إنجيل يسوع المسيح للقدّيس يوحنّا
1 ف البدايِة كانْ الكلْمِة، والكلْمِة كانْ عنْد اَلله، والله كان الكلْمِة. 2 هذا كانْ ف البدايِة عنْد اَلله. 3 كلْ شي بيدو تْكَوَّن، وْبَلاهُ وْلا شي واِحد تْكَوَّنْ منْ شي منْ لَ تْكَوَّنْ. 4 فِيو كانت الحَياة، والحَياةْ نور البَشَرْ. 5 والنّورْ ف العتْمِة ينَوّرْ، والعتْمِة ما وصْلتْلو. 6 كانْ في انْسان انْبَعَثْ من اَلله اسْمو يوحَنّا. 7 هذا جا للشَّهادِة، تَ يشْهَدْ للنّور بْشانْ كلّ انْسان يآمنْ عَلى ايدو. 8 موُ هوّاِ كان النّورْ، بَلىِ جا تَ يشْهَدْ للنّورْ. 9 هاذْ كانْ نور الحَقْ لَ ينَوّرْ كلّ انْسانْ يجي للدّنْياِ، 10 ف الدّنْياِ كانْ، والدّنْياِ بيدو تْكَوَّنتْ، والدّنْياِ ما عَرَفتو. 11 لَوذْ لَنّاِ لهُ جا، وْهَوذْ لَنّاِ لهُ ما قبْلوهُ. 12 وْهَوذْ لَ قبْلوهُ عَطاهنْ سلْطَة تَ يسيِرون اولاد اَلله، هَوذْ لَ آمَنوا باسْمو، 13 هَوذْ لَ موُ منْ دَم، وْلا منْ إرادة لَحم، وْلا منْ إرادةْ رجّالْ، بَلىِ من اَلله ولْدوا.
يوحَنّا يشْهَدْ لَ يَسوُعْ
14 والكلْمِة صارْ بَشَر، وْنَزَّلْ عنّا، وَارَينا مَجْدو، مَجْدْ وَحيدْ م الآبْ، كلّو نعْمِة وْحَقْ. 15 يوحَنّا شهدْلو وْساح وْقالْ: ”هذا واِ هاكْ لَ قلْتُ: ’تَ يّجي بَعْدي، وْصارْ قدّامي، منْ لَ أَقْدَمْ منّي واِ.‘“ 16 وْمنْ كَمالو، نحْناِ كلّتْنا أَخَذْنا وْنعْمِة مْبَدالْ نعْمِة، 17 منْ لَ النّاموسْ بيدْ موسى انْعَطى بَسّ الحَقْ والنَّعْمِة بيدْ يَسوُع المَسيحْ صاروا. 18 اَلله ما اراهُ اَحَّدْ أَبَدْ. وَحيد اَلله هاكْ لَوّاِ ف حضْن اَبوهُ، هوّاِ خَبَّرْ.
شَهادِة يوحَنّا عَلى نَفْسو
19 وْهاي ياِ شَهادِةْ يوحَنّا وَقْتْ لَ بَعَثولو الياهودْ م القدْسْ كَهَنَة وْلاويينْ تَ يسْأَلوهُ: ”منْ أنْتَ؟“ 20 وْقَر وْما نَكَرْ، قالْ: ”موُ أَنا واِ المَسيحْ.“ 21 وْرَدّوا سَأَلوهُ: ”أَيشْ بَقى؟ إيِليّا أنْتَ؟“ قالْ: ”موُ اَنا.“ قالولو النَّبي أنْتَ؟ قالْ: ”لا.“ 22 قالولو: ”بَقى من انْتَ؟ تَ نعْطي جَوابْ لَوذْ لَ بَعَثونا. أَيش تْقولْ عَلى نَفْسكْ؟“ 23 قالْ: ”أَنا صَوتْ لَ يسيِحْ ف البَرّيِّة: ’ساِوَوا طَريِق الرَّبْ،‘ كَما لَ قال اِشعْيا النَّبي.“ 24 وْهَوك المَبْعوثينْ، فَرِّيسيِّة كانوا. 25 وْسَأَلوهُ وْقالولو: ”لَيشْ بَقى تْعَمّذْ لَ موُ المَسيحْ أنْتَ وْلا إيِليّا وْلا النَّبي؟“ 26 رَدْ يوحَنّا قالْلن: ”اَنا ف المَي أَعَمّذْ، بَسْ بَيناتْكنْ قايمْ هاكْ لَ انْتنْ موُ تعْرفوهُ. 27 هاذْ واِ هاكْ لَ بَعْدي جاِييِ وْلَ صارْ قدّامي، هاكْ لَ انا موُ مسْتَحقّ اَنا أَحلْ شادوداتْ صَولو.“ 28 هاذْ صارْ ف بَيتْ عَنْيا خَلْفْ نَهْر الارْدنْ موُضَعْ لَ كان يعَمّذْ يوحَنّا.
يَسوُعْ خاروف زغَيّر بَعَثو اَلله تَ يحْمل خَطيّة الدّنْياِ
29 ثاِني نْهار، يوحَنّا أَرى يَسوُعْ جاِييِ لَعنْدو، وْقال: ”كْوا خاروفْ لَ بَعَثو اَلله تَ يحْملْ خَطيّة الدّنْياِ. 30 هاذْ واِ هاكْ لَ انا قلْتُ عَلَيو: ’بَعْدي جاِييِ رجّالْ صارْ قدّامي، منْ لَ أَقدَمْ منّي واِ.‘ 31 وَانا ما كانْ أَعْرفو، بَلىِ بْشانْ ينْعرفْ منْ بَني اسْرائيل، بْشانْ هاي جيتُ أَعَمّذْ ف المَي.“ 32 وْشَهَدْ يوحَنّا وْقالْ: ”أَرَيتُ الرّوُحْ ينْزَلْ م السَّما كَما الحَمامِة ويوَقّفْ عَلَيو. 33 واَنا ما كانْ أَعْرفو، بَلىِ لَ بَعَثْني تَ اعَمّذْ ف المَي، هوّاِ قالْ لي: ’أَينا لَ ترى الرّوُحْ ينْزَلْ ويوَقّفْ عَلَيو، هوّاِ واِ لَ يعَمّذْ ف روُح القدسْ.‘ 34 وَانا أَرَيتُ وْشهدْتُ: هذا واِ ابن اَلله.“
يَسوُعْ يلتقي فَ اوَّل تَلاميذو
35 ثاِني نْهار، يوحَنّا كانْ قايم هَونَكْ هوّاِ واثْنَينْ منْ تَلاميذو، 36 وْطَلَّعْ فَ يَسوُعْ، وْهوّاِ ماِشي، وْقال: ”كْوا خاروف اَلله.“ 37 وْسمْعوا تَلْميذَينو شي لَ قال، وْراحوا خَلْفْ يَسوُعْ. 38 وانْدارْ يَسوُعْ وَاراهنْ جاِيينْ خَلْفو، وْقالْلنْ: ”أَيش تْريدونْ؟“ قالولو: ”رابي، (يعْنيِ مْعَلّمْ) أَين تْكونْ؟“ 39 قالْلنْ: ”تَعوا وْتَ تّرَونْ.“ قاموا جَوا وَارَوا اَينْ واِ، وْعنْدو بَقَوا هاك اليَومْ، وْكانتْ حَوالي ساعَة عَشْرَة. 40 واِحدْ منْ هَوكْ لَ سمْعوا منْ يوحَنّا وْراحوا خَلْفْ يَسوُعْ، كانْ اَنْدَراوُسْ أَخو شَمْعونْ. 41 هاذْ أَرى ف الاَوَّلْ شَمْعونْ أَخوهُ وْقالْلو: ”أَرَينا المَسيحْ.“ 42 وْجابو لَعنْدْ يَسوُعْ. يَسوُعْ طَلَّعْ فِيو وْقالْ: ”أنْتَ واِ شَمْعون ابنْ يَونا، أنْتَ تَ تْسَمّى كيفا.“ 43 ثاِني نْهار، يَسوُعْ راد يروُحْ للجَّليلْ، وَارى فيلبُّس وْقالْلو: ”تَعانْ خَلْفي.“ 44 فيلبُّسْ كانْ منْ بَيتْ صَيدا بَلَد اَنْدَراوُس وْشَمْعونْ. 45 وْفيلبُّسْ أَرى نَثَناييِل، وْقالْلو: ”هاكْ لَ كَتَبْ عَلَيو موسى ف النّاموسْ والاَنْبِيا، أَرَيناهُ. يَسوُع ابنْ يوسفْ واِ م النّاصْرَة.“ 46 نَثَناييِلْ قالْ: ”م النّاصْرَة يطْلَعْ شي مَليِحْ؟“ فيلبُّسْ قالْلو: ”تَعا وْتَ تّرى.“ 47 وْيَسوُعْ أَرى نَثَناييِل جاِييِ لَعنْدو وْقال: ”كْوا اسْرائيلي ما فِيو غشْ.“ 48 نَثَناييِل قالْلو: ”من اَين تعْرفْني؟“ يَسوُعْ قالْلو: ”بَعدْ قَبلْ لَ يسيِحكْ فيلبُّسْ، وانْتَ تَحْت التّينايِة أَرَيتوكْ.“ 49 رَدْ نَثَناييِل وْقالْلو: ”مْعَلّمْ، أنْتَ واِ ابْن اَلله، أنْتَ واِ مَلك اسْرائيلْ.“ 50 يَسوُعْ قالْلو: ”عَلى لَ قلْتُ لكْ: ’أَرَيتوك تَحْت التّينايِة،‘ أنتَ تْآمنْ أَگْبَرْ منْ هَوذْ تَ تّرى.“ 51 قالْلو: ”الحَقّ الحَقّ اَقولْكنْ م السَّعْ تَ تّرَون السَّماواتْ مَفْتوُحَة وْمَلايكة اَلله يطْلَعون وْينْزَلونْ عَلى ابْن الانْسانْ.“
أَوَّل عَجايبْ يَسوُعْ
1 وْثالث نْهارْ، صارْ عرْسْ فَ قانا الجَّليلْ، وامْ يَسوُعْ هَونَكْ كانتْ. 2 وْيَسوُع وْتَلاميذو زاِ انْدَعوا للعرْسْ. 3 وْخلص الخَمرْ، وامْ يَسوُعْ قالتْلو: ”خَمرْ ما عنْدنْ.“ 4 يَسوُعْ قالْلا: ”أيشْ لي ولكِ يا مَرَة. ساعتي ما كجَّتْ بَعدْ.“ 5 أمّو قالتْ للخدّاِمينْ: ”أَيشْ لَ يقولْكنْ سَوَوا.“ 6 وْكانْ في هَونَكْ ستّ اجْرانْ حَجَر، الياهودْ يسْتَعْملونْ مَيّاِتا لَطقوس التَّطهيرْ، منّا يسَعْلو ثْماِنينْ لتر، وْمنّا ميِّة وْعشْرينْ. 7 يَسوُعْ قالْلنْ: ”عَبَّوا الاجْرانْ مَي دي للثّمْ.“ 8 وْقالْلنْ: ”السَّعْ بَقى اغْرفوا وقَدْموا للعَزَمْ باشي.“ وْغَرَفوا وْقَدَّموا. 9 وَقْتْ لَ ذاق العَزَمْ باشي هَوك المَيّاِتْ لَ صاروا خَمر، وْما كانْ يعْرفْ من اَينْ كانْ، بَسّ الخدّاِمين كانْ يعْرفونْ، منْ لَ هنّاِ عَبَّوا المَي، بَقى وَقْتْ لَ ذاق العَزَم باشي، ساح الخَتَنْ، 10 وْقالْلو: ”كلّ انْسانْ أَوَّلْ شي خَمر الّكْوَيّس يجيب، وْبَعدْ لَ يسكَرونْ، هاك الوَقْتْ الاَقْلَلْ منّو، بَسّ انْتَ خَلَّيتْ خَمر الّكْوَيّسْ دي للسَّعْ.“ 11 هاي أَوَّلْ عَلامِة لَيَسوُع، وْسَواها فَ قانا الجَّليل، وْوَرّى مَجْدو، وْآمْنوا فِيو تَلاميذو. 12 وْبَعدْ هاي، نزلْ لَكَفَرْناحومْ هوّاِ وامّو واخوتو وْتَلاميذو، وْهَونَكْ بَقَولنْ كَمّ نْهارْ.
يَسوُعْ يسَحّت البيّاِعين م الهَيكَلْ
13 وْكانْ كلقَرَّب فَصح الياهودْ، قامْ طَلَعْ يَسوُعْ للقدْسْ، 14 وَارى ف الهَيكَلْ هَوكْ لَ يبيِعونْ ثوراِن وْغَنَم وْحَمامْ، والصّرّاِفينْ قاِعْدينْ. 15 قامْ سَوالو قرْپاچْ من حْباِل، وْسَحَّتنْ كلّنْ م الهَيكَلْ، والغَنَمْ والثّوراِنْ والصّرّاِفين وْبَزْبَز ثْمانن وْقَلَّبْ طاولاتنْ. 16 ولَوكْ لَ يبيِعونْ حَمامْ قالْ: ”شيلوا هَوذْ منَونْ. لا تْسَونْ بَيتْ أَبوي سوُقْ للبيِعْ والشّراِ.“ 17 وْجا لَبال تَلاميذو مَكْتوبْ واِ: ”الغيرِة عَلى بَيتكْ أَكَلتْني.“ 18 قاموا الياهودْ قالولو: ”أَيشْ عَلامِة تْوَرّينا، تَ نعْرف يحقْ لك تْسَي هاذْ لَ تْسَي؟“ 19 رَدْ يَسوُعْ قالْلنْ: ”خَرْبوا هَالهَيكَلْ هاذْ وَانا تَ اعَمّرو فَ ثَةّ اِيمْ.“ 20 الياهودْ قالولو: ”ف ستِّة وَارْبْعينْ سَنِة تْعَمَّرْ هَالهَيكَلْ هاذْ، وانْتَ فَ ثَةّ اِيم تَ تْعَمّرو؟“ 21 بَسْ هوّاِ كانْ يقول عَلى هَيكَلْ جَسَدو. 22 وْوَقْتْ لَ قامْ منْ بَين المَيتينْ، جا لَبالْ تَلاميذو كانْ كلْقالْ هاي، وْآمْنوا بالاسْفارْ وبالكلْمِة لَ قالْ يَسوُعْ. 23 وْوَقْتْ لَ كانْ ف القدْسْ ف عيد الفصْحْ، كْثيرْ آمَنوا فِيو منْ لَ ارَوا عَلاماتْ لَ سَوى. 24 بَسْ يَسوُعْ ما كانْ أَمينْ منّنْ، منْ لَ كانْ يعْرف الكلْ. 25 وْما كانْ يحْتازْ لَاحَّدْ يشْهَدْلو عَلى كلّ انْسانْ، منْ لَ كانْ يعْرفْ أَيشْ في ف الانْسانْ.
الولادِة من جْديدْ م الرّوُحْ
1 كانْ في هَونَكْ زَلَمِة م الفَرّيسيِّة اسْمو نيقوديموُس، كانْ عضو فَ مَجلس الياهودْ. 2 هذا جا لَعنْدْ يَسوُعْ باللَيلْ وْقالْلو: ”مْعَلّمْ، نعْرف من اَلله ك انْبَعَثت مْعَلّمْ، منْ لَ ما فِي انْسانْ يتيِقْ يسَي هَوذْ عَجايبْ لَ تْسَي لَ ما كانْ اَلله مَعو.“ 3 رَدْ يَسوُعْ قالْلو: ”الحَقّ الحَقّ اَقولْ لك: انْسانْ لَ موُ يولَدْ من جْديدْ موُ يتيِقْ يرى مَلَكوت اَلله.“ 4 نيقوديموُسْ قالْلو: ”أشْوَن انْسان يتيِقْ يولَد وْهوّاِ گْبيرْ ف العمرْ؟ يعْنيِ يتيِقْ يدْخلْ فَ بَطنْ أمّو كَرْةْ لخ وْيولَدْ؟“ 5 رَدْ يَسوُع وْقالْلو: ”الحَقّ الحَقّ اَقولْ لك: انْسانْ لَ موُ يولَدْ م المَي والرّوُحْ موُ يتيِقْ يدْخلْ مَلَكوت اَلله. 6 شي لَ يولَدْ م الجَّسَدْ جَسَدْ واِ، وْشي لَ يولَدْ م الرّوُحْ روُحْ واِ. 7 لا تتْعَجَّب لَ قلْتُ لْكنْ: لازمْ تولَدون من جْديدْ. 8 الهَوا موُضَعْ لَ يريد يهب، وْصَوتو تسْمَعو، بَلىِ موُ تعْرفْ من اَين يجي وْلَ اين يروُحْ. كذاِ واِ كلّ انْسانْ يولَدْ م الرّوُحْ.“ 9 نيقوديموُسْ رَدْ سَأَلْ قالْ: ”أشْوَن يسيِرونْ هَوذْ؟“ 10 رَدْ يَسوُعْ قالْلو: ”أنْتَ مْعَلّم اسْرائيل، وْهَوذْ موُ تعْرفْ؟ 11 الحَقّ الحَقّ اَقولْ لكْ: شي لَ نعْرفْ نحْكي، وْشي لَ ارَينا نشْهَدْلو، وانْتنْ موُ تقْبَلونْ شَهادتْنا. 12 لَ عَ الاَرْضيّاتْ أَقولْكن وْموُ تْآمْنونْ، أشْوَنْ لَ قلْتُ لْكنْ عَ السَّماويّاتْ تَ تْآمْنونْ؟ 13 وَاحَّدْ ما طَلَعْ للسَّما غَيرْ هاكْ لَ نزلْ م السَّما، ابْن الانْسانْ هاكْ لَوّاِ ف السَّما.
