓱꓹ ꓙꓳˍ ꓠꓬꓲ꓾ ꓢꓯꓼ ꓟꓬ ꓟꓶˍ ꓟ ꓥꓳ ꓡꓳꓸ ꓓꓴ ꓙꓳˍ ꓡꓳ꓿ 19 ꓮ-ꓓꓯ ꓕꓲ ꓣꓳ ꓡꓰ ꓟꓽ ꓒꓵꓽ ꓛꓳ ꓟ ꓗꓪ ꓐꓰ ꓮꓽ ꓟꓬꓹ ꓣꓳ ꓔꓯ ꓝꓴꓲ ꓙꓳ ꓢꓴ ꓗꓷ ꓡꓰ ꓝꓲˍ ꓟ ꓡꓰ ꓐꓰ꓾ ꓬꓰ-ꓢꓴˍ ꓟꓲ ꓬꓲ ꓕꓲ ꓣꓳ ꓡꓰ ꓒꓵꓽ ꓛꓳ ꓗꓷ ꓟ ꓗꓪ ꓐꓰˍ ꓟꓲ꓾ ꓮꓽ ꓟꓬꓹ ꓣꓳ ꓔꓯ ꓔꓱꓹ ꓜꓳꓽ ꓡꓰ ꓝꓲꓳ꓿ 20 ꓙꓵꓽ ꓗ ꓠꓬ ꓛꓬ ꓖꓴ ꓟꓬꓽ ꓡ ꓝꓲ ꓠꓹ ꓟ ꓬꓰ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓝꓴꓲ ꓮ ꓡꓲ ꓗꓪ ꓟꓬꓽ ꓡ ꓠꓬ ꓖꓳ ꓗꓪ ꓣꓱꓽ ꓛꓰ ꓪ ꓜꓲꓻ ꓟꓬꓽ ꓡ ꓢꓲ꓾ 21 ꓝꓴꓲ ꓠꓬ ꓫꓵꓻˍ ꓟ ꓣꓱꓽ ꓢꓲ ꓣꓳ ꓔꓯ ꓙꓵꓽˍ ꓟ ꓡꓰ ꓐꓰ꓾ ꓣꓱꓽ ꓛꓰˍ ꓟꓲ ꓬꓰ-ꓢꓴ ꓙꓲ-ꓢꓴ ꓣꓳ ꓢꓲ ꓒꓽ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ꓾ ꓔꓱꓹ ꓜꓳꓽˍ ꓟ ꓡꓰ ꓣꓳ ꓔꓯ ꓙꓵꓽˍ ꓡꓳ꓿

ꓣꓳ-ꓟ 6

1 ꓖꓳ ꓡꓱ ꓠꓬ ꓣꓳ ꓮ ꓡꓲ ꓐꓯ ꓠꓯꓹ ꓡ? ꓣꓱꓽ ꓛꓰ ꓟꓬꓽ ꓡ ꓠꓹ ꓟ ꓣꓳ ꓠꓬ ꓡꓯꓽ ꓫꓵ ꓝꓴꓲ ꓬꓰ ꓠꓯꓹ ꓡ? 2 ꓖꓳ ꓡꓱ ꓠꓽ ꓟꓽ ꓥ꓿ ꓝꓴꓲ ꓔꓯ ꓟꓳꓸ ꓫꓵꓻ ꓗꓷ ꓢꓴ ꓣꓳ ꓠꓬ ꓝꓴꓲ ꓠꓯꓸꓼ ꓗꓪ ꓡꓯꓽ ꓫꓵ ꓮ ꓡꓲ ꓢꓯꓸ ꓔꓬ ꓢꓰ? 3 ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓖꓳ ꓓꓱ ꓔꓲꓹ ꓗꓷ ꓢꓴ ꓣꓳ ꓠꓬ꓾ ꓬꓲ ꓫꓵꓻˍ ꓟ ꓠꓯꓸꓼ ꓗꓪ ꓔꓲꓹ ꓓꓵꓽ ꓡꓰ ꓢꓴ ꓥ ꓟ ꓠꓴ ꓪꓽ ꓟꓽ ꓢꓷꓸ ꓡ? 4 ꓖꓳ ꓡꓱ ꓠꓬꓲ ꓣꓳ ꓠꓬ ꓖꓳ ꓓꓱ ꓔꓲꓹˍ ꓟ ꓗꓪ ꓬꓲˍ ꓐꓰ ꓕꓲ ꓪꓺꓼ ꓫꓵꓻ ꓢꓲ ꓔꓵꓸ ꓗꓷꓳ꓿ ꓕꓱ ꓟ ꓠꓬ ꓐꓹ ꓐ ꓟꓬꓱ ꓓꓳꓽ ꓙꓳˍ ꓟ ꓪꓽ ꓠꓬꓲˍ ꓟ ꓡꓰ ꓙꓲ-ꓢꓴ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓟ ꓡꓰ ꓐꓰ꓾ ꓣꓳˍ ꓟꓲ ꓢꓯꓼ ꓟ ꓬꓲ ꓫꓵꓼ ꓗꓪ ꓞꓳ ꓙꓳꓻ ꓪ ꓠꓹ ꓟ ꓥ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓬꓲ ꓫꓵꓻˍ ꓟ ꓔꓯ ꓐꓬꓱꓽ ꓗꓪ ꓣꓳ ꓬꓲ ꓔꓯ ꓝꓱꓺ ꓡꓰˍ ꓠꓬ꓾ ꓢꓯꓸ ꓬꓲꓼ ꓡ ꓟ ꓗꓪˍ ꓟꓲ ꓬꓲ ꓔꓯ ꓝꓱꓺ ꓡꓰˍ ꓥꓳ꓿ 6 ꓣꓳ ꓠꓬ ꓝꓴꓲ ꓚꓳ ꓑꓸ ꓡꓯꓽ ꓫꓵ ꓟꓽ ꓬꓰ ꓠꓹ ꓟ꓾ ꓝꓴꓲ ꓬꓰ ꓠꓲꓹ ꓫꓵˍ ꓟ ꓫꓷꓹ ꓔꓯ ꓟꓶꓽ ꓬꓰ ꓝꓲ ꓢꓲ꓾ ꓣꓳ ꓡꓽ ꓞꓳ ꓡꓵ ꓠꓬ ꓬꓲˍ ꓐꓰ ꓕꓲ ꓪꓺꓼ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓢꓰꓼ ꓗꓷ ꓟ ꓣꓳ ꓢꓷˍ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓬꓲ ꓖꓳ ꓡꓱ ꓫꓵꓻ ꓗꓷ ꓢꓴ ꓠꓬ ꓝꓴꓲ ꓗꓪ ꓐꓰ ꓡꓲꓹ ꓗꓷꓳ꓿ 8 ꓣꓳ ꓠꓬ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓫꓵꓻ ꓗꓷ ꓕꓯ ꓠꓽ꓾ ꓬꓲˍ ꓐꓰ ꓕꓲ ꓪꓺꓼ ꓢꓯꓸ ꓔꓬ ꓪˍ ꓥꓳ꓾ ꓐꓰ ꓣꓳ ꓙꓵꓻˍ ꓡꓳ꓿ 9 ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓗꓷ ꓠꓬꓲ ꓬꓲ ꓝꓮꓲ ꓟꓽ ꓫꓵꓳ꓿ ꓫꓵꓻˍ ꓟˍ ꓟꓲ ꓕꓱ ꓡꓱ ꓖꓳ ꓑꓳ ꓬꓲ ꓔꓯ ꓟꓽ ꓙꓵꓽꓳ꓾ ꓐꓰ ꓣꓳ ꓢꓷˍ ꓡꓳ꓿ 10 ꓬꓲ ꓫꓵꓻˍ ꓟ ꓠꓬ ꓝꓴꓲ ꓐꓱ ꓶ ꓬꓲ ꓕꓲ ꓧꓪꓹˍ ꓡꓰꓽ ꓫꓵꓻˍ ꓟ ꓥ ꓢꓲ꓾ ꓬꓲ ꓢꓯꓸˍ ꓟ ꓠꓽ ꓪꓴ-ꓢ ꓔꓯ ꓟꓳꓸ ꓢꓯꓸ ꓔꓬ ꓟ ꓥ ꓡꓳ꓿ 11 ꓖꓳ ꓟ ꓡꓰ ꓐꓰ ꓠꓴ ꓪꓽ ꓚꓲꓸ ꓛꓬˍ ꓟꓲ ꓝꓴꓲ ꓔꓯ ꓟꓳꓸ ꓫꓵꓻ ꓞꓹ ꓢꓲ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓪꓴ-ꓢ ꓔꓯ ꓟꓳꓸ ꓢꓯꓸ ꓔꓬ ꓟ ꓥ ꓡꓳ꓾ ꓐꓰ ꓚꓬꓹ ꓠꓯꓹ ꓡꓳ꓿ 12 ꓖꓳ ꓡꓱ ꓠꓬꓲ ꓝꓴꓲ ꓦꓯꓸ ꓠꓲꓹ ꓙꓵꓽˍ ꓟ ꓔꓯ ꓛꓳ ꓟꓽ ꓛꓵ ꓠꓹ ꓟ꓾ ꓠꓴ ꓪꓽ ꓧꓪꓽ ꓖꓳ ꓓꓱ ꓔꓯ ꓝꓴꓲ ꓡꓰ ꓕꓽ ꓙꓵꓽ ꓝꓲ꓿ 13 ꓝꓮꓲ ꓠꓴ ꓪꓽ ꓖꓳ ꓓꓱ ꓗꓪ ꓟ ꓡꓯꓼ ꓗꓸ ꓮ ꓡꓲ ꓕꓲ ꓗꓸˍ ꓟꓲ ꓟꓽ ꓔꓱꓹ ꓟꓽ ꓜꓳꓽ ꓟ ꓗꓪ ꓣꓱꓽ ꓓꓴ ꓕꓽ ꓗꓷ ꓡꓰ ꓝꓲ꓿ ꓠꓴ ꓪꓽ ꓠꓬ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓗꓷ ꓢꓴ ꓥ ꓠꓬꓲ꓾ ꓠꓴ ꓪꓽ ꓚꓲꓸ ꓛꓬˍ ꓐꓰ ꓠꓴ ꓪꓽ ꓖꓳ ꓓꓱ ꓗꓪ ꓟ ꓡꓯꓼ ꓗꓸ ꓠꓬ꓾ ꓔꓱꓹ ꓜꓳꓽˍ ꓟ ꓔꓯ ꓣꓱꓽ ꓙ ꓠꓹ ꓟ ꓪꓴ-ꓢ ꓔꓯ ꓔꓲ ꓖꓶ꓿ 14 ꓖꓳ ꓡꓱ ꓬꓰˍ ꓠꓬ ꓝꓴꓲ ꓡꓰ ꓠꓴ ꓪꓽ ꓔꓯ ꓟꓽ ꓙꓵꓽ ꓡ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓙꓵꓽ ꓗꓸ ꓠꓯꓸ ꓘꓪ ꓟꓽ ꓔꓬ꓾ ꓣꓱꓽ ꓛꓰ ꓠꓯꓸ ꓘꓪ ꓔꓬ ꓡꓳ꓿ 15 ꓖꓳ ꓡꓱ ꓠꓬ ꓮ ꓡꓲ ꓥꓳ ꓪ? ꓣꓳ ꓠꓬ ꓙꓵꓽ ꓗꓸ ꓠꓯꓸ ꓘꓪ ꓟꓽ ꓔꓬ ꓔꓬ꓾ ꓣꓱꓽ ꓛꓰ ꓠꓯꓸ ꓘꓪ ꓔꓬ ꓠꓬꓲ ꓝꓴꓲ ꓬꓰ ꓠꓯꓹ ꓡ? ꓮ ꓡꓲ ꓥ ꓟꓲ ꓖꓳ ꓡꓱ ꓠꓽ ꓟꓽ ꓥ꓿ 16 ꓠꓴ ꓪꓽ ꓚꓲꓸ ꓛꓬ ꓠꓬ ꓮꓽ ꓟ ꓔꓯ ꓛꓳ ꓠ ꓡꓳꓹ ꓠꓹ ꓟ ꓡꓯꓼ ꓙꓱ ꓗꓷ ꓠꓬ꓾ ꓖꓳ ꓕꓲ ꓣꓳ ꓬꓲ ꓚꓳ ꓑꓸ ꓒꓬꓱꓼ ꓡ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓠꓴ ꓪꓽ ꓠꓬ ꓝꓴꓲ ꓚꓳ ꓑꓸ ꓬꓰˍ ꓕꓯ ꓠꓽ ꓫꓵꓻˍ ꓥꓳ꓿ ꓪꓴ-ꓢ ꓔꓯ ꓒꓵꓽ ꓛꓳˍ ꓟ ꓚꓳ ꓑꓸ ꓬꓰˍ ꓕꓯ ꓠꓽ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓥꓳ꓿ 17 ꓧꓶꓸ ꓕꓯ ꓠꓴ ꓪꓽ ꓠꓬ ꓝꓴꓲ ꓚꓳ ꓑꓸ ꓬꓰ ꓗꓷ ꓥ ꓟꓲ꓾ ꓮ ꓟꓶ ꓠꓽ ꓠꓴ ꓪꓽ ꓔꓯ ꓟꓸ ꓔ ꓟ ꓟꓸ ꓟꓲꓽ ꓔꓯ ꓕꓲ ꓠꓲꓹ ꓟˍ ꓡꓰꓽ ꓘꓳ ꓣꓴ ꓢꓲ ꓒꓵꓽ ꓛꓳˍ ꓠꓬꓲ꓾ ꓪꓴ-ꓢ ꓔꓯ ꓫ ꓟꓳ꓿ 18 ꓠꓴ ꓪꓽ ꓠꓬ ꓝꓴꓲ ꓗꓪ ꓐꓰ ꓩꓴ ꓗꓷ ꓟꓶ ꓢꓲ꓾ ꓔꓱꓹ ꓜꓳꓽˍ ꓟ ꓬꓲ ꓚꓳ ꓑꓸ ꓒꓬꓱꓼ ꓡꓺꓳ꓿ 19 ꓠꓴ ꓪꓽ ꓠꓬ ꓦꓻ ꓗꓪ ꓢꓯꓼ ꓐꓽˍ ꓢꓰꓽ ꓠꓬꓲ꓾ ꓥꓪ ꓠꓬ ꓞꓳ ꓚꓱꓹ ꓪꓽ ꓚꓱꓹ ꓔꓯ ꓛꓳ ꓢꓲ ꓫꓸ ꓕꓱˍ ꓡꓳ꓿ ꓧꓶꓸ ꓕꓯ ꓠꓴ ꓪꓽ ꓠꓬ ꓖꓳ ꓓꓱ ꓗꓪ ꓟ ꓡꓯꓼ ꓗꓸ ꓔꓯ꓾ ꓟꓽ ꓫꓬꓻ ꓟ ꓐꓰ ꓥꓶˍ ꓟ ꓚꓳ ꓑꓸ ꓬꓰ ꓠꓹ ꓟ ꓔꓲ ꓖꓶ ꓗꓷ ꓟ ꓡꓰ ꓐꓰ꓾ ꓮ ꓟꓶ ꓠꓬ ꓢꓲ ꓚꓰꓸ ꓔ ꓢꓴ ꓒꓬꓱꓼ ꓡ ꓠꓹ ꓟ꓾ ꓠꓴ ꓪꓽ ꓖꓳ ꓓꓱ ꓗꓪ ꓟ ꓡꓯ ꓗꓸ ꓠꓬ꓾ ꓔꓱꓹ ꓜꓳꓽˍ ꓟ ꓬꓲ ꓚꓳ ꓑꓸ ꓬꓰ ꓠꓹ ꓟ ꓔꓲ ꓖꓶ꓿ 20 ꓠꓴ ꓪꓽ ꓝꓴꓲ ꓚꓳ ꓑꓸ ꓬꓰ ꓔꓬ ꓕꓲ ꓝꓲꓸ ꓗꓪ ꓠꓬ ꓔꓱꓹ ꓜꓳꓽˍ ꓟ ꓚꓳ ꓑꓸ ꓟꓽ ꓥ꓿ 21 ꓖꓳ ꓡꓱ ꓠꓬꓲ ꓝꓴꓲ ꓚꓳ ꓑꓸ ꓬꓰˍ ꓟ ꓑꓶ ꓓꓴ ꓮ ꓟꓶ ꓫꓸ ꓔꓳ ꓓꓴ ꓕꓱ ꓟꓬ ꓫꓵꓽ ꓗꓪ ꓐꓰ ꓠꓴ ꓪꓽ ꓮꓸ ꓫꓵ ꓙꓲ ꓖꓴ ꓟꓶˍ ꓡ? ꓖꓳ ꓟꓬ ꓫꓵꓽ ꓟ ꓬꓲ ꓡꓳꓹ ꓬꓰ ꓓꓴ ꓠꓬ ꓫꓵꓻˍ ꓟ ꓥ ꓡꓳ꓿ 22 ꓖꓳ ꓡꓱ ꓥ ꓟꓲ ꓮ ꓟꓶ ꓠꓴ ꓪꓽ ꓠꓬ ꓝꓴꓲ ꓗꓪ ꓐꓰ ꓩꓴ ꓗꓷ ꓟꓶ ꓢꓲ ꓪꓴ-ꓢ ꓚꓳ ꓑꓸ ꓒꓬꓱꓼ ꓡ ꓟ ꓬꓲ ꓙꓲ ꓖꓴ ꓠꓬ꓾ ꓠꓴ ꓪꓽ ꓠꓽ ꓢꓲ ꓚꓰꓸ ꓔ ꓟ ꓒꓬꓱꓼ ꓡ ꓢꓲ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶˍ ꓟ ꓥ ꓡꓳ꓿ 23 ꓮ ꓡꓲꓳ ꓐꓯ ꓠꓬ ꓝꓴꓲ ꓪ ꓒꓵꓽ ꓠꓬ ꓫꓵꓻˍ ꓟ ꓥ ꓡꓳ꓿ ꓪꓴ-ꓢ ꓬꓲ ꓣꓱ ꓛꓰ ꓡꓯꓼ ꓫꓴ ꓠꓽ ꓙꓲ-ꓢꓴ ꓬꓰ-ꓢꓴ ꓣꓳ ꓢꓲ ꓒꓽ ꓠꓯS ꓗꓪ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓥ ꓡꓳ꓿

ꓣꓳ-ꓟ 7

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓙꓵꓽ ꓗ ꓢꓷꓸ ꓢꓴ ꓥ ꓠꓬꓲ ꓥꓪ ꓐꓯˍ ꓐꓰ ꓬꓰˍ ꓟ ꓔꓯ ꓙ ꓜꓲꓼˍ ꓥꓳ꓿ ꓙꓵꓽ ꓗ ꓠꓬ ꓡ ꓞꓳ ꓢꓯꓸ ꓔꓬ ꓕꓯꓽˍ ꓡꓰꓽ ꓬꓲ ꓔꓯ ꓙꓵꓽ ꓬꓯꓼˍ ꓟ ꓠꓴ ꓪꓽ ꓢꓷꓸˍ ꓡꓳ꓿ 2 ꓔꓯ ꓥꓳꓽ ꓐꓯ ꓠꓬ꓾ ꓝꓱꓺ ꓗꓷ ꓟ ꓤ ꓟꓶꓻ ꓠꓬ ꓬꓲ ꓤ ꓖꓴ ꓢꓯꓸ ꓔꓬ ꓕ ꓑꓳꓸ ꓙꓵꓽ ꓗ ꓡꓰ ꓬꓲ ꓤ ꓖꓴˍ ꓐꓰ ꓞꓳꓹ ꓔ ꓟ ꓥꓳ꓿ ꓖꓳ ꓡꓱ ꓥ ꓟꓲ ꓬꓲ ꓤ ꓖꓴ ꓫꓵꓻ ꓕꓯ ꓠꓽ꓾ ꓤ ꓖꓴˍ ꓐꓰ ꓝꓱ ꓗꓷ ꓟ ꓙꓵꓽ ꓗ ꓡꓰ ꓬꓲ ꓔꓯ ꓙꓵꓽ ꓟꓽ ꓬꓯꓼꓳ꓿ 3 ꓤ ꓖꓴ ꓢꓯꓸ ꓔꓬ ꓢꓰꓽ ꓕꓯ ꓠꓱꓸ ꓐꓯꓼ ꓕꓲ ꓣꓳ ꓔꓯ ꓧꓪ ꓙꓰˍ ꓕꓯ ꓠꓽ꓾ ꓬꓲ ꓔꓯ ꓦꓬꓽ ꓛꓳꓽ ꓧꓪ ꓟꓺ꓾ ꓐꓰ ꓘꓴˍ ꓥꓳ꓿ ꓖꓳ ꓡꓱ ꓥ ꓟꓲ ꓬꓲ ꓤ ꓖꓴ ꓫꓵꓻ ꓗꓷ ꓕꓯ ꓠ꓾ ꓬꓲ ꓠꓬ ꓙꓵꓽ ꓗ ꓖꓳ ꓟ ꓗꓪ ꓐꓰ ꓩꓴ ꓗꓷ ꓟꓶ ꓟ ꓥ ꓠꓬꓲ꓾ ꓠꓱꓸ ꓐꓯꓼ ꓕꓲ ꓣꓳ ꓧꓪ ꓙꓰˍ ꓟꓲ ꓬꓲ ꓠꓬ ꓦꓬꓽ ꓛꓳꓽ ꓧꓪ ꓟꓺ ꓟꓽ ꓥ꓿ 4 ꓖꓳ ꓡꓱ ꓠꓬꓲ ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓠꓴ ꓪꓽ ꓥ ꓟꓲ ꓙꓲ-ꓢꓴ ꓬꓲ ꓖꓳ ꓓꓱ ꓗꓪ ꓐꓰ ꓙꓵꓽ ꓗ ꓔꓯ ꓟꓳꓸ ꓫꓵꓻ ꓗꓷ ꓟ ꓠꓬ꓾ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓴ ꓖꓳ ꓕꓲ ꓣꓳ ꓔꓯ ꓝꓱꓺ ꓡꓰ ꓢꓲ꓾ ꓪꓴ-ꓢ ꓐꓱ ꓶ ꓬꓲ ꓢꓶꓽ ꓓꓱꓼ ꓠꓹ ꓟ ꓥ ꓡꓳ꓿ 5 ꓣꓳ ꓠꓬ ꓧꓪꓽ ꓗꓪ ꓟ ꓡ ꓞꓳ ꓥ ꓢꓰꓽ ꓕꓯ꓾ ꓙꓵꓽ ꓗ ꓑꓶꓸ ꓓꓴ ꓝꓴꓲ ꓦꓯꓸ ꓠꓲꓹ ꓙꓵꓽˍ ꓟ ꓠꓬ꓾ ꓫꓵꓻˍ ꓟ ꓬꓲ ꓢꓶꓽ ꓓꓱꓼ ꓝꓲ ꓠꓹ ꓟ ꓣꓳ ꓖꓳ ꓓꓱ ꓗꓪ ꓢꓯꓼ ꓕꓵꓼˍ ꓡꓳ꓿ 6 ꓖꓳ ꓡꓱ ꓥ ꓟꓲ ꓣꓳ ꓠꓬ꓾ ꓕꓳ ꓶ ꓗꓪ ꓐꓳ ꓔ ꓟ ꓚꓱꓹ ꓡꓵ ꓗꓪ ꓐꓰ ꓟꓽ ꓥ ꓥ꓾ ꓢꓲ-ꓫꓬ-ꓟ-ꓦ ꓗꓪ ꓟ ꓚꓱꓹ ꓫꓵꓼ ꓗꓪ ꓣꓱꓽ ꓙ ꓠꓹ ꓟ꓾ ꓣꓳ ꓔꓯ ꓞꓳꓹ ꓞ ꓟ ꓙꓵꓽ ꓗ ꓔꓯ ꓟꓳꓸ ꓫꓵꓻ ꓗꓷ ꓠꓬꓲ꓾ ꓙꓵꓽ ꓗ ꓖꓳ ꓟ ꓗꓪ ꓐꓰ ꓮ ꓟꓶ ꓣꓳ ꓔꓯ ꓩꓴ ꓗꓷꓳ꓿ 7 ꓖꓳ ꓡꓱ ꓠꓬ ꓣꓳ ꓮ ꓡꓲ ꓐꓯ ꓠꓯꓹ ꓡ? ꓙꓵꓽ ꓗ ꓠꓬ ꓝꓴꓲ ꓥ ꓡ? ꓟꓽ ꓥ꓿ ꓙꓵꓽ ꓗ ꓗꓪ ꓐꓰ ꓟꓽ ꓥ ꓠꓬ ꓝꓴꓲ ꓔꓯ ꓥꓪ ꓟꓽ ꓢꓷꓸ ꓡꓳ ꓫꓵꓽ ꓥꓳ꓿ ꓙꓵꓽ ꓗ ꓡꓰ꓾ ꓠꓴ ꓠꓬ ꓠꓲꓹ ꓦꓯꓸ ꓟꓽ ꓓ꓾ ꓟꓽ ꓐꓯ ꓖꓶ ꓡ ꓐꓷˍ ꓠꓬ꓾ ꓠꓲꓹ ꓦꓯˍ ꓟ ꓮꓸ ꓫꓵꓽ ꓥ ꓟ ꓥꓪ ꓟꓽ ꓢꓷꓸ꓿ 8 ꓖꓳ ꓡꓱ ꓥ ꓟꓲ ꓝꓴꓲ ꓠꓬ ꓕꓵꓼ ꓪ ꓗꓪ ꓐꓰ ꓬꓲ ꓑꓶꓸ ꓧꓪ ꓟꓶ ꓢꓲ꓾ ꓥꓪ ꓠꓯꓸꓼ ꓗꓪ ꓠꓲꓹ ꓦꓯꓸˍ ꓟ ꓬꓲ ꓫꓵꓽ ꓬꓲ ꓙꓰꓽ ꓔꓴ ꓡ ꓝꓲˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓙꓵꓽ ꓗ ꓟꓽ ꓙꓳ ꓠꓬ ꓝꓴꓲ ꓠꓽ ꓫꓵꓻ ꓞꓹ ꓟ ꓥ ꓡꓳ꓿ 9 ꓧꓶꓸ ꓕꓯ ꓥꓪ ꓠꓬ ꓙꓵꓽ ꓗꓺˍ ꓐꓰ ꓗꓳꓹ ꓞ ꓢꓲ ꓢꓯꓸ ꓔꓬ ꓗꓷꓳ꓿ ꓖꓳ ꓡꓱ ꓥ ꓟꓲ ꓕꓵꓼ ꓪ ꓛꓲ ꓡ ꓠꓬ ꓝꓴꓲ ꓢꓯꓸ ꓡ ꓢꓲ ꓥꓪ ꓫꓵꓳ꓿ 10 ꓖꓳ ꓡꓱ ꓠꓬꓲ ꓢꓯꓸ ꓔꓬ ꓪ ꓠꓹ ꓟ ꓕꓵꓼ ꓪ ꓕꓱ ꓟ ꓡꓰ ꓫꓵꓻˍ ꓟ ꓔꓯꓹ ꓓꓵꓽ ꓡ ꓟ ꓥꓪ ꓡꓳꓸ ꓓꓳ ꓡ ꓡꓳ꓿ 11 ꓮ ꓡꓲꓳ ꓐꓯ ꓠꓬ ꓕꓵꓼ ꓪ ꓗꓪ ꓐꓰ ꓝꓴꓲ ꓠꓬ ꓬꓲ ꓑꓶꓸ ꓧꓪ ꓟꓶ ꓢꓲ꓾ ꓥꓪ ꓔꓯ ꓧꓳꓽ ꓪꓴꓸ ꓙꓰ ꓢꓲ ꓠꓬꓲ꓾ ꓙꓵꓽ ꓗ ꓗꓪ ꓐꓰ ꓥꓪ ꓔꓯ ꓢꓰꓼˍ ꓡꓳ꓿ 12 ꓖꓳ ꓡꓱ ꓠꓬꓲ꓾ ꓙꓵꓽ ꓗ ꓠꓬ ꓢꓲꓽ ꓫꓬˍ ꓟ ꓥ ꓡꓳ꓿ ꓕꓵꓼ ꓪˍ ꓟꓲ ꓢꓲꓽ ꓫꓬˍ ꓟ ꓐꓰ ꓔꓱꓹ ꓜꓳꓽˍ ꓟ ꓐꓰ ꓙꓲˍ ꓟ ꓥ ꓡꓳ꓿ 13 ꓖꓳ ꓡꓱ ꓥ ꓠꓬ ꓙꓲˍ ꓟ ꓖꓳ ꓟ ꓡꓰ ꓥꓪ ꓫꓵꓻ ꓓꓴ ꓒꓬꓱꓼ ꓡ ꓝꓲˍ ꓡ? ꓖꓳ ꓡꓱ ꓠꓽ ꓟꓽ ꓥ꓿ ꓥꓪ ꓔꓯ ꓫꓵꓻ ꓝꓲˍ ꓟ ꓠꓬ ꓝꓴꓲ ꓥ ꓡꓳ꓿ ꓝꓴꓲ ꓡꓰ ꓙꓲˍ ꓟ ꓕꓵꓼ ꓪ ꓔꓯ ꓣꓱꓽ ꓢꓲ ꓥꓪ ꓔꓯ ꓫꓵꓻ ꓝꓲˍ ꓠꓬꓲ꓾ ꓝꓴꓲ ꓠꓽ ꓚꓵ ꓚꓵ ꓥꓶꓻ ꓓꓰꓺˍ ꓟ ꓥ ꓟ ꓡꓳꓸ ꓓꓳ ꓡꓺꓳ꓿ 14 ꓮ ꓡꓲꓳ ꓐꓯ ꓠꓬ ꓙꓵꓽ ꓗ ꓠꓬ ꓦꓻ ꓗꓪ ꓟ ꓥ ꓟ ꓣꓳ ꓢꓷˍ ꓡꓳ꓿ ꓥꓪ ꓠꓽ ꓧꓪꓽ ꓗꓪ ꓟ ꓥ ꓢꓲ꓾ ꓝꓴꓲ ꓚꓳ ꓑꓸ ꓬꓰ ꓠꓹ ꓟ ꓪꓴꓽ ꓗꓷ ꓟ ꓥ ꓡꓳ꓿ 15 ꓥꓪ ꓬꓰˍ ꓟ ꓔꓯ ꓥꓪ ꓟꓽ ꓙ ꓜꓲꓼ꓿ ꓮ ꓡꓲꓳ ꓐꓯ ꓠꓬ ꓥꓪ ꓬꓰ ꓠꓲꓹ ꓫꓵˍ ꓟ ꓖꓳ ꓟ ꓥꓪ ꓟꓽ ꓬꓰ ꓬꓰ꓾ ꓥꓪ ꓠꓲꓹ ꓜꓳˍ ꓟ ꓖꓳ ꓟ ꓔꓯ ꓥꓪ ꓬꓰˍ ꓡꓳ꓿ 16 ꓖꓳ ꓡꓱ ꓥ ꓟꓲ ꓥꓪ ꓬꓰ ꓠꓲꓹ ꓟꓽ ꓫꓵ ꓟ ꓥꓪ ꓬꓰˍ ꓕꓯ ꓠ꓾ ꓙꓵꓽ ꓗ ꓠꓬ ꓙꓲꓻˍ ꓟ ꓥ ꓟ ꓔꓯ ꓥꓪ ꓣꓷꓠˍ ꓟ ꓥ ꓡꓳ꓿ 17 ꓖꓳ ꓡꓱ ꓠꓬꓲ ꓥꓪ ꓡꓰ ꓬꓰˍ ꓟ ꓟꓽ ꓥ꓾ ꓥꓪ ꓠꓯꓸꓼ ꓗꓪ ꓓꓯꓹ ꓟ ꓝꓴꓲ ꓡꓰ ꓬꓰˍ ꓟ ꓥ ꓡꓳ꓿ 18 ꓥꓪ ꓧꓪꓽ ꓖꓳ ꓓꓱ ꓠꓯꓸꓼ ꓗꓪ ꓙꓲˍ ꓟ ꓕꓲ ꓫꓵˍ ꓟꓲ ꓟꓽ ꓓꓯꓹ ꓟ ꓥꓪ ꓢꓷꓸ ꓡꓰꓳ꓿ ꓮ ꓡꓲꓳ ꓐꓯ ꓠꓬ ꓙꓲꓻˍ ꓟ ꓬꓰ ꓠꓲꓹ ꓫꓵˍ ꓟ ꓠꓲꓹ ꓟ ꓥꓪ ꓔꓯ ꓓꓯꓹˍ ꓟꓲ꓾ ꓬꓰ ꓐ ꓡ ꓟ ꓢꓯꓼ ꓥꓪ ꓔꓯꓸ ꓟꓽ ꓓꓯꓹ꓿ 19 ꓥꓪ ꓬꓰ ꓠꓲꓹ ꓫꓵˍ ꓟ ꓙꓲˍ ꓟ ꓟꓽ ꓬꓰ ꓬꓰ꓾ ꓥꓪ ꓬꓰ ꓠꓲꓹ ꓟꓽ ꓫꓵ ꓟ ꓥꓶˍ ꓟ ꓥꓪ ꓬꓰˍ ꓡꓳ꓿ 20 ꓖꓳ ꓡꓱ ꓠꓬꓲ ꓥꓪ ꓬꓰ ꓠꓲꓹ ꓟꓽ ꓫꓵ ꓟ ꓔꓯ ꓥꓪ ꓬꓰˍ ꓕꓯ ꓠꓽ ꓥꓪ ꓡꓰ ꓬꓰˍ ꓟ ꓟꓽ ꓥ꓿ ꓥꓪ ꓠꓯꓸꓼ ꓗꓪ ꓓꓯꓹ ꓟ ꓝꓴꓲ ꓡꓰ ꓬꓰˍ ꓟ ꓥ ꓡꓳ꓿ 21 ꓖꓳ ꓡꓱ ꓠꓬꓲ ꓙꓲˍ ꓟ ꓥꓪ ꓬꓰ ꓠꓲ ꓫꓵˍ ꓟꓲ꓾ ꓥꓪ ꓬꓰ ꓠꓲꓹ ꓟꓽ ꓫꓵ ꓟ ꓟꓽ ꓙꓲ ꓟ ꓬꓰ ꓓꓳ ꓡ ꓟ ꓙꓵꓽ ꓗ ꓕꓲ ꓫꓵꓽ ꓥꓪ ꓠꓯꓸꓼ ꓗꓪ ꓢꓯꓼ ꓕꓵ ꓔꓬ ꓟ ꓔꓯ ꓥꓪ ꓡꓳꓸ ꓓꓳ ꓡꓺꓳ꓿ 22 ꓮ ꓡꓲꓳ ꓐꓯ ꓠꓬ ꓥꓪ ꓚꓲꓸ ꓛꓬ ꓠꓯꓸꓼ ꓗꓪ ꓠꓽ ꓪꓴ-ꓢ ꓙꓵꓽ ꓗ ꓔꓯ ꓥꓪ ꓠꓲꓹ ꓒꓴˍ ꓟꓲ꓾ 23 ꓥꓪ ꓧꓪꓽ ꓖꓳ ꓓꓱ ꓡꓯꓼ ꓗꓸ ꓗꓪ ꓙꓵꓽ ꓗ ꓠꓱꓸ ꓐꓯꓼ ꓕꓲ ꓟ ꓠꓬ ꓥꓪ ꓙ ꓠꓲꓹ ꓗꓪ ꓟ ꓙꓵꓽ ꓗꓺˍ ꓐꓰ ꓟꓯꓼ ꓬꓰ ꓡꓯꓽ ꓘꓳ ꓢꓲ ꓠꓬꓲ꓾ ꓥꓪ ꓧꓪꓽ ꓖꓳ ꓓꓱ ꓡꓯꓽ ꓗꓸ ꓠꓯꓸꓼ ꓗꓪ ꓟ ꓝꓴꓲ ꓙꓵꓽ ꓗ ꓠꓯꓸ ꓘꓪ ꓥꓪ ꓔꓯ ꓐꓱꓺ ꓔ ꓢꓴ ꓒꓬꓱ ꓡ ꓝꓲ ꓟ ꓥꓪ ꓢꓷꓸ ꓡꓰꓳ꓿ 24 ꓫꓸ ꓙꓵˍ ꓟ ꓡ ꓞꓳ ꓥꓪ ꓕꓱ ꓟ ꓔꓯ ꓠꓽ꓾ ꓫꓵꓻ ꓖꓳ ꓓꓱ ꓕꓱ ꓟ ꓗꓪ ꓐꓰ ꓮꓽ ꓟ ꓡꓰ ꓥꓪ ꓔꓯ ꓚꓬꓴ ꓓꓳ ꓡ ꓢꓰꓽ꓿ 25 ꓬꓰ-ꓢꓴ ꓙꓲ-ꓢꓴ ꓣꓳ ꓢꓲ ꓒꓽ ꓗꓪ ꓐꓰ ꓡꓰꓹ ꓗꓷ ꓐ ꓡ ꓠꓬꓲ꓾ ꓪꓴ-ꓢ ꓔꓯ ꓫꓸ ꓟꓳ꓿ ꓥꓪ ꓚꓲꓸ ꓛꓬ ꓠꓽ ꓙꓽ ꓠꓲꓹ ꓡꓰ ꓪꓴ-ꓢ ꓙꓵꓽ ꓗ ꓔꓯ ꓣꓱ ꓙˍ ꓟꓲ꓾ ꓧꓪꓽ ꓠꓲꓹ ꓡꓶꓽ ꓠꓽ ꓝꓴꓲ ꓙꓵꓽ ꓗ ꓔꓯ ꓣꓱꓽ ꓙ ꓠꓲꓹ ꓫꓵˍ ꓡꓳ꓿

ꓣꓳ-ꓟ 8

1 ꓖꓳ ꓡꓱ ꓠꓬꓲ ꓮ ꓟꓶ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓔꓬ ꓢꓴ ꓔꓯ ꓠꓬ ꓝꓴꓲ ꓐꓯ ꓞꓷꓹ ꓓꓴ ꓟꓽ ꓙꓳ꓿ 2 ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓟ ꓦꓻ ꓢꓯꓼ ꓟꓬ ꓬꓲ ꓙꓵꓽ ꓗ ꓡꓰ꓾ ꓝꓴꓲˍ ꓐꓰ ꓫꓵꓻˍ ꓟ ꓙꓵꓽ ꓗ ꓗꓪ ꓐꓰ ꓣꓳ ꓔꓯ ꓩꓴꓺ ꓗꓷꓳ꓿ 3 ꓮ ꓡꓲꓳ ꓐꓯ ꓠꓬ ꓧꓪꓽ ꓖꓳ ꓓꓱ ꓢꓯꓼ ꓐꓽˍ ꓟ ꓗꓪ ꓐꓰ ꓙꓵꓽ ꓗ ꓡꓰ ꓬꓰ ꓐꓲ ꓡꓰ ꓝꓲ ꓟꓽ ꓐ ꓡ ꓟ ꓗꓪ꓾ ꓪꓴ-ꓢ ꓠꓬ ꓬꓲ ꓚꓲꓸ ꓛꓬ ꓮ ꓐꓲ ꓔꓯ ꓝꓴꓲ ꓑꓶꓸ ꓓꓴ ꓔꓲ ꓓꓴ ꓬꓰ ꓠꓹ ꓟ ꓝꓲ ꓩꓴ ꓡ ꓢꓲ꓾ ꓣꓳ ꓝꓴꓲ ꓙꓳˍ ꓟ ꓧꓪꓽ ꓖꓳ ꓓꓱˍ ꓡꓰ ꓐꓰ ꓗꓷ ꓡꓰ ꓝꓲ ꓢꓲ ꓠꓬꓲ꓾ ꓬꓲ ꓧꓪꓽ ꓖꓳ ꓓꓱ ꓗꓪ ꓝꓴꓲ ꓔꓯ ꓐꓯ ꓟꓴ ꓞꓷꓹ ꓗꓷꓳ꓿ 4 ꓕꓱ ꓟ ꓠꓬ ꓧꓪꓽ ꓠꓲꓹ ꓡꓶ ꓔꓯ ꓟꓽ ꓛꓳ ꓛꓳ꓾ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓞꓳ ꓙꓳ ꓢꓴ ꓣꓳ ꓠꓯꓸꓼ ꓗꓪ ꓔꓱꓹ ꓜꓳꓽˍ ꓟ ꓕꓵꓼ ꓪ ꓬꓰ ꓐꓲ ꓡ ꓝꓲ ꓠꓹ ꓟ ꓥ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓧꓪꓽ ꓠꓲꓹ ꓡꓶ ꓔꓯ ꓛꓳ ꓢꓴ ꓠꓬ ꓧꓪꓽ ꓗꓪ ꓟ ꓔꓯ ꓠꓲꓹ ꓥꓳꓺˍ ꓡꓳ꓿ ꓦꓻ ꓗꓪ ꓛꓳ ꓢꓴ ꓠꓽ ꓦꓻ ꓗꓪ ꓟ ꓔꓯ ꓠꓲꓹ ꓥꓳˍ ꓡꓳ꓿ 6 ꓧꓪꓽ ꓠꓲꓹ ꓡꓶ ꓔꓯ ꓠꓲꓹ ꓥꓳˍ ꓟ ꓠꓬ ꓫꓵꓻˍ ꓟ ꓥ ꓢꓲ꓾ ꓦꓻ ꓔꓯ ꓠꓲꓹ ꓥꓳˍ ꓟ ꓠꓽ ꓢꓯꓼ ꓟꓬˍ ꓐꓰ ꓢꓲ ꓡꓲ ꓟ ꓥ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓧꓪꓽ ꓠꓲꓹ ꓡꓶ ꓔꓯ ꓠꓲꓹ ꓥꓳꓺˍ ꓟ ꓠꓬ ꓪꓴ-ꓢ ꓔꓯ ꓛꓴꓽ ꓙꓳˍ ꓟ ꓥ ꓢꓲ꓾ ꓪꓴ-ꓢ ꓙꓵꓽ ꓗ ꓔꓯ ꓛꓳ ꓠꓲꓹ ꓟꓽ ꓫꓵ꓾ ꓛꓳˍ ꓟꓲ ꓛꓳ ꓟꓽ ꓐ ꓡ꓿ 8 ꓖꓳ ꓡꓱ ꓠꓬꓲ ꓧꓪꓽ ꓠꓲꓹ ꓡꓶꓽ ꓡꓰ ꓙꓵꓽ ꓔ ꓟ ꓡ ꓞꓳ ꓡꓰ ꓪꓴ-ꓢ ꓔꓯ ꓠꓲꓹ ꓒꓴ ꓡꓰ ꓝꓲ ꓟꓽ ꓐ ꓡ꓿ 9 ꓖꓳ ꓡꓱ ꓥ ꓟꓲ ꓪꓴ-ꓢ ꓦꓻ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓕꓯ ꓠꓽ꓾ ꓠꓴ ꓪꓽ ꓠꓬ ꓧꓪꓽ ꓗꓪ ꓟ ꓟꓽ ꓥ꓾ ꓦꓻ ꓗꓪ ꓟ ꓥ ꓡꓳ꓿ ꓮ ꓡꓲ ꓕꓲ ꓣꓳˍ ꓟꓲ ꓙꓲ-ꓢꓴ ꓦꓻ ꓟꓽ ꓙꓳ ꓕꓯ ꓠꓽ꓾ ꓬꓲ ꓠꓬ ꓙꓲ-ꓢꓴ ꓔꓯ ꓟ ꓟꓽ ꓥ꓿ 10 ꓠꓴ ꓪꓽ ꓠꓯꓸꓼ ꓗꓪ ꓙꓲ-ꓢꓴ ꓔꓬ ꓕꓯ ꓠꓽ꓾ ꓖꓳ ꓓꓱ ꓠꓬ ꓝꓴꓲ ꓗꓪ ꓐꓰ ꓫꓵꓻ ꓞꓹ ꓟꓲ꓾ ꓠꓴ ꓪꓽ ꓦꓻ ꓠꓽ ꓔꓱꓹ ꓜꓳꓽˍ ꓟ ꓗꓪ ꓐꓰ ꓢꓯꓸ ꓞꓹ ꓡꓳ꓿ 11 ꓬꓰ-ꓢꓴ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓢꓴ ꓬꓲ ꓦꓻ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓕꓯ ꓠꓽ꓾ ꓙꓲ-ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓴ ꓡꓰ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓟ ꓦꓻ ꓗꓪ ꓐꓰ ꓫꓵꓻ ꓗꓴˍ ꓟ ꓠꓴ ꓪꓽ ꓖꓳ ꓓꓱ ꓔꓯˍ ꓟꓲ ꓢꓯꓸ ꓡ ꓝꓲˍ ꓥꓳ꓿ 12 ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓧꓪꓽ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓢꓯꓸ ꓔꓬ ꓠꓹ ꓟ ꓶꓻ ꓡꓯꓼ ꓐꓵ ꓞꓹ ꓢꓴ ꓟꓽ ꓥ꓿ 13 ꓮ ꓡꓲꓳ ꓐꓯ ꓠꓬ ꓧꓪꓽ ꓠꓲꓹ ꓡꓶ ꓔꓯ ꓛꓳ ꓢꓲ ꓞꓳ ꓙꓳ ꓔꓬ ꓠꓬ꓾ ꓠꓴ ꓪꓽ ꓠꓽ ꓫꓵꓻ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ-ꓫꓬ-ꓟ-ꓦ ꓗꓪ ꓐꓰ ꓧꓪꓽ ꓠꓲꓹ ꓡꓶ ꓡꓰ ꓬꓰ ꓓꓳ ꓡ ꓝꓲˍ ꓟ ꓟꓽ ꓙꓲ ꓟꓽ ꓜꓳꓽ ꓟ ꓔꓯ ꓫꓵꓻ ꓝꓲˍ ꓕꓯ ꓠꓽ ꓠꓴ ꓪꓽ ꓠꓬ ꓢꓯꓸ ꓔꓬ ꓪˍ ꓥꓳ꓿ 14 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓦ ꓡꓰ ꓧꓳꓽ ꓙꓰ ꓔꓬ ꓢꓴ ꓥ ꓕ ꓑꓳꓸ ꓠꓬ ꓪꓴ-ꓢ ꓤ ꓐꓴ ꓥ ꓡꓳ꓿ 15 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓟꓶˍ ꓟ ꓦ ꓠꓬ꓾ ꓠꓴ ꓪꓽ ꓔꓯ ꓝꓮꓲ ꓕꓲ ꓧꓪ ꓙꓳꓺˍ ꓟ ꓚꓳ ꓑꓸ ꓬꓰ ꓝꓲ ꓢꓴ ꓟꓽ ꓥ꓿ ꓠꓴ ꓪꓽ ꓔꓯ ꓠꓽ ꓪꓴ-ꓢ ꓤꓽ ꓒꓬꓱꓼ ꓡ ꓝꓲ ꓢꓲ꓾ ꓬꓲ ꓔꓯ ꓮꓽ ꓐꓽ꓾ ꓐꓹ ꓐ꓾ ꓐꓰ ꓘꓴ ꓐ ꓡ ꓝꓲˍ ꓟ ꓦꓻ ꓥ ꓡꓳ꓿ 16 ꓣꓳ ꓠꓬ ꓪꓴ-ꓢ ꓤ ꓠꓱ ꓥꓳ꓾ ꓐꓰ ꓢꓲ-ꓫꓬ-ꓟ-ꓦ ꓠꓬ ꓣꓳ ꓦˍ ꓐꓰ ꓕꓲ ꓛꓳꓺꓼ ꓢꓷ ꓙ ꓟꓳ ꓙˍ ꓡꓳ꓿ 17 ꓣꓳ ꓠꓬ ꓬꓲ ꓤ ꓠꓱ ꓥ ꓕꓯ ꓠꓽ ꓡꓯꓼ ꓪ ꓟꓶ ꓢꓴˍ ꓟꓲ ꓥꓳ꓿ ꓬꓲꓸˍ ꓐꓰ ꓕꓲ ꓪꓺꓼ ꓣꓳ ꓟꓬꓱ ꓓꓳꓽ ꓟꓶ ꓠꓹ ꓟ꓾ ꓣꓳ ꓬꓲ ꓫꓸ ꓙꓵˍ ꓟ ꓔꓯ ꓑꓯꓹ ꓟꓶ ꓗꓷ ꓕꓯ ꓠꓽ ꓪꓴ-ꓢ ꓡꓯꓼ ꓪ ꓟꓶ ꓢꓴ ꓥ ꓢꓲ꓾ ꓙꓲ-ꓢꓴˍ ꓐꓰ ꓡꓯꓼ ꓪ ꓑꓯꓹ ꓟꓶ ꓢꓴ ꓐꓴ ꓥꓳ꓿ 18 ꓮ ꓡꓲꓳ ꓐꓯ ꓠꓬ ꓮ ꓟꓶ ꓕꓱ ꓕꓲ ꓝꓲꓸ ꓫꓸ ꓙꓵˍ ꓟ ꓠꓽ꓾ ꓢ ꓖꓪ ꓣꓳ ꓔꓯ ꓟꓳꓸ ꓖꓶ ꓡ ꓠꓹ ꓟ ꓐꓬꓱꓼ ꓡꓱꓼ ꓡꓱ ꓟ ꓟꓬꓱ ꓓꓳꓽ ꓔꓯ ꓔꓯꓺ ꓟꓽ ꓟꓵ꓾ ꓐꓰ ꓥꓪ ꓓꓵꓽ ꓙꓽˍ ꓡꓳ꓿ 19 ꓚꓰꓼ ꓔ ꓟ ꓥ ꓕ ꓑꓳꓸ ꓠꓬ ꓪꓴ-ꓢ ꓤꓽ ꓐꓴ ꓟꓳꓸ ꓖꓶ ꓡ ꓟ ꓔꓯ ꓮꓽ ꓘꓶꓸ ꓢꓲꓼ ꓙꓬ ꓢꓲ ꓡꓳꓺ ꓠꓬꓹ ꓔꓬ ꓡꓳ꓿ 20 ꓮ ꓡꓲꓳ ꓐꓯ ꓠꓬ ꓚꓰꓼ ꓔ ꓟ ꓥ ꓕ ꓑꓳꓸ ꓠꓽ꓾ ꓟꓬꓱ ꓓꓳꓽ ꓖꓳꓽ ꓡꓰ ꓙꓵꓽˍ ꓟ ꓠꓯꓸ ꓘꓪ ꓓꓵꓽ ꓡꓰ ꓝꓲˍ ꓟ ꓠꓬ꓾ ꓚꓰꓼ ꓔ ꓡꓳ ꓫꓵꓽ ꓠꓲꓹ ꓡꓶ ꓗꓪ ꓐꓰ ꓟꓽ ꓥ ꓥ꓾ ꓪꓴ-ꓢ ꓠꓲꓹ ꓡꓶ ꓗꓪ ꓐꓰ ꓥ ꓢꓲ꓾ 21 ꓚꓰꓼ ꓔ ꓟ ꓥ ꓕ ꓑꓳꓸˍ ꓟꓲ ꓐꓬ ꓡꓰ ꓛꓵꓽ ꓡꓰˍ ꓟ ꓬꓲ ꓚꓳ ꓑꓸ ꓬꓰ ꓔꓬ ꓟ ꓗꓪ ꓐꓰ ꓩꓴ ꓗꓷ ꓟꓶ ꓢꓲ꓾ ꓪꓴ-ꓢ ꓤ ꓐꓴ ꓐꓬꓱꓼ ꓡꓱꓼ ꓡꓱ ꓟ ꓚꓳ ꓪꓴꓸ ꓙꓵꓽ ꓪ ꓑꓯꓹ ꓟꓶ ꓠꓹ ꓟ ꓥꓳ ꓡꓳꓸ ꓔꓬ ꓡꓳ꓿ 22 ꓮ ꓡꓲꓳ ꓐꓯ ꓠꓬ ꓚꓰꓼ ꓔ ꓟ ꓥ ꓕ ꓑꓳꓸ ꓠꓬ ꓮ ꓟꓶ ꓗꓪ ꓛꓲ ꓕꓲ ꓡꓰꓹꓼ ꓦꓵꓻ ꓠꓻ ꓜꓲꓽ ꓢꓲ ꓠꓻ ꓪꓴꓽ ꓔꓬ ꓟ ꓣꓳ ꓢꓷˍ ꓡꓳ꓿ 23 ꓝꓮꓲ ꓢꓲ-ꓫꓬ-ꓟ-ꓦ ꓡꓯꓼ ꓫꓴ ꓬꓲ ꓪꓴꓸ ꓟꓶ ꓗꓷ ꓢꓴ ꓣꓳˍ ꓟꓲ ꓚꓲꓸ ꓛꓬ ꓠꓲꓹ ꓟ ꓗꓪ ꓠꓻ ꓪꓴꓽ ꓢꓲ꓾ ꓤ ꓙꓵꓽ ꓪ ꓟꓶˍ ꓟ ꓐꓱ ꓶ ꓐꓰ꓾ ꓣꓳ ꓖꓳ ꓓꓱ ꓫꓴꓹ ꓣꓴ ꓟꓶˍ ꓟ ꓔꓯ ꓡꓳꓺ ꓠꓬꓹ ꓔꓬ ꓡꓳ꓿ 24 ꓮ ꓡꓲꓳ ꓐꓯ ꓠꓬ ꓥꓳ ꓡꓳꓸ ꓓꓴ ꓕꓱ ꓟ ꓠꓯꓸꓼ ꓗꓪ ꓣꓳ ꓚꓬꓴ ꓟꓶ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓟꓬ ꓢꓶꓽ ꓡꓰ ꓟꓳꓻ ꓓꓻˍ ꓟ ꓠꓬ ꓥꓳ ꓡꓳꓸ ꓓꓴ ꓚꓵ ꓟꓽ ꓥ꓿ ꓙꓳꓻ ꓞꓹ ꓟ ꓔꓯ ꓠꓬ ꓥꓳ ꓡꓳꓸ ꓔꓬ ꓢꓰꓽ ꓢꓴ ꓟꓽ ꓙꓳ꓿ 25 ꓖꓳ ꓡꓱ ꓥ ꓟꓲ ꓟꓽ ꓙꓳ ꓢꓰꓽ ꓟ ꓔꓯ ꓥꓳ ꓡꓳꓸˍ ꓕꓯ ꓠꓽ꓾ ꓣꓳ ꓜꓲꓽ ꓢꓲ ꓠꓲꓹ ꓡꓱꓻ ꓡꓱˍ ꓡꓰꓽ ꓡꓳꓺ ꓠꓬꓹ ꓓꓴ ꓥꓳ꓿ 26 ꓖꓳ ꓟ ꓡꓰ ꓐꓰ ꓣꓳ ꓢꓯꓼ ꓐꓽˍ ꓟ ꓗꓪˍ ꓟꓲ ꓢꓲ-ꓫꓬ-ꓟ-ꓦ ꓬꓰ ꓙˍ ꓡꓳ꓿ ꓮ ꓡꓲ ꓐꓰ ꓪꓽ ꓘꓴ ꓠꓯꓹ ꓟ ꓣꓳ ꓟꓽ ꓢꓷꓸˍ ꓟꓲ꓾ ꓢꓲ-ꓫꓬ-ꓟ-ꓦ ꓠꓽ ꓐꓯ ꓓꓳ ꓡ ꓟꓽ ꓓ ꓡꓳ ꓫꓵꓽ ꓠꓻ ꓪꓴꓽˍ ꓟ ꓡꓰ ꓣꓳ ꓐꓱ ꓶ ꓶꓼ ꓓꓰꓽ ꓙˍ ꓡꓳ꓿ 27 ꓣꓳ ꓠꓲꓹ ꓟ ꓔꓯ ꓟꓰꓹ ꓠꓬꓲ ꓢꓴ ꓪꓴ-ꓢ ꓠꓬ꓾ ꓢꓲ-ꓫꓬ-ꓟ-ꓦ ꓠꓲꓹ ꓟ ꓔꓯ ꓢꓷꓸˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓲ꓾ ꓦ ꓡꓱ ꓢꓴ ꓐꓴ ꓐꓱ ꓶ ꓓꓰꓽ ꓙˍ ꓡꓳ꓿ 28 ꓝꓮꓲ ꓠꓬ ꓪꓴ-ꓢ ꓔꓯ ꓠꓲꓹ ꓠꓵ ꓢꓴ ꓐꓴˍ ꓐꓰ ꓬꓲ ꓠꓲꓹ ꓡꓶ ꓔꓯ ꓛꓳ ꓢꓲ ꓘꓴꓻ ꓔ ꓢꓴ ꓐꓴ ꓐꓱ ꓶ ꓠꓬ꓾ ꓪꓴ-ꓢ ꓡꓰ ꓮꓸ ꓫꓵꓽ ꓗꓪˍ ꓟꓲ ꓙꓲˍ ꓟ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵ ꓡꓯꓽ ꓘꓳ ꓝꓲˍ ꓟ ꓣꓳ ꓢꓷˍ ꓡꓳ꓿ 29 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓬꓲ ꓠꓽ ꓮ ꓐꓲ ꓔꓯ ꓬꓲ ꓬꓲꓼ ꓬꓲ ꓠꓬꓲ ꓐꓴ ꓗꓳ ꓡꓳ ꓗꓪ ꓤ ꓪꓴꓽ ꓬꓰ ꓝꓲ ꓠꓹ ꓟ ꓐꓰ꓾ ꓬꓲ ꓡꓰ ꓢꓲ ꓔ ꓢꓴ ꓐꓴ ꓔꓯ ꓬꓲ ꓤ ꓒꓬꓱꓽ ꓶꓻ ꓡꓰ ꓝꓲ ꓠꓹ ꓟ ꓢꓲ ꓚꓰꓸ ꓗꓷꓳ꓿ 30 ꓧꓶꓸ ꓕꓯˍ ꓡꓰ ꓬꓲ ꓢꓲ ꓚꓰꓸ ꓔ ꓟ ꓡ ꓞꓳ ꓔꓯ ꓬꓲ ꓘꓴꓻ ꓢꓲ꓾ ꓬꓲ ꓡꓰ ꓘꓴꓻ ꓔ ꓟ ꓡ ꓞꓳ ꓔꓯ ꓔꓱꓹ ꓜꓳꓽ ꓟ ꓚꓬꓹ ꓟꓶ ꓡꓰ ꓝꓲ ꓢꓲ ꓠꓬꓲ꓾ ꓔꓱꓹ ꓜꓳꓽ ꓟ ꓚꓬꓹ ꓖꓶ ꓗꓷ ꓢꓴ ꓐꓴ ꓔꓯ ꓬꓲ ꓡꓰ ꓟꓬꓱ ꓓꓳꓽ ꓟꓶ ꓡꓰ ꓝꓲˍ ꓡꓳ꓿ 31 ꓖꓳ ꓡꓱ ꓥ ꓠꓬ ꓣꓳ ꓮꓸ ꓫꓵ ꓐꓯ ꓠꓯꓹ ꓡ? ꓪꓴ-ꓢ ꓣꓳ ꓔꓯ ꓙ ꓢꓴ ꓥ ꓕꓯ ꓠꓽ꓾ ꓣꓳ ꓔꓯ ꓔꓳꓹ ꓢꓴ ꓮ ꓟ ꓥ ꓡ? 32 ꓬꓲ ꓚꓲꓸ ꓛꓬ ꓮ ꓐꓲ ꓔꓯ ꓟꓽ ꓗꓹ ꓐꓽ ꓐ ꓣꓳ ꓮꓽ ꓙꓵ ꓢꓴ ꓐꓱ ꓶ ꓖꓶ ꓗꓷ ꓢꓴ ꓬꓲ ꓠꓬ꓾ ꓮꓸ ꓫꓵ ꓥ ꓟꓲ ꓬꓲꓸˍ ꓐꓰ ꓕꓲ ꓛꓳꓺꓼ ꓣꓳ ꓔꓯ ꓠꓲꓹ ꓡꓳꓻ ꓡꓳˍ ꓡꓰ ꓟꓽ ꓖꓶ ꓡ꓾ ꓐꓰ꓾ ꓮ ꓡꓲ ꓗꓷ ꓡꓰ ꓓ ꓢꓰ? 33 ꓪꓴ-ꓢ ꓡꓰ ꓢꓲ ꓔ ꓢꓴ ꓔꓯ ꓮꓽ ꓟ ꓡꓰ ꓓꓰꓺˍ ꓥꓳ ꓪ? ꓔꓱꓹ ꓜꓳꓽ ꓟ ꓚꓬꓹ ꓖꓶ ꓡ ꓢꓴ ꓠꓬ ꓪꓴ-ꓢˍ ꓡꓰꓽ ꓥꓳ꓿ 34 ꓖꓳ ꓡꓱ ꓠꓬ ꓣꓳ ꓔꓯ ꓮꓽ ꓟ ꓡꓰ ꓝꓴꓲ ꓐꓯ ꓞꓷꓹˍ ꓥꓳ ꓪ? ꓣꓳ ꓐꓱ ꓶ ꓫꓵꓻ ꓙ ꓗꓷ ꓢꓴ ꓠꓬ ꓬꓰ-ꓢꓴ ꓙꓲ-ꓢꓴ ꓥ ꓢꓲ꓾ ꓪꓴ-ꓢ ꓡꓰ ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓪꓴ-ꓢ ꓡꓯꓼ ꓙ ꓗꓪ ꓔꓬ ꓢꓲ ꓣꓳ ꓐꓱ ꓶ ꓶꓼ ꓓꓰꓽ ꓙ ꓔꓬ ꓡꓳ꓿ 35 ꓣꓳ ꓔꓯ ꓙꓲ-ꓢꓴ ꓠꓵꓻ ꓠꓲꓹˍ ꓐꓰ ꓗꓳꓹ ꓞ ꓝꓲ ꓐ ꓡ ꓢꓴ ꓮꓽ ꓟ ꓥ ꓡ? ꓫꓸ ꓙꓵˍ ꓟ꓾ ꓠꓲꓹ ꓫꓸ ꓟꓬ ꓫꓸ ꓟ꓾ ꓗꓸ ꓧꓪˍ ꓟ꓾ ꓟꓷꓼ ꓢꓲꓼˍ ꓟ꓾ ꓖꓳ ꓓꓱ ꓙꓬꓽ ꓡꓯꓽ ꓟ꓾ ꓙꓲꓻ ꓣꓴꓽˍ ꓟ꓾ ꓥ ꓠꓬ ꓮꓸ ꓕꓽ ꓪꓴꓸ ꓒꓲꓹ ꓡꓰ ꓢꓰꓼ ꓡ ꓟ ꓥ ꓡ? 36 ꓕꓱ ꓟ ꓠꓬ ꓕꓳ ꓶ ꓗꓪ꓾ ꓠꓴ ꓐꓱ ꓶ ꓥꓪ ꓠꓴꓽ ꓠꓬ ꓮ ꓕꓯˍ ꓟꓲ ꓢꓴ ꓡꓰ ꓢꓰꓼ ꓡ ꓟ ꓔꓳꓹ ꓜꓳꓽˍ ꓡꓳ꓿ ꓥꓪ ꓠꓴ ꓔꓯ ꓠꓬ ꓢꓰꓼ ꓗꓷ ꓠꓹ ꓟ ꓮ ꓣꓳˍ ꓡꓰ ꓐꓰ ꓚꓬꓹ ꓔ ꓡꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 37 ꓖꓳ ꓡꓱ ꓥ ꓟꓲ ꓣꓳ ꓔꓯ ꓠꓲꓹ ꓠꓵ ꓢꓴ ꓗꓪ ꓐꓰ꓾ ꓣꓳ ꓠꓬ ꓕꓱ ꓟꓬ ꓫꓵꓽ ꓮꓽ ꓙꓵ ꓟ ꓗꓪ ꓧꓪꓸˍ ꓟ ꓕꓯꓽ ꓢꓲ ꓧꓪꓸ ꓡꓰ ꓢꓴ ꓥ ꓡꓳ꓿ 38 ꓮ ꓡꓲꓳ ꓐꓯ ꓠꓬ ꓫꓵꓻˍ ꓟ ꓥ ꓟꓲ꓾ ꓢꓯꓸˍ ꓟ ꓥ ꓟꓲ꓾ ꓟꓴꓽ ꓗꓪ ꓝꓲ ꓓꓴ ꓥ ꓟꓲ꓾ ꓠꓲꓽ ꓤ ꓢꓲ ꓤ ꓥ ꓟꓲ ꓮ ꓟꓶ ꓟ ꓥ ꓟꓲ꓾ ꓢ ꓖꓪ ꓟ ꓥ ꓟꓲ꓾ ꓪꓽ ꓠꓬꓲ ꓢꓴ ꓥ ꓟꓲ꓾ 39 ꓟꓴꓺˍ ꓟ ꓥ ꓟꓲ꓾ ꓠꓯꓸˍ ꓟ ꓥ ꓟꓲ꓾ ꓚꓰꓼ ꓔ ꓟ ꓠꓱꓸ ꓐꓯꓼ ꓮ ꓡꓲ ꓕꓲ ꓫꓵ ꓥ ꓟꓲ꓾ ꓙꓲ-ꓢꓴ ꓬꓰ-ꓢꓴ ꓣꓳ ꓢꓲ ꓒꓽ ꓠꓯꓸꓼ ꓗꓪ ꓓꓯꓹ ꓟ ꓪꓴ-ꓢ ꓠꓵ ꓠꓲꓹ ꓔꓯˍ ꓐꓰ ꓣꓳ ꓔꓯ ꓗꓳꓹ ꓞꓹ ꓝꓲ ꓟꓽ ꓐ ꓡ꓾ ꓐꓰ ꓥꓪ ꓚꓵ ꓚꓵ ꓢꓷꓸ ꓡꓰꓳ꓿

ꓣꓳ-ꓟ 9

1 - 2 ꓥꓪ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓔꓱꓹˍ ꓟ ꓫꓸ ꓕꓱˍ ꓥꓳ꓾ ꓥꓪ ꓟꓽ ꓗꓶꓸ꓿ ꓥꓪ ꓠꓲꓹ ꓟ ꓮꓽ ꓘꓶꓸ ꓫꓸ ꓢꓲ꓾ ꓥꓪ ꓠꓲꓹ ꓟ ꓠꓬ ꓮ ꓕꓯˍ ꓟꓲ ꓠꓻ ꓔꓬ ꓡꓳ꓾ ꓐꓰ ꓐꓯˍ ꓟ ꓠꓬ ꓔꓱꓹˍ ꓟ ꓥ ꓟ꓾ ꓥꓪ ꓦꓰꓽ ꓠꓲꓹ ꓡꓰ ꓢꓲ-ꓫꓬ-ꓟ-ꓦ ꓗꓪ ꓐꓰ ꓥꓪ ꓔꓯ ꓢꓷꓸ ꓙ ꓟꓳ ꓙˍ ꓡꓳ꓿ 3 ꓥꓪ ꓠꓬ ꓥꓪ ꓬꓲꓼ ꓥꓪ ꓠꓬꓲ ꓐꓴˍ ꓐꓰ ꓥꓪ ꓫꓵꓽ ꓥꓪ ꓧꓪ ꓐꓴ ꓬꓲꓸ ꓛꓲ ꓙꓱꓽ ꓘꓶꓽ ꓶꓻ ꓡꓰ ꓢꓲ꓾ ꓙꓲ-ꓢꓴ ꓔꓯˍ ꓐꓰ ꓗꓳꓹ ꓞ ꓢꓴ ꓒꓬꓱꓼ ꓡ ꓠꓲꓹ ꓫꓵˍ ꓡꓳ ꓫꓵꓽ ꓥ ꓡꓳ꓿ 4 ꓥꓪ ꓫꓵꓽ ꓥꓪ ꓧꓪ ꓐꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓥ ꓢꓲ꓾ ꓤ ꓙꓵꓽ ꓪˍ ꓐꓰ꓾ ꓟꓬꓱ ꓓꓳꓽˍ ꓐꓰ꓾ ꓘꓶꓽ ꓫꓵꓽˍ ꓐꓰ꓾ ꓙꓵꓽ ꓗ ꓐꓰ꓾ ꓢꓲꓽ ꓫꓬ ꓦꓲꓻ ꓗꓪ ꓣꓱ ꓙˍ ꓟ ꓐꓰ꓾ ꓙꓺ ꓟꓳ ꓘꓶꓽ ꓮꓽ ꓙꓵ ꓠꓬ ꓬꓲ ꓪꓽ ꓔꓯ ꓟ ꓥ ꓢꓲ꓾ 5 ꓬꓲ ꓪꓽ ꓠꓬ ꓒꓵꓽ ꓒ ꓝꓳꓹ ꓟꓶ ꓐꓴ ꓞꓲꓼ ꓤ ꓡꓯꓹ ꓤ ꓥ ꓡꓳ꓿ ꓧꓪꓽ ꓖꓳ ꓓꓱ ꓔꓯ ꓟꓳꓸ ꓐꓯˍ ꓠꓬ꓾ ꓙꓲ-ꓢꓴ ꓠꓽ ꓬꓲ ꓪꓽ ꓔꓯꓺˍ ꓐꓰ ꓡꓻ ꓟ ꓥ ꓢꓲ꓾ ꓬꓲ ꓠꓬ ꓙꓳˍ ꓟ ꓥ ꓕ ꓑꓳꓸ ꓕꓯꓽ ꓢꓲ ꓗꓪ ꓟ ꓥ ꓢꓲ ꓠꓬꓲ꓾ ꓕꓲ ꓞꓲꓼ ꓕꓲ ꓑ ꓶꓼ ꓙꓳ ꓫꓱꓹ ꓙꓳˍ ꓟ ꓪꓴ-ꓢ ꓥ ꓡꓳ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ 6 ꓕꓱ ꓡꓱ ꓐꓯˍ ꓟꓲ ꓪꓴ-ꓢ ꓐꓯ ꓘꓶ ꓠꓬ ꓬꓲ ꓖꓳꓽ ꓗꓷ ꓡꓰ ꓟ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓬꓲ-ꓢꓷ-ꓡꓰ ꓗꓪ ꓐꓰ ꓦꓵ ꓔ ꓢꓴ ꓮꓽ ꓙꓵ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓚꓵ ꓟꓽ ꓥ꓿ 7 ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓮꓽ ꓙꓵˍ ꓟꓲ ꓬꓲ ꓤ ꓠꓱ ꓚꓵ ꓟꓽ ꓥ꓿ ꓬꓲ-ꓢ ꓗꓪ ꓐꓰ ꓦꓵ ꓔ ꓟ ꓔꓯˍ ꓡꓰꓽ ꓠꓴ ꓞꓲꓼ ꓤ ꓡꓯꓹ ꓤ ꓘꓴˍ ꓥꓳ꓾ ꓐꓯ ꓔ ꓡꓳ꓿ 8 ꓕꓱ ꓡꓱ ꓐꓯˍ ꓟ ꓠꓬ ꓧꓪꓽ ꓖꓳ ꓓꓱ ꓗꓪ ꓟ ꓤ ꓠꓱ ꓐꓴ ꓠꓬ ꓪꓴ-ꓢ ꓤ ꓠꓱ ꓟꓽ ꓥ꓿ ꓪꓴ-ꓢ ꓡꓰ ꓙ ꓟꓳ ꓔ ꓢꓴ ꓗꓪ ꓐꓰ ꓦꓵꓻ ꓔ ꓟ ꓤ ꓠꓱ ꓐꓴ ꓔꓯˍ ꓡꓰꓽ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓚꓬꓹ ꓡꓳ꓾ ꓐꓰ ꓐꓯˍ ꓟ ꓥ ꓡꓳ꓿ 9 ꓮ ꓡꓲꓳ ꓐꓯ ꓠꓬ ꓙ ꓟꓳ ꓘꓶꓽ ꓗꓪ꓾ ꓠꓯꓸ ꓦꓯ ꓕꓱ ꓕꓲ ꓝꓲꓸ ꓗꓪ ꓥꓪ ꓝꓮꓲ ꓡꓻˍ ꓕꓯ꓾ ꓢ-ꓣ ꓠꓬ ꓤꓽ ꓕꓲ ꓣꓳ ꓙꓳˍ ꓥꓳ꓾ ꓐꓰ ꓐꓯ ꓔ ꓡꓳ꓿ 10 ꓕꓱ ꓟ ꓡꓰꓽ ꓟꓽ ꓞꓲ꓾ ꓤ-ꓐꓱ-ꓘˍ ꓟꓲ ꓣꓳ ꓒꓵꓽ ꓒ ꓬꓲ-ꓢ ꓗꓪ ꓐꓰ ꓤ ꓶꓻ ꓡꓰ ꓢꓲ꓾ 11 ꓤ ꓜꓱꓻ ꓟꓽ ꓦꓵ ꓡ ꓕꓯˍ ꓡꓰ꓾ ꓝꓮꓲ ꓙꓲˍ ꓟ ꓐꓰ ꓥꓶˍ ꓟ ꓮꓸ ꓫꓵꓽ ꓟꓽ ꓬꓰ ꓠꓬꓲ ꓢꓰꓽ ꓕꓯˍ ꓡꓰ꓾ ꓪꓴ-ꓢ ꓡꓰ ꓞꓳ ꓤ ꓔꓯ ꓢꓲꓺˍ ꓟ ꓠꓬ ꓬꓲ ꓪꓽ ꓬꓰˍ ꓟ ꓟꓬꓱꓽ ꓗꓪ ꓐꓰ ꓟꓽ ꓥ ꓥ꓾ ꓬꓲ ꓚꓴꓽ ꓬꓲꓹ ꓔꓯ ꓛꓳ ꓢꓲ ꓘꓴꓻˍ ꓟ ꓔꓯ ꓕꓶꓻ ꓡꓰ ꓝꓲ ꓠꓹ ꓟ꓾ 12 ꓪꓴꓽ ꓢꓴ ꓠꓬ ꓣꓳꓺ ꓢꓴ ꓔꓯ ꓣꓱꓽ ꓙ ꓠ ꓗꓹ ꓥꓳ꓾ ꓐꓰ ꓤ-ꓐꓱ-ꓘ ꓔꓯ ꓐꓯ ꓗꓷꓳ꓿ 13 ꓕꓱ ꓟ ꓠꓬ ꓕꓳ ꓶ ꓗꓪ꓾ ꓬ-ꓗꓴ ꓔꓯ ꓠꓬ ꓥꓪ ꓠꓲꓹ ꓠꓵˍ ꓡꓳ꓿ ꓬꓲ-ꓢꓳꓼ ꓔꓯ ꓠꓽ ꓥꓪ ꓠꓲꓹ ꓜꓳˍ ꓡꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 14 ꓖꓳ ꓡꓱ ꓠꓬ ꓣꓳ ꓮꓸ ꓫꓵ ꓐꓯ ꓠꓯꓹ ꓡ? ꓪꓴ-ꓢ ꓐꓯ ꓟꓴ ꓠꓬ ꓟꓽ ꓔꓱꓹˍ ꓟ ꓥ ꓡ? ꓮ ꓡꓲ ꓥ ꓟꓲ ꓟꓽ ꓥ꓿ 15 ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓟꓳ-ꓫꓲ ꓔꓯ꓾ ꓥꓪ ꓮꓽ ꓟ ꓔꓯ ꓫꓱꓸ ꓤ ꓠꓲꓹ ꓫꓵˍ ꓠꓬ ꓫꓱꓸ ꓤˍ ꓥꓳ꓾ ꓥꓪ ꓮꓽ ꓟ ꓔꓯ ꓠꓲꓹ ꓟ ꓦꓲꓺ ꓖꓶ ꓠꓲꓹ ꓫꓵˍ ꓠꓬ ꓦꓲꓺ ꓖꓶˍ ꓥꓳ꓾ ꓐꓯˍ ꓡꓳ꓿ 16 ꓖꓳ ꓡꓱ ꓠꓬꓲ ꓕꓱ ꓟ ꓠꓬ ꓞꓳ ꓤ ꓠꓲꓹ ꓫꓵˍ ꓟ ꓐꓰ ꓢꓯꓼ ꓕꓵˍ ꓟ ꓗꓪ ꓐꓰ ꓟꓽ ꓥ꓿ ꓫꓱꓸ ꓤ ꓢꓴ ꓪꓴ-ꓢ ꓗꓪ ꓐꓰˍ ꓡꓰꓽ ꓥ ꓡꓳ꓿ 17 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ ꓩ-ꓣꓳ ꓔꓯ꓾ ꓥꓪ ꓠꓬ ꓠꓴ ꓗꓪ ꓐꓰ ꓥꓪ ꓪꓽ ꓠꓬꓲˍ ꓟ ꓟꓳꓸ ꓖꓶ ꓠꓹ ꓟ ꓐꓰ꓾ ꓥꓪ ꓟꓬꓱꓺ ꓠꓬ ꓟꓵ ꓗꓳꓹ ꓓꓵ ꓓꓵ ꓗꓪ ꓚ ꓒꓬꓱ ꓙꓰ ꓝꓲ ꓠꓹ ꓟ꓾ ꓠꓴ ꓔꓯ ꓥꓪ ꓡꓰ ꓪ ꓔꓲ ꓣꓱꓽ ꓝꓲꓳ꓾ ꓐꓰ ꓐꓯ ꓔ ꓡꓳ꓿ 18 ꓖꓳ ꓡꓱ ꓠꓬꓲ ꓪꓴ-ꓢ ꓠꓽ ꓮꓽ ꓟ ꓔꓯ ꓫꓱꓸ ꓤ ꓠꓲꓹ ꓫꓵˍ ꓠꓬ ꓫꓱꓸ ꓤˍ ꓡꓳ꓿ ꓮꓽ ꓟ ꓔꓯ ꓠꓲꓹ ꓟ ꓩꓴꓻ ꓡꓰ ꓝꓲ ꓠꓲꓹ ꓫꓵˍ ꓠꓬ ꓩꓴ ꓡꓰ ꓝꓲˍ ꓟ ꓡꓳꓸ ꓓꓳ ꓡ ꓡꓳ꓿ 19 ꓖꓳ ꓡꓱ ꓥ ꓠꓬ ꓠꓴ ꓪꓽ ꓠꓽ ꓥꓪ ꓔꓯ꓾ ꓪꓴ-ꓢ ꓠꓲꓹ ꓡꓶ ꓔꓯ ꓥꓪ ꓠꓴ ꓗꓽ ꓔ ꓟꓽ ꓘꓴ ꓠꓬ꓾ ꓬꓲ ꓮꓸ ꓫꓵꓽ ꓪꓴꓸ ꓠꓬꓲ ꓥꓪ ꓠꓴ ꓔꓯ ꓛꓬꓻ ꓖꓴ ꓓꓰꓺˍ ꓡ? ꓐꓰ ꓐꓯ ꓡ ꓥꓳ꓿ 20 ꓞꓳ ꓤꓽꓳ꓾ ꓠꓴ ꓠꓬ ꓮꓽ ꓟ ꓥ ꓠꓬꓲ ꓪꓴ-ꓢ ꓔꓯ ꓡꓯꓼ ꓧꓻˍ ꓡ? ꓑꓵꓹ ꓔ ꓟ ꓡꓴꓻ ꓠꓬ ꓬꓲ ꓔꓯ ꓑꓵꓹ ꓢꓴ ꓔꓯ꓾ ꓠꓴ ꓮꓸ ꓫꓵꓽ ꓪꓴꓸ ꓠꓬꓲ ꓥꓪ ꓔꓯ ꓕꓱ ꓡꓱ ꓑꓵꓹˍ ꓡ? ꓐꓰ ꓐꓯ ꓓꓻˍ ꓡ? 21 ꓡꓴꓻ ꓑꓵꓹ ꓒꓽ ꓠꓬ ꓠꓱꓸ ꓠꓲꓺ ꓠꓴꓽ ꓕꓲ ꓘꓴꓸˍ ꓗꓪ ꓐꓰ꓾ ꓒꓵꓽˍ ꓟ ꓡꓴꓻ ꓕꓲ ꓟ꓾ ꓟꓽ ꓒꓵꓽ ꓟ ꓡꓴ ꓕꓲ ꓟ ꓫꓬꓹ ꓠ ꓟ ꓙꓵꓽ ꓪ ꓟꓽ ꓙꓳˍ ꓡ? 22 ꓪꓴ-ꓢ ꓠꓬ ꓬꓲ ꓦꓶꓻ ꓠꓲꓹ ꓡꓰ ꓬꓲ ꓪꓽ ꓠꓬꓲˍ ꓟ ꓟꓳꓸ ꓖꓶ ꓠꓲꓹ ꓫꓵˍ ꓟꓲ꓾ ꓬꓲ ꓠꓽ ꓜꓲ ꓘꓴꓻ ꓠꓲꓹ ꓓꓽ ꓟ ꓡꓰ꓾ ꓟꓶꓽ ꓬꓰ ꓠꓹ ꓟ ꓙꓽ ꓖꓶ ꓔ ꓟ ꓦꓶ ꓠꓲꓹ ꓟꓶˍ ꓟ ꓡꓴꓻ ꓔꓯ ꓠꓲꓹ ꓟ ꓫꓵꓺ ꓖꓶ ꓢꓲ꓾ 23 ꓬꓲ ꓧꓶꓸ ꓕꓯˍ ꓡꓰ ꓙꓽ ꓖꓶ ꓔ ꓟ ꓫꓱꓸ ꓤ ꓠꓲꓹ ꓟꓶˍ ꓟ ꓡꓴꓻ ꓗꓪ ꓬꓲ ꓟꓬꓱ ꓓꓳꓽ ꓮ ꓘꓶꓻ ꓛꓲ ꓐꓳ ꓞꓹ ꓟ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓕꓯ ꓠꓽ꓾ ꓪꓴ-ꓢ ꓬꓲ ꓠꓲꓹ ꓡꓶ ꓥꓳ꓾ ꓟꓽ ꓥ ꓡ? 24 ꓡꓴꓻ ꓕꓱ ꓟ ꓠꓬ ꓬꓲ ꓡꓰ ꓘꓴꓻ ꓔ ꓢꓴ ꓣꓳ ꓔꓯˍ ꓟꓲ ꓐꓯ ꓬꓯꓼˍ ꓟ ꓥ ꓢꓲ꓾ ꓬꓴ-ꓔ ꓡ ꓞꓳ ꓗꓪ ꓐꓰ ꓘꓴ ꓔ ꓟˍ ꓡꓰꓽ ꓟꓽ ꓞꓲ꓾ ꓞꓳ ꓫꓵꓽ ꓞꓳ ꓙꓰꓽ ꓗꓪ ꓐꓰ ꓘꓴ ꓔ ꓟˍ ꓟꓲ ꓥ ꓡꓳ꓿ 25 ꓬꓲ ꓡꓰ ꓧꓳ-ꓫꓲ-ꓬ ꓕꓳ ꓶ ꓗꓪ꓾ ꓥꓪ ꓑ ꓫꓬꓼ ꓟꓽ ꓬꓰ ꓠꓬꓲ ꓢꓴ ꓔꓯ ꓥꓪ ꓑ ꓫꓬꓼ ꓘꓴˍ ꓥꓳ꓿ ꓥꓪ ꓟꓽ ꓠꓲꓹ ꓠꓵ ꓠꓬꓲ ꓢꓴ ꓐꓴ ꓔꓯ ꓠꓲꓹ ꓠꓵ ꓢꓴ꓾ ꓐꓰ ꓘꓴˍ ꓥꓳ꓿ 26 ꓧꓶꓸ ꓕꓯ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓥꓪ ꓑ ꓫꓬꓼ ꓟꓽ ꓥ꓾ ꓐꓯ ꓗꓷ ꓟ ꓬꓲ ꓛꓲ꓾ ꓮ ꓟꓶ ꓠꓴ ꓪꓽ ꓔꓯ ꓠꓬ ꓢꓯꓸ ꓔꓬ ꓟ ꓪꓴ-ꓢ ꓬꓲ ꓤ ꓐꓴ꓾ ꓐꓰ ꓘꓴˍ ꓥꓳ꓾ ꓐꓯˍ ꓟ ꓡꓰ ꓐꓰ ꓥ ꓡꓳ꓿ 27 ꓬꓲ-ꓢ-ꓬ ꓡꓰ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓖꓴ ꓢꓲ꓾ ꓬꓲ-ꓢꓷ-ꓡꓰ ꓞꓲꓼ ꓤ ꓡꓯꓹ ꓤ ꓐꓴ ꓵꓺ ꓟꓬꓱ ꓠꓬ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓟ ꓧꓶꓽ ꓛꓲ ꓟꓬ ꓛꓲ ꓙꓳˍ ꓟꓲ꓾ ꓜꓰꓻ ꓡꓰ ꓢꓴˍ ꓡꓰꓽ ꓚꓬꓴ ꓟꓶˍ ꓥꓳ꓿ 28 ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓡꓰ ꓟꓲ ꓠꓯ ꓗꓪ ꓬꓲ ꓐꓯ ꓞꓷꓹ ꓔ ꓟ ꓬꓰ ꓐꓲ ꓡꓰ ꓝꓲ ꓢꓲ꓾ ꓠꓲꓹ ꓞ ꓬꓰ ꓖꓴ ꓡꓰ ꓝꓲˍ ꓥꓳ꓾ ꓐꓯˍ ꓡꓳ꓿ 29 ꓝꓮꓲ ꓧꓶꓸ ꓕꓯ ꓬꓲ-ꓢ-ꓬ ꓡꓰ꓾ ꓟꓯꓼ ꓜꓴ ꓐꓴ ꓢꓲ ꓒꓽ ꓡꓰ ꓣꓳ ꓔꓯ ꓬꓲ ꓫꓵꓸ ꓟꓽ ꓝꓰ ꓔ ꓕꓯ ꓠꓽ꓾ ꓣꓳ ꓠꓬ ꓢꓳ-ꓓꓳ-ꓟ ꓐꓰ ꓕꓲ ꓡꓰꓹꓼ ꓒꓬꓱꓼ ꓡ ꓢꓲ꓾ ꓳ-ꓟꓳ-ꓡ ꓡꓰ ꓐꓰ ꓗꓷ ꓡꓰˍ ꓡꓳ ꓫꓵꓽ ꓥꓳ꓾ ꓐꓯˍ ꓟ ꓡꓰ ꓐꓰ ꓥꓳ꓿ 30 ꓖꓳ ꓡꓱ ꓠꓬ ꓣꓳ ꓮꓸ ꓫꓵ ꓐꓯ ꓠꓯꓹ ꓡ? ꓔꓱꓹ ꓜꓳꓽˍ ꓟ ꓔꓯ ꓟꓽ ꓖꓼ ꓢꓴ ꓐꓶꓽ ꓞꓳ ꓐꓴ ꓠꓬ꓾ ꓙꓵꓻ ꓠꓲꓹ ꓗꓪ ꓐꓰ ꓔꓱꓹ ꓜꓳꓽˍ ꓟ ꓟꓶ ꓡꓰꓳ꓿ 31 ꓖꓳ ꓡꓱ ꓥ ꓟꓲ ꓬꓲ-ꓢꓷ-ꓡꓰ ꓡ ꓞꓳ ꓠꓬ ꓙꓵꓽ ꓗ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰ ꓝꓲ ꓠꓲꓹ ꓫꓵˍ ꓟꓲ ꓚꓬꓹ ꓟꓽ ꓟꓶ꓿ 32 ꓕꓱ ꓟ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓥ ꓡ? ꓬꓲ ꓪꓽ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓟꓽ ꓥ ꓥ꓾ ꓙꓵꓽ ꓗ ꓟꓬꓱꓽ ꓬꓰˍ ꓟ ꓗꓪ ꓐꓰ ꓔꓱꓹ ꓜꓳꓽˍ ꓟ ꓔꓯ ꓧꓪˍ ꓟ ꓑꓶꓸ ꓓꓴ ꓥꓳ꓿ ꓬꓲ ꓪꓽ ꓠꓬ ꓛꓲ ꓕꓲꓽ ꓓꓴ Bꓸ ꓛꓲ ꓗꓪ ꓛꓲ ꓕꓲꓽ ꓡꓰꓳ꓿ 33 ꓕꓱ ꓟ ꓠꓬ ꓕꓳ ꓶ ꓗꓪ꓾ ꓠꓬꓲ ꓠꓹ꓾ ꓥꓪ ꓠꓬ ꓜꓲ-ꓬꓴ ꓗꓪ ꓛꓲ ꓕꓲꓽ ꓓꓴ Bꓸ ꓛꓲˍ ꓐꓰ ꓡꓱꓸ ꓗꓷ ꓝꓲ ꓓꓴ ꓡꓳ ꓓꓰ ꓕꓲ ꓘꓴꓸ ꓗꓶ ꓔ ꓡꓳ꓿ ꓖꓳ ꓡꓱ ꓢꓲ ꓬꓲ ꓔꓯ ꓙꓵꓻ ꓢꓴ ꓠꓬ ꓮꓽ ꓟˍ ꓟꓲ ꓟꓽ ꓫꓸ ꓔꓳ ꓡꓰ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿

ꓣꓳ-ꓟ 10

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓲ-ꓢꓷ-ꓡꓰ ꓡ ꓞꓳ ꓐꓱ ꓶ ꓥꓪ ꓠꓲꓹ ꓟ ꓗꓪ ꓠꓲꓹ ꓥꓳꓺˍ ꓟ ꓐꓰ ꓥꓪ ꓪꓽ ꓘꓴˍ ꓟ ꓠꓬ꓾ ꓬꓲ ꓪꓽ ꓢꓯꓼ ꓟꓬ ꓝꓸ ꓟꓶ ꓠꓹ ꓟ ꓥ ꓡꓳ꓿ 2 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓪꓴ-ꓢ ꓐꓱ ꓶ ꓮꓽ ꓘꓶꓸ ꓠꓲꓹ ꓡꓱꓻˍ ꓡꓳ꓾ ꓐꓰ ꓬꓲ ꓪꓽ ꓐꓱ ꓶ ꓥꓪ ꓢꓷꓸ ꓙ ꓟꓳꓻ ꓙ ꓐ ꓡ ꓡꓳ꓿ ꓖꓳ ꓡꓱ ꓥ ꓟꓲ ꓙꓽ ꓜꓲꓼ ꓠꓲꓹ ꓔꓯ ꓛꓳ ꓢꓲ ꓠꓲꓹ ꓡꓱꓻˍ ꓟ ꓟꓽ ꓥ꓿ 3 ꓬꓲ ꓪꓽ ꓠꓽ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ ꓔꓯ ꓟꓽ ꓢꓷꓸ ꓠꓬꓲ꓾ ꓚꓲꓸ ꓛꓬ ꓢꓯꓼ ꓕꓵꓼˍ ꓟ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪꓽ ꓠꓬ ꓪꓴ-ꓢ ꓡꓰ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓡ ꓟ ꓚꓱꓹ ꓔꓯ ꓟꓽ ꓘꓳ ꓣꓴ꓿ 4 ꓙꓵꓻ ꓢꓴ ꓥ ꓕ ꓑꓳꓸ ꓔꓯ ꓠꓬ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓡꓰ ꓝꓲ ꓠꓹ ꓟ꓾ ꓙꓲ-ꓢꓴ ꓠꓬ ꓟꓳ-ꓫꓲ ꓙꓵꓽ ꓗ ꓬꓲ ꓡꓳꓹ ꓬꓰ ꓓꓴ ꓥ ꓡꓳ꓿ 5 ꓮ ꓡꓲꓳ ꓐꓯˍ ꓠꓬ ꓟꓳ-ꓫꓲ ꓡꓰ꓾ ꓙꓵꓽ ꓗ ꓗꓪ ꓟ ꓕꓵꓼ ꓪ ꓮꓽ ꓙꓵ ꓒꓵꓽ ꓛꓳ ꓖꓴꓻ ꓡꓰ ꓢꓴ ꓠꓬ꓾ ꓔꓱꓹ ꓜꓳꓽˍ ꓟ ꓟꓶ ꓢꓲ ꓢꓯꓸ ꓔꓬ ꓪˍ ꓥꓳ꓾ ꓐꓰ ꓐꓳ ꓔ ꓡꓳ꓿ 6 ꓖꓳ ꓡꓱ ꓥ ꓟꓲ ꓙꓵꓻ ꓠꓲꓹ ꓗꓪ ꓐꓰ ꓓꓳ ꓡ ꓟ ꓔꓱꓹ ꓜꓳꓽˍ ꓟ ꓡꓰ ꓕꓱ ꓡꓱ ꓐꓯˍ ꓡꓳ꓾ ꓙꓲ-ꓢꓴ ꓔꓯ ꓧꓳꓽ ꓬꓯꓼ ꓡ ꓠꓹ ꓟ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓮꓽ ꓟ ꓓꓯꓺ ꓙꓰ ꓡ? 7 ꓥ ꓠꓬ꓾ ꓫꓵꓻ ꓗꓪ ꓐꓰ ꓙꓲ-ꓢꓴ ꓔꓯ ꓧꓳꓽ ꓓꓯ ꓡ ꓠ ꓟ꓾ ꓫꓵꓻ ꓓꓴꓽ ꓗꓪ ꓮꓽ ꓟ ꓬꓯꓼ ꓙꓰˍ ꓡ?꓾ ꓐꓰ ꓠꓴ ꓪꓽ ꓠꓲꓹ ꓟ ꓗꓪ ꓕꓽ ꓐꓯ꓾ ꓐꓰ ꓐꓯˍ ꓡꓳ꓿ 8 ꓐꓯ ꓘꓶ ꓠꓬ ꓠꓴ ꓒꓺ ꓕꓲ ꓗꓪ ꓓꓻˍ ꓢꓲ꓾ ꓠꓴ ꓟꓷꓽ ꓠꓷꓹˍ ꓐꓰ ꓠꓴ ꓠꓲꓹ ꓟ ꓠꓯꓸꓼ ꓗꓪ ꓓꓯꓹ ꓡꓳ꓾ ꓐꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓥꓪ ꓠꓴꓽ ꓚ ꓟꓸ ꓖꓶˍ ꓟ ꓙꓵꓻ ꓠꓲꓹ ꓟꓸ ꓟꓲ ꓥ ꓢꓲ꓾ 9 ꓠꓴ ꓪꓽ ꓟꓷꓽ ꓠꓷꓹ ꓡꓰ꓾ ꓬꓰ-ꓢꓴ ꓠꓽ ꓢꓲ ꓒꓽ ꓥꓳ꓾ ꓐꓰ ꓣꓷꓠꓸ ꓢꓲ ꓠꓬꓲ꓾ ꓠꓲꓹ ꓟ ꓗꓪ ꓠꓬ ꓪꓴ-ꓢ ꓡꓰ ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲꓳ꓾ ꓐꓰ ꓙꓵꓻˍ ꓕꓯ ꓠꓽ꓾ ꓠꓴ ꓢꓯꓼ ꓟꓬ ꓟꓶˍ ꓥꓳ꓾ ꓐꓯˍ ꓟ ꓥ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓠꓲꓹ ꓟ ꓡꓰ ꓙꓵꓻˍ ꓠꓬꓲ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓢꓲ꓾ ꓟꓷꓽ ꓠꓷꓹ ꓡꓰ ꓣꓷꓠꓸˍ ꓟ ꓗꓪ ꓐꓰ ꓢꓯꓼ ꓟꓬ ꓝꓸ ꓟꓶˍ ꓟ ꓥ ꓡꓳ꓿ 11 ꓮ ꓡꓲꓳ ꓐꓯˍ ꓠꓬ ꓕꓳ ꓶ ꓗꓪ꓾ ꓮ ꓟ ꓥ ꓟꓲ ꓬꓲ ꓔꓯ ꓙꓵꓻˍ ꓠꓬ ꓟꓽ ꓫ ꓔꓳ ꓡꓰ꓾ ꓐꓯ ꓔ ꓡꓳ꓿ 12 ꓮ ꓡꓲꓳ ꓐꓯˍ ꓠꓬ ꓬꓴ-ꓔ ꓡ ꓞꓳˍ ꓐꓰ ꓦꓲ-ꓡꓲ ꓡ ꓞꓳ ꓒꓯꓽ ꓦꓰꓽ ꓓꓴ ꓟꓽ ꓙꓳ꓿ ꓮꓽ ꓙꓵ ꓢꓴ ꓢꓲ ꓒꓽ ꓠꓬ ꓕꓲ ꓣꓳˍ ꓡꓰꓽ ꓥ ꓢꓲ꓾ ꓬꓲ ꓔꓯ ꓶꓼ ꓓꓰꓽ ꓢꓴ ꓥ ꓕ ꓑꓳꓸ ꓐꓱ ꓶ ꓣꓱꓽ ꓛꓰ ꓐꓳ ꓞꓹ ꓢꓴ ꓠꓬ ꓬꓲ ꓥ ꓠꓬꓲ꓾ 13 ꓢꓲ ꓒꓽ ꓟꓬꓱ ꓗꓪ ꓐꓰ ꓘꓴꓻ ꓓꓰꓽ ꓢꓴ ꓥ ꓕ ꓑꓳꓸ ꓠꓽ ꓢꓯꓼ ꓟꓬ ꓝꓸ ꓟꓶˍ ꓥꓳ꓿ 14 ꓖꓳ ꓡꓱ ꓥ ꓟꓲ ꓬꓲ ꓔꓯ ꓟꓽ ꓙꓵꓻ ꓠꓬꓲ ꓢꓴ ꓠꓬ ꓮ ꓡꓲ ꓐꓰ ꓢꓲ ꓬꓲ ꓔꓯ ꓘꓴꓻ ꓓꓰꓽ ꓗꓴꓸ ꓢꓰꓽ? ꓬꓲ ꓓꓳꓽ ꓔꓯ ꓟꓽ ꓑ ꓙꓽ ꓠꓬꓲ ꓢꓴ ꓠꓬ ꓮ ꓡꓲ ꓐꓰ ꓢꓲ ꓬꓲ ꓔꓯ ꓙꓵꓻ ꓐ ꓡ ꓢꓰꓽ? ꓟꓸ ꓟꓲ ꓚ ꓢꓴ ꓟꓽ ꓙꓳ ꓠꓬ ꓮ ꓡꓲ ꓐꓰ ꓢꓲ ꓑ ꓙꓽ ꓢꓰ? 15 ꓟꓸ ꓟꓲ ꓚ ꓢꓴ ꓔꓯ ꓬꓲ ꓪꓽ ꓟꓽ ꓝꓲ ꓩꓴ ꓗꓷ ꓠꓬ ꓮ ꓡꓲ ꓐꓰ ꓢꓲ ꓟꓸ ꓟꓲꓽ ꓚ ꓙꓰ ꓢꓰ? ꓕꓱ ꓟ ꓠꓬ ꓕꓳ ꓶ ꓗꓪ꓾ ꓶꓼ ꓓꓳꓽ ꓫꓱꓹ ꓓꓳꓽ ꓚ ꓖꓶ ꓡ ꓢꓴ ꓡꓻˍ ꓟ ꓠꓬ ꓮꓽ ꓘꓶꓸ ꓠꓲꓹ ꓒꓴ ꓗꓹ ꓛꓲ ꓓꓴ ꓥꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 16 ꓖꓳ ꓡꓱ ꓥ ꓟꓲ ꓬꓲ ꓪꓽ ꓮꓽ ꓙꓵ ꓢꓴ ꓠꓬ ꓶꓼ ꓓꓳ ꓫꓱꓹ ꓓꓳ ꓔꓯ ꓠꓺ ꓡꓳꓹ ꓢꓴ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓬꓲ-ꓢ-ꓬ ꓡꓰ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓐꓯ ꓟꓸ ꓖꓶˍ ꓟ ꓔꓯ ꓮꓽ ꓟ ꓙꓵꓻˍ ꓡ? ꓐꓯˍ ꓡꓳ꓿ 17 ꓖꓳ ꓡꓱ ꓠꓬꓲ ꓙꓵꓻ ꓠꓲꓹ ꓠꓬ ꓶꓼ ꓓꓳ ꓫꓱꓹ ꓓꓳ ꓑ ꓙꓽ ꓟꓶˍ ꓟ ꓗꓪ ꓐꓰ ꓥ ꓢꓲ꓾ ꓶꓼ ꓓꓳꓽ ꓫꓱꓹ ꓓꓳ ꓕꓱ ꓟ ꓠꓬ ꓙꓲ-ꓢꓴ ꓐꓯ ꓘꓶ ꓥ ꓡꓳ꓿ 18 ꓖꓳ ꓡꓱ ꓥ ꓟꓲ ꓥꓪ ꓡꓰ꓾ ꓬꓲ ꓪꓽ ꓟꓽ ꓑ ꓙꓽ ꓠꓬꓲ ꓡ?꓾ ꓐꓰ ꓠꓺ ꓠꓬꓲ ꓐꓷˍ ꓠꓬ꓾ ꓬꓲ ꓪꓽ ꓠꓽ ꓚꓵ ꓚꓵ ꓑ ꓙꓽ ꓠꓬꓲꓳ꓾ ꓐꓰ ꓐꓯ ꓠ ꓗꓹ ꓥꓳ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓬꓲ ꓪꓽ ꓢꓯꓼ ꓠꓬ ꓟꓵ ꓗꓳꓹ ꓓꓵ ꓓꓵ ꓓꓳ ꓙꓰ ꓢꓲ꓾ ꓬꓲ ꓪꓽ ꓐꓯ ꓘꓶ ꓠꓬ ꓟꓲ ꓠꓯ ꓑꓶꓸ ꓗꓪ ꓛꓲ ꓬꓰꓳ꓾ ꓐꓰ ꓐꓳ ꓔ ꓡꓳ꓿ 19 ꓖꓳ ꓡꓱ ꓠꓬꓲ ꓥꓪ ꓡꓰ꓾ ꓬꓲ-ꓢꓷ-ꓡꓰ ꓡ ꓞꓳ ꓠꓬ ꓟꓽ ꓙ ꓜꓲꓼ ꓡ? ꓐꓰ ꓠꓺ ꓠꓬꓲ ꓐꓷˍ ꓠꓬ꓾ ꓟꓳ-ꓫꓲ ꓠꓽ ꓧꓶꓸ ꓕꓯˍ ꓡꓰ꓾ ꓥꓪ ꓠꓬ ꓑ ꓫꓬꓼ ꓟꓽ ꓚꓬꓹ ꓔ ꓟ ꓞꓳ ꓫꓵꓽ ꓡꓰ ꓠꓴ ꓪꓽ ꓔꓯ ꓠꓲꓹ ꓦꓯꓸ ꓡ ꓝꓲˍ ꓥꓳ꓿ ꓟꓽ ꓙ ꓜꓲꓼ ꓟ ꓞꓳ ꓫꓵꓽ ꓡꓰ ꓠꓴ ꓪꓽ ꓔꓯ ꓠꓲꓹ ꓦꓶꓻ ꓡ ꓝꓲˍ ꓥꓳ꓾ ꓐꓰ ꓐꓯ ꓗꓷ ꓟ ꓐꓯ ꓘꓶ ꓙꓳˍ ꓡꓳ꓿ 20 ꓝꓮꓲ ꓬꓲ-ꓢ-ꓬ ꓠꓬ ꓠꓲꓹ ꓪꓴꓽ ꓪꓴˍ ꓡꓰ꓾ ꓥꓪ ꓔꓯ ꓟꓽ ꓧꓪ ꓢꓴ ꓡꓰ ꓥꓪ ꓔꓯ ꓧꓪ ꓟꓶ ꓡꓰꓳ꓿ ꓥꓪ ꓔꓯ ꓟꓳꓸ ꓟꓽ ꓠꓺ ꓠꓬꓲ ꓢꓴ ꓔꓯ ꓥꓪ ꓚꓲꓸ ꓛꓬ ꓟꓳꓸ ꓖꓶ ꓗꓷꓳ꓾ ꓐꓰ ꓐꓯ ꓔ ꓡꓳ꓿ 21 ꓖꓳ ꓡꓱ ꓢꓲ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓟꓳꓸ ꓠꓬ ꓬꓲ-ꓢ-ꓬ ꓡꓰ꓾ ꓥꓪ ꓠꓬ ꓕꓲ ꓠꓬꓲ ꓡꓱꓸꓼ ꓟꓽ ꓠ ꓡꓳꓹ ꓟ ꓐꓰ ꓡꓯꓽ ꓧꓹˍ ꓟ ꓑ ꓫꓬꓼ ꓔꓯ ꓘꓳ ꓣꓴ ꓠꓹ ꓟ ꓡꓯꓼ ꓒꓯꓹ ꓛꓱ ꓔ ꓡꓳ꓾ ꓐꓰ ꓐꓯˍ ꓡꓳ꓿

ꓣꓳ-ꓟ 11

1 ꓖꓳ ꓡꓱ ꓥ ꓠꓬ ꓪꓴ-ꓢ ꓠꓽ ꓬꓲ ꓑ ꓫꓬꓼ ꓐꓴ ꓔꓯ ꓒꓰꓺ ꓗꓷ ꓟ ꓥ ꓡ? ꓖꓳ ꓡꓱ ꓠꓽ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓥꓪˍ ꓟꓲ ꓬꓲ-ꓢꓷ-ꓡꓰ ꓡ ꓞꓳ ꓥ ꓢꓲ꓾ ꓮ-ꓐ-ꓡ-ꓦ ꓬꓲ ꓞꓲꓼ ꓤ ꓡꓯꓹ ꓤ꓾ ꓐꓰ-ꓠꓬ-ꓟꓲ ꓕꓲ ꓪꓳꓼ ꓢꓴ ꓥ ꓡꓳ꓿ 2 ꓪꓴ-ꓢ ꓡꓰ ꓮꓽ ꓠꓱ ꓕꓯˍ ꓡꓰ ꓬꓲ ꓢꓷꓸˍ ꓟ ꓬꓲ ꓑ ꓫꓬꓼ ꓔꓯ ꓟꓽ ꓒꓰꓺ ꓗꓷ꓿ ꓢꓲꓽ ꓫꓬ ꓕꓳ ꓶ ꓗꓪ ꓬꓲ-ꓡꓲ-ꓬ ꓡꓰ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓪꓴ-ꓢ ꓟꓲꓽ ꓙꓬ ꓗꓪ ꓗꓳꓹˍ ꓟ ꓖꓳ ꓕꓲ ꓔꓳꓸ ꓗꓪ꓾ ꓮ ꓡꓲ ꓐꓯ ꓔ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓬꓲ ꓡꓰ꓾ 3 ꓢꓲ ꓒꓽꓳ꓾ ꓬꓲ ꓪꓽ ꓡꓰ ꓠꓴ ꓟꓷꓽ ꓠꓷ ꓝꓸ ꓢꓴ ꓐꓴ ꓔꓯ ꓢꓰꓼ ꓗꓷ ꓢꓲ꓾ ꓠꓴ ꓔꓲ ꓖꓴ ꓔꓯ ꓒꓬꓹ ꓖꓴ ꓡꓰꓳ꓿ ꓥꓪ ꓕꓲ ꓣꓳˍ ꓡꓰ ꓜꓰꓻ ꓡꓰ ꓢꓲ꓾ ꓥꓪ ꓔꓯˍ ꓟꓲ ꓬꓲ ꓪꓽ ꓢꓰꓼ ꓠꓲꓹ ꓫꓵˍ ꓡꓳ꓾ ꓐꓯˍ ꓡꓳ꓿ 4 ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓬꓲ ꓔꓯ꓾ ꓥꓪ ꓚꓲꓸ ꓛꓬ ꓐꓱ ꓶ ꓑ ꓡꓲꓽ ꓔꓯ ꓪꓴꓸ ꓓꓵ ꓟꓽ ꓕꓱꓼ ꓠꓬꓲ ꓟ ꓞꓳ ꓤ ꓫꓵꓽ ꓔꓴ ꓜꓰꓻ ꓞꓹ ꓝꓲˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ 5 ꓖꓳ ꓟ ꓡꓰ ꓐꓰ ꓮ ꓟꓶ ꓕꓱ ꓕꓲ ꓝꓲꓸ ꓗꓪˍ ꓟꓲ꓾ ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓢꓲ ꓔ ꓢꓲ ꓜꓰꓻ ꓞꓹ ꓟ ꓕꓲ ꓧꓳꓽ ꓙꓳˍ ꓢꓰꓽ ꓡꓳ꓿ 6 ꓖꓳ ꓡꓱ ꓠꓬꓲ ꓚꓬꓴ ꓟꓶˍ ꓟ ꓠꓬ ꓣꓱꓽ ꓛꓰ ꓗꓪ ꓐꓰ ꓥ ꓢꓲ꓾ ꓟꓬꓱꓽ ꓬꓰ ꓢꓯꓼ ꓕꓵꓼˍ ꓟ ꓗꓪ ꓐꓰ ꓟꓽ ꓥ꓿ ꓟꓬꓱꓽ ꓬꓰ ꓢꓯꓼ ꓕꓵꓼˍ ꓟ ꓗꓪ ꓐꓰ ꓥ ꓕꓯ ꓠꓽ꓾ ꓣꓱꓽ ꓛꓰ ꓠꓬ ꓕꓱ ꓡꓱ ꓖꓳ ꓑꓳ ꓣꓱꓽ ꓛꓰ ꓟꓽ ꓥ꓾ ꓐꓰ ꓗꓷ ꓡꓰˍ ꓥꓳ꓿ 7 ꓕꓱ ꓡꓱ ꓥ ꓠꓬ ꓬꓲ-ꓢꓷ-ꓡꓰ ꓐꓴ ꓠꓽ ꓬꓲ ꓪꓽ ꓧꓪꓺˍ ꓟ ꓖꓳ ꓟ ꓧꓪ ꓟꓽ ꓟꓶ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓢꓲ ꓔ ꓢꓴ ꓐꓴ ꓠꓬ ꓧꓪ ꓟꓶ ꓡꓰꓳ꓿ ꓠꓱꓸ ꓐꓯꓼ ꓢꓴ ꓠꓬ ꓠꓲꓹ ꓟ ꓩꓴ ꓡꓰꓳ꓿ 8 ꓕꓱ ꓟ ꓠꓬ ꓕꓳ ꓶ ꓗꓪ꓾ ꓠꓬꓲꓸ ꓠꓬꓲ ꓗꓪ ꓛꓲ ꓪꓴ-ꓢ ꓡꓰ ꓬꓲ ꓪꓽ ꓔꓯ ꓔꓯꓽ ꓡꓰˍ ꓟ ꓦˍ ꓐꓰ꓾ ꓠꓬꓲ ꓟꓽ ꓟꓳꓻ ꓡꓳ ꓫꓵꓽ ꓟꓬ ꓢꓶꓽˍ ꓐꓰ꓾ ꓟꓽ ꓑ ꓙꓽˍ ꓡꓳ ꓫꓵ ꓠꓸ ꓑꓳ ꓖꓶ ꓔ ꓡꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 9 ꓓ-ꓪꓵˍ ꓟꓲ꓾ ꓬꓲ ꓪꓽ ꓑꓮꓲ ꓠꓬ ꓑꓱꓸˍ ꓐꓰ꓾ ꓪꓺˍ ꓐꓰ꓾ ꓛꓲ ꓕꓲꓽ ꓓꓴˍ ꓐꓰ꓾ ꓬꓲ ꓪꓽ ꓔꓯ ꓪꓽ ꓛꓴꓽ ꓚꓱꓹ ꓓꓴ ꓒꓬꓱꓼ ꓡ ꓝꓲ꓿ 10 ꓬꓲ ꓪꓽ ꓠꓬꓲꓺ ꓟꓽ ꓟꓳ ꓠꓹ ꓟ ꓬꓲ ꓪꓽ ꓟꓬ ꓢꓶꓽ ꓔꓯ ꓠꓯ ꓞꓲꓹ ꓡꓰ ꓝꓲ꓿ ꓬꓲ ꓪꓽ ꓙꓴꓽ ꓝꓲꓸˍ ꓟꓲ ꓕꓲ ꓞꓲꓼ ꓗꓴ ꓡꓰ ꓝꓲ꓾ ꓐꓯˍ ꓡꓳ꓿ 11 ꓖꓳ ꓡꓱ ꓥ ꓠꓬ ꓬꓲ ꓪꓽ ꓛꓬꓻˍ ꓟ ꓡꓰ ꓬꓲ ꓪꓽ ꓔꓯ ꓕꓲ ꓞꓲꓼ ꓕꓲ ꓑ ꓐꓬ ꓡꓰ ꓝꓲˍ ꓡ? ꓖꓳ ꓡꓱ ꓠꓽ ꓟꓽ ꓥ꓿ ꓬꓲ ꓪꓽ ꓛꓬꓻˍ ꓟ ꓗꓪ ꓐꓰ ꓢꓯꓼ ꓟꓬ ꓟꓶˍ ꓟ ꓣꓱꓽ ꓛꓰ ꓠꓬ ꓐꓶꓽ ꓞꓳ ꓔꓯ ꓛꓲ ꓬꓰ ꓢꓲ꓾ ꓬꓲ-ꓢꓷ-ꓡꓰ ꓐꓴ ꓔꓯ ꓟꓬ ꓔꓳꓹ ꓡ ꓝꓲ ꓠꓹ ꓟ ꓥ ꓡꓳ꓿ 12 ꓬꓲ-ꓢꓷ-ꓡꓰ ꓡ ꓞꓳ ꓛꓬꓻ ꓖꓴ ꓠꓬ ꓟꓲ ꓠꓯ ꓐꓳꓺ ꓡꓰ ꓓꓴ ꓥ ꓢꓲ꓾ ꓬꓲ ꓪꓽ ꓥꓳꓽ ꓖꓴ ꓠꓬ ꓐꓶꓽ ꓞꓳ ꓐꓵꓽ ꓡ ꓐꓶꓹ ꓡ ꓓꓴ ꓥ ꓕꓯ ꓠꓽ꓾ ꓬꓲ ꓪꓽ ꓮꓽ ꓙꓵ ꓡꓱꓸꓼ ꓚꓬꓴ ꓟꓶˍ ꓟ ꓠꓬ ꓪ ꓜꓲꓻ ꓐꓶ ꓞꓳ ꓐꓳꓺ ꓡꓰ ꓓꓴ ꓓꓽ ꓟ ꓒꓬꓱꓼ ꓡ ꓥꓳ꓾ ꓟꓽ ꓥ ꓡ? 13 ꓖꓳ ꓡꓱ ꓥ ꓟꓲ ꓥꓪ ꓠꓬ ꓠꓴ ꓪꓽ ꓐꓶꓽ ꓞꓳ ꓐꓴ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓠꓬ ꓐꓶ ꓞꓳ ꓐꓴ ꓐꓱ ꓶ ꓝꓲ ꓓꓴ ꓠꓬꓲ꓾ 14 ꓟꓬꓱꓽ ꓕꓱ ꓟ ꓗꓪ ꓐꓰ ꓥꓪ ꓡꓰ ꓥꓪ ꓕꓲ ꓫꓵꓽ ꓟ ꓬꓲ-ꓢꓷ-ꓡꓰ ꓐꓴ ꓔꓯ ꓟꓬ ꓔꓳꓹ ꓡ ꓝꓲ ꓢꓲ꓾ ꓮ ꓡꓲ ꓗꓹˍ ꓟꓲ ꓬꓲ ꓪꓽ ꓗꓪ ꓟ ꓕꓲ ꓐꓱ ꓘꓳꓽ ꓠꓻ ꓔꓯ ꓚꓬꓴ ꓟꓶ ꓡꓰ ꓝꓲ ꓠꓹ ꓟ꓾ ꓥꓪ ꓠꓬ ꓥꓪ ꓟꓬꓱꓽ ꓐꓬꓱꓼ ꓘꓶꓽ ꓕꓱ ꓟ ꓔꓯ ꓮꓽ ꓘꓶꓸ ꓒꓵꓽˍ ꓟ ꓚꓬꓹ ꓔ ꓡꓳ꓿ 15 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓟꓽ ꓘꓳ ꓣꓴˍ ꓟ ꓠꓬ ꓟꓲ ꓠꓯ ꓡ ꓞꓳ ꓔꓯ ꓪꓴ-ꓢˍ ꓐꓰ ꓧꓳꓹ ꓡꓰ ꓝꓲˍ ꓟ ꓥ ꓕꓯ ꓠꓽ꓾ ꓬꓲ ꓪꓽ ꓘꓳ ꓣꓴ ꓡ ꓐꓷˍ ꓠꓬ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓟ ꓗꓷ ꓡꓰˍ ꓥꓳ꓾ ꓟꓽ ꓥ ꓡ? 16 ꓬꓲ ꓪꓴꓸ ꓔꓲ ꓚꓰꓸ ꓖꓶˍ ꓟ ꓫꓪ ꓧꓶꓽ ꓢꓲꓽ ꓫꓬˍ ꓕꓯ ꓠꓽ꓾ ꓑ ꓑ ꓕꓲ ꓘꓴꓸ ꓡꓱꓸꓼˍ ꓟꓲ ꓢꓲꓽ ꓫꓬˍ ꓥꓳ꓿ ꓢꓲꓹ ꓜꓲ ꓬꓲꓸ ꓚꓰ ꓢꓲꓽ ꓫꓬˍ ꓕꓯ ꓠꓽ꓾ ꓢꓲꓹ ꓡꓯꓼ ꓗꓸ ꓥ ꓟꓲ ꓢꓲꓽ ꓫꓬꓻˍ ꓥꓳ꓿ 17 ꓖꓳ ꓡꓱ ꓥ ꓟꓲ ꓡꓯꓼ ꓗꓸ ꓕꓲ ꓐꓱ ꓔꓯ ꓧꓳꓽ ꓗꓷ ꓢꓲ꓾ ꓮ ꓛꓬꓽ ꓗꓳꓸ ꓡꓯꓼ ꓗꓸ ꓠꓴ ꓪꓽ ꓔꓯ ꓬꓲ ꓪꓽ ꓗꓳ ꓡꓳ ꓗꓪ ꓝꓸ ꓗꓷ ꓢꓲ ꓠꓬꓲ꓾ ꓬꓲ ꓪꓽˍ ꓐꓰ ꓕꓲ ꓡꓰꓹꓼ ꓮꓽ ꓛꓬꓽ ꓜꓲꓻ ꓬꓲ ꓚꓰ ꓗꓪ ꓟ ꓜꓲꓻ ꓬꓲꓻ ꓑꓯꓹ ꓟꓶ ꓢꓴ ꓒꓬꓱꓼ ꓡ ꓕꓯ ꓠꓽ꓾ 18 ꓠꓴ ꓪꓽ ꓠꓽ ꓡꓯꓼ ꓗꓸ ꓑꓶꓸ ꓓꓴ ꓕꓽ ꓘꓶꓽ ꓘꓹ꓿ ꓧꓳꓽ ꓩꓴ ꓗꓷ ꓟ ꓡꓯꓼ ꓗꓸ ꓔꓯˍ ꓟꓲ ꓟꓳꓻ ꓟꓽ ꓟꓵ ꓕꓽ ꓬꓰ꓿ ꓠꓴ ꓪꓽ ꓘꓶꓽ ꓘꓹ ꓕꓯ ꓠꓽ꓾ ꓠꓴ ꓪꓽ ꓡꓰ ꓬꓲꓸ ꓚꓰ ꓔꓯ ꓦꓵˍ ꓟ ꓟꓽ ꓥ꓾ ꓬꓲꓸ ꓚꓰ ꓡꓰ ꓠꓴ ꓪꓽ ꓔꓯ ꓦꓵˍ ꓟ ꓥ ꓟ ꓔꓯ ꓢꓷꓸ ꓠ ꓗꓹ ꓡꓳ꓿ 19 ꓠꓴ ꓪꓽ ꓕꓱ ꓟ ꓔꓯ ꓢꓷˍ ꓕꓯ ꓠꓽ꓾ ꓡꓯꓼ ꓗꓸ ꓧꓳꓽ ꓞꓰꓻ ꓗꓷ ꓟ ꓠꓬ꓾ ꓥꓪ ꓠꓴꓽ ꓔꓯ ꓝꓸ ꓟꓶ ꓡꓰ ꓝꓲ ꓠꓹ ꓟ ꓥ ꓡꓳ꓾ ꓐꓰ ꓠꓴ ꓪꓽ ꓐꓯ ꓡ ꓥꓳ꓿ 20 ꓬꓲ ꓖꓳ ꓡꓱ ꓥꓳ꓿ ꓬꓲ-ꓢꓷ-ꓡꓰ ꓐꓴ ꓟꓽ ꓙꓵꓻ ꓟ ꓑꓶꓸ ꓓꓴ ꓬꓲ ꓪꓽ ꓔꓯ ꓧꓳꓽ ꓩꓴ ꓗꓷꓳ꓿ ꓠꓴ ꓪꓽ ꓠꓽ ꓙꓵꓻ ꓠꓲꓹ ꓙꓳˍ ꓠꓬꓲ ꓬꓲ ꓜꓲꓻ ꓔꓯ ꓝꓸ ꓡꓰꓳ꓿ ꓖꓳ ꓡꓱ ꓠꓬꓲ ꓟꓽ ꓠꓲꓹ ꓘꓹ ꓘ꓾ ꓙꓳꓺ ꓠꓲꓹ ꓡꓰ ꓞꓳ ꓙꓳ꓿ 21 ꓮ ꓡꓲꓳ ꓐꓯ ꓠꓬ ꓬꓲ ꓪꓴꓸ ꓕꓯ ꓟ ꓡꓯꓼ ꓗꓸ ꓔꓯ ꓪꓴ-ꓢ ꓟꓽ ꓗꓹ ꓐꓽ ꓕꓯ ꓠꓽ꓾ ꓠꓴ ꓪꓽ ꓔꓯˍ ꓟꓲ ꓟꓽ ꓗꓹ ꓐꓽ꓿ 22 ꓖꓳ ꓡꓱ ꓠꓬꓲ ꓪꓴ-ꓢ ꓬꓲ ꓠꓲꓹ ꓙꓽ ꓟꓬ ꓗꓳˍ ꓟ ꓐꓰ꓾ ꓬꓲ ꓠꓲꓹ ꓦꓶꓻ ꓠꓲꓹ ꓛꓰꓹˍ ꓟ ꓔꓯ ꓓꓵꓽ ꓙꓽ ꓠꓬꓲ꓿ ꓡꓱꓸ ꓗꓷ ꓢꓴ ꓔꓯ ꓟꓳꓸ ꓠꓬ ꓦꓶˍ ꓡꓳ꓿ ꓬꓲ ꓣꓱꓽ ꓛꓰ ꓠꓯꓸꓼ ꓗꓪ ꓠꓴ ꓪꓽ ꓟꓽ ꓠꓽ ꓠ ꓔꓬ ꓕꓯ ꓠꓽ ꓠꓴ ꓪ ꓔꓯ ꓬꓲ ꓠꓲꓹ ꓙꓽ ꓟꓬ ꓗꓳˍ ꓥꓳ꓿ ꓟꓽ ꓥ ꓠꓬ ꓠꓴ ꓪꓽ ꓔꓯˍ ꓟꓲ ꓧꓳꓽ ꓩꓴ ꓗꓷ ꓡ ꓥꓳ꓿ 23 ꓬꓲ-ꓢꓷ-ꓡꓰ ꓡ ꓞꓳ ꓐꓴˍ ꓟꓲ꓾ ꓙꓵꓻ ꓠꓲꓹ ꓟꓽ ꓙꓳꓻ ꓟ ꓗꓪ ꓡꓯꓽ ꓫꓵ ꓟꓽ ꓔꓬ ꓕꓯ ꓠꓽ꓾ ꓬꓲ ꓜꓲꓻ ꓗꓪ ꓝꓸ ꓡꓰ ꓝꓲˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓬꓲ ꓪꓽ ꓔꓯ ꓫꓬꓹ ꓝꓸ ꓐ ꓡ ꓡꓳ꓿ 24 ꓖꓳ ꓡꓱ ꓠꓬꓲ ꓮꓽ ꓛꓬꓽ ꓗꓳꓸ ꓜꓲꓻ ꓗꓪ ꓟ ꓡꓯꓼ ꓗꓸ ꓠꓴ ꓪꓽ ꓔꓯ ꓛꓵꓺ ꓔꓯꓹ ꓡ ꓢꓲ꓾ ꓝꓸ ꓚꓰꓼˍ ꓟ ꓡꓰ ꓐꓰ ꓟꓽ ꓥ ꓥ꓾ ꓮꓽ ꓛꓬꓽ ꓘꓴꓽ ꓟꓶꓽ ꓜꓲꓻ ꓗꓪ ꓝꓸ ꓗꓷ ꓝꓲ ꓐ ꓡ ꓕꓯ ꓠꓽ꓾ ꓮ ꓛꓬꓽ ꓘꓴꓽ ꓟꓶꓽ ꓬꓲ ꓡꓯꓼ ꓗꓸ ꓔꓯ ꓠꓬ꓾ ꓚꓲꓸ ꓛꓬ ꓮꓽ ꓛꓬꓽ ꓜꓲ ꓗꓪ ꓪꓻ ꓜꓲ ꓝꓸ ꓡꓰ ꓝꓲ ꓓꓻˍ ꓥꓳ꓾ ꓟꓽ ꓥ ꓡ? 25 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓽ ꓙ ꓜꓲꓼ ꓢꓴ ꓥ ꓡꓳ꓾ ꓐꓰ ꓓꓵꓽ ꓙ ꓢꓲ ꓟꓽ ꓘꓶ ꓘꓹ ꓠꓹ ꓟ꓾ ꓚꓵ ꓘꓶꓽ ꓕꓲ ꓫꓵꓽ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ-ꓢꓷ-ꓡꓰ ꓡ ꓞꓳ ꓕꓲ ꓐꓱ ꓠꓲꓹ ꓟ ꓩꓴ ꓡꓰˍ ꓟ ꓠꓬ꓾ ꓪꓴ-ꓢ ꓔꓯ ꓦ ꓡꓱ ꓡ ꓟ ꓐꓶꓽ ꓞꓳ ꓐꓴ ꓵꓺ ꓟꓬꓱꓺ ꓐꓲ ꓡꓰ ꓗꓪ ꓛꓲˍ ꓡꓰꓽ ꓥ ꓡꓳ꓿ 26 ꓖꓳ ꓡꓱ ꓢꓲ ꓬꓲ-ꓢꓷ-ꓡꓰ ꓐꓴ ꓮꓽ ꓙꓵ ꓡꓱꓸꓼ ꓚꓬꓴ ꓟꓶˍ ꓥꓳ꓿ ꓕꓱ ꓟ ꓠꓬ ꓕꓳ ꓶ ꓗꓪ꓾ ꓜꓲ-ꓬꓴ ꓗꓪ ꓐꓰ ꓚꓬꓴ ꓢꓲ ꓒꓽ ꓓꓳ ꓡ ꓥꓳ꓿ ꓬꓲ ꓡꓰ ꓬ-ꓗꓴ ꓔꓯˍ ꓐꓰ ꓥꓶˍ ꓟ ꓮꓽ ꓙꓵ ꓣꓴ ꓦ ꓗꓷˍ ꓥꓳ꓿ 27 ꓕꓱ ꓟ ꓠꓬ ꓥꓪ ꓡꓰ ꓬꓲ ꓪꓽ ꓝꓴꓲ ꓣꓴ ꓦ ꓗꓷˍ ꓕꓯ꓾ ꓬꓲ ꓪꓽˍ ꓐꓰ ꓬꓰ ꓠꓹ ꓟ ꓥꓪ ꓘꓶꓽ ꓫꓵꓼ ꓥꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 28 ꓶꓼ ꓓꓳꓽ ꓫꓱꓹ ꓓꓳ ꓔꓯ ꓟꓳꓸ ꓐꓯˍ ꓠꓬ꓾ ꓠꓴ ꓪꓽ ꓐꓱ ꓶ ꓬꓲ ꓪꓽ ꓠꓽ ꓪꓴ-ꓢ ꓔꓯ ꓛꓴꓽ ꓙꓳ ꓢꓴ ꓗꓷ ꓡꓰꓳ꓿ ꓢꓲꓺ ꓔ ꓟ ꓔꓯ ꓟꓳꓸ ꓐꓯ ꓠꓽ ꓠꓬꓲ꓾ ꓒꓵꓽ ꓒ ꓐꓴ ꓑꓶꓸ ꓓꓴ ꓬꓲ ꓪꓽ ꓔꓯ ꓠꓬ ꓠꓲꓹ ꓠꓵ ꓔ ꓟ ꓥ ꓡꓳ꓿ 29 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓖꓶꓽˍ ꓟ ꓡꓯꓼ ꓫꓴ ꓔꓯ ꓬꓲ ꓟꓽ ꓣꓴ ꓡꓲꓸ ꓙꓰ꓾ ꓬꓲ ꓡꓰ ꓘꓴ ꓔ ꓟ ꓔꓯˍ ꓟꓲ ꓬꓲ ꓟꓽ ꓒꓳꓹ꓿ 30 ꓧꓶꓸ ꓕꓯ ꓠꓴ ꓪꓽ ꓠꓬ ꓪꓴ-ꓢ ꓔꓯ ꓟꓽ ꓠ ꓡꓳˍ ꓟꓲ꓾ ꓮ ꓟꓶ ꓠꓬ ꓬꓴ-ꓔ ꓡ ꓞꓳ ꓐꓴ ꓟꓽ ꓠ ꓡꓳꓹˍ ꓟ ꓗꓪ ꓐꓰ ꓠꓴ ꓪꓽ ꓠꓽ ꓫꓱꓸ ꓤˍ ꓟ ꓟꓶˍ ꓟ ꓡꓰ ꓐꓰ꓾ 31 ꓮ ꓟꓶ ꓬꓲ ꓪꓽ ꓟꓽ ꓒꓵꓽ ꓛꓳ ꓢꓴ ꓒꓬꓱꓼ ꓡ ꓟ ꓠꓬ꓾ ꓠꓴ ꓪꓽ ꓔꓯ ꓟꓳꓸ ꓖꓶˍ ꓟ ꓫꓱꓸ ꓤ ꓠꓲꓹ ꓗꓪ ꓐꓰ ꓬꓲ ꓪꓽ ꓔꓯˍ ꓟꓲ ꓫꓱꓸ ꓤˍ ꓟ ꓟꓶ ꓝꓲ ꓠꓹ ꓟ ꓥ ꓡꓳ꓿ 32 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓮꓽ ꓙꓵ ꓢꓴ ꓔꓯ ꓫꓱꓸ ꓤˍ ꓟ ꓟꓳꓸ ꓖꓶ ꓪ ꓠꓹ ꓟ꓾ ꓬꓲ ꓡꓰ ꓮꓽ ꓙꓵ ꓢꓴ ꓔꓯ ꓟꓽ ꓒꓵꓽ ꓛꓳˍ ꓟ ꓗꓪ ꓐꓱꓺ ꓗꓷꓳ꓿ 33 ꓪꓴ-ꓢ ꓬꓲ ꓙꓽ ꓗꓴ ꓠꓲꓹˍ ꓐꓰ ꓢꓷꓸ ꓠꓲꓹ ꓮ ꓠꓯꓸ ꓛꓲ ꓐꓳ ꓞꓹ ꓟ ꓔꓯ ꓓꓵꓽ ꓙ ꓖꓴ ꓟꓽ ꓓ꓿ ꓬꓲ ꓐꓯ ꓞꓷꓹˍ ꓟ ꓐꓰ ꓬꓲ ꓚꓱꓹ ꓔꓯ ꓮ ꓡꓲ ꓧꓪ ꓟꓰꓹ ꓖꓴ ꓓ ꓢꓰꓽ꓿ 34 ꓢꓲ ꓒꓽ ꓙꓽ ꓠꓲꓹ ꓮꓽ ꓟ ꓢꓷꓸ ꓠꓬꓲ ꓡ? ꓬꓲ ꓔꓯ ꓖꓪ ꓙꓱ ꓙ ꓢꓴ ꓮꓽ ꓟ ꓬꓰ ꓠꓬꓲ ꓡ? 35 ꓥ ꓠꓬ ꓪꓴ-ꓢ ꓡꓰ ꓚꓱꓹ ꓖꓶ ꓡ ꓠꓹ ꓟ꓾ ꓧꓶ ꓕꓯˍ ꓡꓰ ꓬꓲ ꓔꓯ ꓛꓵꓽ ꓖꓶ ꓢꓴ ꓮꓽ ꓟ ꓥ ꓡ? 36 ꓮ ꓡꓲꓳ ꓐꓯ ꓠꓬ ꓙꓳˍ ꓟ ꓥ ꓕ ꓑꓳꓸ ꓠꓬ ꓬꓲ ꓗꓪ ꓐꓰ ꓡꓻˍ ꓟ ꓥ ꓢꓲ꓾ ꓮꓽ ꓙꓵ ꓡꓱꓸꓼ ꓬꓲ ꓐꓱ ꓶ ꓥ ꓢꓲ ꓠꓬꓲ꓾ ꓬꓲ ꓗꓪ ꓐꓰ ꓙꓳ ꓔꓬ ꓟ ꓥ ꓡꓳ꓿ ꓬꓲ ꓔꓯ ꓠꓬ ꓕꓲ ꓞꓲꓼ ꓕꓲ ꓑ ꓟꓬꓱ ꓓꓳꓽ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓣꓳ-ꓟ 12

1 ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓖꓳ ꓓꓱ ꓠꓬ ꓢꓯꓸ ꓢꓯꓸˍ ꓡꓰ꓾ ꓢꓲꓽ ꓢꓲ ꓫꓬꓻ ꓫꓬˍ ꓡꓰ ꓪꓴ-ꓢ ꓠꓲꓹ ꓒꓴˍ ꓟ ꓔꓲꓺ ꓓꓴ ꓬꓰ ꓢꓲ ꓔꓲ ꓖꓶ ꓠꓹ ꓟ꓾ ꓥꓪ ꓠꓬ꓾ ꓪꓴ-ꓢ ꓫꓱꓸ ꓤˍ ꓟ ꓗꓪ ꓐꓰ ꓠꓴ ꓪꓽ ꓔꓯ ꓘꓶꓸ ꓖꓶˍ ꓥꓳ꓿ ꓠꓴ ꓪꓽ ꓠꓬ ꓦꓻ ꓗꓪ ꓪꓴ-ꓢ ꓔꓯ ꓖꓳ ꓡꓱ ꓣꓱꓽ ꓙ ꓙꓲꓽ ꓙꓳˍ ꓡꓳ꓿ 2 ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓟꓽ ꓦ ꓡꓱ ꓢꓴ ꓡꓲꓽ ꓒꓰ ꓕꓽ ꓣꓱꓽ꓿ ꓠꓴ ꓪꓽ ꓠꓬ ꓪꓴ-ꓢ ꓬꓲ ꓙꓲꓻˍ ꓟ ꓐꓰ꓾ ꓬꓲ ꓠꓲꓹ ꓒꓴˍ ꓟ ꓐꓰ꓾ ꓬꓲ ꓙꓲꓻ ꓓꓰˍ ꓟ ꓠꓲꓹ ꓡꓶꓽ ꓮ ꓡꓲ ꓥ ꓟ ꓢꓷꓸ ꓡꓰ ꓠꓹ ꓟ꓾ ꓠꓴ ꓪꓽ ꓕꓲ ꓙꓽ ꓠꓲꓹ ꓡꓱꓸꓼ ꓬꓲ ꓫꓵꓼ ꓒꓬꓱꓼ ꓡ ꓟ ꓗꓪ ꓐꓰ ꓑꓶꓸ ꓡꓰ ꓠ ꓗꓹ ꓡꓳ꓿ 3 ꓪꓴ-ꓢ ꓡꓰ ꓥꓪ ꓔꓯ ꓖꓶ ꓡ ꓟ ꓬꓲ ꓣꓱꓽ ꓛꓰ ꓗꓪ ꓐꓰ ꓠꓴ ꓪꓽ ꓮꓽ ꓙꓵ ꓢꓴ ꓔꓯ ꓘꓶꓸ ꓖꓶˍ ꓠꓬꓲ꓾ ꓒꓵꓽ ꓙꓲꓽ ꓙꓳˍ ꓟ ꓕꓯ ꓢꓲ ꓚꓲꓸ ꓛꓬ ꓔꓯ ꓒꓵꓽˍ ꓟ ꓕꓽ ꓚꓬꓹ꓿ ꓪꓴ-ꓢ ꓡꓰ ꓠꓴ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓙꓵꓻ ꓠꓲꓹ ꓮ ꓡꓲ ꓐꓱꓻ ꓖꓶ ꓡ ꓠꓬ ꓖꓳ ꓡꓱ ꓞꓳ ꓢꓲꓽ ꓬꓰ ꓢꓲ ꓚꓲꓸ ꓛꓬ ꓔꓯ ꓚꓬꓹ ꓠꓬꓲ꓿ 4 ꓮ ꓡꓲꓳ ꓐꓯ ꓠꓬ ꓣꓳ ꓖꓳ ꓓꓱ ꓕꓲ ꓟꓻꓼ ꓗꓪ ꓡꓯꓼ ꓗꓸ ꓮꓽ ꓟꓬꓹ ꓙꓳˍ ꓟꓲ꓾ ꓡꓯꓼ ꓗꓸ ꓮꓽ ꓙꓵ ꓠꓬ ꓣꓱꓽ ꓬꓯꓼ ꓖꓴ ꓕꓲ ꓫꓵꓽˍ ꓡꓰꓽ ꓟꓽ ꓥ꓿ 5 ꓖꓳ ꓟ ꓡꓰ ꓐꓰ ꓣꓳ ꓮꓽ ꓟꓬꓹ ꓣꓳ ꓥ ꓟꓲ ꓙꓲ-ꓢꓴ ꓠꓯꓸꓼ ꓗꓪ ꓕꓲ ꓖꓳ ꓓꓱˍ ꓡꓰꓽ ꓥ ꓢꓲ꓾ ꓣꓳ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓜꓯꓻ ꓡꓯ ꓘꓳ ꓞꓹ ꓟ ꓡꓯꓼ ꓗꓸ ꓥ ꓡꓳ꓿ 6 ꓖꓳ ꓡꓱ ꓢꓲ ꓣꓳ ꓔꓯ ꓖꓶ ꓡ ꓟ ꓣꓱꓽ ꓛꓰ ꓔꓯ ꓛꓳ ꓢꓲ꓾ ꓟꓽ ꓫꓱꓸ ꓡꓯꓽ ꓘꓳˍ ꓟ ꓡꓯꓼ ꓫꓴˍ ꓟꓲ ꓬꓲ ꓖꓳ ꓡꓱ ꓙꓳˍ ꓠꓬꓲ꓾ ꓟꓷꓽ ꓠꓷꓹ ꓝꓸˍ ꓟ ꓡꓯꓼ ꓫꓴ ꓙꓳ ꓢꓴ ꓠꓬ ꓬꓲ ꓔꓯ ꓙꓵꓻ ꓠꓲꓹ ꓐꓱꓻ ꓖꓶꓽ ꓔ ꓟ ꓔꓯ ꓛꓳ ꓢꓲ ꓟꓷꓽ ꓠꓷꓹ ꓝꓸ ꓝꓲ꓿ 7 ꓣꓱꓽ ꓙˍ ꓟ ꓟꓬꓱꓽ ꓥ ꓕꓯ ꓠꓽ ꓣꓱꓽ ꓙ ꓝꓲ꓿ ꓟꓸ ꓢꓴ ꓥ ꓕꓯ ꓠꓽ ꓟꓸ ꓝꓲ꓿ 8 ꓘꓶꓸ ꓢꓴ ꓥ ꓕꓯ ꓠꓽ ꓘꓶꓸ ꓝꓲ꓿ ꓣꓱꓽ ꓟꓽ ꓡꓳꓼ ꓢꓴ ꓔꓯ ꓖꓶˍ ꓟ ꓡꓯꓽ ꓙꓳ ꓢꓴ ꓠꓬ ꓡꓯꓼ ꓡꓳꓻ ꓡꓳˍ ꓡꓰꓽ ꓖꓶ ꓝꓲ꓿ ꓧꓳꓽˍ ꓟ ꓡꓯꓽ ꓫꓴ ꓙꓳ ꓢꓴ ꓠꓬ ꓕꓰꓻ ꓕꓰˍ ꓡꓰ ꓧꓳꓽ ꓝꓲ꓿ ꓫꓱꓸ ꓤ ꓢꓴ ꓠꓬ ꓠꓲꓹ ꓒꓴ ꓒꓴˍ ꓡꓰ ꓫꓱꓸ ꓤ ꓝꓲ꓿ 9 ꓠꓵ ꓠꓲꓹ ꓗꓪ ꓠꓲꓹ ꓟ ꓠꓬꓲꓽ ꓔꓱꓹ ꓕꓽ ꓬꓰ꓿ ꓥꓶˍ ꓟ ꓔꓯ ꓠꓲꓹ ꓜꓳ꓿ ꓙꓲˍ ꓟ ꓔꓯ ꓣꓴ ꓕꓷ ꓔ꓿ 10 ꓬꓲꓼ ꓤ ꓠꓬꓲ ꓤ ꓐꓴˍ ꓐꓰ ꓙ ꓡꓯꓼ ꓘꓳˍ ꓟ ꓗꓪ ꓠꓴꓽˍ ꓟ ꓠꓲꓹ ꓟ ꓡꓰ ꓙꓽ ꓗꓳ ꓡꓯ ꓘꓳ꓿ ꓕꓲ ꓣꓳ ꓛꓳꓽ ꓕꓲ ꓣꓳ ꓞꓳ ꓒꓵꓽ ꓡꓯꓼ ꓘꓳ꓿ 11 ꓞꓳ ꓕꓰꓻ ꓬꓰˍ ꓟ ꓗꓪ ꓕꓽ ꓐꓴꓻ꓿ ꓦꓻ ꓗꓪ ꓠꓲꓹ ꓟ ꓡꓱ ꓢꓲ ꓢꓲ ꓒꓽ ꓔꓯ ꓣꓱꓽ ꓙ꓿ 12 ꓥꓳ ꓡꓳꓸˍ ꓟ ꓗꓪ ꓗꓹ ꓛꓲ ꓢꓲ꓾ ꓫꓸ ꓙꓵˍ ꓟ ꓗꓪ ꓜꓲꓽ ꓘꓴ ꓢꓲ ꓠꓬꓲ꓾ ꓪꓽ ꓘꓴˍ ꓟ ꓗꓪ ꓮ ꓕꓯˍ ꓟꓲ ꓦ ꓡꓱ ꓐꓳ ꓐꓳ ꓡꓰ ꓢꓯꓼ ꓕꓵꓼ꓿ 13 ꓦ ꓡꓱ ꓢꓴ ꓐꓴ ꓣꓱꓽ ꓟꓽ ꓡꓳꓼ ꓟ ꓗꓪ ꓬꓰ ꓙ ꓡꓯ ꓘꓳ꓿ ꓪꓰ ꓤ ꓔꓯ ꓠꓲꓹ ꓒꓴ ꓒꓴˍ ꓡꓰꓽ ꓘꓳ ꓣꓴ꓿ 14 ꓠꓴ ꓪꓽ ꓔꓯ ꓗꓸ ꓧꓪ ꓢꓴ ꓔꓯ ꓶꓼ ꓥꓳ ꓙꓱꓽ ꓖꓶ꓿ ꓶꓼ ꓥꓳꓽˍ ꓡꓰ ꓙꓱꓽ ꓖꓶ ꓢꓲ꓾ ꓬꓲ ꓪꓽ ꓔꓯ ꓟꓽ ꓙꓲˍ ꓟ ꓕꓽ ꓙꓱꓽ꓿ 15 ꓗꓹ ꓛꓲ ꓢꓴˍ ꓐꓰ ꓕꓲ ꓛꓳꓺꓼ ꓗꓹ ꓛꓲ꓿ ꓥꓴꓻ ꓢꓴˍ ꓐꓰ ꓕꓲ ꓛꓳꓺꓼ ꓥꓴ꓿ 16 ꓕꓲ ꓠꓲꓹ ꓟˍ ꓡꓰꓽ ꓬꓰ꓿ ꓟꓽ ꓠꓲꓹ ꓘꓹ ꓘꓹ ꓱ'ˍ ꓟ ꓡ ꓞꓳ ꓐꓴ ꓛꓳꓽ ꓒꓯꓹ ꓬꓰ꓿ ꓚꓲꓸ ꓛꓬ ꓠꓬ ꓙ ꓜꓲꓼ ꓢꓴ ꓥ ꓡꓳ꓾ ꓐꓰ ꓕꓽ ꓓꓵꓽ ꓙꓽ꓿ 17 ꓮ ꓡꓲ ꓕꓲ ꓣꓳ ꓔꓯˍ ꓟꓲ ꓟꓽ ꓙꓲꓻ ꓟ ꓔꓯ ꓟꓽ ꓙꓲꓻ ꓟ ꓡꓰ ꓕꓽ ꓚꓱꓹ ꓖꓶ꓿ ꓞꓳ ꓤ ꓮꓽ ꓙꓵ ꓟꓲꓽ ꓙꓬ ꓗꓪ ꓜꓳꓽˍ ꓟ ꓐꓰ ꓘꓳ ꓣꓴ ꓓꓻˍ ꓡꓳ ꓫꓵꓽ ꓬꓰ ꓠꓹ ꓟ ꓧꓪꓸ ꓛꓲꓽ ꓔ꓿ 18 ꓞꓳ ꓤ ꓮꓽ ꓙꓵˍ ꓐꓰ ꓧꓳꓹ ꓡꓯ ꓘꓳ ꓡꓰ ꓠꓹ ꓟ꓾ ꓬꓰ ꓐ ꓡ ꓕ ꓑꓳꓸ ꓬꓰ꓿ 19 ꓠꓲꓹ ꓠꓵ ꓢꓴ ꓐꓴꓳ꓾ ꓚꓲꓸ ꓛꓬ ꓡꓰ ꓪꓽ ꓛꓴꓺ ꓕꓽ ꓚꓱꓹ꓿ ꓢꓲ ꓒꓽ ꓦꓶ ꓠꓲꓹ ꓔꓯ ꓙꓵꓺ ꓖꓶ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ ꓢꓲ ꓒꓽ ꓡꓰ꓾ ꓪꓽ ꓛꓴꓽ ꓚꓱꓹˍ ꓟ ꓠꓬ ꓥꓪ ꓔꓯ ꓟ ꓥꓳ꓿ ꓥꓪ ꓡꓰ ꓚꓱꓹ ꓖꓶˍ ꓥꓳ꓾ ꓐꓯˍ ꓡꓳ꓾ ꓐꓰ ꓐꓳ ꓔ ꓡꓳ꓿ 20 ꓖꓳ ꓡꓱ ꓠꓬꓲ꓾ ꓠꓴ ꓔꓯ ꓛꓴꓽ ꓙꓳ ꓢꓴ ꓦꓰꓼ ꓟꓷꓼˍ ꓕꓯ ꓖꓶ ꓜꓽ꓿ ꓢꓲꓼˍ ꓕꓯ ꓖꓶ ꓓꓳꓻ꓿ ꓠꓴ ꓕꓱ ꓡꓱ ꓬꓰ ꓖꓶˍ ꓠꓬ ꓬꓲ ꓪꓴꓸ ꓓꓵ ꓗꓪ ꓮ ꓔꓳꓸ ꓘꓴꓽ ꓟꓶ ꓜꓲ ꓒꓵꓹ ꓖꓶˍ ꓟ ꓡꓰ ꓐꓰ ꓗꓹ ꓥꓳ꓿ 21 ꓟꓽ ꓙꓲˍ ꓟ ꓡꓰ ꓠꓴ ꓔꓯ ꓕꓽ ꓧꓪꓸ ꓡꓰ ꓝꓲ꓿ ꓙꓲˍ ꓟ ꓡꓰ ꓟꓽ ꓙꓲˍ ꓟ ꓔꓯ ꓧꓪꓸ ꓡꓰ ꓝꓲ꓿

ꓣꓳ-ꓟ 13

1 ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓙꓵꓽˍ ꓟ ꓔꓯ ꓮꓽ ꓙꓵ ꓢꓴ ꓒꓵꓽ ꓛꓳ ꓠꓯꓹ ꓡꓳ꓿ ꓪꓴ-ꓢ ꓗꓪ ꓐꓰ ꓟꓽ ꓥ ꓠꓬ ꓮꓽ ꓟˍ ꓟꓲ ꓮꓸ ꓫꓵꓽ ꓙꓵꓽ ꓪꓽ ꓟꓽ ꓙꓳ꓿ ꓮ ꓡꓲꓳ ꓐꓯˍ ꓠꓬ ꓙꓵꓽ ꓪ ꓣꓱꓽ ꓔꓬ ꓢꓴ ꓔꓯ ꓠꓬ ꓪꓴ-ꓢ ꓡꓰ ꓝꓲ ꓔ ꓟ ꓥ ꓡꓳ꓿ 2 ꓙꓵꓽ ꓪ ꓣꓱꓽ ꓢꓴ ꓔꓯ ꓔꓳꓹ ꓢꓴ ꓠꓬ꓾ ꓪꓴ-ꓢ ꓡꓰ ꓝꓲ ꓔ ꓢꓴ ꓔꓯ ꓔꓳꓹˍ ꓟ ꓥ ꓠꓬꓲ ꓛꓬꓻ ꓒꓵꓽ ꓟꓶˍ ꓥꓳ꓿ 3 ꓙꓲꓻ ꓟ ꓬꓰ ꓢꓴ ꓠꓬ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓙꓳꓺ ꓟꓽ ꓛꓵ꓿ ꓟꓽ ꓙꓲꓻ ꓟ ꓬꓰ ꓢꓴ ꓠꓽ ꓙꓳꓺ ꓠ ꓗꓹ ꓥꓳ꓿ ꓖꓳ ꓡꓱ ꓠꓬꓲ ꓠꓴ ꓠꓬ ꓙꓵꓽ ꓪ ꓙꓳꓻ ꓢꓴ ꓔꓯ ꓙꓳꓺ ꓟꓽ ꓛꓵ ꓠꓹ ꓟ꓾ ꓙꓲꓻ ꓟ ꓬꓰˍ ꓠꓬ꓾ ꓬꓲ ꓡꓰ ꓫꓱꓸ ꓖꓶ ꓡ ꓟ ꓟꓶˍ ꓥꓳ꓿ 4 ꓙꓵꓽ ꓪ ꓣꓱꓽ ꓢꓴ ꓠꓽ ꓠꓴ ꓔꓯ ꓙꓲ ꓖꓴ ꓟꓶ ꓡꓰ ꓝꓲ ꓠꓹ ꓟ ꓪꓴ-ꓢ ꓔꓯ ꓣꓱꓽ ꓙ ꓢꓴ ꓥ ꓡꓳ꓿ ꓬꓲ ꓮꓸ ꓕꓽ ꓓꓱꓼˍ ꓟ ꓠꓬ ꓮ ꓔꓳˍ ꓡꓰꓽ ꓟꓽ ꓥ꓿ ꓠꓴ ꓟꓽ ꓙꓲ ꓟ ꓬꓰˍ ꓕꓯ ꓠꓽ ꓙꓳꓺ ꓠꓯꓹ ꓟ ꓥ ꓡꓳ꓿ ꓬꓲ ꓠꓬ ꓪꓴ-ꓢ ꓔꓯ ꓣꓱꓽ ꓙ ꓢꓴ ꓥ ꓢꓲ꓾ ꓟꓽ ꓙꓲ ꓟ ꓬꓰ ꓢꓴ ꓔꓯ ꓦꓶꓻ ꓠꓲꓹ ꓡꓰ ꓪꓽ ꓛꓴꓽ ꓚꓱꓹ ꓖꓶ ꓢꓴ ꓥ ꓡꓳ꓿ 5 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓙꓵꓽˍ ꓟ ꓔꓯ ꓛꓳ ꓠ ꓗꓹ ꓡꓳ꓿ ꓪꓴ-ꓢ ꓦꓶ ꓠꓲꓹ ꓔꓯ ꓙꓳꓺˍ ꓟ ꓗꓪ ꓐꓰ ꓡꓰ ꓟꓽ ꓞꓲ꓾ ꓦꓰꓽ ꓠꓲꓹ ꓑꓶꓸ ꓓꓴˍ ꓟꓲ ꓬꓲ ꓪꓽ ꓔꓯ ꓒꓵꓽ ꓛꓳ ꓠꓯꓹ ꓡꓳ꓿ 6 ꓕꓱ ꓟ ꓪꓴꓸ ꓠꓬꓲ ꓠꓴ ꓪꓽ ꓝꓲꓸ ꓒꓴ ꓓꓳꓺˍ ꓟ ꓥꓳ꓿ ꓬꓲ ꓪꓽ ꓠꓽ ꓕꓱ ꓕꓲ ꓟꓬꓱꓽ ꓗꓪ ꓐꓰ ꓪꓴ-ꓢ ꓔꓯ ꓣꓱꓽ ꓙ ꓢꓴ ꓐꓴ ꓥ ꓡꓳ꓿ 7 ꓖꓳ ꓡꓱ ꓠꓬꓲ ꓮ ꓡꓲ ꓕꓲ ꓣꓳ ꓔꓯ ꓮꓸ ꓫꓵꓽ ꓐꓵ ꓞꓹ ꓠꓬ ꓖꓳ ꓕꓲ ꓫꓵꓽ ꓬꓲ ꓔꓯ ꓖꓶ꓿ ꓟꓵꓽ ꓒꓵꓽ ꓐꓶꓻ ꓠꓯꓹ ꓢꓴ ꓔꓯ ꓟꓵꓽ ꓒꓵꓽ ꓐꓶꓻ꓿ ꓝꓲꓸ ꓒꓵꓽ ꓐꓶꓻ ꓠꓯꓹ ꓢꓴ ꓔꓯ ꓝꓲꓸ ꓒꓵꓽ ꓐꓶꓻ꓿ ꓙꓳꓺ ꓠꓯꓹ ꓢꓴ ꓔꓯ ꓙꓳꓺ꓿ ꓒꓵꓽ ꓠꓯꓹ ꓢꓴ ꓔꓯ ꓒꓵꓽ꓿ 8 ꓠꓲꓹ ꓠꓵ ꓡꓯꓽ ꓘꓳ ꓟ ꓡꓰꓽ ꓟꓽ ꓥ ꓠꓬ ꓮꓽ ꓟ ꓔꓯˍ ꓟꓲ ꓮꓸ ꓫꓵꓽ ꓕꓽ ꓐꓵ ꓞꓹ ꓝꓲ꓿ ꓢꓴ ꓔꓯ ꓠꓲꓹ ꓠꓵˍ ꓟ ꓠꓬ ꓙꓵꓽ ꓗ ꓔꓯ ꓐꓲ ꓡꓰ ꓝꓲˍ ꓟ ꓥ ꓡꓳ꓿ 9 ꓮ ꓡꓲꓳ ꓐꓯ ꓠꓬ꓾ ꓠꓴ ꓦꓬꓽ ꓛꓳꓽ ꓕꓽ ꓧꓪ꓾ ꓞꓳ ꓤ ꓕꓽ ꓢꓰꓼ꓾ ꓕꓽ ꓘꓴꓽ꓾ ꓕꓽ ꓟꓬ ꓦꓯꓸ꓾ ꓥ ꓠꓬ ꓠꓱꓸ ꓐꓯꓼ ꓕꓵꓼ ꓪ ꓮꓸ ꓫꓵ ꓙꓳˍ ꓟꓲ꓾ ꓠꓴ ꓚꓲꓸ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓢꓴ ꓔꓯ ꓠꓲꓹ ꓠꓵ꓾ ꓐꓯˍ ꓟ ꓕꓱ ꓕꓲ ꓘꓶꓽ ꓗꓪ ꓕꓱꓹ ꓞꓹ ꓡꓳ꓿ 10 ꓠꓵ ꓠꓲꓹ ꓠꓬ ꓢꓴ ꓔꓯ ꓟꓽ ꓙꓲ ꓟ ꓟꓽ ꓬꓰ ꓖꓶ꓿ ꓖꓳ ꓡꓱ ꓠꓬꓲ ꓠꓵ ꓠꓲꓹ ꓠꓬ ꓙꓵꓽ ꓗ ꓔꓯ ꓐꓲ ꓡꓰ ꓝꓲˍ ꓟ ꓥ ꓡꓳ꓿ 11 ꓝꓮꓲ ꓮ ꓟꓶ ꓠꓬ ꓬꓲꓼ ꓟꓶ ꓧꓪꓸ ꓛꓲ ꓡ ꓝꓲꓸ ꓥ ꓟ ꓠꓴ ꓪꓽ ꓢꓷˍ ꓠꓬꓲ ꓖꓳ ꓡꓱ ꓬꓰ꓿ ꓮ ꓡꓲꓳ ꓐꓯ ꓠꓬ ꓣꓳ ꓚꓬꓴ ꓟꓶˍ ꓟ ꓙꓵꓹ ꓠꓬ꓾ ꓬꓲ ꓪꓴꓸ ꓙꓵꓻˍ ꓕꓯ ꓟ ꓢꓶꓸ ꓟꓽ ꓞꓲ ꓮ ꓟꓶ ꓠꓶꓽ ꓡꓺꓳ꓿ 12 ꓢ ꓘꓪ ꓮꓽ ꓡ ꓖꓴ ꓡꓰ ꓢꓲ ꓟꓳꓼ ꓡꓳ ꓠꓶꓽ ꓡꓺꓳ꓿ ꓖꓳ ꓡꓱ ꓠꓬꓲ ꓠꓯ ꓞꓲꓹ ꓟ ꓟꓬꓱꓽ ꓔꓯ ꓣꓳ ꓡꓵꓸ ꓗꓷ ꓢꓲ꓾ ꓠꓬꓲ ꓟꓳ ꓓꓴ ꓬꓲ ꓟꓯꓼ ꓣꓱꓽ ꓓꓴ ꓓꓱꓼ ꓔ ꓡꓯ꓿ 13 ꓣꓳ ꓠꓬ ꓟꓳꓼ ꓡꓳ ꓗꓪ ꓟ ꓡꓰ ꓐꓰ ꓬꓲ ꓖ ꓙꓳꓻ ꓙꓳˍ ꓡꓰꓽ ꓚ ꓙꓰ ꓡꓯ꓿ ꓡꓷꓻ ꓖꓪꓺ ꓡꓶꓽ ꓠꓬꓲ꓾ ꓙꓲ ꓒꓶꓽ ꓬꓲꓼ ꓠꓬꓲ꓾ ꓟꓽ ꓢꓲ ꓟꓽ ꓫꓬ ꓬꓰ ꓠꓬꓲ꓾ ꓦꓯꓸ ꓠꓲꓹ ꓙꓵꓽ ꓠꓬꓲ꓾ ꓐꓯ ꓡꓯ ꓘꓳ ꓠꓬꓲ꓾ ꓟꓬ ꓦꓯꓸ ꓠꓬꓲ ꓕꓽ ꓬꓰ꓿ 14 ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓔꓯ ꓐꓵ ꓞꓶ ꓖꓪꓽˍ ꓟ ꓡꓰ ꓐꓰ ꓖꓪꓽ ꓔ ꓢꓲ꓾ ꓧꓪꓽ ꓖꓳ ꓓꓱ ꓗꓪ ꓦꓯꓸ ꓠꓲꓹ ꓙꓵꓽˍ ꓟ ꓔꓯ ꓠꓲꓹ ꓘꓪꓽ ꓫꓵ ꓡꓰ ꓓꓴ ꓬꓲ ꓚꓱꓹ ꓕꓽ ꓫꓬꓹ꓿

ꓣꓳ-ꓟ 14

1 ꓙꓵꓻ ꓠꓲꓹ ꓢꓯꓼ ꓐ ꓢꓴ ꓔꓯ ꓠꓴ ꓪꓽ ꓘꓳ ꓣꓴ꓿ ꓖꓳ ꓡꓱ ꓥ ꓟꓲ ꓓꓵꓽ ꓙˍ ꓟ ꓟꓽ ꓫꓱꓸ ꓡꓯꓼ ꓘꓳ ꓟ ꓗꓪ ꓕꓽ ꓙꓽ ꓘꓶ ꓡꓯ ꓘꓳ꓿ 2 ꓕꓲ ꓣꓳ ꓠꓬ ꓮꓸ ꓫꓵˍ ꓟꓲ ꓜꓽ ꓓꓻˍ ꓟ ꓙꓵꓻ ꓠꓲꓹ ꓙꓳˍ ꓡꓳ꓿ ꓙꓵꓻ ꓠꓲꓹ ꓗꓪ ꓢꓯꓼ ꓐꓽ ꓢꓴ ꓠꓱꓸ ꓐꓯꓼ ꓕꓲ ꓣꓳ ꓠꓽ ꓪꓳꓽ ꓒꓬꓽ ꓠꓲꓹ ꓛꓵꓼˍ ꓡꓰ ꓜꓽ ꓓꓻˍ ꓡꓳ꓾ ꓓꓵꓽ ꓙꓽˍ ꓡꓳ꓿ 3 ꓪꓴ-ꓢ ꓡꓰ ꓬꓲ ꓔꓯ ꓘꓳ ꓣꓴ ꓗꓷ ꓠꓬꓲ꓾ ꓜꓽ ꓢꓴ ꓠꓬ ꓟꓽ ꓜꓽ ꓢꓴ ꓔꓯ ꓟꓳꓻ ꓟꓽ ꓟꓵ ꓕꓽ ꓬꓰ꓿ ꓟꓽ ꓜꓽ ꓢꓴˍ ꓟꓲ ꓜꓽ ꓢꓴ ꓔꓯ ꓕꓽ ꓙ ꓘꓶꓽ꓿ 4 ꓠꓴ ꓮꓽ ꓟ ꓥ ꓠꓬꓲ ꓢꓴ ꓔꓯ ꓣꓱꓽ ꓙ ꓢꓴ ꓔꓯ ꓙꓽ ꓘꓶꓽˍ ꓡ? ꓬꓲ ꓠꓬ ꓦꓰꓼ ꓕꓶꓻ ꓞꓹˍ ꓟꓲ꓾ ꓡꓱꓸ ꓙꓰˍ ꓟꓲ ꓬꓲꓸ ꓢꓲ ꓒꓽ ꓶꓽ ꓥ ꓡꓳ꓿ ꓢꓲ ꓒꓽ ꓠꓬ ꓬꓲ ꓔꓯ ꓦꓰꓼ ꓕꓶ ꓡꓰ ꓝꓲ ꓐ ꓡ ꓠꓬꓲ꓾ ꓬꓲ ꓠꓽ ꓚꓵ ꓚꓵ ꓦꓰꓼ ꓕꓶ ꓡꓰˍ ꓥꓳ꓿ 5 ꓕꓲ ꓣꓳ ꓠꓬ꓾ ꓕꓱ ꓕꓲ ꓠꓬꓲ ꓠꓽ ꓖꓳ ꓕꓲ ꓠꓬꓲ ꓕꓯꓽ ꓢꓲ ꓒꓵꓽˍ ꓡꓳ꓾ ꓐꓰ ꓚꓬꓹ ꓡꓳ꓿ ꓠꓱꓸ ꓐꓯꓼ ꓕꓲ ꓣꓳ ꓠꓬ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓕꓲ ꓡꓰꓹꓼ ꓥꓳ꓾ ꓐꓰ ꓚꓬꓹ ꓡꓳ꓿ ꓮ ꓡꓲ ꓕꓲ ꓣꓳˍ ꓟꓲ ꓚꓲꓸ ꓛꓬ ꓠꓲꓹ ꓟ ꓗꓪ ꓓꓵꓽ ꓙꓽ ꓞꓷꓹ ꓠꓯꓹ ꓡꓳ꓿ 6 ꓦꓬꓼ ꓠꓬꓲ ꓔꓯ ꓒꓵꓽ ꓢꓴ ꓠꓬ ꓢꓲ ꓒꓽ ꓐꓱ ꓶ ꓒꓵꓽˍ ꓟ ꓥ ꓡꓳ꓿ ꓜꓽ ꓢꓴˍ ꓟꓲ ꓪꓴ-ꓢ ꓔꓯ ꓫꓸ ꓟꓳ ꓢꓲ ꓜꓽˍ ꓠꓬꓲ꓾ ꓢꓲ ꓒꓽ ꓔꓯ ꓒꓵꓽ ꓠꓹ ꓟ ꓜꓽˍ ꓟ ꓥ ꓡꓳ꓿ ꓟꓽ ꓜ ꓢꓴˍ ꓟꓲ ꓢꓲ ꓒꓽ ꓔꓯ ꓒꓵꓽ ꓠꓹ ꓟ ꓟꓽ ꓜ ꓟ ꓥ ꓢꓲ ꓪꓴ-ꓢ ꓔꓯ ꓫ ꓟꓳˍ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓣꓳ ꓮꓽ ꓟ ꓥ ꓟꓲ ꓚꓲꓸ ꓛꓬ ꓐꓱ ꓶ ꓢꓯꓸ ꓔꓬ ꓟ ꓟꓽ ꓥ꓿ ꓚꓲꓸ ꓛꓬ ꓐꓱ ꓶ ꓫꓵꓻˍ ꓟˍ ꓟꓲ ꓟꓽ ꓥ꓿ 8 ꓣꓳ ꓢꓯꓸ ꓔꓬ ꓟ ꓠꓬ ꓢꓲ ꓒꓽ ꓐꓱ ꓶ ꓢꓯꓸ ꓔꓬ ꓟ ꓥ ꓢꓲ꓾ ꓫꓵꓻ ꓥ ꓟꓲ ꓢꓲ ꓒꓽ ꓐꓱ ꓶ ꓫꓵꓻˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓫꓵꓻˍ ꓟꓲ ꓢꓯꓸˍ ꓟꓲ꓾ ꓣꓳ ꓠꓽ ꓢꓲ ꓒꓽ ꓔꓯꓸ ꓟ ꓥ ꓡꓳ꓿ 9 ꓕꓱ ꓟ ꓑꓶ ꓓꓴ ꓙꓲ-ꓢꓴ ꓠꓬ ꓞꓳ ꓫꓵꓻ ꓞꓳ ꓢꓯꓸ ꓐꓴ ꓢꓲ ꓒꓽ ꓣꓱ ꓠꓹ ꓟ꓾ ꓬꓲ ꓠꓬ ꓫꓵꓻ ꓢꓲ ꓢꓯꓸ ꓬꓲꓼ ꓡꓺꓳ꓿ 10 ꓖꓳ ꓡꓱ ꓠꓬꓲ ꓠꓴ ꓠꓽ ꓮꓸ ꓫꓵ ꓪꓴꓸ ꓠꓬꓲ ꓠꓴ ꓬꓲꓼ ꓠꓴ ꓠꓬꓲ ꓔꓯ ꓙꓽ ꓘꓶꓽˍ ꓡ? ꓥ ꓠꓬꓲ꓾ ꓮꓸ ꓫꓵ ꓪꓴꓸ ꓠꓬꓲ ꓠꓴ ꓬꓲꓼ ꓠꓴ ꓠꓬꓲ ꓔꓯ ꓟꓳꓻ ꓟꓽ ꓟꓵˍ ꓡ? ꓣꓳ ꓮꓽ ꓙꓵ ꓢꓴ ꓠꓽ ꓪꓴ-ꓢ ꓐꓯ ꓟꓴ ꓘꓶꓽ ꓕꓲꓺ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓠ ꓗꓹ ꓢꓴˍ ꓡꓰꓽ ꓥꓳ꓿ 11 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ ꓢꓲ ꓒꓽ ꓡꓰ꓾ ꓥꓪ ꓠꓬ ꓢꓯꓸ ꓔꓬ ꓢꓴ ꓥ ꓠꓬꓲ꓾ ꓛꓲ ꓝꓲꓸ ꓥ ꓕ ꓑꓳꓸ ꓥꓪ ꓟꓲꓽ ꓙꓬ ꓗꓪ ꓖꓶꓽ ꓠ ꓗꓷ ꓡꓰˍ ꓥꓳ꓿ ꓡ ꓛꓱ ꓥ ꓕ ꓑꓳꓸˍ ꓟꓲ ꓪꓴ-ꓢ ꓥꓪ ꓔꓯ ꓫꓱꓸ ꓖꓶ ꓠ ꓗꓷ ꓡꓰˍ ꓥꓳ꓾ ꓐꓰ ꓐꓯ ꓔ ꓡꓳ꓿ 12 ꓖꓳ ꓡꓱ ꓠꓬꓲ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓬꓰ ꓗꓷ ꓟ ꓮꓽ ꓙꓵ ꓪꓴ-ꓢ ꓟꓲꓽ ꓙꓬ ꓗꓪ ꓢꓪꓸ ꓟꓸ ꓖꓶ ꓠ ꓗꓹ ꓥꓳ꓿ 13 ꓣꓳ ꓠꓬ ꓕꓱ ꓡꓱ ꓖꓳ ꓑꓳ ꓕꓽ ꓙꓽ ꓘꓶ ꓡꓯ ꓘꓳ꓿ ꓮꓽ ꓟ ꓥ ꓟꓲ ꓬꓲꓼ ꓤ ꓠꓬꓲ ꓤ ꓙ ꓖꓴ ꓗꓪ ꓛꓲ ꓕꓲꓽ ꓓꓴ꓾ ꓥ ꓠꓬ ꓡꓱꓸ ꓗꓷ ꓝꓲ ꓓꓴ ꓟꓽ ꓗꓶꓺ ꓔ ꓠꓹ ꓟ ꓓꓵꓽ ꓙꓽ ꓞꓷꓹ ꓠ ꓗꓹ ꓡꓳ꓿ 14 ꓜꓽ ꓓꓴ ꓮ ꓡꓲ ꓕꓲ ꓫꓵꓽˍ ꓟꓲ ꓬꓲꓸ ꓓꓻ ꓬꓲꓸ ꓟꓽ ꓫꓬꓻ ꓟ ꓟꓽ ꓥ꓾ ꓐꓰ ꓢꓲ ꓒꓽ ꓬꓰ-ꓢꓴ ꓠꓯꓸꓼ ꓗꓪ ꓥꓪ ꓙꓵꓻˍ ꓡꓳ꓿ ꓖꓳ ꓡꓱ ꓥ ꓟꓲ ꓮꓽ ꓟ ꓡꓰ ꓮ ꓡꓲ ꓕꓲ ꓫꓵ ꓔꓯ ꓟꓽ ꓫꓬꓻ ꓟ ꓚꓬꓹ ꓔ ꓠꓬ꓾ ꓬꓲ ꓐꓱ ꓶ ꓠꓽ ꓟꓽ ꓫꓬꓻˍ ꓟ ꓥ ꓡꓳ꓿ 15 ꓠꓴ ꓜꓽ ꓓꓴ ꓗꓪ ꓐꓰ ꓠꓴ ꓬꓲꓼ ꓠꓴ ꓠꓬꓲ ꓔꓯ ꓠꓲꓹ ꓟ ꓫꓸ ꓝꓲˍ ꓕꓯ ꓠꓽ꓾ ꓠꓴ ꓠꓬ ꓠꓵ ꓠꓲꓹ ꓚꓱꓹ ꓗꓪ ꓫꓱꓽˍ ꓟ ꓟꓽ ꓥ꓿ ꓙꓲ-ꓢꓴ ꓫꓵꓻ ꓙ ꓗꓷ ꓟ ꓠꓴ ꓬꓲꓼ ꓠꓴ ꓠꓬꓲ ꓔꓯ ꓠꓴ ꓜꓽ ꓓꓴ ꓗꓪ ꓐꓰ ꓕꓽ ꓐꓬ ꓡꓰ ꓝꓲ꓿ 16 ꓠꓴ ꓡꓰ ꓙꓲˍ ꓡꓳ꓾ ꓐꓰ ꓚꓬꓹ ꓔ ꓟ ꓔꓯ ꓢꓴ ꓡꓰ ꓟꓽ ꓙꓲ꓾ ꓕꓽ ꓐꓯ ꓪ ꓝꓲ꓿ 17 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓗꓴꓷꓼ ꓠꓽ ꓜꓽˍ ꓟ ꓐꓰ ꓓꓳꓻˍ ꓟ ꓟꓽ ꓥ꓿ ꓪꓴ-ꓢ ꓗꓴꓷꓼ ꓠꓽ ꓔꓱꓹ ꓜꓳꓽˍ ꓟ ꓐꓰ ꓢꓲ ꓡꓲ ꓟ ꓐꓰ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓟ ꓗꓹ ꓛꓲ ꓟ ꓥ ꓡꓳ꓿ 18 ꓬꓲ ꓕꓱ ꓡꓱ ꓙꓲ-ꓢꓴ ꓔꓯ ꓣꓱꓽ ꓙ ꓢꓴ ꓔꓯ ꓠꓬ ꓪꓴ-ꓢ ꓠꓲꓹ ꓒꓴ ꓢꓲ꓾ ꓞꓳ ꓤˍ ꓟꓲ ꓘꓳ ꓣꓴˍ ꓥꓳ꓿ 19 ꓖꓳ ꓡꓱ ꓠꓬꓲ ꓣꓳ ꓠꓬ ꓢꓲ ꓡꓲ ꓟ ꓐꓰ꓾ ꓕꓲ ꓣꓳ ꓡꓰ ꓕꓲ ꓣꓳ ꓪꓴꓽ ꓡ ꓟꓴ ꓡ ꓓꓴ ꓔꓯ ꓖꓼ ꓙꓰ ꓡꓯ꓿ 20 ꓜꓽ ꓓꓴ ꓑꓶꓸ ꓓꓴ ꓪꓴ-ꓢ ꓟꓬꓱꓽ ꓔꓯ ꓕꓽ ꓒꓬꓹ꓿ ꓜꓽ ꓓꓴ ꓥ ꓕ ꓑꓳꓸ ꓠꓽ ꓢꓲꓽ ꓫꓬˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓜꓽ ꓓꓳꓻˍ ꓟ ꓗꓪ ꓐꓰ ꓢꓴ ꓔꓯ ꓡꓱꓸ ꓗꓷ ꓝꓲˍ ꓟ ꓠꓬ ꓟꓽ ꓜꓳꓽ꓿ 21 ꓧꓪꓽ ꓜꓽ ꓙꓵꓻ ꓓꓳꓻˍ ꓟ ꓗꓪ ꓐꓰ ꓬꓲꓼ ꓤ ꓠꓬꓲ ꓤ ꓔꓯ ꓡꓱꓸ ꓗꓷ ꓝꓲ ꓓꓴ ꓒꓬꓱꓼ ꓡ ꓠꓬ꓾ ꓟꓽ ꓜꓽ ꓟꓽ ꓓꓳꓻ ꓟ ꓟꓬꓽ ꓠꓬꓲ ꓙꓲˍ ꓡꓳ꓿ 22 ꓮꓸ ꓫꓵꓽ ꓜꓽ ꓓ꓾ ꓮꓸ ꓫꓵꓽ ꓜꓽ ꓟꓽ ꓓ꓾ ꓠꓴ ꓮ ꓡꓰ ꓙꓵꓻˍ ꓟꓲ꓾ ꓪꓴ-ꓢˍ ꓐꓰ ꓠꓴ ꓠꓬꓲꓽ ꓗꓴꓸ ꓚꓸꓼ ꓗꓪ ꓥꓳ꓿ ꓚꓲꓸ ꓛꓬ ꓞꓳ ꓙꓳˍ ꓟ ꓗꓪ ꓬꓲꓸ ꓦꓰꓽ ꓠꓲꓹ ꓡꓰ ꓕꓼ ꓓꓴ ꓟꓽ ꓙꓳ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ 23 ꓖꓳ ꓡꓱ ꓥ ꓟꓲ ꓙꓵꓻ ꓠꓲꓹ ꓗꓪ ꓐꓰ ꓟꓽ ꓥ ꓥ꓾ ꓓꓵꓽ ꓙꓽ ꓟꓬꓽ ꓢꓲ ꓜꓽ ꓢꓴ ꓠꓽ ꓚꓲꓸ ꓛꓬ ꓔꓯ ꓝꓴꓲ ꓐꓯ ꓞꓷꓹˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓟꓽ ꓥ ꓟ ꓮꓸ ꓫꓵꓽˍ ꓟꓲ ꓝꓴꓲ ꓥ ꓡꓳ꓿

ꓣꓳ-ꓟ 15

1 ꓣꓳ ꓙꓵꓻ ꓠꓲꓹ ꓢꓯꓼ ꓙꓳ ꓢꓴ ꓠꓬ ꓚꓲꓸ ꓛꓬ ꓐꓱ ꓶˍ ꓡꓰ ꓟꓽ ꓓꓵꓽ ꓙꓽ ꓙꓽ꓾ ꓢꓯꓼ ꓟꓽ ꓔꓲꓹ ꓢꓴ ꓢꓯꓼ ꓐꓽˍ ꓟ ꓔꓯ ꓔꓳꓹ ꓙ ꓠꓯꓹ ꓡꓳ꓿ 2 ꓣꓳ ꓮ ꓡꓲ ꓕꓲ ꓣꓳˍ ꓟꓲ ꓢꓴ ꓔꓯ ꓢꓯꓼ ꓙꓳ ꓡꓰ ꓝꓲ ꓠꓹ ꓟ ꓐꓰ ꓙꓲ ꓖꓴ ꓙꓳ ꓡꓰ ꓠꓹ ꓟ꓾ ꓬꓲ ꓪꓽ ꓔꓯ ꓬꓰ ꓙ ꓢꓲ ꓠꓲꓹ ꓒꓴ ꓡꓰ ꓝꓲ꓿ 3 ꓮ ꓡꓲꓳ ꓐꓯ ꓠꓬ ꓙꓲ-ꓢꓴˍ ꓟꓲ ꓬꓲ ꓚꓲꓸ ꓛꓬ ꓔꓯ ꓠꓲꓹ ꓒꓴ ꓝꓲˍ ꓟ ꓟꓽ ꓬꓰ꓿ ꓕꓱ ꓟ ꓠꓬ ꓕꓳ ꓶ ꓗꓪ꓾ ꓠꓴ ꓔꓯ ꓟꓳꓻ ꓟꓽ ꓟꓵ ꓢꓴ ꓬꓲ ꓪꓽ ꓕꓼ ꓘꓶ ꓠꓬ ꓥꓪ ꓖꓳ ꓓꓱ ꓗꓪ ꓬꓯꓼ ꓗꓷꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 4 ꓮꓽ ꓠꓱ ꓕꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓮꓸ ꓫꓵˍ ꓟꓲ ꓣꓳ ꓔꓯ ꓟꓸ ꓠꓹ ꓟ ꓐꓳ ꓔ ꓟ ꓥ ꓢꓲ꓾ ꓜꓲꓽ ꓘꓴꓻˍ ꓟ ꓐꓰ꓾ ꓠꓲꓹ ꓗꓴ ꓖꓶˍ ꓟ ꓗꓪ ꓐꓰ ꓣꓳ ꓥꓳ ꓡꓳꓸ ꓓꓴ ꓟꓶ ꓠꓹ ꓟ ꓥ ꓡꓳ꓿ 5 ꓠꓴ ꓪꓽ ꓠꓬ ꓕꓲ ꓠꓲꓹ ꓕꓲ ꓘꓶꓽˍ ꓡꓰ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓐꓹ ꓐ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ꓾ ꓜꓲꓽ ꓘꓴ ꓠꓲꓹˍ ꓐꓰ ꓠꓲꓹ ꓗꓴ ꓖꓶˍ ꓟ ꓖꓶ ꓡ ꓢꓴ ꓪꓴ-ꓢ ꓡꓰ꓾ ꓙꓲ-ꓢꓴ ꓠꓯS ꓗꓪ ꓧꓳꓹ ꓡꓯ ꓘꓳˍ ꓟ ꓠꓲꓹ ꓟ ꓠꓴ ꓪꓽ ꓔꓯ ꓖꓶ ꓡ ꓝꓲ꓿ 7 ꓖꓳ ꓡꓱ ꓠꓬꓲ ꓙꓲ-ꓢꓴ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ ꓠꓴ ꓪꓽ ꓔꓯ ꓘꓳ ꓣꓴ ꓗꓷˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓘꓳ ꓣꓴ ꓡꓯ ꓘꓳ꓿ 8 ꓥꓪ ꓡꓰ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓒꓵꓽ ꓒ ꓐꓴ ꓔꓯ ꓖꓶꓽ ꓔ ꓟ ꓪꓴ-ꓢ ꓬꓲ ꓔꓱꓹˍ ꓟ ꓙ ꓟꓳ ꓘꓶꓽ ꓔꓯ ꓕꓶꓻ ꓡꓰ ꓝꓲ ꓠꓹ ꓟ꓾ ꓙꓲ-ꓢꓴ ꓠꓬ ꓬꓴ-ꓔ ꓡ ꓞꓳ ꓐꓴ ꓔꓯ ꓪꓴ-ꓢ ꓬꓲ ꓔꓱꓹˍ ꓟ ꓣꓱꓽ ꓙ ꓢꓴ ꓒꓬꓱꓼ ꓡꓺꓳ꓿ 9 ꓐꓶꓽ ꓞꓳ ꓐꓴˍ ꓟꓲ ꓪꓴ-ꓢ ꓫꓱꓸ ꓤ ꓠꓲꓹ ꓑꓶ ꓓꓴ ꓬꓲ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ ꓥ ꓡꓳ꓿ ꓕꓱ ꓟ ꓠꓬ ꓕꓳ ꓶ ꓗꓪ꓾ ꓕꓱ ꓟ ꓑꓶꓸ ꓓꓴ ꓥꓪ ꓠꓬ ꓐꓶꓽ ꓞꓳ ꓗꓳ ꓡꓳ ꓗꓪ ꓠꓴ ꓔꓯ ꓫꓱꓸ ꓖꓶ ꓢꓲ꓾ ꓠꓴ ꓟꓬꓱ ꓐꓱ ꓶ ꓟꓴ ꓖꓪ ꓖꓪˍ ꓥꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 10 ꓝꓮꓲ ꓬꓲ ꓡꓰ꓾ ꓐꓶꓽ ꓞꓳ ꓐꓴꓳ꓾ ꓢꓲ ꓒꓽ ꓬꓲ ꓑ ꓫꓬꓼ ꓐꓴˍ ꓐꓰ ꓕꓲ ꓡꓰꓹꓼ ꓗꓹ ꓛꓲ ꓡꓯ꓾ ꓐꓯˍ ꓡꓳ꓿ 11 ꓝꓮꓲ ꓠꓬ꓾ ꓐꓶꓽ ꓞꓳ ꓐꓴꓳ꓾ ꓠꓴ ꓪꓽ ꓮꓽ ꓙꓵ ꓢꓲ ꓒꓽ ꓔꓯ ꓫꓱꓸ ꓖꓶ꓿ ꓞꓳ ꓫꓵꓽ ꓞꓳ ꓙꓰꓽ ꓐꓴꓳ꓾ ꓬꓲ ꓔꓯ ꓓꓳꓹ ꓟꓴ꓾ ꓐꓯˍ ꓡꓳ꓿ 12 ꓝꓮꓲ ꓬꓲ-ꓢ-ꓬ ꓡꓰ꓾ ꓢ ꓖꓪ ꓠꓬ ꓬꓰ-ꓫꓲ ꓞꓲꓼ ꓤ ꓡꓯꓹ ꓤ ꓕꓲ ꓣꓳ ꓓꓳ ꓡ ꓢꓲ꓾ ꓐꓶꓽ ꓞꓳ ꓔꓯ ꓙꓵꓽ ꓡ ꓥꓳ꓿ ꓐꓶꓽ ꓞꓳ ꓠꓬ ꓬꓲ ꓔꓯ ꓥꓳ ꓡꓳꓸˍ ꓥꓳ꓾ ꓐꓯˍ ꓡꓳ꓿ 13 ꓥꓳꓺ ꓡꓳꓸ ꓓꓴ ꓖꓶ ꓢꓴ ꓪꓴ-ꓢ ꓡꓰ꓾ ꓙꓵꓻ ꓠꓲꓹ ꓗꓪ ꓐꓰ ꓗꓹ ꓛꓲ ꓓꓴˍ ꓐꓰ ꓢꓲ ꓡꓲ ꓟ ꓮꓽ ꓙꓵˍ ꓐꓰ꓾ ꓢꓲ-ꓫꓬ-ꓟ-ꓦ ꓪꓽ ꓠꓬꓲˍ ꓟ ꓗꓪ ꓐꓰ꓾ ꓠꓴ ꓪꓽ ꓔꓯ ꓥꓳ ꓡꓳꓸ ꓓꓴ ꓒ ꓐꓲꓺꓼ ꓧꓳꓽ ꓖꓶ ꓡ ꓝꓲ꓿ 14 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓠꓴ ꓪꓽ ꓠꓬ ꓙꓲˍ ꓟ ꓐꓲ ꓓꓻˍ ꓢꓲ꓾ ꓢꓷꓸ ꓠꓲꓹ ꓗꓪ ꓪꓴꓽ ꓓꓰ ꓡꓰ ꓢꓲ ꓠꓬꓲ꓾ ꓘꓶꓸ ꓖꓶ ꓟꓸ ꓖꓶ ꓡꓯ ꓘꓳ ꓐ ꓡ ꓢꓴ ꓥ ꓟ ꓔꓯ ꓥꓪ ꓮꓽ ꓘꓶꓸ ꓦ ꓡꓱ ꓐꓳˍ ꓡꓳ꓿ 15 ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓖꓶ ꓡ ꓟ ꓣꓱꓽ ꓛꓰ ꓑꓶꓸ ꓓꓴ ꓥꓪ ꓠꓬ ꓠꓴ ꓪꓽ ꓔꓯ ꓕꓲ ꓫꓵꓽ ꓫꓵꓽ ꓗꓪ ꓠꓲꓹ ꓪꓴꓽ ꓪꓴꓽˍ ꓡꓰ ꓬꓲꓼ ꓠꓬꓲꓸ ꓖꓶ ꓟꓶ ꓡꓰ ꓝꓲ ꓠꓹ ꓟ ꓕꓱ ꓡꓱ ꓐꓳ ꓩꓴ ꓡ ꓟ ꓥ ꓡꓳ꓿ 16 ꓕꓱ ꓟ ꓠꓬ ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓥꓪ ꓔꓯ ꓔꓲ ꓒˍ ꓡꓰ ꓐꓰ ꓐꓶꓽ ꓞꓳ ꓐꓴ ꓗꓳ ꓡꓳ ꓗꓪ ꓪꓴ-ꓢ ꓬꓲ ꓶꓼ ꓓꓳꓽ ꓫꓱꓹ ꓓꓳ ꓚꓺ ꓟꓸ ꓖꓶ ꓢꓴ ꓬꓰ ꓝꓲ ꓢꓲ꓾ ꓐꓶꓽ ꓞꓳ ꓐꓴ ꓠꓬ ꓪꓴ-ꓢ ꓘꓳ ꓣꓴ ꓓꓻˍ ꓟ ꓔꓲ ꓓꓴ ꓕꓲ ꓫꓵ ꓒꓬꓱꓼ ꓡ ꓢꓲ ꓠꓬꓲ꓾ ꓢꓲ-ꓫꓬ-ꓟ-ꓦ ꓗꓪ ꓐꓰ ꓢꓲ ꓚꓰꓸˍ ꓟ ꓟꓶ ꓡꓰ ꓠꓹ ꓟ꓾ ꓥꓪ ꓔꓯ ꓟꓬꓱꓽ ꓐꓬꓱ ꓘꓶ ꓖꓶ ꓔ ꓟ ꓥ ꓡꓳ꓿ 17 ꓖꓳ ꓡꓱ ꓠꓬꓲ ꓥꓪ ꓠꓬ ꓬꓰ-ꓢꓴ ꓠꓯꓸꓼ ꓪꓴ-ꓢ ꓔꓯ ꓣꓱꓽ ꓙˍ ꓟ ꓗꓪ ꓬꓲ ꓔꓯ ꓫꓱꓸ ꓖꓶꓽ ꓓꓴ ꓬꓲ ꓑꓶꓸ ꓧꓪ ꓟꓶꓳ꓿ 18 - 19 ꓖꓳ ꓡꓱ ꓥ ꓟꓲ ꓙꓲ-ꓢꓴ ꓡꓰ ꓥꓪ ꓐꓯ ꓗꓷ ꓟ ꓐꓰ ꓬꓰ ꓗꓷ ꓟ ꓗꓪ ꓐꓰ꓾ ꓢꓲ-ꓫꓬ-ꓟ-ꓦ ꓪ ꓠꓬꓲˍ ꓟ ꓢꓯꓼ ꓣꓱ ꓢꓲ꓾ ꓓꓵꓽ ꓙꓽ ꓟꓶꓻ ꓓꓴˍ ꓐꓰ ꓢꓷꓸ ꓡꓰ ꓓꓴ ꓗꓪ ꓐꓰ ꓐꓶꓽ ꓞꓳ ꓐꓴ ꓠꓬ ꓪꓴ-ꓢ ꓔꓯ ꓒꓵꓽ ꓛꓳ ꓠꓹ ꓟ ꓧꓳꓽ ꓜꓲꓼ ꓡ ꓟ ꓕꓱ ꓟ ꓟꓽ ꓥ ꓠꓬ ꓥꓪ ꓮꓸ ꓫꓵꓽ ꓐꓯ ꓟꓽ ꓑꓶꓸ꓿ ꓖꓳ ꓡꓱ ꓠꓬꓲ ꓥꓪ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓬꓲ-ꓡꓲ-ꓗꓴ ꓗꓪ ꓛꓲ ꓙꓲ-ꓢꓴ ꓶꓼ ꓓꓳꓽ ꓫꓱꓹ ꓓꓳ ꓚ ꓛꓲ ꓬꓰꓳ꓿ 20 ꓖꓳ ꓡꓱ ꓥ ꓟꓲ ꓥꓪ ꓠꓬ ꓠꓱꓸ ꓐꓯꓼ ꓢꓴ ꓦꓲ ꓚꓰꓺ ꓕꓯꓽ ꓢꓲ ꓗꓪ ꓟꓽ ꓜꓶꓻ ꓠꓹ ꓟ꓾ ꓙꓲ-ꓢꓴ ꓟꓬꓱ ꓔꓯ ꓟꓽ ꓑ ꓙꓽ ꓠꓬꓲ ꓟ ꓗꓪ ꓶꓼ ꓓꓳꓽ ꓫꓱꓹ ꓓꓳ ꓚ ꓟꓸ ꓙꓰ ꓠꓹ ꓟ꓾ ꓥꓪ ꓮ ꓕꓯˍ ꓟꓲ ꓠꓲꓹ ꓡꓱꓻ ꓢꓲ ꓢꓯꓼ ꓕꓵꓼˍ ꓡꓳ꓿ 21 ꓕꓱ ꓟ ꓠꓽ ꓕꓳ ꓶ ꓗꓪ꓾ ꓬꓲ ꓓꓳꓽ ꓟꓽ ꓚ ꓛꓲ ꓠꓬꓲ ꓟ ꓗꓪ ꓬꓲ ꓪꓽ ꓡꓳꓸ ꓟꓳˍ ꓥꓳ꓾ ꓟꓽ ꓑ ꓙꓽ ꓠꓬꓲ ꓢꓴ ꓐꓴ ꓠꓬ ꓙ ꓜꓲꓼ ꓡꓰˍ ꓥꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 22 ꓠꓱꓸ ꓐꓯꓼ ꓗꓪ ꓕꓱ ꓡꓱ ꓚ ꓟꓸ ꓙꓰ ꓠ ꓗꓷ ꓡꓰ ꓠꓬꓲ꓾ ꓠꓴ ꓪꓽ ꓔꓬ ꓗꓪ ꓥꓪ ꓡꓻ ꓟꓽ ꓪ ꓮꓽ ꓟꓬꓹ ꓧꓪ ꓗꓷ ꓡꓰꓳ꓿ 23 ꓖꓳ ꓡꓱ ꓥ ꓟꓲ ꓮ ꓟꓶ ꓕꓱ ꓕꓲ ꓟꓵꓽ ꓗꓪ ꓠꓬ ꓝꓮꓲ ꓟꓸ ꓖꓴ ꓟꓽ ꓙꓳ ꓡꓰꓳ꓿ ꓥꓪ ꓠꓬ ꓠꓴ ꓪꓽ ꓔꓬ ꓗꓪ ꓡꓻ ꓠꓹ ꓟ ꓕꓱ ꓟꓬ ꓘꓳꓼ ꓠꓲꓹ ꓥꓳꓺ ꓗꓷ ꓠꓬꓲ꓾ 24 ꓢꓶ-ꓑ-ꓠꓲ-ꓬ ꓟꓵꓽ ꓗꓪ ꓮ ꓕꓯ ꓙꓰˍ ꓠꓬ ꓖꓳ ꓕꓯ ꓥꓪ ꓠꓬ ꓠꓴ ꓪꓽ ꓔꓬ ꓗꓪ ꓡꓻˍ ꓥꓳ꓿ ꓥꓪ ꓢꓶ-ꓑ-ꓠꓲ-ꓬ ꓟꓵꓽ ꓗꓪ ꓙꓰ ꓠꓹ ꓟ ꓣꓳ-ꓟ ꓗꓪ ꓗꓳꓸ ꓬꓯꓼˍ ꓕꓯ꓾ ꓠꓴ ꓪꓽ ꓔꓯ ꓟꓳꓻ ꓡꓯ ꓘꓳ ꓢꓲ ꓕꓲ ꓝꓲꓸ ꓙꓻ ꓡꓯ ꓘꓳ ꓗꓷ ꓗꓸ ꓠꓯꓸ꓾ ꓥꓪ ꓔꓯ ꓠꓴ ꓪꓽ ꓡꓰ ꓧꓳꓽ ꓦꓻ ꓬꓰ ꓡ ꓠꓹ ꓟ ꓥꓳ ꓡꓳꓸ ꓔꓬ ꓡꓳ꓿ 25 - 26 ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓦ ꓡꓱ ꓢꓴ ꓗꓳ ꓡꓳ ꓗꓪ ꓟ ꓞꓳ ꓫ ꓐꓴ ꓐꓱ ꓶ꓾ ꓟ-ꓢꓲ-ꓓꓳˍ ꓐꓰ ꓮ-ꓘꓷ-ꓬ ꓢꓴ ꓠꓬ꓾ ꓬꓰ ꓙ ꓓꓴ ꓒꓴ ꓜꓲꓼ ꓢꓲ ꓡꓯꓼ ꓘꓪ ꓠꓲꓹ ꓫꓵˍ ꓠꓬꓲ꓾ ꓮ ꓟꓶ ꓥꓪ ꓠꓬ ꓦ ꓡꓱ ꓢꓴ ꓐꓴ ꓔꓯ ꓣꓱꓽ ꓙ ꓠꓹ ꓟ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓥꓳ꓿ 27 ꓕꓱ ꓟ ꓠꓬ ꓚꓵ ꓚꓵ ꓬꓲ ꓪꓽ ꓬꓰ ꓠꓲꓹ ꓫꓵˍ ꓟ ꓥ ꓢꓲ꓾ ꓬꓰ ꓙꓲꓽ ꓙꓳˍ ꓟ ꓕꓲ ꓫꓵ ꓥ ꓡꓳ꓿ ꓐꓶꓽ ꓞꓳ ꓐꓴˍ ꓐꓰ ꓬꓴ-ꓔ ꓡ ꓞꓳ ꓐꓴ ꓠꓬ ꓦꓻ ꓗꓪ ꓟ ꓡꓯꓼ ꓫꓴ ꓑꓯꓹ ꓡꓯꓽ ꓘꓳ ꓢꓴ ꓥ ꓠꓬꓲ꓾ ꓧꓪꓽ ꓖꓳ ꓓꓱ ꓐꓱ ꓶ ꓣꓱ ꓬꓯꓼˍ ꓟ ꓗꓪ ꓬꓴ-ꓔ ꓡ ꓞꓳ ꓐꓴ ꓔꓯˍ ꓟꓲ ꓕꓱ ꓡꓱ ꓬꓰ ꓙ ꓡꓯ ꓘꓳ ꓙꓲꓽ ꓙꓳˍ ꓡꓳ꓿ 28 ꓖꓳ ꓡꓱ ꓠꓬꓲ ꓡꓯꓼ ꓫꓴ ꓒꓴ ꓕꓱ ꓟ ꓬꓲ ꓪꓽ ꓔꓯ ꓡꓯꓼ ꓙꓱ ꓗꓷ ꓠꓬ꓾ ꓥꓪ ꓠꓽ ꓠꓴ ꓪꓽ ꓔꓬ ꓗꓪ ꓐꓰ ꓙꓻ ꓙꓰ ꓢꓲ ꓢꓶ-ꓑ-ꓠꓲ-ꓬꓼ ꓗꓪ ꓙꓰˍ ꓥꓳ꓿ 29 ꓥꓪ ꓠꓴ ꓪꓽ ꓔꓯ ꓡꓻˍ ꓕꓯ ꓥꓪ ꓠꓽ ꓙꓲ-ꓢꓴ ꓬꓲ ꓶꓼ ꓤ ꓫꓱꓹ ꓤ ꓐꓲ ꓞꓹ ꓠꓬꓲ ꓐꓰ ꓡꓻˍ ꓟ ꓥꓪ ꓢꓷˍ ꓡꓳ꓿ 30 ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓬ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴˍ ꓐꓰ꓾ ꓢꓲ-ꓫꓬ-ꓟ-ꓦ ꓠꓵ ꓠꓲꓹ ꓗꓪ ꓐꓰ ꓠꓴ ꓪꓽ ꓔꓯ ꓓꓰꓽˍ ꓠꓬꓲ꓾ ꓠꓴ ꓪꓽˍ ꓟꓲ ꓥꓪˍ ꓐꓰ ꓕꓲ ꓪꓺꓼ ꓪꓽ ꓘꓴˍ ꓟ ꓗꓪ ꓢꓯꓼ ꓕꓵꓼ ꓡꓯ꓿ 31 ꓝꓮꓲ ꓠꓬ ꓬꓴ-ꓔ ꓟꓵꓽ ꓗꓪ ꓟꓽ ꓙꓵꓻ ꓢꓴ ꓐꓴ ꓡꓯꓼ ꓒꓯꓹ ꓗꓪ ꓐꓰ ꓥꓪ ꓡꓲꓹ ꓗꓷ ꓟꓶ ꓠꓹ ꓟ ꓐꓰ꓾ ꓙꓱ-ꓣꓴ-ꓢ-ꓡꓱ ꓢꓴ ꓐꓱ ꓶ ꓥꓪ ꓡꓰ ꓬꓰˍ ꓟ ꓣꓱꓽ ꓙ ꓟꓬꓱꓽ ꓔꓯ ꓖꓳ ꓗꓪ ꓟ ꓦ ꓡꓱ ꓢꓴ ꓐꓴ ꓡꓰ ꓠꓲꓹ ꓒꓴ ꓒꓴˍ ꓐꓰ ꓘꓳ ꓣꓴ ꓡ ꓠꓹ ꓟ ꓪꓽ ꓘꓴ ꓙ꓿ 32 ꓕꓱ ꓟ ꓠꓬ ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ ꓗꓹ ꓛꓲꓽ ꓛꓲꓽˍ ꓡꓰꓽ ꓠꓴ ꓪꓽ ꓔꓬ ꓗꓪ ꓛꓲ ꓡ ꓢꓲ꓾ ꓠꓴ ꓪꓽˍ ꓐꓰ ꓕꓲ ꓪꓺꓼ ꓔꓬ ꓟꓶ ꓢꓲ ꓠꓬꓲ ꓢꓰꓺ ꓡꓰ ꓠꓹ ꓟ ꓥ ꓡꓳ꓿ 33 ꓢꓲ ꓡꓲ ꓟ ꓖꓶꓽ ꓢꓴ ꓪꓴ-ꓢ ꓠꓬ ꓠꓴ ꓪꓽ ꓮꓽ ꓙꓵ ꓢꓴˍ ꓐꓰ ꓕꓲ ꓪꓺꓼ ꓔꓬ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓣꓳ-ꓟ 16

1 ꓥꓪ ꓠꓬ ꓣꓳ ꓮꓸ ꓝꓲ ꓩꓱ-ꓐꓲ ꓐꓱ ꓶ ꓠꓴ ꓪꓽ ꓔꓯ ꓢꓷꓸ ꓙ ꓟꓳ ꓙ ꓠꓲꓹ ꓫꓵˍ ꓡꓳ꓿ ꓬꓲ ꓠꓽ ꓚꓰ-ꓗꓷ-ꓡꓲꓼ ꓘꓴ ꓜꓲ ꓞꓳ ꓗꓪ ꓟ ꓪꓴ-ꓢ ꓟꓬꓱꓽ ꓙ ꓟꓺ ꓥ ꓡꓳ꓿ 2 ꓦ ꓡꓱ ꓢꓴ ꓔꓯ ꓬꓰ ꓙ ꓙꓲꓽ ꓙꓳˍ ꓟ ꓡꓰ ꓐꓰ꓾ ꓠꓴ ꓪꓽ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓬꓲ ꓔꓯ ꓘꓳ ꓣꓴ ꓢꓲ꓾ ꓬꓲ ꓣꓱꓽ ꓬꓯꓼˍ ꓟ ꓮꓽ ꓙꓵ ꓗꓪ ꓬꓲ ꓔꓯ ꓬꓰ ꓙ ꓠꓹ ꓟ ꓠꓴ ꓪꓽ ꓔꓯ ꓓꓰꓽ ꓠꓲꓹ ꓫꓵˍ ꓡꓳ꓿ ꓬꓲˍ ꓟꓲ ꓮꓽ ꓟꓬꓹ ꓣꓳ ꓔꓯ ꓬꓰ ꓙ ꓢꓴ ꓥ ꓢꓲ꓾ ꓥꓪ ꓔꓯˍ ꓟꓲ ꓬꓰ ꓙ ꓡ ꓠꓬꓲꓳ꓿ 3 ꓑꓷ-ꓚꓲ-ꓡˍ ꓐꓰ ꓬꓹ-ꓚꓲ-ꓡꓽ ꓔꓯ ꓒꓵꓽ ꓗꓹ ꓬꓰ ꓖꓶ꓿ ꓬꓲ ꓪꓽ ꓠꓬ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓥꓪˍ ꓐꓰ ꓕꓲ ꓡꓰꓹꓼ ꓟꓬꓱꓽ ꓬꓰ ꓛꓳꓽ ꓒꓯꓹ ꓥ ꓢꓲ꓾ 4 ꓥꓪ ꓢꓯꓼ ꓟꓬ ꓐꓱ ꓶ ꓫꓵꓻ ꓗꓴ ꓑꓵꓺ ꓗꓷ ꓢꓴ ꓐꓴ ꓥꓳ꓿ ꓥꓪ ꓬꓲ ꓪꓽ ꓔꓯ ꓫꓸ ꓟꓳˍ ꓟˍ ꓡꓰ ꓟꓽ ꓞꓲ꓾ ꓐꓶꓽ ꓞꓳ ꓘꓴ ꓜꓲ ꓞꓳ ꓮꓽ ꓙꓵˍ ꓟꓲ ꓬꓲ ꓪꓽ ꓔꓯ ꓫ ꓟꓳˍ ꓡꓳ꓿ 5 ꓝꓮꓲ ꓠꓬ ꓬꓲ ꓪꓽ ꓦꓲ ꓗꓪ ꓜꓲꓼ ꓡꓯ ꓘꓳˍ ꓟ ꓘꓴ ꓜꓲ ꓞꓳ ꓔꓯ ꓒꓵꓽ ꓗ ꓬꓰ ꓖꓶ꓿ ꓥꓪ ꓠꓲꓹ ꓠꓵˍ ꓟ ꓬꓲ-ꓑ-ꓠꓲ-ꓕꓴ ꓔꓯˍ ꓟꓲ ꓒꓵꓽ ꓗ ꓬꓰ ꓖꓶ꓿ ꓬꓲ ꓠꓬ ꓮ-ꓢꓲ-ꓬ ꓗꓪ ꓬꓲ ꓪꓴꓸ ꓦ ꓡꓱ ꓡ ꓢꓴ ꓥ ꓡꓳ꓿ 6 ꓠꓴ ꓪꓽ ꓐꓱ ꓶ ꓢꓯꓼ ꓕꓵꓼ ꓗꓷ ꓢꓴ꓾ ꓟ-ꓡꓲ ꓔꓯˍ ꓟꓲ ꓒꓵꓽ ꓗ ꓬꓰ ꓖꓶ꓿ 7 ꓥꓪˍ ꓐꓰ ꓕꓲ ꓪꓺꓼ ꓐꓱꓺ ꓗꓷ ꓢꓴ ꓥꓪ ꓫꓵꓽ ꓥꓪ ꓧꓪ ꓮ-ꓔꓳ-ꓠꓲ-ꓗꓴˍ ꓐꓰ꓾ ꓬꓴ-ꓠꓲ-ꓬꓼ ꓔꓯˍ ꓟꓲ ꓒꓵꓽ ꓗ ꓬꓰ ꓖꓶ꓿ ꓬꓲ ꓪꓽ ꓠꓬ ꓝꓲ ꓓꓴ ꓐꓴ ꓗꓳ ꓡꓳ ꓗꓪ ꓟꓬꓱ ꓓꓳꓽ ꓙꓳ ꓢꓴ ꓥ ꓢꓲ꓾ ꓥꓪ ꓟꓽ ꓦ ꓡꓱ ꓕꓯˍ ꓡꓰ ꓙꓲ-ꓢꓴ ꓔꓯ ꓦ ꓡꓱ ꓗꓷ ꓢꓴ ꓐꓴ ꓥꓳ꓿ 8 ꓢꓲ ꓒꓽ ꓠꓯꓸꓼ ꓗꓪ ꓥꓪ ꓠꓲꓹ ꓠꓵˍ ꓟ ꓮ-ꓑꓷ-ꓡꓲ-ꓕꓴ ꓔꓯ ꓒꓵꓽ ꓗ ꓬꓰ ꓖꓶ꓿ 9 ꓙꓲ-ꓢꓴ ꓠꓯꓸꓼ ꓗꓪ ꓟꓬꓱꓽ ꓬꓰ ꓛꓳ ꓒꓯꓹ꓾ ꓷ-ꓐ-ꓠꓴˍ ꓐꓰ꓾ ꓥꓪ ꓠꓲꓹ ꓠꓵˍ ꓟ ꓢꓶ-ꓔ-ꓗꓴ ꓔꓯˍ ꓟꓲ ꓒꓵꓽ ꓗ ꓬꓰ ꓖꓶ꓿ 10 ꓙꓲ-ꓢꓴ ꓠꓯꓸꓼ ꓗꓪ ꓤꓹ ꓟꓶ ꓗꓷ ꓢꓴ ꓬ-ꓑꓲ-ꓡꓲ ꓔꓯ ꓒꓵꓽ ꓗ ꓬꓰ ꓖꓶ꓿ ꓬ-ꓡꓲ-ꓔꓳ-ꓑꓴ ꓕꓲ ꓦꓲ ꓢꓴ ꓔꓯˍ ꓟꓲ ꓒꓵꓽ ꓗ ꓬꓰ ꓖꓶ꓿ 11 ꓥꓪ ꓫꓵꓽ ꓥꓪ ꓧꓪ ꓫꓲ-ꓡꓳ-ꓕꓰꓺˍ ꓐꓰ꓾ ꓢꓲ ꓒꓽ ꓠꓯꓸꓼ ꓗꓪ ꓔꓬ ꓟ ꓠ-ꓢꓲ-ꓫꓴ ꓕꓲ ꓦꓲ ꓢꓴ ꓔꓯ ꓒꓵꓽ ꓗ ꓬꓰ ꓖꓶ꓿ 12 ꓢꓲ ꓒꓽ ꓐꓱ ꓶ ꓢꓯꓼ ꓕꓵꓼ ꓪꓴꓽ ꓧꓶ ꓢꓴ ꓕꓴ-ꓩꓴ-ꓠˍ ꓐꓰ ꓕꓴ-ꓩꓴ-ꓢ ꓔꓯˍ ꓟꓲ ꓒꓵꓽ ꓗ ꓬꓰ ꓖꓶ꓿ ꓢꓲ ꓒꓽ ꓐꓱ ꓶ ꓮꓽ ꓘꓶꓸ ꓢꓯꓼ ꓕꓵꓼ ꓪꓴꓽ ꓧꓶ ꓢꓴ ꓠꓲꓹ ꓠꓵˍ ꓟ ꓑꓰ-ꓫꓲ ꓔꓯ ꓒꓵꓽ ꓗꓹ ꓬꓰ ꓖꓶ꓿ 13 ꓢꓲ ꓒꓽ ꓠꓯꓸꓼ ꓗꓪ ꓢꓲ ꓔ ꓢꓴ ꓣꓴ-ꓩꓴˍ ꓐꓰ ꓬꓲ ꓟꓹ ꓟ ꓔꓯ ꓒꓵꓽ ꓗ ꓬꓰ ꓖꓶ꓿ ꓬꓲ ꓟꓹ ꓟ ꓠꓬ ꓥꓪ ꓟꓹ ꓟ ꓡꓰ ꓐꓰ ꓥꓳ꓿ 14 ꓬ-ꓫꓲ-ꓚꓲ-ꓕꓴ꓾ ꓩꓴ-ꓡꓷ-ꓗ꓾ ꓫꓲ-ꓷ-ꓟꓲ꓾ ꓑ-ꓡꓳ-ꓑ꓾ ꓧꓷ-ꓟꓷˍ ꓐꓰ꓾ ꓬꓲ ꓪˍ ꓐꓰ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯˍ ꓟꓲ ꓒꓵꓽ ꓗ ꓬꓰ ꓖꓶ꓿ 15 ꓑꓲ-ꓡꓳ-ꓡꓳ-ꓗꓴ꓾ ꓬꓴ-ꓡꓲ-ꓬꓼ꓾ ꓠꓲ-ꓡꓲ-ꓬꓼˍ ꓐꓰ ꓬꓲ ꓠꓬꓲꓺ ꓟ ꓐꓰ꓾ ꓮ-ꓡꓲ-ꓑˍ ꓐꓰ꓾ ꓬꓲ ꓪꓽˍ ꓐꓰ ꓔꓬ ꓟ ꓦ ꓡꓱ ꓢꓴ ꓐꓴ ꓮꓽ ꓙꓵ ꓔꓯ ꓒꓵꓽ ꓗ ꓬꓰ ꓖꓶ꓿ 16 ꓢꓲꓽ ꓢꓲ ꓫꓬꓻ ꓫꓬ ꓐꓳꓼ ꓡꓯ ꓘꓳ ꓢꓲ ꓒꓵꓽ ꓗ ꓬꓰ ꓖꓶ ꓡꓯ ꓘꓳ꓿ ꓕꓱ ꓗꓪ ꓟ ꓙꓲ-ꓢꓴ ꓘꓴ ꓜꓲ ꓞꓳ ꓐꓴ ꓮꓽ ꓙꓵ ꓡꓰ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ 17 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓢꓳ ꓟꓶˍ ꓟ ꓟꓸ ꓟꓲ ꓔꓯ ꓒꓳꓹ ꓢꓲ꓾ ꓠꓴ ꓪꓽ ꓔꓯ ꓗꓪꓺ ꓡꓯ ꓘꓳ ꓝꓲ ꓢꓴˍ ꓐꓰ ꓡꓱꓸ ꓗꓷ ꓝꓲ ꓢꓴ ꓔꓯ ꓤ ꓟꓳ꓿ ꓬꓲ ꓪꓽ ꓔꓯˍ ꓐꓰ ꓧꓹ ꓙꓰ ꓠꓹ ꓟ ꓥꓪ ꓠꓬ ꓠꓴ ꓪꓽ ꓔꓯ ꓘꓶꓸ ꓖꓶˍ ꓥꓳ꓿ 18 ꓕꓱ ꓡꓱ ꓫꓵꓽ ꓡ ꓞꓳ ꓠꓬ ꓣꓳ ꓢꓲ ꓒꓽ ꓙꓲ-ꓢꓴ ꓔꓯ ꓣꓱꓽ ꓙ ꓢꓴ ꓟꓽ ꓥ꓿ ꓬꓲ ꓪꓽ ꓦꓰꓼ ꓟ ꓐꓱ ꓶˍ ꓡꓰ ꓢꓯꓸ ꓔꓬ ꓢꓲ꓾ ꓘꓶꓽ ꓟꓲꓻ ꓘꓶꓽ ꓡꓰ ꓒꓯꓽ ꓦꓰꓽ ꓟꓽ ꓗꓴꓸ ꓢꓴ ꓔꓯ ꓧꓳꓽ ꓪꓴꓸ ꓢꓴ ꓥ ꓡꓳ꓿ 19 ꓠꓴ ꓪꓽ ꓒꓵꓽ ꓛꓳˍ ꓟ ꓓꓳꓽ ꓠꓬ ꓞꓳ ꓤ ꓮꓽ ꓙꓵ ꓔꓯ ꓚ ꓛꓲ ꓬꓰ ꓠꓬꓲ꓾ ꓥꓪ ꓠꓬ ꓠꓴ ꓪꓽ ꓑꓶ ꓓꓴ ꓗꓹ ꓛꓲˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓬ ꓠꓴ ꓪꓽ ꓔꓯ ꓙꓲˍ ꓟ ꓗꓪ ꓙꓽ ꓜꓲꓼ ꓢꓴ ꓬꓰ ꓝꓲ ꓢꓲ꓾ ꓟꓽ ꓙꓲ ꓟ ꓚꓱꓹ ꓗꓪ ꓚ ꓟꓽ ꓗꓴꓸ ꓢꓴ ꓬꓰ ꓝꓲ ꓠꓲꓹ ꓫꓵˍ ꓡꓳ꓿ 20 ꓢꓲ ꓡꓲ ꓟ ꓖꓶ ꓢꓴ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓬꓰ ꓙ ꓢꓲ꓾ ꓢ-ꓓꓯ ꓔꓯ ꓠꓴ ꓪꓽ ꓡꓰ ꓮꓸ ꓟꓲꓸ ꓟꓲ ꓕꓳꓼ ꓑꓬꓼ ꓡꓰ ꓝꓲˍ ꓥꓳ꓿ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰ ꓠꓬ ꓠꓴ ꓪꓽˍ ꓐꓰ ꓕꓲ ꓪꓺꓼ ꓙꓳ ꓝꓲ꓿ 21 ꓥꓪˍ ꓐꓰ ꓕꓲ ꓪꓺꓼ ꓟꓬꓱꓽ ꓬꓰ ꓢꓴ ꓕꓲ-ꓟꓳ-ꓕꓲ-ꓪꓴꓽˍ ꓐꓰ ꓥꓪ ꓫꓵꓽ ꓥꓪ ꓧꓪ ꓡꓴ-ꓘꓷ-ꓬꓴˍ ꓐꓰ ꓬ-ꓢꓳ-ꓠˍ ꓐꓰ꓾ ꓢꓳ-ꓫꓲ-ꓑ-ꓔꓷ ꓡꓰ ꓠꓴ ꓪꓽ ꓔꓯ ꓒꓵꓽ ꓗ ꓬꓰˍ ꓡꓳ꓿ 22 ꓕꓳ ꓶ ꓡꓯꓼ ꓫꓴ ꓐꓳ ꓙ ꓢꓴ ꓕꓷ-ꓕꓲ-ꓬꓴ ꓥꓪˍ ꓟꓲ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓥꓳ꓿ 23 ꓥꓪˍ ꓐꓰ ꓘꓴ ꓜꓲ ꓞꓳ ꓔꓯ ꓖꓶ ꓜꓽ ꓖꓶ ꓓꓳ ꓢꓴ ꓗꓷ-ꓬꓴˍ ꓟꓲ ꓠꓴ ꓪꓽ ꓔꓯ ꓒꓵꓽ ꓗ ꓬꓰˍ ꓡꓳ꓿ 24 ꓡꓳ ꓒꓱ ꓗꓪ ꓒꓴ ꓫꓺ ꓢꓴ ꓬꓲ-ꓣ-ꓔꓴˍ ꓐꓰ꓾ ꓣꓳ ꓠꓬꓲ ꓤ ꓘꓳ-ꓣ-ꓕꓴˍ ꓟꓲ ꓠꓴ ꓪꓽ ꓔꓯ ꓒꓵꓽ ꓗꓹ ꓬꓰ ꓩꓴ ꓡ ꓡꓳ꓿ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓣꓱꓽ ꓛꓰ ꓠꓬ꓾ ꓠꓴ ꓪꓽ ꓮꓽ ꓙꓵ ꓢꓴˍ ꓐꓰ ꓙꓳ ꓝꓲ꓿ 25 ꓥꓪ ꓚ ꓟꓸ ꓖꓶˍ ꓟ ꓬꓰ-ꓢꓴ ꓙꓲ-ꓢꓴ ꓶꓼ ꓓꓳꓽ ꓫꓱꓹ ꓓꓳ ꓗꓪ ꓐꓰ ꓠꓴ ꓪꓽ ꓔꓯ ꓕꓶꓻ ꓡꓰ ꓝꓲ ꓐ ꓡ ꓢꓴ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ꓿ ꓕꓱ ꓟ ꓠꓬ ꓮ ꓠꓱ ꓕꓯˍ ꓡꓰ ꓚꓵ ꓔ ꓟ ꓚꓵ ꓘꓶꓽ ꓮ ꓟꓶ ꓟꓳꓸ ꓖꓶ ꓡ ꓟ ꓥ ꓡꓳ꓿ 26 ꓚꓵ ꓘꓶ ꓕꓱ ꓟ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓢꓴ ꓪꓴ-ꓢ ꓕꓵꓼ ꓪ ꓗꓪ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓕꓳ ꓶ ꓗꓪ ꓟꓳꓸ ꓖꓶ ꓡ ꓟ ꓥ ꓢꓲ꓾ ꓞꓳ ꓫꓵꓽ ꓞꓳ ꓙꓰ ꓮꓽ ꓙꓵ ꓠꓬ ꓙꓵꓻ ꓢꓲ ꓒꓵꓽ ꓛꓳ ꓠꓹ ꓟ ꓬꓲ ꓪꓽ ꓔꓯ ꓢꓷ ꓡꓰ ꓝꓲˍ ꓟ ꓥ ꓡꓳ꓿ 27 ꓬꓲ ꓕꓲ ꓣꓳ ꓔꓵꓸꓼ ꓙ ꓜꓲꓼ ꓠꓲꓹ ꓙꓳ ꓢꓴ ꓪꓴ-ꓢ ꓔꓯ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓟꓬꓱ ꓓꓳꓽ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

1 ꓘꓳ-ꓡꓱ-ꓕꓴ 1

1 ꓬꓰ-ꓢꓴ ꓙꓲ-ꓢꓴ ꓬꓲ ꓝꓲ ꓓꓴ ꓬꓰ ꓠꓹ ꓟ꓾ ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ ꓘꓴ ꓔ ꓟ ꓒꓳ-ꓡꓳ ꓥꓪˍ ꓐꓰ ꓣꓳꓽ ꓮ ꓬꓲꓼ ꓢꓳ-ꓕꓲ-ꓠꓲ ꓡꓰ꓾ 2 ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓢꓲ ꓚꓰꓸ ꓟꓶ ꓡꓰ ꓢꓲ꓾ ꓪꓴ-ꓢ ꓢꓲꓽ ꓫꓬˍ ꓟ ꓑ ꓫꓬꓼ ꓬꓰ ꓝꓲˍ ꓐꓰ ꓘꓴ ꓔ ꓟ ꓘꓳ-ꓡꓱ-ꓕꓴ ꓗꓪ ꓔꓬ ꓢꓴ ꓪꓴ-ꓢ ꓬꓲ ꓘꓴ ꓜꓲꓼ ꓞꓳˍ ꓐꓰ꓾ ꓕꓲ ꓟꓵꓽ ꓕꓲ ꓟꓵꓽ ꓗꓪ ꓔꓬ ꓟ꓾ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓬꓱ ꓔꓯ ꓘꓴꓻ ꓢꓴ ꓮꓽ ꓙꓵ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓙꓲ-ꓢꓴ ꓠꓬ ꓬꓲ ꓪꓽˍ ꓐꓰ ꓣꓳꓽ ꓢꓲ ꓒꓽ ꓥ ꓡꓳ꓿ 3 ꓣꓳꓽ ꓐꓹ ꓐ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 4 ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓠꓴ ꓪꓽ ꓔꓯ ꓖꓶˍ ꓟ ꓪꓴ-ꓢ ꓬꓲ ꓣꓱꓽ ꓛꓰ ꓑꓶꓸ ꓓꓴ꓾ ꓥꓪ ꓠꓬ ꓮ ꓕꓯˍ ꓟꓲ ꓠꓴ ꓪꓽ ꓪꓴꓸ ꓠꓬꓲ ꓪꓴ-ꓢ ꓔꓯ ꓫꓸ ꓟꓳˍ ꓡꓳ꓿ 5 - 6 ꓙꓲ-ꓢꓴ ꓐꓱ ꓶ ꓥꓪ ꓠꓴꓽ ꓡꓰ ꓢꓷꓸ ꓙ ꓟꓳ ꓙˍ ꓟ ꓠꓬ ꓠꓴ ꓪꓽ ꓠꓲꓹ ꓟ ꓠꓯꓸꓼ ꓗꓪ ꓢꓷꓸ ꓕꓶꓻ ꓡꓰ ꓠꓬꓲ꓾ ꓠꓴ ꓪꓽ ꓠꓬ ꓮꓸ ꓫꓵ ꓗꓪˍ ꓟꓲ ꓬꓲ ꓠꓯꓸꓼ ꓗꓪ ꓐꓳ ꓡꓰ ꓢꓲ꓾ ꓐꓯ ꓙꓻˍ ꓐꓰ ꓢꓷꓸ ꓠꓲꓹ ꓮꓽ ꓙꓵ ꓙꓳˍ ꓠꓬꓲ ꓬꓲ ꓔꓯ ꓫꓸ ꓟꓳ꓿ 7 ꓕꓱ ꓟ ꓗꓪ ꓐꓰ ꓠꓴ ꓪꓽ ꓠꓬ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓳꓸ ꓖꓶ ꓡ ꓟ ꓔꓯ ꓢꓲꓼ ꓙꓬ ꓢꓲ ꓦꓴꓻ ꓠꓬꓹ ꓟ ꓗꓪ꓾ ꓦ ꓗꓪ ꓟ ꓣꓱꓽ ꓛꓰ ꓡꓯꓼ ꓫꓴ ꓮ ꓡꓲ ꓕꓲ ꓫꓵꓽ ꓗꓪˍ ꓟꓲ ꓟꓽ ꓡꓳꓼ ꓟꓽ ꓗꓷ ꓡꓰ꓿ 8 ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓦꓬꓼ ꓠꓬꓲ ꓗꓪ ꓠꓴ ꓪꓽ ꓔꓯ ꓕꓼ ꓓꓴ ꓟꓽ ꓙꓳ ꓠꓹ ꓟ꓾ ꓬꓲ ꓠꓬ ꓡꓳꓹ ꓬꓰ ꓗꓪ ꓛꓲ ꓠꓴ ꓪꓽ ꓔꓯ ꓕꓶꓻ ꓡꓰ ꓝꓲˍ ꓥꓳ꓿ 9 ꓪꓴ-ꓢ ꓠꓬ ꓦ ꓡꓱ ꓐꓳˍ ꓟ ꓥ ꓢꓲ꓾ ꓠꓴ ꓪꓽ ꓔꓯ ꓠꓬ ꓬꓲ ꓮ ꓐꓲ꓾ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴˍ ꓐꓰ ꓙꓻ ꓡꓯꓽ ꓘꓳˍ ꓟ ꓗꓪ ꓓꓵꓽ ꓡꓰ ꓠꓹ ꓟ ꓘꓴ ꓔ ꓟ ꓥ ꓡꓳ꓿ 10 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓮꓽ ꓙꓵ ꓢꓴ ꓕꓲꓽ ꓠꓲꓹ ꓟˍ ꓡꓰꓽ ꓬꓰ ꓢꓲ꓾ ꓠꓴ ꓪꓽ ꓗꓳ ꓡꓳ ꓗꓪ ꓗꓪꓺ ꓡꓯꓽ ꓘꓳˍ ꓟ ꓟꓽ ꓙꓳꓻ ꓙꓳ꓾ ꓓꓵꓽ ꓙꓽˍ ꓟ ꓮꓽ ꓙꓵ ꓗꓪ ꓧꓳꓹ ꓡꓯꓽ ꓘꓳ ꓠꓹ ꓟ꓾ ꓥꓪ ꓠꓬ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓬꓱꓺ ꓗꓪ ꓐꓰ ꓠꓴ ꓪꓽ ꓔꓯ ꓘꓶꓸ ꓖꓶˍ ꓥꓳ꓿ 11 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓗꓷ-ꓡꓳꓽ ꓦꓲ ꓗꓪ ꓔꓬ ꓢꓴ ꓡꓰ꓾ ꓠꓴ ꓪꓽ ꓗꓳ ꓡꓳ ꓗꓪ ꓢꓯꓼ ꓡꓯꓽ ꓘꓳ ꓓꓴ ꓙꓳˍ ꓟ꓾ ꓥꓪ ꓔꓯ ꓐꓯ ꓖꓶ ꓡꓺꓳ꓿ 12 ꓮ ꓟꓶ ꓥꓪ ꓐꓯ ꓠꓲꓹ ꓫꓵˍ ꓟ ꓠꓬ ꓕꓱ ꓡꓱ ꓥꓳ꓿ ꓠꓴ ꓪꓽ ꓗꓳ ꓡꓳ ꓗꓪ꓾ ꓥꓪ ꓠꓽ ꓒꓳ-ꓡꓳ ꓔꓯꓸ ꓟ ꓥꓳ꓾ ꓥꓪ ꓠꓽ ꓬ-ꓑꓳ-ꓡꓳ ꓔꓯꓸ ꓟ ꓥꓳ꓾ ꓥꓪ ꓠꓽ ꓗꓷ-ꓒ ꓔꓯꓸ ꓟ ꓥꓳ꓾ ꓥꓪ ꓠꓽ ꓙꓲ-ꓢꓴ ꓔꓯꓸ ꓟ ꓥꓳ꓾ ꓐꓰ ꓐꓯ ꓢꓴ ꓙꓳˍ ꓐꓷ꓿ 13 ꓙꓲ-ꓢꓴ ꓠꓬ ꓬꓲ ꓗꓪ ꓗꓪꓺ ꓡꓰ ꓟ ꓥ ꓡ? ꓠꓴ ꓪꓽ ꓐꓱ ꓶ ꓕꓯꓼ ꓔꓶꓸ ꓗꓷ ꓟ ꓠꓬ ꓒꓳ-ꓡꓳ ꓥ ꓡ? ꓠꓴ ꓪꓽ ꓠꓬ ꓒꓳ-ꓡꓳ ꓟꓬꓱꓺ ꓗꓪ ꓐꓰ ꓖꓳ ꓓꓱ ꓔꓲꓹ ꓗꓷ ꓟ ꓥ ꓡ? 14 - 15 ꓠꓴ ꓪꓽ ꓠꓬ ꓥꓪ ꓟꓬꓱꓺ ꓗꓪ ꓐꓰ ꓖꓳ ꓓꓱ ꓔꓲꓹ ꓟꓶꓻ ꓗꓷꓳ꓾ ꓐꓰ ꓐꓯ ꓢꓴ ꓙꓳꓻ ꓡ ꓟ ꓔꓯ ꓗꓳꓺ ꓚꓱ ꓠꓬꓲ꓾ ꓚꓲ-ꓢꓶ-ꓑꓴˍ ꓐꓰ ꓗꓷ-ꓬꓴ ꓟꓽ ꓥ ꓠꓬ꓾ ꓠꓱꓸ ꓐꓯ ꓢꓴ ꓮꓽ ꓟ ꓔꓯˍ ꓟꓲ ꓥꓪ ꓚꓲꓸ ꓛꓬ ꓡꓰ ꓖꓳ ꓓꓱ ꓟꓽ ꓔꓲꓹ ꓖꓶ ꓗꓷ ꓠꓬꓲ꓾ ꓪꓴ-ꓢ ꓔꓯ ꓫꓸ ꓟꓳ꓿ 16 ꓝꓮꓲ ꓢꓶ-ꓕꓲ-ꓩ-ꓠ ꓕꓲ ꓦꓲ ꓔꓯˍ ꓟꓲ ꓥꓪ ꓡꓰ ꓖꓳ ꓓꓱ ꓔꓲꓹ ꓖꓶ ꓗꓷꓳ꓿ ꓕꓱ ꓟꓬ ꓟ ꓟꓽ ꓥ ꓠꓬ ꓠꓱꓸ ꓐꓯ ꓢꓴ ꓔꓯ ꓥꓪ ꓡꓰ ꓔꓲꓹ ꓖꓶ ꓟꓽ ꓔꓲꓹ ꓖꓶ꓾ ꓥꓪ ꓚꓲꓸ ꓟꓽ ꓟꓶ꓿ 17 ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓡꓰ ꓥꓪ ꓔꓯ ꓝꓲꓺ ꓔ ꓟ ꓠꓬ꓾ ꓖꓳ ꓓꓱ ꓔꓲꓹ ꓖꓶ ꓠꓹ ꓟ ꓟꓽ ꓥ꓾ ꓶꓼ ꓓꓳꓽ ꓫꓱꓹ ꓓꓳ ꓚ ꓟꓸ ꓠꓹ ꓟ ꓥ ꓡꓳ꓿ ꓙꓲ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓬꓲ ꓪꓽ ꓠꓬꓲˍ ꓟ ꓔꓯ ꓟꓽ ꓖꓳꓽ ꓡꓰ ꓝꓲ ꓠꓹ ꓟ꓾ ꓡ ꓞꓳ ꓙꓽ ꓗꓴꓸ ꓠꓲꓹ ꓐꓯ ꓙꓻ ꓣꓱꓽ ꓢꓲ ꓙꓲ-ꓢꓴ ꓡꓰ ꓥꓪ ꓔꓯ ꓟꓸ ꓟꓲꓽ ꓟꓽ ꓚ ꓝꓲ꓿ 18 ꓟꓶꓽ ꓬꓰ ꓔꓬ ꓢꓴ ꓔꓯꓸ ꓟꓳꓸ ꓐꓯ ꓠꓬ꓾ ꓡꓯꓼ ꓐꓳ ꓔꓶꓸ ꓓꓴ ꓟꓸ ꓟꓲꓽ ꓠꓽ ꓙꓲꓽˍ ꓟ ꓥ ꓡꓳ꓾ ꓐꓰ ꓓꓵꓽ ꓙˍ ꓡꓳ꓿ ꓚꓬꓴ ꓟꓶ ꓢꓴ ꓣꓳꓽ ꓔꓯ ꓟꓳꓸ ꓠꓽ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓥ ꓡꓳ꓿ 19 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓥꓪ ꓡꓰ ꓙꓽ ꓗꓴ ꓠꓲꓹ ꓙꓳ ꓢꓴ ꓙꓽ ꓗꓴ ꓠꓲꓹ ꓔꓯ ꓐꓬ ꓡꓰ ꓝꓲ ꓢꓲ꓾ ꓢꓷꓸ ꓠꓲꓹ ꓙꓳ ꓢꓴ ꓢꓷꓸ ꓠꓲꓹ ꓔꓯ ꓖꓳꓽ ꓡꓰ ꓝꓲˍ ꓥꓳ꓾ ꓐꓰ ꓐꓳ ꓔ ꓡꓳ꓿ 20 ꓙꓽ ꓗꓴ ꓠꓲꓹ ꓙꓳ ꓢꓴ ꓮ ꓡꓲ ꓗꓪ ꓔꓬ ꓡ? ꓙꓵꓽ ꓗ ꓟꓸ ꓒ ꓮ ꓡꓲ ꓗꓪ ꓔꓬ ꓡ? ꓕꓱ ꓕꓲ ꓤꓶ ꓗꓪ ꓟ ꓧꓳꓺ ꓡꓯꓽ ꓘꓳ ꓒꓽ ꓮ ꓡꓲ ꓗꓪ ꓔꓬ ꓡ? ꓪꓴ-ꓢ ꓠꓬ ꓟꓲ ꓠꓯ ꓕꓱ ꓟ ꓗꓪ ꓟ ꓙꓽ ꓗꓴꓸ ꓠꓲꓹ ꓔꓯ ꓙꓲꓽˍ ꓟ ꓒꓬꓱꓼ ꓡ ꓝꓲꓳ ꓟꓽ ꓥ ꓡ? 21 ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓞꓳ ꓤ ꓢꓷꓸ ꓠꓲꓹ ꓗꓪ ꓐꓰ ꓪꓴ-ꓢ ꓬꓲ ꓙꓽ ꓗꓴꓸ ꓠꓲꓹ ꓗꓪ ꓟ ꓚꓴꓽ ꓬꓲꓹ ꓔꓯ ꓢꓷꓸ ꓡꓰ ꓟꓽ ꓘꓴꓻ ꓠꓬꓲ꓾ ꓞꓳ ꓤ ꓡꓰ ꓙꓲꓽˍ ꓟ ꓚꓬꓹ ꓔ ꓟ ꓶꓼ ꓓꓳ ꓫꓱꓹ ꓓꓳꓽ ꓟꓸ ꓟꓲꓽ ꓕꓱ ꓟ ꓚˍ ꓟ ꓗꓪ ꓐꓰ꓾ ꓙꓵꓻ ꓢꓴ ꓐꓴ ꓔꓯ ꓪꓴ-ꓢ ꓡꓰ ꓚꓬꓴ ꓟꓶ ꓡꓰ ꓝꓲ ꓠꓹ ꓟ ꓠꓲꓹ ꓒꓴˍ ꓡꓳ꓿ 22 ꓬꓴ-ꓔ ꓡ ꓞꓳ ꓠꓽ ꓢꓷꓸ ꓡꓰ ꓓꓴ ꓓꓰꓽˍ ꓡꓳ꓿ ꓦꓲ-ꓡꓲ ꓡ ꓞꓳ ꓠꓬ ꓙꓽ ꓗꓴ ꓠꓲꓹ ꓧꓪꓺˍ ꓡꓳ꓿ 23 ꓖꓳ ꓡꓱ ꓥ ꓟꓲ ꓥꓪ ꓠꓴꓽ ꓠꓽ ꓕꓯꓼ ꓔꓶ ꓗꓷ ꓟ ꓙꓲ-ꓢꓴ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ꓿ ꓕꓱ ꓟ ꓠꓬ ꓬꓴ-ꓔ ꓡ ꓞꓳ ꓔꓯ ꓟꓳꓸ ꓛꓲ ꓕꓲꓽ ꓓꓴ ꓥ ꓢꓲ꓾ ꓐꓶꓽ ꓞꓳ ꓔꓯ ꓟꓳꓸ ꓠꓽ ꓙꓲꓽˍ ꓟ ꓥ ꓡꓳ꓿ 24 ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓘꓴ ꓔ ꓢꓴ ꓔꓯꓸ ꓟꓳ ꓠꓽ꓾ ꓬꓴ-ꓔ ꓡ ꓞꓳ ꓥ ꓟꓲ꓾ ꓦꓲ-ꓡꓲ ꓡ ꓞꓳ ꓥ ꓟꓲ꓾ ꓙꓲ-ꓢꓴ ꓠꓬ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓐꓰ꓾ ꓪꓴ-ꓢ ꓬꓲ ꓙꓽ ꓗꓴ ꓠꓲꓹ ꓥ ꓡꓳ꓿ 25 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓙꓲꓽˍ ꓟ ꓠꓬ ꓞꓳ ꓤ ꓢꓷꓸˍ ꓟ ꓕꓯ ꓢꓲ ꓙꓽ ꓗꓴ ꓠꓲꓹ ꓙꓳ ꓢꓲ꓾ ꓪꓴ-ꓢ ꓢꓯꓼ ꓐꓽˍ ꓟ ꓠꓬ ꓞꓳ ꓤ ꓢꓯꓼ ꓪꓽ ꓕꓯ ꓢꓲ ꓪꓽ ꓠꓬꓲˍ ꓡꓳ꓿ 26 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓘꓴˍ ꓕꓯ ꓠꓴ ꓪꓽ ꓮ ꓡꓲ ꓡꓴ ꓫꓵ ꓡ ꓞꓳ ꓥ ꓟ ꓔꓯ ꓓꓵꓽ ꓙ ꓠꓬꓲ꓿ ꓠꓴ ꓪꓽ ꓗꓳ ꓡꓳ ꓗꓪ ꓟꓲ ꓠꓯ ꓔꓯꓸ ꓟꓳꓸ ꓙꓽ ꓗꓴ ꓠꓲꓹ ꓙꓳ ꓢꓴ ꓟꓽ ꓟꓬꓽ꓿ ꓪꓽ ꓠꓬꓲ ꓢꓴˍ ꓟꓲ ꓟꓽ ꓟꓬꓽ꓿ ꓒꓵꓽˍ ꓟ ꓡ ꓞꓳ ꓥ ꓟꓲ ꓟꓽ ꓟꓬꓽ꓿ 27 ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓙ ꓗꓴ ꓠꓲꓹ ꓙꓳ ꓢꓴ ꓔꓯ ꓫꓸ ꓔꓳ ꓡꓰ ꓝꓲ ꓠꓹ ꓟ꓾ ꓟꓲ ꓠꓯ ꓗꓪ ꓟ ꓙꓲꓽˍ ꓟ ꓔꓯ ꓢꓲ ꓓꓳ ꓡꓺꓳ꓿ ꓝꓮꓲ ꓠꓬ ꓪꓽ ꓠꓬꓲ ꓢꓴ ꓔꓯ ꓫꓸ ꓔꓳ ꓡꓰ ꓝꓲ ꓠꓹ ꓟ ꓢꓯꓼ ꓐꓽ ꓢꓴ ꓔꓯ ꓢꓲ ꓓꓳ ꓡꓺꓳ꓿ 28 ꓪꓴ-ꓢ ꓠꓬ ꓟꓲ ꓠꓯ ꓗꓪ ꓟꓽ ꓒꓵꓽ ꓟ ꓐꓰ꓾ ꓢꓴ ꓡꓰ ꓟꓳꓻ ꓟꓽ ꓟꓵ ꓟ ꓔꓯ ꓢꓲꓺ ꓓꓳ ꓡ ꓡꓳ꓿ ꓝꓮꓲ ꓠꓬ꓾ ꓙꓳꓻ ꓔꓬ ꓟ ꓔꓯ ꓖꓳꓽ ꓡꓰ ꓝꓲ ꓠꓹ ꓟ꓾ ꓟꓽ ꓙꓳꓻ ꓔꓬ ꓟ ꓔꓯ ꓢꓲꓺ ꓓꓳ ꓡ ꓡꓳ꓿ 29 ꓕꓱ ꓟ ꓠꓬ ꓮꓽ ꓟ ꓥ ꓟꓲ ꓪꓴ-ꓢ ꓟꓲꓽ ꓙꓬ ꓗꓪ ꓘꓶꓽ ꓘꓹ ꓟꓽ ꓐ ꓡ ꓠꓹ ꓟ ꓥ ꓡꓳ꓿ 30 ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓠꓬ ꓪꓴ-ꓢ ꓡꓰ ꓙꓲ-ꓢꓴ ꓬꓰ-ꓢꓴˍ ꓐꓰ ꓝꓱꓺ ꓡꓰ ꓝꓲꓳ꓿ ꓬꓲ ꓠꓬ ꓣꓳꓽ ꓐꓱ ꓶ ꓪꓴ-ꓢ ꓬꓲ ꓙꓽ ꓗꓴ ꓠꓲꓹˍ ꓐꓰ꓾ ꓔꓱꓹ ꓜꓳꓽˍ ꓟ ꓐꓰ꓾ ꓢꓲ ꓚꓰꓸ ꓟꓶ ꓡꓰ ꓓꓴˍ ꓐꓰ ꓫꓴꓹ ꓣꓴ ꓓꓴ ꓒꓬꓱꓼ ꓡꓺꓳ꓿ 31 ꓕꓱ ꓟ ꓑꓶꓸ ꓓꓴ ꓕꓳ ꓶ ꓗꓪ꓾ ꓘꓶꓽ ꓘꓹ ꓢꓴ ꓠꓬ ꓢꓲ ꓒꓽ ꓠꓯꓸꓼ ꓗꓪˍ ꓡꓰꓽ ꓘꓶꓽ ꓘꓹ ꓝꓲ꓾ ꓐꓰ ꓐꓳ ꓔ ꓟ ꓥ ꓡꓳ꓿

1 ꓘꓳ-ꓡꓱ-ꓕꓴ 2

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓧꓶꓸ ꓕꓯ ꓠꓴ ꓪꓽ ꓔꓬ ꓗꓪ ꓥꓪ ꓡ ꓢꓲ ꓪꓴ-ꓢ ꓬꓲ ꓚꓵ ꓘꓶꓽ ꓐꓱ ꓶ ꓢꓷꓸ ꓙ ꓟꓳ ꓙˍ ꓟ ꓠꓬ꓾ ꓐꓯ ꓙˍ ꓐꓰ ꓙꓽ ꓗꓴꓸ ꓠꓲꓹ ꓐꓯ ꓘꓶ ꓗꓪ ꓐꓰ ꓟꓽ ꓥ꓿ 2 ꓬꓰ-ꓢꓴ ꓙꓲ-ꓢꓴˍ ꓐꓰ ꓬꓲ ꓔꓯ ꓕꓯꓼ ꓔꓶ ꓗꓷ ꓟ ꓟꓸ ꓟꓲꓽ ꓟꓽ ꓥ ꓠꓬ꓾ ꓠꓴ ꓪꓽ ꓗꓳ ꓡꓳ ꓗꓪ ꓠꓱꓸ ꓐꓯꓼ ꓮꓸ ꓫꓵˍ ꓟꓲ ꓟꓽ ꓢꓷꓸ ꓟ ꓡꓰ ꓐꓰ ꓔꓬ ꓠꓹ ꓟ꓾ ꓥꓪ ꓚꓴꓽ ꓬꓲꓹ ꓓꓶꓽ ꓚꓵ ꓡꓰꓳ꓿ 3 ꓖꓳ ꓕꓯ ꓥꓪ ꓠꓬ ꓢꓯꓼ ꓐꓽ ꓠꓬꓲ ꓙꓳꓺ ꓠꓬꓲ ꓮꓽ ꓘꓶꓸ ꓛꓱꓽ ꓛꓱꓽ ꓠꓬꓲ ꓐꓰ ꓠꓴ ꓪꓽ ꓔꓬ ꓗꓪ ꓡꓻ ꓗꓷꓳ꓿ 4 - 5 ꓖꓳ ꓡꓱ ꓢꓲ ꓠꓴ ꓪꓽ ꓙꓵꓻ ꓠꓲꓹ ꓠꓬ ꓞꓳ ꓤ ꓙꓽ ꓗꓴꓸ ꓠꓲꓹ ꓗꓪ ꓬꓲ ꓚꓰ ꓜꓶꓻ ꓔ ꓟ ꓟꓽ ꓥ ꓥ꓾ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓗꓪ ꓡꓰ ꓬꓲ ꓚꓰ ꓜꓶꓻ ꓔ ꓟ ꓒꓬꓱꓼ ꓡ ꓝꓲ ꓠꓹ ꓟ꓾ ꓠꓴ ꓪꓽ ꓔꓯ ꓥꓪ ꓡꓰ ꓶꓼ ꓓꓳꓽ ꓫꓱꓹ ꓓꓳ ꓚ ꓟꓸ ꓖꓶˍ ꓕꓯ꓾ ꓟꓲ ꓠꓯ ꓙꓽ ꓗꓴ ꓠꓲꓹ ꓐꓯ ꓘꓶ ꓟꓽ ꓣꓱꓽ ꓣꓱ꓾ ꓢꓲ-ꓫꓬ-ꓟ-ꓦ ꓬꓲ ꓪꓽ ꓠꓬꓲˍ ꓟ ꓗꓪ ꓐꓰ ꓟꓳꓸ ꓖꓶ ꓓꓳ ꓡ ꓝꓲˍ ꓟ ꓥ ꓡꓳ꓿ 6 ꓥꓪ ꓠꓬ ꓦ ꓗꓪ ꓞꓲꓼ ꓔꓰꓹ ꓡꓰ ꓢꓴ ꓐꓴ ꓔꓯ ꓙ ꓗꓴ ꓠꓲꓹ ꓗꓪ ꓟ ꓐꓯ ꓘꓶ ꓚ ꓟꓸ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓟꓲ ꓠꓯ ꓕꓱ ꓟ ꓗꓪ ꓟ ꓙꓽ ꓗꓴꓸ ꓠꓲꓹˍ ꓐꓰ꓾ ꓕꓱ ꓕꓲ ꓤꓶ ꓟ ꓪꓴꓸ ꓓꓵ ꓣꓱ ꓢꓴ ꓐꓴ ꓙ ꓗꓴ ꓠꓲꓹ ꓐꓯ ꓘꓶ ꓠꓽ ꓟꓽ ꓥ꓿ ꓬꓲ ꓪꓽ ꓠꓽ ꓡꓳꓹ ꓬꓰˍ ꓥꓳ꓿ 7 ꓖꓳ ꓡꓱ ꓥ ꓟꓲ ꓣꓳꓽ ꓠꓬ꓾ ꓟꓲ ꓠꓯ ꓕꓱ ꓟ ꓟꓽ ꓙꓳ ꓕꓯˍ ꓡꓰ ꓣꓳꓽ ꓔꓯ ꓟꓬꓱ ꓓꓳꓽ ꓟꓶ ꓡꓰ ꓝꓲ ꓠꓹ ꓟ꓾ ꓪꓴ-ꓢ ꓡꓰ ꓝꓰꓹ ꓔ ꓟ ꓬꓲ ꓚꓵ ꓘꓶꓽ ꓙꓽ ꓗꓴꓸ ꓠꓲꓹ ꓐꓯ ꓘꓶ ꓚꓺˍ ꓡꓳ꓿ 8 ꓟꓲ ꓠꓯ ꓕꓱ ꓟ ꓗꓪ ꓟ ꓪꓴꓸ ꓓꓵ ꓣꓱ ꓢꓴ ꓐꓴˍ ꓟꓲ ꓙ ꓗꓴ ꓠꓲꓹ ꓕꓱ ꓟ ꓔꓯ ꓟꓽ ꓢꓷ ꓠꓬꓲ꓿ ꓬꓲ ꓪꓽ ꓢꓷꓸˍ ꓕꓯ ꓠꓽ꓾ ꓐꓬꓱꓽ ꓡꓱꓼ ꓡꓱ ꓟ ꓢꓲ ꓒ ꓔꓯ ꓟꓽ ꓕꓯꓼ ꓔꓶꓸ ꓗꓷ ꓡꓳ ꓫꓵꓽ ꓥ ꓡꓳ꓿ 9 ꓕꓱ ꓟ ꓠꓽ ꓕꓳ ꓶ ꓗꓪ꓾ ꓪꓴ-ꓢ ꓡꓰ ꓬꓲ ꓔꓯ ꓠꓲꓹ ꓠꓵ ꓢꓴ ꓐꓱ ꓶ ꓙꓽ ꓖꓶ ꓔ ꓟ ꓠꓬ꓾ ꓟꓬ ꓢꓶꓽ ꓟꓽ ꓟꓳ ꓠꓬꓲ ꓟ꓾ ꓠꓸ ꓑꓳ ꓟꓽ ꓑ ꓙꓽ ꓠꓬꓲ ꓟ꓾ ꓞꓳ ꓤ ꓠꓲꓹ ꓟ ꓗꓪˍ ꓟꓲ ꓟꓽ ꓓꓵ ꓡꓰ ꓠꓬꓲ ꓟ꓾ ꓙꓽ ꓖꓶ ꓔ ꓡꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 10 ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓚꓵ ꓘꓶꓽ ꓕꓱ ꓟ ꓣꓳꓽ ꓔꓯ ꓟꓳꓸ ꓖꓶ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓢꓲ-ꓫꓬ-ꓟ-ꓦ ꓠꓽ ꓙꓳˍ ꓟ ꓥ ꓕ ꓑꓳꓸ ꓔꓯ ꓧꓪ ꓟꓰꓹ ꓠꓬꓲˍ ꓡꓳ꓿ ꓪꓴ-ꓢ ꓠꓯꓸˍ ꓟ ꓫꓵꓽ ꓪꓴꓻ ꓔꓯˍ ꓟꓲ ꓟꓰꓹ ꓠꓬꓲˍ ꓡꓳ꓿ 11 ꓞꓳ ꓦ ꓟꓽ ꓥ ꓠꓬ ꓞꓳ ꓤ ꓓꓵꓽ ꓙꓽˍ ꓟ ꓔꓯ ꓢꓷꓸ ꓢꓴ ꓮꓽ ꓟ ꓥ ꓡ? ꓖꓳ ꓟ ꓡꓰ ꓐꓰ ꓪꓴ-ꓢ ꓦ ꓟꓽ ꓥ ꓠꓬ ꓪꓴ-ꓢ ꓓꓵꓽ ꓙꓽˍ ꓟ ꓔꓯ ꓢꓷꓸ ꓢꓴ ꓟꓽ ꓙꓳ꓿ 12 ꓖꓳ ꓡꓱ ꓥ ꓟꓲ ꓣꓳꓽ ꓟꓶ ꓗꓷ ꓟ ꓠꓬ ꓟꓲ ꓠꓯ ꓗꓪ ꓟ ꓦ ꓟꓽ ꓥ꓿ ꓪꓴ-ꓢ ꓔꓯ ꓐꓰ ꓡꓻ ꓟ ꓦ ꓥ ꓡꓳ꓿ ꓕꓱ ꓟ ꓠꓬ ꓪꓴ-ꓢ ꓡꓰ ꓣꓳꓽ ꓔꓯ ꓡꓯꓼ ꓡꓳꓻ ꓡꓳ ꓖꓶ ꓡ ꓟ ꓡꓯꓼ ꓫꓴ ꓔꓯ ꓢꓷꓸ ꓡꓰ ꓠꓹ ꓟ ꓥ ꓡꓳ꓿ 13 ꓥꓪ ꓠꓴꓽ ꓕꓱ ꓟꓬ ꓫꓵ ꓐꓯˍ ꓟ ꓠꓬ꓾ ꓞꓳ ꓤ ꓙ ꓗꓴ ꓠꓲꓹ ꓡꓰ ꓟꓸ ꓖꓶˍ ꓟ ꓐꓯ ꓘꓶ ꓗꓪ ꓐꓰ ꓟꓽ ꓥ ꓥ꓾ ꓢꓲ-ꓫꓬ-ꓟ-ꓦ ꓟꓸ ꓖꓶˍ ꓟ ꓐꓯ ꓘꓶꓽˍ ꓐꓰ꓾ ꓦ ꓗꓪ ꓟ ꓙꓽ ꓗꓴꓸ ꓠꓲꓹ ꓡꓰ ꓦ ꓗꓪ ꓟ ꓫꓵꓽ ꓪꓴꓻ ꓒꓶꓻ ꓟꓸ ꓖꓶˍ ꓟ ꓥ ꓡꓳ꓿ 14 ꓧꓪꓽ ꓗꓪ ꓟ ꓡ ꓞꓳ ꓠꓬ꓾ ꓪꓴ-ꓢ ꓦ ꓗꓪ ꓟ ꓫꓵꓽ ꓪꓴꓻ ꓠꓽ ꓙꓲꓽˍ ꓟ ꓥꓳ꓾ ꓐꓰ ꓓꓵꓽ ꓙꓽˍ ꓠꓬꓲ꓾ ꓦ ꓗꓪ ꓟ ꓔꓯ ꓘꓳ ꓣꓴ ꓟꓽ ꓐ ꓡ꓿ ꓕꓱ ꓟꓬ ꓫꓵꓽ ꓠꓬ ꓦ ꓗꓪ ꓐꓰˍ ꓡꓰꓽ ꓙꓽ ꓜꓲꓼ ꓐ ꓡ ꓟ ꓥ ꓠꓬꓲ꓾ ꓧꓪꓽ ꓗꓪ ꓟ ꓡ ꓞꓳ ꓠꓬ ꓙꓽ ꓜꓲꓼ ꓟ ꓗꓴꓸ꓿ 15 ꓦ ꓗꓪ ꓟ ꓡ ꓞꓳ ꓠꓽ ꓙꓳˍ ꓟ ꓥ ꓕ ꓑꓳ ꓔꓯ ꓦꓰꓽ ꓗꓴꓸ ꓡꓳ꓿ ꓖꓳ ꓡꓱ ꓥ ꓟꓲ ꓧꓪꓽ ꓗꓪ ꓟ ꓡꓽ ꓞꓳ ꓡꓰ ꓬꓲ ꓔꓯ ꓦꓰꓽ ꓐ ꓡ ꓢꓴ ꓟꓽ ꓙꓳ꓿ 16 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓢꓲ ꓒꓽ ꓬꓲ ꓓꓵꓽ ꓙˍ ꓟ ꓔꓯ ꓢꓷꓸ ꓢꓲ꓾ ꓬꓲ ꓔꓯ ꓟꓸ ꓖꓶ ꓗꓴꓸ ꓢꓴ ꓮꓽ ꓟ ꓥ ꓡ? ꓐꓰ꓾ ꓐꓯˍ ꓡꓳ꓿ ꓖꓳ ꓡꓱ ꓥ ꓟꓲ ꓣꓳꓽ ꓠꓯꓸꓼ ꓗꓪ ꓠꓽ ꓙꓲ-ꓢꓴ ꓬꓲ ꓠꓲꓹ ꓟ ꓓꓯꓹ ꓡꓳ꓿

1 ꓘꓳ-ꓡꓱ-ꓕꓴ 3

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓧꓶꓸ ꓕꓯ ꓠꓴ ꓪꓽ ꓔꓯ ꓥꓪ ꓫꓸ ꓕꓱˍ ꓕꓯ꓾ ꓦ ꓗꓪ ꓟ ꓡ ꓞꓳ ꓔꓯˍ ꓡꓰ ꓐꓰ ꓫꓸ ꓕꓱ ꓟꓽ ꓠ꓿ ꓧꓪꓽ ꓖꓳ ꓓꓱ ꓗꓪ ꓟ ꓐꓰ꓾ ꓙꓲ-ꓢꓴ ꓠꓯꓸꓼ ꓗꓪ ꓞꓳ ꓫꓵꓼ ꓤ ꓔꓯˍ ꓡꓰ ꓐꓰ ꓫꓸ ꓕꓱ ꓗꓷꓳ꓿ 2 ꓥꓪ ꓠꓬ ꓠꓴ ꓪꓽ ꓔꓯ ꓜꓻ ꓑꓰꓹ ꓟꓽ ꓖꓶ ꓜꓽ ꓜ ꓮꓽ ꓚꓵꓹ ꓖꓶ ꓓꓳꓻ ꓗꓷꓳ꓿ ꓮ ꓡꓲꓳ ꓐꓯ ꓠꓬ ꓖꓳ ꓕꓯ ꓠꓴ ꓪꓽ ꓜꓻ ꓑꓰꓹ ꓜꓽ ꓟꓽ ꓗꓴꓸ꓿ ꓚꓵ ꓚꓵ ꓐꓯˍ ꓠꓬ ꓮ ꓟꓶˍ ꓟꓲ ꓜꓽ ꓟꓽ ꓗꓴꓸ ꓢꓰꓽ꓿ 3 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓮ ꓟꓶˍ ꓟꓲ ꓧꓪꓽ ꓗꓪ ꓟ ꓡ ꓞꓳ ꓥ ꓢꓰꓽ ꓡꓳ꓿ ꓠꓴ ꓪꓽ ꓗꓳ ꓡꓳ ꓗꓪ ꓟꓬ ꓦꓯꓸˍ ꓟ ꓐꓰ ꓢꓯꓼ ꓡꓯꓽ ꓘꓳˍ ꓟ ꓙꓳˍ ꓠꓬꓲ꓾ ꓠꓴ ꓪꓽ ꓠꓽ ꓧꓪꓽ ꓗꓪ ꓟ ꓥ ꓢꓲ꓾ ꓟꓲ ꓠꓯ ꓚꓱꓹ ꓚ ꓢꓴ ꓥ ꓢꓰꓽ ꓡꓳ ꓟꓽ ꓥ ꓡ? 4 ꓠꓴ ꓪꓽ ꓕꓲ ꓣꓳ ꓠꓬ꓾ ꓥꓪ ꓠꓽ ꓒꓳ-ꓡꓳ ꓔꓯꓸ ꓟ ꓥꓳ꓾ ꓠꓱꓸ ꓐꓯ ꓕꓲ ꓣꓳ ꓠꓬ꓾ ꓥꓪ ꓠꓽ ꓬ-ꓑꓳ-ꓡꓳ ꓔꓯꓸ ꓟ ꓥꓳ꓾ ꓐꓰ ꓐꓯˍ ꓠꓬ꓾ ꓠꓴ ꓪꓽ ꓠꓽ ꓧꓪꓽ ꓗꓪ ꓟ ꓟꓽ ꓥ ꓡ? 5 ꓬ-ꓑꓳ-ꓡꓳ ꓠꓬ ꓮꓸ ꓫꓵ ꓥ ꓡ? ꓒꓳ-ꓡꓳ ꓠꓬ ꓮꓸ ꓫꓵ ꓥ ꓡ? ꓢꓲ ꓒꓽ ꓡꓰ ꓮꓽ ꓟ ꓔꓯ ꓮ ꓡꓲ ꓖꓶˍ ꓠꓬ ꓖꓳ ꓡꓱ ꓣꓱꓽ ꓙ ꓢꓴˍ ꓡꓰꓽ ꓥ ꓢꓲ꓾ ꓬꓲ ꓪꓽ ꓗꓪ ꓐꓰ ꓢꓲ ꓒꓽ ꓔꓯ ꓠꓴ ꓪꓽ ꓙꓵꓻ ꓗꓷ ꓟ ꓥ ꓡꓳ꓿ 6 ꓥꓪ ꓠꓬ ꓔꓶ ꓢꓴ꓾ ꓬ-ꓑꓳ-ꓡꓳ ꓠꓬ ꓬꓲꓻ ꓙꓬ ꓕꓲꓽ ꓢꓴ ꓥ ꓢꓲ꓾ ꓪꓴꓽ ꓡ ꓝꓲ ꓢꓴ ꓠꓽ ꓪꓴ-ꓢ ꓥ ꓡꓳ꓿ 7 ꓖꓳ ꓡꓱ ꓠꓬꓲ ꓔꓶ ꓢꓴˍ ꓟꓲ꓾ ꓬꓲꓻ ꓙꓬ ꓕꓲꓽ ꓢꓴˍ ꓟꓲ ꓮꓸ ꓫꓵ ꓟꓽ ꓥ꓿ ꓚꓬꓹ ꓒꓵꓽˍ ꓟ ꓠꓬ ꓪꓴꓽ ꓡ ꓝꓲ ꓢꓴ ꓪꓴ-ꓢˍ ꓡꓰꓽ ꓥ ꓡꓳ꓿ 8 ꓔꓶ ꓢꓴˍ ꓐꓰ ꓬꓲꓻ ꓙꓬ ꓕꓲꓽ ꓢꓴ ꓠꓬ ꓕꓲ ꓡꓰꓹꓼ ꓟꓬꓱꓽ ꓬꓰ ꓢꓴ ꓥ ꓢꓲ꓾ ꓮꓽ ꓟ ꓟꓬꓱꓽ ꓮ ꓡꓲ ꓬꓰ ꓗꓷ ꓠꓬ ꓖꓳ ꓡꓱ ꓡꓯꓼ ꓫꓴ ꓟꓶˍ ꓥꓳ꓿ 9 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓠ ꓪꓴ-ꓢˍ ꓐꓰ ꓕꓲ ꓛꓳꓺꓼ ꓟꓬꓱꓽ ꓬꓰ ꓢꓴ ꓥ ꓢꓲ꓾ ꓠꓴ ꓪꓽ ꓠꓬ ꓪꓴ-ꓢ ꓦ ꓟꓲˍ ꓐꓰ ꓪꓴ-ꓢ ꓡꓰ ꓜꓶ ꓔꓬ ꓟ ꓦꓲ ꓥ ꓡꓳ꓿ 10 ꓪꓴ-ꓢ ꓡꓰ ꓥꓪ ꓔꓯ ꓖꓶ ꓡ ꓟ ꓣꓱꓽ ꓛꓰ ꓗꓪ ꓐꓰ꓾ ꓥꓪ ꓠꓬ ꓙꓽ ꓜꓲꓼˍ ꓟ ꓦꓲ ꓫꓬ ꓢꓴ ꓑꓴ ꓙꓵꓻˍ ꓡꓰ ꓐꓰ ꓦꓲ ꓚꓰ ꓜꓶ ꓗꓷ ꓢꓲ꓾ ꓠꓱꓸ ꓐꓯ ꓢꓴ ꓠꓬ ꓦꓲ ꓚꓰ ꓖꓳ ꓟ ꓕꓯꓽ ꓢꓲ ꓗꓪ ꓦꓲ ꓫꓬꓹˍ ꓡꓳ꓿ ꓖꓳ ꓡꓱ ꓢꓲ ꓦꓲ ꓚꓰ ꓖꓳ ꓟ ꓕꓯꓽ ꓢꓲ ꓗꓪ ꓦꓲ ꓫꓬ ꓢꓴ ꓮ ꓡꓲ ꓕꓲ ꓣꓳˍ ꓟꓲ ꓮꓽ ꓘꓶꓸ ꓤ ꓟꓳ ꓠꓯꓹ ꓡꓳ꓿ 11 ꓮ ꓡꓲꓳ ꓐꓯ ꓠꓬ ꓜꓶꓻ ꓓꓳ ꓡꓰ ꓟ ꓦꓲ ꓚꓰ ꓖꓳ ꓟ ꓟꓽ ꓥ ꓠꓬ꓾ ꓠꓱꓸ ꓐꓯ ꓦꓲ ꓚꓰ ꓜꓶ ꓐ ꓡ ꓢꓴ ꓟꓽ ꓙꓳ꓿ ꓦꓲ ꓚꓰ ꓖꓳ ꓟ ꓠꓬ ꓬꓰ-ꓢꓴ ꓙꓲ-ꓢꓴ ꓥ ꓡꓳ꓿ 12 ꓦꓲ ꓚꓰ ꓕꓱ ꓟ ꓕꓯ ꓢꓲ ꓗꓪ꓾ ꓫꓵˍ ꓐꓰ ꓒꓴˍ ꓐꓰ ꓒꓵꓽ ꓡꓳˍ ꓐꓰ꓾ ꓢꓲꓹˍ ꓐꓰ ꓫꓵꓸˍ ꓐꓰ ꓜꓻ ꓑꓱꓸ ꓡꓰ ꓦꓲ ꓫꓬ ꓢꓴ ꓙꓳˍ ꓠꓬ꓾ 13 ꓙꓲ-ꓢꓴ ꓦꓬꓼ ꓠꓬꓲ ꓗꓪ ꓮ ꓡꓲ ꓕꓲ ꓣꓳ ꓟ ꓟꓬꓱꓽ ꓔꓯˍ ꓟꓲ꓾ ꓬꓲ ꓬꓰˍ ꓟ ꓟꓬꓱꓽ ꓮ ꓡꓲ ꓡꓴ ꓫꓵꓽ ꓥ ꓟ ꓟꓳꓸ ꓖꓶ ꓓꓳ ꓡ ꓠꓹ ꓟ꓾ ꓮꓸ ꓔꓳꓸ ꓡꓰ ꓛꓴꓻ ꓤꓹ ꓠꓬꓲ ꓡ ꓥꓳ꓿ 14 ꓦꓲ ꓚꓰ ꓖꓳ ꓟ ꓕꓯ ꓢꓲ ꓗꓪ ꓤꓰꓻ ꓞꓹ ꓟ ꓟꓬꓱꓽ ꓬꓰ ꓐ ꓡ ꓢꓴ ꓠꓽ ꓡꓯꓼ ꓫꓴ ꓟꓶˍ ꓥꓳ꓿ 15 ꓮꓽ ꓟ ꓬꓰ ꓗꓷ ꓟ ꓟꓬꓱꓽ ꓔꓯ ꓮꓸ ꓔꓳꓸ ꓡꓰ ꓛꓴꓺ ꓖꓴ ꓡꓰˍ ꓕꓯ ꓠꓽ ꓑ ꓒꓲꓼ ꓗꓷˍ ꓥꓳ꓿ ꓖꓳ ꓡꓱ ꓥ ꓟꓲ ꓚꓲ ꓛꓬ ꓠꓽ ꓮꓸ ꓔꓳꓸ ꓗꓪ ꓗꓳꓸ ꓙꓻ ꓙꓰˍ ꓟ ꓡꓰ ꓐꓰ ꓚꓬꓴ ꓟꓶˍ ꓥꓳ꓿ 16 ꓠꓴ ꓪꓽ ꓠꓬ ꓪꓴ-ꓢ ꓦꓲ ꓥ ꓢꓲ꓾ ꓪꓴ-ꓢ ꓦ ꓠꓬ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓟ ꓠꓴ ꓪꓽ ꓟꓽ ꓢꓷꓸ ꓡ? 17 ꓮꓽ ꓟ ꓡꓰ ꓪꓴ-ꓢ ꓦꓲ ꓔꓯ ꓐꓬ ꓡꓰ ꓝꓲˍ ꓕꓯ ꓠꓽ꓾ ꓪꓴ-ꓢ ꓡꓰ ꓬꓲ ꓔꓯˍ ꓟꓲ ꓐꓬ ꓡꓰ ꓝꓲˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓦꓲ ꓠꓽ ꓢꓲꓽ ꓫꓬꓻˍ ꓟ ꓥ ꓡꓳ꓿ ꓦꓲ ꓕꓱ ꓟ ꓠꓬ ꓠꓴ ꓪꓽ ꓥ ꓡꓳ꓿ 18 ꓚꓲ ꓛꓬ ꓔꓯ ꓕꓽ ꓗꓶꓸ꓿ ꓠꓴ ꓪꓽ ꓗꓳ ꓡꓳ ꓗꓪ ꓮ ꓡꓲ ꓕꓲ ꓣꓳ ꓕꓱ ꓕꓲ ꓤꓶ ꓗꓪ ꓟ ꓙꓽ ꓗꓴꓸ ꓠꓲꓹ ꓙꓳ ꓢꓴ ꓥꓳ꓾ ꓐꓰ ꓓꓵꓽ ꓙˍ ꓕꓯ ꓠꓽ꓾ ꓙꓽ ꓗꓴ ꓠꓲꓹ ꓚꓵ ꓙꓳ ꓡ ꓠꓹ ꓟ ꓬꓲ ꓠꓬ ꓞꓳ ꓙꓲꓽ ꓒꓬꓱꓼ ꓡ ꓝꓲ꓿ 19 ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓕꓱ ꓟ ꓗꓪ ꓟ ꓙꓽ ꓗꓴꓸ ꓠꓲꓹ ꓠꓽ ꓪꓴ-ꓢ ꓟꓲꓽ ꓙꓬ ꓗꓪ ꓙꓲꓽˍ ꓟ ꓥ ꓡꓳ꓿ ꓕꓳ ꓶ ꓗꓪ꓾ ꓢꓲ ꓒꓽ ꓡꓰ ꓙ ꓗꓴꓸ ꓠꓲꓹ ꓙꓳ ꓢꓴ ꓔꓯ ꓬꓲ ꓚꓲ ꓛꓬ ꓖꓳꓼ ꓠꓲꓹ ꓗꓪ ꓪꓴꓻ ꓡꓰ ꓝꓲˍ ꓡꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 20 ꓝꓮꓲ ꓠꓬ꓾ ꓙ ꓗꓴ ꓠꓲꓹ ꓙꓳ ꓢꓴ ꓓꓵꓽ ꓙꓽˍ ꓟ ꓠꓬ ꓬꓲ ꓖꓳꓽ ꓥ ꓟ ꓢꓲ ꓒꓽ ꓢꓷˍ ꓡꓳ꓾ ꓐꓰ ꓐꓳ ꓔ ꓢꓰꓽ ꓡꓳ꓿ 21 ꓖꓳ ꓡꓱ ꓠꓬꓲ ꓮꓽ ꓟˍ ꓟꓲ ꓞꓳ ꓤ ꓑꓶ ꓓꓴ ꓕꓽ ꓘꓶ ꓘꓹ꓿ ꓮ ꓡꓲꓳ ꓐꓯ ꓠꓬ ꓙꓳˍ ꓟ ꓥ ꓕ ꓑꓳꓸ ꓠꓬ ꓠꓴ ꓪꓽ ꓔꓯꓸ ꓟ ꓥ ꓡꓳ꓿ 22 ꓒꓳ-ꓡꓳ ꓥ ꓟꓲ꓾ ꓬ-ꓑꓳ-ꓡꓳ ꓥ ꓟꓲ꓾ ꓒꓲ-ꓕꓱ ꓥ ꓟꓲ꓾ ꓟꓲ ꓠꓯ ꓥ ꓟꓲ꓾ ꓢꓯꓼ ꓟꓬ ꓥ ꓟꓲ꓾ ꓫꓵꓻˍ ꓟ ꓥ ꓟꓲ꓾ ꓮ ꓟꓶ ꓟ ꓥ ꓟꓲ꓾ ꓡ ꓠꓹ ꓟ ꓥ ꓟꓲ꓾ ꓮꓽ ꓙꓵ ꓡꓱꓸꓼ ꓠꓴ ꓪꓽ ꓔꓯꓸ ꓟ ꓥ ꓡꓳ꓿ 23 ꓠꓴ ꓪꓽˍ ꓟꓲ ꓙꓲ-ꓢꓴ ꓔꓯꓸ ꓟ ꓥ ꓢꓲ꓾ ꓙꓲ-ꓢꓴ ꓠꓽ ꓪꓴ-ꓢ ꓔꓯꓸ ꓟ ꓥ ꓡꓳ꓿

1 ꓘꓳ-ꓡꓱ-ꓕꓴ 4

1 ꓥꓪ ꓠꓴꓽ ꓔꓯ ꓠꓬ꓾ ꓪꓴ-ꓢ ꓚꓵ ꓘꓶ ꓡꓯꓼ ꓙꓱ ꓔ ꓢꓴ ꓙꓲ-ꓢꓴ ꓬꓲ ꓚꓳ ꓑꓸ ꓥꓳ꓾ ꓐꓰ ꓠꓴ ꓪꓽ ꓚꓬꓹ ꓠꓯꓹ ꓡꓳ꓿ 2 ꓬꓲ ꓖꓳ ꓡꓱ ꓣꓱꓽ ꓙ ꓟꓬꓱꓽ ꓡꓯꓼ ꓙꓱ ꓔ ꓟ ꓟꓶ ꓡꓰ ꓢꓴ ꓠꓬ꓾ ꓬꓲ ꓢꓲ ꓒꓽ ꓦ ꓡꓱ ꓐꓳ ꓓꓻˍ ꓟ ꓠꓲꓹ ꓟ ꓙꓳ ꓠꓯꓹ ꓡꓳ꓿ 3 ꓖꓳ ꓡꓱ ꓠꓬꓲ ꓠꓴ ꓪꓽ ꓡꓰ ꓥꓪ ꓔꓯ ꓓꓰꓺ ꓖꓴ ꓧꓪ ꓥ ꓟꓲ꓾ ꓢꓴ ꓡꓰ ꓓꓰꓺ ꓡ ꓥ ꓟꓲ꓾ ꓥꓪ ꓠꓽ ꓕꓱ ꓟ ꓔꓯ ꓮꓽ ꓘꓶꓸ ꓣꓳꓺˍ ꓟ ꓕꓲ ꓫꓵ ꓚꓬꓹ ꓡꓳ꓿ ꓥꓪˍ ꓟꓲ ꓥꓪ ꓚꓲ ꓛꓬ ꓔꓯ ꓓꓰ ꓖꓴ ꓟꓽ ꓐꓯ ꓞꓷꓹ꓿ 4 ꓖꓳ ꓡꓱ ꓢꓲ ꓥꓪ ꓦꓰꓽ ꓠꓲꓹ ꓡꓰ ꓚꓲ ꓛꓬ ꓔꓯ ꓮꓸ ꓫꓵ ꓕꓼ ꓓꓴ ꓟꓽ ꓙꓳˍ ꓟꓲ꓾ ꓕꓱ ꓟ ꓗꓪ ꓐꓰ ꓥꓪ ꓔꓯ ꓓꓰ ꓖꓴ ꓟꓽ ꓙꓳˍ ꓟ ꓟꓽ ꓥ꓿ ꓥꓪ ꓔꓯ ꓓꓰ ꓖꓴ ꓐꓯ ꓞꓷꓹ ꓢꓴ ꓠꓽ ꓢꓲ ꓒꓽ ꓥ ꓡꓳ꓿ 5 ꓖꓳ ꓡꓱ ꓠꓬꓲ ꓬꓲ ꓝꓲꓸ ꓟꓽ ꓛꓲ ꓡ ꓢꓰ ꓕꓯˍ ꓡꓰ ꓮꓽ ꓟ ꓔꓯ ꓟꓳꓸˍ ꓟꓲ ꓓꓰ ꓘꓶ ꓟꓽ ꓞꓷꓹ ꓞꓷꓹ꓾ ꓢꓲ ꓒꓽ ꓡ ꓗꓪ ꓛꓲ ꓦꓴ ꓠꓬꓹ꓿ ꓬꓲ ꓡꓰ ꓠꓯ ꓞꓲꓹ ꓟ ꓗꓪ ꓚꓵ ꓔ ꓟ ꓔꓯ ꓠꓬ ꓠꓬꓲ ꓟꓳ ꓓꓴ ꓗꓪ ꓟꓳꓸ ꓖꓶ ꓡ ꓢꓲ꓾ ꓞꓳ ꓤ ꓠꓲꓹ ꓟ ꓗꓪ ꓓꓵꓽ ꓙꓽˍ ꓟ ꓟꓰꓹ ꓓꓳ ꓡ ꓥꓳ꓿ ꓖꓳ ꓕꓯ ꓠꓬ ꓮ ꓡꓲ ꓕꓲ ꓣꓳˍ ꓟꓲ ꓬꓲ ꓬꓰ ꓗꓷ ꓟ ꓔꓯ ꓛꓳ ꓢꓲ ꓪꓴ-ꓢ ꓗꓪ ꓐꓰ ꓫꓱꓸ ꓖꓶˍ ꓟ ꓟꓶˍ ꓥꓳ꓿ 6 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓬ ꓕꓱ ꓟꓬ ꓫꓵ ꓗꓪ ꓐꓰ ꓥꓪ ꓚꓲ ꓛꓬˍ ꓐꓰ ꓬ-ꓑꓳ-ꓡꓳ ꓔꓯ ꓔꓯꓺ ꓗꓷꓳ꓿ ꓥꓪ ꓕꓱ ꓡꓱ ꓬꓰˍ ꓟ ꓠꓬ꓾ ꓠꓴ ꓪꓽ ꓠꓽ ꓥꓪ ꓠꓴꓽ ꓗꓪ ꓐꓰ ꓢꓳ ꓟꓶ ꓢꓲ꓾ ꓐꓳ ꓔ ꓟ ꓕꓯ ꓢꓲ ꓟꓽ ꓬꓰ ꓠꓹ ꓟ ꓥ ꓡꓳ꓿ ꓝꓮꓲ ꓠꓴ ꓪꓽ ꓠꓬ ꓥꓪ ꓠꓴꓽ ꓕꓲ ꓣꓳ ꓑꓶꓸ ꓓꓴ ꓘꓶ ꓘꓹ ꓢꓲ꓾ ꓕꓲ ꓣꓳ ꓔꓯ ꓟꓳꓻ ꓟꓽ ꓟꓵ ꓐꓰ ꓟꓽ ꓬꓰ ꓠꓹ ꓟˍ ꓟꓲ ꓥ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓟꓽ ꓫꓱꓸ ꓡꓯꓽ ꓘꓳ ꓝꓲ ꓢꓴ ꓮꓽ ꓟ ꓥ ꓡ? ꓠꓴ ꓪꓽ ꓠꓬ ꓪꓴ-ꓢ ꓗꓪ ꓐꓰ ꓟꓶˍ ꓟ ꓟꓽ ꓥ ꓟ ꓮꓸ ꓫꓵ ꓙꓳˍ ꓡ? ꓠꓴ ꓪꓽ ꓟꓶˍ ꓟ ꓮꓽ ꓙꓵ ꓪꓴ-ꓢ ꓡꓯꓼ ꓫꓴ ꓥ ꓕꓯ ꓠꓽ꓾ ꓮꓸ ꓫꓵ ꓪꓴꓸ ꓠꓬꓲ ꓠꓴ ꓪꓽ ꓚꓲ ꓛꓬ ꓢꓯꓼ ꓗꓪ ꓐꓰ ꓟꓶ ꓡꓰ ꓟ ꓡꓰ ꓐꓰ ꓘꓶ ꓘꓹ ꓡ? 8 ꓠꓴ ꓪꓽ ꓠꓬ ꓮ ꓟꓶˍ ꓡꓰ ꓜꓽ ꓐꓳ ꓓꓳꓻ ꓐꓳ ꓡꓰꓳ꓿ ꓮ ꓟꓶˍ ꓡꓰ ꓞꓳ ꓐꓳ ꓒꓬꓱꓼ ꓡꓺꓳ꓿ ꓥꓪ ꓠꓴꓽˍ ꓟꓲ ꓠꓴ ꓪꓽˍ ꓐꓰ ꓕꓲ ꓡꓰꓹꓼ ꓪ ꓔꓲ ꓣꓱ ꓪ ꓠꓹ ꓟ꓾ ꓥꓪ ꓠꓬ ꓠꓴ ꓪꓽ ꓔꓯ ꓚꓵ ꓚꓵ ꓪ ꓔꓲ ꓒꓬꓱꓼ ꓡ ꓝꓲ ꓠꓲꓹ ꓫꓵˍ ꓡꓳ ꓫꓵꓽ ꓥ ꓡꓳ꓿ 9 ꓮ ꓡꓲꓳ ꓐꓯ ꓠꓬ ꓥꓪ ꓓꓵꓽ ꓙꓽˍ ꓠꓬ꓾ ꓪꓴ-ꓢ ꓠꓽ ꓥꓪ ꓠꓴꓽ ꓔꓯ ꓮꓸ ꓓꓲ ꓣꓳ ꓓꓰꓺˍ ꓟ ꓒꓬꓱꓼ ꓡ ꓝꓲ ꓢꓲ꓾ ꓫꓵꓻ ꓠꓹ ꓟ ꓐꓯ ꓞꓷꓹ ꓗꓷ ꓢꓴ ꓔꓯˍ ꓡꓰ ꓐꓰ꓾ ꓟꓲ ꓠꓯ ꓕꓱ ꓟ ꓗꓪ ꓟꓴꓽ ꓗꓪ ꓝꓲ ꓓꓴ ꓐꓴˍ ꓐꓰ ꓞꓳ ꓤ ꓡꓳꓸ ꓗꓹ ꓓꓴ ꓒꓬꓱꓼ ꓡ ꓝꓲꓳ꓿ 10 ꓥꓪ ꓠꓴꓽ ꓠꓬ ꓙꓲ-ꓢꓴ ꓐꓱ ꓶ ꓞꓳ ꓙꓲꓽ ꓥ ꓡꓳ꓿ ꓠꓴ ꓪꓽ ꓠꓽ ꓙꓲ-ꓢꓴ ꓠꓯꓸꓼ ꓗꓪ ꓙꓽ ꓜꓲꓼˍ ꓡꓳ꓿ ꓥꓪ ꓠꓴꓽ ꓠꓬ ꓢꓯꓼ ꓐꓽˍ ꓟꓲ ꓠꓴ ꓪꓽ ꓠꓽ ꓢꓯꓼ ꓙꓳˍ ꓡꓳ꓿ ꓠꓴ ꓪꓽ ꓠꓬ ꓟꓬꓱ ꓓꓳꓽ ꓙꓳˍ ꓡꓳ꓿ ꓥꓪ ꓠꓴꓽ ꓠꓽ ꓢꓴ ꓡꓰ ꓟꓳꓻ ꓟꓽ ꓟꓵ ꓟ ꓥ ꓡꓳ꓿ 11 ꓮ ꓟꓶ ꓕꓱ ꓕꓲ ꓙꓵꓹ ꓗꓪ ꓛꓲ ꓥꓪ ꓠꓴꓽ ꓠꓬ꓾ ꓟꓷꓼˍ ꓟ꓾ ꓢꓲꓼˍ ꓟ꓾ ꓙꓬꓽ ꓡꓯꓽ ꓟ ꓐꓰ ꓓꓶꓽ ꓡ ꓟ ꓜꓲꓽ ꓢꓲ꓾ ꓔꓬ ꓕꓶꓺ ꓡꓰ ꓖꓴ ꓟꓽ ꓙꓳ꓿ 12 ꓥꓪ ꓠꓴꓽ ꓠꓬ ꓚꓲ ꓛꓬ ꓡꓯꓼ ꓒꓯꓹ ꓡꓰ ꓟꓬꓱꓽ ꓬꓰ ꓢꓯꓼ ꓕꓵˍ ꓡꓳ꓿ ꓖꓳ ꓡꓱ ꓢꓲ ꓢꓴ ꓡꓰ ꓙꓱꓽ ꓕꓼ ꓡ ꓠꓬ ꓥꓪ ꓠꓴꓽ ꓡꓰ ꓶꓼ ꓥꓳ ꓙꓱꓽ ꓖꓶˍ ꓡꓳ꓿ ꓢꓴ ꓡꓰ ꓗꓸ ꓧꓪ ꓡ ꓥ ꓟꓲ ꓥꓪ ꓠꓴꓽ ꓜꓲꓽˍ ꓡꓳ꓿ 13 ꓢꓴ ꓡꓰ ꓤꓲꓺ ꓡ ꓠꓬ ꓥꓪ ꓠꓴꓽ ꓡꓰ ꓙꓲꓻ ꓘꓶꓽ ꓫꓸ ꓕꓱ ꓖꓶˍ ꓡꓳ꓿ ꓮ ꓟꓶ ꓗꓪ ꓛꓲ ꓥꓪ ꓠꓴꓽ ꓠꓬ ꓟꓲ ꓠꓯ ꓗꓪ ꓟ ꓫꓵꓹ ꓦ ꓗꓷ ꓓꓴ ꓑꓱꓸ ꓛꓵꓽˍ ꓡꓰ ꓐꓰ ꓗꓹ ꓡꓳ꓿ 14 ꓥꓪ ꓠꓬ ꓠꓴ ꓪꓽ ꓔꓯ ꓫꓸ ꓔꓳ ꓡꓰ ꓝꓲ ꓠꓹ ꓟ ꓕꓱ ꓟꓬ ꓫꓵꓽ ꓐꓳ ꓖꓶˍ ꓟ ꓟꓽ ꓥ꓿ ꓥꓪ ꓠꓲ ꓠꓵˍ ꓟ ꓤ ꓠꓱ ꓐꓴ ꓔꓯˍ ꓡꓰ ꓐꓰ ꓘꓶꓸ ꓖꓶˍ ꓟ ꓥ ꓡꓳ꓿ 15 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓙꓲ-ꓢꓴ ꓠꓯꓸꓼ ꓗꓪ ꓟꓸ ꓖꓶ ꓢꓴ ꓕꓲ ꓟꓶꓽ ꓣꓳ ꓙꓳ ꓐꓷˍ ꓟꓲ꓾ ꓠꓴ ꓪꓽ ꓐꓹ ꓐ ꓠꓽ ꓟꓽ ꓟꓬꓽ꓿ ꓥꓪ ꓠꓽ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ꓾ ꓶꓼ ꓓꓳꓽ ꓫꓱꓹ ꓓꓳ ꓗꓪ ꓐꓰ ꓠꓴ ꓪꓽ ꓔꓯ ꓦꓵꓻ ꓗꓷ ꓟ ꓠꓴ ꓪꓽ ꓐꓹ ꓐ ꓥ ꓡꓳ꓿ 16 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓥꓪ ꓔꓯ ꓔꓯꓺ ꓢꓳ ꓢꓴ ꓬꓰ ꓡꓯ꓾ ꓐꓰ ꓘꓶꓸ ꓖꓶ ꓠꓲꓹ ꓫꓵˍ ꓡꓳ꓿ 17 ꓕꓱ ꓟ ꓑꓶꓸ ꓓꓴ ꓥꓪ ꓠꓬ ꓕꓲ-ꓟꓳ-ꓕꓲ-ꓪꓴ ꓔꓯ ꓠꓴ ꓪꓽ ꓔꓬ ꓗꓪ ꓝꓲ ꓩꓴ ꓡꓺꓳ꓿ ꓬꓲ ꓠꓽ ꓢꓲ ꓒꓽ ꓠꓯꓸꓼ ꓗꓪ ꓥꓪ ꓠꓲꓹ ꓠꓵˍ ꓟ ꓐꓰ ꓦ ꓡꓱ ꓐꓳˍ ꓟ ꓤ ꓥ ꓡꓳ꓿ ꓘꓴ ꓜꓲꓼ ꓞꓳ ꓕꓲ ꓟ ꓡꓰ ꓕꓲ ꓟ ꓗꓪ ꓥꓪ ꓟꓸ ꓖꓶˍ ꓟ ꓡꓰ ꓐꓰ꓾ ꓙꓲ-ꓢꓴ ꓠꓯꓸꓼ ꓗꓪ ꓥꓪ ꓮ ꓡꓲ ꓞꓳ ꓙꓳˍ ꓟ ꓬꓲ ꓡꓰ ꓠꓴ ꓪꓽ ꓔꓯ ꓐꓯ ꓟꓸ ꓖꓶ ꓢꓲ ꓬꓲꓼ ꓠꓬꓲꓸ ꓖꓶ ꓡ ꓥꓳ꓿ 18 ꓮ ꓟꓶ ꓠꓴ ꓪꓽ ꓕꓲ ꓐꓱ ꓠꓬ ꓠꓴ ꓪꓽ ꓔꓬ ꓗꓪ ꓥꓪ ꓝꓮꓲ ꓟꓽ ꓡꓻꓳ꓾ ꓐꓰ ꓓꓵꓽ ꓙꓽ ꓢꓲ ꓠꓲꓹ ꓘꓹ ꓔꓬ ꓐꓷ꓿ 19 ꓖꓳ ꓡꓱ ꓥ ꓟꓲ ꓢꓲ ꓒꓽ ꓠꓲꓹ ꓡꓶꓽ ꓥ ꓕꓯ ꓠꓽ꓾ ꓠꓴ ꓪꓽ ꓔꓬ ꓗꓪ ꓥꓪ ꓮꓸ ꓟꓲꓸ ꓡꓻˍ ꓥꓳ꓿ ꓖꓳ ꓕꓯ ꓠꓲꓹ ꓘꓹ ꓢꓴ ꓐꓴ ꓐꓯ ꓘꓶꓽˍ ꓡꓰ ꓟꓽ ꓞꓲ꓾ ꓬꓲ ꓪꓽ ꓠꓯꓸꓼ ꓗꓪ ꓪꓽ ꓠꓬꓲˍ ꓟ ꓢꓯꓼ ꓮ ꓡꓲ ꓕꓲ ꓫꓵꓽ ꓙꓳˍ ꓟˍ ꓟꓲ ꓥꓪ ꓢꓷꓸ ꓡꓰˍ ꓥꓳ꓿ 20 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓗꓴꓷ ꓠꓽ ꓞꓳ ꓤ ꓫꓸ ꓕꓱ ꓘꓶꓽ ꓗꓪ ꓒꓬꓱꓼ ꓞꓹ ꓟ ꓟꓽ ꓥ꓿ ꓪꓴ-ꓢ ꓪꓽ ꓠꓬꓲˍ ꓟ ꓠꓯꓸꓼ ꓗꓪ ꓒꓬꓱꓼ ꓞꓹ ꓟ ꓥ ꓡꓳ꓿ 21 ꓠꓴ ꓪꓽ ꓮꓸ ꓫꓵ ꓠꓵˍ ꓡ? ꓥꓪ ꓠꓬ ꓒꓲꓸ ꓓꓻ ꓔꓯꓹ ꓔ ꓢꓲ ꓠꓴ ꓪꓽ ꓔꓬ ꓗꓪ ꓡ ꓠꓯꓹ ꓡ? ꓥ ꓠꓬ ꓠꓵꓻ ꓠꓲꓹ ꓐꓰ ꓠꓴꓽˍ ꓟ ꓠꓲꓹ ꓟ ꓡꓰ ꓠꓴ ꓪꓽ ꓔꓬ ꓗꓪ ꓡ ꓠꓯꓹ ꓡ?

