1 Kareb nateh tana' pinudut, idi Bala ineh pangeh idi. Ieh idi dengan Allah, idi Ieh mepad dengan Allah teh. 2 Rat pun-pun Bala ineh idi dengan Allah. 3 Rat Neneh Allah nemudut luk amung-amung, idi na luk idi anun-anun pana' luk pangeh pinudut baken ratnan Ieh. 4 Bala ineh lawa ulun idi ulun ineh nengacing acang kuan lemulun. 5 Acang ineh merasat bang dacem, idi dacem ineh na miak ngilep neneh. 6 Inan selemulun luk icuk Allah, ngadanneh Yahya. 7 Ieh iacing pad mada' lemulun ratnan acang ineh. Ieh nemada' ratnan ineh pad amung-amung lemulun miak ninger idi manu ku acang ineh. 8 Ieh sebuleng baken acang ineh; ieh nacing pad maré kali' ratnan acang ineh. 9 Ini acang luk matu luk macing bang tana' ini pad ngacang amung-amung lemulun. 10 Bala ineh pangeh idi bang tana' ini. Idi Allah nemudut tana' ini ratnan Ieh, iamo' tana' ini na nengiti Neneh; 11 Ieh nacing inan pupuNeh sebuleng, iamo' pupuNeh ineh na pian ngalap Neneh. 12 Iamo' kuan lemulun luk nengalap idi manu Neneh, Ieh nemaré lalud pad ideh mangun ku anak-anak Allah. 13 Na ideh mangun ku anak Allah maya' lawé lemulun uen nenganak, iamo' Allah sebuleng mangun ku Tamandeh. 14 Bala ineh pangeh mangun ku lemulun idi netudo arang tau. Tau pangeh nenier rayehNeh luk mepanu' ku katu idi luk matu. Ieh ineh rayeh luk ilapNeh ngaceku Ieh Anak sebuleng Allah Taman. 15 Yahya nemare kali' ratnan Yésus, idi nengitang, kebalaneh, "Ini Lemulun luk bilaku miak macing muci rat negku. Iamo' Ieh meluun rayeh rat negku, ngaceku Ieh pangeh idi kareb nateh ui tinganak." 16 Ngaceku ratnan katuNeh luk pelaba rayeh Allah pangeh nengeperuan netau, idi peruan ineh iuk-iuk mula'. 17 Allah nemaré Ukum dengan tang Musa, iamo' katu idi luk matu pangeh nacing ratnan Yésus Keristus. 18 Seburur pana' nateh luk nenier Allah iamo' Anak buleng ineh luk idi dengan Allah, idi luk tudo iring Taman, Ieh luk pangeh nengegala' Neneh. 19 Lun rayeh-rayeh lun Yahudi déi' Yerusalim nengecuk imam-imam idi lun Liwi amé' ngitun Yahya, kebaladeh, "Idéké iko ini?" 20 Yahya na nengalum, iamo' ieh nengamo dengan megala', kebalaneh, "Ui ini baken Keristus." 21 Idi ideh nengitun neneh teh, "Kudeng pieh kudeng ineh, idéké iko? Iko Eliaké?" Idi keburi'neh, "Baken." "Iko nabi inehké?" Idi keburi'neh, "Baken." 22 Idi kebaladeh neneh, "Idéké iko ini? Ai na miak na ngor bala lemulun luk nengecuk nekai. Anunké luk belénmu ratnan bururmu sebuleng?" 23 Idi kebala Yahya (maya' kudeng bala Nabi Yesaya): " 'Ui ini tang lemulun luk ngitang déi' su luk ali-ali: Ngesiri dalan Tuhan!' " 24 Idi lemulun ineh pangeh icuk luk Parisi. 25 Idi ideh nengitun ni Yahya, keburi'deh, "Kudeng iko ini baken Keristus, idi baken Elia, idi baken nabi ineh, anunké punneh iko ngerereb lemulun?" 26 Idi kebala Yahya, "Ui ini ngerereb dengan abpa' mo', iamo' arang uned muyuh inan Seburur Lemulun luk na muyuh miti, 27 Ieh macing muci rat negku, idi neka abet kasutNeh pana' ui na mayu." 28 Amung ini pangeh mangun déi' Baitani, déi' dipar Abpa' Yarden, su luk inan Yahya nengerereb lemulun. 29 Kenebpa Yahya nenier Yésus macing neneh, idi keburi'neh, "Siruh, Anak Dumba Allah luk mabeh sala' amung uang tana' ini. 30 Ratnan Ieh ini luk ui pangeh nemada', kebalaku, 'Muci rat negku Seburur Lemulun macing, luk meluun rayeh rat negku, ngaceku Ieh pangeh idi atun rat negku.' 31 Atun ui na kali' idé Ieh; iamo' ui nacing ngerereb dengan abpa', pad ngegala' Neneh kuan luk pupu Israil." 32 Idi Yahya pana' nemaré kali' keburi'neh, "Ui nenier Roh Allah temurun rat déi' langit, mepad kudeng aceh suit sukur, idi Ieh tudo luun Yésus. 33 Idi ui na miti Neneh; iamo' Allah luk nengecuk negku ngerereb dengan abpa' ineh, nepebala negku, 'Iko miak nier Roh ineh temurun idi tudo luun Seburur Lemulun. Ieh ineh luk ngerereb dengan Roh Meligan.' " 34 Idi kebala Yahya, "Ui pangeh nenier ineh, idi maré kali' nemuyuh ratnan Ieh ini Anak Allah." 35 Kenebpa Yahya idi teh dengan dueh burur anak sekola'neh. 36 Kareb ieh nenier Yésus nalan, idi ieh nepebala, "Siruh, Anak Dumba Allah." 37 Idi dueh burur anak sekola' ineh neninger neneh pebala kudeng ineh, idi didueh nemaya' Yésus. 38 Yésus nelumi, idi nenier nedidueh luk maya' Neneh ineh, idi kebalaNeh nedidueh, "Anunké luk tekapen medueh?" Idi keburi' didueh Neneh, "O Rabi!" (Ilung Rabbi, ieh ineh Guru), "Iapehké inanMu tudo?" 39 Idi kealaNeh nedidueh, "Amé' tungé' idi nier." Idi didueh nemaya' Neneh idi nenier su luk inanNeh tudo. Idi didueh netudo dengan Yésus aco sineh. (Kaerb ineh pelaba tangal musul aco.) 40 Seburur rat arang didueh luk neninger bala Yahya, idi luk pangeh nemaya' Yésus, ieh ineh Andrias, kinanak Simun Pétrus. 41 Idi Andrias nepapu' kinanakneh Simun, idi nepebala neneh, "Kai pangeh nepapu' Mesias" (luk ilungneh Keristus). 42 Ieh nenguit Simun amé' matun Yésus. Idi Yésus nenier neneh idi nepebala, "Iko ini Simun, anak Yahya, iko miak tetanen Képas." (Ini mepad kudeng Pétrus, idi ilungneh "Batu.") 43 Kenebpa Yésus sikal amé' déi' Galilia. Ieh nenakap ni Pilipus, idi nepebala neneh, "Maya' Negku." ( 44 Pilipus ineh lun Baitsaida, luk pamung bawang dengan Andrias idi Pétrus.) 45 Pilipus nenakap Nataniel, idi nepebala neneh, "Kai pangeh nepapu' Yésus, luk pangeh ginala' Musa bang Surat Ukum idi nabi-nabi pana', ieh ineh Yésus, anak Yusup lun Nasarét." 46 Idi keburi' Nataniel neneh, "Miakké Nasarét ngacing anun-anun luk do'?" Idi keburi' Pilipus neneh, "Amé' iko idi nier." 47 Kareb Yésus nenier Nataniel macing Neneh, idi Ieh nepebala ratnan ieh, "Siruh, seburur lun Israil luk matu, idi luk na naluk teh!" 48 Idi keburi' Nataniel Neneh, "Kudeng apehké Rabbi ngiti negku?" Idi Yésus nengor balaneh, keburi'Neh, "Kareb nateh Pilipus nenawar namu, kareb iko pa liang lawa gita' ineh, pangeh Ui nekali' namu." 49 Idi keburi' Nataniel Neneh, "O Guru, Iko Anak Allah! Iko luk Raca' lun pupu Israil!" 50 Idi kebala Yésus neneh, "Manuké iko ngaceku Ui mala kuanmu Ui nenier namu pa liang lawa gita' ineh? Iko miak nier luk meluun rayeh ratnan ini." 51 Idi kebalaNeh nedeh teh, "Matu Ui pebala nemuyuh, idi muyuh miak nier langit mukab, idi amung-amung melaikat Allah umak idi temurun luun Anak-Lemulun."
1 Dueh aco muci ratnan ineh inan aceh irau paweh déi' bawang Kana, déi' tana' Galilia. Idi tinan Yésus idi déi', 2 Yésus idi anak-anak sekola'Neh pana' tinawar amé' ku irau paweh ineh. 3 Kareb abpa' anggur pangeh mabud, idi tinan Yésus nepebala Neneh, "Abpa' anggurdeh mabud." 4 Idi kebala Yésus neneh, O Ina', aleg ngecuk Negku nganau' kudeng ineh. KarebKu ngegala' rayehKu nateh nacing." 5 Idi tinanNeh nepebala inan amung-amung demulun, "Nganau' muyuh anun-anun luk dukenNeh nemuyuh." 6 Maya' adat baru' lun Yahudi inan anem rubi déi'. Kinula' abpa' luk miak semuet bang aceh rubi, ieh ineh dueh ngepulu' kian teluh ngepulu' gilin. 7 Idi kebala Yésus nelun duken ineh, "Do' manu' amung rubi ini ku abpa'." Idi ideh nenganau' abpa' pad macing mepanu'. 8 Idi kebalaNeh nedeh, "Ngook nekini, idi nguit kuan lun rayeh irau ineh." Idi ideh nenguit ineh iné' neneh. 9 Idi ieh nenutun abpa' luk pangeh mangun ku abpa' anggur ineh. Na ieh kali' rat iapeh ini nacing (iamo' amung lun duken luk nengook abpa' ineh nekali'). Idi ieh nenawar anak deléi luk paweh, 10 idi keburi'neh neneh, "Anid-anid lemulun pekalai maré abpa' anggur luk do' atun, idi kareb lemulun pangeh musam ngirup, idi ieh maré luk na do' tu; iamo' iko nenganug abpa' anggur luk meluun do' macing nekini!" 11 Yésus nenganau' tanu' luk melalud luk pun-pun ini déi' Kana luk bang bawang Galilia; idi Ieh nengegala' rayehNeh déi', pad anak-anak sekola'Neh pana' manu Neneh. 12 Muci ratnan ineh Yésus iné' bawang Kapernaum dengan tinanNeh, kinanak-kinanakNeh, idi anak-anak sekola'Neh. Idi ideh netudo déi' tuda'-tuda' aco kinioneh. 13 Kareb aco rayeh Irau Paska lun Yahudi pangeh muneng, idi Yésus iné' Yerusalim. 14 Idi bang Ruma' Allah Ieh nepapu' tuda'-tuda' lemulun luk masui sapi', dumba, sukur, idi tuda'-tuda' lemulun luk ngelibal usin luk tudo iring méjadeh. 15 Ieh nenganau' aceh bebal ratnan ué', idi Ieh nemasut amung pung rat bang Ruma' Allah ineh, do' dumba idi sapi' pana'. Ieh nengisak amung-amung usin lemulun luk ngelibal usin ineh, idi méjadeh linukebNeh. 16 Idi kebalaNeh nelun luk masui sukur ineh, "Iten muyuh amung ini rat ieni. Aleg muyuh nganau' ruma' TamanKu ini mangun ku luk inan masui idi melih." 17 Idi anak-anak sekola'Neh nengerawé ratnan luk pangeh inayud, "Geriguen ngaceku ruma'Mu ngegio niatKu." 18 Idi lun rayeh-rayeh Yahudi nengedaluh Yésus, kebaladeh, "Anunké tanu' luk miak ruenMu pad ngegala' laludMu kuan kai?" 19 Idi kebala Yésus, "Ngusag Ruma' Allah ini, idi Ui sikal mudut neneh teh bang teluh aco kinioneh." 20 Idi keburi'deh, "Apat ngepulu' anem lak kinioneh lemulun mudut Ruma' Allah ini. Miakké Iko mudut neneh bang teluh aco mo'?" 21 Iamo' ruma' Allah luk bilaNeh ineh, ieh ineh bururNeh sebuleng. 22 Kareb Yésus tinui rat arang lun naté, idi anak-anak sekola'Neh nengerawé ratnan luk bilaNeh ineh. Idi ideh manu ku Surat Allah idi bala Yésus pana'. 23 Kareb Yésus déi' Yerusalim kareb Irau Paska, mula' lemulun manu inan ngadanNeh, ngaceku ideh pangeh nenier amung-amung tanu' luk inau'Neh. 24 Iamo' Yésus na merapet nedeh, ngaceku Ieh nekali' terawé amung-amung lemulun. 25 Na ulekneh seburur pana' mada' Neneh ratnan lemulun, ngaceku Ieh sebuleng kali' amung-amung luk bang niatdeh.
1 Inan seburur lun Parisi, ngadanneh Nikodimus, ieh ineh seburur lun rayeh lun Yahudi. 2 Ieh iné' papu' Yésus kareb malem, idi nepebala Neneh, "O Guru, kai kali' Iko ini Guru luk nacing ratnan Allah. Ngaceku na luk idi seburur pana' miak nganau' amung tanu', mepad kudeng luk ianu'Mu, kudeng na Allah idi denganneh." 3 Idi kebala Yésus, "Matu, Ui pebala namu, kudeng selemulun na tinganak baruh, na ieh miak nier Imet Allah." 4 Idi kebala Nikodimus, "Kudeng apehké seburur lemulun miak ruen nenganak kareb ieh pangeh rayeh? Miakké ieh semuet baruh bang nakan tinanneh, idi ruen nenganak teh?" 5 Idi kebala Yésus, "Matu, Ui pebala namu, kudeng selemulun na tinganak ratnan abpa' idi Roh, na ieh miak semuet bang Imet Allah. 6 Luk tinganak ratnan burur lemulun, ieh lemulun teh; idi luk tinganak ratnan Roh, ieh Roh teh. 7 Aleg iko mawa, ngaceku Ui pebala namu, muyuh na miak na uen nenganak baruh. 8 Bui macing iapeh-iapeh luk pianneh. Iko ninger unineh, iamo' iko na kali' rat iapeh ieh macing idi iapeh luk ulekneh. Kudeng ineh teh anid-anid lemulun luk tinganak ratnan Roh." 9 Idi kebala Nikodimus, "Kudeng apehké amung ineh miak mangun?" 10 Kebala Yésus, "Iko guru lun Israilké, idi na iko kali' ilung amung-amung ini? 11 Matu, Ui pebala namu, kai pebala ratnan luk kali' kai, idi kai mada' ratnan luk sinier kai, iamo' na muyuh pian ngalap bala kai ineh. 12 Muyuh na manu Negku kareb Ui mada' nemuyuh ratnan luk mangun bang tana' ini, kudeng apehké muyuh miak manu kudeng Ui mada' nemuyuh ratnan surga? 13 Seburur pana' nateh numak surga, baken ratnan Anak-Lemulun luk pangeh netemurun rat surga." 14 Mepad kudeng Musa nengiding menipeh ineh déi' su luk ali-ali, kudeng ineh teh Anak-Lemulun kali' rungen uen ngikit, 15 pad idé-idé luk manu Neneh miak ngalap ulun luk meruked. 16 Ngaceku Allah mawa kuan uang tana' ini, pad Ieh nemaré Anak bulengNeh, idi idé'-idé luk manu Neneh na miak maté, iamo' ieh ngalap ulun luk meruked. 17 Ngaceku Allah nan nengecuk AnakNeh amé' bang tana' ini pad ngukum tana' ini, iamo' pad tana' ini miak uen ngulun ngaceku Ieh. 18 Lemulun luk manu Neneh na miak kumin, iamo' lemulun luk na manu ineh kali' rungen pangeh inukum, ngaceku na ieh manu inan ngadan Anak buleng Allah ineh. 19 Idi ini ukum ineh: acang pangeh nacing bang tana' ini, iamo' lemulun meluun sikal ku dacem ratnan acang ineh, ngaceku kekamendeh dat. 20 Idé-idé luk nganau' luk dat, megateh inan acang idi na macing inan acang ineh, pad kekamenneh na uen ngegala', 21 iamo' lemulun luk nganau' luk matu macing inan acang, pad megala' kekamenneh ineh maya' pian Allah. 22 Pangeh ineh Yésus idi anak-anak sekola' iné déi' tana' Yudia. Idi Ieh netudo dengandeh déi', idi nengerereb lemulun. 23 Idi Yahya pana' nengerereb déi' Ainun muneng ku Salim, ngaceku mula' abpa' déi'. Idi lemulun nacing idi rirebneh. ( 24 Yahya nateh tinutup.) 25 Sebuang anak sekola' Yahya nepesaad dengan seburur lun Yahudi ratnan adat sibaru'. 26 Idi ideh iné' ni Yahya idi nepebala neneh, "O Guru iko ngerawé lemulun ineh luk denganmu dipar Abpa' Yarden, luk pangeh bilamu? Ieh ngerereb lemulun nekini idi amung-amung lemulun amé' Neneh." 27 Iamo' kebala Yahya, "Seburur pana' na miak ngalap anun-anun kudeng na barén Allah neneh. 28 Muyuh sebuleng mangun ku lun nekali' negku: Na ui pebala idi ui ini Keristus ineh. Iamo' ui icuk Allah atun rat Neneh. 29 Deléi luk sikal ngaweh, ieh kuan decur ineh; idi lun rurum deléi luk sikal ngaweh ineh tuped iringneh, idi ieh pelaba awang niat ninger bala deléi ineh. Kudeng ineh teh ui ini nekini pelaba awang niat. Idi awangku meriput. 30 Do' Ieh iuk amé' rayeh, idi ui ini iuk amé' isuut." 31 Ieh luk macing rat déi' dita', Ieh ineh luk meluun rayeh ratnan amung-amung. Lemulun luk ratnan tana' ini iniap kuan tana' ini teh idi pebala ratnan tana' ini. Ieh luk macing rat suraga, Ieh ineh pa luun amung-amung. 32 Ieh maré kali' ratnan luk sinierNeh idi luk pindengerNeh teh, iamo' seburur pana' na ngalap balaNeh ineh. 33 Lemulun luk ngalap balaNeh ngegala' ratnan Allah ineh matu. 34 Ieh luk icuk Allah mada' bala Allah, ngaceku Allah maré TohNeh dengan na uen nguad. 35 Taman mawa inan Anak ineh, idi luk amung-amung pangeh biréNeh bang paladNeh. 36 Lemulun luk manu inan Anak ineh, ieh ngalap ulun luk meruked. Iamo' lemulun luk na maya' bala Anak ineh, ieh na miak kali' ulun, iamo' useh Allah tudo pa luunneh.