مْحَبّة اَلله
14 ”وْكَما لَ رَفَعْ موسى الحَيِّة ف البَرّيِّة، كذاِ مْحَضَّرْ تَ ينْرفع ابْن الانْسانْ. 15 بْشانْ أَينا لَ يآمنْ فِيو لا يهْلَكْ يتْتَوبَلْ، بَلىِ ينالْ حَياة الاَبَديِّة. 16 منْ لَ كذاِ حَبّ اَلله العالَمْ حتّى ابْنو الوَحيدْ عَطى بْشانْ كلْ من يآمنْ فِيو لا يهْلَك يتْتَوبَلْ ف الخَطيِّة، بَلىِ ينالْ حَياة الاَبَديِّة. 17 منْ لَ الله ما بَعَث ابْنو للعالَم بْشان يحاكم العالَمْ، بَلىِ بْشانْ يخَلّص العالَم بيدو. 18 لَ يآمنْ فِيو، موُ ينْحكمْ عَلَيو. وْلَ موُ يآمنْ، سَلَفاً مَحْكومْ واِ، منْ لَ ما آمنْ باسْم ابْن اَلله الوَحيدْ. 19 وْهذا واِ الحكم: النّورْ جا للدّنْياِ بَسّ النّاِسْ حَبّوا العتْمِة أكْثَرْ م النّورْ، منْ لَ شَرّيرَة كانتْ افْعالنْ. 20 منْ لَ كلْ منْ يفْعَل فْعالاتْ مَكروُهَة، يكْرَه النّور، وْموُ يجي للنّور بْشانْ لا تنْفضح فْعالاتو. 21 بَسْ ل يسَي حَقْ، يجي للنّور بْشانْ تنْعرف اعْمالو بْإرادة اَلله ياِ مَعْمولِة.“
شَهادِة يوحَنّا ثاِني كَرَّة لَ يَسوُعْ
22 وْبَعْدا، جا يَسوُع وْتَلاميذو لاَرْض الياهوديِّة، وْهَونَكْ كان يدوُرْ مَعنْ، ويعَمّذْ. 23 وْيوحَنّا زاِ كان يعَمّذْ فَ عَينْ نونْ لَ جَنْبْ شاليمْ، منْ لَ كانْ في مَيّاِت كْثيرْ هَونَك، وْكانْ يجَون وْيتْعَمَّذونْ. 24 منْ لَ ما كانْ ك انْحَبَسْ يوحَنّا بَعدْ. 25 وْكانْ كصّارْ جدالْ بَينْ واِحدْ منْ تَلاميذْ يوحَنّا وْواِحدْ ياهودي عَلى مَسَلة التَّطهيرْ. 26 وْجَوا لَعنْدْ يوحَنّا وْقالولو: ”مْعَلّمْ، هاكْ لَ كانْ مَعكْ فَ خاصْرة اللخْ م الارْدنْ، لَ انْتَ شهدْتْلو، كْوا هوّاِ زاِ يعَمّذْ، وكْثير يجَونْ لَعنْدو.“ 27 رَدْ يوحَنّا وْقالْلنْ: ”موُ يتيِق انْسانْ ياخذْ شي، إلا لَ انْعَطى م السَّما. 28 أنْتنْ تشْهَدولي قلْتُ: ’أَنا موُ المَسيح اَنا، بَلىِ رَسولْ لَوّاِ قَبْلو.‘ 29 لَ لهُ ياِ العَروسْ، هوّاِ واِ الخَتَنْ. بَسْ سَديق الخَتَنْ، هاكْ لَ يقوم وْيسْمَعْو، فَرْحَة گْبيرِة يفْرَحْ عَلى صَوت الخَتَنْ. بَقى فَرْحتي اَنا كْوا كمْلتْ. 30 هاكْ بَقى لازم يزيدْ، وَانا أَنْقَصْ. 31 منْ لَ هاكْ لَ م العلو جا، أَعْلى م الكلْ واِ. بَسْ هاكْ لَ م الاَرْضْ، م الاَرْضْ واِ وْعَلى مَسايل الاَرْضْ يحْكي. هاكْ لَ م السَّما جا أَعْلى م الكلْ واِ. 32 وْف شي لَ ارى وْسمعْ يشْهَد. وْشَهادتو اَحَّدْ موُ يقْبَلا. 33 بَسْ هاكْ لَ قبلْ شَهادتو، خَتَم: ’اَلله سادقْ واِ.‘ 34 منْ لَ أَينا لَ الله بَعَثو، كَلام اَلله يحْكي، منْ لَ الله موُ بالكَيلْ عَطا الرّوُحْ. 35 الآبْ يحبّ الابن، وْكلْ شي عَطاهُ وْحَطْ ف ايدو. 36 لَ يآمنْ بالابنْ، لهُ حَياة الاَبَديِّة. وْلَ موُ يطيع الابنْ موُ يرى حَياةْ، بَلىِ غَضَب اَلله تَ يبْقى عَلَيو.“
1 وْيَسوُعْ عَرَفْ سمْعوا الفَرّيسيِّة تَلاميذ كْثيرْ سَوى، ويعَمّذْ أكْثَرْ منْ يوحَنّا، 2 وموُ يَسوُعْ واِ لَ كان يعَمّذْ، بَلىِ تَلاميذو، 3 قامْ عاف الياهوديِّة وْرجعْ راحْ للجَّليلْ. 4 وْكانْ لازمْ فَ طَريِقو يفوتْ ف السّامْرَة. 5 وْجا لَبَلَدْ للسّامريِّة اسْمو شوُخارْ، مَعْ جَنْب مَزْرَعَةْ لَ كانْ كلْعَطى يَعْقوبْ لَيوسف ابْنو، 6 وْكانْ في هَونَكْ بيرْ مَي يَعْقوب. وْيَسوُعْ كانْ كتّعبْ منْ سَفَر الطَّريِق، وْقعدْ عَجَنْب البير وْكانتْ حَوالي ساعَة ستِّة. 7 وْجَتْ مَرَة منْ نسْوان السَّامرَة للبيرْ تَ تتْلي مَي. يَسوُعْ قالْلا: ”اعْطيني مَي تَ اشْرَبْ.“ 8 تَلاميذو كانْ كرّاحوا للبَلَدْ تَ يشْتَرَولنْ أَكَلْ. 9 المَرَة السّامريِّة قالتْلو: ”أشْوَنْ أنْتَ ياهودي، وْمنّي اَنا لَ انا مَرَة سامريِّة تطْلبْ تَ تشْرَبْ؟“ منْ لَ موُ يتْعامَلون الياهودْ مَع السَّامريِّة. 10 رَدْ يَسوُعْ قالْلا: ”يكونْ كانْ تعْرفينْ عَطيّة اَلله، وْمنْ واِ هاذْ لَ قالْكِ: ’اعْطيني تَ اشْرَبْ،‘ أنْتِ كانْ تَ تطْلبينْ منّو وْكانْ تَ يعْطيكِ مَي حَي.“ 11 قالتْلو هاك المَرَة: ”سَيّدي، دَلو ما لكْ والبيرْ عَميِقْ، بَقى من اَين لكْ مَي حي؟ 12 يعْنيِ أنْتَ أَگْبَرْ أنْتَ منْ أَبونا يَعْقوب انْتَ، هاكْ لَ هوّاِ عَطانا هَالبيرْ هاذ، وْهوّاِ منّو شربْ واولادو وْحواِوينو؟“ 13 رَدْ يَسوُع وْقالْلا: ”أَينا لَ يشْرَبْ منْ هَالمَي، يردْ يعْطَشْ. 14 بَسّ اَينا لَ يشْرَبْ منْ مَي لَ انا أَعْطِيو، موُ يعْطشْ للاَبَدْ، بَلىِ هاك مَي لَ اعْطِيو اَنا، يسيِرْ فِيو عَينْ مَي تنْبَعْ لَحَياةْ أَبَدِيِّة.“ 15 هاك المَرَة قالتْلو: ”سَيّدي، اعْطيني منْ هَالمَي بْشانْ لا أَردّ اَعْطَش، وْلا بَقى آجي أَدَلّي وَاجرْ مَي منْ هَونْ.“ 16 يَسوُعْ قالْلا: ”روُحي سيِحي زَوجْكِ وْتَعَي لَونْ.“ 17 قالتْلو: ”ما لي زَوجْ.“ يَسوُعْ قالْلا: ”كْوَيّسْ قلْتِ: ما لي زَوجْ. 18 منْ لَ خَمْس ازْواج كانْ لكِ، وْهاذْ لَ لكِ السَّعْ، موُ زَوجْكِ واِ. هاي كلْمِة صَحْ قلْتِ.“ 19 قالتْلو هاك المَرَة: ”سَيّدي، يبَيّنْ لي نَبي أنْتَ. 20 أَبَّهاتْنا فَ هَالجَّبَلْ سَجَدوا، وانْتن تْقولونْ: ’ف القدْسْ واِ موُضَعْ لَ لازمْ ينْسجدْ.‘“ 21 يَسوُعْ قالْلا: ”يا مَرَة، سَدْقيني جاِيِة ساعَة، موُ فَ هَالجَّبَل وْلا ف القدْسْ تسْجدونْ فِيا للآبْ. 22 أنْتنْ تسْجدونْ لَ شي لَ موُ تعْرفونْ، بَسْ نحْناِ نسْجدْ لَشي لَ نعْرف، منْ لَ م الياهودْ واِ الخَلاصْ. 23 بَلىِ جاِيِة ساعَة، والسَّعْ ياِ، وَقْتْ السّاجدين السّادْقينْ يسْجدونْ للآبْ بالرّوُحْ والحَقْ، منْ لَ الآبْ زاِ كَما هَوك السّاجْدين يريدْ. 24 منْ لَ روُحْ واِ اَلله، وْلَ يسْجدولو، بالرّوُحْ والحَقْ لازمْ يسْجدونْ.“ 25 قالتْلو هاك المَرَة: ”أَنا أَعْرف المَسيحْ جاِييِ واِ، وْمنْ جا، هوّاِ تَ يعَلّمْنا كلْ شي.“ 26 يَسوُعْ قالْلا: ”أَنا واِ. أَنا لَ قايم اَحْكي مَعْكِ.“ 27 وْهوّاِ يحْكي، جَوا تَلاميذو، وْكانْ يتْعَجَّبونْ منْ لَ مَعْ مَرَة يحْكي، بَسّ اَحَّدْ ما قالْ: ”أَيش تْريدْ؟“ يا ”لَيشْ تحْكي مَعا.“ 28 والمَرَة عافتْ جَرّتا وْراحتْ لَلبَلَد، وْقالتْ للنّاِسْ: 29 ”تَعوا رَوا زَلَمِة قالْ لي كلْ شي لَ كسَّيتُ. عَجَبْ هوّاِ واِ المَسيحْ؟“ 30 وْطَلَعوا النّاِسْ م البَلَد وْجَوا لَعنْدو. 31 وْهاك الوَقْتْ، تَلاميذو كانْ يطْلبونْ منّو يقولولو: ”مْعَلّمْ، كلْ.“ 32 بَسْ هوّاِ قالْلنْ: ”في لي أَكلْ تَ آكلْ، شي لَ انْتنْ موُ تعْرفونْ.“ 33 التَّلاميذْ قالوا لَبَعْضنْ: ”عَجَب اَحَّدْ جابْلو شي للاَكلْ؟“ 34 يَسوُعْ قالْلنْ: ”أَكْلي تَ اسَي إرادةْ لَ بَعَثْني وَاخَلّصْ شغْلو. 35 موُ أنْتن تْقولونْ: ’بَعدْ أَرْبَعْة اَشرْ جاِييِ الّحْصاد‘؟ كْوا اَنا أَقولْكنْ: عَلَّوا عَينَيكن وْرَوا زْروُعْ لَ صارتْ للّحْصادْ. 36 وَاينا لَ يحْصدْ أَجرْ ياخذْ، ويلمْ ثَمَرْ لَحَياة الاَبَديِّة، والزّارعْ والحصّاد اثْنَيننْ مَعْ بَعْضنْ يفْرَحونْ. 37 وبْهاي كلْمة حَقْ ياِ لَ تْقولْ: ’واِحدْ يزْرَع وْغَيرو يحْصدْ.‘ 38 أَنا بَعَثْتوكنْ تَ تحْصدْونْ شي لَ موُ أنْتنْ تعبْتنْ فِيو. غَيرْكنْ تعْبوا، وانْتنْ دَخَلْتنْ عَلى تَعَبْ غَيرْكنْ، هَوكْ لَ تعْبوا.“ 39 منْ هاك البَلَدْ، كْثيرْ سامريِّة آمَنوا فِيو، منْ كلْمةْ هاك المَرَة لَ كانْ تشْهَد وتْقولْ: ”قالْ لي كلْ شي لَ كسَّوَيتُ.“ 40 وْوَقْتْ لَ جَوا لَعنْدو هَوك السَّامريِّة، تْوَسَّلولو تَ يباتْ عنْدن، وْباتْ عنْدنْ يَومَينْ. 41 وكْثيرْ آمَنوا فِيو منْ كَلامو، 42 وْكان يقولونْ لاك المَرَة: ”موُ منْ كَلامْكِ بَعدْ نْآمنْ فِيو، منْ لَ نحْناِ سمعْنا وْعَرَفْنا هذا واِ بالحَقّ المَسيح مْخَلّص الدّنْياِ.“
يَسوُعْ يشْفي ابنْ زَلَمِة منْ حاشية المَلكْ
43 وْبَعدْ يَومَينْ، طَلَعْ يَسوُعْ منَونَك وْراحْ للجَّليلْ، 44 منْ لَ يَسوُعْ نَفْسو شَهَد وْقالْ: ”نَبي فَ بَلَدو موُ يتْكَرَّمْ.“ 45 وْوَقْتْ لَ جا للجَّليل، اسْتَقْبَلوهُ الجَّليلْيِّة لَ ارَوا عَلاماتْ لَ سَوى ف القدْسْ ف العيدْ، منْ لَ هنّاِ زاِ كانْ كجَّوا للعيدْ. 46 وْرجعْ جا يَسوُعْ لَ قانا الجَّليلْ موُضَعْ لَ كانْ كسَّوى المَي خَمر. وْكانْ في فَ كَفَرْناحومْ زَلَمِة منْ خدّام المَلك ابْنو مَريِضْ كانْ. 47 هاذْ سمعْ كجّا يَسوُعْ م الياهوديِّة للجَّليل، وْراحْ لَعنْدو وتْوَسَّلْلو تَ ينْزَل وْيشْفي ابْنو، منْ لَ كانْ كلْقَرَّبْ عَ المَوتْ. 48 يَسوُعْ قالْلو: ”لَ ما ارَيتنْ عَلامات وْعَجايبْ، موُ تْآمْنونْ.“ 49 هاك خادم المَلكْ قالْلو: ”سَيّدي، انْزَل قَبلْ لَ يموت الوَلَدْ.“ 50 يَسوُعْ قالْلو: ”روُح. ابْنكْ حَي واِ.“ وْآمنْ هاك الزَّلَمِة بْكلْمةْ لَ قالْلو يَسوُع وْراحْ. 51 وْهوّاِ ناِزلْ، طَلَعوا قدّامو خدّاِمينو وْبَشَّروهُ قالولو: ”ابْنكْ عاشْ.“ 52 وْسَأَلنْ: ”فَ أَينا وَقْت انْشَفى؟“ قالولو: ”مْباِرْحَة ساعَة سَبْعَة عافتو الحمِّة.“ 53 وْعَرَفْ أَبوهُ فاك ساعَةْ لَ قالْلو فِيا يَسوُع: ”ابْنكْ عاشْ.“ وْآمَنْ هوّاِ وْبَيتو كلّو. 54 هاي زاِ ثاِني عَلامِة سَوى يَسوُعْ وَقْتْ لَ جا م الياهوديِّة للجَّليلْ.
شفا مَشْلولْ بَيتْ حَسدا
1 بَعْدا، صارْ عيدْ للياهود، وْطَلَعْ يَسوُعْ للقدْسْ. 2 وْكانْ في هَونَكْ ف القدْسْ موُضَعْ برْكِة يقولولو بلْساِن العبْراني بَيتْ حَسدا، حَولا خَمْس صْفوفْ عَواميدْ مَسْقوفِة، 3 وفِيا مْشَطَّحينْ ناِس كْثيرْ، مَراضىِ وْعَمايِة وْعرْجينْ ومْيَبَّسينْ ينْطرونْ تَ يتْحَرَّك المَي. 4 منْ لَ كمّنْشي كانْ ينْزَلْ مَلاكْ للبرْكِة ويحَرّك المَي، وَاينا لَ يلَحّقْ ينْزَلْ قَبْل الكلْ بَعدْ لَ يتْحَرَّك المَي، ينْشفي أَيشْ لَ كانْ مَرَضو يكونْ. 5 وْكانْ في هَونَكْ واِحدْ زَلَمِة، ثْماِنِة وْثاِثينْ سَنِة كانْ كصّارْلو مَريِضْ. 6 يَسوُعْ أَراهُ مْشَطَّح وْعَرَفْ لهُ زَمانْ طَويل، وْقالْلو: ”تْريدْ تنْشَفى؟“ 7 رَدْ هاك المَريِض وْقالْ: ”نَعمْ سَيّدي، بَسْ ما لي اَحَّدْ، وَقْتْ لَ يتْحَرَّك المَي، تَ يكبْني ف البركِة. وَقْتْ لَ آجي تَ انْزَلْ، غَيرْ واِحدْ قَبْلي ينْزَلْ.“ 8 يَسوُعْ قالْلو: ”قوم اشْقلْ تَخْتكْ وامْشي.“ 9 وْفَ ساعتا انْشَفى هاك الزَّلَمِة، وْقامْ شَقَلْ تَخْتو وْمشي. وْهاك اليَومْ سَبْتْ كانْ. 10 الياهودْ قالوا لاك لَ انْشَفى: ”سَبْتْ واِ، موُ يحلْ لكْ تشْقلْ تَخْتكْ.“ 11 هوّاِ رَدّ وْقالْلنْ: ”هاكْ لَ شَفاني هوّاِ قالْ لي: ’اشْقل تَخْتكْ وامْشي.‘“ 12 وْسَأَلوهُ: ”من واِ هاذْ زَلَمةْ لَ قالْ لك: ’اشْقلْ تَخْتكْ وامْشي‘؟“ 13 بَسْ هاكْ لَ انْشَفى ما كانْ يعْرفْ من واِ. وْيَسوُعْ ما بَقى يبَيّنْ بَينْ لَمّة النّاِس الّگْبيرِة لَ كانْ في فاك الموُضَعْ. 14 بَعدْ زَمانيِّة، أَراهُ يَسوُعْ ف الهَيكَل، وْقالْلو: ”كْوا انْشَفَيتْ، لا ترْجَعْ تخْطي بْشانْ لا يسيِرْ لكْ شي أَخْرَبْ م الاَوَّلْ.“ 15 وْراحْ هاك الزَّلَمِة وْقالْ للياهودْ يَسوُعْ واِ هاكْ لَ شَفاهُ. 16 وْمنْ هاي، الياهودْ حَطّوا حَطاطْ يَسوُع وْكان يريدونْ يقْتلوهُ، منْ لَ كان يسَي هَالاعْمالْ ف السَّبْتْ.
عَلاقة الآبْ بالابن
17 بَسْ يَسوُعْ قالْلنْ: ”أَبوي دي للسَّعْ يشْتغلْ، وَانا زاِ أَشْتغلْ.“ 18 وْمنْ هاي، الياهودْ بالاَكْثَرْ بَقى يسَونْ جهْدنْ تَ يقْتلوهُ، موُ بَسّ منْ لَ كَسَر السَّبْتْ، بَلىِ وْعَلى لَ قال اَلله أَبوهُ واِ، وْساِوى روُحو مَع اَلله. 19 رَدْ يَسوُع وْقالْلن: ”الحَقّ الحَقّ اَقولْكنْ موُ يتيِق الابن يسَي شي منْ نَفْسو، إلّا شي لَ يرى الآب يسَي: كلْ شي لَ الآب يسَي، الابنْ زاِ كَماهُ يسَي. 20 ”منْ لَ الآب يحبّ ابْنو وْكلْ شي لَ يسَي يوَرّيو، وَاعظَمْ منْ هَالاعْمالْ تَ يوَرّيو، بْشانْ أنْتنْ ترَون العَجَبْ. 21 منْ لَ كَما لَ يقَيّم الآبْ مَيتين وْيحييين، الابنْ زاِ كذاِ لَ أَينا لَ يريدْ يحْيي. 22 والآبْ موُ يحْكمْ عَلى اَحَّد، الحكمْ كلّو عَطاهُ للابنْ. 23 بْشانْ كلّ انْسان يكَرّم الابنْ كَما لَ يكَرّم الآبْ. هاكْ لَ موُ يكَرّم الابنْ، موُ يكَرّم الآبْ لَ بَعَثو.
م المَوت للحَياة
24 ”الحَقّ الحَقّ اَقولْكنْ: لَ يسْمَعْ كَلامي ويسَدّقْ لَ بَعَثْني، لهُ حَياة اَبَديِّة، وْموُ يجي لَ تَحْتْ حكمْ، بَلىِ انْتَقَلْ م المَوتْ للحَياةْ. 25 الحَقّ الحَقّ اَقولْكنْ: جاِيِة ساعَة، والسَّعْ ياِ زاِ، ساعَة لَ تَ يسْمَعونْ فِيا المَيتينْ صَوت ابْن اَلله، وْهَوكْ لَ يسْمَعونْ يحْيَونْ. 26 منْ لَ كَما لَ في للآبْ حَياة فَ نَفْسو، كذاِ عَطى الابنْ تَ يكونْلو حَياةْ فَ نَفْسو. 27 وْعَطاهُ سلْطَة تَ يحاِكم وْيحْكمْ، 28 منْ لَ هوّاِ واِ ابْن الانْسانْ، لا تتْعَجَّبون بْهاي، منْ لَ جاِيِة ساعَة، وَقْتْ لَ كلْ هَوذْ لَنّاِ جوّات الّقْبوُرْ تَ يسْمَعونْ صَوتو. 29 وْيطْلَعونْ، لَ كانْ كسَّوا اعْمال خَيرْ لقْياِمة الحَياة، وْلَ كانْ كسَّوا اعْمال شَرْ لقْياِمة الحكمْ عَلَينْ. 30 موُ اتيِق منْ نَفْسي أَسَي شي. كَما لَ اسْمَعْ أَحكم، وْحكْمي عادلْ واِ، منْ لَ موُ ادَوّرْ تَ اسَي إرادتي، بَلىِ إرادةْ هاكْ لَ بَعَثْني.
الآبْ يشْهَدْ للابن
31 ”يكون اَنا أَشْهَدْ لَنَفْسي، شَهادتي ما كانْ تَ تْكونْ حَقْ. 32 غَيري واِ هاكْ لَ يشْهَدْ لي، وَاعْرفْ حَقْ ياِ شَهادةْ لَ يشْهَدْ لي. 33 أنْتنْ بَعَثْتنْ لَعنْدْ يوحَنّا، وْهوّاِ شهدْ للحَق. 34 أَنا موُ من انْسانْ آخذْ شَهادِة، بَلىِ أَقولْ هاذ بْشانْ أنْتنْ تخْلَصونْ. 35 هاك سْراجْ كانْ يشْتعلْ ويضَوّي، وانْتنْ فرحْتنْ تَ تفْتخْرونْ ساعَة ف ضَوّيِتو. 36 بَسّ اَنا لي شَهادِة أَعْظَمْ منْ شَهادِة يوحَنّا، اعْمال لَ عَطاني أَبوي تَ اسَيا، هَالاعْمال لَ اسَي، هيِّ ياِ لَ تشْهَد الآبْ بَعَثْني. 37 والآبْ لَ بَعَثْني، هوّاِ يشْهَدْ لي. أنْتنْ أَبَدْ ما سمعْتنْ صَوتو، وْلا ارَيتنْ مَنْظَرو، 38 وْلا كلْمتو تسْكنْ فيكنْ، منْ لَ موُ تْآمْنون بْهاكْ لَ هوّاِ بَعَثو. 39 افْحَصوا الاسْفارْ لَ فِيا تفْتكْرونْ لكنْ فِيا حَياةْ أَبَدِيِّة، وهيِّ تشْهَدْ لي. 40 بَسّ انْتنْ موُ تقْبَلونْ تجَون لَعنْدي بْشان يكون لْكنْ حَياةْ. 41 مَجْدْ م البَشَر موُ اخذْ. 42 عَرَفْتوكن مْحَبّة اَلله ما فيكنْ. 43 أَنا جيتُ باسمْ أَبوي وْموُ تقْبَلوني. لَ احَّدْ لخْ جا باسمْ نَفْسو، لاكْ تقْبَلونْ. 44 أشْوَن تْتيِقون تْآمْنون انْتنْ لَ تقْبَلونْ مَجْدْ منْ بَعضْكن، وْمَجْدْ لَ من اَلله الواِحدْ موُ تطْلبونْ. 45 تفْتكْرون اَنا أَشْكيكنْ قدّام الآبْ. في منْ يشْكيكنْ، موسى هاكْ لَ عَلَيو عَلَّقْتنْ رَجاكنْ. 46 يكونْ كان تْآمْنونْ ف موسى، في زاِ كانْ تَ تْآمْنونْ، منْ لَ موسى عَلَي كَتَبْ. 47 وْلَ ف اسْفارْ هاكْ موُ تْآمْنونْ، فَ كَلامي أشْوَنْ تَ تْآمْنونْ؟“
يَسوُعْ يطَعّم خَمْسة اَلاف زَلَمِة
1 بَعْدا، راحْ يَسوُعْ لَقَفا بَحْر الجَّليلْ بَحرْ طيباريوُسْ. 2 وْراحْ خَلْفو طَلْقةْ ناِس گْبيرِة منْ لَ ارَوا آيات لَ سَوى ف المَراضىِ لَ شَفى. 3 وْطَلَعْ يَسوُعْ عَ الجَّبَل وْقعدْ هَونَكْ مَعْ تَلاميذو. 4 وْعيد الفصْحْ تَبَع الياهودْ كانْ كلقَرَّبْ. 5 وْرَفَع يَسوُعْ عَينَيو وَارى طَلْقةْ ناِس گْبيرِة جاِيِة لَعنْدو، وْقالْ لَ فيلبُّسْ: ”من اَينْ نشْتري غْبَيزْ تَ ياكْلونْ هَوذْ؟“ 6 قالْلو هاذْ تَ يفْحَصو، منْ لَ كانْ يعْرفْ أَيشْ تَ يسَي. 7 فيلبُّسْ قالْلو: ”بْمَيتَينْ دينار غْبَيزْ موُ يكْفى، لَ اخَذ كلْ واِحدْ منّنْ شطْفِة زْغَيرِة.“ 8 قامْ واِحدْ منْ تَلاميذو، أَنْدَراوُسْ أَخو شَمْعونْ بطْرسْ، قالْلو: 9 ”في هَونْ وَلَدْ مَعو خَمْسةْ رغْفة غْبَيز شْعيِر وْسَمَكْتَينْ، بَسْ هَوذْ أَيشْ ناِ لَوذْ كلّنْ؟“ 10 يَسوُعْ قالْلنْ: ”خَلَّوا النّاِسْ كلّنْ ينْتَكَونْ.“ والحَشيش كْثيرْ كانْ فاك الموُضَعْ. وانْتَكَوا الّرْجاِل، وْكانوا خَمْسة اَلافْ. 11 وَاخَذْ يَسوُع الّغْبَيز وْشَكَر وْفَرَّقْ لَوك المنْتكْيين وْكذاِ زاِ م السَّمَكتَين مْقَدْ لَ رادوا. 12 وْوَقْتْ لَ شبْعوا قالْ لَتَلاميذو: ”لمّوا كساِري لَ فضْلتْ، لا يضيِعْ منّنْ شي.“ 13 وْلَمُّوا وْتَلَوا اثْناعشْ قفِّة منْ كساِري لَ فضْلوا منْ قدّام هَوكْ لَ اكَلوا منْ خَمْسةْ رغْفة غْبَيز الّشْعيِرْ. 14 هَوكْ ناِسْ لَ ارَوا عَلامِةْ لَ سَوى يَسوُعْ، قالوا: ”حَقّ اليَقينْ هذا واِ النَّبي الجّاِييِ للدّنْياِ.“ 15 وْعَرَفْ يَسوُعْ ك تْحَضَّروا تَ يوَدَّوهُ اجْباري ويسَوهُ مَلكْ، قامْ راحْ للجَّبَل بْوَحْدو.