1 ꓘꓳ-ꓡꓱ-ꓕꓴ 5

1 ꓮ ꓟꓶ ꓠꓴ ꓪꓽ ꓗꓳ ꓡꓳ ꓗꓪ ꓟꓽ ꓢꓲ ꓟꓽ ꓫꓬ ꓬꓰˍ ꓟ ꓙꓳˍ ꓡꓳ꓾ ꓐꓯˍ ꓓꓳꓽ ꓥꓪ ꓑ ꓙꓽ ꓟꓶ ꓡꓰꓳ꓿ ꓬꓲ ꓐꓹ ꓐ ꓤ ꓟꓶꓻ ꓔꓯ ꓫ ꓢꓴ ꓕꓲ ꓣꓳ ꓙꓳˍ ꓡꓳ꓿ ꓕꓱ ꓡꓱ ꓡꓴ ꓫꓵꓽ ꓟꓽ ꓢꓲ ꓟꓽ ꓫꓬ ꓟ ꓠꓬ ꓟꓽ ꓦ ꓡꓱ ꓢꓴ ꓐꓴ ꓗꓳ ꓡꓳ ꓗꓪˍ ꓟꓲ ꓟꓽ ꓙꓳ꓿ 2 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓟꓽ ꓢꓲ ꓟꓽ ꓫꓬ ꓟ ꓕꓱ ꓟ ꓪꓴꓸ ꓠꓬꓲ ꓘꓶꓽ ꓘꓹˍ ꓢꓰꓽ ꓡꓳ꓿ ꓠꓴ ꓪꓽ ꓠꓬ ꓠꓲꓹ ꓥꓴꓻ ꓢꓲ ꓕꓱ ꓡꓱ ꓬꓰ ꓢꓴ ꓔꓯ ꓠꓴ ꓪꓽ ꓗꓳ ꓡꓳ ꓗꓪ ꓐꓰ ꓒꓰꓺ ꓩꓴ ꓗꓷ ꓠꓯꓹ ꓡꓳ꓾ ꓟꓽ ꓥ ꓡ? 3 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓻ ꓪꓽˍ ꓐꓰ ꓟꓽ ꓔꓬ ꓥ ꓟꓲ꓾ ꓥꓪ ꓦꓻ ꓠꓽ ꓠꓴ ꓪꓽˍ ꓐꓰ ꓔꓬ ꓠꓬꓲ꓾ ꓥꓪ ꓠꓬ ꓠꓴ ꓪꓽˍ ꓐꓰ ꓔꓬ ꓟ ꓡꓰ ꓐꓰ꓾ ꓕꓱ ꓡꓱ ꓬꓰ ꓢꓴ ꓔꓯ ꓚꓵ ꓚꓵ ꓥꓪ ꓮ ꓟꓶˍ ꓡꓰ ꓓꓰꓺ ꓘꓶ ꓞꓷꓹ ꓗꓷꓳ꓿ 4 ꓥꓪ ꓦꓻˍ ꓟꓲ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓬꓱꓺˍ ꓐꓰ ꓪꓽ ꓠꓬꓲˍ ꓟ ꓗꓪ ꓐꓰ ꓠꓴ ꓪꓽ ꓜꓲꓼ ꓓꓴ ꓗꓪ ꓠꓴ ꓪꓽˍ ꓐꓰ ꓕꓲ ꓪꓺꓼ ꓔꓬ ꓕꓯ꓾ 5 ꓕꓱ ꓡꓱ ꓬꓰ ꓢꓴ ꓬꓲ ꓦ ꓠꓬ ꓣꓳꓽ ꓢꓲ ꓒꓽ ꓬꓰ-ꓢꓴ ꓦꓬꓼ ꓠꓬꓲ ꓗꓪ ꓚꓬꓴ ꓟꓶ ꓢꓲ꓾ ꓬꓲ ꓧꓪꓽ ꓠꓲꓹ ꓡꓶ ꓔꓯ ꓐꓬ ꓡꓰ ꓝꓲ ꓠꓹ ꓟ꓾ ꓬꓲ ꓔꓯ ꓢ-ꓓꓯ ꓡꓯꓽ ꓒꓯꓹ ꓗꓪ ꓡꓯꓼ ꓙꓱ ꓗꓷ꓿ 6 ꓠꓴ ꓪꓽ ꓘꓶꓽ ꓘꓹˍ ꓟ ꓠꓬ ꓟꓽ ꓙꓲ꓿ ꓙꓵꓽ ꓧꓶꓽ ꓮ ꓔꓲꓸ ꓤ ꓡꓰ ꓕꓲ ꓘꓴꓸ ꓡꓱꓸꓼ ꓔꓯ ꓙꓵꓽ ꓡ ꓝꓲˍ ꓟ ꓠꓴ ꓪꓽ ꓟꓽ ꓢꓷ ꓡ? 7 ꓠꓴ ꓪꓽ ꓠꓬ ꓙꓵꓽ ꓧꓶꓽ ꓬꓲ ꓡꓵ ꓔꓯ ꓡꓳ ꓗꓷ ꓢꓲ꓾ ꓙꓵꓽ ꓧꓶ ꓟꓽ ꓓꓯꓹ ꓟ ꓘꓴꓸ ꓫꓵꓼ ꓒꓬꓱꓼ ꓡ ꓝꓲ꓿ ꓣꓳꓽ ꓦꓲ-ꓘꓳ-ꓑꓮꓲ ꓔꓲ ꓓꓴ ꓮ ꓣꓳ ꓤ ꓙꓲ-ꓢꓴ ꓔꓯ ꓣꓳꓽ ꓐꓱ ꓶ ꓢꓰꓼ ꓔꓲ ꓗꓷ ꓠꓬꓲ꓾ ꓠꓴ ꓪꓽ ꓠꓽ ꓚꓵ ꓚꓵ ꓘꓴꓸ ꓫꓵꓼ ꓥ ꓡꓳ꓿ 8 ꓖꓳ ꓡꓱ ꓠꓬꓲ ꓟꓽ ꓙꓲ ꓟꓽ ꓜꓳˍ ꓟ ꓐꓰ ꓥꓶˍ ꓟ ꓓꓯꓹ ꓟ ꓙꓵꓽ ꓧꓶꓽ ꓬꓲ ꓡꓵ ꓟꓽ ꓣꓱꓽ ꓣꓱ꓾ ꓙꓵꓽ ꓧꓶ ꓟꓽ ꓓꓯꓹ ꓟ꓾ ꓢꓲꓽ ꓫꓬˍ ꓟ ꓐꓰ ꓔꓱꓹˍ ꓟ ꓑ ꓑ ꓣꓱꓽ ꓢꓲ ꓣꓳꓽ ꓠꓬ ꓑꓮꓲ ꓬꓰ ꓡꓯ꓿ 9 ꓧꓶꓸ ꓕꓯ ꓥꓪ ꓡꓰ꓾ ꓟꓽ ꓢꓲꓽ ꓟꓽ ꓫꓬ ꓟ ꓬꓰ ꓢꓴˍ ꓐꓰ ꓛꓳꓽ ꓒꓯꓹ ꓕꓽ ꓬꓰ꓾ ꓐꓰ ꓐꓳ ꓖꓶ ꓗꓷꓳ꓿ 10 ꓟꓲ ꓠꓯ ꓕꓱ ꓟ ꓗꓪ ꓟ ꓟꓽ ꓢꓲꓽ ꓟꓽ ꓫꓬ ꓟ ꓬꓰ ꓢꓴ꓾ ꓥ ꓠꓬ ꓠꓲꓹ ꓦꓯꓸ ꓢꓴ꓾ ꓘꓳꓹ ꓜꓽ ꓢꓴ꓾ ꓥ ꓠꓬ ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓐꓴ ꓔꓯ ꓐꓯˍ ꓟ ꓟꓽ ꓥ꓿ ꓖꓳ ꓡꓱ ꓥ ꓕꓯ ꓠꓽ ꓠꓴ ꓪꓽ ꓠꓬ ꓟꓲ ꓠꓯ ꓗꓪ ꓐꓰ ꓓꓳ ꓙꓰ ꓠ ꓗꓹ ꓡꓳ ꓫꓵꓽ ꓥ ꓡꓳ꓿ 11 ꓖꓳ ꓡꓱ ꓥ ꓟꓲ ꓮ ꓟꓶ ꓠꓴ ꓪꓽ ꓔꓯ ꓥꓪ ꓐꓳ ꓖꓶ ꓠꓲꓹ ꓫꓵˍ ꓟ ꓠꓬ꓾ ꓦ ꓡꓱ ꓢꓴ ꓟꓬꓱꓺ ꓟꓯꓻ ꓔ ꓢꓲ꓾ ꓟꓽ ꓢꓲꓽ ꓟꓽ ꓫꓬ ꓟ ꓬꓰ ꓢꓴ꓾ ꓠꓲꓹ ꓦꓯꓸ ꓢꓴ꓾ ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓢꓴ꓾ ꓢꓴ ꓟꓬꓱ ꓓꓳꓽ ꓒꓬꓹ ꓠꓹ ꓟ ꓪ ꓕꓱ ꓢꓴ꓾ ꓙꓲ ꓒꓶꓽ ꓬꓲꓼ ꓢꓴ꓾ ꓥ ꓠꓬ ꓘꓳꓹ ꓜꓽ ꓢꓴ ꓬꓰˍ ꓕꓯ ꓠꓽ꓾ ꓬꓲˍ ꓐꓰ ꓛꓳꓽ ꓒꓯꓹ ꓕꓽ ꓬꓰ꓿ ꓕꓱ ꓡꓱ ꓫꓵꓽ ꓕꓲ ꓣꓳˍ ꓐꓰ ꓜˍ ꓟꓲ ꓕꓲ ꓪꓺꓼ ꓕꓽ ꓜꓽ꓿ 12 ꓮ ꓡꓲꓳ ꓐꓯ ꓠꓬ ꓟꓽ ꓦ ꓡꓱ ꓢꓴ ꓔꓯ ꓐꓯ ꓞꓷꓹ ꓠꓹ ꓟ ꓠꓽ ꓥꓪ ꓟꓬꓱꓽ ꓟꓽ ꓥ꓿ ꓬꓲˍ ꓡꓰ꓾ ꓘꓴ ꓜꓲ ꓞꓳ ꓠꓯS ꓗꓪ ꓟ ꓔꓯ ꓠꓬ ꓠꓴ ꓪꓽ ꓡꓰ ꓐꓯ ꓞꓷꓹ ꓓꓴ ꓟꓽ ꓥ ꓡ? 13 ꓟꓽ ꓦ ꓡꓱ ꓢꓴ ꓔꓯ ꓠꓬ ꓪꓴ-ꓢ ꓡꓰ ꓐꓯ ꓟꓴ ꓘꓶꓽˍ ꓥꓳ꓿ ꓖꓳ ꓡꓱ ꓥ ꓟꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓯˍ ꓟ ꓡꓰ ꓐꓰ꓾ ꓕꓱ ꓡꓱ ꓫꓵꓽ ꓞꓳ ꓥꓶꓻ ꓔꓯ ꓠꓴ ꓪꓽ ꓗꓳ ꓡꓳ ꓗꓪ ꓐꓰ ꓒꓰꓺ ꓩꓴ ꓗꓷ꓿

1 ꓘꓳ-ꓡꓱ-ꓕꓴ 6

1 ꓠꓴ ꓪꓽ ꓠꓬ ꓢꓴˍ ꓐꓰ ꓫꓵꓽ ꓪꓴꓻ ꓙꓳ ꓡꓰ ꓕꓯ꓾ ꓦ ꓡꓱ ꓢꓴ ꓐꓴ ꓟꓲꓽ ꓙꓬ ꓗꓪ ꓟꓽ ꓥ ꓥ꓾ ꓟꓽ ꓦ ꓡꓱ ꓢꓴ ꓐꓴ ꓐꓯ ꓟꓴ ꓜꓲꓼ ꓓꓴ ꓟꓲꓽ ꓙꓬ ꓗꓪ ꓗꓳꓹ ꓡꓯꓽ ꓘꓳ ꓑꓶꓸˍ ꓡ? 2 ꓢ ꓖꓪ ꓠꓬ ꓪꓴ-ꓢ ꓔꓯ ꓦ ꓡꓱ ꓢꓴ ꓐꓴ ꓡꓰ ꓟꓲ ꓠꓯ ꓔꓯ ꓐꓯ ꓟꓴ ꓘꓶꓽˍ ꓥꓳ꓾ ꓐꓰ ꓠꓴ ꓪꓽ ꓟꓽ ꓢꓷꓸ ꓡ? ꓠꓴ ꓪꓽ ꓡꓰ ꓟꓲ ꓠꓯ ꓔꓯ ꓐꓯ ꓟꓴ ꓘꓶꓽ ꓠꓯꓹ ꓟ ꓥ ꓕꓯ ꓠꓽ꓾ ꓕꓱ ꓘꓶ ꓛꓲ ꓣꓳꓺˍ ꓟ ꓫꓵꓽ ꓪꓴꓻ ꓑꓶꓸ ꓓꓴ ꓠꓴ ꓪꓽ ꓐꓯ ꓟꓴ ꓫꓬꓹ ꓟꓽ ꓐ ꓡ ꓡ? 3 ꓣꓳꓽ ꓡꓰ ꓟꓴꓽ ꓗꓪ ꓝꓲ ꓓꓴ ꓐꓴ ꓔꓯ ꓐꓯ ꓟꓴ ꓘꓶꓽˍ ꓥꓳ꓾ ꓐꓰ ꓠꓴ ꓪꓽ ꓟꓽ ꓢꓷ ꓡ? ꓖꓳ ꓡꓱ ꓥ ꓠꓬ ꓕꓱ ꓕꓲ ꓤꓶ ꓗꓪ ꓟ ꓐꓯ ꓟꓴ ꓪꓻ ꓜꓲ ꓣꓳꓽ ꓫꓬꓹ ꓠꓯꓹ ꓡꓳ ꓟꓽ ꓥ ꓡ? 4 ꓕꓱ ꓕꓲ ꓤꓶ ꓗꓪ ꓟ ꓫꓵꓽ ꓪꓴꓻ ꓕꓱꓻ ꓡꓯꓽ ꓘꓳ ꓠ ꓗꓷ ꓡꓰˍ ꓕꓯ꓾ ꓠꓴ ꓪꓽ ꓠꓬ ꓮꓸ ꓫꓵ ꓪꓴꓸ ꓠꓬꓲ ꓟꓽ ꓦ ꓡꓱ ꓢꓴ ꓔꓯ ꓠꓴ ꓪꓽ ꓐꓯ ꓟꓴ ꓘꓶꓽ ꓢꓴ ꓬꓰ ꓝꓲˍ ꓡ? 5 ꓥꓪ ꓠꓬ ꓠꓴ ꓪꓽ ꓔꓯ ꓫꓸ ꓔꓳ ꓡꓰ ꓝꓲ ꓠꓹ ꓟ ꓕꓱ ꓡꓱ ꓐꓯˍ ꓟ ꓥꓳ꓿ ꓮ ꓡꓲ ꓗꓷ ꓡꓰ ꓠꓬꓲ ꓠꓴ ꓪꓽ ꓗꓳ ꓡꓳ ꓗꓪ ꓬꓲꓼ ꓤ ꓠꓬꓲ ꓤ ꓐꓴ ꓐꓱ ꓶ ꓐꓯ ꓟꓴ ꓫꓬꓹ ꓖꓶ ꓐ ꓡ ꓟ ꓙꓽ ꓗꓴꓸ ꓠꓲꓹ ꓙꓳ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ ꓢꓲ꓾ 6 ꓬꓲꓼ ꓤ ꓠꓬꓲ ꓤ ꓛꓳꓽ ꓬꓲ ꓤ ꓠꓬꓲ ꓤ ꓠꓬ ꓟꓽ ꓦ ꓡꓱ ꓢꓴ ꓟꓲꓽ ꓙꓬ ꓗꓪ ꓗꓳꓹ ꓡꓯꓽ ꓘꓳ ꓔꓬ ꓡ? 7 ꓠꓴ ꓪꓽ ꓗꓳꓹ ꓡꓯꓽ ꓘꓳˍ ꓟ ꓕꓱ ꓡꓱ ꓙꓳˍ ꓠꓬ ꓚꓵ ꓚꓵ ꓮ ꓟꓶˍ ꓡꓰ ꓫꓴꓺ ꓡꓰꓳ꓿ ꓧꓪꓸ ꓡꓰ ꓚꓱꓹ ꓟꓽ ꓥ꓿ ꓮꓸ ꓫꓵ ꓪꓴꓸ ꓠꓬꓲ ꓢꓴ ꓡꓰ ꓛꓬꓻ ꓡ ꓟ ꓔꓯ ꓜꓲꓽ ꓠꓲꓹ ꓟꓽ ꓫꓵ ꓡ? ꓮꓸ ꓫꓵ ꓪꓴꓸ ꓠꓬꓲ ꓢꓴ ꓗꓶꓸ ꓜꓽ ꓡ ꓟ ꓔꓯ ꓜꓲꓽ ꓟꓽ ꓘꓴꓻ ꓡ? 8 ꓠꓴ ꓪꓽ ꓠꓬ ꓠꓴ ꓪꓽ ꓛꓳꓽ ꓠꓴ ꓪꓽ ꓛꓬꓻ ꓡꓯꓽ ꓘꓳ ꓢꓲ ꓗꓶꓸ ꓜꓽ ꓡꓯꓽ ꓘꓳˍ ꓡꓳ꓿ ꓬꓲꓼ ꓤ ꓠꓬꓲ ꓤ ꓗꓳ ꓡꓳ ꓗꓪ ꓕꓱ ꓡꓱ ꓬꓰ ꓙꓲꓽ ꓟꓽ ꓙꓳ꓿ 9 ꓥꓶˍ ꓟ ꓬꓰ ꓢꓴ ꓠꓽ ꓪꓴ-ꓢ ꓗꓴꓷ ꓟꓽ ꓟꓶ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓚꓲ ꓛꓬ ꓔꓯ ꓕꓽ ꓗꓶꓸ꓿ ꓟꓽ ꓢꓲꓽ ꓟꓽ ꓫꓬ ꓟ ꓬꓰ ꓢꓴ ꓥ ꓟꓲ꓾ ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓥ ꓟꓲ꓾ ꓦꓬꓽ ꓛꓳꓽ ꓧꓪ ꓢꓴ ꓥ ꓟꓲ꓾ ꓞꓳ ꓛꓬꓻ ꓥ ꓟꓲ꓾ ꓤꓽ ꓛꓳꓽ ꓤ ꓦꓬꓼ ꓛꓳꓽ ꓧꓪ ꓢꓴ ꓥ ꓟꓲ꓾ 10 ꓘꓴꓽ ꓢꓴ ꓥ ꓟꓲ꓾ ꓠꓲꓹ ꓦꓯꓸ ꓢꓴ ꓥ ꓟꓲ꓾ ꓙꓲꓻ ꓒꓶꓽ ꓬꓲꓼ ꓢꓴ ꓥ ꓟꓲ꓾ ꓢꓴ ꓟꓬꓱ ꓓꓳꓽ ꓒꓬꓹ ꓠꓹ ꓟ ꓪ ꓕꓱ ꓢꓴ ꓥ ꓟꓲ꓾ ꓘꓳꓹ ꓜꓽ ꓢꓴ ꓥ ꓟꓲ ꓪꓴ-ꓢ ꓗꓴꓷꓼ ꓡꓯꓼ ꓪ ꓓꓽ ꓟꓽ ꓟꓶ꓿ 11 ꓠꓴ ꓪꓽ ꓕꓲ ꓐꓱ ꓠꓬ ꓧꓶꓸ ꓕꓯ ꓬꓲ ꓕꓱ ꓡꓱ ꓬꓰ ꓠꓬꓲꓳ꓿ ꓖꓳ ꓡꓱ ꓥ ꓟꓲ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓬꓱˍ ꓐꓰ꓾ ꓣꓳꓽ ꓪꓴ-ꓢ ꓬꓲ ꓦ ꓗꓪ ꓐꓰ ꓠꓴ ꓪꓽ ꓞꓲꓽ ꓫꓬꓻ ꓡꓰ ꓢꓲ꓾ ꓢꓲ ꓚꓰꓸ ꓟꓶ ꓡꓰ ꓢꓲ ꓠꓬꓲ꓾ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓥ ꓡꓳ꓿ 12 ꓥꓪ ꓠꓽ ꓮꓸ ꓫꓵˍ ꓟꓲ ꓬꓰ ꓠꓽ ꓬꓰ ꓓꓻ ꓡꓳ꓿ ꓖꓳ ꓡꓱ ꓥ ꓟꓲ ꓮꓽ ꓙꓵ ꓡꓱꓸꓼ ꓙꓲ ꓖꓴ ꓙꓳˍ ꓟ ꓠꓽ ꓟꓽ ꓥ꓿ ꓥꓪ ꓠꓬ ꓮꓸ ꓫꓵˍ ꓟꓲ ꓬꓰ ꓠꓽ ꓬꓰ ꓓꓻˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓔꓯ ꓠꓽ ꓮ ꓡꓲ ꓕꓲ ꓫꓵꓽ ꓡꓰ ꓥ ꓟꓲ ꓙꓵꓽ ꓧꓪꓸ ꓡꓰ ꓝꓲ ꓠꓲꓹ ꓟꓽ ꓫꓵ꓿ 13 ꓜꓽ ꓓꓴ ꓠꓬ ꓦꓰꓼ ꓟ ꓐꓱ ꓶ ꓥ ꓢꓲ꓾ ꓦꓰꓼ ꓟ ꓠꓬ ꓜꓽ ꓓꓴ ꓐꓱ ꓶ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓕꓱ ꓠꓬꓲꓽ ꓫꓵꓽ ꓡꓱꓸꓼ ꓔꓯ ꓡꓳꓹ ꓬꓰ ꓝꓲˍ ꓥꓳ꓿ ꓖꓳ ꓓꓱ ꓠꓬ ꓟꓽ ꓢꓲꓽ ꓟꓽ ꓫꓬ ꓟ ꓐꓱ ꓶ ꓟꓽ ꓥ꓿ ꓢꓲ ꓒꓽ ꓐꓱ ꓶ ꓥ ꓢꓲ꓾ ꓢꓲ ꓒꓽ ꓠꓬ ꓖꓳ ꓓꓱ ꓐꓱ ꓶ ꓥ ꓡꓳ꓿ 14 ꓪꓴ-ꓢ ꓡꓰ ꓢꓲ ꓒꓽ ꓔꓯ ꓢꓯꓸ ꓬꓲꓼ ꓡ ꓝꓲ ꓗꓷ ꓟˍ ꓡꓰꓽ ꓟꓽ ꓞꓲ꓾ ꓣꓳꓽ ꓔꓯˍ ꓟꓲ ꓬꓲ ꓪꓽ ꓠꓬꓲˍ ꓟ ꓡꓰ ꓢꓯꓸ ꓬꓲꓼ ꓡ ꓝꓲˍ ꓥꓳ꓿ 15 ꓠꓴ ꓪꓽ ꓖꓳ ꓓꓱ ꓠꓬ ꓙꓲ-ꓢꓴ ꓡꓯ ꓗꓸ ꓥ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓖꓳ ꓡꓱ ꓥ ꓕꓯ ꓠꓽ ꓥꓪ ꓠꓬ ꓙꓲ-ꓢꓴ ꓡꓯꓼ ꓗꓸ ꓔꓯ ꓣꓴ ꓢꓲ ꓖꓳ ꓪꓴꓽ ꓟ ꓡꓯꓼ ꓗꓸ ꓗꓷ ꓡꓰ ꓝꓲ ꓠꓯꓹ ꓡ? ꓮ ꓡꓲ ꓥ ꓟꓲ ꓖꓳ ꓡꓱ ꓬꓰ ꓟꓽ ꓓ꓿ 16 ꓝꓮꓲ ꓠꓬ ꓖꓳ ꓪꓴꓽ ꓟˍ ꓐꓰ ꓟꓽ ꓢꓲ ꓟꓽ ꓫꓬ ꓬꓰ ꓢꓴ ꓠꓬ ꓬꓲˍ ꓐꓰ ꓕꓲ ꓖꓳ ꓓꓱꓽˍ ꓡꓰ ꓗꓷ ꓡꓰˍ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓡꓰ꓾ ꓬꓲ ꓪꓽ ꓠꓬꓲꓽ ꓣꓳ ꓠꓬ ꓕꓲ ꓧꓪꓽˍ ꓡꓰ ꓗꓷ ꓡꓰˍ ꓥꓳ꓾ ꓐꓰ ꓐꓯ ꓔ ꓡꓳ꓿ 17 ꓖꓳ ꓡꓱ ꓥ ꓟꓲ ꓢꓲ ꓒˍ ꓐꓰ ꓝꓱꓺ ꓡꓰ ꓢꓴ ꓠꓽ꓾ ꓦꓻ ꓗꓪ ꓢꓲ ꓒˍ ꓐꓰ ꓕꓲ ꓖꓳ ꓓꓱꓽˍ ꓡꓰꓽ ꓗꓷ ꓡꓰˍ ꓡꓳ꓿ 18 ꓟꓽ ꓢꓲꓽ ꓟꓽ ꓫꓬ ꓟ ꓔꓯˍ ꓐꓰ ꓛꓰꓹ ꓙꓰ꓿ ꓞꓳ ꓤ ꓡꓰ ꓬꓰˍ ꓟ ꓠꓱꓸ ꓐꓯꓼ ꓮꓸ ꓫꓵ ꓝꓴꓲˍ ꓟꓲ ꓚꓲ ꓛꓬ ꓖꓳ ꓓꓱ ꓔꓯ ꓛꓬꓻ ꓟ ꓟꓽ ꓥ꓿ ꓟꓽ ꓢꓲ ꓟꓽ ꓫꓬ ꓟ ꓬꓰ ꓢꓴ ꓠꓽ ꓬꓲ ꓚꓲ ꓛꓬ ꓖꓳ ꓓꓱꓽ ꓔꓯ ꓛꓬꓻ ꓟ ꓝꓴꓲ ꓬꓰˍ ꓟ ꓥ ꓡꓳ꓿ 19 ꓝꓮꓲ ꓠꓴ ꓪꓽ ꓖꓳ ꓓꓱꓽ ꓠꓬ꓾ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓟ ꓪꓴ-ꓢ ꓢꓲ-ꓫꓬ-ꓟ-ꓦ ꓬꓲ ꓦꓲ ꓥ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓠꓴ ꓪꓽ ꓠꓬ ꓚꓲ ꓛꓬ ꓶꓽ ꓟꓽ ꓥ꓿ 20 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓠꓽ ꓒꓵꓽ ꓡꓰ ꓪꓴꓻ ꓔ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓠꓴ ꓪꓽ ꓖꓳ ꓓꓱꓽ ꓗꓪ ꓪꓴ-ꓢ ꓟꓬꓱ ꓓꓳꓽ ꓓꓳ ꓡ ꓝꓲ꓿

1 ꓘꓳ-ꓡꓱ-ꓕꓴ 7

1 ꓮ ꓟꓶ ꓠꓴ ꓪꓽ ꓡꓰ ꓐꓳ ꓖꓶ ꓩꓴ ꓡ ꓟ ꓔꓯ ꓟꓳꓸ ꓐꓯˍ ꓠꓬ꓾ ꓞꓳ ꓑ ꓤ ꓠꓬ ꓤ ꓟꓶ ꓟꓽ ꓧꓪ ꓧꓪ ꓔꓬ ꓐ ꓡ ꓠꓬ ꓙꓲˍ ꓡꓳ꓿ 2 ꓖꓳ ꓡꓱ ꓥ ꓟꓲ ꓟꓽ ꓢꓲꓽ ꓟꓽ ꓫꓬ ꓟ ꓗꓪ ꓞꓰꓻ ꓓꓵꓽ ꓡꓰ ꓢꓴ ꓟꓬꓽˍ ꓠꓬꓲ꓾ ꓞꓳ ꓑ ꓤ ꓮ ꓡꓲ ꓕꓲ ꓣꓳˍ ꓟꓲ ꓬꓲ ꓚꓲ ꓛꓬ ꓤ ꓟꓶꓻ ꓙꓳ ꓢꓲ꓾ ꓤ ꓟꓶ ꓤ ꓮ ꓡꓲ ꓕꓲ ꓣꓳˍ ꓟꓲ ꓬꓲ ꓚꓲ ꓛꓬ ꓤ ꓖꓴ ꓙꓳ ꓝꓲ꓿ 3 ꓤ ꓖꓴ ꓠꓬ ꓬꓲ ꓤ ꓟꓶ ꓔꓯ ꓖꓶ ꓙꓲꓽ ꓙꓳˍ ꓡꓳ ꓫꓵꓽ ꓖꓶ ꓠꓯꓹ ꓡꓳ꓿ ꓤ ꓟꓶˍ ꓟꓲ ꓬꓲ ꓤ ꓖꓴ ꓔꓯ ꓟꓳꓸ ꓬꓲ ꓖꓳ ꓡꓱ ꓥꓳ꓿ 4 ꓤ ꓟꓶ ꓖꓳ ꓓꓱ ꓔꓯ ꓗꓪ' ꓫꓵꓽ ꓢꓴ ꓠꓬ ꓬꓲ ꓚꓲ ꓛꓬˍ ꓡꓰ ꓟꓽ ꓥ꓾ ꓬꓲ ꓤ ꓖꓴˍ ꓟꓲ ꓥ ꓡꓳ꓿ ꓖꓳ ꓟ ꓡꓰ ꓐꓰ ꓤ ꓖꓴ ꓖꓳ ꓓꓱ ꓔꓯ ꓗꓪ' ꓫꓵꓽ ꓢꓴˍ ꓟꓲ ꓬꓲ ꓚꓲ ꓛꓬˍ ꓡꓰ ꓟꓽ ꓥ꓾ ꓬꓲ ꓤ ꓟꓶˍ ꓟꓲ ꓥ ꓡꓳ꓿ 5 ꓖꓳ ꓡꓱ ꓠꓬꓲ꓾ ꓠꓴ ꓪꓽ ꓖꓪ ꓙꓱꓻ ꓡꓯꓽ ꓘꓳ ꓢꓲ꓾ ꓕꓲ ꓝꓲꓸ ꓤ ꓪꓽ ꓘꓴ ꓠꓹ ꓟ ꓟꓽ ꓥ ꓠꓬ꓾ ꓙꓽ ꓕ ꓦꓽ ꓡꓯꓽ ꓘꓳꓟ ꓖꓳ ꓗꓸ ꓠꓯꓸ ꓠꓬ ꓠꓴ ꓪꓽ ꓕꓲ ꓪꓺꓼ ꓔꓬ ꓛꓵˍ ꓡꓳ꓿ ꓟꓽ ꓥ ꓠꓬ꓾ ꓚꓲ ꓛꓬ ꓔꓯ ꓙꓵꓽ ꓟꓽ ꓐ ꓡ ꓟ ꓗꓪ ꓐꓰ ꓠꓴ ꓪꓽ ꓠꓬ ꓢ-ꓓꓯ ꓡꓰ ꓫꓵꓽ ꓠꓬꓲ ꓤꓹ ꓠꓬꓲˍ ꓟ ꓗꓪ ꓓꓵꓽ ꓡꓰ ꓗꓴˍ ꓡꓳ꓿ 6 ꓥꓪ ꓕꓱ ꓡꓱ ꓐꓯˍ ꓟ ꓠꓬ ꓓꓽ ꓔꓳꓹˍ ꓟ ꓥ ꓡꓳ꓾ ꓕꓵꓼ ꓪ ꓖꓶˍ ꓟ ꓟꓽ ꓥ꓿ 7 ꓠꓴ ꓪꓽ ꓮꓽ ꓙꓵ ꓥꓪˍ ꓐꓰ ꓕꓲ ꓡꓰꓹꓼ ꓒꓬꓱꓼ ꓡ ꓟ ꓔꓯ ꓥꓪ ꓠꓲꓹ ꓫꓵˍ ꓡꓳ꓿ ꓖꓳ ꓡꓱ ꓥ ꓟꓲ ꓣꓳꓽ ꓮ ꓡꓲ ꓕꓲ ꓣꓳ ꓔꓯˍ ꓟꓲ꓾ ꓪꓴ-ꓢ ꓡꓰ ꓖꓶ ꓔ ꓟ ꓡꓯꓼ ꓫꓴ ꓙꓳˍ ꓡꓳ꓿ ꓕꓲ ꓣꓳ ꓕꓯ ꓕꓱ ꓡꓱ ꓖꓶꓽ ꓢꓲ꓾ ꓖꓳ ꓕꓲ ꓣꓳ ꓔꓯ ꓖꓳ ꓡꓱ ꓖꓶ ꓔ ꓡꓳ꓿ 8 ꓮ ꓟꓶ ꓟꓽ ꓝꓱꓺ ꓠꓬꓲ ꓢꓴˍ ꓐꓰ꓾ ꓟꓶꓽ ꓛꓵꓽ ꓟ ꓔꓯ ꓥꓪ ꓕꓱ ꓡꓱ ꓐꓯ ꓖꓶˍ ꓠꓬꓲ꓾ ꓬꓲ ꓪꓽ ꓠꓬ ꓥꓪˍ ꓡꓰ ꓐꓰ ꓔꓬ ꓐ ꓡ ꓕꓯ ꓠꓽ꓾ ꓬꓲ ꓪꓽ ꓐꓱ ꓶ ꓙꓲˍ ꓡꓳ꓿ 9 ꓖꓳ ꓡꓱ ꓥ ꓟꓲ ꓚꓲ ꓛꓬ ꓔꓯ ꓙꓵꓽ ꓟꓽ ꓐ ꓡ ꓐꓷˍ ꓠꓬ꓾ ꓤ ꓖꓴ ꓧꓪ ꓝꓲ꓿ ꓮ ꓡꓲꓳ ꓐꓯ ꓠꓬ ꓝꓱꓺ ꓡꓯꓽ ꓘꓳˍ ꓟ ꓠꓽ ꓛꓴꓻ ꓞꓹ ꓟ ꓕꓯꓽ ꓢꓲ ꓙꓲꓻˍ ꓡꓳ꓿ 10 ꓖꓳ ꓡꓱ ꓥ ꓟꓲ ꓝꓱꓺ ꓔ ꓢꓴ ꓐꓴ ꓐꓱ ꓶ ꓢꓲ ꓒꓽ ꓗꓪ ꓐꓰ ꓥꓪ ꓟꓶˍ ꓟ ꓕꓵꓼ ꓪ ꓠꓬ ꓕꓱ ꓡꓱ ꓥꓳ꓿ ꓤ ꓟꓶꓻ ꓠꓬ ꓬꓲ ꓤ ꓖꓴ ꓔꓯˍ ꓐꓰ ꓕꓽ ꓧꓹ ꓙꓰ ꓝꓲ꓿ 11 ꓬꓲ ꓧꓹ ꓙꓰ ꓐꓷˍ ꓠꓬ ꓢꓴ ꓔꓯ ꓝꓮꓲ ꓟꓽ ꓝꓱꓺ ꓝꓱ ꓔꓬ ꓝꓲ꓿ ꓥ ꓠꓬ ꓬꓲ ꓤ ꓖꓴˍ ꓐꓰ ꓧꓳꓹ ꓡꓯꓽ ꓘꓳ ꓝꓲ꓿ ꓤ ꓖꓴˍ ꓟꓲ ꓤ ꓟꓶꓻ ꓔꓯ ꓕꓽ ꓧꓹ ꓗꓷ ꓝꓲ꓿ 12 ꓜꓰꓻ ꓞꓹ ꓢꓴ ꓔꓯ ꓢꓲ ꓒꓽ ꓡꓰ ꓐꓯˍ ꓟ ꓟꓽ ꓥ ꓥ꓾ ꓥꓪ ꓚꓲ ꓛꓬ ꓡꓰ ꓐꓯ ꓖꓶˍ ꓠꓬꓲ꓾ ꓬꓲꓼ ꓠꓬꓲ ꓕꓲ ꓣꓳ ꓠꓬ ꓟꓽ ꓦ ꓡꓱ ꓟ ꓤꓽ ꓟꓶ ꓕꓲ ꓣꓳ ꓙꓳ ꓢꓲ꓾ ꓬꓲ ꓤ ꓟꓶꓻ ꓠꓬ ꓬꓲˍ ꓐꓰ ꓕꓲ ꓪꓺꓼ ꓔꓬ ꓠꓲꓹ ꓒꓴˍ ꓐꓷˍ ꓠꓬ꓾ ꓬꓲ ꓤ ꓟꓶ ꓔꓯ ꓕꓽ ꓧꓹ ꓗꓷ ꓝꓲ꓿ 13 ꓤ ꓟꓶ ꓤ ꓥ ꓟꓲ ꓟꓽ ꓦ ꓡꓱ ꓟ ꓤ ꓖꓴ ꓙꓳ ꓢꓲ꓾ ꓬꓲ ꓠꓬ ꓬꓲ ꓤ ꓖꓴˍ ꓐꓰ ꓕꓲ ꓪꓺꓼ ꓔꓬ ꓠꓲꓹ ꓒꓴ ꓐꓷˍ ꓠꓬ꓾ ꓬꓲ ꓤ ꓖꓴ ꓔꓯ ꓕꓽ ꓧꓹ ꓗꓷ ꓝꓲ꓿ 14 ꓮ ꓡꓲꓳ ꓐꓯ ꓠꓬ ꓟꓽ ꓦ ꓡꓱ ꓟ ꓤ ꓖꓴ ꓔꓯ ꓠꓬ ꓦ ꓡꓱˍ ꓟ ꓬꓲ ꓤ ꓟꓶ ꓑꓶꓸ ꓓꓴ ꓢꓲꓺ ꓚꓰꓸ ꓔ ꓟ ꓚꓬꓹ ꓖꓶˍ ꓥꓳ꓿ ꓟꓽ ꓦ ꓡꓱ ꓟ ꓤ ꓟꓶ ꓔꓯˍ ꓟꓲ ꓦ ꓡꓱˍ ꓟ ꓬꓲ ꓤ ꓖꓴ ꓑꓶꓸ ꓓꓴ ꓢꓲꓺ ꓚꓰꓸ ꓔ ꓟ ꓚꓬꓹ ꓖꓶˍ ꓥꓳ꓿ ꓖꓳ ꓡꓱ ꓟꓽ ꓥ ꓕꓯ ꓠꓽ ꓠꓴ ꓪꓽ ꓤ ꓠꓱ ꓐꓴ ꓠꓬ ꓟꓽ ꓫꓬꓻ ꓟ ꓤ ꓠꓱ ꓐꓴ ꓗꓷ ꓡꓰˍ ꓡꓳ ꓫꓵꓽ ꓥꓳ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓬꓲ ꓪꓽ ꓔꓯ ꓠꓽ ꓢꓲ ꓚꓰꓸ ꓔ ꓟ ꓚꓬꓹ ꓟꓶˍ ꓡꓳ꓿ 15 ꓖꓳ ꓡꓱ ꓥ ꓟꓲ ꓤ ꓖꓴ ꓤ ꓟꓶ ꓗꓳ ꓡꓳ ꓗꓪ ꓟꓽ ꓦ ꓡꓱ ꓢꓴ ꓖꓳ ꓕꓲ ꓣꓳ ꓧꓹ ꓙꓰ ꓠꓲꓹ ꓫꓵˍ ꓕꓯ ꓠꓽ ꓬꓲ ꓔꓯ ꓧꓹ ꓙꓰ ꓝꓲ꓿ ꓫꓵꓽ ꓪꓴꓻ ꓕꓱ ꓡꓱ ꓫꓵꓽ ꓡꓰ ꓦ ꓡꓱˍ ꓟ ꓬꓲꓼ ꓤ ꓠꓬꓲ ꓤ꓾ ꓥ ꓠꓬ ꓮꓸ ꓝꓲ ꓠꓬꓲ ꓟ ꓔꓯ ꓟꓽ ꓞꓳꓹ ꓞ꓿ ꓪꓴ-ꓢ ꓡꓰ ꓣꓳꓽ ꓔꓯ ꓘꓴꓻˍ ꓟ ꓠꓬ ꓢꓲ ꓡꓲ ꓐꓰ ꓞꓳ ꓙꓳ ꓠꓹ ꓟ ꓘꓴ ꓔ ꓟ ꓥ ꓡꓳ꓿ 16 ꓤ ꓟꓶ ꓣꓱꓽ ꓢꓴꓳ꓾ ꓠꓴ ꓠꓬ ꓮꓽ ꓧꓪꓹ ꓠꓴ ꓤ ꓖꓴ ꓔꓯ ꓚꓬꓴ ꓙ ꓐ ꓡ ꓟ ꓚꓱꓹ ꓙꓳˍ ꓟꓽ ꓢꓷꓸ꓿ ꓥ ꓠꓬ ꓤ ꓖꓴ ꓣꓱꓽ ꓢꓴꓳ꓾ ꓠꓴ ꓠꓬ ꓮꓽ ꓧꓪꓹ ꓠꓴ ꓤ ꓟꓶꓻ ꓔꓯ ꓚꓬꓴ ꓙ ꓐ ꓡ ꓟ ꓚꓱꓹ ꓙꓳˍ ꓟꓽ ꓢꓷꓸ꓿ 17 ꓖꓳ ꓡꓱ ꓥ ꓟꓲ ꓢꓲ ꓒꓽ ꓡꓰ ꓮ ꓡꓲ ꓕꓲ ꓣꓳ ꓔꓯ ꓮꓸ ꓫꓵ ꓡꓯꓼ ꓫꓴ ꓖꓶ ꓔ ꓠꓬ꓾ ꓟꓬꓱꓽ ꓖꓳ ꓟ ꓬꓰ ꓢꓲ ꓔꓬ ꓝꓲ꓿ ꓪꓴ-ꓢ ꓡꓰ ꓮ ꓡꓲ ꓕꓲ ꓣꓳ ꓔꓯ ꓮ ꓡꓲ ꓗꓪ ꓘꓴꓻ ꓔ ꓠꓬ꓾ ꓬꓲ ꓖꓳ ꓡꓱ ꓞꓳ ꓙꓳ ꓠꓹ ꓟ꓾ ꓘꓴ ꓜꓲꓼ ꓞꓳ ꓮꓽ ꓙꓵ ꓟ ꓗꓪ ꓥꓪ ꓡꓰ ꓬꓲ ꓖꓳ ꓡꓱ ꓕꓵꓼ ꓪ ꓖꓶ ꓔ ꓡꓳ꓿ 18 ꓶꓺ ꓗꓷ ꓗꓸ ꓠꓯ ꓘꓴ ꓔ ꓢꓴ ꓙꓳˍ ꓠꓬ꓾ ꓶꓺˍ ꓟ ꓗ ꓫꓵ ꓔꓯ ꓕꓽ ꓖꓳꓽ ꓡꓰ ꓝꓲ꓿ ꓟꓽ ꓶꓺ ꓶ ꓘꓴ ꓟꓶ ꓡꓰ ꓢꓴ ꓙꓳˍ ꓠꓬ꓾ ꓬꓲ ꓔꓯ ꓕꓽ ꓶꓺ ꓝꓲ꓿ 19 ꓶ ꓔꓸ ꓟꓽ ꓶ ꓔꓸ ꓟ ꓠꓬ ꓮꓸ ꓫꓵ ꓟꓽ ꓚꓬꓹ꓿ ꓪꓴ-ꓢ ꓕꓵꓼ ꓪ ꓒꓵꓽ ꓛꓳꓻˍ ꓟ ꓔꓯˍ ꓡꓰ ꓚꓬꓹ ꓒꓵꓽˍ ꓡꓳ꓿ 20 ꓮ ꓡꓲ ꓕꓲ ꓣꓳˍ ꓟꓲ ꓬꓲ ꓔꓯ ꓘꓴꓻˍ ꓕꓯ꓾ ꓬꓲ ꓮꓸ ꓫꓵ ꓟꓬꓱꓽ ꓬꓰ ꓢꓲ ꓞꓳ ꓙꓳ ꓔꓬ ꓠꓬ꓾ ꓖꓳ ꓕꓲ ꓫꓵꓽ ꓗꓪ ꓢꓯꓼ ꓕꓵꓼ ꓔꓬ ꓝꓲ꓿ 21 ꓠꓴ ꓔꓯ ꓘꓴˍ ꓕꓯ ꓠꓴ ꓠꓬ ꓚꓳ ꓑꓸ ꓣꓱꓽ ꓔꓬ ꓡ? ꓠꓲꓹ ꓟ ꓕꓽ ꓫꓸ꓿ ꓖꓳ ꓡꓱ ꓥ ꓟꓲ ꓠꓴ ꓠꓬ ꓚꓳ ꓪꓴꓸ ꓒꓬꓱꓼ ꓡ ꓐ ꓡ ꓐꓷˍ ꓠꓬ ꓙꓲꓻˍ ꓥꓳ꓿ 22 ꓚꓳ ꓑꓸ ꓬꓰ ꓔꓬ ꓕꓯ ꓢꓲ ꓒꓽ ꓡꓰ ꓘꓴ ꓟꓶ ꓡꓰ ꓢꓴ ꓠꓬ꓾ ꓢꓲ ꓒꓽ ꓠꓯꓸꓼ ꓗꓪ ꓚꓳ ꓪꓴꓸ ꓥ ꓡꓳ꓿ ꓖꓳ ꓟ ꓡꓰ ꓐꓰ ꓚꓳ ꓪꓴꓸ ꓬꓰ ꓔꓬ ꓕꓯ ꓘꓴꓻ ꓟꓶ ꓡꓰ ꓢꓴˍ ꓟꓲ ꓙꓲ-ꓢꓴ ꓚꓳ ꓑꓸ ꓥ ꓡꓳ꓿ 23 ꓠꓴ ꓪꓽ ꓔꓯ ꓠꓽ ꓒꓵꓽ ꓡꓰ ꓪꓴꓻ ꓔ ꓟ ꓥ ꓡꓳ꓿ ꓞꓳ ꓤ ꓚꓳ ꓑꓸ ꓕꓽ ꓗꓷ ꓡꓰ ꓝꓲ꓿ 24 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓡꓲ ꓕꓲ ꓣꓳˍ ꓟꓲ ꓬꓲ ꓔꓯ ꓘꓴꓻ ꓔ ꓕꓯ꓾ ꓮ ꓡꓲ ꓕꓲ ꓫꓵ ꓟꓬꓱꓽ ꓣꓱꓽ ꓔꓬ ꓠꓬ ꓖꓳ ꓕꓲ ꓫꓵꓽ ꓟꓬꓱꓽ ꓗꓪ ꓞꓳ ꓙꓳ ꓢꓲ꓾ ꓪꓴ-ꓢ ꓡꓰ ꓘꓴ ꓔ ꓟ ꓠꓯꓸꓼ ꓗꓪ ꓠꓲꓹ ꓘꓪ ꓫꓵ ꓝꓲ꓿ 25 ꓮ ꓟꓶ ꓞꓳ ꓡꓯꓸ ꓚꓵ ꓐꓴ ꓔꓯ ꓟꓳꓸ ꓠꓬ ꓢꓲ ꓒꓽ ꓕꓵꓼ ꓪ ꓥꓪ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓬ ꓢꓲ ꓒꓽ ꓫꓱꓸ ꓤ ꓟ ꓠꓯꓸꓼ ꓗꓪ꓾ ꓦ ꓡꓱ ꓐꓳ ꓓꓻ ꓟ ꓚꓬꓹ ꓟꓶ ꓢꓴ ꓥ ꓟ ꓕꓲ ꓣꓳ ꓡꓰ꓾ ꓥꓪ ꓓꓵꓽ ꓙꓽˍ ꓟ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ꓾ 26 ꓮ ꓟꓶ ꓙꓳˍ ꓟ ꓘꓶ ꓡꓶꓽ ꓓꓴ ꓔꓯ ꓚꓬꓹ ꓠꓬꓲ ꓠꓬ꓾ ꓮ ꓡꓲ ꓕꓲ ꓣꓳˍ ꓟꓲ꓾ ꓮ ꓟꓶ ꓬꓲ ꓮ ꓡꓲ ꓥ ꓠꓬ ꓖꓳ ꓡꓱ ꓞꓳ ꓙꓳ ꓔꓬ ꓠꓬ ꓙꓲꓻˍ ꓡꓳ꓾ ꓓꓵꓽ ꓙꓽˍ ꓡꓳ꓿ 27 ꓠꓴ ꓠꓬ ꓤ ꓟꓶꓻ ꓕꓲ ꓣꓳ ꓔꓯ ꓞꓳꓹ ꓞꓹ ꓡ? ꓡꓲꓹ ꓗꓷ ꓠꓹ ꓟ ꓚꓱꓹ ꓕꓽ ꓧꓪ꓿ ꓠꓴ ꓠꓬ ꓤꓽ ꓟꓶ ꓟꓽ ꓧꓪ ꓔꓸ ꓢꓰꓽ ꓡ? ꓖꓳ ꓡꓱ ꓥ ꓠꓬ ꓤ ꓟꓶ ꓕꓽ ꓧꓪ꓿ 28 ꓖꓳ ꓡꓱ ꓢꓲ ꓠꓴ ꓤ ꓟꓶ ꓧꓪ ꓐꓷˍ ꓟꓲ ꓝꓴꓲ ꓬꓰˍ ꓟ ꓟꓽ ꓥ꓿ ꓤ ꓟꓶ ꓡꓯꓸ ꓚꓵꓺ ꓕꓲ ꓣꓳ ꓤ ꓖꓴ ꓧꓪˍ ꓟꓲ ꓝꓴꓲ ꓬꓰˍ ꓟ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓝꓱꓺ ꓗꓷ ꓢꓴ ꓐꓴ ꓠꓽ ꓕꓱ ꓕꓲ ꓤꓶ ꓟ ꓫꓸ ꓙꓵꓻ ꓓꓴ ꓮꓽ ꓟꓬꓹ ꓔꓳ ꓜꓳꓽˍ ꓥꓳ꓿ ꓥꓪ ꓠꓽ ꓠꓴ ꓪꓽ ꓔꓯ ꓫꓸ ꓙꓵ ꓡꓰ ꓝꓲ ꓠꓲꓹ ꓟꓽ ꓫꓵ ꓠꓬꓲ ꓕꓱ ꓡꓱ ꓐꓯˍ ꓟ ꓥ ꓡꓳ꓿ 29 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓕꓱ ꓡꓱ ꓐꓯˍ ꓟ ꓠꓬ ꓬꓲ ꓙꓵꓹ ꓓꓴꓸ ꓡꓰ ꓔꓬ ꓠꓬꓲ ꓐꓯˍ ꓟ ꓥ ꓡꓳ꓿ ꓕꓱ ꓡꓱ ꓖꓳ ꓑꓳ꓾ ꓤꓽ ꓟꓶ ꓙꓳ ꓢꓴ ꓠꓬ ꓟꓽ ꓙꓳ ꓢꓴˍ ꓡꓰ ꓐꓰ꓾ 30 ꓥꓴꓻ ꓢꓴ ꓠꓬ ꓟꓽ ꓥꓴ ꓢꓴˍ ꓡꓰ ꓐꓰ꓾ ꓗꓹ ꓛꓲ ꓢꓴ ꓠꓬ ꓟꓽ ꓗꓹ ꓛꓲ ꓢꓴˍ ꓡꓰ ꓐꓰ꓾ ꓕꓲ ꓫꓵ ꓪꓴꓻ ꓟꓶ ꓢꓴ ꓠꓬ ꓮꓸ ꓫꓵ ꓟꓽ ꓙꓳ ꓢꓴˍ ꓡꓰ ꓐꓰ꓾ 31 ꓟꓲ ꓠꓯ ꓗꓪ ꓟ ꓣꓱꓽ ꓓꓴ ꓣꓱꓽ ꓢꓴ ꓠꓬ ꓣꓱꓽ ꓓꓴ ꓖꓳ ꓟ ꓡꓰ ꓟꓽ ꓙꓲꓽ ꓧꓪꓸ ꓡꓰ ꓝꓲˍ ꓐꓰ ꓔꓬ ꓠ ꓗꓹ ꓥꓳ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓕꓱ ꓟ ꓠꓽ ꓡꓳꓹ ꓬꓰ ꓔꓬ ꓡꓳ꓿ 32 ꓥꓪ ꓠꓬ ꓠꓴ ꓪꓽ ꓔꓯ ꓓꓵ ꓙꓽ ꓪꓴꓽ ꓧꓶ ꓓꓴ ꓟꓽ ꓙꓳ ꓙꓳ ꓔꓬ ꓝꓲ ꓠꓲꓹ ꓫꓵ ꓡꓳ꓿ ꓤ ꓟꓶ ꓟꓽ ꓙꓳ ꓟ ꓞꓳ ꓑ ꓤ ꓠꓬ꓾ ꓢꓲ ꓒꓽ ꓔꓯ ꓮ ꓡꓲ ꓐꓰ ꓠꓲꓹ ꓒꓴ ꓡꓰ ꓝꓲ ꓠꓹ ꓟ꓾ ꓢꓲ ꓒꓽ ꓫꓵ ꓪꓴꓻ ꓔꓯ ꓠꓲꓹ ꓥꓳˍ ꓡꓳ꓿ 33 ꓤ ꓟꓶ ꓙꓳ ꓢꓴ ꓠꓽ꓾ ꓟꓲ ꓠꓯ ꓗꓪ ꓬꓲ ꓤ ꓟꓶ ꓔꓯ ꓮ ꓡꓲ ꓐꓰ ꓠꓲꓹ ꓒꓴ ꓡꓰ ꓝꓲ ꓠꓹ ꓟ ꓚꓱꓹ ꓗꓪ ꓠꓲꓹ ꓥꓳˍ ꓠꓬꓲ꓾ 34 ꓬꓲ ꓠꓲꓹ ꓟ ꓠꓬ ꓐꓱꓻ ꓞꓹ ꓟ ꓥ ꓡꓳ꓿ ꓦꓲꓻ ꓟꓽ ꓧꓪ ꓢꓰꓽ ꓟ ꓤ ꓟꓶ ꓡꓯꓸ ꓚꓵ ꓠꓬ꓾ ꓧꓪꓽ ꓖꓳ ꓓꓱ ꓗꓪˍ ꓟꓲ꓾ ꓦꓻ ꓗꓪˍ ꓟꓲ ꓢꓲ ꓚꓰꓸ ꓔ ꓢꓴ ꓬꓰ ꓠꓹ ꓟ ꓢꓲ ꓒꓽ ꓙ ꓖꓴ ꓔꓯ ꓠꓲꓹ ꓥꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓝꓱꓺ ꓔ ꓟ ꓤ ꓟꓶ ꓤ ꓠꓽ ꓟꓲ ꓠꓯ ꓗꓪ ꓬꓲ ꓤ ꓖꓴ ꓔꓯ ꓮ ꓡꓲ ꓐꓰ ꓠꓲꓹ ꓒꓴ ꓡꓰ ꓝꓲ ꓠꓹ ꓟ ꓚꓰꓹ ꓗꓪ ꓠꓲꓹ ꓥꓳˍ ꓡꓳ꓿ 35 ꓥꓪ ꓕꓱ ꓡꓱ ꓐꓯˍ ꓟ ꓠꓬ ꓠꓴ ꓪꓽ ꓔꓯ ꓗꓽ ꓔ ꓠꓹ ꓟ ꓟꓽ ꓥ꓿ ꓠꓴ ꓪꓽ ꓙꓲ ꓖꓴ ꓐꓱ ꓶ ꓥ ꓢꓲ꓾ ꓠꓴ ꓪꓽ ꓠꓬ ꓮꓸ ꓫꓵ ꓘꓶꓻ ꓡꓶꓽ ꓓꓴ ꓟꓽ ꓙꓳ ꓙꓳ꓾ ꓔꓱꓹ ꓔꓱꓹꓼ ꓐꓰ ꓢꓲ ꓒꓽ ꓔꓯ ꓣꓱꓽ ꓙ ꓪ ꓠꓹ ꓟ ꓥ ꓡꓳ꓿ 36 ꓤ ꓑ ꓤ ꓕꓲ ꓣꓳ ꓠꓬ ꓬꓲ ꓔꓯ ꓠꓲꓹ ꓒꓴ ꓔ ꓟ ꓤ ꓟꓶ ꓡꓯꓸ ꓚꓵ ꓬꓲ ꓞꓲꓼ ꓪꓴꓽ ꓡꓰ ꓔꓬ ꓢꓲ꓾ ꓝꓮꓲ ꓞꓳ ꓑ ꓤ ꓬꓲ ꓚꓲ ꓛꓬ ꓞꓳ ꓙꓳˍ ꓟ ꓔꓯˍ ꓟꓲ ꓬꓲ ꓙꓵꓽ ꓟꓽ ꓐ ꓡ ꓕꓯ ꓠꓽ꓾ ꓝꓱꓺ ꓡꓯꓽ ꓘꓳ ꓠꓲꓹ ꓫꓵˍ ꓠꓬ꓾ ꓬꓲ ꓪꓽ ꓔꓯ ꓝꓱꓺ ꓡꓯꓽ ꓘꓳ ꓝꓲ꓿ ꓕꓱ ꓟ ꓠꓬ ꓝꓴꓲ ꓬꓰˍ ꓟ ꓟꓽ ꓥ꓿ 37 ꓖꓳ ꓡꓱ ꓥ ꓟꓲ ꓞꓳ ꓑ ꓤ ꓕꓲ ꓣꓳ ꓠꓬ ꓬꓲ ꓠꓲꓹ ꓟ ꓗꓪ ꓓꓵꓽ ꓙꓽ ꓕꓶꓻ ꓡꓰ ꓢꓲ꓾ ꓚꓲ ꓛꓬ ꓠꓲꓹ ꓡꓶꓽ ꓔꓯˍ ꓟꓲ ꓙꓵꓽ ꓐ ꓡ ꓢꓲ ꓠꓬꓲ꓾ ꓤ ꓟꓶ ꓡꓯꓸ ꓚꓵ ꓔꓯ ꓟꓽ ꓝꓱꓺ ꓡꓯꓽ ꓘꓳ ꓠꓹ ꓟ ꓓꓵꓽ ꓙ ꓞꓷꓹ ꓗꓷ ꓐꓷˍ ꓠꓬ꓾ ꓬꓲ ꓬꓰˍ ꓟˍ ꓟꓲ ꓙꓲꓻˍ ꓟ ꓥꓳ꓿ 38 ꓖꓳ ꓡꓱ ꓠꓬꓲ ꓤ ꓟꓶ ꓡꓯꓸˍ ꓐꓰ ꓝꓱꓺ ꓡꓯꓽ ꓘꓳ ꓢꓴˍ ꓟꓲ ꓙꓲꓻˍ ꓟ ꓬꓰˍ ꓟ ꓥ ꓢꓲ꓾ ꓟꓽ ꓝꓱꓺ ꓝꓱ ꓔꓬ ꓠꓹ ꓟ ꓚꓴꓽ ꓬꓲꓹ ꓓꓶ ꓚꓵ ꓡꓰ ꓢꓴˍ ꓟꓲ꓾ ꓪ ꓜꓲ ꓙꓲꓻˍ ꓟ ꓬꓰˍ ꓟ ꓥ ꓡꓳ꓿ 39 ꓤ ꓖꓴ ꓢꓯꓸ ꓔꓬ ꓕ ꓑꓳꓸ꓾ ꓤ ꓟꓶ ꓠꓬ ꓬꓲ ꓤ ꓖꓴ ꓔꓯ ꓞꓳꓹ ꓞꓹ ꓟ ꓥ ꓢꓲ꓾ ꓬꓲ ꓤ ꓖꓴ ꓫꓵꓻ ꓕꓯ ꓠꓽ꓾ ꓬꓲ ꓠꓬ ꓮꓽ ꓟ ꓔꓯ ꓠꓲꓹ ꓒꓴ ꓙꓰ ꓠꓲꓹ ꓫꓵˍ ꓟꓲ ꓩꓴꓺ ꓔ ꓟ ꓥ ꓡꓳ꓿ ꓬꓲˍ ꓡꓰ꓾ ꓢꓲ ꓒꓽ ꓠꓯꓸꓼ ꓗꓪ ꓔꓬ ꓢꓴ ꓕꓲ ꓣꓳ ꓥ ꓠꓯꓹ ꓡꓳ꓿ 40 ꓖꓳ ꓡꓱ ꓥ ꓟꓲ ꓥꓪ ꓓꓵꓽ ꓙˍ ꓠꓬ꓾ ꓟꓶꓽ ꓛꓵꓽ ꓟ ꓠꓬ ꓬꓲ ꓖꓳ ꓡꓱ ꓠꓱꓸ ꓐꓯꓼ ꓕꓲ ꓝꓸ ꓟꓽ ꓠꓲꓹ ꓒꓴ ꓙꓰ ꓙꓰ ꓔꓬ ꓕꓯ ꓠꓽ꓾ ꓬꓲ ꓠꓬ ꓪꓻ ꓜꓲ ꓠꓲꓹ ꓢꓻˍ ꓥꓳ꓿ ꓥꓪ ꓕꓱ ꓡꓱ ꓓꓵꓽ ꓙˍ ꓟ ꓔꓯ ꓪꓴ-ꓢ ꓦꓻˍ ꓟꓲ ꓓꓽ ꓔꓳꓹˍ ꓡꓳ꓾ ꓐꓰ ꓙꓵꓻˍ ꓡꓳ꓿

1 ꓘꓳ-ꓡꓱ-ꓕꓴ 8

1 ꓠꓲꓽ ꓐꓬꓱꓽ ꓔꓯ ꓔꓲꓺ ꓗꓷ ꓡꓳ ꓫꓵꓽ ꓔꓯ ꓟꓳꓸ ꓐꓯˍ ꓠꓬ꓾ ꓣꓳꓽ ꓮꓽ ꓙꓵ ꓢꓴ ꓠꓬ ꓢꓷꓸ ꓠꓲꓹ ꓙꓳ ꓢꓴ ꓥꓳ꓾ ꓐꓰ ꓣꓳꓽ ꓙꓽ ꓜꓲꓼˍ ꓡꓳ꓿ ꓖꓳ ꓡꓱ ꓥ ꓟꓲ ꓢꓷꓸ ꓠꓲꓹ ꓡꓰ ꓣꓳꓽ ꓔꓯ ꓠꓲꓹ ꓘꓹ ꓔꓴ ꓡ ꓝꓲˍ ꓡꓳ꓿ ꓠꓵꓻ ꓠꓲꓹ ꓠꓽ ꓜꓶꓻ ꓪꓴꓽ ꓡ ꓝꓲˍ ꓡꓳ꓿ 2 ꓮꓽ ꓟ ꓥ ꓟꓲ ꓚꓲ ꓛꓬ ꓠꓬ ꓢꓷꓸ ꓢꓴ ꓥ ꓡꓳ ꓓꓵꓽ ꓙꓽˍ ꓕꓯ ꓠꓽ꓾ ꓬꓲ ꓠꓬ ꓬꓲ ꓢꓷꓸ ꓙꓲꓽ ꓙꓳˍ ꓟ ꓟꓬ ꓛꓲ ꓟꓽ ꓢꓷꓸ ꓢꓰꓽ꓿ 3 ꓖꓳ ꓡꓱ ꓥ ꓟꓲ ꓪꓴ-ꓢ ꓔꓯ ꓠꓲꓹ ꓠꓵ ꓢꓴ ꓮ ꓡꓲ ꓕꓲ ꓣꓳ ꓔꓯˍ ꓟꓲ ꓪꓴ-ꓢ ꓢꓷˍ ꓡꓳ꓿ 4 ꓖꓳ ꓡꓱ ꓠꓬꓲ꓾ ꓠꓲꓽ ꓐꓬꓱꓽ ꓔꓯ ꓔꓲꓺ ꓗꓷ ꓡꓳ ꓫꓵꓽ ꓜꓽˍ ꓟ ꓔꓯ ꓐꓯˍ ꓠꓬ꓾ ꓟꓲ ꓠꓯ ꓗꓪ ꓟ ꓠꓲꓽ ꓐꓬꓱꓽ ꓮ ꓡꓲ ꓕꓲ ꓫꓵꓽˍ ꓟꓲ ꓮꓸ ꓫꓵ ꓟꓽ ꓥ ꓟ ꓐꓰ꓾ ꓪꓴ-ꓢ ꓬꓲ ꓕꓲ ꓣꓳˍ ꓡꓰ ꓟꓽ ꓥ ꓠꓬ ꓠꓱꓸ ꓐꓯꓼ ꓪꓴ-ꓢ ꓟꓽ ꓙꓳˍ ꓟ ꓣꓳꓽ ꓢꓷˍ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓗꓪˍ ꓟꓲ꓾ ꓟꓲ ꓠꓯ ꓗꓪˍ ꓟꓲ꓾ ꓢꓲ꓾ ꓥ ꓠꓬ ꓢꓲ ꓒ꓾ ꓮꓽ ꓟꓬꓹ ꓙꓳˍ ꓡꓳ꓾ ꓐꓰ ꓐꓯ ꓢꓴ ꓙꓳˍ ꓟꓲ꓾ 6 ꓣꓳꓽ ꓐꓱ ꓶ ꓠꓽ ꓪꓴ-ꓢ ꓕꓲ ꓣꓳˍ ꓡꓰꓽ ꓙꓳˍ ꓡꓳ꓿ ꓬꓲ ꓠꓬ ꓐꓹ ꓐ ꓥ ꓢꓲ꓾ ꓙꓳˍ ꓟ ꓥ ꓕ ꓑꓳꓸ ꓠꓬ ꓬꓲ ꓗꓪ ꓐꓰ ꓥ ꓢꓲ ꓠꓬꓲ꓾ ꓣꓳˍ ꓟꓲ ꓬꓲ ꓐꓱ ꓶ ꓢꓯꓸ ꓔꓬ ꓟ ꓥ ꓡꓳ꓿ ꓝꓮꓲ ꓣꓳꓽ ꓢꓲ ꓒˍ ꓟꓲ ꓬꓰ-ꓢꓴ ꓙꓲ-ꓢꓴ ꓕꓲ ꓣꓳˍ ꓡꓰꓽ ꓥ ꓢꓲ꓾ ꓙꓳˍ ꓟ ꓥ ꓕ ꓑꓳꓸ ꓠꓬ ꓬꓲ ꓗꓪ ꓐꓰ ꓚꓰꓼ ꓔ ꓟ ꓥ ꓢꓲ ꓠꓬꓲ꓾ ꓣꓳˍ ꓟꓲ ꓬꓲ ꓗꓪ ꓐꓰ ꓢꓯꓸ ꓔꓬ ꓟ ꓥ ꓡꓳ꓿ 7 ꓖꓳ ꓡꓱ ꓥ ꓟꓲ ꓕꓱ ꓟ ꓔꓯ ꓮꓽ ꓙꓵ ꓢꓴ ꓟꓽ ꓢꓷꓸ꓿ ꓕꓲ ꓐꓱ ꓠꓽ ꓠꓲꓽ ꓐꓬꓱ ꓢꓲꓺ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓝꓳ ꓡꓰ ꓠꓬꓲ꓾ ꓮ ꓟꓶˍ ꓟꓲ ꓬꓲ ꓪꓽ ꓜꓽ ꓓꓳˍ ꓕꓯ꓾ ꓠꓲꓽ ꓐꓬꓱꓽ ꓔꓯ ꓔꓲꓺ ꓗꓷˍ ꓟ ꓥꓳ꓾ ꓐꓰ ꓚꓬꓹ ꓔ ꓢꓲ ꓜꓽˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓦꓰꓽ ꓠꓲꓹ ꓢꓯꓼ ꓐꓽ ꓢꓲ ꓜꓽ ꓗꓷ ꓠꓬꓲ꓾ ꓦꓰꓽ ꓠꓲꓹ ꓟꓽ ꓫꓬ ꓗꓷ ꓡꓰꓳ꓿ 8 ꓖꓳ ꓡꓱ ꓥ ꓟꓲ ꓣꓳꓽ ꓠꓬ ꓜꓽ ꓓꓴ ꓗꓪ ꓐꓰ ꓪꓴ-ꓢ ꓔꓯ ꓕꓲꓺ ꓡꓰˍ ꓟ ꓟꓽ ꓥ꓿ ꓣꓳꓽ ꓟꓽ ꓜꓽ ꓥ ꓟꓲ꓾ ꓟꓽ ꓫꓸ ꓡꓰ꓿ ꓜꓽ ꓥ ꓟꓲ꓾ ꓟꓽ ꓐꓶꓹ ꓡ꓿ 9 ꓖꓳ ꓡꓱ ꓥ ꓟꓲ ꓠꓴ ꓪꓽ ꓚꓳ ꓪꓴꓸ ꓙꓵꓽ ꓪꓽ ꓕꓱ ꓟ ꓠꓬ꓾ ꓢꓯꓼ ꓐꓽ ꓢꓴ ꓛꓲ ꓕꓲꓽ ꓓꓴ ꓟꓽ ꓗꓷ ꓡꓰ ꓠꓹ ꓟ ꓤ ꓟꓳ꓿ 10 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓕꓱ ꓡꓱ ꓒꓯꓽ ꓦꓰꓽ ꓗꓴꓸ ꓢꓴ ꓕꓲ ꓣꓳ ꓣꓳ ꓠꓲꓽ ꓦꓲ ꓗꓪ ꓜꓽ ꓔꓬ ꓟ ꓔꓯ ꓦꓰꓽ ꓠꓲꓹ ꓢꓯꓼ ꓐꓽ ꓢꓴ ꓟꓳ ꓗꓷ ꓠꓬ꓾ ꓬꓲ ꓠꓽ ꓠꓲꓽ ꓐꓬꓱꓽ ꓔꓯ ꓔꓲꓺ ꓗꓷ ꓡꓳ ꓫꓵꓽ ꓜꓽ ꓠꓹ ꓟ ꓠꓲꓹ ꓪꓴꓽ ꓡ ꓥꓳ꓾ ꓟꓽ ꓥ ꓡ? 11 ꓖꓳ ꓡꓱ ꓠꓬ ꓙꓲ-ꓢꓴ ꓫꓵꓻ ꓙ ꓗꓷ ꓟ꓾ ꓢꓯꓼ ꓐꓽˍ ꓟ ꓬꓲꓼ ꓤ ꓠꓬꓲ ꓤ ꓖꓳ ꓕꓲ ꓣꓳ ꓠꓬ꓾ ꓠꓴ ꓒꓯꓽ ꓦꓰꓽ ꓗꓴˍ ꓟ ꓢꓷꓸ ꓠꓲꓹ ꓑꓶꓸ ꓓꓴ ꓐꓬ ꓡꓰˍ ꓥꓳ꓿ 12 ꓠꓴ ꓪꓽ ꓡꓰ ꓦꓰꓽ ꓠꓲꓹ ꓢꓯꓼ ꓐꓽˍ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓕꓱ ꓡꓱ ꓡꓱꓸ ꓙꓰ ꓝꓲˍ ꓠꓬ꓾ ꓙꓲ-ꓢꓴ ꓔꓯ ꓛꓬꓻ ꓗꓷˍ ꓟ ꓥ ꓡꓳ꓿ 13 ꓖꓳ ꓡꓱ ꓠꓬꓲ ꓥꓪ ꓜꓽ ꓓꓴ ꓡꓰ ꓥꓪ ꓬꓲꓼ ꓥꓪ ꓠꓬꓲ ꓔꓯ ꓡꓱꓸ ꓗꓷ ꓝꓲˍ ꓕꓯ ꓠꓽ꓾ ꓬꓲ ꓪꓽ ꓟꓽ ꓡꓱꓸ ꓗꓷ ꓝꓲ ꓠꓹ ꓟ꓾ ꓥꓪ ꓠꓬ ꓕꓲ ꓞꓲꓼ ꓡꓱꓸꓼ ꓧꓪꓽ ꓟꓽ ꓜꓽꓳ꓿

1 ꓘꓳ-ꓡꓱ-ꓕꓴ 9

1 ꓥꓪ ꓠꓬ ꓚꓳ ꓪꓴꓸ ꓟꓽ ꓥ ꓡ? ꓥꓪ ꓠꓬ ꓝꓲ ꓓꓴ ꓟꓽ ꓥ ꓡ? ꓥꓪ ꓠꓬ ꓣꓳꓽ ꓢꓲ ꓒꓽ ꓬꓰ-ꓢꓴ ꓔꓯ ꓟꓳꓻ ꓠꓬꓲ ꓢꓴ ꓟꓽ ꓥ ꓡ? ꓠꓴ ꓪꓽ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓟ ꓥꓪ ꓟꓬꓱꓽ ꓟꓽ ꓥ ꓡ? 2 ꓠꓱꓸ ꓐꓯꓼ ꓢꓴ ꓔꓯ ꓟꓳꓸ ꓠꓬ ꓥꓪ ꓠꓽ ꓝꓲ ꓓꓴ ꓟꓽ ꓥ ꓐꓷˍ ꓟꓲ꓾ ꓠꓴ ꓪꓽ ꓔꓯ ꓟꓳꓸ ꓠꓽ ꓚꓵ ꓚꓵ ꓝꓲ ꓓꓴ ꓥꓳ꓿ ꓢꓲ ꓒꓽ ꓠꓯꓸꓼ ꓗꓪ ꓥꓪ ꓠꓬ ꓝꓲ ꓓꓴ ꓥ ꓟ ꓬꓲ ꓗꓸ ꓚꓵ ꓔꓳꓹ ꓠꓷꓼ ꓓꓴ ꓠꓽ ꓠꓴ ꓪꓽ ꓥꓳ꓿ 3 ꓥꓪ ꓔꓯ ꓟꓰꓹ ꓠ ꓠꓬꓲ ꓢꓴ ꓔꓯ꓾ ꓥꓪ ꓒꓳꓹ ꓔꓳꓹ ꓖꓶ ꓓꓴ ꓠꓬ ꓕꓱ ꓡꓱ ꓥꓳ꓾ 4 ꓥꓪ ꓠꓴꓽ ꓠꓬ ꓜꓽ ꓓꓳꓻ ꓠꓹ ꓟ ꓙꓵꓽ ꓪ ꓟꓽ ꓙꓳ ꓡ? 5 ꓥꓪ ꓠꓴꓽ ꓠꓬ ꓠꓱꓸ ꓐꓯ ꓝꓲ ꓓꓴ ꓐꓴˍ ꓐꓰ꓾ ꓢꓲ ꓒꓽ ꓬꓲ ꓠꓬꓲ ꓤ ꓐꓴˍ ꓐꓰ ꓗꓷ-ꓒˍ ꓡꓰ ꓐꓰ꓾ ꓢꓲ ꓒꓽ ꓔꓯ ꓙꓵꓻˍ ꓟ ꓤ ꓟꓶꓻ ꓧꓳꓽ ꓚꓳ ꓠꓹ ꓟ ꓙꓵꓽ ꓪ ꓟꓽ ꓙꓳ ꓡ? 6 ꓥ ꓠꓬ꓾ ꓖꓳ ꓓꓱ ꓦꓵ ꓓꓴ ꓐꓱ ꓶ ꓟꓬꓱꓽ ꓟꓽ ꓬꓰ ꓬꓰ ꓔꓬ ꓟꓽ ꓓ ꓟ ꓠꓬ꓾ ꓐ-ꓠ-ꓐˍ ꓐꓰ ꓥꓪ ꓡꓰ ꓡ? 7 ꓚꓲ ꓛꓬ ꓒꓴ ꓓꓳ ꓢꓲ ꓟꓯꓼ ꓣꓱꓽ ꓢꓴ ꓙꓳˍ ꓡ? ꓛꓱꓼ ꓡꓱ ꓕꓲ ꓐꓱꓺ ꓔꓶ ꓢꓲ ꓬꓲ ꓢꓶꓽ ꓟꓽ ꓜ ꓢꓴ ꓙꓳˍ ꓡ? ꓮꓸ ꓠꓬꓲꓽ ꓕꓲ ꓜꓴꓻ ꓦꓵ ꓔ ꓢꓲ ꓮꓸ ꓠꓬꓲꓽ ꓮꓽ ꓚꓵꓹ ꓟꓽ ꓓꓳ ꓢꓴ ꓙꓳˍ ꓡ? 8 ꓥꓪ ꓕꓱ ꓟꓬ ꓫꓵꓽ ꓐꓯˍ ꓟ ꓠꓬ꓾ ꓞꓳ ꓚꓱꓹ ꓪ ꓚꓱꓹ ꓔꓯˍ ꓡꓰ ꓛꓳ ꓢꓲ ꓐꓯˍ ꓟ ꓥ ꓡ? ꓙꓵꓽ ꓗ ꓗꓪˍ ꓟꓲ ꓖꓳ ꓟˍ ꓐꓰ ꓕꓲ ꓡꓰꓹꓼ ꓐꓯ ꓔ ꓡꓳ ꓟꓽ ꓥ ꓡ? 9 ꓮ ꓡꓲꓳ ꓐꓯ ꓠꓬ ꓟꓳ-ꓫꓲ ꓙꓵꓽ ꓗ ꓗꓪ꓾ ꓮꓸ ꓠꓬꓲꓽ ꓡꓰ ꓜꓻ ꓕꓳꓼ ꓔꓬ ꓕꓯ ꓬꓲ ꓟꓷꓽ ꓠꓷꓹ ꓕꓽ ꓝꓴꓸ ꓔ꓾ ꓐꓰ ꓐꓳ ꓔ ꓡꓳ꓿ ꓪꓴ-ꓢ ꓠꓬ ꓮ ꓠꓬꓲꓽ ꓔꓯ ꓫꓱꓸ ꓤꓽ ꓢꓲ ꓕꓱ ꓡꓱ ꓐꓯˍ ꓟ ꓥ ꓡ? 10 ꓕꓱ ꓟ ꓠꓬ ꓣꓳꓽ ꓐꓱ ꓶ ꓐꓯ ꓔ ꓟ ꓥꓳ꓾ ꓟꓽ ꓥ ꓡ? ꓚꓵ ꓚꓵ ꓣꓳꓽ ꓐꓱ ꓶ ꓐꓳ ꓔ ꓟ ꓥꓳ꓿ ꓮ ꓡꓲꓳ ꓐꓯ ꓠꓬ ꓦꓻ ꓟꓲ ꓟꓽ ꓢꓴˍ ꓐꓰ ꓜꓻ ꓓꓶꓽ ꓢꓴ ꓠꓬ ꓜꓻ ꓫ ꓟꓶ ꓠꓹ ꓟ ꓥꓳ ꓡꓳꓸ ꓔ ꓢꓲ ꓟꓬꓱꓽ ꓬꓰˍ ꓟ ꓥ ꓡꓳ꓿ 11 ꓠꓴ ꓪꓽ ꓗꓳ ꓡꓳ ꓗꓪ ꓥꓪ ꓠꓴꓽ ꓡꓰ ꓦꓻ ꓗꓪ ꓟ ꓬꓲ ꓫꓵꓸ ꓫꓵꓸ ꓗꓷ ꓢꓲ꓾ ꓠꓴ ꓪꓽ ꓗꓪ ꓐꓰ ꓧꓪ ꓖꓳ ꓓꓱꓽ ꓗꓪ ꓣꓱꓽ ꓙ ꓓꓴ ꓫ ꓟꓶˍ ꓟ ꓠꓬ ꓬꓲ ꓓꓽ ꓟ ꓕꓲ ꓫꓵꓽ ꓥ ꓡ? 12 ꓠꓱꓸ ꓐꓯ ꓢꓴ ꓠꓬ ꓠꓴ ꓪꓽ ꓡꓰ ꓔꓳꓹ ꓙˍ ꓟ ꓔꓯ ꓑꓯꓹ ꓟꓶ ꓒꓵꓽˍ ꓟ ꓙꓵꓽ ꓪ ꓙꓳˍ ꓕꓯꓽ ꓠꓽ꓾ ꓥꓪ ꓠꓴꓽ ꓪ ꓜꓲꓻ ꓑꓯꓹ ꓟꓶ ꓙꓲꓽ ꓙꓳˍ ꓡꓳ ꓟꓽ ꓥ ꓡ? ꓖꓳ ꓡꓱ ꓥ ꓟꓲ ꓥꓪ ꓠꓴꓽ ꓠꓬ ꓙꓲ-ꓢꓴ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓟꓽ ꓘꓶꓻ ꓡꓶꓽ ꓡꓰ ꓝꓲ ꓠꓹ ꓟ꓾ ꓮꓸ ꓫꓵ ꓗꓪˍ ꓟꓲ ꓜꓲꓽ ꓔ ꓢꓲ ꓑꓯꓹ ꓟꓶ ꓙꓵꓽ ꓪ ꓕꓱ ꓟ ꓟꓽ ꓣꓱꓽ ꓠꓬꓲ꓿ 13 ꓢꓲꓽ ꓫꓬ ꓦꓲ ꓗꓪ ꓣꓱꓽ ꓙ ꓢꓴ ꓠꓬ ꓖꓳ ꓗꓪ ꓐꓰ ꓖꓳ ꓓꓱ ꓦꓵꓻ ꓓꓴ ꓟꓶˍ ꓡꓳ ꓟꓽ ꓥ ꓡ? ꓢꓲꓽ ꓫꓬ ꓦꓲ ꓗꓪ ꓟ ꓜꓽ ꓓꓴˍ ꓐꓰ꓾ ꓔꓲꓺ ꓖꓴ ꓗꓪ ꓣꓱꓽ ꓙ ꓢꓴˍ ꓟꓲ꓾ ꓔꓲꓺ ꓖꓴ ꓗꓪ ꓟ ꓜꓽ ꓓꓴ ꓐꓱꓻ ꓟꓶˍ ꓟ ꓠꓴ ꓪꓽ ꓟꓽ ꓢꓷꓸ ꓡ? 14 ꓖꓳ ꓟ ꓡꓰ ꓐꓰ ꓶꓼ ꓓꓳꓽ ꓫꓱꓹ ꓓꓳ ꓚ ꓢꓴ ꓠꓬ꓾ ꓶꓼ ꓓꓳ ꓫꓱꓹ ꓓꓳ ꓗꓪ ꓐꓰ ꓟꓶꓺ ꓜꓽ ꓟꓶ ꓓꓳ ꓠꓹ ꓟ ꓢꓲ ꓒꓽ ꓡꓰ ꓕꓵꓼ ꓪ ꓖꓶ ꓗꓷꓳ꓿ 15 ꓖꓳ ꓡꓱ ꓥ ꓟꓲ ꓙꓵꓽ ꓪ ꓕꓱ ꓟ ꓥꓪ ꓕꓲ ꓫꓵˍ ꓟꓲ ꓟꓽ ꓣꓱ ꓠꓬꓲ꓿ ꓥꓪ ꓕꓱ ꓡꓱ ꓐꓳˍ ꓟˍ ꓟꓲ ꓠꓴ ꓪꓽ ꓡꓰ ꓥꓪ ꓐꓱ ꓶ ꓬꓲ ꓖꓳ ꓡꓱ ꓬꓰ ꓖꓶ ꓡ ꓝꓲ ꓠꓹ ꓟ ꓐꓳ ꓩꓴ ꓡ ꓟ ꓟꓽ ꓥ꓿ ꓥꓪ ꓘꓶꓽ ꓘꓹ ꓓꓴ ꓕꓱ ꓟ ꓔꓯ ꓖꓳꓽ ꓡꓰ ꓝꓲˍ ꓟ ꓢꓶꓸ ꓟꓽ ꓞꓲ ꓠꓬ ꓥꓪ ꓫꓵꓻˍ ꓟ ꓟꓬꓽ ꓠꓬꓲ ꓙꓲꓻˍ ꓡꓳ꓿ 16 ꓬꓲˍ ꓡꓰ꓾ ꓶꓼ ꓓꓳꓽ ꓫꓱꓹ ꓓꓳ ꓚˍ ꓟ ꓑꓶꓸ ꓓꓴ ꓥꓪ ꓘꓶꓽ ꓘꓹ ꓓꓴ ꓮꓸ ꓫꓵ ꓟꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓶꓼ ꓓꓳꓽ ꓫꓱꓹ ꓓꓳ ꓟꓽ ꓚ ꓟꓸ ꓟꓽ ꓓ ꓟ ꓥ ꓠꓬꓲ꓾ ꓶꓼ ꓓꓳꓽ ꓫꓱꓹ ꓓꓳ ꓟꓽ ꓚ ꓚ ꓔꓬ ꓐꓷˍ ꓠꓬ ꓥꓪ ꓠꓽ ꓙꓳꓻ ꓫꓸ ꓔꓬ ꓫꓸˍ ꓥꓳ꓿ 17 ꓥꓪ ꓚꓲ ꓛꓬ ꓬꓰ ꓠꓲꓹ ꓫꓵˍ ꓟ ꓗꓪ ꓐꓰ ꓟꓬꓱꓽ ꓕꓱ ꓟ ꓬꓰˍ ꓕꓯ ꓠꓽ ꓥꓪ ꓡꓯꓼ ꓫꓴ ꓟꓶˍ ꓥꓳ꓿ ꓖꓳ ꓡꓱ ꓥ ꓟꓲ ꓥꓪ ꓚꓲ ꓛꓬ ꓬꓰ ꓠꓲꓹ ꓫꓵˍ ꓟ ꓗꓪ ꓐꓰ ꓬꓰˍ ꓟ ꓟꓽ ꓥ ꓕꓯ ꓠꓽ꓾ ꓥꓪ ꓔꓯ ꓡꓯꓼ ꓙꓱ ꓔ ꓟ ꓟꓬꓱ ꓟꓽ ꓬꓰ ꓟꓽ ꓓ ꓠꓬꓲ ꓬꓰˍ ꓟ ꓗꓷ ꓡꓰˍ ꓥꓳ꓿ 18 ꓖꓳ ꓡꓱ ꓥ ꓠꓬ ꓥꓪ ꓟꓶ ꓠꓹ ꓟ ꓡꓯꓼ ꓫꓴ ꓮꓸ ꓫꓵ ꓥ ꓡ? ꓥꓪ ꓟꓶ ꓠꓹ ꓟ ꓡꓯꓼ ꓫꓴ ꓠꓬ ꓶꓼ ꓓꓳꓽ ꓫꓱꓹ ꓓꓳ ꓚˍ ꓟ ꓟꓬꓱꓽ ꓗꓪ ꓑꓯꓹ ꓟꓶˍ ꓟ ꓕꓱ ꓟ ꓥ ꓢꓲ꓾ ꓬꓲ ꓒꓵꓽ ꓟꓽ ꓧꓪ ꓧꓪ ꓢꓴ ꓔꓯ ꓚ ꓟꓸ ꓖꓶ ꓠꓹ ꓟ ꓐꓰ꓾ ꓶꓼ ꓓꓳꓽ ꓫꓱꓹ ꓓꓳ ꓑꓶꓸ ꓓꓴ ꓥꓪ ꓙꓳˍ ꓟ ꓙꓵꓽ ꓪ ꓔꓯ ꓟꓽ ꓣꓱ ꓠꓹ ꓟ ꓥ ꓡꓳ꓿ 19 ꓥꓪ ꓠꓬ ꓚꓳ ꓪꓴꓸ ꓥ ꓡꓳ꓾ ꓚꓳ ꓑꓸ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓡ ꓞꓳ ꓮꓽ ꓟꓬꓹ ꓔꓯ ꓘꓶꓸ ꓟꓶ ꓡꓰ ꓝꓲ ꓠꓹ ꓟ꓾ ꓥꓪ ꓚꓲ ꓛꓬ ꓔꓯ ꓠꓬ ꓮꓽ ꓙꓵ ꓢꓴ ꓚꓳ ꓑꓸ ꓒꓬꓱꓼ ꓡ ꓝꓲꓳ꓿ 20 ꓬꓴ-ꓔ ꓡ ꓞꓳ ꓔꓯ ꓘꓶꓸ ꓟꓶ ꓡꓰ ꓝꓲ ꓠꓹ ꓟ ꓥꓪ ꓠꓬ ꓬꓴ-ꓔ ꓡ ꓞꓳˍ ꓡꓰ ꓐꓰ ꓒꓬꓱꓼ ꓡꓺꓳ꓿ ꓥꓪ ꓠꓬ ꓙꓵꓽ ꓗꓺ ꓠꓯꓸ ꓘꓪ ꓟꓽ ꓔꓬ ꓥ ꓟꓲ꓾ ꓙꓵꓽ ꓗ ꓠꓯꓸ ꓘꓪ ꓔꓬ ꓢꓴ ꓔꓯ ꓘꓶꓸ ꓟꓶ ꓡꓰ ꓝꓲ ꓠꓹ ꓟ꓾ ꓙꓵꓽ ꓗ ꓠꓯꓸ ꓘꓪ ꓔꓬ ꓢꓴˍ ꓡꓰ ꓐꓰ ꓒꓬꓱꓼ ꓡꓺꓳ꓿ 21 ꓝꓮꓲ ꓠꓬ ꓙꓵꓽ ꓗ ꓟꓽ ꓙꓳ ꓢꓴ ꓔꓯ ꓘꓶꓸ ꓟꓶ ꓡꓰ ꓝꓲ ꓠꓹ ꓟ꓾ ꓥꓪ ꓠꓬ ꓙꓵꓽ ꓗ ꓟꓽ ꓙꓳ ꓢꓴˍ ꓡꓰ ꓐꓰ ꓒꓬꓱꓼ ꓡꓺꓳ꓿ ꓬꓲˍ ꓡꓰ꓾ ꓥꓪ ꓚꓲꓸ ꓛꓬ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓟꓽ ꓒꓵꓽ ꓛꓳ ꓔꓬ ꓐꓯˍ ꓟ ꓟꓽ ꓥ꓿ ꓥꓪ ꓠꓬ ꓙꓲ-ꓢꓴ ꓙꓵꓽ ꓗ ꓠꓯꓸ ꓘꓪ ꓔꓬ ꓟ ꓥ ꓡꓳ꓿ 22 ꓢꓯꓼ ꓐꓽ ꓢꓴ ꓔꓯ ꓘꓶꓸ ꓟꓶ ꓡꓰ ꓝꓲ ꓠꓹ ꓟ ꓥꓪˍ ꓟꓲ ꓢꓯꓼ ꓐꓽ ꓢꓴ ꓒꓬꓱꓼ ꓡꓺꓳ꓿ ꓮ ꓡꓲ ꓥ ꓟꓲ ꓡ ꓞꓳ ꓕꓲ ꓐꓱꓻ ꓔꓯ ꓘꓳꓽ ꓠꓻ ꓚꓬꓴ ꓟꓶ ꓡꓰ ꓝꓲ ꓠꓹ ꓟ꓾ ꓥꓪ ꓠꓽ ꓮ ꓡꓲ ꓡꓴ ꓫꓵ ꓡ ꓞꓳ ꓔꓯꓸ ꓟꓳˍ ꓟꓲ ꓖꓳ ꓡꓱ ꓡꓴ ꓫꓵꓽ ꓡ ꓞꓳ ꓒꓬꓱꓼ ꓡꓺꓳ꓿ 23 ꓥꓪ ꓕꓱ ꓡꓱ ꓬꓰˍ ꓟ ꓮꓽ ꓙꓵ ꓠꓬ ꓶꓼ ꓓꓳꓽ ꓫꓱꓹ ꓓꓳ ꓐꓱ ꓶ ꓥ ꓢꓲ꓾ ꓶꓼ ꓓꓳꓽ ꓫꓱꓹ ꓓꓳ ꓬꓲ ꓙꓲꓻ ꓖꓴ ꓑꓯꓹ ꓟꓶ ꓡꓰ ꓠꓹ ꓟ ꓥ ꓡꓳ꓿ 24 ꓔꓷꓹ ꓓꓰ ꓗꓪ ꓔꓷꓹ ꓔꓯ ꓡꓯꓽ ꓘꓳ ꓢꓴ ꓮꓽ ꓟꓬꓹ ꓙꓳˍ ꓟꓲ꓾ ꓡꓯꓼ ꓫꓴ ꓟꓶ ꓢꓴ ꓠꓽ ꓕꓲ ꓣꓳˍ ꓡꓰꓽ ꓥ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓠꓴ ꓪꓽˍ ꓟꓲ ꓡꓯꓼ ꓫꓴ ꓟꓶ ꓠꓹ ꓟ ꓔꓷꓹˍ ꓟ ꓡꓰ ꓐꓰ ꓔꓷꓹ ꓔꓯꓺ ꓡꓯꓽ ꓘꓳ꓿ 25 ꓝꓮꓲ ꓠꓬ ꓔꓷꓹ ꓡꓯꓽ ꓔꓯꓺ ꓢꓴ ꓮꓽ ꓟˍ ꓟꓲ ꓖꓳ ꓓꓱ ꓔꓯ ꓙꓵꓽ ꓢꓲ ꓚꓲ ꓛꓬ ꓔꓯ ꓤꓹ ꓓꓰꓼ ꓡꓰ ꓝꓲˍ ꓡꓳ꓿ ꓬꓲ ꓪꓽ ꓕꓱ ꓡꓱ ꓬꓰˍ ꓟ ꓠꓬ ꓐꓬ ꓡꓰ ꓓꓻˍ ꓟ ꓟꓬꓱ ꓓꓳꓽ ꓪꓴꓸ ꓛꓴꓽ ꓟꓶ ꓠꓹ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳꓽ ꓠꓽ ꓕꓲ ꓞꓲꓼ ꓕꓲ ꓑ ꓤꓰꓻ ꓞꓹ ꓟ ꓪꓴꓸ ꓛꓴꓽ ꓟꓶ ꓡꓰ ꓠꓹ ꓟ ꓢꓯꓼ ꓕꓵꓼˍ ꓟ ꓥ ꓡꓳ꓿ 26 ꓖꓳ ꓡꓱ ꓠꓬꓲ ꓥꓪ ꓔꓷꓹˍ ꓟ ꓠꓬ꓾ ꓔꓶꓺ ꓙꓱꓼ ꓟꓽ ꓙꓳ ꓢꓴ ꓔꓷꓹˍ ꓟ ꓡꓰ ꓐꓰ ꓔꓷꓹˍ ꓟ ꓟꓽ ꓥ꓿ ꓥꓪ ꓚꓴꓹ ꓡꓯꓼ ꓘꓳˍ ꓟˍ ꓟꓲ ꓦ ꓦ ꓗꓪ ꓚꓴꓹˍ ꓟ ꓟꓽ ꓥ꓿ 27 ꓥꓪ ꓠꓬ ꓢꓴ ꓔꓯ ꓕꓱ ꓡꓱ ꓟꓸ ꓖꓶ ꓗꓷ ꓗ ꓠꓯ꓾ ꓚꓲ ꓛꓬ ꓠꓬ ꓔꓷꓹ ꓖꓴ ꓗꓪ ꓔꓷꓹ ꓡꓯꓽ ꓔꓯꓺ ꓟꓽ ꓒꓵꓽ ꓢꓴ ꓟꓽ ꓗꓷ ꓡꓰ ꓠꓹ ꓟ꓾ ꓥꓪ ꓧꓪ ꓖꓳ ꓓꓱ ꓠꓲꓹ ꓡꓶꓽ ꓔꓯ ꓠꓬ ꓥꓪ ꓙꓵꓽˍ ꓟ ꓔꓯ ꓛꓳ ꓝꓲˍ ꓡꓳ꓿

1 ꓘꓳ-ꓡꓱ-ꓕꓴ 10

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮꓽ ꓠꓱ ꓕꓯ ꓣꓳꓽ ꓒꓵꓽ ꓒ ꓐꓴ ꓮ ꓡꓲ ꓥ ꓟ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ ꓬꓲ ꓪꓽ ꓮꓽ ꓙꓵ ꓔꓯ ꓠꓬ ꓟꓴ ꓗꓴꓸ ꓬꓲꓻ ꓘꓴ ꓡꓰ ꓛꓸ ꓙ ꓗꓷꓳ꓿ ꓬꓲꓻ ꓡꓴ ꓐꓱ ꓗꓪ ꓧꓪꓸ ꓧꓪ ꓗꓳꓸ ꓙꓻ ꓙꓰꓳ꓿ 2 ꓬꓲ ꓪꓽ ꓠꓬ ꓟꓳ-ꓫꓲ ꓔꓯ ꓛꓳ ꓢꓴ ꓥ ꓠꓬꓲ꓾ ꓟꓴ ꓗꓴꓸˍ ꓐꓰ ꓬꓲꓻ ꓡꓴ ꓐꓱ ꓗꓪ ꓖꓳ ꓓꓱ ꓔꓲꓹ ꓗꓷꓳ꓿ 3 ꓬꓲ ꓪꓽ ꓮꓽ ꓙꓵ ꓠꓬ ꓦꓻ ꓜꓽ ꓓꓴ ꓕꓲꓽ ꓫꓵꓽˍ ꓡꓰ ꓜꓽ ꓗꓷꓳ꓿ 4 ꓝꓮꓲ ꓬꓲ ꓪꓽ ꓠꓬ ꓬꓲ ꓪꓽˍ ꓐꓰ ꓛꓳ ꓔꓬ ꓟ ꓡꓳ ꓓꓰ ꓗꓪ ꓐꓰ ꓦꓻ ꓓꓳꓻ ꓓꓴ ꓕꓲꓽ ꓫꓵꓽˍ ꓡꓰ ꓓꓳ ꓗꓷꓳ꓿ ꓡꓳ ꓓꓰ ꓖꓳ ꓟ ꓠꓬ ꓙꓲ-ꓢꓴ ꓥ ꓡꓳ꓿ 5 ꓖꓳ ꓡꓱ ꓥ ꓟꓲ ꓬꓲ ꓪꓽ ꓟꓬꓽ ꓠꓬꓲ ꓕꓲ ꓐꓱ ꓟ ꓔꓯ ꓠꓽ ꓪꓴ-ꓢ ꓟꓽ ꓠꓲꓹ ꓒꓴ ꓠꓬꓲ꓾ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓫꓵꓻ ꓝꓲꓳ꓿ 6 ꓕꓱ ꓟꓬ ꓫꓵꓽ ꓠꓬ ꓬꓲ ꓪꓽ ꓬꓰ ꓗꓷ ꓟ ꓡꓰ ꓐꓰ꓾ ꓣꓳꓽ ꓠꓬ ꓟꓽ ꓙꓲ ꓟ ꓔꓯ ꓟꓽ ꓠꓲꓹ ꓦꓯꓸ ꓠꓹ ꓟ꓾ ꓣꓳꓽ ꓢꓳ ꓟꓶ ꓓꓴ ꓔꓯꓺ ꓐꓬꓱꓽ ꓥ ꓡꓳ꓿ 7 ꓕꓳ ꓶ ꓗꓪ꓾ ꓑ ꓫꓬꓼ ꓐꓴ ꓠꓬ ꓜꓽ ꓓꓳꓻ ꓠꓹ ꓟ ꓠꓬꓲꓸ ꓠꓸ ꓢꓲ꓾ ꓖꓼ ꓟ ꓔꓱꓹ ꓔꓱꓹꓼ ꓬꓰ ꓠꓹ ꓟ ꓔꓴ ꓡ ꓡꓳ꓾ ꓐꓰ ꓐꓳ ꓔ ꓡꓳ꓿ ꓬꓲ ꓪꓽ ꓕꓲ ꓐꓱ ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓬꓰˍ ꓟ ꓡꓰ ꓐꓰ ꓠꓴ ꓪꓽ ꓕꓽ ꓬꓰ꓿ 8 ꓬꓲ ꓪꓽ ꓕꓲ ꓐꓱ ꓠꓬ ꓟꓽ ꓢꓲꓽ ꓟꓽ ꓫꓬ ꓟ ꓬꓰ ꓢꓲ꓾ ꓕꓲ ꓠꓬꓲˍ ꓗꓪ ꓠꓬꓲꓽ ꓟꓶꓽ ꓢ ꓔꓴ ꓣꓳ ꓫꓵꓻ ꓟ ꓡꓰ ꓐꓰ ꓟꓽ ꓫꓵꓻ ꓡ ꓠꓹ ꓟ꓾ ꓣꓳꓽ ꓠꓬ ꓟꓽ ꓢꓲꓽ ꓟꓽ ꓫꓬ ꓕꓽ ꓬꓰ ꓠꓯꓹ ꓡꓳ꓿ 9 ꓬꓲ ꓪꓽ ꓕꓲ ꓐꓱ ꓠꓬ ꓢꓲ ꓒꓽ ꓔꓯ ꓫꓵꓽ ꓠꓬꓲ ꓢꓲ꓾ ꓩꓴ ꓡꓰ ꓕꓳꓹ ꓢꓰꓼ ꓗꓷ ꓟ ꓡꓰ ꓐꓰ ꓟꓽ ꓫꓵ ꓡ ꓠꓹ ꓟ꓾ ꓣꓳꓽ ꓠꓬ ꓢꓲ ꓒꓽ ꓔꓯ ꓕꓽ ꓫꓵꓽ ꓠꓬꓲ ꓠꓯꓹ ꓡꓳ꓿ 10 ꓬꓲ ꓪꓽ ꓕꓲ ꓐꓱ ꓠꓬ ꓱ'ꓽ ꓠꓱꓽ ꓢꓲ꓾ ꓛꓴ ꓛꓰꓹ ꓡꓰ ꓝꓲ ꓢꓴ ꓡꓯꓽ ꓒꓯꓹ ꓗꓪ ꓟꓶꓽ ꓬꓰ ꓟ ꓡꓰ ꓐꓰ ꓟꓽ ꓟꓶꓽ ꓬꓰ ꓡ ꓠꓹ ꓟ꓾ ꓣꓳꓽ ꓠꓬ ꓕꓽ ꓱ'ꓽ ꓠꓱꓽ ꓠꓯꓹ ꓡꓳ꓿ 11 ꓬꓲ ꓪꓽ ꓔꓯ ꓕꓱ ꓟꓬ ꓫꓵꓽ ꓗꓷ ꓡꓰ ꓟ ꓠꓬ ꓣꓳꓽ ꓧꓪꓸ ꓛꓲꓽ ꓠꓹ ꓟ ꓥ ꓢꓲ꓾ ꓟꓲ ꓠꓯ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓔꓬ ꓢꓴ ꓣꓳꓽ ꓐꓴ ꓐꓱ ꓶ ꓙꓳꓺ ꓗꓽ ꓓꓴ ꓐꓳ ꓔꓸ ꓬꓰ ꓟ ꓥ ꓡꓳ꓿ 12 ꓖꓳ ꓡꓱ ꓠꓬꓲ ꓚꓲ ꓛꓬ ꓠꓽ ꓦꓰꓼ ꓕꓶ ꓞꓹ ꓡꓳ꓾ ꓐꓰ ꓓꓵꓽ ꓙꓽ ꓢꓴ ꓠꓬ ꓟꓽ ꓡꓱꓸ ꓙꓰ ꓠꓹ ꓟ ꓤ ꓟꓳ ꓠꓯꓹ ꓡꓳ꓿ 13 ꓞꓳ ꓤ ꓜꓲꓽ ꓘꓴ ꓐ ꓡ ꓟ ꓫꓵꓽ ꓠꓬꓲ ꓓꓴ ꓟꓽ ꓥ ꓠꓬ ꓠꓴ ꓪꓽ ꓟꓽ ꓔꓳꓹ ꓜꓳꓽ ꓠꓬꓲ꓿ ꓪꓴ-ꓢ ꓠꓽ ꓦ ꓡꓱ ꓐꓳˍ ꓟ ꓥ ꓠꓬꓲ꓾ ꓜꓲꓽ ꓘꓴˍ ꓟ ꓕꓯ ꓢꓲ ꓠꓴ ꓪꓽ ꓔꓯ ꓟꓽ ꓫꓵꓽ ꓠꓬꓲ ꓝꓲ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓫꓵꓽ ꓠꓬꓲˍ ꓕꓯ꓾ ꓬꓲ ꓡꓰ ꓠꓴ ꓪꓽ ꓜꓲꓽ ꓘꓴ ꓠꓹ ꓟ ꓡꓲꓹ ꓙꓰ ꓚꓱꓹ ꓫꓬꓹ ꓖꓶ ꓡ ꓥꓳ꓿ 14 ꓖꓳ ꓡꓱ ꓠꓬꓲ ꓥꓪ ꓠꓲꓹ ꓠꓵ ꓢꓴ ꓐꓴꓳ꓾ ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼˍ ꓟ ꓔꓯꓸˍ ꓐꓰ ꓧꓹ ꓙꓰ꓿ 15 ꓥꓪ ꓠꓬ ꓙꓽ ꓜꓲꓼ ꓢꓴ ꓔꓯˍ ꓡꓰ ꓐꓰ ꓫꓸ ꓕꓱˍ ꓥꓳ꓿ ꓥꓪ ꓐꓯˍ ꓟ ꓔꓯ ꓠꓴ ꓪꓽ ꓚꓬꓹ ꓠꓬꓲ꓿ 16 ꓥꓪ ꓠꓴꓽ ꓡꓰ ꓶꓼ ꓥꓳ ꓙꓱꓽ ꓖꓶˍ ꓟ ꓶꓼ ꓤ ꓫꓱꓹ ꓤ ꓡꓴ ꓗꓶꓸ ꓠꓬ꓾ ꓙꓲ-ꓢꓴ ꓬꓲ ꓫꓵꓽ ꓑꓯꓹ ꓡꓯꓽ ꓘꓳ ꓟꓶˍ ꓟ ꓟꓽ ꓥ ꓡ? ꓥꓪ ꓠꓴꓽ ꓦꓶꓹˍ ꓟ ꓑ ꓑ ꓠꓬ꓾ ꓙꓲ-ꓢꓴ ꓖꓳ ꓓꓱ ꓑꓯꓹ ꓡꓯꓽ ꓘꓳ ꓟꓶˍ ꓟ ꓟꓽ ꓥ ꓡ? 17 ꓮ ꓡꓲꓳ ꓐꓯ ꓠꓬ ꓣꓳꓽ ꓠꓽ ꓮꓽ ꓟꓬꓹ ꓣꓳ ꓥ ꓥˍ ꓟꓲ꓾ ꓑ ꓑ ꓕꓲ ꓑꓬꓺꓼ ꓗꓪ ꓐꓰ ꓑꓯꓹ ꓜꓽˍ ꓠꓬꓲ ꓕꓲꓽ ꓖꓳ ꓓꓱꓽˍ ꓡꓰꓽ ꓥ ꓡꓳ꓿ 18 ꓧꓪꓽ ꓖꓳ ꓓꓱ ꓕꓲ ꓒꓳꓹ ꓗꓪ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓓꓵꓽ ꓙꓽ ꓠꓬꓲ꓿ ꓔꓲ ꓓꓴ ꓜꓽ ꓢꓴ ꓠꓬ ꓔꓲ ꓖꓴ ꓟꓬꓱꓽ ꓗꓪ ꓑꓯꓹ ꓡꓯꓽ ꓘꓳ ꓟꓶˍ ꓟ ꓟꓽ ꓥ ꓡ? 19 ꓥꓪ ꓕꓱ ꓡꓱ ꓐꓯˍ ꓟ ꓠꓬ꓾ ꓟꓽ ꓦ ꓡꓱ ꓢꓴ ꓐꓴ ꓡꓰ ꓒꓵꓽ ꓔꓬ ꓟ ꓠꓲꓽ ꓐꓬꓱ꓾ ꓥ ꓠꓬ ꓠꓲꓽ ꓐꓬꓱꓽ ꓔꓯ ꓔꓲ ꓖꓶˍ ꓟ ꓧꓪꓽ ꓖꓳ ꓟ ꓠꓬ꓾ ꓠꓵꓻ ꓒꓵꓽˍ ꓟ ꓕꓲ ꓫꓵ ꓥꓳ ꓐꓯˍ ꓟ ꓥ ꓡ? 20 ꓟꓽ ꓥ꓿ ꓥꓪ ꓐꓯˍ ꓟ ꓠꓬ ꓕꓱ ꓡꓱ ꓥꓳ꓾ ꓟꓽ ꓦ ꓡꓱ ꓢꓴ ꓐꓴ ꓡꓰ ꓔꓲ ꓖꓶˍ ꓟ ꓠꓬ ꓠꓲꓽ ꓔꓯ ꓔꓲ ꓖꓶˍ ꓟ ꓥꓳ꓾ ꓪꓴ-ꓢ ꓔꓯ ꓔꓲ ꓖꓶˍ ꓟ ꓟꓽ ꓥ꓿ ꓖꓳ ꓡꓱ ꓠꓬꓲ ꓥꓪ ꓠꓬ ꓠꓴ ꓪꓽ ꓔꓯ ꓠꓲꓽˍ ꓐꓰ ꓑꓯꓹ ꓡꓯꓽ ꓘꓳ ꓢꓴ ꓬꓰ ꓝꓲ ꓠꓲꓹ ꓟꓽ ꓫꓵ꓿ 21 ꓠꓴ ꓪꓽ ꓠꓬ ꓠꓲꓽ ꓡꓴ ꓗꓶꓸ ꓓꓳꓻˍ ꓠꓬ꓾ ꓢꓲ ꓒꓽ ꓡꓴ ꓗꓶꓸ ꓓꓳꓻ ꓟꓽ ꓓ꓿ ꓢꓲ ꓒꓽ ꓢꓽ ꓡ ꓗꓪ ꓜꓽˍ ꓠꓬ꓾ ꓠꓲꓽ ꓢꓽ ꓡ ꓗꓪ ꓜꓽ ꓟꓽ ꓓ꓿ 22 ꓣꓳꓽ ꓠꓬ ꓢꓲ ꓒꓽ ꓔꓯ ꓟꓬ ꓔꓳꓹ ꓡ ꓝꓲ ꓠꓯꓹ ꓡ? ꓣꓳꓽ ꓠꓬ ꓬꓲ ꓕꓯ ꓢꓲ ꓪ ꓠꓬꓲˍ ꓡ? 23 ꓮꓸ ꓫꓵˍ ꓟꓲ ꓬꓰ ꓓꓻ ꓡꓳ꓿ ꓖꓳ ꓡꓱ ꓥ ꓟꓲ ꓮꓽ ꓙꓵ ꓡꓱꓸꓼ ꓙꓲ ꓖꓴ ꓙꓳˍ ꓟ ꓟꓽ ꓥ꓿ ꓮꓸ ꓫꓵˍ ꓟꓲ ꓬꓰ ꓓꓻ ꓡꓳ꓿ ꓖꓳ ꓡꓱ ꓥ ꓟꓲ ꓮꓽ ꓙꓵ ꓡꓱꓸꓼ ꓪꓴꓽ ꓡ ꓟꓴ ꓡ ꓓꓴ ꓟꓽ ꓥ꓿ 24 ꓮꓽ ꓟ ꓥ ꓟꓲ ꓚꓲ ꓛꓬ ꓙꓲꓻ ꓖꓴ ꓟꓽ ꓧꓪ ꓧꓪ꓾ ꓢꓴꓻ ꓙꓲ ꓖꓴ ꓧꓪ꓿ 25 ꓦꓰꓽ ꓠꓲꓹ ꓡꓰ ꓟꓽ ꓕꓼ ꓪ ꓠ ꓟ꓾ ꓧꓪꓽ ꓪꓴꓽ ꓖꓴ ꓗꓪ ꓪꓴꓽ ꓔꓬ ꓟ ꓮꓸ ꓫꓵ ꓧꓪꓽˍ ꓟꓲ꓾ ꓟꓽ ꓠ ꓠꓬꓲ ꓠꓬꓲ ꓜꓽ꓿ 26 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓟꓲ ꓠꓯˍ ꓐꓰ ꓟꓲ ꓠꓯ ꓗꓪ ꓐꓲ ꓞꓹ ꓟ ꓮꓽ ꓙꓵ ꓢꓲ ꓒꓽ ꓔꓯ ꓟ ꓥ ꓡꓳ꓾ ꓐꓰ ꓐꓯˍ ꓡꓳ꓿ 27 ꓟꓽ ꓦ ꓡꓱ ꓢꓴ ꓕꓲ ꓣꓳ ꓡꓰ ꓠꓴ ꓪꓽ ꓔꓯ ꓜ ꓘꓴꓻ ꓖꓶ ꓜꓽ ꓡ ꓢꓲ꓾ ꓠꓴ ꓪꓽ ꓜꓽ ꓬꓰ ꓠꓲꓹ ꓫꓵˍ ꓕꓯ ꓠꓽ꓾ ꓠꓴ ꓪꓽ ꓔꓯ ꓮꓸ ꓫꓵ ꓖꓶ ꓜꓽ ꓡ ꓥ ꓟꓲ꓾ ꓦꓰꓽ ꓠꓲꓹ ꓡꓰ ꓟꓽ ꓕꓼ ꓪ ꓠꓹ ꓟ ꓟꓽ ꓠ ꓠꓬꓲ ꓠꓬꓲ ꓜꓽ꓿ 28 ꓖꓳ ꓡꓱ ꓥ ꓟꓲ ꓕꓱ ꓟ ꓠꓬ ꓠꓲꓽ ꓔꓯ ꓔꓲ ꓗꓷꓳ꓾ ꓐꓰ ꓠꓴ ꓪꓽ ꓔꓯ ꓐꓯ ꓖꓶ ꓡ ꓢꓴ ꓙꓳˍ ꓠꓬ꓾ ꓠꓴ ꓪꓽ ꓔꓯ ꓐꓯ ꓖꓶ ꓡ ꓢꓴ ꓖꓳ ꓕꓲ ꓣꓳ ꓐꓱ ꓶˍ ꓐꓰ ꓦꓰꓽ ꓠꓲꓹ ꓑꓶꓸ ꓓꓴ ꓕꓽ ꓜꓽ꓿ 29 ꓠꓴ ꓦꓰꓽ ꓠꓲꓹ ꓔꓯ ꓟꓽ ꓐꓯ꓾ ꓬꓲ ꓦꓰꓽ ꓠꓲꓹ ꓔꓯ ꓐꓯˍ ꓟ ꓥ ꓡꓳ꓿ ꓖꓳ ꓡꓱ ꓥ ꓠꓬ ꓥꓪ ꓬꓰ ꓓꓻˍ ꓟ ꓔꓯ ꓢꓴ ꓦꓰꓽ ꓠꓲꓹ ꓡꓰ ꓗꓽ ꓔ ꓝꓲ ꓠꓯꓹ ꓡ? 30 ꓥꓪ ꓫꓸ ꓟꓳ ꓢꓲ ꓜꓽˍ ꓠꓬ꓾ ꓢꓴ ꓮꓸ ꓫꓵ ꓪꓴꓸ ꓠꓬꓲ ꓥꓪ ꓫꓸ ꓟꓳ ꓗꓷ ꓟ ꓜꓽ ꓓꓴ ꓑꓶ ꓓꓴ ꓥꓪ ꓔꓯ ꓙꓽ ꓘꓶꓽˍ ꓡ? 31 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓜꓽˍ ꓥ ꓟꓲ꓾ ꓓꓳꓻˍ ꓥ ꓟꓲ꓾ ꓮꓸ ꓫꓵ ꓬꓰˍ ꓥ ꓟꓲ꓾ ꓮꓽ ꓙꓵ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ ꓬꓰ꓿ 32 ꓠꓴ ꓪꓽ ꓠꓬ ꓬꓴ-ꓔ ꓡ ꓞꓳ ꓔꓯˍ ꓟꓲ꓾ ꓦꓲ-ꓡꓲ ꓡ ꓞꓳ ꓔꓯˍ ꓟꓲ꓾ ꓪꓴ-ꓢ ꓬꓲ ꓘꓴ ꓜꓲꓼ ꓞꓳ ꓔꓯˍ ꓟꓲ꓾ ꓛꓲ ꓕꓲꓽ ꓓꓴ ꓕꓽ ꓗꓷ ꓡꓰ ꓝꓲ꓿ 33 ꓥꓪ ꓠꓬ ꓚꓲ ꓛꓬ ꓙꓲ ꓖꓴ ꓟꓽ ꓧꓪ ꓧꓪ꓾ ꓮꓽ ꓙꓵ ꓢꓴ ꓙꓲ ꓖꓴ ꓧꓪ ꓢꓲ꓾ ꓬꓲ ꓪꓽ ꓢꓯꓼ ꓟꓬ ꓝꓸ ꓟꓶ ꓠꓹ ꓟ ꓢꓯꓼ ꓕꓵꓼˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓖꓳ ꓡꓱ ꓬꓰ꓿

1 ꓘꓳ-ꓡꓱ-ꓕꓴ 11

1 ꓥꓪ ꓠꓬ ꓙꓲ-ꓢꓴ ꓔꓯ ꓔꓯꓺ ꓢꓳ ꓢꓴ ꓥ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓥꓪ ꓔꓯ ꓔꓯꓺ ꓢꓳ ꓢꓴ ꓬꓰ ꓡꓯ꓿ 2 ꓠꓴ ꓪꓽ ꓠꓬ ꓮ ꓕꓯˍ ꓟꓲ ꓥꓪ ꓔꓯ ꓓꓵꓽ ꓙꓽ ꓛꓲ ꓡ ꓢꓲ꓾ ꓥꓪ ꓡꓰ ꓠꓴ ꓪꓽ ꓔꓯ ꓟꓸ ꓖꓶˍ ꓟ ꓟꓸ ꓟꓲꓽ ꓔꓯ ꓕꓶꓻ ꓕꓶˍ ꓡꓰ ꓒꓵꓽ ꓛꓳˍ ꓠꓬꓲ꓾ ꓥꓪ ꓠꓬ ꓠꓴ ꓪꓽ ꓔꓯ ꓫꓱꓸ ꓖꓶˍ ꓡꓳ꓿ 3 ꓞꓳ ꓑ ꓤ ꓬꓲ ꓪꓴꓸ ꓓꓵ ꓠꓬ ꓙꓲ-ꓢꓴ ꓥ ꓟ ꓐꓰ꓾ ꓝꓮꓲ ꓠꓬ ꓤ ꓟꓶ ꓤ ꓪꓴꓸ ꓓꓵ ꓠꓬ ꓤ ꓖꓴꓻ ꓥ ꓟ ꓐꓰ꓾ ꓙꓲ-ꓢꓴ ꓪꓴꓸ ꓓꓵ ꓠꓬ ꓪꓴ-ꓢ ꓥ ꓟ ꓠꓴ ꓪꓽ ꓔꓯ ꓥꓪ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 4 ꓞꓳ ꓑ ꓤ ꓮ ꓡꓲ ꓕꓲ ꓣꓳˍ ꓟꓲ ꓪꓽ ꓘꓴˍ ꓕꓯ꓾ ꓥ ꓠꓬ ꓟꓷꓽ ꓠꓷꓹ ꓝꓸˍ ꓕꓯ ꓪꓴꓸ ꓓꓵ ꓑꓲꓸ ꓔ ꓠꓬ꓾ ꓙꓲ-ꓢꓴ ꓔꓯ ꓟꓽ ꓒꓵꓽ ꓟ ꓥ ꓡꓳ꓿ 5 ꓤ ꓟꓶ ꓤ ꓮ ꓡꓲ ꓕꓲ ꓣꓳˍ ꓟꓲ꓾ ꓪꓽ ꓘꓴˍ ꓕꓯ꓾ ꓥ ꓠꓬ ꓟꓷꓽ ꓠꓷꓹ ꓝꓸˍ ꓕꓯ꓾ ꓪꓴꓸ ꓓꓵ ꓟꓽ ꓑꓲꓸ ꓔ ꓠꓬ꓾ ꓬꓲ ꓤꓽ ꓖꓴ ꓔꓯ ꓟꓽ ꓒꓵꓽ ꓟ ꓥ ꓢꓲ꓾ ꓪꓴꓸ ꓓꓵ ꓛꓳꓹ ꓗꓷ ꓟ ꓤ ꓟꓶ ꓤˍ ꓐꓰ ꓕꓲ ꓡꓰꓹꓼ ꓥꓳ꓿ 6 ꓤ ꓟꓶ ꓤ ꓪꓴꓸ ꓓꓵ ꓟꓽ ꓑꓲꓸ ꓕꓯ ꓠꓽ꓾ ꓪꓴꓸ ꓞꓱꓻ ꓞꓶꓽ ꓗꓷ ꓠꓯꓹ ꓡꓳ꓿ ꓤ ꓟꓶ ꓤ ꓪꓴꓸ ꓞꓱꓻ ꓞꓶꓽˍ ꓟ꓾ ꓥ ꓠꓬ꓾ ꓛꓳꓹˍ ꓟ ꓫꓸ ꓔꓳ ꓓꓴ ꓥ ꓕꓯ ꓠꓽ꓾ ꓬꓲ ꓪꓴꓸ ꓓꓵ ꓔꓯ ꓑꓲꓸ ꓔ ꓠꓯꓹ ꓡꓳ꓿ 7 ꓞꓳ ꓑ ꓤ ꓠꓬ ꓪꓴ-ꓢ ꓐꓬꓱꓽˍ ꓐꓰ ꓪꓴ-ꓢ ꓟꓬꓱ ꓓꓳꓽ ꓥ ꓠꓬꓲ ꓪꓴꓸ ꓓꓵ ꓕꓽ ꓑꓲꓸ ꓠꓯꓹ ꓡꓳ꓿ ꓖꓳ ꓡꓱ ꓥ ꓟꓲ ꓤ ꓟꓶ ꓤ ꓠꓽ ꓞꓳ ꓑ ꓤ ꓟꓬꓱ ꓓꓳꓽ ꓥ ꓡꓳ꓿ 8 ꓞꓳ ꓑ ꓤ ꓠꓬ ꓤ ꓟꓶ ꓤ ꓗꓪ ꓐꓰ ꓚꓰꓼ ꓔ ꓟ ꓟꓽ ꓥ꓿ ꓤ ꓟꓶ ꓤ ꓠꓬ ꓞꓳ ꓑ ꓤ ꓗꓪ ꓐꓰ ꓚꓰꓼ ꓔ ꓟ ꓥ ꓡꓳ꓿ 9 ꓞꓳ ꓑ ꓤ ꓠꓬ ꓤ ꓟꓶ ꓤ ꓐꓱ ꓶ ꓚꓰꓼ ꓔ ꓟ ꓟꓽ ꓥ꓿ ꓤ ꓟꓶ ꓤ ꓔꓯ ꓠꓽ ꓞꓳ ꓑ ꓤ ꓐꓱ ꓶ ꓚꓰꓼ ꓔ ꓟ ꓥ ꓡꓳ꓿ 10 ꓖꓳ ꓡꓱ ꓠꓬꓲ ꓟꓴꓽ ꓗꓪ ꓝꓲ ꓓꓴ ꓐꓴ ꓪꓴꓸ ꓠꓬꓲ꓾ ꓤ ꓟꓶ ꓤ ꓠꓬ ꓬꓲ ꓤꓽ ꓖꓴ ꓙꓵꓽ ꓪꓽ ꓠꓯꓸ ꓘꓪ ꓔꓬ ꓟ ꓢꓷꓸ ꓡꓰ ꓓꓴ ꓬꓰ ꓠꓹ ꓟ ꓪꓴꓸ ꓓꓵ ꓑꓲꓸ ꓠ ꓗꓹ ꓡꓳ꓿ 11 ꓖꓳ ꓡꓱ ꓥ ꓟꓲ ꓢꓲ ꓒꓽ ꓠꓯꓸꓼ ꓗꓪ ꓐꓯˍ ꓠꓽ꓾ ꓤ ꓟꓶ ꓤ ꓠꓬ ꓞꓳ ꓑ ꓤ ꓔꓯ ꓣꓱ ꓟꓽ ꓬꓯꓼ ꓟ ꓟꓽ ꓥ꓿ ꓞꓳ ꓑ ꓤꓽˍ ꓟꓲ ꓤ ꓟꓶ ꓤ ꓔꓯ ꓣꓱꓽ ꓟꓽ ꓬꓯꓼ ꓟ ꓟꓽ ꓥ꓿ 12 ꓮ ꓡꓲꓳ ꓐꓯ ꓠꓬ ꓤ ꓟꓶ ꓤ ꓠꓽ ꓞꓳ ꓑ ꓤ ꓗꓪ ꓐꓰ ꓚꓰꓼ ꓔ ꓟ ꓡꓰ ꓐꓰ꓾ ꓞꓳ ꓑ ꓤˍ ꓟꓲ ꓤ ꓟꓶ ꓤ ꓗꓪ ꓐꓰ ꓡꓻ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓙꓳˍ ꓟ ꓥ ꓕ ꓑꓳꓸ ꓠꓬ ꓪꓴ-ꓢ ꓗꓪ ꓐꓰ ꓡꓻ ꓟ ꓥ ꓡꓳ꓿ 13 ꓤ ꓟꓶ ꓤ ꓪꓴꓸ ꓓꓵ ꓟꓽ ꓑꓲꓸ ꓑꓲ ꓪꓴ-ꓢ ꓔꓯ ꓪꓽ ꓘꓴˍ ꓠꓬ ꓜꓳꓽ ꓟꓽ ꓜꓳꓽ ꓠꓴ ꓪꓽ ꓚꓬꓹ ꓠꓬꓲ꓿ 14 ꓞꓳ ꓑ ꓤ ꓪꓴꓸ ꓞꓱꓻ ꓫꓵꓺˍ ꓕꓯ ꓠꓽ꓾ ꓬꓲ ꓫꓸ ꓔꓳ ꓓꓴ ꓥ ꓟ ꓠꓴ ꓪꓽˍ ꓟꓲ ꓢꓷꓸˍ ꓡꓳ ꓟꓽ ꓥ ꓡ? 15 ꓖꓳ ꓡꓱ ꓥ ꓟꓲ ꓤ ꓟꓶ ꓤ ꓪꓴꓸ ꓞꓱꓻ ꓫꓵꓺˍ ꓕꓯ ꓠꓽ ꓬꓲ ꓟꓬꓱ ꓓꓳꓽ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓴꓸ ꓞꓱꓻ ꓠꓽ ꓬꓲ ꓔꓯ ꓑꓲꓸ ꓓꓴ ꓖꓶ ꓔ ꓟ ꓕꓲ ꓫꓵꓽ ꓥ ꓡꓳ꓿ 16 ꓖꓳ ꓡꓱ ꓥ ꓟꓲ ꓧꓳꓺ ꓡꓯꓽ ꓘꓳ ꓠꓲꓹ ꓫꓵ ꓢꓴ ꓙꓳ ꓐꓷˍ ꓠꓬ꓾ ꓒꓳ-ꓡꓳ ꓥꓪˍ ꓟꓲ꓾ ꓪꓴ-ꓢ ꓘꓴ ꓜꓲ ꓞꓳˍ ꓟꓲ꓾ ꓕꓱ ꓟ ꓕꓯ ꓢꓲ ꓠꓱꓸ ꓐꓯ ꓗ ꓫꓵ ꓟꓽ ꓙꓳ꓿ 17 ꓮ ꓟꓶ ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓠꓯꓹ ꓟ ꓠꓬ ꓫꓱꓸ ꓖꓶ ꓘꓶꓽ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓜꓲꓼ ꓡꓯꓽ ꓘꓳˍ ꓟ ꓠꓬ꓾ ꓙꓲꓻ ꓡ ꓓꓴ ꓟꓽ ꓥ ꓥ꓾ ꓟꓬꓽ ꓠꓬꓲ ꓐꓬ ꓡꓰ ꓓꓴ ꓗꓷ ꓡꓰˍ ꓔꓬ ꓡꓳ꓿ 18 ꓬꓲ ꓪꓴꓸ ꓕꓲ ꓫꓵꓽ ꓠꓬ꓾ ꓠꓴ ꓪꓽ ꓘꓴ ꓜꓲꓼ ꓞꓳ ꓗꓪ ꓜꓲꓼ ꓡꓯꓽ ꓘꓳˍ ꓕꓯ ꓠꓴ ꓪꓽ ꓗꓳ ꓡꓳ ꓗꓪ ꓗꓪꓺ ꓡꓯꓽ ꓘꓳˍ ꓟ ꓙꓳˍ ꓡꓳ꓾ ꓐꓯˍ ꓟ ꓔꓯ ꓥꓪˍ ꓟꓲ ꓕꓲ ꓐꓱꓻ ꓙꓵꓻˍ ꓡꓳ꓿ 19 ꓠꓴ ꓪꓽ ꓗꓳ ꓡꓳ ꓗꓪ ꓮꓽ ꓟ ꓜꓳꓽ ꓟꓽ ꓜꓳ ꓡꓳꓸ ꓓꓳ ꓡ ꓝꓲ ꓠꓹ ꓟ꓾ ꓗꓪꓺ ꓡꓯꓽ ꓘꓳˍ ꓟ ꓙꓳ ꓔꓬ ꓐꓷ꓿ 20 ꓠꓴ ꓪꓽ ꓜꓲꓼ ꓡꓯꓽ ꓘꓳˍ ꓕꓯ ꓜꓽ ꓓꓳꓻˍ ꓟ ꓕꓱ ꓟ ꓠꓬ꓾ ꓢꓲ ꓒꓽ ꓟꓶꓼ ꓘꓶꓼ ꓜ ꓜꓽˍ ꓟ ꓟꓽ ꓥ꓿ 21 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓜꓽˍ ꓕꓯ꓾ ꓠꓱꓸ ꓐꓯ ꓢꓴ ꓔꓯ ꓟꓽ ꓦꓴ ꓠꓬꓹ ꓠꓬꓹ꓾ ꓮꓽ ꓟ ꓜꓻ ꓮꓽ ꓟ ꓜꓽ ꓢꓲ꓾ ꓕꓲ ꓐꓱ ꓠꓬ ꓦꓰꓼ ꓟꓷꓼ ꓔꓬ꓾ ꓕꓲ ꓐꓱ ꓠꓬ ꓬꓲꓼ ꓔꓬ ꓐꓷ꓿ 22 ꓠꓴ ꓪꓽ ꓜꓽ ꓓꓳꓻ ꓖꓴ ꓦꓲꓻ ꓟꓽ ꓙꓳ ꓡ? ꓥ ꓠꓬ ꓪꓴ-ꓢ ꓘꓴ ꓜꓲ ꓞꓳ ꓔꓯ ꓟꓳꓻ ꓟꓽ ꓟꓵꓺ ꓢꓲ꓾ ꓣꓱꓽ ꓟ ꓡꓳꓼ ꓢꓴ ꓐꓴ ꓔꓯ ꓫꓸ ꓔꓳ ꓡꓰ ꓝꓲ ꓠꓲꓹ ꓫꓵˍ ꓡ? ꓥꓪ ꓠꓬ ꓠꓴ ꓪꓽ ꓔꓯ ꓮ ꓡꓲ ꓐꓯ ꓖꓶ ꓠꓯꓹ ꓡ? ꓠꓴ ꓪꓽ ꓔꓯ ꓫꓱꓸ ꓖꓶ ꓠꓯꓹ ꓡ? ꓕꓱ ꓕꓲ ꓫꓵꓽ ꓗꓪ ꓥꓪ ꓠꓬ ꓠꓴ ꓪꓽ ꓔꓯ ꓮꓽ ꓔꓲꓸˍ ꓟꓲ ꓟꓽ ꓫꓱꓸ ꓖꓶ꓿ 23 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓥꓪ ꓡꓯꓼ ꓙꓱ ꓖꓶˍ ꓟ ꓠꓬ꓾ ꓢꓲ ꓒꓽ ꓗꓪ ꓐꓰ ꓥꓪ ꓟꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓢꓲ ꓒꓽ ꓬꓰ-ꓢꓴ ꓔꓯ ꓪꓴꓽ ꓜ ꓗꓷˍ ꓟ ꓖꓳ ꓕꓲ ꓦꓬꓼ ꓗꓪ꓾ ꓬꓲ ꓠꓬ ꓑ ꓑ ꓣꓴ ꓢꓲ꓾ 24 ꓫꓸ ꓟꓳ ꓗꓷ ꓠꓬ ꓦꓶꓹ ꓢꓲ ꓠꓬꓲ꓾ ꓕꓱ ꓟ ꓠꓽ ꓥꓪ ꓖꓳ ꓓꓱꓽ ꓠꓴ ꓪꓽ ꓐꓱ ꓶ ꓖꓶ ꓔ ꓟ ꓥꓳ꓿ ꓠꓴ ꓪꓽ ꓥꓪ ꓔꓯ ꓓꓵꓽ ꓙ ꓛꓲ ꓡ ꓠꓹ ꓟ ꓕꓱ ꓡꓱ ꓬꓰ꓾ ꓐꓯˍ ꓡꓳ꓿ 25 ꓜ ꓜꓽ ꓗꓷ ꓗꓸ ꓠꓯꓸˍ ꓟꓲ ꓖꓳ ꓟ ꓡꓰ ꓐꓰ ꓡꓴ ꓗꓶꓸ ꓣꓴ ꓢꓲ꓾ ꓡꓴ ꓗꓶꓸ ꓕꓱ ꓟ ꓠꓬ ꓥꓪ ꓫꓵꓽ ꓡꓰ ꓬꓰ ꓔ ꓟ ꓘꓶꓽ ꓫꓵꓽ ꓫꓵꓼ ꓥ ꓡꓳ꓿ ꓠꓴ ꓪꓽ ꓮ ꓕꓯ ꓓꓳˍ ꓠꓬ ꓖꓳ ꓕꓯ ꓥꓪ ꓔꓯ ꓓꓵꓽ ꓙ ꓛꓲ ꓡ ꓠꓹ ꓟ ꓕꓱ ꓡꓱ ꓬꓰ꓾ ꓐꓯˍ ꓡꓳ꓿ 26 ꓮ ꓡꓲꓳ ꓐꓯ ꓠꓬ ꓑ ꓑ ꓕꓱ ꓟ ꓠꓴ ꓪꓽ ꓮ ꓕꓯ ꓜꓽˍ ꓠꓬ꓾ ꓡꓴ ꓗꓶꓸ ꓕꓱ ꓟ ꓠꓴ ꓪꓽ ꓮ ꓕꓯ ꓓꓳꓻˍ ꓠꓬ꓾ ꓢꓲ ꓒꓽ ꓫꓵꓻ ꓗꓷ ꓟ ꓔꓯ ꓬꓲ ꓝꓮꓲ ꓬꓲꓼ ꓡ ꓗꓪ ꓛꓲ ꓠꓴ ꓪꓽ ꓢꓷꓸ ꓙ ꓟꓳ ꓙˍ ꓟ ꓥ ꓡꓳ꓿ 27 ꓖꓳ ꓡꓱ ꓠꓬꓲ ꓮꓽ ꓟ ꓥ ꓟꓲ ꓟꓽ ꓒꓵꓽ ꓒꓵ ꓢꓲ ꓒꓽ ꓑ ꓑ ꓜꓽ꓾ ꓥ ꓠꓬ ꓢꓲ ꓒꓽ ꓡꓴ ꓗꓶꓸ ꓓꓳˍ ꓠꓬ꓾ ꓢꓲ ꓒꓽ ꓬꓲ ꓖꓳ ꓓꓱˍ ꓐꓰ ꓬꓲ ꓫꓵꓽ ꓔꓯ ꓛꓬˍ ꓟ ꓝꓴꓲ ꓟꓯ ꓠ ꓗꓹ ꓡꓳ꓿ 28 ꓖꓳ ꓡꓱ ꓠꓬꓲ ꓮꓽ ꓟ ꓥ ꓟꓲ ꓚꓲ ꓛꓬ ꓔꓯ ꓚꓬꓹ ꓠꓬꓲ ꓖꓴꓻ ꓡꓰ ꓕꓯ ꓢꓲꓸˍ ꓡꓰ ꓑ ꓑ ꓕꓱ ꓟ ꓜꓽ꓾ ꓡꓴ ꓗꓶꓸ ꓕꓱ ꓟ ꓓꓳꓻ ꓠꓯꓹ ꓡꓳ꓿ 29 ꓮ ꓡꓲꓳ ꓐꓯ ꓠꓬ ꓜꓽ ꓢꓴ ꓓꓳꓻ ꓢꓴ ꓮꓽ ꓟˍ ꓟꓲ꓾ ꓑ ꓑ ꓕꓱ ꓟ ꓠꓬ ꓢꓲ ꓒꓽ ꓖꓳ ꓓꓱꓽ ꓔꓯ ꓔꓯꓺ ꓔ ꓟ ꓥꓳ꓾ ꓐꓰ ꓟꓽ ꓦꓰꓽ ꓓꓳ ꓡ ꓕꓯ ꓠꓽ꓾ ꓚꓲ ꓛꓬ ꓝꓴꓲ ꓜꓽ ꓓꓳꓻˍ ꓟ ꓥ ꓡꓳ꓿ 30 ꓕꓱ ꓟ ꓑꓶꓸ ꓓꓴ ꓠꓴ ꓪꓽ ꓗꓳ ꓡꓳ ꓗꓪ ꓢꓯꓼ ꓐꓽ ꓢꓴˍ ꓐꓰ꓾ ꓠꓻ ꓢꓴ ꓮꓽ ꓟꓬꓹ ꓙꓳˍ ꓡꓳ꓿ ꓫꓵꓻ ꓢꓴˍ ꓟꓲ ꓕꓲ ꓐꓱ ꓙꓳˍ ꓡꓳ꓿ 31 ꓖꓳ ꓡꓱ ꓥ ꓟꓲ ꓣꓳꓽ ꓡꓰ ꓚꓲ ꓛꓬ ꓔꓯ ꓬꓲ ꓜꓶꓻ ꓦꓰꓽ ꓠꓬꓲˍ ꓕꓯ ꓠꓽ꓾ ꓪꓴ-ꓢ ꓡꓰ ꓣꓳꓽ ꓔꓯ ꓐꓯ ꓟꓴ ꓘꓶꓽ ꓟꓽ ꓛꓲ ꓡꓳ ꓫꓵ ꓥ ꓡꓳ꓿ 32 ꓖꓳ ꓡꓱ ꓥ ꓟꓲ ꓣꓳꓽ ꓔꓯ ꓐꓯ ꓟꓴ ꓘꓶꓽ ꓢꓲ꓾ ꓢꓲ ꓒꓽ ꓡꓰ ꓟꓸ ꓙꓽˍ ꓠꓬ꓾ ꓣꓳꓽ ꓔꓯ ꓠꓱꓸ ꓐꓯꓼ ꓟꓲ ꓠꓯ ꓡ ꓞꓳˍ ꓐꓰ ꓕꓲ ꓡꓰꓹꓼ ꓝꓴꓲ ꓟꓽ ꓐꓯ ꓞꓷꓹ ꓠ ꓟ ꓥ ꓡꓳ꓿ 33 ꓖꓳ ꓡꓱ ꓠꓬꓲ ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓠꓴ ꓪꓽ ꓢꓲ ꓒꓽ ꓟꓶꓼ ꓘꓶꓼ ꓜ ꓜˍ ꓐꓰ ꓜꓲꓼ ꓡꓯꓽ ꓘꓳˍ ꓠꓬ ꓡꓳ ꓠꓬꓹ ꓡꓯꓽ ꓘꓳ꓿ 34 ꓠꓴ ꓪꓽ ꓜꓲꓼ ꓡꓯꓽ ꓘꓳˍ ꓟ ꓗꓪ ꓝꓴꓲ ꓐꓯ ꓞꓷꓹ ꓓꓴ ꓟꓽ ꓗꓷ ꓡꓰ ꓠꓹ ꓟ꓾ ꓦꓰꓼ ꓟꓷꓼ ꓢꓴ ꓙꓳˍ ꓠꓬ ꓦꓲ ꓗꓪ ꓜꓽ ꓝꓲ꓿ ꓠꓱꓸ ꓐꓯ ꓫꓵꓽ ꓪꓴꓻ ꓠꓬ ꓥꓪ ꓡꓻ ꓕꓯ ꓥꓪ ꓫꓬꓹ ꓖꓶˍ ꓥꓳ꓿

1 ꓘꓳ-ꓡꓱ-ꓕꓴ 12

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓦ ꓗꓪ ꓟ ꓡꓯꓼ ꓫꓴ ꓔꓯ ꓟꓳꓸ ꓐꓯ ꓠꓬ꓾ ꓠꓴ ꓪꓽ ꓔꓯ ꓟꓽ ꓢꓷꓸ ꓝꓲ ꓐꓰ ꓬꓰ ꓠꓲꓹ ꓟꓽ ꓫꓵ꓿ 2 ꓠꓴ ꓪꓽ ꓟꓽ ꓙꓵꓻ ꓢꓰ ꓕꓯ ꓠꓴ ꓪꓽ ꓔꓯ ꓠꓬ꓾ ꓫꓸ ꓕꓱ ꓟꓽ ꓗꓴꓸ ꓟ ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓠꓹ ꓟ꓾ ꓮꓽ ꓟꓬꓹ ꓫꓵꓽ ꓗꓪ ꓐꓰ ꓧꓳꓽ ꓪꓴꓸ ꓙꓰ ꓠꓬꓲˍ ꓟ ꓠꓴ ꓪꓽ ꓢꓷˍ ꓡꓳ꓿ 3 ꓖꓳ ꓡꓱ ꓠꓬꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓪꓴ-ꓢ ꓦ ꓗꓪ ꓐꓰ ꓫꓸ ꓕꓱ ꓟ ꓥ ꓕꓯ ꓠꓬ꓾ ꓬꓰ-ꓢꓴ ꓔꓯ ꓙꓱ ꓔ ꓟ ꓗꓷ ꓡꓰ ꓝꓲ꓾ ꓐꓰ ꓐꓯ ꓢꓴ ꓟꓽ ꓙꓳ꓿ ꓝꓮꓲ ꓢꓲ-ꓫꓬ-ꓟ-ꓦ ꓗꓪ ꓐꓰ ꓟꓽ ꓥ ꓠꓬ꓾ ꓬꓰ-ꓢꓴ ꓠꓬ ꓢꓲ ꓒꓽ ꓥ ꓡꓳ꓾ ꓐꓰ ꓐꓯ ꓐ ꓡ ꓢꓴ ꓟꓽ ꓙꓳ꓿ 4 ꓡꓯꓼ ꓫꓴ ꓠꓬ ꓟꓽ ꓫꓱꓸ ꓡꓯꓼ ꓘꓳ ꓟ ꓙꓳˍ ꓟꓲ꓾ ꓢꓲ-ꓫꓬ-ꓟ-ꓦ ꓠꓽ ꓬꓲ ꓕꓲ ꓣꓳˍ ꓡꓰꓽ ꓥꓳ꓿ 5 ꓝꓮꓲ ꓠꓬ ꓣꓱꓽ ꓙˍ ꓟ ꓟꓬꓱꓽ ꓠꓬ ꓟꓽ ꓫꓱꓸ ꓡꓯꓽ ꓘꓳ ꓟ ꓙꓳˍ ꓟꓲ꓾ ꓢꓲ ꓒꓽ ꓠꓽ ꓬꓲ ꓕꓲ ꓣꓳˍ ꓡꓰꓽ ꓥꓳ꓿ 6 ꓬꓰ ꓓꓳ ꓡ ꓟ ꓟꓽ ꓫꓱꓸ ꓡꓯꓽ ꓘꓳ ꓟ ꓙꓳˍ ꓟꓲ꓾ ꓙꓵꓻ ꓢꓴ ꓐꓴ ꓠꓯꓸꓼ ꓗꓪ ꓢꓯꓼ ꓕꓵꓼ ꓢꓴ ꓪꓴ-ꓢ ꓠꓽ ꓬꓲ ꓕꓲ ꓣꓳˍ ꓡꓰꓽ ꓥꓳ꓿ 7 ꓖꓳ ꓡꓱ ꓥ ꓟꓲ ꓮꓽ ꓙꓵ ꓢꓴ ꓙꓲ ꓖꓴ ꓐꓱ ꓶ꓾ ꓮ ꓡꓲ ꓕꓲ ꓣꓳ ꓔꓯˍ ꓟꓲ ꓢꓲ-ꓫꓬ-ꓟ-ꓦ ꓓꓯꓹ ꓟ ꓢꓷꓸ ꓠꓹ ꓟꓳꓸ ꓖꓶ ꓔ ꓡꓳ꓿ 8 ꓮ ꓡꓲꓳ ꓐꓯ ꓠꓬ ꓕꓲ ꓣꓳ ꓔꓯ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓙꓽ ꓜꓲꓼˍ ꓟ ꓐꓯ ꓘꓶ ꓖꓶꓽˍ ꓡꓳ꓿ ꓠꓱꓸ ꓐꓯ ꓕꓲ ꓣꓳ ꓔꓯ ꓠꓬ ꓢꓲ-ꓫꓬ-ꓟ-ꓦ ꓬꓲ ꓕꓱ ꓕꓲ ꓣꓳ ꓡꓰ ꓢꓷꓸ ꓠꓲꓹ ꓐꓯ ꓘꓶ ꓖꓶˍ ꓡꓳ꓿ 9 ꓝꓮꓲ ꓕꓲ ꓣꓳ ꓔꓯ ꓠꓬ ꓢꓲ-ꓫꓬ-ꓟ-ꓦ ꓬꓲ ꓕꓱ ꓕꓲ ꓣꓳ ꓡꓰ ꓙꓵꓻ ꓠꓲꓹ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓢꓲ-ꓫꓬ-ꓟ-ꓦ ꓬꓲ ꓕꓱ ꓕꓲ ꓣꓳ ꓡꓰ ꓠꓻ ꓫꓬꓹ ꓟ ꓡꓯꓼ ꓫꓴ ꓖꓶˍ ꓡꓳ꓿ 10 ꓝꓮꓲ ꓕꓲ ꓣꓳ ꓔꓯ ꓠꓬ ꓪꓽ ꓠꓬꓲˍ ꓟ ꓟꓬꓱꓽ ꓬꓰˍ ꓟ ꓡꓯꓼ ꓫꓴ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓟꓷꓽ ꓠꓷꓹ ꓝꓸˍ ꓟ ꓡꓯꓼ ꓫꓴ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓦ ꓔꓯ ꓦꓰꓽ ꓗꓴꓸˍ ꓟ ꓡꓯꓼ ꓫꓴ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓥꓳꓽ ꓫꓵ ꓥꓳꓽ ꓙꓰ ꓫꓸ ꓕꓱˍ ꓟ ꓡꓯꓼ ꓫꓴ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓬꓲꓸ ꓥꓳꓽ ꓡꓶꓸˍ ꓟ ꓡꓯꓼ ꓫꓴ ꓖꓶˍ ꓡꓳ꓿ 11 ꓖꓳ ꓡꓱ ꓥ ꓟꓲ ꓕꓱ ꓟꓬ ꓟ ꓮꓽ ꓙꓵ ꓠꓬ ꓢꓲ-ꓫꓬ-ꓟ-ꓦ ꓬꓲ ꓕꓲ ꓣꓳˍ ꓗꓪ ꓐꓰ ꓬꓰ ꓓꓳ ꓡ ꓟ ꓥ ꓢꓲ꓾ ꓮꓽ ꓟ ꓔꓯ ꓮ ꓡꓲ ꓐꓱ ꓖꓶ ꓠꓲꓹ ꓫꓵˍ ꓠꓬ ꓖꓳ ꓡꓱ ꓐꓱꓻ ꓖꓶ ꓔ ꓟ ꓥ ꓡꓳ꓿ 12 ꓖꓳ ꓓꓱ ꓠꓽ ꓕꓲ ꓟˍ ꓥ ꓢꓲ ꓡꓯꓼ ꓗꓸ ꓮꓽ ꓟꓬꓹ ꓙꓳˍ ꓟ ꓡꓰ ꓐꓰ꓾ ꓝꓮꓲ ꓖꓳ ꓓꓱ ꓡꓯꓼ ꓗꓸ ꓮꓽ ꓟꓬꓹ ꓙꓳˍ ꓟꓲ ꓕꓲ ꓖꓳ ꓓꓱꓽˍ ꓡꓰꓽ ꓥ ꓟ ꓡꓰ ꓐꓰ꓾ ꓙꓲ-ꓢꓴ ꓔꓯꓸ ꓟꓳˍ ꓟꓲ ꓬꓲ ꓖꓳ ꓡꓱ ꓥꓳ꓿ 13 ꓮ ꓡꓲꓳ ꓐꓯ ꓠꓬ ꓣꓳꓽ ꓐꓴ ꓠꓽ꓾ ꓬꓴ-ꓔ ꓡ ꓞꓳ ꓥ ꓟꓲ꓾ ꓦꓲ-ꓡꓲ ꓡ ꓞꓳ ꓥ ꓟꓲ꓾ ꓚꓳ ꓑꓸ ꓥ ꓟꓲ꓾ ꓚꓳ ꓪꓴꓸ ꓥ ꓟꓲ꓾ ꓕꓲ ꓖꓳ ꓓꓱꓽˍ ꓡꓰ ꓒꓬꓱꓼ ꓡ ꓠꓹ ꓟ ꓢꓲ-ꓫꓬ-ꓟ-ꓦ ꓕꓲ ꓣꓳˍ ꓗꓪ ꓐꓰ ꓖꓳ ꓓꓱ ꓔꓲꓹ ꓟꓶˍ ꓡꓳ꓿ ꓝꓮꓲ ꓣꓳꓽ ꓮꓽ ꓙꓵ ꓢꓴ ꓠꓬ ꓢꓲ-ꓫꓬ-ꓟ-ꓦ ꓕꓱ ꓕꓲ ꓣꓳ ꓔꓯ ꓓꓳꓻ ꓟꓶ ꓡꓰꓳ꓿ 14 ꓮ ꓡꓲꓳ ꓐꓯ ꓠꓬ ꓖꓳ ꓓꓱ ꓠꓽ ꓡꓯꓼ ꓗꓸ ꓕꓲ ꓟˍ ꓡꓰ ꓠꓽ ꓟꓽ ꓥ꓾ ꓮꓽ ꓟꓬ ꓥ ꓡꓳ꓿ 15 ꓛꓲ ꓒꓯꓹ ꓡꓰ꓾ ꓥꓪ ꓠꓽ ꓡꓯꓽ ꓒꓯꓹ ꓟꓽ ꓥ ꓠꓬꓲ ꓖꓳ ꓓꓱ ꓗꓪ ꓟ ꓟꓽ ꓥ꓾ ꓐꓰ ꓐꓯ ꓐꓷˍ ꓟꓲ꓾ ꓖꓳ ꓓꓱ ꓗꓪ ꓟ ꓡꓯꓼ ꓗ ꓟꓽ ꓥ ꓐꓰ ꓟꓽ ꓗꓷ ꓡꓰ꓿ 16 ꓝꓮꓲ ꓠꓬ ꓠꓸ ꓑꓳ ꓡꓰ꓾ ꓥꓪ ꓠꓽ ꓟꓬ ꓢꓶꓽ ꓟꓽ ꓥ ꓠꓬꓲ ꓖꓳ ꓓꓱ ꓗꓪ ꓟ ꓟꓽ ꓥ꓾ ꓐꓰ ꓐꓯ ꓐꓷˍ ꓟꓲ꓾ ꓖꓳ ꓓꓱ ꓗꓪ ꓟ ꓡꓯ ꓗꓸ ꓟꓽ ꓥ ꓐꓰ ꓟꓽ ꓗꓷ ꓡꓰ꓿ 17 ꓕꓲ ꓖꓳ ꓓꓱ ꓡꓱꓸꓼ ꓠꓬ ꓟꓬ ꓢꓶꓽ ꓥ ꓕꓯ ꓠꓽ꓾ ꓮ ꓡꓲ ꓑ ꓙꓽ ꓐ ꓡ ꓢꓰꓽ꓿ ꓕꓲ ꓖꓳ ꓓꓱ ꓡꓱꓸꓼ ꓠꓬ ꓠꓸ ꓑꓳ ꓥ ꓕꓯ ꓠꓽ꓾ ꓮ ꓡꓲ ꓠꓱꓽ ꓠꓬꓲ ꓐ ꓡ ꓢꓰꓽ꓿ 18 ꓡꓯꓼ ꓗꓸ ꓮ ꓡꓲ ꓕꓲ ꓟ ꓔꓯ ꓖꓳ ꓓꓱ ꓮ ꓡꓲ ꓕꓲ ꓔꓳꓸ ꓗꓪ ꓜꓯꓻ ꓠ ꓗꓹ ꓠꓬ꓾ ꓪꓴ-ꓢ ꓡꓰ ꓬꓲ ꓠꓲꓹ ꓡꓶꓽ ꓔꓯ ꓛꓳꓻ ꓢꓲ ꓖꓳ ꓗꓪ ꓜꓯꓻ ꓔ ꓟ ꓥ ꓡꓳ꓿ 19 ꓮꓽ ꓙꓵ ꓠꓬ ꓡꓯꓼ ꓗꓸ ꓕꓲ ꓟˍ ꓡꓰꓽ ꓥ ꓕꓯ ꓠꓽ꓾ ꓖꓳ ꓓꓱꓽ ꓮ ꓡꓲ ꓗꓪ ꓥ ꓡ?꓿ 20 ꓖꓳ ꓡꓱ ꓥ ꓟꓲ ꓡꓯꓼ ꓗꓸ ꓠꓬ ꓮꓽ ꓟꓬꓹ ꓙꓳ ꓢꓲ꓾ ꓖꓳ ꓓꓱ ꓠꓽ ꓕꓲ ꓟˍ ꓡꓰꓽ ꓥ ꓡꓳ꓿ 21 ꓟꓬ ꓢꓶꓽ ꓠꓬ ꓡꓯꓽ ꓒꓯꓹ ꓔꓯ꓾ ꓠꓴ ꓔꓯ ꓥꓪ ꓣꓱꓽ ꓟꓽ ꓬꓯꓼ꓾ ꓐꓰ ꓐꓯ ꓟꓽ ꓓꓻ꓿ ꓪꓴꓸ ꓓꓵˍ ꓟꓲ ꓛꓲ ꓒꓯꓹ ꓔꓯ꓾ ꓠꓴ ꓔꓯ ꓥꓪ ꓣꓱꓽ ꓟ ꓬꓯꓼ꓾ ꓐꓰ ꓐꓯ ꓟꓽ ꓓꓻ꓿ 22 ꓖꓳ ꓟ ꓡꓰꓽ ꓟ ꓞꓲ꓾ ꓖꓳ ꓓꓱ ꓗꓪ ꓟꓬꓽ ꓠꓬꓲ ꓢꓯꓼ ꓐꓽˍ ꓟ ꓡꓰ ꓐꓰ ꓗꓹ ꓟ ꓡꓯꓼ ꓗꓸ ꓖꓳ ꓟˍ ꓟꓲ ꓟꓽ ꓙꓳ ꓟꓽ ꓓ ꓟ ꓥ ꓡꓳ꓿ 23 ꓝꓮꓲ ꓣꓳꓽ ꓠꓬ ꓖꓳ ꓓꓱ ꓗꓪ ꓟꓬꓱ ꓓꓳꓽ ꓣꓳꓺˍ ꓟ ꓡꓯꓼ ꓗꓸ ꓔꓯˍ ꓟꓲ ꓒꓵꓽˍ ꓟ ꓚꓬꓹ ꓢꓲ ꓤ ꓟꓳ ꓖꓶˍ ꓡꓳ꓿ ꓟꓽ ꓐꓲꓻ ꓟ ꓡꓯꓼ ꓗꓸ ꓔꓯ ꓠꓬ ꓠꓱꓸ ꓐꓯꓼ ꓡꓯꓼ ꓗꓸ ꓔꓯ ꓢꓶꓸ ꓟꓽ ꓞꓲ ꓫꓺ ꓚꓵꓺ ꓔ ꓡꓳ꓿ 24 ꓐꓲꓻˍ ꓟ ꓡꓯꓼ ꓗꓸ ꓔꓯ ꓠꓬ ꓫꓺ ꓚꓵꓺ ꓔ ꓟꓽ ꓛꓵ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓟꓬꓱ ꓓꓳꓽ ꓟꓽ ꓡꓳꓼˍ ꓟ ꓡꓯꓼ ꓗꓸ ꓔꓯ ꓟꓬꓽ ꓠꓬꓲ ꓟꓬꓱ ꓓꓳꓽ ꓟꓶ ꓡꓰ ꓝꓲ ꓠꓹ ꓟ꓾ ꓖꓳ ꓓꓱꓽ ꓗꓪ ꓜꓯꓻ ꓜꓳꓽ ꓡꓰ ꓝꓲˍ ꓡꓳ꓿ 25 ꓕꓱ ꓟ ꓠꓬ ꓖꓳ ꓓꓱꓽ ꓗꓪ ꓐꓱ ꓡꓯꓽ ꓘꓳˍ ꓟ ꓟꓽ ꓙꓳ ꓙꓳ꓾ ꓡꓯꓼ ꓗꓸ ꓮꓽ ꓙꓵ ꓠꓬ ꓕꓲꓽ ꓟ ꓛꓳꓽ ꓕꓲ ꓟ ꓙꓽ ꓗꓳ ꓡꓯꓽ ꓘꓳ ꓠꓹ ꓟ ꓜꓯꓻ ꓜꓳꓽ ꓡꓰ ꓝꓲ ꓢꓲ꓾ ꓕꓲ ꓠꓲꓹ ꓕꓲ ꓪꓺꓼ ꓗꓷ ꓡꓰ ꓝꓲ ꓠꓹ ꓟ ꓥ ꓡꓳ꓿ 26 ꓡꓯꓼ ꓗꓸ ꓕꓲ ꓗ ꓫꓸ ꓙꓵˍ ꓕꓯ ꓠꓽ꓾ ꓡꓯ ꓗꓸ ꓮꓽ ꓙꓵ ꓬꓲˍ ꓐꓰ ꓕꓲ ꓛꓳꓺꓼ ꓫꓸ ꓙꓵˍ ꓡꓳ꓿ ꓥ ꓠꓬ꓾ ꓡꓯ ꓗꓸ ꓕꓲ ꓗꓸ ꓟꓬꓱ ꓓꓳꓽ ꓟꓶˍ ꓕꓯ ꓠꓽ꓾ ꓡꓯ ꓗ ꓮꓽ ꓙꓵ ꓬꓲˍ ꓐꓰ ꓕꓲ ꓛꓳꓺꓼ ꓗꓹ ꓛꓲˍ ꓡꓳ꓿ 27 ꓮ ꓟꓶ ꓠꓴ ꓪꓽ ꓮ ꓡꓲ ꓕꓲ ꓣꓳˍ ꓟꓲ ꓡꓯꓼ ꓗꓸ ꓜꓯꓻ ꓡꓯꓽ ꓘꓳ ꓞꓹ ꓟ ꓙꓲ-ꓢꓴ ꓬꓲ ꓖꓳ ꓓꓱ ꓥ ꓡꓳ꓿ 28 ꓖꓳ ꓡꓱ ꓢꓲ ꓘꓴ ꓜꓲꓼ ꓞꓳ ꓗꓪ ꓪꓴ-ꓢ ꓡꓰ ꓗꓶꓺ ꓔ ꓟ꓾ ꓬꓲ ꓪꓴꓸ ꓕꓲ ꓫꓵꓽ ꓠꓬ ꓝꓲ ꓓꓴ꓾ ꓠꓬꓲꓽ ꓫꓵꓽ ꓕꓲ ꓫꓵꓽ ꓠꓬ ꓟꓷꓽ ꓠꓷꓹ ꓝꓸ ꓢꓴ꓾ ꓢ ꓫꓵꓽ ꓠꓬ ꓟꓸ ꓢꓴ꓾ ꓖꓳ ꓗꓸ ꓠꓯꓸ ꓠꓬ ꓪꓽ ꓠꓬꓲˍ ꓟ ꓟꓬꓱꓽ ꓬꓰˍ ꓟ꓾ ꓠꓻ ꓫꓬꓹ ꓟ ꓡꓯꓼ ꓫꓴ꓾ ꓢꓴ ꓔꓯ ꓬꓰ ꓙ ꓢꓴ꓾ ꓟꓬꓱꓽ ꓧꓳꓽ ꓢꓴˍ ꓐꓰ ꓥꓳꓽ ꓫꓵ ꓥꓳꓽ ꓙꓰ ꓫꓸ ꓕꓱ ꓢꓴ꓾ ꓕꓱ ꓡꓱ ꓙꓳ ꓝꓲˍ ꓟ ꓥ ꓡꓳ꓿ 29 ꓮꓽ ꓙꓵ ꓢꓴ ꓠꓬ ꓝꓲ ꓓꓴ ꓟꓽ ꓥ꓿ ꓮꓽ ꓙꓵ ꓢꓴ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓟꓽ ꓥ꓿ ꓮꓽ ꓙꓵ ꓢꓴ ꓠꓬ ꓟꓸ ꓢꓴˍ ꓟꓲ ꓟꓽ ꓥ꓿ ꓮꓽ ꓙꓵ ꓢꓴ ꓠꓬ ꓪꓽ ꓠꓬꓲˍ ꓟ ꓟꓬꓱꓽ ꓬꓰ ꓢꓴ ꓟꓽ ꓥ꓿ 30 ꓮꓽ ꓙꓵ ꓠꓬ ꓠꓻ ꓫꓬꓹ ꓟ ꓡꓯꓼ ꓫꓴ ꓙꓳ ꓢꓴˍ ꓟꓲ ꓟꓽ ꓥ꓿ ꓮꓽ ꓙꓵ ꓠꓬ ꓥꓳꓽ ꓫꓵꓽ ꓥꓳꓽ ꓙꓰꓽ ꓫꓸ ꓕꓱ ꓢꓴˍ ꓟꓲ ꓟꓽ ꓥ꓿ ꓮꓽ ꓙꓵ ꓠꓬ ꓥꓳꓽ ꓫꓵꓽ ꓥꓳ ꓙꓰꓽ ꓡꓶꓸ ꓢꓴˍ ꓟꓲ ꓟꓽ ꓥ꓿ 31 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓬ ꓪ ꓜꓲꓻ ꓪꓴꓽˍ ꓟ ꓡꓯꓼ ꓫꓴ ꓟꓶ ꓠꓹ ꓟ ꓠꓲꓹ ꓡꓱꓻ ꓠꓯꓹ ꓡꓳ꓿ ꓥꓪ ꓠꓬ ꓠꓴ ꓪꓽ ꓔꓯ ꓮꓸ ꓓꓲꓽ ꓙꓲꓻˍ ꓟ ꓚꓱꓹ ꓖꓴ ꓟꓳꓸ ꓖꓶˍ ꓠꓬꓲ꓾

1 ꓘꓳ-ꓡꓱ-ꓕꓴ 13

1 ꓥꓪ ꓠꓬ ꓞꓳ ꓤ ꓥꓳꓽ ꓫꓵ ꓥꓳ ꓙꓰꓽˍ ꓐꓰ ꓟꓴꓽ ꓗꓪ ꓝꓲ ꓓꓴ ꓥꓳꓽ ꓫꓸ ꓕꓱ ꓗꓴˍ ꓟꓲ꓾ ꓠꓵꓻ ꓠꓲꓹ ꓟꓽ ꓙꓳ ꓕꓯ ꓠꓽ꓾ ꓥꓪ ꓠꓬ ꓟꓶꓻ ꓓꓴ ꓙꓲꓽ ꓑꓬꓹ꓾ ꓥ ꓠꓬ ꓑꓬꓹ ꓑꓬ ꓞꓪꓽˍ ꓐꓰ ꓕꓲꓽ ꓡꓰꓹꓼ ꓥꓳ꓿ 2 ꓥꓪ ꓠꓬ ꓟꓷꓽ ꓠꓷꓹ ꓝꓸ ꓗꓴˍ ꓟ ꓡꓯ ꓫꓴ ꓙꓳ ꓢꓲ꓾ ꓚꓵ ꓘꓶ ꓮꓽ ꓙꓵˍ ꓐꓰ ꓢꓷꓸ ꓠꓲꓹ ꓮꓽ ꓙꓵ ꓙꓽ ꓜꓲꓼˍ ꓟꓲ꓾ ꓝꓮꓲ ꓪꓽ ꓚꓲ ꓔꓯ ꓙꓵꓺ ꓙꓰ ꓝꓲ ꓠ ꓛꓲ ꓙꓵꓻ ꓠꓲꓹ ꓙꓳ ꓥ ꓟꓲ ꓠꓵꓻ ꓠꓲꓹ ꓟꓽ ꓙꓳ ꓕꓯ ꓠꓽ꓾ ꓥꓪ ꓠꓬ ꓮꓸ ꓫꓵˍ ꓟꓲ ꓟꓽ ꓥ꓿ 3 ꓝꓮꓲ ꓠꓬ ꓥꓪ ꓙꓳˍ ꓟ ꓮꓽ ꓙꓵ ꓞꓳ ꓫ ꓔꓯ ꓖꓶ ꓜꓽ ꓢꓲ꓾ ꓥꓪ ꓖꓳ ꓓꓱ ꓔꓯ ꓮꓸ ꓔꓳꓸ ꓗꓪ ꓛꓴꓻ ꓠꓹ ꓟ ꓡꓯꓼ ꓙꓱ ꓗꓷ ꓥ ꓟꓲ꓾ ꓠꓵꓻ ꓠꓲꓹ ꓟꓽ ꓙꓳ ꓕꓯ ꓠꓽ꓾ ꓥꓪ ꓐꓱ ꓶ ꓮꓸ ꓫꓵ ꓙꓲ ꓖꓴ ꓟꓽ ꓙꓳ꓿ 4 ꓠꓵꓻ ꓠꓲꓹ ꓠꓬ ꓠꓲꓹ ꓟ ꓫꓵ ꓢꓲ ꓠꓲꓹ ꓟ ꓙꓲꓻˍ ꓡꓳ꓿ ꓠꓵꓻ ꓠꓲꓹ ꓠꓬ ꓟꓽ ꓟꓬ ꓦꓯꓸ꓿ ꓟꓽ ꓘꓶꓽ ꓘꓹ꓿ ꓟꓬꓱ ꓓꓳꓽˍ ꓟꓲ ꓟꓽ ꓧꓪ꓿ 5 ꓡꓳꓸ ꓟꓽ ꓐꓲꓻˍ ꓟ ꓟꓽ ꓬꓰ꓿ ꓚꓲ ꓛꓬ ꓐꓱ ꓶ ꓙꓲꓻ ꓖꓴ ꓟꓽ ꓧꓪ꓿ ꓟꓽ ꓠꓲꓹ ꓛꓱꓹ꓿ ꓢꓴ ꓡꓰ ꓛꓬ ꓡ ꓟ ꓔꓯ ꓠꓲꓹ ꓟ ꓟꓽ ꓗꓶ꓿ 6 ꓥꓶˍ ꓟ ꓔꓯ ꓟꓽ ꓗꓹ ꓛꓲ꓿ ꓔꓱꓹˍ ꓟ ꓔꓯˍ ꓡꓰ ꓗꓹ ꓛꓲꓽˍ ꓡꓳ꓿ 7 ꓮ ꓕꓯˍ ꓟꓲ ꓠꓲꓹ ꓟ ꓫꓵˍ ꓡꓳ꓿ ꓮ ꓡꓲ ꓗꓷ ꓡꓰˍ ꓟꓲ ꓙꓵˍ ꓡꓳ꓿ ꓮ ꓕꓯꓽˍ ꓟꓲ ꓥꓳ ꓡꓳꓸˍ ꓡꓳ꓿ ꓮꓸ ꓫꓵ ꓗꓪˍ ꓟꓲ ꓜꓲꓽˍ ꓡꓳ꓿ 8 ꓠꓵꓻ ꓠꓲꓹ ꓠꓬ ꓮ ꓕꓯˍ ꓟꓲ ꓟꓽ ꓡꓳꓹ ꓬꓰ꓿ ꓟꓷꓽ ꓠꓷꓹ ꓝꓸˍ ꓟ ꓠꓽ꓾ ꓣꓱ ꓟꓽ ꓬꓯꓼ ꓗꓷ ꓡꓰˍ ꓥꓳ꓿ ꓥꓳꓽ ꓫꓵ ꓥꓳꓽ ꓙꓰꓽˍ ꓟꓲ꓾ ꓠꓽ ꓡꓰˍ ꓥꓳ꓿ ꓢꓷꓸ ꓠꓲꓹˍ ꓟꓲ ꓣꓱꓽ ꓟꓽ ꓬꓯꓼ ꓗꓷ ꓡꓰˍ ꓥꓳ꓿ 9 ꓮ ꓡꓲꓳ ꓐꓯ ꓠꓬ ꓣꓳꓽ ꓢꓷꓸˍ ꓟ ꓠꓬ ꓕꓲ ꓐꓱꓻ ꓤꓽˍ ꓡꓰ ꓥ ꓢꓲ꓾ ꓣꓳꓽ ꓟꓷꓽ ꓠꓷꓹ ꓝꓸ ꓟˍ ꓟꓲ ꓕꓲ ꓐꓱ ꓤˍ ꓡꓰꓽ ꓥ ꓡꓳ꓿ 10 ꓖꓳ ꓡꓱ ꓥ ꓟꓲ ꓜꓲꓼ ꓓꓰ ꓡꓰˍ ꓟ ꓖꓳ ꓟ ꓛꓲ ꓡ ꓕꓯ꓾ ꓟꓽ ꓪꓴꓽ ꓓꓰˍ ꓟ ꓠꓬ ꓣꓱꓽ ꓟꓽ ꓬꓯꓼ꓾ ꓐꓰ ꓗꓷ ꓡꓰˍ ꓥꓳ꓿ 11 ꓥꓪ ꓤ ꓠꓱ ꓤ ꓕꓯ꓾ ꓥꓪ ꓠꓬ ꓤ ꓠꓱ ꓤˍ ꓡꓰ ꓐꓰ ꓓꓵꓽ ꓙꓽ ꓢꓲ꓾ ꓤ ꓠꓱ ꓤˍ ꓡꓰ ꓐꓰ ꓫꓸ ꓕꓱˍ ꓡꓳ꓿ ꓮ ꓟꓶ ꓥꓪ ꓪꓴꓽ ꓡ ꓠꓬ ꓤ ꓠꓱ ꓤ ꓚꓱꓹ ꓔꓯ ꓡꓳ ꓗꓷꓳ꓿ 12 ꓮ ꓟꓶ ꓣꓳꓽ ꓠꓬ ꓒꓬꓱꓽ ꓠꓬꓲ ꓓꓴ ꓗꓪ ꓶꓻ ꓶˍ ꓐꓰ ꓟꓳˍ ꓡꓳ꓿ ꓢ ꓖꓪ ꓠꓽ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳˍ ꓥꓳ꓿ ꓮ ꓟꓶ ꓥꓪ ꓠꓬ ꓕꓲ ꓐꓱꓻ ꓤˍ ꓡꓰ ꓢꓷˍ ꓡꓳ꓿ ꓢ ꓖꓪ ꓠꓽ ꓢꓲ ꓒꓽ ꓥꓪ ꓔꓯ ꓢꓷꓸ ꓖꓴˍ ꓟ ꓡꓰ ꓐꓰ ꓥꓪˍ ꓟꓲ ꓢꓷꓸ ꓖꓴ ꓡꓰˍ ꓥꓳ꓿ 13 ꓮ ꓟꓶ ꓠꓬ ꓙꓵꓻ ꓠꓲꓹˍ ꓐꓰ꓾ ꓥꓳ ꓡꓳꓸ ꓓꓴˍ ꓐꓰ꓾ ꓠꓵꓻ ꓠꓲꓹ꓾ ꓕꓱ ꓢ ꓫꓵꓽ ꓙꓳˍ ꓡꓳ꓿ ꓕꓱ ꓢ ꓫꓵꓽ ꓗꓪ ꓪ ꓜꓲꓻ ꓪꓴꓽˍ ꓟ ꓠꓬ ꓠꓵꓻ ꓠꓲꓹ ꓥ ꓡꓳ꓿

1 ꓘꓳ-ꓡꓱ-ꓕꓴ 14

1 ꓖꓳ ꓡꓱ ꓠꓬꓲ ꓠꓵꓻ ꓠꓲꓹ ꓚꓱꓹ ꓗꓪ ꓚ ꓢꓲ꓾ ꓦꓻ ꓡꓯꓼ ꓫꓴ ꓟꓶ ꓠꓹ ꓟ ꓠꓲꓹ ꓥꓳ꓿ ꓟꓷꓽ ꓠꓷꓹ ꓝꓸ ꓠꓹ ꓟ ꓪ ꓜꓲꓻ ꓠꓲꓹ ꓥꓳ ꓠꓯꓹ ꓡꓳ꓿ 2 ꓥꓳꓽ ꓫꓵꓽ ꓫꓸ ꓕꓱ ꓢꓴ ꓠꓬ ꓞꓳ ꓤ ꓔꓯ ꓫꓸ ꓕꓱˍ ꓟ ꓟꓽ ꓥ꓿ ꓪꓴ-ꓢ ꓔꓯ ꓫꓸ ꓕꓱˍ ꓟ ꓥ ꓠꓬꓲ ꓠ ꓠꓹ ꓗꓴꓸ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓦ ꓠꓯꓸꓼ ꓗꓪ ꓚꓵ ꓘꓶꓽ ꓫꓸ ꓕꓱˍ ꓟ ꓥ ꓡꓳ꓿ 3 ꓖꓳ ꓡꓱ ꓥ ꓟꓲ ꓟꓷꓽ ꓠꓷꓹ ꓝꓸ ꓢꓴ ꓠꓽ ꓞꓳ ꓤ ꓔꓯ ꓪꓴꓽ ꓡ ꓟꓴ ꓡ ꓝꓲ ꓠꓹ ꓟ ꓐꓰ꓾ ꓘꓶꓸ ꓖꓶ ꓓꓴˍ ꓐꓰ ꓠꓲꓹ ꓟ ꓗꓴꓺ ꓖꓶ ꓓꓴ ꓟꓶ ꓠꓹ ꓟ ꓫꓸ ꓕꓱˍ ꓟ ꓥ ꓡꓳ꓿ 4 ꓥꓳꓽ ꓫꓵꓽ ꓫꓸ ꓕꓱ ꓢꓴ ꓠꓬ ꓚꓲ ꓛꓬ ꓔꓯ ꓪꓴꓽ ꓡ ꓟꓴ ꓡ ꓝꓲˍ ꓡꓳ꓿ ꓟꓷꓽ ꓠꓷꓹ ꓝꓸ ꓢꓴ ꓠꓽ ꓘꓴ ꓜꓲ ꓞꓳ ꓔꓯ ꓪꓴꓽ ꓡ ꓟꓴ ꓡ ꓝꓲˍ ꓡꓳ꓿ 5 ꓠꓴ ꓪꓽ ꓮꓽ ꓙꓵ ꓢꓴ ꓠꓬ ꓥꓳꓽ ꓫꓵ ꓥꓳꓽ ꓙꓰ ꓫꓸ ꓕꓱˍ ꓟ ꓔꓯ ꓥꓪ ꓠꓲꓹ ꓫꓵˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓪ ꓜꓲ ꓠꓲꓹ ꓒꓴˍ ꓟ ꓠꓬ꓾ ꓠꓴ ꓪꓽ ꓟꓷꓽ ꓠꓷꓹ ꓝꓸ ꓠꓹ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓳꓽ ꓫꓵ ꓥꓳꓽ ꓙꓰ ꓫꓸ ꓕꓱ ꓢꓴ ꓠꓬ꓾ ꓘꓴ ꓜꓲꓼ ꓞꓳ ꓔꓯ ꓪꓴꓽ ꓡ ꓟꓴ ꓡ ꓠꓹ ꓟ꓾ ꓬꓲ ꓟꓽ ꓡꓶꓸ ꓓꓳ ꓡ ꓕꓯ ꓠꓽ꓾ ꓟꓷꓽ ꓠꓷꓹ ꓝꓸ ꓢꓴ ꓠꓬ ꓥꓳꓽ ꓫꓵ ꓥꓳ ꓙꓰꓽ ꓫꓸ ꓕꓱ ꓢꓴ ꓕꓯ ꓢꓲ ꓪꓴꓽˍ ꓡꓳ꓿ 6 ꓖꓳ ꓡꓱ ꓥ ꓟꓲ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓬ ꓠꓴ ꓪꓽ ꓔꓯꓺ ꓟꓳꓸ ꓖꓶ ꓓꓴ꓾ ꓥ ꓠꓬ ꓢꓷꓸ ꓠꓲꓹ꓾ ꓥ ꓠꓬ ꓟꓷꓽ ꓠꓷꓹ ꓝꓸˍ ꓟ꓾ ꓥ ꓠꓬ ꓟꓸ ꓖꓶˍ ꓟ ꓟꓽ ꓣꓱꓽ ꓣꓱ꓾ ꓠꓴ ꓪꓽ ꓔꓯ ꓥꓳꓽ ꓫꓵ ꓥꓳꓽ ꓙꓰˍ ꓡꓰꓽ ꓫꓸ ꓕꓱ ꓠꓬꓲˍ ꓐꓰ ꓡꓻ ꓐꓷˍ ꓠꓬ꓾ ꓥꓪ ꓗꓪ ꓐꓰ ꓠꓴ ꓪꓽ ꓮꓸ ꓫꓵ ꓙꓲ ꓖꓴ ꓟꓶˍ ꓥꓳ ꓪ? 7 ꓢꓯꓼ ꓟꓬ ꓟꓽ ꓙꓳˍ ꓡꓳ ꓫꓵˍ ꓟꓲ꓾ ꓥ ꓠꓬ ꓙꓵꓽ ꓡꓵꓽ꓾ ꓥ ꓠꓬ ꓛꓲ ꓐꓶꓺ꓾ ꓬꓲ ꓟꓶꓻ ꓢꓯꓼ ꓗꓪ ꓒꓯꓽ ꓦꓰꓽ ꓓꓴ ꓟꓽ ꓙꓳˍ ꓕꓯ ꓠꓽ꓾ ꓮꓸ ꓫꓵ ꓢꓯꓼ ꓥ ꓟ ꓮ ꓡꓲ ꓢꓷꓸ ꓓ ꓢꓰ? 8 ꓐꓽ ꓡ ꓢꓯꓼ ꓔꓯ ꓦꓰꓽ ꓓꓳ ꓡ ꓟꓽ ꓓ ꓕꓯ ꓠꓽ꓾ ꓓꓶꓽ ꓡꓯꓽ ꓘꓳ ꓠꓹ ꓟ ꓙꓽ ꓖꓶ ꓢꓴ ꓮꓽ ꓟ ꓙꓳ ꓢꓰ? 9 ꓕꓱ ꓟ ꓡꓰ ꓐꓰ ꓠꓴ ꓪꓽˍ ꓟꓲ ꓠ ꓠꓹ ꓗꓴˍ ꓟ ꓥꓳꓽ ꓟꓽ ꓫꓸ ꓕꓱ ꓕꓯ ꓠꓽ꓾ ꓠꓴ ꓪꓽ ꓐꓯ ꓔꓬ ꓟ ꓮꓸ ꓫꓵ ꓥ ꓟ ꓢꓴ ꓮ ꓡꓲ ꓢꓷ ꓢꓰ? ꓖꓳ ꓡꓱ ꓥ ꓕꓯ ꓠꓽ ꓠꓴ ꓪꓽ ꓠꓬ ꓦꓻ ꓦˍ ꓗꓪ ꓫꓸ ꓕꓱ ꓔꓬ ꓟˍ ꓡꓰꓽ ꓥꓳ꓿ 10 ꓟꓲ ꓠꓯ ꓗꓪ ꓟ ꓥꓳꓽ ꓕꓱ ꓟꓬ ꓫꓵꓽ ꓙꓳˍ ꓟꓲ꓾ ꓬꓲ ꓟꓸ ꓟꓲꓽ ꓟꓽ ꓙꓳ ꓟ ꓥꓳꓽ ꓕꓲ ꓫꓵꓽˍ ꓟꓲ ꓟꓽ ꓙꓳ꓿ 11 ꓖꓳ ꓡꓱ ꓥ ꓟꓲ ꓡ ꓞꓳ ꓕꓲ ꓣꓳ ꓠꓬ ꓥꓪ ꓟꓽ ꓢꓷꓸˍ ꓟ ꓥꓳꓽ ꓡꓰ ꓥꓪ ꓔꓯ ꓫꓸ ꓕꓱ ꓡ ꓠꓬ꓾ ꓥꓪ ꓠꓬ ꓬꓲ ꓔꓯꓸ ꓟꓳꓸ ꓐꓶꓽ ꓒ ꓒꓬꓱꓼ ꓡ ꓢꓲ꓾ ꓬꓲˍ ꓟꓲ ꓥꓪ ꓔꓯꓸ ꓟꓳꓸ ꓐꓶꓽ ꓒ ꓒꓬꓱꓼ ꓡ ꓟ ꓥ ꓡꓳ꓿ 12 ꓠꓴ ꓪꓽ ꓠꓬ ꓦꓻ ꓡꓯꓼ ꓫꓴ ꓟꓶ ꓠꓹ ꓟ ꓮꓽ ꓘꓶꓸ ꓠꓲꓹ ꓡꓱꓻˍ ꓠꓬꓲ꓾ ꓘꓴ ꓜꓲ ꓞꓳ ꓔꓯ ꓪꓴꓽ ꓡ ꓟꓴ ꓡ ꓝꓲˍ ꓟ ꓡꓯꓼ ꓫꓴ ꓔꓯ ꓟꓬꓽ ꓠꓬꓲ ꓧꓪ ꓢꓯꓼ ꓕꓵꓼ ꓠꓯꓹ ꓡꓳ꓿ 13 ꓖꓳ ꓡꓱ ꓠꓬꓲ ꓥꓳꓽ ꓫꓵꓽ ꓫꓸ ꓕꓱ ꓢꓴ ꓠꓬ꓾ ꓡꓶꓸ ꓓꓳ ꓡ ꓐ ꓡ ꓠꓹ ꓟ ꓪꓽ ꓘꓴ ꓠꓯꓹ ꓡꓳ꓿ 14 ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓥꓳꓽ ꓫꓵꓽ ꓣꓱ ꓢꓲ ꓪꓽ ꓘꓴ ꓐꓷˍ ꓠꓬ꓾ ꓥꓪ ꓦ ꓠꓬ ꓪꓽ ꓘꓴ ꓔꓬ ꓥ ꓟꓲ꓾ ꓥꓪ ꓙꓽ ꓠꓲꓹ ꓠꓽ ꓟꓽ ꓔꓹ ꓞꓹ꓾ ꓐꓰ ꓗꓹ ꓥꓳ꓿ 15 ꓖꓳ ꓡꓱ ꓥ ꓠꓬ ꓥꓪ ꓮ ꓡꓲ ꓬꓰ ꓠꓯꓹ ꓡ? ꓥꓪ ꓠꓬ ꓦ ꓗꓪ ꓐꓰ ꓪꓽ ꓘꓴˍ ꓠꓬ꓾ ꓙꓽ ꓠꓲꓹ ꓗꓪ ꓐꓰˍ ꓟꓲ ꓪꓽ ꓘꓴˍ ꓥꓳ꓿ ꓦ ꓗꓪ ꓐꓰ ꓟꓴꓽ ꓖꓪ ꓖꓪˍ ꓠꓬ꓾ ꓙꓽ ꓠꓲꓹ ꓗꓪ ꓐꓰˍ ꓟꓲ ꓖꓪˍ ꓥꓳ꓿ 16 ꓟꓽ ꓥ ꓠꓬ ꓠꓴ ꓠꓽ ꓦ ꓡꓰ ꓪꓽ ꓘꓴ ꓢꓲ ꓪꓴ-ꓢ ꓔꓯ ꓫꓸ ꓟꓳ ꓔꓬ ꓥ ꓟꓲ꓾ ꓟꓽ ꓙ ꓜꓲꓼ ꓢꓴ ꓐꓴ ꓠꓬ ꓠꓴ ꓐꓯˍ ꓟ ꓬꓲ ꓪꓽ ꓠ ꓠꓹ ꓟꓽ ꓗꓴ ꓠꓬꓲ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓐꓰ ꓮ ꓡꓲ ꓐꓯ ꓐ ꓡ ꓢꓰꓽ꓿ 17 ꓠꓴ ꓠꓽ ꓫꓸ ꓟꓳ ꓘꓶꓽ ꓮꓽ ꓘꓶꓸ ꓙꓲꓻˍ ꓟ ꓐꓯ ꓔꓬ ꓟꓲ꓾ ꓢꓴ ꓔꓯ ꓪꓴꓽ ꓡ ꓟꓴ ꓡ ꓝꓲ ꓟꓽ ꓗꓴꓸ꓿ 18 ꓥꓪ ꓠꓬ ꓠꓴ ꓪꓽ ꓮꓽ ꓙꓵ ꓢꓴ ꓟꓬ ꓟꓽ ꓞꓲ ꓥꓳꓽ ꓫꓵ ꓫꓸ ꓕꓱˍ ꓠꓬꓲ ꓥꓪ ꓪꓴ-ꓢ ꓔꓯ ꓫꓸ ꓟꓳ꓿ 19 ꓖꓳ ꓡꓱ ꓥ ꓟꓲ ꓥꓪ ꓠꓬ ꓜꓲꓼ ꓓꓴ ꓗꓪ ꓘꓴ ꓜꓲ ꓞꓳ ꓔꓯ ꓟꓸ ꓖꓶ ꓪ ꓠꓹ ꓟ꓾ ꓥꓳꓽ ꓫꓵ ꓡꓰ ꓕꓲ ꓟꓶꓽ ꓘꓶ ꓫꓸ ꓕꓱˍ ꓟ ꓢꓶꓸ ꓟꓽ ꓞꓲ꓾ ꓮꓽ ꓙꓵ ꓢꓴ ꓡꓰ ꓠ ꓠꓹ ꓗꓴˍ ꓟ ꓥꓳꓽ ꓥꓪꓽ ꓘꓶꓽ ꓫꓸ ꓕꓱˍ ꓟ ꓔꓯ ꓪ ꓜꓲꓻ ꓠꓲꓹ ꓫꓵˍ ꓡꓳ꓿ 20 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓤ ꓠꓱ ꓤ ꓓꓵꓽ ꓙꓽˍ ꓟ ꓡꓰ ꓐꓰ ꓕꓽ ꓓꓵꓽ ꓙꓽ꓿ ꓥꓶꓺˍ ꓟ ꓚꓱꓹ ꓗꓪ ꓠꓬ ꓞꓳ ꓫꓵꓼ ꓤˍ ꓡꓰ ꓐꓰ ꓬꓰ꓿ ꓓꓵꓽ ꓙꓽˍ ꓟ ꓗꓪ ꓠꓽ ꓞꓲꓼ ꓪꓴꓽ ꓢꓴ ꓬꓰ꓿ 21 ꓢꓲꓽ ꓫꓬ ꓕꓳ ꓶ ꓗꓪ ꓢꓲ ꓒꓽ ꓡꓰ꓾ ꓥꓪ ꓠꓬ ꓠꓱꓸ ꓐꓯ ꓥꓳꓽˍ ꓐꓰ꓾ ꓐꓶꓽ ꓒ ꓟꓷꓽ ꓠꓷꓹ ꓗꓴꓹ ꓙꓲꓻ ꓣꓱꓽ ꓢꓲ ꓑ ꓫꓬꓼ ꓕꓱ ꓟ ꓔꓯ ꓫꓸ ꓕꓱˍ ꓥꓳ꓿ ꓕꓱ ꓡꓱ ꓬꓰˍ ꓟꓲ ꓬꓲ ꓪꓽ ꓥꓪ ꓔꓯ ꓟꓽ ꓠ ꓠꓹ꓾ ꓐꓯˍ ꓡꓳ꓾ ꓐꓰ ꓐꓳ ꓔ ꓡꓳ꓿ 22 ꓖꓳ ꓡꓱ ꓠꓬꓲ ꓥꓳꓽ ꓫꓵ ꓥꓳꓽ ꓙꓰ ꓠꓬ ꓦ ꓡꓱ ꓢꓴ ꓐꓱ ꓶ ꓢꓷꓸ ꓡꓰ ꓓꓴ ꓟꓽ ꓥ꓾ ꓟꓽ ꓦ ꓡꓱ ꓢꓴ ꓐꓱ ꓶ ꓥ ꓡꓳ꓿ ꓟꓷꓽ ꓠꓷꓹ ꓝꓸ ꓟ ꓠꓽ ꓟꓽ ꓦ ꓡꓱ ꓢꓴ ꓐꓱ ꓶ ꓟꓽ ꓥ꓾ ꓦ ꓡꓱ ꓢꓴ ꓐꓱ ꓶ ꓥ ꓡꓳ꓿ 23 ꓖꓳ ꓡꓱ ꓠꓬꓲ ꓘꓴ ꓜꓲꓼ ꓞꓳ ꓮꓽ ꓙꓵ ꓜꓲꓼ ꓡꓯꓽ ꓘꓳˍ ꓟ ꓗꓪ ꓮꓽ ꓙꓵ ꓢꓴ ꓥꓳꓽ ꓫꓵꓽ ꓥꓳ ꓙꓰ ꓫꓸ ꓕꓱˍ ꓠꓬ꓾ ꓟꓽ ꓙ ꓜꓲꓼ ꓢꓴ꓾ ꓥ ꓠꓬ ꓟꓽ ꓦ ꓡꓱ ꓢꓴ ꓓꓵ ꓡ ꓕꓯ꓾ ꓬꓲ ꓪꓽ ꓡꓰ ꓠꓴ ꓪꓽ ꓠꓬ ꓪꓴꓸˍ ꓡꓳ꓾ ꓐꓯ ꓡ ꓥꓳ꓾ ꓟꓽ ꓥ ꓡ? 24 ꓖꓳ ꓡꓱ ꓥ ꓟꓲ ꓕꓲ ꓣꓳ ꓡꓰ ꓟꓷꓽ ꓠꓷꓹ ꓝꓸ ꓔꓬ ꓟ ꓗꓪ ꓟꓽ ꓦ ꓡꓱ ꓢꓴ꓾ ꓥ ꓠꓬ ꓟꓽ ꓙ ꓜꓲꓼ ꓢꓴ ꓕꓲ ꓣꓳ ꓓꓵꓽ ꓡ ꓠꓬ꓾ ꓬꓲ ꓑ ꓙꓽ ꓟꓶˍ ꓟ ꓟꓸ ꓟꓲꓽ ꓡꓰ ꓬꓲ ꓝꓴꓲ ꓖꓴ ꓟꓳꓸ ꓖꓶ ꓓꓳ ꓡ ꓢꓲ꓾ ꓧꓪꓸ ꓛꓲꓽ ꓡ ꓝꓲˍ ꓠꓬꓲ꓾ 25 ꓬꓲ ꓠꓲꓹ ꓟ ꓗꓪ ꓚꓵ ꓔ ꓟˍ ꓟꓲ ꓐꓯ ꓓꓳ ꓡ ꓟ ꓑꓶꓸ ꓓꓴ꓾ ꓬꓲ ꓠꓬ ꓟꓳꓼ ꓡꓰ ꓢꓲ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓠꓬꓲ꓾ ꓪꓴ-ꓢ ꓠꓬ ꓚꓵ ꓚꓵ ꓠꓴ ꓪꓽˍ ꓐꓰ ꓔꓬ ꓐꓷ꓾ ꓐꓰ ꓐꓯˍ ꓥꓳ꓿ 26 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓖꓳ ꓡꓱ ꓥ ꓠꓬ ꓮ ꓡꓲ ꓬꓰ ꓠꓯꓹ ꓡ? ꓠꓴ ꓪꓽ ꓜꓲꓼ ꓡꓯꓽ ꓘꓳˍ ꓕꓯ꓾ ꓕꓲ ꓣꓳ ꓠꓬ ꓟꓴ ꓖꓪ ꓕꓲ ꓚꓱꓹ ꓙꓳ꓾ ꓕꓲ ꓣꓳ ꓠꓬ ꓟꓸ ꓖꓶ ꓓꓴ ꓕꓲꓽ ꓫꓵ ꓙꓳ꓾ ꓥ ꓠꓬ ꓟꓳꓸ ꓖꓶ ꓓꓴ ꓕꓲ ꓫꓵꓽ ꓙꓳ꓾ ꓥ ꓠꓬ ꓥꓳꓽ ꓫꓵꓽ꓾ ꓥ ꓠꓬ ꓡꓶꓸ ꓘꓶꓽ ꓙꓳˍ ꓠꓬ꓾ ꓮꓸ ꓫꓵ ꓥ ꓟꓲ ꓘꓴ ꓜꓲ ꓞꓳ ꓔꓯ ꓪꓴꓽ ꓡ ꓟꓴ ꓡ ꓝꓲ ꓠꓹ ꓟ ꓬꓰ꓿ 27 ꓮꓽ ꓟ ꓥ ꓟꓲ ꓥꓳꓽ ꓫꓵꓽ ꓫꓸ ꓕꓱˍ ꓕꓯ꓾ ꓠꓬꓲꓽ ꓣꓳ꓾ ꓥ ꓠꓬ ꓮꓽ ꓘꓶ ꓟꓬꓽˍ ꓠꓬ ꓢ ꓣꓳ ꓡꓰ꓾ ꓕꓲ ꓣꓳ ꓗꓸ ꓠꓯ ꓕꓲ ꓣꓳ ꓫꓸ ꓕꓱ ꓢꓲ꓾ ꓐꓯ ꓘꓶ ꓡꓶꓸ ꓢꓴ ꓕꓲ ꓣꓳ ꓙꓳ ꓠꓯꓹ ꓡꓳ꓿ 28 ꓐꓯ ꓘꓶ ꓡꓶꓸ ꓢꓴ ꓟꓽ ꓙꓳˍ ꓕꓯ ꓠꓽ꓾ ꓜꓲꓼ ꓓꓴ ꓗꓪ ꓬꓲ ꓪꓽ ꓔꓯ ꓟꓽ ꓪꓳꓹ ꓔꓬ ꓝꓲ꓿ ꓖꓳ ꓡꓱ ꓢꓲ ꓚꓲꓸ ꓛꓬꓽˍ ꓐꓰ ꓪꓴ-ꓢ ꓔꓯˍ ꓡꓰ ꓫꓸ ꓕꓱ ꓝꓲ꓿ 29 ꓟꓷꓽ ꓠꓷꓹ ꓝꓸ ꓢꓴ ꓠꓬ ꓠꓬꓲꓽ ꓣꓳ꓾ ꓥ ꓠꓬ ꓢ ꓣꓳ ꓔꓯ ꓝꓸ ꓝꓲ ꓢꓲ꓾ ꓠꓱꓸ ꓐꓯꓼ ꓢꓴ ꓠꓬ ꓬꓲ ꓪꓽ ꓔꓯ ꓚꓬꓹ ꓠꓬꓲ ꓠꓯꓹ ꓡꓳ꓿ 30 ꓖꓳ ꓡꓱ ꓥ ꓟꓲ ꓠꓬꓲꓸ ꓠꓸ ꓔꓬ ꓢꓲ ꓠ ꓠꓹ ꓔꓬ ꓢꓴ ꓕꓲ ꓣꓳ ꓔꓯ ꓟꓳꓸ ꓖꓶ ꓓꓴ ꓖꓶ ꓡ ꓕꓯ ꓠꓽ꓾ ꓬꓲ ꓪꓴꓸ ꓟꓸ ꓔꓬ ꓢꓴ ꓖꓳ ꓕꓲ ꓣꓳ ꓔꓯ ꓫꓸ ꓕꓱ ꓠꓽ ꓡꓰ ꓝꓲ꓿ 31 ꓮꓽ ꓙꓵ ꓢꓴ ꓢꓳ ꓟꓶ ꓢꓲ ꓘꓶꓸ ꓖꓶ ꓓꓴ ꓟꓶ ꓠꓹ ꓟ꓾ ꓠꓴ ꓪꓽ ꓮꓽ ꓙꓵ ꓕꓲ ꓣꓳ ꓗꓸ ꓠꓯꓸ ꓕꓲ ꓣꓳ ꓟꓷꓽ ꓠꓷꓹ ꓝꓸ ꓛꓵˍ ꓡꓳ꓿ 32 ꓟꓷꓽ ꓠꓷꓹ ꓝꓸ ꓢꓴ ꓦ ꓠꓬ꓾ ꓟꓷꓽ ꓠꓷꓹ ꓝꓸ ꓢꓴ ꓙꓵꓽˍ ꓟ ꓔꓯ ꓛꓳˍ ꓡꓳ꓿ 33 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ꓾ ꓢꓴꓺ ꓡ ꓝꓲ ꓢꓴ ꓟꓽ ꓥ꓾ ꓢꓲ ꓡꓲ ꓟ ꓪꓴ-ꓢ ꓥ ꓡꓳ꓿ 34 ꓪꓴ-ꓢ ꓬꓲ ꓘꓴ ꓜꓲ ꓞꓳ ꓮꓽ ꓙꓵ ꓟ ꓗꓪ ꓬꓰˍ ꓟ ꓡꓰ ꓐꓰ꓾ ꓤ ꓟꓶ ꓤ ꓐꓴ ꓠꓬ ꓜꓲꓼ ꓓꓴ ꓗꓪ ꓟꓽ ꓪꓳꓹ ꓔꓬ ꓠꓯꓹ ꓡꓳ꓿ ꓬꓲ ꓪꓽ ꓔꓯ ꓕꓽ ꓫꓸ ꓕꓱ ꓝꓲ꓿ ꓙꓵꓽ ꓗ ꓗꓪ ꓐꓯˍ ꓟ ꓡꓰ ꓐꓰ꓾ ꓬꓲ ꓪꓽ ꓠꓬ ꓙꓵꓽˍ ꓟ ꓠꓯꓸ ꓘꓪ ꓔꓬ ꓠꓯꓹ ꓡꓳ꓿ 35 ꓬꓲ ꓪꓽ ꓕꓲ ꓫꓵ ꓫꓵ ꓠ ꓠꓬꓲ ꓠꓲꓹ ꓫꓵˍ ꓕꓯ ꓠꓽ꓾ ꓦꓲ ꓗꓪ ꓚꓲ ꓛꓬ ꓤꓽ ꓖꓴ ꓔꓯ ꓠ ꓠꓬꓲ ꓝꓲ꓿ ꓮ ꓡꓲꓳ ꓐꓯ ꓠꓬ ꓜꓲꓼ ꓓꓴ ꓗꓪ ꓤ ꓟꓶ ꓤ ꓫꓸ ꓕꓱˍ ꓟ ꓠꓬ ꓫꓸ ꓔꓳ ꓓꓴ ꓥ ꓡꓳ꓿ 36 ꓪꓴ-ꓢ ꓐꓯ ꓘꓶ ꓠꓬ ꓠꓴ ꓪꓽ ꓗꓪ ꓐꓰ ꓪꓴꓸ ꓔꓴ ꓢꓲ ꓓꓳꓺ ꓙꓰ ꓟ ꓥ ꓡ? ꓥ ꓠꓬ ꓠꓴ ꓪꓽ ꓔꓯˍ ꓡꓰꓽ ꓛꓲ ꓡ ꓗꓷ ꓟ ꓥ ꓡ? 37 ꓚꓲ ꓛꓬ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓥ ꓡꓳ꓾ ꓥ ꓠꓬ ꓦ ꓡꓯꓼ ꓫꓴ ꓟꓶ ꓡꓰ ꓢꓴ ꓥꓳ꓾ ꓐꓰ ꓓꓵꓽ ꓙꓽ ꓢꓴ ꓙꓳˍ ꓕꓯ ꓠꓽ꓾ ꓥꓪ ꓡꓰ ꓠꓴ ꓪꓽ ꓔꓯ ꓐꓳ ꓖꓶˍ ꓟ ꓠꓬ ꓢꓲ ꓒꓽ ꓕꓵꓼ ꓪ ꓥꓳ꓾ ꓐꓰ ꓬꓲ ꓘꓳ ꓣꓴ ꓠꓯꓹ ꓡꓳ꓿ 38 ꓕꓱ ꓡꓱ ꓟꓽ ꓘꓳ ꓣꓴ ꓢꓴ ꓔꓯ ꓠꓬ ꓠꓴ ꓪꓽˍ ꓟꓲ ꓕꓽ ꓘꓳ ꓣꓴ꓿ 39 ꓖꓳ ꓡꓱ ꓠꓬꓲ ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓟꓷꓽ ꓠꓷꓹ ꓝꓸ ꓠꓹ ꓟ ꓠꓲꓹ ꓥꓳ ꓠꓯꓹ ꓡꓳ꓿ ꓝꓮꓲ ꓠꓬ꓾ ꓥꓳꓽ ꓫꓵ ꓥꓳꓽ ꓙꓰꓽ ꓫꓸ ꓕꓱ ꓢꓴ ꓔꓯˍ ꓟꓲ ꓕꓽ ꓗꓽ ꓔ꓿ 40 ꓖꓳ ꓡꓱ ꓥ ꓟꓲ ꓮꓽ ꓙꓵ ꓟ ꓗꓪ ꓬꓲ ꓖ ꓙꓳꓻ ꓙꓳˍ ꓡꓰ꓾ ꓕꓲ ꓫꓵꓽ ꓗꓸ ꓠꓯ ꓕꓲ ꓫꓵ ꓬꓰ ꓠꓯꓹ ꓡꓳ꓿

1 ꓘꓳ-ꓡꓱ-ꓕꓴ 15

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓔꓯ ꓥꓪ ꓚ ꓖꓶ ꓗꓷ ꓟ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓟꓳꓸ ꓝꓮꓲ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ꓿ ꓶꓼ ꓓꓳꓽ ꓫꓱꓹ ꓓꓳ ꓕꓱ ꓟ ꓠꓴ ꓪꓽ ꓘꓳ ꓣꓴ ꓟꓶ ꓡꓰ ꓢꓲ ꓕꓱ ꓟ ꓗꓪ ꓠꓴ ꓪꓽ ꓦꓰꓼ ꓕꓶꓻ ꓡꓰꓳ꓿ 2 ꓠꓴ ꓪꓽ ꓠꓬ ꓶꓼ ꓓꓳꓽ ꓫꓱꓹ ꓓꓳ ꓕꓱ ꓟ ꓔꓯ ꓕꓶ ꓕꓶˍ ꓡꓰꓽ ꓣꓴ ꓔ ꓠꓬ ꓚꓬꓴ ꓟꓶˍ ꓥꓳ꓿ ꓖꓳ ꓡꓱ ꓟꓽ ꓥ ꓕꓯ ꓠꓽ ꓠꓴ ꓪꓽ ꓙꓵꓻ ꓗꓷ ꓟ ꓠꓬ ꓮꓽ ꓔꓳˍ ꓡꓰꓽ ꓥꓳ꓿ 3 ꓮ ꓡꓲꓳ ꓐꓯ ꓠꓬ ꓥꓪ ꓡꓰ ꓠꓴ ꓪꓽ ꓔꓯ ꓡꓯꓼ ꓙꓱ ꓖꓶˍ ꓟ ꓬꓲ ꓪꓴ ꓕꓲ ꓫꓵꓽ ꓠꓬ꓾ ꓥꓪˍ ꓟꓲ ꓘꓳ ꓣꓴ ꓟꓶˍ ꓟ ꓥ ꓡꓳ꓿ ꓕꓱ ꓟ ꓠꓬ꓾ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓡꓰ ꓐꓰ꓾ ꓙꓲ-ꓢꓴ ꓠꓬ ꓣꓳꓽ ꓝꓴꓲ ꓑꓶ ꓓꓴ ꓫꓵꓻ ꓢꓲ ꓬꓲ ꓔꓯ ꓔꓵꓸ ꓗꓷꓳ꓿ 4 ꓝꓮꓲ ꓠꓬ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓡꓰ ꓐꓰ꓾ ꓢ ꓠꓬꓲ ꓗꓪ ꓬꓲ ꓔꓯ ꓢꓯꓸ ꓬꓲꓼ ꓡ ꓝꓲꓳ꓿ 5 ꓖꓳ ꓗꓸ ꓠꓯꓸ ꓒꓲ-ꓕꓱ ꓔꓯ ꓬꓲ ꓖꓳ ꓓꓱ ꓟꓳꓸ ꓖꓶˍ ꓡꓳ꓿ ꓗꓸ ꓠꓯꓸ ꓠꓬ ꓞꓲ ꓠꓬꓲꓽ ꓣꓳ ꓔꓯ ꓟꓳꓸ ꓖꓶˍ ꓡꓳ꓿ 6 ꓗꓸ ꓠꓯꓸ ꓬꓲ ꓠꓬ ꓕꓲ ꓙꓪꓻꓼ ꓐꓰ ꓬꓲꓼ ꓤ ꓠꓬꓲ ꓤ ꓥꓪꓽ ꓦꓬ ꓣꓳ ꓟꓽ ꓞꓲ ꓔꓯ ꓟꓳꓸ ꓖꓶˍ ꓡꓳ꓿ ꓬꓲ ꓪꓽ ꓟꓬꓽ ꓠꓬꓲ ꓕꓲ ꓐꓱ ꓠꓬ꓾ ꓮ ꓟꓶ ꓗꓪ ꓛꓲ ꓢꓯꓸ ꓔꓬ ꓢꓰꓽ ꓡꓳ꓿ ꓕꓲ ꓐꓱ ꓠꓽ ꓫꓵꓻꓳ꓿ 7 ꓗꓸ ꓠꓯꓸ ꓬꓲ ꓠꓬ ꓬ-ꓗꓴ ꓔꓯ ꓟꓳꓸ ꓖꓶˍ ꓡꓳ꓿ ꓗꓸ ꓠꓯꓸ ꓠꓬ ꓝꓲ ꓓꓴ ꓮꓽ ꓙꓵ ꓔꓯ ꓟꓳꓸ ꓖꓶˍ ꓡꓳ꓿ 8 ꓮꓽ ꓙꓵ ꓟ ꓗꓸ ꓠꓯꓸ ꓠꓬ꓾ ꓦꓬꓼ ꓠꓬꓲ ꓟꓽ ꓐꓲ ꓕꓯˍ ꓡꓰ ꓦꓵ ꓔ ꓟ ꓡꓰ ꓐꓰ ꓗ ꓢꓴ ꓥꓪ ꓔꓯˍ ꓟꓲ ꓟꓳꓸ ꓖꓶ ꓡꓺꓳ꓿ 9 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓘꓴ ꓜꓲ ꓞꓳ ꓔꓯ ꓥꓪ ꓗꓸ ꓧꓪ ꓗꓷ ꓠꓬꓲ꓾ ꓥꓪ ꓠꓽ ꓝꓲ ꓓꓴ ꓣꓳ ꓓꓰˍ ꓕꓲ ꓣꓳ ꓟ ꓥ ꓢꓲ꓾ ꓝꓲ ꓓꓴ ꓘꓴꓻ ꓟꓽ ꓒꓵꓽ ꓟ ꓥ ꓡꓳ꓿ 10 ꓥꓪ ꓕꓱ ꓡꓱ ꓛꓲ ꓤꓽ ꓕꓲ ꓣꓳ ꓒꓬꓱꓼ ꓡ ꓟˍ ꓟꓲ ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓥ ꓡꓳ꓿ ꓬꓲ ꓥꓪ ꓔꓯ ꓖꓶ ꓡ ꓟ ꓣꓱꓽ ꓛꓰ ꓠꓬ ꓮꓽ ꓔꓳ ꓟꓽ ꓗꓷ ꓡꓰ꓿ ꓥꓪ ꓠꓬ ꓝꓲ ꓓꓴ ꓮꓽ ꓙꓵ ꓢꓴ ꓟꓬꓺ ꓟꓽ ꓞꓲ ꓮꓽ ꓘꓶꓸ ꓢꓯꓼ ꓕꓵꓼ ꓪꓴꓽ ꓧꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓥꓪ ꓢꓯꓼ ꓗꓪ ꓐꓰ ꓟꓽ ꓥ꓿ ꓥꓪ ꓔꓯ ꓖꓶ ꓡ ꓟ ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓥ ꓡꓳ꓿ 11 ꓖꓳ ꓡꓱ ꓠꓬꓲ ꓥꓪ ꓥ ꓟꓲ꓾ ꓬꓲ ꓪꓽ ꓥ ꓟꓲ꓾ ꓕꓱ ꓡꓱ ꓚ ꓟꓸ ꓖꓶ ꓢꓲ꓾ ꓠꓴ ꓪꓽ ꓠꓬ ꓕꓱ ꓟ ꓔꓯ ꓙꓵꓻ ꓗꓷ ꓟ ꓥ ꓡꓳ꓿ 12 ꓙꓲ-ꓢꓴ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲꓳ꓾ ꓐꓰ ꓥꓪ ꓠꓴꓽ ꓚ ꓟꓸ ꓖꓶ ꓗꓷꓳ꓿ ꓖꓳ ꓡꓱ ꓥ ꓠꓬ ꓠꓴ ꓪꓽ ꓕꓲ ꓐꓱ ꓮ ꓡꓲ ꓗꓷ ꓡꓰ ꓠꓬꓲ꓾ ꓞꓳ ꓫꓵꓻ ꓢꓯꓸ ꓬꓲꓼ ꓡ ꓟ ꓟꓽ ꓙꓳ꓾ ꓐꓰ ꓐꓯˍ ꓢꓰꓽ ꓡ? 13 ꓞꓳ ꓫꓵꓻ ꓢꓯꓸ ꓬꓲꓼ ꓡ ꓟ ꓟꓽ ꓙꓳˍ ꓕꓯ ꓠꓽ꓾ ꓙꓲ-ꓢꓴ ꓔꓯˍ ꓟꓲ ꓟꓽ ꓢꓯꓸ ꓬꓲꓼ ꓡ ꓝꓲ ꓗꓷ ꓡꓳ ꓫꓵꓽ ꓥ ꓡꓳ꓿ 14 ꓙꓲ-ꓢꓴ ꓔꓯ ꓟꓽ ꓢꓯꓸ ꓬꓲꓼ ꓡ ꓝꓲ ꓗꓷ ꓐꓷˍ ꓠꓬ꓾ ꓥꓪ ꓠꓴꓽ ꓚˍ ꓟ ꓠꓬ ꓮꓽ ꓔꓳˍ ꓡꓰꓽ ꓥ ꓢꓲ꓾ ꓠꓴ ꓪꓽ ꓙꓵꓻ ꓠꓲꓹˍ ꓟꓲ ꓮꓽ ꓔꓳˍ ꓡꓰꓽ ꓥꓳ꓿ 15 ꓖꓳ ꓟ ꓕꓯ ꓢꓲ꓾ ꓞꓳ ꓫꓵꓻ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ ꓚꓵ ꓚꓵ ꓟꓽ ꓙꓳ ꓕꓯ ꓠꓽ꓾ ꓥꓪ ꓠꓴꓽ ꓠꓬ ꓪꓴ-ꓢ ꓡꓰ ꓙꓲ-ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲꓳ꓾ ꓐꓰ ꓪꓴ-ꓢ ꓐꓱ ꓶ ꓢꓷꓸ ꓙ ꓟꓳꓻ ꓙ ꓗꓷ ꓠꓬꓲ꓾ ꓥꓪ ꓠꓴꓽ ꓠꓽ ꓟꓽ ꓔꓱꓹ ꓟ ꓢꓷꓸ ꓙ ꓟꓳ ꓙ ꓢꓴ ꓥ ꓟ ꓢꓴ ꓡꓳꓸ ꓓꓳ ꓡ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓙꓲ-ꓢꓴ ꓔꓯ ꓟꓽ ꓢꓯꓸ ꓬꓲꓼ ꓡ ꓝꓲ ꓗꓷ ꓐꓷˍ ꓠꓬ꓾ ꓞꓳ ꓫꓵˍ ꓟꓲ ꓟꓽ ꓢꓯꓸ ꓬꓲꓼ ꓡ ꓡꓳ ꓫꓵꓽ ꓥ ꓡꓳ꓿ 16 ꓮ ꓡꓲꓳ ꓐꓯ ꓠꓬ ꓞꓳ ꓫꓵꓻ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ ꓟꓽ ꓙꓳˍ ꓕꓯ ꓠꓽ꓾ ꓙꓲ-ꓢꓴ ꓔꓯˍ ꓟꓲ ꓟꓽ ꓢꓯꓸ ꓬꓲꓼ ꓡ ꓝꓲ ꓗꓷ ꓡꓳ ꓫꓵꓽ ꓥ ꓡꓳ꓿ 17 ꓙꓲ-ꓢꓴ ꓔꓯ ꓟꓽ ꓢꓯꓸ ꓬꓲꓼ ꓡ ꓝꓲ ꓗꓷ ꓐꓷˍ ꓠꓬ꓾ ꓠꓴ ꓪꓽ ꓙꓵꓻ ꓠꓲꓹ ꓠꓬ ꓮꓽ ꓔꓳˍ ꓡꓰꓽ ꓥ ꓢꓲ꓾ ꓠꓴ ꓪꓽ ꓠꓽ ꓚꓲ ꓛꓬ ꓝꓴꓲ ꓠꓯꓸꓼ ꓗꓪ ꓔꓬ ꓢꓰ ꓡꓳ꓿ 18 ꓖꓳ ꓡꓱ ꓥ ꓐꓷˍ ꓠꓬ꓾ ꓙꓲ-ꓢꓴ ꓠꓯꓸꓼ ꓗꓪ ꓫꓵꓻ ꓢꓴˍ ꓟꓲ ꓟꓶꓽ ꓬꓰꓳ꓿ 19 ꓙꓲ-ꓢꓴ ꓔꓯ ꓥꓳ ꓡꓳꓸˍ ꓟ ꓠꓬ ꓮ ꓟꓶ ꓕꓱ ꓕꓲ ꓤꓶ ꓐꓱ ꓶˍ ꓡꓰ ꓥ ꓕꓯ ꓠꓽ꓾ ꓣꓳꓽ ꓠꓬ ꓞꓳ ꓤ ꓥ ꓕ ꓑꓳꓸ ꓕꓯ ꓢꓲ ꓫꓱꓸ ꓤ ꓓꓴ ꓗꓷ ꓡꓰꓳ꓿ 20 ꓖꓳ ꓡꓱ ꓥ ꓟꓲ ꓮ ꓟꓶ ꓠꓬ ꓙꓲ-ꓢꓴ ꓔꓯ ꓫꓵ ꓗꓪ ꓐꓰ ꓚꓵ ꓚꓵ ꓢꓯꓸ ꓬꓲꓼ ꓡ ꓝꓲꓳ꓿ ꓬꓲ ꓠꓬ ꓫꓵꓻ ꓢꓴ ꓐꓴ ꓗꓪ ꓟ ꓜꓻ ꓪꓴꓸ ꓥ ꓡꓳ꓿ 21 ꓮ ꓡꓲꓳ ꓐꓯ ꓠꓬ ꓫꓵꓻˍ ꓟ ꓠꓬ ꓡ ꓞꓳ ꓕꓲ ꓣꓳ ꓗꓪ ꓐꓰ ꓡꓻˍ ꓟ ꓥ ꓠꓬꓲ꓾ ꓢꓯꓸ ꓬꓲꓼ ꓡ ꓟˍ ꓟꓲ ꓡ ꓞꓳ ꓕꓲ ꓣꓳ ꓗꓪ ꓐꓰ ꓡꓻˍ ꓟ ꓥ ꓡꓳ꓿ 22 ꓮ ꓡꓲꓳ ꓐꓯ ꓠꓬ ꓮ-ꓓꓯ ꓠꓯꓸꓼ ꓗꓪ ꓮꓽ ꓙꓵ ꓢꓴ ꓫꓵˍ ꓟ ꓡꓰ ꓐꓰ꓾ ꓙꓲ-ꓢꓴ ꓠꓯꓸꓼ ꓗꓪˍ ꓟꓲ ꓮꓽ ꓙꓵ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲˍ ꓥꓳ꓿ 23 ꓖꓳ ꓡꓱ ꓥ ꓟꓲ ꓮꓽ ꓟ ꓝꓲꓸ ꓗꓪ ꓮꓽ ꓟ ꓢꓯꓸ ꓬꓲꓼ ꓡ ꓥꓳ꓿ ꓙꓲ-ꓢꓴ ꓠꓬ ꓜꓻ ꓪꓴꓸ ꓥ ꓠꓬꓲ ꓬꓲ ꓧꓶꓸ ꓕꓯ ꓢꓯꓸ ꓬꓲꓼ ꓡꓺꓳ꓿ ꓗꓸ ꓠꓯꓸ ꓬꓲ ꓬꓲꓼ ꓡ ꓕꓯꓽ ꓠꓬ ꓬꓲ ꓢꓲ ꓤ ꓐꓴ ꓢꓯꓸ ꓬꓲꓼ ꓡ ꓥꓳ꓿ 24 ꓖꓳ ꓕꓯ ꓙꓲ-ꓢꓴ ꓡꓰ ꓪꓴꓸ ꓓꓵ ꓣꓱꓽ ꓢꓴˍ ꓐꓰ꓾ ꓙꓵꓽ ꓪꓽˍ ꓐꓰ ꓪꓽ ꓠꓬꓲˍ ꓟ ꓮꓽ ꓙꓵ ꓔꓯ ꓟꓶꓽ ꓡꓰ ꓝꓲ ꓢꓲ꓾ ꓗꓴꓷ ꓠꓬ ꓐꓹ ꓐ ꓪꓴ-ꓢ ꓔꓯ ꓡꓯꓼ ꓙꓱ ꓖꓶˍ ꓥꓳ꓿ ꓖꓳ ꓗꓸ ꓠꓯꓸ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ 25 ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓠꓽ ꓬꓲ ꓔꓯ ꓛꓴꓽ ꓙꓳ ꓢꓴ ꓮꓽ ꓙꓵ ꓔꓯ ꓬꓲ ꓛꓲ ꓒꓯꓹ ꓠꓯꓸ ꓘꓪ ꓕꓳꓼ ꓗꓷˍ ꓗꓪ ꓛꓲ ꓪ ꓔꓲ ꓣꓱˍ ꓥꓳ꓿ 26 ꓟꓶꓽ ꓬꓰ ꓝꓲ ꓠꓹ ꓟ ꓛꓴꓽ ꓙꓳ ꓢꓴ ꓡꓳꓹ ꓬꓰˍ ꓕꓲ ꓟꓻ ꓟ ꓠꓬ꓾ ꓫꓵꓻ ꓟ ꓥ ꓡꓳ꓿ 27 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ꓾ ꓙꓳˍ ꓟ ꓥ ꓕ ꓑꓳꓸ ꓔꓯ ꓙꓲ-ꓢꓴ ꓛꓲ ꓒꓯꓹ ꓠꓯꓸ ꓘꓪ ꓗꓷ ꓡꓰ ꓝꓲˍ ꓡꓳ꓿ ꓬꓲ ꓡꓰ ꓙꓳˍ ꓟ ꓥ ꓕ ꓑꓳꓸ ꓔꓯ ꓬꓲ ꓛꓲ ꓒꓯꓹ ꓠꓯꓸ ꓘꓪ ꓗꓷ ꓡꓰ ꓝꓲˍ ꓡꓳ꓾ ꓐꓯˍ ꓟ ꓥ ꓟꓲ꓾ ꓬꓲ ꓖꓳ ꓡꓱ ꓗꓷ ꓡꓰ ꓝꓲ ꓢꓴ ꓪꓴ-ꓢ ꓬꓲ ꓚꓲꓸ ꓛꓬꓽ ꓠꓬ ꓕꓱ ꓟ ꓠꓯꓸꓼ ꓗꓪ ꓟꓽ ꓕꓱꓹ ꓞꓹ ꓟ꓾ ꓔꓲ ꓢꓲꓽ ꓢꓲˍ ꓡꓰ ꓟꓳꓻ ꓞꓹ ꓡꓳ꓿ 28 ꓖꓳ ꓡꓱ ꓢꓲ ꓙꓳˍ ꓟ ꓥ ꓕ ꓑꓳꓸ ꓔꓯ꓾ ꓙꓲ-ꓢꓴ ꓡꓰ ꓙꓵꓽˍ ꓟ ꓔꓯ ꓛꓳ ꓝꓲ ꓗꓷ ꓗꓸ ꓠꓯꓸ꓾ ꓪꓴ-ꓢ ꓠꓽ ꓙꓳˍ ꓟ ꓥ ꓕ ꓑꓳꓸ ꓪꓴꓸ ꓗꓪ ꓢꓲ ꓒꓽ ꓣꓱꓽ ꓠꓹ ꓟ꓾ ꓮ ꓐꓲ ꓬꓲ ꓚꓲ ꓛꓬˍ ꓟꓲ ꓐꓹ ꓐ ꓪꓴ-ꓢ ꓙꓵꓽˍ ꓟ ꓔꓯ ꓛꓳˍ ꓥꓳ꓿ ꓖꓳ ꓕꓯ ꓪꓴ-ꓢ ꓠꓬ ꓙꓳˍ ꓟ ꓥ ꓕ ꓑꓳꓸ ꓕꓯ ꓢꓲ ꓗꓪ꓾ ꓙꓳˍ ꓟ ꓥ ꓕ ꓑꓳꓸ ꓢꓲꓸ ꓒ ꓣꓱˍ ꓥꓳ꓿ 29 ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ ꓟꓽ ꓙꓳˍ ꓕꓯ ꓠꓽ꓾ ꓫꓵꓻ ꓢꓴ ꓐꓱ ꓶ ꓖꓳ ꓓꓱ ꓔꓲꓹ ꓢꓴ ꓮ ꓡꓲ ꓬꓰˍ ꓥꓳ ꓪ? ꓮꓸ ꓫꓵ ꓪꓴꓸ ꓠꓬꓲ ꓬꓲ ꓪꓽ ꓐꓱ ꓶ ꓖꓳ ꓓꓱ ꓔꓲꓹˍ ꓡ? 30 ꓮꓸ ꓫꓵ ꓪꓴꓸ ꓠꓬꓲ ꓥꓪ ꓠꓴˍ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓙꓲ ꓣꓴꓽˍ ꓟ ꓗꓪ ꓔꓬ ꓡ? 31 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓬ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓠꓴ ꓪꓽ ꓑꓶꓸ ꓓꓴ ꓘꓶꓽ ꓘꓹ ꓓꓴ ꓙꓳˍ ꓠꓬꓲ꓾ ꓥꓪ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓫꓵˍ ꓡꓳ꓾ ꓐꓰ ꓚꓬꓹˍ ꓡꓳ꓿ 32 ꓫꓵꓻ ꓢꓴ ꓔꓯ ꓚꓵ ꓚꓵ ꓟꓽ ꓢꓯꓸ ꓬꓲ ꓡ ꓝꓲ ꓐꓷˍ ꓠꓬ꓾ ꓥꓪ ꓠꓬ ꓞꓳ ꓤ ꓠꓲꓹ ꓡꓶ ꓔꓯ ꓛꓳ ꓢꓲ꓾ ꓬꓲ-ꓩꓴ-ꓢꓳ ꓗꓪ ꓬꓲꓸ ꓡꓽ ꓬꓲ ꓗꓳꓸˍ ꓐꓰ ꓓꓶꓽ ꓡꓯꓼ ꓘꓳˍ ꓟ ꓡꓰ ꓐꓰ ꓓꓶꓽ ꓗꓷ ꓐꓷˍ ꓟꓲ꓾ ꓥꓪ ꓐꓱ ꓶ ꓮꓸ ꓫꓵ ꓙꓲ ꓖꓴ ꓟꓶ ꓢꓰꓽ꓿ ꓕꓱ ꓡꓱ ꓥ ꓐꓷˍ ꓠꓬ꓾ ꓬꓲ ꓪꓽ ꓐꓯˍ ꓟ ꓡꓰ ꓐꓰ꓾ ꓣꓳꓽ ꓠꓬ ꓢꓹ ꓖꓶ ꓕꓲꓽ ꓠꓬꓲ ꓫꓵꓻ ꓡ ꓓꓴˍ ꓡꓰꓽ ꓥ ꓠꓬꓲ꓾ ꓜꓽ ꓠꓬꓲ ꓓꓳ ꓠꓬꓲ ꓬꓰ ꓡꓯ꓾ ꓐꓰ ꓐꓯ ꓠꓯꓹ ꓡꓳ꓾ ꓟꓽ ꓥ ꓡ? 33 ꓚꓲ ꓛꓬ ꓔꓯ ꓕꓽ ꓗꓶꓸ꓾ ꓟꓽ ꓙꓲ ꓟ ꓡ ꓞꓳˍ ꓐꓰ ꓛꓳꓽ ꓒꓯꓹ ꓬꓰˍ ꓟ ꓠꓬ ꓙꓲꓻˍ ꓟ ꓫꓷꓹ ꓔꓯ ꓐꓬ ꓡꓰ ꓝꓲˍ ꓟ ꓥ ꓡꓳ꓿ 34 ꓠꓴ ꓪꓽ ꓠꓬ ꓔꓱꓹ ꓜꓳꓽˍ ꓟ ꓬꓰ ꓠꓹ ꓟ ꓧꓪꓸ ꓛꓲꓽ ꓢꓲ ꓝꓴꓲ ꓕꓽ ꓬꓰ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓕꓲ ꓐꓱ ꓠꓽ ꓪꓴ-ꓢ ꓔꓯ ꓟꓽ ꓢꓷ ꓢꓴ ꓙꓳˍ ꓡꓳ꓿ ꓥꓪ ꓕꓱ ꓡꓱ ꓐꓯ ꓠ ꓗꓷ ꓡꓰˍ ꓟ ꓠꓬ ꓠꓴ ꓪꓽ ꓫꓸ ꓔꓳ ꓓꓴ ꓥ ꓡꓳ꓿ 35 ꓡ ꓞꓳ ꓕꓲ ꓐꓱ ꓠꓽ꓾ ꓫꓵꓻ ꓢꓴ ꓔꓯ ꓮ ꓡꓲ ꓐꓰ ꓢꓯꓸ ꓬꓲꓼ ꓡ ꓝꓲˍ ꓡ?꓾ ꓬꓲ ꓪꓽ ꓠꓬ ꓮ ꓡꓲ ꓡꓴ ꓫꓵꓽ ꓖꓳ ꓓꓱ ꓙꓳˍ ꓡ?꓾ ꓐꓰ ꓐꓯ ꓢꓴ ꓙꓳˍ ꓥꓳ꓿ 36 ꓞꓳ ꓙꓲꓽꓳ꓾ ꓠꓴ ꓫꓵꓸ ꓔ ꓟ ꓜꓻ ꓫꓵꓸ ꓟꓽ ꓛꓵꓽ ꓡꓰ ꓕꓯ ꓠꓽ ꓟꓽ ꓣꓱꓻ ꓡ꓿ 37 ꓠꓴ ꓡꓰ ꓫꓵꓸ ꓔ ꓟ ꓠꓬ ꓫꓪ꓾ ꓥ ꓠꓬ ꓠꓱꓸ ꓐꓯꓼ ꓮꓸ ꓫꓵ ꓫꓵꓸˍ ꓟꓲ ꓬꓲ ꓫꓵꓸ ꓕꓲ ꓢꓶꓽˍ ꓡꓰꓽ ꓥꓳ꓿ ꓗ ꓠꓯꓸ ꓓꓱꓼ ꓡ ꓟ ꓠꓬ ꓖꓳ ꓕꓲ ꓢꓶꓽ ꓟꓽ ꓥꓻꓳ꓿ 38 ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓬꓲ ꓠꓲꓹ ꓒꓴˍ ꓟ ꓔꓯ ꓛꓳ ꓢꓲ꓾ ꓮ ꓡꓲ ꓕꓲ ꓫꓵꓽ ꓟ ꓬꓲ ꓫꓵꓸ ꓔꓯˍ ꓟꓲ ꓖꓳ ꓕꓲ ꓫꓵꓽ ꓟ ꓬꓲ ꓢꓶꓽ ꓓꓱꓼ ꓡ ꓝꓲˍ ꓡꓳ꓿ 39 ꓧꓪꓽ ꓥ ꓕ ꓑꓳꓸ ꓠꓬ ꓕꓲ ꓫꓵˍ ꓡꓰ ꓟꓽ ꓥ꓿ ꓞꓳ ꓤ ꓧꓪꓽ ꓕꓲ ꓫꓵ꓾ ꓙꓱꓽ ꓤ ꓧꓪ ꓕꓲ ꓫꓵꓽ꓾ ꓠꓬꓹ ꓧꓪꓽ ꓕꓲ ꓫꓵ꓾ ꓥꓪꓸ ꓧꓪꓽ ꓕꓲ ꓫꓵ ꓥ ꓡꓳ꓿ 40 ꓟꓵꓽ ꓪꓴꓽ ꓗꓪ ꓠꓬ ꓟꓲꓽ ꓟꓲ ꓦ ꓐ ꓗꓴ ꓤ ꓙꓳˍ ꓡꓳ꓿ ꓟꓲ ꓠꓯ ꓗꓪˍ ꓟꓲ ꓬꓲ ꓫꓵꓽ ꓬꓲ ꓙꓰꓽ ꓙꓳˍ ꓡꓳ꓿ ꓟꓵꓽ ꓪꓴꓽ ꓗꓪ ꓙꓳˍ ꓟ ꓐꓲꓻ ꓒꓬꓱꓽ ꓕꓲꓽ ꓫꓵ꓾ ꓟꓲ ꓠꓯ ꓗꓪ ꓙꓳˍ ꓟ ꓐꓲꓻ ꓒꓬꓱꓽ ꓕꓲ ꓫꓵ ꓥ ꓡꓳ꓿ 41 ꓟꓲꓽ ꓟꓲ ꓐꓬꓱꓼ ꓡꓱꓼˍ ꓟ ꓕꓲ ꓫꓵ꓾ ꓦ ꓐ ꓐꓬꓱꓼ ꓡꓱꓼˍ ꓟ ꓕꓲ ꓫꓵ꓾ ꓗꓴ ꓤ ꓐꓬꓱꓼ ꓡꓱꓼˍ ꓟ ꓕꓲ ꓫꓵ ꓥ ꓡꓳ꓿ ꓗꓴ ꓤ ꓐꓬꓱꓼ ꓡꓱꓼˍ ꓟˍ ꓟꓲ ꓕꓲ ꓢꓶˍ ꓐꓰ ꓕꓲ ꓢꓶꓽ ꓟꓽ ꓫꓱꓸ ꓡꓯꓼ ꓘꓳ꓿ 42 ꓫꓵꓻ ꓢꓴ ꓢꓯꓸ ꓬꓲꓼ ꓡ ꓟˍ ꓟꓲ ꓖꓳ ꓡꓱ ꓥꓳ꓿ ꓫꓵꓸ ꓗꓷ ꓟ ꓠꓬ ꓛꓵꓽ ꓡꓰˍ ꓟꓲ꓾ ꓢꓯꓸ ꓬꓲꓼ ꓡ ꓟ ꓖꓳ ꓓꓱ ꓠꓬ ꓛꓵꓽ ꓡꓰ ꓟꓽ ꓗꓴꓸ ꓟ ꓖꓳ ꓓꓱꓽ ꓥ ꓡꓳ꓿ 43 ꓫꓵꓸ ꓗꓷˍ ꓕꓯ ꓡꓳꓸ ꓟꓽ ꓐꓲꓻˍ ꓟꓲ꓾ ꓡꓳꓸ ꓐꓲˍ ꓟ ꓐꓰ ꓟꓬꓱ ꓓꓳꓽ ꓙꓳˍ ꓟ ꓖꓳ ꓓꓱ ꓑꓶꓸ ꓡꓰ ꓢꓲ ꓢꓯꓸ ꓡ ꓝꓲˍ ꓥꓳ꓿ ꓫꓵꓸ ꓗꓷˍ ꓕꓯ ꓬꓲ ꓢꓯꓼ ꓟꓬ ꓟꓽ ꓓꓯꓹ ꓟꓲ꓾ ꓪꓽ ꓠꓬꓲˍ ꓟ ꓗꓪ ꓢꓯꓸ ꓡ ꓝꓲˍ ꓥꓳ꓿ 44 ꓫꓵꓸ ꓔ ꓟ ꓠꓬ ꓧꓪꓽ ꓖꓳ ꓓꓱ ꓥ ꓢꓲ꓾ ꓢꓯꓸ ꓬꓲꓼ ꓡ ꓝꓲˍ ꓟ ꓠꓬ ꓦ ꓖꓳ ꓓꓱ ꓥ ꓡꓳ꓿ ꓧꓪ ꓖꓳ ꓓꓱ ꓙꓳˍ ꓕꓯ ꓠꓽ꓾ ꓦ ꓖꓳ ꓓꓱˍ ꓟꓲ ꓙꓳˍ ꓥꓳ꓿ 45 ꓖꓳ ꓟ ꓡꓰ ꓐꓰ ꓕꓳ ꓶ ꓗꓪˍ ꓟꓲ꓾ ꓬꓲ ꓪꓴꓸ ꓟ ꓡ ꓞꓳ ꓮ-ꓓꓯ ꓠꓬ ꓞꓳ ꓢꓯꓸ ꓒꓬꓱꓼ ꓡ ꓡꓳ꓾ ꓐꓰ ꓐꓳ ꓔ ꓟ ꓕꓲ ꓔꓳꓸ ꓙꓳˍ ꓡꓳ꓿ ꓡꓳꓹ ꓬꓰˍ ꓟ ꓮ-ꓓꓯ ꓠꓽ ꓢꓯꓼ ꓟꓬ ꓖꓶ ꓢꓴ ꓦ ꓒꓬꓱꓼ ꓡ ꓡꓳ꓿ 46 ꓖꓳ ꓡꓱ ꓥ ꓟꓲ ꓦ ꓗꓪ ꓟ ꓧꓶꓸ ꓕꓯ ꓟꓽ ꓥ꓾ ꓧꓪꓽ ꓗꓪ ꓟ ꓧꓶꓸ ꓕꓯ ꓥ ꓡꓳ꓿ ꓖꓳ ꓗꓸ ꓠꓯꓸ ꓢꓲꓸˍ ꓡꓰ ꓦ ꓗꓪ ꓟ ꓥ ꓡꓳ꓿ 47 ꓡ ꓞꓳ ꓬꓲ ꓪꓴꓸ ꓕꓲ ꓣꓳ ꓟ ꓠꓬ ꓟꓲ ꓠꓯ ꓗꓪ ꓟ ꓥ ꓢꓲ꓾ ꓠꓱꓸ ꓦꓱꓽ ꓗꓪ ꓐꓰ ꓓꓳ ꓡ ꓟ ꓥꓳ꓿ ꓠꓬꓲꓽ ꓣꓳ ꓕꓲ ꓣꓳ ꓟ ꓠꓬ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓥꓳ꓿ 48 ꓠꓱꓸ ꓦꓱꓽ ꓗꓪ ꓟ ꓖꓳ ꓕꓲ ꓣꓳ ꓮ ꓡꓲ ꓥ ꓠꓬ꓾ ꓠꓱꓸ ꓦꓱꓽ ꓗꓪ ꓟ ꓞꓳ ꓤꓽˍ ꓟꓲ ꓖꓳ ꓡꓱ ꓥꓳ꓿ ꓟꓴꓽ ꓗꓪ ꓗꓪ ꓟ ꓖꓳ ꓕꓲ ꓣꓳ ꓮ ꓡꓲ ꓥ ꓠꓬ ꓟꓴꓽ ꓗꓪ ꓗꓪ ꓟ ꓞꓳ ꓤꓽˍ ꓟꓲ ꓬꓲ ꓖꓳ ꓡꓱ ꓗꓹ ꓥꓳ꓿ 49 ꓣꓳꓽ ꓠꓬ ꓠꓱꓸ ꓦꓱꓽ ꓗꓪ ꓟ ꓖꓳ ꓕꓲ ꓣꓳ ꓒꓬꓱꓽ ꓶꓻ ꓠꓬꓲˍ ꓟ ꓡꓰ ꓐꓰ꓾ ꓢ ꓖꓪ ꓠꓽ ꓟꓴꓽ ꓗꓪ ꓗꓪ ꓟ ꓖꓳ ꓕꓲ ꓣꓳ ꓒꓬꓱꓽ ꓶꓻ ꓡꓰˍ ꓥꓳ꓿ 50 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓠꓲꓹ ꓫꓵˍ ꓟ ꓠꓬ꓾ ꓧꓪꓽ ꓙꓳ ꓫꓵꓽ ꓙꓳˍ ꓟ ꓠꓬ ꓪꓴ-ꓢ ꓗꓴꓷ ꓟꓶ ꓟꓽ ꓓ꓿ ꓛꓵꓽ ꓡꓰˍ ꓟˍ ꓟꓲ ꓟꓽ ꓛꓵꓽ ꓡꓰˍ ꓟ ꓟꓶ ꓟꓽ ꓓ꓿ 51 ꓠ ꓠꓹ꓾ ꓥꓪ ꓠꓬ ꓠꓴ ꓪꓽ ꓔꓯ ꓚꓵ ꓘꓶꓽ ꓕꓲ ꓫꓵꓽ ꓐꓯ ꓖꓶˍ ꓠꓬꓲ꓾ ꓣꓳꓽ ꓮꓽ ꓙꓵ ꓠꓽ ꓫꓵꓻˍ ꓡꓳ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓐꓽ ꓡ ꓡꓳꓹ ꓬꓰ ꓕꓲ ꓧꓪꓹ ꓟ ꓟꓶ ꓡ ꓕꓯ꓾ ꓣꓳ ꓠꓬ ꓮꓽ ꓠꓬ ꓞꓼ ꓐꓰ ꓕꓲ ꓟꓬ ꓞꓲꓹˍ ꓗꓪ ꓑꓶꓸ ꓡꓰˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓐꓽ ꓡ ꓟꓶ ꓢꓲ꓾ ꓫꓵꓻ ꓢꓴ ꓔꓯ ꓠꓬ ꓢꓯꓸ ꓬꓲꓼ ꓡ ꓝꓲ ꓢꓲ ꓠꓬꓲ꓾ ꓛꓵꓽ ꓡꓰ ꓟꓽ ꓗꓴꓸ ꓟ ꓒꓬꓱꓼ ꓡ ꓢꓲ꓾ ꓣꓳꓽ ꓢꓯꓸ ꓔꓬ ꓢꓰꓽ ꓢꓴ ꓔꓯˍ ꓟꓲ ꓑꓶꓸ ꓡꓰ ꓝꓲˍ ꓥꓳ꓿ 53 ꓛꓵꓽ ꓡꓰ ꓓˍ ꓟ ꓕꓱ ꓟ ꓠꓬ ꓛꓵꓽ ꓡꓰ ꓟꓽ ꓓ ꓟ ꓖꓪꓽ ꓠ ꓗꓹ ꓢꓲ꓾ ꓫꓵꓻ ꓗꓴꓸˍ ꓟ ꓕꓱ ꓟˍ ꓟꓲ ꓫꓵꓻ ꓟꓽ ꓗꓴ ꓟ ꓖꓪꓽ ꓠ ꓗꓹ ꓥꓳ꓿ 54 ꓖꓳ ꓡꓱ ꓠꓬ ꓛꓵꓽ ꓡꓰ ꓓꓻˍ ꓟ ꓕꓱ ꓟ ꓠꓬ꓾ ꓛꓵꓽ ꓡꓰ ꓟꓽ ꓓ ꓟ ꓖꓪꓽ ꓗꓷ ꓢꓲ꓾ ꓫꓵꓻ ꓗꓴˍ ꓟ ꓕꓱ ꓟ ꓠꓬ ꓫꓵꓻ ꓟꓽ ꓗꓴꓸ ꓟ ꓖꓪꓽ ꓗꓷ ꓕꓯ꓾ ꓕꓳ ꓶ ꓗꓪ ꓐꓯ ꓔ ꓟ ꓡꓰ ꓐꓰ꓾ ꓧꓪꓸ ꓡꓰˍ ꓟ ꓡꓰ ꓫꓵꓻ ꓟ ꓔꓯ ꓖꓴ ꓓꓵꓽ ꓡꓰꓳ꓿ 55 ꓫꓵꓻ ꓟꓺꓳ꓾ ꓠꓴ ꓧꓪꓸ ꓡꓰˍ ꓟ ꓮꓺ ꓡꓲ ꓗꓪ ꓓꓻˍ ꓡ? ꓫꓵꓻ ꓟꓺꓳ꓾ ꓠꓴ ꓫꓵꓻ ꓓꓳꓼ ꓮꓺ ꓡꓲ ꓗꓪ ꓓꓹ ꓡ?꓾ ꓐꓰ ꓐꓳ ꓔ ꓟ ꓐꓯ ꓘꓶ ꓐꓲ ꓡ ꓥꓳ꓿ 56 ꓫꓵꓻ ꓓꓴ ꓓꓳꓼ ꓠꓬ ꓝꓴꓲ ꓥ ꓢꓲ꓾ ꓝꓴꓲ ꓓꓰꓺ ꓪꓽ ꓠꓬꓲˍ ꓟ ꓠꓬ ꓙꓵꓽ ꓗ ꓗꓪ ꓐꓰ ꓥ ꓡꓳ꓿ 57 ꓖꓳ ꓡꓱ ꓥ ꓟꓲ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓳꓽ ꓔꓯ ꓧꓪꓸ ꓡꓰ ꓝꓲ ꓢꓴ ꓪꓴ-ꓢ ꓔꓯ ꓫꓸ ꓟꓳ꓿ 58 ꓖꓳ ꓡꓱ ꓠꓬꓲ ꓥꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓟꓽ ꓶꓹ ꓡꓵ ꓡꓰ ꓝꓲ ꓝꓲ ꓦꓰꓼ ꓕꓶꓻ ꓞꓹ ꓢꓲ꓾ ꓮ ꓕꓯˍ ꓟꓲ ꓢꓲ ꓒꓽ ꓟꓬꓱꓽ ꓮꓽ ꓟꓬꓹ ꓬꓰ꓿ ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪꓽ ꓢꓯ ꓕꓵꓼ ꓪꓴꓽ ꓧꓶˍ ꓟ ꓠꓬ ꓮꓽ ꓔꓳˍ ꓡꓰ ꓟꓽ ꓥ ꓟ ꓠꓴ ꓪꓽ ꓢꓷˍ ꓡꓳ꓿

1 ꓘꓳ-ꓡꓱ-ꓕꓴ 16

1 ꓪꓴ-ꓢ ꓦ ꓡꓱ ꓢꓴ ꓐꓴ ꓐꓱ ꓶ ꓒꓴ ꓜꓲꓼˍ ꓟ ꓔꓯ ꓟꓳꓸ ꓐꓯˍ ꓠꓬ꓾ ꓖ-ꓡ-ꓕꓲ-ꓬ ꓘꓴ ꓜꓲꓼ ꓞꓳ ꓐꓴ ꓔꓯ ꓥꓪ ꓡꓰ ꓐꓯ ꓖꓶ ꓗꓷ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓖꓳ ꓡꓱ ꓬꓰ꓿ 2 ꓥꓪ ꓡꓻ ꓕꓯ ꓒꓴ ꓜꓲꓼ ꓡꓯꓽ ꓘꓳ ꓟꓽ ꓛꓵ ꓠꓹ ꓟ꓾ ꓠꓴ ꓪꓽ ꓮ ꓡꓲ ꓕꓲ ꓣꓳˍ ꓟꓲ꓾ ꓫꓵꓽ ꓠꓬꓲ ꓟ ꓬꓲ ꓪꓴꓸ ꓕꓲ ꓠꓬꓲ ꓗꓪ꓾ ꓪꓴ-ꓢ ꓡꓰ ꓮ ꓡꓲ ꓶꓼ ꓛꓳ ꓝꓲˍ ꓠꓬ ꓖꓳ ꓡꓱ ꓝꓰꓺ ꓔ꓿ 3 ꓖꓳ ꓡꓱ ꓢꓲ ꓥꓪ ꓛꓲ ꓡ ꓕꓯ ꓠꓴ ꓪꓽ ꓦ ꓡꓱ ꓐꓳˍ ꓟ ꓡ ꓞꓳ ꓐꓱ ꓶ ꓢꓷꓸ ꓙ ꓟꓳ ꓙ ꓕꓳ ꓶ ꓐꓳ ꓢꓲ꓾ ꓠꓴ ꓪꓽ ꓡꓰ ꓜꓲꓼ ꓔ ꓟ ꓒꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓔꓯꓹ ꓙꓰ ꓝꓲˍ ꓥꓳ꓿ 4 ꓥꓪˍ ꓟꓲ ꓙꓱ-ꓣꓴ-ꓢ-ꓡꓱ ꓗꓪ ꓙꓰ ꓠ ꓗꓷ ꓡꓰ ꓐꓷˍ ꓠꓬ꓾ ꓬꓲ ꓪꓽ ꓠꓽ ꓥꓪˍ ꓐꓰ ꓕꓲ ꓛꓳꓺꓼ ꓙꓰ ꓛꓵˍ ꓡꓳ꓿ 5 ꓥꓪ ꓠꓬ ꓟ-ꓢꓲ-ꓓꓳ ꓗꓪ ꓙꓰ ꓗꓷ ꓗꓸ ꓠꓯ ꓠꓴ ꓪꓽ ꓔꓬ ꓗꓪ ꓡꓻˍ ꓥꓳ꓿ 6 ꓥꓪ ꓮ ꓡꓲ ꓗꓪ ꓙꓰˍ ꓟꓲ꓾ ꓠꓴ ꓪꓽ ꓡꓰ ꓥꓪ ꓔꓯ ꓧꓳꓽ ꓦ ꓖꓶ ꓙꓰ ꓡ ꓠꓹ ꓟ꓾ ꓮꓽ ꓧꓪꓹ ꓠꓴ ꓪꓽˍ ꓐꓰ ꓕꓲ ꓝꓲꓸ ꓔꓬ꓾ ꓥ ꓠꓬ ꓕꓲ ꓟꓵꓽ ꓞꓴꓽ ꓗꓳꓸ ꓠ ꓗꓷ ꓡꓰˍ ꓟꓽ ꓢꓷ꓿ 7 ꓥꓪ ꓡꓻ ꓕꓯ꓾ ꓢꓲ ꓒꓽ ꓡꓰ ꓥꓪ ꓔꓯ ꓔꓬ ꓝꓲˍ ꓕꓯ ꓠꓽ꓾ ꓠꓴ ꓪꓽˍ ꓐꓰ ꓬꓲ ꓜꓶ ꓙꓻ ꓡꓯꓽ ꓘꓳ ꓟꓶ ꓠꓹ ꓟ꓾ ꓕꓲ ꓑꓹ ꓤꓽˍ ꓡꓰ ꓟꓽ ꓥ ꓥ꓾ ꓟꓶ ꓤ ꓕꓲ ꓝꓲꓸ ꓔꓬ ꓠꓹ ꓟ ꓥꓳ ꓡꓳꓸ ꓔꓬ ꓡꓳ꓿ 8 ꓖꓳ ꓡꓱ ꓥ ꓟꓲ ꓥꓪ ꓠꓬ ꓥꓪꓽ-ꓞꓲ-ꓠꓬꓲ-ꓑꓮꓲ ꓗꓪ ꓛꓲ꓾ ꓬꓲ-ꓩꓴ-ꓢꓳ ꓗꓪ ꓔꓬ ꓓꓴ ꓥꓳ꓿ 9 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓟꓬꓱꓽ ꓬꓲ ꓜꓶꓻ ꓬꓰ ꓪ ꓓꓻˍ ꓟ ꓗꓺ ꓘꓶ ꓬꓲ ꓓꓽ ꓟ ꓕꓲ ꓒꓰꓼ ꓥꓪ ꓐꓱ ꓶ ꓒꓴꓻ ꓞꓹ ꓡꓳ꓿ ꓒꓳꓹ ꓔꓳꓹ ꓢꓴˍ ꓟꓲ ꓮꓽ ꓟꓬꓹ ꓙꓳˍ ꓡꓳ꓿ 10 ꓕꓲ-ꓟꓳ-ꓕꓲ-ꓪꓴ ꓠꓴ ꓪꓽ ꓔꓬ ꓗꓪ ꓡꓻˍ ꓠꓬ꓾ ꓬꓲˍ ꓟꓲ ꓥꓪˍ ꓡꓰ ꓐꓰ ꓪꓴ-ꓢ ꓟꓬꓱꓽ ꓬꓰ ꓢꓴ ꓥ ꓠꓬꓲ꓾ ꓬꓲ ꓔꓯ ꓠꓲꓹ ꓒꓴ ꓒꓴ ꓘꓳ ꓣꓴ ꓖꓶ꓿ ꓮꓸ ꓫꓵ ꓙꓽ ꓫ ꓓꓴ ꓕꓽ ꓔꓳꓹ ꓜꓳꓽ ꓝꓲ꓿ 11 ꓮꓽ ꓟˍ ꓟꓲ ꓕꓲ-ꓟꓳ-ꓕꓲ-ꓪꓴ ꓔꓯ ꓟꓳꓻ ꓟꓽ ꓟꓵ ꓕꓽ ꓬꓰ ꓝꓲ꓿ ꓬꓲ ꓠꓬ ꓬꓲꓼ ꓤ ꓠꓬꓲ ꓤ ꓐꓴˍ ꓐꓰ ꓥꓪ ꓔꓬ ꓗꓪ ꓧꓪꓸ ꓧꓪˍ ꓛꓲ ꓡ ꓠꓹ ꓟ ꓠꓴ ꓪꓽ ꓡꓰ ꓧꓳꓽ ꓦ ꓙ ꓩꓴ ꓡꓯ꓿ ꓮ ꓡꓲꓳ ꓐꓯ ꓠꓬ ꓬꓲꓼ ꓤ ꓠꓬꓲ ꓤ ꓐꓴˍ ꓐꓰ ꓕꓲ ꓛꓳꓺꓼ ꓬꓲ ꓡ ꓠꓹ ꓟ ꓥꓪ ꓡꓳꓸ ꓔꓬ ꓡꓳ꓿ 12 ꓖꓳ ꓡꓱ ꓥ ꓟꓲ ꓠꓬꓲ ꓤ ꓬ-ꓑꓳ-ꓡꓳ ꓠꓽ ꓠꓬꓲ꓾ ꓬꓲꓼ ꓤ ꓠꓬꓲ ꓤ ꓐꓴˍ ꓐꓰ ꓕꓲ ꓛꓳꓺꓼ ꓠꓴ ꓪꓽ ꓔꓬ ꓗꓪ ꓡ ꓠꓹ ꓟ ꓥꓪ ꓬꓲ ꓔꓯ ꓮꓽ ꓘꓶꓸꓸ ꓓꓰꓽ ꓗꓷˍ ꓟꓲ꓾ ꓬꓲ ꓮ ꓟꓶ ꓡ ꓠꓲꓹ ꓟꓽ ꓫꓵ ꓢꓰꓽ꓿ ꓗꓸ ꓠꓯ ꓕꓯ ꓡ ꓐ ꓡ ꓠꓬ ꓡꓻˍ ꓥꓳ꓿ 13 ꓠꓴ ꓪꓽ ꓠꓬ ꓧꓪꓸ ꓛꓲꓽ ꓛꓲ ꓔꓬ꓿ ꓙꓵꓻˍ ꓟ ꓙ ꓖꓴ ꓗꓪ ꓕꓶꓻ ꓕꓶˍ ꓡꓰ ꓦꓰꓼ ꓞꓹ꓿ ꓞꓳ ꓑ ꓓꓽ ꓟ ꓡꓰ ꓐꓰ ꓬꓰ꓿ ꓢꓯꓼ ꓙꓳ ꓔꓬ꓿ 14 ꓠꓴ ꓪꓽ ꓮꓸ ꓫꓵ ꓬꓰˍ ꓟꓲ ꓠꓵꓻ ꓠꓲꓹ ꓣꓱꓽ ꓢꓲ ꓬꓰ꓿ 15 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓔꓯ ꓕꓲꓽ ꓫꓵꓽ ꓓꓰꓽˍ ꓠꓬꓲ꓾ ꓢꓶ-ꓕꓲ-ꓩ-ꓠ ꓕꓲ ꓦꓲ ꓢꓴ ꓠꓬ ꓮ-ꓘꓷ-ꓬ ꓟꓵꓽ ꓗꓪ ꓬꓲ ꓪꓴꓸ ꓦ ꓡꓱ ꓡ ꓢꓴ ꓥ ꓟ ꓐꓰ꓾ ꓬꓲ ꓪꓽ ꓠꓬ ꓪꓴ-ꓢ ꓘꓴ ꓜꓲ ꓞꓳ ꓔꓯ ꓣꓱꓽ ꓙ ꓠꓹ ꓟ ꓠꓲꓹ ꓟ ꓡꓱˍ ꓟ ꓠꓴ ꓪꓽ ꓢꓷˍ ꓡꓳ꓿ 16 ꓖꓳ ꓡꓱ ꓠꓬꓲ ꓠꓴ ꓪꓽˍ ꓟꓲ ꓟꓬꓱꓽ ꓗꓪ ꓕꓱ ꓡꓱ ꓣꓱꓽ ꓙ ꓢꓴˍ ꓐꓰ꓾ ꓢꓯꓼ ꓕꓵꓼ ꓪꓴꓽ ꓧꓶ ꓢꓴ ꓮꓽ ꓟ ꓔꓯ ꓥ ꓟꓲ꓾ ꓬꓲ ꓪꓽ ꓧꓳꓽˍ ꓟ ꓔꓯ ꓛꓳ ꓠꓹ ꓟ ꓠꓴ ꓪꓽ ꓔꓯ ꓥꓪ ꓓꓰꓽˍ ꓥꓳ꓿ 17 ꓝꓮꓲ ꓢꓶ-ꓕꓲ-ꓩ-ꓠ ꓐꓰ ꓩꓴ-ꓕꓴ-ꓠ-ꓔꓷˍ ꓐꓰ꓾ ꓮ-ꓘꓷ-ꓬ-ꓗꓴ ꓕꓱ ꓗꓪ ꓛꓲ ꓡ ꓟ ꓗꓪ ꓐꓰ ꓥꓪ ꓗꓹ ꓛꓲˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓲꓹ ꓗꓴꓺ ꓖꓶ ꓡꓯꓼ ꓟꓽ ꓛꓲ ꓟ ꓗꓪ ꓬꓲ ꓪꓽ ꓡꓰ ꓡꓯꓼ ꓛꓲ ꓖꓶ ꓡ ꓠꓬꓲ꓾ 18 ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓢꓰꓺ ꓡꓰ ꓝꓲ ꓟ ꓡꓰ ꓐꓰ ꓥꓪ ꓔꓯˍ ꓟꓲ ꓢꓰꓺ ꓡꓰ ꓝꓲꓳ꓿ ꓖꓳ ꓡꓱ ꓠꓬꓲ ꓕꓱ ꓡꓱ ꓡꓴ ꓫꓵꓽ ꓡ ꓞꓳ ꓔꓯ ꓠꓴ ꓪꓽ ꓡꓰ ꓞꓳ ꓒꓵꓽ ꓠꓯꓹ ꓡꓳ꓿ 19 ꓮ-ꓢꓲ-ꓬ ꓘꓴ ꓜꓲ ꓞꓳ ꓐꓴ ꓡꓰ ꓠꓴ ꓪꓽ ꓔꓯ ꓒꓵꓽ ꓗ ꓬꓰˍ ꓡꓳ꓿ ꓬꓹ-ꓚꓲ-ꓡꓽˍ ꓐꓰ ꓑꓷ-ꓚꓲ-ꓡˍ ꓐꓰ ꓬꓲ ꓪꓽ ꓦꓲ ꓗꓪ ꓔꓬ ꓟ ꓘꓴ ꓜꓲꓼ ꓞꓳ ꓡꓰ꓾ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪꓽ ꓔꓯ ꓠꓲꓹ ꓡꓱ ꓡꓱˍ ꓡꓰꓽ ꓒꓵꓽ ꓗ ꓬꓰˍ ꓡꓳ꓿ 20 ꓕꓻ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴ ꓮꓽ ꓙꓵˍ ꓟꓲ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ ꓕꓲ ꓣꓳ ꓛꓳ ꓕꓲ ꓣꓳ ꓢꓲꓽ ꓢꓲ ꓫꓬꓻ ꓫꓬ ꓡꓰ ꓐꓳꓼ ꓡꓯꓽ ꓘꓳ ꓢꓲ ꓒꓵꓽ ꓗ ꓬꓰ꓿ 21 ꓒꓳ-ꓡꓳ ꓥꓪ ꓠꓬ ꓚꓲ ꓛꓬ ꓡꓯꓽ ꓒꓯꓹ ꓡꓰ ꓕꓳ ꓶ ꓕꓱ ꓟ ꓐꓳ ꓢꓲ ꓒꓵꓽ ꓗ ꓬꓰ ꓩꓴ ꓡ ꓥꓳ꓿ 22 ꓢꓲ ꓒꓽ ꓔꓯ ꓟꓽ ꓠꓲꓹ ꓠꓵ ꓢꓴ ꓙꓳˍ ꓕꓯ ꓠꓽ꓾ ꓬꓲ ꓔꓯ ꓙꓱꓽ ꓔ ꓟ ꓗꓷ ꓡꓰ ꓝꓲ꓿ ꓢꓲ ꓒꓽꓳ꓾ ꓮꓸ ꓟꓲꓸ ꓬꓯꓼ ꓡꓯ꓿ 23 ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰ ꓠꓬ ꓠꓴ ꓪꓽˍ ꓐꓰ ꓙꓳ ꓝꓲ꓿ 24 ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓥꓪ ꓠꓵꓻ ꓠꓲꓹ ꓠꓬ ꓠꓴ ꓪꓽ ꓮꓽ ꓙꓵ ꓢꓴˍ ꓐꓰ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

2 ꓘꓳ-ꓡꓱ-ꓕꓴ 1

1 ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ꓾ ꓙꓲ-ꓢꓴ ꓬꓰ-ꓢꓴ ꓬꓲ ꓝꓲ ꓓꓴ ꓬꓰˍ ꓟ ꓒꓳ-ꓡꓳ ꓥꓪˍ ꓐꓰ ꓣꓳ ꓠꓬꓲ ꓤ ꓕꓲ-ꓟꓳ-ꓕꓲ-ꓪꓴ ꓡꓰ꓾ ꓘꓳ-ꓡꓱ-ꓕꓴ ꓗꓪ ꓔꓬ ꓟ ꓪꓴ-ꓢ ꓘꓴ ꓜꓲ ꓞꓳˍ ꓐꓰ꓾ ꓮ-ꓘꓷ-ꓬꓼ ꓕꓲ ꓟꓵ ꓡꓱꓸꓼ ꓗꓪ ꓔꓬ ꓟ ꓪꓴ-ꓢ ꓦ ꓡꓱ ꓢꓴ ꓮꓽ ꓙꓵ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ 2 ꓣꓳ ꓐꓹ ꓐ ꓪꓴ-ꓢˍ ꓐꓰ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 3 ꓣꓳ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓪꓴ-ꓢˍ ꓐꓰ ꓬꓲ ꓐꓹ ꓐ ꓠꓬ꓾ ꓫꓱꓸ ꓤˍ ꓟ ꓮꓽ ꓙꓵ ꓬꓲ ꓐꓹ ꓐˍ ꓐꓰ ꓠꓲꓹ ꓗꓴ ꓖꓶ ꓟ ꓥ ꓕ ꓑꓳꓸ ꓖꓶ ꓢꓴ ꓪꓴ-ꓢ ꓥ ꓠꓬꓲ꓾ ꓬꓲ ꓔꓯ ꓫꓱꓸ ꓖꓶˍ ꓟ ꓟꓶ ꓝꓲ꓿ 4 ꓪꓴ-ꓢ ꓠꓬ ꓣꓳ ꓫꓸ ꓙꓵˍ ꓟ ꓮꓽ ꓙꓵ ꓗꓪ ꓠꓲꓹ ꓟ ꓗꓴ ꓖꓶ ꓡ ꓠꓬꓲ꓾ ꓬꓲ ꓡꓰ ꓖꓶ ꓡ ꓟ ꓠꓲꓹ ꓗꓴ ꓓꓴ ꓡꓰ ꓣꓳꓽˍ ꓟꓲ ꓢꓴ ꓫꓸ ꓙꓵꓻˍ ꓟ ꓗꓪ ꓬꓲ ꓪꓽ ꓔꓯ ꓠꓲꓹ ꓗꓴ ꓖꓶˍ ꓡꓳ꓿ 5 ꓙꓲ-ꓢꓴ ꓫꓸ ꓙꓵˍ ꓟ ꓣꓳꓽ ꓮꓽ ꓟꓬꓹ ꓑꓯꓹ ꓟꓶˍ ꓟ ꓡꓰ ꓐꓰ꓾ ꓬꓲ ꓗꓪ ꓐꓰ ꓠꓲꓹ ꓗꓴ ꓓꓴˍ ꓟꓲ ꓣꓳꓽ ꓮꓽ ꓟꓬꓹ ꓑꓯꓹ ꓟꓶˍ ꓡꓳ꓿ 6 ꓥꓪ ꓠꓴꓽ ꓫꓸ ꓙꓵ ꓠ ꓗꓹ ꓐꓷˍ ꓠꓬ꓾ ꓠꓴ ꓪꓽ ꓔꓯ ꓠꓲꓹ ꓗꓴ ꓖꓶ ꓠꓹ ꓟ ꓐꓰ ꓚꓬꓴ ꓟꓶ ꓝꓲ ꓠꓹ ꓟ ꓥ ꓡꓳ꓿ ꓥꓪ ꓠꓴꓽ ꓠꓲꓹ ꓗꓴ ꓖꓶ ꓓꓴ ꓟꓶˍ ꓟ ꓠꓬ꓾ ꓠꓴ ꓪꓽ ꓔꓯˍ ꓟꓲ ꓠꓲꓹ ꓗꓴ ꓖꓶ ꓓꓴ ꓟꓶ ꓡꓰ ꓝꓲ ꓠꓹ ꓟ ꓥ ꓢꓲ꓾ ꓥꓪ ꓠꓴˍ ꓐꓰ ꓕꓲ ꓡꓰꓹꓼ ꓫꓸ ꓙꓵˍ ꓟ ꓔꓯ ꓠꓴ ꓪꓽ ꓜꓲꓽ ꓘꓴ ꓠꓹ ꓟ ꓥ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓫꓸ ꓙꓵˍ ꓟ ꓠꓴ ꓪꓽ ꓑꓯꓹ ꓟꓶˍ ꓟ ꓡꓰ ꓐꓰ꓾ ꓠꓲꓹ ꓟ ꓗꓴ ꓖꓶ ꓓꓴˍ ꓟꓲ ꓠꓴ ꓪꓽ ꓑꓯꓹ ꓟꓶˍ ꓥꓳ꓾ ꓐꓰ ꓢꓷˍ ꓠꓬꓲ꓾ ꓠꓴ ꓪꓽ ꓔꓯ ꓥꓪ ꓠꓴꓽ ꓦ ꓡꓱ ꓐꓳˍ ꓟ ꓠꓬ ꓕꓶꓻˍ ꓟ ꓥ ꓡꓳ꓿ 8 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ-ꓢꓲ-ꓬ ꓗꓪ ꓥꓪ ꓠꓴꓽ ꓫꓸ ꓙꓵ ꓓꓴ ꓔꓳꓹ ꓜꓳˍ ꓟ ꓕꓱ ꓟ ꓠꓴ ꓪꓽ ꓔꓯˍ ꓟꓲ ꓢꓷ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ ꓖꓳ ꓗꓪ ꓫꓸ ꓙꓵꓻˍ ꓟ ꓡꓰ ꓥꓪ ꓠꓴ ꓢꓯꓼ ꓟꓬ ꓮꓽ ꓡꓻ ꓟꓶꓽ ꓬꓰ ꓗꓪ ꓛꓲ꓾ ꓥꓪ ꓠꓴꓽ ꓔꓯ ꓜꓲꓽ ꓟꓽ ꓘꓴ ꓘꓴ ꓮꓽ ꓘꓶꓸ ꓠꓬꓲꓸ ꓞꓹ ꓟ ꓗꓷ ꓡꓰ ꓠꓬꓲ꓾ 9 ꓥꓪ ꓠꓴꓽ ꓠꓬ ꓮ ꓡꓲ ꓥ ꓟꓲ ꓫꓵꓻ ꓡ ꓓꓴ ꓥꓳ꓾ ꓐꓰ ꓓꓵꓽ ꓙꓽ ꓗꓷꓳ꓿ ꓖꓳ ꓡꓱ ꓥ ꓟꓲ ꓕꓱ ꓡꓱ ꓗꓷ ꓡꓰ ꓟ ꓠꓽ꓾ ꓥꓪ ꓠꓴꓽ ꓚꓲ ꓛꓬ ꓔꓯ ꓥꓪ ꓠꓴꓽ ꓟꓽ ꓦ ꓡꓱ ꓡꓱ꓾ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓴ ꓪꓴ-ꓢ ꓔꓯˍ ꓡꓰ ꓪꓽ ꓪꓴꓽ ꓘꓳꓹ ꓝꓲ ꓠꓹ ꓟ ꓥ ꓐꓷ꓿ 10 ꓫꓵꓻ ꓡ ꓓꓴ ꓙꓲꓻ ꓣꓴ ꓟ ꓬꓲꓸ ꓓꓽ ꓟ ꓖꓳ ꓟ ꓗꓪ ꓐꓰ ꓬꓲ ꓡꓰ ꓥꓪ ꓠꓴꓽ ꓔꓯ ꓚꓬꓴ ꓓꓳ ꓡꓺꓳ꓿ ꓡꓻ ꓠꓹ ꓟ ꓦꓬꓼ ꓠꓬꓲ ꓗꓪˍ ꓟꓲ ꓠꓴ ꓪꓽ ꓡꓰ ꓪꓽ ꓘꓴ ꓙˍ ꓟ ꓗꓪ ꓐꓰ ꓪꓴ-ꓢ ꓡꓰ ꓥꓪ ꓠꓴꓽ ꓔꓯ ꓡꓯꓽ ꓫꓵ ꓚꓬꓴ ꓙ ꓡ ꓥꓳ꓾ ꓐꓰ ꓥꓳ ꓡꓳꓸ ꓔꓬ ꓥꓳ꓿ 11 ꓠꓴ ꓪꓽ ꓮꓽ ꓟꓬꓹ ꓣꓳ ꓡꓰ ꓪꓽ ꓘꓴ ꓙˍ ꓟ ꓑꓶꓸ ꓓꓴ꓾ ꓪꓴ-ꓢ ꓡꓰ ꓥꓪ ꓠꓴꓽ ꓔꓯ ꓶꓼ ꓤ ꓫꓱꓹ ꓤ ꓖꓶ ꓡ ꓠꓬꓲ꓾ ꓡ ꓞꓳ ꓮꓽ ꓟꓬꓹ ꓣꓳ ꓥꓪ ꓠꓴ ꓐꓱ ꓶ ꓬꓲ ꓔꓯ ꓫꓸ ꓟꓳ ꓐꓯˍ ꓥꓳ꓿ 12 ꓟꓲ ꓠꓯ ꓗꓪ ꓥꓪ ꓠꓴꓽ ꓞꓳꓻ ꓙꓳ ꓢꓲ ꓠꓴ ꓪꓽˍ ꓐꓰ ꓙꓻ ꓡꓯꓽ ꓘꓳˍ ꓟ ꓗꓪ꓾ ꓥꓪ ꓠꓴꓽ ꓠꓬ ꓟꓲ ꓠꓯ ꓞꓳ ꓤ ꓙꓽ ꓗꓴꓸ ꓠꓲꓹ ꓗꓪ ꓐꓰ ꓟꓽ ꓥ ꓥ꓾ ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓟꓶˍ ꓟ꓾ ꓠꓲꓹ ꓔꓱꓹ ꓠꓲꓹ ꓓꓰˍ ꓟ ꓐꓰ ꓠꓲꓹ ꓒꓵꓽ ꓠꓲꓹ ꓡꓱˍ ꓟ ꓣꓱꓽ ꓢꓲ ꓙꓻ ꓡꓯꓽ ꓘꓳ ꓟꓶ ꓡꓰ ꓠꓬꓲ꓾ ꓥꓪ ꓠꓴꓽ ꓠꓲꓹ ꓪꓴꓽ ꓓꓴ ꓓꓽ ꓟ ꓓꓴ ꓙꓳˍ ꓡꓳ꓿ ꓕꓱ ꓟ ꓔꓯ ꓥꓪ ꓠꓴꓽ ꓦꓰꓽ ꓠꓲꓹˍ ꓟꓲ ꓢꓷꓸ ꓙ ꓟꓳ ꓙˍ ꓡꓳ꓿ 13 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓥꓪ ꓠꓴꓽ ꓡꓰ ꓐꓳ ꓖꓶˍ ꓟ ꓕꓳ ꓶ ꓕꓱ ꓟ ꓠꓬ꓾ ꓠꓴ ꓪꓽ ꓵ ꓟꓽ ꓗꓴꓸ ꓟ ꓐꓰ ꓙ ꓜꓲꓼ ꓟꓽ ꓐ ꓡ ꓟ ꓟꓽ ꓥ꓿ ꓠꓴ ꓪꓽ ꓠꓬ ꓮ ꓟꓶ ꓥꓪ ꓠꓴꓽ ꓔꓯꓸ ꓟꓳꓸ ꓕꓲ ꓐꓱꓻ ꓤꓽˍ ꓡꓰꓽ ꓙ ꓜꓲꓼˍ ꓟꓲ꓾ ꓟꓶ ꓤ ꓟꓽ ꓥ ꓠꓬ ꓮꓽ ꓙꓵ ꓡꓱꓸꓼ ꓙ ꓜꓲꓼ ꓡꓰ ꓢꓲ꓾ 14 ꓣꓳ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓦꓬꓼ ꓠꓬꓲ ꓗꓪ ꓠꓴ ꓪꓽ ꓠꓬ ꓥꓪ ꓠꓴꓽ ꓘꓶꓽ ꓘꓹ ꓓꓴ ꓥ ꓟ ꓡꓰ ꓐꓰ꓾ ꓥꓪ ꓠꓴꓽˍ ꓟꓲ ꓠꓴ ꓪꓽ ꓘꓶ ꓘꓹ ꓓꓴ ꓒꓬꓱꓼ ꓡ ꓥꓳ꓾ ꓐꓰ ꓥꓪ ꓥꓳ ꓡꓳꓸˍ ꓡꓳ꓿ 15 ꓕꓱ ꓟ ꓔꓯ ꓥꓪ ꓦ ꓡꓱ ꓐꓳˍ ꓠꓬꓲ꓾ ꓠꓴ ꓪꓽ ꓠꓬ ꓙꓲꓻ ꓖꓴ ꓠꓬꓲꓽ ꓧꓪꓹ ꓟꓶ ꓡꓰ ꓠꓹ ꓟ꓾ ꓥꓪ ꓠꓬ ꓠꓴ ꓪꓽ ꓔꓬ ꓗꓪ ꓡ ꓠꓹ ꓟ ꓚꓴꓽ ꓬꓲꓹ ꓓꓶꓽ ꓗꓷ ꓟ ꓥꓳ꓿ 16 ꓥꓪ ꓓꓵꓽ ꓙ ꓗꓷ ꓟ ꓠꓬ꓾ ꓟ-ꓢꓲ-ꓓꓳ ꓗꓪ ꓥꓪ ꓙꓰˍ ꓕꓯ ꓠꓴ ꓪꓽ ꓔꓬ ꓗꓪ ꓚꓳ ꓡ ꓢꓲ꓾ ꓖꓳ ꓗꓪ ꓐꓰ ꓡꓽ ꓡ ꓕꓯˍ ꓟꓲ꓾ ꓠꓴ ꓪꓽ ꓔꓬ ꓗꓪ ꓝꓮꓲ ꓚꓳ ꓛꓲ ꓡ ꓝꓲ ꓢꓲ ꓠꓬꓲ꓾ ꓖꓳ ꓗꓪ ꓐꓰ ꓠꓴ ꓪꓽ ꓡꓰ ꓥꓪ ꓔꓯ ꓬꓴ-ꓔ ꓟꓵꓽ ꓗꓪ ꓧꓳꓽ ꓦ ꓙꓰ ꓝꓲ ꓠꓹ ꓟ ꓓꓵꓽ ꓙꓽˍ ꓡꓳ꓿ 17 ꓥꓪ ꓕꓱ ꓡꓱ ꓚꓴꓽ ꓬꓲꓹ ꓓꓶˍ ꓟ ꓠꓬ ꓒꓳꓹ ꓙꓰ ꓒꓳꓹ ꓡ ꓗꓹ ꓟ ꓥ ꓡ? ꓥ ꓠꓬ ꓥꓪ ꓚꓴꓽ ꓬꓲꓹ ꓓꓶˍ ꓟ ꓠꓬ ꓟꓲ ꓠꓯ ꓗꓪ ꓧꓪꓽ ꓠꓲꓹ ꓡꓶꓽ ꓔꓯ ꓛꓳ ꓢꓴ ꓐꓴˍ ꓡꓰ ꓐꓰ꓾ ꓟꓽ ꓥ ꓟ ꓔꓯ꓾ ꓥꓳ꓾ ꓥꓳ꓾ ꓥ ꓠꓬ꓾ ꓥ ꓟ ꓔꓯˍ ꓟꓲ꓾ ꓟꓽ ꓥ꓾ ꓟꓽ ꓥ꓾ ꓐꓰ ꓐꓯ ꓔꓬ ꓟ ꓥ ꓡ? 18 ꓪꓴ-ꓢ ꓠꓬ ꓦ ꓡꓱ ꓐꓳˍ ꓟ ꓥ ꓟ ꓡꓰ ꓐꓰ꓾ ꓠꓴ ꓪꓽ ꓔꓯ ꓥꓪ ꓠꓴꓽ ꓐꓯ ꓖꓶˍ ꓟ ꓠꓬ꓾ ꓥ ꓡꓳ꓾ ꓐꓰ꓾ ꓟꓽ ꓥ꓾ ꓠꓬꓲꓽ ꓒꓳꓹ ꓠꓬꓲ ꓫꓵꓽ ꓐꓯˍ ꓟ ꓟꓽ ꓥ꓿ 19 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ꓾ ꓥꓪˍ ꓐꓰ ꓫꓲ-ꓡˍ ꓐꓰ ꓕꓲ-ꓟꓳ-ꓕꓲ-ꓪꓴ꓾ ꓥꓪ ꓠꓴꓽ ꓢ ꓣꓳ ꓡꓰ ꓚ ꓟꓸ ꓖꓶˍ ꓟ ꓪꓴ-ꓢ ꓬꓲ ꓮ ꓐꓲ ꓬꓰ-ꓢꓴ ꓙꓲ-ꓢꓴ ꓬꓲ ꓠꓬ꓾ ꓥ ꓡꓳ꓾ ꓐꓰ꓾ ꓟꓽ ꓥ꓾ ꓐꓰ ꓠꓬꓲꓽ ꓒꓳꓹ ꓠꓬꓲ ꓫꓵꓽ ꓟꓽ ꓙꓳ꓿ ꓬꓲ ꓠꓯꓸꓼ ꓗꓪ ꓠꓬ꓾ ꓥ ꓡꓳ꓾ ꓐꓰˍ ꓡꓰꓽ ꓥꓳ꓿ 20 ꓪꓴ-ꓢ ꓙ ꓟꓳ ꓘꓶ ꓠꓬ ꓮꓺ ꓟꓬ ꓛꓲ ꓙꓳˍ ꓟꓲ꓾ ꓮꓽ ꓙꓵ ꓡꓱꓸꓼ ꓙꓲ-ꓢꓴ ꓠꓯꓸꓼ ꓗꓪ꓾ ꓥ ꓡꓳ꓾ ꓐꓰˍ ꓡꓰꓽ ꓥꓳ꓿ ꓕꓱ ꓟ ꓑꓶꓸ ꓓꓴ ꓥꓪ ꓠꓴꓽ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓐꓯˍ ꓟˍ ꓟꓲ ꓬꓲ ꓗꓪ ꓐꓰˍ ꓡꓰꓽ ꓥꓳ꓿ 21 ꓙꓲ-ꓢꓴ ꓠꓯꓸꓼ ꓗꓪ ꓥꓪ ꓠꓴꓽˍ ꓐꓰ ꓠꓴ ꓪꓽ ꓔꓯ ꓕꓶ ꓡꓰ ꓝꓲ ꓢꓲ꓾ ꓣꓳ ꓔꓯ ꓟꓰ ꓞꓶꓻ ꓟꓰ ꓖꓶ ꓡ ꓢꓴ ꓠꓬ ꓪꓴ-ꓢ ꓥ ꓡꓳ꓿ 22 ꓝꓮꓲ ꓣꓳ ꓠꓬ ꓬꓲꓸ ꓶꓽ ꓥ ꓟ ꓢꓷꓸ ꓡꓰ ꓓꓴ ꓣꓳ ꓔꓯ ꓔꓳꓹ ꓠꓷꓼ ꓔ ꓢꓲ꓾ ꓢꓹ ꓖꓪ ꓡꓻ ꓠꓯꓹ ꓟ ꓔꓯꓸ ꓟꓳ꓾ ꓒꓳꓹ ꓟꓽ ꓓ ꓟ ꓬꓲꓸ ꓗꓸ ꓚꓵ ꓬꓰ ꓠꓹ ꓟ꓾ ꓬꓲ ꓢꓲ-ꓫꓬ-ꓟ-ꓦˍ ꓟꓲ ꓬꓲ ꓡꓰ ꓣꓳ ꓠꓲꓹ ꓟ ꓠꓯS ꓗꓪ ꓖꓶ ꓡꓺꓳ꓿ 23 ꓘꓳ-ꓡꓱ-ꓕꓴ ꓗꓪ ꓥꓪ ꓟꓽ ꓡ ꓟ ꓬꓲ ꓑꓶ ꓠꓬ꓾ ꓠꓴ ꓪꓽ ꓔꓯ ꓥꓪ ꓠꓲꓹ ꓟ ꓦꓲꓺ ꓖꓶ ꓠꓹ ꓟ ꓥ ꓡꓳ꓾ ꓐꓰ꓾ ꓪꓴ-ꓢ ꓠꓬ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓬꓰ ꓝꓲ ꓠꓹ ꓟ ꓓꓰꓽˍ ꓥꓳ꓿ 24 ꓠꓴ ꓪꓽ ꓠꓬ ꓙꓵꓻ ꓠꓲꓹ ꓗꓪ ꓕꓶꓻ ꓞꓹ ꓠꓬꓲ꓾ ꓥꓪ ꓠꓴꓽ ꓡꓰ ꓠꓴ ꓪꓽ ꓙꓵ ꓚꓱꓹ ꓔꓯ ꓙꓵꓽ ꓟꓽ ꓛꓵꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓴꓽ ꓠꓽ ꓠꓴ ꓪꓽˍ ꓐꓰ ꓕꓲ ꓛꓳꓺꓼ ꓟꓬꓱꓽ ꓬꓰ ꓛꓳꓽ ꓒꓯꓹ ꓥ ꓢꓲ꓾ ꓠꓴ ꓪꓽ ꓔꓯ ꓗꓹ ꓛꓲ ꓡꓰ ꓝꓲ ꓠꓲꓹ ꓫꓵˍ ꓡꓳ꓿

2 ꓘꓳ-ꓡꓱ-ꓕꓴ 2

1 ꓖꓳ ꓡꓱ ꓠꓬꓲ ꓥꓪ ꓝꓮꓲ ꓕꓲ ꓧꓪꓹ ꓠꓴ ꓪꓽ ꓔꓬ ꓗꓪ ꓡꓻ ꓕꓯ꓾ ꓠꓴ ꓪꓽ ꓔꓯ ꓠꓲꓹ ꓟ ꓫꓸ ꓡꓰ ꓝꓲ ꓟꓽ ꓛꓵ ꓠꓹ ꓟ ꓥꓪ ꓓꓵ ꓙꓽ ꓞꓷꓹ ꓗꓷꓳ꓿ 2 ꓮ ꓡꓲꓳ ꓐꓯ ꓠꓬ ꓥꓪ ꓡꓰ ꓠꓴ ꓪꓽ ꓔꓯ ꓠꓲꓹ ꓟ ꓫ ꓡꓰ ꓝꓲˍ ꓕꓯ ꓠꓽ꓾ ꓠꓲꓹ ꓟ ꓫꓸˍ ꓟ ꓔꓳꓹ ꓜꓳꓽ ꓢꓴ ꓠꓴ ꓪꓽ ꓡꓰ ꓟꓽ ꓥ ꓠꓬ꓾ ꓥꓪ ꓔꓯ ꓠꓲꓹ ꓒꓴ ꓡꓰ ꓝꓲ ꓢꓴ ꓮꓽ ꓟ ꓙꓳ ꓢꓰꓽ꓿ 3 ꓥꓪ ꓛꓲ ꓡ ꓕꓯ꓾ ꓥꓪ ꓔꓯ ꓗꓹ ꓛꓲꓽ ꓡꓰ ꓝꓲ ꓠꓯꓹ ꓟ ꓖꓳ ꓕꓲ ꓧꓳꓽ ꓡꓰ ꓥꓪ ꓔꓯ ꓠꓲꓹ ꓟ ꓫꓸ ꓡꓰ ꓝꓲˍ ꓟ ꓔꓯ ꓗꓳꓺ ꓚꓱ ꓠꓬꓲ꓾ ꓥꓪ ꓠꓬ ꓠꓴ ꓪꓽ ꓔꓯ ꓧꓶꓸ ꓕꓯˍ ꓡꓰ ꓬꓲ ꓕꓱ ꓡꓱ ꓐꓳ ꓖꓶ ꓗꓷ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓗꓹ ꓛꓲꓽ ꓓꓴ ꓠꓬ ꓠꓴ ꓪꓽ ꓮꓽ ꓙꓵ ꓢꓴ ꓗꓹ ꓛꓲꓽ ꓓꓴˍ ꓟꓲ ꓥꓳ꓾ ꓐꓰ ꓥꓪ ꓦ ꓡꓱ ꓐꓳˍ ꓡꓳ꓿ 4 ꓠꓴ ꓪꓽ ꓔꓯ ꓐꓳ ꓖꓶ ꓗꓷ ꓟ ꓠꓬ꓾ ꓠꓴ ꓪꓽ ꓔꓯ ꓠꓲꓹ ꓟ ꓫꓸ ꓡꓰ ꓝꓲ ꓠꓹ ꓟ ꓟꓽ ꓥ꓿ ꓥꓪ ꓠꓲꓹ ꓟ ꓮ ꓘꓶ ꓫꓸ ꓢꓲ ꓠꓲꓹ ꓟ ꓠꓻ ꓠꓬꓲ꓾ ꓟꓬ ꓐꓲ ꓮꓽ ꓟꓬꓹ ꓓꓳ ꓠꓬꓲˍ ꓐꓰ꓾ ꓠꓴ ꓪꓽ ꓔꓯ ꓥꓪ ꓮ ꓘꓶꓻ ꓛꓲ ꓠꓲꓹ ꓠꓵˍ ꓟ ꓢꓷꓸ ꓡꓰ ꓝꓲ ꓠꓹ ꓟ ꓐꓳ ꓖꓶ ꓗꓷ ꓟ ꓥ ꓡꓳ꓿ 5 ꓖꓳ ꓡꓱ ꓥ ꓟꓲ ꓠꓲꓹ ꓟ ꓫꓸ ꓡꓰ ꓝꓲ ꓢꓴ ꓙꓳ ꓐꓷˍ ꓠꓬ꓾ ꓥꓪ ꓔꓯˍ ꓡꓰ ꓠꓲꓹ ꓟ ꓫꓸ ꓡꓰ ꓝꓲˍ ꓟ ꓟꓽ ꓥ꓿ ꓠꓴ ꓪꓽ ꓮꓽ ꓙꓵ ꓢꓴ ꓔꓯˍ ꓟꓲ ꓮ ꓔꓲꓸ ꓤ ꓠꓲꓹ ꓟ ꓫꓸ ꓡꓰ ꓝꓲˍ ꓟ ꓥ ꓡꓳ꓿ 6 ꓕꓱ ꓡꓱ ꓫꓵ ꓡ ꓞꓳ ꓔꓯ ꓠꓽ ꓠꓴ ꓪꓽ ꓟꓬꓽˍ ꓟ ꓕꓲ ꓐꓱꓻ ꓟ ꓡꓰ ꓟꓸ ꓙ ꓗꓷˍ ꓟ ꓡꓳꓼˍ ꓥꓳ꓿ 7 ꓕꓱ ꓡꓱ ꓫꓵꓽ ꓡ ꓞꓳ ꓬꓲ ꓠꓲꓹ ꓟ ꓫꓸ ꓟꓬꓽ ꓡꓰˍ ꓟ ꓡꓰ ꓬꓲ ꓔꓯ ꓟꓽ ꓖꓴꓻ ꓓꓵꓽ ꓡꓰ ꓠꓹ ꓟ꓾ ꓠꓴ ꓪꓽ ꓠꓽ ꓬꓲ ꓔꓯ ꓖꓽ ꓖꓶ ꓢꓲ ꓠꓲꓹ ꓟ ꓗꓴ ꓖꓶˍ ꓠꓬ ꓙꓲꓻˍ ꓡꓳ꓿ 8 ꓖꓳ ꓡꓱ ꓠꓬꓲ ꓬꓲ ꓔꓯ ꓟꓳꓸ ꓠꓴ ꓪꓽ ꓠꓵ ꓠꓲꓹ ꓝꓮꓲ ꓟꓳꓸ ꓖꓶ ꓠꓹ ꓟ꓾ ꓥꓪ ꓠꓬ ꓠꓴ ꓪꓽ ꓔꓯ ꓘꓶꓸ ꓖꓶ ꓠꓲꓹ ꓫꓵˍ ꓡꓳ꓿ 9 ꓠꓴ ꓪꓽ ꓠꓬ ꓮꓸ ꓫꓵ ꓗꓪˍ ꓟꓲ ꓥꓪ ꓐꓯ ꓘꓶ ꓔꓯ ꓒꓵꓽ ꓛꓳ ꓟꓽ ꓒꓵ ꓛꓳˍ ꓟ ꓥꓪ ꓢꓷꓸ ꓡꓰ ꓠꓹ ꓟ꓾ ꓠꓴ ꓪꓽ ꓔꓯ ꓥꓪ ꓡꓰ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓗꓷ ꓟ ꓥꓳ꓿ 10 ꓠꓴ ꓪꓽ ꓡꓰ ꓖꓽ ꓖꓶ ꓗꓷ ꓢꓴ ꓔꓯ ꓠꓬ ꓥꓪˍ ꓟꓲ ꓖꓽ ꓖꓶˍ ꓥꓳ꓿ ꓥꓪ ꓖꓽ ꓖꓶ ꓗꓷ ꓟ ꓮꓸ ꓫꓵ ꓙꓳˍ ꓕꓯ ꓠꓽ꓾ ꓖꓳ ꓟ ꓠꓬ ꓙꓲ-ꓢꓴ ꓟꓲꓽ ꓙꓬ ꓗꓪ ꓠꓴ ꓪꓽ ꓐꓱ ꓶ ꓬꓰ ꓗꓷ ꓟ ꓥ ꓡꓳ꓿ 11 ꓣꓳ ꓕꓱ ꓡꓱ ꓖꓽ ꓖꓶˍ ꓟ ꓠꓬ ꓢ-ꓓꓯ ꓡꓰ ꓣꓳ ꓔꓯ ꓟꓽ ꓧꓪꓸ ꓡꓰ ꓠꓹ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓚꓴꓽ ꓬꓲꓹ ꓔꓯ ꓣꓳ ꓟꓽ ꓢꓷꓸ ꓟ ꓟꓽ ꓥ꓾ ꓣꓳ ꓢꓷꓸˍ ꓡꓳ꓿ 12 ꓥꓪ ꓠꓬ ꓙꓲ-ꓢꓴ ꓶꓼ ꓓꓳꓽ ꓫꓱꓹ ꓓꓳ ꓐꓱ ꓶ ꓕꓷ-ꓡꓳ-ꓬ ꓗꓪ ꓛꓲ ꓬꓰ ꓢꓲ꓾ ꓢꓲ ꓒ ꓡꓰ ꓥꓪ ꓔꓯ ꓗꓺ ꓘꓶꓽ ꓕꓲ ꓟ ꓒꓴ ꓖꓶ ꓡ ꓥ ꓟꓲ꓾ 13 ꓖꓳ ꓗꓪ ꓥꓪ ꓠꓬꓲ ꓤ ꓕꓲ-ꓔꓳ ꓔꓯ ꓧꓪ ꓟꓽ ꓟꓶ ꓠꓬꓲ ꓥꓪ ꓠꓲꓹ ꓟ ꓔꓬ ꓟꓽ ꓢ ꓗꓷ ꓡꓰꓳ꓿ ꓖꓳ ꓡꓱ ꓠꓬꓲ ꓥꓪ ꓠꓽ ꓖꓳ ꓗꓪ ꓔꓬ ꓢꓴ ꓐꓴ ꓔꓯ ꓧꓪꓸ ꓧꓪ ꓐꓯ ꓔ ꓬꓰ ꓢꓲ ꓟ-ꓢꓲ-ꓓꓳ ꓗꓪ ꓙꓰꓳ꓿ 14 ꓖꓳ ꓡꓱ ꓥ ꓟꓲ ꓙꓲ-ꓢꓴ ꓠꓯꓸꓼ ꓗꓪ ꓣꓳ ꓔꓯ ꓠꓬ꓾ ꓧꓪꓸ ꓡꓰ ꓢꓴ ꓬꓲ ꓜꓴ ꓫꓱꓽ ꓝꓯꓸ ꓔꓬ ꓟ ꓚꓱꓹ ꓗꓪ ꓮ ꓕꓯˍ ꓟꓲ ꓧꓳꓽ ꓟꓸ ꓖꓶ ꓢꓲ꓾ ꓬꓲ ꓔꓯ ꓢꓷˍ ꓟ ꓫꓳꓺ ꓠꓱ ꓐꓵꓽ ꓠꓬ꓾ ꓣꓳ ꓗꓪ ꓐꓰ ꓕꓲ ꓟꓵꓽ ꓕꓲ ꓟꓵꓽ ꓗꓪ ꓟꓳꓸ ꓖꓶ ꓓꓳ ꓡ ꓝꓲ ꓢꓴ ꓪꓴ-ꓢ ꓔꓯ ꓫꓸ ꓟꓳ꓿ 15 ꓮ ꓡꓲꓳ ꓐꓯ ꓠꓬ ꓚꓬꓴ ꓟꓶ ꓢꓴ ꓐꓴ ꓗꓳ ꓡꓳ ꓗꓪ ꓥ ꓟꓲ꓾ ꓟꓶꓽ ꓬꓰ ꓔꓬ ꓢꓴ ꓐꓴ ꓗꓳ ꓡꓳ ꓗꓪ ꓥ ꓟꓲ꓾ ꓣꓳ ꓠꓬ ꓪꓴ-ꓢ ꓟꓲ ꓙꓬꓽ ꓗꓪ ꓙꓲ-ꓢꓴ ꓬꓲ ꓫꓳ ꓠꓱꓻˍ ꓟ ꓐꓵꓽ ꓥ ꓡꓳ꓿ 16 ꓬꓲ ꓐꓵꓽ ꓕꓱ ꓟ ꓠꓬ꓾ ꓕꓱ ꓕꓲ ꓧꓳꓽ ꓔꓯ ꓟꓳꓸ꓾ ꓫꓵꓻ ꓠꓹ ꓟ ꓫꓵꓻ ꓐꓵꓽ ꓥ ꓡꓳ꓿ ꓖꓳ ꓕꓲ ꓧꓳꓽ ꓔꓯ ꓟꓳꓸ ꓠꓽ꓾ ꓢꓯꓸ ꓠꓹ ꓟ ꓢꓯꓸ ꓐꓵꓽ ꓥ ꓡꓳ꓿ ꓟꓬꓱꓽ ꓐꓬꓱꓼ ꓘꓶ ꓕꓱ ꓟ ꓮꓽ ꓟ ꓟꓯꓻ ꓘꓴ ꓢꓰꓽ꓿ 17 ꓥꓪ ꓠꓴꓽ ꓠꓽ ꓠꓱꓸ ꓐꓯꓼ ꓢꓴ ꓮꓽ ꓟꓬꓹ ꓟ ꓡꓰ ꓐꓰ꓾ ꓪꓴ-ꓢ ꓐꓯ ꓘꓶ ꓡꓰ ꓶꓻ ꓡꓯꓼ ꓟꓴ ꓜꓽ ꓢꓴ ꓟꓽ ꓥ꓿ ꓬꓲˍ ꓡꓰ꓾ ꓥꓪ ꓠꓴꓽ ꓠꓽ ꓪꓴ-ꓢ ꓡꓰ ꓝꓲꓺ ꓔ ꓢꓴ ꓥ ꓟ ꓡꓰ ꓐꓰ꓾ ꓙꓲ-ꓢꓴ ꓠꓯꓸꓼ ꓗꓪ ꓠꓲꓹ ꓔꓱꓹ ꓠꓲꓹ ꓓꓰˍ ꓟ ꓘꓶꓽ ꓡꓰ꓾ ꓪꓴ-ꓢ ꓟꓲꓽ ꓙꓬ ꓗꓪ ꓫꓸ ꓕꓱˍ ꓡꓳ꓿

2 ꓘꓳ-ꓡꓱ-ꓕꓴ 3

1 ꓥꓪ ꓠꓴꓽ ꓠꓬ ꓝꓮꓲ ꓕꓲ ꓧꓪꓹ ꓚꓲ ꓛꓬ ꓔꓯ ꓓꓳꓹ ꓟꓴˍ ꓟ ꓥ ꓡ? ꓠꓱꓸ ꓐꓯꓼ ꓢꓴ ꓕꓲ ꓐꓱ ꓢꓷꓸ ꓙ ꓟꓳ ꓙ ꓕꓳ ꓶ ꓣꓱꓽ ꓬꓯꓼˍ ꓟ ꓡꓰ ꓐꓰ꓾ ꓠꓴ ꓪꓽ ꓔꓯꓸ ꓟꓳ꓾ ꓥ ꓠꓬ ꓠꓴ ꓪꓽ ꓗꓪ ꓐꓰ꓾ ꓥꓪ ꓠꓴꓽˍ ꓟꓲ ꓢꓷꓸ ꓙ ꓟꓳ ꓙ ꓕꓳ ꓶ ꓣꓱꓽ ꓬꓯꓼˍ ꓡ? 2 ꓥꓪ ꓠꓴꓽ ꓢꓷꓸ ꓙ ꓟꓳ ꓙ ꓕꓳ ꓶ ꓠꓽ ꓠꓴ ꓪꓽ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓞꓳ ꓤ ꓮꓽ ꓙꓵ ꓡꓰ ꓢꓷꓸ ꓢꓲ ꓵ ꓗꓷ ꓟ꓾ ꓥꓪ ꓠꓴꓽ ꓠꓲꓹ ꓟ ꓗꓪ ꓐꓳ ꓔ ꓟ ꓕꓳ ꓶ ꓠꓬ ꓠꓴ ꓪꓽ ꓥ ꓡꓳ꓿ 3 ꓠꓴ ꓪꓽ ꓠꓬ ꓥꓪ ꓠꓴꓽ ꓡꓰ ꓟꓸ ꓪꓴꓽ ꓡ ꓟ ꓙꓲ-ꓢꓴ ꓕꓳ ꓶ ꓡꓯꓼ ꓫꓴ ꓥ ꓟ ꓔꓲ ꓢꓲꓽ ꓢꓲˍ ꓡꓰ ꓟꓳꓻ ꓞꓹ ꓡꓳ꓿ ꓕꓳ ꓶ ꓕꓱ ꓟ ꓠꓬ ꓐꓳ ꓞꓶꓻ ꓡꓰ ꓐꓳ ꓔ ꓟ ꓟꓽ ꓥ꓿ Bꓸ ꓒꓬꓸ ꓗꓪ ꓐꓳ ꓔ ꓟˍ ꓟꓲ ꓟꓽ ꓥ꓿ ꓞꓳ ꓤ ꓠꓲꓹ ꓟ ꓗꓪ ꓢꓯꓸ ꓔꓬ ꓟ ꓪꓴ-ꓢ ꓦ ꓡꓰ ꓐꓳ ꓔ ꓟ ꓥ ꓡꓳ꓿ 4 ꓙꓲ-ꓢꓴ ꓑꓶꓸ ꓓꓴ ꓥꓪ ꓠꓴꓽ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓦ ꓡꓱ ꓐꓳ ꓓꓴ ꓙꓳˍ ꓠꓬꓲ ꓕꓱ ꓡꓱ ꓐꓯˍ ꓟ ꓥ ꓡꓳ꓿ 5 ꓥꓪ ꓠꓴꓽ ꓠꓬ ꓚꓲ ꓛꓬ ꓗꓪ ꓐꓰ ꓮꓸ ꓫꓵ ꓬꓰ ꓐ ꓡ ꓘꓴˍ ꓟ ꓟꓽ ꓚꓬꓹ꓿ ꓥꓪ ꓠꓴꓽ ꓐ ꓡ ꓟ ꓮꓽ ꓙꓵ ꓠꓽ ꓪꓴ-ꓢ ꓗꓪ ꓐꓰˍ ꓡꓰꓽ ꓥꓳ꓿ 6 ꓥꓪ ꓠꓴꓽ ꓔꓯ ꓘꓶꓽ ꓫꓵꓽ ꓬꓲ ꓫꓵꓼ ꓗꓪ ꓣꓱꓽ ꓙ ꓢꓴ ꓬꓰ ꓐ ꓡ ꓝꓲ ꓢꓴ ꓠꓬ ꓪꓴ-ꓢ ꓥꓳ꓿ ꓕꓱ ꓟ ꓠꓬ ꓕꓳ ꓶ ꓝꓳꓹ ꓡꓰ ꓐꓳ ꓔ ꓟ ꓟꓽ ꓥ꓾ ꓦ ꓗꓪ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓐꓳ ꓔ ꓟ ꓡꓰ ꓣꓳ ꓔꓯ ꓫꓵꓻ ꓝꓲˍ ꓡꓳ꓿ ꓖꓳ ꓡꓱ ꓥ ꓟꓲ ꓦꓻ ꓠꓽ ꓢꓯꓼ ꓟꓬ ꓖꓶ ꓡ ꓡꓳ꓿ 7 ꓫꓵꓻˍ ꓟ ꓟꓬꓱꓽ ꓔꓯꓹ ꓓꓵꓽ ꓡ ꓟ꓾ ꓡꓳ ꓒꓬꓸ ꓗꓪ ꓜꓰꓺ ꓔ ꓟ ꓙꓵꓽ ꓗ ꓬꓲꓸ ꓪꓴ ꓐꓳˍ ꓕꓯ꓾ ꓐꓬꓱꓼ ꓡꓱꓼ ꓡꓱ ꓗꓹ ꓠꓬꓲ꓾ ꓬꓲ-ꓢꓷ-ꓡꓰ ꓞꓲꓼ ꓤ ꓡꓯꓹ ꓤ ꓐꓴ ꓠꓬ ꓟꓳ-ꓫꓲ ꓒꓬꓱꓽ ꓟꓬ ꓗꓪ ꓟꓬ ꓔꓱꓹ ꓡꓳꓸ ꓟꓽ ꓑꓶꓸ꓿ ꓧꓳꓽ ꓬꓰ ꓔꓬ ꓟ ꓐꓬꓱꓼ ꓡꓱꓼˍ ꓟ ꓔꓯ ꓡꓳꓸ ꓟꓽ ꓑꓶ ꓕꓯ ꓠꓽ꓾ 8 ꓢꓯꓼ ꓟꓬ ꓖꓶ ꓡ ꓢꓴ ꓢꓲ-ꓫꓬ-ꓟ-ꓦ ꓠꓬ ꓪ ꓜꓲ ꓮ ꓘꓶꓸ ꓐꓬꓱꓼ ꓡꓱꓼˍ ꓥꓳ꓾ ꓟꓽ ꓥ ꓡ? 9 ꓝꓴꓲ ꓐꓯ ꓞꓷꓹˍ ꓟ ꓟꓬꓱꓽ ꓖꓳ ꓟ ꓐꓬꓱꓼ ꓡꓱꓼ ꓡꓱ ꓗꓹ ꓠꓬ꓾ ꓔꓱꓹ ꓜꓳꓽˍ ꓟ ꓔꓯꓹ ꓖꓶ ꓡ ꓟ ꓟꓬꓱꓽ ꓠꓬ ꓪ ꓜꓲ ꓮ ꓘꓶꓸ ꓐꓬꓱꓼ ꓡꓱꓼˍ ꓟ ꓥꓳ꓾ ꓟꓽ ꓥ ꓡ?꓿ 10 ꓧꓶꓸ ꓕꓯ ꓐꓬꓱꓼ ꓡꓱꓼˍ ꓟ ꓖꓳ ꓟ ꓠꓬ꓾ ꓮ ꓟꓶ ꓮꓸ ꓓꓲꓽ ꓐꓬꓱꓼ ꓡꓱꓼˍ ꓟ ꓔꓯ ꓔꓯꓺ ꓟꓽ ꓧꓪꓸˍ ꓠꓬꓲ꓾ ꓧꓶꓸ ꓕꓯ ꓐꓬꓱꓼ ꓡꓱꓼ ꓟ ꓠꓬ ꓧꓳꓽ ꓬꓰꓳ꓿ 11 ꓧꓳꓽ ꓬꓰˍ ꓟ ꓖꓳ ꓟ ꓐꓬꓱꓼ ꓡꓱꓼ ꓡꓱ ꓗꓹ ꓕꓯ ꓠꓽ꓾ ꓮ ꓕꓯˍ ꓟꓲ ꓧꓳꓽ ꓬꓰ ꓟꓽ ꓓ ꓟ ꓕꓱ ꓟ ꓠꓬ ꓟꓬꓽ ꓠꓬꓲ ꓮꓽ ꓘꓶꓸ ꓐꓬꓱꓼ ꓡꓱꓼˍ ꓟ ꓥ ꓡꓳ꓿ 12 ꓖꓳ ꓡꓱ ꓠꓬꓲ ꓥꓳ ꓡꓳꓸ ꓓꓴ ꓕꓱ ꓡꓱ ꓫꓵꓽ ꓙꓳˍ ꓠꓬꓲ꓾ ꓥꓪ ꓠꓴꓽ ꓠꓬ ꓠꓲꓹ ꓪꓴꓽ ꓪꓴˍ ꓡꓰ ꓫ ꓕꓱ ꓢꓲ꓾ 13 ꓟꓳ-ꓫꓲˍ ꓡꓰ ꓐꓰ ꓟꓽ ꓬꓰ꓿ ꓬꓲ ꓠꓬ ꓧꓳꓽ ꓬꓰ ꓔꓬ ꓟ ꓐꓬꓱꓼ ꓡꓱꓼ ꓟ ꓔꓯ ꓬꓲ-ꓢꓷ-ꓡꓰ ꓐꓴ ꓟꓽ ꓡꓳꓸ ꓟꓳ ꓠꓹ ꓟ꓾ ꓬꓲ ꓒꓬꓱꓽ ꓟꓬ ꓗꓪ ꓑꓲꓸ ꓛ ꓡꓰ ꓛꓺ ꓔ ꓡꓳ꓿ 14 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓠꓲꓹ ꓟ ꓩꓴˍ ꓠꓬꓲ꓾ ꓠꓬꓲꓸ ꓠꓬꓲ ꓗꓪ ꓛꓲ ꓘꓶꓽ ꓫꓵꓽ ꓡꓵ ꓵˍ ꓕꓯ ꓬꓲ ꓪꓽ ꓠꓲꓹ ꓟ ꓗꓪ ꓑꓲꓸ ꓛ ꓖꓳ ꓟ ꓓꓹ ꓢꓰꓽ ꓡꓳ꓿ ꓑꓲꓸ ꓛ ꓖꓳ ꓟ ꓠꓬ ꓙꓲ-ꓢꓴ ꓠꓯꓸꓼ ꓗꓪˍ ꓡꓰꓽ ꓣꓴ ꓦ ꓗꓷ ꓐ ꓡ ꓡꓳ꓿ 15 ꓖꓳ ꓡꓱ ꓠꓬꓲ ꓮ ꓟꓶ ꓗꓪ ꓛꓲ꓾ ꓟꓳ-ꓫꓲ ꓕꓳ ꓶ ꓮ ꓕꓯ ꓵˍ ꓠꓬ ꓖꓳ ꓕꓯ ꓬꓲ ꓪꓽ ꓠꓲꓹ ꓟ ꓗꓪ ꓑꓲꓸ ꓛ ꓓꓹ ꓢꓰꓽ ꓡꓳ꓿ 16 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓬ ꓢꓲ ꓒ ꓔꓯꓸ ꓟꓳꓸ ꓮ ꓕꓯꓽ ꓒꓳꓹ ꓬꓲꓼ ꓡ ꓠꓬ ꓖꓳ ꓕꓯ ꓑꓲꓸ ꓛ ꓖꓳ ꓟ ꓣꓴ ꓦ ꓗꓷ ꓟ ꓟꓶˍ ꓡꓳ꓿ 17 ꓢꓲ ꓒ ꓠꓬ ꓦ ꓥ ꓡꓳ꓿ ꓢꓲ ꓒ ꓬꓲ ꓦ ꓮ ꓡꓲ ꓗꓪ ꓔꓬ ꓠꓬ ꓖꓳ ꓗꓪ ꓩꓴ ꓗꓷ ꓟꓶˍ ꓟ ꓙꓳˍ ꓡꓳ꓿ 18 ꓖꓳ ꓡꓱ ꓠꓬꓲ ꓣꓳ ꓐꓴ ꓠꓽ ꓒꓬꓱꓽ ꓟꓬ ꓟꓽ ꓑꓲꓸ ꓑꓲ꓾ ꓒꓬꓱꓽ ꓠꓬꓲ ꓓꓴ ꓗꓪ ꓟꓳˍ ꓟ ꓡꓰ ꓐꓰ꓾ ꓢꓲ ꓒ ꓐꓬꓱꓼ ꓡꓱꓼ ꓡꓱꓼ ꓟ ꓔꓯ ꓡꓳꓸ ꓠꓬꓲ ꓔꓬ ꓠꓬꓲ꓾ ꓣꓳ ꓠꓬ ꓬꓲ ꓒꓬꓱꓽ ꓶꓻ ꓡꓰ ꓠꓹ ꓟ ꓑꓶꓸ ꓡꓰ ꓔꓬ ꓢꓲ꓾ ꓐꓬꓱꓼ ꓡꓱꓼ ꓟ ꓕꓯꓽ ꓢꓲ ꓐꓬꓱꓼ ꓡꓱꓼ ꓡꓱ ꓗꓷ ꓡꓰˍ ꓡꓳ꓿ ꓕꓱ ꓟ ꓠꓬ ꓢꓲ ꓒ ꓬꓲ ꓦ ꓗꓪ ꓐꓰ ꓥ ꓡꓳ꓿

2 ꓘꓳ-ꓡꓱ-ꓕꓴ 4

1 ꓥꓪ ꓠꓴꓽ ꓠꓬ ꓪꓴ-ꓢ ꓫꓱ ꓤˍ ꓟ ꓗꓪ ꓐꓰ ꓣꓱꓽ ꓙ ꓟꓬꓱꓽ ꓕꓱ ꓟ ꓟꓶˍ ꓠꓬꓲ꓾ ꓠꓲꓹ ꓟ ꓟꓽ ꓙꓬ ꓡꓰ꓿ 2 ꓥꓪ ꓠꓴꓽ ꓠꓬ ꓚꓵꓺ ꓔ ꓟ ꓫꓸ ꓔꓳ ꓓꓴ ꓚꓱꓹ ꓔꓯ ꓡꓳ ꓩꓴ ꓗꓷꓳ꓿ ꓠꓲꓹ ꓖꓳꓼ ꓢꓴ ꓟꓽ ꓬꓰ꓿ ꓪꓴ-ꓢ ꓐꓯ ꓘꓶꓽ ꓔꓯˍ ꓟꓲ ꓟꓽ ꓖꓳꓼ ꓟꓽ ꓒꓯꓹ ꓡꓰ ꓝꓲ꓿ ꓪꓻ ꓜꓲ ꓥꓪ ꓠꓴ ꓠꓽ꓾ ꓮꓽ ꓟ ꓦꓰꓽ ꓠꓲꓹ ꓗꓪˍ ꓟꓲ ꓥꓪ ꓠꓴꓽ ꓔꓯ ꓘꓳ ꓣꓴ ꓐ ꓡ ꓝꓲ ꓠꓹ ꓟ꓾ ꓪꓴ-ꓢ ꓒꓬꓱꓽ ꓕꓯ ꓗꓪ ꓥꓪ ꓠꓴꓽ ꓠꓬ ꓔꓱꓹ ꓟˍ ꓡꓰꓽ ꓚ ꓟꓸ ꓖꓶˍ ꓡꓳ꓿ 3 ꓶꓼ ꓓꓳꓽ ꓫꓱꓹ ꓓꓳ ꓕꓱ ꓟ ꓑꓲꓸ ꓞꓹ ꓐꓷˍ ꓠꓬ꓾ ꓟꓶꓽ ꓬꓰ ꓔꓬ ꓢꓴ ꓔꓯ ꓟꓳꓸ ꓑꓲꓸ ꓞꓹ ꓟ ꓥꓳ꓿ 4 ꓪꓴ-ꓢ ꓬꓲ ꓒꓬꓱꓽ ꓥ ꓟ ꓙꓲ-ꓢꓴ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓶꓼ ꓓꓳꓽ ꓫꓱꓹ ꓓꓳ ꓠꓬꓲ ꓟꓳ ꓓꓴ ꓔꓯ ꓬꓲ ꓪꓽ ꓟꓽ ꓟꓳ ꓝꓲ ꓠꓹ ꓟ꓾ ꓟꓲ ꓠꓯ ꓕꓱ ꓟ ꓬꓲ ꓢꓲꓺ ꓡꓰ꓾ ꓟꓽ ꓙꓵꓻ ꓢꓴ ꓐꓴ ꓙꓽ ꓠꓲꓹ ꓟꓬ ꓢꓶꓽ ꓔꓯ ꓔꓶ ꓡꓰ ꓝꓲˍ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓠꓽ ꓚꓲ ꓛꓬ ꓔꓯꓸ ꓟꓳꓸ ꓟꓽ ꓚ ꓟꓸ꓿ ꓙꓲ-ꓢꓴ ꓬꓰ-ꓢꓴ ꓠꓬ ꓢꓲ ꓒ ꓥ ꓟ ꓐꓰ꓾ ꓥꓪ ꓠꓴꓽ ꓠꓬ ꓬꓰ-ꓢꓴ ꓐꓱ ꓶ ꓠꓴ ꓪꓽ ꓚꓳ ꓑꓸ ꓬꓰˍ ꓟ ꓚ ꓟꓸˍ ꓡꓳ꓿ 6 ꓮ ꓡꓲꓳ ꓐꓯ ꓠꓬ꓾ ꓠꓬꓲ ꓟꓳ ꓓꓴ ꓠꓬ ꓠꓯ ꓞꓲꓹ ꓟ ꓗꓪ ꓐꓰ ꓣꓳꓺ ꓓꓳ ꓡ ꓝꓲ꓾ ꓐꓰ ꓐꓯ ꓢꓴ ꓪꓴ-ꓢ ꓬꓲ ꓖꓳ ꓕꓲ ꓣꓳ ꓡꓰ꓾ ꓬꓲ ꓐꓬꓱꓼ ꓡꓱꓼ ꓟ ꓔꓯ ꓢꓷˍ ꓟ ꓢꓷꓸ ꓠꓲꓹ ꓠꓬ ꓬꓰ-ꓢꓴ ꓙꓲ-ꓢꓴ ꓒꓬꓱꓽ ꓟꓬ ꓗꓪ ꓡꓬꓸ ꓖꓶ ꓢꓲ꓾ ꓣꓳ ꓠꓲꓹ ꓟ ꓗꓪ ꓣꓳꓺ ꓖꓶ ꓡꓺꓳ꓿ 7 ꓖꓳ ꓡꓱ ꓥ ꓟꓲ ꓮꓽ ꓙꓵ ꓟ ꓕꓯꓽ ꓢꓲ ꓘꓳꓻ ꓙꓰˍ ꓟ ꓪ ꓠꓬꓲˍ ꓟ ꓕꓱ ꓟ ꓠꓬ꓾ ꓣꓳ ꓚꓲ ꓛꓬ ꓗꓪ ꓐꓰ ꓟꓽ ꓥ ꓥ꓾ ꓪꓴ-ꓢ ꓗꓪ ꓐꓰ ꓥ ꓟ ꓟꓳꓸ ꓖꓶ ꓠꓹ ꓟ꓾ ꓒꓵꓽ ꓶ ꓕꓱ ꓟ ꓠꓬ ꓣꓳ ꓠꓱꓸ ꓦꓱ ꓡꓴꓻ ꓗꓪ ꓙꓳˍ ꓡꓳ꓿ 8 ꓥꓪ ꓠꓴꓽ ꓠꓬ ꓮ ꓡꓲ ꓕꓲ ꓛꓱꓽ ꓗꓪ ꓐꓰ ꓫꓸ ꓙꓵ ꓟꓶˍ ꓥ ꓟꓲ꓾ ꓠꓲꓹ ꓗꓷꓹ ꓟꓬ ꓗꓷꓹ ꓠꓬꓲ ꓟꓽ ꓗꓷ ꓡꓰ꓿ ꓓꓵꓽ ꓙꓽ ꓪꓴꓽ ꓧꓶꓻˍ ꓟꓲ ꓥꓳ ꓡꓳꓸ ꓓꓴ ꓒꓲꓼ ꓬꓰ ꓠ ꓛꓲ ꓟꓽ ꓗꓷ ꓡꓰ꓿ 9 ꓗꓸ ꓧꓪ ꓟꓶˍ ꓟꓲ ꓒꓰꓺ ꓗꓷ ꓟ ꓟꓽ ꓥ꓿ ꓓꓶꓽ ꓓꓳꓽ ꓡꓰˍ ꓟꓲ ꓟꓽ ꓟꓶꓽ ꓡꓰ꓿ 10 ꓬꓰ-ꓢꓴ ꓢꓯꓸ ꓔꓬ ꓟ ꓔꓯ ꓥꓪ ꓠꓴꓽ ꓖꓳ ꓓꓱ ꓗꓪ ꓐꓰ ꓟꓳꓸ ꓖꓶ ꓓꓳ ꓡ ꓠꓹ ꓟ꓾ ꓢꓲ ꓒ ꓬꓰ-ꓢꓴ ꓫꓵꓻˍ ꓟˍ ꓟꓲ ꓥꓪ ꓠꓴꓽ ꓖꓳ ꓓꓱ ꓗꓪ ꓮ ꓕꓯˍ ꓟꓲ ꓟꓯꓻ ꓞꓹ ꓡꓳ꓿ 11 ꓮ ꓡꓲꓳ ꓐꓯ ꓠꓬ ꓬꓰ-ꓢꓴ ꓢꓯꓸ ꓔꓬ ꓟ ꓠꓬ꓾ ꓫꓵꓻ ꓗꓴˍ ꓟ ꓥꓪ ꓠꓴꓽ ꓧꓪ ꓖꓳ ꓓꓱ ꓗꓪ ꓟꓳꓸ ꓖꓶ ꓓꓳ ꓡ ꓠꓹ ꓟ꓾ ꓥꓪ ꓠꓴꓽ ꓠꓬ ꓮ ꓕꓯˍ ꓟꓲ ꓬꓰ-ꓢꓴ ꓐꓱ ꓶ ꓫꓵꓻ ꓠꓹ ꓟ ꓡꓯꓼ ꓙꓱ ꓖꓶ ꓔ ꓡꓳ꓿ 12 ꓖꓳ ꓟ ꓗꓪ ꓐꓰ꓾ ꓥꓪ ꓠꓴꓽ ꓠꓯꓸꓼ ꓗꓪ ꓠꓬ ꓫꓵꓻˍ ꓟ ꓢꓯꓼ ꓕꓵꓼ ꓔꓬ ꓢꓲ꓾ ꓠꓴ ꓪꓽ ꓠꓯꓼ ꓗꓪ ꓠꓽ ꓢꓯꓼ ꓟꓬ ꓢꓯꓼ ꓕꓵꓼ ꓔꓬ ꓡꓳ꓿ 13 ꓖꓳ ꓡꓱ ꓥ ꓟꓲ ꓕꓳ ꓶ ꓗꓪ꓾ ꓥꓪ ꓙꓵꓻˍ ꓠꓬꓲ ꓥꓪ ꓫ ꓕꓱ ꓗꓷꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ꓾ ꓥꓪ ꓠꓴꓽˍ ꓟꓲ ꓖꓳ ꓟ ꓐꓰ ꓕꓲ ꓡꓰꓹꓼ ꓦ ꓗꓪ ꓟ ꓙꓵ ꓠꓲꓹ ꓙꓳˍ ꓠꓬꓲ꓾ ꓥꓪ ꓠꓴꓽˍ ꓟꓲ ꓙꓵꓻ ꓢꓲ ꓫꓸ ꓕꓱˍ ꓟ ꓥ ꓡꓳ꓿ 14 ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓴ ꓡꓰ ꓣꓳ ꓔꓯˍ ꓟꓲ ꓬꓰ-ꓢꓴˍ ꓐꓰ ꓕꓲ ꓪꓺꓼ ꓢꓯꓸ ꓬꓲꓼ ꓡ ꓝꓲ ꓢꓲ ꓠꓬꓲ꓾ ꓥꓪ ꓠꓴꓽ ꓔꓯ ꓠꓬ ꓠꓴ ꓪˍ ꓐꓰ ꓕꓲ ꓪꓺꓼ ꓬꓲ ꓟꓲꓽ ꓙꓬ ꓗꓪ ꓧꓳꓽ ꓙꓰˍ ꓥꓳ꓾ ꓐꓰ ꓥꓪ ꓠꓴꓽ ꓢꓷˍ ꓡꓳ꓿ 15 ꓕꓱ ꓟ ꓮꓽ ꓙꓵ ꓠꓬ ꓠꓴ ꓪꓽ ꓙꓲꓻ ꓖꓴ ꓥ ꓢꓲ꓾ ꓪꓴ-ꓢ ꓣꓱꓽ ꓛꓰ ꓡꓰ ꓡ ꓞꓳ ꓮꓽ ꓟꓬꓹ ꓔꓯ ꓡꓯꓼ ꓛꓲ ꓬꓰˍ ꓟ ꓗꓪ ꓐꓰ꓾ ꓫ ꓟꓳ ꓓꓴ ꓟꓬꓽ ꓡ ꓟꓬ ꓡ ꓢꓲ꓾ ꓖꓳ ꓟ ꓗꓪ ꓐꓰ ꓪꓴ-ꓢ ꓟꓬꓱ ꓓꓳꓽ ꓔꓯ ꓪ ꓜꓲ ꓓꓳꓹ ꓟꓴ ꓟꓶ ꓡꓰ ꓠꓹ ꓟ ꓥ ꓡꓳ꓿ 16 ꓖꓳ ꓡꓱ ꓠꓬꓲ ꓥꓪ ꓠꓴꓽ ꓠꓲꓹ ꓟ ꓟꓽ ꓙꓬ ꓡꓰ꓿ ꓣꓳ ꓧꓪꓽ ꓖꓳ ꓓꓱ ꓕꓲꓽ ꓒꓳꓹ ꓗꓪ ꓟꓳꓽ ꓡꓰ ꓔꓬ ꓥ ꓟꓲ꓾ ꓦ ꓕꓲ ꓒꓳꓹ ꓗꓪ ꓠꓽ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓫꓵꓼ ꓒꓬꓱꓼ ꓡ ꓔꓬ ꓡꓳ꓿ 17 ꓮ ꓡꓲꓳ ꓐꓯ ꓠꓬ ꓣꓳ ꓕꓲ ꓑꓹ ꓤ ꓡꓰ ꓡꓳꓻ ꓡꓳ ꓤ ꓫꓸ ꓙꓵˍ ꓟ ꓠꓬ꓾ ꓣꓳ ꓐꓱ ꓶ ꓔꓯꓺ ꓖꓴ ꓟꓽ ꓓ ꓟ꓾ ꓕꓲ ꓞꓲꓼ ꓕꓲ ꓑ ꓟ ꓟꓬꓱ ꓓꓳꓽ ꓒꓬꓱꓼ ꓡ ꓝꓲˍ ꓡꓳ꓿ 18 ꓖꓳ ꓡꓱ ꓠꓬꓲ ꓣꓳ ꓠꓬ ꓟꓬ ꓢꓶꓽ ꓡꓰ ꓟꓳꓻˍ ꓡꓳ ꓫꓵꓽ ꓔꓯ ꓥꓳ ꓡꓳꓸ ꓔꓬ ꓟ ꓟꓽ ꓥ꓿ ꓟꓽ ꓟꓳꓻˍ ꓡꓳ ꓫꓵꓽ ꓔꓯ ꓥꓳ ꓡꓳꓸ ꓔꓬ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓳꓻ ꓓꓻˍ ꓡꓳ ꓫꓵꓽ ꓠꓬ ꓕꓲ ꓑꓹ ꓤ ꓐꓱ ꓶˍ ꓡꓰꓽ ꓥ ꓢꓲ꓾ ꓟꓳꓻ ꓟꓽ ꓓꓻ ꓡꓳ ꓫꓵꓽ ꓠꓽ ꓕꓲ ꓞꓲꓼ ꓕꓲ ꓑ ꓟ ꓥ ꓡꓳ꓿