1 Lun Parisi neninger ratnan kudeng apeh Yésus ngalap idi ngerereb meluun ula' anak sekola' ratnan Yahya. ( 2 Setuneh baken Yésus sebuleng nengerereb lemulun, iamo' anak-anak sekola'Neh luk nengerereb nedeh.) 3 Kareb Yésus kali' baladeh ineh, idi Ieh nenecan tana' Yudia, idi nelemubed iné' Galilia. 4 Iamo' na miak na Ieh lemaba tana' Samaria. 5 Ieh nacing inan aceh bawang déi' Samaria, ngadanneh Sikar, muneng ku tana' luk pangeh biré Yakub atun kuan Yusup, anakneh ineh. 6 Idi déi' inan aceh subuk Yakub. Idi ngaceku Yésus merur nenalan Ieh netudo iring subuk ineh. Kareb ineh lélé muned aco. 7 Idi seburur decur lun Samaria nacing sikal ngalap abpa' ineh; idi kebala Yésus neneh, "Ui mutuh ngirup." ( 8 Ngaceku anak-anak sekola'Neh pangeh iné' melih luk kenen déi' bang bawang.) 9 Idi kebala decur lun Samaria Neneh, "Kudeng apehké Iko ini seburur lun Yahudi mutuh luk rupen rat negku, seburur decur lun Samaria?" Ngaceku lun Yahudi na pamung akan dengan lun Samaria. 10 Idi kebala Yésus, 'Kudeng iko kali' katu Allah idi idé Lemulun luk mutuh namu maré luk rupen, na miak na iko mutuh rat Neneh, pad Ieh maré abpa' luk mulun kuanmu." 11 Idi keburi' decur ineh, "O Tuan, Iko na luk ku ngook abpa', idi subuk ini medalem. Rat iapehké Iko ngalap abpa' luk mulun ineh? 12 Tepun kai Yakub nemaré subuk ini kuan kai. Idi ieh sebuleng nengirup ratnan subuk ini dengan anak-anakneh idi sapi'neh pana'. Ikoké meluun rayeh ratnan tepun kai Yakub?" 13 Kebala Yésus, "Idé-idé luk ngirup abpa' ini, ieh miak meparing teh: 14 iamo' idé-idé luk ngirup abpa' luk barénKu neneh, na ieh miak meparing ruked-ruked, ngaceku abpa' luk barénKu ineh, miak mangun bang bururneh ku aceh bued abpa' luk manud macing inan ulun luk meruked." 15 Idi kebala decur ineh, "O Tuan, maré negku abpa' ineh, pad ui na meparing idi na merur amé' tungé ngook abpa'." 16 Kebala Yésus neneh, "Amé' iko nawar awanmu, idi lemubed amé' tungé'." 17 Kebala decur ineh, "Ui na awan." Idi kebala Yésus neneh, "Matu balamu, iko na awan. 18 Limeh burur deléi pangeh mangun ku awanmu, idi luk nekini baken awanmu. Matu balamu ineh." 19 Kebala decur ineh, "O Tuan, ui kali' Iko seburur nabi. 20 Tepun kai nesembayang luun surud ini iamo' kebala muyuh, Yerusalim ineh luk do' inan lemulun sembayang." 21 Keburi' Yésus neneh, O decur, do' iko manu Negku, karebneh miak macing idi lemulun na miak sembayang inan Taman ineh luun surud ini idi déi' Yerusalim pana'. 22 Muyuh lun Samaria na kali' idé luk inan muyuh sembayang; kai lun Yahudi kali' luk inan kai sembayang, ngaceku ulun macing rat nelun Yahudi. 23 Iamo' karebneh miak macing, idi nekini pana' pangeh nacing idi amung-amung lemulun luk sembayang luk matu ineh miak sembayang inan Taman dengan lalud Roh Allah idi luk matu; ngaceku Taman ineh petulu dengan lemulun luk kudeng ineh sembayang Neneh. 24 Allah ineh Roh; idi lemulun luk sembayang Neneh, na miak na ieh sembayang dengan lalud RohNeh idi luk matu." 25 Idi keburi' decur ineh Neneh, "Ui kali' Mesias luk titen Keristus miak macing. Kareb Ieh macing, Ieh miak mada' netau ratnan luk amung-amung." 26 Kebala Yésus neneh,"Ui ini Ieh luk pegayam denganmu." 27 Kareb ineh teh anak-anak sekola'Neh nacing; idi ideh mawa, ngaceku Yésus nepegayam dengan seburur decur. Iamo' seburur pana' na nengitun Neneh, "Anunké luk tekapenMu?" idi "Ngudehké Iko pebala neneh?" 28 Idi decur ineh nenecan sidangurneh, idi iné' bang bawang idi nepebala nelun mula' déi', 29 "Amé' muyuh nier lemulun luk mada' negku ratnan amung-amung luk inau'ku. Bakenké Ieh ini Keristus?" 30 Idi lun mula' ineh nenalan rat bang bawang iné' nier Yésus. 31 Kareb ineh teh kebala anak-anak sekola' ineh nan Yésus, "O Guru, kuman Iko." 32 Iamo' keburi'Neh nedeh, "Ui inan luk kenen luk Ui sikal kuman luk na kali' muyuh." 33 Idi anak-anak sekola' nepebala seburur dengan seburur, "Inanké lemulun nenguit luk kenen kuanNeh?" 34 Idi kebala Yésus nedeh, "AkanKu, ieh ineh nganau' luk pianNeh luk nengecuk Negku, idi ngeriput kekamenNeh. 35 Muyuh pebala, idi apat bulan teh idi miak ngeranih. Matu Ui pebala nemuyuh, Do' muyuh tukag, idi nier lati'-lati', ngaceku nekini lati' ineh pangeh melak miak uen ngeranih. 36 Idi lemulun luk ngeranih ineh ngalap tabpar, idi ngamung bua' luk kuan ulun luk meruked, pad lemulun luk nibu idi lemulun luk ngeranih, pad-pad mawang niat. 37 Matu bala ini, "Seburur nibu, idi seburur luk baken ngeranih.' 38 Ui nengecuk nemuyuh ngeranih bang lati' luk na inau' muyuh; luk baken nenganau' ineh, idi muyuh ngalap uli'neh." 39 Mula' lun Samaria bang bawang ineh manu inan Yésus, ngaceku ratnan bala decur luk nepebala, "Ieh nemada' negku ratnan amung-amung luk inau'ku." 40 Idi kareb lun Samaria ineh nacing inan Yésus ideh nemutuh Neneh tudo dengandeh; idi Ieh netudo déi' dueh aco kinioneh. 41 Idi meluun ula' lemulun manu teh, ngaceku bala Yésus. 42 Idi kebaladeh nan decur ineh, "Nekini kai manu, baken ngaceku luk bilamu mo', iamo' kai sebuleng pangeh neninger balaNeh idi kai nekali', idi Ieh ineh Lun Nengulun tana' ini." 43 Idi pangeh dueh aco Yésus nenalan rat déi' iné' Galilia. 44 Ngaceku Yésus sebuleng nepebala, "Seburur nabi na miak ruen ngedita' bang bawangneh sebuleng." 45 Kareb Ieh nacing déi' Galilia, idi Ieh tinawar lun Galilia, ngaceku ideh pangeh iné' ku Irau Paska déi' Yerusalim, idi ideh nenier amung-amung luk inau'Neh kareb irau ineh. 46 Idi Yésus nelemubed iné' Kana déi' tana' Galilia, su luk inan abpa' inisu'Neh mangun ku abpa' anggur ineh. Idi inan seburur lun tareh raca' luk inan aceh anak luk mét déi' Kapernaum. 47 Kareb ieh neninger ratnan Yésus pangeh nacing rat tana' Yudia amé' Galilia, idi ieh iné' papu' Yésus, idi nemutuh Neneh amé' ngedo' anakneh luk lélé maté. 48 Kebala Yésus neneh, "Kudeng na muyuh nier tanu' idi kekamen luk nan mawa, na tu muyuh manu." 49 Idi kebala lun tareh raca' ineh, "O Tuan, amé' Iko kareb nateh anakku maté." 50 Kebala Yésus neneh, "Amé' iko, anakmu ineh mulun." Idi lemulun ineh manu ku bala Yésus ineh, idi ieh iné'. 51 Kareb ieh arang dalan, demulunneh iné' papu' neneh, kebaladeh, "Anakmu ineh pangeh do'." 52 Idi ieh nengitun nedeh ratnan idan karebneh ieh nedo'. Idi kebaladeh, "Nalem kareb mepulid aco dademneh pangeh nedo'." 53 Idi tamanneh nengerawé kareb ineh teh Yésus nepebala neneh, "Anakmu ineh mulun." Idi ieh manu dengan amung uang tetek ruma'neh. 54 Idi ini tanu' luk kedueh inau' Yésus kareb pangeh Ieh nacing rat tana' Yudia amé' Galilia.
1 Muci ratnan ineh inan aceh irau lun Yahudi; idi Yésus iné' déi' Yerusalim. 2 Idi déi' Yerusalim muneng ku "Tanga' Dumba" inan aceh takung, maya' buri' Iberani titen Betesda, idi takung ineh inan limeh tadur. 3 Mula' lun mét telubid luun tadur ineh, ieh ineh lun mebuser, lun meliai, idi lun mét naté urat. (Ideh nganét abpa' takung ineh melipu', 4 ngaceku nganét kareb aceh melaikat Tuhan temurun bang takung neh idi ngelipu' abpa', idi lun mét luk temurun atun bang takung ineh, kareb abpa'neh melipu', idi ieh do'ratnan anun-anun luk métneh.) 5 Idi inan teh déi' seburur lemulun luk mét pangeh teluh ngepulu' ualuh lak kinioneh. 6 Kareb Yésus nenier nedeh telubid déi', idi nekali' ieh pangeh mét mio kudeng ineh, idi Ieh nepebala neneh, "Sikalké iko do' ratnan étmu?" 7 Idi kebala lun luk mét ineh, "O Tuan, na lemulun luk miak nguit negku semuet bang takung ini kareb abpa'neh melipu', iamo' kareb ui macing, lun baken pangeh netemurun nengili negku." 8 Kebala Yésus neneh, "Tumui iko idi nguit ugammu idi nalan!" 9 Idi petacu lemulun ineh nedo', idi ieh nenguit ugamneh idi nenalan. Idi ini mangun kareb Aco luk inan Mudeng. 10 Ngaceku ineh lun Yahudi nepebala kuan lemulun luk dino' ineh, "Aco sini Aco luk inan Mudeng, bibpeng kuanmu na miak nguit ugammu ineh." 11 Iamo' kebalaneh, "Kebala lemulun luk nengedo' negku ini, 'Nguit ugammu idi nalan.' " 12 Idi ideh nengitun neneh, keburi'deh, "Idéké lemulun ineh luk nemala kuanmu, 'Nguit ugammu idi nalan'?" 13 Iamo' lemulun luk dino' ineh na kali' Neneh idé, ngaceku pelaba ula' lemulun su ineh, idi Yésus pangeh nenalan. 14 Muci ratnan ineh Yésus nepapu' neneh bang Ruma' Allah, idi nepebala neneh, "Nekini iko pangeh do'. Aleg nganau' sala' peh, pad iko na mekaneh luk meluun dat." 15 Idi lemulun ineh iné' mada' nelun Yahudi ratnan Yésus luk nengedo' neneh ineh. 16 Ngaceku ineh lun Yahudi nengimun ngedereh Yésus, ngaceku Ieh nenganau' luk kudeng ineh kareb Aco luk inan Mudeng. 17 Iamo' kebala Yésus nedeh, "TamanKu ngakem kidi-kidi, idi Ui pana' ngakem teh." 18 Ngaceku ineh lun Yahudi meluun tueh nakap dalan sikal ngaté Neneh, baken ngaceku ngelaba ukum Aco luk inan Mudeng mo', iamo' ngaceku Ieh nemala Allah ineh TamanNeh, idi maad bururNeh dengan Allah. 19 Idi kebala Yésus, "Matu, Ui pebala nemuyuh, Anak ineh na miak nganau' anun-anun luk maya' pianNeh sebuleng, iamo' Ieh nier luk ruen Taman ineh. Anun-anun luk inau' Taman, ineh teh luk ruen Anak ineh. 20 Ngaceku Taman mawa inan Anak ineh, idi Ieh nemada' sirenNeh amung-amung luk ruenNeh sebuleng; idi teh Ieh sikal mada' sirenNeh kekamen luk meluun rayeh ratnan amung-amung ini, pad muyuh pana' miak mawa. 21 Mepad kudeng Taman nui amung-amung lun naté idi ngulun nedeh, kudeng ineh teh Anak ineh ngulun idé-idé luk pianNeh. 22 Ngaceku Taman ineh na ngukum seburur pana', iamo' Ieh pangeh nemaré amung-amung ukum ineh kuan Anak ineh, 23 pad amung-amung lemulun miak gedita' Anak ineh mepad kudeng ideh ngedita' Taman ineh mepad kudeng ideh ngedita' Taman ineh teh. Lemulun luk na ngedita' Anak ineh, idi ieh pana' na ngedita' Taman luk nengecuk Neneh. 24 "Matu, Ui pebala nemuyuh, lemulun luk ninger balaKu idi manu inan Luk nengecuk Negku, ieh ineh ngalap ulun luk meruked, idi na semuet bang ukum, iamo' ieh pangeh pinuit ratnan até amé' inan ulun. 25 Matu, Ui pebala nemuyuh, idi karebneh miak macing idi nekini pana' pangeh nacing, idi amung-amung lun naté miak ninger uni tang Anak Allah, idi lemulun luk ninger ineh miak mulun. 26 Mepad kudeng Taman ineh lawa ulun, kudeng ineh teh Ieh nemaré kuan AnakNeh mangun ku lawa ulun teh. 27 Idi teh Ieh nemaré lalud kuanNeh miak ngacing ukum, ngaceku Ieh Anak-Lemulun. 28 Aleg muyuh mawa ratnan ineh, ngaceku karebneh miak macing idi amung-amung lemulun luk bang tanem miak ninger uni tangNeh, 29 idi ideh miak remuat rat bang tanem. Idé-idé luk pangeh nenganau' luk do' miak tumui amé' inan ulun luk meruked, idi idé-idé luk pangeh nenganau' luk dat miak tumui idi ngalap ukum. 30 "UI na miak nganau' anun-anun maya' pianKu sebuleng. Ui ngukum lemulun maya' kudeng luk uen Allah ngeletep, idi ukumKu ineh matu; ngaceku na Ui maya' pianKu sebuleng, iamo' pianNeh luk nengecuk Negku. 31 "Kudeng Ui maré kali' ratnan bururKu sebuleng, idi luk nekali'Ku ineh na matu. 32 Inan luk bakén luk maré kali' ratnan Ui, idi Ui kali' bala luk bilaNeh ineh matu. 33 Muyuh ini pangeh nengecuk lemulun amé' matun Yahya, idi ieh pana' nemaré kali' ratnan luk matu ineh. 34 Iamo' Ui ini na ngalap luk nekali' ratnan lemulun, iamo' Ui mala ratnan ini, pad muyuh ini miak uen ngulun. 35 Yahya ineh mepad kudeng aceh lapung luk mulun idi merasat; iamo' muyuh ini sikal mawang niat segageh mo' kinioneh bang acangneh ineh. 36 Iamo' Ui inan aceh luk nemaré kali' luk meluun rayeh ratnan luk nekali' Yahya ineh. Kekamen luk inau'Ku, luk icuk TamanKu ruenKu, maré kali' ratnan Ui, idi ngegala' ratnan Ui icuk TamanKu. 37 Idi Taman ineh luk nengecuk Negku pangeh nemaré kali' ratnan Ui. Muyuh nateh neninger uni tangNeh idi nenier kiungNeh, 38 idi muyuh na nganug balaNeh bang niat muyuh, ngaceku muyuh na manu Neneh luk icukNeh. 39 Muyuh ngelio Surat Allah, ngaceku bang terawé muyuh bang ineh muyuh miak ngalap ulun luk meruked. Idi Surat ineh teh maré kali' ratnan Ui. 40 Iamo' na muyuh sikal macing Negku pad muyuh miak mulun. 41 "Ui ini na ngalap dita' ratnan lemulun. 42 Iamo' Ui kali' nemuyuh na luk idi awa Allah bang niat muyuh. 43 Ui ini macing dengan ngadan TamanKu, iamo' muyuh na ngalap Negku; kudeng selemulun baken macing dengan ngadanneh sebuleng, kali' rungen muyuh ngalap neneh. 44 Kudeng apehké muyuh miak manu, laba' muyuh nakap rayeh rat arang muyuh sebuleng, iamo' na muyuh nakap rayeh ratnan Allah luk Sebuleng ineh? 45 Aleg muyuh ngerawé Ui ini sikal ngadu' nemuyuh pa kiung Taman ineh. Inan selemulun luk ngadu' nemuyuh, ieh ineh Musa luk inan muyuh merapet. 46 Kudeng muyuh manu inan Musa, kali' rungen muyuh manu Negku, ngaceku Musa pangeh nengayud ratnan Ui. 47 Iamo' kudeng muyuh na manu ku luk inayud bang surat Musa, kudeng apehké muyuh miak manu ku balaKu?"