يَسوُعْ يمْشي عَ المَي
16 وَقْتْ لَ مَسَّت المَسا، تَلاميذو نزْلوا للبَحرْ. 17 وركبوا سَفّينِة وْساقوا لَشاطي اللاخْ تَ يروُحونْ لَكَفَرْناحوم. وْعَتَّمَت الدّنْياِ وْيَسوُعْ ما جا لحقنْ. 18 البَحرْ هاج عَلَينْ، منْ لَ كانْ كلْقامْ هَوا قَوي. 19 وْساقوا حَوالي ثَث اَرْبَع امْيالْ، وَارَوا يَسوُعْ يمْشي عَ البَحر وْلَمَنْ قربْ منْ سَفّينتنْ خافوا. 20 بَسْ يَسوُعْ قالْلنْ: ”أَنا واِ، لا تْخافونْ.“ 21 وْفرْحوا تَ يسْتَقْبلوهُ ف السَّفّينِة، وْفَ ساعتا وصْلت السَّفّينِة لاكْ أَرْضْ لَ كانوا رايحينْلا. 22 ثاِني نْهار، هَوكْ لَمّة النّاِسْ لَ بَقَوا عَلى شاطي اللاخْ، أَرَوا سَفّينِةْ لخْ غَيرْ هاكْ لَ طَلَعوا فِيا التَّلاميذْ ما كانْ في هَونَك، وْيَسوُعْ ما كانْ كدَّخَل مَعنْ، مَعْ تَلاميذو للسَّفّينِة. 23 بَسْ كانْ كجَّوا غَيرْ سَفّينات منْ طَبَرِيّا وْوَقَّفوا مَع جَنْبْ هاك موُضَعْ لَ اكَلوا فِيو غْبَيزْ وَقْتْ لَ باِرَك يَسوُعْ. 24 وْوَقْتْ لَ ارَوا هَوكْ لَمّة النّاِسْ يَسوُعْ موُ هَونَكْ واِ وْلا تَلاميذو، طَلَعوا لَوذ السَّفّينات وْجَوا لَ كَفَرْناحوم يدَورونْ عَلى يَسوُعْ. 25 وْوَقْتْ لَ ارَوهُ عَلى شاطي اللاخْ، قالولو: ”مْعَلّمْ، أَيمَتْ جيتْ لَون؟“ 26 رَدْ يَسوُعْ قالْلن: ”الحَقّ الحَقّ اَقولْكنْ أنْتن تْدَورونْ عَلَي موُ منْ لَ ارَيتنْ عَلامات، بَلىِ منْ لَ اكَلْتن غْبَيز وْشبعْتنْ. 27 لا تخْدمونْ أَكَل لَ يزولْ، بَلىِ أَكلْ لَ يبْقى لَحَياة الاَبَديِّة، هاذْ لَ ابْن الانْسانْ يعْطيكنْ، منْ لَ هاذْ واِ لَ خَتَمو بْخاتمو اَلله الآبْ.“ 28 قالولو: ”أَيشْ لازم نْسَي تَ نخْدم اعْمال اَلله؟“ 29 يَسوُعْ قالْلنْ: ”هاذْ واِ عَمَل اَلله، تَ تْآمْنون بْهاذْ لَ هوّاِ بَعَثوا.“ 30 قالولو: ”أَيشْ عَلامِة تْسَي، تَ نّرى ونْآمنْ فيكْ؟ أَيش تْسَي؟ 31 أَبَّهاتْنا مَنّ السَّما أَكَلوا ف البَرّيِّة، كَما لَوّاِ مَكْتوب: ’غْبَيزْ م السَّما عَطاهنْ للاَكلْ.‘“ 32 يَسوُعْ قالْلن: ”الحَقّ الحَقّ اَقولْكنْ موُ موسى عَطاكن غْبَيزْ م السَّما. بَلىِ أَبوي يعْطيكن غْبَيزْ الحَقْ م السَّما. 33 منْ لَ غْبَيز اَلله هوّاِ هاكْ لَ نزلْ م السَّما، وْيعْطي حَياةْ للدّنْياِ.“ 34 قالولو: ”سَيّدْنا، دايم اعْطينا هَالّغْبَيزْ هاذْ.“ 35 قالْلن: ”اَنا واِ غْبَيز الحَياةْ، منْ لَ يجي لَعنْدي موُ يجوُع، وْمنْ لَ يآمنْ في موُ يعْطشْ للاَبَدْ. 36 بَلىِ قلْتُ لْكنْ: أَرَيتنْني وْموُ تْآمْنونْ. 37 كلْ واِحدْ لَ عَطاني واِ الآبْ، لَعنْدي يجي، وْمنْ لَ يجي لَعنْدي موُ اطاِلعو لَبَرّا، 38 منْ لَ نزلْتُ م السَّما موُ بْشانْ أَسَي شي لَ اريدْ، بَلىِ شي لَ يريدْ هاكْ لَ بَعَثْني. 39 وهاذْ واِ شي لَ يريدْ هاذْ لَ بَعَثْني: يريدني كلْ شي لَ عَطاني موُ اضَيّعْ منّو شي، بَلىِ أَعْطِيو الّقْياِمِة فَ يَوم الآِخرْ. 40 منْ لَ هاذْ واِ شي لَ يريدْ أَبوي: كلْ من يرى الابنْ ويآمنْ فِيو، يكونْلو حَياةْ أَبَدِيِّة، وَانا أَعْطِيو الّقْياِمِة فَ يَوم الآِخرْ.“ 41 الياهودْ كانْ يتْأَفْأَفونْ منْ يَسوُعْ، منْ لَ قالْ: ”أَنا واِ غْبَيزْ لَ نزلْ م السَّما.“ 42 وْقالوا: ”موُ يَسوُع ابنْ يوسفْ واِ هاذْ، هاكْ لَ نعْرف أمّو وَابوهُ؟ أشْوَنْ هاذْ يقول: ’نزلْتُ م السَّما؟‘“ 43 رَدْ يَسوُع وْقالْلنْ: ”لا تْدَمْدمونْ بَين بَعضْكنْ. 44 أَحَّدْ موُ يتيِقْ يجي لَعنْدي لَ ما سَحَبو الآبْ لَ بَعَثْني، وَانا أَعْطِيو الّقْياِمِة فَ يَوم الآِخر. 45 مَكْتوبْ ف اسْفار الاَنْبِيا: ’تَ يكونونْ كلّن مْعَلَّمينْ من اَلله.‘ بَقى كلْ واِحدْ منْكنْ يسْمَعْ م الآب وْيتْعَلَّمْ منّو، يجي لَعنْدي. 46 أَحَّدْ موُ يرى الآبْ غَير لَوّاِ من اَلله، هاكْ واِ لَ يرى الآبْ. 47 الحَقّ الحَقّ اَقولْكنْ لَ يآمنْ في لهُ حَياةْ أَبَدِيِّة. 48 أَنا واِ غْبَيز الحَياةْ. 49 أَبَّهاتْكنْ أَكَلوا المَنْ ف البَرّيِّة وْماتوا. 50 بَسْ هاذْ واِ غْبَيزْ لَ نزلْ م السَّما بْشانْ ياكلّ الانْسانْ منّو وْموُ يموتْ. 51 أَنا واِ غْبَيز الحَي لَ نزلْ م السَّما. وْلَ انْسانْ أَكَلْ منْ هَالّغْبَيزْ هاذْ، تَ يعيشْ للاَبَدْ. وغْبَيزْ لَ انا أَعْطي، جَسَدي واِ، لَ أَعْطِيو بْشانْ حَياة الدّنْياِ.“ 52 الياهودْ كانْ يتْجاِدَلونْ جدالْ حاِمي واِحدْ مَع اللاخْ ويقولونْ: ”أشْوَن يتيِقْ هاذْ يعْطينا جَسَدو تَ ناكلو؟“ 53 يَسوُعْ قالْلن: ”الحَقّ الحَقّ اَقولْكنْ: لَ موُ تاكْلونْ جَسَد ابْن الانْسان وْتشْرَبونْ دَمّو، ما لْكنْ حَياةْ فَ نَفْسْكنْ. 54 لَ ياكلْ جَسَدي وْيشْرَبْ دَمّي، لهُ حَياةْ أَبَدِيِّة وَانا تَ اعْطِيو الّقْياِمِة فَ يَوم الآِخرْ. 55 منْ لَ جَسَدي بالحَقْ أَكلْ واِ، وْدَمّي بالحَقْ شرْبْ واِ. 56 ل ياكلْ جَسَدي وْيشْرَبْ دَمّي يسْكنْ في وَانا فِيو. 57 كَما لَ بَعَثْني الآب الحَي وَانا حَي بالآب، وْلَ ياكلْني زاِ، تَ يعيش في. 58 هذا واِ غْبَيزْ لَ نزلْ م السَّما. موُ كَما لَ اكَلوا أَبَّهاتْكنْ مَن وْماتوا. ل ياكلْ منْ هَالّغْبَيزْ هاذْ، تَ يعيشْ للاَبَدْ.“ 59 هَوذْ قالْ ف المَجْمَع، وْهوّاِ يعَلّم فَ كَفَرْناحومْ.
التَّلاميذْ يشكّون
60 كْثيرْ منْ تَلاميذو لَ سمْعوا، قالُوَا: ”صَعْبْ واِ هَالكَلامْ. من يتيِقْ يسْمَعْو؟“ 61 يَسوُعْ عَرَفْ فَ قَلْبو تَلاميذو يتْأَفْأَفونْ منْ هَالكَلام، وْقالْلنْ: ”هاذ يعَثْورْكنْ؟ 62 أشْوَنْ بَقى لَ ارَيتن ابْن الانْسانْ يصْعَدْ لَ موُضَعْ لَ كانْ فِيو منْ قَبلْ؟ 63 الرّوُحْ واِ لَ يعْطي حَياةْ. الجَّسَدْ موُ ينْفَعْ شي. كَلامْ لَ قلْتُ لْكنْ روُح وْحَياةْ واِ. 64 بَلىِ في ناِسْ منْكنْ موُ يآمْنونْ.“ منْ لَ كانْ يعْرفْ يَسوُعْ منْ قَبلْ منْ ناِ لَ موُ يآمْنون وْمنْ واِ هاكْ لَ تَ يسَلّمو. 65 وْقالْلنْ: ”منْ هاي قلْتُ لْكنْ: ما في انْسان يتيِقْ يجي لَعنْدي، لَ ما كانْ ك انْعَطى منْ أَبوي.“ 66 بْشانْ هَالكَلامْ، كْثيرْ منْ تَلاميذو عافوا وْخَلَّوهُ، وْما بَقْ يمْشَونْ مَعو. 67 يَسوُعْ قالْ للاثْناعشْ: ”أنْتنْ زاِ تْريدون تْروُحونْ؟“ 68 رَدْ شَمْعونْ بطْرس، وْقالْ: ”يا رَبْ، لَعنْدْ من نْروُحْ. كَلامْ حَياة الاَبَديِّة عنْدكْ واِ؟ 69 وْنحْناِ آمَنّا وْعَرَفْنا أنْتَ واِ المَسيح ابْن اَلله الحَي.“ 70 يَسوُعْ قالْلنْ: ”موُ اَنا اخْترْتوكن أنْتنْ الاثْناعشْ؟ وْواِحدْ منْكنْ شيِطانْ واِ.“ 71 كان يقولْ عَلى ياهوذا ابنْ شَمْعون الاسْخَرْيوطي، منْ لَ هوّاِ كانْ لَ تَ يسَلّمو، وْواِحدْ م الاثْناعشْ كانْ.
يَسوُعْ يروُح عَ الياهوديِّة
1 بَعْدا، يَسوُعْ كانْ يتْنَقَّلْ ف الجَّليلْ. ما كان يريد يمْشي ف الياهوديِّة، منْ لَ كان يريدون الياهودْ يقْتلوهُ. 2 وْقَرَّبْ عيد الخِيَم، تَبَع الياهودْ، 3 واخوةْ يَسوُعْ قالولو: ”عيفكْ منَون وْروُح للياهوديِّة، تَ يرَونْ تَلاميذكْ اعْمالْ لَ تسَي: 4 ما فِي اَحَّد يسَي شي بالخبْيِة، ويريدْ تَ يكون مْبَيَّنْ. مادام هَالاعْمال تْسَي، وَرّي روُحكْ للدّنْياِ.“ 5 منْ لَ اخوتو زاِ ما كان يآمْنونْ فِيو، فَ يَسوُعْ. 6 يَسوُعْ قالْلنْ: ”وَقْتْي بَعدْ للسَّعْ ما كجّا. بَسْ وَقْتْكنْ دايمْ حاضرْ واِ. 7 الدّنْياِ موُ تْتيِقْ تكْرَهْكن انْتنْ، بَسّ اَنا تكْرَهْني، منْ لَ اشْهَدْ ضدّا: اعْمالا اعْمال شَرْ ناِ. 8 أنْتنْ اطْلَعوا لَهَالعيد، اَنا موُ اطْلَع السَّعْ لَهَالعيدْ، منْ لَ ما كلْكملْ وَقْتْي بَعدْ.“ 9 قالْ هاذ وْبَقى ف الجَّليلْ. 10 وْبَعدْ لَ طَلَعوا اخوتو للعيدْ، هوّاِ زاِ هاك الوَقْتْ طَلَعْ، موُ قدّام العالَم بَلىِ كَما لَ يكونْ بالخبْيِة. 11 والياهودْ كان يدَورونْ عَلَيو ف العيدْ ويقولونْ: ”أَني واِ هاكْ؟“ 12 وْجدالاتْ حاِميِة عَلَيو قامْ بَين النّاِسْ، منْ لَ كانْ في لَ يقولونْ: ”صالحْ واِ،“ وْغَيرنْ كان يقولونْ: ”لا، يضَيّع الشَّعْبْ.“ 13 بَسّ اَحَّدْ قدّام العالَم ما كانْ يحْكي عَلَيو، منْ خَوفنْ م الياهودْ.
يَسوُعْ يعَلّم ف الهَيكَلْ قدّام العالَم كلّنْ
14 وَقْتْ لَ صارْ نصّ اِيّاِم العيدْ، يَسوُعْ طَلَعْ للهَيكَل وْبَقى يعَلّمْ. 15 والياهودْ كانْ يتْعَجَّبونْ ويقولونْ: ”أشْوَنْ يعْرفْ هاذْ تَعْليم، وْهوّاِ ما ك تْعَلَّمْ؟“ 16 رَدْ يَسوُع وْقالْ: ”تَعْليمي موُ لي واِ، لاكْ لَ بَعَثْني واِ. 17 منْ لَ يريد يسَي إرادتو، يعْرفْ تَعْليمي، لَ منْ عنْد اَلله واِ، والّا منْ عنْدي أَحْكي. 18 لَ يحْكي منْ عنْدو، مَجْدْ لَنَفْسو يريدْ. بَسْ هاكْ لَ يريدْ مَجْدْ لَ بَعَثو، سادقْ واِ وْغشْ فَ قَلْبو ما في. 19 موُ موسى عَطاكن النّاموس؟ وْلا انْسانْ منْكنْ يحْفظ النّاموسْ. لَيش تْدَورونْ تَ تقْتلوني؟“ 20 لَمّة النّاِسْ كلّنْ رَدّوا وْقالوا: ”شيِطانْ لكْ، منْ واِ لَ يدَوّرْ تَ يقْتلكْ؟“ 21 رَدْ يَسوُع وْقالْلنْ: ”عَمَلْ واِحدْ سَوَيتُ وْكلّتْكنْ تتْعَجَّبونْ. 22 منْ هاي موسى عَطاكن الّطْهوُرْ، موُ منْ لَوّاِ منّو، منْ موسى، بَلىِ منْ لَوّاِ م الاَبَّهات. وْف السَّبْت تْطَهْرون الانْسانْ. 23 بَقى لَ كان الانْسانْ يتْطَهَّرْ يَوم السَّبْت بْشانْ لا ينْكسرْ ناموس موسى، لَيشْ تتْأَفْأَفونْ منّي عَلى لَ شَفيتُ انْسانْ كلّو فَ يَومْ سَبْتْ؟ 24 لا تحْكمونْ حكْم مْنافقين، حكمْ عادْلين احْكموا.“ 25 ناِسْ من اَهل القدْسْ كان يقولونْ: ”موُ هاذْ واِ هاكْ لَ يريدونْ يقْتلوهُ؟ 26 كْواناِ قدّام العالَمْ يحْكي، وَاحَّدْ موُ يقولْلو شي. عَجَب شْيوُختْنا عَرَفوا حَقّ اليَقين هاذْ واِ المَسيحْ؟ 27 بَلىِ هاذْ نعْرفْ من اَينْ واِ، والمَسيحْ بَس يجي اَحَّدْ موُ يعْرفْ من اَينْ واِ.“ 28 يَسوُعْ رَفَعْ صَوتو وْهوّاِ يعَلّمْ ف الهَيكَل وْقالْ: ”تعْرفوني وْتعْرفونْ من اَين اَنا؟ وَانا منْ عنْد نَفْسي ما جيتُ، بَلىِ حَقْ واِ لَ بَعَثْني، هاكْ لَ انْتن موُ تعْرفوهُ. 29 بَسّ اَنا أَعْرفو، منْ لَ منْ عنْدو اَنا، وْهوّاِ بَعَثْني.“ 30 وْرادوا يمْسكوهُ، بَسّ اَحَّدْ ما مَدّ ايدو لَيو، منْ لَ ما كانْ كجَّتْ ساعتو بَعدْ. 31 بَسّ كْثيرْ منْ ناِس الملْتَمّينْ، آمَنوا فِيو وْقالوا: ”المَسيحْ بَسْ يجي، لَيشْ أكْثَرْ منْ هَالعَلاماتْ لَ يسَي هاذْ تَ يسَي؟“ 32 وْسمْعوا الفَرّيسيِّة ناِس الملْتَمّينْ لَ كانْ يحْكَونْ عَلَيو هَالحَكي، وْبَعَثوا هنّاِ وگْباريّة الكَهَنَة عَسْكَرْ تَ يمْسكوهُ. 33 وْيَسوُعْ قالْ: ”أَنا لَشْوَيِّةْ لخْ مَعْكن اَنا، وْراِجع اَنا لَعنْدْ لَ بَعَثْني. 34 وْتَ تْدَورونْ عَلَي وْموُ ترَوني، وْموُضَعْ لَ انا موُ تْتيِقْون انْتنْ تجَونْ.“ 35 الياهودْ بَقى يقولونْ فَ قَلْبنْ: ”لَ اينْ تَ يروُح هاذ وْنحْناِ موُ نْتيِقْ نراهُ؟ عَجَبْ لبلاد الامَمْ تَ يروُحْ ويعَلّم الوَثَنيِّة؟ 36 أَيشْ ياِ هاي كلْمةْ لَ قالْ: ’تَ تْدَورونْ عَلَي وْموُ ترَوني، وْموُضَعْ لَ انا موُ تْتيِقْون انْتنْ تجَونْ‘؟“
أَينا لَ عطش خَلّي يجي لَعنْدي
37 وْفَ يَوم الّگبيرْ لَوّاِ آِخر اِيّاِم العيدْ، قامْ يَسوُع يسيِحْ ويقولْ: ”لَ في انْسانْ عطْشانْ، خَلّي يجي لَعنْدي وْيشْرَبْ. 38 كلْ واِحدْ لَ يآمنْ في، كَما لَ قال الّكْتاِب، انْهارْ مَي حَي تَ تجْري فَ بَطْنو.“ 39 قالْ هاي عَ الرّوُحْ لَ تَ يقْبَلوهُ هَوذْ لَ يآمْنونْ فِيو. والرّوُحْ ما كانْ ك انْعَطى بَعدْ، منْ لَ ما كانْ ك تْمَجَّدْ يَسوُعْ بَعدْ. 40 كْثيرْ منْ ناِس الملْتَمّينْ لَ سمْعوا كَلامو، قالوا: ”حَقّ اليَقين هذا واِ النَّبي.“ 41 وْغَيرنْ كان يقولونْ: ”هذا واِ المَسيحْ.“ غَيرنْ قالوا: ”لَيشْ م الجَّليلْ يجي المَسيحْ؟ 42 موُ الّكْتاِبْ يقولْ: ’منْ نَسْل داهود، وْمنْ بَيتْ لَحمْ ضيِعَة داهودْ، جاِييِ المَسيحْ؟‘“ 43 وْصارْ خلافْ وانْقَسَموا النّاِسْ عَلى بَعْضنْ لَخاطرو. 44 وْكانْ في ناِسْ منّنْ رادوا يمْسكوهُ، بَلىِ اَحَّدْ ما مَدّ ايدو لَيو. 45 وْجَوا هَوكْ حرّاس الهَيكَلْ لَعنْد گْباريّة الكَهَنَة والفَرّيسيِّة. وْقالولن الكَهَنَة: ”لَيشْ ما جبْتنو؟“ 46 الحرّاسْ قالولنْ: ”أَبَدْ كذاِ ما حَكى انْسانْ كَما لَ حَكى هَالرّجّالْ هاذْ.“ 47 الفَرّيسيِّة قالولنْ: ”لَيش انْتنْ زاِ تْضيِعونْ؟ 48 لَيش اَحَّدْ م الرُّوَسا يا م الفَرّيسيِّة آمَنْ فِيو؟ 49 بَلىِ هَالشَّعْبْ لَ موُ يعْرف النّاموسْ مَنْعولْ واِ.“ 50 واِحدْ منّنْ، نيقوديموُسْ، هاكْ لَ كانْ كجّا لَعنْدْ يَسوُعْ باللَيلْ، قالْلنْ: 51 ”لَيشْ ناموسْنا يحْكمْ عَلى اَحَّدْ لَ موُ يسْمَعْ منّو قَبل وْيعْرفْ أَيشْ سَوى؟“ 52 رَدّوا وْقالولو: ”لَيشْ أنْتَ زاِ م الجَّليل انْتَ؟ فَتّش وْرى! نَبي م الجَّليلْ موُ يقومْ.“ 53 بَعْدا راحوا كلْ واِحدْ لَبَيتو.