2 ꓘꓳ-ꓡꓱ-ꓕꓴ 5

1 ꓟꓲ ꓠꓯ ꓗꓪ ꓟ ꓣꓳ ꓦꓲꓻ ꓐꓱ ꓥ ꓟ ꓖꓳ ꓓꓱ ꓕꓱ ꓟ ꓐꓬ ꓡꓰ ꓠꓬ꓾ ꓡꓯꓼ ꓒꓯꓹ ꓡꓰ ꓫꓬꓹ ꓔ ꓟ ꓟꓽ ꓥ ꓟ꓾ ꓟꓴꓽ ꓗꓪ ꓗꓪ ꓪꓴ-ꓢ ꓡꓰ ꓫꓬꓹ ꓔ ꓟ꓾ ꓕꓲ ꓞꓲꓼ ꓕꓲ ꓑ ꓐꓬ ꓡꓰ ꓟꓽ ꓓ ꓟ ꓦꓲ ꓕꓲ ꓦꓲ ꓙꓳˍ ꓟ ꓣꓳ ꓢꓷˍ ꓡꓳ꓿ 2 ꓮ ꓟꓶ ꓧꓪꓽ ꓖꓳ ꓓꓱ ꓦꓲ ꓕꓱ ꓕꓲ ꓟ ꓗꓪ ꓣꓳ ꓠꓬ ꓚꓵ ꓚꓵ ꓠꓻ ꓪꓴꓽ ꓢꓲ꓾ ꓟꓴꓽ ꓗꓪ ꓗꓪ ꓟ ꓣꓳ ꓔꓬ ꓖꓴ ꓦꓲ ꓔꓯ ꓖꓪꓽ ꓪ ꓠꓹ ꓟ ꓠꓲꓹ ꓥꓳ ꓔꓬ ꓡꓳ꓿ 3 ꓖꓳ ꓟ ꓖꓪꓽ ꓪˍ ꓕꓯ ꓠꓽ ꓣꓳ ꓠꓬ ꓙꓬꓽ ꓡꓯꓽ ꓟꓴ ꓟꓽ ꓗꓷ ꓡꓰ꓿ 4 ꓮ ꓡꓲꓳ ꓐꓯ ꓠꓬ ꓧꓪꓽ ꓖꓳ ꓓꓱ ꓦꓲ ꓐꓱꓺ ꓕꓱ ꓕꓲ ꓦꓲ ꓗꓪ ꓔꓬ ꓕꓯ꓾ ꓶꓻ ꓡꓲꓽ ꓢꓲ ꓣꓳꓽ ꓠꓻ ꓪꓴꓽˍ ꓟ ꓠꓬ꓾ ꓕꓱ ꓕꓲ ꓦꓲ ꓔꓯ ꓡꓵꓸ ꓩꓴ ꓗꓷ ꓠꓲꓹ ꓫꓵˍ ꓠꓬꓲ ꓠꓽ ꓟꓽ ꓥ꓿ ꓖꓳ ꓕꓲ ꓦꓲ ꓔꓯ ꓖꓪꓽ ꓔ ꓠꓲꓹ ꓫꓵˍ ꓠꓬꓲ ꓠꓻ ꓪꓴꓽˍ ꓟ ꓥ ꓢꓲ꓾ ꓫꓵꓻ ꓗꓴꓸˍ ꓟ ꓕꓱ ꓟ ꓔꓯ ꓠꓬ ꓫꓵꓻ ꓟꓽ ꓗꓴꓸ ꓟ ꓖꓳ ꓓꓱ ꓑꓶꓸ ꓡꓰ ꓝꓲ ꓠꓹ ꓟ ꓥ ꓡꓳ꓿ 5 ꓕꓱ ꓡꓱ ꓑꓶꓸ ꓡꓰ ꓠꓹ ꓟ ꓣꓳ ꓐꓱ ꓶ ꓙꓽ ꓖꓶ ꓔ ꓢꓴ ꓠꓬ ꓪꓴ-ꓢ ꓥ ꓢꓲ꓾ ꓕꓱ ꓟ ꓬꓲ ꓗꓸ ꓚꓵ ꓬꓰ ꓠꓹ ꓟ ꓢꓲ-ꓫꓬ-ꓟ-ꓦ ꓖꓶ ꓡ ꓢꓴˍ ꓟꓲ ꓬꓲ ꓥ ꓡꓳ꓿ 6 ꓖꓳ ꓡꓱ ꓠꓬꓲ ꓣꓳ ꓠꓬ ꓮ ꓕꓯˍ ꓟꓲ ꓠꓲꓹ ꓪꓴꓽ ꓓꓴ ꓙꓳˍ ꓡꓳ꓿ ꓖꓳ ꓡꓱ ꓢꓲ ꓣꓳ ꓠꓬ ꓧꓪꓽ ꓖꓳ ꓓꓱ ꓕꓱ ꓟ ꓗꓪ ꓢꓯꓸ ꓔꓬ ꓕꓯ꓾ ꓢꓲ ꓒ ꓡꓰ ꓣꓳ ꓐꓱ ꓶ ꓙꓽ ꓖꓶ ꓔ ꓟ ꓦꓲꓻˍ ꓐꓰ ꓗꓳꓹ ꓞ ꓟ ꓣꓳ ꓢꓷˍ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓣꓳ ꓞꓳ ꓙꓳˍ ꓟ ꓠꓬ꓾ ꓟꓬ ꓢꓶ ꓡꓰ ꓡꓳꓸ ꓟꓳˍ ꓟ ꓔꓯ ꓠꓲꓹ ꓥꓳ ꓢꓲ ꓞꓳ ꓙꓳˍ ꓟ ꓟꓽ ꓥ꓿ ꓙꓵꓻ ꓠꓲꓹ ꓗꓪ ꓐꓰ ꓞꓳ ꓙꓳ ꓔꓬ ꓟ ꓥ ꓡꓳ꓿ 8 ꓚꓵ ꓚꓵ ꓐꓯˍ ꓠꓬ꓾ ꓥꓪ ꓠꓴꓽ ꓠꓽ ꓖꓳ ꓓꓱˍ ꓐꓰ ꓧꓹ ꓗꓷ ꓢꓲ꓾ ꓢꓲ ꓒˍ ꓐꓰ ꓕꓲ ꓪꓺꓼ ꓦꓲ ꓖꓳ ꓟ ꓗꓪ ꓔꓬ ꓟꓶ ꓠꓹ ꓟ ꓔꓯ ꓪ ꓜꓲ ꓠꓲꓹ ꓫꓵˍ ꓡꓳ ꓫꓵ ꓥꓳ꓾ ꓐꓰ ꓠꓲꓹ ꓪꓴꓽ ꓪꓴˍ ꓐꓯ ꓐ ꓡ ꓡꓳ꓿ 9 ꓖꓳ ꓡꓱ ꓠꓬꓲ꓾ ꓧꓪ ꓖꓳ ꓓꓱ ꓦꓲ ꓕꓱ ꓕꓲ ꓟ ꓗꓪ ꓔꓬ ꓥ ꓟꓲ꓾ ꓟꓽ ꓔꓬ ꓥ ꓟꓲ꓾ ꓥꓪ ꓠꓴꓽ ꓠꓬ ꓢꓲ ꓒ ꓔꓯ ꓠꓲꓹ ꓒꓴ ꓡꓰ ꓝꓲ ꓠꓹ ꓟ ꓠꓲꓹ ꓫꓵˍ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓖꓳ ꓓꓱ ꓗꓪ ꓔꓬ ꓕꓯ ꓬꓰ ꓗꓷ ꓟ꓾ ꓙꓲˍ ꓟ ꓟꓲ꓾ ꓥꓶˍ ꓟ ꓟꓲ꓾ ꓮꓽ ꓟ ꓮ ꓡꓲ ꓬꓰˍ ꓠꓬ꓾ ꓟꓶ ꓙꓲꓽ ꓙꓳˍ ꓟ ꓖꓳ ꓡꓱ ꓟꓶ ꓠꓹ ꓟ꓾ ꓙꓲ-ꓢꓴ ꓐꓯ ꓟꓴ ꓕꓲꓺ ꓟꓲꓽ ꓙꓬ ꓗꓪ ꓣꓳ ꓮꓽ ꓙꓵ ꓦꓰꓼ ꓞꓹ ꓠ ꓗꓹ ꓥꓳ꓿ 11 ꓢꓲ ꓒ ꓔꓯ ꓙꓳ ꓒꓵꓽ ꓠꓯꓹ ꓟ ꓥꓪ ꓠꓴꓽ ꓢꓷꓸˍ ꓠꓬꓲ꓾ ꓢꓴ ꓔꓯˍ ꓟꓲ ꓬꓲ ꓖꓳ ꓡꓱ ꓘꓶꓸ ꓖꓶˍ ꓡꓳ꓿ ꓥꓪ ꓠꓴꓽ ꓠꓬ ꓮ ꓡꓲ ꓡꓴ ꓫꓵꓽ ꓞꓳ ꓤ ꓥ ꓟ ꓪꓴ-ꓢ ꓢꓷꓸˍ ꓡꓳ꓿ ꓝꓮꓲ ꓠꓴ ꓪꓽ ꓦꓰꓽ ꓠꓲꓹ ꓗꓪˍ ꓟꓲ ꓥꓪ ꓠꓴꓽ ꓔꓯ ꓢꓷꓸ ꓡꓰꓳ꓾ ꓐꓰ ꓥꓪ ꓥꓳ ꓡꓳꓸ ꓔꓬ ꓡꓳ꓿ 12 ꓥꓪ ꓠꓴꓽ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓚꓲ ꓛꓬ ꓔꓯ ꓝꓮꓲ ꓕꓲ ꓧꓪꓹ ꓓꓳꓹ ꓟꓴˍ ꓟ ꓟꓽ ꓥ꓿ ꓠꓲꓹ ꓟ ꓔꓯ ꓟꓽ ꓡꓳꓸ ꓡꓳ꓾ ꓒꓬꓱꓽ ꓔꓯ ꓡꓳꓸ ꓢꓲ ꓘꓶꓽ ꓘꓹ ꓢꓴ ꓔꓯ ꓠꓴ ꓪꓽ ꓡꓰ ꓒꓳꓹ ꓖꓶ ꓓꓴ ꓙꓳ ꓠꓹ ꓟ ꓐꓰ꓾ ꓥꓪ ꓠꓴꓽ ꓑꓶꓸ ꓓꓴ ꓠꓴ ꓪꓽ ꓘꓶꓽ ꓘꓹ ꓓꓴ ꓙꓳ ꓠꓹ ꓟ ꓥ ꓡꓳ꓿ 13 ꓥꓪ ꓠꓴꓽ ꓪꓴꓸ ꓐꓷˍ ꓠꓬ꓾ ꓪꓴ-ꓢ ꓐꓱ ꓶ ꓥ ꓢꓲ꓾ ꓠꓲꓹ ꓟ ꓢꓲꓽ ꓐꓷˍ ꓠꓬ꓾ ꓠꓴ ꓪꓽ ꓐꓱ ꓶ ꓥ ꓡꓳ꓿ 14 ꓮꓽ ꓙꓵ ꓢꓴ ꓐꓱ ꓶ ꓕꓲ ꓣꓳ ꓫꓵꓻ ꓗꓷ ꓠꓬꓲ꓾ ꓮꓽ ꓙꓵ ꓢꓴ ꓠꓬ ꓬꓲ ꓫꓵꓻˍ ꓟ ꓔꓯ ꓑꓯꓹ ꓟꓶ ꓡꓰꓳ꓾ ꓐꓰ ꓥꓪ ꓠꓴꓽ ꓢꓷꓸ ꓕꓶꓻ ꓡꓰ ꓠꓬꓲ꓾ ꓙꓲ-ꓢꓴ ꓠꓵ ꓠꓲꓹ ꓡꓰ ꓥꓪ ꓠꓴꓽ ꓔꓯ ꓠꓬꓲꓸ ꓞꓹ ꓡꓳ꓿ 15 ꓢꓯꓸ ꓔꓬ ꓢꓴ ꓠꓬ ꓕꓱ ꓡꓱ ꓖꓳ ꓑꓳ ꓚꓲ ꓛꓬ ꓐꓱ ꓶ ꓢꓯꓸ ꓔꓬ ꓟ ꓟꓽ ꓥ ꓥ꓾ ꓬꓲ ꓪꓽ ꓐꓱ ꓶ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓢꓴ ꓖꓳ ꓕꓲ ꓣꓳ ꓐꓱ ꓶ ꓢꓯꓸ ꓔꓬ ꓠꓹ ꓟ꓾ ꓬꓲ ꓠꓬ ꓮꓽ ꓙꓵ ꓢꓴ ꓐꓱ ꓶ ꓫꓵꓻꓳ꓿ 16 ꓖꓳ ꓡꓱ ꓠꓬꓲ ꓕꓱ ꓡꓱ ꓖꓳ ꓑꓳ꓾ ꓥꓪ ꓠꓴꓽ ꓠꓬ ꓧꓪ ꓖꓳ ꓓꓱ ꓕꓲ ꓒꓳꓹ ꓓꓵꓽ ꓙ ꓚꓱꓹ ꓔꓯ ꓛꓳ ꓢꓲ ꓮꓸ ꓫꓵ ꓡ ꓞꓳ ꓔꓯˍ ꓟꓲ ꓟꓽ ꓦꓰꓽ꓿ ꓧꓪꓽ ꓖꓳ ꓓꓱ ꓚꓱꓹ ꓗꓪ ꓐꓰ ꓙꓲ-ꓢꓴ ꓔꓯ ꓥꓪ ꓠꓴꓽ ꓢꓷꓸ ꓠꓬꓲ ꓥ ꓟꓲ꓾ ꓕꓱ ꓡꓱ ꓖꓳ ꓑꓳ ꓠꓽ ꓖꓳ ꓡꓱ ꓟꓽ ꓥꓻꓳ꓿ 17 ꓖꓳ ꓡꓱ ꓠꓬꓲ ꓮꓽ ꓟ ꓥ ꓟꓲ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓐꓷˍ ꓠꓬ꓾ ꓬꓲ ꓠꓽ ꓡ ꓞꓳ ꓫꓵꓼ ꓒꓬꓱꓼ ꓡ ꓟ ꓥ ꓡꓳ꓿ ꓬꓲ ꓐꓰꓽ ꓠꓬ ꓗꓳꓸ ꓗꓷꓳ꓿ ꓠꓬꓲ ꓠꓹ꓾ ꓮꓽ ꓙꓵ ꓬꓲ ꓫꓵꓼ ꓒꓬꓱ ꓡ ꓟ ꓥ ꓡꓳ꓿ 18 ꓕꓱ ꓟ ꓮꓽ ꓙꓵ ꓠꓬ ꓪꓴ-ꓢ ꓡꓰ ꓬꓰˍ ꓟ ꓥ ꓢꓲ꓾ ꓬꓲ ꓠꓬ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓣꓳ ꓔꓯ ꓬꓲˍ ꓐꓰ ꓧꓳꓹ ꓡꓰ ꓝꓲ ꓢꓲ ꓠꓬꓲ꓾ ꓧꓳꓹ ꓡꓰ ꓝꓲˍ ꓟ ꓟꓬꓱꓽ ꓣꓳ ꓔꓯ ꓡꓯꓼ ꓙꓱ ꓔ ꓡꓳ꓿ 19 ꓪꓴ-ꓢ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓟꓲ ꓠꓯ ꓡ ꓞꓳ ꓔꓯ ꓬꓲˍ ꓐꓰ ꓧꓳꓹ ꓡꓰ ꓝꓲ ꓢꓲ꓾ ꓬꓲ ꓪꓽ ꓔꓯ ꓛꓬꓻ ꓖꓴ ꓥꓳꓽ ꓖꓴ ꓖꓽ ꓖꓶ ꓠꓹ ꓟ꓾ ꓧꓳꓹ ꓡꓰ ꓝꓲˍ ꓟ ꓐꓯ ꓘꓶ ꓥꓪ ꓠꓴꓽ ꓔꓯ ꓡꓯꓼ ꓙꓱ ꓔ ꓡꓳ꓿ 20 ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓥꓪ ꓠꓴꓽ ꓗꓪ ꓐꓰ ꓠꓴ ꓪꓽ ꓔꓯ ꓘꓶꓸ ꓖꓶˍ ꓟ ꓡꓰ ꓐꓰ꓾ ꓥꓪ ꓠꓴꓽ ꓠꓬ ꓙꓲ-ꓢꓴ ꓬꓲ ꓗꓴꓷ ꓝꓲ ꓓꓴ ꓥ ꓢꓲ꓾ ꓙꓲ-ꓢꓴ ꓐꓱ ꓶ ꓠꓴ ꓪꓽ ꓔꓯ ꓓꓰꓽˍ ꓠꓬꓲ꓾ ꓪꓴ-ꓢˍ ꓐꓰ ꓧꓳꓹ ꓡꓰ Gꓽ꓿ 21 ꓣꓳ ꓔꓯ ꓙꓲ-ꓢꓴ ꓠꓯꓸꓼ ꓗꓪ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ ꓒꓬꓱꓼ ꓡ ꓝꓲ ꓠꓹ ꓟ꓾ ꓪꓴ-ꓢ ꓡꓰ ꓝꓴꓲ ꓟꓽ ꓙꓳ ꓢꓴ ꓖꓳ ꓕꓲ ꓣꓳ ꓔꓯ꓾ ꓣꓳ ꓐꓱ ꓶ ꓝꓴꓲ ꓒꓬꓱꓼ ꓡ ꓝꓲꓳ꓿

2 ꓘꓳ-ꓡꓱ-ꓕꓴ 6

1 ꓪꓴ-ꓢˍ ꓐꓰ ꓕꓲ ꓛꓳꓺꓼ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓥꓪ ꓠꓴꓽ ꓡꓰ ꓘꓶꓸ ꓖꓶꓽˍ ꓠꓬꓲ꓾ ꓠꓴ ꓪꓽ ꓟꓶꓺ ꓗꓷ ꓟ ꓪꓴ-ꓢ ꓣꓱꓽ ꓛꓰ ꓔꓯ ꓮꓽ ꓔꓳ ꓕꓽ ꓗꓷ ꓡꓰ ꓝꓲ꓿ 2 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ꓾ ꓘꓳ ꓣꓴ ꓓꓻˍ ꓟ ꓝꓲꓸ ꓗꓪ ꓠꓴ ꓔꓯ ꓥꓪ ꓠ ꓠꓹ ꓗꓷꓳ꓿ ꓢꓯꓼ ꓟꓬ ꓟꓶ ꓓꓻˍ ꓟ ꓦꓬꓼ ꓠꓬꓲ ꓗꓪ ꓠꓴ ꓔꓯ ꓥꓪ ꓬꓰ ꓙ ꓗꓷꓳ꓾ ꓐꓰ ꓐꓯˍ ꓡꓳ꓿ ꓠꓬꓲ ꓠꓹ꓾ ꓪꓴ-ꓢ ꓡꓰ ꓘꓳ ꓣꓴ ꓓꓻˍ ꓟ ꓝꓲꓸ ꓠꓬ ꓮ ꓟꓶ ꓥꓳ꓿ ꓠ ꓠꓹ꓾ ꓢꓯꓼ ꓟꓬ ꓟꓶ ꓓꓻˍ ꓟ ꓦꓬꓼ ꓠꓬꓲˍ ꓟꓲ ꓮ ꓟꓶ ꓥꓳ꓿ 3 ꓪꓴ-ꓢ ꓟꓬꓱꓽ ꓬꓰˍ ꓟ ꓗꓪ ꓢꓴ ꓡꓰ ꓥꓪ ꓠꓴꓽ ꓔꓯ ꓓꓰꓺ ꓖꓴ ꓧꓪ ꓑꓶꓸ ꓟꓽ ꓙꓳ ꓠꓹ ꓟ꓾ ꓥꓪ ꓠꓴꓽ ꓠꓬ ꓮꓽ ꓟ ꓔꓯˍ ꓟꓲ ꓛꓲ ꓕꓲꓽ ꓓꓴ ꓟꓽ ꓗꓷ ꓡꓰ ꓝꓲ ꓠꓬꓲ꓿ 4 ꓪ ꓜꓲ ꓥꓪ ꓠꓴꓽ ꓠꓽ꓾ ꓬꓰˍ ꓟ ꓮꓽ ꓙꓵ ꓗꓪ ꓪꓴ-ꓢ ꓬꓲ ꓚꓳ ꓑꓸ ꓥ ꓟ ꓟꓳꓸ ꓖꓶ ꓓꓳ ꓡ ꓝꓲ ꓠꓹ ꓟ꓾ ꓮꓽ ꓘꓶꓸ ꓜꓲꓽ ꓠ ꓗꓹ ꓟ ꓗꓪ꓾ ꓫꓸ ꓙꓵ ꓟꓷꓼ ꓙꓵˍ ꓟ ꓗꓪ꓾ ꓣꓱꓽ ꓟ ꓡꓳꓼ ꓟ ꓗꓪ꓾ 5 ꓠꓲꓹ ꓫꓸ ꓟꓬ ꓫˍ ꓟ ꓗꓪ꓾ ꓢꓴ ꓡꓰ ꓓꓶꓽ ꓡ ꓟ ꓗꓪ꓾ ꓐꓱ ꓓꓴꓽ ꓗꓪ ꓐꓱ ꓡ ꓟ ꓗꓪ꓾ ꓞꓳ ꓜꓴꓻ ꓞꓳ ꓟꓯꓼ ꓡꓰ ꓚꓳꓸ ꓡ ꓟ ꓗꓪ꓾ ꓟꓬꓱꓽ ꓟꓬꓽˍ ꓟ ꓗꓪ꓾ ꓬꓲꓼ ꓟꓶ ꓟꓽ ꓪ ꓟ ꓗꓪ꓾ ꓦꓰꓼ ꓟꓷꓼˍ ꓟ ꓗꓪ꓾ ꓕꓱ ꓟꓬ ꓫꓵꓽ ꓔꓯ ꓠꓲꓹ ꓟ ꓫꓵ ꓢꓲ ꓜꓲꓽˍ ꓡꓳ꓿ 6 ꓝꓮꓲ ꓥꓪ ꓠꓴꓽ ꓠꓬ꓾ ꓢꓲꓽ ꓢꓲꓽ ꓫꓬ ꓫꓬ ꓞꓳ ꓙꓳˍ ꓟ ꓗꓪ꓾ ꓙꓽ ꓜꓲꓼˍ ꓟ ꓗꓪ꓾ ꓜꓲꓽ ꓘꓴ ꓠꓲꓹ ꓗꓪ꓾ ꓠꓲꓹ ꓟ ꓙꓲˍ ꓟ ꓗꓪ꓾ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ꓾ ꓠꓵ ꓠꓲꓹ ꓚꓵ ꓗꓪ꓾ 7 ꓔꓱꓹˍ ꓟ ꓟꓸ ꓟꓲꓽ ꓗꓪ꓾ ꓪꓴ-ꓢ ꓪꓽ ꓠꓬꓲˍ ꓟ ꓗꓪ꓾ ꓥꓪ ꓠꓴꓽ ꓠꓽ ꓪꓴ-ꓢ ꓬꓲ ꓚꓳ ꓑꓸ ꓥ ꓟ ꓟꓳꓸ ꓖꓶˍ ꓡꓳ ꓿ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ ꓠꓬ꓾ ꓡꓯꓼ ꓶꓸ ꓡꓯꓼ ꓙ ꓗꓪ ꓥꓪ ꓠꓴꓽ ꓣꓱꓽ ꓓꓴ ꓟꓯꓼ ꓶꓻ ꓥ ꓡꓳ꓿ 8 ꓢꓴ ꓡꓰ ꓥꓪ ꓠꓴꓽ ꓟꓬꓱ ꓓꓳꓽ ꓒꓬꓹ ꓡ ꓟˍ ꓟꓲ ꓔꓳꓹ ꓜꓳꓽ ꓠꓬꓲꓳ꓿ ꓫꓱꓸ ꓖꓶ ꓡ ꓟˍ ꓟꓲ ꓟꓶ ꓠꓬꓲꓳ꓿ ꓢꓴ ꓡꓰ ꓥꓪ ꓠꓴꓽ ꓔꓯ ꓞꓳ ꓗꓶꓸ ꓚꓬꓹ ꓖꓶ ꓡ ꓥ ꓟꓲ꓾ ꓥꓪ ꓠꓴꓽ ꓠꓽ ꓔꓱꓹ ꓥꓳꓽˍ ꓡꓰ ꓫꓸ ꓕꓱˍ ꓡꓳ꓿ 9 ꓥꓪ ꓠꓴꓽ ꓔꓯ ꓢꓴꓻ ꓢꓷꓸ ꓟ ꓡꓰ ꓐꓰ ꓗꓹ ꓟꓲ꓾ ꓢꓴ ꓡꓰ ꓟꓽ ꓢꓷꓸ ꓟ ꓡꓰ ꓐꓰ ꓚꓬꓹ ꓡꓳ꓿ ꓫꓵꓻ ꓢꓴˍ ꓡꓰ ꓐꓰ ꓗꓹ ꓟꓲ꓾ ꓠꓬꓲ ꓠꓹ꓾ ꓥꓪ ꓠꓴꓽ ꓠꓬ ꓢꓯꓸ ꓔꓬ ꓢꓰꓽ ꓡꓳ꓿ ꓓꓶꓽˍ ꓟ ꓟꓶ ꓡꓰˍ ꓟꓲ ꓫꓵꓻ ꓗꓪ ꓛꓲ ꓟꓽ ꓗꓷ ꓡꓰ꓿ 10 ꓠꓲꓹ ꓟ ꓫꓸ ꓟ ꓡꓰ ꓐꓰ ꓗꓹ ꓟꓲ꓾ ꓮ ꓕꓯˍ ꓟꓲ ꓗꓹ ꓛꓲˍ ꓡꓳ꓿ ꓞꓳ ꓫꓸˍ ꓡꓰ ꓐꓰ ꓗꓹ ꓟꓲ꓾ ꓮꓽ ꓟꓬꓹ ꓣꓳ ꓔꓯ ꓐꓳ ꓡꓰ ꓝꓲ ꓐ ꓡ ꓡꓳ꓿ ꓮꓸ ꓫꓵ ꓟꓽ ꓙꓳ ꓟ ꓡꓰ ꓐꓰ ꓗꓹ ꓟꓲ꓾ ꓮꓸ ꓫꓵˍ ꓟꓲ ꓙꓳ ꓢꓴˍ ꓡꓰ ꓐꓰ ꓗꓹ ꓡꓳ꓿ 11 ꓘꓳ-ꓡꓱ-ꓕꓴ ꓢꓴꓳ꓾ ꓥꓪ ꓠꓴꓽ ꓠꓬ ꓠꓴ ꓪꓽ ꓔꓯ ꓮꓽ ꓙꓵ ꓔꓱꓹ ꓔꓱꓹꓼ ꓐꓯ ꓖꓶ ꓢꓲ꓾ ꓥꓪ ꓠꓴꓽ ꓠꓲꓹ ꓟˍ ꓟꓲ ꓠꓴ ꓪꓽ ꓐꓱ ꓶ ꓒꓴ ꓞꓹ ꓡꓳ꓿ 12 ꓠꓲꓹ ꓟ ꓟꓽ ꓒꓴ ꓢꓴ ꓠꓬ ꓠꓴ ꓪꓽ ꓥꓳ꓾ ꓥꓪ ꓠꓴꓽ ꓟꓽ ꓥ꓿ 13 ꓥꓪ ꓠꓬ ꓠꓴ ꓪꓽ ꓔꓯ ꓥꓪ ꓤ ꓠꓱ ꓐꓴ ꓔꓯˍ ꓡꓰ ꓐꓰ ꓫꓸ ꓕꓱ ꓟ ꓥꓳ꓿ ꓠꓴ ꓪꓽˍ ꓟꓲ ꓥꓪ ꓠꓴꓽ ꓔꓯꓸ ꓟꓳꓸ ꓠꓲꓹ ꓟ ꓒꓴ ꓡꓲꓸ ꓖꓶ ꓡꓯ꓿ 14 ꓠꓴ ꓪꓽ ꓠꓬ ꓟꓽ ꓦ ꓡꓱ ꓢꓴˍ ꓐꓰ ꓕꓽ ꓝꓱ ꓡꓯ ꓗꓳ꓿ ꓬꓲ ꓪ ꓠꓬ ꓠꓴ ꓪꓽ ꓐꓱ ꓶ ꓛꓳ ꓒꓯ ꓬꓰ ꓟꓽ ꓜꓳꓽ꓿ ꓮ ꓡꓲꓳ ꓐꓯ ꓠꓬ꓾ ꓔꓱꓹ ꓜꓳꓽˍ ꓟ ꓐꓰ ꓥꓶˍ ꓟ ꓠꓬ ꓮꓸ ꓫꓵ ꓪꓽ ꓡꓯꓽ ꓘꓳ ꓓꓴ ꓙꓳˍ ꓡ? ꓠꓬꓲ ꓟꓳ ꓓꓴˍ ꓐꓰ ꓠꓯ ꓞꓲꓹ ꓟ ꓠꓬ ꓮꓸ ꓫꓵ ꓙꓻ ꓡꓯꓽ ꓘꓳ ꓓꓴ ꓙꓳˍ ꓡ? 15 ꓙꓲ-ꓢꓴˍ ꓐꓰ ꓢ-ꓓꓯ ꓠꓬ ꓮꓸ ꓫꓵ ꓕꓽ ꓡꓯꓽ ꓘꓳ ꓓꓴ ꓙꓳˍ ꓡ? ꓦ ꓡꓱ ꓢꓴˍ ꓐꓰ ꓟꓽ ꓦ ꓡꓱ ꓢꓴ ꓠꓬ ꓮꓸ ꓫꓵ ꓑꓯꓹ ꓡꓯꓽ ꓘꓳ ꓓꓴ ꓙꓳˍ ꓡ? 16 ꓪꓴ-ꓢ ꓦꓲˍ ꓐꓰ ꓠꓲꓽ ꓐꓬꓱꓽ ꓠꓬ ꓮꓸ ꓫꓵ ꓧꓳꓹ ꓡꓯꓽ ꓘꓳ ꓓꓴ ꓙꓳˍ ꓡ? ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ꓾ ꓥꓪ ꓠꓬ ꓥꓪ ꓑ ꓫꓬꓼ ꓐꓴˍ ꓐꓰ ꓔꓬ ꓢꓲ꓾ ꓬꓲ ꓪꓽ ꓗꓳ ꓡꓳ ꓗꓪ ꓫꓱꓽˍ ꓥꓳ꓿ ꓥꓪ ꓠꓬ ꓬꓲ ꓪꓽ ꓪꓴ-ꓢ ꓬꓰ ꓢꓲ꓾ ꓬꓲ ꓪꓽˍ ꓟꓲ ꓥꓪ ꓑ ꓫꓬꓼ ꓬꓰˍ ꓥꓳ꓾ ꓐꓯˍ ꓟ ꓡꓰ ꓐꓰ꓾ ꓣꓳ ꓠꓬ ꓢꓯꓸ ꓔꓬ ꓟ ꓪꓴ-ꓢ ꓬꓲ ꓦꓲ ꓥ ꓡꓳ꓿ 17 ꓖꓳ ꓡꓱ ꓠꓬꓲ ꓢꓲ ꓒ ꓡꓰ꓾ ꓠꓴ ꓪꓽ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓐꓰ ꓓꓳ ꓡ ꓢꓲ꓾ ꓬꓲ ꓪꓽˍ ꓐꓰ ꓗꓳꓹ ꓞ ꓢꓲ ꓠꓬꓲ꓾ ꓟꓽ ꓫꓬꓻˍ ꓟ ꓕꓲ ꓫꓵꓽ ꓔꓯˍ ꓟꓲ ꓕꓽ ꓫꓱꓹ꓿ ꓖꓳ ꓡꓱ ꓠꓬ ꓠꓴ ꓪꓽ ꓔꓯ ꓥꓪ ꓘꓳ ꓣꓴ ꓢꓲ꓾ 18 ꓥꓪ ꓠꓬ ꓠꓴ ꓪꓽ ꓐꓹ ꓐ ꓬꓰ ꓢꓲ ꓠꓬꓲ꓾ ꓠꓴ ꓪꓽ ꓠꓬ ꓥꓪ ꓮꓺ ꓐꓲ ꓮꓸ ꓟꓲꓽ ꓐꓴ ꓬꓰˍ ꓥꓳ꓾ ꓐꓰ ꓮꓸ ꓫꓵˍ ꓟꓲ ꓐ ꓡ ꓢꓴ ꓢꓲ ꓒ ꓡꓰ ꓐꓯˍ ꓡꓳ꓿

2 ꓘꓳ-ꓡꓱ-ꓕꓴ 7

1 ꓠꓲꓹ ꓠꓵ ꓢꓴ ꓐꓴꓳ꓾ ꓙ ꓟꓳ ꓘꓶ ꓕꓱ ꓟꓬ ꓘꓶꓽ ꓙꓳˍ ꓠꓬꓲ꓾ ꓣꓳ ꓧꓪꓽ ꓖꓳ ꓓꓱˍ ꓐꓰ ꓦꓻ ꓗꓪ ꓟꓽ ꓫꓬꓻ ꓟꓽ ꓖꓼ ꓟ ꓮꓽ ꓙꓵ ꓗꓪ ꓐꓰ ꓢꓲꓽ ꓫꓬ ꓡꓰ ꓝꓲ꓿ ꓪꓴ-ꓢ ꓔꓯ ꓙꓳ ꓒꓵꓽˍ ꓟ ꓠꓯꓸꓼ ꓗꓪ꓾ ꓣꓳꓽ ꓢꓲ ꓚꓰꓸ ꓟꓶ ꓡꓰ ꓟ ꓕꓱ ꓟ ꓔꓯ ꓜꓳꓽ ꓓꓰ ꓡꓰ ꓝꓲ ꓡꓯ꓿ 2 ꓠꓴ ꓪꓽ ꓠꓲꓹ ꓟ ꓠꓬ ꓥꓪ ꓠꓴꓽ ꓔꓯꓸ ꓟꓳꓸ ꓒꓴ ꓖꓶ ꓡꓯ꓿ ꓥꓪ ꓠꓴꓽ ꓠꓬ ꓮꓽ ꓟ ꓔꓯ_ ꓟꓲ ꓟꓽ ꓛꓬ ꓡꓰ ꓠꓬꓲ꓿ ꓮꓽ ꓟ ꓔꓯˍ ꓟꓲ ꓟꓽ ꓐꓬ ꓡꓰ ꓝꓲ ꓠꓬꓲ꓿ ꓮꓽ ꓟ ꓔꓯˍ ꓟꓲ ꓟꓽ ꓒꓬꓸ ꓜꓽ ꓠꓬꓲ꓿ 3 ꓥꓪ ꓕꓱ ꓡꓱ ꓐꓯˍ ꓟ ꓠꓬ ꓠꓴ ꓪꓽ ꓔꓯ ꓝꓴꓲ ꓓꓰˍ ꓟ ꓟꓽ ꓥ꓿ ꓠꓴ ꓪꓽ ꓠꓬ ꓥꓪ ꓠꓴꓽ ꓠꓲꓹ ꓟ ꓗꓪ ꓮ ꓕꓯˍ ꓟꓲ ꓓꓯꓹ ꓠꓬꓲ꓾ ꓧꓶꓸ ꓕꓯ ꓥꓪ ꓐꓯ ꓗꓷ ꓟ ꓡꓰ ꓐꓰ꓾ ꓥꓪ ꓠꓴꓽ ꓠꓬ ꓠꓴ ꓪꓽˍ ꓐꓰ ꓕꓲ ꓛꓳꓺꓼ ꓫꓵꓻˍ ꓟꓲ ꓫꓵ꓾ ꓢꓯꓸˍ ꓟꓲ ꓢꓯꓸ ꓔꓬ ꓠꓲꓹ ꓫꓵˍ ꓡꓳ ꓫꓵꓽ ꓥ ꓡꓳ꓿ 4 ꓥꓪ ꓠꓬ ꓠꓴ ꓪꓽ ꓔꓯ ꓮꓽ ꓘꓶꓸ ꓦ ꓡꓱ ꓐꓳ ꓢꓲ ꓠꓴ ꓪꓽ ꓑꓶꓸ ꓓꓴ ꓮꓽ ꓘꓶꓸ ꓘꓶꓽ ꓘꓹ ꓡꓳ꓿ ꓖꓳ ꓡꓱ ꓠꓬꓲ ꓥꓪ ꓠꓴꓽ ꓫꓸ ꓙꓵˍ ꓟ ꓮꓽ ꓙꓵ ꓗꓪˍ ꓟꓲ ꓠꓲꓹ ꓗꓴ ꓟꓬ ꓗꓴ ꓟˍ ꓐꓰ ꓗꓹ ꓛꓲˍ ꓟ ꓐꓲ ꓡꓶꓽ ꓡꓰꓳ꓿ 5 ꓮ ꓡꓲꓳ ꓐꓯ ꓠꓬ ꓧꓶꓸ ꓕꓯ ꓥꓪ ꓠꓴꓽ ꓟ-ꓢꓲ-ꓓꓳ ꓗꓪ ꓛꓲ ꓬꓰ ꓕꓯ ꓥ ꓟꓲ꓾ ꓧꓪꓽ ꓖꓳ ꓓꓱ ꓗꓪ ꓥꓪ ꓠꓴꓽ ꓪꓴ ꓧꓶ ꓠꓽ ꓟꓽ ꓪ꓿ ꓮ ꓡꓲ ꓕꓲ ꓒꓳꓹ ꓗꓪˍ ꓟꓲ ꓥꓪ ꓠꓴꓽ ꓔꓯ ꓘꓶꓻ ꓡꓶꓽ ꓡ ꓟ ꓐꓰ ꓔꓳꓹ ꓡꓯꓽ ꓘꓳ ꓡ ꓟ ꓙꓳˍ ꓠꓬꓲ꓾ ꓠꓲꓹ ꓟ ꓗꓪ ꓙꓳꓺ ꓓꓴˍ ꓐꓰ ꓙꓽ ꓫꓸ ꓓꓴ ꓗꓷ ꓡꓰꓳ꓿ 6 ꓖꓳ ꓡꓱ ꓥ ꓟꓲ ꓠꓲꓹ ꓟ ꓫꓸ ꓢꓴ ꓔꓯ ꓠꓲꓹ ꓗꓴ ꓖꓶ ꓢꓴ ꓪꓴ-ꓢ ꓡꓰ꓾ ꓕꓲ-ꓔꓳ ꓔꓯ ꓝꓲ ꓩꓴ ꓡ ꓢꓲ꓾ ꓥꓪ ꓠꓴꓽ ꓔꓯ ꓠꓲꓹ ꓟ ꓗꓴ ꓖꓶꓽ ꓡꓺꓳ꓿ 7 ꓬꓲ ꓛꓲ ꓡ ꓟ ꓗꓪ ꓐꓰˍ ꓡꓰ ꓟꓽ ꓞꓲ꓾ ꓠꓴ ꓪꓽ ꓡꓰ ꓬꓲ ꓔꓯ ꓠꓲꓹ ꓟ ꓗꓴ ꓖꓶˍ ꓟ ꓗꓪ ꓐꓰˍ ꓟꓲ ꓥꓪ ꓠꓴꓽ ꓠꓲꓹ ꓗꓴ ꓟꓶ ꓡꓰꓳ꓿ ꓝꓮꓲ ꓠꓬ ꓬꓲ ꓡꓰ꓾ ꓠꓴ ꓪꓽ ꓠꓽ ꓥꓪ ꓔꓯ ꓮ ꓡꓲ ꓛꓲ ꓢꓲꓼ ꓙꓬ ꓔꓬ ꓟ ꓐꓰ꓾ ꓥꓪ ꓐꓱ ꓶ ꓮ ꓡꓲ ꓠꓲꓹ ꓟ ꓫꓸ ꓔꓬ ꓟ ꓐꓰ꓾ ꓥꓪ ꓔꓯ ꓮ ꓡꓲ ꓠꓲꓹ ꓟ ꓥꓳ ꓔꓬ ꓟ ꓐꓯ ꓖꓶ ꓡ ꓠꓬꓲ꓾ ꓥꓪ ꓪ ꓜꓲꓻ ꓗꓹ ꓛꓲ ꓡꓰꓳ꓿ 8 ꓧꓶꓸ ꓕꓯ ꓟ ꓥꓪ ꓕꓳ ꓶ ꓡꓯꓼ ꓫꓴ ꓡꓰ ꓠꓴ ꓪꓽ ꓔꓯ ꓠꓲꓹ ꓟ ꓫꓸ ꓡꓰ ꓝꓲ ꓠꓬꓲ꓾ ꓥꓪˍ ꓟꓲ ꓮ ꓔꓲꓸ ꓤ ꓠꓲꓹ ꓟ ꓫꓸ ꓡꓰꓳ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓠꓽ ꓠꓲꓹ ꓟ ꓟꓽ ꓫꓸ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓖꓳ ꓟ ꓡꓰ ꓠꓴ ꓪꓽ ꓔꓯ ꓕꓲ ꓑꓹ ꓤˍ ꓡꓰꓽ ꓠꓲꓹ ꓟ ꓫꓸ ꓡꓰ ꓝꓲˍ ꓟ ꓥꓪ ꓡꓳꓸ ꓓꓳ ꓡꓺꓳ꓿ 9 ꓮ ꓟꓶ ꓥꓪ ꓗ ꓛꓲˍ ꓟ ꓠꓬ꓾ ꓠꓴ ꓪꓽ ꓔꓯ ꓕꓳ ꓶ ꓖꓳ ꓟ ꓡꓰ ꓠꓲꓹ ꓟ ꓫꓸ ꓡꓰ ꓝꓲˍ ꓟ ꓗꓪ ꓐꓰ ꓠꓽ ꓟ ꓥ꓿ ꓠꓴ ꓪꓽ ꓠꓲꓹ ꓟ ꓫˍ ꓟ ꓠꓬ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓚꓱꓹ ꓗꓷ ꓡꓰ ꓠꓬꓲ ꓥꓪ ꓗꓹ ꓛꓲˍ ꓟ ꓥ ꓡꓳ꓿ ꓠꓴ ꓪꓽ ꓠꓲꓹ ꓟ ꓫꓸ ꓠ ꓗꓷ ꓡꓰ ꓟ ꓠꓬ ꓪꓴ-ꓢ ꓠꓲꓹ ꓡꓶ ꓗꓪ ꓐꓰ ꓥ ꓢꓲ꓾ ꓠꓴ ꓪꓽ ꓠꓬ ꓥꓪ ꓠꓴꓽ ꓑꓶꓸ ꓓꓴ ꓮꓸ ꓫꓵ ꓫꓺ ꓡꓰ ꓓꓴ ꓟꓽ ꓙꓳ꓿ 10 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓔꓯꓺˍ ꓐꓰ ꓡꓻˍ ꓟ ꓠꓲꓹ ꓟ ꓫꓸˍ ꓟ ꓡꓰ꓾ ꓢꓯꓼ ꓟꓬ ꓟꓶ ꓡꓰ ꓠꓹ ꓟ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓟ ꓬꓰ ꓓꓳ ꓡ ꓝꓲˍ ꓠꓬꓲ꓾ ꓮꓸ ꓫꓵ ꓟꓽ ꓛꓵ꓿ ꓖꓳ ꓡꓱ ꓥ ꓟꓲ ꓟꓲ ꓠꓯ ꓗꓪ ꓐꓰ ꓡꓻˍ ꓟ ꓠꓲꓹ ꓟ ꓫꓸˍ ꓟ ꓠꓬ ꓫꓵꓻˍ ꓟ ꓬꓰ ꓓꓳ ꓡ ꓝꓲˍ ꓡꓳ꓿ 11 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓔꓯ ꓐꓰ ꓡꓻˍ ꓟ꓾ ꓠꓴ ꓪꓽ ꓠꓲꓹ ꓟ ꓫ ꓓꓴ ꓡꓰ ꓬꓰ ꓓꓳ ꓡ ꓟ ꓮ ꓡꓲ ꓡꓴ ꓫꓵꓽ ꓥ ꓟ꓾ ꓓꓵꓽ ꓙ ꓠꓬꓲ꓿ ꓠꓴ ꓪꓽ ꓔꓯ ꓮ ꓘꓶꓻ ꓛꓲ ꓕꓰꓻ ꓡ ꓝꓲˍ ꓟ꓾ ꓛꓬꓻ ꓖꓴ ꓓꓰꓺ ꓖꓴ ꓟꓽ ꓙꓳ ꓠꓹ ꓟ ꓮ ꓘꓶꓻ ꓛꓲ ꓢꓯꓼ ꓕꓵꓼ ꓠꓲꓹ ꓙꓳ ꓡ ꓝꓲˍ ꓟ꓾ ꓥꓶˍ ꓟ ꓔꓯ ꓮ ꓘꓶꓻ ꓛꓲ ꓠꓲꓹ ꓜꓳ ꓡ ꓝꓲˍ ꓟ꓾ ꓮ ꓘꓶꓻ ꓛꓲ ꓙꓳꓺ ꓒꓵꓽ ꓡ ꓝꓲˍ ꓟ꓾ ꓮ ꓘꓶꓻ ꓛꓲ ꓢꓲꓼ ꓙꓬ ꓡ ꓝꓲˍ ꓟ꓾ ꓮ ꓘꓶꓻ ꓛꓲ ꓠꓲꓹ ꓟ ꓡꓱꓻ ꓡ ꓝꓲˍ ꓟ꓾ ꓟꓽ ꓜꓳꓽˍ ꓟ ꓔꓯ ꓮ ꓘꓶꓻ ꓛꓲ ꓪꓽ ꓛꓴꓽ ꓚꓱꓹ ꓠꓲꓹ ꓫꓵ ꓡ ꓝꓲˍ ꓟ꓾ ꓕꓱ ꓟꓬ ꓟ ꓔꓯ ꓓꓵꓽ ꓙꓽ ꓠꓬꓲ꓿ ꓕꓱ ꓟꓬ ꓫꓵ ꓮꓽ ꓙꓵ ꓗꓪ ꓠꓴ ꓪꓽ ꓠꓬ ꓓꓰꓺ ꓖꓴ ꓟꓽ ꓙꓳ ꓢꓴ ꓥ ꓟ ꓟꓳꓸ ꓖꓶ ꓓꓳ ꓡꓺꓳ꓿ 12 ꓖꓳ ꓡꓱ ꓠꓬꓲ ꓠꓴ ꓪꓽ ꓔꓯ ꓥꓪ ꓐꓳ ꓖꓶ ꓗꓷ ꓟ ꓠꓬ꓾ ꓛꓬ ꓗꓷ ꓢꓴ ꓑꓶꓸ ꓓꓴˍ ꓡꓰꓽ ꓟꓽ ꓥ꓿ ꓛꓬꓻ ꓡ ꓟ ꓜꓲꓽ ꓟꓶ ꓢꓴ ꓑꓶꓸ ꓓꓴˍ ꓟꓲ ꓟꓽ ꓥ꓿ ꓪꓴ-ꓢ ꓟꓲꓽ ꓙꓬ ꓗꓪ ꓠꓴ ꓪꓽ ꓠꓬ ꓥꓪ ꓠꓴꓽ ꓔꓯ ꓟꓳꓸ ꓮ ꓘꓶꓻ ꓛꓲ ꓠꓲꓹ ꓟ ꓡꓱˍ ꓟ ꓔꓯ ꓡꓳꓸ ꓓꓳ ꓡ ꓝꓲ ꓠꓹ ꓟ ꓥ ꓡꓳ꓿ 13 ꓕꓱ ꓟꓬ ꓫꓵꓽ ꓗꓪ ꓐꓰ ꓥꓪ ꓠꓴꓽ ꓠꓲꓹ ꓗꓴ ꓟꓶˍ ꓡꓳ꓿ ꓖꓳ ꓟˍ ꓡꓰ ꓟꓽ ꓞꓲ꓾ ꓠꓴ ꓪꓽ ꓮꓽ ꓙꓵ ꓢꓴ ꓡꓰ ꓕꓲ-ꓔꓳ ꓔꓯ ꓢꓰꓺ ꓡꓰ ꓝꓲ ꓢꓲ ꓬꓲ ꓗꓹ ꓛꓲ ꓟꓶ ꓡꓰ ꓠꓬꓲ꓾ ꓥꓪ ꓠꓴꓽˍ ꓟꓲ ꓪ ꓜꓲꓻ ꓗ ꓛꓲˍ ꓡꓳ꓿ 14 ꓮ ꓡꓲꓳ ꓐꓯ ꓠꓬ ꓕꓲ-ꓔꓳ ꓟꓲꓽ ꓙꓬ ꓗꓪ꓾ ꓠꓴ ꓪꓽ ꓓꓳꓽ ꓚ ꓢꓲ ꓥꓪ ꓘꓶꓽ ꓘꓹ ꓗꓷˍ ꓟꓲ꓾ ꓥꓪ ꓔꓯ ꓫꓸ ꓔꓳ ꓡꓰ ꓝꓲˍ ꓟ ꓟꓽ ꓙꓳ꓿ ꓠꓴ ꓪꓽ ꓔꓯ ꓥꓪ ꓠꓴꓽ ꓡꓰ ꓐꓯ ꓖꓶ ꓗꓷ ꓟ ꓮꓽ ꓙꓵ ꓔꓱꓹˍ ꓟ ꓥ ꓟ ꓡꓰ ꓐꓰ꓾ ꓕꓲ-ꓔꓳ ꓟꓲꓽ ꓙꓬ ꓗꓪ ꓥꓪ ꓘꓶ ꓘꓹ ꓟˍ ꓟꓲ ꓔꓱꓹˍ ꓟ ꓒꓬꓱꓼ ꓡꓺꓳ꓿ 15 ꓝꓮꓲ ꓕꓲ-ꓔꓳ ꓔꓯ ꓠꓴ ꓪꓽ ꓮꓽ ꓙꓵ ꓢꓴ ꓡꓰ ꓮ ꓡꓲ ꓐꓰ ꓠ ꓡꓳꓹ ꓢꓲ꓾ ꓙꓳ ꓠꓬꓲ ꓛꓱꓽ ꓠꓬꓲ ꓐꓰ ꓘꓳ ꓣꓴ ꓖꓶ ꓡ ꓟ ꓔꓯ ꓬꓲ ꓓꓵꓽ ꓙꓽ ꓛꓲ ꓡ ꓠꓬ꓾ ꓬꓲ ꓠꓽ ꓠꓴ ꓪꓽ ꓔꓯ ꓪ ꓜꓲꓻ ꓢꓲꓼ ꓙꓬˍ ꓡꓳ꓿ 16 ꓮꓸ ꓫꓵ ꓗꓪˍ ꓟꓲ ꓠꓴ ꓪꓽ ꓠꓬ ꓦ ꓡꓱ ꓐꓳ ꓓꓻˍ ꓠꓬꓲ ꓥꓪ ꓗꓹ ꓛꓲˍ ꓡꓳ꓿

2 ꓘꓳ-ꓡꓱ-ꓕꓴ 8

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓡꓰ ꓟ-ꓢꓲ-ꓓꓳ ꓗꓪ ꓟ ꓘꓴ ꓜꓲ ꓞꓳ ꓐꓴ ꓔꓯ ꓖꓶ ꓗꓷ ꓟ ꓣꓱꓽ ꓛꓰ ꓔꓯꓸ ꓟꓳꓸ꓾ ꓠꓴ ꓪꓽ ꓔꓯ ꓥꓪ ꓠꓴꓽ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 2 ꓬꓲ ꓪ ꓠꓬ ꓮꓽ ꓘꓶ ꓫꓸ ꓙꓵˍ ꓟ ꓤꓹ ꓠꓬꓲ ꓓꓴ ꓔꓳꓹ ꓜꓳꓽ ꓢꓲ ꓫꓸ ꓓꓰꓺ ꓡꓰˍ ꓟꓲ꓾ ꓬꓲ ꓪꓽ ꓗꓹ ꓛꓲˍ ꓟ ꓐꓲ ꓡꓶꓽ ꓡꓰ ꓢꓲ꓾ ꓮ ꓡꓲ ꓐ ꓡ ꓠꓬ ꓖꓳ ꓡꓱ ꓠꓲꓹ ꓡꓳꓻ ꓡꓳˍ ꓡꓰ ꓢꓴ ꓔꓯ ꓮꓽ ꓘꓶꓸ ꓬꓰ ꓙˍ ꓡꓳ꓿ 3 ꓖꓳ ꓡꓱ ꓢꓲ ꓬꓲ ꓪꓽ ꓐ ꓡ ꓟ ꓕꓯꓽ ꓢꓲ ꓗꓪ ꓥ ꓟꓲ꓾ ꓣꓱꓽ ꓙˍ ꓟ ꓟꓬꓱꓽ ꓗꓪ ꓚꓲ ꓛꓬ ꓠꓲꓹ ꓡꓱ ꓢꓲ ꓢꓯꓼ ꓕꓵꓼ ꓗꓷꓳ꓾ ꓐꓰ ꓥꓪ ꓢꓷꓸ ꓙ ꓟꓳ ꓙ ꓠꓲꓹ ꓫꓵˍ ꓡꓳ꓿ 4 ꓬꓲ ꓪꓽ ꓠꓲꓹ ꓡꓱˍ ꓟ ꓗꓪ ꓐꓰ ꓚꓲꓸ ꓛꓬ ꓡꓯꓼ ꓜꓴ ꓔꓴ ꓢꓲ꓾ ꓬꓴ-ꓔ ꓟꓵꓽ ꓗꓪ ꓔꓬ ꓟ ꓦ ꓡꓱ ꓢꓴ ꓐꓴ ꓔꓯ ꓣꓱꓽ ꓙˍ ꓟ ꓟꓬꓱꓽ ꓕꓱ ꓟ ꓗꓪ ꓔ ꓪ ꓡꓰ ꓠꓹ ꓟ꓾ ꓥꓪ ꓠꓴꓽ ꓔꓯ ꓓꓰꓽ ꓡꓺꓳ꓿ 5 ꓝꓮꓲ ꓠꓬ ꓥꓪ ꓠꓴꓽ ꓟꓽ ꓥꓳ ꓡꓳꓸ ꓔ ꓟ ꓗꓪ꓾ ꓬꓲ ꓪꓽ ꓠꓬ ꓕꓲ ꓖꓳ ꓓꓱ ꓕꓲ ꓠꓲꓹ ꓟ ꓡꓱꓸꓼ ꓢꓲ ꓒ ꓔꓯ ꓧꓶꓸ ꓕꓯ ꓡꓯꓼ ꓙꓱ ꓖꓶ ꓢꓲ꓾ ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ ꓥꓪ ꓠꓴꓽ ꓔꓯˍ ꓟꓲ ꓬꓰ ꓙ ꓡꓺꓳ꓿ 6 ꓟꓬꓱꓽ ꓕꓱ ꓟ ꓬꓰ ꓪꓴꓸ ꓔꓴ ꓢꓴ ꓠꓬ ꓕꓲ-ꓔꓳ ꓥ ꓠꓬꓲ꓾ ꓣꓱꓽ ꓙˍ ꓟ ꓟꓬꓱꓽ ꓕꓱ ꓟ ꓠꓴ ꓪꓽ ꓗꓳ ꓡꓳ ꓗꓪˍ ꓟꓲ ꓬꓰ ꓓꓳ ꓡꓰ ꓝꓲ ꓠꓹ ꓟ꓾ ꓥꓪ ꓠꓴꓽ ꓡꓰ ꓬꓲ ꓔꓯ ꓢꓯꓼ ꓖꓶ ꓗꓷꓳ꓿ 7 ꓠꓴ ꓪꓽ ꓠꓬ ꓙꓵꓻ ꓠꓲꓹˍ ꓐꓰ ꓐꓯ ꓙꓻˍ ꓐꓰ ꓢꓷ ꓠꓲꓹˍ ꓐꓰ ꓠꓲꓹ ꓟ ꓡꓱˍ ꓟ ꓮꓽ ꓙꓵˍ ꓐꓰ꓾ ꓠꓴ ꓪꓽ ꓠꓯS ꓗꓪ ꓠꓵ ꓠꓲꓹ ꓐꓲ ꓞꓹ ꓟ ꓡꓰ ꓐꓰ꓾ ꓣꓱꓽ ꓙˍ ꓟ ꓟꓬꓱꓽ ꓕꓱ ꓕꓲ ꓫꓵ ꓗꓪˍ ꓟꓲ ꓐꓲ ꓡꓶꓽ ꓡꓰ ꓝꓲ꓿ 8 ꓥꓪ ꓕꓱ ꓡꓱ ꓐꓯˍ ꓟ ꓠꓬ ꓠꓴ ꓪꓽ ꓔꓯ ꓕꓵꓼ ꓪꓽ ꓖꓶˍ ꓟ ꓟꓽ ꓥ꓿ ꓠꓱꓸ ꓐꓯꓼ ꓢꓴ ꓠꓲꓹ ꓟ ꓡꓱˍ ꓟ ꓔꓯ ꓖꓴ ꓢꓲ꓾ ꓠꓴ ꓪꓽˍ ꓟꓲ ꓠꓵ ꓠꓲꓹ ꓚꓵꓺ ꓙꓳ ꓟꓽ ꓙꓳ ꓤꓹ ꓠꓬꓲˍ ꓟ ꓥ ꓡꓳ꓿ 9 ꓮ ꓡꓲꓳ ꓐꓯ ꓠꓬ ꓣꓳ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓣꓱꓽ ꓛꓰ ꓔꓯ ꓠꓴ ꓪꓽ ꓢꓷˍ ꓡꓳ꓿ ꓬꓲ ꓠꓬ ꓞꓳ ꓐꓳ ꓞꓳ ꓬꓲꓼ ꓥꓻ ꓥ ꓟꓲ꓾ ꓬꓲ ꓠꓬ ꓠꓴ ꓪꓽ ꓐꓱ ꓶ ꓞꓳ ꓫꓸ ꓒꓬꓱꓼ ꓡ ꓢꓲ꓾ ꓬꓲ ꓫꓸˍ ꓟ ꓗꓪ ꓐꓰ ꓠꓴ ꓪꓽ ꓔꓯ ꓞꓳ ꓐꓳ ꓒꓬꓱꓼ ꓡ ꓝꓲꓳ꓿ 10 ꓫꓵꓽ ꓪꓴ ꓕꓱ ꓟ ꓔꓯꓸ ꓟꓳꓸ ꓥꓪ ꓓꓵꓽ ꓙˍ ꓟ ꓐꓯ ꓖꓶˍ ꓠꓬꓲ꓿ ꓮꓽ ꓠꓲꓹ ꓕꓯ ꓟꓬꓱꓽ ꓕꓱ ꓟ ꓬꓰ ꓪꓴꓸ ꓔꓴ ꓢꓴ ꓠꓬ ꓠꓴ ꓪꓽ ꓥ ꓟˍ ꓡꓰ ꓟꓽ ꓞꓲ꓾ ꓬꓰ ꓠꓲꓹ ꓙꓳ ꓢꓴˍ ꓟꓲ ꓠꓴ ꓪꓽ ꓥꓳ꓿ 11 ꓖꓳ ꓡꓱ ꓠꓬꓲ ꓠꓴ ꓪꓽ ꓬꓰ ꓐ ꓡ ꓟ ꓔꓯ ꓛꓳ ꓢꓲ꓾ ꓟꓬꓱꓽ ꓕꓱ ꓟ ꓮꓸ ꓟꓲꓸ ꓬꓰ ꓓꓳ ꓡꓰ ꓝꓲ꓿ ꓠꓴ ꓪꓽ ꓠꓲꓹ ꓡꓱ ꓢꓲ ꓐꓯ ꓞꓷꓹ ꓔ ꓟ ꓔꓯ ꓬꓰ ꓓꓳ ꓡꓰ ꓠꓹ ꓟ ꓢꓯꓼ ꓕꓵꓼ꓿ 12 ꓮ ꓡꓲꓳ ꓐꓯ ꓠꓬ ꓡꓯꓼ ꓫꓴ ꓖꓶ ꓠꓲꓹ ꓒꓴˍ ꓟ ꓠꓲꓹ ꓟ ꓙꓳˍ ꓕꓯ ꓠꓽ꓾ ꓪꓴ-ꓢ ꓘꓳ ꓣꓴ ꓠꓲꓹ ꓒꓴˍ ꓟ ꓥ ꓡꓳ꓿ ꓪꓴ-ꓢ ꓠꓽ ꓣꓳ ꓟꓽ ꓙꓳˍ ꓟ ꓔꓯ ꓛꓳ ꓢꓲ ꓧꓪ ꓔꓬ ꓟ ꓟꓽ ꓥ꓾ ꓣꓳ ꓙꓳˍ ꓟ ꓔꓯ ꓛꓳ ꓢꓲ ꓧꓪ ꓔꓬ ꓟ ꓥ ꓡꓳ꓿ 13 ꓕꓱ ꓟ ꓠꓬ ꓢꓴ ꓔꓯ ꓢꓻ ꓡꓰ ꓝꓲ ꓢꓲ ꓠꓴ ꓪꓽ ꓔꓯ ꓫꓸ ꓡꓰ ꓝꓲ ꓠꓹ ꓟ ꓟꓽ ꓥ꓿ ꓬꓲˍ ꓡꓰ꓾ ꓮꓽ ꓙꓵ ꓗꓪ ꓕꓲꓽ ꓡꓰꓹꓼ ꓐꓰ ꓣꓱꓽ ꓓꓴ ꓟꓴꓺ ꓓꓴ ꓙꓳ ꓡꓰ ꓠꓹ ꓟ ꓥ ꓡꓳ꓿ 14 ꓮ ꓟꓶ ꓕꓱ ꓕꓲ ꓝꓲꓸ ꓗꓪ ꓠꓴ ꓪꓽ ꓣꓱꓽ ꓓꓴ ꓙꓳˍ ꓟ ꓡꓰ ꓬꓲ ꓪꓽ ꓟꓽ ꓡꓳꓼ ꓟ ꓗꓪ ꓔ ꓙ ꓢꓲ꓾ ꓢ ꓖꓪ ꓬꓲ ꓪꓽ ꓙꓳꓻ ꓡ ꓠꓬ ꓠꓴ ꓪꓽ ꓟꓽ ꓡꓳꓼ ꓟ ꓗꓪ ꓔ ꓙ ꓡꓯꓽ ꓘꓳ ꓐ ꓡ ꓠꓹ ꓟ ꓥ ꓡꓳ꓿ ꓕꓱ ꓟ ꓗꓪ ꓐꓰ ꓮꓽ ꓙꓵ ꓢꓴ ꓔꓱ ꓟꓬꓸꓼ ꓙꓳ ꓠꓹ ꓟ ꓥ ꓡꓳ꓿ 15 ꓕꓱ ꓟ ꓠꓬ ꓕꓳ ꓶ ꓗꓪ꓾ ꓮꓽ ꓟꓬꓹ ꓫ ꓟꓶ ꓢꓴˍ ꓠꓬ ꓜꓰꓻ ꓡꓰ ꓟ ꓟꓽ ꓙꓳ꓾ ꓮꓽ ꓔꓲ ꓤ ꓫ ꓟꓶ ꓢꓴˍ ꓟꓲ ꓟꓽ ꓡꓳꓼ ꓟꓽ ꓗꓷ ꓡꓰ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥꓳ꓿ 16 ꓠꓴ ꓪꓽ ꓐꓱ ꓶ ꓥꓪ ꓠꓲꓹ ꓡꓱˍ ꓟ ꓡꓰ ꓐꓰ꓾ ꓕꓲ-ꓔꓳ ꓔꓯˍ ꓟꓲ ꓠꓲꓹ ꓡꓱ ꓝꓲ ꓢꓴ ꓪꓴ-ꓢ ꓔꓯ ꓫꓸ ꓟꓳ꓿ 17 ꓬꓲ ꓠꓬ ꓥꓪ ꓠꓴꓽ ꓡꓰ ꓓꓰꓽˍ ꓟ ꓔꓯ ꓘꓳ ꓣꓴˍ ꓟ ꓡꓰ ꓟꓽ ꓞꓲ꓾ ꓬꓲ ꓚꓲ ꓛꓬˍ ꓟꓲ ꓮꓽ ꓘꓶꓸ ꓠꓲꓹ ꓡꓱˍ ꓠꓬꓲ꓾ ꓬꓲ ꓓꓻ ꓬꓲ ꓠꓴ ꓪꓽ ꓔꓬ ꓗꓪ ꓡ ꓗꓷ ꓟ ꓥ ꓡꓳ꓿ 18 ꓥꓪ ꓠꓴꓽ ꓠꓬ ꓬꓲˍ ꓐꓰ ꓕꓲꓽ ꓛꓳꓺꓼ ꓬꓲꓼ ꓤ ꓠꓬꓲ ꓤ ꓕꓲ ꓣꓳ ꓝꓲ ꓩꓴ ꓡ ꓥꓳ꓿ ꓬꓲ ꓠꓬ ꓶꓼ ꓓꓳꓽ ꓫꓱꓹ ꓓꓳ ꓟꓬꓱꓽ ꓗꓪ ꓠꓲꓹ ꓡꓱˍ ꓟ ꓑꓶꓸ ꓓꓴ ꓘꓴ ꓜꓲ ꓞꓳ ꓮꓽ ꓙꓵ ꓡꓰ ꓞꓳ ꓒꓵꓽˍ ꓟ ꓕꓲ ꓣꓳ ꓥ ꓡꓳ꓿ 19 ꓕꓱ ꓟ ꓡꓰ ꓟꓽ ꓞꓲ꓾ ꓬꓰ ꓙ ꓓꓴ ꓡꓯꓼ ꓫꓴ ꓕꓱ ꓟ ꓑꓶꓺ ꓖꓶ ꓙꓰˍ ꓕꓯ꓾ ꓥꓪ ꓠꓴˍ ꓐꓰ ꓕꓲ ꓛꓳꓺꓼ ꓓꓴ ꓓꓳ ꓛꓳꓽ ꓒꓯꓹ ꓬꓰ ꓠꓹ ꓟ꓾ ꓘꓴ ꓜꓲ ꓞꓳ ꓐꓴ ꓡꓰ ꓬꓲ ꓔꓯ ꓝꓲ ꓔ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓥꓪ ꓠꓴꓽˍ ꓟꓲ ꓪꓴ-ꓢ ꓟꓬꓱꓺ ꓓꓳꓽ ꓓꓳ ꓡ ꓠꓹ ꓟ ꓐꓰ꓾ ꓣꓱꓽ ꓙˍ ꓟ ꓟꓬꓱꓽ ꓕꓱ ꓟ ꓗꓪ ꓥꓪ ꓠꓴꓽ ꓠꓲꓹ ꓡꓳꓻˍ ꓟ ꓟꓳꓸ ꓖꓶ ꓓꓳ ꓡ ꓠꓹ ꓟ ꓥ ꓡꓳ꓿ 20 ꓣꓱꓽ ꓙ ꓓꓴ ꓡꓯꓼ ꓫꓴ ꓕꓱ ꓟ ꓑꓶꓸ ꓓꓴ ꓥꓪ ꓠꓴꓽ ꓔꓯ ꓮꓽ ꓟˍ ꓟꓲ ꓛꓬ ꓖꓴ ꓓꓰꓺ ꓓꓴ ꓟꓽ ꓙꓳ ꓠꓹ ꓟ ꓥꓪ ꓠꓴꓽ ꓤ ꓟꓳ ꓔꓬ ꓡꓳ꓿ 21 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓠꓽ ꓢꓲ ꓒ ꓟꓲꓽ ꓙꓬ ꓗꓪˍ ꓟꓲ꓾ ꓞꓳ ꓤ ꓟꓲꓽ ꓙꓬ ꓗꓪˍ ꓟꓲ꓾ ꓜꓳꓽˍ ꓟ ꓡꓰꓽ ꓬꓰ ꓠꓹ ꓟ ꓢꓯꓼ ꓕꓵꓼˍ ꓡꓳ꓿ 22 ꓝꓮꓲ ꓥꓪ ꓠꓴꓽ ꓠꓬ ꓬꓲꓼ ꓤ ꓠꓬꓲ ꓤ ꓠꓱꓸ ꓐꓯꓼ ꓕꓲ ꓣꓳ ꓔꓯ ꓬꓲ ꓪꓽˍ ꓐꓰ ꓕꓲ ꓪꓺꓼ ꓝꓲ ꓩꓴ ꓗꓷꓳ꓿ ꓥꓪ ꓠꓴꓽ ꓠꓬ ꓮꓽ ꓟꓬꓹ ꓫꓵꓽ ꓗꓪ꓾ ꓬꓲ ꓠꓲꓹ ꓟ ꓡꓱꓻˍ ꓟ ꓔꓯ ꓮꓽ ꓟꓬ ꓧꓪꓹ ꓤꓹ ꓠꓬꓲ ꓟꓶꓳ꓿ ꓮ ꓟꓶ ꓬꓲ ꓠꓬ ꓠꓴ ꓪꓽ ꓔꓯ ꓮꓽ ꓘꓶꓸ ꓦ ꓡꓱ ꓐꓳˍ ꓟ ꓑꓶꓸ ꓓꓴ ꓪꓻ ꓜꓲꓻ ꓣꓱꓽ ꓙ ꓠꓲꓹ ꓡꓱˍ ꓡꓳ꓿ 23 ꓕꓲ-ꓔꓳ ꓠꓬ ꓥꓪ ꓛꓳꓽ ꓒꓯꓹ ꓥ ꓢꓲ꓾ ꓥꓪˍ ꓐꓰ ꓕꓲ ꓛꓳꓺꓼ ꓠꓴ ꓪꓽ ꓐꓱ ꓶ ꓟꓬꓱꓽ ꓬꓰ ꓢꓴ ꓥ ꓡꓳ꓿ ꓬꓲ ꓔꓯ ꓛꓳ ꓡ ꓢꓴ ꓬꓲꓼ ꓤ ꓠꓬꓲ ꓤ ꓕꓱ ꓠꓬꓲ ꓣꓳ ꓟ ꓠꓬ ꓘꓴ ꓜꓲ ꓞꓳ ꓝꓲ ꓓꓴ ꓥ ꓢꓲ꓾ ꓬꓲ ꓪꓽ ꓠꓬ ꓙꓲ-ꓢꓴ ꓟꓬꓱ ꓓꓳꓽ ꓓꓳ ꓡ ꓝꓲ ꓢꓴ ꓥ ꓡꓳ꓿ 24 ꓖꓳ ꓡꓱ ꓠꓬꓲ ꓕꓱ ꓕꓲ ꓧꓳꓽ ꓔꓯ ꓠꓴ ꓪꓽ ꓠꓵ ꓠꓲꓹ ꓗꓸ ꓚꓵ ꓟꓳꓸ ꓖꓶ꓿ ꓝꓮꓲ ꓠꓴ ꓪꓽ ꓑꓶꓸ ꓓꓴ ꓥꓪ ꓠꓴꓽ ꓘꓶ ꓘꓹ ꓗꓷ ꓟ ꓗꓸ ꓚꓵˍ ꓟꓲ ꓘꓴ ꓜꓲ ꓞꓳ ꓐꓴ ꓟꓳꓻ ꓪ ꓝꓲ꓿

2 ꓘꓳ-ꓡꓱ-ꓕꓴ 9

1 ꓪꓴ-ꓢ ꓦ ꓡꓱ ꓢꓴ ꓐꓴ ꓔꓯ ꓬꓰ ꓙ ꓟ ꓟꓬꓱꓽ ꓔꓯ ꓟꓳ ꓐꓯˍ ꓠꓬ ꓠꓴ ꓪꓽ ꓔꓯ ꓥꓪ ꓐꓳ ꓖꓶ ꓟꓽ ꓛꓵꓳ꓿ 2 ꓠꓴ ꓪꓽ ꓬꓰ ꓙ ꓠꓲꓹ ꓙꓳˍ ꓟ ꓥꓪ ꓢꓷꓸˍ ꓠꓬꓲ꓾ ꓥꓪ ꓠꓬ ꓠꓴ ꓪꓽ ꓔꓯ ꓫꓱꓸ ꓖꓶ ꓢꓲ꓾ ꓮ-ꓘꓷ-ꓬ ꓢꓴ ꓠꓬ ꓮꓽ ꓠꓲꓹ ꓕꓲ ꓘꓳꓼ ꓕꓯˍ ꓡꓰ ꓙꓽ ꓖꓶ ꓔꓸꓳ꓾ ꓐꓰ ꓟ-ꓢꓲ-ꓓꓳ ꓢꓴ ꓔꓯ ꓐꓯ ꓥꓪ ꓡꓰ ꓐꓯ ꓖꓶ ꓗꓷꓳ꓿ ꓖꓳ ꓡꓱ ꓢꓲ ꓠꓴ ꓪꓽ ꓠꓲꓹ ꓟ ꓡꓱˍ ꓟ ꓡꓰ ꓬꓲ ꓪꓽ ꓮꓽ ꓟꓬꓹ ꓣꓳ ꓔꓯ ꓡꓵꓹ ꓔꓴ ꓗꓷ ꓟ ꓥꓳ꓿ 3 ꓖꓳ ꓡꓱ ꓠꓬꓲ꓾ ꓥꓪ ꓐꓯ ꓗꓷ ꓟ ꓡꓰ ꓐꓰ ꓕꓱ ꓕꓲ ꓫꓵ ꓗꓪ ꓠꓴ ꓪꓽ ꓙꓽ ꓖꓶ ꓪ ꓠꓹ ꓟ꓾ ꓝꓮꓲ ꓥꓪ ꓠꓴꓽ ꓡꓰ ꓠꓴ ꓪꓽ ꓔꓯ ꓓꓳꓹ ꓟꓴ ꓗꓷ ꓟ ꓘꓶꓽ ꓖꓳꓽ ꓟꓽ ꓗꓷ ꓡꓰ ꓠꓹ ꓟ꓾ ꓥꓪ ꓡꓰ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓝꓲ ꓩꓴ ꓡ ꓟ ꓥꓳ꓿ 4 ꓕꓱ ꓟ ꓠꓬ ꓮ ꓧꓪꓹ꓾ ꓟ-ꓢꓲ-ꓓꓳ ꓢꓴˍ ꓟꓲ ꓥꓪˍ ꓐꓰ ꓕꓲ ꓛꓳꓺꓼ ꓡꓻ ꓢꓴ ꓙꓳ ꓢꓲ꓾ ꓠꓴ ꓪꓽ ꓟꓽ ꓙꓽ ꓖꓶ ꓔ ꓟ ꓔꓯ ꓟꓳꓻ ꓗꓷ ꓠꓬ꓾ ꓠꓴ ꓪꓽˍ ꓡꓰ ꓟꓽ ꓞꓲ꓾ ꓠꓴ ꓪꓽ ꓑꓶꓸ ꓓꓴ ꓘꓶ ꓘꓹ ꓗꓷ ꓢꓴ ꓥꓪ ꓠꓴꓽˍ ꓟꓲ ꓫꓸ ꓔꓳ ꓟꓽ ꓛꓲ ꓠꓹ ꓟ ꓐꓱ ꓶ ꓥꓳ꓿ 5 ꓖꓳ ꓡꓱ ꓠꓬꓲ ꓠꓴ ꓪꓽ ꓡꓰ ꓖꓶ ꓙ ꓟꓳˍ ꓟ ꓡꓯꓼ ꓫꓴ ꓖꓳ ꓟ ꓠꓬ꓾ ꓟꓽ ꓓ ꓟꓽ ꓞ ꓟ ꓗꓪ ꓐꓰ ꓟꓽ ꓥ ꓥ꓾ ꓠꓲꓹ ꓒꓴ ꓒꓴˍ ꓡꓰ ꓖꓶ ꓪ ꓡꓰ ꓠꓹ ꓟ꓾ ꓝꓮꓲ ꓠꓬ ꓥꓪ ꓟꓽ ꓡ ꓕꓯˍ ꓡꓰ ꓙꓽ ꓖꓶ ꓟꓶ ꓡꓰ ꓠꓹ ꓟ꓾ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠꓴ ꓪꓽ ꓔꓬ ꓗꓪ ꓧꓶꓸ ꓕꓯꓽ ꓝꓲ ꓩꓴ ꓡ ꓟ ꓥ ꓡꓳ꓿ 6 ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓮ ꓔꓲꓸ ꓤˍ ꓡꓰ ꓫꓵꓸ ꓢꓴ ꓠꓬ ꓮ ꓔꓲꓸ ꓤˍ ꓡꓰ ꓫ ꓟꓶˍ ꓥꓳ꓿ ꓮꓽ ꓟꓬꓹ ꓫꓵꓸ ꓢꓴ ꓠꓽ ꓮꓽ ꓟꓬꓹ ꓫ ꓟꓶˍ ꓥꓳ꓿ 7 ꓮꓽ ꓟ ꓠꓲꓹ ꓟ ꓗꓪ ꓚꓴ ꓬꓲꓹ ꓮ ꓡꓲ ꓓꓶꓽ ꓔ ꓠꓬ ꓖꓳ ꓡꓱ ꓖꓶ ꓠꓯꓹ ꓡꓳ꓿ ꓖꓶꓽ ꓟ ꓓꓻ ꓓꓻ ꓐꓰˍ ꓟꓲ ꓕꓽ ꓬꓰ꓿ ꓟꓽ ꓓ ꓟꓽ ꓞꓽˍ ꓟꓲ ꓕꓽ ꓬꓰ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓗꓹ ꓛꓲ ꓛꓲˍ ꓡꓰꓽ ꓖꓶ ꓡ ꓢꓴ ꓔꓯ ꓠꓲꓹ ꓠꓵˍ ꓡꓳ꓿ 8 ꓠꓴ ꓪꓽ ꓠꓬ ꓮꓽ ꓙꓵ ꓟ ꓗꓪ꓾ ꓮ ꓕꓯˍ ꓟꓲ꓾ ꓮꓸ ꓫꓵ ꓗꓪˍ ꓟꓲ ꓣꓱꓽ ꓡꓳꓼ ꓡꓰ ꓢꓲ꓾ ꓙꓲˍ ꓟ ꓟꓬꓱꓽ ꓥ ꓕ ꓑꓳ ꓮꓽ ꓟꓬꓹ ꓬꓰ ꓪ ꓡꓰ ꓠꓹ ꓟ꓾ ꓪꓴ-ꓢ ꓠꓬ ꓣꓱꓽ ꓛꓰ ꓥ ꓕ ꓑꓳꓸ ꓠꓴ ꓪꓽ ꓔꓯ ꓐꓲꓺ ꓡꓶꓽ ꓡꓰ ꓝꓲ ꓐ ꓡ ꓡꓳ꓿ 9 ꓕꓱ ꓟ ꓠꓬ ꓕꓳ ꓶ ꓗꓪ꓾ ꓬꓲ ꓠꓬ ꓞꓳ ꓫꓸ ꓐꓴ ꓔꓯ ꓠꓲꓹ ꓡꓳꓻ ꓡꓳˍ ꓡꓰꓽ ꓬꓲ ꓡꓯꓼ ꓫꓴ ꓑꓶꓺ ꓖꓶ ꓗꓷꓳ꓾ ꓬꓲ ꓔꓱꓹ ꓜꓳꓽˍ ꓟ ꓠꓬ ꓕꓲ ꓞꓲꓼ ꓕꓲ ꓑ ꓕꓶꓻ ꓞꓹ ꓡꓳ꓾ ꓐꓰ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿ 10 ꓜꓻ ꓫꓵꓸ ꓫꓵ ꓢꓴ ꓔꓯ ꓜꓻ ꓫꓵꓸ ꓖꓶ ꓢꓲ꓾ ꓜꓽ ꓢꓴ ꓔꓯ ꓜꓽ ꓓꓴ ꓖꓶꓽ ꓜ ꓢꓴ ꓪꓴ-ꓢ ꓡꓰ꓾ ꓠꓴ ꓪꓽ ꓔꓱꓹ ꓜꓳꓽˍ ꓟ ꓗꓪ ꓐꓰ ꓢꓴ ꓔꓯ ꓐꓱꓻ ꓖꓶ ꓓꓴ ꓟꓬꓽ ꓠꓬꓲ ꓙꓳ ꓡ ꓠꓹ ꓟ꓾ ꓶꓼ ꓝꓲꓸ ꓗꓪ ꓟꓬꓽ ꓠꓬꓲ ꓫ ꓟꓶ ꓡꓰ ꓝꓲˍ ꓥꓳ꓿ 11 ꓝꓮꓲ ꓠꓴ ꓪꓽ ꓠꓬ ꓢꓴ ꓔꓯ ꓖꓶꓽ ꓓꓴ ꓙꓳ ꓠꓹ ꓟ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓐꓳꓻ ꓡ ꓝꓲ ꓢꓲ꓾ ꓠꓴ ꓪꓽ ꓡꓰ ꓢꓴ ꓔꓯ ꓖꓶˍ ꓟ ꓡꓯꓼ ꓫꓴ ꓕꓱ ꓟ ꓥꓪ ꓠꓴꓽ ꓡꓰ ꓑꓶꓺ ꓖꓶˍ ꓟ ꓗꓪ ꓐꓰ꓾ ꓮꓽ ꓟꓬꓹ ꓣꓳ ꓠꓬ ꓪꓴ-ꓢ ꓔꓯ ꓫꓸ ꓟꓳˍ ꓥꓳ꓿ 12 ꓠꓴ ꓪꓽ ꓡꓰ ꓖꓶˍ ꓟ ꓡꓰ ꓪꓴ-ꓢ ꓦ ꓡꓱ ꓢꓴ ꓐꓴ ꓣꓱ ꓬꓯꓼˍ ꓟ ꓗꓪ ꓣꓱꓽ ꓡꓳꓼ ꓡꓰ ꓝꓲˍ ꓟ ꓡꓰ ꓟꓽ ꓞꓲ꓾ ꓪꓴ-ꓢ ꓔꓯ ꓫꓸ ꓟꓳˍ ꓟ ꓐꓲ ꓡꓶꓽ ꓡꓰ ꓝꓲˍ ꓟˍ ꓟꓲ ꓥꓳ꓿ 13 ꓣꓱꓽ ꓙˍ ꓟ ꓟꓬꓱꓽ ꓕꓱ ꓕꓲ ꓫꓵ ꓗꓪ ꓐꓰ ꓠꓴ ꓪꓽ ꓠꓬ꓾ ꓠꓴ ꓪꓽ ꓣꓷꓠˍ ꓟ ꓙꓲ-ꓢꓴ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓒꓵꓽ ꓛꓳ ꓢꓴ ꓥ ꓟ ꓬꓲ ꓗꓸ ꓚꓵ ꓙꓳ ꓢꓲ꓾ ꓠꓴ ꓪꓽ ꓠꓬ ꓠꓲꓹ ꓡꓳꓻ ꓡꓳˍ ꓡꓰ ꓮꓽ ꓙꓵ ꓢꓴ ꓐꓱ ꓶ ꓒꓴ ꓜꓲꓼ ꓖꓶˍ ꓟ ꓪꓴꓸ ꓠꓬꓲ꓾ ꓬꓲ ꓪꓽ ꓠꓽ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓥꓳ꓿ 14 ꓖꓳ ꓡꓱ ꓢꓲ ꓠꓴ ꓪꓽ ꓟꓶ ꓗꓷ ꓟ ꓪꓴ-ꓢ ꓣꓱꓽ ꓛꓰ ꓠꓬ ꓮꓸ ꓓꓲꓽ ꓪꓴꓽˍ ꓟ ꓑꓶꓸ ꓓꓴ꓾ ꓬꓲ ꓪꓽˍ ꓟꓲ ꓠꓴ ꓪꓽ ꓔꓯ ꓢꓲꓼ ꓙꓬ ꓢꓲ ꓠꓴ ꓪꓽ ꓐꓱ ꓶ ꓶꓼ ꓓꓰ ꓙˍ ꓥꓳ꓿ 15 ꓐꓯ ꓖꓴ ꓟꓽ ꓓ ꓟ ꓪꓴ-ꓢ ꓡꓯꓼ ꓫꓴ ꓑꓶꓸ ꓓꓴ ꓬꓲ ꓔꓯ ꓫꓸ ꓟꓳ꓿

2 ꓘꓳ-ꓡꓱ-ꓕꓴ 10

1 ꓠꓴ ꓪꓽˍ ꓐꓰ ꓟꓳꓻ ꓡꓯꓽ ꓘꓳˍ ꓕꓯ ꓠꓲꓹ ꓟ ꓣꓳ ꓢꓲ꓾ ꓠꓴ ꓪꓽ ꓔꓯˍ ꓐꓰ ꓗꓳꓹ ꓞꓹ ꓕꓯ ꓠꓲꓹ ꓪꓴꓽˍ ꓡꓳ꓾ ꓐꓰ꓾ ꓢꓴ ꓡꓰ ꓐꓯ ꓔꓬ ꓟ ꓒꓳ-ꓡꓳ ꓥꓪ ꓡꓰ꓾ ꓙꓲ-ꓢꓴ ꓠꓴꓽ ꓠꓲꓹˍ ꓐꓰ ꓙꓻ ꓣꓳꓽ ꓠꓲꓹ ꓡꓰ ꓠꓴ ꓪꓽ ꓔꓯ ꓘꓶꓸ ꓖꓶꓽ ꓠꓲꓹ ꓫꓵˍ ꓡꓳ꓿ 2 ꓮ ꓡꓲꓳ ꓐꓯ ꓠꓬꓕꓲ ꓐꓱ ꓡꓰ꓾ ꓒꓳ-ꓡꓳ ꓠꓬ ꓧꓪꓽ ꓠꓲꓹ ꓡꓶ ꓔꓯ ꓛꓳ ꓢꓲ ꓞꓳ ꓙꓳˍ ꓡꓳ꓾ ꓐꓰ ꓐꓯ ꓢꓴ ꓖꓳ ꓕꓲ ꓧꓳꓽ ꓔꓯ꓾ ꓥꓪ ꓡꓰ ꓠꓲꓹ ꓪꓴꓽ ꓪꓴˍ ꓐꓰ ꓬꓰ ꓟꓳꓸ ꓖꓶˍ ꓐꓰ ꓓꓵꓽ ꓙˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓴꓽ ꓡ ꓕꓯ꓾ ꓕꓱ ꓟꓬ ꓛꓲ ꓠꓲꓹ ꓪꓴꓽˍ ꓟ ꓣꓱꓽ ꓟꓳꓸ ꓖꓶ ꓟꓽ ꓛꓵ ꓠꓹ ꓟ꓾ ꓠꓴ ꓪꓽ ꓔꓯ ꓓꓰꓽ ꓠꓲꓹ ꓫꓵˍ ꓡꓳ꓿ 3 ꓥꓪ ꓠꓴꓽ ꓠꓬ ꓧꓪꓽ ꓖꓳ ꓓꓱ ꓗꓪ ꓦꓬꓼ ꓠꓬꓲ ꓗꓳꓸ ꓔꓬ ꓥ ꓟꓲ꓾ ꓧꓪꓽ ꓠꓲꓹ ꓡꓶ ꓔꓯ ꓛꓳ ꓢꓲ ꓟꓯꓼ ꓓꓶꓽ ꓡꓯꓽ ꓘꓳ ꓔꓬ ꓟ ꓟꓽ ꓥ꓿ 4 ꓟꓯꓼ ꓘꓶꓽ ꓗꓪ ꓥꓪ ꓠꓴꓽ ꓣꓱꓽˍ ꓟ ꓟꓯꓼ ꓶꓻ ꓤ ꓠꓬ ꓟꓲ ꓠꓯ ꓕꓱ ꓟ ꓗꓪ ꓟ ꓟꓽ ꓥ꓿ ꓬꓲˍ ꓡꓰ꓾ ꓟꓯꓼ ꓶ ꓕꓱ ꓟ ꓠꓬ ꓧꓪꓸ ꓒꓱ ꓔꓯ ꓒꓬꓹ ꓗꓷ ꓘꓴꓻˍ ꓟ꓾ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓢꓯꓼ ꓥ ꓡꓳ꓿ 5 ꓟꓲ ꓠꓯ ꓗꓪ ꓟ ꓙꓽ ꓜꓲꓼ ꓠꓲꓹ ꓡꓰ ꓪꓴ-ꓢ ꓢꓷꓸ ꓠꓲꓹ ꓔꓯ ꓔꓳꓹ ꓢꓲ꓾ ꓘꓶ ꓘꓹ ꓔꓴ ꓡ ꓟ ꓚꓴꓽ ꓬꓲꓹ ꓮꓽ ꓙꓵ ꓔꓯ ꓥꓪ ꓠꓴꓽ ꓒꓬꓹ ꓗꓷ ꓢꓲ ꓠꓬꓲ꓾ ꓞꓳ ꓤ ꓠꓲꓹ ꓟ ꓗꓪ ꓓꓵꓽ ꓙꓽˍ ꓟ ꓮꓽ ꓙꓵ ꓡꓱꓸꓼ ꓔꓯ ꓡꓳꓽ ꓔꓯꓹ ꓡ ꓗꓸ ꓠꓯ꓾ ꓙꓲ-ꓢꓴ ꓙꓵꓽˍ ꓟ ꓔꓯ ꓒꓵꓽ ꓛꓳ ꓝꓲˍ ꓡꓳ꓿ 6 ꓖꓳ ꓡꓱ ꓢꓲ ꓠꓴ ꓪꓽ ꓒꓵꓽ ꓛꓳˍ ꓟ ꓬꓰ ꓐꓲ ꓡꓰ ꓕꓯ꓾ ꓟꓽ ꓒꓵꓽ ꓛꓳ ꓢꓴ ꓮꓽ ꓙꓵ ꓔꓯ ꓟꓸ ꓙ ꓠꓹ ꓟ ꓥꓪ ꓠꓴꓽ ꓙꓽ ꓖꓶ ꓔ ꓟ ꓥ ꓡꓳ꓿ 7 ꓠꓴ ꓪꓽ ꓠꓬ ꓕꓯꓽ ꓢꓲ ꓕꓲ ꓔꓱꓹ ꓗꓪˍ ꓡꓰꓽ ꓡꓳꓸ ꓠꓬꓲ ꓔꓬ ꓡꓳ꓿ ꓮꓽ ꓟ ꓥ ꓟꓲ ꓚꓲ ꓛꓬ ꓠꓬ ꓙꓲ-ꓢꓴ ꓔꓯꓸ ꓟ ꓥ ꓡꓳ꓾ ꓐꓰ ꓦ ꓡꓱ ꓐꓳ ꓢꓴ ꓙꓳˍ ꓕꓯ ꓠꓽ꓾ ꓬꓲ ꓠꓬ ꓙꓲ-ꓢꓴ ꓔꓯꓸ ꓟ ꓥ ꓟ ꓡꓰ ꓐꓰ꓾ ꓥꓪ ꓠꓴꓽˍ ꓟꓲ ꓙꓲ-ꓢꓴ ꓔꓯꓸ ꓟ ꓥ ꓡꓳ꓾ ꓐꓰ ꓢꓷꓸ ꓠꓯꓹ ꓡꓳ꓿ 8 ꓮ ꓡꓲꓳ ꓐꓯ ꓠꓬ ꓢꓲ ꓒ ꓡꓰ ꓥꓪ ꓠꓴꓽ ꓔꓯ ꓖꓶ ꓡ ꓟ ꓙꓵꓽ ꓪ ꓠꓬ꓾ ꓠꓴ ꓪꓽ ꓔꓯ ꓒꓬꓹ ꓗꓷ ꓠꓹ ꓟ ꓟꓽ ꓥ꓿ ꓠꓴ ꓪꓽ ꓔꓯ ꓪꓴꓽ ꓡ ꓟꓴ ꓡ ꓝꓲ ꓠꓹ ꓟ ꓥ ꓡꓳ꓿ ꓥꓪ ꓠꓴꓽ ꓙꓵꓽ ꓪ ꓕꓱ ꓟ ꓗꓪ ꓐꓰ ꓥꓪ ꓘꓶ ꓘꓹ ꓗꓷ ꓟ ꓮ ꓔꓲ ꓟꓬꓽ ꓡꓰ ꓐꓷˍ ꓟꓲ ꓥꓪ ꓟꓽ ꓫꓸ ꓔꓳ꓿ 9 ꓥꓪ ꓠꓬ ꓕꓳ ꓶ ꓡꓯꓼ ꓫꓴ ꓗꓪ ꓐꓰ ꓠꓴ ꓪꓽ ꓔꓯ ꓚꓳꓹ ꓖꓶˍ ꓟ ꓡꓰ ꓐꓰ ꓗꓷ ꓡꓰˍ ꓟ ꓔꓯ ꓗꓳ ꓚꓱˍ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓕꓲ ꓐꓱ ꓡꓰ꓾ ꓒꓳ-ꓡꓳ ꓕꓳ ꓶ ꓡꓯꓼ ꓫꓴ ꓠꓬ ꓐꓯ ꓡꓲꓽˍ ꓟ ꓐꓰ ꓢꓯꓼ ꓙꓳˍ ꓟ ꓥꓻ ꓥ ꓟꓲ꓾ ꓬꓲ ꓖꓳ ꓓꓱ ꓔꓯ ꓟꓳˍ ꓕꓯ ꓠꓽ ꓬꓲ ꓠꓬ ꓟꓽ ꓳ'ꓸ ꓠꓬꓲꓺ꓿ ꓬꓲ ꓫꓸ ꓕꓱ ꓘꓶꓽˍ ꓟꓲ ꓒꓵˍ ꓟꓽ ꓥ꓾ ꓐꓰ ꓐꓯ ꓢꓴ ꓙꓳˍ ꓡꓳ꓿ 11 ꓕꓱ ꓡꓱ ꓫꓵ ꓡ ꓞꓳ ꓢꓷꓸ ꓠꓯꓹ ꓟ ꓠꓬ꓾ ꓥꓪ ꓠꓴꓽ ꓟꓽ ꓔꓬ ꓕꓯ ꓥꓪ ꓠꓴꓽ ꓕꓳ ꓶ ꓡꓯꓼ ꓫꓴ ꓗꓪ ꓮ ꓡꓲ ꓐꓳ ꓩꓴ ꓡ ꓠꓬ꓾ ꓖꓳ ꓗꓪ ꓛꓲ ꓡ ꓕꓯ꓾ ꓥꓪ ꓠꓴꓽ ꓬꓰˍ ꓟˍ ꓟꓲ ꓬꓲꓸ ꓕꓲ ꓡꓰꓹꓼ ꓬꓰ ꓡ ꓥꓳ꓾ ꓐꓰ ꓢꓷꓸ ꓠꓯꓹ ꓡꓳ꓿ 12 ꓥꓪ ꓠꓴꓽ ꓠꓬ ꓚꓲ ꓛꓬ ꓔꓯ ꓫꓱꓸ ꓖꓶ ꓢꓴ ꓖꓳ ꓕꓲ ꓧꓳꓽ ꓟˍ ꓐꓰ ꓔꓯꓺ ꓡꓯꓽ ꓘꓳ ꓟꓽ ꓑꓶꓸ꓿ ꓬꓲ ꓪꓽ ꓕꓲ ꓧꓳꓽ ꓟ ꓐꓰˍ ꓟꓲ ꓚꓬꓹ ꓠꓲꓹ ꓟꓽ ꓫꓵ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ꓾ ꓮꓽ ꓟ ꓟꓬꓽ ꓠꓬꓲ ꓓꓻˍ ꓟ꓾ ꓮꓽ ꓟ ꓟꓬꓽ ꓠꓬꓲ ꓢꓷꓸˍ ꓟ꓾ ꓬꓲ ꓪꓽ ꓛꓳꓽ ꓬꓲ ꓪꓽ ꓔꓯꓺ ꓡꓯꓽ ꓘꓳˍ ꓡꓳ꓿ ꓕꓱ ꓡꓱ ꓚꓲꓸ ꓛꓬꓽˍ ꓐꓰ ꓔꓯꓺ ꓡꓯꓽ ꓘꓳˍ ꓟ ꓠꓬ ꓙꓽ ꓜꓲꓼ ꓠꓲꓹ ꓙꓳ ꓢꓴ ꓟꓽ ꓥ꓿ 13 ꓥꓪ ꓠꓴꓽ ꓠꓬ ꓘꓶꓽ ꓘꓹ ꓙꓲꓽ ꓙꓳˍ ꓟ ꓕꓯꓽ ꓢꓲ ꓟꓽ ꓘꓶ ꓘꓹ꓿ ꓪꓴ-ꓢ ꓡꓰ ꓥꓪ ꓠꓴꓽ ꓔꓯ ꓐꓱꓻ ꓔ ꓖꓶˍ ꓟ ꓟꓬꓱꓽ ꓐꓬꓱꓼ ꓘꓶꓽ ꓗꓪˍ ꓡꓰꓽ ꓘꓶ ꓘꓹ ꓡꓳ꓿ ꓟꓬꓱꓽ ꓐꓬꓱꓼ ꓘꓶ ꓕꓱ ꓟ ꓠꓬ ꓠꓴ ꓪꓽ ꓔꓬ ꓗꓪ ꓛꓲˍ ꓟꓲ ꓡꓯꓼ ꓛꓲ ꓬꓰˍ ꓟ ꓥ ꓡꓳ꓿ 14 ꓥꓪ ꓠꓴꓽ ꓠꓬ ꓠꓴ ꓪꓽ ꓔꓯ ꓡꓯꓼ ꓟꓽ ꓛꓲ ꓢꓲ꓾ ꓘꓶꓽ ꓖꓳꓽ ꓡꓰ ꓘꓶꓽ ꓘꓹ ꓔꓬ ꓟ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓬ ꓗꓪ ꓙꓲ-ꓢꓴ ꓶꓼ ꓓꓳꓽ ꓫꓱꓹ ꓓꓳ ꓬꓲ ꓪꓴꓸ ꓚ ꓛꓲ ꓡ ꓢꓴ ꓠꓬ ꓥꓪ ꓠꓴꓽ ꓥꓳ꓿ 15 ꓥꓪ ꓠꓴꓽ ꓟꓬꓱꓽ ꓐꓬꓱꓼ ꓘꓶꓽ ꓗꓪ ꓐꓰ ꓘꓳꓻ ꓙꓰ ꓢꓲ꓾ ꓠꓱꓸ ꓐꓯꓼ ꓢꓴ ꓢꓯꓼ ꓕꓵꓼ ꓔ ꓟ ꓗꓪ ꓥꓪ ꓠꓴꓽ ꓟꓽ ꓘꓶ ꓘꓹ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓙꓵꓻ ꓠꓲꓹ ꓪꓴꓽ ꓡ ꓕꓯ꓾ ꓥꓪ ꓠꓴꓽ ꓟꓬꓱꓽ ꓐꓬꓱꓼ ꓘꓶꓽ ꓠꓬ ꓠꓴ ꓪꓽ ꓗꓪ ꓐꓰ ꓟꓬꓽ ꓠꓬꓲ ꓪꓴꓽ ꓡ ꓢꓲ꓾ 16 ꓠꓴ ꓪꓽ ꓐꓻ ꓢꓲ ꓗꓪ ꓟ ꓟꓵꓽ ꓗꓪˍ ꓟꓲ ꓶꓼ ꓓꓳꓽ ꓫꓱꓹ ꓓꓳ ꓟꓸ ꓛꓲ ꓬꓰ ꓠꓹ ꓟ ꓥꓳ ꓡꓳꓸ ꓔꓬ ꓡꓳ꓿ ꓠꓱꓸ ꓐꓯꓼ ꓢꓴ ꓡꓰ ꓬꓰ ꓔ ꓟ ꓟꓬꓱꓽ ꓗꓪ ꓐꓰ ꓥꓪ ꓠꓴꓽ ꓟꓽ ꓘꓶꓽ ꓘꓹ꓿ 17 ꓖꓳ ꓡꓱ ꓥ ꓟꓲ ꓕꓳ ꓶ ꓗꓪ ꓐꓯ ꓔ ꓟ ꓡꓰ ꓐꓰ꓾ ꓘꓶꓽ ꓘꓹ ꓢꓴ ꓠꓽ ꓢꓲ ꓒ ꓠꓯꓸꓼ ꓗꓪˍ ꓡꓰꓽ ꓘꓶꓽ ꓘꓹ ꓝꓲ꓿ 18 ꓮ ꓡꓲꓳ ꓐꓯ ꓠꓬ ꓚꓲ ꓛꓬ ꓔꓯ ꓓꓳꓹ ꓟꓴˍ ꓟ ꓠꓬ ꓘꓳ ꓣꓴ ꓒꓵꓽˍ ꓟ ꓟꓽ ꓚꓬꓹ꓿ ꓢꓲ ꓒ ꓡꓰ ꓓꓳꓹ ꓟꓴ ꓖꓶ ꓡ ꓟˍ ꓡꓰꓽ ꓒꓵꓽˍ ꓟ ꓚꓬꓹ ꓓꓻˍ ꓡꓳ꓿

2 ꓘꓳ-ꓡꓱ-ꓕꓴ 11

1 ꓥꓪ ꓮ ꓔꓲꓸ ꓙꓲꓽˍ ꓟ ꓡꓰ ꓐꓰ ꓫꓸ ꓕꓱˍ ꓟꓲ꓾ ꓠꓴ ꓪꓽ ꓡꓰ ꓜꓲꓽ ꓖꓶ ꓡ ꓠꓹ ꓟ ꓓꓰꓽˍ ꓥꓳ꓿ ꓚꓵ ꓚꓵ ꓐꓯˍ ꓠꓬ꓾ ꓠꓴ ꓪꓽ ꓠꓽ ꓥꓪ ꓔꓯ ꓮ ꓟꓶˍ ꓡꓰ ꓜꓲꓽ ꓖꓶ ꓔꓬ ꓡꓳ꓿ 2 ꓥꓪ ꓠꓬ ꓠꓴ ꓪꓽ ꓔꓯ ꓙꓲ-ꓢꓴ ꓔꓯ ꓝꓱꓺ ꓖꓶ ꓠꓹ ꓟ ꓟꓯꓸ ꓡꓯꓸ ꓟ ꓚꓵꓺ ꓬꓰ ꓝꓲˍ ꓐꓰ꓾ ꓪꓴ-ꓢ ꓐꓱ ꓶ ꓟꓬ ꓔꓳꓹ ꓢꓲ ꓠꓴ ꓪꓽ ꓔꓯ ꓢꓽ ꓔ ꓡꓳ꓿ 3 ꓖꓳ ꓡꓱ ꓥ ꓟꓲ ꓩꓴꓺ ꓡꓰ ꓖꓳꓼ ꓠꓲꓹ ꓗꓪ ꓐꓰ ꓰꓹ-ꓪ ꓔꓯ ꓧꓳꓽ ꓪꓴꓸ ꓙꓰ ꓟ ꓡꓰ ꓐꓰ꓾ ꓠꓴ ꓪꓽ ꓓꓵꓽ ꓙꓽˍ ꓟ ꓔꓯ ꓧꓶꓸ ꓙꓰ ꓝꓲ ꓢꓲ꓾ ꓠꓲꓹ ꓔꓱꓹ ꓠꓲꓹ ꓓꓰꓺˍ ꓟ ꓡꓰ ꓙꓲ-ꓢꓴ ꓔꓯ ꓔꓱ ꓔꓱꓹꓼ ꓐꓰ ꓒꓵꓽ ꓛꓳˍ ꓟ ꓗꓪ ꓐꓰ ꓒꓳꓹ ꓙꓰ ꓝꓲˍ ꓟ ꓔꓯ ꓥꓪ ꓗꓳꓺ ꓚꓱˍ ꓡꓳ꓿ 4 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓬ ꓗꓪ ꓡ ꓢꓴ ꓡꓰ꓾ ꓥꓪ ꓠꓴꓽ ꓚ ꓗꓷ ꓟ ꓬꓰ-ꓢꓴ ꓟꓽ ꓥ ꓥ꓾ ꓬꓰ-ꓢꓴ ꓬꓲ ꓔꓱꓹ ꓬꓲ ꓕꓲ ꓣꓳ ꓙ ꓖꓴ ꓚˍ ꓟꓲ꓾ ꓥ ꓠꓬ ꓠꓴ ꓪꓽ ꓟꓶꓺ ꓗꓷ ꓟ ꓦꓻ ꓟꓽ ꓥ ꓥ꓾ ꓦ ꓬꓲ ꓔꓱꓹ ꓬꓲ ꓕꓲꓽ ꓟ ꓟꓶ ꓡꓰ ꓠꓹ ꓟ ꓠꓴ ꓪꓽ ꓔꓯ ꓟꓸ ꓖꓶˍ ꓟꓲ꓾ ꓥ ꓠꓬ ꓠꓴ ꓪꓽ ꓘꓳ ꓣꓴ ꓗꓷ ꓟ ꓶꓼ ꓓꓳꓽ ꓫꓱꓹ ꓓꓳ ꓟꓽ ꓥ ꓥ꓾ ꓬꓲ ꓔꓱꓹ ꓬꓲ ꓕꓲ ꓫꓵꓽ ꓚˍ ꓟꓲ꓾ ꓠꓴ ꓪꓽ ꓠꓽ ꓕꓱ ꓡꓱ ꓚꓺ ꓢꓴ ꓔꓯ ꓜꓲꓽ ꓔ ꓢꓰꓽ ꓐꓷ꓿ 5 ꓥꓪ ꓠꓽ ꓠꓴ ꓪꓽ ꓡꓰ ꓮꓸ ꓓꓲꓽ ꓪꓴꓽˍ ꓟ ꓝꓲ ꓓꓴ ꓚꓬꓹ ꓔ ꓢꓴ ꓐꓴ ꓠꓯꓸ ꓘꓪ ꓮꓽ ꓔꓲꓸˍ ꓟꓲ ꓣꓳꓺˍ ꓟ ꓟꓽ ꓥ꓾ ꓐꓰ ꓓꓵꓽ ꓙꓽˍ ꓡꓳ꓿ 6 ꓥꓪ ꓐꓯ ꓙ ꓟꓽ ꓙꓳ ꓥ ꓟꓲ꓾ ꓢꓷꓸ ꓠꓲꓹ ꓟꓽ ꓙꓳ ꓟ ꓟꓽ ꓥ꓿ ꓕꓱ ꓟ ꓠꓬ ꓮ ꓕꓯˍ ꓟꓲ꓾ ꓮꓸ ꓫꓵ ꓗꓪˍ ꓟꓲ꓾ ꓠꓴ ꓪꓽ ꓔꓯ ꓔꓲꓺ ꓢꓲꓽ ꓢꓲˍ ꓡꓰꓽ ꓥꓪ ꓠꓴꓽ ꓟꓳꓸ ꓖꓶ ꓗꓷꓳ꓿ 7 ꓠꓴ ꓪꓽ ꓔꓯ ꓛꓵꓽ ꓔꓴ ꓖꓶ ꓠꓹ ꓟ꓾ ꓥꓪ ꓠꓬ ꓚꓲ ꓛꓬ ꓔꓯ ꓱꓺ ꓡꓰ ꓝꓲ ꓢꓲ꓾ ꓠꓴ ꓪꓽ ꓔꓯ ꓬꓲ ꓒꓵꓽ ꓟꓽ ꓧꓪꓺ ꓧꓪ꓾ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳ ꓚ ꓟꓸ ꓖꓶ ꓗꓷ ꓟ ꓠꓬ꓾ ꓛꓬ ꓗꓷ ꓟ ꓥ ꓡ? 8 ꓥꓪ ꓠꓬ ꓠꓱꓸ ꓐꓯꓼ ꓘꓴ ꓜꓲ ꓞꓳ ꓗꓪ ꓐꓰ ꓪꓽ ꓒꓵꓽ ꓣꓴ ꓜ ꓢꓲ꓾ ꓬꓲ ꓪꓽ ꓔꓯ ꓟꓸ ꓖꓶ ꓠꓯꓹ ꓟ ꓬꓲ ꓛꓲ ꓠꓴ ꓪꓽ ꓔꓯ ꓶꓼ ꓓꓳꓽ ꓫꓱꓹ ꓓꓳ ꓚ ꓖꓶ ꓗꓷꓳ꓿ 9 ꓠꓴ ꓪꓽˍ ꓐꓰ ꓔꓬ ꓢꓲ ꓣꓱ ꓟꓽ ꓡꓳꓼˍ ꓕꓯ꓾ ꓠꓴ ꓪꓽ ꓕꓲ ꓣꓳ ꓔꓯˍ ꓟꓲ ꓥꓪ ꓟꓽ ꓪꓴꓽ ꓧꓶ ꓡꓰ ꓝꓲ꓿ ꓮ ꓡꓲꓳ ꓐꓯ ꓠꓬ ꓥꓪ ꓣꓱꓽ ꓟꓽ ꓡꓳꓼ ꓟ ꓗꓪ꓾ ꓟ-ꓢꓲ-ꓓꓳ ꓗꓪ ꓟ ꓘꓴ ꓜꓲ ꓞꓳ ꓐꓴ ꓡꓰ ꓬꓰ ꓙ ꓓꓴ ꓡꓯꓼ ꓘꓪ ꓩꓴ ꓡꓺꓳ꓿ ꓠꓴ ꓪꓽ ꓔꓯ ꓟꓽ ꓪꓴꓽ ꓧꓶ ꓡꓰ ꓝꓲ ꓠꓹ ꓟ ꓮꓸ ꓫꓵ ꓗꓪˍ ꓟꓲ ꓥꓪ ꓤ ꓟꓳ ꓗꓷ ꓟ ꓡꓰ ꓐꓰ꓾ ꓕꓱ ꓡꓱ ꓖꓳ ꓑꓳˍ ꓟꓲ ꓡꓯꓽ ꓫꓵ ꓤ ꓟꓳˍ ꓥꓳ꓿ 10 ꓥꓪ ꓠꓯꓸꓼ ꓗꓪ ꓙꓲ-ꓢꓴ ꓬꓲ ꓔꓱꓹˍ ꓟ ꓓꓯꓹ ꓟ ꓡꓰ ꓐꓰ꓾ ꓮ-ꓘꓷ-ꓬꓼ ꓕꓲ ꓟꓵ ꓡꓱꓸꓼ ꓗꓪ ꓥꓪ ꓘꓶꓽ ꓘꓹ ꓟ ꓕꓱ ꓟ ꓔꓯ ꓮꓽ ꓟˍ ꓟꓲ ꓗꓽ ꓔ ꓟꓽ ꓐ ꓡ꓾ ꓐꓰ ꓥꓪ ꓢꓷˍ ꓡꓳ꓿ 11 ꓮꓸ ꓫꓵ ꓪꓴꓸ ꓠꓬꓲ ꓥ ꓡ? ꓠꓴ ꓪꓽ ꓔꓯ ꓥꓪ ꓟꓽ ꓠꓲꓹ ꓠꓵˍ ꓠꓬꓲ ꓥ ꓡ? ꓟꓽ ꓥ꓾ ꓠꓴ ꓪꓽ ꓔꓯ ꓥꓪ ꓠꓲ ꓠꓵˍ ꓟ ꓪꓴ-ꓢ ꓢꓷˍ ꓡꓳ꓿ 12 ꓥꓪ ꓠꓴꓽˍ ꓡꓰ ꓐꓰ ꓟꓬꓱꓽ ꓬꓰˍ ꓡꓳ꓾ ꓐꓯ ꓢꓲ ꓝꓲ ꓓꓴ ꓥ ꓟ ꓡꓰ ꓐꓰ ꓘꓶꓽ ꓘꓹ ꓢꓴ ꓖꓳ ꓕꓲ ꓧꓳꓽ ꓟ ꓔꓯ ꓗꓽ ꓔ ꓠꓹ ꓟ꓾ ꓥꓪ ꓬꓰ ꓗꓷ ꓟ ꓡꓰ ꓐꓰ ꓡꓯꓽ ꓫꓵ ꓬꓰˍ ꓢꓰꓽ ꓥꓳ꓿ 13 ꓮ ꓡꓲꓳ ꓐꓯ ꓠꓬ ꓕꓱ ꓡꓱ ꓫꓵ ꓡ ꓞꓳ ꓠꓬ ꓟꓽ ꓔꓱꓹ ꓟ ꓝꓲ ꓐꓴˍ ꓐꓰ ꓖꓳꓼ ꓠꓲꓹ ꓟꓬꓱꓽ ꓬꓰ ꓢꓴ ꓥ ꓢꓲ꓾ ꓚꓲ ꓛꓬ ꓔꓯ ꓙꓲ-ꓢꓴ ꓝꓲ ꓓꓴ ꓥ ꓟ ꓡꓰ ꓐꓰ ꓒꓬꓱꓽ ꓫꓬꓹ ꓗꓶꓸ ꓢꓴ ꓥ ꓡꓳ꓿ 14 ꓕꓱ ꓟ ꓔꓯ ꓓꓵꓽ ꓙꓽ ꓟꓶ ꓟꓽ ꓛꓵ꓿ ꓮ ꓡꓲꓳ ꓐꓯ ꓠꓬ ꓢ-ꓓꓯ ꓬꓲ ꓚꓲ ꓛꓬˍ ꓟꓲ ꓠꓬꓲ ꓟꓳ ꓓꓴ ꓝꓲ-ꓓꓴ ꓒꓬꓱꓽ ꓫꓬꓹ ꓘꓶꓸˍ ꓡꓳ꓿ 15 ꓖꓳ ꓡꓱ ꓠꓬꓲ ꓢ-ꓓꓯ ꓝꓲ ꓓꓴ ꓐꓴ ꓠꓬ꓾ ꓔꓱꓹ ꓜꓳꓽˍ ꓟ ꓗꓪ ꓣꓱꓽ ꓙ ꓢꓴ ꓒꓬꓱꓽ ꓫꓬꓹ ꓗꓶꓸˍ ꓟ ꓙꓳ ꓡ ꓥ ꓟꓲ ꓕꓽ ꓓꓵꓽ ꓙꓽ ꓟꓶ꓿ ꓬꓲ ꓪꓽ ꓡꓳꓹ ꓬꓰˍ ꓟ ꓗꓪ ꓠꓬ ꓬꓲ ꓪꓽ ꓬꓰ ꓗꓷ ꓟ ꓡꓰ ꓐꓰ ꓶꓼ ꓫꓺ ꓟꓶˍ ꓥꓳ꓿ 16 ꓥꓪ ꓝꓮꓲ ꓐꓯ ꓖꓶˍ ꓠꓬꓲ꓾ ꓮꓽ ꓟˍ ꓟꓲ ꓥꓪ ꓔꓯ ꓞꓳ ꓙꓲꓽ ꓕꓽ ꓚꓬꓹ꓿ ꓕꓱ ꓡꓱ ꓚꓬꓹ ꓢꓴ ꓙꓳˍ ꓟꓲ꓾ ꓥꓪ ꓮ ꓔꓲꓸ ꓤ ꓘꓶ ꓘꓹ ꓠ ꓟ꓾ ꓞꓳ ꓙꓲꓽ ꓥ ꓟ ꓡꓰ ꓐꓰ ꓥꓪ ꓔꓯ ꓘꓳ ꓣꓴ ꓡꓯ꓿ 17 ꓮ ꓟꓶ ꓥꓪ ꓫ ꓕꓱˍ ꓟ ꓠꓬ ꓢꓲ ꓒ ꓔꓯ ꓛꓳ ꓢꓲ ꓫꓸ ꓕꓱˍ ꓟ ꓟꓽ ꓥ꓿ ꓞꓳ ꓙꓲꓽˍ ꓡꓰ ꓐꓰ ꓫꓸ ꓕꓱˍ ꓟ ꓥ ꓡꓳ꓿ 18 ꓧꓪꓽ ꓖꓳ ꓓꓱ ꓔꓯ ꓛꓳ ꓢꓲ ꓘꓶꓽ ꓘꓹ ꓢꓴ ꓮꓽ ꓟꓬꓹ ꓙꓳˍ ꓠꓬꓲ ꓥꓪˍ ꓟꓲ ꓮꓽ ꓔꓲꓸ ꓘꓶ ꓘꓹ ꓟꓸ ꓖꓶ ꓠꓲꓹ ꓫꓵˍ ꓡꓳ꓿ 19 ꓠꓴ ꓪꓽ ꓠ ꓙꓽ ꓜꓲꓼ ꓢꓴ ꓥ ꓠꓬꓲ ꓠꓲꓹ ꓒꓴ ꓒꓴˍ ꓐꓰ ꓞꓳ ꓙꓲꓽ ꓔꓯ ꓜꓲꓽˍ ꓡꓳ꓾ ꓟꓽ ꓥ ꓡ?꓿ 20 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓠꓴ ꓪꓽ ꓔꓯ ꓚꓳ ꓑꓸ ꓬꓰ ꓝꓲ ꓢꓴ꓾ ꓠꓴ ꓪꓽ ꓔꓯ ꓒꓬꓹ ꓜꓽ ꓢꓴ꓾ ꓠꓴ ꓪꓽ ꓔꓯ ꓪꓻ ꓕꓴ ꓢꓴ꓾ ꓠꓴ ꓪꓽ ꓔꓯ ꓟꓳꓻ ꓟꓽ ꓟꓵ ꓢꓴ꓾ ꓠꓴ ꓪꓽ ꓒꓬꓱꓽ ꓟꓬ ꓗꓪ ꓓꓶꓽ ꓢꓴ ꓔꓯˍ ꓟꓲ ꓜꓲꓽˍ ꓡꓳ꓾ ꓟꓽ ꓥ ꓡ?꓿ 21 ꓥꓪ ꓠꓽ ꓖꓳ ꓟꓬ ꓫꓵꓽ ꓬꓰ ꓟꓽ ꓐ ꓡ ꓠꓬꓲ꓾ ꓫꓸ ꓔꓳ ꓓꓴ ꓥꓳ꓾ ꓐꓰ ꓥꓪ ꓚꓬꓹ ꓠꓯꓹ ꓡ? ꓖꓳ ꓡꓱ ꓥ ꓟꓲ ꓥꓪ ꓞꓳ ꓙꓲꓽ ꓥꓳ ꓫ ꓕꓱ ꓖꓶˍ ꓠꓬꓲ꓾ ꓮꓽ ꓟ ꓮꓺ ꓡꓲ ꓫꓵꓽ ꓗꓪ ꓠꓲꓹ ꓪꓴꓽˍ ꓠꓬ ꓥꓪˍ ꓟꓲ ꓠꓲꓹ ꓪꓴꓽ ꓓꓴ ꓙꓳˍ ꓡꓳ꓿ 22 ꓬꓲ ꓪꓽ ꓠꓬ ꓦꓲ-ꓐꓱ-ꓣꓴ ꓡ ꓞꓳ ꓥ ꓡ? ꓥꓪˍ ꓟꓲ ꓥꓳ꓿ ꓬꓲ ꓪꓽ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓥ ꓡ? ꓥꓪˍ ꓟꓲ ꓥꓳ꓿ ꓬꓲ ꓪꓽ ꓠꓬ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓡ? ꓥꓪˍ ꓟꓲ ꓥꓳ꓿ 23 ꓥꓪ ꓠꓬ ꓞꓳ ꓪꓴꓸˍ ꓡꓰ ꓐꓰ ꓫ ꓕꓱ ꓖꓶˍ ꓠꓬꓲ꓾ ꓬꓲ ꓪꓽ ꓠꓬ ꓙꓲ-ꓢꓴ ꓔꓯ ꓣꓱꓽ ꓙ ꓢꓴ ꓥ ꓡ? ꓥꓪ ꓪꓻ ꓜꓲ ꓥꓳ꓿ ꓢꓯꓼ ꓕꓵꓼ ꓪꓴꓽ ꓧꓶˍ ꓟ ꓗꓪ ꓥꓪ ꓪꓻ ꓜꓲ ꓟꓬꓽˍ ꓡꓳ꓿ ꓐꓱ ꓓꓴ ꓗꓪ ꓐꓱ ꓗꓷˍ ꓟ ꓥꓪ ꓪꓻ ꓜꓲ ꓟꓬꓽˍ ꓡꓳ꓿ ꓓꓶꓽ ꓟꓶ ꓟ ꓗꓪˍ ꓟꓲ ꓥꓪ ꓪ ꓜꓲ ꓟꓬꓽˍ ꓡꓳ꓿ ꓫꓵꓻ ꓠ ꓛꓲˍ ꓟꓲ ꓮꓽ ꓟꓬꓹ ꓧꓪ ꓗꓷ ꓡꓰꓳ꓿ 24 ꓬꓴ-ꓔ ꓡ ꓞꓳ ꓡꓰ ꓬꓲ ꓪꓽ ꓗ ꓫꓵ ꓔꓯ ꓛꓳ ꓢꓲ꓾ ꓥꓪ ꓔꓯ ꓢ ꓞꓲ ꓗꓴ ꓕꓷꓹ ꓐꓰ ꓥꓪꓽ ꓧꓪꓹ ꓔꓲꓸ ꓡꓺꓳ꓿ 25 ꓥꓪ ꓔꓯ ꓢꓲꓹ ꓓ ꓡꓰ ꓢ ꓧꓪꓹ ꓔꓲꓸ ꓡꓺꓳ꓿ Bꓸ ꓛꓲ ꓡꓰ ꓕꓲ ꓧꓪꓹ ꓡꓳꓺ ꓡꓺꓳ꓿ ꓡꓲ ꓐꓬ ꓡꓰˍ ꓟ ꓗꓪ ꓢ ꓧꓪꓹ ꓗꓷ ꓡꓰꓳ꓿ ꓠꓯꓸˍ ꓟ ꓬꓲꓻ ꓡꓴꓽ ꓐꓱ ꓗꓪ ꓕꓲ ꓦꓬꓼ ꓕꓲ ꓠꓬꓲ ꓔꓬ ꓗꓷꓳ꓿ 26 ꓓꓴ ꓓꓳˍ ꓟ ꓗꓪ ꓙꓲ ꓣꓴꓽ ꓓꓴ ꓮꓽ ꓟꓬꓹ ꓧꓪꓹ ꓔꓳꓹ ꓜꓳꓽ ꓗꓷꓳ꓿ ꓠꓯꓺ ꓬꓲ ꓗꓪ ꓙꓲ ꓣꓴꓽˍ ꓟ꓾ ꓦꓴ ꓜꓽ ꓢꓴ ꓑꓶꓸ ꓓꓴ ꓙꓲ ꓣꓴˍ ꓟ꓾ ꓥꓪ ꓕꓲ ꓫꓵꓽ ꓟ ꓡ ꓞꓳ ꓗꓪ ꓐꓰ ꓙꓲ ꓣꓴꓽˍ ꓟ꓾ ꓐꓶ ꓞꓳ ꓗꓪ ꓐꓰ ꓙꓲ ꓣꓴꓽˍ ꓟ꓾ ꓡꓳ ꓒꓱ ꓠꓯꓸꓼ ꓗꓪ ꓙꓲ ꓣꓴˍ ꓟ꓾ ꓡꓲ ꓛꓲ ꓗꓪ ꓙꓲ ꓣꓴꓽˍ ꓟ꓾ ꓬꓲꓻ ꓡꓴꓽ ꓐꓱ ꓗꓪ ꓙꓲ ꓣꓴꓽˍ ꓟ꓾ ꓟꓽ ꓔꓱꓹ ꓟ ꓬꓲꓼ ꓤ ꓠꓬꓲ ꓤ ꓐꓴ ꓗꓳ ꓡꓳ ꓗꓪ ꓙꓲꓻ ꓣꓴꓽˍ ꓟ ꓔꓳꓹ ꓜꓳꓽ ꓢꓲ꓾ 27 ꓢꓯꓼ ꓕꓵꓼ ꓪꓴꓽ ꓧꓶꓻ ꓢꓲ ꓟꓽ ꓬꓲꓼ ꓟꓶ ꓟ ꓮꓽ ꓟꓬꓹ ꓦꓬꓼ ꓗꓷ ꓡꓰꓳ꓿ ꓟꓷꓼˍ ꓟꓲ ꓟꓷꓼ꓾ ꓢꓲꓼˍ ꓟꓲ ꓢꓲꓼ꓾ ꓜꓽ ꓓꓴ ꓟꓽ ꓙꓳ ꓮꓽ ꓟꓬꓹ ꓧꓪꓹ ꓗꓷ ꓡꓰꓳ꓿ ꓙꓬꓺˍ ꓟ ꓗꓪ ꓖꓪꓽ ꓓꓴ ꓟꓽ ꓙꓳ ꓮꓽ ꓟꓬꓹ ꓧꓪ ꓗꓷ ꓡꓰꓳ꓿ 28 ꓖꓳ ꓟꓬ ꓫꓵꓽˍ ꓡꓰ ꓟꓽ ꓞꓲ꓾ ꓘꓴ ꓜꓲ ꓞꓳ ꓮꓽ ꓙꓵ ꓟ ꓑꓶꓸ ꓓꓴ ꓙꓽ ꓫˍ ꓟ ꓡꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓥꓪ ꓔꓯ ꓠꓬꓲꓸ ꓞꓹ ꓡꓳ꓿ 29 ꓮꓽ ꓟ ꓢꓯꓼ ꓐ ꓔꓬ ꓢꓲ ꓥꓪˍ ꓟꓲ ꓟꓽ ꓢꓯꓼ ꓐˍ ꓡ? ꓢꓴ ꓡꓰ ꓮꓽ ꓟ ꓔꓯ ꓡꓱꓸ ꓗꓷ ꓝꓲ ꓠꓬ ꓥꓪ ꓠꓲꓹ ꓟ ꓟꓽ ꓛꓴꓻ ꓞꓹ ꓡ? 30 ꓥꓪ ꓘꓶꓽ ꓘꓹ ꓠ ꓗꓹ ꓕꓯ ꓠꓽ꓾ ꓥꓪ ꓢꓯꓼ ꓐˍ ꓟ ꓔꓯ ꓟꓳꓸ ꓘꓶ ꓘꓹ ꓥꓳ꓿ 31 ꓕꓱ ꓟ ꓔꓯꓸ ꓟꓳꓸ ꓥꓪ ꓟꓽ ꓗꓶꓸ ꓟ ꓠꓬ ꓕꓲ ꓞꓲꓼ ꓕꓲ ꓑ ꓶꓼ ꓙꓳ ꓫꓱꓹ ꓙꓳˍ ꓟ ꓢꓲ ꓒ ꓬꓰ-ꓢꓴ ꓬꓲ ꓐꓹ ꓐ ꓪꓴ-ꓢ ꓢꓷˍ ꓡꓳ꓿ 32 ꓔ-ꓟ-ꓢꓷ ꓗꓪ ꓪ ꓔꓲ ꓬꓹ-ꓡꓲ-ꓔꓼ ꓠꓯꓸ ꓘꓪ ꓟ ꓢꓲꓽ ꓒ ꓓꓽ ꓟ ꓠꓬ꓾ ꓥꓪ ꓔꓯ ꓣꓴ ꓠꓹ ꓟ ꓔ-ꓟ-ꓢꓷ ꓡꓳ ꓒꓱ ꓗꓪ ꓦꓴ ꓠꓬꓹ ꓡꓳ꓿ 33 ꓖꓳ ꓡꓱ ꓥ ꓟꓲ ꓡꓳ ꓒꓱ ꓚꓬꓹ ꓗꓪ ꓟ ꓠꓬꓲ ꓟꓳ ꓓꓴ ꓗꓺ ꓘꓶꓽ ꓗꓪ ꓐꓰ꓾ ꓘꓹ ꓕꓴ ꓗꓪ ꓥꓪ ꓔꓯ ꓗꓶ ꓔ ꓢꓲ ꓩꓴ ꓬꓯꓼ ꓡꓰ ꓠꓬꓲ ꓬꓲ ꓡꓯꓼ ꓒꓯꓹ ꓗꓪ ꓐꓰ ꓡꓲꓹ ꓗꓷ ꓟꓶˍ ꓟ ꓥꓳ꓿

2 ꓘꓳ-ꓡꓱ-ꓕꓴ 12

1 ꓥꓪ ꓘꓶ ꓘꓹˍ ꓟ ꓙꓲꓻ ꓖꓴ ꓟꓽ ꓙꓳˍ ꓟꓲ꓾ ꓡꓯꓽ ꓫꓵ ꓘꓶ ꓘꓹˍ ꓢꓰꓽ ꓥꓳ꓿ ꓮ ꓟꓶ ꓥꓪ ꓠꓬ ꓢꓲ ꓒ ꓦ ꓐꓬꓱꓽˍ ꓐꓰ ꓟꓳꓸ ꓖꓶˍ ꓟ ꓔꓯ ꓟꓳꓸ ꓐꓯ ꓛꓲ ꓬꓰ ꓝꓲ ꓠꓲꓹ ꓫꓵˍ ꓡꓳ꓿ 2 ꓥꓪ ꓠꓬ ꓙꓲ-ꓢꓴ ꓠꓯS ꓗꓪ ꓔꓬ ꓢꓴ ꓕꓲ ꓣꓳ ꓔꓯ ꓢꓷˍ ꓡꓳ꓿ ꓕꓱ ꓕꓲ ꓣꓳ ꓔꓯ ꓠꓬ ꓧꓶꓸ ꓕꓯ ꓞꓲ ꓡꓲ ꓘꓳꓼ ꓗꓪ꓾ ꓟꓴꓽ ꓗꓪ ꓢ ꓔꓱꓹ ꓕꓲ ꓔꓱꓹ ꓗꓪ ꓛꓲ ꓛꓵꓽ ꓓꓯ ꓙꓰꓳ꓿ ꓬꓲ ꓖꓳ ꓓꓱ ꓬꓲ ꓑꓰꓹ ꓛꓵꓽ ꓓꓯ ꓙꓰ ꓥ ꓢꓷ?꓾ ꓥ ꓠꓬ ꓦ ꓐꓬꓱꓽ ꓟꓳꓻ ꓗꓷ ꓥ ꓢꓷ?꓾ ꓥꓪ ꓟꓽ ꓢꓷꓸ꓿ ꓪꓴ-ꓢ ꓠꓽ ꓢꓷˍ ꓡꓳ꓿ 3 ꓥꓪ ꓠꓬ ꓕꓱ ꓡꓱ ꓫꓵꓽ ꓡ ꓞꓳ ꓕꓲ ꓣꓳ ꓔꓯ ꓢꓷˍ ꓟꓲ꓾ ꓬꓲ ꓔꓯ ꓧꓪꓽ ꓖꓳ ꓓꓱꓽ ꓗꓪ꓾ ꓥ ꓠꓬ ꓦ ꓗꓪ ꓛꓵꓽ ꓓꓯ ꓙꓰˍ ꓟ ꓥꓪ ꓟꓽ ꓢꓷꓸ꓿ ꓪꓴ-ꓢ ꓠꓽ ꓢꓷˍ ꓡꓳ꓿ 4 ꓬꓲ ꓔꓯ ꓠꓬ ꓙꓳ-ꓢ-ꓖꓴ ꓗꓪ ꓛꓵꓽ ꓓꓯ ꓙꓰ ꓢꓲ꓾ ꓖꓳ ꓗꓪ ꓡ ꓞꓳ ꓐꓯ ꓟꓽ ꓗꓴꓸ ꓡꓳ ꓫꓵꓽˍ ꓐꓰ ꓐꓯ ꓟꓸ ꓟꓽ ꓓ ꓡꓳ ꓫꓵ ꓥꓳꓽ ꓑ ꓙꓽˍ ꓡꓳ꓿ 5 ꓕꓱ ꓡꓱ ꓫꓵ ꓕꓲ ꓣꓳ ꓐꓱ ꓶ ꓥꓪ ꓘꓶ ꓘꓹ ꓠꓲꓹ ꓫꓵˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓢꓯꓼ ꓐꓽˍ ꓟ ꓗꓪ ꓐꓰ ꓟꓽ ꓥ ꓠꓬ꓾ ꓥꓪ ꓚꓲ ꓛꓬ ꓐꓱ ꓶ ꓠꓽ ꓟꓽ ꓘꓶ ꓘꓹ꓿ 6 ꓥꓪ ꓠꓬ ꓘꓶ ꓘꓹ ꓠꓲꓹ ꓫꓵˍ ꓟꓲ꓾ ꓔꓱꓹ ꓟ ꓐꓯ ꓘꓶˍ ꓡꓰ ꓐꓯ ꓔꓬ ꓠꓬꓲ꓾ ꓥꓪ ꓠꓬ ꓞꓳ ꓙꓲꓽ ꓟꓽ ꓥ꓿ ꓮ ꓧꓪꓹ ꓢꓴ ꓠꓬ ꓥꓪ ꓟꓬꓱꓽ ꓔꓯ ꓡꓳꓸ ꓟꓳ ꓢꓲ꓾ ꓥ ꓠꓬ ꓥꓪ ꓐꓯ ꓘꓶꓽ ꓑꓶ ꓓꓴ꓾ ꓥꓪ ꓔꓯ ꓒꓵꓽ ꓙꓲꓽ ꓙꓳˍ ꓟ ꓕꓯ ꓢꓲ ꓒꓵꓽ ꓡ ꓟ ꓔꓯ ꓗꓳꓺ ꓚꓱ ꓠꓬꓲ꓾ ꓥꓪ ꓘꓶꓽ ꓘꓹ ꓟꓽ ꓑꓶꓸ꓿ 7 ꓪꓴ-ꓢ ꓡꓰ ꓥꓪ ꓔꓯ ꓟꓳꓸ ꓖꓶ ꓡ ꓟ ꓮꓸ ꓓꓲꓽ ꓪꓴꓽˍ ꓟ ꓕꓱ ꓟꓬ ꓫꓵꓽ ꓗꓪ ꓐꓰ ꓥꓪ ꓟꓽ ꓘꓶ ꓘꓹ ꓟꓬꓽ ꓡꓰ ꓠꓹ ꓟ꓾ ꓥꓪ ꓧꓪꓽ ꓗꓪ ꓥꓪ ꓔꓯ ꓗꓸ ꓠꓻ ꓡꓰ ꓝꓲ ꓠꓹ ꓟ ꓢ-ꓓꓯ ꓬꓲ ꓝꓲ ꓓꓴ ꓛꓴꓽ ꓕꓲ ꓕꓷꓹ ꓥꓳꓹ ꓡꓰ ꓝꓲˍ ꓡꓳ꓿ 8 ꓖꓳ ꓡꓱ ꓠꓬꓲ ꓛꓴꓽ ꓕꓱ ꓟ ꓥꓪ ꓗꓪ ꓐꓰ ꓓꓳ ꓙꓰ ꓠꓹ ꓟ꓾ ꓥꓪ ꓠꓬ ꓢꓲ ꓒ ꓔꓯ ꓢ ꓧꓪꓹ ꓓꓰꓽ ꓗꓷꓳ꓿ 9 ꓖꓳ ꓡꓱ ꓥ ꓟꓲ ꓬꓲ ꓡꓰ ꓥꓪ ꓔꓯ꓾ ꓥꓪ ꓣꓱꓽ ꓛꓰ ꓠꓬ ꓠꓴ ꓐꓱ ꓶ ꓡꓳꓼˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓪꓽ ꓠꓬꓲˍ ꓟ ꓠꓬ ꓢꓯꓼ ꓐꓽˍ ꓟ ꓠꓯꓸꓼ ꓗꓪ ꓟꓳꓸ ꓖꓶ ꓓꓳ ꓡ ꓥꓳ꓾ ꓐꓰ ꓐꓯ ꓖꓶ ꓡꓺꓳ꓿ ꓖꓳ ꓡꓱ ꓠꓬꓲ ꓙꓲ-ꓢꓴ ꓪꓽ ꓠꓬꓲˍ ꓟ ꓥꓪ ꓔꓯ ꓚꓰꓹ ꓞꓹ ꓠꓹ ꓟ꓾ ꓥꓪ ꓢꓯꓼ ꓐꓽˍ ꓟ ꓗꓪ ꓐꓰ ꓮꓸ ꓓꓲꓽ ꓠꓲꓹ ꓒꓴ ꓢꓲ ꓪ ꓜꓲꓻ ꓘꓶ ꓘꓹ ꓥꓳ꓿ 10 ꓖꓳ ꓡꓱ ꓠꓬꓲ ꓙꓲ-ꓢꓴ ꓐꓱ ꓶ ꓢꓯꓼ ꓐꓽˍ ꓟ ꓗꓪ꓾ ꓫꓸ ꓔꓳ ꓫ ꓒꓯꓼ ꓬꓰ ꓖꓶ ꓡ ꓟ ꓗꓪ꓾ ꓣꓱꓽ ꓟ ꓡꓳꓼˍ ꓟ ꓗꓪ꓾ ꓗꓸ ꓧꓪˍ ꓟ ꓐꓰ ꓠꓲꓹ ꓫꓸ ꓟꓬ ꓫˍ ꓟ ꓗꓪ ꓥꓪ ꓠꓲꓹ ꓘꓪ ꓫꓵˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓮ ꓕꓯ ꓢꓯꓼ ꓐꓽˍ ꓠꓬ ꓖꓳ ꓕꓯ ꓙꓲ-ꓢꓴ ꓠꓯS ꓗꓪ ꓥꓪ ꓢꓯꓼ ꓔꓰꓹ ꓡ ꓓꓴ ꓙꓳˍ ꓡꓳ꓿ 11 ꓥꓪ ꓠꓬ ꓘꓶ ꓘꓹ ꓟ ꓗꓪ ꓞꓳ ꓙꓲꓽ ꓒꓬꓱꓼ ꓡꓺꓳ꓿ ꓠꓴ ꓪꓽ ꓡꓰ ꓥꓪ ꓔꓯ ꓟꓽ ꓓ ꓟꓽ ꓞꓽ ꓖꓳ ꓡꓱ ꓗꓷ ꓡꓰ ꓝꓲˍ ꓟ ꓥꓳ꓿ ꓥꓪ ꓠꓬ ꓝꓲ ꓓꓴ ꓥ ꓟ ꓔꓯ ꓠꓴ ꓪꓽ ꓡꓰ ꓣꓷꓠꓸ ꓙꓲꓽ ꓙꓳˍ ꓡꓳ ꓫꓵꓽ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓮꓸ ꓫꓵ ꓟꓽ ꓒꓵꓽ ꓢꓴ ꓥ ꓟꓲ꓾ ꓠꓴ ꓪꓽ ꓡꓰ ꓮꓸ ꓓꓲꓽ ꓪꓴꓽˍ ꓟ ꓝꓲ ꓓꓴ ꓚꓬꓹ ꓔ ꓢꓴ ꓐꓴ ꓔꓯ ꓖꓼ ꓟꓽ ꓟꓶ ꓟ ꓮꓸ ꓫꓵˍ ꓟꓲ ꓟꓽ ꓙꓳ꓿ 12 ꓝꓲ ꓓꓴ ꓚꓵ ꓚꓵ ꓥ ꓢꓴ ꓔꓯ ꓛꓳ ꓞꓹ ꓟ ꓢꓷꓸ ꓙ ꓟꓳ ꓙ ꓓꓴ ꓙꓳˍ ꓟ ꓡꓰ ꓐꓰ꓾ ꓥꓪ ꓠꓬ ꓠꓴ ꓪ ꓗꓳ ꓡꓳ ꓗꓪ ꓢꓷ ꓡꓰ ꓓꓴˍ ꓐꓰ ꓓꓵꓽ ꓙ ꓟꓶ ꓓꓴˍ ꓐꓰ꓾ ꓪꓽ ꓠꓬꓲˍ ꓟ ꓟꓬꓱ ꓗꓪ ꓐꓰ꓾ ꓮꓸ ꓫꓵ ꓗꓪˍ ꓟꓲ ꓜꓲꓽ ꓢꓲ꓾ ꓥꓪˍ ꓟꓲ ꓝꓲ ꓓꓴ ꓥ ꓟ ꓠꓴ ꓪꓽ ꓗꓳ ꓡꓳ ꓗꓪ ꓬꓰ ꓟꓳꓸ ꓖꓶ ꓗꓷꓳ꓿ 13 ꓠꓱꓸ ꓐꓯꓼ ꓘꓴ ꓜꓲ ꓞꓳ ꓔꓯ ꓔꓯꓺˍ ꓠꓬ꓾ ꓠꓴ ꓪꓽ ꓖꓼ ꓟꓽ ꓟꓶ ꓟ ꓮ ꓫꓵ ꓙꓳˍ ꓡ?꓿ ꓥꓪ ꓚꓲ ꓛꓬ ꓣꓱꓽ ꓓꓴ ꓑꓶꓸ ꓓꓴ ꓠꓴ ꓪꓽ ꓔꓯ ꓟꓽ ꓪꓴꓽ ꓧꓶ ꓝꓲˍ ꓟ ꓟꓽ ꓥ ꓠꓬ ꓖꓼ ꓟꓽ ꓟꓶ ꓟ ꓟꓽ ꓙꓳ꓿ ꓕꓱ ꓟ ꓗꓪ ꓥꓪ ꓛꓬ ꓡꓰ ꓠꓬ꓾ ꓥꓪ ꓔꓯ ꓖꓽ ꓖꓶ ꓡꓯ꓿ 14 ꓮ ꓟꓶ ꓥꓪ ꓠꓴ ꓪꓽ ꓔꓬ ꓗꓪ ꓡꓻˍ ꓐꓰ ꓙꓽ ꓖꓶˍ ꓟ ꓠꓬ꓾ ꓢ ꓧꓪꓹ ꓕꓲ ꓧꓪꓹ ꓟ ꓥꓳ꓿ ꓥꓪ ꓠꓬ ꓠꓴ ꓪꓽ ꓔꓯ ꓪꓴꓽ ꓧꓶꓻ ꓡꓰ ꓝꓲ ꓠꓲꓹ ꓟꓽ ꓫꓵ꓿ ꓮ ꓡꓲꓳ ꓐꓯ ꓠꓬ ꓥꓪ ꓧꓪˍ ꓟ ꓠꓽ ꓠꓴ ꓪꓽ ꓒꓵꓽ ꓶ ꓟꓽ ꓥ꓾ ꓠꓴ ꓪꓽ ꓔꓯ ꓧꓪˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓤ ꓠꓱ ꓐꓴ ꓡꓰ ꓮꓽ ꓐ ꓮ ꓟ ꓐꓱ ꓶ ꓒꓴ ꓫ ꓔꓸ ꓖꓶꓽ ꓠꓯꓹ ꓟ ꓟꓽ ꓥ꓿ ꓮꓽ ꓐ ꓮ ꓟ ꓡꓰ ꓤ ꓠꓱ ꓐꓴ ꓐꓱ ꓶ ꓫ ꓔ ꓖꓶ ꓠꓯꓹ ꓟ ꓥ ꓡꓳ꓿ 15 ꓕꓱ ꓟ ꓟ ꓑꓶ ꓓꓴ ꓥꓪ ꓠꓬ ꓠꓴ ꓪꓽ ꓦ ꓐꓱ ꓶ ꓠꓲꓹ ꓒꓴ ꓒꓴˍ ꓐꓰ ꓢꓯꓼ ꓕꓵꓼ ꓪꓴꓽ ꓧꓶ ꓠꓲꓹ ꓫꓵˍ ꓡꓳ꓿ ꓥꓪ ꓚꓲ ꓛꓬ ꓖꓳ ꓓꓱꓽˍ ꓟꓲ ꓠꓴ ꓪꓽ ꓐꓱ ꓶ ꓖꓶꓽ ꓗꓷ ꓓꓻˍ ꓡꓳ꓿ ꓠꓴ ꓪꓽ ꓔꓯ ꓥꓪ ꓪꓻ ꓜꓲ ꓠꓲꓹ ꓠꓵˍ ꓠꓬ꓾ ꓠꓴ ꓪꓽ ꓥꓪ ꓔꓯ ꓠꓲ ꓠꓵˍ ꓟ ꓠꓵ ꓠꓲꓹ ꓪꓻ ꓜꓲ ꓣꓳ ꓡꓰˍ ꓡ? 16 ꓥꓪ ꓡꓰ ꓠꓴ ꓪꓽ ꓔꓯ ꓟꓽ ꓪꓴꓽ ꓧꓶ ꓡꓰ ꓝꓲ ꓟ ꓗꓪ ꓐꓰ꓾ ꓥꓪ ꓠꓽ ꓠꓲꓹ ꓖꓳꓼ ꓢꓲ ꓠꓴ ꓪꓽ ꓔꓯ ꓠꓸ ꓣꓴꓻ ꓟꓶ ꓡꓰ ꓝꓲꓳ꓾ ꓐꓰ ꓐꓯ ꓢꓴ ꓙꓳˍ ꓟꓽ ꓢꓷꓸ꓿ 17 ꓠꓴ ꓪꓽ ꓔꓬ ꓗꓪ ꓥꓪ ꓡꓰ ꓝꓲ ꓩꓴ ꓡ ꓢꓴ ꓖꓳ ꓟꓬ ꓣꓳꓺ ꓗꓪ꓾ ꓮ ꓡꓲ ꓕꓲ ꓣꓳ ꓗꓪ ꓐꓰ ꓠꓴ ꓪꓽ ꓔꓯ ꓥꓪ ꓡꓰ ꓒꓬꓸ ꓜꓽ ꓗꓷ ꓡ? 18 ꓥꓪ ꓠꓬ ꓕꓲ-ꓔꓳ ꓔꓯ ꓢꓯꓼ ꓖꓶ ꓢꓲ꓾ ꓮꓸ ꓬꓲꓼ ꓖꓳ ꓕꓲ ꓣꓳ ꓔꓯ ꓬꓲˍ ꓐꓰ ꓕꓲ ꓛꓳꓺꓼ ꓝꓲ ꓩꓴ ꓡꓺꓳ꓿ ꓕꓲ-ꓔꓳ ꓡꓰ ꓠꓴ ꓪꓽ ꓔꓯ ꓮꓸ ꓡꓲ ꓕꓲ ꓫꓵ ꓗꓪ ꓗꓶꓸ ꓜꓽ ꓗꓷ ꓡ? ꓥꓪ ꓠꓴꓽ ꓠꓬ ꓮꓸ ꓫꓵ ꓬꓰˍ ꓟꓲ ꓕꓲ ꓠꓲꓹ ꓕꓲ ꓦꓻˍ ꓡꓰꓽ ꓥ ꓢꓲ꓾ ꓛꓲ ꓓꓴꓻ ꓕꓲ ꓓꓴˍ ꓗꓪ ꓚˍ ꓡꓳ꓾ ꓟꓽ ꓥ ꓡ? 19 ꓥꓪ ꓕꓱ ꓟꓬ ꓛꓲ ꓐꓯˍ ꓟ ꓠꓬ꓾ ꓚꓲ ꓛꓬ ꓐꓱ ꓶ ꓒꓶ ꓔꓳꓹ ꓘꓶꓽ ꓫ ꓕꓱˍ ꓡꓳ꓾ ꓐꓰ ꓓꓵꓽ ꓙꓽˍ ꓡ? ꓥꓪ ꓠꓴꓽ ꓠꓽ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓢꓲ꓾ ꓪꓴ-ꓢ ꓒꓬꓱꓽ ꓕꓯ ꓗꓪ ꓫꓸ ꓕꓱˍ ꓟ ꓥ ꓡꓳ꓿ ꓠꓲꓹ ꓠꓵ ꓢꓴ ꓐꓴꓳ꓾ ꓥꓪ ꓠꓴꓽ ꓬꓰˍ ꓟ ꓮꓽ ꓙꓵ ꓠꓬ ꓠꓴ ꓪꓽ ꓔꓯ ꓪꓴꓽ ꓡ ꓟꓴ ꓡ ꓝꓲ ꓠꓹ ꓟ ꓥ ꓡꓳ꓿ 20 ꓮ ꓧꓪꓹ ꓥꓪ ꓡꓻ ꓕꓯ꓾ ꓠꓴ ꓪꓽ ꓠꓬ ꓥꓪ ꓥꓳ ꓡꓳꓸ ꓔ ꓟ ꓡꓰ ꓐꓰ ꓟꓽ ꓗꓹ ꓞꓹ ꓟ ꓐꓰ꓾ ꓥꓪˍ ꓟꓲ ꓠꓴ ꓪꓽ ꓥꓳ ꓡꓳꓸ ꓔ ꓟ ꓡꓰ ꓐꓰ ꓟꓽ ꓗꓹ ꓞꓹ ꓟ ꓔꓯ ꓗꓳ ꓚꓱˍ ꓡꓳ꓿ ꓮ ꓧꓪꓹ꓾ ꓢꓯꓼ ꓡꓯꓽ ꓘꓳˍ ꓟ꓾ ꓟꓬ ꓦꓯꓸˍ ꓟ꓾ ꓠꓲꓹ ꓛꓰˍ ꓟ꓾ ꓗꓪꓺ ꓡꓯꓽ ꓘꓳˍ ꓟ꓾ ꓪ ꓕꓱˍ ꓟ꓾ ꓢꓴ ꓘꓽ ꓚꓺˍ ꓟ꓾ ꓠꓲꓹ ꓘꓹˍ ꓟ꓾ ꓢꓴꓺ ꓔꓴ ꓡ ꓟ꓾ ꓕꓱ ꓡꓱ ꓡꓳ ꓫꓵꓽ ꓙꓳˍ ꓟ ꓔꓯ ꓗꓳꓺ ꓚꓱˍ ꓡꓳ꓿ 21 ꓥꓪ ꓝꓮꓲ ꓡ ꓕꓯ ꓬꓲ ꓪꓽ ꓮꓽ ꓟꓬꓹ ꓣꓳ ꓠꓬ꓾ ꓬꓲ ꓪꓽ ꓧꓶꓸ ꓕꓯ ꓞꓳ ꓙꓳꓻ ꓗꓷ ꓠꓬꓲ ꓟ ꓡꓰ ꓐꓰ꓾ ꓟꓽ ꓫꓬꓻ ꓟꓽ ꓖꓼ ꓟ꓾ ꓟꓽ ꓢꓲ ꓟꓽ ꓫꓬ ꓟ ꓐꓰ꓾ ꓦꓯꓸ ꓠꓲꓹ ꓙꓵꓽˍ ꓟ꓾ ꓕꓱ ꓡꓱ ꓡꓳ ꓫꓵ ꓝꓴꓲ ꓗꓪ ꓐꓰ ꓟꓽ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓠꓬꓲ꓾ ꓥꓪ ꓠꓲꓹ ꓥꓴꓻ ꓢꓲ꓾ ꓥꓪ ꓪꓴ-ꓢ ꓡꓰ ꓠꓴ ꓪꓽ ꓟꓲꓽ ꓙꓬ ꓗꓪ ꓝꓮꓲ ꓕꓲ ꓧꓪꓹ ꓥꓪ ꓔꓯ ꓫꓸ ꓔꓳ ꓡꓰ ꓝꓲˍ ꓟ ꓔꓯ ꓗꓳ ꓚꓱˍ ꓡꓳ꓿

2 ꓘꓳ-ꓡꓱ-ꓕꓴ 13

1 ꓕꓱ ꓟ ꓠꓬ ꓠꓴ ꓪꓽ ꓔꓬ ꓗꓪ ꓥꓪ ꓡꓻ ꓠꓹ ꓟ ꓢ ꓧꓪꓹ ꓕꓲ ꓧꓪꓹ ꓟ ꓥꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓡꓰ ꓐꓰ꓾ ꓫꓵꓽ ꓪꓴꓻ ꓙꓳˍ ꓠꓬ꓾ ꓢꓷꓸ ꓙ ꓟꓳ ꓙ ꓢꓴ ꓠꓬꓲꓽ ꓢ ꓣꓳ ꓗꓪ ꓐꓰ ꓓꓰꓺ ꓘꓶꓽ ꓕꓶꓻ ꓡꓰ ꓝꓲ ꓠꓯꓹ ꓡꓳ꓿ 2 ꓧꓶꓸ ꓕꓯ ꓠꓴ ꓪꓽ ꓔꓬ ꓗꓪ ꓥꓪ ꓠꓬꓲꓽ ꓧꓪꓹ ꓕꓲ ꓧꓪꓹ ꓡꓻ ꓕꓯ ꓐꓯ ꓖꓶ ꓗꓷ ꓟ ꓡꓰ ꓐꓰ꓾ ꓠꓴ ꓪˍ ꓐꓰ ꓥꓪ ꓟꓽ ꓔꓬ ꓥ ꓟꓲ ꓮ ꓟꓶˍ ꓡꓰ ꓐꓯ ꓖꓶˍ ꓠꓬꓲ꓾ ꓧꓶꓸ ꓕꓯ ꓝꓴꓲ ꓬꓰ ꓢꓴ ꓖꓳ ꓕꓲ ꓧꓳꓽˍ ꓐꓰ ꓠꓱꓸ ꓐꓯꓼ ꓝꓴꓲ ꓬꓰ ꓢꓴ ꓮꓽ ꓙꓵ ꓔꓯ꓾ ꓥꓪ ꓝꓮꓲ ꓕꓲ ꓧꓪꓹ ꓡꓻ ꓕꓯ ꓠꓲꓹ ꓟ ꓟꓽ ꓦꓲ ꓖꓶ꓿ 3 ꓥꓪ ꓠꓯꓸꓼ ꓗꓪ ꓙꓲ-ꓢꓴ ꓫꓸ ꓕꓱꓻˍ ꓟ ꓗꓸ ꓚꓵ ꓠꓴ ꓪꓽ ꓧꓪ ꓔꓬ ꓠꓬꓲ꓾ ꓗꓸ ꓚꓵ ꓖꓳ ꓟ ꓬꓲ ꓡꓰ ꓠꓴ ꓪꓽ ꓔꓯ ꓟꓳꓸ ꓖꓶ ꓡ ꓥꓳ꓿ ꓙꓲ-ꓢꓴ ꓠꓽ ꓠꓴ ꓪꓽ ꓔꓯ ꓟꓳꓸ ꓢꓯꓼ ꓐꓽˍ ꓟ ꓟꓽ ꓥ꓿ ꓠꓴ ꓪꓽ ꓗꓳ ꓡꓳ ꓗꓪ ꓪꓽ ꓠꓬꓲ ꓠꓬꓲˍ ꓡꓰꓽ ꓟꓳꓸ ꓖꓶ ꓡ ꓥꓳ꓿ 4 ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓔꓯ ꓠꓽ ꓢꓯꓼ ꓐꓽˍ ꓟ ꓗꓪ ꓕꓯꓼ ꓔꓶꓸ ꓗꓷˍ ꓟꓲ꓾ ꓪꓴ-ꓢ ꓪꓽ ꓠꓬꓲˍ ꓟ ꓗꓪ ꓐꓰ ꓬꓲ ꓢꓯꓸ ꓔꓬ ꓡꓳ꓿ ꓥꓪ ꓠꓴꓽ ꓠꓬ ꓬꓲ ꓢꓯꓼ ꓐꓽˍ ꓟ ꓔꓯ ꓑꓯꓹ ꓟꓶ ꓗꓷˍ ꓟꓲ꓾ ꓪꓴ-ꓢ ꓪꓽ ꓠꓬꓲˍ ꓟ ꓠꓯS ꓗꓪ ꓬꓲꓸˍ ꓐꓰ ꓕꓲ ꓪꓺꓼ ꓢꓯꓸ ꓔꓬ ꓢꓲ꓾ ꓥꓪ ꓠꓴ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿ 5 ꓠꓴ ꓪꓽ ꓚꓲ ꓛꓬ ꓔꓯ ꓟꓰꓹ ꓠꓬꓲ ꓢꓲ꓾ ꓠꓴ ꓪꓽ ꓠꓬ ꓙꓵꓻ ꓠꓲꓹ ꓠꓯꓸꓼ ꓗꓪ ꓔꓬ ꓟꓽ ꓔꓬ꓾ ꓐꓰ꓾ ꓚꓲ ꓛꓬ ꓔꓯ ꓚꓬꓹ ꓠꓬꓲ꓿ ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓦ ꓗꓪ ꓫꓴꓺ ꓡꓰ ꓢꓴ ꓟꓽ ꓥ ꓕꓯ ꓠꓽ꓾ ꓠꓴ ꓪꓽ ꓠꓯꓸꓼ ꓗꓪ ꓬꓰ-ꓢꓴ ꓙꓲ-ꓢꓴ ꓔꓬ ꓟ ꓠꓴ ꓪꓽ ꓢꓷꓸˍ ꓥꓳ꓾ ꓟꓽ ꓥ ꓡ? 6 ꓥꓪ ꓠꓴꓽ ꓔꓯˍ ꓟꓲ꓾ ꓟꓰꓹ ꓠꓬꓲ ꓗꓷ ꓠꓬ꓾ ꓦ ꓗꓪ ꓫꓴꓺ ꓡꓰ ꓢꓴ ꓟꓽ ꓥ ꓟ ꓠꓴ ꓪꓽ ꓢꓷꓸ ꓪ ꓓꓻˍ ꓥꓳ꓾ ꓐꓰ ꓥꓪ ꓥꓳ ꓡꓳꓸˍ ꓡꓳ꓿ 7 ꓠꓴ ꓪꓽ ꓠꓬ ꓟꓽ ꓜꓳꓽ ꓟ ꓕꓲ ꓫꓵꓽˍ ꓟꓲ ꓕꓽ ꓬꓰ ꓪ ꓝꓲ꓾ ꓐꓰ ꓪꓴ-ꓢ ꓔꓯ ꓥꓪ ꓠꓴꓽ ꓪꓽ ꓘꓴˍ ꓡꓳ꓿ ꓕꓱ ꓟ ꓠꓬ ꓢꓴ ꓡꓰ ꓥꓪ ꓠꓴꓽ ꓠꓽ ꓓꓻ ꓒ ꓥ ꓟ ꓔꓯ ꓡꓳꓸ ꓓꓳ ꓡ ꓝꓲ ꓠꓹ ꓟ ꓟꓽ ꓥ꓿ ꓥꓪ ꓠꓴꓽ ꓠꓬ ꓫꓴꓺ ꓡꓰ ꓟ ꓡꓰ ꓐꓰ ꓗꓹ ꓟꓲ꓾ ꓠꓴ ꓪꓽ ꓠꓬ ꓜꓳꓽˍ ꓟ ꓬꓰ ꓪ ꓠꓹ ꓟ ꓥ ꓡꓳ꓿ 8 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓠꓽ ꓔꓱꓹ ꓚꓵˍ ꓟ ꓔꓯ ꓔꓳꓹ ꓠꓹ ꓟ ꓮꓸ ꓫꓵ ꓬꓰ ꓟꓽ ꓐ ꓡ꓿ ꓔꓱꓹ ꓚꓵˍ ꓟ ꓐꓱ ꓶˍ ꓡꓰꓽ ꓬꓰ ꓐ ꓡ ꓡꓳ꓿ 9 ꓥꓪ ꓠꓴꓽ ꓢꓯꓼ ꓐꓽˍ ꓟꓲ ꓠꓴ ꓪꓽ ꓢꓯꓼ ꓔꓰꓹˍ ꓠꓬ꓾ ꓥꓪ ꓠꓴꓽ ꓗꓹ ꓛꓲˍ ꓡꓳ꓿ ꓝꓮꓲ ꓥꓪ ꓠꓴꓽ ꓠꓬ ꓠꓴ ꓪꓽ ꓟꓬꓽ ꓠꓬꓲ ꓜꓳꓽ ꓓꓰ ꓡꓰ ꓠꓹ ꓟ ꓐꓱ ꓶˍ ꓟꓲ ꓪꓽ ꓘꓴˍ ꓡꓳ꓿ 10 ꓢꓲ ꓒ ꓡꓰ ꓥꓪ ꓔꓯ ꓖꓶ ꓡ ꓟ ꓙꓵꓽ ꓪꓽ ꓠꓬ ꓠꓴ ꓪꓽ ꓔꓯ ꓪꓴꓽ ꓡ ꓟꓴ ꓡ ꓝꓲ ꓠꓹ ꓟ ꓥ ꓡꓳ꓿ ꓠꓴ ꓪꓽ ꓔꓯ ꓒꓬꓹ ꓗꓷ ꓠꓹ ꓟ ꓟꓽ ꓥ꓿ ꓖꓳ ꓡꓱ ꓠꓬꓲ ꓠꓴ ꓪꓽ ꓔꓬ ꓗꓪ ꓥꓪ ꓛꓲ ꓡ ꓕꓯ꓾ ꓙꓵꓽ ꓪ ꓕꓱ ꓟ ꓔꓯ ꓛꓳ ꓢꓲ ꓡꓲꓽ ꓡꓲꓽˍ ꓡꓰ ꓬꓰ ꓟꓽ ꓛꓵ ꓠꓹ ꓟ꓾ ꓥꓪ ꓟꓽ ꓡ ꓕꓯˍ ꓡꓰ ꓕꓱ ꓟꓬ ꓫꓵꓽ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ 11 ꓡꓳꓹ ꓬꓰˍ ꓟ ꓕꓲ ꓘꓶꓽ ꓠꓬ꓾ ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓧꓪ ꓧꓪˍ ꓔꓬ꓿ ꓜꓳꓽ ꓓꓰ ꓟ ꓔꓯ ꓖꓼ ꓙꓰ꓿ ꓠꓲꓹ ꓗꓴ ꓟꓬ ꓗꓴ ꓖꓶˍ ꓟ ꓟꓶ ꓝꓲ꓿ ꓕꓲ ꓠꓲꓹ ꓕꓲ ꓪꓽˍ ꓬꓰ꓿ ꓧꓳꓹ ꓡꓯꓼ ꓘꓳ ꓔꓬ꓿ ꓖꓳ ꓡꓱ ꓠꓬ ꓠꓵ ꓠꓲꓹˍ ꓐꓰ ꓢꓲ ꓡꓲ ꓟ ꓬꓲ ꓪꓴ-ꓢ ꓠꓬ ꓠꓴ ꓪꓽˍ ꓐꓰ ꓔꓬ ꓥꓳ꓿ 12 ꓕꓲ ꓣꓳ ꓛꓳꓽ ꓕꓲ ꓣꓳ ꓢꓲꓽ ꓢꓲ ꓫꓬꓻ ꓫꓬˍ ꓡꓰ ꓐꓳꓼ ꓢꓲ ꓒꓵꓽ ꓗ ꓬꓰ ꓡꓯꓽ ꓘꓳ꓿ 13 ꓕꓱ ꓗꓪ ꓔꓬ ꓟ ꓦ ꓡꓱ ꓢꓴ ꓮꓽ ꓙꓵ ꓡꓰ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿

ꓖ-ꓡ-ꓕꓲ-ꓬ 1

1 - 2 ꓝꓲ ꓓꓴ ꓒꓳ-ꓡꓳ ꓥꓪˍ ꓐꓰ꓾ ꓕꓱ ꓗꓪ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴ ꓡꓰ꓾ ꓖ-ꓡ-ꓕꓲ-ꓬ ꓗꓪ ꓟ ꓘꓴ ꓜꓲ ꓞꓳ ꓮꓽ ꓙꓵ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓥꓪ ꓝꓲ ꓓꓴ ꓬꓰˍ ꓟ ꓠꓬ ꓞꓳ ꓤ ꓡꓰ ꓬꓰ ꓝꓲˍ ꓟ ꓟꓽ ꓥ꓿ ꓞꓳ ꓤ ꓙꓵꓽ ꓪ ꓗꓪ ꓐꓰ ꓬꓰˍ ꓟˍ ꓟꓲ ꓟꓽ ꓥ꓿ ꓬꓰ-ꓢꓴ ꓙꓲ-ꓢꓴˍ ꓐꓰ ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓢꓴ ꓐꓹ ꓐ ꓪꓴ-ꓢ ꓡꓰ ꓝꓲ ꓔ ꓟ ꓥ ꓡꓳ꓿ 3 ꓐꓹ ꓐ ꓪꓴ-ꓢˍ ꓐꓰ ꓣꓳꓽ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 4 ꓙꓲ-ꓢꓴ ꓠꓬ ꓣꓳꓽ ꓐꓹ ꓐ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓲ꓾ ꓥꓶˍ ꓟ ꓕꓱ ꓕꓲ ꓤꓶꓻ ꓗꓪ ꓐꓰ ꓣꓳꓽ ꓔꓯ ꓚꓬꓴ ꓓꓳ ꓡ ꓠꓹ ꓟ꓾ ꓣꓳꓽ ꓝꓴꓲ ꓑꓶꓸ ꓓꓴ ꓬꓲ ꓚꓲ ꓛꓬ ꓖꓳ ꓓꓱ ꓖꓶꓽ ꓗꓷꓳ꓿ 5 ꓪꓴ-ꓢ ꓔꓯ ꓕꓲ ꓞꓲꓼ ꓕꓲ ꓑ ꓟꓬꓱ ꓓꓳꓽ ꓙꓳ ꓝꓲ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓿ 6 ꓠꓴ ꓪꓽ ꓠꓬ ꓙꓲ-ꓢꓴ ꓣꓱꓽ ꓛꓰ ꓡꓰ ꓠꓴ ꓪꓽ ꓔꓯ ꓘꓴꓻ ꓢꓴ ꓖꓳ ꓕꓲ ꓣꓳꓽ ꓔꓯ ꓕꓱ ꓘꓶꓻ ꓠꓲꓹ ꓞ ꓧꓹ ꓗꓷ ꓢꓲ꓾ ꓶꓼ ꓓꓳ ꓫꓱꓹ ꓓꓳꓽ ꓬꓲ ꓔꓱꓹ ꓬꓲ ꓕꓲ ꓟ ꓔꓯ ꓘꓳꓻ ꓣꓴˍ ꓠꓬꓲ ꓥꓪ ꓓꓵꓽ ꓙꓽ ꓟꓶˍ ꓡꓳ꓿ 7 ꓚꓵ ꓚꓵ ꓐꓯˍ ꓠꓬ ꓠꓴ ꓪꓽ ꓘꓳꓻ ꓣꓴ ꓗꓷ ꓟ ꓕꓱ ꓟ ꓠꓬ ꓶꓼ ꓓꓳ ꓫꓱꓹ ꓓꓳꓽ ꓬꓲ ꓔꓱꓹ ꓬꓲ ꓕꓲ ꓟ ꓠꓽ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓘꓶꓻ ꓡꓶ ꓡꓰ ꓝꓲ ꓠꓹ ꓟ꓾ ꓙꓲ-ꓢꓴ ꓬꓲ ꓶꓼ ꓓꓳ ꓫꓱꓹ ꓓꓳꓽ ꓔꓯ ꓧꓶꓸ ꓡꓰ ꓝꓲ ꓠꓲꓹ ꓫꓵ ꓢꓴ ꓕꓲ ꓐꓱ ꓙꓳˍ ꓡꓳ꓿ 8 ꓥꓪ ꓠꓴꓽ ꓡꓰ ꓠꓴ ꓪꓽ ꓔꓯ ꓚ ꓟꓸ ꓖꓶꓽ ꓗꓷ ꓟ ꓟꓽ ꓥ ꓥ꓾ ꓥꓪ ꓠꓴꓽ ꓥ ꓟꓲ꓾ ꓟꓴꓽ ꓗꓪ ꓝꓲ ꓓꓴ ꓥ ꓟꓲ꓾ ꓶꓼ ꓓꓳ ꓫꓱꓹ ꓓꓳꓽ ꓬꓲ ꓔꓱꓹ ꓬꓲ ꓕꓲ ꓫꓵꓽ ꓠꓴ ꓪꓽ ꓔꓯ ꓚ ꓟꓸ ꓖꓶ ꓐꓷˍ ꓠꓬ꓾ ꓬꓲ ꓔꓯ ꓙꓱꓽ ꓔ ꓟ ꓗꓷ ꓡꓰ ꓝꓲ꓿ 9 ꓥꓪ ꓠꓴꓽ ꓧꓶꓸ ꓕꓯ ꓐꓯ ꓗꓷ ꓟ ꓡꓰ ꓐꓰ꓾ ꓮ ꓟꓶ ꓥꓪ ꓝꓮꓲ ꓕꓲ ꓧꓪꓹ ꓐꓯˍ ꓢꓰꓽ ꓥꓳ꓿ ꓠꓴ ꓪꓽ ꓧꓶꓸ ꓕꓯ ꓘꓳꓻ ꓣꓴ ꓗꓷ ꓟ ꓶꓼ ꓓꓳꓽ ꓫꓱꓹ ꓓꓳ ꓟꓽ ꓥ ꓥ꓾ ꓬꓲ ꓔꓱꓹ ꓬꓲ ꓕꓲ ꓫꓵꓽ ꓠꓴ ꓪꓽ ꓔꓯ ꓚ ꓟꓸ ꓖꓶ ꓢꓴ ꓙꓳˍ ꓠꓬ꓾ ꓬꓲ ꓔꓯ ꓙꓱꓽ ꓔ ꓟ ꓗꓷ ꓡꓰ ꓝꓲ꓿ 10 ꓮ ꓟꓶ ꓥꓪ ꓠꓬ ꓞꓳ ꓤ ꓠꓲꓹ ꓒꓴˍ ꓟ ꓔꓯ ꓧꓪˍ ꓟ ꓥ ꓡ? ꓥ ꓠꓬ ꓪꓴ-ꓢ ꓠꓲꓹ ꓒꓴˍ ꓟ ꓔꓯ ꓧꓪˍ ꓟ ꓥ ꓡ? ꓥ ꓠꓬ ꓞꓳ ꓤ ꓠꓲꓹ ꓒꓴ ꓡ ꓠꓹ ꓟ ꓢꓯꓼ ꓕꓵꓼˍ ꓟ ꓥ ꓡ? ꓥꓪ ꓠꓬ ꓞꓳ ꓤ ꓠꓲꓹ ꓒꓴ ꓡ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓥ ꓐꓷˍ ꓠꓬ꓾ ꓥꓪ ꓠꓽ ꓙꓲ-ꓢꓴ ꓚꓳ ꓑꓸ ꓟꓽ ꓥꓻꓳ꓿ 11 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓡꓰ ꓚ ꓟꓸ ꓖꓶˍ ꓟ ꓶꓼ ꓓꓳꓽ ꓫꓱꓹ ꓓꓳ ꓠꓬ꓾ ꓞꓳ ꓤ ꓚꓴꓽ ꓬꓲꓹ ꓗꓪ ꓐꓰ ꓓꓳ ꓡ ꓟ ꓟꓽ ꓥ ꓟ ꓠꓴ ꓪꓽ ꓔꓯ ꓥꓪ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 12 ꓶꓼ ꓓꓳꓽ ꓫꓱꓹ ꓓꓳ ꓕꓱ ꓟ ꓠꓬ ꓞꓳ ꓤ ꓗꓪ ꓐꓰ ꓟꓶˍ ꓟ ꓟꓽ ꓥ꓿ ꓢꓴ ꓡꓰ ꓥꓪ ꓔꓯ ꓟꓸ ꓖꓶ ꓡ ꓟˍ ꓟꓲ ꓟꓽ ꓥ꓿ ꓬꓰ-ꓢꓴ ꓙꓲ-ꓢꓴ ꓡꓰ ꓟꓳꓸ ꓖꓶ ꓡ ꓟ ꓥ ꓡꓳ꓿ 13 ꓧꓶꓸ ꓕꓯ ꓬꓴ-ꓔ ꓢꓳꓺ ꓗꓪ ꓥꓪ ꓮ ꓡꓲ ꓞꓳ ꓙꓳ ꓗꓷ ꓟ ꓐꓰ꓾ ꓪꓴ-ꓢ ꓘꓴ ꓜꓲ ꓞꓳ ꓔꓯ ꓥꓪ ꓮ ꓘꓶꓻ ꓛꓲ ꓗꓸ ꓧꓪ ꓢꓲ ꓐꓬ ꓡꓰ ꓝꓲ ꓠꓹ ꓟ ꓢꓯꓼ ꓕꓵꓼ ꓗꓷ ꓟ ꓠꓴ ꓪꓽ ꓑ ꓙꓽ ꓠꓬꓲꓳ꓿ 14 ꓥꓪ ꓠꓬ ꓥꓪ ꓫꓵꓽ ꓥꓪ ꓪꓳꓼ ꓗꓳ ꓡꓳ ꓗꓪ ꓟ ꓥꓪ ꓕꓲꓽ ꓙꓷꓻ ꓢꓴ ꓮꓽ ꓟꓬꓹ ꓣꓳ ꓕꓯꓽ ꓢꓲ ꓬꓴ-ꓔ ꓢꓳꓺ ꓗꓪ ꓓꓻ ꓒꓽ ꓕꓲ ꓣꓳ ꓥ ꓢꓲ꓾ ꓥꓪ ꓒꓵꓽ ꓒ ꓐꓴ ꓡꓲꓽ ꓒꓰꓼ ꓗꓪ ꓮꓽ ꓘꓶꓸ ꓐꓰ ꓮꓽ ꓘꓶꓸ ꓠꓲꓹ ꓟ ꓡꓱꓻ ꓗꓷꓳ꓿ 15 ꓖꓳ ꓡꓱ ꓥ ꓟꓲ ꓥꓪ ꓟꓹ ꓟ ꓤꓽ ꓘꓶꓻ ꓗꓪ ꓔꓬ ꓢꓰꓽ ꓕꓯˍ ꓡꓰ ꓥꓪ ꓔꓯ ꓢꓲ ꓚꓰꓸ ꓔ ꓢꓲ꓾ ꓣꓱꓽ ꓛꓰ ꓗꓪ ꓐꓰ ꓥꓪ ꓔꓯ ꓘꓴꓻ ꓢꓴ ꓪꓴ-ꓢ ꓡꓰ꓾ 16 ꓥꓪ ꓔꓯ ꓐꓶꓽ ꓞꓳ ꓗꓳ ꓡꓳ ꓗꓪ ꓬꓲ ꓮ ꓐꓲ ꓓꓳꓽ ꓚ ꓟꓸ ꓖꓶ ꓝꓲ ꓠꓹ ꓟ꓾ ꓥꓪ ꓗꓪ ꓐꓰ ꓬꓲ ꓤ ꓔꓲꓸ ꓟꓳꓸ ꓖꓶ ꓓꓳ ꓡ ꓝꓲ ꓠꓲꓹ ꓒꓴˍ ꓕꓯ꓾ ꓥꓪ ꓠꓬ ꓞꓳ ꓤ ꓔꓯ ꓚꓴꓽ ꓬꓲꓹ ꓟꓽ ꓓꓰꓽ꓾ ꓖꓪˍ ꓟꓲ ꓟꓽ ꓖꓪ ꓙꓱ꓿ 17 ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ꓾ ꓥꓪ ꓧꓶꓸ ꓕꓯ ꓗꓪˍ ꓡꓰ ꓝꓲ ꓓꓴ ꓣꓱꓽ ꓔꓬ ꓢꓴ ꓐꓴ ꓔꓯˍ ꓟꓲ ꓟꓽ ꓙꓰ ꓙꓰ꓾ ꓬꓹ-ꓡ-ꓑꓷ ꓗꓪ ꓙꓰ ꓢꓲ꓾ ꓖꓳ ꓗꓸ ꓠꓯꓸ ꓠꓬ ꓔ-ꓟ-ꓢꓷ ꓗꓪ ꓬꓲꓼ ꓙꓰꓳ꓿ 18 ꓢ ꓘꓳꓼ ꓗꓸ ꓠꓯꓸ ꓒꓲ-ꓕꓱ ꓔꓯ ꓜꓲꓻ ꓡꓯꓽ ꓘꓳ ꓠꓹ ꓟ꓾ ꓥꓪ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰ ꓢꓲ ꓬꓲˍ ꓐꓰ ꓞꓲ ꓥꓪꓽ ꓠꓬꓲ ꓔꓬ ꓗꓷꓳ꓿ 19 ꓖꓳ ꓕꓯ ꓢꓲ ꓒ ꓬꓲ ꓠꓬꓲ ꓤ ꓬ-ꓗꓴ ꓟꓽ ꓥ ꓠꓬ ꓠꓱꓸ ꓐꓯꓼ ꓝꓲ ꓓꓴ ꓮꓽ ꓟ ꓔꓯˍ ꓟꓲ ꓟꓽ ꓜꓲꓻ ꓡꓯꓽ ꓘꓳ꓿ 20 ꓠꓴ ꓪꓽ ꓔꓯ ꓥꓪ ꓕꓱ ꓡꓱ ꓐꓳ ꓖꓶˍ ꓟ ꓠꓬ ꓗꓶꓸ ꓘꓶꓽ ꓟꓽ ꓥ꓾ ꓐꓰ ꓪꓴ-ꓢ ꓟꓲꓽ ꓙꓬꓽ ꓗꓪ ꓥꓪ ꓐꓯˍ ꓥꓳ꓿ 21 ꓖꓳ ꓗꓸ ꓠꓯꓸ ꓥꓪ ꓠꓬ ꓫꓲ-ꓡꓲ-ꓬˍ ꓐꓰ ꓚꓲ-ꓡꓲ-ꓚꓬ ꓗꓪ ꓛꓲ ꓬꓰꓳ꓿ 22 ꓖꓳ ꓕꓯ ꓬꓴ-ꓔ ꓟꓵꓽ ꓗꓪ ꓟ꓾ ꓙꓲ-ꓢꓴ ꓠꓯS ꓗꓪ ꓔꓬ ꓟ ꓘꓴ ꓜꓲ ꓞꓳ ꓐꓴ ꓠꓬ ꓥꓪ ꓒꓬꓱꓽ ꓔꓯ ꓟꓽ ꓟꓳꓻ ꓠꓬꓲ꓿ 23 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓬ꓾ ꓧꓶꓸ ꓕꓯ ꓥꓪ ꓠꓴꓽ ꓔꓯ ꓗꓸ ꓧꓪ ꓢꓴ ꓠꓽ ꓬꓲ ꓡꓰ ꓒꓬꓹ ꓗꓷˍ ꓐꓰ ꓬꓰˍ ꓟ ꓙꓵꓻ ꓠꓲꓹ ꓙ ꓖꓴ ꓔꓯ ꓮ ꓟꓶ ꓚ ꓟꓸ ꓖꓶ ꓔꓬ ꓡꓳ꓾ ꓐꓯ ꓔꓬ ꓟ ꓔꓯ ꓑ ꓙꓽ ꓡꓰ ꓠꓬꓲ꓾ 24 ꓬꓲ ꓪꓽ ꓠꓬ ꓥꓪ ꓑꓶꓸ ꓓꓴ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿

ꓖ-ꓡ-ꓕꓲ-ꓬ 2

1 ꓞꓲ ꓡꓲ ꓘꓳꓼ ꓗ ꓠꓯ꓾ ꓥꓪˍ ꓐꓰ ꓐ-ꓠ-ꓐ ꓠꓬ ꓕꓲ-ꓔꓳ ꓔꓯ ꓧꓳꓽ ꓔ ꓢꓲ ꓙꓱ-ꓣꓴ-ꓢ-ꓡꓱ ꓗꓪ ꓝꓮꓲ ꓙꓰ ꓗꓷꓳ꓿ 2 ꓕꓱ ꓟ ꓠꓬ ꓪꓴ-ꓢ ꓡꓰ ꓥꓪ ꓔꓯ ꓟꓳꓸ ꓖꓶ ꓡ ꓟ ꓕꓲ ꓫꓵ ꓟꓶ ꓗꓷ ꓠꓬꓲ꓾ ꓐꓶꓽ ꓞꓳ ꓗꓳ ꓡꓳ ꓗꓪ ꓥꓪ ꓚ ꓟꓸ ꓖꓶˍ ꓟ ꓶꓼ ꓓꓳꓽ ꓫꓱꓹ ꓓꓳ ꓙ ꓖꓴ ꓕꓱ ꓟ ꓙꓱ-ꓣꓴ-ꓢ-ꓡꓱ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ ꓐꓯ ꓖꓶ ꓠꓹ ꓟ ꓙꓰ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓔꓷꓹ ꓗꓷ ꓟ ꓐꓰ ꓔꓷꓹ ꓔꓬ ꓟ ꓮꓽ ꓔꓳˍ ꓡꓰ ꓗꓷ ꓡꓰˍ ꓟ ꓔꓯ ꓗꓳ ꓚꓱ ꓠꓬꓲ꓾ ꓖꓳ ꓗꓪ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓔꓯˍ ꓡꓰꓽ ꓘꓳ ꓫꓱꓸ ꓫꓱ ꓗꓪ ꓐꓯ ꓟꓳꓸ ꓖꓶꓽ ꓗꓷꓳ꓿ 3 ꓥꓪ ꓔꓯ ꓛꓳ ꓙꓰ ꓢꓴ ꓕꓲ-ꓔꓳ ꓠꓬ ꓦꓲ-ꓡꓲ ꓡꓽ ꓞꓳ ꓥ ꓥˍ ꓟꓲ꓾ ꓬꓲ ꓪꓽ ꓡꓰ ꓬꓲ ꓔꓯ ꓶˍ ꓟ ꓗ ꓫꓵ ꓟꓽ ꓛꓳ ꓟꓽ ꓓ꓾ ꓐꓰ ꓟꓽ ꓐꓯ꓿ 4 ꓖꓳ ꓡꓱ ꓥ ꓟꓲ ꓘꓳ ꓫꓱꓸ ꓫꓱˍ ꓐꓰ ꓘꓴ ꓜꓲ ꓞꓳ ꓗꓪ ꓓꓵꓽ ꓡ ꓟ ꓟꓽ ꓔꓱꓹ ꓟ ꓬꓲꓼ ꓤ ꓠꓬꓲ ꓤ ꓐꓴ ꓠꓬ ꓣꓳꓽ ꓔꓯ ꓚꓳ ꓑꓸ ꓒꓬꓱꓼ ꓡ ꓝꓲ ꓠꓹ ꓟ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓣꓳꓽ ꓙꓳˍ ꓟ ꓚꓳ ꓪꓴꓸ ꓙꓵꓽ ꓪ ꓔꓯ ꓛꓽ ꓠꓬꓲ ꓕꓺ ꓠꓬꓲ ꓡ ꓡꓳ꓿ 5 ꓖꓳ ꓡꓱ ꓥ ꓟꓲ ꓶꓼ ꓓꓳꓽ ꓫꓱꓹ ꓓꓳ ꓬꓲ ꓔꓱꓹ ꓚꓵˍ ꓟ ꓐꓯ ꓘꓶꓽ ꓠꓬ ꓠꓴ ꓪꓽˍ ꓐꓰ ꓮ ꓕꓯˍ ꓟꓲ ꓙꓳ ꓝꓲ ꓠꓹ ꓟ꓾ ꓥꓪ ꓠꓴꓽ ꓠꓽ ꓬꓲ ꓪꓽ ꓔꓯ ꓮ ꓔꓲꓸˍ ꓟꓲ ꓟꓽ ꓙꓵꓺ ꓖꓶ꓿ 6 ꓞꓳ ꓔꓲ ꓟꓬꓱꓺ ꓓꓳꓽ ꓟꓯꓻ ꓔ ꓢꓴ ꓖꓳ ꓕꓲ ꓧꓳꓽ ꓡꓰ ꓥꓪ ꓔꓯ ꓮꓸ ꓫꓵꓽ ꓡꓴꓽ ꓖꓶ ꓡ ꓟ ꓟꓽ ꓙꓳ꓿ (ꓪꓴ-ꓢ ꓠꓬ ꓞꓳ ꓒꓬꓱꓽ ꓔꓯ ꓡꓳꓸ ꓢꓴ ꓟꓽ ꓥ ꓠꓬꓲ꓾ ꓬꓲ ꓪꓽ ꓮꓸ ꓫꓵꓽ ꓒꓬꓱ ꓫꓬꓹˍ ꓟꓲ ꓖꓳ ꓟ ꓔꓯ ꓥꓪ ꓮꓸ ꓫꓵꓽ ꓟꓽ ꓚꓬꓹ꓿) 7 ꓖꓳ ꓡꓱ ꓥ ꓟꓲ ꓬꓴ-ꓔ ꓡꓽ ꓞꓳ ꓔꓯ ꓶꓼ ꓓꓳꓽ ꓫꓱꓹ ꓓꓳ ꓚꓺ ꓟꓸ ꓠꓹ ꓟ ꓠꓬ ꓒꓲ-ꓕꓱ ꓔꓯ ꓡꓯꓼ ꓙꓱ ꓖꓶ ꓔ ꓟ ꓡꓰ ꓐꓰ꓾ ꓓ ꓔꓯ ꓟꓸ ꓠꓹ ꓟ ꓠꓬ ꓥꓪ ꓔꓯ ꓡꓯꓼ ꓙꓱ ꓖꓶ ꓔ ꓟ ꓔꓯ ꓬꓲ ꓪꓽ ꓟꓳˍ ꓡꓳ꓿ 8 ꓮ ꓡꓲꓳ ꓐꓯ ꓠꓬ ꓬꓴ-ꓔ ꓡꓽ ꓞꓳ ꓗꓳ ꓡꓳ ꓗꓪ ꓝꓲ ꓓꓴ ꓟꓬꓱꓽ ꓣꓱꓽ ꓢꓴ ꓒꓲ-ꓕꓱ ꓠꓯꓸꓼ ꓗꓪ ꓢꓯꓼ ꓕꓵꓼ ꓢꓴ ꓪꓴ-ꓢ ꓠꓬ꓾ ꓥꓪ ꓠꓯꓸꓼ ꓗꓪˍ ꓟꓲ ꓢꓯꓼ ꓕꓵ ꓢꓲ ꓐꓶꓽ ꓞꓳ ꓐꓴ ꓐꓱ ꓶ ꓥꓪ ꓔꓯ ꓝꓲ ꓓꓴ ꓒꓬꓱꓼ ꓡ ꓝꓲꓳ꓿ 9 ꓖꓳ ꓡꓱ ꓢꓲ ꓥꓪ ꓔꓯ ꓖꓶ ꓡ ꓟ ꓣꓱꓽ ꓛꓰ ꓔꓯ ꓬꓲ ꓪꓽ ꓟꓳˍ ꓕꓯ꓾ ꓥꓪ ꓠꓴ ꓠꓬ ꓐꓶꓽ ꓞꓳ ꓔꓯ ꓟꓸ ꓙꓰ ꓠꓹ ꓟ ꓐꓰ꓾ ꓬꓲ ꓪꓽ ꓠꓬ ꓬꓴ-ꓔ ꓡꓽ ꓞꓳ ꓔꓯ ꓙꓰ ꓠꓹ ꓟ꓾ ꓘꓴ ꓜꓲ ꓞꓳ ꓬꓲꓻ ꓘꓴꓻ ꓡꓰ ꓐꓰ ꓚꓬꓹ ꓔ ꓟ ꓬ-ꓗꓴ ꓐꓰ ꓒꓲ-ꓕꓱ ꓐꓰ ꓬꓳ-ꓦ ꓡꓰ꓾ ꓐ-ꓠ-ꓐ ꓐꓰ ꓥꓪ ꓔꓯ ꓘꓳꓻ ꓣꓴ ꓡ ꓢꓲ꓾ ꓪꓴ-ꓢ ꓟꓬꓱꓽ ꓗꓪ ꓙꓻ ꓡꓯꓽ ꓘꓳ ꓟ ꓟꓶ ꓡꓰ ꓠꓹ ꓟ ꓡꓯꓼ ꓒꓯꓹ ꓧꓪꓸ ꓖꓶ ꓡꓺꓳ꓿ 10 ꓖꓳ ꓡꓱ ꓢꓲ ꓞꓳ ꓫꓸ ꓔꓯ ꓟꓽ ꓟꓲ ꓡꓰ ꓠꓹ ꓟ ꓬꓲ ꓪꓽ ꓡꓰ ꓬꓲꓼ ꓠꓬꓲꓸ ꓖꓶ ꓡꓺꓳ꓿ ꓞꓳ ꓫꓸ ꓔꓯ ꓣꓱꓽ ꓙˍ ꓟ ꓕꓱ ꓕꓲ ꓫꓵꓽ ꓠꓬ ꓥꓪˍ ꓟꓲ ꓬꓲ ꓖꓳ ꓡꓱ ꓬꓰ ꓠꓹ ꓟ ꓠꓲꓹ ꓡꓱꓻ ꓔꓬ ꓟ ꓥ ꓡꓳ꓿ 11 ꓖꓳ ꓗꓸ ꓠꓯꓸ ꓒꓲ-ꓕꓱ ꓠꓬ ꓮ-ꓕꓲ-ꓬ ꓗꓪ ꓛꓲ ꓡ ꓕꓯ ꓬꓲ ꓔꓯ ꓕꓼ ꓙꓲꓽ ꓙꓳˍ ꓠꓬꓲ꓾ ꓥꓪ ꓬꓲ ꓔꓯ ꓒꓬꓱꓽ ꓔꓳꓹ ꓟꓬ ꓔꓳꓹ ꓕꓼ ꓗꓷꓳ꓿ 12 ꓮ ꓡꓲꓳ ꓐꓯ ꓠꓬ ꓬ-ꓗꓴ ꓔꓯˍ ꓐꓰ ꓡꓻ ꓟ ꓖꓳ ꓕꓲ ꓧꓳꓽ ꓟꓽ ꓛꓲ ꓡ ꓧꓶ ꓕꓯ꓾ ꓬꓲ ꓠꓬ ꓐꓶꓽ ꓞꓳˍ ꓐꓰ ꓕꓲ ꓪꓺꓼ ꓜ ꓜꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓛꓲ ꓡ ꓠꓬ ꓬꓲ ꓠꓽ ꓶꓺ ꓔ ꓢꓴ ꓕꓲ ꓧꓳꓽ ꓔꓯ ꓙꓳꓺ ꓠꓬꓲ꓾ ꓙꓵꓺ ꓙꓰ ꓢꓲ ꓚꓲ ꓛꓬ ꓔꓯ ꓐꓶꓽ ꓞꓳˍ ꓐꓰ ꓗꓳꓹ ꓞꓹ ꓝꓲˍ ꓡꓳ꓿ 13 ꓠꓱꓸ ꓐꓯꓼ ꓟ ꓬꓴ-ꓔ ꓡꓽ ꓞꓳ ꓬꓲꓼ ꓤ ꓠꓬꓲ ꓤ ꓐꓴˍ ꓟꓲ ꓒꓲ-ꓕꓱ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽˍ ꓟ ꓔꓯ ꓛꓳ ꓢꓲ ꓐ-ꓠ-ꓐ ꓔꓯˍ ꓟꓲ ꓧꓳꓽ ꓪꓴꓸ ꓙꓰˍ ꓡꓳ꓿ 14 ꓬꓲ ꓪꓽ ꓠꓬ ꓔꓱꓹ ꓚꓵˍ ꓟ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓔꓱꓹ ꓔꓱꓹꓼ ꓟꓽ ꓛꓳˍ ꓟ ꓔꓯ ꓥꓪ ꓟꓳꓻ ꓗꓷ ꓕꓯ꓾ ꓥꓪ ꓡꓰ ꓮꓽ ꓙꓵ ꓢꓴ ꓟꓲꓽ ꓙꓬ ꓗꓪ ꓒꓲ-ꓕꓱ ꓔꓯ꓾ ꓠꓴ ꓠꓬ ꓬꓴ-ꓔ ꓡꓽ ꓞꓳ ꓥ ꓢꓲ꓾ ꓬꓴ-ꓔ ꓡꓽ ꓞꓳˍ ꓡꓰ ꓐꓰ ꓟꓽ ꓥ ꓥ꓾ ꓐꓶꓽ ꓞꓳˍ ꓡꓰ ꓐꓰ ꓞꓳ ꓙꓳ ꓔꓬ ꓠꓬ꓾ ꓮ ꓡꓲ ꓗꓹ ꓠꓬꓲ ꓠꓴ ꓠꓬ ꓐꓶꓽ ꓞꓳ ꓔꓯ ꓟꓽ ꓓ ꓟꓽ ꓞ ꓬꓴ-ꓔ ꓡꓽ ꓞꓳˍ ꓡꓰ ꓐꓰ ꓞꓳ ꓙꓳ ꓔꓬ ꓝꓲˍ ꓡ? 15 ꓣꓳꓽ ꓠꓬ ꓦꓵꓻˍ ꓕꓯˍ ꓡꓰ ꓬꓴ-ꓔ ꓡꓽ ꓞꓳ ꓥ ꓢꓲ꓾ ꓝꓴꓲ ꓙꓳˍ ꓟ ꓐꓶꓽ ꓞꓳ ꓟꓽ ꓥˍ ꓟꓲ꓾ 16 ꓞꓳ ꓤ ꓠꓬ ꓙꓵꓽ ꓗ ꓟꓬꓱꓽ ꓬꓰˍ ꓟ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓟ ꓟꓽ ꓥ ꓥ꓾ ꓙꓲ-ꓢꓴ ꓬꓰ-ꓢꓴ ꓔꓯ ꓙꓵꓻˍ ꓟ ꓗꓪ ꓐꓰˍ ꓡꓰꓽ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓣꓳꓽ ꓢꓷꓸˍ ꓠꓬꓲ꓾ ꓣꓳꓽ ꓥ ꓟꓲ ꓙꓵꓽ ꓗ ꓟꓬꓱꓽ ꓬꓰˍ ꓟ ꓗꓪ ꓐꓰ ꓟꓽ ꓥ ꓥ꓾ ꓙꓲ-ꓢꓴ ꓔꓯ ꓙꓵꓻˍ ꓟ ꓗꓪ ꓐꓰ ꓔꓱꓹ ꓜꓳˍ ꓟ ꓚꓬꓹ ꓟꓶ ꓠꓹ ꓟ꓾ ꓙꓲ-ꓢꓴ ꓬꓰ-ꓢꓴ ꓔꓯ ꓙꓵꓻ ꓗꓷ ꓟ ꓥ ꓡꓳ꓿ ꓮꓽ ꓟ ꓥ ꓟꓲ ꓙꓵꓽ ꓗ ꓟꓬꓱꓽ ꓬꓰˍ ꓟ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓟꓽ ꓥ꓿ 17 ꓖꓳ ꓡꓱ ꓥ ꓟꓲ ꓣꓳꓽ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓠꓲꓹ ꓫꓵˍ ꓠꓬ꓾ ꓣꓳˍ ꓟꓲ ꓐꓶꓽ ꓞꓳˍ ꓡꓰ ꓐꓰ ꓝꓴꓲ ꓙꓳ ꓢꓴ ꓥ ꓟ ꓡꓳꓸ ꓓꓳ ꓡꓺꓳ꓿ ꓖꓳ ꓡꓱ ꓥ ꓠꓬ ꓙꓲ-ꓢꓴ ꓠꓽ ꓝꓴꓲ ꓔꓯ ꓣꓱꓽ ꓙ ꓢꓴ ꓥ ꓡ? ꓖꓳ ꓡꓱ ꓠꓽ ꓟꓽ ꓥ꓿ 18 ꓥꓪ ꓡꓰ ꓒꓬꓹ ꓗꓷˍ ꓟ ꓔꓯ ꓥꓪ ꓝꓮꓲ ꓕꓲ ꓧꓪꓹ ꓫꓬꓹ ꓜꓶꓻˍ ꓠꓬ꓾ ꓥꓪ ꓠꓽ ꓛꓬꓻ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ 19 ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓪꓴ-ꓢ ꓔꓯ ꓟꓳꓸ ꓢꓯꓸ ꓔꓬ ꓠꓹ ꓟ꓾ ꓙꓵꓽ ꓗ ꓗꓪ ꓐꓰ ꓙꓵꓽ ꓗ ꓔꓯ ꓟꓳꓸ ꓫꓵꓳ꓿ 20 ꓥꓪ ꓔꓯ ꓠꓬ ꓙꓲ-ꓢꓴˍ ꓐꓰ ꓕꓲꓽ ꓪꓺꓼ ꓕꓯꓼ ꓔꓶ ꓗꓷꓳ꓿ ꓮ ꓟꓶ ꓢꓯꓸ ꓔꓬ ꓟ ꓠꓽ ꓥꓪ ꓟꓽ ꓥ꓾ ꓙꓲ-ꓢꓴ ꓥꓪ ꓠꓯꓸꓼ ꓗꓪ ꓢꓯꓸ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓮ ꓟꓶ ꓧꓪꓽ ꓖꓳ ꓓꓱ ꓗꓪ ꓥꓪ ꓢꓯꓸ ꓔꓬ ꓟ ꓠꓬ꓾ ꓥꓪ ꓔꓯ ꓠꓲꓹ ꓠꓵ ꓢꓲ ꓥꓪ ꓐꓱ ꓶ ꓬꓲ ꓚꓲ ꓛꓬ ꓖꓳ ꓓꓱ ꓖꓶꓽ ꓗꓷ ꓟ ꓪꓴ-ꓢ ꓬꓲ ꓮ ꓐꓲ ꓔꓯ ꓙꓵꓻˍ ꓟ ꓗꓪ ꓐꓰ ꓢꓯꓸ ꓔꓬ ꓟ ꓥ ꓡꓳ꓿ 21 ꓥꓪ ꓠꓬ ꓪꓴ-ꓢ ꓣꓱꓽ ꓛꓰ ꓔꓯ ꓖꓳꓽ ꓡꓰ ꓝꓲ ꓠꓲꓹ ꓟꓽ ꓫꓵ꓿ ꓮ ꓡꓲꓳ ꓐꓯ ꓠꓬ ꓔꓱꓹ ꓜꓳꓽˍ ꓟ ꓠꓬ ꓙꓵꓽ ꓗ ꓗꓪ ꓐꓰ ꓟꓶˍ ꓟ ꓥ ꓕꓯ ꓠꓽ꓾ ꓙꓲ-ꓢꓴ ꓫꓵꓻˍ ꓟ ꓠꓬ ꓮꓽ ꓔꓳˍ ꓡꓰꓽ ꓗꓷ ꓡꓰˍ ꓡꓳ ꓫꓵꓽ ꓥꓳ꓾ ꓐꓰ ꓐꓯ ꓖꓶꓽ ꓗꓷꓳ꓿

ꓖ-ꓡ-ꓕꓲ-ꓬ 3

1 ꓞꓲ ꓡꓲ ꓘꓳꓼ ꓗ ꓠꓯ꓾ ꓥꓪˍ ꓐꓰ ꓐ-ꓠ-ꓐ ꓠꓬ ꓕꓲ-ꓔꓳ ꓔꓯ ꓧꓳꓽ ꓔ ꓢꓲ ꓙꓱ-ꓣꓴ-ꓢ-ꓡꓱ ꓗꓪ ꓝꓮꓲ ꓙꓰ ꓗꓷꓳ꓿ 2 ꓕꓱ ꓟ ꓠꓬ ꓪꓴ-ꓢ ꓡꓰ ꓥꓪ ꓔꓯ ꓟꓳꓸ ꓖꓶ ꓡ ꓟ ꓕꓲ ꓫꓵ ꓟꓶ ꓗꓷ ꓠꓬꓲ꓾ ꓐꓶꓽ ꓞꓳ ꓗꓳ ꓡꓳ ꓗꓪ ꓥꓪ ꓚ ꓟꓸ ꓖꓶˍ ꓟ ꓶꓼ ꓓꓳꓽ ꓫꓱꓹ ꓓꓳ ꓙ ꓖꓴ ꓕꓱ ꓟ ꓙꓱ-ꓣꓴ-ꓢ-ꓡꓱ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ ꓐꓯ ꓖꓶ ꓠꓹ ꓟ ꓙꓰ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓔꓷꓹ ꓗꓷ ꓟ ꓐꓰ ꓔꓷꓹ ꓔꓬ ꓟ ꓮꓽ ꓔꓳˍ ꓡꓰ ꓗꓷ ꓡꓰˍ ꓟ ꓔꓯ ꓗꓳ ꓚꓱ ꓠꓬꓲ꓾ ꓖꓳ ꓗꓪ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓔꓯˍ ꓡꓰꓽ ꓘꓳ ꓫꓱꓸ ꓫꓱ ꓗꓪ ꓐꓯ ꓟꓳꓸ ꓖꓶꓽ ꓗꓷꓳ꓿ 3 ꓥꓪ ꓔꓯ ꓛꓳ ꓙꓰ ꓢꓴ ꓕꓲ-ꓔꓳ ꓠꓬ ꓦꓲ-ꓡꓲ ꓡꓽ ꓞꓳ ꓥ ꓥˍ ꓟꓲ꓾ ꓬꓲ ꓪꓽ ꓡꓰ ꓬꓲ ꓔꓯ ꓶˍ ꓟ ꓗ ꓫꓵ ꓟꓽ ꓛꓳ ꓟꓽ ꓓ꓾ ꓐꓰ ꓟꓽ ꓐꓯ꓿ 4 ꓖꓳ ꓡꓱ ꓥ ꓟꓲ ꓘꓳ ꓫꓱꓸ ꓫꓱˍ ꓐꓰ ꓘꓴ ꓜꓲ ꓞꓳ ꓗꓪ ꓓꓵꓽ ꓡ ꓟ ꓟꓽ ꓔꓱꓹ ꓟ ꓬꓲꓼ ꓤ ꓠꓬꓲ ꓤ ꓐꓴ ꓠꓬ ꓣꓳꓽ ꓔꓯ ꓚꓳ ꓑꓸ ꓒꓬꓱꓼ ꓡ ꓝꓲ ꓠꓹ ꓟ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓣꓳꓽ ꓙꓳˍ ꓟ ꓚꓳ ꓪꓴꓸ ꓙꓵꓽ ꓪ ꓔꓯ ꓛꓽ ꓠꓬꓲ ꓕꓺ ꓠꓬꓲ ꓡ ꓡꓳ꓿ 5 ꓖꓳ ꓡꓱ ꓥ ꓟꓲ ꓶꓼ ꓓꓳꓽ ꓫꓱꓹ ꓓꓳ ꓬꓲ ꓔꓱꓹ ꓚꓵˍ ꓟ ꓐꓯ ꓘꓶꓽ ꓠꓬ ꓠꓴ ꓪꓽˍ ꓐꓰ ꓮ ꓕꓯˍ ꓟꓲ ꓙꓳ ꓝꓲ ꓠꓹ ꓟ꓾ ꓥꓪ ꓠꓴꓽ ꓠꓽ ꓬꓲ ꓪꓽ ꓔꓯ ꓮ ꓔꓲꓸˍ ꓟꓲ ꓟꓽ ꓙꓵꓺ ꓖꓶ꓿ 6 ꓞꓳ ꓔꓲ ꓟꓬꓱꓺ ꓓꓳꓽ ꓟꓯꓻ ꓔ ꓢꓴ ꓖꓳ ꓕꓲ ꓧꓳꓽ ꓡꓰ ꓥꓪ ꓔꓯ ꓮꓸ ꓫꓵꓽ ꓡꓴꓽ ꓖꓶ ꓡ ꓟ ꓟꓽ ꓙꓳ꓿ (ꓪꓴ-ꓢ ꓠꓬ ꓞꓳ ꓒꓬꓱꓽ ꓔꓯ ꓡꓳꓸ ꓢꓴ ꓟꓽ ꓥ ꓠꓬꓲ꓾ ꓬꓲ ꓪꓽ ꓮꓸ ꓫꓵꓽ ꓒꓬꓱ ꓫꓬꓹˍ ꓟꓲ ꓖꓳ ꓟ ꓔꓯ ꓥꓪ ꓮꓸ ꓫꓵꓽ ꓟꓽ ꓚꓬꓹ꓿) 7 ꓖꓳ ꓡꓱ ꓥ ꓟꓲ ꓬꓴ-ꓔ ꓡꓽ ꓞꓳ ꓔꓯ ꓶꓼ ꓓꓳꓽ ꓫꓱꓹ ꓓꓳ ꓚꓺ ꓟꓸ ꓠꓹ ꓟ ꓠꓬ ꓒꓲ-ꓕꓱ ꓔꓯ ꓡꓯꓼ ꓙꓱ ꓖꓶ ꓔ ꓟ ꓡꓰ ꓐꓰ꓾ ꓓ ꓔꓯ ꓟꓸ ꓠꓹ ꓟ ꓠꓬ ꓥꓪ ꓔꓯ ꓡꓯꓼ ꓙꓱ ꓖꓶ ꓔ ꓟ ꓔꓯ ꓬꓲ ꓪꓽ ꓟꓳˍ ꓡꓳ꓿ 8 ꓮ ꓡꓲꓳ ꓐꓯ ꓠꓬ ꓬꓴ-ꓔ ꓡꓽ ꓞꓳ ꓗꓳ ꓡꓳ ꓗꓪ ꓝꓲ ꓓꓴ ꓟꓬꓱꓽ ꓣꓱꓽ ꓢꓴ ꓒꓲ-ꓕꓱ ꓠꓯꓸꓼ ꓗꓪ ꓢꓯꓼ ꓕꓵꓼ ꓢꓴ ꓪꓴ-ꓢ ꓠꓬ꓾ ꓥꓪ ꓠꓯꓸꓼ ꓗꓪˍ ꓟꓲ ꓢꓯꓼ ꓕꓵ ꓢꓲ ꓐꓶꓽ ꓞꓳ ꓐꓴ ꓐꓱ ꓶ ꓥꓪ ꓔꓯ ꓝꓲ ꓓꓴ ꓒꓬꓱꓼ ꓡ ꓝꓲꓳ꓿ 9 ꓖꓳ ꓡꓱ ꓢꓲ ꓥꓪ ꓔꓯ ꓖꓶ ꓡ ꓟ ꓣꓱꓽ ꓛꓰ ꓔꓯ ꓬꓲ ꓪꓽ ꓟꓳˍ ꓕꓯ꓾ ꓥꓪ ꓠꓴ ꓠꓬ ꓐꓶꓽ ꓞꓳ ꓔꓯ ꓟꓸ ꓙꓰ ꓠꓹ ꓟ ꓐꓰ꓾ ꓬꓲ ꓪꓽ ꓠꓬ ꓬꓴ-ꓔ ꓡꓽ ꓞꓳ ꓔꓯ ꓙꓰ ꓠꓹ ꓟ꓾ ꓘꓴ ꓜꓲ ꓞꓳ ꓬꓲꓻ ꓘꓴꓻ ꓡꓰ ꓐꓰ ꓚꓬꓹ ꓔ ꓟ ꓬ-ꓗꓴ ꓐꓰ ꓒꓲ-ꓕꓱ ꓐꓰ ꓬꓳ-ꓦ ꓡꓰ꓾ ꓐ-ꓠ-ꓐ ꓐꓰ ꓥꓪ ꓔꓯ ꓘꓳꓻ ꓣꓴ ꓡ ꓢꓲ꓾ ꓪꓴ-ꓢ ꓟꓬꓱꓽ ꓗꓪ ꓙꓻ ꓡꓯꓽ ꓘꓳ ꓟ ꓟꓶ ꓡꓰ ꓠꓹ ꓟ ꓡꓯꓼ ꓒꓯꓹ ꓧꓪꓸ ꓖꓶ ꓡꓺꓳ꓿ 10 ꓖꓳ ꓡꓱ ꓢꓲ ꓞꓳ ꓫꓸ ꓔꓯ ꓟꓽ ꓟꓲ ꓡꓰ ꓠꓹ ꓟ ꓬꓲ ꓪꓽ ꓡꓰ ꓬꓲꓼ ꓠꓬꓲꓸ ꓖꓶ ꓡꓺꓳ꓿ ꓞꓳ ꓫꓸ ꓔꓯ ꓣꓱꓽ ꓙˍ ꓟ ꓕꓱ ꓕꓲ ꓫꓵꓽ ꓠꓬ ꓥꓪˍ ꓟꓲ ꓬꓲ ꓖꓳ ꓡꓱ ꓬꓰ ꓠꓹ ꓟ ꓠꓲꓹ ꓡꓱꓻ ꓔꓬ ꓟ ꓥ ꓡꓳ꓿ 11 ꓖꓳ ꓗꓸ ꓠꓯꓸ ꓒꓲ-ꓕꓱ ꓠꓬ ꓮ-ꓕꓲ-ꓬ ꓗꓪ ꓛꓲ ꓡ ꓕꓯ ꓬꓲ ꓔꓯ ꓕꓼ ꓙꓲꓽ ꓙꓳˍ ꓠꓬꓲ꓾ ꓥꓪ ꓬꓲ ꓔꓯ ꓒꓬꓱꓽ ꓔꓳꓹ ꓟꓬ ꓔꓳꓹ ꓕꓼ ꓗꓷꓳ꓿ 12 ꓮ ꓡꓲꓳ ꓐꓯ ꓠꓬ ꓬ-ꓗꓴ ꓔꓯˍ ꓐꓰ ꓡꓻ ꓟ ꓖꓳ ꓕꓲ ꓧꓳꓽ ꓟꓽ ꓛꓲ ꓡ ꓧꓶ ꓕꓯ꓾ ꓬꓲ ꓠꓬ ꓐꓶꓽ ꓞꓳˍ ꓐꓰ ꓕꓲ ꓪꓺꓼ ꓜ ꓜꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓛꓲ ꓡ ꓠꓬ ꓬꓲ ꓠꓽ ꓶꓺ ꓔ ꓢꓴ ꓕꓲ ꓧꓳꓽ ꓔꓯ ꓙꓳꓺ ꓠꓬꓲ꓾ ꓙꓵꓺ ꓙꓰ ꓢꓲ ꓚꓲ ꓛꓬ ꓔꓯ ꓐꓶꓽ ꓞꓳˍ ꓐꓰ ꓗꓳꓹ ꓞꓹ ꓝꓲˍ ꓡꓳ꓿ 13 ꓠꓱꓸ ꓐꓯꓼ ꓟ ꓬꓴ-ꓔ ꓡꓽ ꓞꓳ ꓬꓲꓼ ꓤ ꓠꓬꓲ ꓤ ꓐꓴˍ ꓟꓲ ꓒꓲ-ꓕꓱ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽˍ ꓟ ꓔꓯ ꓛꓳ ꓢꓲ ꓐ-ꓠ-ꓐ ꓔꓯˍ ꓟꓲ ꓧꓳꓽ ꓪꓴꓸ ꓙꓰˍ ꓡꓳ꓿ 14 ꓬꓲ ꓪꓽ ꓠꓬ ꓔꓱꓹ ꓚꓵˍ ꓟ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓔꓱꓹ ꓔꓱꓹꓼ ꓟꓽ ꓛꓳˍ ꓟ ꓔꓯ ꓥꓪ ꓟꓳꓻ ꓗꓷ ꓕꓯ꓾ ꓥꓪ ꓡꓰ ꓮꓽ ꓙꓵ ꓢꓴ ꓟꓲꓽ ꓙꓬ ꓗꓪ ꓒꓲ-ꓕꓱ ꓔꓯ꓾ ꓠꓴ ꓠꓬ ꓬꓴ-ꓔ ꓡꓽ ꓞꓳ ꓥ ꓢꓲ꓾ ꓬꓴ-ꓔ ꓡꓽ ꓞꓳˍ ꓡꓰ ꓐꓰ ꓟꓽ ꓥ ꓥ꓾ ꓐꓶꓽ ꓞꓳˍ ꓡꓰ ꓐꓰ ꓞꓳ ꓙꓳ ꓔꓬ ꓠꓬ꓾ ꓮ ꓡꓲ ꓗꓹ ꓠꓬꓲ ꓠꓴ ꓠꓬ ꓐꓶꓽ ꓞꓳ ꓔꓯ ꓟꓽ ꓓ ꓟꓽ ꓞ ꓬꓴ-ꓔ ꓡꓽ ꓞꓳˍ ꓡꓰ ꓐꓰ ꓞꓳ ꓙꓳ ꓔꓬ ꓝꓲˍ ꓡ? 15 ꓣꓳꓽ ꓠꓬ ꓦꓵꓻˍ ꓕꓯˍ ꓡꓰ ꓬꓴ-ꓔ ꓡꓽ ꓞꓳ ꓥ ꓢꓲ꓾ ꓝꓴꓲ ꓙꓳˍ ꓟ ꓐꓶꓽ ꓞꓳ ꓟꓽ ꓥˍ ꓟꓲ꓾ 16 ꓞꓳ ꓤ ꓠꓬ ꓙꓵꓽ ꓗ ꓟꓬꓱꓽ ꓬꓰˍ ꓟ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓟ ꓟꓽ ꓥ ꓥ꓾ ꓙꓲ-ꓢꓴ ꓬꓰ-ꓢꓴ ꓔꓯ ꓙꓵꓻˍ ꓟ ꓗꓪ ꓐꓰˍ ꓡꓰꓽ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓣꓳꓽ ꓢꓷꓸˍ ꓠꓬꓲ꓾ ꓣꓳꓽ ꓥ ꓟꓲ ꓙꓵꓽ ꓗ ꓟꓬꓱꓽ ꓬꓰˍ ꓟ ꓗꓪ ꓐꓰ ꓟꓽ ꓥ ꓥ꓾ ꓙꓲ-ꓢꓴ ꓔꓯ ꓙꓵꓻˍ ꓟ ꓗꓪ ꓐꓰ ꓔꓱꓹ ꓜꓳˍ ꓟ ꓚꓬꓹ ꓟꓶ ꓠꓹ ꓟ꓾ ꓙꓲ-ꓢꓴ ꓬꓰ-ꓢꓴ ꓔꓯ ꓙꓵꓻ ꓗꓷ ꓟ ꓥ ꓡꓳ꓿ ꓮꓽ ꓟ ꓥ ꓟꓲ ꓙꓵꓽ ꓗ ꓟꓬꓱꓽ ꓬꓰˍ ꓟ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓟꓽ ꓥ꓿ 17 ꓖꓳ ꓡꓱ ꓥ ꓟꓲ ꓣꓳꓽ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓠꓲꓹ ꓫꓵˍ ꓠꓬ꓾ ꓣꓳˍ ꓟꓲ ꓐꓶꓽ ꓞꓳˍ ꓡꓰ ꓐꓰ ꓝꓴꓲ ꓙꓳ ꓢꓴ ꓥ ꓟ ꓡꓳꓸ ꓓꓳ ꓡꓺꓳ꓿ ꓖꓳ ꓡꓱ ꓥ ꓠꓬ ꓙꓲ-ꓢꓴ ꓠꓽ ꓝꓴꓲ ꓔꓯ ꓣꓱꓽ ꓙ ꓢꓴ ꓥ ꓡ? ꓖꓳ ꓡꓱ ꓠꓽ ꓟꓽ ꓥ꓿ 18 ꓥꓪ ꓡꓰ ꓒꓬꓹ ꓗꓷˍ ꓟ ꓔꓯ ꓥꓪ ꓝꓮꓲ ꓕꓲ ꓧꓪꓹ ꓫꓬꓹ ꓜꓶꓻˍ ꓠꓬ꓾ ꓥꓪ ꓠꓽ ꓛꓬꓻ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ 19 ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓪꓴ-ꓢ ꓔꓯ ꓟꓳꓸ ꓢꓯꓸ ꓔꓬ ꓠꓹ ꓟ꓾ ꓙꓵꓽ ꓗ ꓗꓪ ꓐꓰ ꓙꓵꓽ ꓗ ꓔꓯ ꓟꓳꓸ ꓫꓵꓳ꓿ 20 ꓥꓪ ꓔꓯ ꓠꓬ ꓙꓲ-ꓢꓴˍ ꓐꓰ ꓕꓲꓽ ꓪꓺꓼ ꓕꓯꓼ ꓔꓶ ꓗꓷꓳ꓿ ꓮ ꓟꓶ ꓢꓯꓸ ꓔꓬ ꓟ ꓠꓽ ꓥꓪ ꓟꓽ ꓥ꓾ ꓙꓲ-ꓢꓴ ꓥꓪ ꓠꓯꓸꓼ ꓗꓪ ꓢꓯꓸ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓮ ꓟꓶ ꓧꓪꓽ ꓖꓳ ꓓꓱ ꓗꓪ ꓥꓪ ꓢꓯꓸ ꓔꓬ ꓟ ꓠꓬ꓾ ꓥꓪ ꓔꓯ ꓠꓲꓹ ꓠꓵ ꓢꓲ ꓥꓪ ꓐꓱ ꓶ ꓬꓲ ꓚꓲ ꓛꓬ ꓖꓳ ꓓꓱ ꓖꓶꓽ ꓗꓷ ꓟ ꓪꓴ-ꓢ ꓬꓲ ꓮ ꓐꓲ ꓔꓯ ꓙꓵꓻˍ ꓟ ꓗꓪ ꓐꓰ ꓢꓯꓸ ꓔꓬ ꓟ ꓥ ꓡꓳ꓿ 21 ꓥꓪ ꓠꓬ ꓪꓴ-ꓢ ꓣꓱꓽ ꓛꓰ ꓔꓯ ꓖꓳꓽ ꓡꓰ ꓝꓲ ꓠꓲꓹ ꓟꓽ ꓫꓵ꓿ ꓮ ꓡꓲꓳ ꓐꓯ ꓠꓬ ꓔꓱꓹ ꓜꓳꓽˍ ꓟ ꓠꓬ ꓙꓵꓽ ꓗ ꓗꓪ ꓐꓰ ꓟꓶˍ ꓟ ꓥ ꓕꓯ ꓠꓽ꓾ ꓙꓲ-ꓢꓴ ꓫꓵꓻˍ ꓟ ꓠꓬ ꓮꓽ ꓔꓳˍ ꓡꓰꓽ ꓗꓷ ꓡꓰˍ ꓡꓳ ꓫꓵꓽ ꓥꓳ꓾ ꓐꓰ ꓐꓯ ꓖꓶꓽ ꓗꓷꓳ꓿

ꓖ-ꓡ-ꓕꓲ-ꓬ 4

1 ꓥꓪ ꓐꓯ ꓔꓬ ꓟ ꓠꓬ ꓕꓱ ꓡꓱ ꓥꓳ꓿ ꓡꓯꓼ ꓪ ꓟꓶ ꓠꓯꓹ ꓢꓴ ꓠꓬ ꓮꓽ ꓙꓵ ꓟ ꓬꓲ ꓢꓲ ꓒ ꓥꓻ ꓥ ꓟꓲ꓾ ꓬꓲ ꓤ ꓠꓱ ꓤ ꓥ ꓢꓰꓽ ꓕꓯ ꓠꓬ ꓚꓳ ꓑꓸˍ ꓐꓰ ꓕꓲ ꓡꓰꓹꓼ ꓥ ꓢꓲ꓾ 2 ꓬꓲ ꓐꓹ ꓐ ꓝꓰꓹ ꓔ ꓟ ꓦꓬꓼ ꓠꓬꓲ ꓟꓽ ꓛꓲ ꓡ ꓕ ꓑꓳꓸ꓾ ꓬꓲ ꓠꓽ ꓤ ꓠꓱ ꓠꓬꓲꓺ ꓢꓴˍ ꓐꓰ ꓦꓲ ꓙꓵꓽ ꓢꓴ ꓠꓯꓸ ꓘꓪ ꓔꓬ ꓡꓳ꓿ 3 ꓖꓳ ꓟ ꓡꓰ ꓐꓰ ꓣꓳˍ ꓟꓲ ꓤ ꓠꓱ ꓤ ꓥ ꓢꓰꓽ ꓕꓯ꓾ ꓟꓲ ꓠꓯ ꓞꓳ ꓚꓱꓹ ꓪꓽ ꓚꓱꓹ ꓚꓳ ꓑꓸ ꓬꓰ ꓗꓷꓳ꓿ 4 ꓖꓳ ꓡꓱ ꓥ ꓟꓲ ꓦꓬꓼ ꓠꓬꓲ ꓐꓲ ꓡ ꓕꓯ ꓤ ꓟꓶ ꓤ ꓡꓰ ꓙꓵꓽ ꓗ ꓠꓯꓸ ꓘꓪ ꓦꓵꓻ ꓔ ꓟ ꓪꓴ-ꓢ ꓬꓲ ꓮ ꓐꓲ ꓔꓯ ꓬꓲ ꓡꓰ ꓝꓲ ꓩꓴ ꓡ ꓢꓲ꓾ 5 ꓙꓵꓽ ꓗ ꓠꓯꓸ ꓘꓪ ꓔꓬ ꓢꓴ ꓔꓯ ꓫꓴꓹ ꓣꓴ ꓗꓷ ꓢꓲꓸ ꓠꓬꓲ꓾ ꓣꓳꓽ ꓔꓯ ꓤꓽ ꓙꓵꓽ ꓪ ꓟꓶ ꓡꓰ ꓝꓲꓳ꓿ 6 ꓠꓴ ꓪꓽ ꓠꓬ ꓤꓽ ꓐꓴ ꓥ ꓠꓬꓲ꓾ ꓪꓴ-ꓢ ꓡꓰ ꓬꓲ ꓮ ꓐꓲ ꓦꓻ ꓔꓯ ꓠꓴ ꓪꓽ ꓠꓲꓹ ꓟ ꓗꓪ ꓝꓲ ꓩꓴ ꓡ ꓢꓲ꓾ ꓮꓽ ꓐ꓾ ꓐꓹ ꓐ꓾ ꓘꓴ ꓔꓬ ꓡꓳ꓿ 7 ꓖꓳ ꓡꓱ ꓠꓬꓲ ꓕꓱ ꓡꓱ ꓖꓳ ꓑꓳ ꓠꓴ ꓪꓽ ꓠꓬ ꓚꓳ ꓑꓸ ꓟꓽ ꓥ꓾ ꓬꓲ ꓤꓽ ꓥ ꓡꓳ꓿ ꓬꓲ ꓤꓽ ꓥ ꓕꓯ ꓠꓽ ꓪꓴ-ꓢ ꓡꓯꓼ ꓪꓺ ꓟꓶ ꓢꓴ ꓥ ꓡꓳ꓿ 8 ꓧꓶꓸ ꓕꓯ ꓠꓴ ꓪꓽ ꓪꓴ-ꓢ ꓔꓯ ꓟꓽ ꓢꓷꓸ ꓕꓯ꓾ ꓬꓲ ꓚꓰ ꓬꓲ ꓪꓴꓸ ꓗꓪ ꓐꓰ ꓢꓲꓺ ꓟꓽ ꓥ ꓢꓴ ꓔꓯ ꓚꓳ ꓑꓸ ꓔꓯꓹ ꓗꓷꓳ꓿ 9 ꓮ ꓟꓶ ꓠꓴ ꓪꓽ ꓠꓬ ꓪꓴ-ꓢ ꓔꓯ ꓢꓷꓸ ꓡꓰ ꓢꓲ꓾ ꓥ ꓠꓬ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓧꓪ ꓟꓶ ꓡꓰ ꓗꓸ ꓠꓯ꓾ ꓠꓴ ꓪꓽ ꓠꓬ ꓮ ꓡꓲ ꓗꓷ ꓡꓰ ꓠꓬꓲ ꓒꓳꓹ ꓬꓲꓼ ꓙꓰ ꓢꓲ ꓢꓯꓼ ꓐꓽˍ ꓟ ꓐꓰ ꓣꓱꓽ ꓬꓯꓼ ꓖꓴ ꓟꓽ ꓙꓳ ꓟ ꓞꓳ ꓚꓱꓹ ꓪꓽ ꓚꓱꓹ ꓚꓳ ꓑꓸ ꓬꓰ ꓠꓲꓹ ꓫꓵˍ ꓢꓰꓽ ꓡ? 10 ꓠꓴ ꓪꓽ ꓠꓬ ꓦꓬꓼ ꓠꓬꓲˍ ꓐꓰ ꓦ ꓐˍ ꓐꓰ ꓝꓲꓸˍ ꓐꓰ ꓘꓳꓼ ꓔꓯ ꓚꓲꓸˍ ꓡꓳ꓿ 11 ꓠꓴ ꓪꓽ ꓐꓱ ꓶ ꓥꓪ ꓢꓯꓼ ꓕꓵꓼ ꓗꓷ ꓟ ꓠꓬ ꓮꓽ ꓔꓳ ꓗꓷ ꓡꓰ ꓟꓽ ꓢꓷꓸꓳ꓾ ꓐꓰ ꓥꓪ ꓗꓳ ꓚꓱˍ ꓡꓳ꓿ 12 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓠꓴ ꓪꓽ ꓠꓬ ꓥꓪˍ ꓐꓰ ꓕꓲ ꓡꓰꓹꓼ ꓒꓬꓱꓼ ꓡ ꓠꓹ ꓟ ꓠꓴ ꓪꓽ ꓔꓯ ꓓꓰꓽˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪˍ ꓟꓲ ꓠꓴ ꓪꓽˍ ꓐꓰ ꓕꓲ ꓡꓰꓹꓼ ꓗꓷ ꓡꓰꓳ꓿ ꓠꓴ ꓪꓽ ꓠꓬ ꓥꓪ ꓔꓯ ꓟꓽ ꓛꓬ ꓡꓰ ꓠꓬꓲ꓿ 13 ꓥꓪ ꓡꓰ ꓠꓴ ꓪꓽ ꓔꓯ ꓶꓼ ꓓꓳꓽ ꓫꓱꓹ ꓓꓳ ꓬꓲ ꓪꓴꓸ ꓕꓲ ꓧꓪ ꓚ ꓟꓸ ꓖꓶ ꓪˍ ꓟ ꓠꓬ꓾ ꓥꓪ ꓖꓳ ꓓꓱ ꓗꓪ ꓠꓻ ꓓꓴ ꓙꓳˍ ꓟ ꓗꓪ ꓐꓰ ꓥ ꓟ ꓠꓴ ꓪꓽ ꓢꓷꓸˍ ꓡꓳ꓿ 14 ꓖꓳ ꓡꓱ ꓢꓲ ꓥꓪ ꓠꓻˍ ꓟ ꓠꓬ ꓠꓴ ꓪꓽ ꓔꓯ ꓤꓹ ꓠꓬꓲ ꓓꓴ ꓕꓲ ꓫꓵꓽˍ ꓡꓰ ꓐꓰ ꓗꓷ ꓡꓰˍ ꓟꓲ꓾ ꓠꓴ ꓪꓽ ꓥꓪ ꓔꓯ ꓟꓳꓻ ꓟꓽ ꓟꓵꓺ ꓟꓽ ꓬꓰ꓿ ꓠꓲꓹˍ ꓟꓲ ꓟꓽ ꓠꓲꓹ ꓜꓲ꓿ ꓠꓴ ꓪꓽ ꓠꓽ ꓪꓴ-ꓢ ꓝꓲ ꓓꓴ ꓔꓯ ꓘꓳꓻ ꓣꓴˍ ꓟ ꓡꓰ ꓐꓰ꓾ ꓥ ꓠꓬ ꓙꓲ-ꓢꓴ ꓬꓰ-ꓢꓴ ꓔꓯ ꓘꓳꓻ ꓣꓴˍ ꓟ ꓡꓰ ꓐꓰ ꓥꓪ ꓔꓯ ꓘꓳꓻ ꓣꓴ ꓡꓺꓳ꓿ 15 ꓖꓳ ꓕꓯꓽˍ ꓡꓰ ꓠꓴ ꓪꓽ ꓙꓳˍ ꓟ ꓗꓹ ꓛꓲ ꓓꓴ ꓮ ꓡꓲ ꓗꓪ ꓙꓰ ꓗꓷ ꓡ? ꓠꓴ ꓪꓽ ꓐꓻ ꓡ ꓕꓯ ꓠꓽ꓾ ꓠꓴ ꓪꓽ ꓟꓬ ꓢꓶꓽˍ ꓟꓲ ꓗꓳꓸ ꓓꓳ ꓡ ꓢꓲ ꓥꓪ ꓔꓯ ꓖꓶ ꓠꓲꓹ ꓒꓴˍ ꓡꓳ ꓫꓵ ꓥ ꓟ꓾ ꓠꓴ ꓪꓽ ꓐꓱ ꓶ ꓥꓪ ꓢꓷꓸ ꓙ ꓟꓳ ꓙ ꓑꓶꓸˍ ꓡꓳ꓿ 16 ꓥꓪ ꓡꓰ ꓠꓴ ꓪꓽ ꓔꓯ ꓔꓱꓹˍ ꓟ ꓐꓯ ꓖꓶˍ ꓟ ꓗꓪ ꓐꓰ꓾ ꓥꓪ ꓠꓬ ꓠꓴ ꓪꓽ ꓔꓯ ꓛꓴꓽ ꓙꓳ ꓢꓴ ꓒꓬꓱꓼ ꓡ ꓡ? 17 ꓠꓱꓸ ꓐꓯꓼ ꓕꓲ ꓧꓳꓽ ꓟ ꓡꓰ ꓠꓴ ꓪ ꓔꓯ ꓠꓲꓹ ꓡꓱꓻ ꓡꓱˍ ꓡꓰ ꓧꓪ ꓡ ꓟ ꓠꓬ꓾ ꓠꓴ ꓪꓽ ꓙꓲ ꓖꓴ ꓟꓶ ꓝꓲ ꓠꓹ ꓟ ꓟꓽ ꓥ꓿ ꓠꓴ ꓪꓽ ꓠꓬ ꓬꓲ ꓪꓽ ꓚꓱꓹ ꓗꓪ ꓠꓲꓹ ꓡꓱ ꓡ ꓢꓲ꓾ ꓥꓪ ꓠꓴ ꓔꓯˍ ꓐꓰ ꓗꓳꓹ ꓞꓹ ꓝꓲ ꓠꓹ ꓟ ꓥ ꓡꓳ꓿ 18 ꓥꓪ ꓠꓴꓻ ꓪˍ ꓐꓰ ꓔꓬ ꓕꓯˍ ꓡꓰꓽ ꓟꓽ ꓞꓲ꓾ ꓮ ꓕꓯˍ ꓟꓲ ꓬꓲ ꓖꓳ ꓡꓱ ꓙꓲˍ ꓟ ꓟꓬꓱꓽ ꓗꓪ ꓠꓲꓹ ꓡꓱˍ ꓠꓬ ꓙꓲˍ ꓡꓳ꓿ 19 ꓥꓪ ꓠꓲꓹ ꓠꓵˍ ꓟ ꓤ ꓠꓱ ꓐꓴꓳ꓾ ꓠꓴ ꓪꓽ ꓠꓬ ꓙꓲ-ꓢꓴ ꓒꓬꓱꓽ ꓟꓽ ꓶꓻ ꓡꓰ ꓕ ꓑꓳ꓾ ꓠꓴ ꓪꓽ ꓐꓱ ꓶ ꓥꓪ ꓠꓬ ꓦꓵꓻ ꓠ ꓜꓲꓽ ꓔꓬ ꓢꓴˍ ꓡꓰ ꓐꓰ ꓠꓻ ꓜꓲꓽ ꓔꓬ ꓥꓳ꓿ 20 ꓮ ꓟꓶ ꓠꓴ ꓪꓽ ꓔꓯ ꓥꓪ ꓟꓳꓻ ꓡꓯꓽ ꓘꓳ ꓪ ꓢꓲ꓾ ꓠꓴ ꓪꓽ ꓐꓱ ꓶ ꓕꓱ ꓡꓱ ꓓꓵꓽ ꓙꓽ ꓪꓴꓽ ꓧꓶ ꓟꓽ ꓛꓵ ꓐꓷˍ ꓠꓬ꓾ ꓮꓽ ꓘꓶꓸ ꓙꓲˍ ꓡꓳ ꓫꓵꓽ ꓥꓳ꓿ 21 ꓙꓵꓽ ꓗ ꓠꓯꓸ ꓘꓪ ꓔꓬ ꓠꓲꓹ ꓫꓵ ꓢꓴ ꓐꓴꓳ꓾ ꓙꓵꓽ ꓗ ꓗꓪ ꓮ ꓡꓲ ꓐꓯ ꓔ ꓟ ꓠꓴ ꓪꓽ ꓟꓽ ꓢꓷꓸ ꓡ? 22 ꓙꓵꓽ ꓗ ꓕꓳ ꓶ ꓗꓪ꓾ ꓮ-ꓐ-ꓡ-ꓦ ꓬꓲ ꓤ ꓠꓬꓲꓽ ꓫꓵꓸ ꓙꓳˍ ꓡꓳ꓿ ꓕꓲ ꓣꓳ ꓠꓬ ꓚꓳ ꓟ ꓗꓪ ꓐꓰ꓾ ꓕꓲ ꓣꓳ ꓠꓬ ꓢꓲꓺ ꓟ ꓗꓪ ꓐꓰ ꓦꓵ ꓟꓶˍ ꓟ ꓥ ꓡꓳ꓾ ꓐꓰ ꓐꓳ ꓔ ꓡꓳ꓿ 23 ꓖꓳ ꓡꓱ ꓥ ꓟꓲ ꓚꓳ ꓟ ꓗꓪ ꓐꓰ ꓦꓵ ꓔ ꓟ ꓠꓬ ꓧꓪꓽ ꓖꓳ ꓓꓱ ꓔꓯ ꓛꓳ ꓢꓲ ꓦꓵ ꓔ ꓟ ꓥ ꓡꓳ꓿ ꓢꓲꓺ ꓟ ꓗꓪ ꓐꓰ ꓦꓵ ꓔ ꓟ ꓠꓽ ꓙ ꓟꓳ ꓘꓶꓽ ꓗꓪ ꓐꓰ ꓥ ꓡꓳ꓿ 24 ꓔꓯ ꓥꓳꓽ ꓬꓲ ꓟꓸ ꓟꓲꓽ ꓠꓬ ꓕꓱ ꓡꓱ ꓥꓳ꓿ ꓤ ꓟꓶ ꓕꓱ ꓠꓬꓲꓽ ꓟꓶꓽ ꓟ ꓠꓬ ꓘꓶꓽ ꓫꓵꓽ ꓠꓬꓲꓽ ꓟ ꓔꓯ ꓔꓯꓺ ꓔ ꓟ ꓥ ꓡꓳ꓿ ꓚꓳ ꓑꓸ ꓬꓰ ꓠꓹ ꓟ ꓤꓽ ꓦꓵꓻ ꓢꓴ ꓠꓬ ꓫꓬ-ꓚꓬꓼ ꓥ ꓢꓲ꓾ ꓬꓲ ꓠꓬ ꓢꓲ-ꓠ ꓪꓽ ꓚꓲ ꓗꓪ ꓟ ꓘꓶꓽ ꓫꓵꓽ ꓔꓯ ꓔꓯꓺ ꓔ ꓟ ꓥ ꓡꓳ꓿ 25 ꓫꓬ-ꓚꓬꓼ ꓠꓬ ꓬ-ꓡ-ꓑꓷ ꓗꓪ ꓟ ꓢꓲ-ꓠ ꓪꓽ ꓚꓲ ꓥ ꓢꓲ꓾ ꓮ ꓟꓶ ꓙꓳˍ ꓟ ꓙꓱ-ꓣꓴ-ꓢ-ꓡꓱ ꓔꓯ ꓔꓯꓺ ꓬꓯꓼˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓙꓱ-ꓣꓴ-ꓢ-ꓡꓱˍ ꓐꓰ ꓬꓲ ꓑ ꓫꓬꓼ ꓐꓴ ꓠꓬ ꓚꓳ ꓑꓸ ꓬꓰ ꓔꓬ ꓡꓳ꓿ 26 ꓖꓳ ꓡꓱ ꓥ ꓟꓲ ꓟꓴꓽ ꓗꓪ ꓗꓪ ꓟ ꓙꓱ-ꓣꓴ-ꓢ-ꓡꓱ ꓠꓽ ꓢꓲꓺ ꓟ ꓥ ꓢꓲ꓾ ꓬꓲ ꓠꓬ ꓣꓳꓽ ꓐꓴ ꓟꓹ ꓟ ꓥ ꓡꓳ꓿ 27 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓤ ꓠꓱ ꓟꓽ ꓦꓵꓻ ꓠꓬꓲ ꓟ ꓞꓳ ꓡꓱꓽ ꓟꓺꓳ꓾ ꓗꓹ ꓛꓲꓽ ꓔꓴ ꓡꓯ꓿ ꓦꓵꓻ ꓠꓻ ꓟꓽ ꓜꓲꓽ ꓠꓬꓲ ꓢꓴꓳ꓾ ꓢꓯꓼ ꓓꓽ ꓟ ꓡꓰ ꓘꓴ ꓔꓴ ꓡꓯ꓿ ꓮ ꓡꓲꓳ ꓐꓯ ꓠꓬ ꓒꓰ ꓔꓸ ꓢꓴ ꓬꓲ ꓤ ꓠꓱ ꓠꓬ꓾ ꓤ ꓖꓴ ꓙꓳ ꓢꓴ ꓬꓲ ꓤ ꓠꓱ ꓢꓶꓸ ꓟꓽ ꓞꓲ ꓟꓬꓽˍ ꓡꓳ꓾ ꓐꓰ ꓐꓳ ꓔ ꓡꓳ꓿ 28 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ ꓐꓴ ꓠꓬ ꓬꓲ-ꓢˍ ꓡꓰ ꓐꓰ ꓙ ꓟꓳ ꓘꓶꓽ ꓬꓲ ꓤ ꓠꓱ ꓐꓴ ꓥ ꓡꓳ꓿ 29 ꓖꓳ ꓕꓯ ꓧꓪꓽ ꓖꓳ ꓓꓱ ꓔꓯ ꓛꓳ ꓢꓲ ꓦꓵꓻ ꓔ ꓢꓴ ꓡꓰ꓾ ꓢꓲ-ꓫꓬ-ꓟ-ꓦ ꓔꓯ ꓛꓳ ꓢꓲ ꓦꓵ ꓔ ꓕꓲ ꓣꓳ ꓟ ꓔꓯ ꓗꓸ ꓧꓪ ꓟ ꓡꓰ ꓐꓰ꓾ ꓮ ꓟꓶˍ ꓟꓲ ꓬꓲ ꓖꓳ ꓡꓱ ꓗꓹ ꓡꓳ꓿ 30 ꓖꓳ ꓡꓱ ꓥ ꓟꓲ ꓢꓲꓽ ꓫꓬ ꓕꓳ ꓶ ꓗꓪ ꓮ ꓡꓲ ꓐꓯ ꓡ? ꓚꓳ ꓟ ꓐꓰ ꓬꓲ ꓤ ꓔꓯ ꓖꓼ ꓓꓳ ꓗꓷ꓾ ꓮ ꓡꓲꓳ ꓐꓯ ꓠꓬ ꓚꓳ ꓟ ꓬꓲ ꓤ ꓠꓬ ꓢꓲꓺ ꓟ ꓬꓲ ꓤˍ ꓐꓰ ꓕꓲ ꓪꓺꓼ ꓡꓯꓼ ꓪ ꓟꓽ ꓟꓶ꓾ ꓐꓯˍ ꓡꓳ꓿ 31 ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ ꓐꓴ ꓠꓽ ꓚꓳ ꓟ ꓬꓲ ꓤꓽ ꓐꓴ ꓟꓽ ꓥ꓾ ꓢꓲꓺ ꓟ ꓬꓲ ꓤ ꓐꓴ ꓥ ꓡꓳ꓿

ꓖ-ꓡ-ꓕꓲ-ꓬ 5

1 ꓣꓳꓽ ꓐꓴ ꓠꓬ ꓚꓳ ꓪꓴꓸ ꓙꓵꓽ ꓪ ꓙꓳ ꓠꓹ ꓟ꓾ ꓙꓲ-ꓢꓴ ꓡꓰ ꓣꓳꓽ ꓔꓯ ꓒꓶꓻ ꓩꓴ ꓗꓷꓳ꓿ ꓖꓳ ꓡꓱ ꓠꓬꓲ ꓩꓴ ꓗꓷ ꓟꓶ ꓡꓰ ꓟ ꓚꓳ ꓪꓴꓸˍ ꓡꓰ ꓐꓰ ꓕꓶꓻ ꓕꓶˍ ꓡꓰ ꓦꓰꓼ ꓔ ꓢꓲ꓾ ꓚꓳ ꓑꓸ ꓡꓽ ꓡꓰ ꓝꓮꓲ ꓕꓽ ꓓꓱꓼ ꓪ ꓡꓰ ꓝꓲ꓿ 2 ꓒꓳ-ꓡꓳ ꓥꓪ ꓡꓰ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓠ ꓠꓹ꓾ ꓠꓴ ꓪꓽ ꓠꓬ ꓶˍ ꓟ ꓗꓺ ꓫꓵ ꓛꓳˍ ꓕꓯ ꓠꓽ꓾ ꓙꓲ-ꓢꓴ ꓠꓬ ꓠꓴ ꓪꓽ ꓐꓱ ꓶ ꓙꓲ ꓖꓴ ꓟꓽ ꓙꓳ꓿ 3 ꓶˍ ꓟ ꓗꓺ ꓫꓵ ꓛꓳ ꓢꓴ ꓮꓽ ꓟ ꓥ ꓟꓲ꓾ ꓙꓵꓽ ꓗ ꓮꓽ ꓙꓵ ꓔꓯ ꓛꓳ ꓠꓹ ꓟ ꓐꓵ ꓞꓹ ꓟ ꓥ ꓡꓳ꓾ ꓐꓰ ꓥꓪ ꓢꓷꓸ ꓙ ꓟꓳ ꓙˍ ꓢꓰꓽ ꓥꓳ꓿ 4 ꓙꓵꓽ ꓗ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓠꓲꓹ ꓫꓵ ꓢꓴ ꓠꓴ ꓪꓽ ꓠꓬ ꓙꓲ-ꓢꓴˍ ꓐꓰ ꓗꓳꓹ ꓞ ꓢꓲ꓾ ꓪꓴ-ꓢ ꓣꓱꓽ ꓛꓰ ꓔꓯ ꓡꓯꓼ ꓟꓽ ꓛꓲ ꓗꓷ ꓡꓰ ꓟ ꓥꓳ꓿ 5 ꓮ ꓡꓲꓳ ꓐꓯ ꓠꓬ ꓣꓳꓽ ꓐꓴ ꓠꓽ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ꓾ ꓙꓵꓻ ꓠꓲꓹ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓡ ꓠꓹ ꓟ ꓥꓳ ꓡꓳꓸ ꓔ ꓓꓴ ꓔꓯ ꓡꓳꓺ ꓠꓬꓹ ꓔꓬ ꓟ ꓥ ꓡꓳ꓿ 6 ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓠꓽ꓾ ꓶˍ ꓟ ꓥ ꓟꓲ꓾ ꓟꓽ ꓶˍ ꓟ ꓥ ꓟꓲ ꓮꓸ ꓫꓵꓽ ꓣꓱꓽ ꓟꓽ ꓬꓯꓼ꓿ ꓠꓵ ꓠꓲꓹ ꓗꓪ ꓐꓰ ꓢꓯꓼ ꓕꓵꓼ ꓓꓳ ꓡ ꓟ ꓙꓵꓻ ꓠꓲꓹˍ ꓡꓰꓽ ꓣꓱꓽ ꓬꓯꓼˍ ꓡꓳ꓿ 7 ꓧꓶꓸ ꓕꓯ ꓠꓴ ꓪꓽ ꓠꓬ ꓬꓲ ꓜꓶ ꓐꓰ ꓔꓷꓹ ꓔꓬ ꓡꓳ꓿ ꓔꓱꓹ ꓚꓵˍ ꓟ ꓔꓯ ꓟꓽ ꓒꓵꓽ ꓛꓳ ꓠꓹ ꓟ ꓮꓽ ꓟ ꓡꓰ ꓠꓴ ꓪꓽ ꓔꓯ ꓝꓯꓼ ꓡꓯꓼ ꓗꓷ ꓡ? 8 ꓕꓱ ꓟ ꓠꓬ ꓠꓴ ꓪꓽ ꓔꓯ ꓘꓴꓻ ꓢꓴ ꓪꓴ-ꓢ ꓗꓪ ꓐꓰ ꓡꓻˍ ꓟ ꓟꓽ ꓥ꓿ 9 ꓙꓵꓽ ꓧꓶꓽ ꓮ ꓔꓲꓸ ꓤ ꓡꓰ ꓕꓲ ꓘꓴꓸ ꓡꓱꓸꓼ ꓔꓯ ꓙꓵꓽ ꓡ ꓝꓲˍ ꓡꓳ꓿ 10 ꓠꓴ ꓪꓽ ꓠꓬ ꓠꓱꓸ ꓐꓯꓼ ꓕꓲ ꓚꓱꓹ ꓗꓪ ꓟꓽ ꓪꓴꓸ ꓙꓰ꓾ ꓐꓰ ꓢꓲ ꓒ ꓠꓯꓸꓼ ꓗꓪ ꓥꓪ ꓦ ꓡꓱ ꓐꓳˍ ꓡꓳ꓿ ꓠꓴ ꓪꓽ ꓔꓯ ꓘꓶꓻ ꓡꓶꓽ ꓢꓴ ꓮꓽ ꓟ ꓥ ꓐꓯˍ ꓟꓲ꓾ ꓬꓲ ꓛꓬꓻ ꓒꓵꓽ ꓬꓲ ꓟꓯꓻ ꓠ ꓗꓹ ꓥꓳ꓿ 11 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓬ ꓶˍ ꓟ ꓗ ꓫꓵ ꓛꓳ ꓠꓹ ꓟ ꓟꓸ ꓖꓶ ꓔꓬ ꓢꓰꓽ ꓐꓷˍ ꓠꓬ꓾ ꓢꓴ ꓡꓰ ꓥꓪ ꓔꓯ ꓟꓽ ꓗꓸ ꓧꓪ ꓡꓳ ꓫꓵꓽ ꓥꓳ꓿ ꓖꓳ ꓡꓱ ꓥ ꓕꓯ ꓠꓽ ꓡꓯꓼ ꓐꓳ ꓔꓶꓸ ꓓꓴ ꓟꓸ ꓟꓲꓽ ꓚˍ ꓟ ꓗꓪ ꓘꓶꓻ ꓡꓶ ꓓꓴ ꓟꓽ ꓙꓳˍ ꓡꓳ ꓫꓵꓽ ꓥ ꓡꓳ꓿ 12 ꓠꓴ ꓪꓽ ꓔꓯ ꓘꓶꓻ ꓡꓶꓽ ꓢꓴ ꓐꓴ ꓬꓲ ꓪꓽ ꓚꓲ ꓛꓬ ꓔꓯꓸ ꓟ ꓕꓲꓽ ꓙꓪˍ ꓓꓶ ꓡꓳ ꓩꓴ ꓗꓷˍ ꓠꓬ ꓙꓲˍ ꓡꓳ ꓫꓵꓽ ꓥꓳ꓿ 13 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓔꓯ ꓠꓬ ꓚꓳ ꓪꓴꓸ ꓣꓱꓽ ꓝꓲ ꓠꓹ ꓟ ꓘꓴ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓚꓳ ꓪꓴꓸ ꓙꓵꓽ ꓪ ꓕꓱ ꓟ ꓔꓯ ꓠꓬ ꓧꓪꓽ ꓖꓳ ꓓꓱ ꓦꓯꓸ ꓠꓲꓹ ꓙꓵꓽˍ ꓟ ꓬꓲ ꓚꓱꓹ ꓚ ꓠꓹ ꓟ ꓟꓽ ꓗꓷ ꓡꓰ ꓝꓲ ꓝꓲ꓾ ꓠꓴ ꓪꓽ ꓠꓬ ꓠꓵꓻ ꓠꓲꓹ ꓡꓰ ꓣꓱꓽ ꓙ ꓡꓯꓽ ꓘꓳ꓿ 14 ꓮ ꓡꓲꓳ ꓐꓯ ꓠꓬ ꓙꓵꓽ ꓗ ꓮꓽ ꓙꓵ ꓠꓬ꓾ ꓠꓴ ꓠꓽ ꓚꓲ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓢꓴ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓯˍ ꓟ ꓕꓱ ꓕꓲ ꓘꓶ ꓗꓪ ꓐꓲ ꓡꓰˍ ꓟ ꓥ ꓡꓳ꓿ 15 ꓖꓳ ꓡꓱ ꓠꓬꓲ ꓠꓴ ꓪꓽ ꓟꓽ ꓘꓳꓼ ꓚꓵꓹ ꓡꓯꓽ ꓘꓳ ꓠꓹ ꓟ ꓤ ꓟꓳ꓿ ꓟꓽ ꓥ ꓠꓬ ꓠꓴ ꓪꓽ ꓛꓳ ꓠꓴ ꓪꓽ ꓐꓬꓺ ꓡꓰ ꓝꓲˍ ꓟ ꓗꓷ ꓡꓰˍ ꓥꓳ꓿ 16 ꓥꓪ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓞꓳ ꓙꓳˍ ꓠꓬ꓾ ꓧꓪꓽ ꓖꓳ ꓓꓱꓽ ꓦꓯꓸ ꓠꓲꓹ ꓙꓵꓽˍ ꓟ ꓠꓲꓹ ꓡꓶꓽ ꓟꓽ ꓬꓰ ꓓꓳ ꓡ꓿ 17 ꓮ ꓡꓲꓳ ꓐꓯ ꓠꓬ ꓧꓪꓽ ꓠꓲꓹ ꓡꓶꓽ ꓠꓬ꓾ ꓢꓲ-ꓫꓬ-ꓟ-ꓦ ꓠꓲꓹ ꓡꓶꓽ ꓔꓯ ꓔꓳꓹ ꓡꓯꓽ ꓘꓳˍ ꓡꓳ꓿ ꓢꓲ-ꓫꓬ-ꓟ-ꓦˍ ꓟꓲ ꓧꓪꓽ ꓠꓲꓹ ꓡꓶꓽˍ ꓐꓰ ꓔꓳꓹ ꓡꓯꓽ ꓘꓳˍ ꓡꓳ꓿ ꓠꓴ ꓪꓽ ꓠꓲꓹ ꓫꓵˍ ꓟ ꓬꓰ ꓟꓽ ꓐ ꓡ ꓠꓹ ꓟ꓾ ꓕꓱ ꓠꓬꓲꓽ ꓫꓵꓽ ꓔꓳꓹ ꓡꓯꓽ ꓘꓳˍ ꓡꓳ꓿ 18 ꓖꓳ ꓡꓱ ꓥ ꓟꓲ ꓢꓲ-ꓫꓬ-ꓟ-ꓦ ꓡꓰ ꓠꓴ ꓪꓽ ꓔꓯ ꓧꓳꓽ ꓔꓬ ꓕꓯ ꓠꓽ꓾ ꓠꓴ ꓪꓽ ꓠꓬ ꓙꓵꓽ ꓗ ꓠꓯꓸ ꓘꓪ ꓟꓽ ꓔꓬꓳ꓿ 19 ꓔꓲ ꓢꓲꓽ ꓢꓲꓽˍ ꓡꓰ ꓟꓳꓻ ꓞꓹ ꓟ ꓧꓪꓽ ꓠꓲꓹ ꓡꓶꓽ ꓟꓬꓱꓽ ꓠꓬ꓾ ꓢꓴ ꓤ ꓟꓶ ꓔꓯ ꓛꓬˍ ꓟ꓾ ꓟꓽ ꓢꓲꓽ ꓟꓽ ꓫꓬꓻˍ ꓟ꓾ ꓡꓳꓸ ꓟꓽ ꓐꓲˍ ꓟ ꓬꓰˍ ꓟ꓾ 20 ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼˍ ꓟ꓾ ꓥꓺ ꓟꓬꓱꓽ ꓬꓰˍ ꓟ꓾ ꓠꓲꓹ ꓜꓳ ꓡꓯꓽ ꓘꓳˍ ꓟ꓾ ꓢꓯꓼ ꓡꓯꓽ ꓘꓳˍ ꓟ꓾ ꓟꓬꓺ ꓔꓳꓹ ꓡꓯꓽ ꓘꓳˍ ꓟ꓾ ꓠꓲꓹ ꓟ ꓦꓶˍ ꓟ꓾ ꓐꓯ ꓔꓳꓹ ꓡꓯꓽ ꓘꓳˍ ꓟ꓾ ꓬꓲꓸ ꓐꓱꓻ ꓐꓱꓻ ꓡꓯꓽ ꓘꓳˍ ꓟ꓾ ꓬꓲꓸ ꓗꓪ ꓗꓪꓺ ꓡꓰˍ ꓟ꓾ 21 ꓟꓬ ꓠꓯꓺˍ ꓟ꓾ ꓙꓲꓻ ꓒꓶꓽ ꓬꓲꓼˍ ꓟ꓾ ꓡꓷꓻ ꓖꓪꓺ ꓡꓶꓽˍ ꓟ ꓐꓰ꓾ ꓕꓱ ꓟꓬ ꓫꓵꓽˍ ꓡꓰ ꓐꓰ ꓗꓹ ꓟ ꓠꓱꓸ ꓐꓯꓼ ꓮꓽ ꓙꓵ ꓥ ꓡꓳ꓿ ꓕꓱ ꓟ ꓠꓬ ꓥꓪ ꓡꓰ ꓠꓴ ꓪꓽ ꓔꓯ ꓧꓶꓸ ꓕꓯ ꓐꓯ ꓖꓶˍ ꓟ ꓡꓰ ꓐꓰ ꓮ ꓟꓶˍ ꓟꓲ ꓝꓮꓲ ꓐꓯ ꓖꓶˍ ꓠꓬꓲ꓾ ꓕꓱ ꓡꓱ ꓫꓵꓽ ꓬꓰ ꓢꓴ ꓠꓬ ꓪꓴ-ꓢ ꓗꓴꓷꓼ ꓗꓪ ꓓꓵꓽ ꓡꓰ ꓟꓽ ꓓ꓿ 22 ꓖꓳ ꓡꓱ ꓥ ꓟꓲ ꓢꓲ-ꓫꓬ-ꓟ-ꓦ ꓗꓪ ꓐꓰ ꓓꓱꓼ ꓓꓳ ꓡ ꓟ ꓠꓽ꓾ ꓠꓵꓻ ꓠꓲꓹ꓾ ꓗꓹ ꓛꓲ ꓠꓲꓹ꓾ ꓢꓲ ꓡꓲ ꓟ꓾ ꓠꓲꓹ ꓟ ꓫꓵꓺˍ ꓟ꓾ ꓙꓽ ꓗꓳꓺˍ ꓟ꓾ ꓙꓲꓻˍ ꓟ꓾ ꓦ ꓡꓱ ꓐꓳˍ ꓟ꓾ 23 ꓠꓴꓽ ꓠꓲꓹˍ ꓐꓰ ꓚꓲ ꓛꓬ ꓔꓯ ꓙꓵꓽ ꓘꓴˍ ꓟ ꓥ ꓡꓳ꓿ ꓕꓱ ꓡꓱꓳ ꓫꓵꓽ ꓔꓯ ꓗꓽ ꓔ ꓟ ꓙꓵꓽ ꓗ ꓟꓽ ꓙꓳ꓿ 24 ꓖꓳ ꓡꓱ ꓠꓬꓲ ꓙꓲ-ꓢꓴ ꓬꓰ-ꓢꓴ ꓬꓲ ꓡꓽ ꓞꓳ ꓠꓬ꓾ ꓧꓪꓽ ꓠꓲꓹ ꓡꓶꓽ ꓗꓪ ꓦꓯꓸ ꓠꓲꓹ ꓙꓵꓽˍ ꓟ ꓐꓰ ꓠꓲꓹ ꓦꓯꓸ ꓟ ꓔꓯ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓔꓶꓸ ꓗꓷꓳ꓿ 25 ꓣꓳꓽ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓢꓯꓸ ꓔꓬ ꓠꓬ꓾ ꓢꓲ-ꓫꓬ-ꓟ-ꓦ ꓗꓪ ꓐꓰˍ ꓟꓲ ꓞꓳ ꓙꓳ ꓡꓯ꓿ 26 ꓣꓳꓽ ꓠꓬ ꓘꓶꓽ ꓘꓹ ꓠꓲꓹ ꓘꓹ ꓠꓬꓲ꓾ ꓛꓴꓸ ꓡꓯꓽ ꓘꓳ ꓠꓬꓲ꓾ ꓠꓲꓹ ꓦꓯꓸ ꓟꓬ ꓦꓯꓸ ꓠꓬꓲ ꓕꓽ ꓬꓰ ꓠꓯꓹ ꓡꓳ꓿

ꓖ-ꓡ-ꓕꓲ-ꓬ 6

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓡꓽ ꓞꓳ ꓕꓲ ꓣꓳ ꓔꓯ ꓝꓴꓲ ꓕꓲ ꓫꓵꓽ ꓡꓰ ꓧꓪꓸ ꓡꓰ ꓐꓷˍ ꓠꓬ꓾ ꓠꓴ ꓪꓽ ꓦ ꓢꓯꓼ ꓙꓳ ꓢꓴ ꓡꓰ ꓠꓴꓽ ꓠꓲꓹ ꓣꓱꓽ ꓢꓲꓸ ꓫꓬꓹ ꓔꓳꓹ ꓖꓶ꓿ ꓖꓳ ꓡꓱ ꓢꓲ ꓠꓴ ꓪꓽ ꓚꓲ ꓛꓬˍ ꓟꓲ ꓧꓪꓸ ꓛꓲꓽ ꓢꓲ꓾ ꓝꓴꓲ ꓗꓪ ꓟꓽ ꓓꓵ ꓡꓰ ꓠꓹ ꓟ ꓤ ꓟꓳ꓿ 2 ꓙꓲ-ꓢꓴ ꓬꓲ ꓙꓵꓽ ꓗ ꓬꓰ ꓐꓲ ꓡꓰ ꓝꓲ ꓠꓹ ꓟ꓾ ꓠꓴ ꓪꓽ ꓕꓲ ꓣꓳ ꓛꓳꓽ ꓕꓲ ꓣꓳ ꓶꓻ ꓟꓯꓻ ꓙ ꓡꓯꓽ ꓘꓳ꓿ 3 ꓡꓽ ꓞꓳ ꓕꓲ ꓣꓳ ꓠꓬ ꓮꓸ ꓫꓵˍ ꓟꓲ ꓟꓽ ꓥ ꓢꓲ ꓬꓲ ꓠꓬ꓾ ꓓꓻ ꓒꓽ ꓥ ꓡꓳ꓾ ꓓꓵꓽ ꓙꓽˍ ꓕꓯ ꓠꓽ꓾ ꓚꓲ ꓛꓬ ꓔꓯ ꓗꓶꓸˍ ꓟ ꓥ ꓡꓳ꓿ 4 ꓮ ꓡꓲ ꓕꓲ ꓣꓳ ꓥ ꓟꓲ ꓬꓲ ꓚꓲ ꓛꓬ ꓬꓰˍ ꓟ ꓔꓯ ꓤꓹ ꓠꓬꓲ ꓗꓷ ꓗꓸ ꓠꓯꓸ ꓢꓲꓸˍ ꓡꓰꓽ ꓘꓶꓽ ꓘꓹ ꓑꓶꓸ ꓙꓳˍ ꓟꓲ꓾ ꓚꓲ ꓛꓬ ꓙꓲˍ ꓟ ꓟꓬꓱꓽ ꓗꓪ ꓘꓶꓽ ꓘꓹ ꓠꓯꓹ ꓡꓳ꓿ ꓢꓴ ꓔꓯ ꓔꓯꓺ ꓡꓯꓽ ꓘꓳ ꓟꓽ ꓛꓵ꓿ 5 ꓮ ꓡꓲꓳ ꓐꓯ ꓠꓬ ꓮ ꓡꓲ ꓕꓲ ꓣꓳ ꓥ ꓟꓲ ꓬꓲ ꓚꓲ ꓛꓬ ꓶꓻ ꓬꓲ ꓟꓯꓻ ꓠ ꓗꓹ ꓥꓳ꓿ 6 ꓶꓼ ꓓꓳꓽ ꓫꓱꓹ ꓓꓳ ꓢꓳ ꓟꓶ ꓡꓰ ꓢꓴ ꓠꓬ꓾ ꓬꓲ ꓙꓳˍ ꓟ ꓙꓲˍ ꓟ ꓖꓴꓽ ꓙꓴꓽ ꓗꓪ ꓐꓰ ꓟꓸ ꓢꓴ ꓔꓯ ꓣꓱꓽ ꓙ ꓠꓯꓹ ꓡꓳ꓿ 7 ꓚꓲ ꓛꓬ ꓔꓯ ꓕꓽ ꓗꓶꓸ꓿ ꓪꓴ-ꓢ ꓔꓯ ꓟꓳꓻ ꓟꓽ ꓟꓵ ꓕꓽ ꓬꓰ꓿ ꓮ ꓡꓲꓳ ꓐꓯ ꓠꓬ ꓡꓽ ꓞꓳ ꓮꓸ ꓫꓵꓽ ꓫꓵꓸˍ ꓠꓬ ꓖꓳ ꓕꓲ ꓫꓵꓽˍ ꓡꓰꓽ ꓫ ꓟꓶˍ ꓡꓳ꓿ 8 ꓚꓲ ꓛꓬ ꓧꓪꓽ ꓖꓳ ꓓꓱ ꓐꓱ ꓶˍ ꓡꓰ ꓫꓵꓸ ꓢꓴ ꓠꓬ꓾ ꓧꓪꓽ ꓖꓳ ꓓꓱ ꓗꓪ ꓛꓵꓽ ꓡꓰˍ ꓟ ꓫ ꓟꓶˍ ꓥꓳ꓿ ꓢꓲ-ꓫꓬ-ꓟ-ꓦ ꓔꓯ ꓛꓳ ꓢꓲ ꓫꓵꓸ ꓢꓴ ꓠꓽ꓾ ꓢꓲ-ꓫꓬ-ꓟ-ꓦ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓫ ꓟꓶˍ ꓥꓳ꓿ 9 ꓣꓳꓽ ꓠꓬ ꓙꓲˍ ꓟ ꓬꓰˍ ꓟ ꓗꓪ ꓠꓲꓹ ꓟ ꓕꓽ ꓙꓬ ꓡꓰ ꓝꓲ ꓡꓯ꓿ ꓠꓲꓹ ꓟ ꓟꓽ ꓙꓬ ꓡꓰ ꓠꓬ ꓬꓲ ꓝꓲꓸ ꓛꓲ ꓡ ꓕꓯ ꓣꓳꓽ ꓶꓼ ꓫ ꓟꓶˍ ꓥꓳ꓿ 10 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓬꓲ ꓝꓲꓸ ꓙꓳˍ ꓕꓯ ꓡꓰ ꓞꓳ ꓤ ꓥ ꓕ ꓑꓳ ꓔꓯ ꓙꓲˍ ꓟ ꓬꓰ ꓖꓶ ꓠꓯꓹ ꓡꓳ꓿ ꓙꓵꓻ ꓠꓲꓹ ꓗꓪ ꓟ ꓣꓳꓽ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓪꓻ ꓜꓲꓻ ꓬꓲ ꓕꓱ ꓡꓱ ꓙꓲˍ ꓟ ꓬꓰ ꓖꓶ ꓠꓯꓹ ꓡꓳ꓿ 11 ꓥꓪ ꓚꓲ ꓛꓬ ꓡꓯꓼ ꓒꓯꓹ ꓡꓰ ꓠꓴ ꓪꓽ ꓔꓯ ꓐꓳꓺ ꓖꓶˍ ꓟ ꓕꓳ ꓶ ꓝꓳꓹ ꓮ ꓪꓴꓻ ꓛꓲ ꓗꓹ ꓟ ꓔꓯ ꓡꓳꓸ ꓠꓬꓲ꓿ 12 ꓧꓪꓽ ꓖꓳ ꓓꓱ ꓗꓪ ꓢꓴ ꓔꓯ ꓠꓲꓹ ꓒꓴ ꓡꓰ ꓝꓲ ꓠꓲꓹ ꓫꓵ ꓢꓴˍ ꓐꓰ꓾ ꓙꓲ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓪꓴꓸ ꓠꓬꓲ ꓗꓸ ꓧꓪˍ ꓟ ꓟꓶ ꓠꓲꓹ ꓟꓽ ꓫꓵ ꓢꓴ ꓐꓴ ꓠꓬ꓾ ꓠꓴ ꓪꓽ ꓔꓯ ꓟꓽ ꓓ ꓟꓽ ꓞꓽ ꓶꓺ ꓟꓶ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 13 ꓶꓺˍ ꓟ ꓗꓺ ꓫꓵ ꓛꓳ ꓗꓷ ꓢꓴ ꓕꓱ ꓕꓲ ꓧꓳꓽ ꓠꓬ꓾ ꓚꓲ ꓛꓬ ꓠꓽ ꓙꓵꓽ ꓗ ꓔꓯ ꓟꓽ ꓒꓵꓽ ꓛꓳˍ ꓟꓲ꓾ ꓧꓪꓽ ꓖꓳ ꓓꓱ ꓗꓪ ꓬꓲ ꓪꓽ ꓘꓶꓽ ꓘꓹ ꓪ ꓠ ꓟ꓾ ꓠꓴ ꓪꓽ ꓔꓯ ꓶ ꓟꓶ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 14 ꓥꓪ ꓠꓬ ꓣꓳꓽ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓪꓴꓸ ꓠꓬꓲ ꓟꓽ ꓥ ꓠꓬ ꓮ ꓡꓲ ꓥ ꓟꓲ ꓘꓶꓽ ꓘꓹ ꓠꓲꓹ ꓟꓽ ꓫꓵ꓿ ꓡꓯꓼ ꓐꓳ ꓔꓶꓸ ꓓꓴ ꓕꓱ ꓟ ꓗꓪ ꓐꓰ꓾ ꓟꓲ ꓠꓯ ꓠꓬ ꓥꓪ ꓔꓯ ꓟꓳꓸ ꓕꓯꓼ ꓔꓶꓸ ꓔ ꓟ ꓥ ꓢꓲ꓾ ꓥꓪˍ ꓟꓲ ꓟꓲ ꓠꓯ ꓔꓯꓸ ꓟꓳꓸ ꓕꓯꓼ ꓔꓶꓸ ꓔ ꓟ ꓥ ꓡꓳ꓿ 15 ꓮ ꓡꓲꓳ ꓐꓯ ꓠꓬ ꓶꓺˍ ꓟ ꓥ ꓟꓲ꓾ ꓟꓽ ꓶꓺˍ ꓟ ꓥ ꓟꓲ ꓮꓸ ꓫꓵꓽ ꓟꓽ ꓥ꓿ ꓡꓽ ꓞꓳ ꓫꓵꓼ ꓣꓱꓽˍ ꓟ ꓕꓱ ꓟ ꓡꓰ ꓚꓬꓹ ꓒꓵꓽˍ ꓡꓳ꓿ 16 ꓕꓱ ꓡꓱ ꓞꓳ ꓙꓳ ꓔꓬ ꓟ ꓪꓴ-ꓢ ꓬꓲꓸ ꓬꓲ-ꓢꓷ-ꓡꓰ ꓐꓴ ꓕꓯ ꓢꓲ ꓗꓪ꓾ ꓢꓲ ꓡꓲ ꓟ ꓐꓰ ꓫꓱꓸ ꓤˍ ꓟ ꓬꓯꓼ ꓡ ꓝꓲ꓿ 17 ꓕꓱ ꓡꓱ ꓖꓳ ꓑꓳ ꓮꓽ ꓟˍ ꓟꓲ ꓥꓪ ꓔꓯ ꓕꓽ ꓘꓶꓻ ꓡꓶꓽ ꓡ ꓝꓲ꓿ ꓮ ꓡꓲꓳ ꓐꓯ ꓠꓬ ꓥꓪ ꓖꓳ ꓓꓱ ꓗꓪ ꓬꓰ-ꓢꓴ ꓬꓲ ꓢꓷꓸ ꓡꓰ ꓓꓴ ꓠꓻ ꓓꓴꓻ ꓔꓳꓹ ꓠꓷꓼ ꓔ ꓡꓳ꓿ 18 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓣꓳꓽ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰ ꓠꓬ ꓠꓴ ꓪꓽ ꓐꓰ ꓕꓲ ꓪꓺꓼ ꓙꓳ ꓝꓲ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓬꓲ-ꓩꓴ-ꓢꓳ 1

1 ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ ꓙꓲ-ꓢꓴ ꓬꓰ-ꓢꓴ ꓬꓲ ꓝꓲ ꓓꓴ ꓒꓳ-ꓡꓳ ꓥꓪ ꓡꓰ꓾ ꓬꓲ-ꓩꓴ-ꓢꓳ ꓗꓪ ꓔꓬ ꓟ ꓪꓴ-ꓢ ꓦ ꓡꓱ ꓢꓴ ꓐꓴ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓙꓵꓻ ꓠꓲꓹ ꓙꓳ ꓢꓴ ꓐꓴ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ 2 ꓣꓳꓽ ꓐꓹ ꓐ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 3 ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓐꓹ ꓐˍ ꓐꓰ꓾ ꓬꓲ ꓪꓴ-ꓢ ꓔꓯ ꓫꓸ ꓟꓳ ꓡꓯ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓦ ꓗꓪ ꓟ ꓶꓼ ꓤ ꓫꓱꓹ ꓤ ꓥ ꓕ ꓑꓳ ꓡꓰ꓾ ꓟꓴꓽ ꓗꓪ ꓕꓯ ꓢꓲ ꓗꓪ ꓣꓳꓽ ꓔꓯ ꓙꓲ-ꓢꓴ ꓠꓯꓸꓼ ꓗꓪ ꓶꓼ ꓥꓳꓽ ꓙꓱ ꓖꓶ ꓢꓲ꓾ 4 ꓣꓳꓽ ꓠꓬ ꓬꓲ ꓟꓲꓽ ꓙꓬ ꓗꓪ ꓓꓰ ꓖꓴ ꓟꓽ ꓙꓳˍ ꓟ ꓚꓰꓸ ꓔ ꓢꓴ ꓒꓬꓱꓼ ꓡ ꓠꓹ ꓟ꓾ ꓟꓵ ꓟꓽ ꓔꓶ ꓟꓲ ꓟꓽ ꓔꓶ ꓕꓯˍ ꓡꓰ ꓙꓲ-ꓢꓴ ꓠꓯꓸꓼ ꓗꓪ ꓣꓳꓽ ꓔꓯ ꓢꓲꓺ ꓔ ꓡꓳ꓿ 5 ꓝꓮꓲ ꓬꓲ ꓠꓬ ꓣꓳꓽ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓬꓲ ꓠꓲꓹ ꓡꓶꓽ ꓠꓲꓹ ꓒꓴˍ ꓟ ꓔꓯ ꓛꓳ ꓢꓲ꓾ ꓣꓳꓽ ꓔꓯ ꓬꓲ ꓚꓲ ꓛꓬ ꓤꓽ ꓐꓴ ꓒꓬꓱꓼ ꓡ ꓝꓲ ꓠꓹ ꓟ꓾ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓧꓶꓸ ꓕꓯˍ ꓡꓰ ꓝꓰꓹ ꓔ ꓡꓳ꓿ 6 ꓕꓱ ꓟ ꓠꓬ ꓬꓲ ꓠꓲ-ꓠꓵ-ꓔ-ꓢꓴ ꓠꓯꓸꓼ ꓗꓪ ꓣꓳꓽ ꓔꓯ ꓠꓲꓹ ꓡꓳꓻ ꓡꓳˍ ꓡꓰ ꓖꓶ ꓡ ꓟ꓾ ꓟꓬꓱ ꓓꓳꓽ ꓙꓳˍ ꓟ ꓣꓱꓽ ꓛꓰ ꓔꓯ ꓓꓳꓹ ꓟꓴ ꓠꓹ ꓟ ꓥ ꓡꓳ꓿ 7 - 8 ꓪꓴ-ꓢ ꓠꓬ ꓬꓲ ꓐꓳ ꓞꓹ ꓟ ꓣꓱꓽ ꓛꓰ ꓣꓳꓽ ꓔꓯ ꓧꓳꓸ ꓧꓳꓽ ꓖꓶ ꓡ ꓢꓲ꓾ ꓙꓲ-ꓢꓴ ꓠꓯꓸꓼ ꓗꓪ ꓬꓲ ꓫꓵꓽ ꓡꓰ ꓣꓳꓽ ꓔꓯ ꓫꓴꓹ ꓣꓴˍ ꓟ ꓐꓰ ꓛꓬꓻ ꓖꓴ ꓖꓽ ꓖꓶˍ ꓟ ꓟꓶ ꓡꓰ ꓝꓲꓳ꓿ 9 ꓝꓮꓲ ꓬꓲ ꓠꓲꓹ ꓒꓴˍ ꓟ ꓚꓴꓽ ꓬꓲꓹ ꓔꓯ ꓛꓳ ꓢꓲ꓾ ꓙꓲ-ꓢꓴ ꓠꓯꓸꓼ ꓗꓪ ꓬꓲ ꓡꓰ ꓓꓶꓽ ꓔ ꓟ ꓚꓴꓽ ꓬꓲꓹˍ ꓐꓰ ꓬꓲ ꓠꓲꓹ ꓡꓶꓽ ꓚꓵ ꓘꓶꓽˍ ꓟꓲ ꓣꓳꓽ ꓔꓯ ꓢꓷꓸ ꓡꓰ ꓝꓲˍ ꓡꓳ꓿ 10 ꓕꓱ ꓟ ꓠꓬ ꓝꓰꓹ ꓔ ꓟ ꓦꓬꓼ ꓠꓬꓲ ꓐꓲ ꓡ ꓕꓯ꓾ ꓟꓴꓽ ꓗꓪ ꓕꓯ ꓢꓲ ꓗꓪ ꓟ ꓐꓰ ꓟꓲ ꓠꓯ ꓕꓯ ꓢꓲ ꓗꓪ ꓟ ꓥ ꓕ ꓑꓳ꓾ ꓙꓲ-ꓢꓴ ꓙꓵꓽˍ ꓟ ꓠꓯꓸ ꓘꓪˍ ꓡꓰꓽ ꓗꓷ ꓡꓰ ꓝꓲ ꓠꓹ ꓟ ꓥ ꓡꓳ꓿ 11 ꓝꓮꓲ ꓠꓬ ꓬꓲ ꓚꓲ ꓛꓬ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓙꓳˍ ꓟ ꓥ ꓕ ꓑꓳ ꓔꓯ ꓬꓰ ꓒꓬꓱꓼ ꓡ ꓢꓴ ꓠꓬ꓾ ꓬꓲ ꓚꓴꓽ ꓬꓲꓹ ꓗꓪ ꓐꓰ ꓙꓲ-ꓢꓴ ꓠꓯꓸꓼ ꓗꓪ ꓣꓳꓽ ꓔꓯ ꓢꓲ ꓚꓰꓸ ꓔ ꓢꓲ꓾ ꓬꓲ ꓠꓯꓸꓼ ꓗꓪ ꓣꓳꓽ ꓔꓯ ꓡꓯꓼ ꓪ ꓟꓶ ꓡꓰ ꓝꓲꓳ꓿ 12 ꓕꓱ ꓟ ꓠꓬ ꓙꓲ-ꓢꓴ ꓔꓯ ꓬꓲ ꓪꓴꓸ ꓥꓳ ꓡꓳꓸ ꓗꓷ ꓢꓴ ꓣꓳꓽ ꓠꓬ ꓪꓴ-ꓢ ꓬꓲ ꓟꓬꓱ ꓓꓳꓽ ꓔꓯ ꓓꓳꓹ ꓟꓴ ꓠꓹ ꓟ ꓥ ꓡꓳ꓿ 13 ꓠꓴ ꓪꓽˍ ꓟꓲ ꓔꓱꓹ ꓚꓵˍ ꓟ ꓐꓯ ꓘꓶꓽ ꓢꓯꓼ ꓟꓬ ꓝꓸ ꓓꓴ ꓶꓼ ꓓꓳ ꓫꓱꓹ ꓓꓳ ꓕꓱ ꓟ ꓔꓯ ꓑ ꓙꓽ ꓢꓲ ꓙꓲ-ꓢꓴ ꓔꓯ ꓙꓵꓻ ꓗꓷ ꓠꓬꓲ꓾ ꓖꓶꓽ ꓙ ꓟꓳˍ ꓟ ꓢꓲ-ꓫꓬ-ꓟ-ꓦ ꓟꓶ ꓡꓰ ꓟ ꓗꓪ ꓐꓰ ꓙꓲ-ꓢꓴ ꓠꓯꓸꓼ ꓗꓪ ꓠꓴ ꓪꓽ ꓔꓯ ꓔꓳꓹ ꓠꓷꓼ ꓗꓷꓳ꓿ 14 ꓪꓴ-ꓢ ꓬꓲ ꓚꓲ ꓛꓬ ꓑ ꓫꓬꓼ ꓔꓯ ꓫꓴꓹ ꓣꓴˍ ꓗꓪ ꓛꓲ꓾ ꓣꓳꓽ ꓡꓯꓼ ꓪ ꓟꓶˍ ꓟ ꓢꓷꓸ ꓡꓰ ꓓꓴ ꓠꓬ ꓢꓲ-ꓫꓬ-ꓟ-ꓦ ꓥ ꓡꓳ꓿ ꓕꓱ ꓟ ꓮꓽ ꓙꓵ ꓠꓬ ꓪꓴ-ꓢ ꓟꓬꓱ ꓓꓳꓽ ꓔꓯ ꓓꓳꓹ ꓟꓴ ꓠꓹ ꓟ ꓥ ꓡꓳ꓿ 15 ꓕꓱ ꓟ ꓑꓶꓸ ꓓꓴˍ ꓐꓰ꓾ ꓝꓮꓲ ꓠꓴ ꓪꓽ ꓠꓬ ꓢꓲ ꓒꓽ ꓬꓰ-ꓢꓴ ꓔꓯ ꓙꓵꓻˍ ꓟ ꓐꓰ꓾ ꓬꓲ ꓔꓯ ꓦ ꓡꓱ ꓢꓴ ꓐꓴ ꓮꓽ ꓙꓵ ꓔꓯ ꓠꓲꓹ ꓠꓵˍ ꓟ ꓓꓳꓽ ꓥꓪ ꓑ ꓙꓽ ꓟꓶ ꓡꓰ ꓠꓬꓲ꓾ 16 ꓥꓪˍ ꓟꓲ ꓠꓴ ꓪꓽ ꓐꓱ ꓶ ꓟꓽ ꓠꓽ ꓠ ꓫꓸ ꓟꓳ ꓢꓲ꓾ ꓥꓪ ꓪꓽ ꓘꓴˍ ꓟ ꓗꓪ ꓠꓴ ꓪꓽ ꓟꓬꓱ ꓞꓶꓻ ꓢꓲ ꓠꓬꓲ꓾ 17 ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓪꓴ-ꓢ꓾ ꓐꓬꓱꓼ ꓡꓱ ꓡꓱꓼ ꓟ ꓐꓹ ꓐ ꓡꓰ ꓠꓴ ꓪꓽ ꓔꓯ ꓬꓲ ꓦ ꓖꓶ ꓩꓴ ꓡ ꓢꓲ꓾ ꓪꓴ-ꓢ ꓬꓲ ꓚꓲ ꓛꓬˍ ꓐꓰ ꓬꓲ ꓡꓰ ꓟꓳꓸ ꓖꓶ ꓡ ꓟ ꓔꓯ ꓟꓬꓽ ꓠꓬꓲ ꓢꓷꓸ ꓡꓰ ꓠꓹ ꓟ꓾ ꓠꓴ ꓪꓽ ꓔꓯ ꓦꓻ ꓗꓪ ꓟ ꓙꓽ ꓗꓴꓸ ꓠꓲꓹ ꓖꓶꓽ ꓡ ꓠꓹ ꓟ ꓐꓰ꓾ 18 ꓠꓴ ꓪꓽ ꓠꓲꓹ ꓟ ꓟꓬ ꓢꓶꓽ ꓠꓬꓲ ꓟꓳꓻ ꓡ ꓝꓲ ꓠꓹ ꓟˍ ꓟꓲ ꓓꓰꓽˍ ꓡꓳ꓿ ꓕꓱ ꓟ ꓠꓬ ꓣꓳꓽ ꓔꓯ ꓬꓲ ꓡꓰ ꓘꓴˍ ꓟ ꓣꓱꓽ ꓛꓰ ꓗꓪ ꓥꓳ ꓡꓳꓸ ꓓꓴ ꓮꓸ ꓫꓵ ꓥ ꓟ ꓐꓰ꓾ ꓣꓳꓽ ꓪꓴ-ꓢ ꓔꓯ ꓦ ꓡꓱ ꓢꓴ ꓐꓴ ꓗꓳ ꓡꓳ ꓗꓪ ꓬꓲ ꓡꓯꓼ ꓪ ꓟꓬꓱ ꓓꓳꓽ ꓮ ꓘꓶꓻ ꓛꓲ ꓐꓳ ꓞꓹ ꓟ ꓔꓯ ꓠꓴ ꓪꓽ ꓢꓷꓸ ꓡꓰ ꓠꓹ ꓟ ꓥ ꓡꓳ꓿ 19 ꓝꓮꓲ ꓠꓬ ꓣꓳꓽ ꓙꓵꓻ ꓢꓴ ꓐꓴ ꓔꓯ ꓟꓳꓸ ꓬꓲ ꓪꓽ ꓠꓬꓲˍ ꓟ ꓠꓬ꓾ ꓮꓸ ꓓꓲꓽ ꓪꓴꓽˍ ꓟ ꓥ ꓟ ꓠꓴ ꓪꓽ ꓢꓷꓸ ꓡꓰ ꓠꓹ ꓟˍ ꓟꓲ ꓥ ꓡꓳ꓿ 20 ꓪꓽ ꓠꓬꓲˍ ꓟ ꓕꓱ ꓟ ꓠꓬ꓾ ꓪꓴ-ꓢ ꓡꓰ ꓙꓲ-ꓢꓴ ꓔꓯ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓢꓲ꓾ ꓟꓴꓽ ꓗꓪ ꓕꓯ ꓢꓲ ꓬꓲ ꓡꓯꓼ ꓙ ꓕꓲꓽ ꓛꓱ ꓗꓪ ꓠꓬꓲꓸ ꓠꓸ ꓝꓲ ꓢꓲ꓾ 21 ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ꓾ ꓙꓵꓽ ꓪ ꓙꓳ ꓢꓴ ꓐꓴˍ ꓐꓰ꓾ ꓪꓽ ꓠꓬꓲ ꓢꓴ ꓐꓴˍ ꓐꓰ꓾ ꓢꓲꓽ ꓒ ꓣꓱꓽ ꓢꓴ ꓮꓽ ꓙꓵ ꓟ ꓕꓯ ꓢꓲ ꓮꓽ ꓘꓶꓸ ꓟꓴˍ ꓟ ꓗꓪ꓾ ꓕꓱ ꓕꓲꓽ ꓤꓶꓻ ꓗꓪˍ ꓡꓰ ꓟꓽ ꓞꓲ꓾ ꓡ ꓠꓹ ꓟ ꓕꓲ ꓤꓶꓻ ꓗꓪˍ ꓟꓲ꓾ ꓟꓬꓱꓺ ꓔ ꓟ ꓟꓬꓱ ꓥ ꓕ ꓑꓳ ꓕꓯ ꓢꓲ ꓮꓽ ꓘꓶ ꓟꓴˍ ꓟ ꓗꓪ ꓠꓬꓲꓸ ꓠꓸ ꓝꓲˍ ꓟ꓾ ꓙꓲ-ꓢꓴ ꓠꓯꓸꓼ ꓗꓪ ꓣꓱꓽ ꓗꓷ ꓟ ꓪꓽ ꓠꓬꓲˍ ꓟ ꓢꓯꓼ ꓔꓯ ꓐꓯˍ ꓟ ꓥ ꓡꓳ꓿ 22 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓙꓳˍ ꓟ ꓥ ꓕ ꓑꓳ ꓔꓯ꓾ ꓙꓲ-ꓢꓴ ꓛꓲ ꓒꓯꓹ ꓠꓯꓸ ꓘꓪ ꓬꓲ ꓙꓵꓽˍ ꓟ ꓔꓯ ꓛꓳ ꓝꓲ ꓢꓲ꓾ ꓘꓴ ꓜꓲ ꓞꓳ ꓔꓯ ꓟꓳꓸ ꓮꓽ ꓙꓵ ꓟ ꓗꓪ꓾ ꓪꓴꓸ ꓓꓵ ꓣꓱꓽ ꓠꓹ ꓟ ꓙꓵꓽ ꓪꓽ ꓬꓲ ꓔꓯ ꓖꓶꓽ ꓗꓷꓳ꓿ 23 ꓘꓴ ꓜꓲ ꓞꓳ ꓠꓬ ꓬꓰ-ꓢꓴ ꓙꓲ-ꓢꓴ ꓬꓲ ꓖꓳ ꓓꓱ ꓥ ꓢꓲ꓾ ꓮ ꓡꓲ ꓗꓪˍ ꓟꓲ ꓙꓳˍ ꓟ ꓥ ꓕ ꓑꓳ ꓔꓯ ꓐꓲꓺ ꓡꓰ ꓝꓲ ꓢꓴ ꓬꓲꓸ ꓐꓲ ꓡ ꓓꓴ ꓥ ꓡꓳ꓿

ꓬꓲ-ꓩꓴ-ꓢꓳ 2

1 ꓠꓴ ꓪꓽ ꓠꓬ ꓛꓬꓻ ꓖꓴ ꓥꓳꓽ ꓖꓴˍ ꓐꓰ ꓝꓴꓲ ꓗꓪ ꓫꓵꓻ ꓞ ꓢꓴ ꓬꓰ ꓠꓬꓲꓳ꓿ 2 ꓖꓳ ꓕꓯ ꓠꓴ ꓪꓽ ꓠꓬ ꓟꓲ ꓠꓯ ꓕꓱ ꓟ ꓚꓱꓹˍ ꓐꓰ꓾ ꓟꓵꓽ ꓪꓴ ꓗꓪ ꓟ ꓙꓵꓽ ꓪ ꓪꓴꓸ ꓓꓵ ꓣꓱꓽ ꓢꓴ ꓬꓲ ꓚꓱꓹ ꓚ ꓢꓲ ꓞꓳ ꓙꓳ ꓗꓷꓳ꓿ ꓖꓳ ꓟ ꓠꓬ ꓟꓽ ꓠ ꓡꓳꓹ ꓟꓽ ꓒꓵꓽ ꓛꓳ ꓢꓴ ꓐꓴ ꓠꓯꓸꓼ ꓗꓪ ꓮ ꓟꓶˍ ꓟꓲ ꓢꓯꓼ ꓕꓵꓼ ꓔꓬ ꓟ ꓦ ꓥ ꓡꓳ꓿ 3 ꓧꓶꓸ ꓕꓯ ꓣꓳꓽˍ ꓟꓲ ꓬꓲ ꓪꓽˍ ꓡꓰ ꓐꓰ ꓧꓪꓽ ꓖꓳ ꓓꓱ ꓐꓰ ꓦꓯꓸ ꓠꓲꓹ ꓙꓵꓽˍ ꓟ ꓗꓪ ꓞꓳ ꓙꓳ ꓗꓷ ꓢꓲ꓾ ꓧꓪꓽ ꓗꓪ ꓐꓰ ꓓꓵꓽ ꓙˍ ꓟ ꓐꓰ꓾ ꓧꓪꓽ ꓠꓲꓹ ꓟ ꓡꓰ ꓠꓲꓹ ꓫꓵˍ ꓟ ꓬꓰ ꓢꓲ ꓠꓬꓲ꓾ ꓠꓱꓸ ꓐꓯꓼ ꓢꓴˍ ꓐꓰ ꓕꓲꓽ ꓡꓰꓹꓼ ꓚꓰꓺ ꓠꓲꓹ ꓗꓪ ꓐꓰ ꓦꓶꓻ ꓠꓲꓹ ꓬꓲ ꓤꓽ ꓠꓱ ꓐꓴ ꓬꓰ ꓠꓬꓲꓳ꓿ 4 ꓖꓳ ꓡꓱ ꓥ ꓟꓲ ꓫꓱꓸ ꓤ ꓠꓲꓹ ꓐꓳ ꓞꓹ ꓢꓴ ꓪꓴ-ꓢ ꓠꓬ꓾ ꓬꓲ ꓠꓵ ꓠꓲꓹ ꓓꓽ ꓟ ꓡꓰ ꓣꓳꓽ ꓔꓯ ꓠꓲꓹ ꓠꓵˍ ꓠꓬꓲ꓾ 5 ꓣꓳꓽ ꓠꓬ ꓣꓳꓽ ꓛꓬꓻ ꓖꓴ ꓗꓪ ꓫꓵꓻ ꓞꓹ ꓕꓯ꓾ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓣꓳꓽ ꓔꓯ ꓢꓯꓸ ꓡ ꓝꓲꓳ꓿ (ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠ ꓣꓱꓽ ꓛꓰ ꓗꓪ ꓐꓰ ꓢꓯꓼ ꓟꓬ ꓟꓶ ꓗꓷ ꓢꓴ ꓥ ꓡꓳ꓿) 6 ꓪꓴ-ꓢ ꓡꓰ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓣꓳꓽ ꓔꓯ ꓢꓯꓸ ꓡ ꓝꓲ ꓢꓲ꓾ ꓬꓲˍ ꓐꓰ ꓕꓲ ꓪꓺꓼ ꓟꓴꓽ ꓗꓪ ꓕꓯ ꓢꓲ ꓗꓪ ꓣꓳꓽ ꓔꓯ ꓠꓬꓲꓸ ꓠꓸ ꓝꓲˍ ꓡꓳ꓿ 7 ꓕꓱ ꓟ ꓠꓬ ꓬꓲ ꓡꓰ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓣꓳꓽ ꓔꓯ ꓙꓽ ꓗꓳˍ ꓟ ꓐꓰ꓾ ꓣꓳꓽ ꓐꓱ ꓶ ꓬꓲ ꓣꓱꓽ ꓛꓰ ꓮ ꓓꓲꓽ ꓐꓳ ꓞꓹ ꓟ꓾ ꓡ ꓠꓹ ꓟ ꓤꓶꓻ ꓗꓪ ꓟꓳꓸ ꓖꓶ ꓓꓳ ꓡ ꓠꓹ ꓟ ꓥ ꓡꓳ꓿ 8 ꓮ ꓡꓲꓳ ꓐꓯ ꓠꓬ ꓣꓱꓽ ꓛꓰ ꓗꓪ ꓐꓰ꓾ ꓙꓵꓻ ꓠꓲꓹ ꓑꓶ ꓓꓴ ꓠꓴ ꓪꓽ ꓢꓯꓼ ꓟꓬ ꓝ ꓟꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓽ ꓚꓲ ꓛꓬ ꓗꓪ ꓐꓰ ꓟꓽ ꓥ꓾ ꓪꓴ-ꓢ ꓡꓯꓼ ꓫꓴ ꓥ ꓡꓳ꓿ 9 ꓢꓯꓼ ꓟꓬ ꓟꓶˍ ꓟ ꓠꓬ ꓚꓲ ꓛꓬ ꓟꓬꓱꓽ ꓬꓰ ꓢꓯꓼ ꓕꓵˍ ꓟ ꓗꓪ ꓐꓰ ꓟꓽ ꓥ ꓠꓬꓲ꓾ ꓮꓽ ꓟˍ ꓟꓲ ꓘꓶꓽ ꓘꓹ ꓓꓴ ꓟꓽ ꓙꓳ꓿ 10 ꓮ ꓡꓲꓳ ꓐꓯ ꓠꓬ ꓣꓳꓽ ꓠꓽ ꓬꓲ ꓡꓯꓼ ꓟꓬꓱꓽ ꓥ ꓢꓲ꓾ ꓙꓲˍ ꓟ ꓟꓬꓱꓽ ꓬꓰ ꓠꓹ ꓟ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓚꓰꓼ ꓔ ꓟ ꓥ ꓡꓳ꓿ ꓙꓲˍ ꓟ ꓟꓬꓱꓽ ꓬꓰ ꓠꓹ ꓟ꓾ ꓪꓴ-ꓢ ꓠꓬ ꓧꓶꓸ ꓕꓯˍ ꓡꓰ ꓣꓳꓽ ꓐꓱ ꓶ ꓙꓽ ꓖꓶ ꓔ ꓟ ꓥ ꓡꓳ꓿ 11 ꓖꓳ ꓡꓱ ꓠꓬꓲ ꓧꓶꓸ ꓕꓯ ꓠꓴ ꓪꓽ ꓠꓬ ꓧꓪꓽ ꓖꓳ ꓓꓱ ꓗꓪ ꓐꓶꓽ ꓞꓳ ꓥ ꓟ ꓔꓯ ꓓꓵꓽ ꓙꓽ ꓠꓬꓲ꓿ ꓶꓺ ꓔ ꓟ ꓬꓴ-ꓔ ꓡꓽ ꓞꓳ ꓐꓴ ꓡꓰ ꓠꓴ ꓪꓽ ꓔꓯ ꓟꓽ ꓶꓺ ꓔ ꓢꓴ꓾ ꓐꓰ ꓘꓴˍ ꓡꓳ꓿ ꓕꓱ ꓟ ꓠꓬ ꓧꓪꓽ ꓖꓳ ꓓꓱ ꓗꓪ ꓡꓯꓼ ꓒꓯꓹ ꓡꓰ ꓶꓺˍ ꓟ ꓗ ꓫꓵ ꓬꓰˍ ꓟ ꓔꓯ ꓐꓯˍ ꓟ ꓥ ꓡꓳ꓿ 12 ꓖꓳ ꓕꓯ ꓠꓴ ꓪꓽ ꓠꓬ ꓙꓲ-ꓢꓴˍ ꓐꓰ ꓗꓳꓹ ꓞ ꓢꓲ꓾ ꓬꓲ-ꓢꓷ-ꓡꓰ ꓑ ꓫꓬꓼ ꓗꓪˍ ꓟꓲ ꓟꓽ ꓚꓬꓹ ꓔ꓿ ꓠꓴ ꓪꓽ ꓠꓬ ꓙ ꓟꓳ ꓘꓶꓽ ꓬꓲ ꓘꓶꓽ ꓫꓵꓽ ꓔꓯ ꓟꓳꓸ ꓐꓶꓽ ꓒ ꓥ ꓢꓲ꓾ ꓟꓲ ꓠꓯ ꓗꓪ ꓥꓳ ꓡꓳꓸ ꓓꓴ ꓟꓽ ꓙꓳ ꓢꓴˍ ꓐꓰ꓾ ꓪꓴ-ꓢ ꓟꓽ ꓙꓳ ꓢꓴ ꓥ ꓟ ꓔꓯ ꓓꓵꓽ ꓙꓽ ꓠꓬꓲ꓿ 13 ꓖꓳ ꓡꓱ ꓥ ꓟꓲ ꓧꓶꓸ ꓕꓯ ꓶꓽ ꓤ ꓗꓳꓹ ꓞ ꓢꓴ ꓠꓴ ꓪꓽ ꓔꓯ ꓠꓬ꓾ ꓮ ꓟꓶ ꓠꓽ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓬꓲ ꓫꓵꓽ ꓗꓪ ꓐꓰ ꓕꓲꓺ ꓡꓯꓽ ꓘꓳ ꓡꓰ ꓝꓲꓳ꓿ 14 ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓣꓳꓽ ꓧꓳꓹ ꓡꓯꓽ ꓘꓳ ꓓꓴ ꓢꓲ ꓡꓲ ꓟ ꓥ ꓠꓬꓲ꓾ ꓣꓳꓽ ꓠꓬꓲꓽ ꓫꓵꓽ ꓟ ꓔꓯ ꓕꓲ ꓫꓵꓽˍ ꓡꓰ ꓒꓬꓱꓼ ꓡ ꓝꓲ ꓢꓲ ꓠꓬꓲ꓾ ꓣꓳꓽ ꓠꓬꓲꓽ ꓗꓴꓸ ꓚꓸꓼ ꓗꓪ ꓕꓴꓽ ꓔ ꓟ ꓚꓬꓹ ꓔꓯ ꓒꓬꓹ ꓩꓴ ꓗꓷꓳ꓿ 15 ꓝꓮꓲ ꓣꓳꓽ ꓛꓴꓽ ꓙꓳ ꓡꓯꓽ ꓘꓳˍ ꓟ ꓔꓯ ꓠꓬ ꓬꓲ ꓖꓳ ꓓꓱꓽ ꓗꓪ ꓐꓰ ꓟꓽ ꓙꓳ ꓗꓷ ꓡꓰ ꓝꓲ ꓢꓲ꓾ ꓕꓵꓼ ꓪꓽˍ ꓐꓰ ꓙꓵꓽ ꓚꓱꓹ ꓙꓳˍ ꓟ ꓙꓵꓽ ꓗ ꓔꓯˍ ꓟꓲ ꓒꓬꓹ ꓩꓴ ꓗꓷꓳ꓿ ꓕꓱ ꓟ ꓠꓬ ꓙꓲ-ꓢꓴ ꓡꓰ ꓞꓳ ꓫꓵꓽ ꓕꓱ ꓠꓬꓲꓽ ꓫꓵꓽ ꓗꓪ ꓐꓰ ꓬꓲ ꓚꓲ ꓛꓬ ꓠꓯꓸꓼ ꓗꓪ ꓞꓳ ꓤ ꓬꓲ ꓫꓵꓼ ꓕꓲ ꓫꓵꓽ ꓚꓰꓼ ꓓꓳ ꓡ ꓢꓲ ꓧꓳꓹ ꓡꓯꓽ ꓘꓳ ꓡꓰ ꓝꓲ ꓠꓹ ꓟ ꓥ ꓡꓳ꓿ 16 ꓝꓮꓲ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓡꓰ ꓛꓴꓽ ꓙꓳ ꓡꓯꓽ ꓘꓳˍ ꓟ ꓔꓯ ꓟꓶꓽ ꓬꓰ ꓝꓲ ꓢꓲ꓾ ꓠꓬꓲꓽ ꓫꓵ ꓡꓱꓸꓼ ꓔꓯ ꓕꓲ ꓖꓳ ꓓꓱˍ ꓗꓪ꓾ ꓪꓴ-ꓢˍ ꓐꓰ ꓧꓳꓹ ꓡꓰ ꓝꓲ ꓠꓹ ꓟˍ ꓟꓲ ꓥ ꓡꓳ꓿ 17 ꓖꓳ ꓡꓱ ꓠꓬꓲ ꓙꓲ-ꓢꓴ ꓡ ꓢꓲ꓾ ꓶꓽ ꓤ ꓗꓪ ꓔꓬ ꓟ ꓐꓶꓽ ꓞꓳ ꓐꓴ ꓠꓴ ꓪꓽ ꓔꓯˍ ꓟꓲ꓾ ꓒ ꓕꓲꓺꓼ ꓗꓪ ꓔꓬ ꓟ ꓬꓴ-ꓔ ꓡꓽ ꓞꓳ ꓐꓴ ꓔꓯˍ ꓟꓲ꓾ ꓧꓳꓹ ꓡꓰ ꓓꓴ ꓢꓲ ꓡꓲ ꓟ ꓓꓳꓽ ꓚ ꓟꓸ ꓖꓶ ꓡꓺꓳ꓿ 18 ꓮ ꓡꓲꓳ ꓐꓯ ꓠꓬ ꓣꓳꓽ ꓠꓬꓲ ꓫꓵꓽ ꓡꓱꓸꓼ ꓠꓬ ꓬꓲ ꓠꓯꓸꓼ ꓗꓪ ꓢꓲ-ꓫꓬ-ꓟ-ꓦ ꓬꓲ ꓕꓲ ꓣꓳˍ ꓗꓪ ꓐꓰ ꓐꓹ ꓐ ꓟꓲꓽ ꓙꓬ ꓗꓪ ꓓꓵꓽ ꓡꓰ ꓓꓻˍ ꓟ ꓙꓵꓽ ꓪꓽ ꓙꓳ ꓡꓰꓳ꓿ 19 ꓖꓳ ꓡꓱ ꓠꓬꓲ ꓕꓱ ꓡꓱ ꓖꓳ ꓑꓳ ꓠꓴ ꓪꓽ ꓠꓬ ꓐꓶꓽ ꓒˍ ꓐꓰ ꓞꓳ ꓬꓯꓼ ꓟꓽ ꓥꓻꓳ꓿ ꓠꓴ ꓪꓽ ꓠꓽ ꓦ ꓡꓱ ꓢꓴ ꓐꓴˍ ꓐꓰ ꓕꓲꓽ ꓡꓰꓹꓼ ꓐꓰ ꓪꓴ-ꓢ ꓬꓲ ꓑ ꓫꓬꓼ ꓐꓴ ꓥ ꓢꓲ꓾ ꓪꓴ-ꓢ ꓬꓲ ꓕꓲꓽ ꓦꓲ ꓢꓴ ꓐꓴ ꓥ ꓡꓳ꓿ 20 ꓠꓴ ꓪꓽ ꓠꓬ ꓝꓲ ꓓꓴ ꓐꓴˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓰ ꓫꓬꓹ ꓔ ꓟ ꓦꓲ ꓚꓰ ꓕꓯ ꓢꓲ ꓗꓪ ꓜꓶꓻ ꓔ ꓟ ꓦꓲ ꓥ ꓡꓳ꓿ ꓙꓲ-ꓢꓴ ꓬꓰ-ꓢꓴ ꓠꓽ ꓦꓲ ꓚꓰ ꓖꓳ ꓟ ꓬꓲ ꓡꓳꓺ ꓓꓰ ꓓꓽ ꓟ ꓥꓳ꓿ 21 ꓕꓲ ꓦꓲ ꓡꓱꓸꓼ ꓠꓬ ꓬꓲ ꓠꓯꓸꓼ ꓗꓪ ꓜꓯꓻ ꓜꓳꓽ ꓡꓰ ꓟ ꓗꓪ ꓐꓰ꓾ ꓢꓲ ꓒꓽ ꓠꓯꓸꓼ ꓗꓪ ꓪꓴꓽ ꓡ ꓢꓲ ꓠꓬꓲ꓾ ꓢꓲꓽ ꓫꓬ ꓦꓲ ꓕꓲ ꓦꓲ ꓒꓬꓱꓼ ꓡ ꓢꓲ꓾ 22 ꓢꓲ-ꓫꓬ-ꓟ-ꓦ ꓗꓪ ꓐꓰ ꓪꓴ-ꓢ ꓬꓲ ꓔꓬ ꓖꓴ ꓒꓬꓱꓼ ꓡ ꓠꓹ ꓟ꓾ ꓠꓴ ꓪꓽ ꓔꓯ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓜꓶꓻ ꓔ ꓟ ꓥ ꓡꓳ꓿