1 Muci ratnan ineh Yésus ine' déi' dipar Takung Galilia, (ieh ineh Takung Tibirias). 2 Mula lemulun nemaya' Neneh, ngaceku nenier tanu'-tanu' kareb Ieh nengedo' lun mét. 3 Yésus numak nan aceh surud idi Ieh netudo déi' dengan anak-anak sekola'Neh. 4 Irau Paska lun Yahudi pangeh muneng, 5 Yésus nenier libut-libutneh idi nekali' mula' lemulun amé' Neneh, idi kebalaNeh ni Pilipus, "Rat iapehké tau melih ruti, pad lun mula' ini kuman?" ( 6 Idi Yésus nepebala kudeng ineh ngaceku sikal nutun neneh, ngaceku Ie sebuleng kali' luk miak ruenNeh.) 7 Kebala Pilipus Neneh, "Ruti luk dueh ngeratu rigit raganeh na petap kuan lemulun ini, sagan pana' panid sesuut." 8 Idi seburur rat arang anak-anak sekola' ineh, ieh ineh Andrias, kinanak Simun Pétrus, nepebala Neneh, 9 "Tungé' inan aceh anak luk inan limeh balad ruti ikun idi dueh lawid; iamo' anunké ulekneh ineh kuan lun mula' ini?" 10 Idi keburi' Yésus, "Ngecuk lun mula' ineh tudo." Ngaceku su luk inandeh ineh mula' uduh; idi kinula' deléi luk netudo lélé limeh ngeribu burur. 11 Yésus nengalap ruti ineh, idi nemaré ubur nan Allah, idi Ieh nemabpat ineh kuan lun mula' luk tudo ineh. Kudeng ineh teh lawid ineh pana' bibpatNeh. Idi amungdeh nekuman dengan petap. 12 Kareb amung-amungdeh mebor, idi Yésus nepebala inan anak-anak sekola'Neh, "Ngamung amung-amung tecehneh, pad sesuut pana' na talan." 13 Idi ideh nengamung tecehneh panu' pulu' dueh ngebuan dengan areg ruti luk limeh balad ineh, ieh ineh areg luk teceh kinan lemulun ineh. 14 Kareb lun mula' pangeh nenier tanu' luk inau' Yésus, idi keburi'deh, "Matu Ieh ini nabi luk macing bang tana' ini." 15 Yésus nekali' nedeh macing sikal nganau' Neneh mangun ku raca' idi Ieh sebuleng iné' luun aceh pegkung teh. 16 Kareb lélé malem aco idi anak-anak sekola'Neh iné' déi' takung, 17 idi ideh netemaleb bang alud idi neguta takung ineh iné' Kapernaum. Idi kareb aco pangeh medacem, Yésus nateh nacing nedeh. 18 Idi takung ineh pelaba ula' ribut, ngaceku bui pelaba tueh. 19 Kareb ideh pangeh peribué lélé teluh apat batu kiadoneh, denak-denak ideh nenier Yésus nalan luun abpa' takung ineh, macing muneng ku aluddeh, idi ideh matot. 20 Iamo' kebala Yésus nedeh, "Ui ini, aleg matot." 21 Idi ideh mawang niat ngalap Neneh umak bang alud, idi petacu alud ineh nacing luun tangeb, su luk ulekdeh. 22 Lun mula' luk neketecan déi' dipar takung ineh, nekali' inan sebuleng alud mo' luk ketecan su ineh. Ideh kali' Yésus na nemaya' alud anak-anak sekola'Neh, iamo' ideh pangeh nenalan atun. 23 Kenebpa inan tuda'-tuda' alud luk nacing rat Tibirias, muneng ku su luk inandeh nekuman ruti nalem kareb Tuhan pangeh nemaré ubur. 24 Iamo' kareb lun mula' nenier Yésus na idi déi', idi anak-anak sekola'Neh pana' nateh idi, idi ideh netemaleb bang alud, idi iné' déi' Kapernamun nakap Yésus. 25 Kareb lun mula' nepanu' Yésus dipar takung ineh, idi ideh nepebala Neneh, "O Guru, idanké Iko nacing tungé?" 26 Idi kebala Yésus, "Matu, Ui pebala nemuyuh, muyuh ini nakap Negku baken ngaceku muyuh kali' ilung kekamenKu luk melalud, iamo' ngaceku muyuh nekuman ruti pad macing mebor. 27 Aleg muyuh ngakem ngaceku akan luk melu, iamo' ngaceku akan luk meraben macing inan ulun luk meruked. Akan ineh miak barén Anak-Lemulun nemuyuh ngaceku Allah Taman pangeh nenganau' etuNeh luunNeh pad ngamo Neneh matu." 28 Idi kebaladeh Neneh, "Anunké luk miak ruen kai pad kai nganau' kekamen Allah?" 29 Idi kebala Yésus, "Ini luk pian Alah ruen muyuh, do' muyuh manu Neneh luk icuk Allah ineh." 30 Idi keburi'deh Neneh, "Anunké tanu' luk ruenMu, pad kai miak nier idi manu Namu? Anunké luk ruenMu? 31 Tepun kai nekuman manna déi' su luk ali-ali, mepad kudeng luk inayud ineh 'Ieh pangeh nemaré uandeh ruti rat déi' surga kenendeh.' " 32 Kebala Yésus nedeh, "Matu, Ui pebala nemuyuh, baken Musa luk nemaré ruti rat déi' surga ineh, iamo' TamanKu luk nemaré kuan muyuh Ruti luk matu ineh rat surga. 33 Ngaceku Ruti Allah, Ieh ineh luk temurun rat surga idi luk maré ulun kuan uang tana' ini." 34 Idi keburi'deh Neneh, "O Tuan, do' megéi' maré Ruti ini kuan kai." 35 Idi kebala Yésus nedeh, "Ui ini Ruti Ulun ineh; lemulun luk macing Negku, na ieh miak melau peh, idi lemulun luk manu Negku, na ieh miak meparing teh. 36 Ui nepebala nemuyuh, muyuh pangeh nenier Negku iamo' na muyu manu. 37 Anid-anid lemulun luk barén Taman Negku miak amé' Negku, idi lemulun luk amé' Negku na tu-tu uenKu ngarung. 38 Ngaceku Ui netemurun rat surga, pad nganau' pianNeh luk nengecuk Negku, baken maya' pianKu sebuleng. 39 Iamo' ini pian Taman luk nengecuk Negku, pad Ui na ngetutu' idé-idé ratnan amung amungdeh luk biréNeh Negku, iamo' luk pianNeh, do' Ui nui nedeh kareb aco luk kekiped. 40 Ngaceku ini pian TamanKu, pad amung-amung luk nier Anak ineh idi manu Neneh miak ngalap ulun luk meruked, idi Ui ini miak nui nedeh kareb aco luk kekiped." 41 Idi lun Yahudi ngedureng Neneh, ngaceku Ieh nepebala, "Ui ini Ruti luk netemurun rat surga." 42 Idi keburi'deh, "Bakenké lun ini Yésus, anak Yusup? Kai kali' taman-tinanNeh. Kudeng apehké Ieh pebala, 'Ui temurun rat déi' surga'?" 43 Idi kebala Yésus, "Aleg muyuh dureng-dureg arang muyuh sebuleng! 44 Seburur pana' na miak macing Negku kudeng niatneh na rinuid Taman luk nengecuk Negku; idi Ui ini miak nui neneh kareb aco luk kekiped. 45 Pangeh inayud nabi-nabi, 'Amung lemulun miak badén Allah.' Idi anid-anid lemulun luk pangeh ninger bala Taman idi sibada' rat Neneh, ieh teh miak amé' Negku. 46 Baken ilungneh seburur lemulun pangeh nenier Taman, iamo' Ieh luk nacing ratnan Allah pangeh nenier Taman ineh. 47 Matu, Ui pebala nemuyuh, lemulun luk manu ngalap ulun luk meruked. 48 Ui ini Ruti Ulun. 49 Tepun muyuh pangeh nekuman manna déi' su luk ali-ali, idi ideh naté teh. 50 Idé-idé luk kuman Ruti luk temurun rat surga, na ieh maté. 51 Ui ini Ruti luk mulun, luk temurun rat surga. Kudeng idé lemulun kuman ratnan Ruti ini, ieh miak mulun ruked-ruked. Idi Ruti luk barénKu ineh, ieh ineh bururKu. Ui maré ineh pad tana' ini ngalap ulun." 52 Idi lun Yahudi nepekedaluh arangdeh sebuleng idi nepebala, "Kudeng apehké lun ini miak amré bururNeh kenen kai?" 53 Idi kebala Yésus nedeh, "Matu, Ui pebala nemuyuh, kudeng muyuh na kuman burur Anak-Lemulun idi ngirup dara'Neh, na muyuh miak ngalap ulun bang burur muyuh. 54 Kudeng idé-idé luk kuman bururKu idi ngirup dara'Ku, ieh inan ulun luk meruked, idi Ui ini sikal nui neneh kareb aco luk kekiped. 55 Ngaceku bururKu, ieh ineh akan luk matu, idi dara'Ku, ieh ineh luk rupen luk matu. 56 Kudeng idé-idé luk kuman bururKu idi ngirup dara'Ku, idi ieh lutep bang Negku, idi Ui pana' lutep bang neneh. 57 Mepad kudeng Taman luk mulun ineh nengecuk Negku, idi Ui pana' mulun ngaceku ratnan Taman ineh, kudeng ineh teh idé-idé luk kuman bururKu, ieh pana' miak mulun ngaceku Ui mulun. 58 Ini Ruti luk temurun rat surga. Na ieh mepad kudeng ruti luk kinan tepun muyuh, luk ngacing até. Idé-idé luk kuman Ruti ini, ieh miak mulun ruked-ruked." 59 Amung-amung bala ini bila Yésus bang ruma' sembayang, kareb Ieh nemada' déi' Kapernaum. 60 Mula' Anak sekola'Neh neninger bala ineh kudeng ini, idi kebaladeh, "Mikat kali' ilung bala ini. Idéké luk miak ninger ineh?" 61 Yésus kali' anak-anak sekola'Neh dureng-dureng ratnan bala ini, idi kebalaNeh nedeh, "Muyuh mesabeng ku bala iniké? 62 Kudeng apehké kareb muyuh nier Anak-Lemulun umak amé' su luk inanNeh atun? 63 Roh, Ieh ineh luk ngulun, idi burur, sebuleng pana' na ulekneh. Idi bala luk Ui mala kuan muyuh ngacing Roh Allah luk maré ulun. 64 Iamo' inan teh rat arang muyuh tuda'-tuda' lemulun luk na manu." Ngaceku rat punneh Yésus nekali' idé luk na manu ineh, idi idé luk sikal masui Neneh. 65 Idi keburi'Neh, "Ini punneh Ui nepebala nemuyuh, idi seburur pana' na miak macing Negku kudeng na ratnan Taman." 66 Ngaceku ineh mula' anak sekola'Neh nelemubed, idi na nemaya' Neneh teh. 67 Idi kebala Yésus nan pulu' dueh anak sekola'Neh ineh, "Inanké muyuh pian necan Negku?" 68 Idi kebala Simun Pétrus Neneh, "O Tuhan, amé' nidéké kai? BalaMu mo' luk maré ulun luk meruked. 69 Kai ini pangeh manu idi kali', idi Iko ineh Luk Meluun Ligan luk macing ratnan Allah." 70 Idi kebala Yésus nedeh, "Bakenké Ui nemili' nemuyuh luk pulu' dueh burur ini? Iamo' inan seburur rat arang muyuh luk mangun ku sétan." 71 Ieh nepebala ratnan Yudas, anak Simun Iskariot; ngaceku ieh luk sikal masui Yésus, idi ieh pana' seburur rat arang pulu' dueh anak sekola' ineh.
1 Muci ratnan ineh Yésus nenalan déi' tana' Galilia. Ieh na sikal lemaba bawang Yudia, ngaceku lun Yahudi nakap dalan sikal ngaté Neneh. 2 Iamo' irau lun Yahudi pangeh muneng, ieh ineh Irau Lepo. 3 Idi kebala kinanak-kinanakNeh Neneh, "Nalan rat ieni, idi amé' tana' Yudia, pad anak-anak sekola'Mu miak nier amung-amung kekamen luk ruenMu. 4 Seburur pana' na miak nganau' anun-anun dengan lulem kudeng ieh sebuleng sikal buren. Kudeng Iko nganau' kekamen ineh, ngegala' bururMu kuan uang tana' ini!" 5 Kinanak-kinanakNeh pana' nateh manu Neneh. 6 Idi kebala Yésus nedeh, "KarebKu ngegala' rayehKu nateh nacing; iamo' kareb muyuh ineh idi kidi-kidi. 7 Uang tana' ini na megateh nemuyuh iamo' ieh megateh Negku, ngaceku ui ngegala' ratnan amung-amung kekamendeh luk dat. 8 Do' muyuh amé ku irau. Nateh Ui netemina' amé' ku irau ini, ngaceku karebKu ngegala' rayehKu nateh nacing." 9 Kudeng ineh teh balaNeh. Idi Ieh netudo déi' Galilia. 10 Pangeh kinanak-kinanakNeh iné' ku irau ineh, idi Yésus iné' teh. Iamo' na Ieh nesibada'. Ieh iné' lulem. 11 Lun Yahudi nenakap Neneh bang irau ineh idi nepebala, 'Iapehké Ieh?" 12 Idi lun mula' pelaba dureng ratnan Yésus. Idi inan luk pebala, "Ieh lemulun luk do'," idi lun baken nepebala, 'Baken, iamo' Ieh naluk nelun mula' ineh." 13 Iamo' seburur pana' na pebala-pebala dengan megala' ratnan Yésus, ngaceku ideh matot nelun Yahudi. 14 Kareb uned irau ineh, idi Yésus nesemeut bang Ruma' Allah idi nemada'. 15 Idi lun Yahudi mawa, keburi'deh, "Kudeng apehké lemulun ini kali' surat dengan na nesibada'?" 16 Idi kebala Yésus, "Bada'Ku ineh baken rat Negku, iamo' ratnan Allah luk nengecuk Negku. 17 Kudeng idé lemulun luk sikal nganau' pian Allah, ieh miak kali' ratnan bada' ini, kudeng ratnan Allah punneh, kian, Ui pebala dengan pianKu sebuleng lek. 18 Lemulun luk pebala dengan pianneh sebuleng, ieh nakap rayehneh sebuleng, iamo' lemulun luk nakap rayehneh luk nengecuk neneh, ieh ineh luk matu, idi na luk idi sala' bang neneh. 19 Naké Musa nemaré Ukum kuan muyuh? Idi na luk idi seburur pana' rat arang muyuh luk maya' Ukum ineh. Anunké punneh muyuh nakap dalan sikal ngaté Negku?" 20 Idi kebala lun mula', "Iko sinuet ada'. Idéké nakap dalan sikal ngaté Namu?" 21 Kebala Yésus nedeh, "Ui nenganau' aceh kekamen luk melalud, idi amung muyuh mawa ku ineh. 22 Musa nengecuk nemuyuh uen nunat. Kareb Aco luk inan Mudeng pana' muyuh miak nunat anak muyuh. Setuneh adat nunat baken rat ni Musa, iamo' ratnan tepun muyuh sebuleng. 23 Kudeng selemulun sinunat kareb Aco luk inan Mudeng, pad Ukum Musa na uen ngelaba ngudehké muyuh museh Negku ngaceku Ui nengedo' selemulun kareb Aco luk inan Mudeng? 24 Aleg muyuh ngadu' lemulun maya' luk sinier muyuh mo', iamo' mutut ukum dengan mesiri idi matu." 25 Inan tuda'-tuda' lemulun rat Yerusalim luk nepebala, "Bakenké Ieh ini luk tekapen lun Yahudi, pad Ieh pitayendeh? 26 Siruh! Ieh pebala pa kiung lun mula', idi na lemulun mebpeng Neneh. Kian, lun rayeh-rayeh kali' lek idi matu Ieh ini Keristus? 27 Kareb Kerisuts macing, seburur pana' na miak kali' rat iapeh iratNeh. Iamo' kai kali' lemulun ini, idi rat iapeh iratNeh." 28 Kareb Yésus nemada' bang Ruma' Allah, idi Ieh nengitang, kebalaNeh, "Matuké muyuh ngiti Negku; inanké muyuh kali' rat iapeh iratKu? Ui na macing maya' pianKu sebuleng. Ieh luk nengecuk Negku ineh matu, idi muyuh na ngiti Neneh. 29 Ui miti Neneh, ngaceku Ui nacing rat Neneh, idi Ieh luk nengecuk Negku." 30 Di lun rayeh lun Yahudi nenakap dalan sikal ngakem Neneh, iamo' seburur pana' na mekuu' ngakem Neneh, ngaceku tarekNeh nateh nacing. 31 Iamo' mula' lemulun rat arang lun mula' ineh manu Neneh, idi nepebala, "Kareb Keristus macing, miakké Ieh nganau' tanu' meluun ula' ratnan luk inau' lemulun ini?" 32 Lun Parisi neninger lun mula' ineh pebala-pebala kudeng ini ratna Yésus. Idi imam-imam rayeh idi lun Parisi pana' nengecuk tuda'-tuda' lun pulis amé' ngakem Neneh. 33 Idi kebala Yésus, "Segageh mo' kinioneh Ui tudo dengan muyuh, idi Ui amé' Neneh luk nengecuk Negku. 34 Muyuh sikal nakap Negku, idi na muyuh miak ngalap Negku: idi su luk inanKu, muyuh na miak macing." 35 Idi lun Yahudi nepebala arangdeh sebuleng, "Iapehké ulek lemulun ini pad tau na miak ngalap Neneh? Sikalké Ieh amé' bawang lun Grika su luk inan lun Yahudi tebawang pad Ieh mada' nelun Grika? 36 KebalaNeh, 'Muyuh sikal nakap Negku, idi na muyuh miak kali' Negku, idi su luk inanKu, muyuh na miak amé'.' Anunké ilung balaNeh ineh?" 37 Aco luk kekiped bang irau ineh, ieh ineh aco luk meluun rayeh. Bang aco sineh Yésus netuped idi nengitang, kebalaNeh, "Kudeng idé lemulun luk meparing, do' ieh macing Negku idi ngirup. 38 Maya' kudeng luk inayud bang Surat Allah, 'Idé-idé luk manu Negku, rat bang neneh ineh miak manud tuda'-tuda' bued abpa' luk mulun.' " ( 39 Ieh nemala ini ratnan Roh luk miak lapen amung-amung lemulun luk manu Neneh. Ngaceku kareb ineh nateh Roh Meligan biré, ngaceku Yésus nateh rinayeh.) 40 Mula' lemulun neninger bala ini, idi ideh nepebala, "Matu Ieh ini nabi ineh!" 41 Lun baken nepebala, "Ieh ini Keristus." Inan teh lun baken nepebala, "Keristus na miak macing rat Galilia! 42 Pangeh inayud bang Surat Allah, Keristus ineh inul Daud, idi uen nenganak déi' Baitlahim su luk inan Daud tudo." 43 Ngaceku lun mula' pekedaluh ratnan Yésus. 44 Sebuangdeh sikal ngakem Neneh, iamo' seburur pana' nateh luk mekuu'. 45 Idi lun pulis ineh nelemubed iné' inan imam-imam rayeh idi lun Parisi luk nengitun nedeh, kebaladeh, "Ngudehké muyuh na nenguit Neneh?" 46 Idi keburi' lun pulis ineh, "Nateh lemulun nepebala mepad kudeng lemulun ini." 47 Idi kebala lun Parisi nedeh, "Pangehké muyuh rinaruhNeh? 48 Inanké muyuh nekali' seburur lun rayeh kian lun Parisi lek, luk manu Neneh? 49 Lun mula' ini na kali' Ukum Musa, idi ideh kidiman Allah!" 50 Idi Nikodimus seburur rat arang lun Parisi ineh, ieh ineh luk nepapu' Yésus atun. Ieh nepebala nedeh, 51 "Maya' Ukum tau, tau na miak ngukum selemulun kareb nateh neninger luk inau' idi luk belénneh." 52 Idi kebaladeh, "Iko rat Galilia teh? Ngelio bang Surat Allah! Inanké nabi luk macing rat Galilia?"