المَرَة الخاطيِة قدّامْ يَسوُعْ
1 وْيَسوُعْ راحْ لَ جَبَل الزَّيتونْ 2 والصّبْحْ رجعْ جا للهَيكَل، وْكلّ الشَّعْبْ كانْ يجي لَعنْدو. وْهوّاِ قاِعد يعَلّمنْ. 3 مْعَلْمين النّاموسْ والفَرّيسيِّة جابوا مَرَة انْمَسَكتْ بالزّنىِ. وْوَقَّفووا ف النّص، 4 وْقالولو: ”مْعَلّمْ هَالمَرَة انْمَسَكتْ قدّام العَين فَ نَفْسْ شَغلة الزّنىِ. 5 وْفَ ناموسْ موسى، أَمَرْ: كَما هَوذْ لازمْ نرْجمنْ. أنْتَ بَقى أَيش تْقولْ؟“ 6 هاي قالوا يجَربوهُ، بْشانْ بَلْكي يسيِرْلنْ مَمْسَكْ تَ يشْتَكَونْ عَلَيو. بَسْ يَسوُعْ نَخّى لَ تَحْت وْبَقى يكْتبْ عَ الاَرْضْ. 7 وْلَمَنْ طَوَّلوا يسْأَلوهُ، قامْ تْساِوى وْقالْ: ”أينا منْكنْ لَوّاِ بَلا خَطيِّة، خَلّي قَبْل الكلّ يكبْ عَلَيا حَجَرَة.“ 8 وْرجعْ نَخّى يكْتبْ عَ الاَرْضْ. 9 وْهنّاِ وَقْتْ لَ سمْعوا، بَقى يطْلَعونْ واِحدْ واِحدْ، بَدَوا م الّشْيوُخَة. وْبَقى يَسوُع بْوَحْدو وْبَقَت المَرَة بْوَحْدا ف النّصْ. 10 وْوَقْتْ لَ قام تْساِوى يَسوُعْ، قالْ للمَرَة: ”أَني ناِ؟ أَحَّدْ ما حَكَمْ عَلَيكِ؟“ 11 هاكْ قالت: ”وْلا واِحدْ يا سيّدْ.“ قالْلا: ”وْلا أَنا أَحْكمْ عَلَيكِ. روُحي وْم السَّعْ لَ بَعدْ لا بَقْ تخْطَينْ.“
يَسوُعْ ضَوّ الدّنْياِ
12 وْكَرْةْ لخْ حَكى مَعنْ يَسوُع وْقالْ: ”أَنا واِ نور الدّنْياِ. منْ لَ يجي خَلْفي، موُ يمْشي ف العتْمِة، بَلىِ تَ يكونْلو نور الحَياةْ.“ 13 الفَرّيسيِّة قالولو: ”أنْتَ لَنَفْسكْ تشْهَدْ، شَهادتكْ موُ حَقْ ياِ.“ 14 رَدْ يَسوُع وْقالْلنْ: ”حتّى لَ شهدْتُ لَنَفْسي، شَهادتي حَقْ ياِ، منْ لَ اعْرفْ من اَينْ جيتُ وْلَ اين اَنا رايحْ. بَسْ أنْتنْ موُ تعْرفونْ لا من اَينْ جيتُ وْلا لَ اين اَنا رايحْ. 15 أنْتنْ حكمْ جَسَدي تحْكمونْ. بَسّ اَنا موُ احْكمْ عَلى اَحَّدْ. 16 وْلَ حَكَمْتُ زاِ، حكْمي حَقّاني واِ، منْ لَ موُ بْوَحْدي أَحْكمْ، بَلىِ اَنا وَابوي لَ بَعَثْني. 17 وْفَ ناموسْكنْ زاِ مَكْتوبْ: ’شَهادةْ رجّالَينْ حَقْ ياِ.‘ 18 أَنا واِ لَ اشْهَدْ لَنَفْسي، وَابوي لَ بَعَثْني يشْهَدْ لي.“ 19 قالولو: ”أينْ واِ أَبوك؟“ رَدْ يَسوُع وْقالْلنْ: ”لا لي تعْرفون وْلا لاَبوي. يكونْ كانْ تعْرفوني، أَبوي زاِ كانْ تَ تعْرفوهُ.“ 20 هَالاقْوالْ هَوذْ قالنْ يَسوُعْ فَ بَيت الخَزْنِة. وَاحَّدْ ما مسكو، منْ لَ ما كانْ كجَّتْ ساعتو بَعدْ.
لَ موُ يآمن فَ يَسوُع يموت فَ خَطيّتو
21 وْقالْلنْ زاِ يَسوُعْ: ”أَنا رايح اَنا، وْتَ تْدَورونْ عَلَي وْتَ تْموتونْ فَ خَطيّاتْكن، وْموُضَعْ لَ انا رايح، انْتنْ موُ تْتيِقْونْ تجَونْ.“ 22 الياهودْ قالوا: ”لَيشْ تَ يقْتل روُحو، يقولْ موُضَعْ لَ انا رايحْ أنْتنْ موُ تْتيِقْونْ تجَونْ؟“ 23 وْقالْلنْ: ”أنْتنْ منْ تَحْت انْتنْ، وَانا منْ فوُق اَنا. أنْتنْ منْ هَالدّنْياِ أنْتنْ، أَنا موُ منْ هَالدّنْياِ اَنا. 24 قلْتُ لْكنْ: تَ تْموتونْ فَ خَطيّاتْكنْ، منْ لَ تَ تْموتونْ فَ خَطيّاتْكنْ لَ ما آمَنْتن اَنا واِ.“ 25 الياهودْ قالولو: ”منْ أنْتَ؟“ يَسوُعْ قالْلن: ”وْلَ بَدَيتُ أَحْكي مَعْكنْ، 26 كْثيرْ في لي تَ اقولْ وَاحْكمْ عَلَيكنْ. بَسْ لَ بَعَثْني سادقْ واِ، وَانا شي لَ سمعْتُ منّو، هاذْ واِ لَ احْكي ف الدّنْياِ. 27 وْما عَرَفوا عَ الآبْ قالْلنْ.“ 28 وْقالْلنْ زاِ يَسوُعْ: ”أَيمَتْ لَ رَفَعْتن ابْن الانْسانْ، تَ تعْرفون اَنا واِ، وْشي منْ عنْدي موُ سَي، بَلىِ كَما لَ عَلَّمني أَبوي كذاِ أَحْكي. 29 وْلَ بَعَثْني مَعي واِ، ما كلْعافْني بْوَحْدي أَبوي، منْ لَ شي لَ يرْضِيو أَسَي ف كلْ وَقْتْ.“
الابن يخَلّص الانْسانْ منْ عبوديّة الخَطيِّة
30 وَقْتْ لَ كان يقول هَالاقْوال، كْثيرْ آمَنوا فِيو. 31 وْقال يَسوُعْ لَوك الياهودْ لَ آمَنوا فِيو: ”لَ ثَبَتّنْ ف كلْمتي، بالحَقْ تَلاميذي أنْتنْ. 32 وْتَ تعْرفون الحَقْ والحَقْ تَ يحَرّرْكنْ.“ 33 قالولو: ”نَسْل ابْراهيمْ نحْناِ، وَابَد لانْسانْ ما صرْنا عَبيدْ، أشْوَن تْقولْ: ’تَ تْسيِرونْ حرّينْ؟‘“ 34 يَسوُعْ قالْلنْ: ”الحَقّ الحَقّ اَقولْكنْ كلْ واِحدْ لَ يسَي الخَطيِّة عَبْد للخَطيِّة واِ. 35 والعَبْدْ موُ يبْقى للأَبَدْ ف البَيتْ، بَسّ الابنْ للأَبَدْ يبْقى. 36 بَقى لَ حَرّرْكن الابنْ، بالحَقْ تَ تْكونونْ حرّينْ. 37 أَعْرفْ نَسْل ابْراهيمْ أنْتنْ، بَلىِ تْدَورونْ تَ تقْتلوني، منْ لَ ما في موُضَعْ لَكَلامي فيكنْ. 38 أَنا شي لَ ارَيتُ عنْد اَبوي اَحْكي، وانْتنْ شي لَ ارَيتنْ عنْد أَبوكن تْسَونْ.“ 39 رَدّوا وْقالولو: ”أَبونا ابْراهيمْ واِ.“ قالْلن: ”يكون اولاد ابْراهيمْ كنْتن، اعْمال ابْراهيمْ كانْ تَ تْسَونْ. 40 السَّع كْوا تْدَورونْ تَ تقْتلوني، أَنا زَلَمِةْ لَ حَكى مَعْكن الحَقْ لَ سمعو منْ اَلله. هاي ابْراهيمْ ما سَواها. 41 أنْتنْ تعْمَلون اعْمال أَبوكنْ.“ قالولو: ”نحْناِ موُ اولادْ زنىِ نحْناِ. أَبْ واِحدْ لنا هوّاِ أَلله.“ 42 يَسوُعْ قالْلن: ”يكون اَلله واِ أَبوكنْ، كانْ تَ تْحبّوني، منْ لَ من اَلله طَلَعْتُ وْجيتُ، موُ منْ عنْد نَفْسي جيتُ، هوّاِ بَعَثْني. 43 لَيشْ موُ تفْهَمونْ كَلامي؟ منْ لَ موُ تْتيِقْونْ تسْمَعونْ كَلامي. 44 أنْتنْ منْ أَبْ هوّاِ إبْليس، وْشَهْوةْ أَبوكن تْريدونْ تَ تْسَونْ. هاكْ م البدايِة قاتل النّاِسْ كانْ. وْبالحَقْ موُ يقومْ، منْ لَ ما فِيو حَقْ. وَقْتْ لَ يحْكي گذْبْ، منْ شي لَ لهُ يحْكي، منْ لَوّاِ گذّاب وَابو الگذّابْ. 45 بَسّ اَنا لَ احْكي الحَقْ، موُ تْسَدْقوني. 46 منْ واِ منْكنْ لَ يتيِقْ يمْسكْ عَلَي خَطيِّة وحْدِة؟ وْلَ حَقْ أَحْكي، لَيشْ موُ تْسَدْقوني؟ 47 أَينا لَوّاِ من اَلله، يسْمَعْ كَلام اَلله. منْ هاي أنْتنْ موُ تسْمَعونْ، منْ لَ موُ من اَلله أنْتنْ.“ 48 رَدّوا الياهود وْقالولو: ”موُ كْوَيّس نْقول: سامري أنْتَ وْشيِطانْ في لكْ؟“ 49 يَسوُعْ قالْلنْ: ”لي شيِطانْ ما في. أَنا أَكَرّمْ أَبوي وانْتن تْهينوني. 50 أَنا موُ اطْلبْ مَجْدْ لَنَفْسي. في منْ يطْلب وْيحْكمْ. 51 الحَقّ الحَقّ اَقولْكنْ لَ يطيعْ كَلامي، مَوتْ موُ يرى للاَبَدْ.“ 52 الياهودْ قالولو: ”السَّعْ عَرَفْنا في لكْ شيِطان: ابْراهيمْ ماتْ والنَّبايِة، وانْتَ تْقولْ: ’لَ يطيعْ كَلامي، مَوتْ موُ يذوُقْ للاَبَدْ؟‘ 53 لَيشْ أنْتَ أَعْظَم انْتَ منْ أَبونا ابْراهيمْ لَ مات، وْم النَّبايِة لَ ماتوا؟ من تْسَي روُحكْ؟“ 54 يَسوُعْ قالْلن: ”يكون اَنا أَمَجّدْ نَفْسي، مَجْدي موُ شي واِ. أَبوي واِ لَ يمَجّدْني، هاكْ لَ تْقولونْ أنْتنْ: إلهْنا واِ، 55 وْموُ تعْرفوهُ. بَسّ اَنا أَعْرفو. لَ قلْتُ: موُ اعْرفو، تَ اسيِرْ گذّابْ كَماكنْ. بَلىِ أَنا أَعْرفو وَاطيعْ كلْمتو. 56 أَبوكن ابْراهيم كْثيرْ مشْتاقْ كانْ يرى يَومي، وَارى وْفرحْ.“ 57 الياهودْ قالولو: ”بَعد ابنْ خَمْسينْ سَنِة ما كصّرْتْ، وَارَيت ابْراهيمْ؟“ 58 يَسوُعْ قالْلن: ”الحَقّ الحَقّ اَقولْكن: قَبلْ لَ يكون ابْراهيمْ، أَنا كاينْ.“ 59 قاموا شَقَلو حجاِيرْ تَ يرْجموهُ. بَسْ يَسوُع اخْتفى وْطَلَعْ م الهَيكَلْ.
يَسوُعْ يشْفي واِحدْ أعْمي م الولادِة
1 وْهوّاِ فاِيتْ، أَرى زَلَمِة أعْمي منْ بَطنْ أمّو. 2 تَلاميذو سَأَلوهُ وْقالولو: ”مْعَلّمْ! منْ خطي هذا والّا أَبوهُ وامّو، كذاِ ولد اَعْمي؟“ 3 يَسوُعْ قالْلنْ: ”لا هوّاِ خطي وْلا أَبوهُ وامّو، بَسّ بْشان تْبَيّنْ فِيو اعْمال اَلله. 4 لازمْ أَسَي اعْمالْ لَ بَعَثْني مْقَدْ لَوّاِ نْهار. اللَيلْ جاِييِ وَاحَّدْ موُ يتيِقْ يشْتغلْ. 5 مْقَدْ لَ انا ف الدّنْياِ نور الدّنْياِ اَنا.“ 6 قالْ هاذ وْبَزَق عَ الاَرْض، وْجَبَلْ وَحلْ منْ بَزْقو، وْدَهَنو عَلى عَينَين الاَعْمي، 7 وْقالْلو: ”روُح تْخَسَّلْ ف برْكةْ شيلوحا {يعْنيِ رَسولْ}.“ قامْ راح تْخَسَّل وْجا يرى. 8 جرانينو وْلَ كان يرَوهُ منْ قَبْل يگَدّي، كان يقولونْ: ”موُ هاذْ واِ هاكْ لَ كانْ يقْعَدْ ويگَدّي؟“ 9 وْكانْ في لَ يقولونْ: ”هوّاِ واِ.“ وْلَ يقولونْ: ”لا، بَلىِ شَبَهْ يشْبَهو.“ بَسْ هوّاِ كان يقول: ”أنا واِ.“ 10 قالولو: ”أشْوَن تْفَتَّحتْ عَينَيكْ؟“ 11 رَدّ وْقالْلنْ: ”هاك الرّجّالْ لَ اسْمو يَسوُعْ جَبَلْ وَحل وْدَهَنْني عَلى عَينَي، وْقالْ لي: ’روُح تْخَسَّلْ فَ مَي شيلوحا.‘ وْرحْتُ تْخَسَّلْتُ وْبَقى أَرى.“ 12 قالولو: ”أين واِ؟“ قالْ: ”موُ اعْرفْ.“ 13 وْجابوا هاكْ لَ منْ قَبلْ كانْ أعْمي لَعنْد الفَرّيسيِّة. 14 وْسَبْتْ كانْ يَومْ لَ سَوى يَسوُعْ وَحل وْفَتَّحْلو عَينَيو. 15 الفَرّيسيِّة زاِ سَأَلوهُ: ”أشْوَنْ بَقى ترى؟“ قالْلنْ: ”حَطْ وَحلْ عَلى عَينَي وتْخَسَّلْتُ، وْبَقى أَرى.“ 16 ناِسْ م الفَرّيسيِّة قالوا: ”هَالزَّلَمِة هاذْ موُ من اَلله واِ، منْ لَ موُ يحْفظ السَّبْتْ.“ بَسْ غَيرنْ كان يقولونْ: ”أشْوَنْ يتيِقْ زَلَمِة خاطي يسَي هَالعَلامات؟“ وْوَقَعْ خلافْ بَيناتنْ. 17 رجْعوا قالوا لاك الاَعْمي: ”أنْتَ، لَ فَتَّحْ لكْ عَينَيكْ، أَيش تْقولْ عَلَيو؟“ قالْلنْ: ”أَنا أَقولْ: نَبي واِ.“ 18 الياهودْ ما سَدَّقوهُ أعْمي كانْ وَارى، لَ ما ساحوا أَبو هاكْ لَ ارى وامّو. 19 وْسَأَلوون: ”لَ هاذْ واِ ابنْكنْ هاكْ لَ تْقولونْ ولدْ أعْمي، أشْوَنْ يرى السَّعْ؟“ 20 رَدّوا الأَبْ والامّ وْقالوا: ”نعْرفْ هاذ ابنْنا واِ وْنعْرفْ أعْمي ولدْ. 21 بَسّ اَشْوَنْ السَّعْ يرى يا منْ فَتَّحْلو عَينَيو موُ نعْرفْ. هوّاِ زاِ بالغْ واِ ف العمر، لهُ اسْأَلوا. هوّاِ يعْطي جَوابْ منْ قدّامْ روُحو.“ 22 أَبوهُ وامّو قالوا كذاِ منْ خَوفنْ م الياهودْ، لَ كانْ كلْحَطَّوا ف فكْرنْ تَ يسَحْتونْ م المَجْمَعْ كلْ واِحد يآمن المَسيحْ واِ 23 بْشانْ هاي أَبوهُ وامّو قالوا: ”بالغْ واِ اسْأَلوهُ.“ 24 وْكَرْةْ لخْ ساحوا الزَّلَمِة، هاكْ لَ كانْ أعْمي، وْقالولو: ”سَبّح لَالله. نحْناِ نعْرف هَالزَّلَمِة خاطي واِ.“ 25 رَدْ هوّاِ وْقالْلنْ: ”خاطي واِ موُ اعْرف اَنا. شي واِحد اَعْرفْ، أعْمي كنْتُ والسَّع كْوا أَرى.“ 26 رجْعوا سَأَلوهُ: ”أَيشْ سَوى لكْ؟ أشْوَنْ فَتَّحْ لكْ عَينَيكْ؟“ 27 قالْلنْ: ”قلْتُ لْكن وْما سمعْتنْ. لَيشْ كَرْةْ لخ تْريدونْ تسْمَعونْ؟ لَيشْ أنْتنْ زاِ تَلاميذ تْريدون تْسيِرولو؟“ 28 وْهنّاِ تْنَعَّلوا عَلَيو وْقالولو: ”أنْتَ واِ تَلْميذْ هاكْ. نحْناِ تَلاميذْ موسى نحْناِ. 29 وْنعْرفْ مَعْ موسى ألله حَكى، بَسْ هاذْ موُ نعْرفْ من اَينْ واِ.“ 30 رَدْ هاك الزَّلَمِة وْقالْلنْ: ”فَ هاي واِ العَجَبْ، فَ هاي لَ موُ تعْرفونْ من اَينْ واِ، وْعَينَيّ اَنا فَتَّحْ. 31 وْنعْرف اَلله موُ يسْمَعْ للخاطْيينْ، بَلىِ لاكْ لَ يخافْ منّو ويسَي إرادتو، لاكْ يسْمَعْ. 32 منْ يَومْ لَ كانت الدّنْياِ دنْياِ، ما انْسَمَعتْ هاي اَحَّدْ فَتَّحْ عَينَينْ واِحدْ ولد اَعْمي؟ 33 يكونْ موُ من اَلله واِ هاذْ، ما كانْ تَ يتيِق يسَي هاي.“ 34 رَدّوا وْقالولو: ”أنْتَ كلّكْ عَلى بَعْضكْ ف الخَطيّاتْ كلْولدْتْ، كجّيتْ تَ تْعَلّمْنا؟“ وْطاِلَعوهُ لَبَرّا. 35 يَسوُعْ سمعْ طاِلَعوهُ لَبَرّا، وَاراهُ وْقالْلو: ”أنْتَ تْآمنْ بابْن اَلله؟“ 36 رَدْ هاكْ لَ انْشَفى وْقالْ: ”منْ واِ تَ آمنْ فِيو سَيّدي؟“ 37 يَسوُعْ قالْلو: ”أرَيتو. هاذْ لَ قايمْ يحْكي مَعكْ هوّاِ واِ.“ 38 قالْ: ”أَآمنْ سَيّدي. وْوَقَعْ سَجَدْلو.“ 39 وْقالْ يَسوُع: ”بْشان مْحاكَمِة وْحكمْ عَ الدّنْياِ جيتُ للدّنْياِ، بْشانْ لَ موُ يرَون يرَون، وْلَ يرَونْ يعْمَونْ.“ 40 وْسمْعوا ناِسْ م الفَرّيسيِّة لَ كانوا مَعو هَالكَلام، وْقالولو: ”يعْنيِ نحْناِ زاِ عَمايِة نحْناِ؟“ 41 يَسوُعْ قالْلن: ”يكونْ كنْتنْ عَمايِة، ما كانْ تَ يكونْ في عَلَيكنْ خَطيِّة، بَسّ السَّع تْقولونْ: ’نرى.‘ منْ هاي خَطيّتكنْ قايمِة (فَ رَقْبتْكنْ) ياِ.“
اَنا واِ الرّاعي الصّالح
1 ”الحَقّ الحَقّ اَقولْكنْ هاذْ لَ موُ يدْخلْ م البابْ لَ ماوى الغَنَمْ، بَلىِ يطْلَعْ منْ غَيرْ موُضَعْ، هاك حَرامي وْقطّاعْ طرْقْ واِ. 2 بَسْ هاكْ لَ يدْخلْ م البابْ، راعي الغَنَم واِ. 3 ولاذْ، ناطوُر البابْ يفْتَح البابْ. والغَنَمْ تسْمَعْ صَوتو، ويسيِحْ خواِريفو، كلْ واِحدْ باسْمو، ويطاِلعنْ. 4 وْمنْ طاِلَعْ غَنَمو، قدّاما يمْشي، وْخَواِريفو يمْشَونْ خَلْفو، منْ لَ يعْرفونْ صَوتو. 5 خَلْف الغَريبْ، موُ تمْشي الغَنَم، بَلىِ تهْربْ منّو، منْ لَ موُ تعْرفْ صَوت الغَريبْ.“ 6 يَسوُعْ قالْلنْ هَالمَثَلْ، بَسْ هنّاِ ما عَرَفوا أَيشْ يحْكي مَعنْ. 7 رجعْ يَسوُعْ قالْلن: ”الحَقّ الحَقّ اَقولْكنْ أَنا واِ باب الغَنَمْ. 8 لَ جَوا {قَبْلي} كلّنْ حَراميِّة وْقطّاِعينْ طرْقْ كانوا، بَلىِ الغَنَمْ ما سمْعتْلنْ. 9 أَنا واِ البابْ. لَ يدْخلْ منّي، يخْلَصْ. يدْخل وْيطْلَع وْيرى رعىِ. 10 الحَرامي موُ يجي غَير بْشانْ يشْبط وْيقْتلْ ويتَوبلْ. بَسّ اَنا جيتُ بْشان يكونْلنْ حَياة، وْشي أَحْسَن يكونْلنْ. 11 أَنا واِ الرّاعي الصّالح. الرّاعي الصّالحْ روُحو يحطْ قدّامْ غَنَمو. 12 بَسّ الشَّغّيلْ لَ موُ راعي واِ والغَنَمْ موُ لهُ ناِ، منْ أَرى الذّيبْ جاِييِ، يخَلّي الغَنَم وْيهْرب. وْيجي الذّيب يچَوّرْ ويهَجّج الغَنَمْ. 13 الشَّغّيلْ يهْربْ، منْ لَ شَغّيلْ واِ وْموُ ياكلْ هَمّ الغَنَمْ. 14 أَنا واِ الرّاعي الصّالحْ، أَعْرفْ هَوذْ لَ لي، وْمَعْروف اَنا منْ هَوذْ لَنّاِ لي، 15 كَما لَ يعْرفْني أَبوي وَانا أَعْرفْ أَبوي. وْروُحي أَحطْ قدّام الغَنَمْ. 16 وْلي زاِ غَيرْ خواِريفْ موُ منْ ماوى الغَنَمْ هاذْ. هَوكْ زاِ لازم اَجيبن، وْتَ يسْمَعونْ صَوتي، وتْسيِر الغَنَمْ كلّا قَطيعْ واِحد وْراعي واِحدْ. 17 منْ هاي أَبوي يحبْني، منْ لَ احطْ روُحي بْشانْ أَردّ آخذا. 18 موُ اَحَّدْ ياخذا منّي. بَلىِ اَنا أَحطّا منْ رضاي، منْ لَ لي سلْطَة أَحطّا وْسلْطَة تَ ارْجَعْ آخذا، منْ لَ هَالوَصِيِّة اسْتَلَمْتُ منْ أَبوي.“ 19 وْصارْ كَرْةْ لخْ خلافْ بَين الياهودْ عَلى هَالكَلامْ هاذْ. 20 كْثيرْ منّنْ كان يقولونْ: ”لهُ شيِطانْ وجْنونْ جَنْ. لَيشْ تسْتمْعولو؟“ 21 غَيرنْ كان يقولونْ: ”هاذْ موُ حَكي واِحدْ فِيو شيطانْ واِ. لَيشْ شيِطان يتيِق يفَتّحْ عَينَين اَعْمي؟“
يَسوُع يقول عَلى روُحو المَسيحْ واِ
22 وْصارْ عيد التَّجديدْ ف القدْس، وْشتاِ كانْ، 23 وْيَسوُعْ كانْ يتْمَشّى ف رواق سْليِمانْ. 24 والتَمّوا حَولو الياهود وْقالولو: ”لَ أَيمَتْ تَ تْخَلّينا مْحَيَّرينْ؟ لَ انْتَ واِ المَسيحْ، قلْنا بْصَراحَة.“ 25 رَدْ يَسوُع وْقالْلنْ: ”قلْتُ لْكن وْموُ تْسَدْقونْ، واعْمالْ لَ اسَي باسْم اَبوي هيِّ تشْهَدْ لي. 26 بَسّ انْتنْ موُ تْسَدقونْ، منْ لَ موُ منْ خواِريفي أنْتنْ. كَما لَ قلْتُ لْكنْ، 27 خواِريفي يسْمَعونْ صَوتي وَانا أَعْرفن وْهنّاِ يجَونْ خَلْفي. 28 وَانا أَعْطِينْ حَياةْ أَبَدِيِّة، وْموُ يتْتَوبَلْونْ للاَبَدْ، وَاحَّدْ موُ يشْبطنْ من ايدي: 29 أَبوي لَ عَطاني ناِ، أَعْظَمْ م الكلْ واِ، وَاحَّدْ موُ يتيِقْ يشْبطْ من ايد أَبوي. 30 أَنا وَابوي واِحدْ نحْناِ.“
الياهودْ يقَرّرون تَ يقْتلون يَسوُعْ
31 وْكَرْةْ لخ الياهودْ شَقَلوا حجاِيرْ تَ يرْجموهُ. 32 يَسوُعْ قالْلن: ”كْثير اعْمال كْوَيسِة منْ عنْد اَبوي وَرَّيتوكنْ، لَخاطرْ أَينا عَمَلْ منّنْ ترْجموني؟“ 33 الياهودْ قالولو: ”موُ لَخاطر اعْمال كْوَيسِة نرْجمكْ، بَلىِ منْ لَ تكْفر. انْسانْ أنْتَ وتْسَي روُحكْ إلهْ.“ 34 يَسوُعْ قالْلنْ: ”لَيشْ موُ كذاِ مَكْتوبْ فَ ناموسْكنْ: ’أَنا قلْتُ آلِهَة أنْتنْ‘؟ 35 لَ لَهَوكْ قالْ ’آلِهَة،‘ منْ لَ صارتْ عنْدنْ كلْمة اَلله، والمَكْتوبْ ف النّاموسْ موُ ممْكنْ يبْطَلْ، 36 تْقولونْ لَهاكْ لَ الآبْ قَدَّسو وْبَعَثو للدّنْياِ: ’تكْفرْ،‘ عَلى لَ قلْتُ لْكن: ’ابن اَلله اَنا‘؟ 37 لَ ما كانْ أَسَي اعْمال اَبوي، لا تْسَدْقوني. 38 بَسْ لَ كانْ أَسَي اعْمال أَبوي، لَ ما سَدَّقتنْني، سَدْقوا الاعْمالْ، تَ تعْرفونْ وتْسَدقونْ أَبوي في واِ وَانا فَ ابوي اَنا.“ 39 وْكَرْةْ لخْ رادوا يمْسكوهُ، وْطَلَعْ منْ بَين ايدَينْ. 40 وْراحْ لَشاطي الارْدن اللاخْ، موُضَعْ لَ كانْ يوحَنّا يعَمّذْ منْ قَبل وْبَقى هَونَكْ. 41 وْجَوا ناِس كْثيرْ لَعنْدو وْكان يقولونْ: ”يوحَنّا ما سَوى وْلا عَلامِة وحْدِة، بَسْ كلْ شي لَ قالْ يوحَنّا عَلى هَالرّجّالْ حَقْ واِ.“ 42 وكْثيرْ آمَنوا فِيو.