ꓬꓲ-ꓩꓴ-ꓢꓳ 3

1 ꓖꓳ ꓡꓱ ꓠꓬꓲ ꓠꓴ ꓪꓽ ꓐꓶꓽ ꓞꓳ ꓑꓶꓸ ꓓꓴ ꓙꓲ-ꓢꓴ ꓬꓰ-ꓢꓴ ꓐꓱ ꓶ ꓐꓱ ꓔ ꓢꓴ ꓒꓳ-ꓡꓳ ꓥꓪ ꓔꓯ ꓠꓬ꓾ 2 ꓠꓴ ꓪꓽ ꓙꓲ ꓖꓴ ꓐꓱ ꓶ ꓪꓴ-ꓢ ꓣꓱꓽ ꓛꓰ ꓗꓪ ꓣꓱꓽ ꓙˍ ꓟ ꓟꓬꓱꓽ ꓡꓯꓼ ꓙꓱ ꓖꓶ ꓔ ꓟ ꓠꓴ ꓪꓽ ꓑ ꓙꓽ ꓗꓷ ꓐꓷˍ ꓥꓳ꓿ 3 ꓮ ꓡꓲꓳ ꓐꓯ ꓠꓬ ꓚꓵ ꓘꓶꓽ ꓕꓱ ꓟ ꓪꓴ-ꓢ ꓡꓰ ꓥꓪ ꓔꓯ ꓢꓷꓸ ꓡꓰ ꓝꓲˍ ꓟ꓾ ꓧꓶꓸ ꓕꓯ ꓥꓪ ꓡꓰ ꓠꓴ ꓪꓽ ꓔꓯ ꓓꓴꓸ ꓓꓴꓸ ꓤ ꓐꓳ ꓖꓶꓽ ꓗꓷꓳ꓿ 4 ꓕꓳ ꓶ ꓕꓱ ꓟ ꓠꓴ ꓪꓽ ꓵˍ ꓕꓯ꓾ ꓙꓲ-ꓢꓴ ꓬꓲ ꓚꓵ ꓘꓶꓽ ꓔꓯ ꓥꓪ ꓙꓽ ꓜꓲꓼˍ ꓟ ꓠꓴ ꓪꓽ ꓢꓷꓸ ꓡꓰ ꓓꓻˍ ꓡꓳ꓿ 5 ꓚꓵ ꓘꓶꓽ ꓕꓱ ꓟ ꓠꓬ ꓗꓳꓸ ꓗꓷ ꓟ ꓤꓶꓻ ꓐꓴ ꓔꓯ ꓟꓽ ꓢꓷꓸ ꓡꓰ ꓝꓲ ꓠꓬꓲ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓠꓬ ꓪꓴ-ꓢ ꓡꓰ ꓬꓲ ꓢꓲ-ꓫꓬ-ꓟ-ꓦ ꓗꓪ ꓐꓰ꓾ ꓬꓲ ꓡꓰ ꓢꓲ ꓚꓰꓸ ꓔ ꓟ ꓝꓲ ꓓꓴ ꓐꓴˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓔꓯ ꓟꓳꓸ ꓖꓶ ꓡꓺꓳ꓿ 6 ꓚꓵ ꓘꓶꓽ ꓕꓱ ꓟ ꓠꓬ ꓕꓱ ꓡꓱ ꓥꓳ꓿ ꓐꓶꓽ ꓞꓳ ꓐꓴˍ ꓟꓲ ꓬꓴ-ꓔ ꓡꓽ ꓞꓳ ꓐꓴˍ ꓐꓰ ꓕꓲꓽ ꓡꓰꓹꓼ ꓐꓰ ꓡꓯꓼ ꓪ ꓟꓶ ꓢꓴ ꓥ ꓢꓲ꓾ ꓬꓰ-ꓢꓴ ꓙꓲ-ꓢꓴ ꓬꓲ ꓖꓳ ꓓꓱꓽ ꓗꓪ ꓟ ꓡꓯꓼ ꓗ ꓥ ꓢꓲ ꓠꓬꓲ꓾ ꓬꓲ ꓠꓯꓸꓼ ꓗꓪ ꓶꓼ ꓓꓳ ꓫꓱꓹ ꓓꓳ ꓗꓪ ꓐꓰ ꓙ ꓟꓳ ꓘꓶꓽ ꓕꓲꓽ ꓡꓰꓹꓼ ꓟꓶ ꓢꓴ ꓥ ꓡꓳ꓿ 7 ꓪꓴ-ꓢ ꓠꓬ ꓬꓲ ꓪꓽ ꓠꓬꓲˍ ꓟ ꓔꓯ ꓛꓳ ꓢꓲ꓾ ꓥꓪ ꓔꓯ ꓬꓲ ꓣꓱꓽ ꓛꓰ ꓡꓯꓼ ꓫꓴ ꓖꓶ ꓡ ꓢꓲ ꓠꓬꓲ꓾ ꓶꓼ ꓓꓳ ꓫꓱꓹ ꓓꓳ ꓕꓱ ꓟ ꓗꓪ ꓣꓱꓽ ꓙ ꓢꓴ ꓬꓰ ꓝꓲˍ ꓡꓳ꓿ 8 ꓥꓪ ꓠꓬ ꓪꓴ-ꓢ ꓦ ꓡꓱ ꓢꓴ ꓐꓴ ꓮꓽ ꓙꓵ ꓟ ꓠꓯꓸ ꓘꓪ ꓮꓸ ꓓꓲꓽ ꓣꓳ ꓓꓰˍ ꓟ ꓕꓲ ꓣꓳ ꓥ ꓟꓲ꓾ ꓪꓴ-ꓢ ꓡꓰ ꓬꓲ ꓣꓱꓽ ꓛꓰ ꓕꓱ ꓟ ꓥꓪ ꓔꓯ ꓖꓶ ꓡ ꓢꓲ꓾ ꓟꓰꓹ ꓖꓴ ꓟꓽ ꓓ ꓡꓳ ꓫꓵꓽ ꓙꓲ-ꓢꓴ ꓬꓲ ꓐꓳ ꓞꓹ ꓟ ꓕꓱ ꓟ ꓐꓶꓽ ꓞꓳ ꓔꓯ ꓚ ꓟꓸ ꓖꓶ ꓠꓹ ꓟ ꓟꓬꓱꓽ ꓖꓶ ꓡꓺꓳ꓿ 9 ꓝꓮꓲ ꓠꓬ ꓙꓳˍ ꓟ ꓥ ꓕ ꓑꓳ ꓔꓯ ꓚꓰꓼ ꓢꓴ ꓪꓴ-ꓢ ꓠꓯꓸꓼ ꓗꓪ꓾ ꓮꓽ ꓟꓬꓹ ꓤꓶꓻ ꓕꓯˍ ꓡꓰ ꓚꓵ ꓔ ꓟ ꓚꓵ ꓘꓶꓽ ꓗꓪ ꓣꓱꓽ ꓙˍ ꓟ ꓟꓬꓱꓽ ꓮꓸ ꓫꓵ ꓥ ꓟ ꓞꓳ ꓤ ꓥ ꓕ ꓑꓳꓸ ꓔꓯ ꓟꓳꓻ ꓝꓲ ꓠꓹ ꓟ ꓣꓱꓽ ꓛꓰ ꓕꓱ ꓟˍ ꓟꓲ ꓥꓪ ꓔꓯ ꓖꓶ ꓡꓺꓳ꓿ 10 ꓕꓱ ꓟ ꓠꓬ ꓪꓴ-ꓢ ꓙ ꓗꓴꓸ ꓠꓲꓹ ꓮ ꓟꓬꓹ ꓒꓳꓹ ꓙꓳˍ ꓟ꓾ ꓮ ꓟꓶ ꓘꓴ ꓜꓲ ꓞꓳ ꓗꓪ ꓐꓰ ꓟꓵꓽ ꓪꓴꓽ ꓗꓪ ꓟ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ꓾ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓢꓷꓸ ꓡꓰ ꓝꓲ ꓠꓹ ꓟ ꓥ ꓢꓲ꓾ 11 ꓣꓳꓽ ꓢꓲ ꓒꓽ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓣꓳꓽ ꓔꓯ ꓟꓳꓸ ꓖꓶ ꓡ ꓟ ꓪꓴ-ꓢ ꓬꓲ ꓕꓲ ꓞꓲꓼ ꓕꓲ ꓑ ꓟ ꓚꓴꓽ ꓬꓲꓹ ꓥ ꓡꓳ꓿ 12 ꓣꓳꓽ ꓠꓬ ꓙꓲ-ꓢꓴ ꓔꓯ ꓙꓵꓻˍ ꓟ ꓗꓪ ꓐꓰ꓾ ꓬꓲ ꓠꓯꓸꓼ ꓗꓪ ꓠꓲꓹ ꓪꓴꓽ ꓓꓴ ꓙꓳ ꓢꓲ꓾ ꓦ ꓡꓱ ꓐꓳ ꓐꓳˍ ꓡꓰ ꓬꓲ ꓗꓪ ꓐꓰ ꓪꓴ-ꓢ ꓟꓲꓽ ꓙꓬ ꓗꓪ ꓓꓵ ꓡꓰ ꓓꓻˍ ꓟ ꓙꓵꓽ ꓪ ꓙꓳˍ ꓡꓳ꓿ 13 ꓖꓳ ꓡꓱ ꓠꓬꓲ ꓠꓴ ꓪꓽ ꓐꓱ ꓶ ꓥꓪ ꓫꓸ ꓙꓵꓻˍ ꓟ ꓑꓶꓸ ꓓꓴ ꓠꓴ ꓪꓽ ꓠꓲꓹ ꓟ ꓟꓽ ꓙꓬ ꓡꓰ ꓠꓹ ꓟ ꓠꓴ ꓪꓽ ꓔꓯ ꓥꓪ ꓓꓰꓽˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓫꓸ ꓙꓵꓻˍ ꓟ ꓕꓱ ꓟ ꓠꓬ ꓠꓴ ꓪꓽ ꓟꓬꓱ ꓓꓳꓽ ꓥ ꓡꓳ꓿ 14 - 15 ꓕꓱ ꓟ ꓑꓶ ꓓꓴ ꓥꓪ ꓠꓬ ꓟꓴꓽ ꓗꓪˍ ꓐꓰ ꓟꓲ ꓠꓯ ꓕꓯ ꓢꓲ ꓗꓪ ꓟ ꓞꓳ ꓪꓳꓼ ꓥ ꓕ ꓑꓳ ꓔꓯ ꓟꓬꓱꓺ ꓟꓬꓱ ꓖꓶ ꓢꓴ ꓐꓹ ꓐ ꓟꓲꓽ ꓙꓬ ꓗꓪ ꓛꓲ ꓝꓲꓸ ꓖꓶ ꓢꓲ ꓕꓱ ꓡꓱ ꓶꓼ ꓓꓰˍ ꓡꓳ꓿ 16 ꓐꓹ ꓐ ꓡꓰ ꓬꓲ ꓐꓳ ꓞꓹ ꓟ ꓟꓬꓱ ꓓꓳꓽ ꓮ ꓡꓲ ꓙꓳˍ ꓠꓬ꓾ ꓬꓲ ꓦ ꓗꓪ ꓐꓰ ꓠꓴ ꓪꓽ ꓠꓲꓹ ꓟ ꓠꓯꓸꓼ ꓗꓪ ꓪꓽ ꓠꓬꓲˍ ꓟ ꓢꓯꓼ ꓖꓳ ꓡꓱ ꓖꓶ ꓡ ꓠꓹ ꓟ꓾ 17 ꓠꓴ ꓪꓽ ꓙꓵꓻ ꓠꓲꓹ ꓑꓶ ꓓꓴ ꓙꓲ-ꓢꓴ ꓠꓬ ꓠꓴ ꓪꓽ ꓠꓲꓹ ꓟ ꓠꓯꓸꓼ ꓗꓪ ꓔꓬ ꓡ ꓟ ꓗꓪ ꓐꓰ꓾ ꓠꓴ ꓪꓽ ꓠꓬ ꓠꓵꓻ ꓠꓲꓹ ꓗꓪ ꓬꓲ ꓚꓰ ꓜꓳꓺ ꓕꓶꓻ ꓡꓰ ꓢꓲ꓾ 18 ꓙꓲ-ꓢꓴ ꓠꓵ ꓠꓲꓹ ꓮ ꓦꓲꓺ ꓛꓲ꓾ ꓮꓸ ꓫꓵꓺ ꓛꓲ꓾ ꓮ ꓟꓴ ꓛꓲ꓾ ꓮ ꓠꓯꓸ ꓛꓲ ꓙꓳˍ ꓟ꓾ ꓠꓴ ꓪꓽ ꓠꓬ ꓪꓴ-ꓢ ꓔꓯ ꓦ ꓡꓱ ꓢꓴ ꓐꓴ ꓮꓽ ꓙꓵꓽˍ ꓐꓰ ꓕꓲꓽ ꓡꓰꓹꓼ꓾ ꓙꓽ ꓜꓲꓼˍ ꓟ ꓢꓯꓼ ꓙꓳ ꓡ ꓠꓹ ꓟ ꓐꓰ꓾ 19 ꓙꓽ ꓜꓲꓼˍ ꓟ ꓥ ꓕ ꓑꓳ ꓕꓯ ꓢꓲ ꓘꓳꓻ ꓙꓰ ꓟ ꓙꓲ-ꓢꓴ ꓠꓵ ꓠꓲꓹ ꓔꓯ ꓠꓴ ꓪꓽ ꓢꓷꓸ ꓡꓰ ꓢꓲ꓾ ꓪꓴ-ꓢ ꓐꓲꓺ ꓞꓹ ꓟ ꓮꓽ ꓙꓵ ꓠꓴ ꓪꓽ ꓔꓯ ꓐꓲ ꓡꓰ ꓝꓲ ꓠꓹ ꓟ ꓓꓰꓽˍ ꓡꓳ꓿ 20 ꓮ ꓟꓶ ꓣꓳꓽ ꓠꓯꓸꓼ ꓗꓪ ꓢꓯꓼ ꓕꓵꓼ ꓔꓬ ꓟ ꓪꓽ ꓠꓬꓲˍ ꓟ ꓔꓯ ꓛꓳ ꓢꓲ꓾ ꓣꓳꓽ ꓓꓰꓽˍ ꓟ ꓐꓰ ꓓꓵꓽ ꓙꓽˍ ꓟ ꓮꓽ ꓙꓵ ꓟ ꓕꓯꓽ ꓢꓲ ꓘꓳꓻ ꓙꓰˍ ꓗꓪ ꓛꓲ꓾ ꓐꓯ ꓖꓴ ꓟꓽ ꓓ ꓓ ꓬꓰ ꓐ ꓡ ꓢꓴ ꓔꓯ꓾ 21 ꓘꓴ ꓜꓲ ꓞꓳˍ ꓐꓰ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓕꓲꓽ ꓤꓶꓻ ꓡꓰ ꓕꓲ ꓤꓶꓻ꓾ ꓕꓲ ꓞꓲꓼ ꓕꓲ ꓑ ꓟꓬꓱ ꓓꓳꓽ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓬꓲ-ꓩꓴ-ꓢꓳ 4

1 ꓖꓳ ꓡꓱ ꓠꓬꓲ ꓢꓲꓺ ꓒ ꓐꓱ ꓶ ꓐꓱ ꓞꓹ ꓢꓴ ꓥꓪ ꓡꓰ ꓠꓴ ꓪꓽ ꓔꓯ ꓘꓶꓸ ꓖꓶˍ ꓠꓬꓲ꓾ ꓠꓴ ꓪꓽ ꓔꓯ ꓘꓴꓻ ꓔ ꓟ ꓗꓪ ꓘꓴ ꓒꓵꓽ ꓒꓵˍ ꓡꓰꓽ ꓞꓳ ꓙꓳ꓿ 2 ꓮꓸ ꓫꓵꓽ ꓗꓪˍ ꓟꓲ ꓙꓻ ꓣꓳꓽˍ ꓟ ꓐꓰ ꓠꓴꓽ ꓠꓲꓹˍ ꓐꓰ ꓠꓲꓹ ꓟ ꓫꓵˍ ꓟ ꓣꓱꓽ ꓢꓲ꓾ ꓠꓵꓻ ꓠꓲꓹ ꓡꓰ ꓕꓲ ꓣꓳ ꓛꓳꓽ ꓕꓲ ꓣꓳ ꓜꓲꓽ ꓡꓯꓽ ꓘꓳ꓿ 3 ꓧꓳꓹ ꓡꓯꓽ ꓘꓳˍ ꓟ ꓠꓲꓹ ꓟ ꓡꓰ ꓞꓳꓹ ꓞ ꓢꓲ꓾ ꓢꓲ-ꓫꓬ-ꓟ-ꓦ ꓡꓰ ꓖꓶ ꓡ ꓟ ꓕꓲ ꓠꓲꓹ ꓕꓲ ꓪꓽ ꓬꓰˍ ꓟ ꓠꓲꓹ ꓟ ꓟꓽ ꓒꓲꓼ ꓬꓰ ꓠꓹ ꓟ ꓢꓯꓼ ꓕꓵꓼ꓿ 4 ꓠꓴ ꓪꓽ ꓔꓯ ꓘꓴꓻˍ ꓟ ꓠꓬ꓾ ꓥꓳ ꓡꓳꓸ ꓓꓴ ꓕꓲ ꓟꓻꓼ ꓗꓪ ꓘꓴ ꓔ ꓟ ꓡꓰ ꓐꓰ꓾ ꓖꓳ ꓓꓱꓽˍ ꓟꓲ ꓕꓲ ꓟˍ ꓥꓳ꓿ ꓢꓲ-ꓫꓬ-ꓟ-ꓦˍ ꓟꓲ ꓕꓲ ꓣꓳˍ ꓥꓳ꓿ 5 ꓢꓲ ꓒꓽˍ ꓟꓲ ꓕꓲ ꓣꓳˍ ꓥꓳ꓿ ꓙꓵꓻ ꓠꓲꓹˍ ꓟꓲ ꓕꓲ ꓟˍ ꓥꓳ꓿ ꓖꓳ ꓓꓱ ꓔꓲꓹ ꓟˍ ꓟꓲ ꓕꓲ ꓟˍ ꓥꓳ꓿ 6 ꓮꓽ ꓙꓵ ꓟ ꓕꓯꓽ ꓢꓲ ꓗꓪ꓾ ꓮꓽ ꓙꓵ ꓟ ꓗꓳ ꓡꓳ ꓗꓪ꓾ ꓮꓽ ꓙꓵ ꓟ ꓠꓯꓸꓼ ꓗꓪ ꓔꓬ ꓟ꓾ ꓮꓽ ꓙꓵ ꓢꓴ ꓐꓹ ꓐ ꓐꓰ ꓪꓴ-ꓢˍ ꓟꓲ ꓕꓲ ꓣꓳˍ ꓡꓰꓽ ꓥꓳ꓿ 7 ꓖꓳ ꓡꓱ ꓥ ꓟꓲ ꓙꓲ-ꓢꓴ ꓬꓲ ꓡꓯꓼ ꓫꓴ ꓮ ꓡꓲ ꓙꓳˍ ꓠꓬ꓾ ꓣꓳꓽ ꓮ ꓡꓲ ꓕꓲ ꓣꓳ ꓔꓯˍ ꓟꓲ ꓣꓱꓽ ꓛꓰ ꓬꓲ ꓖꓳ ꓡꓱ ꓐꓱꓻ ꓖꓶ ꓡ ꓟ ꓥ ꓡꓳ꓿ 8 ꓖꓳ ꓡꓱ ꓠꓬꓲ ꓕꓳ ꓶ ꓗꓪ꓾ ꓬꓲ ꓠꓬ ꓕꓯꓽ ꓢꓲ ꓗꓪ ꓓꓯ ꓙꓰˍ ꓕꓯ꓾ ꓪꓳꓽ ꓞꓹ ꓢꓴ ꓔꓯ ꓬꓲ ꓡꓳꓽ ꓔꓯꓹ ꓙꓰ ꓢꓲ꓾ ꓞꓳ ꓤ ꓔꓯ ꓡꓯꓼ ꓫꓴ ꓖꓶˍ ꓡꓳ꓾ ꓐꓰ ꓐꓳ ꓔ ꓡꓳ꓿ 9 (ꓬꓲ ꓓꓯ ꓙꓰˍ ꓡꓳ꓾ ꓐꓯˍ ꓟ ꓠꓬ꓾ ꓬꓲ ꓠꓬ ꓧꓶꓸ ꓕꓯˍ ꓡꓰ ꓟꓲ ꓠꓯ ꓠꓯꓸ ꓘꓪˍ ꓟꓲ ꓬꓯꓼ ꓙꓰ ꓠꓬꓲˍ ꓡꓳ ꓟꓽ ꓥ ꓡ? 10 ꓬꓯꓼ ꓙꓰ ꓢꓴ ꓖꓳ ꓕꓲ ꓣꓳ ꓠꓬ ꓙꓳˍ ꓟ ꓥ ꓕ ꓑꓳ ꓗꓪ ꓔꓬ ꓐꓲ ꓡꓰ ꓠꓹ ꓟ꓾ ꓟꓴꓽ ꓗꓪ ꓮꓽ ꓙꓵ ꓟ ꓕꓯ ꓢꓲ ꓶꓽ ꓤꓻ ꓗꓪ ꓓꓯ ꓙꓰ ꓢꓴ ꓖꓳ ꓕꓲ ꓣꓳ ꓥ ꓢꓰꓽ ꓡꓳ꓿) 11 ꓬꓲ ꓖꓶꓽ ꓡ ꓟ ꓡꓯꓼ ꓫꓴ ꓠꓬ꓾ ꓝꓲ ꓓꓴ ꓬꓰ ꓠꓹ ꓟ ꓕꓲ ꓐꓱ꓾ ꓟꓷꓽ ꓠꓷꓹ ꓝ ꓢꓴ ꓬꓰ ꓠꓹ ꓟ ꓕꓲ ꓐꓱ꓾ ꓶꓼ ꓓꓳ ꓫꓱꓹ ꓓꓳ ꓟꓸ ꓒꓬꓱ ꓢꓴ ꓬꓰ ꓠꓹ ꓟ ꓕꓲ ꓐꓱ꓾ ꓟꓬꓱꓽ ꓡꓳꓸ ꓢꓴˍ ꓐꓰ ꓟꓸ ꓢꓴ ꓬꓰ ꓠꓹ ꓟ ꓕꓲ ꓐꓱ ꓥ ꓢꓲ꓾ 12 ꓣꓱꓽ ꓙˍ ꓟ ꓟꓬꓱꓽ ꓗꓪ ꓦ ꓡꓱ ꓢꓴ ꓐꓴ ꓔꓯ ꓙꓽ ꓖꓶ ꓖꓴ ꓡꓰ ꓝꓲ ꓢꓲ ꓠꓬꓲ꓾ ꓙꓲ-ꓢꓴ ꓖꓳ ꓓꓱ ꓥ ꓟ ꓘꓴ ꓜꓲ ꓞꓳ ꓔꓯ ꓜꓶꓻ ꓟꓴ ꓡ ꓝꓲˍ ꓟ ꓗꓪ ꓐꓰ꓾ 13 ꓣꓳꓽ ꓮꓽ ꓙꓵ ꓠꓬ ꓙꓵꓻ ꓠꓲꓹˍ ꓐꓰ ꓪꓴ-ꓢ ꓬꓲ ꓮ ꓐꓲ ꓔꓯ ꓢꓷꓸˍ ꓟ ꓗꓪ꓾ ꓕꓲ ꓠꓲꓹ ꓟˍ ꓡꓰ ꓒꓬꓱꓼ ꓡ ꓗꓸ ꓠꓯꓸ ꓪꓴꓽ ꓓꓰ ꓡꓰ ꓢꓲ꓾ ꓙꓲ-ꓢꓴ ꓬꓲ ꓔꓯꓺ ꓓꓴ ꓔꓯ ꓖꓼ ꓟꓶ ꓡꓰˍ ꓗꓪ ꓛꓲ꓾ ꓦ ꓗꓪ ꓪꓴꓽ ꓓꓰ ꓡꓰˍ ꓟ ꓡꓽ ꓞꓳ ꓒꓬꓱꓼ ꓡ ꓠꓹ ꓟ ꓥ ꓡꓳ꓿ 14 ꓕꓱ ꓟ ꓠꓬ ꓣꓳꓽ ꓠꓽ ꓕꓱ ꓡꓱ ꓖꓳ ꓑꓳ ꓞꓳ ꓤ ꓥ ꓟꓬꓱꓽˍ ꓐꓰ꓾ ꓖꓳꓼ ꓠꓲꓹˍ ꓐꓰ꓾ ꓗꓶꓸˍ ꓟ ꓚꓴꓽ ꓬꓲꓹˍ ꓐꓰ꓾ ꓟꓸ ꓟꓲꓽ ꓬꓲ ꓫꓵꓽ ꓬꓲ ꓙꓰꓽ ꓗꓪ ꓟꓲꓽ ꓦꓲ ꓡꓰ ꓙꓱꓼ ꓙꓰ ꓙꓱ ꓡ ꓗꓹ ꓟ ꓤ ꓠꓱ ꓤˍ ꓡꓰ ꓐꓰ ꓟꓽ ꓬꓰ ꓠꓹ ꓟ ꓥ ꓡꓳ꓿ 15 ꓖꓳ ꓟˍ ꓡꓰ ꓟꓽ ꓞꓲ꓾ ꓣꓳꓽ ꓠꓽ ꓠꓵ ꓠꓲꓹ ꓠꓯꓸꓼ ꓗꓪ ꓔꓱꓹ ꓘꓶꓽ ꓫꓸ ꓕꓱ ꓢꓲ꓾ ꓮꓸ ꓫꓵꓽ ꓗꓪˍ ꓟꓲ ꓣꓳꓽ ꓪꓴꓸ ꓓꓵ ꓥ ꓟ ꓙꓲ-ꓢꓴ ꓠꓯꓸꓼ ꓗꓪ ꓪꓴꓽ ꓡ ꓟꓴ ꓡ ꓠꓯꓹ ꓡꓳ꓿ 16 ꓕꓲ ꓖꓳ ꓓꓱꓽ ꓡꓱꓸꓼ ꓠꓬ ꓙꓲ-ꓢꓴ ꓗꓪ ꓐꓰ ꓜꓯꓻ ꓜꓳꓽ ꓡꓰ ꓢꓲ꓾ ꓬꓲ ꓝꓲꓸ ꓬꓲ ꓟꓲˍ ꓐꓰ ꓬꓲ ꓡꓯꓼ ꓗ ꓥ ꓕ ꓑꓳ ꓥꓳꓺ ꓡꓯꓽ ꓘꓳ ꓞꓹ ꓢꓲ ꓠꓬꓲ꓾ ꓡꓯꓼ ꓗ ꓮ ꓡꓲ ꓕꓲ ꓗꓸˍ ꓟꓲ ꓮ ꓡꓲ ꓢꓯꓼ ꓕꓵꓼ ꓙꓲꓽ ꓙꓳˍ ꓠꓬ ꓖꓳ ꓡꓱ ꓢꓯꓼ ꓕꓵꓼˍ ꓟ ꓗꓪ ꓐꓰ ꓙꓲ-ꓢꓴ ꓬꓲ ꓖꓳ ꓓꓱꓽ ꓥ ꓟ ꓬꓲ ꓘꓴ ꓜꓲ ꓞꓳ ꓔꓯ ꓪꓴꓽ ꓡ ꓝꓲ ꓢꓲ꓾ ꓠꓵ ꓠꓲꓹ ꓗꓪ ꓜꓶꓻ ꓟꓴ ꓡ ꓝꓲ ꓠꓹ ꓟ ꓥ ꓡꓳ꓿ 17 ꓖꓳ ꓡꓱ ꓠꓬꓲ ꓥꓪ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪꓽ ꓔꓯ ꓘꓶꓸ ꓖꓶˍ ꓠꓬꓲ꓾ ꓬꓲ ꓖꓳꓽ ꓔꓯˍ ꓡꓰꓽ ꓓꓵꓽ ꓙꓽˍ ꓟ ꓟꓽ ꓦ ꓡꓱ ꓢꓴ ꓐꓴ ꓞꓳꓻ ꓙꓳˍ ꓟ ꓡꓰ ꓐꓰ ꓕꓽ ꓞꓳ ꓙꓳ꓿ 18 ꓬꓲ ꓪꓽ ꓠꓬ ꓠꓲꓹ ꓟ ꓩꓴ ꓢꓴ ꓥ ꓢꓲ꓾ ꓙꓽ ꓠꓲꓹ ꓗꓪ ꓠꓯ ꓞꓲꓹ ꓡꓰ ꓠꓬꓲ ꓪꓴ-ꓢ ꓔꓯˍ ꓟꓲ ꓟꓽ ꓢꓷꓸ꓿ ꓪꓴ-ꓢ ꓬꓲ ꓢꓯꓼ ꓟꓬ ꓗꓪ ꓐꓰˍ ꓟꓲ ꓶꓽ ꓤ ꓗꓳꓹ ꓞꓹ ꓡꓳ꓿ 19 ꓬꓲ ꓪꓽ ꓠꓬ ꓫꓸ ꓔꓳ ꓟꓽ ꓗꓴꓸ ꓢꓲ꓾ ꓟꓽ ꓫꓬꓻ ꓟꓽ ꓖꓼ ꓟ ꓬꓲ ꓫꓵꓽ ꓬꓲ ꓙꓰˍ ꓐꓰ ꓠꓲꓹ ꓦꓯꓸˍ ꓟ ꓟꓬꓱꓽ ꓟꓬꓽ ꓠꓬꓲ ꓟꓬꓽ ꓠꓬꓲ ꓬꓰ ꓠ ꓟ꓾ ꓦꓯꓸ ꓠꓲꓹ ꓙꓵꓽˍ ꓟ ꓗꓪ ꓚꓲ ꓛꓬ ꓔꓯ ꓡꓯꓼ ꓙꓱ ꓗꓷ ꓢꓴ ꓐꓴ ꓥꓳ꓿ 20 ꓖꓳ ꓡꓱ ꓥ ꓟꓲ ꓙꓲ-ꓢꓴ ꓗꓪ ꓐꓰ ꓠꓴ ꓪꓽ ꓢꓳ ꓟꓶ ꓗꓷ ꓟ ꓠꓬ ꓖꓳ ꓡꓱ ꓞꓳ ꓙꓳ ꓠꓹ ꓟ ꓟꓽ ꓥ꓿ 21 ꓔꓱꓹ ꓚꓵˍ ꓟ ꓠꓬ ꓬꓰ-ꓢꓴ ꓠꓯS ꓗꓪˍ ꓡꓰꓽ ꓙꓳˍ ꓠꓬꓲ꓾ ꓠꓴ ꓪꓽ ꓠꓬ ꓶꓼ ꓓꓳ ꓫꓱꓹ ꓓꓳ ꓑ ꓙꓽ ꓟꓶ ꓡꓰ ꓢꓲ ꓬꓲ ꓠꓯS ꓗꓪ ꓟꓸ ꓔ ꓢꓴ ꓐꓴ ꓥ ꓕꓯ ꓠꓽ꓾ 22 ꓠꓴ ꓪꓽ ꓣꓱ ꓝꓳꓺ ꓡꓰ ꓟ ꓡ ꓞꓳ ꓡꓵ ꓗꓶꓸˍ ꓟ ꓐꓰ ꓦꓯꓸ ꓠꓲꓹ ꓙꓵˍ ꓟ ꓐꓰ ꓐꓬ ꓡꓰ ꓛꓵꓽ ꓡꓰ ꓓꓴ ꓔꓯ ꓡꓵꓸ ꓦ ꓗꓷ꓿ 23 ꓠꓴ ꓪꓽ ꓦꓻˍ ꓐꓰ ꓓꓵꓽ ꓙˍ ꓟ ꓔꓯ ꓬꓲ ꓫꓵꓼ ꓡꓵꓸ ꓗꓷ ꓢꓲ꓾ ꓡꓽ ꓞꓳ ꓫꓵꓼ ꓣꓱ꓿ 24 ꓡꓽ ꓞꓳ ꓫꓵꓼ ꓕꓱ ꓟ ꓠꓬ ꓪꓴ-ꓢ ꓬꓲ ꓒꓬꓱꓽ ꓔꓯ ꓛꓳ ꓢꓲ꓾ ꓔꓱꓹ ꓜꓳˍ ꓟ ꓐꓰ꓾ ꓔꓱꓹ ꓟ ꓠꓯꓸꓼ ꓗꓪ ꓚꓰꓼ ꓔ ꓟ ꓥ ꓡꓳ꓿ 25 ꓖꓳ ꓡꓱ ꓠꓬꓲ ꓠꓴ ꓪꓽ ꓮꓽ ꓟ ꓥ ꓟꓲ ꓗꓶꓸˍ ꓟ ꓔꓯ ꓡꓵꓸ ꓗꓷ ꓢꓲ꓾ ꓠꓶꓽ ꓛꓳꓽ ꓕꓲ ꓛꓳꓽˍ ꓐꓰ ꓔꓱꓹ ꓘꓶꓽ ꓫꓸ ꓕꓱ ꓡꓯꓽ ꓘꓳ꓿ ꓮ ꓡꓲꓳ ꓐꓯ ꓠꓬ ꓣꓳꓽ ꓮꓽ ꓙꓵ ꓢꓴ ꓠꓽ ꓕꓲ ꓖꓳ ꓓꓱꓽˍ ꓗꓪ ꓟ ꓡꓯꓼ ꓗ ꓛꓳꓽ ꓒꓯꓹ ꓥ ꓡꓳ꓿ 26 ꓠꓴ ꓪꓽ ꓠꓲꓹ ꓟ ꓦꓶˍ ꓟꓲ ꓝꓴꓲ ꓬꓰˍ ꓟ ꓕꓽ ꓗꓷ ꓡꓰ ꓝꓲ꓿ ꓟꓲꓽ ꓟꓲ ꓓꓵ ꓡꓰˍ ꓗꓪ ꓛꓲ ꓠꓲꓹ ꓟ ꓕꓽ ꓦꓶ꓿ 27 ꓝꓮꓲ ꓠꓬ ꓠꓲꓽ ꓪ ꓔꓲ ꓔꓯ ꓔꓬ ꓖꓴ ꓕꓽ ꓙꓵꓺ ꓖꓶ꓿ 28 ꓧꓶꓸ ꓕꓯ ꓘꓴꓽ ꓢꓴ ꓠꓬ ꓕꓱ ꓡꓱ ꓖꓳ ꓑꓳ ꓕꓽ ꓘꓴꓽ꓿ ꓣꓱꓽ ꓟꓽ ꓡꓳꓼ ꓢꓴ ꓔꓯ ꓖꓶꓽ ꓓꓴ ꓙꓳ ꓠꓹ ꓟ ꓢꓯꓼ ꓕꓵꓼ ꓢꓲ꓾ ꓚꓲ ꓛꓬ ꓡꓯꓼ ꓒꓯꓹ ꓡꓰ ꓙꓲˍ ꓟ ꓟꓬꓱꓽ ꓬꓰ ꓠꓯꓹ ꓡꓳ꓿ 29 ꓠꓴ ꓪꓽ ꓟꓷꓽ ꓠꓷꓹ ꓗꓪ ꓐꓰ ꓟꓽ ꓫꓬꓻ ꓥꓳꓽ ꓕꓲ ꓘꓶꓽˍ ꓟꓲ ꓕꓽ ꓓꓳ ꓡ ꓝꓲ꓿ ꓑ ꓙꓽ ꓢꓴ ꓔꓯ ꓙꓲꓻ ꓖꓴ ꓟꓶ ꓝꓲ ꓠꓹ ꓟ꓾ ꓞꓳ ꓤ ꓪꓴꓽ ꓡ ꓟꓴ ꓡ ꓓꓴ ꓣꓱꓽ ꓬꓯꓼˍ ꓡꓳ ꓫꓵꓽˍ ꓡꓰ ꓫꓸ ꓕꓱ꓿ 30 ꓝꓮꓲ ꓠꓬ ꓫꓴ ꓣꓴˍ ꓟ ꓦꓬꓼ ꓠꓬꓲ ꓗꓪ ꓛꓲ ꓠꓴ ꓪꓽ ꓔꓯ ꓔꓳꓹ ꓠꓷꓼ ꓔ ꓢꓴ꓾ ꓪꓴ-ꓢ ꓬꓲ ꓢꓲ-ꓫꓬ-ꓟ-ꓦ ꓔꓯ ꓠꓲꓹ ꓟ ꓕꓽ ꓫꓸ ꓡꓰ ꓝꓲ꓿ 31 ꓠꓲꓹ ꓟ ꓘꓪꓽˍ ꓟ꓾ ꓠꓲꓹ ꓖꓳꓼˍ ꓟ꓾ ꓠꓲꓹ ꓟ ꓦꓶˍ ꓟ꓾ ꓑꓱꓹ ꓡꓯꓽ ꓘꓳˍ ꓟ꓾ ꓙꓱꓽ ꓕꓼˍ ꓟ ꓐꓰ꓾ ꓢꓴ ꓔꓯ ꓠꓻ ꓡꓰ ꓝꓲˍ ꓟ ꓮꓽ ꓙꓵ ꓠꓴ ꓪꓽ ꓠꓯꓸꓼ ꓗꓪ ꓐꓰ ꓡꓳ ꓦ ꓗꓷ꓿ 32 ꓠꓴ ꓪꓽ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓙꓽ ꓗꓳ ꓡꓯꓽ ꓘꓳ ꓢꓲ꓾ ꓠꓴꓽˍ ꓟ ꓠꓲꓹ ꓟ ꓙꓳ ꓢꓲ ꓠꓬꓲ꓾ ꓙꓲ-ꓢꓴ ꓠꓯꓸꓼ ꓗꓪ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓖꓽ ꓖꓶ ꓗꓷ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓖꓽ ꓖꓶ ꓡꓯꓽ ꓘꓳ꓿

ꓬꓲ-ꓩꓴ-ꓢꓳ 5

1 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓪꓴ-ꓢ ꓠꓲꓹ ꓠꓵˍ ꓟ ꓤ ꓠꓱ ꓐꓴ ꓥ ꓟ ꓡꓰ ꓐꓰ ꓪꓴ-ꓢ ꓔꓯ ꓔꓯꓺ ꓢꓳ ꓢꓴ ꓬꓰ꓿ 2 ꓙꓲ-ꓢꓴ ꓠꓬ ꓣꓳꓽ ꓔꓯ ꓠꓲꓹ ꓠꓵ ꓢꓲ꓾ ꓪꓴ-ꓢ ꓠꓲꓹ ꓒꓴˍ ꓟ ꓫꓳꓺ ꓠꓱ ꓓꓴˍ ꓐꓰ ꓢꓰꓼ ꓔꓲ ꓓꓴ ꓬꓰ ꓠꓹ ꓟ꓾ ꓚꓲ ꓛꓬ ꓖꓳ ꓓꓱꓽ ꓖꓶꓽ ꓗꓷ ꓟ ꓡꓰ ꓐꓰ ꓠꓵ ꓠꓲꓹ ꓚꓱꓹ ꓗꓪ ꓚ꓿ 3 ꓠꓴ ꓪꓽ ꓠꓬ꓾ ꓪꓴ-ꓢ ꓔꓯ ꓦ ꓡꓱ ꓢꓴ ꓐꓴ ꓞꓳ ꓙꓳ ꓙꓲꓽ ꓙꓳˍ ꓟ ꓡꓰ ꓐꓰ꓾ ꓟꓽ ꓢꓲꓽ ꓟꓽ ꓫꓬꓻ ꓟ ꓐꓰ꓾ ꓟꓽ ꓫꓬꓻ ꓟꓽ ꓖꓼ ꓟ ꓮꓽ ꓙꓵˍ ꓐꓰ ꓠꓲꓹ ꓦꓯꓸˍ ꓟ ꓠꓬ꓾ ꓠꓴ ꓪꓽ ꓗꓳ ꓡꓳ ꓗꓪ ꓬꓲ ꓟꓬꓱꓺˍ ꓟꓲ ꓕꓽ ꓞꓶ ꓪ ꓝꓲ꓿ 4 ꓠꓲꓹ ꓒꓳꓹ ꓥꓳꓽ ꓥ ꓟꓲ꓾ ꓢꓯꓺ ꓥꓳꓽ ꓫꓸ ꓕꓱˍ ꓟ ꓥ ꓟꓲ꓾ ꓗꓸ ꓟꓽ ꓘꓳꓽ ꓟ ꓪꓽ ꓫꓱꓻ ꓥꓳꓽ ꓓꓷꓼˍ ꓟ ꓥ ꓟꓲ ꓕꓽ ꓙꓳ ꓝꓲ꓿ ꓕꓱ ꓡꓱ ꓡꓳ ꓫꓵ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓙꓳ ꓟꓽ ꓒꓰꓸ꓿ ꓟꓬꓽ ꓠꓬꓲ ꓙꓲˍ ꓟ ꓠꓽ ꓪꓴ-ꓢ ꓔꓯ ꓫꓸ ꓟꓳˍ ꓟ ꓥ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓟꓽ ꓢꓲ ꓟꓽ ꓫꓬꓻ ꓟ ꓬꓰ ꓢꓴ ꓥ ꓟꓲ꓾ ꓟꓽ ꓫꓬꓻ ꓟꓽ ꓖꓼ ꓟ ꓡꓽ ꓞꓳ ꓥ ꓟꓲ꓾ ꓠꓲꓹ ꓦꓯꓸ ꓢꓴ ꓥ ꓟꓲ꓾ ꓙꓲ-ꓢꓴˍ ꓐꓰ ꓪꓴ-ꓢ ꓗꓴꓷ ꓗꓪ ꓮꓸ ꓫꓵ ꓡꓯꓼ ꓪ ꓟꓽ ꓙꓳ ꓟ ꓠꓴ ꓪꓽ ꓚꓵ ꓚꓵ ꓢꓷꓸˍ ꓡꓳ꓿ ꓕꓱ ꓡꓱ ꓡꓳ ꓫꓵ ꓡꓽ ꓞꓳ ꓠꓽ ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓐꓰ ꓕꓲ ꓡꓰꓹꓼ ꓥꓳ꓿ 6 ꓠꓴ ꓪꓽ ꓮꓽ ꓟ ꓔꓯˍ ꓟꓲ ꓢꓴ ꓘꓶꓽ ꓖꓳꓽ ꓡꓰ ꓕꓽ ꓗꓶꓸ ꓪ ꓡꓰ ꓝꓲ꓿ ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓫꓵꓽ ꓪꓴꓸ ꓠꓬꓲ ꓪꓴ-ꓢ ꓦꓶꓻ ꓠꓲꓹ ꓠꓬ ꓟꓽ ꓒꓵꓽ ꓛꓳ ꓢꓴ ꓐꓴ ꓔꓯ ꓬꓯꓼ ꓡ ꓥꓳ꓿ 7 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓬꓲ ꓪꓽˍ ꓐꓰ ꓔꓺ ꓡꓯꓽ ꓘꓳ ꓢꓴ ꓕꓽ ꓬꓰ꓿ 8 ꓮ ꓡꓲꓳ ꓐꓯ ꓠꓬ ꓧꓶꓸ ꓕꓯ ꓠꓴ ꓪꓽ ꓠꓽ ꓠꓯ ꓞꓲꓹ ꓟ ꓗꓪ ꓔꓬ ꓠꓬꓲꓳ꓿ ꓮ ꓟꓶ ꓠꓽ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪꓽ ꓠꓬ ꓠꓬꓲ ꓟꓳꓻ ꓓꓴ ꓥ ꓠꓬꓲ꓾ ꓠꓬꓲ ꓟꓳꓻ ꓓꓴ ꓤ ꓠꓱ ꓐꓴˍ ꓡꓰ ꓐꓰ ꓞꓳ ꓙꓳ꓿ 9 ꓮ ꓡꓲꓳ ꓐꓯˍ ꓠꓬ ꓠꓬꓲ ꓟꓳꓻ ꓓꓴ ꓡꓰ ꓓꓱꓼ ꓓꓳ ꓡ ꓟ ꓬꓲ ꓢꓶꓽ ꓠꓬ꓾ ꓙꓲˍ ꓟ ꓐꓰ꓾ ꓔꓱꓹ ꓜꓳꓽˍ ꓟ ꓐꓰ ꓔꓱꓹ ꓟ ꓥ ꓡꓳ꓿ 10 ꓮ ꓡꓲ ꓕꓲ ꓫꓵꓽ ꓡꓰ ꓢꓲ ꓒꓽ ꓔꓯ ꓠꓲꓹ ꓒꓴ ꓡꓰ ꓝꓲˍ ꓟ ꓔꓯ ꓚꓬꓹ ꓠꓬꓲ ꓢꓲ ꓬꓰ ꓠꓯꓹ ꓡꓳ꓿ 11 ꓮꓸ ꓫꓵ ꓙꓲ ꓖꓴ ꓟꓽ ꓙꓳˍ ꓟ ꓠꓯ ꓞꓲꓹ ꓟ ꓟꓬꓱꓽ ꓬꓰ ꓢꓴ ꓐꓴˍ ꓐꓰ ꓕꓽ ꓔꓺ ꓡꓯꓽ ꓘꓳ꓿ ꓟꓬꓽ ꓠꓬꓲ ꓙꓲˍ ꓟ ꓠꓬ ꓬꓲ ꓪꓽ ꓛꓬꓻ ꓖꓴ ꓥꓳꓽ ꓖꓴ ꓔꓯ ꓟꓳꓸ ꓖꓶ ꓓꓳ ꓡ ꓝꓲ ꓠꓯꓹ ꓡꓳ꓿ 12 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓡꓰ ꓘꓳ ꓫꓱꓸ ꓫꓱ ꓗꓪ ꓬꓰˍ ꓡꓳ ꓫꓵꓽ ꓠꓬ ꓐꓯˍ ꓟꓲ ꓫꓸ ꓔꓳ ꓓꓴ ꓥ ꓡꓳ꓿ 13 ꓖꓳ ꓡꓱ ꓥ ꓟꓲ ꓮꓸ ꓫꓵ ꓔꓯˍ ꓟꓲ ꓠꓬꓲ ꓟꓳꓻ ꓓꓴ ꓡꓬꓸ ꓖꓶꓽ ꓗꓷ ꓠꓬ ꓟꓳꓻ ꓓꓻˍ ꓟ ꓥ ꓠꓬꓲ꓾ ꓠꓬꓲ ꓟꓳꓻ ꓓꓴ ꓡꓰ ꓮ ꓡꓲ ꓫꓵꓽ ꓔꓯˍ ꓟꓲ ꓖꓴ ꓟꓳꓸ ꓖꓶ ꓓꓳ ꓡ ꓟ ꓥ ꓡꓳ꓿ 14 ꓖꓳ ꓡꓱ ꓠꓬꓲ ꓕꓳ ꓶ ꓗꓪ꓾ ꓬꓲꓼ ꓟꓶ ꓢꓴ ꓐꓴꓳ꓾ ꓧꓪꓸ ꓛꓲ ꓡ ꓢꓲ ꓫꓵꓻˍ ꓟ ꓗꓪ ꓐꓰ ꓔꓴ ꓡꓯ꓿ ꓖꓳ ꓡꓱ ꓠꓬ ꓙꓲ-ꓢꓴ ꓡꓰ ꓠꓴ ꓔꓯ ꓣꓳꓺ ꓖꓶ ꓡ ꓥꓳ꓾ ꓐꓰ ꓐꓯˍ ꓟ ꓥ ꓡꓳ꓿ 15 ꓖꓳ ꓡꓱ ꓠꓬꓲ ꓠꓴ ꓪꓽ ꓮ ꓡꓲ ꓞꓳ ꓙꓳ ꓠꓹ ꓟ ꓬꓲ ꓜꓶ ꓤ ꓟꓳ꓿ ꓞꓳ ꓙꓲꓽˍ ꓡꓰ ꓐꓰ ꓕꓽ ꓬꓰ꓿ ꓙꓽ ꓗꓴ ꓠꓲꓹ ꓙꓳ ꓢꓴˍ ꓡꓰ ꓐꓰ ꓬꓰ꓿ 16 ꓮ ꓟꓶ ꓠꓬ ꓥꓶꓺˍ ꓟ ꓦꓬꓼ ꓠꓬꓲ ꓥ ꓠꓬꓲ꓾ ꓬꓲ ꓙꓵꓹ ꓮꓽ ꓔꓳ ꓟꓽ ꓑꓹ ꓒꓲꓼ ꓬꓰ ꓝꓲ ꓠꓹ ꓟ ꓤ ꓟꓳ꓿ 17 ꓠꓴ ꓪꓽ ꓠꓬ ꓞꓳ ꓙꓲꓽ ꓟꓽ ꓬꓰ ꓬꓰ꓾ ꓢꓲ ꓒꓽ ꓠꓲꓹ ꓡꓶꓽ ꓮ ꓡꓲ ꓥ ꓟ ꓙꓽ ꓜꓲꓼ ꓢꓴ ꓬꓰ꓿ 18 ꓙꓲꓻ ꓒꓶꓽ ꓬꓲꓼ ꓢꓲ ꓐꓬ ꓡꓰ ꓢꓴ ꓙꓳˍ ꓠꓬꓲ꓾ ꓠꓴ ꓪꓽ ꓠꓬ ꓙꓲ ꓒꓶꓽ ꓬꓲꓼ ꓢꓴ ꓕꓽ ꓬꓰ꓿ ꓠꓴ ꓪꓽ ꓔꓯ ꓠꓽ ꓢꓲ-ꓫꓬ-ꓟ-ꓦˍ ꓡꓰꓽ ꓐꓲ ꓞꓹ ꓝꓲ ꓢꓲ꓾ 19 ꓟꓴꓽ ꓖꓪꓽ ꓕꓳ ꓶ ꓚꓱꓹˍ ꓐꓰ ꓫꓱꓸ ꓖꓶ ꓟꓴꓽ ꓖꓪꓽˍ ꓐꓰ꓾ ꓦ ꓖꓪ ꓓꓴ ꓡꓰ ꓕꓲ ꓣꓳ ꓛꓳꓽ ꓕꓲ ꓣꓳ ꓫꓸ ꓕꓱ ꓡꓯꓽ ꓘꓳ꓿ ꓝꓮꓲ ꓠꓬ ꓠꓴ ꓪꓽ ꓠꓲꓹ ꓟ ꓗꓪ ꓠ ꓠꓹ ꓢꓻˍ ꓟ ꓡꓰ ꓢꓲ ꓒꓽ ꓔꓯ ꓫꓱꓸ ꓖꓶ ꓓꓴ ꓖꓪ ꓢꓲ꓾ 20 ꓐꓹ ꓐ ꓪꓴ-ꓢ ꓔꓯ ꓠꓬ ꓮ ꓕꓯˍ ꓟꓲ꓾ ꓮꓸ ꓫꓵ ꓗꓪˍ ꓟꓲ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓬꓱ ꓗꓪ ꓐꓰ ꓫꓸ ꓟꓳ ꓖꓶ꓿ 21 ꓙꓲ-ꓢꓴ ꓔꓯ ꓙꓳꓺ ꓒꓵꓽˍ ꓟ ꓠꓯꓸꓼ ꓗꓪ ꓠꓴ ꓪꓽ ꓕꓲ ꓣꓳ ꓛꓳ ꓕꓲ ꓣꓳ ꓠ ꓡꓳꓹ ꓡꓯꓽ ꓘꓳ꓿ 22 ꓤ ꓟꓶ ꓣꓱꓽ ꓢꓴ ꓐꓴꓳ꓾ ꓢꓲ ꓒꓽ ꓙꓵꓽˍ ꓟ ꓔꓯ ꓛꓳꓻˍ ꓟ ꓡꓰ ꓐꓰ꓾ ꓠꓴ ꓪꓽ ꓤ ꓖꓴ ꓙꓵꓽˍ ꓟ ꓔꓯ ꓛꓳ꓿ 23 ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓠꓽ ꓘꓴ ꓜꓲ ꓞꓳ ꓬꓲ ꓪꓴꓸ ꓓꓵ ꓥ ꓟ ꓡꓰ ꓐꓰ꓾ ꓤꓽ ꓖꓴˍ ꓟꓲ ꓤ ꓟꓶ ꓪꓴꓸ ꓓꓵ ꓥ ꓡꓳ꓿ ꓙꓲ-ꓢꓴ ꓬꓲ ꓚꓲ ꓛꓬ ꓠꓬ ꓬꓲ ꓖꓳ ꓓꓱꓽ ꓥ ꓟ ꓘꓴ ꓜꓲ ꓞꓳ ꓔꓯ ꓢꓯꓼ ꓟꓬ ꓝꓸ ꓖꓶ ꓢꓴ ꓥ ꓡꓳ꓿ 24 ꓘꓴ ꓜꓲ ꓞꓳ ꓠꓽ ꓙꓲ-ꓢꓴ ꓙꓵꓽˍ ꓟ ꓔꓯ ꓛꓳˍ ꓟ ꓡꓰ ꓐꓰ꓾ ꓤ ꓟꓶ ꓣꓱꓽ ꓢꓴ ꓐꓴˍ ꓟꓲ꓾ ꓮꓸ ꓫꓵꓽ ꓗꓪˍ ꓟꓲ ꓬꓲ ꓤꓽ ꓖꓴ ꓙꓵꓽˍ ꓟ ꓔꓯ ꓛꓳ ꓠꓯꓹ ꓡꓳ꓿ 25 ꓤ ꓖꓴ ꓣꓱꓽ ꓢꓴ ꓐꓴꓳ꓾ ꓙꓲ-ꓢꓴ ꓡꓰ ꓘꓴ ꓜꓲ ꓞꓳ ꓔꓯ ꓠꓲꓹ ꓠꓵ ꓢꓲ꓾ ꓘꓴ ꓜꓲ ꓞꓳ ꓐꓱ ꓶ ꓬꓲ ꓚꓲ ꓛꓬ ꓖꓳ ꓓꓱ ꓖꓶꓽ ꓗꓷ ꓟ ꓡꓰ ꓐꓰ꓾ ꓠꓴ ꓪꓽ ꓤ ꓟꓶ ꓐꓴ ꓔꓯˍ ꓟꓲ ꓬꓲ ꓖꓳ ꓡꓱ ꓠꓲꓹ ꓠꓵ꓿ 26 ꓕꓱ ꓟ ꓠꓬ ꓙꓲ-ꓢꓴ ꓡꓰ ꓪꓴ-ꓢ ꓐꓯ ꓘꓶꓽˍ ꓐꓰ ꓬꓲꓻ ꓙꓬ ꓡꓰ ꓞꓲꓽˍ ꓟ ꓗꓪ ꓐꓰ ꓘꓴ ꓜꓲ ꓞꓳ ꓔꓯ ꓫꓬꓻ ꓡꓰ ꓝꓲ ꓢꓲ꓾ ꓢꓲ ꓚꓰꓸ ꓔ ꓟ ꓟꓶ ꓝꓲ ꓠꓹ ꓟ ꓐꓰ꓾ 27 ꓘꓴ ꓜꓲ ꓞꓳ ꓠꓬ ꓤꓰꓽ ꓞꓹ ꓟ ꓐꓰ ꓝꓲꓹ ꓞꓹ ꓟ ꓟꓽ ꓙꓳ ꓟ꓾ ꓠꓱꓸ ꓐꓯꓼ ꓬꓲ ꓐꓼ ꓮꓸ ꓫꓵꓽˍ ꓟꓲ ꓟꓽ ꓙꓳ ꓙꓳ꓾ ꓚꓰꓸ ꓔ ꓟ ꓒꓬꓱꓼ ꓡ ꓢꓲ꓾ ꓢꓲ ꓒꓽ ꓬꓲ ꓚꓲ ꓛꓬ ꓠꓬ ꓟꓬꓱ ꓓꓳꓽ ꓢꓽ ꓓꓳꓽ ꓙꓳˍ ꓟ ꓘꓴ ꓜꓲ ꓞꓳ ꓔꓯ ꓘꓳ ꓣꓴ ꓟꓶ ꓡꓰ ꓠꓹ ꓟ ꓥ ꓡꓳ꓿ 28 ꓖꓳ ꓟ ꓡꓰ ꓐꓰ ꓤꓽ ꓖꓴ ꓣꓱꓽ ꓢꓴ ꓐꓴˍ ꓟꓲ꓾ ꓬꓲ ꓪꓽ ꓚꓲ ꓛꓬ ꓖꓳ ꓓꓱ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓤꓽ ꓟꓶ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓿ ꓬꓲ ꓤ ꓟꓶ ꓔꓯ ꓠꓲꓹ ꓠꓵ ꓢꓴ ꓠꓬ ꓚꓲ ꓛꓬ ꓔꓯ ꓠꓲꓹ ꓠꓵˍ ꓟ ꓥ ꓡꓳ꓿ 29 ꓮ ꓡꓲꓳ ꓐꓯ ꓠꓬ ꓚꓲ ꓛꓬ ꓖꓳ ꓓꓱ ꓔꓯ ꓠꓲꓹ ꓜꓳ ꓢꓴ ꓮꓽ ꓟˍ ꓟꓲ ꓟꓽ ꓙꓳ꓿ ꓙꓲ-ꓢꓴ ꓡꓰ ꓘꓴ ꓜꓲ ꓞꓳ ꓔꓯ ꓙꓽ ꓗꓳ ꓢꓲ ꓦꓵꓻ ꓙꓽˍ ꓟ ꓡꓰ ꓐꓰ꓾ ꓬꓲˍ ꓟꓲ ꓬꓲ ꓚꓲ ꓛꓬ ꓖꓳ ꓓꓱ ꓔꓯ ꓙꓽ ꓗꓳ ꓢꓲ ꓦꓵꓻ ꓙꓽˍ ꓡꓳ꓿ 30 ꓮ ꓡꓲꓳ ꓐꓯ ꓠꓬ ꓣꓳꓽ ꓠꓽ ꓬꓲ ꓖꓳ ꓓꓱꓽ ꓗꓪ ꓟ ꓡꓯꓼ ꓗꓸ ꓥ ꓡꓳ꓿ 31 ꓢꓲꓽ ꓫꓬ ꓕꓳ ꓶ ꓗꓪ꓾ ꓕꓱ ꓟ ꓑꓶꓸ ꓓꓴ ꓞꓳ ꓑꓸ ꓤ ꓠꓬ ꓬꓲ ꓐꓹ ꓐ ꓟꓹ ꓟ ꓐꓰ ꓧꓹ ꓗꓷ ꓢꓲ꓾ ꓬꓲ ꓤꓽ ꓟꓶ ꓔꓯ ꓝꓱꓺ ꓡꓰˍ ꓥꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓠꓬꓲꓽ ꓟ ꓠꓬ ꓕꓲ ꓧꓪꓽˍ ꓡꓰ ꓒꓬꓱꓼ ꓬꓰˍ ꓥꓳ꓾ ꓐꓯˍ ꓡꓳ꓿ 32 ꓚꓵ ꓘꓶꓽ ꓕꓱ ꓟ ꓠꓬ ꓠꓯꓸˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓬ ꓙꓲ-ꓢꓴˍ ꓐꓰ ꓘꓴ ꓜꓲ ꓞꓳ ꓔꓯ ꓖꓴꓺ ꓢꓲ ꓐꓯˍ ꓟ ꓥ ꓡꓳ꓿ 33 ꓠꓴ ꓪꓽ ꓠꓽ ꓕꓲ ꓣꓳ ꓡꓰ ꓕꓲ ꓣꓳ ꓚꓲ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓚꓲ ꓛꓬ ꓤ ꓟꓶ ꓔꓯ ꓠꓲꓹ ꓠꓵ꓿ ꓤ ꓟꓶˍ ꓟꓲ ꓬꓲ ꓤꓽ ꓖꓴ ꓔꓯ ꓒꓵꓽ ꓠꓹ ꓟ ꓧꓪꓸ ꓛꓲ ꓠ ꓗꓹ ꓡꓳ꓿

ꓬꓲ-ꓩꓴ-ꓢꓳ 6

1 ꓤ ꓠꓱ ꓐꓴꓳ꓾ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪꓽ ꓐꓹ ꓐ ꓟꓹ ꓟ ꓔꓯ ꓒꓵꓽ ꓛꓳ꓿ ꓕꓱ ꓡꓱ ꓬꓰˍ ꓟ ꓠꓬ ꓜꓳꓽˍ ꓟ ꓥ ꓡꓳ꓿ 2 - 3 ꓙ ꓟꓳ ꓘꓶꓽ ꓕꓱꓹ ꓞꓹ ꓟ ꓕꓵꓼ ꓪꓽ ꓬꓲ ꓪꓴꓸ ꓕꓲ ꓚꓱꓹ ꓗꓪ꓾ ꓠꓴ ꓪꓽ ꓶꓼ ꓙꓳ ꓫꓱꓹ ꓙꓳ ꓠꓹ ꓟˍ ꓐꓰ ꓟꓲ ꓠꓯ ꓗꓪ ꓟꓶ ꓤ ꓢꓯꓸ ꓔꓬ ꓪ ꓠꓹ ꓟ꓾ ꓠꓴ ꓪꓽ ꓐꓹ ꓐ ꓟꓹ ꓟ ꓔꓯ ꓒꓵꓽ꓾ ꓐꓰ ꓐꓯ ꓔ ꓡꓳ꓿ 4 ꓮꓽ ꓐꓽ ꓣꓱꓽ ꓢꓴ ꓐꓴꓳ꓾ ꓠꓴ ꓪꓽ ꓤ ꓠꓱ ꓐꓴ ꓠꓲꓹ ꓟ ꓦꓶ ꓡ ꓚꓱꓹ ꓕꓽ ꓬꓰ꓿ ꓬꓲ ꓪꓽ ꓔꓯ ꓠꓽ ꓢꓲ ꓒꓽ ꓟꓸ ꓟꓲꓽˍ ꓐꓰ ꓬꓲ ꓟꓸ ꓚꓱꓹ ꓗꓪ ꓦꓵꓻ ꓙꓽ꓿ 5 ꓚꓳ ꓑꓸ ꓐꓴꓳ꓾ ꓙꓲ-ꓢꓴ ꓔꓯ ꓒꓵꓽ ꓛꓳˍ ꓟ ꓡꓰ ꓐꓰ꓾ ꓠꓴ ꓪꓽ ꓧꓪꓽ ꓖꓳ ꓓꓱ ꓗꓪ ꓟ ꓢꓲꓺ ꓒꓽ ꓣꓱꓽ ꓢꓴ ꓐꓴ ꓔꓯ꓾ ꓙꓳꓺ ꓠꓬꓲ ꓛꓱꓽ ꓠꓬꓲ ꓠꓲꓹ ꓟ ꓕꓲ ꓔꓱꓹˍ ꓡꓰ ꓣꓱꓽ ꓢꓲ ꓒꓵꓽ ꓛꓳ꓿ 6 ꓬꓲ ꓪꓽ ꓔꓯ ꓠꓲꓹ ꓒꓴ ꓡꓰ ꓝꓲ ꓠꓹ ꓟ꓾ ꓟꓬ ꓢꓶꓽ ꓟꓳˍ ꓟ ꓗꓪˍ ꓡꓰꓽ ꓣꓱꓽ ꓙˍ ꓟ ꓕꓽ ꓬꓰ꓿ ꓕꓲ ꓠꓲꓹ ꓟ ꓡꓱꓸꓼ ꓪꓴ-ꓢ ꓠꓲꓹ ꓡꓶꓽ ꓛꓳ ꓢꓴ ꓙꓲ-ꓢꓴ ꓚꓳ ꓑꓸ ꓐꓴ ꓬꓰ ꓙꓲꓽ ꓙꓳˍ ꓟ ꓡꓰ ꓐꓰ ꓬꓰ꓿ 7 ꓞꓳ ꓤ ꓐꓱ ꓶ ꓟꓽ ꓥ ꓥ꓾ ꓣꓳ ꓢꓲ ꓒꓽ ꓐꓱ ꓶ ꓥꓳ꓾ ꓐꓰ ꓚꓬꓹ ꓢꓲ꓾ ꓠꓲꓹ ꓒꓴ ꓒꓴˍ ꓡꓰꓽ ꓣꓱꓽ ꓙ꓿ 8 ꓮ ꓡꓲꓳ ꓐꓯ ꓠꓬ ꓚꓳ ꓑꓸ ꓥ ꓟꓲ꓾ ꓚꓳ ꓪꓴꓸ ꓥ ꓟꓲ꓾ ꓮ ꓡꓲ ꓕꓲ ꓣꓳ ꓥ ꓟꓲ꓾ ꓙꓲˍ ꓟ ꓮꓸ ꓫꓵ ꓕꓲ ꓫꓵꓽ ꓬꓰˍ ꓠꓬ꓾ ꓣꓳ ꓢꓲ ꓒꓽ ꓡꓰ ꓬꓲ ꓔꓯ ꓡꓯꓼ ꓫꓴ ꓖꓶ ꓡ ꓥꓳ꓾ ꓐꓰ ꓠꓴ ꓪꓽ ꓢꓷꓸˍ ꓡꓳ꓿ 9 ꓢꓲꓺ ꓒꓽ ꓣꓱꓽ ꓢꓴ ꓐꓴꓳ꓾ ꓠꓴ ꓪꓽ ꓚꓳ ꓑꓸ ꓐꓴ ꓔꓯˍ ꓟꓲ ꓖꓳ ꓟ ꓡꓰ ꓐꓰ ꓙꓲˍ ꓟ ꓬꓰ ꓖꓶ ꓢꓲ꓾ ꓬꓲ ꓪꓽ ꓔꓯ ꓮꓽ ꓔꓳ ꓕꓽ ꓚꓳꓹ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽˍ ꓐꓰ ꓠꓴ ꓪꓽ ꓢꓲ ꓒꓽ ꓠꓬ ꓟꓴꓽ ꓗꓪ ꓕꓯ ꓢꓲ ꓗꓪ ꓔꓬ ꓢꓲ꓾ ꓬꓲ ꓠꓬ ꓞꓳ ꓒꓬꓱꓽ ꓢꓲꓺ ꓢꓴ ꓟꓽ ꓥ ꓟ ꓠꓴ ꓪꓽ ꓢꓷꓸˍ ꓡꓳ꓿ 10 ꓡꓳꓹ ꓬꓰ ꓟ ꓕꓲ ꓘꓶꓽ ꓠꓬ꓾ ꓢꓲ ꓒꓽˍ ꓐꓰ ꓬꓲ ꓪꓽ ꓠꓬꓲˍ ꓟ ꓢꓯꓼ ꓠꓯꓸꓼ ꓗꓪ ꓠꓴ ꓪꓽ ꓢꓯꓼ ꓙꓳ ꓔꓬ꓿ 11 ꓠꓴ ꓪꓽ ꓠꓬ ꓢ-ꓓꓯ ꓠꓲꓹ ꓖꓳꓼˍ ꓟ ꓚꓴꓽ ꓬꓲꓹ ꓔꓯ ꓗꓽ ꓔ ꓘꓴ ꓠꓹ ꓟ꓾ ꓪꓴ-ꓢ ꓟꓯꓼ ꓖꓪꓽ ꓓꓴ ꓮꓽ ꓙꓵ ꓡꓱS ꓖꓪꓽ ꓔ꓿ 12 ꓮ ꓡꓲꓳ ꓐꓯ ꓠꓬ ꓣꓳꓽ ꓠꓽ ꓫꓵꓽ ꓙꓳ ꓧꓪꓽ ꓙꓳˍ ꓟ ꓞꓳ ꓤ ꓔꓯ ꓓꓶꓽ ꓡꓯꓽ ꓘꓳ ꓔꓬ ꓟ ꓟꓽ ꓥ꓿ ꓣꓳꓽ ꓠꓽ ꓟꓵꓽ ꓪꓴ ꓗꓪ ꓥꓶꓻˍ ꓟ ꓦ ꓜꓴꓻ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ꓾ ꓙꓵꓽ ꓪ ꓙꓳ ꓢꓴ ꓐꓴˍ ꓐꓰ꓾ ꓠꓯ ꓞꓲꓹ ꓟ ꓟꓲ ꓠꓯ ꓕꓱ ꓟ ꓔꓯ ꓙꓵꓽ ꓢꓴ ꓐꓴˍ ꓐꓰ ꓓꓶꓽ ꓡꓯꓽ ꓘꓳˍ ꓟ ꓥ ꓡꓳ꓿ 13 ꓖꓳ ꓡꓱ ꓠꓬꓲ ꓥꓶˍ ꓟ ꓦꓬꓼ ꓠꓬꓲ ꓗꓪ ꓬꓲ ꓪꓽ ꓔꓯ ꓠꓴ ꓪꓽ ꓗꓽ ꓔ ꓘꓴ ꓠꓹ ꓟ꓾ ꓝꓮꓲ ꓮꓸ ꓫꓵꓽˍ ꓟꓲ ꓬꓰ ꓓꓳ ꓡꓰ ꓗꓸ ꓠꓯꓸ ꓠꓴ ꓪꓽ ꓦꓰꓼ ꓞꓹ ꓘꓴ ꓠꓹ ꓟ꓾ ꓪꓴ-ꓢ ꓟꓯꓼ ꓣꓱꓽ ꓓꓴ ꓮꓽ ꓙꓵ ꓡꓱS ꓣꓴ ꓖꓪꓽ ꓔ꓿ 14 ꓠꓴ ꓪꓽ ꓙꓴꓽ ꓝꓲꓸ ꓗꓪ ꓠꓬ ꓔꓱꓹ ꓚꓵˍ ꓟ ꓙꓽ ꓧꓶꓹ ꓡꓰ ꓧꓶꓹ ꓔ ꓢꓲ꓾ ꓠꓴ ꓪꓽ ꓳ'ꓺ ꓟꓶ ꓔꓺ ꓓꓴ ꓠꓬ ꓔꓱꓹ ꓜꓳꓽˍ ꓟ ꓬꓰ ꓢꓲ ꓠꓬꓲ꓾ 15 ꓠꓴ ꓪꓽ ꓛꓲ ꓒꓯꓹ ꓗꓪ ꓠꓬ ꓢꓲ ꓡꓲ ꓟ ꓶꓼ ꓓꓳ ꓫꓱꓹ ꓓꓳ ꓡꓰ ꓙꓽ ꓖꓶ ꓔꓸ ꓟ ꓛꓲꓺ ꓠꓲꓺ ꓠꓲ ꓢꓲ꓾ ꓕꓶꓻ ꓕꓶˍ ꓡꓰ ꓦꓰꓼ ꓔ꓿ 16 ꓮꓽ ꓙꓵ ꓟ ꓕꓯ ꓢꓲ ꓗꓪ ꓠꓬ꓾ ꓥꓶˍ ꓟ ꓖꓳ ꓕꓲ ꓣꓳ ꓬꓲ ꓮ ꓔꓳꓸ ꓚꓬ ꓚꓱꓹ ꓮꓽ ꓙꓵ ꓔꓯ ꓠꓴ ꓪꓽ ꓢꓰꓼ ꓟꓶꓽ ꓡꓰ ꓝꓲ ꓐ ꓡ ꓟ ꓙꓵꓻ ꓠꓲꓹ ꓚꓬꓺ ꓠꓲꓺ ꓣꓴ ꓔꓯꓹ ꓔ꓿ 17 ꓝꓮꓲ ꓠꓬ ꓚꓬꓴ ꓟꓶˍ ꓟ ꓪꓴꓸ ꓛꓴꓽ ꓘꓳꓹ ꓔ ꓢꓲ ꓢꓲ-ꓫꓬ-ꓟ-ꓦ ꓮ ꓕꓽ ꓟꓶꓽ ꓛꓴ ꓣꓴ ꓔ꓿ ꓮ ꓕꓽ ꓟꓶꓽ ꓛꓴ ꓕꓱ ꓟ ꓠꓬ ꓪꓴ-ꓢ ꓐꓯ ꓘꓶꓽ ꓥ ꓡꓳ꓿ 18 ꓮ ꓡꓲ ꓕꓲ ꓝꓲꓸ ꓗꓪˍ ꓟꓲ꓾ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓪ ꓘꓴˍ ꓟ ꓐꓰ ꓶꓼ ꓓꓰꓽˍ ꓟ ꓮꓽ ꓙꓵ ꓡꓰ ꓶꓼ ꓓꓰꓽ ꓪꓽ ꓘꓴ꓿ ꓕꓱ ꓡꓱ ꓬꓰˍ ꓟ ꓗꓪ ꓧꓪꓸ ꓛꓲꓽ ꓛꓲ꓾ ꓮ ꓕꓯˍ ꓟꓲ ꓦ ꓡꓱ ꓢꓴ ꓐꓴ ꓮꓽ ꓙꓵ ꓐꓱ ꓶ ꓶꓼ ꓓꓰꓽ ꓪ ꓘꓴ꓿ 19 ꓥꓪ ꓐꓱ ꓶˍ ꓟꓲ ꓪꓽ ꓘꓴ ꓙ꓿ ꓥꓪ ꓠꓬ ꓠꓲꓹ ꓪꓴꓽ ꓪꓴˍ ꓡꓰ ꓘꓶꓽ ꓒꓴ ꓢꓲ꓾ ꓐꓯ ꓙꓻ ꓙꓳ ꓙꓳˍ ꓡꓰ ꓶꓼ ꓓꓳ ꓫꓱꓹ ꓓꓳ ꓬꓲ ꓚꓵ ꓘꓶꓽ ꓐꓯ ꓟꓸ ꓖꓶ ꓐ ꓡ ꓠꓹ ꓟ ꓪ ꓘꓴ ꓙ꓿ 20 ꓕꓱ ꓕꓲ ꓝꓲꓸ ꓗꓪ ꓥꓪ ꓠꓬ ꓐꓱ ꓓꓴꓽ ꓗꓪ ꓔꓬ ꓥ ꓟꓲ꓾ ꓥꓪ ꓠꓬ ꓶꓼ ꓓꓳ ꓫꓱꓹ ꓓꓳꓽ ꓐꓱ ꓶ ꓪꓴ-ꓢ ꓡꓰ ꓝꓲ ꓔ ꓟ ꓬꓲ ꓗꓴꓷꓼ ꓝꓲ ꓓꓴ ꓥ ꓡꓳ꓿ ꓖꓳ ꓡꓱ ꓠꓬꓲ ꓶꓼ ꓓꓳ ꓫꓱꓹ ꓓꓳ ꓕꓱ ꓟ ꓐꓱ ꓶ ꓠꓲꓹ ꓪꓴꓽ ꓪꓴˍ ꓡꓰ ꓫꓸ ꓕꓱ ꓐ ꓡ ꓠꓹ ꓟ ꓪꓽ ꓘꓴ ꓙ꓿ 21 ꓖꓳ ꓡꓱ ꓥ ꓟꓲ ꓥꓪ ꓮ ꓡꓲ ꓥ ꓟ ꓓꓳꓽ ꓠꓬ꓾ ꓢꓲ ꓒꓽ ꓠꓯꓸꓼ ꓗꓪ ꓦ ꓡꓱ ꓐꓳˍ ꓟ ꓣꓱꓽ ꓙ ꓢꓴ ꓠꓲꓹ ꓠꓵˍ ꓟ ꓠꓬꓲ ꓤ ꓕꓲ-ꓚꓲ-ꓗꓴ ꓡꓰ꓾ ꓠꓴ ꓪꓽ ꓔꓯ ꓮꓽ ꓙꓵ ꓢꓷꓸ ꓡꓰ ꓝꓲˍ ꓥꓳ꓿ 22 ꓥꓪ ꓠꓴꓽ ꓙ ꓖꓴ ꓠꓴ ꓪꓽ ꓢꓷꓸ ꓡꓰ ꓠꓹ ꓟ ꓐꓰ꓾ ꓬꓲ ꓡꓰ ꓠꓴ ꓪꓽ ꓔꓯ ꓠꓲꓹ ꓟ ꓗꓴ ꓖꓶ ꓠꓹ ꓟ꓾ ꓥꓪ ꓡꓰ ꓬꓲ ꓔꓯ ꓠꓴ ꓪꓽ ꓔꓬ ꓗꓪ ꓝꓲ ꓩꓴ ꓡ ꓟ ꓥꓳ꓿ 23 ꓐꓹ ꓐ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓟꓶ ꓟ ꓠꓵ ꓠꓲˍ ꓐꓰ ꓙꓵꓻ ꓠꓲꓹ ꓠꓯꓸꓼ ꓗꓪ꓾ ꓬꓲꓼ ꓤ ꓠꓬꓲ ꓤ ꓐꓴ ꓠꓴ ꓪꓽ ꓠꓬ ꓢꓲ ꓡꓲ ꓟ ꓟꓶ ꓝꓲ꓿ 24 ꓐꓬ ꓡꓰ ꓟꓽ ꓓ ꓟ ꓠꓵ ꓠꓲꓹ ꓡꓰ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓔꓯ ꓠꓲꓹ ꓠꓵ ꓢꓴ ꓥ ꓕ ꓑꓳ ꓔꓯ ꓪꓴ-ꓢ ꓡꓰ ꓣꓱꓽ ꓛꓰ ꓖꓶ ꓡ ꓝꓲ꓿

ꓒꓲ-ꓡꓲ-ꓒꓲ 1

1 ꓙꓲ-ꓢꓴ ꓬꓰ-ꓢꓴ ꓚꓳ ꓑꓸ ꓒꓳ-ꓡꓳ ꓥꓪˍ ꓐꓰ ꓕꓲ-ꓟꓳ-ꓕꓲ-ꓪꓴ ꓡꓰ꓾ ꓒꓲ-ꓡꓲ-ꓒꓲ ꓗꓪ ꓔꓬ ꓟ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓪꓴ-ꓢ ꓦ ꓡꓱ ꓢꓴ ꓐꓴ ꓮꓽ ꓙꓵˍ ꓐꓰ ꓟꓬꓱꓽ ꓡꓳꓸ ꓢꓴ ꓐꓴˍ ꓐꓰ ꓟꓬꓱꓽ ꓙ ꓢꓴ ꓐꓴ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ 2 ꓣꓳ ꓐꓹ ꓐ ꓪꓴ-ꓢˍ ꓐꓰ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 3 ꓠꓴ ꓪꓽ ꓔꓯ ꓮ ꓕꓯꓽ ꓓꓵꓽ ꓙꓽ ꓛꓲ ꓡ ꓠꓬ ꓖꓳ ꓕꓯꓽ ꓠꓴ ꓪꓽ ꓑꓶꓸ ꓓꓴ ꓥꓪ ꓪꓴ-ꓢ ꓔꓯ ꓫꓸ ꓟꓳˍ ꓡꓳ꓿ 4 ꓠꓴ ꓪꓽ ꓮꓽ ꓙꓵ ꓢꓴ ꓐꓱ ꓶ ꓥꓪ ꓠꓬ ꓮ ꓕꓯˍ ꓟꓲ ꓗꓹ ꓛꓲ ꓛꓲˍ ꓡꓰ ꓪꓽ ꓘꓴˍ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓬꓲ ꓪꓴꓸ ꓕꓲ ꓠꓬꓲ ꓗꓪ ꓐꓰ ꓮ ꓟꓶ ꓗꓪ ꓛꓲ꓾ ꓠꓴ ꓪꓽ ꓠꓬ ꓶꓼ ꓓꓳ ꓫꓱꓹ ꓓꓳ ꓐꓯ ꓒꓬꓱ ꓙꓰˍ ꓟ ꓗꓪ ꓥꓪˍ ꓐꓰ ꓑꓯꓹ ꓡꓯꓽ ꓘꓳ ꓢꓴ ꓥ ꓠꓬꓲ ꓥꓪ ꓫꓸ ꓟꓳ ꓔꓬ ꓡꓳ꓿ 6 ꓠꓴ ꓪꓽ ꓠꓯꓸꓼ ꓗꓪ ꓙꓲꓻˍ ꓟ ꓟꓬꓱꓽ ꓬꓰ ꓪꓴꓸ ꓔꓴ ꓢꓴ ꓪꓴ-ꓢ ꓡꓰ꓾ ꓬꓰ-ꓢꓴ ꓙꓲ-ꓢꓴ ꓦꓬꓼ ꓠꓬꓲ ꓗꓪ ꓛꓲ ꓟꓬꓱꓽ ꓖꓳ ꓟ ꓔꓯ ꓬꓰ ꓓꓳ ꓡꓰ ꓝꓲˍ ꓥꓳ꓾ ꓐꓰ ꓥꓪ ꓦꓻ ꓡꓱ ꓐꓳˍ ꓡꓳ꓿ 7 ꓠꓴ ꓪꓽ ꓮꓽ ꓙꓵ ꓢꓴ ꓠꓬ ꓮ ꓕꓯꓽˍ ꓟꓲ ꓥꓪ ꓠꓲꓹ ꓟ ꓗꓪ ꓓꓯꓹ ꓠꓬꓲ꓾ ꓥꓪ ꓠꓬ ꓠꓴ ꓪꓽ ꓐꓱ ꓶ ꓕꓱ ꓡꓱ ꓓꓵꓽ ꓙꓽ ꓙꓲꓽ ꓙꓳˍ ꓡꓳ꓿ ꓞꓳꓹ ꓚ ꓡꓰ ꓥꓪ ꓔꓯ ꓞꓳꓹ ꓞ ꓕꓯˍ ꓟꓲ꓾ ꓶꓼ ꓓꓳ ꓫꓱꓹ ꓓꓳ ꓐꓱ ꓶ ꓒꓶꓻ ꓔꓳꓹ ꓢꓲ ꓬꓲ ꓗꓸ ꓚꓵ ꓐꓯ ꓟꓳꓸ ꓖꓶˍ ꓟ ꓗꓪˍ ꓟꓲ꓾ ꓠꓴ ꓪꓽ ꓮꓽ ꓙꓵ ꓢꓴ ꓠꓬ ꓥꓪˍ ꓐꓰ ꓕꓲꓽ ꓡꓰꓹꓼ ꓪꓴ-ꓢ ꓣꓱꓽ ꓛꓰ ꓟꓬꓱꓽ ꓕꓱ ꓟ ꓗꓪ ꓑꓯꓹ ꓡꓯꓽ ꓘꓳ ꓔꓬ ꓢꓴ ꓐꓴ ꓥꓳ꓿ 8 ꓙꓲ-ꓢꓴ ꓬꓰ-ꓢꓴ ꓫꓱ ꓤ ꓠꓲꓹ ꓠꓯꓸꓼ ꓗꓪ꓾ ꓠꓴ ꓪꓽ ꓮꓽ ꓙꓵ ꓢꓴ ꓔꓯ ꓥꓪ ꓮ ꓘꓶꓻ ꓛꓲ ꓢꓲꓼ ꓙꓬˍ ꓟ ꓔꓯ ꓟꓳꓸ꓾ ꓪꓴ-ꓢ ꓠꓬ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓥ ꓡꓳ꓿ 9 ꓥꓪ ꓠꓬ ꓕꓱ ꓡꓱ ꓪꓽ ꓘꓴ ꓔꓬ ꓥꓳ꓾ ꓢꓷꓸ ꓠꓲꓹˍ ꓐꓰ ꓦꓰꓽ ꓐ ꓡ ꓟ ꓥ ꓕ ꓑꓳꓸ ꓗꓪ꓾ ꓠꓴ ꓪꓽ ꓠꓵ ꓠꓲꓹ ꓮꓽ ꓟꓬꓹ ꓪꓴꓽ ꓡ ꓢꓲ꓾ 10 ꓟꓬꓽ ꓠꓬꓲ ꓙꓲꓻˍ ꓟ ꓔꓯ ꓠꓴ ꓪꓽ ꓦꓰꓽ ꓐ ꓡ ꓢꓲ ꓠꓬꓲ꓾ ꓙꓲ-ꓢꓴ ꓦꓬꓼ ꓠꓬꓲ ꓗꓪ ꓛꓲ꓾ ꓓꓰ ꓖꓴ ꓟꓽ ꓙꓳ ꓙꓳ ꓠꓲꓹ ꓔꓱ ꓠꓲꓹ ꓓꓰˍ ꓟ ꓒꓬꓱꓼ ꓡ ꓠꓹ ꓟ ꓐꓰ꓾ 11 ꓙꓲ-ꓢꓴ ꓬꓰ-ꓢꓴ ꓗꓪ ꓐꓰ ꓠꓴ ꓪꓽ ꓔꓯ ꓠꓬ ꓔꓱꓹ ꓜꓳꓽˍ ꓟ ꓡꓰ ꓬꓰ ꓓꓳ ꓡ ꓟ ꓟꓬꓱꓽ ꓐꓲ ꓡꓰ ꓢꓲ꓾ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓓꓴˍ ꓐꓰ ꓫꓱꓸ ꓖꓶ ꓓꓴ ꓒꓬꓱꓼ ꓡ ꓠꓹ ꓟ ꓪꓽ ꓘꓴ ꓙ ꓔꓬ ꓥꓳ꓿ 12 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓔꓯ ꓗꓷ ꓡꓰˍ ꓟ ꓠꓬ ꓶꓼ ꓓꓳ ꓫꓱꓹ ꓓꓳꓽ ꓟꓬꓽ ꓠꓬꓲ ꓒꓬꓱ ꓙꓰ ꓓꓴ ꓒꓬꓱꓼ ꓡ ꓟ꓾ ꓠꓴ ꓪꓽ ꓔꓯ ꓥꓪ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 13 ꓥꓪ ꓔꓯ ꓞꓳꓹˍ ꓟ ꓠꓬ ꓙꓲ-ꓢꓴ ꓐꓱ ꓶ ꓥ ꓟ꓾ ꓪ ꓔꓲ ꓙ ꓗꓪ ꓟ ꓕꓲ ꓟꓯꓼ ꓙ ꓡꓱꓸꓼˍ ꓐꓰ ꓠꓱꓸ ꓐꓯꓼ ꓢꓴ ꓮꓽ ꓙꓵˍ ꓟꓲ ꓢꓷꓸ ꓡꓰꓳ꓿ 14 ꓖꓳ ꓟ ꓡꓰ ꓟꓽ ꓞꓲ꓾ ꓢꓲ ꓒ ꓠꓯꓸꓼ ꓗꓪ ꓟ ꓬꓲꓼ ꓤ ꓠꓬꓲ ꓤ ꓮꓽ ꓟꓬꓹ ꓕꓲ ꓐꓱ ꓠꓬ꓾ ꓥꓪ ꓞꓳꓹ ꓚ ꓑꓶꓸ ꓓꓴ ꓠꓲꓹ ꓪꓴꓽ ꓡ ꓢꓲ꓾ ꓟꓽ ꓙꓳꓺ ꓙꓳ ꓪꓴ-ꓢ ꓐꓯ ꓘꓶꓽ ꓪꓻ ꓜꓲꓻ ꓚ ꓑꓶꓸ ꓡꓰꓳ꓿ 15 ꓕꓲ ꓐꓱ ꓠꓽ ꓟꓬ ꓦꓯꓸˍ ꓟ ꓐꓰ ꓢꓯꓼ ꓡꓯꓽ ꓘꓳˍ ꓟ ꓗꓪ ꓐꓰ ꓙꓲ-ꓢꓴ ꓟꓸ ꓟꓲꓽ ꓚ ꓔꓬ ꓟ ꓚꓵ ꓚꓵ ꓥ ꓡꓳ꓿ 16 ꓕꓲ ꓧꓳꓽ ꓠꓬ ꓶꓼ ꓓꓳ ꓫꓱꓹ ꓓꓳ ꓟꓬꓱꓽ ꓗꓪ ꓔ ꓙ ꓠꓹ ꓟ ꓥꓪ ꓔꓯ ꓢꓲ ꓚꓰꓸ ꓔ ꓟ ꓬꓲ ꓪꓽ ꓢꓷꓸˍ ꓠꓬꓲ꓾ ꓠꓵ ꓠꓲꓹ ꓗꓪ ꓐꓰ ꓚˍ ꓡꓳ꓿ 17 ꓕꓲ ꓧꓳꓽ ꓠꓽ꓾ ꓞꓳꓹ ꓚ ꓗꓪ ꓥꓪ ꓔꓯ ꓟꓬꓽ ꓠꓬꓲ ꓫꓸ ꓙꓵ ꓝꓲ ꓠꓹ ꓟ ꓓꓵꓽ ꓙꓽ ꓢꓲ꓾ ꓔꓱꓹˍ ꓟ ꓗꓪ ꓐꓰ ꓟꓽ ꓥ ꓥ꓾ ꓠꓲꓹ ꓦꓯꓸˍ ꓟ ꓚꓴꓽ ꓬꓲꓹ ꓗꓪ ꓐꓰ ꓙꓲ-ꓢꓴ ꓟꓸ ꓟꓲꓽ ꓚˍ ꓡꓳ꓿ 18 ꓗꓶꓸˍ ꓟ ꓚꓴꓽ ꓬꓲꓹ ꓗꓪ ꓐꓰ ꓚˍ ꓟꓲ꓾ ꓔꓱꓹˍ ꓟ ꓗꓪ ꓐꓰ ꓚˍ ꓟꓲ꓾ ꓮ ꓡꓲ ꓥ ꓟꓲ ꓙꓲ-ꓢꓴ ꓟꓸ ꓟꓲꓽ ꓚ ꓒꓬꓱ ꓙꓰˍ ꓟ ꓗꓪ ꓐꓰ ꓥꓪ ꓗꓹ ꓛꓲ ꓢꓲ꓾ ꓡꓯꓽ ꓫꓵ ꓗꓹ ꓛꓲˍ ꓥꓳ꓿ 19 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓶꓼ ꓓꓰˍ ꓟ ꓐꓰ ꓬꓰ-ꓢꓴ ꓙꓲ-ꓢꓴ ꓬꓲ ꓦ ꓡꓰ ꓬꓰ ꓙˍ ꓟ ꓗꓪ ꓐꓰ꓾ ꓥꓪ ꓔꓯ ꓕꓱ ꓟꓬ ꓫꓵ ꓔꓳꓹ ꓜꓳꓽˍ ꓟꓲ ꓥꓪ ꓐꓱ ꓶ ꓡꓲꓹ ꓗꓷ ꓟꓶ ꓓꓴ ꓒꓬꓱ ꓡ ꓥꓳ꓾ ꓐꓰ ꓥꓪ ꓢꓷꓸˍ ꓡꓳ꓿ 20 ꓮ ꓡꓲ ꓕꓲ ꓫꓵ ꓗꓪˍ ꓟꓲ ꓥꓪ ꓠꓬ ꓫꓸ ꓔꓳ ꓓꓴ ꓟꓽ ꓙꓳ ꓠꓹ ꓟ꓾ ꓮ ꓕꓯˍ ꓟꓲ ꓦ ꓡꓱ ꓐꓳ ꓢꓲ ꓥꓳ ꓡꓳꓸˍ ꓟ ꓡꓰ ꓐꓰ꓾ ꓮ ꓟꓶˍ ꓟꓲ ꓥꓪ ꓠꓲꓹ ꓪꓴꓽ ꓢꓲ꓾ ꓫꓵꓻ ꓥ ꓟꓲ ꓢꓯꓸ ꓥ ꓟꓲ꓾ ꓥꓪ ꓗꓪ ꓐꓰ ꓙꓲ-ꓢꓴ ꓟꓬꓱ ꓓꓳꓽ ꓓꓳ ꓡ ꓝꓲ ꓠꓲꓹ ꓫꓵˍ ꓡꓳ꓿ 21 ꓮ ꓡꓲꓳ ꓐꓯ ꓠꓬ ꓥꓪ ꓢꓯꓸ ꓔꓬ ꓟ ꓠꓬ ꓙꓲ-ꓢꓴ ꓐꓱ ꓶ ꓢꓯꓸ ꓔꓬ ꓟꓶˍ ꓟ ꓥ ꓢꓲ꓾ ꓥꓪ ꓫꓵꓻˍ ꓟ ꓠꓬ ꓥꓪ ꓐꓱ ꓶ ꓙꓲꓻ ꓖꓴ ꓬꓲ ꓐꓶꓹ ꓟꓶˍ ꓟ ꓥ ꓡꓳ꓿ 22 ꓖꓳ ꓡꓱ ꓥ ꓟꓲ ꓧꓪꓽ ꓖꓳ ꓓꓱ ꓗꓪ ꓥꓪ ꓢꓯꓸ ꓔꓬ ꓢꓰꓽ ꓠꓬ ꓙꓲꓻ ꓖꓴ ꓙꓳˍ ꓟ ꓟꓬꓱꓽ ꓬꓰ ꓪˍ ꓥꓳ꓿ ꓖꓳ ꓡꓱ ꓠꓬꓲ ꓮ ꓡꓲ ꓕꓲ ꓫꓵꓽ ꓟ ꓔꓯ ꓢꓲ ꓠꓯꓹ ꓟ ꓥꓪ ꓟꓽ ꓢꓷꓸꓳ꓿ 23 ꓥꓪ ꓠꓬ ꓕꓱ ꓠꓬꓲꓽ ꓗꓴꓸ ꓚꓸꓼ ꓗꓪ ꓓꓵꓽ ꓙꓽ ꓫꓸ ꓡꓳ꓿ ꓥꓪ ꓠꓽ ꓟꓲ ꓠꓯˍ ꓐꓰ ꓧꓹ ꓗꓷ ꓢꓲ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓔꓬ ꓬꓰ ꓠꓲꓹ ꓫꓵˍ ꓡꓳ ꓫꓵꓽ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ ꓪꓻ ꓜꓲꓻ ꓙꓲꓻˍ ꓟ ꓥ ꓡꓳ꓿ 24 ꓖꓳ ꓡꓱ ꓥ ꓟꓲ ꓥꓪ ꓧꓪꓽ ꓖꓳ ꓓꓱ ꓗꓪ ꓢꓯꓸ ꓔꓬ ꓠꓬ꓾ ꓠꓴ ꓪꓽ ꓐꓱ ꓶ ꓟꓬꓽ ꓠꓬꓲ ꓣꓱꓽ ꓬꓯꓼ ꓖꓴ ꓙꓳˍ ꓡꓳ꓿ 25 ꓖꓳ ꓡꓱ ꓠꓬꓲ ꓥꓪ ꓢꓯꓸ ꓔꓬ ꓪ ꓢꓲ꓾ ꓠꓴ ꓪꓽ ꓙꓵꓻ ꓠꓲꓹ ꓪꓴꓽ ꓡ ꓟꓴ ꓡ ꓓꓴˍ ꓐꓰ ꓗꓹ ꓛꓲ ꓓꓴ ꓐꓱ ꓶ꓾ ꓠꓴ ꓪꓽ ꓮꓽ ꓙꓵ ꓢꓴˍ ꓐꓰ ꓕꓲ ꓪꓺꓼ ꓔꓬ ꓪˍ ꓥꓳ꓾ ꓐꓰ ꓙꓵꓻˍ ꓡꓳ꓿ 26 ꓖꓳ ꓟˍ ꓡꓰ ꓟꓽ ꓞꓲ꓾ ꓠꓴ ꓪꓽ ꓔꓬ ꓗꓪ ꓥꓪ ꓝꓮꓲ ꓕꓲ ꓧꓪꓹ ꓛꓲ ꓡ ꓠꓬ꓾ ꓠꓴ ꓪꓽ ꓠꓽ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓥꓪ ꓑꓶꓸ ꓓꓴ ꓟꓬꓽ ꓠꓬꓲ ꓗꓹ ꓛꓲ ꓓꓴ ꓙꓳˍ ꓥꓳ꓿ 27 ꓮ ꓡꓲ ꓥ ꓟꓲ ꓠꓴ ꓪꓽ ꓠꓬ ꓙꓲ-ꓢꓴ ꓶꓼ ꓓꓳ ꓫꓱꓹ ꓓꓳ ꓔꓯ ꓒꓵꓽ ꓛꓳˍ ꓟ ꓗꓪ ꓞꓳ ꓙꓳ ꓔꓬ꓿ ꓖꓳ ꓡꓱ ꓠꓬ ꓠꓴ ꓪꓽˍ ꓐꓰ ꓥꓪ ꓔꓬ ꓥ ꓟꓲ ꓟꓽ ꓔꓬ ꓥ ꓟꓲ꓾ ꓠꓴ ꓪꓽ ꓓꓳꓽˍ ꓡꓰ ꓑ ꓙꓽ ꓪ ꓥ ꓟꓲ꓾ ꓠꓴ ꓪꓽ ꓠꓬ ꓕꓲ ꓠꓲꓹ ꓕꓲ ꓦˍ ꓡꓰ ꓶꓼ ꓓꓳ ꓫꓱꓹ ꓓꓳ ꓔꓯ ꓒꓵꓽˍ ꓟ ꓙꓵꓻ ꓚꓱꓹ ꓗꓪ ꓢꓯꓼ ꓕꓵꓼ ꓢꓲ ꓦꓰꓼ ꓕꓶ ꓞꓹ ꓟ ꓥꓪ ꓢꓷꓸ ꓡꓰˍ ꓥꓳ꓿ 28 ꓠꓴ ꓪꓽ ꓔꓯ ꓔꓳꓹ ꓢꓴ ꓔꓯ ꓟꓽ ꓙꓳ ꓙꓳ ꓕꓱ ꓡꓱ ꓦꓰꓼ ꓞꓹ ꓟ ꓗꓪ ꓐꓰ꓾ ꓬꓲ ꓪꓽ ꓠꓬ ꓟꓶꓽ ꓡꓰ ꓢꓴ ꓥ ꓟ ꓟꓳꓸ ꓖꓶ ꓓꓳ ꓡ ꓢꓲ꓾ ꓠꓴ ꓪꓽ ꓠꓽ ꓪꓴ-ꓢ ꓗꓪ ꓐꓰ ꓚꓬꓴ ꓟꓶ ꓢꓴ ꓥ ꓡꓳ꓾ ꓐꓰ ꓢꓷꓸ ꓡꓰ ꓓꓴ ꓒꓬꓱ ꓡ ꓥꓳ꓿ 29 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓙꓲ-ꓢꓴ ꓑꓶꓸ ꓓꓴ ꓖꓶ ꓔ ꓟ ꓣꓱꓽ ꓛꓰ ꓠꓬ꓾ ꓬꓲ ꓔꓯ ꓙꓵꓻ ꓠꓹ ꓟˍ ꓡꓰ ꓟꓽ ꓞꓲ꓾ ꓬꓲ ꓐꓱ ꓶ ꓫꓸ ꓙꓵ ꓠꓹ ꓟˍ ꓟꓲ ꓥ ꓡꓳ꓿ 30 ꓖꓳ ꓡꓱ ꓠꓬꓲ ꓠꓴ ꓪꓽˍ ꓟꓲ ꓥꓪˍ ꓐꓰ ꓕꓲꓽ ꓡꓰꓹꓼ ꓛꓴꓽ ꓙꓳ ꓢꓴ ꓔꓯ ꓔꓳꓹ ꓡꓯꓽ ꓘꓳ ꓔꓬ ꓟ ꓥ ꓡꓳ꓿ ꓧꓶꓸ ꓕꓯ ꓥꓪ ꓮ ꓡꓲ ꓔꓳꓹ ꓡꓯꓽ ꓘꓳ ꓗꓷ ꓟ ꓠꓴ ꓪꓽ ꓢꓷꓸ ꓠꓬꓲ ꓟ ꓡꓰ ꓐꓰ꓾ ꓮ ꓟꓶˍ ꓟꓲ ꓬꓲ ꓖꓳ ꓡꓱ ꓥ ꓟ ꓠꓴ ꓪꓽ ꓑ ꓙꓽ ꓐꓷˍ ꓥꓳ꓿

ꓒꓲ-ꓡꓲ-ꓒꓲ 2

1 ꓠꓴ ꓪꓽ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓠꓬꓲ ꓢꓯꓼ ꓖꓶ ꓡꓯꓽ ꓘꓳ ꓓꓴˍ ꓐꓰ꓾ ꓠꓵ ꓠꓲꓹ ꓗꓪ ꓗꓴ ꓖꓶꓽ ꓡꓯꓽ ꓘꓳ ꓓꓴˍ ꓐꓰ꓾ ꓢꓲ-ꓫꓬ-ꓟ-ꓦ ꓗꓪ ꓙ ꓡꓯꓽ ꓘꓳˍ ꓟ ꓐꓰ ꓠꓲꓹ ꓟ ꓜꓲꓺˍ ꓟ ꓐꓰ꓾ ꓫꓱꓸ ꓤ ꓡꓯꓽ ꓘꓳˍ ꓟ ꓙꓳˍ ꓕꓯ ꓠꓽ꓾ 2 ꓕꓲ ꓠꓲꓹ ꓕꓲ ꓪꓽ ꓬꓰ ꓢꓲ꓾ ꓠꓵ ꓠꓲꓹ ꓕꓲꓽ ꓡꓰꓹꓼ ꓙꓳ ꓢꓲ ꓠꓬꓲ꓾ ꓕꓲ ꓠꓲꓹ ꓕꓲ ꓦ ꓬꓰˍ ꓟ ꓗꓪ ꓐꓰ ꓥꓪ ꓗꓹ ꓛꓲ ꓠꓲꓹ ꓐꓲ ꓡ ꓝꓲ꓿ 3 ꓮꓸ ꓫꓵ ꓗꓪˍ ꓟꓲ ꓚꓲ ꓛꓬ ꓙꓲ ꓖꓴ ꓟꓶ ꓠꓹ ꓟ ꓡꓰ ꓗꓪꓺ ꓡꓯꓽ ꓘꓳˍ ꓟ ꓐꓰ ꓟꓬꓱ ꓓꓳꓽ ꓬꓲ ꓖꓳꓽ ꓧꓪˍ ꓟ ꓕꓽ ꓬꓰ꓿ ꓮꓽ ꓟ ꓥ ꓟꓲ ꓙ ꓣꓳꓽˍ ꓟ ꓠꓲꓹ ꓟ ꓡꓰ ꓚꓲ ꓛꓬ ꓕꓯꓽ ꓢꓲ ꓢꓴꓻ ꓔꓯ ꓪꓻ ꓜꓲꓻ ꓒꓵꓽˍ ꓟ ꓚꓬꓹ꓿ 4 ꓠꓴ ꓪꓽ ꓮꓽ ꓟ ꓥ ꓟꓲ ꓚꓲ ꓛꓬ ꓙꓲ ꓖꓴ ꓐꓱ ꓶˍ ꓡꓰ ꓕꓽ ꓓꓵꓽ ꓙ꓿ ꓢꓴ ꓐꓱ ꓶˍ ꓟꓲ ꓓꓵꓽ ꓙꓽ ꓙ꓿ 5 ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓓꓯꓹ ꓟ ꓠꓲꓹ ꓟ ꓕꓱ ꓟ ꓠꓬ ꓠꓴ ꓪꓽ ꓠꓯꓸꓼ ꓗꓪˍ ꓟꓲ ꓓꓯꓹ ꓝꓲ꓿ 6 ꓬꓲ ꓠꓬ ꓪꓴ-ꓢ ꓒꓬꓱꓽ ꓙꓳ ꓞꓹ ꓥ ꓟꓲ꓾ ꓪꓴ-ꓢˍ ꓐꓰ ꓔꓱꓺ ꓪꓴꓸꓼ ꓥ ꓟ ꓟꓬꓱ ꓓꓳꓽ ꓔꓯ ꓩꓴ ꓗꓷ ꓟꓽ ꓬꓯꓼ꓾ ꓐꓰ ꓟꓽ ꓓꓵꓽ ꓙꓽ ꓙ꓾ 7 ꓬꓲ ꓠꓬ ꓚꓲ ꓛꓬ ꓔꓯ ꓧꓳꓸ ꓩꓴ ꓗꓷ ꓢꓲ꓾ ꓚꓳ ꓑꓸ ꓒꓬꓱꓽ ꓣꓴ ꓢꓲ ꓠꓬꓲ ꓞꓳ ꓤ ꓒꓬꓱꓽ ꓶꓻ ꓡꓰꓳ꓿ 8 ꓬꓲ ꓠꓬ ꓞꓳ ꓤ ꓒꓬꓱꓽ ꓙꓳ ꓞꓹ ꓢꓲ꓾ ꓙ ꓣꓳ ꓢꓲ ꓠꓬꓲ꓾ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓫꓵꓻˍ ꓗꓪ ꓛꓲ ꓒꓵꓽ ꓛꓳ ꓗꓷꓳ꓿ 9 ꓖꓳ ꓟ ꓑꓶ ꓓꓴ ꓪꓴ-ꓢ ꓡꓰ ꓬꓲ ꓔꓯ ꓮ ꓟꓴꓹ ꓟꓴ ꓓꓳꓹ ꓟꓴ ꓗꓷ ꓢꓲ꓾ ꓟꓬꓱ ꓥ ꓕ ꓑꓳꓸ ꓕꓯꓽ ꓢꓲ ꓪꓴꓽˍ ꓟ ꓟꓬꓱ ꓕꓲ ꓟ ꓖꓶꓽ ꓗꓷꓳ꓿ 10 ꓕꓱ ꓟ ꓗꓪ ꓐꓰ ꓟꓴꓽ ꓗꓪ ꓕꓯ ꓢꓲ ꓗꓪ ꓔꓬ ꓢꓴˍ ꓐꓰ꓾ ꓟꓲ ꓠꓯ ꓗꓪ ꓔꓬ ꓢꓴˍ ꓐꓰ꓾ ꓟꓲ ꓠꓯ ꓠꓯꓸ ꓘꓪ ꓔꓬ ꓢꓴ ꓮꓽ ꓙꓵ ꓠꓬ ꓬꓰ-ꓢꓴ ꓟꓬꓱ ꓑꓶꓸ ꓓꓴ ꓛꓲ ꓝꓲꓸ ꓖꓶ ꓢꓲ꓾ 11 ꓐꓹ ꓐ ꓪꓴ-ꓢ ꓔꓯ ꓟꓬꓱ ꓓꓳꓽ ꓟꓶ ꓝꓲ ꓠꓹ ꓟ꓾ ꓬꓰ-ꓢꓴ ꓙꓲ-ꓢꓴ ꓠꓬ ꓢꓲ ꓒꓽ ꓥꓳ꓾ ꓐꓰ ꓡꓺ ꓛꓱ ꓥ ꓕ ꓑꓳꓸ ꓣꓷꓠꓸ ꓠꓹ ꓟ ꓥ ꓡꓳ꓿ 12 ꓖꓳ ꓡꓱ ꓠꓬꓲ ꓥꓪ ꓠꓲꓹ ꓠꓵ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓮ ꓕꓯˍ ꓟꓲ ꓒꓵꓽ ꓛꓳˍ ꓟ ꓡꓰ ꓐꓰ꓾ ꓥꓪ ꓠꓬ ꓠꓴ ꓪꓽˍ ꓐꓰ ꓔꓬ ꓕꓯˍ ꓡꓰ ꓟꓽ ꓞꓲ꓾ ꓮ ꓟꓶ ꓥꓪ ꓟꓽ ꓔꓬ ꓕꓯ ꓥ ꓟꓲ ꓪꓻ ꓜꓲꓻ ꓮꓽ ꓘꓶꓸ ꓒꓵꓽ ꓛꓳ ꓢꓲ꓾ ꓠꓴ ꓪꓽ ꓢꓯꓼ ꓟꓬ ꓝꓸ ꓟꓶˍ ꓟ ꓠꓬ ꓙꓳꓺ ꓠꓬꓲ ꓛꓱꓽ ꓠꓬꓲ ꓬꓰ ꓓꓳ ꓡꓯ꓿ 13 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓲꓹ ꓒꓴˍ ꓟ ꓠꓲꓹ ꓡꓶꓽ ꓔꓯ꓾ ꓠꓴ ꓪꓽ ꓠꓲꓹˍ ꓟꓲ ꓠꓲꓹ ꓫꓵ ꓢꓲ꓾ ꓬꓰˍ ꓟꓲ ꓬꓰ ꓐ ꓡ ꓝꓲ ꓠꓹ ꓟ ꓠꓴ ꓪꓽ ꓠꓯꓸꓼ ꓗꓪ ꓢꓯꓼ ꓕꓵꓼ ꓢꓴ ꓠꓬ ꓪꓴ-ꓢ ꓬꓲ ꓥ ꓡꓳ꓿ 14 ꓠꓴ ꓪꓽ ꓠꓬ ꓛꓬꓻ ꓖꓴˍ ꓐꓰ ꓠꓲꓹ ꓟ ꓠꓬꓲꓽ ꓔꓱꓹ ꓣꓱˍ ꓟ ꓟꓽ ꓙꓳ ꓙꓳ꓾ ꓖꓳꓼˍ ꓟ ꓐꓰ ꓡꓯꓽ ꓧꓻˍ ꓟ ꓕꓲ ꓤꓶꓻ ꓢꓴ ꓗꓳꓺ ꓡꓳ ꓗꓪ꓾ ꓓꓰ ꓖꓴ ꓟꓽ ꓙꓳ ꓟ꓾ ꓢꓲ ꓫꓬˍ ꓟ ꓪꓴ-ꓢ ꓬꓲ ꓤ ꓠꓱ ꓐꓴ ꓒꓬꓱꓼ ꓡ ꓠꓹ ꓟ꓾ ꓮꓸ ꓫꓵꓽ ꓗꓪˍ ꓟꓲ ꓱ'ꓽ ꓠꓱꓽˍ ꓟ ꓐꓰ ꓐꓯ ꓔꓳꓹ ꓡꓯꓽ ꓘꓳˍ ꓟ ꓟꓽ ꓙꓳ ꓙꓳ ꓬꓰ꓿ ꓠꓴ ꓪꓽ ꓠꓬ ꓟꓲ ꓠꓯ ꓗꓪ ꓗꓴ ꓤ ꓡꓰ ꓐꓰ ꓣꓳꓺ ꓔꓬ ꓟ ꓠꓬꓲ ꓟꓳꓻ ꓓꓴ ꓥ ꓠꓬꓲ꓾ 16 ꓢꓯꓼ ꓟꓬ ꓐꓯ ꓘꓶꓽ ꓔꓯ ꓕꓶꓻ ꓕꓶˍ ꓡꓰ ꓣꓴ ꓔ꓿ ꓕꓱ ꓟ ꓠꓬ ꓙꓲ-ꓢꓴ ꓦꓬꓼ ꓠꓬꓲ ꓗꓪ꓾ ꓥꓪ ꓔꓷꓹˍ ꓟ ꓐꓰ ꓥꓪ ꓢꓯꓼ ꓕꓵꓼ ꓪꓴꓽ ꓧꓶˍ ꓟ ꓠꓬ ꓮꓽ ꓔꓳˍ ꓡꓰ ꓟꓽ ꓥ꓾ ꓐꓰ ꓥꓪ ꓠꓲꓹ ꓘꓪ ꓫꓵ ꓓꓴ ꓙꓳ ꓠꓹ ꓟ ꓥ ꓡꓳ꓿ 17 ꓠꓴ ꓪꓽ ꓙꓵ ꓠꓲꓹˍ ꓐꓰ ꓣꓱꓽ ꓙ ꓟ ꓟꓬꓱꓽ ꓔꓲꓺ ꓓꓴ ꓕꓯ ꓢꓲ ꓗꓪ꓾ ꓥꓪ ꓢꓯꓼ ꓟꓬ ꓔꓯ ꓧꓳꓸ ꓔꓲꓺ ꓓꓴ ꓡꓰ ꓐꓰ ꓔꓲꓺ ꓗꓷ ꓠ ꓗꓹˍ ꓟꓲ꓾ ꓥꓪ ꓠꓲꓹ ꓘꓪ ꓫꓵ ꓢꓲ꓾ ꓠꓴ ꓪꓽ ꓮꓽ ꓙꓵ ꓢꓴˍ ꓐꓰ ꓕꓲꓽ ꓡꓰꓹꓼ ꓗꓹ ꓛꓲˍ ꓥꓳ꓿ 18 ꓖꓳ ꓟ ꓡꓰ ꓐꓰ ꓠꓴ ꓪꓽˍ ꓟꓲ ꓗꓹ ꓛꓲꓽ ꓢꓲ ꓥꓪˍ ꓐꓰ ꓕꓲ ꓡꓰꓹꓼ ꓠꓲꓹ ꓒꓴ ꓡꓯ꓿ 19 ꓥꓪ ꓠꓬ ꓠꓴ ꓪꓽ ꓮ ꓡꓲ ꓞꓳ ꓙꓳ ꓔꓬ ꓟ ꓓꓳꓽ ꓑ ꓙꓽ ꓢꓲ ꓠꓲꓹ ꓗꓴ ꓟꓶ ꓠꓹ ꓟ꓾ ꓕꓲ-ꓟꓳ-ꓕꓲ-ꓪꓴ ꓔꓯ ꓠꓴ ꓪꓽ ꓔꓬ ꓗꓪ ꓮꓸ ꓟꓲꓸ ꓝꓲ ꓩꓴ ꓡ ꓠꓹ ꓟ꓾ ꓢꓲ ꓒ ꓬꓰ-ꓢꓴ ꓠꓯꓸꓼ ꓗꓪ ꓥꓳ ꓡꓳꓸ ꓔꓬ ꓥꓳ꓿ 20 ꓠꓴ ꓪꓽ ꓮ ꓡꓲ ꓞꓳ ꓙꓳˍ ꓟ ꓔꓯ꓾ ꓚꓵ ꓚꓵ ꓠꓲꓹ ꓟ ꓥꓳꓺ ꓢꓴ ꓬꓲˍ ꓡꓰ ꓐꓰ ꓥꓪ ꓠꓱꓸ ꓐꓯꓼ ꓟꓽ ꓙꓳ꓿ 21 ꓠꓱꓸ ꓐꓯꓼ ꓢꓴ ꓠꓽ ꓚꓲ ꓛꓬ ꓙꓲ ꓖꓴ ꓐꓱ ꓶˍ ꓡꓰꓽ ꓓꓵꓽ ꓙꓽ ꓢꓲ꓾ ꓙꓲ-ꓢꓴ ꓬꓰ-ꓢꓴ ꓐꓱ ꓶ ꓟꓽ ꓓꓵꓽ ꓙ꓿ 22 ꓖꓳ ꓡꓱ ꓥ ꓟꓲ ꓕꓲ-ꓟꓳ-ꓕꓲ-ꓪꓴ ꓠꓽ ꓦ ꓡꓱ ꓐꓳˍ ꓟ ꓔꓯ ꓠꓴ ꓪꓽ ꓢꓷꓸˍ ꓡꓳ꓿ ꓤ ꓠꓱ ꓠꓬ ꓬꓲ ꓐꓹ ꓐꓽˍ ꓐꓰ ꓕꓲ ꓪꓺꓼ ꓢꓯꓼ ꓕꓵꓼˍ ꓟ ꓡꓰ ꓐꓰ꓾ ꓬꓲ ꓠꓬ ꓶꓼ ꓓꓳ ꓫꓱꓹ ꓓꓳ ꓟꓬꓱꓽ ꓗꓪ ꓥꓪˍ ꓐꓰ ꓕꓲꓽ ꓡꓰꓹꓼ ꓣꓱꓽ ꓙ ꓢꓴ ꓥꓳ꓿ 23 ꓖꓳ ꓡꓱ ꓠꓬꓲ ꓥꓪ ꓔꓯ ꓮ ꓡꓲ ꓗꓷ ꓡꓰ ꓠꓯꓹ ꓟ ꓒꓻ ꓢꓷꓸ ꓗꓷ ꓟꓶꓽ ꓕꓯ꓾ ꓬꓲ ꓔꓯ ꓠꓲꓹ ꓞ ꓝꓲ ꓩꓴ ꓡ ꓠꓹ ꓟ ꓥꓳ ꓡꓳꓸ ꓔꓬ ꓥꓳ꓿ 24 ꓟꓶ ꓤ ꓟꓽ ꓥ ꓠꓬ ꓥꓪ ꓚꓲ ꓛꓬˍ ꓟꓲ ꓡ ꓪˍ ꓥꓳ꓾ ꓐꓰ ꓢꓲ ꓒ ꓠꓯꓸꓼ ꓗꓪ ꓦ ꓡꓱ ꓐꓳˍ ꓡꓳ꓿ 25 ꓥꓪ ꓠꓬ ꓬꓲ-ꓑ-ꓩꓴ-ꓓꓲ-ꓕꓴ ꓔꓯˍ ꓟꓲ ꓠꓴ ꓪꓽ ꓔꓬ ꓗꓪ ꓬꓲꓼ ꓡ ꓝꓲ ꓠꓹ ꓟ ꓓꓵꓽ ꓙˍ ꓡꓳ꓿ ꓬꓲ ꓠꓬ ꓥꓪ ꓠꓬꓲ ꓤˍ ꓐꓰ꓾ ꓥꓪ ꓟꓬꓱꓽ ꓬꓰ ꓛꓳꓽ ꓒꓯꓹˍ ꓐꓰ꓾ ꓟꓯꓼ ꓬꓰ ꓛꓳꓽ ꓒꓯꓹˍ ꓐꓰ꓾ ꓥꓪ ꓣꓱꓽ ꓬꓯꓼˍ ꓟ ꓗꓪ꓾ ꓥꓪ ꓔꓯ ꓬꓰ ꓙ ꓝꓲ ꓠꓹ ꓟ꓾ ꓠꓴ ꓪꓽ ꓝꓲ ꓓꓴˍ ꓐꓰ ꓣꓱꓽ ꓙ ꓢꓴ ꓥ ꓡꓳ꓿ 26 ꓬꓲ ꓠꓽ ꓠꓴ ꓪꓽ ꓮꓽ ꓙꓵ ꓢꓴ ꓔꓯ ꓢꓲꓼ ꓙꓬ ꓔꓬ ꓢꓲ꓾ ꓬꓲ ꓠꓻ ꓔꓬ ꓟ ꓓꓳꓽ ꓔꓯ ꓠꓴ ꓪꓽ ꓑ ꓙꓽ ꓗꓷ ꓟ ꓬꓲ ꓢꓷꓸ ꓡꓰ ꓕꓯ꓾ ꓬꓲˍ ꓟꓲ ꓠꓴ ꓪ ꓐꓱ ꓶ ꓠꓲꓹ ꓟ ꓫꓸ ꓡꓰꓳ꓿ 27 ꓬꓲ ꓠꓽ ꓚꓵ ꓚꓵ ꓮꓽ ꓡ ꓫꓵꓻ ꓠ ꓛꓲ ꓠꓻ ꓗꓷꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓬꓲ ꓔꓯ ꓫꓱꓸ ꓤ ꓗꓷꓳ꓿ ꓬꓲ ꓔꓯˍ ꓡꓰꓽ ꓟꓽ ꓞꓲ꓾ ꓥꓪ ꓠꓲꓹ ꓟ ꓫꓸˍ ꓟ ꓕꓯ ꓢꓲ ꓠꓲꓹ ꓟ ꓫꓸˍ ꓟ ꓟꓽ ꓗꓷ ꓡꓰ ꓠꓹ ꓟ ꓥꓪ ꓔꓯˍ ꓟꓲ ꓪꓴ-ꓢ ꓫꓱꓸ ꓤ ꓢꓲ ꓬꓲ ꓔꓯ ꓓꓻ ꓡꓰ ꓝꓲꓳ꓿ 28 ꓖꓳ ꓡꓱ ꓠꓬꓲ ꓠꓴ ꓪꓽ ꓬꓲ ꓔꓯ ꓝꓮꓲ ꓕꓲ ꓧꓪ ꓟꓳˍ ꓕꓯ ꓗꓹ ꓛꓲ ꓡꓰ ꓢꓲ꓾ ꓥꓪ ꓓꓵꓽ ꓙꓽ ꓪꓴꓽ ꓧꓶꓻˍ ꓟˍ ꓟꓲ ꓡꓳꓻ ꓡꓰ ꓠꓹ ꓟ ꓥꓪ ꓠꓬ ꓬꓲ ꓔꓯ ꓬꓲꓼ ꓡ ꓝꓲ ꓠ ꓟ ꓪꓻ ꓜꓲꓻ ꓠꓲꓹ ꓡꓱˍ ꓡꓳ꓿ 29 ꓖꓳ ꓡꓱ ꓠꓬꓲ ꓢꓲ ꓒ ꓠꓯꓸꓼ ꓗꓪ ꓗꓹ ꓛꓲ ꓛꓲˍ ꓡꓰ ꓬꓲ ꓔꓯ ꓘꓳꓻ ꓣꓴ꓿ ꓕꓱ ꓡꓱ ꓡꓳ ꓫꓵꓽ ꓡꓽ ꓞꓳ ꓔꓯ ꓠꓽ ꓒꓵꓽ ꓙꓲꓽ ꓙꓳˍ ꓡꓳ꓿ 30 ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓙꓲ-ꓢꓴ ꓟꓬꓱꓽ ꓑꓶ ꓓꓴ ꓮꓽ ꓡ ꓫꓵꓻ ꓗꓪ ꓛꓲ꓾ ꓠꓴ ꓪꓽ ꓥꓪ ꓔꓯ ꓣꓱꓽ ꓙ ꓟꓽ ꓡꓳꓼ ꓟ ꓗꓪ ꓐꓲ ꓡꓰ ꓝꓲ ꓠꓹ ꓟ ꓫꓵꓻ ꓗꓳ ꓑꓵꓺ ꓗꓷꓳ꓿

ꓒꓲ-ꓡꓲ-ꓒꓲ 3

1 ꓝꓮꓲ ꓕꓲ ꓘꓶ ꓠꓬ ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓢꓲ ꓒ ꓠꓯꓸꓼ ꓗꓪ ꓗꓹ ꓛꓲ꓿ ꓐꓯ ꓘꓶꓽ ꓕꓱ ꓟ ꓠꓴ ꓪꓽ ꓔꓯ ꓥꓪ ꓝꓮꓲ ꓐꓳ ꓖꓶ ꓠꓹ ꓟ ꓥꓪ ꓐꓱ ꓶ ꓫꓸ ꓟ ꓟꓽ ꓥ꓿ ꓥꓪ ꓕꓱ ꓡꓱ ꓐꓯˍ ꓟ ꓠꓬ ꓠꓴ ꓪꓽ ꓔꓯ ꓕꓶꓻ ꓡꓰ ꓝꓲ ꓠꓹ ꓟ ꓥ ꓡꓳ꓿ 2 ꓶꓺˍ ꓟ ꓗ ꓫꓵ ꓟꓽ ꓓ ꓟ ꓞꓽ ꓛꓳ ꓝꓲ ꓠꓲꓹ ꓫꓵˍ ꓟ꓾ ꓥꓶˍ ꓟ ꓟꓬꓱꓽ ꓬꓰ ꓢꓴ ꓮꓸ ꓠꓽ ꓖꓳ ꓕꓲ ꓧꓳꓽ ꓔꓯ ꓤ ꓟꓳ꓿ 3 ꓪꓴ-ꓢ ꓦ ꓗꓪ ꓐꓰ ꓪꓴꓸ ꓓꓵ ꓕꓱꓼ ꓢꓲ꓾ ꓙꓲ-ꓢꓴ ꓬꓰ-ꓢꓴ ꓔꓯ ꓪꓽ ꓪꓴꓽ ꓘꓳꓹ ꓢꓲ ꓠꓬꓲ꓾ ꓧꓪꓽ ꓖꓳ ꓓꓱ ꓗꓪ ꓟ ꓞꓳ ꓚꓱꓹ ꓪꓽ ꓚꓱꓹ ꓔꓯ ꓟꓽ ꓦ ꓡꓱ ꓢꓴ ꓣꓳꓽ ꓠꓬ ꓶꓺ ꓔ ꓢꓴ ꓬꓲ ꓚꓵ ꓟ ꓥ ꓡꓳ꓿ 4 ꓧꓪꓽ ꓖꓳ ꓓꓱ ꓗꓪ ꓟ ꓞꓳ ꓚꓱꓹ ꓪꓽ ꓚꓱꓹ ꓔꓯ ꓠꓱꓸ ꓐꓯꓼ ꓢꓴ ꓦ ꓡꓱ ꓐꓳ ꓓꓻˍ ꓟ ꓙꓳˍ ꓕꓯ ꓠꓽ꓾ ꓥꓪ ꓪꓻ ꓜꓲꓻ ꓙꓳˍ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓬꓲ-ꓢꓷ-ꓡꓰ ꓕꓲ ꓫꓵꓽ꓾ ꓐꓰ-ꓠꓬ-ꓟꓲ ꓕꓲ ꓪꓳꓼ ꓟ ꓦꓲ-ꓐꓱ-ꓣꓴ ꓡꓽ ꓞꓳ ꓚꓵ ꓥ ꓢꓲ꓾ ꓦꓰꓼ ꓠꓬꓲ ꓕꓲ ꓠꓬꓲ ꓗꓪ ꓶꓺˍ ꓟ ꓗ ꓫꓵ ꓟꓶ ꓗꓷ ꓢꓴ ꓥꓳ꓿ ꓙꓵꓽ ꓗ ꓔꓯ ꓟꓳꓸ ꓐꓯˍ ꓠꓬ꓾ ꓥꓪ ꓠꓽ ꓒ-ꓡꓲ-ꓢꓷ ꓡꓽ ꓞꓳ ꓥ ꓡꓳ꓿ 6 ꓠꓲꓹ ꓟ ꓡꓱˍ ꓟ ꓔꓯꓸ ꓟꓳꓸ ꓐꓯˍ ꓠꓬ꓾ ꓥꓪ ꓠꓽ ꓘꓴ ꓜꓲ ꓞꓳ ꓔꓯ ꓗꓸ ꓧꓪ ꓢꓴ ꓥ ꓢꓲ꓾ ꓙꓵꓽ ꓗ ꓗꓪ ꓔꓱꓹ ꓜꓳꓽˍ ꓟ ꓔꓯ ꓟꓳꓸ ꓐꓯˍ ꓠꓬ ꓓꓰ ꓖꓴ ꓟꓽ ꓙꓳ ꓢꓴ ꓥ ꓡꓳ꓿ 7 ꓖꓳ ꓡꓱ ꓥ ꓟꓲ ꓧꓶꓸ ꓕꓯ ꓥꓪ ꓐꓱ ꓶ ꓙꓲ ꓖꓴ ꓙꓳˍ ꓡꓳ꓾ ꓐꓰ ꓓꓵꓽ ꓙꓽ ꓔ ꓟ ꓔꓯ ꓠꓬ꓾ ꓮ ꓟꓶ ꓠꓽ ꓥꓪ ꓡꓰ ꓙꓲ-ꓢꓴ ꓐꓱ ꓶ ꓒꓲꓼ ꓬꓰ ꓓꓴ ꓚꓬꓹ ꓗꓷꓳ꓿ 8 ꓚꓵ ꓚꓵ ꓙꓲ-ꓢꓴ ꓬꓰ-ꓢꓴ ꓥꓪ ꓢꓲ ꓒꓽ ꓔꓯ ꓢꓷꓸˍ ꓟ ꓠꓬ ꓮꓸ ꓓꓲꓽ ꓒꓵꓽˍ ꓟ ꓥ ꓠꓬꓲ꓾ ꓥꓪ ꓠꓬ ꓮꓽ ꓙꓵ ꓡꓱS ꓒꓲꓼ ꓬꓰ ꓓꓴ ꓚꓬꓹ ꓗꓷꓳ꓿ ꓥꓪ ꓠꓬ ꓙꓲ-ꓢꓴ ꓟꓶ ꓡꓰ ꓠꓹ ꓟ꓾ ꓬꓲ ꓐꓱ ꓶ ꓥꓪ ꓮꓽ ꓙꓵ ꓡꓱS ꓑꓹ ꓒꓲꓼ ꓗꓷ ꓢꓲ꓾ ꓡꓳ ꓗꓷ ꓓꓴˍ ꓡꓰꓽ ꓚꓬꓹ ꓔ ꓡꓳ꓿ 9 ꓕꓱ ꓟ ꓠꓬ ꓥꓪ ꓠꓽ ꓬꓲ ꓠꓯS ꓗꓪ ꓔꓬ ꓢꓴ ꓒꓬꓱꓼ ꓡ ꓢꓲ꓾ ꓙꓵꓽ ꓗ ꓗꓪ ꓐꓰ ꓡꓻˍ ꓟ ꓚꓲ ꓛꓬ ꓔꓱꓹ ꓜꓳꓽˍ ꓟ ꓟꓽ ꓥ ꓥ꓾ ꓙꓲ-ꓢꓴ ꓔꓯ ꓙꓵꓻˍ ꓟ ꓗꓪ ꓐꓰ ꓟꓶˍ ꓟ ꓔꓱꓹ ꓜꓳꓽˍ ꓟ ꓥ ꓡꓳ꓿ ꓔꓱꓹ ꓜꓳꓽˍ ꓟ ꓕꓱ ꓟ ꓠꓬ꓾ ꓙꓵꓻ ꓠꓲꓹ ꓑꓶꓸ ꓓꓴ ꓪꓴ-ꓢ ꓗꓪ ꓐꓰ ꓟꓶˍ ꓟ ꓥ ꓡꓳ꓿ 10 ꓥꓪ ꓠꓬ ꓙꓲ-ꓢꓴ ꓔꓯ ꓢꓷꓸ ꓡꓰ ꓢꓲ꓾ ꓬꓲ ꓢꓯꓸ ꓬꓲꓼ ꓡ ꓟ ꓪꓽ ꓠꓬꓲˍ ꓟ ꓐꓰ꓾ ꓬꓲ ꓫꓸ ꓙꓵꓻˍ ꓟ ꓔꓯˍ ꓟꓲ ꓑꓯꓹ ꓟꓶ ꓡꓰ ꓢꓲ ꓠꓬꓲ꓾ 11 ꓬꓲ ꓫꓵꓻˍ ꓟ ꓒꓬꓱꓽ ꓥꓪ ꓶꓻ ꓡꓰ ꓗꓸ ꓠꓯ꓾ ꓥꓪˍ ꓟꓲ ꓫꓵꓻˍ ꓟ ꓗꓪ ꓐꓰ ꓢꓯꓸˍ ꓟ ꓗꓪ ꓓꓵꓽ ꓡꓰ ꓟꓶ ꓠꓹ ꓟ ꓥꓪ ꓥꓳ ꓡꓳꓸ ꓔꓬ ꓡꓳ꓿ 12 ꓥꓪ ꓠꓬ ꓮ ꓟꓶˍ ꓡꓰ ꓟꓶ ꓡꓰꓳ꓾ ꓮ ꓟꓶˍ ꓡꓰ ꓜꓳꓽ ꓓꓰ ꓡꓰꓳ꓾ ꓐꓯˍ ꓟ ꓠꓽ ꓟꓽ ꓥ꓿ ꓙꓲ-ꓢꓴ ꓬꓰ-ꓢꓴ ꓠꓬ ꓥꓪ ꓔꓯ ꓡꓯꓼ ꓫꓴ ꓟꓶ ꓡꓰ ꓝꓲ ꓠꓲꓹ ꓫꓵ ꓢꓲ ꓥꓪ ꓔꓯ ꓚꓬꓴ ꓗꓷ ꓠꓬꓲ꓾ ꓥꓪ ꓠꓬ ꓡꓯꓼ ꓫꓴ ꓖꓳ ꓟ ꓟꓶ ꓡꓰ ꓠꓹ ꓟ ꓥꓳ ꓡꓳꓸ ꓢꓲ ꓔꓷꓹ ꓙꓰ ꓔꓬ ꓟ ꓥ ꓡꓳ꓿ 13 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓥꓪ ꓠꓬ ꓟꓶ ꓗꓷꓳ꓾ ꓐꓰ ꓟꓽ ꓚꓬꓹ ꓢꓰ꓿ ꓖꓳ ꓡꓱ ꓥ ꓟꓲ ꓥꓪ ꓠꓽ ꓕꓲ ꓫꓵꓽˍ ꓡꓰ ꓬꓰˍ ꓡꓳ꓿ ꓗꓸ ꓠꓯꓸ ꓢꓲ ꓟ ꓔꓯ ꓟꓲ ꓡꓰ ꓢꓲ꓾ ꓟꓲꓸ ꓙꓬꓽ ꓔꓯ ꓟꓳꓸ ꓡꓯꓼ ꓢꓲ ꓠꓬꓲ꓾ 14 ꓪꓴ-ꓢ ꓡꓰ ꓕꓯꓽ ꓢꓲ ꓗꓪ ꓐꓰ ꓙꓲ-ꓢꓴ ꓠꓯꓸꓼ ꓗꓪ ꓥꓪ ꓔꓯ ꓘꓴꓻˍ ꓟ ꓡꓯꓼ ꓫꓴ ꓟꓶ ꓠꓹ ꓟ꓾ ꓥꓪ ꓠꓬ ꓧꓪꓸ ꓡꓰ ꓖꓴ ꓔꓯ ꓟꓳꓸ ꓑꓵꓺ ꓙꓰ ꓔꓬ ꓡꓳ꓿ 15 ꓖꓳ ꓡꓱ ꓠꓬꓲ ꓣꓳꓽ ꓦ ꓗꓪ ꓪꓴꓽ ꓓꓰ ꓡꓰ ꓢꓴ ꓗꓳꓺ ꓡꓳ ꓗꓪ ꓠꓬ ꓕꓱ ꓡꓱ ꓫꓵꓽ ꓠꓲꓹ ꓟ ꓣꓱꓽ ꓡꓯ꓿ ꓠꓱꓸ ꓐꓯꓼ ꓕꓲ ꓫꓵꓽ ꓫꓵ ꓔꓯ ꓟꓳꓸ ꓠꓴ ꓪꓽ ꓓꓵꓽ ꓙˍ ꓟ ꓟꓽ ꓫꓱꓸ ꓓꓴ ꓙꓳˍ ꓠꓬ꓾ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓬꓲ ꓠꓲꓹ ꓡꓶꓽ ꓟꓳꓸ ꓖꓶ ꓡ ꓥꓳ꓿ 16 ꓬꓲ ꓡꓰ꓾ ꓣꓳ ꓘꓳ ꓣꓴ ꓟꓶ ꓗꓷ ꓟ ꓟꓬ ꓛꓲ ꓕꓶꓻ ꓕꓶˍ ꓡꓰ ꓣꓴ ꓔ ꓢꓲ ꓞꓳ ꓙꓳꓻ ꓡꓯ꓿ 17 ꓬꓲꓼ ꓠꓬꓲ ꓐꓴꓳ꓾ ꓥꓪ ꓠꓴꓽ ꓡꓰ ꓟꓸ ꓖꓶꓽ ꓗꓷ ꓟ ꓡꓰ ꓐꓰ ꓛꓳ ꓔꓬ ꓢꓴ ꓔꓯ ꓬꓲ ꓜꓶ ꓡꓳꓸ ꓔ꓿ ꓠꓴ ꓪꓽ ꓠꓬ ꓕꓲ ꓛꓳꓺꓼ ꓐꓰ ꓥꓪ ꓔꓯ ꓔꓯꓺ ꓢꓳ ꓢꓴ ꓬꓰ ꓢꓲ ꓞꓳ ꓙꓳ ꓡꓯ꓿ 18 ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓛꓴꓽ ꓙꓳ ꓢꓴ ꓬꓰ ꓢꓲ ꓞꓳ ꓙꓳ ꓔꓬ ꓢꓴ ꓮꓽ ꓟꓬꓹ ꓙꓳˍ ꓡꓳ꓿ ꓬꓲ ꓪꓽ ꓬꓰˍ ꓟ ꓠꓴ ꓪꓽ ꓔꓯ ꓥꓪ ꓮꓽ ꓟꓬꓹ ꓧꓪꓹ ꓐꓯ ꓖꓶꓽ ꓗꓷꓳ꓿ ꓮ ꓟꓶˍ ꓟꓲ ꓥꓴ ꓠꓬꓲ ꓐꓰ ꓠꓴ ꓪꓽ ꓔꓯ ꓐꓯ ꓖꓶˍ ꓢꓰꓽ ꓥꓳ꓿ 19 ꓬꓲ ꓪꓽ ꓢꓲꓺ ꓠꓬ ꓚꓲ ꓛꓬ ꓦꓰꓼ ꓟ ꓥ ꓢꓲ꓾ ꓫꓸ ꓔꓳ ꓓꓴ ꓔꓯ ꓠꓬ ꓘꓶꓽ ꓘ ꓓꓴ ꓚꓬꓹ ꓢꓲ ꓠꓬꓲ꓾ ꓟꓲ ꓠꓯ ꓗꓪ ꓟ ꓔꓯˍ ꓡꓰ ꓠꓲꓹ ꓥꓳˍ ꓠꓬꓲ꓾ ꓬꓲ ꓪꓽ ꓠꓽ ꓐꓬ ꓡꓰˍ ꓟ ꓗꓪ ꓡꓳꓹ ꓬꓰˍ ꓥꓳ꓿ 20 ꓖꓳ ꓡꓱ ꓥ ꓟꓲ ꓣꓳ ꓠꓽ ꓟꓴꓽ ꓗꓪ ꓗꓪ ꓟ ꓑ ꓫꓬꓼ ꓥ ꓢꓲ꓾ ꓠꓬꓱꓻ ꓗꓪ ꓐꓰ ꓡꓻ ꓠꓹ ꓟ ꓚꓬꓴ ꓢꓲ ꓒ ꓕꓲ ꓣꓳ ꓔꓯ ꓡꓳꓺ ꓠꓬꓹ ꓔꓬ ꓟ ꓥ ꓡꓳ꓿ ꓬꓲ ꓠꓬ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓥ ꓡꓳ꓿ 21 ꓬꓲ ꓡꓰ ꓙꓳˍ ꓟ ꓥ ꓕ ꓑꓳꓸ ꓬꓲ ꓚꓲ ꓛꓬ ꓙꓵꓽˍ ꓟ ꓠꓯꓸ ꓘꓪ ꓗꓷ ꓡꓰ ꓝꓲˍ ꓟ ꓢꓯꓼ ꓔꓯ ꓛꓳ ꓢꓲ꓾ ꓣꓳ ꓟꓽ ꓒꓵꓽ ꓟ ꓖꓳ ꓓꓱ ꓔꓯ ꓠꓬ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓖꓳ ꓓꓱ ꓒꓬꓱꓽˍ ꓡꓰ ꓐꓰ ꓑꓶꓸ ꓡꓰ ꓝꓲˍ ꓥꓳ꓿

ꓒꓲ-ꓡꓲ-ꓒꓲ 4

1 ꓖꓳ ꓡꓱ ꓠꓬꓲ ꓥꓪ ꓠꓲꓹ ꓠꓵ ꓢꓲ ꓢꓲꓼ ꓙꓬ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓗꓹ ꓛꓲ ꓓꓴˍ ꓐꓰ ꓟꓬꓱ ꓓꓳꓽ ꓪꓴꓸ ꓛꓴꓽ ꓥ ꓟ ꓥꓪ ꓠꓲꓹ ꓠꓵ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓢꓲ ꓒ ꓠꓯꓸꓼ ꓗꓪ ꓕꓱ ꓡꓱ ꓦꓰꓼ ꓕꓶꓻ ꓞ꓿ 2 ꓬꓴ-ꓪ-ꓔꓲˍ ꓐꓰ ꓢꓶ-ꓔꓴ-ꓚꓲ ꓔꓯˍ ꓟꓲ ꓥꓪ ꓘꓶꓸ ꓖꓶˍ ꓠꓬꓲ꓾ ꓢꓲ ꓒ ꓠꓯꓸꓼ ꓗꓪ ꓕꓲ ꓠꓲꓹ ꓟˍ ꓡꓰꓽ ꓬꓰ꓿ 3 ꓚꓵ ꓚꓵ ꓥꓪˍ ꓐꓰ ꓕꓲ ꓛꓳꓺꓼ ꓔꓱꓹˍ ꓟ ꓟꓬꓱꓽ ꓬꓰ ꓛꓳꓽ ꓒꓯꓹꓳ꓾ ꓤꓽ ꓟꓶ ꓤ ꓕꓱ ꓠꓬꓲꓽ ꓣꓳ ꓔꓯ ꓬꓰ ꓙ ꓠꓹ ꓟ ꓠꓴ ꓔꓯˍ ꓟꓲ ꓓꓰꓽˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓥꓪˍ ꓐꓰ ꓕꓲ ꓛꓳꓺꓼ ꓶꓼ ꓓꓳ ꓫꓱꓹ ꓓꓳ ꓗꓪ ꓢꓯꓼ ꓕꓵꓼ ꓪꓴꓽ ꓧꓶꓻ ꓢꓴ ꓥ ꓡꓳ꓿ ꓝꓮꓲ ꓗꓷ-ꓡꓲ-ꓟꓰˍ ꓐꓰ ꓠꓱꓸ ꓐꓯꓼ ꓟꓬꓱꓽ ꓬꓰ ꓛꓳꓽ ꓒꓯꓹ ꓐꓴˍ ꓟꓲ ꓥꓪ ꓙꓳˍ ꓡꓳ꓿ ꓬꓲ ꓪꓽ ꓟꓬꓱꓺ ꓠꓬ ꓢꓯꓼ ꓟꓬ ꓕꓳ ꓶ ꓗꓪ ꓓꓯꓹ ꓡꓳ꓿ 4 ꓮ ꓕꓯˍ ꓟꓲ ꓢꓲ ꓒ ꓠꓯꓸꓼ ꓗꓪ ꓗꓹ ꓛꓲ ꓔꓬ꓾ ꓗꓹ ꓛꓲ ꓔꓬ꓾ ꓐꓰ ꓥꓪ ꓝꓮꓲ ꓐꓯˍ ꓥꓳ꓿ 5 ꓠꓴ ꓪꓽ ꓠꓲꓹ ꓟ ꓠꓴꓽˍ ꓟ ꓠꓬ ꓞꓳ ꓤ ꓮꓽ ꓙꓵ ꓡꓰ ꓡꓳꓸ ꓓꓳ ꓡ ꓝꓲ꓿ ꓢꓲ ꓒ ꓠꓬ ꓣꓳ ꓒ ꓕꓲꓺꓼ ꓗꓪ ꓔꓬ ꓡꓳ꓿ 6 ꓮꓸ ꓫꓵ ꓗꓪˍ ꓟꓲ ꓟꓽ ꓙꓽ ꓫꓸ ꓫꓸ꓾ ꓪꓽ ꓘꓴˍ ꓟ ꓐꓰ꓾ ꓶꓼ ꓓꓰꓽˍ ꓟ ꓐꓰ꓾ ꓫꓸ ꓟꓳˍ ꓟ ꓡꓰ ꓠꓴ ꓪꓽ ꓓꓰꓽˍ ꓟ ꓪꓴ-ꓢ ꓔꓯ ꓢꓷꓸ ꓡꓰ ꓝꓲ꓿ 7 ꓖꓳ ꓡꓱ ꓢꓲ ꓙꓽ ꓜꓲꓼˍ ꓟ ꓥ ꓕ ꓑꓳꓸ ꓕꓯ ꓢꓲ ꓘꓳꓻ ꓙꓰˍ ꓟ ꓪꓴ-ꓢ ꓬꓲ ꓢꓲ ꓡꓲ ꓟ ꓠꓬ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ꓾ ꓠꓴ ꓪꓽ ꓠꓲꓹ ꓟ ꓐꓰ ꓠꓴ ꓪꓽ ꓓꓵꓽ ꓙˍ ꓟ ꓔꓯ ꓔꓺ ꓙ ꓡꓳꓸ ꓙˍ ꓥꓳ꓿ 8 ꓝꓮꓲ ꓕꓲ ꓘꓶ ꓠꓬ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓔꓱꓹˍ ꓟ ꓮꓸ ꓫꓵ ꓥ ꓟꓲ꓾ ꓒꓵꓽ ꓠꓯꓹ ꓟ ꓮꓸ ꓫꓵ ꓥ ꓟꓲ꓾ ꓜꓳꓽ ꓓꓰꓺ ꓟ ꓮꓸ ꓫꓵ ꓥ ꓟꓲ꓾ ꓢꓲꓽ ꓫꓬꓻ ꓟ ꓮꓸ ꓫꓵ ꓥ ꓟꓲ꓾ ꓘꓳꓻ ꓣꓴ ꓓꓻ ꓟ ꓮꓸ ꓫꓵ ꓥ ꓟꓲ꓾ ꓙꓲꓻˍ ꓟ ꓟꓬꓱ ꓓꓳꓽ ꓙꓳˍ ꓟ ꓮꓸ ꓫꓵ ꓥ ꓟꓲ꓾ ꓙꓲꓻ ꓓꓰ ꓡꓰ ꓟ ꓐꓰ ꓫꓱꓸ ꓖꓶ ꓒꓵꓽˍ ꓟ ꓮꓸ ꓫꓵ ꓙꓳˍ ꓠꓬ꓾ ꓕꓱ ꓡꓱ ꓡꓳ ꓫꓵꓽ ꓔꓯ ꓓꓵꓽ ꓙꓽ ꓔ꓿ 9 ꓥꓪ ꓗꓪ ꓐꓰ ꓠꓴ ꓪꓽ ꓢꓳ ꓟꓶ ꓟ ꓐꓰ꓾ ꓘꓳꓻ ꓣꓴ ꓟꓶ ꓟ ꓐꓰ꓾ ꓑ ꓙꓽ ꓗꓷ ꓟ ꓐꓰ ꓡꓳꓸ ꓟꓳꓻ ꓗꓷ ꓟ ꓕꓱ ꓟꓬ ꓫꓵꓽ ꓠꓴ ꓪꓽˍ ꓟꓲ ꓬꓰ꓿ ꓖꓳ ꓡꓱ ꓠꓬ ꓢꓲ ꓡꓲ ꓟ ꓖꓶ ꓢꓴ ꓪꓴ-ꓢ ꓠꓽ ꓠꓴ ꓪꓽˍ ꓐꓰ ꓕꓲ ꓪꓺꓼ ꓔꓬ ꓥꓳ꓿ 10 ꓕꓱ ꓟꓶ ꓛꓲ ꓗꓷ ꓡꓰ ꓥ ꓟꓲ꓾ ꓠꓴ ꓪꓽ ꓥꓪ ꓔꓯ ꓠꓲꓹ ꓟ ꓥꓳꓺˍ ꓟ ꓝꓮꓲ ꓕꓲ ꓧꓪꓹ ꓟꓳꓸ ꓖꓶ ꓓꓳ ꓡ ꓠꓬꓲ꓾ ꓢꓲ ꓒ ꓠꓯꓸꓼ ꓗꓪ ꓥꓪ ꓮꓽ ꓘꓶꓸ ꓗꓹ ꓛꓲˍ ꓡꓳ꓿ ꓧꓶꓸ ꓕꓯˍ ꓡꓰ ꓠꓴ ꓪꓽ ꓠꓬ ꓚꓵ ꓚꓵ ꓥꓪ ꓔꓯ ꓠꓲꓹ ꓟ ꓥꓳꓺˍ ꓟ ꓥꓪ ꓢꓷꓸˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪ ꓥꓪ ꓔꓯ ꓬꓰ ꓙ ꓠꓹ ꓟ ꓬꓲ ꓑꓶꓸ ꓟꓽ ꓪ꓿ 11 ꓥꓪ ꓠꓬ ꓣꓱꓽ ꓟꓽ ꓡꓳꓼ ꓠꓬꓲ ꓐꓯˍ ꓟ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓥꓪ ꓮ ꓡꓲ ꓔꓬ ꓠ ꓗꓷ ꓡꓰˍ ꓟꓲ ꓠꓲꓹ ꓘꓪꓽ ꓫꓵ ꓠꓹ ꓟ ꓥꓪ ꓢꓳ ꓟꓶ ꓡꓰꓳ꓿ 12 ꓣꓱꓽ ꓟꓽ ꓡꓳꓼ ꓟ ꓗꓪ ꓮ ꓡꓲ ꓞꓳ ꓙꓳ ꓠꓹ ꓟ ꓐꓰ꓾ ꓣꓱꓽ ꓖꓴ ꓟꓽ ꓓ ꓟ ꓗꓪ ꓮ ꓡꓲ ꓐꓰ ꓞꓳ ꓙꓳ ꓠꓹ ꓟ ꓥꓪ ꓢꓷꓸ ꓡꓰꓳ꓿ ꓐꓳ ꓡ ꓥ ꓟꓲ꓾ ꓟꓷꓼ ꓡ ꓥ ꓟꓲ꓾ ꓮꓽ ꓟꓬꓹ ꓙꓳˍ ꓟꓲ꓾ ꓣꓱꓽ ꓟꓽ ꓡꓳꓼˍ ꓟꓲ꓾ ꓮ ꓡꓲ ꓗꓷ ꓡꓰˍ ꓟꓲ꓾ ꓮꓸ ꓫꓵ ꓗꓪˍ ꓟꓲ꓾ ꓮ ꓡꓲ ꓐꓰ ꓞꓳ ꓙꓳ ꓠꓹ ꓟ ꓚꓵ ꓘꓶꓽ ꓕꓱ ꓟ ꓥꓪ ꓢꓳ ꓟꓶ ꓡꓰꓳ꓿ 13 ꓥꓪ ꓔꓯ ꓢꓯꓼ ꓧꓳꓽ ꓖꓶ ꓡ ꓢꓴ ꓬꓲ ꓗꓪ ꓐꓰ ꓮꓸ ꓫꓵˍ ꓟꓲ ꓥꓪ ꓬꓰ ꓐ ꓡ ꓡꓳ꓿ 14 ꓖꓳ ꓡꓱ ꓥ ꓟꓲ ꓥꓪ ꓫꓸ ꓙꓵꓻˍ ꓟ ꓗꓪ ꓠꓴ ꓪꓽ ꓑꓯꓹ ꓡꓯꓽ ꓘꓳˍ ꓟ ꓕꓱ ꓟ ꓠꓬ꓾ ꓠꓴ ꓪꓽ ꓙꓲꓻˍ ꓟ ꓬꓰˍ ꓟ ꓥ ꓡꓳ꓿ 15 ꓒꓲ-ꓡꓲ-ꓒꓲ ꓢꓴꓳ꓾ ꓶꓼ ꓓꓳ ꓫꓱꓹ ꓓꓳ ꓚ ꓪꓴꓸ ꓔꓴˍ ꓟ ꓗꓪ꓾ ꓥꓪ ꓠꓬ ꓟ-ꓢꓲ-ꓓꓳ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓟꓬꓱꓽ ꓕꓱ ꓟ ꓗꓪ ꓠꓴ ꓪꓽ ꓟꓽ ꓥ ꓠꓬ ꓥꓪˍ ꓐꓰ ꓑꓯꓹ ꓡꓯꓽ ꓘꓳˍ ꓟ ꓠꓱꓸ ꓐꓯꓼ ꓘꓴ ꓜꓲ ꓞꓳ ꓟꓽ ꓙꓳ ꓟ ꓠꓴ ꓪꓽ ꓢꓷꓸˍ ꓡꓳ꓿ 16 ꓕꓰ-ꓢ-ꓡꓳ-ꓠꓲ-ꓬ ꓗꓪ ꓔꓬ ꓕꓯꓽˍ ꓟꓲ꓾ ꓥꓪ ꓣꓱꓽ ꓬꓯꓼˍ ꓟ ꓗꓪ ꓠꓴ ꓪꓽ ꓡꓰ ꓕꓲ ꓧꓪꓹ ꓗꓸ ꓠꓯꓸ ꓕꓲ ꓧꓪꓹ ꓖꓶ ꓩꓴ ꓡꓺꓳ꓿ 17 ꓥꓪ ꓠꓬ ꓠꓴ ꓪꓽ ꓡꓰ ꓖꓶ ꓡ ꓟ ꓔꓯ ꓧꓪˍ ꓟ ꓟꓽ ꓥ꓿ ꓟꓬꓽ ꓠꓬꓲ ꓠꓽ ꓠꓴ ꓪꓽ ꓶꓻ ꓡꓯꓼ ꓕꓳ ꓶ ꓗꓪ ꓬꓲ ꓐꓵꓽ ꓬꓲ ꓐꓶꓹ ꓟꓬꓽ ꓡ ꓠꓹ ꓟ ꓐꓱ ꓶ ꓥ ꓡꓳ꓿ 18 ꓠꓴ ꓪꓽ ꓡꓰ ꓖꓶ ꓩꓴ ꓡ ꓟ ꓡꓯꓼ ꓫꓴ ꓠꓬ ꓬꓲ-ꓑ-ꓩꓴ-ꓓꓲ-ꓕꓴ ꓗꓪ ꓐꓰ ꓥꓪ ꓣꓴ ꓟꓶ ꓡꓰ ꓠꓬꓲ꓾ ꓥꓪ ꓠꓽ ꓣꓱꓽ ꓬꓯꓼˍ ꓟ ꓕꓯꓽ ꓢꓲˍ ꓟꓲ ꓙꓳ ꓡꓰꓳ꓿ ꓡꓯꓼ ꓫꓴ ꓕꓱ ꓟ ꓠꓬ ꓫꓳꓺ ꓠꓱˍ ꓟ ꓐꓵꓽ ꓥ ꓢꓲ꓾ ꓪꓴ-ꓢ ꓘꓳꓻ ꓣꓴ ꓠꓲꓹ ꓫꓵˍ ꓟ ꓐꓰ ꓠꓲꓹ ꓒꓴˍ ꓟ ꓔꓲ ꓓꓴ ꓥ ꓡꓳ꓿ 19 ꓥꓪ ꓪꓴ-ꓢ ꓠꓽ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ꓾ ꓬꓲ ꓐꓬꓱꓼ ꓡꓱꓼ ꓡꓱˍ ꓟ ꓒꓵꓽ ꓶ ꓐꓳ ꓞꓹ ꓟ ꓔꓯ ꓛꓳ ꓢꓲ꓾ ꓠꓴ ꓪꓽ ꓣꓱꓽ ꓬꓯꓼ ꓟ ꓥ ꓕ ꓑꓳꓸ ꓖꓶ ꓐꓲ ꓡ ꓝꓲˍ ꓥꓳ꓿ 20 ꓣꓳꓽ ꓐꓹ ꓐ ꓪꓴ-ꓢ ꓔꓯ ꓕꓲ ꓞꓲꓼ ꓕꓲ ꓑ ꓟꓬꓱ ꓓꓳꓽ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ 21 ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓔꓬ ꓟ ꓢꓲ ꓚꓰꓸ ꓔ ꓢꓴ ꓮꓽ ꓙꓵ ꓔꓯ ꓥꓪ ꓐꓱ ꓶ ꓒꓵꓽ ꓗꓹ ꓬꓰ ꓖꓶ꓿ ꓥꓪˍ ꓐꓰ ꓕꓲ ꓪꓺꓼ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴ ꓡꓰ ꓠꓴ ꓪꓽ ꓔꓯ ꓒꓵꓽ ꓗꓹ ꓬꓰ ꓩꓴ ꓡ ꓡꓳ꓿ 22 ꓕꓻˍ ꓔꓬ ꓟ ꓪꓴ-ꓢ ꓦ ꓡꓱ ꓢꓴ ꓐꓴ ꓮꓽ ꓙꓵ ꓡꓰ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ ꓢꓲ-ꓢ ꓙ ꓗꓪ ꓔꓬ ꓢꓴ ꓡꓰ ꓪꓻ ꓜꓲꓻ ꓒꓵꓽ ꓗꓹ ꓬꓰ ꓩꓴ ꓡ ꓡꓳ꓿ 23 ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰ ꓠꓬ ꓠꓴ ꓪꓽ ꓐꓰ ꓕꓲ ꓪꓺꓼ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓗꓳ-ꓡꓳ-ꓫꓲ 1

1 ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ ꓙꓲ-ꓢꓴ ꓬꓰ-ꓢꓴ ꓬꓲ ꓝꓲ ꓓꓴ ꓬꓰˍ ꓟ ꓒꓳ-ꓡꓳ ꓥꓪˍ ꓐꓰ꓾ ꓣꓳꓽ ꓠꓬꓲ ꓤꓽ ꓕꓲ-ꓟꓳ-ꓕꓲ-ꓪꓴ ꓡꓰ꓾ 2 ꓗꓳ-ꓡꓳ-ꓫꓲ ꓗꓪ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓟ ꓪꓴ-ꓢ ꓔꓯ ꓦ ꓡꓱ ꓢꓴ ꓐꓴˍ ꓐꓰ ꓦ ꓡꓱ ꓐꓳˍ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓣꓳꓽ ꓐꓹ ꓐ ꓪꓴ-ꓢ ꓗꓪ ꓐꓰ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 3 ꓥꓪ ꓠꓴꓽ ꓠꓬ ꓠꓴ ꓪꓽ ꓐꓱ ꓶ ꓮ ꓕꓯˍ ꓟꓲ ꓪꓽ ꓘꓴ ꓢꓲ꓾ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓐꓹ ꓐ ꓪꓴ-ꓢ ꓔꓯ ꓫꓸ ꓟꓳ ꓔꓬ ꓥꓳ꓿ 4 ꓕꓱ ꓟ ꓠꓬ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓠꓴ ꓪꓽ ꓙꓵꓻ ꓠꓲꓹ ꓙꓳˍ ꓟ ꓐꓰ꓾ ꓦ ꓡꓱ ꓢꓴ ꓐꓴ ꓮꓽ ꓙꓵ ꓐꓱ ꓶ ꓠꓴ ꓪꓽ ꓠꓵ ꓠꓲꓹ ꓙꓳˍ ꓟ ꓥꓪ ꓠꓴꓽ ꓑ ꓙꓽ ꓗꓷ ꓢꓲ꓾ 5 ꓟꓴꓽ ꓗꓪ ꓕꓯꓽ ꓢꓲ ꓗꓪ ꓠꓴ ꓪꓽ ꓐꓱ ꓶ ꓫꓺ ꓗꓶ ꓔ ꓟ ꓥꓳ ꓡꓳꓸ ꓓꓴ ꓗꓪ ꓐꓰ ꓡꓻˍ ꓟ ꓙꓵꓻ ꓠꓲꓹˍ ꓐꓰ ꓠꓵ ꓠꓲꓹ ꓑꓶꓸ ꓓꓴ꓾ ꓥꓪ ꓠꓴꓽ ꓠꓬ ꓮ ꓕꓯˍ ꓟꓲ ꓪꓴ-ꓢ ꓔꓯ ꓫꓸ ꓟꓳ ꓔꓬ ꓥꓳ꓿ ꓥꓳ ꓡꓳꓸ ꓓꓴ ꓓꓳꓽ ꓕꓱ ꓟ ꓠꓬ꓾ ꓠꓴ ꓪꓽ ꓔꓯ ꓚ ꓛꓲ ꓬꓰˍ ꓟ ꓔꓱꓹˍ ꓟ ꓶꓼ ꓓꓳ ꓫꓱꓹ ꓓꓳ ꓐꓯ ꓘꓶꓽ ꓗꓪ ꓐꓰ ꓠꓴ ꓪꓽ ꓑ ꓙꓽ ꓗꓷ ꓟ ꓥ ꓡꓳ꓿ 6 ꓪꓴ-ꓢ ꓣꓱꓽ ꓛꓰ ꓶꓼ ꓓꓳ ꓫꓱꓹ ꓓꓳ ꓕꓱ ꓟ ꓠꓴ ꓪꓽ ꓑ ꓙꓽ ꓗꓷ ꓢꓲ ꓔꓱꓹˍ ꓟ ꓔꓯ ꓠꓴ ꓪꓽ ꓙꓽ ꓜꓲꓼ ꓡꓰ ꓗꓸ ꓠꓯꓸ꓾ ꓠꓴ ꓪꓽ ꓗꓳꓺ ꓡꓳ ꓗꓪ ꓶꓼ ꓓꓳ ꓫꓱꓹ ꓓꓳ ꓬꓲ ꓢꓶꓽ ꓮꓽ ꓟꓬꓹ ꓓꓱꓼ ꓡ ꓟ ꓡꓰ ꓐꓰ꓾ ꓟꓵꓽ ꓗꓳꓹ ꓓꓵꓺ ꓓꓵ ꓗꓪˍ ꓟꓲ ꓶꓼ ꓓꓳ ꓫꓱꓹ ꓓꓳ ꓚ ꓒꓬꓱ ꓙꓰ ꓢꓲ꓾ ꓬꓲ ꓢꓶꓽ ꓮꓽ ꓟꓬꓹ ꓓꓱꓼ ꓡ ꓔꓬ ꓡꓳ꓿ 7 ꓠꓴ ꓪꓽ ꓠꓬ ꓶꓼ ꓓꓳ ꓫꓱꓹ ꓓꓳꓽ ꓕꓱ ꓟ ꓔꓯ ꓥꓪ ꓠꓴꓽ ꓠꓲꓹ ꓠꓵˍ ꓟ ꓚꓳ ꓑꓸ ꓛꓳꓽ ꓒꓯꓹ ꓬꓲ-ꓑ-ꓩꓴ ꓗꓪ ꓐꓰ ꓑ ꓙꓽ ꓟꓶˍ ꓟ ꓥ ꓡꓳ꓿ ꓬꓲ ꓠꓬ ꓥꓪ ꓠꓴꓽ ꓐꓱ ꓶ ꓦ ꓡꓱ ꓐꓳˍ ꓟ ꓙꓲ-ꓢꓴ ꓟꓬꓱꓽ ꓬꓰ ꓢꓴ ꓥ ꓡꓳ꓿ 8 ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓠꓴ ꓪꓽ ꓠꓵ ꓠꓲꓹ ꓙꓳˍ ꓟ ꓓꓳꓽ ꓕꓱ ꓟ ꓬꓲ ꓡꓰ ꓥꓪ ꓠꓴꓽ ꓔꓯˍ ꓟꓲ ꓐꓯ ꓖꓶ ꓡꓺꓳ꓿ 9 ꓖꓳ ꓡꓱ ꓠꓬꓲ ꓥꓪ ꓠꓴꓽˍ ꓟꓲ ꓕꓱ ꓟ ꓔꓯ ꓑ ꓙꓽ ꓗꓷ ꓕ ꓑꓳ꓾ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓦ ꓢꓷꓸ ꓠꓲꓹˍ ꓐꓰ ꓙꓽ ꓗꓴꓸ ꓠꓲꓹ ꓮꓽ ꓙꓵ ꓗꓪ ꓪꓴ-ꓢ ꓠꓲꓹ ꓡꓶꓽ ꓔꓯ ꓢꓷꓸˍ ꓟ ꓠꓲꓹ ꓟ ꓐꓲ ꓡꓰ ꓝꓲ ꓠꓹ ꓟ꓾ ꓟꓽ ꓠꓽ ꓠ ꓠꓴ ꓪꓽ ꓐꓱ ꓶ ꓪꓽ ꓘꓴ ꓙ ꓔꓬ ꓥꓳ꓿ 10 ꓕꓱ ꓟ ꓠꓬ ꓠꓴ ꓪꓽ ꓠꓽ ꓢꓲ ꓒꓽ ꓠꓵꓻˍ ꓟ ꓡꓰ ꓐꓰ ꓞꓳ ꓙꓳ ꓐ ꓡ ꓢꓲ꓾ ꓮ ꓕꓯˍ ꓟꓲ ꓬꓲ ꓠꓲꓹ ꓡꓶꓽ ꓛꓳ ꓐ ꓡ ꓠꓹ ꓟ ꓥ ꓡꓳ꓿ ꓖꓳ ꓡꓱ ꓠꓬ ꓠꓴ ꓪꓽ ꓠꓽ ꓙꓲꓻˍ ꓟ ꓟꓬꓱꓽ ꓮꓽ ꓙꓵˍ ꓐꓰ꓾ ꓪꓴ-ꓢ ꓔꓯ ꓢꓷꓸˍ ꓟ ꓗꓪ ꓪꓴꓽ ꓡ ꓟꓴ ꓡ ꓠꓹ ꓟ ꓪꓽ ꓘꓴ ꓔꓬ ꓥꓳ꓿ 11 ꓖꓳ ꓡꓱ ꓢꓲ꓾ ꓪꓴ-ꓢ ꓡꓰ ꓬꓲ ꓐꓬꓱꓽ ꓡꓱꓼˍ ꓟ ꓐꓰ ꓪꓽ ꓠꓬꓲˍ ꓟ ꓢꓯꓼ ꓗꓪ ꓐꓰ ꓠꓴ ꓪꓽ ꓔꓯ ꓢꓯꓼ ꓙꓳ ꓡ ꓝꓲ ꓢꓲ꓾ ꓠꓴ ꓪꓽ ꓠꓬ ꓮꓸ ꓫꓵ ꓗꓪˍ ꓟꓲ ꓠꓲꓹ ꓟ ꓫꓵ ꓢꓲ ꓠꓬꓲ꓾ ꓜꓲꓽ ꓘꓴ ꓠꓲꓹ ꓣꓱꓽ ꓐ ꓡ ꓠꓹ ꓟ ꓐꓰ꓾ 12 ꓠꓴ ꓪꓽ ꓔꓯ ꓠꓬ ꓠꓬꓲ ꓟꓳꓻ ꓓꓴ ꓗꓪ ꓔꓬ ꓟ ꓦ ꓡꓱ ꓢꓴ ꓐꓴ ꓡꓯꓼ ꓪ ꓔꓯ ꓑꓯꓹ ꓟꓶ ꓒꓵꓽ ꓢꓴ ꓒꓬꓱꓼ ꓡ ꓝꓲˍ ꓠꓬꓲ꓾ ꓗꓹ ꓛꓲ ꓠꓲꓹ ꓡꓰ ꓐꓹ ꓐ ꓪꓴ-ꓢ ꓔꓯ ꓫꓸ ꓟꓳ ꓔꓬ ꓥꓳ꓿ 13 ꓬꓲ ꓡꓰ ꓠꓯ ꓞꓲꓹ ꓟ ꓬꓲ ꓪꓽ ꓠꓬꓲˍ ꓟ ꓙꓵꓽ ꓪ ꓗꓪ ꓐꓰ ꓣꓳꓽ ꓔꓯ ꓚꓬꓴ ꓓꓳ ꓡ ꓢꓲ꓾ ꓬꓲ ꓠꓲꓹ ꓠꓵˍ ꓟ ꓮ ꓐꓲ ꓬꓲ ꓗꓴꓷ ꓗꓪ ꓣꓳ ꓔꓯ ꓧꓳꓽ ꓓꓵ ꓡꓰ ꓢꓲ ꓠꓬꓲ꓾ 14 ꓙꓲ-ꓢꓴ ꓠꓯꓸꓼ ꓗꓪ ꓫꓴꓹ ꓣꓴˍ ꓟ ꓐꓰ ꓝꓴꓲ ꓖꓽ ꓖꓶˍ ꓟ ꓣꓳ ꓔꓯ ꓟꓶꓻ ꓡꓰ ꓝꓲꓳ꓿ 15 ꓬꓰ-ꓢꓴ ꓠꓬ ꓟꓳꓻ ꓟꓽ ꓓ ꓟ ꓪꓴ-ꓢ ꓬꓲ ꓒꓬꓱꓽ ꓥ ꓢꓲ꓾ ꓚꓰꓼ ꓔ ꓟ ꓥ ꓕ ꓑꓳꓸ ꓧꓶꓸ ꓕꓯ ꓗꓪ ꓟ ꓥ ꓡꓳ꓿ 16 ꓮ ꓡꓲꓳ ꓐꓯ ꓠꓬ ꓙꓳˍ ꓟ ꓥ ꓕ ꓑꓳꓸ ꓠꓬ ꓬꓲ ꓗꓪ ꓐꓰ ꓚꓰꓼ ꓔ ꓟ ꓥ ꓡꓳ꓿ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓟ ꓥ ꓟꓲ꓾ ꓟꓲ ꓠꓯ ꓕꓯꓽ ꓢꓲ ꓗꓪ ꓟ ꓥ ꓟꓲ꓾ ꓟꓳꓻ ꓓꓻˍ ꓡꓳ ꓫꓵꓽ ꓥ ꓟꓲ꓾ ꓟꓳꓻ ꓟꓽ ꓓ ꓡꓳ ꓫꓵ ꓥ ꓟꓲ꓾ ꓥ ꓠꓬ ꓙꓵꓽ ꓠꓬꓲꓸ ꓕꓲ꓾ ꓥ ꓠꓬ ꓢꓲꓽ ꓒ ꓣꓱꓽ ꓢꓴ ꓐꓴ꓾ ꓥ ꓠꓬ ꓪꓴꓸ ꓓꓵ ꓣꓱꓽ ꓢꓴ ꓐꓴ꓾ ꓥ ꓠꓬ ꓙꓵꓽ ꓪ ꓣꓱꓽ ꓢꓴ ꓐꓴ ꓥ ꓟꓲ꓾ ꓮꓽ ꓙꓵ ꓠꓬ ꓬꓲ ꓗꓪ ꓐꓰ ꓬꓲ ꓐꓱ ꓶ ꓚꓰꓼ ꓔ ꓟ ꓥ ꓡꓳ꓿ 17 ꓬꓲ ꓠꓬ ꓮꓸ ꓫꓵ ꓟꓽ ꓙꓳ ꓕꓯˍ ꓡꓰ ꓙꓳ ꓔꓬ ꓢꓲ꓾ ꓙꓳˍ ꓟ ꓥ ꓕ ꓑꓳꓸ ꓠꓬ ꓬꓲ ꓠꓯꓸꓼ ꓗꓪ ꓥꓳꓺ ꓡꓯꓽ ꓘꓳ ꓞꓹ ꓡꓳ꓿ 18 ꓘꓴ ꓜꓲ ꓞꓳ ꓠꓬ ꓬꓲ ꓖꓳ ꓓꓱꓽ ꓥ ꓢꓲ꓾ ꓬꓲ ꓠꓬ ꓘꓴ ꓜꓲ ꓞꓳ ꓬꓲ ꓪꓴꓸ ꓓꓵ ꓥ ꓡꓳ꓿ ꓝꓮꓲ ꓬꓲ ꓠꓬ ꓙꓳˍ ꓟ ꓥ ꓕ ꓑꓳꓸ ꓗꓪ ꓓꓽ ꓪꓴꓸ ꓒꓬꓱꓼ ꓡ ꓠꓹ ꓟ꓾ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓗꓷ ꓢꓴ ꓬꓲ ꓪꓴꓸ ꓕꓲ ꓣꓳ ꓟ ꓥ ꓡꓳ꓿ 19 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓐꓲ ꓞꓹ ꓟ ꓮꓽ ꓙꓵ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓓꓯꓹ ꓠꓹ ꓟ ꓐꓹ ꓐ ꓪꓴ-ꓢ ꓠꓲꓹ ꓒꓴˍ ꓡꓳ꓿ 20 ꓪꓴ-ꓢ ꓠꓬ ꓙꓲ-ꓢꓴ ꓗꓪ ꓐꓰ ꓙꓳˍ ꓟ ꓥ ꓕ ꓑꓳꓸ ꓔꓯ ꓬꓲ ꓚꓲ ꓛꓬˍ ꓐꓰ ꓧꓳꓹ ꓡꓰ ꓝꓲꓳ꓿ ꓟꓲ ꓠꓯ ꓕꓯꓽ ꓢꓲ ꓗꓪ ꓟ ꓥ ꓟꓲ꓾ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓟ ꓥ ꓟꓲ꓾ ꓙꓳˍ ꓟ ꓥ ꓕ ꓑꓳꓸ ꓔꓯ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓧꓳꓸ ꓡꓰ ꓟ ꓬꓰ-ꓢꓴ ꓫꓵꓽ ꓗꓪ ꓐꓰ ꓪꓴ-ꓢ ꓬꓲ ꓚꓲ ꓛꓬˍ ꓐꓰ ꓧꓳꓹ ꓡꓰ ꓝꓲꓳ꓿ 21 ꓧꓶꓸ ꓕꓯ ꓠꓴ ꓪꓽ ꓠꓬ ꓥꓶˍ ꓟ ꓟꓬꓱꓽ ꓬꓰˍ ꓟ ꓑꓶꓸ ꓓꓴ ꓪꓴ-ꓢˍ ꓐꓰ ꓗꓳꓹ ꓞ ꓢꓲ꓾ ꓠꓴ ꓪꓽ ꓙꓽ ꓠꓲꓹ ꓗꓪ ꓬꓲꓸˍ ꓐꓰ ꓛꓴꓽ ꓙꓳ ꓢꓴ ꓬꓰ ꓗꓷˍ ꓟꓲ꓾ 22 ꓮ ꓟꓶ ꓠꓽ ꓬꓰ-ꓢꓴ ꓫꓵꓻ ꓙ ꓗꓷ ꓟ ꓗꓪ ꓐꓰ ꓠꓴ ꓪꓽ ꓔꓯ ꓬꓲˍ ꓐꓰ ꓧꓳꓹ ꓡꓰ ꓝꓲꓳ꓿ ꓕꓱ ꓟ ꓠꓬ ꓠꓴ ꓪꓽ ꓔꓯ ꓚꓰꓸ ꓔ ꓟꓶ ꓡꓰ ꓝꓲ ꓢꓲ꓾ ꓓꓰꓺ ꓖꓴˍ ꓐꓰ ꓕꓼ ꓓꓴ ꓟꓽ ꓙꓳ ꓙꓳ ꓪꓴ-ꓢ ꓟꓲꓽ ꓙꓬ ꓗꓪ ꓧꓳꓽ ꓛꓲ ꓬꓰ ꓠꓹ ꓟ ꓥ ꓡꓳ꓿ 23 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓙꓵꓻˍ ꓟ ꓙ ꓖꓴ ꓗꓪ ꓮ ꓕꓯˍ ꓟꓲ ꓚ ꓔꓬ ꓢꓲ꓾ ꓟꓽ ꓶꓹ ꓡꓵ ꓡꓰ ꓝꓲ ꓝꓲ ꓜꓳꓺ ꓕꓶꓻ ꓞꓹ ꓢꓲ ꓠꓬꓲ꓾ ꓠꓴ ꓪꓽ ꓑ ꓙꓽ ꓗꓷ ꓟ꓾ ꓟꓴꓽ ꓗꓪ ꓠꓯꓸ ꓘꓪ ꓔꓬ ꓢꓴ ꓥ ꓕ ꓑꓳꓸ ꓔꓯ ꓚ ꓙꓰˍ ꓟ ꓶꓼ ꓓꓳ ꓫꓱꓹ ꓓꓳ ꓬꓲ ꓥꓳ ꓡꓳꓸ ꓓꓴ ꓗꓪ ꓐꓰ ꓕꓽ ꓧꓹ ꓙꓰ꓿ ꓪꓴ-ꓢ ꓡꓰ ꓒꓳ-ꓡꓳ ꓥꓪ ꓔꓯ ꓠꓬ ꓶꓼ ꓓꓳ ꓫꓱꓹ ꓓꓳ ꓕꓱ ꓟ ꓗꓪ ꓣꓱꓽ ꓙ ꓢꓴ ꓬꓰ ꓝꓲˍ ꓟ ꓥ ꓡꓳ꓿ 24 ꓮ ꓟꓶ ꓥꓪ ꓠꓬ ꓠꓴ ꓪꓽ ꓐꓱ ꓶ ꓫꓸ ꓙꓵꓻ ꓟꓶˍ ꓠꓬꓲ ꓗꓹ ꓛꓲˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓖꓳ ꓓꓱꓽ ꓥ ꓟ ꓘꓴ ꓜꓲ ꓞꓳ ꓐꓱ ꓶ ꓥꓪ ꓫꓸ ꓙꓵꓻˍ ꓟ ꓟꓽ ꓡꓳꓼ ꓟ ꓔꓯ꓾ ꓥꓪ ꓧꓪꓽ ꓖꓳ ꓓꓱ ꓗꓪ ꓐꓲ ꓡ ꓝꓲ ꓟ ꓥ ꓡꓳ꓿ 25 ꓪꓴ-ꓢ ꓐꓯ ꓘꓶꓽ ꓮꓽ ꓙꓵ ꓡꓱS ꓟꓸ ꓪ ꓡꓰ ꓠꓹ ꓟ꓾ ꓠꓴ ꓪꓽ ꓐꓱ ꓶ ꓪꓴ-ꓢ ꓡꓰ ꓥꓪ ꓔꓯ ꓣꓱꓽ ꓙ ꓟꓬꓱꓽ ꓮ ꓡꓲ ꓡꓯꓼ ꓙꓱ ꓔ ꓠꓬ꓾ ꓘꓴ ꓜꓲ ꓞꓳ ꓔꓯ ꓖꓳ ꓡꓱ ꓣꓱꓽ ꓙ ꓢꓴ ꓬꓰ ꓝꓲˍ ꓟ ꓥ ꓡꓳ꓿ 26 ꓐꓯ ꓘꓶꓽ ꓕꓱ ꓟ ꓠꓬ ꓗꓳꓸ ꓗꓷ ꓟ ꓦꓬꓼ ꓠꓬꓲˍ ꓐꓰ ꓤꓶꓻ ꓗꓪ ꓠꓽ ꓚꓵ ꓔ ꓟ ꓚꓵ ꓘꓶꓽ ꓥ ꓢꓲ꓾ ꓮ ꓟꓶ ꓠꓽ ꓬꓲ ꓔꓯ ꓦ ꓡꓱ ꓢꓴ ꓐꓴ ꓔꓯ ꓟꓳꓸ ꓖꓶꓽ ꓗꓷꓳ꓿ 27 ꓐꓶꓽ ꓞꓳ ꓗꓳꓺ ꓡꓳ ꓗꓪ ꓚꓵ ꓘꓶꓽ ꓕꓱ ꓟ ꓬꓲ ꓟꓬꓱ ꓓꓳꓽ ꓮ ꓘꓶꓻ ꓛꓲ ꓐꓳ ꓞꓹ ꓟ꓾ ꓪꓴ-ꓢ ꓡꓰ ꓬꓲ ꓔꓯ ꓦ ꓡꓱ ꓢꓴ ꓐꓴ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓒꓴˍ ꓡꓳ꓿ ꓚꓵ ꓘꓶ ꓕꓱ ꓟ ꓠꓽ ꓙꓲ-ꓢꓴ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓟ ꓕꓱ ꓟ ꓥ ꓢꓲ꓾ ꓟꓬꓱ ꓓꓳꓽ ꓟꓶ ꓠꓹ ꓟ ꓥꓳ ꓡꓳꓸ ꓔ ꓓꓴ ꓥ ꓡꓳ꓿ 28 ꓥꓪ ꓠꓴꓽ ꓠꓬ ꓙꓲ-ꓢꓴ ꓬꓲ ꓙ ꓖꓴ ꓚ ꓟꓸ ꓖꓶˍ ꓕꓯ꓾ ꓪꓴ-ꓢ ꓡꓰ ꓖꓶ ꓡ ꓟ ꓙꓽ ꓗꓴꓸ ꓠꓲꓹ ꓮꓽ ꓙꓵ ꓣꓱꓽ ꓢꓲ꓾ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓘꓶꓸ ꓖꓶ ꓢꓲ ꓠꓬꓲ ꓟꓸ ꓖꓶˍ ꓡꓳ꓿ ꓥꓪ ꓠꓴꓽ ꓕꓱ ꓡꓱ ꓬꓰˍ ꓟ ꓠꓬ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓙꓲ-ꓢꓴ ꓠꓯꓸꓼ ꓗꓪ ꓜꓳꓽ ꓓꓰ ꓡꓰ ꓢꓴ ꓒꓬꓱꓼ ꓡ ꓝꓲ ꓢꓲ꓾ ꓪꓴ-ꓢ ꓔꓯ ꓡꓯꓼ ꓙꓱ ꓖꓶ ꓪ ꓠꓹ ꓟ ꓥ ꓡꓳ꓿ 29 ꓕꓱ ꓟ ꓑꓶꓸ ꓓꓴ ꓥꓪ ꓠꓬ ꓬꓲ ꓖꓶ ꓡ ꓟ ꓪꓽ ꓠꓬꓲˍ ꓟ ꓢꓯꓼ ꓗꓪ ꓐꓰ ꓫꓵꓻ ꓗꓳ ꓑꓵꓺ ꓢꓲ ꓟꓬꓱꓽ ꓬꓰ ꓢꓯꓼ ꓕꓵꓼ ꓔꓬ ꓟ ꓥꓳ꓿

ꓗꓳ-ꓡꓳ-ꓫꓲ 2

1 ꓠꓴ ꓪꓽˍ ꓐꓰ꓾ ꓡ-ꓪꓳ-ꓓꓲ-ꓫꓲ-ꓬ ꓢꓴˍ ꓐꓰ꓾ ꓥꓪ ꓔꓯ ꓒꓬꓱꓽ ꓔꓳꓹ ꓟꓬꓺ ꓔꓳꓹ ꓟꓽ ꓟꓳꓻ ꓠꓬꓲ ꓢꓴ ꓐꓴ ꓐꓱ ꓶ꓾ ꓥꓪ ꓠꓬ ꓮ ꓘꓶꓻ ꓛꓲ ꓢꓯꓼ ꓕꓵꓼ ꓔꓬ ꓟ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 2 ꓕꓱ ꓟ ꓠꓬ ꓬꓲ ꓪꓽ ꓠꓲꓹ ꓗꓴ ꓟꓶ ꓢꓲ꓾ ꓠꓵ ꓠꓲꓹ ꓡꓰ ꓥꓳꓺ ꓡꓯꓽ ꓘꓳ ꓞꓹ ꓢꓲ ꓠꓬꓲ꓾ ꓬꓲ ꓪꓽ ꓠꓬ ꓪꓴ-ꓢ ꓚꓵ ꓘꓶ ꓢꓷꓸ ꓡꓰ ꓠꓹ ꓟ ꓐꓰ꓾ ꓦ ꓡꓱ ꓐꓳ ꓓꓴ ꓮꓽ ꓙꓵ ꓒ ꓐꓲ ꓐꓲ ꓟꓶꓻ ꓡꓰ ꓗꓪ ꓛꓲ꓾ ꓙꓽ ꓗꓴꓸ ꓠꓲꓹ ꓙꓳ ꓡ ꓠꓹ ꓟ ꓥꓪ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿ ꓚꓵ ꓘꓶ ꓕꓱ ꓟ ꓠꓬ ꓙꓲ-ꓢꓴ ꓥ ꓢꓲ꓾ 3 ꓬꓲ ꓠꓯꓸꓼ ꓗꓪ ꓠꓬ ꓙꓽ ꓗꓴꓸ ꓠꓲꓹˍ ꓐꓰ ꓢꓷꓸ ꓠꓲꓹ ꓬꓲ ꓒꓵꓽ ꓶꓽ ꓥ ꓕ ꓑꓳꓸ ꓚꓵꓺ ꓞꓹ ꓡꓳ꓿ 4 ꓥꓪ ꓕꓱ ꓡꓱ ꓐꓯˍ ꓟ ꓠꓬ꓾ ꓮꓽ ꓟ ꓥ ꓟꓲ ꓘꓶꓽ ꓟꓲꓻˍ ꓟ ꓡꓰ ꓠꓴ ꓪꓽ ꓔꓯ ꓟꓽ ꓟꓸ ꓒꓬꓹ ꓪ ꓠꓹ ꓟ ꓥ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓥꓪ ꓖꓳ ꓓꓱ ꓠꓬ ꓠꓴ ꓪꓽˍ ꓐꓰ ꓕꓲ ꓪꓺꓼ ꓟꓽ ꓔꓬ ꓥ ꓟꓲ꓾ ꓦ ꓠꓯꓸꓼ ꓗꓪ ꓠꓴ ꓪꓽˍ ꓐꓰ ꓔꓬ ꓢꓲ꓾ ꓠꓴ ꓪꓽ ꓠꓬ ꓬꓲ ꓖ ꓙꓳ ꓙꓳˍ ꓡꓰ ꓞꓳ ꓙꓳ ꓢꓲ ꓠꓬꓲ꓾ ꓙꓲ-ꓢꓴ ꓔꓯ ꓕꓶꓻ ꓕꓶˍ ꓡꓰ ꓙꓵꓻ ꓔꓬ ꓟ ꓟꓳꓻ ꓞꓹ ꓠꓬꓲ ꓥꓪ ꓗꓹ ꓛꓲꓽˍ ꓡꓳ꓿ 6 ꓮ ꓟꓶ ꓠꓴ ꓪꓽ ꓠꓬ ꓬꓰ-ꓢꓴ ꓙꓲ-ꓢꓴ ꓔꓯ ꓢꓲ ꓒꓽ ꓣꓱꓽ ꓝꓲ ꓠꓹ ꓟ ꓘꓳꓻ ꓣꓴ ꓗꓷ ꓠꓬꓲ꓾ ꓬꓲ ꓠꓯꓸꓼ ꓗꓪ ꓡꓯꓽ ꓫꓵ ꓞꓳ ꓙꓳ ꓢꓲ꓾ 7 ꓬꓲ ꓚꓰ ꓜꓳ ꓕꓶꓻ ꓞꓹ ꓠꓬꓲ ꓐꓰ ꓪꓴꓽ ꓡ ꓟꓴ ꓡ ꓢꓲ ꓠꓬꓲ꓾ ꓠꓴ ꓪꓽ ꓔꓯ ꓟꓸ ꓖꓶꓽ ꓗꓷ ꓟ ꓡꓰ ꓐꓰ ꓙꓵꓻ ꓠꓲꓹ ꓗꓪ ꓕꓶꓻ ꓡꓰ ꓢꓲ꓾ ꓫꓸ ꓟꓳ ꓠꓲꓹ ꓐꓲ ꓡꓶꓽ ꓡꓶ ꓡꓰ ꓞꓳ ꓙꓳ ꓔꓬ꓿ 8 ꓙꓲ-ꓢꓴ ꓔꓯ ꓟꓽ ꓛꓳ ꓛꓳ꓾ ꓞꓳ ꓤ ꓡꓰ ꓓꓵꓽ ꓙꓽ ꓓꓳ ꓡ ꓟ ꓟ ꓟꓲˍ ꓐꓰ꓾ ꓞꓳ ꓚꓱꓹ ꓪꓽ ꓚꓱꓹ ꓔꓯ ꓛꓳˍ ꓟ ꓢꓷꓸ ꓠꓲꓹ ꓢꓳꓺ ꓓꓴ ꓕꓲ ꓫꓵꓽˍ ꓐꓰ ꓗꓶꓸˍ ꓟ ꓘꓶꓽ ꓖꓳꓽ ꓗꓪ ꓐꓰ ꓢꓴ ꓡꓰ ꓠꓴ ꓪꓽ ꓔꓯ ꓟꓽ ꓧꓳꓽ ꓪꓴꓸ ꓙꓰ ꓝꓲ ꓠꓹ ꓟ ꓤ ꓟꓳ꓿ 9 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓐꓲ ꓞꓹ ꓟ ꓢꓲꓺ ꓠꓲꓹ ꓮꓽ ꓙꓵ ꓠꓬ꓾ ꓙꓲ-ꓢꓴ ꓖꓳ ꓓꓱ ꓗꓪ ꓑꓰꓹ ꓑꓰꓹˍ ꓡꓰꓽ ꓓꓯꓹ ꓡꓳ꓿ 10 ꓠꓴ ꓪꓽ ꓔꓯˍ ꓟꓲ ꓙꓲ-ꓢꓴ ꓠꓯꓸꓼ ꓗꓪ ꓐꓲ ꓡꓶꓽ ꓡꓰ ꓝꓲꓳ꓿ ꓬꓲ ꓠꓬ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓙꓵꓽ ꓪ ꓙꓳ ꓢꓴ ꓥ ꓕ ꓑꓳꓸ ꓬꓲ ꓪꓴꓸ ꓓꓵ ꓥ ꓡꓳ꓿ 11 ꓠꓴ ꓪꓽ ꓠꓬ ꓬꓲ ꓠꓯꓸꓼ ꓗꓪ ꓶꓺ ꓔ ꓟ ꓥ ꓡꓳ꓿ ꓕꓱ ꓟ ꓠꓬ ꓞꓳ ꓤ ꓡꓯꓼ ꓒꓯꓹ ꓡꓰ ꓶꓺ ꓔ ꓟ ꓟꓽ ꓥ꓿ ꓠꓴ ꓪꓽ ꓧꓪꓽ ꓠꓲꓹ ꓡꓶꓽ ꓔꓯ ꓡꓵꓸ ꓦ ꓗꓷ ꓝꓲ ꓠꓹ ꓟ꓾ ꓙꓲ-ꓢꓴ ꓡꓰ ꓬꓲ ꓠꓯꓸꓼ ꓗꓪ ꓠꓴ ꓪꓽ ꓔꓯ ꓶꓺ ꓔ ꓟ ꓥ ꓡꓳ꓿ 12 ꓝꓮꓲ ꓠꓬ ꓖꓳ ꓓꓱ ꓔꓲꓹˍ ꓟ ꓗꓪ ꓠꓴ ꓪꓽ ꓔꓯ ꓬꓰ-ꓢꓴˍ ꓐꓰ ꓕꓲ ꓛꓳꓺꓼ ꓔꓵꓸ ꓗꓷ ꓢꓲ꓾ ꓫꓵꓻˍ ꓟ ꓗꓪ ꓐꓰ ꓬꓲ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓴ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓔꓯ ꓠꓴ ꓪꓽ ꓙꓵꓻˍ ꓟ ꓗꓪ ꓐꓰ꓾ ꓬꓲ ꓡꓰ ꓠꓴ ꓪꓽ ꓔꓯ ꓬꓰ-ꓢꓴˍ ꓐꓰ ꓕꓲ ꓛꓳꓺꓼ ꓢꓯꓸ ꓬꓲꓼ ꓡ ꓝꓲꓳ꓿ 13 ꓧꓶꓸ ꓕꓯ ꓠꓴ ꓪꓽ ꓠꓬ ꓙꓵꓽ ꓗ ꓟꓽ ꓙꓳ ꓢꓴˍ ꓐꓰ ꓟꓽ ꓶꓺ ꓟꓶ ꓟ ꓡꓽ ꓞꓳ ꓥ ꓢꓲ꓾ ꓝꓴꓲ ꓠꓯꓸꓼ ꓗꓪ ꓫꓵꓻ ꓞ ꓢꓴ ꓥ ꓥˍ ꓟꓲ꓾ ꓮ ꓟꓶ ꓠꓬ ꓪꓴ-ꓢ ꓡꓰ ꓣꓳꓽ ꓛꓬꓻ ꓗꓷ ꓥꓳꓽ ꓗꓷ ꓟ ꓮꓽ ꓙꓵ ꓖꓽ ꓖꓶ ꓢꓲ꓾ ꓣꓳꓽ ꓔꓯ ꓬꓲ ꓡꓰ ꓬꓰ-ꓢꓴˍ ꓐꓰ ꓕꓲ ꓪꓺꓼ ꓢꓯꓸ ꓡ ꓝꓲꓳ꓿ 14 ꓝꓮꓲ ꓠꓬ ꓣꓳꓽ ꓔꓯ ꓔꓳꓹˍ ꓟ ꓙꓵꓽ ꓗ ꓗꓪ ꓟ ꓙꓵꓽ ꓚꓱꓹ ꓔꓯ ꓬꓲ ꓡꓰ ꓒꓬꓹ ꓦ ꓗꓷ ꓢꓲ꓾ ꓣꓴ ꓔꓯꓹ ꓙꓰ ꓢꓲ ꓠꓬꓲ꓾ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓗꓷꓳ꓿ 15 ꓠꓲꓽ ꓜꓴꓻ ꓐꓴ ꓪꓴꓸ ꓓꓵ ꓣꓱꓽ ꓢꓴˍ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓟꓯꓼ ꓶꓻ ꓤ ꓔꓯˍ ꓟꓲ ꓬꓲ ꓡꓰ ꓒꓬꓹ ꓔꓯꓹ ꓙꓰ ꓢꓲ꓾ ꓬꓲ ꓪꓽ ꓔꓯ ꓠꓬ ꓮꓽ ꓙꓵ ꓢꓴ ꓟꓲꓽ ꓙꓬꓽ ꓗꓪ ꓫꓸ ꓔꓳ ꓓꓴ ꓒꓬꓱꓼ ꓡ ꓝꓲ ꓢꓲ ꓠꓬꓲ꓾ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓐꓰ ꓬꓲ ꓪꓽ ꓔꓯ ꓧꓪꓸ ꓡꓰꓳ꓿ 16 ꓖꓳ ꓡꓱ ꓠꓬꓲ ꓜ ꓓꓴ ꓓꓳꓻ ꓓꓴ꓾ ꓥ ꓠꓬ ꓑꓮꓲ ꓦꓬꓼ ꓠꓬꓲ꓾ ꓥ ꓠꓬ ꓦ ꓒꓴ ꓫꓵꓼ꓾ ꓥ ꓠꓬ ꓠꓽ ꓦꓬꓼ ꓠꓬꓲ ꓑꓶꓸ ꓓꓴ꓾ ꓮꓽ ꓟˍ ꓟꓲ ꓠꓴ ꓪꓽ ꓔꓯ ꓕꓽ ꓙꓽ ꓘꓶꓽ ꓝꓲ꓿ 17 ꓕꓱ ꓟꓬ ꓫꓵꓽ ꓠꓬ ꓡ ꓠꓹ ꓟ ꓬꓲ ꓶꓻ ꓥꓳꓽ ꓥ ꓢꓲ꓾ ꓬꓲ ꓑꓰꓹ ꓚꓵ ꓠꓽ ꓙꓲ-ꓢꓴ ꓥ ꓡꓳ꓿ 18 ꓚꓲ ꓛꓬ ꓔꓯ ꓘꓶꓻ ꓙꓵꓻ ꓢꓲ ꓙꓻ ꓣꓳꓽ ꓗꓶꓸˍ ꓟ ꓟꓸ ꓟꓲꓽˍ ꓐꓰ꓾ ꓟꓴꓽ ꓗꓪ ꓝꓲ ꓓꓴ ꓐꓴ ꓔꓯ ꓪꓴꓸ ꓓꓵ ꓕꓱꓼˍ ꓟ ꓟꓸ ꓟꓲꓽ ꓡꓰ꓾ ꓠꓴ ꓪꓽ ꓮꓽ ꓟ ꓔꓯˍ ꓟꓲ ꓡꓯꓼ ꓫꓴ ꓟꓶ ꓟꓽ ꓒꓵꓽ ꓢꓴ ꓕꓽ ꓗꓷ ꓡꓰ ꓝꓲ꓿ ꓕꓱ ꓡꓱ ꓫꓵꓽ ꓡꓽ ꓞꓳ ꓠꓬ ꓬꓲ ꓪꓽ ꓟꓳˍ ꓟ ꓦ ꓐꓬꓱꓽ ꓔꓯˍ ꓡꓰꓽ ꓬꓲ ꓓꓽ ꓟ ꓚꓬꓹ ꓢꓲ꓾ ꓧꓪꓽ ꓖꓳ ꓓꓱꓽ ꓚꓱꓹ ꓗꓪ ꓮꓽ ꓔꓳ ꓔꓳ ꓘꓶꓽ ꓘꓹ ꓢꓲ ꓠꓬꓲ꓾ 19 ꓘꓴ ꓜꓲ ꓞꓳ ꓬꓲ ꓪꓴꓸ ꓓꓵ ꓣꓱꓽ ꓢꓴ ꓙꓲ-ꓢꓴ ꓔꓯ ꓕꓶꓻ ꓕꓶˍ ꓐꓰ ꓟꓽ ꓝꓸ ꓞꓹ ꓢꓴ ꓥ ꓡꓳ꓿ ꓕꓲ ꓖꓳ ꓓꓱ ꓡꓱꓸꓼ ꓬꓲ ꓝꓲꓸ ꓬꓲ ꓟꓲꓺˍ ꓐꓰ ꓬꓲ ꓙꓴꓽ ꓣꓱꓽ ꓬꓯꓼˍ ꓟ ꓮꓽ ꓙꓵ ꓠꓬ ꓪꓴꓸ ꓓꓵ ꓗꓪ ꓐꓰ ꓟꓶˍ ꓟ ꓥ ꓢꓲ꓾ ꓡꓯꓼ ꓗꓸ ꓮꓽ ꓙꓵˍ ꓟꓲ ꓥꓳꓺ ꓡꓯꓽ ꓘꓳ ꓞꓹ ꓢꓲ ꓠꓬꓲ꓾ ꓪꓴ-ꓢ ꓡꓰ ꓪꓴꓽ ꓡ ꓟꓴ ꓡ ꓝꓲˍ ꓟ ꓥ ꓡꓳ꓿ 20 ꓠꓴ ꓪꓽ ꓠꓬ ꓟꓲ ꓠꓯ ꓗꓪ ꓟ ꓞꓳ ꓚꓱꓹ ꓪꓽ ꓚꓱꓹ ꓔꓯ ꓟꓳꓸ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓫꓵꓻ ꓗꓷ ꓟ ꓥ ꓐꓷˍ ꓠꓬ꓾ ꓮꓸ ꓫꓵ ꓪꓴꓸ ꓠꓬꓲ ꓟꓲ ꓠꓯ ꓗꓪ ꓟ ꓥ ꓟ ꓡꓰ ꓐꓰ ꓞꓳ ꓙꓳ ꓔꓬ ꓢꓰꓽ ꓡ? 21 ꓮꓸ ꓫꓵ ꓪꓴꓸ ꓠꓬꓲ꓾ ꓕꓽ ꓣꓴ꓾ ꓕꓽ ꓢꓳꓽ ꓠꓬꓲ꓾ ꓕꓽ ꓫꓱꓹ꓾ ꓐꓯˍ ꓟ ꓙꓵꓽ ꓚꓱꓹ ꓔꓯ ꓒꓵꓽ ꓛꓳˍ ꓢꓰꓽ ꓡ? 22 ꓕꓱ ꓟꓬ ꓫꓵꓽ ꓠꓬ ꓞꓳ ꓤ ꓟꓸ ꓘꓶˍ ꓐꓰ ꓕꓵꓼ ꓪꓽ ꓥ ꓠꓬꓲ꓾ ꓮꓽ ꓙꓵ ꓕꓱ ꓡꓱ ꓣꓱꓽ ꓕꓱ ꓡꓱ ꓟꓶꓽ ꓬꓰ ꓡꓳꓹ ꓬꓰ ꓓꓴˍ ꓡꓰꓽ ꓥꓳ꓿ 23 ꓙꓻ ꓣꓳꓽ ꓗꓶꓸˍ ꓟ ꓐꓰ꓾ ꓟꓴꓽ ꓗꓪ ꓝꓲ ꓓꓴ ꓔꓯ ꓪꓴꓸ ꓓꓵ ꓕꓱꓼˍ ꓟ ꓐꓰ꓾ ꓚꓲ ꓛꓬ ꓖꓳ ꓓꓱ ꓔꓯ ꓘꓶꓻ ꓙꓵꓻˍ ꓟ ꓕꓱ ꓟꓬ ꓫꓵꓽ ꓠꓬ ꓙꓽ ꓗꓴꓸ ꓠꓲꓹ ꓒꓬꓱꓽ ꓶꓻ ꓞꓹˍ ꓟꓲ꓾ ꓧꓪꓽ ꓖꓳ ꓓꓱ ꓦꓯꓸ ꓠꓲꓹ ꓙꓵꓽˍ ꓟ ꓔꓯ ꓗꓽ ꓔ ꓠꓹ ꓟ ꓮꓸ ꓫꓵ ꓣꓱꓽ ꓬꓯꓼ ꓖꓴ ꓟꓽ ꓙꓳ꓿

ꓗꓳ-ꓡꓳ-ꓫꓲ 3

1 ꓠꓴ ꓪꓽ ꓔꓯ ꓠꓬ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓢꓯꓸ ꓡ ꓝꓲ ꓗꓷ ꓠꓬꓲ꓾ ꓟꓴꓽ ꓗꓪ ꓕꓯ ꓢꓲ ꓪꓴ-ꓢ ꓡꓯꓼ ꓙ ꓗꓪ ꓠꓬꓲꓸ ꓠꓸ ꓔꓬ ꓟ꓾ ꓙꓲ-ꓢꓴ ꓔꓬ ꓗꓪ ꓙꓳˍ ꓡꓳ ꓫꓵꓽ ꓔꓯ ꓠꓲꓹ ꓥꓳꓺ꓿ 2 ꓠꓴ ꓪꓽ ꓠꓲꓹ ꓟ ꓠꓬ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓙꓳˍ ꓟ ꓔꓯ ꓠꓲꓹ ꓥꓳꓺ꓿ ꓟꓲ ꓠꓯ ꓗꓪ ꓙꓳˍ ꓟ ꓔꓯ ꓕꓽ ꓠꓲꓹ ꓥꓳ꓿ 3 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓫꓵꓻ ꓗꓷ ꓢꓲ꓾ ꓠꓴ ꓪꓽ ꓢꓯꓼ ꓟꓬ ꓠꓬ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓪꓴ-ꓢ ꓠꓯꓸꓼ ꓗꓪ ꓚꓵꓺ ꓔ ꓡꓳ꓿ 4 ꓙꓲ-ꓢꓴ ꓠꓬ ꓣꓳꓽ ꓢꓯꓼ ꓟꓬ ꓥ ꓡꓳ꓿ ꓬꓲ ꓟꓳꓸ ꓖꓶ ꓡ ꓕꓯ꓾ ꓠꓴ ꓪꓽˍ ꓟꓲ ꓬꓲˍ ꓐꓰ ꓕꓲ ꓪꓺꓼ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓑꓯꓹ ꓟꓶˍ ꓥꓳ꓿ 5 ꓖꓳ ꓡꓱ ꓠꓬꓲ ꓟꓲ ꓠꓯ ꓔꓯ ꓠꓲꓹ ꓥꓳꓺˍ ꓟ ꓠꓴ ꓪꓽ ꓡꓯꓼ ꓗꓸ ꓔꓯ ꓫꓵꓻ ꓝꓲ꓿ ꓕꓱ ꓟ ꓠꓬ꓾ ꓟꓽ ꓢꓲ ꓟꓽ ꓫꓬꓻ ꓟ꓾ ꓟꓽ ꓫꓬꓻ ꓟꓽ ꓖꓼ ꓟ꓾ ꓦꓯꓸ ꓠꓲꓹ ꓙꓵꓽ ꓟ꓾ ꓟꓽ ꓙꓲ ꓟ ꓔꓯ ꓠꓲꓹ ꓫꓵˍ ꓟ ꓐꓰ ꓠꓲ ꓦꓯꓸ ꓟ ꓥ ꓡꓳ꓿ ꓠꓲ ꓦꓯꓸˍ ꓟ ꓠꓬ ꓠꓲꓽ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼˍ ꓟ ꓐꓰ ꓕꓲ ꓡꓰꓹꓼ ꓥ ꓡꓳ꓿ 6 ꓕꓱ ꓟꓬ ꓫꓵꓽ ꓬꓰ ꓢꓴ ꓐꓴ ꓕꓯꓽ ꓢꓲ ꓗꓪ ꓪꓴ-ꓢ ꓬꓲ ꓦꓶꓻ ꓠꓲꓹ ꓬꓯꓼ ꓡ ꓥꓳ꓿ 7 ꓧꓶꓸ ꓕꓯ ꓕꓱ ꓡꓱ ꓫꓵꓽ ꓗꓪ ꓠꓴ ꓪꓽ ꓢꓯꓸ ꓔꓬ ꓕꓯ꓾ ꓠꓴ ꓪꓽˍ ꓟꓲ ꓕꓱ ꓡꓱ ꓫꓵ ꓚꓱꓹ ꓗꓪ ꓚ ꓗꓷꓳ꓿ 8 ꓖꓳ ꓡꓱ ꓠꓬꓲ ꓮ ꓟꓶ ꓠꓴ ꓪꓽ ꓠꓬ꓾ ꓠꓲꓹ ꓟ ꓦꓶˍ ꓟ꓾ ꓠꓲꓹ ꓛꓰꓹˍ ꓟ꓾ ꓠꓲꓹ ꓟ ꓗꓶꓺˍ ꓟ꓾ ꓝꓯꓼ ꓡꓯꓼˍ ꓟ꓾ ꓟꓽ ꓫꓬ ꓟ ꓥꓳꓽ ꓫꓸ ꓕꓱˍ ꓟ꓾ ꓕꓱ ꓟꓬ ꓫꓵꓽ ꓮꓽ ꓙꓵ ꓔꓯ ꓡꓳ ꓩꓴ ꓗꓷ꓿ 9 ꓠꓴ ꓪꓽ ꓠꓬ ꓡꓽ ꓞꓳ ꓡꓵꓺˍ ꓐꓰ ꓬꓲ ꓬꓰˍ ꓟ ꓟꓬꓱꓽ ꓔꓯ ꓡꓵꓸ ꓩꓴ ꓗꓷ ꓢꓲ ꓡꓽ ꓞꓳ ꓫꓵꓼ ꓖꓪꓽ ꓔ ꓢꓴ ꓥ ꓠꓬꓲ ꓕꓽ ꓗꓶꓸ ꓡꓯꓽ ꓘꓳ꓿ 10 ꓡꓽ ꓞꓳ ꓫꓵꓼ ꓠꓬ ꓬꓲ ꓔꓯ ꓚꓰꓼ ꓢꓴ ꓒꓬꓱꓽ ꓶꓻ ꓡꓰ ꓢꓲ꓾ ꓬꓲ ꓔꓯ ꓢꓷꓸˍ ꓟ ꓗꓪ ꓬꓲ ꓫꓵꓼ ꓑꓶꓸ ꓡꓰ ꓔꓬ ꓟ ꓥ ꓡꓳ꓿ 11 ꓖꓳ ꓡꓱ ꓠꓬꓲ ꓡꓽ ꓞꓳ ꓫꓵꓼ ꓠꓯꓸꓼ ꓗꓪ ꓠꓬ꓾ ꓦꓲ-ꓡꓲ ꓡ ꓞꓳˍ ꓐꓰ ꓬꓴ-ꓔ ꓡ ꓞꓳ꓾ ꓶꓺ ꓔ ꓢꓴˍ ꓐꓰ ꓟꓽ ꓶꓺ ꓔ ꓢꓴ꓾ ꓐꓶꓽ ꓒˍ ꓐꓰ ꓞꓳ ꓗꓳꓸˍ ꓐꓰ꓾ ꓚꓳ ꓑꓸˍ ꓐꓰ ꓚꓳ ꓪꓴꓸ꓾ ꓒꓯꓽ ꓓꓴ ꓟꓽ ꓙꓳ꓿ ꓙꓲ-ꓢꓴ ꓠꓽ ꓮꓽ ꓙꓵ ꓡꓱꓸꓼ ꓥ ꓢꓲ꓾ ꓮꓽ ꓙꓵ ꓢꓴ ꓠꓯꓸꓼ ꓗꓪ ꓔꓬ ꓡꓳ꓿ 12 ꓠꓴ ꓪꓽ ꓠꓬ ꓪꓴ-ꓢ ꓡꓰ ꓢꓲ ꓔ ꓢꓴˍ ꓐꓰ꓾ ꓚꓰꓸ ꓔ ꓢꓴˍ ꓐꓰ ꓠꓲꓹ ꓠꓵ ꓔ ꓢꓴ ꓐꓴ ꓥ ꓠꓬꓲ꓾ ꓫꓱꓸ ꓤ ꓠꓲꓹ꓾ ꓙꓽ ꓗꓳꓺ ꓠꓲꓹ꓾ ꓙꓻ ꓣꓳꓽ ꓠꓲꓹ꓾ ꓠꓴꓽ ꓠꓲꓹˍ ꓐꓰ ꓠꓲꓹ ꓟ ꓫꓵˍ ꓟ ꓖꓪꓽ ꓔ ꓢꓲ꓾ 13 ꓮ ꓡꓲ ꓕꓲ ꓣꓳˍ ꓟꓲ ꓢꓴ ꓔꓯ ꓠꓲꓹ ꓟ ꓫꓸ ꓓꓴ ꓕꓲ ꓫꓵꓽ ꓙꓳ ꓐꓷˍ ꓠꓬ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓜꓲꓽ ꓡꓯꓽ ꓘꓳ ꓢꓲ꓾ ꓢꓲ ꓒꓽ ꓡꓰ ꓠꓴ ꓪꓽ ꓔꓯ ꓖꓽ ꓖꓶ ꓗꓷ ꓟ ꓡꓰ ꓐꓰ ꓠꓴ ꓪꓽˍ ꓟꓲ ꓖꓽ ꓖꓶ ꓡꓯꓽ ꓘꓳ꓿ 14 ꓕꓱ ꓟꓬ ꓫꓵꓽ ꓕꓯꓽ ꓢꓲ ꓗꓪ ꓠꓬ ꓠꓵ ꓠꓲꓹ ꓖꓪꓽ ꓔ꓿ ꓠꓵ ꓠꓲꓹ ꓠꓬ ꓧꓳꓹ ꓡꓰ ꓝꓲ ꓓꓴ ꓜꓳꓽ ꓓꓰꓺˍ ꓟ ꓧꓷꓹ ꓚ ꓥ ꓡꓳ꓿ 15 ꓝꓮꓲ ꓠꓬ ꓙꓲ-ꓢꓴ ꓬꓲ ꓢꓲ ꓡꓲ ꓟ ꓡꓰ ꓠꓴ ꓪꓽ ꓠꓲꓹ ꓟ ꓗꓪ ꓙꓵꓽ ꓝꓲ꓿ ꓬꓲ ꓢꓲ ꓡꓲ ꓟ ꓡꓰ ꓕꓱ ꓡꓱ ꓙꓵꓽ ꓝꓲ ꓠꓹ ꓟ ꓠꓴ ꓪꓽ ꓔꓯ ꓕꓲ ꓖꓳ ꓓꓱꓽˍ ꓗꓪ ꓘꓴꓻ ꓔ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓫꓸ ꓟꓳ ꓠꓲꓹ ꓙꓳ ꓠꓯꓹ ꓡꓳ꓿ 16 ꓙꓲ-ꓢꓴ ꓬꓲ ꓐꓯ ꓘꓶꓽ ꓠꓴ ꓪꓽ ꓠꓯꓸꓼ ꓗꓪ ꓒ ꓐꓲꓺꓼ ꓓꓯꓹ ꓝꓲ ꓢꓲ꓾ ꓪꓴ-ꓢ ꓖꓶ ꓡ ꓟ ꓙꓽ ꓗꓴꓸ ꓠꓲꓹ ꓮꓽ ꓙꓵ ꓡꓰ ꓢꓯꓼ ꓖꓶ ꓟꓸ ꓖꓶ ꓡꓯꓽ ꓘꓳ ꓢꓲ ꓠꓬꓲ꓾ ꓟꓴ ꓖꓪ ꓚꓱꓹˍ ꓐꓰ ꓫꓱꓸ ꓖꓶ ꓓꓴˍ ꓐꓰ꓾ ꓦ ꓖꓪ ꓓꓴ ꓡꓰ ꓕꓲ ꓣꓳ ꓛꓳꓽ ꓕꓲ ꓣꓳ ꓘꓶꓸ ꓖꓶ ꓡꓯꓽ ꓘꓳ ꓢꓲ꓾ ꓫꓸ ꓟꓳ ꓠꓲꓹ ꓡꓰ ꓪꓴ-ꓢ ꓔꓯ ꓖꓪ ꓖꓶ꓿ 17 ꓠꓴ ꓪꓽ ꓮꓸ ꓫꓵ ꓬꓰˍ ꓟꓲ꓾ ꓫꓸ ꓕꓱˍ ꓥ ꓟꓲ꓾ ꓬꓰˍ ꓟ ꓗꓪ ꓥ ꓟꓲ꓾ ꓮꓽ ꓙꓵ ꓠꓬ ꓢꓲ ꓒꓽ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓬꓰ ꓢꓲ꓾ ꓬꓲ ꓗꓪ ꓐꓰ ꓐꓹ ꓐ ꓪꓴ-ꓢ ꓔꓯ ꓫꓸ ꓟꓳ ꓖꓶ꓿ 18 ꓤꓽ ꓟꓶ ꓣꓱꓽ ꓢꓴ ꓐꓴꓳ꓾ ꓢꓲ ꓒꓽ ꓠꓯꓸꓼ ꓗꓪ ꓬꓰ ꓙꓲꓽ ꓙꓳˍ ꓟ ꓡꓰ ꓐꓰ꓾ ꓠꓴ ꓪꓽ ꓤꓽ ꓖꓴ ꓙꓵꓽˍ ꓟ ꓔꓯ ꓛꓳ꓿ 19 ꓤꓽ ꓖꓴ ꓣꓱꓽ ꓢꓴ ꓐꓴꓳ꓾ ꓠꓴ ꓪꓽ ꓤꓽ ꓟꓶ ꓔꓯ ꓠꓲꓹ ꓠꓵ꓿ ꓬꓲ ꓪꓽ ꓔꓯ ꓫꓸ ꓟꓴ ꓫꓸ ꓚꓬ ꓕꓽ ꓬꓰ꓿ 20 ꓤꓽ ꓠꓱ ꓐꓴꓳ꓾ ꓮ ꓕꓯˍ ꓟꓲ ꓠꓴ ꓪꓽ ꓐꓹ ꓐ ꓟꓹ ꓟ ꓐꓴ ꓔꓯ ꓒꓵꓽ ꓛꓳ꓿ ꓕꓱ ꓡꓱ ꓬꓰˍ ꓟ ꓠꓬ ꓢꓲ ꓒꓽ ꓠꓲꓹ ꓒꓴ ꓓꓴ ꓥ ꓡꓳ꓿ 21 ꓐꓹ ꓐ ꓣꓱꓽ ꓢꓴ ꓐꓴꓳ꓾ ꓠꓴ ꓪꓽ ꓤꓽ ꓠꓱ ꓐꓴ ꓠꓲꓹ ꓟ ꓟꓽ ꓙꓬ ꓡꓰ ꓠꓹ ꓟ꓾ ꓬꓲ ꓪꓽ ꓠꓲꓹ ꓟ ꓦꓶ ꓡ ꓚꓱꓹ ꓕꓽ ꓬꓰ꓿ 22 ꓚꓳ ꓑꓸ ꓐꓴꓳ꓾ ꓮꓸ ꓫꓵ ꓗꓪˍ ꓟꓲ꓾ ꓠꓴ ꓪꓽ ꓧꓪꓽ ꓖꓳ ꓓꓱ ꓗꓪ ꓟ ꓢꓲ ꓒꓽ ꓐꓴ ꓔꓯ ꓠ ꓠꓹ꓿ ꓠꓴ ꓪꓽ ꓢꓲ ꓒꓽ ꓐꓴ ꓡꓳꓸ ꓟꓳˍ ꓟ ꓗꓪˍ ꓡꓰꓽ ꓬꓲ ꓪꓽ ꓔꓯ ꓠꓲꓹ ꓒꓴ ꓡꓰ ꓝꓲ ꓓꓴ ꓬꓰˍ ꓟ ꓟꓽ ꓥ ꓥ꓾ ꓪꓴ-ꓢ ꓔꓯ ꓙꓳꓺ ꓒꓵꓽˍ ꓟ ꓠꓯꓸꓼ ꓗꓪ ꓔꓱꓹˍ ꓟ ꓠꓲꓹ ꓟ ꓡꓰ ꓬꓲ ꓪꓽ ꓔꓯ ꓣꓱꓽ ꓙ꓿ 23 ꓠꓴ ꓪꓽ ꓮꓸ ꓫꓵ ꓬꓰˍ ꓟꓲ ꓞꓳ ꓤ ꓐꓱ ꓶˍ ꓡꓰꓽ ꓟꓽ ꓥ ꓥ꓾ ꓢꓲ ꓒꓽ ꓐꓱ ꓶ ꓥ ꓟ ꓡꓰ ꓐꓰ ꓠꓲꓹ ꓡꓱ ꓡꓱˍ ꓡꓰꓽ ꓬꓰ꓿ 24 ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓗꓪ ꓐꓰ ꓡꓯꓼ ꓪ ꓬꓰ ꓠꓹ ꓟ ꓡꓯꓼ ꓫꓴ ꓟꓶˍ ꓥꓳ꓾ ꓐꓰ ꓠꓴ ꓪꓽ ꓢꓷꓸˍ ꓡꓳ꓿ ꓠꓴ ꓪꓽ ꓠꓬ ꓢꓲ ꓒꓽ ꓙꓲ-ꓢꓴ ꓔꓯ ꓣꓱꓽ ꓙ ꓔꓬ ꓟ ꓥ ꓡꓳ꓿ 25 ꓛꓬꓻ ꓢꓴ ꓠꓬ ꓛꓬꓺ ꓒꓵꓽ ꓟꓶˍ ꓥꓳ꓿ ꓪꓴ-ꓢ ꓠꓬ ꓞꓳ ꓒꓬꓱꓽ ꓔꓯ ꓟꓽ ꓢꓲ꓿

ꓗꓳ-ꓡꓳ-ꓫꓲ 4

1 ꓢꓲ ꓒꓽ ꓣꓱꓽ ꓢꓴ ꓐꓴꓳ꓾ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓠꓴ ꓪꓽˍ ꓟꓲ ꓢꓲ ꓒꓽ ꓕꓲ ꓣꓳ ꓙꓳˍ ꓟ ꓢꓷꓸˍ ꓠꓬꓲ꓾ ꓠꓴ ꓪꓽ ꓚꓳ ꓑꓸ ꓐꓴ ꓔꓯˍ ꓟꓲ ꓔꓱꓹ ꓜꓳꓽˍ ꓟ ꓐꓰ ꓙꓲꓻˍ ꓟ ꓬꓰ ꓖꓶ꓿ 2 ꓠꓲꓹ ꓟ ꓡꓱꓻ ꓢꓲ ꓟꓽ ꓠꓽ ꓠ ꓪꓽ ꓘꓴ꓿ ꓮ ꓕꓯˍ ꓟꓲ ꓧꓪꓸ ꓛꓲ ꓔ꓿ ꓪꓽ ꓘꓴˍ ꓟ ꓗꓪ ꓪꓴ-ꓢ ꓔꓯ ꓫꓸ ꓟꓳ ꓠꓲꓹ ꓙꓳ ꓝꓲ꓿ 3 ꓪꓴ-ꓢ ꓡꓰ ꓥꓪ ꓠꓴꓽ ꓔꓯ ꓐꓯ ꓘꓶꓽ ꓚ ꓟꓸ ꓓꓴ ꓗꓺ ꓘꓶꓽ ꓒꓴ ꓖꓶ ꓡ ꓢꓲ꓾ ꓙꓲ-ꓢꓴ ꓬꓲ ꓚꓵ ꓘꓶꓽ ꓟꓸ ꓖꓶ ꓐ ꓡ ꓠꓹ ꓟ꓾ ꓥꓪ ꓠꓴꓽ ꓐꓱ ꓶˍ ꓟꓲ ꓪꓽ ꓘꓴ ꓙ꓿ ꓮ ꓡꓲꓳ ꓐꓯ ꓠꓬ ꓚꓵ ꓘꓶꓽ ꓕꓱ ꓟ ꓑꓶꓸ ꓓꓴ ꓥꓪ ꓔꓯ ꓐꓱꓺ ꓔ ꓟ ꓥ ꓡꓳ꓿ 4 ꓝꓮꓲ ꓠꓬ ꓥꓪ ꓫꓸ ꓕꓱ ꓙꓲꓽ ꓙꓳˍ ꓟ ꓡꓰ ꓐꓰ꓾ ꓥꓪ ꓠꓬ ꓚꓵ ꓘꓶꓽ ꓕꓱ ꓟ ꓐꓯ ꓟꓳꓸ ꓖꓶ ꓐ ꓡ ꓠꓹ ꓟ ꓓꓰꓽ ꓙ꓿ 5 ꓠꓴ ꓪꓽ ꓠꓬ ꓟꓽ ꓦ ꓡꓱ ꓢꓴ ꓐꓴˍ ꓐꓰ ꓙꓻ ꓡꓯꓽ ꓘꓳˍ ꓕꓯ ꓞꓳ ꓕꓰꓻ ꓬꓰ ꓢꓲ꓾ ꓬꓲ ꓙꓵꓹ ꓟꓽ ꓒꓲꓼ ꓬꓰ ꓝꓲ ꓝꓲ ꓬꓲ ꓪꓽ ꓔꓯ ꓘꓶꓸ ꓟꓶꓻ ꓡꓰ ꓠꓹ ꓟ ꓢꓯꓼ ꓕꓵꓼ꓿ 6 ꓠꓴ ꓪ ꓠꓬ ꓮ ꓡꓲ ꓕꓲ ꓣꓳ ꓔꓯ ꓮ ꓡꓰ ꓐꓰ ꓒꓳꓹ ꓖꓶ ꓠꓯꓹ ꓟ ꓢꓷꓸ ꓡꓰ ꓠꓹ ꓟ꓾ ꓠꓴ ꓪꓽ ꓫꓸ ꓕꓱ ꓘꓶꓽ ꓠꓬ ꓮ ꓕꓯˍ ꓟꓲ ꓣꓱ ꓛꓰ ꓙꓳ ꓢꓲ꓾ ꓞꓼ ꓐꓳˍ ꓡꓰ ꓐꓰ ꓛꓵꓻ ꓔꓬ ꓝꓲ꓿ 7 ꓥꓪ ꓫꓵꓽ ꓪꓴꓻ ꓮꓽ ꓙꓵ ꓠꓬ ꓕꓲ-ꓚꓲ-ꓗꓴ ꓡꓰ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲˍ ꓥꓳ꓿ ꓬꓲ ꓠꓬ ꓠꓲꓹ ꓠꓵˍ ꓟ ꓠꓬꓲ ꓤˍ ꓐꓰ꓾ ꓦ ꓡꓱ ꓐꓳˍ ꓟ ꓣꓱꓽ ꓙ ꓢꓴˍ ꓐꓰ꓾ ꓢꓲ ꓒꓽ ꓠꓯꓸꓼ ꓗꓪ ꓚꓳ ꓑꓸ ꓛꓳꓽ ꓒꓯꓹ ꓥ ꓡꓳ꓿ 8 ꓥꓪ ꓠꓴꓽ ꓮ ꓡꓲ ꓥ ꓟ ꓠꓴ ꓪꓽ ꓢꓷꓸ ꓡꓰ ꓢꓲ꓾ ꓬꓲ ꓡꓰ ꓠꓴ ꓪꓽ ꓔꓯ ꓠꓲꓹ ꓟ ꓗꓴ ꓖꓶ ꓟꓶ ꓠꓹ ꓟ꓾ ꓥꓪ ꓡꓰ ꓬꓲ ꓔꓯ ꓠꓴ ꓪꓽ ꓔꓬ ꓗꓪ ꓝꓲ ꓩꓴ ꓡ ꓟ ꓥ ꓡꓳ꓿ 9 ꓝꓮꓲ ꓦ ꓡꓱ ꓐꓳˍ ꓟ ꓐꓰ ꓠꓲꓹ ꓠꓵˍ ꓟ ꓠꓬꓲ ꓤꓽ ꓳ-ꓠꓲ-ꓫꓲ-ꓟꓴ ꓔꓯˍ ꓟꓲ ꓬꓲꓸˍ ꓐꓰ ꓕꓲ ꓛꓳꓺꓼ ꓝꓲ ꓩꓴ ꓡ ꓥꓳ꓿ ꓬꓲ ꓠꓬ ꓠꓴ ꓪꓽ ꓗꓪ ꓟ ꓕꓲ ꓣꓳ ꓥꓳ꓿ ꓕꓱ ꓗꓪ ꓮ ꓡꓲ ꓗꓷ ꓡꓰ ꓟ ꓮꓽ ꓙꓵ ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓐꓯ ꓖꓶ ꓡ ꓥꓳ꓿ 10 ꓥꓪˍ ꓐꓰ ꓕꓲ ꓡꓰꓹꓼ ꓐꓱꓺ ꓔ ꓢꓴ ꓛꓳꓽ ꓒꓯꓹ ꓬ-ꓡꓲ-ꓓ-ꓗꓴˍ ꓐꓰ꓾ ꓐ-ꓠ-ꓐ ꓬꓲ ꓗꓪ ꓛꓳꓽ ꓟ-ꓘꓳ ꓡꓰ꓾ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ ꓟ-ꓘꓳ ꓕꓱ ꓕꓲ ꓣꓳ ꓔꓯ ꓟꓳꓸ ꓧꓶꓸ ꓕꓯ ꓠꓴ ꓪꓽ ꓔꓯ ꓐꓯ ꓗꓷ ꓟ ꓡꓰ ꓐꓰ꓾ ꓬꓲ ꓠꓴ ꓪꓽ ꓔꓯ ꓡ ꓕꓯ ꓬꓲ ꓔꓯ ꓘꓳꓻ ꓣꓴ꓿ 11 ꓝꓮꓲ ꓠꓬ ꓬꓴ-ꓢꓶ-ꓓꓴ ꓟꓬꓱ ꓔ ꓟ ꓬꓰ-ꓢꓴˍ ꓟꓲ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ ꓬꓴ-ꓔ ꓡꓽ ꓞꓳ ꓗꓪ ꓐꓰ ꓪꓴ-ꓢ ꓗꓴꓷ ꓐꓱ ꓶ ꓟꓬꓱꓽ ꓬꓰ ꓢꓴ ꓥꓪ ꓛꓳꓽ ꓒꓯꓹ ꓠꓬ ꓕꓱ ꓢ ꓣꓳˍ ꓡꓰꓽ ꓥꓳ꓿ ꓬꓲ ꓪꓽ ꓡꓰ ꓥꓪ ꓔꓯ ꓮꓽ ꓘꓶꓸ ꓠꓲꓹ ꓟ ꓗꓴ ꓖꓶ ꓡꓺꓳ꓿ 12 ꓠꓴ ꓪꓽ ꓗꓪ ꓟ ꓙꓲ-ꓢꓴ ꓬꓰ-ꓢꓴ ꓚꓳ ꓑꓸ ꓬꓲ-ꓑ-ꓩꓴ ꓡꓰ꓾ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ ꓬꓲ ꓠꓬ ꓪꓽ ꓘꓴˍ ꓟ ꓗꓪ ꓮ ꓕꓯꓽˍ ꓟꓲ ꓢꓯꓼ ꓕꓵꓼ ꓢꓲ꓾ ꓪꓴ-ꓢ ꓠꓲꓹ ꓡꓶꓽ ꓮꓽ ꓙꓵ ꓗꓪ ꓠꓴ ꓪꓽ ꓜꓳꓽ ꓓꓰ ꓡꓰ ꓢꓲ ꓠꓬꓲ꓾ ꓦ ꓡꓱ ꓐꓳ ꓐꓳˍ ꓡꓰ ꓦꓰꓼ ꓞ ꓘꓴ ꓠꓹ ꓟ ꓠꓴ ꓪꓽ ꓐꓱ ꓶ ꓓꓰꓽ ꓙ ꓢꓴ ꓥ ꓡꓳ꓿ 13 ꓝꓮꓲ ꓬꓲ ꓠꓬ ꓠꓴ ꓪꓽ ꓐꓱ ꓶ ꓐꓰ ꓡ-ꓪꓳ-ꓓꓲ-ꓫꓲ-ꓬ ꓗꓪ ꓔꓬ ꓢꓴ ꓐꓱ ꓶ ꓐꓰ꓾ ꓫꓲ-ꓡ-ꓑꓳ-ꓡꓲ ꓗꓪ ꓔꓬ ꓢꓴ ꓐꓱ ꓶ ꓠꓲꓹ ꓡꓱ ꓡꓱˍ ꓡꓰ ꓢꓯꓼ ꓕꓵꓼˍ ꓟ ꓔꓯ ꓟꓳꓸ꓾ ꓥꓪ ꓠꓬ ꓬꓲ ꓐꓱ ꓶ ꓢꓷꓸ ꓙ ꓟꓳ ꓙ ꓥꓳ꓿ 14 ꓝꓮꓲ ꓠꓬ ꓠꓲꓹ ꓠꓵˍ ꓟ ꓠꓻ ꓫꓬ ꓒ ꓡꓴ-ꓘ ꓐꓰ ꓓꓲ-ꓟ ꓡꓰ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ 15 ꓡ-ꓪꓳ-ꓓꓲ-ꓫꓲ-ꓬ ꓗꓪ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴˍ ꓐꓰ꓾ ꓠꓰ-ꓩ ꓐꓰ ꓬꓲ ꓦꓲ ꓗꓪ ꓜꓲꓼ ꓡꓯꓽ ꓘꓳˍ ꓟ ꓘꓴ ꓜꓲ ꓞꓳ ꓔꓯ ꓒꓵꓽ ꓗ ꓬꓰ ꓖꓶ꓿ 16 ꓕꓳ ꓶ ꓡꓯꓼ ꓫꓴ ꓕꓱ ꓟ ꓔꓯ ꓠꓴ ꓪꓽ ꓵ ꓗꓷ ꓠꓬ꓾ ꓡ-ꓪꓳ-ꓓꓲ-ꓫꓲ-ꓬ ꓘꓴ ꓜꓲ ꓞꓳ ꓗꓪˍ ꓟꓲ ꓵ ꓪ ꓝꓲ꓿ ꓝꓮꓲ ꓠꓬ ꓡ-ꓪꓳ-ꓓꓲ-ꓫꓲ-ꓬ ꓗꓪ ꓐꓰ ꓡꓻ ꓟ ꓕꓳ ꓶ ꓡꓯꓼ ꓫꓴ ꓔꓯˍ ꓟꓲ ꓠꓴ ꓪꓽ ꓵ ꓓꓴ ꓬꓰ꓿ 17 ꓝꓮꓲ ꓠꓬ ꓬ-ꓚꓲ-ꓑꓴ ꓔꓯ꓾ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓟꓶ ꓗꓷ ꓟ ꓟꓬꓱꓽ ꓔꓯ ꓬꓰ ꓐꓲ ꓡꓰ ꓝꓲ ꓠꓹ ꓟ ꓢꓯꓼ ꓕꓵꓼ꓾ ꓐꓰ ꓐꓯ ꓖꓶ꓿ 18 ꓕꓱ ꓟ ꓠꓬ ꓒꓳ-ꓡꓳ ꓥꓪ ꓚꓲ ꓛꓬ ꓡꓯꓼ ꓒꓯꓹ ꓡꓰ ꓐꓳ ꓩꓴ ꓡ ꓟ ꓥꓳ꓿ ꓥꓪ ꓞꓳꓹ ꓚ ꓔꓯ ꓕꓽ ꓟꓲ ꓡꓰ ꓝꓲ꓿ ꓪꓴ-ꓢ ꓣꓱꓽ ꓛꓰ ꓠꓬ ꓠꓴ ꓪꓽˍ ꓐꓰ ꓙꓳ ꓝꓲ꓿

1 ꓕꓰ-ꓢ-ꓡꓳ-ꓠꓲ-ꓬ 1

1 ꓒꓳ-ꓡꓳ ꓥꓪˍ ꓐꓰ ꓫꓲ-ꓡˍ ꓐꓰ꓾ ꓕꓲ-ꓟꓳ-ꓕꓲ-ꓪꓴ ꓡꓰ꓾ ꓐꓹ ꓐ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓟ꓾ ꓕꓰ-ꓢ-ꓡꓳ-ꓠꓲ-ꓬ ꓘꓴ ꓜꓲ ꓞꓳ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 2 ꓥꓪ ꓠꓴꓽ ꓠꓬ ꓮ ꓕꓯˍ ꓟꓲ ꓠꓴ ꓪꓽ ꓮꓽ ꓙꓵ ꓢꓴ ꓑꓶꓸ ꓓꓴ ꓪꓴ-ꓢ ꓔꓯ ꓫꓸ ꓟꓳ ꓢꓲ꓾ ꓥꓪ ꓠꓴꓽ ꓪꓽ ꓘꓴˍ ꓕꓯ ꓠꓴ ꓪꓽ ꓟꓬꓱ ꓞꓶꓻ ꓔꓬ ꓥꓳ꓿ 3 ꓠꓴ ꓪꓽ ꓙꓵꓻ ꓠꓲꓹ ꓗꓪ ꓐꓰ ꓬꓰˍ ꓟ ꓟꓬꓱꓽ ꓐꓰ꓾ ꓠꓵ ꓠꓲꓹ ꓗꓪ ꓐꓰ ꓢꓯꓼ ꓕꓵꓼ ꓪꓴꓽ ꓧꓶˍ ꓟ ꓐꓰ꓾ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓔꓯ ꓥꓳ ꓡꓳꓸˍ ꓟ ꓗꓪ ꓠꓴ ꓪꓽ ꓜꓲꓽ ꓘꓴˍ ꓟ ꓔꓯ꓾ ꓥꓪ ꓠꓴꓽ ꓠꓬ ꓣꓳꓽ ꓐꓹ ꓐ ꓪꓴ-ꓢ ꓟꓲꓽ ꓙꓬ ꓗꓪ ꓟꓽ ꓠꓽ ꓠ ꓓꓵꓽ ꓙꓽ ꓛꓲ ꓡ ꓡꓳ꓿ 4 ꓪꓴ-ꓢ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓬꓲ ꓡꓰ ꓢꓲ ꓔ ꓢꓴ ꓥ ꓟ ꓥꓪ ꓠꓴꓽ ꓢꓷꓸˍ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓡꓰ ꓠꓴ ꓪꓽ ꓔꓯ ꓶꓼ ꓓꓳꓽ ꓫꓱꓹ ꓓꓳ ꓟꓸ ꓗꓷ ꓟ ꓠꓬ꓾ ꓐꓯ ꓘꓶ ꓗꓪ ꓐꓰˍ ꓡꓰꓽ ꓟꓽ ꓥ꓿ ꓪꓽ ꓠꓬꓲˍ ꓟ ꓐꓰ ꓢꓲ-ꓫꓬ-ꓟ-ꓦˍ ꓐꓰ꓾ ꓮꓽ ꓘꓶꓸ ꓙꓵꓻ ꓕꓶˍ ꓟ ꓠꓲꓹ ꓟ ꓗꓪ ꓐꓰ ꓥ ꓡꓳ꓿ ꓥꓪ ꓠꓴꓽ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓔꓬ ꓕꓯ ꓮ ꓡꓲ ꓞꓳ ꓙꓳ ꓗꓷ ꓟ ꓠꓴ ꓪꓽ ꓢꓷꓸˍ ꓡꓳ꓿ 6 ꓠꓴ ꓪꓽ ꓠꓬ ꓮꓽ ꓘꓶꓸ ꓫꓸ ꓙꓵˍ ꓟꓲ ꓢꓲ-ꓫꓬ-ꓟ-ꓦ ꓗꓪ ꓐꓰ ꓗꓹ ꓛꓲ ꓛꓲˍ ꓡꓰ ꓐꓯ ꓘꓶ ꓔꓯ ꓘꓳ ꓣꓴ ꓗꓷ ꓠꓬꓲ꓾ ꓥꓪ ꓠꓴꓽˍ ꓐꓰ ꓢꓲ ꓒꓽ ꓔꓯ ꓔꓯꓺ ꓢꓳ ꓢꓴ ꓒꓬꓱꓼ ꓡꓺꓳ꓿ 7 ꓝꓮꓲ ꓠꓬ ꓟ-ꓢꓲ-ꓓꓳˍ ꓐꓰ ꓮ-ꓘꓷ-ꓬ ꓗꓪ ꓔꓬ ꓟ ꓦ ꓡꓱ ꓢꓴ ꓐꓴ ꓐꓱ ꓶˍ ꓟꓲ ꓔꓯꓺ ꓢꓳ ꓓꓴ ꓒꓬꓱꓼ ꓡꓺꓳ꓿ 8 ꓢꓲ ꓒꓽ ꓐꓯ ꓘꓶ ꓠꓬ ꓠꓴ ꓪꓽ ꓗꓪ ꓐꓰ ꓚ ꓓꓳ ꓙꓰ ꓢꓲ꓾ ꓟ-ꓢꓲ-ꓓꓳˍ ꓐꓰ ꓮ-ꓘꓷ-ꓬ ꓗꓪ ꓛꓲ ꓬꓰˍ ꓟ ꓡꓰꓽ ꓟ ꓞꓲ꓾ ꓪꓴ-ꓢ ꓠꓯS ꓗꓪ ꓠꓴ ꓪꓽ ꓙꓵꓻ ꓠꓲꓹ ꓙꓳˍ ꓟ ꓓꓳꓽ ꓠꓬ꓾ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓚ ꓒꓬꓱ ꓙꓰ ꓠꓬꓲ꓾ ꓥꓪ ꓠꓴꓽ ꓮꓸ ꓫꓵꓽ ꓐꓯ ꓡꓴꓽ ꓟꓽ ꓛꓵꓳ꓿ 9 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓚꓲ ꓛꓬ ꓡꓰ꓾ ꓠꓴ ꓪꓽ ꓠꓬ ꓥꓪ ꓠꓴꓽ ꓔꓯ ꓮ ꓡꓲ ꓘꓳ ꓣꓴ ꓗꓷ ꓟ ꓐꓰ꓾ ꓢꓯꓸ ꓔꓬ ꓟ ꓐꓰ ꓔꓱꓹˍ ꓟ ꓪꓴ-ꓢ ꓔꓯ ꓠꓴ ꓪꓽ ꓣꓱꓽ ꓙ ꓠꓹ ꓟ꓾ ꓠꓲꓽ ꓐꓬꓱ ꓗꓪ ꓐꓰ ꓠꓴ ꓪꓽ ꓮ ꓡꓲ ꓪꓴ-ꓢ ꓔꓯꓸ ꓟꓳꓸ ꓒꓳꓹ ꓬꓲꓼ ꓡ ꓟ ꓐꓰ꓾ 10 ꓬꓲ ꓡꓰ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓢꓲ꓾ ꓡ ꓠꓹ ꓟ ꓦꓶꓻ ꓠꓲꓹ ꓗꓪ ꓐꓰ ꓣꓳꓽ ꓔꓯ ꓚꓬꓴ ꓓꓳ ꓡ ꓢꓴ꓾ ꓬꓲ ꓮ ꓐꓲ ꓬꓰ-ꓢꓴ ꓠꓬ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓠꓹ ꓟ ꓔꓯ ꓠꓴ ꓪꓽ ꓡꓳꓺ ꓠꓬꓹ ꓔꓬ ꓟ ꓔꓯꓸ ꓟꓳꓸ ꓢꓷꓸ ꓙ ꓟꓳ ꓙˍ ꓡꓳ꓿

1 ꓕꓰ-ꓢ-ꓡꓳ-ꓠꓲ-ꓬ 2

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓔꓬ ꓗꓪ ꓥꓪ ꓠꓴꓽ ꓡ ꓗꓷ ꓟ ꓠꓬ ꓮꓽ ꓔꓳ ꓡꓰ ꓟꓽ ꓥ ꓟ ꓠꓴ ꓪꓽ ꓢꓷꓸˍ ꓡꓳ꓿ 2 ꓠꓴ ꓪꓽ ꓢꓷꓸˍ ꓟ ꓡꓰ ꓐꓰ ꓧꓶꓸ ꓕꓯ ꓒꓲ-ꓡꓲ-ꓒꓲ ꓗꓪ ꓥꓪ ꓠꓴꓽ ꓔꓯ ꓮꓽ ꓘꓶꓸ ꓔꓳꓹ ꓡ ꓢꓲ꓾ ꓫꓸ ꓔꓳ ꓫꓸ ꓒꓯꓼ ꓬꓰ ꓖꓶ ꓡ ꓟ ꓜꓲꓽ ꓪˍ ꓟꓲ꓾ ꓥꓪ ꓠꓴꓽ ꓠꓽ ꓪꓴ-ꓢ ꓡꓰ ꓢꓯꓼ ꓖꓶ ꓡ ꓟ ꓠꓯꓸꓼ ꓗꓪ ꓠꓲꓹ ꓪꓴꓽ ꓪꓴꓽˍ ꓡꓰ ꓠꓴ ꓪꓽ ꓔꓯ ꓶꓼ ꓓꓳꓽ ꓫꓱꓹ ꓓꓳ ꓚ ꓟꓸ ꓖꓶ ꓗꓷꓳ꓿ 3 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓘꓶꓸ ꓘꓶꓽ ꓠꓬ ꓟꓽ ꓔꓱꓹˍ ꓟ ꓟꓽ ꓥ꓿ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽˍ ꓟ ꓗꓪ ꓐꓰˍ ꓟꓲ ꓟꓽ ꓥ꓿ ꓖꓳꓼ ꓠꓲꓹ ꓐꓯ ꓘꓶꓽˍ ꓟꓲ ꓟꓽ ꓥ꓿ 4 ꓬꓲˍ ꓡꓰ꓾ ꓪꓴ-ꓢ ꓠꓬ ꓥꓪ ꓠꓴꓽ ꓔꓯ ꓦ ꓡꓱ ꓐꓳ ꓢꓲ꓾ ꓶꓼ ꓓꓳꓽ ꓫꓱꓹ ꓓꓳ ꓚ ꓟꓸ ꓠꓹ ꓟ ꓟꓬꓱꓽ ꓡꓯꓼ ꓙꓱ ꓖꓶ ꓡ ꓠꓬꓲ꓾ ꓥꓪ ꓠꓴꓽ ꓠꓬ ꓬꓲ ꓖꓳ ꓡꓱ ꓚ ꓟꓸ ꓖꓶˍ ꓟ ꓥ ꓡꓳ꓿ ꓞꓳ ꓤ ꓔꓯ ꓠꓲꓹ ꓒꓴ ꓡꓰ ꓝꓲ ꓠꓹ ꓟˍ ꓟꓲ ꓟꓽ ꓥ꓿ ꓥꓪ ꓠꓴꓽ ꓠꓲꓹ ꓟ ꓔꓯ ꓤꓹ ꓠꓬꓲ ꓢꓴ ꓪꓴ-ꓢ ꓔꓯ ꓠꓲꓹ ꓒꓴ ꓡꓰ ꓝꓲ ꓠꓹ ꓟ ꓥ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓠꓽ ꓫꓱꓸ ꓖꓶ ꓗꓶꓸˍ ꓟ ꓡꓰ꓾ ꓠꓲꓹ ꓦꓯꓸˍ ꓟ ꓔꓯ ꓑꓲꓸ ꓓꓴ ꓮ ꓕꓯˍ ꓟꓲ ꓟꓽ ꓬꓰ ꓠꓬꓲ ꓟ ꓠꓴ ꓪꓽ ꓢꓷꓸˍ ꓡꓳ꓿ ꓪꓴ-ꓢˍ ꓟꓲ ꓕꓱ ꓟ ꓔꓯ ꓢꓷꓸ ꓙ ꓟꓳ ꓙ ꓢꓴ ꓥ ꓡꓳ꓿ 6 ꓥꓪ ꓠꓴꓽ ꓠꓬ ꓙꓲ-ꓢꓴ ꓝꓲ ꓓꓴ ꓥ ꓟ ꓙꓵꓽ ꓪ ꓣꓱꓽ ꓙꓲꓽ ꓙꓳˍ ꓟꓲ꓾ ꓖꓳ ꓡꓱ ꓟꓽ ꓬꓰ ꓬꓰ꓾ ꓥꓪ ꓠꓴꓽ ꓠꓬ ꓠꓴ ꓪꓽ ꓗꓪ ꓐꓰˍ ꓟꓲ꓾ ꓠꓱꓸ ꓐꓯ ꓢꓴ ꓗꓪ ꓐꓰˍ ꓟꓲ ꓟꓬꓱ ꓓꓳꓽ ꓟꓽ ꓧꓪ꓿ 7 ꓮꓽ ꓚꓵꓹ ꓖꓶ ꓛꓵꓼ ꓢꓴ ꓟꓹ ꓟ ꓡꓰ ꓬꓲ ꓚꓲ ꓛꓬ ꓤꓽ ꓠꓱ ꓔꓯ ꓠꓲꓹ ꓙꓽ ꓟꓬ ꓗꓳˍ ꓟ ꓡꓰ ꓐꓰ꓾ ꓥꓪ ꓠꓴꓽ ꓠꓽ ꓠꓴ ꓪꓽ ꓔꓯꓸ ꓟꓳꓸ ꓠꓲꓹ ꓟ ꓠꓴꓽ ꓢꓲ ꓙꓽ ꓗꓳ ꓠꓲꓹ ꓣꓱꓽˍ ꓡꓳ꓿ 8 ꓝꓮꓲ ꓠꓬ ꓥꓪ ꓠꓴꓽ ꓠꓽ ꓠꓴ ꓪꓽ ꓔꓯ ꓮꓽ ꓘꓶꓸ ꓠꓲꓹ ꓠꓵˍ ꓠꓬꓲ꓾ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳ ꓚ ꓟꓸ ꓖꓶ ꓠꓲꓹ ꓫꓵˍ ꓟ ꓡꓰ ꓟꓽ ꓞꓲ꓾ ꓥꓪ ꓠꓴꓽ ꓚꓲ ꓛꓬ ꓢꓯꓼ ꓟꓬˍ ꓟꓲ ꓠꓴ ꓪꓽ ꓐꓱ ꓶ ꓖꓶ ꓠꓲꓹ ꓫꓵˍ ꓡꓳ꓿ 9 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓮ ꓡꓲ ꓕꓲ ꓣꓳ ꓔꓯˍ ꓟꓲ ꓟꓽ ꓪꓴ ꓧꓶ ꓡꓰ ꓝꓲ ꓠꓹ ꓟ꓾ ꓥꓪ ꓠꓴꓽ ꓠꓬ ꓟꓳꓼ ꓡꓳ ꓢ ꓘꓪ ꓪꓴꓽ ꓧꓶ ꓪꓴ ꓡꓰꓼ ꓟꓬꓱꓽ ꓬꓰ ꓢꓯꓼ ꓕꓵꓼ ꓢꓲ꓾ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳ ꓠꓴ ꓪꓽ ꓔꓯ ꓚ ꓟꓸ ꓖꓶˍ ꓟ ꓠꓴ ꓪꓽ ꓚꓲꓸ ꓟꓶˍ ꓢꓰꓽ ꓐꓷˍ ꓥꓳ꓿ 10 ꓥꓪ ꓠꓴꓽ ꓠꓬ ꓠꓴ ꓪꓽ ꓦ ꓡꓱ ꓢꓴ ꓐꓴ ꓔꓯꓸ ꓟꓳꓸ ꓮ ꓘꓶꓻ ꓛꓲ ꓠꓲꓹ ꓟ ꓡꓱꓻˍ ꓟ ꓐꓰ꓾ ꓔꓱꓹ ꓜꓳꓽˍ ꓟ ꓐꓰ꓾ ꓓꓰ ꓖꓴ ꓟꓽ ꓙꓳ ꓙꓳ ꓞꓳ ꓙꓳꓻ ꓗꓷ ꓟ ꓔꓯ ꓢꓷꓸ ꓙ ꓟꓳ ꓙ ꓢꓴ ꓠꓬ ꓠꓴ ꓪꓽˍ ꓐꓰ ꓪꓴ-ꓢ ꓥ ꓡꓳ꓿ 11 ꓮꓽ ꓐ ꓣꓱꓽ ꓢꓴ ꓡꓰ ꓬꓲ ꓚꓲ ꓛꓬ ꓤꓽ ꓠꓱ ꓔꓯ ꓟꓸ ꓖꓶˍ ꓟ ꓡꓰ ꓐꓰ꓾ ꓥꓪ ꓠꓴꓽ ꓠꓬ ꓠꓴ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓘꓶꓸ ꓢꓲ꓾ 12 ꓠꓲꓹ ꓟ ꓗꓴꓺ ꓖꓶ ꓢꓲ ꓠꓬꓲ꓾ ꓬꓲ ꓚꓲ ꓛꓬ ꓗꓴꓷˍ ꓐꓰ ꓐꓬꓱꓼ ꓡꓱ ꓡꓱ ꓟ ꓗꓪ ꓠꓴ ꓪꓽ ꓔꓯ ꓘꓴꓻ ꓓꓵꓽ ꓡꓰ ꓢꓴ ꓪꓴ-ꓢ ꓟꓲꓽ ꓙꓬ ꓗꓪ ꓒꓵꓽ ꓒꓵˍ ꓡꓰ ꓞꓳ ꓙꓳ ꓠꓹ ꓟ ꓢꓯꓼ ꓖꓶ ꓗꓷ ꓟ ꓠꓴ ꓪꓽ ꓢꓷꓸˍ ꓡꓳ꓿ 13 ꓝꓮꓲ ꓠꓴ ꓪꓽ ꓠꓬ ꓥꓪ ꓠꓴꓽ ꓗꓪ ꓐꓰ ꓪꓴ-ꓢ ꓐꓯ ꓘꓶ ꓑ ꓙꓽ ꓟꓶˍ ꓕꓯ꓾ ꓞꓳ ꓤ ꓐꓯ ꓘꓶ ꓟꓽ ꓥ꓾ ꓪꓴ-ꓢ ꓐꓯ ꓘꓶ ꓥꓳ꓾ ꓐꓰ ꓠꓴ ꓪꓽ ꓘꓳ ꓣꓴˍ ꓠꓬꓲ꓾ ꓥꓪ ꓠꓴꓽ ꓠꓬ ꓟꓽ ꓠꓽ ꓠ ꓪꓴ-ꓢ ꓔꓯ ꓫꓸ ꓟꓳˍ ꓡꓳ꓿ ꓐꓯ ꓘꓶ ꓕꓱ ꓟ ꓠꓬ ꓚꓵ ꓚꓵ ꓪꓴ-ꓢ ꓐꓯ ꓘꓶ ꓥ ꓢꓲ꓾ ꓠꓴ ꓪꓽ ꓙꓵꓻ ꓢꓴ ꓐꓴ ꓠꓲꓹ ꓟ ꓗꓪ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿ 14 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓬꓴ-ꓔ ꓟꓵꓽ ꓗꓪ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓟ ꓪꓴ-ꓢ ꓘꓴ ꓜꓲ ꓞꓳ ꓔꓯ ꓔꓯꓺ ꓢꓳ ꓢꓴ ꓒꓬꓱꓼ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓬꓴ-ꓔ ꓡ ꓞꓳ ꓡꓯꓼ ꓒꓯꓹ ꓗꓪ ꓬꓲ ꓪꓽ ꓫꓸ ꓙꓵꓻ ꓜꓲꓽˍ ꓟ ꓐꓰ ꓕꓲꓽ ꓡꓰꓹꓼ ꓠꓴ ꓪꓽˍ ꓟꓲ ꓚꓲ ꓛꓬ ꓟꓵꓽ ꓢꓴ ꓡꓯꓼ ꓒꓯꓹ ꓗꓪ ꓫꓸ ꓙꓵꓻ ꓜꓲꓽˍ ꓡꓳ꓿ 15 ꓬꓴ-ꓔ ꓡ ꓞꓳ ꓡꓰ ꓢꓲ ꓒꓽ ꓬꓰ-ꓢꓴˍ ꓐꓰ ꓟꓷ ꓠꓷꓹ ꓝꓸ ꓢꓴ ꓐꓴ ꓔꓯ ꓢꓰꓼ ꓗꓷꓳ꓿ ꓥꓪ ꓠꓴꓽ ꓔꓯˍ ꓟꓲ ꓖꓼ ꓓꓳ ꓩꓴ ꓡꓺꓳ꓿ ꓬꓲ ꓪꓽ ꓠꓬ ꓪꓴ-ꓢ ꓠꓵˍ ꓟ ꓟꓽ ꓬꓰ ꓬꓰ꓾ ꓞꓳ ꓤ ꓮꓽ ꓙꓵ ꓔꓯ ꓛꓴꓽ ꓙꓳ ꓢꓴ ꓬꓰ ꓢꓲ꓾ 16 ꓐꓶꓽ ꓞꓳ ꓐꓴ ꓢꓯꓼ ꓟꓬ ꓝ ꓟꓶ ꓓꓴ ꓟꓸ ꓟꓲ ꓟꓽ ꓚ ꓠꓹ ꓟ ꓬꓲ ꓪꓽ ꓡꓰ ꓥꓪ ꓠꓴꓽ ꓔꓯ ꓗꓽ ꓔ ꓡꓳ꓿ ꓬꓲ ꓪꓽ ꓠꓬ ꓮ ꓕꓯˍ ꓟꓲ ꓚꓲ ꓛꓬ ꓝꓴꓲ ꓔꓯ ꓡꓴꓽ ꓐꓲ ꓡ ꓝꓲˍ ꓠꓬꓲ꓾ ꓪꓴ-ꓢ ꓦꓶ ꓠꓲꓹ ꓠꓬ ꓒ ꓐꓲꓺꓼ ꓐꓰ ꓬꓲ ꓪꓽ ꓔꓯ ꓬꓯꓼ ꓡꓺꓳ꓿ 17 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓴꓽ ꓖꓳ ꓓꓱꓽ ꓠꓬ ꓠꓴ ꓪꓽˍ ꓐꓰ ꓕꓲ ꓑꓹ ꓤ ꓗꓳꓹ ꓞꓹ ꓟꓲ꓾ ꓠꓲꓹ ꓟ ꓠꓽ ꓟꓽ ꓗꓳꓹ ꓞꓹ꓿ ꓥꓪ ꓠꓴꓽ ꓠꓽ ꓠꓴ ꓪꓽ ꓔꓯ ꓢꓲꓼ ꓙꓬ ꓠꓬꓲ꓾ ꓒꓬꓱꓽ ꓔꓳꓹ ꓟꓬ ꓔꓳ ꓮꓽ ꓘꓶꓸ ꓟꓳꓻ ꓡꓯꓽ ꓘꓳ ꓠꓲꓹ ꓫꓵˍ ꓡꓳ꓿ 18 ꓥꓪ ꓠꓴꓽ ꓠꓽ ꓠꓴ ꓪꓽ ꓔꓬ ꓗꓪ ꓡ ꓠꓲꓹ ꓫꓵ ꓠꓬꓲ ꓒꓳ-ꓡꓳ ꓥꓪ ꓠꓬ ꓡ ꓠꓹ ꓟ ꓕꓲ ꓠꓬꓲꓽ ꓧꓪꓹ ꓬꓰ ꓗꓷˍ ꓟꓲ꓾ ꓢ-ꓓꓯ ꓡꓰ ꓥꓪ ꓠꓴꓽ ꓔꓯ ꓗꓽ ꓔ ꓡꓳ꓿ 19 ꓥꓪ ꓠꓴꓽ ꓥꓳ ꓡꓳꓸ ꓓꓴˍ ꓐꓰ ꓗꓹ ꓛꓲ ꓓꓴˍ ꓐꓰ ꓟꓬꓱ ꓓꓳꓽ ꓪꓴꓸ ꓛꓴꓽ ꓠꓬ ꓮꓸ ꓫꓵꓽ ꓥ ꓡ? ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓡꓻˍ ꓕꓯ꓾ ꓬꓲ ꓟꓲꓽ ꓙꓬ ꓗꓪ ꓥꓪ ꓠꓴꓽ ꓟꓬꓱ ꓓꓳꓽ ꓪꓴꓸ ꓛꓴꓽ ꓠꓬ ꓠꓴ ꓪꓽ ꓟꓽ ꓥ ꓡ? 20 ꓚꓵ ꓚꓵ ꓠꓴ ꓪꓽ ꓠꓬ ꓥꓪ ꓠꓴꓽ ꓟꓬꓱ ꓓꓳꓽˍ ꓐꓰ ꓗꓹ ꓛꓲ ꓓꓴ ꓥꓳ꓿

1 ꓕꓰ-ꓢ-ꓡꓳ-ꓠꓲ-ꓬ 3

1 ꓥꓪ ꓠꓴꓽ ꓠꓬ ꓜꓲꓽ ꓟꓽ ꓘꓴ ꓡ ꓠꓬꓲ꓾ ꓬ-ꓕꓰ-ꓠ ꓗꓪ ꓔꓲꓹ ꓬꓰˍ ꓟꓲ ꓙꓲˍ ꓡꓳ꓾ ꓓꓵꓽ ꓙꓽ ꓢꓲ꓾ 2 ꓙꓵꓻ ꓠꓲꓹ ꓗꓪ ꓠꓴ ꓪꓽ ꓔꓯ ꓢꓯꓼ ꓖꓶ ꓢꓲ ꓕꓶꓻ ꓡꓰ ꓝꓲ ꓠꓹ ꓟ꓾ ꓙꓲ-ꓢꓴ ꓶꓼ ꓓꓳꓽ ꓫꓱꓹ ꓓꓳ ꓗꓪ ꓥꓪ ꓠꓴꓽˍ ꓐꓰ ꓕꓲꓽ ꓪꓺꓼ ꓪꓴ-ꓢ ꓔꓯ ꓣꓱꓽ ꓙ ꓢꓴ꓾ ꓣꓳꓽ ꓠꓬꓲ ꓤꓽ ꓕꓲ-ꓟꓳ-ꓕꓲ-ꓪꓴ ꓔꓯ꓾ ꓥꓪ ꓠꓴꓽ ꓡꓰ ꓠꓴ ꓪꓽ ꓔꓬ ꓗꓪ ꓝꓲ ꓩꓴ ꓡꓺꓳ꓿ 3 ꓕꓱ ꓟ ꓠꓬ ꓠꓴ ꓪꓽ ꓮ ꓡꓲ ꓕꓲ ꓣꓳˍ ꓟꓲ ꓫꓸ ꓙꓵꓻˍ ꓟ ꓕꓱ ꓟꓬ ꓫꓵꓽ ꓪꓴꓸ ꓠꓬꓲ ꓟꓽ ꓶꓹ ꓡꓵ ꓡꓰ ꓝꓲ ꓠꓹ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓣꓳꓽ ꓕꓱ ꓡꓱ ꓔꓳꓹ ꓜꓳꓽˍ ꓟ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓢꓲꓺ ꓚꓲꓸ ꓔ ꓟ ꓥꓳ꓾ ꓐꓰ ꓠꓴ ꓪꓽ ꓢꓷꓸˍ ꓡꓳ꓿ 4 ꓥꓪ ꓠꓬ ꓠꓴ ꓪꓽˍ ꓐꓰ ꓔꓬ ꓕꓯˍ ꓟꓲ꓾ ꓣꓳꓽ ꓫꓸ ꓙꓵ ꓠ ꓗꓹ ꓟ ꓚꓵ ꓚꓵ ꓠꓴ ꓪꓽ ꓔꓯ ꓧꓶꓸ ꓕꓯ ꓐꓯ ꓖꓶ ꓗꓷꓳ꓿ ꓖꓳ ꓗꓸ ꓠꓯꓸ ꓬꓲ ꓖꓳ ꓡꓱ ꓒꓬꓱꓼ ꓡ ꓟ ꓠꓴ ꓪꓽ ꓢꓷꓸˍ ꓡꓳ꓿ 5 ꓕꓱ ꓟ ꓑꓶꓸ ꓓꓴ ꓥꓪ ꓜꓲꓽ ꓟꓽ ꓘꓴ ꓡ ꓠꓬꓲ꓾ ꓮ ꓧꓪꓹ ꓗꓶꓸ ꓫꓵꓽ ꓠꓬꓲ ꓢꓴ ꓖꓳ ꓕꓲ ꓣꓳ ꓡꓰ ꓕꓲ ꓫꓵꓽ ꓫꓵ ꓗꓪ ꓐꓰ ꓠꓴ ꓪꓽ ꓔꓯ ꓫꓵꓽ ꓠꓬꓲ ꓢꓲ꓾ ꓥꓪ ꓠꓴꓽ ꓢꓯꓼ ꓕꓵꓼ ꓪꓴꓽ ꓧꓶ ꓗꓷ ꓟ ꓮꓽ ꓔꓳˍ ꓡꓰ ꓗꓷ ꓡꓰˍ ꓟ ꓔꓯ ꓗꓳ ꓚꓱ ꓠꓬꓲ꓾ ꓠꓴ ꓪꓽ ꓙꓵꓻ ꓠꓲꓹ ꓮ ꓡꓲ ꓥ ꓟꓽ ꓥ ꓢꓷꓸ ꓡꓰ ꓠꓹ ꓟ꓾ ꓕꓲ-ꓟꓳ-ꓕꓲ-ꓪꓴ ꓔꓯ ꓝꓲ ꓩꓴ ꓡ ꓟ ꓥꓳ꓿ 6 ꓖꓳ ꓡꓱ ꓥ ꓟꓲ ꓕꓲ-ꓟꓳ-ꓕꓲ-ꓪꓴ ꓠꓬ꓾ ꓠꓴ ꓪꓽ ꓔꓬ ꓗꓪ ꓐꓰ ꓮ ꓟꓶ ꓥꓪ ꓠꓴꓽ ꓔꓯ ꓬꓲꓼ ꓛꓲꓺ ꓡ ꓢꓲ꓾ ꓠꓴ ꓪꓽ ꓙꓵꓻ ꓠꓲꓹˍ ꓐꓰ ꓠꓵ ꓠꓲꓹ ꓙꓳˍ ꓟ ꓐꓰ꓾ ꓠꓴ ꓪꓽ ꓠꓬ ꓮ ꓕꓯˍ ꓟꓲ ꓥꓪ ꓠꓴꓽ ꓔꓯ ꓮꓽ ꓘꓶ ꓓꓵꓽ ꓙꓽ ꓢꓲ꓾ ꓥꓪ ꓠꓴꓽ ꓠꓬ ꓠꓴ ꓪꓽ ꓔꓯ ꓟꓳꓻ ꓠꓲꓹ ꓫꓵˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓥꓪ ꓠꓴꓽ ꓔꓯ ꓟꓳꓻ ꓠꓲꓹ ꓫꓵˍ ꓟ꓾ ꓙꓲˍ ꓟ ꓓꓳꓽ ꓕꓱ ꓟ ꓐꓯ ꓖꓶ ꓡꓺꓳ꓿ 7 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓴꓽ ꓠꓬ ꓠꓲꓹ ꓫꓸ ꓟꓬ ꓫꓸ ꓟ ꓐꓰ ꓫꓸ ꓙꓵ ꓟꓷꓼ ꓙꓵꓻˍ ꓟ ꓔꓳꓹ ꓜꓳꓽˍ ꓟꓲ꓾ ꓠꓴ ꓪꓽ ꓙꓵꓻ ꓠꓲꓹ ꓑꓶꓸ ꓓꓴ ꓥꓪ ꓠꓴꓽ ꓠꓲꓹ ꓗꓴ ꓟꓬ ꓗꓴ ꓟꓶˍ ꓡꓳ꓿ 8 ꓠꓴ ꓪꓽ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓦꓰꓼ ꓕꓶꓻ ꓞꓹ ꓠꓬꓲ꓾ ꓥꓪ ꓠꓴꓽ ꓠꓽ ꓮꓽ ꓘꓶ ꓠꓲꓹ ꓘꓪꓽ ꓫꓵˍ ꓡꓳ꓿ 9 ꓥꓪ ꓠꓴꓽ ꓠꓬ ꓠꓴ ꓪꓽ ꓑꓶꓸ ꓓꓴ ꓣꓳꓽ ꓪꓴ-ꓢ ꓟꓲꓽ ꓙꓬ ꓗꓪ ꓟꓶˍ ꓟ ꓗꓹ ꓛꓲ ꓓꓴ ꓕꓱ ꓟ ꓐꓱ ꓶ ꓮ ꓡꓲ ꓐꓰ ꓢꓲ ꓪꓴ-ꓢ ꓔꓯ ꓫꓸ ꓟꓳ ꓐꓯ ꓖꓴ ꓓ ꓢꓰꓽ꓿ 10 ꓥꓪ ꓠꓴꓽ ꓠꓬ ꓠꓴ ꓪꓽ ꓙꓵꓻ ꓠꓲꓹ ꓟꓽ ꓡꓳꓼ ꓟ ꓗꓪ ꓐꓲꓺ ꓡꓰ ꓝꓲ ꓠꓹ ꓟ꓾ ꓒꓬꓱꓽ ꓔꓳꓹ ꓟꓬ ꓔꓳꓹ ꓠꓴ ꓪꓽˍ ꓐꓰ ꓟꓳꓻ ꓡꓯꓽ ꓘꓳ ꓪ ꓝꓲ꓾ ꓐꓰ ꓟꓳꓼ ꓡꓳ ꓢ ꓘꓪ ꓮꓽ ꓘꓶꓸ ꓪꓽ ꓘꓴ ꓔꓬ ꓡꓳ꓿ 11 ꓣꓳꓽ ꓐꓹ ꓐꓽ ꓪꓴ-ꓢ ꓬꓲ ꓚꓲ ꓛꓬˍ ꓐꓰ꓾ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓡꓰ꓾ ꓥꓪ ꓠꓴꓽ ꓔꓯ ꓠꓴ ꓪꓽ ꓔꓬ ꓗꓪ ꓛꓲ ꓙ ꓖꓴ ꓧꓳꓽ ꓟꓳꓸ ꓖꓶ ꓡ ꓝꓲ꓿ 12 ꓝꓮꓲ ꓠꓬ꓾ ꓠꓴ ꓪꓽ ꓔꓯ ꓥꓪ ꓠꓴꓽ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓠꓲꓹ ꓠꓵ ꓡꓯꓽ ꓘꓳ ꓢꓲ꓾ ꓞꓳ ꓤ ꓥ ꓕ ꓑꓳ ꓔꓯˍ ꓟꓲ ꓠꓲꓹ ꓠꓵ ꓐ ꓡ ꓠꓹ ꓟ꓾ ꓢꓲ ꓒꓽ ꓡꓰ ꓠꓴ ꓪꓽ ꓠꓵ ꓠꓲꓹ ꓔꓯ ꓟꓬꓽ ꓡ ꓐꓶꓹ ꓡ ꓝꓲ꓿ 13 ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓠꓬ ꓬꓲ ꓢꓲ ꓫꓬ ꓢꓴ ꓐꓴˍ ꓐꓰ ꓕꓲ ꓛꓳꓺꓼ ꓡꓻ ꓕꓯ꓾ ꓠꓴ ꓪꓽ ꓠꓬ ꓣꓳꓽ ꓐꓹ ꓐ ꓪꓴ-ꓢ ꓟꓲꓽ ꓙꓬ ꓗꓪ ꓢꓲ ꓚꓰꓸ ꓔ ꓟꓶ ꓢꓲ꓾ ꓓꓰ ꓖꓴ ꓟꓽ ꓙꓳ ꓢꓴ ꓒꓬꓱꓼ ꓡ ꓠꓹ ꓟ꓾ ꓬꓲ ꓡꓰ ꓠꓴ ꓪꓽ ꓠꓲꓹ ꓟ ꓔꓯ ꓕꓶꓻ ꓡꓰ ꓝꓲ꓿

1 ꓕꓰ-ꓢ-ꓡꓳ-ꓠꓲ-ꓬ 4

1 ꓡꓳꓹ ꓬꓰˍ ꓟ ꓕꓲ ꓘꓶꓽ ꓠꓬ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓔꓯ ꓠꓲꓹ ꓒꓴ ꓡꓰ ꓝꓲ ꓠꓹ ꓟ꓾ ꓠꓴ ꓪꓽ ꓮ ꓡꓲ ꓞꓳ ꓙꓳꓻ ꓠꓯꓹ ꓟ ꓕꓱ ꓟ ꓥꓪ ꓠꓴꓽ ꓔꓯˍ ꓐꓰ ꓠꓴ ꓪꓽ ꓢꓳ ꓟꓶ ꓗꓷ ꓢꓲ꓾ ꓠꓴ ꓪꓽ ꓠꓬ ꓬꓲ ꓖꓳ ꓡꓱ ꓞꓳ ꓙꓳ ꓔꓬ ꓟ ꓥꓳ꓿ ꓮ ꓟꓶ ꓥꓪ ꓠꓴꓽ ꓠꓬ ꓢꓲ ꓒꓽ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓠꓴ ꓪꓽ ꓔꓯ ꓓꓰꓽˍ ꓠꓬꓲ꓾ ꓟꓬꓽ ꓠꓬꓲ ꓕꓱ ꓡꓱ ꓞꓳ ꓙꓳ ꓐ ꓡ ꓠꓹ ꓟ ꓢꓯꓼ ꓕꓵꓼ꓿ 2 ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓬꓰ-ꓢꓴ ꓕꓵꓼ ꓘꓶ ꓗꓪ ꓐꓰ ꓠꓴ ꓪꓽ ꓔꓯ ꓥꓪ ꓠꓴꓽ ꓡꓰ ꓮ ꓡꓲ ꓡꓴ ꓫꓵꓽ ꓕꓵꓼ ꓪꓽ ꓖꓶ ꓔ ꓟ ꓠꓴ ꓪꓽ ꓢꓷꓸˍ ꓡꓳ꓿ 3 ꓪꓴ-ꓢ ꓠꓲꓹ ꓡꓶ ꓠꓬ ꓕꓱ ꓡꓱ ꓥ ꓡꓳ꓿ ꓠꓴ ꓪꓽ ꓠꓽ ꓢꓲ ꓚꓰꓸ ꓔ ꓢꓴ ꓥ ꓟ ꓡꓰ ꓐꓰ꓾ ꓟꓽ ꓢꓲ ꓟꓽ ꓫꓬ ꓟ ꓔꓯ ꓚꓲꓸ ꓠꓹ ꓟ ꓐꓰ꓾ 4 ꓮ ꓡꓲ ꓕꓲ ꓣꓳˍ ꓟꓲ꓾ ꓚꓲ ꓛꓬ ꓖꓳ ꓓꓱ ꓔꓯ ꓢꓲꓽ ꓢꓲ ꓫꓬꓻ ꓫꓬˍ ꓡꓰꓽ ꓙꓵꓽ ꓔ ꓢꓲ꓾ ꓞꓳ ꓙꓳˍ ꓟ ꓗꓪ ꓒꓵꓽ ꓓˍ ꓟ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ꓿ 5 ꓝꓮꓲ ꓠꓬ ꓪꓴ-ꓢ ꓔꓯ ꓟꓽ ꓢꓷꓸˍ ꓟ ꓐꓶꓽ ꓞꓳ ꓐꓴ ꓦꓯꓸ ꓠꓲ ꓙꓵˍ ꓟ ꓡꓰ ꓐꓰ ꓠꓴ ꓪꓽ ꓟꓽ ꓬꓰ ꓠꓹ ꓟ ꓐꓰ꓾ 6 ꓮꓽ ꓟˍ ꓟꓲ ꓬꓲ ꓬꓲꓼ ꓬꓲ ꓠꓬꓲ ꓔꓯ ꓟꓽ ꓪꓴꓸ ꓘꓳꓻ ꓟꓽ ꓛꓬ ꓡꓰ ꓠꓹ ꓟ ꓥ ꓡꓳ꓿ ꓠꓴ ꓪꓽ ꓔꓯ ꓥꓪ ꓠꓴꓽ ꓡꓰ ꓙꓳꓺ ꓗꓽ ꓖꓶ ꓗꓷ ꓟ ꓡꓰ ꓐꓰ꓾ ꓕꓱ ꓟꓬ ꓫꓵꓽ ꓗꓪ ꓐꓰ ꓬꓲ ꓬꓲꓼ ꓬꓲ ꓠꓬꓲ ꓔꓯ ꓛꓬ ꓢꓴ ꓔꓯ ꓠꓬ꓾ ꓢꓲ ꓒꓽ ꓡꓰ ꓪꓽ ꓛꓴꓽ ꓚꓱꓹ ꓖꓶ ꓡ ꓥꓳ꓿ 7 ꓮ ꓡꓲꓳ ꓐꓯ ꓠꓬ ꓣꓳꓽ ꓔꓯ ꓠꓽ꓾ ꓟꓽ ꓢꓲꓽ ꓟꓽ ꓫꓬ ꓟ ꓗꓪ ꓞꓳ ꓙꓳ ꓠꓹ ꓟ ꓪꓴ-ꓢ ꓡꓰ ꓘꓴꓻ ꓔ ꓟ ꓟꓽ ꓥ꓿ ꓢꓲ ꓚꓰꓸ ꓟꓶ ꓢꓴ ꓞꓳ ꓙꓳ ꓚꓱꓹ ꓗꓪ ꓞꓳ ꓙꓳ ꓠꓹ ꓟ ꓘꓴꓻ ꓔ ꓟ ꓥ ꓡꓳ꓿ 8 ꓖꓳ ꓡꓱ ꓠꓬꓲ ꓕꓵꓼ ꓪꓽ ꓕꓱ ꓟ ꓟꓽ ꓘꓳ ꓣꓴ ꓢꓴ ꓠꓬ꓾ ꓞꓳ ꓤ ꓔꓯ ꓟꓽ ꓘꓳ ꓣꓴˍ ꓟ ꓟꓽ ꓥ꓿ ꓠꓴ ꓪꓽ ꓔꓯ ꓬꓲ ꓢꓲ-ꓫꓬ-ꓟ-ꓦ ꓖꓶ ꓡ ꓢꓴ ꓪꓴ-ꓢ ꓔꓯ ꓟꓽ ꓘꓳ ꓣꓴˍ ꓟ ꓥ ꓡꓳ꓿ 9 ꓬꓲꓼ ꓤ ꓠꓬꓲ ꓤ ꓐꓴ ꓠꓲꓹ ꓠꓵ ꓡꓯꓼ ꓘꓳ ꓠꓯꓹ ꓟ ꓔꓯꓸ ꓟꓳꓸ ꓐꓯˍ ꓠꓬ꓾ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ ꓟꓸ ꓖꓶ ꓔ ꓠꓬꓲ꓾ ꓬꓲ ꓐꓶꓹ ꓮꓸ ꓫꓵꓽ ꓐꓳ ꓖꓶ ꓟꓽ ꓛꓵꓳ꓿ 10 ꓟ-ꓢꓲ-ꓓꓳ ꓕꓲ ꓟꓵꓽ ꓡꓱꓸꓼ ꓗꓪ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ꓾ ꓠꓴ ꓪꓽ ꓚꓵ ꓚꓵ ꓕꓱ ꓡꓱ ꓠꓲꓹ ꓠꓵˍ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓟ ꓡꓰ ꓐꓰ ꓠꓴ ꓪꓽ ꓟꓬꓽ ꓠꓬꓲ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ ꓠꓴ ꓪꓽ ꓔꓯ ꓘꓶꓸ ꓖꓶ ꓠꓲꓹ ꓫꓵˍ ꓡꓳ꓿ 11 ꓠꓴ ꓪꓽ ꓔꓯ ꓥꓪ ꓠꓴꓽ ꓡꓰ ꓕꓵꓼ ꓪꓽ ꓖꓶ ꓗꓷ ꓟ ꓡꓰ ꓐꓰ꓾ ꓠꓴ ꓪꓽ ꓠꓬ ꓢꓲ ꓡꓲ ꓐꓰ ꓔꓬ ꓗꓴˍ ꓟ ꓡ ꓞꓳ ꓬꓰ ꓢꓲ꓾ ꓚꓲ ꓛꓬ ꓫꓵꓽ ꓪꓴ ꓔꓯˍ ꓡꓰ ꓗꓪ' ꓫꓵꓽ ꓢꓲ ꓠꓬꓲ꓾ ꓚꓲ ꓛꓬ ꓡꓯꓼ ꓒꓯꓹ ꓡꓰ ꓟꓬꓱꓽ ꓬꓰ ꓢꓲ ꓖꓳ ꓓꓱ ꓦꓵꓻ ꓓꓴ ꓬꓰ꓿ 12 ꓕꓱ ꓡꓱ ꓬꓰˍ ꓠꓬ ꓟꓽ ꓦ ꓡꓱ ꓢꓴˍ ꓟꓲ ꓠꓴ ꓪꓽ ꓔꓯ ꓞꓳ ꓒꓵꓽ ꓡ ꓢꓲ꓾ ꓠꓴ ꓪꓽ ꓣꓱꓽ ꓬꓯꓼˍ ꓟ ꓮꓽ ꓙꓵ ꓐꓲ ꓡꓰ ꓠꓬꓲ꓾ ꓮꓽ ꓟ ꓔꓯˍ ꓟꓲ ꓪꓽ ꓪꓴꓽ ꓘꓳꓹ ꓟꓽ ꓛꓵ ꓗꓷ ꓡꓰˍ ꓥꓳ꓿ 13 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓥꓳ ꓡꓳꓸ ꓓꓴ ꓟꓽ ꓙꓳ ꓢꓴ ꓠꓲꓹ ꓟ ꓫꓸ ꓟ ꓡꓰ ꓐꓰ ꓠꓲꓹ ꓟ ꓫꓸ ꓟꓽ ꓛꓵ ꓠꓹ ꓟ꓾ ꓫꓵꓻ ꓢꓴ ꓔꓯꓸ ꓟꓳꓸ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 14 ꓮ ꓡꓲꓳ ꓐꓯ ꓠꓬ ꓬꓰ-ꓢꓴ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓟ ꓔꓯ ꓣꓳꓽ ꓙꓵˍ ꓠꓬꓲ꓾ ꓬꓰ-ꓢꓴ ꓠꓯꓸꓼ ꓗꓪ ꓫꓵꓻ ꓢꓴ ꓔꓯˍ ꓟꓲ꓾ ꓪꓴ-ꓢ ꓡꓰ ꓬꓰ-ꓢꓴˍ ꓐꓰ ꓕꓲ ꓛꓳꓺꓼ ꓧꓳꓽ ꓡ ꓥꓳ꓿ 15 ꓥꓪ ꓠꓴꓽ ꓠꓬ ꓢꓲ ꓒꓽ ꓐꓯ ꓘꓶ ꓕꓲ ꓘꓶ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓢꓲ ꓒꓽ ꓡ ꓗꓪ ꓛꓲ ꓢꓯꓸ ꓔꓬ ꓢꓴ ꓣꓳꓽ ꓠꓬ꓾ ꓮ ꓡꓲ ꓗꓹˍ ꓟꓲ ꓫꓵꓻ ꓢꓴ ꓐꓴ ꓟꓲꓽ ꓕꓯꓽ ꓢꓲ ꓗꓪ ꓟꓽ ꓗꓷ ꓡꓰ꓿ 16 ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓬꓲ ꓚꓲ ꓛꓬ ꓘꓴꓻ ꓢꓲ ꓕꓵꓼ ꓪꓽ ꓖꓶ ꓢꓲ ꓠꓬꓲ꓾ ꓟꓴꓽ ꓗꓪ ꓝꓲ ꓓꓴ ꓓꓽ ꓟ ꓘꓴꓻ ꓠꓬꓲ꓾ ꓪꓴ-ꓢ ꓬꓲ ꓐꓽ ꓡ ꓟꓶ ꓠꓬꓲ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓥꓳ꓿ ꓖꓳ ꓡꓱ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓫꓵꓻ ꓢꓴ ꓧꓶꓸ ꓕꓯ ꓢꓯꓸ ꓬꓲꓼ ꓡ ꓥꓳ꓿ 17 ꓖꓳ ꓕꓯ ꓢꓯꓸ ꓔꓬ ꓢꓰꓽ ꓢꓴ ꓣꓳꓽ ꓠꓬ ꓬꓲ ꓪꓽˍ ꓐꓰ ꓕꓲ ꓛꓳꓺꓼ ꓟꓵꓽ ꓪꓴ ꓗꓪ ꓢꓲ ꓒꓽˍ ꓐꓰ ꓜꓲꓻ ꓡꓯꓽ ꓘꓳ ꓠꓹ ꓟ꓾ ꓟꓴ ꓗꓴꓸ ꓗꓪ ꓛꓵꓽ ꓓꓯ ꓙꓰˍ ꓥꓳ꓿ ꓖꓳ ꓡꓱ ꓢꓲ ꓣꓳꓽ ꓠꓬ ꓮ ꓕꓯˍ ꓟꓲ ꓢꓲ ꓒꓽˍ ꓐꓰ ꓕꓲ ꓪꓺꓼ ꓔꓬ ꓥꓳ꓿ 18 ꓖꓳ ꓡꓱ ꓠꓬꓲ ꓠꓴ ꓪꓽ ꓕꓲ ꓣꓳ ꓛꓳꓽ ꓕꓲ ꓣꓳ ꓐꓯ ꓘꓶ ꓕꓱ ꓟ ꓡꓰ ꓠꓲꓹ ꓟ ꓗꓴꓺ ꓖꓶ ꓡꓯꓽ ꓘꓳ꓿

1 ꓕꓰ-ꓢ-ꓡꓳ-ꓠꓲ-ꓬ 5

1 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓦꓬꓼ ꓠꓬꓲˍ ꓐꓰ ꓬꓲ ꓝꓲꓸ ꓔꓯ ꓐꓯˍ ꓠꓬ꓾ ꓠꓴ ꓪꓽ ꓔꓯ ꓮꓸ ꓫꓵꓽ ꓐꓳ ꓖꓶ ꓟꓽ ꓛꓵꓳ꓿ 2 ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓦꓬꓼ ꓠꓬꓲ ꓛꓲ ꓡ ꓟ ꓠꓬ꓾ ꓢ ꓘꓪ ꓞꓳ ꓘꓴꓽˍ ꓡꓰ ꓐꓰ ꓡꓻ ꓟ ꓠꓴ ꓪꓽ ꓢꓷꓸˍ ꓡꓳ꓿ 3 ꓞꓳ ꓤ ꓡꓰ꓾ ꓢꓲ ꓡꓲ ꓡꓲ ꓮꓸ ꓫꓵꓽ ꓟꓽ ꓘꓳ ꓟꓽ ꓟꓳ ꓥꓳ꓾ ꓐꓯ ꓔꓬ ꓕꓯ꓾ ꓤꓽ ꓠꓱ ꓶꓻ ꓞꓹ ꓟ ꓤꓽ ꓟꓶ ꓤ ꓬꓲ ꓤꓽ ꓠꓱ ꓦꓵ ꓠꓻ ꓛꓲ ꓡ ꓟ ꓡꓰ ꓐꓰ꓾ ꓬꓲ ꓪꓽ ꓛꓴꓻ ꓛꓰꓹ ꓡꓰ ꓓꓴ ꓞꓼ ꓐꓰ ꓛꓲ ꓡ ꓥꓳ꓿ ꓖꓳ ꓕꓯ ꓬꓲ ꓪꓽ ꓠꓬ ꓮ ꓡꓲ ꓗꓹˍ ꓟꓲ ꓛꓰꓹ ꓡꓲꓹ ꓗꓷ ꓟꓽ ꓓ꓿ 4 ꓖꓳ ꓡꓱ ꓥ ꓟꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓦꓬꓼ ꓠꓬꓲ ꓖꓳ ꓟ ꓠꓬ ꓞꓳ ꓘꓴꓽˍ ꓡꓰ ꓐꓰ ꓠꓴ ꓪꓽ ꓔꓯ ꓞꓼ ꓐꓰ ꓖꓼ ꓟꓶ ꓡ ꓠꓹ ꓟ꓾ ꓠꓴ ꓪꓽ ꓠꓬ ꓠꓯ ꓞꓲꓹ ꓟ ꓗꓪ ꓔꓬ ꓟ ꓟꓽ ꓥ꓿ 5 ꓠꓴ ꓪꓽ ꓮꓽ ꓙꓵ ꓠꓽ꓾ ꓠꓬꓲꓺ ꓟꓳꓻ ꓓꓴ ꓗꓪ ꓟˍ ꓐꓰ꓾ ꓟꓳꓼ ꓡꓳ ꓗꓪ ꓟ ꓤꓽ ꓐꓴ ꓥ ꓡꓳ꓿ ꓣꓳꓽ ꓠꓬ ꓢ ꓘꓪ ꓗꓪ ꓟ ꓟꓽ ꓥ꓾ ꓠꓯ ꓞꓲꓹ ꓟ ꓗꓪ ꓔꓬ ꓟˍ ꓟꓲ ꓟꓽ ꓥ꓿ 6 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓠꓱꓸ ꓐꓯ ꓢꓴˍ ꓡꓰ ꓐꓰ ꓟꓽ ꓬꓲꓼ ꓟꓶ ꓟꓶ꓾ ꓧꓪꓸ ꓛꓲ ꓐꓰ ꓔꓬ ꓢꓲ ꓞꓳ ꓢꓲꓽ ꓬꓰ ꓡꓯ꓿ 7 ꓮ ꓡꓲꓳ ꓐꓯ ꓠꓬ ꓬꓲꓼ ꓟꓶ ꓢꓴ ꓠꓬ ꓢ ꓘꓪ ꓕꓯ ꓬꓲꓼ ꓟꓶˍ ꓡꓳ꓿ ꓙꓲ ꓒꓶꓽ ꓬꓲꓼ ꓢꓴˍ ꓟꓲ ꓢ ꓘꓪ ꓕꓯ ꓬꓲꓼˍ ꓡꓳ꓿ 8 ꓣꓳꓽ ꓠꓽ ꓟꓳꓼ ꓡꓳ ꓗꓪ ꓟ ꓥ ꓠꓬꓲ ꓞꓳ ꓢꓲꓽ ꓬꓰ ꓢꓲ꓾ ꓙꓵꓻ ꓠꓲꓹˍ ꓐꓰ ꓠꓵ ꓠꓲꓹ ꓠꓬ ꓳ' ꓟꓶꓽ ꓔ ꓓꓴ ꓡꓰ ꓐꓰ ꓓꓱꓼ ꓔ ꓢꓲ ꓠꓬꓲ꓾ ꓪꓴꓸ ꓓꓵ ꓗꓪ ꓠꓬ ꓚꓬꓴ ꓟꓶˍ ꓟ ꓥꓳ ꓡꓳꓸ ꓓꓴ ꓘꓳꓹ ꓔ ꓡꓯ꓿ 9 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓣꓳꓽ ꓔꓯ ꓦꓶ ꓠꓲꓹ ꓟꓶ ꓝꓲ ꓠꓹ ꓟ ꓝꓰꓹ ꓔ ꓟ ꓟꓽ ꓥ꓿ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓚꓬꓴ ꓟꓶ ꓡꓰ ꓝꓲ ꓠꓹ ꓟ ꓝꓰꓹ ꓔ ꓟ ꓥ ꓡꓳ꓿ 10 ꓣꓳꓽ ꓠꓬ ꓧꓪꓸ ꓛꓲ ꓔꓬ ꓥ ꓟꓲ ꓬꓲꓼ ꓟꓶ ꓔꓬ ꓥ ꓟꓲ ꓬꓲˍ ꓐꓰ ꓕꓲ ꓪꓺꓼ ꓢꓯꓸ ꓔꓬ ꓠꓹ ꓟ꓾ ꓢꓲ ꓒꓽ ꓬꓰ-ꓢꓴ ꓠꓬ ꓣꓳꓽ ꓐꓱ ꓶ ꓫꓵꓻ ꓙ ꓗꓷꓳ꓿ 11 ꓖꓳ ꓡꓱ ꓠꓬꓲ ꓠꓴ ꓪꓽ ꓬꓰ ꓔꓬ ꓟ ꓡꓰ ꓐꓰ꓾ ꓡꓯꓽ ꓫꓵ ꓘꓶꓸ ꓖꓶ ꓡꓯꓼ ꓘꓳ ꓢꓲ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓢꓯꓼ ꓖꓶ ꓡꓯꓽ ꓘꓳˍ ꓟ ꓗꓪ ꓐꓰ ꓪꓴꓽ ꓡ ꓟꓴꓺ ꓡ ꓝꓲ꓿ 12 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓗꓳ ꓡꓳ ꓗꓪ ꓢꓯꓼ ꓕꓵꓼ ꓪꓴꓽ ꓧꓶ ꓢꓲ꓾ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪꓽ ꓔꓯ ꓧꓳꓽ ꓢꓴˍ ꓐꓰ ꓟꓸ ꓢꓴ ꓐꓴ ꓔꓯ ꓞꓳ ꓒꓵꓽ꓿ 13 ꓬꓲ ꓪꓽ ꓬꓰˍ ꓟ ꓟꓬꓱꓽ ꓑꓶꓸ ꓓꓴ꓾ ꓠꓵ ꓠꓲꓹ ꓗꓪ ꓐꓰ ꓬꓲ ꓪꓽ ꓔꓯ ꓮꓽ ꓘꓶꓸ ꓒꓵꓽ ꓠꓹ ꓟ ꓠꓴ ꓪꓽ ꓔꓯ ꓓꓰꓽˍ ꓥꓳ꓿ ꓠꓴ ꓪꓽˍ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓧꓳꓹ ꓡꓯꓽ ꓘꓳˍ ꓟ ꓡꓰ ꓞꓳꓻ ꓙꓳ꓿ 14 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓞꓳ ꓐꓴꓻ ꓔꓯ ꓙꓳꓺ ꓗꓽ ꓖꓶ꓿ ꓠꓲꓹ ꓟ ꓙꓬ ꓡꓰ ꓢꓴ ꓔꓯ ꓘꓶꓸ ꓖꓶ꓿ ꓢꓯꓼ ꓐ ꓢꓴ ꓔꓯ ꓬꓰ ꓙ꓿ ꓮꓽ ꓙꓵ ꓢꓴ ꓔꓯꓸ ꓟꓳ ꓠꓲꓹ ꓟ ꓫꓵˍ ꓟ ꓣꓱꓽ꓿ 15 ꓮꓽ ꓟ ꓥ ꓟꓲ꓾ ꓟꓽ ꓙꓲ ꓟ ꓔꓯ ꓟꓽ ꓙꓲ ꓟ ꓟꓽ ꓚꓱꓹ ꓖꓶ ꓠꓹ ꓟ ꓤ ꓟꓳ꓿ ꓠꓴ ꓪꓽ ꓠꓬ ꓮ ꓕꓯˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓙꓲˍ ꓟ ꓡꓰꓽ ꓬꓰ ꓖꓶ ꓡꓯꓼ ꓘꓳ ꓠꓹ ꓟ ꓐꓰ꓾ ꓠꓱꓸ ꓐꓯꓼ ꓢꓴ ꓮꓽ ꓙꓵ ꓔꓯˍ ꓟꓲ ꓙꓲˍ ꓟ ꓬꓰ ꓖꓶ ꓠꓹ ꓟ ꓢꓯꓼ ꓕꓵꓼ꓿ 16 ꓮ ꓕꓯˍ ꓟꓲ ꓗꓹ ꓛꓲ꓿ 17 ꓟꓽ ꓠꓽ ꓠ ꓪꓽ ꓘꓴ꓿ 18 ꓮꓸ ꓫꓵ ꓗꓪˍ ꓟꓲ ꓪꓴ-ꓢ ꓔꓯ ꓫꓸ ꓟꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓠꓴ ꓪꓽ ꓐꓱ ꓶ ꓪꓴ-ꓢ ꓠꓲꓹ ꓡꓶ ꓥ ꓡꓳ꓿ 19 ꓢꓲ-ꓫꓬ-ꓟ-ꓦ ꓮꓸ ꓔꓳꓸ ꓕꓽ ꓢꓰꓼ꓿ 20 ꓪꓴ-ꓢ ꓐꓯ ꓘꓶꓽ ꓔꓯ ꓟꓳꓻ ꓟꓽ ꓟꓵ ꓕꓽ ꓬꓰ꓿ 21 ꓮꓸ ꓫꓵ ꓔꓯˍ ꓟꓲ ꓙꓲꓻ ꓟꓽ ꓙꓲ ꓐꓰ ꓚꓬꓹ ꓠꓬꓲ ꓢꓲ꓾ ꓙꓲˍ ꓟ ꓔꓯ ꓠꓬ ꓕꓶꓻ ꓕꓶˍ ꓡꓰ ꓣꓴ ꓔ꓿ 22 ꓥꓶˍ ꓟ ꓐꓰ ꓥꓶ ꓒꓬꓱꓽ ꓶꓻˍ ꓟ ꓮ ꓡꓲ ꓕꓲ ꓫꓵ ꓗꓪ ꓐꓰˍ ꓟꓲ ꓧꓹ ꓙꓰ꓿ 23 ꓢꓲ ꓡꓲ ꓟ ꓪꓴ-ꓢ ꓬꓲ ꓚꓲ ꓛꓬ ꓡꓰ ꓠꓴ ꓪꓽ ꓔꓯ ꓢꓲ ꓚꓰꓸ ꓖꓴꓻ ꓡꓰ ꓝꓲ ꓢꓲ꓾ ꓣꓳꓽ ꓢꓲ ꓒꓽ ꓬꓰ-ꓢꓴ ꓛꓲ ꓡ ꓕꓯ꓾ ꓠꓴ ꓪꓽ ꓦˍ ꓐꓰ ꓶ ꓟꓬˍ ꓐꓰ ꓖꓳ ꓓꓱ ꓔꓯ ꓓꓰ ꓖꓴ ꓟꓽ ꓙꓳꓻ ꓙꓳ ꓝꓰꓺ ꓔ ꓟꓶ ꓝꓲ꓿ 24 ꓠꓴ ꓪꓽ ꓔꓯ ꓘꓴꓻ ꓢꓴ ꓠꓬ ꓦ ꓡꓱ ꓐꓳˍ ꓟ ꓥ ꓠꓬꓲ꓾ ꓬꓲ ꓡꓰ ꓕꓱ ꓡꓱ ꓒꓬꓱꓼ ꓡ ꓝꓲˍ ꓥꓳ꓿ 25 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓴꓽ ꓐꓱ ꓶ ꓪꓽ ꓘꓴ ꓙ꓿ 26 ꓦ ꓡꓱ ꓢꓴ ꓐꓴ ꓮꓽ ꓙꓵ ꓠꓬ ꓢꓲꓽ ꓢꓲ ꓫꓬꓻ ꓫꓬ ꓡꓰ ꓐꓳꓼ ꓡꓯꓽ ꓘꓳ ꓢꓲ ꓒꓵꓽ ꓗꓹ ꓬꓰ ꓡꓯꓼ ꓘꓳ꓿ 27 ꓕꓳ ꓶ ꓡꓯꓼ ꓫꓴ ꓕꓱ ꓟ ꓠꓬ ꓦ ꓡꓱ ꓢꓴ ꓮꓽ ꓙꓵ ꓔꓯ ꓵ ꓟꓸ ꓖꓶ ꓠꓹ ꓟ꓾ ꓥꓪ ꓠꓬ ꓢꓲ ꓒꓽ ꓟꓬꓱꓺ ꓗꓪ ꓐꓰ ꓠꓴ ꓪꓽ ꓔꓯ ꓕꓵꓼ ꓪꓽ ꓖꓶˍ ꓥꓳ꓿ 28 ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰ ꓠꓬ ꓠꓴ ꓪꓽˍ ꓐꓰ ꓕꓲ ꓪꓺꓼ ꓙꓳ ꓝꓲ꓿

2 ꓕꓰ-ꓢ-ꓡꓳ-ꓠꓲ-ꓬ 1

1 ꓒꓳ-ꓡꓳ ꓥꓪˍ ꓐꓰ ꓫꓲ-ꓡˍ ꓐꓰ ꓕꓲ-ꓟꓳ-ꓕꓲ-ꓪꓴ ꓡꓰ꓾ ꓣꓳ ꓐꓹ ꓐ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓟ꓾ ꓕꓰ-ꓢ-ꓡꓳ-ꓠꓲ-ꓬ ꓘꓴ ꓜꓲ ꓞꓳ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ 2 ꓐꓹ ꓐ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 3 ꓬꓲꓼ ꓤ ꓠꓬꓲ ꓤꓽ ꓐꓴꓳ꓾ ꓠꓴ ꓪꓽ ꓙꓵꓻ ꓠꓲꓹ ꓮꓽ ꓘꓶꓸ ꓪꓴꓽ ꓡ ꓢꓲ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳˍ ꓟ ꓠꓲꓹ ꓟˍ ꓟꓲ ꓟꓬꓽ ꓡ ꓐꓶꓹ ꓡ ꓠꓬꓲ꓾ ꓥꓪ ꓠꓴꓽ ꓠꓬ ꓠꓴ ꓪꓽ ꓑꓶꓸ ꓓꓴ ꓮ ꓕꓯˍ ꓟꓲ ꓪꓴ-ꓢ ꓔꓯ ꓫꓸ ꓟꓳ ꓙꓲꓽ ꓙꓳˍ ꓡꓳ꓿ 4 ꓠꓴ ꓪꓽ ꓠꓬ ꓗꓸ ꓧꓪ ꓟ ꓐꓰ ꓫꓸ ꓙꓵˍ ꓟ ꓮꓽ ꓙꓵ ꓗꓪ ꓜꓲꓽ ꓘꓴ ꓢꓲ ꓙꓵꓻ ꓠꓲꓹ ꓙꓳˍ ꓠꓬꓲ꓾ ꓥꓪ ꓠꓴꓽ ꓠꓬ ꓪꓴ-ꓢ ꓘꓴ ꓜꓲ ꓞꓳ ꓮꓽ ꓙꓵ ꓟ ꓗꓪ ꓠꓴ ꓪꓽ ꓑꓶꓸ ꓓꓴ ꓘꓶꓽ ꓘꓹ ꓡꓳ꓿ 5 ꓕꓱ ꓟ ꓠꓬ ꓠꓴ ꓪꓽ ꓠꓽ ꓪꓴ-ꓢ ꓗꓴꓷꓼ ꓐꓱ ꓶ ꓫꓸ ꓙꓵ ꓜꓲꓽ ꓗꓷ ꓠꓬꓲ꓾ ꓪꓴ-ꓢ ꓗꓴꓷꓼ ꓟꓶ ꓒꓵꓽˍ ꓟ ꓢꓪ' ꓟꓶˍ ꓥꓳ꓾ ꓐꓰ ꓪꓴ-ꓢ ꓔꓱꓹ ꓜꓳˍ ꓟ ꓐꓯ ꓞꓷꓹ ꓓꓴ ꓬꓲ ꓗꓸ ꓚꓵ ꓥ ꓡꓳ꓿ 6 ꓪꓴ-ꓢ ꓠꓬ ꓔꓱꓹ ꓜꓳꓽˍ ꓟ ꓥ ꓠꓬꓲ꓾ ꓠꓴ ꓪꓽ ꓔꓯ ꓫꓸ ꓙꓵ ꓝꓲ ꓢꓴ ꓔꓯ ꓫꓸ ꓙꓵˍ ꓟ ꓚꓱꓹ ꓖꓶˍ ꓥꓳ꓿ 7 ꓖꓳ ꓟ ꓡꓰ ꓟꓽ ꓞꓲ꓾ ꓢꓲ ꓒꓽ ꓬꓰ-ꓢꓴˍ ꓐꓰ ꓬꓲ ꓪꓽ ꓠꓬꓲˍ ꓟ ꓟꓴꓽ ꓗꓪ ꓝꓲ ꓓꓴ ꓐꓴˍ ꓐꓰ ꓕꓲ ꓪꓺꓼ ꓟꓴꓽ ꓗꓪ ꓗꓪ ꓐꓰ ꓐꓬꓻ ꓞꓹ ꓟ ꓮꓸ ꓔꓳꓸ ꓠꓯꓸꓼ ꓗꓪ ꓟꓳꓸ ꓖꓶ ꓡ ꓕꓯ꓾ ꓫꓸ ꓙꓵ ꓟꓶ ꓢꓴ ꓠꓴ ꓪꓽ ꓔꓯ ꓥꓪ ꓠꓴꓽˍ ꓐꓰ ꓕꓲ ꓪꓺꓼ ꓪꓴꓽ ꓧꓶ ꓠꓽ ꓟꓶ ꓡꓰ ꓝꓲ ꓢꓲ ꓠꓬꓲ꓾ 8 ꓪꓴ-ꓢ ꓔꓯ ꓟꓽ ꓢꓷꓸ ꓢꓴˍ ꓐꓰ꓾ ꓣꓳ ꓢꓲ ꓒꓽ ꓬꓰ-ꓢꓴ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓟꓽ ꓒꓵꓽ ꓛꓳ ꓢꓴ ꓔꓯ ꓬꓲ ꓡꓰ ꓪ ꓛꓴꓽ ꓚꓱꓹ ꓖꓶˍ ꓥꓳ꓿ 9 ꓬꓲ ꓪꓽ ꓔꓯ ꓟꓶ ꓝꓲ ꓠꓹ ꓟ ꓛꓬ ꓒꓵꓽ ꓠꓬ꓾ ꓢꓲ ꓒꓽ ꓬꓲ ꓪꓽ ꓠꓬꓲˍ ꓟ ꓗꓴꓺ ꓒꓬꓱꓽ ꓗꓪ ꓐꓰ ꓗꓳꓹ ꓞꓹ ꓝꓲ ꓢꓲ꓾ ꓕꓲ ꓞꓲꓼ ꓕꓲ ꓑ ꓐꓬꓺ ꓡꓰ ꓝꓲ ꓠꓹ ꓟ ꓥ ꓡꓳ꓿ 10 ꓥꓪ ꓠꓴꓽ ꓢꓷꓸ ꓙ ꓟꓳ ꓙ ꓘꓶꓽ ꓔꓯ ꓠꓴ ꓪꓽ ꓙꓵꓻ ꓗꓷ ꓠꓬꓲ꓾ ꓢꓲ ꓒꓽ ꓠꓬ ꓬꓲ ꓔꓯ ꓦ ꓡꓱ ꓢꓴ ꓐꓴ ꓗꓪ ꓐꓰ ꓟꓬꓱ ꓓꓳꓽ ꓟꓶ ꓠꓹ ꓟ ꓐꓰ꓾ ꓬꓲ ꓔꓯ ꓙꓵꓻ ꓢꓴ ꓐꓴ ꓗꓪ ꓐꓰ ꓢꓽ ꓓꓳ ꓟꓶ ꓠꓹ ꓟ ꓡꓻ ꓕꓯ꓾ ꓠꓴ ꓪˍ ꓟꓲ ꓬꓲ ꓔꓯ ꓦ ꓡꓱ ꓢꓴ ꓐꓴ ꓠꓯꓸꓼ ꓗꓪ ꓚꓬꓹ ꓟꓶˍ ꓥꓳ꓿ 11 ꓕꓱ ꓟ ꓑꓶꓸ ꓓꓴ ꓥꓪ ꓠꓴꓽ ꓠꓬ ꓠꓴ ꓪꓽ ꓐꓱ ꓶ ꓮ ꓕꓯˍ ꓟꓲ ꓪꓽ ꓘꓴ ꓢꓲ꓾ ꓣꓳ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓘꓴˍ ꓟ ꓣꓱꓽ ꓛꓰ ꓗꓪ ꓞꓳ ꓙꓳ ꓒꓵꓽ ꓢꓴ ꓚꓬꓹ ꓖꓶ ꓡ ꓠꓹ ꓟ ꓐꓰ꓾ ꓠꓴ ꓪꓽ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓙꓲˍ ꓟ ꓔꓯ ꓠꓲꓹ ꓥꓳˍ ꓟ ꓟꓬꓱꓽ ꓮꓽ ꓙꓵ ꓗꓪ꓾ ꓬꓲ ꓪꓽ ꓠꓬꓲˍ ꓟ ꓢꓯꓼ ꓗꓪ ꓐꓰ ꓬꓰ ꓐꓲ ꓡꓰ ꓝꓲ ꓠꓹ ꓟ ꓪꓽ ꓘꓴ ꓙ ꓔꓬ ꓥꓳ꓿ 12 ꓕꓱ ꓟ ꓠꓬ ꓠꓴ ꓪꓽ ꓗꓳ ꓡꓳ ꓗꓪ ꓣꓳ ꓢꓲ ꓒꓽ ꓬꓰ-ꓢꓴ ꓬꓲ ꓟꓬꓱ ꓔꓯ ꓓꓳꓹ ꓟꓴ ꓠꓹ ꓟ ꓥ ꓢꓲ꓾ ꓠꓴ ꓪˍ ꓟꓲ ꓣꓳ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰ ꓗꓪ ꓐꓰ ꓬꓲ ꓠꓯꓸꓼ ꓗꓪ ꓟꓬꓱ ꓓꓳꓽ ꓟꓶ ꓠꓹ ꓟ ꓪꓽ ꓘꓴˍ ꓟ ꓥ ꓡꓳ꓿