1 Idi amung-amungdeh nuli'. Iamo' Yésus iné' déi' Surud Saitun. 2 Pekak kenebpa idi Ieh iné' bang Ruma' Allah teh, idi lun mula' iné' Neneh, idi Ieh netudo mada' nedeh. 3 Idi guru-guru Ukum idi lun Parisi pana' nenguit seburur decur luk kikem uned pasét, idi ideh nenganau' neneh tuped pa atundeh, 4 idi nepebala nan Yésus, "O Guru, decur ini kikem uned pasét. 5 Bang Ukum kai Musa nengecuk mitung decur luk kudeng ini ku batu. Kudeng apehké terawé Guru ratnan ineh?" 6 Ideh nemala ini sikal nutun Neneh, pad ideh miak ngadu' Neneh. Iamo' Yésus nemunel idi nengayud luun tana' ku bua' ticu'Neh. 7 Iamo' kareb ideh ngitun Neneh, Ieh netuped idi nepebala nedeh, "Idé-idé rat arang muyuh luk na nenganau' sala' do' ieh mitung decur ini ku batu atun." 8 Idi Ieh nemunel teh idi nengayud luun tana'. 9 Kareb ideh neninger bala ineh, ideh neremuat sebuleng-sebuleng, ngimun rat nelun merar. Yésus sebuleng neketecan. Idi decur ineh pana' tuped su ineh. 10 Yésus netuped, idi nepebala neneh, "O decur, iapehké ideh? Naké seburur neketecan teh luk ngukum namu?" 11 Idi keburi' decur ineh, "Seburur pana' nateh, O Tuhan." Idi keburi' Yésus neneh, "Ui ini pana' nateh sikal ngukum namu. Muli' iko, idi aleg nganau' sala' peh." 12 Yésus nemada' nedeh teh, kebalaNeh, "Ui ini Acang Tana'. Idé-idé luk maya' Negku miak ngalap acang luk maré ulun, idi na ieh miak nalan bang dacem." 13 Idi keburi' lun Parisi Neneh, "Iko maré kali' ratnan bururMu sebuleng; luk nekali'Mu ineh na matu." 14 Idi kebala Yésus, "Sagan pana' Ui maré kali' ratnan bururKu sebuleng, matu teh luk nekali'Ku ineh, ngaceku Ui kali' rat iapeh Ui nacing idi iapeh ulekKu, iamo' muyuh ini ka kali' rat iapeh Ui nacing idi iapeh ulekKu. 15 Muyuh ini ngukum maya' terawé lemulun; Ui ini na ngukum seburur pana'. 16 Iamo' kudeng Ui ngukum pana', idi ukumKu ineh matu, ngaceku baken Ui sebuleng mo' iamo' Taman luk nengecuk Negku idi denganKu. 17 Bang ukum muyuh pangeh inayud, idi luk nekali' dueh burur matu peh. 18 Ui maré kali' ratnan bururKu sebuleng, idi teh Taman luk nengecuk Negku pana' maré kali' ratnan Ui." 19 Idi keburi'deh Neneh, "Iapehké TamanMu?" Idi kebala Yésus, "Muyuh na miti Negku idi TamanKu pana' muyuh na miti. Kudeng muyuh miti Negku, kali' rungen muyuh miti TamanKu teh." 20 Amung bala ini bilaNeh kareb Ieh mada' bang Ruma' Allah, muneng ku su luk inan nganug usin. Idi seburur pana' na nengakem Neneh, ngaceku tarekNeh nateh nacing. 21 Kebala Yésus nedeh teh, "Ui ini amé', idi muyuh sikal nakap Negku, iamo' muyuh miak maté bang sala' muyuh. Muyuh na miak macing su luk inanKu amé'." 22 Idi keburi' lun Yahudi, "KebalaNeh, 'Muyuh na miak macing su luk inanKu amé'.' Ieh sikal peripatéké?" 23 Idi kebala Yésus nedeh, "Muyuh ini rat pa liang, Ui ini rat déi' dita'. Muyuh ini ratnan tana' ini, Ui ini baken ratnan tana' ini. 24 Ineh punneh Ui nepebala nemuyuh, idi muyuh miak maté bang sala' muyuh. Kali' rungen muyuh miak maté bang sala' muyuh, kudeng muyuh na manu, idi Ui ini Ieh." 25 Idi keburi'deh Neneh, "Idéké Iko ini?" Idi kebala Yésus nedeh, "Anunké ulekneh Ui pebala kuan muyuh teh. 26 Inan mula' luk belénKu idi luk ruenKu mutut ratnan muyuh, iamo' Ieh luk nengecuk Negku matu peh, idi anun luk pindengerKu rat Neneh, ineh teh luk belénKu kuan uang tana' ini." 27 Idi ideh na kali' luk bilaNeh nedeh, ieh ineh ratnan Taman. 28 Idi kebala Yésus nedeh, "Kareb muyuh ngikit Anak-Lemulun, idi muyuh miak kali' Ui ini Ieh, idi teh muyuh miak kali' idi sebuleng pana' na Ui nganau' maya' pianKu sebuleng, iamo' mepad kudeng TamanKu nemada' Negku, kudeng ineh teh luk belénKu. 29 Idi Ieh luk nengecuk Negku idi denganKu, idi na Ieh necan Negku sebuleng, ngaceku Ui megéi' maya' luk pianNeh." 30 Kareb Yésus pebala kudeng ineh, mula' lemulun manu Neneh. 31 Idi kebala Yésus nelun Yahudi luk manu Neneh, "Kudeng muyuh maya' balaKu, idi dengan matu muyuh mangun ku anak-anak sekola'ku, 32 idi muyuh miak kali' luk matu, idi luk matu ineh miak muit nemuyuh." 33 Idi kebaladeh, "Kai ini mupun Ibrahim, idi nateh kai mangun ku demulun seburur pana', kudeng apehké balaMu, 'Muyuh miak mepuit'?" 34 Kebala Yésus nedeh, "Matu, Ui pebala nemuyuh, idé-idé luk nganau' sala', ieh ineh luk demulun sala'. 35 Idi demulun ineh na mangun ku uang tetek ruma' ruked-ruked, iamo' anak ineh tudo ruked-ruked. 36 Kudeng Anak ineh muit nemuyuh, idi muyuh pangeh mepuit dengan matu. 37 Ui kali' muyuh mupun Ibrahim, iamo' muyuh nakap dalan ngaté Negku, ngaceku bada'Ku na lapen muyuh. 38 Ui pebala ratnan luk bida' TamanKu Negku, iamo' muyuh pana' nganau' luk bida' taman muyuh nemuyuh." 39 Idi ideh nengor balaNeh, keburi'deh, "Ibrahim, ieh luk taman kai." Idi keburi' Yésus nedeh, "Kudeng muyuh anak Ibrahim, kali' rungen muyuh sikal nganau' teh amung-amung kekamen Ibrahim. 40 Luk pangeh inau'Ku, ieh ineh ngegala' kuan muyuh anun-anun luk matu luk ilapKu ratnan Allah. Iamo' muyuh pian ngaté Negku. Ibrahim na nenganau' kudeng ineh! 41 Muyuh ini nganau' kekamen taman muyuh." Idi keburi'deh Neneh, "Baken kai tinganak ratnan sét. Inan sebuleng Taman kai, ieh ineh Allah." 42 Idi kebala Yésus nedeh, "Kudeng Allah ineh Taman muyuh, kali' rungen muyuh mawa Negku, ngaceku Ui pangeh nacing ratnan Allah, idi nekini Ui idi ieni. Na Ui nacing maya' pianKu sebuleng, iamo' Ieh luk nengecuk Negku. 43 Ngudehké muyuh na kali' ilung balaKu? Ngaceku muyuh na miak ninger bada'Ku ini. 44 Taman muyuh, ieh ineh Iblis, idi muyuh sikal maya' pian taman muyuh. Rat pun-pun Iblis, ieh ineh lun ngaté, idi na ieh tudo bang luk matu, ngaceku na luk matu bang neneh. Kareb ieh mebalih idi ieh pebala maya' ayuneh sebuleng, ngaceku ieh luk mebalih ineh taman amung-amung balih. 45 Iamo' Ui ngegala' luk matu ratnan Allah. Ineh punneh muyuh na manu Negku. 46 Idéké rat arang muyuh miak ngesala' Negku? Kudeng Ui mala luk matu, ngudehké muyuh na manu Negku? 47 Lemulun luk ratnan Allah, ieh teh luk ninger bala Allah. Ini punneh muyuh na ninger bala ineh, ngaceku muyuh baken ratnan Allah." 48 Idi lun Yahudi nengor bala Yésus, keburi'deh, "Bakenké matu luk bila kai, Iko seburur lun Samaria, idi Iko sinuet ada'?" 49 Idi kebala Yésus, "Ui na sinuet ada'. Ui ngedita' TamanKu, iamo' muyuh ngedat Negku. 50 Ui na nakap rayeh kuan bururKu sebuleng. Inan Sebuleng luk ngerayeh Negku idi luk ngamo Negku matu. 51 Matu, Ui pebala nemuyuh, kudeng idé lemulun maya' balaKu, na ieh miak maté." 52 Idi keburi' lun Yahudi Neneh, "Nekini kai kali' idi Iko sinuet ada'. Ibrahim idi amung-amung nabi pangeh naté. Iamo' Iko ini pebala, 'Kudeng idé lemulun maya' balaKu na ieh miak maté.' 53 Taman kai Ibrahim pangeh naté! Ikoké meluun rayeh ratnan Ibrahim? Amung-amung nabi pana' pangeh naté. Bang terawéMu, idéké Iko?" 54 Kebala Yésus, "Kudeng Ui ngerayeh bururKu sebuleng, kali' rungen rayehKu na ulek. Iamo' luk ngerayeh Negku, ieh ineh TamanKu luk belén muyuh Allah muyuh. 55 Muyuh na miti Neneh, iamo' Ui miti Neneh. Kudeng Ui pebala idi na Ui miti Neneh, kali' rungen Ui mepad kudeng muyuh luk mebalih, iamo' Ui miti Neneh, idi Ui maya' balaNeh. 56 Idi taman muyuh Ibrahim geregan nier acoKu; ieh pangeh nenier ineh idi ieh mawang niat peh." 57 Idi keburi' lun Yahudi Neneh, "UlunMu nateh limeh ngepulu' lak, idi Iko pangeh nenier Ibrahimké?" 58 Idi kebala Yésus, "Matu, Ui pebala nemuyuh, kareb nateh Ibrahim tinganak, Ui ini pangeh idi." 59 Idi ideh nengamung batu pian mitung Neneh, iamo' Yésus nesigapung idi neremuat rat bang Ruma' Allah ineh.
1 Yésus nenalan, idi Ieh nenier selemulun luk nebuser rat bang batek tinanneh. 2 Idi anak-anak sekola'Neh nengitun Neneh, keburi'deh, "O Guru, idéké luk nenganau' sala', lemulun iniké kian taman-tinanneh lek, pad ieh mebuser rat bang batek tinanneh?" 3 Idi kebala Yésus, "Baken lemulun ini nebuser ngaceku sala'neh sebuleng idi sala' taman-tinanneh, iamo' pad lalud Allah miak uen ngegala' bang ulunneh. 4 Do' tau nganau' kekamen Allah luk nengecuk Negku ini kareb aco macang teh. Ngaceku dacem sikal macing idi kareb ineh seburur pana' na miak ngakem. 5 Ruked Ui bang tana' ini, Ui ini Acang Tana'." 6 Kareb Ieh pangeh nepebala kudeng ini, idi Ieh nengelica' luun tana', idi nenganau' tana' ineh mesalit ku aka'Neh. Idi Ieh nemiid tana' salit ineh luun mateh lun mebuser ineh, 7 idi nepebala neneh, "Amé' iko sibaru' déi' bang Takung Siloam!" (Ilung Siloam bang buri' Iberani, ieh ineh "Icuk.") Idi ieh iné' sibaru', idi nelemubed dengan matehneh nedo.' 8 Idi keburi' lun bang bawangneh idi lun baken pana' luk nekali' neneh atun mutuh mo', "Bakenké ieh ini lun luk tudo mutuh mo'?" 9 Inan luk nepebala, "Ini ieh." Inan teh luk nepebala, "Baken, iamo' ayuneh mepad kudeng ieh." Lemulun ineh sebuleng nepebala, "Ui ini ieh." 10 Idi keburi'deh neneh, "Kudeng apehké matehmu nedo'?" 11 Idi kebalaneh, "Inan selemulun ngadanNeh Yésus nenganau' tana' ineh mesalit, idi nemiid luun matehku idi nepebala, 'Amé' iko sibaru' déi' Takung Siloam.' Idi ui pana' iné' sibaru' déi', idi ui miak nier." 12 Idi ideh nengitun neneh, keburi'deh, "Iapehké lemulun ineh?" Idi keburi'neh, "Ui na kali'." 13 Idi ideh nenguit lun luk nebuser ineh amé' matun lun Parisi. 14 Kareb Yésus nenganau' tana' salit ineh idi nengedo' matehneh, ieh ineh Aco luk inan Mudeng. 15 Idi lun Parisi nengitun neneh sekua' teh, kudeng apehké ieh nier. Idi keburi'neh nedeh, "Ieh nenganau' tana' salit luun matehku, idi ui nesibaru' idi nenier." 16 Idi sebuang lun Parisi ineh nepebala, "Lemulun ini baken ratnan Allah, ngaceku Ieh na maya' ukum Aco luk inan Mudeng." Idi inan teh lemulun luk pebala, "Kudeng apehké seburur lun mesala' miak nganau' tanu'-tanu' luk kudeng ineh?" Idi ideh pekedaluh arangdeh sebuleng. 17 Ngaceku ineh ideh nengitun neneh sekua'teh, "Anunké luk belénmu ratnan Ieh? Ngaceku Ieh pangeh nengedo' matehmu?" Idi ieh nengor baladeh, keburi'neh, "Ieh ineh nabi." 18 Idi lun Yahudi na manu ratnan ieh nebuser atun idi nekini miak nier, pad ideh nenawar taman-tinan lemulun luk nedo' mateh ineh. 19 Idi ideh nengitun nedidueh, keburi'deh, "Matuké, ieh ini anak medueh, luk bila medueh nebuser rat bang batek? Kudeng apehké ieh miak nier nekini?" 20 Idi kebala taman-tinanneh, "Kai miti neneh idi ieh ini luk anak kai, idi teh ieh nebuser rat bang batek. 21 Na kai kali' kudeng apeh ieh miak nier. Idi na kai kali' idé luk nengedo' matehneh. Ngitun neneh sebuleng, ieh pangeh rayeh, nima' neneh sebuleng maré kali'." 22 Taman-tinanneh nepebala kudeng ineh ngaceku matot nelun Yahudi, ngaceku ideh pangeh nepegayam, idi kudeng inan selemulun ngamo Yésus ineh Keristus, ieh miak talan rat bang ruma' sembayang. 23 Ineh punneh taman-tinanneh nepebala, "Ieh pangeh rayeh, do' ngitun neneh sebuleng." 24 Idi ideh nenawar lun luk nebuser ineh sekua' teh, idi nepebala neneh, "Do' iko mada' luk matu pa kiung Allah! Kai ini kali', idi lemulun ineh lun mesala'." 25 Idi ieh nengor baladeh, keburi'neh, "Kudeng Ieh seburur lun mesala' ui na kali', iamo' sebuleng mo' luk ui kali', idi atun ui nebuser, idi nekini ui nier." 26 Idi keburi'deh neneh, "Anunké luk inau'Neh kuanmu? Kudeng apehké Ieh nengedo' matehmu?" 27 Idi keburi'neh nedeh, "Pangeh ui nemala kuan muyuh, iamo' na muyuh neninger. Anunké punneh muyuh sikal ninger sekua' teh? Sikalké muyuh mangun ku anak sekola'Neh?" 28 Idi ideh nengedat neneh, kebaladeh, "Iko ini luk anak sekola'Neh, iamo' kai ini anak sekola' Musa. 29 Kai kali' idi Allah pangeh nepebala kuan Musa; iamo' ratnan lemulun ini kai na kali' rat iapeh Ieh nacing." 30 Idi lemulun ineh nengor baladeh, keburi'neh, "Ui mawa ku ineh, muyuh na kali' rat iapeh Ieh nacing sagan pana' Ieh nengedo' matehku. 31 Tau kali' idi Allah na ninger lemulun luk mesala', iamo' lemulun luk sembayang inan Allah idi luk nganau' pinianNeh, ieh ineh mo' luk pedingerenNeh. 32 Rat pun tana' ini nateh lemulun nekali' bala ratnan lemulun luk ngedo' mateh lemulun luk nebuser rat bang batek. 33 Kudeng lemulun ineh baken ratnan Allah, Ieh na miak nganau' anun-anun." 34 Idi ideh nengor balaneh, keburi'deh, "Matu iko ini tinganak bang sala', idi iko sikal mada' nekaiké?" Idi ideh nenala' neneh rat bang ruma' sembayang. 35 Yésus neninger ratnan lemulun ineh pangeh tila'deh. Idi Ieh nenakap neneh kebalaNeh, "Manuké iko inan Anak Allah?" 36 Idi lemulun ineh nengor balaNeh, "Idéké Ieh ineh, O Guru,pad ui miak manu Neneh?" 37 Idi keburi' Yésus neneh, "Iko pangeh nenier Neneh, idi luk pebala denganmu, ieh ineh Ieh." 38 Idi keburi'neh, "O Tuhan, ui manu." Idi ieh netekeradung pa kiung Yésus. 39 Idi kebala Yésus, "Ui macing bang tana' ini pad mutut ukum luk matu, pad lemulun luk na nier miak nier, idi lemulun luk nier ineh mangun mebuser." 40 Tuda'-tuda' lun Parisi luk idi denganNeh déi' neninger bala ini idi nepebala Neneh, "Iko ngerawé kai mebuserké?" 41 Idi kebala Yésus nedeh, "Kudeng muyuh mebuser, na muyuh mesala', iamo' ngaceku muyuh pebala, 'Kai nier,' sala' muyuh ineh idi teh.
1 "Matu, Ui pebala nemuyuh, idé-idé luk na semuet bang libung dumba maya' tanga', iamo' manad maya' dalan luk baken, ieh ineh lemulun luk mano idi lun ngaro. 2 Lemulun luk semuet maya' tanga' ineh, ieh ineh lun luk matar dumba. 3 Lun luk matar tanga' ngukab tanga' kuanneh, idi dumba-dumba ineh ninger uni tangneh, idi ieh nawar ngadan anid-anid dumbaneh, idi nenguit nedeh remuat. 4 Kareb ieh pangeh nengeruat dumbaneh ineh, idi ieh nalan pa atundeh, idi dumba-dumba ineh maya' neneh, ngaceku ideh miti uni tangneh. 5 Na tu-tu ideh sikal maya' nelun baken, iamo' ideh buro rat neneh, ngaceku na ideh miti uni tang lun baken." 6 Idi luk pinginud ineh bila Yésus nedeh; iamo' na ideh kali' ilung luk bilaNeh nedeh. 7 Idi Yésus nepebala nedeh teh, "Matu, Ui pebala nemuyuh, Ui ini Tanga' kuan dumba ineh. 8 Amung-amung lemulun luk nacing atun rat Negku, ieh ineh lemulun luk mano idi lun ngaro, iamo' dumba ineh na ninger baladeh. 9 Ui ini Tanga'. Kudeng idé lemulun semuet maya' Negku, ieh miak uen ngulun, idi ieh pana' remuat idi semuet idi ngalap akanneh. 10 Idi lun mano ineh macing sikal mano idi ngaté idi ngusag mo'. Ui ini nacing pad dumba ineh miak ngalap ulun idi ngalap ulun ineh dengan mela. 11 "Ui ini Lun Matar luk Do'; idi Lun Matar luk Do' ineh maré ulunNeh ku libal dumba-dumba ineh. 12 Lun tebarin luk baken lun matar, idi teh dumba ineh baken aya'neh sebuleng, kareb ieh nier bungalé luk macing, idi ieh necan sengeriudan dumba ineh idi upun muit bururneh sebuleng, idi bungalé ngakem dumba ineh pad matad-matad nedeh. 13 Idi lun tebarin ineh buro ngaceku ieh kali' rungen lun tebarin mo', idi na ieh méi' inan dumba ineh. 14 Ui ini Lun Matar luk Do'; idi Ui miti dumba-dumbaKu idi dumba-dumbaKu miti Negku teh, 15 mepad kudeng Taman miti Negku, idi Ui pana' miti Taman; idi Ui maré' ulunKu ngaceku amung-amung dumba ineh. 16 Inan teh dumbaKu luk baken luk na semuet bang libung dumba ini; idi amung-amung ini pana' Ui miak nguit, idi dumba-dumba ineh miak ninger uni tangKu, idi miak mangun ku aceh sengeriudan idi Lun Matar ineh pana' sebuleng mo'. 17 "Taman mawa Negku, ngaceku Ui maré ulunKu pad Ui miak ngalap neneh lemubed teh. 18 Seburur pana' na ngalap ulunKu rat Negku, iamo' Ui maré neneh maya' pianKu sebuleng. Ui melalud maré neneh idi melalud ngalap neneh lemubed teh. Ini lalud luk ilapKu ratnan TamanKu." 19 Idi lun Yahudi pekedaluh ratnan bala ineh. 20 Idi mula' rat arangdeh nepebala, "Ieh sinuet ada'! Ieh meruden! Ngudehké muyuh ninger balaNeh?" 21 Inan teh luk baken nepebala, "Lemulun luk sinuet ada' na miak pebala kudeng ini. Kudeng apehké ada' miak ngedo' mateh lun mebuser?" 22 Kareb ineh, ieh ineh kareb meteneb, inan Irau Ngeligan Ruma' Allah déi' Yerusalim. 23 Idi Yésus nalan bang Ruma' Allah, ieh ineh luun Tadur Selimun. 24 Idi lun Yahudi nepamung libut-libutNeh idi kebaladeh, "Anunké kinioneh teh Iko ngagau niat kai? Kudeng Iko ini Keristus, mala kuan kai dengan megala'." 25 Kebala Yésus nedeh, "Ui pangeh nemada' nemuyuh, idi na muyuh manu. Kekamen luk inau'Ku dengan ngadan TamanKu, ieh ineh maré kali' ratnan Ui. 26 Iamo' muyuh ini na manu, ngaceku muyuh baken dumbaKu. 27 Dumba-dumbaKu ninger uni tangKu, idi Ui miti nedeh, idi ideh maya' Negku. 28 Ui maré kuandeh ulun luk meruked, idi na tu dumba-dumba ineh miak maté ruked-ruked peh, idi seburur pana' na miak ngaro nedeh rat bang paladKu. 29 TamanKu luk nemaré nedeh kuanKu meluun rayeh ratnan amung-amung; idi seburur pana' na miak ngaro nedeh rat bang palad TamanKu. 30 Ui idi Taman ineh Sebuleng." 31 Sekua'teh lun Yahudi nengamung batu sikal mitung Neneh. 32 Iamo' kebala Yésus nedeh, "Mula' kekamen luk do' pangeh inau'Ku kuan muyuh dengan ngadan TamanKu; ratnan kekamen anunké muyuh sikal mitung Negku?" 33 Idi lun Yahudi nengor balaNeh, keburi'deh, "Baken ngaceku kekamen luk do' kai mitung Namu, iamo' ngaceku Iko nguyo Allah. Iko lemulun mo' iamo' Iko maad bururMu dengan Allah." 34 Kebala Yésus nedeh, "Bakenké bang Ukum muyuh inan luk pangeh inayud kudeng ini, 'Ui pangeh nepebala, muyuh allah-allah'? 35 Tau kali' bala luk inayud bang Surat Allah na miak uen ngalum macing ruked-ruked. Allah sebuleng neten allah-allah, ieh ineh lemulun luk inan bala Allah pangeh biré. 36 Miakké muyuh ini pebala Ui nguyo Allah, ngaceku Ui ngamo Ui ini Anak Allah? Ui ini luk pinili' idi icuk Allah amé' bang tana' ini. 37 Kudeng na Ui nganau' kekamen TamanKu, aleg muyuh manu Negku. 38 Iamo' kudeng Ui nganau' ineh, sagan pana' muyuh na manu Negku, na miak na muyuh manu ku kekamenKu pad muyuh kali' do'-do' ratnan Taman ineh idi bang Negku idi Ui pana' bang Neneh." 39 Idi sekua' teh ideh nenakap dalan sikal ngakem Neneh, iamo' Yésus mepuit rat bang paladdeh. 40 Yésus iné' déi' dipar Abpa' Yarden teh, su luk inan Yahya nengerereb lemulun atun. Idi Ieh netudo déi'. 41 Idi mula' lemulun nacing Neneh idi nepebala, "Kali' rungen Yahya na nenganau' sebuleng tanu', iamo' amung-amung bala luk bila Yahya ratnan lemulun ini matu peh." 42 Idi mula' lemulun luk déi' manu inan Yésus.