مَوت أَليعازر
1 وْكانْ في واِحدْ مَريِضْ، أَليعازرْ، منْ ضيِعةْ بَيتْ عَنْيا، أَخو مَرْيَم وْمَرْتا. 2 وْمَرْيَمْ هاي هيِّ ياِ لَ دَهَنت اجْرَينْ يَسوُعْ بالعطر وْمَسَحتن بْشَعْرا. أَليعازر المَريِضْ أَخو هاي كانْ. 3 وْبَعَثوا الاختَينْ لَعنْدْ يَسوُع يقولونْ: ”سَيّدْنا، كْوا هاكْ لَ تْحبْ مَريِضْ واِ.“ 4 وْيَسوُعْ قالْ: ”هَالمَرَضْ موُ للمَوتْ واِ، لَتَمجيد اَلله واِ، منْ لَ تَ يتْمَجَّد ابْن اَلله بْسَبَبو.“ 5 وْيَسوُعْ كان يحبْ مَرْتا وْمَرْيَمْ واليعازرْ، 6 وْلَمَنْ سمعْ مَريِضْ واِ، بَقى موُضَعْ لَ كانْ يَومَينْ. 7 وْبَعْدا قالْ لَتَلاميذو: ”تَعَوا نرْجَع نْروُحْ للياهوديِّة.“ 8 تَلاميذو قالولو: ”مْعَلّم! السَّع الياهودْ كان يريدونْ يرْجموك، وْترْجَع تْروُحْ لَونَكْ؟“ 9 يَسوُعْ قالْ: ”موُ اثْناعشْ ساعَة في ف الّنْهارْ؟ لَ يمْشي بنْهارْ، موُ يتْچَقلَبْ، منْ لَ يرى نورْ هَالدّنْياِ هاي. 10 بَسْ لَ يمْشي باللَيلْ، يتْچَقلَبْ، منْ لَ ما فِيو ضَو.“ 11 بَعدْ لَ قالْ يَسوُعْ هَالاقْوالْ، كَمَّل وْقالْلنْ: ”أَليعازرْ عَزيزْنا رَقَدْ، وكْوا رايح اَنا تَ اقاِعدو (أصَحِّيو).“ 12 التَّلاميذْ قالولو: ”سَيّدْنا، لَ نامْ، تَ يتْعَدَّلْ.“ 13 بَسْ يَسوُعْ قالْ عَلى مَوتو، وْهنّاِ قالوا بَلْكي عَلى رَقْدة النَّومْ قالْ. 14 هاك الوَقْتْ فَهَّمنْ قالْلنْ: ”أَليعازرْ ماتْ. 15 وَانا بْشانْكنْ أَفْرَحْ عَلى لَ ما كنْتُ هَونَك، بْشان تْآمْنونْ. بَلىِ امْشَوا لَونَكْ.“ 16 توما، هاذْ لَ يقولولو التَّومْ، قالْ لَرفَقو التَّلاميذْ: ”نحْناِ زاِ تَ نْروُح بْشان نْموتْ مَعو.“
اَنا الّقْياِمِة والحَياة
17 وْجا يَسوُعْ لَبَيتْ عَنْيا، وَارى أَرْبَعْة اِيمْ كصّارْلو ف القَبرْ. 18 وْبَيتْ عَنْيا كانتْ جَنْب القدسْ، تبْعَدْلا منّا شي ميلَينْ. 19 وكْثيرْ م الياهودْ كانْ كجَّوا لَعنْدْ مَرْتا وْمَرْيَمْ تَ ياخْذونْ منْ قَلْبن، يعَزَّوونْ فَ اخوونْ. 20 مَرْتا، وَقْتْ لَ سمْعتْ يَسوُعْ جا، طَلَعتْ لَقدّامو، وْمَرْيَمْ قاِعْدِة كانتْ ف البَيتْ. 21 مَرْتا قالتْ لَ يَسوُعْ: ”سَيّدي، يكونْ هَونْ كنْتْ، ما كانْ تَ يموتْ أَخوي. 22 بَلىِ حتّى السَّعْ أَعْرفْ أَيشْ لَ طَلَبْتْ من اَلله يعْطيكْ.“ 23 يَسوُعْ قالْلا: ”تَ يقومْ أَخوكِ.“ 24 مَرْتا قالتْ: أَعْرفْ تَ يقومْ ف الّقْياِمِة فَ يَوم الآِخرْ. 25 يَسوُعْ قالْلا: ”أنا واِ القيامِة والحَياةْ. لَ يآمنْ في، حتّى لَ ماتْ تَ يعيشْ. 26 وْكلْ لَ يعيشْ ويآمنْ في، للأَبَدْ موُ يموت. تْآمْنين بْهاي؟“ 27 قالتْلو: ”نَعمْ سَيّدي. أَنا أَآمنْ أنْتَ واِ المَسيح ابْن اَلله الجّاِييِ للدّنْياِ.“
يَسوُعْ يبْكي
28 بَعدْ لَ قالتْ هَالشِّي، راحتْ ساحتْ مَرْيَمْ أخْتا بالسّر وْقالتْلا: ”الّمْعَلّمْ جا ويسيِحْكِ.“ 29 مَرْيَمْ وَقْتْ لَ سمْعتْ، قامتْ خَفيف، وْجَتْ لَعنْدو. 30 يَسوُعْ ما كانْ كجّا للضّيِعَة بَعدْ، بَلىِ فاك موُضَعْ لَ لاقتو فِيو مَرْيَمْ كانْ. 31 هَوك الياهودْ زاِ لَ كانوا مَعا ف البَيت يعَزَّووا، وَقْتْ لَ ارَوا مَرْيَمْ خَفيفْ قامتْ طَلَعتْ، راحوا خَلْفا، منْ لَ افْتَكَروا للقَبرْ ياِ رايحَة تَ تبْكي. 32 وْمَرْيَمْ وَقْتْ لَ جَتْ لَموُضَعْ لَ كانْ يَسوُعْ وَارَتو، وَقَعتْ عَلى اجْرَيو تْقولْلو: ”يكونْ هَونْ كنْتْ سَيّدي، ما كانْ يموت اَخوي.“ 33 يَسوُعْ وَقْتْ لَ اراها تبْكي وْهَوكْ ياهود لَ جَوا مَعا يبْكَون، غضبْ ف روُحو وانْخَضْ. 34 وْقالْ: ”أينْ حَطَّيتنو؟“ قالولو: ”سَيّدْنا، تَعا رى.“ 35 وْنزْلوا دموُع يَسوُعْ. 36 والياهودْ كان يقولونْ: ”طَلْعوا أَشْقَدْ كان يحبّو!“ 37 وْناِسْ منّنْ قالوا: ”هاذْ لَ فَتَّحْ عَينَينْ هاك الاَعْمي، ما كان يتيِقْ يسَي لاذْ زاِ شي لا يموتْ؟“
يَسوُعْ يقَيّم أَليعازر م المَوت
38 يَسوُعْ، وْهوّاِ غضْبانْ بَينو وْبَينْ نَفْسو، جا للقَبرْ. والقَبرْ كان مْغارَة وْكافْ حَجَرْ مَحْطوُطْ عَلى بابو. 39 وْيَسوُعْ قالْ: ”شيلوا هَالكافْ هاذْ.“ مَرْتا أخْت المَيّتْ قالتْلو: ”سَيّدي، السَّعْ منْ زَمانْ نتنْ، منْ لَ صارْلو أَرْبَعْة اِيمْ.“ 40 يَسوُعْ قالْلا: ”ما قلْتُ لْكِ لَ آمَنْتِ، تَ تّرَينْ مَجْد اَلله؟“ 41 وْشالوا هاك الكاف، وْيَسوُعْ رَفَع عَينَيو لَفوُق، وْقالْ: ”آبا، أَشْكركْ عَلى لَ سمعْتْ لي. 42 وَانا أَعْرفْ دايمْ تسْمَعْ لي، بَلىِ لَخاطرْ هَالنّاِس القايمينْ أَقولْ هَالكَلامْ، لَخاطر يآمْنونْ أنْتَ بَعَثْتْني.“ 43 وْبَعدْ لَ قالْ هَالكَلامْ، ساح بْصَوتْ عاِلي: ”أَليعازرْ، تَعا لَبَرّا!“ 44 وْطَلَعْ هاك المَيّتْ وايدَيو واجْرَيو مَشْدودينْ ف قْماشات، وْوچّو مَشْدودْ فَ مَرْحَمِة. يَسوُعْ قالْلنْ: ”حلّوهُ وْخَلَّوهُ يروُحْ.“
دُبارَة لَقتل يَسوُعْ
45 وكْثيرْ م الياهودْ لَ جَوا لَعنْدْ مَرْيَمْ وَقْتْ لَ ارَوا شي لَ سَوى يَسوُعْ، آمَنوا فِيو. 46 وْناِسْ منّنْ، راحوا لَعنْد الفَرّيسيِّة وْقالولنْ عَلى شي لَ سَوى يَسوُعْ. 47 واجْتَمَعوا گْباريّة الكَهَنَة والفَرّيسيِّة وْقالوا: ”أَيش نْسَي؟ هَالزَّلَمِة عَلامات كْثير يسَي. 48 لَ عفْناهُ كذاِ، كلّ النّاِسْ تَ يآمْنونْ فِيو، وْتَ يجَون الرّوُمانْ ياخْذونْ موُضَعْنا وَامّتْنا.“ 49 واِحدْ منّنْ اسْمو قَيافا، گْبير الكَهَنَة كانْ هاك السَّنِة، قالْلنْ: ”أنْتنْ موُ تعْرفونْ شي. 50 وْلا تفْتكْرونْ وتْقولونْ: أَحْسَنْ واِ لنا واِحد يموت مْبَدال الأمِّة وْلا الأمِّة كلّا تتْتَوبَلْ.“ 51 وْهاي موُ منْ عنْدو قالا. بَلىِ منْ لَ گْبير الكَهَنَة كانْ هاك السَّنِة، تْنَبّا عَلى يَسوُعْ تَ يموت مْبَدال الأمِّة. 52 وْموُ مْبَدال الأمِّة بَسْ، بَلىِ بْشان يلمْ زاِ اولاد اَلله الّمْبَذَّرينْ ويسَويينْ واِحدْ. 53 وْمناك اليَوم، تْشاوَروا تَ يقْتلوهُ. 54 وْيَسوُعْ ما بَقى يمْشي قدّام العَينْ بَين الياهود. وْراحْ منَونَكْ لَموُضَعْ قْرَيَّبْ لأَرْض القافوُرَة، لَبَلَد اسْمو افراِم، وْهَونَكْ كانْ يروُح وْيجي مَعْ تَلاميذو. 55 وْكانْ كلقَرَّبْ فَصح الياهود، وْطَلَعوا كْثيرْ م الّضْياعْ للقدْسْ قَبْل العيدْ تَ يطَهْرونْ نَفْسن بْموجبْ عاداتْ وعْباداتْ. 56 وْكان يدَورونْ عَلى يَسوُعْ، ويقولونْ واِحدْ للاخْ ف الهَيكَلْ: ”أَيشْ تفْتكْرونْ؟ موُ يجي للعيدْ؟“ 57 وگْباريّة الكَهَنَة والفَرّيسيِّة كانْ كلوَصَّوا: لَ عَرَف اَحَّدْ أَينْ واِ، خَلّي يعْطِين اخْباريِّة عَلَيو تَ يمْسكوهُ.
صَبّ العطر عَلى يَسوُعْ
1 وْقَبل الفصْح بْسةّ اِيمْ، جا يَسوُعْ لَبَيتْ عَنْيا، بَلَدْ أَليعازرْ، هاكْ لَ قَيَّم منْ بَين المَيتينْ. 2 وْسَولو هَونَكْ عَشا، وْمَرْتا كانْ كلْقامتْ للخدْمِة، واليعازرْ واِحدْ م المنْتكْيينْ مَعو كانْ. 3 مَرْيَمْ شالتْ شوشايةْ عطرْ نارْدينْ منْ نَوعْ ثَقيلْ غال كْثير، وْدَهَنتْ فِيو اجْرَينْ يَسوُع وْمَسَحتنْ فَ شَعْرا، وانْتَلى البَيتْ منْ ريحة العطرْ. 4 ياهوذا الاسْخَرْيوطي، هاكْ لَ كانْ واِحدْ منْ تَلاميذو، هاكْ لَ كانْ تَ يسَلّمو، قالْ: 5 لَيشْ ما انْباعْ هَالعطر بْثاثَميةْ دينارْ وتْفَرَّقتْ عَ الفَقاراِ؟ 6 قالْ هاي موُ منْ لَ كانْ كلْحَمَلْ غَمّ الفَقاراِ، بَلىِ منْ لَ حَرامي كان، وْكيسة الّثمانْ عنْدو كات، وْشي لَ كانْ ينْحَط فِيا، هوّاِ كانْ يحْملو. 7 يَسوُعْ قالْ: خَلّيا! لَيَومْ دَفْنتي خَلَّتو. 8 منْ لَ دايمْ لكنْ فَقاراِ مَعْكنْ. بَسّ اَنا موُ دايمْ عنْدْكن اَنا. 9 لَمّاتْ ناِس كْثيرْ م الياهودْ سمْعوا يَسوُعْ هَونَكْ واِ وْجَوا، موُ لَخاطرْ يَسوُعْ بَس، بَلىِ لَخاطرْ يرَون زاِ أَليعازر هاكْ لَ قَيَّم منْ بَين المَيتينْ. 10 قاموا گْباريّة الكَهَنَة حَطّوا فَ بالن تَ يقْتلون أَليعازر زاِ 11 منْ لَ كْثيرْ م الياهودْ بسَبَبو كانْ يروُحونْ ويآمْنونْ بْيَسوُعْ.
يَسوُعْ يدْخلْ للقدْسْ
12 ثاِني نْهار، هاك أَمّة النّاِسْ لَ كانْ كجَّوا عَ العيدْ، وَقْتْ لَ سمْعوا يَسوُعْ جاِييِ واِ للقدْسْ، 13 حَمَلوا شيقان سجَر تَمَر وْطَلَعوا لاسْتقْبالو وْكانْ يسيِحون: أوُشَعْنا. مبارَك الجّاِييِ باسْم الرَّبْ. مبارَك مَلك اسْرائيلْ. 14 وْيَسوُعْ أَرى حمار وركب عَلَيو، كَما لَوّاِ مَكْتوبْ: 15 لا تْخافين بنْتْ صَهْيونْ، كْوا مَلككِ جاِييِ لَ عنْدكِ، راِكب عَلى جَحْش ابنْ آتان. 16 بَسْ هَوذ النّبوّات ما عَرَفوون تَلاميذْ يَسوُعْ فاك الوَقْتْ، بَلىِ وَقْتْ لَ تمَجَّد يَسوُعْ جا لَبالن مَكْتوبْين كانوا هَوذ النّبوّات عَلَيو، وسَوَولو ناِ. 17 وْهاك الشَّعْبْ لَ كانْ مَعو كانْ يشْهَدْ ساح أَليعازر م القَبر وْقَيَّمو منْ بَين المَيتينْ. 18 وْمنْ هاي طَلَعوا لاسْتقْبالو النّاِسْ طَلْقاتْ طَلْقاتْ، منْ لَ سمْعوا عَلى هاي عَلامِة لَ سَوى. 19 الفَرّيسيِّة بَقى يقولونْ واِحدْ للاخ: ترَون اَشْوَنْ موُ تنْفَعونْ شي؟ كْوا الدّنْياِ كلّا خَلْفو راحتْ. 20 وْكانْ في م الامَمْ زاِ ناِسْ طَلَعوا تَ يسْجدونْ ف العيدْ. 21 هَوذْ جَوا قَرَّبوا لَعنْدْ فيلبُّسْ، هاكْ لَ منْ بَيتْ صَيدا م الجَّليل، وْقالولو: سَيّدي! نْريدْ نرى يَسوُعْ. 22 وْجا فيلبُّس وْقالْ لانْدَراوُسْ، وَانْدَراوُس وْفيلبُّسْ قالوا لَيَسوُعْ.
المَوت باب للحَياة
23 وْيَسوُعْ رَدْ قالْلنْ: جَت السّاعَة لَ تَ يتْمَجَّدْ فِيا ابْن الانْسانْ. 24 الحَقّ الحَقّ اَقولْكنْ لَ ما وَقَعتْ حَبّاية الحنْطَة ف الاَرْض وْماتت، بْوَحْدا تبْقى. بَسْ لَ ماتتْ، ثَمَر كْثير تْجيبْ. 25 لَ يحبْ حَياتو، يتَوبلا. وْلَ يكْرَهْ نَفْسو فَ هَالدّنْياِ، يحْفظا لَحَياة الاَبَديِّة. 26 أَينا لَ يخْدمْني، يجي خَلْفي، وَاينْ لَ اكون اَنا، هَونَكْ تَ يكونْ خادمي زاِ. وَاينا لَ يخْدمْني، أَبوي تَ يكَرّمو.
لَ موُ يآمن أعْمي قَلْب واِ
27 ”نَفْسي السَّع كْوا مَخْضوُضَة ياِ، وَايشْ أَقولْ؟ أَبوي، نَجّيني منْ هَالسّاعَة. بَسّ اَنا بْشانْ هاذْ جيتُ لَ هَالسّاعَة. 28 آبا، مَجّد اسْمك.“ وْجا صَوتْ م السَّما يقولْ: مَجَّدْتُ وْبَعدْ تَ امَجّدْ. 29 ناِسْ لَ كانوا قيّامْ، سمْعوا وْقالوا: صارْ قراِقيعْ. غَيرنْ قالوا: مَلاكْ حَكى مَعو. 30 رَدْ يَسوُع وْقالْلنْ: موُ لَخاطري صارْ هَالصَّوتْ، لَخاطرْكنْ صارْ. 31 السَّعْ ساعة الحكمْ عَلى هَالدّنْياِ ياِ. السَّعْ سَيّدْ هَالدّنْياِ ينْكَبْ لَبَرّا. 32 وَانا بَسّ اَنْرفعْ تَ اسْحَب الكلْ لَعنْدي. 33 قالْ هاي تَ يوَرّي أَيشْ مَوتِة تَ يموتْ. 34 قالولو لَمّات النّاِسْ: نحْناِ سمعْنا م النّاموس المَسيحْ تَ يبْقى للاَبَدْ. أشْوَن تْقولْ: تَ ينْرفع ابْن الانْسانْ؟ منْ واِ هاذْ ابْن الانْسانْ؟ 35 يَسوُعْ قالْلنْ: لَ شْوَيِّةْ لخْ زاِ، النّورْ مَعْكنْ واِ. امْشَوا مْقَدْ لَ في لْكنْ نور، بْشانْ لا تطْبقْ عَلَيكن العتْمِة. وْلَ يمْشي ف العتْمِة موُ يعْرفْ لَ اين يروُحْ. 36 مْقَدْ لَ في لْكنْ نورْ، آمْنو بالنّور بْشان اولاد النّور تْسيِرونْ. قالْ يَسوُعْ هَالكَلام وْراح اخْتَفى منْ قدّامنْ. 37 وْمَعْ كلْ هَوذ العَلامات لَ سَوى قدّامنْ، ما آمَنوا فِيو. 38 تَ تْتمْ فِينْ كلْمة اِشعْيا النَّبي لَ قالْ: ”يا رَبْ، منْ سَدَّق كَلامْنا؟ وْلَمنْ ظَهَرت ذْراع الرَّبْ؟“ 39 منْ هاي ما تاقوا يآمْنونْ، منْ لَ قالْ عَلَينْ نَبي اِشعْيا: 40 عَمَّوا عَينَين وْعَتَّموا قَلْبن، بْشانْ لا يرَون بعَينَين وْيفْتهْمون بْقَلْبن وْيرْجَعونْ وَاشْفيينْ. 41 هَوذْ قال اِشعْيا وَقْتْ لَ ارى مَجْدو وْحَكى عَلَيو. 42 مَعْ هاذْ، م الرُّوَسا زاِ كْثيرْ آمَنوا فِيو، بَلىِ م (الخَوفْ م) الفَرّيسيِّة ما كان يقرّون بْإيمانن، بْشانْ لا يسيِرونْ بَرّات المَجْمَعْ، 43 منْ لَ حَبّوا مَجْد البَشَرْ أكْثَرْ منْ مَجْد اَلله.