2 ꓕꓰ-ꓢ-ꓡꓳ-ꓠꓲ-ꓬ 2

1 ꓬꓲꓼ ꓤ ꓠꓬꓲ ꓤꓽ ꓐꓴꓳ꓾ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓡꓻˍ ꓟ ꓐꓰ꓾ ꓬꓲ ꓔꓯ ꓜꓲꓻ ꓡꓯꓽ ꓘꓳ ꓠꓹ ꓟ ꓣꓳ ꓜꓲꓼ ꓡꓯꓽ ꓘꓳˍ ꓟ ꓔꓯ ꓟꓳꓸ ꓐꓯˍ ꓠꓬ꓾ 2 ꓢꓴ ꓡꓰ ꓥꓪ ꓠꓴꓽ ꓟꓬꓱꓺ ꓘꓴꓽ ꓢꓲ ꓐꓳ ꓔ ꓟ ꓕꓳ ꓶ ꓗꓪ ꓐꓰ ꓥ ꓟꓲ꓾ ꓐꓯ ꓘꓶ ꓗꓪ ꓐꓰ ꓥ ꓟꓲ꓾ ꓟꓷꓽ ꓠꓷꓹ ꓝꓸ ꓘꓶ ꓗꓪ ꓐꓰ ꓥ ꓟꓲ꓾ ꓢꓲ ꓒꓽ ꓦꓬꓼ ꓠꓬꓲ ꓛꓲ ꓡ ꓗꓷꓳ꓾ ꓐꓯˍ ꓟ ꓑ ꓙꓽˍ ꓠꓬ꓾ ꓠꓴ ꓪꓽ ꓠꓲꓹ ꓟ ꓔꓯ ꓕꓽ ꓶꓹ ꓡꓵ ꓡꓰ ꓝꓲ꓾ ꓙꓽˍ ꓟꓲ ꓕꓽ ꓙꓽ ꓫꓸ꓾ ꓐꓰ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ꓿ 3 ꓮ ꓡꓲ ꓕꓲ ꓫꓵ ꓗꓪ ꓐꓰˍ ꓟꓲ ꓠꓴ ꓪꓽ ꓔꓯ ꓕꓽ ꓗꓶꓸ ꓟꓶ ꓡꓰ ꓝꓲ꓿ ꓮ ꓡꓲꓳ ꓐꓯ ꓠꓬ ꓒꓳꓹ ꓬꓲꓼ ꓙꓰˍ ꓟ ꓦꓬꓼ ꓠꓬꓲ ꓓꓽ ꓟ ꓧꓶꓸ ꓕꓯ ꓛꓲ ꓡ ꓥꓳ꓿ ꓖꓳ ꓡꓱ ꓥ ꓟꓲ ꓝꓴꓲ ꓓꓽ ꓟ ꓙꓳ ꓢꓴ ꓟꓶꓽ ꓬꓰˍ ꓟ ꓤ ꓖꓳ ꓕꓲ ꓣꓳ ꓟꓽ ꓟꓳꓸ ꓖꓶ ꓡ ꓕ ꓑꓳ ꓠꓬ ꓢꓲ ꓒꓽ ꓦꓬꓼ ꓠꓬꓲ ꓟꓽ ꓛꓲ ꓡ꓿ 4 ꓬꓲ ꓠꓬ꓾ ꓢꓲꓺ꓾ ꓐꓰ ꓟꓬꓱ ꓔ ꓟ ꓐꓰ ꓪꓴꓸ ꓓꓵ ꓕꓱꓼ ꓓꓴ ꓥ ꓕ ꓑꓳ ꓔꓯ ꓔꓳꓹ ꓢꓲ꓾ ꓪꓴ-ꓢ ꓢꓲꓽ ꓫꓬ ꓦꓲ ꓗꓪ ꓠꓬꓲꓸ ꓠꓸ ꓢꓲ ꓠꓬꓲ꓾ ꓚꓲ ꓛꓬ ꓠꓬ ꓪꓴ-ꓢ ꓥ ꓡꓳ꓾ ꓐꓰ ꓚ ꓟꓸ ꓖꓶ ꓢꓲ ꓚꓲ ꓛꓬ ꓔꓯ ꓓꓳꓹ ꓟꓴˍ ꓥꓳ꓿ 5 ꓧꓶꓸ ꓕꓯ ꓥꓪ ꓠꓴꓻ ꓪꓽˍ ꓐꓰ ꓔꓬ ꓕꓯ ꓕꓱ ꓟꓬ ꓫꓵꓽ ꓠꓴ ꓪꓽ ꓔꓯ ꓐꓯ ꓖꓶ ꓗꓷ ꓟ ꓠꓴ ꓪꓽ ꓚꓲꓸ ꓟꓽ ꓟꓶ ꓡ? 6 ꓬꓲ ꓝꓲꓸ ꓛꓲ ꓡ ꓕꓯ ꓢꓲꓸˍ ꓡꓰꓽ ꓟꓳꓸ ꓖꓶ ꓡ ꓠꓹ ꓟ꓾ ꓮ ꓟꓶ ꓮꓸ ꓫꓵꓽ ꓡꓰ ꓬꓲ ꓔꓯ ꓗꓽ ꓔ ꓟ ꓠꓴ ꓪꓽ ꓢꓷˍ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓙꓵꓽ ꓗ ꓟꓽ ꓙꓳ ꓟ ꓪꓽ ꓠꓬꓲˍ ꓟ ꓖꓳ ꓟ ꓠꓬ ꓚꓵ ꓔ ꓢꓲ ꓮ ꓟꓶˍ ꓡꓰꓻ ꓢꓯꓼ ꓕꓵꓼ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓗꓽ ꓔ ꓢꓴ ꓔꓯ ꓟꓽ ꓣꓴ ꓔꓯꓹ ꓙꓰ ꓕ ꓑꓳ꓾ ꓬꓲ ꓖꓳ ꓡꓱ ꓗꓽ ꓔ ꓢꓰꓽ ꓥꓳ꓿ 8 ꓖꓳ ꓗ ꓠꓯ ꓠꓬ ꓙꓵꓽ ꓗ ꓟꓽ ꓙꓳ ꓢꓴ ꓖꓳ ꓕꓲ ꓣꓳ ꓟꓳꓸ ꓖꓶ ꓡ ꓥꓳ꓿ ꓖꓳ ꓡꓱ ꓥ ꓟꓲ ꓢꓲ ꓒꓽ ꓬꓰ-ꓢꓴ ꓡꓻˍ ꓕꓯ꓾ ꓢꓲ ꓒꓽ ꓟꓷꓽ ꓠꓷꓹ ꓗꓪ ꓐꓰ ꓓꓳ ꓡ ꓟ ꓢꓯꓼˍ ꓐꓰ꓾ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓡꓰ ꓙꓵꓽ ꓗ ꓟꓽ ꓙꓳ ꓢꓴ ꓖꓳ ꓕꓲ ꓣꓳ ꓔꓯ ꓟꓶꓽ ꓬꓰ ꓝꓲˍ ꓥꓳ꓿ 9 ꓙꓵꓽ ꓗ ꓟꓽ ꓙꓳ ꓢꓴ ꓖꓳ ꓕꓲ ꓣꓳ ꓡꓻˍ ꓠꓬ꓾ ꓪꓽ ꓠꓬꓲˍ ꓟ ꓐꓰ꓾ ꓢꓷꓸ ꓡꓰ ꓓꓴˍ ꓐꓰ꓾ ꓗꓶꓸˍ ꓟ ꓓꓵꓽ ꓙꓽ ꓟꓶ ꓓꓴ ꓮꓽ ꓙꓵ ꓡꓱꓸꓼ ꓣꓱꓽ ꓢꓲ꓾ ꓢ-ꓓꓯ ꓟꓬꓱꓽ ꓬꓰˍ ꓥꓳ꓿ 10 ꓝꓮꓲ ꓬꓲ ꓠꓬ ꓥꓶˍ ꓟ ꓐꓰ ꓗꓶꓸˍ ꓟ ꓮꓽ ꓙꓵ ꓣꓱꓽ ꓢꓲ꓾ ꓟꓶꓽ ꓬꓰ ꓔꓬ ꓢꓴ ꓐꓴ ꓔꓯ ꓧꓳꓽ ꓪꓴꓸ ꓙꓰˍ ꓥꓳ꓿ ꓬꓲ ꓪꓽ ꓟꓶꓽ ꓬꓰ ꓔꓬ ꓟ ꓠꓬ꓾ ꓔꓱꓹ ꓚꓵˍ ꓟ ꓔꓯ ꓟꓽ ꓠꓲꓹ ꓠꓵ ꓢꓲ ꓟꓽ ꓘꓳ ꓣꓴ ꓠꓬꓲ ꓥ ꓡꓳ꓿ 11 ꓖꓳ ꓟ ꓑꓶꓸ ꓓꓴ ꓬꓲ ꓪꓽ ꓠꓬ ꓟꓽ ꓔꓱꓹˍ ꓟ ꓔꓯ ꓙꓵꓻ ꓡꓰ ꓝꓲ ꓠꓹ ꓟ꓾ ꓪꓴ-ꓢ ꓡꓰ ꓬꓲ ꓪꓽ ꓗꓳ ꓡꓳ ꓗꓪ ꓗꓶꓸˍ ꓟ ꓐꓰ ꓟꓽ ꓔꓱꓹˍ ꓟꓽ ꓜꓳꓽ ꓟ ꓢꓯꓼ ꓕꓵꓼ ꓡ ꓝꓲˍ ꓥꓳ꓿ 12 ꓕꓱ ꓟ ꓠꓬ ꓔꓱꓹ ꓚꓵˍ ꓟ ꓔꓯ ꓟꓽ ꓙꓵꓻ ꓢꓲ꓾ ꓟꓽ ꓙꓲ ꓟꓽ ꓜꓳꓽˍ ꓟ ꓔꓯ ꓠꓲꓹ ꓒꓴ ꓢꓴ ꓮꓽ ꓙꓵ ꓔꓯ ꓐꓯ ꓟꓴ ꓘꓶ ꓠꓹ ꓟ ꓥ ꓡꓳ꓿ 13 ꓢꓲ ꓒꓽ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤꓽ ꓐꓴꓳ꓾ ꓠꓴ ꓪꓽ ꓔꓯ ꓢꓲ-ꓫꓬ-ꓟ-ꓦ ꓗꓪ ꓐꓰ ꓢꓲ ꓚꓰꓸ ꓟꓶ ꓡꓰ ꓝꓲ ꓢꓲ꓾ ꓔꓱꓹ ꓚꓵˍ ꓟ ꓔꓯ ꓙꓵꓻˍ ꓟ ꓗꓪ ꓐꓰ ꓢꓯꓼ ꓟꓬ ꓝꓸ ꓟꓶ ꓝꓲ ꓠꓹ ꓟ꓾ ꓬꓲ ꓚꓰ ꓬꓲ ꓪꓴꓸ ꓕꓯˍ ꓡꓰ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓢꓲꓺ ꓗꓷ ꓠꓬꓲ꓾ ꓠꓴ ꓪꓽ ꓑꓶꓸ ꓓꓴ ꓥꓪ ꓠꓴꓽ ꓠꓬ ꓮ ꓕꓯˍ ꓟꓲ ꓪꓴ-ꓢ ꓔꓯ ꓫꓸ ꓟꓳ ꓙꓲꓽ ꓙꓳˍ ꓡꓳ꓿ 14 ꓕꓱ ꓟ ꓠꓬ ꓥꓪ ꓠꓴꓽ ꓡꓰ ꓚ ꓟꓸ ꓖꓶˍ ꓟ ꓶꓼ ꓓꓳꓽ ꓫꓱꓹ ꓓꓳ ꓗꓪ ꓐꓰ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓘꓴꓻ ꓢꓲ꓾ ꓠꓴ ꓪˍ ꓟꓲ ꓣꓳ ꓢꓲ ꓒꓽ ꓬꓰ-ꓢꓴ ꓬꓲ ꓟꓬꓱ ꓓꓳꓽ ꓑꓯꓹ ꓟꓶ ꓡꓰ ꓠꓹ ꓟ ꓥ ꓡꓳ꓿ 15 ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤꓽ ꓐꓴꓳ꓾ ꓥꓪ ꓠꓴꓽ ꓟꓷꓽ ꓠꓷꓹ ꓘꓶꓽˍ ꓐꓰ ꓕꓳ ꓶ ꓡꓯꓼ ꓫꓴ ꓗꓪ ꓐꓰ ꓠꓴ ꓪꓽ ꓔꓯ ꓟꓸ ꓖꓶ ꓗꓷ ꓟ ꓟꓸ ꓟꓲ ꓔꓯ ꓕꓶꓻ ꓕꓶˍ ꓡꓰꓽ ꓣꓴ ꓔ꓿ 16 ꓮ ꓟꓶ ꓣꓳ ꓔꓯ ꓠꓲꓹ ꓠꓵ ꓢꓲ꓾ ꓣꓱꓽ ꓛꓰ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓟ ꓠꓲꓹ ꓗꓴ ꓖꓶ ꓓꓴˍ ꓐꓰ꓾ ꓙꓲˍ ꓟ ꓥꓳ ꓡꓳꓸ ꓓꓴ ꓖꓶ ꓡ ꓢꓴ ꓣꓳ ꓐꓹ ꓐ ꓪꓴ-ꓢˍ ꓐꓰ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓡꓰ꓾ 17 ꓠꓴ ꓪꓽ ꓔꓯ ꓠꓲꓹ ꓟ ꓗꓴ ꓖꓶ ꓢꓲ꓾ ꓠꓴ ꓪꓽ ꓬꓰˍ ꓟ ꓮꓽ ꓙꓵꓽˍ ꓐꓰ ꓫꓸ ꓕꓱˍ ꓟ ꓮꓽ ꓙꓵ ꓗꓪ꓾ ꓙꓲˍ ꓟˍ ꓡꓰꓽ ꓬꓰ ꓐ ꓡ꓾ ꓫꓸ ꓕꓱ ꓐ ꓡ ꓠꓹ ꓟ꓾ ꓠꓴ ꓪꓽ ꓔꓯ ꓢꓯꓼ ꓧꓳꓽ ꓖꓶ ꓝꓲ꓿

2 ꓕꓰ-ꓢ-ꓡꓳ-ꓠꓲ-ꓬ 3

1 ꓡꓳꓹ ꓬꓰˍ ꓟ ꓕꓲ ꓘꓶ ꓠꓬ ꓬꓲꓼ ꓤ ꓠꓬꓲ ꓤꓽ ꓐꓴꓳ꓾ ꓠꓴ ꓪꓽ ꓗꓳ ꓡꓳ ꓗꓪ ꓢꓲ ꓒꓽ ꓐꓯ ꓘꓶ ꓒꓬꓱ ꓙꓰ ꓢꓲ ꓒꓵꓽ ꓒꓵ ꓡꓰ ꓘꓳ ꓣꓴ ꓟꓶˍ ꓟ ꓡꓰ ꓐꓰ꓾ ꓥꓪ ꓠꓴꓽ ꓔꓬ ꓗꓪˍ ꓟꓲ ꓶꓼ ꓓꓳ ꓫꓱꓹ ꓓꓳꓽ ꓠꓲꓹ ꓞ ꓒꓬꓱ ꓙꓰ ꓠꓹ ꓟ ꓥꓪ ꓠꓴꓽ ꓐꓱ ꓶ ꓪꓽ ꓘꓴ ꓙ꓿ 2 ꓝꓮꓲ ꓠꓬ ꓡ ꓞꓳ ꓮꓽ ꓙꓵ ꓠꓬ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓙꓵꓻ ꓢꓴ ꓟꓽ ꓥ ꓠꓬꓲ꓾ ꓟꓽ ꓙꓲ ꓟꓽ ꓜꓳ ꓟ ꓬꓰ ꓢꓴ ꓞꓳ ꓥꓶꓻ ꓐꓴ ꓡꓯꓼ ꓒꓯꓹ ꓗꓪ ꓐꓰ ꓥꓪ ꓠꓴꓽ ꓡꓲꓹ ꓗꓷ ꓟꓶ ꓠꓹ ꓟˍ ꓟꓲ ꓪꓽ ꓘꓴ ꓙ꓿ 3 ꓖꓳ ꓡꓱ ꓥ ꓟꓲ ꓢꓲ ꓒꓽ ꓠꓬ ꓦ ꓡꓱ ꓐꓳˍ ꓟ ꓥ ꓢꓲ꓾ ꓠꓴ ꓪꓽ ꓔꓯ ꓕꓶꓻ ꓡꓰ ꓝꓲ ꓢꓲ ꓠꓬꓲ꓾ ꓥꓶˍ ꓟ ꓖꓳ ꓕꓲ ꓣꓳ ꓗꓪ ꓐꓰ ꓫꓺ ꓙˍ ꓥꓳ꓿ 4 ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓮ ꓕꓯˍ ꓟꓲ ꓥꓪ ꓠꓴꓽ ꓖꓶˍ ꓟ ꓕꓵꓼ ꓪ ꓔꓯ ꓠꓴ ꓪꓽ ꓛꓳˍ ꓥꓳ꓾ ꓐꓰ ꓥꓪ ꓠꓴꓽ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪꓽ ꓔꓯ ꓦ ꓡꓱ ꓐꓳˍ ꓡꓳ꓿ 5 ꓢꓲ ꓒꓽ ꓡꓰ ꓠꓴ ꓪꓽ ꓠꓲꓹ ꓟ ꓔꓯ꓾ ꓪꓴ-ꓢ ꓠꓵ ꓠꓲˍ ꓐꓰ ꓙꓲ-ꓢꓴ ꓜꓲꓽ ꓘꓴ ꓟ ꓠꓯS ꓗꓪ ꓕꓶꓻ ꓡꓰ ꓠꓹ ꓟ ꓧꓳꓽ ꓟꓳꓸ ꓖꓶ ꓝꓲ꓿ 6 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓴꓽ ꓡꓰ ꓟꓸ ꓖꓶ ꓗꓷ ꓟ ꓟꓸ ꓟꓲ ꓔꓯ ꓟꓽ ꓛꓳ ꓢꓴ꓾ ꓞꓳ ꓐꓴꓻ ꓬꓰ ꓔꓬ ꓟ ꓬꓲꓼ ꓤ ꓠꓬꓲ ꓤ ꓮ ꓡꓲ ꓕꓲ ꓣꓳ ꓔꓯˍ ꓟꓲ ꓟꓽ ꓙꓻ ꓡꓯꓽ ꓘꓳ ꓠꓹ ꓟ꓾ ꓥꓪ ꓠꓴꓽ ꓠꓬ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓬꓱ ꓗꓪ ꓐꓰ ꓠꓴ ꓪꓽ ꓔꓯ ꓕꓵꓼ ꓪ ꓖꓶˍ ꓥꓳ꓿ 7 ꓥꓪ ꓠꓴꓽ ꓔꓯ ꓮ ꓡꓲ ꓐꓰ ꓔꓯꓺ ꓢꓳ ꓠ ꓗꓹ ꓟ ꓠꓴ ꓪꓽ ꓢꓷˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓠꓽ ꓠꓴ ꓪꓽ ꓗꓳ ꓡꓳ ꓗꓪ ꓞꓳ ꓐꓴꓻ ꓟꓽ ꓬꓰ ꓠꓬꓲ꓿ 8 ꓝꓮꓲ ꓠꓬ ꓮ ꓡꓲ ꓕꓲ ꓣꓳ ꓜꓽ ꓓꓴˍ ꓟꓲ ꓬꓲ ꓒꓵꓽ ꓟꓽ ꓐꓶꓻ ꓐꓶ꓾ ꓥꓪ ꓠꓴꓽ ꓮꓽ ꓔꓳ ꓟꓽ ꓜ ꓠꓬꓲ꓿ ꓥꓪ ꓠꓴꓽ ꓠꓽ ꓠꓴ ꓪꓽ ꓮꓽ ꓟ ꓔꓯˍ ꓟꓲ ꓟꓽ ꓪꓴꓽ ꓧꓶ ꓡꓰ ꓝꓲ ꓠꓹ ꓟ꓾ ꓟꓳ ꓡꓳ ꓢ ꓘꓪ ꓢꓯꓼ ꓕꓵꓼ ꓢꓲ ꓟꓬꓱꓽ ꓬꓰ ꓗꓷꓳ꓿ 9 ꓥꓪ ꓠꓴꓽ ꓕꓱ ꓡꓱ ꓬꓰ ꓗꓷ ꓟ ꓠꓬ ꓙꓵꓽ ꓪꓽ ꓟꓽ ꓙꓳˍ ꓠꓬꓲ ꓟꓽ ꓥ꓿ ꓠꓴ ꓪꓽ ꓔꓯꓺ ꓢꓳ ꓓꓴ ꓬꓰ ꓠꓹ ꓟ ꓟꓳꓸ ꓖꓶ ꓗꓷ ꓟ ꓥ ꓡꓳ꓿ 10 ꓧꓶꓸ ꓕꓯ ꓠꓴ ꓪˍ ꓐꓰ ꓥꓪ ꓠꓴꓽ ꓔꓬ ꓕꓯ꓾ ꓟꓬꓱꓽ ꓬꓰ ꓟꓽ ꓫꓳ ꓢꓴ ꓙꓳ ꓐꓷˍ ꓠꓬ ꓬꓲ ꓔꓯ ꓜ ꓕꓽ ꓜ ꓝꓲ꓾ ꓐꓰ ꓠꓴ ꓪꓽ ꓔꓯ ꓕꓵꓼ ꓪ ꓖꓶ ꓗꓷꓳ꓿ 11 ꓠꓴ ꓪꓽ ꓗꓳ ꓡꓳ ꓗꓪ꓾ ꓐꓴꓻ ꓢꓲ ꓮꓸ ꓫꓵꓽ ꓟꓬꓱꓽˍ ꓟꓲ ꓟꓽ ꓬꓰ ꓬꓰ꓾ ꓢꓴ ꓫꓵꓽ ꓪꓴꓻ ꓗꓪˍ ꓡꓰꓽ ꓘꓶ ꓡꓶꓽ ꓔꓬ ꓢꓴ ꓙꓳˍ ꓟ ꓥꓪ ꓠꓴꓽ ꓑ ꓙꓽ ꓗꓷꓳ꓿ 12 ꓡ ꓞꓳ ꓖꓳ ꓕꓲ ꓧꓳꓽ ꓠꓬ ꓢꓲ ꓡꓲ ꓐꓰ ꓟꓬꓱꓽ ꓬꓰ ꓢꓲ ꓚꓲ ꓛꓬ ꓖꓳ ꓓꓱ ꓦꓵ ꓠꓹ ꓟ꓾ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓬꓱ ꓗꓪ ꓐꓰ ꓥꓪ ꓠꓴꓽ ꓡꓰ ꓕꓵꓼ ꓪ ꓖꓶꓽ ꓢꓲ ꓘꓶꓸ ꓖꓶ ꓠꓲꓹ ꓫꓵˍ ꓡꓳ꓿ 13 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓽ ꓙꓲˍ ꓟ ꓬꓰˍ ꓟ ꓗꓪ ꓠꓲꓹ ꓟ ꓕꓽ ꓙꓬ ꓡꓰ ꓝꓲ꓿ 14 ꓕꓳ ꓶ ꓡꓯꓼ ꓫꓴ ꓕꓱ ꓟ ꓗꓪ ꓟ ꓥꓪ ꓠꓴꓽ ꓐꓯ ꓘꓶ ꓔꓯ ꓟꓽ ꓒꓵꓽ ꓛꓳ ꓢꓴ ꓙꓳˍ ꓠꓬ꓾ ꓖꓳ ꓕꓲ ꓣꓳ ꓔꓯ ꓚꓲꓸ ꓔ ꓢꓲ꓾ ꓬꓲ ꓔꓯ ꓫꓸ ꓔꓳ ꓡꓰ ꓝꓲ ꓠꓹ ꓟ꓾ ꓠꓴ ꓪꓽ ꓠꓬ ꓬꓲˍ ꓐꓰ ꓛꓳ ꓒꓯꓹ ꓕꓽ ꓬꓰ꓿ 15 ꓖꓳ ꓡꓱ ꓥ ꓟꓲ ꓬꓲ ꓔꓯ ꓛꓴꓽ ꓙꓳ ꓢꓴ ꓟꓽ ꓚꓬꓹ ꓚꓬ꓾ ꓬꓲꓼ ꓤ ꓠꓬꓲ ꓤ ꓔꓯˍ ꓡꓰ ꓐꓰ ꓘꓶꓸ ꓖꓶ꓿ 16 ꓢꓲ ꓡꓲ ꓟ ꓢꓲ ꓒꓽ ꓬꓲ ꓚꓲ ꓛꓬ ꓡꓰ꓾ ꓮ ꓕꓯˍ ꓟꓲ꓾ ꓮ ꓡꓲ ꓗꓷ ꓡꓰˍ ꓟꓲ꓾ ꓠꓴ ꓪꓽ ꓔꓯ ꓢꓲ ꓡꓲ ꓟ ꓖꓶ ꓡ ꓝꓲ꓿ ꓢꓲ ꓒꓽ ꓠꓬ ꓠꓴ ꓪꓽ ꓮꓽ ꓙꓵ ꓢꓴˍ ꓐꓰ ꓕꓲ ꓪꓺꓼ ꓔꓬ ꓝꓲ꓿ 17 ꓒꓳ-ꓡꓳ ꓥꓪ ꓚꓲ ꓛꓬ ꓡꓯꓼ ꓒꓯꓹ ꓡꓰ ꓠꓴ ꓪꓽ ꓔꓯ ꓒꓵꓽ ꓗ ꓐꓳ ꓩꓴ ꓡ ꓟ ꓥꓳ꓿ ꓕꓱ ꓟ ꓠꓬ ꓥꓪ ꓕꓳ ꓶ ꓡꓯꓼ ꓫꓴ ꓮ ꓡꓲ ꓕꓲ ꓚꓴꓸ ꓗꓪˍ ꓟꓲ ꓢꓷꓸ ꓡꓰ ꓓꓴ ꓥ ꓡꓳ꓿ ꓥꓪ ꓡꓯꓼ ꓓꓴꓻ ꓠꓬ ꓬꓲ ꓕꓱ ꓡꓱ ꓥꓳ꓿ 18 ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰ ꓠꓬ ꓠꓴ ꓪꓽ ꓮꓽ ꓙꓵ ꓢꓴˍ ꓐꓰ ꓕꓲ ꓪꓺꓼ ꓙꓳ ꓝꓲ꓿

1 ꓕꓲ-ꓟꓳ-ꓕꓲ-ꓪꓴ 1

1 ꓣꓳ ꓚꓬꓴ ꓢꓲ ꓒꓽ ꓪꓴ-ꓢˍ ꓐꓰ ꓣꓳ ꓥꓳ ꓡꓳꓸ ꓓꓴ ꓙꓲ-ꓢꓴ ꓬꓰ-ꓢꓴ ꓬꓲ ꓕꓵꓼ ꓪꓽ ꓗꓪ ꓐꓰ ꓙꓲ-ꓢꓴ ꓬꓰ-ꓢꓴ ꓬꓲ ꓝꓲ ꓓꓴ ꓬꓰˍ ꓟ ꓒꓳ-ꓡꓳ ꓥꓪ ꓡꓰ꓾ 2 ꓙꓵꓻ ꓠꓲꓹ ꓗꓪ ꓟ ꓥꓪ ꓤ ꓚꓵ ꓕꓲ-ꓟꓳ-ꓕꓲ-ꓪꓴ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓐꓹ ꓐ ꓪꓴ-ꓢˍ ꓐꓰ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓱꓽ ꓛꓰˍ ꓐꓰ ꓫꓱꓸ ꓤˍ ꓟ ꓐꓰ ꓢꓲ ꓡꓲ ꓟ ꓠꓴ ꓟꓶ ꓝꓲ꓿ 3 ꓥꓪ ꓟ-ꓢꓲ-ꓓꓳ ꓗꓪ ꓙꓰˍ ꓐꓰ ꓬꓰˍ ꓕꓯ ꓠꓴ ꓔꓯ ꓘꓶꓸ ꓖꓶ ꓗꓷ ꓟ ꓡꓰ ꓐꓰ꓾ ꓟꓽ ꓔꓱꓹ ꓟ ꓟꓸ ꓒꓽ ꓐꓴ ꓡꓰ ꓟꓸ ꓔꓬ ꓟ ꓟꓽ ꓔꓱꓹ ꓟ ꓟꓸ ꓟꓲꓽ ꓔꓯ ꓗꓽ ꓔ ꓠꓹ ꓟ꓾ ꓠꓴ ꓠꓬ ꓬꓲ-ꓩꓴ-ꓢꓳ ꓗꓪ ꓔꓬ ꓢꓰꓽ꓿ 4 ꓛꓵꓸ ꓟꓲꓽˍ ꓐꓰ ꓬꓲ ꓡꓳꓹ ꓬꓰ ꓖꓴ ꓟꓽ ꓙꓳ ꓟ ꓫꓵꓽ ꓚˍ ꓟꓲ ꓟꓽ ꓟꓸ ꓠꓹ ꓟ ꓠꓴ ꓡꓰ ꓬꓲ ꓪꓽ ꓔꓯ ꓕꓵꓼ ꓪꓽ ꓖꓶ꓿ ꓕꓱ ꓡꓱ ꓫꓵꓽ ꓛꓵꓸ ꓟꓲꓽˍ ꓐꓰ ꓫꓵꓽ ꓚ ꓡꓰ ꓪꓴ-ꓢ ꓠꓲꓹ ꓡꓶ ꓬꓰ ꓓꓳ ꓡ ꓟꓽ ꓓ꓿ ꓧꓳꓺ ꓡꓯꓽ ꓘꓳˍ ꓟˍ ꓡꓰꓽ ꓓꓳ ꓡ ꓝꓲˍ ꓡꓳ꓿ ꓪꓴ-ꓢ ꓠꓲꓹ ꓡꓶ ꓬꓰ ꓒꓬꓱꓼ ꓡ ꓟ ꓠꓬ ꓙꓵꓻ ꓠꓲꓹ ꓗꓪ ꓐꓰˍ ꓡꓰꓽ ꓥ ꓡꓳ꓿ 5 ꓥꓪ ꓖꓶˍ ꓟ ꓕꓵꓼ ꓪꓽ ꓕꓱ ꓟ ꓬꓲ ꓑꓶꓸ ꓠꓬ꓾ ꓠꓲꓹ ꓔꓱꓹ ꓠꓲꓹ ꓓꓰˍ ꓟ ꓠꓲꓹ ꓟ ꓗꓪ ꓐꓰ ꓡꓻˍ ꓟ ꓠꓵ ꓠꓲꓹˍ ꓐꓰ꓾ ꓙꓲꓻˍ ꓟ ꓦꓰꓽ ꓠꓲꓹˍ ꓐꓰ꓾ ꓔꓱꓹ ꓚꓵˍ ꓟ ꓙꓵꓻ ꓠꓲꓹ ꓓꓳ ꓡ ꓠꓹ ꓟ ꓥ ꓡꓳ꓿ 6 ꓡ ꓞꓳ ꓕꓲ ꓐꓱ ꓠꓬ ꓕꓱ ꓟꓬ ꓫꓵ ꓗꓪ ꓐꓰ ꓧꓶꓸ ꓙꓰ ꓢꓲ꓾ ꓘꓶꓽ ꓖꓳꓽ ꓫꓸ ꓕꓱˍ ꓟ ꓗꓪ ꓪꓴꓸ ꓙꓰ ꓢꓲ ꓠꓬꓲ꓾ 7 ꓬꓲ ꓪꓽ ꓚꓲ ꓛꓬ ꓮꓸ ꓫꓵ ꓐꓯ ꓔꓬ ꓟ ꓐꓰ꓾ ꓚꓲ ꓛꓬ ꓡꓰ ꓠꓲꓹ ꓪꓴꓽ ꓪꓴˍ ꓡꓰ ꓐꓯ ꓞꓷꓹ ꓗꓷ ꓟ ꓔꓯ ꓬꓲ ꓪꓽ ꓟꓽ ꓙꓽ ꓜꓲꓼˍ ꓟꓲ꓾ ꓙꓵꓽ ꓗ ꓟꓸ ꓒ ꓬꓰ ꓠꓲꓹ ꓫꓵˍ ꓡꓳ꓿ 8 ꓣꓱꓽ ꓠ ꓗꓹ ꓟ ꓗꓪ ꓣꓱꓽˍ ꓠꓬ ꓙꓵꓽ ꓗ ꓠꓽ ꓙꓲꓻˍ ꓟ ꓥ ꓟ ꓣꓳ ꓢꓷˍ ꓡꓳ꓿ 9 ꓙꓵꓽ ꓗ ꓠꓬ ꓔꓱꓹ ꓜꓳꓽ ꓢꓴ ꓐꓱ ꓶ ꓬꓰ ꓔ ꓟ ꓟꓽ ꓥ꓿ ꓙꓵꓽ ꓗ ꓔꓯ ꓟꓽ ꓛꓳ ꓢꓴ꓾ ꓒꓳꓹ ꓔꓳꓹ ꓢꓴ꓾ ꓠꓲꓹ ꓟꓽ ꓒꓵ ꓠꓲꓹ ꓟꓽ ꓡꓱ ꓢꓴˍ ꓐꓰ ꓝꓴꓲ ꓬꓰ ꓢꓴ꓾ ꓟꓽ ꓢꓲꓽ ꓟꓽ ꓫꓬꓻ ꓢꓴˍ ꓐꓰ ꓪꓴ-ꓢ ꓔꓯ ꓟꓽ ꓒꓵ ꓢꓴ꓾ ꓮꓽ ꓐ ꓮꓽ ꓟ ꓔꓯ ꓢꓰꓼ ꓢꓴ꓾ ꓞꓳ ꓤ ꓢꓰꓼ ꓢꓴ꓾ 10 ꓟꓽ ꓢꓲ ꓟꓽ ꓫꓬ ꓬꓰ ꓢꓴ꓾ ꓤꓽ ꓛꓳꓽ ꓤ ꓦꓬꓽ ꓛꓳꓽ ꓧꓪ ꓢꓴ꓾ ꓞꓳ ꓤ ꓘꓴꓽ ꓢꓴ꓾ ꓗꓶꓸ ꓢꓴ꓾ ꓪꓵꓼ ꓞꓷꓹ ꓗꓷ ꓗꓸ ꓠꓯꓸ ꓒꓳꓹ ꓢꓴ ꓐꓱ ꓶˍ ꓐꓰ꓾ ꓔꓱˍ ꓟ ꓟꓸ ꓟꓲ ꓔꓯ ꓟꓽ ꓧꓳꓹ ꓟ ꓠꓱꓸ ꓐꓯ ꓕꓲ ꓫꓵꓽ ꓫꓵꓽ ꓬꓰ ꓢꓴ ꓐꓱ ꓶ ꓬꓰ ꓔ ꓟ ꓥ ꓟ ꓣꓳ ꓢꓷˍ ꓡꓳ꓿ 11 ꓕꓱ ꓟ ꓠꓬ ꓪꓴ-ꓢ ꓡꓰ ꓥꓪ ꓔꓯ ꓡꓯꓼ ꓙꓱ ꓔ ꓟ꓾ ꓶꓼ ꓙꓳ ꓫꓱꓹ ꓙꓳˍ ꓟ ꓐꓰ ꓟꓬꓱ ꓓꓳꓽ ꓙꓳˍ ꓟ ꓬꓲ ꓶꓼ ꓓꓳꓽ ꓫꓱꓹ ꓓꓳ ꓔꓯ ꓛꓳ ꓢꓲ ꓐꓯˍ ꓟ ꓥ ꓡꓳ꓿ 12 ꓥꓪ ꓔꓯ ꓢꓯꓼ ꓖꓶ ꓡ ꓢꓴ꓾ ꓣꓳ ꓢꓲ ꓒꓽ ꓙꓲ-ꓢꓴ ꓬꓰ-ꓢꓴ ꓠꓬ ꓥꓪ ꓔꓯ ꓦ ꓡꓱ ꓐꓳ ꓢꓲ꓾ ꓬꓲ ꓟꓬꓱꓽ ꓬꓰ ꓠꓹ ꓟ ꓟꓬꓱꓽ ꓐꓬꓱꓽ ꓘꓶꓽ ꓖꓶ ꓡ ꓠꓬꓲ ꓬꓲ ꓔꓯ ꓫꓸ ꓟꓳ꓿ 13 ꓧꓶꓸ ꓕꓯ ꓥꓪ ꓠꓬ ꓬꓰ-ꓢꓴ ꓟꓬꓱꓺ ꓔꓯ ꓙꓱꓽ ꓢꓴˍ ꓐꓰ ꓬꓲ ꓔꓯ ꓗꓸ ꓧꓪ ꓢꓴˍ ꓐꓰ ꓘꓴ ꓜꓲ ꓞꓳ ꓔꓯ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰ ꓗꓷ ꓢꓴ ꓥ ꓥˍ ꓟꓲ꓾ ꓕꓱ ꓟꓬ ꓫꓵ ꓟ ꓠꓬ ꓥꓪ ꓟꓽ ꓙꓵꓻ ꓢꓰꓽ ꓕꓯ ꓟꓽ ꓢꓷꓸ ꓢꓷꓸ ꓬꓰ ꓗꓷ ꓟ ꓥ ꓠꓬꓲ꓾ ꓥꓪ ꓠꓬ ꓫꓱꓸ ꓤˍ ꓟ ꓟꓶˍ ꓢꓰꓽ ꓡꓳ꓿ 14 ꓖꓳ ꓡꓱ ꓢꓲ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓟ ꓙꓵꓻ ꓠꓲꓹˍ ꓐꓰ ꓠꓵ ꓠꓲꓹˍ ꓐꓰ꓾ ꓣꓳ ꓢꓲ ꓒꓽ ꓣꓱꓽ ꓛꓰ ꓠꓬ ꓥꓪ ꓐꓱ ꓶ ꓐꓲ ꓡꓶꓽ ꓡꓰꓳ꓿ 15 ꓙꓲ-ꓢꓴ ꓬꓰ-ꓢꓴ ꓟꓲ ꓠꓯ ꓗꓪ ꓡ ꓟ ꓠꓬ꓾ ꓝꓴꓲ ꓙꓳ ꓢꓴ ꓔꓯ ꓚꓬꓴ ꓙ ꓠꓹ ꓟ ꓥ ꓡꓳ꓾ ꓐꓯˍ ꓟ ꓐꓯ ꓘꓶ ꓕꓱ ꓟ ꓠꓬ꓾ ꓦ ꓡꓱ ꓐꓳˍ ꓟ ꓐꓰ ꓮꓽ ꓙꓵ ꓢꓴ ꓘꓳ ꓣꓴ ꓒꓵꓽˍ ꓟ ꓥ ꓡꓳ꓿ ꓝꓴꓲ ꓙꓳ ꓢꓴ ꓗꓳ ꓡꓳ ꓗꓪ ꓥꓪ ꓠꓬ ꓮꓸ ꓓꓲꓽ ꓪꓴꓽˍ ꓟ ꓝꓴꓲ ꓙꓳ ꓢꓴ ꓕꓲ ꓣꓳ ꓥꓳ꓿ 16 ꓖꓳ ꓡꓱ ꓥ ꓟꓲ ꓮꓸ ꓓꓲꓽ ꓪꓴˍ ꓟ ꓝꓴꓲ ꓙꓳ ꓢꓴ ꓥꓪ ꓖꓳ ꓓꓱ ꓗꓪ ꓫꓱꓸ ꓤˍ ꓟ ꓟꓶˍ ꓟ ꓠꓬ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓬꓰ-ꓢꓴ ꓔꓯ ꓙꓵꓻ ꓡ ꓠꓯꓹ ꓢꓴ ꓔꓯ ꓟꓳꓸ ꓬꓲ ꓠꓲꓹ ꓟ ꓫꓵꓺˍ ꓟ ꓮꓽ ꓙꓵ ꓟꓳꓸ ꓖꓶ ꓓꓳ ꓡ ꓠꓹ ꓟ ꓥ ꓡꓳ꓿ 17 ꓕꓲ ꓞꓲꓼ ꓕꓲ ꓑ ꓪ ꓔꓲ ꓣꓱ ꓔꓬ ꓟ꓾ ꓫꓵꓻ ꓟꓽ ꓓ ꓟ꓾ ꓡꓳꓸ ꓟꓳꓻ ꓟꓽ ꓓ ꓟ꓾ ꓕꓲ ꓔꓲꓸˍ ꓡꓰꓽ ꓟ ꓪꓴ-ꓢ ꓠꓬ꓾ ꓕꓲ ꓞꓲꓼ ꓕꓲ ꓑ ꓞꓳ ꓒꓵꓽˍ ꓟ ꓐꓰ ꓟꓬꓱ ꓓꓳꓽ ꓟꓶ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ 18 ꓥꓪ ꓤ ꓕꓲ-ꓟꓳ-ꓕꓲ-ꓪꓴꓽꓳ꓾ ꓧꓶꓸ ꓕꓯ ꓠꓴ ꓔꓯ ꓖꓴ ꓔ ꓟ ꓟꓷꓽ ꓠꓷꓹ ꓝꓸ ꓘꓶꓽ ꓔꓯ ꓛꓳ ꓢꓲ꓾ ꓥꓪ ꓠꓬ ꓠꓴ ꓔꓯ ꓕꓵꓼ ꓪꓽ ꓡꓯꓼ ꓙꓱ ꓖꓶˍ ꓥꓳ꓿ ꓠꓴ ꓠꓬ ꓟꓷꓽ ꓠꓷꓹ ꓝꓸ ꓘꓶꓽ ꓖꓳ ꓟ ꓔꓯ ꓬꓲ ꓜꓶ ꓛꓳ ꓢꓲ ꓟꓯꓼ ꓘꓶꓽ ꓗꓪ ꓕꓶꓻ ꓕꓶˍ ꓡꓰꓽ ꓓꓶꓽ ꓡꓯꓽ ꓘꓳ꓿ 19 ꓠꓴ ꓠꓬ ꓙꓵꓻ ꓠꓲꓹˍ ꓐꓰ ꓙꓲꓻˍ ꓟ ꓦꓰꓽ ꓠꓲꓹ ꓔꓯ ꓬꓲ ꓜꓶꓻ ꓣꓴ ꓔ꓿ ꓕꓲꓽ ꓐꓱꓻ ꓠꓬ ꓦꓰꓽ ꓠꓲꓹ ꓡꓰ ꓬꓲꓼ ꓠꓬꓲꓸ ꓖꓶˍ ꓟ ꓔꓯ ꓟꓽ ꓛꓳ ꓠꓬꓲ꓾ ꓙꓵꓻ ꓠꓲꓹ ꓐꓬ ꓡꓰ ꓓꓴ ꓗꓷ ꓡꓰꓳ꓿ 20 ꓕꓱ ꓕꓲ ꓧꓳꓽ ꓟ ꓗꓳ ꓡꓳ ꓗꓪ ꓠꓬ꓾ ꓧꓷ-ꓟꓲ-ꓠꓲ-ꓬꓴˍ ꓐꓰ ꓬ-ꓡꓲ-ꓢ-ꓓˍ ꓟꓲ ꓔꓹ ꓞꓹ ꓡꓳ꓿ ꓬꓲ ꓪꓽ ꓠꓬ ꓟꓽ ꓚꓰꓼˍ ꓟ ꓙꓱꓽ ꓟꓽ ꓓ꓾ ꓐꓰ ꓢꓳ ꓟꓶ ꓡꓰ ꓝꓲ ꓠꓹ ꓟ꓾ ꓥꓪ ꓡꓰ ꓬꓲ ꓪꓽ ꓔꓯ ꓢ-ꓓꓯ ꓡꓯꓼ ꓒꓯꓹ ꓗꓪ ꓡꓯꓼ ꓙꓱ ꓗꓷꓳ꓿

1 ꓕꓲ-ꓟꓳ-ꓕꓲ-ꓪꓴ 2

1 ꓖꓳ ꓡꓱ ꓠꓬꓲ ꓠꓴ ꓔꓯ ꓥꓪ ꓢꓯꓼ ꓖꓶ ꓠꓲꓹ ꓫꓵˍ ꓟ ꓬꓲ ꓪꓴꓸ ꓕꓲ ꓫꓵ ꓠꓬ꓾ ꓞꓳ ꓤ ꓥ ꓕ ꓑꓳ ꓐꓱ ꓶ ꓶꓼ ꓓꓰˍ ꓟ ꓐꓰ꓾ ꓪꓽ ꓘꓴˍ ꓟ ꓐꓰ꓾ ꓓꓰꓽ ꓙˍ ꓟ ꓐꓰ ꓫꓸ ꓟꓳˍ ꓟ ꓬꓰ ꓠ ꓟ꓾ ꓕꓰ ꓟꓬ ꓫꓵ ꓥ ꓡꓳ꓿ 2 ꓣꓳ ꓠꓬ ꓠꓲꓹ ꓒꓵ ꓠꓲꓹ ꓡꓱˍ ꓟ ꓐꓰ꓾ ꓠꓲꓹ ꓔꓱꓹ ꓠꓲ ꓓꓰˍ ꓟ ꓮꓽ ꓙꓵ ꓗꓪ꓾ ꓧꓪ ꓧꓪˍ ꓐꓰ ꓢꓲ ꓡꓲ ꓟ ꓦꓬꓼ ꓠꓬꓲ ꓗꓳꓸ ꓪ ꓠꓹ ꓟ꓾ ꓪ ꓔꓲ ꓐꓴˍ ꓐꓰ ꓙꓵꓽ ꓪꓽ ꓙꓳ ꓢꓴ ꓐꓴ ꓐꓱ ꓶˍ ꓟꓲ ꓪꓽ ꓘꓴ ꓙ꓿ 3 ꓕꓱ ꓟ ꓠꓬ ꓪꓴ-ꓢ ꓣꓳ ꓚꓬꓴ ꓢꓲ ꓒꓽ ꓒꓬꓱꓽ ꓕꓯ ꓗꓪ ꓙꓲˍ ꓟ ꓐꓰ ꓬꓲ ꓠꓲꓹ ꓒꓴˍ ꓟ ꓥ ꓡꓳ꓿ 4 ꓪꓴ-ꓢ ꓠꓬ ꓞꓳ ꓤ ꓥ ꓕ ꓑꓳ ꓔꓯ ꓢꓯꓼ ꓟꓬ ꓝꓸ ꓟꓶ ꓝꓲ ꓢꓲ ꓔꓱꓹˍ ꓟ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓕꓲ ꓣꓳˍ ꓡꓰꓽ ꓙꓳ ꓢꓲ꓾ ꓪꓴ-ꓢˍ ꓐꓰ ꓞꓳ ꓤ ꓠꓬꓲꓽ ꓗꓴꓸ ꓚꓸꓼ ꓗꓪˍ ꓟꓲ ꓜꓲꓽ ꓟꓴꓽ ꓕꓲ ꓣꓳˍ ꓡꓰꓽ ꓙꓳˍ ꓡꓳ꓿ ꓬꓲ ꓠꓬ ꓞꓳ ꓤ ꓒꓬꓱꓼ ꓡ ꓗꓷ ꓢꓴ ꓙꓲ-ꓢꓴ ꓬꓰ-ꓢꓴ ꓥ ꓡꓳ꓿ 6 ꓬꓲ ꓝꓲꓸ ꓐꓲ ꓡ ꓕꓯ ꓮꓽ ꓙꓵ ꓢꓴ ꓐꓱ ꓶ ꓫꓴꓹ ꓣꓴ ꓒꓵꓽ ꓬꓰ ꓠꓹ ꓟ ꓚꓲ ꓛꓬ ꓖꓳ ꓓꓱ ꓖꓶ ꓗꓷ ꓟ ꓕꓱ ꓟ ꓠꓬ꓾ ꓪꓴ-ꓢ ꓡꓰ ꓮꓽ ꓙꓵ ꓢꓴ ꓔꓯ ꓚꓬꓴ ꓠꓲꓹ ꓫꓵˍ ꓟ ꓬꓲ ꓗꓸ ꓚꓵ ꓥ ꓡꓳ꓿ 7 ꓕꓱ ꓟ ꓑꓶꓸ ꓓꓴ ꓥꓪ ꓔꓯˍ ꓟꓲ꓾ ꓟꓸ ꓖꓶ ꓢꓴˍ ꓐꓰ ꓝꓲ ꓓꓴˍ ꓐꓰ꓾ ꓔꓱꓹˍ ꓟ ꓙꓵꓻ ꓠꓲꓹ ꓚꓱꓹ ꓗꓪ ꓐꓶꓽ ꓞꓳ ꓐꓴ ꓟꓸ ꓒ ꓬꓰ ꓠꓹ ꓟ ꓝꓲ ꓔ ꓟ ꓥ ꓡꓳ꓿ (ꓥꓪ ꓠꓬ ꓟꓽ ꓗꓶꓸ ꓗꓶꓸ ꓔꓱꓹ ꓘꓶꓽ ꓫꓸ ꓕꓱˍ ꓟ ꓥ ꓡꓳ꓿) 8 ꓖꓳ ꓡꓱ ꓠꓬꓲ ꓮ ꓡꓲ ꓗꓪˍ ꓟꓲ꓾ ꓞꓳ ꓑꓸ ꓤ ꓐꓴ ꓠꓬ ꓛꓬ ꓖꓴ ꓟꓽ ꓙꓳˍ ꓟ ꓡꓯꓼ ꓒꓯꓹ ꓛꓱ ꓔ ꓢꓲ꓾ ꓠꓲꓹ ꓟ ꓦꓶˍ ꓟ ꓐꓰ ꓧꓳꓺ ꓡꓯꓽ ꓘꓳˍ ꓟ ꓟꓽ ꓙꓳꓻ ꓙꓳ ꓪꓽ ꓘꓴ ꓠꓹ ꓟ ꓥꓪ ꓠꓲꓹ ꓫꓵˍ ꓡꓳ꓿ 9 ꓖꓳ ꓟ ꓡꓰ ꓐꓰ꓾ ꓤꓽ ꓟꓶ ꓤ ꓐꓴ ꓔꓯˍ ꓟꓲ꓾ ꓢꓲꓽˍ ꓟ ꓠꓲꓹ ꓟ ꓣꓱꓽ ꓢꓲ꓾ ꓜꓳꓽˍ ꓟ ꓐꓰ ꓖꓪꓽ ꓙꓲꓽ ꓙꓳˍ ꓟ ꓐꓵ ꓞꓶ ꓖꓪꓽ ꓝꓲ ꓠꓲꓹ ꓫꓵˍ ꓡꓳ꓿ ꓪꓴꓸ ꓞꓱ ꓐꓲꓻ ꓫꓴꓽˍ ꓟ꓾ ꓫꓵꓺ꓾ ꓥ ꓠꓬ ꓡꓳ ꓒꓴ ꓡꓴꓸ ꓢꓶꓽ꓾ ꓥ ꓠꓬ ꓒꓵꓽ ꓘꓹˍ ꓟ ꓐꓵ ꓞꓶ ꓣꓱꓽ ꓝꓲ ꓠꓲꓹ ꓟꓽ ꓫꓵ꓿ 10 ꓪꓴ-ꓢ ꓔꓯ ꓙꓳ ꓒꓵꓽˍ ꓟ ꓤꓽ ꓟꓶ ꓤ ꓐꓴ ꓬꓰ ꓙꓲꓽ ꓙꓳˍ ꓟ ꓡꓰ ꓐꓰ ꓙꓲˍ ꓟ ꓟꓬꓱꓽ ꓗꓪ ꓢꓯꓼ ꓕꓵ ꓝꓲ ꓠꓲꓹ ꓫꓵˍ ꓡꓳ꓿ 11 ꓤꓽ ꓟꓶ ꓤ ꓐꓴ ꓠꓬ ꓢꓲ ꓡꓲ ꓡꓲ ꓐꓰ ꓙꓵꓽˍ ꓟ ꓔꓯ ꓕꓲ ꓠꓲꓹ ꓟˍ ꓡꓰꓽ ꓛꓳ ꓢꓲ ꓢꓳ ꓢꓴ ꓬꓰ ꓠꓯꓹ ꓡꓳ꓿ 12 ꓥꓪ ꓠꓽ ꓤꓽ ꓟꓶ ꓤ ꓔꓯ ꓟꓸ ꓟꓲ ꓟꓸ ꓝꓲ ꓠꓲꓹ ꓟꓽ ꓫꓵ꓿ ꓞꓳ ꓑꓸ ꓤ ꓔꓯˍ ꓟꓲ ꓤꓽ ꓟꓶ ꓤ ꓡꓰ ꓙꓵꓽ ꓝꓲ ꓠꓲꓹ ꓟꓽ ꓫꓵ꓿ ꓬꓲ ꓪꓽ ꓠꓬ ꓟꓽ ꓪꓳꓹ ꓢꓲ ꓡꓲ ꓐꓰ ꓔꓬ ꓠꓯꓹ ꓡꓳ꓿ 13 ꓮ ꓡꓲꓳ ꓐꓯ ꓠꓬ ꓮ-ꓓꓯ ꓔꓯ ꓧꓶꓸ ꓕꓯ ꓚꓰꓼ ꓔ ꓡꓳ꓿ ꓖꓳ ꓗꓸ ꓠꓯꓸ ꓢꓲꓸˍ ꓡꓰꓽ ꓰ-ꓪ ꓔꓯ ꓚꓰꓼˍ ꓡꓳ꓿ 14 ꓝꓮꓲ ꓠꓬ ꓮ-ꓓꓯ ꓔꓯ ꓗꓶꓸ ꓟꓶ ꓡꓰ ꓟ ꓟꓽ ꓥ꓿ ꓤꓽ ꓟꓶ ꓤ ꓔꓯ ꓗꓶꓸ ꓟꓶ ꓡꓰ ꓢꓲ ꓝꓴꓲ ꓬꓰ ꓓꓳ ꓡ ꓟ ꓥ ꓡꓳ꓿ 15 ꓖꓳ ꓡꓱ ꓥ ꓟꓲ ꓤꓽ ꓟꓶ ꓤ ꓐꓴ ꓠꓬ꓾ ꓤ ꓦꓵꓻ ꓠꓱ ꓦꓵ ꓢꓲ꓾ ꓙꓵꓻ ꓠꓲꓹˍ ꓐꓰ꓾ ꓠꓵ ꓠꓲꓹˍ ꓐꓰ꓾ ꓢꓲꓽ ꓫꓬˍ ꓟ ꓐꓰ꓾ ꓚꓲ ꓛꓬ ꓔꓯ ꓙꓵꓽˍ ꓟ ꓚꓱꓹ ꓗꓪ ꓚ ꓔꓬ ꓠꓬ ꓚꓬꓴ ꓟꓶˍ ꓥꓳ꓿

1 ꓕꓲ-ꓟꓳ-ꓕꓲ-ꓪꓴ 3

1 ꓡ ꓞꓳ ꓕꓲ ꓣꓳ ꓠꓬ ꓪꓴ-ꓢ ꓟꓬꓱꓽ ꓡꓳꓸ ꓢꓴ ꓬꓰ ꓠꓲꓹ ꓫꓵˍ ꓕꓯ ꓠꓽ꓾ ꓬꓲ ꓠꓬ ꓙꓲˍ ꓟ ꓟꓬꓱꓽ ꓔꓯ ꓠꓲꓹ ꓥꓳˍ ꓟ ꓥ ꓡꓳ꓾ ꓐꓯˍ ꓟ ꓠꓬ ꓚꓵ ꓚꓵ ꓥꓳ꓿ 2 ꓪꓴ-ꓢ ꓟꓬꓱꓽ ꓡꓳꓸ ꓢꓴ ꓠꓬ꓾ ꓕꓼ ꓓꓴ ꓟꓽ ꓙꓳ ꓟ ꓐꓰ ꓤꓽ ꓟꓶꓻ ꓕꓲ ꓟꓶꓽˍ ꓡꓰ ꓫ ꓢꓴ꓾ ꓠꓲꓹ ꓟ ꓫꓵ ꓢꓴ꓾ ꓞꓳ ꓢꓲꓽˍ ꓐꓰ ꓞꓳ ꓙꓲꓻ꓾ ꓪꓰ ꓤ ꓔꓯ ꓘꓳꓻ ꓣꓴ ꓠꓲꓹ ꓒꓴ ꓢꓴ꓾ ꓟꓸ ꓐ ꓡ ꓢꓴ꓾ 3 ꓙꓲꓻ ꓒꓶ ꓟꓽ ꓗꓪꓸ ꓢꓴ꓾ ꓠꓲꓹ ꓟ ꓠꓴꓽ ꓢꓴ꓾ ꓟꓽ ꓢꓯꓼ ꓡꓯꓽ ꓘꓳ ꓢꓴ꓾ ꓒꓴ ꓤ ꓫꓵ ꓤ ꓔꓯ ꓟꓽ ꓠꓲꓹ ꓦꓯꓸ ꓢꓴ꓾ 4 ꓚꓲ ꓛꓬ ꓦꓲ ꓔꓯ ꓬꓲ ꓜꓶ ꓙꓵꓽ ꓢꓲ ꓮ ꓕꓯˍ ꓟꓲ ꓚꓲ ꓛꓬ ꓤ ꓠꓱ ꓔꓯ ꓬꓲ ꓙꓵꓽˍ ꓟ ꓔꓯ ꓛꓳ ꓝꓲ ꓢꓴˍ ꓡꓰꓽ ꓬꓰ ꓠ ꓗꓹ ꓡꓳ꓿ 5 (ꓬꓲ ꓚꓲ ꓛꓬ ꓦꓲ ꓔꓯ ꓙꓵꓽ ꓟꓽ ꓗꓴꓸ ꓢꓴ ꓠꓽ꓾ ꓪꓴ-ꓢ ꓘꓴ ꓜꓲ ꓞꓳ ꓔꓯ ꓮ ꓡꓲ ꓬꓰ ꓙ ꓐ ꓡ ꓢꓰꓽ?) 6 ꓬꓲ ꓫꓵꓼ ꓦ ꓡꓱ ꓢꓴ ꓠꓬ ꓟꓬꓱꓽ ꓡꓳꓸ ꓢꓴ ꓬꓰ ꓟꓽ ꓓ꓿ ꓮꓽ ꓧꓪꓹ꓾ ꓬꓲ ꓢꓯꓺˍ ꓟ ꓠꓲꓹ ꓟ ꓙꓳ ꓡ ꓢꓲ꓾ ꓠꓲꓽ ꓪ ꓔꓲˍ ꓡꓰ ꓐꓰ ꓐꓯꓺ ꓟꓴꓺ ꓗꓪ ꓞꓰꓻ ꓓꓵꓽ ꓡꓰˍ ꓟꓽ ꓢꓷꓸ꓿ 7 ꓖꓳ ꓟˍ ꓡꓰ ꓟꓽ ꓞꓲ꓾ ꓟꓬꓱꓽ ꓡꓳꓸ ꓢꓴ ꓠꓬ ꓟꓽ ꓦ ꓡꓱ ꓢꓴ ꓐꓴ ꓡꓰ ꓥ ꓟꓲ ꓠꓬꓲꓺ ꓒꓵꓽ ꓟꓳꓻ ꓒꓵꓽˍ ꓟ ꓡ ꓞꓳ ꓥ ꓠ ꓗꓹ ꓡꓳ꓿ ꓟꓽ ꓥ ꓠꓬ ꓮꓽ ꓧꓪꓹ ꓝꓯꓼ ꓡꓯꓼ ꓘꓶ ꓡꓰ ꓬꓲ ꓔꓯ ꓠꓲꓽ ꓪꓺ ꓗꓪ ꓞꓰꓻ ꓓꓵ ꓡꓰ ꓝꓲˍ ꓟꓽ ꓢꓷꓸ꓿ 8 ꓖꓳ ꓟ ꓡꓰ ꓐꓰ ꓪꓴ-ꓢ ꓟꓬꓱꓽ ꓙ ꓢꓴˍ ꓟꓲ꓾ ꓠꓲꓹ ꓔꓱꓹ ꓠꓲꓹ ꓓꓰ ꓢꓴˍ ꓡꓰꓽ ꓬꓰ ꓠ ꓗꓹ ꓡꓳ꓿ ꓠꓬꓲꓽ ꓒꓳꓹ ꓠꓬꓲꓽ ꓫꓵꓽ ꓟꓽ ꓫꓸ ꓕꓱ ꓢꓴ꓾ ꓙꓲ ꓒꓶꓽ ꓟꓽ ꓗꓪꓸ ꓢꓴ꓾ ꓒꓴ ꓤ ꓫꓵ ꓤ ꓔꓯ ꓟꓽ ꓠꓲꓹ ꓦꓯꓸ ꓢꓴ꓾ 9 ꓦꓰꓽ ꓠꓲꓹ ꓗꓪ ꓕꓼ ꓓꓴ ꓟꓽ ꓙꓳ ꓙꓳ ꓙꓵꓻ ꓚꓱꓹ ꓔꓯ ꓕꓶꓻ ꓕꓶˍ ꓡꓰꓽ ꓣꓴ ꓔ ꓢꓴˍ ꓡꓰꓽ ꓬꓰ ꓠ ꓗꓹ ꓡꓳ꓿ 10 ꓬꓲ ꓪꓽ ꓔꓯ ꓧꓶꓸ ꓕꓯ ꓤꓹ ꓠꓬꓲ ꓢꓲ꓾ ꓛꓬ ꓖꓴ ꓟꓽ ꓙꓳˍ ꓕꓯ ꓠ ꓪꓴ-ꓢ ꓟꓬꓱꓽ ꓙ ꓢꓴ ꓬꓰ ꓝꓲ꓿ 11 ꓖꓳ ꓟ ꓡꓰ ꓐꓰ ꓬꓲ ꓪꓽ ꓤꓽ ꓟꓶꓻ ꓐꓴˍ ꓟꓲ ꓠꓲꓹ ꓔꓱ ꓠꓲꓹ ꓓꓰ ꓠ ꓗꓹ ꓡꓳ꓿ ꓢꓴ ꓡꓲꓺ ꓪꓺ ꓚ ꓢꓴ ꓬꓰ ꓟꓽ ꓓ꓿ ꓮꓸ ꓫꓵ ꓗꓪˍ ꓟꓲ ꓞꓳ ꓢꓲꓽ ꓬꓰ ꓢꓲ ꓦ ꓡꓱ ꓐꓳ ꓢꓴ ꓬꓰ ꓠ ꓗꓹ ꓡꓳ꓿ 12 ꓪꓴ-ꓢ ꓟꓬꓱꓽ ꓙ ꓢꓴ ꓐꓴ ꓠꓬ꓾ ꓤꓽ ꓟꓶꓻ ꓕꓲ ꓟꓶꓽˍ ꓡꓰ ꓫ ꓢꓲ꓾ ꓬꓲ ꓪꓽ ꓤ ꓠꓱ ꓐꓴˍ ꓐꓰ ꓬꓲ ꓪꓽ ꓚꓲ ꓛꓬ ꓦꓲ ꓔꓯ ꓬꓲ ꓜꓶ ꓙꓵꓽ ꓢꓴ ꓬꓰ ꓠꓯꓹ ꓡꓳ꓿ 13 ꓪꓴ-ꓢ ꓟꓬꓱꓽ ꓙ ꓢꓴ ꓬꓰˍ ꓟ ꓗꓪ ꓬꓲ ꓜꓶ ꓣꓱꓽ ꓢꓴ ꓠꓬ ꓚꓲ ꓛꓬ ꓐꓱ ꓶ ꓙꓲˍ ꓟ ꓟꓬꓱꓺ ꓓꓳꓽ ꓟꓶˍ ꓠꓬꓲ꓾ ꓙꓲ-ꓢꓴ ꓬꓰ-ꓢꓴ ꓔꓯ ꓙꓵꓻˍ ꓟ ꓙꓵꓻ ꓠꓲꓹ ꓗꓪ ꓠꓲꓹ ꓪꓴꓽ ꓓꓴ ꓙꓳˍ ꓡꓳ꓿ 14 ꓟꓶ ꓤ ꓟꓽ ꓥ ꓠꓬ ꓠꓴ ꓪꓽ ꓔꓬ ꓗꓪ ꓥꓪ ꓡ ꓠꓹ ꓟ ꓥꓳ ꓡꓳꓸ ꓔꓬ ꓡꓳ꓿ 15 ꓖꓳ ꓡꓱ ꓥ ꓟꓲ ꓥꓪ ꓡꓰ ꓠꓴ ꓔꓯ ꓕꓱ ꓟꓬ ꓫꓵꓽ ꓐꓳ ꓖꓶ ꓩꓴ ꓡ ꓟ ꓠꓬ꓾ ꓮꓽ ꓧꓪꓹ ꓥꓪ ꓡ ꓦꓬꓼ ꓠꓬꓲ ꓟꓬꓺ ꓬꓰ ꓐꓷˍ ꓠꓬ꓾ ꓪꓴ-ꓢ ꓦꓲꓻ ꓗꓪ ꓟ ꓡ ꓞꓳ ꓮ ꓡꓲ ꓞꓳ ꓙꓳ ꓠꓯꓹ ꓟ ꓠꓴ ꓢꓷꓸ ꓡꓰ ꓠꓹ ꓟ ꓥ ꓡꓳ꓿ ꓦꓲ ꓕꓱ ꓟ ꓠꓬ꓾ ꓢꓯꓸ ꓔꓬ ꓟ ꓪꓴ-ꓢ ꓬꓲ ꓘꓴ ꓜꓲ ꓞꓳ꓾ ꓔꓱꓹ ꓚꓵˍ ꓟ ꓬꓲꓸ ꓬꓲꓻ ꓘꓴˍ ꓐꓰ ꓦꓲ ꓚꓰ ꓥ ꓡꓳ꓿ 16 ꓣꓳ ꓣꓷꓠˍ ꓟ ꓚꓵ ꓘꓶ ꓕꓱ ꓟ ꓠꓬ ꓮꓸ ꓓꓲꓽ ꓪꓴꓽˍ ꓟ ꓥ ꓢꓲ꓾ ꓪꓴ-ꓢ ꓠꓬ ꓧꓪꓽ ꓖꓳ ꓓꓱ ꓒꓬꓱꓼ ꓡꓺꓳ꓾ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓢꓴ ꓥ ꓟ ꓢꓲ-ꓫꓬ-ꓟ-ꓦ ꓗꓪ ꓐꓰ ꓟꓳꓸ ꓖꓶ ꓡꓺꓳ꓾ ꓟꓴꓽ ꓗꓪ ꓝꓲ ꓓꓴ ꓐꓴ ꓡꓰ ꓟꓳꓻ ꓗꓷꓳ꓾ ꓐꓶ ꓞꓳ ꓗꓳ ꓡꓳ ꓗꓪ ꓚ ꓟꓸ ꓖꓶ ꓗꓷꓳ꓾ ꓟꓲ ꓠꓯ ꓞꓳ ꓤ ꓡꓰ ꓬꓲ ꓔꓯ ꓙꓵꓻ ꓗꓷ ꓢꓲ꓾ ꓐꓬꓱꓼ ꓡꓱꓼ ꓡꓱ ꓟ ꓗꓪ ꓬꓲ ꓔꓯ ꓛꓵꓽ ꓓꓯ ꓙꓰꓳ꓾ ꓐꓰ ꓐꓯˍ ꓟ ꓕꓱ ꓟ ꓠꓬ꓾ ꓮꓽ ꓟˍ ꓟꓲ ꓧꓳꓺ ꓟꓽ ꓐ ꓡ꓿

1 ꓕꓲ-ꓟꓳ-ꓕꓲ-ꓪꓴ 4

1 ꓢꓲ-ꓫꓬ-ꓟ-ꓦ ꓠꓽ ꓢꓲꓽ ꓢꓲˍ ꓡꓰ ꓕꓱ ꓡꓱ ꓐꓯˍ ꓡꓳ꓿ ꓡꓳꓹ ꓬꓰˍ ꓟ ꓝꓲꓸ ꓗꓪ ꓡ ꓞꓳ ꓕꓲ ꓐꓱ ꓠꓬ ꓟꓸ ꓒꓬꓹ ꓟ ꓦˍ ꓐꓰ ꓠꓲꓽ ꓟꓸ ꓟꓲ ꓔꓯ ꓠ ꓠꓹ ꓢꓲ꓾ ꓙꓵꓻ ꓠꓲꓹ ꓙ ꓖꓴ ꓗꓪ ꓐꓰ ꓧꓹ ꓙꓰˍ ꓥꓳ꓿ 2 ꓕꓱ ꓟ ꓠꓬ ꓗꓶꓸˍ ꓟ ꓥꓳꓽ ꓫꓸ ꓕꓱ ꓢꓴ ꓠꓲꓹ ꓟ ꓠꓬꓲꓽ ꓔꓱꓹ ꓣꓱˍ ꓟ ꓗꓪ ꓐꓰ ꓓꓳ ꓡ ꓟ ꓥ ꓡꓳ꓿ ꓕꓱ ꓕꓲ ꓧꓳꓽ ꓟ ꓬꓲ ꓪꓽ ꓦꓰꓽ ꓠꓲꓹ ꓠꓬ꓾ ꓛꓴꓻ ꓢꓲꓽ ꓔ ꓟ ꓧꓳꓻ ꓡꓰ ꓔꓶꓸ ꓩꓴꓻ ꓡꓰ ꓟ ꓡꓰ ꓐꓰ ꓗꓹ ꓢꓲ꓾ 3 ꓤꓽ ꓟꓶꓻ ꓕꓽ ꓧꓪ ꓠꓯꓹ ꓟ ꓐꓰ꓾ ꓜꓽ ꓓꓴ ꓕꓲ ꓫꓵꓽ ꓫꓵꓽ ꓚꓲꓸ ꓠꓹ ꓟ ꓕꓵꓼ ꓪꓽ ꓖꓶ ꓢꓲ ꓟꓸˍ ꓡꓳ꓿ ꓜꓽ ꓓꓴ ꓠꓬ꓾ ꓔꓱꓹ ꓚꓵˍ ꓟ ꓔꓯ ꓙꓵꓻ ꓢꓴˍ ꓐꓰ ꓢꓷꓸ ꓢꓴ ꓡꓰ ꓫꓸ ꓟꓳ ꓠꓲꓹ ꓣꓱ ꓢꓲ ꓜꓽ ꓠꓹ ꓟ ꓪꓴ-ꓢ ꓡꓰ ꓚꓰꓼ ꓔ ꓟ ꓥ ꓡꓳ꓿ 4 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓡꓳ ꓫꓵ ꓥ ꓕ ꓑꓳ ꓠꓬ ꓙꓲꓻˍ ꓟ ꓥ ꓢꓲ꓾ ꓫꓸ ꓟꓳ ꓠꓲꓹ ꓣꓱꓽ ꓢꓲ ꓠꓬꓲ ꓘꓳ ꓣꓴˍ ꓕꓯ ꓠꓽ꓾ ꓮꓸ ꓫꓵˍ ꓟꓲ ꓡꓳꓺ ꓗꓷ ꓓꓴ ꓟꓽ ꓥ꓿ 5 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓬꓲ ꓐꓯ ꓘꓶˍ ꓐꓰ꓾ ꓪꓽ ꓘꓴˍ ꓟ ꓗꓪ ꓐꓰ ꓚꓰꓸ ꓗꓷ ꓟ ꓥ ꓡꓳ꓿ 6 ꓠꓴ ꓡꓰ ꓕꓱ ꓟꓬ ꓫꓵꓽ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓬꓲꓼ ꓠꓬꓲꓸ ꓖꓶˍ ꓠꓬ꓾ ꓠꓴ ꓠꓽ ꓙꓲ-ꓢꓴ ꓬꓰ-ꓢꓴ ꓐꓱ ꓶ ꓙꓲꓻˍ ꓟ ꓚꓳ ꓑꓸˍ ꓐꓰ꓾ ꓠꓴ ꓛꓳˍ ꓟ ꓙꓵꓻ ꓠꓲꓹ ꓐꓯ ꓘꓶꓽ ꓐꓰ꓾ ꓙꓲꓻˍ ꓟ ꓟꓸ ꓟꓲ ꓐꓯ ꓘꓶ ꓡꓰ ꓦꓵꓻ ꓙꓽ ꓔ ꓟ ꓡ ꓞꓳ ꓒꓬꓱꓼ ꓡ ꓥꓳ꓿ 7 ꓖꓳ ꓡꓱ ꓢꓲ ꓟꓲ ꓠꓯ ꓚꓱꓹ ꓗꓪ ꓟ ꓞꓳ ꓟꓳꓽ ꓟ ꓛꓵꓸ ꓟꓲꓽ ꓔꓯ ꓡꓳ ꓗꓷ꓿ ꓪꓴ-ꓢ ꓚꓱꓹ ꓗꓪ ꓠꓲꓹ ꓒꓵꓽ ꓠꓲꓹ ꓡꓱˍ ꓟ ꓗꓪ ꓠꓴ ꓚꓲ ꓛꓬ ꓔꓯ ꓤꓹ ꓓꓰꓽ ꓡꓰ ꓝꓲ꓿ 8 ꓮ ꓡꓲꓳ ꓐꓯ ꓠꓬ ꓖꓳ ꓓꓱ ꓔꓯ ꓤꓹ ꓓꓰꓼ ꓡꓰ ꓝꓲˍ ꓟ ꓠꓬ꓾ ꓣꓱ ꓬꓯꓼ ꓖꓴ ꓮꓽ ꓔꓲꓸ ꓤ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓔꓯ ꓟꓳꓸ ꓠꓲꓹ ꓒꓵꓽ ꓠꓲꓹ ꓡꓱˍ ꓟ ꓗꓪ ꓤꓹ ꓓꓰꓼ ꓡꓰ ꓝꓲˍ ꓟ ꓠꓬ꓾ ꓮꓸ ꓫꓵꓽ ꓗꓪˍ ꓟꓲ ꓣꓱ ꓬꓯꓼ ꓖꓴ ꓙꓳ ꓢꓲ꓾ ꓮ ꓟꓶ ꓟ ꓤꓶ ꓐꓱ ꓶ ꓥ ꓟꓲ꓾ ꓡ ꓠꓹ ꓟ ꓤꓶ ꓐꓱ ꓶ ꓥ ꓟꓲ꓾ ꓥꓳ ꓡꓳꓸ ꓓꓴ ꓙ ꓟꓳ ꓘꓶꓽ ꓙꓳˍ ꓡꓳ꓿ 9 ꓐꓯ ꓘꓶꓽ ꓕꓱ ꓟ ꓠꓬ ꓦ ꓡꓱ ꓐꓳˍ ꓟ ꓐꓰ ꓮꓽ ꓙꓵ ꓢꓴ ꓘꓳ ꓣꓴ ꓒꓵꓽˍ ꓟ ꓥ ꓡꓳ꓿ 10 ꓖꓳ ꓡꓱ ꓠꓬꓲ ꓞꓳ ꓤ ꓮꓽ ꓙꓵ ꓔꓯ ꓚꓬꓴ ꓙ ꓢꓴ꓾ ꓟꓬꓽ ꓠꓬꓲ ꓠꓬ ꓬꓲ ꓔꓯ ꓙꓵꓻ ꓢꓴ ꓐꓴ ꓔꓯ ꓚꓬꓴ ꓢꓴ꓾ ꓢꓯꓸ ꓔꓬ ꓟ ꓪꓴ-ꓢ ꓠꓯꓸꓼ ꓗꓪ ꓥꓳ ꓡꓳꓸ ꓓꓴ ꓙꓳˍ ꓠꓬꓲ ꓣꓳ ꓠꓬ ꓟꓬꓱꓽ ꓬꓰ ꓢꓯꓼ ꓕꓵˍ ꓟ ꓥ ꓡꓳ꓿ 11 ꓠꓴ ꓠꓬ ꓬꓲ ꓪꓽ ꓔꓯ ꓕꓱ ꓟꓬ ꓫꓵꓽ ꓟꓸ ꓖꓶ ꓢꓲ ꓛꓳ ꓝꓲ꓿ 12 ꓮꓽ ꓟˍ ꓟꓲ ꓠꓴ ꓞꓲꓼ ꓣꓳˍ ꓟ ꓔꓯ ꓕꓽ ꓠꓬꓲꓺ ꓣꓳ ꓡꓰ ꓝꓲ꓿ ꓠꓴ ꓠꓬ꓾ ꓫꓸ ꓕꓱˍ ꓟ ꓗꓪ꓾ ꓞꓳ ꓙꓳˍ ꓟ ꓗꓪ꓾ ꓠꓵ ꓠꓲꓹ ꓗꓪ꓾ ꓙꓵꓻ ꓠꓲꓹ ꓗꓪ꓾ ꓢꓲꓽ ꓫꓬˍ ꓟ ꓗꓪ꓾ ꓦ ꓡꓱ ꓢꓴ ꓐꓴ ꓐꓱ ꓶ ꓔꓯꓺ ꓢꓳ ꓓꓴ ꓬꓰ꓿ 13 ꓥꓪ ꓟꓽ ꓛꓲ ꓡ ꓕ ꓑꓳ ꓠꓬ꓾ ꓮꓽ ꓙꓵ ꓢꓴ ꓔꓯ ꓢꓲ ꓫꓬ ꓕꓳ ꓶ ꓵꓺ ꓟꓸ ꓖꓶˍ ꓟ ꓐꓰ꓾ ꓘꓶꓸ ꓖꓶˍ ꓟ ꓐꓰ꓾ ꓟꓸ ꓖꓶˍ ꓟ ꓗꓪ ꓠꓲꓹ ꓡꓱ ꓡꓱˍ ꓡꓰ ꓬꓰ꓿ 14 ꓠꓴ ꓙꓳˍ ꓟ ꓣꓱꓽ ꓛꓰ ꓡꓯꓼ ꓫꓴ ꓔꓯ ꓟꓽ ꓣꓱ ꓕꓽ ꓬꓰ꓿ ꓡꓯꓼ ꓫꓴ ꓕꓱ ꓟ ꓠꓬ ꓟꓷꓽ ꓠꓷꓹ ꓝꓸ ꓘꓶꓽˍ ꓐꓰ꓾ ꓟꓬꓱꓽ ꓡꓳꓸ ꓢꓴ ꓐꓴ ꓡꓰ ꓡꓯꓼ ꓒꓯꓹ ꓚꓰꓹ ꓖꓶˍ ꓟ ꓗꓪ ꓐꓰ ꓠꓴ ꓟꓶ ꓗꓷ ꓟ ꓥ ꓡꓳ꓿ 15 ꓕꓱ ꓟꓬ ꓫꓵꓽ ꓠꓴ ꓠꓲꓹ ꓟ ꓗꓪ ꓗꓶꓺ ꓔ ꓢꓲ꓾ ꓠꓴ ꓪꓴꓽ ꓡ ꓟꓴ ꓡ ꓔꓬ ꓟ ꓔꓯ ꓮꓽ ꓙꓵ ꓢꓴ ꓟꓳꓻ ꓡꓰ ꓝꓲ ꓠꓹ ꓟ꓾ ꓕꓲ ꓠꓲꓹ ꓟˍ ꓡꓰꓽ ꓢꓯꓼ ꓕꓵꓼ꓿ 16 ꓠꓴ ꓮ ꓡꓲ ꓞꓳ ꓙꓳˍ ꓟ ꓐꓰ ꓠꓴ ꓮ ꓡꓲ ꓟꓸ ꓖꓶ ꓠꓹ ꓟ ꓤ ꓟꓳ ꓢꓲ ꓢꓯ ꓕꓵꓼ꓿ ꓠꓴ ꓕꓱ ꓡꓱ ꓬꓰˍ ꓠꓬ꓾ ꓠꓴ ꓚꓲ ꓛꓬ ꓔꓯˍ ꓟꓲ꓾ ꓠꓴ ꓔꓯ ꓑ ꓙꓽ ꓢꓴ ꓔꓯˍ ꓟꓲ꓾ ꓠꓴ ꓡꓰ ꓚꓬꓴ ꓟꓶ ꓡꓰ ꓝꓲˍ ꓥꓳ꓿

1 ꓕꓲ-ꓟꓳ-ꓕꓲ-ꓪꓴ 5

1 ꓞꓳ ꓟꓳꓽ ꓔꓯ ꓠꓬ ꓟꓽ ꓑꓱꓹ ꓑꓱꓹ꓾ ꓚꓲ ꓛꓬ ꓐꓹ ꓐ ꓔꓯˍ ꓡꓰ ꓐꓰ ꓘꓶꓸ ꓖꓶ꓿ ꓞꓳ ꓡꓯꓸ ꓐꓴ ꓔꓯ ꓠꓬ ꓚꓲ ꓛꓬ ꓬꓲꓼ ꓤ ꓠꓬꓲ ꓤ ꓐꓴ ꓔꓯˍ ꓡꓰ ꓐꓰ꓾ 2 ꓞꓳ ꓟꓳꓽ ꓟ ꓐꓴ ꓔꓯ ꓠꓬ ꓚꓲ ꓛꓬ ꓟꓹ ꓟ ꓐꓴ ꓔꓯˍ ꓡꓰ ꓐꓰ꓾ ꓤꓽ ꓟꓶ ꓡꓯꓸ ꓐꓴ ꓔꓯ ꓠꓬ ꓢꓲꓽ ꓢꓲ ꓫꓬꓻ ꓫꓬˍ ꓡꓰ ꓚꓲ ꓛꓬ ꓮꓸ ꓝꓲꓺ ꓠꓬꓲ ꓟ ꓐꓴ ꓚꓬꓹ ꓢꓲ ꓙꓻ ꓡꓯꓽ ꓘꓳ꓿ 3 ꓟꓶꓽ ꓛꓵꓽ ꓟ ꓚꓵꓺ ꓔꓯ ꓒꓵꓽ꓿ 4 ꓖꓳ ꓡꓱ ꓥ ꓟꓲ ꓟꓶꓽ ꓛꓵꓽ ꓟ ꓠꓬ ꓬꓲ ꓤ ꓠꓱ꓾ ꓥ ꓠꓬ ꓡꓲꓸ ꓑꓸ ꓡꓲꓸ ꓟ ꓙꓳˍ ꓠꓬ꓾ ꓬꓲ ꓪꓽ ꓠꓽ ꓦ ꓡꓱ ꓚꓱꓹ ꓗꓪ ꓟꓸ ꓔ ꓟ ꓡꓰ ꓐꓰ ꓚꓲ ꓛꓬ ꓕꓲ ꓦꓲ ꓢꓴ ꓔꓯ ꓧꓶꓸ ꓕꓯ ꓬꓰ ꓙ ꓠꓹ ꓟ ꓢꓳ ꓟꓶ ꓡꓰ ꓝꓲ ꓢꓲ꓾ ꓬꓲ ꓪꓽ ꓐꓹ ꓐ ꓟꓹ ꓟ ꓐꓴ ꓔꓯ ꓦꓵꓻ ꓚꓱꓹ ꓖꓶ ꓝꓲ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓠ ꓪꓴ-ꓢ ꓠꓲꓹ ꓒꓴˍ ꓟ ꓥ ꓡꓳ꓿ 5 ꓕꓲ ꓣꓳ ꓔꓵꓸꓼ ꓔꓬ ꓟ ꓟꓶꓽ ꓛꓵꓽ ꓟ ꓚꓵꓺ ꓬꓲ ꓥꓳ ꓡꓳꓸ ꓓꓴ ꓠꓬ ꓪꓴ-ꓢ ꓥ ꓠꓬꓲ꓾ ꓪꓴ-ꓢ ꓡꓰ ꓬꓲ ꓔꓯ ꓬꓰ ꓙ ꓡ ꓠꓹ ꓟ ꓬꓲ ꓠꓬ ꓟꓳꓼ ꓡꓳ ꓢ ꓘꓪ ꓟꓽ ꓠꓽ ꓠ ꓶꓼ ꓓꓰ ꓪꓽ ꓘꓴˍ ꓡꓳ꓿ 6 ꓖꓳ ꓡꓱ ꓥ ꓟꓲ ꓧꓪ ꓖꓳ ꓓꓱꓽ ꓠꓲꓹ ꓘꓪ ꓫꓵ ꓓꓴˍ ꓡꓰ ꓧꓪˍ ꓟ ꓟꓶꓽ ꓛꓵꓽ ꓟ ꓠꓽ꓾ ꓬꓲ ꓢꓯꓸ ꓔꓬ ꓥ ꓟꓲ ꓫꓵꓻ ꓞꓹ ꓟ ꓥ ꓡꓳ꓿ 7 ꓕꓱ ꓟꓬ ꓫꓵ ꓗꓪ ꓕꓼ ꓓꓴ ꓟꓽ ꓙꓳ ꓝꓲ ꓠꓹ ꓟ ꓬꓲ ꓪꓽ ꓔꓯ ꓬꓲ ꓜꓶꓻ ꓟꓸ ꓖꓶ꓿ 8 ꓚꓲ ꓛꓬ ꓫꓵꓽ ꓤ ꓧꓪ ꓤ꓾ ꓟꓬꓽ ꓠꓬꓲ ꓠꓬ ꓬꓲ ꓚꓲ ꓛꓬ ꓕꓲ ꓦꓲ ꓢꓴ ꓔꓯ ꓟꓽ ꓦꓵ ꓙ ꓢꓴ ꓠꓬ꓾ ꓙꓵꓻ ꓚꓱꓹ ꓔꓯ ꓟꓽ ꓣꓷꓠꓸ ꓢꓴ ꓥ ꓢꓲ꓾ ꓟꓽ ꓦ ꓡꓱ ꓢꓴ ꓢꓶꓸ ꓟꓽ ꓞꓲ ꓟꓽ ꓙꓲ ꓢꓴ ꓥ ꓡꓳ꓿ 9 ꓛꓳꓼ ꓞꓲ ꓘꓳꓼ ꓟꓽ ꓙꓳ ꓟ ꓟꓶꓽ ꓛꓵꓽ ꓟ ꓔꓯ ꓦꓵꓻ ꓙ ꓕꓳ ꓶ ꓗꓪ ꓟꓬꓱ ꓕꓽ ꓐꓳ꓿ ꓬꓲ ꓤ ꓖꓴ ꓕꓲ ꓣꓳˍ ꓡꓰ ꓫ ꓠꓬꓲ ꓢꓲ꓾ 10 ꓙꓲꓻˍ ꓟ ꓟꓬꓱꓽ ꓬꓰ ꓠꓬꓲˍ ꓟ ꓢꓷꓸ ꓙ ꓟꓳ ꓙ ꓓꓴ ꓙꓳ ꓢꓲ ꓠꓬꓲ꓾ ꓤ ꓠꓱ ꓔꓯ ꓬꓲ ꓜꓶ ꓦꓵ ꓪꓴꓽ ꓡ ꓗꓷ ꓢꓴ꓾ ꓪꓰ ꓤ ꓔꓯ ꓘꓳ ꓣꓴ ꓗꓷ ꓢꓲ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓬꓰ ꓙ ꓠꓹ ꓟ ꓱꓺˍ ꓟ ꓟꓬꓱꓽ ꓬꓰ ꓗꓷ ꓢꓴ꓾ ꓫꓸ ꓙꓵ ꓢꓴ ꓔꓯ ꓬꓰ ꓙ ꓗꓷ ꓢꓴˍ ꓐꓰ꓾ ꓙꓲꓻˍ ꓟ ꓟꓬꓱꓽ ꓬꓲ ꓫꓵꓽ ꓬꓲ ꓙꓰꓽ ꓬꓰ ꓗꓷ ꓢꓴ ꓥ ꓐꓷˍ ꓠꓬ ꓬꓲ ꓟꓬꓱ ꓐꓳ ꓛꓵˍ ꓡꓳ꓿ 11 ꓖꓳ ꓡꓱ ꓥ ꓟꓲ ꓞꓲꓼ ꓣꓳˍ ꓟ ꓟꓶꓽ ꓛꓵꓽ ꓟ ꓟꓬꓱꓺ ꓠꓬ ꓕꓽ ꓐꓳꓺ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓧꓪꓽ ꓖꓳ ꓓꓱ ꓗꓪ ꓛꓴꓻ ꓞ ꓡ ꓕꓯ꓾ 12 ꓙꓲ-ꓢꓴ ꓠꓯS ꓗꓪ ꓬꓲ ꓪꓴꓸ ꓪꓵꓼ ꓗꓷ ꓟ ꓪꓵꓼ ꓘꓶꓽ ꓔꓯ ꓡꓳ ꓗꓷ ꓢꓲ ꓦꓲꓻ ꓧꓪ ꓠꓲꓹ ꓫꓵ ꓡ ꓠꓬ꓾ ꓬꓲ ꓪꓽ ꓠꓽ ꓛꓬꓻ ꓒꓵꓽ ꓟꓶˍ ꓥꓳ꓿ 13 ꓖꓳ ꓟˍ ꓡꓰ ꓟꓽ ꓞꓲ꓾ ꓬꓲ ꓪꓽ ꓠꓬ ꓐꓴꓻˍ ꓟ ꓢꓳ ꓟꓶ ꓢꓲ꓾ ꓕꓲ ꓦꓲ ꓕꓲ ꓦꓲ ꓗꓪ ꓚꓳ ꓙꓰˍ ꓡꓳ꓿ ꓐꓴꓻˍ ꓟˍ ꓡꓰ ꓟꓽ ꓞꓲ꓾ ꓪ ꓕꓱꓻ ꓢꓴˍ ꓐꓰ ꓝꓯꓼ ꓡꓯꓼ ꓢꓴˍ ꓟꓲ ꓒꓬꓱꓼ ꓡ ꓢꓲ꓾ ꓫꓸ ꓕꓱ ꓙꓲꓽ ꓟꓽ ꓙꓳ ꓡꓳ ꓫꓵ ꓫꓸ ꓕꓱˍ ꓡꓳ꓿ 14 ꓖꓳ ꓡꓱ ꓠꓬꓲ ꓛꓴꓽ ꓙꓳ ꓢꓴ ꓡꓰ ꓤꓲꓺ ꓡ ꓓꓴ ꓬꓲ ꓑꓶꓸ ꓟꓽ ꓙꓳ ꓝꓲ ꓠꓹ ꓟ꓾ ꓥꓪ ꓠꓬ ꓞꓲꓼ ꓣꓳˍ ꓟ ꓟꓶꓽ ꓛꓵꓽ ꓟ ꓔꓯ ꓦꓲ ꓧꓪ ꓝꓲ ꓢꓲ꓾ ꓤ ꓠꓱ ꓦꓵ ꓝꓲ ꓢꓲ ꓠꓬꓲ꓾ ꓦꓲꓻ ꓙꓵꓽ ꓢꓴ ꓬꓰ ꓝꓲ ꓠꓲꓹ ꓫꓵˍ ꓡꓳ꓿ 15 ꓮ ꓡꓲꓳ ꓐꓯ ꓠꓬ ꓮ ꓟꓶˍ ꓡꓰ ꓟꓶꓽ ꓛꓵꓽ ꓟ ꓕꓲ ꓐꓱ ꓠꓽ ꓢ-ꓓꓯ ꓔꓯ ꓛꓳ ꓙꓰ ꓠꓹ ꓟ ꓒꓳꓹ ꓡꓰꓼ ꓙꓰꓳ꓿ 16 ꓦ ꓡꓱ ꓢꓴ ꓐꓴ ꓕꓲ ꓦꓲ ꓦꓲ ꓗꓪ ꓟꓶꓽ ꓛꓵꓽ ꓟ ꓙꓳˍ ꓠꓬ꓾ ꓖꓳ ꓕꓲ ꓦꓲ ꓢꓴ ꓡꓰ ꓬꓲ ꓪꓽ ꓔꓯ ꓬꓰ ꓙ ꓢꓲ꓾ ꓘꓴ ꓜꓲ ꓞꓳ ꓔꓯ ꓕꓽ ꓪꓴꓽ ꓧꓶ ꓝꓲ꓿ ꓬꓲ ꓪꓽ ꓕꓱ ꓡꓱ ꓬꓰˍ ꓠꓬ꓾ ꓬꓰ ꓙ ꓢꓴ ꓟꓽ ꓙꓳ ꓟ ꓟꓶꓽ ꓛꓵꓽ ꓟ ꓐꓴ ꓔꓯ ꓘꓴ ꓜꓲ ꓞꓳ ꓡꓰ ꓬꓰ ꓙ ꓪ ꓡꓰˍ ꓥꓳ꓿ 17 ꓬꓲ ꓜꓶ ꓧꓳꓽ ꓗꓴꓸ ꓢꓲ ꓐꓯ ꓘꓶ ꓟꓸ ꓖꓶˍ ꓟ ꓗꓪ ꓢꓯꓼ ꓕꓵꓼˍ ꓟ ꓟꓬꓱꓽ ꓡꓳꓸ ꓢꓴ ꓐꓴ ꓔꓯ ꓠꓬ꓾ ꓠꓬꓲꓽ ꓩꓴꓸ ꓒꓵꓽ ꓢꓲ ꓬꓰ ꓙ ꓙꓲꓽ ꓙꓳˍ ꓡꓳ꓿ 18 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓜꓻ ꓕꓳꓼ ꓔꓬ ꓟ ꓮꓸ ꓠꓬꓲꓽ ꓟꓷꓽ ꓠꓷꓹ ꓔꓯ ꓕꓽ ꓝꓴꓸ ꓔ꓿ ꓟꓬꓱꓽ ꓬꓰ ꓢꓴˍ ꓟꓲ ꓪꓽ ꓒꓵꓽ ꓟꓶ ꓒꓵꓽˍ ꓡꓳ꓾ ꓐꓯˍ ꓡꓳ꓿ 19 ꓟꓬꓱꓽ ꓡꓳꓸ ꓢꓴ ꓔꓯ ꓓꓰˍ ꓟ ꓓꓰꓺ ꓘꓶ ꓔꓯ ꓠꓬ꓾ ꓢꓷꓸ ꓙ ꓟꓳ ꓙ ꓢꓴ ꓠꓬꓲꓽ ꓢ ꓣꓳ ꓟꓽ ꓙꓳ ꓠꓬ ꓕꓽ ꓘꓳ ꓣꓴ꓿ 20 ꓝꓴꓲ ꓡꓯꓽ ꓫꓵ ꓬꓰ ꓔꓬ ꓢꓴ ꓔꓯ ꓮꓽ ꓙꓵ ꓢꓴ ꓟꓲꓽ ꓙꓬ ꓗꓪ ꓕꓼ ꓢꓲ꓾ ꓠꓱꓸ ꓐꓯꓼ ꓢꓴ ꓔꓯˍ ꓟꓲ ꓙꓳꓺ ꓗꓽ ꓖꓶˍ ꓟ ꓟꓶ ꓡꓰ ꓝꓲ꓿ 21 ꓥꓪ ꓠꓬ ꓪꓴ-ꓢˍ ꓐꓰ꓾ ꓙꓲ-ꓢꓴ ꓬꓰ-ꓢꓴˍ ꓐꓰ꓾ ꓬꓲ ꓡꓰ ꓢꓲ ꓔ ꓟ ꓟꓴꓽ ꓗꓪ ꓝꓲ ꓓꓴ ꓐꓴ ꓒꓬꓱꓽ ꓕꓯ ꓗꓪ ꓠꓴ ꓔꓯ ꓕꓵꓼ ꓪꓽ ꓖꓶˍ ꓠꓬꓲ꓾ ꓠꓴ ꓠꓬ ꓐꓯ ꓘꓶ ꓕꓱ ꓟꓬ ꓟ ꓔꓯ ꓒꓵꓽ ꓛꓳ ꓢꓲ꓾ ꓮꓸ ꓫꓵ ꓗꓪˍ ꓟꓲ ꓕꓽ ꓐ ꓟꓴ꓾ ꓕꓽ ꓒꓯꓹ ꓦꓰꓽ꓿ 22 ꓮꓽ ꓟ ꓔꓯˍ ꓟꓲ ꓠꓲꓹ ꓞ ꓡꓯꓼ ꓒꓯꓹ ꓕꓽ ꓚꓰꓹ ꓖꓶ꓿ ꓠꓱꓸ ꓐꓯ ꓢꓴ ꓝꓴꓲ ꓗꓪˍ ꓟꓲ ꓕꓽ ꓑꓯꓹ ꓡꓯꓽ ꓘꓳ꓿ ꓠꓴ ꓠꓽ ꓚꓲ ꓛꓬ ꓔꓯ ꓝꓴꓲ ꓗꓪ ꓐꓰ ꓗꓷꓹ ꓞ ꓝꓲ꓿ 23 ꓕꓱ ꓡꓱ ꓖꓳ ꓑꓳ ꓬꓲꓻ ꓙꓬˍ ꓡꓰꓽ ꓟꓽ ꓓꓳꓻ ꓓꓳ꓾ ꓠꓴ ꓦꓰꓼ ꓛꓲˍ ꓐꓰ ꓠꓴ ꓔꓯ ꓘꓶꓻ ꓡꓶꓽ ꓔꓬ ꓟ ꓠꓻ ꓓꓴ ꓑꓶꓸ ꓓꓴ ꓛꓱꓼ ꓡꓱꓼ ꓙꓵꓻ ꓮꓽ ꓔꓲꓸ ꓤ ꓓꓳ꓿ 24 ꓡ ꓞꓳ ꓕꓲ ꓐꓱ ꓟ ꓝꓴꓲ ꓠꓬ ꓟꓳꓻ ꓞ ꓢꓲ꓾ ꓬꓲ ꓪꓽ ꓔꓯ ꓐꓯ ꓟꓴ ꓘꓶ ꓖꓴ ꓗꓪ ꓧꓳꓽ ꓙꓰ ꓔꓬ ꓡꓳ꓿ ꓕꓲ ꓐꓱ ꓟ ꓝꓴꓲ ꓠꓽ ꓬꓲ ꓪꓽ ꓔꓯ ꓖꓼ ꓟꓽ ꓟꓶ ꓢꓰꓽ꓿ 25 ꓕꓱ ꓟ ꓡꓰ ꓐꓰ ꓙꓲꓻˍ ꓟ ꓟꓬꓱꓽˍ ꓟꓲ ꓟꓳꓻ ꓞ ꓢꓲ꓾ ꓟꓽ ꓙꓲ ꓟ ꓟꓬꓱꓽ ꓔꓯˍ ꓟꓲ ꓚꓵꓺ ꓔ ꓟꓽ ꓐ ꓡ꓿

1 ꓕꓲ-ꓟꓳ-ꓕꓲ-ꓪꓴ 6

1 ꓪꓴ-ꓢ ꓟꓬꓱꓺˍ ꓐꓰ ꓣꓳꓽ ꓟꓸ ꓟꓲ ꓔꓯ ꓢꓴ ꓡꓰ ꓟꓽ ꓤꓲ ꓡ ꓠꓹ ꓟ꓾ ꓚꓳ ꓑꓸ ꓣꓱꓽ ꓢꓴ ꓮꓽ ꓙꓵ ꓠꓬ ꓮꓸ ꓫꓵ ꓗꓪˍ ꓟꓲ ꓬꓲ ꓪꓽ ꓚꓲ ꓛꓬ ꓢꓲ ꓒꓽ ꓔꓯ ꓞꓳ ꓒꓵꓽ ꓙꓲꓽ ꓙꓳˍ ꓡꓳ꓿ 2 ꓝꓮꓲ ꓠꓬ ꓪꓴ-ꓢ ꓦ ꓡꓱˍ ꓟ ꓢꓲ ꓒꓽ ꓐꓴ ꓔꓯ ꓠꓬ꓾ ꓚꓳ ꓑꓸ ꓐꓴ ꓡꓰ ꓬꓲ ꓪꓽ ꓔꓯ ꓙꓲ-ꓢꓴ ꓠꓯꓸꓼ ꓗꓪ ꓬꓲꓼ ꓤ ꓠꓬꓲ ꓤ ꓐꓴˍ ꓡꓰꓽ ꓥꓳ꓾ ꓐꓰ ꓚꓬꓹ ꓢꓲ꓾ ꓬꓲ ꓪꓽ ꓔꓯ ꓟꓽ ꓒꓵꓽ ꓟꓽ ꓚꓬ ꓬꓰ ꓟꓽ ꓓ꓿ ꓪꓴ-ꓢ ꓦ ꓡꓱˍ ꓟ ꓚꓳ ꓑꓸ ꓐꓴˍ ꓐꓰ ꓢꓲ ꓒꓽ ꓐꓴ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓬꓲꓼ ꓤ ꓠꓬꓲ ꓤ ꓥ ꓠꓬꓲ꓾ ꓠꓬꓲꓽ ꓧꓳ ꓡꓱꓸꓼ ꓙꓲ ꓖꓴ ꓟꓶ ꓡꓰ ꓠꓹ ꓟ꓾ ꓟꓬꓽ ꓠꓬꓲ ꓠꓲꓹ ꓡꓱꓻ ꓡꓱˍ ꓡꓰꓽ ꓣꓱꓽ ꓙ ꓬꓰ ꓙ ꓡꓯꓼ ꓘꓳ ꓠ ꓗꓹ ꓡꓳ꓿ ꓕꓱ ꓟꓬ ꓫꓵꓽ ꓟ ꓬꓲ ꓪꓽ ꓔꓯ ꓬꓲ ꓜꓶ ꓟꓸ ꓖꓶ ꓢꓲ꓾ ꓡꓯꓽ ꓫꓵ ꓬꓲꓼ ꓠꓬꓲꓸ ꓖꓶ ꓠꓯꓹ ꓡꓳ꓿ 3 ꓮꓽ ꓟˍ ꓟꓲ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓔꓱꓹˍ ꓟ ꓐꓯ ꓘꓶꓽˍ ꓐꓰ꓾ ꓣꓳ ꓦ ꓡꓱ ꓚꓱꓹ ꓔꓯ ꓟꓽ ꓧꓳꓹˍ ꓟ ꓟꓸ ꓟꓲ ꓟꓸ ꓐꓷˍ ꓠꓬ꓾ 4 ꓬꓲ ꓠꓽ ꓘꓶꓽ ꓘꓹ ꓢꓴ ꓥ ꓢꓲ꓾ ꓮꓸ ꓫꓵꓽˍ ꓟꓲ ꓟꓽ ꓙꓽ ꓜꓲꓼ ꓢꓴ ꓥ ꓡꓳ꓿ ꓬꓲ ꓠꓽ ꓢꓴ ꓓꓵꓽ ꓙꓽ ꓟꓬꓽˍ ꓟ ꓫꓵꓽ ꓪꓴꓻˍ ꓐꓰ ꓐꓯ ꓘꓶ ꓗꓪ ꓐꓯ ꓧꓳꓺ ꓡꓯꓽ ꓘꓳˍ ꓟ ꓬꓲ ꓫꓷꓹ ꓙꓳꓻ ꓢꓲ꓾ ꓕꓱ ꓟ ꓗꓪ ꓐꓰ ꓟꓬꓺ ꓦꓯꓸˍ ꓟ꓾ ꓢꓯꓼ ꓡꓯꓽ ꓘꓳˍ ꓟ꓾ ꓟꓽ ꓚꓰꓼ ꓟ ꓙꓱꓽˍ ꓟ ꓐꓰ꓾ ꓥꓶꓺˍ ꓟ ꓓꓵꓽ ꓙˍ ꓟ ꓓꓳ ꓡ ꓟ ꓥ ꓡꓳ꓿ 5 ꓝꓮꓲ ꓠꓬ ꓙꓽ ꓠꓲꓹ ꓐꓬ ꓡꓰ ꓢꓲ ꓔꓱꓹ ꓚꓵˍ ꓟ ꓟꓽ ꓙꓳ ꓢꓴ ꓠꓬ꓾ ꓟꓽ ꓠꓽ ꓠ ꓧꓳꓺ ꓡꓯꓽ ꓘꓳˍ ꓟ ꓬꓰ ꓓꓳ ꓡ ꓡꓳ꓿ ꓕꓱ ꓡꓱ ꓫꓵꓽ ꓡ ꓞꓳ ꓠꓬ ꓦ ꓡꓱ ꓚꓱꓹ ꓔꓯ ꓐꓳꓺ ꓡ ꓓꓴ ꓚꓱꓹ ꓚꓬꓹ ꓡꓳ꓿ 6 ꓖꓳ ꓡꓱ ꓥ ꓟꓲ ꓣꓳ ꓙꓳˍ ꓟ ꓔꓯ ꓠꓲꓹ ꓘꓪꓽ ꓫꓵ ꓢꓲ ꓦ ꓡꓱ ꓚꓱꓹ ꓗꓪ ꓢꓯꓼ ꓕꓵꓼ ꓢꓴ ꓠꓬ꓾ ꓚꓵ ꓚꓵ ꓞꓳ ꓐꓳ ꓞꓳ ꓬꓲꓼ ꓥꓳ꓿ 7 ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓗꓪ ꓣꓳ ꓮꓸ ꓫꓵ ꓟꓽ ꓔꓯꓹ ꓓꓵꓽ ꓡ꓿ ꓝꓮꓲ ꓣꓳ ꓠꓬ ꓮꓸ ꓫꓵˍ ꓟꓲ ꓔꓯꓹ ꓓꓳ ꓙꓰ ꓟꓽ ꓐ ꓡ꓿ 8 ꓖꓳ ꓡꓱ ꓠꓬꓲ ꓜꓽ ꓓꓴˍ ꓐꓰ ꓖꓪ ꓓꓴ ꓙꓳꓻˍ ꓠꓬ꓾ ꓠꓲꓹ ꓘꓪ ꓫꓵ ꓛꓵˍ ꓡꓳ꓿ 9 ꓞꓳ ꓐꓳ ꓬꓰ ꓠꓲꓹ ꓫꓵ ꓢꓴ ꓠꓽ꓾ ꓫꓵꓽ ꓠꓬꓲˍ ꓟ ꓐꓰ ꓪꓺ ꓗꓪ ꓞꓰꓻ ꓓꓵꓽ ꓡꓰ ꓢꓲ꓾ ꓞꓳ ꓤ ꓔꓯ ꓛꓴ ꓛꓰꓹ ꓡꓰ ꓝꓲˍ ꓟ ꓐꓰ ꓟꓶꓽ ꓬꓰ ꓝꓲ ꓐ ꓡ ꓡꓳ ꓫꓵꓽ꓾ ꓙꓲꓽˍ ꓟ ꓐꓰ ꓠꓻ ꓡꓰ ꓝꓲ ꓓꓴ ꓦꓯꓸ ꓠꓲꓹ ꓙꓵꓽˍ ꓟ ꓮꓽ ꓟꓬꓹ ꓫꓵ ꓗꓪ ꓞꓰꓻ ꓓꓵꓽ ꓡꓰˍ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓒꓴ ꓔꓯ ꓠꓲꓹ ꓦꓯꓸˍ ꓟ ꓠꓬ꓾ ꓥꓶꓺˍ ꓟ ꓕꓲꓽ ꓦ ꓫꓵꓽ ꓡꓳꓻ ꓟ ꓬꓲ ꓚꓰꓺ ꓥ ꓡꓳ꓿ ꓕꓲ ꓐꓱ ꓠꓽ ꓒꓴ ꓔꓯ ꓠꓲꓹ ꓦꓯꓸ ꓠꓬꓲ꓾ ꓙꓵꓻ ꓚꓱꓹ ꓗꓪ ꓐꓰ ꓧꓹ ꓙꓰ ꓢꓲ꓾ ꓠꓲꓹ ꓟ ꓫꓸ ꓓꓴ ꓮꓽ ꓟꓬꓹ ꓫꓵꓽ ꓡꓰ ꓬꓲ ꓪꓽ ꓚꓲ ꓛꓬ ꓔꓯ ꓗꓸ ꓙꓻ ꓙꓰˍ ꓡꓳ꓿ 11 ꓖꓳ ꓡꓱ ꓥ ꓟꓲ ꓪꓴ-ꓢ ꓡ ꓞꓳꓻꓳ꓾ ꓠꓴ ꓠꓬ ꓕꓱ ꓡꓱ ꓫꓵꓽ ꓗꓪ ꓐꓰ ꓛꓰꓹ ꓙꓰ ꓢꓲ꓾ ꓔꓱꓹ ꓜꓳꓽˍ ꓟ꓾ ꓠꓲꓹ ꓒꓵꓽ ꓠꓲꓹ ꓡꓱˍ ꓟ꓾ ꓙꓵꓻ ꓠꓲꓹ꓾ ꓠꓵ ꓠꓲꓹ꓾ ꓜꓲꓽ ꓘꓴ ꓠꓲꓹˍ ꓐꓰ ꓠꓴꓽ ꓠꓲꓹ ꓔꓯ ꓟꓽ ꓠꓽ ꓠ ꓧꓪ꓿ 12 ꓙꓵꓻ ꓚꓱꓹ ꓗꓪ ꓬꓲ ꓜꓶꓻ ꓓꓶꓽ ꓡꓯꓽ ꓘꓳ ꓢꓲ꓾ ꓠꓴ ꓔꓯ ꓘꓴꓻ ꓗꓷ ꓟ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶˍ ꓟ ꓚꓱꓹ ꓔꓯ ꓬꓲ ꓜꓶ ꓣꓴ ꓔ꓿ ꓠꓴ ꓠꓬ ꓢꓷꓸ ꓙ ꓟꓳ ꓙ ꓢꓴ ꓮꓽ ꓟꓬꓹ ꓣꓳ ꓟꓲꓽ ꓙꓬ ꓗꓪ ꓢꓯꓼ ꓟꓬ ꓙ ꓖꓴ ꓕꓱ ꓟ ꓔꓯ ꓕꓶꓻ ꓕꓶˍ ꓡꓰꓽ ꓣꓷꓠꓸ ꓗꓷ ꓟ ꓥ ꓡꓳ꓿ 13 ꓙꓳˍ ꓟ ꓥ ꓕ ꓑꓳ ꓔꓯ ꓢꓯꓼ ꓟꓬ ꓖꓶ ꓢꓴ ꓪꓴ-ꓢˍ ꓐꓰ꓾ ꓒ-ꓕꓲ-ꓢꓶ ꓒꓲꓹ-ꓡ ꓟꓲꓽ ꓙꓬ ꓗꓪ ꓙꓲꓻ ꓙꓲˍ ꓡꓰ ꓢꓷꓸ ꓙ ꓟꓳ ꓙ ꓗꓷ ꓢꓴ ꓙꓲ-ꓢꓴ ꓬꓰ-ꓢꓴ ꓒꓬꓱꓽ ꓕꓯ ꓗꓪ꓾ ꓥꓪ ꓡꓰ ꓠꓴ ꓔꓯ ꓕꓱ ꓡꓱ ꓕꓵꓼ ꓪꓽ ꓖꓶˍ ꓠꓬꓲ꓾ 14 ꓠꓴ ꓠꓬ ꓛꓬ ꓖꓴ ꓓꓰ ꓖꓴ ꓟꓽ ꓙꓳ ꓙꓳ꓾ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓳꓸ ꓖꓶ ꓡ ꓗꓪ ꓛꓲ꓾ ꓕꓵꓼ ꓪꓽ ꓕꓱ ꓟ ꓔꓯ ꓒꓵꓽ ꓛꓳ꓿ 15 ꓬꓲ ꓝꓲꓸ ꓛꓲ ꓡ ꓠꓬ ꓶꓼ ꓙꓳ ꓫꓱꓹ ꓙꓳ ꓢꓴ꓾ ꓬꓲ ꓕꓲ ꓣꓳˍ ꓡꓰꓽ ꓟ ꓪꓽ ꓠꓬꓲ ꓢꓴ꓾ ꓪ ꓔꓲ ꓐꓴ ꓔꓯ ꓙꓵꓽ ꓢꓴ꓾ ꓢꓲꓽ ꓒꓽ ꓐꓴ ꓔꓯ ꓗꓪꓽ' ꓢꓴ ꓪꓴ-ꓢ ꓡꓰ ꓢꓲ ꓒꓽ ꓬꓰ-ꓢꓴ ꓟꓳꓸ ꓖꓶ ꓓꓳ ꓡ ꓥꓳ꓿ 16 ꓬꓲ ꓕꓲ ꓣꓳˍ ꓡꓰꓽ ꓮ ꓕꓯˍ ꓟꓲ ꓫꓵꓻ ꓟꓽ ꓓ ꓟ ꓥ ꓢꓲ꓾ ꓠꓶꓽ ꓙꓰ ꓟꓽ ꓓ ꓟ ꓠꓬꓲ ꓟꓳꓻ ꓓꓴ ꓗꓪ ꓔꓬ ꓡꓳ꓿ ꓬꓲ ꓔꓯ ꓠꓬ ꓮꓽ ꓟˍ ꓟꓲ ꓟꓽ ꓟꓳ ꓠꓬꓲ꓿ ꓟꓳˍ ꓟꓲ ꓟꓳꓻ ꓟꓽ ꓓ꓿ ꓬꓲ ꓔꓯ ꓠꓬ ꓟꓬꓱ ꓓꓳꓽˍ ꓐꓰ ꓕꓲ ꓞꓲꓼ ꓕꓲ ꓑ ꓪꓽ ꓠꓬꓲˍ ꓟ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ 17 ꓕꓱ ꓕꓲꓽ ꓤꓶꓻ ꓗꓪ ꓟ ꓞꓳ ꓐꓳ ꓐꓴ ꓔꓯ ꓠꓬ꓾ ꓕꓽ ꓠꓲꓹ ꓘꓹ ꓠꓯꓹ ꓟ ꓐꓰ꓾ ꓦ ꓡꓱ ꓐꓳ ꓟꓽ ꓓ ꓟ ꓒꓴ ꓤ ꓫꓵꓺ ꓤ ꓔꓯ ꓕꓽ ꓥꓳ ꓡꓳꓸ ꓠꓯꓹ ꓟ ꓐꓰ꓾ ꓣꓳ ꓗꓹ ꓛꓲ ꓓꓴ ꓮꓽ ꓙꓵ ꓒꓺ ꓐꓳ ꓐꓳ ꓐꓰ ꓖꓶ ꓡ ꓢꓴ ꓪꓴ-ꓢ ꓔꓯˍ ꓡꓰꓽ ꓥꓳ ꓡꓳꓸ ꓠꓯꓹ ꓡꓳ꓾ ꓐꓰ ꓟꓸ ꓖꓶ꓿ 18 ꓝꓮꓲ ꓠꓬ ꓙꓲꓻˍ ꓟ ꓟꓬꓱꓽ ꓬꓰˍ ꓟ ꓗꓪ ꓞꓳ ꓐꓳ ꓬꓰ ꓠꓯꓹ ꓟ ꓐꓰ꓾ ꓫꓱꓸ ꓤ ꓓꓴ ꓟꓬꓱꓽ ꓬꓰˍ ꓟ ꓗꓪ ꓠꓲꓹ ꓡꓳ ꓠꓯꓹ ꓟ ꓬꓲ ꓪꓽ ꓔꓯ ꓟꓸ ꓖꓶ꓿ 19 ꓬꓲ ꓪꓽ ꓕꓱ ꓡꓱ ꓬꓰˍ ꓠꓬ꓾ ꓡ ꓠꓹ ꓟ ꓤꓶ ꓗꓪ ꓢꓯꓼ ꓟꓬ ꓚꓵꓺ ꓔꓯ ꓣꓴ ꓟꓶ ꓡꓰ ꓠꓹ ꓟ ꓐꓰ꓾ ꓒꓵꓽ ꓶꓽ ꓫ ꓟꓶ ꓡꓰ ꓠꓹ ꓟ ꓥ ꓡꓳ꓿ 20 ꓕꓲ-ꓟꓳ-ꓕꓲ-ꓪꓴꓽꓳ꓾ ꓠꓴ ꓔꓯ ꓡꓯꓼ ꓙꓱ ꓔ ꓟ ꓔꓯ ꓕꓶꓻ ꓕꓶˍ ꓡꓰ ꓫ ꓔ꓿ ꓪꓴ-ꓢ ꓔꓯ ꓟꓽ ꓒꓵꓽ ꓟ ꓘꓶꓽ ꓖꓳꓽˍ ꓐꓰ꓾ ꓢꓴ ꓡꓰ ꓢꓷꓸ ꓠꓲꓹ꓾ ꓐꓰ ꓟꓬꓱ ꓔ ꓟ ꓧꓳ ꓡꓯꓽ ꓘꓳ ꓓꓴ ꓔꓯ ꓐꓰ ꓧꓹ ꓙꓰ꓿ ꓖꓳ ꓡꓱ ꓫꓵꓽ ꓠꓬ ꓔꓱꓹˍ ꓟ ꓢꓷꓸ ꓠꓲꓹ ꓟꓽ ꓥ꓿ 21 ꓕꓲ ꓐꓱ ꓠꓬ ꓢꓷꓸ ꓠꓲꓹ ꓕꓱ ꓟ ꓔꓯ ꓘꓳ ꓣꓴˍ ꓠꓬꓲ꓾ ꓙꓵꓻ ꓚꓱꓹ ꓗꓪ ꓐꓰ ꓧꓶꓸ ꓙꓰꓳ꓿ ꓣꓱꓽ ꓛꓰ ꓠꓬ ꓠꓴˍ ꓐꓰ ꓕꓲ ꓪꓺꓼ ꓙꓳ ꓝꓲ꓿

2 ꓕꓲ-ꓟꓳ-ꓕꓲ-ꓪꓴ 1

1 ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓙꓳꓻˍ ꓟ ꓢꓯꓼ ꓟꓬ ꓙꓻ ꓟꓳ ꓘꓶꓽ ꓚ ꓒꓬꓱ ꓙꓰ ꓠꓹ ꓟ꓾ ꓪꓴ-ꓢ ꓠꓲꓹ ꓡꓶ ꓗꓪ ꓐꓰ ꓙꓲ-ꓢꓴ ꓬꓰ-ꓢꓴ ꓬꓲ ꓝꓲ ꓓꓴ ꓬꓰˍ ꓟ ꓒꓳ-ꓡꓳ ꓥꓪ ꓡꓰ꓾ 2 ꓥꓪ ꓠꓲꓹ ꓠꓵˍ ꓟ ꓤꓽ ꓕꓲ-ꓟꓳ-ꓕꓲ-ꓪꓴ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓐꓹ ꓐ ꓪꓴ-ꓢˍ ꓐꓰ ꓣꓳ ꓢꓲ ꓒꓽ ꓙꓲ-ꓢꓴ ꓬꓰ-ꓢꓴ ꓗꓪ ꓐꓰ꓾ ꓣꓱꓽ ꓛꓰˍ ꓐꓰ ꓫꓱꓸ ꓤˍ ꓟ ꓐꓰ ꓢꓲ ꓡꓲ ꓟ ꓠꓴ ꓟꓶꓻ ꓝꓲ꓿ 3 ꓥꓪ ꓒꓵꓽ ꓒ ꓐꓴ ꓬꓰ ꓗꓷ ꓟ ꓡꓰ ꓐꓰ꓾ ꓥꓪˍ ꓟꓲ ꓦꓰꓽ ꓠꓲꓹ ꓗꓪ ꓕꓼ ꓓꓴ ꓟꓽ ꓙꓳꓻ ꓙꓳ꓾ ꓥꓪ ꓣꓱꓽ ꓙ ꓔꓬ ꓟ ꓪꓴ-ꓢ ꓔꓯ ꓫꓸ ꓟꓳ꓿ ꓥꓪ ꓶꓼ ꓓꓰˍ ꓟ ꓗꓪ ꓟꓳꓼ ꓡꓳ ꓢ ꓘꓪ ꓟꓽ ꓠꓽ ꓠ ꓠꓴ ꓔꓯ ꓓꓵꓽ ꓙꓽ ꓛꓲ ꓡ ꓔꓬ ꓡꓳ꓿ 4 ꓠꓴ ꓟꓬ ꓐꓲ ꓔꓯ ꓓꓵꓽ ꓙꓽ ꓛꓲ ꓡ ꓕꓯ꓾ ꓥꓪ ꓗꓹ ꓛꓲ ꓠꓲꓹ ꓐꓲ ꓡꓰ ꓠꓹ ꓟ ꓠꓴ ꓔꓯ ꓟꓳꓻ ꓠꓲꓹ ꓫꓵˍ ꓡꓳ꓿ 5 ꓠꓴ ꓠꓯꓸꓼ ꓗꓪ ꓓꓯꓹ ꓟ ꓙꓵꓻ ꓠꓲꓹ ꓚꓵꓺ ꓔꓯˍ ꓟꓲ ꓥꓪ ꓓꓵꓽ ꓙꓽ ꓛꓲ ꓡ ꓡꓳ꓿ ꓙꓵꓻ ꓠꓲꓹ ꓕꓱ ꓟ ꓠꓬ ꓧꓶꓸ ꓕꓯ ꓠꓴ ꓮꓸ ꓬꓽ ꓡꓳ-ꓬꓲˍ ꓐꓰ ꓠꓴ ꓟꓹ ꓟ ꓬꓴ-ꓠꓲ-ꓢꓶ ꓠꓯꓸꓼ ꓗꓪ ꓓꓯꓹ ꓟ ꓥ ꓢꓲ꓾ ꓮ ꓟꓶ ꓠꓴ ꓠꓯꓸꓼ ꓗꓪˍ ꓟꓲ ꓓꓯꓹ ꓡꓳ꓾ ꓐꓰ ꓥꓪ ꓦ ꓡꓱ ꓐꓳˍ ꓡꓳ꓿ 6 ꓕꓱ ꓟ ꓪꓴꓸ ꓠꓬꓲ ꓥꓪ ꓡꓯꓼ ꓒꓯꓹ ꓚꓰꓹˍ ꓟ ꓗꓪ ꓐꓰ ꓠꓴ ꓠꓯꓸꓼ ꓗꓪ ꓓꓯꓹ ꓟ ꓪꓴ-ꓢ ꓡꓯꓼ ꓫꓴ ꓔꓯ꓾ ꓠꓴ ꓡꓰ ꓡꓯꓽ ꓫꓵ ꓐꓬꓻ ꓪꓴꓽ ꓡ ꓝꓲ ꓠꓹ ꓟ ꓠꓴ ꓔꓯ ꓥꓪ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓙꓳꓺ ꓠꓲꓹ ꓖꓶ ꓔ ꓟ ꓟꓽ ꓥ꓿ ꓪꓽ ꓠꓬꓲˍ ꓟ ꓐꓰ ꓠꓵ ꓠꓲꓹˍ ꓐꓰ꓾ ꓚꓲ ꓛꓬ ꓔꓯ ꓙꓵꓽ ꓐ ꓡ ꓟ ꓠꓲꓹ ꓟ ꓖꓶ ꓔ ꓟ ꓥ ꓡꓳ꓿ 8 ꓖꓳ ꓡꓱ ꓠꓬꓲ ꓠꓴ ꓠꓬ꓾ ꓣꓳ ꓢꓲ ꓒꓽ ꓐꓱ ꓶ ꓢꓷꓸ ꓙ ꓟꓳ ꓙˍ ꓟ ꓪꓴꓸ ꓠꓬꓲ꓾ ꓥ ꓠꓬ ꓬꓲ ꓐꓱ ꓶ ꓐꓱꓺ ꓔ ꓢꓴ ꓥꓪ ꓪꓴꓸ ꓠꓬꓲ ꓕꓽ ꓫꓸ ꓔꓳ꓿ ꓶꓼ ꓓꓳ ꓫꓱꓹ ꓓꓳ ꓐꓱ ꓶ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓔꓯ ꓛꓳ ꓢꓲ꓾ ꓣꓳ ꓠꓬ ꓪ ꓜꓲ ꓕꓲ ꓡꓰꓹꓼ ꓐꓰ ꓫꓸ ꓙꓵˍ ꓟ ꓔꓯ ꓜꓲꓽ ꓔ ꓡꓯ꓿ 9 ꓬꓲ ꓡꓰ ꓣꓳ ꓔꓯ ꓚꓬꓴ ꓗꓷ ꓢꓲ꓾ ꓬꓲ ꓢꓲ ꓚꓰꓸ ꓔ ꓢꓴ ꓬꓰ ꓠꓹ ꓟ ꓣꓳ ꓔꓯ ꓘꓴ ꓗꓷꓳ꓿ ꓕꓱ ꓟ ꓠꓬ ꓣꓳ ꓟꓬꓱꓽ ꓬꓰˍ ꓟ ꓔꓯ ꓛꓳ ꓢꓲ ꓘꓴꓻ ꓔ ꓟ ꓟꓽ ꓥ꓿ ꓬꓲ ꓚꓲ ꓛꓬ ꓚꓴꓽ ꓬꓲꓹ ꓓꓶꓽ ꓚꓵ ꓔ ꓟ ꓐꓰ꓾ ꓕꓲ ꓞꓲꓼ ꓕꓲ ꓑ ꓟ ꓤꓶ ꓧꓶꓸ ꓕꓯˍ ꓡꓰ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓣꓳ ꓔꓯ ꓖꓶ ꓔ ꓟ ꓣꓱꓽ ꓛꓰ ꓔꓯ ꓛꓳ ꓢꓲ ꓘꓴ ꓔ ꓟ ꓥ ꓡꓳ꓿ 10 ꓣꓱꓽ ꓛꓰ ꓕꓱ ꓟ ꓠꓬ ꓣꓳ ꓚꓬꓴ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓲ ꓠꓯ ꓗꓪ ꓡ ꓗꓷ ꓟ ꓗꓪ ꓐꓰ꓾ ꓣꓳ ꓔꓯ ꓮ ꓟꓶ ꓟꓳꓸ ꓖꓶ ꓡꓺꓳ꓿ ꓬꓲ ꓡꓰ ꓫꓵꓻ ꓪꓽ ꓠꓬꓲˍ ꓟ ꓔꓯ ꓟꓶꓽ ꓡꓰ ꓝꓲ ꓢꓲ꓾ ꓶꓼ ꓓꓳ ꓫꓱꓹ ꓓꓳ ꓗꓪ ꓐꓰ ꓐꓬ ꓡꓰ ꓛꓵꓽ ꓡꓰ ꓟꓽ ꓓ ꓟ ꓢꓯꓼ ꓟꓬ ꓟꓳꓸ ꓖꓶ ꓡꓺꓳ꓿ 11 ꓶꓼ ꓓꓳ ꓫꓱꓹ ꓓꓳ ꓕꓱ ꓟ ꓚ ꓟꓸ ꓖꓶ ꓢꓴˍ ꓐꓰ꓾ ꓝꓲ ꓓꓴˍ ꓐꓰ ꓟꓸ ꓒ ꓬꓰ ꓠꓹ ꓟ ꓥꓪ ꓔꓯ ꓝꓲ ꓔ ꓟ ꓥ ꓡꓳ꓿ 12 ꓕꓱ ꓟ ꓪꓴꓸ ꓠꓬꓲ ꓥꓪ ꓠꓬ ꓫꓸ ꓙꓵꓻ ꓓꓴ ꓕꓱ ꓟꓬ ꓫꓵꓽ ꓜꓲꓽ ꓠ ꓗꓷ ꓡꓰˍ ꓟꓲ ꓟꓽ ꓫꓸ ꓔꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓮꓽ ꓟ ꓔꓯ ꓙꓵꓻ ꓗꓷ ꓟ ꓥꓪ ꓢꓷꓸ ꓢꓲ꓾ ꓥꓪ ꓡꓰ ꓦꓬꓼ ꓠꓬꓲ ꓖꓳ ꓟ ꓐꓱ ꓶ ꓬꓲ ꓔꓯ ꓡꓯꓼ ꓙꓱ ꓔ ꓟ ꓔꓯ ꓬꓲ ꓫꓺ ꓙ ꓐ ꓡ ꓡꓳ꓾ ꓐꓰ ꓥꓪ ꓦ ꓡꓱ ꓐꓳˍ ꓡꓳ꓿ 13 ꓥꓪ ꓗꓪ ꓐꓰ ꓠꓴ ꓑ ꓙꓽ ꓗꓷ ꓟ꓾ ꓔꓯꓺ ꓢꓳ ꓓꓴ ꓔꓱꓹˍ ꓟ ꓐꓯ ꓘꓶ ꓔꓯ ꓬꓲ ꓜꓶ ꓣꓴ ꓔ ꓢꓲ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓟ ꓙꓵꓻ ꓠꓲꓹˍ ꓐꓰ ꓠꓵ ꓠꓲꓹ ꓚꓱꓹ ꓗꓪ ꓞꓳꓻ ꓙꓳ꓿ 14 ꓠꓴ ꓔꓯ ꓡꓯꓼ ꓙꓱ ꓔ ꓟ ꓒꓵꓽ ꓶ ꓔꓯˍ ꓟꓲ꓾ ꓣꓳ ꓠꓯꓸꓼ ꓗꓪ ꓔꓬ ꓟ ꓢꓲ-ꓫꓬ-ꓟ-ꓦ ꓗꓪ ꓐꓰ ꓫ ꓔ꓿ 15 ꓮ-ꓢꓲ-ꓬꓼ ꓗꓪ ꓔꓬ ꓢꓴ ꓮꓽ ꓙꓵ ꓠꓬ ꓥꓪ ꓗꓪ ꓐꓰ ꓧꓹ ꓙꓰ ꓟ ꓠꓴ ꓢꓷꓸˍ ꓡꓳ꓿ ꓩꓴ-ꓗꓷ-ꓡꓴˍ ꓐꓰ ꓧꓷ-ꓟꓳ-ꓚꓲ-ꓠꓲˍ ꓟꓲ ꓙꓰ ꓗꓷꓳ꓿ 16 ꓢꓲ ꓒꓽ ꓡꓰ ꓳ-ꓠꓰ-ꓢꓷ-ꓩꓴ ꓕꓲ ꓦꓲ ꓔꓯ ꓫꓱꓸ ꓤ ꓝꓲ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓥꓪ ꓧꓳꓺ ꓫꓱꓺ ꓚ ꓑꓶꓸ ꓓꓴ ꓟꓽ ꓫꓸ ꓔꓳ ꓔꓳ꓾ ꓥꓪ ꓔꓯ ꓮꓽ ꓟꓬꓹ ꓧꓪꓹ ꓡ ꓢꓲ ꓠꓲꓹ ꓗꓴꓺ ꓖꓶ ꓡꓺꓳ꓿ 17 ꓣꓳ-ꓟ ꓗꓪ ꓬꓲ ꓛꓲ ꓡ ꓟꓶꓽ ꓕꓯ ꓬꓲ ꓠꓬ ꓠꓲꓹ ꓡꓱꓻ ꓡꓱˍ ꓡꓰꓽ ꓥꓪ ꓔꓯ ꓧꓪ ꓟꓶ ꓡꓰ ꓗꓪ ꓛꓲ ꓧꓪ ꓡꓺꓳ꓿ 18 ꓢꓲ ꓒꓽ ꓡꓻˍ ꓟ ꓦꓬꓼ ꓠꓬꓲ ꓖꓳ ꓟ ꓗꓪ꓾ ꓢꓲ ꓒꓽ ꓡꓰ ꓬꓲ ꓔꓯ ꓶꓼ ꓤ ꓫꓱꓹ ꓤ ꓖꓶ ꓝꓲ꓿ ꓝꓮꓲ ꓠꓬ ꓬꓲ-ꓩꓴ-ꓢꓳ ꓗꓪ ꓬꓲ ꓡꓰ ꓥꓪ ꓔꓯ ꓣꓱꓽ ꓙ ꓗꓷ ꓟ ꓮꓽ ꓙꓵ ꓠꓴ ꓬꓲ ꓜꓶ ꓢꓷꓸˍ ꓡꓳ꓿

2 ꓕꓲ-ꓟꓳ-ꓕꓲ-ꓪꓴ 2

1 ꓖꓳ ꓡꓱ ꓠꓬꓲ ꓥꓪ ꓤꓽꓳ꓾ ꓠꓴ ꓠꓬ ꓙꓲ-ꓢꓴ ꓬꓰ-ꓢꓴ ꓬꓲ ꓣꓱꓽ ꓛꓰ ꓠꓯꓸꓼ ꓗꓪ ꓢꓯꓼ ꓙꓳ ꓔꓬ꓿ 2 ꓝꓮꓲ ꓠꓬ ꓢꓷꓸ ꓙ ꓟꓳ ꓙ ꓢꓴ ꓮꓽ ꓟꓬꓹ ꓣꓳ ꓟꓲꓽ ꓙꓬ ꓗꓪ ꓥꓪ ꓗꓪ ꓐꓰ ꓠꓴ ꓑ ꓙꓽˍ ꓟ ꓕꓱ ꓟꓬ ꓫꓵꓽ ꓠꓬ꓾ ꓦ ꓡꓱ ꓐꓳ ꓢꓴˍ ꓐꓰ ꓠꓱꓸ ꓐꓯꓼ ꓢꓴ ꓔꓯˍ ꓟꓲ ꓟꓸ ꓖꓶ ꓐ ꓡ ꓢꓴ ꓔꓯ ꓡꓯꓼ ꓙꓱ ꓖꓶ꓿ 3 ꓠꓴ ꓠꓬ ꓙꓲ-ꓢꓴ ꓬꓰ-ꓢꓴ ꓬꓲ ꓦ ꓡꓱ ꓐꓳˍ ꓟ ꓟꓯꓼ ꓤˍ ꓡꓰ ꓐꓰ꓾ ꓥꓪˍ ꓐꓰ ꓕꓲ ꓛꓳꓺꓼ ꓫꓸ ꓙꓵˍ ꓟ ꓜꓲꓽ ꓡꓯ꓿ 4 ꓮ ꓡꓲ ꓫꓵꓽ ꓟꓯꓼ ꓥ ꓟꓲ꓾ ꓟꓯꓼ ꓘꓶꓽ ꓗꓪ ꓬꓲ ꓟꓯꓼ ꓢꓲꓽ ꓒ ꓔꓯ ꓠꓲꓹ ꓒꓴ ꓡꓰ ꓝꓲ ꓠꓹ ꓟ꓾ ꓚꓲ ꓛꓬ ꓔꓯ ꓠꓬ ꓑ ꓫꓬ ꓐꓴ ꓫꓵꓽ ꓪꓴꓻ ꓡꓰ ꓟꓽ ꓘꓶꓻ ꓡꓶꓽ ꓡꓰ ꓝꓲ꓿ 5 ꓝꓮꓲ ꓠꓬ ꓗꓹ ꓓꓰ ꓗꓪ ꓮꓽ ꓟ ꓧꓪꓸ ꓟꓽ ꓧꓪꓸ ꓤꓹ ꓔꓯꓺ ꓡꓯꓽ ꓘꓳˍ ꓟꓲ꓾ ꓗꓺ ꓫꓵ ꓔꓯ ꓟꓽ ꓛꓳ ꓕꓯ ꓠꓽ ꓬꓲ ꓔꓯ ꓧꓪꓸ ꓡꓰˍ ꓟ ꓡꓯꓼ ꓫꓴ ꓟꓽ ꓖꓶ꓿ 6 ꓟꓬꓱꓽ ꓬꓰ ꓡꓳ ꓬꓰ ꓢꓯꓼ ꓕꓵꓼ ꓢꓴ ꓠꓬ꓾ ꓜꓽ ꓪꓳꓽ ꓡꓳꓻ ꓪꓳ ꓬꓲ ꓪꓴꓸ ꓟꓲ ꓡ ꓟ ꓗꓪ ꓐꓰ ꓬꓲ ꓟꓶ ꓙꓲꓽ ꓙꓳꓻˍ ꓟ ꓖꓳ ꓕꓲ ꓐꓱꓻ ꓟꓶ ꓠ ꓗꓹ ꓡꓳ꓿ 7 ꓥꓪ ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲ꓾ ꓮꓸ ꓫꓵ ꓗꓪˍ ꓟꓲ ꓢꓲ ꓒꓽ ꓡꓰ ꓠꓴ ꓔꓯ ꓙꓽ ꓜꓲꓼ ꓠꓲꓹ ꓖꓶ ꓡ ꓥꓳ꓿ 8 ꓓ-ꓪꓵ ꓬꓲ ꓞꓲꓼ ꓤ ꓡꓯꓹ ꓤ꓾ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓢꓴ ꓬꓰ-ꓢꓴ ꓙꓲ-ꓢꓴ ꓔꓯ ꓓꓵꓽ ꓙꓽ ꓔ꓿ ꓕꓱ ꓟ ꓠꓬ ꓥꓪ ꓚ ꓟꓸ ꓖꓶˍ ꓟ ꓶꓼ ꓓꓳ ꓫꓱꓹ ꓓꓳꓽ ꓥ ꓡꓳ꓿ 9 ꓶꓼ ꓓꓳ ꓫꓱꓹ ꓓꓳ ꓕꓱ ꓟ ꓑꓶꓸ ꓓꓴ ꓥꓪ ꓔꓯ ꓠꓬ ꓛꓬꓻ ꓢꓴˍ ꓡꓰ ꓐꓰ ꓞꓳꓹ ꓚ ꓡꓰ ꓞꓳꓹ ꓔ ꓢꓲ ꓫꓸ ꓙꓵ ꓔꓬ ꓥ ꓟꓲ꓾ ꓪꓴ-ꓢ ꓐꓯ ꓘꓶ ꓠꓽ ꓟꓽ ꓞꓳꓹ ꓞꓹ꓿ 10 ꓖꓳ ꓡꓱ ꓠꓬꓲ ꓢꓲ ꓔ ꓢꓴ ꓐꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓟꓬꓱ ꓓꓳꓽˍ ꓐꓰ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓢꓯꓼ ꓟꓬ ꓝꓸ ꓟꓶ ꓡꓰ ꓠꓹ ꓟ꓾ ꓥꓪ ꓠꓬ ꓮꓸ ꓫꓵ ꓔꓯˍ ꓟꓲ ꓬꓲ ꓪꓽ ꓐꓱ ꓶ ꓜꓲꓽˍ ꓡꓳ꓿ 11 ꓮ ꓡꓲꓳ ꓐꓯ ꓠꓬ ꓣꓳ ꓦ ꓡꓱ ꓐꓳ ꓓꓴ ꓐꓯ ꓘꓶꓽ ꓕꓱ ꓡꓱ ꓙꓳˍ ꓡꓳ꓾ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓣꓳ ꓫꓵꓻ ꓕꓯ ꓠꓽ꓾ ꓬꓲˍ ꓐꓰ ꓕꓲ ꓪꓺꓼ ꓢꓯꓸ ꓔꓬ ꓟꓶˍ ꓥꓳ꓿ 12 ꓣꓳ ꓜꓲꓽ ꓔˍ ꓕꓯ ꓠꓽ꓾ ꓣꓳ ꓬꓲˍ ꓐꓰ ꓕꓲ ꓪꓺꓼ ꓪ ꓔꓲ ꓣꓱꓽˍ ꓥꓳ꓿ ꓣꓳ ꓬꓲ ꓔꓯ ꓟꓽ ꓣꓷꓠꓸ ꓕꓯ ꓠꓽ꓾ ꓬꓲˍ ꓟꓲ ꓣꓳ ꓔꓯ ꓟꓽ ꓣꓷꓠꓸ꓿ 13 ꓣꓳ ꓠꓬ ꓦ ꓡꓱ ꓟꓽ ꓐꓳ ꓗꓷ ꓡꓰ ꓥ ꓟꓲ꓾ ꓬꓲ ꓠꓽ ꓮ ꓕꓯˍ ꓟꓲ ꓦ ꓡꓱ ꓐꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓬꓲ ꓐꓯ ꓘꓶ ꓔꓯ ꓒꓳꓹ ꓢꓲ꓾ ꓚꓲ ꓛꓬ ꓔꓯ ꓗꓶꓸ ꓟꓽ ꓐ ꓡ꓾ ꓐꓰ ꓐꓯˍ ꓟ ꓐꓯ ꓘꓶ ꓕꓱ ꓟ ꓠꓬ ꓣꓳ ꓦ ꓡꓱ ꓐꓳ ꓓꓴ ꓐꓯ ꓘꓶ ꓥ ꓡꓳ꓿ 14 ꓕꓱ ꓟꓬ ꓫꓵꓽ ꓟ ꓗꓪ ꓬꓲ ꓪꓽ ꓔꓯ ꓬꓲꓼ ꓠꓬꓲꓸ ꓖꓶ ꓢꓲ꓾ ꓙꓲ ꓖꓴ ꓟꓽ ꓙꓳ ꓟ ꓐꓰ꓾ ꓑ ꓙꓽ ꓢꓴ ꓔꓯ ꓐꓬ ꓡꓰ ꓝꓲˍ ꓟ ꓐꓯ ꓘꓶ ꓗꓪ ꓐꓰ ꓬꓲ ꓪꓽ ꓟꓽ ꓧꓳꓺ ꓡꓯꓽ ꓘꓳ ꓠꓹ ꓟ꓾ ꓪꓴ-ꓢ ꓟꓲꓽ ꓙꓬ ꓗꓪ ꓬꓲ ꓪꓽ ꓔꓯ ꓕꓵꓼ ꓪ ꓖꓶ꓿ 15 ꓠꓴ ꓠꓬ ꓪꓴ-ꓢ ꓠꓲꓹ ꓒꓴˍ ꓟ ꓐꓰ꓾ ꓫꓸ ꓔꓳ ꓟꓽ ꓛꓵ ꓟ ꓟꓬꓱꓽ ꓬꓰ ꓢꓴˍ ꓐꓰ꓾ ꓔꓱꓹ ꓚꓵˍ ꓟ ꓐꓯ ꓘꓶ ꓔꓯ ꓔꓱꓹ ꓔꓱꓹꓼ ꓐꓱꓻ ꓐ ꓡ ꓢꓴ ꓬꓰ ꓠꓹ ꓟ ꓢꓯꓼ ꓕꓵꓼ꓿ 16 ꓪꓴ-ꓢ ꓔꓯ ꓟꓽ ꓒꓵꓽˍ ꓟ ꓘꓶꓽ ꓖꓳꓽ ꓠꓬ꓾ ꓢꓴ ꓔꓯ ꓟꓬꓽ ꓠꓬꓲ ꓧꓹ ꓙꓰ ꓝꓲ ꓐ ꓡ ꓠꓬꓲ꓾ ꓕꓱ ꓡꓱ ꓫꓵꓽ ꓔꓯ ꓤ ꓟꓳ꓿ 17 ꓕꓱ ꓡꓱꓳ ꓫꓵꓽ ꓟꓸ ꓘꓶꓽ ꓠꓬ ꓠꓻ ꓓꓳꓼ ꓕꓲ ꓫꓵˍ ꓡꓰ ꓐꓰ ꓒꓬꓱꓺ ꓙꓰˍ ꓡꓳ꓿ ꓕꓱ ꓡꓱ ꓟꓸ ꓢꓴ ꓐꓴ ꓗꓳ ꓡꓳ ꓗꓪ ꓠꓬ꓾ ꓧꓷ-ꓟꓲ-ꓠꓲ-ꓬꓴˍ ꓐꓰ ꓒꓲ-ꓡꓲ-ꓕꓴ꓾ ꓕꓱ ꓠꓬꓲꓽ ꓣꓳˍ ꓟꓲ ꓔꓹ ꓞꓹ ꓡꓳ꓿ 18 ꓬꓲ ꓪꓽ ꓠꓬ ꓔꓱꓹ ꓚꓵˍ ꓟ ꓗꓪ ꓐꓰ ꓧꓶꓸ ꓙꓰ ꓢꓲ꓾ ꓢꓯꓸ ꓬꓲꓼ ꓡ ꓟ ꓦꓬꓼ ꓠꓬꓲ ꓠꓬ ꓗꓳꓸ ꓗꓷꓳ꓾ ꓐꓰ ꓐꓯ ꓢꓲ ꓠꓬꓲ꓾ ꓕꓲ ꓐꓱ ꓙꓵꓻ ꓠꓲꓹ ꓔꓯ ꓐꓬ ꓡꓰ ꓝꓲˍ ꓡꓳ꓿ 19 ꓖꓳ ꓡꓱ ꓥ ꓟꓲ ꓪꓴ-ꓢ ꓬꓲ ꓦꓲ ꓚꓰ ꓠꓬ ꓕꓶꓻ ꓞꓹ ꓢꓰꓽ ꓡꓳ꓿ ꓮ ꓡꓲꓳ ꓐꓯ ꓠꓬ ꓦꓲ ꓚꓰ ꓖꓳ ꓟ ꓗꓪ꓾ ꓢꓲ ꓒꓽ ꓠꓬ ꓬꓲ ꓚꓲ ꓛꓬ ꓔꓯ ꓟ ꓬꓲ ꓢꓷꓸˍ ꓡꓳ꓾ ꓐꓯˍ ꓟ ꓐꓰ꓾ ꓢꓲ ꓒꓽ ꓬꓲ ꓟꓬꓱꓺ ꓟꓬꓱ ꓔ ꓢꓴ ꓮꓽ ꓙꓵ ꓠꓬ ꓥꓶˍ ꓟ ꓚꓱꓹ ꓗꓪ ꓐꓰ ꓧꓹ ꓙꓰ꓾ ꓐꓯˍ ꓟ ꓕꓱ ꓟ ꓔꓳꓹ ꓠꓷꓼ ꓓꓴ ꓙꓳˍ ꓡꓳ꓿ 20 ꓦꓲ ꓓꓽ ꓟ ꓗꓪ ꓠꓽ꓾ ꓫꓵ ꓡꓴꓻ ꓒꓴ ꓡꓴ ꓙꓳꓻˍ ꓟ ꓡꓰ ꓟꓽ ꓞꓲ꓾ ꓢꓲꓹ ꓡꓴˍ ꓐꓰ ꓠꓱꓸ ꓡꓴˍ ꓟꓲ ꓙꓳˍ ꓡꓳ꓿ ꓕꓲ ꓐꓱ ꓠꓬ ꓟꓬꓱ ꓓꓳꓽ ꓙꓳˍ ꓗꓪ ꓣꓱꓽ ꓓꓴ꓾ ꓕꓲ ꓐꓱ ꓠꓬ ꓟꓬꓱ ꓓꓳꓽ ꓟꓽ ꓙꓳˍ ꓗꓪ ꓣꓱꓽ ꓓꓴ ꓥ ꓡꓳ꓿ 21 ꓖꓳ ꓡꓱ ꓠꓬ ꓟꓬꓱ ꓓꓳꓽ ꓟꓽ ꓙꓳˍ ꓗꓪ ꓣꓱꓽˍ ꓟ ꓡꓴꓻ ꓕꓱ ꓟ ꓗꓪ ꓐꓰ ꓚꓰꓸ ꓗꓷ ꓢꓲ ꓚꓲ ꓛꓬ ꓔꓯ ꓫꓬꓻ ꓡꓰ ꓝꓲˍ ꓠꓬ꓾ ꓬꓲ ꓠꓽ ꓒꓵˍ ꓟ ꓟꓬꓱ ꓓꓳꓽ ꓡꓴ ꓒꓬꓱꓼ ꓡ ꓢꓲ꓾ ꓬꓲ ꓢꓲ ꓒꓽ ꓣꓱꓽ ꓬꓯꓼˍ ꓟ ꓐꓰ꓾ ꓙꓲꓻˍ ꓟ ꓟꓬꓱꓽ ꓥ ꓕ ꓑꓳꓸ ꓬꓰ ꓠ ꓟ ꓙꓽ ꓖꓶ ꓔ ꓟ ꓐꓰ ꓚꓰꓸ ꓔ ꓟ ꓡꓴꓻ ꓒꓬꓱ ꓡ ꓥꓳ꓿ 22 ꓞꓲꓼ ꓣꓳ ꓢꓴ ꓦꓯꓸ ꓠꓲꓹ ꓙꓵˍ ꓟ ꓔꓯˍ ꓐꓰ ꓛꓰꓹ ꓙꓰ꓿ ꓢꓲꓽ ꓫꓬˍ ꓟ ꓠꓲꓹ ꓟ ꓡꓰ ꓢꓲ ꓒꓽ ꓔꓯ ꓘꓴ ꓢꓴˍ ꓐꓰ ꓕꓲ ꓛꓳꓺꓼ꓾ ꓔꓱꓹ ꓜꓳꓽˍ ꓟ ꓐꓰ꓾ ꓙꓵꓻ ꓠꓲꓹˍ ꓐꓰ꓾ ꓠꓵ ꓠꓲꓹˍ ꓐꓰ ꓢꓲ ꓡꓲ ꓟ ꓔꓯ ꓟꓽ ꓠꓽ ꓠ ꓧꓪ꓿ 23 ꓙꓲꓽˍ ꓟ ꓐꓰ ꓢꓷꓸ ꓠꓲꓹ ꓔꓯ ꓟꓽ ꓛꓳ ꓟ ꓧꓳꓺ ꓡꓯꓽ ꓘꓳ ꓓꓴ ꓔꓯ ꓡꓳꓺ ꓗꓷ꓿ ꓕꓱ ꓡꓱ ꓡꓳ ꓫꓵ ꓡꓰ ꓢꓯꓼ ꓡꓯꓽ ꓘꓳ ꓓꓴ ꓓꓳ ꓡ ꓝꓲˍ ꓟ ꓣꓳ ꓢꓷꓸˍ ꓡꓳ꓿ 24 ꓢꓲ ꓒꓽ ꓬꓲ ꓚꓳ ꓑꓸ ꓠꓬ ꓢꓯꓼ ꓡꓯꓽ ꓘꓳ ꓢꓴ ꓬꓰ ꓟꓽ ꓓ꓿ ꓮꓽ ꓙꓵ ꓢꓴ ꓔꓯ ꓟꓳꓸ ꓠꓲꓹ ꓟ ꓙꓲꓻˍ ꓟ ꓐꓰ꓾ ꓟꓸ ꓐ ꓡ ꓢꓴˍ ꓐꓰ꓾ ꓛꓬ ꓡ ꓟ ꓔꓯ ꓜꓲꓽ ꓘꓴ ꓢꓴ ꓬꓰ ꓠꓯꓹ ꓡꓳ꓿ 25 ꓔꓳꓹ ꓡ ꓢꓴ ꓔꓯ ꓠꓲꓹ ꓠꓴꓽ ꓠꓴˍ ꓡꓰ ꓫꓬꓹ ꓔꓱꓹ ꓖꓶ꓿ ꓮꓽ ꓧꓪꓹ ꓔꓱꓹˍ ꓟ ꓔꓯ ꓢꓷꓸ ꓡꓰˍ ꓗꓪ ꓛꓲ꓾ ꓪꓴ-ꓢ ꓡꓰ ꓬꓲ ꓪꓽ ꓔꓯ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓟ ꓠꓲꓹ ꓟ ꓖꓶ ꓡ ꓟꓽ ꓢꓷꓸ꓿ 26 ꓖꓳ ꓡꓱ ꓢꓲ ꓢ-ꓓꓯ ꓡꓰ ꓬꓲ ꓠꓲꓹ ꓡꓶꓽ ꓔꓯ ꓛꓳ ꓝꓲ ꓠꓹ ꓟ꓾ ꓧꓶꓸ ꓕꓯˍ ꓡꓰ ꓬꓲ ꓪꓽ ꓔꓯ ꓪꓺ ꓗꓪ ꓪꓴꓻ ꓡꓰ ꓝꓲ ꓢꓲ ꓡꓳꓽ ꓔꓯꓹ ꓙꓰ ꓗꓷˍ ꓟꓲ꓾ ꓬꓲ ꓪꓽ ꓠꓬ ꓧꓪꓸ ꓛꓲ ꓡ ꓢꓲ ꓡꓲꓹ ꓗꓷ ꓟꓶˍ ꓟꓽ ꓢꓷꓸ꓿

2 ꓕꓲ-ꓟꓳ-ꓕꓲ-ꓪꓴ 3

1 ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓠꓬ ꓙꓲ ꓣꓴˍ ꓟ ꓝꓲꓸ ꓛꓲ ꓡ ꓥꓳ꓾ ꓐꓰ ꓠꓴ ꓢꓷꓸ ꓠꓯꓹ ꓡꓳ꓿ 2 ꓮ ꓡꓲꓳ ꓐꓯ ꓠꓬ ꓞꓳ ꓤ ꓠ꓾ ꓚꓲ ꓛꓬ ꓔꓯˍ ꓡꓰꓽ ꓠꓲꓹ ꓠꓵ ꓢꓴ꓾ ꓒꓴ ꓤ ꓫꓵ ꓤ ꓔꓯ ꓠꓲꓹ ꓦꓯꓸ ꓢꓴ꓾ ꓘꓶꓽ ꓘꓹ ꓢꓴ꓾ ꓢꓴ ꓔꓯ ꓟꓳꓻ ꓟꓽ ꓟꓵ ꓢꓴ꓾ ꓢꓴ ꓔꓯ ꓘꓶꓻ ꓙꓵ ꓢꓴ꓾ ꓮꓽ ꓐ ꓮ ꓟ ꓔꓯ ꓟꓽ ꓒꓵꓽ ꓢꓴ꓾ ꓫꓸ ꓟꓳ ꓠꓲꓹ ꓟꓽ ꓙꓳ ꓢꓴ꓾ ꓦ ꓡꓱ ꓚꓱꓹ ꓗꓪ ꓠꓲꓹ ꓟ ꓟꓽ ꓡꓱ ꓢꓴ꓾ 3 ꓟꓽ ꓙꓽ ꓗꓳ ꓢꓴ꓾ ꓖꓽ ꓖꓶꓽ ꓠꓲꓹ ꓟꓽ ꓙꓳ ꓢꓴ꓾ ꓝꓯꓼ ꓡꓯꓼ ꓢꓴ꓾ ꓚꓲ ꓛꓬ ꓔꓯ ꓙꓵꓽ ꓟꓽ ꓐ ꓡ ꓢꓴ꓾ ꓞꓳ ꓦꓶꓻ꓾ ꓙꓲꓻˍ ꓟ ꓔꓯ ꓠꓲꓹ ꓜꓳ ꓢꓴ꓾ 4 ꓛꓳꓽ ꓒꓯꓹ ꓔꓯ ꓪꓴꓽ ꓜ ꓢꓴ꓾ ꓞꓳ ꓡꓽ ꓞꓳ ꓗ ꓡ꓾ ꓟꓴ ꓠꓲꓹ ꓙꓳ ꓢꓴ꓾ ꓪꓴ-ꓢ ꓔꓯ ꓠꓲꓹ ꓠꓵˍ ꓟ ꓢꓶꓸ ꓟꓽ ꓞꓲ ꓧꓪꓽ ꓖꓳ ꓓꓱꓽ ꓗꓪ ꓟ ꓠꓲꓹ ꓘꓪ ꓫꓵ ꓓꓴ ꓔꓯ ꓠꓲꓹ ꓠꓵ ꓢꓴ ꓒꓬꓱꓼ ꓡ ꓢꓲ꓾ 5 ꓦ ꓡꓱˍ ꓟ ꓒꓬꓱꓽ ꓙꓳ ꓞꓹˍ ꓟꓲ꓾ ꓦ ꓡꓱ ꓚꓱꓹ ꓬꓲ ꓪꓽ ꓠꓬꓲˍ ꓟ ꓔꓯ ꓬꓲ ꓪꓽ ꓟꓽ ꓣꓷꓠ꓿ ꓕꓱ ꓡꓱꓳ ꓫꓵꓽ ꓡ ꓞꓳ ꓗꓪ ꓐꓰ ꓧꓹ ꓙꓰ꓿ 6 ꓮ ꓡꓲꓳ ꓐꓯ ꓠꓬ ꓕꓱ ꓕꓲ ꓧꓳꓽ ꓗꓪ ꓟ ꓕꓲ ꓐꓱ ꓠꓬ꓾ ꓢꓴ ꓦꓲ ꓗꓪ ꓘꓴꓽ ꓓꓵꓽ ꓡꓰ ꓢꓲ꓾ ꓝꓴꓲ ꓶꓻ ꓠꓬꓲꓸ ꓞ ꓢꓲꓸ ꓢꓯꓼ ꓐꓽˍ ꓟ ꓤ ꓟꓶ ꓤ ꓐꓴ ꓔꓯ ꓣꓴ ꓔꓯꓹ ꓙꓰˍ ꓡꓳ꓿ ꓤ ꓟꓶ ꓤ ꓖꓳ ꓕꓲ ꓧꓳꓽ ꓔꓯ ꓠꓬ꓾ ꓦꓯꓸ ꓠꓲꓹ ꓙꓵꓽˍ ꓟ ꓬꓲ ꓫꓵꓽ ꓬꓲ ꓙꓰ ꓡꓰ ꓧꓳꓽ ꓪꓴꓸ ꓙꓰˍ ꓟ ꓥ ꓢꓲ꓾ 7 ꓬꓲ ꓪꓽ ꓠꓬ ꓟꓽ ꓠꓽ ꓠ ꓢꓳꓺ ꓔꓬ ꓥ ꓟꓲ꓾ ꓔꓱꓹ ꓚꓵˍ ꓟ ꓔꓯ ꓢꓷꓸ ꓡꓰˍ ꓟ ꓗꓪ ꓮ ꓕꓯˍ ꓟꓲ ꓢꓳ ꓛꓲ ꓬꓰ ꓟꓽ ꓘꓴ꓿ 8 ꓬ-ꓠꓲˍ ꓐꓰ ꓬ-ꓟꓲ-ꓐꓲ-ꓡꓲ ꓡꓰ ꓟꓳ-ꓫꓲ ꓔꓯ ꓮ ꓡꓲ ꓔꓳꓹˍ ꓠꓬ꓾ ꓟꓸ ꓒꓬꓹ ꓢꓴ ꓕꓱ ꓕꓲ ꓧꓳꓽ ꓟˍ ꓟꓲ ꓔꓱꓹ ꓚꓵˍ ꓟ ꓔꓯ ꓔꓳꓹ ꓢꓲ ꓙꓽ ꓠꓲꓹ ꓐꓬꓺ ꓡꓰ ꓢꓴ ꓥ ꓠꓬꓲ꓾ ꓙꓵꓻ ꓚꓱꓹ ꓗꓪ ꓣꓱꓽ ꓬꓯꓼ ꓖꓴ ꓟꓽ ꓙꓳ꓿ 9 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓝꓮꓲ ꓡꓯꓽ ꓫꓵ ꓔꓳꓹ ꓟꓽ ꓐ ꓡ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓙꓲꓽˍ ꓟ ꓠꓬ ꓖꓳ ꓠꓬꓲꓽ ꓣꓳˍ ꓡꓰ ꓐꓰ ꓮꓽ ꓙꓵ ꓢꓴ ꓟꓲꓽ ꓙꓬ ꓗꓪ ꓟꓳꓸ ꓖꓶ ꓓꓳ ꓡ ꓥꓳ꓿ 10 ꓖꓳ ꓡꓱ ꓥ ꓟꓲ ꓠꓴ ꓠꓽ ꓥꓪ ꓟꓸ ꓖꓶˍ ꓟ ꓟꓸ ꓟꓲ꓾ ꓥꓪ ꓞꓳ ꓙꓳꓻˍ ꓟ꓾ ꓥꓪ ꓚꓴꓽ ꓬꓲꓹ ꓓꓶꓽ ꓚꓵ ꓡꓰˍ ꓟ꓾ ꓥꓪ ꓙꓵꓻ ꓠꓲꓹ꓾ ꓥꓪ ꓠꓲꓹ ꓟ ꓫꓵˍ ꓟ꓾ ꓥꓪ ꓠꓵ ꓠꓲꓹˍ ꓐꓰ꓾ ꓥꓪ ꓜꓲꓽ ꓘꓴ ꓠꓲꓹ꓾ ꓕꓱ ꓟꓬ ꓫꓵꓽ ꓔꓯ ꓠꓴ ꓛꓳ ꓢꓳ ꓗꓷꓳ꓿ 11 ꓝꓮꓲ ꓠꓬ ꓥꓪ ꓔꓯ ꓗꓸ ꓧꓪˍ ꓟ꓾ ꓥꓪ ꓫꓸ ꓙꓵˍ ꓟ꓾ ꓮ-ꓕꓲ-ꓬ ꓗꓪ꓾ ꓬꓲ-ꓗꓳ-ꓠꓰ ꓗꓪ꓾ ꓡꓴ-ꓢꓶ-ꓔꓷ ꓗꓪ ꓥꓪ ꓔꓯ ꓗꓷ ꓡꓰˍ ꓟ ꓐꓰ꓾ ꓥꓪ ꓜꓲꓽ ꓗꓷ ꓟ ꓗꓸ ꓧꓪ ꓓꓴ ꓔꓯˍ ꓟꓲ ꓠꓴ ꓢꓷꓸˍ ꓡꓳ꓿ ꓕꓱ ꓟꓬ ꓫꓵꓽ ꓮꓽ ꓙꓵ ꓗꓪ ꓐꓰ ꓢꓲ ꓒꓽ ꓡꓰ ꓥꓪ ꓔꓯ ꓚꓬꓴ ꓓꓳ ꓡꓺꓳ꓿ 12 ꓥ ꓡꓳ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓠꓲꓹ ꓒꓵꓽ ꓠꓲꓹ ꓡꓱˍ ꓟ ꓞꓳ ꓙꓳ ꓠꓲꓹ ꓫꓵ ꓢꓴ ꓮꓽ ꓙꓵ ꓠꓬ ꓗꓸ ꓧꓪˍ ꓟ ꓔꓳꓹ ꓜꓳꓽˍ ꓥꓳ꓿ 13 ꓞꓳ ꓥꓶˍ ꓐꓰ ꓗꓶꓸ ꓧꓳꓽ ꓪꓴꓸ ꓙꓰ ꓢꓴ ꓐꓴ ꓠꓬ ꓬꓲ ꓪꓽ ꓛꓳ ꓬꓲ ꓪꓽ ꓗꓶꓸ ꓡꓯꓽ ꓘꓳ ꓢꓲ꓾ ꓪꓻ ꓜꓲ ꓥꓶˍ ꓟ ꓒꓬꓱꓼ ꓡ ꓥꓳ꓿ 14 ꓖꓳ ꓡꓱ ꓥ ꓟꓲ ꓠꓴ ꓠꓬ꓾ ꓠꓴ ꓢꓳꓺ ꓟꓶˍ ꓟ ꓐꓰ ꓙꓵꓻ ꓔꓰꓹ ꓡꓰ ꓟ ꓟꓸ ꓟꓲ ꓗꓪ ꓮ ꓕꓯˍ ꓟꓲ ꓔꓬ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓮꓽ ꓟ ꓗꓪ ꓐꓰ ꓢꓳ ꓟꓶˍ ꓟ ꓠꓴ ꓢꓷꓸˍ ꓡꓳ꓿ 15 ꓝꓮꓲ ꓠꓬ ꓢꓲꓽ ꓫꓬ ꓕꓳ ꓶ ꓔꓯ ꓠꓴ ꓤ ꓠꓱ ꓤ ꓕꓯˍ ꓡꓰ ꓙꓽ ꓜꓲꓼˍ ꓟ ꓠꓴ ꓢꓷꓸˍ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓟ ꓙꓽ ꓗꓴꓸ ꓠꓲꓹ ꓡꓰ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓟ ꓙꓵꓻ ꓠꓲꓹ ꓗꓪ ꓐꓰ꓾ ꓢꓯꓼ ꓟꓬ ꓝꓸ ꓟꓶ ꓠꓹ ꓟ ꓠꓴ ꓔꓯ ꓧꓳꓽ ꓓꓵ ꓙꓰ ꓐ ꓡ ꓡꓳ꓿ 16 ꓢꓲꓽ ꓫꓬ ꓕꓳ ꓶ ꓮꓽ ꓙꓵ ꓟ ꓠꓬ ꓪꓴ-ꓢ ꓡꓰ ꓢꓯꓼ ꓧꓳꓽ ꓔ ꓟ ꓥ ꓢꓲ꓾ ꓟꓸ ꓟꓲ ꓟꓸ ꓖꓶˍ ꓟ ꓐꓱ ꓶˍ ꓐꓰ꓾ ꓛꓬˍ ꓟ ꓥꓳꓽˍ ꓟ ꓔꓯ ꓖꓴ ꓟꓸ ꓖꓶˍ ꓟ ꓐꓱ ꓶˍ ꓐꓰ꓾ ꓔꓱꓹ ꓡꓰ ꓝꓲˍ ꓟ ꓐꓱ ꓶˍ ꓐꓰ꓾ ꓔꓱꓹ ꓜꓳꓽˍ ꓟ ꓗꓪ ꓤꓹ ꓓꓰꓼ ꓡꓰ ꓝꓲ ꓠꓹ ꓟ ꓐꓱ ꓶ ꓙꓲ ꓖꓴ ꓙꓳꓻˍ ꓟ ꓥ ꓡꓳ꓿ 17 ꓕꓱ ꓟ ꓠꓬ ꓪꓴ-ꓢ ꓬꓲ ꓡ ꓞꓳ ꓔꓯ ꓙꓲꓻˍ ꓟ ꓟꓬꓱꓽ ꓥ ꓕ ꓑꓳꓸ ꓬꓰ ꓠꓹ ꓟ ꓙꓽ ꓖꓶ ꓖꓴ ꓡꓰ ꓝꓲ ꓢꓲ ꓜꓲꓼ ꓓꓰ ꓡꓰ ꓝꓲ ꓠꓹ ꓟ ꓥ ꓡꓳ꓿

2 ꓕꓲ-ꓟꓳ-ꓕꓲ-ꓪꓴ 4

1 ꓥꓪ ꓠꓬ ꓞꓳ ꓢꓯꓸˍ ꓐꓰ ꓞꓳ ꓫꓵꓻ ꓔꓯ ꓐꓯ ꓟꓴ ꓘꓶꓽ ꓢꓴ ꓪꓴ-ꓢˍ ꓐꓰ ꓙꓲ-ꓢꓴ ꓬꓰ-ꓢꓴ ꓟꓲꓽ ꓙꓬ ꓗꓪ꓾ ꓝꓮꓲ ꓠꓬ ꓬꓲ ꓚꓲ ꓛꓬ ꓟꓳꓸ ꓖꓶ ꓡ ꓟ ꓐꓰ ꓬꓲ ꓗꓴꓷ ꓑꓶꓸ ꓓꓴ ꓠꓴ ꓔꓯ ꓕꓵꓼ ꓪ ꓖꓶˍ ꓠꓬꓲ꓾ 2 ꓪꓴ-ꓢ ꓐꓯ ꓘꓶ ꓚ ꓟꓸ ꓖꓶ꓿ ꓐꓯ ꓝꓲꓸ ꓥ ꓟꓽ ꓥ ꓟꓲ ꓢꓯꓼ ꓕꓵꓼ ꓢꓲ꓾ ꓠꓲꓹ ꓟ ꓫꓵ ꓫꓵˍ ꓡꓰꓽ ꓟꓸ ꓖꓶ ꓢꓲ ꓠꓬꓲ꓾ ꓛꓬˍ ꓟ ꓥꓳꓽˍ ꓟ ꓔꓯ ꓖꓴꓺ ꓟꓳꓸ ꓖꓶ꓿ ꓕꓼˍ ꓟꓲ ꓕꓼ꓾ ꓘꓶꓸˍ ꓟꓲ ꓘꓶꓸ ꓖꓶ꓿ 3 ꓮ ꓡꓲꓳ ꓐꓯ ꓠꓬ ꓔꓱꓹˍ ꓟ ꓟꓸ ꓟꓲ ꓔꓯ ꓢꓴ ꓠ ꓠꓹ ꓠꓲꓹ ꓟꓽ ꓫꓵ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ ꓬꓲ ꓪꓽ ꓠꓬ ꓚꓲ ꓛꓬ ꓠꓸ ꓑꓳ ꓠꓲꓹ ꓟꓵˍ ꓟ ꓔꓯ ꓠꓲꓹ ꓘꓪ ꓫꓵ ꓡꓰ ꓝꓲ ꓓꓴ ꓚ ꓟꓸ ꓖꓶ ꓐ ꓡ ꓢꓴ ꓟꓸ ꓒ ꓮꓽ ꓟꓬꓹ ꓧꓪ ꓡꓴꓽ ꓡ ꓥꓳ꓿ 4 ꓝꓮꓲ ꓬꓲ ꓪꓽ ꓠꓬ ꓔꓱꓹˍ ꓟ ꓔꓯ ꓠ ꓠꓹ ꓟ ꓗꓪ ꓐꓰ ꓒꓳꓹ ꓙꓰ ꓢꓲ꓾ ꓛꓵꓸ ꓟꓲꓽ ꓔꓯꓸ ꓟꓳꓸ ꓧꓹ ꓙꓰˍ ꓥꓳ꓿ 5 ꓖꓳ ꓡꓱ ꓥ ꓟꓲ ꓠꓴ ꓠꓽ ꓮꓸ ꓫꓵ ꓗꓪˍ ꓟꓲ ꓞꓳ ꓢꓲꓽ ꓬꓰ꓿ ꓫꓸ ꓙꓵˍ ꓟ ꓜꓲꓽ ꓢꓲ ꓶꓼ ꓓꓳ ꓫꓱꓹ ꓓꓳ ꓟꓸ ꓒ ꓟꓬꓱꓽ ꓬꓰ ꓢꓲ ꓠꓬꓲ ꓠꓴ ꓟꓬꓱꓽ ꓐꓬꓱꓼ ꓘꓶꓽ ꓬꓰ ꓐꓲꓺ ꓡꓰ ꓝꓲ꓿ 6 ꓥꓪ ꓔꓯ ꓠꓬ ꓧꓳꓸ ꓔꓲꓺ ꓓꓴˍ ꓡꓰ ꓐꓰ ꓔꓲ ꓗꓷ ꓢꓲ꓾ ꓟꓲ ꓠꓯˍ ꓐꓰ ꓧꓹ ꓗꓷ ꓠꓹ ꓟ ꓦꓬꓼ ꓠꓬꓲ ꓛꓲ ꓡꓺꓳ꓿ 7 ꓟꓯꓼ ꓘꓶꓽ ꓗꓪ ꓥꓪ ꓠꓬ ꓬꓲ ꓜꓶꓻ ꓓꓶꓽ ꓡꓯꓽ ꓘꓳ ꓗꓷ ꓢꓲ꓾ ꓔꓷꓹ ꓡꓯꓽ ꓔꓯ ꓖꓴ ꓗꓪˍ ꓟꓲ ꓔꓷꓹ ꓡꓳꓹ ꓬꓰ ꓢꓲ ꓠꓬꓲ꓾ ꓙꓵꓻ ꓚꓱꓹ ꓔꓯˍ ꓟꓲ ꓬꓲ ꓜꓶ ꓒꓵꓽ ꓛꓳ ꓗꓷꓳ꓿ 8 ꓖꓳ ꓡꓱ ꓠꓬꓲ ꓥꓪ ꓐꓱ ꓶ ꓠꓬ ꓔꓱꓹ ꓜꓳꓽˍ ꓟ ꓗꓪ ꓧꓪꓸ ꓡꓰ ꓟ ꓟꓬꓱ ꓓꓳꓽ ꓪꓴꓸ ꓛꓴꓽ ꓝꓰꓺ ꓔ ꓖꓶˍ ꓡꓳ꓿ ꓕꓱ ꓟ ꓠꓬ ꓖꓳ ꓕꓲ ꓠꓬꓲ ꓗꓪ꓾ ꓔꓱꓹ ꓜꓳꓽˍ ꓟ ꓐꓯ ꓟꓴ ꓘꓶꓽ ꓢꓲꓽ ꓒ꓾ ꓣꓳ ꓢꓲ ꓒꓽ ꓡꓰ ꓥꓪ ꓔꓯ ꓖꓶ ꓡ ꓠꓹ ꓟ ꓥ ꓡꓳ꓿ ꓥꓪ ꓔꓯ ꓖꓶˍ ꓟ ꓡꓰ ꓟꓽ ꓞꓲ꓾ ꓬꓲ ꓟꓳꓸ ꓖꓶ ꓡ ꓟ ꓔꓯ ꓠꓲꓹ ꓠꓵ ꓢꓲꓼ ꓙꓬ ꓔꓬ ꓢꓴ ꓥ ꓕ ꓑꓳꓸ ꓔꓯˍ ꓟꓲ ꓖꓶˍ ꓥꓳ꓿ 9 ꓥꓪ ꓔꓬ ꓗꓪ ꓠꓲꓹ ꓞ ꓡ ꓠꓹ ꓟ ꓢꓯꓼ ꓕꓵꓼ꓿ 10 ꓮ ꓡꓲꓳ ꓐꓯ ꓠꓬ ꓓꓲ-ꓟ ꓠꓽ ꓮ ꓟꓶ ꓟ ꓟꓲ ꓠꓯ ꓔꓯ ꓠꓲꓹ ꓠꓵ ꓠꓬꓲ꓾ ꓥꓪ ꓔꓯ ꓧꓹ ꓗꓷ ꓢꓲ ꓕꓰ-ꓢ-ꓡꓳ-ꓠꓲ-ꓬ ꓗꓪ ꓙꓰ ꓗꓷꓳ꓿ ꓘꓷ-ꓡꓰ-ꓢꓶ ꓠꓬ ꓖ-ꓡ-ꓕꓲ-ꓬ ꓗꓪ ꓙꓰ ꓗꓷꓳ꓿ ꓕꓲ-ꓔꓳ ꓠꓬ ꓓ-ꓟꓰ-ꓫꓬ ꓗꓪ ꓙꓰ ꓗꓷꓳ꓿ 11 ꓡꓴ-ꓘ ꓕꓲ ꓣꓳˍ ꓡꓰꓽ ꓥꓪˍ ꓐꓰ ꓔꓬ ꓡꓳ꓿ ꓥꓪ ꓠꓬ ꓟꓬꓱꓽ ꓗꓪ ꓟ-ꓘꓳ ꓔꓯ ꓣꓱꓽ ꓬꓯꓼˍ ꓠꓬꓲ꓾ ꓠꓴˍ ꓐꓰ ꓕꓲ ꓛꓳꓺꓼ ꓬꓲ ꓔꓯ ꓧꓳꓽ ꓔꓯꓹ ꓡꓯ꓿ 12 ꓕꓲ-ꓚꓲ-ꓗꓴ ꓔꓯ ꓠꓽ ꓥꓪ ꓡꓰ ꓬꓲ-ꓩꓴ-ꓢꓳ ꓗꓪ ꓝꓲ ꓩꓴ ꓗꓷꓳ꓿ 13 ꓠꓴ ꓡꓻ ꓕꓯ ꓕꓷ-ꓡꓳ-ꓬ ꓗꓪ ꓚꓬ-ꓑꓴ ꓡꓯꓼ ꓒꓯꓹ ꓗꓪ ꓥꓪ ꓡꓰ ꓗꓶꓺ ꓔ ꓬꓰ ꓟ ꓐꓵ ꓞꓶˍ ꓐꓰ ꓕꓳ ꓶ ꓡꓲꓺ ꓔꓯꓹ ꓖꓶ ꓡꓯ꓿ ꓥꓪ ꓟꓬꓽ ꓠꓬꓲ ꓠꓵˍ ꓟ ꓠꓬ ꓧꓪꓽ ꓙꓲꓻ ꓕꓳ ꓶ ꓖꓳ ꓕꓷ ꓥ ꓡꓳ꓿ 14 ꓙꓲꓽ ꓓꓶꓽ ꓒ ꓬ-ꓡꓲ-ꓢ-ꓓ ꓠꓬ ꓥꓪ ꓔꓯ ꓟꓽ ꓙꓲ ꓟ ꓮꓽ ꓟꓬꓹ ꓫꓵꓽ ꓬꓰ ꓗꓷꓳ꓿ ꓬꓲ ꓮ ꓡꓲ ꓬꓰ ꓗꓷ ꓠꓬ꓾ ꓢꓲ ꓒꓽ ꓡꓰ ꓬꓲ ꓔꓯ ꓖꓳ ꓡꓱ ꓚꓱꓹ ꓖꓶˍ ꓥꓳ꓿ 15 ꓠꓴˍ ꓟꓲ ꓬꓲ ꓔꓯ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓣꓳ ꓡꓰ ꓟꓸ ꓖꓶˍ ꓟ ꓐꓯ ꓘꓶ ꓔꓯ ꓮꓽ ꓘꓶꓸ ꓔꓳꓹˍ ꓡꓳ꓿ 16 ꓥꓪ ꓬꓲ ꓪꓴꓸ ꓕꓲ ꓧꓪ ꓒꓶꓻ ꓔꓳꓹ ꓘꓶꓽ ꓫꓸ ꓕꓱˍ ꓕꓯ꓾ ꓮꓽ ꓟˍ ꓟꓲ ꓥꓪ ꓔꓯ ꓟꓽ ꓬꓰ ꓙ ꓙ꓾ ꓬꓲ ꓪꓽ ꓮꓽ ꓙꓵ ꓥꓪ ꓔꓯ ꓒꓰꓺ ꓗꓷˍ ꓡꓳ꓿ ꓬꓲ ꓪꓽ ꓕꓱ ꓡꓱ ꓬꓰˍ ꓟꓲ ꓪꓴ-ꓢ ꓡꓰ ꓬꓲ ꓪꓽ ꓔꓯ ꓖꓽ ꓖꓶ ꓝꓲ꓿ 17 ꓖꓳ ꓡꓱ ꓥ ꓟꓲ ꓥꓪ ꓗꓪ ꓐꓰ ꓶꓼ ꓓꓳ ꓫꓱꓹ ꓓꓳ ꓚ ꓐꓲꓺ ꓡꓰ ꓝꓲ ꓠꓹ ꓟ ꓐꓰ꓾ ꓐꓶ ꓞꓳ ꓮꓽ ꓙꓵ ꓑ ꓙꓽ ꓝꓲ ꓠꓹ ꓟ꓾ ꓢꓲ ꓒꓽ ꓠꓬ ꓥꓪˍ ꓐꓰ ꓕꓲ ꓪꓺꓼ ꓦꓰꓼ ꓞ ꓢꓲ꓾ ꓥꓪ ꓔꓯ ꓢꓯꓼ ꓧꓳꓽ ꓖꓶ ꓡ ꓢꓲ ꓠꓬꓲ꓾ ꓡꓽ ꓢꓯꓹ ꓟꓷ ꓠꓷꓹ ꓗꓪ ꓐꓰ ꓥꓪ ꓔꓯ ꓚꓬꓴ ꓓꓳ ꓡꓺꓳ꓿ 18 ꓢꓲ ꓒꓽ ꓡꓰ ꓥꓶˍ ꓟ ꓚꓴꓽ ꓬꓲꓹ ꓮꓽ ꓙꓵ ꓗꓪ ꓐꓰ ꓥꓪ ꓔꓯ ꓚꓬꓴ ꓓꓳ ꓡ ꓢꓲ꓾ ꓟꓴꓽ ꓗꓪ ꓗꓪ ꓟ ꓬꓲ ꓗꓴꓷꓼ ꓗꓪ ꓥꓪ ꓔꓯ ꓧꓪꓸ ꓧꓪꓸˍ ꓐꓰ ꓧꓳꓽ ꓛꓲ ꓬꓰˍ ꓥꓳ꓿ ꓟꓬꓱ ꓓꓳꓽ ꓠꓬ ꓕꓲ ꓞꓲꓼ ꓕꓲ ꓑ ꓬꓲ ꓔꓯ ꓟ ꓥꓳ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ 19 ꓑꓷ-ꓚꓲ-ꓡˍ ꓐꓰ ꓬꓹ-ꓚꓲ-ꓡꓽˍ ꓐꓰ ꓳ-ꓠꓰ-ꓢꓷ-ꓩꓴ ꓕꓲ ꓦꓲ ꓔꓯ ꓒꓵꓽ ꓗ ꓬꓰ ꓖꓶ꓿ 20 ꓬꓲ-ꓣ-ꓔꓴ ꓠꓬ ꓘꓳ-ꓡꓱ-ꓕꓴ ꓗꓪ ꓔꓲꓹ ꓬꓰꓳ꓿ ꓕꓷ-ꓡꓳ-ꓩꓴ-ꓟꓴ ꓠꓬ ꓠꓻˍ ꓠꓬꓲ꓾ ꓥꓪ ꓡꓰ ꓬꓲ ꓔꓯ ꓟꓲ-ꓡꓲ-ꓔꓴ ꓗꓪ ꓔꓲꓹ ꓬꓰ ꓝꓲꓳ꓿ 21 ꓙꓬ ꓝꓲꓸ ꓟꓽ ꓛꓲ ꓡ ꓧꓶꓸ ꓕꓯ ꓡꓰ ꓥꓪ ꓔꓬ ꓗꓪ ꓠꓲꓹ ꓞ ꓡ ꓠꓹ ꓟ ꓢꓯꓼ ꓕꓵꓼ꓿ ꓬꓴ-ꓑꓴ-ꓡꓳ ꓐꓰ꓾ ꓒꓴ-ꓕꓲ-ꓢꓶ ꓐꓰ꓾ ꓡꓲ-ꓠꓳ-ꓢꓶ ꓐꓰ꓾ ꓗꓷ-ꓡꓳ-ꓔꓲ-ꓬ ꓐꓰ ꓬꓲꓼ ꓤ ꓠꓬꓲ ꓤ ꓐꓴ ꓮꓽ ꓙꓵ ꓡꓰ ꓠꓴ ꓔꓯ ꓒꓵꓽ ꓗꓹꓬꓰ ꓩꓴ ꓡ ꓡꓳ꓿ 22 ꓢꓲ ꓒꓽ ꓠꓬ ꓠꓴ ꓦꓻ ꓐꓰ ꓕꓲ ꓪꓺꓼ ꓔꓬ ꓝꓲ꓿ ꓣꓱꓽ ꓛꓰ ꓠꓴˍ ꓐꓰ ꓕꓲ ꓪꓺꓼ ꓙꓳ ꓝꓲ꓿

ꓕꓲ-ꓔꓳ 1

1 ꓪꓴ-ꓢ ꓬꓲ ꓚꓳ ꓑꓸ ꓐꓰ ꓬꓰ-ꓢꓴ ꓙꓲ-ꓢꓴ ꓬꓲ ꓝꓲ ꓓꓴ꓾ ꓒꓳ-ꓡꓳ ꓥꓪ ꓡꓰ꓾ ꓕꓲ-ꓔꓳ ꓠꓴ ꓔꓯ ꓕꓳ ꓶ ꓐꓳ ꓩꓴ ꓡ ꓥꓳ꓿ ꓥꓪ ꓔꓯ ꓠꓬ ꓪꓴ-ꓢ ꓡꓰ꓾ ꓢꓲ ꓔ ꓢꓴ ꓐꓴ ꓔꓯ ꓠꓲꓹ ꓒꓵꓽ ꓠꓲꓹ ꓡꓱꓻˍ ꓟ ꓗꓪ ꓧꓳꓽ ꓛꓲ ꓬꓰ ꓝꓲˍ ꓟ ꓙꓵꓻ ꓠꓲꓹˍ ꓐꓰ ꓔꓱꓹ ꓚꓵˍ ꓟ ꓢꓷꓸ ꓠꓲꓹ ꓗꓪ ꓧꓳꓽ ꓟꓳꓸ ꓖꓶ ꓠꓹ ꓟ ꓝꓲ ꓔ ꓟ ꓥ ꓢꓲ꓾ 2ꓥꓪ ꓟꓸˍ ꓟ ꓟꓸ ꓟꓲ ꓠꓬ꓾ ꓮ ꓕꓯˍ ꓟꓲ ꓟꓽ ꓗꓶꓸ ꓠꓬꓲ ꓟ ꓪꓴ-ꓢ ꓡꓰ꓾ ꓟꓵꓽ ꓟꓽ ꓔꓶ ꓟꓲ ꓟꓽ ꓔꓶ ꓧꓶꓸ ꓕꓯˍ ꓡꓰ ꓣꓳꓽ ꓔꓯ ꓙ ꓟꓳ ꓔ ꓟ ꓐꓯ ꓘꓶ ꓥ ꓢꓲ ꓠꓬꓲ꓾ 3 ꓬꓲ ꓝꓲꓸ ꓐꓲ ꓡ ꓕꓯ ꓬꓲ ꓐꓯ ꓘꓶꓽ ꓗꓪ ꓐꓰ ꓟꓳꓸ ꓖꓶ ꓓꓳ ꓡꓺꓳ꓿ ꓥꓪ ꓔꓯ ꓠꓬ ꓬꓲ ꓐꓯ ꓘꓶꓽ ꓕꓱ ꓟ ꓡꓯꓼ ꓙꓱ ꓔ ꓟ ꓥ ꓢꓲ꓾ ꓥꓪ ꓠꓬ ꓣꓳꓽ ꓔꓯ ꓚꓬꓴ ꓙ ꓢꓴ ꓪꓴ-ꓢ ꓕꓵꓼ ꓪꓽ ꓗꓪ ꓐꓰ ꓐꓯ ꓘꓶꓽ ꓕꓱ ꓟ ꓚ ꓟꓸ ꓖꓶˍ ꓟ ꓥ ꓡꓳ꓿ 4 ꓙꓵ ꓠꓲꓹ ꓕꓲ ꓟˍ ꓟ ꓔꓯ ꓑꓯꓹ ꓟꓶ ꓡꓰ ꓟ ꓗꓪ ꓐꓰ ꓥꓪ ꓤꓽ ꓚꓵ ꓥ ꓟ ꓕꓲ-ꓔꓳ ꓠꓴ ꓠꓬ꓾ ꓣꓳꓽ ꓐꓹ ꓐ ꓪꓴ-ꓢˍ ꓐꓰ ꓣꓳꓽ ꓚꓬꓴ ꓢꓲ ꓒꓽ ꓙꓲ-ꓢꓴ ꓬꓰ-ꓢꓴ ꓔꓯˍ ꓐꓰ ꓣꓱꓽ ꓛꓰ ꓐꓰ ꓢꓲ ꓡꓲ ꓟ ꓟꓶ ꓝꓲ꓿ 5 ꓠꓴ ꓔꓯ ꓥꓪ ꓡꓰ ꓕꓵꓼ ꓪꓽ ꓖꓶ ꓗꓷ ꓟ ꓡꓰ ꓐꓰ꓾ ꓫꓬꓹ ꓔꓱꓹ ꓟꓽ ꓓꓳ ꓡꓰ ꓟ ꓫꓵꓽ ꓪꓴ ꓫꓬꓹ ꓖꓴ ꓡꓰ ꓝꓲ ꓢꓲ ꓮ ꓡꓲ ꓕꓲ ꓡꓳ ꓒꓱ ꓗꓪˍ ꓟꓲ ꓟꓬꓱꓽ ꓡꓳꓸ ꓢꓴ ꓢꓲꓺ ꓝꓲ ꓠꓹ ꓟ꓾ ꓥꓪ ꓡꓰ ꓠꓴ ꓔꓯ ꓗꓷ-ꓡꓲ-ꓔꓲ ꓗꓪ ꓔꓲꓹ ꓬꓰ ꓝꓲ ꓟ ꓥ ꓡꓳ꓿ 6 ꓮꓽ ꓟ ꓥ ꓟꓲ ꓕꓼ ꓓꓴ ꓟꓽ ꓙꓳ ꓢꓲ꓾ ꓤ ꓟꓶ ꓕꓲ ꓟꓶꓽˍ ꓡꓰ ꓫꓺ ꓢꓴ꓾ ꓙꓵꓻˍ ꓟ ꓤ ꓠꓱ ꓙꓳ ꓢꓲ꓾ ꓬꓲ ꓤ ꓠꓱ ꓠꓬ ꓞꓳ ꓗꓺ ꓡ ꓬꓰˍ ꓡꓳ꓾ ꓥ ꓠꓬ ꓟꓸ ꓘꓶꓽ ꓟꓽ ꓠ ꓠꓹ꓾ ꓐꓰ ꓓꓰꓺ ꓢꓴ ꓟꓽ ꓙꓳˍ ꓕꓯ ꓠꓽ ꓬꓲ ꓔꓯ ꓢꓲ ꓓꓻˍ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓟꓬꓱꓽ ꓡꓳꓸ ꓢꓴ ꓠꓽ ꓪꓴ-ꓢ ꓦꓲ ꓙꓵꓽ ꓢꓴ ꓥ ꓠꓬꓲ꓾ ꓕꓼ ꓖꓴ ꓓꓰ ꓖꓴ ꓟꓽ ꓙꓳ ꓢꓴ꓾ ꓚꓲ ꓛꓬ ꓠꓲꓹ ꓡꓶꓽ ꓟꓽ ꓛꓳ ꓢꓴ꓾ ꓠꓲꓹ ꓟ ꓦꓶꓻ ꓟꓽ ꓢꓻ ꓢꓴ꓾ ꓙꓲꓻ ꓒꓶꓽ ꓟꓽ ꓗꓪꓸ ꓢꓴ꓾ ꓞꓳ ꓓꓶꓽ ꓒ ꓟꓽ ꓥ ꓢꓴ꓾ ꓒꓴ ꓤ ꓫꓵ ꓤ ꓔꓯ ꓟꓽ ꓠꓲꓹ ꓦꓯꓸ ꓢꓴ꓾ 8 ꓝꓮꓲ꓾ ꓪꓰ ꓤ ꓔꓯˍ ꓟꓲ ꓘꓳ ꓣꓴ ꓠꓲꓹ ꓒꓴ ꓢꓴ꓾ ꓙꓲˍ ꓟ ꓔꓯ ꓠꓲꓹ ꓠꓵ ꓢꓴ꓾ ꓠꓲꓹ ꓟ ꓢꓲꓽ ꓢꓴ꓾ ꓔꓱꓹ ꓜꓳꓽ ꓢꓴ꓾ ꓙꓵꓻ ꓚꓱꓹ ꓗꓪ ꓠꓲꓹ ꓡꓱ ꓢꓴˍ ꓐꓰ ꓚꓲ ꓛꓬ ꓔꓯ ꓙꓵꓽ ꓐ ꓡ ꓢꓴ ꓔꓯˍ ꓡꓰꓽ ꓟꓬꓱꓽ ꓡꓳꓸ ꓢꓴ ꓢꓲꓺ ꓠ ꓗꓹ ꓡꓳ꓿ 9 ꓟꓬꓱꓽ ꓡꓳꓸ ꓢꓴ ꓠꓬ ꓔꓱꓹ ꓟ ꓟꓸ ꓟꓲ ꓔꓯ ꓬꓲ ꓜꓶ ꓣꓴꓻ ꓔ ꓢꓲ꓾ ꓔꓱꓹ ꓟ ꓡꓰ ꓢꓴ ꓔꓯ ꓘꓶꓸ ꓖꓶ ꓢꓲ ꓠꓬꓲ꓾ ꓒꓳꓹ ꓔꓳ ꓢꓴ ꓔꓯˍ ꓟꓲ ꓒꓶꓻ ꓔꓳꓹ ꓖꓶ ꓐ ꓡ ꓠ ꓗꓹ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓔꓳꓹ ꓢꓴ꓾ ꓮꓽ ꓔꓳ ꓔꓳ ꓫꓸ ꓕꓱ ꓢꓴˍ ꓐꓰ ꓗꓶꓸ ꓢꓴ ꓮꓽ ꓟꓬꓹ ꓙꓳˍ ꓡꓳ꓿ ꓬꓴ-ꓔ ꓡ ꓞꓳ ꓐꓴ ꓗꓪ ꓐꓰ ꓦ ꓡꓱ ꓡ ꓢꓴ ꓪ ꓜꓲ ꓖꓳ ꓡꓱ ꓗꓹ ꓡꓳ꓿ 11 ꓬꓲ ꓪꓽ ꓠꓽ ꓒꓴ ꓤ ꓫꓵꓺ ꓤ ꓔꓯ ꓠꓲꓹ ꓦꓯˍ ꓟ ꓑꓶ ꓓꓴ ꓟꓸ ꓙꓲꓽ ꓟꓽ ꓙꓳ ꓡꓳ ꓫꓵꓽ ꓟꓸ ꓟꓲ ꓟꓸ ꓢꓲ꓾ ꓕꓲꓽ ꓦꓲ ꓕꓲꓽ ꓦꓲ ꓔꓯ ꓐꓬ ꓡꓰ ꓝꓲˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪꓽ ꓔꓯ ꓟꓽ ꓪꓳꓹ ꓔꓬ ꓝꓲ ꓠꓯꓹ ꓡꓳ꓿ 12 ꓬꓲ ꓪꓽ ꓚꓲ ꓛꓬ ꓗꓳ ꓡꓳ ꓗꓪ ꓟ ꓟꓷ ꓠꓷꓹ ꓝꓸ ꓢꓴ ꓕꓲ ꓣꓳ ꓡꓰ꓾ ꓗꓷ-ꓡꓲ-ꓔꓲ ꓢꓴ ꓠꓬ꓾ ꓮ ꓕꓯˍ ꓟꓲ ꓞꓳ ꓗꓶꓸˍ ꓐꓰ꓾ ꓞꓳ ꓥꓶꓺˍ ꓐꓰ꓾ ꓞꓳ ꓐꓴꓻˍ ꓐꓰ ꓞꓳ ꓗꓪꓸ ꓥ ꓡꓳ꓾ ꓐꓯˍ ꓡꓳ꓿ 13 ꓢꓷꓸ ꓙ ꓟꓳ ꓙ ꓘꓶ ꓕꓱ ꓟ ꓠꓬ ꓚꓵ ꓚꓵ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪꓽ ꓠꓬ ꓙꓵꓻ ꓚꓱꓹ ꓗꓪ ꓕꓶꓻ ꓡꓰ ꓠꓹ ꓟ꓾ ꓬꓲ ꓪꓽ ꓔꓯ ꓡꓲꓽ ꓡꓲꓽˍ ꓡꓰ ꓕꓼ꓿ 14 ꓝꓮꓲ ꓠꓬ ꓬꓴ-ꓔ ꓡ ꓞꓳ ꓛꓵꓸ ꓟꓲꓽˍ ꓐꓰ꓾ ꓔꓱꓹ ꓚꓵˍ ꓟ ꓗꓪ ꓐꓰ ꓧꓹ ꓙꓰ ꓢꓴ ꓐꓴ ꓕꓵꓼ ꓪꓽ ꓔꓯ ꓟꓽ ꓛꓳ ꓠꓹ ꓟ ꓬꓲ ꓪꓽ ꓔꓯ ꓕꓼ꓿ 15 ꓢꓲꓽ ꓫꓬ ꓢꓴ ꓔꓯ ꓟꓳꓸ ꓠꓬ ꓮꓸ ꓫꓵˍ ꓟꓲ ꓢꓲꓽ ꓫꓬˍ ꓟ ꓥ ꓡꓳ꓿ ꓟꓽ ꓫꓬ ꓟ ꓠꓷꓼ ꓞꓹ ꓟ ꓐꓰ ꓟꓽ ꓙꓵꓻ ꓢꓴ ꓔꓯ ꓟꓳꓸ ꓠꓽ꓾ ꓬꓲ ꓪꓽ ꓙꓽ ꓠꓲˍ ꓐꓰ ꓦꓰꓽ ꓠꓲˍ ꓟꓲ꓾ ꓟꓽ ꓫꓬ ꓟ ꓑꓶꓸ ꓡꓰ ꓠꓬꓲ꓾ ꓮꓸ ꓫꓵ ꓗꓪˍ ꓟꓲ ꓟꓽ ꓫꓬꓻ ꓟˍ ꓡꓰꓽ ꓗꓷ ꓡꓰꓳ꓿ 16 ꓬꓲ ꓪꓽ ꓠꓬ ꓪꓴ-ꓢ ꓔꓯ ꓢꓷꓸˍ ꓡꓳ꓾ ꓐꓯ ꓠꓽ ꓐꓯˍ ꓟꓲ꓾ ꓬꓲ ꓪꓽ ꓬꓰˍ ꓟ ꓟꓬꓱꓽ ꓗꓪ ꓐꓰ ꓬꓲ ꓔꓯ ꓟꓽ ꓣꓷꓠ ꓟ ꓡꓳꓸ ꓢꓷꓸ ꓡꓰ ꓓꓻˍ ꓡꓳ꓿ ꓬꓲ ꓪꓽ ꓠꓬ ꓠꓲꓹ ꓒꓳꓹ ꓟ ꓐꓰ ꓟꓽ ꓠ ꓡꓳꓹ ꓟ ꓞꓳ ꓤ ꓥ ꓢꓲ꓾ ꓙꓲˍ ꓟ ꓟꓬꓱꓽ ꓮꓸ ꓫꓵꓽˍ ꓟꓲ ꓬꓰ ꓟꓽ ꓒꓵꓽ ꓢꓴ ꓥ ꓡꓳ꓿

ꓕꓲ-ꓔꓳ 2

1 ꓠꓴ ꓟꓸ ꓖꓶˍ ꓟ ꓠꓬ ꓔꓱꓹ ꓚꓵˍ ꓟ ꓙꓵ ꓚꓱꓹ ꓟꓸ ꓟꓲꓽ ꓔꓯ ꓧꓳꓹ ꓡꓰ ꓝꓲ ꓠ ꓗꓹ ꓡꓳ꓿ 2 ꓞꓳ ꓟꓳꓽ ꓒ ꓐꓴ ꓔꓯ ꓠꓬ꓾ ꓞꓳ ꓢꓲꓽˍ ꓐꓰ ꓢꓴ ꓡꓰ ꓞꓳ ꓒꓵꓽ ꓡ ꓟ ꓟꓶ ꓒꓵꓽ ꓢꓴ꓾ ꓚꓲ ꓛꓬ ꓔꓯ ꓙꓵꓽ ꓐ ꓡ ꓢꓴ꓾ ꓙꓵꓻ ꓠꓲꓹ ꓐꓰ ꓠꓵ ꓠꓲꓹ ꓐꓰ ꓜꓲꓽ ꓘꓴ ꓠꓲꓹ ꓙꓳ ꓢꓴ ꓬꓰ ꓠꓯꓹ ꓟ ꓟꓸ ꓖꓶ꓿ 3 ꓞꓳ ꓟꓳꓽ ꓟ ꓐꓴ ꓔꓯˍ ꓟꓲ꓾ ꓞꓳ ꓒꓵꓽ ꓒꓵˍ ꓡꓰꓽ ꓞꓳ ꓙꓳ ꓠꓯꓹ ꓟ꓾ ꓝꓯꓼ ꓡꓯꓼ ꓢꓴ ꓕꓽ ꓬꓰ ꓠꓯꓹ ꓟ꓾ ꓙꓲ ꓒꓶꓽ ꓬꓲꓸ ꓚꓳꓺ ꓟ ꓕꓽ ꓬꓰ ꓠꓯꓹ ꓟ ꓐꓰ꓾ ꓙꓲˍ ꓟ ꓟꓸ ꓖꓶ ꓢꓴ ꓬꓰ ꓠꓯꓹ ꓡꓳ꓾ ꓐꓰ ꓟꓸ ꓖꓶ꓿ 4 ꓝꓮꓲ ꓞꓳ ꓟꓳꓽ ꓟ ꓐꓴ ꓠꓬ ꓞꓲꓼ ꓣꓳˍ ꓟ ꓤ ꓟꓶ ꓤ ꓐꓴ ꓔꓯ꓾ ꓬꓲ ꓪꓽ ꓤ ꓖꓴˍ ꓐꓰ ꓤ ꓠꓱ ꓔꓯ ꓠꓲꓹ ꓠꓵ ꓠꓯꓹ ꓟ ꓐꓰ꓾ 5 ꓪꓴ-ꓢ ꓐꓯ ꓘꓶꓽ ꓔꓯ ꓢꓴ ꓡꓰ ꓟꓽ ꓒꓵꓽ ꓟꓽ ꓗꓷ ꓡꓰ ꓝꓲ ꓠꓹ ꓟ꓾ ꓬꓲ ꓪꓽ ꓠꓬ ꓞꓳ ꓢꓲꓽ ꓬꓰ ꓠꓯꓹ ꓟ꓾ ꓢꓲꓽ ꓫꓬ ꓢꓴ ꓬꓰ ꓠꓯꓹ ꓟ꓾ ꓦꓲ ꓟꓬꓱꓽ ꓣꓱꓽ ꓢꓴ ꓬꓰ ꓠꓯꓹ ꓟ꓾ ꓠꓲꓹ ꓟ ꓙꓲˍ ꓟ ꓬꓰ ꓠꓯꓹ ꓟ ꓐꓰ꓾ ꓚꓲ ꓛꓬ ꓤ ꓖꓴ ꓙꓵꓽˍ ꓟ ꓔꓯ ꓛꓳ ꓠꓯꓹ ꓟ ꓟꓸ ꓖꓶ ꓝꓲ꓿ 6 ꓖꓳ ꓟ ꓡꓰ ꓐꓰ ꓞꓲꓼ ꓣꓳˍ ꓟ ꓞꓳ ꓑ ꓤ ꓐꓴ ꓔꓯ ꓠꓬ꓾ ꓮꓸ ꓫꓵꓽ ꓗꓪˍ ꓟꓲ ꓚꓲ ꓛꓬ ꓔꓯ ꓙꓵ ꓐ ꓡ ꓟ ꓞꓳ ꓢꓲꓽ ꓬꓰ ꓠꓹ ꓟ ꓘꓶꓸ ꓖꓶ꓿ 7 ꓠꓴ ꓚꓲ ꓛꓬ ꓠꓽ ꓮꓸ ꓫꓵꓽ ꓗꓪˍ ꓟꓲ ꓙꓲˍ ꓟ ꓟꓬꓱꓽ ꓬꓰ ꓠ ꓟ ꓔꓯꓺ ꓢꓳ ꓓꓴ ꓬꓰ ꓟꓳꓸ ꓖꓶ꓿ ꓠꓴ ꓟꓸ ꓟꓲ ꓟꓸˍ ꓟ ꓗꓪ ꓠꓬꓲꓽ ꓒꓳꓹ ꓠꓬꓲꓽ ꓫꓵ ꓟꓽ ꓬꓰ ꓬꓰ꓾ ꓞꓳ ꓢꓲꓽˍ ꓐꓰ ꓠꓲꓹ ꓔꓱꓹ ꓠꓲ ꓓꓰˍ ꓟ ꓬꓰ ꓟꓳꓸ ꓖꓶ꓿ 8 ꓝꓮꓲ ꓠꓬ ꓣꓳꓽ ꓔꓯ ꓔꓳꓹ ꓢꓴ ꓫꓸ ꓔꓳ ꓡꓰ ꓢꓲ꓾ ꓟꓽ ꓙꓲ ꓟ ꓕꓲ ꓫꓵꓽˍ ꓟꓲ ꓐꓯ ꓓꓴ ꓟꓽ ꓙꓳ ꓝꓲ ꓠꓹ ꓟ꓾ ꓛꓬ ꓖꓴ ꓧꓪ ꓟꓶ ꓟꓽ ꓓ ꓟ ꓔꓱꓹ ꓥꓳꓽ ꓫꓸ ꓕꓱ꓿ 9 ꓚꓳ ꓑꓸ ꓐꓴ ꓔꓯ ꓠꓬ꓾ ꓚꓲ ꓛꓬ ꓢꓲ ꓒ ꓐꓴ ꓙꓵꓽˍ ꓟ ꓔꓯ ꓛꓳ ꓢꓲ꓾ ꓮꓸ ꓫꓵ ꓗꓪˍ ꓟꓲ ꓬꓲ ꓪꓽ ꓔꓯ ꓠꓲꓹ ꓒꓴ ꓡꓰ ꓝꓲ ꓢꓲ ꓠꓬꓲ꓾ ꓕꓽ ꓡꓯꓽ ꓧꓹ ꓠꓯꓹ ꓟ ꓐꓰ꓾ 10 ꓕꓽ ꓘꓴꓽ ꓠꓯꓹ ꓟ ꓐꓰ꓾ ꓮꓸ ꓫꓵ ꓬꓰˍ ꓟꓲ ꓦ ꓡꓱ ꓐꓳ ꓐꓳˍ ꓡꓰꓽ ꓬꓰ ꓠꓹ ꓟ ꓘꓶꓸ ꓖꓶ꓿ ꓖꓳ ꓡꓱ ꓬꓰˍ ꓠꓬ ꓣꓳꓽ ꓚꓬꓴ ꓢꓲ ꓒꓽ ꓪꓴ-ꓢ ꓬꓲ ꓟꓸ ꓟꓲ ꓔꓯ ꓢꓴ ꓟꓬꓽ ꓠꓬꓲ ꓢꓲꓼ ꓙꓬ ꓠꓲꓹ ꓒꓴ ꓡ ꓥꓳ꓿ 11 ꓮ ꓡꓲꓳ ꓐꓯ ꓠꓬ ꓞꓳ ꓤ ꓥ ꓕ ꓑꓳꓸ ꓔꓯ ꓚꓬꓴ ꓓꓴ ꓪꓴ-ꓢ ꓬꓲ ꓢꓯꓼ ꓟꓬ ꓝꓸ ꓟ ꓣꓱꓽ ꓛꓰ ꓟꓳꓸ ꓖꓶ ꓡꓺꓳ꓿ 12 ꓣꓱꓽ ꓛꓰ ꓟꓸ ꓟꓲ ꓕꓱ ꓟ ꓡꓰ ꓣꓳ ꓔꓯ꓾ ꓕꓱ ꓕꓲꓽ ꓤꓶꓻ ꓗꓪ ꓟ ꓪꓴ-ꓢ ꓔꓯ ꓟꓽ ꓙꓵꓻ ꓢꓴ ꓞꓳ ꓙꓳ ꓚꓱꓹ ꓐꓰ ꓟꓲ ꓠꓯ ꓦꓯꓸ ꓠꓲꓹ ꓙꓵˍ ꓟ ꓔꓯ ꓡꓳ ꓗꓷ ꓢꓲ꓾ ꓣꓳꓽ ꓞꓳ ꓙꓳˍ ꓟ ꓚꓱꓹ ꓗꓪ꓾ ꓞꓳ ꓢꓲꓽˍ ꓐꓰ꓾ ꓔꓱꓹ ꓜꓳꓽˍ ꓟ ꓐꓰ꓾ ꓠꓲꓹ ꓒꓵꓽ ꓠꓲꓹ ꓡꓱ ꓢꓴ ꓒꓬꓱꓼ ꓡ ꓠꓹ ꓟ ꓣꓳ ꓔꓯ ꓟꓸ ꓖꓶ ꓡ ꓡꓳ꓿ 13 ꓝꓮꓲ ꓠꓬ ꓶꓼ ꓙꓳ ꓫꓱꓹ ꓙꓳˍ ꓟ ꓥꓳ ꓡꓳꓸ ꓓꓴ ꓐꓱ ꓶ ꓣꓳ ꓩꓴ ꓠꓬꓹ ꓔꓬ ꓡꓳ꓿ ꓕꓱ ꓟ ꓠꓬ ꓪꓽ ꓠꓬꓲ ꓢꓴ ꓪꓴ-ꓢ ꓣꓳꓽ ꓚꓬꓴ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓟꓬꓱ ꓓꓳꓽ ꓙꓳꓻ ꓙꓳˍ ꓡꓰ ꓟꓳꓸ ꓖꓶ ꓡ ꓟ ꓔꓯ ꓐꓯˍ ꓟ ꓥ ꓡꓳ꓿ 14 ꓬꓰ-ꓢꓴ ꓙꓲ-ꓢꓴ ꓠꓬ꓾ ꓛꓬ ꓖꓴ ꓥꓳꓽ ꓖꓴ ꓮꓽ ꓙꓵ ꓗꓪ ꓐꓰ ꓣꓳꓽ ꓔꓯ ꓫꓴꓹ ꓓꓳ ꓡ ꓢꓲ꓾ ꓬꓲ ꓚꓲ ꓛꓬ ꓶꓽ ꓬꓰ ꓠꓹ ꓟ ꓑ ꓫꓬꓼ ꓕꓲ ꓧꓳꓽ ꓔꓯ ꓢꓲꓽ ꓫꓬꓻ ꓡꓰ ꓝꓲ ꓢꓲ ꓠꓬꓲ꓾ ꓙꓲˍ ꓟ ꓟꓬꓱꓽ ꓗꓪ ꓠꓲꓹ ꓡꓱ ꓝꓲ ꓠꓹ ꓟ꓾ ꓣꓳꓽ ꓐꓱ ꓶ ꓬꓲ ꓚꓲ ꓛꓬ ꓢꓯꓼ ꓟꓬ ꓖꓶ ꓗꓷꓳ꓿ 15 ꓠꓴ ꓠꓬ ꓕꓱ ꓟꓬ ꓫꓵꓽ ꓟ ꓬꓲ ꓪꓽ ꓔꓯ ꓟꓸ ꓖꓶ꓿ ꓬꓲ ꓪꓽ ꓔꓯ ꓘꓶꓸ ꓖꓶ꓾ ꓢꓯꓼ ꓖꓶ꓿ ꓕꓼ ꓠ ꓗꓹ ꓠꓬ ꓙꓵꓽ ꓪ ꓙꓳ ꓙꓳˍ ꓡꓰꓽ ꓕꓼ꓿ ꓮꓽ ꓟˍ ꓟꓲ ꓠꓴ ꓔꓯ ꓟꓳꓻ ꓟꓽ ꓟꓵ ꓟ ꓕꓽ ꓗꓷ ꓡꓰ ꓝꓲ꓿

ꓕꓲ-ꓔꓳ 3

1 ꓢꓲ ꓤ ꓐꓴ ꓠꓬ꓾ ꓢꓲꓽ ꓒ ꓐꓴˍ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓙꓵꓽˍ ꓟ ꓔꓯ ꓛꓳꓻ ꓠ ꓡꓳꓹ ꓠꓯꓹ ꓟ ꓐꓰ꓾ ꓙꓲˍ ꓟ ꓟꓬꓱꓽ ꓥ ꓕ ꓑꓳ ꓗꓪ ꓠꓲꓹ ꓡꓱ ꓠꓯꓹ ꓡꓳ꓾ ꓐꓰ ꓬꓲꓼ ꓠꓬꓲꓸ ꓖꓶ꓿ 2 ꓝꓮꓲ ꓠꓬ ꓮꓽ ꓟ ꓔꓯ ꓥ ꓟꓲ ꓕꓽ ꓪꓻ ꓕꓱ ꓠꓯꓹ ꓟ꓾ ꓢꓲ ꓡꓲ ꓐꓰ ꓔꓬ ꓠꓯꓹ ꓟ꓾ ꓠꓲꓹ ꓟ ꓠꓴꓽ ꓠꓯꓹ ꓟ ꓐꓰ꓾ ꓞꓳ ꓤ ꓮꓽ ꓙꓵ ꓔꓯ ꓠꓲꓹ ꓟ ꓙꓲˍ ꓟ ꓬꓰ ꓟꓳꓸ ꓖꓶ ꓠꓯꓹ ꓟ ꓬꓲ ꓪꓽ ꓔꓯ ꓬꓲꓼ ꓠꓬꓲꓸ ꓖꓶ꓿ 3 ꓮ ꓡꓲꓳ ꓐꓯ ꓠꓬ ꓣꓳꓽ ꓥ ꓟꓲ ꓧꓶꓸ ꓕꓯ ꓠꓬ꓾ ꓞꓳ ꓙꓲꓽ꓾ ꓟꓽ ꓒꓵꓽ ꓛꓳˍ ꓟ꓾ ꓛꓬꓻ ꓡꓰ ꓥꓳꓽ ꓡꓰˍ ꓟ꓾ ꓦꓯꓸ ꓠꓲꓹ ꓙꓵˍ ꓟ ꓐꓰ ꓟꓲ ꓠꓯ ꓗꓹ ꓛꓲ ꓓꓴ ꓬꓲ ꓫꓵꓽ ꓬꓲ ꓙꓰ ꓚꓳ ꓑꓸ ꓬꓰ ꓗꓷꓳ꓿ ꓣꓳꓽ ꓠꓬ ꓟꓽ ꓙꓲ ꓟ ꓐꓰ ꓟꓬ ꓦꓯꓸˍ ꓟ ꓗꓪ ꓞꓳ ꓙꓳ ꓗꓷ ꓢꓲ꓾ ꓢꓴ ꓡꓰ ꓣꓳꓽ ꓔꓯ ꓠꓲꓹ ꓜꓳˍ ꓟ ꓐꓰ꓾ ꓣꓳꓽ ꓛꓳ ꓣꓳꓽˍ ꓟꓲ ꓠꓲꓹ ꓜꓳꓺ ꓡꓯꓽ ꓘꓳ ꓗꓷꓳ꓿ 4 ꓖꓳ ꓡꓱ ꓥ ꓟꓲ ꓪꓴ-ꓢ ꓣꓳꓽ ꓚꓬꓴ ꓢꓲ ꓒꓽ ꓙꓽ ꓗꓳˍ ꓟ ꓐꓰ꓾ ꓬꓲ ꓡꓰ ꓞꓳ ꓤ ꓔꓯ ꓠꓲꓹ ꓠꓵˍ ꓟ ꓠꓲꓹ ꓟ ꓟꓳꓸ ꓖꓶ ꓡ ꓕꓯ꓾ 5 ꓣꓳꓽ ꓚꓲ ꓛꓬ ꓬꓰ ꓗꓷ ꓟ ꓔꓱꓹ ꓜꓳꓽˍ ꓟ ꓟꓬꓱꓽ ꓗꓪ ꓐꓰ ꓟꓽ ꓥ ꓥ꓾ ꓬꓲ ꓫꓱꓸ ꓤ ꓠꓲꓹ ꓔꓯ ꓛꓳ ꓢꓲ꓾ ꓞꓲꓽˍ ꓟ ꓡꓯꓹ ꓟ ꓐꓰ ꓢꓲ-ꓫꓬ-ꓟ-ꓦ ꓡꓰ ꓫꓬꓹ ꓦꓵꓻˍ ꓟ ꓗꓪ ꓐꓰ ꓣꓳꓽ ꓔꓯ ꓢꓯꓼ ꓟꓬ ꓝꓸ ꓖꓶ ꓡꓺꓳ꓿ 6 ꓪꓴ-ꓢ ꓠꓬ ꓬꓰ-ꓢꓴ ꓙꓲ-ꓢꓴ ꓣꓳꓽ ꓚꓬꓴ ꓢꓲ ꓒꓽ ꓗꓪ ꓐꓰ꓾ ꓠꓲꓹ ꓡꓳꓻ ꓡꓳˍ ꓡꓰ ꓣꓳꓽ ꓕꓯ ꓢꓲ ꓗꓪ ꓢꓲ-ꓫꓬ-ꓟ-ꓦ ꓧꓳꓸ ꓖꓶ ꓩꓴ ꓡꓺꓳ꓿ 7 ꓕꓱ ꓟ ꓠꓬ ꓬꓲ ꓣꓱꓽ ꓛꓰ ꓗꓪ ꓐꓰ ꓣꓳꓽ ꓔꓯ ꓔꓱꓹ ꓜꓳꓽˍ ꓟ ꓚꓬꓹ ꓖꓶ ꓡ ꓟ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶˍ ꓟ ꓥꓳ ꓡꓳꓸ ꓓꓴˍ ꓐꓰ꓾ ꓣꓳꓽ ꓔꓯ ꓡꓯꓼ ꓪ ꓟꓶ ꓢꓴ ꓒꓬꓱꓼ ꓡ ꓝꓲ ꓠꓹ ꓟ ꓥ ꓡꓳ꓿ 8 ꓕꓱ ꓟꓬ ꓫꓵꓽ ꓠꓬ ꓦ ꓡꓱ ꓐꓳ ꓓꓻˍ ꓟ ꓐꓯ ꓘꓶꓽ ꓥ ꓢꓲ꓾ ꓪꓴ-ꓢ ꓔꓯ ꓙꓵꓻ ꓗꓷ ꓢꓴ ꓠꓬ ꓙꓲˍ ꓟ ꓟꓬꓱꓽ ꓗꓪ ꓢꓯꓼ ꓕꓵꓼ ꓠꓹ ꓟ꓾ ꓠꓴ ꓡꓰ ꓕꓱ ꓟꓬ ꓫꓵꓽ ꓟ ꓠꓲꓹ ꓪꓴꓽ ꓪꓴꓽˍ ꓡꓰ ꓐꓯ ꓟꓸ ꓖꓶ ꓝꓲ ꓠꓹ ꓟ ꓥꓪ ꓠꓲꓹ ꓫꓵˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓫꓵ ꓠꓽ꓾ ꓙꓲˍ ꓟ ꓐꓰ ꓞꓳ ꓤ ꓐꓱ ꓶ ꓣꓱꓽ ꓬꓯꓼ ꓖꓴ ꓙꓳˍ ꓟ ꓥ ꓡꓳ꓿ 9 ꓖꓳ ꓡꓱ ꓥ ꓟꓲ ꓙꓵꓽ ꓗ ꓔꓯ ꓟꓳꓸ ꓮꓽ ꓔꓳ ꓧꓳ ꓡꓯꓽ ꓘꓳˍ ꓟ꓾ ꓫꓵꓽ ꓚ ꓚˍ ꓟ ꓐꓰ꓾ ꓐꓯ ꓔꓳꓹ ꓡꓯꓽ ꓘꓳˍ ꓟ ꓗꓪ ꓐꓰ ꓧꓹ ꓙꓰ꓿ ꓕꓱ ꓡꓱ ꓫꓵꓽ ꓠꓽ ꓮꓸ ꓫꓵꓽ ꓙꓲ ꓖꓴ ꓟꓽ ꓙꓳ꓿ ꓣꓱꓽ ꓬꓯꓼ ꓖꓴˍ ꓟꓲ ꓟꓽ ꓙꓳ꓿ 10 ꓗꓪꓺ ꓡꓯꓽ ꓘꓳ ꓢꓴ ꓔꓯ ꓠꓬ꓾ ꓕꓲ ꓧꓪꓹ ꓠꓬꓲꓽ ꓧꓪ ꓘꓶꓸ ꓖꓶ ꓗꓷ ꓗꓸ ꓠꓯꓸ ꓟꓽ ꓠ ꓠꓹ ꓡ ꓠꓬ ꓬꓲˍ ꓐꓰ ꓕꓽ ꓙ ꓡꓯꓽ ꓘꓳ꓿ 11 ꓕꓱ ꓡꓱ ꓫꓵ ꓞꓳ ꓤ ꓠꓬ ꓠꓲꓹ ꓟ ꓒꓳꓹ ꓒꓯꓹ ꓡꓰ ꓢꓲ꓾ ꓝꓴꓲ ꓬꓰ ꓓꓳ ꓡ ꓢꓴ ꓥ ꓠꓬꓲ꓾ ꓚꓲ ꓛꓬ ꓔꓯ ꓐꓯ ꓟꓴ ꓞꓶꓹ ꓗꓷ ꓟ ꓣꓳꓽ ꓢꓷꓸˍ ꓡꓳ꓿ 12 ꓥꓪ ꓡꓰ ꓮ-ꓕꓲ-ꓟ ꓔꓯ꓾ ꓥ ꓠꓬ ꓕꓲ-ꓚꓲ-ꓗꓴ ꓔꓯ ꓠꓴ ꓔꓬ ꓗꓪ ꓝꓲꓺ ꓩꓴ ꓡ ꓕꓯ꓾ ꓠꓴ ꓠꓬ ꓠꓲ-ꓘꓳ-ꓒꓳ-ꓡꓲ ꓗꓪ ꓥꓪ ꓔꓯ ꓜꓲꓻ ꓡ ꓠꓹ ꓟ ꓢꓯꓼ ꓕꓵꓼ꓿ ꓮ ꓡꓲꓳ ꓐꓯ ꓠꓬ ꓥꓪ ꓖꓳ ꓗꓪ ꓙꓬ ꓝꓲꓸ ꓗꓳꓸ ꓠ ꓟ ꓚꓴꓽ ꓬꓲꓹ ꓓꓶꓽ ꓗꓷꓳ꓿ 13 ꓙꓵꓽ ꓗ ꓒꓽ ꓤꓰ-ꓠ ꓐꓰ ꓬꓹ-ꓑꓳ-ꓡꓳ ꓓꓴꓻ ꓓꓳˍ ꓟ ꓗꓪ ꓮꓸ ꓫꓵ ꓟꓽ ꓡꓳꓼ ꓟꓽ ꓗꓷ ꓡꓰ ꓠ ꓟ꓾ ꓬꓲ ꓪꓽ ꓔꓯ ꓬꓲ ꓜꓶ ꓬꓰ ꓙ꓿ 14 ꓝꓮꓲ ꓣꓳꓽ ꓬꓲꓼ ꓤ ꓠꓬꓲ ꓤ ꓐꓴ ꓠꓬ ꓬꓲ ꓢꓶ ꓟꓽ ꓓꓱꓼ ꓓꓱ ꓮꓽ ꓔꓳ ꓞꓳ ꓙꓳˍ ꓟ ꓟꓽ ꓗꓷ ꓡꓰ ꓡꓰ꓾ ꓣꓱꓽ ꓬꓯꓼˍ ꓟ ꓮꓽ ꓙꓵ ꓗꓪ ꓐꓲꓺ ꓡꓰ ꓠꓹ ꓟ꓾ ꓙꓲˍ ꓟ ꓟꓬꓱꓽ ꓮꓽ ꓟꓬꓹ ꓬꓰ ꓗꓴꓸ ꓡꓰ ꓝꓲ꓿ 15 ꓥꓪˍ ꓐꓰ ꓔꓬ ꓢꓴ ꓮꓽ ꓙꓵ ꓡꓰ ꓠꓴ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ ꓙꓵꓻ ꓠꓲꓹ ꓗꓪ ꓣꓳꓽ ꓔꓯ ꓠꓲꓹ ꓠꓵ ꓢꓴ ꓐꓴ ꓔꓯ ꓒꓵꓽ ꓗ ꓬꓰ ꓖꓶ ꓙ꓿ ꓣꓱꓽ ꓛꓰ ꓠꓬ ꓠꓴ ꓪꓽ ꓮꓽ ꓙꓵ ꓢꓴˍ ꓐꓰ ꓕꓲ ꓪꓺꓼ ꓙꓳ ꓝꓲ꓿

ꓒꓲ-ꓡꓲ-ꓟꓷ 1

1 ꓙꓲ-ꓢꓴ ꓬꓰ-ꓢꓴ ꓐꓱ ꓶ ꓐꓱ ꓞꓹ ꓢꓴ ꓒꓳ-ꓡꓳ ꓥꓪˍ ꓐꓰ ꓣꓳꓽ ꓠꓬꓲ ꓤ ꓕꓲ-ꓟꓳ-ꓕꓲ-ꓪꓴ ꓡꓰ꓾ ꓥꓪ ꓠꓴꓽ ꓠꓲꓹ ꓠꓵˍ ꓟ ꓟꓬꓱꓽ ꓬꓰ ꓛꓳꓽ ꓒꓯꓹ ꓒꓲ-ꓡꓲ-ꓟꓷˍ ꓐꓰ꓾ 2 ꓮꓸ ꓝꓲ ꓬ-ꓒꓲ-ꓬꓼˍ ꓐꓰ ꓣꓳꓽ ꓟꓯꓼ ꓬꓰ ꓛꓳꓽ ꓒꓯꓹ ꓬ-ꓚꓲ-ꓑꓴˍ ꓐꓰ ꓠꓴ ꓦꓲ ꓗꓪ ꓜꓲꓼ ꓡꓯꓼ ꓘꓳˍ ꓟ ꓘꓴ ꓜꓲ ꓞꓳ ꓔꓯ ꓕꓳ ꓶ ꓡꓯꓼ ꓫꓴ ꓐꓳꓺ ꓖꓶ ꓩꓴ ꓡ ꓥꓳ꓿ 3 ꓣꓳꓽ ꓐꓹ ꓐ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶꓻ ꓝꓲ꓿ 4 ꓥꓪ ꓠꓬ ꓪꓴ-ꓢ ꓔꓯ ꓮ ꓕꓯꓽˍ ꓟꓲ ꓫꓸ ꓟꓳ ꓢꓲ꓾ ꓥꓪ ꓪꓽ ꓘꓴˍ ꓟ ꓗꓪ ꓠꓴ ꓟꓬꓱ ꓞꓶꓻ ꓔꓬ ꓥꓳ꓿ 5 ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓢꓲ ꓒꓽ ꓬꓰ-ꓢꓴ ꓐꓱ ꓶ ꓠꓵ ꓠꓲꓹˍ ꓐꓰ ꓙꓵꓻ ꓠꓲꓹ ꓙꓳˍ ꓟ ꓐꓰ꓾ ꓢꓲ ꓚꓰꓸ ꓔ ꓢꓴ ꓐꓴ ꓮꓽ ꓙꓵ ꓐꓱ ꓶ ꓠꓵ ꓠꓲꓹ ꓙꓳˍ ꓟ ꓥꓪ ꓑ ꓙꓽ ꓗꓷꓳ꓿ 6 ꓠꓴ ꓙꓳˍ ꓟ ꓙꓵꓻ ꓠꓲꓹ ꓢꓴ ꓔꓯ ꓐꓱꓻ ꓖꓶˍ ꓟ ꓗꓪ ꓐꓰ꓾ ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓣꓳꓽ ꓙꓳˍ ꓟ ꓙꓲˍ ꓟ ꓡꓯꓼ ꓫꓴ ꓮꓽ ꓙꓵ ꓔꓯ ꓠꓴ ꓟꓬꓽ ꓠꓬꓲ ꓙꓽ ꓜꓲꓼ ꓡꓰ ꓠꓹ ꓟ ꓠꓴ ꓐꓱ ꓶ ꓥꓪ ꓪꓽ ꓘꓴˍ ꓡꓳ꓿ 7 ꓠꓬꓲ ꓤꓽꓳ꓾ ꓠꓴ ꓗꓪ ꓐꓰ ꓢꓲ ꓚꓰꓸ ꓔ ꓢꓴ ꓐꓴ ꓠꓲꓹ ꓟ ꓔꓯ ꓡꓱꓻ ꓔꓴ ꓡ ꓝꓲˍ ꓠꓬꓲ꓾ ꓠꓴ ꓠꓵꓻ ꓠꓲꓹ ꓑꓶꓸ ꓓꓴ ꓥꓪˍ ꓟꓲ ꓗꓹ ꓛꓲ ꓓꓴˍ ꓐꓰ ꓠꓲꓹ ꓗꓴꓺ ꓓꓴ ꓮꓽ ꓟꓬꓹ ꓟꓶ ꓗꓷꓳ꓿ 8 ꓖꓳ ꓡꓱ ꓠꓬꓲ ꓙꓲ-ꓢꓴ ꓠꓯꓸꓼ ꓗꓪ ꓥꓪ ꓮꓽ ꓘꓶ ꓠꓲꓹ ꓪꓴꓽ ꓢꓲ꓾ ꓬꓰ ꓙꓲꓽ ꓙꓳˍ ꓡꓳ ꓫꓵꓽ ꓬꓰ ꓝꓲ ꓠꓹ ꓟ ꓥꓪ ꓡꓰ ꓠꓴ ꓔꓯ ꓕꓵꓼ ꓪ ꓖꓶ ꓐ ꓡ ꓥ ꓟꓲ꓾ 9 ꓙꓲ-ꓢꓴ ꓬꓰ-ꓢꓴ ꓐꓱ ꓶ ꓐꓱꓺ ꓔ ꓟ ꓞꓳ ꓟꓳꓽ ꓒꓳ-ꓡꓳ ꓥꓪ ꓠꓬ ꓕꓵꓼ ꓪ ꓖꓶˍ ꓟ ꓟꓽ ꓥ ꓥ꓾ ꓠꓵꓻ ꓠꓲꓹ ꓗꓪ ꓐꓰ ꓠꓴ ꓔꓯ ꓕꓲ ꓫꓵꓽ ꓓꓰꓽ ꓠꓲ ꓫꓵˍ ꓡꓳ꓿ 10 ꓥꓪ ꓔꓯ ꓞꓳꓹ ꓞꓹ ꓕꓯ ꓙꓵꓻ ꓠꓲꓹ ꓗꓪ ꓦꓵꓻ ꓟꓶˍ ꓟ ꓥꓪ ꓤꓽ ꓳ-ꓠꓲ-ꓫꓲ-ꓟꓴ ꓐꓱ ꓶ ꓠꓴ ꓔꓯ ꓓꓰꓽˍ ꓥꓳ꓿ 11 ꓧꓶꓸ ꓕꓯ ꓬꓲ ꓠꓬ ꓠꓴ ꓐꓱ ꓶ ꓙꓲꓻ ꓖꓴ ꓟꓽ ꓙꓳˍ ꓟꓲ꓾ ꓮ ꓟꓶ ꓠꓽ ꓠꓴ ꓐꓱ ꓶˍ ꓟꓲ ꓥꓪ ꓐꓱ ꓶˍ ꓟꓲ ꓙꓲꓻ ꓖꓴ ꓙꓳˍ ꓟ ꓒꓬꓱꓼ ꓡꓺꓳ꓿ 12 ꓥꓪ ꓡꓰ ꓬꓲ ꓔꓯ ꓠꓴ ꓔꓬ ꓗꓪ ꓬꓲꓼ ꓡ ꓝꓲˍ ꓕꓯ꓾ ꓥꓪ ꓠꓲꓹ ꓟˍ ꓟꓲ ꓬꓲ ꓔꓯ ꓛꓳ ꓞꓹ ꓟ ꓥ ꓡꓳ꓿ 13 ꓶꓼ ꓓꓳꓽ ꓫꓱꓹ ꓓꓳ ꓑꓶꓸ ꓓꓴ ꓐꓱꓺ ꓞꓹ ꓟ ꓗꓪ꓾ ꓠꓴꓻ ꓬꓲ ꓛꓲꓺ ꓥꓪ ꓔꓯ ꓣꓱꓽ ꓙ ꓠ ꓟ꓾ ꓬꓲ ꓔꓯ ꓥꓪˍ ꓐꓰ ꓕꓲ ꓪꓺꓼ ꓔꓺ ꓔꓬ ꓝꓲ ꓠꓲꓹ ꓫꓵˍ ꓡꓳ ꓫꓵꓽ ꓥ ꓡꓳ꓿ 14 ꓖꓳ ꓡꓱ ꓥ ꓟꓲ ꓠꓴ ꓮ ꓡꓲ ꓓꓵꓽ ꓙˍ ꓟ ꓥꓪ ꓟꓽ ꓢꓷꓸ ꓠꓬꓲ꓾ ꓥꓪ ꓖꓳ ꓡꓱ ꓬꓰ ꓠꓲꓹ ꓟꓽ ꓫꓵ꓿ ꓕꓱ ꓟ ꓠꓬ ꓠꓴ ꓙꓲˍ ꓟ ꓬꓰˍ ꓟ ꓠꓽ ꓟꓽ ꓓ ꓟꓽ ꓞ ꓟꓽ ꓥ ꓥ꓾ ꓠꓴ ꓚꓲ ꓛꓬ ꓬꓰ ꓠꓲꓹ ꓫꓵˍ ꓟ ꓗꓪ ꓐꓰ ꓬꓰˍ ꓟ ꓒꓬꓱꓼ ꓡ ꓝꓲ ꓠꓹ ꓟ ꓥ ꓡꓳ꓿ 15 ꓬꓲ ꓠꓴˍ ꓐꓰ ꓕꓲ ꓑꓹ ꓤ ꓧꓹ ꓡꓯꓽ ꓘꓳ ꓠ ꓗꓷ ꓡꓰ ꓟ ꓠꓬ꓾ ꓝꓮꓲ ꓠꓴˍ ꓐꓰ ꓕꓲꓽ ꓤꓶꓻ ꓡꓱꓸꓼ ꓬꓲꓼ ꓤ ꓠꓬꓲ ꓤˍ ꓡꓰ ꓐꓰ ꓔꓬ ꓟꓶ ꓠꓹ ꓟ ꓥˍ ꓟꓽ ꓢꓷꓸ꓿ 16 ꓕꓱ ꓡꓱ ꓖꓳ ꓑꓳ ꓬꓲꓸ ꓠꓽ ꓠꓴ ꓚꓳ ꓑꓸ ꓟꓽ ꓥ ꓥ꓾ ꓚꓳ ꓑꓸ ꓢꓶꓸ ꓟꓽ ꓞꓲ ꓒꓵꓽˍ ꓟ ꓠꓲꓹ ꓠꓵˍ ꓟ ꓠꓬꓲ ꓤ ꓕꓲ ꓣꓳ ꓬꓰ ꓠꓹ ꓟ ꓥ ꓡꓳ꓿ ꓬꓲ ꓠꓬ ꓥꓪ ꓔꓯꓸ ꓟꓳꓸ ꓚꓵ ꓚꓵ ꓕꓱ ꓡꓱ ꓥꓳ꓿ ꓠꓴ ꓔꓯꓸ ꓟꓳꓸ ꓠꓽ꓾ ꓧꓪꓽ ꓖꓳ ꓓꓱꓽ ꓗꓪˍ ꓟꓲ꓾ ꓢꓲ ꓒꓽ ꓠꓯꓸꓼ ꓗꓪˍ ꓟꓲ꓾ ꓪꓻ ꓜꓲ ꓕꓱ ꓡꓱ ꓥꓳ꓾ ꓟꓽ ꓥ ꓡ? 17 ꓖꓳ ꓡꓱ ꓠꓬꓲ ꓠꓴ ꓥꓪ ꓔꓯ ꓟꓬꓱꓽ ꓬꓰ ꓛꓳꓽ ꓒꓯꓹ ꓚꓬꓹ ꓔ ꓕꓯ ꓠꓽ꓾ ꓥꓪ ꓔꓯ ꓘꓳꓻ ꓣꓴˍ ꓟ ꓡꓰ ꓐꓰ ꓬꓲ ꓔꓯˍ ꓟꓲ ꓘꓳꓻ ꓣꓴ ꓖꓶ꓿ 18 ꓠꓴ ꓔꓯ ꓬꓲ ꓮꓸ ꓫꓵ ꓛꓬꓻ ꓗꓷ ꓠꓬ꓾ ꓥ ꓠꓬ ꓠꓴ ꓔꓯ ꓮꓸ ꓫꓵ ꓐꓵ ꓞꓹ ꓠꓬ꓾ ꓥꓪ ꓡꓰ ꓠꓴ ꓔꓯ ꓐꓵ ꓞꓹ ꓟ ꓚꓬꓹ ꓔ꓿ 19 ꓥꓪ ꓡꓰ ꓚꓱꓹ ꓖꓶꓽ ꓡꓲꓸ ꓖꓶ ꓓꓴ ꓥꓳ꓿ ꓕꓱ ꓟ ꓠꓬ ꓒꓳ-ꓡꓳ ꓥꓪ ꓚꓲ ꓛꓬ ꓡꓯꓼ ꓒꓯꓹ ꓡꓰ ꓐꓳˍ ꓟ ꓥ ꓡꓳ꓿ ꓠꓴ ꓚꓲ ꓛꓬ ꓖꓳ ꓓꓱꓽˍ ꓟꓲ ꓥꓪ ꓔꓯ ꓐꓵ ꓞꓹ ꓟ ꓕꓱ ꓟ ꓠꓴ ꓢꓷꓸˍ ꓠꓬꓲ꓾ ꓕꓱ ꓟ ꓔꓯ ꓟꓳꓸ ꓥꓪ ꓮꓸ ꓫꓵ ꓐꓯ ꓟꓽ ꓛꓵꓳ꓿ 20 ꓥꓳ꓾ ꓠꓬꓲ ꓤꓽꓳ꓾ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓥꓪ ꓔꓯ ꓗꓹ ꓛꓲ ꓡꓰ ꓝꓲ ꓡꓯ꓿ ꓙꓲ-ꓢꓴ ꓠꓯꓸꓼ ꓗꓪ ꓥꓪ ꓠꓲꓹ ꓟ ꓔꓯ ꓢꓰꓺ ꓡꓰ ꓝꓲ ꓡꓯ꓿ 21 ꓠꓴ ꓓꓽ ꓔꓳꓹˍ ꓥꓳ꓾ ꓐꓰ ꓥꓪ ꓦ ꓡꓱ ꓐꓳˍ ꓠꓬꓲ꓾ ꓠꓴ ꓔꓯ ꓕꓱ ꓡꓱ ꓐꓳꓺ ꓖꓶ ꓩꓴ ꓡ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓡꓰ ꓓꓰꓽ ꓩꓴ ꓡ ꓟ ꓕꓯꓽ ꓢꓲˍ ꓟꓲ ꓠꓴ ꓬꓰˍ ꓥꓳ꓾ ꓐꓰ ꓥꓪ ꓢꓷˍ ꓡꓳ꓿ 22 ꓥꓪ ꓐꓱ ꓶˍ ꓟꓲ ꓔꓬ ꓖꓴ ꓙꓽ ꓖꓶ ꓔ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓪꓽ ꓘꓴˍ ꓟ ꓗꓪ ꓐꓰ ꓥꓪ ꓠꓬ ꓩꓴꓺ ꓗꓷ ꓟꓶ ꓢꓲ꓾ ꓠꓴ ꓪꓽ ꓔꓬ ꓗꓪ ꓛꓲ ꓡ ꓠꓹ ꓟ ꓥꓳ ꓡꓳꓸ ꓔꓬ ꓡꓳ꓿ 23 ꓙꓲ-ꓢꓴ ꓬꓰ-ꓢꓴ ꓑꓶꓸ ꓓꓴ ꓐꓱꓺ ꓔꓸ ꓢꓴ ꓥꓪ ꓛꓳꓽ ꓒꓯꓹ ꓬꓲ-ꓑ-ꓩꓴ ꓡꓰ ꓠꓴ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ 24 ꓥꓪ ꓟꓬꓱꓽ ꓬꓰ ꓛꓳꓽ ꓒꓯꓹ ꓟ-ꓘꓳ꓾ ꓬ-ꓡꓲ-ꓓ-ꓗꓴ꓾ ꓓꓲ-ꓟ ꓐꓰ ꓡꓴ-ꓘˍ ꓟꓲ ꓠꓴ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ 25 ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓣꓱꓽ ꓛꓰ ꓠꓬ ꓠꓴ ꓪꓽ ꓦˍ ꓐꓰ ꓕꓲ ꓪꓻꓼ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓦꓲ-ꓐꓱ-ꓣꓴ 1

1 ꓮꓽ ꓠꓱ ꓕꓯ ꓪꓴ-ꓢ ꓡꓰ ꓒꓵꓽ ꓒ ꓐꓴ ꓔꓯ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓗꓪ ꓐꓰ ꓮꓽ ꓟꓬꓹ ꓧꓪꓹ ꓮꓽ ꓟꓬꓹ ꓚꓱꓹ ꓣꓱꓽ ꓢꓲ ꓫꓸ ꓕꓱ ꓗꓷꓳ꓿ 2 ꓖꓳ ꓡꓱ ꓥ ꓟꓲ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓕꓱ ꓟ ꓗꓪ ꓠꓬ ꓬꓲ ꓤ ꓗꓪ ꓐꓰ ꓫꓸ ꓕꓱ ꓩꓴ ꓡꓺꓳ꓿ ꓟꓴꓽ ꓗꓪ ꓟꓲ ꓠꓯˍ ꓐꓰ ꓖꓳ ꓗꓪ ꓙꓳˍ ꓟ ꓥ ꓕ ꓑꓳꓸ ꓠꓬ ꓬꓲ ꓗꓪ ꓐꓰ ꓚꓰꓼ ꓔ ꓟ ꓥ ꓢꓲ꓾ ꓙꓳˍ ꓟ ꓥ ꓕ ꓑꓳꓸ ꓠꓬ ꓬꓲ ꓡꓯꓼ ꓪ ꓬꓰ ꓠꓹ ꓟ ꓪꓴ-ꓢ ꓡꓰ ꓬꓲ ꓔꓯ ꓡꓯꓼ ꓙꓱ ꓗꓷꓳ꓿ 3 ꓬꓲ ꓠꓬ ꓪꓴ-ꓢ ꓐꓬꓱ ꓡꓱꓼ ꓡꓱ ꓟ ꓣꓳꓺ ꓓꓳ ꓡ ꓓꓴ ꓥ ꓢꓲ꓾ ꓪꓴ-ꓢ ꓒꓬꓱꓽ ꓬꓲ ꓚꓵ ꓥ ꓢꓲ ꓠꓬꓲ꓾ ꓬꓲ ꓪꓽ ꓠꓬꓲˍ ꓟ ꓐꓯ ꓘꓶ ꓡꓰ ꓙꓳˍ ꓟ ꓥ ꓕ ꓑꓳ ꓔꓯ ꓔꓳꓹ ꓔ ꓖꓶ ꓔꓬ ꓟ ꓥ ꓡꓳ꓿ ꓬꓲ ꓡꓰ ꓝꓴꓲ ꓔꓯ ꓞꓲꓽ ꓫꓬ ꓡꓰˍ ꓟ ꓟꓬꓱꓽ ꓬꓰ ꓗꓷ ꓠꓬ꓾ ꓟꓴ ꓡꓳꓹ ꓗꓪ ꓗꓴ ꓙꓳ ꓢꓴ ꓪ ꓔꓲ ꓬꓲꓸ ꓡꓯꓼ ꓙ ꓗꓪ ꓠꓬꓲꓸ ꓠꓸ ꓡꓰꓳ꓿ 4 ꓬꓲ ꓠꓬ ꓟꓴꓽ ꓗꓪ ꓝꓲ ꓓꓴ ꓐꓴ ꓕꓯ ꓢꓲ ꓮꓽ ꓘꓶ ꓙꓲˍ ꓟ ꓒꓬꓱꓼ ꓡ ꓟ ꓡꓰ ꓐꓰ꓾ ꓬꓲ ꓪꓽ ꓟꓬꓱꓺ ꓕꓯꓽ ꓢꓲ ꓒꓵꓽˍ ꓟ ꓟꓬꓱꓺ ꓕꓲꓽ ꓟꓬꓱˍ ꓟꓲ ꓟꓶ ꓡꓰꓳ꓿ 5 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓟꓴꓽ ꓗꓪ ꓝꓲ ꓓꓴ ꓮ ꓡꓲ ꓕꓲ ꓣꓳ ꓟ ꓔꓯ꓾ ꓠꓴ ꓠꓬ ꓥꓪ ꓮꓺ ꓐꓲ ꓥ ꓡꓳ꓾ ꓠꓬꓲꓸ ꓠꓬꓲ ꓥꓪ ꓡꓰ ꓠꓴ ꓔꓯ ꓦꓵꓻ ꓗꓷꓳ꓾ ꓐꓰ ꓐꓯ ꓠꓬꓲˍ ꓡ? ꓝꓮꓲ꓾ ꓥꓪ ꓠꓬ ꓬꓲ ꓐꓹ ꓐ ꓬꓰ ꓢꓲ꓾ ꓬꓲ ꓠꓬ ꓥꓪ ꓮꓸ ꓐꓲ ꓬꓰˍ ꓥꓳ꓾ ꓐꓰ ꓮ ꓕꓯꓽ ꓐꓯ ꓠꓬꓲˍ ꓡ? 6 ꓪꓴ-ꓢ ꓠꓬ ꓬꓲ ꓤ ꓪꓴꓽ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡ ꓐꓰ ꓬꓰˍ ꓕꓯ꓾ ꓪꓴ-ꓢ ꓬꓲ ꓟꓴꓽ ꓗꓪ ꓝꓲ ꓓꓴ ꓐꓴ ꓮꓽ ꓙꓵ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓝꓲ꓾ ꓐꓯˍ ꓡꓳ꓿ 7 ꓝꓮꓲ ꓟꓴꓽ ꓗꓪ ꓝꓲ ꓓꓴ ꓐꓴ ꓔꓯꓸ ꓟꓳꓸ ꓪꓴ-ꓢ ꓡꓰ꓾ ꓬꓲ ꓝꓲ ꓓꓴ ꓐꓴ ꓔꓯ ꓪꓽ ꓠꓬꓲˍ ꓟ ꓟꓲꓽ ꓦꓲ ꓒꓬꓱꓼ ꓡ ꓝꓲ ꓢꓲ꓾ ꓬꓲ ꓔꓯ ꓣꓱꓽ ꓙ ꓢꓴ ꓐꓴ ꓔꓯ ꓮꓸ ꓔꓳꓸ ꓡꓺ ꓡꓱ ꓒꓬꓱꓼ ꓡ ꓝꓲˍ ꓡꓳ꓾ ꓐꓯˍ ꓡꓳ꓿ 8 ꓖꓳ ꓡꓱ ꓥ ꓟꓲ ꓮꓸ ꓐꓲ ꓔꓯ ꓠꓽ ꓪꓴ-ꓢ ꓡꓰ꓾ ꓪꓴ-ꓢꓺꓳ꓾ ꓠꓴ ꓙꓵꓽ ꓠꓬꓲꓸ ꓕꓲ ꓠꓬ ꓕꓲ ꓞꓲꓼ ꓕꓲ ꓑ ꓓꓹ ꓥꓳ꓿ ꓠꓴ ꓠꓬ ꓔꓱꓹ ꓜꓳꓽˍ ꓟ ꓙꓵꓽ ꓓ ꓡꓰ ꓠꓴ ꓗꓴꓷꓼ ꓔꓯ ꓙꓵꓽˍ ꓥꓳ꓿ 9 ꓠꓴ ꓠꓬ ꓔꓱꓹ ꓜꓳꓽˍ ꓟ ꓔꓯ ꓠꓲꓹ ꓠꓵ ꓢꓲ꓾ ꓟꓽ ꓔꓱꓹ ꓟꓽ ꓜꓳꓽ ꓟ ꓔꓯ ꓠꓲꓹ ꓜꓳˍ ꓡꓳ꓿ ꓖꓳ ꓡꓱ ꓠꓬꓲ ꓪꓴ-ꓢ꓾ ꓠꓴ ꓪꓴ-ꓢ ꓠꓬ ꓠꓲꓹ ꓒꓴˍ ꓟ ꓟꓰ ꓞꓶꓻ ꓡꓰ ꓠꓴ ꓛꓳꓽ ꓒꓯꓹ ꓐꓴ ꓔꓯ ꓟꓰ ꓖꓶˍ ꓟ ꓢꓶꓸ ꓟꓽ ꓞꓲ ꓠꓴ ꓔꓯ ꓟꓰ ꓖꓶ ꓗꓷꓳ꓾ ꓐꓯˍ ꓡꓳ꓿ 10 ꓝꓮꓲ ꓪꓴ-ꓢ ꓡꓰ꓾ ꓢꓲ ꓒꓽꓳ꓾ ꓬꓲ ꓚꓰ ꓬꓲ ꓪꓴꓸ ꓗꓪ ꓠꓴ ꓡꓰ ꓟꓲ ꓠꓯ ꓬꓲ ꓚꓰ ꓜꓶˍ ꓡꓳ꓿ ꓟꓴꓽ ꓗꓪˍ ꓟꓲ ꓠꓴ ꓡꓯꓼ ꓟꓬꓱꓽ ꓥ ꓡꓳ꓿ 11 ꓟꓴꓽ ꓗꓪ ꓟꓲ ꓠꓯ ꓠꓬ ꓟꓶꓽ ꓬꓰˍ ꓥꓳ꓿ ꓠꓴ ꓠꓽ ꓮ ꓕꓯꓽˍ ꓟꓲ ꓙꓳ ꓔꓬ ꓥꓳ꓿ ꓟꓴꓽ ꓗꓪ ꓟꓲ ꓠꓯ ꓠꓬ ꓐꓵꓻ ꓞꓶꓽˍ ꓡꓰ ꓐꓰ ꓐꓰꓽ ꓡꓰˍ ꓥꓳ꓿ 12 ꓟꓴꓽ ꓗꓪ ꓟꓲ ꓠꓯ ꓔꓯ ꓠꓬ ꓠꓴ ꓡꓰ ꓐꓵ ꓞꓶꓽ ꓐꓽ ꓢꓽˍ ꓡꓰ ꓐꓰ ꓓꓱꓺ ꓗꓷˍ ꓥꓳ꓿ ꓐꓵ ꓞꓶꓽˍ ꓡꓰ ꓐꓰ ꓡꓶꓸ ꓗꓷˍ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓠꓽ ꓕꓲ ꓡꓰꓹꓼ ꓥꓳ꓾ ꓠꓴ ꓤꓶꓺˍ ꓟꓲ ꓟꓽ ꓖꓴ ꓡꓰ꓾ ꓐꓯˍ ꓡꓳ꓿ 13 ꓖꓳ ꓡꓱ ꓥ ꓟꓲ ꓟꓴꓽ ꓗꓪ ꓝꓲ ꓓꓴ ꓮ ꓡꓲ ꓕꓲ ꓣꓳ ꓟ ꓔꓯ꓾ ꓠꓴˍ ꓐꓰ ꓛꓴꓽ ꓙꓳ ꓡꓯꓽ ꓘꓳ ꓢꓴ ꓐꓴ ꓔꓯ꓾ ꓥꓪ ꓡꓰ ꓠꓴ ꓛꓲ ꓕꓳꓼ ꓕꓲꓺ ꓟꓽ ꓗꓷ ꓡꓰ ꓝꓲ ꓕ ꓑꓳ꓾ ꓥꓪ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ꓾ ꓐꓰ ꓮ ꓕꓯꓽ ꓐꓯ ꓠꓬꓲˍ ꓡ? 14 ꓖꓳ ꓡꓱ ꓠꓬꓲ ꓟꓴꓽ ꓗꓪ ꓝꓲ ꓓꓴ ꓐꓴ ꓠꓬ꓾ ꓢꓯꓼ ꓟꓬ ꓝꓸ ꓟꓶ ꓠꓯꓹ ꓢꓴ ꓐꓴ ꓔꓯ ꓣꓱꓽ ꓙ ꓝꓲˍ ꓐꓰ ꓝꓲ ꓩꓴ ꓡ ꓟ ꓦꓻ ꓟꓽ ꓥ ꓡ?

ꓦꓲ-ꓐꓱ-ꓣꓴ 2

1 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓟꓽ ꓧꓶꓸ ꓙꓰ ꓠꓹ ꓟ꓾ ꓣꓳꓽ ꓑ ꓙꓽ ꓗꓷ ꓟ ꓟꓸ ꓟꓲ ꓔꓯ ꓬꓲ ꓜꓶꓻ ꓛꓳ ꓠ ꓡꓳꓹ ꓙꓲꓽ ꓙꓳˍ ꓡꓳ꓿ 2 ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓝꓲ ꓓꓴ ꓗꓪ ꓐꓰ ꓐꓯˍ ꓟ ꓐꓯ ꓘꓶ ꓠꓬ ꓡꓶꓸ ꓟꓽ ꓓ ꓟ ꓥ ꓢꓲ꓾ ꓛꓬ ꓗꓷ ꓢꓴˍ ꓐꓰ ꓟꓽ ꓒꓵꓽ ꓛꓳ ꓢꓴ ꓮ ꓡꓲ ꓕꓲ ꓣꓳˍ ꓟꓲ꓾ ꓛꓬꓻ ꓒꓵꓽ ꓮ ꓡꓲ ꓟꓶ ꓙꓲꓽ ꓙꓳˍ ꓠꓬ ꓔꓱꓹ ꓜꓳꓽˍ ꓟ ꓐꓯꓺ ꓟꓴꓺ ꓗꓪ ꓐꓰ ꓖꓳ ꓡꓱ ꓟꓶˍ ꓡꓳ ꓫꓵꓽ ꓥ ꓠꓬꓲ꓾ 3 ꓕꓱ ꓘꓶ ꓛꓲ ꓪꓴꓽˍ ꓟ ꓚꓬꓴ ꓟꓶ ꓚꓱꓹ ꓔꓯ ꓣꓳꓽ ꓟꓳꓻ ꓟꓽ ꓟꓵ ꓕꓯ ꓠꓽ꓾ ꓣꓳꓽ ꓮ ꓡꓲ ꓐꓰ ꓡꓲꓹ ꓙꓰ ꓓ ꓢꓰꓽ? ꓚꓬꓴ ꓟꓶ ꓚꓱꓹ ꓕꓱ ꓟ ꓠꓬ꓾ ꓬꓲ ꓪꓴꓸ ꓕꓯ ꓢꓲ ꓒ ꓬꓲ ꓚꓲ ꓛꓬ ꓡꓰ ꓚ ꓟꓸ ꓖꓶ ꓢꓲ꓾ ꓬꓲ ꓔꓯ ꓑ ꓙꓽ ꓢꓴ ꓐꓴ ꓡꓰ ꓣꓳꓽ ꓔꓯ ꓬꓲ ꓗꓸ ꓚꓵ ꓙꓳ ꓙꓳˍ ꓡꓰꓽ ꓢꓷꓸ ꓕꓶꓻ ꓡꓰ ꓝꓲˍ ꓟ ꓥ ꓡꓳ꓿ 4 ꓪꓴ-ꓢˍ ꓟꓲ ꓬꓲ ꓚꓲ ꓛꓬ ꓠꓲꓹ ꓡꓶꓽ ꓔꓯ ꓛꓳ ꓢꓲ꓾ ꓢꓷꓸ ꓡꓰ ꓓꓴˍ ꓐꓰ ꓓꓵꓽ ꓙꓽ ꓟꓶꓻ ꓓꓴˍ ꓐꓰ꓾ ꓪꓽ ꓠꓬꓲ ꓟ ꓮꓽ ꓟꓬꓹ ꓫꓵ ꓐꓰ ꓢꓲ-ꓫꓬ-ꓟ-ꓦ ꓡꓯꓼ ꓫꓴ ꓮꓽ ꓟꓬꓹ ꓫꓵꓽ ꓗꓪ ꓐꓰ꓾ ꓬꓲ ꓪꓽˍ ꓐꓰ ꓕꓲ ꓛꓳꓺꓼ ꓢꓷꓸ ꓙ ꓟꓳ ꓙ ꓗꓷꓳ꓿ 5 ꓣꓳꓽ ꓐꓯ ꓔꓬ ꓟ ꓡ ꓠꓹ ꓟ ꓟꓲ ꓠꓯ ꓔꓯ ꓠꓬ꓾ ꓪꓴ-ꓢ ꓡꓰ ꓟꓴꓽ ꓗꓪ ꓝꓲ ꓓꓴ ꓐꓴ ꓔꓯ ꓟꓽ ꓙꓵꓽ ꓝꓲ꓿ 6 ꓖꓳ ꓡꓱ ꓥ ꓟꓲ ꓡꓽ ꓞꓳ ꓕꓲ ꓣꓳ ꓢꓷꓸ ꓙ ꓟꓳ ꓙ ꓢꓲ ꓕꓱ ꓡꓱ ꓐꓯˍ ꓟ ꓔꓳꓸ ꓙꓳˍ ꓡꓳ꓾ ꓞꓳ ꓤ ꓮꓸ ꓫꓵ ꓥ ꓠꓬꓲ ꓠꓴ ꓬꓲ ꓔꓯ ꓓꓵꓽ ꓙꓽ ꓛꓲ ꓡ ꓡ? ꓪꓽ ꓤ ꓮꓸ ꓫꓵ ꓥ ꓠꓬꓲ ꓠꓴ ꓬꓲ ꓔꓯ ꓙꓽ ꓗꓳˍ ꓡ? 7 ꓠꓴ ꓡꓰ ꓬꓲ ꓔꓯ ꓕꓲꓽ ꓑꓹ ꓤꓽ ꓟꓴꓽ ꓗꓪ ꓝꓲ ꓓꓴ ꓠꓯꓸ ꓘꓪ ꓣꓳˍ ꓟ ꓒꓬꓱꓼ ꓡ ꓝꓲꓳ꓿ ꓠꓴ ꓠꓬ ꓬꓲ ꓔꓯ ꓟꓬꓱ ꓓꓳꓽˍ ꓐꓰ ꓞꓳ ꓒꓵꓽˍ ꓟ ꓪꓴꓸ ꓛꓴꓽ ꓘꓳꓹ ꓖꓶ ꓢꓲ꓾ 8 ꓠꓴ ꓡꓰ ꓙꓳˍ ꓟ ꓥ ꓕ ꓑꓳ ꓔꓯ ꓬꓲ ꓛꓲ ꓒꓯꓹ ꓠꓯꓸ ꓘꓪ ꓬꓲ ꓙꓵꓽˍ ꓟ ꓔꓯ ꓛꓳ ꓝꓲˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓪꓴ-ꓢ ꓡꓰ ꓙꓳˍ ꓟ ꓥ ꓕ ꓑꓳ ꓬꓲ ꓙꓵꓽˍ ꓟ ꓠꓯꓸ ꓘꓪ ꓗꓷ ꓡꓰ ꓝꓲꓳ꓾ ꓐꓯˍ ꓠꓬꓲ꓾ ꓬꓲ ꓡꓰ ꓙꓵꓽ ꓟꓽ ꓬꓯꓼ ꓟ ꓠꓬ ꓕꓲ ꓫꓵꓽˍ ꓟꓲ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓠꓬ ꓙꓳˍ ꓟ ꓥ ꓕ ꓑꓳ ꓬꓲ ꓙꓵꓽˍ ꓟ ꓔꓯ ꓛꓳˍ ꓟ ꓣꓳꓽ ꓟꓽ ꓟꓳ ꓢꓰꓽ꓿ 9 ꓖꓳ ꓡꓱ ꓥ ꓟꓲ ꓪꓴ-ꓢ ꓬꓲ ꓣꓱꓽ ꓛꓰ ꓗꓪ ꓐꓰ ꓮ ꓡꓲ ꓕꓲ ꓣꓳ ꓐꓱ ꓶ ꓥ ꓟꓲ ꓫꓵꓻ ꓢꓯꓼ ꓢꓳꓽ ꓠꓬꓲ ꓠꓹ ꓟ꓾ ꓟꓴꓽ ꓗꓪ ꓝꓲ ꓓꓴ ꓠꓯꓸ ꓘꓪ ꓕꓲ ꓑꓹ ꓤ ꓣꓳꓺ ꓡꓰ ꓢꓴ꓾ ꓬꓰ-ꓢꓴ ꓔꓯ ꓣꓳꓽ ꓟꓳˍ ꓡꓳ꓿ ꓬꓲ ꓠ ꓫꓸ ꓙꓵ ꓢꓲ ꓫꓵꓻ ꓗꓷ ꓠꓬꓲ꓾ ꓮ ꓟꓶ ꓠꓽ ꓬꓲ ꓔꓯ ꓟꓬꓱ ꓓꓳꓽˍ ꓐꓰ ꓞꓳ ꓒꓵꓽˍ ꓟ ꓪꓴꓸ ꓛꓴ ꓘꓳꓹ ꓖꓶˍ ꓟ ꓟꓶˍ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓙꓳˍ ꓟ ꓥ ꓕ ꓑꓳꓸ ꓔꓯ ꓚꓰꓼ ꓢꓲ ꓙꓳ ꓔꓬ ꓝꓲ ꓢꓴ ꓪꓴ-ꓢ ꓠꓽ꓾ ꓤ ꓐꓴ ꓮꓽ ꓟꓬꓹ ꓣꓳ ꓔꓯ ꓐꓬꓱꓽ ꓡꓱ ꓡꓱꓼ ꓟ ꓗꓪ ꓧꓳꓽ ꓓꓵ ꓡꓰ ꓠꓹ ꓟ꓾ ꓬꓲ ꓪꓽ ꓢꓯꓼ ꓟꓬ ꓝꓸ ꓟꓶ ꓓꓴ ꓙꓻ ꓪꓴꓸ ꓕꓴꓻ ꓢꓴ ꓖꓳ ꓕꓲ ꓣꓳꓽ ꓔꓯ꓾ ꓫꓸ ꓙꓵˍ ꓟ ꓗꓪ ꓐꓰ ꓜꓳꓽ ꓓꓰ ꓡꓰ ꓝꓲˍ ꓟ ꓠꓬ ꓬꓰ ꓙꓲꓽ ꓙꓳˍ ꓟ ꓥ ꓡꓳ꓿ 11 ꓢꓲ ꓚꓰꓸ ꓢꓴˍ ꓐꓰ꓾ ꓢꓲ ꓚꓰꓸ ꓟꓶ ꓡꓰ ꓢꓴ ꓐꓴ ꓬꓲ ꓪꓽ ꓐꓹ ꓐ ꓠꓬ ꓕꓲ ꓣꓳˍ ꓡꓰꓽ ꓥ ꓠꓬꓲ꓾ ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓬꓲ ꓤ ꓠꓬꓲ ꓤ ꓐꓴ꓾ ꓐꓰ ꓘꓴ ꓠꓹ ꓟ ꓟꓽ ꓫꓸ ꓔꓳ꓿ 12 ꓬꓲ ꓡꓰ꓾ ꓠꓴ ꓟꓬꓱꓺ ꓠꓬ ꓥꓪ ꓡꓰ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓔꓯ ꓚ ꓟꓸ ꓖꓶˍ ꓥꓳ꓿ ꓜꓲꓼ ꓓꓴ ꓗꓪ ꓠꓴ ꓔꓯ ꓫꓱꓸ ꓖꓶ ꓓꓴ ꓥꓪ ꓖꓪˍ ꓥꓳ꓾ ꓐꓯˍ ꓡꓳ꓿ 13 ꓝꓮꓲ ꓬꓲ ꓡꓰ꓾ ꓥꓪ ꓠꓬ ꓬꓲ ꓠꓯS ꓗꓪ ꓦ ꓡꓱ ꓖꓴ ꓬꓰˍ ꓥꓳ꓾ ꓐꓯˍ ꓡꓳ꓿ ꓝꓮꓲ ꓠꓱꓸ ꓐꓯ ꓕꓲ ꓖ ꓗꓪ꓾ ꓠꓬꓲ ꓠꓹ꓾ ꓥꓪˍ ꓐꓰ ꓪꓴ-ꓢ ꓡꓰ ꓥꓪ ꓔꓯ ꓖꓶ ꓡ ꓟ ꓤ ꓠꓱ ꓐꓴ ꓠꓬ ꓕꓻˍ ꓔꓬ ꓥꓳ꓾ ꓐꓰ ꓐꓯ ꓔ ꓡꓳ꓿ 14 ꓬꓲ ꓐꓯ ꓔꓬ ꓟ ꓤ ꓠꓱ ꓐꓴ ꓠꓽ ꓫꓵꓽ ꓙꓳ ꓧꓪꓽ ꓙꓳ ꓢꓴ ꓥ ꓠꓬꓲ꓾ ꓬꓰ-ꓢꓴ ꓬꓲ ꓚꓲ ꓛꓬˍ ꓟꓲ ꓖꓳ ꓟ ꓡꓰ ꓐꓰ ꓫꓵꓽ ꓙꓳ ꓧꓪꓽ ꓙꓳ ꓢꓴ ꓒꓬꓱꓼ ꓡꓺꓳ꓿ ꓕꓱ ꓟ ꓠꓬ ꓬꓲ ꓫꓵꓻ ꓟ ꓗꓪ ꓐꓰ꓾ ꓫꓵꓻˍ ꓟ ꓔꓯ ꓙꓵꓽ ꓪꓽ ꓠꓬꓲ ꓢꓴ ꓢ-ꓓꓯꓼ ꓬꓲ ꓪꓽ ꓠꓬꓲˍ ꓟ ꓔꓯ ꓐꓬ ꓡꓰ ꓝꓲ ꓠꓹ ꓟ ꓥ ꓡꓳ꓿ 15 ꓝꓮꓲ ꓠꓬ ꓕꓲꓽ ꓤꓶꓻ ꓡꓱꓸꓼ ꓫꓵˍ ꓟ ꓔꓯ ꓙꓳꓺˍ ꓟ ꓗꓪ ꓚꓳ ꓑꓸ ꓬꓰ ꓔꓬ ꓢꓴ ꓮꓽ ꓙꓵ ꓔꓯˍ ꓟꓲ ꓩꓴ ꓗꓷ ꓟꓶ ꓠꓹ ꓟ ꓥ ꓡꓳ꓿ 16 ꓬꓲ ꓠꓽ ꓟꓴꓽ ꓗꓪ ꓝꓲ ꓓꓴ ꓐꓴ ꓔꓯ ꓬꓰ ꓙˍ ꓟ ꓟꓽ ꓥ꓿ ꓮ-ꓐ-ꓡ-ꓦ ꓞꓲ ꓤ ꓡꓯꓹ ꓤ ꓔꓯ ꓬꓰ ꓙˍ ꓟ ꓥ ꓟ ꓫꓬꓽ ꓫꓬꓽˍ ꓡꓰꓽ ꓟꓳꓻ ꓞꓹ ꓡꓳ꓿ 17 ꓖꓳ ꓡꓱ ꓠꓬꓲ ꓑ ꓫꓬꓼ ꓐꓴ ꓝꓴꓲ ꓑꓶꓸ ꓓꓴ ꓦꓶꓻ ꓠꓽ ꓡꓰˍ ꓟ ꓔꓲ ꓓꓴ ꓬꓰ ꓠꓹ ꓟ ꓐꓰ꓾ ꓪꓴ-ꓢ ꓟꓲꓽ ꓙꓬ ꓗꓪ ꓫꓱꓸ ꓤ ꓗꓴˍ ꓟ ꓐꓰ ꓦ ꓡꓱ ꓐꓳˍ ꓟ ꓔꓲ ꓒ ꓓꓽ ꓟ ꓒꓬꓱꓼ ꓡ ꓠꓹ ꓟ꓾ ꓬꓰ-ꓢꓴ ꓠꓬ ꓮꓸ ꓫꓵ ꓗꓪˍ ꓟꓲ ꓬꓲ ꓬꓲꓼ ꓬꓲ ꓠꓬꓲ ꓐꓴˍ ꓡꓰ ꓐꓰ ꓒꓬꓱꓼ ꓡ ꓠ ꓗꓷ ꓡꓰꓳ꓿ 18 ꓮ ꓡꓲꓳ ꓐꓯ ꓠꓬ ꓬꓲ ꓚꓲ ꓛꓬˍ ꓟꓲ ꓫꓵꓽ ꓠꓬꓲ ꓤꓹ ꓠꓬꓲ ꓟꓶˍ ꓟ ꓗꓪ ꓫꓸ ꓙꓵ ꓗꓷ ꓠꓬꓲ꓾ ꓫꓵꓽ ꓠꓬꓲˍ ꓟ ꓔꓳꓹ ꓜꓳꓽ ꓢꓴ ꓐꓴ ꓔꓯ ꓬꓲ ꓬꓰ ꓙ ꓐ ꓡ ꓡꓳ꓿

ꓦꓲ-ꓐꓱ-ꓣꓴ 3

1 ꓖꓳ ꓡꓱ ꓠꓬꓲ ꓟꓴꓽ ꓗꓪ ꓗꓪ ꓐꓰ ꓘꓴˍ ꓟ ꓣꓱꓽ ꓛꓰ ꓑꓯꓹ ꓟꓶ ꓢꓴ꓾ ꓢꓲ ꓚꓰꓸ ꓔ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ ꓣꓷꓠꓸ ꓔꓬ ꓟ ꓙꓵꓻ ꓚꓱꓹ ꓗꓪ ꓟ ꓝꓲ ꓓꓴˍ ꓐꓰ ꓔꓲ ꓒ ꓓꓽ ꓟ ꓬꓰ-ꓢꓴ ꓙꓲ-ꓢꓴ ꓔꓯ ꓓꓵꓽ ꓙꓽ ꓠꓬꓲ꓿ 2 ꓟꓳ-ꓫꓲ ꓠꓬ ꓪꓴ-ꓢ ꓦꓲ ꓕꓲ ꓦꓲ ꓡꓱꓸꓼ ꓗꓪ ꓦ ꓡꓱ ꓐꓳˍ ꓟ ꓡꓰ ꓐꓰ꓾ ꓬꓰ-ꓢꓴˍ ꓟꓲ ꓬꓲ ꓔꓯ ꓝꓲ ꓢꓴ ꓔꓯꓸ ꓟꓳꓸ ꓦ ꓡꓱ ꓐꓳˍ ꓡꓳ꓿ 3 ꓦꓲ ꓫꓬꓹ ꓒ ꓠꓬ ꓦꓲ ꓢꓶꓸ ꓟꓽ ꓞꓲ ꓟꓬꓱ ꓓꓳꓽ ꓙꓳˍ ꓟ ꓡꓰ ꓐꓰ꓾ ꓬꓰ-ꓢꓴˍ ꓟꓲ ꓟꓳ-ꓫꓲ ꓢꓶꓸ ꓟ ꓞꓲ ꓞꓳ ꓒꓵꓽˍ ꓟ ꓐꓰ ꓟꓬꓱ ꓓꓳꓽ ꓟꓶ ꓒꓵꓽˍ ꓡꓳ꓿ 4 ꓦꓲ ꓥ ꓕ ꓑꓳ ꓠꓽ ꓡꓽ ꓞꓳ ꓡꓰ ꓫꓬꓹ ꓔ ꓟ ꓥ ꓟꓲ꓾ ꓙꓳˍ ꓟ ꓥ ꓕ ꓑꓳ ꓔꓯ ꓫꓬꓹ ꓕꓶꓻ ꓡꓰ ꓝꓲ ꓢꓴ ꓠꓽ ꓪꓴ-ꓢ ꓥ ꓡꓳ꓿ 5 ꓟꓳ-ꓫꓲ ꓠꓬ ꓗꓸ ꓠꓯꓸ ꓚ ꓟꓸ ꓖꓶ ꓡ ꓠꓯꓹ ꓟ ꓔꓯ ꓢꓷꓸ ꓙ ꓟꓳ ꓙ ꓠ ꓟ꓾ ꓪꓴ-ꓢ ꓦꓲ ꓕꓲ ꓦꓲ ꓡꓱꓸꓼ ꓗꓪ ꓦ ꓡꓱ ꓐꓳˍ ꓟ ꓣꓱꓽ ꓙ ꓢꓴ ꓥ ꓡꓳ꓿ 6 ꓖꓳ ꓡꓱ ꓥ ꓟꓲ ꓙꓲ-ꓢꓴ ꓠꓽ꓾ ꓪꓴ-ꓢ ꓕꓲ ꓦꓲ ꓢꓴ ꓔꓯ ꓙꓵꓽ ꓠꓹ ꓟ ꓦ ꓡꓱ ꓐꓳˍ ꓟ ꓤꓽ ꓥ ꓡꓳ꓿ ꓣꓳꓽ ꓠꓬ ꓡꓳꓹ ꓬꓰ ꓗꓪ ꓛꓲ꓾ ꓣꓳꓽ ꓠꓲꓹ ꓪꓴꓽˍ ꓟ ꓐꓰ ꓣꓳꓽ ꓥꓳ ꓡꓳꓸˍ ꓟ ꓗ ꓛꓲ ꓓꓴ ꓔꓯ ꓕꓶꓻ ꓕꓶˍ ꓡꓰꓽ ꓣꓴ ꓔ ꓕꓯ ꓠꓽ꓾ ꓣꓳꓽ ꓠꓬ ꓪꓴ-ꓢ ꓕꓲ ꓦꓲ ꓢꓴ ꓥ ꓡꓳ꓿ 7 ꓖꓳ ꓡꓱ ꓠꓬꓲ ꓢꓲ-ꓫꓬ-ꓟ-ꓦ ꓐꓯˍ ꓟ ꓡꓰ ꓐꓰ꓾ ꓠꓬꓲꓸ ꓠꓬꓲ ꓬꓲ ꓢꓯꓼ ꓠꓴ ꓪꓽ ꓑ ꓙꓽˍ ꓠꓬ꓾ 8 ꓧꓶꓸ ꓕꓯ ꓒꓳꓹ ꓔꓳꓹ ꓟ ꓝꓲꓸ ꓐꓰ ꓡꓲ ꓛꓲ ꓗꓪ ꓤꓹ ꓠꓬꓲˍ ꓟ ꓦꓬꓼ ꓠꓬꓲ ꓗꓪ ꓬꓰ ꓗꓷ ꓟ ꓡꓰ ꓐꓰ ꓠꓴ ꓪꓽ ꓠꓲꓹ ꓟ ꓕꓽ ꓩꓴꓻ꓿ 9 ꓖꓳ ꓗꓪ ꓠꓴ ꓪꓽ ꓒꓵꓽ ꓒ ꓐꓴ ꓠꓬ ꓥꓪ ꓬꓰˍ ꓟ ꓟꓬꓱꓽ ꓔꓯ ꓡꓲ ꓞꓲ ꓘꓳꓼ ꓟꓳ ꓗꓷˍ ꓟꓲ꓾ ꓥꓪ ꓔꓯ ꓫꓵꓽ ꓠꓬꓲ ꓤꓹ ꓠꓬꓲ ꓗꓷꓳ꓿ 10 ꓖꓳ ꓡꓱ ꓠꓬꓲ ꓖꓳ ꓕꓲꓽ ꓤꓶꓻ ꓢꓴ ꓔꓯ ꓥꓪ ꓠꓲꓹ ꓟ ꓦꓶ ꓢꓲ꓾ ꓬꓲ ꓪꓽ ꓠꓬ ꓮ ꓕꓯꓽˍ ꓟꓲ ꓓꓵꓽ ꓙꓽ ꓥꓳꓽ ꓡꓰ ꓔꓬ ꓠꓬꓲ꓾ ꓥꓪ ꓙꓻ ꓖꓴ ꓔꓯ ꓬꓲ ꓪꓽ ꓟꓽ ꓢꓷ꓾ ꓐꓰ ꓐꓯ ꓗꓷꓳ꓿ 11 ꓖꓳ ꓡꓱ ꓠꓬꓲ ꓠꓲꓹ ꓟ ꓦꓶˍ ꓟ ꓗꓪ ꓥꓪ ꓡꓰ꓾ ꓥꓪ ꓠꓽ ꓖꓴ ꓗꓪ ꓬꓲ ꓪꓽ ꓓꓵꓽ ꓡꓰ ꓟꓽ ꓓ꓾ ꓐꓰ ꓙꓱꓽ ꓗꓷꓳ꓾ ꓐꓯˍ ꓡꓳ꓿ 12 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓗꓳ ꓡꓳ ꓗꓪˍ ꓟꓲ꓾ ꓥꓶˍ ꓟ ꓐꓰ ꓙꓵꓻ ꓠꓲꓹ ꓟꓽ ꓙꓳˍ ꓟ ꓠꓲꓹ ꓟ ꓪꓴꓸ ꓠꓬꓲ꓾ ꓢꓯꓸ ꓔꓬ ꓟ ꓪꓴ-ꓢ ꓔꓯˍ ꓐꓰ ꓧꓹ ꓙꓰ ꓢꓴ ꓟꓽ ꓙꓳ ꓠꓹ ꓟ ꓤ ꓟꓳ꓿ 13 ꓠꓴ ꓪꓽ ꓗꓪ ꓟ ꓮ ꓡꓲ ꓕꓲ ꓣꓳ ꓥ ꓟꓲ ꓝꓴꓲ ꓡꓰ ꓗꓶꓸˍ ꓟ ꓗꓪ ꓐꓰ ꓠꓲꓹ ꓟ ꓟꓽ ꓩꓴꓻ ꓡꓰ ꓠꓹ ꓟ꓾ ꓦꓬꓼ ꓠꓬꓲ ꓙꓳˍ ꓢꓰꓽ ꓕꓯˍ ꓡꓰ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓬꓲꓼ ꓠꓬꓲꓸ ꓖꓶ ꓡꓯꓽ ꓘꓳ꓿ 14 ꓮ ꓡꓲꓳ ꓐꓯ ꓠꓬ ꓣꓳꓽ ꓙꓵꓻ ꓪꓴꓸ ꓔꓴˍ ꓟ ꓦ ꓡꓱ ꓐꓳ ꓠꓲꓹ ꓔꓯ ꓡꓳꓹ ꓬꓰ ꓗꓪ ꓛꓲ ꓕꓶ ꓕꓶˍ ꓡꓰꓽ ꓣꓴ ꓔ ꓕꓯ ꓠꓽ꓾ ꓣꓳꓽ ꓠꓬ ꓙꓲ-ꓢꓴ ꓔꓯ ꓑꓯꓹ ꓟꓶ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ 15 ꓖꓳ ꓡꓱ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ꓾ ꓠꓬꓲꓸ ꓠꓬꓲ ꓬꓲ ꓢꓯꓼ ꓠꓴ ꓪꓽ ꓑ ꓙꓽˍ ꓠꓬ꓾ ꓧꓶꓸ ꓕꓯꓽ ꓒꓳꓹ ꓔꓳꓹˍ ꓟ ꓝꓲꓸ ꓗꓪ ꓬꓰ ꓗꓷ ꓟ ꓡꓰ ꓐꓰ ꓠꓴ ꓪꓽ ꓠꓲꓹ ꓟ ꓕꓽ ꓩꓴꓻ꓾ ꓐꓰ ꓐꓳ ꓔ ꓡꓳ꓿ 16 ꓑ ꓙꓽ ꓢꓲ ꓪꓴ-ꓢ ꓔꓯ ꓒꓳꓹ ꓔꓳ ꓢꓴ ꓠꓬ ꓮꓽ ꓟ ꓥ ꓡ? ꓟꓳ-ꓫꓲ ꓡꓰ ꓬꓲ-ꓙꓲ ꓟꓵꓽ ꓗꓪ ꓐꓰ ꓧꓳꓽ ꓓꓳ ꓡ ꓢꓴ ꓐꓴ ꓮꓽ ꓙꓵ ꓟꓽ ꓥ ꓡ? 17 ꓪꓴ-ꓢ ꓡꓰ ꓡꓲ ꓞꓲ ꓘꓳꓼ ꓠꓲꓹ ꓟ ꓦꓶꓻ ꓗꓷ ꓢꓴ ꓠꓬ ꓮꓽ ꓟ ꓥ ꓡ? ꓝꓴꓲ ꓬꓰ ꓢꓲ ꓡꓲ ꓛꓲ ꓗꓪ ꓓꓳꓽ ꓡꓰ ꓢꓴ ꓖꓳ ꓕꓷ ꓟꓽ ꓥ ꓡ? 18 ꓥꓪ ꓠꓽ ꓖꓴ ꓗꓪˍ ꓟꓲ ꓬꓲ ꓪꓽ ꓓꓵꓽ ꓡꓰ ꓟꓽ ꓓ꓾ ꓐꓰ ꓪꓴ-ꓢ ꓡꓰ ꓮꓽ ꓟ ꓔꓯ ꓙꓱꓽ ꓗꓷ ꓡ? ꓬꓲ ꓔꓯ ꓟꓽ ꓒꓵꓽ ꓛꓳ ꓢꓴ ꓖꓳ ꓕꓷ ꓔꓯ ꓙꓱꓽ ꓗꓷꓳ ꓟꓽ ꓥ ꓡ? 19 ꓖꓳ ꓡꓱ ꓠꓬꓲ ꓬꓲ ꓪꓽ ꓟꓽ ꓙꓵꓻ ꓟ ꓑꓶꓸ ꓓꓴ ꓓꓵꓽ ꓡꓰ ꓟꓽ ꓪ ꓟ ꓣꓳꓽ ꓡꓳꓸ ꓓꓳ ꓡꓺꓳ꓿

ꓦꓲ-ꓐꓱ-ꓣꓴ 4

1 ꓖꓳ ꓡꓱ ꓠꓬꓲ ꓠꓴ ꓪꓽ ꓗꓪ ꓟ ꓕꓲ ꓣꓳ ꓣꓳ ꓓꓵꓽ ꓡꓰ ꓟꓽ ꓟꓶ ꓟꓽ ꓗꓷ ꓡꓰ ꓠꓹ ꓟ꓾ ꓬꓲ ꓠꓽ ꓖꓴ ꓗꓪ ꓓꓵꓽ ꓡꓰ ꓠꓹ ꓟ ꓙ ꓟꓳ ꓘꓶ ꓙꓳˍ ꓢꓰꓽ ꓕꓯˍ ꓡꓰ꓾ ꓣꓳꓽ ꓙꓳꓺ ꓢꓲ ꓤ ꓟꓳ ꓠꓯꓹ ꓡꓳ꓿ 2 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓔꓯ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓗꓷ ꓟ ꓡꓰ ꓐꓰ꓾ ꓣꓳꓽ ꓔꓯˍ ꓟꓲ ꓚꓵ ꓚꓵ ꓚ ꓟꓸ ꓖꓶ ꓡꓺꓳ꓿ ꓖꓳ ꓡꓱ ꓥ ꓟꓲ ꓐꓯ ꓘꓶ ꓖꓳ ꓟ ꓔꓯ ꓬꓲ ꓪꓽ ꓑ ꓙꓽ ꓕꓯ ꓙꓵꓻ ꓠꓲꓹ ꓡꓰ ꓟꓽ ꓘꓳ ꓣꓴ ꓠꓬꓲ꓾ ꓬꓲ ꓪꓽ ꓐꓱ ꓶ ꓙꓲ ꓖꓴ ꓟꓽ ꓙꓳ ꓗꓷ ꓡꓰꓳ꓿ 3 ꓪꓴ-ꓢ ꓠꓬ ꓟꓵꓽ ꓚꓰꓼ ꓟꓲ ꓚꓰꓼ ꓓꓳ ꓡꓰˍ ꓟꓲ꓾ ꓬꓲ ꓡꓰ꓾ ꓥꓪ ꓠꓲꓹ ꓟ ꓦꓶˍ ꓟ ꓗꓪ꓾ ꓥꓪ ꓠꓽ ꓖꓴ ꓗꓪ ꓬꓲ ꓪꓽ ꓓꓵꓽ ꓡꓰ ꓟꓽ ꓓ꓾ ꓐꓰ ꓙꓱꓽ ꓗꓷꓳ꓾ ꓐꓯˍ ꓡꓳ꓿ ꓖꓳ ꓡꓱ ꓥ ꓟꓲ ꓣꓳꓽ ꓙꓵꓻ ꓗꓷ ꓢꓴ ꓐꓴ ꓠꓬ ꓠꓽ ꓖꓴ ꓖꓳ ꓟ ꓗꓪ ꓓꓵꓽ ꓡꓰ ꓪˍ ꓡꓳ꓿ 4 ꓫꓵꓽ ꓠꓬꓲ ꓕꓲ ꓠꓬꓲ ꓟ ꓔꓯꓸ ꓟꓳꓸ ꓐꓯˍ ꓠꓬ꓾ ꓫꓵꓽ ꓠꓬꓲ ꓕꓲ ꓠꓬꓲ ꓗꓪ ꓪꓴ-ꓢ ꓠꓽ ꓬꓲ ꓬꓰˍ ꓟ ꓟꓬꓱꓽ ꓮꓽ ꓙꓵ ꓗꓪ ꓐꓰ ꓠꓽ ꓗꓷꓳ꓾ ꓐꓰ ꓐꓳ ꓔ ꓟ ꓕꓲ ꓔꓳꓸ ꓙꓳˍ ꓡꓳ꓿ 5 ꓝꓮꓲ ꓖꓳ ꓕꓲ ꓖ ꓗꓪ꓾ ꓥꓪ ꓠꓽ ꓖꓴ ꓗꓪ ꓬꓲ ꓪꓽ ꓓꓵꓽ ꓡꓰ ꓟꓽ ꓓ꓾ ꓐꓰ ꓐꓯˍ ꓡꓳ꓿ 6 ꓖꓳ ꓡꓱ ꓥ ꓟꓲ ꓖꓳ ꓗꓪ ꓓꓵꓽ ꓡꓰ ꓠꓯꓹ ꓟ ꓕꓲ ꓐꓱ ꓙꓳˍ ꓢꓰꓽ ꓠꓬꓲ꓾ ꓝꓮꓲ ꓠꓬ ꓬꓲ ꓪꓴꓸ ꓕꓯ ꓶꓼ ꓓꓳ ꓫꓱꓹ ꓓꓳ ꓑ ꓙꓽ ꓢꓴ ꓟꓽ ꓒꓵꓽ ꓛꓳˍ ꓟ ꓗꓪ ꓐꓰ ꓓꓵꓽ ꓡꓰ ꓟꓽ ꓟꓶ ꓠꓬꓲ꓾ 7 ꓪꓴ-ꓢ ꓡꓰ ꓦꓬꓼ ꓠꓬꓲ ꓝꓮꓲ ꓕꓲ ꓟ ꓝꓰꓹ ꓔ ꓢꓲ꓾ ꓮꓽ ꓟꓬꓹ ꓘꓳꓼ ꓗꓸ ꓠꓯꓸ ꓬꓲ ꓡꓰ ꓓ-ꓪꓵ ꓟꓷꓽ ꓠꓷꓹ ꓗꓪ ꓐꓰ ꓮꓽ ꓢꓳ ꓐꓯˍ ꓟ ꓡꓰ ꓐꓰ꓾ ꓠꓬꓲꓸ ꓠꓬꓲ ꓬꓲ ꓢꓯꓼ ꓠꓴ ꓪꓽ ꓑ ꓙꓽˍ ꓠꓬ ꓠꓲꓹ ꓟ ꓕꓽ ꓩꓴꓻ꓾ ꓐꓯˍ ꓡꓳ꓿ 8 ꓬꓳ-ꓫꓴ ꓡꓰ ꓬꓲ ꓪꓽ ꓔꓯ ꓠꓽ ꓖꓴ ꓖꓶ ꓗꓷ ꓐꓷˍ ꓠꓬ꓾ ꓪꓴ-ꓢ ꓠꓽ ꓝꓮꓲ ꓬꓲ ꓔꓱꓹ ꓬꓲ ꓕꓲ ꓠꓬꓲ ꓔꓯ ꓟꓽ ꓐꓯˍ ꓡꓳ ꓫꓵꓽ ꓥ ꓡꓳ꓿ 9 ꓖꓳ ꓡꓱ ꓠꓬꓲ ꓪꓴ-ꓢ ꓬꓲ ꓑ ꓫꓬꓼ ꓐꓴ ꓐꓱ ꓶ ꓝꓰꓹ ꓔ ꓟ ꓠꓽ ꓦꓬꓼ ꓠꓬꓲ ꓕꓲ ꓠꓬꓲ ꓙꓳˍ ꓢꓰꓽ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓖꓴ ꓗꓪ ꓓꓵꓽ ꓡꓰ ꓢꓴ ꓠꓽ꓾ ꓪꓴ-ꓢ ꓬꓲ ꓟꓬꓱꓽ ꓔꓯ ꓠꓽ ꓗꓷˍ ꓟ ꓡꓰ ꓐꓰ꓾ ꓖꓳ ꓕꓲ ꓣꓳˍ ꓟꓲ ꓬꓲ ꓟꓬꓱꓽ ꓔꓯ ꓠꓽ ꓗꓷꓳ꓿ 11 ꓖꓳ ꓡꓱ ꓠꓬꓲ ꓮꓽ ꓟ ꓥ ꓟꓲ ꓬꓲ ꓪˍ ꓡꓰ ꓐꓰ ꓟꓽ ꓒꓵ ꓛꓳ ꓟ ꓕꓱ ꓕꓲ ꓫꓵꓽ ꓑꓶꓸ ꓓꓴ ꓟꓽ ꓡꓱꓸ ꓙꓰ ꓙꓰ꓾ ꓠꓽ ꓖꓴ ꓖꓳ ꓟ ꓗꓪ ꓓꓵꓽ ꓡꓰ ꓪ ꓠ ꓟ ꓢꓯꓼ ꓕꓵꓼ ꓡꓯ꓿ 12 ꓪꓴ-ꓢ ꓐꓯ ꓘꓶ ꓠꓬ꓾ ꓢꓯꓸ ꓔꓬ ꓟ ꓐꓰ ꓢꓯꓼ ꓕꓵꓼ ꓔꓬ ꓟ ꓥ ꓢꓲ꓾ ꓠꓬꓲꓽ ꓛꓱꓽ ꓬꓲ ꓢꓶꓽ ꓠꓬꓲꓽ ꓙꓳˍ ꓟ ꓮꓸ ꓕꓽ ꓥ ꓕ ꓑꓳ ꓢꓶꓸ ꓟꓽ ꓞꓲ ꓕꓯꓹ ꓢꓲ ꓠꓬꓲ꓾ ꓶ ꓟꓬˍ ꓐꓰ ꓬꓲ ꓦ꓾ ꓬꓲ ꓝꓲꓸ ꓬꓲ ꓪꓴꓽ ꓑꓲ ꓥ ꓟꓲ ꓐꓱꓻ ꓗꓷ ꓗꓪ ꓛꓲ ꓗꓸ ꓓꓵꓽ ꓡꓰ ꓘꓴˍ ꓟ ꓥ ꓢꓲ꓾ ꓞꓳ ꓤ ꓠꓲꓹ ꓟ ꓗꓪ ꓓꓵꓽ ꓙꓽ ꓟ ꓐꓰ ꓚꓴꓽ ꓬꓲꓹ ꓔꓯ ꓐꓯ ꓞꓷꓹ ꓐ ꓡ ꓡꓳ꓿ 13 ꓚꓰꓼ ꓔ ꓟ ꓥ ꓕ ꓑꓳ ꓠꓬ ꓪꓴ-ꓢ ꓟꓲꓽ ꓙꓬꓽ ꓗꓪ ꓚꓵ ꓞꓹ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ꓿ ꓙꓳˍ ꓟ ꓥ ꓕ ꓑꓳ ꓠꓬ ꓬꓲ ꓒꓬꓱꓽ ꓕꓯ ꓗꓪ ꓙꓬꓽ ꓡꓯꓽ ꓟꓴꓽ ꓒꓴꓺ ꓞꓹ ꓟꓳꓻ ꓞꓹ ꓟ ꓥ ꓡꓳ꓿ 14 ꓟꓵꓽ ꓪꓴꓽ ꓗꓳꓸ ꓙꓻ ꓙꓰ ꓢꓲ ꓪꓴ-ꓢ ꓔꓬ ꓗꓪ ꓓꓵꓽ ꓙꓰ ꓗꓷ ꓟ ꓟꓬꓱ ꓓꓳꓽ ꓪꓴꓽˍ ꓟ ꓔꓲ ꓒ ꓓꓽ ꓟ꓾ ꓪꓴ-ꓢ ꓬꓲ ꓮ ꓐꓲ ꓬꓰ-ꓢꓴ ꓕꓲ ꓣꓳꓺ ꓣꓳꓽ ꓙꓳˍ ꓠꓬꓲ꓾ ꓣꓳꓽ ꓣꓷꓠꓸˍ ꓟ ꓙꓵꓻ ꓚꓱꓹ ꓔꓯ ꓕꓶꓻ ꓕꓶˍ ꓡꓰ ꓣꓴ ꓔ ꓡꓯ꓿ 15 ꓮ ꓡꓲꓳ ꓐꓯ ꓠꓬ ꓣꓳꓽ ꓙꓳˍ ꓟ ꓔꓲ ꓒ ꓓꓽ ꓟ ꓠꓽ ꓣꓳꓽ ꓢꓯꓼ ꓐꓽˍ ꓟ ꓔꓯ ꓫꓱꓸ ꓤ ꓟꓽ ꓗꓴꓸ ꓟ ꓟꓽ ꓥ꓿ ꓬꓲ ꓠꓬ ꓮꓸ ꓫꓵ ꓗꓪˍ ꓟꓲ ꓣꓳˍ ꓐꓰ ꓕꓲ ꓡꓰꓹꓼ ꓤꓹ ꓠꓬꓲ ꓟꓶ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓽ ꓝꓴꓲ ꓟꓽ ꓬꓰ ꓠꓬꓲ꓿ 16 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓫꓱꓸ ꓤˍ ꓟ ꓟꓶ ꓠꓹ ꓟ ꓐꓰ꓾ ꓣꓱꓽ ꓬꓯꓼˍ ꓟ ꓕꓲ ꓝꓲꓸ ꓗꓪ ꓬꓰ ꓙ ꓓꓴ ꓣꓱꓽ ꓛꓰ ꓧꓪ ꓟꓶ ꓠ ꓟ꓾ ꓣꓳꓽ ꓠꓬ ꓣꓱꓽ ꓛꓰ ꓙꓵꓽ ꓠꓬꓲꓸ ꓕꓲ ꓗꓪ ꓠꓲꓹ ꓪꓴꓽ ꓪꓴˍ ꓡꓰꓽ ꓠꓶꓽ ꓙꓰ ꓡꓯ꓿

ꓦꓲ-ꓐꓱ-ꓣꓴ 5

1 ꓞꓳ ꓤ ꓗꓳ ꓡꓳ ꓗꓪ ꓐꓰ ꓢꓲ ꓓꓳ ꓡ ꓟ ꓔꓲ ꓒ ꓓꓽ ꓟ ꓮ ꓡꓲ ꓕꓲ ꓣꓳ ꓥ ꓟꓲ꓾ ꓝꓴꓲ ꓑꓶꓸ ꓓꓴ ꓪꓴ-ꓢ ꓟꓲꓽ ꓙꓬꓽ ꓗꓪ꓾ ꓮꓽ ꓙꓵ ꓢꓴ ꓬꓲꓸ ꓛꓲ ꓡꓯꓼ ꓫꓴˍ ꓐꓰ ꓔꓲ ꓓꓴ ꓔꓲ ꓖꓶ ꓠꓹ ꓟ ꓢꓲ ꓔ ꓟ ꓥ ꓡꓳ꓿ 2 ꓬꓲ ꓚꓲ ꓛꓬˍ ꓟꓲ ꓮꓽ ꓟꓬꓹ ꓫꓵꓽ ꓗꓪ ꓢꓯꓼ ꓐ ꓢꓴ ꓥ ꓠꓬꓲ꓾ ꓬꓲ ꓠꓬ ꓟꓽ ꓢꓷꓸ ꓢꓴ ꓐꓰ ꓥꓳꓽ ꓡꓰ ꓢꓴ ꓔꓯ ꓠꓴꓽ ꓠꓴ ꓐꓰ ꓜꓲꓽ ꓖꓶ ꓐ ꓡ ꓡꓳ꓿ 3 ꓖꓳ ꓟ ꓑꓶꓸ ꓓꓴ ꓬꓲ ꓠꓬ ꓑ ꓫꓬꓼ ꓐꓴ ꓐꓱ ꓶˍ ꓐꓰ꓾ ꓬꓲ ꓚꓲ ꓛꓬ ꓐꓱ ꓶˍ ꓟꓲ꓾ ꓝꓴꓲ ꓑꓶꓸ ꓓꓴ ꓢꓰꓼ ꓔꓲ ꓓꓴ ꓔꓲ ꓠ ꓗꓹ ꓟ ꓥ ꓡꓳ꓿ 4 ꓯ-ꓣꓷ ꓔꓯ ꓘꓴˍ ꓟ ꓡꓰ ꓐꓰ ꓪꓴ-ꓢ ꓡꓰ ꓘꓴ ꓔ ꓟ ꓟꓽ ꓥ ꓠꓬ꓾ ꓮꓽ ꓟˍ ꓟꓲ ꓔꓲ ꓒ ꓓꓽ ꓟ ꓟꓬꓱꓺ ꓓꓳꓽ ꓕꓱ ꓟ ꓔꓯ ꓚꓲ ꓛꓬ ꓣꓴ ꓢꓴ ꓟꓽ ꓙꓳ꓿ 5 ꓖꓳ ꓟ ꓡꓰ ꓐꓰ꓾ ꓙꓲ-ꓢꓴˍ ꓟꓲ ꓔꓲ ꓒ ꓓꓽ ꓟ ꓣꓱꓽˍ ꓟ ꓟꓬꓱ ꓓꓳꓽ ꓗꓪ ꓚꓲ ꓛꓬ ꓔꓯ ꓢꓲ ꓚꓰꓸˍ ꓟ ꓟꓽ ꓥ꓿ ꓠꓴ ꓠꓬ ꓥꓪ ꓮ ꓐꓲ ꓥ ꓡꓳ꓾ ꓠꓬꓲꓸ ꓠꓬꓲ ꓥꓪ ꓡꓰ ꓠꓴ ꓔꓯ ꓦꓵꓻ ꓗꓷꓳ꓾ ꓐꓰ ꓐꓯ ꓢꓴ ꓖꓳ ꓕꓲ ꓣꓳ ꓡꓰ ꓬꓲ ꓔꓯ ꓔꓲ ꓒ ꓓꓽ ꓟ ꓣꓱꓽ ꓝꓲˍ ꓟ ꓥ ꓡꓳ꓿ 6 ꓝꓮꓲ ꓠꓱꓸ ꓐꓯꓼ ꓕꓲ ꓖ ꓗꓪˍ ꓟꓲ ꓪꓴ-ꓢ ꓡꓰ꓾ ꓠꓴ ꓠꓬ ꓟꓷ-ꓚꓲ-ꓫꓲ-ꓔꓷ ꓕꓲ ꓫꓵꓽ ꓗꓪ ꓟ ꓕꓲ ꓞꓲꓼ ꓕꓲ ꓑ ꓟ ꓔꓲ ꓒ ꓥꓳ꓾ ꓐꓯˍ ꓟ ꓡꓰ ꓐꓰ ꓥ ꓡꓳ꓿ 7 ꓙꓲ-ꓢꓴ ꓬꓲ ꓧꓪ ꓖꓳ ꓓꓱ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ꓾ ꓫꓵꓻ ꓗꓪ ꓐꓰ ꓬꓲ ꓔꓯ ꓚꓬꓴ ꓐ ꓡ ꓢꓴ ꓔꓯ ꓟꓬ ꓐꓲ ꓓꓳ ꓠꓬꓲ ꓐꓰ ꓢꓯꓼ ꓓꓽ ꓟ ꓡꓰ ꓘꓴ ꓢꓲ ꓪꓽ ꓘꓴ ꓶꓼ ꓓꓰꓽˍ ꓕꓯ꓾ ꓬꓲ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽˍ ꓟ ꓑꓶꓸ ꓓꓴ ꓬꓲ ꓪꓽ ꓘꓴ ꓘꓶꓽ ꓔꓯ ꓪꓴ-ꓢ ꓑ ꓙꓽ ꓗꓷꓳ꓿ 8 ꓝꓮꓲ ꓬꓲ ꓠꓬ ꓪꓴ-ꓢ ꓬꓲ ꓮ ꓐꓲ ꓥ ꓥˍ ꓟꓲ꓾ ꓬꓲ ꓫꓸ ꓙꓵˍ ꓟ ꓖꓳ ꓟꓬ ꓫꓵꓽ ꓗꓪ ꓐꓰ ꓒꓵꓽ ꓛꓳˍ ꓟ ꓢꓳ ꓟꓶ ꓡꓰ ꓢꓲ꓾ 9 ꓬꓲ ꓔꓯ ꓜꓳꓽ ꓓꓰ ꓡꓰ ꓝꓲ ꓗꓸ ꓠꓯꓸ꓾ ꓬꓲ ꓔꓯ ꓒꓵꓽ ꓛꓳ ꓢꓴ ꓥ ꓕ ꓑꓳ ꓐꓱ ꓶ ꓬꓲ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓬꓲꓸ ꓝꓳꓹ ꓟꓶ ꓒꓬꓱꓼ ꓡꓺꓳ꓿ 10 ꓖꓳ ꓡꓱ ꓢꓲ ꓪꓴ-ꓢ ꓡꓰ ꓬꓲ ꓔꓯ꓾ ꓟꓷ-ꓚꓲ-ꓫꓲ-ꓔꓷ ꓕꓲ ꓫꓵꓽ ꓟ ꓔꓲ ꓒ ꓓꓽ ꓟ꓾ ꓐꓰ ꓟꓬꓱ ꓔ ꓡꓳ꓿ 11 ꓕꓱ ꓟ ꓔꓯ ꓟꓳꓸ ꓥꓪ ꓠꓴꓽ ꓐꓯ ꓓꓴ ꓮꓽ ꓟꓬꓹ ꓙꓳˍ ꓟꓲ꓾ ꓠꓴ ꓪꓽ ꓠꓲꓹ ꓞ ꓙꓽ ꓜꓲꓼ ꓟꓽ ꓐ ꓡ ꓠꓬꓲ ꓒꓶꓻ ꓟꓸ ꓖꓶ ꓫꓸˍ ꓡꓳ꓿ 12 ꓦꓬꓼ ꓠꓬꓲ ꓟꓶ ꓫꓵ ꓡꓰˍ ꓟ ꓔꓯ ꓚꓬꓹ ꓠꓬꓲˍ ꓠꓬ꓾ ꓮ ꓟꓶ ꓠꓴ ꓪꓽ ꓠꓽ ꓟꓸ ꓢꓴ ꓬꓰ ꓐ ꓡ ꓙꓲꓽ ꓙꓳˍ ꓡꓳ ꓫꓵ ꓥꓳ꓿ ꓖꓳ ꓡꓱ ꓥ ꓟꓲ ꓪꓴ-ꓢ ꓐꓯ ꓘꓶ ꓢꓳ ꓪꓴꓸ ꓔꓴˍ ꓟ ꓕꓲ ꓔꓱꓹ ꓗꓪ ꓐꓰ ꓢꓴ ꓡꓰ ꓠꓴ ꓪꓽ ꓔꓯ ꓟꓸ ꓖꓶ ꓠ ꓗꓹ ꓢꓰꓽ ꓐꓷ꓿ ꓠꓴ ꓪꓽ ꓠꓬ ꓜꓻ ꓘꓹ ꓜꓽ ꓟꓽ ꓗꓴꓸ ꓠꓬꓲ ꓮꓽ ꓚꓵꓹ ꓣꓱꓽ ꓠ ꓗꓹ ꓢꓰꓽ ꓐꓷ꓿ 13 ꓮ ꓡꓲꓳ ꓐꓯˍ ꓠꓬ ꓮꓽ ꓚꓵꓹ ꓛꓵꓼ ꓢꓴ ꓠꓬ ꓞꓳ ꓫꓵꓼ ꓤ ꓥ ꓠꓬꓲ꓾ ꓔꓱꓹ ꓜꓳꓽˍ ꓟ ꓐꓯ ꓘꓶ ꓔꓯ ꓣꓱꓽ ꓟ ꓗꓴꓸ꓾ ꓙꓽ ꓜꓲꓼ ꓟꓽ ꓗꓴꓸ꓿ 14 ꓜꓻ ꓘꓹ ꓠꓽ ꓪꓴꓽ ꓓꓰ ꓡꓰ ꓢꓴ ꓐꓱ ꓶ ꓥ ꓢꓲ꓾ ꓙꓲˍ ꓟ ꓐꓰ ꓟꓽ ꓙꓲˍ ꓟ ꓔꓯ ꓦꓰꓽ ꓗꓴˍ ꓟ ꓗꓪ ꓤꓹ ꓓꓰꓼ ꓡꓰ ꓢꓴ ꓐꓴ ꓐꓱ ꓶ ꓥ ꓡꓳ꓿