1 Inan selemulun luk mét, ngadanneh Lasarus, lun Baitani, ieh ineh bawang Mariam idi kinanakneh Marta. ( 2 Mariam ineh luk nengumau Yésus ku umau luk do' buen, idi luk nemiid kukudNeh ku abpukneh. Idi Lasarus luk mét, ieh ineh kinanakneh.) 3 Idi dueh kinanakneh ineh nemaré bala kuan Yésus, kebala didueh, "O Tuhan, lemulun luk inanMu mawa ineh mét." 4 Kareb Yésus neninger bala ineh, keburi'Neh, "Et ini na miak ngacing até kuan Lasarus. Iamo' ini miak ngegala' rayeh Allah, pad Anak Allah pana' uen ngerayeh ngaceku ineh." 5 Iamo' Yésus mawa inan Marta, idi kinanakneh luk decur, idi Lasarus ineh. 6 Kareb Ieh neninger ratnan Lasarus ineh mét, idi Ieh netudo dueh aco su ineh teh. 7 Pangeh ineh Yésus nepebala inan anak-anak sekola'Neh, "Do' tau lemubed amé' bawang Yudia." 8 Idi kebala anak-anak sekola'Neh, "O Guru, ina lun Yahudi nakap dalan sikal mitung Namu, idi nekini Iko sikal lemubed amé' déi' teh?" 9 Idi kebala Yésus, "Bakenké bang seaco pulu' dueh jam? Kudeng selemulun nalan kareb acang aco na ieh matuk, ngaceku ieh nier acang tana' ini. 10 Iamo' kudeng ieh nalan kareb medacem, kali' rungen ieh matuk, ngaceku acang ineh na idi bang neneh." 11 Yésus nepebala kudeng ini, idi teh keburi'Neh nedeh, "Lun rurum tau Lasarus pangeh nerudap, iamo' Ui amé' nui neneh." 12 Idi keburi' anak-anak sekola'Neh, "O Tuhan, kudeng ieh rudap, miak ieh do' lek." 13 Iamo' ilung bala Yésus, Lasarus pangeh naté. Iamo' ideh nengerawé Yésus pebala ratnan Lasarus rudap mo'. 14 Idi Yésus nepebala nedeh dengan megala', "Lasarus pangeh naté. 15 Samal kuan muyuh, Ui na idi déi', pad muyuh manu. Iamo' do' tau amé' ni Lasarus." 16 Idi keburi' Tomas (luk titen Anak Rapid) kuandeh luk pad-pad anak sekola' Yésus, "Do' tau amé' teh, pad tau maté denganNeh." 17 Kareb Yésus nacing, idi Ieh nekali' Lasarus ineh pangeh tinanem apat aco. 18 Kiado Baitani rat Yerusalim na mela ratnan dueh batu. 19 Idi mula' lun Yahudi pangeh nengikak ni Marta idi Mariam sikal ngubuk nedidueh, ngaceku kinanak didueh Lasarus ineh pangeh naté. 20 Kareb Marta neninger bala ratnan Yésus macing, idi ieh iné' papu' Neneh. Mariam netudo déi' ruma'. 21 Idi keburi' Marta inan Yésus, "O Tuhan, kudeng Iko idi tungé', kali' rungen kinanakku na naté! 22 Iamo' ui kali' teh idi anun-anun luk pituenMu ratnan Alah miak barénNeh kuanMu." 23 Idi kebala Yésus ni Marta, "Kinanakmu ineh miak tumui teh." 24 Idi kebala Marta inan Yésus, "Ui kali' ieh miak tumui kareb aco luk kekiped." 25 Idi kebala Yésus ni Marta, "Ui ini Tui ratnan até idi Ulun. Idé-idé luk manu Negku, sagan pana' pangeh naté, ieh miak mulun teh; 26 idi idé-idé luk mulun idi manu Negku, na ieh miak maté ruked-ruked peh. Manuké iko ku ini?" 27 Idi kebala Marta, "Mo, Tuhan, ui manu idi Iko ineh Keristus, Anak Allah, luk macing bang tana' ini." 28 Pangeh Marta nepebala kudeng ini, idi ieh iné' nawar kinanakneh Mariam dengan ayen-ayen, keburi'neh, "Guru idi tungé', idi Ieh nawar namu." 29 Kareb Mariam neninger kudeng ineh, ieh petacu tumui idi iné' matun Yésus. ( 30 Kareb ineh Yésus nateh nacing bang bawang ineh, iamo' Ieh idi déi' su luk inan Marta nepapu' Neneh teh.) 31 Lun Yahudi luk idi dengan Mariam bang ruma', idi luk nengubuk neneh, nemaya' neneh kareb ideh nenier neneh nudur dengan mesaget. Ideh nengerawé Mariam amé' inan tanem idi nangi' déi'. 32 Kareb Mariam nacing su luk inan Yésus ineh idi ieh nenier Neneh, idi ieh netekeradung iring kukudNeh, idi kebalaNeh, "O Tuhan, kudeng Iko idi tungé', na kinanakku ineh naté." 33 Kareb Yésus nenier Mariam nangi', idi amung-amung lun Yahudi luk pebaya' neneh ineh pana' nangi', idi niatNeh nesigio idi Ieh mesusa' peh, 34 idi kebalaNeh "Iapehké ihe inau' muyuh?" Idi keburi'deh Neneh, "O Tuhan, amé' tungé' idi nier." 35 Yésus nangi'. 36 Idi kebala lun Yahudi ineh, "Siruh, kudeng apeh Ieh mawa neneh!" 37 Iamo' arangdeh inan luk nepebala, "Ieh negedo' mateh lun mebuser ineh. Ngudehké Ieh na nengedo' ni Lasarus pad ieh na naté?" 38 Idi niat Yésus nesigio teh. Idi Ieh iné' inan tanem. Idi tanem ineh bang lubang batu, idi aceh batu inau' ku kakebneh. 39 Idi kebala Yésus, "Ngelubid batu ini." Idi kebala Marta, kinanak lun luk naté ineh, "O Tuhan, nekini ieh pangeh mebuen, ngaceku pangeh apat aco kinioneh." 40 Idi kebala Yésus neneh, "Bakenké Ui nepebala namu, kudeng iko manu iko miak nier rayeh Allah?" 41 Idi ideh nengelubid batu ineh. Idi Yésus netengook, kesembayangNeh, "O Ama', Ui maré ubur kuanMu ngaceku Iko neninger balaKu. 42 Ui kali' Iko megéi' ninger balaKu, iamo' ngaceku lun mula' ini Ui mala kudeng ineh, pad ideh manu ratnan Iko luk nengecuk Negku." 43 Kareb Ieh pangeh nepebala kudeng ini, Ieh nengitang, kebalaNeh, "O Lasarus, remuat iko!" 44 Idi lun luk naté ineh neremuat, dengan abet kukud idi ticu'neh ratnan kibung luk mebuda', idi kiungneh ibpu ku belaca. Idi kebala Yésus nedeh, "Neka neneh idi nima' neneh nalan." 45 Mula' lun Yahudi luk iné' ngikak ni Mariam idi luk nenier kekamen Yésus ineh manu neneh. 46 Iamo' sebuangdeh iné' nelun Parisi, idi nemada' nedeh ratnan kekamen luk inau' Yésus ineh. 47 Ngaceku ineh imam-imam rayeh idi lun Parisi nengamung lun rayeh-rayeh netebubpun, idi nepebala, "Anunké luk ruen tau, ngaceku lemulun ineh nganau' mula' tanu'? 48 Kudeng tau nima' Neneh kudeng ineh, kali' rungen amung lemulun manu Neneh, idi lun Rum macing ngaro Ruma' Allah idi pupu tau pana'!" 49 Idi rat arangdeh inan selemulun ngadanneh Kayapas, ieh ineh Imam Rayeh bang lak ineh, nepebala nedeh, "Muyuh na kali' anun-anun. 50 Naké muyuh kali' meluun do' seburur lemulun maté ku libal pupu tau, ratnan amung-amung pupu ineh maté?" 51 Setuneh ieh na nepebala maya' terawéneh sebuleng, iamo' ngaceku ieh Imam Rayeh, ieh nemada' luk biré Allah ratnan Yésus miak maté ku libal lun Yahudi; 52 idi baken ku libal pupu ineh mo', iamo' pad amung-amung anak Allah luk mepatad-patad ineh pana' uenNeh ngamung mangun ku sebuleng. 53 Idi rat aco sineh ideh nepegayam sikal ngaté Yésus. 54 Ngaceku ineh Yésus nalan dengan silagan déi' Yudia, iamo' Ieh iné' inan aceh bawang muneng ku su luk ali-ali, bang aceh bawang luk titen Epraim. Idi Ieh netudo déi' dengan anak-anak sekolaNeh. 55 Idi Irau Paska lun Yahudi pangeh muneng, idi mula' lemulun rat bawang ineh iné' Yerusalim, pad ideh uen ngeligan kareb nateh irau ineh. 56 Ideh nenakap Yésus idi nepebala seburur inan seburur karebdeh nepamung bang Ruma' Allah, "Anunké terawé muyuh? Miakké Ieh macing kareb irau ini?" 57 Iamo' imam-imam rayeh idi lun Parisi pana' pangeh nemaré ukum, kudeng idé luk kali' su luk inan Yésus tudo, do' ieh mada', pad ideh miak ngakem Neneh.
1 Anem aco atun ratnan Irau Paska ineh, idi Yésus iné' déi' Batiani, su luk inan Lasarus luk tinuiNeh. 2 Idi ideh nenganau' aceh Irau kuanNeh déi'. Idi Marta nengasa' nedeh; idi Lasarus pana' netudo kuman iring Yésus. 3 Idi Mariam nengalap sekati umau luk do' buen luk mikat raganeh, idi nengumau kukud Yésus, idi nemiid kukudNeh ineh ku abpukneh. Idi bang ruma' ineh mepanu' ku buen umau ineh. 4 Iamo' keburi' seburur anak sekola'Neh, ieh ineh Yudas Iskariot, luk masui Yésus muci, 5 "Ngudehké umau ini na pisuen dengan raga teluh ngeratu rigit, idi usin ineh barén kuan lun masi'?" 6 Ieh nepebala kudeng ineh, baken ngaceku ieh méi' nelun masi', iamo' ngaceku ieh lun mano, idi ieh luk ngimet tabpung idi ngalap usin luk tinipa bang tabpung ineh. 7 Idi kebala Yésus, "Aleg ngesabeng decur ineh! Nima' neneh nganug luk idi neneh kuan aco luk inanKu tinamen. 8 Lun masi' megéi' idi dengan muyuh, iamo' Ui na megéi' idi dengan muyuh." 9 Mula' lun Yahudi nekali' ratnan Yésus idi déi' Batiani. Idi ideh iné' déi', baken ngaceku Yésus mo', iamo' ngaceku sikal nier Lasarus teh luk tinuiNeh rat arang lun naté. 10 Idi imam-imam rayeh nepegayam ratnan ngaté Lasarus teh, 11 ngaceku mula' lun Yahdi pangeh nenecan nelun nguyut nedeh idi manu inan Yésus. 12 Kenebpa lun mula' luk pangeh iné' ku irau ineh neninger bala ratnan Yésus amé' Yerusalim. 13 Ideh nengalap angat-angat piasau idi iné' ngalap Yésus. Ideh nengitang, "Ngubur Allah! Samal kuanNeh luk macing bang ngadan Tuhan, ieh ineh Raca' Israil!" 14 Idi Yésus pana' nengalap aceh anak keladai, idi netudo luun ketedneh, maya' kudeng luk inayud bang Surat Allah, kebalaneh, 15 "Aleg matot, anak decur rat Sion! Siruh Raca'mu macing, idi tudo lun keted anak keladai!" 16 Kareb ineh anak-anak sekola'Neh na kali' ilung bala ineh. Iamo' kareb Yésus pangeh rinayeh, idi ideh nengerawé ratnan luk pangeh inayud ratnan Ieh, idi teh ideh pangeh nenganau' ini kuanNeh. 17 Lun mula' luk idi dengan Yésus kareb Ieh nenawar Lasarus remuat rat bang tanem idi nenui neneh rat arang lun naté, nemada' ratnan luk pangeh mangun. 18 Ineh punneh lun mula' ineh iné' papu' Neneh, ngaceku ideh neninger idi Yésus pangeh nenganau' kekamen luk melalud ineh. 19 Idi kebala lun Parisi seburur nan seburur, "Siruh, amung uang tana' ini pangeh nemaya' Neneh. Kekamen tau na ulek!" 20 Idi inan tuda'-tuda' lun Grika arang lemulun luk pangeh nacing sembayang kareb irau ineh. 21 Lemulun ineh iné' ni Pilipus, lun Baitsaida déi' tana' Galilia, idi nemutuh neneh, keburi'deh, "Tuan, kai sikal nier Yésus." 22 Pilipus iné' mada' ni Andrias, idi didueh iné' mada' Yésus. 23 Idi kebala Yésus nedeh, "Tarekneh pangeh nacing kareb Anak-Lemulun miak uen ngerayeh. 24 Matu, Ui pebala nemuyuh, kudeng aceh ngilung padé na mebpeh luun tana' idi maté, ieh ketecan aceh ngilung mo', kudeng ieh maté, ieh miak kebua' mula'. 25 Lemulun luk mawa inan ulunneh na miak ngalap ulun luk matu, idi idé luk megateh inan ulunneh bang tana' ini, miak ngalap ulun luk matu, ieh ineh ulun luk meruked. 26 Idé-idé luk pian ngakem kuanKu, do' ieh maya' Negku, pad demulunKu idi dengaKu iapeh-iapeh pana' Ui idi. Idi TamanKu miak ngedita' lemulun luk ngakem kuanKu. 27 "Nekini niatKu mesusa'. Anunké luk belénKu? Miakké Ui pebala, 'O Ama', ngado Negku ratnan kareb ini'? Na! Ngaceku ineh punneh Ui pangeh nacing inan kareb luk medereh ini. 28 O Ama', ngerayeh ngadanMu!" Idi aceh tang rat bang langit nepebala, "Ui pangeh nengerayeh Neneh, idi Ui sikal ngerayeh Neneh teh." 29 Lun mula' luk tuped déi' neninger tang ineh idi nepebala, "Ini uni lalam." Inan teh lun baken nepebala, "Seburur melaikat nepebala Neneh." 30 Iamo' kebala Yésus nedeh, "Baken ngaceku Ui, bala ini pindenger, iamo' ngaceku muyuh. 31 Nekini karebneh tana' ini miak kumin; nekini raca' tana' ini miak talan. 32 Kareb Ui uen ngikit ratnan tana' ini, Ui sikal ngeruid amung-amung lemulun amé' Negku." ( 33 Dengan bala ini, Ieh nengegala' ratnan kudeng apeh Ieh maté.) 34 Kebala lun mula' nedeh, "Surat Ukum kai mada' ratnan Keristus ineh mulun ruked-ruked. Kudeng apehké Iko pebala, idi na miak na Anak-Lemulun ineh uen ngikit? Idéké Anak-Lemulun ineh?" 35 Idi kebala Yésus nedeh, "Acang ineh idi arang muyuh segageh mo'. Do' muyuh nalan kareb acang ineh idi arang muyuh, pad dacem na ngili nemuyuh. Lemulun luk nalan bang dacem, na ieh kali' iapeh luk suetneh. 36 Do' manu ku acang ineh, kareb acang ineh idi arang muyuh, pad muyuh mangun ku anak acang. Pangeh Yésus nepebala kudeng ineh idi Ieh neburo idi sigapung nedeh. 37 Sagan pana' mula' tanu' inau' Yésus pa kiungdeh, iamo' na ideh manu Neneh; 38 pad ngacing bala Nabi Yésaya luk nemala, "O Tuhan, idéké luk pangeh manu ku bala kai? Idi kuan idéké ticu' Tuhan pangeh ginala'?" 39 Ini punneh ideh na miak manu, ngaceku bala Yésaya teh, 40 "Allah nengebuser matehdeh idi nengetueh terawédeh, pad ideh na nier dengan matehdeh, idi na kali' dengan terawédeh, pelé ideh na lumi Negku, uenKu ngedo'." 41 Yésaya nepebala kudeng ini ngaceku ieh pangeh nenier rayeh Yésus idi nepebala ratnan Ieh. 42 Sagan pana' kudeng ineh, mula' rat arang lun rayeh-rayeh manu inan Yésus, iamo' ngaceku ratnan lun Parisi ideh na mekuu' ngamo, pad ideh na talan rat bang ruma' sembayang. 43 Ideh sikal buren lemulun, iamo' na pian buren Allah. 44 Idi Yésus nengitang, kebalaNeh, "Idé-idé luk manu Negku, baken ieh manu Negku mo', iamo' inan Allah teh luk nengecuk Negku. 45 Idé'-idé luk nier Negku, ieh pana' nier Allah luk nengecuk Negku. 46 Ui ini nacing bang tana' ini mangun ku acang, pad idé-idé luk manu Negku na tudo bang dacem. 47 Idé-idé luk ninger balaKu, iamo' na nginita neneh, Ui na ngukum neneh; ngaceku na Ui macing ngukum uang tana' ini, iamo' sikal ngulun nedeh. 48 Lemulun luk nala' Negku idi na ngalap balaKu, inan Sebuleng luk ngukum neneh. Idi bala luk badénKu, ieh ineh luk ngukum neneh kareb aco luk kekiped. 49 Ngaceku Ui na nepebala maya' pianKu sebuleng, iamo' Taman luk negecuk Negku ineh luk mada' Negku ratnan bala luk belénKu. 50 Idi Ui kali' ukumNeh ineh maré ulun luk meruked. Kudeng ineh teh anun-anun luk belénKu, ieh ineh luk bida' Taman Negku miak belénKu.