ضَوّ الايمان
44 وْساحْ يَسوُعْ صَوت وْقالْ: لَ يآمنْ في، موُ في يآمنْ، بَلىِ فاك لَ بَعَثْني. 45 وَاينا لَ يراني، يرى لَ بَعَثْني. 46 أَنا نورْ جيتُ للدّنْياِ، بْشانْ كلْ واِحدْ لَ يآمنْ في، موُ يبْقى ف العتْمِة. 47 وْمنْ لَ يسْمَعْ كَلامي وْموُ يحْفظو، أَنا موُ احْكمْ عَلَيو، منْ لَ ما جيتُ تَ احْكمْ عَ الدّنْياِ، بَلىِ جيتُ تَ اخَلّص الدّنْياِ 48 لَ يظْلمْني وْموُ يقْبَلْ كَلامي، في منْ يحْكمْ عَلَيو. كلْمِةْ لَ حَكَيتُ، هيِّ تَ تحْكمْ عَلَيو فَ يَوم الآِخرْ، 49 منْ لَ ما حَكَيتُ منْ عنْدي، الآبْ لَ بَعَثْني هوّاِ عَطاني أَمَرْ أَيشْ تَ اقول وَايش اَحْكي. 50 واَنا أَعْرفْ وَصيّتو حَياةْ أَبَدِيِّة ياِ. بَقى كلْ شي لَ احْكيو، كَما لَ قالْ لي الآبْ، كذاِ أَحْكي.
يَسوُعْ يخَسّل اجْرَينْ التَّلاميذْ
1 وْقَبلْ عيد الفصْحْ، يَسوُعْ كانْ يعْرفْ وصلتْ ساعَة لَ تَ ينْتقلْ منْ هَالدّنْياِ لَعنْد الآبْ. وْحَبْ جَماعتو لَ فَ هَالدّنْياِ، حَبّنْ دي للآِخرْ. 2 وَقْتْ لَ صارت العَشا، الشّيِطانْ كانْ كلْحَطْ فَ قَلْبْ ياهوذا ابنْ شَمْعون الاسْخَرْيوطي تَ يسَلّمو، 3 وْيَسوُعْ، منْ لَ كانْ يعْرف الآبْ عَطاهُ كلْ شي ف ايدَيو، وْيعْرفْ من اَلله جا وْلَ عنْد اَلله تَ يروُحْ، 4 قامْ منْ عَ العَشا، وْحَطْ دَلْمتو وَاخَذْ مَنْشَفِة شَدّا ف وسْطو. 5 وْصَبْ مَي ف فْراغْ للخَسّيل، وْبَدا يخَسّل اجْرَينْ تَلاميذو ويمَسّح بْمَنْشَفةْ لَ شَدْ عَلى وسْطو. 6 وَقْتْ لَ جا لَعنْدْ شَمْعونْ بطْرسْ، شَمْعونْ قالْلو: ”سَيّدي، أنْتَ تْخَسّلْ لي اجْرَي؟“ 7 رَدْ يَسوُع وْقالْلو: ”شي لَ اسَي، أنْتَ موُ تعْرفْ أَيشْ واِ السَّعْ، بَسْ بَعْدا تَ تعْرفْ.“ 8 شَمْعونْ بطْرسْ قالْلو: ”أَبَدْ موُ تْخَسّلْ لي اجْرَي.“ يَسوُعْ قالْلو: ”لَ ما خَسَّلتوكْ، ما لكْ مَعي نَصيبْ.“ 9 شَمْعونْ بطْرسْ قالْلو: ”بَقى، سَيّدي، موُ بَسّ اجْرَي خَسّلْ لي، بَلىِ ايدَي زاِ وْراسي زاِ.“ 10 يَسوُعْ قالْلو: ”الّمْخَسَّلْ، موُ يريدْلو غَيرْ تَ يخَسّل اجْرَيو بَسْ، منْ لَ طاهرْ واِ كلّو، وانْتنْ طاهْرين انْتنْ كلّتْكنْ، بَلىِ موُ كلّتْكنْ.“ 11 يَسوُعْ كانْ يعْرفْ هاكْ لَ تَ يسَلّمو، منْ هاي قالْ: ”موُ كلّتْكنْ طاهْرين انْتنْ.“ 12 وْوَقْتْ لَ خَسَّل اجْرَينْ، أَخَذْ دَلْمتو وانْتَكا وْقالْلنْ: ”عَرَفْتنْ أَيشْ سَيتُ لْكنْ؟ 13 أنْتنْ تْسيِحوني: مْعَلّمْنا، سَيّدْنا، وكْوَيّس تْقولونْ، منْ لَ كذاِ اَنا. 14 بَقى لَ انا سَيّدْكنْ ومْعَلّمْكنْ خَسَّلتُ اجْرَيكنْ، أَشْقَدْ بَقى لازمْ أنْتن تْخَسْلون اجْرَينْ بَعضْكنْ؟ 15 منْ لَ هاذْ مَثَلْ عَطَيتوكنْ واِ، بْشانْ كَما لَ انا سَيتُ لْكنْ، أنْتنْ زاِ تْسَونْ. 16 ”الحَقّ الحَقّ اَقولْكنْ ما في عَبْد أَگْبَرْ منْ سَيّدو، وْلا مَبْعوُثْ أَگْبَرْ منْ لَ بَعَثو. 17 لَ عَرَفْتنْ هَوذْ لَ اقولْكنْ، طوباكنْ لَ سَوَيتننْ. 18 موُ عَلى كلّتْكنْ أَقولْ، منْ لَ اعْرفْ ناِسْ لَ اخْترْتُ. بَسّ بْشان يسيِرْ شي لَ انْكَتَبْ ف الّكْتاِبْ لَ يقولْ: ’هاكْ ل ياكلْ مَعي غْبَيزْ، رَفَعْ عَلَي عَقْب اجْرو.‘ 19 م السَّعْ أَقولْكنْ قَبلْ لَ يسيِر، بْشانْ منْ صار، تْآمْنون اَنا واِ. 20 الحَقّ الحَقّ اَقولْكنْ منْ لَ يقْبَلْ هاكْ لَ ابْعَثو، لي يقْبَل. وْمنْ لَ يقْبَلْني، يقْبَلْ لَهاكْ لَ بَعَثْني.“
خيانة ياهوذا
21 قالْ يَسوُعْ هَالكَلام، وْغضبْ ف روُحو، وْشَهَد وْقال: ”الحَقّ الحَقّ اَقولْكنْ واِحدْ منْكنْ تَ يسَلّمْني.“ 22 التَّلاميذْ بَقى يطَلْعونْ واِحدْ ف اللاخْ، منْ لَ ما كانْ يعْرفونْ عَلى منْ قالْ. 23 وْكانْ في واِحدْ منْ تَلاميذو كانْ منْتكي ف حضْنو، هاكْ لَ كان يحبّو يَسوُعْ. 24 لاذْ أَشَّرْ شَمْعونْ بطْرسْ تَ يسْأَلو منْ واِ هاكْ لَ قالْ عَلَيو. 25 وْوَقَعْ هاك التَّلْميذْ عَلى سدرْ يَسوُع وْقالْلو: ”سَيّدي، منْ واِ هاذْ؟“ 26 رَدْ يَسوُع وْقالْلو: ”هاكْ لَ اغْمزْ لقْمة الّغْبَيزْ وَاعْطِيو ياِ، هوّاِ واِ.“ وْغَمَزْ يَسوُعْ لقْمة غْبَيز وْعَطاها لَياهوذا ابنْ شَمْعون الاسْخَرْيوطي. 27 وْبَعْد اللقْمِة، دَخَلْ فِيو الشّيِطان. وْيَسوُعْ قالْلو: ”شي لَ تَ تْسَي، سَيو خَفيفْ.“ 28 بَسْ هاي اَحَّدْ منْ هَوك المنْتكْيينْ ما عَرَف عَلى أَيشْ قالْلو 29 منْ لَ ناِس افْتَكَروا، منْ لَ كيسة الّثمانْ مَعْ ياهوذا كاتْ، وَصايِة شي وَصّاهُ تَ يشْتري شي يريدْلنْ للعيدْ، يا تَ يعْطي شي للفَقاراِ. 30 وْياهوذا أَخَذ اللقْمِة، وْفَ ساعتا طَلَعْ لَبَرّا، وْكانْ كصّارْ لَيلْ وَقْتْ لَ طَلَعْ.
وَصيِّة جْديدِة
31 وْيَسوُعْ قال: ”السَّع تْمَجَّد ابْن الانْسانْ وتْمَجَّد اَلله فِيو. 32 وْلَ تْمَجَّد اَلله فِيو، أَلله زاِ تَ يمَجّدو ف نَفْسو، وْراساً تَ يمَجّدو. 33 يا اولادي! لَ شْوَيِّةْ لخْ مَعْكن اَنا. وْتَ تْدَورونْ عَلَي. وْكَما لَ قلْتُ للياهودْ: لَ موُضَعْ لَ انا رايحْ، أنْتنْ موُ تْتيِقْونْ تجَون، لْكنْ زاِ أَقول السَّعْ. 34 وَصيِّة جْديدِة أَوَصّيكنْ: حبّوا بَعضْكنْ. كَما لَ انا حَبَّيتوكنْ، كذاِ أنْتنْ زاِ حبّوا بَعضْكنْ. 35 بْهاي تَ يعْرفْ كلّ انْسانْ تَلاميذي أنْتنْ، لَ كانْ فيكنْ مْحَبِّة واِحدْ للاخْ.
يَسوُعْ يتْنَبّا بطْرسْ تَ ينكرو
36 شَمْعونْ بطْرسْ قالْلو: ”سَيّدْنا، لَ اين انْتَ رايحْ؟“ رَدْ يَسوُع وْقالْلو: ”موُضَعْ لَ انا رايحْ، موُ تْتيِقْ أنْتَ السَّعْ تجي خَلْفي، بَسْ ف الآخرْ تَ تّجي.“ 37 شَمْعونْ بطْرسْ قالْلو: ”سَيّدي، لَيشْ موُ اتيِقْ آجي خَلْفكْ السَّعْ؟ روُحي قدّامكْ أَحطّ اَنا.“ 38 يَسوُعْ قالْلو: أنْتَ تْحطْ روُحكْ قدّامي؟ الحَقّ الحَقّ اَقولْ لكْ: موُ يلْحَق يسيِح الدّيكْ لَ موُ تنْكرْني ثَةْ طرْقْ.
اَنا واِ الطَّريِقْ والحَقْ والحَياة
1 ”لا تقْلَقونْ. آمْنوا فَ الله، وْفي آمْنوا. 2 كْثيرْ ناِ أُوَد بَيتْ أَبوي. والّا واِ كانْ تَ اقولْكنْ. أَنا رايحْ تَ احَضّر لْكنْ موُضَعْ. 3 وْلَ رحْتُ أَحَضّر لْكنْ موُضَعْ، تَ اردّ آجي وَاوَدّيكنْ لَعنْدي، بْشانْ موُضَعْ لَ انا، أنْتنْ زاِ تْكونونْ. 4 وْلَ اينْ أَنا رايحْ، تعْرفونْ. والطَّريِقْ، تعْرفونْ.“ 5 توما قالْلو: ”سَيّدْنا، موُ نعْرفْ لَ اين انْتَ رايحْ، أشْوَنْ بَقى نْتيِقْ نعْرف الطَّريِقْ؟“ 6 يَسوُعْ قالْلو: ”أنا واِ الطَّريِقْ والحَقْ والحَياةْ. ما في انْسانْ يجي لَعنْد اَبوي إلّا بي. 7 يكونْ كانْ تعْرفوني، لاَبوي زاِ كانْ تَ تعْرفونْ. بَسْ م السَّعْ تعْرفوهُ، وَارَيتنو.“ 8 فيلبُّسْ قالْلو: ”سَيّدْنا، وَرّينا الآب وْيكْفانا.“ 9 يَسوُعْ قالْلو: ”هَالزَّمانْ كلّو مَعْكن اَنا وْما عَرَفْتْني يا فيلبُّسْ؟ منْ لَ يراني، يرى الآبْ. أشْوَنْ بَقى تْقولْ: وَرّينا الآبْ؟ 10 موُ تْآمنْ فَ ابوي اَنا وَابوي في واِ، وْكَلام لَ احْكي موُ منْ عنْدي أَحْكِيو؟ بَقى أَبوي لَوّاِ ساِكنْ في، هوّاِ واِ لَ يسَي هَالاعْمالْ. 11 سَدْقوا فَ ابوي اَنا وَابوي في واِ، والّا بْسَبَبْ هَالاعْمالْ سَدْقوا. 12 الحَقّ الحَقّ اَقولْكنْ منْ لَ يآمنْ في، اعْمالْ لَ اسَي هوّاِ زاِ تَ يسَي، وَاكْثَرْ منْ هَوذْ تَ يسَي، منْ لَ رايحْ لَعنْد اَبوي اَنا. 13 أَيشْ لَ تطْلبونْ باسْمي، تَ اسَي لْكن، بْشانْ يتْمَجَّد الآبْ ف الابنْ. 14 لَ طَلَبتن باسْمي، تَ اسَي.
الوَعد بْروُح القدس
15 ”لَ كان تْحبّوني، احْفَظوا وَصيّاتي. 16 وَانا تَ اطْلبْ م الآبْ تَ يعْطيكنْ فارقليطْ لخْ تَ يبْقى مَعْكنْ للاَبَدْ، 17 روُح الحَقْ هاكْ لَ موُ تْتيِق الدّنْياِ تقْبَلو، منْ لَ ما ارَتو وْلا عَرَفتو. بَسّ انْتنْ تعْرفوهُ منْ لَ يسْكنْ عنْدْكن، وْفيكنْ واِ. 18 موُ اخَلّيكنْ يَتامىِ، منْ لَ جاِييِ اَنا لَعنْدْكنْ. شْوَيِّةْ لخْ، 19 والدّنْياِ ما تَ تّراني. بَسّ انْتنْ تَ تّرَوني. منْ لَ حَيّ اَنا، أنْتنْ زاِ تَ تحْيَونْ. 20 فاك اليَومْ، تَ تعْرفونْ فَ ابوي اَنا، وانْتنْ فِي انْتنْ، وَانا فيكن اَنا. 21 ”لَ عنْدو وَصيّاتي وْيحْفظا، هاكْ واِ لَ يحبْني. وْهاكْ لَ يحبْني يحبّو أَبوي، وَانا أَحبّو وَاوَرّيو نَفْسي.“ 22 وْياهوذا، موُ الاسْخَرْيوطي، قالْلو: ”سَيّدي، لَيشْ لنا تَ تْوَرّي نَفْسك، وْموُ للدّنْياِ؟“ 23 رَدْ يَسوُع وْقالْلو: ”لَ يحبْني يحْفظ كلْمتي، وَابوي يحبّو، وْلَعنْدو نجي ونْسَي بَيتْنا عنْدو. 24 وْهاكْ لَ موُ يحبْني، موُ يحْفظْ كلْمتي. وْهَالكلْمِة هاي لَ تسْمَعونْ موُ لي ياِ. للآبْ لَ بَعَثْني ياِ. 25 قلْتُ لْكنْ هاذْ وَانا عنْدْكنْ. 26 بَسّ الفارقْليطْ، روُح القدسْ لَ تَ يبْعَثْو الآبْ باسْمي، هوّاِ تَ يعَلّمْكنْ كلْ شي، وْهوّاِ تَ يجيبْ لَبالْكنْ كلْ شي لَ اقولْكنْ.
سَلامْ يَسوُعْ
27 ”سَلامْ أَخَلّي لْكنْ، سَلامي أَعْطيكنْ. موُ كَما شي لَ تعْطي الدّنْياِ أَنا أَعْطيكنْ. لا تقْلَقون وْلا تْخافونْ. 28 سمعْتنْ قلْتُ لْكنْ: تَ اروُحْ وت آجي لَعنْدْكن. يكونْ كان تْحبّوني، كانْ تَ تفْرَحونْ تَ اروُحْ لَعنْد اَبوي، منْ لَ أَبوي أَعْظَمْ واِ منّي. 29 والسَّع، كْوا قلْتُ لْكنْ قَبلْ لَ يسيِر، بْشانْ منْ صار تْآمْنونْ. 30 م السَّع وْلَ بَعدْ، موُ احْكي مَعْكن كْثيرْ، منْ لَ جاِييِ واِ رَيّسْ هَالدّنْياِ، وْفي مالو شي. 31 بَسّ بْشان الدّنْياِ تعْرفْ أَحبّ اَبوي، وْكَما لَ وَصّاني كذاِ أسَي. قوموا تَ نْروُحْ منْ هَونْ.
1 ”أَنا واِ الغَرْز الحَقيقي وَابوي صاحب الغَرْزْ. 2 كلْ شاق في موُ يعْطي ثَمَرْ، يقْطَعْو. وَاينا لَ يعْطي ثَمَرْ، يكْسَحو بْشانْ ثَمَر كْثيرْ يعْطي. 3 وانْتنْ السَّعْ مَكْسوُحين انْتنْ م الكَلامْ لَ حَكَيتُ مَعْكنْ. 4 اثْبتوا في وَانا فيكنْ. كَما لَ موُ يتيِقْ الشّاق يعْطي ثَمَرْ منْ نَفْسو لَ ما ثَبَتْ ف سجَرة العنبْ، أنْتنْ زاِ كذاِ لَ ما ثَبَتّنْ في. 5 أَنا الغَرْز اَنا وانْتنْ الشّيقانْ. منْ لَ يثْبتْ في وَانا فِيو يجيبْ ثَمَر كْثيرْ: بَلاي موُ تْتيِقْون تْسَونْ شي. 6 انْسانْ لَ موُ يثْبتْ في، ينْكَبْ لَبَرّا كَما شاق النّاِشف، وْيلْقطوهُ يكبّوهُ ف النّارْ تَ ينْحرقْ. 7 لَ ثَبَتّنْ في وْثَبَتْ كَلامي فيكنْ، كلْ شي لَ تْريدون وْتطْلبونْ، تَ يكون لْكنْ. 8 بْهاي يتْمَجَّدْ أَبوي، تَ تْجيبونْ ثَمَر كْثيرْ، وتْكونونْ تَلاميذي. 9 كَما لَ حَبني أَبوي، حَبَّيتوكن اَنا. اثْبتوا ف مْحَبّتي. 10 لَ حَفَظْتنْ وَصيّاتي، تثْبتونْ ف مْحَبّتي، كَما لَ انا حَفَظْتُ وَصيّاتْ أَبوي وْثابت اَنا ف مْحَبّتو. 11 حَكَيتُ مَعْكنْ هَالكَلامْ بْشانْ فَرْحتي تْكونْ فيكن وْتكْمَلْ فَرْحتْكنْ. 12 هاي ياِ وَصيّتي، تَ تْحبّونْ بَعضْكنْ كَما لَ انا حَبَّيتوكنْ. 13 مْحَبِّة أَگْبَرْ منْ هاي ما في: تَ يحطّ انْسانْ روُحو قدّام مَحْبوبينو. 14 أنْتنْ مَحْبوبيني أنْتنْ لَ سَيتنْ كلْ شي لَ اوَصّيكنْ. 15 بَقى موُ عَبيدْ أَسَمّيكنْ، منْ لَ موُ يعْرف العَبْدْ أَيش يسَي سَيّدو. مَحْبوبيني سَمَّيتوكن، منْ لَ قلْتُ لْكنْ عَلى كلْ شي لَ سمعْتوهُ منْ أَبوي. 16 موُ أنْتن اخْترْتنْني. أَنا اخْترْتوكن وْعَيَّنتوكنْ تَ تْروُحون انْتنْ زاِ تْجيبونْ ثَمَر وْثَمَرْكنْ يبْقى، بْشانْ كلْ شي لَ تطْلبونْ منْ أَبوي باسْمي يعْطيكنْ. 17 هاي أَوَصّيكنْ: تَ تْحبّونْ بَعضْكنْ.
يَسوُعْ والدّنْياِ
18 ”لَ كَرَهتْكن الدّنْياِ، اعْرفوا قَبلْكنْ لي كَرَهتْ. 19 يكونْ م الدّنْياِ كنْتن، الدّنْياِ كانْ تَ تْحبْ ناِسا. بَلىِ موُ م الدّنْياِ أنْتنْ، منْ لَ انا اخْترْتوكنْ م الدّنْياِ. منْ هاي تكْرَهْكن الدّنْياِ. 20 جبوا لَ بالْكنْ كلْمِة لَ قلْتُ لْكنْ: ما في عَبْد اَگْبَرْ منْ سَيّدو. لَ لي اضْطَهَدوا، لكنْ زاِ تَ يضْطهْدون. وْلَ حَفَظوا كلْمتي، كلْمتْكنْ زاِ تَ يحْفظونْ. 21 بَلىِ هاذْ كلّو يسَون فيكنْ لَخاطر اسْمي، منْ لَ موُ يعْرفونْ لَ بَعَثْني. 22 يكونْ ما كانْ كجّيتُ حَكَيتُ مَعنْ، ما كانْ تَ يكونْلنْ خَطيِّة. بَسّ السَّعْ مالنْ عذرْ عَلى خَطيّتنْ. 23 لَ لي يكْرَهْ، لاَبوي زاِ يكْرَهْ. 24 يكونْ ما كانْ كسَّوَيتُ قدّامْ عَينَين اعْمال ما سَوى كَماها اَحَّدْ لخْ، ما كانْ تَ يكونْلنْ خَطيِّة. بَسّ السَّعْ أَرَوا وْكَرَهوا، لي زاِ وْلاَبوي زاِ، 25 ”بْشان تْتمْ كلْمة المَكْتوبِة فَ ناموسنْ: ’كَرَهوني مْبَلاشْ.‘ 26 وْبَسْ يجي الفارقْليطْ، هاكْ لَ انا أَبْعَث لْكنْ منْ عنْد أَبوي، روُح الحَقْ، هاكْ لَ منْ عنْد أَبوي يطْلَعْ، هوّاِ تَ يشْهَدْ لي. 27 وانْتنْ زاِ تَ تشْهَدونْ، منْ لَ م البدايِة مَعي انْتنْ.