ꓦꓲ-ꓐꓱ-ꓣꓴ 6

1 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓙꓲ-ꓢꓴ ꓟꓸ ꓟꓲ ꓬꓲ ꓪꓴꓸ ꓔꓴ ꓔꓴˍ ꓟ ꓔꓯ ꓙꓻ ꓙꓰ ꓢꓲ꓾ ꓪꓴꓽ ꓓꓰ ꓡꓰ ꓠꓹ ꓟ ꓗꓪ ꓢꓳ ꓓꓯ ꓙꓰ ꓡꓯ꓿ ꓫꓵꓻ ꓟꓬꓱꓽ ꓗꓪ ꓐꓰ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓟ꓾ ꓪꓴ-ꓢ ꓔꓯ ꓙꓵꓻˍ ꓟ꓾ 2 ꓖꓳ ꓓꓱ ꓔꓲˍ ꓟ꓾ ꓡꓯꓼ ꓒꓯꓹ ꓚꓰꓹˍ ꓟ꓾ ꓫꓵꓻ ꓢꓴ ꓢꓯꓸ ꓬꓲꓼ ꓡ ꓟ ꓐꓰ꓾ ꓕꓲ ꓞꓲꓼ ꓕꓲ ꓑ ꓐꓯ ꓟꓴ ꓘꓶˍ ꓟ ꓟꓸ ꓟꓲ ꓬꓲ ꓚꓰ ꓝꓮꓲ ꓟꓽ ꓫꓬꓹ ꓤꓶ ꓤꓶ꓾ ꓡꓯꓽ ꓫꓵ ꓟꓲꓸ ꓙꓬ ꓢꓲ ꓢꓳꓺ ꓓꓯ ꓙꓰ ꓡꓯ꓿ 3 ꓪꓴ-ꓢ ꓢꓯꓼ ꓧꓳ ꓖꓶ ꓡ ꓟ ꓡꓰ ꓐꓰ ꓣꓳꓽ ꓬꓲ ꓕꓱ ꓡꓱ ꓬꓰˍ ꓥꓳ꓿ 4 ꓪꓴ-ꓢ ꓬꓲ ꓠꓬꓲ ꓟꓳ ꓓꓴ ꓗꓪ ꓔꓬ ꓗꓷ ꓗꓸ ꓠꓯꓸ꓾ ꓟꓴꓽ ꓗꓪ ꓗꓪ ꓟ ꓡꓯꓼ ꓫꓴ ꓔꓯˍ ꓟꓲ ꓢꓳꓽ ꓠꓬꓲ ꓗꓷ ꓢꓲ꓾ ꓢꓲ-ꓫꓬ-ꓟ-ꓦˍ ꓐꓰ ꓙꓻ ꓡꓯꓽ ꓘꓳ ꓟꓶ ꓡꓰ ꓗꓸ ꓠꓯꓸ꓾ 5 ꓝꓮꓲ ꓠꓬ ꓪꓴ-ꓢ ꓙꓲˍ ꓟ ꓐꓯ ꓘꓶˍ ꓐꓰ ꓡꓻ ꓠꓹ ꓟ ꓤꓶ ꓬꓲ ꓪꓽ ꓠꓬꓲˍ ꓟ ꓔꓯˍ ꓟꓲ ꓢꓳꓽ ꓟꓶ ꓡꓰ ꓗꓸ ꓠꓯꓸ ꓧꓹ ꓙꓰ ꓢꓴ ꓠꓬ꓾ 6 ꓬꓲ ꓪꓽ ꓡꓰ ꓪꓴ-ꓢ ꓬꓲ ꓮ ꓐꓲ ꓔꓯ ꓝꓮꓲ ꓕꓲ ꓧꓪꓹ ꓕꓯꓼ ꓔꓶꓸ ꓢꓲ꓾ ꓫꓬꓽ ꓫꓬꓽ ꓗꓪ ꓬꓲ ꓔꓯ ꓫꓸ ꓔꓳ ꓡꓰ ꓝꓲˍ ꓟ ꓥ ꓠꓬꓲ꓾ ꓬꓲ ꓪꓽ ꓔꓯ ꓝꓮꓲ ꓕꓲ ꓧꓪꓹ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓝꓲ ꓠꓹ ꓟ ꓚꓱꓹ ꓟꓽ ꓙꓳ꓿ 7 ꓮ ꓡꓲꓳ ꓐꓯˍ ꓠꓬ ꓟꓵꓽ ꓪꓴ ꓗꓪ ꓐꓰ ꓟꓽ ꓠꓽ ꓠ ꓦ ꓩꓴ ꓡ ꓟ ꓟꓶꓽ ꓦ ꓓꓳꓻ ꓪˍ ꓟ ꓦ ꓟꓲꓺˍ ꓐꓰ꓾ ꓟꓬꓱꓽ ꓬꓰ ꓡꓳ ꓬꓰ ꓢꓴ ꓣꓱꓽ ꓬꓯꓼˍ ꓟ ꓪꓳꓽ ꓫꓵꓽ ꓪꓳꓽ ꓙꓰ ꓣꓱꓻ ꓡ ꓟ ꓦ ꓟꓲ ꓠꓬ꓾ ꓪꓴ-ꓢ ꓗꓪ ꓐꓰ ꓶꓼ ꓤ ꓫꓱꓹ ꓤ ꓟꓶˍ ꓟ ꓦ ꓟꓲ ꓥ ꓡꓳ꓿ 8 ꓖꓳ ꓡꓱ ꓥ ꓟꓲ ꓛꓴꓽ ꓑꓳˍ ꓐꓰ ꓛꓴꓽ ꓟꓳꓼˍ ꓡꓰꓽ ꓣꓱꓻ ꓡ ꓟ ꓦ ꓟꓲ ꓠꓬ ꓙꓲ ꓖꓴ ꓟꓽ ꓙꓳ ꓠꓬꓲ ꓙꓱꓽ ꓘꓶꓽ ꓟꓶ ꓡꓰ ꓠ ꓗꓹ ꓢꓲ꓾ ꓡꓳꓹ ꓬꓰ ꓟ ꓗꓪ ꓠꓽ ꓛꓴꓻ ꓗꓷ ꓓꓴˍ ꓡꓰꓽ ꓥꓳ꓿ 9 ꓠꓲꓹ ꓠꓵ ꓢꓴ ꓐꓴꓳ꓾ ꓥꓪ ꓠꓴꓽ ꓕꓱ ꓡꓱ ꓐꓯˍ ꓟ ꓠꓬ ꓠꓴ ꓪꓽ ꓔꓯ ꓓꓵꓽ ꓙꓽ ꓟꓬꓽˍ ꓠꓬꓲ ꓟꓽ ꓥ꓿ ꓟꓬꓽ ꓠꓬꓲ ꓙꓲˍ ꓟ ꓮꓸ ꓫꓵꓽ ꓥ ꓟ ꓐꓰ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓗꓪ ꓣꓳꓽ ꓔꓯ ꓧꓳꓽ ꓛꓲ ꓬꓰˍ ꓟ ꓮꓸ ꓫꓵꓽ ꓥ ꓟ ꓠꓴ ꓪꓽ ꓢꓷꓸˍ ꓡꓳ꓾ ꓐꓰ ꓥꓪ ꓠꓴꓽ ꓦ ꓡꓱ ꓐꓳˍ ꓡꓳ꓿ 10 ꓪꓴ-ꓢ ꓠꓽ ꓔꓱꓹ ꓜꓳꓽˍ ꓟ ꓥ ꓠꓬꓲ꓾ ꓠꓴ ꓪꓽ ꓠꓬ ꓬꓲ ꓟꓬꓱꓺ ꓔꓯ ꓠꓲꓹ ꓠꓵˍ ꓟ ꓗꓪ ꓐꓰ ꓬꓰ ꓗꓷ ꓟ ꓟꓬꓱꓽˍ ꓐꓰ꓾ ꓙꓵꓻ ꓢꓴ ꓔꓯ ꓣꓱꓽ ꓙ ꓗꓷ ꓟ ꓐꓰ꓾ ꓮ ꓟꓶ ꓣꓱꓽ ꓙ ꓔꓬ ꓢꓰꓽ ꓟ ꓔꓯ ꓬꓲ ꓟꓽ ꓟꓲ ꓡꓰ꓿ 11 ꓠꓴ ꓪꓽ ꓥꓳ ꓡꓳˍ ꓟ ꓬꓲ ꓖꓳꓽ ꓟꓽ ꓗꓷ ꓡꓰ ꓠꓹ ꓟ꓾ ꓡꓳꓹ ꓬꓰ ꓗꓪ ꓛꓲ ꓠꓴ ꓪꓽ ꓕꓲ ꓣꓳꓽ ꓡꓰ ꓕꓲ ꓣꓳꓽ ꓕꓲꓽ ꓡꓰꓹꓼ ꓐꓰ ꓧꓪꓸ ꓛꓲꓽ ꓢꓲ ꓠꓲꓹ ꓟ ꓡꓱꓻ ꓠꓹ ꓟ ꓥꓪ ꓠꓴꓽ ꓠꓲꓹ ꓫꓵˍ ꓡꓳ꓿ 12 ꓠꓴ ꓪꓽ ꓠꓬ ꓦ ꓙ ꓖꓴ ꓗꓪ ꓞꓳ ꓐꓴꓻ ꓕꓽ ꓬꓰ꓿ ꓙꓵꓻ ꓠꓲꓹ ꓙꓳ ꓢꓲ ꓠꓲꓹ ꓟ ꓫꓵꓺ ꓢꓴ ꓐꓴ ꓔꓯ ꓔꓯꓺ ꓢꓳ꓿ ꓖꓳ ꓡꓱ ꓠꓬ ꓙ ꓟꓳ ꓔ ꓟ ꓠꓴ ꓪꓽ ꓟꓶˍ ꓥꓳ꓿ 13 ꓪꓴ-ꓢ ꓡꓰ ꓮ-ꓐ-ꓡ-ꓦ ꓔꓯ ꓙ ꓟꓳ ꓘꓶꓽ ꓖꓶˍ ꓕꓯ꓾ ꓪꓴ-ꓢ ꓠꓬ ꓚꓲ ꓛꓬ ꓕꓯ ꓢꓲ ꓪꓴꓽˍ ꓟ ꓔꓯ ꓖꓴ ꓢꓲ ꓪꓵꓼ ꓙꓱꓽ ꓖꓴ ꓟꓽ ꓙꓳ ꓠꓬꓲ꓾ ꓬꓲ ꓚꓲ ꓛꓬ ꓔꓯ ꓖꓴ ꓢꓲ꓾ 14 ꓥꓪ ꓠꓬ ꓠꓴ ꓔꓯ ꓶꓼ ꓥꓳ ꓙꓱꓽ ꓖꓶ ꓢꓲ ꓠꓴ ꓞꓲ ꓤ ꓡꓯꓹ ꓤ ꓟꓬꓽ ꓡ ꓝꓲˍ ꓥꓳ꓾ ꓐꓰ ꓪꓵꓼ ꓙꓱˍ ꓡꓳ꓿ 15 ꓮ-ꓐ-ꓡ-ꓦ ꓠꓬ ꓠꓲꓹ ꓟ ꓫꓵꓺ ꓫꓵˍ ꓡꓰꓽ ꓡꓳꓺ ꓠꓬꓹ ꓗꓷ ꓠꓬꓲ ꓙ ꓟꓳ ꓔ ꓟ ꓬꓲ ꓟꓶꓻ ꓡꓰꓳ꓿ 16 ꓞꓳ ꓤ ꓠꓽ ꓬꓲ ꓪꓽ ꓕꓯ ꓢꓲ ꓪꓴꓽˍ ꓟ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓡꓳ꓿ ꓬꓲ ꓪꓽ ꓐꓯ ꓡꓯꓽ ꓘꓳˍ ꓟ ꓮ ꓡꓲ ꓕꓲ ꓫꓵꓽ ꓗꓪˍ ꓟꓲ꓾ ꓪꓵꓼ ꓙꓱꓽ ꓘꓶꓽ ꓗꓪ ꓐꓰ ꓐꓯ ꓞꓷꓹˍ ꓡꓳ꓿ 17 ꓖꓳ ꓟ ꓡꓰ ꓐꓰ ꓪꓴ-ꓢ ꓠꓬ ꓬꓲ ꓚꓴꓽ ꓬꓲꓹ ꓠꓽ ꓡꓶꓸ ꓟꓽ ꓓ ꓟ ꓥ ꓟ꓾ ꓙ ꓟꓳ ꓘꓶ ꓟꓶ ꓢꓴ ꓔꓯ ꓬꓲ ꓜꓶꓻ ꓢꓷ ꓡꓰ ꓝꓲ ꓠꓲꓹ ꓫꓵˍ ꓠꓬꓲ꓾ ꓬꓲ ꓠꓬ ꓙꓱꓽ ꓘꓶꓽ ꓡꓰ ꓗꓸ ꓚꓵ ꓬꓰˍ ꓡꓳ꓿ 18 ꓖꓳ ꓡꓱ ꓠꓬꓲ ꓣꓳꓽ ꓟꓲꓽ ꓙꓬ ꓗꓪ ꓓꓹ ꓟ ꓥꓳ ꓡꓳꓸ ꓔ ꓓꓴ ꓔꓯ ꓣꓴ ꓟꓶ ꓠꓹ ꓟ꓾ ꓫ ꓑꓬ ꓖꓴ ꓗꓪ ꓛꓰꓹ ꓑꓬ ꓡ ꓢꓴ ꓣꓳꓽ ꓠꓬ꓾ ꓡꓶꓸ ꓟꓽ ꓓ ꓟ ꓙ ꓟꓳ ꓘꓶꓽ ꓐꓰ ꓪꓵꓼ ꓘꓶꓕꓱ ꓠꓬꓲ ꓫꓵꓽ ꓑꓶꓸ ꓓꓴ ꓠꓲꓹ ꓪꓴꓽ ꓓꓴ ꓓꓽ ꓟ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓟꓽ ꓗꓶꓸ꓿ 19 ꓣꓳꓽ ꓠꓬ꓾ ꓢꓯꓼ ꓟꓬ ꓡꓲ ꓞꓳꓹ ꓓꓴ ꓬꓰ ꓠꓹ ꓟ꓾ ꓕꓶꓻˍ ꓟ ꓐꓰ ꓤꓰꓻˍ ꓟ ꓥꓳ ꓡꓳꓸ ꓓꓴ ꓙꓳˍ ꓢꓲ꓾ 20 ꓥꓳ ꓡꓳꓸ ꓓꓴ ꓕꓱ ꓟ ꓠꓬ꓾ ꓕꓲ ꓞꓲꓼ ꓕꓲ ꓑ ꓟꓷ-ꓚꓲ-ꓫꓲ-ꓔꓷ ꓕꓲ ꓫꓵꓽ ꓟ ꓔꓲ ꓒ ꓓꓽ ꓟ ꓒꓬꓱꓼ ꓡ ꓗꓷ ꓢꓴˍ ꓐꓰ꓾ ꓣꓳꓽ ꓐꓱ ꓶ ꓙꓻ ꓪꓴꓸ ꓕꓴꓻ ꓢꓴ ꓬꓰ-ꓢꓴ ꓓꓵꓽ ꓡꓰ ꓗꓷ ꓟ꓾ ꓮꓽ ꓘꓶ ꓢꓲꓽ ꓫꓬ ꓖꓴ ꓗꓪ ꓟ ꓗꓳꓹ ꓛ ꓔꓯ ꓙꓻ ꓙꓰˍ ꓟ ꓥꓳ ꓡꓳꓸ ꓓꓴ ꓥ ꓡꓳ꓿

ꓦꓲ-ꓐꓱ-ꓣꓴ 7

1 ꓟꓷ-ꓚꓲ-ꓫꓲ-ꓔꓷ ꓠꓬ ꓢ-ꓡꓱ ꓪ ꓔꓲ ꓥ ꓢꓲ꓾ ꓟꓴ ꓡꓳꓹ ꓬꓰ ꓟ ꓪꓴ-ꓢ ꓬꓲ ꓔꓲ ꓒꓽˍ ꓟꓲ ꓥꓳ꓿ ꓮ-ꓐ-ꓡ-ꓦ ꓠꓬ ꓪ ꓔꓲ ꓐꓴ ꓔꓯ ꓢꓰꓼ ꓧꓪꓸ ꓡꓰ ꓢꓲ ꓬꓲꓼ ꓡ ꓕꓯ꓾ ꓟꓷ-ꓚꓲ-ꓫꓲ-ꓔꓷ ꓠꓬ ꓮ-ꓐ-ꓡ-ꓦ ꓔꓯ ꓔꓳꓹ ꓜꓳꓽ ꓢꓲ꓾ ꓬꓲ ꓡꓰ ꓮ-ꓐ-ꓡ-ꓦ ꓔꓯ ꓶꓼ ꓥꓳꓽ ꓙꓱ ꓖꓶˍ ꓡꓳ꓿ 2 ꓮ-ꓐ-ꓡ-ꓦ ꓡꓰ ꓡꓳꓽ ꓔꓯꓹ ꓡ ꓟ ꓮꓽ ꓙꓵ ꓟ ꓗꓪ ꓐꓰ ꓬꓲ ꓔꓯ ꓞꓲꓺ ꓐꓱ ꓕꓲ ꓐꓱ ꓖꓶˍ ꓡꓳ꓿ ꓟꓷ-ꓚꓲ-ꓫꓲ-ꓔꓷ ꓬꓲ ꓟꓬꓱ ꓡꓶꓸ ꓓꓳ ꓡ ꓠꓬ꓾ ꓬꓲ ꓪꓴꓸ ꓠꓬ꓾ ꓔꓱꓹ ꓜꓳꓽˍ ꓟ ꓪ ꓔꓲ꓾ ꓝꓮꓲ ꓠꓬ ꓢ-ꓡꓱ ꓪ ꓔꓲ꓾ ꓥ ꓠꓬ꓾ ꓢꓲ ꓡꓲ ꓟ ꓪ ꓔꓲ꓾ ꓐꓯˍ ꓟ ꓥ ꓡꓳ꓿ 3 ꓬꓲ ꓠꓬ ꓐꓹ ꓐ ꓟꓽ ꓙꓳ꓿ ꓟꓹ ꓟˍ ꓟꓲ ꓟꓽ ꓙꓳ꓿ ꓫꓵꓽ ꓚ ꓕꓳ ꓶ ꓗꓪ ꓬꓲ ꓦꓵ ꓦꓬꓼ ꓠꓬꓲˍ ꓐꓰ ꓫꓵꓻ ꓦꓬꓼ ꓠꓬꓲˍ ꓟꓲ ꓟꓽ ꓐꓳ ꓔ꓿ ꓬꓲ ꓠꓽ ꓪꓴ-ꓢ ꓬꓲ ꓤꓽˍ ꓡꓰ ꓐꓰ ꓥ ꓢꓲ꓾ ꓕꓲ ꓞꓲꓼ ꓕꓲ ꓑ ꓔꓲ ꓒ ꓣꓱꓽˍ ꓡꓳ꓿ 4 ꓒꓵꓽ ꓒ ꓮ-ꓐ-ꓡ-ꓦ ꓡꓰ ꓦꓴꓺ ꓟꓶˍ ꓟ ꓖꓴꓽ ꓙꓴꓽ ꓗꓪ ꓐꓰ꓾ ꓮꓸ ꓓꓲꓽ ꓙꓲˍ ꓟ ꓞꓲ ꓐꓱ ꓕꓲ ꓐꓱ ꓖꓶꓽ ꓗꓷ ꓢꓴ ꓕꓱ ꓕꓲ ꓣꓳ ꓠꓬ꓾ ꓮ ꓘꓶꓻ ꓛꓲ ꓒꓵꓽ ꓢꓴ ꓥ ꓟ ꓠꓴ ꓪꓽ ꓓꓵꓽ ꓙ ꓠꓬꓲ꓿ 5 ꓔꓲ ꓒ ꓟꓬꓱꓽ ꓐꓬꓱꓼ ꓘꓶꓽ ꓟꓶ ꓢꓴ ꓡꓱ-ꓬꓲ ꓞꓲ ꓤ ꓡꓯꓹ ꓤ ꓠꓽ꓾ ꓑ ꓫꓬꓼ ꓐꓴ ꓗꓪ ꓐꓰ ꓞꓲ ꓐꓱ ꓕꓲ ꓐꓱ ꓣꓴ ꓠꓹ ꓟ ꓙꓵꓽ ꓗ ꓗꓪ ꓕꓵꓼ ꓪꓽ ꓙꓳˍ ꓡꓳ꓿ ꓑ ꓫꓬꓼ ꓐꓴˍ ꓐꓰ ꓡꓱ-ꓬꓲ ꓞꓲꓼ ꓤ ꓡꓯꓹ ꓤ ꓐꓴ ꓠꓽ꓾ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓢꓲ ꓬꓲꓼ ꓤ ꓠꓬꓲ ꓤ ꓬꓯꓼˍ ꓟꓲ꓾ ꓬꓲ ꓪꓽ ꓗꓪ ꓐꓰ ꓞꓲ ꓐꓱ ꓕꓲ ꓐꓱ ꓣꓴˍ ꓡꓳ꓿ 6 ꓖꓳ ꓡꓱ ꓥ ꓟꓲ ꓡꓱ-ꓬꓲ ꓡꓽ ꓞꓳ ꓫꓵꓽ ꓚ ꓗꓪˍ ꓟꓲ ꓟꓽ ꓝꓸ ꓞꓹ ꓢꓴ ꓟꓷ-ꓚꓲ-ꓫꓲ-ꓔꓷ ꓠꓽ꓾ ꓪꓴ-ꓢ ꓙ ꓟꓳ ꓘꓶ ꓟꓶ ꓢꓴ ꓮ-ꓐ-ꓡ-ꓦ ꓗꓪ ꓐꓰ ꓞꓲ ꓐꓱ ꓕꓲ ꓐꓱ ꓣꓴ ꓢꓲ꓾ ꓬꓲ ꓔꓯ ꓶꓼ ꓥꓳ ꓙꓱꓽ ꓖꓶ ꓗꓷꓳ꓿ 7 ꓪꓴꓽ ꓢꓴ ꓡꓰ ꓣꓳꓺ ꓢꓴ ꓔꓯ ꓶꓼ ꓥꓳ ꓙꓱꓽ ꓖꓶ ꓠꓹ ꓟ ꓬꓲ ꓡꓲꓽ ꓙꓳˍ ꓡꓳ꓿ 8 ꓕꓲ ꓒꓳꓹ ꓗꓪ ꓠꓬ ꓫꓵꓻ ꓗꓴˍ ꓟ ꓔꓲ ꓒ ꓐꓴ ꓡꓰ ꓞꓲ ꓐꓱ ꓕꓲ ꓐꓱ ꓫ ꓟꓶˍ ꓡꓳ꓿ ꓟꓷ-ꓚꓲ-ꓫꓲ-ꓔꓷ ꓔꓯ ꓐꓯˍ ꓠꓬ ꓬꓲ ꓠ ꓟꓽ ꓫꓵꓻ ꓫꓵ ꓢꓯꓸ ꓔꓬ ꓡꓳ꓾ ꓐꓰ ꓢꓷꓸ ꓙ ꓟꓳ ꓙˍ ꓟ ꓟꓶ ꓢꓲ ꓞꓲ ꓐꓱ ꓕꓲ ꓐꓱ ꓫ ꓟꓶˍ ꓡꓳ꓿ 9 - 10 ꓟꓷ-ꓚꓲ-ꓫꓲ-ꓔꓷꓼˍ ꓐꓰ ꓮ-ꓐ-ꓡ-ꓦ ꓜꓲꓻ ꓡꓯꓽ ꓘꓳˍ ꓕꓯ꓾ ꓡꓱ-ꓬꓲ ꓠꓬ ꓬꓲ ꓒꓵ ꓒ ꓖꓳ ꓓꓱ ꓗꓪ ꓓꓯꓹ ꓢꓰ ꓠꓬꓲ꓾ ꓞꓲ ꓐꓱ ꓕꓲ ꓐꓱ ꓟꓶ ꓢꓴ ꓡꓱ-ꓬꓲˍ ꓟꓲ ꓮ-ꓐ-ꓡ-ꓦ ꓗꓪ ꓐꓰ ꓬꓲ ꓖꓳ ꓡꓱ ꓞꓲ ꓐꓱ ꓕꓲ ꓐꓱ ꓖꓶ ꓗꓷꓳ꓾ ꓐꓰ ꓐꓯˍ ꓟꓲ꓾ ꓐꓯ ꓓꓻˍ ꓡꓳ꓿ 11 ꓑ ꓫꓬꓼ ꓐꓴ ꓠꓬ ꓡꓱ-ꓬꓲ ꓕꓲ ꓫꓵꓽ ꓟ ꓔꓲ ꓒ ꓟꓬꓱꓽ ꓐꓬꓱꓼ ꓘꓶꓽ ꓗꓪ ꓙꓵꓽ ꓗ ꓟꓶˍ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓡꓱ-ꓬꓲ ꓕꓲ ꓫꓵꓽ ꓟ ꓔꓲ ꓒ ꓟꓬꓱꓽ ꓐꓬꓱꓼ ꓘꓶꓽ ꓗꓪ ꓐꓰ ꓜꓳꓽ ꓓꓰ ꓡꓰ ꓓˍ ꓠꓬ꓾ ꓮ ꓡꓲ ꓗꓹ ꓠꓬꓲ ꓯ-ꓣꓷ ꓕꓲ ꓫꓵꓽ ꓟ ꓟꓽ ꓥ ꓥ꓾ ꓟꓷ-ꓚꓲ-ꓫꓲ-ꓔꓷ ꓕꓲ ꓫꓵꓽ ꓟ ꓔꓲ ꓒ ꓬꓲ ꓔꓱꓹ ꓬꓲ ꓕꓲ ꓣꓳ ꓓꓳ ꓡ ꓠꓯꓹ ꓢꓰꓽ ꓡ? 12 ꓮ ꓡꓲꓳ ꓐꓯ ꓠꓬ ꓔꓲ ꓒ ꓟꓬꓱꓽ ꓐꓬꓱ ꓘꓶꓽ ꓡꓶꓸˍ ꓕꓯ ꓠꓽ꓾ ꓙꓵꓽ ꓗ ꓟꓲ ꓡꓶꓸ ꓗꓷ ꓠ ꓗꓹ ꓟ ꓥ ꓡꓳ꓿ 13 ꓐꓯ ꓘꓶ ꓕꓱ ꓟꓬ ꓡꓰ ꓖꓴꓺ ꓔ ꓟ ꓖꓳ ꓕꓲ ꓣꓳ ꓠꓬ꓾ ꓬꓲ ꓔꓱꓹ ꓬꓲ ꓕꓲ ꓪꓳꓼ ꓥ ꓢꓲ꓾ ꓖꓳ ꓕꓲ ꓪꓳꓼ ꓗꓪ ꓐꓰ ꓮꓽ ꓟˍ ꓟꓲ ꓔꓲ ꓖꓴ ꓗꓪ ꓟꓽ ꓣꓱꓽ ꓙ ꓠꓬꓲ꓿ 14 ꓮ ꓡꓲꓳ ꓐꓯ ꓠꓬ ꓣꓳꓽ ꓢꓲ ꓒ ꓠꓽ ꓬꓴ-ꓔ ꓕꓲ ꓪꓳꓼ ꓗꓪ ꓐꓰ ꓓꓳ ꓡ ꓟ ꓥꓳ꓾ ꓐꓰ ꓮꓽ ꓟˍ ꓟꓲ ꓢꓷꓸˍ ꓡꓳ꓿ ꓖꓳ ꓕꓲ ꓪꓳꓼ ꓔꓲ ꓒ ꓣꓱꓽˍ ꓟ ꓔꓯꓸ ꓟꓳ ꓠꓬ ꓟꓳ-ꓫꓲ ꓡꓰ ꓮꓸ ꓫꓵˍ ꓟꓲ ꓟꓽ ꓐꓯ ꓔ꓿ 15 - 16 ꓖꓳ ꓡꓱ ꓠꓬ ꓧꓪꓽ ꓖꓳ ꓓꓱ ꓗꓪ ꓟ ꓒꓵꓽ ꓒˍ ꓐꓰ ꓙꓵꓽ ꓗ ꓬꓲ ꓡꓲꓽ ꓬꓲ ꓒꓰꓼ ꓔꓯ ꓛꓳˍ ꓟ ꓟꓽ ꓥ ꓥ꓾ ꓐꓬ ꓡꓰ ꓟꓽ ꓓ ꓟ ꓢꓯꓼ ꓟꓬ ꓬꓲ ꓪꓽ ꓠꓬꓲˍ ꓟ ꓔꓯ ꓛꓳ ꓢꓲ꓾ ꓟꓷ-ꓚꓲ-ꓫꓲ-ꓔꓷˍ ꓡꓰ ꓐꓰ ꓗꓹ ꓟ ꓔꓲ ꓒ ꓬꓲ ꓔꓱꓹ ꓬꓲ ꓕꓲ ꓣꓳ ꓓꓳ ꓡ ꓕꓯ ꓠꓽ꓾ ꓮꓽ ꓢꓳ ꓐꓯ ꓗꓷ ꓟ ꓠꓬ ꓟꓬꓽ ꓠꓬꓲ ꓔꓲ ꓢꓲꓽ ꓡ ꓡꓳ꓿ 17 ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓖꓴ ꓢꓲ꓾ ꓠꓴ ꓠꓬ ꓟꓷ-ꓚꓲ-ꓫꓲ-ꓔꓷ ꓕꓲ ꓫꓵꓽ ꓗꓪ ꓟ ꓕꓲ ꓞꓲꓼ ꓕꓲ ꓑ ꓟ ꓔꓲ ꓒ ꓥ ꓡꓳ꓾ ꓐꓰ ꓢꓷꓸ ꓙ ꓟꓳ ꓙ ꓗꓷꓳ꓿ 18 ꓧꓶ ꓕꓯꓽ ꓟ ꓕꓵꓼ ꓪꓽ ꓠꓬ ꓢꓯꓼ ꓐꓽˍ ꓟ ꓐꓰ ꓣꓱꓽ ꓟꓽ ꓬꓯꓼ ꓟ ꓪꓴꓸ ꓠꓬꓲ ꓣꓴ ꓩꓴ ꓗꓷꓳ꓿ 19 ꓙꓵꓽ ꓗ ꓠꓽ ꓮꓸ ꓫꓵ ꓔꓯˍ ꓟꓲ ꓜꓳꓽ ꓓꓰ ꓡꓰ ꓝꓲ ꓟꓽ ꓐ ꓡ ꓠꓬꓲ꓾ ꓮ ꓟꓶ ꓠꓬ ꓣꓳꓽ ꓔꓯ ꓖꓶ ꓡ ꓟ ꓟꓬꓽ ꓠꓬꓲ ꓙꓲˍ ꓟ ꓥꓳ ꓡꓳꓸ ꓓꓴ ꓕꓱ ꓟ ꓗꓪ ꓐꓰ ꓣꓳꓽ ꓠꓬ ꓪꓴ-ꓢ ꓔꓯ ꓠꓶꓽ ꓡꓰ ꓓꓻˍ ꓡꓳ꓿ 20 ꓝꓮꓲ ꓔꓲ ꓒ ꓬꓰˍ ꓟ ꓠꓬ꓾ ꓪꓵꓼ ꓙꓱꓽ ꓘꓶ ꓗꓪ ꓐꓰ ꓬꓰˍ ꓟ ꓥ ꓡꓳ꓿ 21 ꓡꓱ-ꓬꓲ ꓡꓽ ꓞꓳ ꓠꓽ ꓪꓵꓼ ꓙꓱꓽ ꓘꓶ ꓟꓽ ꓙꓳ ꓙꓳ ꓔꓲ ꓒ ꓟꓬꓱꓽ ꓐꓬꓱꓼ ꓘꓶꓽ ꓟꓶˍ ꓡꓳ꓿ ꓬꓰ-ꓢꓴ ꓔꓯ ꓟꓳꓸ ꓠꓽ ꓪꓴ-ꓢ ꓡꓰ ꓪꓵꓼ ꓙꓱ ꓗꓷ ꓢꓲ꓾ ꓠꓴ ꓠꓬ ꓕꓲ ꓞꓲꓼ ꓕꓲ ꓑ ꓔꓲ ꓒ ꓥ ꓡꓳ꓾ ꓐꓰ ꓢꓲ ꓒ ꓡꓰ ꓪꓵꓼ ꓙꓱꓽ ꓗꓷꓳ꓿ ꓬꓲ ꓪꓵꓼ ꓘꓶꓽ ꓔꓯ ꓬꓲ ꓟꓽ ꓒꓳꓹ꓾ ꓐꓰ ꓐꓯ ꓖꓶˍ ꓡꓳ꓿ 22 ꓕꓱ ꓟ ꓗꓪ ꓐꓰˍ ꓟꓲ ꓬꓰ-ꓢꓴ ꓠꓬ ꓟꓬꓽ ꓠꓬꓲ ꓙꓲˍ ꓟ ꓘꓶꓽ ꓫꓵꓽ ꓔꓯ ꓑꓮꓳꓽ ꓙ ꓢꓴ ꓒꓬꓱꓼ ꓡ ꓡꓳ꓿ 23 ꓔꓲ ꓒ ꓐꓴ ꓖꓳ ꓕꓲ ꓧꓳꓽ ꓠꓬ ꓮꓽ ꓘꓶꓸ ꓟꓬꓽ ꓢꓲ꓾ ꓫꓵꓻ ꓕꓯ ꓠꓱꓸ ꓐꓯꓼ ꓕꓲ ꓣꓳ ꓡꓰ ꓔꓲ ꓒ ꓟꓬꓱꓽ ꓐꓬꓱꓼ ꓘꓶ ꓑ ꓣꓱꓽ ꓠ ꓗꓹ ꓥ ꓟꓲ꓾ 24 ꓬꓰ-ꓢꓴ ꓠꓽ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓠꓬꓲ ꓑ ꓡꓶꓸ ꓟꓽ ꓛꓵ ꓟ ꓔꓲ ꓒ ꓟꓬꓱꓽ ꓐꓬꓱꓼ ꓘꓶ ꓟꓶ ꓡꓰꓳ꓿ 25 ꓬꓲ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓢꓴ ꓥ ꓠꓬꓲ꓾ ꓬꓲ ꓪꓽ ꓐꓱ ꓶ ꓪꓴ-ꓢ ꓟꓲꓽ ꓙꓬ ꓗꓪ ꓶꓼ ꓓꓰꓽ ꓙ ꓢꓲ꓾ ꓬꓲ ꓗꓪ ꓐꓰ ꓪꓴ-ꓢ ꓔꓯ ꓠꓶꓽ ꓙꓰ ꓢꓴ ꓔꓯ ꓬꓲ ꓚꓬꓴ ꓡꓳꓹ ꓬꓰ ꓘꓴꓻˍ ꓡꓳ꓿ 26 ꓖꓳ ꓡꓱ ꓠꓬꓲ ꓢꓲꓽ ꓫꓬ ꓟ꓾ ꓓꓰ ꓖꓴ ꓟꓽ ꓙꓳ ꓟ꓾ ꓟꓽ ꓫꓬꓻ ꓟ ꓟꓽ ꓠꓷꓼ ꓡꓰ ꓟ꓾ ꓝꓴꓲ ꓙꓳ ꓢꓴˍ ꓐꓰ ꓗꓳꓹ ꓞ ꓟ ꓐꓰ꓾ ꓟꓴꓽ ꓗꓪ ꓟꓴꓺ ꓟꓽ ꓞꓲ ꓓꓳꓹ ꓟꓴ ꓟꓶ ꓡꓰ ꓟ꓾ ꓕꓱ ꓡꓱ ꓫꓵꓽ ꓔꓲ ꓒ ꓓꓽ ꓟ ꓔꓯ ꓠꓬ ꓣꓳꓽ ꓚꓵ ꓚꓵ ꓣꓱꓽ ꓬꓯꓼˍ ꓟ ꓥ ꓡꓳ꓿ 27 ꓬꓲ ꓠꓬ ꓔꓲ ꓒ ꓓꓽ ꓟ ꓐꓴ ꓖꓳ ꓕꓷˍ ꓡꓰ ꓐꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ꓾ ꓬꓲ ꓪꓴꓸ ꓠꓬ ꓚꓲ ꓛꓬ ꓝꓴꓲ ꓑꓶꓸ ꓓꓴ꓾ ꓗꓸ ꓠꓯ ꓠꓬ ꓑ ꓫꓬꓼ ꓐꓴ ꓝꓴꓲ ꓑꓶꓸ ꓓꓴ ꓢꓰꓼ ꓔꓲ ꓓꓴ ꓔꓲ ꓖꓶ ꓟꓽ ꓛꓵ꓿ ꓮ ꓡꓲꓳ ꓐꓯ ꓠꓬ ꓬꓲ ꓚꓲ ꓛꓬ ꓖꓳ ꓓꓱꓽ ꓔꓲ ꓖꓶˍ ꓕꓯ꓾ ꓬꓲ ꓪꓽ ꓝꓴꓲ ꓐꓱ ꓶ ꓕꓲ ꓧꓪꓹꓼ ꓐꓰ ꓕꓱ ꓡꓱ ꓬꓰ ꓗꓷꓳ꓿ 28 ꓙꓵꓽ ꓗ ꓠꓬ ꓢꓯꓼ ꓐꓽˍ ꓟ ꓞꓳ ꓤ ꓔꓯ ꓔꓲ ꓒ ꓓꓽ ꓟ ꓣꓱꓽ ꓝꓲˍ ꓡꓳ꓿ ꓖꓳ ꓡꓱ ꓥ ꓟꓲ ꓙꓵꓽ ꓗ ꓟꓶ ꓗꓷ ꓗꓸ ꓠꓯꓸ ꓡꓻˍ ꓟ ꓪꓵꓼ ꓙꓱꓽ ꓘꓶ ꓠ꓾ ꓕꓲ ꓞꓲꓼ ꓕꓲ ꓑ ꓜꓳꓽ ꓓꓰˍ ꓟ ꓮ ꓐꓲ ꓔꓯ ꓔꓲ ꓒ ꓣꓱꓽ ꓝꓲˍ ꓡꓳ꓿

ꓦꓲ-ꓐꓱ-ꓣꓴ 8

1 ꓐꓯ ꓗꓷ ꓟ ꓗꓪ ꓬꓳꓹ ꓚꓲꓽˍ ꓟ ꓕꓲ ꓘꓶ ꓠꓬ ꓕꓱ ꓡꓱ ꓥ ꓡꓳ꓿ ꓟꓴꓽ ꓗꓪ ꓕꓯ ꓢꓲ ꓗꓴꓺ ꓙꓳ ꓢꓴ꓾ ꓪ ꓔꓲ ꓙꓵꓽ ꓠꓬꓲꓸ ꓕꓲ ꓡꓯꓼ ꓙꓺ ꓗꓪ ꓠꓬꓲꓸ ꓠꓸ ꓡꓰˍ ꓟ ꓔꓲ ꓒ ꓓꓽ ꓟ ꓕꓲ ꓣꓳ ꓣꓳꓽ ꓙꓳˍ ꓡꓳ꓿ 2 ꓬꓲ ꓠꓬ ꓢꓲꓽ ꓫꓬ ꓖꓴ꓾ ꓦꓲ ꓐꓱ ꓚꓵꓺ ꓗꓪ ꓣꓱꓽ ꓙ ꓢꓴ ꓕꓲ ꓣꓳ ꓥ ꓡꓳ꓿ ꓦꓲ ꓐꓱ ꓕꓱ ꓟ ꓠꓬ ꓞꓳ ꓤ ꓡꓰ ꓔꓶꓺ ꓔ ꓟ ꓟꓽ ꓥ꓾ ꓢꓲ ꓒ ꓡꓰ ꓔꓶꓺ ꓔ ꓟ ꓥ ꓡꓳ꓿ 3 ꓮ ꓡꓲꓳ ꓐꓯ ꓠꓬ ꓔꓲ ꓒ ꓓꓽ ꓟ ꓮ ꓡꓲ ꓕꓲ ꓣꓳˍ ꓟꓲ꓾ ꓡꓯꓼ ꓫꓴˍ ꓐꓰ ꓢꓰꓼ ꓔꓲ ꓓꓴ ꓔꓲ ꓖꓶ ꓠ ꓟ ꓢꓲ ꓚꓰꓸ ꓔ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳꓽ ꓔꓲ ꓒ ꓓꓽ ꓟ ꓕꓱ ꓕꓲ ꓣꓳˍ ꓟꓲ ꓔꓲ ꓓꓴ ꓕꓲ ꓫꓵꓽ ꓙꓳ ꓠ ꓗꓹ ꓡꓳ꓿ 4 ꓟꓲ ꓠꓯ ꓗꓪ ꓠꓬ ꓙꓵꓽ ꓗ ꓔꓯ ꓛꓳ ꓢꓲ ꓔꓲ ꓖꓶˍ ꓟ ꓔꓲ ꓒ ꓟꓬꓱꓽ ꓣꓱꓽ ꓢꓴ ꓙꓳˍ ꓠꓬꓲ꓾ ꓬꓲ ꓟꓲ ꓠꓯ ꓗꓪ ꓔꓬ ꓢꓰ ꓐꓷˍ ꓠꓬ ꓔꓲ ꓒ ꓟꓽ ꓬꓰ ꓡꓳ ꓫꓵ ꓥ ꓡꓳ꓿ 5 ꓟꓲ ꓠꓯ ꓗꓪ ꓟ ꓔꓲ ꓒ ꓐꓴ ꓠꓬ ꓟꓴꓽ ꓗꓪ ꓗꓪ ꓟ ꓦꓲ ꓐꓱ ꓬꓲ ꓐꓬꓱꓽˍ ꓐꓰ ꓬꓲ ꓶꓻ ꓥꓳꓽ ꓗꓪ ꓣꓱꓽ ꓙˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓳ-ꓫꓲ ꓡꓰ ꓦꓲ ꓐꓱ ꓫꓬꓹˍ ꓐꓰ ꓬꓰˍ ꓕꓯ꓾ ꓪꓴ-ꓢ ꓡꓰ ꓬꓲ ꓔꓯ ꓙꓳꓺ ꓗꓽ ꓖꓶ ꓢꓲ꓾ ꓪꓽ ꓚꓲ ꓗꓪ ꓠꓴ ꓔꓯ ꓟꓳꓸ ꓖꓶˍ ꓟ ꓔꓯꓺ ꓐꓬꓱꓽ ꓮꓽ ꓙꓵ ꓔꓯ ꓠꓴ ꓛꓳꓻ ꓢꓲ ꓫꓬꓹ ꓠ ꓟ ꓤꓻ ꓟꓳ꓾ ꓐꓯ ꓖꓶˍ ꓡꓳ꓿ 6 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓽ ꓪꓻ ꓜꓲ ꓙꓲˍ ꓟ ꓘꓶꓽ ꓫꓵꓽ ꓗꓪ ꓟ ꓜꓲꓽ ꓟꓳꓽ ꓥ ꓢꓲ꓾ ꓘꓶꓽ ꓫꓵꓽ ꓕꓱ ꓟ ꓠꓬ ꓪꓻ ꓜꓲ ꓙꓲˍ ꓟ ꓙ ꓟꓳ ꓘꓶ ꓗꓪ ꓐꓰ ꓬꓰ ꓔ ꓠꓬꓲ꓾ ꓬꓲ ꓠꓬ ꓟꓬꓽ ꓠꓬꓲ ꓙꓲˍ ꓟ ꓟꓬꓱꓽ ꓐꓬꓱꓼ ꓘꓶꓽ ꓟꓶ ꓡꓰꓳ꓿ 7 ꓘꓶꓽ ꓫꓵꓽ ꓬꓲ ꓪꓴꓸ ꓕꓲꓽ ꓟꓻ ꓟ ꓜꓳꓽ ꓓꓰˍ ꓕꓯ ꓠꓽ꓾ ꓗꓸ ꓠꓯꓸ ꓕꓲ ꓟ ꓧꓪ ꓟꓽ ꓛꓵ ꓡꓳ ꓫꓵꓽ ꓥꓳ꓿ 8 ꓖꓳ ꓡꓱ ꓥ ꓟꓲ ꓢꓲ ꓒꓽ ꓡꓰ ꓑ ꓫꓬꓼ ꓐꓴ ꓛꓬꓻ ꓖꓴ ꓔꓯ ꓖꓴ ꓢꓲ꓾ ꓥꓪ ꓠꓬ ꓬꓲ-ꓢꓷ-ꓡꓰ ꓕꓲ ꓦꓲ ꓢꓴˍ ꓐꓰ꓾ ꓬꓴ-ꓔ ꓕꓲ ꓦꓲ ꓢꓴˍ ꓐꓰ ꓘꓶꓽ ꓫꓵꓽ ꓬꓲ ꓫꓵꓼ ꓬꓰ ꓠꓹ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ 9 ꓘꓶꓽ ꓫꓵꓽ ꓕꓱ ꓟ ꓠꓬ꓾ ꓬꓲ-ꓙꓲ ꓟꓵ ꓗꓪ ꓐꓰ ꓬꓲ ꓪꓽ ꓔꓯ ꓧꓳꓽ ꓓꓳ ꓡ ꓠ ꓟ ꓬꓲ ꓪꓽ ꓡꓯꓼ ꓒꓯꓹ ꓗꓪ ꓖꓳꓻ ꓖꓶˍ ꓟ ꓦꓬꓼ ꓠꓬꓲ ꓗꓪ꓾ ꓥꓪ ꓡꓰ ꓬꓲ ꓪꓽ ꓒꓵꓽ ꓒ ꓐꓴˍ ꓐꓰ ꓬꓰ ꓔ ꓟ ꓘꓶꓽ ꓫꓵꓽˍ ꓡꓰ ꓐꓰ ꓟꓽ ꓗꓹ꓿ ꓮ ꓡꓲꓳ ꓐꓯ ꓠꓬ ꓥꓪ ꓘꓶꓽ ꓫꓵꓽ ꓔꓯ ꓬꓲ ꓪꓽ ꓟꓽ ꓛꓳˍ ꓠꓬꓲ꓾ ꓥꓪˍ ꓟꓲ ꓬꓲ ꓪꓽ ꓔꓯ ꓟꓽ ꓗꓪꓽ ꓫꓵꓽꓳ꓾ ꓐꓯˍ ꓡꓳ꓿ 10 ꓝꓮꓲ ꓢꓲ ꓒꓽ ꓡꓰ꓾ ꓦꓬꓼ ꓠꓬꓲ ꓖꓳ ꓟ ꓗꓸ ꓠꓯ ꓥꓪ ꓡꓰ ꓬꓲ-ꓢꓷ-ꓡꓰ ꓕꓲ ꓦꓲˍ ꓐꓰ ꓬꓰ ꓠ ꓟ ꓘꓶꓽ ꓫꓵꓽ ꓠꓬ ꓕꓱ ꓡꓱ ꓥꓳ꓿ ꓥꓪ ꓙꓵꓽ ꓗ ꓠꓬ ꓥꓪ ꓡꓰ ꓬꓲ ꓪꓽ ꓙꓽ ꓠꓲꓹ ꓠꓯꓸꓼ ꓗꓪ ꓧꓳꓽ ꓖꓶ ꓢꓲ꓾ ꓬꓲ ꓪꓽ ꓠꓲꓹ ꓟ ꓗꓪ ꓐꓳ ꓔ ꓢꓲ ꓠꓬꓲ꓾ ꓥꓪ ꓠꓬ ꓬꓲ ꓪꓽ ꓪꓴ-ꓢ ꓬꓰˍ ꓥꓳ꓿ ꓬꓲ ꓪˍ ꓟꓲ ꓥꓪ ꓑ ꓫꓬꓼ ꓬꓰˍ ꓥꓳ꓿ 11 ꓖꓳ ꓡꓱ ꓢꓲ ꓬꓲ ꓪꓽ ꓮ ꓡꓲ ꓕꓲ ꓣꓳˍ ꓟꓲ꓾ ꓠꓶꓽ ꓛꓳ ꓕꓲ ꓛꓳꓺꓼ ꓐꓰ ꓚꓲ ꓛꓬ ꓬꓲꓼ ꓤ ꓠꓬꓲ ꓤ ꓐꓴ ꓔꓯ꓾ ꓢꓲ ꓒꓽ ꓔꓯ ꓢꓷꓸ ꓠꓯꓹ ꓡꓳ꓾ ꓐꓰ ꓐꓯ ꓟꓸ ꓖꓶ ꓟꓽ ꓛꓵꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓪꓴꓽ ꓪꓴ ꓣꓳꓺ ꓣꓳ ꓮꓽ ꓙꓵ ꓥꓪ ꓔꓯ ꓢꓷꓸˍ ꓥꓳ꓿ 12 ꓝꓮꓲ ꓬꓲ ꓪꓽ ꓟꓽ ꓙꓲ ꓟꓽ ꓜꓳ ꓟ ꓔꓯ ꓥꓪ ꓡꓰ ꓖꓽ ꓖꓶꓽ ꓢꓲ꓾ ꓬꓲ ꓪꓽ ꓝꓴꓲ ꓔꓯ ꓥꓪ ꓟꓽ ꓚꓲꓸ ꓔꓸꓳ꓾ ꓐꓯˍ ꓡꓳ꓿ 13 ꓬꓲ ꓡꓰ꓾ ꓘꓶꓽ ꓫꓵꓽ ꓫꓵꓼ ꓐꓯˍ ꓟ ꓪꓴ ꓠꓬꓲ꓾ ꓬꓲ ꓪꓴꓸ ꓕꓲ ꓟ ꓟ ꓔꓯ ꓠꓬ ꓬꓲ ꓡꓵꓺ ꓗꓷ ꓡꓰ ꓝꓲꓳ꓿ ꓐꓰꓽ ꓡꓰ ꓡꓵꓺ ꓡꓰ ꓗꓴꓸˍ ꓟ ꓠꓬ ꓟꓬꓼ ꓬꓰ ꓓꓴˍ ꓡꓰꓽ ꓥ ꓡꓳ꓿

ꓦꓲ-ꓐꓱ-ꓣꓴ 9

1 ꓘꓶꓽ ꓫꓵꓽ ꓬꓲ ꓪꓴꓸ ꓕꓲ ꓟ ꓗꓪˍ ꓟꓲ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼˍ ꓟ ꓙꓵꓽ ꓚꓱꓹˍ ꓐꓰ꓾ ꓞꓳ ꓤ ꓡꓰ ꓫꓬꓹ ꓔ ꓟ ꓢꓲꓽ ꓫꓬ ꓦꓲ ꓗꓪ ꓪꓴꓸ ꓓꓵ ꓕꓱꓼ ꓖꓴ ꓙꓳˍ ꓡꓳ꓿ 2 ꓬꓲ ꓪꓽ ꓠꓬ ꓟꓶ ꓔꓶꓸ ꓦꓲ ꓕꓲ ꓦꓲ ꓙꓽ ꓖꓶ ꓔ ꓢꓲ꓾ ꓬꓲ ꓪꓴꓸ ꓕꓲ ꓗꓳꓹ ꓔꓯ ꓠꓬ ꓢꓲꓽ ꓫꓬ ꓖꓴ꓾ ꓐꓯˍ ꓡꓳ꓿ ꓖꓳ ꓕꓲ ꓗꓳꓹ ꓗꓪ ꓠꓬ ꓟꓬ ꓡꓴ ꓕꓲˍ ꓐꓰ ꓢꓽ ꓡ ꓐꓰ꓾ ꓲ'ꓺ ꓗꓶ ꓔꓸ ꓟ ꓑ ꓑ ꓙꓳˍ ꓡꓳ꓿ 3 ꓝꓮꓲ ꓗꓳꓹ ꓛ ꓠꓬꓲꓽ ꓟ ꓕꓲꓽ ꓟꓻ ꓟ ꓗꓸ ꓠꓯ ꓢꓲ ꓗꓪ ꓠꓬ꓾ ꓮꓽ ꓘꓶꓸ ꓢꓲꓽ ꓫꓬ ꓖꓴ꓾ ꓐꓯˍ ꓟ ꓟꓶ ꓔꓶꓸ ꓦꓲ ꓕꓲ ꓗꓳꓹ ꓙꓳˍ ꓡꓳ꓿ 4 ꓖꓳ ꓟ ꓠꓯꓸꓼ ꓗꓪ ꓠꓬ ꓫꓵꓺ ꓡꓰ ꓫꓬꓹ ꓔ ꓟ ꓫꓳꓸ ꓛꓴꓻ ꓖꓴˍ ꓐꓰ꓾ ꓫꓵꓺ ꓡꓰ ꓔꓱꓹ ꓠꓷꓼ ꓔ ꓟ ꓘꓶꓽ ꓫꓵꓽ ꓝꓲꓸ ꓖꓶꓽ ꓙꓳˍ ꓡꓳ꓿ ꓝꓲꓸ ꓖꓶꓽ ꓖꓳ ꓟ ꓗꓪ ꓠꓬ ꓟ-ꓠ ꓗꓶ ꓔ ꓟ ꓫꓵꓺ ꓬꓲꓻ ꓪꓴ ꓤˍ ꓐꓰ꓾ ꓬꓲꓸ ꓡꓯꓼ ꓐꓵ ꓠꓱꓽ ꓡ ꓗꓷ ꓟ ꓯ-ꓣꓷ ꓙꓽ ꓥꓳꓽˍ ꓐꓰ ꓘꓶꓽ ꓫꓵꓽ B ꓒꓬꓸ ꓠꓬꓲꓽ ꓒꓬꓸ ꓙꓳˍ ꓡꓳ꓿ 5 ꓝꓲꓸ ꓖꓶꓽ ꓖꓳ ꓟ ꓕꓯꓽ ꓢꓲ ꓗꓪ ꓠꓬ꓾ ꓐꓬꓱꓼ ꓡꓱꓼ ꓡꓱꓼ ꓟ ꓚꓲ-ꓡꓴ-ꓑꓷ ꓡꓰ ꓣꓱꓽ ꓛꓰ ꓟꓶ ꓕꓲ ꓔꓯ ꓛꓸ ꓔ ꓡꓳ꓿ ꓕꓱ ꓟꓬ ꓫꓵꓽ ꓔꓯ ꓠꓬ ꓮ ꓟꓶ ꓜꓲ ꓜꓲ ꓟꓵ ꓟꓵ ꓐꓯ ꓖꓴ ꓟꓽ ꓓ꓿ 6 ꓕꓱ ꓟꓬ ꓫꓵꓽ ꓙꓽ ꓖꓶ ꓗꓷ ꓠꓬ꓾ ꓔꓲ ꓒ ꓐꓴ ꓠꓽ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓶ ꓔꓶꓸ ꓦꓲ ꓬꓲ ꓪꓴꓸ ꓕꓲ ꓗꓳꓹ ꓗꓪ ꓓꓵꓽ ꓙꓰ ꓢꓲ꓾ ꓪꓴ-ꓢ ꓔꓯ ꓣꓱꓽ ꓙˍ ꓟ ꓟꓬꓱꓽ ꓬꓰˍ ꓡꓳ꓿ 7 ꓗꓸ ꓠꓯ ꓕꓲ ꓗꓳꓹ ꓗꓪ ꓠꓽ꓾ ꓔꓲ ꓒ ꓓꓽ ꓟ ꓬꓲ ꓕꓲ ꓣꓳˍ ꓡꓰꓽ ꓕꓲ ꓘꓳꓼ ꓕꓲ ꓧꓪꓹ꓾ ꓬꓲ ꓚꓲ ꓛꓬ ꓐꓱ ꓶˍ ꓐꓰ ꓑ ꓫꓬꓼ ꓐꓴ ꓟꓽ ꓢꓷꓸ ꓟ ꓗꓪ ꓐꓰ ꓛꓬ ꓗꓷˍ ꓟ ꓛꓬꓻ ꓖꓴ ꓥꓳꓽ ꓖꓴ ꓐꓱ ꓶ ꓔꓲ ꓖꓶ ꓠꓹ ꓟ ꓫꓵꓽ ꓔꓯꓹ ꓔ ꓢꓲ ꓓꓵꓽ ꓙꓰˍ ꓡꓳ꓿ 8 ꓕꓱ ꓟꓬ ꓫꓵꓽ ꓗꓪ ꓐꓰ꓾ ꓟꓶ ꓔꓶꓸ ꓦꓲ ꓬꓲ ꓪꓴꓸ ꓕꓲ ꓦꓲ ꓟ ꓓꓹ ꓢꓰꓽ ꓕꓯ ꓠꓬ꓾ ꓢꓲꓽ ꓫꓬ ꓖꓴ ꓗꓪ ꓓꓵꓽ ꓙꓰˍ ꓟ ꓙ ꓖꓴ ꓟꓽ ꓒꓴ ꓔ ꓢꓰꓽ꓾ ꓐꓰ ꓢꓲ-ꓫꓬ-ꓟ-ꓦ ꓡꓰ ꓟꓳꓸ ꓖꓶˍ ꓡꓳ꓿ 9 ꓕꓱ ꓟ ꓠꓬ ꓮ ꓟꓶ ꓟ ꓦꓬꓼ ꓠꓬꓲ ꓐꓱ ꓶ ꓔꓯ ꓐꓬꓱꓽ ꓥ ꓡꓳ꓿ ꓖꓳ ꓗꓪ ꓔꓲ ꓖꓶˍ ꓟ ꓡꓯꓼ ꓫꓴˍ ꓐꓰ ꓔꓲ ꓓꓴ ꓡꓰ꓾ ꓪꓴꓸ ꓓꓵ ꓕꓱꓼ ꓢꓴ ꓦꓰꓽ ꓠꓲꓹ ꓔꓯ ꓜꓳꓽ ꓓꓰ ꓡꓰ ꓝꓲ ꓟꓽ ꓐ ꓡ꓿ 10 ꓖꓳ ꓟꓬ ꓫꓵꓽ ꓠꓬ ꓜꓽ ꓓꓴ ꓓꓳꓻ ꓓꓴˍ ꓐꓰ ꓞꓲꓽˍ ꓟ ꓡꓯꓹˍ ꓟ ꓐꓰ꓾ ꓧꓪꓽ ꓖꓳ ꓓꓱ ꓗꓪ ꓟ ꓙꓵꓽ ꓚꓱꓹ ꓬꓲ ꓫꓵꓽ ꓬꓲ ꓙꓰꓽˍ ꓡꓰꓽ ꓥ ꓢꓲ꓾ ꓪꓴ-ꓢ ꓡꓰ ꓚꓱꓹ ꓬꓲ ꓫꓵꓼ ꓔꓶ ꓡ ꓟ ꓦꓬꓼ ꓠꓬꓲ ꓗꓪ ꓛꓲˍ ꓡꓰꓽ ꓗꓪꓽ ꓫꓵꓽˍ ꓟ ꓥ ꓡꓳ꓿ 11 ꓖꓳ ꓡꓱ ꓥ ꓟꓲ ꓙꓲˍ ꓟ ꓖꓶ ꓢꓴ ꓔꓲ ꓒ ꓓꓽ ꓟ ꓙꓲ-ꓢꓴ ꓛꓲ ꓡ ꓕꓯ꓾ ꓬꓲ ꓠꓬ ꓪ ꓜꓲꓻ ꓪꓴꓽˍ ꓟ ꓐꓰ ꓪ ꓜꓲ ꓜꓳꓽ ꓓꓰˍ ꓟ ꓟꓶ ꓔꓶꓸ ꓦꓲ ꓗꓪ ꓐꓰ ꓗꓳꓸ ꓙꓰꓳ꓿ ꓟꓶ ꓔꓶꓸ ꓦꓲ ꓕꓱ ꓟ ꓠꓬ ꓡꓯꓼ ꓒꓯꓹ ꓡꓰ ꓫꓬꓹ ꓔ ꓟ ꓟꓽ ꓥ꓿ ꓚꓰꓼ ꓔ ꓡꓳ ꓫꓵꓽ ꓗꓪ ꓟˍ ꓟꓲ ꓟꓽ ꓥ꓿ 12 ꓬꓲ ꓠꓬ ꓮꓸ ꓛꓵꓼ ꓫꓵꓽˍ ꓐꓰ ꓮꓸ ꓠꓬꓲꓽ ꓤ ꓫꓵꓽ ꓗꓪ ꓐꓰ ꓟꓽ ꓥ ꓥ꓾ ꓬꓲ ꓚꓲ ꓛꓬ ꓫꓵꓽ ꓗꓪ ꓐꓰ ꓢꓲꓽ ꓫꓬ ꓖꓴ ꓗꓪ ꓬꓲ ꓕꓲ ꓧꓪꓹˍ ꓡꓰꓽ ꓓꓵꓽ ꓙꓰ ꓢꓲ꓾ ꓣꓳꓽ ꓐꓱ ꓶ ꓕꓲ ꓞꓲꓼ ꓕꓲ ꓑ ꓫꓴꓹ ꓣꓴˍ ꓟ ꓟꓬꓱꓽ ꓬꓰ ꓓꓳ ꓡꓰꓳ꓿ 13 ꓮ ꓡꓲꓳ ꓐꓯ ꓠꓬ ꓮꓸ ꓛꓵꓼˍ ꓐꓰ ꓮꓸ ꓠꓬꓲꓽ ꓑ ꓫꓵꓽˍ ꓐꓰ ꓮꓸ ꓠꓬꓲꓽ ꓟ ꓡꓯꓸ ꓤ ꓘꓴꓽ ꓦ ꓡꓰ꓾ ꓟꓽ ꓫꓬꓻ ꓟ ꓠꓷꓼ ꓞ ꓢꓴ ꓔꓯ ꓧꓶꓺ ꓗꓷ ꓢꓲ꓾ ꓧꓪꓽ ꓖꓳ ꓓꓱꓽ ꓔꓯ ꓫꓬꓻ ꓡꓰ ꓝꓲ ꓐ ꓡ ꓕꓯ ꓠꓽ꓾ 14 ꓬꓰ-ꓢꓴ ꓬꓲ ꓫꓵꓽ ꓡꓰ ꓟꓬꓽ ꓠꓬꓲ ꓣꓳꓽ ꓔꓯ ꓞꓲꓽ ꓫꓬꓻ ꓡꓰ ꓝꓲ ꓐ ꓡ ꓥꓳ ꓟꓽ ꓥ ꓡ? ꓬꓲ ꓠꓬ ꓕꓲ-ꓞꓲ-ꓕꓲ-ꓑ-ꓟ-ꓦ ꓗꓪ ꓐꓰ꓾ ꓬꓲ ꓚꓲ ꓛꓬ ꓖꓳ ꓓꓱ ꓠꓬ ꓜꓳꓽ ꓓꓰˍ ꓟ ꓔꓲ ꓓꓴ ꓬꓰ ꓢꓲ ꓪꓴ-ꓢ ꓔꓯ ꓔꓲ ꓖꓶ ꓗꓷꓳ꓿ ꓖꓳ ꓡꓱ ꓠꓬꓲ ꓣꓳꓽ ꓠꓬ ꓢꓯꓸ ꓔꓬ ꓟ ꓪꓴ-ꓢ ꓔꓯ ꓣꓱꓽ ꓙ ꓪ ꓠꓹ ꓟ꓾ ꓙꓲ ꓖꓴ ꓟꓽ ꓙꓳ ꓟ ꓫꓵꓻ ꓟꓬꓱꓽ ꓗꓪ ꓟ ꓣꓳꓽ ꓦꓰꓽ ꓠꓲꓹ ꓔꓯ ꓬꓰ-ꓢꓴ ꓫꓵꓽ ꓡꓰ ꓫꓬꓻ ꓡꓰ ꓝꓲꓳ꓿ 15 ꓕꓱ ꓟ ꓑꓶꓸ ꓓꓴ ꓬꓲ ꓠꓬ ꓘꓶꓽ ꓫꓵꓽ ꓫꓵꓼ ꓜꓲꓽ ꓟꓳꓽ ꓬꓰˍ ꓡꓳ꓿ ꓕꓱ ꓟ ꓠꓬ ꓬꓲ ꓪꓴꓸ ꓟ ꓘꓶꓽ ꓫꓵꓽ ꓠꓯꓸ ꓘꓪ ꓛꓬ ꓗꓷ ꓥꓳꓽ ꓗꓷ ꓢꓴ ꓔꓯ ꓬꓲ ꓫꓵꓻˍ ꓟ ꓗꓪ ꓐꓰ ꓫꓴꓹ ꓣꓴ ꓠ ꓟ ꓐꓰ꓾ ꓘꓴ ꓔ ꓢꓴ ꓔꓯ ꓙ ꓟꓳ ꓔ ꓟ ꓕꓲ ꓞꓲꓼ ꓕꓲ ꓑ ꓟ ꓡꓯꓼ ꓪ ꓟꓶꓻ ꓝꓲ ꓠꓹ ꓟ ꓥ ꓡꓳ꓿ 16 ꓘꓶꓽ ꓫꓵꓽ ꓬꓰ ꓔ ꓟ ꓡꓯꓼ ꓪ ꓟꓶ ꓡꓰ ꓠꓹ ꓟ ꓠꓬ꓾ ꓘꓶꓽ ꓫꓵꓽ ꓬꓰ ꓢꓴ ꓖꓳ ꓕꓲ ꓣꓳ ꓫꓵꓻˍ ꓟ ꓗꓸ ꓚꓵ ꓙꓳ ꓠ ꓗꓹ ꓡꓳ꓿ 17 ꓮ ꓡꓲꓳ ꓐꓯ ꓠꓬ ꓘꓶꓽ ꓫꓵꓽ ꓬꓰ ꓢꓴ ꓫꓵꓻ ꓗꓷ ꓗꓸ ꓠꓯꓸ ꓢꓲˍ ꓡꓰ꓾ ꓡꓯꓼ ꓪ ꓟꓶ ꓓꓻˍ ꓟ ꓥ ꓡꓳ꓿ ꓘꓶꓽ ꓫꓵꓽ ꓬꓰ ꓢꓴ ꓢꓯꓸ ꓔꓬ ꓢꓰꓽ ꓕꓯ ꓠꓬ ꓡꓯꓼ ꓪ ꓖꓳ ꓟ ꓟꓶ ꓟꓽ ꓓ꓿ 18 ꓖꓳ ꓡꓱ ꓠꓬꓲ ꓬꓲ ꓪꓴꓸ ꓟ ꓘꓶꓽ ꓫꓵˍ ꓟꓲ꓾ ꓫꓵꓽ ꓟꓽ ꓣꓱꓽ ꓣꓱ ꓬꓰ ꓔ ꓟ ꓟꓽ ꓥ꓿ 19 ꓮ ꓡꓲꓳ ꓐꓯ ꓠꓬ ꓟꓳ-ꓫꓲ ꓡꓰ ꓙꓵꓽ ꓗ ꓔꓯ ꓛꓳꓻ ꓢꓲ꓾ ꓕꓵꓼ ꓪꓽ ꓕꓲ ꓫꓵꓽ ꓡꓰ ꓕꓲ ꓫꓵ ꓮꓽ ꓙꓵ ꓑ ꓫꓬꓼ ꓐꓴ ꓔꓯ ꓚ ꓟꓸ ꓖꓶ ꓗꓷ ꓠꓬ꓾ ꓬꓲ ꓡꓰ ꓮꓸ ꓠꓬꓲꓽ ꓤ ꓫꓵꓽˍ ꓐꓰ ꓮꓸ ꓛꓵꓼ ꓫꓵꓽˍ ꓐꓰ ꓬꓲꓻ ꓙꓬˍ ꓐꓰ꓾ ꓮ ꓣꓳ ꓟꓵ ꓠꓲꓺ ꓠꓲꓺ ꓟˍ ꓐꓰ꓾ ꓫꓵꓽ ꓧꓶꓺ ꓟꓳꓼ ꓣꓴ ꓢꓲ꓾ ꓕꓳ ꓶ ꓔꓯ ꓥ ꓟꓲ ꓑ ꓫꓬꓼ ꓐꓴ ꓔꓯ ꓥ ꓟꓲ ꓧꓶꓺ ꓢꓲ ꓠꓬꓲ꓾ 20 ꓕꓱ ꓟ ꓠꓬ ꓪꓴ-ꓢ ꓡꓰ ꓠꓴ ꓪˍ ꓐꓰ ꓬꓰ ꓔ ꓖꓶ ꓟ ꓘꓶꓽ ꓫꓵꓽ ꓗꓪ ꓟ ꓬꓲ ꓫꓵꓽ ꓥ ꓡꓳ꓾ ꓐꓯ ꓖꓶˍ ꓡꓳ꓿ 21 ꓝꓮꓲ ꓖꓳ ꓟ ꓡꓰ ꓐꓰ꓾ ꓬꓲ ꓠꓬ ꓟꓶ ꓔꓶꓸ ꓦꓲˍ ꓐꓰ ꓣꓱꓽ ꓓꓴ ꓡꓴꓻ ꓮꓽ ꓙꓵ ꓗꓪ ꓫꓵꓽ ꓡꓰ ꓧꓶꓺ ꓗꓷˍ ꓡꓳ꓿ 22 ꓙꓵꓽ ꓗ ꓗꓪ ꓠꓬ꓾ ꓮꓽ ꓡ ꓙꓳˍ ꓟ ꓥ ꓕ ꓑꓳ ꓔꓯ ꓫꓵꓽ ꓡꓰ ꓢꓲꓽ ꓫꓬ ꓡꓰ ꓝꓲˍ ꓡꓳ꓾ ꓐꓰ ꓐꓯ ꓓꓻˍ ꓡꓳ꓿ ꓫꓵꓽ ꓧꓳꓸ ꓡꓰˍ ꓟ ꓗꓪ ꓐꓰ ꓟꓽ ꓥ ꓠꓬ ꓝꓴꓲ ꓖꓽ ꓖꓶˍ ꓟ ꓟꓽ ꓙꓳ꓿ 23 ꓖꓳ ꓡꓱ ꓠꓬꓲ ꓟꓴꓽ ꓗꓪ ꓗꓪ ꓟ ꓔꓯ ꓔꓯ ꓢꓲ ꓫꓬꓹ ꓔ ꓟ ꓔꓯ ꓠꓬ꓾ ꓢꓰꓼ ꓔꓲ ꓓꓴ ꓕꓱ ꓡꓱ ꓫꓵꓽ ꓡꓰ ꓢꓲꓽ ꓫꓬ ꓡꓰ ꓝꓲ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓟꓴꓽ ꓗꓪ ꓗꓪ ꓟ ꓬꓲ ꓑꓰꓹ ꓚꓵ ꓔꓯ ꓠꓽ꓾ ꓪꓻ ꓜꓲ ꓙꓲˍ ꓟ ꓢꓰꓼ ꓔꓲ ꓓꓴ ꓡꓰ ꓢꓲꓽ ꓫꓬ ꓡꓰ ꓝꓲ ꓠ ꓗꓹ ꓡꓳ꓿ 24 ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓠꓽ꓾ ꓢꓲꓽ ꓫꓬ ꓖꓴ ꓚꓵ ꓔꓯ ꓔꓯꓺ ꓔ ꓟ꓾ ꓞꓳ ꓤ ꓡꓯꓼ ꓒꓯꓹ ꓡꓰ ꓫꓬꓹ ꓔ ꓟ ꓢꓲꓽ ꓫꓬ ꓖꓴ ꓗꓪ ꓓꓵꓽ ꓙꓰ ꓗꓷ ꓟ ꓟꓽ ꓥ꓿ ꓬꓲ ꓠꓽ ꓟꓴꓽ ꓗꓪ ꓗꓪ ꓟ ꓢꓲꓽ ꓫꓬ ꓖꓴ ꓚꓵ ꓗꓪ ꓓꓵꓽ ꓙꓰ ꓢꓲ꓾ ꓣꓳꓽ ꓐꓱ ꓶ ꓪꓴ-ꓢ ꓟꓲꓽ ꓙꓬ ꓗꓪ ꓓꓵꓽ ꓙꓰ ꓗꓷꓳ꓿ 25 ꓝꓮꓲ ꓔꓲ ꓒ ꓓꓽ ꓟ ꓠꓬ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓚꓲ ꓛꓬ ꓫꓵꓽ ꓟꓽ ꓥ ꓟ ꓙꓱꓽ ꓤ ꓫꓵꓽ ꓔꓯꓹ ꓔ ꓢꓲ꓾ ꓢꓲꓽ ꓫꓬ ꓖꓴ ꓗꓪ ꓓꓵꓽ ꓙꓰˍ ꓡꓳ꓿ ꓙꓲ-ꓢꓴ ꓠꓽ ꓬꓲ ꓚꓲ ꓛꓬ ꓔꓯ ꓮꓽ ꓟꓬꓹ ꓧꓪꓹ ꓔꓲ ꓠꓹ ꓟ ꓟꓽ ꓓꓵꓽ ꓙꓰ꓿ 26 ꓮꓽ ꓟꓬꓹ ꓧꓪꓹ ꓓꓵꓽ ꓙꓰ ꓠ ꓗꓹ ꓕꓯ ꓠꓽ꓾ ꓟꓵ ꓔꓶ ꓟꓲ ꓔꓶ ꓕ ꓑꓳꓸ ꓬꓲ ꓮꓽ ꓟꓬꓹ ꓧꓪꓹ ꓫꓸ ꓙꓵ ꓠ ꓗꓹ ꓡꓳ ꓫꓵꓽ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓟ ꓤꓶꓻ ꓮꓽ ꓙꓵ ꓡꓳꓹ ꓬꓰˍ ꓟ ꓗꓪ ꓬꓲ ꓕꓲ ꓧꓪꓹˍ ꓡꓰꓽ ꓡ ꓢꓲ꓾ ꓚꓲ ꓛꓬ ꓔꓯ ꓔꓲ ꓗꓷ ꓟ ꓗꓪ ꓐꓰ ꓝꓴꓲ ꓔꓯ ꓣꓴ ꓦ ꓗꓷꓳ꓿ 27 ꓞꓳ ꓤ ꓔꓯ ꓠꓬ ꓕꓲ ꓧꓪꓹ ꓫꓵꓻ ꓠ ꓟ ꓐꓯ ꓞꓷꓹ ꓔ ꓢꓲ꓾ ꓫꓵꓻ ꓗꓸ ꓠꓯ ꓠꓬ ꓐꓯ ꓟꓴ ꓘꓶꓽˍ ꓟ ꓙꓳˍ ꓠꓬꓲ꓾ 28 ꓖꓳ ꓟ ꓡꓰ ꓐꓰ ꓮꓽ ꓟꓬꓹ ꓣꓳ ꓐꓱ ꓶ ꓝꓴꓲ ꓟꓯꓻ ꓦ ꓙ ꓠꓹ ꓟ꓾ ꓬꓲ ꓕꓲ ꓧꓪꓹˍ ꓐꓰ ꓔꓲ ꓖꓶ ꓗꓷ ꓢꓴ ꓙꓲ-ꓢꓴ ꓠꓬ꓾ ꓠꓬꓲꓽ ꓧꓪꓹ ꓕꓲ ꓧꓪꓹ ꓟꓳꓸ ꓖꓶ ꓡ ꓕꓯ꓾ ꓝꓴꓲ ꓟꓯꓻ ꓙ ꓠꓹ ꓟ ꓟꓽ ꓥ꓿ ꓬꓲ ꓔꓯ ꓡꓳꓺ ꓠꓬꓹ ꓢꓴ ꓔꓯ ꓚꓬꓴ ꓠꓹ ꓟ ꓥ ꓡꓳ꓿

ꓦꓲ-ꓐꓱ-ꓣꓴ 10

1 ꓙꓵꓽ ꓗ ꓠꓬ ꓡ ꓠꓹ ꓟ ꓙꓲˍ ꓟ ꓬꓲ ꓫꓵꓽ ꓬꓲ ꓙꓰ ꓟ ꓬꓲ ꓶꓻ ꓥꓳꓽˍ ꓡꓰꓽ ꓥ ꓢꓲ ꓬꓲ ꓑꓰꓹ ꓚꓵ ꓟꓽ ꓥ ꓠꓬꓲ꓾ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓟꓽ ꓠꓽ ꓠ ꓔꓲ ꓖꓶˍ ꓟ ꓢꓰꓼ ꓔꓲ ꓓꓴ ꓖꓳ ꓡꓱ ꓫꓵꓽ ꓗꓪ ꓐꓰ ꓠꓶꓽ ꓡ ꓢꓴ ꓔꓯ ꓮ ꓡꓲ ꓥ ꓟꓲ ꓜꓳꓽ ꓓꓰ ꓡꓰ ꓝꓲ ꓟꓽ ꓐ ꓡ꓿ 2 ꓙꓵꓽ ꓗ ꓦꓬꓼ ꓠꓬꓲ ꓗꓪ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓐꓴ ꓬꓲ ꓪꓽ ꓝꓴꓲ ꓔꓯ ꓕꓲ ꓧꓪꓹˍ ꓐꓰ ꓫꓬꓻ ꓡꓰ ꓝꓲ ꓐ ꓡ ꓕꓯ ꓠꓽ꓾ ꓬꓲ ꓪꓽ ꓦꓰꓼ ꓠꓲꓹ ꓡꓰ ꓬꓲ ꓪꓽ ꓝꓴꓲ ꓑꓶꓸ ꓓꓴ ꓟꓽ ꓕꓼ ꓡꓳ ꓫꓵ ꓥ ꓡꓳ꓿ ꓖꓳ ꓡꓱ ꓥ ꓠꓬ ꓔꓲ ꓖꓶˍ ꓟ ꓠꓬ ꓧꓶꓸ ꓕꓯꓽˍ ꓡꓰ ꓠꓽ ꓗꓷ ꓠ ꓗꓹ ꓡꓳ ꓫꓵꓽ ꓥꓳ꓿ 3 ꓖꓳ ꓡꓱ ꓥ ꓟꓲ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓔꓲˍ ꓟ ꓢꓰꓼ ꓔꓲ ꓓꓴ ꓠꓬ ꓝꓴꓲ ꓔꓯ ꓓꓵꓽ ꓙ ꓛꓲ ꓡ ꓓꓴˍ ꓡꓰꓽ ꓥ ꓡꓳ꓿ 4 ꓮ ꓡꓲꓳ ꓐꓯˍ ꓠꓬ ꓮꓸ ꓠꓬꓲꓽ ꓑꓸ ꓫꓵꓽˍ ꓐꓰ ꓮꓸ ꓛꓵꓼ ꓫꓵꓽ ꓡꓰ ꓝꓴꓲ ꓔꓯ ꓣꓴ ꓦ ꓗꓷ ꓟꓽ ꓐ ꓡ꓿ 5 ꓖꓳ ꓡꓱ ꓠꓬꓲ ꓙꓲ-ꓢꓴ ꓟꓲ ꓠꓯ ꓗꓪ ꓓꓵꓽ ꓡꓺˍ ꓐꓰ ꓬꓰˍ ꓕꓯ ꓬꓲ ꓡꓰ ꓪꓴ-ꓢ ꓔꓯ꓾ ꓢꓰꓼ ꓔꓲ ꓓꓴˍ ꓐꓰ ꓔꓲ ꓓꓴ ꓔꓯ ꓠꓴ ꓟꓽ ꓠꓵ ꓠꓬꓲ꓾ ꓠꓴ ꓡꓰ ꓥꓪ ꓐꓱ ꓶ ꓖꓳ ꓓꓱ ꓕꓲ ꓟ ꓙ ꓖꓶ ꓗꓷꓳ꓿ 6 ꓕꓲ ꓟꓳꓻ ꓡꓱꓸꓼ ꓛꓴ ꓔꓲ ꓓꓴˍ ꓐꓰ ꓝꓴꓲ ꓑꓶꓸ ꓓꓴ ꓔꓲ ꓓꓴ ꓔꓯ ꓠꓴ ꓟꓽ ꓠꓲꓹ ꓒꓴ꓿ 7 ꓖꓳ ꓕꓯ ꓥꓪ ꓡꓰ꓾ ꓕꓳ ꓶ ꓡꓲ ꓗꓪ ꓠꓬ ꓥꓪ ꓔꓯ ꓖꓴ ꓢꓲ ꓕꓱ ꓡꓱ ꓐꓳ ꓔ ꓡꓳ꓿ ꓪꓴ-ꓢꓺꓳ꓾ ꓠꓬꓲ ꓠꓹ꓾ ꓠꓴ ꓠꓲꓹ ꓡꓶꓽ ꓬꓰ ꓠ ꓟ ꓥꓪ ꓛꓲ ꓡꓺꓳ꓾ ꓐꓯˍ ꓡꓳ꓿ 8 ꓬꓲ ꓐꓯˍ ꓟ ꓬꓲ ꓪꓴꓸ ꓕꓲ ꓘꓶ ꓠꓬ꓾ ꓢꓰꓼ ꓔꓲ ꓓꓴˍ ꓐꓰ ꓔꓲ ꓖꓶ ꓓꓴˍ ꓐꓰ꓾ ꓕꓲ ꓟꓳ ꓡꓱꓸꓼ ꓛꓴꓻ ꓔꓲ ꓓꓴˍ ꓐꓰ ꓝꓴꓲ ꓑꓶꓸ ꓓꓴ ꓔꓲ ꓓꓴ ꓔꓯ ꓠꓴ ꓟꓽ ꓠꓲꓹ ꓫꓵ꓾ ꓠꓲꓹˍ ꓟꓲ ꓟꓽ ꓠꓲ ꓒꓴ꓾ ꓐꓯ ꓗꓷꓳ꓿ ꓕꓱ ꓡꓱ ꓡꓴ ꓫꓵꓽ ꓮꓽ ꓙꓵ ꓠꓬ ꓙꓵꓽ ꓗ ꓔꓯ ꓛꓳ ꓢꓲ ꓔꓲ ꓖꓶˍ ꓟ ꓥ ꓥˍ ꓟꓲ꓾ ꓬꓲ ꓠꓬ ꓕꓱ ꓡꓱ ꓐꓯˍ ꓢꓰꓽ ꓡꓳ꓿ 9 ꓠꓬꓲꓽ ꓘꓶꓽ ꓕꓲ ꓘꓶꓽ ꓗꓪ ꓠꓬ꓾ ꓠꓬꓲ ꓠꓹ꓾ ꓠꓴ ꓠꓲꓹ ꓡꓶꓽ ꓬꓰ ꓠꓹ ꓟ ꓥꓪ ꓛꓲ ꓡꓺꓳ꓾ ꓐꓯˍ ꓠꓬꓲ꓾ ꓬꓲ ꓡꓰ ꓧꓶꓸ ꓕꓯ ꓟ ꓔꓲ ꓚꓱꓹ ꓐꓰꓽ ꓔꓯ ꓣꓴ ꓦ ꓗꓷ ꓢꓲ꓾ ꓔꓲ ꓚꓱꓹ ꓬꓲ ꓫꓵꓼ ꓕꓲ ꓟ ꓙꓽ ꓖꓶ ꓗꓷ ꓟ ꓥꓳ꓿ 10 ꓖꓳ ꓡꓱ ꓢꓲ ꓬꓲ ꓠꓲꓹ ꓡꓶ ꓖꓳ ꓟ ꓗꓪ ꓐꓰ꓾ ꓬꓰ-ꓢꓴ ꓙꓲ-ꓢꓴ ꓖꓳ ꓓꓱ ꓬꓲ ꓕꓲ ꓧꓪꓹˍ ꓐꓰ ꓔꓲ ꓗꓷ ꓟ ꓑꓶꓸ ꓓꓴ ꓣꓳꓽ ꓔꓯ ꓢꓲ ꓚꓰꓸ ꓗꓷꓳ꓿ 11 ꓔꓲ ꓒ ꓮ ꓡꓲ ꓕꓲ ꓣꓳˍ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓦꓰꓼ ꓔ ꓢꓲ ꓣꓱꓽ ꓙ ꓢꓲ ꓠꓬꓲ꓾ ꓔꓲ ꓓꓴ ꓬꓲ ꓖꓳ ꓕꓲ ꓫꓵꓽˍ ꓟ ꓕꓲ ꓧꓪꓹ ꓗꓸ ꓠꓯꓸ ꓕꓲ ꓧꓪꓹ ꓔꓲ ꓖꓶˍ ꓟꓲ꓾ ꓝꓴꓲ ꓔꓯ ꓣꓴ ꓦ ꓗꓷ ꓟꓽ ꓐ ꓡ꓿ 12 ꓖꓳ ꓡꓱ ꓥ ꓟꓲ ꓝꓴꓲ ꓑꓶꓸ ꓓꓴ ꓙꓲ-ꓢꓴ ꓡꓰ ꓕꓲ ꓞꓲꓼ ꓕꓲ ꓑ ꓟ ꓔꓲ ꓓꓴ ꓕꓲ ꓟ ꓔꓲ ꓗꓷ ꓠꓬ꓾ ꓪꓴ-ꓢ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ ꓡꓰꓳ꓿ 13 ꓖꓳ ꓡꓱ ꓢꓲ ꓖꓳ ꓕꓲ ꓙꓵꓹ ꓗꓪ ꓐꓰ ꓬꓲ ꓔꓯ ꓛꓴꓽ ꓙꓳ ꓢꓴ ꓔꓯ ꓬꓲ ꓛꓲ ꓕꓳꓼ ꓕꓲ ꓗꓷ ꓡꓰˍ ꓗꓪ ꓛꓲ ꓡꓳꓺ ꓠꓬꓹ ꓔꓬ ꓡꓳ꓿ 14 ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓔꓲ ꓓꓴ ꓕꓲ ꓟˍ ꓗꓪ ꓐꓰ꓾ ꓢꓲ ꓚꓰꓸˍ ꓟ ꓟꓶ ꓢꓴ ꓐꓴ ꓔꓯ ꓕꓲ ꓞꓲꓼ ꓕꓲ ꓑ ꓜꓳꓽ ꓓꓰ ꓡꓰ ꓝꓲꓳ꓿ 15 ꓢꓲ-ꓫꓬ-ꓟ-ꓦˍ ꓟꓲ ꓕꓱ ꓟ ꓔꓯꓸ ꓟꓳꓸ ꓣꓳꓽ ꓔꓯ ꓢꓷꓸ ꓙ ꓟꓳ ꓙ ꓢꓲ꓾ 16 ꓦꓬꓼ ꓠꓬꓲ ꓖꓳ ꓟ ꓗꓸ ꓠꓯꓸ ꓥꓪ ꓡꓰ ꓬꓲ ꓪˍ ꓐꓰ ꓘꓶꓽ ꓫꓵꓽ ꓬꓰ ꓠ ꓟ ꓠꓬ ꓕꓱ ꓡꓱ ꓥ ꓡꓳ꓿ ꓥꓪ ꓙꓵꓽ ꓗ ꓠꓬ ꓥꓪ ꓡꓰ ꓬꓲ ꓪꓽ ꓠꓲꓹ ꓟ ꓗꓪ ꓗꓶ ꓔꓸ ꓢꓲ꓾ ꓬꓲ ꓪꓽ ꓙꓽ ꓠꓲꓹ ꓗꓪ ꓐꓳ ꓓꓴ ꓥꓳ꓾ ꓐꓰ ꓢꓲ ꓒꓽ ꓡꓰ ꓐꓯˍ ꓡꓳ꓾ ꓐꓰ ꓐꓯˍ ꓡꓳ꓿ 17 ꓝꓮꓲ ꓖꓳ ꓗꓸ ꓠꓯ ꓬꓲ ꓡꓰ꓾ ꓬꓲ ꓪꓽ ꓝꓴꓲˍ ꓐꓰ ꓬꓲ ꓪꓽ ꓛꓬꓻ ꓖꓴ ꓔꓯ ꓥꓪ ꓟꓽ ꓚꓲꓸ ꓔꓸꓳ꓾ ꓐꓯˍ ꓡꓳ꓿ 18 ꓝꓴꓲ ꓖꓽ ꓖꓶꓽ ꓗꓷ ꓟ ꓙꓳ ꓡꓰ ꓠꓬꓲ꓾ ꓝꓴꓲ ꓑꓶꓸ ꓓꓴ ꓔꓲ ꓓꓴ ꓝꓮꓲ ꓣꓱꓽ ꓟꓽ ꓬꓯꓼꓳ꓿ 19 ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ ꓠꓬ ꓬꓰ-ꓢꓴ ꓫꓵꓽ ꓗꓪ ꓐꓰ ꓮꓸ ꓓꓲꓽ ꓢꓲꓽ ꓫꓬ ꓖꓴ ꓗꓪ ꓓꓵꓽ ꓙꓰ ꓠꓹ ꓟ ꓠꓲꓹ ꓪꓴꓽ ꓓꓴ ꓙꓳˍ ꓡꓳ꓿ 20 ꓕꓱ ꓟ ꓠꓬ ꓬꓰ-ꓢꓴ ꓡꓰ ꓣꓳꓽ ꓐꓱ ꓶ ꓬꓲ ꓖꓳ ꓓꓱ ꓖꓶꓽ ꓗꓷ ꓢꓲ꓾ ꓗꓳꓹ ꓛꓺ ꓗꓪ ꓗꓳꓸ ꓙꓻ ꓙꓰˍ ꓟ ꓢꓯꓸ ꓚꓱꓹ ꓬꓲ ꓫꓵꓼ ꓕꓲ ꓚꓱꓹ ꓒꓴ ꓖꓶ ꓡ ꓠꓬꓲ ꓥ ꓡꓳ꓿ 21 ꓮ ꓟꓶ ꓣꓳꓽ ꓠꓬ ꓪꓴ-ꓢ ꓦꓲ ꓙꓵꓽ ꓢꓴ ꓔꓲ ꓒ ꓓꓽ ꓟ ꓕꓲ ꓣꓳ ꓕꓱ ꓡꓱ ꓙꓳˍ ꓠꓬꓲ꓾ 22 ꓣꓳꓽ ꓠꓬ ꓔꓱꓹˍ ꓟ ꓠꓲꓹ ꓟ ꓡꓰ ꓙꓵꓻ ꓠꓲꓹ ꓗꓪ ꓠꓲꓹ ꓪꓴꓽ ꓢꓲ꓾ ꓣꓳꓽ ꓠꓲꓹ ꓟ ꓔꓯ ꓫꓵꓽ ꓧꓶ ꓗꓷ ꓟ ꓗꓪ ꓐꓰ ꓥꓶˍ ꓟ ꓦꓰꓽ ꓠꓲꓹ ꓔꓯ ꓢꓲꓽ ꓫꓬ ꓡꓰ ꓝꓲ ꓢꓲ ꓠꓬꓲ꓾ ꓣꓳꓽ ꓖꓳ ꓓꓱ ꓔꓯˍ ꓟꓲ ꓬꓲꓻ ꓫꓬꓻ ꓡꓰ ꓞꓲꓽ ꓫꓬ ꓡꓰ ꓝꓲ ꓠꓬꓲ꓾ ꓠꓲꓹ ꓪꓴꓽ ꓪꓴˍ ꓡꓰ ꓬꓲ ꓔꓯ ꓕꓲ ꓙꓰ ꓡꓯ꓿ 23 ꓬꓲ ꓙ ꓟꓳ ꓘꓶ ꓠꓬ ꓦ ꓡꓱ ꓐꓳ ꓓꓻˍ ꓟ ꓥ ꓠꓬꓲ꓾ ꓣꓳꓽ ꓠꓬ ꓒꓳꓹ ꓙꓰ ꓒꓳꓹ ꓡ ꓟꓽ ꓬꓰ ꓬꓰ꓾ ꓣꓳꓽ ꓣꓷꓠꓸˍ ꓟ ꓥꓳ ꓡꓳꓸ ꓓꓴ ꓔꓯ ꓕꓶꓻ ꓕꓶˍ ꓡꓰ ꓣꓴ ꓔ ꓡꓯ꓿ 24 ꓝꓮꓲ ꓠꓬ ꓠꓵ ꓠꓲꓹˍ ꓐꓰ ꓙꓲˍ ꓟ ꓟꓬꓱꓽ ꓗꓪ ꓣꓳꓽ ꓕꓲ ꓣꓳ ꓛꓳꓽ ꓕꓲ ꓣꓳ ꓢꓯꓼ ꓖꓶ ꓡꓯꓽ ꓘꓳ ꓠꓹ ꓟ ꓧꓪꓸ ꓛꓲ ꓔ ꓡꓯ꓿ 25 ꓣꓳꓽ ꓠꓬ ꓠꓱꓸ ꓐꓯ ꓢꓴ ꓕꓲ ꓐꓱ ꓜꓲꓼ ꓡꓯꓽ ꓘꓳˍ ꓟ ꓠꓽ ꓗꓷ ꓟ ꓡꓰ ꓐꓰ ꓕꓽ ꓠꓽ ꓗꓷ ꓡꓯ꓿ ꓢꓲ ꓒꓽ ꓦꓬꓼ ꓠꓬꓲ ꓓꓽ ꓟ ꓖꓳ ꓟ ꓠꓶꓽ ꓡ ꓟ ꓔꓯ ꓠꓴ ꓪꓽ ꓢꓷꓸˍ ꓠꓬꓲ꓾ ꓟꓬꓽ ꓠꓬꓲ ꓬꓲ ꓕꓱ ꓡꓱ ꓢꓯꓼ ꓖꓶ ꓡꓯꓽ ꓘꓳ꓿ 26 ꓔꓱꓹ ꓚꓵˍ ꓟ ꓔꓯ ꓣꓳꓽ ꓢꓷꓸ ꓡꓰ ꓗꓸ ꓠꓯꓸ꓾ ꓟꓬ ꓒꓴ ꓒꓴ ꓝꓴꓲ ꓬꓰˍ ꓕꓯ ꓠꓽ꓾ ꓣꓳꓽ ꓝꓴꓲ ꓑꓶꓸ ꓓꓴ ꓔꓲ ꓓꓴ ꓠꓱꓸ ꓐꓯꓼ ꓮꓸ ꓫꓵ ꓟꓽ ꓙꓳꓻꓳ꓿ 27 ꓐꓯ ꓟꓴ ꓘꓶꓽ ꓡ ꓟ ꓔꓯ ꓙꓳꓺ ꓠꓬꓲ ꓐꓰ꓾ ꓪꓴ-ꓢ ꓔꓯ ꓔꓳꓹ ꓢꓴ ꓔꓯ ꓛꓴꓻ ꓖꓴ ꓡꓰ ꓝꓲˍ ꓟ ꓮꓸ ꓔꓳꓸ ꓔꓯ ꓡꓳꓺ ꓠꓬꓹ ꓟ ꓕꓱ ꓕꓲ ꓫꓵꓽˍ ꓡꓰ ꓙꓳˍ ꓡꓳ꓿ 28 ꓟꓳ-ꓫꓲ ꓙꓵꓽ ꓗ ꓔꓯ ꓛꓬꓻ ꓗꓷ ꓢꓴ ꓠꓬ꓾ ꓢꓷꓸ ꓙ ꓟꓳ ꓙ ꓢꓴ ꓠꓬꓲꓽ ꓢ ꓣꓳ ꓐꓯ ꓘꓶ ꓗꓪ ꓐꓰ ꓫꓱꓸ ꓤˍ ꓟ ꓟꓽ ꓟꓶ ꓟꓶ ꓫꓵꓻˍ ꓡꓳ꓿ 29 ꓖꓳ ꓡꓱ ꓥ ꓠꓬ ꓪꓴ-ꓢ ꓬꓲ ꓮ ꓐꓲ ꓔꓯ ꓟꓽ ꓒꓵꓽ ꓟꓽ ꓚꓬ ꓬꓰ ꓢꓲ꓾ ꓢꓲ ꓚꓰꓸˍ ꓟ ꓟꓶ ꓡꓰ ꓝꓲˍ ꓟ ꓘꓶꓽ ꓫꓵꓽ ꓬꓲ ꓫꓵꓽ ꓔꓯˍ ꓟꓲ ꓟꓽ ꓒꓵꓽ ꓒꓵꓽ꓾ ꓣꓱꓽ ꓛꓰ ꓙꓳˍ ꓟ ꓦ ꓔꓯ ꓫꓸ ꓔꓳ ꓫꓸ ꓒꓯꓼ ꓬꓰ ꓖꓶ ꓢꓴ ꓟꓶ ꓠꓯꓹ ꓟ ꓛꓬ ꓒꓵꓽ ꓮ ꓘꓶꓻ ꓛꓲ ꓡꓲꓽˍ ꓡꓳ ꓫꓵꓽ ꓥ ꓟ ꓔꓯ ꓠꓴ ꓪꓽ ꓓꓵꓽ ꓙꓽ ꓠꓬꓲ꓿ 30 ꓮ ꓡꓲꓳ ꓐꓯ ꓠꓬ꓾ ꓪꓽ ꓛꓴꓽ ꓚꓱˍ ꓟ ꓠꓬ ꓥꓪ ꓔꓯ ꓟ ꓥ ꓡꓳ꓾ ꓥꓪ ꓚꓱꓹ ꓖꓶˍ ꓥꓳ꓾ ꓐꓯ ꓢꓴˍ ꓐꓰ꓾ ꓢꓲ ꓒꓽ ꓡꓰ ꓬꓲ ꓑ ꓫꓬꓼ ꓔꓯ ꓐꓯ ꓟꓴ ꓘꓶꓽˍ ꓥꓳ꓾ ꓐꓯ ꓢꓴ ꓔꓯ ꓣꓳꓽ ꓢꓷꓸˍ ꓡꓳ꓿ 31 ꓢꓯꓸ ꓔꓬ ꓟ ꓪꓴ-ꓢ ꓬꓲ ꓦꓶꓻ ꓠꓲꓹ ꓗꓪ ꓞꓰ ꓓꓵꓽ ꓡꓰ ꓠꓬ ꓙꓳꓺ ꓓꓴ ꓓꓽ ꓟ ꓥ ꓡꓳ꓿ 32 ꓠꓴ ꓪꓽ ꓠꓬ ꓗꓳꓸ ꓡ ꓟ ꓦꓬꓼ ꓠꓬꓲ ꓗꓪ꓾ ꓠꓬꓲ ꓟꓳ ꓓꓴ ꓟꓶꓻ ꓡꓰ ꓗꓸ ꓠꓯꓸ꓾ ꓮ ꓡꓲ ꓐꓰ ꓠꓲꓹ ꓟ ꓟꓽ ꓙꓬ ꓡꓰ ꓡꓰ ꓫꓸ ꓙꓵꓻˍ ꓟ ꓜꓲꓽ ꓗꓳꓸ ꓡ ꓟ ꓔꓯ ꓓꓵꓽ ꓙ ꓠꓬꓲ꓿ 33 ꓕꓲ ꓧꓪꓹ ꓧꓪ ꓠꓴ ꓪꓽ ꓠꓬ ꓞꓳ ꓤ ꓟꓲꓽ ꓙꓬ ꓗꓪ ꓤꓲꓺ ꓟꓶˍ ꓟ ꓐꓰ꓾ ꓗꓸ ꓧꓪˍ ꓟ ꓟꓶˍ ꓟ ꓐꓰ꓾ ꓢꓴ ꓟꓳꓻ ꓟꓽ ꓟꓵ ꓟ ꓜꓲꓽ ꓪˍ ꓡꓳ꓿ ꓠꓴ ꓪꓽ ꓠꓬ ꓕꓱ ꓟꓬ ꓫꓵꓽ ꓜꓲꓽˍ ꓟ ꓕꓯꓽ ꓢꓲ꓾ ꓠꓲꓹ ꓒꓴ ꓒꓴˍ ꓐꓰ ꓬꓲ ꓖꓳ ꓡꓱ ꓜꓲꓽ ꓔꓬ ꓢꓴ ꓐꓴ ꓛꓳ ꓒꓯꓹˍ ꓟꓲ ꓬꓰˍ ꓢꓰꓽ ꓡꓳ꓿ 34 ꓞꓳꓹ ꓔ ꓢꓴ ꓔꓯˍ ꓟꓲ ꓠꓴ ꓪꓽ ꓫꓱꓸ ꓤˍ ꓡꓳ꓿ ꓠꓴ ꓪꓽ ꓖꓴꓽ ꓙꓴ ꓦꓴꓺ ꓔꓯꓹ ꓙꓰ ꓢꓴ ꓔꓯˍ ꓟꓲ ꓠꓴ ꓪꓽ ꓠꓲꓹ ꓒꓴ ꓒꓴˍ ꓐꓰ ꓜꓲꓽˍ ꓡꓳ꓿ ꓕꓱ ꓟ ꓠꓬ ꓠꓴ ꓪꓽ ꓚꓲ ꓛꓬ ꓐꓱ ꓶ ꓪꓻ ꓜꓲ ꓙꓲˍ ꓟ ꓐꓰ꓾ ꓮ ꓕꓯꓽˍ ꓟꓲ ꓤꓰꓻ ꓞꓹ ꓟ ꓐꓳ ꓶꓽ ꓙꓳˍ ꓟ ꓠꓴ ꓪꓽ ꓢꓷꓸˍ ꓠꓬꓲ ꓥ ꓡꓳ꓿ 35 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓲꓹ ꓪꓴꓽˍ ꓟ ꓠꓲꓹ ꓟ ꓕꓱ ꓟ ꓕꓽ ꓡꓳ ꓗꓷ꓿ ꓕꓱ ꓡꓱ ꓡꓴ ꓫꓵꓽ ꓠꓲꓹ ꓟ ꓙꓳˍ ꓠꓬ ꓡꓯꓼ ꓫꓴ ꓓꓽ ꓟ ꓟꓶˍ ꓥꓳ꓿ 36 ꓠꓴ ꓪꓽ ꓠꓬ ꓪꓴ-ꓢ ꓠꓲꓹ ꓡꓶꓽ ꓬꓰ ꓓꓳ ꓡꓰ ꓢꓲ꓾ ꓖꓶ ꓙ ꓟꓳˍ ꓟ ꓔꓯ ꓟꓶ ꓠꓹ ꓟ ꓜꓲꓽ ꓘꓴ ꓠꓲꓹ ꓙꓳ ꓠꓯꓹ ꓡꓳ꓿ 37 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓝꓮꓲ ꓕꓲ ꓑꓹ ꓤ ꓠꓬ ꓡ ꓠꓹ ꓟ ꓖꓳ ꓕꓲ ꓣꓳ ꓡ ꓥꓳ꓿ ꓬꓲ ꓠꓽ ꓟꓶ ꓤ ꓟꓽ ꓗꓷ ꓡꓰ꓿ 38 ꓔꓱꓹ ꓜꓳꓽˍ ꓟ ꓥꓪ ꓡꓽ ꓞꓳ ꓬꓲ ꓠꓽ ꓙꓵꓻ ꓠꓲꓹ ꓗꓪ ꓐꓰ ꓢꓯꓸ ꓔꓬ ꓪˍ ꓥꓳ꓿ ꓔꓲꓸ ꓒꓳꓹ ꓡꓽ ꓙꓰ ꓢꓴ ꓔꓯ ꓠꓬ ꓥꓪ ꓟꓽ ꓠꓲꓹ ꓒꓴ꓾ ꓐꓰ ꓐꓳ ꓔ ꓡꓳ꓿ 39 ꓣꓳꓽ ꓠꓽ ꓒꓳꓹ ꓙꓰ ꓢꓲ ꓟꓶꓽ ꓬꓰˍ ꓟ ꓖꓳ ꓕꓲ ꓧꓳꓽ ꓗꓪ ꓟ ꓟꓽ ꓥ꓿ ꓙꓵꓻ ꓢꓲ ꓚꓬꓴ ꓟꓶˍ ꓟ ꓖꓳ ꓕꓲ ꓧꓳꓽ ꓗꓪ ꓟ ꓥ ꓡꓳ꓿

ꓦꓲ-ꓐꓱ-ꓣꓴ 11

1 ꓙꓵꓻ ꓠꓲꓹ ꓠꓬ ꓥꓳ ꓡꓳꓸˍ ꓟ ꓬꓲ ꓦ ꓡꓱ ꓐꓳ ꓖꓴ ꓥ ꓢꓲ꓾ ꓟꓽ ꓟꓳ ꓢꓰꓽ ꓟ ꓬꓲ ꓗꓸ ꓚꓵ ꓥ ꓡꓳ꓿ 2 ꓮꓽ ꓠꓱ ꓟ ꓞꓳ ꓤ ꓔꓯ ꓪꓴ-ꓢ ꓠꓲꓹ ꓒꓴˍ ꓟ ꓠꓬ ꓙꓵꓻ ꓠꓲꓹ ꓕꓱ ꓟ ꓑꓶꓸ ꓓꓴ ꓥ ꓡꓳ꓿ 3 ꓣꓳꓽ ꓠꓬ ꓙꓵꓻ ꓠꓲꓹ ꓗꓪ ꓐꓰ꓾ ꓟꓲ ꓠꓯ ꓕꓱ ꓟꓬ ꓟ ꓮꓽ ꓙꓵ ꓠꓬ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓙꓳ ꓡ ꓗꓷꓳ꓾ ꓐꓰ꓾ ꓙꓽ ꓜꓲꓼˍ ꓡꓳ꓿ ꓖꓳ ꓡꓱ ꓢꓲ ꓟꓳꓻ ꓓꓻ ꓡꓳ ꓫꓵ ꓠꓬ ꓟꓳ ꓟꓽ ꓓꓻˍ ꓡꓳ ꓫꓵ ꓣꓱꓽ ꓢꓲ ꓚꓰꓼ ꓔ ꓟ ꓥ ꓡꓳ꓿ 4 ꓮ-ꓐꓱ ꓠꓬ ꓙꓵꓻ ꓠꓲꓹ ꓗꓪ ꓐꓰ꓾ ꓗꓷ-ꓬꓲ ꓔꓲ ꓓꓴ ꓢꓶꓸ ꓟꓽ ꓞꓲ ꓙꓲˍ ꓟ ꓔꓲ ꓓꓴ ꓪꓴ-ꓢ ꓔꓯ ꓔꓲ ꓖꓶˍ ꓡꓳ꓿ ꓙꓵꓻ ꓠꓲꓹ ꓡꓰ ꓔꓲ ꓖꓶˍ ꓟ ꓡꓯꓼ ꓫꓴ ꓔꓯ ꓪꓴ-ꓢ ꓘꓳ ꓣꓴˍ ꓠꓬꓲ꓾ ꓬꓲ ꓔꓯ ꓔꓱꓹ ꓜꓳꓽ ꓢꓴ ꓥ ꓟ ꓚꓬꓹ ꓖꓶˍ ꓡꓳ꓿ ꓮ-ꓐꓱ ꓠꓬ ꓫꓵꓻ ꓗꓷ ꓥ ꓟꓲ꓾ ꓙꓵꓻ ꓠꓲꓹ ꓕꓱ ꓟ ꓗꓪ ꓐꓰ ꓫꓸ ꓕꓱ ꓔꓬ ꓢꓰꓽ ꓡꓳ꓿ 5 ꓬꓲ-ꓠ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓬꓲ ꓔꓯ ꓟꓽ ꓫꓵꓻ ꓫꓵ ꓛꓵꓽ ꓔꓯꓹ ꓙꓰꓳ꓿ ꓕꓳ ꓶ ꓗꓪ꓾ ꓪꓴ-ꓢ ꓡꓰ ꓬꓲ ꓔꓯ ꓔꓯꓹ ꓙꓰ ꓠꓬꓲ꓾ ꓢꓴ ꓬꓲ ꓔꓯ ꓧꓪ ꓟꓽ ꓟꓳ꓾ ꓐꓰ ꓐꓳ ꓔ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓟꓽ ꓔꓯꓹ ꓓꓯ ꓙꓰ ꓧꓶꓸ ꓕꓯˍ ꓡꓰ꓾ ꓬꓲ ꓙꓵꓻ ꓠꓲꓹ ꓡꓰ ꓪꓴ-ꓢ ꓔꓯ ꓠꓲꓹ ꓒꓴ ꓡꓰ ꓝꓲˍ ꓟ ꓢꓷꓸ ꓙ ꓟꓳ ꓙ ꓓꓴ ꓬꓲ ꓟꓶ ꓗꓷꓳ꓿ 6 ꓙꓵꓻ ꓠꓲꓹ ꓟꓽ ꓙꓳ ꓙꓳ ꓪꓴ-ꓢ ꓔꓯ ꓠꓲꓹ ꓒꓴ ꓡꓰ ꓝꓲ ꓟꓽ ꓐ ꓡ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓔꓯ ꓠꓶꓽ ꓡ ꓢꓴ ꓠꓬ꓾ ꓪꓴ-ꓢ ꓙꓳ ꓔꓬ ꓟ ꓐꓰ꓾ ꓬꓲ ꓔꓯ ꓧꓪ ꓢꓴ ꓔꓯ ꓡꓯꓼ ꓫꓴ ꓖꓶ ꓢꓴ ꓥ ꓟ ꓙꓵꓻ ꓠ ꓗꓹ ꓡꓳ꓿ 7 ꓟꓽ ꓟꓳ ꓠꓬꓲ ꓟ ꓐꓰ ꓟꓽ ꓛꓲ ꓡ ꓢꓰꓽ ꓟ ꓫꓵꓽ ꓪꓴꓻ ꓔꓯ ꓖꓴ ꓢꓲ ꓪꓴ-ꓢ ꓡꓰ ꓠꓳ-ꓪ ꓔꓯ ꓙꓳꓺ ꓗꓽ ꓖꓶˍ ꓕꓯ꓾ ꓬꓲ ꓠꓬ ꓙꓵꓻ ꓠꓲꓹ ꓡꓰ ꓪꓴ-ꓢ ꓐꓯ ꓘꓶ ꓔꓯ ꓒꓵꓽ ꓛꓳ ꓢꓲ꓾ ꓬꓲ ꓕꓲ ꓦꓲ ꓢꓴ ꓡꓲꓹ ꓗꓷ ꓟꓶ ꓠꓹ ꓟ ꓦꓲ ꓡꓲ ꓓꓽ ꓟ ꓙꓽ ꓖꓶˍ ꓡꓳ꓿ ꓕꓱ ꓟ ꓗꓪ ꓐꓰ ꓟꓲ ꓠꓯ ꓞꓳ ꓤ ꓠꓬ ꓝꓴꓲ ꓐꓯ ꓞꓷꓹ ꓟꓶ ꓢꓲ꓾ ꓠꓳ-ꓪ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶˍ ꓟ ꓡꓯꓼ ꓪ ꓟꓶ ꓢꓴ ꓒꓬꓱꓼ ꓡ ꓗꓷꓳ꓿ 8 ꓮ-ꓐ-ꓡ-ꓦ ꓔꓯ ꓪꓴ-ꓢ ꓡꓰ ꓘꓴˍ ꓕꓯ꓾ ꓬꓲ ꓮ ꓡꓲ ꓗꓪ ꓙꓰˍ ꓟ ꓟꓽ ꓢꓷꓸˍ ꓟꓲ꓾ ꓙꓵꓻ ꓠꓲꓹ ꓗꓪ ꓐꓰ ꓒꓵꓽ ꓛꓳ ꓢꓲ꓾ ꓬꓲ ꓟꓶ ꓠꓯꓹ ꓟ ꓡꓯꓼ ꓪ ꓟꓵ ꓗꓪ ꓙꓰˍ ꓡꓳ꓿ 9 ꓬꓲ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓙ ꓟꓳ ꓔ ꓟ ꓟꓵ ꓗꓪ꓾ ꓞꓳ ꓬꓯꓼ ꓟꓴ ꓔꓬ ꓢꓴˍ ꓡꓰ ꓐꓰ꓾ ꓬꓲˍ ꓐꓰ ꓕꓲ ꓛꓳꓺꓼ ꓙ ꓟꓳ ꓘꓶ ꓖꓳ ꓟ ꓟꓶ ꓡꓰ ꓢꓴ꓾ ꓬꓲ-ꓢˍ ꓐꓰ ꓬ-ꓗꓴˍ ꓐꓰ ꓕꓲ ꓪꓺꓼ ꓟꓶ ꓔꓶꓸ ꓦꓲ ꓗꓪ ꓔꓬ ꓗꓷꓳ꓿ 10 ꓮ ꓡꓲꓳ ꓐꓯ ꓠꓬ ꓮ-ꓐ-ꓡ-ꓦ ꓠꓽ ꓤꓰꓻˍ ꓟ ꓡꓳ ꓒꓱ ꓖꓳ ꓟ ꓔꓯ ꓡꓳꓺ ꓠꓬꓹ ꓗꓷꓳ꓿ ꓡꓳ ꓒꓱ ꓖꓳ ꓟ ꓔꓯ ꓜꓯꓻ ꓢꓴˍ ꓐꓰ ꓜꓶꓻ ꓢꓴ ꓠꓬ ꓪꓴ-ꓢ ꓥ ꓡꓳ꓿ 11 ꓢ-ꓣˍ ꓟꓲ ꓬꓲ ꓘꓳꓼ ꓗꓳꓸ ꓗꓷ ꓗꓸ ꓠꓯ ꓙꓵꓻ ꓠꓲꓹ ꓗꓪ ꓐꓰ ꓤꓽ ꓶꓻ ꓡꓰ ꓠ ꓟ ꓪꓽ ꓠꓬꓲˍ ꓟ ꓟꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓤꓽ ꓖꓶꓽ ꓙ ꓟꓳ ꓢꓴ ꓪꓴ-ꓢ ꓠꓽ ꓦ ꓡꓱ ꓐꓳˍ ꓟ ꓥ ꓡꓳ꓾ ꓐꓰ ꓬꓲ ꓙꓵꓻˍ ꓡꓳ꓿ 12 ꓖꓳ ꓡꓱ ꓠꓬꓲ ꓫꓵꓻ ꓟ ꓪꓴꓸ ꓙꓴꓽ ꓥ ꓟ ꓡꓽ ꓞꓳ ꓕꓲ ꓣꓳ ꓗꓪ ꓐꓰ꓾ ꓬꓲ ꓞꓲꓼ ꓤ ꓡꓯꓹ ꓤ ꓵ ꓟꓬꓱ ꓠꓬ ꓟꓴꓽ ꓗꓪ ꓗꓪ ꓟ ꓗꓴ ꓤˍ ꓐꓰ꓾ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓟ ꓧꓶꓽ ꓚꓲꓺˍ ꓡꓰ ꓐꓰ ꓵ ꓖꓴ ꓟꓽ ꓓ ꓗꓷ ꓡꓰꓳ꓿ 13 ꓕꓱ ꓟꓬ ꓣꓳ ꓮꓽ ꓙꓵ ꓠꓬ ꓙ ꓟꓳ ꓔ ꓟ ꓟꓽ ꓟꓶ ꓟꓶ ꓙꓵꓻ ꓠꓲꓹ ꓙꓳ ꓔ ꓢꓲ ꓫꓵꓻꓳ꓿ ꓖꓳ ꓡꓱ ꓥ ꓟꓲ ꓶ ꓤꓻ ꓗꓪ ꓐꓰ ꓙ ꓟꓳ ꓔ ꓟ ꓔꓯ ꓬꓲ ꓪꓽ ꓡꓳꓸ ꓟꓳ ꓗꓷ ꓠꓬꓲ ꓠꓲꓹ ꓒꓴ ꓒꓴˍ ꓐꓰ ꓘꓳ ꓣꓴ ꓢꓲ꓾ ꓚꓲ ꓛꓬ ꓠꓬ ꓟꓲ ꓠꓯ ꓗꓪ ꓞꓳ ꓬꓯꓼ ꓟꓴ ꓢꓴˍ ꓐꓰ ꓓꓴꓻ ꓓꓳ ꓢꓴ ꓥ ꓟ ꓣꓷꓠˍ ꓡꓳ꓿ 14 ꓕꓱ ꓡꓱ ꓣꓷꓠꓸ ꓢꓴ ꓠꓽ꓾ ꓬꓲ ꓪꓽ ꓚꓲ ꓛꓬ ꓐꓱ ꓶ ꓟꓵꓽ ꓕꓲ ꓟꓵ ꓧꓪ ꓔꓬ ꓢꓴ ꓥ ꓟ ꓔꓲ ꓢꓲꓽ ꓢꓲˍ ꓡꓰꓽ ꓢꓴ ꓔꓯ ꓡꓳꓸ ꓢꓷ ꓡꓰ ꓝꓲˍ ꓡꓳ꓿ 15 ꓬꓲ ꓪꓽ ꓓꓳꓺ ꓡ ꓗꓷ ꓟ ꓟꓵꓽ ꓔꓯ ꓬꓲ ꓪꓽ ꓟꓽ ꓢꓲꓼ ꓙꓬ꓿ ꓢꓲꓼ ꓙꓬˍ ꓢꓰꓽ ꓕꓯ ꓠꓽ ꓡꓽ ꓬꓲꓼ ꓙꓰ ꓓꓻˍ ꓡꓳ ꓫꓵꓽ ꓥ ꓡꓳ꓿ 16 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓪ ꓜꓲ ꓙꓲˍ ꓟ ꓟꓴꓽ ꓗꓪ ꓗꓪ ꓟ ꓟꓵꓽ ꓔꓯ ꓢꓲꓼ ꓙꓬˍ ꓡꓳ꓿ ꓖꓳ ꓡꓱ ꓠꓬꓲ ꓪꓴ-ꓢ ꓠꓬ꓾ ꓬꓲ ꓪꓽ ꓡꓰ ꓬꓲ ꓔꓯ ꓬꓲ ꓪꓽ ꓪꓴ-ꓢ ꓘꓴ ꓝꓲ ꓠ ꓟ ꓟꓽ ꓫꓸ ꓔꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓬꓲ ꓪꓽ ꓐꓱ ꓶ ꓡꓳ ꓒꓱ ꓕꓲ ꓟ ꓙꓽ ꓖꓶ ꓔ ꓡꓳ꓿ 17 ꓮ-ꓐ-ꓡ-ꓦ ꓔꓯ ꓤꓹ ꓠꓬꓲˍ ꓕꓯ ꓬꓲ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓬꓲ ꓤꓽ ꓔꓲꓸ ꓬꓲ-ꓢ ꓔꓯ ꓔꓲ ꓗꓷꓳ꓿ ꓬꓲ-ꓢ ꓗꓪ ꓐꓰˍ ꓡꓰꓽ ꓠꓴ ꓞꓲꓼ ꓤ ꓡꓯꓹ ꓤ ꓟꓬꓽ ꓡ ꓥꓳ꓾ ꓐꓯ ꓔ ꓥ ꓟꓲ꓾ ꓙ ꓟꓳ ꓘꓶ ꓔꓯ ꓠꓲꓹ ꓒꓴ ꓒꓴˍ ꓐꓰ ꓘꓳ ꓣꓴ ꓢꓴ ꓮ-ꓐ-ꓡ-ꓦ ꓡꓰ꓾ ꓬꓲ ꓚꓲ ꓛꓬ ꓤ ꓔꓲꓸ ꓔꓲꓺ ꓖꓶˍ ꓡꓳ꓿ 19 ꓮ ꓡꓲꓳ ꓐꓯ ꓠꓬ ꓮ-ꓐ-ꓡ-ꓦ ꓠꓽ ꓫꓵꓻ ꓗꓪ ꓐꓰˍ ꓟꓲ ꓪꓴ-ꓢ ꓡꓰ ꓬꓲ ꓤ ꓔꓯ ꓢꓯꓸ ꓡ ꓝꓲ ꓐ ꓡ ꓥꓳ꓾ ꓐꓰ ꓙꓵꓻˍ ꓠꓬꓲ꓾ ꓬꓲ ꓠꓬ ꓬꓲ ꓤ ꓬꓲ-ꓢ ꓔꓯ ꓫꓵꓻ ꓗꓪ ꓐꓰ ꓣꓴ ꓬꓲꓼ ꓡ ꓟ ꓡꓰ ꓐꓰ ꓗꓷ ꓡꓰꓳ꓿ 20 ꓬꓲ-ꓢ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓡꓻ ꓠꓹ ꓟ ꓔꓯ ꓖꓴ ꓢꓲ꓾ ꓬ-ꓗꓴˍ ꓐꓰ ꓬꓲ-ꓢꓳ ꓔꓯ ꓶꓼ ꓥꓳ ꓙꓱꓽ ꓖꓶˍ ꓡꓳ꓿ 21 ꓬ-ꓗꓴˍ ꓟꓲ ꓫꓵꓻˍ ꓐꓰ ꓗꓹ ꓕꓯ꓾ ꓙꓵꓻ ꓠꓲꓹ ꓗꓪ ꓐꓰ ꓬꓳ-ꓢꓷ ꓬꓲ ꓤ ꓠꓬꓲꓽ ꓫꓵꓸ ꓔꓯ ꓶꓼ ꓥꓳ ꓙꓱꓽ ꓖꓶ ꓢꓲ꓾ ꓙꓽ ꓥꓳꓽ ꓔꓳꓹ ꓔ ꓢꓲ ꓠꓬꓲ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼˍ ꓡꓳ꓿ 22 ꓬꓳ-ꓢꓷ ꓠꓬ ꓬꓲ ꓫꓵꓻ ꓝꓲ ꓠꓶꓽ ꓡ ꓕꓯ꓾ ꓙꓵꓻ ꓠꓲꓹ ꓗꓪ ꓐꓰ ꓬꓲ-ꓢꓷ-ꓡꓰ ꓞꓲꓼ ꓤ ꓡꓯꓹ ꓤ ꓐꓴ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳ ꓙꓰˍ ꓟ ꓔꓯ ꓖꓴ ꓢꓲ꓾ ꓚꓲ ꓛꓬ ꓪꓳꓼ ꓔꓳ ꓔꓯ ꓟꓳꓸ ꓐꓯ ꓘꓶ ꓟꓸ ꓔ ꓬꓰˍ ꓡꓳ꓿ 23 ꓟꓳ-ꓫꓲ ꓔꓯ ꓦꓵꓻ ꓗꓷ ꓕꓯ꓾ ꓬꓲ ꓠꓽ ꓐꓲꓻˍ ꓟ ꓤ ꓠꓱ ꓥ ꓟ ꓬꓲ ꓪꓽ ꓡꓳꓸ ꓟꓳˍ ꓠꓬꓲ꓾ ꓪ ꓔꓲ ꓕꓵꓼ ꓪꓽ ꓔꓯ ꓟꓽ ꓙꓳꓺ ꓙꓳ꓾ ꓬꓲ ꓐꓹ ꓐ ꓟꓹ ꓟ ꓡꓰ ꓙꓵꓻ ꓠꓲꓹ ꓗꓪ ꓐꓰ ꓬꓲ ꓔꓯ ꓦ ꓐ ꓢ ꓟ ꓚꓵ ꓔ ꓡꓳ꓿ 24 ꓟꓳ-ꓫꓲ ꓪꓴꓽ ꓡ ꓕꓯ꓾ ꓙꓵꓻ ꓠꓲꓹ ꓗꓪ ꓐꓰ ꓩ-ꓣꓳ ꓬꓲ ꓮꓸ ꓟꓲꓽ ꓬꓲ ꓤꓽ ꓙꓵꓽ ꓪ ꓔꓯ ꓟꓽ ꓠꓵꓻ ꓠꓵꓻ꓾ 25 ꓝꓴꓲ ꓠꓯS ꓗꓪ ꓗꓹ ꓛꓲꓽ ꓓꓴ ꓕꓲꓽ ꓝꓲꓸ ꓤ ꓟꓶꓻ ꓠꓹ ꓟ ꓬꓲ ꓛꓲ꓾ ꓪꓴ-ꓢ ꓑ ꓫꓬꓼ ꓐꓴˍ ꓐꓰ ꓕꓲꓽ ꓛꓳˍ ꓫꓸ ꓙꓵꓻ ꓜꓲꓽˍ ꓟ ꓔꓯ ꓢꓲ ꓣꓴˍ ꓡꓳ꓿ 26 ꓟꓳ-ꓫꓲ ꓠꓬ ꓡ ꓠꓹ ꓟ ꓡꓯꓼ ꓫꓴ ꓔꓯ ꓟꓬ ꓔꓱꓹ ꓡꓳꓸ ꓔ ꓢꓲ꓾ ꓙꓲ-ꓢꓴ ꓐꓱ ꓶ ꓫꓸ ꓔꓳ ꓫꓸ ꓒꓯꓼ ꓜꓲꓽˍ ꓟ ꓔꓯ ꓠꓬ ꓬꓲ-ꓙꓲ ꓟꓵꓽ ꓗꓪ ꓟ ꓒꓵꓽ ꓶꓽ ꓢꓶꓸ ꓟꓽ ꓞꓲ ꓒꓵꓽˍ ꓟ ꓚꓬꓹ ꓗꓷꓳ꓿ 27 ꓬꓲ ꓠꓬ ꓙꓵꓻ ꓠꓲꓹ ꓗꓪ ꓐꓰ꓾ ꓟꓳꓻ ꓟꓽ ꓓ ꓟ ꓢꓲ ꓒꓽ ꓔꓯ ꓡꓳꓸ ꓟꓳˍ ꓟ ꓡꓰ ꓐꓰ ꓚꓬꓹ ꓔ ꓢꓲ꓾ ꓪ ꓔꓲ ꓠꓲꓹ ꓛꓰꓹ ꓟ ꓔꓯˍ ꓟꓲ ꓟꓽ ꓙꓳꓺ ꓙꓳ꓾ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳ ꓙꓰꓳ꓿ 28 ꓝꓮꓲ ꓠꓬ ꓤ ꓪꓴꓽ ꓔꓯ ꓟꓶꓽ ꓬꓰ ꓝꓲ ꓢꓴ ꓖꓳ ꓕꓲ ꓣꓳ ꓡꓰ ꓬꓲ ꓪꓽ ꓔꓯ ꓟꓽ ꓡꓵꓹ ꓬꓯꓼ ꓡ ꓠꓹ ꓟ꓾ ꓬꓲ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓦꓲ-ꓘꓳ-ꓑꓮꓲˍ ꓐꓰ ꓫꓵꓽ ꓧꓶꓺˍ ꓟ ꓗ ꓫꓵ ꓬꓰˍ ꓡꓳ꓿ 29 ꓬꓲ-ꓢꓷ-ꓡꓰ ꓐꓴ ꓠꓬ ꓬꓲ ꓪꓽ ꓙꓵꓻ ꓠꓲꓹ ꓑꓶꓸ ꓓꓴ꓾ ꓬꓲꓻ ꓡꓴꓽ ꓐꓱ ꓠꓲꓺ ꓗꓪ ꓟꓲꓺ ꓙꓴ ꓓꓳ ꓡ ꓢꓲ ꓗꓳꓸ ꓙꓰ ꓪˍ ꓡꓳ꓿ ꓬꓲ-ꓙꓲ ꓡꓽ ꓞꓳˍ ꓟꓲ ꓖꓳ ꓡꓱ ꓬꓰ ꓠꓬꓲ ꓠꓬ ꓔꓲꓹ ꓫꓵ ꓖꓴꓳ꓿ 30 ꓬꓲ-ꓢꓷ-ꓡꓰ ꓐꓴ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓙꓱ-ꓡꓱ-ꓘꓳ ꓡꓳ ꓒꓱ ꓚꓬꓹ ꓔꓯ ꓫꓵꓽ ꓠꓬꓲ ꓚꓳ ꓗꓷ ꓠꓬ ꓐꓱꓽ ꓡꓰꓳ꓿ 31 ꓖꓳꓻ ꓪꓴꓽ ꓟ ꓡ-ꓧꓳꓽ ꓠꓬ ꓙꓵꓻ ꓠꓲꓹ ꓗꓪ ꓐꓰ꓾ ꓟꓵꓽ ꓕꓺ ꓠꓬꓲ ꓢꓴ ꓬꓲ-ꓢꓷ-ꓡꓰ ꓐꓴ ꓔꓯ ꓘꓳꓻ ꓣꓴ ꓗꓷ ꓠꓬꓲ꓾ ꓪꓴ-ꓢ ꓔꓯ ꓟꓽ ꓒꓵꓽ ꓛꓳ ꓢꓴ ꓖꓳ ꓕꓲ ꓧꓳꓽˍ ꓐꓰ ꓕꓲ ꓪꓺꓼ ꓟꓽ ꓫꓵꓻ꓿ 32 ꓖꓳ ꓡꓱ ꓠꓬ ꓥꓪ ꓝꓮꓲ ꓮꓸ ꓫꓵ ꓐꓯ ꓠꓯꓹ ꓢꓰꓽ ꓡ? ꓖꓷ-ꓓꓰ-ꓬꓴ꓾ ꓐ-ꓣ-ꓗꓷ꓾ ꓢ-ꓟꓳ-ꓢꓳ-ꓠ꓾ ꓬꓰ-ꓩꓴ-ꓕ꓾ ꓓ-ꓪꓵ꓾ ꓢ-ꓟꓴ-ꓬꓰˍ ꓐꓰ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓔꓯ ꓟꓳꓸ ꓚ ꓠꓹ ꓟ ꓬꓲ ꓙꓵꓹ ꓟꓽ ꓡꓳꓼ꓿ 33 ꓬꓲ ꓪꓽ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓗꓴꓷꓼ ꓔꓯ ꓓꓶꓽ ꓧꓪꓸ ꓡꓰꓳ꓿ ꓔꓱꓹ ꓜꓳꓽˍ ꓟ ꓟꓬꓱꓽ ꓬꓰ ꓗꓷꓳ꓿ ꓙ ꓟꓳ ꓘꓶ ꓟꓶ ꓡꓰꓳ꓿ ꓡꓽ ꓢꓯꓹ ꓟꓷꓽ ꓠꓷꓹ ꓔꓯ ꓛꓵꓽ ꓗꓷꓳ꓿ 34 ꓮꓸ ꓔꓳꓸ ꓪꓽ ꓠꓬꓲˍ ꓟ ꓔꓯ ꓢꓰꓼ ꓗꓷꓳ꓿ ꓮꓸ ꓕꓽ ꓢꓶꓽ ꓠꓬꓲꓽ ꓗꓪ ꓐꓰ ꓡꓲꓹ ꓗꓷꓳ꓿ ꓬꓲ ꓪꓽ ꓢꓯꓼ ꓐꓽˍ ꓟ ꓠꓬ ꓪꓽ ꓠꓬꓲˍ ꓟ ꓒꓬꓱꓼ ꓡꓺꓳ꓿ ꓟꓯꓼ ꓘꓶꓽ ꓗꓪ ꓪꓽ ꓠꓬꓲ ꓠꓬꓲˍ ꓡꓰꓽ ꓐꓶꓽ ꓒ ꓟꓯꓼ ꓜꓴꓻ ꓔꓯ ꓖꓼ ꓦ ꓗꓷꓳ꓿ 35 ꓤꓽ ꓟꓶ ꓤ ꓕꓲ ꓐꓱ ꓠꓬ ꓬꓲ ꓪꓽ ꓞꓳ ꓫꓵꓻ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ ꓟꓶ ꓗꓷꓳ꓿ ꓝꓮꓲ ꓠꓱꓸ ꓐꓯꓼ ꓕꓲ ꓐꓱ ꓠꓬ꓾ ꓪꓻ ꓜꓲ ꓙꓲˍ ꓟ ꓢꓯꓸ ꓬꓲꓼ ꓡ ꓟ ꓟꓶꓻ ꓠꓹ ꓟ꓾ ꓘꓶꓻ ꓙꓵꓻ ꓟꓶ ꓢꓲ ꓩꓴ ꓗꓷˍ ꓟ ꓔꓯ ꓬꓲ ꓪꓽ ꓟꓽ ꓘꓳ ꓣꓴ꓿ 36 ꓝꓮꓲ ꓠꓱꓸ ꓐꓯ ꓕꓲ ꓐꓱ ꓠꓬ꓾ ꓤꓲꓺˍ ꓟ ꓐꓰ ꓓꓶꓽˍ ꓟ꓾ ꓞꓳꓹˍ ꓟ ꓐꓰ ꓐꓱ ꓗꓷˍ ꓟ ꓔꓳꓹ ꓜꓳꓽ ꓗꓷꓳ꓿ 37 ꓬꓲ ꓪꓽ ꓔꓯ Bꓸ ꓛꓲ ꓡꓳꓺ ꓗꓷꓳ꓿ ꓶꓼ ꓓꓴ ꓡꓰ ꓠꓬꓲꓽ ꓕꓱꓻ ꓶꓼ ꓗꓷꓳ꓿ ꓫꓵꓽ ꓠꓬꓲ ꓤꓹ ꓠꓬꓲˍ ꓟ ꓔꓳꓹ ꓜꓳꓽ ꓗꓷꓳ꓿ ꓮꓸ ꓕꓽ ꓡꓰ ꓢꓰꓼ ꓗꓷꓳ꓿ ꓬꓲ ꓪꓽ ꓠꓬ ꓫꓸ ꓙꓵ ꓟꓷꓼ ꓙꓵ ꓢꓲ ꓘꓶꓻ ꓙꓵ ꓟꓶˍ ꓠꓬꓲ꓾ ꓮ ꓣꓳ ꓙꓲꓻ ꓘꓳꓹ ꓠꓬꓲ꓾ ꓮꓸ ꓛꓵꓼ ꓙꓲ ꓘꓳꓹ ꓠꓬꓲ ꓐꓰ ꓚꓳ ꓙꓰ ꓗꓷꓳ꓿ 38 ꓟꓲ ꓠꓯ ꓠꓬ ꓬꓲ ꓪꓽ ꓔꓬ ꓠꓹ ꓟ ꓟꓽ ꓒꓵꓽ ꓠꓬꓲ꓾ ꓬꓲ ꓪꓽ ꓠꓬ ꓡꓲ ꓛꓲˍ ꓐꓰ ꓪꓽ ꓚꓲ ꓗꓪ ꓶꓻ ꓚꓳ ꓢꓲ꓾ Bꓸ ꓘꓴˍ ꓐꓰ ꓟꓲꓺ ꓘꓴ ꓗꓪ ꓔꓬ ꓠ ꓗꓷ ꓡꓰꓳ꓿ 39 ꓬꓲ ꓪꓽ ꓮꓽ ꓙꓵ ꓠꓬ ꓬꓲ ꓪꓽ ꓙꓵꓻ ꓠꓲꓹ ꓑꓶꓸ ꓓꓴ ꓓꓳꓹ ꓟꓴˍ ꓟ ꓟꓶ ꓡꓰˍ ꓟꓲ꓾ ꓖꓶꓽ ꓙ ꓟꓳ ꓔ ꓟ ꓔꓯ ꓟꓽ ꓟꓶ ꓢꓰꓽ꓿ 40 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓣꓳꓽ ꓐꓱ ꓶ ꓪꓻ ꓜꓲ ꓙꓲˍ ꓡꓳ ꓫꓵꓽ ꓙꓽ ꓖꓶ ꓔ ꓢꓲ꓾ ꓬꓲ ꓪꓽ ꓠꓽ ꓣꓳˍ ꓐꓰ ꓕꓲ ꓪꓺꓼ ꓟꓽ ꓥ ꓠꓬ ꓟꓽ ꓜꓳꓽ ꓓꓰ ꓡꓰ꓾ ꓟꓽ ꓜꓲꓼ ꓓꓰ ꓡꓰ꓿

ꓦꓲ-ꓐꓱ-ꓣꓴ 12

1 ꓖꓳ ꓡꓱ ꓠꓬꓲ ꓕꓱ ꓘꓶꓻ ꓛꓲ ꓪꓴꓽˍ ꓟ ꓢꓷꓸ ꓙ ꓟꓳ ꓙ ꓢꓴ ꓕꓲ ꓜꓴ ꓠꓬ ꓟꓴ ꓗꓴꓸˍ ꓡꓰ ꓐꓰ ꓣꓳꓽ ꓔꓯ ꓚꓳ ꓞꓹ ꓠꓬꓲ꓾ ꓣꓳˍ ꓟꓲ ꓘꓶꓻ ꓡꓶ ꓓꓴ ꓮꓽ ꓙꓵˍ ꓐꓰ꓾ ꓣꓳꓽ ꓔꓯ ꓞꓳꓹ ꓞꓹ ꓟ ꓝꓴꓲ ꓔꓯ ꓡꓵꓸ ꓗꓷ ꓢꓲ꓾ ꓜꓲꓽ ꓘꓴ ꓠꓲꓹ ꓡꓰ ꓣꓳꓽ ꓟꓲꓽ ꓙꓬ ꓗꓪ ꓓꓹ ꓟ ꓔꓷꓹ ꓖꓴ ꓗꓪ ꓔꓷꓹ ꓙꓰ ꓡꓯ꓿ 2 ꓣꓳꓽ ꓙꓵꓻ ꓠꓲꓹ ꓬꓲ ꓚꓰˍ ꓐꓰ ꓣꓳꓽ ꓙꓵꓻ ꓠꓲꓹ ꓔꓯ ꓪꓴꓽ ꓓꓰ ꓡꓰ ꓝꓲ ꓢꓴ ꓬꓰ-ꓢꓴ ꓔꓯ ꓟꓬ ꓔꓱꓹ ꓡꓳꓸ ꓔ ꓡꓯ꓿ ꓬꓲ ꓠꓬ ꓬꓲ ꓟꓲꓽ ꓙꓬ ꓗꓪ ꓓꓹ ꓟ ꓗꓹ ꓛꓲꓽ ꓓꓴ ꓪꓴꓸ ꓠꓬꓲ꓾ ꓫꓸ ꓔꓳ ꓫꓸ ꓒꓯꓼ ꓟ ꓔꓯ ꓟꓳꓻ ꓟꓽ ꓟꓵ ꓟꓵ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓫꓸ ꓙꓵˍ ꓟ ꓜꓲꓽ ꓢꓲ꓾ ꓪꓴ-ꓢ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ ꓡꓰꓳ꓿ 3 ꓠꓴ ꓪꓽ ꓠꓬ ꓪꓴꓽ ꓧꓶꓻˍ ꓟꓲ ꓠꓲꓹ ꓟ ꓟꓽ ꓙꓬ ꓡꓰ ꓠꓹ ꓟ꓾ ꓝꓴꓲ ꓙꓳ ꓢꓴ ꓐꓴ ꓡꓰ ꓡꓯꓼ ꓧꓹˍ ꓟ ꓔꓯ ꓜꓲꓽ ꓗꓷ ꓢꓴ ꓬꓰ-ꓢꓴ ꓔꓯ ꓓꓵꓽ ꓙꓽ ꓔ꓿ 4 ꓠꓴ ꓪꓽ ꓠꓬ ꓝꓴꓲ ꓔꓯ ꓔꓳꓹˍ ꓟ ꓗꓪ ꓫꓵꓽ ꓧꓳꓸ ꓡꓰ ꓗꓪ ꓛꓲ ꓟꓽ ꓗꓷ ꓡꓰ ꓢꓰꓽ꓿ 5 ꓪꓴ-ꓢ ꓡꓰ ꓘꓶꓸ ꓖꓶꓽˍ ꓟ ꓐꓯ ꓘꓶ ꓔꓯ ꓠꓴ ꓪꓽ ꓟꓲꓺ ꓡꓰ ꓡ? ꓬꓲ ꓡꓰ꓾ ꓥꓪ ꓤꓽꓳ꓾ ꓢꓲ ꓒꓽ ꓡꓰ ꓟꓸ ꓙꓽˍ ꓟ ꓔꓯ ꓟꓳꓻ ꓟꓽ ꓟꓵ ꓕꓽ ꓬꓰ꓿ ꓬꓲ ꓡꓰ ꓠꓴ ꓪꓽ ꓔꓯ ꓕꓼˍ ꓥ ꓟꓲ ꓠꓲꓹ ꓟ ꓕꓽ ꓙꓬ ꓡꓰ꓿ 6 ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓠꓲꓹ ꓠꓵ ꓢꓴ ꓔꓯ ꓠꓬ ꓬꓲ ꓟꓸ ꓙꓽ ꓢꓲ꓾ ꓬꓲ ꓡꓰ ꓮ ꓐꓲ ꓣꓷꓠꓸ ꓔ ꓟ ꓥ ꓕ ꓑꓳꓸ ꓔꓯ ꓬꓲ ꓧꓶꓹˍ ꓥꓳ꓾ ꓐꓰ ꓐꓯ ꓔ ꓡꓳ꓿ 7 ꓠꓴ ꓪꓽ ꓫꓸ ꓙꓵˍ ꓕꓯ꓾ ꓪꓴ-ꓢ ꓡꓰ ꓤꓽ ꓐꓴ ꓔꓯˍ ꓡꓰ ꓐꓰ ꓟꓸ ꓙꓽ ꓡ ꓟ ꓚꓬꓹ ꓢꓲ ꓜꓲꓽ ꓔ꓿ ꓮ ꓡꓲꓳ ꓐꓯ ꓠꓬ ꓮꓽ ꓐ ꓡꓰ ꓟꓽ ꓟꓸ ꓙˍ ꓟ ꓤꓽ ꓟꓽ ꓙꓳ꓿ 8 ꓮ ꓐꓲ ꓐꓴ ꓔꓯˍ ꓡꓰ ꓐꓰ ꓠꓴ ꓪꓽ ꓔꓯ ꓟꓽ ꓟꓸ ꓙˍ ꓠꓬ꓾ ꓠꓴ ꓪꓽ ꓠꓽ ꓤ ꓚꓵ ꓟꓽ ꓥ꓾ ꓓꓲꓽ ꓤꓽ ꓥ ꓡꓳ꓿ (ꓮ ꓡꓲꓳ ꓐꓯ ꓠꓬ ꓮ ꓐꓲ ꓮ ꓡꓲ ꓕꓲ ꓣꓳˍ ꓟꓲ ꓟꓸ ꓙꓽ ꓟ ꓟꓶˍ ꓡꓳ꓿) 9 ꓝꓮꓲ ꓣꓳꓽ ꓠꓬ ꓧꓪ ꓖꓳ ꓓꓱ ꓗꓪ ꓟꓸ ꓙꓽ ꓢꓴ ꓣꓳꓽ ꓮꓽ ꓐ ꓮ ꓟ ꓐꓴ ꓔꓯ ꓒꓵꓽˍ ꓡꓳ꓿ ꓖꓳ ꓡꓱ ꓥ ꓠꓬ ꓢꓯꓼ ꓟꓬ ꓟꓶ ꓡꓰ ꓝꓲ ꓠꓹ ꓟ ꓣꓳꓽ ꓔꓯ ꓙꓵꓽ ꓔꓬ ꓟ ꓦ ꓗꓪ ꓟ ꓐꓹ ꓐ ꓔꓯ ꓪ ꓜꓲ ꓒꓵꓽ ꓠꓯꓹ ꓡꓳ ꓟꓽ ꓥ ꓡ? 10 ꓮ ꓡꓲꓳ ꓐꓯ ꓠꓬ ꓧꓪꓽ ꓗꓪ ꓟ ꓮꓽ ꓐ ꓮ ꓟ ꓐꓴ ꓠꓬ꓾ ꓬꓲ ꓪꓽ ꓮ ꓡꓲ ꓛꓲ ꓙꓽ ꓜꓲꓼˍ ꓟ ꓔꓯ ꓛꓳ ꓢꓲ ꓕꓲ ꓑꓹ ꓤ ꓣꓱꓽ ꓬꓯꓼˍ ꓡꓳ ꓫꓵ ꓐꓱ ꓶ ꓟꓸ ꓙꓽ ꓡ ꓡꓳ꓿ ꓪꓴ-ꓢ ꓠꓽ ꓣꓳꓽ ꓔꓯ ꓬꓲ ꓢꓲꓽ ꓫꓬ ꓟ ꓑꓯꓹ ꓟꓶ ꓢꓴ ꓬꓰ ꓝꓲ ꓠꓹ ꓟ ꓟꓸ ꓙꓽˍ ꓡꓳ꓿ 11 ꓟꓸ ꓙꓽ ꓓꓴ ꓔꓳꓹ ꓜꓳꓽˍ ꓟ ꓕꓲ ꓑꓹ ꓗꓪ ꓠꓬ ꓗꓹ ꓛꓲꓽ ꓓꓴ ꓟꓽ ꓥ꓾ ꓠꓲꓹ ꓫꓸ ꓟꓬ ꓫꓸ ꓓꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓟꓸ ꓒꓬꓱꓼ ꓡ ꓟ ꓡꓽ ꓞꓳ ꓠꓬ꓾ ꓔꓱꓹ ꓜꓳꓽˍ ꓟ ꓐꓰ ꓢꓲ ꓡꓲ ꓟ ꓬꓲ ꓢꓶꓽ ꓓꓱꓼ ꓓꓳ ꓡ ꓡꓳ꓿ 12 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ꓾ ꓢꓯꓼ ꓐꓽˍ ꓟ ꓡꓯꓼ ꓒꓯꓹˍ ꓐꓰ ꓢꓯꓼ ꓟꓽ ꓙꓳ ꓟ ꓛꓲ ꓝꓲꓸ ꓔꓯ ꓢꓯꓼ ꓔꓰꓹ ꓡꓰ ꓝꓲ ꓢꓲ꓾ 13 ꓛꓲ ꓫꓳꓸ ꓠꓬ ꓟꓽ ꓕꓳꓼ ꓫꓵꓸ ꓡꓰ ꓡꓰ ꓟꓬꓽ ꓠꓬꓲ ꓓꓻ ꓡꓰ ꓠꓹ ꓟ꓾ ꓔꓱꓹˍ ꓟ ꓙ ꓖꓴ ꓗꓪ ꓫꓱꓽ꓿ 14 ꓮꓽ ꓙꓵ ꓢꓴˍ ꓐꓰ ꓧꓳꓹ ꓡꓯꓽ ꓘꓳ ꓠꓹ ꓟ ꓐꓰ꓾ ꓠꓲꓹ ꓟ ꓢꓲꓽ ꓢꓲ ꓫꓬ ꓫꓬˍ ꓡꓰ ꓞꓳ ꓙꓳ ꓢꓲ ꓔꓬ ꓠꓹ ꓟ ꓢꓯꓼ ꓕꓵꓼ꓿ ꓮ ꓡꓲꓳ ꓐꓯ ꓠꓬ ꓠꓲꓹ ꓟ ꓟꓽ ꓢꓲ ꓫꓬ ꓢꓴ ꓮꓽ ꓟˍ ꓟꓲ ꓢꓲ ꓒꓽ ꓔꓯ ꓟꓳꓻ ꓪ ꓟꓽ ꓓ꓿ 15 ꓪꓴ-ꓢ ꓣꓱꓽ ꓛꓰ ꓔꓯ ꓘꓳ ꓣꓴ ꓟꓽ ꓟꓶ ꓢꓴ ꓟꓽ ꓙꓳ ꓠꓹ ꓟ ꓤ ꓟꓳ꓿ ꓟꓽ ꓥ ꓠꓬ ꓘꓪꓽˍ ꓟ ꓬꓲ ꓚꓰ ꓣꓱꓻ ꓡ ꓢꓲ꓾ ꓠꓴ ꓪꓽ ꓔꓯ ꓘꓶꓻ ꓡꓶ ꓡ ꓢꓲ ꓠꓬꓲ꓾ ꓕꓱ ꓟ ꓗꓪ ꓐꓰ ꓮꓽ ꓟꓬꓹ ꓣꓳ ꓔꓯ ꓟꓽ ꓫꓬꓻ ꓟ ꓠꓷꓼ ꓡꓰ ꓝꓲˍ ꓟꓽ ꓢꓷ꓿ 16 ꓠꓴ ꓪꓽ ꓗꓳ ꓗꓪ ꓟꓽ ꓢꓲ ꓟꓽ ꓫꓬ ꓟ ꓬꓰ ꓢꓴ ꓟꓽ ꓙꓳ ꓠꓹ ꓟ ꓤ ꓟꓳ꓿ ꓝꓮꓲ꓾ ꓬꓲ-ꓢꓳꓽ ꓠꓬ ꓪꓴ-ꓢ ꓔꓯ ꓟꓽ ꓒꓵ ꓢꓲ꓾ ꓬꓲ ꓤ ꓪꓴꓽ ꓙꓵꓽ ꓪꓽ ꓠꓬ ꓜꓻ ꓕꓲ ꓜꓽˍ ꓡꓰꓽ ꓑ ꓜꓽ ꓗꓷ ꓟ ꓡꓰ ꓐꓰ꓾ ꓠꓴ ꓪꓽ ꓗꓳꓺ ꓡꓳ ꓗꓪ ꓪꓴ-ꓢ ꓔꓯ ꓟꓽ ꓒꓵꓽ ꓢꓴ ꓕꓲ ꓣꓳˍ ꓟꓲ ꓕꓽ ꓙꓳ ꓝꓲ꓿ 17 ꓗꓸ ꓠꓯ ꓬꓲ-ꓢꓳ ꓠꓬ ꓟꓬ ꓐꓲ ꓓꓳ ꓠꓬꓲ ꓐꓰ ꓬꓲ ꓐꓹ ꓐ ꓶꓼ ꓘꓶꓽ ꓟꓶ ꓠꓲꓹ ꓫꓵˍ ꓟꓲ꓾ ꓠꓲꓹ ꓟ ꓡꓶꓸ ꓚꓱꓹ ꓧꓪ ꓟꓽ ꓟꓶ ꓟ ꓠꓴ ꓪꓽ ꓢꓷꓸˍ ꓡꓳ꓿ 18 ꓠꓴ ꓪꓽ ꓠꓽ ꓫꓱꓹ ꓟꓶ ꓓꓻˍ ꓟ ꓐꓰ ꓮꓸ ꓔꓳꓸ ꓐꓬꓻ ꓞꓹ ꓟ ꓪꓽ ꓚꓲˍ ꓐꓰ꓾ ꓟꓴ ꓗꓴꓸ ꓠꓯꓺˍ ꓐꓰ ꓠꓯ ꓞꓲꓹ ꓟ ꓐꓰ ꓕꓳꓽ ꓥꓳꓽˍ ꓐꓰ꓾ 19 ꓐꓽ ꓡ ꓢꓯꓼˍ ꓐꓰ ꓫꓸ ꓕꓱˍ ꓟ ꓢꓯꓼ ꓔꓯ ꓕꓲꓺ ꓡ ꓟ ꓟꓽ ꓥ꓿ ꓢꓯꓼ ꓕꓱ ꓟ ꓔꓯ ꓑ ꓙꓽ ꓢꓴ ꓠꓬ꓾ ꓬꓲ ꓪꓽ ꓔꓯ ꓝꓮꓲ ꓟꓽ ꓫꓸ ꓕꓱ ꓡ ꓠꓹ ꓟ ꓓꓰꓽ ꓗꓷꓳ꓿ 20 ꓮ ꓡꓲꓳ ꓐꓯ ꓠꓬ꓾ ꓪꓽ ꓚꓲ ꓕꓱ ꓟ ꓔꓯ ꓙꓱꓽ ꓤ ꓕꓲ ꓟ ꓠꓶꓽ ꓡꓰˍ ꓟꓲ Bꓸ ꓛꓲ ꓡꓰ ꓡꓳ ꓢꓰꓼ ꓗꓷ ꓠ ꓗꓹ ꓡꓳ꓾ ꓐꓰ ꓐꓯˍ ꓟ ꓕꓵꓼ ꓪꓽ ꓔꓯ ꓬꓲ ꓪꓽ ꓟꓯꓻ ꓟꓽ ꓘꓴ꓿ 21 ꓖꓳ ꓘꓶꓻ ꓛꓲ ꓙꓳꓺ ꓠꓯꓹ ꓡꓳ ꓫꓵꓽ ꓟꓳˍ ꓠꓬꓲ ꓟꓳ-ꓫꓲ ꓡꓰ꓾ ꓥꓪ ꓠꓬ ꓮꓽ ꓘꓶ ꓙꓳꓺ ꓛꓱꓽ ꓡꓰꓳ꓾ ꓐꓯˍ ꓡꓳ꓿ 22 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓜꓲ-ꓬꓴ ꓪ ꓚꓲˍ ꓐꓰ꓾ ꓢꓯꓸ ꓔꓬ ꓟ ꓪꓴ-ꓢ ꓬꓲ ꓡꓳ ꓒꓱ꓾ ꓟꓴꓽ ꓗꓪ ꓗꓪ ꓟ ꓙꓱ-ꓣꓴ-ꓢ-ꓡꓱˍ ꓐꓰ꓾ ꓟꓴꓽ ꓗꓪ ꓝꓲ ꓓꓴ ꓬꓲ ꓔꓴ ꓬꓲ ꓟꓶꓽˍ ꓐꓰ꓾ 23 ꓟꓴꓽ ꓗꓪ ꓕꓯ ꓢꓲ ꓗꓪ ꓟꓬꓱ ꓐꓳ ꓔ ꓟ ꓤ ꓪꓴꓽ ꓐꓴ ꓘꓴ ꓜꓲ ꓞꓳ ꓔꓯ ꓕꓲ ꓡꓺꓳ꓿ ꓝꓮꓲ ꓠꓴ ꓪꓽ ꓠꓬ ꓞꓳ ꓫꓵꓽ ꓞꓳ ꓙꓰꓽ ꓔꓯ ꓐꓯ ꓟꓴ ꓘꓶꓽ ꓢꓴ ꓢꓲ ꓒꓽ ꓪꓴ-ꓢˍ ꓐꓰ꓾ ꓬꓲ ꓡꓰ ꓜꓳꓽ ꓓꓰ ꓡꓰ ꓝꓲ ꓟ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓢꓴ ꓐꓴ ꓦꓻˍ ꓐꓰ꓾ 24 ꓘꓶꓽ ꓫꓵꓽ ꓫꓵꓼ ꓜꓲꓽ ꓟꓳꓽ ꓣꓱꓽ ꓢꓴ ꓬꓰ-ꓢꓴˍ ꓐꓰ꓾ ꓮ-ꓐꓱ ꓫꓵꓽ ꓫꓸ ꓕꓱˍ ꓟ ꓕꓯ ꓢꓲ ꓙꓲˍ ꓟ ꓐꓯ ꓘꓶ ꓫꓸ ꓕꓱˍ ꓟ ꓬꓰ-ꓢꓴ ꓫꓵꓽ ꓔꓯ ꓕꓲ ꓡꓰˍ ꓟ ꓥ ꓡꓳ꓿ 25 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓽ ꓠꓴ ꓪꓽ ꓔꓯ ꓫꓸ ꓕꓱ ꓔꓬ ꓟ ꓬꓰ-ꓢꓴ ꓔꓯ ꓟꓽ ꓠ ꓠꓹ ꓕꓽ ꓬꓰ꓿ ꓟꓲ ꓠꓯ ꓗꓪ ꓙꓳꓺ ꓗꓽ ꓖꓶ ꓓꓴ ꓔꓯ ꓟꓽ ꓠ ꓠꓹ ꓢꓴ ꓐꓴ ꓡꓲꓹ ꓗꓷ ꓟꓽ ꓪ ꓕꓯ ꓠꓽ꓾ ꓟꓴꓽ ꓗꓪ ꓕꓯ ꓢꓲ ꓗꓪ ꓐꓰ ꓙꓳꓺ ꓗꓽ ꓖꓶ ꓢꓴ ꓔꓯ ꓟꓽ ꓠ ꓠꓹ ꓐꓷˍ ꓠꓬ꓾ ꓣꓳꓽ ꓮ ꓡꓲ ꓐꓰ ꓡꓲꓹ ꓗꓷ ꓓ ꓢꓰ? 26 ꓖꓳ ꓕꓯ ꓬꓲ ꓫꓸ ꓕꓱ ꓢꓯꓼ ꓡꓰ ꓟꓲ ꓠꓯ ꓔꓯ ꓶꓹ ꓡꓵ ꓡꓰ ꓝꓲꓳ꓿ ꓮ ꓟꓶ ꓠꓬ ꓬꓲ ꓡꓰ꓾ ꓥꓪ ꓠꓽ ꓟꓲ ꓠꓯ ꓔꓯˍ ꓡꓰꓽ ꓟꓽ ꓞꓲ꓾ ꓟꓴꓽ ꓗꓪ ꓔꓯˍ ꓟꓲ ꓕꓲ ꓧꓪꓹ ꓶꓹ ꓡꓵ ꓡꓰ ꓝꓲˍ ꓥꓳ꓾ ꓐꓰ ꓙ ꓟꓳ ꓗꓷꓳ꓿ 27 ꓝꓮꓲ ꓕꓲ ꓧꓪ ꓶꓹ ꓡꓵ ꓡꓰ ꓝꓲˍ ꓢꓰꓽ ꓥꓳ꓾ ꓐꓯˍ ꓟ ꓕꓱ ꓕꓲ ꓘꓶ ꓠꓬ꓾ ꓶꓹ ꓡꓵ ꓡꓰ ꓟꓽ ꓓꓻ ꓟ ꓔꓯ ꓝꓰꓺ ꓞꓹ ꓝꓲ ꓠ ꓟ꓾ ꓚꓰꓼ ꓔ ꓟ ꓮꓽ ꓙꓵ ꓔꓯ ꓶꓹ ꓡꓵ ꓡꓰ ꓝꓲ ꓠꓹ ꓟ ꓔꓯ ꓐꓯˍ ꓟ ꓥ ꓡꓳ꓿ 28 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓶꓹ ꓡꓵ ꓡꓰ ꓟꓽ ꓓ ꓟ ꓗꓴꓷ ꓟꓶ ꓗꓷ ꓠꓬꓲ ꓪꓴ-ꓢ ꓔꓯ ꓫꓸ ꓟꓳ ꓢꓲ꓾ ꓙꓳꓺ ꓒꓵꓽˍ ꓟ ꓠꓲꓹ ꓟ ꓡꓰ ꓪꓴ-ꓢ ꓠꓲꓹ ꓒꓴˍ ꓟ ꓣꓱꓽ ꓙ ꓢꓴ ꓬꓰ ꓡꓯ꓿ 29 ꓮ ꓡꓲꓳ ꓐꓯ ꓠꓬ ꓣꓳꓽ ꓪꓴ-ꓢ ꓠꓽ ꓛꓴꓻ ꓖꓴꓻ ꓡꓰ ꓝꓲˍ ꓟ ꓮꓸ ꓔꓳꓸ ꓥ ꓡꓳ꓿

ꓦꓲ-ꓐꓱ-ꓣꓴ 13

1 ꓬꓲꓼ ꓤ ꓠꓬꓲ ꓤ ꓐꓴˍ ꓡꓰ ꓐꓰ ꓮ ꓕꓯꓽˍ ꓟꓲ ꓠꓲꓹ ꓠꓵ ꓡꓯꓽ ꓘꓳ꓿ 2 ꓠꓲꓹ ꓒꓴ ꓒꓴˍ ꓐꓰ ꓪꓰ ꓤ ꓔꓯ ꓘꓳ ꓣꓴˍ ꓟ ꓕꓽ ꓟꓲ ꓡꓰ ꓝꓲ꓿ ꓮ ꓡꓲꓳ ꓐꓯ ꓠꓬ ꓖꓳ ꓡꓱ ꓬꓰˍ ꓟ ꓗꓪ ꓐꓰ꓾ ꓕꓲ ꓐꓱ ꓠꓬ ꓟꓽ ꓢꓷꓸ ꓢꓷ ꓟꓴꓽ ꓗꓪ ꓝꓲ ꓓꓴ ꓔꓯ ꓘꓳ ꓣꓴ ꓗꓷ ꓠꓬꓲꓳ꓿ 3 ꓠꓴ ꓪꓽ ꓠꓬ ꓐꓱꓺ ꓔ ꓢꓴ ꓐꓴ ꓔꓯ ꓬꓲ ꓪˍ ꓐꓰ ꓕꓲ ꓡꓰꓹꓼ ꓐꓱ ꓞꓹ ꓟ ꓡꓰ ꓐꓰ ꓓꓵꓽ ꓙꓽ ꓔ꓿ ꓘꓶꓻ ꓙꓵꓺ ꓟꓶ ꓢꓴ ꓐꓴ ꓔꓯˍ ꓟꓲ꓾ ꓧꓪꓽ ꓖꓳ ꓓꓱ ꓗꓪ ꓬꓲ ꓪˍ ꓐꓰ ꓕꓲ ꓡꓰꓹꓼ ꓘꓶꓻ ꓙꓵ ꓟꓶˍ ꓟ ꓚꓬꓹ ꓢꓲ ꓕꓽ ꓟꓲ ꓡꓰ ꓝꓲ꓿ 4 ꓤꓽ ꓟꓶ ꓝꓱˍ ꓟ ꓗꓺ ꓫꓵ ꓔꓯ ꓮꓽ ꓙꓵ ꓢꓴ ꓒꓵꓽ ꓢꓲ꓾ ꓬꓲꓼ ꓖꓴˍ ꓟꓲ ꓟꓽ ꓫꓬ ꓕꓽ ꓗꓷ ꓡꓰ ꓝꓲ꓿ ꓟꓽ ꓢꓲ ꓟꓽ ꓫꓬ ꓬꓰ ꓢꓴˍ ꓐꓰ ꓦꓬꓽ ꓛꓳ ꓧꓪ ꓢꓴ ꓔꓯ ꓠꓬ ꓪꓴ-ꓢ ꓡꓰ ꓐꓯ ꓟꓴ ꓘꓶꓽˍ ꓥꓳ꓿ 5 ꓠꓴ ꓪꓽ ꓞꓳ ꓙꓳˍ ꓟ ꓗꓪ ꓒꓴ ꓔꓯ ꓕꓽ ꓠꓲꓹ ꓦꓯꓸ꓿ ꓠꓴ ꓪꓽ ꓙꓳˍ ꓟ ꓔꓯ ꓠꓲꓹ ꓘꓪ ꓫꓵ꓿ ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓬꓲ ꓚꓲ ꓛꓬ ꓡꓰ꓾ ꓮ ꓡꓲ ꓥ ꓟꓲ ꓠꓴ ꓔꓯ ꓥꓪ ꓟꓽ ꓡꓳꓺ ꓗꓷ꓿ ꓮ ꓕꓯꓽˍ ꓟꓲ ꓠꓴ ꓔꓯ ꓟꓽ ꓒꓰꓺ ꓗꓷ꓾ ꓐꓰ ꓐꓯ ꓗꓷꓳ꓿ 6 ꓖꓳ ꓡꓱ ꓠꓬꓲ ꓣꓳꓽ ꓠꓬ꓾ ꓢꓲ ꓒꓽ ꓠꓽ ꓥꓪ ꓔꓯ ꓬꓰ ꓙ ꓢꓴ ꓥ ꓠꓬꓲ ꓥꓪ ꓟꓽ ꓙꓳꓺ꓿ ꓞꓳ ꓤ ꓡꓰ ꓥꓪ ꓔꓯ ꓮ ꓡꓲ ꓬꓰ ꓖꓶ ꓐ ꓡ ꓢꓰꓽ꓾ ꓐꓰ ꓠꓲꓹ ꓪꓴꓽ ꓪꓴˍ ꓡꓰ ꓐꓯ ꓐ ꓡ ꓡꓳ꓿ 7 ꓠꓴ ꓪꓽ ꓔꓯ ꓧꓳꓽ ꓢꓲ ꓪꓴ-ꓢ ꓐꓯ ꓘꓶꓽ ꓚ ꓟꓸ ꓖꓶ ꓗꓷ ꓢꓴ ꓔꓯ ꓕꓽ ꓟꓲ ꓡꓰ ꓝꓲ꓿ ꓬꓲ ꓪꓽ ꓞꓳ ꓙꓳ ꓗꓷ ꓟ ꓔꓯ ꓓꓵꓽ ꓙꓽ ꓔ ꓢꓲ ꓬꓲ ꓪꓽ ꓙꓵꓻ ꓠꓲꓹ ꓔꓯ ꓔꓯꓺ ꓢꓳ꓿ 8 ꓬꓰ-ꓢꓴ ꓙꓲ-ꓢꓴ ꓠꓬ꓾ ꓮꓽ ꓠꓬꓲ꓾ ꓠꓬꓲꓸ ꓠꓬꓲ꓾ ꓮ ꓕꓯꓽˍ ꓟꓲ ꓕꓲ ꓡꓰW ꓥꓳ꓿ 9 ꓟꓽ ꓔꓱꓹˍ ꓟ ꓟꓸ ꓟꓲ ꓬꓲ ꓫꓵꓽ ꓬꓲ ꓙꓰꓽ ꓡꓰ ꓠꓴ ꓪꓽ ꓔꓯ ꓕꓽ ꓧꓳꓽ ꓪꓴꓸ ꓙꓰ ꓝꓲ꓿ ꓮ ꓡꓲꓳ ꓐꓯ ꓠꓬ ꓣꓳꓽ ꓠꓲꓹ ꓟ ꓔꓯ ꓕꓶꓻ ꓡꓰ ꓝꓲˍ ꓟ ꓠꓬ ꓜꓽ ꓓꓴ ꓓꓳꓻ ꓓꓴˍ ꓐꓰ ꓗꓴꓸ ꓙꓲꓽ ꓙꓳˍ ꓟ ꓙꓵꓽ ꓚꓱꓹ ꓗꓪ ꓐꓰ ꓟꓽ ꓥ꓾ ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓥ ꓡꓳ꓿ ꓜꓽ ꓓꓳꓻˍ ꓟ ꓗ ꓫꓵ ꓔꓯ ꓛꓳ ꓢꓴ ꓠꓽ ꓙꓲꓻ ꓖꓴ ꓟꓽ ꓟꓶ꓿ 10 ꓣꓳꓽ ꓠꓬ ꓔꓲ ꓖꓴ ꓕꓲ ꓟ ꓙꓳˍ ꓡꓳ꓿ ꓬꓲ-ꓢꓷ-ꓡꓰ ꓐꓴ ꓟꓶ ꓔꓶꓸ ꓦꓲ ꓗꓪ ꓣꓱꓽ ꓙ ꓗꓷ ꓢꓴ ꓠꓬ꓾ ꓔꓲ ꓖꓴ ꓖꓳ ꓟ ꓗꓪ ꓟ ꓔꓲ ꓧꓪꓽ ꓜꓽ ꓠꓹ ꓟ ꓙꓵꓽ ꓪ ꓟꓽ ꓙꓳ꓿ 11 ꓮ ꓡꓲꓳ ꓐꓯ ꓠꓬ ꓝꓴꓲ ꓑꓶꓸ ꓓꓴ ꓔꓲ ꓓꓴ ꓙꓱ ꓤ ꓫꓵꓽ ꓠꓬ꓾ ꓔꓲ ꓒ ꓓꓽ ꓟ ꓡꓰ ꓢꓲꓽ ꓫꓬ ꓖꓴ ꓗꓪ ꓔꓯꓹ ꓓꓵ ꓡꓰ ꓢꓲ꓾ ꓙꓱ ꓤ ꓬꓲ ꓖꓳ ꓓꓱ ꓔꓯ ꓠꓽ ꓟꓯꓼ ꓒꓱ ꓠꓱꓺ ꓫꓱ ꓟꓸꓼ ꓗꓪ ꓛꓴꓻ ꓦ ꓗꓷˍ ꓟ ꓥ ꓡꓳ꓿ 12 ꓖꓳ ꓟ ꓡꓰ ꓐꓰ ꓬꓰ-ꓢꓴˍ ꓟꓲ ꓬꓲ ꓚꓲ ꓛꓬ ꓫꓵꓽ ꓡꓰ ꓑ ꓫꓬꓼ ꓐꓴ ꓔꓯ ꓢꓲ ꓚꓰꓸˍ ꓟ ꓟꓶ ꓡꓰ ꓝꓲ ꓠ ꓟ꓾ ꓡꓳ ꓒꓱ ꓗꓺ ꓘꓶꓽ ꓠꓱ ꓫꓱ ꓟꓸꓼ ꓗꓪ ꓫꓸ ꓙꓵ ꓗꓷꓳ꓿ 13 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓬꓲ ꓫꓸ ꓔꓳ ꓫꓸ ꓒꓯꓼ ꓟ ꓑꓯꓹ ꓟꓶ ꓠꓹ ꓟ꓾ ꓟꓯ ꓒꓱ ꓠꓱ ꓫꓱ ꓟꓸꓼ ꓬꓲ ꓔꓬ ꓗꓪ ꓓꓳ ꓙꓰ ꓡꓯ꓿ 14 ꓮ ꓡꓲꓳ ꓐꓯ ꓠꓬ ꓣꓳꓽ ꓠꓽ ꓟꓲ ꓠꓯ ꓕꓱ ꓟ ꓗꓪ ꓤꓰꓻˍ ꓟ ꓡꓳ ꓒꓱ ꓟꓽ ꓙꓳ꓿ ꓡ ꓠꓹ ꓟ ꓡꓳ ꓒꓱ ꓔꓯ ꓡꓳꓺ ꓠꓬꓹ ꓔꓬ ꓟ ꓥ ꓡꓳ꓿ 15 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓬꓰ-ꓢꓴ ꓗꓪ ꓐꓰ꓾ ꓟꓽ ꓠꓽ ꓠ ꓪꓴ-ꓢ ꓔꓯ ꓫꓱꓸ ꓖꓶˍ ꓟ ꓔꓲ ꓓꓴ ꓔꓲ ꓖꓶ ꓡꓯ꓿ ꓔꓲ ꓓꓴ ꓕꓱ ꓟ ꓠꓬ꓾ ꓬꓲ ꓔꓯ ꓢꓲ ꓒꓽ ꓣꓷꓠꓸ ꓢꓴ ꓐꓴ ꓡꓰ ꓬꓲ ꓟꓬꓱꓺ ꓔꓯ ꓫꓱꓸ ꓖꓶˍ ꓟ ꓐꓯ ꓘꓶꓽ ꓥ ꓡꓳ꓿ 16 ꓙꓲˍ ꓟ ꓟꓬꓱꓽ ꓬꓰˍ ꓟ ꓐꓰ꓾ ꓬꓰ ꓙ ꓔꓳꓹ ꓙ ꓡꓯꓽ ꓘꓳ ꓠꓹ ꓟ ꓕꓽ ꓟꓲ ꓡꓰ꓿ ꓮ ꓡꓲꓳ ꓐꓯ ꓠꓬ ꓕꓱ ꓡꓱ ꓫꓵꓽ ꓠꓬ ꓪꓴ-ꓢ ꓠꓲꓹ ꓒꓴˍ ꓟ ꓔꓲ ꓓꓴ ꓥ ꓡꓳ꓿ 17 ꓠꓴ ꓪꓽ ꓔꓯ ꓧꓳꓽ ꓢꓴ ꓔꓯ ꓠ ꓠꓹ ꓢꓲ ꓬꓲ ꓪꓽ ꓙꓵꓽˍ ꓟ ꓔꓯ ꓛꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓶꓻ ꓡꓯꓼ ꓢꓪꓸ ꓢꓴˍ ꓡꓰ ꓐꓰ ꓪꓴ-ꓢ ꓔꓯ ꓢꓪꓸ ꓟꓸ ꓖꓶ ꓠ ꓗꓹ ꓢꓴ ꓥ ꓠꓬꓲ꓾ ꓦꓻ ꓗꓪ ꓠꓴ ꓪꓽ ꓔꓯ ꓪꓴꓽ ꓧꓶ ꓪꓴꓽ ꓡꓰꓽ ꓡꓳꓸ ꓙ ꓔꓬ ꓟ ꓥ ꓡꓳ꓿ ꓬꓲ ꓪꓽ ꓠꓬ ꓠꓴ ꓪꓽ ꓐꓱ ꓶ ꓢꓯꓼ ꓕꓵꓼˍ ꓟ ꓗꓪ ꓶꓻ ꓡꓲꓽ ꓟꓯꓻˍ ꓟ ꓟꓽ ꓥ ꓥ꓾ ꓗꓹ ꓛꓲ ꓛꓲ ꓡꓰꓽ ꓢꓯꓼ ꓕꓵꓼ ꓐ ꓡ ꓠꓹ ꓟ ꓬꓲ ꓪꓽ ꓔꓯ ꓠ ꓠꓹ꓿ ꓟꓽ ꓥ ꓠꓬ ꓠꓴ ꓪꓽ ꓐꓱ ꓶ ꓙꓲ ꓖꓴ ꓟꓽ ꓙꓳ꓿ 18 ꓥꓪ ꓠꓴꓽ ꓐꓱ ꓶ ꓪꓽ ꓘꓴ ꓙ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓠꓽ ꓙꓲˍ ꓟ ꓦꓰꓽ ꓠꓲꓹ ꓡꓰ ꓮꓸ ꓫꓵ ꓗꓪˍ ꓟꓲ ꓔꓱꓹ ꓔꓱꓹꓼ ꓞꓳ ꓙꓳ ꓠꓲꓹ ꓫꓵˍ ꓡꓳ꓿ 19 ꓠꓴ ꓪꓽ ꓔꓬ ꓗꓪ ꓥꓪ ꓠꓲꓹ ꓞ ꓬꓲꓼ ꓡ ꓐ ꓡ ꓠ ꓟ ꓮꓽ ꓘꓶ ꓪꓽ ꓘꓴ ꓙ꓾ ꓐꓰ ꓠꓴ ꓪꓽ ꓔꓯ ꓓꓰꓽ ꓠꓲꓹ ꓫꓵˍ ꓡꓳ꓿ 20 ꓢꓲ ꓡꓲ ꓟ ꓪꓴ-ꓢ꓾ ꓕꓲ ꓞꓲꓼ ꓕꓲ ꓑ ꓟ ꓘꓶꓽ ꓫꓵꓽ ꓬꓲ ꓫꓵꓽ ꓑꓶꓸ ꓓꓴ꓾ ꓮ ꓣꓳ ꓡꓳꓸ ꓒ ꓓꓽ ꓟ ꓣꓳꓽ ꓢꓲ ꓒꓽ ꓬꓰ-ꓢꓴ ꓔꓯ ꓫꓵꓻ ꓗꓪ ꓐꓰ ꓧꓳꓽ ꓬꓲꓼ ꓡ ꓢꓴ ꓡꓰ꓾ 21 ꓬꓲ ꓠꓲꓹ ꓡꓶ ꓔꓯ ꓛꓳ ꓐ ꓡ ꓠꓹ ꓟ꓾ ꓙꓲˍ ꓟ ꓟꓬꓱꓽ ꓥ ꓕ ꓑꓳ ꓗꓪ ꓠꓴ ꓪꓽ ꓔꓯ ꓙꓽ ꓖꓶ ꓢꓲ꓾ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓠꓴ ꓪꓽ ꓠꓲꓹ ꓟ ꓠꓯꓸꓼ ꓗꓪ ꓬꓲ ꓠꓲ ꓒꓴˍ ꓟ ꓔꓯ ꓬꓰ ꓐꓲ ꓡꓰ ꓝꓲ ꓠꓹ ꓟ ꓙ ꓖꓶꓽ ꓙ ꓝꓲ꓿ ꓬꓰ-ꓢꓴ ꓙꓲ-ꓢꓴ ꓔꓯ ꓠꓬ ꓕꓲ ꓞꓲꓼ ꓕꓲ ꓑ ꓟꓬꓱ ꓓꓳꓽ ꓙꓳ ꓝꓲ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓿ 22 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓘꓶꓸ ꓖꓶꓽ ꓗꓷ ꓟ ꓐꓯ ꓘꓶ ꓕꓱ ꓟꓬ ꓟ ꓔꓯ ꓬꓲ ꓜꓶ ꓚꓲꓸ ꓔ꓿ ꓮ ꓡꓲꓳ ꓐꓯ ꓠꓬ ꓥꓪ ꓡꓰ ꓠꓴ ꓪꓽ ꓔꓯ ꓐꓳꓺ ꓖꓶ ꓩꓴ ꓡ ꓟ ꓠꓬ ꓮꓽ ꓫꓵꓹ ꓫꓵ ꓟꓽ ꓥ꓿ 23 ꓣꓳꓽ ꓠꓬꓲ ꓤ ꓕꓲ-ꓟꓳ-ꓕꓲ-ꓪꓴ ꓔꓯ ꓩꓴ ꓗꓷˍ ꓟ ꓠꓴ ꓪꓽ ꓔꓯ ꓢꓷꓸ ꓝꓲ ꓠꓲꓹ ꓫꓵˍ ꓡꓳ꓿ ꓬꓲ ꓠꓲꓹ ꓞ ꓡ ꓐꓷˍ ꓠꓬ꓾ ꓥꓪ ꓡꓰ ꓠꓴ ꓪꓽ ꓔꓬ ꓗꓪ ꓬꓲ ꓔꓯ ꓧꓳꓽ ꓔꓯꓹ ꓡ ꓢꓲ꓾ ꓣꓳꓽ ꓟꓳ ꓡꓯꓽ ꓘꓳˍ ꓥꓳ꓿ 24 ꓠꓴ ꓪꓽ ꓔꓯ ꓧꓳꓽ ꓢꓴ ꓮꓽ ꓙꓵˍ ꓐꓰ꓾ ꓦ ꓡꓱ ꓢꓴ ꓐꓴ ꓮꓽ ꓙꓵ ꓔꓯ ꓒꓵ ꓗ ꓬꓰ ꓖꓶ꓿ ꓬꓲ-ꓔ-ꓡꓲ ꓢꓴ ꓡꓰ ꓠꓴ ꓪꓽ ꓔꓯ ꓒꓵꓽ ꓗ ꓬꓰˍ ꓡꓳ꓿ 25 ꓣꓱꓽ ꓛꓰ ꓠꓬ ꓠꓴ ꓪꓽ ꓮꓽ ꓙꓵ ꓢꓴˍ ꓐꓰ ꓕꓲ ꓪꓺꓼ ꓙꓳ ꓝꓲ꓿

ꓬ-ꓗꓴ 1

1 ꓪꓴ-ꓢ ꓐꓰ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓚꓳ ꓑꓸ ꓬ-ꓗꓴ ꓥꓪ ꓡꓰ꓾ ꓧꓹ ꓒꓬꓱꓺ ꓙꓰ ꓢꓴ ꓞꓲ ꓠꓬꓲꓽ ꓪꓳꓼ ꓟ ꓔꓯ ꓒꓵꓽ ꓗ ꓬꓰ ꓩꓴ ꓡ ꓥꓳ꓿ 2 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓠꓴ ꓪꓽ ꓠꓬ ꓤꓹ ꓠꓬꓲ ꓟ ꓮꓽ ꓟꓬꓹ ꓫꓵ ꓔꓳꓹ ꓜꓳꓽˍ ꓕꓯ꓾ ꓮꓽ ꓙꓵ ꓡꓱꓸꓼ ꓗꓹ ꓛꓲ ꓓꓴ ꓚꓬꓹ ꓔ꓿ 3 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓙꓵꓻ ꓠꓲꓹ ꓔꓯ ꓤꓹ ꓠꓬꓲ ꓟ ꓡꓰ꓾ ꓜꓲꓽ ꓘꓴ ꓠꓲꓹ ꓬꓰ ꓓꓳ ꓡ ꓝꓲ ꓟ ꓠꓴ ꓪꓽ ꓢꓷˍ ꓡꓳ꓿ 4 ꓠꓴ ꓪꓽ ꓠꓬ ꓜꓳꓽ ꓓꓰꓺ ꓟ ꓐꓰ ꓜꓲꓼ ꓓꓰˍ ꓟ ꓒꓬꓱꓼ ꓡ ꓢꓲ꓾ ꓮꓸ ꓫꓵ ꓗꓪˍ ꓟꓲ ꓟꓽ ꓡꓳꓼ ꓟꓽ ꓗꓷ ꓡꓰ ꓠꓹ ꓟ꓾ ꓤꓹ ꓠꓬꓲ ꓓꓴ ꓔꓯ ꓡꓳꓹ ꓬꓰ ꓗꓪ ꓛꓲ ꓜꓲꓽ ꓔ꓿ 5 ꓠꓴ ꓪꓽ ꓗꓳ ꓡꓳ ꓗꓪ ꓮ ꓡꓲ ꓕꓲ ꓣꓳ ꓙꓽ ꓗꓴꓸ ꓠꓲꓹ ꓟꓽ ꓡꓳꓼ ꓐꓷˍ ꓠꓬ ꓪꓴ-ꓢ ꓔꓯ ꓓꓰꓽ ꓝꓲ꓿ ꓖꓳ ꓡꓱ ꓠꓬ ꓬꓲ ꓔꓯ ꓖꓶꓽ ꓡ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓟꓽ ꓕꓼ ꓕꓼ꓾ ꓮꓽ ꓙꓵ ꓢꓴ ꓔꓯ ꓡꓯꓼ ꓡꓳꓻ ꓡꓳˍ ꓡꓰꓽ ꓖꓶ ꓢꓴ ꓥ ꓡꓳ꓿ 6 ꓖꓳ ꓡꓱ ꓥ ꓟꓲ ꓬꓲ ꓔꓯ ꓓꓰꓽ ꓢꓴ ꓠꓽ ꓮꓸ ꓫꓵˍ ꓟꓲ ꓟꓽ ꓓꓵꓽ ꓙꓽ ꓟꓬꓽ ꓟꓬ ꓙꓵꓻ ꓠꓲꓹ ꓙꓳꓻ ꓙꓳ ꓡꓰꓽ ꓓꓰꓽ ꓠꓯꓹ ꓡꓳ꓿ ꓮ ꓡꓲꓳ ꓐꓯ ꓠꓬ ꓓꓵꓽ ꓙꓽ ꓟꓬꓽ ꓢꓴ ꓠꓽ꓾ ꓬꓲꓻ ꓡꓴꓽ ꓐꓱꓻ ꓓꓽ ꓟ ꓗꓪ ꓟ ꓬꓲꓻ ꓡꓯꓼ ꓟꓰꓼ ꓔꓯ ꓟꓲꓽ ꓦꓲ ꓡꓰ ꓙꓱꓼ ꓙꓰ ꓙꓱꓼ ꓡ ꓔꓬ ꓟ ꓡꓰ ꓐꓰ ꓗꓹ ꓡꓳ꓿ 7 - 8 ꓕꓱ ꓡꓱ ꓡꓳ ꓫꓵꓽ ꓡꓽ ꓞꓳ ꓠꓬ ꓠꓲꓹ ꓟ ꓠꓬꓲꓽ ꓔꓱꓹ ꓣꓱ ꓢꓴ ꓥ ꓢꓲ꓾ ꓬꓲ ꓬꓰˍ ꓟ ꓮꓽ ꓙꓵ ꓗꓪ ꓟꓽ ꓕꓶ ꓞꓹ ꓢꓴ ꓥ ꓠꓬꓲ꓾ ꓢꓲ ꓒ ꓗꓪ ꓐꓰ ꓮꓸ ꓫꓵˍ ꓟꓲ ꓟꓶ ꓥꓳ꓾ ꓐꓰ꓾ ꓕꓽ ꓓꓵ ꓙꓽ꓿ 9 ꓫꓸˍ ꓟ ꓬꓲꓼ ꓤ ꓠꓬꓲ ꓤ ꓕꓲ ꓣꓳ ꓔꓯ ꓪꓴ-ꓢ ꓡꓰ ꓛꓵꓽ ꓔꓴ ꓗꓷ ꓠꓬ ꓬꓲ ꓠꓽ ꓗꓹ ꓛꓲ ꓠꓯꓹ ꓡꓳ꓿ 10 ꓞꓳ ꓐꓳˍ ꓟꓲ ꓪꓴ-ꓢ ꓡꓰ ꓬꓲ ꓔꓯ ꓬꓯꓼ ꓡꓰ ꓝꓲˍ ꓕꓯ ꓠꓲꓹ ꓘꓪꓽ ꓫꓵ ꓠꓯꓹ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ꓾ ꓟꓳꓼ ꓪꓰˍ ꓡꓰ ꓐꓰ ꓧꓳꓽ ꓬꓰˍ ꓥꓳ꓿ 11 ꓟꓲꓽ ꓟꓲ ꓓꓳ ꓡ ꓢꓲ ꓬꓲꓸ ꓞꓻ ꓢꓯꓼ ꓡꓰ ꓟꓳꓼ ꓔꓯ ꓙꓴꓺ ꓬꓰ ꓝꓲˍ ꓕꓯ꓾ ꓬꓲ ꓪꓰꓺ ꓞꓰꓻ ꓡꓰ ꓢꓲ ꓬꓲ ꓐꓲꓻ ꓒꓬꓱꓽ ꓧꓳꓽ ꓬꓰˍ ꓟ ꓡꓰ ꓐꓰ꓾ ꓞꓳ ꓐꓳˍ ꓟꓲ ꓬꓲ ꓬꓰˍ ꓟ ꓗꓪ ꓬꓲ ꓖꓳ ꓡꓱ ꓧꓳꓽ ꓬꓰˍ ꓥꓳ꓿ 12 ꓤꓹ ꓠꓬꓲˍ ꓟ ꓔꓯ ꓜꓲꓽ ꓧꓪꓸ ꓡꓰ ꓢꓴ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓤꓹ ꓠꓬꓲˍ ꓟ ꓔꓯ ꓔꓳꓹ ꓞꓹ ꓘꓴˍ ꓠꓬ꓾ ꓢꓲ ꓒ ꓡꓰ ꓬꓲ ꓔꓯ ꓠꓲꓹ ꓠꓵ ꓢꓴ ꓔꓯ ꓖꓶꓽ ꓙꓻ ꓟꓳˍ ꓟ꓾ ꓧꓪꓸ ꓡꓰ ꓟ ꓢꓯꓼ ꓟꓬ ꓪꓴꓸ ꓛꓴꓽ ꓟꓶˍ ꓥꓳ꓿ 13 ꓮꓽ ꓟ ꓥ ꓟꓲ ꓫꓵꓽ ꓠꓬꓲˍ ꓟ ꓔꓳꓹ ꓜꓳˍ ꓕꓯ꓾ ꓥꓪ ꓔꓯ ꓠꓽ ꓪꓴ-ꓢ ꓡꓰ ꓫꓵꓽ ꓠꓬꓲ ꓡꓺꓳ꓾ ꓕꓽ ꓐꓯ꓿ ꓮ ꓡꓲꓳ ꓐꓯ ꓠꓬ ꓥꓶˍ ꓟ ꓡꓰ ꓪꓴ-ꓢ ꓔꓯ ꓫꓵꓽ ꓠꓬꓲ ꓟꓽ ꓐ ꓡ꓿ ꓝꓮꓲ ꓪꓴ-ꓢ ꓬꓲ ꓚꓲ ꓛꓬˍ ꓟꓲ꓾ ꓥꓶꓺˍ ꓟ ꓡꓰ ꓮꓽ ꓟ ꓔꓯˍ ꓟꓲ ꓟꓽ ꓫꓵꓽ ꓠꓬꓲ꓿ 14 ꓖꓳ ꓡꓱ ꓥ ꓟꓲ ꓡꓽ ꓞꓳ ꓕꓲ ꓣꓳ ꓠꓬ꓾ ꓬꓲ ꓚꓲ ꓛꓬ ꓦꓯꓸ ꓠꓲꓹ ꓙꓵꓽˍ ꓟ ꓡꓰ ꓬꓲ ꓔꓯ ꓠꓸ ꓟꓶꓻ ꓡꓰ ꓕꓯ ꓠꓽ꓾ ꓦꓯꓸ ꓠꓲꓹ ꓙꓵˍ ꓟ ꓖꓳ ꓟ ꓡꓰ ꓬꓲ ꓔꓯ ꓫꓵꓽ ꓠꓬꓲˍ ꓟ ꓗꓪ ꓖꓳ ꓓꓵꓽ ꓡꓰ ꓟ ꓥ ꓡꓳ꓿ 15 ꓖꓳ ꓡꓱ ꓢꓲ ꓦꓯꓸ ꓠꓲꓹ ꓙꓵꓽˍ ꓟ ꓶꓻ ꓡꓰ ꓠꓬ ꓝꓴꓲ ꓦꓵꓻ ꓓꓳ ꓡ ꓡꓳ꓿ ꓝꓴꓲ ꓪꓴꓽ ꓓꓰ ꓡꓰ ꓠꓬ ꓫꓵꓻˍ ꓟ ꓦꓵꓻ ꓓꓳ ꓡ ꓡꓳ꓿ 16 ꓥꓪ ꓠꓲꓹ ꓠꓵˍ ꓟ ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓢꓴ ꓡꓰ ꓠꓴ ꓪꓽ ꓔꓯ ꓕꓽ ꓧꓳꓽ ꓪꓴꓸ ꓙꓰ ꓝꓲ꓿ 17 ꓙꓲꓻˍ ꓟ ꓡꓯ ꓫꓴˍ ꓐꓰ ꓜꓳꓽ ꓓꓰˍ ꓟ ꓡꓯꓼ ꓫꓴ ꓥ ꓕ ꓑꓳꓸ ꓠꓬ꓾ ꓟꓴꓽ ꓗꓪ ꓗꓪ ꓔꓬ ꓟ ꓠꓬꓲ ꓟꓳꓻ ꓓꓴ ꓮꓽ ꓙꓵ ꓟ ꓐꓹ ꓐ ꓔꓯˍ ꓐꓰ ꓬꓯꓼ ꓡ ꓟ ꓥ ꓡꓳ꓿ ꓬꓲ ꓔꓯ ꓠꓬ ꓑꓶꓸ ꓡꓰ ꓟ ꓟꓽ ꓙꓳ꓿ ꓒꓳꓹ ꓛꓸ ꓡꓰˍ ꓟ ꓶꓻ ꓥꓳꓽˍ ꓟꓲ ꓟꓽ ꓙꓳ꓿ 18 ꓣꓳꓽ ꓔꓯ ꓠꓬ ꓬꓲ ꓡꓰ ꓚꓰꓼ ꓔ ꓟ ꓮꓽ ꓙꓵ ꓗꓪ ꓓꓽ ꓪꓴꓸ ꓒꓬꓱꓼ ꓡ ꓝꓲ ꓠꓹ ꓟ꓾ ꓬꓲ ꓚꓲ ꓛꓬ ꓠꓲꓹ ꓡꓶꓽ ꓗꓪ ꓐꓰ ꓔꓱꓹ ꓚꓵˍ ꓟ ꓐꓯ ꓘꓶꓽ ꓡꓰ ꓣꓳꓽ ꓔꓯ ꓦꓵꓻ ꓗꓷꓳ꓿ 19 ꓥꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓡꓽ ꓞꓳ ꓮ ꓡꓲ ꓕꓲ ꓣꓳˍ ꓟꓲ꓾ ꓠ ꓠꓹ ꓟ ꓗꓪ ꓠꓲꓹ ꓞ ꓢꓲ꓾ ꓫꓸ ꓕꓱˍ ꓟ ꓗꓪ ꓠꓲꓹ ꓡꓯꓽ ꓢꓲ ꓠꓬꓲ꓾ ꓠꓲꓹ ꓟ ꓦꓶꓻˍ ꓟ ꓗꓪˍ ꓟꓲ ꓠꓲꓹ ꓡꓯꓽˍ ꓟ ꓬꓰ ꓠꓯꓹ ꓟ ꓠꓴ ꓪꓽ ꓢꓷꓸ ꓠꓯꓹ ꓡꓳ꓿ 20 ꓮ ꓡꓲꓳ ꓐꓯ ꓠꓬ ꓞꓳ ꓤ ꓠꓲꓹ ꓟ ꓦꓶˍ ꓟ ꓡꓰ ꓪꓴ-ꓢ ꓔꓱꓹ ꓜꓳꓽˍ ꓟ ꓬꓰ ꓒꓬꓱꓼ ꓡ ꓟꓽ ꓓ꓿ 21 ꓖꓳ ꓡꓱ ꓠꓬꓲ ꓠꓲꓹ ꓒꓳꓹ ꓠꓲꓹ ꓙꓬ ꓟ ꓮꓽ ꓙꓵˍ ꓐꓰ꓾ ꓥꓶˍ ꓟ ꓬꓲ ꓫꓱꓹ ꓮꓽ ꓙꓵ ꓔꓯ ꓡꓳ ꓩꓴ ꓗꓷ ꓢꓲ꓾ ꓠꓴ ꓪꓽ ꓔꓯ ꓢꓯꓼ ꓟꓬ ꓝꓸ ꓖꓶ ꓐ ꓡ ꓟ꓾ ꓠꓲꓹ ꓟ ꓗꓪ ꓔꓶꓺ ꓔ ꓟ ꓐꓯ ꓘꓶꓽ ꓔꓯ ꓠꓴꓽ ꓠꓲꓹ ꓡꓰ ꓘꓳ ꓣꓴ꓿ 22 ꓠꓴ ꓪꓽ ꓠꓬ ꓐꓯ ꓘꓶꓽ ꓔꓯ ꓑ ꓙꓽ ꓢꓴˍ ꓡꓰꓽ ꓟꓽ ꓬꓰ ꓬꓰ ꓐꓯ ꓘꓶꓽ ꓔꓯ ꓒꓵꓽ ꓛꓳ ꓢꓴ ꓬꓰ꓿ ꓟꓽ ꓥ ꓠꓬ ꓚꓲ ꓛꓬ ꓔꓯ ꓗꓶꓸ ꓢꓴ ꓒꓬꓱꓼ ꓡ ꓥꓳ꓿ 23 - 24 ꓮꓽ ꓟ ꓥ ꓟꓲ ꓐꓯ ꓘꓶꓽ ꓔꓯ ꓑ ꓙꓽ ꓢꓲ ꓟꓽ ꓒꓵꓽ ꓛꓳ ꓕꓯ ꓠꓽ꓾ ꓬꓲ ꓠꓬ ꓒꓬꓱꓽ ꓠꓬꓲ ꓓꓴ ꓗꓪ ꓬꓲ ꓚꓲ ꓛꓬ ꓒꓬꓱꓽ ꓔꓯ ꓕꓲ ꓑꓹ ꓤ ꓡꓳꓸ ꓠꓬꓲ ꓗꓷ ꓗꓸ ꓠꓯ꓾ ꓬꓲ ꓮ ꓡꓲ ꓡꓳ ꓫꓵꓽ ꓡꓽ ꓞꓳ ꓥ ꓟ ꓞꓼ ꓐꓰ ꓟꓲꓺ ꓡꓰ ꓢꓴˍ ꓡꓰ ꓐꓰ ꓗꓹ ꓡꓳ꓿ 25 ꓚꓳ ꓪꓴꓸ ꓒꓬꓱꓼ ꓡ ꓝꓲˍ ꓟ ꓜꓳꓽ ꓓꓰˍ ꓟ ꓙꓵꓽ ꓗ ꓔꓯ ꓬꓲ ꓜꓲꓻ ꓧꓪ ꓟꓰꓹ ꓠꓬꓲ ꓢꓲ꓾ ꓑ ꓙˍ ꓟ ꓔꓯ ꓟꓲꓺ ꓡꓰ ꓢꓴ ꓟꓽ ꓥ ꓥ ꓢꓯꓼ ꓕꓵꓼ ꓢꓲ ꓒꓵꓽ ꓛꓳ ꓢꓴ ꓕꓱ ꓕꓲ ꓣꓳ ꓠꓽ꓾ ꓬꓲ ꓬꓰˍ ꓟ ꓗꓪ ꓶꓼ ꓛꓳ ꓫꓱꓹ ꓛꓳˍ ꓥꓳ꓿ 26 ꓮ ꓡꓲ ꓕꓲ ꓣꓳˍ ꓟꓲ ꓚꓲ ꓛꓬ ꓔꓯ꓾ ꓦ ꓡꓱ ꓚꓱꓹ ꓗꓪ ꓠꓲꓹ ꓡꓱ ꓢꓴ ꓥꓳ꓾ ꓐꓰ ꓚꓬꓹ ꓢꓲ꓾ ꓬꓲ ꓡ ꓛꓱ ꓔꓯ ꓟꓽ ꓙꓵꓽˍ ꓕꓯ ꓠꓽ꓾ ꓚꓲ ꓛꓬ ꓔꓯ ꓗꓶꓸ ꓢꓴ ꓥ ꓢꓲ ꓬꓲ ꓦ ꓡꓱˍ ꓟ ꓠꓬ ꓬꓲ ꓖꓳꓽ ꓥ ꓡꓳ꓿ 27 ꓤ ꓛꓵꓽ ꓟꓶꓽ ꓛꓵꓽ ꓫꓸ ꓙꓵˍ ꓟ ꓗꓪ ꓬꓰ ꓙ ꓢꓲ꓾ ꓚꓲ ꓛꓬ ꓔꓯ ꓟꓲ ꓠꓯ ꓗꓪ ꓟ ꓚꓱꓹ ꓡꓰ ꓟꓽ ꓫꓬꓻ ꓟꓽ ꓗꓷ ꓡꓰ ꓝꓲ ꓢꓴ ꓠꓬ꓾ ꓣꓳ ꓐꓹ ꓐ ꓪꓴ-ꓢ ꓟꓲꓽ ꓙꓬ ꓗꓪ ꓔꓱꓹ ꓚꓵˍ ꓟ ꓐꓰ ꓓꓰ ꓖꓴ ꓟꓽ ꓙꓳˍ ꓟ ꓦ ꓡꓱ ꓚꓱꓹ ꓚ ꓢꓴ ꓥ ꓡꓳ꓿

ꓬ-ꓗꓴ 2

1 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓐꓬꓱꓼ ꓡꓱꓼ ꓡꓱ ꓟ ꓣꓳ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓔꓯ ꓙꓵꓻˍ ꓟ ꓚꓱꓹ ꓗꓪ ꓚ ꓢꓴ ꓣꓳ ꓠꓬ꓾ ꓞꓳ ꓒꓬꓱꓽ ꓕꓽ ꓢꓲ ꓠꓯꓹ ꓡꓳ꓿ 2 ꓡꓽ ꓞꓳ ꓕꓲ ꓣꓳ ꓠꓬ ꓫꓵꓺ ꓡꓯꓼ ꓠꓬꓲ ꓗꓷꓹ ꓓꓱꓼ ꓠꓬꓲ꓾ ꓐꓲꓻˍ ꓟ ꓐꓵ ꓞꓶꓽ ꓖꓪ ꓠꓬꓲ ꓐꓰ ꓠꓴ ꓪꓽ ꓜꓲꓼ ꓓꓴ ꓗꓪ ꓓꓵꓽ ꓡ ꓢꓲ꓾ ꓝꓮꓲ ꓞꓳ ꓫꓸ ꓕꓲ ꓣꓳˍ ꓟꓲ ꓐꓵ ꓞꓶꓽ ꓐꓰꓽ ꓖꓪ ꓔ ꓢꓲ ꓓꓵꓽ ꓡ ꓐꓷˍ ꓠꓬ꓾ 3 ꓠꓴ ꓪꓽ ꓠꓬ ꓐꓲꓻˍ ꓟ ꓐꓵ ꓞꓶꓽ ꓖꓪ ꓢꓴ ꓖꓳ ꓕꓲ ꓣꓳ ꓔꓯ ꓟꓳꓻ ꓟꓵ ꓢꓲ꓾ ꓕꓱ ꓗꓪ ꓙꓲꓻˍ ꓟ ꓠꓬꓲꓸ ꓠ ꓖꓴ ꓗꓪ ꓠꓬꓲꓸ ꓠꓸ ꓡꓯ꓾ ꓐꓯ ꓖꓶ ꓢꓲ꓾ ꓞꓳ ꓫꓸ ꓖꓳ ꓕꓲ ꓣꓳ ꓔꓯ ꓠꓬ꓾ ꓠꓴ ꓠꓽ ꓖꓳ ꓗꓪ ꓦꓰꓼ ꓔ꓾ ꓥ ꓠꓬ ꓙꓪꓻ ꓥꓪ ꓛꓲ ꓕꓳꓼ ꓕꓲ ꓱ ꓱˍ ꓟ ꓗꓪ ꓠꓬꓲꓸ ꓠꓸ꓾ ꓐꓯ ꓖꓶˍ ꓠꓬ꓾ 4 ꓠꓴ ꓪꓽ ꓠꓽ ꓞꓳ ꓒꓬꓱꓽ ꓢꓲ ꓢꓲ꓾ ꓥꓶˍ ꓟ ꓙꓽ ꓠꓲꓹ ꓡꓰ ꓐꓯ ꓞꓷꓹ ꓢꓴ ꓒꓬꓱꓼ ꓡ ꓡꓳ꓾ ꓟꓽ ꓥ ꓡ? 5 ꓥꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠ ꓠꓹ꓾ ꓟꓲ ꓠꓯ ꓗꓪ ꓟ ꓞꓳ ꓫꓸ ꓔꓯꓸ ꓠꓬ ꓙꓵꓻ ꓠꓲꓹ ꓗꓪ ꓞꓳ ꓐꓳꓻ ꓒꓬꓱꓼ ꓡ ꓝꓲ ꓢꓲ ꓬꓲ ꓔꓯ ꓠꓲꓹ ꓠꓵ ꓢꓴ ꓔꓯ ꓖꓶꓽ ꓙꓻ ꓟꓳˍ ꓟ ꓗꓴꓷꓼ ꓡꓯꓼ ꓪ ꓟꓶ ꓢꓴ ꓒꓬꓱꓼ ꓡ ꓝꓲ ꓠꓹ ꓟ꓾ ꓪꓴ-ꓢ ꓡꓰ ꓬꓲ ꓪꓽ ꓔꓯ ꓢꓲ ꓔ ꓡꓳ꓾ ꓟꓽ ꓥ ꓡ? 6 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓞꓳ ꓫꓸ ꓔꓯ ꓟꓽ ꓒꓵ ꓟꓽ ꓚꓬ ꓬꓰ ꓗꓷꓳ꓿ ꓞꓳ ꓐꓳꓻ ꓠꓬ ꓠꓴ ꓪꓽ ꓔꓯ ꓠꓬꓲꓸ ꓤꓲꓺ ꓢꓲ꓾ ꓐꓯ ꓟꓴ ꓘꓶꓽ ꓖꓴ ꓗꓪ ꓖꓳꓻ ꓧꓳꓽ ꓙꓰˍ ꓡꓳ꓾ ꓟꓽ ꓥ ꓡ? 7 ꓠꓴ ꓪꓽ ꓔꓯ ꓘꓴꓻ ꓢꓴ ꓖꓳ ꓕꓲ ꓣꓳ ꓬꓲ ꓒꓵꓽˍ ꓟ ꓟꓬꓱ ꓔꓯ ꓤꓲꓺ ꓢꓴˍ ꓟꓲ ꓬꓲ ꓪꓽ ꓟꓽ ꓥ ꓡ? 8 ꓖꓳ ꓡꓱ ꓥ ꓟꓲ ꓢꓲꓽ ꓫꓬ ꓕꓳ ꓶ ꓗꓪ꓾ ꓠꓴ ꓠꓬ ꓚꓲ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓢꓴ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓯˍ ꓟ ꓪꓴ-ꓢ ꓙꓵꓽ ꓗ ꓔꓯ ꓠꓴ ꓪꓽ ꓒꓵꓽ ꓛꓳˍ ꓕꓯ ꓠꓽ ꓬꓰ ꓜꓳꓽˍ ꓟ ꓥ ꓡꓳ꓿ 9 ꓠꓴ ꓪꓽ ꓠꓬ ꓞꓳ ꓒꓬꓱꓽ ꓢꓲˍ ꓕꓯ ꓠꓽ ꓝꓴꓲ ꓬꓰˍ ꓟ ꓥ ꓢꓲ꓾ ꓙꓵꓽ ꓗ ꓡꓰ ꓠꓴ ꓪꓽ ꓔꓯ ꓛꓬꓻ ꓢꓴ ꓥ ꓟ ꓐꓯ ꓞꓷꓹ ꓟꓶꓻ ꓡꓰˍ ꓥꓳ꓿ 10 ꓮꓽ ꓟ ꓥ ꓟꓲ ꓙꓵꓽ ꓗ ꓕꓲ ꓚꓱꓹ ꓔꓯ ꓡꓰ ꓛꓬꓻ ꓗꓷ ꓟꓲ꓾ ꓙꓵꓽ ꓗ ꓮꓽ ꓙꓵ ꓔꓯ ꓛꓬꓻ ꓗꓷ ꓟ ꓒꓬꓱꓼ ꓡ ꓡꓳ꓿ 11 ꓮ ꓡꓲꓳ ꓐꓯ ꓠꓬ ꓦꓬꓽ ꓛꓳ ꓕꓽ ꓧꓪ ꓐꓯ ꓢꓴ ꓡꓰ꓾ ꓞꓳ ꓤ ꓕꓽ ꓢꓰꓼ꓾ ꓐꓰˍ ꓟꓲ ꓐꓯ ꓔ ꓡꓳ꓿ ꓠꓴ ꓠꓬ ꓦꓬꓽ ꓛꓳꓽ ꓟꓽ ꓧꓪ ꓥ ꓟꓲ ꓞꓳ ꓤ ꓢꓰꓼˍ ꓕꓯ ꓠꓽ꓾ ꓙꓵꓽ ꓗ ꓔꓯ ꓛꓬ ꓢꓴ ꓒꓬꓱꓼ ꓡ ꓥꓳ꓿ 12 ꓠꓴ ꓪꓽ ꓠꓬ ꓚꓳ ꓪꓴꓸ ꓒꓬꓱꓼ ꓡ ꓝꓲˍ ꓟ ꓙꓵꓽ ꓗ ꓡꓰ ꓐꓯ ꓟꓴ ꓘꓶꓽ ꓟꓶꓻ ꓡꓰ ꓠꓯꓹ ꓢꓴ ꓥ ꓠꓬꓲ꓾ ꓫꓸ ꓕꓱˍ ꓟ ꓐꓰ ꓞꓳ ꓙꓳˍ ꓟ ꓗꓪ ꓙꓵꓽ ꓗ ꓖꓳ ꓟ ꓔꓯ ꓛꓳ ꓢꓲ ꓞꓳ ꓙꓳ꓿ 13 ꓮ ꓡꓲꓳ ꓐꓯ ꓠꓬ ꓫꓱꓸ ꓤ ꓠꓲꓹ ꓟꓽ ꓙꓳ ꓢꓴ ꓔꓯ ꓠꓬ꓾ ꓐꓯ ꓟꓴ ꓘꓶꓽˍ ꓕꓯ ꓫꓱꓸ ꓤˍ ꓟ ꓟꓽ ꓟꓳꓸ ꓖꓶꓽ ꓡ꓿ ꓫꓱꓸ ꓤ ꓠꓲꓹ ꓡꓰ ꓐꓯ ꓟꓴ ꓘꓶꓽˍ ꓟ ꓔꓯ ꓧꓪꓸ ꓡꓰˍ ꓥꓳ꓿ 14 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓮꓽ ꓟ ꓥ ꓟꓲ ꓙꓵꓻ ꓠꓲꓹ ꓙꓳˍ ꓡꓳ꓾ ꓐꓯ ꓢꓲ꓾ ꓬꓰ ꓓꓳ ꓡ ꓟ ꓟꓬꓱꓽ ꓟꓽ ꓙꓳˍ ꓕꓯ ꓠꓽ꓾ ꓮꓸ ꓫꓵ ꓙꓲ ꓖꓴ ꓙꓳˍ ꓡ? ꓖꓳ ꓡꓱ ꓡꓳ ꓫꓵꓽ ꓙꓵꓻ ꓠꓲꓹ ꓡꓰ ꓬꓲ ꓔꓯ ꓚꓬꓴ ꓐ ꓡ ꓡ? 15 ꓬꓲ ꓤ ꓠꓬꓲ ꓤ꓾ ꓥ ꓠꓬ ꓮꓸ ꓝꓲ ꓠꓬꓲ ꓟ ꓕꓲ ꓣꓳ ꓠꓬ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱꓽ ꓬꓯꓼˍ ꓟ ꓜꓽ ꓓꓴ ꓖꓪꓽ ꓓꓴ ꓟꓽ ꓙꓳꓻ ꓗꓹ ꓕꓯ꓾ 16 ꓠꓴ ꓪꓽ ꓗꓪ ꓟ ꓕꓲ ꓣꓳ ꓡꓰ ꓬꓲ ꓔꓯ꓾ ꓢꓲ ꓡꓲ ꓐꓰ ꓙꓰ꓾ ꓠꓴ ꓔꓯ ꓠꓬ ꓡꓱꓻ ꓡ ꓝꓲ꓾ ꓐꓳꓻ ꓡ ꓝꓲ꓾ ꓐꓯ ꓖꓶ ꓢꓲ ꓬꓲ ꓣꓱꓽ ꓬꓯꓼˍ ꓟ ꓬꓲ ꓔꓯ ꓟꓽ ꓖꓶ ꓐꓷˍ ꓠꓬ ꓮꓸ ꓫꓵ ꓙꓲ ꓖꓴ ꓙꓳˍ ꓡ? 17 ꓙꓵꓻ ꓠꓲꓹˍ ꓟꓲ ꓖꓳ ꓟ ꓡꓰ ꓐꓰ ꓥꓳ꓿ ꓬꓰ ꓓꓳ ꓡ ꓟ ꓟꓬꓱꓽ ꓟꓽ ꓙꓳ ꓠꓬ ꓫꓵꓻ ꓞꓹ ꓟ ꓙꓵ ꓠꓲꓹ ꓥ ꓡꓳ꓿ 18 ꓮꓽ ꓧꓪꓹ ꓕꓲ ꓣꓳ ꓣꓳ ꓡꓰ꓾ ꓠꓴ ꓠꓬ ꓙꓵꓻ ꓠꓲꓹ ꓙꓳˍ ꓡꓳ꓿ ꓥꓪ ꓠꓽ ꓬꓰˍ ꓟ ꓟꓬꓱꓽ ꓙꓳˍ ꓡꓳ꓾ ꓐꓯ ꓢꓴ ꓙꓳˍ ꓠꓬ꓾ ꓬꓰˍ ꓟ ꓟꓬꓱꓽ ꓟꓽ ꓙꓳꓻ ꓙꓳ ꓠꓴ ꓙꓵꓻ ꓠꓲꓹ ꓥꓪ ꓔꓯ ꓟꓳꓸ ꓖꓶꓽ ꓡꓯ꓿ ꓖꓳ ꓡꓱ ꓢꓲ ꓥꓪ ꓡꓰ ꓥꓪ ꓬꓰˍ ꓟ ꓟꓬꓱꓽ ꓗꓪ ꓐꓰ ꓥꓪ ꓙꓵꓻ ꓠꓲꓹ ꓠꓴ ꓔꓯ ꓟꓳꓸ ꓖꓶˍ ꓥꓳ꓾ ꓐꓰ ꓐꓯ ꓡ ꓢꓴ ꓙꓳˍ ꓥꓳ꓿ 19 ꓪꓴ-ꓢ ꓬꓲ ꓕꓲ ꓣꓳˍ ꓡꓰꓽ ꓙꓳˍ ꓡꓳ꓾ ꓐꓰ ꓠꓴ ꓙꓵꓻˍ ꓟ ꓠꓬ ꓜꓳꓽˍ ꓡꓳ꓿ ꓠꓲꓽˍ ꓟꓲ ꓬꓲ ꓖꓳ ꓡꓱ ꓙꓵꓻ ꓢꓲ ꓛꓱꓽ ꓛꓱꓽ ꓡꓰꓳ꓿ 20 ꓞꓳ ꓖꓳꓽꓳ꓾ ꓙꓵꓻ ꓠꓲꓹ ꓠꓬ ꓟꓬꓱꓽˍ ꓐꓰ ꓗꓳꓹ ꓞꓹ ꓕꓯ ꓠꓽ ꓫꓵꓻ ꓞꓹ ꓟ ꓙꓵ ꓠꓲꓹ ꓥ ꓟ ꓠꓴ ꓟꓽ ꓢꓷꓸ ꓢꓰ ꓡ? 21 ꓣꓳ ꓒꓵꓽ ꓒ ꓮ-ꓐ-ꓡ-ꓦ ꓠꓬ ꓬꓲ ꓤ ꓬꓲ-ꓢ ꓔꓯ ꓔꓲ ꓖꓴ ꓗꓪ ꓔꓲ ꓖꓶ ꓗꓷ ꓟ ꓑꓶ ꓓꓴ꓾ ꓬꓲ ꓬꓰˍ ꓟ ꓟꓬꓱꓽ ꓗꓪ ꓐꓰ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓗꓷꓳ꓾ ꓟꓽ ꓥ ꓡ? 22 ꓮ-ꓐ-ꓡ-ꓦ ꓙꓵꓻ ꓠꓲꓹ ꓠꓬ ꓬꓲ ꓟꓬꓱꓽˍ ꓐꓰ ꓕꓲꓽ ꓡꓰꓹˍ ꓬꓰ ꓔꓬ ꓢꓲ꓾ ꓟꓬꓱꓽ ꓗꓪ ꓐꓰ ꓙꓵꓻ ꓠꓲꓹ ꓔꓯ ꓜꓳꓽ ꓓꓰ ꓡꓰ ꓝꓲˍ ꓟ ꓥ ꓟ ꓠꓴ ꓡꓳꓸ ꓢꓷꓸ ꓡꓰ ꓓꓻˍ ꓡꓳ꓿ 23 ꓢꓲꓽ ꓫꓬ ꓕꓳ ꓶ ꓗꓪ꓾ ꓮ-ꓐ-ꓡ-ꓦ ꓠꓬ ꓪꓴ-ꓢ ꓔꓯ ꓙꓵꓻˍ ꓠꓬꓲ ꓬꓲ ꓔꓯ ꓔꓱꓹ ꓜꓳꓽ ꓢꓴ ꓚꓬꓹ ꓖꓶˍ ꓡꓳ꓾ ꓐꓰ ꓐꓯ ꓔ ꓟ ꓠꓬ ꓐꓲꓺ ꓡꓰꓳ꓿ ꓬꓲ ꓙꓵꓻ ꓠꓲꓹ ꓑꓶꓸ ꓓꓴ ꓮ-ꓐ-ꓡ-ꓦ ꓔꓯ꓾ ꓪꓴ-ꓢ ꓗꓪ ꓛꓳꓽ꓾ ꓐꓰ ꓘꓴˍ ꓡꓳ꓿ 24 ꓖꓳ ꓡꓱ ꓠꓬꓲ ꓡꓽ ꓞꓳ ꓔꓯ ꓠꓬ ꓙꓵꓻ ꓠꓲꓹ ꓗꓪ ꓐꓰˍ ꓡꓰ ꓟꓽ ꓥ ꓥ꓾ ꓬꓰˍ ꓟ ꓟꓬꓱꓽ ꓗꓪ ꓐꓰˍ ꓟꓲ ꓔꓱꓹ ꓜꓳꓽˍ ꓟ ꓚꓬꓹ ꓖꓶˍ ꓡꓳ꓾ ꓐꓰ ꓠꓴ ꓪꓽ ꓡꓳꓸ ꓢꓷꓸ ꓡꓰ ꓓꓹ ꓡꓳ꓿ 25 ꓖꓳ ꓟ ꓡꓰ ꓐꓰ ꓖꓳꓻ ꓪꓴꓽ ꓟ ꓡ-ꓧꓳꓽˍ ꓟꓲ꓾ ꓕꓺ ꓠꓬꓲ ꓢꓴ ꓔꓯ ꓘꓳ ꓣꓴ ꓢꓲ꓾ ꓬꓲ ꓪꓽ ꓐꓱ ꓶ ꓡꓲꓹ ꓙꓰ ꓚꓱꓹ ꓫꓬꓹ ꓖꓶˍ ꓠꓬꓲ꓾ ꓬꓲꓸ ꓬꓰˍ ꓟ ꓟꓬꓱꓽ ꓗꓪ ꓐꓰ ꓔꓱꓹ ꓜꓳꓽ ꓢꓴ ꓚꓬꓹ ꓖꓶˍ ꓡꓳ꓾ ꓟꓽ ꓥ ꓡ? 26 ꓖꓳ ꓓꓱꓽ ꓠꓬ ꓦꓻˍ ꓐꓰ ꓗꓳꓹ ꓞꓹ ꓕꓯ ꓫꓵꓻ ꓞꓹ ꓟ ꓡꓰ ꓐꓰ꓾ ꓙꓵꓻ ꓠꓲꓹˍ ꓟꓲ ꓬꓰˍ ꓟ ꓟꓬꓱꓽˍ ꓐꓰ ꓗꓳꓹ ꓞꓹ ꓕꓯ ꓠꓽ ꓫꓵꓻ ꓞꓹ ꓟ ꓥ ꓡꓳ꓿

ꓬ-ꓗꓴ 3

1 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓣꓳ ꓟꓸ ꓢꓴ ꓐꓴ ꓠꓬ ꓪꓻ ꓜꓲ ꓡꓲꓽˍ ꓟ ꓐꓯ ꓟꓴ ꓟꓯꓻˍ ꓟ ꓣꓳꓽ ꓢꓷꓸˍ ꓠꓬꓲ꓾ ꓟꓸ ꓒꓽ ꓮꓽ ꓟꓬꓹ ꓕꓽ ꓬꓰ ꓞꓽ꓿ 2 ꓮ ꓡꓲꓳ ꓐꓯ ꓠꓬ ꓣꓳ ꓮꓽ ꓙꓵ ꓠꓬ ꓮꓽ ꓟꓬꓹ ꓧꓪꓹ ꓛꓬꓻ ꓗꓷ ꓠꓬꓲꓳ꓿ ꓮꓽ ꓟ ꓥ ꓟꓲ ꓬꓲ ꓐꓯˍ ꓟ ꓗꓪ ꓟꓽ ꓛꓬꓻ ꓗꓷ ꓐꓷˍ ꓠꓬ꓾ ꓖꓳ ꓕꓲ ꓣꓳ ꓠꓽ ꓜꓳꓽ ꓓꓰ ꓡꓰ ꓢꓴ ꓥ ꓢꓲ꓾ ꓕꓲ ꓖꓳ ꓓꓱ ꓡꓱꓸꓼ ꓔꓯˍ ꓟꓲ ꓙꓵꓽ ꓐ ꓡ ꓢꓴ ꓥ ꓡꓳ꓿ 3 ꓮꓸ ꓟꓴꓽ ꓠꓬ ꓣꓳꓽ ꓔꓯ ꓒꓵꓽ ꓛꓳ ꓠꓹ ꓟ ꓬꓲ ꓟꓷꓽ ꓠꓷꓹ ꓗꓪ ꓮꓸ ꓟꓴꓽ ꓘꓳꓼ ꓓꓻ ꓗꓶꓺ ꓗꓷ ꓠꓬ꓾ ꓬꓲ ꓕꓲ ꓖꓳ ꓓꓱ ꓡꓱꓸꓼ ꓔꓯ ꓣꓳ ꓡꓰ ꓙꓵꓽ ꓐ ꓡ ꓟ ꓥ ꓡꓳ꓿ 4 ꓡꓲ ꓔꓯˍ ꓟꓲ ꓓꓵꓽ ꓙꓽ ꓠꓬꓲ꓿ ꓡꓲ ꓓꓽ ꓟ ꓔꓯ ꓠꓬ ꓟꓲꓽ ꓦꓲꓻ ꓓꓽ ꓟ ꓡꓰꓺˍ ꓡꓰꓽ ꓙꓱꓼ ꓔꓯꓹ ꓙꓰ ꓓꓻˍ ꓟ ꓥ ꓟꓲ꓾ ꓡꓲ ꓚꓳ ꓓꓴ ꓬꓲ ꓧꓶꓸ ꓤ ꓡꓰ꓾ ꓡꓲ ꓙꓵꓽ ꓒ ꓮ ꓡꓲ ꓗꓪ ꓙꓰ ꓠꓲꓹ ꓫꓵˍ ꓠꓬ ꓖꓳ ꓗꓪ ꓚꓳ ꓙꓰ ꓝꓲˍ ꓡꓳ꓿ 5 ꓡ ꓛꓱˍ ꓟꓲ ꓖꓳ ꓓꓱ ꓗꓪ ꓟ ꓡꓯꓼ ꓗꓸ ꓬꓲ ꓧꓶꓸ ꓤ ꓥ ꓢꓲ ꓬꓲ ꓓꓽ ꓟ ꓔꓯ ꓘꓶꓽ ꓘꓹ ꓡꓳ꓿ ꓮꓸ ꓔꓳ ꓟꓶꓽ ꓜꓲꓼ ꓕꓲ ꓟ ꓡꓰ ꓢꓲꓹ ꓠꓯ ꓓꓽ ꓟ ꓔꓯ ꓛꓴꓻ ꓐꓬꓺ ꓡꓰˍ ꓟ ꓔꓯ ꓓꓵꓽ ꓙꓽ ꓠꓬꓲ꓿ 6 ꓡ ꓛꓱ ꓠꓬ ꓮꓸ ꓔꓳꓸ ꓥ ꓢꓲ꓾ ꓖꓳ ꓓꓱ ꓡꓯꓼ ꓗꓸ ꓗꓳ ꓡꓳ ꓗꓪ ꓥꓶ ꓓꓰꓺˍ ꓟ ꓡꓯꓼ ꓗꓸ ꓥ ꓢꓲ ꓠꓬꓲ꓾ ꓕꓲ ꓖꓳ ꓓꓱ ꓡꓱꓸꓼ ꓔꓯ ꓟꓽ ꓫꓬꓻ ꓟ ꓗꓷ ꓡꓰ ꓝꓲˍ ꓟ ꓗꓪ ꓐꓰ ꓡꓽ ꓞꓳ ꓕꓲ ꓣꓳ ꓕꓲꓽ ꓤꓶꓻ ꓡꓱꓸꓼ ꓔꓯ ꓛꓬꓼ ꓟꓵꓽ ꓮꓸ ꓔꓳꓸ ꓡꓰ ꓓꓳꓼ ꓐꓬꓻ ꓡꓰ ꓝꓲ ꓐ ꓡ ꓡꓳ꓿ 7 ꓠꓲꓸ ꓙꓱꓽ ꓐꓰ ꓠꓬꓹ ꓤ ꓙꓱꓻ ꓤ꓾ ꓟꓲ ꓠꓯ ꓕꓯꓽ ꓢꓲ ꓫꓳꓺ ꓙꓰˍ ꓟ ꓢꓯꓸ ꓫꓵꓽ ꓢꓯꓸ ꓙꓰˍ ꓐꓰ꓾ ꓬꓲꓻ ꓡꓴꓽ ꓐꓱꓻ ꓗꓪ ꓔꓬ ꓟ ꓢꓯꓸ ꓫꓵꓽ ꓔꓯ ꓥ ꓟꓲ ꓞꓳ ꓤ ꓡꓰ ꓘꓴꓽ ꓟꓶꓽ ꓡꓰ ꓝꓲ ꓠꓬꓲꓳ꓿ 8 ꓖꓳ ꓡꓱ ꓥ ꓟꓲ ꓡ ꓛꓱ ꓔꓯ ꓠꓽ ꓮꓽ ꓟˍ ꓟꓲ ꓘꓴꓽ ꓟꓶꓽ ꓡꓰ ꓝꓲ ꓟꓽ ꓐ ꓡ꓿ ꓡ ꓛꓱ ꓠꓬ ꓢꓴꓺ ꓔꓬ ꓟ꓾ ꓟꓽ ꓙꓲ ꓟ ꓕꓲ ꓫꓵ ꓥ ꓢꓲ ꓫꓵꓻ ꓓꓳꓼ ꓐꓲ ꓞꓹ ꓟ ꓥ ꓡꓳ꓿ 9 ꓣꓳꓽ ꓠꓬ ꓡ ꓛꓱ ꓡꓰ ꓢꓲ ꓒˍ ꓐꓰ ꓐꓹ ꓐ ꓪꓴ-ꓢ ꓔꓯ ꓫꓱꓸ ꓖꓶˍ ꓡꓳ꓿ ꓝꓮꓲ꓾ ꓣꓳꓽ ꓡ ꓛꓱ ꓕꓱ ꓟ ꓡꓰ ꓪꓴ-ꓢ ꓬꓲ ꓒꓬꓱꓽ ꓔꓯ ꓛꓳ ꓢꓲ ꓚꓰꓼ ꓔ ꓟ ꓞꓳ ꓤ ꓔꓯ ꓙꓱꓽˍ ꓡꓳ꓿ 10 ꓟꓷꓽ ꓠꓷꓹ ꓕꓲ ꓘꓴꓻˍ ꓗꓪ ꓐꓰ꓾ ꓶꓼ ꓥꓳ ꓙꓱꓽ ꓟ ꓐꓰ ꓟꓽ ꓙꓲ ꓟ ꓙꓱꓽ ꓘꓶꓽ ꓓꓳ ꓡ ꓡꓳ꓿ ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓣꓳꓽ ꓠꓬ ꓕꓱ ꓡꓱ ꓬꓰ ꓙꓲꓽ ꓟꓽ ꓙꓳ꓿ 11 ꓬꓲꓻ ꓝꓳꓹ ꓟꓶ ꓕꓲ ꓘꓴꓻˍ ꓗꓪ ꓐꓰ꓾ ꓬꓲꓻ ꓛꓵꓻ ꓐꓰ ꓬꓲꓻ ꓘꓪꓽ ꓓꓳ ꓡ ꓡ? 12 ꓘꓶꓽ ꓢꓶ ꓜꓲ ꓠꓬ ꓮꓽ ꓛꓬꓽ ꓢꓶꓽ ꓓꓱꓼ ꓗꓴˍ ꓡ? ꓥ ꓠꓬ ꓛꓱꓼ ꓡꓱ ꓚ ꓡꓰ ꓘꓶꓽ ꓢꓶ ꓓꓱꓼ ꓗꓴˍ ꓡ? ꓞꓼ ꓐꓳ ꓘꓪꓽˍ ꓟ ꓬꓲꓻ ꓙꓬ ꓗꓪˍ ꓟꓲ꓾ ꓬꓲꓻ ꓙꓬ ꓛꓵꓻˍ ꓟ ꓓꓳ ꓡ ꓟꓽ ꓐ ꓡ꓿ ꓬꓲꓻ ꓝꓳꓹ ꓟꓶ ꓕꓲ ꓘꓴꓻˍ ꓗꓪ ꓐꓰˍ ꓟꓲ ꓬꓲꓻ ꓛꓵꓻˍ ꓐꓰ ꓬꓲꓻ ꓘꓪꓽ ꓓꓳ ꓡ ꓟꓽ ꓐ ꓡ꓿ 13 ꓠꓴ ꓪꓽ ꓗꓳ ꓡꓳ ꓗꓪ ꓙꓽ ꓗꓴꓸ ꓠꓲꓹˍ ꓐꓰ ꓢꓷꓸ ꓠꓲꓹ ꓙꓳ ꓢꓴ ꓮꓽ ꓟ ꓥ ꓡ? ꓬꓲ ꓠꓬ ꓙ ꓣꓳ ꓠꓲꓹ ꓣꓱꓽ ꓢꓲ꓾ ꓙꓲꓻˍ ꓟ ꓞꓳ ꓙꓳˍ ꓟ ꓐꓰ ꓙꓲꓻˍ ꓟ ꓟꓬꓱꓽ ꓬꓰˍ ꓟ ꓗꓪ ꓐꓰ ꓙꓽ ꓗꓴꓸ ꓠꓲꓹ ꓙꓳ ꓢꓴ ꓥ ꓟ ꓟꓳꓸ ꓖꓶ ꓓꓳ ꓡ ꓝꓲ꓿ 14 ꓠꓴ ꓪꓽ ꓠꓲꓹ ꓟ ꓗꓪ ꓘꓪꓽˍ ꓟ꓾ ꓟꓬ ꓔꓳꓹˍ ꓟ ꓐꓰ ꓘꓶꓽ ꓘꓹ ꓠꓲꓹ ꓘꓹˍ ꓟ ꓙꓳˍ ꓠꓬ ꓕꓽ ꓘꓶꓽ ꓘꓹ꓿ ꓔꓱꓹ ꓚꓵˍ ꓟ ꓔꓯ ꓔꓳꓹ ꓢꓲ ꓕꓽ ꓗꓶꓸ꓿ 15 ꓖꓳ ꓡꓱ ꓡꓳ ꓫꓵꓽ ꓙꓽ ꓗꓴꓸ ꓠꓲꓹ ꓠꓬ ꓕꓯꓽ ꓢꓲ ꓗꓪ ꓐꓰ ꓡꓻˍ ꓟ ꓟꓽ ꓥ꓿ ꓟꓲ ꓠꓯ ꓗꓪ ꓟ ꓥ ꓢꓲ ꓧꓪꓽ ꓠꓲꓹ ꓡꓶꓽˍ ꓐꓰ ꓠꓲꓽ ꓗꓪ ꓐꓰ ꓡꓻˍ ꓟ ꓥ ꓡꓳ꓿ 16 ꓮ ꓡꓲꓳ ꓐꓯ ꓠꓬ ꓟꓬ ꓔꓳꓹ ꓟ ꓐꓰ ꓗꓪꓺ ꓡꓯꓽ ꓘꓳꓻ ꓟ ꓮ ꓡꓲ ꓗꓪ ꓙꓳˍ ꓠꓬ꓾ ꓬꓲ ꓖꓳ ꓗꓪ ꓢꓴꓺ ꓔꓴ ꓡ ꓟ ꓐꓰ ꓥꓶˍ ꓟ ꓟꓬꓱꓽ ꓬꓲ ꓫꓵꓽ ꓬꓲ ꓙꓰ ꓓꓳ ꓡ ꓡꓳ꓿ 17 ꓕꓯꓽ ꓢꓲ ꓗꓪ ꓐꓰ ꓡꓻ ꓟ ꓙ ꓗꓴꓸ ꓠꓲꓹ ꓠ꓾ ꓬꓲ ꓪꓴꓸ ꓠꓬ ꓢꓲꓽ ꓫꓬ ꓟ꓾ ꓗꓸ ꓠꓯꓸ ꓠꓬ ꓧꓳꓹ ꓡꓯꓽ ꓘꓳꓻ ꓟ꓾ ꓠꓲꓹ ꓟ ꓠꓴꓽ ꓟ꓾ ꓘꓶꓸ ꓢꓻ ꓟ꓾ ꓫꓱꓸ ꓤˍ ꓟ ꓐꓰ ꓙꓲꓻˍ ꓟ ꓟꓬꓱꓽ ꓐꓲꓺ ꓞꓹ ꓟ꓾ ꓠꓲꓹ ꓟ ꓕꓶˍ ꓟ ꓐꓰ꓾ ꓠꓲꓹ ꓟ ꓠꓬꓲꓽ ꓔꓱꓹ ꓟꓽ ꓣꓱꓽ ꓟ꓾ ꓕꓱ ꓟꓬ ꓫꓵꓽ ꓥ ꓡꓳ꓿ 18 ꓧꓳꓹ ꓡꓯꓽ ꓘꓳꓻ ꓡꓰ ꓝꓲ ꓢꓴ ꓡꓰ ꓢꓲ ꓡꓲꓺ ꓟ ꓗꓪ ꓫꓵꓸ ꓔꓸ ꓟ ꓗꓪ ꓐꓰ ꓓꓱꓼ ꓓꓳ ꓡ ꓟ ꓠꓬ꓾ ꓔꓱꓹ ꓜꓳꓽˍ ꓟ ꓥ ꓡꓳ꓿

ꓬ-ꓗꓴ 4

1 ꓠꓴ ꓪꓽ ꓗꓳ ꓡꓳ ꓗꓪ ꓢꓯꓼ ꓡꓯꓽ ꓘꓳꓻˍ ꓟ ꓐꓰ ꓑꓱꓹ ꓡꓯꓽ ꓘꓳꓻˍ ꓟ ꓠꓬ ꓮ ꓡꓲ ꓗꓪ ꓐꓰ ꓡꓻ ꓡ? ꓠꓴ ꓪꓽ ꓠꓯS ꓗꓪ ꓟꓽ ꓠꓽ ꓠꓽ ꓔꓳꓹ ꓡꓯꓽ ꓘꓳꓻ ꓔꓬ ꓟ ꓧꓪꓽ ꓖꓳ ꓓꓱꓽ ꓦꓯꓸ ꓠꓲꓹ ꓙꓵꓽˍ ꓟ ꓐꓰ ꓧꓪꓽ ꓖꓳ ꓓꓱ ꓠꓲꓹ ꓘꓪꓽ ꓫꓵ ꓓꓴ ꓗꓪ ꓐꓰ ꓡꓻˍ ꓡꓳ꓾ ꓟꓽ ꓥ ꓡ? 2 ꓠꓴ ꓪꓽ ꓠꓬ ꓕꓲ ꓫꓵ ꓔꓯ ꓠꓲꓹ ꓦꓯꓸ ꓢꓲ ꓟꓽ ꓟꓶ ꓠꓬ ꓢꓴ ꓔꓯ ꓢꓰꓼˍ ꓡꓳ꓿ ꓠꓴ ꓪꓽ ꓟꓬ ꓦꓯꓸˍ ꓟꓲ ꓟꓶ ꓟꓽ ꓓ ꓠꓬꓲ꓾ ꓢꓯꓼ ꓡꓯꓽ ꓘꓳꓻ ꓑꓱꓹ ꓡꓯꓽ ꓘꓳꓻˍ ꓡꓳ꓿ ꓠꓴ ꓪꓽ ꓟꓽ ꓟꓶˍ ꓟ ꓠꓬ ꓪꓴ-ꓢ ꓔꓯ ꓟꓽ ꓓꓰꓽ ꓠꓬꓲ ꓥ ꓡꓳ꓿ 3 ꓠꓴ ꓪꓽ ꓓꓰꓽˍ ꓟꓲ ꓠꓴ ꓪꓽ ꓧꓪꓽ ꓖꓳ ꓓꓱ ꓠꓲꓹ ꓘꓪꓽ ꓫꓵ ꓓꓴ ꓗꓪ ꓣꓱ ꓠꓹ ꓟ ꓓꓰꓽ ꓛꓬꓻ ꓗꓷ ꓠꓬꓲ ꓟꓽ ꓟꓶ꓿ 4 ꓦꓬꓽ ꓛꓳꓽ ꓧꓪ ꓢꓴ ꓐꓴꓳ꓾ ꓟꓲ ꓠꓯˍ ꓐꓰ ꓙꓻ ꓡꓯꓽ ꓘꓳꓻˍ ꓟ ꓠꓬ ꓪꓴ-ꓢˍ ꓐꓰ ꓛꓴꓽ ꓙꓳ ꓡꓯꓽ ꓘꓳꓻˍ ꓟ ꓥ ꓟ ꓠꓴ ꓪꓽ ꓟꓽ ꓢꓷꓸ ꓡ? ꓟꓲ ꓠꓯˍ ꓐꓰ ꓙꓻ ꓡꓯꓽ ꓘꓳꓻ ꓠꓲꓹ ꓫꓵ ꓢꓴ ꓮꓽ ꓟˍ ꓟꓲ꓾ ꓬꓲ ꓚꓲ ꓛꓬ ꓔꓯ ꓪꓴ-ꓢ ꓐꓰ ꓛꓴꓽ ꓙꓳ ꓡꓯꓽ ꓘꓳꓻ ꓢꓴ ꓒꓬꓱꓼ ꓡ ꓝꓲˍ ꓟ ꓥ ꓡꓳ꓿ 5 ꓥ ꓠꓬ ꓢꓲꓽ ꓫꓬ ꓕꓳ ꓶ ꓗꓪ꓾ ꓪꓴ-ꓢ ꓡꓰ ꓣꓳ ꓠꓯꓸꓼ ꓗꓪ ꓔꓬ ꓝꓲˍ ꓟ ꓦ ꓠꓬ ꓟꓬ ꓔꓳꓹˍ ꓟ ꓦ ꓥ ꓡꓳ꓾ ꓐꓯˍ ꓟ ꓮꓽ ꓔꓳ ꓐꓯˍ ꓡꓳ ꓓꓵꓽ ꓙꓽˍ ꓡ? 6 ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓪꓻ ꓜꓲ ꓪꓴꓽˍ ꓟ ꓣꓱꓽ ꓛꓰ ꓖꓶꓽ ꓡ ꓡꓳ꓿ ꓖꓳ ꓡꓱ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ꓾ ꓪꓴ-ꓢ ꓠꓬ ꓠꓲꓹ ꓘ ꓢꓴ ꓔꓯ ꓔꓳꓹ ꓢꓲ꓾ ꓙꓻ ꓣꓳ ꓢꓴ ꓔꓯ ꓣꓱꓽ ꓛꓰ ꓖꓶˍ ꓡꓳ꓾ ꓐꓯˍ ꓡꓳ꓿ 7 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓪꓴ-ꓢ ꓙꓵꓽˍ ꓟ ꓔꓯ ꓛꓳ꓿ ꓠꓲꓽ ꓔꓯ ꓠꓽ ꓗꓽ ꓔ꓿ ꓖꓳ ꓕꓯ ꓬꓲ ꓠꓬ ꓠꓴ ꓪꓽ ꓗꓪ ꓐꓰ ꓛꓰꓹ ꓙꓰˍ ꓥꓳ꓿ 8 ꓠꓴ ꓪꓽ ꓪꓴ-ꓢ ꓔꓯ ꓠꓶꓽ ꓙꓰˍ ꓠꓬ꓾ ꓬꓲˍ ꓟꓲ ꓠꓴ ꓪꓽ ꓔꓯ ꓠꓶꓽ ꓡ ꓥꓳ꓿ ꓝꓴꓲ ꓙꓳ ꓢꓴ ꓐꓴꓳ꓾ ꓠꓴ ꓪꓽ ꓡꓯꓼ ꓒꓯꓹ ꓞꓲꓽ ꓫꓬꓻ ꓡꓰ ꓝꓲ꓿ ꓠꓲꓹ ꓟ ꓠꓬꓲꓽ ꓔꓱꓹ ꓣꓱ ꓢꓴ ꓐꓴꓳ꓾ ꓠꓴ ꓪꓽ ꓠꓲꓹ ꓟ ꓔꓯ ꓢꓲꓽ ꓫꓬꓻ ꓡꓰ ꓝꓲ꓿ 9 ꓠꓲꓹ ꓟ ꓫꓸ ꓠꓬꓲ꓾ ꓠꓲꓹ ꓥꓴꓻ ꓠꓬꓲ꓾ ꓮꓸ ꓛꓬ ꓙꓱ ꓠꓬꓲ ꓬꓰ ꓢꓲ꓾ ꓠꓴ ꓪꓽ ꓪꓽ ꓫꓱˍ ꓟ ꓔꓯ ꓠꓲꓹ ꓥꓴˍ ꓟ ꓑꓶꓸ ꓡꓰ ꓝꓲ꓿ ꓠꓴ ꓪꓽ ꓗꓹ ꓛꓲˍ ꓟ ꓔꓯˍ ꓟꓲ ꓓꓵꓽ ꓙꓽ ꓪꓴꓽ ꓧꓶ ꓓꓴ ꓑꓶꓸ ꓡꓰ ꓝꓲ꓿ 10 ꓢꓲ ꓒ ꓟꓲꓽ ꓙꓬ ꓗꓪ ꓠꓴ ꓪꓽ ꓙ ꓣꓳˍ ꓠꓬ꓾ ꓬꓲ ꓡꓰ ꓠꓴ ꓪꓽ ꓔꓯ ꓓꓳꓹ ꓟꓴ ꓖꓶꓽ ꓡ ꓥꓳ꓿ 11 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓢꓴ ꓪ ꓕꓽ ꓕꓱꓻ꓿ ꓮꓽ ꓟˍ ꓟꓲ ꓬꓲꓼ ꓤ ꓠꓬꓲ ꓤ ꓕꓲ ꓣꓳ ꓪ ꓕꓱꓻ꓾ ꓥ ꓠꓬ ꓬꓲ ꓔꓯ ꓙꓽ ꓘꓶꓽˍ ꓠꓬ꓾ ꓙꓵꓽ ꓗ ꓔꓯ ꓔꓳꓹ ꓢꓲ ꓙꓽ ꓘꓶˍ ꓟ ꓥ ꓡꓳ꓿ ꓠꓴ ꓪꓽ ꓠꓬ ꓙꓵꓽ ꓗ ꓔꓯ ꓙꓽ ꓘꓶˍ ꓕꓯ ꓠꓽ꓾ ꓙꓵꓽ ꓗ ꓔꓯ ꓛꓳ ꓢꓴ ꓬꓰˍ ꓟ ꓟꓽ ꓥ꓾ ꓐꓯ ꓟꓴ ꓘꓶꓽ ꓢꓲꓽ ꓒ ꓬꓰˍ ꓟ ꓥꓳ꓿ 12 ꓙꓵꓽ ꓗ ꓖꓶ ꓢꓴˍ ꓐꓰ ꓐꓯ ꓟꓴ ꓘꓶꓽ ꓢꓲꓽ ꓒ ꓠꓬ꓾ ꓢꓯꓼ ꓟꓬ ꓝꓸ ꓖꓶ ꓐ ꓡ ꓢꓴˍ ꓐꓰ ꓟꓶꓽ ꓬꓰ ꓝꓲ ꓐ ꓡ ꓢꓴ ꓪꓴ-ꓢ ꓬꓲ ꓖꓳ ꓕꓲ ꓣꓳˍ ꓡꓰꓽ ꓥ ꓡꓳ꓿ ꓠꓴ ꓠꓬ ꓮꓽ ꓟ ꓥ ꓠꓬꓲ ꓢꓴ ꓔꓯ ꓐꓯ ꓞꓷꓹˍ ꓡ? 13 ꓥꓪ ꓠꓴꓽ ꓠꓬ ꓠꓬꓲꓸ ꓠꓬꓲ꓾ ꓥ ꓠꓬ ꓢ ꓖꓶ꓾ ꓡꓳ ꓒꓱ ꓕꓱ ꓕꓲ ꓟ꓾ ꓥ ꓠꓬ ꓖꓳ ꓕꓲ ꓟ ꓗꓪ ꓙꓰ ꓢꓲ꓾ ꓖꓳ ꓗꓪ ꓕꓲ ꓘꓳꓼ ꓔꓬ ꓢꓲ ꓠꓬꓲ꓾ ꓶ ꓡꓯꓼ ꓟꓴ ꓢꓲ ꓬꓲ ꓐꓶꓹ ꓒꓳꓹ ꓟꓶꓻ ꓝꓲˍ ꓥꓳ꓾ ꓐꓯ ꓢꓴ ꓠꓴ ꓪꓽꓳ꓾ 14 ꓢ ꓖꓶ ꓕꓲ ꓠꓬꓲ ꓗꓪ ꓮꓸ ꓫꓵ ꓒꓬꓱꓼ ꓡ ꓟ ꓠꓴ ꓪꓽ ꓟꓽ ꓢꓷꓸ꓿ ꓠꓴ ꓪꓽ ꓤꓶ ꓦꓬꓼ ꓠꓬꓲ ꓠꓬ ꓮꓸ ꓫꓵ ꓥ ꓡ? ꓠꓴ ꓪꓽ ꓠꓽ ꓕꓲ ꓑꓹ ꓤˍ ꓡꓰꓽ ꓓꓳ ꓡ ꓢꓲ ꓟꓬꓼ ꓬꓰˍ ꓟ ꓟꓴ ꓗꓴꓸ ꓥ ꓡꓳ꓿ 15 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓽ꓾ ꓢꓲ ꓒ ꓠꓲꓹ ꓡꓶꓽ ꓥ ꓠꓬ ꓥꓪ ꓠꓴꓽ ꓢꓯꓸˍ ꓟꓲ ꓢꓯꓸ ꓔꓬ ꓢꓲ꓾ ꓕꓱ ꓟ ꓬꓰ꓾ ꓥ ꓠꓬ ꓖꓳ ꓟ ꓬꓰˍ ꓥꓳ꓾ ꓐꓯ ꓙꓲꓽ ꓙꓳˍ ꓡꓳ꓿ 16 ꓮ ꓟꓶ ꓠꓴ ꓪꓽ ꓠꓽ ꓚꓲ ꓛꓬ ꓔꓯ ꓓꓳꓹ ꓟꓴ ꓢꓲ ꓘꓶꓽ ꓘꓹ ꓡꓳ꓿ ꓘꓶꓽ ꓘꓹ ꓟ ꓕꓱ ꓡꓱ ꓫꓵꓽ ꓮꓽ ꓙꓵ ꓠꓬ ꓥꓶˍ ꓟ ꓥ ꓡꓳ꓿ 17 ꓖꓳ ꓡꓱ ꓠꓬꓲ ꓙꓲꓻˍ ꓟ ꓬꓰ ꓠꓯꓹ ꓟ ꓢꓷꓸ ꓢꓲ꓾ ꓟꓽ ꓬꓰ ꓢꓴ꓾ ꓖꓳ ꓕꓲ ꓣꓳ ꓐꓱ ꓶ ꓠꓬ ꓝꓴꓲ ꓥ ꓡꓳ꓿

ꓬ-ꓗꓴ 5

1 ꓞꓳ ꓐꓳꓻ ꓐꓴꓳ꓾ ꓠ ꓠꓹ꓿ ꓠꓴ ꓪꓽ ꓔꓯ ꓬꓯꓼ ꓡ ꓠꓹ ꓟ ꓙꓽ ꓫꓸ ꓓꓴ ꓪꓴꓸ ꓠꓬꓲ ꓥꓴꓻ ꓢꓲ ꓮꓸ ꓛꓬ ꓙꓱ ꓔꓴ ꓡꓯ꓿ 2 ꓠꓴ ꓪꓽ ꓐꓳꓻ ꓶꓽ ꓠꓬ ꓛꓵꓽ ꓡꓰꓳ꓿ ꓠꓴ ꓪꓽ ꓐꓵ ꓞꓶꓽ ꓔꓯˍ ꓟꓲ ꓧꓪꓽ ꓟꓵ ꓐꓵꓽ ꓡꓴꓹ ꓡꓰ ꓜꓽ ꓗꓷꓳ꓿ 3 ꓠꓴ ꓪꓽ ꓒꓴˍ ꓐꓰ ꓫꓵꓺ ꓔꓯ ꓠꓬ ꓙꓲꓽ ꓡꓰ ꓜꓽ ꓗꓷꓳ꓿ ꓙꓲꓽ ꓜꓽˍ ꓟ ꓖꓳ ꓟ ꓠꓬ ꓠꓴ ꓪꓽ ꓔꓯ ꓔꓳꓹ ꓠꓹ ꓟ ꓢꓷꓸ ꓙ ꓟꓳ ꓙ ꓓꓴ ꓒꓬꓱꓼ ꓡ ꓢꓲ꓾ ꓮꓸ ꓔꓳꓸ ꓡꓰ ꓛꓴꓻ ꓖꓴꓻ ꓡꓰˍ ꓟ ꓡꓰ ꓐꓰ꓾ ꓠꓴ ꓪꓽ ꓧꓪꓽ ꓔꓯˍ ꓟꓲ ꓖꓴꓻ ꓡꓰ ꓝꓲˍ ꓥꓳ꓿ ꓠꓴ ꓪꓽ ꓠꓬ ꓟꓲ ꓠꓯ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓛꓲ ꓡ ꓟꓲ ꓒꓵꓽ ꓶꓽ ꓫ ꓒꓵꓹ ꓔ ꓢꓰꓽ ꓡꓳ꓿ 4 ꓠꓬꓲ ꓠꓹ꓾ ꓠꓴ ꓪꓽ ꓦ ꓟꓲ ꓗꓪ ꓜꓽ ꓪꓳꓽ ꓡꓳ ꓪꓳ ꓶꓼ ꓢꓴ ꓪꓽ ꓤ ꓐꓴ ꓔꓯ ꓟꓽ ꓖꓶꓽ ꓖꓶꓽ ꓗꓶ ꓔꓸ ꓟ ꓪꓽ ꓒꓵ ꓠꓬ ꓠꓴ ꓪꓽ ꓔꓯ ꓔꓳꓹ ꓢꓲ ꓘꓴꓻ ꓔꓴ ꓡ ꓡꓳ꓿ ꓶꓼ ꓫ ꓢꓴ ꓐꓴ ꓘꓴˍ ꓟ ꓢꓯꓼˍ ꓟꓲ ꓟꓴ ꓡꓳꓹ ꓬꓰ ꓟ ꓢꓲ ꓒ ꓬꓲꓸ ꓠꓸ ꓑꓳ ꓗꓪ ꓓꓵꓽ ꓡꓰꓳ꓿ 5 ꓠꓴ ꓪꓽ ꓠꓬ ꓟꓲ ꓠꓯ ꓗꓪ ꓜꓽ ꓢꓻ ꓔꓬ ꓢꓻ ꓢꓲ ꓖꓼ ꓟꓽ ꓔꓱꓹ ꓔꓱꓹꓼ ꓬꓰ ꓗꓷꓳ꓿ ꓠꓴ ꓪꓽ ꓠꓬ ꓢꓰꓼ ꓦꓬꓼ ꓠꓬꓲ ꓐꓱ ꓶ ꓠꓴ ꓪꓽ ꓚꓲ ꓛꓬ ꓔꓯ ꓬꓽ ꓞꓶ ꓡ ꓝꓲꓳ꓿ 6 ꓠꓴ ꓪꓽ ꓡꓰ ꓔꓱꓹ ꓜꓳꓽ ꓢꓴ ꓔꓯ ꓫꓵꓻ ꓠꓹ ꓟ ꓓꓰꓺ ꓘꓶꓽ ꓐꓯ ꓞꓷꓹ ꓢꓲ ꓢꓰꓼ ꓗꓷˍ ꓟꓲ꓾ ꓬꓲ ꓪ ꓠꓬ ꓠꓴ ꓪꓽ ꓔꓯ ꓟꓽ ꓔꓳꓹ꓿ 7 ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓢꓲ ꓒ ꓛꓲ ꓡ ꓗꓪ ꓛꓲ ꓠꓲꓹ ꓟ ꓫꓵ ꓠꓯꓹ ꓡꓳ꓿ ꓟꓬꓱꓽ ꓬꓰ ꓡꓳ ꓬꓰ ꓢꓴ ꓠꓬ ꓟꓶꓽ ꓦ ꓠꓯꓼˍ ꓐꓰ ꓟꓶ ꓦ ꓡꓷꓺ ꓟꓽ ꓟꓶ ꓕ ꓑꓳ꓾ ꓦꓻ ꓟꓲ ꓗꓪ ꓒꓵꓽˍ ꓟ ꓜꓽ ꓪꓳꓽ ꓡꓳ ꓪꓳ ꓫ ꓟꓶꓻ ꓠꓹ ꓟ ꓠꓲꓹ ꓟ ꓫꓵꓺ ꓢꓲ ꓡꓳ ꓠꓬꓹ ꓟ ꓡꓰ ꓐꓰ꓾ 8 ꓠꓴ ꓪꓽˍ ꓟꓲ ꓠꓲꓹ ꓟ ꓫꓵꓺ ꓢꓲ ꓠꓴ ꓪꓽ ꓠꓲꓹ ꓟ ꓔꓯ ꓕꓶꓻ ꓡꓰ ꓝꓲ꓿ ꓮ ꓡꓲꓳ ꓐꓯ ꓠꓬ ꓢꓲ ꓒ ꓡꓻˍ ꓟ ꓦꓬꓼ ꓠꓬꓲ ꓠꓶꓽ ꓡꓺꓳ꓿ 9 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓔꓯ ꓐꓯ ꓟꓴ ꓟꓽ ꓘꓶ ꓡ ꓠꓹ ꓟ ꓕꓽ ꓪꓻ ꓕꓱ ꓡꓯꓽ ꓘꓳ꓿ ꓠꓬꓲ ꓠꓹ꓾ ꓐꓯ ꓟꓴ ꓘꓶꓽ ꓢꓲꓽ ꓒ ꓠꓬ ꓗ ꓘꓶꓽ ꓗꓪ ꓦꓰꓼ ꓞꓹ ꓡꓳ꓿ 10 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓫꓸ ꓙꓵ ꓢꓲ ꓠꓲꓹ ꓟ ꓫꓵˍ ꓟ ꓗꓪ ꓔꓯꓺ ꓢꓳ ꓓꓴ ꓬꓰ ꓠꓹ ꓟ꓾ ꓧꓶꓸ ꓕꓯ ꓢꓲ ꓒ ꓟꓬꓱꓺ ꓗꓪ ꓐꓰ ꓟꓷꓽ ꓠꓷꓹ ꓝꓸ ꓗꓷ ꓢꓴ ꓐꓴ ꓔꓯ ꓓꓵꓽ ꓙꓽ ꓔ꓿ 11 ꓧꓶꓸ ꓕꓯ ꓜꓲꓽ ꓘꓴ ꓠꓲꓹ ꓙꓳ ꓢꓴ ꓐꓴ ꓔꓯ ꓣꓳ ꓡꓰ꓾ ꓶꓼ ꓙꓳ ꓫꓱꓹ ꓙꓳ ꓢꓴ ꓚꓬꓹ ꓡꓳ꓿ ꓬꓳ-ꓐꓰ ꓬꓲ ꓜꓲꓽ ꓘꓴ ꓠꓲꓹ ꓙꓳˍ ꓟ ꓔꓯ ꓠꓴ ꓪꓽ ꓑ ꓙꓽ ꓠꓬꓲꓳ꓿ ꓡꓳꓹ ꓬꓰˍ ꓕꓯ ꓢꓲ ꓒ ꓡꓰ ꓬꓲ ꓐꓱ ꓶ ꓬꓰ ꓗꓷ ꓟ ꓔꓯ ꓠꓴ ꓪꓽ ꓢꓷˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓢꓲ ꓒ ꓠꓽ ꓠꓲꓹ ꓙꓽ ꓟꓬ ꓗꓳˍ ꓟ ꓐꓰ ꓫꓱꓸ ꓤˍ ꓟ ꓐꓲ ꓞꓹ ꓡꓳ꓿ 12 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓮꓽ ꓙꓵ ꓟ ꓕꓯꓽ ꓢꓲ ꓕꓲ ꓘꓶꓽ ꓠꓬ꓾ ꓕꓽ ꓪꓵꓼ ꓙꓱꓽ꓿ ꓟꓴꓽ ꓗꓪ ꓔꓯ ꓖꓴ ꓠꓬꓲ꓾ ꓟꓲ ꓠꓯ ꓔꓯ ꓖꓴ ꓠꓬꓲ꓾ ꓠꓱꓸ ꓐꓯꓼ ꓮ ꓡꓲ ꓕꓲ ꓫꓵ ꓔꓯ ꓖꓴ ꓠꓬꓲ ꓐꓰˍ ꓟꓲ ꓕꓽ ꓪꓵꓼ ꓙꓱꓽ꓿ ꓠꓴ ꓪꓽ ꓠꓬ ꓐꓯ ꓟꓴ ꓘꓶꓽˍ ꓟ ꓗꓪ ꓟꓽ ꓓꓵꓽ ꓡꓰ ꓠꓹ ꓟ꓾ ꓥ ꓠꓬ ꓥ ꓡꓳ꓾ ꓟꓽ ꓥ ꓠꓬ ꓟꓽ ꓥ꓾ ꓕꓱ ꓡꓱˍ ꓡꓰꓽ ꓐꓯ꓿ 13 ꓠꓴ ꓪꓽ ꓗꓳ ꓡꓳ ꓗꓪ ꓫꓸ ꓙꓵ ꓔꓬ ꓢꓴ ꓙꓳˍ ꓡ? ꓙꓳˍ ꓠꓬ ꓬꓲ ꓠꓽ ꓪꓽ ꓘꓴ ꓝꓲ꓿ ꓗ ꓛꓲ ꓔꓬ ꓢꓻ ꓢꓴ ꓙꓳˍ ꓡ? ꓙꓳˍ ꓠꓬ ꓬꓲ ꓠꓽ ꓫꓱꓸ ꓖꓶ ꓟꓴꓽ ꓖꓪ ꓖꓪ ꓝꓲ꓿ 14 ꓠꓴ ꓪꓽ ꓗꓳ ꓡꓳ ꓗꓪ ꓠꓻ ꓢꓴ ꓙꓳˍ ꓡ? ꓙꓳˍ ꓠꓬ ꓬꓲ ꓠꓽ ꓘꓴ ꓜꓲ ꓞꓳ ꓗꓪ ꓟ ꓟꓬꓱꓽ ꓡꓳꓸ ꓢꓴ ꓐꓴ ꓔꓯ ꓘꓴ ꓔꓯꓹ ꓡ ꓢꓲ꓾ ꓬꓲ ꓪꓽ ꓠꓬ ꓢꓲ ꓒ ꓟꓬꓱ ꓗꓪ ꓐꓰ꓾ ꓮꓽ ꓛꓬꓽ ꓞꓶꓻ ꓡꓰ ꓬꓲ ꓔꓯ ꓟꓰ ꓖꓶ ꓢꓲ ꓠꓬꓲ꓾ ꓬꓲ ꓐꓱ ꓶ ꓪꓽ ꓘꓴ ꓖꓶ ꓝꓲ꓿ 15 ꓙꓵꓻ ꓠꓲꓹ ꓡꓰ ꓪꓽ ꓘꓴˍ ꓟ ꓗꓪ ꓐꓰ ꓞꓳ ꓠꓻ ꓓꓻ ꓡꓰ ꓢꓲ꓾ ꓢꓲ ꓒ ꓡꓰ ꓬꓲ ꓔꓯ ꓢꓯꓼ ꓙꓳꓻ ꓡ ꓝꓲˍ ꓥꓳ꓿ ꓝꓮꓲ ꓬꓲ ꓝꓴꓲ ꓬꓰ ꓗꓷ ꓐꓷˍ ꓠꓬ ꓬꓲ ꓔꓯ ꓖꓽ ꓖꓶˍ ꓥꓳ꓿ 16 ꓖꓳ ꓡꓱ ꓠꓬꓲ ꓠꓴ ꓪꓽ ꓓꓻ ꓡꓰ ꓟꓶꓻ ꓠꓹ ꓟ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓝꓴꓲ ꓣꓷꓠꓸ ꓡꓯꓽ ꓘꓳꓻ ꓢꓲ꓾ ꓕꓲ ꓣꓳ ꓐꓱ ꓶ ꓕꓲ ꓣꓳ ꓓꓰꓽ ꓙ ꓡꓯꓽ ꓘꓳ꓿ ꓔꓱꓹ ꓜꓳꓽ ꓢꓴ ꓪꓽ ꓘꓴ ꓘꓶꓽ ꓠꓬ ꓢꓯꓼ ꓙꓳ ꓢꓲ꓾ ꓙꓲꓻ ꓖꓴ ꓮꓽ ꓟꓬꓹ ꓓꓳ ꓡ ꓝꓲ ꓐ ꓡ ꓡꓳ꓿ 17 ꓬꓲ-ꓡꓲ-ꓬ ꓠꓬ ꓣꓳꓽ ꓐꓰ ꓕꓲꓽ ꓡꓰꓹꓼ ꓟ ꓡꓽ ꓞꓳ ꓥ ꓥ ꓟꓲ꓾ ꓬꓲ ꓡꓰ ꓟꓶꓽ ꓦ ꓟꓽ ꓦ ꓡ ꓝꓲ ꓠꓹ ꓟ ꓠꓲꓹ ꓡꓱ ꓡꓱˍ ꓡꓰ ꓶꓼ ꓓꓰꓽ ꓪꓽ ꓘꓴ ꓗꓷ ꓠꓬ꓾ ꓢ ꓘꓳꓼ ꓐꓶꓽ ꓟꓶ ꓦ ꓟꓽ ꓦ ꓡ ꓗꓷ ꓡꓰꓳ꓿ 18 ꓖꓳ ꓡꓱ ꓢꓲ ꓬꓲ ꓝꓮꓲ ꓪꓽ ꓘꓴ ꓗꓷ ꓠꓬ ꓟꓴꓽ ꓗꓪ ꓗꓪ ꓐꓰ ꓟꓶ ꓦꓻ ꓦ ꓡ ꓢꓲ꓾ ꓦ ꓟꓲ ꓗꓪ ꓜꓽ ꓪꓳꓽ ꓡꓳ ꓪꓳꓽ ꓣꓱꓻ ꓡ ꓢꓲ ꓠꓬꓲ ꓬꓲ ꓢꓶꓽ ꓓꓱꓼ ꓓꓳ ꓡ ꓡꓳ꓿ 19 ꓥꓪ ꓬꓲꓼ ꓥꓪ ꓠꓬꓲ ꓐꓴꓳ꓾ ꓠꓴ ꓪꓽ ꓗꓳ ꓡꓳ ꓗꓪ ꓔꓱꓹ ꓚꓵˍ ꓟ ꓗꓪ ꓐꓰ ꓫꓱꓽ ꓥꓳꓽ ꓙꓰ ꓢꓴ ꓙꓳ ꓢꓲ꓾ ꓬꓲ ꓔꓯ ꓧꓳꓽ ꓬꓲꓼ ꓡ ꓢꓴ ꓙꓳˍ ꓠꓬ꓾ 20 ꓝꓴꓲ ꓙꓳ ꓢꓴ ꓕꓲ ꓣꓳ ꓔꓯ ꓬꓲ ꓥꓳꓽ ꓙꓰˍ ꓟ ꓗꓪ ꓐꓰ ꓧꓳꓽ ꓬꓲꓼ ꓡ ꓢꓴ ꓥ ꓟ ꓕꓽ ꓟꓲ ꓡꓰ ꓝꓲ꓿ ꓬꓲ ꓠꓽ꓾ ꓖꓳ ꓕꓲ ꓣꓳ ꓬꓲ ꓶꓻ ꓟꓬ ꓔꓯ ꓫꓵꓻ ꓗꓪ ꓐꓰ ꓚꓬꓴ ꓗꓷˍ ꓟ ꓥ ꓢꓲ꓾ ꓝꓴꓲ ꓮꓽ ꓟꓬꓹ ꓔꓯ ꓖꓽ ꓖꓶˍ ꓟ ꓟꓶꓻ ꓡꓰ ꓝꓲˍ ꓟ ꓥ ꓡꓳ꓾ ꓐꓰ ꓢꓷꓸ ꓠꓯꓹ ꓡꓳ꓿

1 ꓒꓲ-ꓕꓱ 1

1 ꓬꓰ-ꓢꓴ ꓙꓲ-ꓢꓴ ꓬꓲ ꓝꓲ ꓓꓴ ꓒꓲ-ꓕꓱ ꓥꓪ ꓡꓰ꓾ ꓒ-ꓠꓷ-ꓕꓴ꓾ ꓖ-ꓡ-ꓕꓲ-ꓬ꓾ ꓚꓬ-ꓑꓷ-ꓔꓳ-ꓚꓬ꓾ ꓮ-ꓢꓲ-ꓬˍ ꓐꓰ꓾ ꓑꓲ-ꓕꓴ-ꓠꓲ-ꓬ ꓗꓪ ꓧꓹ ꓒꓬꓱ ꓙꓰ ꓢꓲ ꓞꓳ ꓬꓯꓼ ꓟꓴ ꓔꓬ ꓟ꓾ ꓪꓴ-ꓢ ꓡꓰ ꓢꓲ ꓔ ꓢꓴ ꓐꓴ ꓔꓯ ꓕꓳ ꓶ ꓐꓳ ꓩꓴ ꓡ ꓥꓳ꓿ 2 ꓠꓴ ꓪꓽ ꓔꓯ ꓠꓬ ꓐꓹ ꓐ ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ ꓢꓲ ꓔ ꓟ ꓥ ꓢꓲ꓾ ꓬꓰ-ꓢꓴ ꓙꓲ-ꓢꓴ ꓔꓯ ꓒꓵꓽ ꓛꓳ ꓢꓴ ꓬꓰ ꓠꓹ ꓟ ꓐꓰ꓾ ꓬꓲ ꓫꓵꓽ ꓡꓰ ꓧꓶꓺ ꓟꓶꓻ ꓡꓰ ꓠꓹ ꓟ꓾ ꓢꓲ-ꓫꓬ-ꓟ-ꓦ ꓗꓪ ꓐꓰ ꓠꓴ ꓪꓽ ꓔꓯ ꓢꓲ ꓚꓰꓸ ꓟꓶ ꓡꓰ ꓝꓲꓳ꓿ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓒ ꓐꓲ ꓐꓲS ꓐꓰ ꓟꓶꓻ ꓝꓲ꓿ 3 ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓐꓹ ꓐ ꓪꓴ-ꓢ ꓔꓯ ꓓꓳꓹ ꓟꓴ ꓖꓶ꓿ ꓬꓲ ꓠꓬ ꓬꓲ ꓫꓱꓸ ꓤˍ ꓟ ꓬꓲ ꓓꓽ ꓟ ꓡꓰ꓾ ꓣꓳꓽ ꓔꓯ ꓢꓯꓸ ꓔꓬ ꓟ ꓥꓳ ꓡꓳꓸ ꓓꓴ ꓙꓳ ꓝꓲ ꓠꓹ ꓟ꓾ ꓬꓰ-ꓢꓴ ꓙꓲ-ꓢꓴ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓟ ꓡꓰ ꓣꓳꓽ ꓔꓯ ꓫꓬꓹ ꓦꓵ ꓗꓷꓳ꓿ 4 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓟꓴꓽ ꓗꓪ ꓕꓯ ꓢꓲ ꓗꓪ ꓣꓳ ꓐꓱ ꓶ ꓫ ꓗꓶ ꓔ ꓟ꓾ ꓛꓵꓽ ꓡꓰ ꓟꓽ ꓓ ꓟ ꓐꓰ꓾ ꓐꓬ ꓡꓰ ꓟꓽ ꓓ ꓟ ꓐꓰ ꓧꓳꓽ ꓬꓰ ꓟꓽ ꓓ ꓟ ꓡꓯꓼ ꓪ ꓔꓯ ꓥꓳ ꓡꓳꓸ ꓔꓬ ꓟ ꓥ ꓡꓳ꓿ 5 ꓡꓯꓼ ꓪ ꓕꓱ ꓟ ꓠꓬ꓾ ꓙꓵꓻ ꓠꓲꓹ ꓗꓪ ꓐꓰ ꓪꓴ-ꓢ ꓡꓰ ꓫ ꓙˍ ꓟ ꓟꓶ ꓢꓴ ꓠꓴ ꓪꓽ ꓐꓱ ꓶ ꓥ ꓡꓳ꓿ ꓠꓴ ꓪꓽ ꓔꓯ ꓠꓬ ꓡꓳꓹ ꓬꓰ ꓝꓲꓸ ꓗꓪ ꓟꓳꓸ ꓖꓶꓽ ꓡ ꓠꓹ ꓟ ꓚꓬꓴˍ ꓟ ꓣꓱꓽ ꓛꓰ ꓐꓱ ꓶ ꓪꓴ-ꓢ ꓪꓽ ꓠꓬꓲˍ ꓟ ꓡꓰ ꓫ ꓙ ꓔ ꓟ ꓥ ꓡꓳ꓿ 6 ꓕꓱ ꓟ ꓗꓪ ꓐꓰ ꓠꓴ ꓪꓽ ꓠꓬ ꓤꓹ ꓠꓬꓲˍ ꓟ ꓬꓲ ꓫꓵꓽ ꓬꓲ ꓙꓰ ꓗꓪ ꓕꓲ ꓑꓹ ꓤ ꓫꓸ ꓙꓵˍ ꓟꓲ ꓗꓹ ꓛꓲ ꓓꓴ ꓮꓽ ꓟꓬꓹ ꓙꓳˍ ꓡꓳ꓿ 7 ꓠꓴ ꓪꓽ ꓙꓵꓻ ꓠꓲꓹ ꓔꓯ ꓤꓹ ꓠꓬꓲˍ ꓟ ꓠꓬ꓾ ꓮꓸ ꓔꓳꓸ ꓗꓪ ꓚꓲ ꓔ ꓟ ꓐꓬ ꓡꓰ ꓓˍ ꓟ ꓫꓵꓺ ꓢꓶꓸ ꓟꓽ ꓞꓲ ꓒꓵꓽˍ ꓟ ꓒꓬꓱꓼ ꓡ ꓢꓲ꓾ ꓬꓰ-ꓢꓴ ꓙꓲ-ꓢꓴ ꓟꓳꓸ ꓖꓶꓽ ꓡ ꓕꓯ ꓫꓱꓸ ꓖꓶ ꓓꓴˍ ꓐꓰ꓾ ꓐꓬꓱꓼ ꓡꓱꓼ ꓡꓱ ꓟ ꓐꓰ꓾ ꓟꓬꓱ ꓓꓳꓽ ꓒꓬꓱꓼ ꓡ ꓠꓹ ꓟ ꓥ ꓡꓳ꓿ 8 - 9 ꓠꓴ ꓪꓽ ꓠꓬ ꓬꓲ ꓔꓯ ꓟꓽ ꓟꓳꓻ ꓠꓬꓲ ꓥ ꓟꓲ꓾ ꓬꓲ ꓔꓯ ꓠꓲꓹ ꓠꓵˍ ꓡꓳ꓿ ꓮ ꓟꓶ ꓬꓲ ꓔꓯ ꓟꓽ ꓟꓳ ꓥ ꓟꓲ ꓬꓲ ꓔꓯ ꓙꓵꓻ ꓢꓲ꓾ ꓠꓴ ꓪꓽ ꓶꓻ ꓟꓬ ꓔꓯ ꓚꓬꓴˍ ꓟ ꓙꓵꓻ ꓠꓲꓹ ꓡꓰ ꓓꓱꓼ ꓓꓳ ꓡ ꓟ ꓐꓯ ꓖꓴ ꓟꓽ ꓓ ꓓ ꓠꓲꓹ ꓒꓴ ꓗꓹ ꓛꓲˍ ꓟ ꓙꓳˍ ꓡꓳ꓿ 10 ꓟꓷꓽ ꓠꓷꓹ ꓝꓸ ꓢꓴ ꓐꓴ ꓠꓬ ꓚꓬꓴˍ ꓟ ꓙ ꓖꓴ ꓕꓱ ꓟ ꓔꓯ ꓜꓲꓻ ꓜꓲˍ ꓡꓰꓽ ꓧꓪ ꓟꓰꓹ ꓠꓬꓲ ꓗꓷꓳ꓿ ꓬꓲ ꓪꓽ ꓠꓬ ꓠꓴ ꓪꓽ ꓟꓶˍ ꓟ ꓣꓱꓽ ꓛꓰ ꓔꓯ ꓧꓶꓸ ꓕꓯˍ ꓡꓰ ꓟꓷꓽ ꓠꓷꓹ ꓝꓸ ꓢꓲ꓾ 11 ꓬꓲ ꓪꓽ ꓠꓯꓸꓼ ꓗꓪ ꓓꓯꓹ ꓟ ꓙꓲ-ꓢꓴ ꓦ ꓡꓰ꓾ ꓙꓲ-ꓢꓴ ꓫꓸ ꓙꓵˍ ꓟ ꓐꓰ ꓗꓸ ꓠꓯꓸ ꓟꓶˍ ꓟ ꓟꓬꓱ ꓓꓳꓽ ꓖꓴ ꓟꓳꓸ ꓖꓶˍ ꓟ ꓠꓬ ꓮꓸ ꓫꓵ ꓥ ꓟ ꓐꓰ꓾ ꓮ ꓡꓲ ꓡꓴ ꓫꓵꓽ ꓦꓬꓼ ꓠꓬꓲ ꓗꓪ ꓥ ꓟ ꓟꓰꓹ ꓠꓬꓲ ꓗꓷꓳ꓿ 12 ꓟꓷꓽ ꓠꓷꓹ ꓝꓸ ꓢꓴ ꓐꓴ ꓠꓬ ꓚꓲ ꓛꓬ ꓔꓯ ꓣꓱ ꓙˍ ꓟ ꓟꓽ ꓥ ꓥ꓾ ꓠꓴ ꓪꓽ ꓔꓯ ꓣꓱꓽ ꓙ ꓗꓷ ꓟ ꓥ ꓟ꓾ ꓟꓴꓽ ꓗꓪ ꓗꓪ ꓐꓰ ꓝꓲꓺ ꓩꓴ ꓡ ꓟ ꓢꓲ-ꓫꓬ-ꓟ-ꓦ ꓗꓪ ꓐꓰ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓢꓴ ꓡꓰ ꓐꓯ ꓟꓳꓸ ꓖꓶꓽ ꓡꓺꓳ꓿ ꓟꓴꓽ ꓗꓪ ꓝꓲ ꓓꓴ ꓐꓴˍ ꓟꓲ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓰ ꓐꓯ ꓗꓷ ꓡꓳ ꓫꓵꓽ ꓔꓯ ꓮꓽ ꓘꓶꓸ ꓢꓷꓸ ꓠꓲꓹ ꓫꓵˍ ꓡꓳ꓿ 13 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓲꓹ ꓟ ꓗꓪ ꓕꓶꓻ ꓕꓶˍ ꓡꓰꓽ ꓙꓽ ꓖꓶ ꓔ ꓢꓲ ꓞꓳ ꓢꓲꓽ ꓬꓰ꓿ ꓖꓳ ꓡꓱ ꓢꓲ ꓬꓰ-ꓢꓴ ꓙꓲ-ꓢꓴ ꓟꓳꓸ ꓖꓶ ꓡ ꓕꓯ ꓠꓴ ꓪꓽ ꓔꓯ ꓔꓯꓹ ꓖꓶꓽ ꓡ ꓟ ꓣꓱꓽ ꓛꓰ ꓔꓯ ꓕꓶꓻ ꓕꓶˍ ꓡꓰ ꓥꓳ ꓡꓳꓸ ꓔ꓿ 14 ꓒꓵꓽ ꓛꓳˍ ꓟ ꓤ ꓠꓱˍ ꓡꓰ ꓐꓰ ꓬꓰ ꓢꓲ꓾ ꓧꓶ ꓕꓯ ꓠꓴ ꓪꓽ ꓟꓽ ꓢꓷꓸ ꓟ ꓦꓬꓼ ꓠꓬꓲ ꓗꓪ ꓦꓯꓸ ꓠꓲꓹ ꓙꓵꓽ ꓗꓷ ꓟ ꓚꓱꓹ ꓡꓰ ꓠꓴ ꓪꓽ ꓔꓯ ꓝꓮꓲ ꓕꓽ ꓙꓵꓽ ꓪ ꓝꓲ꓿ 15 ꓠꓴ ꓪꓽ ꓔꓯ ꓘꓴꓻ ꓢꓴ ꓠꓬ ꓢꓲꓽ ꓫꓬ ꓢꓴ ꓥ ꓟ ꓡꓰ ꓐꓰ꓾ ꓠꓴ ꓪꓽ ꓞꓳ ꓙꓳꓻˍ ꓟ ꓮꓽ ꓙꓵ ꓗꓪˍ ꓟꓲ ꓢꓲ ꓚꓰꓸ ꓟꓶ ꓡꓰ ꓢꓴˍ ꓡꓰ ꓐꓰ ꓢꓲꓽ ꓢꓲꓽ ꓫꓬꓻ ꓫꓬˍ ꓡꓰꓽ ꓞꓳ ꓙꓳ꓿ 16 ꓮ ꓡꓲꓳ ꓐꓯˍ ꓠꓬ ꓕꓳ ꓶ ꓗꓪ꓾ ꓥꓪ ꓠꓬ ꓢꓲꓽ ꓫꓬ ꓢꓴ ꓥ ꓠꓬꓲ꓾ ꓠꓴ ꓪꓽˍ ꓟꓲ ꓢꓲꓽ ꓫꓬ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓿ 17 ꓖꓳ ꓡꓱ ꓠꓬ ꓮꓽ ꓟ ꓟꓬꓱꓽ ꓮ ꓡꓲ ꓬꓰˍ ꓠꓬ ꓖꓳ ꓡꓱ꓾ ꓞꓳ ꓒꓬꓱꓽ ꓟꓽ ꓢꓲ ꓢꓲ ꓐꓯ ꓟꓴ ꓘꓶꓽ ꓢꓴ ꓪꓴ-ꓢ ꓔꓯ ꓠꓴ ꓪꓽ ꓐꓹ ꓐ ꓘꓴˍ ꓠꓬꓲ꓾ ꓠꓴ ꓪꓽ ꓟꓲ ꓠꓯ ꓗꓪ ꓞꓳ ꓬꓯꓼ ꓟꓴ ꓔꓬ ꓕꓯ ꓬꓲ ꓔꓯ ꓙꓳꓺ ꓒꓵꓽ ꓢꓲ ꓦꓬꓼ ꓠꓬꓲ ꓗꓳꓸ ꓠꓯꓹ ꓡꓳ꓿ 18 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓒꓵꓽ ꓒ ꓐꓴ ꓗꓪ ꓐꓰ ꓝꓸ ꓩꓴ ꓡ ꓟ꓾ ꓮꓽ ꓔꓳ ꓔꓳ ꓞꓳ ꓙꓳˍ ꓟ ꓮꓽ ꓙꓵ ꓗꓪ ꓐꓰ ꓠꓴ ꓪꓽ ꓔꓯ ꓫꓴꓹ ꓓꓳ ꓡ ꓟ ꓒꓵꓽ ꓠꓬ꓾ ꓐꓬ ꓡꓰ ꓓꓻˍ ꓟ ꓒꓴˍ ꓐꓰ ꓫꓵꓺ ꓟꓽ ꓥ꓿ 19 ꓙꓲ-ꓢꓴ ꓬꓲ ꓒꓵꓽˍ ꓟ ꓫꓵꓽ ꓥ ꓡꓳ꓿ ꓬꓲ ꓠꓬ ꓛꓬꓻ ꓖꓴ ꓟꓽ ꓙꓳ ꓟ ꓐꓰ ꓬꓲꓸ ꓐ ꓟꓽ ꓙꓳ ꓟ ꓮ ꓣꓳ ꓤˍ ꓡꓰ ꓐꓰ ꓗꓹ ꓡꓳ꓿ 20 ꓟꓵꓽ ꓟꓽ ꓔꓶ ꓟꓲ ꓟꓽ ꓔꓶ ꓕꓯˍ ꓡꓰ ꓪꓴ-ꓢ ꓡꓰ ꓬꓲ ꓔꓯ ꓢꓲ ꓚꓰꓸ ꓔ ꓟ ꓥ ꓢꓲ꓾ ꓡꓳꓹ ꓬꓰˍ ꓟ ꓤꓶꓻ ꓕꓱ ꓟ ꓗꓪ ꓠꓬ ꓠꓴ ꓪꓽ ꓙꓲ ꓖꓴ ꓐꓱ ꓶ ꓟꓳꓸ ꓖꓶꓽ ꓡ ꓟ ꓥ ꓡꓳ꓿ 21 ꓪꓴ-ꓢ ꓡꓰ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓝꓲ ꓢꓲ꓾ ꓟꓬꓱ ꓓꓳꓽ ꓖꓶꓽ ꓗꓷ ꓢꓴ ꓕꓱ ꓕꓲꓽ ꓣꓳ ꓗꓪ ꓐꓰ ꓪꓴ-ꓢ ꓔꓯ ꓠꓴ ꓪꓽ ꓙꓵꓻ ꓗꓷ ꓠꓬꓲ꓾ ꓠꓴ ꓪꓽ ꓙꓵꓻ ꓠꓲꓹˍ ꓐꓰ ꓥꓳ ꓡꓳꓸ ꓓꓴ ꓠꓬ ꓪꓴ-ꓢ ꓠꓯꓸꓼ ꓗꓪ ꓥ ꓡꓳ꓿ 22 ꓠꓴ ꓪꓽ ꓠꓬ ꓔꓱꓹ ꓚꓵˍ ꓟ ꓔꓯ ꓒꓵꓽ ꓛꓳˍ ꓟ ꓗꓪ ꓐꓰ꓾ ꓬꓲꓼ ꓤ ꓠꓬꓲ ꓤ ꓐꓴˍ ꓐꓰ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ꓾ ꓚꓲ ꓛꓬ ꓔꓯ ꓫꓬꓻ ꓡꓰ ꓝꓲ ꓢꓲ ꓠꓬꓲ꓾ ꓠꓲꓹ ꓟ ꓠꓬꓲꓽ ꓔꓱꓹ ꓟꓽ ꓣꓱꓽ ꓣꓱ ꓠꓲꓹ ꓠꓵ ꓡꓯꓽ ꓘꓳ꓿ 23 ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓫꓬꓹ ꓦꓵ ꓗꓷ ꓟ ꓠꓬ꓾ ꓐꓬ ꓡꓰ ꓛꓵꓽ ꓡꓰ ꓓꓻˍ ꓡꓳ ꓫꓵꓽ ꓗꓪ ꓐꓰ ꓟꓽ ꓥ꓿ ꓕꓲꓽ ꓞꓲꓼ ꓕꓲ ꓑ ꓢꓯꓸ ꓔꓬ ꓟ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓫꓬꓹ ꓦꓵꓻ ꓗꓷ ꓟ ꓥ ꓡꓳ꓿ 24 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓞꓳ ꓤ ꓮꓽ ꓙꓵ ꓠꓬ ꓟꓳꓼˍ ꓡꓰ ꓐꓰ ꓗꓹ ꓢꓲ꓾ ꓬꓲ ꓟꓬꓱ ꓓꓳꓽ ꓮꓽ ꓙꓵˍ ꓟꓲ ꓟꓳꓼ ꓪꓰˍ ꓡꓰ ꓐꓰ ꓗꓹ ꓡꓳ꓿ ꓟꓳꓼ ꓠꓬ ꓙꓴꓺ ꓡꓰˍ ꓡꓳ꓾ ꓬꓲ ꓪꓰˍ ꓟꓲ ꓧꓳꓽ ꓬꓰˍ ꓡꓳ꓿ 25 ꓖꓳ ꓡꓱ ꓥ ꓟꓲ ꓢꓲ ꓒꓽ ꓐꓯ ꓘꓶꓽ ꓠꓽ ꓮ ꓕꓯꓽˍ ꓟꓲ ꓟꓽ ꓡꓳꓹ ꓬꓰ꓾ ꓐꓰ ꓐꓯ ꓔ ꓡꓳ꓿ ꓐꓯ ꓘꓶꓽ ꓕꓱ ꓟ ꓠꓬ ꓠꓴ ꓪꓽ ꓔꓯ ꓚ ꓟꓸ ꓖꓶꓽ ꓗꓷ ꓟ ꓶꓼ ꓓꓳ ꓫꓱꓹ ꓓꓳ ꓥ ꓡꓳ꓿

1 ꓒꓲ-ꓕꓱ 2

1 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ꓾ ꓟꓽ ꓙꓲ ꓟ ꓮꓽ ꓙꓵ꓾ ꓖꓳꓼ ꓠꓲꓹ ꓮꓽ ꓙꓵ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽˍ ꓟ꓾ ꓠꓲꓹ ꓦꓯꓸˍ ꓟ ꓐꓰ ꓢꓴ ꓔꓯ ꓠꓻ ꓡꓰ ꓝꓲ ꓘꓶꓽ ꓫꓸ ꓕꓱˍ ꓟ ꓮꓽ ꓙꓵ ꓡꓳ ꓗꓷ ꓢꓲ꓾ 2 ꓞꓳ ꓫꓵꓼ ꓤˍ ꓡꓰ ꓐꓰ ꓦ ꓗꓪ ꓟ ꓮ ꓚꓵꓹ ꓚꓵꓺ ꓔꓯ ꓢꓲꓼ ꓢꓴ ꓬꓰ꓿ ꓕꓱ ꓡꓱ ꓬꓰˍ ꓠꓬ ꓠꓴ ꓪꓽ ꓠꓽ ꓢꓯꓼ ꓟꓬ ꓝꓸ ꓟꓶˍ ꓟ ꓣꓱꓽ ꓛꓰ ꓗꓪ ꓪꓴꓽ ꓡ ꓥꓳ꓿ 3 ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓠꓲꓹ ꓙꓽ ꓟꓬ ꓗꓳˍ ꓟ ꓔꓯ ꓠꓴ ꓪꓽ ꓢꓳꓽ ꓠꓬꓲ ꓗꓷꓳ꓿ 4 ꓢꓲ ꓒ ꓠꓬ ꓢꓯꓸ ꓞꓹ ꓟ B ꓛꓲ ꓥ ꓢꓲ꓾ ꓞꓳ ꓤ ꓡꓰ ꓬꓲ ꓔꓯ ꓒꓰ ꓗꓷˍ ꓟꓲ꓾ ꓪꓴ-ꓢ ꓡꓰ ꓢꓲꓺ ꓔ ꓟ ꓐꓰ ꓒꓵˍ ꓟ ꓥ ꓡꓳ꓿ ꓠꓴ ꓪꓽ ꓬꓲ ꓔꓯ ꓡ ꓠꓬ꓾ 5 ꓠꓴ ꓪꓽˍ ꓟꓲ ꓢꓯꓸ ꓔꓬ ꓟ Bꓸ ꓛꓲˍ ꓡꓰ ꓐꓰ ꓥ ꓢꓲ꓾ ꓠꓴ ꓪꓽ ꓠꓬ ꓢꓲ ꓚꓰꓸ ꓔ ꓟ ꓔꓲ ꓒ ꓐꓴ ꓒꓬꓱꓼ ꓡ ꓝꓲ ꓢꓲ ꓠꓬꓲ꓾ ꓠꓴ ꓪꓽ ꓠꓬ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓪꓴ-ꓢ ꓘꓳ ꓣꓴ ꓓꓻˍ ꓟ ꓦ ꓗꓪ ꓟ ꓔꓲꓺ ꓖꓶ ꓓꓴ ꓔꓲꓺ ꓖꓶ ꓐ ꓡ ꓠꓹ ꓟ ꓜꓶꓻ ꓔꓬ ꓟ ꓦ ꓗꓪ ꓟ ꓦꓲ ꓥ ꓡꓳ꓿ 6 ꓮ ꓡꓲꓳ ꓐꓯ ꓠꓬ ꓢꓲꓽ ꓫꓬ ꓕꓳ ꓶ ꓗꓪ꓾ ꓠꓬꓲ ꓠꓹ꓾ ꓥꓪ ꓡꓰ ꓢꓲ ꓔ ꓟ ꓐꓰ ꓒꓵꓽˍ ꓟ ꓦꓲ ꓚꓰ ꓗꓪ ꓟ Bꓸ ꓛꓲ ꓠꓬ ꓜꓲ-ꓬꓴ ꓗꓪ ꓔꓶ ꓔ ꓡꓳ꓿ ꓬꓲ ꓔꓯ ꓙꓵꓻ ꓢꓴ ꓔꓯ ꓠꓬ ꓟꓽ ꓫꓸ ꓔꓳ ꓡꓰ ꓝꓲ꓾ ꓐꓯ ꓔ ꓡꓳ꓿ 7 ꓖꓳ ꓡꓱ ꓠꓬꓲ ꓠꓴ ꓪꓽ ꓙꓵꓻ ꓢꓴ ꓔꓯꓸ ꓟꓳꓸ ꓠꓬ꓾ ꓬꓲ ꓠꓽ ꓒꓵˍ ꓟ ꓥ ꓡꓳ꓿ ꓟꓽ ꓙꓵꓻ ꓢꓴ ꓔꓯꓸ ꓟꓳꓸ ꓠꓽ꓾ ꓦꓲꓻ ꓫꓬ ꓢꓴ ꓡꓰ ꓒꓰꓻ ꓗꓷ ꓟ ꓡꓳ ꓓꓰ ꓠꓬ꓾ ꓦꓲꓻ ꓚꓰ ꓗꓪ ꓟ ꓡꓳ ꓓꓰ ꓒꓬꓱꓼ ꓡ ꓟ ꓥ ꓡꓳ꓿ 8 Bꓸ ꓛꓲ ꓕꓱ ꓟ ꓠꓬ ꓢꓴ ꓛꓲ ꓕꓲꓽ ꓓꓴ ꓥꓳ꓿ Bꓸ ꓑꓸ ꓕꓱ ꓟ ꓠꓬ ꓢꓴ ꓡꓱꓸ ꓗꓷ ꓝꓲ ꓓꓴ ꓥꓳ꓾ ꓐꓰ ꓐꓳ ꓔ ꓢꓰꓽ ꓡꓳ꓿ ꓬꓲ ꓪꓽ ꓠꓬ ꓐꓯ ꓘꓶꓽ ꓔꓯ ꓟꓽ ꓒꓵꓽ ꓛꓳ ꓠꓬꓲ꓾ ꓕꓱ ꓡꓱ ꓡꓱꓸ ꓗꓷˍ ꓟ ꓠꓬ ꓪꓴ-ꓢ ꓐꓯ ꓞꓷꓹ ꓔ ꓟ ꓡꓰ ꓐꓰ ꓥ ꓡꓳ꓿ 9 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓽ ꓢꓲ ꓔ ꓟ ꓞꓳ ꓫꓵꓽˍ ꓐꓰ꓾ ꓪ ꓔꓲ ꓕꓲ ꓫꓵꓽ ꓟ ꓔꓲ ꓒ ꓐꓴˍ ꓐꓰ꓾ ꓢꓲ ꓚꓰꓸ ꓔ ꓟ ꓡꓽ ꓞꓳ ꓕꓲ ꓫꓵꓽ ꓥ ꓡꓳ꓿ ꓖꓳ ꓡꓱ ꓢꓲ ꓠꓴ ꓪꓽ ꓠꓬ ꓪꓴ-ꓢ ꓬꓲ ꓚꓲ ꓛꓬ ꓑ ꓫꓬꓼ ꓥ ꓠꓬꓲ꓾ ꓠꓯ ꓞꓲꓹ ꓟ ꓗꓪ ꓐꓰ ꓠꓴ ꓪꓽ ꓔꓯ ꓘꓴꓻ ꓓꓳ ꓡ ꓢꓲ꓾ ꓓꓵꓽ ꓙꓽ ꓟꓶˍ ꓟ ꓬꓲ ꓠꓬꓲ ꓟꓳꓻ ꓓꓴ ꓗꓪ ꓓꓵꓽ ꓡꓰ ꓝꓲ ꓢꓴ꓾ ꓬꓲ ꓙꓲꓻ ꓓꓰˍ ꓟ ꓔꓯ ꓚ ꓟꓸ ꓖꓶ ꓠꓹ ꓟ ꓥ ꓡꓳ꓿ 10 ꓧꓶꓸ ꓕꓯ ꓠꓴ ꓪꓽ ꓠꓬ ꓑ ꓫꓬꓼ ꓟꓽ ꓥ ꓟꓲ꓾ ꓮ ꓟꓶ ꓠꓽ ꓪꓴ-ꓢ ꓬꓲ ꓑ ꓫꓬꓼ ꓥ ꓡꓳ꓿ ꓧꓶꓸ ꓕꓯ ꓫꓱꓸ ꓤˍ ꓟ ꓟꓽ ꓟꓶˍ ꓟꓲ꓾ ꓮ ꓟꓶ ꓠꓽ ꓫꓱꓸ ꓤˍ ꓟ ꓟꓶ ꓗꓷꓳ꓿ 11 ꓖꓳ ꓡꓱ ꓠꓬꓲ ꓠꓲꓹ ꓠꓵ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓟꓲ ꓠꓯ ꓕꓱ ꓟ ꓗꓪ ꓞꓳ ꓬꓯꓼˍ ꓐꓰ ꓓꓴꓻ ꓓꓳ ꓢꓴˍ ꓡꓰ ꓐꓰ ꓗꓹ ꓠꓬꓲ꓾ ꓶꓻ ꓟꓬˍ ꓐꓰ ꓔꓳꓹ ꓡꓯꓽ ꓘꓳˍ ꓟ ꓧꓪꓽ ꓖꓳ ꓓꓱ ꓦꓯꓸ ꓠꓲꓹ ꓙꓵꓽˍ ꓟ ꓔꓯ ꓚꓲꓸ ꓠꓹ ꓟ꓾ ꓥꓪ ꓠꓬ ꓠꓴ ꓪꓽ ꓔꓯ ꓘꓶꓸ ꓖꓶ ꓠꓲꓹ ꓫꓵˍ ꓡꓳ꓿ 12 ꓠꓴ ꓪꓽ ꓠꓬ ꓟꓽ ꓙꓵꓻ ꓢꓴ ꓐꓴ ꓗꓳꓺ ꓡꓳ ꓗꓪ ꓔꓬ ꓥ ꓟꓲ ꓙꓲˍ ꓟ ꓠꓯꓸꓼ ꓗꓪ ꓞꓳ ꓙꓳ ꓢꓲ꓾ ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓟꓽ ꓙꓲ ꓟ ꓬꓰ ꓢꓴ ꓥ ꓡꓳ꓾ ꓐꓰ ꓮ ꓡꓲ ꓕꓲ ꓫꓵꓽ ꓗꓪ ꓓꓰꓺ ꓡ ꓥ ꓟꓲ꓾ ꓬꓲ ꓖꓳ ꓕꓲ ꓫꓵꓽ ꓗꓪ ꓬꓲ ꓪꓽ ꓠꓬ ꓠꓴ ꓪꓽ ꓙꓲˍ ꓟ ꓟꓬꓱꓽ ꓔꓯ ꓡꓳꓸ ꓟꓳ ꓢꓲ꓾ ꓐꓯ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓬꓲ ꓪꓽ ꓠꓬ ꓠꓴ ꓪꓽ ꓑꓶꓸ ꓓꓴ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓓꓴ ꓒꓬꓱꓼ ꓡ ꓝꓲ꓿ 13 ꓞꓳ ꓤ ꓡꓰ ꓔꓶ ꓔ ꓟ ꓙꓵꓽ ꓚꓱꓹ ꓮꓽ ꓙꓵ ꓔꓯ ꓠꓴ ꓪꓽ ꓠꓬ ꓪꓴ-ꓢ ꓐꓱ ꓶ ꓥ ꓟ ꓡꓰ ꓐꓰ ꓚꓬꓹ ꓢꓲ ꓒꓵꓽ ꓛꓳ꓿ ꓪ ꓔꓲ ꓠꓬ ꓮꓸ ꓓꓲꓽ ꓪꓴꓽˍ ꓟ ꓥ ꓠꓬꓲ ꓬꓲ ꓙꓵꓽˍ ꓟ ꓔꓯ ꓛꓳ꓿ 14 ꓢꓲꓽ ꓒ ꓐꓴ ꓙꓵꓽ ꓗ ꓔꓯˍ ꓟꓲ ꓒꓵꓽ ꓛꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓟꓽ ꓙꓲ ꓟ ꓬꓰ ꓢꓴ ꓔꓯ ꓟꓸ ꓙ ꓢꓲ꓾ ꓙꓲˍ ꓟ ꓬꓰ ꓢꓴ ꓔꓯ ꓫꓱꓸ ꓖꓶ ꓠꓹ ꓟ꓾ ꓪ ꓔꓲ ꓡꓰ ꓝꓲ ꓔ ꓟ ꓥ ꓡꓳ꓿ 15 ꓠꓴ ꓪꓽ ꓙꓲˍ ꓟ ꓬꓰ ꓟ ꓗꓪ ꓐꓰ ꓟꓽ ꓙꓽ ꓜꓲꓼ ꓟ ꓞꓳ ꓖꓳꓽ ꓐꓴ ꓡꓰ ꓮꓸ ꓫꓵ ꓐꓯ ꓓꓴ ꓟꓽ ꓙꓳ ꓗꓷ ꓡꓰ ꓝꓲ ꓠꓹ ꓟ ꓕꓱ ꓟ ꓠꓬ꓾ ꓪꓴ-ꓢ ꓠꓲꓹ ꓡꓶꓽ ꓥ ꓡꓳ꓿ 16 ꓠꓴ ꓪꓽ ꓠꓬ ꓚꓳ ꓪꓴꓸ ꓥ ꓠꓬꓲ꓾ ꓚꓳ ꓪꓴꓸˍ ꓡꓰ ꓐꓰ ꓞꓳ ꓙꓳ꓿ ꓖꓳ ꓡꓱ ꓥ ꓟꓲ ꓚꓳ ꓪꓴꓸ ꓙꓵꓽ ꓪ ꓕꓱ ꓟ ꓡꓰ ꓟꓽ ꓙꓲ ꓟ ꓔꓯ ꓑꓲꓸ ꓓꓴ ꓟꓽ ꓬꓰ ꓬꓰ꓾ ꓪꓴ-ꓢ ꓚꓳ ꓑꓸ ꓐꓴˍ ꓡꓰ ꓐꓰ ꓬꓰ꓿ 17 ꓞꓳ ꓤ ꓮꓽ ꓙꓵ ꓔꓯ ꓒꓵꓽ꓿ ꓘꓴ ꓜꓲ ꓞꓳ ꓗꓪ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠꓲꓹ ꓠꓵ꓿ ꓪꓴ-ꓢ ꓔꓯ ꓙꓳꓺ ꓒꓵꓽ꓿ ꓪ ꓔꓲ ꓔꓯ ꓞꓳ ꓒꓵꓽ꓿ 18 ꓣꓱꓽ ꓙ ꓢꓴ ꓐꓴꓳ꓾ ꓮꓸ ꓫꓵ ꓗꓪˍ ꓟꓲ ꓠꓴ ꓪꓽ ꓢꓲ ꓒꓽ ꓐꓴ ꓙꓵꓽˍ ꓟ ꓔꓯ ꓞꓳ ꓒꓵꓽ ꓒꓵˍ ꓡꓰ ꓛꓳ꓿ ꓙꓲˍ ꓟ ꓐꓰ ꓠꓴꓽˍ ꓟ ꓙꓵꓽ ꓢꓴ ꓢꓲ ꓒꓽ ꓔꓯˍ ꓡꓰ ꓟꓽ ꓞꓲ꓾ ꓠꓲꓹ ꓟ ꓟꓽ ꓙꓲˍ ꓟ ꓢꓲ ꓒꓽ ꓔꓯˍ ꓟꓲ ꓒꓵꓽ꓿ 19 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓯꓸꓼ ꓗꓪ ꓣꓳ ꓦꓰꓽ ꓠꓲꓹ ꓡꓰ ꓚꓲ ꓛꓬ ꓔꓯ ꓕꓼ ꓓꓴ ꓟꓽ ꓙꓳˍ ꓕꓯ ꓠꓽ꓾ ꓮꓽ ꓔꓳ ꓔꓳ ꓠꓲꓹ ꓫꓸ ꓟꓬ ꓫꓸ ꓜꓲꓽ ꓠ ꓗꓷ ꓡꓰˍ ꓟꓲ ꓮꓸ ꓫꓵ ꓟꓽ ꓛꓵ꓿ ꓕꓱ ꓟ ꓠꓬ ꓪꓴ-ꓢ ꓠꓲꓹ ꓒꓴˍ ꓟ ꓥ ꓡꓳ꓿ 20 ꓠꓴ ꓪꓽ ꓝꓴꓲ ꓬꓰˍ ꓟ ꓑꓶꓸ ꓓꓴ ꓓꓶꓽ ꓟꓶˍ ꓟ ꓔꓯ ꓜꓲꓽ ꓔ ꓠꓬ ꓮꓸ ꓫꓵ ꓙꓲ ꓖꓴ ꓙꓳ ꓢꓰ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓙꓲˍ ꓟ ꓬꓰˍ ꓟ ꓗꓪ ꓐꓰ ꓫꓸ ꓙꓵ ꓢꓲ ꓜꓲꓽ ꓪˍ ꓕꓯ ꓠꓽ ꓪꓴ-ꓢ ꓠꓲꓹ ꓒꓴˍ ꓡꓳ꓿ 21 ꓠꓴ ꓪꓽ ꓔꓯ ꓘꓴˍ ꓟ ꓠꓬ ꓕꓱ ꓟ ꓑꓶꓸ ꓓꓴ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓙꓲ-ꓢꓴˍ ꓟꓲ ꓠꓴ ꓪꓽ ꓐꓱ ꓶ ꓫꓸ ꓙꓵ ꓢꓲ꓾ ꓠꓴ ꓪꓽ ꓠꓬ ꓬꓲ ꓛꓲ ꓓꓴ ꓗꓪ ꓛꓳ ꓫꓱꓽ ꓠꓹ ꓟ꓾ ꓠꓴ ꓪꓽ ꓐꓱ ꓶ ꓔꓯꓺ ꓢꓳ ꓓꓴ ꓗꓶ ꓔ ꓬꓰˍ ꓡꓳ꓿ 22 ꓬꓲ ꓠꓬ ꓮꓸ ꓫꓵ ꓝꓴꓲ ꓟꓽ ꓬꓰ ꓠꓬꓲ꓿ ꓗꓶꓸˍ ꓟꓲ ꓟꓽ ꓗꓶꓸ ꓠꓬꓲ꓿ 23 ꓬꓲ ꓔꓯ ꓢꓴ ꓡꓰ ꓤꓲˍ ꓕꓯ ꓬꓲ ꓟꓽ ꓤꓲ ꓡꓲꓸ ꓖꓶ꓿ ꓬꓲ ꓫꓸ ꓙꓵꓻˍ ꓕꓯ ꓢꓴ ꓔꓯ ꓟꓽ ꓚꓳꓹ ꓚꓳꓹ꓾ ꓔꓱꓹ ꓜꓳꓽˍ ꓟ ꓡꓰ ꓐꓯ ꓟꓴ ꓘꓶꓽ ꓢꓴ ꓪꓴ-ꓢ ꓡꓯꓼ ꓒꓯꓹ ꓗꓪ ꓚꓲ ꓛꓬ ꓔꓯ ꓡꓯꓼ ꓙꓱ ꓗꓷˍ ꓡꓳ꓿ 24 ꓣꓳꓽ ꓠꓬ ꓝꓴꓲ ꓔꓯꓸ ꓟꓳꓸ ꓫꓵꓻ ꓞ ꓢꓲ꓾ ꓔꓱꓹ ꓜꓳꓽˍ ꓟ ꓠꓯS ꓗꓪ ꓢꓯꓸ ꓔꓬ ꓐ ꓡ ꓠꓹ ꓟ꓾ ꓬꓲ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓣꓳ ꓝꓴꓲ ꓟꓯꓻ ꓙ ꓗꓷꓳ꓿ ꓖꓳ ꓡꓱ ꓢꓲ ꓬꓲ ꓔꓯ ꓓꓶꓽ ꓐꓴꓻ ꓙꓵꓽ ꓡꓰˍ ꓟ ꓗꓪ ꓐꓰ ꓠꓴ ꓪꓽ ꓓꓻ ꓡꓰꓳ꓿ 25 ꓮ ꓡꓲꓳ ꓐꓯ ꓠꓬ ꓧꓶꓸ ꓕꓯ ꓠꓴ ꓪꓽ ꓠꓽ ꓥꓳꓽ ꓙꓰ ꓔꓬ ꓟ ꓮ ꓣꓳˍ ꓡꓰ ꓐꓰ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓠꓽ ꓠꓴ ꓪꓽ ꓞꓳ ꓦ ꓔꓯ ꓡꓳꓸ ꓙ ꓢꓴˍ ꓐꓰ ꓔ ꓙ ꓢꓴ ꓮ ꓣꓳ ꓡꓳꓸ ꓒꓽ ꓔꓯ ꓬꓲꓼ ꓡꓺꓳ꓿