1 Bang aco luk atun ratnan Irau Paska ineh, idi Yésus nekali' ratnan karebNeh pangeh nacing luk inanNeh necan tana' ini amé' inan Taman. Ieh pangeh mawa inan uang tana' ini, idi Ieh mawa nedeh macing kekipedneh. 2 Yésus idi anak-anak sekola'Neh kuman malem. Iblis paneh nemili' Yudas Iskariot, anak Simun ineh, pad ieh masui Yésus. 3 Yésus kali' idi TamanNeh pangeh nemaré luk amung-amung bang paladNeh, idi teh Ieh kali' Ieh nacing ratnan Allah idi muli' amé' inan Allah. 4 Yésus neburo ratnan méja idi nengelengu kuyu'Neh, idi nengalap aceh aduk, idi nengabet awa'Neh. 5 Ieh nengutang abpa' bang aceh bigan luk rayeh, idi nengimun maru' kukud anak-anak sekola'Neh, idi nemiid ku aduk luk inabet i awa'Neh ineh. 6 Kareb Yésus nacing ni Simun Pétrus, idi keburi' Pétrus Neneh, "O Tuhan, pianké Iko maru' kukudku?" 7 Kebala Yésus, "Anun-anun luk ruenKu, iko na kali' nekini, iamo' muci iko miak kali'." 8 Idi kebala Pétrus Neneh, "Aleg tu-tu Iko maru' kukudku." Iamo' kebala Yésus neneh, "Kudeng Ui na maru' kukudmu iko na miak ngalap babpat denganKu." 9 Idi keburi' Simun Pétrus Neneh, "O Tuhan, kudeng pieh kudeng ineh, aleg maru' kukudku sebuleng mo', iamo' do' maru' ticu' idi uluhku teh." 10 Kebala Yésus neneh, "Idé-idé luk pangeh nediu', amung bururneh pana' malét; lemulun ineh maru' kukudneh mo'. Amung muyuh pana' malét, iamo' sebuleng mo' luk na." ( 11 Ngaceku Yésus panegh nekali' idé luk sikal masui Neneh; ineh punneh Ieh nepebala, "Amung muyuh pana' malét, iamo' sebuleng mo' luk na.") 12 Pangeh Yésus nemaru' kukud amung-amung anak sekola'Neh idi nenuet kuyu'Neh, idi Ieh netudo iring méja idi nepebala nedeh, "Muyuh kali' luk inau'Ku kuan muyuhké? 13 Muyuh ini nawar Negku Guru idi Tuhan, idi matu bala muyuh ineh, ngaceku Ui ini Ieh. 14 Kudeng Ui, Tuhan idi Guru, pangeh nemaru' kukud muyuh, do' muyuh maru' kukud muyuh seburur dengan seburur teh. 15 Ui pangeh nemaré luk pinginud kuan muyuh, pad muyuh pana' nganau' mepad kudeng Ui nganau' kuan muyuh. 16 Matu, Ui pebala nemuyuh, seburur demulun na meluun rayeh ratnan tuanneh, idi seburur lun duken pana' na meluun rayeh ratnan luk nengecuk neneh. 17 Kudeng muyuh kali' amung-amung ini, samal kuan muyuh kudeng muyuh nganau' ineh. 18 "Ui pebala baken ratnan amung-amung muyuh; ngaceku Ui kali' idé lemulun luk pinili'Ku; iamo' bala bang Surat Allah ineh na miak na uen ngacing, ieh ineh, 'Lemulun luk kuman pad-pad denganKu ineh sikal metueh rat Negku.' 19 Nekini Ui mala amung ini kuan muyuh, pad muyuh manu idi Ui ini Ieh, kareb ieh mangun. 20 Matu, Ui pebala nemuyuh luk ngalap lemulun luk icukKu, ieh ngalap Negku; iamo' lemulun luk ngalap Negku, ieh ngalap Allah luk nengecuk Negku." 21 Pangeh Yésus nepebala kudeng ini, idi Ieh mesusa' niat idi nemaré kali', kebalaNeh, "Matu, Ui pebala nemuyuh, idi seburur rat arang muyuh sikal masui Negku." 22 Anak-anak sekola' ineh melingo idi nenier seburur dengan seburur luk baken, ngaceku na ideh kali' idé luk bilaNeh ineh. 23 Seburur rat arang anak-anak sekola' Yésus, ieh ineh luk inanNeh mawa, netudo iring Yésus. 24 Simun Pétrus nenawar neneh, kebalaneh neneh, "Ngitun idé luk bilaNeh ineh." 25 Idi anak sekola' ineh iné' muneng nan Yésus idi nengitun Neneh, "O Tuhan, idéké ieh?" 26 Idi kebala Yésus, "Ui miak ngerereb aceh picut ruti idi maré kuanneh. Ini ieh." Idi Ieh nengalap ruti ineh, idi nengerereb neneh, idi nemaré kuan Yudas anak Simun Iskariot ineh. 27 Pangeh Yudas nengalap ruti ineh, idi Sétan nesemuet bang niatneh. Idi keburi' Yésus neneh, "Do' iko nganau' dengan mesaget anun luk ruenmu!" 28 Iamo' na luk idi seburur pana' rat arang amungdeh luk pad-pad kuman ineh kali' anun punneh Ieh nepebala kudeng ineh kuanneh. 29 Ngaceku Yudas ineh ngimet usin, inan luk ngerawé Yésus nepebala neneh, "Do' tau melih anun-anun luk pian tau kuan irau," kian, pad ieh maré kuan lun masi' lek. 30 Yudas nengalap ruti ineh, idi ieh neremuat dengan mesaget. Idi aco pana' malem. 31 Kareb Yudas pangeh neremuat, idi Yésus nepebala, "Nekini rayeh Anak-Lemulun ginala', idi rayeh Allah pana' ginala' bang Neneh. 32 Kudeng rayeh Allah ginala' bang Neneh, idi Allah teh sikal ngegala' rayehNeh bang bururNeh sebuleng, idi Allah miak nganau' ineh dengan mesaget. 33 O anak-anakKu, segageh mo' kinioneh Ui tudo dengan muyuh. Muyuh sikal nakap Negku. Iamo' mepad kudeng Ui pangeh nepebala kuan lun Yahudi, Ui pebala kuan muyuh, 'Su luk inanKu amé', muyuh na miak macing.' 34 Aceh ukum luk mebaruh Ui maré kuan muyuh, ieh ineh, do' muyuh mawa seburur inan seburur mepad kudeng Ui pangeh mawa nemuyuh, pad muyuh pana' mawa seburur inan seburur. 35 Kudeng muyuh mawa seburur inan seburur, idi amung-amung lemulun miak kali' muyuh ineh anak-anak sekola'Ku." 36 Idi kebala Simun Pétrus Neneh, "O Tuhan, iapehké luk inanMu amé'?" Idi kebala Yésus neneh, "Iko na miak maya' Negku amé' su luk inanKu amé' nekini. Iamo' muci iko miak maya' Negku." 37 Idi kebala Pétrus, "O Tuhan, ngudehké ui na miak maya' Namu nekini? Ui temina' maté ngaceku Iko." 38 Idi kebala Yésus, "Matuké Iko temina maté ngaceku Ui? Matu, Ui pebala namu, kareb nateh lal ngekook, iko miak ngalum Negku teluh kua'."
1 Kebala Yésus nedeh, "Aleg muyuh megagau niat; do' manu inan Allah, idi manu inan Negku teh. 2 Bang ruma' TamanKu inan mula' luk inan tudo' kudeng na pieh kudeng ineh, kali' rungen Ui pangeh nemala kuan muyuh; ngaceku Ui amé' nganau' temina' luk inan kuan muyuh. 3 Pangeh Ui amé' nganau' temina' luk inan kuan muyuh, idi Ui lemubed ngalap nemuyuh amé' Negku, pelé su luk inanKu tudo, déi' teh luk inan muyuh. 4 Idi muyuh kali' dalan amé' su luk inanKu." 5 Kebala Tomas Neneh, "O Tuhan, kai na kali' su apeh luk inanMu amé' kudeng apehké kai kali' dalan ineh?" 6 Keburi' Yésus neneh, "Ui ini dalan idi Luk Matu idi Ulun. Seburur pana' na macing inan Taman, kudeng na ratnan Negku. 7 Muyuh pangeh nengiti Negku. Idi muyuh miak ngiti TamanKu teh. Idi rat kareb ini muyuh miti Neneh, idi teh muyuh pangeh nenier Neneh." 8 Idi keburi' Pilipus Neneh, "O Tuhan, mada' Taman ineh siren kai, pad kai mawang niat." 9 Idi kebala Yésus neneh, "O Pilipus, tuda'-tuda' io Ui tudo dengan muyuh, idi nateh iko miti Negku? Lemulun luk pangeh nenier Negku, ieh pangeh nenier Taman teh. Kudeng apehké balamu, 'Mada' Taman ineh siren kai'? 10 Naké iko manu idi Ui ini bang Taman, idi Taman pana' bang Negku? Amung-amung bala luk Ui ini mala kuan muyuh, baken Ui pebala dengan pianKu sebuleng, iamo' Taman ineh luk lutep bang Negku, Ieh luk nganau' amung-amung kekamen ineh. 11 Do' muyuh manu Negku, ngaceku Ui ini bang Taman idi Taman pana' bang Negku; kudeng na tu pana', do' manu Negku ngaceku ratnan kekamen ini. 12 Matu, Ui pebala nemuyuh, idé luk manu Negku, ieh pana' miak nganau' kekamen luk ruenKu, idi ieh miak nganau' kekamen luk meluun rayeh ratnan ini, ngaceku Ui amé' inan TamanKu. 13 Idi anun-anun pana' luk pituen muyuh bang ngadanKu, Ui miak ngua' neneh, pad Taman uen ngerayeh bang Anak. 14 Kudeng muyuh mutuh rat Negku anun-anun bang ngadanKu, Ui miak ngua' neneh. 15 "Kudeng muyuh mawa Negku, do' maya' ukum-ukumKu. 16 Ui mutuh ratnan Taman, idi Ieh miak maré nemuyuh Lun Ngedengan luk baken, ieh ineh Roh luk matu pad Ieh ngedengan nemuyuh ruked-ruked peh. 17 Ieh na miak lapen tana' ini, ngaceku tana' ini na kali' Neneh, idi na miti Neneh. Iamo' muyuh miti Neneh ngaceku Ieh tudo dengan muyuh, idi Ieh idi bang nemuyuh. 18 "Ui na miak necan nemuyuh mepad kudeng anak maté; Ui sikal macing nemuyuh. 19 Segageh teh uang tana' ini na miak nier Negku peh, iamo' muyuh ini miak nier Negku, ngaceku Ui ini mulun, idi muyuh pana' miak mulun teh. 20 Kareb aco ineh teh muyuh miak kali' idi Ui ini bang TamanKu, idi muyuh pana' bang Negku, idi Ui pana' bang nemuyuh. 21 "Kudeng idé-idé luk gimet idi maya' amung ukumKu, ieh ineh luk mawa Negku. Idi lemulun luk mawa Negku, idi Taman pana' mawa neneh, idi Ui teh mawa neneh idi ngegala' bururKu kuanneh." 22 Idi Yudas (baken Yudas Iskariot ineh) nepebala Neneh, "O Tuhan, kudeng apehké dalanneh Iko sikal ngegala' bururMu kuan kai idi baken kuan uang tana' ini?" 23 Idi kebala Yésus, "Kudeng idé-idé luk mawa Negku, kali' rungen ieh maya' balaKu, idi TamanKu ineh mawa neneh, idi Kai sikal macing neneh idi tudo denganneh. 24 Lemulun luk na mawa Negku, na ieh maya' balaKu. Idi bala luk muyuh ninger ineh baken balaKu, iamo' bala Taman ineh luk nengecuk Negku. 25 "Ui pangeh nemala amung ini kuan muyuh selaba' Ui tudo dengan muyuh. 26 Iamo' Lun Ngedengan ineh, ieh ineh Roh Meligan, luk uen Taman ngecuk bang ngadanKu, Ieh luk miak mada' luk amung-amung kuan muyuh. Idi Ieh ngedengan nemuyuh pad muyuh ngerawé amung-amung luk pangeh bilaKu nemuyuh. 27 "Ui necan awang kuan muyuh, idi Ui maré awangKu sebuleng kuan muyuh. Ui na maré ineh kuan muyuh maya' lawé tana' ini. Aleg muyuh megagau niat idi aleg matot. 28 Muyuh pangeh neninger balaKu nemuyuh, 'Ui amé' idi Ui sikal lemubed kuan muyuh.' Kudeng muyuh mawa Negku, kali' rungen muyuh mawang niat ngaceku Ui amé' inan Taman, ngaceku TamanKu meluun rayeh rat Negku. 29 Nekini Ui pangeh nemala kuan muyuh kareb nateh ineh mangun, pad muyuh miak manu kareb ieh mangun. 30 Na Ui miak mala mio kuan muyuh teh, ngaceku raca' tana' ini macing, iamo' na ieh melalud rat Negku. 31 Ui nganau' teh mepad kudeng luk icuk Taman kuanKu, pad uang tana' ini miak kali' idi Ui mawa inan Taman. "Tumui muyuh, do' tau nalan rat ieni.
1 "Ui ini Lawa Anggur luk matu, idi TamanKu, Ieh ineh luk ngasa' neneh. 2 Anid-anid angat luk bang Negku luk na kebua' miak tetuinNeh; idi anid-anid angat luk kebua' ruenNeh ngalét pad bua'neh meluun ula'. 3 Muyuh ini kali' rungen malét ngaceku bala luk bilaKu nemuyuh. 4 Do' muyuh lutep bang Negku, idi Ui pana' bang nemuyuh. Mepad kudeng angat na miak kebua' dengan lalud bururneh sebuleng, kudeng na lutep bang lawa anggur, kudeng ineh teh muyuh pana' na miak kebua' kudeng muyuh na lutep bang Negku. 5 "Ui ini Lawa Anggur, idi muyuh angat-angatneh. Kudeng idé-idé luk lutep bang Negku, idi Ui pana' bang neneh, ieh miak kebua' mula'; ngaceku kudeng Ui na ngedengan nemuyuh, muyuh na miak nganau' anun-anun. 6 Kudeng idé-idé luk na lutep bang Negku, ieh miak talan mepad kudeng angat ineh, idi mangun tekering. Muci lemulun miak ngamung angat-angat ineh idi ideh miak talan bang apui, idi sabpen. 7 Kudeng muyuh lutep bang Negku, idi balaKu lutep bang nemuyuh, do' mutuh anun-anun luk pian muyuh, idi ineh luk miak mangun kuan muyuh. 8 Bang amung ini rayeh TamanKu uen ngegala', ieh ineh kudeng muyuh kebua' mula', idi muyuh miak mangun ku anak-anak sekola'Ku. 9 Mepad kudeng Taman pangeh mawa Negku, kudeng ineh teh Ui pangeh mawa nemuyuh. Do' muyuh lutep bang awaKu ineh. 10 Kudeng muyuh maya' ukum-ukumKu, kali' rungen muyuh miak lutep bang awaKu, mepad kudeng Ui pangeh nemaya' ukum-ukum TamanKu, idi nelutep bang awaNeh. 11 "Idi Ui pangeh nemala amung ini kuan muyuh, pad awangKu tudo bang nemuyuh, idi awang muyuh pana' meriput peh. 12 Ini ukumKu, ieh ineh do' muyuh mawa seburur inan seburur mepad kudeng Ui pangeh mawa nemuyuh. 13 Na luk idi seburur pana' luk inan awa luk meluun rayeh ratnan ini, ieh ineh pad ieh maré ulunneh ngaceku amung-amung luk rurumneh. 14 Muyuh ini lun rurumKu kudeng muyuh nganau' anun-anun luk dukenKu nemuyuh. 15 Na Ui neten nemuyuh demulun teh, ngaceku seburur demulun na kali' luk ruen tuanneh; iamo' Ui pangeh neneten nemuyuh luk rurumKu, ngaceku amung-amung luk Ui neninger ratnan TamanKu, ineh teh luk bida'Ku nemuyuh. 16 Baken muyuh luk nemili' Negku, iamo' Ui ini luk nemili' nemuyuh idi nengeletep nemuyuh, pad muyuh amé' ngeruat mula' bua', idi pad bua' muyuh ineh meruked peh. Idi anun-anun luk pituen muyuh ratnan Taman bag ngadanKu, Ieh miak maré kuan muyuh. 17 Ini luk dukenKu nemuyuh, pad muyuh mawa seburur inan seburur. 18 "Kudeng uang tana' ini megateh nemuyuh, ngerawé, idi ieh pangeh megateh Negku atun rat nemuyuh. 19 Kudeng muyuh ratnan tana' ini, kali' rungen tana' ini miak mawa nemuyuh mepad kudeng pupuneh sebuleng. Iamo' muyuh baken ratnan tana' ini, ngaceku Ui pangeh nemili' nemuyuh ratnan tana' ini. Ini punneh tana' ini megateh nemuyuh. 20 Do' muyuh ngerawé bala luk bilaKu nemuyuh, 'Seburur demulun na meluun rayeh ratnan tuanneh.' Kudeng ideh nengedereh Negku, kali' rungen ideh ngedereh nemuyuh teh. Kudeng ideh nemaya' balaKu, idi bala muyuh pana' miak béndeh. 21 Iamo amung-amung ini miak ruendeh kuan muyuh ngaceku ngadanKu, ngaceku ideh na miti Neneh luk nengecuk Negku. 22 Kudeng Ui na nacing pebala nedeh, idi na ideh nmesala', iamo' nekini ideh na miak sumaad ratnan sala'deh. 23 Idé-idé luk megateh Nekgu, ieh megateh inan TamanKu teh. 24 Kudeng Ui na nenganau' tuda'-tuda' kekamen luk nateh inau' lun baken arangdeh, idi na ide ideh mesala' iamo' nekini ideh pangeh nenier idi megateh Negku idi inan Taman teh. 25 Iamo' amung ini pangeh mangun kudeng ini, pad ngacing bala luk inayud bang Ukumdeh, 'Idi ideh pangeh megateh Negku dengan na punneh.' 26 "Iamo' Lun Ngedengan ineh miak macing, ieh ineh Roh luk matu luk macing ratnan Taman. Ui ngecuk Neneh amé' nemuyuh ratnan Taman ineh, idi Ieh miak maré kali' ratnan Ui. 27 Muyuh pana' miak mangun ku lun nekali' Negku, ngaceku muyuh tudo denganKu rat pun-pun.