روُح القدس
1 ”حَكَيتُ مَعْكنْ عَلى هَوذ بْشانْ لا تتْعَثوَرونْ، 2 منْ لَ تَ يطاِلعوكنْ منْ مجاِمعن، وْتجي ساعَة كلْ واِحدْ لَ يقْتلْكنْ يفْتكر قرْبان يقَرّبْ لَالله. 3 كذاِ تَ يسَون فيكنْ منْ لَ ما عَرَفوا لا لأَبوي وْلا لي. 4 ”حَكَيتُ مَعْكنْ عَلى هَوذ بْشانْ لَ جا وَقْتْنْ يجي لَبالْكنْ أَنا قلْتُ لْكنْ عَلَينْ. ما قلْتُ لْكنْ عَلَوذْ منْ قَبلْ منْ لَ مَعْكنْ كنْتُ. 5 بَسّ السَّعْ رايح اَنا لَعنْدْ لَ بَعَثْني، وْلا أَحَّدْ منْكنْ يسْأَلْني لَ اين انْتَ رايحْ. 6 بَسْ منْ لَ قلْتُ لْكنْ عَلَوذ، الغَمْ عبّا قْلوبْكنْ. 7 بَلىِ الحَقّ اَقولْكنْ: أَحْسَن لْكنْ لَ رحْتُ. لَ ما رحْتُ أنا، الفارقْليطْ موُ يجي لَعنْدْكنْ، بَسْ لَ رحْتُ، تَ ابْعَث لْكنْ واِ. 8 وْبَسْ يجي تَ يوَبّخ الدّنْياِ عَلى خَطيِّة وْعَلى بر وْعَلى حكمْ. 9 عَ الخَطيِّة، منْ لَ ما آمَنوا في، 10 وْعَلى برْ، منْ هاي لَ تَ اروُحْ لَعنْد الآب وْموُ ترَوني. 11 وْعَلى حكمْ، منْ هاي لَ انْحَكَمْ عَلى رَيّسْ هَالدّنْياِ. 12 وْبَعْد كْثيرْ عنْدي تَ اقولْ، بَلىِ موُ تْتيِقْونْ تفْتهْمون السَّعْ. 13 بَسْ منْ جا روُح الحَقْ، هوّاِ تَ يرْشدْكنْ تَ تفْتهْمون الحَقْ كلّو، منْ لَ موُ يحْكي منْ عنْدو: كلْ شي لَ يسْمَعْ، هاك يقول. وْتَ يعَرّفْكنْ عَلى أمور تَ تْسيِرْ ف المسْتَقبَلْ. 14 هوّاِ تَ يمَجّدْني، منْ لَ منّي ياخذْ ويوَرّيكنْ. 15 كلْ شي لَ في لَ أَبوي، لي واِ. منْ هاي قلْتُ لْكنْ: ياخذْ منّي ويوَرّيكنْ. 16 شْوَيِّة وْموُ ترَوني، وشْوَيِّةْ لخ وْترَوني، منْ لَ رايح اَنا لَعنْد الآبْ.“
الفَرَح بَعد الحزن
17 ناِسْ منْ تَلاميذو بَقى يقولونْ واِحدْ للاخْ: أَيشْ ياِ هاي لَ يقول: ”شْوَيِّة وْموُ ترَوني، وشْوَيِّة لخ وْترَوني، وْمنْ لَ رايح اَنا لَعنْد اَبوي؟ 18 وْكان يقولونْ: أَيشْ ياِ هَالّشْوَيِّة هاي لَ قالْ؟ موُ نعْرفْ أَيشْ يحْكي.“ 19 يَسوُعْ عَرَف يريدونْ يسْأَلوهُ، قامْ قالْلنْ: ”عَلى هاي تاخْذون وْتعْطَونْ مَعْ بَعضْكنْ، هاي لَ قلْتُ: ’شْوَيِّة وْموُ ترَوني، وشْوَيِّةْ لخْ تَ تّرَوني‘؟ 20 الحَقّ الحَقّ اَقولْكنْ أنْتنْ تَ تبْكَونْ وتْوَلْولونْ والدّنْياِ تفْرَحْ وانْتنْ تحْزَنونْ، بَسْ حزنْكنْ تَ ينْقلبْ لَفَرَحْ. 21 المَرَة وَقْتْ لَ تولَدْ تحْزَنْ، منْ لَ جا يَوم وْلادتا. وْبَس تْجيبْ وَلَدْ، موُ يجي لَبالا الشّدِّة، م الفَرْحَة فَ هاي لَ جابت انْسانْ ف الدّنْياِ. 22 أنْتنْ زاِ السَّعْ تحْزَنونْ، بَسْ تَ ارْجَعْ أَراكن وْيفْرَحْ قَلْبْكن، وْفَرْحتْكنْ ما في انْسانْ ياخذا منْكنْ. 23 وْفاك اليَومْ منّي ما تَ تطْلبونْ شي. الحَقّ الحَقّ اَقولْكنْ كلْ شي لَ تطْلبونْ منْ أَبوي باسْمي، تَ يعْطيكنْ. 24 دي للسَّعْ، ما طَلَبْتنْ شي باسْمي. اطْلبوا، وْتاخذون، بْشان تْكون فَرْحتكنْ كامْلِة.
يَسوُعْ يفرجا عَ المومنين ف ذيقاتن
25 ”بامْثال رْموزْ قلْتُ لْكنْ هَوذْ، بَسْ جاِيِة ساعَة موُ احْكي مَعْكنْ بامْثال رْموزْ، بَلىِ بْوضوحْ تَ اعَرّفكنْ عَ الآبْ، 26 فَ هاكْ يَومْ لَ تَ تطْلبونْ باسْمي. وْموُ اقولْكنْ أَنا تَ اطْلب لْكنْ م الآبْ. 27 منْ لَ الآبْ نَفْسو يحبْكنْ منْ لَ حَبَّيتنّي، وْآمَنْتنْ منْ عنْد اَلله طَلَعْتُ. 28 طَلَعْتُ منْ عنْد اَلله وْجيتُ للدّنْياِ، وَارْجَع اَخَلّي الدّنْياِ وَاروُحْ لَعنْد الآبْ.“ 29 تَلاميذو قالولو: ”هاي السَّع بْكَلامْ واضحْ تحْكي، وامْثال رْموز وْلا واِحد تْقولْ. 30 السَّعْ نعْرفْ كلْ شي تعْرف، وْموُ يلْزَم اَحَّدْ يسْأَلكْ. منْ هاي نحْناِ نْآمنْ من اَلله طَلَعْتْ.“ 31 يَسوُعْ قالْلنْ: ”آمْنوا. 32 منْ لَ هاي جاِيِة ساعَة، والسَّعْ جَتْ، تَ تتْفَرَّقونْ كلْ واِحدْ لَ ديرتو، وتْخَلَّوني بْوَحْدي. بَسْ موُ بْوَحْدي اَنا، الآبْ مَعي واِ. 33 قلْتُ لْكنْ عَلى هَوذ، بْشانْ في أَنا يكون لْكنْ سَلامْ. ف الدّنْياِ تَ يكون لْكنْ ذيقْ، بَسْ قَوَّوا قَلْبْكنْ: أَنا غَلَبْتُ الدّنْياِ.“
صَلاة يَسوُعْ بْشانْ تَلاميذو قَبل الصَّلب
1 قالْ يَسوُعْ هَالكَلام، وْرَفَعْ عَينَيو للسَّما وْقالْ: ”أَبوي، جَتّ السّاعَة. مَجّد ابْنكْ، تَ يمَجّدك ابْنكْ. 2 بْهاي لَ عَطَيتو سلْطَة عَلى كلّ البَشَر بْشانْ يعْطي حَياةْ أَبَدِيِّة لكلّ انْسانْ عَطَيتو واِ. 3 وْهاي ياِ الحَياة الاَبَديِّة: تَ يعْرفوكْ أنْتَ الإله الحَقيقي بْوَحدك وْيَسوُع المَسيحْ لَ بَعَثتو. 4 أَنا مَجَّدتوكْ عَ الاَرْضْ: عَمَلْ لَ عَطَيتْني تَ اعْمَلْ تَمَّمْتوهُ. 5 والسَّعْ، مَجّدْني أنْتَ أَبوي عنْدك بْمَجْدْ لَ كانْ لي عنْدكْ منْ قَبلْ لَ تْكون الدّنْياِ. 6 عَرَّفْتُ إسْمكْ للنّاِسْ، هَوكْ لَ عَطَيتْني م الدّنْياِ. لكْ كانوا، وْعَطَيتْني ناِ، وْحَفَظوا كلْمتكْ. 7 والسَّعْ عَرَفوا كلْ شي لَ عَطَيتْني منْ عنْدكْ واِ. 8 منْ لَ عَطَيتوونْ كَلامْ لَ عَطَيتْني، وْهنّاِ قبْلوا وْعَرَفوا وتْيَقَّنوا منْ عنْدكْ طَلَعْتُ، وْآمَنوا أنْتَ بَعَثْتْني. 9 وَانا لهن اَطْلبْ، موُ للدّنْياِ أَطْلبْ. أطْلبْ لَوكْ لَ عَطَيتْني، منْ لَ لكْ ناِ. 10 وْكلْ شي لَ لي لكْ واِ، وْلَ لكْ لي واِ، ومْمَجَّد اَنا فِينْ. 11 وْم السَّعْ لَ بَعدْ موُ ف الدّنْياِ أَنا، وْهَوكْ ف الدّنْياِ ناِ، وَانا جاِييِ لَعنْدك اَنا. يا أَبوي القَدّوس، احْفَظنْ ف اسْمكْ هَوكْ لَ عَطَيتْني، بْشان يكونونْ واِحدْ كَما لَ نحْناِ. 12 ”وَقْتْ لَ كنْتُ مَعنْ ف الدّنْياِ، كان اَحْفظنْ ف اسْمكْ. هَوذْ لَ عَطَيتْني حَفَظْتوونْ، وَاحَّدْ منّنْ ما تْتَوبَلْ غَير ابن التَّوبَلِة تَ يتمّ الّكْتاِبْ. 13 السَّعْ بَقى لَعنْدكْ جاِييِ اَنا. وَاقولْ هَالكَلامْ ف الدّنْياِ بْشانْ فَرْحتي تْكونْ كامْلِة فِينْ. 14 أَنا عَطَيتوونْ كلْمتكْ والدّنْياِ كَرَهتنْ، منْ لَ موُ م الدّنْياِ ناِ، كَما لَ انا موُ م الدّنْياِ أَنا. 15 موُ اطْلبْ تَ تْشيلنْ م الدّنْياِ، بَلىِ تَ تحْفَظنْ م الشَّرّيرْ. 16 موُ م الدّنْياِ ناِ، كَما لَ انا موُ م الدّنْياِ. 17 أَبوي، قَدّسنْ فَ حَقّك. كلْمتكْ ياِ الحَقْ. 18 كَما لَ بَعَثْتْني للدّنْياِ، أَنا زاِ بَعَثتوونْ للدّنْياِ. 19 وْلَخاطرنْ أَقَدّسْ نَفْسي بْشانْ هنّاِ زاِ يكونون مْقَدَّسينْ ف الحَقْ.
صَلاة يَسوُع المَسيحْ بْشان المومنين فِيو
20 ”وْموُ لَخاطرْ هَوذْ بَسّ اَطْلبْ. أطْلبْ لَخاطرْ لَ يآمْنونْ في بْكلْمتنْ زاِ، 21 تَ يكونونْ كلّنْ واِحدْ. كَما لَ انْتَ أَبوي في وَانا فيكْ، هنّاِ زاِ واِحدْ فينا تَ يكونون، بْشان الدّنْياِ تْآمنْ أنْتَ بَعَثْتْني. 22 مَجْدْ لَ عَطَيتْني عَطَيتوون، بْشان يكونونْ واِحدْ كَما لَ نحْناِ واِحدْ. 23 أَنا فِينْ وانْتَ في بْشان يكونونْ كامْلينْ ف واِحدْ، وبْشانْ تعْرف الدّنْياِ أنْتَ بَعَثْتْني وْحَبَّيتنْ كَما لَ حَبَّيتْني. 24 أَبوي، هَوكْ لَ عَطَيتْني، أَريدْ موُضَعْ لَ انا هنّاِ زاِ يكونونْ مَعي، تَ يرَونْ مَجْدي لَ عَطَيتْني منْ لَ حَبَّيتْني قَبلْ تَأسيس الدّنْياِ. 25 أَبوي البار، الدّنْياِ ما عَرَفتكْ، بَسّ اَنا عَرَفْتوك، وْهنّاِ عَرَفوا أنْتَ بَعَثْتْني. 26 وْعَرَّفتوون اسْمكْ وَاعَرّفن، بْشانْ هاك الّمْحَبِّة لَ حَبَّيتْني تْكونْ فِينْ وَانا أَكونْ فِينْ.“
1 يَسوُعْ قالْ هَوذ وْطَلَعْ قَطَعْ مَعْ تَلاميذو رجْلةْ قَدْرون، وْهَونَكْ كانْ في بستانْ دَخَلو هوّاِ وْتَلاميذو. 2 وْياهوذا زاِ لَ سَلَّمو كانْ يعْرفْ هاك الموُضَعْ، منْ كثرْ لَ كانْ يجْتمعْ يَسوُعْ فِيو مَعْ تَلاميذو. 3 بَقى ياهوذا جابْ جَماعةْ عَسْكَر، وْمنْ عنْد گْباريّة الكَهَنَة والفَرّيسيِّة جابْ حرّاس. وْجا جابنْ لَونَك مَعْ مشاِعلْ نَفْطْ وسْراجاتْ وسْلاحْ. 4 وْيَسوُعْ لَ كانْ يعْرفْ كلْ شي جاِييِ عَلَيو، طَلَع وْقالْلنْ: ”لَمن تْريدونْ؟“ 5 قالولو: ”لَيَسوُع النّاصري.“ يَسوُعْ قالْلنْ: ”أَنا واِ.“ وْياهوذا زاِ لَ سَلَّمو كانْ قايمْ مَعنْ. 6 وَقْتْ لَ قالْلنْ يَسوُعْ: ”أَنا واِ،“ رجْعوا لَخَلْف وْوَقَعوا عَ الاَرْضْ. 7 رَدْ يَسوُعْ سَأَلنْ: ”لمن تْريدونْ؟“ وْهنّاِ قالوا: ”لَيَسوُع النّاصري.“ 8 يَسوُعْ قالْلنْ: ”قلْتُ لْكن اَنا واِ. بَقى لَ لي تْريدونْ، خَلَّوا هَوك يروُحونْ.“ 9 تَ تْتمْ كلْمةْ لَ قالْ: ”هَوذْ لَ عَطَيتْني، ما تَوبَلْتُ منّن وْلا واِحدْ.“ 10 شَمْعونْ بطْرسْ كانْ مَعو سَيف زْغَيّرْ، قامْ سَحَبو وْضَرَبْ خادم گْبير الكَهَنَة وْجاب اذْنو اليَمين. الخادمْ كان اسْمو موُلخْ. 11 يَسوُعْ قالْ لَبطْرسْ: ”حطّ السَّيفْ موُضَعو. كاسْ لَ عَطاني أَبوي موُ اشْرَبو؟“
يَسوُعْ عنْد حَنّان وقَيافا
12 هاك الوَقْتْ العَسْكَر وْقوّادن وْحرّاس الياهودْ مسْكوا يَسوُع وْشَدَّدوهُ، 13 وْوَدَّوهُ أَوَّلْ شي لَعنْدْ حَنّانْ، منْ لَ حَمو قَيافا كانْ، هاكْ لَ كان گْبير الكَهَنَة هاك السَّنِة. 14 وْقَيافا هوّاِ واِ هاكْ لَ شارْ عَ الياهود وْقالْلنْ: ”أَحْسَنْ واِ زَلَمِة واِحد يموت مْبَدال الأمِّة.“
بطْرسْ ينكر يَسوُعْ
15 شَمْعونْ بطْرس وْتَلْميذْ لخْ كانْ يمْشَونْ خَلْفْ يَسوُع. وْهاك التَّلْميذْ كانْ يعْرفو گْبير الكَهَنَة، وْدَخَلْ مَعْ يَسوُعْ للبَيتْ. 16 بَسْ بطْرسْ كانْ قايمْ بَرّا عنْد الباب. وْطَلَعْ هاكْ تَلْميذ اللاخْ، لَ يعْرفو گْبير الكَهَنَة، وْحَكى مَعْ ناطوُرة الباب وْدَخَّلْ شَمْعونْ. 17 البنْتْ ناطوُرة البابْ قالتْ لَشَمْعونْ: ”موُ أنْتَ زاِ منْ تَلاميذْ هَالزَّلَمِة أنْتَ؟“ قالْلا: ”لا.“ 18 الخدّاِمين والحرّاسْ كانوا قايمينْ يشْعلونْ نارْ تَ يتْدَفَّونْ، منْ لَ بَرْدْ زَمْهَريرْ كان. وْشَمْعونْ زاِ كانْ قايمْ مَعنْ يتْدَفّا.
يَسوُعْ عنْد حَنّان
19 گْبير الكَهَنَة سَأَلْ يَسوُعْ عَلى تَلاميذو وْتَعْليمو. 20 يَسوُعْ قالْلو: ”أَنا قدّام العَينْ حَكَيتُ مَع النّاِس، وْدايمْ عَلَّمْتُ ف المجاِمع وْف الهَيكَلْ موُضَعْ لَ يجْتمْعون الياهودْ كلّن، وْشي بالخبْيِة ما حَكَيتُ. 21 لَيشْ تسْأَلْني اَنا؟ اسْأَلْ لَوكْ لَ سمْعوا أَيشْ حَكَيتُ مَعن. كْوا هنّاِ يعْرفونْ كلْ شي لَ حَكَيتُ.“ 22 وَقْتْ لَ قالْ يَسوُعْ هاذْ، واِحدْ م الحرّاسْ كانْ قايمْ ضَرَبْ يَسوُعْ عَلى خَدّو وْقالْلو: ”كذاِ تْجاِوب گْبير الكَهَنَة؟“ 23 يَسوُعْ قالْلو: ”لَ خَرابْ حَكَيتُ، اشْهَدْ عَ الخَراب، وْلَ كْوَيّسْ، لَيشْ ضَرَبْتْني؟“ 24 قامْ حَنّانْ بَعَثو مْشَدَّدْ لَعنْدْ قَيافا گْبير الكَهَنَة.
بطْرسْ مَرة لخ ينكر المَسيحْ
25 وْشَمْعونْ بطْرسْ قايمْ كانْ يتْدَفّا وْقالولو: ”موُ أنْتَ زاِ واِحدْ منْ تَلاميذو أنْتَ؟“ هوّاِ نَكَر وْقالْ: ”لا موُ منّنْ.“ 26 واِحدْ منْ خدّاِمين گْبير الكَهَنَة، قَرايبو لاكْ لَ كانْ كلْقَطَعْ شَمْعون اذْنو، قالْلو: ”موُ أَنا أَرَيتوكْ مَعو ف البسْتانْ؟“ 27 وْكَرْةْ لخْ نَكَرْ شَمْعون، وْفَ ساعتا ساح الدّيكْ.
يَسوُعْ قدّام بيلاطُسْ
28 بَعْدا، جابوا يَسوُعْ منْ عنْدْ قَيافا لَقَصر الحاكم. وْكانْ كصّارت الصّبح. وْهنّاِ ما دَخَلوا للقَصر بْشانْ لا يتْنَجَّسونْ قَبلْ لَ ياكْلون الفصْحْ. 29 قامْ بيلاطُسْ طَلَعْ لَعنْدنْ لَبَرّا وْقالْلنْ: ”أَيشْ دَعْوى لكنْ عَ الزَّلَمِة هاذْ؟“ 30 قالولو: ”يكونْ ما كانْ كسَّوى شْرور، وْلا لكْ كانْ تَ نْسَلّمو.“ 31 بيلاطُسْ قالْلنْ: ”وَدَّوهُ انْتن وْحاِكْموهُ بْموجبْ ناموسْكنْ.“ الياهودْ قالوا: ”موُ يحقّ لْنا نقْتل اَحَّدْ.“ 32 تَ تْتمْ كلْمةْ لَ قالْ يَسوُعْ وَقْتْ لَ خَبَّرْ أَينا مَوتِة تَ يموتْ. 33 قامْ بيلاطُسْ دَخَلْ للقَصر وْساحْ يَسوُع وْقالْلو: ”أنْتَ واِ مَلك الياهودْ؟“ 34 يَسوُعْ قالْلو: ”منْ عنْدكْ قلْتْ هاي، والّا ناِسْ قالوا لكْ عَلَي؟“ 35 بيلاطُسْ قالْلو: ”لَيش اَنا ياهودي اَنا؟ اولادْ أَمّتكْ وگْباريّة الكَهَنَة سَلَّموكْ لي. أَيشْ سَوَيتْ؟“ 36 يَسوُعْ قالْلو: ”مَمْلَكتي موُ منْ هَالدّنْياِ ياِ. يكونْ منْ هَالدّنْياِ كانتْ مَمْلَكتي، خدّاِميني كانْ تَ يحاِرْبونْ موُ يخَلَّونْ أَتسَلَّمْ للياهودْ. بَقى السَّعْ مَمْلَكتي موُ منْ هَونْ ياِ.“ 37 بيلاطُسْ قالْلو: ”بَقى مَلك انْتَ.“ يَسوُعْ قالْلو: ”أنْتَ قلْتْ مَلك اَنا. أَنا لَهاي مَولود اَنا، وْلَهاي جيتُ للدّنْياِ، تَ اشْهَدْ للحَقْ. كلْ واِحدْ م الحَقْ يسْمَعْ صَوتي.“ 38 بيلاطُسْ قالْلو: ”أَيشْ واِ الحَق؟“ وْوَقْتْ لَ قالْ هاي، طَلَعْ كَرْةْ لخْ لَعنْد الياهود وْقالْلنْ: ”أَنا وْلا علِّة وحْدِة أَرى فِيو. 39 وانْتن تْعَوَّدْتنْ تَ اَفَلّت لْكنْ واِحدْ مَحْبوسْ ف عيد الفصْحْ. بَقى تْريدون اَفَلّت لْكنْ هاذْ مَلك الياهودْ؟“ 40 وْكلّنْ ساحوا وْقالوا: ”لا لاذْ، بَلىِ لَبارابا.“ وْبارابا هاذْ واِحدْ قطّاعْ طرْقْ كانْ.