1 ꓒꓲ-ꓕꓱ 3

1 - 2 ꓤ ꓟꓶꓻ ꓣꓱꓽ ꓢꓴ ꓐꓴ ꓠꓴ ꓪꓽˍ ꓟꓲ ꓚꓲ ꓛꓬ ꓤꓽ ꓖꓴ ꓙꓵꓽˍ ꓟ ꓔꓯ ꓛꓳ꓿ ꓖꓳ ꓡꓱ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓟꓽ ꓒꓵꓽ ꓛꓳˍ ꓟ ꓤꓽ ꓖꓴ ꓙꓳ ꓐꓷˍ ꓟꓲ꓾ ꓬꓲ ꓤ ꓟꓶꓻ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓲ ꓙꓲˍ ꓟ ꓐꓰ ꓢꓲꓽ ꓫꓬˍ ꓟ ꓗꓪ ꓞꓳ ꓙꓳˍ ꓟ ꓟꓳꓻ ꓗꓷ ꓠꓬ꓾ ꓤꓽ ꓖꓴ ꓔꓯ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓝꓲ ꓐ ꓡ ꓥꓳ꓿ 3 ꓠꓴ ꓪꓽ ꓐꓲꓻ ꓓꓴ ꓠꓬ ꓞꓳ ꓤ ꓡꓰ ꓟꓳ ꓓꓻˍ ꓟ꓾ ꓠꓴ ꓪꓽ ꓪꓴꓸ ꓓꓵ ꓗꓪ ꓪꓴꓸ ꓒꓬꓱꓽ ꓒꓬꓱꓽˍ ꓟ꓾ ꓫꓵꓺˍ ꓐꓰ ꓒꓵꓽ ꓡꓳ ꓬꓲ ꓫꓵꓽ ꓬꓲ ꓙꓰ ꓓꓱꓼˍ ꓟ ꓐꓰ꓾ ꓒꓵꓽ ꓘꓹ ꓟ ꓐꓵꓺ ꓞꓶ ꓖꓪˍ ꓟ ꓡꓰ ꓟꓽ ꓬꓰ ꓬꓰ꓾ 4 ꓠꓲꓹ ꓟ ꓠꓯꓸꓼ ꓗꓪ ꓐꓬ ꓡꓰ ꓟꓽ ꓓ ꓟ꓾ ꓠꓴꓽˍ ꓟ ꓐꓰ ꓢꓲ ꓡꓲ ꓟ ꓠꓲꓹ ꓟ ꓡꓰ ꓐꓲꓻ ꓓꓴ ꓬꓰ꓿ ꓕꓱ ꓟ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓮꓸ ꓓꓲꓽ ꓒꓵꓽ ꓘꓹ ꓟ ꓥ ꓡꓳ꓿ 5 ꓮ ꓡꓲꓳ ꓐꓯ ꓠꓬ ꓮꓽ ꓠꓱ ꓕꓯ꓾ ꓪꓴ-ꓢ ꓔꓯ ꓦ ꓡꓱ ꓢꓲ ꓬꓲ ꓐꓱ ꓶ ꓚꓰꓸ ꓔ ꓟ ꓤ ꓟꓶ ꓤ ꓐꓴˍ ꓟꓲ ꓚꓲ ꓛꓬ ꓤ ꓖꓴꓻ ꓙꓵꓽˍ ꓟ ꓔꓯ ꓒꓵꓽ ꓛꓳˍ ꓟ ꓡꓰ ꓬꓲ ꓕꓱ ꓡꓱ ꓐꓲꓻ ꓓꓴ ꓬꓰ ꓠꓬꓲꓳ꓿ 6 ꓢ-ꓣˍ ꓡꓰ ꓐꓰ ꓬꓰ꓿ ꓬꓲ ꓠꓬ ꓮ-ꓐ-ꓡ-ꓦ ꓔꓯ ꓒꓵꓽ ꓛꓳ ꓢꓲ ꓬꓲ ꓔꓯ꓾ ꓢꓲ ꓒꓽ꓾ ꓐꓰ ꓘꓴˍ ꓡꓳ꓿ ꓠꓴ ꓪꓽˍ ꓟꓲ ꓠꓲꓹ ꓪꓴꓽ ꓪꓴ ꓡꓰ ꓙꓲˍ ꓟ ꓬꓰˍ ꓕꓯ ꓠꓽ꓾ ꓠꓴ ꓪꓽ ꓠꓬ ꓢ-ꓣ ꓬꓲ ꓮꓸ ꓟꓲꓽ ꓐꓴ ꓥ ꓡꓳ꓿ 7 ꓖꓳ ꓟ ꓡꓰ ꓐꓰ ꓠꓴ ꓪꓽ ꓤ ꓖꓴꓻ ꓣꓱꓽ ꓢꓴ ꓐꓴˍ ꓟꓲ꓾ ꓠꓴ ꓪꓽ ꓪꓽ ꓘꓴˍ ꓟ ꓗꓪ ꓗꓽ ꓔ ꓓꓴ ꓟꓽ ꓙꓳ ꓠꓹ ꓟ꓾ ꓠꓴ ꓪꓽ ꓤ ꓟꓶꓻ ꓐꓴ ꓔꓯ ꓠꓲꓹ ꓟ ꓙꓲꓻ ꓡꓯꓽ ꓘꓳˍ ꓟ ꓗꓪ ꓞꓳꓻ ꓙꓳ꓿ ꓤ ꓟꓶ ꓤ ꓠꓬ ꓠꓴ ꓢꓶꓸ ꓟꓽ ꓞꓲ ꓢꓯꓼ ꓐꓽˍ ꓟ ꓥ ꓟꓲ꓾ ꓠꓴˍ ꓐꓰ ꓕꓲꓽ ꓡꓰꓹꓼ ꓢꓯꓼ ꓟꓬ ꓣꓱꓽ ꓛꓰ ꓟꓶ ꓢꓴ ꓥ ꓠꓬꓲ ꓬꓲ ꓔꓯ ꓒꓵꓽ ꓠꓯꓹ ꓡꓳ꓿ 8 ꓡꓳꓹ ꓬꓰ ꓟ ꓕꓲ ꓘꓶꓽ ꓠꓬ꓾ ꓠꓴ ꓪꓽ ꓮꓽ ꓙꓵ ꓕꓲꓽ ꓠꓲꓹ ꓟˍ ꓡꓰꓽ ꓬꓰ꓿ ꓠꓲꓹ ꓟ ꓠꓻ ꓡꓯꓽ ꓘꓳ꓿ ꓮ ꓬꓲꓼ ꓠꓬꓲ ꓤ ꓡꓰ ꓐꓰ ꓠꓲꓹ ꓠꓵ ꓡꓯꓽ ꓘꓳ꓿ ꓙ ꓣꓳꓽˍ ꓟ ꓠꓲꓹ ꓟ ꓡꓰ ꓙꓽ ꓗꓳ ꓡꓯꓽ ꓘꓳ꓿ 9 ꓟꓽ ꓙꓲꓻ ꓟ ꓔꓯ ꓟꓽ ꓙꓲ ꓟ ꓕꓽ ꓚꓱꓹ ꓖꓶ꓿ ꓤꓲ ꓢꓴ ꓔꓯ ꓟꓽ ꓤꓲ ꓡꓲꓸ ꓖꓶ ꓖꓶ ꓶꓼ ꓥꓳꓽ ꓙꓱꓽ ꓖꓶ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓠꓽ ꓶꓼ ꓤ ꓫꓱꓹ ꓤ ꓟꓶꓻ ꓝꓲ ꓠꓹ ꓟ꓾ ꓕꓱ ꓡꓱ ꓬꓰ ꓝꓲˍ ꓐꓰ ꓘꓴ ꓔ ꓟ ꓥ ꓡꓳ꓿ 10 ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓢꓯꓼ ꓟꓬ ꓔꓯ ꓠꓲꓹ ꓠꓵ ꓢꓲ꓾ ꓙꓲˍ ꓟ ꓦꓬꓼ ꓠꓬꓲ ꓟꓶ ꓠꓲꓹ ꓫꓵ ꓢꓴ ꓠꓬ꓾ ꓟꓽ ꓙꓲˍ ꓟ ꓫꓸ ꓕꓱˍ ꓟ ꓐꓰ ꓗꓶꓸˍ ꓟ ꓔꓯ ꓠꓽ ꓗꓷ ꓢꓲ꓾ 11 ꓟꓽ ꓙꓲ ꓟ ꓔꓯ ꓧꓹ ꓗꓷ ꓢꓲ ꓠꓬꓲ ꓙꓲˍ ꓟ ꓬꓰ ꓠꓯꓹ ꓡꓳ꓿ ꓬꓲ ꓠꓬ ꓢꓲ ꓡꓲ ꓟ ꓧꓪ ꓢꓲ ꓖꓳ ꓟ ꓔꓯ ꓖꓼ ꓙꓰ ꓠꓯꓹ ꓡꓳ꓿ 12 ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓟꓬ ꓢꓶꓽ ꓠꓬ ꓔꓱꓹ ꓜꓳꓽ ꓢꓴ ꓔꓯ ꓡꓳꓸ ꓔꓬ ꓢꓲ꓾ ꓬꓲ ꓠꓸ ꓑꓳ ꓠꓬ ꓬꓲ ꓪꓽ ꓶꓼ ꓓꓰꓽˍ ꓟ ꓔꓯ ꓠ ꓠꓹ ꓡꓳ꓿ ꓖꓳ ꓡꓱ ꓥ ꓟꓲ ꓥꓶˍ ꓟ ꓬꓰ ꓢꓴ ꓔꓯꓸ ꓟꓳꓸ ꓠꓽ ꓢꓲ ꓒꓽ ꓒꓬꓱꓽ ꓒꓳꓹ ꓡꓰˍ ꓡꓳ꓾ ꓐꓰ ꓐꓳ ꓔ ꓡꓳ꓿ 13 ꓠꓴ ꓪꓽ ꓙꓲˍ ꓟ ꓬꓰˍ ꓟ ꓗꓪ ꓠꓲꓹ ꓟ ꓡꓱꓻˍ ꓕꓯ ꓠꓽ꓾ ꓮꓽ ꓟ ꓡꓰ ꓠꓴ ꓪꓽ ꓔꓯ ꓥꓶˍ ꓟ ꓬꓰ ꓖꓶꓽ ꓡ ꓥꓳ ꓪ? 14 ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓔꓱꓹ ꓜꓳˍ ꓟ ꓬꓰˍ ꓟ ꓑꓶꓸ ꓓꓴ ꓫꓸ ꓙꓵꓻ ꓠ ꓗꓷ ꓡꓰ ꓐꓷˍ ꓟꓲ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ ꓢꓴ ꓚꓳꓹ ꓖꓶꓽ ꓡ ꓟ ꓔꓯ ꓕꓽ ꓙꓳ꓿ ꓙꓽˍ ꓟꓲ ꓕꓽ ꓙꓽ ꓫꓸ꓿ 15 ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓲꓹ ꓟ ꓗꓪ ꓙꓲ-ꓢꓴ ꓔꓯ ꓢꓲ ꓒꓽ ꓬꓰ ꓝꓲ ꓠꓹ ꓟ ꓢꓲ ꓣꓴ ꓢꓲ ꓮ ꓕꓯꓽˍ ꓟꓲ ꓬꓲ ꓔꓯ ꓒꓵꓽ꓿ ꓠꓴ ꓪꓽ ꓠꓲꓹ ꓟ ꓗꓪ ꓥꓳ ꓡꓳꓸˍ ꓟ ꓔꓯ ꓠ ꓠꓬꓲ ꓡ ꓢꓴ ꓙꓳˍ ꓠꓬ꓾ ꓮ ꓕꓯꓽˍ ꓟꓲ ꓙ ꓣꓳˍ ꓟ ꓐꓰ꓾ ꓙꓳꓺ ꓒꓵꓽˍ ꓟ ꓠꓲꓹ ꓟ ꓡꓰ ꓮꓽ ꓙꓵ ꓢꓴ ꓔꓯ ꓒꓳꓹ ꓖꓶ ꓐ ꓡ ꓠꓹ ꓟ ꓙꓽ ꓖꓶ ꓔ꓿ 16 ꓙꓲ-ꓢꓴ ꓠꓯꓸꓼ ꓗꓪ ꓠꓴ ꓪꓽ ꓙꓲˍ ꓟ ꓞꓳ ꓙꓳˍ ꓟ ꓔꓯ ꓮꓽ ꓔꓳ ꓪꓻ ꓕꓱ ꓢꓲ꓾ ꓝꓯꓼ ꓡꓯꓼ ꓢꓴ ꓔꓯ ꓫꓸ ꓔꓳ ꓡꓰ ꓝꓲ ꓠꓹ ꓟ꓾ ꓠꓴ ꓪꓽ ꓠꓬ ꓮꓸ ꓫꓵ ꓗꓪˍ ꓟꓲ ꓙꓲˍ ꓟ ꓦꓰꓽ ꓠꓲꓹ ꓙꓳ ꓠꓯꓹ ꓡꓳ꓿ 17 ꓠꓴ ꓪꓽ ꓙꓲˍ ꓟ ꓬꓰˍ ꓟ ꓑꓶꓸ ꓓꓴ ꓫꓸ ꓙꓵꓻ ꓠꓹ ꓟ ꓪꓴ-ꓢ ꓠꓲꓹ ꓡꓶꓽ ꓥ ꓕꓯ ꓠꓽ꓾ ꓟꓽ ꓙꓲꓻ ꓟ ꓬꓰˍ ꓟ ꓑꓶꓸ ꓓꓴ ꓫꓸ ꓙꓵˍ ꓟ ꓕꓯꓽ ꓢꓲ ꓙꓲˍ ꓡꓳ꓿ 18 ꓮ ꓡꓲꓳ ꓐꓯ ꓠꓬ ꓔꓱꓹ ꓜꓳꓽˍ ꓟ ꓙꓲ-ꓢꓴˍ ꓟꓲ꓾ ꓣꓳꓽ ꓝꓴꓲ ꓙꓳ ꓢꓴ ꓐꓴ ꓔꓯ ꓪꓴ-ꓢ ꓟꓲꓽ ꓙꓬꓽ ꓗꓪ ꓧꓳ ꓛꓲ ꓬꓰ ꓝꓲ ꓠꓹ ꓟ꓾ ꓣꓳꓽ ꓟꓽ ꓔꓱꓹ ꓟꓽ ꓜꓳꓽ ꓢꓴ ꓝꓴꓲ ꓑꓶꓸ ꓓꓴ ꓬꓲ ꓕꓲꓽ ꓧꓪꓹˍ ꓡꓰꓽ ꓫꓵꓻꓳ꓿ ꓬꓲ ꓔꓯ ꓠꓬ ꓧꓪꓽ ꓖꓳ ꓓꓱ ꓗꓪ ꓢꓰꓼ ꓗꓷ ꓟ ꓥ ꓢꓲ꓾ ꓦ ꓗꓪ ꓐꓰ ꓢꓯꓸ ꓡ ꓝꓲꓳ꓿ 19 ꓬꓲ ꓠꓬ ꓦꓻ ꓖꓳ ꓓꓱ ꓕꓱ ꓟ ꓗꓪ ꓐꓰ꓾ ꓐꓱꓻ ꓓꓴꓽ ꓗꓪ ꓔꓬ ꓟ ꓦꓻ ꓔꓯ ꓟꓸ ꓟꓲ ꓚ ꓖꓶꓽ ꓗꓷꓳ꓿ 20 ꓬꓲ ꓪꓽ ꓠꓬ ꓧꓶꓸ ꓕꓯ ꓠꓳ-ꓪ ꓦꓬꓼ ꓠꓬꓲ ꓗꓪ ꓦꓲ ꓡꓲ ꓓꓽ ꓟ ꓫꓬꓹ ꓕꓯ꓾ ꓪꓴ-ꓢ ꓠꓲꓹ ꓟ ꓦꓲꓺ ꓖꓶ ꓢꓲ ꓡꓳ ꓠꓬꓹ ꓔꓬ ꓕꓯ꓾ ꓪꓴ-ꓢ ꓔꓯ ꓟꓽ ꓠ ꓡꓳꓹ ꓢꓴ ꓖꓳ ꓕꓲ ꓧꓳꓽ ꓟ ꓦ ꓥ ꓡꓳ꓿ ꓦꓲ ꓡꓲ ꓓꓽ ꓟ ꓠꓯꓸꓼ ꓗꓪ ꓬꓲꓻ ꓙꓬ ꓗꓪ ꓐꓰ ꓚꓬꓴ ꓟꓶ ꓢꓴ ꓠꓬ ꓮꓽ ꓟꓬꓹ ꓟꓽ ꓙꓳ꓾ ꓦꓰꓼ ꓣꓳˍ ꓡꓰꓽ ꓙꓳˍ ꓡꓳ꓿ 21 ꓬꓲꓻ ꓙꓬ ꓕꓱ ꓟ ꓠꓬ ꓖꓳ ꓓꓱ ꓔꓲꓹ ꓟ ꓔꓯ ꓔꓯ ꓬꓯꓼ ꓢꓲ꓾ ꓖꓳ ꓓꓱ ꓔꓲꓹ ꓟ ꓕꓱ ꓟ ꓡꓰ ꓮ ꓟꓶ ꓠꓴ ꓪꓽ ꓔꓯˍ ꓟꓲ ꓚꓬꓴ ꓟꓶꓻ ꓡꓰ ꓝꓲˍ ꓡꓳ꓿ ꓕꓱ ꓟ ꓠꓬ ꓧꓪꓽ ꓖꓳ ꓓꓱ ꓗꓪ ꓟꓽ ꓫꓬꓻ ꓟ ꓞꓲꓽ ꓦ ꓗꓷˍ ꓟ ꓗꓪ ꓐꓰ ꓟꓽ ꓥ꓿ ꓬꓰ-ꓢꓴ ꓙꓲ-ꓢꓴ ꓢꓯꓸ ꓬꓲꓼ ꓡ ꓟ ꓗꓪ ꓐꓰ꓾ ꓪꓴ-ꓢ ꓔꓯ ꓟꓳꓸ ꓙꓲˍ ꓟ ꓦꓰꓽ ꓠꓲꓹ ꓙꓳ ꓠꓹ ꓟ ꓐꓯ ꓞꓷꓹ ꓟ ꓗꓪ ꓐꓰ ꓥ ꓡꓳ꓿ 22 ꓬꓰ-ꓢꓴ ꓠꓬ ꓟꓴꓽ ꓗꓪ ꓗꓪ ꓙꓰ ꓗꓷ ꓢꓲ꓾ ꓪꓴ-ꓢ ꓡꓯꓼ ꓙ ꓗꓪ ꓔꓬ ꓡꓳ꓿ ꓟꓴꓽ ꓗꓪ ꓝꓲ ꓓꓴ ꓐꓴˍ ꓐꓰ꓾ ꓙꓵꓽ ꓪ ꓙꓳ ꓢꓴ ꓐꓴˍ ꓐꓰ ꓪꓽ ꓠꓬꓲ ꓢꓴ ꓐꓴˍ ꓟꓲ ꓬꓲ ꓙꓵꓽˍ ꓟ ꓔꓯ ꓛꓳˍ ꓡꓳ꓿

1 ꓒꓲ-ꓕꓱ 4

1 ꓙꓲ-ꓢꓴ ꓠꓬ ꓣꓳ ꓐꓱ ꓶ ꓧꓪꓽ ꓖꓳ ꓓꓱ ꓗꓪ ꓫꓸ ꓙꓵ ꓗꓷ ꓟ ꓔꓯ ꓓꓵꓽ ꓙꓽ ꓛꓲ ꓡ ꓝꓲ ꓢꓲ꓾ ꓠꓴ ꓪꓽˍ ꓟꓲ ꓫꓸ ꓙꓵꓻˍ ꓟ ꓗꓪ ꓠꓴ ꓪꓽ ꓠꓲꓹ ꓟ ꓔꓯ ꓢꓯꓼ ꓙꓳꓻ ꓡ ꓝꓲ꓿ ꓮ ꓡꓲꓳ ꓐꓯ ꓠꓬ ꓧꓪꓽ ꓖꓳ ꓓꓱ ꓗꓪ ꓫꓸ ꓙꓵ ꓔꓬ ꓢꓴ ꓬꓲ ꓠꓬ ꓝꓴꓲ ꓬꓰˍ ꓟ ꓠꓽ ꓗꓷꓳ꓿ 2 ꓖꓳ ꓡꓱ ꓠꓬꓲ ꓧꓪꓽ ꓖꓳ ꓓꓱꓽ ꓗꓪ ꓜꓰꓻ ꓞꓹ ꓟ ꓦꓬꓼ ꓠꓬꓲ ꓗꓳꓸ ꓔꓬ ꓢꓴ ꓠꓬ꓾ ꓞꓳ ꓤ ꓦꓯꓸ ꓠꓲꓹ ꓙꓵꓽˍ ꓟ ꓔꓯ ꓟꓽ ꓛꓳ ꓛꓳ꓾ ꓪꓴ-ꓢ ꓠꓲꓹ ꓡꓶꓽ ꓛꓳˍ ꓥꓳ꓿ 3 ꓮ ꓡꓲꓳ ꓐꓯ ꓠꓬ ꓗꓳꓸ ꓗꓷ ꓟ ꓦꓬꓼ ꓠꓬꓲ ꓗꓪ ꓠꓴ ꓪꓽ ꓠꓬ ꓟꓽ ꓙꓵꓻ ꓢꓴ ꓬꓰˍ ꓟ ꓡꓰ ꓐꓰ꓾ ꓦꓯꓸ ꓠꓲꓹ ꓙꓵꓽˍ ꓟ꓾ ꓖꓼ ꓟꓽ ꓔꓱꓹ ꓔꓱꓹꓼ ꓬꓰˍ ꓟ꓾ ꓙꓲ ꓒꓶꓽ ꓬꓲꓼˍ ꓟ꓾ ꓡꓷꓻ ꓖꓪ ꓡꓶꓽˍ ꓟ꓾ ꓙꓵꓻ ꓪꓵꓻ ꓙꓵꓻ ꓓꓷꓼˍ ꓟ ꓐꓰ꓾ ꓠꓲꓽ ꓖꓴ ꓠꓲꓽ ꓪꓵꓼ ꓠꓬꓲ ꓬꓰˍ ꓟ ꓠꓬ ꓡꓳꓼ ꓡꓰꓳ꓿ 4 ꓮ ꓟꓶ ꓠꓴ ꓪꓽ ꓠꓬ ꓕꓱ ꓟꓬ ꓫꓵꓽ ꓗꓪ ꓬꓲ ꓪꓽ ꓔꓯ ꓟꓽ ꓛꓳ ꓔꓬ ꓠꓬꓲ꓾ ꓟꓽ ꓙꓵꓻ ꓢꓴ ꓐꓴ ꓠꓽ ꓓꓵꓽ ꓙꓽ ꓟꓶ ꓢꓲ ꓠꓴ ꓪꓽ ꓔꓯ ꓒꓬꓹˍ ꓡꓳ꓿ 5 ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓽ ꓢꓯꓸ ꓔꓬ ꓢꓴˍ ꓐꓰ꓾ ꓫꓵꓻ ꓢꓴ ꓔꓯ ꓐꓯ ꓟꓴ ꓘꓶꓽˍ ꓐꓰ ꓙꓽ ꓖꓶ ꓔ ꓢꓴ ꓟꓲꓽ ꓙꓬ ꓗꓪ ꓶꓻ ꓡꓯꓼ ꓢꓪ' ꓠ ꓗꓹ ꓥꓳ꓿ 6 ꓕꓱ ꓟ ꓑꓶꓸ ꓓꓴ꓾ ꓶꓼ ꓓꓳ ꓫꓱꓹ ꓓꓳ ꓠꓬ ꓫꓵꓻ ꓢꓴ ꓐꓴ ꓔꓯˍ ꓟꓲ ꓧꓶ ꓕꓯˍ ꓡꓰ ꓚ ꓟꓸ ꓖꓶꓽ ꓗꓷꓳ꓿ ꓕꓱ ꓟ ꓠꓬ ꓬꓲ ꓪꓽ ꓔꓯˍ ꓟꓲ ꓧꓪꓽ ꓖꓳ ꓓꓱꓽ ꓚꓱꓹ ꓗꓪ ꓠꓬ ꓠꓱꓸ ꓐꓯꓼ ꓢꓴ ꓔꓯˍ ꓡꓰ ꓐꓰ ꓐꓯ ꓟꓴ ꓘꓶꓽ ꓟꓶ ꓢꓲ꓾ ꓦ ꓚꓱꓹ ꓗꓪ ꓠꓬ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓢꓯꓸ ꓔꓬ ꓠꓹ ꓟ ꓥ ꓡꓳ꓿ 7 ꓙꓳˍ ꓟ ꓥ ꓕ ꓑꓳꓸ ꓬꓲ ꓡꓳꓹ ꓬꓰ ꓝꓲꓸ ꓠꓶꓽ ꓡꓺꓳ꓿ ꓖꓳ ꓡꓱ ꓠꓬꓲ ꓠꓴ ꓪꓽ ꓠꓬ ꓪꓽ ꓘꓴ ꓠꓹ ꓟ꓾ ꓠꓲꓹ ꓟ ꓧꓪꓸ ꓛꓲꓽ ꓐꓰ ꓔꓬ ꓢꓲ ꓞꓳ ꓢꓲꓽ ꓬꓰ꓿ 8 ꓮꓽ ꓙꓵ ꓕꓯꓽ ꓢꓲ ꓒꓵꓽˍ ꓟ ꓕꓲꓽ ꓫꓵ ꓠꓬ ꓕꓲꓽ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ ꓠꓲꓹ ꓡꓱ ꓠꓯꓹ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓵꓻ ꓠꓲꓹ ꓠꓬ ꓝꓴꓲ ꓮꓽ ꓟꓬꓹ ꓔꓯ ꓑꓲꓸ ꓡꓰ ꓘꓴˍ ꓡꓳ꓿ 9 ꓟꓽ ꓱ'ꓽ ꓠꓱꓽ ꓠꓱ ꓪꓰ ꓤ ꓔꓯ ꓘꓳ ꓣꓴ꓿ 10 ꓪꓴ-ꓢ ꓣꓱꓽ ꓛꓰ ꓬꓲ ꓫꓵꓽ ꓬꓲ ꓙꓰꓽ ꓟꓶˍ ꓟ ꓗꓪ ꓙꓲˍ ꓟ ꓦꓲ ꓙꓵꓽ ꓢꓴˍ ꓡꓰ ꓐꓰ ꓬꓰ ꓢꓲ꓾ ꓣꓱꓽ ꓛꓰ ꓡꓯꓼ ꓫꓴ ꓮ ꓡꓲ ꓟꓶˍ ꓠꓬ ꓖꓳ ꓡꓱ ꓣꓱꓽ ꓙ ꓡꓯꓽ ꓘꓳ꓿ 11 ꓟꓸ ꓟꓲ ꓚ ꓢꓴ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓛꓳ ꓢꓲ ꓚ ꓝꓲ꓿ ꓣꓱꓽ ꓙ ꓢꓴ ꓠꓬ ꓪꓴ-ꓢ ꓖꓶꓽ ꓡ ꓟ ꓢꓯꓼ ꓔꓯ ꓛꓳ ꓢꓲ ꓣꓱꓽ ꓙ ꓝꓲ꓿ ꓕꓱ ꓟ ꓠꓬ ꓮꓸ ꓫꓵ ꓗꓪˍ ꓟꓲ ꓬꓰ-ꓢꓴ ꓙꓲ-ꓢꓴ ꓑꓶꓸ ꓓꓴ ꓪꓴ-ꓢ ꓟꓬꓱ ꓓꓳꓽ ꓟꓶꓻ ꓠꓹ ꓟ ꓥ ꓡꓳ꓿ ꓟꓬꓱ ꓓꓳꓽˍ ꓐꓰ ꓙꓵꓽ ꓪ ꓠꓬ ꓕꓲꓽ ꓞꓲꓼ ꓕꓲ ꓑ ꓬꓲ ꓔꓯ ꓟ ꓥꓳ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓿ 12 ꓠꓲꓹ ꓠꓵ ꓢꓴ ꓐꓴꓳ꓾ ꓤꓹ ꓠꓬꓲ ꓓꓴ ꓡꓰ ꓮꓸ ꓔꓳꓸ ꓗꓪ ꓚꓲ ꓡ ꓟ ꓡꓰ ꓐꓰ ꓠꓴ ꓪꓽ ꓔꓯ ꓚꓲ ꓤꓹ ꓠꓬꓲ ꓡ ꓕꓯ꓾ ꓓꓵꓽ ꓙꓽ ꓟꓶ ꓓꓴ ꓕꓲ ꓫꓵꓽ ꓗꓷ ꓡꓰˍ ꓟ ꓡꓰ ꓐꓰ ꓕꓽ ꓚꓬꓹ꓿ 13 ꓠꓴ ꓪꓽ ꓠꓬ ꓙꓲ-ꓢꓴ ꓫꓸ ꓙꓵˍ ꓟ ꓔꓯ ꓑꓯꓹ ꓟꓶˍ ꓕꓯ ꓡꓯꓼ ꓫꓵ ꓗꓹ ꓛꓲꓽ ꓓꓴ ꓚꓬꓹ ꓔ꓿ ꓖꓳ ꓡꓱ ꓠꓬ ꓙꓲ-ꓢꓴ ꓟꓬꓱ ꓓꓳꓽ ꓟꓳꓸ ꓖꓶꓽ ꓡ ꓕꓯ꓾ ꓠꓴ ꓪꓽˍ ꓟꓲ ꓗꓹ ꓛꓲ ꓓꓴ ꓓꓽ ꓟ ꓟꓶˍ ꓥꓳ꓿ 14 ꓙꓲ-ꓢꓴ ꓟꓬꓱ ꓑꓶꓸ ꓓꓴ ꓢꓴ ꓡꓰ ꓠꓴ ꓪꓽ ꓔꓯ ꓤꓲ ꓡ ꓕꓯ ꓠꓽ꓾ ꓪꓴ-ꓢ ꓬꓲ ꓐꓬꓱꓼ ꓡꓱꓼ ꓟ ꓦ ꓠꓬ ꓠꓴ ꓪꓽˍ ꓐꓰ ꓔꓬ ꓠꓬꓲ ꓠꓴ ꓪꓽ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ꓿ 15 ꓖꓳ ꓡꓱ ꓢꓲ ꓠꓴ ꓪꓽ ꓗꓳꓺ ꓡꓳ ꓗꓪ꓾ ꓞꓳ ꓤ ꓢꓰꓼ ꓢꓴ꓾ ꓘꓴꓽ ꓢꓴ꓾ ꓟꓽ ꓙꓲ ꓟ ꓬꓰ ꓢꓴ꓾ ꓥ ꓠꓬ ꓢꓴ ꓫꓵꓽ ꓪꓴ ꓗꓪ ꓝꓯꓼ ꓡꓯꓼ ꓢꓴ ꓬꓰ ꓢꓲ ꓫꓸ ꓙꓵ ꓢꓴ ꓕꓲ ꓣꓳˍ ꓟꓲ ꓕꓽ ꓙꓳ ꓝꓲ꓿ 16 ꓖꓳ ꓡꓱ ꓥ ꓟꓲ ꓙꓲ-ꓢꓴ ꓢꓲ ꓤ ꓬꓰˍ ꓟ ꓑꓶꓸ ꓓꓴ ꓫꓸ ꓙꓵˍ ꓕꓯ ꓠꓽ ꓕꓽ ꓫꓸ ꓔꓳ꓿ ꓙꓲ-ꓢꓴ ꓢꓲ ꓤ ꓟꓬꓱꓺ ꓕꓱ ꓟ ꓑꓶꓸ ꓓꓴ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓯꓹ ꓢꓰꓽ ꓡꓳ꓿ 17 ꓪꓴ-ꓢ ꓐꓯ ꓟꓴ ꓘꓶꓽ ꓝꓲꓸ ꓛꓲ ꓡꓺꓳ꓿ ꓐꓯ ꓟꓴ ꓠꓬ ꓪꓴ-ꓢ ꓑ ꓫꓬꓼ ꓐꓴ ꓗꓪ ꓐꓰ ꓧꓶꓸ ꓕꓯ ꓪꓴꓸ ꓔꓴˍ ꓥꓳ꓿ ꓣꓳꓽ ꓔꓯˍ ꓐꓰ ꓧꓶ ꓕꓯ ꓪꓴꓸ ꓔꓴˍ ꓕꓯ ꓠꓽ꓾ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓔꓯ ꓟꓽ ꓠ ꓡꓳꓹ ꓢꓴ ꓐꓴ ꓔꓯ ꓠꓬ꓾ ꓮꓺ ꓘꓶꓻ ꓛꓲ ꓗꓷ ꓡꓰ ꓠꓯꓹ ꓟ ꓢꓷꓸ ꓖꓴ ꓟꓽ ꓓꓻꓳ꓿ 18ꓕꓳ ꓶ ꓗꓪ꓾ ꓔꓱꓹ ꓜꓳꓽ ꓢꓴ ꓢꓯꓼ ꓟꓬ ꓮꓽ ꓡ ꓟꓽ ꓟꓶ ꓕꓯ ꓠꓽ꓾ ꓪꓴ-ꓢ ꓔꓯ ꓟꓽ ꓒꓵ ꓢꓴˍ ꓐꓰ ꓝꓴꓲ ꓙꓳ ꓢꓴ ꓠꓬ ꓮ ꓡꓲ ꓗꓷ ꓡꓰˍ ꓥꓳ ꓪ? ꓐꓰ ꓐꓳ ꓔ ꓡꓳ꓿ 19 ꓖꓳ ꓡꓱ ꓠꓬꓲ ꓪꓴ-ꓢ ꓠꓲꓹ ꓡꓶꓽ ꓛꓳˍ ꓟ ꓗꓪ ꓐꓰ ꓫꓸ ꓙꓵ ꓟ ꓔꓳꓹ ꓜꓳꓽ ꓢꓴ ꓠꓬ꓾ ꓕꓲꓽ ꓦ ꓕꓲ ꓖꓳ ꓓꓱ ꓡꓱꓸꓼ ꓚꓰꓼ ꓢꓴ ꓢꓲ ꓒꓽ ꓔꓯ ꓡꓯꓼ ꓙꓱ ꓢꓲ꓾ ꓙꓲˍ ꓟ ꓬꓰ ꓟ ꓕꓽ ꓠꓽ ꓗꓷ ꓠꓯꓹ ꓡꓳ꓿ ꓮ ꓡꓲꓳ ꓐꓯˍ ꓠꓬ ꓪꓴ-ꓢ ꓠꓽ ꓦ ꓡꓱ ꓐꓳ ꓓˍ ꓟ ꓥ ꓡꓳ꓿

1 ꓒꓲ-ꓕꓱ 5

1 ꓖꓳ ꓡꓱ ꓠꓬꓲ ꓥꓪ ꓠꓬ ꓠꓴ ꓪꓽˍ ꓐꓰ ꓕꓲꓽ ꓡꓰꓹˍ ꓟꓬꓱꓽ ꓡꓳꓸ ꓢꓴ ꓥ ꓢꓲ꓾ ꓙꓲ-ꓢꓴ ꓫꓸ ꓙꓵˍ ꓟ ꓔꓯˍ ꓟꓲ ꓟꓳꓻ ꓠꓬꓲ ꓢꓴ ꓥ ꓢꓲ ꓠꓬꓲ꓾ ꓟꓲꓽ ꓕꓯꓽ ꓢꓲ ꓗꓪ ꓟꓳꓸ ꓖꓶꓽ ꓡ ꓠꓹ ꓟ ꓐꓬꓱꓼ ꓡꓱꓼ ꓡꓱ ꓟ ꓑꓯꓹ ꓟꓶ ꓢꓴ ꓥ ꓟ ꓡꓰ ꓐꓰ꓾ ꓠꓴ ꓪꓽ ꓗꓪ ꓟ ꓟꓬꓱꓽ ꓡꓳꓸ ꓢꓴ ꓐꓴ ꓔꓯ ꓘꓶꓸ ꓖꓶˍ ꓠꓬꓲ꓾ 2 ꓠꓴ ꓪꓽ ꓗꓳꓺ ꓡꓳ ꓗꓪ ꓟ ꓪꓴ-ꓢ ꓮ ꓣꓳ ꓜꓴ ꓔꓯ ꓡꓳꓸ ꓙ ꓦꓵꓻ ꓙ꓿ ꓠꓴ ꓪꓽ ꓠꓬ ꓟꓽ ꓓ ꓟ ꓞꓽ ꓟ ꓗꓪ ꓐꓰ ꓟꓽ ꓥ ꓥ꓾ ꓟꓽ ꓫꓬꓻ ꓟ ꓒꓴ ꓤ ꓫꓵ ꓤ ꓔꓯ ꓠꓲꓹ ꓦꓯꓸˍ ꓟ ꓗꓪ ꓐꓰˍ ꓟꓲ ꓟꓽ ꓥ ꓥ꓾ ꓪꓴ-ꓢ ꓠꓲꓹ ꓡꓶꓽ ꓛꓳ ꓢꓲ ꓠꓲꓹ ꓡꓱꓻ ꓡꓱꓻˍ ꓡꓰꓽ ꓣꓱꓽ ꓙ ꓢꓲ ꓠꓬꓲ ꓟꓬꓱꓽ ꓡꓳꓸ ꓢꓴ ꓟꓬꓱꓽ ꓬꓰ꓿ 3 ꓝꓮꓲ ꓠꓴ ꓪꓽ ꓔꓯ ꓡꓯꓼ ꓙꓱ ꓔ ꓟ ꓕꓲ ꓧꓳꓽ ꓔꓯ꓾ ꓢꓲꓽ ꓒꓽ ꓐꓴ ꓡꓰ ꓬꓰˍ ꓟ ꓡꓰ ꓐꓰ ꓙꓵꓽ ꓒꓬꓱꓽ ꓕꓽ ꓟꓳꓸ ꓖꓶ꓿ ꓠꓴ ꓪꓽ ꓚꓲ ꓛꓬ ꓠꓬ ꓮ ꓣꓳ ꓜꓴ ꓔꓯ ꓢꓳ ꓓꓴ ꓒꓬꓱꓼ ꓡ ꓝꓲ꓿ 4 ꓖꓳ ꓡꓱ ꓢꓲ ꓮ ꓣꓳ ꓡꓳꓸ ꓒ ꓓꓽ ꓟ ꓡ ꓕꓯ꓾ ꓠꓴ ꓪꓽ ꓠ ꓧꓳꓽ ꓬꓰ ꓟꓽ ꓓ ꓟ ꓟꓬꓱ ꓓꓳꓽ ꓪꓴꓸ ꓛꓴꓽ ꓟꓶˍ ꓥꓳ꓿ 5 ꓠꓴ ꓪꓽ ꓞꓲꓼ ꓣꓳ ꓢꓴ ꓠꓬ ꓞꓲꓼ ꓪꓴꓽ ꓢꓴ ꓙꓲꓽˍ ꓟ ꓔꓯ ꓛꓳꓻ ꓠꓺ ꓡꓳꓹ꓿ ꓝꓮꓲ ꓣꓱꓽ ꓙ ꓡꓯꓽ ꓘꓳˍ ꓟ ꓗꓪ ꓠꓴ ꓪꓽ ꓮꓽ ꓙꓵ ꓢꓴ ꓙ ꓣꓳꓽˍ ꓟ ꓖꓪꓽ ꓔ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓪꓴ-ꓢ ꓠꓽ꓾ ꓠꓲꓹ ꓘꓹ ꓢꓴ ꓔꓯ ꓔꓳꓹ ꓢꓲ꓾ ꓙ ꓣꓳꓽ ꓢꓴ ꓔꓯ ꓣꓱꓽ ꓛꓰ ꓖꓶˍ ꓡꓳ꓾ ꓐꓰ ꓐꓳ ꓔ ꓡꓳ꓿ 6 ꓖꓳ ꓡꓱ ꓠꓬꓲ ꓬꓲ ꓝꓲꓸ ꓛꓲ ꓡ ꓕꓯ꓾ ꓪꓴ-ꓢ ꓡꓰ ꓠꓴ ꓪꓽ ꓔꓯ ꓓꓳꓹ ꓟꓴ ꓖꓶꓽ ꓡ ꓠꓹ ꓟ꓾ ꓬꓲ ꓪꓽ ꓠꓬꓲˍ ꓟ ꓡꓯꓼ ꓒꓯꓹ ꓠꓯꓸ ꓘꓪ ꓠꓴ ꓪꓽ ꓚꓲ ꓛꓬ ꓔꓯ ꓙ ꓣꓳꓽ ꓡꓰ ꓝꓲ꓿ 7 ꓠꓴ ꓪꓽ ꓙꓽ ꓫꓸ ꓟ ꓮꓽ ꓙꓵ ꓪꓴ-ꓢ ꓔꓯ ꓡꓯꓼ ꓙꓱ ꓖꓶ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓠꓴ ꓪꓽ ꓔꓯ ꓙꓽ ꓗꓳˍ ꓡꓳ꓿ 8 ꓧꓪꓸ ꓛꓲꓽ ꓐꓰ ꓞꓳ ꓢꓲꓽ ꓬꓰ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓔꓳꓹ ꓒ ꓠꓲꓽ ꓪ ꓔꓲ ꓠꓬ ꓟꓶꓻ ꓔꓬ ꓟ ꓡꓽ ꓢꓯꓹˍ ꓡꓰ ꓐꓰ꓾ ꓕꓲꓽ ꓣꓳ ꓣꓳ ꓔꓯ ꓖꓴꓻ ꓓꓵꓽ ꓡꓰ ꓠꓹ ꓟ ꓧꓪ ꓚꓳ ꓔꓬ ꓡꓳ꓿ 9 ꓠꓴ ꓪꓽ ꓠꓬ ꓙꓵꓻ ꓠꓲꓹ ꓗꓪ ꓕꓶꓻ ꓞ ꓢꓲ ꓬꓲ ꓔꓯ ꓔꓳꓹ꓿ ꓮ ꓡꓲꓳ ꓐꓯ ꓠꓬ ꓟꓵꓽ ꓕꓯ ꓗꓳꓹ ꓕꓯ ꓗꓪ ꓔꓬ ꓟ꓾ ꓠꓴ ꓪꓽ ꓬꓲꓼ ꓤ ꓠꓬꓲ ꓤ ꓐꓴˍ ꓟꓲ ꓠꓴ ꓪꓽˍ ꓐꓰ ꓕꓲꓽ ꓡꓰꓹꓼ ꓫꓸ ꓙꓵ ꓟꓶˍ ꓟ ꓠꓴ ꓪꓽ ꓢꓷꓸˍ ꓡꓳ꓿ 10 ꓣꓱꓽ ꓛꓰ ꓥ ꓕ ꓑꓳꓸ ꓖꓶ ꓢꓴ꓾ ꓙꓲ-ꓢꓴ ꓠꓯꓸꓼ ꓗꓪ ꓠꓴ ꓪꓽ ꓔꓯ ꓘꓴ ꓢꓴ ꓪꓴ-ꓢ ꓠꓬ꓾ ꓠꓴ ꓪꓽ ꓔꓯ ꓕꓲꓽ ꓞꓲꓼ ꓕꓲ ꓑ ꓟ ꓬꓲ ꓟꓬꓱ ꓓꓳꓽ ꓟꓶꓻ ꓝꓲ ꓠꓹ ꓟ꓾ ꓠꓴ ꓪꓽ ꓕꓲ ꓑꓹ ꓤ ꓫꓸ ꓙꓵ ꓗꓷ ꓗꓸ ꓠꓯ꓾ ꓬꓲ ꓚꓲ ꓛꓬ ꓡꓰ ꓠꓴ ꓪꓽ ꓔꓯ ꓜꓳꓽ ꓓꓰ ꓡꓰ ꓝꓲ ꓢꓲ꓾ ꓕꓶꓻ ꓡꓰ ꓝꓲ ꓢꓲ ꓠꓬꓲ꓾ ꓢꓯꓼ ꓙꓳꓻ ꓡ ꓝꓲˍ ꓥꓳ꓿ 11 ꓬꓲ ꓔꓯ ꓠꓬ ꓕꓲꓽ ꓞꓲꓼ ꓕꓲ ꓑ ꓙꓵꓽ ꓪ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ 12 ꓥꓪ ꓠꓬ ꓥꓪ ꓡꓰ ꓦ ꓡꓱ ꓐꓳ ꓢꓴ ꓚꓬꓹ ꓔ ꓟ ꓣꓳꓽ ꓠꓬꓲ ꓤꓽ ꓫꓲ-ꓡ ꓡꓰ ꓬꓰ ꓙˍ ꓟ ꓗꓪ ꓐꓰ ꓠꓴ ꓪꓽ ꓔꓯ ꓕꓳ ꓶ ꓓꓴꓸ ꓓꓴ ꓤ ꓐꓳ ꓢꓲ꓾ ꓪꓴ-ꓢ ꓔꓱꓹˍ ꓟ ꓣꓱꓽ ꓛꓰ ꓕꓱ ꓟ ꓔꓯꓸ ꓟꓳꓸ ꓢꓷꓸ ꓙ ꓟꓳ ꓙ ꓢꓲ ꓠꓬꓲ ꓢꓯꓼ ꓖꓶ ꓩꓴ ꓡ ꓟ ꓥꓳ꓿ ꓠꓴ ꓪꓽ ꓠꓬ ꓣꓱꓽ ꓛꓰ ꓕꓱ ꓟ ꓠꓯꓸꓼ ꓗꓪ ꓕꓶ ꓕꓶˍ ꓡꓰ ꓦꓰꓼ ꓔ꓿ 13 ꓠꓴ ꓪꓽˍ ꓐꓰ ꓕꓲꓽ ꓡꓰꓹꓼ ꓢꓲ ꓔ ꓟ ꓟꓶ ꓢꓴ ꓐ-ꓐꓲ-ꓡꓶ ꓗꓪ ꓔꓬ ꓟ ꓘꓴ ꓜꓲ ꓞꓳ ꓡꓰ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ ꓥꓪ ꓤꓽ ꓟ-ꓘꓳˍ ꓟꓲ ꓠꓴ ꓪꓽ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ 14 ꓙꓲ-ꓢꓴ ꓠꓵꓻ ꓠꓲꓹ ꓡꓰ ꓐꓳꓼ ꓡꓯꓽ ꓘꓳ ꓢꓲ ꓒꓵꓽ ꓗ ꓬꓰ ꓖꓶꓽ ꓡꓯꓽ ꓘꓳ꓿ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓢꓴ ꓠꓴ ꓪꓽ ꓮꓽ ꓙꓵ ꓢꓲ ꓡꓲ ꓟ ꓟꓶꓻ ꓝꓲ꓿

2 ꓒꓲ-ꓕꓱ 1

1 ꓬꓰ-ꓢꓴ ꓙꓲ-ꓢꓴ ꓬꓲ ꓚꓳ ꓑꓸˍ ꓐꓰ ꓬꓲ ꓝꓲ ꓓꓴ꓾ ꓢꓲ-ꓟꓴ ꓒꓲ-ꓕꓱ ꓥꓪ ꓡꓰ꓾ ꓣꓳ ꓪꓴ-ꓢˍ ꓐꓰ ꓚꓬꓴ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓔꓱꓹ ꓜꓳꓽˍ ꓟ ꓗꓪ ꓐꓰ꓾ ꓥꓪ ꓠꓴꓽˍ ꓐꓰ ꓕꓲꓽ ꓡꓰꓹˍ ꓒꓵꓽˍ ꓟ ꓙꓵꓻ ꓠꓲꓹ ꓟꓶ ꓢꓴ ꓐꓴ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ 2 ꓪꓴ-ꓢˍ ꓐꓰ ꓣꓳ ꓢꓲ ꓒꓽ ꓬꓰ-ꓢꓴ ꓔꓯ ꓢꓷꓸˍ ꓟ ꓠꓯS ꓗꓪ꓾ ꓣꓱ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓔꓯ ꓮꓽ ꓟꓬꓹ ꓡꓴꓽ ꓖꓶꓽ ꓡ ꓝꓲ꓿ 3 ꓪꓴ-ꓢ ꓠꓬ ꓬꓲ ꓚꓲ ꓛꓬ ꓟꓬꓱ ꓓꓳꓽˍ ꓐꓰ ꓬꓲ ꓙꓲˍ ꓟ ꓠꓲꓹ ꓟ ꓡꓰ ꓣꓳꓽ ꓔꓯ ꓘꓴ ꓗꓷ ꓢꓲ꓾ ꓣꓳ ꓬꓲ ꓔꓯ ꓢꓷꓸˍ ꓟ ꓗꓪ ꓐꓰ ꓬꓲ ꓢꓲꓺ ꓪꓽ ꓠꓬꓲˍ ꓟ ꓢꓯꓼ ꓡꓰ꓾ ꓦ ꓡꓱ ꓚꓱꓹ ꓗꓪ ꓠꓲꓹ ꓡꓱ ꓡꓱˍ ꓐꓰ ꓞꓳ ꓙꓳ ꓠꓹ ꓟ꓾ ꓣꓱꓽ ꓬꓯꓼˍ ꓟ ꓮꓽ ꓙꓵ ꓣꓳꓽ ꓔꓯ ꓖꓶꓽ ꓡꓺꓳ꓿ 4 ꓮꓸ ꓓꓲꓽ ꓒꓵꓽˍ ꓟ ꓐꓰ ꓪꓴꓽˍ ꓟ ꓬꓲ ꓙ ꓟꓳ ꓘꓶ ꓠꓬ ꓣꓳꓽ ꓔꓯ ꓬꓲ ꓖꓳ ꓡꓱ ꓖꓶꓽ ꓡ ꓢꓲ꓾ ꓙ ꓟꓳ ꓘꓶꓽ ꓕꓱ ꓟ ꓗꓪ ꓐꓰ ꓣꓳꓽ ꓠꓬ ꓐꓬ ꓡꓰ ꓛꓵꓽ ꓡꓰ ꓓꓴ ꓟꓲ ꓠꓯ ꓦꓯꓸ ꓠꓲꓹ ꓙꓵꓽˍ ꓟ ꓗꓪ ꓐꓰ ꓡꓲꓹ ꓗꓷ ꓢꓲ ꓠꓬꓲ꓾ ꓪꓴ-ꓢ ꓬꓲ ꓢꓲꓺ ꓠꓲꓹ ꓑꓯꓹ ꓟꓶꓻ ꓠꓹ ꓟ ꓥ ꓡꓳ꓿ 5 ꓕꓱ ꓟ ꓑꓶꓸ ꓓꓴ ꓠꓴ ꓪꓽ ꓠꓬ ꓮꓽ ꓘꓶꓸ ꓢꓯꓼ ꓕꓵꓼ ꓢꓲ꓾ ꓙꓵꓻ ꓠꓲꓹ ꓗꓪ ꓙꓲˍ ꓟ ꓞꓳ ꓙꓳˍ ꓟ ꓡꓴꓽ꓾ ꓙꓲˍ ꓟ ꓞꓳ ꓙꓳˍ ꓟ ꓗꓪ ꓢꓷꓸ ꓠꓲꓹ ꓡꓴꓽ꓾ 6 ꓢꓷꓸ ꓠꓲꓹ ꓗꓪ ꓚꓲ ꓛꓬ ꓔꓯ ꓙꓵꓽˍ ꓟ ꓡꓴꓽ꓾ ꓚꓲ ꓛꓬ ꓔꓯ ꓙꓵꓽˍ ꓟ ꓗꓪ ꓜꓲꓽ ꓘꓴ ꓠꓲꓹ ꓡꓴꓽ꓾ ꓜꓲꓽ ꓘꓴ ꓠꓲꓹ ꓗꓪ ꓪꓴ-ꓢ ꓚꓱꓹ ꓗꓪ ꓠꓲꓹ ꓡꓱˍ ꓟ ꓡꓴꓽ꓾ 7 ꓪꓴ-ꓢ ꓚꓱꓹ ꓗꓪ ꓠꓲꓹ ꓡꓱˍ ꓟ ꓗꓪ ꓬꓲꓼ ꓤ ꓠꓬꓲ ꓤ ꓔꓯ ꓙꓽ ꓗꓳ ꓡꓯꓽ ꓘꓳˍ ꓟ ꓡꓴꓽ꓾ ꓬꓲꓼ ꓤ ꓠꓬꓲ ꓤ ꓔꓯ ꓙꓽ ꓗꓳ ꓡꓯꓽ ꓘꓳˍ ꓟ ꓗꓪ ꓠꓵꓻ ꓠꓲꓹ ꓡꓴꓽ꓿ 8 ꓕꓱ ꓟꓬ ꓫꓵꓽ ꓟ ꓠꓴ ꓪꓽ ꓙꓳ ꓢꓲ ꓡꓯꓼ ꓫꓵ ꓪꓴꓽ ꓡ ꓟꓴ ꓡ ꓔꓬ ꓕꓯ ꓠꓽ꓾ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓔꓯ ꓚꓵ ꓚꓵ ꓢꓷꓸˍ ꓟ ꓗꓪ꓾ ꓠꓴ ꓪꓽ ꓠꓬ ꓙꓲ ꓖꓴ ꓟꓽ ꓙꓳˍ ꓟ ꓐꓰ ꓬꓲ ꓢꓶꓽ ꓟꓽ ꓓꓱꓼ ꓟ ꓟꓽ ꓗꓷ ꓡꓰ꓿ 9 ꓕꓱ ꓟꓬ ꓫꓵꓽ ꓟꓽ ꓙꓳ ꓢꓴ ꓠꓬ ꓟꓬ ꓔꓷ ꓢꓴˍ ꓐꓰ ꓒꓻ ꓕꓲꓺꓼ ꓗꓪ ꓟ ꓔꓯˍ ꓡꓰꓽ ꓟꓳ ꓘꓴꓻ ꓢꓴ ꓥ ꓢꓲ꓾ ꓬꓲ ꓬꓰ ꓗꓷ ꓟ ꓝꓴꓲ ꓞꓲꓽ ꓫꓬ ꓡꓰˍ ꓟ ꓔꓯ ꓟꓲꓺ ꓡꓰ ꓢꓴ ꓥ ꓡꓳ꓿ 10 ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓔꓯ ꓘꓴ ꓔ ꓟ ꓐꓰ ꓢꓲ ꓔ ꓟ ꓚꓱꓹ ꓗꓪ ꓕꓶꓻ ꓡꓰ ꓝꓲ ꓠꓹ ꓟ ꓪꓻ ꓜꓲ ꓢꓯꓼ ꓕꓵꓼ꓿ ꓠꓴ ꓪꓽ ꓕꓱ ꓟꓬ ꓫꓵ ꓬꓰˍ ꓕꓯ ꓠꓽ꓾ ꓮ ꓕꓯꓽˍ ꓟꓲ ꓟꓽ ꓡꓱꓸ ꓙꓰ ꓢꓲ꓾ 11 ꓣꓳ ꓢꓲ ꓒꓽˍ ꓐꓰ ꓚꓬꓴ ꓙ ꓢꓴ ꓬꓰ-ꓢꓴ ꓙꓲ-ꓢꓴ ꓬꓲ ꓕꓲ ꓞꓲꓼ ꓕꓲ ꓑ ꓟ ꓗꓴꓷꓼ ꓗꓪ ꓓꓵꓽ ꓙꓰ ꓠꓹ ꓟ ꓗꓪ꓾ ꓗꓹ ꓛꓲ ꓛꓲ ꓐꓰ ꓘꓳ ꓣꓴ ꓡ ꓟ ꓟꓶˍ ꓥꓳ꓿ 12 ꓖꓳ ꓡꓱ ꓠꓬꓲ ꓕꓱ ꓟꓬ ꓫꓵꓽ ꓠꓴ ꓪꓽ ꓢꓷꓸ ꓢꓲ꓾ ꓠꓴ ꓪꓽ ꓠꓬ ꓔꓱꓹˍ ꓟ ꓐꓯ ꓘꓶꓽ ꓗꓪ ꓕꓶꓻ ꓕꓶˍ ꓡꓰꓽ ꓔꓬ ꓥ ꓟꓲ꓾ ꓕꓱ ꓟꓬ ꓫꓵꓽ ꓟ ꓥꓪ ꓮ ꓕꓯꓽˍ ꓟꓲ ꓠꓴ ꓪꓽ ꓔꓯ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ꓿ 13 ꓥꓪ ꓠꓬ ꓖꓳ ꓓꓱ ꓕꓱ ꓟ ꓗꓪ ꓢꓯꓸ ꓔꓬ ꓕ ꓑꓳ꓾ ꓠꓴ ꓪꓽ ꓔꓯ ꓕꓱ ꓡꓱ ꓬꓲꓼ ꓠꓬꓲꓸ ꓧꓪꓸ ꓛꓲꓽ ꓡ ꓝꓲ ꓙꓲꓽ ꓙꓳˍ ꓡꓳ꓾ ꓓꓵꓽ ꓙˍ ꓡꓳ꓿ 14 ꓮ ꓡꓲꓳ ꓐꓯ ꓠꓬ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓡꓰ ꓥꓪ ꓔꓯ ꓟꓳꓸ ꓖꓶꓽ ꓡ ꓟ ꓡꓰ ꓐꓰ꓾ ꓥꓪ ꓖꓳ ꓓꓱ ꓕꓱ ꓟ ꓔꓯ ꓡꓵꓸ ꓦ ꓗꓷ ꓠꓹ ꓟ ꓦꓬꓼ ꓠꓬꓲ ꓠꓲꓹ ꓞ ꓛꓲ ꓡ ꓟ ꓥꓪ ꓢꓷˍ ꓡꓳ꓿ 15 ꓖꓳ ꓡꓱ ꓠꓬꓲ ꓥꓪ ꓫꓵꓻ ꓗꓷ ꓗꓸ ꓠꓯ꓾ ꓠꓴ ꓪꓽ ꓮ ꓕꓯꓽˍ ꓟꓲ ꓕꓱ ꓟꓬ ꓫꓵꓽ ꓔꓯ ꓓꓵꓽ ꓙꓽ ꓛꓲ ꓡ ꓠꓹ ꓟ ꓥꓪ ꓢꓯꓼ ꓕꓵꓼ ꓔ ꓬꓰˍ ꓥꓳ꓿ 16 ꓥꓪ ꓠꓴꓽ ꓡꓰ ꓠꓴ ꓪꓽ ꓔꓯ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓪꓽ ꓠꓬꓲˍ ꓟ ꓐꓰ꓾ ꓬꓲ ꓬꓲꓼ ꓡ ꓟ ꓔꓯꓸ ꓟꓳꓸ ꓢꓷꓸ ꓙ ꓟꓳ ꓙˍ ꓟ ꓠꓬ꓾ ꓞꓳ ꓤ ꓢꓷꓸ ꓠꓲꓹ ꓗꓪ ꓐꓰ ꓚꓰꓼ ꓓꓳ ꓡ ꓟ ꓟꓸ ꓟꓲ ꓟꓽ ꓥ꓿ ꓥꓪ ꓠꓴꓽ ꓚꓲ ꓛꓬ ꓟꓬ ꓢꓶꓽ ꓡꓰ ꓬꓲ ꓪꓽ ꓠꓬꓲˍ ꓟ ꓗꓴꓺ ꓒꓬꓱ ꓟꓳꓻ ꓗꓷ ꓟ ꓔꓯ ꓢꓷꓸ ꓙ ꓟꓳ ꓙˍ ꓟ ꓥ ꓡꓳ꓿ 17 ꓮ ꓡꓲꓳ ꓐꓯ ꓠꓬ ꓮꓸ ꓓꓲꓽ ꓪꓴꓽˍ ꓟ ꓟꓬꓱ ꓓꓳꓽ ꓙꓳ ꓢꓴ ꓗꓪ ꓐꓰ ꓢꓯꓼ ꓓꓳ ꓡ ꓢꓲ꓾ Zꓕꓱ ꓟ ꓠꓬ ꓥꓪ ꓠꓲꓹ ꓠꓵˍ ꓟ ꓮ ꓐꓲ ꓥ ꓡꓳ꓾ ꓬꓲ ꓔꓯ ꓥꓪ ꓮꓽ ꓘꓶꓸ ꓠꓲꓹ ꓒꓴˍ ꓡꓳ꓾X ꓐꓯˍ ꓕꓯ꓾ ꓬꓲ ꓠꓬ ꓐꓹ ꓐ ꓪꓴ-ꓢ ꓗꓪ ꓐꓰ ꓞꓳ ꓒꓵꓽˍ ꓟ ꓐꓰ ꓟꓬꓱ ꓓꓳꓽ ꓟꓶ ꓗꓷꓳ꓿ 18 ꓢꓲ ꓚꓰꓸ ꓔ ꓟ ꓪꓽ ꓚꓲ ꓖꓳ ꓟ ꓗꓪ ꓥꓪ ꓠꓴꓽ ꓬꓲˍ ꓐꓰ ꓕꓲꓽ ꓪꓺꓼ ꓔꓬ ꓕꓯ꓾ ꓢꓯꓼ ꓕꓱ ꓟ ꓟꓴꓽ ꓗꓪ ꓗꓪ ꓐꓰ ꓓꓳ ꓡ ꓟ ꓥꓪ ꓠꓴꓽˍ ꓟꓲ ꓑ ꓙꓽ ꓗꓷꓳ꓿ 19 ꓖꓳ ꓡꓱ ꓠꓬꓲ ꓥꓪ ꓠꓴꓽ ꓠꓬ ꓟꓷꓽ ꓠꓷꓹ ꓝꓸ ꓘꓶ ꓔꓯ ꓪꓻ ꓜꓲ ꓙꓵꓻ ꓕꓶ ꓡꓰꓳ꓿ ꓠꓴ ꓪꓽˍ ꓟꓲ ꓐꓯ ꓘꓶꓽ ꓖꓳ ꓟ ꓔꓯ ꓬꓲ ꓜꓲꓻ ꓒꓵꓽ ꓛꓳ ꓠꓯꓹ ꓡꓳ꓿ ꓐꓯ ꓘꓶꓽ ꓖꓳ ꓟ ꓠꓬ ꓠꓴ ꓪꓽ ꓠꓲꓹ ꓟ ꓗꓪ ꓠꓯꓼ ꓗꓴ ꓟ ꓤꓲꓺ ꓓꓳ ꓡ ꓗꓪ ꓛꓲ꓾ ꓠꓯ ꓞꓲꓹ ꓟ ꓗꓪ ꓣꓳꓺ ꓔꓬ ꓟ ꓟꓬ ꓡꓴˍ ꓡꓰ ꓐꓰ ꓗꓹ ꓡꓳ꓿ 20 ꓠꓴ ꓪꓽ ꓢꓷꓸ ꓠꓯꓹ ꓟ ꓬꓲ ꓪꓴꓸ ꓕꓲ ꓫꓵꓽ ꓠꓬ꓾ ꓢꓲꓽ ꓫꓬ ꓕꓳ ꓶ ꓗꓪ ꓙꓳˍ ꓟ ꓟꓷꓽ ꓠꓷꓹ ꓝꓸ ꓘꓶ ꓮ ꓡꓲ ꓕꓲ ꓘꓶꓽˍ ꓟꓲ꓾ ꓟꓷꓽ ꓠꓷꓹ ꓝꓸ ꓢꓴ ꓬꓲ ꓚꓲ ꓛꓬ ꓠꓲꓹ ꓟ ꓔꓯ ꓛꓳꓻ ꓢꓲ ꓒꓶ ꓟꓸ ꓔ ꓟ ꓟꓽ ꓥ꓾ ꓐꓰ ꓠꓴ ꓪꓽ ꓢꓷ ꓠꓯꓹ ꓡꓳ꓿ 21 ꓮ ꓡꓲꓳ ꓐꓯ ꓠꓬ ꓟꓷꓽ ꓠꓷꓹ ꓝꓸ ꓘꓶ ꓠꓽ꓾ ꓞꓳ ꓤ ꓠꓲꓹ ꓡꓶꓽ ꓗꓪ ꓐꓰ ꓓꓳ ꓡ ꓟ ꓮ ꓕꓯꓽˍ ꓟꓲ ꓟꓽ ꓙꓳ ꓠꓬꓲ꓿ ꓬꓲˍ ꓡꓰ꓾ ꓢꓲ-ꓫꓬ-ꓟ-ꓦ ꓡꓰ ꓞꓳ ꓤ ꓠꓲꓹ ꓟ ꓔꓯ ꓙꓵꓽ ꓢꓲ꓾ ꓬꓲ ꓪꓽ ꓠꓬ ꓪꓴ-ꓢ ꓗꓪ ꓐꓰ ꓫꓸ ꓕꓱ ꓓꓳ ꓡ ꓟ ꓥ ꓡꓳ꓿

2 ꓒꓲ-ꓕꓱ 2

1 ꓖꓳ ꓡꓱ ꓥ ꓟꓲ ꓧꓶꓸ ꓕꓯ ꓑ ꓫꓬꓼ ꓐꓴ ꓗꓳ ꓡꓳ ꓗꓪ ꓟꓽ ꓔꓱꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓓꓳ ꓡ ꓗꓷ ꓟ ꓡꓰ ꓐꓰ꓾ ꓠꓴ ꓪꓽ ꓗꓳ ꓡꓳ ꓗꓪˍ ꓟꓲ ꓟꓽ ꓔꓱꓹ ꓟ ꓟꓸ ꓒ ꓐꓴ ꓓꓳ ꓡ ꓥꓳ꓿ ꓬꓲ ꓪꓽ ꓠꓬ ꓘꓳꓺ ꓫꓱ ꓫꓱꓺꓼ ꓐꓰ꓾ ꓐꓬ ꓡꓰ ꓓꓴ ꓖꓳꓼˍ ꓟ ꓟꓸ ꓟꓲ ꓔꓯꓹ ꓓꓵꓽ ꓡ ꓢꓲ꓾ ꓬꓲ ꓪꓽ ꓠꓬ ꓫꓴꓹ ꓣꓴ ꓢꓲ ꓒꓽ ꓔꓯˍ ꓟꓲ ꓟꓽ ꓣꓷꓠꓸ ꓣꓷꓠꓸ꓾ ꓚꓲ ꓛꓬ ꓔꓯ ꓠꓲꓹ ꓞ ꓟꓶꓽ ꓬꓰ ꓝꓲ ꓓꓴ ꓔꓯꓹ ꓡ ꓥꓳ꓿ 2 ꓬꓲ ꓪꓽ ꓦꓯꓸ ꓠꓲꓹ ꓙꓵꓽˍ ꓟ ꓚꓱꓹ ꓔꓯ ꓛꓳ ꓢꓴ ꓮꓽ ꓟꓬꓹ ꓙꓳ ꓡ ꓢꓲ꓾ ꓬꓲ ꓪꓽ ꓑꓶꓸ ꓓꓴ ꓔꓱꓹ ꓚꓵˍ ꓟ ꓙ ꓖꓴ ꓔꓯ ꓝꓯꓼ ꓡꓯꓼ ꓢꓲ ꓐꓯ ꓒꓬꓹ ꓢꓴ ꓓꓳ ꓡ ꓥꓳ꓿ 3 ꓬꓲ ꓪꓽ ꓠꓬ ꓠꓲꓹ ꓦꓯꓸˍ ꓟ ꓐꓰ ꓗꓶꓸ ꓘꓶꓽ ꓡꓰ ꓚꓰꓼ ꓔ ꓟ ꓟꓸ ꓟꓲ ꓡꓰ ꓠꓴ ꓪꓽ ꓔꓯ ꓟꓸ ꓒꓬꓹ ꓢꓲ꓾ ꓬꓲ ꓪꓽ ꓙꓲꓻ ꓖꓴ ꓐꓱ ꓶ ꓠꓴ ꓪꓽ ꓔꓯ ꓣꓱꓽ ꓡ ꓥꓳ꓿ ꓮꓽ ꓠꓱ ꓕꓯˍ ꓡꓰ ꓬꓲ ꓪꓽ ꓔꓯ ꓐꓯ ꓟꓴ ꓘꓶꓽ ꓠꓹ ꓟ ꓦꓬꓼ ꓠꓬꓲ ꓙꓽ ꓖꓶ ꓔꓸ ꓡꓳ꓿ ꓬꓲ ꓪꓽ ꓔꓯ ꓟꓶꓽ ꓬꓰ ꓝꓲ ꓢꓴˍ ꓟꓲ ꓬꓲꓼ ꓟꓶ ꓔꓬ ꓟ ꓟꓽ ꓥ꓿ 4 ꓮ ꓡꓲꓳ ꓐꓯ ꓠꓬ ꓟꓴꓽ ꓗꓪ ꓝꓲ ꓓꓴ ꓐꓴ ꓝꓴꓲ ꓬꓰˍ ꓕꓯˍ ꓟꓲ꓾ ꓪꓴ-ꓢ ꓠꓲꓹ ꓟ ꓟꓽ ꓦꓲꓺ ꓖꓶ ꓖꓶ꓾ ꓐꓯ ꓟꓴ ꓘꓶꓽ ꓟꓶꓻ ꓠꓹ ꓟ ꓬꓲ ꓪꓽ ꓔꓯ ꓛꓬꓼ ꓟꓵꓽ ꓗꓪ ꓡꓳ ꓧꓳꓽ ꓔ ꓢꓲ꓾ ꓠꓯ ꓞꓲꓹ ꓟ ꓘꓴꓻ ꓗꓪ ꓞꓳꓹ ꓐꓱꓻ ꓔ ꓡꓳ꓿ 5 ꓝꓮꓲ ꓠꓬ ꓪꓴ-ꓢ ꓔꓯ ꓟꓽ ꓒꓵꓽ ꓟ ꓮꓽ ꓠꓱ ꓢꓴ ꓔꓯ ꓠꓲꓹ ꓟ ꓟꓽ ꓦꓲ ꓖꓶ ꓖꓶ꓾ ꓬꓲ ꓡꓰ ꓟꓵ ꓟꓷꓸ ꓟꓲ ꓟꓷꓸ ꓗꓷ ꓕꓯ꓾ ꓔꓱꓹ ꓜꓳꓽˍ ꓟ ꓚ ꓟꓸ ꓖꓶ ꓢꓴ ꓠꓳ-ꓪ ꓕꓲ ꓦꓲ ꓢꓴ ꓦꓰꓼ ꓣꓳ ꓔꓯˍ ꓡꓰꓽ ꓔ ꓙˍ ꓡꓳ꓿ 6 ꓪꓴ-ꓢ ꓔꓯ ꓟꓽ ꓒꓵꓽ ꓢꓴ ꓔꓯ ꓙꓳꓺ ꓗꓽ ꓓꓴ ꓬꓰ ꓠꓹ ꓟ꓾ ꓬꓲ ꓡꓰ ꓢꓳ-ꓓꓳ-ꓟ ꓐꓰ ꓳꓽ-ꓟꓳ-ꓡ ꓡꓳ ꓒꓱ ꓖꓳ ꓠꓬꓲꓽ ꓟ ꓔꓯ ꓘꓴꓽ ꓦ ꓒꓬꓱꓼ ꓡ ꓗꓪ ꓛꓲ ꓛꓴꓻ ꓐꓬꓻ ꓡꓰ ꓝꓲˍ ꓡꓳ꓿ ꓬꓲ ꓪꓽ ꓔꓯ ꓝꓴꓲ ꓐꓯ ꓞꓷꓹ ꓢꓲ꓾ 7 ꓞꓳ ꓥꓶ ꓦꓯꓸ ꓠꓲꓹ ꓙꓵꓽˍ ꓟ ꓞꓳ ꓙꓳ ꓚꓱꓹ ꓡꓰ ꓘꓶꓻ ꓡꓶˍ ꓟ ꓟꓶ ꓗꓷ ꓢꓴ꓾ ꓔꓱꓹ ꓜꓳꓽˍ ꓟ ꓡꓳꓽ-ꓔꓷ ꓔꓯ ꓚꓬꓴ ꓓꓳ ꓡ ꓡꓳ꓿ 8 (ꓮ ꓡꓲꓳ ꓐꓯ ꓠꓬ ꓔꓱꓹ ꓜꓳꓽ ꓢꓴ ꓖꓳ ꓕꓲ ꓣꓳ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓔꓬ ꓢꓲ꓾ ꓬꓲ ꓪꓽ ꓙꓵꓽ ꓗ ꓟꓽ ꓛꓳꓻˍ ꓟ ꓟꓬꓱꓽ ꓔꓯ ꓟꓳꓻˍ ꓟꓲ ꓟꓳ꓾ ꓑˍ ꓟꓲ ꓑ ꓙꓽ ꓗꓷ ꓠꓬꓲ꓾ ꓬꓲ ꓔꓱꓹ ꓜꓳꓽˍ ꓟ ꓶꓻ ꓟꓬ ꓠꓬ꓾ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓓꓵꓽ ꓙꓽ ꓪꓴꓽ ꓧꓶ ꓠ ꓗꓷ ꓡꓰꓳ꓿) 9 ꓖꓳ ꓡꓱ ꓠꓬꓲ ꓠꓲꓹ ꓒꓵꓽ ꓠꓲꓹ ꓡꓱ ꓢꓴ ꓔꓯ ꓤꓹ ꓠꓬꓲˍ ꓟ ꓗꓪ ꓐꓰ ꓮ ꓡꓲ ꓚꓬꓴ ꓓꓳ ꓡ ꓠꓹ ꓟ ꓐꓰ꓾ ꓐꓯ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓛꓲ ꓟꓽ ꓙꓲ ꓟꓽ ꓜꓳꓽ ꓢꓴ ꓔꓯ ꓮ ꓡꓲ ꓐꓰ ꓛꓬꓻ ꓒꓵꓽ ꓖꓶ ꓠꓹ ꓟ ꓢꓲ ꓒꓽ ꓬꓲ ꓢꓷˍ ꓡꓳ꓿ 10 ꓖꓳ ꓓꓱꓽ ꓦꓯꓸ ꓠꓲꓹ ꓙꓵˍ ꓟ ꓗꓪ ꓟꓽ ꓫꓬꓻ ꓟꓽ ꓖꓼ ꓟ ꓬꓰ ꓢꓲ꓾ ꓪꓴ-ꓢ ꓕꓵꓼ ꓪ ꓔꓯ ꓟꓳꓻ ꓟꓽ ꓟꓵ ꓢꓴ ꓔꓯ ꓪꓻ ꓜꓲ ꓛꓬ ꓒꓵꓽ ꓖꓶˍ ꓥꓳ꓿ ꓬꓲ ꓪꓽ ꓠꓬ ꓠꓲꓹ ꓪꓴꓽ ꓪꓴꓽˍ ꓡꓰ ꓘꓶꓽ ꓘꓹ ꓢꓲ꓾ ꓟꓴꓽ ꓗꓪ ꓗꓪ ꓟ ꓗꓴꓺ ꓙꓳ ꓢꓴˍ ꓐꓰ ꓙꓵꓽ ꓪꓽ ꓙꓳ ꓢꓴ ꓔꓯ ꓟꓽ ꓙꓳꓺ ꓙꓳꓺ꓾ ꓟꓳꓻ ꓟꓽ ꓟꓵ ꓘꓶꓽ ꓫꓸ ꓕꓱ ꓢꓴ ꓐꓴ ꓥ ꓡꓳ꓿ 11 ꓟꓴꓽ ꓗꓪ ꓝꓲ ꓓꓴ ꓐꓴ ꓠꓬ ꓟꓸ ꓒꓬꓹ ꓢꓴ ꓕꓯꓽ ꓢꓲ ꓢꓯꓼ ꓙꓳ ꓪꓽ ꓠꓬꓲˍ ꓟꓲ꓾ ꓢꓲ ꓒꓽ ꓟꓲꓽ ꓙꓬ ꓗꓪ ꓬꓲ ꓪꓽ ꓔꓯ ꓥꓶˍ ꓟ ꓐꓯ ꓘꓶꓽ ꓡꓰ ꓟꓽ ꓓꓰꓺ꓿ 12 ꓖꓳ ꓕꓲ ꓧꓳꓽ ꓟ ꓠꓬ ꓣꓴ ꓢꓰꓼ ꓠꓹ ꓟ ꓦꓵꓻ ꓔ ꓟ꓾ ꓙꓽ ꓜꓲꓼ ꓠꓲꓹ ꓟꓽ ꓙꓳˍ ꓟ ꓙꓱꓽ ꓤˍ ꓡꓰ ꓐꓰ ꓗꓹ ꓠꓬꓲ꓾ ꓬꓲ ꓪꓽ ꓟꓽ ꓢꓷꓸ ꓡꓳ ꓫꓵꓽ ꓗꓪ ꓙꓱꓽ ꓕꓼˍ ꓡꓳ꓿ ꓬꓲ ꓪꓽ ꓠꓬ ꓠꓲꓸ ꓙꓱꓽˍ ꓡꓰ ꓐꓰ ꓫꓵꓻ ꓖꓴ ꓡꓰˍ ꓥꓳ꓿ 13 ꓬꓲ ꓪꓽ ꓡꓰ ꓢꓴ ꓔꓯ ꓫꓸ ꓙꓵ ꓝꓲˍ ꓟ ꓫꓸ ꓙꓵ ꓓꓴ ꓡꓰ ꓬꓲ ꓪꓽ ꓔꓯ ꓚꓱꓹ ꓖꓶˍ ꓥꓳ꓿ ꓬꓲ ꓪꓽ ꓠꓬ ꓟꓳꓼ ꓡꓳ ꓟꓶꓽ ꓫꓵꓺ ꓧꓪꓽ ꓖꓳ ꓓꓱ ꓦꓯꓸ ꓠꓲꓹ ꓙꓵꓽˍ ꓟ ꓔꓯ ꓠꓲꓹ ꓘꓪꓽ ꓫꓵ ꓡꓰ ꓝꓲ ꓓꓴ ꓧꓪˍ ꓡꓳ꓿ ꓬꓲ ꓪꓽ ꓠꓬ ꓠꓴ ꓪꓽˍ ꓐꓰ ꓕꓲꓽ ꓪꓺꓼ ꓜꓻ ꓫꓳꓺˍ ꓟ ꓗꓪ ꓔꓹ ꓜꓽ ꓔꓬ ꓥ ꓟꓲ꓾ ꓠꓴ ꓪꓽ ꓟꓬꓱ ꓓꓳꓽ ꓒꓬꓹ ꓢꓴˍ ꓐꓰ ꓫꓸ ꓔꓳ ꓟꓽ ꓗꓴꓸ ꓢꓴ ꓥ ꓢꓲ꓾ ꓠꓴ ꓪꓽ ꓔꓯ ꓬꓲ ꓖꓳ ꓡꓱ ꓗꓶꓸ ꓜ ꓗꓶꓸ ꓓꓳꓻˍ ꓟ ꓔꓯ ꓗꓹ ꓛꓲ ꓓꓴ ꓚꓬꓹ ꓡꓳ꓿ 14 ꓬꓲ ꓪꓽ ꓟꓬ ꓢꓶꓽ ꓠꓬ ꓦꓬꓽ ꓛꓳꓽ ꓧꓪˍ ꓟ ꓡꓰ ꓐꓲ ꓞꓹ ꓢꓲ꓾ ꓝꓴꓲ ꓬꓰˍ ꓟ ꓗꓪ ꓠꓽ ꓡꓰ ꓟꓽ ꓗꓴꓸ ꓗꓴ꓾ ꓠꓲꓹ ꓟ ꓟꓽ ꓕꓶꓻ ꓢꓴ ꓔꓯ ꓧꓳꓽ ꓪꓴꓸ ꓙꓰˍ ꓡꓳ꓿ ꓬꓲ ꓪꓽ ꓠꓲꓹ ꓟ ꓗꓪ ꓠꓲꓹ ꓦꓯꓸ ꓝꓳꓺ ꓡꓰ ꓠꓬꓲ ꓪꓴ-ꓢ ꓡꓰ ꓙꓱꓽ ꓔ ꓢꓴ ꓐꓴ ꓗꓷ ꓡꓰꓳ꓿ 15 ꓬꓲ ꓪꓽ ꓠꓬ ꓔꓱꓹˍ ꓟ ꓙ ꓖꓴ ꓔꓯ ꓡꓳꓺ ꓗꓷ ꓢꓲ꓾ ꓟꓽ ꓔꓱꓹ ꓟꓽ ꓜꓳꓽ ꓟ ꓪꓽ ꓒꓵ ꓔꓯ ꓠꓲꓹ ꓦꓯꓸ ꓢꓴ ꓑꓲꓽ-ꓪꓳ-ꓣ ꓬꓲ ꓤ ꓑ-ꓡꓽ ꓚꓱꓹ ꓗꓪ ꓛꓳ ꓙꓰˍ ꓡꓳ꓿ 16 ꓬꓲ ꓠ ꓬꓲ ꓚꓲ ꓛꓬ ꓛꓬꓻ ꓖꓴ ꓑꓶꓸ ꓓꓴ ꓕꓼ ꓟꓶˍ ꓡꓳ꓿ ꓫꓸ ꓕꓱ ꓟꓽ ꓗꓴꓸ ꓟ ꓕꓳꓽ ꓡ ꓟꓴꓽ ꓠꓬ ꓞꓳ ꓤˍ ꓡꓰ ꓐꓰ ꓫꓸ ꓕꓱ ꓡ ꓢꓲ꓾ ꓟꓷꓽ ꓠꓷꓹ ꓝꓸ ꓒ ꓬꓲ ꓙꓲꓽˍ ꓟ ꓟꓬꓱꓽ ꓔꓯ ꓗꓽ ꓔ ꓡꓳ꓿ 17 ꓕꓱ ꓕꓲ ꓧꓳꓽ ꓟ ꓠꓬ꓾ ꓬꓲꓻ ꓙꓬ ꓟꓽ ꓙꓳ ꓟ ꓬꓲꓻ ꓙꓬ ꓘꓴꓻ ꓥ ꓢꓲ꓾ ꓕꓳꓽ ꓥꓳꓽ ꓡꓰ ꓙꓱꓼ ꓙꓰˍ ꓟ ꓟꓴ ꓗꓴꓸ ꓜꓲꓽ ꓥ ꓡꓳ꓿ ꓬꓲ ꓪꓽ ꓐꓱ ꓶ ꓠꓬ ꓠꓯ ꓞꓲꓹ ꓠꓯ ꓕꓳꓽ ꓟ ꓝꓰꓺ ꓔ ꓡꓳ꓿ 18 ꓬꓲ ꓪꓽ ꓠꓬ ꓘꓶꓽ ꓖꓳꓽ ꓡꓰ ꓘꓶꓽ ꓘꓹ ꓢꓲ꓾ ꓖꓼ ꓟꓽ ꓔꓱꓹ ꓔꓱꓹꓼ ꓬꓰˍ ꓟ ꓐꓰ ꓧꓪꓽ ꓖꓳꓻ ꓓꓱ ꓦꓯꓸ ꓠꓲꓹ ꓙꓵꓽˍ ꓟ ꓡꓰ꓾ ꓟꓽ ꓙꓲꓻ ꓟ ꓟꓬꓱꓽ ꓗꓪ ꓐꓰ ꓮ ꓟꓶ ꓢꓲꓸˍ ꓡꓰ ꓡꓲꓹ ꓗꓷ ꓢꓴ ꓔꓯ ꓧꓳꓽ ꓪꓴꓸ ꓙꓰˍ ꓡꓳ꓿ 19 ꓬꓲ ꓪꓽ ꓠꓬ ꓞꓳ ꓙꓳˍ ꓟ ꓗꓪ ꓐꓬ ꓡꓰ ꓛꓵꓽ ꓡꓰ ꓓꓴ ꓚꓳ ꓑꓸ ꓬꓰ ꓔꓬ ꓥ ꓟꓲ꓾ ꓢꓴꓻ ꓔꓯ ꓠꓽ ꓚꓳ ꓪꓴꓸ ꓙꓵꓽ ꓪ ꓖꓶ ꓙ ꓟꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓮ ꓡꓲ ꓕꓲ ꓫꓵꓽ ꓡꓰ ꓞꓳ ꓤ ꓔꓯ ꓧꓪꓸ ꓡꓰˍ ꓠꓬ꓾ ꓬꓲ ꓠꓽ ꓖꓳ ꓕꓲ ꓫꓵ ꓟ ꓚꓳ ꓑꓸ ꓥ ꓡꓳ꓿ 20 ꓬꓲ ꓪꓽ ꓠꓬ ꓣꓳ ꓢꓲ ꓒꓽˍ ꓐꓰ ꓚꓬꓴ ꓙ ꓢꓴ ꓬꓰ-ꓢꓴ ꓙꓲ-ꓢꓴ ꓔꓯ ꓢꓷˍ ꓟ ꓗꓪ ꓐꓰ꓾ ꓟꓲ ꓠꓯ ꓟꓽ ꓫꓬꓻ ꓟꓽ ꓖꓼ ꓟ ꓗꓪ ꓐꓰ ꓡꓲꓹ ꓗꓷ ꓗꓸ ꓠꓯ꓾ ꓖꓳ ꓟ ꓗꓪ ꓝꓮꓲ ꓕꓲ ꓧꓪꓹ ꓪꓴꓻ ꓡꓰ ꓢꓲ꓾ ꓥꓶˍ ꓟ ꓡꓰ ꓬꓲ ꓪꓽ ꓔꓯ ꓧꓪꓸ ꓡꓰ ꓐꓷˍ ꓠꓬ꓾ ꓬꓲ ꓟꓶꓽ ꓗꓪ ꓠꓽ ꓧꓶꓸ ꓕꓯ ꓟ ꓕꓯꓽ ꓢꓲ ꓐꓬ ꓡꓰ ꓓꓴ ꓗꓷ ꓡꓰˍ ꓥꓳ꓿ 21 ꓮ ꓡꓲꓳ ꓐꓯ ꓠꓬ ꓔꓱꓹ ꓜꓳꓽˍ ꓟ ꓙ ꓖꓴ ꓔꓯ ꓬꓲ ꓪꓽ ꓢꓷꓸ ꓗꓷ ꓗꓸ ꓠꓯ꓾ ꓬꓲ ꓪꓽ ꓔꓯ ꓡꓯꓼ ꓙꓱ ꓔ ꓟ ꓪꓴ-ꓢ ꓬꓲ ꓢꓲꓽ ꓫꓬˍ ꓟ ꓕꓵꓼ ꓪ ꓗꓪ ꓐꓰ ꓒꓳꓹ ꓬꓲꓼ ꓙꓰˍ ꓕꓯ ꓠꓽ꓾ ꓟꓽ ꓢꓷꓸ ꓠꓬꓲ ꓟ ꓪꓻ ꓜꓲ ꓙꓲˍ ꓡꓳ ꓫꓵꓽ ꓥ ꓡꓳ꓿ 22 ꓥꓳꓽ ꓜꓱ ꓗꓪ꓾ ꓮꓸ ꓠꓽ ꓠꓬ ꓬꓲ ꓚꓲ ꓛꓬ ꓒꓰꓼ ꓔ ꓟ ꓔꓯ ꓚꓱꓹ ꓬꓲꓼ ꓙꓰˍ ꓢꓰꓽ ꓡꓳ꓿ ꓮ ꓪꓯꓼ ꓠꓬ ꓞꓲꓽ ꓗꓷ ꓗꓸ ꓠꓯ ꓠꓱꓸ ꓛꓵꓽ ꓒꓼ ꓗꓪ ꓖꓴˍ ꓢꓰ ꓡꓳ꓾ ꓐꓰ ꓐꓯˍ ꓟ ꓡꓰ ꓐꓰ꓾ ꓬꓲ ꓪꓽ ꓔꓯ ꓗꓷ ꓡꓰꓳ꓿

2 ꓒꓲ-ꓕꓱ 3

1 ꓠꓲꓹ ꓠꓵ ꓢꓴ ꓐꓴꓳ꓾ ꓮ ꓟꓶ ꓥꓪ ꓡꓰ ꓠꓴ ꓪꓽ ꓔꓯ ꓐꓳ ꓖꓶ ꓩꓴ ꓡ ꓟ ꓕꓳ ꓶ ꓡꓯꓼ ꓫꓴ ꓕꓱ ꓟ ꓠꓬ ꓠꓬꓲꓽ ꓚꓴꓸ ꓕꓲ ꓚꓴꓸ ꓟ ꓥꓳ꓿ ꓕꓱ ꓠꓬꓲꓽ ꓚꓴꓸ ꓡꓱꓸꓼ ꓗꓪ ꓠꓴ ꓪꓽ ꓠꓬ ꓕꓱ ꓟꓬ ꓫꓵꓽ ꓔꓯ ꓟꓳꓸ ꓧꓪꓸ ꓛꓲꓽ ꓠꓹ ꓟ ꓥꓪ ꓡꓰ ꓬꓲꓼ ꓠꓬꓲꓸ ꓖꓶˍ ꓟ ꓐꓰ ꓡꓵꓹ ꓔꓴ ꓖꓶˍ ꓟ ꓥꓳ꓿ 2 ꓕꓱ ꓟ ꓠꓬ ꓧꓶ ꓕꓯˍ ꓡꓰ ꓢꓲ ꓚꓰꓸ ꓔ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓰ ꓫꓸ ꓕꓱ ꓗꓷ ꓟ ꓐꓯ ꓘꓶˍ ꓐꓰ꓾ ꓠꓴ ꓪꓽ ꓔꓯ ꓝꓲ ꓓꓴ ꓐꓴ ꓡꓰ ꓟꓸ ꓖꓶꓽ ꓗꓷ ꓟ꓾ ꓢꓲ ꓒꓽˍ ꓐꓰ ꓚꓬꓴ ꓙ ꓢꓴ ꓕꓵꓼ ꓪ ꓔꓯ ꓠꓴ ꓪꓽ ꓓꓵꓽ ꓙꓽ ꓛꓲ ꓡ ꓠꓹ ꓟ ꓥ ꓡꓳ꓿ 3 ꓬꓲ ꓪꓴꓸ ꓕꓲ ꓫꓵꓽ ꓠꓬ꓾ ꓡꓳꓹ ꓬꓰ ꓟ ꓦꓬꓼ ꓠꓬꓲ ꓗꓪ ꓠꓽ ꓜꓲ ꓢꓴˍ ꓐꓰ ꓚꓲ ꓛꓬ ꓦꓯꓸ ꓠꓲꓹ ꓙꓵꓽˍ ꓟ ꓔꓯˍ ꓡꓰ ꓛꓳ ꓢꓴ ꓓꓳ ꓡ ꓥꓳ꓾ ꓐꓰ ꓠꓴ ꓪꓽ ꓢꓷꓸ ꓠꓯꓹ ꓡꓳ꓿ ꓬꓲ ꓪꓽ ꓠꓬ ꓪꓴ-ꓢ ꓔꓯ ꓟꓽ ꓒꓵꓽ ꓢꓲ꓾ 4 ꓢꓲ ꓒꓽ ꓡ ꓙ ꓟꓳˍ ꓟ ꓮ ꓡꓲ ꓗꓪ ꓥ ꓡ? ꓣꓳ ꓒꓵꓽ ꓒ ꓐꓴ ꓫꓵꓻ ꓗꓷ ꓟ ꓦꓬꓼ ꓠꓬꓲ ꓗꓪ ꓐꓰ ꓮ ꓟꓶ ꓗꓪ ꓛꓲ꓾ ꓮꓸ ꓫꓵ ꓥ ꓟꓲ ꓬꓲ ꓪꓴꓸ ꓚꓰꓼ ꓔ ꓟ ꓡꓰ ꓐꓰ ꓓꓹ ꓢꓰꓽ ꓡꓳ꓾ ꓐꓰ ꓐꓯ ꓢꓲ ꓜꓲ ꓡ ꓥꓳ꓿ 5 ꓮ ꓡꓲꓳ ꓐꓯ ꓠꓬ ꓮꓽ ꓠꓱ ꓕꓯ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓟꓴꓽ ꓗꓪ ꓙꓳ ꓡ ꓢꓲ꓾ ꓟꓲ ꓠꓯ ꓠꓬ ꓬꓲꓻ ꓙꓬ ꓗꓳ ꓡꓳ ꓗꓪ ꓐꓰ ꓓꓳ ꓡ ꓢꓲ ꓠꓬꓲ ꓙꓳ ꓡ ꓟ ꓕꓱ ꓟ ꓔꓯ ꓬꓲ ꓪꓽ ꓣꓷꓠꓸ ꓠꓲꓹ ꓟꓽ ꓫꓵ꓿ 6 ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓖꓳ ꓕꓯ ꓟ ꓟꓲꓺ ꓠꓯ ꓔꓯ ꓬꓲꓻ ꓙꓬ ꓟꓷꓸ ꓡꓰ ꓢꓲ ꓐꓬ ꓡꓰ ꓝꓲꓳ꓿ 7 ꓮ ꓟꓶ ꓟ ꓟꓴꓽ ꓗꓪ ꓟꓲ ꓠꓯ ꓔꓯˍ ꓟꓲ꓾ ꓐꓯ ꓘꓶꓽ ꓖꓳ ꓟ ꓡꓰ ꓮꓸ ꓔꓳꓸ ꓛꓴꓻ ꓠꓹ ꓟ ꓝꓰꓺ ꓔ ꓡꓳ꓿ ꓪꓴ-ꓢ ꓔꓯ ꓟꓽ ꓒꓵꓽ ꓢꓴ ꓔꓯ ꓐꓯ ꓟꓴ ꓘꓶꓽ ꓢꓲ ꓛꓴꓻ ꓛꓰꓹ ꓡꓰ ꓝꓲˍ ꓟ ꓖꓳ ꓕꓲ ꓠꓬꓲ ꓗꓪ ꓛꓲ ꓝꓰꓺ ꓔ ꓟ ꓥ ꓡꓳ꓿ 8 ꓖꓳ ꓡꓱ ꓥ ꓟꓲ ꓠꓲꓹ ꓠꓵ ꓢꓴ ꓐꓴꓳ꓾ ꓢꓲ ꓒꓽ ꓟꓲꓽ ꓙꓬ ꓗꓪ ꓕꓲ ꓠꓬꓲ ꓠꓬ ꓕꓲ ꓔꓴ ꓘꓳꓼˍ ꓡꓰ ꓐꓰ꓾ ꓕꓲ ꓔꓴ ꓘꓳꓼ ꓠꓬ ꓕꓲ ꓠꓬꓲˍ ꓡꓰ ꓐꓰ ꓥ ꓟ꓾ ꓕꓱ ꓕꓲꓽ ꓫꓵꓽ ꓕꓽ ꓟꓲ ꓡꓰ ꓝꓲ꓿ 9 ꓢꓲ ꓒꓽ ꓡ ꓙ ꓟꓳ ꓔ ꓟ ꓠꓬ ꓡꓷꓺ ꓡꓰꓳ꓾ ꓐꓰ ꓓꓵꓽ ꓙꓽ ꓢꓴ ꓙꓳˍ ꓟ ꓡꓰ ꓐꓰ ꓡꓷ ꓡꓰ ꓟ ꓟꓽ ꓥ꓿ ꓠꓴ ꓪꓽ ꓕꓲ ꓣꓳꓺˍ ꓟꓲ ꓟꓽ ꓟꓶꓽ ꓡꓰ ꓠꓹ ꓟ꓾ ꓮꓽ ꓙꓵ ꓢꓴ ꓔꓯ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓝꓲ ꓠꓲꓹ ꓫꓵˍ ꓠꓬꓲ꓾ ꓬꓲ ꓠꓲꓹ ꓟ ꓫꓵꓺ ꓖꓶ ꓔꓬ ꓟ ꓥ ꓡꓳ꓿ 10 ꓖꓳ ꓡꓱ ꓥ ꓟꓲ ꓢꓲ ꓒꓽ ꓦꓬꓼ ꓠꓬꓲ ꓠꓬ꓾ ꓞꓳ ꓘꓴꓽˍ ꓡꓰ ꓐꓰ ꓛꓲ ꓡ ꓥꓳ꓿ ꓖꓳ ꓕꓲ ꓠꓬꓲ ꓗꓪ ꓟꓴꓽ ꓗꓪ ꓠꓬ ꓢꓯꓼ ꓓꓽ ꓟ ꓟꓶꓻ ꓢꓲ ꓡꓳꓹ ꓬꓰˍ ꓥꓳ꓿ ꓬꓲ ꓑꓰꓹ ꓙꓳˍ ꓟ ꓥ ꓕ ꓑꓳꓸ ꓠꓬ ꓮꓸ ꓓꓲꓽ ꓞꓻˍ ꓟ ꓮꓸ ꓔꓳꓸ ꓗꓪ ꓙꓲꓻ ꓡꓰ ꓢꓲ꓾ ꓟꓲ ꓠꓯˍ ꓐꓰ ꓟꓲ ꓠꓯ ꓠꓯꓸꓼ ꓗꓪ ꓙꓳˍ ꓟ ꓮꓽ ꓙꓵ ꓛꓴꓻ ꓖꓴ ꓡꓰˍ ꓥꓳ꓿ 11 ꓕꓱ ꓟꓬ ꓟ ꓮꓽ ꓙꓵ ꓔꓯ ꓬꓲ ꓕꓱ ꓡꓱ ꓟꓶꓽ ꓡꓰ ꓝꓲ ꓠ ꓗꓹ ꓠꓬꓲ꓾ ꓠꓴ ꓪꓽ ꓞꓳ ꓙꓳˍ ꓟ ꓗꓪ ꓢꓲ ꓚꓰꓸ ꓔ ꓢꓴˍ ꓡꓰ ꓐꓰ ꓠꓲꓹ ꓒꓵꓽ ꓠꓲꓹ ꓡꓱ ꓢꓴ ꓬꓰ ꓠꓹ ꓟ ꓪ ꓜꓲ ꓧꓪꓸ ꓛꓲꓽ ꓔ ꓢꓲ꓾ 12 ꓪꓴ-ꓢ ꓦꓬꓼ ꓠꓬꓲ ꓛꓲ ꓡ ꓠꓹ ꓟ ꓔꓯ ꓠꓲꓹ ꓡꓱꓻ ꓡꓱˍ ꓡꓰꓽ ꓢꓯꓼ ꓕꓵꓼ ꓢꓲ ꓦꓴꓺ ꓠꓬꓹ ꓙꓲꓽ ꓙꓳˍ ꓡꓳ꓿ ꓖꓳ ꓕꓲ ꓠꓬꓲ ꓗꓪ ꓠꓬ ꓮꓸ ꓓꓲꓽ ꓪꓽ ꓠꓬꓲˍ ꓟ ꓮꓸ ꓔꓳꓸ ꓡꓰ ꓟꓴꓽ ꓗꓪ ꓔꓯ ꓛꓴꓻ ꓖꓴ ꓡꓰ ꓢꓲ꓾ ꓗꓴ ꓤ ꓮꓽ ꓙꓵˍ ꓟꓲ ꓙꓲꓻ ꓡꓰ ꓖꓴˍ ꓥꓳ꓿ 13 ꓖꓳ ꓡꓱ ꓥ ꓟꓲ ꓣꓳꓽ ꓠꓬ ꓪꓴ-ꓢ ꓡꓰ ꓙ ꓟꓳ ꓔ ꓟ꓾ ꓪꓴ-ꓢ ꓬꓲ ꓔꓱꓹ ꓜꓳꓽˍ ꓟ ꓐꓲ ꓞꓹ ꓖꓴ ꓟꓴꓽ ꓗꓪ ꓫꓵꓼˍ ꓐꓰ ꓟꓲ ꓠꓯ ꓫꓵꓼ ꓔꓯ ꓥꓳ ꓡꓳꓸ ꓔꓬ ꓟ ꓥ ꓡꓳ꓿ 14 ꓖꓳ ꓡꓱ ꓠꓬꓲ ꓠꓲꓹ ꓠꓵ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓕꓱ ꓟꓬ ꓫꓵꓽ ꓔꓯ ꓥꓳ ꓡꓳꓸ ꓔꓬ ꓠꓬꓲ꓾ ꓢꓲ ꓒꓽ ꓟꓲꓽ ꓙꓬ ꓗꓪ ꓠꓴ ꓪꓽ ꓠꓬ ꓬꓲꓸ ꓐꓼ ꓟꓽ ꓙꓳ ꓟ ꓐꓰ ꓓꓰ ꓖꓴ ꓟꓽ ꓙꓳ ꓢꓴ ꓒꓬꓱꓼ ꓡ ꓢꓲ꓾ ꓬꓲˍ ꓐꓰ ꓧꓳꓹ ꓡꓰ ꓠꓹ ꓟ ꓢꓯꓼ ꓕꓵꓼ꓿ 15 ꓝꓮꓲ ꓣꓳ ꓢꓲ ꓒꓽ ꓠꓲꓹ ꓟ ꓫꓵˍ ꓟ ꓔꓯ ꓠꓬ ꓚꓬꓴ ꓟꓶˍ ꓟ ꓣꓱ ꓛꓰ ꓚꓬꓹ ꓠꓯꓹ ꓡꓳ꓿ ꓕꓱ ꓟ ꓔꓯꓸ ꓟꓳ꓾ ꓣꓳ ꓠꓲꓹ ꓠꓵˍ ꓟ ꓮ ꓬꓲꓼ ꓒꓳ-ꓡꓳ ꓡꓰ꓾ ꓢꓲ ꓒꓽ ꓬꓲ ꓔꓯ ꓖꓶꓽˍ ꓟ ꓙꓽ ꓗꓴꓸ ꓠꓲꓹ ꓔꓯ ꓛꓳ ꓢꓲ ꓠꓴ ꓪꓽ ꓔꓯ ꓐꓳ ꓖꓶ ꓩꓴ ꓡ ꓟ ꓡꓰ ꓐꓰ ꓥ ꓡꓳ꓿ 16 ꓬꓲ ꓕꓳ ꓶ ꓡꓯꓼ ꓫꓴ ꓮꓽ ꓙꓵ ꓗꓪˍ ꓟꓲ ꓕꓱ ꓟꓬ ꓫꓵꓽ ꓔꓯ ꓟꓳꓸ ꓐꓯ ꓔ ꓟ ꓙꓳˍ ꓡꓳ꓿ ꓬꓲ ꓐꓳ ꓔ ꓟ ꓗꓪ ꓙꓽ ꓜꓲꓼ ꓫꓸˍ ꓟ ꓕꓲ ꓫꓵꓽ ꓫꓵ ꓙꓳˍ ꓡꓳ꓿ ꓟꓽ ꓢꓷꓸ ꓢꓴˍ ꓐꓰ ꓠꓲꓹ ꓟ ꓟꓽ ꓔꓰꓹ ꓢꓴ ꓠꓬ꓾ ꓢꓲꓽ ꓫꓬ ꓕꓳ ꓶ ꓕꓲ ꓔꓳꓸ ꓔꓳꓸ ꓔꓯ ꓒꓶ ꓧꓶꓸ ꓡꓰ ꓝꓲ ꓢꓲ ꓚꓲ ꓛꓬ ꓔꓯ ꓐꓬ ꓡꓰ ꓝꓲ ꓓꓴ ꓗꓷ ꓡꓰˍ ꓟ ꓡꓰ ꓐꓰ꓾ ꓒꓳ-ꓡꓳ ꓡꓰ ꓐꓳ ꓔ ꓟ ꓔꓯˍ ꓟꓲ ꓒꓶ ꓧꓶꓸ ꓡꓰ ꓝꓲˍ ꓡꓳ꓿ 17 ꓖꓳ ꓡꓱ ꓠꓬꓲ ꓠꓲꓹ ꓠꓵ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓧꓶꓸ ꓕꓯˍ ꓡꓰ ꓕꓱ ꓟꓬ ꓫꓵ ꓔꓯ ꓢꓷˍ ꓠꓬꓲ꓾ ꓬꓲ ꓡꓲꓽ ꓟꓽ ꓛꓳ ꓢꓴ ꓐꓴ ꓡꓰ ꓠꓴ ꓪꓽ ꓔꓯ ꓧꓳꓽ ꓪꓴꓸ ꓙꓰ ꓢꓲ꓾ ꓕꓶˍ ꓟ ꓔꓬ ꓖꓴ ꓗꓪ ꓐꓰ ꓟꓽ ꓞꓰꓻ ꓡꓰ ꓠꓹ ꓟ ꓤꓻ ꓟꓳ꓿ 18 ꓖꓳ ꓡꓱ ꓢꓲ ꓣꓱ ꓛꓰˍ ꓐꓰ꓾ ꓚꓬꓴ ꓙ ꓢꓴ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓔꓯ ꓢꓷꓸˍ ꓟ ꓗꓪ ꓮ ꓕꓯꓽˍ ꓟꓲ ꓪꓴꓽ ꓡ ꓝꓲ꓿ ꓮ ꓟꓶ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓬꓲ ꓠꓬ ꓟꓬꓱ ꓓꓳꓽ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

1 ꓬꓳ-ꓦ 1

1 ꓬꓲ ꓚꓰ ꓬꓲ ꓪꓴꓸ ꓗꓪ ꓐꓰ ꓙꓳ ꓔꓬ ꓢꓲ꓾ ꓥꓪ ꓠꓴꓽ ꓑ ꓙꓽ ꓗꓷ ꓟ꓾ ꓥꓪ ꓠꓴꓽ ꓚꓲꓸ ꓛꓬ ꓟꓬ ꓢꓶꓽ ꓡꓰ ꓡꓳꓸ ꓟꓳꓻ ꓗꓷ ꓟ ꓐꓰ꓾ ꓥꓪ ꓠꓴꓽ ꓡꓰ ꓔꓱꓹ ꓠꓬꓲ ꓗꓷ ꓢꓲ ꓡꓯꓼ ꓒꓯꓹ ꓡꓰ ꓫꓱꓹ ꓠꓬꓲ ꓗꓷ ꓟ ꓢꓯꓼ-ꓟꓬ ꓐꓯ-ꓘꓶꓽ ꓔꓯꓸ ꓟꓳꓸ ꓢꓷꓸ ꓙ ꓟꓳ ꓙ ꓠꓲꓹ ꓫꓵˍ ꓡꓳ꓿ 2 ꓐꓹ ꓐˍ ꓐꓰ ꓕꓲꓽ ꓪꓺꓼ ꓔꓬ ꓟ꓾ ꓕꓲ ꓞꓲꓼ ꓕꓲ ꓑ ꓢꓯꓼ-ꓟꓬ ꓕꓱ ꓟ ꓠꓬ ꓥꓪ ꓠꓴꓽ ꓔꓯ ꓟꓳꓸ ꓖꓶꓽ ꓡꓺꓳ꓿ ꓢꓯꓼ-ꓟꓬ ꓐꓯ-ꓘꓶ ꓕꓱ ꓟ ꓔꓯ ꓥꓪ ꓠꓴꓽ ꓟꓳꓻ ꓗꓷ ꓠꓬꓲ꓾ ꓥꓪ ꓠꓴꓽ ꓠꓬ ꓕꓱ ꓟ ꓐꓱ ꓶ ꓢꓷꓸ ꓙ ꓟꓳ ꓙ ꓢꓲ꓾ ꓠꓴ ꓪꓽ ꓔꓯˍ ꓟꓲ ꓐꓯ ꓟꓸ ꓖꓶˍ ꓟ ꓥ ꓡꓳ꓿ 3 ꓥꓪ ꓠꓴꓽ ꓠꓬ ꓐꓹ ꓐˍ ꓐꓰ ꓬꓲ ꓮ ꓐꓲ ꓬꓰ-ꓢꓴ ꓙꓲ-ꓢꓴˍ ꓐꓰ ꓙꓻ ꓡꓯꓽ ꓘꓳˍ ꓟ ꓥ ꓢꓲ꓾ ꓠꓴ ꓪꓽˍ ꓟꓲ ꓙꓻ ꓡꓯꓽ ꓘꓳˍ ꓟ ꓖꓳ ꓟ ꓑꓯꓹ ꓟꓶ ꓠꓹ ꓟ꓾ ꓥꓪ ꓠꓴꓽ ꓟꓳꓻ ꓠꓬꓲ ꓟ ꓐꓰ ꓑ ꓙꓽ ꓠꓬꓲ ꓟ ꓠꓴ ꓪꓽ ꓔꓯ ꓐꓯ ꓟꓸ ꓖꓶˍ ꓟ ꓥ ꓡꓳ꓿ 4 ꓥꓪ ꓠꓴꓽ ꓡꓰ ꓕꓱ ꓟꓬ ꓫꓵꓽ ꓐꓳ ꓖꓶ ꓩꓴ ꓡ ꓟ ꓠꓬ꓾ ꓣꓳ ꓗꓹ ꓛꓲ ꓓꓴ ꓐꓲ ꓡꓰ ꓠꓹ ꓟ ꓥ ꓡꓳ꓿ 5 ꓬꓲ ꓗꓪ ꓐꓰ ꓥꓪ ꓠꓴꓽ ꓑ ꓙꓽ ꓗꓷ ꓢꓲ ꓠꓴ ꓪꓽ ꓔꓯˍ ꓟꓲ ꓐꓯ ꓟꓸ ꓖꓶ ꓠꓲꓹ ꓫꓵˍ ꓟ ꓓꓳꓽ ꓠꓬ꓾ ꓪꓴ-ꓢ ꓠꓽ ꓠꓬꓲꓺ ꓟꓳꓻ ꓓꓴ ꓥ ꓢꓲ꓾ ꓬꓲ ꓠꓯꓸꓼ ꓗꓪ ꓠꓯ ꓞꓲꓹ ꓟ ꓮꓸ ꓔꓲꓸˍ ꓟꓲ ꓟꓽ ꓙꓳ꓾ ꓐꓯˍ ꓟ ꓕꓱ ꓟ ꓥ ꓡꓳ꓿ 6 ꓣꓳꓽ ꓠꓬ ꓪꓴ-ꓢˍ ꓐꓰ ꓙꓻ ꓡꓯꓽ ꓘꓳˍ ꓡꓳ꓾ ꓐꓯ ꓢꓲ꓾ ꓠꓯ ꓞꓲꓹ ꓟ ꓗꓪ ꓞꓳ ꓙꓳ ꓔꓬ ꓢꓰꓽ ꓕꓯ ꓠꓽ꓾ ꓣꓳꓽ ꓗꓶꓸ ꓢꓴ ꓥ ꓢꓲ꓾ ꓔꓱꓹ ꓚꓵˍ ꓟ ꓟꓽ ꓬꓰ ꓔꓬ ꓢꓴ ꓥ ꓡꓳ꓿ 7 ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓠꓬꓲ ꓟꓳꓻ ꓓꓴ ꓥ ꓟ ꓡꓰ ꓐꓰ꓾ ꓣꓳˍ ꓟꓲ ꓠꓬꓲ ꓟꓳꓻ ꓓꓴ ꓗꓪ ꓞꓳ ꓙꓳˍ ꓕꓯ ꓠꓽ꓾ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓙꓻ ꓡꓯꓽ ꓘꓳ ꓡꓰ ꓢꓲ꓾ ꓬꓲ ꓮ ꓐꓲ ꓬꓰ-ꓢꓴ ꓙꓲ-ꓢꓴ ꓫꓵꓽ ꓡꓰ ꓣꓳ ꓝꓴꓲ ꓮꓽ ꓙꓵ ꓔꓯ ꓞꓲꓽ ꓫꓬꓻ ꓡꓰˍ ꓟ ꓥ ꓡꓳ꓿ 8 ꓣꓳꓽ ꓠꓬ꓾ ꓮꓸ ꓫꓵ ꓝꓴꓲ ꓟꓽ ꓙꓳ꓾ ꓐꓰ ꓐꓯ ꓗꓷ ꓐꓷˍ ꓠꓬ꓾ ꓣꓳꓽ ꓠꓽ ꓚꓲꓸ ꓛꓬ ꓔꓯ ꓗꓶꓸ ꓔꓬ ꓟ ꓥ ꓢꓲ꓾ ꓣꓳꓽ ꓠꓯS ꓗꓪˍ ꓟꓲ ꓔꓱꓹ ꓚꓵˍ ꓟ ꓟꓽ ꓓꓯꓹ꓿ 9 ꓣꓳꓽ ꓝꓴꓲ ꓣꓳꓽ ꓣꓷꓠꓸˍ ꓕꓯ ꓠꓽ꓾ ꓣꓳꓽ ꓝꓴꓲ ꓬꓲ ꓖꓽ ꓖꓶꓽ ꓢꓲ꓾ ꓟꓽ ꓔꓱꓹ ꓟꓽ ꓜꓳꓽ ꓟ ꓮꓽ ꓙꓵ ꓗꓪ ꓐꓰ ꓞꓲꓽ ꓫꓬꓻ ꓡꓰ ꓝꓲ ꓠꓹ ꓟ꓾ ꓪꓴ-ꓢ ꓠꓬ ꓦ ꓡꓱ ꓐꓳˍ ꓟ ꓐꓰ ꓔꓱꓹ ꓜꓳꓽˍ ꓟ ꓥ ꓡꓳ꓿ 10 ꓣꓳꓽ ꓠꓬ ꓝꓴꓲ ꓟꓽ ꓬꓰ ꓠꓬꓲ꓾ ꓐꓰ ꓐꓯˍ ꓕꓯ ꓠꓽ꓾ ꓣꓳ ꓡꓰ ꓪꓴ-ꓢ ꓔꓯ ꓗꓶꓸ ꓢꓴ ꓒꓬꓱꓼ ꓡ ꓝꓲˍ ꓟ ꓥ ꓢꓲ꓾ ꓬꓲ ꓐꓯ ꓘꓶꓽˍ ꓟꓲ ꓣꓳꓽ ꓠꓯꓸꓼ ꓗꓪ ꓟꓽ ꓓꓯꓹ꓿

1 ꓬꓳ-ꓦ 2

1 ꓥꓪ ꓤ ꓠꓱ ꓤ ꓐꓴꓳ꓾ ꓥꓪ ꓡꓰ ꓠꓴ ꓪꓽ ꓔꓯ ꓕꓱ ꓟꓬ ꓫꓵꓽ ꓐꓳ ꓖꓶ ꓩꓴ ꓡ ꓟ ꓠꓬ꓾ ꓠꓴ ꓪꓽ ꓝꓴꓲ ꓟꓽ ꓬꓰ ꓠꓹ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓮꓽ ꓟ ꓝꓴꓲ ꓬꓰ ꓗꓷ ꓐꓷˍ ꓠꓬ꓾ ꓐꓹ ꓐ ꓔꓬ ꓗꓪ ꓣꓳ ꓐꓱ ꓶ ꓖꓶꓻ ꓬꓲꓽ ꓙ ꓢꓴ ꓕꓲ ꓣꓳ ꓙꓳˍ ꓡꓳ꓿ ꓬꓲ ꓠꓬ ꓔꓱꓹ ꓜꓳꓽ ꓢꓴ ꓬꓰ-ꓢꓴ ꓙꓲ-ꓢꓴ ꓥ ꓡꓳ꓿ 2 ꓝꓮꓲ ꓬꓲ ꓚꓲꓸ ꓛꓬ ꓠꓬ ꓣꓳ ꓝꓴꓲ ꓑꓶꓸ ꓓꓴ ꓦꓶꓻ ꓠꓽ ꓡꓰˍ ꓟ ꓔꓲ ꓓꓴ ꓬꓰ ꓗꓷꓳ꓿ ꓣꓳ ꓐꓱ ꓶˍ ꓡꓰ ꓟꓽ ꓞꓲꓺ꓾ ꓟꓵꓽ ꓗꓳꓹ ꓓꓵ ꓓꓵ ꓢꓴ ꓐꓱ ꓶˍ ꓟꓲ ꓥ ꓡꓳ꓿ 3 ꓬꓲ ꓕꓵꓼ ꓪ ꓔꓯ ꓣꓳ ꓒꓵꓽ ꓛꓳˍ ꓕꓯ ꓠꓽ꓾ ꓣꓳꓽ ꓠꓬ ꓬꓲ ꓔꓯ ꓢꓷꓸˍ ꓟ ꓗꓸ ꓚꓵ ꓥ ꓡꓳ꓿ 4 ꓥꓪ ꓠꓬ ꓬꓲ ꓔꓯ ꓢꓷꓸˍ ꓡꓳ꓾ ꓐꓯ ꓢꓲ꓾ ꓬꓲ ꓕꓵꓼ ꓪ ꓔꓯ ꓟꓽ ꓒꓵꓽ ꓛꓳ ꓢꓴ ꓠꓽ ꓗꓶꓸ ꓢꓴ ꓥ ꓢꓲ꓾ ꓔꓱꓹ ꓚꓵˍ ꓟ ꓠꓬ ꓬꓲ ꓠꓯꓸꓼ ꓗꓪ ꓟꓽ ꓓꓯꓹ꓿ 5 ꓖꓳ ꓡꓱ ꓥ ꓟꓲ ꓪꓴ-ꓢ ꓐꓯ ꓘꓶꓽ ꓒꓵꓽ ꓛꓳ ꓢꓴ ꓮꓽ ꓟ ꓠꓯꓸꓼ ꓗꓪˍ ꓟꓲ꓾ ꓪꓴ-ꓢ ꓠꓵꓻ ꓠꓲꓹ ꓪꓴꓽ ꓓꓰ ꓡꓰ ꓟ ꓥ ꓢꓲ꓾ ꓕꓱ ꓟ ꓗꓪ ꓐꓰ ꓣꓳꓽ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓔꓬ ꓟ ꓢꓷꓸ ꓡꓰ ꓓꓻˍ ꓡꓳ꓿ 6 ꓥꓪ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓔꓬ ꓡꓳ꓾ ꓐꓯ ꓢꓴ ꓠꓬ ꓬꓲ ꓚꓲꓸ ꓛꓬꓽˍ ꓟꓲ ꓙꓲ-ꓢꓴ ꓞꓳ ꓙꓳ ꓗꓷ ꓟ ꓡꓰ ꓐꓰ ꓞꓳ ꓙꓳ ꓙꓲꓽ ꓙꓳˍ ꓡꓳ꓿ 7 ꓠꓲꓹ ꓠꓵ ꓢꓴ ꓐꓴꓳ꓾ ꓥꓪ ꓡꓰ ꓠꓴ ꓪꓽ ꓔꓯ ꓐꓳ ꓖꓶ ꓩꓴ ꓡ ꓟ ꓠꓬ ꓕꓵꓼ ꓪ ꓬꓲ ꓫꓵꓼ ꓕꓲ ꓚꓱꓹ ꓟꓽ ꓥ꓿ ꓠꓴ ꓪꓽ ꓬꓲ ꓪꓴꓸ ꓕꓯˍ ꓡꓰ ꓙꓳˍ ꓟ ꓕꓵꓼ ꓪ ꓬꓲ ꓡꓵ ꓥ ꓢꓲ꓾ ꓠꓴ ꓪꓽ ꓑ ꓙꓽ ꓠꓬꓲ ꓟ ꓐꓯ ꓘꓶꓽ ꓥ ꓡꓳ꓿ 8 ꓖꓳ ꓡꓱ ꓥ ꓟꓲ ꓥꓪ ꓡꓰ ꓠꓴ ꓪꓽ ꓔꓯ ꓐꓳ ꓖꓶ ꓩꓴ ꓡ ꓟ ꓠꓬ ꓕꓵꓼ ꓪ ꓬꓲ ꓫꓵꓼˍ ꓡꓰ ꓐꓰ ꓗꓹ ꓢꓰꓽ ꓡꓳ꓿ ꓔꓱꓹˍ ꓟ ꓕꓱ ꓟ ꓠꓬ ꓢꓲ ꓒꓽ ꓠꓯꓸꓼ ꓗꓪˍ ꓟꓲ꓾ ꓠꓴ ꓪꓽ ꓠꓯꓸꓼ ꓗꓪˍ ꓟꓲ꓾ ꓙꓳˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓯ ꓞꓲꓹˍ ꓟ ꓠꓬ ꓗꓳꓸ ꓙꓰ ꓔꓬ ꓢꓲ꓾ ꓔꓱꓹˍ ꓟ ꓠꓬꓲ ꓟꓳꓻ ꓓꓴ ꓠꓬ ꓮ ꓟꓶˍ ꓡꓰ ꓣꓳꓺ ꓡꓺꓳ꓿ 9 ꓠꓬꓲ ꓟꓳꓻ ꓓꓴ ꓗꓪ ꓔꓬ ꓡꓳ꓾ ꓐꓯ ꓢꓲ ꓬꓲ ꓬꓲꓼ ꓠꓬꓲ ꓔꓯ ꓠꓲꓹ ꓜꓳ ꓢꓴ ꓠꓬ꓾ ꓮ ꓟꓶˍ ꓟꓲ ꓠꓯ ꓞꓲꓹˍ ꓟ ꓗꓪ ꓔꓬ ꓢꓰꓽ ꓡꓳ꓿ 10 ꓬꓲ ꓬꓲꓼ ꓬꓲ ꓠꓬꓲ ꓔꓯ ꓠꓲꓹ ꓠꓵ ꓢꓴ ꓠꓬ ꓠꓬꓲ ꓟꓳꓻ ꓓꓴ ꓗꓪ ꓔꓬ ꓟ ꓥ ꓢꓲ꓾ ꓬꓲ ꓠꓯꓸꓼ ꓗꓪ ꓛꓲ ꓕꓲꓽ ꓡꓰ ꓑꓶꓸ ꓟꓽ ꓙꓳ꓿ 11 ꓖꓳ ꓡꓱ ꓥ ꓟꓲ ꓬꓲ ꓬꓲꓼ ꓬꓲ ꓠꓬꓲ ꓔꓯ ꓠꓲꓹ ꓜꓳ ꓢꓴ ꓠꓽ ꓠꓯ ꓞꓲꓹˍ ꓟ ꓗꓪ ꓔꓬ ꓢꓲ ꓠꓯ ꓞꓲꓹˍ ꓟ ꓗꓪ ꓫꓱꓽˍ ꓠꓬꓲ꓾ ꓠꓯ ꓞꓲꓹˍ ꓟ ꓡꓰ ꓬꓲ ꓟꓬ ꓢꓶꓽ ꓔꓯ ꓔꓶꓺ ꓡꓰ ꓝꓲˍ ꓟ ꓗꓪ ꓐꓰ ꓬꓲ ꓮ ꓡꓲ ꓗꓪ ꓙꓰˍ ꓟˍ ꓟꓲ ꓟꓽ ꓢꓷꓸ꓿ 12 ꓤ ꓠꓱ ꓤ ꓐꓴꓳ꓾ ꓢꓲ ꓒꓽ ꓟꓬꓱ ꓗꓪ ꓐꓰ ꓠꓴ ꓪꓽ ꓝꓴꓲ ꓥꓸ ꓦ ꓟꓶ ꓠꓬꓲ꓾ ꓥꓪ ꓡꓰ ꓠꓴ ꓪꓽ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ 13 ꓮꓽ ꓐꓽ ꓣꓱ ꓢꓴ ꓐꓴꓳ꓾ ꓬꓲ ꓚꓰ ꓬꓲ ꓪꓴꓸ ꓕꓯˍ ꓡꓰ ꓙꓳ ꓔꓬ ꓢꓴ ꓖꓳ ꓕꓲ ꓣꓳ ꓔꓯ ꓠꓴ ꓪꓽ ꓢꓷˍ ꓠꓬꓲ꓾ ꓥꓪ ꓡꓰ ꓠꓴ ꓪꓽ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ ꓤꓽ ꓖꓴ ꓡꓯꓸ ꓐꓴꓳ꓾ ꓠꓴ ꓪꓽ ꓠꓬ ꓥꓶˍ ꓟ ꓖꓳ ꓕꓲ ꓣꓳ ꓔꓯ ꓧꓪꓸ ꓡꓰ ꓠꓬꓲ꓾ ꓥꓪ ꓡꓰ ꓠꓴ ꓪꓽ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ ꓤ ꓠꓱ ꓤ ꓐꓴꓳ꓾ ꓠꓴ ꓪꓽ ꓠꓬ ꓐꓹ ꓐ ꓔꓯ ꓢꓷꓸˍ ꓠꓬꓲ꓾ ꓠꓴ ꓪꓽ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ 14 ꓮꓽ ꓐꓽ ꓣꓱꓽ ꓢꓴ ꓐꓴꓳ꓾ ꓬꓲ ꓚꓰ ꓬꓲ ꓪꓴꓸ ꓕꓯˍ ꓡꓰ ꓙꓳ ꓔꓬ ꓢꓴ ꓖꓳ ꓕꓲ ꓣꓳ ꓔꓯ ꓠꓴ ꓪꓽ ꓢꓷˍ ꓠꓬꓲ꓾ ꓥꓪ ꓡꓰ ꓠꓴ ꓪꓽ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ ꓤꓽ ꓖꓴ ꓡꓯꓸ ꓐꓴꓳ꓾ ꓠꓴ ꓪꓽ ꓠꓬ ꓢꓯꓼ ꓙꓳ ꓢꓲ꓾ ꓪꓴ-ꓢ ꓐꓯ ꓘꓶˍ ꓟꓲ ꓠꓴ ꓪꓽ ꓠꓯꓸꓼ ꓗꓪ ꓓꓯꓹ ꓢꓲ ꓠꓬꓲ꓾ ꓥꓶˍ ꓟ ꓖꓳ ꓕꓲ ꓣꓳ ꓔꓯ ꓠꓴ ꓪꓽ ꓧꓪꓸ ꓡꓰ ꓠꓬꓲ꓾ ꓥꓪ ꓡꓰ ꓠꓴ ꓪꓽ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ 15 ꓟꓲ ꓠꓯˍ ꓐꓰ ꓟꓲ ꓠꓯ ꓗꓪ ꓙꓳˍ ꓟ ꓔꓯ ꓕꓽ ꓠꓲꓹ ꓠꓵ꓿ ꓟꓲ ꓠꓯ ꓔꓯ ꓠꓲꓹ ꓠꓵ ꓢꓴ ꓠꓯS ꓗꓪ ꓠꓽ ꓐꓹ ꓐ ꓠꓵꓻ ꓠꓲꓹ ꓟꓽ ꓓꓯꓹ꓿ 16 ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓗꓪ ꓙꓳˍ ꓟ꓾ ꓧꓪꓽ ꓖꓳ ꓓꓱ ꓦꓯꓸ ꓠꓲꓹ ꓙꓵꓽˍ ꓟ꓾ ꓟꓬ ꓢꓶꓽ ꓟꓬ ꓦꓯꓸˍ ꓟ ꓐꓰ꓾ ꓕꓱ ꓕꓲ ꓤꓶꓻ ꓟ ꓘꓶꓽ ꓘꓹ ꓓꓴ ꓮꓽ ꓙꓵ ꓠꓬ꓾ ꓐꓹ ꓐ ꓗꓪ ꓐꓰ ꓡꓻ ꓟ ꓟꓽ ꓥ꓿ ꓟꓲ ꓠꓯ ꓗꓪ ꓐꓰ ꓡꓻ ꓟ ꓥ ꓡꓳ꓿ 17 ꓝꓮꓲ ꓟꓲ ꓠꓯˍ ꓐꓰ ꓟꓲ ꓠꓯ ꓗꓪ ꓟ ꓦꓯꓸ ꓠꓲꓹ ꓙꓵꓽˍ ꓟ ꓠꓬ ꓗꓳꓸ ꓙꓰ ꓔꓬ ꓡꓳ꓿ ꓪꓴ-ꓢ ꓠꓲꓹ ꓡꓶꓽ ꓛꓳ ꓢꓴ ꓠꓽ ꓕꓲ ꓞꓲꓼ ꓕꓲ ꓑ ꓙꓳ ꓔꓬ ꓥꓳ꓿ 18 ꓤ ꓠꓱ ꓤ ꓐꓴꓳ꓾ ꓮ ꓟꓶ ꓠꓽ ꓡꓳꓹ ꓬꓰ ꓝꓲꓸ ꓥ ꓡꓳ꓿ ꓙꓲ-ꓢꓴ ꓔꓯ ꓔꓳꓹ ꓒ ꓖꓳ ꓕꓲ ꓣꓳ ꓡꓻˍ ꓥꓳ꓾ ꓐꓰ ꓠꓴ ꓪꓽ ꓑ ꓙꓽ ꓗꓷ ꓟ ꓡꓰ ꓐꓰ꓾ ꓮ ꓟꓶˍ ꓟꓲ ꓙꓲ-ꓢꓴ ꓔꓯ ꓔꓳꓹ ꓢꓴ ꓮꓽ ꓟꓬꓹ ꓓꓳ ꓡ ꓠꓬꓲ꓾ ꓡꓳꓹ ꓬꓰ ꓝꓲꓸ ꓥ ꓟ ꓣꓳꓽ ꓢꓷꓸˍ ꓡꓳ꓿ 19 ꓬꓲ ꓪꓽ ꓠꓬ ꓣꓳ ꓗꓪ ꓟ ꓟꓽ ꓥ ꓠꓬꓲ ꓣꓳꓽ ꓗꓪ ꓐꓰ ꓓꓳ ꓙꓰꓳ꓿ ꓬꓲ ꓪꓽ ꓠꓬ ꓣꓳ ꓗꓪ ꓟ ꓥ ꓕꓯ ꓠꓽ꓾ ꓣꓳꓽˍ ꓐꓰ ꓕꓲꓽ ꓪꓺꓼ ꓔꓬ ꓡꓳ ꓫꓵꓽ ꓥꓳ꓿ ꓬꓲ ꓪꓽ ꓓꓳ ꓙꓰˍ ꓟ ꓠꓬ꓾ ꓬꓲ ꓪꓽ ꓠꓽ ꓣꓳ ꓗꓪ ꓟ ꓟꓽ ꓥ ꓟ ꓟꓳꓸ ꓖꓶ ꓓꓳ ꓡ ꓠꓹ ꓟ ꓥ ꓡꓳ꓿ 20 ꓖꓳ ꓡꓱ ꓥ ꓟꓲ ꓢꓲ-ꓫꓬ-ꓢꓴ ꓖꓳ ꓕꓲ ꓣꓳ ꓡꓰ ꓠꓴ ꓪꓽ ꓔꓯ ꓟꓰꓺ ꓞꓶꓻ ꓟꓰ ꓖꓶꓽ ꓗꓷ ꓠꓬꓲ꓾ ꓠꓴ ꓪꓽ ꓮꓽ ꓙꓵ ꓠꓬ ꓔꓱꓹˍ ꓟ ꓔꓯ ꓢꓷˍ ꓡꓳ꓿ 21 ꓠꓴ ꓪꓽ ꓔꓯ ꓥꓪ ꓡꓰ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓟ ꓠꓬ꓾ ꓔꓱꓹ ꓚꓵˍ ꓟ ꓔꓯ ꓠꓴ ꓪꓽ ꓟꓽ ꓢꓷꓸ ꓠꓬꓲ ꓠꓽ ꓟꓽ ꓥ꓿ ꓔꓱꓹ ꓚꓵˍ ꓟ ꓔꓯ ꓠꓴ ꓪꓽ ꓢꓷꓸ ꓢꓲ꓾ ꓗꓶꓸˍ ꓟ ꓥ ꓕ ꓑꓳꓸ ꓠꓬ ꓔꓱꓹ ꓚꓵˍ ꓟ ꓗꓪ ꓐꓰ ꓡꓻˍ ꓟ ꓟꓽ ꓥ ꓟ ꓠꓴ ꓪꓽ ꓢꓷꓸˍ ꓠꓬꓲ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ 22 ꓗꓶꓸ ꓢꓴ ꓠꓬ ꓮꓽ ꓟ ꓥ ꓡ? ꓬꓰ-ꓢꓴ ꓠꓬ ꓙꓲ-ꓢꓴ ꓥꓳ꓾ ꓐꓰ ꓟꓽ ꓣꓷꓠꓸ ꓢꓴ ꓖꓳ ꓟ ꓟꓽ ꓥ ꓡ? ꓐꓹ ꓐˍ ꓐꓰ ꓮ ꓐꓲ ꓔꓯ ꓟꓽ ꓣꓷꓠꓸ ꓢꓴ ꓠꓬ ꓙꓲ-ꓢꓴ ꓔꓯ ꓔꓳꓹ ꓒ ꓥ ꓡꓳ꓿ 23 ꓮ ꓐꓲ ꓔꓯ ꓟꓽ ꓣꓷꓠꓸ ꓢꓴ ꓠꓬ ꓐꓹ ꓐ ꓔꓯ ꓡꓳꓺ ꓦ ꓗꓷ ꓢꓴ ꓥꓳ꓿ ꓮ ꓐꓲ ꓔꓯ ꓣꓷꓠꓸ ꓢꓴ ꓠ ꓐꓹ ꓐꓽˍ ꓟꓲ ꓙꓳˍ ꓡꓳ꓿ 24 ꓬꓲ ꓪꓴꓸ ꓕꓯˍ ꓡꓰ ꓑ ꓙˍ ꓟ ꓖꓳ ꓟ ꓠꓴ ꓪꓽ ꓠꓲꓹ ꓟ ꓗꓪ ꓮ ꓕꓯꓽˍ ꓟꓲ ꓓꓯꓹ ꓝꓲ꓿ ꓖꓳ ꓡꓱ ꓬꓰˍ ꓠꓬ ꓠꓴ ꓪꓽ ꓠꓽ ꓮ ꓐꓲˍ ꓐꓰ ꓐꓹ ꓐ ꓠꓯꓸꓼ ꓗꓪ ꓔꓬ ꓟꓶˍ ꓥꓳ꓿ 25 ꓢꓲ ꓒꓽ ꓡꓰ ꓣꓳꓽ ꓔꓯ ꓖꓶꓽ ꓙꓻ ꓟꓳˍ ꓟ ꓠꓬ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓥ ꓡꓳ꓿ 26 ꓥꓪ ꓡꓰ ꓠꓴ ꓪꓽ ꓔꓯ ꓕꓱ ꓟꓬ ꓫꓵꓽ ꓐꓳ ꓖꓶ ꓩꓴ ꓡ ꓟ ꓠꓬ꓾ ꓠꓴ ꓪꓽ ꓔꓯ ꓧꓳꓽ ꓪꓴꓸ ꓙꓰˍ ꓐꓰ ꓬꓰ ꓔꓬ ꓢꓴ ꓐꓴ ꓔꓯ ꓖꓴꓺ ꓢꓲ ꓐꓳ ꓔ ꓟ ꓥ ꓡꓳ꓿ 27 ꓠꓴ ꓪꓽ ꓔꓯ ꓢꓲ ꓒꓽ ꓡꓰ ꓟꓰ ꓞꓰꓻ ꓟꓰ ꓟꓶˍ ꓟ ꓠꓬ ꓮ ꓕꓯꓽˍ ꓟꓲ ꓠꓴ ꓪꓽˍ ꓐꓰ ꓔꓬ ꓠꓬꓲ꓾ ꓮꓽ ꓟˍ ꓟꓲ ꓠꓴ ꓪꓽ ꓔꓯ ꓟꓸ ꓖꓶ ꓟꓽ ꓛꓵ꓿ ꓢꓲ ꓒꓽ ꓟꓰ ꓞꓶ ꓟꓰ ꓖꓶˍ ꓟ ꓡꓰ ꓮꓸ ꓫꓵ ꓗꓪˍ ꓟꓲ ꓠꓴ ꓪꓽ ꓔꓯ ꓟꓸ ꓖꓶꓽ ꓡ ꓥꓳ꓿ ꓟꓰ ꓞꓶ ꓟꓰˍ ꓟ ꓕꓱ ꓟ ꓠꓬ ꓔꓱꓹˍ ꓟ ꓥ ꓡꓳ꓾ ꓗꓶꓸˍ ꓟ ꓟꓽ ꓥ꓿ ꓬꓲ ꓡꓰ ꓠꓴ ꓪꓽ ꓔꓯ ꓟꓸ ꓖꓶˍ ꓟ ꓡꓰ ꓐꓰ ꓠꓴ ꓪꓽ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓔꓬ ꓠꓯꓹ ꓡꓳ꓿ 28 ꓖꓳ ꓡꓱ ꓠꓬꓲ꓾ ꓤ ꓠꓱ ꓤ ꓐꓴꓳ꓾ ꓬꓲ ꓟꓳꓸ ꓖꓶꓽ ꓡ ꓕꓯ ꓣꓳꓽ ꓠꓲꓹ ꓪꓴꓽ ꓢꓲ꓾ ꓬꓲꓸ ꓡꓻˍ ꓕꓯ ꓬꓲ ꓟꓲꓽ ꓙꓬ ꓗꓪ ꓣꓳ ꓫꓸ ꓔꓳ ꓟꓽ ꓛꓵ ꓠꓹ ꓟ꓾ ꓠꓴ ꓪꓽ ꓠꓬ ꓬꓲ ꓠꓯꓸꓼ ꓗꓪ ꓔꓬ꓿ 29 ꓬꓲ ꓠꓬ ꓔꓱꓹ ꓜꓳꓽˍ ꓟ ꓥ ꓟ ꓠꓴ ꓪꓽ ꓢꓷˍ ꓕꓯ ꓠꓽ꓾ ꓔꓱꓹ ꓜꓳꓽˍ ꓟ ꓬꓰ ꓢꓴ ꓮꓽ ꓙꓵˍ ꓟꓲ ꓪꓴ-ꓢ ꓤ ꓠꓱ ꓥ ꓟ ꓠꓴ ꓪꓽ ꓢꓷˍ ꓡꓳ꓿

1 ꓬꓳ-ꓦ 3

1 ꓣꓳꓽ ꓔꓯ ꓪꓴ-ꓢ ꓤ ꓠꓱ ꓘꓴ ꓪ ꓠꓹ ꓟ꓾ ꓐꓹ ꓐ ꓡꓰ ꓣꓳꓽ ꓔꓯ ꓮ ꓘꓶꓻ ꓛꓲ ꓪꓴꓽˍ ꓟ ꓠꓵꓻ ꓠꓲꓹ ꓡꓰ ꓠꓲꓹ ꓠꓵˍ ꓟ ꓔꓯ ꓓꓵꓽ ꓙꓽ ꓠꓬꓲ꓿ ꓣꓳꓽ ꓠꓽ ꓚꓵ ꓚꓵ ꓬꓲ ꓤ ꓠꓱ ꓥ ꓡꓳ꓿ ꓟꓲ ꓠꓯ ꓞꓳ ꓤ ꓠꓬ ꓪꓴ-ꓢ ꓔꓯ ꓟꓽ ꓢꓷꓸˍ ꓠꓬꓲ꓾ ꓣꓳꓽ ꓔꓯˍ ꓟꓲ ꓬꓲ ꓪꓽ ꓟꓽ ꓢꓷꓸ꓿ 2 ꓠꓲꓹ ꓠꓵ ꓢꓴ ꓐꓴꓳ꓾ ꓮ ꓟꓶ ꓣꓳꓽ ꓠꓬ ꓪꓴ-ꓢ ꓤ ꓠꓱ ꓥ ꓡꓳ꓿ ꓖꓳ ꓡꓱ ꓢꓲ ꓢ ꓖꓪ ꓣꓳ ꓮ ꓡꓲ ꓒꓬꓱꓼ ꓡ ꓠ ꓗꓹ ꓟ ꓠꓬ ꓣꓳ ꓬꓲ ꓜꓶ ꓟꓽ ꓢꓷꓸ ꓢꓰꓽ꓿ ꓖꓳ ꓡꓱ ꓥ ꓟꓲ ꓬꓰ-ꓢꓴ ꓡ ꓕꓯ꓾ ꓣꓳꓽ ꓠꓬ ꓬꓲ ꓒꓬꓱꓽ ꓶꓻ ꓡꓰˍ ꓥꓳ꓾ ꓐꓰ ꓣꓳꓽ ꓢꓷˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓮ ꓡꓲ ꓥ ꓟ ꓢꓲꓽ ꓢꓲˍ ꓡꓰꓽ ꓣꓳ ꓬꓲ ꓔꓯ ꓟꓳꓻˍ ꓥꓳ꓿ 3 ꓮꓽ ꓟ ꓥ ꓟꓲ ꓢꓲ ꓒꓽ ꓠꓯꓸꓼ ꓗꓪ ꓥꓳ ꓡꓳꓸ ꓓꓴ ꓕꓱ ꓟ ꓙꓳ ꓢꓴ ꓠꓬ꓾ ꓢꓲ ꓒꓽ ꓢꓲꓽ ꓫꓬˍ ꓟ ꓡꓰ ꓐꓰ ꓚꓲꓸ ꓛꓬ ꓔꓯ ꓢꓲꓽ ꓫꓬ ꓡꓰ ꓝꓲˍ ꓡꓳ꓿ 4 ꓝꓴꓲ ꓬꓰ ꓢꓴ ꓮꓽ ꓟ ꓥ ꓟꓲ ꓙꓵꓽ ꓗ ꓔꓯ ꓛꓬˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓙꓵꓽ ꓗ ꓔꓯ ꓟꓽ ꓛꓳˍ ꓟ ꓠꓬ ꓝꓴꓲ ꓥ ꓡꓳ꓿ 5 ꓢꓲ ꓒꓽ ꓡ ꓗꓷ ꓟ ꓠꓬ ꓝꓴꓲ ꓣꓴ ꓦ ꓗꓷ ꓠꓹ ꓟ ꓥ ꓢꓲ꓾ ꓬꓲ ꓠꓬ ꓮꓸ ꓫꓵ ꓝꓴꓲ ꓟꓽ ꓙꓳ ꓟ ꓠꓴ ꓪꓽ ꓢꓷˍ ꓡꓳ꓿ 6 ꓬꓲ ꓠꓯꓸꓼ ꓗꓪ ꓔꓬ ꓢꓴ ꓮꓽ ꓟ ꓥ ꓟꓲ ꓝꓴꓲ ꓟꓽ ꓬꓰ ꓔꓬ꓿ ꓝꓴꓲ ꓬꓰ ꓔꓬ ꓢꓴ ꓮꓽ ꓟ ꓥ ꓟꓲ ꓬꓲ ꓔꓯ ꓟꓽ ꓟꓳꓻ ꓠꓬꓲ꓿ ꓢꓷˍ ꓟꓲ ꓟꓽ ꓢꓷꓸ ꓠꓬꓲ꓿ 7 ꓤ ꓠꓱ ꓤ ꓐꓴꓳ꓾ ꓮꓽ ꓟˍ ꓟꓲ ꓠꓴ ꓪꓽ ꓔꓯ ꓕꓽ ꓧꓳ ꓪꓴꓸ ꓙꓰ ꓝꓲ꓿ ꓔꓱꓹ ꓜꓳꓽˍ ꓟ ꓬꓰ ꓢꓴ ꓠꓬ꓾ ꓢꓲ ꓒꓽ ꓔꓱꓹ ꓜꓳꓽˍ ꓟ ꓡꓰ ꓐꓰ ꓬꓲˍ ꓟꓲ ꓔꓱꓹ ꓜꓳꓽˍ ꓡꓳ꓿ 8 ꓝꓴꓲ ꓬꓰ ꓔꓬ ꓢꓴ ꓠꓬ꓾ ꓬꓲ ꓪꓴꓸ ꓕꓯˍ ꓡꓰ ꓝꓴꓲ ꓬꓰ ꓔꓬ ꓢꓴ ꓠꓲꓽ ꓪ ꓔꓲ ꓔꓯꓸ ꓟ ꓥ ꓡꓳ꓿ ꓠꓲꓽ ꓪ ꓔꓲ ꓟꓬꓱꓽ ꓔꓯ ꓟꓶꓽ ꓬꓰ ꓝꓲ ꓠꓹ ꓟ ꓪꓴ-ꓢ ꓬꓲ ꓮ ꓐꓲ ꓟꓳꓸ ꓖꓶ ꓡ ꓗꓷꓳ꓿ 9 ꓪꓴ-ꓢ ꓡꓰ ꓦꓵꓻ ꓔ ꓢꓴ ꓮꓽ ꓟˍ ꓟꓲ ꓝꓴꓲ ꓟꓽ ꓬꓰ ꓔꓬ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓯS ꓗꓪ ꓪꓴ-ꓢ ꓬꓲ ꓫꓱꓹ ꓓꓯꓹ ꓢꓲ꓾ ꓬꓲ ꓠꓽ ꓪꓴ-ꓢ ꓤ ꓠꓱ ꓥ ꓠꓬꓲ ꓝꓴꓲ ꓬꓰ ꓟꓽ ꓐ ꓡ꓿ 10 ꓕꓱ ꓟ ꓗꓪ ꓐꓰ ꓪꓴ-ꓢ ꓤ ꓠꓱˍ ꓐꓰ꓾ ꓠꓲꓽ ꓪ ꓔꓲ ꓤ ꓠꓱ ꓒꓯꓽ ꓦꓰꓽ ꓓꓴ ꓙꓳˍ ꓡꓳ꓿ ꓔꓱꓹ ꓜꓳꓽˍ ꓟ ꓟꓽ ꓬꓰ ꓢꓴˍ ꓐꓰ꓾ ꓬꓲ ꓬꓲꓼ ꓬꓲ ꓠꓬꓲ ꓔꓯ ꓟꓽ ꓠꓲꓹ ꓠꓵ ꓢꓴ ꓠꓬ ꓪꓴ-ꓢ ꓤ ꓠꓱ ꓟꓽ ꓥ꓿ 11 ꓣꓳꓽ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ ꓠ ꓗꓹ ꓡꓳ꓾ ꓐꓯˍ ꓟ ꓕꓱ ꓟ ꓠꓬ꓾ ꓬꓲ ꓚꓰ ꓬꓲ ꓪꓴꓸ ꓗꓪ ꓐꓰ ꓠꓴ ꓪꓽ ꓑ ꓙꓽ ꓗꓷ ꓠꓬꓲ ꓟ ꓐꓯ ꓘꓶ ꓥ ꓡꓳ꓿ 12 ꓗꓷ-ꓬꓲˍ ꓡꓰ ꓐꓰ ꓕꓽ ꓬꓰ꓿ ꓬꓲ ꓠꓽ ꓥꓶˍ ꓟ ꓖꓳ ꓕꓲ ꓣꓳ ꓔꓯꓸ ꓟ ꓥ ꓠꓬꓲ ꓬꓲ ꓠꓬꓲ ꓤꓽ ꓔꓯ ꓢꓰꓼ ꓗꓷꓳ꓿ ꓮꓸ ꓫꓵ ꓪꓴꓸ ꓠꓬꓲ ꓬꓲ ꓔꓯ ꓢꓰꓼ ꓗꓷ ꓡ? ꓬꓲ ꓚꓲ ꓛꓬ ꓬꓰˍ ꓟ ꓟꓬꓱꓽ ꓠꓬ ꓥꓶˍ ꓟ ꓥ ꓢꓲ꓾ ꓬꓲ ꓠꓬꓲ ꓤꓽ ꓠꓬ ꓔꓱꓹ ꓜꓳꓽˍ ꓟ ꓬꓰˍ ꓠꓬꓲ꓾ ꓬꓲ ꓔꓯ ꓢꓰꓼ ꓗꓷ ꓟ ꓥ ꓡꓳ꓿ 13 ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓞꓳ ꓤ ꓡꓰ ꓠꓴ ꓪꓽ ꓔꓯ ꓠꓲꓹ ꓜꓳ ꓡ ꓠꓬ꓾ ꓕꓽ ꓓꓵꓽ ꓙꓽ ꓟꓶ꓿ 14 ꓣꓳꓽ ꓠꓬ ꓬꓲꓼ ꓤ ꓠꓬꓲ ꓤ ꓔꓯ ꓠꓲꓹ ꓠꓵˍ ꓠꓬꓲ꓾ ꓫꓵꓻˍ ꓟ ꓔꓯ ꓗꓳꓸ ꓡ ꓢꓲ꓾ ꓢꓯꓼ ꓟꓬ ꓗꓪ ꓓꓵꓽ ꓡꓰˍ ꓟ ꓣꓳꓽ ꓢꓷˍ ꓡꓳ꓿ ꓬꓲꓼ ꓤ ꓠꓬꓲ ꓤ ꓔꓯ ꓟꓽ ꓠꓲꓹ ꓠꓵ ꓢꓴ ꓠꓬ ꓫꓵꓻˍ ꓟ ꓗꓪ ꓔꓬ ꓢꓰꓽ ꓡꓳ꓿ 15 ꓬꓲꓼ ꓤ ꓠꓬꓲ ꓤ ꓔꓯ ꓠꓲꓹ ꓜꓳ ꓢꓴ ꓮꓽ ꓟ ꓥ ꓟꓲ ꓞꓳ ꓤ ꓢꓰꓼ ꓢꓴ ꓥ ꓡꓳ꓿ ꓞꓳ ꓤ ꓢꓰꓼ ꓢꓴ ꓮ ꓡꓲ ꓕꓲ ꓣꓳ ꓠꓯꓸꓼ ꓗꓪˍ ꓟꓲ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓽ ꓓꓯꓹ ꓟ ꓠꓴ ꓪꓽ ꓢꓷˍ ꓡꓳ꓿ 16 ꓢꓲ ꓒꓽ ꓬꓲ ꓢꓯꓼ ꓟꓬ ꓣꓳ ꓐꓱ ꓶ ꓖꓶꓽ ꓗꓷˍ ꓟ ꓕꓱ ꓟ ꓗꓪ ꓐꓰ꓾ ꓠꓵꓻ ꓠꓲꓹ ꓮꓸ ꓫꓵ ꓥ ꓟ ꓣꓳꓽ ꓢꓷˍ ꓡꓳ꓿ ꓖꓳ ꓟ ꓡꓰ ꓐꓰ ꓣꓳˍ ꓟꓲ ꓬꓲꓼ ꓤ ꓠꓬꓲ ꓤ ꓐꓱ ꓶ ꓢꓯꓼ ꓟꓬ ꓖꓶꓽ ꓗꓷ ꓙꓲꓽ ꓙꓳˍ ꓡꓳ꓿ 17 ꓟꓲ ꓠꓯ ꓗꓪ ꓟ ꓒꓵꓽ ꓶꓽ ꓙꓳ ꓢꓴ ꓕꓲ ꓣꓳ ꓠꓬ꓾ ꓬꓲ ꓬꓲꓼ ꓬꓲ ꓠꓬꓲ ꓣꓱꓽ ꓟꓽ ꓡꓳꓼ ꓟ ꓔꓯ ꓟꓳꓻˍ ꓟꓲ ꓬꓲ ꓔꓯ ꓟꓽ ꓫꓱꓸ ꓤ ꓐꓷˍ ꓠꓬ꓾ ꓬꓲ ꓠꓽ ꓪꓴ-ꓢ ꓔꓯ ꓠꓲꓹ ꓠꓵ ꓢꓴ ꓥꓳ꓾ ꓐꓰ ꓮ ꓡꓲ ꓐꓯ ꓠ ꓢꓰꓽ꓿ 18 ꓤ ꓠꓱ ꓤ ꓐꓴꓳ꓾ ꓣꓳꓽ ꓠꓬ ꓟꓷꓽ ꓠꓷꓹ ꓘꓶꓽˍ ꓐꓰ ꓡꓺ ꓛꓱꓺ ꓗꓪ ꓐꓰˍ ꓡꓰ ꓕꓽ ꓠꓲꓹ ꓠꓵ꓿ ꓬꓰˍ ꓟ ꓐꓰ ꓔꓱꓹˍ ꓟ ꓗꓪ ꓠꓵꓻ ꓠꓲꓹ ꓟꓳꓸ ꓖꓶ ꓓꓳ ꓡ ꓝꓲ꓿ 19 ꓕꓱ ꓟ ꓗꓪ ꓐꓰ ꓣꓳꓽ ꓠꓽ ꓔꓱꓹ ꓚꓵˍ ꓟ ꓗꓪ ꓔꓬ ꓟ ꓣꓳꓽ ꓢꓷ ꓢꓲ꓾ ꓣꓳ ꓦꓰꓽ ꓠꓲꓹ ꓡꓰ ꓣꓳ ꓔꓯ ꓕꓼ ꓓꓴ ꓙꓳˍ ꓟꓲ꓾ ꓪꓴ-ꓢ ꓟꓲꓽ ꓙꓬꓽ ꓗꓪ ꓠꓲꓹ ꓪꓴꓽ ꓓꓴ ꓙꓳˍ ꓡꓳ꓿ 20 ꓮ ꓡꓲꓳ ꓐꓯ ꓠꓬ ꓣꓳꓽ ꓦꓰꓽ ꓠꓲꓹ ꓡꓰ ꓣꓳꓽ ꓔꓯ ꓕꓼˍ ꓠꓬ꓾ ꓪꓴ-ꓢ ꓠ ꓣꓳꓽ ꓦꓰꓽ ꓠꓲꓹ ꓕꓯꓽ ꓢꓲꓺ ꓪꓴꓽˍ ꓟ ꓥ ꓢꓲ꓾ ꓮꓸ ꓫꓵˍ ꓟꓲ ꓢꓷꓸ ꓖꓴꓻˍ ꓟ ꓥ ꓡꓳ꓿ 21 ꓠꓲꓹ ꓠꓵ ꓢꓴ ꓐꓴꓳ꓾ ꓣꓳꓽ ꓦꓰꓽ ꓠꓲꓹ ꓡꓰ ꓣꓳꓽ ꓔꓯ ꓟꓽ ꓕꓼˍ ꓕꓯ ꓠꓽ꓾ ꓣꓳꓽ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓠꓲꓹ ꓪꓴꓽ ꓓꓴ ꓙꓳˍ ꓡꓳ꓿ 22 ꓬꓲ ꓕꓵꓼ ꓪ ꓔꓯ ꓣꓳ ꓒꓵꓽ ꓛꓳ ꓢꓲ꓾ ꓬꓲ ꓟꓲꓽ ꓙꓬ ꓗꓪ ꓠꓲꓹ ꓒꓴˍ ꓟ ꓣꓳ ꓬꓰˍ ꓟ ꓑꓶꓸ ꓓꓴ꓾ ꓮꓸ ꓫꓵ ꓓꓰꓽˍ ꓟꓲ ꓬꓲ ꓗꓪ ꓐꓰ ꓣꓳ ꓟꓶˍ ꓡꓳ꓿ 23 ꓬꓲ ꓮ ꓐꓲ ꓬꓰ-ꓢꓴ ꓙꓲ-ꓢꓴ ꓟꓬꓱ ꓔꓯ ꓙꓵꓻ ꓢꓲ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ ꓕꓱ ꓟ ꓠꓬ ꓬꓲ ꓕꓵꓼ ꓪ ꓥ ꓡꓳ꓿ 24 ꓪꓴ-ꓢ ꓕꓵꓼ ꓪ ꓔꓯ ꓒꓵꓽ ꓛꓳ ꓢꓴ ꓠꓬ ꓪꓴ-ꓢ ꓠꓯꓸꓼ ꓗꓪ ꓔꓬ ꓢꓲ꓾ ꓪꓴ-ꓢˍ ꓟꓲ ꓬꓲ ꓠꓯꓸꓼ ꓗꓪ ꓔꓬ ꓡꓳ꓿ ꓪꓴ-ꓢ ꓣꓳꓽ ꓠꓯꓸꓼ ꓗꓪ ꓔꓬ ꓟ ꓢꓷꓸ ꓡꓰ ꓓꓴ ꓠꓬ ꓬꓲ ꓡꓰ ꓣꓳꓽ ꓔꓯ ꓖꓶꓽ ꓡ ꓗꓷ ꓟ ꓢꓲ-ꓫꓬ-ꓟ-ꓦ ꓥ ꓡꓳ꓿

1 ꓬꓳ-ꓦ 4

1 ꓠꓲꓹ ꓠꓵ ꓢꓴ ꓐꓴꓳꓻ ꓦꓻ ꓥ ꓕ ꓑꓳꓸ ꓔꓯ ꓕꓽ ꓙꓵꓻ꓿ ꓦꓻ ꓖꓳ ꓟ ꓠꓬ ꓪꓴ-ꓢ ꓗꓪ ꓐꓰ ꓡꓻ ꓟ ꓦꓻ ꓥ ꓟꓽ ꓥ ꓤꓹ ꓠꓬꓲ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓗꓪ ꓟꓽ ꓔꓱꓹˍ ꓟ ꓟꓷꓽ ꓠꓷꓹ ꓝꓸ ꓢꓴ ꓮꓽ ꓟꓬꓹ ꓓꓳ ꓡꓺꓳ꓿ 2 ꓬꓰ-ꓢꓴ ꓙꓲ-ꓢꓴ ꓠꓬ ꓧꓪꓽ ꓖꓳ ꓓꓱꓽ ꓗꓪ ꓡ ꓗꓷꓳ꓾ ꓐꓰ ꓣꓷꓠꓸˍ ꓟ ꓦꓻ ꓥ ꓕ ꓑꓳꓸ ꓠꓬ ꓪꓴ-ꓢ ꓗꓪ ꓐꓰ ꓡꓻˍ ꓟ ꓥ ꓡꓳ꓿ ꓕꓱ ꓟ ꓗꓪ ꓐꓰ ꓪꓴ-ꓢ ꓦ ꓔꓯ ꓠꓴ ꓪꓽ ꓢꓷˍ ꓡꓳ꓿ 3 ꓖꓳ ꓡꓱ ꓠꓬꓲ ꓬꓰ-ꓢꓴ ꓔꓯ ꓟꓽ ꓣꓷꓠꓸ ꓟ ꓦ ꓠꓬ ꓪꓴ-ꓢ ꓗꓪ ꓐꓰ ꓡꓻˍ ꓟ ꓦ ꓟꓽ ꓥ꓿ ꓕꓱ ꓟ ꓠꓬ ꓙꓲ-ꓢꓴ ꓔꓯ ꓔꓳꓹ ꓒ ꓖꓳ ꓕꓲ ꓣꓳ ꓬꓲ ꓦ ꓥ ꓡꓳ꓿ ꓕꓱ ꓕꓲ ꓣꓳ ꓡ ꓠꓹ ꓟ ꓠꓴ ꓪꓽ ꓑ ꓙꓽ ꓠꓬꓲꓳ꓿ ꓮ ꓟꓶˍ ꓟꓲ ꓬꓲ ꓠꓬ ꓟꓲ ꓠꓯ ꓗꓪ ꓔꓬ ꓡꓳ꓿ 4 ꓤ ꓠꓱ ꓤ ꓐꓴꓳ꓾ ꓠꓴ ꓪꓽ ꓠꓬ ꓪꓴ-ꓢ ꓤ ꓠꓱ ꓥ ꓢꓲ꓾ ꓗꓶꓸˍ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓔꓯ ꓧꓪꓸ ꓡꓰꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓯꓸꓼ ꓗꓪ ꓔꓬ ꓢꓴ ꓬꓲ ꓠꓽ꓾ ꓟꓲ ꓠꓯ ꓗꓪ ꓔꓬ ꓟ ꓖꓳ ꓕꓲ ꓣꓳ ꓕꓯꓽ ꓢꓲ ꓪꓽ ꓠꓬꓲˍ ꓡꓳ꓿ 5 ꓬꓲ ꓪꓽ ꓠꓬ ꓟꓲ ꓠꓯ ꓗꓪ ꓟ ꓥ ꓢꓲ꓾ ꓟꓲ ꓠꓯ ꓗꓪ ꓟ ꓡꓰ ꓐꓰ ꓫꓸ ꓕꓱˍ ꓠꓬꓲ꓾ ꓟꓲ ꓠꓯ ꓞꓳ ꓤˍ ꓟꓲ ꓬꓲ ꓪꓽ ꓔꓯ ꓠ ꓠꓹˍ ꓡꓳ꓿ 6 ꓣꓳꓽ ꓠꓽ ꓪꓴ-ꓢ ꓤ ꓠꓱ ꓥ ꓢꓲ꓾ ꓪꓴ-ꓢ ꓔꓯ ꓢꓷꓸ ꓢꓴ ꓠꓬ ꓣꓳꓽ ꓔꓯ ꓠ ꓠꓹˍ ꓡꓳ꓿ ꓪꓴ-ꓢ ꓔꓯꓸ ꓟ ꓟꓽ ꓥ ꓢꓴ ꓠꓬ ꓣꓳꓽ ꓔꓯˍ ꓟꓲ ꓟꓽ ꓠ ꓠꓹ꓿ ꓕꓱ ꓟ ꓗꓪ ꓐꓰ ꓣꓳꓽ ꓠꓬ ꓔꓱꓹ ꓟ ꓦˍ ꓐꓰ ꓗꓶꓸˍ ꓟ ꓦ ꓔꓯ ꓢꓷꓸ ꓡꓰ ꓓꓻˍ ꓡꓳ꓿ 7 ꓠꓲꓹ ꓠꓵ ꓢꓴ ꓐꓴꓳ꓾ ꓣꓳꓽ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ ꓠꓯꓹ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓵꓻ ꓠꓲꓹ ꓠꓽ ꓪꓴ-ꓢ ꓗꓪ ꓐꓰ ꓡꓻˍ ꓟ ꓥ ꓡꓳ꓿ ꓠꓲꓹ ꓠꓵ ꓢꓴ ꓮꓽ ꓟ ꓥ ꓟꓲ ꓪꓴ-ꓢ ꓤ ꓠꓱ ꓥ ꓢꓲ ꓪꓴ-ꓢ ꓔꓯ ꓢꓷˍ ꓡꓳ꓿ 8 ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓠꓬꓲ꓾ ꓟꓽ ꓠꓲꓹ ꓠꓵ ꓢꓴ ꓠꓽ ꓪꓴ-ꓢ ꓔꓯ ꓟꓽ ꓢꓷꓸ꓿ 9 ꓣꓳꓽ ꓠꓬ ꓪꓴ-ꓢ ꓬꓲ ꓮ ꓐꓲ ꓗꓪ ꓐꓰ ꓢꓯꓸ ꓔꓬ ꓟꓶ ꓠꓹ ꓟ꓾ ꓪꓴ-ꓢ ꓡꓰ ꓬꓲ ꓤ ꓔꓲꓸ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡꓺꓳ꓿ ꓕꓱ ꓟ ꓗꓪ ꓐꓰ ꓪꓴ-ꓢ ꓣꓳꓽ ꓔꓯ ꓠꓲꓹ ꓠꓵˍ ꓟ ꓟꓳꓸ ꓖꓶꓽ ꓡ ꓡꓳ꓿ 10 ꓣꓳ ꓧꓶꓸ ꓕꓯ ꓪꓴ-ꓢ ꓔꓯ ꓠꓲꓹ ꓠꓵ ꓗꓷ ꓟ ꓟꓽ ꓥ꓿ ꓪꓴ-ꓢ ꓧꓶꓸ ꓕꓯ ꓣꓳꓽ ꓔꓯ ꓠꓲꓹ ꓠꓵ ꓢꓲ꓾ ꓣꓳ ꓝꓴꓲ ꓑꓶꓸ ꓓꓴ ꓦꓶꓻ ꓠꓽ ꓡꓰˍ ꓟ ꓔꓲ ꓓꓴ ꓬꓰ ꓠꓹ ꓟ꓾ ꓬꓲ ꓮ ꓐꓲ ꓔꓯ ꓝꓲ ꓩꓴ ꓡ ꓟ ꓕꓱ ꓟ ꓠꓬ ꓪꓴ-ꓢ ꓬꓲ ꓠꓵꓻ ꓠꓲꓹ ꓗꓪ ꓐꓰ ꓥꓳ꓿ 11 ꓠꓲꓹ ꓠꓵ ꓢꓴ ꓐꓴꓳ꓾ ꓪꓴ-ꓢ ꓣꓳꓽ ꓔꓯ ꓕꓱ ꓘꓶꓻ ꓛꓲ ꓠꓲꓹ ꓠꓵˍ ꓠꓬꓲ꓾ ꓣꓳˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ ꓠꓯꓹ ꓡꓳ꓿ 12 ꓪꓴ-ꓢ ꓔꓯ ꓟꓳꓻ ꓠꓬꓲ ꓢꓴ ꓮ ꓕꓯꓽˍ ꓟꓲ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳˍ ꓕꓯ ꓠꓽ꓾ ꓪꓴ-ꓢ ꓠꓬ ꓣꓳꓽ ꓠꓯꓸꓼ ꓗꓪ ꓔꓬ ꓢꓲ꓾ ꓬꓲ ꓠꓵꓻ ꓠꓲꓹˍ ꓟꓲ ꓣꓳꓽ ꓠꓯꓸꓼ ꓗꓪ ꓪꓴꓽ ꓓꓰ ꓡꓰˍ ꓟ ꓥ ꓡꓳ꓿ 13 ꓪꓴ-ꓢ ꓬꓲ ꓦ ꓣꓳꓽ ꓔꓯ ꓖꓶꓽ ꓡ ꓟ ꓗꓪ ꓐꓰ꓾ ꓣꓳꓽ ꓠꓬ ꓬꓲ ꓠꓯꓸꓼ ꓗꓪ ꓔꓬ ꓢꓲ꓾ ꓬꓲˍ ꓟꓲ ꓣꓳꓽ ꓠꓯꓸꓼ ꓗꓪ ꓔꓬ ꓟ ꓣꓳꓽ ꓢꓷˍ ꓡꓳ꓿ 14 ꓐꓹ ꓐ ꓠꓬ ꓮ ꓐꓲ ꓔꓯ ꓟꓲ ꓠꓯ ꓞꓳ ꓤ ꓚꓬꓴ ꓢꓲ ꓒꓽ ꓬꓰ ꓝꓲ ꓠꓹ ꓟ ꓝꓲ ꓩꓴ ꓡ ꓟ ꓔꓯ꓾ ꓥꓪ ꓠꓴꓽ ꓟꓳꓻ ꓠꓬꓲ ꓢꓲ ꓢꓷꓸ ꓙ ꓟꓳ ꓙˍ ꓟ ꓥ ꓡꓳ꓿ 15 ꓬꓰ-ꓢꓴ ꓠꓬ ꓪꓴ-ꓢ ꓬꓲ ꓮ ꓐꓲ ꓥꓳ꓾ ꓐꓰ ꓣꓷꓠꓸ ꓢꓴ ꓮꓽ ꓟ ꓠꓯS ꓗꓪˍ ꓟꓲ ꓪꓴ-ꓢ ꓔꓬ ꓢꓲ꓾ ꓬꓲˍ ꓟꓲ ꓪꓴ-ꓢ ꓠꓯꓸꓼ ꓗꓪ ꓔꓬ ꓡꓳ꓿ 16 ꓪꓴ-ꓢ ꓠꓬ ꓣꓳꓽ ꓔꓯ ꓠꓲꓹ ꓠꓵˍ ꓟ ꓣꓳꓽ ꓢꓷꓸ ꓢꓲ ꓙꓵꓻˍ ꓟꓲ ꓙꓵꓻ ꓗꓷꓳ꓿ ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓡꓳ꓿ ꓠꓵꓻ ꓠꓲꓹ ꓠꓯꓸꓼ ꓗꓪ ꓔꓬ ꓢꓴ ꓠꓬ ꓪꓴ-ꓢ ꓠꓯꓸꓼ ꓗꓪ ꓔꓬ ꓢꓲ꓾ ꓪꓴ-ꓢˍ ꓟꓲ ꓬꓲ ꓠꓯꓸꓼ ꓗꓪ ꓔꓬ ꓡꓳ꓿ 17ꓖꓳ ꓡꓱ ꓠꓬꓲ ꓣꓳꓽ ꓠꓯꓸꓼ ꓗꓪ ꓪꓴ-ꓢ ꓠꓵꓻ ꓠꓲꓹ ꓙꓳˍ ꓠꓬ꓾ ꓣꓳꓽ ꓠꓽ ꓪꓴꓽ ꓓꓰ ꓡꓰ ꓢꓲ꓾ ꓬꓲ ꓮ ꓡꓲ ꓥ ꓠꓬ ꓣꓳꓽˍ ꓟꓲ ꓬꓲ ꓖꓳ ꓡꓱ ꓥ ꓠꓬꓲ꓾ ꓐꓯ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓗꓪ ꓣꓳꓽ ꓠꓲꓹ ꓪꓴꓽ ꓓꓴ ꓙꓳˍ ꓡꓳ꓿ 18 ꓠꓵꓻ ꓠꓲꓹ ꓠꓯꓸꓼ ꓗꓪ ꓠꓬ ꓙꓳꓺ ꓠꓲꓹ ꓟꓽ ꓙꓳ꓿ ꓪꓴꓽ ꓓꓰˍ ꓟ ꓠꓵꓻ ꓠꓲꓹ ꓡꓰ ꓙꓳꓺ ꓠꓲꓹ ꓔꓯ ꓖꓼ ꓓꓳ ꓗꓷˍ ꓡꓳ꓿ ꓙꓳꓺ ꓠꓲꓹ ꓗꓪ ꓠꓬ ꓛꓬ ꓒꓵꓽ ꓙꓳˍ ꓠꓬꓲ꓾ ꓙꓳꓺ ꓢꓴ ꓠꓬ ꓠꓵꓻ ꓠꓲꓹ ꓗꓪ ꓟꓽ ꓪꓴꓽ ꓓꓰ ꓡꓰ ꓢꓰꓽ꓿ 19 ꓬꓲ ꓧꓶꓸ ꓕꓯ ꓣꓳꓽ ꓔꓯ ꓠꓲꓹ ꓠꓵˍ ꓠꓬꓲ꓾ ꓣꓳˍ ꓟꓲ ꓬꓲ ꓔꓯ ꓠꓲꓹ ꓠꓵˍ ꓡꓳ꓿ 20 ꓮꓽ ꓟˍ ꓟꓲ꓾ ꓥꓪ ꓠꓬ ꓪꓴ-ꓢ ꓔꓯ ꓠꓲꓹ ꓠꓵˍ ꓡꓳ꓾ ꓐꓯ ꓢꓲ ꓬꓲ ꓬꓲꓼ ꓬꓲ ꓠꓬꓲ ꓔꓯ ꓠꓲꓹ ꓜꓳ ꓢꓴ ꓠꓬ ꓞꓳ ꓗꓶꓸ ꓥ ꓡꓳ꓿ ꓟꓳꓻ ꓓꓻˍ ꓟ ꓬꓲꓼ ꓤ ꓠꓬꓲ ꓤ ꓔꓯ ꓟꓽ ꓠꓲꓹ ꓠꓵ ꓢꓴ ꓠꓬ꓾ ꓟꓳ ꓟꓽ ꓓ ꓟ ꓪꓴ-ꓢ ꓔꓯ ꓠꓲꓹ ꓠꓵ ꓟꓽ ꓐ ꓡ꓿ 21 ꓪꓴ-ꓢ ꓔꓯ ꓠꓲꓹ ꓠꓵ ꓢꓴ ꓠꓬ꓾ ꓬꓲ ꓬꓲꓼ ꓬꓲ ꓠꓬꓲ ꓔꓯˍ ꓟꓲ ꓠꓲꓹ ꓠꓵ ꓠꓹ ꓟ ꓕꓵꓼ ꓪꓽ ꓕꓱ ꓟ ꓙꓲ-ꓢꓴ ꓗꓪ ꓐꓰ ꓣꓳꓽ ꓟꓶ ꓗꓷꓳ꓿

1 ꓬꓳ-ꓦ 5

1 ꓬꓰ-ꓢꓴ ꓠꓬ ꓙꓲ-ꓢꓴ ꓥꓳ꓾ ꓐꓰ ꓙꓵꓻ ꓢꓴ ꓮꓽ ꓟ ꓥ ꓟꓲ꓾ ꓪꓴ-ꓢ ꓤ ꓠꓱ ꓥ ꓡꓳ꓿ ꓪꓴ-ꓢ ꓔꓯ ꓠꓲꓹ ꓠꓵ ꓢꓴ ꓮꓽ ꓟˍ ꓟꓲ꓾ ꓪꓴ-ꓢ ꓬꓲ ꓤ ꓔꓯˍ ꓟꓲ ꓠꓲꓹ ꓠꓵˍ ꓡꓳ꓿ 2 ꓣꓳꓽ ꓠꓬ ꓪꓴ-ꓢ ꓔꓯ ꓠꓲꓹ ꓠꓵ ꓢꓲ ꓬꓲ ꓕꓵꓼ ꓪ ꓔꓯ ꓒꓵꓽ ꓛꓳˍ ꓕꓯ ꓠ꓾ ꓕꓱ ꓟ ꓗꓪ ꓐꓰ ꓪꓴ-ꓢ ꓤ ꓠꓱ ꓔꓯ ꓣꓳꓽ ꓠꓲꓹ ꓠꓵˍ ꓟ ꓣꓳꓽ ꓢꓷˍ ꓡꓳ꓿ 3 ꓪꓴ-ꓢ ꓕꓵꓼ ꓪ ꓔꓯ ꓣꓳ ꓒꓵꓽ ꓛꓳˍ ꓟ ꓕꓱ ꓟ ꓠꓬ꓾ ꓬꓲ ꓔꓯ ꓠꓲꓹ ꓠꓵˍ ꓟ ꓗꓸ ꓚꓵ ꓥ ꓢꓲ꓾ ꓬꓲ ꓕꓵꓼ ꓪ ꓔꓯ ꓣꓳ ꓒꓵꓽ ꓛꓳ ꓠꓹ ꓟ ꓬꓰ ꓫˍ ꓟ ꓟꓽ ꓥ꓿ 4 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓦꓵ ꓔ ꓢꓴ ꓮꓽ ꓟ ꓥ ꓟꓲ꓾ ꓟꓲ ꓠꓯ ꓔꓯ ꓧꓪꓸ ꓡꓰ ꓢꓲ꓾ ꓧꓪꓸ ꓡꓰ ꓓꓴ ꓕꓱ ꓟ ꓠꓬ ꓣꓳ ꓙꓵꓻ ꓠꓲꓹ ꓥ ꓡꓳ꓿ 5 ꓟꓲ ꓠꓯ ꓔꓯ ꓧꓪꓸ ꓡꓰ ꓔꓬ ꓢꓴ ꓮꓽ ꓟ ꓥ ꓡ? ꓬꓰ-ꓢꓴ ꓠꓬ ꓪꓴ-ꓢ ꓬꓲ ꓮ ꓐꓲ ꓥꓳ꓾ ꓐꓰ ꓙꓵꓻ ꓢꓴ ꓐꓴ ꓥ ꓡꓳ꓿ 6 ꓕꓱ ꓟ ꓠꓬ ꓬꓲꓻ ꓙꓬˍ ꓐꓰ ꓫꓵꓽ ꓗꓪ ꓐꓰ ꓡꓻˍ ꓟ ꓬꓰ-ꓢꓴ ꓙꓲ-ꓢꓴ ꓥ ꓡꓳ꓿ ꓬꓲꓻ ꓙꓬ ꓗꓪ ꓐꓰˍ ꓡꓰ ꓟꓽ ꓞꓲ꓾ ꓬꓲꓻ ꓙꓬˍ ꓐꓰ ꓫꓵꓽ ꓕꓱ ꓠꓬꓲꓽ ꓫꓵ ꓡꓱꓸꓼ ꓗꓪ ꓐꓰ ꓡꓻˍ ꓟ ꓥ ꓡꓳ꓿ 7 ꓕꓱ ꓟ ꓠꓬ ꓔꓱꓹ ꓚꓵˍ ꓟ ꓥꓳ꓾ ꓐꓰ ꓢꓷꓸ ꓙ ꓟꓳ ꓙ ꓢꓴ ꓠꓬ ꓢꓲ-ꓫꓬ-ꓟ-ꓦ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓢꓲ-ꓫꓬ-ꓟ-ꓦ ꓠꓽ ꓔꓱꓹ ꓚꓵˍ ꓟ ꓥ ꓡꓳ꓿ 8 ꓢꓷꓸ ꓙ ꓟꓳ ꓙ ꓢꓴ ꓢꓺ ꓫꓵꓽ ꓙꓳˍ ꓡꓳ꓿ ꓢꓲ-ꓫꓬ-ꓟ-ꓦˍ ꓐꓰ ꓬꓲꓻ ꓙꓬˍ ꓐꓰ ꓫꓵꓽ ꓥ ꓡꓳ꓿ ꓕꓱ ꓢ ꓫꓵꓽ ꓟ ꓢꓷꓸ ꓙ ꓟꓳ ꓙ ꓘꓶꓽ ꓠꓬ ꓪꓽ ꓡꓯꓽ ꓘꓳˍ ꓡꓳ꓿ 9 ꓪꓴ-ꓢ ꓠꓽ ꓬꓲ ꓮ ꓐꓲ ꓔꓯ ꓖꓴꓺ ꓢꓲ ꓢꓷꓸ ꓙ ꓟꓳ ꓙˍ ꓗꓷꓳ꓿ ꓣꓳꓽ ꓠꓬ ꓞꓳ ꓤ ꓢꓷꓸ ꓙ ꓟꓳ ꓙ ꓘꓶꓽ ꓔꓯ ꓘꓳ ꓣꓴˍ ꓠꓬ꓾ ꓪꓴ-ꓢ ꓢꓷꓸ ꓙ ꓟꓳ ꓙˍ ꓟ ꓠꓽ ꓪꓻ ꓜꓲ ꓪꓴꓽˍ ꓡꓳ꓿ 10 ꓪꓴ-ꓢ ꓬꓲ ꓮ ꓐꓲ ꓔꓯ ꓙꓵꓻ ꓢꓴ ꓠꓬ꓾ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓢꓷꓸ ꓙ ꓟꓳ ꓙ ꓘꓶꓽ ꓕꓱ ꓟ ꓙꓳˍ ꓡꓳ꓿ ꓪꓴ-ꓢ ꓔꓯ ꓟꓽ ꓙꓵꓻ ꓢꓴ ꓠꓬ꓾ ꓪꓴ-ꓢ ꓡꓰ ꓬꓲ ꓮ ꓐꓲ ꓐꓱ ꓶ ꓢꓷꓸ ꓙ ꓟꓳ ꓙˍ ꓟ ꓔꓯ ꓟꓽ ꓙꓵꓻ ꓠꓬꓲ꓾ ꓪꓴ-ꓢ ꓔꓯ ꓗꓶꓸ ꓢꓴ ꓒꓬꓱꓼ ꓡ ꓝꓲꓳ꓿ 11 ꓢꓷꓸ ꓙ ꓟꓳ ꓙ ꓘꓶꓽ ꓠꓬ ꓕꓱ ꓡꓱ ꓥ ꓡꓳ꓾ ꓪꓴ-ꓢ ꓡꓰ ꓣꓳꓽ ꓔꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶꓽ ꓗꓷꓳ꓿ ꓢꓯꓼ ꓟꓬ ꓕꓱ ꓟ ꓠꓬ ꓬꓲ ꓮ ꓐꓲ ꓠꓯꓸꓼ ꓗꓪ ꓓꓯꓹ ꓡꓳ꓿ 12 ꓪꓴ-ꓢ ꓬꓲ ꓮ ꓐꓲ ꓙꓳ ꓢꓴ ꓠꓬ ꓢꓯꓼ ꓟꓬ ꓙꓳˍ ꓡꓳ꓿ ꓪꓴ-ꓢ ꓬꓲ ꓮ ꓐꓲ ꓟꓽ ꓙꓳ ꓢꓴ ꓠꓽ ꓢꓯꓼ ꓟꓬ ꓟꓽ ꓙꓳ꓿ 13 ꓪꓴ-ꓢ ꓬꓲ ꓮ ꓐꓲ ꓟꓬꓱꓺ ꓔꓯ ꓙꓵꓻ ꓢꓴ ꓠꓴ ꓪꓽ ꓠꓬ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳˍ ꓡꓳ꓾ ꓐꓰ ꓢꓷꓸ ꓠꓹ ꓟ ꓥꓪ ꓠꓬ ꓠꓴ ꓪꓽ ꓔꓯ ꓕꓱ ꓟꓬ ꓫꓵꓽ ꓐꓳ ꓖꓶ ꓩꓴ ꓡ ꓟ ꓥ ꓡꓳ꓿ 14 ꓬꓲ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓣꓳ ꓮꓸ ꓫꓵ ꓓꓰꓽˍ ꓟꓲ꓾ ꓬꓲ ꓣꓳꓽ ꓔꓯ ꓠ ꓠˍ ꓥꓳ꓾ ꓐꓰ ꓬꓲ ꓟꓲꓽ ꓙꓬ ꓗꓪ ꓠꓶꓽ ꓡ ꓕꓯ ꓠꓲꓹ ꓪꓴꓽ ꓓꓴ ꓣꓳ ꓙꓳˍ ꓡꓳ꓿ 15 ꓖꓳ ꓡꓱ ꓢꓲ ꓣꓳ ꓮꓸ ꓫꓵ ꓓꓰꓽˍ ꓟꓲ ꓬꓲ ꓣꓳꓽ ꓔꓯ ꓠ ꓠꓹˍ ꓟ ꓣꓳꓽ ꓢꓷˍ ꓕꓯ ꓠ꓾ ꓣꓳ ꓬꓲ ꓔꓯ ꓓꓰꓽˍ ꓟˍ ꓟꓲ ꓟꓶ ꓗꓷꓳ꓾ ꓐꓰ ꓣꓳꓽ ꓢꓷˍ ꓡꓳ꓿ 16 ꓮꓽ ꓟ ꓥ ꓟꓲ ꓬꓲ ꓬꓲꓼ ꓬꓲ ꓠꓬꓲ ꓡꓰ ꓫꓵꓻ ꓠ ꓛꓲ ꓟꓽ ꓗꓹ ꓟ ꓝꓴꓲ ꓬꓰ ꓔꓬ ꓟ ꓟꓳꓻˍ ꓠꓬ꓾ ꓬꓲ ꓐꓱ ꓶ ꓓꓰꓽ ꓙ ꓠꓯꓹ ꓡꓳ꓿ ꓖꓳ ꓡꓱ ꓠꓬ ꓪꓴ-ꓢ ꓡꓰ꓾ ꓫꓵꓻ ꓠ ꓛꓲ ꓟꓽ ꓗꓹ ꓟ ꓝꓴꓲ ꓬꓰ ꓢꓴ ꓔꓯ ꓢꓯꓼ ꓟꓬ ꓖꓶꓽ ꓡ ꓥꓳ꓿ ꓫꓵꓻ ꓠ ꓛꓲ ꓗꓹ ꓟ ꓝꓴꓲ ꓕꓲ ꓫꓵ ꓙꓳˍ ꓡꓳ꓿ ꓕꓱ ꓕꓲ ꓫꓵꓽ ꓟ ꓐꓱ ꓶ ꓓꓰꓽ ꓙ ꓠ ꓗꓹ ꓡꓳ꓾ ꓐꓰ ꓥꓪ ꓟꓽ ꓐꓯ꓿ 17 ꓟꓽ ꓔꓱꓹ ꓟ ꓜꓳꓽ ꓟ ꓮꓽ ꓙꓵ ꓠꓬ ꓝꓴꓲ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓫꓵꓻ ꓠ ꓛꓲ ꓟꓽ ꓗꓹ ꓟ ꓝꓴꓲ ꓕꓲ ꓫꓵꓽ ꓙꓳˍ ꓡꓳ꓿ 18 ꓪꓴ-ꓢ ꓤ ꓠꓱ ꓮꓽ ꓟ ꓥ ꓟꓲ ꓝꓴꓲ ꓡꓯꓽ ꓫꓵ ꓟꓽ ꓬꓰ ꓔꓬ ꓟ ꓣꓳꓽ ꓢꓷˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓬꓲ ꓤ ꓔꓲ ꓡꓰ ꓬꓲ ꓔꓯ ꓫꓺ ꓙˍ ꓠꓬꓲ꓾ ꓥꓶˍ ꓟ ꓖꓳ ꓕꓲ ꓣꓳ ꓡꓰ ꓬꓲ ꓔꓯ ꓣꓴ ꓟꓶ ꓟꓽ ꓓ꓿ 19 ꓕꓲ ꓟꓲ ꓠꓯ ꓡꓱꓸꓼ ꓔꓯ ꓠꓬ ꓥꓶˍ ꓟ ꓖꓳ ꓕꓲ ꓣꓳ ꓡꓰ ꓙꓵꓽ ꓔꓬ ꓥ ꓟꓲ꓾ ꓣꓳꓽ ꓠꓽ ꓪꓴ-ꓢ ꓔꓯ ꓟ ꓥꓳ꓾ ꓐꓰ ꓢꓷꓸˍ ꓡꓳ꓿ 20 ꓝꓮꓲ ꓠꓬ ꓪꓴ-ꓢ ꓬꓲ ꓮ ꓐꓲ ꓛꓲ ꓡ ꓢꓲ꓾ ꓬꓲ ꓡꓰ ꓣꓳꓽ ꓔꓯ ꓙꓽ ꓗꓴꓸ ꓠꓲꓹ ꓖꓶꓽ ꓡ ꓠꓬꓲ꓾ ꓔꓱꓹˍ ꓟ ꓪꓴ-ꓢ ꓔꓯ ꓣꓳꓽ ꓢꓷꓸˍ ꓡꓳ꓿ ꓣꓳꓽ ꓠꓬ ꓪꓴ-ꓢ ꓬꓲ ꓮ ꓐꓲ ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓔꓬ ꓠꓬ꓾ ꓔꓱꓹˍ ꓟ ꓪꓴ-ꓢ ꓠꓯꓸꓼ ꓗꓪ ꓔꓬ ꓟ ꓥ ꓢꓲ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓗꓪ ꓔꓬ ꓟ ꓥ ꓡꓳ꓿ 21 ꓤ ꓠꓱ ꓤ ꓐꓴꓳ꓾ ꓠꓴ ꓪꓽ ꓚꓲꓸ ꓛꓬ ꓔꓯ ꓠꓲꓽ ꓐꓬꓱꓽ ꓢꓲꓺ ꓐꓬꓱꓽ ꓗꓪ ꓐꓰ ꓗꓳꓹ ꓞꓹ ꓝꓲ ꓠꓹ ꓟ ꓧꓪꓸ ꓛꓲꓽ ꓔ꓿

2 ꓬꓳ-ꓦ 1

1 ꓟꓬꓱꓽ ꓡꓳꓸ ꓢꓴ ꓥꓪ ꓡꓰ꓾ ꓔꓱꓹ ꓚꓵˍ ꓟ ꓠꓯꓸꓼ ꓗꓪ ꓥꓪ ꓠꓲꓹ ꓠꓵˍ ꓟ꓾ ꓪꓴ-ꓢ ꓡꓰ ꓢꓲꓺ ꓔ ꓟ ꓞꓳ ꓔꓲ ꓟ ꓐꓰ ꓬꓲ ꓤ ꓠꓱ ꓐꓴ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓥꓪˍ ꓡꓰꓽ ꓟꓽ ꓞꓲꓺ꓾ ꓔꓱꓹ ꓚꓵˍ ꓟ ꓔꓯ ꓢꓷꓸ ꓢꓴ ꓮꓽ ꓙꓵˍ ꓟꓲ ꓠꓴ ꓪꓽ ꓔꓯ ꓠꓲꓹ ꓠꓵˍ ꓡꓳ꓿ 2 ꓔꓱꓹ ꓚꓵˍ ꓟ ꓕꓱ ꓟ ꓠꓬ ꓣꓳꓽˍ ꓐꓰ ꓔꓬ ꓢꓲ꓾ ꓮ ꓕꓯꓽˍ ꓟꓲ ꓣꓳꓽ ꓔꓯ ꓟꓽ ꓧꓹ ꓗꓷ꓿ꓮ 3 ꓐꓹ ꓐ ꓪꓴ-ꓢˍ ꓐꓰ ꓬꓲ ꓮ ꓐꓲ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓡꓻˍ ꓟ ꓣꓱꓽ ꓛꓰˍ ꓐꓰ꓾ ꓫꓱꓸ ꓤ ꓠꓲꓹˍ ꓐꓰ ꓢꓲ ꓡꓲ ꓟ ꓠꓬ꓾ ꓔꓱꓹˍ ꓟ ꓐꓰ ꓠꓵꓻ ꓠꓲꓹ ꓠꓯꓸꓼ ꓗꓪ ꓣꓳꓽˍ ꓐꓰ ꓕꓲ ꓪꓺꓼ ꓙꓳˍ ꓥꓳ꓿ 4 ꓠꓴ ꓤ ꓠꓱ ꓗꓪ ꓟ ꓕꓲ ꓐꓱ ꓠꓬ꓾ ꓣꓳꓽ ꓐꓹ ꓐ ꓡꓰ ꓣꓳꓽ ꓔꓯ ꓕꓵꓼ ꓪꓽ ꓖꓶˍ ꓟ ꓡꓰ ꓐꓰ꓾ ꓔꓱꓹ ꓚꓵˍ ꓟ ꓗꓪ ꓞꓳ ꓙꓳ ꓔꓬ ꓟ ꓥꓪ ꓟꓳꓻˍ ꓠꓬꓲ ꓮꓽ ꓘꓶꓸ ꓗꓹ ꓛꓲˍ ꓡꓳ꓿ 5 ꓞꓳ ꓔꓲ ꓟꓺꓳ꓾ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ ꓥꓪ ꓡꓰ ꓠꓴ ꓔꓯ ꓘꓶꓸ ꓖꓶˍ ꓡꓳ꓿ ꓕꓱ ꓟ ꓠꓬ ꓕꓵꓼ ꓪ ꓬꓲ ꓫꓵꓼ ꓕꓲ ꓚꓱꓹ ꓠꓴ ꓔꓯ ꓐꓳ ꓖꓶ ꓩꓴ ꓡ ꓟ ꓟꓽ ꓥ꓿ ꓬꓲ ꓪꓴꓸ ꓕꓯˍ ꓡꓰ ꓣꓳ ꓟꓶˍ ꓟ ꓕꓵꓼ ꓪ ꓥ ꓡꓳ꓿ 6 ꓥꓪ ꓐꓯˍ ꓟ ꓠꓵꓻ ꓠꓲꓹ ꓕꓱ ꓟ ꓠꓬ ꓪꓴ-ꓢ ꓕꓵꓼ ꓪ ꓔꓯ ꓒꓵꓽ ꓛꓳˍ ꓟ ꓔꓯ ꓐꓯˍ ꓟ ꓥ ꓡꓳ꓿ ꓬꓲ ꓪꓴꓸ ꓕꓯˍ ꓡꓰ ꓠꓴ ꓪꓽ ꓑ ꓙꓽ ꓢꓲ ꓛꓳ ꓠꓯꓹ ꓟ ꓕꓵꓼ ꓪꓽ ꓠꓬ꓾ ꓠꓲꓹ ꓠꓵ ꓡꓯꓽ ꓘꓳ ꓠꓯꓹ ꓟ ꓕꓵꓼ ꓪ ꓕꓱ ꓟ ꓥ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓗꓪ꓾ ꓬꓰ-ꓢꓴ ꓙꓲ-ꓢꓴ ꓠꓬ ꓧꓪꓽ ꓖꓳ ꓓꓱ ꓗꓪ ꓡ ꓗꓷ ꓟ ꓔꓯ ꓟꓽ ꓣꓷꓠꓸ ꓟ ꓗꓶꓸ ꓢꓴ ꓮꓽ ꓟꓬꓹ ꓓꓳ ꓡꓺꓳ꓿ ꓕꓱ ꓡꓱ ꓐꓯ ꓢꓴ ꓠꓬ ꓞꓳ ꓗꓶꓸ ꓥ ꓢꓲ꓾ ꓙꓲ-ꓢꓴ ꓔꓯ ꓔꓳꓹ ꓒ ꓖꓳ ꓕꓲ ꓣꓳ ꓟ ꓥ ꓡꓳ꓿ 8 ꓣꓳ ꓬꓰ ꓗꓷ ꓟ ꓟꓬꓱꓽ ꓬꓲ ꓖꓳꓽ ꓟꓽ ꓗꓷ ꓡꓰ ꓡꓰ꓾ ꓡꓯꓼ ꓫꓴ ꓒ ꓐꓲ ꓐꓲꓺꓼ ꓟꓶ ꓠꓹ ꓟ ꓠꓴ ꓪꓽ ꓢꓯꓼ ꓕꓵꓼ꓿ 9 ꓮꓽ ꓟ ꓥ ꓟꓲ ꓙꓲ-ꓢꓴ ꓟꓸ ꓟꓲ ꓠꓯꓸꓼ ꓗꓪ ꓟꓽ ꓔꓬ ꓔꓬ ꓫꓱꓽ ꓘꓳ ꓙꓰˍ ꓕꓯ ꓠꓽ꓾ ꓬꓲ ꓠꓯꓸꓼ ꓗꓪ ꓪꓴ-ꓢ ꓟꓽ ꓔꓬ꓿ ꓟꓸ ꓟꓲ ꓕꓱ ꓟ ꓠꓯꓸꓼ ꓗꓪ ꓔꓬ ꓢꓴ ꓠꓬ ꓐꓹ ꓐ ꓙꓳ ꓢꓲ꓾ ꓮ ꓐꓲˍ ꓟꓲ ꓙꓳˍ ꓡꓳ꓿ 10 ꓠꓴ ꓪꓽ ꓔꓬ ꓗꓪ ꓡ ꓢꓴ ꓙꓳ ꓢꓲ꓾ ꓟꓸ ꓟꓲ ꓕꓱ ꓕꓲ ꓫꓵ ꓔꓯꓹ ꓡ ꓟ ꓟꓽ ꓥ ꓢꓴ ꓔꓯ ꓠꓬ꓾ ꓠꓴ ꓪꓽ ꓦꓲ ꓗꓪˍ ꓟꓲ ꓕꓽ ꓘꓳ ꓣꓴ꓿ ꓒꓵꓽ ꓗꓹˍ ꓟꓲ ꓕꓽ ꓬꓰ ꓖꓶ꓿ 11 ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓒꓵ ꓗꓹ ꓬꓰ ꓖꓶ ꓢꓴ ꓠꓽ꓾ ꓬꓲ ꓥꓶˍ ꓟ ꓟꓬꓱꓽ ꓔꓯ ꓑꓯꓹ ꓡꓯꓽ ꓘꓳˍ ꓟ ꓥ ꓡꓳ꓿ 12 ꓥꓪ ꓡꓰ ꓠꓴ ꓪꓽ ꓔꓯ ꓐꓳ ꓖꓶ ꓓꓴ ꓮꓽ ꓟꓬꓹ ꓙꓳˍ ꓟꓲ꓾ ꓕꓳ ꓶ ꓒꓬꓽˍ ꓐꓰ ꓐꓳ ꓞꓶ ꓣꓱꓽ ꓢꓲ ꓟꓽ ꓐꓳ ꓩꓴ ꓡꓺꓳ꓿ ꓠꓴ ꓪꓽ ꓔꓯ ꓡ ꓢꓲ꓾ ꓒꓬꓱꓽ ꓔꓳꓹ ꓟꓬ ꓔꓳꓹ ꓫꓸ ꓕꓱ ꓡꓯꓽ ꓘꓳ ꓪ ꓢꓲ ꓠꓬꓲ꓾ ꓣꓳ ꓗꓹ ꓛꓲ ꓠꓲꓹ ꓐꓲ ꓡ ꓝꓲ ꓠꓹ ꓟ ꓥꓳ ꓡꓳꓸ ꓔꓬ ꓡꓳ꓿ 13 ꓪꓴ-ꓢ ꓡꓰ ꓢꓲꓺ ꓔ ꓟ ꓠꓴ ꓪꓽ ꓮꓸ ꓝꓲ ꓬꓲꓸ ꓤ ꓠꓱ ꓡꓰ ꓠꓴ ꓔꓯ ꓒꓵꓽ ꓗꓹ ꓬꓰ ꓩꓴ ꓡ ꓡꓳ꓿

3 ꓬꓳ-ꓦ 1

1 ꓟꓬꓱꓽ ꓡꓳꓸ ꓢꓴ ꓥꓪ ꓡꓰ꓾ ꓔꓱˍ ꓟ ꓠꓯꓸꓼ ꓗꓪ ꓥꓪ ꓠꓲꓹ ꓠꓵ ꓟ ꓗꓷ-ꓬꓴ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ꓮ 2 ꓠꓲꓹ ꓠꓵ ꓟ ꓛꓳꓽ ꓒꓯꓹꓳ꓾ ꓠꓴ ꓠꓬ ꓦꓻ ꓗꓪ ꓶꓼ ꓛꓳ ꓫꓱꓹ ꓛꓳˍ ꓟ ꓡꓰ ꓐꓰ꓾ ꓮꓸ ꓫꓵ ꓗꓪˍ ꓟꓲ ꓶꓼ ꓛꓳ ꓫꓱꓹ ꓛꓳ ꓢꓲ꓾ ꓠꓴ ꓧꓪꓽ ꓖꓳ ꓓꓱ ꓗꓪˍ ꓟꓲ ꓧꓪꓹ ꓧꓪS ꓔꓬ ꓟꓶꓻ ꓠꓹ ꓟ ꓥꓪ ꓪꓽ ꓘꓴˍ ꓡꓳ꓿ 3 ꓬꓲꓼ ꓤ ꓠꓬꓲ ꓤ ꓐꓴ ꓕꓲ ꓐꓱ ꓕꓱ ꓗꓪ ꓛꓲ ꓡ ꓢꓲ꓾ ꓠꓴ ꓠꓬ ꓔꓱꓹ ꓚꓵˍ ꓟ ꓠꓯꓸꓼ ꓗꓪ ꓞꓳ ꓙꓳ ꓔꓬ ꓡꓳ꓾ ꓐꓰ ꓢꓷꓸ ꓙ ꓟꓳ ꓙ ꓡ ꓠꓬꓲ ꓥꓪ ꓮꓽ ꓘꓶꓸ ꓗꓹ ꓛꓲ ꓡꓰꓳ꓿ 4 ꓥꓪ ꓤ ꓠꓱ ꓐꓴ ꓠꓬ ꓔꓱꓹ ꓚꓵˍ ꓟ ꓗꓪ ꓞꓳ ꓙꓳ ꓔꓬ ꓟ ꓓꓳꓽ ꓑ ꓙˍ ꓟꓶˍ ꓟ ꓕꓱ ꓟ ꓠꓬ꓾ ꓥꓪ ꓐꓱ ꓶ ꓮꓸ ꓓꓲꓽ ꓪꓴꓽˍ ꓟ ꓗꓹ ꓛꓲ ꓓꓴ ꓥ ꓡꓳ꓿ 5 ꓠꓲꓹ ꓠꓵ ꓛꓳꓽ ꓒꓯꓹꓳ꓾ ꓠꓴ ꓟꓽ ꓢꓷꓸ ꓡꓯꓽ ꓘꓳꓻ ꓠꓬꓲ ꓟ ꓦ ꓡꓱ ꓢꓴ ꓐꓴ ꓔꓯˍ ꓟꓲ ꓬꓰ ꓙˍ ꓟ ꓕꓱ ꓟ ꓠꓬ꓾ ꓦ ꓡꓱ ꓐꓳˍ ꓟ ꓐꓰ ꓠꓲꓹ ꓒꓵꓽ ꓠꓲꓹ ꓡꓱˍ ꓟ ꓥ ꓡꓳ꓿ 6 ꓬꓲ ꓪꓽ ꓠꓬ ꓘꓴ ꓜꓲ ꓞꓳ ꓟꓲꓽ ꓙꓬ ꓗꓪ ꓠꓴ ꓠꓵꓻ ꓠꓲꓹ ꓔꓯ ꓖꓴ ꓢꓲ ꓢꓷꓸ ꓙ ꓟꓳ ꓙˍ ꓡꓳ꓿ ꓠꓴ ꓠꓬ ꓪꓴ-ꓢ ꓔꓯ ꓣꓱꓽ ꓙ ꓢꓴ ꓬꓰ ꓙꓲꓽ ꓙꓳˍ ꓟ ꓡꓰ ꓐꓰ꓾ ꓬꓲ ꓪꓽ ꓓꓴ ꓓꓳ ꓝꓸ ꓙꓰˍ ꓟ ꓗꓪ ꓬꓰ ꓙˍ ꓠꓬ ꓙꓲꓻˍ ꓡꓳ꓿ 7 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓟꓽ ꓦ ꓡꓱ ꓢꓴ ꓗꓪ ꓐꓰ ꓮꓸ ꓫꓵˍ ꓟꓲ ꓟꓽ ꓘꓳ ꓣꓴ ꓣꓴ꓾ ꓢꓲ ꓒꓽ ꓟꓬꓱ ꓑꓶꓸ ꓓꓴ ꓓꓴꓻ ꓓꓳ ꓙꓰˍ ꓟ ꓥ ꓡꓳ꓿ 8 ꓖꓳ ꓡꓱ ꓠꓬꓲ ꓣꓳꓽ ꓠꓬ ꓔꓱꓹ ꓚꓵˍ ꓟ ꓟꓬꓱꓽ ꓬꓰˍ ꓟ ꓗꓪ ꓬꓲ ꓪꓽˍ ꓐꓰ ꓑꓯꓹ ꓟꓶꓻ ꓠꓹ ꓟ ꓬꓲ ꓪꓽ ꓔꓯ ꓬꓰ ꓙ꓿ 9 ꓥꓪ ꓠꓬ ꓘꓴ ꓜꓲ ꓞꓳ ꓔꓯ ꓕꓲ ꓠꓬꓲꓽ ꓫꓵꓽ ꓐꓳ ꓖꓶꓽ ꓗꓷꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓗꓳꓺ ꓡꓳ ꓗꓪ ꓪꓴꓸ ꓓꓵ ꓣꓱꓽ ꓠꓲꓹ ꓫꓵ ꓢꓴ ꓔꓲ-ꓮ-ꓕꓷ-ꓒꓲ ꓠꓬ ꓥꓪ ꓐꓯ ꓘꓶꓽ ꓔꓯ ꓟꓽ ꓘꓳ ꓣꓴ꓿ 10 ꓖꓳ ꓡꓱ ꓠꓬꓲ ꓥꓪ ꓡꓻˍ ꓕꓯ ꓠꓽ꓾ ꓬꓲ ꓬꓰˍ ꓟ ꓟꓬꓱꓽ ꓔꓯ ꓥꓪ ꓐꓯ ꓓꓳ ꓡ ꓥꓳ꓿ ꓬꓲ ꓠꓬ ꓥꓶˍ ꓟ ꓚꓴꓽ ꓬꓲꓹ ꓡꓰ ꓥꓪ ꓠꓴꓽ ꓪꓻ ꓕꓱˍ ꓡꓳ꓿ ꓖꓳ ꓟˍ ꓡꓰ ꓟꓽ ꓞꓲꓺ꓾ ꓬꓲ ꓠꓬ ꓦ ꓡꓱˍ ꓟ ꓬꓲꓼ ꓤ ꓠꓬꓲ ꓤ ꓔꓯ ꓟꓽ ꓘꓳ ꓣꓴ꓿ ꓘꓳ ꓣꓴ ꓠꓲꓹ ꓫꓵ ꓢꓴ ꓔꓯˍ ꓟꓲ ꓗꓽ ꓔ ꓢꓲ꓾ ꓬꓲ ꓪꓽ ꓔꓯ ꓘꓴ ꓜꓲ ꓞꓳ ꓗꓪ ꓐꓰ ꓒꓰꓺ ꓗꓷˍ ꓡꓳ꓿ 11 ꓠꓲꓹ ꓠꓵ ꓛꓳꓽ ꓒꓯꓹꓳ꓾ ꓟꓽ ꓙꓲ ꓟ ꓔꓯ ꓕꓽ ꓔꓯꓺ ꓢꓳ꓿ ꓙꓲꓻˍ ꓟ ꓔꓯˍ ꓡꓰꓽ ꓔꓯꓺ ꓢꓳ꓿ ꓙꓲꓻˍ ꓟ ꓬꓰ ꓢꓴ ꓠꓬ ꓪꓴ-ꓢ ꓔꓯꓸ ꓟ ꓥ ꓡꓳ꓿ ꓟꓽ ꓙꓲ ꓟ ꓬꓰ ꓢꓴ ꓠꓽ ꓪꓴ-ꓢ ꓔꓯ ꓟꓽ ꓟꓳꓻ ꓠꓬꓲ ꓢꓴ ꓥꓳ꓿ 12 ꓔꓲ-ꓟꓲ-ꓕꓲ-ꓪꓴꓽ ꓔꓯ ꓟꓳꓸ ꓠꓬ ꓮꓽ ꓙꓵ ꓢꓴ ꓗꓪ ꓐꓰ ꓙꓲˍ ꓟ ꓢꓷꓸ ꓙ ꓟꓳ ꓙ ꓘꓶ ꓙꓳˍ ꓡꓳ꓿ ꓔꓱꓹ ꓚꓵˍ ꓟ ꓥ ꓟꓲ ꓬꓲ ꓐꓱ ꓶ ꓢꓷꓸ ꓙ ꓟꓳ ꓙˍ ꓡꓳ꓿ ꓥꓪ ꓠꓴꓽ ꓡꓰ ꓬꓲ ꓐꓱ ꓶ ꓢꓷꓸ ꓙ ꓟꓳ ꓙ ꓟˍ ꓟꓲ ꓔꓱˍ ꓟ ꓥ ꓟ ꓠꓴ ꓢꓷꓸˍ ꓡꓳ꓿ 13 ꓥꓪ ꓠꓬ ꓠꓴ ꓔꓯ ꓐꓯ ꓖꓶ ꓓꓴ ꓮꓽ ꓟꓬꓹ ꓙꓳˍ ꓟꓲ꓾ ꓐꓳ ꓗꓸˍ ꓐꓰ ꓐꓳ ꓞꓶꓻ ꓣꓱꓽ ꓢꓲ ꓐꓳ ꓖꓶ ꓠꓲꓹ ꓟꓽ ꓫꓵ꓿ 14 ꓥꓪ ꓠꓽ ꓠꓴ ꓔꓯ ꓟꓶꓻ ꓤ ꓟꓽ ꓥ ꓕꓯ ꓟꓳꓻ ꓡꓯꓽ ꓘꓳꓻ ꓢꓲ꓾ ꓒꓬꓱꓽ ꓔꓳꓹ ꓟꓬ ꓔꓳꓹ ꓫꓸ ꓕꓱ ꓡꓯꓽ ꓘꓳꓻ ꓟꓶꓻ ꓠꓹ ꓟ ꓥꓳꓻ ꓡꓳꓸ ꓔꓬ ꓡꓳ꓿ 15 ꓢꓲ ꓡꓲ ꓟ ꓠꓴ ꓟꓶꓻ ꓝꓲ꓿ ꓛꓳꓽ ꓒꓯꓹ ꓐꓴ ꓡꓰ ꓠꓴ ꓔꓯ ꓒꓵꓽ ꓗ ꓬꓰ ꓩꓴ ꓡ ꓡꓳ꓿ ꓠꓴˍ ꓟꓲ ꓖꓳ ꓗꓪ ꓔꓬ ꓟ ꓥꓪ ꓠꓴꓽ ꓛꓳꓽ ꓒꓯꓹ ꓐꓴ ꓔꓯ ꓟꓬꓱ ꓞꓶꓻ ꓢꓲ ꓒꓵꓽ ꓗ ꓬꓰ ꓖꓶ꓿

ꓬꓴ-ꓔ 1

1 ꓬꓰ-ꓢꓴ ꓙꓲ-ꓢꓴ ꓬꓲ ꓚꓳ ꓑꓸ꓾ ꓬ-ꓗꓴ ꓬꓲ ꓠꓬꓲꓺ ꓤꓽ ꓬꓴ-ꓔ ꓥꓪ ꓡꓰ꓾ ꓐꓹ ꓐ ꓪꓴ-ꓢ ꓡꓰ ꓠꓲꓹ ꓠꓵ ꓔ ꓢꓲ ꓘꓴ ꓔ ꓢꓴˍ ꓐꓰ꓾ ꓬꓰ-ꓢꓴ ꓙꓲ-ꓢꓴ ꓡꓰ ꓫ ꓙ ꓔ ꓢꓴ ꓐꓴ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶꓽ ꓩꓴ ꓡ ꓥꓳ꓿ 2 ꓫꓱꓸ ꓤˍ ꓟ ꓐꓰ ꓢꓲ ꓡꓲ ꓟ ꓐꓰ ꓠꓵꓻ ꓠꓲꓹ ꓠꓬ ꓠꓴ ꓪꓽ ꓔꓯ ꓮꓽ ꓟꓬꓹ ꓡꓴꓽ ꓖꓶꓽ ꓡ ꓝꓲ꓿ 3 ꓠꓲꓹ ꓠꓵ ꓛꓳꓽ ꓒꓯꓹ ꓐꓴꓳ꓾ ꓥꓪ ꓠꓬ ꓣꓳ ꓑꓯꓹ ꓡꓯꓽ ꓘꓳ ꓟꓶˍ ꓟ ꓢꓯꓼ ꓟꓬ ꓙ ꓖꓴ ꓔꓯ ꓟꓳꓸ ꓠꓴ ꓪꓽ ꓔꓯ ꓐꓳ ꓖꓶ ꓩꓴ ꓡ ꓠꓲꓹ ꓫꓵˍ ꓟꓲ꓾ ꓟꓬꓽ ꓠꓬꓲ ꓠꓬ ꓦ ꓡꓱ ꓢꓴ ꓐꓴ ꓔꓯ ꓕꓲ ꓧꓪˍ ꓐꓰ ꓡꓯꓼ ꓙꓱ ꓔ ꓟ ꓙꓵꓻ ꓠꓲꓹ ꓚꓱꓹ ꓐꓱ ꓶ ꓔꓳꓹ ꓡꓯꓽ ꓘꓳˍ ꓟ ꓗꓪ꓾ ꓠꓴ ꓪꓽ ꓠꓬ ꓠꓲꓹ ꓡꓱꓻ ꓡꓱˍ ꓡꓰꓽ ꓢꓯꓼ ꓕꓵꓼ ꓝꓲ ꓠꓹ ꓟ꓾ ꓥꓪ ꓕꓳ ꓶ ꓡꓯꓼ ꓫꓴ ꓐꓳ ꓢꓲ ꓠꓴ ꓪꓽ ꓔꓯ ꓘꓶꓸ ꓖꓶ ꓠꓹ ꓟ ꓥꓪ ꓠꓲꓹ ꓟ ꓗꓪ ꓠꓬꓲꓸ ꓞꓹ ꓡꓳ꓿ 4 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓔꓯ ꓟꓽ ꓒꓵꓽ ꓢꓴ ꓕꓲ ꓧꓳꓽ ꓠꓬ ꓣꓳ ꓗꓳꓺ ꓡꓳ ꓗꓪ ꓘꓳ ꓫꓱ ꓫꓱꓺꓼ ꓐꓰ ꓓꓵꓽ ꓡ ꓗꓷꓳ꓿ ꓬꓲ ꓪꓽ ꓠꓬ ꓥꓶˍ ꓟ ꓔꓯ ꓑꓲꓸ ꓓꓴ ꓬꓰ ꓠꓹ ꓟ꓾ ꓪꓴ-ꓢ ꓬꓲ ꓣꓱꓽ ꓛꓰ ꓟꓸ ꓟꓲ ꓔꓯ ꓧꓶꓸ ꓡꓰ ꓝꓲ ꓢꓲ꓾ ꓕꓲ ꓔꓲꓸˍ ꓡꓰꓽ ꓟ ꓣꓳ ꓪꓴ-ꓢˍ ꓐꓰ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓔꓯ ꓟꓽ ꓣꓷꓠꓸ꓿ ꓬꓲ ꓪꓽ ꓠꓽ ꓮꓽ ꓠꓱ ꓠꓱ ꓕꓯˍ ꓡꓰ ꓐꓯ ꓞꓷꓹ ꓔ ꓟ ꓐꓯ ꓟꓴ ꓟꓶꓻ ꓠ ꓗꓹ ꓢꓴ ꓐꓴ ꓥ ꓡꓳ꓿ 5 ꓠꓴ ꓪꓽ ꓠꓬ ꓕꓱ ꓟ ꓮꓽ ꓙꓵ ꓢꓷˍ ꓥ ꓟꓲ꓾ ꓥꓪ ꓠꓬ ꓠꓴ ꓪꓽ ꓔꓯ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓢꓰꓽ ꓡꓳ꓿ ꓢꓲ ꓒꓽ ꓡꓰ ꓑ ꓫꓬꓼ ꓕꓲ ꓧꓳꓽ ꓔꓯ ꓬꓲ-ꓙꓲ ꓟꓵꓽ ꓗꓪ ꓐꓰ ꓚꓬꓴ ꓓꓳ ꓡ ꓥ ꓟꓲ꓾ ꓟꓽ ꓙꓵꓻ ꓢꓴ ꓔꓯ ꓬꓲ ꓡꓰ ꓟꓶꓽ ꓬꓰ ꓝꓲꓳ꓿ 6 ꓝꓮꓲ ꓠꓬ ꓚꓲ ꓛꓬ ꓙꓳˍ ꓟ ꓙꓵꓽ ꓪ ꓔꓯ ꓟꓽ ꓒꓵꓽ ꓒꓵ꓾ ꓬꓲ ꓪꓽ ꓔꓬ ꓖꓴ ꓔꓯ ꓡꓳ ꓔ ꓬꓰˍ ꓟ ꓟꓴꓽ ꓗꓪ ꓝꓲ ꓓꓴ ꓐꓴ ꓔꓯ ꓠꓬ꓾ ꓦꓬꓼ ꓠꓬꓲ ꓓꓽ ꓟ ꓖꓳ ꓟ ꓗꓪ ꓐꓯ ꓟꓴ ꓘꓶꓽ ꓠꓹ ꓟ꓾ ꓬꓲ ꓡꓰ ꓕꓲ ꓞꓲꓼ ꓕꓲ ꓑ ꓟ ꓞꓳꓹ ꓚ ꓡꓰ ꓠꓯ ꓞꓲꓹ ꓟ ꓗꓪ ꓞꓳꓹ ꓔ ꓡꓳ꓿ 7 ꓢꓳ-ꓓꓳ-ꓟ ꓐꓰ ꓳꓽ-ꓟꓳꓽ-ꓡˍ ꓐꓰ ꓚꓳ ꓡꓳ ꓗꓪ ꓟ ꓡꓳ ꓒꓱˍ ꓟꓲ꓾ ꓬꓲ ꓪꓽˍ ꓡꓰ ꓐꓰ ꓟꓽ ꓢꓲꓽ ꓟꓽ ꓫꓬꓻ ꓬꓰ ꓢꓲ꓾ ꓟꓽ ꓚꓰꓼ ꓟ ꓦꓯꓸ ꓠꓲꓹ ꓙꓵꓽˍ ꓟ ꓗꓪ ꓖꓼ ꓙꓰˍ ꓟ ꓑꓶꓸ ꓓꓴ ꓙꓳꓺ ꓗꓽ ꓓꓴ ꓬꓰ ꓠꓹ ꓟ꓾ ꓕꓲ ꓞꓲꓼ ꓕꓲ ꓑ ꓟ ꓮꓸ ꓔꓳꓸ ꓗꓪ ꓛꓬꓻ ꓒꓵꓽ ꓟꓶˍ ꓡꓳ꓿ 8 ꓖꓳ ꓟ ꓡꓰ ꓐꓰ ꓬꓲꓼ ꓟꓬ ꓘꓳ ꓢꓴ ꓕꓱ ꓕꓲ ꓧꓳˍ ꓟꓲ꓾ ꓧꓪꓽ ꓖꓳ ꓓꓱ ꓔꓯ ꓟꓽ ꓫꓬꓻ ꓟꓽ ꓖꓼ ꓟ ꓠꓷꓼ ꓡꓰ ꓝꓲ ꓢꓲ꓾ ꓪꓴ-ꓢ ꓙꓵꓽ ꓪ ꓔꓯˍ ꓟꓲ ꓟꓳꓻ ꓟꓽ ꓟꓵ ꓟꓵ ꓬꓰ ꓢꓲ ꓠꓬꓲ꓾ ꓐꓬꓱꓼ ꓡꓱꓼ ꓡꓱ ꓟ ꓟꓴꓽ ꓗꓪ ꓜꓴꓻ ꓔꓯ ꓟꓽ ꓒꓵꓽ ꓟꓽ ꓚꓬ ꓘꓶꓽ ꓫꓸ ꓕꓱˍ ꓡꓳ꓿ 9 ꓟꓴꓽ ꓗꓪ ꓝꓲ ꓓꓴ ꓓꓽ ꓟ ꓟꓲ-ꓘꓷ-ꓡꓷˍ ꓟꓲ ꓖꓳ ꓟ ꓡꓰ ꓐꓰ ꓠꓬ ꓫꓸ ꓕꓱ ꓟꓽ ꓑꓶꓸ꓿ ꓟꓳ-ꓫꓲ ꓫꓵꓻ ꓟꓳ ꓑꓶꓸ ꓓꓴ ꓧꓳꓺ ꓡꓯꓽ ꓘꓳ ꓢꓲ ꓠꓲꓽ ꓪ ꓔꓲˍ ꓐꓰ ꓐꓯ ꓡꓯꓽ ꓘꓳˍ ꓕꓯ꓾ ꓬꓲ ꓔꓯ ꓙꓱꓽ ꓕꓼ ꓠꓬꓲ ꓐꓯ ꓟꓴ ꓘꓶꓽ ꓠꓬꓲ ꓟꓽ ꓬꓰ ꓬꓰ꓾ ꓢꓲ ꓒꓽ ꓡꓰ ꓠꓴ ꓔꓯ ꓕꓼ ꓝꓲ꓾ ꓐꓰˍ ꓡꓰ ꓐꓯ ꓖꓶˍ ꓡꓳ꓿ 10 ꓖꓳ ꓡꓱ ꓥ ꓟꓲ ꓟꓸ ꓒꓬꓹ ꓢꓴ ꓕꓱ ꓕꓲ ꓧꓳꓽ ꓟ ꓠꓽ ꓬꓲ ꓪꓽ ꓟꓽ ꓙꓽ ꓜꓲꓼ ꓟ ꓥ ꓕ ꓑꓳꓸ ꓔꓯ ꓟꓽ ꓒꓵꓽ ꓟꓽ ꓚꓬ ꓘꓶꓽ ꓫꓸ ꓕꓱˍ ꓡꓳ꓿ ꓬꓲ ꓪꓽ ꓠꓬ ꓙꓽ ꓜꓲꓼ ꓠꓲꓹ ꓟꓽ ꓙꓳˍ ꓟ ꓙꓱꓽ ꓤˍ ꓡꓰ ꓐꓰ꓾ ꓚꓰ ꓠꓲꓹ ꓗꓪ ꓢꓷˍ ꓡꓳ ꓫꓵꓽ ꓗꓪ ꓐꓰ ꓚꓲ ꓛꓬ ꓔꓯ ꓟꓶꓽ ꓬꓰ ꓝꓲˍ ꓡꓳ꓿ 11 ꓬꓲ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓗꓷ-ꓬꓲ ꓙ ꓖꓴ ꓗꓪ ꓫꓱꓽ ꓢꓲ꓾ ꓪꓽ ꓒꓵꓽ ꓟꓶꓻ ꓠꓹ ꓟ ꓑ-ꓡꓽ ꓥꓳꓽ ꓙꓰˍ ꓟ ꓗꓪ ꓔꓷꓹ ꓑꓵꓺ ꓙꓰ ꓢꓲ ꓠꓬꓲ꓾ ꓘꓳ-ꓣˍ ꓡꓰ ꓐꓰ ꓒꓳꓹ ꓔꓳꓹˍ ꓠꓬꓲ ꓐꓬꓺ ꓡꓰꓳ꓿ 12 ꓕꓱ ꓕꓲ ꓧꓳꓽ ꓟ ꓠꓬ ꓠꓴ ꓪꓽˍ ꓐꓰ ꓕꓲꓽ ꓪꓺꓼ ꓜ ꓜꓽˍ ꓕꓯ꓾ ꓠꓴ ꓪꓽ ꓠꓵꓻ ꓠꓲꓹ ꓑꓮꓲꓽ ꓔꓯ ꓟꓽ ꓫꓬꓻ ꓗꓷ ꓡꓰ ꓝꓲ ꓢꓴ ꓥ ꓡꓳ꓿ ꓬꓲ ꓪꓽ ꓠꓬ ꓚꓲ ꓛꓬ ꓔꓯˍ ꓡꓰ ꓦꓵ ꓙˍ ꓟ ꓮ ꓣꓳ ꓡꓳꓸ ꓢꓴ꓾ ꓟꓲꓽ ꓦꓲ ꓡꓰ ꓙꓱꓼ ꓔꓯꓹ ꓙꓰˍ ꓟ ꓬꓲꓻ ꓙꓬ ꓟꓽ ꓓꓯꓹˍ ꓟ ꓟꓴ ꓗꓴꓸ꓾ ꓬꓲ ꓢꓶꓽ ꓟꓽ ꓓꓱꓼˍ ꓟ ꓢꓲꓹ ꓜꓲꓻˍ ꓐꓰ꓾ ꓬꓲ ꓚꓰ ꓟꓰꓹ ꓙꓰ ꓢꓲ ꓠꓬꓲꓽ ꓧꓪꓹ ꓕꓲ ꓧꓪꓹ ꓫꓵꓻˍ ꓟ ꓢꓲꓹ ꓜꓲꓻˍ ꓡꓰ ꓐꓰ ꓗꓹ ꓡꓳ꓿ 13 ꓬꓲ ꓪꓽ ꓠꓬ ꓬꓲꓻ ꓡꓴꓽ ꓐꓱꓻ ꓪꓳꓹˍ ꓟ ꓬꓲꓻ ꓡꓯꓼ ꓟꓰꓼ ꓡꓰ ꓐꓰ꓾ ꓬꓲ ꓪꓽ ꓫꓸ ꓔꓳ ꓫꓸ ꓒꓯꓼ ꓟ ꓠꓬ ꓬꓲꓻ ꓩꓵꓸ ꓡꓰ ꓐꓰ ꓓꓳ ꓡ ꓡꓳ꓿ ꓝꓮꓲ ꓠꓬ ꓶꓻ ꓚꓳ ꓔꓬ ꓟ ꓗꓴ ꓤ ꓡꓰ ꓐꓰ ꓗꓹ ꓢꓲ꓾ ꓬꓲ ꓪꓽ ꓐꓱ ꓶ ꓠꓬ ꓕꓲ ꓞꓲꓼ ꓕꓲ ꓑ ꓠꓯ ꓞꓲꓹ ꓠꓯ ꓕꓳꓽ ꓟ ꓝꓰꓺ ꓔ ꓡꓳ꓿ 14 ꓮ-ꓓꓯ ꓗꓪ ꓐꓰ ꓫꓵꓽ ꓤꓶꓻ ꓗꓪ ꓟ ꓬꓲ-ꓠ ꓠꓬ ꓕꓱ ꓕꓲ ꓧꓳꓽ ꓔꓯ ꓖꓴ ꓠꓬꓲ ꓟꓷꓽ ꓠꓷꓹ ꓝꓸ ꓢꓲ꓾ ꓠꓬꓲ ꓠꓹ꓾ ꓢꓲ ꓒꓽ ꓠꓬ ꓬꓲ ꓢꓲꓽ ꓫꓬ ꓢꓴ ꓔꓴ ꓔꓴ ꓟꓶꓽ ꓟꓶˍ ꓐꓰ ꓕꓲ ꓛꓳꓺꓼ ꓡꓻˍ ꓡꓳ꓿ 15 ꓬꓲ ꓠꓬ ꓪꓴ-ꓢ ꓔꓯ ꓟꓽ ꓒꓵꓽ ꓢꓴ ꓔꓯ ꓐꓯ ꓟꓴ ꓘꓶꓽ ꓢꓲ꓾ ꓠꓲꓹ ꓟꓽ ꓒꓵ ꓠꓲꓹ ꓟ ꓡꓱ ꓢꓴ ꓬꓰˍ ꓟ ꓮꓽ ꓙꓵ ꓔꓯ ꓖꓴꓺ ꓟꓸ ꓖꓶ ꓢꓲ ꓠꓬꓲ꓾ ꓬꓲ ꓪꓽ ꓡꓰ ꓬꓰ ꓗꓷ ꓟ ꓮꓽ ꓙꓵ ꓐꓰ꓾ ꓪꓴ-ꓢ ꓔꓯ ꓟꓽ ꓒꓵꓽˍ ꓟ ꓗꓹ ꓫꓵꓸ ꓘꓶꓽ ꓮꓽ ꓙꓵ ꓟ ꓑꓶꓸ ꓓꓴ꓾ ꓐꓯ ꓟꓴ ꓘꓶꓽ ꓢꓲ ꓝꓴꓲ ꓖꓴ ꓟꓳꓸ ꓖꓶ ꓠꓹ ꓟ ꓡ ꓡꓳ꓾ ꓐꓯˍ ꓡꓳ꓿ 16 ꓕꓱ ꓕꓲ ꓧꓳꓽ ꓟ ꓠꓬ ꓚꓲ ꓛꓬ ꓦꓯꓸ ꓠꓲꓹ ꓙꓵˍ ꓟ ꓔꓯ ꓛꓳ ꓢꓲ꓾ ꓒꓴꓽ ꓥꓳꓽ ꓓꓽ ꓟ ꓫꓸ ꓕꓱ ꓢꓲ ꓠꓬꓲ꓾ ꓱ'ꓽ ꓠꓱꓽ ꓢꓴˍ ꓐꓰ ꓚꓲ ꓡꓲ ꓥꓳꓽ ꓠꓳꓽ ꓫꓸ ꓕꓱ ꓢꓴ ꓥ ꓢꓲ꓾ ꓚꓲ ꓛꓬ ꓙꓲ ꓖꓴ ꓟꓶꓻ ꓠꓹ ꓟ ꓢꓴ ꓔꓯ ꓘꓶꓽ ꓖꓳꓽ ꓡꓰ ꓓꓳꓹ ꓟꓴˍ ꓡꓳ꓿ 17 ꓠꓲꓹ ꓠꓵ ꓛꓳꓽ ꓒꓯꓹ ꓐꓴꓳ꓾ ꓠꓴ ꓪꓽ ꓠ ꓧꓶꓸ ꓕꓯ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓝꓲ ꓓꓴ ꓐꓴ ꓡꓰ ꓐꓯˍ ꓟ ꓐꓯ ꓘꓶꓽ ꓔꓯ ꓚꓲꓸ ꓔ꓿ 18 ꓬꓲ ꓪꓽ ꓡꓰ꓾ ꓡꓳꓹ ꓬꓰ ꓝꓲꓸ ꓗꓪ ꓠꓬ ꓪꓴ-ꓢ ꓚꓱꓹ ꓔꓯ ꓟꓽ ꓒꓵꓽ ꓒꓵꓽ ꓚꓲ ꓛꓬ ꓦꓯꓸ ꓠꓲꓹ ꓙꓵꓽˍ ꓟ ꓗꓪ ꓚˍ ꓟ ꓤꓲꓺ ꓢꓴ ꓓꓳ ꓡ ꓥꓳ꓾ ꓐꓰ ꓠꓴ ꓪꓽ ꓔꓯ ꓐꓯ ꓖꓶꓽ ꓗꓷꓳ꓿ 19 ꓕꓱ ꓕꓲ ꓧꓳꓽ ꓟ ꓠꓬ꓾ ꓧꓪꓽ ꓗꓪ ꓟ ꓔꓯ ꓛꓳ ꓢꓴ ꓥ ꓢꓲ꓾ ꓢꓲ-ꓫꓬ-ꓟ-ꓦ ꓟꓽ ꓙꓳ ꓢꓴˍ ꓐꓰ ꓗꓪ ꓡꓯꓽ ꓘꓳ ꓝꓲ ꓢꓴ ꓥ ꓡꓳ꓿ 20 ꓠꓲꓹ ꓠꓵˍ ꓟ ꓛꓳꓽ ꓒꓯꓹ ꓐꓴꓳ꓾ ꓮꓸ ꓓꓲꓽ ꓒꓵꓽˍ ꓟ ꓙꓵꓻ ꓠꓲꓹ ꓗꓪ ꓠꓴ ꓪꓽ ꓚꓲ ꓛꓬ ꓔꓯ ꓜꓶꓻ ꓟꓴ ꓡ ꓝꓲ ꓢꓲ꓾ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓪꓽ ꓘꓴ꓿ 21 ꓠꓴ ꓪꓽ ꓠꓬ ꓪꓴ-ꓢ ꓠꓵꓻ ꓠꓲꓹ ꓠꓯS ꓗꓪ ꓔꓬ ꓢꓲ꓾ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓫꓱꓸ ꓤ ꓠꓲꓹ ꓗꓪ ꓐꓰ ꓠꓴ ꓪꓽ ꓔꓯ ꓖꓶꓽ ꓡ ꓠꓹ ꓟ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓔꓯ ꓡꓳꓺ ꓠꓬꓹ ꓔꓬ꓿ 22 ꓠꓴ ꓪꓽ ꓠꓬ ꓓꓵꓽ ꓙꓽ ꓟꓬꓽ ꓢꓴ ꓔꓯ ꓫꓱꓸ ꓤ ꓠꓲꓹ ꓟꓳꓸ ꓖꓶ꓿ 23 ꓮꓸ ꓔꓳꓸ ꓗꓪ ꓞꓰꓻ ꓓꓵꓽ ꓡꓰ ꓢꓴ ꓔꓯ ꓣꓴ ꓓꓳ ꓡ ꓢꓲ ꓚꓬꓴ ꓙ꓿ ꓝꓮꓲ ꓕꓲ ꓐꓱ ꓔꓯ ꓠꓬ꓾ ꓤꓻ ꓟꓳ ꓠꓲꓹ ꓡꓰ ꓫꓱꓸ ꓤ ꓢꓲ꓾ ꓬꓲ ꓪꓽ ꓧꓪꓽ ꓠꓲꓹ ꓡꓶꓽ ꓗꓪ ꓐꓰ ꓟꓽ ꓫꓬꓻ ꓗꓷ ꓡꓰ ꓟ ꓐꓵꓻ ꓞꓶ ꓔꓯ ꓠꓽ ꓠꓲꓹ ꓜꓳ꓿ 24 ꓠꓴ ꓪꓽ ꓔꓯ ꓟꓽ ꓡꓱꓸ ꓗꓷ ꓝꓲ ꓠꓹ ꓟ ꓔ ꓙ ꓢꓲ꓾ ꓛꓬꓻ ꓖꓴ ꓟꓽ ꓙꓳ ꓙꓳ ꓗꓹ ꓛꓲ ꓛꓲˍ ꓡꓰꓽ꓾ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓗꓪ ꓧꓳꓽ ꓓꓵꓽ ꓡꓰ ꓐ ꓡ ꓢꓴ꓾ 25 ꓣꓳ ꓚꓬꓴ ꓢꓲ ꓒꓽ ꓪꓴ-ꓢ ꓕꓲ ꓔꓲꓸˍ ꓡꓰꓽ ꓟ ꓔꓯ꓾ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓟꓬꓱꓽ ꓓꓳꓽˍ ꓐꓰ ꓪ ꓔꓲ ꓗꓴꓺ ꓒꓬꓱꓽˍ ꓐꓰ ꓪꓽ ꓠꓬꓲˍ ꓟ ꓐꓰ ꓙꓵꓽ ꓪ ꓠꓬ꓾ ꓧꓶꓸ ꓕꓯ ꓟ ꓤꓶˍ ꓐꓰ ꓮ ꓟꓶˍ ꓐꓰ ꓕꓲ ꓞꓲꓼ ꓕꓲ ꓑ ꓬꓲ ꓔꓯ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿

ꓟꓳ ꓖꓶ ꓓꓴ 1

1 ꓕꓱ ꓟ ꓠꓬ ꓟꓶ ꓤ ꓟꓽ ꓗꓷ ꓡꓰ ꓕꓯ ꓒꓬꓱꓼ ꓡ ꓠ ꓗꓹ ꓟ ꓫꓵꓽ ꓪꓴꓻ ꓔꓯ ꓟꓳꓸ꓾ ꓬꓰ-ꓢꓴ ꓡꓰ ꓬꓲ ꓚꓳ ꓑꓸ ꓐꓴ ꓔꓯ ꓟꓳꓸ ꓖꓶ ꓝꓲ ꓠꓹ ꓟ꓾ ꓪꓴ-ꓢ ꓡꓰ ꓬꓰ-ꓢꓴ ꓔꓯ ꓖꓶ ꓔ ꓟ ꓥ ꓡꓳ꓿ ꓬꓰ-ꓢꓴ ꓠꓬ ꓬꓲ ꓟꓴꓽ ꓗꓪ ꓝꓲ ꓓꓴ ꓔꓯ ꓝꓲ ꓢꓲ꓾ ꓬꓲ ꓚꓳ ꓑꓸ ꓬꓳ-ꓦ ꓔꓯ ꓫꓵꓽ ꓪꓴꓻ ꓕꓱ ꓟ ꓢꓷꓸ ꓡꓰ ꓝꓲꓳ꓿ 2 ꓬꓳ-ꓦ ꓠꓬ ꓪꓴ-ꓢ ꓐꓯ ꓘꓶꓽ ꓐꓰ ꓬꓰ-ꓢꓴ ꓙꓲ-ꓢꓴ ꓬꓲ ꓢꓷꓸ ꓙ ꓟꓳ ꓙ ꓘꓶꓽ ꓐꓰ꓾ ꓬꓲ ꓡꓳꓸ ꓟꓳˍ ꓟ ꓮꓽ ꓙꓵ ꓐꓯ ꓓꓳ ꓡ ꓡꓳ꓿ 3 ꓟꓷꓽ ꓠꓷꓹ ꓝꓸ ꓘꓶꓽ ꓕꓱ ꓟ ꓔꓯ ꓵ ꓢꓴ ꓐꓰ꓾ ꓕꓱ ꓗꓪ ꓐꓳ ꓔ ꓟ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓒꓵꓽ ꓛꓳ ꓢꓴ ꓐꓴ ꓠꓬ꓾ ꓶꓼ ꓙꓳ ꓫꓱꓹ ꓙꓳ ꓡꓳ꓿ ꓮ ꓡꓲꓳ ꓐꓯ ꓠꓬ ꓦꓬꓼ ꓠꓬꓲ ꓠꓶꓽ ꓡꓺꓳ꓿ 4 ꓬꓳ-ꓦ ꓥꓪ ꓡꓰ ꓮ-ꓢꓲ-ꓬ ꓕꓲ ꓫꓴ ꓗꓪ ꓟ ꓘꓴ ꓜꓲ ꓞꓳ ꓫꓵꓽ ꓟ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ ꓥꓳ꓿ ꓔꓬ ꓗꓷ ꓟ ꓐꓰ꓾ ꓔꓬ ꓟ ꓐꓰ꓾ ꓔꓬ ꓡ ꓠꓹ ꓟ ꓖꓳ ꓕꓲ ꓣꓳˍ ꓐꓰ꓾ ꓬꓲ ꓙꓵꓽ ꓠꓬꓲꓸ ꓕꓲ ꓟꓲꓽ ꓙꓬ ꓗꓪ ꓟ ꓦꓻ ꓫꓵꓽ ꓟ ꓐꓰ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓱꓽ ꓛꓰˍ ꓐꓰ ꓢꓲ ꓡꓲ ꓟ ꓠꓴ ꓪꓽ ꓟꓶ ꓝꓲ꓿ 5 ꓬꓲ ꓠꓬ ꓦ ꓡꓱ ꓐꓳˍ ꓟ ꓢꓷꓸ ꓙ ꓟꓳ ꓙ ꓢꓴ ꓥ ꓢꓲ꓾ ꓫꓵꓻ ꓗꓪ ꓐꓰ ꓬꓲ ꓪꓴꓸ ꓢꓯꓸ ꓡ ꓢꓴˍ ꓐꓰ꓾ ꓟꓲ ꓠꓯ ꓪ ꓔꓲ ꓐꓴ ꓔꓯ ꓙꓵꓽ ꓢꓴ ꓥ ꓡꓳ꓿ ꓣꓳ ꓔꓯ ꓠꓲꓹ ꓠꓵ ꓢꓲ꓾ ꓬꓲ ꓫꓵꓽ ꓡꓰ ꓣꓳ ꓝꓴꓲ ꓗꓪ ꓐꓰ ꓩꓴ ꓗꓷ ꓖꓶ ꓡ ꓢꓴˍ ꓐꓰ꓾ 6 ꓣꓳ ꓔꓯ ꓗꓴꓷꓼ ꓕꓲ ꓟ ꓒꓬꓱꓼ ꓡ ꓝꓲ ꓢꓲ꓾ ꓬꓲ ꓪꓴ-ꓢˍ ꓐꓰ ꓬꓲ ꓐꓹ ꓐ ꓐꓱ ꓶ ꓔꓲ ꓒ ꓒꓬꓱꓼ ꓡ ꓝꓲ ꓢꓴ ꓔꓯ꓾ ꓮ ꓕꓯˍ ꓟꓲ ꓟꓬꓱ ꓓꓳꓽˍ ꓐꓰ ꓪꓽ ꓠꓬꓲˍ ꓟ ꓙꓳ ꓝꓲ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ 7 ꓠꓬꓲ ꓠꓹ꓾ ꓬꓲ ꓠꓬ ꓟꓴ ꓗꓴꓸ ꓜꓶꓽ ꓢꓲ ꓡꓻˍ ꓕꓯ꓾ ꓟꓬ ꓢꓶꓽ ꓥ ꓕ ꓑꓳꓸˍ ꓐꓰ ꓬꓲ ꓔꓯ ꓗꓸ ꓗꓷ ꓢꓴ ꓮꓽ ꓙꓵˍ ꓟꓲ ꓬꓲ ꓔꓯ ꓡꓳꓸ ꓟꓳˍ ꓥꓳ꓿ ꓝꓮꓲ ꓠꓬ ꓟꓲ ꓠꓯ ꓗꓪ ꓟ ꓞꓳ ꓫꓵꓽ ꓮꓽ ꓙꓵ ꓬꓲ ꓑꓶꓸ ꓓꓴ ꓮ ꓛꓬꓹ ꓙꓱˍ ꓥꓳ꓿ ꓥ ꓡꓳ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓿ 8 ꓢꓲ ꓒꓽ ꓪꓴ-ꓢ ꓡꓰ꓾ ꓥꓪ ꓠꓬ ꓬꓲ ꓪꓴꓸ ꓟ ꓐꓰ ꓬꓲ ꓟꓶꓽˍ ꓟ꓾ ꓔꓬ ꓗꓷ ꓟ꓾ ꓔꓬ ꓟ ꓐꓰ꓾ ꓔꓬ ꓡ ꓠꓹ ꓟ꓾ ꓮꓸ ꓫꓵˍ ꓟꓲ ꓬꓰ ꓐ ꓡ ꓢꓴ ꓥ ꓡꓳ꓾ ꓐꓯˍ ꓡꓳ꓿ 9 ꓠꓴ ꓪꓽˍ ꓐꓰ ꓕꓲ ꓛꓳꓺꓼ ꓫꓸ ꓙꓵˍ ꓟ ꓐꓰ꓾ ꓗꓴꓷꓼˍ ꓐꓰ꓾ ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓜꓲꓽ ꓘꓴ ꓠꓲꓹ ꓑꓯꓹ ꓟꓶ ꓢꓴ ꓠꓴ ꓪꓽ ꓠꓬꓲ ꓤ ꓬꓳ-ꓦ ꓥꓪ ꓠꓬ꓾ ꓪꓴ-ꓢ ꓐꓯ ꓘꓶꓽˍ ꓐꓰ ꓬꓰ-ꓢꓴ ꓙꓲ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙˍ ꓟ ꓑꓶꓸ ꓓꓴ꓾ ꓑꓺ-ꓟꓳ꓾ ꓟꓬꓱ ꓔ ꓟ ꓬꓲꓻ ꓗꓳ ꓡꓳ ꓟꓵꓽ ꓗꓪ ꓔꓬ ꓕꓯ꓾ 10 ꓢꓲ ꓒꓽ ꓦꓬꓼ ꓠꓬꓲ ꓗꓪ ꓥꓪ ꓔꓯ ꓢꓲ-ꓫꓬ-ꓟ-ꓦ ꓐꓲ ꓡꓰ ꓢꓲ꓾ ꓥꓪ ꓗꓸ ꓠꓯꓸ ꓢꓲ ꓗꓪ ꓐꓽ ꓡꓻ ꓟꓶꓻˍ ꓟ ꓡꓰ ꓐꓰ ꓗꓹ ꓟ ꓢꓯꓼ ꓓꓽ ꓟ ꓡꓰ꓾ 11 ꓠꓴ ꓡꓳꓸ ꓟꓳˍ ꓟ ꓠꓬ ꓕꓳ ꓶ ꓗꓪ ꓐꓳ ꓢꓲ꓾ ꓬꓲ-ꓩꓴ-ꓢꓳ꓾ ꓢꓶ-ꓟꓲ-ꓠ꓾ ꓒꓱ-ꓗ-ꓟꓳ꓾ ꓕꓷ-ꓬꓼ-ꓕꓷ-ꓡ꓾ ꓢ-ꓓꓲ꓾ ꓒꓲ-ꓡ-ꓔꓷ-ꓒꓲ-ꓬꓼˍ ꓐꓰ ꓡ-ꓪꓳ-ꓓꓲ-ꓫꓲ-ꓬꓼ ꓗꓪ ꓟ ꓘꓴ ꓜꓲ ꓞꓳ ꓖꓳ ꓫꓵꓽ ꓟ ꓔꓯ ꓦꓻ ꓖꓶ ꓩꓴ ꓗꓷ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 12 ꓖꓳ ꓕꓯ ꓥꓪ ꓔꓯ ꓫꓸ ꓕꓱ ꓢꓴ ꓔꓯ ꓡꓳꓸ ꓠꓬꓲ ꓠꓹ ꓟ ꓔꓲꓸ ꓒꓳꓹ ꓗꓷ ꓠꓬ꓾ ꓫꓵ ꓟꓬ ꓡꓴꓻ ꓕꓲ ꓫꓵꓽ ꓟ ꓐꓰ꓾ 13 ꓟꓬ ꓡꓴ ꓕꓲ ꓖꓳ ꓫꓵꓽ ꓟ ꓗꓳ ꓡꓳ ꓗꓪ ꓠꓬ꓾ ꓬꓲ ꓛꓲ ꓒꓯꓹ ꓗꓪ ꓛꓲˍ ꓟ ꓐꓵ ꓞꓶꓽ ꓐꓽ ꓢꓽ ꓕꓲ ꓘꓳꓹ ꓖꓪꓽ ꓔ ꓢꓲ꓾ ꓬꓲ ꓳ' ꓟꓶꓽ ꓗꓪ ꓠꓬ ꓫꓵ ꓙꓽ ꓧꓷꓹ ꓕꓲ ꓚꓱꓹ ꓧꓷꓹ ꓔ ꓟ꓾ ꓡꓽ ꓞꓳ ꓮ ꓐꓲˍ ꓡꓰ ꓐꓰ ꓗꓹ ꓟ ꓕꓲ ꓣꓳ ꓔꓯ ꓥꓪ ꓟꓳˍ ꓡꓳ꓿ 14 ꓬꓲ ꓪꓴꓸ ꓓꓵꓺˍ ꓐꓰ ꓪꓴꓸ ꓞꓱꓻ ꓠꓬ꓾ ꓒꓴˍ ꓟ ꓮ ꓣꓳ ꓟꓵˍ ꓡꓰ ꓐꓰ ꓗꓹ ꓢꓲ꓾ ꓪꓽˍ ꓡꓰ ꓐꓰ ꓒꓴˍ ꓡꓳ꓿ ꓬꓲ ꓟꓬ ꓢꓶꓽ ꓠꓬ ꓮꓸ ꓔꓳꓸ ꓡ ꓡꓱˍ ꓡꓰ ꓐꓰ ꓗꓹ ꓡꓳ꓿ 15 ꓬꓲ ꓛꓲ ꓒꓯꓹ ꓠꓬ ꓚꓲꓺ ꓒꓱꓻ ꓗꓪ ꓚꓲꓺ ꓫꓬꓻ ꓡꓰ ꓢꓲ ꓞꓹ ꓔ ꓟ ꓙꓲꓽˍ ꓡꓰ ꓐꓰ ꓗꓹ ꓢꓲ꓾ ꓬꓲ ꓢꓯꓼ ꓠꓬ ꓬꓲꓻ ꓞꓰꓻ ꓓꓽ ꓟ ꓢꓯꓼˍ ꓡꓰ ꓐꓰ ꓗꓹ ꓡꓳ꓿ 16 ꓬꓲ ꓡꓯꓼ ꓙ ꓐꓽ ꓗꓪ ꓠꓬ ꓗꓴ ꓤ ꓫꓵꓽ ꓢꓶꓽ ꓔꓯꓹ ꓔ ꓡꓳ꓿ ꓬꓲ ꓟꓷꓽ ꓠꓷꓹ ꓗꓪ ꓠꓬ꓾ ꓠꓬꓲꓽ ꓛꓱꓽ ꓬꓲ ꓢꓶꓽ ꓠꓬꓲꓽ ꓕꓯꓹˍ ꓟ ꓮꓸ ꓕꓽ ꓕꓲ ꓛꓲ ꓓꓳ ꓞꓹ ꓡꓳ꓿ ꓬꓲ ꓒꓬꓱꓽ ꓠꓬ ꓟꓲꓽ ꓟꓲ ꓮ ꓘꓶ ꓡꓬꓸˍ ꓕꓯ ꓟ ꓡꓰ ꓐꓰ ꓐꓬꓱꓼ ꓡꓱꓼˍ ꓡꓳ꓿ 17 ꓥꓪ ꓬꓲ ꓔꓯ ꓟꓳꓻ ꓗꓷ ꓟꓶꓽ ꓕꓯ꓾ ꓫꓵꓻ ꓢꓴˍ ꓡꓰ ꓐꓰ ꓬꓲ ꓟꓲꓽ ꓙꓬꓽ ꓗꓪ ꓓꓳꓽ ꓡꓰ ꓠꓬ꓾ ꓬꓲ ꓡꓯꓼ ꓙ ꓐꓽ ꓥꓪ ꓕꓯꓽ ꓢꓲ ꓗꓪ ꓚꓰꓹ ꓢꓲ ꓕꓱ ꓡꓱ ꓐꓯˍ ꓡꓳ꓿ ꓕꓽ ꓙꓳ꓾ ꓥꓪ ꓠꓬ ꓬꓲ ꓪꓴꓸ ꓟ ꓐꓰ ꓬꓲꓸ ꓟꓶꓽˍ ꓟ ꓥꓳ꓿ 18 ꓥꓪ ꓠꓬ ꓢꓯꓸ ꓔꓬ ꓢꓴ ꓥꓳ꓿ ꓫꓵꓻˍ ꓟꓲ ꓫꓵꓻ ꓠꓬꓲꓳ꓿ ꓖꓳ ꓡꓱ ꓥ ꓟꓲ ꓥꓪ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓢꓲ꓾ ꓫꓵꓻˍ ꓟ ꓐꓰ ꓟꓸ ꓟꓲ ꓟꓵꓽ ꓜꓳꓻ ꓜꓴˍ ꓟꓲ ꓥꓪ ꓔꓯ ꓙꓳˍ ꓡꓳ꓿ 19 ꓖꓳ ꓡꓱ ꓠꓬꓲ ꓠꓴ ꓡꓳꓸ ꓟꓳˍ ꓟ ꓐꓰ꓾ ꓮ ꓟꓶ ꓙꓳˍ ꓟ ꓐꓰ꓾ ꓕꓱ ꓡꓱ ꓖꓳ ꓑꓳꓸ ꓒꓬꓱꓼ ꓡ ꓠ ꓗꓹ ꓟ ꓐꓳ ꓔ꓿ 20 ꓥꓪ ꓡꓯꓼ ꓙ ꓗꓪ ꓠꓴ ꓟꓳˍ ꓟ ꓗꓴ ꓤ ꓕꓱ ꓫꓵꓽ ꓢꓶꓽˍ ꓐꓰ ꓫꓵ ꓟꓬ ꓡꓴꓻ ꓕꓲ ꓫꓵꓽ ꓟ ꓟ ꓬꓲ ꓚꓵ ꓘꓶ ꓠꓬ ꓕꓱ ꓡꓱ ꓥ ꓡꓳ꓿ ꓗꓴ ꓤ ꓕꓱ ꓫꓵꓽ ꓢꓶꓽ ꓠꓽ ꓘꓴ ꓜꓲ ꓞꓳ ꓫꓵꓽ ꓟꓻ ꓟ ꓝꓲ ꓓꓴ ꓐꓴ ꓥ ꓡꓳ꓿ ꓟꓬ ꓡꓴ ꓕꓲ ꓫꓵꓽ ꓟ ꓟˍ ꓟꓲ ꓘꓴ ꓜꓲ ꓞꓳ ꓫꓵꓽ ꓟꓻ ꓟ ꓥ ꓡꓳ꓾ ꓐꓯˍ ꓡꓳ꓿

ꓟꓳ ꓖꓶ ꓓꓴ 2

1 ꓝꓮꓲ ꓬꓲ ꓡꓰ꓾ ꓬꓲ-ꓩꓴ-ꓢꓳ ꓗꓪ ꓟ ꓘꓴ ꓜꓲ ꓞꓳ ꓬꓲ ꓝꓲ ꓓꓴ ꓔꓯ ꓕꓱ ꓡꓱ ꓐꓳ ꓖꓶ꓿ ꓬꓲ ꓡꓯꓼ ꓙ ꓐꓽ ꓗꓪ ꓗꓴ ꓤ ꓫꓵꓽ ꓢꓶ ꓔꓯꓹ ꓔ ꓢꓲ꓾ ꓫꓵ ꓟꓬ ꓡꓴꓻ ꓕꓲ ꓫꓵꓽ ꓟ ꓗꓳ ꓡꓳ ꓗꓪ ꓫꓱꓽ ꓢꓴ ꓡꓰ ꓕꓱ ꓡꓱ ꓐꓯˍ ꓡꓳ꓾ 2 ꓠꓴ ꓬꓰˍ ꓟ ꓟꓬꓱꓽˍ ꓐꓰ꓾ ꓠꓴ ꓢꓯꓼ ꓕꓵꓼˍ ꓟ ꓐꓰ꓾ ꓠꓴ ꓜꓲꓽ ꓘꓴ ꓠꓲꓹˍ ꓐꓰ꓾ ꓟꓽ ꓙꓲꓻ ꓟ ꓔꓯ ꓠꓴ ꓜꓲꓽ ꓟꓽ ꓘꓴˍ ꓟ ꓐꓰ꓾ ꓬꓲ ꓪꓽ ꓚꓲ ꓛꓬ ꓠꓬ ꓝꓲ ꓓꓴ ꓥ ꓡꓳ꓾ ꓐꓯ ꓢꓴ ꓔꓯ ꓥ ꓟꓽ ꓥ ꓠꓴ ꓤꓹ ꓠꓬꓲ ꓢꓲ꓾ ꓬꓲ ꓪꓽ ꓟꓽ ꓔꓱꓹ ꓟ ꓥ ꓟ ꓠꓴ ꓡꓳꓸ ꓓꓳ ꓡ ꓟ ꓥꓪ ꓢꓷꓸˍ ꓡꓳ꓿ 3 ꓠꓴ ꓠꓬ ꓜꓲꓽ ꓘꓴ ꓠꓲꓹ ꓙꓳ ꓢꓲ꓾ ꓥꓪ ꓟꓬꓱ ꓐꓱ ꓶ ꓜꓲꓽ ꓔꓬ ꓥ ꓟꓲ ꓠꓲꓹ ꓟ ꓟꓽ ꓙꓬ ꓡꓰ꓿ 4 ꓖꓳ ꓡꓱ ꓥ ꓟꓲ ꓠꓴ ꓠꓬ ꓬꓲ ꓪꓴꓸ ꓕꓯ ꓟ ꓠꓵ ꓠꓲꓹ ꓔꓯꓺˍ ꓐꓰ ꓧꓹ ꓙꓰ ꓗꓷ ꓠꓬꓲ꓾ ꓠꓴ ꓔꓯ ꓥꓪ ꓕꓼ ꓓꓴ ꓕꓲ ꓫꓵꓽ ꓙꓳˍ ꓡꓳ꓿ 5 ꓖꓳ ꓡꓱ ꓠꓬꓲ ꓠꓴ ꓮ ꓡꓲ ꓗꓪ ꓐꓰ ꓞꓰꓻ ꓡꓰ ꓟ ꓓꓵꓽ ꓙꓽ ꓛꓲ ꓡ ꓝꓲ ꓢꓲ꓾ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓢꓲ ꓠꓬꓲ ꓬꓲ ꓪꓴꓸ ꓬꓰ ꓗꓷ ꓟ ꓟꓬꓱꓽ ꓬꓰ꓿ ꓠꓴ ꓟꓽ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓕꓯ ꓠꓽ ꓠꓴ ꓔꓯ ꓥꓪ ꓡ ꓢꓲ꓾ ꓠꓴ ꓟꓬ ꓡꓴꓻ ꓕꓲ ꓠꓬ ꓬꓲ ꓓꓹ ꓖꓴ ꓗꓪ ꓐꓰ ꓣꓴ ꓦ ꓗꓷˍ ꓥꓳ꓿ 6 ꓖꓳ ꓡꓱ ꓥ ꓟꓲ ꓠꓴ ꓬꓰ ꓜꓳꓽˍ ꓟ ꓕꓲ ꓫꓵꓽ ꓠꓬ꓾ ꓥꓪ ꓠꓲꓹ ꓜꓳˍ ꓟ ꓠꓲ-ꓗꓳ-ꓡ ꓕꓲ ꓧꓳꓽ ꓟ ꓟꓬꓱꓽ ꓔꓯ ꓠꓴˍ ꓟꓲ ꓠꓲꓹ ꓜꓳˍ ꓡꓳ꓿ 7 ꓠꓸ ꓑꓳ ꓙꓳ ꓢꓴ ꓠꓬ꓾ ꓢꓲ-ꓫꓬ-ꓟ-ꓦ ꓡꓰ ꓘꓴ ꓜꓲ ꓞꓳ ꓐꓴ ꓔꓯ ꓐꓯ ꓖꓶˍ ꓟ ꓔꓯ ꓠ ꓠꓹ ꓝꓲ꓿ ꓧꓪꓸ ꓡꓰ ꓢꓴ ꓔꓯ ꓠꓽ꓾ ꓪꓴ-ꓢ ꓬꓲ ꓙꓳ ꓢꓻ ꓖꓴ ꓗꓪ ꓟ ꓢꓯꓼ ꓟꓬ ꓢꓲꓹ ꓜꓲꓻ ꓬꓲ ꓢꓶꓽ ꓜꓽ ꓠꓹ ꓟ ꓙꓵꓽ ꓪ ꓥꓪ ꓡꓰ ꓬꓲ ꓔꓯ ꓖꓶꓽˍ ꓥꓳ꓾ ꓐꓯˍ ꓡꓳ꓾ ꓐꓰ ꓐꓳ ꓖꓶ꓿ 8 ꓢꓶ-ꓟꓲ-ꓠ ꓗꓪ ꓟ ꓘꓴ ꓜꓲ ꓞꓳ ꓬꓲ ꓝꓲ ꓓꓴ ꓔꓯ ꓕꓱ ꓡꓱ ꓐꓳ ꓖꓶ꓿ ꓬꓲ ꓪꓴꓸ ꓟ ꓐꓰ ꓬꓲ ꓟꓶꓽˍ ꓟ꓾ ꓫꓵꓻ ꓗꓷ ꓢꓲ ꓢꓯꓸ ꓬꓲꓼ ꓡ ꓢꓴ ꓡꓰ꓾ 9 ꓠꓴ ꓫꓸ ꓙꓵˍ ꓟ ꓐꓰ ꓣꓱꓽ ꓟ ꓡꓳꓼ ꓟ ꓥꓪ ꓢꓷꓸˍ ꓡꓳ꓿ (ꓖꓳ ꓡꓱ ꓥ ꓟꓲ ꓠꓴ ꓠꓽ ꓐꓳˍ ꓡꓳ꓿) ꓝꓮꓲ ꓚꓲ ꓛꓬ ꓠꓬ ꓬꓴ-ꓔ ꓡꓽ ꓞꓳ ꓥ ꓡꓳ꓾ ꓐꓯˍ ꓟꓲ ꓟꓽ ꓥ ꓢꓲ꓾ ꓥꓶ ꓘꓶꓽ ꓫꓸ ꓕꓱ ꓢꓴ ꓔꓯ ꓥꓪ ꓢꓷꓸˍ ꓡꓳ꓿ ꓬꓲ ꓪꓽ ꓠꓽ ꓢ-ꓓꓯ ꓬꓲ ꓜꓲꓼ ꓦꓲ ꓕꓲ ꓦꓲ ꓥ ꓡꓳ꓿ 10 ꓠꓴ ꓫꓸ ꓙꓵˍ ꓐꓰ ꓗꓹ ꓟ ꓔꓯ ꓕꓽ ꓙꓳꓺ꓿ ꓠꓬꓲ ꓠꓹ꓾ ꓠꓴ ꓗꓪ ꓟ ꓕꓲ ꓐꓱ ꓔꓯ ꓤꓹ ꓠꓬꓲ ꓠꓹ ꓟ꓾ ꓢ-ꓓꓯ ꓡꓰ ꓐꓱ ꓓꓴꓽ ꓗꓪ ꓡꓳ ꓧꓳꓽ ꓗꓷˍ ꓐꓰ ꓬꓰˍ ꓡꓳ꓿ ꓠꓴ ꓪꓽ ꓠꓽ ꓞꓲ ꓠꓬꓲ ꓫꓸ ꓙꓵˍ ꓥꓳ꓿ ꓠꓴ ꓠꓬ ꓫꓵꓻ ꓗꓪ ꓛꓲ ꓦ ꓡꓱ ꓐꓳˍ ꓕꓯ ꓠꓽ꓾ ꓢꓯꓼ ꓟꓬ ꓪꓴꓸ ꓛꓴꓽ ꓖꓳ ꓟ ꓥꓪ ꓡꓰ ꓠꓴ ꓔꓯ ꓖꓶˍ ꓥꓳ꓿ 11 ꓠꓸ ꓑꓳ ꓙꓳ ꓢꓴ ꓠꓬ ꓢꓲ-ꓫꓬ-ꓟ-ꓦ ꓡꓰ ꓘꓴ ꓜꓲ ꓞꓳ ꓐꓴ ꓔꓯ ꓐꓯ ꓖꓶˍ ꓟ ꓔꓯ ꓠ ꓠꓹ ꓝꓲ꓿ ꓧꓪꓸ ꓡꓰ ꓢꓴ ꓔꓯ ꓠꓽ꓾ ꓠꓬꓲꓽ ꓧꓪꓹ ꓕꓲ ꓧꓪ ꓫꓵꓻˍ ꓟ ꓡꓰ ꓟꓽ ꓠꓻ ꓡꓰ ꓝꓲ꓾ ꓐꓯˍ ꓡꓳ꓾ ꓐꓰ ꓐꓳ ꓖꓶ꓿ 12 ꓒꓱ-ꓗ-ꓟꓳ ꓗꓪ ꓟ ꓘꓴ ꓜꓲ ꓞꓳ ꓬꓲ ꓝꓲ ꓓꓴ ꓔꓯ ꓕꓱ ꓡꓱ ꓐꓳ ꓖꓶ꓿ ꓠꓬꓲꓽ ꓛꓱꓽ ꓬꓲ ꓢꓶꓽ ꓠꓬꓲꓽ ꓕꓯꓹˍ ꓟ ꓮꓸ ꓕꓽ ꓙꓳ ꓢꓴ ꓡꓰ ꓕꓱ ꓡꓱ ꓐꓯˍ ꓡꓳ꓾ 13 ꓠꓴ ꓔꓬ ꓖꓴ ꓠꓬ ꓢ-ꓓꓯ ꓬꓲ ꓙꓵꓽ ꓠꓬꓲꓸ ꓕꓲ ꓙꓳˍ ꓟ ꓗꓪ ꓥ ꓟ ꓥꓪ ꓢꓷꓸˍ ꓡꓳ꓿ ꓖꓳ ꓡꓱ ꓥ ꓟꓲ ꓥꓪ ꓟꓬꓱ ꓔꓯ ꓠꓴ ꓕꓶꓻ ꓕꓶˍ ꓡꓰ ꓣꓴ ꓔ ꓢꓲ꓾ ꓥꓪ ꓦ ꓡꓱ ꓐꓳˍ ꓟ ꓢꓷꓸ ꓙ ꓟꓳ ꓙ ꓢꓴ꓾ ꓮ-ꓕꓲ-ꓒ ꓔꓯ ꓠꓴ ꓪꓽ ꓗꓳ ꓡꓳ ꓗꓪ ꓟ ꓢ-ꓓꓯꓼ ꓔꓬ ꓖꓴ ꓗꓪ ꓢꓰꓼˍ ꓟ ꓦꓬꓼ ꓠꓬꓲ ꓗꓪˍ ꓟꓲ ꓠꓴ ꓠꓬ ꓥꓪ ꓔꓯ ꓙꓵꓻˍ ꓟ ꓚꓱꓹ ꓔꓯ ꓟꓽ ꓣꓷꓠꓸ ꓐꓰ ꓟꓽ ꓬꓰ꓿ 14 ꓖꓳ ꓡꓱ ꓥ ꓟꓲ ꓠꓴ ꓔꓯ ꓥꓪ ꓕꓼ ꓓꓴ ꓠꓬꓲꓽ ꓢ ꓫꓵꓽ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓗꓳ ꓡꓳ ꓗꓪ꓾ ꓬꓲ-ꓢꓷ-ꓡꓰ ꓔꓯ ꓛꓲ ꓕꓲꓽ ꓡꓰ ꓝꓲ ꓠꓹ ꓟ ꓑ-ꓡꓷꓽ ꓔꓯ ꓟꓸ ꓖꓶ ꓢꓴ ꓑ-ꓡꓽ ꓟꓸ ꓟꓲ ꓔꓯ ꓣꓴ ꓔ ꓢꓴ ꓕꓲ ꓐꓱ ꓙꓳ ꓡꓳ꓿ ꓑ-ꓡ ꓠꓬ ꓠꓲꓽ ꓐꓬꓱꓽ ꓔꓯ ꓔꓲ ꓗꓷ ꓡꓳ ꓫꓵ ꓜꓽ ꓝꓲ ꓠꓹ ꓟ ꓐꓰ꓾ ꓟꓽ ꓢꓲ ꓟꓽ ꓫꓬ ꓟ ꓬꓰ ꓝꓲ ꓠꓹ ꓟ ꓑ-ꓡꓷꓽ ꓔꓯ ꓟꓸ ꓖꓶˍ ꓡꓳ꓿ 15 ꓖꓳ ꓟ ꓡꓰ ꓐꓰ ꓠꓴ ꓗꓳ ꓡꓳ ꓗꓪ ꓠꓲ-ꓗꓳ-ꓡ ꓕꓲ ꓧꓳꓽ ꓟ ꓬꓲ ꓪꓽ ꓟꓸ ꓟꓲ ꓔꓯ ꓣꓴ ꓔ ꓢꓴˍ ꓟꓲ ꓕꓲ ꓐꓱ ꓙꓳˍ ꓢꓰꓽ ꓡꓳ꓿ 16 ꓖꓳ ꓡꓱ ꓠꓬꓲ ꓓꓵꓽ ꓙꓽ ꓒꓳꓹ ꓬꓲꓼ ꓡꓯ꓿ ꓟꓽ ꓥ ꓠꓬ ꓠꓴ ꓔꓯ ꓥꓪ ꓮꓸ ꓟꓲꓸ ꓡ ꓢꓲ꓾ ꓥꓪ ꓟꓷꓽ ꓠꓷꓹ ꓗꓪ ꓟ ꓮꓸ ꓕꓽ ꓡꓰ ꓬꓲ ꓪꓽ ꓔꓯ ꓔꓳꓹ ꓢꓲ ꓟꓯꓼ ꓬꓰˍ ꓥꓳ꓿ 17 ꓠꓸ ꓑꓳ ꓙꓳ ꓢꓴ ꓠꓬ꓾ ꓢꓲ-ꓫꓬ-ꓟ-ꓦ ꓡꓰ ꓘꓴ ꓜꓲ ꓞꓳ ꓐꓴ ꓔꓯ ꓐꓯ ꓖꓶˍ ꓟ ꓔꓯ ꓠ ꓠꓹ ꓝꓲ꓿ ꓧꓪꓸ ꓡꓰ ꓢꓴ ꓔꓯ ꓠꓽ꓾ ꓥꓪ ꓡꓰ ꓚꓵ ꓔ ꓟ ꓟ-ꓠ ꓕꓲ ꓣꓷꓽˍ ꓐꓰ ꓡꓳ ꓓꓰ ꓒꓴ ꓕꓲ ꓒꓬꓸ ꓖꓶˍ ꓥꓳ꓿ ꓡꓳ ꓒꓬꓸ ꓖꓳ ꓟ ꓗꓪ ꓠꓬ꓾ ꓟꓶꓻ ꓡꓰ ꓢꓴ ꓬꓲ ꓚꓲ ꓛꓬ ꓟꓽ ꓥ ꓠꓬ꓾ ꓮꓽ ꓟˍ ꓟꓲ ꓟꓽ ꓢꓷꓸ ꓟ ꓟꓬꓱ ꓫꓵꓼ ꓕꓲ ꓟꓬꓱ ꓐꓳ ꓔ ꓡꓳ꓾ ꓐꓯˍ ꓡꓳ꓾ ꓐꓰ ꓐꓳ ꓖꓶ꓿ 18 ꓕꓷ-ꓬ-ꓕꓷ-ꓡ ꓗꓪ ꓟ ꓘꓴ ꓜꓲ ꓞꓳ ꓬꓲ ꓝꓲ ꓓꓴ ꓔꓯ ꓕꓱ ꓡꓱ ꓐꓳ ꓖꓶ꓿ ꓬꓲ ꓛꓲ ꓒꓯꓹ ꓠꓬ ꓞꓹ ꓔ ꓟ ꓙꓲꓽˍ ꓡꓰ ꓐꓰ ꓗꓹ ꓢꓲ꓾ ꓬꓲ ꓟꓬ ꓢꓶꓽ ꓠꓬ ꓮꓸ ꓔꓳꓸ ꓡ ꓡꓱˍ ꓡꓰ ꓐꓰ ꓗꓹ ꓢꓴ ꓪꓴ-ꓢ ꓬꓲ ꓮ ꓐꓲ ꓡꓰ ꓕꓱ ꓡꓱ ꓐꓯˍ ꓡꓳ꓾ 19 ꓠꓴ ꓬꓰˍ ꓟ ꓟꓬꓱꓽˍ ꓐꓰ ꓠꓵꓻ ꓠꓲꓹˍ ꓐꓰ ꓙꓵꓻ ꓠꓲꓹˍ ꓐꓰ꓾ ꓣꓱꓽ ꓙˍ ꓟ ꓟꓬꓱꓽˍ ꓐꓰ꓾ ꓜꓲꓽ ꓘꓴ ꓠꓲꓹˍ ꓐꓰ꓾ ꓠꓴ ꓮ ꓟꓶ ꓬꓰˍ ꓟ ꓟꓬꓱꓽ ꓠꓬ꓾ ꓧꓶꓸ ꓕꓯ ꓬꓰ ꓗꓷ ꓟ ꓢꓶꓸ ꓟꓽ ꓞꓲ ꓟꓬꓽˍ ꓟ ꓥꓪ ꓢꓷꓸˍ ꓡꓳ꓿ 20 ꓖꓳ ꓡꓱ ꓥ ꓟꓲ ꓥꓪ ꓠꓬ ꓠꓴ ꓔꓯ ꓕꓼ ꓓꓴ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓚꓲ ꓛꓬ ꓔꓯ꓾ ꓟꓷꓽ ꓠꓷꓹ ꓝꓸ ꓟꓺ꓾ ꓐꓰ ꓘꓴ ꓢꓴ꓾ ꓤ ꓟꓶ ꓤ ꓬꓰ-ꓫꓲ-ꓑꓰꓽ ꓔꓯ ꓠꓴ ꓟꓽ ꓗꓽ ꓔ ꓔ ꓜꓲꓽ ꓔ ꓡꓳ꓿ ꓬꓲ ꓡꓰ ꓥꓪ ꓚꓳ ꓑꓸ ꓐꓴ ꓔꓯ ꓟꓸ ꓒꓬꓹ ꓢꓲ꓾ ꓟꓽ ꓢꓲ ꓟꓽ ꓫꓬꓻ ꓬꓰ ꓝꓲ ꓢꓲ ꓠꓬꓲ꓾ ꓠꓲꓽ ꓐꓬꓱ ꓔꓯ ꓔꓲ ꓗꓷˍ ꓡꓳ ꓫꓵꓽ ꓜꓽ ꓝꓲˍ ꓡꓳ꓿ 21 ꓥꓪ ꓬꓲ ꓔꓯ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓝꓲ ꓠꓹ ꓟ ꓬꓲ ꓝꓲꓸ ꓕꓲ ꓟ ꓖꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓽ ꓬꓲ ꓟꓽ ꓢꓲ ꓟꓽ ꓫꓬ ꓟ ꓗꓪ ꓐꓰ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓟꓽ ꓫꓳ꓿ 22 ꓠ ꓠꓹ꓾ ꓥꓪ ꓬꓲ ꓔꓯ ꓘꓹ ꓛꓽ ꓗꓪ ꓠꓻ ꓓꓳꓽ ꓡꓰ ꓝꓲ ꓢꓲ꓾ ꓬꓲˍ ꓐꓰ ꓦꓬꓽ ꓛꓳꓽ ꓧꓪ ꓢꓴ ꓐꓴ ꓠꓬ꓾ ꓬꓲ ꓪꓽ ꓬꓰˍ ꓟ ꓟꓬꓱꓽ ꓗꓪ ꓐꓰ ꓟꓽ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓕꓯ ꓠꓽ꓾ ꓬꓲˍ ꓐꓰ ꓕꓲ ꓛꓳꓺꓼ ꓮꓽ ꓘꓶꓸ ꓫꓸ ꓙꓵˍ ꓟ ꓗꓪ ꓡꓳ ꓗꓷˍ ꓥꓳ꓿ 23 ꓥꓪ ꓡꓰ ꓬꓲ ꓤ ꓠꓱ ꓐꓴ ꓔꓯ ꓠꓻ ꓓꓱꓽ ꓡꓰ ꓫꓵꓻ ꓖꓴ ꓡꓰ ꓝꓲˍ ꓥꓳ꓿ ꓖꓳ ꓡꓱ ꓢꓲ ꓥꓪ ꓠꓬ ꓢꓲꓽ ꓤ ꓠꓲꓹ ꓤ ꓔꓯ ꓧꓪꓺ ꓟꓰꓹ ꓠꓬꓲ ꓢꓴ ꓥ ꓟ꓾ ꓘꓴ ꓜꓲ ꓞꓳ ꓮꓽ ꓙꓵ ꓢꓷꓸ ꓡꓰˍ ꓥꓳ꓿ ꓥꓪ ꓠꓽ ꓠꓴ ꓪꓽ ꓮ ꓡꓲ ꓬꓰˍ ꓠꓬ ꓖꓳ ꓡꓱ ꓚꓱꓹ ꓖꓶˍ ꓥꓳ꓿ 24 ꓕꓷ-ꓬ-ꓕꓷ-ꓡ ꓗꓪ ꓜꓰꓻ ꓞꓹ ꓢꓲ꓾ ꓬꓰ-ꓫꓲ-ꓑꓰ ꓟꓸ ꓟꓲ ꓕꓱ ꓟ ꓟꓽ ꓛꓳ ꓢꓴ꓾ ꓢ-ꓓꓯ ꓬꓲ ꓠꓯꓸˍ ꓟ ꓟꓸ ꓟꓲ ꓔꓯ ꓟꓽ ꓢꓳ ꓠꓬꓲ ꓢꓴ ꓐꓴꓳ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓥꓪ ꓠꓬ ꓠꓴ ꓪꓽ ꓔꓯ ꓠꓱꓸ ꓐꓯꓼ ꓶꓻ ꓟꓽ ꓑꓵꓸ ꓡꓴꓽ ꓖꓶ꓿ 25 ꓖꓳ ꓡꓱ ꓥ ꓟꓲ ꓠꓴ ꓪꓽ ꓙꓳˍ ꓟ ꓔꓯ ꓥꓪ ꓡ ꓗꓪ ꓛꓲ ꓬꓲ ꓜꓶ ꓣꓴ ꓔ꓿ 26 ꓧꓪꓸ ꓡꓰ ꓢꓲ ꓡꓳꓹ ꓬꓰ ꓗꓪ ꓛꓲ ꓥꓪ ꓠꓲꓹ ꓡꓶꓽ ꓛꓳ ꓢꓴ ꓔꓯ ꓠꓬ꓾ ꓞꓳ ꓫꓵꓽ ꓐꓴ ꓔꓯ ꓙꓵꓽ ꓠꓹ ꓟ ꓙꓵꓽ ꓪ ꓥꓪ ꓬꓲ ꓔꓯ ꓖꓶˍ ꓥꓳ꓿ 27 ꓥꓪ ꓐꓹ ꓐ ꓗꓪ ꓐꓰ ꓥꓪ ꓟꓶˍ ꓟ ꓙꓵꓽ ꓪꓽ ꓔꓯ ꓛꓳ ꓢꓲ꓾ ꓬꓲ ꓠꓬ ꓠꓱꓸ ꓦꓱꓽ ꓡꓴꓻ ꓔꓯ ꓲ'ꓼ ꓛꓱꓼ ꓗꓷˍ ꓟ ꓡꓰ ꓐꓰ ꓧꓳꓻ ꓓꓻ ꓡꓰ ꓬꓲ ꓪꓽ ꓔꓯ ꓙꓵꓽˍ ꓥꓳ꓿ 28 ꓝꓮꓲ ꓥꓪ ꓡꓰ ꓬꓲ ꓔꓯ ꓠꓯꓼ ꓗꓴ ꓟ ꓤꓲ ꓖꓶˍ ꓥꓳ꓿ 29 ꓠꓸ ꓑꓳ ꓙꓳ ꓢꓴ ꓠꓬ꓾ ꓢꓲ-ꓫꓬ-ꓟ-ꓦ ꓡꓰ ꓘꓴ ꓜꓲ ꓞꓳ ꓐꓴ ꓔꓯ ꓐꓯ ꓖꓶˍ ꓟ ꓔꓯ ꓠ ꓠꓹ ꓝꓲ꓾ ꓐꓯˍ ꓡꓳ꓾ ꓐꓰ ꓐꓳ ꓖꓶ꓿

ꓟꓳ ꓖꓶ ꓓꓴ 3

1 ꓢ-ꓓꓲ ꓗꓪ ꓟ ꓘꓴ ꓜꓲ ꓞꓳ ꓬꓲ ꓝꓲ ꓓꓴ ꓔꓯ ꓕꓱ ꓡꓱ ꓐꓳ ꓖꓶ꓿ ꓪꓴ-ꓢ ꓦꓻ ꓫꓵꓽ ꓟ ꓐꓰ ꓗꓴ ꓤ ꓫꓵꓽ ꓢꓶꓽ ꓙꓳ ꓢꓴ ꓡꓰ꓾ ꓠꓴ ꓬꓰˍ ꓟ ꓟꓬꓱꓽˍ ꓐꓰ꓾ ꓢꓯꓸ ꓔꓬ ꓟ ꓟꓬꓱ ꓓꓳꓽ ꓟꓯꓻ ꓔˍ ꓟꓲ꓾ ꓠꓴ ꓠꓽ ꓫꓵꓻ ꓞꓹ ꓟ ꓥ ꓟ ꓥꓪ ꓢꓷꓸˍ ꓡꓳ꓿ 2 ꓖꓳ ꓡꓱ ꓠꓬꓲ ꓠꓴ ꓧꓪꓸ ꓛꓲ ꓡꓯ꓿ ꓜꓰꓻ ꓞꓹ ꓢꓲ ꓫꓵꓻˍ ꓐꓰ ꓗꓹ ꓟ ꓔꓯ ꓢꓯꓼ ꓙꓳ ꓡ ꓝꓲ꓿ ꓮ ꓡꓲꓳ ꓐꓯ ꓠꓬ ꓠꓴ ꓬꓰˍ ꓟ ꓟꓬꓱꓽ ꓠꓬ꓾ ꓥꓪ ꓪꓴ-ꓢ ꓟꓲꓽ ꓙꓬ ꓗꓪ ꓪꓴꓽ ꓓꓰ ꓡꓰˍ ꓟ ꓕꓲ ꓫꓵˍ ꓟꓲ ꓧꓪꓺ ꓟꓽ ꓟꓶ꓿ 3 ꓖꓳ ꓡꓱ ꓠꓬꓲ ꓠꓴ ꓟꓶ ꓗꓷ ꓟ ꓐꓰ ꓑ ꓙꓽ ꓗꓷ ꓟ ꓔꓯ ꓓꓵꓽ ꓙꓽ ꓔ ꓢꓲ꓾ ꓒꓵꓽ ꓛꓳ ꓠꓬꓲ ꓐꓰ ꓓꓵꓽ ꓙꓽ ꓒꓳꓹ ꓬꓲꓼ ꓡꓯ꓿ ꓠꓴ ꓟꓽ ꓧꓪꓸ ꓛꓲ ꓡ ꓠꓬ꓾ ꓥꓪ ꓠꓽ ꓞꓳ ꓘꓴꓽˍ ꓡꓰ ꓐꓰ ꓡꓻˍ ꓥꓳ꓿ ꓥꓪ ꓮ ꓡꓲ ꓕꓲ ꓙꓵꓹ ꓗꓪ ꓛꓲ ꓡ ꓟ ꓠꓴ ꓟꓽ ꓢꓷꓸ꓿ 4 ꓖꓳ ꓡꓱ ꓥ ꓟꓲ ꓢ-ꓓꓲ ꓗꓪ ꓚꓲ ꓛꓬ ꓐꓵ ꓞꓶꓽ ꓔꓯ ꓟꓽ ꓫꓬꓻ ꓟ ꓟꓽ ꓠꓷꓼ ꓡꓰ ꓝꓲ ꓢꓴ ꓠꓴ ꓗꓳ ꓡꓳ ꓗꓪ ꓕꓲ ꓧꓳꓽ ꓤ ꓙꓳˍ ꓡꓳ꓿ ꓬꓲ ꓪꓽ ꓠꓬ ꓥꓪˍ ꓐꓰ ꓫꓱꓽ ꓒꓵꓽˍ ꓠꓬꓲ꓾ ꓐꓵ ꓞꓶꓽ ꓒꓴ ꓖꓪꓽ ꓢꓲ ꓥꓪˍ ꓐꓰ ꓕꓲ ꓛꓳꓺꓼ ꓫꓱꓽˍ ꓥꓳ꓿ 5 ꓧꓪꓸ ꓡꓰ ꓢꓴ ꓔꓯ ꓠꓽ꓾ ꓬꓲ ꓕꓱ ꓡꓱ ꓐꓵ ꓞꓶꓽ ꓒꓴ ꓖꓶ ꓖꓪꓽ ꓢꓲ꓾ ꓢꓯꓼ ꓟꓬ ꓕꓳ ꓶ ꓗꓪ ꓬꓲ ꓟꓬꓱ ꓐꓳ ꓔ ꓟ ꓥꓪ ꓟꓽ ꓫꓵꓹ ꓩꓴ ꓗꓷ꓿ ꓥꓪ ꓐꓹ ꓐ ꓟꓲꓽ ꓙꓬˍ ꓐꓰ ꓬꓲ ꓟꓴꓽ ꓗꓪ ꓝꓲ ꓓꓴ ꓐꓴ ꓟꓲꓽ ꓙꓬ ꓗꓪˍ ꓟꓲ ꓬꓲ ꓟꓬꓱ ꓔꓯ ꓥꓪ ꓣꓷꓠꓸˍ ꓥꓳ꓿ 6 ꓠꓸ ꓑꓳ ꓙꓳ ꓢꓴ ꓠꓬ꓾ ꓢꓲ-ꓫꓬ-ꓟ-ꓦ ꓡꓰ ꓘꓴ ꓜꓲ ꓞꓳ ꓐꓴ ꓔꓯ ꓐꓯ ꓖꓶˍ ꓟ ꓔꓯ ꓠ ꓠꓹ ꓝꓲ꓾ ꓐꓯˍ ꓡꓳ꓾ ꓐꓰ ꓐꓳ ꓖꓶ꓿ 7 ꓒꓲ-ꓡ-ꓔꓷ-ꓒꓲ-ꓬ ꓗꓪ ꓟ ꓘꓴ ꓜꓲ ꓞꓳ ꓬꓲ ꓝꓲ ꓓꓴ ꓔꓯ ꓕꓱ ꓡꓱ ꓐꓳ ꓖꓶ꓿ ꓢꓲꓽ ꓫꓬˍ ꓟ ꓐꓰ ꓔꓱꓹˍ ꓟ꓾ ꓬꓲ ꓒꓴ ꓗꓷ ꓠꓬ ꓚꓵꓸ ꓐ ꓡ ꓢꓴ ꓟꓽ ꓙꓳ꓾ ꓬꓲ ꓚꓵꓸ ꓗꓷ ꓠꓬ ꓒꓴ ꓐꓻ ꓡ ꓢꓴ ꓟꓽ ꓙꓳˍ ꓟ꓾ ꓓ-ꓪꓵ ꓜꓳ ꓜꓴꓻ ꓔꓯꓹ ꓔꓸ ꓢꓴ ꓡꓰ ꓕꓱ ꓡꓱ ꓐꓯˍ ꓡꓳ꓾ 8 ꓠꓴ ꓬꓰˍ ꓟ ꓟꓬꓱꓽ ꓔꓯ ꓥꓪ ꓢꓷꓸˍ ꓡꓳ꓿ ꓠꓴ ꓪꓽ ꓠꓬꓲˍ ꓟ ꓢꓯꓼ ꓮ ꓔꓲꓸ ꓤ ꓡꓰꓽ ꓙꓳˍ ꓟꓲ꓾ ꓠꓴ ꓠꓬ ꓥꓪ ꓐꓯ ꓘꓶꓽ ꓒꓵꓽ ꓛꓳ ꓢꓲ꓾ ꓥꓪ ꓟꓬꓱ ꓔꓯ ꓟꓽ ꓣꓷꓠꓸ ꓐꓰ ꓟꓽ ꓬꓰ꓿ ꓠꓬꓲ ꓠꓹ꓾ ꓮꓽ ꓟˍ ꓟꓲ ꓚꓵꓸ ꓟꓽ ꓐ ꓡ ꓟ ꓗ ꓘꓶꓽ ꓕꓲ ꓒꓰꓼ ꓠꓬ꓾ ꓥꓪ ꓡꓰ ꓠꓴ ꓟꓲꓽ ꓙꓬ ꓗꓪ ꓒꓴ ꓞꓹ ꓝꓲˍ ꓥꓳ꓿ 9 ꓠꓬꓲ ꓠꓹ꓾ ꓬꓲ ꓪꓽ ꓚꓲ ꓛꓬ ꓠꓬ ꓬꓴ-ꓔ ꓡꓽ ꓞꓳ ꓥ ꓡꓳ꓾ ꓐꓰ ꓗꓶꓸ ꓢꓴ꓾ ꓢ-ꓓꓯ ꓬꓲ ꓜꓲꓼ ꓦꓲ ꓗꓪ ꓟ ꓖꓳ ꓕꓲ ꓧꓳꓽ ꓔꓯ꓾ ꓠꓴ ꓟꓲꓽ ꓙꓬ ꓗꓪ ꓛꓲ ꓝꓲꓸ ꓖꓶꓽ ꓡ ꓝꓲ ꓠꓹ ꓟ ꓥꓪ ꓡꓰ ꓐꓯ ꓘꓶꓽ ꓖꓶ ꓢꓲ꓾ ꓠꓴ ꓔꓯ ꓥꓪ ꓠꓲꓹ ꓠꓵˍ ꓟ ꓬꓲ ꓪꓽ ꓔꓯ ꓢꓷꓸ ꓡꓰ ꓝꓲˍ ꓥꓳ꓿ 10 ꓥꓪ ꓕꓵꓼ ꓪ ꓔꓯ ꓠꓴ ꓒꓵꓽ ꓛꓳ ꓢꓲ ꓜꓲꓽ ꓘꓴˍ ꓠꓬꓲ꓾ ꓟꓲ ꓠꓯ ꓗꓪ ꓔꓬ ꓢꓴ ꓔꓯ ꓤꓹ ꓠꓬꓲ ꓠꓹ ꓟ꓾ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓤꓹ ꓠꓬꓲ ꓡ ꓟ ꓙꓵꓹ ꓗꓪ꓾ ꓠꓴ ꓔꓯ ꓟꓽ ꓗꓷ ꓡꓰ ꓝꓲ ꓠꓹ ꓟ ꓥꓪ ꓡꓰ ꓠꓴ ꓔꓯ ꓫꓺ ꓙˍ ꓥꓳ꓿ 11 ꓥꓪ ꓮꓸ ꓟꓲꓸ ꓟꓲ ꓡꓻˍ ꓥꓳ꓿ ꓢꓴ ꓡꓰ ꓠꓴ ꓪꓴꓸ ꓛꓴꓽ ꓟꓽ ꓣꓴ ꓔꓯꓹ ꓙꓰ ꓠꓹ ꓟ꓾ ꓠꓴ ꓙꓳˍ ꓟ ꓔꓯ ꓕꓶꓻ ꓕꓶˍ ꓡꓰꓽ ꓣꓴ ꓔ꓿ 12 ꓧꓪꓸ ꓡꓰ ꓢꓴ ꓔꓯ ꓠꓽ꓾ ꓥꓪ ꓡꓰ ꓬꓲ ꓔꓯ ꓥꓪ ꓪꓴ-ꓢ ꓢꓲꓽ ꓫꓬ ꓦꓲ ꓗꓪ ꓟ ꓬꓲꓻ ꓘꓴ ꓒꓬꓱꓼ ꓡ ꓝꓲ ꓢꓲ꓾ ꓬꓲ ꓠꓬ ꓖꓳ ꓗꓪ ꓐꓰ ꓝꓮꓲ ꓟꓽ ꓓꓳ ꓙꓰ꓿ ꓥꓪ ꓡꓰ ꓥꓪ ꓪꓴ-ꓢ ꓟꓬꓱˍ ꓐꓰ ꓥꓪ ꓪꓴ-ꓢ ꓗꓪ ꓐꓰ ꓬꓯꓼ ꓡ ꓟ ꓙꓱ-ꓣꓴ-ꓢ-ꓡꓱ ꓫꓵꓼˍ ꓐꓰ꓾ ꓥꓪ ꓪꓴ-ꓢ ꓬꓲ ꓡꓳ ꓒꓱ ꓟꓬꓱˍ ꓐꓰ꓾ ꓥꓪ ꓚꓲ ꓛꓬ ꓟꓬꓱ ꓫꓵꓼ ꓠꓬ ꓬꓲ ꓕꓯꓽ ꓢꓲ ꓗꓪ ꓐꓳˍ ꓥꓳ꓿ 13 ꓠꓸ ꓑꓳ ꓙꓳ ꓢꓴ ꓠꓬ꓾ ꓢꓲ-ꓫꓬ-ꓟ-ꓦ ꓡꓰ ꓘꓴ ꓜꓲ ꓞꓳ ꓐꓴ ꓔꓯ ꓐꓯ ꓖꓶˍ ꓟ ꓔꓯ ꓠ ꓠꓹ ꓝꓲ꓾ ꓐꓯˍ ꓡꓳ꓾ ꓐꓰ ꓐꓳ ꓖꓶ꓿ 14 ꓡ-ꓪꓳ-ꓓꓲ-ꓫꓲ-ꓬ ꓗꓪ ꓟ ꓘꓴ ꓜꓲ ꓞꓳ ꓬꓲ ꓝꓲ ꓓꓴ ꓔꓯ ꓕꓱ ꓡꓱ ꓐꓳ ꓖꓶ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓐꓰ ꓟꓬꓱ ꓔ ꓟ ꓦ ꓡꓱ ꓐꓳˍ ꓟ ꓐꓰ ꓔꓱꓹ ꓟ ꓢꓷꓸ ꓙ ꓟꓳ ꓙ ꓢꓴ꓾ ꓪꓴ-ꓢ ꓡꓰ ꓚꓰꓼ ꓔ ꓡꓳ ꓫꓵꓽ ꓥ ꓕ ꓑꓳꓸ ꓬꓲ ꓚꓰꓺ ꓡꓰ ꓕꓱ ꓡꓱ ꓐꓯˍ ꓡꓳ꓾ 15 ꓠꓴ ꓬꓰˍ ꓟ ꓟꓬꓱꓽ ꓗꓪ꓾ ꓠꓴ ꓠꓬ ꓙꓬˍ ꓟꓲ ꓟꓽ ꓙꓬ꓾ ꓞꓻˍ ꓟꓲ ꓟꓽ ꓞꓹ ꓟ ꓥꓪ ꓢꓷꓸˍ ꓡꓳ꓿ ꓠꓴ ꓠꓽ ꓥ ꓠꓬ ꓙꓬꓺ꓾ ꓥ ꓠꓬ ꓞꓻˍ ꓟ ꓔꓯ ꓥꓪ ꓠꓲꓹ ꓫꓵˍ ꓡꓳ꓿ 16 ꓠꓴ ꓠꓬ ꓙꓬꓺˍ ꓟꓲ ꓟꓽ ꓙꓬ꓾ ꓞꓻˍ ꓟꓲ ꓟꓽ ꓞ꓾ ꓡꓱꓻ ꓟꓱꓽ ꓟꓱꓽ ꓐꓰ ꓗꓹ ꓠꓬꓲ꓾ ꓥꓪ ꓟꓷꓽ ꓠꓷꓹ ꓗꓪ ꓐꓰ ꓠꓴ ꓔꓯ ꓔꓲꓸ ꓓꓳ ꓩꓴ ꓗꓷˍ ꓥꓳ꓿ 17 ꓠꓴ ꓠꓬ꓾ ꓥꓪ ꓠꓽ ꓒꓵꓽ ꓮꓽ ꓟꓬꓹ ꓧꓪ ꓟꓶ ꓡꓰ ꓢꓲ꓾ ꓞꓳ ꓐꓳ ꓒꓬꓱꓼ ꓡ ꓠꓬꓲ ꓣꓱꓽ ꓟ ꓡꓳꓼ ꓟ ꓕꓲ ꓫꓵˍ ꓟꓲ ꓟꓽ ꓙꓳ꓾ ꓐꓯˍ ꓟꓲ꓾ ꓠꓴ ꓠꓽ ꓫꓸ ꓙꓵˍ ꓟ ꓐꓰ꓾ ꓫꓱꓸ ꓤ ꓠꓯꓹ ꓟ ꓐꓰ꓾ ꓫꓸˍ ꓟ ꓐꓰ꓾ ꓟꓬ ꓔꓶˍ ꓟ ꓐꓰ ꓙꓬꓽ ꓡꓯꓽ ꓟꓴ ꓗꓹ ꓟ ꓠꓴ ꓟꓽ ꓢꓷꓸ꓿ 18 ꓠꓴ ꓠꓬ ꓐꓳ ꓡ ꓠꓹ ꓟ ꓮꓸ ꓔꓳꓸ ꓗꓪ ꓚꓲꓺ ꓫꓬꓻ ꓔ ꓟ ꓫꓵꓺ ꓥꓪ ꓔꓯ ꓪꓴꓻ ꓡ ꓢꓲ꓾ ꓙꓬꓽ ꓡꓯꓽ ꓟꓴ ꓗꓹ ꓠꓬꓲ ꓠꓴ ꓫꓸ ꓔꓳ ꓓꓴ ꓔꓯ ꓑꓲꓸ ꓠꓹ ꓟ꓾ ꓖꓪꓽ ꓓꓴ ꓐꓵ ꓞꓶꓽ ꓒꓴ ꓪꓴꓻ ꓢꓲ ꓠꓬꓲ꓾ ꓠꓴ ꓠꓬꓲ ꓟꓳꓻ ꓡ ꓠꓹ ꓟ ꓠꓴ ꓟꓬ ꓢꓶꓽ ꓗꓪ ꓟꓰꓺ ꓓꓴ ꓠꓯ ꓞꓲꓼ ꓪꓴꓻ ꓡꓯ꓾ ꓐꓰ ꓠꓴ ꓔꓯ ꓥꓪ ꓘꓶꓸ ꓖꓶˍ ꓥꓳ꓿ 19 ꓥꓪ ꓠꓲꓹ ꓠꓵˍ ꓟ ꓥ ꓕ ꓑꓳꓸ ꓔꓯ ꓠꓬ ꓥꓪ ꓕꓼ ꓢꓲ ꓟꓸ ꓙꓽˍ ꓥꓳ꓿ ꓖꓳ ꓡꓱ ꓠꓬꓲ ꓠꓲꓹ ꓟ ꓡꓱ ꓢꓲ ꓓꓵꓽ ꓙꓽ ꓒꓳꓹ ꓬꓲꓼ ꓡꓯ꓿ 20 ꓠꓬꓲ ꓠꓹ꓾ ꓥꓪ ꓠꓬ ꓗ ꓘꓶꓽ ꓗꓪ ꓦꓰꓼ ꓞꓹ ꓢꓲ ꓲ'ꓼ ꓔꓬ ꓥꓳ꓿ ꓮꓽ ꓟ ꓥ ꓟꓲ ꓥꓪ ꓢꓯꓼ ꓑ ꓙꓽ ꓢꓲ ꓗ ꓘꓶꓽ ꓒꓴ ꓖꓶ ꓡ ꓠꓬ ꓥꓪ ꓬꓲ ꓔꓯ ꓡ ꓢꓲ꓾ ꓬꓲˍ ꓐꓰ ꓕꓲ ꓪꓺꓼ ꓜ ꓜꓽ ꓠꓬꓲ ꓐꓰ ꓙꓻ ꓡꓯꓽ ꓘꓳˍ ꓥꓳ꓿ 21 ꓥꓪ ꓠꓬ ꓧꓪꓸ ꓡꓰ ꓢꓲ꓾ ꓥꓪ ꓐꓹ ꓐ ꓬꓲ ꓙꓵꓽ ꓠꓬꓲ ꓕꓲ ꓗꓪ ꓬꓲˍ ꓐꓰ ꓕꓲ ꓪꓺꓼ ꓠꓬꓲ ꓠꓸˍ ꓟ ꓡꓰ ꓐꓰ꓾ ꓧꓪꓸ ꓡꓰ ꓢꓴ ꓔꓯ ꓠꓽ ꓥꓪ ꓙꓵꓽ ꓠꓬꓲꓸ ꓕꓲ ꓗꓪ ꓥꓪˍ ꓐꓰ ꓕꓲ ꓪꓺꓼ ꓠꓬꓲꓸ ꓠꓸ ꓠꓹ ꓟ ꓙꓵꓽ ꓪ ꓖꓶˍ ꓥꓳ꓿ 22 ꓠꓸ ꓑꓳ ꓙꓳ ꓢꓴ ꓠꓬ꓾ ꓢꓲ-ꓫꓬ-ꓟ-ꓦ ꓡꓰ ꓘꓴ ꓜꓲ ꓞꓳ ꓐꓴ ꓔꓯ ꓐꓯ ꓖꓶˍ ꓟ ꓔꓯ ꓠ ꓠꓹ ꓝꓲ꓾ ꓐꓯˍ ꓡꓳ꓾ ꓐꓰ ꓐꓳ ꓖꓶ꓿

ꓟꓳ ꓖꓶ ꓓꓴ 4

1 ꓕꓱ ꓟꓬ ꓙꓰꓽ ꓗꓸ ꓠꓯꓸ ꓥꓪ ꓡꓳꓸ ꓠꓬꓲ ꓠꓬ ꓟꓴꓽ ꓗꓪ ꓗꓪ ꓗ ꓘꓶꓽ ꓕꓲ ꓟ ꓒꓴ ꓞꓹ ꓟ ꓥꓪ ꓟꓳˍ ꓡꓳ꓿ ꓖꓳ ꓡꓱ ꓢꓲ ꓥꓪ ꓬꓲ ꓪꓴꓸ ꓑ ꓙꓽˍ ꓟ ꓐꓽ ꓡ ꓢꓯꓼˍ ꓡꓰ ꓐꓰ ꓗꓹ ꓟ ꓡꓰ ꓥꓪ ꓔꓯ ꓫꓸ ꓕꓱ ꓡ ꓢꓲ꓾ ꓕꓱ ꓗꓪ ꓓꓯ ꓡꓯ꓾ ꓕꓱ ꓡꓱ ꓖꓳ ꓑꓳꓸ ꓒꓬꓱꓼ ꓡ ꓠ ꓗꓹ ꓟ ꓠꓴ ꓔꓯ ꓥꓪ ꓟꓳꓸ ꓖꓶˍ ꓥꓳ꓾ ꓐꓯˍ ꓡꓳ꓿ 2 ꓖꓳ ꓕꓯ ꓥꓪ ꓠꓬ ꓞꓼ ꓐꓰ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓔꓬ ꓟꓶ ꓡꓰ ꓢꓲ꓾ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓙꓵꓽ ꓠꓬꓲꓸ ꓕꓲ ꓕꓲ ꓟ ꓕꓯꓽ ꓢꓲ ꓗꓪ ꓠꓬꓲꓸ ꓠꓸ ꓔꓬ ꓢꓴ ꓕꓲ ꓣꓳ ꓔꓯ ꓟꓳꓻ ꓡꓰꓳ꓿ 3 ꓖꓳ ꓕꓲ ꓣꓳ ꓬꓲ ꓒꓬꓱꓽ ꓠꓬ꓾ ꓒꓵꓽ ꓡꓳ ꓠꓯꓺ ꓤꓲꓺˍ ꓐꓰ꓾ ꓒꓵꓽ ꓡꓳ ꓢꓲꓽ ꓠꓯˍ ꓡꓰ ꓐꓰ ꓗꓹ ꓡꓳ꓿ ꓝꓮꓲ ꓒꓵꓽ ꓡꓳ ꓠꓲꓹ ꓛꓵꓼ ꓒꓬꓱꓽ ꓶꓻˍ ꓟ ꓮꓸ ꓟꓴꓽ ꓬꓲꓻ ꓫꓵ ꓠꓬ꓾ ꓙꓵꓽ ꓠꓬꓲꓸ ꓕꓲ ꓔꓯ ꓚꓳ ꓞꓹ ꓡꓳ꓿ 4 ꓝꓮꓲ ꓙꓵꓽ ꓠꓬꓲ ꓕꓲ ꓚꓳ ꓡꓳ ꓗꓪ ꓠꓬ꓾ ꓙꓵꓽ ꓠꓬꓲꓸ ꓕꓲ ꓠꓬꓲꓽ ꓞꓲ ꓡꓲ ꓟ ꓙꓳˍ ꓡꓳ꓿ ꓐꓵ ꓞꓶꓽ ꓒꓴ ꓖꓪꓽ ꓔ ꓢꓲ ꓬꓲ ꓪꓽ ꓪꓴꓸ ꓓꓵ ꓗꓪ ꓠꓬ꓾ ꓫꓵ ꓙꓵꓽ ꓪꓴꓸ ꓛꓴꓽ ꓘꓳꓹ ꓔ ꓟ ꓞꓳ ꓪꓴꓽ ꓞꓳ ꓔꓲ ꓠꓬꓲꓽ ꓞꓲ ꓡꓲ ꓣꓳ ꓠꓬ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓔꓬ ꓡꓳ꓿ 5 ꓟꓲꓽ ꓐꓬꓱꓼ ꓤꓰꓽˍ ꓟ ꓐꓰ꓾ ꓟꓶꓻ ꓢꓯꓼˍ ꓐꓰ꓾ ꓟꓴ ꓖꓴ ꓑꓱꓹˍ ꓟ ꓠꓬ꓾ ꓙꓵꓽ ꓠꓬꓲꓸ ꓕꓲ ꓗꓪ ꓐꓰ ꓓꓳ ꓡ ꓡꓳ꓿ ꓙꓵꓽ ꓠꓬꓲꓸ ꓕꓲ ꓟꓲꓽ ꓕꓯ ꓗꓪ ꓠꓬ ꓟꓬ ꓡꓴ ꓫꓵꓽ ꓟ ꓟꓬ ꓔ ꓡꓳ꓿ ꓕꓱ ꓟ ꓠꓬ ꓪꓴ-ꓢ ꓦ ꓫꓵꓽ ꓟ ꓥ ꓡꓳ꓿ 6 ꓙꓵꓽ ꓠꓬꓲꓸ ꓕꓲ ꓟꓲꓽ ꓕꓯ ꓗꓪ ꓠꓬ ꓒꓵꓽ ꓡꓳ ꓫꓬꓻˍ ꓡꓰ ꓐꓰ ꓗꓹ ꓟ꓾ ꓠꓬꓺ ꓐ ꓬꓲꓻ ꓡꓴ ꓐꓱ ꓕꓲ ꓟ ꓙꓳˍ ꓟ ꓡꓰ ꓐꓰ ꓗꓹ ꓡꓳ꓿ ꓙꓵꓽ ꓠꓬꓲꓸ ꓕꓲ ꓬꓲ ꓔꓱꓹ ꓫꓵˍ ꓐꓰ ꓚꓳ ꓡꓳ ꓗꓪ ꓠꓬ꓾ ꓟꓲꓽ ꓕꓯꓽ ꓢꓲˍ ꓐꓰ ꓗꓸ ꓠꓯꓸ ꓢꓲ ꓗꓪ ꓟꓬ ꓢꓶꓽ ꓐꓲ ꓞꓹ ꓟ ꓢꓯꓸ ꓫꓵꓽ ꓡꓲ ꓟ ꓔꓬ ꓡꓳ꓿ 7 ꓢꓯꓸ ꓫꓵꓽ ꓬꓲ ꓪꓴꓸ ꓕꓲ ꓟ ꓠꓬ ꓡꓽ ꓢꓯꓹˍ ꓡꓰ ꓐꓰ꓾ ꓠꓬꓲꓽ ꓟ ꓕꓲ ꓟ ꓠꓬ ꓮꓸ ꓠꓬꓲꓽ ꓤˍ ꓡꓰ ꓐꓰ꓾ ꓢ ꓟ ꓕꓲ ꓟ ꓬꓲ ꓒꓬꓱꓽ ꓟꓬ ꓠꓬ ꓞꓳ ꓤˍ ꓡꓰ ꓐꓰ꓾ ꓡꓲ ꓟ ꓕꓲ ꓟ ꓠꓬ ꓐꓬꓱꓻ ꓔꓬ ꓟ ꓙꓱ ꓓꓽ ꓟ ꓡꓰ ꓐꓰ ꓗꓹ ꓡꓳ꓿ 8 ꓢꓯꓸ ꓫꓵꓽ ꓕꓱ ꓡꓲ ꓟ ꓠꓬ ꓕꓲ ꓟ ꓡꓰ ꓕꓲ ꓟ꓾ ꓬꓲ ꓓꓴꓻ ꓡꓯꓼ ꓛꓳꓼ ꓐꓽ ꓙꓳ ꓢꓲ꓾ ꓕꓲ ꓖꓳ ꓓꓱꓽ ꓡꓱꓸꓼ ꓐꓰ꓾ ꓓꓴ ꓡꓯꓼ ꓠꓯꓸ ꓘꓪˍ ꓟꓲ ꓟꓬ ꓢꓶꓽ ꓐꓲ ꓞꓹ ꓡꓳ꓿ ꓬꓲ ꓪꓽ ꓠꓬ ꓟꓳꓼ ꓡꓳ ꓢ ꓘꓪ ꓟꓽ ꓠꓽ ꓠ꓾ ꓔꓬ ꓗꓷ ꓟ ꓐꓰ꓾ ꓔꓬ ꓟ ꓐꓰ꓾ ꓔꓬ ꓡ ꓠꓹ ꓟ꓾ ꓮꓸ ꓫꓵˍ ꓟꓲ ꓐ ꓡ ꓟ꓾ ꓢꓲ ꓒꓽ ꓪꓴ-ꓢ ꓠꓬ ꓢꓲꓽ ꓫꓬˍ ꓡꓳ꓾ ꓢꓲꓽ ꓫꓬˍ ꓡꓳ꓾ ꓢꓲꓽ ꓫꓬˍ ꓡꓳ꓾ ꓐꓰ ꓖꓪ ꓔꓬ ꓡꓳ꓿ 9 ꓢꓯꓸ ꓫꓵꓽ ꓡꓰ꓾ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓢꓲ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓔꓬ ꓢꓴ ꓔꓯ꓾ ꓟꓬꓱ ꓓꓳꓽˍ ꓐꓰ ꓞꓳ ꓒꓵꓽˍ ꓟ ꓡꓰ ꓫꓸ ꓟꓳ ꓖꓶˍ ꓕꓯ꓾ 10 ꓞꓳ ꓪꓴꓽ ꓞꓳ ꓔꓲ ꓖꓳ ꓠꓬꓲꓽ ꓞꓲ ꓡꓲ ꓣꓳ ꓠꓬ꓾ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓔꓬ ꓢꓴ ꓟꓲꓽ ꓙꓬ ꓗꓪ ꓟꓳꓼ ꓔ ꓢꓲ꓾ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓢꓴ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓠꓬꓲ꓾ ꓬꓲ ꓪꓽ ꓙꓵꓽ ꓪꓴꓸ ꓛꓴꓽ ꓔꓯ ꓙꓵꓽ ꓠꓬꓲꓸ ꓕꓲ ꓟꓲ ꓙꓬ ꓗꓪ ꓡꓵꓸ ꓗꓶ ꓔ ꓢꓲ꓾ 11 ꓥꓪ ꓠꓴꓽ ꓢꓲ ꓒꓽ ꓥꓪ ꓠꓴꓽ ꓪꓴ-ꓢꓺꓳ꓾ ꓠꓴ ꓡꓰ ꓙꓳˍ ꓟ ꓥ ꓕ ꓑꓳꓸ ꓔꓯ ꓠꓴ ꓠꓲꓹ ꓡꓶ ꓗꓪ ꓐꓰ ꓚꓰꓼ ꓔ ꓢꓲ ꓙꓳ ꓔꓬ ꓠꓬꓲ꓾ ꓠꓴ ꓠꓽ ꓟꓬꓱ ꓓꓳꓽˍ ꓐꓰ ꓞꓳ ꓒꓵꓽˍ ꓟ ꓐꓰ꓾ ꓪꓽ ꓠꓬꓲˍ ꓟ ꓟꓶꓻ ꓒꓵꓽˍ ꓡꓳ꓾ ꓐꓯˍ ꓡꓳ꓿