1 "Ui pangeh nemala amung ini kuan muyuh, pad anu muyuh na mesabeng. 2 Idi muyuh miak uen lun masut rat bang ruma' sembayang. Matu, karebneh miak macing, idi idé-idé luk ngaté nemuyuh miak ngerawé ieh nganau' luk do' kuan Allah. 3 Amung-amung ini miak ruendeh, ngaceku na ideh miti Taman idi Ui teh. 4 Iamo' Ui pangeh nemala amung ini kuan muyuh, pad kareb ini macing muyuh miak ngerawé, idi amung ineh pangeh bilaKu nemuyuh. "Idi na Ui mala amung-amung ini kuan muyuh rat pun-pun, ngaceku Ui tudo dengan muyuh. 5 Iamo' nekini Ui amé' inan Allah luk nengecuk Negku, sagan pana' seburur rat arang muyuh na ngitun Negku, 'Su apehké ulekMu?' 6 Iamo' ngaceku Ui pangeh nemala amung ini kuan muyuh, niat muyuh mesusa'. 7 Iamo' Ui mala luk matu kuan muyuh, do' kuan muyuh kudeng Ui ini amé', ngaceku kudeng Ui na amé', Lun Ngedenan ineh na miak macing nemuyuh; iamo' kudeng Ui amé'. Ui miak ngecuk Neneh amé' nemuyuh. 8 Idi kareb Ieh macing Ieh miak ngegala' kuan uang tana' ini ratnan ideh sala' terawé ratnan kekamen luk dat idi ratnan luk matu idi ratnan ukum. 9 Ideh sala' terawé ratnan kekamen luk dat, ngaceku ideh na manu Negku. 10 Ideh sala' terawé ratnan luk matu, ngaceku Ui amé' inan Taman idi muyuh na miak nier Negku teh. 11 Ideh sala' terawé ratnan ukum, ngaceku raca' tana' ini pangeh inukum. 12 "Inan teh mula' bala luk Ui sikal mala kuan muyuh, iamo' nekini muyuh na miak tuman ratnan ineh. 13 Iamo' kareb Roh luk matu macing, idi Ieh miak nguit nemuyuh semuet bang amung-amung luk matu. Na Ieh pebala maya' pianNeh sebuleng, iamo' anun-anun luk pedingerenNeh, ineh teh luk miak belénNeh. Ieh miak mada' nemuyuh ratnan luk miak macing. 14 Idi Ieh sikal ngerayeh Negku, ngaceku Ieh sikal ngalap luk rat Negku, idi mada' kuan muyuh. 15 Amung-amung luk Taman kuan, ineh teh Ui kuan, ineh punneh Ui nepebala, idi Ieh sikal ngalap luk rat Negku, pad uen ngacing kuan muyuh. 16 "Segageh mo' idi muyuh na miak nier Negku teh, idi segageh mo', idi muyuh miak nier Negku." 17 Idi tuda'-tuda' burur anak sekola'Neh nepebala seburur inan seburur, "Anunké ilungneh? KebalaNeh, 'Segageh mo' idi muyuh na miak nier Negku teh, idi segageh mo' idi muyuh miak nier Negku,' idi teh kebalaNeh, 'Ngaceku Ui amé' inan Taman'?" 18 Idi keburi'deh, "Anunké ilungneh, 'Segageh teh'? Na tau kali' ilung luk bilaNeh ineh." 19 Yésus kali' nedeh sikal ngitun Neneh. Di kebala Yésus nedeh, "Iniké luk tunin muyuh arang muyuh sebuleng, ngaceku Ui nepebala, 'Segageh mo', idi muyuh na miak nier Negku teh, idi segageh mo', idi muyuh miak nier Negku'? 20 Matu, Ui pebala nemuyuh, muyuh miak nangi' idi temido, iamo' uang tana' ini miak mawang niat; idi muyuh ini miak mesusa' niat, iamo' susa' muyuh miak misu' mangun ku awang. 21 Kareb seburur decur mét nenganak, ieh mesusa' niat, ngaceku karebneh pangeh macing; iamo' kareb anak mebpeh ieh na ngerawé derehneh, ngaceku ieh mawang niat ku anakneh luk tinganak bang tana' ini. 22 Kudeng ineh teh muyuh mesusa' nekini, iamo' Ui miak nier nemuyuh teh, idi miak muyuh mepanu' ku awang, idi seburur pana' nateh luk miak ngalap awang ineh rat nemuyuh. 23 "Kareb aco sineh muyuh na miak mutuh anun-anun rat Negku peh. Matu, Ui pebala nemuyuh, Taman ineh miak maré nemuyuh anun-anun luk pituen muyuh bang ngadanKu. 24 Macing nekini pana' muyuh nateh nemuyuh anun-anun bang ngadanKu. Do' mutuh, pad muyuh miak ngalap, pad awang muyuh miak meriput peh. 25 "Amung-amung ini pangeh bida'Ku nemuyuh dengan luk pinginud. Iamo' karebneh miak macing idi Ui na pebala kuan muyuh teh dengan luk pinginud, iamo' dengan megala' Ui miak mada' nemuyuh ratnan Taman ineh. 26 Kareb aco sineh muyuh miak mutuh bang ngadanKu, idi Ui na mala Ui ini sikal mutuh kuan muyuh ratnan Taman, 27 ngaceku Taman sebuleng mawa nemuyuh, ngaceku muyuh ini mawa Negku, idi ngaceku muyuh pangeh manu idi Ui ini nacing ratnan Taman. 28 Ui nacing ratnan Taman, idi nesemuet bang tana' ini; iamo' nekini Ui sikal necan tana' ini teh idi amé' inan Taman." 29 Idi kebala anak-anak sekola'Neh Neneh, "Siruh, nekini Iko pebala dengan megala' idi na pebala dengan luk pinginud. 30 Nekini kai kali' idi Iko kali' luk amung-amung, idi na ulekneh selemulun ngitun Namu; ngaceku ineh kai manu idi Iko pangeh nacing ratnan Allah." 31 Kebala Yésus nedeh, "Manuké muyuh nekini? 32 Siruh, karebneh miak macing, idi pangeh nacing teh, idi muyuh miak mepatad anid-anid burur amé' ruma'neh sebuleng, pad Ui sebuleng ketecan; iamo' na Ui sebuleng, ngaceku Taman ineh idi denganKu. 33 Ui nemala amung ini kuan muyuh, pad muyuh mawang niat bang Negku. Bang tana' ini muyuh medereh; iamo' do' muyuh mekuu'. Ui pangeh metueh ratnan tana' ini."
1 Pangeh Yésus nepebala, idi Ieh netengook déi' langit, kebalaNeh, "O Ama' karebneh pangeh macing. Ngegala' rayeh AnakMu, pad AnakMu pana' miak ngegala' rayehMu. 2 Iko pangeh nemaré lalud kuanNeh pa luun amung-amung lemulun, pad Ieh miak maré ulun luk meruked kuan anid-anid burur luk biréMu Neneh. 3 Ini ulun luk meruked, ieh ineh pad ideh miti Namu, Allah luk Sebuleng idi matu, idi Yésus Keristus luk Iko nengecuk ineh. 4 Ui pangeh nengerayeh Namu bang tana', idi nengeriput kekamen luk Iko nemaré kuanKu. 5 Idi nekini, O Ama', ngerayeh Negku pa kiungMu sebuleng dengan rayeh luk Ui nekali' pa kiungMu kareb nateh tana' ini pinudut. 6 "Ui pangeh nengegala' ngadanMu kuan lemulun bang tana' ini luk biréMu kuanKu. Ideh kuanMu, idi Iko nemaré nedeh kuanKu, idi ideh pangeh nemaya' balaMu. 7 Nekini ideh kali' idi amung-amung luk biréMu kuanKu ineh macing rat Namu. 8 Ui nemaré kuandeh bala luk bilaMu Negku, idi ideh pangeh nengalap ineh. Ideh nekali' dengan matu idi Ui nacing rat Namu. Idi teh ideh manu ratnan Iko luk nengecuk Negku. 9 "Ui ini mutuh kuandeh, Na Ui mutuh kuan uang tana' ini, iamo' kuan lemulun luk biréMu Negku, ngaceku ideh kuanMu. 10 Amung-amung luk kuanKu, ineh teh kuanMu, idi luk kuanMu, ineh teh kuanKu, idi rayehKu ginala' bang nedeh. 11 Idi nekini Ui amé' Namu. Na Ui tudo bang tana' ini teh, iamo' ideh tudo bang tana' ini. O Ama' luk meligan! Ngasa' nedeh ku lalud ngadanMu luk biréMu Negku, pad ideh mangun ku sebuleng mepad kudeng Kiteh. 12 Laba' Ui tudo dengandeh, Ui ini nengimet nedeh bang ngadanMu luk biréMu Negku. Ui pangeh nematar nedeh, idi seburur pana' rat arangdeh na metutu', iamo' lemulun luk na miak na metutu', pad ngacing bala bang Surat Allah. 13 Iamo' nekini Ui amé' Namu; idi Ui mala amung ini serukedKu tudo bang tana' ini, pad ideh miak ngalap awangKu bang niatdeh dengan meriput. 14 Ui ini nengacing balaMu kuandeh; idi uang tana' ini megateh nedeh, ngaceku ideh baken ratnan tana' ini, mepad kudeng Ui teh baken ratnan tana' ini. 15 Na Ui mutuh Namu ngalap nedeh rat bang tana' ini, iamo' pad Iko ngimet nedeh ratnan luk Dat ineh. 16 Mepad kudeng Ui ini baken ratnan tana' ini, ideh pana' baken ratnan tana' ini. 17 Ngeligan nedeh bang luk matu; balaMu, ineh luk matu. 18 Ui nengecuk nedeh amé' bang tana' ini, mepad kudeng Iko nengecuk Negku. 19 Ui ngeligan bururKu ngaceku ideh, pad ideh pana' uen ngeligan bang luk matu. 20 "Ui mutuh baken kuandeh mo', iamo' kuan idé-idé pana' luk manu Negku ngaceku ratnan bada'deh. 21 Ui mutuh pelé amungdeh mangun ku sebuleng mepad kudeng Iko bang Negku, O Ama', idi Ui pana' bang Namu, idi ideh pana' mangun ku sebuleng bang Nekiteh, pad uang tana' ini miak manu ratnan Iko luk nengecuk Negku. 22 Ui nemaré kuandeh rayeh luk pangeh biréMu Negku; pad ideh pana' mangun ku sebuleng, mepad kudeng Kiteh ini mangun ku sebuleng peh. 23 Ui ini bang nedeh. Idi Iko bang Negku, pelé ideh miak mangun meligan bang sebuleng rurum; pad uang tana' ini miak kali' ratnan Iko luk nengecuk Negku idi mawa nedeh mepad kudeng Iko mawa Negku. 24 "O Ama', pianKu idi lemulun luk pangeh biréMu Negku ineh idi denganKu iapeh-iapeh luk inanKu, pad ideh miak nier rayehKu luk pangeh biréMu Negku, ngaceku Iko pangeh mawa Negku atun ratnan tana' ini pinudut. 25 O Ama' luk matu, tana' ini na miti Namu, iamo' Ui ini miti Namu, idi ideh pana' pangeh nekali' ratnan Iko luk nengecuk Negku. 26 Ui nengegala' Namu kuandeh, idi Ui sikal ngegala' Namu teh, pad awa luk mepad kudeng awaMu kuanKu ineh, lutep bang nedeh, idi Ui pana' lutep bang nedeh teh."
1 Pangeh Yésus nesembayang kudeng ineh, idi Ieh nenalan dengan anak-anak sekola'Neh iné' déi' dipar Arur Kidron, su luk inan aceh kabun. Yésus iné' bang kabun ineh dengan anak-anak sekola'Neh. 2 Yudas, luk nemasui Neneh, kali' kabun ineh, ngaceku megéi kua' Yésus tebubpun déi' dengan anak-anak sekolaNeh. 3 Ngaceku ineh Yudas nenguit sebuang bunu' dengan lun pulis ratnan imam-imam rayeh idi lun Parisi, idi nacing déi' dengan lapung, sesakan, idi pelapet. 4 Idi Yésus luk nekali' amung-amung luk miak mangun kuanNeh, neremuat idi nepebala nedeh, "Idéké luk tekapen muyuh?" 5 Idi kebaladeh, "Yésus lun Nasarét." Idi kebala Yésus nedeh, "Ui ini Ieh." Idi Yudas luk nemasui Neneh tuped dengandeh. 6 Kareb Yésus nepebala, "Ui ini Ieh," idi ideh nelemubed idi neluka' luun tana'. 7 Idi Yésus nengitun nedeh teh, "Idéké luk tekapen muyuh?" Idi kebaladeh, "Yésus lun Nasarét." 8 Idi kebala Yésus, "Ui pangeh nepebala nemuyuh, 'Ui ini Ieh.' Ngaceku ineh, kudeng muyuh nakap Negku, nima' lun baken ini nalan." ( 9 Ieh nemala kudeng ini pad ngacing bala luk bilaNeh ineh, "Ratnan amung-amung lemulun luk biréMu Negku ineh, seburur pana' na Ui ngetutu'.") 10 Idi Simun Pétrus inan pelapet. Ieh nengangat neneh idi nenarad demulun imam Rayeh, idi nenangal lalidneh pa tinueh. Ngadan demulun ineh Malkus. 11 Kebala Yésus ni Pétrus, "Do' ngusong pelapetmu bang binanneh. Naké Ui miak ngirup ratnan sangkir luk biré Taman kuanKu?" 12 Idi sebuang bunu' idi lun rayehdeh idi amung-amung lun pulis lun Yahudi ineh pana' nengakem Yésus, idi nengabet Neneh, 13 idi nenguit Neneh pun-pun amé' matun Annas, ieh ineh iban Kayapas, luk mangun ku Imam Rayeh bang lak ineh. 14 Kayapas ineh luk nemada' lun Yahudi do' kudeng seburur lemulun maté ku libal pupu ineh. 15 Simun Pétrus idi seburur anak sekola' baken nemaya' puet Yésus. Idi anak sekola' luk baken ineh initi Imam Rayeh, idi ieh iné' dengan Yésus luun natad ruma' Imam Rayeh. 16 Iamo' Pétrus netuped déi' liang, munung tanga'. Idi anak sekola' luk baken ineh neremuat, idi nepebala dengan seburur decur luk matar tanga', idi ieh nenguit Pétrus semuet. 17 Idi keburi' decur luk matar tanga' ineh ni Pétrus, "Bakenké iko pana' seburur anak sekola' lemulun ineh?" Idi kebala Pétrus, "Baken." 18 Idi amung-amung demulun idi lun pulis pangeh nengaba apui ngaceku meteneb, idi ideh nengisidu, idi Pétrus pana' tuped dengandeh idi singidu. 19 Imam Rayeh ineh nengitun Yésus ratnan anak-anak sekola'Neh, idi ratnan bada'Neh. 20 Idi kebala Yésus neneh, "Ui ini pangeh nepebala dengan megala' kuan uang tana' ini; megéi Ui mada' bang ruma' sembayang idi bang Ruma' Allah, ieh ineh su luk inan amung lun Yahudi pamung. Idi sebuleng pana' na Ui nemala dengan ngalum. 21 Anunké punneh iko ngitun Negku? Do' ngitun lemulun luk pangeh neninger balaKu. Ideh kali' luk bilaKu ineh." 22 Kareb Yésus pangeh nemala ini, seburur lun matar luk tuped déi' nemepag kiungNeh kebalaneh, "Ngudehké Iko mekuu' pebala kudeng ini nelun Imam Rayeh?" 23 Idi kebala Yésus neneh, "Kudeng balaKu ini sala', do' ngegala' ineh nelun mula' luk idi ieni. Iamo' kudeng balaKu matu, ngudehké iko mepad Negku?" 24 Idi Annas nengecuk nated Neneh amé' matun Imam Rayeh Kayapas. Idi ticu' Yésus inabet. 25 Simun Pétrus tuped sigidu teh. Idi keburi' seburur neneh, "Bakenké iko pana' seburur anak sekola'Neh?" Idi ieh nengalum, keburi'neh, "Baken." 26 Idi seburur rat arang demulun Imam Rayeh, luk dingkanid dengan lemulun luk tirad Pétrus lalid ineh, nepebala, "Naké ui nenier namu bang kabun denganNeh?" 27 Idi Pétrus pana' nengalum teh; idi lal pana' petacu nengekook peh. 28 Idi pekak uka-uka, ideh nenguit Yésus rat ruma' Kayapas amé' ruma' Lun luk Ngimet Ukum. Idi lun Yahudi na nesemuet bang ruma' ineh, pad ideh na uen ngelutak, idi ideh miak kuman Irau Paska. 29 Ngaceku ineh Pilatus iné' ngitun nedeh, keburi'neh, "Anunké adu' muyuh kuan lemulun ini?" 30 Idi kebaladeh, "Kudeng lemulun ini baken selemulun luk mesala', nateh kai nemaré Neneh kuan tuan." 31 Idi keburi' Pilauts nedeh, "Do' muyuh ngalap Neneh idi ngukum Neneh maya' Ukum muyuh." Keburi' lun Yahudi neneh, "Kai ini na miak ngaté seburur lemulun pana'." ( 32 Ini mangun pad ngacing luk pangeh bila Yésus ratnan lawé atéNeh.) 33 Pangeh Pilatus nesemuet bang ruma' Lun luk Ngimet Ukum ineh, idi ieh nenawar Yésus, idi ieh nengitun, "Ikoké Raca' lun Yahudi?" 34 Idi kebala Yésus, "Inanké bala ini ratnan Tuan sebuleng, kian, lun baken nemala kuanmu ratnan Ui lek?" 35 Kebala Pilatus, "Ui ini lun Yahudiké? PupuMu sebuleng idi imam-imam rayeh luk nemaré Namu kuanku. Anunké luk inau'Mu?" 36 Idi kebala Yésus, "ImetKu ineh baken ratnan tana' ini. Kudeng ImetKu ratnan tana' ini, kali' rungen demulun-demulunKu miak pebunu' pad Ui na barén kuan lun Yahudi. Iamo' ImetKu ineh baken ratnan tana' ini!" 37 Idi keburi' Pilatus Neneh, "Iko pana' seburur raca ké?" Idi kebala Yésus, "Matu kudeng buri'mu, Ui ini seburur raca' Ini punneh Ui pangeh tinganak, idi nacing bang tana' ini pad Ui maré kali' ratnan luk matu. Idé-idé luk geregan ku luk matu ineh, ieh luk ninger balaKu." 38 Idi keburi' Pilatus Neneh, "Anunké luk matu ineh?" Idi Pilatus neremuat iné' nelun Yahudi, idi keburi'neh nedeh, "Ui na kali' anun punneh ui ngukum Neneh. 39 Iamo' maya' adat muyuh, kareb Irau Paska ui miak muit seburur lemulun luk tinutup. Sikalké muyuh ku ui muit Raca' lun Yahudi ineh?" 40 Idi ideh nengitang, keburi' deh, "Baken Ieh, iamo' Barabas!" (Barabas ineh seburur lun mano.)