1 هاك الوَقْتْ، بيلاطُسْ قَرْپَچ يَسوُعْ. 2 والعَسْكَرْ ضَفَروا اكْليلْ منْ شَوك وْحَطّوهُ عَلى راسو، وْلَبَّسوهُ دلْمِة أرْجوانيِّة، 3 وْكان يقولولو: ”سَلامْ يا مَلك الياهود.“ وْكانْ يضْربوهُ عَلى خْدودو. 4 وْرَدْ كَرْةْ لخْ طَلَعْ بيلاطُسْ لَبَرّا وْقالْلنْ: ”هاي اَنا أَطاِلع لْكنْ واِ لَبَرّا، تَ تعْرفونْ موُ ارى فِيو وْلا علِّة وحْدِة.“ 5 وْطَلَعْ يَسوُعْ لَبَرّا وْعَلَيو اكْليل الشَّوك وْدلْمة الارْجوانيِّة. وْبيلاطُسْ قالْلن: ”كْوا الزَّلَمِة.“ 6 وَقْتْ لَ ارَوهُ گْباريّة الكَهَنَة والحرّاسْ ساحوا: ”اصْلبو! اصْلبو!“ بيلاطُسْ قالْلنْ: ”وَدَّوهُ أنْتن اصْلبوهُ. أَنا موُ ارى فِيو علِّة.“ 7 الياهودْ قالولو: ”نحْناِ لنا ناموسْ، وبْموجبْ شي لَ في فَ ناموسْنا مسْتَحقْ واِ للمَوتْ، منْ لَ سَوى روُحو ابْن اَلله.“ 8 لَمَنْ سمعْ بيلاطُسْ هَالكلْمِة، أكْثَرْ خافْ. 9 وْكَرْةْ لخْ رَدْ دَخَلْ للقَصر وْقالْ لَيَسوُعْ: ”من اَين انْتَ؟“ يَسوُعْ جَوابْ ما عَطاهُ. 10 بيلاطُسْ قالْلو: ”مَعي أَنا موُ تحْكي؟ موُ تعْرفْ لي سلْطَة أَتيِقْ أَفَلّتكْ وَاتيِقْ أَصْلبكْ؟“ 11 يَسوُعْ قالْلو: ”ما كانْ تَ يكونْ لكْ عَلَي سلْطَة وْلا بْشي واِحد، يكونْ ما كانْ ك انْعَطَيتْ منْ فوُقْ. منْ هاي، لَ سَلَّمْني لكْ، أَگْبَرْ ياِ خَطيّتو منْ خَطِيّتكْ.“ 12 وْمنْ هاي، كان يريد بيلاطُس يفَلّتو، بَسّ الياهودْ ساحوا: ”لَ فَلَّتْتْ هاذْ، موُ مْحبّ القَيصَر انْتَ، منْ لَ كلْ من يسَي روُحو مَلكْ، عَدو واِ للقَيصَرْ.“ 13 وَقْتْ لَ سمعْ بيلاطُسْ هَالكلْمِة، طاِلعْ يَسوُعْ لَبَرّا وْقعدْ عَ البيما، ف موُضَعْ لَ يقولولو ”رَصيف الحَجَر“، وْبالعبْراني ”گْفيفْتا“. 14 وْاسْتعْداد الفصْحْ كان، وْكانتْ حَوالي ساعَة ستِّة. وْقال للياهود: ”كْوا مَلكْكنْ.“ 15 وْهنّاِ قاموا بَقى يسيِحونْ: ”شيلو! شيلو! اصْلبو! اصْلبو!“ بيلاطُسْ قالْلنْ: ”لَمَلكْكنْ أَصْلب؟“ گْباريّة الكَهَنَة قالوا: ”ما لْنا مَلكْ غَيرْ قَيصَرْ.“ 16 هاك الوَقْتْ سَلَّمنْ واِ تَ يصْلبوهُ. وْساقوهُ وْطاِلَعوهُ.
يَسوُعْ عَ الصَّليبْ
17 وْهوّاِ حاِملْ صَليبو لَموُضَعْ لَ يقولولو: ”الجّمْجمِة“، وبلْساِن العبْراني ”گوُگوُلْتا“، 18 موُضَعْ لَ صَلَبوهُ وْمَعو اثْنَينْ لخ، واِحدْ منَون وْواِحدْ منَون وْيَسوُعْ ف النّصْ. 19 وْكَتَبْ زاِ بيلاطُسْ عَلى لوُحْ حَطّو عَلى صَليبو، وْكذاِ كانْ مَكْتوبْ فِيو: ”هذا يَسوُع النّاصري مَلك الياهودْ.“ 20 وْشي المَكْتوبْ عَلى هَالدَّفِّة، كْثيرْ م الياهودْ قَرَوهُ، منْ لَ قرَيَّبْ كانْ م البَلَدْ موُضَعْ لَ انْصَلَبْ فِيو يَسوُع. وْكانْ مَكْتوبْ بلْساِن العبْراني واليوناني والرّوُماني. 21 قاموا گْباريّة الكَهَنَة قالوا لَبيلاطُسْ: ”لا تكْتبْ ’مَلك الياهودْ واِ،‘ بَلىِ ’هوّاِ قالْ: مَلك الياهود اَنا.‘“ 22 بيلاطُسْ قالْلنْ: ”شي لَ كَتَبْتُ كَتَبْتُ.“ 23 والعَسْكَرْ، وَقْتْ لَ صَلَبوا يَسوُعْ، شالوا حَويسو وْسَوَوا أَرْبَعْة اقْسامْ، لكلْ واِحدْ م العَسْكَرْ قسمْ. وْقَميسو بَلا خْياطَة كانْ، منْ فوُق مَنْسوجْ كلّو. 24 قاموا قالوا واِحدْ للاخْ: ”موُ نْشقّو، تَ نْكبْ عَلَيو قرْعَة تَ نّرى لَمنْ تَ يكون.“ وْتَمّ المَكْتوبْ لَ يقول: ”تْقَسَّموا حَويسي بَيناتن، وْعَلى قَميسي كَبّوا قرْعَة“. هاذْ واِ لَ سَوَوا العَسْكَرْ. 25 وْقايمينْ كانوا عنْدْ صَليب يَسوُعْ أمّو واخْتْ أمّو وْمَرْيَمْ مَرْةْ قلِيوفا وْمَرْيَمْ المَجْدَليِّة. 26 وَارى يَسوُعْ أمّو والتَّلْميذْ لَ كان يحبّو قايم، وْقال لامّو: ”يا مَرَة، كْوا ابنْكِ.“ 27 وْقال لاك التَّلْميذ: ”هاي أمّك.“ وْمنْ هاك السّاعَة وَدّاها هاك التَّلْميذْ لَعنْدو.
مَوت يَسوُعْ
28 بَعْدا، عَرَفْ يَسوُعْ كلْ شي كمل، وبْشان يتمّ الّكْتاِبْ، قالْ: ”عطْشان اَنا.“ 29 وْكانْ مَحْطوُط فْراغْ متْلي خَلْ، قاموا غَطّوا فِيو اسْفنْجِة وْرَبَّصووا خَلّ وْحَطّووا عَلى شاقْ زوفى وْعَلَّووا لَعنْدْ ثمّو. 30 وَقْتْ لَ ذاقْ يَسوُعْ هاك الخَل قالْ: ”كملْ.“ وْنَخّى راسو وْسَلَّمْ روُحو. 31 والياهودْ، منْ لَ اسْتعْدادْ كانْ قالوا: موُ يسيِر يبيتونْ هَالاجْسادْ هَوذْ عَ الصَّليبْ، منْ لَ قَرَّبْ يطْلَع السَّبْتْ، منْ لَ يَوم گْبيرْ كانْ يَوم السَّبْتْ هاك. وْطَلَبوا منْ بيلاطُسْ تَ يكْسرونْ سيقانْ هَوك المَصْلوبينْ وينَزْلوونْ. 32 وْجَوا العَسْكَر وْكَسَروا سيقان الاَوَّل وْهاك اللاخْ المَصلوبينْ مَعو. 33 وْوَقْتْ لَ جَوا لَعنْدْ يَسوُعْ، أَرَوا كلْمات وْما كَسَروا سيقانو. 34 بَلىِ واِحدْ م العَسْكَرْ ضَرَبو فَ خاصْرتو بالرّمْح، وْراساً طَلَعْ دَم وْمَي. 35 هاذْ لَ ارى، يشْهَد. وْشَهادتو حَقْ ياِ. وْهوّاِ يعْرف الحَقْ قال بْشان انْتنْ زاِ تْآمْنونْ. 36 منْ لَ صاروا هَوذْ تَ يتم كْتاِبْ لَ قالْ: ”عَظمْ موُ ينْكسرْ فِيو.“ 37 وْغَير كتاِبْ زاِ قالْ: ”تَ يطَلْعونْ فاذْ لَ ضَرَبوهُ بالرّمحْ.“
دَفنة يَسوُعْ
38 بَعْدا، جا يوسفْ هاكْ لَ م الرّامِة طَلَبْ منْ بيلاطُسْ، منْ لَ تَلْميذْ كانْ لَيَسوُعْ بَسْ بالسّر منْ خَوفو م الياهودْ، طَلَبْ تَ ياخذْ جَسَدْ يَسوُع. وْبيلاطُسْ عطاهُ أذن، وْجا وَاخَذْ جَسَدْ يَسوُعْ. 39 وْجا نيقوديموُسْ، هاكْ لَ كانْ كجّا منْ قَبلْ لَعنْدْ يَسوُعْ باللَيل، وْجابْ مَعو خَلْطةْ مرّ وْعودْ حَوالي ميةْ رطلْ. 40 واثْنَيننْ حَمَلوا جَسَدْ يَسوُع، وْلَفّوهُ ف قْماشاتْ كتّان وْبعْطورْ، كَما لَ في عادِة للياهودْ وَقْتْ لَ يقْبرونْ. 41 وْكانْ في فاكْ موُضَعْ لَ انْصَلَبْ فِيو يَسوُعْ بسْتان، وْف البسْتانْ كانْ في قَبْر جْديد، اَحَّدْ بَعدْ ما كانْ ك انْحَطْ فِيو. 42 وْحَطّوا هَونَكْ يَسوُعْ، منْ لَ وَقْت وْكانْ يدْخلْ السَّبْت، وْمنْ لَ قْرَيَّبْ كان القَبرْ.
قياِمة يَسوُعْ
1 وْيَوم الاحَّدْ، مَرْيَمْ المَجْدَليِّة منْ وچّ الصّبحْ، والدّنْياِ بَعدْ فِيا عتْمِة، جَتْ للقَبرْ، وَارَت الحَجَرَة مَشْيولِة م القَبرْ. 2 وْعدْيتْ جَتْ لَعنْدْ شَمْعونْ بطْرس وْلعنْدْ هاك تَلْميذ اللاخْ لَ كانْ يَسوُع يحبّو، وقالتْلنْ: ”شالوا وَدَّوا سَيّدْنا مناك القَبر وْموُ اعْرف اَينْ حَطّوهُ.“ 3 وْطَلَعْ شَمْعون وْهاك تَلْميذ اللاخ، وْجَوا للقَبرْ. 4 وْكانْ يعْدَون اثْنَيننْ مَع بَعْضنْ. بَسْ تَلْميذ اللاخْ غَلَبْ شَمْعونْ ف العَدو وْوصلْ للقَبرْ قَبْلو. 5 وْطَلَع كْوَيّسْ أَرى لَفّات الكتّانْ مَحْطوُطينْ، بَسْ ما دَخَلْ. 6 وْجا شَمْعونْ بَعْدو وْدَخَلْ للقَبرْ وَارى قْماشات الكتّانْ مَحْطوُطَة، 7 وحْرامْ لَ كانْ مَشْدودْ فَ راسو موُ مَع الكتّانْ، بَلىِ مَلْفوُف ومَحْطوُطْ فَ موُضَعْ عَلى خاصْرَة. 8 هاك الوَقْتْ، هاكْ تَلْميذْ لَ جا ف الاَوَّلْ زاِ دَخَلْ للقَبرْ، وَارى وْآمَنْ. 9 منْ لَ ما كانْ يعْرفونْ بَعدْ م الاسْفارْ تَ يقومْ منْ بَين المَيتينْ. 10 وْرَدّوا راحوا التَّلْميذَينْ لَموُضَعنْ.
يَسوُعْ يظْهَر لَ مَرْيَمْ المَجْدَليِّة
11 بَسْ مَرْيَم المَجْدَليِّة قايمِة كانتْ عنْد القَبرْ تبْكي. وْهيِّ تبْكي، طَلَّعت كْوَيّسْ ف القَبرْ، 12 وَارَتْ مَلاكَينْ فَ بَياضْ قاِعْدينْ، واِحدْ منْ صوُبْ مَسْنَدْ راسو وْواِحدْ منْ صوُب اجْرَيو. 13 وْقالولا: ”يا مَرَة، لَيشْ تبْكَينْ؟“ قالتْلنْ: ”شالوا وَدَّوا سَيّدي وْموُ اعْرف اَينْ حَطّوهُ.“ 14 قالتْ هاي وانْدارتْ لَخَلْفا وَارَتْ يَسوُعْ قايم، وْما عَرَفتْ يَسوُعْ واِ. 15 يَسوُعْ قالْلا: ”يا مَرَة، لَيشْ تبْكَين، وْعَلى من تْدَورينْ؟“ هيِّ قالتْ بَلْكي البقْچَچي واِ، وقالتْلو: ”سَيّدي، لَ انْتَ شلْتْ وَدَّيتو، قلْ لي: اَين حَطَّيتو، تَ اروُح اَوَدّيو.“ 16 يَسوُعْ قالْلا: ”مَرْيَمْ.“ وانْدارت وْقالتْلو بلْساِن العبْراني: ”رابولي!“ يعْنيِ: مْعَلّمْ! 17 يَسوُعْ قالْلا: ”لا تْجسّيني، منْ لَ ما كصّعدْتُ بَعدْ لَعنْد اَبوي، بَسْ روُحي لَعنْد اخوتي وْقوليلنْ: ’صاِعد اَنا لَعنْد اَبوي وَابوكنْ، إلهي وْإلهكنْ.‘“ 18 هاك الوَقْتْ، جَتْ مَرْيَم المَجْدَليِّة وْبَشَّرت التَّلاميذْ أَرَتْ سَيّدْنا وْهَوذ الكلاِمي قالْلا.
يَسوُعْ يظْهَر لَتَلاميذو
19 وْلَمَنْ صارتْ مَساتْ هاكْ يَوم الاحَّدْ، والابْواب مْقَفَّلينْ موُضَعْ لَ كانوا التَّلاميذْ، منْ خَوفنْ م الياهودْ، جا يَسوُع وْقامْ بَيناتن وْقالْ: ”سَلامْ مَعْكنْ.“ 20 ووَرّاهن ايدَيو وْخاصْرتو. وْفرْحوا التَّلاميذْ وَقْتْ لَ ارَوا الرَّبْ. 21 ورَدْ كَرْة لخْ قالْلنْ يَسوُعْ: ”سَلامْ مَعْكنْ. كَما لَ بَعَثْني أَبوي، اَنا زاِ أَبْعَثْكنْ.“ 22 قالْ هاذ وْنَفَخْ فِين وْقال: ”اقْبَلوا روُح القدسْ. 23 أَينا لَ تغْفرولو خَطيّاتو تنْغفرْلو. وَاينا لَ موُ تغْفرولو، موُ ينْغفرْلو.“
يَسوُعْ وتوما
24 بَسْ توما، واِحدْ م الاثْناعشْ، هاكْ لَ يقولولو: ”التَّوم“، ما كانْ مَعنْ هَونَكْ وَقْتْ لَ جا يَسوُعْ. 25 التَّلاميذْ قالولو: ”أَرَينا الرَّبْ.“ بَسْ هوّاِ قالْلنْ: ”لَ موُ ارى ف ايدَيو مَواضع البساِمير، وَاكبْ فِين اَصابيِعي، وَامدّ ايدي ف خاصْرتو، موُ آمنْ.“ 26 وْبَعد ثْمنْة اِيمْ، كَرْةْ لخْ جَوّا كانوا التَّلاميذ وْتوما مَعن، وْجا يَسوُعْ والابْواب مْقَپَّطينْ. قامْ ف النّص وْقالْلنْ: ”سَلامْ مَعْكنْ.“ 27 وْقالْ لَتوما: ”هات اصْباعتكْ لَون، وْرى ايدَي، وْهات ايدك وْمدّا فَ خاصْرتي، وْلا تْكونْ موُ مومنْ، كونْ مومنْ.“ 28 ورَدْ توما وْقالْلو: ”رَبّي وْإلهي!“ 29 يَسوُعْ قالْلو: ”السَّعْ لَ ارَيتْني، آمَنْتْ. هَنيِّةْ لَ ما ارَوني وْآمَنوا.“
لَيشْ انْكَتَبْ هَالانْجيل
30 وكْثيرْ عَلاماتْ غَيرْ هَوذْ سَوى يَسوُعْ قدّامْ تَلاميذو موُ مَكْتوبِة فَ هَالّكْتاِبْ هاذْ. 31 وْهَوذ المَكْتوبينْ زاِ، انْكَتَبوا تَ تْآمْنونْ يَسوُعْ واِ المَسيح ابْن اَلله. وْلَ آمَنْتنْ، تَ يكون لْكنْ باسْمو حَياةْ أَبَدِيِّة.
يَسوُعْ يظْهَر لَسَبعَة منْ تَلاميذو
1 وْبَعدْ هَوذْ، كَرْةْ لخْ رَدْ وَرّى يَسوُعْ نَفْسو لتَلاميذو عَلى شاطي بَحْرةْ طَبَرِيّا. وْكذاِ رَوّى نَفْسو: 2 كانوا مَعْ بَعْضنْ شَمْعونْ بطْرس وْتوما لَ يقولولو ”التَّوم“ وْنَثَناييِلْ هاكْ لَ منْ قانا الجَّليلْ واولادْ زَبَدي الاثْنَينْ، واثْنَينْ لخْ م التَّلاميذْ. 3 شَمْعونْ بطْرسْ قالْلنْ: ”أَنا رايح اَصيدْ سَمَكْ.“ قالولو: ”وْنحْناِ زاِ تَ نجي مَعك.“ وْمشْيوا راحوا وْطَلَعوا للسَّفّينِة، وْفاك اللَيلِة شي ما صادوا. 4 وَقْتْ لَ صارتْ الصّبحْ، قامْ يَسوُعْ عَلى شاطي البَحر، وْما عَرَفوا التَّلاميذْ يَسوُعْ واِ. 5 قامْ يَسوُعْ قالْلنْ: ”يا شَبابْ، عنْدْكنْ شي للاَكلْ؟“ قالولو: ”لا.“ 6 قالْلنْ: ”كبّوا شَبَكتْكنْ منْ جَنْب السَّفّينِة اليَمينْ، تَ تّرَون.“ وْكَبّوا وْما تاقوا يسْحَبون الشَّبَكِة منْ كثرْ سَمَكْ لَ مسْكتْ. 7 وْهاكْ تَلْميذْ لَ كان يحبّو يَسوُعْ قالْ لَ بطْرسْ: ”هاذْ الرَّبْ واِ.“ شَمْعونْ وَقْتْ لَ سمعْ: ”الرَّبْ واِ،“ أَخَذْ لَظَمْ قَميسو حَولْ وسْطو، منْ لَ مْشَلَّحْ كان، وْكَبْ روُحو ف المَي وْجا لَعنْدْ يَسوُعْ. 8 وْتَلاميذ الاخَرْ ف السَّفّينِة جَوا، منْ لَ موُ كْثير بْعادْ كانوا م الاَرْضْ غَيرْ حَوالي ميتَين ذْراع، وْكانْ يسْحَبون شَبَكة السَّمَكْ هاكْ. 9 وَقْتْ لَ نزْلوا عَ الشّاطي أَرَوا جمرْ عَلَيو سَمَكْ وغْبَيزْ. 10 يَسوُعْ قالْلنْ: هاتوا منْ سَمَكْ لَ صدْتن السَّعْ. 11 قامْ شَمْعونْ بطْرسْ طَلَع وْسَحَب الشَّبَكِة للاَرْضْ متْليِّة سَمَك گْبارْ، ميِّة وْثاثِة وْخَمْسينْ. وبْكلْ هَالثّقلْ هاذْ ما تْشَرَّطتْ هاك الشَّبَكِة. 12 وْقالْلنْ يَسوُعْ: ”تَعوا تْغَدَّوا.“ وَاحَّدْ م التَّلاميذْ ما كانْ يسْتَرْجي يسْأَلو منْ واِ، منْ لَ كانْ يعْرفون الرَّبْ واِ. 13 وْقَرَّبْ يَسوُع وشال غْبَيز وْسَمَك وْعَطاهنْ. 14 هاي ثالثْ كَرَّة ظَهَرْ فِيا يَسوُعْ لَتَلاميذو بَعدْ لَ قامْ منْ بَين المَيتينْ.
يَسوُعْ وبطْرسْ
15 وْبَعدْ لَ تْغَدَّوا، يَسوُعْ قالْ لَشَمْعونْ بطْرسْ: ”يا شَمْعون ابنْ يَونا، تْحبْني أكْثَرْ منْ هَوذْ؟“ قالْلو: ”نَعمْ يا رَبْ. أنْتَ تعْرف اَحبّكْ.“ قالْلو: ”رَعّي لي خواِريفي الّزْغارْ.“ 16 ورَدْ ثاِني كَرَّة قالْلو: ”شَمْعون ابنْ يَونا، تْحبْني؟“ قالْلو: ”نَعمْ يا رَبْ. أنْتَ تعْرف اَحبّكْ.“ قالْلو: ”رَعّي لي كْباشي.“ 17 وْقالْلو ثالثْ كَرَّة: ”شَمْعون ابنْ يَونا، تحبْني؟“ وْصعْبتْ لَشَمْعونْ وحزنْ، منْ لَ قالْلو لَ ثالثْ كَرَّة: ”تْحبْني؟“. وْقالْلو: ”يا رَبْ، كلْ شي تعْرف انْتَ. أنْتَ تعْرف اَحبّكْ.“ يَسوُعْ قالْلو: ”رَعّي لي نَعْجاتي. 18 الحَقّ الحَقّ اَقولْ لكْ: وَقْتْ لَ كنْتْ شَبْ، أنْتَ لَروُحكْ كان تْشدْ وسْطكْ وتْروُحْ لَ اينْ لَ تْريدْ. بَسْ منْ شَيَّبْت، تْمدّ ايدَيك وْغَيرك يشدْ لكْ وسْطكْ ويوَدّيكْ لَموُضَعْ لَ موُ تْريدْ.“ 19 وْهاي قالا تَ يوَرّي بَاينا مَوتِة تَ يمَجّد اَلله. وْبَعدْ لَ قالْ هَوذْ، قالْلو: ”تَعا خَلْفي.“
تَلْميذْ لَ كانْ يَسوُعْ يحبّو
20 وانْدارْ شَمْعونْ وَارى هاك تَلْميذْ لَ كانْ يَسوُع يحبّو جاِييِ خَلْفو، هاكْ لَ وَقَعْ ف العَشا عَلى سدرْ يَسوُع وْقالْ: ”سَيّدي، منْ واِ لَ تَ يسَلّمكْ؟“ 21 هاذْ، وَقْتْ لَ اراهُ بطْرسْ (يمْشي خَلْفو)، قالْ لَيَسوُعْ: ”يا رَبّ، وْهاذْ أَيشْ؟“ 22 يَسوُعْ قالْلو: ”لَ ردْتُ تَ يبْقى هاذْ دي لَمَنْ آجي، أنْتَ أَيشْ راحْ لكْ؟ أنْتَ تَعا خَلْفي.“ 23 وْطَلَعتْ هَالكلْمِة بَين الاخْوِة: ”هاك التَّلْميذْ موُ يموتْ“. بَسْ يَسوُعْ ما قالْ ”موُ يموتْ،“ قالْ: ”لَ ردْتُ يبْقى دي لَمَنْ آجي أنْتَ أَيشْ راحْ لكْ؟“ 24 هاذْ واِ تَلْميذْ لَ شَهَدْ لَوذْ كلّن، وْهوّاِ واِ زاِ لَ كَتَبن. وْنحْناِ نعْرفْ حَقْ ياِ شَهادتو. 25 وفي كْثيرْ غَيرْ هَوذ سَوى يَسوُعْ يكون وحْدِة وحْدِة كانْ ينْكتْبون، الدّنْياِ كلّا زاِ موُ افْتكرْ كانْ تَ تّسَعْ لَكْتاِباتْ لَ كانْ تَ ينْكتْبونْ.