ꓟꓳ ꓖꓶ ꓓꓴ 5

1 ꓝꓮꓲ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓡꓯꓼ ꓙ ꓗꓪ ꓠꓬ꓾ ꓠꓬꓲꓽ ꓒꓳꓹ ꓡꓱꓸꓼ ꓗꓪ ꓐꓳ ꓔ ꓢꓲ꓾ ꓔꓳꓹ ꓠꓷꓼ ꓓꓴ ꓫꓵꓽ ꓟ ꓡꓰ ꓔꓳꓹ ꓠꓷꓼ ꓔ ꓟ ꓕꓳ ꓶ ꓕꓲꓽ ꓡꓲ ꓔꓯ ꓥꓪ ꓟꓳˍ ꓡꓳ꓿ 2 ꓢꓯꓼ ꓙꓳˍ ꓟ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓠꓬ ꓢꓯꓼ ꓓꓽ ꓟ ꓡꓰ꓾ ꓔꓳꓹ ꓠꓷꓼ ꓓꓴ ꓒꓴ ꓢꓲ ꓕꓳ ꓶ ꓡꓲ ꓔꓯ ꓒꓶꓻ ꓠꓹ ꓟ ꓮꓽ ꓟ ꓒꓵꓽˍ ꓡ?꓾ ꓐꓰ ꓘꓴ ꓔꓬ ꓟ ꓥꓪ ꓟꓳˍ ꓡꓳ꓿ 3 ꓟꓴꓽ ꓗꓪ ꓗꓪ ꓥ ꓟꓲ꓾ ꓟꓲ ꓠꓯ ꓗꓪ ꓥ ꓟꓲ꓾ ꓟꓲ ꓠꓯ ꓠꓯꓸ ꓘꓪ ꓥ ꓟꓲ꓾ ꓕꓳ ꓶ ꓡꓲ ꓖꓳ ꓟ ꓔꓯ ꓒꓶꓻ ꓐ ꓡ ꓢꓴˍ ꓐꓰ ꓡꓳꓸ ꓠꓬꓲ ꓐ ꓡ ꓢꓴ ꓟꓽ ꓙꓳ꓿ 4 ꓕꓳ ꓶ ꓡꓲ ꓖꓳ ꓟ ꓒꓶꓻ ꓡꓳꓸ ꓠꓬꓲ ꓒꓵꓽ ꓢꓴ ꓕꓲ ꓣꓳˍ ꓟꓲ ꓧꓪ ꓟꓽ ꓟꓳꓻ ꓠꓬꓲ ꓥꓪ ꓮꓽ ꓘꓶꓸ ꓥꓴꓻ ꓗꓷꓳ꓿ 5 ꓖꓳ ꓕꓯ ꓞꓳ ꓪꓴꓽ ꓞꓳ ꓔꓲ ꓗꓪ ꓟ ꓕꓲ ꓣꓳ ꓡꓰ ꓥꓪ ꓔꓯ꓾ ꓕꓽ ꓥꓴꓻ꓾ ꓠꓬꓲ ꓠꓹ꓾ ꓬꓴ-ꓔ ꓕꓲ ꓪꓳꓼ ꓗꓪ ꓟ ꓡꓽ ꓢꓯꓹ꓾ ꓓ-ꓪꓵ ꓬꓲ ꓚꓰ ꓖꓳ ꓕꓲ ꓣꓳ ꓠꓬ꓾ ꓕꓳ ꓶ ꓡꓲˍ ꓐꓰ ꓬꓲ ꓔꓳꓹ ꓠꓷꓼ ꓓꓴ ꓖꓳ ꓫꓵꓽ ꓟ ꓔꓯ ꓒꓶꓻ ꓠꓹ ꓟ ꓧꓪꓸ ꓡꓰꓳ꓾ ꓐꓯˍ ꓡꓳ꓿ 6 ꓖꓳ ꓗꓸ ꓠꓯꓸ ꓢꓰꓼ ꓗꓷ ꓠꓬꓲ ꓟ ꓡꓰ ꓐꓰ ꓗꓹ ꓟ ꓮ ꓣꓳ ꓤ ꓕꓲ ꓟ ꓠꓬ꓾ ꓙꓵꓽ ꓠꓬꓲꓸ ꓕꓲ ꓬꓲꓸ ꓔꓱ ꓦꓲ ꓗꓪ꓾ ꓢꓯꓸ ꓫꓵꓽ ꓡꓲ ꓟ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓡꓰ ꓚꓳ ꓞꓹ ꓢꓲ ꓦꓰꓼ ꓞꓹ ꓟ ꓔꓯ ꓥꓪ ꓟꓳˍ ꓡꓳ꓿ ꓮ ꓣꓳ ꓤ ꓖꓳ ꓟ ꓠꓬ ꓪꓴꓸ ꓛꓲ ꓫꓵꓽ ꓗꓸˍ ꓐꓰ ꓟꓬ ꓢꓶꓽ ꓫꓵꓽ ꓐꓽ ꓙꓳˍ ꓡꓳ꓿ ꓖꓳ ꓟ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓝꓲ ꓩꓴ ꓗꓷ ꓟ ꓪꓴ-ꓢ ꓦ ꓫꓵꓽ ꓟ ꓥ ꓡꓳ꓿ 7 ꓖꓳ ꓕꓯ ꓮ ꓣꓳ ꓤ ꓡ ꓢꓲ꓾ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓡꓯꓼ ꓙ ꓗꓪ ꓐꓰ ꓕꓳ ꓶ ꓡꓲ ꓣꓴˍ ꓡꓳ꓿ 8 ꓕꓳ ꓶ ꓡꓲ ꓔꓯ ꓬꓲ ꓣꓴ ꓗꓷ ꓕꓯ꓾ ꓢꓯꓸ ꓫꓵꓽ ꓡꓲ ꓟ ꓐꓰ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬꓲꓽ ꓞꓲ ꓡꓲ ꓣꓳ ꓟ ꓠꓬ꓾ ꓮ ꓣꓳ ꓤ ꓟꓲꓽ ꓙꓬ ꓗꓪ ꓟꓳꓼ ꓡꓰˍ ꓡꓳ꓿ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓛꓲꓻ ꓐꓶꓺ ꓕꓲ ꓟ ꓐꓰ ꓫꓳꓸ ꓐꓲ ꓞꓹ ꓟ ꓫꓵ ꓡꓴ ꓗꓶꓸ ꓕꓲ ꓒꓯꓼ ꓔꓯꓹ ꓔ ꓡꓳ꓿ ꓕꓱ ꓟ ꓠꓬ ꓦ ꓡꓱ ꓢꓴ ꓐꓴ ꓪꓽ ꓘꓴ ꓘꓶꓽ ꓥ ꓡꓳ꓿ 9 ꓬꓲ ꓪꓽ ꓠꓬ ꓟꓴꓽ ꓖꓪ ꓫꓵꓼ ꓖꓪ ꓢꓲ꓾ ꓠꓴ ꓠꓽ ꓕꓳ ꓶ ꓡꓲ ꓣꓴ ꓢꓲ ꓔꓳꓹ ꓠꓷꓼ ꓓꓴ ꓒꓶꓻ ꓒꓵꓽˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓔꓯ ꓢꓰꓼ ꓗꓷ ꓠꓬꓲꓳ꓿ ꓖꓳ ꓡꓱ ꓢꓲ ꓠꓴ ꓠꓬ ꓪꓴ-ꓢ ꓐꓱ ꓶ꓾ ꓕꓲ ꓪꓳꓼ ꓡꓰ ꓕꓲ ꓪꓳꓼˍ ꓐꓰ꓾ ꓥꓳꓽ ꓫꓵꓽ ꓥꓳꓽ ꓙꓰˍ ꓐꓰ꓾ ꓑ ꓫꓬꓼ ꓑ ꓟꓲ ꓐꓴˍ ꓐꓰ꓾ ꓞꓳ ꓫꓵꓽ ꓞꓳ ꓙꓰꓽ ꓥ ꓕ ꓑꓳꓸ ꓗꓪ ꓐꓰ ꓬꓲ ꓪꓽ ꓔꓯ ꓠꓴ ꓫꓵꓽ ꓡꓰ ꓪꓴꓻ ꓗꓷ ꓢꓲ꓾ 10 ꓥꓪ ꓠꓴꓽ ꓪꓴ-ꓢ ꓐꓱ ꓶ ꓬꓲ ꓪꓽ ꓔꓯ ꓗꓴꓷꓼˍ ꓐꓰ ꓔꓲ ꓒ ꓐꓴ ꓒꓬꓱꓼ ꓡ ꓝꓲꓳ꓿ ꓬꓲ ꓪꓽ ꓠꓬ ꓟꓲ ꓠꓯ ꓗꓪ ꓙꓵꓽˍ ꓥꓳ꓾ ꓐꓰ ꓖꓪˍ ꓡꓳ꓿ 11 ꓝꓮꓲ ꓙꓵꓽ ꓠꓬꓲꓸ ꓕꓲˍ ꓐꓰ꓾ ꓢꓯꓸ ꓫꓵꓽˍ ꓐꓰ꓾ ꓞꓳ ꓪꓴꓽ ꓞꓳ ꓔꓲ ꓐꓴ ꓚꓳ ꓡꓳ ꓗꓪ ꓠꓬ꓾ ꓟꓴꓽ ꓗꓪ ꓝꓲ ꓓꓴ ꓮꓽ ꓟꓬꓹ ꓟ ꓢꓯꓼ ꓔꓯ ꓥꓪ ꓑ ꓙꓽˍ ꓡꓳ꓿ ꓬꓲ ꓪꓽ ꓵ ꓟꓬꓱ ꓠꓬ ꓟꓶꓽ ꓟꓶ ꓫꓬꓹ ꓫꓬ ꓵ ꓖꓴ ꓟꓽ ꓓ ꓠ ꓛꓲ ꓙꓳˍ ꓟ ꓥꓪ ꓟꓳˍ ꓡꓳ꓿ 12 ꓬꓲ ꓪꓽ ꓠꓬ ꓢꓯꓼ ꓓꓽ ꓟ ꓡꓰ꓾ ꓢꓰꓼ ꓗꓷ ꓠꓬꓲ ꓟ ꓮ ꓣꓳ ꓤ ꓠꓬ꓾ ꓪꓽ ꓠꓬꓲˍ ꓟ ꓐꓰ꓾ ꓐꓳ ꓶꓽˍ ꓐꓰ꓾ ꓙꓽ ꓗꓴꓸ ꓠꓲꓹˍ ꓐꓰ꓾ ꓢꓯꓼ ꓪꓽˍ ꓐꓰ꓾ ꓞꓳ ꓒꓵꓽˍ ꓟ ꓐꓰ꓾ ꓟꓬꓱ ꓓꓳꓽˍ ꓐꓰ ꓫꓱꓸ ꓖꓶˍ ꓟ ꓟꓶꓻ ꓒꓵꓽˍ ꓡꓳ꓾ ꓐꓯˍ ꓡꓳ꓿ 13 ꓝꓮꓲ ꓠꓬ ꓟꓴꓽ ꓗꓪ ꓕꓯꓽ ꓢꓲ ꓗꓪ꓾ ꓟꓲ ꓠꓯ ꓕꓯꓽ ꓢꓲ ꓗꓪ꓾ ꓟꓲ ꓠꓯ ꓠꓯꓸ ꓘꓪ꓾ ꓬꓲꓻ ꓡꓴ ꓐꓱ ꓠꓯꓸꓼ ꓗꓪ꓾ ꓚꓰꓼ ꓔ ꓟ ꓥ ꓕ ꓑꓳꓸˍ ꓐꓰ ꓬꓲ ꓠꓯꓸꓼ ꓗꓪ ꓙꓳˍ ꓟ ꓮꓽ ꓙꓵ ꓡꓰ꓾ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓴˍ ꓐꓰ ꓮ ꓣꓳ ꓤ ꓔꓯ ꓠꓬ꓾ ꓫꓱꓸ ꓖꓶˍ ꓟ ꓐꓰ꓾ ꓞꓳ ꓒꓵꓽˍ ꓟ ꓐꓰ꓾ ꓟꓬꓱ ꓓꓳꓽˍ ꓐꓰ ꓙꓵꓽ ꓪ ꓮ ꓕꓯˍ ꓟꓲ ꓙꓳ ꓝꓲ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 14 ꓖꓳ ꓕꓯ ꓢꓯꓸ ꓫꓵꓽ ꓡꓲ ꓟ ꓡꓰ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓐꓯˍ ꓡꓳ꓿ ꓞꓳ ꓪꓴꓽ ꓞꓳ ꓔꓲ ꓐꓴˍ ꓟꓲ ꓟꓳꓼ ꓡꓰ ꓢꓲ ꓪꓴꓸ ꓓꓵ ꓕꓱꓼˍ ꓡꓳ꓿

ꓟꓳ ꓖꓶ ꓓꓴ 6

1 ꓮ ꓣꓳ ꓤ ꓡꓰ ꓔꓳꓹ ꓠꓷꓼ ꓓꓴ ꓫꓵꓽ ꓟ ꓗꓪ ꓟ ꓬꓲꓸ ꓪꓴꓸ ꓕꓲ ꓟ ꓒꓶꓻˍ ꓟ ꓔꓯ ꓥꓪ ꓡꓳꓸ ꓔꓬ ꓕꓯ꓾ ꓢꓯꓸ ꓫꓵꓽ ꓡꓲ ꓟ ꓗꓪ ꓟ ꓕꓲ ꓟ ꓠꓬ꓾ ꓟꓴꓽ ꓖꓴꓽ ꓢꓯꓼˍ ꓡꓰ ꓐꓰ꓾ ꓡꓯꓻ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 2 ꓥꓪ ꓡꓳꓸ ꓠꓬꓲ ꓠꓬ ꓮꓸ ꓟꓴꓽ ꓒꓴ ꓕꓲ ꓛꓲ ꓥꓪ ꓟꓳꓻ ꓡꓰꓳ꓿ ꓬꓲ ꓕꓯꓽ ꓢꓲ ꓗꓪ ꓜꓶꓽ ꓔ ꓢꓴ ꓠꓬ ꓛꓬꓹ ꓕꓲ ꓗꓸ ꓔꓯꓹ ꓔ ꓢꓲ꓾ ꓬꓲ ꓔꓯ ꓠꓬ ꓪꓴꓸ ꓛꓴꓽ ꓕꓲ ꓚꓴꓸ ꓖꓶ ꓔ ꓡꓳ꓿ ꓬꓲ ꓠꓬ ꓧꓪꓸ ꓡꓰ ꓢꓲ ꓝꓮꓲ ꓧꓪꓸ ꓡꓰ ꓠꓹ ꓟ ꓓꓳ ꓙꓰˍ ꓡꓳ꓿ 3 ꓮ ꓣꓳ ꓤ ꓡꓰ ꓔꓳꓹ ꓠꓷꓼ ꓓꓴ ꓠꓬꓲꓽ ꓟ ꓕꓲ ꓟ ꓒꓶꓻˍ ꓕꓯ꓾ ꓢꓯꓸ ꓫꓵꓽ ꓠꓬꓲꓽ ꓟ ꓕꓲ ꓟ ꓡꓰ꓾ ꓡꓯꓻ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 4 ꓖꓳ ꓡꓱ ꓠꓬ ꓮꓸ ꓟꓴ ꓢꓲꓽ ꓕꓲ ꓛꓲ ꓓꓳ ꓡ ꓡꓳ꓿ ꓬꓲ ꓕꓯꓽ ꓢꓲ ꓗꓪ ꓜꓶꓽ ꓔ ꓢꓴ ꓔꓯ ꓠꓬ꓾ ꓟꓲ ꓠꓯ ꓗꓪ ꓐꓰ ꓢꓲ ꓡꓲ ꓟ ꓣꓴ ꓔꓯꓹ ꓙꓰ ꓢꓲ꓾ ꓬꓲ ꓪꓽ ꓔꓯ ꓕꓲ ꓣꓳ ꓛꓳꓽ ꓕꓲ ꓣꓳ ꓢꓰꓼ ꓡꓯꓽ ꓘꓳ ꓝꓲ ꓠꓹ ꓟ ꓙꓵꓽ ꓪ ꓖꓶ ꓔ ꓡꓳ꓿ ꓬꓲ ꓔꓯ ꓮꓸ ꓕꓽ ꓓꓽ ꓟˍ ꓟꓲ ꓕꓲ ꓛꓲ ꓖꓶ ꓔ ꓡꓳ꓿ 5 ꓮ ꓣꓳ ꓤ ꓡꓰ ꓔꓳꓹ ꓠꓷꓼ ꓓꓴ ꓢ ꓟ ꓕꓲ ꓟ ꓒꓶꓻˍ ꓕꓯ꓾ ꓢꓯꓸ ꓫꓵꓽ ꓢ ꓟ ꓕꓲ ꓟ ꓡꓰ꓾ ꓡꓯꓻ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ ꓥꓪ ꓠꓬ ꓮꓸ ꓟꓴ ꓠꓯꓺ ꓕꓲ ꓛꓲ ꓟꓳˍ ꓡꓳ꓿ ꓬꓲ ꓕꓯꓽ ꓢꓲ ꓗꓪ ꓜꓶꓽ ꓔ ꓢꓴ ꓡꓯꓼ ꓒꓯꓹ ꓗꓪ ꓠꓬ꓾ ꓞꓰꓻ ꓓꓴ ꓕꓲ ꓟ ꓔꓯꓹ ꓔ ꓡꓳ꓿ 6 ꓢꓯꓸ ꓫꓵꓽ ꓡꓲ ꓟ ꓗꓳ ꓡꓳ ꓗꓪ ꓠꓬ꓾ ꓕꓲ ꓠꓬꓲ ꓪꓽ ꓒꓵꓽ ꓫꓪ ꓕꓲ ꓕꓴꓽ꓾ ꓕꓲ ꓠꓬꓲ ꓪꓽ ꓒꓵꓽ ꓤꓴꓻ ꓢ ꓕꓴꓽ꓾ ꓮꓽ ꓛꓬꓽ ꓞꓶˍ ꓐꓰ ꓛꓱꓼ ꓡꓱꓼ ꓢꓶꓽ ꓪꓴꓽ ꓬꓲꓻ ꓔꓯ ꓠꓬ ꓕꓽ ꓠꓻ ꓡꓰ ꓝꓲ꓾ ꓐꓯˍ ꓟ ꓢꓯꓼˍ ꓡꓰ ꓐꓰ ꓥꓪ ꓑ ꓙꓽˍ ꓡꓳ꓿ 7 ꓮ ꓣꓳ ꓤ ꓡꓰ ꓔꓳꓹ ꓠꓷꓼ ꓓꓴ ꓡꓲ ꓟ ꓕꓲ ꓟ ꓒꓶꓻˍ ꓕꓯ꓾ ꓢꓯꓸ ꓫꓵꓽ ꓡꓲ ꓟ ꓕꓲ ꓟ ꓡꓰ꓾ ꓡꓯꓻ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 8 ꓥꓪ ꓠꓬ ꓮꓸ ꓟꓴ ꓗꓴ ꓕꓴꓽ ꓕꓲ ꓛꓲ ꓟꓳˍ ꓡꓳ꓿ ꓬꓲ ꓕꓯꓽ ꓢꓲ ꓗꓪ ꓜꓶꓽ ꓔ ꓢꓴ ꓬꓲ ꓟꓬꓱ ꓠꓬ꓾ ꓫꓵꓻˍ ꓟ꓾ ꓐꓰ ꓟꓬꓱ ꓔ ꓡꓳ꓿ ꓟꓸ ꓟꓲ ꓟꓵꓽ ꓠꓬ ꓬꓲ ꓗꓸ ꓠꓯꓸ ꓢꓲ ꓛꓳ ꓞꓹ ꓡꓳ꓿ ꓬꓲ ꓪꓽ ꓔꓯ ꓠꓬ ꓮꓸ ꓕꓽˍ ꓐꓰ꓾ ꓦꓰꓼ ꓟꓷꓼˍ ꓟ ꓐꓰ꓾ ꓠꓻ ꓓꓱꓽˍ ꓐꓰ꓾ ꓟꓲ ꓠꓯ ꓗꓪ ꓟ ꓠꓲꓸ ꓙꓱꓼ ꓡꓰ꓾ ꓟꓲ ꓠꓯ ꓗꓪ ꓟ ꓡꓲ ꓐꓱ ꓕꓲ ꓐꓱ ꓔꓯ ꓢꓰꓼ ꓠꓹ ꓟ ꓙꓵꓽ ꓪ ꓖꓶ ꓔ ꓡꓳ꓿ 9 ꓮ ꓣꓳ ꓤ ꓡꓰ ꓔꓳꓹ ꓠꓷꓼ ꓓꓴ ꓥꓪꓽ ꓟ ꓕꓲ ꓟ ꓒꓶˍ ꓕꓯ꓾ ꓔꓲ ꓖꓴ ꓠꓯꓸ ꓘꓪ ꓗꓪ꓾ ꓪꓴ-ꓢ ꓐꓯ ꓘꓶꓽˍ ꓐꓰ ꓬꓲ ꓪꓽ ꓢꓷꓸ ꓙ ꓟꓳ ꓙˍ ꓟ ꓑꓶꓸ ꓓꓴ ꓢꓰꓼ ꓗꓷ ꓢꓴ ꓐꓴ ꓬꓲ ꓪꓽ ꓦꓻ ꓔꓯ ꓥꓪ ꓟꓳˍ ꓡꓳ꓿ 10 ꓬꓲ ꓪꓽ ꓠꓬ ꓢꓯꓼ ꓓꓽ ꓟ ꓡꓰ ꓘꓴ ꓢꓲ꓾ ꓢꓲꓽ ꓫꓬˍ ꓟ ꓐꓰ ꓔꓱꓹˍ ꓟ ꓢꓲ ꓒꓽꓳ꓾ ꓠꓴ ꓠꓬ ꓟꓲ ꓠꓯ ꓗꓪ ꓔꓬ ꓢꓴ ꓔꓯ ꓐꓯ ꓟꓴ ꓘꓶꓽ ꓢꓲ꓾ ꓥꓪ ꓠꓴꓽ ꓔꓯ ꓢꓰꓼ ꓢꓴ ꓔꓯ ꓪꓽ ꓛꓴꓽ ꓚꓱꓹ ꓙ ꓠꓹ ꓟ ꓮ ꓟꓶ ꓛꓲ ꓛˍ ꓢꓰꓽ ꓡ?꓾ ꓐꓯˍ ꓡꓳ꓿ 11 ꓖꓳ ꓡꓱ ꓠꓬ ꓬꓲ ꓪꓽ ꓮ ꓡꓲ ꓕꓲ ꓣꓳ ꓔꓯˍ ꓟꓲ ꓒꓴˍ ꓟ ꓐꓵ ꓞꓶꓽ ꓐꓽ ꓢꓽ ꓕꓲ ꓣꓳ ꓕꓲ ꓘꓳꓹ ꓖꓶ ꓢꓲ꓾ ꓬꓲ ꓪꓽˍ ꓐꓰ ꓕꓲ ꓛꓳꓺꓼ ꓚꓳ ꓑꓸ ꓬꓰ ꓢꓴˍ ꓐꓰ꓾ ꓬꓲ ꓪꓽ ꓬꓲꓼ ꓤ ꓠꓬꓲ ꓤ ꓐꓴ ꓔꓯˍ ꓟꓲ ꓬꓲ ꓪꓽ ꓔꓯˍ ꓡꓰ ꓐꓰ꓾ ꓢꓴ ꓡꓰ ꓢꓰꓼ ꓗꓷ ꓠꓹ ꓟ ꓵ ꓟꓬꓱ ꓟꓽ ꓐꓲ ꓡ ꓕ ꓑꓳꓸ꓾ ꓕꓲ ꓑꓹ ꓤ ꓦꓴꓺ ꓠꓬꓹ ꓢꓰꓽ꓾ ꓐꓰ ꓬꓲ ꓪꓽ ꓔꓯ ꓐꓯ ꓖꓶˍ ꓡꓳ꓿ 12 ꓮ ꓣꓳ ꓤ ꓡꓰ ꓔꓳꓹ ꓠꓷꓼ ꓓꓴ ꓛꓳꓼ ꓟ ꓕꓲ ꓟ ꓒꓶˍ ꓕꓯ ꓥꓪ ꓡꓳꓸ ꓠꓬꓲ ꓠꓬ꓾ ꓟꓵꓽ ꓓꓵˍ ꓟ ꓬꓲ ꓓꓽ ꓟ ꓗꓷ ꓡꓰ ꓢꓲ꓾ ꓟꓲꓽ ꓟꓲ ꓠꓬ ꓧꓪꓽ ꓟꓵ ꓟꓶ ꓠꓯꓺˍ ꓡꓰ ꓐꓰ ꓠꓯꓺ ꓡꓰꓳ꓿ ꓦ ꓐˍ ꓟꓲ ꓫꓵꓽˍ ꓡꓰ ꓐꓰ ꓠꓲꓺ ꓡꓰˍ ꓡꓳ꓿ 13 ꓘꓶꓽ ꓢꓶ ꓜꓲꓻ ꓔꓯ ꓟꓲꓽ ꓦꓲ ꓓꓽ ꓟ ꓡꓰ ꓙꓱꓼ ꓬꓯꓼ ꓡꓰ ꓕꓯ꓾ ꓟꓽ ꓟꓲꓺ ꓟ ꓘꓶꓽ ꓢꓶ ꓙꓱꓼ ꓞꓰ ꓡꓰˍ ꓟ ꓡꓰ ꓐꓰ꓾ ꓟꓴꓽ ꓗꓪ ꓗꓪ ꓟ ꓗꓴ ꓤ ꓠꓬ ꓟꓲ ꓠꓯ ꓗꓪ ꓞꓰ ꓬꓯꓼ ꓡꓰˍ ꓡꓳ꓿ 14 ꓟꓴꓽ ꓗꓪ ꓠꓬ ꓕꓳ ꓶ ꓡꓲˍ ꓡꓰ ꓐꓰ ꓡꓲ ꓡꓰˍ ꓡꓳ꓿ ꓪꓽ ꓚꓲˍ ꓐꓰ ꓬꓲꓻ ꓗꓳ ꓡꓳ ꓟꓵꓽ ꓥ ꓕ ꓑꓳꓸˍ ꓟꓲ ꓬꓲ ꓓꓹ ꓖꓴ ꓗꓪ ꓐꓰ ꓙꓵꓺ ꓙꓰˍ ꓡꓳ꓿ 15 ꓖꓳ ꓕꓯ ꓟꓲ ꓠꓯ ꓗꓪ ꓟ ꓪ ꓔꓲ ꓐꓴ꓾ ꓢꓲꓽ ꓒ ꓓꓽ ꓟ ꓐꓴ꓾ ꓟꓯꓼ ꓢꓲꓽ ꓒ ꓐꓴ꓾ ꓞꓳ ꓐꓳ ꓐꓴ꓾ ꓢꓯꓼ ꓙꓳ ꓒ ꓐꓴ꓾ ꓚꓳ ꓑꓸ ꓐꓴˍ ꓐꓰ ꓚꓳ ꓪꓴꓸ ꓥ ꓕ ꓑꓳꓸ ꓠꓬ꓾ ꓪꓽ ꓚꓲ ꓗꓪ ꓟ ꓟꓲꓺ ꓘꓴꓻˍ ꓐꓰ Bꓸ ꓘꓴꓽ ꓗꓪ ꓑꓬ ꓙꓰ ꓢꓲ꓾ 16 ꓬꓲ ꓪꓽ ꓠꓬ ꓪꓽ ꓚꓲˍ ꓐꓰ Bꓸ ꓔꓯ꓾ ꓥꓪ ꓠꓴꓽ ꓕꓯꓽ ꓢꓲ ꓗꓪ ꓐꓱꓽ ꓑꓲꓸ ꓡ ꓢꓲ꓾ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓬꓲꓸ ꓒꓬꓱꓽˍ ꓐꓰ ꓮ ꓣꓳ ꓤ ꓦꓶꓻ ꓠꓲꓹ ꓗꓪ ꓐꓰ ꓥꓪ ꓠꓴꓽ ꓔꓯ ꓛꓸ ꓔ ꓖꓶ ꓡꓯ꓿ 17 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓲꓹ ꓟ ꓦꓶˍ ꓟ ꓦꓬꓼ ꓠꓬꓲ ꓓꓽ ꓟ ꓛꓲ ꓡꓺꓳ꓾ ꓮꓽ ꓟ ꓔꓳꓹ ꓘꓴꓻ ꓢꓰꓽ꓾ ꓐꓯˍ ꓡꓳ꓿

ꓟꓳ ꓖꓶ ꓓꓴ 7

1 ꓖꓳ ꓗꓸ ꓠꓯꓸ ꓟꓲ ꓠꓯ ꓡꓲ ꓡꓯꓼ ꓗꓪ꓾ ꓟꓴꓽ ꓗꓪ ꓝꓲ ꓓꓴ ꓡꓲ ꓣꓳ ꓦꓰꓼ ꓞ ꓢꓲ꓾ ꓟꓲꓽ ꓦꓲ ꓔꓯ ꓠꓬ ꓟꓲ ꓠꓯ ꓗꓪˍ ꓟꓲ꓾ ꓬꓲꓻ ꓡꓴꓽ ꓐꓱ ꓗꓪˍ ꓟꓲ꓾ ꓢꓲꓹ ꓜꓲꓻ ꓗꓪˍ ꓟꓲ ꓟꓽ ꓙꓱꓼ ꓬꓯꓼ ꓡꓰ ꓝꓲ ꓠꓹ ꓟ꓾ ꓟꓲ ꓠꓯ ꓡꓲ ꓛꓱꓽ ꓗꓪ ꓟ ꓟꓲꓽ ꓦꓲ ꓔꓯ ꓗꓽ ꓔꓬ ꓟ ꓥꓪ ꓟꓳˍ ꓡꓳ꓿ 2 ꓟꓴꓽ ꓗꓪ ꓝꓲ ꓓꓴ ꓝꓮꓲ ꓕꓲ ꓣꓳ ꓠꓬ ꓢꓯꓸ ꓔꓬ ꓟ ꓪꓴ-ꓢ ꓬꓲ ꓔꓳꓹ ꓠꓷꓼ ꓓꓴ ꓔꓯꓹ ꓔ ꓢꓲ ꓐꓶꓽ ꓓꓳ ꓘꓶꓽ ꓗꓪ ꓐꓰ ꓓꓯ ꓡ ꓟ ꓥꓪ ꓟꓳˍ ꓡꓳ꓿ ꓬꓲ ꓠꓬ ꓢꓯꓼ ꓓꓽ ꓟ ꓡꓰ ꓘꓴ ꓢꓲ꓾ ꓟꓲ ꓠꓯˍ ꓐꓰ ꓬꓲꓻ ꓡꓴꓽ ꓐꓱ ꓔꓯ ꓐꓬ ꓡꓰ ꓝꓲ ꓠꓹ ꓟ ꓪꓽ ꓠꓬꓲˍ ꓟ ꓟꓶ ꓢꓴ ꓟꓴꓽ ꓗꓪ ꓝꓲ ꓓꓴ ꓖꓳ ꓡꓲ ꓣꓳ ꓔꓯ꓾ 3 ꓣꓳ ꓪꓴ-ꓢ ꓬꓲ ꓚꓳ ꓑꓸ ꓐꓴ ꓥꓷꓼ ꓛꓲ ꓗꓪ꓾ ꓥꓪ ꓠꓴꓽ ꓡꓰ ꓟꓽ ꓔꓳꓹ ꓠꓷꓼ ꓗꓷ ꓕ ꓑꓳꓸ꓾ ꓟꓲ ꓠꓯˍ ꓐꓰ ꓬꓲꓻ ꓡꓴꓽ ꓐꓱˍ ꓐꓰ ꓢꓲꓹ ꓜꓲꓻ ꓔꓯ ꓕꓽ ꓐꓬ ꓡꓰ ꓝꓲ ꓢꓰꓽ꓾ ꓐꓯˍ ꓡꓳ꓿ 4 ꓖꓳ ꓡꓱ ꓢꓲ ꓔꓳꓹ ꓠꓷꓼˍ ꓟ ꓟꓶ ꓢꓴ ꓵ ꓟꓬꓱ ꓥꓪ ꓑ ꓙꓽˍ ꓡꓳ꓿ ꓬꓲ-ꓢꓷ-ꓡꓰ ꓞꓲꓼ ꓤ ꓡꓯꓹ ꓤ ꓕꓲ ꓪꓳꓼ ꓡꓰ ꓕꓲ ꓪꓳꓼ ꓗꓪ ꓐꓰ ꓔꓳꓹ ꓠꓷꓼ ꓟꓶ ꓢꓴ ꓕꓲ ꓫꓬꓹ ꓡꓲ ꓟꓶꓽ ꓡꓲ ꓔꓴ ꓙꓳˍ ꓡꓳ꓿ 5 ꓬꓴ-ꓔ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ ꓣꓴ-ꓐꓰ-ꓠ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ ꓖꓷ-ꓔꓷꓽ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ 6 ꓬꓹ-ꓫꓱ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ ꓠꓽ-ꓩꓴ-ꓕ-ꓡꓲ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ ꓟ-ꓠ-ꓢꓲ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ 7 ꓢꓲ-ꓟꓰ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ ꓡꓱ-ꓬꓲ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ ꓬꓲ-ꓢ-ꓘꓷ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ 8 ꓢꓲ-ꓑꓴ-ꓡꓶ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ ꓬꓳꓹ-ꓢꓷ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ꓾ ꓐꓰ-ꓠꓬ-ꓟꓲ ꓕꓲ ꓪꓳꓼ ꓗꓪ ꓕꓲ ꓟꓶꓽ ꓠꓬꓲꓽ ꓔꓴ ꓣꓳ ꓙꓳˍ ꓡꓳ꓿ 9 ꓕꓱ ꓟꓬ ꓟ ꓗꓸ ꓠꓯ꓾ ꓠꓬꓲ ꓠꓹ꓾ ꓕꓲ ꓗꓴꓷꓼ ꓡꓰ ꓕꓲ ꓗꓴꓷꓼ꓾ ꓕꓲ ꓫꓵꓽ ꓡꓰ ꓕꓲ ꓫꓵꓽ꓾ ꓑ ꓫꓬꓼ ꓑ ꓟꓲ꓾ ꓥꓳꓽ ꓫꓵꓽ ꓥꓳ ꓙꓰ ꓗꓪ ꓐꓰ ꓮꓽ ꓟˍ ꓟꓲ ꓵ ꓖꓴ ꓟꓽ ꓓ ꓟ ꓞꓳ ꓜꓴ ꓓꓽ ꓟ ꓠꓬ ꓐꓵ ꓞꓶꓽ ꓒꓴ ꓖꓪ ꓢꓲ꓾ ꓡꓯꓼ ꓒꓯꓹ ꓗꓪ ꓙꓲꓻ ꓫꓴꓽ ꓡꓯꓼ ꓗꓸ ꓣꓴ ꓔ ꓢꓲ ꓠꓬꓲ꓾ ꓙꓵꓽ ꓠꓬꓲꓸ ꓕꓲ ꓟꓲꓽ ꓙꓬˍ ꓐꓰ ꓮ ꓣꓳ ꓤ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓟ ꓥꓪ ꓟꓳˍ ꓡꓳ꓿ 10 ꓬꓲ ꓪꓽ ꓠꓬ ꓢꓯꓼ ꓓꓽ ꓟ ꓡꓰ ꓘꓴ ꓢꓲ꓾ ꓣꓳ ꓔꓯ ꓚꓬꓴˍ ꓟ ꓣꓱꓽ ꓛꓰ ꓠꓬ꓾ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓣꓳ ꓪꓴ-ꓢˍ ꓐꓰ ꓮ ꓣꓳ ꓤ ꓔꓯꓸ ꓟ ꓥ ꓡꓳ꓾ ꓐꓯˍ ꓡꓳ꓿ 11 ꓟꓴꓽ ꓗꓪ ꓝꓲ ꓓꓴ ꓐꓴ ꓮꓽ ꓙꓵ ꓠꓬ꓾ ꓙꓵꓽ ꓠꓬꓲꓸ ꓕꓲˍ ꓐꓰ꓾ ꓞꓳ ꓪꓴꓽ ꓞꓳ ꓔꓲ ꓐꓴˍ ꓐꓰ꓾ ꓢꓯꓸ ꓫꓵꓽ ꓡꓲ ꓟ ꓟ ꓚꓳ ꓡꓳ ꓗꓪ ꓦꓰꓼ ꓔ ꓢꓲ꓾ ꓙꓵꓽ ꓠꓬꓲꓸ ꓕꓲ ꓟꓲꓽ ꓙꓬ ꓗꓪ ꓟꓳꓼ ꓡꓰ ꓢꓲ ꓠꓬꓲ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ 12 ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓫꓱꓸ ꓖꓶ ꓓꓴˍ ꓐꓰ꓾ ꓟꓬꓱ ꓓꓳˍ ꓐꓰ꓾ ꓙꓽ ꓗꓴꓸ ꓠꓲꓹˍ ꓐꓰ꓾ ꓫꓸ ꓟꓳˍ ꓟ ꓐꓰ꓾ ꓞꓳ ꓒꓵꓽˍ ꓟ ꓐꓰ꓾ ꓪꓽ ꓠꓬꓲˍ ꓟ ꓐꓰ ꓢꓯꓼ ꓪꓽ ꓠꓬ꓾ ꓕꓲ ꓞꓲꓼ ꓕꓲ ꓑ ꓣꓳ ꓪꓴ-ꓢ ꓔꓯꓸ ꓟ ꓥ ꓡꓳ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓐꓯˍ ꓡꓳ꓿ 13 ꓞꓳ ꓪꓴ ꓞꓳ ꓔꓲ ꓗꓪ ꓟ ꓕꓲ ꓣꓳ ꓡꓰ ꓥꓪ ꓔꓯ꓾ ꓐꓵ ꓞꓶꓽ ꓒꓴ ꓖꓪꓽ ꓢꓴ ꓕꓱ ꓕꓷ ꓠꓬ ꓮꓽ ꓟ ꓥ ꓡ? ꓮ ꓡꓲ ꓗꓪ ꓐꓰ ꓡꓻˍ ꓟ ꓥ ꓡ?꓾ ꓐꓰ ꓠ ꓠꓬꓲˍ ꓡꓺꓳ꓿ 14 ꓥꓪ ꓡꓰ ꓬꓲ ꓔꓯ꓾ ꓞꓳ ꓪꓴꓽꓳ꓾ ꓠꓴ ꓢꓷꓸˍ ꓡꓳ꓾ ꓐꓯ ꓖꓶꓳ꓿ ꓖꓳ ꓡꓱ ꓠꓬ ꓬꓲ ꓡꓰ ꓥꓪ ꓔꓯ꓾ ꓡꓽ ꓞꓳ ꓕꓱꓻ ꓕꓷ ꓠꓬ ꓫꓸ ꓙꓵ ꓓꓴ ꓓꓽ ꓟ ꓜꓲꓽ ꓡꓳꓹ ꓡ ꓢꓲ꓾ ꓮ ꓣꓳ ꓤ ꓫꓵꓽ ꓗꓪ ꓬꓲ ꓪꓽ ꓐꓵ ꓞꓶꓽ ꓞꓲꓽ ꓒꓴ ꓡꓰ ꓢꓴ ꓐꓴ ꓥ ꓡꓳ꓿ 15 ꓕꓱ ꓟ ꓑꓶꓸ ꓓꓴ꓾ ꓬꓲ ꓪꓽ ꓠꓬ ꓟꓳꓼ ꓡꓳ ꓢ ꓘꓪ ꓪꓴ-ꓢ ꓢꓲꓽ ꓫꓬ ꓦꓲ ꓗꓪ ꓔꓬ ꓢꓲ꓾ ꓬꓲ ꓙꓵꓽ ꓠꓬꓲꓸ ꓕꓲ ꓟꓲꓽ ꓙꓬ ꓗꓪ ꓬꓲ ꓔꓯ ꓣꓱꓽ ꓙ ꓔꓬ ꓟ ꓥ ꓡꓳ꓿ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓡꓰ ꓬꓲ ꓪꓽ ꓕꓯꓽ ꓢꓲ ꓗꓪ ꓬꓲ ꓟꓶ ꓔꓶꓸ ꓦꓲ ꓚꓵꓹ ꓔꓶꓸ ꓖꓶˍ ꓥꓳ꓿ 16 ꓬꓲ ꓪꓽ ꓠꓬ ꓕꓱ ꓡꓱ ꓖꓳ ꓑꓳ ꓟꓽ ꓦꓰꓼ ꓟꓷꓼꓳ꓿ ꓢꓲꓼˍ ꓟꓲ ꓟꓽ ꓢꓲꓼꓳ꓿ ꓟꓲꓽ ꓟꓲˍ ꓐꓰ ꓞꓻˍ ꓟ ꓮꓸ ꓫꓵˍ ꓟꓲ ꓬꓲ ꓪꓽ ꓔꓯ ꓟꓽ ꓔꓶꓸ ꓡꓺꓳ꓿ 17 ꓮ ꓡꓲꓳ ꓐꓯ ꓠꓬ ꓙꓵꓽ ꓠꓬꓲꓸ ꓕꓲ ꓔꓱ ꓦꓲ ꓗꓪ ꓟ ꓮ ꓣꓳ ꓤ ꓡꓰ ꓬꓲ ꓪꓽ ꓔꓯ ꓡꓳꓸ ꓙ ꓢꓲ꓾ ꓢꓯꓼ ꓟꓬ ꓬꓲꓻ ꓙꓬ ꓬꓲꓻ ꓝꓳꓹ ꓟꓶ ꓗꓪ ꓬꓲ ꓪꓽ ꓔꓯ ꓧꓳꓽ ꓛꓲ ꓬꓰˍ ꓥꓳ꓿ ꓬꓲ ꓪꓽ ꓟꓬ ꓐꓲ ꓮꓽ ꓙꓵ ꓪꓴ-ꓢ ꓡꓰ ꓫꓵꓹ ꓖꓶˍ ꓥꓳ꓾ ꓐꓯˍ ꓡꓳ꓿

ꓟꓳ ꓖꓶ ꓓꓴ 8

1 ꓮ ꓣꓳ ꓤ ꓡꓰ ꓔꓳꓹ ꓠꓷ ꓓꓴ ꓫꓵꓽ ꓟ ꓕꓲ ꓟ ꓒꓶˍ ꓕꓯ꓾ ꓟꓴꓽ ꓗꓪ ꓗꓪ ꓢꓲ ꓡꓲ ꓐꓰ ꓮꓽ ꓡ ꓕꓲ ꓐꓶꓽ ꓙꓵꓹ ꓗꓷ ꓡꓰꓳ꓿ 2 ꓖꓳ ꓕꓯ ꓪꓴ-ꓢ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓟ ꓟꓴꓽ ꓗꓪ ꓝꓲ ꓓꓴ ꓖꓳ ꓫꓵꓽ ꓣꓳ ꓔꓯ ꓥꓪ ꓟꓳˍ ꓡꓳ꓿ ꓬꓲ ꓪꓽ ꓔꓯ ꓠꓬ ꓐꓽ ꓡ ꓫꓵꓽ ꓕꓷꓹ ꓖꓶ ꓔ ꓡꓳ꓿ 3 ꓟꓴꓽ ꓗꓪ ꓝꓲ ꓓꓴ ꓝꓮꓲ ꓕꓲ ꓣꓳ ꓠꓬ꓾ ꓫꓳꓸ ꓛꓴ ꓖꓴ ꓫꓵ ꓡꓴꓻ ꓕꓲ ꓟ ꓔꓯꓹ ꓔ ꓢꓲ꓾ ꓔꓲ ꓖꓴ ꓒ ꓕꓲ ꓗꓪ ꓦꓰꓼ ꓡ ꓡꓳ꓿ ꓦ ꓡꓱ ꓢꓴ ꓐꓴ ꓮꓽ ꓙꓵ ꓶꓼ ꓓꓰꓽˍ ꓟ ꓐꓰ ꓕꓲ ꓛꓳꓺꓼ ꓙꓵꓽ ꓠꓬꓲꓸ ꓕꓲ ꓟꓲꓽ ꓙꓬ ꓗꓪ ꓓꓹ ꓟ ꓫꓵ ꓡꓰ ꓫꓬ ꓔ ꓟ ꓔꓲ ꓖꓴ ꓗꓪ ꓔꓲ ꓠꓹ ꓟ꓾ ꓬꓲ ꓔꓯ ꓫꓳꓸ ꓮꓽ ꓟꓬꓹ ꓖꓶ ꓔ ꓡꓳ꓿ 4 ꓫꓳꓸ ꓟꓴꓽ ꓘꓴꓽˍ ꓐꓰ ꓦ ꓡꓱ ꓢꓴ ꓐꓴ ꓶꓼ ꓓꓰꓽˍ ꓟ ꓠꓬ꓾ ꓟꓴꓽ ꓗꓪ ꓝꓲ ꓓꓴ ꓖꓳ ꓕꓲ ꓣꓳ ꓡꓯꓼ ꓒꓯꓹ ꓗꓪ ꓐꓰ ꓪꓴ-ꓢ ꓟꓲꓽ ꓙꓬ ꓗꓪ ꓓꓯ ꓛꓲ ꓬꓰˍ ꓡꓳ꓿ 5 ꓟꓴꓽ ꓗꓪ ꓝꓲ ꓓꓴ ꓖꓳ ꓕꓲ ꓣꓳ ꓡꓰ ꓫꓳꓸ ꓛꓴꓻ ꓡꓴ ꓣꓴ ꓔ ꓢꓲ꓾ ꓔꓲ ꓖꓴ ꓗꓪ ꓟ ꓮꓸ ꓔꓳꓸ ꓗꓶ ꓐꓲ ꓡꓰ ꓝꓲ ꓢꓲ ꓠꓬꓲ ꓟꓲ ꓠꓯ ꓗꓪ ꓶꓹ ꓡꓳ ꓩꓴ ꓗꓷ ꓠꓬ꓾ ꓟꓴ ꓖꓴꓽ ꓑꓱꓹ ꓠꓬꓲ꓾ ꓟꓲꓽ ꓐꓬꓱꓼ ꓤꓰꓽ ꓠꓬꓲ꓾ ꓟꓵꓽ ꓓꓵ ꓠꓬꓲ ꓗꓷ ꓡꓰˍ ꓡꓳ꓿ 6 ꓐꓽ ꓡ ꓕꓲ ꓣꓳ ꓕꓲ ꓕꓷꓹ ꓔꓯꓹ ꓔ ꓟ ꓟꓴꓽ ꓗꓪ ꓝꓲ ꓓꓴ ꓫꓵꓽ ꓣꓳ ꓠꓬ ꓟꓵ ꓠS ꓐꓰ ꓙꓽ ꓖꓶ ꓔ ꓡꓳ꓿ 7 ꓬꓲ ꓪꓴꓸ ꓕꓲ ꓣꓳ ꓟ ꓟꓵ ꓗꓷ ꓠꓬ꓾ ꓫꓵꓽ ꓦꓱꓹ ꓞꓹ ꓟ ꓪꓽ ꓢꓶꓽˍ ꓐꓰ ꓮꓸ ꓔꓳꓸ ꓓꓳ ꓡ ꓢꓲ꓾ ꓟꓲ ꓠꓯ ꓗꓪ ꓶꓹ ꓩꓴ ꓗꓷ ꓠꓬ ꓟꓲ ꓠꓯ ꓢ ꓐꓱꓻ ꓕꓲꓽ ꓐꓱˍ ꓐꓰ ꓢꓲꓹ ꓜꓲꓻˍ ꓟꓲ ꓢ ꓐꓱꓻ ꓕꓲꓽ ꓐꓱ ꓛꓴꓻ ꓖꓴ ꓡꓰ ꓠꓬꓲ꓾ ꓟꓳꓼ ꓠꓲꓹ ꓛꓵꓼ ꓠꓬ ꓮꓽ ꓙꓵ ꓛꓴꓻ ꓖꓴ ꓡꓰꓳ꓿ 8 ꓟꓴꓽ ꓗꓪ ꓝꓲ ꓓꓴ ꓠꓬꓲꓽ ꓣꓳ ꓕꓲ ꓣꓳ ꓟ ꓟꓵ ꓗꓷ ꓠꓬ꓾ ꓮꓸ ꓔꓳꓸ ꓐꓬ ꓞꓹ ꓢꓲ ꓪꓽ ꓚꓲ ꓓꓽ ꓟ ꓡꓰ ꓐꓰ ꓗꓹ ꓟ ꓕꓲ ꓫꓵꓽ ꓬꓲꓻ ꓡꓴꓽ ꓐꓱ ꓗꓪ ꓡꓳ ꓧꓳꓽ ꓗꓷˍ ꓡꓳ꓿ ꓖꓳ ꓕꓯ ꓬꓲꓻ ꓡꓴꓽ ꓐꓱ ꓢ ꓐꓱꓻ ꓕꓲꓽ ꓐꓱ ꓠꓬ ꓫꓵꓽ ꓒꓬꓱꓼ ꓡ ꓢꓲ꓾ 9 ꓬꓲꓻ ꓡꓴꓽ ꓐꓱ ꓗꓪ ꓟ ꓢꓯꓸ ꓫꓵꓽ ꓢ ꓐꓱꓻ ꓕꓲꓽ ꓐꓱˍ ꓟꓲ ꓫꓵꓻꓳ꓿ ꓡꓲˍ ꓟꓲ ꓢ ꓐꓱꓻ ꓕꓲꓽ ꓐꓱ ꓐꓬ ꓡꓰꓳ꓿ 10 ꓟꓴꓽ ꓗꓪ ꓝꓲ ꓓꓴ ꓢ ꓣꓳ ꓕꓲ ꓣꓳ ꓟ ꓟꓵ ꓗꓷ ꓠꓬ꓾ ꓟꓴꓽ ꓗꓪ ꓗꓪ ꓐꓰ ꓮꓸ ꓔꓳ ꓡ ꓡꓱꓺ ꓡꓰ ꓐꓰ ꓐꓬ ꓞꓹ ꓟ ꓗꓴ ꓤ ꓓꓽ ꓟ ꓕꓲ ꓢꓶꓽ ꓠꓬ꓾ ꓠꓯ ꓬꓲꓻ ꓢ ꓐꓱꓻ ꓕꓲꓽ ꓐꓱˍ ꓐꓰ ꓬꓲꓻ ꓝꓳꓹ ꓟꓶ ꓗꓪ ꓞꓰꓻ ꓬꓯꓼ ꓡ ꓡꓳ꓿ 11 ꓗꓴ ꓤ ꓕꓱ ꓟ ꓬꓲ ꓟꓬꓱ ꓠꓬ ꓘꓪꓽˍ ꓟ꓾ ꓐꓯˍ ꓡꓳ꓿ ꓬꓲꓻ ꓙꓬ ꓢ ꓐꓱꓻ ꓕꓲꓽ ꓐꓱ ꓠꓬ ꓘꓪꓽ ꓡꓰ ꓠꓬꓲ꓾ ꓬꓲꓻ ꓘꓪꓽ ꓖꓳ ꓟ ꓗꓪ ꓐꓰ ꓞꓳ ꓤ ꓮꓽ ꓟꓬꓹ ꓫꓵꓻꓳ꓿ 12 ꓟꓴꓽ ꓗꓪ ꓝꓲ ꓓꓴ ꓡꓲ ꓣꓳ ꓕꓲ ꓣꓳ ꓟ ꓟꓵ ꓗꓷ ꓠꓬ꓾ ꓟꓲꓽ ꓟꓲ ꓢ ꓐꓱꓻ ꓕꓲꓽ ꓐꓱ ꓟ ꓐꓰ꓾ ꓦ ꓐ ꓢ ꓐꓱꓻ ꓕꓲꓽ ꓐꓱ ꓟ ꓐꓰ꓾ ꓗꓴ ꓤ ꓢ ꓐꓱꓻ ꓕꓲꓽ ꓐꓱ ꓟ ꓔꓯ ꓓꓶꓽ ꓗꓷ ꓠꓬꓲ꓾ ꓡꓬꓸ ꓢꓯꓼ ꓢ ꓐꓱꓻ ꓕꓲꓽ ꓐꓱ ꓠꓲꓸ ꓡꓰꓳ꓿ ꓖꓳ ꓡꓱ ꓢꓲ ꓟꓳꓼ ꓡꓳ ꓗꓪ ꓟ ꓠꓬꓲ ꓟꓳꓻ ꓓꓴ ꓢ ꓐꓱꓻ ꓕꓲꓽ ꓐꓱˍ ꓟꓲ ꓠꓲꓸ ꓡꓰꓳ꓿ ꓢ ꓘꓪˍ ꓟꓲ ꓬꓲ ꓖꓳ ꓡꓱ ꓗꓷ ꓡꓰꓳ꓿ 13 ꓝꓮꓲ ꓟꓵꓽ ꓪꓴꓽ ꓔꓱ ꓫꓵ ꓗꓪ ꓙꓱꓻ ꓓꓽ ꓟ ꓕꓲ ꓟ ꓐꓬꓱꓻ ꓔꓬ ꓟ ꓥꓪ ꓟꓳˍ ꓡꓳ꓿ ꓬꓲ ꓠꓬ ꓢꓯꓼ ꓓꓽ ꓟ ꓡꓰ꓾ ꓮ ꓟꓶ ꓜꓰꓻ ꓞ ꓢꓲ ꓟꓵˍ ꓐꓰ ꓬꓰˍ ꓟ ꓟꓴꓽ ꓗꓪ ꓝꓲ ꓓꓴ ꓖꓳ ꓢ ꓣꓳ ꓡꓰ ꓐꓽ ꓡ ꓟꓵ ꓡ ꓠꓬ꓾ ꓟꓲ ꓠꓯ ꓗꓪ ꓔꓬ ꓢꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓾ ꓫꓸ ꓙꓵˍ ꓥꓳ꓾ ꓫꓸ ꓙꓵˍ ꓥꓳ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿

ꓟꓳ ꓖꓶ ꓓꓴ 9

1 ꓟꓴꓽ ꓗꓪ ꓝꓲ ꓓꓴ ꓥꓪꓽ ꓣꓳ ꓕꓲ ꓣꓳ ꓟ ꓟꓵ ꓗꓷ ꓠꓬ꓾ ꓟꓴꓽ ꓗꓪ ꓗꓪ ꓐꓰ ꓟꓲ ꓠꓯ ꓗꓪ ꓞꓰꓻ ꓡ ꓟ ꓗꓴ ꓤ ꓕꓲ ꓢꓶꓽ ꓥꓪ ꓟꓳˍ ꓡꓳ꓿ ꓠꓯꓸˍ ꓟ ꓫꓵꓻ ꓓꓴꓽ ꓢꓳ ꓕꓴꓽ ꓒꓰꓹ ꓓꓴ ꓠꓬ ꓗꓴ ꓤ ꓖꓳ ꓟ ꓔꓯ ꓖꓶ ꓔ ꓡꓳ꓿ 2 ꓬꓲ ꓡꓰ ꓫꓵꓻ ꓓꓴꓽ ꓒꓴ ꓗꓷ ꓠꓬ꓾ ꓬꓲꓸ ꓘꓴꓻ ꓗꓪ ꓐꓰ ꓟꓴꓽ ꓘꓴꓽ ꓓꓯ ꓙꓰˍ ꓡꓳ꓿ ꓖꓳ ꓟ ꓠꓬ ꓚꓲꓺ ꓒꓱꓻ ꓓꓽ ꓟ ꓗꓪ ꓟ ꓟꓴꓽ ꓘꓴꓽˍ ꓡꓰ ꓐꓰ ꓗꓹ ꓡꓳ꓿ ꓫꓵꓻ ꓓꓴꓽ ꓗꓪ ꓐꓰ ꓓꓳ ꓡ ꓟ ꓟꓴꓽ ꓘꓴꓽ ꓡꓰ ꓟꓲꓽ ꓟꓲˍ ꓐꓰ ꓟꓵꓽ ꓪꓴꓽ ꓔꓯ ꓛꓸ ꓡꓰꓳ꓿ 3 ꓖꓳ ꓕꓯ ꓚ ꓑꓴ ꓜꓴꓻ ꓓꓽ ꓟ ꓠꓬ ꓟꓴꓽ ꓘꓴꓽ ꓗꓪ ꓐꓰ ꓓꓳ ꓡ ꓢꓲ ꓟꓲ ꓠꓯ ꓗꓪ ꓡ ꓡꓳ꓿ ꓬꓲ ꓪꓽ ꓔꓯ ꓖꓶ ꓔ ꓟ ꓪꓽ ꓠꓬꓲˍ ꓟ ꓠꓬ ꓟꓲ ꓠꓯ ꓗꓪ ꓟ ꓟꓲꓺ ꓙꓱꓼ ꓪꓽ ꓠꓬꓲˍ ꓟ ꓡꓰ ꓐꓰ ꓗꓹ ꓡꓳ꓿ 4 ꓟꓲ ꓠꓯ ꓗꓪ ꓟ ꓟꓳꓼ ꓔꓯ ꓥ ꓟꓲ꓾ ꓠꓲꓹ ꓛꓵꓼˍ ꓟ ꓮꓸ ꓫꓵ ꓔꓯ ꓥ ꓟꓲ꓾ ꓢꓲꓹ ꓜꓲꓻ ꓔꓯˍ ꓟꓲ ꓕꓽ ꓐꓬ ꓡꓰ ꓝꓲ꓿ ꓥꓷꓼ ꓛꓲ ꓗꓪ ꓪꓴ-ꓢ ꓬꓲ ꓔꓳꓹ ꓠꓷꓼ ꓓꓴ ꓟꓽ ꓔꓳꓹ ꓠꓷꓼ ꓔ ꓟ ꓡꓽ ꓞꓳ ꓔꓯˍ ꓡꓰꓽ ꓠꓻ ꓡꓰ ꓝꓲ꓾ ꓐꓰ ꓬꓲ ꓪꓽ ꓔꓯ ꓐꓯ ꓖꓶ ꓔ ꓡꓳ꓿ 5 ꓞꓳ ꓤ ꓔꓯ ꓬꓲ ꓪꓽ ꓡꓰ ꓢꓰꓼ ꓗꓷ ꓠꓹ ꓟ ꓙꓵꓽ ꓪ ꓚ ꓑꓴ ꓜꓴꓻ ꓔꓯ ꓟꓽ ꓖꓶ ꓔ꓿ ꓖꓳ ꓡꓱ ꓥ ꓟꓲ꓾ ꓚ ꓑꓴ ꓜꓴꓻ ꓓꓽ ꓟ ꓡꓰ ꓬꓲ ꓪꓽ ꓔꓯ ꓦ ꓐ ꓥꓪꓽ ꓟꓻ ꓫꓸ ꓙꓵꓻ ꓝꓲ ꓠꓹ ꓟ꓾ ꓕꓵꓼ ꓪ ꓖꓶ ꓔ ꓡꓳ꓿ ꓬꓲ ꓪꓽ ꓔꓯ ꓫꓸ ꓙꓵ ꓝꓲˍ ꓟ ꓠꓬ꓾ ꓟꓲꓺ ꓙꓱꓼ ꓡꓰ ꓡꓽ ꓞꓳ ꓔꓯ ꓔꓶꓸˍ ꓕꓯ ꓫꓸ ꓙꓵˍ ꓟ ꓡꓰ ꓐꓰ ꓗꓹ ꓡꓳ꓿ 6 ꓦꓬꓼ ꓠꓬꓲ ꓖꓳ ꓟ ꓗꓪ ꓞꓳ ꓤ ꓠꓬ ꓫꓵꓻ ꓠꓲꓹ ꓫꓵˍ ꓟꓲ ꓫꓵꓻˍ ꓟ ꓔꓯ ꓧꓪ ꓟꓽ ꓟꓶ ꓗꓷ ꓡꓰˍ ꓥꓳ꓿ ꓫꓵꓻ ꓠꓲꓹ ꓫꓵˍ ꓟꓲ꓾ ꓫꓵꓻˍ ꓟ ꓠꓬ ꓬꓲ ꓪꓽ ꓔꓯˍ ꓐꓰ ꓛꓰꓹ ꓙꓰˍ ꓡꓳ꓿ 7 ꓚ ꓑꓴ ꓜꓴꓻ ꓬꓲ ꓪꓽ ꓒꓬꓱꓽ ꓠꓬ꓾ ꓟꓯꓼ ꓬꓰ ꓙꓰ ꓠꓹ ꓟ ꓙꓽ ꓖꓶ ꓔ ꓟ ꓮꓸ ꓟꓴꓽˍ ꓡꓰ ꓐꓰ ꓗꓹ ꓡꓳ꓿ ꓬꓲ ꓪꓽ ꓪꓴꓸ ꓓꓵ ꓗꓪ ꓘꓳꓹ ꓔ ꓟ ꓠꓬ ꓫꓵ ꓪꓴꓸ ꓛꓴꓽˍ ꓡꓰ ꓐꓰ ꓗꓹ ꓡꓳ꓿ ꓬꓲ ꓪꓽ ꓒꓬꓱꓽ ꓟꓬ ꓠꓬ ꓞꓳ ꓤ ꓒꓬꓱꓽ ꓟꓬˍ ꓡꓰ ꓐꓰ ꓗꓹ ꓡꓳ꓿ 8 ꓬꓲ ꓪꓽ ꓪꓴꓸ ꓞꓱꓻ ꓠꓬ ꓤ ꓟꓶ ꓤ ꓪꓴꓸ ꓞꓱꓻˍ ꓡꓰ ꓐꓰ ꓗꓹ ꓢꓲ꓾ ꓬꓲ ꓪꓽ ꓢꓶꓽ ꓛꓲꓻ ꓠꓬ ꓡꓽ ꓢꓯꓹ ꓢꓶꓽ ꓛꓲˍ ꓡꓰ ꓐꓰ ꓗꓹ ꓡꓳ꓿ 9 ꓬꓲ ꓪꓽ ꓠꓬ ꓧꓳ ꓳꓺ ꓟꓶꓽ ꓔꓺ ꓓꓴˍ ꓡꓰ ꓐꓰ ꓗꓹ ꓟ ꓬꓲ ꓓꓵꓼ ꓙꓳˍ ꓡꓳ꓿ ꓬꓲ ꓪꓽ ꓓꓴꓻ ꓡꓯꓼ ꓟꓶꓻˍ ꓟ ꓢꓯꓼ ꓠꓬ꓾ ꓟꓯꓼ ꓬꓰ ꓡꓯꓽ ꓘꓳˍ ꓟ ꓗꓪ ꓟꓯꓼ ꓖꓽ ꓡꓲꓽˍ ꓐꓰ ꓮꓸ ꓟꓴꓽ ꓮꓽ ꓟꓬꓹ ꓔꓷꓹˍ ꓟ ꓢꓯꓼ ꓡꓰ ꓐꓰ ꓗꓹ ꓡꓳ꓿ 10 ꓬꓲ ꓪꓽ ꓟꓶꓸˍ ꓐꓰ ꓔꓶꓸ ꓓꓴ ꓬꓲ ꓤꓲꓽ ꓠꓬ ꓟꓲꓺ ꓙꓱꓼˍ ꓡꓰ ꓐꓰ ꓗꓹ ꓡꓳ꓿ ꓬꓲ ꓪꓽ ꓟꓶꓸ ꓗꓪ ꓠꓬ ꓡꓽ ꓞꓳ ꓔꓯ ꓦ ꓐ ꓥꓪꓽ ꓟ ꓠꓻ ꓡꓰ ꓝꓲ ꓓꓴ ꓪꓽ ꓠꓬꓲˍ ꓟ ꓓꓯꓹ ꓡꓳ꓿ 11 ꓬꓲ ꓪꓽ ꓕꓯꓽ ꓢꓲ ꓗꓪ ꓪ ꓔꓲ ꓣꓱꓽ ꓢꓴ ꓠꓬ꓾ ꓫꓵꓻ ꓓꓴꓽ ꓬꓲ ꓝꓲ ꓓꓴ ꓥ ꓡꓳ꓿ ꓦꓲ-ꓐꓱ-ꓣꓴ ꓥꓳꓽ ꓗꓪ ꓠꓬ ꓬꓲ ꓟꓬꓱ ꓔꓯ꓾ ꓬ-ꓑ-ꓓ-ꓠ꓾ ꓐꓯˍ ꓡꓳ꓿ ꓦꓲ-ꓡꓲ ꓥꓳꓽ ꓗꓪ ꓠꓬ꓾ ꓬ-ꓒꓳ-ꓡꓶ꓾ ꓐꓯˍ ꓡꓳ꓿ (ꓒꓶꓻ ꓓꓳ ꓡ ꓠꓬ꓾ ꓟꓶꓽ ꓬꓰ ꓝꓲ ꓢꓴ꓾ ꓐꓯˍ ꓟ ꓥ ꓡꓳ꓿) 12 ꓫꓸ ꓙꓵˍ ꓟ ꓬꓲ ꓪꓴꓸ ꓕꓲ ꓫꓵꓽ ꓠꓬ ꓗꓳꓸ ꓙꓰꓳ꓿ ꓫꓸ ꓙꓵˍ ꓟ ꓝꓮꓲ ꓠꓬꓲꓽ ꓫꓵꓽ ꓡ ꓢꓰꓽ ꓡꓳ꓿ 13 ꓟꓴꓽ ꓗꓪ ꓝꓲ ꓓꓴ ꓛꓳꓼ ꓣꓳ ꓕꓲ ꓣꓳ ꓟ ꓟꓵ ꓗꓷ ꓠꓬ꓾ ꓪꓴ-ꓢ ꓟꓲꓽ ꓙꓬ ꓗꓪ ꓟ꓾ ꓫꓵ ꓡꓰ ꓫꓬꓹ ꓔ ꓟ ꓔꓲ ꓖꓴ ꓬꓲ ꓪꓴꓸ ꓛꓲ ꓡꓲ ꓗꓸ ꓗꓪ ꓐꓰ ꓢꓯꓼ ꓓꓳ ꓡ ꓢꓲ꓾ 14 ꓐꓽ ꓡ ꓔꓯꓹ ꓔ ꓟ ꓟꓴꓽ ꓗꓪ ꓝꓲ ꓓꓴ ꓛꓳꓼ ꓣꓳ ꓕꓲ ꓣꓳ ꓔꓯ꓾ ꓬꓴ-ꓩ-ꓕꓲ-ꓢꓶ ꓠꓯ ꓬꓲꓻ ꓓꓽ ꓟ ꓗꓪ ꓞꓳꓹ ꓔ ꓟ ꓟꓴꓽ ꓗꓪ ꓝꓲ ꓓꓴ ꓖꓳ ꓡꓲ ꓣꓳ ꓔꓯ ꓩꓴ ꓗꓷ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 15 ꓖꓳ ꓕꓲ ꓘꓳꓼˍ ꓐꓰ ꓖꓳ ꓕꓲ ꓦ ꓐˍ ꓐꓰ ꓖꓳ ꓕꓲ ꓠꓬꓲˍ ꓐꓰ ꓖꓳ ꓕꓲ ꓙꓵꓹ ꓗꓪ ꓞꓳ ꓤ ꓢ ꓐꓱꓻ ꓕꓲꓽ ꓐꓱ ꓔꓯ ꓢꓰꓼ ꓠꓹ ꓟ ꓙꓽ ꓖꓶ ꓔ ꓟ ꓟꓴꓽ ꓗꓪ ꓝꓲ ꓓꓴ ꓖꓳ ꓡꓲ ꓣꓳ ꓔꓯ ꓩꓴ ꓗꓷꓳ꓿ 16 ꓖꓳ ꓡꓱ ꓢꓲ ꓮꓸ ꓟꓴꓽ ꓜꓶꓽ ꓢꓴ ꓟꓯꓼ ꓵ ꓟꓬꓱ ꓠꓬ ꓠꓬꓲꓽ ꓔꓴ ꓫꓬꓹ ꓙꓳˍ ꓟ ꓥꓪ ꓑ ꓙꓽ ꓗꓷꓳ꓿ 17 ꓦ ꓐꓬꓱꓽ ꓗꓪ ꓥꓪ ꓟꓳˍ ꓟ ꓮꓸ ꓟꓴꓽˍ ꓐꓰ ꓮꓸ ꓟꓴꓽ ꓜꓶ ꓢꓴ ꓠꓬ ꓕꓱ ꓡꓱ ꓗꓹ ꓡꓳ꓿ ꓬꓲ ꓪꓽ ꓳ' ꓟꓶꓽ ꓔꓺ ꓓꓴ ꓠꓬꓲꓺ ꓒꓬꓱꓽ ꓠꓬ꓾ ꓮꓸ ꓔꓳꓸˍ ꓐꓰ ꓒꓵꓽ ꓡꓳ ꓠꓲꓹ ꓛꓵꓼ ꓟꓵꓽ ꓪꓴꓽˍ ꓐꓰ ꓡꓳ ꓐˍ ꓡꓰ ꓐꓰ ꓗꓹ ꓡꓳ꓿ ꓮꓸ ꓟꓴꓽ ꓪꓴꓸ ꓓꓵ ꓠꓬ ꓡꓽ ꓢꓯꓹ ꓪꓴꓸ ꓓꓵˍ ꓡꓰ ꓐꓰ ꓗꓹ ꓢꓲ꓾ ꓮꓸ ꓟꓴꓽ ꓟꓷꓽ ꓠꓷꓹ ꓗꓪ ꓐꓰ ꓮꓸ ꓔꓳꓸˍ ꓐꓰ ꓟꓴꓽ ꓘꓴꓽˍ ꓐꓰ ꓡꓳ ꓐ ꓓꓳ ꓡ ꓡꓳ꓿ 18 ꓮꓸ ꓟꓴꓽ ꓟꓷꓽ ꓠꓷꓹ ꓗꓪ ꓐꓰ ꓓꓳ ꓡ ꓟ ꓮꓸ ꓔꓳˍ ꓐꓰ ꓟꓴꓽ ꓘꓴꓽˍ ꓐꓰ ꓡꓳ ꓐ ꓫꓸ ꓘꓶ ꓓꓴ ꓕꓱ ꓢ ꓫꓵꓽ ꓡꓰ꓾ ꓞꓳ ꓤ ꓢ ꓐꓱꓻ ꓕꓲꓽ ꓐꓱ ꓔꓯ ꓢꓰꓼ ꓗꓷꓳ꓿ 19 ꓮꓸ ꓟꓴꓽ ꓪꓽ ꓠꓬꓲˍ ꓟ ꓠꓽ꓾ ꓬꓲ ꓪꓽ ꓟꓷꓽ ꓠꓷꓹˍ ꓐꓰ ꓬꓲ ꓪꓽ ꓟꓶꓸ ꓗꓪ ꓓꓯꓹ ꓡꓳ꓿ ꓬꓲ ꓪꓽ ꓟꓶꓸ ꓠꓬ ꓩꓴꓺˍ ꓡꓰ ꓐꓰ ꓗꓹ ꓢꓲ ꓪꓴꓸ ꓓꓵ ꓙꓳˍ ꓡꓳ꓿ ꓖꓳ ꓟ ꓡꓰ ꓢꓴ ꓔꓯ ꓠꓻ ꓡꓰ ꓝꓲˍ ꓡꓳ꓿ 20 ꓫꓸ ꓘꓶꓻ ꓓꓴ ꓕꓱ ꓟ ꓗꓪ ꓐꓰ ꓜꓰꓻ ꓡꓰˍ ꓟ ꓞꓳ ꓤ ꓠꓬ꓾ ꓬꓲ ꓪꓽ ꓡꓯꓼ ꓒꓯꓹ ꓡꓰ ꓬꓰˍ ꓟ ꓟꓬꓱꓽ ꓗꓪ ꓐꓰ ꓟꓽ ꓓꓵꓽ ꓙꓽ ꓒꓳꓹ ꓬꓲꓼ ꓡ꓿ ꓫꓵˍ ꓐꓰ ꓒꓴˍ ꓐꓰ ꓙꓲꓽˍ ꓐꓰ Bꓸ ꓛꓲˍ ꓐꓰ ꓢꓲꓹ ꓡꓰ ꓫꓬꓹ ꓔ ꓟ꓾ ꓟꓳꓻ ꓟꓽ ꓗꓴꓸ꓾ ꓑ ꓙꓽ ꓟꓽ ꓗꓴꓸ꓾ ꓫꓱꓽ ꓟꓽ ꓗꓴꓸ ꓟ ꓢꓲꓺ ꓐꓬꓱꓽˍ ꓐꓰ ꓠꓲꓽ ꓔꓯ ꓪꓴꓸ ꓓꓵ ꓕꓱꓼˍ ꓟˍ ꓟꓲ ꓟꓽ ꓠꓽ ꓗꓷ꓿ 21 ꓬꓲ ꓪꓽ ꓠꓬ ꓞꓳ ꓤ ꓢꓰꓼˍ ꓟ ꓐꓰ꓾ ꓥꓺ ꓟꓬꓱꓽ ꓬꓰˍ ꓟ ꓐꓰ꓾ ꓟꓽ ꓢꓲꓽ ꓟꓽ ꓫꓬ ꓬꓰˍ ꓟ ꓐꓰ ꓘꓴꓽˍ ꓟ ꓗꓪ ꓐꓰˍ ꓟꓲ ꓟꓽ ꓓꓵꓽ ꓙꓽ ꓒꓳꓹ ꓬꓲꓼ ꓡ꓿

ꓟꓳ ꓖꓶ ꓓꓴ 10

1 ꓖꓳ ꓕꓯ ꓪꓽ ꓠꓬꓲˍ ꓟ ꓟꓴꓽ ꓗꓪ ꓝꓲ ꓓꓴ ꓬꓲ ꓔꓱꓹ ꓬꓲꓸ ꓕꓲ ꓣꓳ ꓠꓬ꓾ ꓟꓴ ꓗꓴꓸ ꓪꓸ ꓔ ꓢꓲ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓥꓪ ꓟꓳˍ ꓡꓳ꓿ ꓬꓲ ꓪꓴꓸ ꓓꓵ ꓗꓪ ꓠꓬ ꓮꓸ ꓟꓴꓽ ꓬꓲꓻ ꓫꓵ ꓚꓳ ꓞꓹ ꓢꓲ꓾ ꓬꓲ ꓒꓬꓱꓽ ꓟꓬ ꓠꓬ ꓟꓲꓽ ꓟꓲˍ ꓡꓰ ꓐꓰ ꓗꓹ ꓡꓳ꓿ ꓬꓲ ꓛꓲ ꓒꓯꓹ ꓠꓬ ꓮꓸ ꓔꓳꓸ ꓬꓲꓻ ꓘꓴꓻˍ ꓡꓰ ꓐꓰ ꓗꓹ ꓡꓳ꓿ 2 ꓬꓲ ꓡꓯꓼ ꓒꓯꓹ ꓗꓪ ꓠꓬ꓾ ꓒꓬꓱ ꓔ ꓟ ꓕꓳ ꓶ ꓡꓲ ꓤ ꓕꓲ ꓡꓲ ꓔꓯꓹ ꓔ ꓡꓳ꓿ ꓬꓲ ꓛꓲ ꓙ ꓕꓲ ꓐꓽ ꓠꓬ ꓬꓲꓻ ꓡꓴꓽ ꓐꓱ ꓗꓪ꓾ ꓛꓲ ꓶꓸ ꓕꓲ ꓐꓽ ꓠꓬ ꓟꓲ ꓠꓯ ꓗꓪ ꓕꓳꓼ ꓔ ꓢꓲ꓾ 3 ꓡꓽ ꓢꓯꓹ ꓟꓶˍ ꓟ ꓡꓰ ꓐꓰ ꓢꓯꓼ ꓓ ꓟ ꓡꓰ ꓘꓴˍ ꓡꓳ꓿ ꓬꓲ ꓘꓴꓻ ꓗꓷ ꓠꓬ꓾ ꓟꓴꓽ ꓖꓴꓽ ꓫꓵꓽ ꓕꓷꓹ ꓑꓱꓹ ꓢꓲ ꓫꓸ ꓕꓱ ꓡ ꓡꓳ꓿ 4 ꓟꓴꓽ ꓖꓴꓽ ꓫꓵꓽ ꓕꓷꓹ ꓟ ꓫꓸ ꓕꓱ ꓗꓷ ꓗꓸ ꓠꓯꓸ ꓥꓪ ꓐꓳˍ ꓐꓰ ꓬꓰ ꓠꓬ꓾ ꓟꓴꓽ ꓗꓪ ꓗꓪ ꓐꓰ ꓐꓯ ꓩꓴ ꓡ ꓟ ꓢꓯꓼ ꓡꓰ꓾ ꓟꓴꓽ ꓖꓴꓽ ꓫꓵꓽ ꓕꓷꓹ ꓡꓰ ꓫꓸ ꓕꓱ ꓗꓷ ꓟ ꓔꓯ ꓑꓲꓸ ꓔ꓾ ꓕꓽ ꓐꓳ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 5 ꓖꓳ ꓕꓯ ꓥꓪ ꓟꓳˍ ꓟ ꓬꓲꓻ ꓡꓴꓽ ꓐꓱˍ ꓐꓰ ꓟꓲ ꓠꓯ ꓔꓯ ꓕꓳꓼ ꓢꓴ ꓟꓴꓽ ꓗꓪ ꓝꓲ ꓓꓴ ꓖꓳ ꓕꓲ ꓣꓳ ꓠꓬ꓾ ꓬꓲ ꓡꓯꓼ ꓙ ꓕꓲ ꓐꓽ ꓟ ꓟꓴꓽ ꓗꓪ ꓔꓯꓸ ꓟꓳꓸ ꓛꓱ ꓔ ꓢꓲ꓾ 6 ꓟꓴꓽ ꓗꓪˍ ꓐꓰ ꓬꓲ ꓠꓯꓸꓼ ꓗꓪ ꓙꓳˍ ꓟ꓾ ꓟꓲ ꓠꓯˍ ꓐꓰ ꓬꓲ ꓠꓯꓸꓼ ꓗꓪ ꓙꓳˍ ꓟ꓾ ꓬꓲꓻ ꓡꓴꓽ ꓐꓱˍ ꓐꓰ ꓬꓲ ꓘꓴꓽ ꓠꓯꓸꓼ ꓗꓪ ꓙꓳˍ ꓟ ꓔꓯ ꓚꓰꓼ ꓢꓴ꓾ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓢꓴ ꓔꓯ ꓖꓴ ꓢꓲ꓾ ꓪꓵꓼ ꓙꓱꓽ ꓢꓲ ꓠꓬꓲ꓾ ꓕꓱ ꓡꓱ ꓖꓳ ꓑꓳꓸ ꓬꓲ ꓐꓶꓹ ꓟꓽ ꓪꓽ ꓐꓶꓽ ꓡꓰꓳ꓿ 7 ꓟꓴꓽ ꓗꓪ ꓝꓲ ꓓꓴ ꓫꓵꓽ ꓣꓳ ꓕꓲ ꓣꓳ ꓟ ꓐꓽ ꓡ ꓟꓵˍ ꓐꓰ ꓬꓰˍ ꓕꓯ꓾ ꓪꓴ-ꓢ ꓡꓰ ꓬꓲ ꓔꓯ ꓣꓱꓽ ꓙ ꓢꓴ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓔꓯ ꓚ ꓖꓶ ꓗꓷˍ ꓟ ꓡꓰ ꓐꓰ꓾ ꓪꓴ-ꓢ ꓬꓲ ꓚꓵ ꓘꓶ ꓬꓰ ꓓꓳ ꓡꓰˍ ꓥꓳ꓾ ꓐꓰ ꓐꓯˍ ꓡꓳ꓿ 8 ꓖꓳ ꓡꓱ ꓢꓲ ꓟꓴꓽ ꓗꓪ ꓗꓪ ꓐꓰ ꓥꓪ ꓑ ꓙꓽˍ ꓟ ꓢꓯꓼ ꓖꓳ ꓟ ꓡꓰ ꓥꓪ ꓔꓯ ꓝꓮꓲ ꓫꓸ ꓕꓱ ꓡ ꓢꓲ꓾ ꓙꓰ꓾ ꓬꓲꓻ ꓡꓴꓽ ꓐꓱˍ ꓐꓰ ꓟꓲ ꓠꓯ ꓔꓯ ꓕꓳꓼ ꓢꓴ ꓟꓴꓽ ꓗꓪ ꓝꓲ ꓓꓴ ꓖꓳ ꓕꓲ ꓣꓳ ꓡꓯꓼ ꓒꓯꓹ ꓗꓪ ꓒꓬꓱ ꓔ ꓟ ꓕꓳ ꓶ ꓡꓲ ꓤ ꓖꓳ ꓟ ꓣꓴ ꓬꓰ꓾ ꓐꓯˍ ꓡꓳ꓿ 9 ꓖꓳ ꓡꓱ ꓠꓬꓲ ꓥꓪ ꓠꓬ ꓟꓴꓽ ꓗꓪ ꓝꓲ ꓓꓴ ꓔꓯ ꓙꓰ ꓢꓲ꓾ ꓕꓳ ꓶ ꓡꓲ ꓖꓳ ꓟ ꓥꓪ ꓔꓯ ꓖꓶ ꓡ ꓠꓹ ꓟ ꓬꓲ ꓔꓯ ꓐꓯ ꓖꓶ ꓗꓷꓳ꓿ ꓖꓳ ꓕꓯ ꓬꓲ ꓡꓰ ꓥꓪ ꓔꓯ꓾ ꓠꓴ ꓣꓴ ꓢꓲ ꓜꓽ ꓖꓴ ꓡꓰ ꓝꓲ꓿ ꓠꓴ ꓟꓷꓽ ꓠꓷꓹ ꓗꓪ ꓐꓬꓽˍ ꓡꓰ ꓐꓰ ꓛꓵꓻˍ ꓟꓲ꓾ ꓦꓰꓼ ꓟ ꓗꓪ ꓠꓽ ꓘꓪꓽˍ ꓥꓳ꓾ ꓐꓯ ꓖꓶ ꓡꓺꓳ꓿ 10 ꓖꓳ ꓡꓱ ꓠꓬ ꓥꓪ ꓡꓰ ꓟꓴꓽ ꓗꓪ ꓝꓲ ꓓꓴ ꓡꓯꓼ ꓒꓯꓹ ꓗꓪ ꓐꓰ ꓕꓳ ꓶ ꓡꓲ ꓤ ꓣꓴ ꓢꓲ ꓜꓽ ꓗꓷ ꓠꓬ꓾ ꓥꓪ ꓟꓷꓽ ꓠꓷꓹ ꓗꓪ ꓐꓬꓽˍ ꓡꓰ ꓐꓰ ꓛꓵˍ ꓡꓳ꓿ ꓜ ꓗꓷ ꓗꓸ ꓠꓯꓸ ꓥꓪ ꓦꓰꓼ ꓟ ꓗꓪ ꓘꓪꓽ ꓡꓰꓳ꓿ 11 ꓖꓳ ꓕꓯ ꓬꓲ ꓪꓽ ꓡꓰ ꓥꓪ ꓔꓯ꓾ ꓠꓴ ꓠꓬ ꓑ ꓫꓬꓼ ꓑ ꓟꓲˍ ꓐꓰ꓾ ꓞꓳ ꓫꓵꓽ ꓞꓳ ꓙꓰˍ ꓐꓰ꓾ ꓥꓳꓽ ꓫꓵꓽ ꓥꓳ ꓙꓰˍ ꓐꓰ ꓪ ꓔꓲ ꓐꓴ ꓔꓯ ꓖꓴ ꓢꓲ ꓟꓷꓽ ꓠꓷꓹ ꓝꓸ ꓠ ꓗꓹ ꓢꓰꓽ ꓡꓳ꓾ ꓐꓯˍ ꓡꓳ꓿

ꓟꓳ ꓖꓶ ꓓꓴ 11

1 ꓖꓳ ꓡꓱ ꓠꓬ ꓙꓽ ꓥꓳꓽˍ ꓡꓰ ꓐꓰ ꓗꓹ ꓟ ꓔꓯꓺ ꓓ ꓕꓲ ꓕꓷꓹ ꓥꓪ ꓔꓯ ꓖꓶ ꓡ ꓢꓲ꓾ ꓔꓴ꓾ ꓪꓴ-ꓢ ꓢꓲꓽ ꓫꓬ ꓦꓲˍ ꓐꓰ ꓔꓲ ꓖꓴ ꓔꓯ ꓔꓯꓺ ꓢꓲ ꓦꓲ ꓠꓯꓸꓼ ꓗꓪ ꓟ ꓪꓴꓸ ꓓꓵ ꓕꓱꓼ ꓢꓴ ꓐꓴ ꓔꓯ ꓵ ꓠꓬꓲ꓿ 2 ꓖꓳ ꓡꓱ ꓥ ꓟꓲ ꓪꓴ-ꓢ ꓢꓲꓽ ꓫꓬ ꓦꓲ ꓠꓱ ꓫꓱꓸ ꓟꓸꓼ ꓗꓪ ꓟ ꓡ ꓙꓳ ꓓꓰ ꓔꓯ ꓠꓬ ꓕꓽ ꓔꓯꓺ꓿ ꓮ ꓡꓲꓳ ꓐꓯ ꓠꓬ ꓖꓳ ꓟ ꓠꓽ ꓞꓳ ꓫꓵꓽ ꓐꓴ ꓔꓯ ꓖꓶ ꓗꓷꓳ꓿ ꓬꓲ ꓪꓽ ꓠꓬ ꓙꓱ-ꓣꓴ-ꓢ-ꓡꓱ ꓔꓯ ꓦ ꓐ ꓡꓲ ꓞꓲ ꓠꓬꓲꓽ ꓟ ꓕꓳꓼˍ ꓥꓳ꓿ 3 ꓥꓪ ꓠꓬ ꓥꓪ ꓢꓷꓸ ꓙ ꓟꓳ ꓙ ꓢꓴ ꓖꓳ ꓠꓬꓲꓽ ꓣꓳ ꓔꓯ ꓪꓽ ꓠꓬꓲˍ ꓟ ꓖꓶˍ ꓥꓳ꓿ ꓬꓲ ꓪꓽ ꓠꓬ ꓓꓸ ꓖꓶꓸ ꓟꓶ ꓐꓵ ꓞꓶꓽ ꓖꓪꓽ ꓔ ꓢꓲ꓾ ꓕꓲ ꓔꓴ ꓠꓬꓲꓽ ꓦꓬ ꓛꓳꓼ ꓞꓲ ꓠꓬꓲ ꓟꓷꓽ ꓠꓷꓹ ꓝˍ ꓥꓳ꓾ ꓐꓯˍ ꓡꓳ꓿ 4 ꓬꓲ ꓪꓽ ꓠꓬ ꓟꓲ ꓠꓯ ꓬꓲ ꓢꓲ ꓒꓽ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓟ ꓮꓽ ꓛꓬꓽ ꓜꓲ ꓖꓳ ꓠꓬꓲꓽ ꓜꓲˍ ꓐꓰ ꓟꓬ ꓡꓴ ꓕꓲ ꓖꓳ ꓠꓬꓲꓽ ꓟ ꓥ ꓡꓳ꓿ 5 ꓮꓽ ꓟ ꓡꓰ ꓬꓲ ꓪꓽ ꓔꓯ ꓫꓸ ꓙꓵ ꓡꓰ ꓝꓲ ꓠꓲꓹ ꓫꓵˍ ꓠꓬ꓾ ꓬꓲ ꓪꓽ ꓟꓷꓽ ꓠꓷꓹ ꓗꓪ ꓐꓰ ꓮꓸ ꓔꓳꓸ ꓓꓳ ꓡ ꓢꓲ꓾ ꓛꓴꓽ ꓙꓳ ꓢꓴ ꓔꓯ ꓛꓴꓻ ꓖꓴ ꓡꓰ ꓝꓲˍ ꓥꓳ꓿ ꓮꓽ ꓟ ꓡꓰ ꓬꓲ ꓪꓽ ꓔꓯ ꓐꓬꓺ ꓡꓰ ꓝꓲ ꓠꓲꓹ ꓫꓵˍ ꓠꓬ꓾ ꓖꓳ ꓟ ꓡꓰ ꓐꓰ ꓬꓲ ꓔꓯ ꓛꓴꓻ ꓢꓰꓼ ꓗꓷˍ ꓥꓳ꓿ 6 ꓕꓱ ꓠꓬꓲꓽ ꓣꓳ ꓬꓲ ꓪꓽ ꓟꓷꓽ ꓠꓷꓹ ꓝˍ ꓟ ꓦꓬꓼ ꓠꓬꓲ ꓗꓪ ꓟꓶꓽ ꓦ ꓟꓽ ꓦ ꓝꓲ ꓠꓹ ꓟ꓾ ꓟꓴꓽ ꓗꓪ ꓔꓯ ꓚꓵꓸ ꓔ ꓟ ꓪꓽ ꓠꓬꓲˍ ꓟ ꓙꓳˍ ꓡꓳ꓿ ꓝꓮꓲ ꓠꓬ ꓬꓲ ꓪꓽ ꓮ ꓕꓯ ꓬꓰ ꓠꓲꓹ ꓫꓵˍ ꓠꓬ ꓖꓳ ꓕꓯ꓾ ꓬꓲꓻ ꓙꓬ ꓔꓯ ꓙꓵꓽ ꓢꓲ ꓫꓵꓽ ꓒꓬꓱꓼ ꓡ ꓝꓲ ꓠꓹ ꓟ ꓐꓰ꓾ ꓫꓸ ꓘꓶ ꓓꓴ ꓥ ꓕ ꓑꓳꓸ ꓗꓪ ꓐꓰ ꓟꓲ ꓠꓯ ꓔꓯ ꓓꓶꓽ ꓠꓹ ꓟ ꓪꓽ ꓠꓬꓲˍ ꓟˍ ꓟꓲ ꓙꓳˍ ꓡꓳ꓿ 7 ꓬꓲ ꓪꓽ ꓢꓷꓸ ꓙ ꓟꓳ ꓙˍ ꓟ ꓬꓰ ꓓꓳ ꓡꓰ ꓕꓯ꓾ ꓫꓵꓻ ꓓꓴꓽ ꓗꓪ ꓐꓰ ꓓꓯ ꓡ ꓟ ꓓꓴꓽ ꓪꓴ ꓠꓬ ꓬꓲ ꓪꓽˍ ꓐꓰ ꓟꓯꓼ ꓬꓰ ꓢꓲ꓾ ꓬꓲ ꓪꓽ ꓔꓯ ꓧꓪꓸ ꓡꓰ ꓢꓲ ꓠꓬꓲ ꓢꓰꓼ ꓗꓷˍ ꓥꓳ꓿ 8 ꓬꓲ ꓪꓽ ꓫꓵꓻ ꓟꓳꓻ ꓠꓬ꓾ ꓬꓲ ꓪꓽ ꓢꓲ ꓒꓽ ꓔꓯ ꓕꓯꓼ ꓔꓶ ꓗꓷ ꓟ ꓡꓳ ꓒꓱ ꓓꓽ ꓟ ꓗꓪ ꓓꓳꓽ ꓞꓹ ꓥꓳ꓿ ꓔꓯꓺ ꓟꓬꓱ ꓡꓰ ꓡꓳ ꓒꓱ ꓖꓳ ꓟ ꓔꓯ ꓢꓳ-ꓓꓳ-ꓟ꓾ ꓥ ꓠꓬ꓾ ꓬꓲ-ꓙꓲꓽ꓾ ꓐꓯˍ ꓡꓳ꓿ 9 ꓑ ꓫꓬꓼ ꓑ ꓟꓲˍ ꓐꓰ꓾ ꓞꓳ ꓫꓵꓽ ꓞꓳ ꓙꓰˍ ꓐꓰ꓾ ꓥꓳꓽ ꓫꓵꓽ ꓥꓳ ꓙꓰꓽˍ ꓐꓰ꓾ ꓗꓴꓷꓼ ꓫꓵꓽ ꓗꓴꓷꓼ ꓙꓰꓽ ꓗꓪ ꓟ ꓡꓽ ꓞꓳ ꓡꓰ ꓬꓲ ꓪꓽ ꓫꓵꓻ ꓟꓳꓻ ꓔꓯ ꓟꓽ ꓔꓵꓸ ꓝꓲ ꓝꓲ ꓢꓽ ꓠꓬꓲ ꓐꓶꓽ ꓡꓳꓸ ꓔ ꓥꓳ꓿ 10 ꓟꓷꓽ ꓠꓷꓹ ꓝꓸ ꓢꓴ ꓕꓱ ꓠꓬꓲꓽ ꓣꓳ ꓡꓰ ꓬꓲ ꓪꓽ ꓔꓯ ꓫꓸ ꓙꓵꓻ ꓝꓲ ꓗꓷ ꓠꓬꓲ꓾ ꓟꓲ ꓠꓯ ꓗꓪ ꓔꓬ ꓢꓴ ꓐꓴ ꓠꓬ ꓕꓱ ꓠꓬꓲꓽ ꓣꓳ ꓔꓯ ꓗꓷ ꓡꓰˍ ꓟ ꓫꓸ ꓓꓴ ꓑꓶꓸ ꓓꓴ ꓗꓹ ꓛꓲꓽ ꓠꓲꓹ ꓒꓴ ꓢꓲ꓾ ꓡꓯꓼ ꓫꓴ ꓦꓻ ꓖꓶ ꓡꓯꓽ ꓘꓳ ꓠꓬꓲ ꓬꓰˍ ꓥꓳ꓿ 11 ꓕꓱ ꓢ ꓠꓬꓲ ꓐꓶꓽ ꓗꓸ ꓠꓯꓸ꓾ ꓪꓴ-ꓢ ꓗꓪ ꓐꓰ ꓡꓻ ꓟ ꓢꓯꓼ ꓟꓬ ꓬꓲ ꓦ ꓢꓯꓼ ꓬꓲ ꓪꓽ ꓠꓯꓸꓼ ꓗꓪ ꓓꓵꓽ ꓡꓰ ꓠꓬ꓾ ꓬꓲ ꓪꓽ ꓦꓰꓼ ꓔꓴ ꓡ ꓡꓳ꓿ ꓖꓳ ꓕꓯ ꓬꓲ ꓪꓽ ꓔꓯ ꓡꓳꓸ ꓟꓳꓻ ꓢꓴ ꓐꓴ ꓠꓬ ꓮꓽ ꓘꓶꓸ ꓙꓳ ꓦꓲꓸ ꓡꓰˍ ꓡꓳ꓿ 12 ꓟꓴꓽ ꓗꓪ ꓗꓪ ꓐꓰ ꓢꓯꓼ ꓓꓽ ꓟ ꓡꓰ ꓬꓲ ꓪꓽ ꓔꓯ꓾ ꓕꓱ ꓗꓪ ꓓꓯ ꓡꓯ꓾ ꓐꓯˍ ꓟ ꓬꓲ ꓪꓽ ꓑ ꓙꓽˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓠꓽ ꓟꓴ ꓗꓴꓸ ꓗꓪ ꓐꓰ ꓟꓴꓽ ꓗꓪ ꓗꓪ ꓓꓯ ꓙꓰꓳ꓿ ꓬꓲ ꓪꓽ ꓔꓯ ꓛꓴꓽ ꓙꓳ ꓢꓴˍ ꓟꓲ ꓟꓳˍ ꓡꓳ꓿ 13 ꓖꓳ ꓕꓲ ꓙꓵꓹ ꓗꓪ ꓟꓵꓽ ꓮꓽ ꓘꓶꓸ ꓓꓵ ꓡ ꓢꓲ꓾ ꓡꓳ ꓒꓱ ꓖꓳ ꓟ ꓞꓲ ꓐꓱ ꓕꓲ ꓐꓱ ꓠꓬ ꓐꓱꓽ ꓡꓰꓳ꓿ ꓟꓵ ꓓꓵˍ ꓟ ꓗꓪ ꓐꓰ ꓡꓽ ꓞꓳ ꓫꓵꓽ ꓔꓴ ꓫꓵꓻˍ ꓡꓳ꓿ ꓜꓰ ꓡꓰ ꓢꓴ ꓠꓬ ꓙꓳ ꓦꓲꓸ ꓡꓰ ꓢꓲ ꓟꓴꓽ ꓗꓪ ꓗꓪ ꓟ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ 14 ꓫꓸ ꓙꓵˍ ꓟ ꓠꓬꓲꓽ ꓫꓵꓽ ꓕꓲ ꓫꓵ ꓟ ꓗꓳꓸ ꓙꓰ ꓠꓬ꓾ ꓞꓼ ꓐꓰ ꓫꓸ ꓙꓵˍ ꓟ ꓢ ꓫꓵꓽ ꓕꓲ ꓫꓵ ꓟ ꓛꓲ ꓡ ꓥꓳ꓿ 15 ꓟꓴꓽ ꓗꓪ ꓝꓲ ꓓꓴ ꓫꓵꓽ ꓣꓳ ꓕꓲ ꓣꓳ ꓬꓲ ꓐꓽ ꓡ ꓟꓵ ꓗꓷ ꓠꓬ꓾ ꓟꓴꓽ ꓗꓪ ꓗꓪ ꓐꓰ ꓢꓯꓼ ꓓ ꓟ ꓮꓽ ꓟꓬꓹ ꓡꓰ꓾ ꓟꓲ ꓠꓯ ꓗꓪ ꓟ ꓗꓴꓷꓼ ꓠꓬ꓾ ꓣꓳ ꓢꓲ ꓒꓽ ꓪꓴ-ꓢˍ ꓐꓰ ꓬꓲ ꓙꓲ-ꓢꓴ ꓔꓯꓸ ꓟ ꓒꓬꓱꓼ ꓡꓺꓳ꓿ ꓬꓲ ꓠꓬ ꓕꓲ ꓞꓲꓼ ꓕꓲ ꓑ ꓪ ꓔꓲ ꓣꓱꓽˍ ꓥꓳ꓾ ꓐꓯˍ ꓡꓳ꓿ 16 ꓪꓴ-ꓢ ꓟꓲꓽ ꓙꓬ ꓗꓪ ꓚꓲ ꓛꓬ ꓙꓵꓽ ꓠꓬꓲ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓞꓳ ꓪꓴꓽ ꓞꓳ ꓔꓲ ꓖꓳ ꓠꓬꓲꓽ ꓞꓲ ꓡꓲ ꓣꓳ ꓠꓬ ꓟꓳꓼ ꓡꓰ ꓢꓲ꓾ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓠꓬꓲ꓾ 17 ꓔꓬ ꓗꓷ ꓟ ꓐꓰ ꓔꓬ ꓟ꓾ ꓮꓸ ꓫꓵˍ ꓟꓲ ꓬꓰ ꓐ ꓡ ꓟ ꓢꓲ ꓒꓽ ꓪꓴ-ꓢꓺꓳ꓾ ꓠꓴ ꓠꓬ ꓪ ꓠꓬꓲˍ ꓟ ꓓꓽ ꓟ ꓡꓰ ꓪ ꓔꓲ ꓣꓱꓽ ꓡ ꓠꓬꓲ ꓠꓴ ꓔꓯ ꓫꓸ ꓟꓳ꓿ 18 ꓞꓳ ꓫꓵꓽ ꓐꓴ ꓠꓬ ꓠꓲꓹ ꓟ ꓦꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓦꓶ ꓠꓲꓹˍ ꓐꓰ꓾ ꓫꓵꓻ ꓢꓴ ꓔꓯ ꓐꓯ ꓟꓴ ꓘꓶꓽˍ ꓟ ꓬꓲ ꓝꓲꓸˍ ꓐꓰ꓾ ꓠꓴ ꓔꓯ ꓣꓱꓽ ꓙˍ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ꓾ ꓠꓴ ꓔꓯ ꓦ ꓡꓱ ꓢꓴ ꓐꓴˍ ꓐꓰ꓾ ꓠꓴ ꓟꓬꓱ ꓔꓯ ꓙꓳꓺ ꓒꓵꓽ ꓢꓴ ꓪꓴꓽ ꓪꓴꓽ ꓣꓳ ꓣꓳ ꓔꓯ ꓡꓯꓼ ꓫꓴ ꓖꓶ ꓝꓲꓸˍ ꓐꓰ꓾ ꓟꓲ ꓠꓯ ꓔꓯ ꓐꓬ ꓡꓰ ꓝꓲ ꓢꓴ ꓔꓯ ꓐꓬ ꓡꓰ ꓝꓲˍ ꓟ ꓬꓲ ꓙꓵꓹ ꓛꓲ ꓡꓺꓳ꓾ ꓐꓯˍ ꓡꓳ꓿ 19 ꓖꓳ ꓡꓱ ꓠꓬ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓟ ꓪꓴ-ꓢ ꓢꓲꓽ ꓫꓬ ꓦꓲ ꓒꓴ ꓗꓷꓳ꓿ ꓢꓲꓽ ꓫꓬ ꓦꓲ ꓠꓯꓸꓼ ꓗꓪ ꓟ ꓬꓲ ꓘꓶꓽ ꓫꓵꓽ ꓝꓲꓸ ꓖꓶ ꓔꓯˍ ꓟꓲ ꓟꓳˍ ꓡꓳ꓿ ꓖꓳ ꓗꓸ ꓠꓯꓸ ꓠꓬ ꓟꓲꓽ ꓐꓬꓱꓼ ꓤꓰꓽˍ ꓟ ꓐꓰ꓾ ꓫꓸ ꓕꓱˍ ꓟ ꓢꓯꓼˍ ꓐꓰ꓾ ꓟꓴꓽ ꓖꓴꓽ ꓑꓱꓹˍ ꓟ ꓙꓳˍ ꓡꓳ꓿ ꓟꓵꓽˍ ꓟꓲ ꓓꓵ ꓡ ꓢꓲ꓾ ꓪꓽ ꓢꓶꓽ ꓓꓽ ꓟ ꓦꓻ ꓩꓴ ꓡ ꓡꓳ꓿

ꓟꓳ ꓖꓶ ꓓꓴ 12

1 ꓖꓳ ꓗꓸ ꓠꓯꓸ ꓟꓴꓽ ꓗꓪ ꓗꓪ ꓢꓷꓸ ꓡꓰ ꓓꓴ ꓓꓽ ꓟ ꓕꓲ ꓟ ꓓꓳ ꓡ ꓡꓳ꓿ ꓤ ꓟꓶ ꓤ ꓕꓲ ꓣꓳ ꓠꓬ ꓟꓲꓽ ꓟꓲ ꓪꓸ ꓔ ꓢꓲ꓾ ꓦ ꓐ ꓠꓬ ꓬꓲ ꓛꓲ ꓒꓯꓹ ꓠꓯꓸ ꓘꓪ ꓓꓹ ꓢꓲ ꓠꓬꓲ꓾ ꓬꓲ ꓪꓴꓸ ꓓꓵ ꓗꓪ ꓗꓴ ꓤ ꓞꓲ ꓠꓬꓲꓽ ꓢꓶ ꓔꓶ ꓔꓸ ꓟ ꓪꓴꓸ ꓛꓴꓽ ꓕꓲ ꓚꓴꓸ ꓘꓳꓹ ꓔ ꓡꓳ꓿ 2 ꓬꓲ ꓖꓳ ꓓꓱ ꓗꓪ ꓤ ꓠꓱ ꓶꓻ ꓞꓹ ꓢꓲ꓾ ꓦꓵꓻ ꓠ ꓜꓲꓽ ꓫꓸ ꓙꓵ ꓠꓬꓲ ꓦꓵꓻ ꓡ ꓠꓹ ꓟ ꓘꓴ ꓔꓴ ꓡ ꓡꓳ꓿ 3 ꓝꓮꓲ ꓟꓴꓽ ꓗꓪ ꓗꓪ ꓢꓷꓸ ꓡꓰ ꓓꓴ ꓬꓲ ꓔꓱꓹ ꓬꓲ ꓕꓲ ꓟ ꓟꓳˍ ꓡꓳ꓿ ꓠꓬꓲ ꓠꓹ꓾ ꓡꓴꓽ ꓢꓲꓽ ꓓꓽ ꓟ ꓕꓲ ꓟ ꓔꓬ ꓢꓲ꓾ ꓪꓴꓸ ꓓꓵ ꓫꓵꓽ ꓟ꓾ ꓪꓴꓸ ꓛꓲ ꓞꓲ ꓗꓸ ꓙꓳ ꓢꓲ ꓠꓬꓲ꓾ ꓬꓲ ꓪꓴꓸ ꓓꓵ ꓗꓪ ꓠꓬ ꓙꓵꓽ ꓪꓴꓸ ꓛꓴꓽ ꓫꓵꓽ ꓚꓴꓸ ꓘꓳꓹ ꓔ ꓡꓳ꓿ 4 ꓬꓲ ꓟꓶꓸ ꓡꓰ ꓟꓴꓽ ꓗꓪ ꓗꓪ ꓟ ꓗꓴ ꓤ ꓢ ꓐꓱꓻ ꓕꓲꓽ ꓐꓱ ꓔꓯ ꓟꓲ ꓠꓯ ꓗꓪ ꓡꓷꓹ ꓞꓰ ꓩꓴ ꓗꓷˍ ꓡꓳ꓿ ꓖꓳ ꓡꓱ ꓢꓲ ꓡꓴꓽ ꓖꓳ ꓟ ꓠꓬ ꓤ ꓠꓱ ꓦꓵˍ ꓐꓰ ꓬꓰˍ ꓟ ꓤ ꓟꓶ ꓤ ꓖꓳ ꓕꓲ ꓣꓳ ꓬꓲ ꓤ ꓦꓵ ꓡ ꓕꓯ꓾ ꓜꓽ ꓗꓷ ꓠꓹ ꓟ ꓬꓲ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓡꓳ꓿ 5 ꓖꓳ ꓡꓱ ꓠꓬ ꓤ ꓟꓶ ꓤ ꓡꓰ ꓮ ꓐꓲ ꓕꓲ ꓣꓳ ꓦꓵꓻ ꓡ ꓡꓳ꓿ ꓤ ꓕꓱ ꓟ ꓠꓬ ꓧꓳ ꓓꓻ ꓡꓰ ꓞꓳ ꓫꓵꓽ ꓥ ꓕ ꓑꓳꓸ ꓔꓯ ꓙꓵꓽ ꓠꓹ ꓟ ꓥ ꓡꓳ꓿ ꓬꓲ ꓤ ꓔꓯ ꓠꓬ ꓪꓴ-ꓢˍ ꓐꓰ ꓬꓲ ꓙꓵꓽ ꓠꓬꓲꓸ ꓕꓲ ꓗꓪ ꓛꓵꓽ ꓓꓯ ꓙꓰˍ ꓡꓳ꓿ 6 ꓤ ꓟꓶ ꓤ ꓠꓽ ꓡꓲ ꓛꓲ ꓗꓪ ꓛꓰꓹ ꓙꓰˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓖꓳ ꓗꓪ ꓬꓲ ꓔꓯ ꓕꓲ ꓔꓴ ꓠꓬꓲꓽ ꓦꓬ ꓛꓳꓽ ꓞꓲ ꓠꓬꓲ ꓦꓵꓻ ꓙ ꓠꓹ ꓟ꓾ ꓪꓴ-ꓢ ꓡꓰ ꓬꓲ ꓐꓱ ꓶ ꓙꓽ ꓖꓶ ꓔ ꓟ ꓕꓲ ꓖ ꓙꓳˍ ꓡꓳ꓿ 7 ꓟꓴꓽ ꓗꓪ ꓗꓪ ꓠꓬ ꓟꓯꓼ ꓓꓶꓽ ꓡꓯꓽ ꓘꓳˍ ꓟ ꓙꓳˍ ꓡꓳ꓿ ꓟꓲ-ꓘꓷ-ꓡꓷˍ ꓐꓰ ꓬꓲ ꓝꓲ ꓓꓴ ꓐꓴ ꓠꓬ꓾ ꓡꓴꓽˍ ꓐꓰ ꓓꓶꓽ ꓡꓯꓽ ꓘꓳˍ ꓕꓯ꓾ ꓡꓴꓽˍ ꓐꓰ ꓬꓲ ꓝꓲ ꓓꓴ ꓐꓴˍ ꓟꓲ ꓬꓲ ꓪꓽ ꓔꓯ ꓔꓳꓹ ꓡ ꓡꓳ꓿ 8 ꓖꓳ ꓡꓱ ꓥ ꓟꓲ ꓡꓴꓽ ꓠꓬ ꓧꓪꓸ ꓡꓰ ꓟꓽ ꓘꓴꓻ ꓠꓬꓲ ꓟꓴꓽ ꓗꓪ ꓗꓪˍ ꓟꓲ ꓬꓲ ꓔꓬ ꓖꓴ ꓟꓽ ꓙꓳ ꓗꓷ ꓡꓰꓳ꓿ 9 ꓠꓲꓽ ꓪ ꓔꓲˍ ꓐꓰ ꓢ-ꓓꓯ ꓟꓬꓱ ꓔ ꓟ ꓮꓽ ꓠꓱ ꓟ ꓩꓴ꓾ ꓟꓵꓽ ꓗꓳꓹ ꓓꓵ ꓓꓵ ꓔꓯ ꓗꓶꓸ ꓢꓴ ꓡꓴꓽ ꓓꓽ ꓟ ꓖꓳ ꓟ ꓔꓯ ꓟꓲ ꓠꓯ ꓗꓪ ꓡꓳ ꓬꓯꓼ ꓩꓴ ꓗꓷꓳ꓿ ꓬꓲ ꓝꓲ ꓓꓴ ꓐꓴ ꓔꓯˍ ꓟꓲ ꓬꓲˍ ꓐꓰ ꓕꓲ ꓛꓳꓺꓼ ꓡꓳ ꓬꓯꓼ ꓩꓴ ꓗꓷꓳ꓿ 10 ꓝꓮꓲ ꓟꓴꓽ ꓗꓪ ꓗꓪ ꓐꓰ ꓥꓪ ꓑ ꓙꓽˍ ꓟ ꓢꓯꓼ ꓓꓽ ꓟ ꓠꓬ꓾ ꓣꓳ ꓪꓴ-ꓢ ꓬꓲ ꓚꓬꓴˍ ꓟ ꓐꓰ꓾ ꓪꓽ ꓠꓬꓲˍ ꓟ ꓐꓰ꓾ ꓗꓴꓷꓼˍ ꓐꓰ꓾ ꓬꓲ ꓙꓲ-ꓢꓴ ꓙꓵꓽ ꓪ ꓠꓬ ꓮ ꓟꓶ ꓓꓳ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓬꓲꓼ ꓥꓪ ꓠꓴꓽ ꓠꓬꓲ ꓐꓴ ꓔꓯ ꓟꓳꓼ ꓡꓳ ꓢ ꓘꓪ ꓪꓴ-ꓢ ꓟꓲꓽ ꓙꓬ ꓗꓪ ꓓꓰꓺ ꓢꓴ ꓔꓯ ꓠꓬ ꓟꓲ ꓠꓯ ꓗꓪ ꓡꓳ ꓬꓯꓼ ꓩꓴ ꓗꓷꓳ꓿ 11 ꓬꓲ ꓪꓽ ꓠꓬ ꓮ ꓣꓳ ꓤ ꓬꓲ ꓫꓵꓽˍ ꓐꓰ꓾ ꓬꓲ ꓐꓱ ꓶ ꓢꓷꓸ ꓙ ꓟꓳ ꓙ ꓘꓶꓽ ꓗꓪ ꓐꓰ ꓬꓲ ꓔꓯ ꓧꓪꓸ ꓡꓰꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓽ ꓚꓲ ꓛꓬ ꓢꓯꓼ ꓟꓬ ꓔꓯˍ ꓟꓲ ꓟꓽ ꓗꓹ ꓐꓼ ꓐꓼ꓾ ꓫꓵꓻ ꓗꓳ ꓑꓵ ꓢꓲ ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙˍ ꓡꓳ꓿ 12 ꓖꓳ ꓡꓱ ꓠꓬꓲ ꓟꓴꓽ ꓗꓪˍ ꓐꓰ ꓖꓳ ꓗꓪ ꓔꓬ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓗꓹ ꓛꓲ Gꓽ꓿ ꓟꓲ ꓠꓯˍ ꓐꓰ ꓬꓲꓻ ꓡꓴꓽ ꓐꓱ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓲꓽ ꓪ ꓔꓲ ꓠꓽ꓾ ꓬꓲ ꓔꓬ ꓪꓺˍ ꓟ ꓬꓲ ꓝꓲꓸ ꓠꓲꓸˍ ꓟ ꓢꓷꓸˍ ꓠꓬꓲ꓾ ꓠꓲꓹ ꓟ ꓦꓶꓻ ꓦꓶˍ ꓡꓰꓽ ꓠꓴ ꓪꓽ ꓔꓬ ꓗꓪ ꓬꓯꓼ ꓡꓺꓳ꓾ ꓐꓰ ꓐꓯˍ ꓟ ꓑ ꓙꓽˍ ꓡꓳ꓿ 13 ꓡꓴꓽ ꓠꓬ ꓚꓲ ꓛꓬ ꓔꓯ ꓟꓲ ꓠꓯ ꓗꓪ ꓡꓳ ꓬꓯꓼ ꓩꓴ ꓗꓷ ꓟ ꓔꓯ ꓚꓬꓹ ꓪ ꓡꓰ ꓠꓬ꓾ ꓮ ꓐꓲ ꓤ ꓦꓵꓻ ꓢꓴ ꓤꓽ ꓟꓶꓽ ꓤ ꓖꓳ ꓕꓲ ꓣꓳ ꓔꓯ ꓗꓸ ꓧꓪ ꓠꓹ ꓟ ꓖꓼ ꓙꓰˍ ꓡꓳ꓿ 14 ꓤ ꓟꓶ ꓤ ꓠꓬ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓐꓬꓱꓻ ꓙꓰ ꓢꓲ ꓩꓴ ꓔꓯˍ ꓐꓰ ꓑꓬ ꓠꓬꓹ ꓠꓹ ꓟ꓾ ꓬꓲ ꓔꓯ ꓙꓱꓻ ꓓꓽ ꓟ ꓓꓴꓻ ꓡꓯꓼ ꓠꓬꓲꓽ ꓐꓽ ꓖꓶ ꓔ ꓡꓳ꓿ ꓖꓳ ꓗꓪ ꓬꓲ ꓔꓯ ꓕꓲ ꓝꓲꓸˍ ꓐꓰ ꓠꓬꓲꓽ ꓝꓲꓸˍ ꓐꓰ ꓐꓶꓽ ꓝꓲꓸ ꓦꓵꓻ ꓙꓽˍ ꓡꓳ꓿ 15 ꓖꓳ ꓡꓱ ꓠꓬ ꓩꓴ ꓠꓽ ꓬꓲꓻ ꓙꓬ ꓡꓰ ꓤ ꓟꓶ ꓤ ꓔꓯ ꓐꓴꓻ ꓙꓰ ꓝꓲ ꓠꓹ ꓟ ꓤ ꓟꓶ ꓤ ꓗꓸ ꓠꓯꓸ ꓢꓲ ꓗꓪ꓾ ꓬꓲ ꓟꓷꓽ ꓠꓷꓹ ꓗꓪ ꓐꓰ ꓬꓲꓻ ꓙꓬ ꓡꓳꓻ ꓕꓲ ꓡꓳꓻ ꓒꓰꓼ ꓓꓳ ꓩꓴ ꓗꓷˍ ꓡꓳ꓿ 16 ꓖꓳ ꓡꓱ ꓥ ꓟꓲ ꓟꓲ ꓠꓯ ꓠꓬ ꓤ ꓟꓶ ꓤ ꓔꓯ ꓬꓰ ꓙ ꓠꓹ ꓟ ꓟꓷꓽ ꓠꓷꓹ ꓧꓽ ꓢꓲ꓾ ꓡꓴꓽ ꓟꓷꓽ ꓠꓷꓹ ꓗꓪ ꓐꓰ ꓒꓰꓼ ꓓꓳ ꓡ ꓟ ꓬꓲꓻ ꓙꓬ ꓔꓯ ꓓꓳꓻ ꓖꓴ ꓡꓰ ꓝꓲˍ ꓡꓳ꓿ 17 ꓖꓳ ꓡꓱ ꓠꓬꓲ ꓡꓴꓽ ꓡꓰ ꓤ ꓟꓶ ꓤ ꓔꓯ ꓠꓲꓹ ꓟ ꓦꓶꓻ ꓔꓴ ꓡ ꓢꓲ꓾ ꓜꓰ ꓞꓹ ꓟ ꓬꓲ ꓞꓲ ꓤ ꓡꓯꓹ ꓤ꓾ ꓪꓴ-ꓢ ꓕꓵꓼ ꓪ ꓒꓵꓽ ꓛꓳ ꓢꓲ ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙ ꓘꓶ ꓔꓯ ꓣꓴ ꓔ ꓢꓴ ꓔꓯ ꓓꓶꓽ ꓡꓯꓽ ꓘꓳ ꓙꓰˍ ꓡꓳ꓿ ꓡꓴꓽ ꓠꓬ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓟ ꓧꓶꓽ ꓚꓲꓺ ꓗꓪ ꓦꓰꓼ ꓞꓹ ꓡꓳ꓿

ꓟꓳ ꓖꓶ ꓓꓴ 13

1 ꓖꓳ ꓕꓯ ꓬꓲ ꓪꓴꓸ ꓛꓲ ꓞꓲ ꓗꓸ꓾ ꓬꓲ ꓪꓴꓸ ꓓꓵ ꓫꓵꓽ ꓟ ꓙꓳ ꓢꓲ꓾ ꓪꓴꓸ ꓛꓲ ꓗꓪ ꓪꓴꓸ ꓛꓴꓽ ꓞꓲ ꓚꓴꓸ ꓙꓳ ꓢꓲ ꓠꓬꓲ꓾ ꓪꓴꓸ ꓓꓵ ꓫꓵꓽ ꓟ ꓗꓪ ꓠꓬ ꓟꓽ ꓚꓰꓼ ꓟ ꓙꓱꓽˍ ꓟ ꓟꓬꓱ ꓙꓳˍ ꓟ ꓓꓴꓽ ꓪꓴꓻ ꓕꓲ ꓟ ꓬꓲꓻ ꓡꓴꓽ ꓐꓱ ꓗꓪ ꓐꓰ ꓓꓳ ꓡ ꓟ ꓥꓪ ꓟꓳˍ ꓡꓳ꓿ 2 ꓥꓪ ꓡꓳꓸ ꓟꓳˍ ꓟ ꓓꓴꓽ ꓪꓴꓻ ꓠꓬ꓾ ꓡꓽ ꓪꓴꓸ ꓓꓴꓽˍ ꓡꓰ ꓐꓰ ꓗꓹ ꓢꓲ꓾ ꓬꓲ ꓛꓲ ꓒꓯꓹ ꓠꓬ ꓪꓳꓻ ꓛꓲ ꓒꓯꓹˍ ꓡꓰ ꓐꓰ꓾ ꓬꓲ ꓟꓷꓽ ꓠꓷꓹ ꓠꓬ ꓡꓽ ꓢꓯꓹ ꓟꓷꓽ ꓠꓷꓹ ꓡꓰ ꓐꓰ ꓗꓹ ꓡꓳ꓿ ꓡꓴꓽ ꓠꓬ ꓬꓲ ꓚꓲ ꓛꓬ ꓪꓽ ꓠꓬꓲˍ ꓟ ꓐꓰ꓾ ꓬꓲ ꓙꓵꓽ ꓠꓬꓲꓸ ꓕꓲˍ ꓐꓰ꓾ ꓙꓵꓽ ꓪ ꓓ ꓟ ꓓꓴꓽ ꓪꓴꓻ ꓖꓳ ꓟ ꓔꓯ ꓖꓶˍ ꓡꓳ꓿ 3 ꓬꓲ ꓪꓴꓸ ꓓꓵ ꓫꓵꓽ ꓟ ꓗꓪ ꓟ ꓕꓲ ꓟ ꓠꓬ꓾ ꓫꓵꓻ ꓠ ꓛꓲ ꓠꓻ ꓡꓰˍ ꓟ ꓡꓰ ꓐꓰ ꓗꓹ ꓟ ꓔꓯ ꓥꓪ ꓟꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓫꓵꓻ ꓠ ꓛꓲ ꓠꓻ ꓓꓴꓻ ꓓꓴ ꓞꓹ ꓟ ꓪꓴꓸ ꓓꓵ ꓖꓳ ꓟ ꓠꓬ ꓓꓻ ꓡꓰꓳ꓿ ꓟꓵꓽ ꓗꓳꓹ ꓓꓵ ꓓꓵ ꓢꓴ ꓠꓬ ꓓꓵꓽ ꓙꓽ ꓟꓶ ꓢꓲ ꓓꓴꓽ ꓪꓴꓻ ꓖꓳ ꓟ ꓔꓯ ꓛꓳ ꓙꓰˍ ꓡꓳ꓿ 4 ꓡꓴꓽ ꓬꓲ ꓚꓲ ꓛꓬ ꓙꓵꓽ ꓪ ꓠꓬ ꓓꓴꓽ ꓪꓴꓻ ꓔꓯ ꓖꓶ ꓗꓷ ꓠꓬꓲ꓾ ꓟꓵꓽ ꓗꓳꓹ ꓓꓵ ꓓꓵ ꓢꓴ ꓠꓬ ꓡꓴꓽ ꓔꓯ ꓪꓴꓸ ꓓꓵ ꓕꓱꓼˍ ꓡꓳ꓿ ꓓꓴꓽ ꓪꓴꓻ ꓔꓯˍ ꓟꓲ ꓪꓴꓸ ꓓꓵ ꓕꓱꓼ ꓢꓲ꓾ ꓓꓴꓽ ꓪꓴꓻ ꓕꓱ ꓟ ꓔꓯ ꓮꓽ ꓟ ꓔꓯ ꓐ ꓡ ꓡ? ꓮꓽ ꓟ ꓬꓲ ꓔꓯ ꓓꓶꓽ ꓡꓯꓽ ꓘꓳ ꓐ ꓡ ꓡ?꓾ ꓐꓯˍ ꓡꓳ꓿ 5 ꓝꓮꓲ ꓠꓬ ꓐꓯ ꓟꓽ ꓚꓰꓼ ꓟ ꓐꓯˍ ꓟ ꓐꓰ ꓘꓶꓽ ꓘꓹ ꓘꓶꓽ ꓫꓸ ꓕꓱˍ ꓟ ꓟꓷꓽ ꓠꓷꓹ ꓬꓲ ꓔꓯ ꓖꓶ ꓔ ꓡꓳ꓿ ꓦꓻ ꓐ ꓡꓲ ꓞꓲ ꓠꓬꓲꓽ ꓟ ꓬꓲ ꓙꓵꓽ ꓬꓲ ꓟꓴ ꓙꓵꓽ ꓠꓹ ꓟ ꓙꓵꓽ ꓪꓽˍ ꓟꓲ ꓬꓲ ꓔꓯ ꓖꓶ ꓔ ꓡꓳ꓿ 6 ꓓꓴꓽ ꓪꓴꓻ ꓠꓬ ꓬꓲ ꓟꓷꓽ ꓠꓷꓹ ꓒꓴ ꓢꓲ꓾ ꓪꓴ-ꓢˍ ꓐꓰ ꓪꓴ-ꓢ ꓬꓲ ꓟꓬꓱˍ ꓐꓰ꓾ ꓪꓴ-ꓢ ꓦꓲˍ ꓐꓰ ꓖꓳ ꓗꓪ ꓔꓬ ꓢꓴ ꓐꓴ ꓔꓯ ꓟꓽ ꓚꓰꓼ ꓟ ꓙꓱꓽˍ ꓡꓳ꓿ 7 ꓝꓮꓲ ꓪꓴ-ꓢ ꓦ ꓡꓱ ꓢꓴ ꓐꓴˍ ꓐꓰ ꓓꓶꓽ ꓡꓯꓽ ꓘꓳ ꓢꓲ꓾ ꓧꓪꓸ ꓡꓰ ꓠꓹ ꓟˍ ꓟꓲ ꓬꓲ ꓔꓯ ꓖꓶ ꓔ ꓡꓳ꓿ ꓞꓳ ꓫꓵꓽ ꓞꓳ ꓙꓰˍ ꓐꓰ꓾ ꓑ ꓫꓬꓼ ꓑ ꓟꓲˍ ꓐꓰ꓾ ꓥꓳꓽ ꓫꓵꓽ ꓥꓳ ꓙꓰˍ ꓐꓰ꓾ ꓗꓴꓷꓼ ꓫꓵꓽ ꓗꓴꓷꓼ ꓙꓰꓽ ꓥ ꓕ ꓑꓳꓸ ꓔꓯ ꓙꓵꓽ ꓠꓹ ꓟ ꓙꓵꓽ ꓪꓽˍ ꓟꓲ ꓬꓲ ꓔꓯ ꓖꓶꓽ ꓔ ꓡꓳ꓿ 8 ꓝꓮꓲ ꓠꓬ ꓟꓵꓽ ꓔꓶꓺ ꓟꓲ ꓔꓶ ꓕꓯˍ ꓡꓰ ꓢꓰꓼ ꓗꓷ ꓠꓬꓲ ꓟ ꓮ ꓣꓳ ꓤ ꓬꓲ ꓢꓯꓼ ꓟꓬ ꓕꓳ ꓶ ꓗꓪ ꓟꓬꓱ ꓟꓽ ꓐꓳ ꓔ ꓟ꓾ ꓟꓲ ꓠꓯ ꓞꓳ ꓤ ꓥ ꓕ ꓑꓳꓸ ꓠꓬ ꓬꓲ ꓔꓯ ꓪꓴꓸ ꓓꓵ ꓕꓱꓼˍ ꓥꓳ꓿ 9 ꓠꓸ ꓑꓳ ꓙꓳ ꓢꓴ ꓠꓬ ꓠ ꓠꓹ ꓝꓲ꓿ 10 ꓡꓳꓽ ꓔꓯꓹ ꓙꓰ ꓠ ꓗꓹ ꓢꓴ ꓔꓯ ꓠꓽ ꓡꓳꓽ ꓔꓯꓹ ꓙꓰˍ ꓥꓳ꓿ ꓮꓸ ꓕꓽ ꓡꓰ ꓢꓰꓼ ꓠ ꓗꓹ ꓢꓴ ꓔꓯˍ ꓟꓲ ꓢꓰꓼ ꓗꓷˍ ꓥꓳ꓿ ꓦ ꓡꓱ ꓢꓴ ꓐꓴ ꓜꓲꓽ ꓘꓴ ꓠꓲꓹˍ ꓐꓰ ꓙꓵꓻ ꓠꓲꓹ ꓙꓳ ꓠ ꓗꓹ ꓟ ꓠꓬ ꓕꓱ ꓗꓪ ꓥꓳ꓿ 11 ꓝꓮꓲ ꓓꓴꓽ ꓪꓴꓻ ꓬꓲ ꓔꓱꓹ ꓬꓲ ꓕꓲ ꓟ ꓟꓲ ꓠꓯ ꓗꓪ ꓐꓰ ꓓꓳ ꓡ ꓟ ꓔꓯ ꓥꓪ ꓟꓳˍ ꓢꓰꓽ ꓡꓳ꓿ ꓬꓲ ꓠꓬ ꓮ ꓣꓳ ꓑˍ ꓡꓰ ꓐꓰ ꓪꓴꓸ ꓛꓲ ꓠꓬꓲꓽ ꓗꓸ ꓙꓳ ꓢꓲ꓾ ꓡꓴꓽˍ ꓡꓰ ꓐꓰ ꓫꓸ ꓕꓱˍ ꓡꓳ꓿ 12 ꓬꓲ ꓠꓬ ꓓꓴꓽ ꓪꓴꓻ ꓬꓲ ꓪꓴꓸ ꓕꓲ ꓟ ꓟ ꓬꓲ ꓙꓵꓽ ꓪ ꓮꓽ ꓙꓵ ꓙꓳ ꓢꓲ꓾ ꓓꓴꓽ ꓪꓴꓻ ꓬꓲ ꓪꓴꓸ ꓕꓲ ꓟ ꓟ ꓟꓲꓽ ꓙꓬ ꓗꓪ ꓙꓵꓽ ꓪꓽ ꓖꓳ ꓟ ꓮꓽ ꓙꓵ ꓣꓱꓽˍ ꓡꓳ꓿ ꓝꓮꓲ ꓠꓬ ꓟꓲ ꓠꓯˍ ꓐꓰ ꓟꓲ ꓠꓯ ꓗꓪ ꓔꓬ ꓢꓴ ꓔꓯ ꓠꓬ꓾ ꓫꓵꓻ ꓠ ꓛꓲ ꓠꓻ ꓓꓴ ꓓꓴ ꓡꓰ ꓢꓲ ꓓꓻ ꓡꓰ ꓟ ꓓꓴꓽ ꓪꓴꓻ ꓬꓲ ꓪꓴꓸ ꓕꓲ ꓟ ꓔꓯ ꓪꓴꓸ ꓓꓵ ꓕꓱꓼ ꓝꓲˍ ꓡꓳ꓿ 13 ꓝꓮꓲ ꓠꓬ ꓬꓲ ꓡꓰ ꓞꓳ ꓤ ꓟꓲꓽ ꓙꓬ ꓗꓪ ꓢꓷꓸ ꓡꓰ ꓓꓴˍ ꓐꓰ ꓓꓵꓽ ꓙꓽ ꓟꓶ ꓓꓴ ꓓꓽ ꓟ ꓬꓰ ꓢꓲ꓾ ꓟꓴꓽ ꓗꓪ ꓗꓪ ꓐꓰ ꓟꓲ ꓠꓯ ꓗꓪ ꓮꓸ ꓔꓳꓸ ꓬꓯꓼ ꓡ ꓝꓲˍ ꓡꓳ꓿ 14 ꓓꓴꓽ ꓪꓴꓻ ꓬꓲ ꓪꓴꓸ ꓕꓲ ꓟ ꓟꓲꓽ ꓙꓬ ꓗꓪ ꓢꓷꓸ ꓡꓰ ꓓꓴ ꓬꓰ ꓝꓲ ꓠꓹ ꓟ ꓪꓽ ꓠꓬꓲˍ ꓟ ꓬꓲ ꓔꓯ ꓖꓶ ꓗꓷ ꓠꓬꓲ꓾ ꓬꓲ ꓡꓰ ꓟꓲ ꓠꓯ ꓗꓪ ꓔꓬ ꓢꓴ ꓔꓯ ꓟꓸ ꓒꓬꓹ ꓢꓲ꓾ ꓮꓸ ꓕꓽ ꓡꓰ ꓠꓻ ꓓꓴꓻ ꓡꓰ ꓝꓲˍ ꓟꓲ ꓢꓯꓸ ꓔꓬ ꓢꓰꓽ ꓟ ꓓꓴꓽ ꓪꓴꓻ ꓐꓬꓱꓽ ꓕꓲ ꓟ ꓫꓬꓹ꓾ ꓐꓰ ꓬꓲ ꓪꓽ ꓔꓯ ꓐꓯˍ ꓡꓳ꓿ 15 ꓖꓳ ꓡꓱ ꓠꓬ ꓓꓴꓽ ꓪꓴ ꓐꓬꓱꓽ ꓖꓳ ꓟ ꓔꓯ ꓢꓯꓼ ꓦ ꓝꓲ ꓢꓲ꓾ ꓫꓸˍ ꓟꓲ ꓫꓸ ꓕꓱ ꓝꓲ ꓢꓲ ꓠꓬꓲ꓾ ꓬꓲ ꓐꓬꓱꓽ ꓖꓳ ꓟ ꓔꓯ ꓪꓴꓸ ꓓꓵ ꓟꓽ ꓕꓱꓼ ꓢꓴ ꓮꓽ ꓟ ꓔꓯˍ ꓟꓲ ꓢꓰꓼ ꓗꓷ ꓠꓹ ꓟ ꓙꓵꓽ ꓪꓽ ꓬꓲ ꓔꓯ ꓖꓶˍ ꓡꓳ꓿ 16 ꓬꓲ ꓡꓰ ꓪꓴꓽ ꓪꓴ ꓣꓳ ꓣꓳ꓾ ꓞꓳ ꓐꓳ ꓞꓳ ꓫꓸ ꓔꓯˍ ꓟꓲ꓾ ꓚꓳ ꓪꓴꓸ ꓚꓳ ꓑꓸ ꓔꓯˍ ꓟꓲ꓾ ꓡꓯꓼ ꓙ ꓕꓲ ꓐꓽ ꓗꓪ꓾ ꓥ ꓠꓬ ꓥꓷꓼ ꓛꓲ ꓗꓪ꓾ ꓟꓽ ꓓ ꓟꓽ ꓞꓽ ꓬꓲ ꓢꓷꓸ ꓡꓰ ꓓꓴ ꓕꓲ ꓟ ꓔꓳꓹ ꓠꓷꓼ ꓝꓲ ꓢꓲ꓾ 17 ꓮꓽ ꓟ ꓥ ꓟꓲ ꓓꓴꓽ ꓪꓴ ꓬꓲ ꓟꓬꓱ꓾ ꓥ ꓠꓬ ꓬꓲ ꓵ ꓟꓬꓱ ꓬꓲ ꓢꓷꓸ ꓡꓰ ꓓꓴ ꓟꓽ ꓙꓳ ꓐꓷˍ ꓠꓬ꓾ ꓪꓴꓽ ꓟꓽ ꓓ꓾ ꓪꓴꓻ ꓟꓽ ꓓ꓾ ꓐꓰ ꓬꓰ ꓔ ꓡꓳ꓿ 18 ꓕꓱ ꓗꓪ ꓠꓬ ꓙꓽ ꓗꓴꓸ ꓠꓲꓹ ꓙꓳ ꓠꓯꓹ ꓡꓳ꓿ ꓙꓽ ꓜꓲꓼ ꓠꓲꓹ ꓙꓳ ꓢꓴ ꓠꓬ ꓓꓴꓽ ꓪꓴ ꓬꓲ ꓵ ꓟꓬꓱ ꓔꓯ ꓢꓪꓸ ꓠꓬꓲ ꓠꓯꓹ ꓡꓳ꓿ ꓕꓱ ꓟ ꓠꓽ ꓞꓳ ꓤ ꓕꓲ ꓣꓳ ꓟꓬꓱ ꓬꓲ ꓛꓲ ꓥ ꓢꓲ꓾ ꓬꓲ ꓵ ꓟꓬꓱ ꓠꓬ꓾ ꓛꓳꓼ ꓦꓬ ꓛꓳꓼ ꓞꓲ ꓛꓳꓼ (666 ) ꓥ ꓡꓳ꓿

ꓟꓳ ꓖꓶ ꓓꓴ 14

1 ꓖꓳ ꓗꓸ ꓠꓯꓸ ꓜꓲ-ꓬꓴ ꓪ ꓚꓲ ꓗꓪ ꓮ ꓣꓳ ꓤ ꓦꓰꓼ ꓞ ꓢꓲ ꓬꓲ ꓪꓽ ꓥꓷꓼ ꓛꓲ ꓗꓪ꓾ ꓬꓲ ꓟꓬꓱˍ ꓐꓰ ꓬꓲ ꓐꓹ ꓐ ꓟꓬꓱ ꓐꓳ ꓔ ꓢꓴ꓾ ꓕꓲ ꓫꓬꓹ ꓡꓲ ꓟꓶꓽ ꓡꓲ ꓔꓴ ꓣꓳ ꓠꓬ ꓬꓲˍ ꓐꓰ ꓕꓲ ꓪꓺꓼ ꓔꓬ ꓟ ꓔꓯ ꓥꓪ ꓟꓳˍ ꓡꓳ꓿ 2 ꓝꓮꓲ ꓟꓴꓽ ꓗꓪ ꓗꓪ ꓐꓰ ꓥꓪ ꓑ ꓙꓽˍ ꓟ ꓢꓯꓼ ꓠꓬ꓾ ꓬꓲꓻ ꓙꓬ ꓬꓲꓻ ꓞꓰꓻ ꓓꓽ ꓟ ꓢꓯꓼˍ ꓐꓰ ꓟꓴꓽ ꓖꓴ ꓑꓱꓹˍ ꓟ ꓢꓯꓼ ꓓꓽ ꓟ ꓡꓰ ꓐꓰ ꓗꓹ ꓢꓲ꓾ ꓛꓲ ꓐꓶ ꓛꓰꓹ ꓢꓴ ꓡꓰ ꓗꓹ ꓛꓲꓽˍ ꓟ ꓢꓯꓼ ꓛꓰꓹ ꓔꓬ ꓟ ꓡꓰ ꓐꓰ ꓗꓹ ꓡꓳ꓿ 3 ꓬꓲ ꓪꓽ ꓠꓬ ꓙꓵꓽ ꓠꓬꓲꓸ ꓕꓲ ꓟꓲꓽ ꓙꓬˍ ꓐꓰ꓾ ꓢꓯꓸ ꓫꓵ ꓡꓲ ꓟ ꓐꓰ ꓞꓳ ꓪꓴ ꓞꓳ ꓔꓲ ꓐꓴ ꓟꓲꓽ ꓙꓬ ꓗꓪ ꓟꓴꓽ ꓖꓪ ꓫꓵꓼ ꓕꓲ ꓚꓱꓹ ꓖꓪˍ ꓡꓳ꓿ ꓟꓲ ꓠꓯ ꓗꓪ ꓐꓰ ꓫꓴꓹ ꓓꓳ ꓡ ꓗꓷ ꓟ ꓖꓳ ꓕꓲ ꓫꓬꓹ ꓡꓲ ꓟꓶꓽ ꓡꓲ ꓔꓴ ꓣꓳ ꓟ ꓟꓽ ꓥ ꓠꓬ ꓮꓽ ꓟˍ ꓟꓲ ꓟꓴꓽ ꓖꓪ ꓕꓱ ꓟ ꓢꓳ ꓟꓶꓻ ꓟꓽ ꓐ ꓡ꓿ 4 ꓕꓱ ꓕꓲ ꓧꓳꓽ ꓠꓬ ꓤꓽ ꓖꓴ ꓡꓯꓸ ꓚꓵ ꓥ ꓢꓲ꓾ ꓤ ꓟꓶ ꓤˍ ꓐꓰ ꓟꓽ ꓬꓲꓼ ꓔꓸ ꓠꓬꓲ ꓢꓴˍ ꓐꓰ꓾ ꓟꓽ ꓫꓬꓻ ꓟ ꓟꓽ ꓠꓷꓼ ꓡꓰ ꓠꓬꓲ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓢꓲ ꓬꓲ ꓪꓽ ꓠꓬ ꓮ ꓣꓳ ꓤ ꓮ ꓡꓲ ꓗꓪ ꓙꓰˍ ꓟꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓬꓲ ꓪꓽ ꓔꓯ ꓠꓬ ꓞꓳ ꓤ ꓗꓳ ꓡꓳ ꓗꓪ ꓐꓰ ꓫꓴꓹ ꓔꓯꓹ ꓡ ꓟ ꓥ ꓢꓲ꓾ ꓪꓴ-ꓢ ꓐꓰ ꓮ ꓣꓳ ꓤ ꓐꓱ ꓶ ꓜꓻ ꓪꓴꓸ ꓥ ꓡꓳ꓿ 5 ꓬꓲ ꓪꓽ ꓠꓬ ꓓꓰ ꓖꓴ ꓟꓽ ꓙꓳ ꓢꓴ ꓥ ꓢꓲ ꓮ ꓕꓯˍ ꓟꓲ ꓟꓽ ꓗꓶꓸ ꓠꓬꓲ ꓢꓴ ꓐꓴ ꓥ ꓡꓳ꓿ 6 ꓟꓴꓽ ꓗꓪ ꓝꓲ ꓓꓴ ꓬꓲ ꓔꓱꓹ ꓬꓲ ꓕꓲ ꓣꓳ ꓠꓬ꓾ ꓟꓲ ꓠꓯ ꓗꓪ ꓔꓬ ꓢꓴˍ ꓐꓰ꓾ ꓗꓴꓷꓼ ꓫꓵꓽ ꓗꓴꓷꓼ ꓙꓰꓽ ꓮꓽ ꓙꓵˍ ꓐꓰ꓾ ꓞꓳ ꓫꓵꓽ ꓞꓳ ꓙꓰˍ ꓐꓰ꓾ ꓥꓳꓽ ꓫꓵꓽ ꓥꓳꓽ ꓙꓰˍ ꓐꓰ꓾ ꓑ ꓫꓬꓼ ꓑ ꓟꓲ ꓥ ꓕ ꓑꓳꓸ ꓔꓯ ꓚ ꓟꓸ ꓖꓶ ꓠꓹ ꓟ꓾ ꓕꓲ ꓞꓲꓼ ꓕꓲ ꓑ ꓟ ꓶꓼ ꓓꓳ ꓫꓱꓹ ꓓꓳ ꓔꓯꓹ ꓔ ꓢꓲ ꓟꓴꓽ ꓗꓪ ꓔꓱ ꓫꓵ ꓗꓪ ꓐꓬꓱꓻ ꓔꓬ ꓟ ꓔꓯ ꓥꓪ ꓟꓳˍ ꓢꓰꓽ ꓡꓳ꓿ 7 ꓬꓲ ꓠꓬ ꓢꓯꓼ ꓓꓽ ꓟ ꓡꓰ꓾ ꓪꓴ-ꓢ ꓔꓯ ꓙꓳ ꓒꓵ꓾ ꓬꓲ ꓔꓯ ꓟꓬꓱ ꓓꓳꓽ ꓖꓶ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓐꓯ ꓟꓴ ꓘꓶꓽ ꓙꓵꓹ ꓛꓲ ꓡꓺꓳ꓿ ꓟꓴꓽ ꓗꓪ ꓟꓲ ꓠꓯˍ ꓐꓰ꓾ ꓬꓲꓻ ꓡꓴꓽ ꓐꓱˍ ꓐꓰ꓾ ꓬꓲꓻ ꓙꓬ ꓬꓲꓸ ꓝꓳꓹ ꓟꓶ ꓔꓯ ꓚꓰꓼ ꓢꓴ ꓪꓴ-ꓢ ꓔꓯ ꓪꓴꓸ ꓓꓵ ꓕꓱ꓾ ꓐꓯˍ ꓡꓳ꓿ 8 ꓖꓳ ꓟ ꓗꓸ ꓠꓯꓸ ꓟꓴꓽ ꓗꓪ ꓝꓲ ꓓꓴ ꓠꓬꓲꓽ ꓣꓳ ꓕꓲ ꓣꓳ ꓐꓬꓱꓻ ꓛꓳ ꓡ ꓢꓲ ꓞꓳ ꓫꓵꓽ ꓐꓴ ꓔꓯ꓾ ꓟꓽ ꓢꓲꓽ ꓟꓽ ꓫꓬ ꓟ ꓦꓯꓸ ꓠꓲꓹ ꓙꓵꓽˍ ꓟ ꓙꓲ ꓒꓶꓽ ꓓꓳ ꓝꓲˍ ꓟ ꓐ-ꓐꓲ-ꓡꓶ ꓓꓽ ꓟ ꓠꓬ꓾ ꓐꓱꓽ ꓡꓰꓳ꓾ ꓐꓱꓽ ꓡꓰꓳ꓾ ꓐꓯˍ ꓡꓳ꓿ 9 ꓖꓳ ꓗꓸ ꓠꓯꓸ ꓟꓴꓽ ꓗꓪ ꓝꓲ ꓓꓴ ꓢ ꓣꓳ ꓕꓲ ꓣꓳ ꓡ ꓢꓲ ꓢꓯꓼ ꓓꓽ ꓟ ꓡꓰ꓾ ꓓꓴꓽ ꓪꓴˍ ꓐꓰ ꓬꓲ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓥꓷꓼ ꓛꓲˍ ꓐꓰ ꓡꓯꓼ ꓒꓯꓹ ꓗꓪ ꓬꓲꓸ ꓔꓳꓹ ꓠꓷꓼ ꓓꓴ ꓔꓳꓹ ꓠꓷꓼ ꓟꓶ ꓡꓰ ꓢꓴ ꓮꓽ ꓟˍ ꓟꓲ꓾ 10 ꓪꓴ-ꓢ ꓦꓶ ꓠꓲꓹ ꓡꓴ ꓗꓶꓸ ꓗꓪ꓾ ꓬꓲꓻ ꓙꓬ ꓟꓽ ꓦꓱꓹ ꓔ ꓟ ꓬꓲ ꓠꓲꓹ ꓛꓰˍ ꓟ ꓙꓲ ꓒꓶꓽ ꓓꓳ ꓪꓺˍ ꓥꓳ꓿ ꓝꓮꓲ ꓬꓲ ꓪꓽ ꓠꓬ ꓢꓲꓽ ꓫꓬˍ ꓟ ꓟꓴꓽ ꓗꓪ ꓝꓲ ꓓꓴ ꓐꓴ ꓟꓲꓽ ꓙꓬˍ ꓐꓰ ꓮ ꓣꓳ ꓤ ꓟꓲꓽ ꓙꓬ ꓗꓪ꓾ ꓐꓬ ꓞꓹ ꓟ ꓮꓸ ꓔꓳꓸ ꓡꓳ ꓐ ꓗꓪ ꓫꓸ ꓙꓵˍ ꓥꓳ꓿ 11 ꓖꓳ ꓡꓱ ꓢꓲ ꓓꓴꓽ ꓪꓴˍ ꓐꓰ꓾ ꓬꓲ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓬꓲ ꓟꓬꓱ ꓔꓳꓹ ꓠꓷꓼ ꓓꓴ ꓟꓶ ꓡꓰ ꓢꓴ ꓐꓴ ꓔꓯ ꓫꓸ ꓙꓵ ꓝꓲˍ ꓟ ꓟꓴꓽ ꓘꓴꓽ ꓠꓬ꓾ ꓮ ꓕꓯˍ ꓟꓲ ꓓꓯ ꓙꓰˍ ꓥꓳ꓾ ꓬꓲ ꓪꓽ ꓠꓬ ꓟꓳꓼ ꓡꓳ ꓢ ꓘꓪ ꓪꓴꓽ ꓧꓶ ꓠꓽ ꓪ ꓟꓽ ꓓ꓾ ꓐꓯˍ ꓡꓳ꓿ 12 ꓪꓴ-ꓢ ꓕꓵꓼ ꓪ ꓒꓵꓽ ꓛꓳˍ ꓟ ꓐꓰ ꓬꓰ-ꓢꓴ ꓔꓯ ꓙꓵˍ ꓟ ꓗꓪ ꓦ ꓡꓱ ꓐꓳˍ ꓟ ꓦ ꓡꓱ ꓢꓴ ꓐꓴ ꓬꓲ ꓪꓽ ꓜꓲꓽ ꓘꓴ ꓠꓲꓹ ꓙꓳ ꓠ ꓗꓹ ꓟ ꓠꓬ ꓕꓱ ꓗꓪ ꓥꓳ꓿ 13 ꓖꓳ ꓗꓸ ꓠꓯꓸ ꓟꓴꓽ ꓗꓪ ꓗꓪ ꓐꓰ ꓢꓯꓼ ꓕꓲ ꓟ ꓡꓰ꓾ ꓕꓱ ꓡꓱ ꓖꓳ ꓑꓳ ꓢꓲ ꓒꓽ ꓠꓯꓸꓼ ꓗꓪ ꓫꓵꓻ ꓢꓴ ꓠꓽ ꓶ ꓙꓳ ꓫꓱꓹ ꓙꓳˍ ꓥꓳ꓾ ꓐꓰ ꓐꓳ ꓔ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ ꓢꓲ-ꓫꓬ-ꓟ-ꓦˍ ꓟꓲ꓾ ꓥ ꓡꓳ꓾ ꓬꓲ ꓪꓽ ꓠꓬ ꓚꓲ ꓛꓬ ꓟꓬꓱꓽ ꓗꓪ ꓐꓰ ꓪꓴꓽ ꓧꓶ ꓠꓽ ꓟꓶˍ ꓥꓳ꓿ ꓬꓲ ꓪꓽ ꓢꓯꓼ ꓕꓵꓼ ꓪꓴꓽ ꓧꓶ ꓗꓷ ꓟ ꓟꓬꓱꓽˍ ꓟꓲ ꓬꓲ ꓪꓽ ꓔꓯ ꓛꓳ ꓞꓹ ꓡꓳ꓾ ꓐꓯˍ ꓡꓳ꓿ 14 ꓖꓳ ꓗꓸ ꓠꓯꓸ ꓥꓪ ꓟꓲꓽ ꓙꓬ ꓗꓪ ꓟ ꓟꓴ ꓗꓴꓸ ꓒꓴ ꓕꓲ ꓘꓴꓸ ꓗꓪ꓾ ꓡꓽ ꓞꓳ ꓮ ꓐꓲˍ ꓡꓰ ꓐꓰ ꓗꓹ ꓢꓴ ꓕꓲ ꓣꓳ ꓠꓬꓲꓸ ꓠꓸ ꓔꓬ ꓟ ꓔꓯ ꓥꓪ ꓟꓳˍ ꓡꓳ꓿ ꓬꓲ ꓪꓴꓸ ꓓꓵ ꓗꓪ ꓠꓬ ꓫꓵ ꓙꓵꓽ ꓪꓴꓸ ꓛꓴꓽ ꓘꓳꓹ ꓔ ꓢꓲ꓾ ꓬꓲ ꓡꓯꓼ ꓒꓯꓹ ꓗꓪ ꓠꓬ ꓕꓯꓹˍ ꓟ ꓟꓳꓸ ꓞꓳꓹ ꓔꓯꓹ ꓔ ꓡꓳ꓿ 15 ꓝꓮꓲ ꓠꓬ ꓢꓲꓽ ꓫꓬ ꓦꓲ ꓗꓪ ꓐꓰ ꓟꓴꓽ ꓗꓪ ꓝꓲ ꓓꓴ ꓬꓲ ꓔꓱꓹ ꓬꓲ ꓕꓲ ꓣꓳ ꓓꓳ ꓡ ꓢꓲ꓾ ꓟꓴ ꓗꓴꓸ ꓗꓪ ꓠꓬꓲꓸ ꓠꓸ ꓢꓴ ꓔꓯ ꓢꓯꓼ ꓓꓽ ꓟ ꓡꓰ ꓘꓴ ꓢꓲ ꓠꓬꓲ꓾ ꓟꓲ ꓠꓯ ꓗꓪ ꓟ ꓜꓽ ꓪꓳꓽ ꓡꓳ ꓪꓳ ꓟꓲ ꓡ ꓢꓲ ꓶꓼ ꓝꓲꓸ ꓛꓲ ꓡ ꓠꓬꓲ꓾ ꓠꓴ ꓟꓳꓸ ꓞꓳꓹ ꓛꓱ ꓓꓳ ꓡ ꓢꓲ ꓶꓼ꓾ ꓐꓯˍ ꓡꓳ꓿ 16 ꓖꓳ ꓡꓱ ꓢꓲ ꓟꓴ ꓗꓴꓸ ꓗꓪ ꓠꓬꓲꓸ ꓠꓸ ꓢꓴ ꓬꓲ ꓟꓳꓸ ꓞꓳꓹ ꓟꓲ ꓠꓯ ꓗꓪ ꓕꓲ ꓶꓹ ꓶꓹ ꓗꓷ ꓠꓬ꓾ ꓟꓲ ꓠꓯ ꓗꓪ ꓟ ꓜꓽ ꓪꓳ ꓡꓳ ꓪꓳ ꓶꓼ ꓖꓴ ꓡꓰꓳ꓿ 17 ꓝꓮꓲ ꓠꓬ ꓟꓴꓽ ꓗꓪ ꓗꓪ ꓟ ꓢꓲꓽ ꓫꓬ ꓦꓲꓻ ꓗꓪ ꓐꓰ ꓟꓴꓽ ꓗꓪ ꓝꓲ ꓓꓴ ꓬꓲ ꓔꓱꓹ ꓬꓲ ꓕꓲ ꓣꓳ ꓓꓳ ꓡ ꓢꓲ꓾ ꓬꓲˍ ꓟꓲ ꓕꓯꓹˍ ꓟ ꓟꓳꓸ ꓞꓳꓹ ꓔꓯꓹ ꓔ ꓡꓳ꓿ 18 ꓖꓳ ꓗꓸ ꓠꓯꓸ ꓮꓸ ꓔꓳꓸ ꓔꓯ ꓙꓵꓽ ꓠꓹ ꓟ ꓙꓵꓽ ꓪ ꓙꓳ ꓢꓴ ꓟꓴꓽ ꓗꓪ ꓝꓲ ꓓꓴ ꓬꓲ ꓔꓱꓹ ꓬꓲ ꓕꓲ ꓣꓳ ꓠꓬ ꓔꓲ ꓖꓴ ꓗꓪ ꓐꓰ ꓓꓳ ꓡ ꓢꓲ꓾ ꓕꓯꓹˍ ꓟ ꓟꓳꓸ ꓞꓳꓹ ꓔꓯꓹ ꓔ ꓢꓴ ꓔꓯ ꓢꓯꓼ ꓓꓽ ꓟ ꓡꓰ ꓘꓴ ꓢꓲ ꓠꓬꓲ꓾ ꓟꓲ ꓠꓯ ꓗꓪ ꓟ ꓛꓱꓼ ꓡꓱꓼ ꓢꓶꓽ ꓟꓲ ꓡꓺꓳ꓾ ꓖꓳ ꓡꓱ ꓠꓬꓲ ꓠꓴ ꓕꓯꓹˍ ꓟ ꓟꓳꓸ ꓞꓳꓹ ꓛꓱꓺ ꓓꓳ ꓡ ꓢꓲ ꓛꓱꓼ ꓡꓱ ꓑꓴ ꓔꓯ ꓶꓼ ꓫ꓾ ꓐꓯˍ ꓡꓳ꓿ 19 ꓖꓳ ꓡꓱ ꓠꓬꓲ ꓟꓴꓽ ꓗꓪ ꓝꓲ ꓓꓴ ꓖꓳ ꓟ ꓬꓲ ꓟꓳꓸ ꓞꓳꓹ ꓡꓰ ꓟꓲ ꓠꓯ ꓗꓪ ꓶꓼ ꓗꓷ ꓠꓬ꓾ ꓟꓲ ꓠꓯ ꓗꓪ ꓟ ꓛꓱꓼ ꓡꓱꓼ ꓑꓴ ꓔꓯ ꓶꓼ ꓫ ꓗꓷ ꓢꓲ꓾ ꓪꓴ-ꓢ ꓠꓲꓹ ꓛꓰꓹˍ ꓟ ꓛꓱꓼ ꓡꓱꓼ ꓢꓶꓽ ꓠꓬꓲꓸ ꓖꓴ ꓓꓽ ꓟ ꓗꓪ ꓡꓳ ꓧꓳꓽ ꓗꓷˍ ꓡꓳ꓿ 20 ꓛꓱꓼ ꓡꓱꓼ ꓢꓶ ꓕꓳꓼ ꓠꓬꓲꓸ ꓖꓴ ꓖꓳ ꓟ ꓠꓬ ꓡꓳ ꓒꓱ ꓠꓱ ꓫꓱꓸ ꓟꓸꓼ ꓗꓪ ꓥ ꓢꓲ꓾ ꓛꓱꓼ ꓡꓱꓼ ꓢꓶ ꓠꓬꓲꓸ ꓖꓴ ꓗꓪ ꓐꓰ ꓬꓲꓻ ꓓꓳ ꓡ ꓟ ꓫꓵꓽ ꓠꓬ꓾ ꓮꓸ ꓟꓴ ꓐꓽ ꓛꓬꓹ ꓟꓴ ꓛꓲ ꓙꓳ ꓢꓲ ꓠꓬꓲ꓾ ꓡꓳ ꓔꓺ ꓠꓬꓲꓽ ꓦꓬ ꓕꓷꓹ ꓛꓲ ꓬꓲꓻ ꓙꓰˍ ꓡꓳ꓿

ꓟꓳ ꓖꓶ ꓓꓴ 15

1 ꓟꓴꓽ ꓗꓪ ꓗꓪ ꓮꓽ ꓘꓶꓸ ꓓꓵꓽ ꓙꓽ ꓟꓶˍ ꓟ ꓢꓷꓸ ꓡꓰ ꓓꓴ ꓓꓽ ꓟ ꓝꓮꓲ ꓕꓲ ꓫꓵ ꓥꓪ ꓟꓳˍ ꓡꓳ꓿ ꓕꓱ ꓟ ꓠꓬ ꓡꓳꓹ ꓬꓰˍ ꓟ ꓫꓸ ꓘꓶ ꓓꓴ ꓫꓵꓽ ꓟ ꓔꓯꓹ ꓔ ꓟ ꓟꓴꓽ ꓗꓪ ꓝꓲ ꓓꓴ ꓫꓵꓽ ꓣꓳ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓫꓸ ꓘꓶꓻ ꓓꓴ ꓕꓱ ꓫꓵꓽ ꓟ ꓡꓰ ꓪꓴ-ꓢ ꓦꓶꓻ ꓠꓲꓹ ꓬꓰ ꓓꓳ ꓡꓰˍ ꓡꓳ꓿ 2 ꓝꓮꓲ ꓠꓬ ꓮꓸ ꓔꓳꓸ ꓦꓱꓹ ꓞꓹ ꓟ ꓠꓬꓺ ꓐꓺ ꓡꓰ ꓐꓰ ꓗꓹ ꓟ ꓬꓲꓻ ꓡꓴꓽ ꓐꓱˍ ꓕꓲ ꓟ ꓥꓪ ꓟꓳˍ ꓡꓳ꓿ ꓓꓴꓽ ꓪꓴꓻˍ ꓐꓰ ꓬꓲ ꓐꓬꓱꓽˍ ꓐꓰ ꓬꓲ ꓟꓬꓱ ꓢꓷꓸ ꓡꓰ ꓓꓴ ꓠ ꓐꓼ ꓙꓳ ꓢꓴ ꓔꓯ ꓧꓪꓸ ꓡꓰ ꓢꓴ ꓐꓴ ꓔꓯˍ ꓟꓲ ꓥꓪ ꓟꓳˍ ꓡꓳ꓿ ꓬꓲ ꓪꓽ ꓠꓬ ꓪꓴ-ꓢ ꓛꓲꓺ ꓐꓶ ꓔꓯꓹ ꓔ ꓢꓲ꓾ ꓠꓬ ꓐ ꓬꓲꓻ ꓡꓴꓽ ꓐꓱ ꓘꓶ ꓗꓪ ꓦꓰꓼ ꓞꓹ ꓢꓲ ꓠꓬꓲ꓾ 3 ꓬꓲ ꓪꓽ ꓠꓬ ꓪꓴ-ꓢ ꓬꓲ ꓚꓳ ꓑꓸ ꓟꓳ-ꓫꓲ ꓟꓴꓽ ꓖꓪˍ ꓐꓰ ꓮ ꓣꓳ ꓤ ꓟꓴꓽ ꓖꓪ ꓕꓱ ꓡꓱ ꓖꓪˍ ꓡꓳ꓾ ꓮꓸ ꓫꓵˍ ꓟꓲ ꓬꓰ ꓐ ꓡ ꓢꓴ ꓢꓲ ꓒꓽꓳ꓾ ꓠꓴ ꓟꓬꓱꓽ ꓬꓰˍ ꓟ ꓠꓬ ꓮꓽ ꓘꓶ ꓪꓴꓽˍ ꓟ ꓥꓳ꓿ ꓪꓽ ꓠꓬꓲ ꓖꓴ ꓡꓰ ꓢꓴ ꓪꓴ-ꓢꓺꓳ꓾ ꓠꓴ ꓟꓬꓱꓽ ꓠꓬ ꓓꓵꓽ ꓙꓽ ꓟꓶ ꓓꓴ ꓥꓳ꓿ ꓞꓳ ꓫꓵꓽ ꓞꓳ ꓙꓰꓽ ꓐꓴ ꓪ ꓔꓲꓸꓳ꓾ ꓠꓴ ꓚꓱꓹ ꓠꓬ ꓔꓱꓹ ꓜꓳꓽˍ ꓟ ꓐꓰ ꓔꓱꓹ ꓚꓵˍ ꓟ ꓥ ꓡꓳ꓿ 4 ꓢꓲ ꓒꓽꓳ꓾ ꓠꓴ ꓟꓬꓱ ꓔꓯ ꓟꓽ ꓙꓳꓺ ꓮꓽ ꓟ ꓬꓰ ꓑꓶꓸˍ ꓡ? ꓠꓴ ꓟꓬꓱ ꓔꓯ ꓟꓽ ꓒꓵꓽ ꓮꓽ ꓟ ꓬꓰ ꓓ ꓡ? ꓮ ꓡꓲꓳ ꓐꓯˍ ꓠꓬ ꓠꓴ ꓕꓲ ꓣꓳˍ ꓡꓰꓽ ꓢꓲꓽ ꓫꓬˍ ꓟ ꓥ ꓠꓬꓲ꓾ ꓞꓳ ꓫꓵꓽ ꓞꓳ ꓙꓰꓽ ꓐꓴ ꓠꓬ ꓠꓴ ꓟꓲꓽ ꓙꓬꓽ ꓗꓪ ꓡ ꓢꓲ ꓪꓴꓸ ꓓꓵ ꓕꓱꓼ ꓡ ꓥꓳ꓿ ꓮ ꓡꓲꓳ ꓐꓯˍ ꓠꓬ ꓠꓴ ꓔꓱꓹ ꓜꓳꓽˍ ꓟ ꓟꓬꓱꓽ ꓟꓳꓸ ꓖꓶ ꓓꓳ ꓡꓺꓳ꓾ ꓐꓰ ꓖꓪˍ ꓡꓳ꓿ 5 ꓕꓱ ꓟꓬ ꓫꓵꓽ ꓗꓸ ꓠꓯꓸ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓢꓷꓸ ꓙ ꓟꓳ ꓙ ꓖꓴ ꓦꓲ ꓐꓱ ꓗꓪ ꓟ ꓢꓲꓽ ꓫꓬ ꓖꓴ ꓒꓴ ꓗꓷˍ ꓟ ꓔꓯ ꓥꓪ ꓟꓳˍ ꓡꓳ꓿ 6 ꓫꓸ ꓘꓶꓻ ꓓꓴ ꓫꓵꓽ ꓟ ꓔꓯꓹ ꓔ ꓢꓴ ꓟꓴꓽ ꓗꓪ ꓝꓲ ꓓꓴ ꓖꓳ ꓫꓵꓽ ꓣꓳ ꓠꓬ꓾ ꓫꓬꓻ ꓫꓬˍ ꓡꓰꓽ ꓗꓹ ꓢꓲ ꓐꓬꓱꓼ ꓡꓱꓼ ꓡꓱ ꓟ ꓪꓰꓻ ꓜꓲꓽ ꓟꓶ ꓐꓵ ꓞꓶꓽ ꓖꓪꓽ ꓔ ꓢꓲ꓾ ꓳ' ꓟꓶꓽ ꓗꓪ ꓠꓬ ꓫꓵ ꓙꓽ ꓧꓷꓹ ꓧꓷ ꓔ ꓢꓲ ꓠꓬꓲ ꓢꓲꓽ ꓫꓬ ꓦꓲ ꓗꓪ ꓐꓰ ꓓꓳ ꓡ ꓡꓳ꓿ 7 ꓢꓯꓸ ꓫꓵ ꓡꓲ ꓟ ꓗꓪ ꓟ ꓕꓲ ꓟ ꓡꓰ꓾ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓟ ꓪꓴ-ꓢ ꓦꓶ ꓠꓲꓹ ꓗꓶ ꓐꓲ ꓞꓹ ꓟ ꓫꓵ ꓡꓴ ꓗꓶꓸ ꓫꓵꓽ ꓒꓯꓼ ꓟꓴꓽ ꓗꓪ ꓝꓲ ꓓꓴ ꓖꓳ ꓫꓵꓽ ꓣꓳ ꓔꓯ ꓖꓶˍ ꓡꓳ꓿ 8 ꓢꓲꓽ ꓫꓬ ꓦꓲ ꓗꓪ ꓠꓬ ꓪꓴ-ꓢ ꓐꓬꓱꓼ ꓡꓱꓼ ꓡꓱ ꓟ ꓐꓰ꓾ ꓬꓲ ꓪꓽ ꓠꓬꓲˍ ꓟ ꓗꓪ ꓐꓰ ꓟꓴꓽ ꓘꓴꓽ ꓐꓲ ꓡꓰˍ ꓡꓳ꓿ ꓝꓮꓲ ꓠꓬ ꓟꓴꓽ ꓗꓪ ꓝꓲ ꓓꓴ ꓫꓵꓽ ꓣꓳ ꓡꓰ ꓔꓯꓹ ꓔ ꓟ ꓫꓸ ꓘꓶꓻ ꓓꓴ ꓫꓵꓽ ꓟ ꓬꓰ ꓟꓽ ꓓꓳ ꓡꓰ ꓕ ꓑꓳꓸ꓾ ꓮꓽ ꓟˍ ꓟꓲ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓙꓰ ꓟꓽ ꓐ ꓡ꓿

ꓟꓳ ꓖꓶ ꓓꓴ 16

1 ꓢꓲꓽ ꓫꓬ ꓦꓲ ꓗꓪ ꓐꓰ ꓢꓯꓼ ꓓꓽ ꓟ ꓓꓳ ꓡ ꓢꓲ ꓟꓴꓽ ꓗꓪ ꓝꓲ ꓓꓴ ꓖꓳ ꓫꓵꓽ ꓣꓳ ꓔꓯ꓾ ꓠꓴ ꓪꓽ ꓙꓰ ꓢꓲ ꓪꓴ-ꓢ ꓠꓲꓹ ꓛꓰꓹˍ ꓟ ꓗꓶ ꓐꓲ ꓞꓹ ꓟ ꓡꓴ ꓗꓶꓸ ꓖꓳ ꓫꓵꓽ ꓒꓯꓼ ꓔꓯ ꓟꓲ ꓠꓯ ꓗꓪ ꓧꓳꓸ ꓩꓴ ꓗꓷ꓾ ꓐꓰ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 2 ꓖꓳ ꓡꓱ ꓠꓬ ꓬꓲ ꓪꓴꓸ ꓕꓲ ꓣꓳ ꓙꓰ ꓢꓲ ꓬꓲ ꓡꓴ ꓗꓶꓸ ꓟꓲ ꓠꓯ ꓗꓪ ꓧꓳꓸ ꓩꓴ ꓗꓷ ꓠꓬ꓾ ꓓꓴꓽ ꓪꓴ ꓬꓲ ꓔꓳꓹ ꓠꓷꓼ ꓓꓴ ꓙꓳ ꓢꓲ ꓬꓲ ꓐꓬꓱ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓖꓳ ꓓꓱ ꓗꓪ꓾ ꓮ ꓘꓶ ꓠꓻˍ ꓟ ꓐꓰ ꓠꓲꓹ ꓒꓳꓹˍ ꓟ ꓠꓻ ꓛꓴꓽ ꓓꓲꓻ ꓡ ꓡꓳ꓿ 3 ꓟꓴꓽ ꓗꓪ ꓝꓲ ꓓꓴ ꓠꓬꓲꓽ ꓣꓳ ꓕꓲ ꓣꓳ ꓟ ꓬꓲ ꓡꓴ ꓗꓶꓸ ꓔꓯ ꓬꓲꓻ ꓡꓴꓽ ꓐꓱ ꓗꓪ ꓧꓳꓸ ꓩꓴ ꓗꓷ ꓠꓬ꓾ ꓬꓲꓻ ꓡꓴꓽ ꓐꓱ ꓠꓽ ꓫꓵꓻ ꓢꓴ ꓫꓵꓽˍ ꓡꓰ ꓐꓰ ꓗꓷ ꓡꓰ ꓢꓲ꓾ ꓬꓲꓻ ꓡꓴꓽ ꓐꓱ ꓠꓯS ꓗꓪ ꓢꓯꓸ ꓔꓬ ꓟ ꓥ ꓕ ꓑꓳꓸ ꓫꓵꓻ ꓖꓴ ꓡꓰꓳ꓿ 4 ꓟꓴꓽ ꓗꓪ ꓝꓲ ꓓꓴ ꓢ ꓣꓳ ꓕꓲ ꓣꓳ ꓟ ꓬꓲ ꓡꓴ ꓗꓶꓸ ꓔꓯ ꓠꓯ ꓬꓲꓻ ꓐꓰ ꓬꓲꓻ ꓝꓳꓹ ꓟꓶ ꓗꓪ ꓧꓳꓸ ꓩꓴ ꓗꓷ ꓠꓬ꓾ ꓠꓯ ꓬꓲꓻ ꓐꓰ ꓬꓲ ꓝꓳꓹ ꓟꓶ ꓠꓽ ꓫꓵꓽ ꓑꓶꓸ ꓡꓰꓳ꓿ 5 ꓖꓳ ꓡꓱ ꓢꓲ ꓬꓲꓻ ꓙꓬ ꓔꓯ ꓙꓵꓽ ꓢꓴ ꓟꓴꓽ ꓗꓪ ꓝꓲ ꓓꓴ ꓡꓰ꓾ ꓔꓬ ꓟ ꓐꓰ ꓔꓬ ꓗꓷ ꓟ ꓢꓲ-ꓫꓬ-ꓢꓴꓳ꓾ ꓠꓴ ꓐꓯ ꓟꓴ ꓕꓱ ꓡꓱ ꓘꓶꓽˍ ꓟ ꓠꓬ ꓔꓱꓹ ꓜꓳˍ ꓟ ꓥ ꓡꓳ꓿ 6 ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓡꓰ꓾ ꓠꓴ ꓔꓯ ꓦ ꓡꓱ ꓢꓴ ꓐꓴˍ ꓐꓰ ꓟꓷꓽ ꓠꓷꓹ ꓝ ꓢꓴ ꓐꓴ ꓫꓵꓽ ꓔꓯ ꓧꓳꓸ ꓡꓰ ꓝꓲ ꓠꓬꓲ꓾ ꓮ ꓟꓶ ꓠꓴ ꓬꓲ ꓪꓽ ꓔꓯ ꓫꓵꓽ ꓖꓶ ꓓꓳꓻˍ ꓟ ꓠꓬ ꓬꓲ ꓪꓽ ꓟꓶ ꓙꓲꓽ ꓙꓳˍ ꓡꓳ꓾ ꓐꓰ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 7 ꓖꓳ ꓕꓯ ꓔꓲ ꓖꓴ ꓗꓪ ꓐꓰ ꓓꓳ ꓡ ꓟ ꓢꓯꓼ ꓡꓰ꓾ ꓥ ꓡꓳ꓾ ꓮꓸ ꓫꓵˍ ꓟꓲ ꓬꓰ ꓐ ꓡ ꓢꓴ ꓢꓲ ꓒꓽ ꓪꓴ-ꓢꓺꓳ꓾ ꓠꓴ ꓐꓯ ꓟꓴ ꓞꓷꓹˍ ꓟ ꓮꓽ ꓙꓵ ꓠꓬ ꓔꓱꓹ ꓚꓵˍ ꓟ ꓐꓰ ꓔꓱꓹ ꓜꓳꓽˍ ꓟ ꓥ ꓡꓳ꓾ ꓐꓯˍ ꓟ ꓥꓪ ꓑ ꓙꓽˍ ꓡꓳ꓿ 8 ꓟꓴꓽ ꓗꓪ ꓝꓲ ꓓꓴ ꓡꓲ ꓣꓳ ꓕꓲ ꓣꓳ ꓟ ꓬꓲ ꓡꓴ ꓗꓶꓸ ꓔꓯ ꓟꓲꓽ ꓟꓲ ꓕꓯꓽ ꓢꓲ ꓗꓪ ꓧꓳꓸ ꓩꓴ ꓗꓷ ꓠꓬ꓾ ꓮꓸ ꓔꓳꓸ ꓡꓰ ꓞꓳ ꓤ ꓔꓯ ꓛꓴꓻ ꓔꓶꓸ ꓠꓹ ꓟ ꓟꓲꓽ ꓟꓲ ꓔꓯ ꓙꓵꓽ ꓪ ꓖꓶˍ ꓡꓳ꓿ 9 ꓖꓳ ꓡꓱ ꓢꓲ ꓞꓳ ꓤ ꓐꓴ ꓠꓬ ꓞꓻ ꓢꓯꓼ ꓡꓰ ꓔꓶꓸ ꓛꓵꓼ ꓡꓰˍ ꓟꓲ꓾ ꓫꓸ ꓘꓶꓻ ꓓꓴ ꓕꓱ ꓟ ꓔꓯ ꓙꓵꓽ ꓢꓴ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ ꓟꓽ ꓒꓳꓹ ꓬꓲꓼ ꓡ ꓡ꓾ ꓬꓲ ꓟꓬꓱ ꓔꓯ ꓟꓽ ꓚꓰꓼ ꓟ ꓙꓱꓽˍ ꓡꓳ꓿ 10 ꓟꓴꓽ ꓗꓪ ꓝꓲ ꓓꓴ ꓥꓪꓽ ꓣꓳ ꓕꓲ ꓣꓳ ꓟ ꓬꓲ ꓡꓴ ꓗꓶꓸ ꓔꓯ ꓓꓴꓽ ꓪꓴ ꓬꓲ ꓙꓵꓽ ꓠꓬꓲꓸ ꓕꓲ ꓗꓪ ꓧꓳꓸ ꓩꓴ ꓗꓷ ꓠꓬ꓾ ꓓꓴꓽ ꓪꓴ ꓗꓴꓷꓼ ꓠꓬ ꓠꓯ ꓞꓲꓹ ꓠꓯ ꓕꓳꓽ ꓗꓷ ꓡꓰ ꓢꓲ꓾ ꓖꓳ ꓗꓪ ꓟ ꓑ ꓫꓬꓼ ꓐꓴ ꓠꓬ ꓠꓻ ꓠꓬꓲ ꓡ ꓛꓱ ꓔꓯ ꓘꓳꓼ ꓢꓲ ꓠꓬꓲ꓾ 11 ꓬꓲ ꓪꓽ ꓠꓻˍ ꓟ ꓐꓰ ꓠꓽ ꓛꓴꓽ ꓓꓲˍ ꓟ ꓑꓶꓸ ꓓꓴ ꓟꓴꓽ ꓗꓪ ꓗꓪ ꓟ ꓪꓴ-ꓢ ꓔꓯ ꓟꓽ ꓚꓰꓼ ꓟ ꓙꓱˍ ꓡꓳ꓿ ꓬꓲ ꓪꓽ ꓬꓰ ꓛꓬ ꓗꓷ ꓟ ꓟꓬꓱꓽ ꓗꓪ ꓐꓰˍ ꓟꓲ ꓟꓽ ꓓꓵꓽ ꓙꓽ ꓒꓳꓹ ꓬꓲꓼ ꓡ꓿ 12 ꓟꓴꓽ ꓗꓪ ꓝꓲ ꓓꓴ ꓛꓳꓼ ꓣꓳ ꓕꓲ ꓣꓳ ꓟ ꓬꓲ ꓡꓴ ꓗꓶꓸ ꓔꓯ ꓬꓴ-ꓩ-ꓕꓲ-ꓢꓶ ꓠꓯ ꓬꓲꓻ ꓓꓽ ꓟ ꓕꓯꓽ ꓢꓲ ꓗꓪ ꓧꓳꓸ ꓩꓴ ꓗꓷ ꓠꓬ꓾ ꓐꓶꓽ ꓓꓳ ꓗꓪ ꓐꓰ ꓡꓻ ꓟ ꓪ ꓔꓲ ꓐꓴ ꓙ ꓖꓴ ꓙꓽ ꓖꓶ ꓟꓶ ꓠꓹ ꓟ ꓬꓲꓻ ꓙꓬ ꓖꓳ ꓟ ꓫꓱ ꓡꓰ ꓖꓴꓳ꓿ 13 ꓝꓮꓲ ꓡꓴꓽ ꓟꓷꓽ ꓠꓷꓹ ꓐꓰ꓾ ꓓꓴꓽ ꓪꓴ ꓟꓷꓽ ꓠꓷꓹ ꓐꓰ꓾ ꓟꓽ ꓔꓱꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓟꓷꓽ ꓠꓷꓹ ꓗꓪ ꓐꓰ꓾ ꓪꓴꓸ ꓑꓸ ꓡꓰ ꓐꓰ ꓗꓹ ꓟ ꓟꓽ ꓫꓬꓻ ꓟ ꓦ ꓢ ꓟ ꓓꓳ ꓡ ꓟ ꓥꓪ ꓟꓳˍ ꓡꓳ꓿ 14 ꓬꓲ ꓪꓽ ꓠꓽ ꓢꓷꓸ ꓡꓰ ꓓꓴ ꓬꓰˍ ꓟ ꓠꓲꓽ ꓬꓲ ꓦꓻ ꓥ ꓢꓲ꓾ ꓮꓸ ꓫꓵˍ ꓟꓲ ꓬꓰ ꓐ ꓡ ꓟ ꓪꓴ-ꓢ ꓬꓲ ꓦꓬꓼ ꓠꓬꓲ ꓓꓽ ꓟ ꓗꓪ꓾ ꓟꓯꓼ ꓓꓶꓽ ꓡꓯꓽ ꓘꓳ ꓠꓹ ꓟ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓪ ꓔꓲ ꓐꓴ ꓔꓯ ꓜꓲꓼ ꓡ ꓝꓲ ꓢꓴ ꓥ ꓡꓳ꓿ 15 (ꓠꓬꓲ ꓠꓹ꓾ ꓥꓪ ꓠꓬ ꓞꓳ ꓘꓴꓽˍ ꓡꓰ ꓐꓰ ꓡꓻ ꓥꓳ꓿ ꓧꓪꓸ ꓛꓲ ꓛꓲˍ ꓐꓰ ꓬꓲ ꓐꓵ ꓞꓶ ꓖꓪꓽ ꓔ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ꓿ ꓟꓽ ꓥ ꓠꓬ꓾ ꓢꓴ ꓟꓲꓽ ꓙꓬ ꓗꓪ ꓙꓬꓽ ꓡꓯ ꓟꓴ ꓫꓱꓽ ꓠ ꓗꓷ ꓡꓰ ꓢꓲ ꓬꓲ ꓫꓸ ꓔꓳˍ ꓟ ꓢꓴ ꓟꓳꓻ ꓡꓰˍ ꓥꓳ꓿) 16 ꓟꓽ ꓫꓬꓻ ꓟ ꓦꓻ ꓖꓳ ꓢ ꓟ ꓡꓰ ꓪ ꓔꓲ ꓐꓴ ꓔꓯ꓾ ꓦꓲ-ꓐꓱ-ꓣꓴ ꓥꓳꓽ ꓡꓰ꓾ ꓧ-ꓟꓲ-ꓗꓷ-ꓔꓳꓼ꓾ ꓟꓬꓱ ꓔ ꓟ ꓕꓲ ꓔꓳꓸ ꓗꓪ ꓜꓲꓼ ꓡ ꓝꓲˍ ꓡꓳ꓿ 17 ꓝꓮꓲ ꓠꓬ ꓟꓴꓽ ꓗꓪ ꓝꓲ ꓓꓴ ꓫꓵꓽ ꓣꓳ ꓕꓲ ꓣꓳ ꓟ ꓬꓲ ꓡꓴ ꓗꓶꓸ ꓔꓯ ꓟꓵꓽ ꓪꓴꓽ ꓗꓪ ꓧꓳꓸ ꓩꓴ ꓗꓷ ꓠꓬ꓾ ꓢꓲꓽ ꓫꓬ ꓦꓲ ꓗꓪ ꓟ ꓙꓵꓽ ꓠꓬꓲꓸ ꓕꓲ ꓗꓪ ꓐꓰ ꓢꓯꓼ ꓓꓽ ꓟ ꓓꓳ ꓡ ꓢꓲ꓾ ꓬꓰ ꓓꓳ ꓡꓰꓳ꓾ ꓐꓯˍ ꓡꓳ꓿ 18 ꓖꓳ ꓕꓯ ꓟꓲꓽ ꓐꓬꓱꓼ ꓤꓰˍ ꓟ ꓐꓰ ꓫꓸ ꓕꓱˍ ꓟ ꓢꓯꓼˍ ꓐꓰ ꓟꓴꓽ ꓖꓴꓽ ꓑꓱꓹˍ ꓟ ꓙꓳˍ ꓡꓳ꓿ ꓖꓳ ꓡꓱ ꓢꓲ ꓟꓲ ꓠꓯ ꓗꓪ ꓞꓳ ꓤ ꓙꓳ ꓡ ꓕ ꓑꓳꓸ꓾ ꓖꓳ ꓘꓶꓻ ꓛꓲ ꓪꓴꓽˍ ꓟ ꓐꓰ ꓖꓳ ꓘꓶ ꓛꓲ ꓪꓽ ꓠꓬꓲˍ ꓟ ꓟꓽ ꓙꓳ ꓠꓬꓲ ꓡꓳ ꓫꓵ ꓟꓵꓽ ꓓꓵˍ ꓟ ꓬꓲ ꓓꓽ ꓟ ꓗꓷ ꓡꓰˍ ꓡꓳ꓿ 19 ꓡꓳ ꓒꓱ ꓓꓽ ꓟ ꓖꓳ ꓟ ꓠꓬ ꓢ ꓐꓱ ꓐꓰ ꓐꓶꓽ ꓡꓰ ꓢꓲ꓾ ꓞꓳ ꓫꓵꓽ ꓐꓴ ꓡꓳ ꓒꓱˍ ꓟꓲ ꓐꓱꓽ ꓡꓰꓳ꓿ ꓪꓴ-ꓢ ꓠꓬ ꓐ-ꓐꓲ-ꓡꓶ ꓓꓽ ꓟ ꓔꓯ ꓓꓵꓽ ꓙꓽ ꓛꓲ ꓡ ꓢꓲ꓾ ꓬꓲ ꓦꓶꓻ ꓠꓲꓹ ꓐꓲ ꓞꓹ ꓟ ꓡꓴ ꓗꓶꓸ ꓬꓲ ꓔꓯ ꓖꓶ ꓓꓳˍ ꓡꓳ꓿ 20 ꓬꓲꓻ ꓗꓳ ꓡꓳ ꓟꓵꓽ ꓮꓽ ꓙꓵˍ ꓟꓲ ꓟꓬꓼ ꓡꓰꓳ꓿ ꓪ ꓚꓲ ꓮꓽ ꓙꓵˍ ꓟꓲ ꓧꓪ ꓟꓽ ꓟꓳꓻ ꓗꓷ ꓡꓰꓳ꓿ 21 ꓪꓽ ꓢꓶꓽ ꓓꓽ ꓟˍ ꓟꓲ ꓟꓴꓽ ꓗꓪ ꓗꓪ ꓐꓰ ꓞꓳ ꓤ ꓕꓯꓽ ꓢꓲ ꓗꓪ ꓞꓰ ꓬꓯꓼ ꓩꓴ ꓡ ꓡꓳ꓿ ꓮ ꓡꓲ ꓕꓲ ꓢꓶˍ ꓟꓲ ꓮꓽ ꓡ ꓢ ꓞꓲ ꓚꓪ ꓛꓲ ꓡꓲꓽˍ ꓡꓳ꓿ ꓪꓽ ꓢꓶ ꓫꓸ ꓘꓶ ꓓꓴ ꓕꓱ ꓟ ꓮ ꓘꓶ ꓡꓲꓽˍ ꓠꓬꓲ꓾ ꓞꓳ ꓤ ꓠꓬ ꓪꓴ-ꓢ ꓔꓯ ꓟꓽ ꓚꓰꓼ ꓟ ꓙꓱˍ ꓡꓳ꓿

ꓟꓳ ꓖꓶ ꓓꓴ 17

1 ꓕꓱ ꓟ ꓗꓸ ꓠꓯꓸ ꓠꓬ ꓡꓴ ꓗꓶꓸ ꓕꓲ ꓣꓳ ꓕꓲ ꓒꓯꓼ ꓔꓯꓹ ꓔ ꓟ ꓟꓴꓽ ꓗꓪ ꓝꓲ ꓓꓴ ꓫꓵꓽ ꓣꓳ ꓗꓪ ꓟ ꓕꓲ ꓣꓳ ꓥꓪ ꓔꓯ ꓫꓸ ꓕꓱ ꓡ ꓢꓲ꓾ ꓕꓱ ꓗꓪ ꓡꓯ꓾ ꓬꓲꓻ ꓙꓬ ꓮꓽ ꓟꓬꓹ ꓟ ꓕꓯꓽ ꓢꓲ ꓗꓪ ꓠꓬꓲꓸ ꓠꓸ ꓔꓬ ꓟ ꓖꓳ ꓪꓴꓽ ꓟ ꓓꓽ ꓟ ꓔꓯ ꓐꓯ ꓟꓴ ꓘꓶꓽˍ ꓟ ꓠꓴ ꓔꓯ ꓥꓪ ꓟꓳꓸ ꓖꓶˍ ꓥꓳ꓿ 2 ꓟꓲ ꓠꓯ ꓗꓪ ꓟ ꓪ ꓔꓲ ꓐꓴ ꓠꓬ ꓬꓲˍ ꓐꓰ ꓟꓽ ꓢꓲ ꓟꓽ ꓫꓬ ꓬꓰ ꓢꓲ꓾ ꓟꓲ ꓠꓯ ꓗꓪ ꓔꓬ ꓢꓴ ꓠꓬ ꓬꓲ ꓟꓽ ꓢꓲ ꓟꓽ ꓫꓬ ꓟ ꓙꓲ ꓒꓶꓽ ꓓꓳ ꓬꓲꓼ ꓡꓰꓳ꓾ ꓐꓯˍ ꓡꓳ꓿ 3 ꓖꓳ ꓗꓸ ꓠꓯꓸ ꓟꓴꓽ ꓗꓪ ꓝꓲ ꓓꓴ ꓡꓰ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓥꓪ ꓔꓯ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓔꓯꓹ ꓛꓲ ꓬꓰˍ ꓡꓳ꓿ ꓖꓳ ꓗꓪ ꓠꓬ ꓟꓽ ꓚꓰꓼ ꓟ ꓙꓱꓽˍ ꓟ ꓟꓬꓱ ꓐꓲ ꓞꓹ ꓢꓲ꓾ ꓪꓴꓸ ꓓꓵ ꓫꓵꓽ ꓟ ꓐꓰ ꓪꓴꓸ ꓛꓲ ꓞꓲ ꓗꓸ ꓙꓳˍ ꓟ ꓓꓴꓽ ꓪꓴ ꓢꓲꓽ ꓕꓲ ꓟ ꓔꓯ ꓜꓶꓽ ꓔ ꓟ ꓤ ꓟꓶ ꓤ ꓕꓲ ꓣꓳ ꓥꓪ ꓟꓳˍ ꓡꓳ꓿ 4 ꓤ ꓟꓶ ꓤ ꓖꓳ ꓟ ꓠꓬ꓾ ꓠꓲꓺ ꓛꓵꓽ ꓟ ꓐꓰ ꓐꓵ ꓞꓶꓽ ꓠꓲꓺ ꓖꓪꓽ ꓔ ꓢꓲ꓾ ꓫꓵˍ ꓐꓰ꓾ ꓒꓵꓽ ꓡꓳˍ ꓐꓰ꓾ ꓡꓳ ꓒꓴ ꓡꓴꓸ ꓢꓶ ꓓꓱꓼ ꓔ ꓡꓳ꓿ ꓡꓯꓼ ꓒꓯꓹ ꓗꓪ ꓠꓬ꓾ ꓠꓲꓹ ꓒꓳꓹˍ ꓡꓳ ꓫꓵꓽˍ ꓐꓰ꓾ ꓬꓲ ꓟꓽ ꓢꓲ ꓟꓽ ꓫꓬˍ ꓟ ꓐꓰ ꓟꓽ ꓫꓬꓻ ꓟꓽ ꓖꓼ ꓟ ꓗꓶ ꓐꓲ ꓔ ꓟ ꓫꓵ ꓡꓴ ꓗꓶꓸ ꓔꓯꓹ ꓔ ꓡꓳ꓿ 5 ꓬꓲ ꓥꓷꓼ ꓛꓲ ꓗꓪ ꓠꓬ꓾ ꓐ-ꓐꓲ-ꓡꓶ ꓓꓽ ꓟ꓾ ꓖꓳ ꓪꓴꓽ ꓟ ꓐꓴˍ ꓐꓰ ꓟꓲ ꓠꓯ ꓗꓪ ꓟ ꓠꓲꓹ ꓒꓳꓹˍ ꓡꓳ ꓫꓵꓽ ꓬꓲ ꓟꓹ ꓟ꓾ ꓐꓰ ꓐꓳ ꓔ ꓡꓳ꓿ 6 ꓝꓮꓲ ꓤ ꓟꓶ ꓤ ꓖꓳ ꓟ ꓠꓬ ꓪꓴ-ꓢ ꓦ ꓡꓱ ꓢꓴ ꓐꓴˍ ꓐꓰ꓾ ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓫꓵꓽ ꓓꓳꓻ ꓬꓲꓼ ꓡꓰˍ ꓟ ꓔꓯ ꓥꓪ ꓟꓳˍ ꓡꓳ꓿ ꓥꓪ ꓬꓲ ꓔꓯ ꓟꓳꓻ ꓗꓷ ꓠꓬ ꓮꓽ ꓘꓶ ꓓꓵꓽ ꓙꓽ ꓟꓶ ꓡꓰꓳ꓿ 7 ꓖꓳ ꓡꓱ ꓠꓬ ꓟꓴꓽ ꓗꓪ ꓝꓲ ꓓꓴ ꓡꓰ ꓥꓪ ꓔꓯ꓾ ꓠꓴ ꓮꓸ ꓫꓵ ꓪꓴꓸ ꓠꓬꓲ ꓓꓵꓽ ꓙꓽ ꓟꓶˍ ꓡ? ꓥꓪ ꓠꓬ ꓤ ꓟꓶ ꓤ ꓕꓱ ꓟ ꓐꓰ ꓬꓲ ꓜꓶꓽ ꓔ ꓟ꓾ ꓪꓴꓸ ꓓꓵ ꓫꓵꓽ ꓟ ꓐꓰ ꓪꓴꓸ ꓛꓲ ꓞꓲ ꓗꓸ ꓙꓳˍ ꓟ ꓓꓴꓽ ꓪꓴꓻ ꓬꓲ ꓚꓵ ꓘꓶꓽ ꓠꓴ ꓔꓯ ꓐꓯ ꓖꓶˍ ꓥꓳ꓿ 8 ꓠꓴ ꓡꓳꓸ ꓟꓳˍ ꓟ ꓓꓴꓽ ꓪꓴ ꓠꓬ꓾ ꓔꓬ ꓗꓷ ꓢꓲ ꓮ ꓟꓶ ꓠꓽ ꓟꓽ ꓔꓬꓳ꓿ ꓬꓲ ꓠꓬ ꓫꓵꓻ ꓓꓴꓽ ꓗꓪ ꓐꓰ ꓓꓯ ꓡ ꓢꓲ ꓟꓶꓽ ꓬꓰ ꓖꓴ ꓗꓪ ꓙꓰˍ ꓥꓳ꓿ ꓟꓵꓽ ꓔꓶ ꓟꓲ ꓔꓶ ꓕ ꓑꓳꓸ ꓢꓯꓼ ꓟꓬ ꓕꓳ ꓶ ꓗꓪ ꓬꓲ ꓪꓽ ꓟꓬꓱ ꓟ ꓐꓳ ꓔ ꓟ ꓟꓲ ꓠꓯ ꓗꓪ ꓔꓬ ꓢꓴ ꓐꓴ ꓠꓬ꓾ ꓓꓴꓽ ꓪꓴ ꓖꓳ ꓟ ꓔꓬ ꓗꓷ ꓟ ꓐꓰ꓾ ꓮ ꓟꓶ ꓟꓽ ꓔꓬ ꓟ ꓐꓰ꓾ ꓔꓬ ꓡ ꓠꓹ ꓟ ꓔꓯ ꓟꓳˍ ꓠꓬ ꓬꓲ ꓪꓽ ꓓꓵꓽ ꓙꓽ ꓟꓶˍ ꓥꓳ꓿ 9 ꓕꓱ ꓟ ꓔꓯ ꓠꓬ ꓙꓽ ꓗꓴꓸ ꓠꓲꓹ ꓙꓳˍ ꓟ ꓠꓲꓹ ꓟ ꓡꓰ ꓓꓵꓽ ꓙꓽ ꓠꓬꓲ ꓠꓯꓹ ꓡꓳ꓿ ꓪꓴꓸ ꓓꓵ ꓖꓳ ꓫꓵꓽ ꓟ ꓠꓬ ꓤ ꓟꓶ ꓤ ꓠꓬꓲꓸ ꓠꓸ ꓔꓬ ꓟ ꓪꓽ ꓚꓲ ꓫꓵꓽ ꓚꓲ ꓥ ꓡꓳ꓿ 10 ꓝꓮꓲ ꓠꓬ ꓪ ꓔꓲ ꓫꓵꓽ ꓣꓳˍ ꓟꓲ ꓥ ꓡꓳ꓿ ꓥꓪꓽ ꓣꓳ ꓠꓬ ꓓꓳꓽ ꓡꓰꓳ꓿ ꓕꓲ ꓣꓳ ꓠꓬ ꓔꓬ ꓢꓰꓽ ꓡꓳ꓿ ꓕꓲ ꓣꓳ ꓠꓬ ꓟꓽ ꓛꓲ ꓡ ꓢꓰ꓿ ꓬꓲ ꓡ ꓕꓯ ꓠꓬ ꓕꓲ ꓝꓲꓸ ꓤ ꓔꓬ ꓠ ꓗꓹ ꓡꓳ꓿ 11 ꓔꓬ ꓗꓷ ꓢꓲ ꓮ ꓟꓶ ꓟꓽ ꓔꓬ ꓟ ꓓꓴꓽ ꓪꓴ ꓖꓳ ꓟ ꓠꓬ ꓪ ꓔꓲ ꓦꓰꓼ ꓣꓳ ꓕꓲ ꓣꓳ ꓟ ꓥ ꓢꓲ꓾ ꓖꓳ ꓫꓵꓽ ꓣꓳ ꓗꓪ ꓟˍ ꓟꓲ ꓥ ꓢꓲ ꓠꓬꓲ ꓟꓶꓽ ꓬꓰ ꓖꓴ ꓗꓪ ꓙꓰˍ ꓥꓳ꓿ 12 ꓠꓴ ꓡꓳꓸ ꓟꓳˍ ꓟ ꓪꓴꓸ ꓛꓲ ꓖꓳ ꓞꓲ ꓗꓸ ꓠꓬ ꓪ ꓔꓲ ꓞꓲ ꓣꓳ ꓥ ꓡꓳ꓿ ꓬꓲ ꓪꓽ ꓠꓬ ꓗꓴꓷꓼ ꓟꓽ ꓟꓶ ꓢꓰ꓿ ꓖꓳ ꓡꓱ ꓥ ꓟꓲ ꓬꓲ ꓪꓽ ꓠꓬ ꓓꓴꓽ ꓪꓴˍ ꓐꓰ ꓕꓲ ꓪꓺꓼ ꓪ ꓔꓲ ꓙꓵꓽ ꓪ ꓕꓲ ꓙꓵꓹ ꓟꓶˍ ꓥꓳ꓿ 13 ꓬꓲ ꓪꓽ ꓚꓴꓽ ꓬꓲꓹ ꓠꓬ ꓕꓲ ꓡꓰꓹꓼ ꓥ ꓢꓲ꓾ ꓬꓲ ꓪꓽ ꓪꓽ ꓠꓬꓲˍ ꓟ ꓐꓰ ꓙꓵꓽ ꓪ ꓠꓬ ꓓꓴꓽ ꓪꓴ ꓖꓳ ꓟ ꓔꓯ ꓖꓶˍ ꓥꓳ꓿ 14 ꓬꓲ ꓪꓽ ꓠꓬ ꓮ ꓣꓳ ꓤˍ ꓐꓰ ꓟꓯꓼ ꓓꓶꓽ ꓡꓯꓽ ꓘꓳˍ ꓥꓳ꓿ ꓖꓳ ꓡꓱ ꓢꓲ ꓮ ꓣꓳ ꓤ ꓠꓽ ꓬꓲ ꓪꓽ ꓔꓯ ꓧꓪꓸ ꓡꓰˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓮ ꓣꓳ ꓤ ꓠꓽ ꓢꓲ ꓒꓽ ꓐꓴ ꓕꓯꓽ ꓢꓲ ꓟ ꓢꓲ ꓒ꓾ ꓪ ꓔꓲ ꓐꓴ ꓕꓯꓽ ꓢꓲ ꓟ ꓪ ꓔꓲ ꓥ ꓡꓳ꓿ ꓝꓮꓲ ꓮ ꓣꓳ ꓤ ꓡꓰ ꓘꓴ ꓔ ꓟ ꓐꓰ ꓢꓲ ꓔ ꓢꓲ ꓦ ꓡꓱ ꓐꓳ ꓐꓳˍ ꓡꓰꓽ ꓬꓲ ꓔꓯ ꓛꓳ ꓢꓴ ꓠꓬ ꓬꓲˍ ꓐꓰ ꓕꓲ ꓪꓺꓼ ꓔꓬ ꓡꓳ꓿ 15 ꓝꓮꓲ ꓟꓴꓽ ꓗꓪ ꓝꓲ ꓓꓴ ꓡꓰ ꓥꓪ ꓔꓯ꓾ ꓠꓴ ꓟꓳˍ ꓟ ꓖꓳ ꓪꓴꓽ ꓟ ꓠꓬꓲꓸ ꓠꓸ ꓖꓴ ꓬꓲꓻ ꓙꓬ ꓠꓬ꓾ ꓑ ꓫꓬꓼ ꓑ ꓟꓲˍ ꓐꓰ꓾ ꓞꓳ ꓜꓴ ꓞꓳ ꓟꓯꓼˍ ꓐꓰ꓾ ꓞꓳ ꓫꓵꓽ ꓞꓳ ꓙꓰˍ ꓐꓰ ꓥꓳꓽ ꓫꓵꓽ ꓥꓳ ꓙꓰꓽ ꓥ ꓡꓳ꓿ 16 ꓠꓴ ꓡꓳꓸ ꓟꓳˍ ꓟ ꓪꓴꓸ ꓛꓲ ꓖꓳ ꓞꓲ ꓗꓸˍ ꓐꓰ ꓓꓴꓽ ꓪꓴ ꓠꓬ ꓖꓳ ꓪꓴꓽ ꓟ ꓕꓱ ꓟ ꓔꓯ ꓠꓲꓹ ꓜꓳˍ ꓥꓳ꓿ ꓬꓲ ꓔꓯ ꓐꓬ ꓡꓰ ꓝꓲ ꓢꓲ꓾ ꓙꓬꓽ ꓡꓯꓽ ꓟꓴ ꓗꓷ ꓡꓰ ꓝꓲ ꓢꓲ ꓠꓬꓲ꓾ ꓬꓲ ꓧꓪꓽ ꓜꓽ ꓗꓷ ꓠꓬ ꓮꓸ ꓔꓳ ꓗꓪ ꓛꓴꓻ ꓖꓴ ꓡꓰ ꓝꓲˍ ꓥꓳ꓿ 17 ꓮ ꓡꓲꓳ ꓐꓯ ꓠꓬ ꓪꓴ-ꓢ ꓐꓯ ꓘꓶꓽ ꓟꓽ ꓐꓲ ꓡꓰ ꓕ ꓑꓳꓸ꓾ ꓪꓴ-ꓢ ꓡꓰ ꓬꓲ ꓪꓽ ꓔꓯ ꓬꓲ ꓠꓲꓹ ꓡꓶ ꓬꓰ ꓝꓲ ꓠꓹ ꓟ꓾ ꓕꓲ ꓠꓲꓹ ꓕꓲ ꓪꓽˍ ꓐꓰ ꓬꓲ ꓪꓽ ꓗꓴꓷꓼ ꓠꓬ ꓓꓴꓽ ꓪꓴ ꓔꓯ ꓖꓶ ꓠꓹ ꓟ ꓚꓴꓽ ꓬꓲꓹ ꓬꓲ ꓪꓽ ꓠꓲꓹ ꓟ ꓗꓪ ꓧꓳꓽ ꓖꓶˍ ꓡꓳ꓿ 18 ꓠꓴ ꓡꓳꓸ ꓟꓳˍ ꓟ ꓤ ꓟꓶ ꓤ ꓖꓳ ꓟ ꓠꓬ꓾ ꓟꓲ ꓠꓯ ꓗꓪ ꓟ ꓪ ꓔꓲ ꓐꓴ ꓔꓯ ꓙꓵꓽˍ ꓟ ꓡꓳ ꓒꓱ ꓓꓽ ꓟ ꓥ ꓡꓳ꓾ ꓐꓯˍ ꓡꓳ꓿

ꓟꓳ ꓖꓶ ꓓꓴ 18

1 ꓕꓱ ꓟꓬ ꓫꓵꓽ ꓗꓸ ꓠꓯꓸ ꓙꓵꓽ ꓪ ꓓꓽ ꓟ ꓙꓳˍ ꓟ ꓟꓴꓽ ꓗꓪ ꓝꓲ ꓓꓴ ꓬꓲ ꓔꓱꓹ ꓬꓲ ꓕꓲ ꓣꓳ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓔꓯ ꓥꓪ ꓟꓳˍ ꓡꓳ꓿ ꓖꓳ ꓡꓱ ꓢꓲ ꓟꓲ ꓠꓯ ꓠꓬ ꓟꓴꓽ ꓗꓪ ꓝꓲ ꓓꓴ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓗꓪ ꓐꓰ ꓡꓬꓸ ꓡ ꓡꓳ꓿ 2 ꓬꓲ ꓠꓬ ꓢꓯꓼ ꓓꓽ ꓟ ꓡꓰ ꓘꓴ ꓢꓲ꓾ ꓐ-ꓐꓲ-ꓡꓶ ꓓꓽ ꓟ ꓠꓬ ꓐꓱꓽ ꓗꓷꓳ꓾ ꓐꓱꓽ ꓗꓷꓳ꓿ ꓬꓲ ꓠꓽ ꓠꓲꓽ ꓔꓬ ꓖꓴˍ ꓐꓰ ꓟꓽ ꓫꓬ ꓟ ꓦꓻ ꓥ ꓕ ꓑꓳꓸˍ ꓐꓰ꓾ ꓟꓽ ꓫꓬ ꓟ ꓐꓰ ꓠꓲꓹ ꓒꓳꓹˍ ꓡꓳ ꓫꓵꓽ ꓠꓬꓹ ꓤ ꓙꓱꓻ ꓤ ꓥ ꓕ ꓑꓳꓸ ꓔꓬ ꓖꓴ ꓒꓬꓱꓼ ꓡꓺꓳ꓿ 3 ꓮ ꓡꓲꓳ ꓐꓯ ꓠꓬ ꓞꓳ ꓫꓵꓽ ꓞꓳ ꓙꓰ ꓠꓬ ꓬꓲ ꓟꓽ ꓢꓲ ꓟꓽ ꓫꓬ ꓟ ꓦꓯꓸ ꓠꓲꓹ ꓙꓵˍ ꓟ ꓙꓲꓻ ꓒꓶꓽ ꓓꓳ ꓬꓲꓼ ꓡꓰꓳ꓿ ꓟꓲ ꓠꓯ ꓗꓪ ꓟ ꓪ ꓔꓲ ꓐꓴ ꓠꓬ ꓬꓲˍ ꓐꓰ ꓟꓽ ꓢꓲ ꓟꓽ ꓫꓬ ꓟ ꓬꓰ ꓢꓲ꓾ ꓶꓻ ꓡꓯꓼ ꓟꓴꓺ ꓢꓴ ꓐꓴ ꓠꓬ ꓖꓳꓻ ꓪꓴꓽ ꓟ ꓟꓽ ꓢꓲ ꓟꓽ ꓫꓬ ꓟ ꓗꓪ ꓐꓰ ꓟꓶˍ ꓟ ꓒꓴ ꓤ ꓫꓵ ꓤ ꓡꓰ ꓐꓳ ꓡꓰꓳ꓾ ꓐꓯˍ ꓡꓳ꓿ 4 ꓝꓮꓲ ꓟꓴꓽ ꓗꓪ ꓗꓪ ꓐꓰ ꓥꓪ ꓑ ꓙꓽˍ ꓟ ꓢꓯꓼ ꓬꓲ ꓔꓱꓹ ꓬꓲ ꓕꓲ ꓟ ꓡꓰ꓾ ꓥꓪ ꓑ ꓫꓬꓼ ꓐꓴꓳ꓾ ꓠꓴ ꓪꓽ ꓠꓬ ꓬꓲ ꓝꓴꓲ ꓗꓪ ꓟꓽ ꓔ ꓪ ꓡꓰ ꓠꓹ ꓟ ꓐꓰ꓾ ꓬꓲ ꓔꓯ ꓫꓸ ꓘꓶ ꓓꓴ ꓗꓪ ꓠꓴ ꓪꓽ ꓟꓽ ꓑꓯꓹ ꓟꓶ ꓠꓹ ꓟ ꓬꓲ ꓗꓪ ꓐꓰ ꓓꓳ ꓡꓯ꓿ 5 ꓮ ꓡꓲꓳ ꓐꓯ ꓠꓬ ꓬꓲ ꓝꓴꓲ ꓠꓬ ꓟꓴꓽ ꓗꓪ ꓟꓴ ꓛꓲ ꓒꓵꓹ ꓡꓰ ꓠꓬꓲ꓾ ꓬꓲ ꓟꓽ ꓙꓲ ꓟꓽ ꓜꓳˍ ꓟ ꓔꓯ ꓪꓴ-ꓢ ꓓꓵꓽ ꓙ ꓛꓲ ꓡꓺꓳ꓿ 6 ꓬꓲ ꓡꓰ ꓢꓴ ꓔꓯ ꓮ ꓡꓲ ꓬꓰ ꓖꓶˍ ꓠꓬ꓾ ꓬꓲ ꓔꓯˍ ꓟꓲ ꓖꓳ ꓡꓱ ꓬꓰ ꓖꓶ꓿ ꓬꓲ ꓬꓰˍ ꓟ ꓟꓬꓱꓽˍ ꓡꓰ ꓐꓰ ꓬꓲ ꓔꓯ ꓠꓬꓲꓽ ꓝꓸ ꓡꓴꓽ ꓖꓶ꓿ ꓬꓲ ꓦꓱꓹˍ ꓟ ꓙꓲꓻ ꓒꓶꓽ ꓡꓴ ꓗꓶꓸ ꓗꓪ ꓠꓬꓲꓽ ꓝꓸ ꓦꓱꓹ ꓢꓲ ꓬꓲ ꓔꓯ ꓖꓶꓽ ꓓꓳꓻ꓿ 7 ꓬꓲ ꓚꓲ ꓛꓬ ꓟꓬꓱ ꓓꓳꓽ ꓮ ꓟꓬ ꓛꓲ ꓧꓪ ꓢꓲ꓾ ꓟꓽ ꓫꓬꓻ ꓟꓽ ꓖꓼ ꓟ ꓮ ꓟꓬ ꓬꓰˍ ꓠꓬ꓾ ꓫꓸ ꓙꓵˍ ꓟ ꓐꓰ ꓠꓲꓹ ꓥꓴꓻˍ ꓟˍ ꓟꓲ ꓬꓲ ꓖꓳ ꓟꓬ ꓛꓲ ꓬꓲ ꓔꓯ ꓖꓶ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓲꓹ ꓟ ꓗꓪ꓾ ꓥꓪ ꓠꓬ ꓪ ꓔꓲ ꓟꓺ ꓣꓱꓽ ꓔꓬ ꓢꓲ꓾ ꓟꓶꓽ ꓛꓵꓽ ꓟ ꓟꓽ ꓥ꓿ ꓮ ꓡꓲ ꓗꓹ ꓟꓲ ꓥꓪ ꓠꓽ ꓠꓲꓹ ꓥꓴꓻˍ ꓟ ꓟꓽ ꓔꓳꓹ ꓜꓳ꓾ ꓐꓰ ꓓꓵꓽ ꓙˍ ꓡꓳ꓿ 8 ꓖꓳ ꓡꓱ ꓠꓬꓲ ꓕꓲ ꓠꓬꓲ ꓠꓯꓸꓼ ꓗꓪ꓾ ꓫꓵꓻˍ ꓟ ꓐꓰ꓾ ꓠꓲꓹ ꓥꓴꓻˍ ꓟ ꓐꓰ꓾ ꓦꓰꓼ ꓟꓷꓼˍ ꓟ ꓫꓸ ꓘꓶ ꓓꓴ ꓠꓬ ꓬꓲ ꓔꓯ ꓛꓲ ꓡ ꓥꓳ꓿ ꓬꓲ ꓔꓯ ꓐꓯ ꓟꓴ ꓘꓶꓽ ꓢꓴ ꓢꓲ ꓒꓽ ꓪꓴ-ꓢ ꓠꓽ ꓪꓽ ꓠꓬꓲˍ ꓟ ꓥ ꓠꓬꓲ꓾ ꓬꓲ ꓔꓯ ꓛꓴ ꓖꓴꓻ ꓡꓰ ꓝꓲˍ ꓥꓳ꓾ ꓐꓰ ꓐꓯˍ ꓡꓳ꓿ 9 ꓬꓲˍ ꓐꓰ ꓟꓽ ꓢꓲꓽ ꓟꓽ ꓫꓬ ꓟ ꓬꓰ ꓗꓷ ꓢꓲ꓾ ꓠꓲꓹ ꓘꓪ ꓫꓵ ꓓꓴ ꓔꓯ ꓑꓯꓹ ꓟꓶ ꓗꓷ ꓟ ꓟꓲ ꓠꓯ ꓗꓪ ꓟ ꓪ ꓔꓲ ꓐꓴ ꓠꓬ ꓬꓲ ꓔꓯ ꓛꓴꓻˍ ꓟ ꓟꓴꓽ ꓘꓴꓽ ꓔꓯ ꓟꓳˍ ꓕꓯ꓾ ꓬꓲ ꓐꓱ ꓶ ꓮꓸ ꓛꓬꓹ ꓙꓱˍ ꓥꓳ꓿ 10 ꓬꓲ ꓫꓸ ꓙꓵˍ ꓟ ꓔꓯ ꓙꓳꓺ ꓠꓬꓲ ꓶꓽ ꓤ ꓗꓪ ꓦꓰꓼ ꓞ ꓢꓲ꓾ ꓐ-ꓐꓲ-ꓡꓶ ꓡꓳ ꓒꓱ ꓓꓽ ꓟꓻꓳ꓾ ꓪꓽ ꓠꓬꓲˍ ꓟ ꓡꓳ ꓒꓱꓻꓳ꓾ ꓠꓴ ꓠꓽ ꓫꓸ ꓙꓵꓻꓳ꓾ ꓫꓸ ꓙꓵꓻꓳ꓾ ꓠꓴ ꓔꓯ ꓛꓬꓻ ꓒꓵꓽ ꓖꓶˍ ꓟ ꓮꓽ ꓙꓵ ꓠꓬ ꓕꓲ ꓙꓵꓹ ꓠꓯS ꓗꓪ ꓛꓲ ꓡꓺꓳ꓾ ꓐꓰ ꓐꓯˍ ꓡꓳ꓿ 11 ꓟꓵ ꓕꓯ ꓗꓳꓹ ꓕꓯꓽ ꓗꓪ ꓶꓻ ꓡꓯꓼ ꓟꓴ ꓢꓴ ꓐꓴˍ ꓟꓲ ꓬꓲ ꓪꓽ ꓖꓴꓽ ꓙꓴꓽ ꓪꓴꓻ ꓡ ꓢꓴ ꓟꓽ ꓙꓳ ꓠꓬꓲ꓾ ꓬꓲ ꓑꓶꓸ ꓓꓴ ꓮꓸ ꓛꓬꓹ ꓙꓱ ꓠꓬꓲ ꓥꓴꓻˍ ꓥꓳ꓿ 12 ꓖꓴꓽ ꓙꓴ ꓕꓱ ꓟ ꓠꓬ꓾ ꓫꓵ꓾ ꓒꓴ꓾ ꓒꓵꓽ ꓡꓳ꓾ ꓡꓳ ꓒꓴ ꓡꓴꓸ ꓢꓶ꓾ ꓪꓰꓻ ꓜꓲꓽ ꓟꓶ꓾ ꓠꓲꓺ ꓛꓵꓽ ꓟ ꓟꓶ꓾ ꓐꓵꓽ ꓟꓶ꓾ ꓢꓲꓽ ꓢꓲ ꓟ ꓟꓶ꓾ ꓫꓳꓺ ꓠꓱ ꓢꓲꓹ ꓬꓲ ꓫꓵꓽ ꓬꓲ ꓙꓰꓽ꓾ ꓦꓻ ꓟ ꓙꓵꓻ ꓡꓰ ꓫꓬꓹ ꓔ ꓟ ꓡꓴꓻ ꓫꓵꓽ ꓡꓴ ꓙꓰꓽ꓾ ꓮ ꓘꓶ ꓒꓵꓽˍ ꓟ ꓢꓲꓹ꓾ ꓙꓲꓽ꓾ ꓧꓳ꓾ ꓡꓳ ꓐꓷ ꓒꓴ ꓡꓰ ꓫꓬꓹ ꓔ ꓟ ꓡꓴꓻ ꓫꓵꓽ ꓡꓴ ꓙꓰꓽ꓾ 13 ꓢꓲꓹ ꓗꓴꓹ ꓡꓹ ꓜꓷꓼ꓾ ꓜꓽ ꓟꓲꓻ ꓧꓶꓽ꓾ ꓫꓳꓸ꓾ ꓟꓴ-ꓬ꓾ ꓫꓳꓺ ꓠꓱˍ ꓟ ꓢꓲꓹ ꓜꓲꓼ꓾ ꓛꓱꓼ ꓡꓱ ꓙꓵꓻ꓾ ꓮꓽ ꓛꓬꓽ ꓞꓶꓻ꓾ ꓠꓴꓽˍ ꓟ ꓫꓪ ꓧꓶꓽ꓾ ꓫꓪꓺ꓾ ꓮꓸ ꓠꓬꓲꓽ꓾ ꓮ ꓣꓳ꓾ ꓮꓸ ꓟꓴꓽ꓾ ꓮꓸ ꓟꓴꓽ ꓖꓽ ꓡꓲꓽ꓾ ꓚꓳ ꓑꓸˍ ꓐꓰ ꓞꓳ ꓤ ꓢꓯꓼ ꓟꓬ ꓥ ꓡꓳ꓿ 14 ꓶꓻ ꓡꓯꓼ ꓟꓴ ꓢꓴ ꓡꓰ꓾ ꓐ-ꓐꓲ-ꓡꓶꓽꓳ꓾ ꓠꓴ ꓠꓲꓹ ꓥꓳˍ ꓟ ꓠꓬ ꓮꓽ ꓙꓵ ꓟꓬꓼ ꓡꓰꓳ꓿ ꓠꓴ ꓐꓬꓱꓼ ꓡꓱꓼ ꓡꓱ ꓟ ꓐꓰ ꓐꓳ ꓶꓽ ꓮꓽ ꓙꓵˍ ꓟꓲ ꓟꓶꓽ ꓬꓰꓳ꓿ ꓕꓱ ꓡꓱ ꓖꓳ ꓑꓳ ꓮ ꓡꓲ ꓥ ꓟꓲ ꓝꓮꓲ ꓧꓪ ꓟꓶ ꓟꓽ ꓓꓻꓳ꓾ ꓐꓯˍ ꓡꓳ꓿ 15 ꓕꓱ ꓟꓬ ꓫꓵꓽ ꓡꓰ ꓶꓻ ꓡꓯꓼ ꓟꓴ ꓢꓲ ꓬꓲ ꓗꓪ ꓐꓰ ꓐꓳ ꓡꓰ ꓢꓴ ꓠꓬ ꓬꓲ ꓫꓸ ꓙꓵˍ ꓟ ꓔꓯ ꓙꓳꓺ ꓠꓬꓲ ꓶꓽ ꓤ ꓗꓪ ꓦꓰꓼ ꓞ ꓢꓲ꓾ ꓮꓸ ꓛꓬꓹ ꓙꓱ ꓢꓲ ꓠꓬꓲ꓾ 16 ꓪꓰꓻ ꓜꓲꓽ ꓟꓶˍ ꓐꓰ꓾ ꓠꓲꓺ ꓛꓵꓽ ꓟ ꓐꓰ꓾ ꓢꓲꓽ ꓢꓲ ꓟ ꓟꓶꓺ ꓖꓪꓽ ꓢꓲ꓾ ꓫꓵˍ ꓐꓰ꓾ ꓒꓵꓽ ꓡꓳˍ ꓐꓰ꓾ ꓡꓳ ꓒꓴ ꓡꓴꓸ ꓢꓶꓽ ꓓꓱꓼ ꓢꓴ ꓡꓳ ꓒꓱ ꓓꓽ ꓟ ꓖꓳ ꓟ ꓠꓬ꓾ ꓫꓸ ꓙꓵꓻꓳ꓾ ꓫꓸ ꓙꓵꓻꓳ꓿ 17 ꓮ ꓡꓲꓳ ꓐꓯ ꓠꓬ ꓕꓱ ꓘꓶ ꓐꓳˍ ꓟ ꓠꓬ꓾ ꓕꓲ ꓙꓵꓹ ꓟ ꓠꓯS ꓗꓪ ꓬꓲ ꓖꓳꓽ ꓗꓷ ꓡꓰꓳ꓾ ꓐꓰ ꓘꓴˍ ꓡꓳ꓿ ꓡꓲ ꓙꓵꓽ ꓒ ꓐꓴˍ ꓐꓰ꓾ ꓡꓲ ꓜꓶꓽ ꓢꓲ ꓓꓴꓻ ꓓꓳ ꓢꓴ ꓥ ꓕ ꓑꓳꓸˍ ꓐꓰ꓾ ꓡꓲ ꓗꓪ ꓟꓬꓱꓽ ꓣꓱꓽ ꓢꓴ ꓮꓽ ꓙꓵˍ ꓐꓰ꓾ ꓬꓲꓻ ꓡꓴꓽ ꓐꓱ ꓗꓪ ꓧꓪ ꓜꓽ ꓧꓪ ꓓꓳꓻ ꓢꓴ ꓥ ꓕ ꓑꓳꓸ ꓠꓬ ꓶꓽ ꓤ ꓗꓪ ꓦꓰꓼ ꓞꓹ ꓢꓲ꓾ 18 ꓬꓲ ꓔꓯ ꓛꓴˍ ꓟ ꓟꓴꓽ ꓘꓴꓽ ꓔꓯ ꓡꓳꓸ ꓔ ꓢꓲ ꓠꓬꓲ꓾ ꓡꓳ ꓒꓱ ꓓꓽ ꓟ ꓖꓳ ꓟ ꓡꓰ ꓐꓰ ꓗꓹ ꓟ ꓠꓱꓸ ꓐꓯꓼ ꓡꓳ ꓒꓱ ꓮ ꓡꓲ ꓗꓪ ꓙꓳ ꓢꓰꓽ꓾ ꓐꓯˍ ꓡꓳ꓿ 19 ꓝꓮꓲ ꓬꓲ ꓪꓽ ꓠꓬ ꓪꓴꓸ ꓓꓵ ꓗꓪ ꓠꓱꓸ ꓦꓱꓽ ꓚꓪꓹ ꓧꓶꓺ ꓢꓲ꓾ ꓮꓸ ꓛꓬꓹ ꓙꓱ ꓠꓬꓲ ꓘꓴ ꓔꓴ ꓡ ꓢꓲ ꓠꓬꓲ꓾ ꓡꓳ ꓒꓱ ꓓꓽ ꓟꓺꓳ꓾ ꓠꓴ ꓠꓽ꓾ ꓫꓸ ꓙꓵꓻꓳ꓾ ꓫꓸ ꓙꓵꓻꓳ꓿ ꓮ ꓡꓲꓳ ꓐꓯ ꓠꓬ ꓐꓳ ꓶꓽ ꓗꓪ ꓐꓰ ꓬꓲꓻ ꓡꓴꓽ ꓐꓱ ꓗꓪ ꓡꓲ ꓙꓳ ꓢꓴ ꓮꓽ ꓙꓵ ꓔꓯ ꓐꓳ ꓡꓰ ꓝꓲˍ ꓟ ꓡꓳ ꓒꓱ ꓠꓬ꓾ ꓕꓲ ꓙꓵꓹ ꓟ ꓠꓯS ꓗꓪ ꓬꓲ ꓖꓳꓽ ꓗꓷ ꓡꓰꓳ꓿ 20 ꓟꓴꓽ ꓗꓪꓺꓳ꓾ ꓬꓲ ꓟꓶꓽ ꓬꓰ ꓠꓬꓲ ꓗꓹ ꓛꓲꓽ G꓿ ꓦ ꓡꓱ ꓢꓴ ꓐꓴˍ ꓐꓰ꓾ ꓝꓲ ꓓꓴ ꓐꓴˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓐꓴꓳ꓾ ꓪꓴ-ꓢ ꓡꓰ ꓠꓴ ꓪꓽ ꓐꓱ ꓶ ꓬꓲ ꓔꓯ ꓪꓽ ꓛꓴ ꓚꓱꓹ ꓗꓷ ꓠꓬꓲ ꓠꓲꓹ ꓒꓴ G꓾ ꓐꓯˍ ꓡꓳ꓿ 21 ꓖꓳ ꓕꓯ ꓢꓯꓼ ꓙꓳˍ ꓟ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓠꓬ꓾ ꓡꓳ ꓙꓱꓻ ꓓꓽ ꓟ ꓡꓰ ꓐꓰ ꓗꓹ ꓟ Bꓸ ꓛꓲ ꓕꓲ ꓒꓬꓸ ꓛꓵꓽ ꓔꓴ ꓡ ꓢꓲ꓾ ꓬꓲꓻ ꓡꓴꓽ ꓐꓱ ꓗꓪ ꓡꓳ ꓧꓳꓽ ꓗꓷ ꓢꓲ ꓠꓬꓲ꓾ ꓐ-ꓐꓲ-ꓡꓶ ꓡꓳ ꓒꓱ ꓓꓽ ꓟ ꓔꓯˍ ꓟꓲ ꓕꓱ ꓟ ꓡꓰ ꓐꓰ ꓦꓶꓻ ꓦꓶˍ ꓡꓰ ꓓꓱꓽ ꓐꓱꓽ ꓩꓴ ꓗꓷ ꓢꓲ ꓝꓮꓲ ꓧꓪ ꓟꓳꓻ ꓟꓽ ꓓ ꓗꓷ ꓡꓰ ꓝꓲˍ ꓥꓳ꓿ 22 ꓝꓮꓲ ꓠꓬ ꓛꓲ ꓐꓶ ꓛꓰꓹ ꓢꓴ꓾ ꓟꓴꓽ ꓖꓪ ꓖꓪ ꓢꓴ꓾ ꓙꓵꓽ ꓡꓵꓽ ꓟꓵꓺ ꓢꓴˍ ꓐꓰ ꓐꓽ ꓡ ꓟꓵ ꓢꓴ ꓢꓯꓼ ꓠꓬ꓾ ꓕꓱ ꓡꓱ ꓖꓳ ꓑꓳ ꓮ ꓡꓲ ꓥ ꓟꓲ ꓠꓴ ꓗꓳ ꓡꓳ ꓗꓪ ꓟꓽ ꓑ ꓙꓽ ꓡꓺꓳ꓿ ꓮ ꓡꓲ ꓫꓵꓽ ꓟꓬꓱꓽ ꓗꓪ ꓟ ꓑꓴꓺ ꓙꓵꓻ ꓔꓯˍ ꓟꓲ ꓕꓱ ꓡꓱ ꓖꓳ ꓑꓳ ꓧꓪ ꓟꓳꓻ ꓟꓽ ꓓꓻꓳ꓿ ꓡꓳ ꓙꓱ ꓖꓳꓻ ꓢꓯꓼˍ ꓟꓲ ꓕꓱ ꓡꓱ ꓖꓳ ꓑꓳ ꓟꓽ ꓑ ꓙꓽ ꓡꓺꓳ꓿ 23 ꓟꓬ ꓡꓴ ꓠꓬꓲ ꓟꓳꓻ ꓓꓴˍ ꓟꓲ ꓕꓱ ꓡꓱ ꓖꓳ ꓑꓳ ꓟꓽ ꓣꓳ ꓡꓺꓳ꓿ ꓠꓴ ꓗꓳ ꓡꓳ ꓗꓪ ꓠꓬ ꓟꓯꓸ ꓡꓯꓸ ꓒˍ ꓐꓰ ꓟꓯꓸ ꓡꓯꓸ ꓟ ꓢꓯꓼˍ ꓟꓲ ꓕꓱ ꓡꓱ ꓖꓳ ꓑꓳ ꓟꓽ ꓑ ꓙꓽ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓶꓻ ꓡꓯꓼ ꓟꓴ ꓢꓴ ꓐꓴ ꓠꓬ꓾ ꓟꓲ ꓠꓯ ꓗꓪ ꓟ ꓒꓵꓽˍ ꓟ ꓡꓽ ꓞꓳ ꓥ ꓢꓲ꓾ ꓞꓳ ꓫꓵꓽ ꓐꓴ ꓮꓽ ꓙꓵ ꓔꓯˍ ꓟꓲ ꓠꓴ ꓥꓺ ꓟꓬꓱꓽ ꓡꓰ ꓗꓶꓸ ꓗꓷꓳ꓾ ꓐꓯˍ ꓡꓳ꓿ 24 ꓟꓷꓽ ꓠꓷꓹ ꓝꓸ ꓢꓴ ꓐꓴˍ ꓐꓰ꓾ ꓦ ꓡꓱ ꓢꓴ ꓐꓴˍ ꓐꓰ꓾ ꓟꓲ ꓠꓯ ꓗꓪ ꓢꓰꓼ ꓗꓷ ꓢꓴ ꓐꓴ ꓫꓵꓽ ꓮꓽ ꓙꓵ ꓠꓬ꓾ ꓡꓳ ꓒꓱ ꓕꓱ ꓟ ꓠꓯꓸꓼ ꓗꓪ ꓧꓪ ꓟꓶ ꓡꓰꓳ꓾ ꓐꓯˍ ꓡꓳ꓿

ꓟꓳ ꓖꓶ ꓓꓴ 19

1 ꓕꓱ ꓟꓬ ꓫꓵꓽ ꓗꓸ ꓠꓯꓸ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓞꓳ ꓜꓴ ꓓꓽ ꓟ ꓘꓴ ꓢꓯꓼˍ ꓡꓰ ꓐꓰ ꓗꓹ ꓟ ꓥꓪ ꓑ ꓙꓽˍ ꓡꓳ꓿ ꓬꓲ ꓪꓽ ꓡꓰ꓾ ꓢꓲ ꓒꓽ ꓔꓯ ꓫꓱꓸ ꓖꓶ꓾ ꓢꓯꓼ ꓟꓬ ꓝꓸˍ ꓟ ꓐꓰ꓾ ꓟꓬꓱ ꓓꓳꓽˍ ꓐꓰ ꓪꓽ ꓠꓬꓲˍ ꓟ ꓠꓬ ꓣꓳ ꓪꓴ-ꓢ ꓔꓯꓸ ꓟ ꓥ ꓡꓳ꓿ 2 ꓮ ꓡꓲꓳ ꓐꓯ ꓠꓬ ꓬꓲ ꓐꓯ ꓞꓷꓹˍ ꓟ ꓠꓬ ꓔꓱꓹ ꓚꓵˍ ꓟ ꓐꓰ ꓔꓱꓹ ꓜꓳꓽˍ ꓟ ꓥ ꓡꓳ꓿ ꓟꓽ ꓢꓲꓽ ꓟꓽ ꓫꓬ ꓟ ꓗꓪ ꓐꓰ ꓟꓲ ꓠꓯ ꓔꓯꓸ ꓐꓬ ꓡꓰ ꓝꓲ ꓢꓴ ꓖꓳꓻ ꓪꓴꓽ ꓟ ꓓꓽ ꓟ ꓔꓯ ꓬꓲ ꓡꓰ ꓐꓯ ꓟꓴ ꓘꓶꓽ ꓢꓲ꓾ ꓬꓲ ꓡꓯꓼ ꓒꓯꓹ ꓗꓪ ꓐꓰ ꓪꓴ-ꓢ ꓬꓲ ꓚꓳ ꓑꓸ ꓐꓴ ꓫꓵꓽ ꓔꓯ ꓧꓳꓸ ꓡꓰ ꓝꓲˍ ꓟ ꓝꓴꓲ ꓪꓽ ꓒꓵꓽ ꓚꓱꓹ ꓖꓶ ꓗꓷꓳ꓾ ꓐꓯˍ ꓡꓳ꓿ 3 ꓬꓲ ꓪꓽ ꓡꓰ ꓝꓮꓲ ꓕꓲ ꓧꓪꓹ꓾ ꓢꓲ ꓒꓽ ꓔꓯ ꓫꓱꓸ ꓖꓶ꓾ ꓖꓳꓻ ꓪꓴꓽ ꓟ ꓔꓯ ꓛꓴꓻˍ ꓟ ꓟꓴꓽ ꓘꓴꓽ ꓠꓬ꓾ ꓕꓲ ꓞꓲꓼ ꓕꓲ ꓑ ꓓꓯ ꓙꓰˍ ꓡꓳ꓾ ꓐꓯˍ ꓡꓳ꓿ 4 ꓞꓳ ꓪꓴꓽ ꓞꓳ ꓔꓲ ꓐꓴ ꓖꓳ ꓠꓬꓲꓽ ꓞꓲ ꓡꓲ ꓣꓳˍ ꓐꓰ ꓢꓯꓸ ꓫꓵꓽ ꓡꓲ ꓟ ꓠꓬ ꓟꓳꓼ ꓔ ꓢꓲ꓾ ꓙꓵꓽ ꓠꓬꓲ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓠꓬꓲ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓢꓲ ꓒꓽ ꓔꓯ ꓫꓱꓸ ꓖꓶ꓾ ꓐꓯˍ ꓡꓳ꓿ 5 ꓖꓳ ꓗꓸ ꓠꓯꓸ ꓙꓵꓽ ꓠꓬꓲꓸ ꓕꓲ ꓗꓪ ꓐꓰ ꓢꓯꓼ ꓓꓳ ꓡ ꓢꓲ꓾ ꓪꓴ-ꓢ ꓔꓯ ꓙꓳ ꓒꓵꓽˍ ꓟ ꓬꓲ ꓚꓳ ꓑꓸ ꓐꓴꓳ꓾ ꓪꓴꓽ ꓪꓴꓽ ꓣꓳ ꓣꓳ ꓮꓽ ꓙꓵ ꓣꓳ ꓪꓴ-ꓢ ꓔꓯ ꓫꓱꓸ ꓖꓶ ꓡꓯ꓾ ꓐꓯˍ ꓡꓳ꓿ 6 ꓝꓮꓲ ꓬꓲꓻ ꓙꓬ ꓬꓲꓻ ꓞꓰꓻ ꓮꓽ ꓟꓬꓹ ꓟ ꓢꓯꓼˍ ꓐꓰ ꓟꓴꓽ ꓖꓴ ꓑꓱꓹ ꓢꓯꓼ ꓓꓽ ꓟ ꓡꓰ ꓐꓰ ꓗꓹ ꓟ ꓞꓳ ꓜꓴ ꓓꓽ ꓟ ꓢꓯꓼ ꓔꓯ ꓥꓪ ꓑ ꓙꓽˍ ꓡꓳ꓿ ꓬꓲ ꓪꓽ ꓡꓰ꓾ ꓢꓲ ꓒꓽ ꓔꓯ ꓫꓱꓸ ꓖꓶ꓾ ꓮꓸ ꓫꓵˍ ꓟꓲ ꓬꓰ ꓐ ꓡ ꓢꓴ ꓢꓲ ꓒꓽ ꓣꓳ ꓪꓴ-ꓢ ꓠꓬ ꓪ ꓔꓲ ꓣꓱꓽ ꓔꓬ ꓡꓳ꓿ 7 ꓣꓳ ꓠꓬ ꓠꓲꓹ ꓒꓴ ꓗꓹ ꓛꓲ ꓢꓲ ꓬꓲ ꓔꓯ ꓟꓬꓱ ꓓꓳꓽ ꓖꓶ ꓡꓯ꓿ ꓮ ꓡꓲꓳ ꓐꓯ ꓠꓬ ꓮ ꓣꓳ ꓤ ꓔꓯ ꓝꓱꓺ ꓖꓶˍ ꓟ ꓦꓬꓼ ꓠꓬꓲ ꓛꓲ ꓡꓺꓳ꓾ ꓬꓲ ꓟꓯꓸ ꓡꓯꓸ ꓟˍ ꓟꓲ ꓚꓲ ꓛꓬ ꓔꓯ ꓙꓽ ꓖꓶꓽ ꓖꓴ ꓡꓰꓳ꓿ 8 ꓢꓲꓽ ꓫꓬˍ ꓟ ꓐꓰ ꓐꓬꓱꓼ ꓡꓱꓼ ꓡꓱ ꓟ ꓪꓰꓻ ꓜꓲꓽ ꓟꓶ ꓖꓪ ꓓꓴ ꓬꓲ ꓔꓯ ꓖꓶ ꓗꓷꓳ꓾ ꓐꓯˍ ꓡꓳ꓿ (ꓪꓰꓻ ꓜꓲꓽ ꓟꓶ ꓕꓱ ꓟ ꓠꓬ ꓪꓴ-ꓢ ꓦ ꓡꓱ ꓢꓴ ꓐꓴ ꓡꓰ ꓬꓰˍ ꓟ ꓔꓱꓹ ꓜꓳꓽˍ ꓟ ꓟꓬꓱꓽ ꓔꓯ ꓖꓴˍ ꓡꓳ꓿) 9 ꓟꓴꓽ ꓗꓪ ꓝꓲ ꓓꓴ ꓡꓰ ꓥꓪ ꓔꓯ꓾ ꓠꓴ ꓐꓳ ꓔ꓾ ꓮ ꓣꓳ ꓤ ꓬꓲ ꓤ ꓟꓶꓻ ꓝꓱꓺˍ ꓟ ꓟꓶꓼ ꓘꓶꓼ ꓜꓻ ꓜꓽ ꓠꓹ ꓟ ꓘꓴꓻ ꓔ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯˍ ꓡꓳ꓿ ꓝꓮꓲ ꓬꓲ ꓡꓰ ꓥꓪ ꓔꓯ꓾ ꓕꓱ ꓟ ꓠꓬ ꓪꓴ-ꓢ ꓬꓲ ꓔꓱꓹ ꓚꓵˍ ꓟ ꓐꓯ ꓘꓶꓽ ꓥ ꓡꓳ꓾ ꓐꓯˍ ꓡꓳ꓿ 10 ꓖꓳ ꓡꓱ ꓠꓬ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓠꓹ ꓟ ꓬꓲ ꓟꓲꓽ ꓙꓬꓽ ꓗꓪ ꓥꓪ ꓟꓳꓼ ꓡꓰ ꓠꓬ ꓬꓲ ꓡꓰ ꓥꓪ ꓔꓯ꓾ ꓠꓴ ꓕꓱ ꓡꓱ ꓕꓽ ꓬꓰ꓿ ꓥꓪ ꓠꓽ ꓠꓴˍ ꓐꓰ ꓠꓴ ꓬꓲꓼ ꓠꓴ ꓠꓬꓲ ꓐꓴˍ ꓐꓰ ꓕꓲ ꓡꓰꓹꓼ ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓚꓳ ꓑꓸ ꓛꓳꓽ ꓒꓯꓹ ꓥ ꓡꓳ꓿ ꓠꓴ ꓠꓬ ꓪꓴ-ꓢ ꓔꓯˍ ꓡꓰꓽ ꓪꓴꓸ ꓓꓵ ꓕꓱꓼ꓿ ꓮ ꓡꓲꓳ ꓐꓯˍ ꓠꓬ ꓟꓷꓽ ꓠꓷꓹ ꓝꓸ ꓘꓶꓽ ꓬꓲ ꓠꓲꓹ ꓟ ꓠꓬ ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙˍ ꓟ ꓥ ꓡꓳ꓾ ꓐꓯˍ ꓡꓳ꓿ 11 ꓖꓳ ꓡꓱ ꓠꓬ ꓟꓴꓽ ꓗꓪ ꓒꓴ ꓡ ꓢꓲ ꓮꓸ ꓟꓴꓽ ꓒꓴ ꓕꓲ ꓛꓲ ꓦꓰꓼ ꓞꓹ ꓟ ꓔꓯ ꓥꓪ ꓟꓳˍ ꓡꓳ꓿ ꓬꓲ ꓕꓯꓽ ꓢꓲ ꓗꓪ ꓜꓶꓽ ꓔ ꓢꓴ ꓔꓯ ꓠꓬ꓾ ꓦ ꓡꓱ ꓐꓳˍ ꓟ ꓐꓰ ꓔꓱꓹ ꓚꓵˍ ꓟ꓾ ꓟꓬꓱ ꓔ ꓡꓳ꓿ ꓬꓲ ꓠꓬ ꓔꓱꓹ ꓜꓳꓽˍ ꓟ ꓡꓰ ꓐꓯ ꓟꓴ ꓘꓶꓽ ꓢꓲ ꓟꓯꓼ ꓓꓶꓽˍ ꓡꓳ꓿ 12 ꓬꓲ ꓟꓬ ꓢꓶꓽ ꓠꓬ ꓮꓸ ꓔꓳ ꓡ ꓡꓱˍ ꓡꓰ ꓐꓰ ꓗꓹ ꓢꓲ꓾ ꓬꓲ ꓪꓴꓸ ꓓꓵ ꓗꓪ ꓠꓬ ꓙꓵꓽ ꓪꓴꓸ ꓛꓴ ꓮꓽ ꓟꓬꓹ ꓚꓴꓸ ꓘꓳꓹ ꓔ ꓡꓳ꓿ ꓬꓲ ꓚꓲ ꓛꓬ ꓟꓽ ꓥ ꓠꓬ ꓮꓽ ꓟˍ ꓟꓲ ꓟꓽ ꓢꓷꓸ ꓟ ꓟꓬꓱ ꓕꓲ ꓟꓬꓱ ꓬꓲ ꓕꓯꓽ ꓢꓲ ꓗꓪ ꓐꓳ ꓔ ꓡꓳ꓿ 13 ꓬꓲ ꓠꓬ ꓫꓵꓽ ꓡꓰ ꓠꓶꓸ ꓔ ꓟ ꓐꓵ ꓞꓶꓽ ꓐꓽ ꓢꓽ ꓕꓲ ꓘꓳꓹ ꓖꓪ ꓔ ꓢꓲ꓾ ꓬꓲ ꓟꓬꓱ ꓠꓬ꓾ ꓪꓴ-ꓢ-ꓐꓯ-ꓘꓶ꓾ ꓐꓰ ꓐꓯˍ ꓡꓳ꓿ 14 ꓟꓴꓽ ꓗꓪ ꓗꓪ ꓔꓬ ꓟ ꓟꓯꓼ ꓜꓴ ꓠꓬ꓾ ꓮꓸ ꓟꓴꓽ ꓒꓴ ꓜꓶꓽ ꓢꓲ꓾ ꓫꓬꓻˍ ꓟ ꓐꓰ ꓒꓴˍ ꓟ ꓪꓰꓻ ꓜꓲꓽ ꓟꓶ ꓖꓪ ꓔ ꓢꓲ ꓠꓬꓲ ꓬꓲ ꓔꓯ ꓛꓳ ꓔꓬ ꓡꓳ꓿ 15 ꓬꓲ ꓟꓷꓽ ꓠꓷꓹ ꓗꓪ ꓐꓰ꓾ ꓞꓳ ꓫꓵꓽ ꓐꓴ ꓔꓯ ꓢꓰꓼ ꓠꓹ ꓟ ꓕꓯꓹˍ ꓟ ꓮꓸ ꓕꓽ ꓕꓲ ꓛꓲ ꓓꓳ ꓡ ꓡꓳ꓿ ꓬꓲ ꓠꓬ ꓧꓳꓺ ꓓꓻ ꓣꓱꓽ ꓢꓲ ꓬꓲ ꓪꓽ ꓔꓯ ꓙꓵꓽˍ ꓥꓳ꓿ ꓝꓮꓲ ꓠꓬ ꓮꓸ ꓫꓵˍ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓬꓲ ꓪꓳꓹˍ ꓟ ꓦꓶ ꓠꓲꓹ ꓛꓱꓼ ꓡꓱꓼ ꓢꓶꓽ ꓠꓬꓲꓸ ꓖꓴ ꓗꓪ ꓟ ꓛꓱꓼ ꓡꓱꓼ ꓢꓶꓽ ꓔꓯ ꓕꓳꓼˍ ꓥꓳ꓿ 16 ꓬꓲ ꓐꓵ ꓞꓶꓽˍ ꓐꓰ ꓬꓲ ꓒꓲꓽ ꓢꓰ ꓗꓪ ꓠꓬ꓾ ꓪ ꓔꓲ ꓐꓴ ꓕꓯꓽ ꓢꓲ ꓟ ꓪ ꓔꓲ꓾ ꓢꓲ ꓒꓽ ꓐꓴ ꓕꓯꓽ ꓢꓲ ꓟ ꓢꓲ ꓒ꓾ ꓐꓰ ꓐꓳ ꓔꓸ ꓟ ꓟꓬꓱ ꓕꓲ ꓟꓬꓱ ꓙꓳˍ ꓡꓳ꓿ 17 ꓝꓮꓲ ꓠꓬ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓠꓬ ꓟꓲꓽ ꓟꓲ ꓗꓪ ꓦꓰꓼ ꓞꓹ ꓟ ꓥꓪ ꓟꓳˍ ꓡꓳ꓿ ꓬꓲ ꓠꓬ ꓢꓯꓼ ꓓꓽ ꓟ ꓡꓰ꓾ ꓟꓵꓽ ꓪꓴ ꓗꓪ ꓐꓬꓱꓻ ꓔꓬ ꓟ ꓠꓬꓹ ꓮꓽ ꓙꓵ ꓔꓯ ꓘꓴ ꓢꓲ꓾ ꓡꓯ꓾ ꓠꓴ ꓪꓽ ꓠꓬ ꓪꓴ-ꓢ ꓟꓶꓼ ꓘꓶꓽ ꓜꓻ ꓫꓳˍ ꓟ ꓗꓪ ꓜꓲꓼ ꓡ ꓢꓲ꓾ 18 ꓪ ꓔꓲ ꓐꓴˍ ꓐꓰ꓾ ꓟꓯꓼ ꓢꓲꓽ ꓒ ꓐꓴˍ ꓐꓰ꓾ ꓢꓯꓼ ꓙꓳ ꓒ ꓐꓴˍ ꓐꓰ꓾ ꓮꓸ ꓟꓴꓽˍ ꓐꓰ꓾ ꓬꓲ ꓔꓯ ꓜꓶꓽ ꓢꓴ ꓐꓴˍ ꓐꓰ꓾ ꓚꓳ ꓪꓴꓸˍ ꓐꓰ ꓚꓳ ꓑˍ ꓐꓰ꓾ ꓞꓳ ꓤ ꓥ ꓕ ꓑꓳꓸ ꓪꓴꓽ ꓪꓴ ꓣꓳ ꓣꓳ ꓟ ꓬꓲ ꓪꓽ ꓧꓪꓽ ꓔꓯ ꓜꓽ ꓡꓯ꓾ ꓐꓯˍ ꓡꓳ꓿ 19 ꓝꓮꓲ ꓠꓬ ꓓꓴꓽ ꓪꓴˍ ꓐꓰ꓾ ꓟꓲ ꓠꓯ ꓗꓪ ꓟ ꓪ ꓔꓲ ꓐꓴˍ ꓐꓰ ꓬꓲ ꓪꓽ ꓟꓯꓼ ꓜꓴ ꓠꓬ꓾ ꓮꓸ ꓟꓴꓽ ꓜꓶ ꓢꓴˍ ꓐꓰ ꓬꓲ ꓟꓯꓼ ꓜꓴ ꓔꓯ ꓓꓶꓽ ꓡꓯꓽ ꓘꓳ ꓠꓹ ꓟ ꓜꓲꓼ ꓞꓹ ꓟ ꓥꓪ ꓟꓳˍ ꓡꓳ꓿ 20 ꓖꓳ ꓡꓱ ꓠꓬ ꓓꓴꓽ ꓪꓴˍ ꓐꓰ ꓕꓲ ꓛꓳꓺꓼ ꓬꓲ ꓟꓲꓽ ꓙꓬ ꓗꓪ ꓓꓵꓽ ꓙꓽ ꓟꓶˍ ꓟ ꓢꓷꓸ ꓡꓰ ꓓꓴ ꓬꓰ ꓢꓴ꓾ ꓟꓽ ꓔꓱꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓔꓯˍ ꓟꓲ ꓣꓴ ꓔ ꓡꓳ꓿ ꓬꓲ ꓡꓰ ꓢꓷꓸ ꓡꓰ ꓓꓴ ꓟꓬꓱꓽ ꓕꓱ ꓟ ꓗꓪ ꓐꓰ꓾ ꓓꓴꓽ ꓪꓴ ꓬꓲ ꓔꓳꓹ ꓠꓷꓼ ꓓꓴ ꓟꓶ ꓗꓷ ꓢꓴˍ ꓐꓰ ꓬꓲ ꓐꓬꓱꓽ ꓔꓯ ꓪꓴ ꓓꓵ ꓕꓱꓼ ꓢꓴ ꓐꓴ ꓔꓯ ꓗꓶꓸ ꓟꓶ ꓡꓰ ꓟ ꓥ ꓡꓳ꓿ ꓬꓲ ꓪꓽ ꓠꓬꓲꓽ ꓣꓳ ꓔꓯ ꓠꓬ ꓐꓬꓻ ꓞꓹ ꓟ ꓡꓳ ꓐ ꓮꓸ ꓔꓳꓸ ꓬꓲꓻ ꓐꓱ ꓗꓪ ꓢꓯꓸ ꓢꓯˍ ꓡꓰꓽ ꓡꓳ ꓧꓳꓽ ꓗꓷˍ ꓡꓳ꓿ 21 ꓜꓰꓻ ꓞꓹ ꓢꓴ ꓐꓴ ꓔꓯ ꓠꓬ꓾ ꓮꓸ ꓟꓴꓽ ꓜꓶꓽ ꓢꓴ ꓬꓲ ꓟꓷꓽ ꓠꓷꓹ ꓗꓪ ꓐꓰ ꓓꓳ ꓡ ꓟ ꓮꓸ ꓕꓽ ꓡꓰ ꓢꓰꓼ ꓗꓷ ꓢꓲ꓾ ꓠꓬꓹ ꓮꓽ ꓙꓵ ꓠꓬ ꓬꓲ ꓪꓽ ꓧꓪꓽ ꓜꓽ ꓢꓲ ꓐꓳ ꓡꓰˍ ꓡꓳ꓿

ꓟꓳ ꓖꓶ ꓓꓴ 20

1 ꓖꓳ ꓕꓯ ꓟꓴꓽ ꓗꓪ ꓝꓲ ꓓꓴ ꓕꓲ ꓣꓳ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓢꓲ꓾ ꓬꓲ ꓡꓯꓼ ꓒꓯꓹ ꓗꓪ ꓫꓵꓻ ꓓꓴꓽ ꓜꓳ ꓜꓴˍ ꓐꓰ꓾ ꓧꓳ ꓫꓱ ꓚ ꓓꓽ ꓟ ꓕꓲ ꓚꓱꓹ ꓔꓯꓹ ꓔ ꓟ ꓔꓯ ꓥꓪ ꓟꓳˍ ꓡꓳ꓿ 2 ꓬꓲ ꓡꓰ꓾ ꓠꓲꓽ ꓪ ꓔꓲˍ ꓐꓰ ꓢ-ꓓꓯ ꓐꓯˍ ꓟ ꓡꓴꓽ꓾ ꓮꓽ ꓠꓱ ꓟ ꓩꓴ ꓖꓳ ꓟ ꓔꓯ ꓣꓴ ꓔ ꓢꓲ꓾ ꓕꓲ ꓔꓴ ꓘꓳꓼ ꓐꓱ ꓶ ꓞꓳꓹ ꓔ ꓢꓲ ꓠꓬꓲ꓾ 3 ꓞꓳ ꓫꓵꓽ ꓐꓴ ꓔꓯ ꓝꓮꓲ ꓟꓽ ꓧꓳꓽ ꓪꓴꓸ ꓠꓹ ꓟ ꓫꓵꓻ ꓓꓴꓽ ꓗꓪ ꓡꓳ ꓧꓳꓽ ꓗꓷ ꓢꓲ꓾ ꓕꓲ ꓔꓴ ꓘꓳꓼ ꓟꓽ ꓐꓲ ꓡ ꓕ ꓑꓳꓸ ꓗ ꓘꓶꓽ ꓚꓵꓸ ꓗꓷ ꓢꓲ ꓠꓬꓲ ꓔꓳꓹ ꓠꓷꓼ ꓗꓷˍ ꓡꓳ꓿ ꓕꓲ ꓔꓴ ꓘꓳꓼ ꓗꓸ ꓠꓯꓸ ꓠꓬ ꓬꓲ ꓔꓯ ꓕꓲ ꓝꓲꓸ ꓤ ꓩꓴ ꓓꓳ ꓡ ꓠꓹ ꓟ ꓥ ꓡꓳ꓿ 4 ꓖꓳ ꓕꓯ ꓥꓪ ꓠꓬ ꓙꓵꓽ ꓠꓬꓲꓸ ꓕꓲ ꓮꓽ ꓟꓬꓹ ꓟ ꓟꓳꓻ ꓢꓲ꓾ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓐꓴ ꓔꓯ ꓠꓬ ꓐꓯ ꓟꓴ ꓘꓶꓽ ꓠꓹ ꓟ ꓙꓵꓽ ꓪ ꓖꓶ ꓔ ꓡꓳ꓿ ꓝꓮꓲ ꓠꓬ ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙ ꓢꓲ꓾ ꓪꓴ-ꓢ ꓐꓯ ꓘꓶꓽ ꓪꓴꓸ ꓠꓬꓲ ꓪꓴꓸ ꓓꓵ ꓓꓶ ꓗꓷ ꓢꓴˍ ꓐꓰ꓾ ꓓꓴꓽ ꓪꓴ ꓔꓯˍ ꓟꓲ꓾ ꓬꓲ ꓐꓬꓱꓽ ꓔꓯˍ ꓟꓲ ꓪꓴꓸ ꓓꓵ ꓟꓽ ꓕꓱꓼ ꓠꓬꓲ ꓢꓴ꓾ ꓥꓷꓼ ꓛꓲ ꓗꓪˍ ꓟꓲ꓾ ꓡꓯꓼ ꓒꓯꓹ ꓗꓪˍ ꓟꓲ꓾ ꓬꓲ ꓔꓳꓹ ꓠꓷꓼ ꓓꓴ ꓟꓽ ꓟꓶ ꓠꓬꓲ ꓢꓴ ꓮꓽ ꓙꓵ ꓢꓯꓸ ꓬꓲꓼ ꓡ ꓢꓲ ꓠꓬꓲ꓾ ꓙꓲ-ꓢꓴˍ ꓐꓰ ꓕꓲ ꓪꓺꓼ ꓕꓲ ꓔꓴ ꓘꓳꓼ ꓪ ꓔꓲ ꓣꓱꓽˍ ꓡꓳ꓿ 5 ꓕꓱ ꓟ ꓠꓬ ꓬꓲ ꓪꓴꓸ ꓕꓲ ꓧꓪꓹ ꓢꓯꓸ ꓬꓲꓼ ꓡ ꓟ ꓥ ꓡꓳ꓿ ꓜꓰꓻ ꓞꓹ ꓟ ꓫꓵꓻ ꓢꓴ ꓠꓬ ꓖꓳ ꓕꓲ ꓔꓴ ꓘꓳꓼ ꓟꓽ ꓡꓳꓹ ꓬꓰ ꓕ ꓑꓳꓸ ꓟꓽ ꓢꓯꓸ ꓡ꓿ 6 ꓬꓲ ꓪꓴꓸ ꓕꓲ ꓧꓪ ꓢꓯꓸ ꓬꓲꓼ ꓡ ꓟ ꓑꓯꓹ ꓟꓶ ꓢꓴ ꓠꓬ꓾ ꓶꓼ ꓙꓳ ꓫꓱꓹ ꓙꓳˍ ꓟ ꓐꓰ ꓢꓲ ꓚꓰꓸ ꓟꓶ ꓢꓴ ꓥ ꓡꓳ꓿ ꓠꓬꓲꓽ ꓧꓪ ꓕꓲ ꓧꓪ ꓫꓵꓻˍ ꓟ ꓠꓬ ꓬꓲ ꓪꓽ ꓔꓯ ꓙꓵꓽ ꓟꓽ ꓪꓺꓳ꓿ ꓬꓲ ꓪꓽ ꓠꓽ ꓪꓴ-ꓢˍ ꓐꓰ ꓙꓲ-ꓢꓴ ꓬꓲ ꓔꓲ ꓒ ꓐꓴ ꓬꓰ ꓢꓲ꓾ ꓬꓲˍ ꓐꓰ ꓕꓲ ꓪꓺꓼ ꓪ ꓔꓲ ꓕꓲ ꓔꓴ ꓘꓳꓼ ꓣꓱꓽˍ ꓥꓳ꓿ 7 ꓖꓳ ꓕꓲ ꓔꓴ ꓘꓳꓼ ꓡꓳꓹ ꓬꓰ ꓠꓬ꓾ ꓢ-ꓓꓯ ꓔꓯ ꓐꓱ ꓓꓴꓽ ꓗꓪ ꓐꓰ ꓩꓴ ꓗꓷ ꓢꓲ꓾ 8 ꓬꓲ ꓠꓬ ꓟꓵꓽ ꓕꓯ ꓗꓳꓹ ꓕꓯ ꓗꓪ ꓟ ꓞꓳ ꓫꓵꓽ ꓗꓳ-ꓗꓷˍ ꓐꓰ ꓟ-ꓗꓳ-ꓗꓷꓼ ꓔꓯ ꓟꓸ ꓒꓬꓹ ꓢꓲ ꓠꓬꓲ꓾ ꓟꓯꓼ ꓘꓶꓽ ꓗꓪ ꓬꓲ ꓪꓽ ꓔꓯ ꓧꓳꓽ ꓜꓲꓼ ꓡ ꓥꓳ꓿ ꓬꓲ ꓪꓽ ꓵ ꓟꓬꓱ ꓠꓬ ꓬꓲꓻ ꓡꓴꓽ ꓐꓱ ꓗꓪ ꓟ ꓧꓶꓽ ꓚꓲꓺˍ ꓡꓰ ꓐꓰ ꓟꓬꓽˍ ꓡꓳ꓿ 9 ꓬꓲ ꓪꓽ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓐꓰ ꓜꓲꓼ ꓡ ꓢꓲ꓾ ꓦ ꓡꓱ ꓢꓴ ꓐꓴ ꓟꓯꓼ ꓒꓱˍ ꓐꓰ ꓠꓲꓹ ꓠꓵˍ ꓟ ꓡꓳ ꓒꓱ ꓖꓳ ꓟ ꓔꓯ ꓚꓳꓸ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓟꓴꓽ ꓗꓪ ꓗꓪ ꓐꓰ ꓮꓸ ꓔꓳ ꓬꓯꓼ ꓡ ꓢꓲ ꓬꓲ ꓪꓽ ꓔꓯ ꓛꓴꓻ ꓖꓴ ꓡꓰꓳ꓿ 10 ꓞꓳ ꓤ ꓔꓯ ꓟꓸ ꓒꓬꓹ ꓢꓴ ꓠꓲꓽ ꓪ ꓔꓲ ꓖꓳ ꓟ ꓔꓯ ꓠꓬ꓾ ꓓꓴꓽ ꓪꓴˍ ꓐꓰ ꓟꓽ ꓔꓱꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓔꓬ ꓖꓴ꓾ ꓡꓳ ꓐ ꓮꓸ ꓔꓳꓸ ꓬꓲꓻ ꓐꓱ ꓗꓪ ꓡꓳ ꓧꓳꓽ ꓗꓷˍ ꓡꓳ꓿ ꓬꓲ ꓪꓽ ꓠꓬ ꓟꓳꓼ ꓡꓳ ꓢ ꓘꓪ ꓮ ꓕꓯˍ ꓟꓲ ꓖꓳ ꓗꓪ ꓫꓸ ꓙꓵꓻ ꓟꓷꓼ ꓙꓵꓻˍ ꓥꓳ꓿ 11 ꓖꓳ ꓗꓸ ꓠꓯꓸ ꓒꓴ ꓛꓹ ꓟ ꓙꓵꓽ ꓠꓬꓲꓸ ꓕꓲ ꓓꓽ ꓟ ꓐꓰ ꓕꓯꓽ ꓢꓲ ꓗꓪ ꓠꓬꓲꓸ ꓠꓸ ꓢꓴ ꓔꓯ ꓥꓪ ꓟꓳˍ ꓡꓳ꓿ ꓟꓴꓽ ꓗꓪ ꓟꓲ ꓠꓯ ꓠꓬ ꓬꓲ ꓒꓬꓱꓽ ꓕꓯꓽ ꓗꓪ ꓐꓰ ꓛꓰꓹ ꓙꓰ ꓢꓲ ꓧꓪ ꓟꓳꓻ ꓟꓽ ꓓ ꓗꓷ ꓡꓰꓳ꓿ 12 ꓫꓵꓻ ꓢꓴ ꓪꓴꓽ ꓪꓴ ꓣꓳ ꓣꓳ ꓠꓬ ꓙꓵꓽ ꓠꓬꓲꓸ ꓕꓲ ꓟꓲꓽ ꓙꓬꓽ ꓗꓪ ꓦꓰꓼ ꓞꓹ ꓟ ꓔꓯ ꓥꓪ ꓟꓳˍ ꓢꓰ ꓡꓳ꓿ ꓖꓳ ꓡꓱ ꓢꓲ ꓕꓳ ꓶ ꓡꓲ ꓮꓽ ꓟꓬꓹ ꓡꓲ ꓒꓬꓱꓺ ꓔ ꓡꓳ꓿ ꓕꓳ ꓶ ꓬꓲ ꓔꓱꓹ ꓬꓲ ꓕꓲ ꓡꓲ ꓔꓯˍ ꓟꓲ ꓒꓬꓱꓺ ꓗꓷˍ ꓡꓳ꓿ ꓖꓳ ꓟ ꓠꓬ ꓢꓯꓼ ꓟꓬ ꓕꓳ ꓶ ꓥ ꓡꓳ꓿ ꓫꓵꓻ ꓢꓴ ꓔꓯ ꓠꓬ ꓬꓲ ꓪꓽ ꓟꓬꓱꓽ ꓔꓯ ꓛꓳ ꓢꓲ ꓕꓳ ꓶ ꓗꓪ ꓐꓳ ꓔ ꓟ ꓡꓰ ꓐꓰ ꓐꓯ ꓟꓴ ꓘꓶꓽˍ ꓡꓳ꓿ 13 ꓬꓲꓻ ꓡꓴꓽ ꓐꓱˍ ꓟꓲ ꓬꓲ ꓠꓯꓸꓼ ꓗꓪ ꓔꓲꓹ ꓫꓵꓻ ꓗꓷ ꓟ ꓡꓽ ꓞꓳ ꓡꓯꓼ ꓙꓱ ꓖꓶ ꓩꓴ ꓡ ꓢꓲ꓾ ꓫꓵꓻˍ ꓟ ꓐꓰ ꓟꓸ ꓟꓲ ꓟꓵˍ ꓟꓲ ꓬꓲ ꓠꓯꓸꓼ ꓗꓪ ꓫꓵꓻ ꓗꓷ ꓟ ꓡꓽ ꓞꓳ ꓡꓯꓼ ꓙꓱ ꓖꓶ ꓩꓴ ꓡ ꓡꓳ꓿ ꓬꓲ ꓪꓽ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓠꓬ꓾ ꓬꓲ ꓪꓽ ꓬꓰ ꓗꓷˍ ꓟ ꓟꓬꓱꓽ ꓔꓯ ꓛꓳ ꓢꓲ ꓐꓯ ꓟꓴ ꓘꓶꓽˍ ꓡꓳ꓿ 14 ꓖꓳ ꓕꓯ ꓫꓵꓻˍ ꓟ ꓐꓰ ꓟꓸ ꓟꓲ ꓟꓵꓽ ꓔꓯˍ ꓟꓲ ꓮꓸ ꓔꓳꓸ ꓬꓲꓻ ꓡꓴ ꓐꓱ ꓗꓪ ꓡꓳ ꓧꓳꓽ ꓗꓷˍ ꓡꓳ꓿ ꓮꓸ ꓔꓳꓸ ꓬꓲꓻ ꓡꓴꓽ ꓐꓱ ꓕꓱ ꓟ ꓠꓬ ꓠꓬꓲꓽ ꓧꓪꓹ ꓕꓲ ꓧꓪꓹ ꓫꓵꓻˍ ꓟ ꓥ ꓡꓳ꓿ 15 ꓢꓯꓼ ꓟꓬ ꓕꓳ ꓶ ꓗꓪ ꓟꓬꓱ ꓟꓽ ꓐꓳ ꓔ ꓢꓴ ꓮꓽ ꓙꓵ ꓔꓯ ꓠꓬ ꓮꓸ ꓔꓳꓸ ꓬꓲꓻ ꓡꓴꓽ ꓐꓱ ꓗꓪ ꓡꓳ ꓧꓳꓽ ꓗꓷˍ ꓡꓳ꓿

ꓟꓳ ꓖꓶ ꓓꓴ 21

1 ꓖꓳ ꓕꓯ ꓟꓴꓽ ꓗꓪ ꓫꓵꓼˍ ꓐꓰ ꓟꓲ ꓠꓯ ꓫꓵꓼ ꓔꓯ ꓥꓪ ꓟꓳˍ ꓡꓳ꓿ ꓬꓲ ꓪꓴꓸ ꓟ ꓟꓴꓽ ꓗꓪˍ ꓐꓰ ꓟꓲ ꓠꓯ ꓠꓬ ꓗꓳꓸ ꓙꓰꓳ꓿ ꓬꓲꓻ ꓡꓴꓽ ꓐꓱˍ ꓟꓲ ꓟꓽ ꓙꓳ ꓗꓷ ꓡꓰꓳ꓿ 2 ꓬꓲ ꓤꓽ ꓖꓴ ꓐꓱ ꓶ ꓙꓽ ꓖꓶ ꓢꓲ ꓐꓲꓻ ꓫꓬꓹ ꓔ ꓟ ꓟꓯꓸ ꓡꓯꓸ ꓟ ꓡꓰ ꓐꓰ꓾ ꓚꓰꓸ ꓔ ꓟ ꓡꓳ ꓒꓱ ꓙꓱ-ꓣꓴ-ꓢ-ꓡꓱ ꓫꓵꓼ ꓠꓬ ꓟꓴꓽ ꓗꓪ ꓗꓪ ꓪꓴ-ꓢ ꓗꓪ ꓐꓰ ꓬꓯꓼ ꓡ ꓟ ꓥꓪ ꓟꓳˍ ꓡꓳ꓿ 3 ꓝꓮꓲ ꓙꓵꓽ ꓠꓬꓲꓸ ꓕꓲ ꓗꓪ ꓐꓰ ꓢꓯꓼ ꓓꓽ ꓟ ꓕꓲ ꓟ ꓓꓳ ꓡ ꓟ ꓥꓪ ꓑ ꓙꓽˍ ꓡꓳ꓿ ꓢꓯꓼ ꓖꓳ ꓟ ꓡꓰ꓾ ꓪꓴ-ꓢ ꓔꓬ ꓖꓴ ꓠꓬ ꓞꓳ ꓤ ꓗꓳ ꓡꓳ ꓗꓪ ꓥ ꓢꓲ꓾ ꓬꓲ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓔꓬ ꓥꓳ꓿ ꓬꓲ ꓪꓽ ꓠꓬ ꓬꓲ ꓑ ꓫꓬꓼ ꓐꓴ ꓬꓰˍ ꓥꓳ꓿ ꓪꓴ-ꓢ ꓬꓲ ꓚꓲ ꓛꓬ ꓠꓬ ꓬꓲ ꓪꓽ ꓗꓳ ꓡꓳ ꓗꓪ ꓔꓬ ꓢꓲ ꓬꓲ ꓪꓽ ꓪꓴ-ꓢ ꓬꓰˍ ꓥꓳ꓿ 4 ꓬꓲ ꓪꓽ ꓟꓬ ꓐꓲ ꓮꓽ ꓙꓵ ꓬꓲ ꓡꓰ ꓫꓵꓹ ꓦ ꓖꓶˍ ꓥꓳ꓿ ꓕꓱ ꓡꓱ ꓖꓳ ꓑꓳ ꓫꓵꓻˍ ꓟ ꓟꓽ ꓙꓳꓻꓳ꓿ ꓠꓲꓹ ꓥꓴˍ ꓟ ꓐꓰ ꓮꓸ ꓛꓬꓹ ꓙꓱˍ ꓟ ꓐꓰ ꓠꓻ ꓟˍ ꓟꓲ ꓟꓽ ꓙꓳꓻꓳ꓿ ꓮ ꓡꓲꓳ ꓐꓯ ꓠꓬ ꓧꓶꓸ ꓕꓯ ꓟ ꓠꓽ ꓗꓳꓸ ꓙꓰꓳ꓾ ꓐꓯˍ ꓡꓳ꓿ 5 ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓴ ꓡꓰ꓾ ꓠꓬꓲ ꓠꓹ꓾ ꓥꓪ ꓡꓰ ꓙꓳˍ ꓟ ꓥ ꓕ ꓑꓳꓸ ꓔꓯ ꓬꓲ ꓫꓵꓼ ꓒꓬꓱꓼ ꓡ ꓝꓲ ꓔꓬ ꓡꓳ꓾ ꓐꓯˍ ꓡꓳ꓿ ꓝꓮꓲ ꓬꓲ ꓡꓰ꓾ ꓐꓳ ꓔ꓾ ꓮ ꓡꓲꓳ ꓐꓯ ꓠꓬ ꓐꓯ ꓘꓶꓽ ꓕꓱ ꓟ ꓠꓬ ꓦ ꓡꓱ ꓐꓳˍ ꓟ ꓐꓰ ꓔꓱꓹ ꓚꓵˍ ꓟ ꓥ ꓡꓳ꓾ ꓐꓯˍ ꓡꓳ꓿ 6 ꓝꓮꓲ ꓬꓲ ꓡꓰ ꓥꓪ ꓔꓯ ꓕꓱ ꓡꓱ ꓐꓯˍ ꓢꓰꓽ ꓡꓳ꓾ ꓬꓰ ꓓꓳ ꓡꓰꓳ꓾ ꓥꓪ ꓠꓬ ꓬꓲ ꓪꓴꓸ ꓟ ꓐꓰ ꓬꓲ ꓟꓶꓽˍ ꓟ ꓥ ꓡꓳ꓿ ꓥꓪ ꓠꓬ ꓢꓯꓼ ꓟꓬ ꓬꓲꓻ ꓙꓬ ꓬꓲꓻ ꓝꓳꓹ ꓟꓶ ꓗꓪ ꓐꓰ ꓢꓲꓼ ꓢꓴ ꓔꓯ ꓬꓲ ꓒꓵꓽ ꓟꓽ ꓧꓪ ꓧꓪ ꓖꓶꓽ ꓓꓳꓻˍ ꓥꓳ꓿ 7 ꓧꓪꓸ ꓡꓰ ꓢꓴ ꓠꓬ ꓕꓱ ꓟꓬ ꓫꓵꓽ ꓟꓶ ꓢꓲ꓾ ꓥꓪ ꓠꓬ ꓬꓲ ꓪꓴ-ꓢ ꓬꓰ ꓢꓲ ꓠꓬꓲ꓾ ꓬꓲꓸˍ ꓟꓲ ꓥꓪ ꓤꓽ ꓥꓪ ꓠꓱ ꓐꓴ ꓬꓰˍ ꓥꓳ꓿ 8 ꓖꓳ ꓡꓱ ꓥ ꓟꓲ ꓠꓲꓹ ꓐꓽ ꓢꓴ꓾ ꓟꓽ ꓙꓵꓻ ꓢꓴ꓾ ꓠꓲꓹ ꓒꓳꓹ ꓠꓲꓹ ꓙꓬ ꓗꓹ ꓢꓴ꓾ ꓞꓳ ꓤ ꓢꓰꓽ ꓢꓴ꓾ ꓟꓽ ꓢꓲ ꓟꓽ ꓫꓬ ꓬꓰ ꓢꓴ꓾ ꓥꓺ ꓟꓬꓱꓽ ꓬꓰ ꓢꓴ꓾ ꓠꓲꓽ ꓐꓬꓱ ꓔꓯ ꓪꓴꓸ ꓓꓵ ꓕꓱꓼ ꓢꓴˍ ꓐꓰ ꓗꓶꓸ ꓢꓴ ꓐꓴ ꓔꓬ ꓖꓴ ꓠꓬ ꓐꓬꓻ ꓞꓹ ꓟ ꓡꓳ ꓐ ꓮꓸ ꓔꓳꓸ ꓬꓲꓻ ꓐꓱ ꓗꓪ ꓥ ꓡꓳ꓿ ꓕꓱ ꓟ ꓠꓬ ꓠꓬꓲꓽ ꓧꓪꓹ ꓕꓲ ꓧꓪ ꓫꓵꓻˍ ꓟ ꓥ ꓡꓳ꓾ ꓐꓯˍ ꓡꓳ꓿ 9 ꓖꓳ ꓕꓯ ꓡꓳꓹ ꓬꓰˍ ꓟ ꓫꓸ ꓘꓶ ꓓꓴ ꓫꓵꓽ ꓟ ꓗꓶꓺ ꓐꓲ ꓞꓹ ꓟ ꓡꓴ ꓗꓶꓸ ꓫꓵꓽ ꓒꓯꓼ ꓔꓯꓹ ꓔ ꓟ ꓟꓴꓽ ꓗꓪ ꓝꓲ ꓓꓴ ꓫꓵꓽ ꓣꓳ ꓗꓪ ꓟ ꓕꓲ ꓣꓳ ꓥꓪ ꓔꓯ ꓫꓸ ꓕꓱ ꓡ ꓢꓲ꓾ ꓕꓱ ꓗꓪ ꓡꓯ꓾ ꓥꓪ ꓡꓰ ꓠꓴ ꓔꓯ ꓮ ꓣꓳ ꓤ ꓬꓲ ꓤ ꓟꓶꓻ ꓟꓯꓸ ꓡꓯꓸ ꓟ ꓟꓳꓸ ꓖꓶˍ ꓠꓬꓲ꓾ ꓐꓯˍ ꓡꓳ꓿ 10 ꓟꓴꓽ ꓗꓪ ꓝꓲ ꓓꓴ ꓠꓬ ꓢꓲ-ꓫꓬ-ꓟ-ꓦ ꓠꓯꓸꓼ ꓗꓪ ꓥꓪ ꓔꓯ ꓮ ꓘꓶ ꓪꓴꓽˍ ꓟ ꓐꓰ ꓟꓴˍ ꓟ ꓪꓽ ꓚꓲ ꓗꓪ ꓔꓯꓹ ꓓꓯ ꓙꓰ ꓢꓲ꓾ ꓟꓴꓽ ꓗꓪ ꓗꓪ ꓪꓴ-ꓢ ꓗꓪ ꓐꓰ ꓬꓯꓼ ꓡ ꓟ꓾ ꓚꓰꓸ ꓔ ꓟ ꓡꓳ ꓒꓱ꓾ ꓙꓱ-ꓣꓴ-ꓢ-ꓡꓱ ꓟꓳꓸ ꓖꓶ ꓡ ꓡꓳ꓿ 11 ꓡꓳ ꓒꓱ ꓖꓳ ꓟ ꓗꓪ ꓠꓬ ꓪꓴ-ꓢ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓙꓳ ꓢꓲ꓾ ꓮ ꓘꓶ ꓒꓵꓽˍ ꓟ ꓒꓵꓽ ꓡꓳˍ ꓡꓰ ꓐꓰ ꓐꓺ ꓢꓲ ꓠꓬꓲ꓾ ꓒꓵꓽ ꓡꓳ ꓫꓬꓻˍ ꓡꓰ ꓐꓰ ꓫꓬꓻ ꓫꓬˍ ꓡꓰꓽ ꓗꓹ ꓟ ꓒꓵꓽ ꓡꓳ ꓠꓯꓺ ꓤꓲꓺˍ ꓡꓰ ꓐꓰ ꓣꓳꓺ ꓔꓬ ꓡꓳ꓿ 12 ꓡꓳ ꓒꓱ ꓠꓬ ꓮ ꓘꓶ ꓫꓵˍ ꓟ ꓐꓰ ꓟꓴꓺˍ ꓟ ꓚꓬꓹ ꓓꓽ ꓟ ꓙꓳ ꓢꓲ꓾ ꓗ ꓘꓶꓽˍ ꓟꓲ ꓞꓲ ꓠꓬꓲꓽ ꓒꓰꓼ ꓙꓳ ꓢꓲ ꓠꓬꓲ꓾ ꓗ ꓘꓶꓽ ꓞꓲ ꓠꓬꓲꓽ ꓒꓰꓼ ꓟ ꓗꓪ ꓟꓴꓽ ꓗꓪ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓬ ꓡꓳ꓿ ꓬꓲ-ꓢꓷ-ꓡꓰ ꓡꓽ ꓞꓳ ꓞꓲ ꓠꓬꓲꓽ ꓪꓳꓼ ꓟ ꓟꓬꓱꓺˍ ꓟꓲ ꓗ ꓘꓶꓽ ꓖꓳ ꓞꓲ ꓠꓬꓲꓽ ꓒꓰꓼ ꓗꓪ ꓜꓰꓺ ꓐꓳ ꓔ ꓡꓳ꓿ 13 ꓐꓶꓽ ꓓꓳ ꓔꓯꓸ ꓟꓳꓸ ꓗ ꓘꓶꓽ ꓢ ꓒꓰꓼ꓾ ꓖꓴ ꓪꓴꓸ ꓔꓯꓸ ꓟꓳꓸ ꓢ ꓒꓰ꓾ ꓖꓴ ꓟꓶꓸ ꓔꓯꓸ ꓟꓳꓸ ꓢ ꓒꓰꓼ꓾ ꓐꓶꓽ ꓓꓵꓽ ꓔꓯꓸ ꓟꓳꓸ ꓢ ꓒꓰꓼ ꓙꓳˍ ꓡꓳ꓿ 14 ꓡꓳ ꓒꓱ ꓚꓬꓹ ꓠꓬ ꓬꓲ ꓚꓰ ꓞꓲ ꓠꓬꓲꓽ ꓟ ꓙꓳ ꓢꓲ꓾ ꓮ ꓣꓳ ꓤ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓟ ꓟꓬꓱ ꓠꓬ ꓖꓳ ꓗꓪ ꓐꓳ ꓔ ꓡꓳ꓿ 15 ꓥꓪ ꓔꓯ ꓫꓸ ꓕꓱ ꓢꓴ ꓠꓬ꓾ ꓡꓳ ꓒꓱˍ ꓐꓰ ꓡꓳ ꓒꓱ ꓗ ꓘꓶꓽˍ ꓐꓰ ꓡꓳ ꓒꓱ ꓚꓬꓹ ꓔꓯ ꓔꓯꓺ ꓠꓹ ꓟ꓾ ꓔꓯꓺ ꓓꓴ ꓫꓵ ꓓꓻ ꓕꓲ ꓕꓷꓹ ꓔꓯꓹ ꓔ ꓡꓳ꓿ 16 ꓡꓳ ꓒꓱ ꓠꓬ ꓡꓲ ꓡꓯꓼ ꓐꓰ ꓗꓹ ꓢꓲ꓾ ꓫꓵˍ ꓟ ꓐꓰ ꓦꓲˍ ꓟ ꓠꓬ ꓕꓲ ꓡꓰꓹꓼ ꓥꓳ꓿ ꓬꓲ ꓠꓬ ꓫꓵ ꓓꓻ ꓖꓳ ꓟ ꓡꓰ ꓡꓳ ꓒꓱ ꓔꓯ ꓔꓯꓺ ꓠꓬꓲ ꓠꓬ꓾ ꓡꓳ ꓔ ꓕꓲ ꓔꓴ ꓥꓪꓽ ꓦꓬꓻ ꓕꓷꓹ ꓙꓳˍ ꓡꓳ꓿ ꓫꓵ ꓔꓯ ꓟꓳꓸˍ ꓐꓰ ꓦꓲꓺ ꓔꓯꓸ ꓟꓳꓸ ꓐꓰ꓾ ꓟꓴꓺ ꓔꓯ ꓟꓳꓸ ꓕꓲ ꓡꓰꓹꓼ ꓥ ꓡꓳ꓿ 17 ꓟꓴꓽ ꓗꓪ ꓝꓲ ꓓꓴ ꓡꓰ ꓞꓳ ꓤ ꓔꓯꓺ ꓓꓴ ꓗꓪ ꓐꓰ ꓚꓬꓹ ꓔꓯˍ ꓟꓲ ꓔꓯꓺ ꓠꓬꓲ ꓠꓬ꓾ ꓕꓲ ꓦꓬꓻ ꓡꓲ ꓞꓲ ꓡꓲ ꓛꓬꓹ ꓙꓳˍ ꓡꓳ꓿ ꓕꓱ ꓟ ꓠꓬ ꓟꓴꓽ ꓗꓪ ꓝꓲ ꓓꓴ ꓡꓰ ꓔꓯ ꓠꓬꓲˍ ꓟ ꓥ ꓡꓳ꓿ 18 ꓚꓬꓹ ꓠꓬ ꓒꓵꓽ ꓡꓳ ꓠꓯꓺ ꓤꓲꓺ ꓡꓰ ꓫꓬꓹ ꓔ ꓡꓳ꓿ ꓡꓳ ꓒꓱ ꓠꓬ ꓫꓬꓻ ꓫꓬˍ ꓡꓰ ꓟ ꓠꓬꓺ ꓐˍ ꓡꓰ ꓐꓰ ꓗꓹ ꓟ ꓫꓵ ꓫꓬꓻ ꓥ ꓡꓳ꓿ 19 ꓚꓬꓹ ꓬꓲ ꓚꓰ ꓗꓪ ꓠꓬ ꓒꓵꓽ ꓡꓳ ꓬꓲ ꓫꓵꓽ ꓬꓲ ꓙꓰ ꓥ ꓕ ꓑꓳꓸ ꓡꓰ ꓐꓲꓻ ꓫꓴꓽ ꓔ ꓡꓳ꓿ ꓚꓬꓹ ꓚꓰ ꓬꓲ ꓪꓴꓸ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓠꓯꓺ-ꓤꓲꓺ꓾ ꓠꓬꓲꓽ ꓟꓻ ꓕꓲ ꓟꓻ ꓟ ꓠꓬ꓾ ꓒꓵꓽ-ꓡꓳ-ꓟꓵꓽ-ꓪꓴ-ꓠꓲꓹ-ꓛꓵꓼ꓾ ꓢ ꓟ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓒꓴꓻ-ꓠꓶꓻ꓾ ꓡꓲ ꓟ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓠꓲꓹ-ꓛꓵꓼ꓾ 20 ꓥꓪꓽ ꓟꓻ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓡꓯꓼ-ꓫꓱꓽ꓾ ꓛꓳꓼ ꓟ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓢꓲꓽ-ꓠꓯꓺ꓾ ꓫꓵꓽ ꓟ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓫꓵ꓾ ꓦꓰꓼ ꓟ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓠꓲꓹ-ꓛꓵꓼ-ꓬꓲ-ꓡꓴꓽ-ꓐꓱ꓾ ꓗꓴꓸ ꓟ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓐꓺ-ꓡꓱꓺ꓾ ꓞꓲ ꓟ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓠꓲꓹ-ꓛꓵꓼ-ꓐꓬꓱꓺ꓾ ꓞꓲ ꓕꓲ ꓟ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓠꓲꓺ-ꓛꓵꓽ꓾ ꓞꓲ ꓠꓬꓲꓽ ꓟ ꓕꓲ ꓟꓻ ꓟ ꓠꓬ ꓒꓵꓽ-ꓡꓳ-ꓢꓲꓽ-ꓠꓲꓹ-ꓛꓵꓼ ꓥ ꓡꓳ꓿ 21 ꓗ ꓘꓶꓽ ꓓꓽ ꓟ ꓞꓲ ꓠꓬꓲꓽ ꓒꓰꓼ ꓠꓬ ꓡꓳ ꓒꓴ ꓡꓴꓸ ꓢꓶꓽ ꓞꓲ ꓠꓬꓲꓽ ꓢꓶꓽ ꓡꓰ ꓫꓬꓹ ꓔ ꓡꓳ꓿ ꓗ ꓘꓶꓽ ꓕꓲ ꓒꓰꓼ ꓡꓰ ꓕꓲ ꓒꓰꓼ ꓠꓬ ꓡꓴ ꓒꓴ ꓡꓴꓸ ꓢꓶ ꓕꓲ ꓢꓶꓽˍ ꓡꓰ ꓫꓬꓹ ꓔ ꓡꓳ꓿ ꓡꓳ ꓒꓱ ꓗꓪ ꓟ ꓙ ꓖꓴ ꓠꓬ ꓡꓳꓸ ꓙꓻ ꓙꓰˍ ꓟ ꓠꓬ ꓐˍ ꓡꓰ ꓐꓰ ꓗꓹ ꓟ ꓫꓵ ꓫꓬꓻ ꓥ ꓡꓳ꓿ 22 ꓡꓳ ꓒꓱ ꓖꓳ ꓟ ꓗꓪ ꓢꓲꓽ ꓫꓬ ꓦꓲ ꓥꓪ ꓟꓽ ꓟꓳ꓿ ꓮ ꓡꓲꓳ ꓐꓯ ꓠꓬ ꓮꓸ ꓫꓵˍ ꓟꓲ ꓬꓰ ꓐ ꓡ ꓢꓴ ꓢꓲ ꓒꓽ ꓪꓴ-ꓢˍ ꓐꓰ ꓮ ꓣꓳ ꓤ ꓠꓬ꓾ ꓖꓳ ꓗꓪ ꓟ ꓢꓲꓽ ꓫꓬ ꓦꓲ ꓥ ꓡꓳ꓿ 23 ꓡꓳ ꓒꓱ ꓖꓳ ꓟ ꓗꓪ ꓣꓳꓺ ꓖꓶ ꓠꓹ ꓟ ꓟꓲꓽ ꓟꓲ ꓦ ꓐ ꓣꓱꓽ ꓟꓽ ꓬꓯꓼ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓐꓬꓱꓼ ꓡꓱꓼ ꓡꓱ ꓟ ꓠꓬ ꓖꓳ ꓗꓪ ꓟ ꓠꓬꓲ ꓟꓳꓻ ꓓꓴ ꓥ ꓢꓲ꓾ ꓮ ꓣꓳ ꓤ ꓠꓬ ꓖꓳ ꓗꓪ ꓟ ꓟꓬ ꓡꓴ ꓥ ꓡꓳ꓿ 24 ꓞꓳ ꓫꓵꓽ ꓐꓴ ꓠꓬ ꓡꓳ ꓒꓱ ꓠꓬꓲ ꓟꓳꓻ ꓓꓴ ꓗꓪ ꓐꓰ ꓫꓱꓽˍ ꓥꓳ꓿ ꓟꓲ ꓠꓯ ꓗꓪ ꓟ ꓪ ꓔꓲ ꓐꓴˍ ꓟꓲ ꓬꓲ ꓪꓽ ꓟꓬꓱ ꓓꓳꓽ ꓖꓳ ꓗꓪ ꓔꓯꓹ ꓓꓵꓽ ꓡꓰˍ ꓥꓳ꓿ 25 ꓖꓳ ꓗꓪ ꓠꓬ ꓢ ꓘꓪ ꓟꓽ ꓙꓳ ꓠꓬꓲ꓾ ꓡꓳ ꓒꓱ ꓗ ꓘꓶꓽ ꓠꓬ ꓮ ꓕꓯˍ ꓟꓲ ꓟꓽ ꓚꓵꓸ ꓗꓷ꓿ 26 ꓞꓳ ꓫꓵꓽ ꓐꓴ ꓠꓬ ꓬꓲ ꓪꓽ ꓟꓬꓱ ꓓꓳꓽˍ ꓐꓰ ꓞꓳ ꓒꓵꓽˍ ꓟ ꓖꓳ ꓗꓪ ꓔꓯꓹ ꓓꓵꓽ ꓡꓰˍ ꓥꓳ꓿ 27 ꓟꓽ ꓫꓬꓻ ꓡꓳ ꓫꓵꓽˍ ꓐꓰ꓾ ꓠꓲꓹ ꓒꓳˍ ꓡꓳ ꓫꓵꓽˍ ꓐꓰ ꓗꓶꓸ ꓢꓴ ꓠꓬ꓾ ꓮ ꓡꓲ ꓥ ꓟꓲ ꓖꓳ ꓗꓪ ꓟꓽ ꓓꓵꓽ ꓡꓰ꓿ ꓮ ꓣꓳ ꓤ ꓬꓲ ꓢꓯꓼ ꓟꓬ ꓕꓳ ꓶ ꓗꓪ ꓟꓬꓱ ꓐꓳ ꓔ ꓢꓴˍ ꓡꓰ ꓓꓵꓽ ꓡꓰˍ ꓥꓳ꓿

ꓟꓳ ꓖꓶ ꓓꓴ 22

1 ꓖꓳ ꓗꓸ ꓠꓯꓸ ꓪꓴ-ꓢ ꓐꓰ ꓮ ꓣꓳ ꓤ ꓙꓵꓽ ꓠꓬꓲꓸ ꓕꓲ ꓗꓪ ꓐꓰ ꓡꓳ ꓒꓱ ꓙ ꓖꓴ ꓓꓽ ꓟ ꓔꓱ ꓦꓲ ꓗꓪ꓾ ꓒꓵꓽ ꓡꓳ ꓫꓬꓻ ꓡꓰ ꓐꓰ ꓐꓬꓱꓼ ꓡꓱꓼ ꓡꓱ ꓬꓲꓻ ꓔꓬ ꓟ ꓢꓯꓼ ꓟꓬ ꓠꓯ ꓬꓲꓻ ꓕꓲ ꓓꓴꓽ ꓬꓲ ꓥꓪ ꓔꓯ ꓟꓳꓸ ꓖꓶ ꓡ ꓡꓳ꓿ 2 ꓠꓯ ꓬꓲꓻ ꓖꓳ ꓐꓽ ꓕ ꓐꓽ ꓗꓪ ꓠꓬ꓾ ꓦ ꓐ ꓕꓲ ꓟ ꓕꓲ ꓫꓵꓽ꓾ ꓕꓲ ꓘꓳꓼ ꓠꓯS ꓗꓪ ꓬꓲ ꓢꓶꓽ ꓞꓲ ꓠꓬꓲꓽ ꓫꓵꓽ ꓓꓱꓼˍ ꓟ ꓢꓯꓼ ꓟꓬ ꓢꓲꓹ ꓜꓲꓻ ꓙꓳˍ ꓡꓳ꓿ ꓢꓲꓹ ꓜꓲꓻ ꓬꓲ ꓒꓬꓽ ꓠꓬ ꓞꓳ ꓫꓵꓽ ꓐꓴ ꓔꓯ ꓫꓬꓹ ꓓꓻ ꓡꓰ ꓓꓴ ꓥ ꓡꓳ꓿ 3 ꓪꓴ-ꓢ ꓙꓱꓽ ꓘꓶ ꓶꓻ ꓞꓹ ꓟ ꓮꓸ ꓫꓵˍ ꓟꓲ ꓕꓱ ꓡꓱ ꓖꓳ ꓑꓳꓸ ꓟꓽ ꓙꓳꓻꓳ꓿ ꓪꓴ-ꓢˍ ꓐꓰ ꓮ ꓣꓳ ꓤ ꓙꓵꓽ ꓠꓬꓲꓸ ꓕꓲ ꓠꓬ ꓡꓳ ꓒꓱ ꓠꓯꓸꓼ ꓗꓪ ꓓꓹ ꓢꓲ꓾ ꓬꓲ ꓚꓳ ꓑꓸ ꓐꓴ ꓠꓬ ꓬꓲ ꓔꓯ ꓣꓱꓽ ꓙˍ ꓥꓳ꓿ 4 ꓬꓲ ꓪꓽ ꓠꓬ ꓬꓲ ꓒꓬꓱꓽ ꓔꓯ ꓟꓳˍ ꓥꓳ꓿ ꓬꓲ ꓟꓬꓱˍ ꓟꓲ ꓬꓲ ꓪꓽ ꓥꓷꓼ ꓛꓲ ꓗꓪ ꓐꓳ ꓔ ꓥꓳ꓿ 5 ꓖꓳ ꓗꓸ ꓠꓯꓸ ꓠꓬ ꓢ ꓘꓪ ꓟꓽ ꓙꓳꓻꓳ꓿ ꓟꓬ ꓡꓴ ꓠꓬꓲ ꓟꓳꓻ ꓓꓴˍ ꓟꓲ꓾ ꓟꓲꓽ ꓟꓲ ꓠꓬꓲ ꓟꓳꓻ ꓓꓴˍ ꓟꓲ ꓬꓲ ꓪꓽ ꓣꓱꓽ ꓟꓽ ꓬꓯꓼꓳ꓿ ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓪꓴ-ꓢ ꓠꓬ ꓬꓲ ꓪꓽ ꓠꓬꓲ ꓟꓳꓻ ꓓꓴ ꓥ ꓡꓳ꓿ ꓬꓲ ꓪꓽ ꓠꓬ ꓕꓲ ꓞꓲꓼ ꓕꓲ ꓑ ꓪ ꓔꓲ ꓣꓱꓽˍ ꓥꓳ꓿ 6 ꓟꓴꓽ ꓗꓪ ꓝꓲ ꓓꓴ ꓡꓰ ꓥꓪ ꓔꓯ꓾ ꓐꓯ ꓘꓶꓽ ꓕꓱ ꓟꓬ ꓟ ꓠꓬ ꓦꓻ ꓡꓱ ꓐꓳˍ ꓟ ꓐꓰ ꓔꓱꓹˍ ꓟ ꓥ ꓡꓳ꓿ ꓟꓷꓽ ꓠꓷꓹ ꓝꓸ ꓢꓴ ꓦꓻ ꓬꓲ ꓪꓽ ꓢꓲ ꓒꓽ ꓪꓴ-ꓢ ꓡꓰ꓾ ꓟꓶꓻ ꓤ ꓟꓽ ꓗꓷ ꓡꓰ ꓕꓯ ꓒꓬꓱꓼ ꓡ ꓠ ꓗꓹ ꓟ꓾ ꓬꓲ ꓚꓳ ꓑꓸ ꓐꓴ ꓔꓯ ꓟꓳꓸ ꓖꓶ ꓠꓹ ꓟ ꓬꓲ ꓟꓴꓽ ꓗꓪ ꓝꓲ ꓓꓴ ꓔꓯ ꓝꓲ ꓩꓴ ꓡꓺꓳ꓿ 7 ꓬꓰ-ꓢꓴ ꓡꓰ꓾ ꓠ ꓠꓹ꓾ ꓥꓪ ꓠꓬ ꓮꓸ ꓟꓲꓸ ꓟꓲ ꓡ ꓥꓳ꓿ ꓕꓳ ꓶ ꓕꓱ ꓟ ꓗꓪ ꓟ ꓟꓷꓽ ꓠꓷꓹ ꓝꓸ ꓘꓶ ꓔꓯ ꓒꓵꓽ ꓛꓳ ꓢꓴ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯˍ ꓡꓳ꓿ 8 ꓕꓱ ꓟꓬ ꓫꓵꓽ ꓟ ꓔꓯ ꓑ ꓙꓽ ꓢꓲ ꓟꓳꓻ ꓢꓴ ꓠꓬ ꓬꓳ-ꓦ ꓥꓪ ꓥ ꓡꓳ꓿ ꓥꓪ ꓑ ꓙꓽ ꓢꓲ ꓟꓳˍ ꓕꓯ꓾ ꓕꓱ ꓟꓬ ꓫꓵꓽ ꓟ ꓥꓪ ꓔꓯ ꓟꓳꓸ ꓖꓶ ꓡ ꓢꓴ ꓟꓴꓽ ꓗꓪ ꓝꓲ ꓓꓴ ꓔꓯ ꓪꓴꓸ ꓓꓵ ꓕꓱꓼ ꓠꓹ ꓟ ꓬꓲ ꓟꓲꓽ ꓙꓬ ꓗꓪ ꓥꓪ ꓟꓳꓼ ꓡꓰꓳ꓿ 9 ꓖꓳ ꓡꓱ ꓥ ꓟꓲ ꓬꓲ ꓡꓰ ꓥꓪ ꓔꓯ꓾ ꓠꓴ ꓕꓱ ꓡꓱ ꓕꓽ ꓬꓰ꓿ ꓥꓪ ꓠꓬ ꓠꓴˍ ꓐꓰ ꓟꓷꓽ ꓠꓷꓹ ꓝꓸ ꓢꓴ ꓠꓴ ꓬꓲꓼ ꓠꓴ ꓠꓬꓲ ꓐꓴˍ ꓐꓰ꓾ ꓕꓳ ꓶ ꓕꓱ ꓟ ꓗꓪ ꓟ ꓐꓯ ꓘꓶꓽ ꓔꓯ ꓒꓵꓽ ꓛꓳ ꓢꓴˍ ꓐꓰ ꓕꓲ ꓡꓰꓹꓼ ꓚꓳ ꓑꓸ ꓛꓳꓽ ꓒꓯꓹ ꓥ ꓡꓳ꓿ ꓠꓴ ꓠꓬ ꓪꓴ-ꓢ ꓔꓯˍ ꓡꓰꓽ ꓪꓴꓸ ꓓꓵ ꓕꓱꓼ꓾ ꓐꓯ ꓖꓶ ꓡ ꓡꓳ꓿ 10 ꓝꓮꓲ ꓬꓲ ꓡꓰ ꓥꓪ ꓔꓯ꓾ ꓕꓳ ꓶ ꓕꓱ ꓟ ꓗꓪ ꓟ ꓟꓷꓽ ꓠꓷꓹ ꓝꓸ ꓘꓶ ꓔꓯ ꓕꓽ ꓑꓲꓸ ꓔ꓿ ꓮ ꓡꓲꓳ ꓐꓯ ꓠꓬ ꓬꓲ ꓝꓲꓸ ꓠꓶꓽ ꓡꓺꓳ꓿ 11 ꓟꓽ ꓜꓳꓽˍ ꓟ ꓬꓰ ꓢꓴ ꓠꓬ ꓟꓽ ꓜꓳꓽˍ ꓟ ꓬꓰ ꓔꓬ ꓝꓲ ꓢꓰꓽ꓾ ꓠꓲꓹ ꓒꓳꓹˍ ꓟ ꓬꓰ ꓢꓴ ꓠꓬ ꓠꓲꓹ ꓒꓳꓹˍ ꓟ ꓬꓰ ꓔꓬ ꓝꓲ ꓢꓰꓽ꓾ ꓔꓱꓹ ꓜꓳꓽˍ ꓟ ꓬꓰ ꓢꓴ ꓠꓬ ꓬꓲ ꓖꓳ ꓡꓱ ꓔꓱꓹ ꓜꓳꓽˍ ꓟ ꓬꓰ ꓔꓬ ꓝꓲ ꓢꓰꓽ꓾ ꓢꓲ ꓚꓰꓸ ꓔ ꓢꓴ ꓔꓯ ꓠꓬ꓾ ꓢꓲ ꓚꓰꓸ ꓔ ꓟ ꓗꓪ ꓔꓬ ꓝꓲ ꓢꓰꓽ꓾ ꓐꓯˍ ꓡꓳ꓿ 12 ꓬꓰ-ꓢꓴ ꓡꓰ꓾ ꓠ ꓠꓹ꓾ ꓕꓲ ꓣꓳ ꓡꓰ ꓕꓲ ꓣꓳ ꓬꓰ ꓗꓷ ꓟ ꓔꓯ ꓛꓳ ꓢꓲ ꓚꓱꓹ ꓖꓶ ꓠꓹ ꓟ ꓥꓪ ꓮꓸ ꓟꓲꓸ ꓟꓲꓸ ꓡ ꓥꓳ꓿ 13 ꓥꓪ ꓠꓬ ꓮ-ꓡ-ꓩ ꓐꓰ ꓳ-ꓟꓲ-ꓗ ꓬꓲ ꓪꓴꓸ ꓟ ꓐꓰ ꓬꓲ ꓟꓶꓽ ꓟ꓾ ꓪꓴꓸ ꓔꓴ ꓟ ꓐꓰ ꓡꓳꓹ ꓬꓰ ꓟ ꓥ ꓡꓳ꓾ ꓐꓯˍ ꓡꓳ꓿ 14 ꓚꓲ ꓛꓬ ꓐꓵ ꓞꓶꓽ ꓞꓲꓽ ꓫꓬꓻ ꓡꓰ ꓝꓲ ꓢꓲ ꓡꓳ ꓒꓱ ꓗ ꓘꓶꓽ ꓗꓪ ꓓꓵꓽ ꓡꓰ ꓟꓶ ꓢꓴ ꓐꓰ꓾ ꓢꓯꓼ ꓟꓬ ꓢꓲꓹ ꓜꓲꓻ ꓗꓪ ꓟ ꓢꓶꓹ ꓢꓶꓽ ꓜꓽ ꓠꓹ ꓟ ꓙꓵꓽ ꓪ ꓟꓶ ꓢꓴ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ 15 ꓮꓸ ꓠꓽ ꓡꓰ ꓐꓰ ꓗꓹ ꓟ ꓞꓳ ꓐꓬ꓾ ꓥꓺ ꓟꓬꓱꓽ ꓬꓰ ꓢꓴ꓾ ꓟꓽ ꓢꓲ ꓟꓽ ꓫꓬ ꓬꓰ ꓢꓴ꓾ ꓞꓳ ꓤ ꓢꓰꓼ ꓢꓴ꓾ ꓠꓲꓽ ꓐꓬꓱ ꓔꓯ ꓪꓴꓸ ꓓꓵ ꓕꓱꓼ ꓢꓴ ꓐꓰ ꓗꓶꓸˍ ꓟ ꓔꓯ ꓠꓲꓹ ꓠꓵ ꓢꓲ ꓗꓶꓸ ꓢꓴ ꓥ ꓕ ꓑꓳꓸ ꓠꓬ ꓡꓳ ꓒꓱ ꓠꓱ ꓫꓱ ꓟꓸꓼ ꓗꓪ ꓔꓬ ꓡꓳ꓿ 16 ꓝꓮꓲ ꓬꓰ-ꓢꓴ ꓡꓰ꓾ ꓬꓰ-ꓢꓴ ꓥꓪ ꓠꓬ ꓘꓴ ꓜꓲ ꓞꓳ ꓔꓯ ꓕꓱ ꓟꓬ ꓫꓵꓽ ꓢꓷꓸ ꓡꓰ ꓝꓲ ꓠꓹ ꓟ꓾ ꓥꓪ ꓟꓴꓽ ꓗꓪ ꓝꓲ ꓓꓴ ꓝꓲ ꓩꓴ ꓡꓺꓳ꓿ ꓥꓪ ꓠꓬ ꓓ-ꓪꓵ ꓬꓲ ꓚꓰ ꓐꓰ ꓬꓲ ꓞꓲꓼ ꓤ ꓡꓯꓹ ꓤ ꓐꓰ꓾ ꓐꓬꓱꓼ ꓡꓱꓼ ꓟ ꓠꓯꓼ ꓗꓴ ꓟ ꓤꓲꓺ ꓥ ꓡꓳ꓾ ꓐꓯˍ ꓡꓳ꓿ 17 ꓢꓲ-ꓫꓬ-ꓟ-ꓦˍ ꓐꓰ ꓟꓯꓸ ꓡꓯꓸ ꓟ ꓡꓰ꓾ ꓡꓯ꓾ ꓐꓯˍ ꓡꓳ꓿ ꓑ ꓙꓽ ꓢꓴ ꓔꓯˍ ꓟꓲ꓾ ꓡꓯ꓾ ꓐꓰ ꓐꓯ ꓝꓲ꓿ ꓢꓲꓼ ꓢꓴ ꓔꓯˍ ꓟꓲ ꓡ ꓝꓲ꓿ ꓢꓯꓼ ꓟꓬ ꓬꓲꓻ ꓙꓬ ꓓꓳꓻ ꓠꓲꓹ ꓫꓵ ꓢꓴ ꓔꓯ ꓠꓬ ꓬꓲ ꓒꓵꓽ ꓟꓽ ꓐꓶꓻ ꓐꓶ ꓓꓳꓻ ꓝꓲ꓿ 18 ꓕꓳ ꓶ ꓕꓱ ꓟ ꓗꓪ ꓟ ꓟꓷꓽ ꓠꓷꓹ ꓝꓸ ꓘꓶꓽ ꓑ ꓙꓽ ꓢꓴ ꓔꓯ ꓥꓪ ꓡꓰ ꓕꓱ ꓡꓱ ꓙꓳ ꓗꓽ ꓖꓶˍ ꓥꓳ꓿ ꓮꓽ ꓟ ꓡꓰ ꓟꓷꓽ ꓠꓷꓹ ꓝꓸ ꓘꓶ ꓕꓱ ꓟ ꓔꓯ ꓡꓴꓽ ꓖꓶˍ ꓕꓯ ꓠꓽ꓾ ꓪꓴ-ꓢ ꓡꓰ ꓕꓳ ꓶ ꓕꓱ ꓟ ꓗꓪ ꓐꓳ ꓔ ꓟ ꓫꓸ ꓘꓶ ꓓꓴˍ ꓟꓲ ꓬꓲ ꓔꓯ ꓡꓴꓽ ꓖꓶ ꓡ ꓥꓳ꓿ 19 ꓮꓽ ꓟ ꓡꓰ ꓟꓷꓽ ꓠꓷꓹ ꓝꓸ ꓕꓳ ꓶ ꓕꓱ ꓟ ꓗꓪ ꓟ ꓐꓯ ꓘꓶꓽ ꓕꓲ ꓐꓱ ꓣꓴꓻ ꓩꓴ ꓗꓷˍ ꓕꓯ ꓠꓽ꓾ ꓕꓳ ꓶ ꓕꓱ ꓟ ꓗꓪ ꓐꓳ ꓔ ꓟ꓾ ꓢꓯꓼ ꓟꓬ ꓢꓲꓹ ꓜꓲꓻ ꓐꓰ ꓢꓲ ꓚꓰꓸ ꓔ ꓟ ꓡꓳ ꓒꓱ ꓗꓪ ꓟ ꓬꓲ ꓔꓯ ꓕꓲ ꓣꓷꓽ ꓟˍ ꓟꓲ ꓪꓴ-ꓢ ꓡꓰ ꓣꓴ ꓦ ꓗꓷˍ ꓥꓳ꓿ 20 ꓕꓱ ꓟꓬ ꓫꓵꓽ ꓔꓯ ꓢꓷꓸ ꓙ ꓟꓳ ꓙ ꓢꓴ ꓡꓰ꓾ ꓥ ꓡꓳ꓾ ꓥꓪ ꓮꓸ ꓟꓲꓸ ꓟꓲꓸ ꓡ ꓥꓳ꓾ ꓐꓯˍ ꓡꓳ꓿ ꓕꓱ ꓡꓱ ꓒꓬꓱꓼ ꓡ ꓝꓲ꓿ ꓢꓲ ꓒꓽ ꓬꓰ-ꓢꓴꓳ꓾ ꓡꓯ꓿ 21 ꓢꓲ ꓒꓽ ꓬꓰ-ꓢꓴ ꓣꓱꓽ ꓛꓰ ꓠꓬ ꓪꓴ-ꓢ ꓬꓲ ꓑ ꓫꓬꓼ ꓮꓽ ꓙꓵ ꓢꓴ ꓐꓰ ꓕꓲ ꓪꓺꓼ ꓙꓳ ꓝꓲ꓾ ꓕꓱ ꓡꓱ ꓒꓬꓱꓼ ꓡ ꓝꓲ꓿