1 Pangeh ineh Pilatus pana' nenguit Yésus, idi nemebal Neneh. 2 Idi lun pebunu' ineh nengapid tabpa' ku pata idi nengerareng ineh luun uluhNeh. Idi ideh nengayung Neneh ku kuyu' luk sia' merirem; 3 idi ideh iné' Neneh, kebaladeh, "Tabi' Raca' lun Yahudi!" Idi ideh nemepag Neneh. 4 Idi Pilatus neremuat idi nepebala nedeh, "Siruh, ui nguit Neneh kuan muyuh, pad muyuh kali' negku na kali' anun punneh ui ngukum Neneh." 5 Idi Yésus neremuat, dengan pata luk metabpa' idi kuyu' luk sia' merirem. Idi keburi' Pilatus kuan amung-amungdeh, "Siruh, lemulun ineh!" 6 Kareb imam-imam rayeh idi lun pulis pana' nenier Neneh, idi ideh nengitang, keburi'deh, "Nalib Neneh, nalib Neneh!" Idi keburi' Pilatus nedeh, "Do' muyuh ngalap Neneh, idi nalib Neneh! Ngaceku na ui kali' anun punneh ui ngukum Neneh." 7 Idi lun Yahudi nengor balaneh, keburi'deh, "Maya' Ukum kai do' Ieh mate, ngaceku Ieh nemala bururNeh Anak Allah." 8 Kareb Pilatus neninger bala ineh, idi ieh pelaba tot. 9 Ieh nesemuet bang ruma' Lun luk Ngimet Ukum ineh sekua' teh, idi nepebala inan Yésus, "Rat iapehké iratMu?" Iamo' Yésus na nengor balaneh. 10 Idi keburi' Pilatus Neneh, "Naké Iko sikal pebala negku? Naké Iko kali' ui melalud muit Namu, idi melalud nalib Namu?" 11 Idi kebala Yésus neneh, "Iko na melalud pa luunKu, kudeng na biré namu ratnan Allah. Ngaceku ineh lemulun luk nemaré Negku kuanmu meluun rayeh sala'." 12 Kareb Pilatus neninger bala ineh, idi ieh nenakap dalan sikal muit Yésus. Iamo' lun Yahudi nengitang, keburi'deh, "Kudeng Tuan muit lemulun ini, baken Tuan lun dengan raca' Rum. Idé-idé luk ngamo bururneh raca', ieh luk sikal metueh ratnan raca' Rum." 13 Pangeh Pilatus neninger bala ini, idi ieh neguit Yésus remuat, idi netudo luun kerusi besara', idi su ineh titen "Batu luk Mebalad." (Bang buri' Iberani ieh ineh, "Gabata".) 14 Kareb ineh lélé muned aco, idi kenebpa Irau Paska. Idi kebala Pilatus nelun Yahudi, "Siruh, Raca' muyuh!" 15 Iamo' ideh nengitang, keburi'deh, "Ngaté Neneh! Ngaté Neneh! Nalib Neneh!" Idi keburi' Pilatus nedeh, "Do'ké ui nalib Raca' muyuh?" Idi imam-imam rayeh nengor balaneh, keburi'deh, "Na luk idi raca' kai luk baken ratnan raca' Rum." 16 Idi Piltus nemaré Yésus nedeh, pad Ieh uen nalib. Idi ideh nenguti Yésus. 17 Idi Ieh neremuat idi nemaan salibNeh sebuleng amé' matun. Su luk inan Perupuk Uluh (Bang buri' Iberani ieh ineh "Golgota.") 18 Déi' ideh nenalib Neneh dengan dueh burur lun baken, sebuleng selipa idi sebuleng selipa, iamo' Yésus arang uned didueh. 19 Pilatus nengayud aceh surat, idi ieh nengerareng ineh pa luun salib ineh. Ieh nengayud kudeng ini, "Yésus, lun Nasarét, Raca' lun Yahudi." 20 Idi mula' lun Yahudi nemaca' ayud ineh, ngaceku su luk inan Yésus sinalib ineh muneng inan bawang, idi surat ineh inayud bang buri' Iberani, buri' Rum, idi buri' Grika. 21 Idi kebala imam-imam rayeh lun Yahudi kuan Pilatus, "Aleg iko ngayud 'Raca' lun Yahudi,' iamo', 'Ui ini Raca' lun Yahudi,' mepad kudeng luk bilaNeh ineh." 22 Iamo' kebala Pilatus, "Luk pangeh inayudku pangehneh ineh." 23 Pangeh lun pebunu' ineh nenalib Yésus, idi ideh nengalap ayungNeh, idi nemabpat neneh apat babpat, ieh ineh kuan anid-anid burur lun pebunu' sebuleng babpat. Idi teh ideh nengalap kuyu'Neh; iamo' kuyu' ineh na dirut, iamo' pekatu rat dita' macing pa beneh. 24 Idi ideh nepebala seburur inan seburur, "Aleg tau narak neneh, iamo' do' tau nala' udi ratnan ineh, pad tau kali' idé luk miak ngalap neneh," pad ngacing bala bang Surat Allah ineh luk pebala, "Ideh pangeh nemabpat ayungKu seburur dengan seburur, Idi ideh nala' udi ratnan kuyu'Ku." Idi lun pebunu' ineh nenganau' kudeng ineh. 25 Idi tinan Yésus idi kinanak tinanNeh luk decur, Mariam awan Kliopas, idi Mariam Magdalina netuped iring salib Yésus. 26 Kareb Yésus nenier tinanNeh idi anak sekola' luk inanNeh mawa ineh tuped muneng, idi Ieh nepebala inan tinanNeh, "O Ina', siruh, anakmu!" 27 Pangeh ineh Ieh nepebala inan anak sekola' ineh, "Siruh, tinanmu!" Idi rat kareb ineh anak sekola' ineh nengalap neneh tudo bang ruma'neh sebuleng. 28 Pangeh neh Yésus nekali' idi amung-amung pangeh riniput, idi Ieh nepebala, "Ui meparing," pad ngacing bala bang Surat Allah ineh. 29 Idi déi' inan aceh sangkir luk rireng mepanu' ku abpa' luk malam; idi ideh nengerareng aceh lemut batu, luk mepanu' ku abpa' luk malam nan paped angat likudung, idi nenguit ineh macing inan tang Yésus. 30 Kareb Yésus pangeh nengalap abpa' luk malam ineh, kebalaNeh, "Pangeh meriput!" Idi Ieh nemunel idi niatNeh neputut. 31 Idi ngaceku aco sineh aco limeh, ieh ineh Aco Temina' kuan Irau Paska, pad butung lemulun luk sinalib ineh na ketecan luun salib, meluun teh ngaceku Aco luk inan Mudeng bang minggu ineh meluun ligan, idi lun Yahudi nemutuh Pilatus nima' nedeh mutul kukuddeh idi ngalap butungdeh ratnan salib. 32 Idi lun pebunu' nacing, idi nemutul kukud lemulun luk pun-pun idi kukud lun baken luk sinalib dengan Yésus ineh. 33 Iamo' kareb ideh nacing ni Yésus idi nenier Neneh pangeh naté, na ideh nemutul kukudNeh. 34 Iamo' seburur lun pebunu' nenebpek sigarang Yésus ku busu, idi petacu dara' Yésus neremuat dengan abpa'. ( 35 Idi lemulun luk pangeh nenier ineh nemaré kali', pad muyuh miak manu. Luk nekali'neh ineh matu. Idi ieh kali' luk bilaneh ineh matu.) 36 Ini punneh ini mangun, pad ngacing bala bang Surat Allah ineh, "Sebuleng tulangNeh pana' na miak pitulen." 37 Idi inan teh ayat bang Surat Allah luk mala, "Ideh miak nier Neneh luk pangeh tibpekdeh." 38 Pangeh ineh Yusup lun Arimatia nemutuh butung Yésus rat ni Pilatus. (Yusup ineh seburur anak sekola' Yésus teh, iamo' dengan lulem ngaceku matot nelun Yahudi.) Idi Pilatus nenima' neneh. Idi Yusup iné' ngalap butung Yésus. 39 Idi Nikodimus luk iné' atun matun Yésus kareb malem, nacing teh, idi nenguit mur pinuar dengan tara ala, lélé anem ngepulu' kati beratneh. 40 Idi didueh nengalap butung Yésus, idi nengelilib neneh ku kibung luk do' idi ku amung-amung luk do' buen ineh, maya' lawé nanem lun Yahudi. 41 Muneng ku su luk inan Yésus sinalib ineh inan aceh kabun, idi bang kabun ineh inan aceh tanem luk mebaruh, su luk nateh inan ngerareng butung lemulun. 42 Ngaceku aco sineh kareb nateh Aco luk inan Mudeng, idi ideh nengerareng butung Yésus bang ineh.
1 Pekak uka-uka bang Aco Minggu, ieh ineh kareb medacem teh, idi Mariam Magdalina iné' inan tanem ineh, idi nenier batu ineh pangeh linubid rat munung lubang tanem ineh. 2 Idi ieh nupun iné' nakap Simun Pétrus, idi anak sekola' luk baken luk inan Yésus mawa, idi nepebala nedidueh, "Lemulun pangeh nengalap Tuhan rat bang tanem, idi na kai kali' iapeh inandeh nengerareng Neneh." 3 Idi Pétrus neremuat dengan anak sekola' luk baken ineh idi iné' nan tanem ineh. 4 Idi didueh nupun, iamo' anak sekola' luk baken nupun, meluun awer rat ni Pétrus, idi nacing atun inan tanem ineh. 5 Ieh netekunal, idi ieh nenier amung-amung kibung ineh ketecan, iamo' na ieh nesemuet bang tanem ineh. 6 Simun Pétrus pana' nacing rat pa puet, idi nesemuet bang tanem ineh, idi ieh nenier kibung ineh teh, 7 idi aduk luk luun uluhNeh atun na rireng dengan kibung luk baken, iamo' linulun setau'. 8 Idi anak sekola' luk baken luk nacing atun déi' bang tanem ineh pana' nesemuet, idi nenier idi manu. ( 9 Nateh ideh nekali' ilung bala bang Surat Allah ratnan Ieh na miak na tumui rat arang lun naté.) 10 Idi dueh anak sekola' ineh nuli'. 11 Iamo' Mariam nangi' pa atun tanem ineh. Kareb ieh nangi' ieh netekunal idi nenier bang tanem; 12 idi ieh nenier dueh burur melaikat luk ayung mebuda' luk tudo, ieh ineh seburur pa uluh idi seburur pa kukud su luk inan nengerareng butung Yésus atun. 13 Idi kebala didueh ni Mariam, "O decur, anunké punneh iko nangi'?" Idi keburi' Mariam nedidueh, "Ngaceku lemulun pangeh nengalap Tuhanku, idi ui na kali' iapeh inandeh nengerareng Neneh." 14 Pangeh Mariam nepebala kudeng ineh, idi ieh nelumi, idi nenier Yésus tuped su ineh, iamo' na ieh miti Neneh Yésus. 15 Idi Yésus nengitun neneh, kebalaNeh, "O decur, anunké punneh iko nangi'? Idéké luk tekapenmu?" Mariam ngerawé Ieh ineh lun matar kabun, idi kebalaneh Neneh, "Tuan, kudeng iko nengalap Neneh rat ieni, mada' negku, iapehké inanmu nengerareng Neneh, pad ui miak amé' ngalap Neneh." 16 Kebala Yésus neneh, "Mariam!" Idi Mariam nelumi idi nepebala bang buri' lun Iberani, "Rabbuni!" (Ilungneh "Guru.") 17 Idi kebala Yésus neneh, "Aleg iko ngakem Negku, ngaceku nateh Ui numak iné' inan TamanKu, iamo' amé' iko inan amung-amung kinanakKu, idi mala kuandeh, 'Ui umak amé' inan TamanKu idi Taman muyuh, idi inan TuhanKu idi Tuhan muyuh.' " 18 Idi Mariam Magdalina iné' mada' anak-anak sekola' ineh ratnan ieh pangeh nenier Tuhan, idi nemada' nedeh ratnan amung ini. 19 Idi kareb malem Aco Minggu, idi kareb amung-amung tanga' initek su luk inan anak-anak sekola' tudo ngaceku matot nelun Yahudi, idi Yésus nacing netuped arangdeh idi nemala kuandeh, "Awang kuan muyuh!" 20 Kareb Ieh pangeh nemala kudeng ini, Ieh nemada' ticu'Neh idi sigarangNeh sirendeh. Idi anak-anak sekola' ineh mawang niat kareb ideh nenier Tuhan ineh. 21 Idi Yésus nemala kuandeh sekua' teh, "Awang kuan muyuh! Mepad kudeng Taman pangeh nengecuk nemuyuh." 22 Idi kareb Ieh pangeh nemala kudeng ini, idi Ieh nenginiat kuandeh idi nepebala nedeh, "Lapen muyuh Roh Meligan. 23 Kudeng idé-idé luk inan muyuh maré do' ratnan sala'deh, idi ideh miak ngalap do' ratnan sala', idi idé-idé luk inan muyuh na maré do', idi ideh mabeh sala'deh." 24 Idi Tomas, seburur rat arang pulu' dueh anak sekola' ineh, (luk titen Anak Rapid), na idi dengandeh kareb Yésus nacing. 25 Idi anak-anak sekola' luk baken ineh nepebala neneh, "Amung-amung kai pangeh nepapu' dengan Tuhan ineh." Iamo' Tomas nepebala nedeh, "Kudeng ui na nier lubang paku' bang paladNeh, idi na ngerareng bua' ticu'ku bang lubang paku' di, idi na ngerareng ticu'ku bang sigarangneh, na ui miak manu." 26 Pangeh seminggu, idi anak-anak sekola' Yésus nepamung bang ruma' teh, idi Tomas pana' idi dengandeh. Kareb tanga' ruma' ineh initek, idi Yésus nacing netuped arangdeh idi nepebala, "Awang kuan muyuh!" 27 Idi Ieh nepebala ni Tomas, "Ngerareng bua' ticu'mu su ini idi nier paladKu, idi natang ticu'mu idi ngerareng neneh bang sigarangKu, idi aleg iko merapang, iamo' manu." 28 Idi kebala Tomas Neneh, "O Allah, O Tuhanku!" 29 Kebala Yésus neneh, "Manuké iko ngaceku iko nenier Negku? Samal kuan lemulun luk manu, sagan pana' na nenier Negku!" 30 Idi inan mula' tanu' luk baken teh luk inau' Yésus pa kiung anak-anak sekola'Neh luk na inayud bang surat ini. 31 Amung-amung ini pangeh inayud, pad muyuh miak manu, idi Yésus ineh Keristus, Anak Allah, pad muyuh luk manu ineh miak ngalap ulun bang ngadanNeh.
1 Pangeh ineh Yésus nengegala' bururNeh sekua' teh kuan anak-anak sekola'Neh déi' Takung Tibirias. Kudeng ini lawéneh. 2 Simun Pétrus, Tomas (luk titen Anak Rapid). Nataniel (rat bawang Kana déi' tana' Galilia), anak-anak Sabdi, idi dueh burur anak-anak sekola'Neh luk baken nepamung. 3 Idi keburi' Simun Pétrus nedeh, "Ui amé' ngerabat." Idi keburi'deh neneh, "Kai pana' sikal maya' namu." Idi ideh nesemuet bang alud idi nenalan; idi kareb malem ineh sebuleng pana' nateh luk ilapdeh. 4 Kareb aco masat Yésus netuped tangeb abpa'; iamo' anak-anak sekola' ineh na kali' Neneh Yésus. 5 Kebala Yésus nedeh, "O lun rurumKu, inanké lawid muyuh?" Idi kebaladeh, "Na luk idi." 6 Kebala Yésus nedeh, "Mepet rabat muyuh pa tinueh alud ineh, kali' rungen muyuh ngalap." Idi ideh nemepet rabatdeh, idi ideh na miak ngeruid neneh ngaceku pelaba ula' lawid. 7 Idi anak sekola' luk inan Yésus mawa nepebala ni Pétrus, "Ieh ineh Tuhan!" Kareb Simun Pétrus neninger idi Ieh ineh Tuhan, idi ieh nengabet kuyu'neh i awa'neh, ngaceku ieh lungu, idi ieh nubpa bang abpa'. 8 Iamo' anak-anak sekola' luk baken nacing dengan alud ineh, ngaceku ideh na mado tu rat tangeb, iamo' limeh ngepulu' depeh mo'. Idi ideh nengeruid rabat luk mepanu' ku lawid ineh. 9 Kareb ideh numak luun tangeb, idi ideh nenier bareh apui, idi lawid rireng pa luunneh dengan ruti. 10 Idi kebala Yésus nedeh, "Do' muyuh nguit sesuut lawid luk ilap muyuh ina." 11 Idi Simun Pétrus numak bang alud idi nengeruid rabat ineh luk mepanu' ku lawid luk mekara macing nan tangeb, idi inan meratu limeh ngepulu' teluh kinula'deh, iamo' na rabat ineh nedarak. 12 Kebala Yésus nedeh, "Amé' tungé idi kuman." Iamo' seburur anak sekola' pana' nateh luk mekuu' ngitun Neneh, "Idéké Iko?" ngaceku ideh kali' Ieh ineh Tuhan. 13 Idi Yésus nacing idi nengalap ruti idi nemaré kuandeh, idi kudeng ineh teh lawid ineh pana'. 14 Idi ineh luk keteluh kua'neh Yésus nengegala' bururNeh kuan anak-anak sekola'Neh muci ratnan Ieh netumui rat arang lun naté. 15 Pangeh ideh nekuman, idi Yésus nengitun Simun Pétrus, "O Simun, anak Yahya, mawaké iko Negku meluun ratnan lemulun ini?" Idi keburi' Pétrus Neneh, "O Tuhan, Iko kali' idi ui mawa Namu." Idi kebala Yésus neneh, "Do iko maman anak-anak dumbaKu." 16 Idi Ieh nengitun neneh luk kedueh kua', "O Simun, anak Yahya, mawaké iko Negku?" Idi keburi' Pétrus Neneh, "O Tuhan, Iko kali' idi ui mawa Namu." Idi kebala Yésus neneh, "Do' iko maman dumba-dumbaKu." 17 Idi Ieh nengitun neneh luk keteluh kua', "O Simun, anak Yahya, mawaké iko Negku?" Idi Pétrus pana' mesusa', ngaceku pangeh teluh kua' Ieh nengitun neneh, "Mawaké iko Negku?" Idi keburi' Pétrus Neneh, "O Tuhan, Iko kali' amung-amung, idi Iko kali' idi ui mawa Namu." Idi kebala Yésus neneh, "Do' iko maman dumba-dumbaKu. 18 Matu, Ui pebala namu, kareb iko isuut, iko sebuleng nengabet awa'mu, idi iné' iapeh-iapeh pian niatmu; iamo' kareb iko pangeh rayeh, iko miak natang ticu'mu, idi seburur lun baken miak ngabet awa'mu, idi nguit namu amé' su luk inanmu na sikal amé'." 19 Dengan bala ini Yésus nengegala' ayu até Pétrus luk miak ngerayeh Allah. Kareb Ieh pangeh nepebala kudeng ini, idi kebalaNeh ni Pétrus, "Do' iko maya' Negku." 20 Pétrus nelumi, idi nenier anak sekola' luk ina Yésus mawa maya' pa puetdeh, idi ieh ineh luk iné' muneng nan Yésus kareb irau malem idi nengitun, "Idéké luk miak masui Tuhan?" 21 Idi kareb Pétrus nenier anak sekola' ineh, idi ieh nepebala nan Yésus, "O Tuhan, kudeng apehké lemulun ini?" 22 Idi kebala Yésus neneh, "Kudeng pianKu lemulun ini ketecan pad Ui macing baruh, bala ini baken kuanmu. Do' iko maya' Negku." 23 Idi bala ini nepiar arang uned amung-amung kinanak, idi anak sekola' ineh na miak maté. Iamo' baken kudeng ineh bala Yésus, idi anak sekola' ineh na miak maté, iamo', "Kudeng pianKu idi lemulun ini ketecan pad Ui macing baruh, bala ini baken kuanmu." 24 Idi ieh ineh anak sekola' luk maré kali' ratnan amung-amung ini, idi luk pangeh negayud amung-amung ini; idi tau kali' idi luk nekali'neh ineh matu peh. 25 Idi inan teh mula' kekamen baken luk inau' Yésus, idi kudeng anid-anid kekamen ineh uen ngayud, ui ngerawé tana' ini pana' na miak ngimet surat-surat luk uen ngayud ineh.